Norgga stuorimus boazodoallosuohkan Guovdageaidnu manaha ollu ruđa go diktet olggobeale fitnodagaid buvttadit bohccobierggu.

Suohkanrájiid siskkobealde njuvvet gal ollu bohccuid, muhto biergu mii ii leat buvttaduvvon nu ahte dan lea dušše báistii bidjalit ja liggestit, gohčoduvvo vuođđoávnnasin. Das ii leat nu stuora dienas go bierggus, mii leat gárvvisin buvttaduvvon.
 – Mii leat geahččaleame ásahit bohccobiergobuvttadeami deike Guovdageidnui, muhto leat ain plánendásis, muitala MT-slakt njuovahaga jođiheaddji Mikkel Triumf. Son muitala ahte dá lea prošeakta mainna leat veháš ádjánan.
 – Dál manná eanas biergu ja dienas olggos suohkanis, dadjá son, ja vuordá ahte ožžot dása doarjagiid go leat ollen dan muddui ahte leat gergosat álgit buvttademiin.
 – Vuorddán doarjaga dása go sádden ohcama, go dát han buktá bargosajiid, dadjá Triumf. 



Boazodoalli Anders S. Buljo lea okta dain gii maid lea bargame dakkár doaimma cegget, muhto son muitala ahte lea nu divrras cegget nugo vistti dán doibmii ja dat veháš caggá.
 – Lea nu divrras hukset ahte lea lossat jus galgá divrras visteloanain maid rahčat lassin, čilge son ja lohká dán stuora táhpan olles suohkanii go diktet dietnasa mannat olggos suohkanis go dáppe barget dušše roavvabargguid.
 – Dát čuohcá bargosajiide, dadjá son, gii maid lea guovddážis suohkanpolitihkas.
Buljo čujuha dasa ahte gávdnojit biergobuvttadandoaimmat maiddái suohkana siskkobealde, muhto ahte dat orrot dárbbašuvvome eanet dakkár doaimmat.
 – Lean iskan biergobuvttadandoaimmaiguin eará báikkiin, nu go lullelis Norggas, ja doppe goit lohket ges váttisin oažžut doarvái bierggu maid buvttadit, dadjá son ja imaštallá go dál rahčet jođihit bohccobierggu.

Buljo lea vásihan ahte lea váttis okto cegget dakkár doaimma ja lohká ge ahte galggaše máŋggas searvat jus galgá nagodit doaimmahit stuorrát.
 – Jus máŋggas searvvaše, de livččii álkit danin go okto ii nagot bargat visot. Ii goit guhkit áigge, oaivvilda son.