Ēkosi māka ētikwē anima kā-itwēt awa oskinīkiw miywāsin, kīspin ta-kakwē-nisitohtamēk ēkwa mīna ta-kakwē-mitoni-wīcihisoyēk anima, ōma nēhiyawēwin kispin kinōhtē-kiskēyihtēnāwāw. Ōma ōtē kā-itapiyāhk Sāskwatōn, ēkosi isi ōma nikakwēcimikawinān kīkway, kīkway ē-nōhtē-kiskēyihtahkik ēkosi isi ōma, pāh-pēyak ōmisi isi nikī-kitotikonānak, “Kīkwāy anima ēwako? Tānisi anima ēwako ē-itwēmakahk pīkiskwēwin?” Ēkosi itwēwak, ēwako anima ē-kakwēcimikoyāhkok, ēkosi wiya ē-kiskēyihtamāhk anima kīkwāy ka-nōhtē-kiskēyihtahkik, ēkosi nitati-wīhtamawānānak, ēkosi ē-isīhcikēyāhk ōtē Sāskwatōn; ēkwa pēyakwayak anima ēkosi isi ōma ē-apiyāhk, ēkwa pēyakwayak mīna ihtakon (kiskēyihtam awa anima ita mīna ē-apiyāhk), ēkota pisisik kēhtē-ayak. Ēkota ēkwa ēkonik kā-nitawēyihtahkik, mēkwāc ōma ēwako ōma ēkwa kā-nōcihtācik, ēkota anima niwīcihiwān.

Nēhiyawēwin ēkwa ēwako, namōya piko ōma kiyānaw ōma kā-isi-nēhiyawēyahk, namōya piko ēwako, nanātohk ōki wēcīpwayāniwak nahkawiyiniwak pwātak, osk-āyak ōki mistahi ē-wanihtācik pīkiskwēwin; ēkwa ōki ē-itwēcik nahkawiyiniwak wīstawāw, mihcēt aniki osk-āyak namōya ē-āpacihtācik anima nahkawēwin, wīstawāw otisi-pīkiskwēwiniwāw, ēkosi ēkwa aniki kēhtē-ayak nitawēyihtamwak wīstawāw otōsk-āyimiwāwa ta-āpacihtāyit anima onahkawēwiniwāw; namōya wī-āpacihtāwak ēwako anima opīkiskwēwiniwāw ōki osk-āyak, iyāyaw ōma ākayāsīmowin, ēwako mistahi, namōya kakētihk ayiwāk āpacihtāwak.

Namōya mīna ē-wī-itwēyāhk, ē-pakwātamawāyāhkok osk-āyak ōma kā-itatoskēcik, ōma kā-ākayāsīmocik, tāpwē mistahi miywāsin ōma, kā-itatoskēyēk, ākayāsīmowin ōma ohci mistahi kimiyo-āpacihtānāwāw; cikēmā namōya miywāsin ēkā ta-ākayāsīmot ayisiyiniw — mācika niya ōma, īh ē-nōtokwēwiyān, seventy (tēpakohkpimitanaw) ēkwa ē-ati-itahtopipnēyān, namōya ē-iskōliwiyān, namōya iskōl ē-ohci-itohtēyān, ēwako ohci mitoni niya nēhiyaw, nēhiyaw-iskwēw mitoni niya, ēwako ohci nikī-otinikawin anita Sāskwatōn, ēkota anima, ēkosi isi ōma kīkway ta-wīcihakik osk-āyak ta-wīhtamawakik, ēwako ōma, osām ē-nēhiyawēyān mitoni, ēkosi ēkwa, ēkota ēkwa anima ēkwa, ēwako ōma ēkwa ta-kakwē-kiskinohamawakik ōma nēhiyawēwin ōki, ēkwa, ēwako ōma ēkwa kā-kiskinohamāsoyēk ōma kā-ākayāsīmoyēk, mitoni nahiyikohk miywāsin ē-ākayāsīmoyek ē-kiskinohamāsoyēk, māka ēkwa, ay-āpihtaw iyikohk tāpiskōc ta-kī-āpacihtāyēk, kinēhiyawānāwāw, ēkosi ēkwa, kwayask ēkwa anita ta-kakwē-pōnihtāyēk, ēkā ta-kakwē-wanikiskisiyēk anima kā-nēhiyawēyēk.