Luima Seripos Corpus Лӯима̄ сэ̄рипос

1050 2013.04.26. Тамара МЕРОВА

О̄лупсав нэ̄пакн хансаве. Ма̄ньполь э̄тпост ля̄ххал тотнэ ма̄хум Ханты-Мансийский государственный архивколн во̄виньта̄лве̄сыт. Тот рӯпитан хо̄тпат та̄нанылн йильпи та̄ратым нэ̄пакыт урыл потыртасыт ос дискыт суссылтасыт. Пе̄с порат Самароват Пётр Ефимович Кузнецов о̄лум. XIX нот оигпам та̄лытыт ос XX нот палытыл Кузнецовыт ще̄мья о̄лыглам тэ̄лат ань пуссын та̄рапаттуве̄сыт. Та̄н пе̄с хурияныл ос документаныл архивыт о̄выл щёс суссылтаве̄сыт. Ань рӯтаныл Тюмень ос Ярославль ӯсыт о̄лэ̄гыт. Тувыл кит йильпи нэ̄пакыг та̄ратавесы̄г. Акв нэ̄пак О. В. Буксина ос мо̄тан О. Н. Гаврилова хассы̄г, тэ̄н нэ̄пакаге̄н архивт рӯпитан хо̄тпатн та̄ратаӈкве нё̄твесы̄г. Ольга Владимировна Буксина (Маслова) такви Москват о̄лы ос «Новости Югры» газетан ля̄ххалыт хансы. Тав «Мой жизненный закат прекрасен» нампа нэ̄паке̄т Иван Михайлович Губкин академик урыл потыртас. О̄йка 45 та̄лэ порат Варвара Боярская, ма̄ньлат нэ̄, ёт хо̄нтхатас. То̄нт нэ̄ ва̄т нупыл акв та̄лэ то̄влыс. Тэ̄н акван ат минасы̄г кос, ос то̄внакт аквъёт рӯпитым яласасы̄г. Иван Михайлович ма̄во̄й киснэ ма̄т рӯпитас, Варвара картат по̄сыт по̄слыс. Тувыл о̄йка сымын э̄рнэ а̄гитэ̄нтыл тэ̄нки халэ̄нт пищмат хасмы̄г. 1939 та̄лт Губкин а̄тимыг е̄мтыс, ос ётыл са̄р э̄кватэ̄н пищманэ Российский АН архивколн тотымат. Та̄наныл тот Валентина Васильевна Патранова, «Новости Югры» газетат рӯпитан э̄ква, ка̄сала̄санэ ос Ольга Буксинан нэ̄пак щё̄питаӈкве ла̄выс. Ань ос тамле пӯмыщ йильпи нэ̄пак ва̄рвес. Мо̄т «Детство, опалённое войной» нампа нэ̄пакт Ольга Гаврилова Урай ӯст о̄лум матумпа̄ла хо̄тпат потраныл хассанэ. Та ӯст школат ханищтахтын ня̄врамыт «Росток» нампа объединеният о̄с потрыт хансым яласэ̄гыт. Ань яныгпа̄ла хо̄тпат о̄лум та̄рвитыӈ тэ̄ланыл урыл хансым потраныл пуссын акв нэ̄пакын щё̄питаве̄сыт. Ханты-Мансийск ӯсув урыл «Город Солнца» нампа диск ва̄рима. «Архивы Югории» №12 йильпи журнал ос «Югорский калейдоскоп событий на 2013» календарь суссылтавесы̄г. Ты нэ̄пакыт манос дискыт пуссын 2012 та̄лн хансыглым проектыт щирыл ва̄рве̄сыт. Ань ты та̄л ты архивкол «История исчезнувших деревень» нампа мо̄т проект щирыл рӯпитаӈкве паты. Налыман та̄л ювле хультум порат 292 ма̄нь па̄выл округ янытыл картан хансым о̄лсыт. Ань 194 ма̄нь па̄влытт ма̄хум о̄луӈкве туп хультмыт. Мо̄т па̄вылквет хоталь со̄ймысыт, хумле е̄мтсыт? Хунь та̄н о̄лве̄сыт, маныр нам о̄щсыт? Хотьют тот о̄выл кол ӯнттыглас ос хоты хо̄тпат тув о̄лмыгта̄лсыт? Пуссын ты тэ̄лат та̄рапаттын ма̄гыс округт о̄лнэ ма̄хум китыглавет. Хотьют нё̄туӈкве ка̄сащи ке, аквъёт рӯпитаӈкве во̄вавет. Таима̄гыс ма̄хум та̄нки самын патум ма̄нь па̄вланыл урыл потыртаӈкве ве̄рме̄гыт. Пе̄с хурит, матыр документыт о̄ньще̄гыт ке, архивын о̄с вос тотнуваныл. 2014 та̄лт архивт рӯпитан хо̄тпат «Памяти исчезнувших сёл и деревень Ханты-Мансийского района» нэ̄пак щё̄питаӈкве ла̄вхатсыт. Ма̄н ос ма̄нки ма̄ньщи ма̄хманув о̄лум па̄влыт нэ̄пакн щё̄питануванӯв ке, такем ёмас о̄лнӯв. Са̄выӈпа̄лэ туп ащо̄йканув самын патум пе̄с нэ̄паканылт хансым хультсыт . О̄влэ̄т хум хо̄тпанув репрессия та̄лытыт хотталь тотыгпаве̄сыт. Тувыл мо̄таныт хо̄нтлан ма̄т порславе̄сыт. Па̄вланувт ма̄ньщи ще̄мьят мощщамасыт. Ётыл колхозыт ква̄лтапаптуве̄сыт. Ма̄нь па̄влыт акв яныг па̄влын тотве̄сыт. Тащирыл ма̄ньщи па̄вланув суйта̄лыг та патсыт. То̄внакт наманыл э̄ргытт хӯнтлыгла̄лыянӯв ос пе̄с йис мо̄йтытт ловиньталыянув: Ме̄сыг па̄выл, Кӯртья па̄выл, Мувынке̄с, Ра̄ктья па̄выл, Сӯма па̄выл, Хохаӈья па̄выл. . Ос пе̄с потыр о̄ньщегы̄н ке, на̄н gahm a o @ y a n d e x . r u электронный почтан ла̄тыӈ хансэ̄н. Ты тэ̄лат ма̄гыс Светлана Владимировна Тюлина пуӈктоты. Мо̄лал та архивыт акванатым пе̄с документыт, хурит пуссын ищхӣпыӈ утын по̄слуве̄сыт. Ос «Электронный архив Югры» нампа сайтын ва̄рве̄сыт. На̄н ань матыр э̄рнэ пе̄с нэ̄пакыт тот сунсыглаӈкве ве̄рмияны̄н. Ты ла̄тӈыт щирыл кисхатэ̄н: arhivugra. admhmao. ru манос gahmao. ru Ма̄хум ань потраныл манос хурияныл пищмал ке̄тыянын ке, адресэ тамле: 628011, Ханты-Мансийск ӯс, Энгельса ӯсхулы, 14 колэ. Манос 8(3467) 32-97-76, 33-14-67 телефоныг хосыт звонитэ̄н.

1050 2013.04.26. Людмила ТЕТКИНА ТЕТКИНА

Советский ӯст Ӯринэ̄ква хо̄тал янытлавес. «Ӯринэ̄ква хо̄тал» янытлан ма̄гсыл Советский ӯскант са̄в мир акванатхатыгласыт. Са̄в ма̄хум районныл тув во̄виньта̄лве̄сыт. Ӯсыӈ мир ты хо̄тал урыл пуссын ва̄гыт ос таве янытлаӈкве ка̄сыӈ тӯя ёхталэ̄гыт. Та̄л сыс Советский ӯст ос районт 12 ма̄ньщи ос ханты ня̄врам самын патсыт. Ялпыӈ хо̄тал о̄вылтахтам порат та̄н ща̄няныла̄щаныл пуссын янытлаве̄сыт ос мӯйлупсал мӯйлуптаве̄сыт. Ӯскант тыналахтын ос суссылтан ва̄рмалиг рӯпитасы̄г. Ма̄щтыр хо̄тпат та̄нки ва̄рум пормасаныл ос сувенираныл тот тыналасаныл. Ня̄врамыт о̄с са̄всыр щирыл пӯмщалаве̄сыт, та̄н са̄лыӈ сун ӯлтта поргысыт, тыньщаӈ па̄хвтысыт. Мӯй ма̄хум пуссын тот со̄ламатыл тыттуве̄сыт ос ща̄ил айтве̄сыт. Ӯсанылт ос та районт о̄лнэ ансамблит э̄ргысыт ос йӣквысыт. Та ма̄т ань мощща соссаӈ хо̄тпа о̄лы. Ма̄н ма̄ньщи ос ханты йӣкванув рущ йӣквыт ёт аквантэ̄лыгтаве̄сыт. Ос маснутыт яныг хансал ю̄нтавет. Тамле супыт соссаӈ хо̄тпанув нэ̄мхуньт ат ю̄нтыгласыт. Туп таи ёмас, ты та̄л тув ма̄ньщи ос ханты э̄ргыт, йӣквыт ва̄нэ хо̄тпат во̄виньта̄лве̄сыт. Маргарита Рябова ос Людмила Хомляк Белоярский ӯсныл «Увас хурамат» ансаблит э̄рге̄г, Фаина Иштимирова А̄с-угорский театрыт рӯпиты ос Виктор Банк «Ешак най» ансаблит йӣкви, та̄н аквъёт концерт ва̄рыгласыт. Та̄н ма̄ньщи ос ханты щирыл э̄ргуӈкве ос йӣквуӈкве ёмащаквег ха̄сэ̄гыт. Тамле ялпыӈ хо̄тал ань округувт таима̄гсыл ва̄рыглаве, мо̄т мирыт ма̄н культурагув урыл са̄внув вос ва̄гыт. Ма̄ньщит, хантыт пе̄с йис ва̄рмаляныл ул вос ёрувлыяныл. Ты ялпыӈ хо̄тал ва̄рыглам хо̄тпат тох ла̄всыт, Советский ӯст о̄лнэ мир «Ӯринэ̄ква хо̄тал» янытлаӈкве сака э̄руптэ̄гыт. Ты та̄л кон сака ащирмаӈ ос во̄тыӈ хо̄тал о̄лыс, мощща ма̄хум тув ёхталас. Ялпыӈ хо̄тал о̄лум порат ам районныл ёхталам ма̄ньщит ёт потрамаӈкве тахсум ос китыглахтуӈкве, ты ялпыӈ хо̄тал та̄нанылн мӯстыс ман а̄ти. Туп акв нэ̄ Ольга Чистякова (Дунаева) Таёжный па̄вылныл ам ётум потыртас. Мо̄таныт пуссын молях сысы тахасыт. Округ янытыл яласым ам акваг са̄в ма̄хум ёт хо̄нтхатыглэ̄гум, тамле ва̄рмаль воссыг нэ̄мхо̄т ат ва̄щиньтасум. Манрыг потыртаӈкве ат ка̄сащасыт, аты торгамтаслум.

1050 2013.04.26. Александр ВЬЮТКИН ВЬЮТКИН

Па̄сcаӈ ка̄тыл каснэ ма̄т та̄ксарыг о̄лы. Э̄тпос о̄вылтахтам порат ма̄ньщи боксёрув Руслан Проводников юв Ха̄льӯсн миннэ лё̄ӈхе̄т Ханты-Мансийск ӯсн хо̄иглас. Тыг ёхталаме̄т тав «Югра» телерадиоком– паниян потыртаӈкве во̄виньта̄лвес. Тувыл технолого–педагогический колледжин ма̄ньлат ма̄хум ёт потыртан ма̄гсыл щалтсас. Хӯрмит ма̄н тав округ мирколн яныг кӯщаит ос Н. В. Комарова губернаторув ёт хо̄нтхатыглаӈкве Ассамблеят рӯпитан ма̄хманувн во̄виньта̄лвес. Боксёрув ёт ва̄йхатнэ кастыл яныгса̄т ляпатем ма̄ньлат хо̄тпа тув ёхталасыт. О̄влэ̄т Руслан такви ще̄мьятэ ос мо̄лалнув о̄лум касылэ урыл мощ потыртас. На̄н тав потре э̄лаль ло̄виньтэлы̄н. – Хунь ам ты касылн щё̄питахтасум, США ос Россия то̄ва ма̄т о̄лнэ ма̄хум а̄нумн интернет хосыт са̄всыр пищмат хассыт: «Руслан, наӈ Тимоти ёт касуӈкв щар наска̄ссыг ла̄вхатсын. Наӈ ё̄рын тав ё̄ре̄н щар ат ёхты. Тав наӈын ринг тӣврыт о̄выл тит раундыт тах ра̄тытэ. Ве̄рми ос тох е̄мтуӈкв, Руслан, наӈ тувыл титка̄тпалыл пувим ма̄хманы̄н рингыл кональ нас ва̄нттавен». Та̄н те̄тум пищманылн ам та̄ра ювле ла̄тыӈ ла̄всум. Ам а̄ти наска̄ссыг ты касылн щё̄питахтасум, ам таве ве̄рмилум. Хотьют ты касыл сунсыс, тав ва̄гтэ, ме̄н халме̄нт хотьютаме̄н ма̄к ё̄рыг о̄лы». Тав потыртан ма̄ныл а̄стуме юипа̄лт, титыглаӈкв о̄вылтавес. – Руслан, наӈ хунь хоса юн ат о̄лыглэ̄гын, ще̄мьян маныр ты урыл ла̄ве̄гыт? – Со̄ль, тыи пуссын о̄лыглы, ме̄н э̄кваме̄нтыл ме̄нти халме̄нт ты урыл потыртасме̄н. Э̄квам наме Наталья, тав а̄нумн хуньт хосат боксыл по̄хан минуӈкв ла̄выглас. Ам таве̄н ла̄всум: «Бокс – тыи ам рӯпатам, ам тыгыл по̄хан ат минэ̄гум». Та па̄сныл ты урыл потыр воссыг аты е̄мталас. Ань Наташам а̄нумн аквписыг нё̄ты. – Руслан, ань о̄лнэ тренерын Фреди Роуч ёт хумус наӈ ва̄йхатсын? – Фреди Роуч – тав яныг намыӈ тренер, мир янытыл ёмщакв ва̄ве. Тав Лос-Анджелес ӯст о̄лы, тот рӯпиты. Хунь щар о̄выл порат ам тав ётэ ва̄йхатасум, тав ётэ по̄слахтасум, та па̄сыл ты хум урыл ам са̄в ёмас ла̄тыӈ ла̄вуӈкв ве̄рме̄гум. Тав ётэ рӯпитаӈкве са̄в ма̄хум ка̄саще̄гыт. Ос Фреди Роуч таве̄н э̄рнэ боксёр такви пе̄рии. Хунь ам тав палтэ е̄мтсум, пуссын ла̄всыт: «Наӈ со̄тыӈ хо̄тпа о̄лнэн». О̄влэ̄т ам намум нэ̄мхотьютын атыпыл хӯлыглавес. Хунь хотьютын э̄рмыглэ̄гум, та̄н «Эй, Русский» намыл а̄нум во̄всаныл. Тох о̄лыглам порат ам нас номсысум, э̄ри мощ ве̄ритаӈкв. Фреди Роуч ёт хунь щё̄питахтуӈкв патсум, та юипалт та̄н ам ётум о̄с ва̄йхатуӈкв патсыт. Ань ос Тимоти Бредли ёт алхатамум юипа̄лт та̄н но̄хлю̄лим ка̄тпатта ра̄тсыт. Ань та̄н намум ва̄ганыл, хоты ма̄ныл ам о̄лэ̄гум о̄с ва̄гыт. Ма̄ньлат ма̄хмыт ёт потыртаме юипа̄лт, Руслан та̄ра округ мирколн минас. Тот Т. С. Гоголева ёт тэ̄н са̄всыр э̄лаль ва̄рнэ тэ̄ланэ̄н урыл потыртасы̄г. Э̄типа̄лаг ос боксёрув кӯщаит ёт потыртас. Хотьютын ма̄ныр пӯмащ о̄лыс, тав та урыл Руслан та титыгластэ. Соссаӈ мир Ассамблея кӯщаиг о̄лнэ хум Е. Д. Айпин Руслан ка̄тсор щё̄сыл мӯйлуптастэ ос пуста̄гыл о̄лнэ ла̄тӈыл ла̄выстэ. Та юипа̄лт Н. В. Комарова Руслан ёт хо̄нтхатыглаӈкве ёхтыс. Ма̄ньщи хум такви каснэ па̄ссатэ губернаторувн мӯйлуптастэ. Потре̄н халт Наталья Владимировна титыглахтас: «Бокс ёмщакв э̄лаль тотнэ ма̄гсыл иӈ маныр э̄ри? » Руслан ювле ла̄выс: «Ты ма̄гсыл касуӈкве ханищтахтын ёмас колыт ос каснэ кастыл щё̄питахтын пормасыт ёвтуӈкве э̄ре̄гыт». Губернаторув округувт о̄лнэ боксыл ханищтан колытын нё̄туӈкв ла̄вхатас. Та юипа̄лт Н. В. Комарова такви ва̄ӈын кӯщаиг о̄лнэ хумитэ Алексей Путин Руслан ёт потыртаӈкве ла̄выстэ ос титыглахтуӈкв, ты касыл э̄лаль тотнэ ма̄гсыл маныр э̄ри. Руслан такви номтанэ пуссын таве̄н потыртасанэ. Алексей Путин Ха̄льӯс районныл округ мирколн заявка нампа нэ̄пак те̄туӈкв ла̄выс. Та нэ̄пак тыг те̄тнэ юипа̄лт, аквта та̄ра пуссын э̄рнэ пормасыт тах ёвтавет.

1050 2013.04.26. Тамара МЕРОВА

Ма̄н таве 95та̄лэ̄тыл янытлылӯв! Мо̄лал Саранпа̄вылныл пищма ёхтыс. Ма̄навн музеит рӯпитан кӯщай нэ̄ Вера Павловна Комкова хансыс. Тав тамле ща̄гт ла̄тыӈ ке̄тыс: ты э̄тпос хӯрмит хо̄талэ̄т Анастасия Ивановна Сангилева 95 та̄лэ то̄влыс. Тав та па̄влыт щар яныгпа̄ла хо̄тпаг о̄лы. Э̄ква Алы Няхлаӈ па̄вылт самын патыс, а̄ще Иван Иванович Вынгилев тувыл о̄лыс, оматэ ос Дарья Яковлевна Ромбандеева Мувынке̄с па̄вылныл о̄лум нэ̄. Ты э̄кваго̄йкаг хӯрум пыг ос кит а̄ги янмалтасы̄г. Колта̄гланыл щёлыӈыг о̄лыс, са̄в са̄лы ос ӯйхул о̄щсыт. Каӈканэ а̄ще ёт са̄лы ӯрим яласасыт, Наста ма̄нь та̄гыл Марья увщитэ̄нтыл оматэ̄н колсори рӯпата ва̄руӈкве нё̄тсы̄г. 1938 репрессия пилыщмаӈ та̄лытыт Сангилевыт колта̄гыл са̄лыяныл, ӯйхуланыл хотняртумтаве̄сыт. Туп акв мисыл, лувыл ос матахмат са̄лыл хультуптымат. Александр, Фома, Семён каӈканэ о̄с хотталь ва̄та̄л ма̄н тотыгпаве̄сыт. Мо̄лтынув ущ та̄рапатыс, та̄н пуссын Ханты-Мансийскат порслымат. Яныг хо̄нт е̄мтум порат Наста 23 та̄лэ то̄влыс. То̄нт нэ̄ хо̄тпат пуссын хӯл алыщласыт. Тыи сака та̄рвитыӈ рӯпата, э̄тэхо̄талэ ва̄гта̄л патнэ мус ма̄хум тот та рӯпитасыт. Хӯл алыщлым яласыматэ тав тот Иван Сангилев ёт хо̄нтхатас. Ётыл тэ̄н акванминасы̄г. Иван Егорович Ха̄ӈла па̄вылныл о̄лыс. 1945 та̄л тӯяг тэ̄н ты па̄вылн ва̄нтлысы̄г, аквъёт хӯл алыщлан пиркатат рӯпитаӈкв патсы̄г. Э̄кваго̄йкаг Николай, Пётр, Дорофей пыганэ̄н ос Даша а̄гитэ̄н янмалтасы̄г. 1952 та̄л та̄н Саранпа̄вылн ва̄нтлысыт. Анастасия Ивановна мис поснэ ма̄т рӯпитаӈкве патыс. Ос э̄типа̄лаг юн ла̄мпатэ пе̄ламтытэ, колканын ӯнтым маснут ю̄нтыс. О̄йкатэ ос ня̄враманэ ла̄гыл маснутыл, сахил, мольщаӈыл такви ю̄нтыгласанэ. Анастасия Ивановна сака ёмас ос нёмса хо̄тпа. Тав нэ̄мхуньт мо̄т э̄лумхо̄лас нупыл лю̄ль ла̄тыӈ ат ла̄выглас, тав ёмас сымыл, ёмас номтыл о̄лы. Ма̄ньлат а̄гитнпыгытн э̄ква ла̄выглы, са̄ртын ма̄хум сака щёлыӈыг ат о̄лсыт, нуса ва̄сыт ос та̄нки халанылт сака юртыӈыщ о̄лсыт, пуссын акваннё̄тхатсыт. Ань тай ла̄кква ма̄н миныгласыт, мо̄рсыӈ порат акванхо̄нтхатыглэ̄гыт. Щир мус та̄нки халанылт потыртаӈкве аман ат ха̄сэ̄гыт, аман ат таӈхе̄гыт. Э̄ква ань Дарья а̄гитэ̄нтыл аквъёт о̄лэ̄г. Апганэ̄н уральтаве, та̄н пуссын мӯйлуӈкве ёхталэ̄гыт. Анастасия Ивановна ла̄ви, тав акваг ка̄ркамыг рӯпитас, таима̄гыс са̄в та̄л о̄лы. Э̄лумхо̄лас рӯпатаныл нэ̄мхуньт ул вос пилы ос таквина̄тэ ул вос са̄литытэ. Я̄тил Анастасия Ивановна, ма̄н наӈын яныг намхо̄талыл янытлылӯв! Са̄в та̄л сыс наӈ са̄всыр та̄рвит ва̄рмалит ва̄щиньтасын. Та̄наныл пуссын ёмщакв ва̄рсанын, по̄хан лаквтысанын. Таима̄гыс ма̄н яныг пӯмащипа ла̄ве̄в, ма̄н ань наӈынныл аквтох э̄лаль о̄луӈкве ханищтахтэ̄в. Мо̄т э̄лумхо̄лас нупыл сымыӈыщ суснэ хо̄тпаг, ёмас номтыл о̄лнэ хо̄тпаг вос хультэ̄в. Са̄в со̄т, са̄в щунь наӈын ла̄ве̄в! Ма̄н, ма̄ньщи газетат рӯпитан хо̄тпат, Анастасия Ивановнан паща ла̄тыӈ ке̄тэ̄в ос 95 та̄лыл янытлылӯв! Пус ка̄т, пус ла̄гыл таве̄н, То̄рум ёт, О̄тыр ёт!

1050 2013.04.26. Галина КОНДИНА

Ма̄н таве янытлылӯв. Яныгполь э̄тпос 22 хо̄талт яныг ма̄ньщи учёныюв, доктор нам о̄щнэ хо̄тпав Евдокия Ивановна Ромбандеева намхо̄талэ, тав 1928 та̄лт Ха̄льӯс район Хо̄сло̄х па̄вылт самын патыс. Ма̄ньта̄гыл ханищтахтуӈкве ка̄сащас, матыра̄ти пуссын сымыӈыщ ва̄рыс. Та порат самын патум ма̄хум ма̄ньта̄гыл рӯпитасыт. Евдокия Ивановна тэ̄лы ханищтахтас, туи пум, щилос ва̄рим, хӯл алыщлым рӯпитас. Са̄т класс Кульпас па̄вылт а̄стлас ос Ханты-Мансийск ӯсн педучилищан ханищтахтуӈкве минас, 1947 та̄лт таве а̄стластэ. 1947-49 та̄лытт Хо̄сло̄хт ня̄врамыт ханищтас. То̄нт ты торгамтастэ – ханищтан нэ̄пак щар ат то̄вылхаты. Тувыл э̄лаль Ленинград ӯсн А. А. Жданов нампа университетн ханищтахтуӈкве минас. Тот ханищтахтаме сыс ня̄врамыт ловиньтан ма̄гсыл нэ̄пакыт ма̄ньщи ла̄тӈыл толмащлас. 1954 та̄лт «Мансийскоруcский словарь» та̄ратас. 1964 та̄лт кандидатский диссертациятэ хансыс ос сака ёмщакв таве вуянтастэ, та та̄л кандидат наук намыл майвес. Евдокия Ивановна са̄в та̄л Москва ӯст о̄лыс, тот рӯпитас. 1990 та̄лыт порат округ кӯщаитын тав рӯпитаӈкве тыг во̄ввес. Ань тыг мус тав А̄с-угорский институт рӯпиты. Нотэ палытыл Евдокия Ивановна 150 са̄виттем нэ̄пак та̄ратас. Тэ̄лытӯяг йильпи, осыӈ нэ̄паке «Медвежьи эпические песни манси (вогулов)» ва̄рвес, тав 657 страница о̄ньщи. Ань тав наме округт о̄лнэ ка̄сыӈ хо̄тпан ва̄ве, мо̄тпал хо̄н ма̄т ос тыт тав хансум нэ̄паканэ щирыл ма̄хум ма̄ньщи ла̄тӈув ханищтыяныл. Та̄рвитыӈ порат яныгмам хо̄тпа матъёмас наука щирыл э̄лаль рӯпитаӈкве патыс ос ма̄н ла̄тӈув ань молях ат ёрувлаве. Евдокия Ивановна са̄в янытлан нэ̄пакыт ос ма̄гылт о̄щнэ по̄сыт о̄ньщи: «За заслуги перед Отечеством II степени», «Заслуженный деятель науки Российской Федерации», «Заслуженный работник образования», «Почётный гражданин ХМАО», «Труженик тыла», «Ветеран труда», «50 лет Победы в ВОВ 1941-45 г. г. », «60 лет Победы в ВОВ 1941-45 г. г. » ос мо̄таныт. А̄с-угорский институт та хо̄тал конференция ва̄рыглас, тув учёный хо̄тпат са̄в па̄лыл ёхталасыт, та̄нти потраныл ловиньтасыт. Та урыл мо̄тыт газетавт ловиньтэ̄н.

1050 2013.04.26. Тамара МЕРОВА

Хӯлтыглан ла̄тыӈ. Округ губернаторув Наталья Комарова ва̄ӈын хо̄тпанэ акванатыгласанэ. Та̄н ма̄хум пенсиянылн но̄хнё̄тнэ олныт ос мо̄т са̄всыр нё̄тмилыт урыл потыртасыт. Рӯпатаныл по̄хан минам пенсионерыт ты та̄л о̄вылтахтам па̄сныл пенсия коныпал олннё̄тмилыл (рущ щирыл «дополнительный пенсияг» ла̄ваве) ойтуӈкве о̄с патавет. Тыи туп 2010 та̄л яныг таквс э̄тпос ва̄т хо̄тал мус пенсияныл ма̄гыс заявление хансум ма̄хум та̄н тамле олныл тах ойтавет. Мо̄лты та̄л сӯкыр э̄тпос па̄сныл яныг нам о̄щнэ манос ма̄гылн тагатан по̄сыл маим хо̄тпат туп та̄н акв тамле олннё̄тмилыл майлуве̄сыт. Ань округ экономика департаментыт о̄лнэ кӯщай хум Павел Сидоров ла̄выс: «Ты та̄л ва̄т са̄грапнал э̄тпос о̄выл хо̄талэ̄ныл ты олннё̄тмилыл рӯпатаныл по̄хан минам пенсионеранув пуссын ойтуӈкве патавет. Тох ка̄сыӈ яныгпа̄ла хо̄тпа кит «прожиточный минимум» мус пенсиятэ са̄вми». Округ Правительство па̄лыл ты ва̄рмаль ма̄гыс 20132015 та̄лытн 435 млн. арыгкем солко̄ви та̄стым о̄лы. Югра янытыл тамле пенсия олннё̄тмилыл 170 со̄тыра хо̄тпа мивет. Губернатор прессслужбаныл ке̄тым ла̄тыӈ Т. МЕРОВА ма̄ньщи ла̄тӈыл хансыстэ.

1050 2013.04.26. Раиса Решетникова (RUS)Валентина Хозумова (MAN)

Мощщаг хультум мирыт акванатхатыгласыт. Ювле хультум э̄тпос 27-30 хо̄талытт Салехард ӯст Лӯима̄ янытыл о̄лнэ мощщаг хультум мирыт съезданыл о̄лыс. Ты VII съезданыл Север, Сибирь ос Дальний Восток ассоциацияныл ва̄рыглас. Ань Россия са̄всыр ма̄ныл ос мо̄т хо̄н ма̄ныл 356 хо̄тпа тув ёхталасыт. Съезд рӯпататэ о̄вылтан э̄лыпа̄лт яныгпа̄ла хо̄тпат койп ра̄тым по̄йкщасыт ос мощ пӯрлахтасыт. Тувыл съезд рӯпататэ та о̄вылтавес. Са̄всыр ма̄ныл ёхталам депутатхо̄тпат ос кӯщаит потыртасыт. Титыт хо̄талт йильпи президент пе̄риявес. Ты э̄лыпа̄л рӯпитам Сергей Харючи нила щёс тув пе̄рия̄лвес. Та̄лыт пуссын акван те ловиньтаӈкв, хо̄тхуйплов та̄л тав тот кӯщайлахтас. Тав рӯпитаме̄т ты ассоциация «Уставыг» ла̄внэ ма̄к яныг нэ̄паке мо̄т щирыл хасвес: ты хосыт президентыг пе̄рияхтын хо̄тпа кос манах щёс тув пе̄рияхтуӈкв ве̄рми. Ювле хультум та̄лт Москва кӯщаитн та̄н ла̄вве̄сыт, нэ̄паканыл пуссын са̄ккон щирыл вос хансыяныл. Ань таима̄гыс ты ва̄рмаляныл пуссын та̄рапаттысаныл ос э̄рнэ щирыл ва̄рсаныл. Ассоциация кӯщаиг ос мо̄т хо̄тпа пе̄риявес – Григорий Ледков, тав Государственный Дума депутатыг ос по делам национальностей комитетыт рӯпиты. Тав о̄с тах нила та̄л рӯпитаӈкв паты. Ань са̄всыр ма̄ныл атхатыглам ма̄хум пуссын та̄нти та̄рвитыӈ ва̄рмаляныл урыл потыртасыт. Кос хоты э̄лы ма̄т та̄н о̄лэ̄гыт, ва̄рмаляныл пуссын аквхурипат: ла̄тӈаныл ня̄врамыт ат ва̄ганыл, пе̄с ва̄рмаляныл, пе̄с наканыл ла̄щлакв та ёрувлахтэ̄гыт, о̄лнэ ма̄нылныл мо̄т ма̄н ва̄нтлуӈкв кащилтавет. Ань туп са̄лы о̄щнэ хосыт ма̄нь мирыт пе̄с о̄лупсаныл э̄лаль тотуӈкв ве̄рмияныл. Ос са̄лыӈ ма̄хум ла̄ве̄гыт, са̄лыяныл ӯрнэ ма̄гыс ма̄ ат то̄вылхаты, са̄лы тэ̄пыӈ ма̄ моще̄ртын ат хульты. Ма̄во̄й ос газ ма̄ныл но̄хняртын предприятият акваг хильта̄л ма̄ныл нупыл ла̄щлакв та лакве̄гыт. Ты хосыт соссаӈ ма̄хумн ос мо̄т ма̄н ва̄нтлуӈкв э̄ри. Ань съездын ёхталам мир резолюциянэ̄пак хассыт, тув потыртам ва̄рмаляныл пуссын хӯлтсаныл. Э̄лаль ты нэ̄пак ёт Россия Правительство яныг кӯщаит рӯпитаӈкв патэ̄гыт. Раиса Решетникова хансум потыр ма̄ньщи ла̄тӈыл Валентина Хозумова толмащластэ.

1050 2013.04.26. Людмила ТЕТКИНА

9 май кастыл яныгпа̄ла хо̄тпат олныл ойтавет. Ты тэ̄ла урыл Наталья Комарова такви ва̄ӈын хо̄тпанэ ёт сапра̄нит потыртас. Ань та̄н ты урыл ла̄всыт, 9 май ялпыӈ хо̄тал кастыл округувт 9 со̄тыра арыгкем э̄лумхо̄лас олныл тах ойтавет. Хо̄нтлам яныгпа̄ла хо̄тпат хӯрум со̄тыра солко̄вил мивет, блокадный Ленинград ӯст о̄лум ма̄хум, «Труженик тыла» нам о̄щнэ хо̄тпат, концлагерит саватым хо̄тпат кит со̄тыра солко̄вил ойтавет. Ос яныг хо̄нтлан нак порат порслым ма̄хум ня̄враманыл акв со̄тыра солко̄вил мивет. Наталья Комарова ос округувт о̄лнэ мир ты ялпыӈ хо̄тал янытлаӈкве пуссын во̄всанэ. Яныгпа̄ла ма̄хум хо̄нтлым са̄в ё̄р пинсыт ос ты яныг ва̄рмаль урыл хотёрувлаӈкве щар ат ро̄ви. О̄с аквта порат кӯщаит са̄лыӈ ма̄хум урыл потыртасыт ос постановлениенэ̄пак пирмайтасыт. Наталья Комарова ла̄выс: «Ань ма̄ньлат ма̄ньщи, ханты хо̄тпат та̄нки пе̄с йис ва̄рмаляныл нупыл ат сунсэ̄гыт ос са̄лы ӯруӈкве ат ка̄саще̄гыт. Ты ва̄рмаль урыл Белоярский ӯсн ялмум порат соссаӈ ма̄хум а̄нумн потыртасыт. Округувт о̄лнэ са̄лыӈ ма̄хум ма̄гсыл йильпи касыл ва̄рыглаӈкве тах патэ̄в. Та̄нки йис о̄лупсаныл нупыл вос сунсэ̄гыт ос э̄лаль вос тотыяныл». Та̄н ат номинацият щирыл касуӈкве патэ̄гыт. Ка̄сыӈ та̄л ре̄тыӈ ю̄свой э̄тпост «День оленевода» ялпыӈ хо̄таланыл о̄лыглан порат но̄хпатум хо̄тпат тот янытлавет. Совхозыт, общинат, фермат ос та̄нки ма̄гсыланыл са̄лыт янмалтан ма̄хум пуссын касуӈкве тот ве̄рме̄гыт. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ.

1050 2013.04.26. Людмила ТЕТКИНА

Во̄р янмалтан ва̄рмаль – ты яныг рӯпата. Ка̄сыӈ та̄л яныгполь э̄тпос 10 хо̄талэ̄т А. А. Дунин-Горкавич самын патум хо̄талэ кастыл Ханты-Мансийск ӯст во̄р ӯргалан хо̄тпат конференциян акванатхатыглэ̄гыт. Тот та̄н ма̄вит ӯргалан, во̄р янмалтан ва̄рмалит урыл потыртэ̄гыт. Александр Дунин-Горкавич 1854 – 1927 та̄лыт сыс о̄лыс, тав налыман арыгкем та̄л лӯима̄т во̄р ӯргалым рӯпитас. Тыт тав соссаӈ ма̄хум о̄лупсаныл урыл нэ̄пакыт о̄с хансыс. Ты рӯпата ва̄рим ма̄ньщи, ханты мирыг ма̄гсыл са̄в э̄рнэ тэ̄ла тотыс. Ты та̄л о̄лум конференциян Москва, Екатеринбург ӯсыгныл ос округувныл ма̄хум ёхталасыт. Михаил Гиряев, Московский университетт рӯпитан хум, во̄р янмалтан ва̄рмаль урыл потыртас. Тав ла̄вме щирыл ань яныг та̄рвит: хус та̄л сыс Россият во̄р ӯргалан урыл о̄лнэ са̄кконыт акваг пе̄нтавет, йильпи щирыл хансавет. Ань са̄всыр постановленият, правовой актыт ос мо̄т нэ̄пакыт о̄лэ̄гыт, ма̄хум хоты нэ̄пакыт хосыт э̄лаль рӯпитаӈкве – ат ва̄гыт. Тыил ос мо̄т та̄рвит е̄мтыс, ань мӯсхалыг во̄р ат ӯргалаве. Са̄в йӣвыт хотса̄гравет, йильпи во̄р яныгмаӈкве ат а̄лыми. Россият яныгман во̄р пуссын мӯсхалыг ханищтаӈкв ос йӣвыт номсахтым хотса̄груӈкве э̄ри, туп то̄нт ма̄витув сыстамыг паты ос во̄р хотса̄грим са̄в олн сэ̄луӈкве ро̄ви. Тамле рӯпата ва̄рнэ э̄лумхо̄лас о̄с ат то̄вылхаты, ма̄ньлат ма̄хум во̄р ӯргалан хо̄тпаг ханищтахтуӈкве ань ат ка̄саще̄гыт. Михаил Гиряев ла̄выс, ты э̄лыпа̄лт во̄р ӯргалан ма̄хум сака янытлаве̄сыт. Ань Россият са̄т ӯст ты ма̄хум ма̄гсыл памятникыт тӯщтуве̄сыт. Акв тамле ут Ханты-Мансийск ӯст Александр Дунин-Горкавич хурил ва̄рвес. Ты ма̄хум яныг рӯпата ва̄рим са̄в щёл государстван тотэ̄гыт. Ты конференция 2005 та̄лныл Ханты-Мансийск ӯст ва̄рыглаве, ма̄ньлат хо̄тпат тот та̄нки потраныл ловиньтаӈкве о̄с во̄виньта̄лавет. Ос ты коныпал та̄н ма̄гсыланыл А. А. Дунин-Горкавич нампа премия ва̄рвес, тав касыл щирыл миве. Ты та̄л Виктория Русакова, ЮГУ нилыт курсыт ханищтахтын а̄ги, но̄хпатыс ос конференция о̄лум порат тав янытлавес. Тамле ва̄рмаль таима̄гсыл ва̄рыглаве, ма̄ньлат а̄гитпыгыт ты тэ̄ла нупыл вос сунсэ̄гыт ос ханищтахтуӈкве а̄стланэ̄ныл юипа̄лт во̄р ӯргалаӈкве вос минэ̄гыт. Конференцият ма̄хум ат секция щирыл уртхатым рӯпитасыт, тот ма̄хум во̄р янмалтан, ма̄вит ӯргалан, мӯйлын, ма̄вит сыстамтан ва̄рмалит ос А̄с-угорский мирыт урыл потыртасыт.

1050 2013.04.26. Галина КОНДИНА

«Победа» ма̄шинал минэ̄гыт. Яныг хо̄нтыт но̄хпатум хо̄тал янытлан ма̄гсыл мо̄лты та̄л па̄сныл автопробегыг ла̄внэ лё̄х ва̄рыглаӈкве патвес. Константин Репин, ма̄ньлат ма̄хум халт Югра парламентыт кӯщаиг о̄лнэ пыг, «Победа – одна на всех» нампа проект хансыс. Тот рӯпитан ма̄ньлат а̄гитпыгыт ты номт э̄лаль тэ̄лаг ва̄руӈкве патсаныл. Ань ты тӯя ма̄хум «Победа» нампа са̄т пе̄с ма̄шинал хӯрумхуйплов ӯс та̄ра 6 362 км атхуйплов хо̄тал сыс тах минэ̄гыт. Ты ӯсыт пуссын город-Герой нам о̄ньще̄гыт. Мурманск ӯсныл яныгполь э̄тпос ва̄т нупыл атыт хо̄талт минмыгтэ̄гыт СанктПетербург, Москва, Тула, Смоленск, Минск, Брест, Киев, Одесса, Севастополь, Керчь, Новороссийск ӯсытын хо̄иглэ̄гыт ос я̄ӈк на̄тнэ э̄тпос нёлолов щислат Волгоград ӯсн ёхтэ̄гыт. Ка̄сыӈ ӯст та̄н Победа хо̄тал кастыл ва̄рыглан мероприятиятыт та̄нти лё̄ӈханыл урыл потыртаӈкве патэ̄гыт. Ре̄тыӈ ю̄свой э̄тпос 1943 та̄лт Сталинград ӯс по̄хыт немцыт ма̄н ма̄хманувн ёмщакв алыщлаве̄сыт, ӯс ляпан щар ат та̄ртве̄сыт. То̄нт ты ГАЗ М-20 ма̄шина ва̄руӈкве о̄вылтавес, ётыл тав «Победа» намыл пинвес. Ань са̄т тамле ма̄шина Тюменил, Няганил, Екатеринбургыл, Ханты-Мансийскыл, Фёдоровский па̄вылныл ос Мурманск ӯсныл Победа хо̄тал янытлаӈкве минмыгтэ̄гыт. Ты пе̄с ма̄шинат пуссын ёмщакв хотщё̄питаве̄сыт ос лё̄ӈханыл хӯрум государство та̄ра паты – Россия, Украина, Белоруссия. Ты автопробег мо̄лты та̄л о̄вылтавес, ма̄хум Нижневартовсканыл Екатеринбург мус титхуйплов ӯс та̄ра хус «Победа» ма̄шинал минасыт. Ка̄сыӈ ӯст, ка̄сыӈ па̄вылт ня̄врамыт ос яныг ма̄хум тамле ма̄шинатыл сака пӯмщалахтасыт. Хуньт пе̄с порат ва̄рим утыт ань тыг мус рӯпитэ̄гыт ос мирн та пилыщмаӈ, та̄рвитыӈ пора хотёрувлаӈкве ат мыгыт. Молодёжный парламентыл те̄тым ля̄ххал Г. Кондина ма̄ньщи ла̄тӈыл хансыстэ.

1050 2013.04.26. Александр ВЬЮТКИН

Ва̄ӈын кӯщай потре. Мо̄лалнув Ханты-Мансийск ӯст Алексей Путин, губернатор ва̄ӈын хум, ля̄ххал тотнэ хо̄тпат ёт хо̄нтхатыглас. О̄влэ̄т ня̄врамыт туи ӯщлахтын урыл потрув минас. Тав ла̄выс: «Ты та̄л ня̄врамыт ӯщлахтын ма̄гсыл округ бюджетныл 700 млн. солко̄ви майвес. Та олнытыл вожатыиг рӯпитан ма̄ньла̄т ма̄хум тах ойтавет. Тыгыл э̄лы ма̄н тотыглан ня̄врамыт э̄лаюв ялнэ лё̄ӈханыл ос тот о̄лнэ хо̄таланыл о̄с ты олныл ойтавет. Тувыл округувт ня̄врамыт пуста̄гыл яныгман ма̄гсыл матыра̄ти пуссын ва̄руӈкв э̄ри. Ня̄врамыт ӯщлахтын колытт ле̄ккарыт вос рӯпитэ̄гыт. Тэ̄нут па̄йтнэ ма̄т сыстамыг вос о̄ньщавет. Ты ва̄рмалит пуссын ня̄врамыт ӯщлахтын э̄лыпа̄лт уральтыянув. Ма̄н са̄в рӯпата ва̄ре̄в, ня̄враманӯв ӯщлахтын хо̄таланыл ёмасыг вос о̄лэ̄гыт». Э̄лаль кӯщай пусмалтахтын колыт урыл потре о̄лыс: «Ань пӯльницатт са̄всыр специальность щирыл рӯпитан ле̄ккарыт щар ат то̄вылхатэ̄гыт. Хумус ань ла̄ваве, ат та̄л сыс ёмас, яныг пӯльница ӯнттаве. Акв та̄л сыс таве са̄всыр а̄гм пусмалтан йильпи пормасыл ёвтаве. Тот рӯпитан ёмас ле̄ккар ханищтан ма̄гсыл ловмантем та̄л э̄ри. Таи ёмас, ма̄н ма̄ньлат ма̄хманув ле̄ккарыг ханищтахтын ма̄гсыл са̄в нё̄тмилыл ва̄риянӯв. Са̄всыр нё̄тмилолныл ойтыянӯв. Тувыл рӯпата олныт о̄с ёмщакв но̄хнё̄тсанӯв». Хӯрмит потре садикыт урыл о̄лыс: «Ань ма̄нь ня̄врамыт о̄щнэ колыт ат то̄вылхатэ̄гыт. Хуньт пе̄с садикыт мо̄т колыг ва̄рыглаве̄сыт. Таима̄гсыл ань йильпи садикыт ӯнттуӈкв э̄ре̄гыт. 2013 та̄л сыс округувт нила яныг садик пӯнсаве. Тув са̄т со̄тыра ляпатем ня̄врам ялантаӈкве ве̄рме̄гыт. 2014-2015 та̄лыг сыс о̄с аквта са̄вит ня̄врам ма̄гсыл акв тамле са̄т кол округув янытыл ӯнттаве».

1050 2013.04.26. Александр ВЬЮТКИН

Ялэ̄н, ӯщлахтэ̄н. Ханты-Мансийск ӯст турист ма̄хум ёт рӯпитан «Союз турпредприятий Югры» ос «Региональный информационноаналитический центр STI» тит колыг акваннё̄тхатнэ ма̄гсыл нэ̄пакт хасхатсы̄г. «Союз турпредприятий Югры» ма̄н округув янытыл рӯпиты. Таве Наталья Комарова губернаторув 2011 та̄лт ва̄руӈкв номылматыстэ. Мо̄т компания Доминикана мо̄т хо̄н ма̄ ёт рӯпиты. Россия ма̄хум тув яласаӈкв 2004 та̄л па̄сныл о̄вылтахтасыт. О̄выл та̄л сыс 6 со̄тыра э̄лумхо̄лас тув ялсыт. Мо̄лты та̄л сыс 167 со̄тыра хо̄тпа ма̄н ма̄вныл тот ӯщлахтасыт. Округувт туризм ёт рӯпитан кӯщай нэ̄ Дана Гуц ла̄выс: «Ма̄навн ты акваннё̄тхатнэ ва̄рмаль сака э̄ри. Та̄н са̄в э̄рнэ рӯпата ма̄навн хӯлтуӈкв ве̄рме̄гыт». Мо̄т компания кӯщае Виталий Наумов ювле таи потыртас: «На̄н о̄лнэ ма̄н со̄тыӈ. Тыт во̄ре сыстам, витэ сыстам, ӯйхул са̄в. Соссаӈ ма̄хум са̄лы о̄ньще̄гыт. Туристыт тыг во̄внэ ма̄гсыл нэ̄матыр воссыг ат э̄ри. Мӯсхал щирыл щё̄питахтуӈкв – тувыл та». Потраныл оигпам юипа̄лт акваннё̄тхатым рӯпитан нэ̄паканылт тит кӯщаиг ка̄тпосанэ̄н та по̄стысы̄г.

1050 2013.04.26. Александр ВЬЮТКИН

Ва̄сыт па̄тлуптан пора. Округувт ӯйхул ӯргалан Департамент колт прессконференция о̄лыс. Алы ма̄ныл тыг ёхтын товлыӈ ӯит ка̄тынпаттын урыл ма̄н ётув потыртаӈкве ӯйхул ӯргалан тит кӯщаиг ёхталасы̄г. Акватэ наме Юрий Васильевич Василенко, тав округув янытыл ӯйхул ос во̄р ӯргалан кӯщаиг о̄лы. Мо̄танэ наме Алексей Николаевич Залибеков, тав ос во̄р ӯйхул ӯргалан кӯщаиг рӯпиты. Тэ̄н алы ма̄ныл ёхтын то̄влыӈ ӯит па̄тлуптан хо̄талыт урыл потыртасы̄г. Округув онтолов район щирыл ла̄ккваурты мо̄лы. Мо̄лты та̄л па̄сныл тыт лов хо̄талын ва̄с па̄тлуптан ва̄рмаль ва̄рвес. Алы нила районанув (ты Советский, Кондинский, Ханты-Мансийский ос Нефтеюганский) я̄ӈк на̄тнэ э̄тпост 4 щислат во̄раян ва̄рмаляныл о̄вылтахты. Мо̄т ат лӯи (Октябрьский, Белоярский, Ха̄льӯс, Сургутский ос Нижневартовский) районыт 11 щислат ва̄с па̄тлуптаӈкв та̄ртаве. Акв э̄т сыс хӯрум хум ва̄с, акв лунт па̄тамтаӈкв ро̄ви. Мо̄лты та̄л хольт ва̄с ӯрнэ лицензия тын щирыл миӈкве патаве, рущ щирыл «госпошлинаг» ла̄ваве, тав тынэ 420 солко̄ви. Ка̄тынпаттын ка̄сыӈ ва̄с манос лунт та̄ра л и ц е н з и я н э̄ п а к ы н по̄стуӈкв э̄ри. Ӯйхул ӯргалан ма̄хмытын хунь уральтаве̄н, нэ̄паканы̄н та̄тылат те, штрафыл пинаве̄н. Ва̄с ма̄гсыл 900 солко̄ви, лунт ос 1500 солко̄ви. Ха̄пыл яласанэ̄н порат писаляны̄н патроныл ул пинэ̄н. Ос писалит сыпаляныл тӣвырн пиным тотыглаӈкв э̄ре̄гыт. Мо̄т щирыл о̄с штрафыл хансаве̄н. Ма̄колыӈ о̄йка ка̄тынпаттын лицензия ат те о̄ньщегы̄н, карабин нампа писаляны̄н ёт тотыглаӈкв ат ро̄ви. Лицензия та̄л таве ёт тотыглым хо̄нтаве̄н те, та̄ра хотвиве. Ювле ве̄рмаве ат миӈкв. Ма̄ньщит хумыт, во̄раян со̄т вос о̄ныще̄гын, ӯйхул ӯргалан ма̄хмытын ул вос пуваве̄н.

1050 2013.04.26. Людмила ТЕТКИНА

Во̄рт о̄лнэ ма̄хум ва̄рмаляныл. Во̄раян ос хӯл алыщлан ма̄хум Сургутский район Русскинские па̄вылн акванатхатыгласыт. Та̄н районанылт хӯрум со̄тыра арыгкем соссаӈ хо̄тпа пе̄с йис щирыл о̄лэ̄гыт. Ка̄сыӈ та̄л ма̄ньполь э̄тпост район янытыл та̄н Русскинские па̄вылн сапра̄нин во̄виньта̄лавет. Ань тув Сергей Черкашин, Сургутский район кӯщай ва̄ӈын хум, Анатолий Прасолов, Русскинские миркол кӯщай, ос налоговый инспекцият рӯпитан нэ̄ ёхталасыт. С. А. Черкашин са̄в та̄л сыс пе̄с йис ма̄т о̄лнэ ханты ма̄хум ёт рӯпиты, тав ка̄сыӈ ще̄мья ёмащаквег ва̄гтэ, ка̄сыӈ хо̄тпан нё̄туӈкве таӈхи. Ёмас, ка̄ркам хум соссаӈ ще̄мьятын сака янытлаве. Сургутский районт 157 родовой угодие о̄лы, та̄н халанылт 50 пе̄с йис ма̄ ханты ос ё̄рн ще̄мьят та̄нки нупыланыл хансуӈкве ат а̄лымасаныл. Ань йильпи са̄кконыт щирыл соссаӈ ма̄хум родовой угодияныл та̄нкина̄нылн хансуӈкве Москва ӯст туп ве̄рме̄гыт. Ос мо̄т та̄рвит, хумус ты рӯпата ва̄руӈкве, та ма̄хум о̄с ат ва̄гыт. Тыима̄гсыл ханты ще̄мьятын мощ ӯрхатуӈкве э̄ри. Сергей Черкашин ла̄вме щирыл, та̄н ты та̄рвитыӈ ва̄рмаль урыл ёмщакв ва̄гыт ос э̄лаль рӯпитаӈкве тах патэ̄гыт. Кӯщай хум писалит урыл ла̄тыӈ о̄с ла̄выс. Йильпи са̄ккон щирыл писаль ёвтнэ хо̄тпан о̄влэ̄т ханищтахтуӈкве э̄ри. Ханищтахтын ма̄ныл а̄сты, тувыл нэ̄пакыл миве, рущ ла̄тӈыл «разрешение на ношение оружия» намаим о̄лы. Ос та юипа̄лт ёвтум писале полицият хансуӈкве э̄ри. Сургутский районт писалил па̄тлуптаӈкве туп акв организация ханищты. Ты рӯпата ма̄гсыл хо̄т со̄тыра солко̄ви выг. Тамле нэ̄пак ат о̄щнэ во̄раян хотпат ань пуссын ханищтахтуӈкве ла̄вве̄сыт. Соссаӈ ма̄хум во̄раян ва̄рмаль урыл китыглахтасыт. Ань квота щирыл та̄н акв та̄л сыс туп 50 лэ̄ӈын ка̄тынпаттуӈкве ве̄рме̄гыт. Ты ва̄рмаль урыл Сергей Александрович ювле таи ла̄выс: «На̄н о̄лнэ ма̄нанын охотугодияг ке хансыяны̄н, то̄нт на̄н акв со̄тыра лэ̄ӈын алыщлаӈкве ве̄рмегы̄н. Родовой угодиянын ань «Территории традиционного природопользования» ловиньтахтэ̄гыт oc са̄в во̄руй тот ка̄тынпаттуӈкве на̄н ат ве̄рмегы̄н». Хӯл алыщлан урыл потыр о̄с о̄лыс. Ань соссаӈ ма̄хум ка̄сыӈ та̄л заявлениенэ̄пак хансэ̄гыт ос квота щирыл акв хо̄тпа та̄л сыс тэ̄нэ ма̄гсыл 266 кила я̄ӈк хӯл пувуӈкве ве̄рми. Мо̄т хӯл тыгыл са̄внув пyвуӈкве ро̄ви. Та ма̄т о̄лнэ хантыт са̄лыяныл хӯлыл тыттыяныл. Таима̄гсыл та̄н сака са̄в хӯл пуве̄гыт. Кӯщай хум ла̄выс, ты квота ат ке то̄вылхаты, ты коныпал о̄с ёвтуӈкве ро̄ви. Ты нэ̄пак туп 20 солко̄ви тынэ. Налоговый инспекцияныл ёхталам нэ̄ ос налоголн урыл потыртас. Ань пе̄с йис ма̄т о̄лнэ ще̄мьят нефтяникыт ёт соглашениенэ̄пак хансэ̄гыт. Ма̄во̄й но̄хвинэ ма̄хум та̄нанылн компенсацияолн ойтэ̄гыт, «Бураныл», моторыл, ха̄пыл мыганыл. Тувыл акв компания налог такви ойты ос мо̄т компания ты олныт такви ат ойтыянэ, ханты ма̄хмытын ойтхатуӈкве э̄ри. Налоговый инспектор соссаӈ хо̄тпатын ла̄выс, ты ва̄рмаль урыл губернаторын пищма вос хансэ̄гыт. Э̄рыӈ то̄нт нефтяникыт ёт потыртахтэ̄гыт ос налоголн пуссын таит ювле ойтуӈкве патэ̄гыт. Сапра̄нит ма̄хум ма̄вит ӯргалан урыл тох ла̄всыт, ань тыг мус то̄ва ма̄т ма̄во̄й мори со̄сантаве, тувыл нефтяникыт ма̄ хотсыстамтаӈкве сака ат ка̄саще̄гыт. Сергей Черкашин ювле ла̄выс, тамле ва̄рмаль хунь е̄мты, хури вос ва̄ре̄гыт манос кина вос по̄слэ̄гыт. Ос ма̄вит ӯргалан департаментын вос ке̄тыяныл. Ань тамле лю̄ль тэ̄ла ва̄рнэ ма̄гсыл нефтяникыт яныг штрафолныл пинавет. То̄нт моляхнув нёвсуӈкве патэ̄гыт ос ма̄вит хотсыстамтыяныл. Та ма̄т о̄лнэ хантыт пуссын туп та̄нки ла̄тӈыл потыртэ̄гыт. То̄ват рущ ла̄тыӈ щар ат ва̄гыт, Аграфена Сопочина ма̄хманэ потраныл кӯщаитын рущ ла̄тӈыл толмащласанэ. Тамле ва̄рмаль, улпыл, ань туп та ма̄т ка̄салаӈкве ро̄ви. Та̄н та̄нки пе̄с йис ва̄рмаляныл э̄лаль тотыяныл.

1050 2013.04.26. Тамара МЕРОВА

Пе̄с накыт э̄лаль тотавет. Ханты-Мансийск ӯсн Карелияныл, Коми, Мордовия, Удмуртия, Марий Эл ос Ямал ма̄ныл мӯй ма̄хум ёхталасыт. Та̄н пуссын «Нематериальное наследие финноугорских народов как объект сохранения» нампа конференциян во̄виньта̄лве̄сыт. Тамле ва̄рмаль культура департаментыт ос творческий объединение «Культура» колт рӯпитан хо̄тпат щё̄пита̄лсыт. Мӯй ма̄хум пе̄с йис накыт ёмщаквег ханищтан ос э̄лаль ма̄кыг тотнэ урыл аквъёт потыртасыт. «Нематериальный наследияг» йис пораныл о̄лнэ потрыт, мо̄йтыт, пе̄с йӣквыт, э̄ргыт, соссаӈ ма̄хум янытлан ялпыӈ хо̄талыт, сыресыр ёнгилыт ла̄вавет. Россия янытыл ань манхурип пе̄с накыт ӯргалавет ос э̄лаль тотавет, ты о̄вылтыт Москваныл ёхталам нэ̄ Мери Вахтанговна Русанова потыртас. Ос ма̄хум хоты порат маныр ва̄ре̄гыт, манырсыр пе̄с потрыт, мо̄йтыт о̄ньще̄гыт – пуссын та̄рапаттуве̄сыт ос реестрнэ̄пакын хасве̄сыт. Финноугорский мирыт ты ва̄рмалит ёт о̄с я̄нас рӯпитаӈкве патсыт. Сыктывкар ӯст финноугорский ма̄хум культурный центр ва̄рсыт, тот Татьяна Тихоновна Барахова пуӈктоты. Ка̄сыӈ мирныл тув хо̄тпа о̄с пе̄риявес. Ханты ос ма̄ньщи ма̄хмытныл Елена Михайловна Полоникова, творческий объединение «Культура» колт кӯщай нэ̄, тув паттыма. Тав э̄лыпа̄лэ̄т о̄с аквты колт рӯпитам хум Пётр Носов тот кӯщайлахтам. Ань тыг мус та реестрын ма̄н ялпыӈ хо̄таланув, э̄рганув, йӣкванув тув иӈ ат хасве̄сыт. Округ па̄лыл культура департаментыт рӯпитан хо̄тпат ма̄н ва̄рмалянув хӯлтыглан ма̄гыс ущты э̄рнэ нэ̄пак та̄ратасыт. Ялпыӈ хо̄талыт, пе̄с потрыт, э̄ргыт манос ёнгыт тув хаснэ э̄лыпа̄лт о̄влэ̄т комиссиян сунсавет. Та комиссиян хус хо̄тпа атсыт. Ань ма̄ньщит, хантыт тӯлыглапаныл ос Ӯринэ̄ква ялпыӈ хо̄таланыл щар са̄ртын тув хансуӈкве э̄ре̄гыт. Ты конференция минам порат ты пе̄с накыг урыл мӯйлын ма̄хум потыртаве̄сыт. Валентина Перова, Саранпа̄вылт искусство школат рӯпитан кӯщай нэ̄, тӯлыглапыт урыл потыртас ос ма̄нь кина суссылтас. Тав а̄тятэ Дмитрий Георгиевич Агеев са̄в э̄ргыт, та̄ныт, йӣквыт матумпа̄ла хо̄тпатныл ханищтас. Та̄н пуссын ёлхансым о̄лэ̄гыт. Ань хоты хо̄тпа ты пе̄с э̄ргытыл, потрытыл ос са̄ӈквылтан та̄нытыл э̄лаль пӯмщалахтуӈкве паты ке, матыр нэ̄пак манос кина ва̄руӈкве номылматы ке, та̄н таве̄н о̄с тах нё̄тэ̄гыт. Лариса Новикова, Нягань ӯсныл ос Тамара Пятникова, Белоярский ӯсныл ёхталасы̄г. Тэ̄н Ӯринэ̄ква ялпыӈ хо̄тал о̄вылтыт потыртасы̄г. Пе̄с ханты э̄ргыт хансуӈкве ос та̄наныл ханищтаӈкве Раиса Загородняя Тэ̄к па̄вылн ялыс. Тав та урыл потыртас. Мария Кузьминична Волдина пӯмыщ ос ощхуль ва̄рнэ урыл потыртас. Э̄лумхо̄лас хумус са̄всыр ёнгилыл ос сыресыр суй ва̄рнэ утыл таквина̄тэ пӯмщалаӈкве ве̄рмитэ – таи суссылтас. Эрика Петровна Сургутскова, «То̄рум Маа» музеит рӯпитан э̄ква, Ханты-Мансийскат «Тылащ пори» пе̄с ялпыӈ хо̄тал урыл потыртас. Мо̄тыт хо̄талт мӯй ма̄хум пуссын Ӯринэ̄ква хо̄тал янытлаӈкве тотыглаве̄сыт. Тав Археопарк нампа ӯскант ва̄рыглавес. Ты о̄вылтыт на̄н хурит сунсэ̄н.

1050 2013.04.26. Анна АЛГАДЬЕВА

Ӯринэ̄ква хо̄тал. Тӯя хо̄тал хо̄талэ посыӈ, Тӯя хо̄тал хо̄талэ хоса, Тӯя хо̄тал палытэ хоса. Щаквщуӈкв хо̄талэ то̄вылхаты, Ма̄щтырлаӈкв хо̄талэ то̄вылхаты. Ощхультаӈкв ос ёнгасаӈкв, Ня̄врамытн поргащлаӈкв о̄с то̄вылхаты. Ма̄хум ла̄ве̄гыт: «Ӯринэ̄ква ёхтум – тӯяпа̄лаг та патыс, ма̄лтыпыг ты е̄мты». Ха̄льӯс е̄рт Хулюмсӯнт па̄вылт «Ӯринэ̄ква хо̄тал» тох ты минас. Мо̄лты ка̄сыӈ е̄мт ты хо̄талув ма̄ньщи па̄вылт Та̄гт ва̄тат ва̄рыгла̄лвес. Ань ос са̄р тӯя па̄сныл Александр Константинович ос Елена Ильинична Адиныг кол по̄хыт ва̄рыглаӈкв патыслӯв. Миркол па̄лыл ты хо̄тпаг кол по̄хыт йӣквнэ каныл ва̄рвесӯв. О̄влэ̄т ма̄хум атхатнэ сыс Валерия Лыткина, 9 классыт ханищтахтын а̄ги, сыгсов тынтлас. Татьяна Сивцова, 9 классыт ханищтахтын а̄ги, хумыс хӯлуп тыяве, суссылтас ос ма̄ньщи ня̄врамыт пе̄с пора ёнгынутыт пасанын та̄рамта̄лас. Надежда Константиновна Маслова са̄нсква̄лыг сагнэ ва̄рмаль суссылтас. Ма̄хум са̄выг е̄мтсыт, ущ концерт о̄вылтаслӯв. Ам ӯринэ̄кваг масхатыгласум, ёхтум ма̄хмытн ос ня̄врамытн паща ла̄тыӈ ла̄всум. Ня̄врамыт Ӯринэ̄ква yрыл ма̄ньщи ла̄тӈыл ос рущ ла̄тӈыл стихотвореният потыртасыт, э̄ргыт э̄ргысыт. Сака ма̄щтырыг э̄ргысы̄г, нё̄тнэг йӣквсы̄г ос пӯмащиг тӯлыглахтасы̄г Марина Александровна Алгадьева ос Оксана Алексеевна Алгадьева. Константин Георгиевич Адин ма̄нки ма̄в урыл кит рущ э̄рыг э̄ргыс. Акв йильпи ва̄рмаль о̄лыс. Пуссын нэ̄ хо̄тпат, а̄гит, а̄гирищит, хо̄ӈха ма̄ньщи ӯламыл хорамаӈыг масхатым о̄лсыт, пyссын сценан во̄виньта̄лве̄сыт. Тот ла̄квыг ё̄мыгтасыт, супаныл суссылтасыт. Ос хотьют ка̄сащасыт, йӣквуӈкв лю̄люмта̄лсыт. Ты халт ханты супыл ос халатыл масхатым кит ханты нэ̄г о̄лсы̄г – Зоя Емельяновна Адина, пенсият о̄лнэ э̄ква, ос Альбина Ксенофонтовна Таратова, школат ханищтан нэ̄г рӯпиты. Ос са̄всыр конкурсыт о̄лсыт, хо̄т ня̄врамыт номтанылтыл ос ё̄ранылтыл а̄рталахтасыт. Ты сыс Ольга Васильевна Баранова, миркол кӯщай нэ̄в, Альбина Ксенофонтовна Таратова ос Галина Константиновна Алгадьева, пенсият о̄лнэ хо̄тпа, а̄ращ па̄лтсыт, нё̄выль пӯт ос хӯл исмит па̄йтсыт. Хо̄ӈха ка̄сащас, ма̄ньщи тэ̄нут а̄рталаӈкв ос атыӈ ут а̄лмаяӈкв – пасан ва̄тан ялсыт, тэ̄пъяласыт, потрамасыт ос ущ ла̄ккваминыгласыт. Ма̄н, Хулюмсӯнт ма̄хум, «Ӯринэ̄ква» хо̄талув тох та парласлӯв. Ты ёнгум ос ка̄с тотум хо̄талув Татьяна Андреевна Головина, школат ханищтан нэ̄г рӯпитан хо̄тпа, яныгнув ня̄врамыт ёт щё̄питас. Ка̄сыӈ та̄л Ӯринэ̄ква хо̄талт та̄л сыс самын патум ня̄врамыт ма̄нь мӯйлупсал уртыглыянӯв. Ты та̄л щар яныг хо̄тпат о̄с ма̄нь мӯйлупсал майласанӯв. Ка̄сыӈ е̄мт мӯйлупсат ос конкурсыт а̄рталахтын ма̄т ма̄гыс миркол па̄лыл олн ло̄мтыл майла̄лаве̄в. О̄c яныг пӯмащипа ла̄тыӈ Геннадий Иванович Просунковын, УТТиСТ кӯщай хумн ла̄ве̄в, тав ка̄сыӈ та̄л колпо̄х тӯйт хотняртнэ ё̄р майлы – ма̄хум ос ня̄врамыт ёмщакв ос лощитыг вос поргащлэ̄гыт. Пуссын ма̄ньщи ма̄хманув, Хо̄ӈха ма̄ньщи ла̄тыӈ торгамты, Хо̄ӈха ма̄ньщи щирыл о̄луӈкв вораты – Пуссын пуста̄гыл о̄лэ̄н! Пупыгн-То̄румн вос ӯргалаве̄н!

1050 2013.04.26. Валентина УЗЕЛЬ

Са̄лыт о̄щнэ колта̄глыт. Сургутский район Русскинские па̄выл Лӯима̄ нупыл о̄лы, Когалым ӯс ляпат. Тот са̄в ханты ма̄хум та̄нти родовой угодиянылт о̄лэ̄гыт. Ма̄н тув ялмувт тот ялпыӈ хо̄тал о̄лыс, са̄лыӈ ма̄хум та̄нти халанылт кассыт. Тот ам таи ка̄саласум – э̄кват, нэ̄ хо̄тпат пуссын та̄нти маснутыл масхатым о̄лэ̄гыт ос пуссын кастэ̄гыт. Округув янытыл тамле ва̄рмаль воссыг нэ̄мхот ат ва̄слум. Та е̄рт о̄лнэ ханты ма̄хум та̄нти халанылт туп ща̄нь ла̄тӈыл потыртэ̄гыт, то̄ват рущ ла̄тыӈ щар ат ва̄гыт. Ня̄враманыл о̄с тох янмалтыяныл. Школан миннэ пораныл ёхты, интернатн тотавет. О̄лнэ ма̄наныл ляпат нефтяникыт рӯпитэ̄гыт. Хотьют родовой угодияныл та̄нти нупыланыл хассаныл, та̄н ще̄мьянылт ка̄сыӈ хо̄тпа олныл ойтаве. Ты урыл а̄нумн Лидия Антоновна Сопочина потыртас. Тэ̄н о̄йкатэ̄нтыл ос пыге̄н такви колта̄глэ ёт акв ма̄т о̄лэ̄гыт. Та̄н родовой угодияныл №16 по̄сыл пиным о̄лы, Пихтовый я̄ ва̄тат о̄лэ̄гыт. Та̄н ляпанылт иӈ нёлолов ще̄мья о̄лэ̄гыт. Ханты э̄ква ла̄выс, ма̄наныл сака ма̄ниг хасвес. Та̄н са̄лы о̄ньще̄гыт, са̄лыяныл ӯрнэ ма̄гыс ма̄ ат то̄вылхаты. Нефтяникыт ёт договор щирыл рӯпитэ̄гыт, угодиянылт нефтепровод пиным о̄лы. Таи ёмас, манах та̄л тав тот хуи, нэ̄мхуньт па̄лыг иӈ ат маныгта̄лвес. Лидия Антоновна ла̄выс, хӯрум э̄тпос сыс акв хо̄тпа ма̄гыс та̄н туп 5 со̄тыра 500 солко̄вил ойтавет. Ос хӯрум та̄л сыс акв щёс на̄йив сартнэ «Дружбал», на̄йпос ва̄рнэ станциял ос кол ӯнттын ма̄гыс са̄всыр э̄рнэ утыл мивет. Тыи пуссын э̄ри, ань тот о̄лнэ хантыт ё̄рнкол ат о̄ньще̄гыт, нор кол ӯнттэ̄гыт. Тав о̄йкатэ Владимир Иванович ань самаге сака лю̄льсаӈ на̄ӈке̄г, рӯпитаӈкв сака ат ве̄рми. Тэ̄н пенсият о̄лэ̄г, сас 7 со̄тыра солко̄вил ойтаве̄г. Па̄вылт о̄с кол о̄ньще̄г, тув ойтхатнэ ма̄гыс о̄с са̄в олн мины. Ня̄враманэ̄н пуссын янгыт, я̄нас о̄лэ̄гыт. Акв а̄гитэ̄н Муравленко ӯст о̄лы, нила а̄ги о̄ньщи. Таве̄н о̄с нё̄туӈкв э̄ри. Э̄ква такви ю̄нсхатуӈкв сака ха̄сы, та̄л сыс хӯрум сахи ю̄нтум, пуссын тыналасанэ. Ань са̄в хо̄тпа ла̄гыл маснут манос мо̄т пормас таве̄н ю̄нтылтэ̄гыт. Ты ще̄мья во̄рт о̄лым са̄в пил ва̄тэ̄гыт, хӯл, нё̄выль тыналэ̄гыт. Ты хосыт олн мощ о̄с сэ̄лэ̄гыт. Тамле ты ма̄хум ёт ма̄н ва̄щиньтахтасӯв. Ань туп во̄рт о̄лнэ ма̄хум пе̄с йис щирыл о̄луӈкв ве̄рме̄гыт. Туп та̄н нэ̄мхотьютн ул вос новавет ос кӯщаитн вос нё̄тавет.

1050 2013.04.26. Валентина УЗЕЛЬ

Тав йӣвныл са̄всыр пормас ёрги. Виктор Сергеевич Зы рянов Сургутский район Белый Яр па̄вылт о̄лы. Тув тав Свердловский областиныл ёхтыс, са̄в та̄л геологыг рӯпитас. Э̄кватэ хӯл алыщлаӈкв сака э̄рупты, тав ты о̄йкатэ во̄рн ялуӈкв акваг ётво̄выгластэ. Са̄т та̄л ювле хультум порат о̄йка во̄рт ё̄мыгтыматэ яныг поталыӈ ха̄ль ка̄саластэ. Та йӣв ёлсартыстэ ос йӣв поталытэ юв тотыстэ. Номсыс, матыр пормас тах ёрги. О̄выл щёс нэ̄матыр ат тэ̄лыс, йӣве тувто̄сыс. Хумус йӣв ёт рӯпитаӈкв тав ханищтахтуӈкв патыс. Нэ̄пакыт хо̄нтыс, ищхӣпыӈ утыт са̄в потыр ловиньтас. Ань о̄выл щёс Ханты-Мансийск ӯст суссылтапе ва̄рвес. Са̄всыр пӯмыщ утанэ тыг тотыгласанэ. А̄ныиг манос мо̄т пормасыг ань иӈ ат ва̄рсанэ. О̄йка тох ты ла̄ви: «Ка̄сыӈ йӣв такви щирыл яныгми, тӣвраныл пуссын са̄всырыт. А̄нумн тыи пӯмщиг о̄лы, ос матыр а̄ны манос хусап ва̄руӈкв ам тах ханищтахтэ̄гум». Тав э̄кватэ̄н акваг нё̄таве. Ань ты выставка ва̄рнэ ма̄гыс э̄кватэ хо̄та̄ти титыглахтас, потыртахтас. Тэ̄н акв пыг о̄ньще̄г, пыге̄н ань яныг, такви ня̄врамыӈыг е̄мтыс. Та̄н пуссын сака юртыӈыщ о̄лэ̄гыт, халанылт нё̄тхатэ̄гыт. Тох о̄луӈкв ос рӯпитаӈкв, ва̄им, сака ёмас.

1050 2013.04.26. Людмила ТЕТКИНА

Мӯтраӈ о̄йка хӯнтлаӈкве сака пӯмащ. Ханты-Мансийск ӯст библиотекаколт стихыт, потрыт хаснэ ё̄рн хум Юрий Вэлла ма̄хум ёт хо̄нтхатыглас. Тав такви хансум нэ̄паканэ урыл потыртас. Ты мӯтраӈ о̄йка хӯнтлаӈкв сака пӯмащ о̄лыс. Юрий Кылевич ла̄выс: «Ам яныг ос осыӈ нэ̄пакыт хансуӈкве ат ха̄сэ̄гум, «Ветерок с озера» нэ̄пакум щар янгыг о̄лы. Ам таве хосат хансуӈкве о̄вылтаслум. Хунь а̄стласлум, о̄лнэ колум на̄йин ё̄свес. То̄нт номсысум, нэ̄пакум витыг та минас. Ос на̄й хунь лапхарыгтаслӯв, колув ӯнлын ма̄т хансум нэ̄пакум хо̄нтыслум, ловиньтан ке̄мыг о̄лыс. Потрум ловиньтаслум, тувыл мо̄т щирыл хансыслум та юипа̄лт нэ̄пакыг та̄ратаслум. Ань таи торгамтаслум, ка̄сыӈ потыр такви пора о̄ньщи, о̄выл хансум потрум улпыл лю̄льсаӈ хансым о̄лыс». Са̄всыр мо̄йтыт, а̄мщит, мӯтраӈ потрыт тав о̄с акванатыянэ. То̄ва потрыт, а̄мщит тав «Азбука оленевода» нэ̄паке̄т хассанэ. Ты нэ̄паке са̄т ла̄тӈыл толмащлавес. О̄выл стихе тав 4 классыт хансыстэ. 1979 та̄лт хансум потранэ журналын ва̄рве̄сыт. Ма̄хум ёт потыртым тав ла̄выс: «Ам 65 та̄лум то̄влыс, ань тыг мус ханищтахтэ̄гум. Школа а̄стламум юипа̄лт э̄лаль ханищтахтуӈкве ат минасум. Туп 40 та̄лум то̄влум порат литературный институтт ханищтахтуӈкве патсум. Ань ам заочный щирыл юристыг китыт курсыт ханищтахтэ̄гум. Пе̄с йис ма̄т о̄лым ос нефтяникыт ёт воритотым, ам гражданский, жилищный ос ма̄, во̄р урыл хансым кодексыт пуссын мӯсхалыг ханищтасанум. Амки нэ̄пакыт ловиньтаӈкве щар ат э̄руптэ̄гум». Юрий Кылевич китыглавес: «Наӈ стихотвореният, потрыт акваг хансэ̄гын манос хунь номтын паты? » Тав ла̄выс: «Ам хунь тыг йисум, акв номт ёхтыс, ма̄шинам ёлпо̄илттаслум, стихум молях нэ̄пакын хансыслум, ул вос ёрувлахты. Ос туп сыстам нэ̄пакн хансуӈкве ат ха̄сэ̄гум, тув стихыт лю̄льсаӈ хасхатэ̄гыт. Нэ̄пакло̄мт ще̄пыт акваг о̄ньще̄гум, э̄рыӈ пуӈкумн матыр ёмас ла̄тӈыл ёхтавем, ёлхансуӈкв вос а̄лымаслум». Юрий Вэлла потыртаӈкве сака ёмащакв ха̄сы, ма̄хум таве кит арыгкем щё̄с китыгласаныл.

1050 2013.04.26. Н. П. Чернякова (Вынгилева)

Ты стихотворение Н. П. Чернякова (Вынгилева) хансыстэ. Ты стихотворение Н. П. Чернякова (Вынгилева) хансыстэ. Тэ̄лы а̄нумн те̄тсанэ, тот тамле ла̄тӈыт хансыс: «Галина Рудольфовна, тыныӈ оман такем ёмас хо̄тпа о̄лум, ань мус мӯтраӈ ла̄тӈанэ хӯлъянум. Наӈын Пе̄с Ва̄щиль хо̄талыл янытлылум, амки хансум э̄рыгсовла̄тӈыл мӯйлуптылум». Ётыл тав ма̄н палтув ёхталаме̄т, ме̄н потыртахтасме̄н ты стихотворениятэ яныгполь э̄тпост газетан ва̄руӈкве. То̄нт ам омам Аксинья Степановна Мерова а̄тимыг е̄мтум хо̄талэ. Ань тэ̄натэ̄н ка̄стым ты ла̄тӈыт та ловиньтыяны̄н. Ты стихотворение Н. П. Чернякова (Вынгилева) хансыстэ. Тэ̄лы а̄нумн те̄тсанэ, тот тамле ла̄тӈыт хансыс: «Галина Рудольфовна, тыныӈ оман такем ёмас хо̄тпа о̄лум, ань мус мӯтраӈ ла̄тӈанэ хӯлъянум. Наӈын Пе̄с Ва̄щиль хо̄талыл янытлылум, амки хансум э̄рыгсовла̄тӈыл мӯйлуптылум». Ётыл тав ма̄н палтув ёхталаме̄т, ме̄н потыртахтасме̄н ты стихотворениятэ яныгполь э̄тпост газетан ва̄руӈкве. То̄нт ам омам Аксинья Степановна Мерова а̄тимыг е̄мтум хо̄талэ. Ань тэ̄натэ̄н ка̄стым ты ла̄тӈыт та ловиньтыяны̄н. Ищпан о̄йка а̄ги ла̄вум ла̄тыӈ Ищпан о̄йка а̄гиа̄гикве Ма̄ньщи номткве таве̄н э̄рикве, Ла̄тӈе щар ат ёрувлытэ, Нэ̄пакн хансым э̄лтотытэ. Я̄тил, посыӈ ма̄ньщи нэ̄кве Яныг ӯсыт о̄лантыкве, Хосат та̄гыл таве ва̄глум, О̄лнэ (миннэ) лё̄ӈхе кои ла̄глыл. Окщинья оматэ ма̄щтыр о̄лыс, Ма̄н музеювн ёхтала̄лас, Са̄всыр пормас ва̄руӈкв ха̄сыс, Ма̄ньлат мир тав ханищта̄лас. Э̄ква номтэ ёмас о̄лыс, Потре, ла̄тӈе сохтыг овтыс, Пе̄с йис ва̄рмаль тав та ва̄с, Са̄всыр э̄рнэ потыр потыртас. Хотитн ма̄н ань ханищтаве̄в? По̄ри ла̄тыӈ ул вос ла̄ве̄в: Халувт роттыг, со̄ймыг вос о̄лэ̄ва, То̄пал ма̄хум ат хӯнтлэ̄ва. То̄пал ма̄хум хотыл нэ̄глы? Та̄н щар охсар хурип лэ̄гыл Ха̄йтнэ лё̄хрищаныл хосувлыяныл, То̄пал ва̄рмаляныл тӯйтыгпияныл. Хо̄тпа ха̄сэ̄гыт портуптаӈкве, Щисгим ве̄рме̄гыт ро̄ӈхантаӈкве, Щар туп оссам ня̄врамрищит Полщит ва̄рим ха̄йтантырищит. Та̄н ураныл яныг ма̄хум Ла̄выгласыт тамле ла̄тыӈ: «Ты кӯняррищит номтаныл ва̄ти, Таима̄гыс щисге̄гыт (ха̄йтэ̄гыт) хо̄та̄ти, Та̄н номтаныл – полщиг овтэ̄гыт, Та̄н потраныл по̄ри минэ̄гыт. Тамле ма̄хум э̄лнув ӯрена, Та̄н ляпаныл ул ё̄мыгтэ̄на. Тамле то̄пал э̄лумхо̄ласыт Са̄внув мирув портуптасыт, Па̄выл ёрт хольт ха̄йтантэ̄гыт, О̄лнэ лылыт сакватэ̄гыт Э̄рыг тотнэ пыганува, Э̄рыг тотнэ а̄гиянува, На̄нан наска̄ссыг хунь нёвитасанува, Наска̄ссыг хунь янмалтасанува. О̄лумминам ва̄рмаляквет Хосат хультсыт йис пораквет, Та̄кыӈномтыӈ ня̄врамаквет Э̄лаль кинсэ̄гыт о̄лнэ накыт» Тамле посыӈ, ёмас ла̄тӈыт, Яныг ма̄хум койнэ потрыт, Нотум палыт хӯлыглэ̄гум, Мӯтраӈ хо̄тпа хунь хо̄нтэ̄гум Январь 12 хо̄талт 2013 та̄лт, Нина Чернякова (Вынгилева)

1050 2013.04.26. Татьяна Бахтиярова

Ульяна урыл (ма̄ньщи мо̄йт). Э̄кваго̄йкаг о̄лэ̄г, акв āги о̄ньщēг. Нё̄р вāтат о̄лэ̄гыт, о̄йка сāв сāлы о̄ньщи, мо̄рсыӈыщ юн о̄лыгла̄лы. Акв порат о̄с та щё̄питахтас нёрн минуӈкве, нэ̄тэ ётворатас. Āгирищ пāвлэ̄т такке̄т хультыс, тэ̄лы хо̄талыт лю̄льсыт, ща̄няге-āщаге нё̄рн сāлыянэ̄н уральтаӈкве та минасы̄г . Ульяна кӯтюве ёт поргыс, ёнгыс, турманлаӈкв патыс. Тыттыстэ, ёлнэ̄гыстэ, такви юв щалтыс. Āвитэ то̄рттыстэ, сунсы, юн мулыпāлт такем мāнь пыгрищ ӯнлы. Тав э̄лыпа̄лэ̄т āны ӯнлы, витэ – пāлэ сэ̄мыл, пāлэ – посыӈ. Ӯнлы, акваг тувле āны нупыл та сунсы. Āнытэ акв пāлэ сэ̄млыг ēмты, мо̄т пāлэ ос посыӈыг ēмты, тувыл ос пе̄нтхатэ̄г. Тове̄рт лылыепыл тāртытэ, тове̄рт щар хумп ат нэ̄глы, тувыл ня̄нь ло̄мт выг, мāниг тапыртытэ, о̄с витын паргалтытэ. Āгирищ сунсы, кон тӯюӈкв та патыс, щар сома ня̄нь ло̄мт парги. Тове̄рт кантмим самыл сунсы, тувыл нумпа̄лыл о̄с витыл со̄сытэ, тувыл āны о̄влэ мāнь хӯмпыл ле̄ӈкталытэ. Ӯнлы, ӯнлы, мовалы, лāщлакв ре̄гыӈ лылыепыл тāртытэ. Акваг тащир хотум та хитырты. Āгирищ мощ хотрохтыс. Ро̄ӈхуӈкв āл та патыс, та кӯм щащēкватэ номылматастэ. Мāньнув порат лāвыгла̄лвес, хунь самсай нэ̄глы, ат ро̄ви ро̄ӈхуӈкве, мори лоскуӈкве, тув новхатаӈкве о̄с ат ро̄ви, ат тайи. Тащир э̄тпалыт ӯнлыс, суйта̄л сунсыс, мат кӯмт ёлоилматвес, ат номитэ. Āлпыл са̄йкалас, сунсы – нэ̄мхотьют āтим. Пыгрищ мат халт минам, щар хиле āтим. Квāлыс, номсы, ул ӯлмаяс. Тащир такке̄т о̄лыме̄т, кит сāт та холас. Ща̄няге-āщаге та ёхтысы̄г, та вāрмаль āгирищ ёрувластэ. Ща̄няге̄нāщаге̄н ат потыртастэ. Та пāсыл āгирищ такке̄т хульты, юн о̄луӈкве щар ат пилы. Пыгрищ тове̄рт нэ̄глалы, аквта щир ӯнлы, ӯнлы, тувыл ос постыглан э̄лыпāлт та мины. Тащир атхуйплов тāл та холас. Āги янгыг ēмтыс, ща̄нягеāщаге хотталь щалтсы̄г, Ульяна такке̄т хультыс. Акв порат ӯнлы, лю̄ньщи. Āще сāлыт, номсы, хотьютн ань тах о̄ньщавет, хотьютн ка̄сыӈ порат акванатавет, ха̄йтнутн ювтэ̄вет, такем сāлит. Ке̄рнялянэ, лэ̄санэ тох та во̄рт хультсыт, лап ат пантым, такви ат вāгтэ, хо̄т о̄лэ̄гыт, āще кос хунь такви ялантас. Тащир лю̄ньщиме̄т та турманлас. Самаге но̄хлаплас, номсы – пос пēламтаӈкв э̄ри, хо̄тал палыт нэ̄матыр ат вāрыс, тэ̄ӈкв такем тахмаяс. Конквāлыс, о̄рас тӯлыс. Щалтыс, сунсы, юн пыг такем ты пос пēламты, мольщаӈыл, вāйил масхатам, щар э̄лмхо̄лас. Ла̄тыӈ ла̄вуӈкв ат āлымас, пыг такви та потрамас: Наӈ такем ёмас āги о̄лсын, атхуйплов тāл о̄лсын, а̄нум ва̄щиньта̄лсын, нэ̄мхотьютн ат потырта̄лэ̄гын, щаще̄кван лāвум ла̄тӈыт ёмащакв номиянын. Āщин вāрмалянэ ма̄гыс сымын акваг та āгмыӈ. Наӈ ляльтылын воссыг сунсуӈкв ат ве̄рмысум, рӯт ат о̄ньще̄гын, нё̄тнэ ма̄хум наӈ палтылын ат ёхты. Ам наӈын сака э̄руптылум, хосаг е̄мтыс, вāглум. Таӈхе̄гум наӈын ань акваг нё̄тнэ юртыг о̄луӈкв, матыр таӈхе̄гын – пуссын вāре̄гум, наӈ туп лāвен, лю̄ль ва̄рмаль нэ̄мхуньт ат тотэ̄гум, ат вāре̄гум. А̄ги номсы: « Я– ты, аман хомус юв щалтыс». Такем хотум пилыщмаӈ суйты. Сунсы, со̄ль, та сāр пыгрищ хурип, туп янгыг ēмтум. Щёровн пилыщман ёхтаве, кӯре молях пēламтастэ, пӯтанэ ӯнттыс. Пыгрищ о̄с потыртаӈкв та патыс: – Тыхо̄тал па̄сыл наӈ воссыг тэ̄нут пāйтуӈкв ат патэ̄гын, тувыл тāрвитаӈ вāрмаль вāруӈкв наӈын воссыг ат э̄ри, кос маныр ань ам вāруӈкв патэ̄гум, туп лāвен, ам вāрапе̄гум. То̄нт пасан щар тāглэ сырсыр тэ̄нутыл та тэ̄лапавес. Маныр таӈхе̄гын, кос маныр о̄лы. Колэ о̄с самаге сунсым щар та̄глэ, осэ̄ва̄тал пормасыл тэ̄лапавес, щар мувал нас вольги. Пыгрищ то̄румыл тартым о̄лыс, тав ка̄сыӈ порат тāл пēнты, тӯйт, ракв вāри, таӈхихо̄тал нэ̄глы. Тове̄рт турап вāри, тӯйт паргалты. Тове̄рт щахлыӈ хо̄тал вāри, тувыл ос сыстам хо̄тал вāри. Тащир тāлпалыт та хитырты. Āги о̄влэ̄т акваг хурахлым о̄лыс. Акваг Ульяна матыр таӈхи, пыг со̄ль, щар пуссын вāрапи. Нё̄рн ялыс, сāлыт по̄сас, во̄рт кēрнялит, лэ̄сыт пуссын но̄ххо̄нтсанэ, ёмщакв хотщё̄питасанэ, ёмщакв но̄хӯнттысанэ. Āще кӯтювыт акваг во̄рн тотыгла̄лыянэ, щар ат пилэ̄гыт, сома щар тав та о̄траныл. Кос маныр вāри, кос маныр вēрми, сома щар āще хольтыл. Тащир матпалыт о̄лсы̄г, аквматэ̄рт āги номсы, тав тāлэ воссыг ат вēрми тах о̄луӈкв, такем ханьщувлас, ёмас пыгрищ, акваг мовала̄лым матыр вāри, щар ат тāрвитлахты. Потыртахтасы̄г, акван та о̄лмыгтасы̄г. Колэ̄н нумпа̄лт акваг хо̄тал посты, турапыг нэ̄мхуньт ат ēмталас. Ань та о̄лэ̄г, ань та щуне̄г. Амки хансум мо̄йтум.

1050 2013.04.26. Валентина УЗЕЛЬ

Ты ня̄врамыт ма̄щтырлаӈкв сака ха̄сэ̄гыт. Ка̄сыӈ та̄л школат ханищтахтын ня̄врамыт ма̄гыс Ханты-Мансийск ӯст научнопрактический конференция ва̄рыглаве, «Ремёсла и промыслы: прошлое и будущее» тамле намыл пиным о̄лы. Ты та̄л ремёсла Центр колт рӯпитан ма̄хум нёлоловит щёс ня̄врамыт округув янытыл акванатыгласаныл. Ань са̄всыр районытныл, ӯсытныл ос ма̄нь па̄влытныл ня̄врамыт тыг ёхталасыт. Ка̄сыӈ хо̄тал о̄влэ̄т ня̄врамыт та̄нти хансум номтыӈ потраныл ловиньтасаныл, тувыл ос та̄нти халанылт ханищтахтасыт. Ха̄льӯс район Хулюмсӯнтныл Надежда Константиновна Маслова ёт тит а̄гирищиг Маша Лаверина ос Татьяна Сивцова ёхталасы̄г. Таня Сивцова о̄выл хо̄талт «Хултнэ сов» урыл потре ловиньтастэ. Пе̄с порат Та̄гт я̄ алгаль о̄лум ма̄ньщи ма̄хум тамле алыщлапыл хулюмхӯл пувсыт. Танян Константин Георгиевич Адин ты урыл потыртас. Тувыл а̄гирищакве такви ма̄щтырыг хӯлп сагуӈкв ханищтахтам. Маша Лаверина ос ма̄ньщи сансква̄лыг сагнэ урыл потыртас, са̄в хури суссылтас. Ань конференцият о̄лум ня̄врамыт сагуӈкв тэ̄н о̄с ханищтасанэ̄н. Тэ̄натэ̄н Н. К. Маслова ханищтыяге. Ты Центр кӯщай нэ̄ Ольга Дмитриевна Бубновене ань Надежда Константиновна сака янытластэ. Нилыт та̄л тав няврамыт тыг тотыглыянэ, та̄н акваг ёмащакв щё̄питахтэ̄гыт, потрыт хансэ̄гыт, ма̄щтырлэ̄гыт. ЮГУ рӯпитан Диана Васильевна Герасимова жюрихо̄тпаг о̄лыс. Тав хӯрум хо̄тал ня̄врамыт потраныл хӯнтлысанэ, сунсыс – та̄н маныр ха̄сэ̄гыт, халанылт хумус ханищтахтэ̄гыт. Тав тох ла̄выс: «Ам студентыт ёт рӯпитанэм сыс ань таи ла̄ве̄гум – ты ня̄врамыт пуссын школат ханищтахтэ̄гыт, ос та̄н потраныл татем ёмащакв, номтыӈыщ ос пӯмщиг хасматныл. Ам ханищтан студентанум тох хансуӈкв ат ха̄сэ̄гыт. Та̄наныл ханищтан хо̄тпатн яныг пӯмащипа ла̄тыӈ ла̄ве̄гум, та̄н яныг ос э̄рнэ рӯпата ва̄ре̄гыт. Ты ня̄врамаквет о̄с э̄лаль вос ханищтахтэ̄гыт, ты рӯпатаныл ул вос хультуптыяныл». Лянтор ӯст о̄лнэ ма̄хум о̄с сака э̄сгуве̄сыт. Та̄н ка̄сыӈ та̄л тыг ёхталэ̄гыт, ня̄враманыл ма̄щтырлаӈкв сака ёмащакв ха̄сэ̄гыт. Акв ханты а̄ги Настя Обирина са̄лы сов ёт рӯпитас, сыстамтастэ, тынтластэ. Мо̄т а̄ги хансаӈ па̄сса сагыс, ёнгынутыт суссылтасыт. Сургут ӯсныл ёхталам ня̄врамыт нирныл хусапыт ва̄руӈкв ма̄хум ханищтасаныл. Тамле рӯпата кӯпнит хунь. Ма̄н ня̄врамыт ёт о̄с тамле хусапыт ва̄руӈкв ханищтахтасӯв, ма̄щтырлаӈкв пӯмыщ о̄лыс. Мо̄тыт та̄л тыт о̄с акв тамле конференция тах ва̄рыглаве. Ня̄враманы̄н тыг те̄тсуӈкв ка̄сащегы̄н те, ремёсла Центрыт рӯпитан ма̄хум ёт потыртэ̄н. А̄гитпыгыт пе̄с ва̄рмалянув э̄лаль тотуӈкв вос ханищтахтэ̄гыт.

1051 2013.05.10. Людмила ТЕТКИНА

Ӯйхул янмалтан хо̄тпат урыл. Ӯйхул янмалтан, хӯл алыщлан хо̄тпат Ханты-Мансийск ӯсн сапра̄нин акванатыглаве̄сыт. Та̄н 2012 та̄л сыс хумус рӯпитасыт, та урыл потыртасыт. Ӯйхул янмалтан ва̄рмаль ма̄гсыл округув акваг са̄в олн холты. Ювле хультум та̄лт бюджетныл акв миллиард арыгкем солко̄ви хансыглавес. Ань «Развитие агропромышленного комплекса, заготовка и переработка дикоросов в ХМАО-Югре до 2015 года» нампа яныг программа рӯпиты. Ты хосыт ӯйхул янмалтан ма̄хум нё̄тавет. Александр Киселёв, природный ресурс департаментыт рӯпитан хум, та урыл потыртас, 2012 та̄л сыс манаса̄вит тонна хӯл тыт пуввес, манхурип хӯл тэ̄нутыг ва̄рвес. Манаса̄вит щаквит посвес, мис нё̄выль, са̄лы нё̄выль тыналавес. Та та̄лт ӯйхул янмалтан 57 йильпи ферма рӯпитаӈкве о̄вылтахтасыт. Та̄н пуссын ты программа щирыл нё̄тавет ос субсидияолныл ойтавет. Соссаӈ ма̄хум общинат о̄с тувыл нё̄тавет, та̄н хӯл алыщлан, ӯйхул янмалтан, пил ва̄тнэ ос ла̄хыс атнэ ма̄гсыл грантолныл мивет. Сельский хозяйстват рӯпитан хо̄тпат ёмащакв кос рӯпитасыт, тувыл ань тыг мус иӈ са̄в та̄рвитыӈ ва̄рмаль о̄лы. Ты урыл кӯщай хум таи ла̄выс: «Округувт ань нила со̄тыра арыгкем э̄лумхо̄лас ӯйхул янмалтэ̄гыт, хӯл алыщлэ̄гыт. Таи туп лю̄ль, та̄н тамле та̄рвитыӈ рӯпата ва̄рим, мощща олн сэ̄лэ̄гыт. Ма̄ньлат хо̄тпат па̄вылн минуӈкве ос ты рӯпата ва̄руӈкве ат ка̄саще̄гыт. Ос мо̄т та̄рвит, тыт лӯима̄т ӯйхул тыттын ма̄гсыл са̄всыр комбикорм мо̄т ма̄ныл тыг тотуӈкве э̄ри. Ты хосыт нё̄выль тыныӈнувег е̄мты». Сэ̄мыл охсар янмалтан предприятие урыл кӯщай тох ла̄выс. Та̄н мӯсхалыг рӯпитаӈкве о̄с ат ве̄рме̄гыт. Охсар сованыл тынта̄л э̄лаль тыналыяныл ос охсар янмалтаӈкве, тыттуӈкве са̄в олн э̄ри. Тыил олн сэ̄луӈкве щар ат ве̄рме̄гыт. Ма̄н округувт туп Белоярский район Касум па̄вылт ос Кондинский район Шугур па̄вылт о̄лнэ совхозыгт сэ̄мыл охсарыт янмалтавет. Хӯрум частный предприятие ты рӯпата о̄с кос ва̄ре̄гыт. Та̄н о̄с торыӈ щирыл олн сэ̄луӈкве ат ве̄рме̄гыт. Са̄всыр районныл ёхталам хо̄тпат та̄нки рӯпатаныл ос та̄рвитыӈ ва̄рмаляныл урыл кӯщаит э̄лыпа̄лт потыртасыт.

1051 2013.05.10. Л. Обросова (RUS) Г. Кондина (MAN)

Яныг хо̄нт юипа̄лт о̄лум та̄ланув нэ̄мхуньт ат ёрувлыянӯв. Ма̄н редакциявн Лидия Григорьевна Обросова такви а̄гитэ ёт рущ ла̄тӈыл хансум пищматэ те̄тыс. Э̄ква Кондинский район Леуши па̄вылт о̄лы, а̄тятэ ма̄ньщи хум о̄лыс, яныг хо̄нтыт хо̄нтлыс. Оматэ рущ нэ̄ о̄лум, та̄н хуньт тыг те̄тым ма̄хум. Лидия хо̄нтаӈ ма̄т 1945 та̄лт самын патыс. На̄н тав яныгмам та̄ланэ урыл потре ловиньтэлы̄н. Нахрачи па̄выл. Кондинское па̄выл пе̄с порат Нахрачи ла̄ввес, тав 90та̄лыт мус районный центрыг о̄лыс. Тот са̄всыр мирыт – хантыт, ма̄ньщит, рущит о̄лсыт, 50та̄лыт мус калмыкыт, евреит о̄с о̄лсыт. Ётыл та̄н «Храбрый» на̄иӈха̄пыл та̄нти самын патум ма̄нылн ювле тотве̄сыт. То̄нт ма̄в сака щёлыӈ о̄лыс, тыт нё̄тнэ, ёмас во̄рквет са̄в пил, ла̄хыс яныгмас, са̄всыр ӯйхул во̄рт ха̄йтыгтас, я̄нув хӯлыӈыт о̄лсыт, ос янгыщ тыт ка̄ркам ма̄хум о̄лсыт. Хум ма̄хум во̄раясыт, хӯл алыщласыт, нэ̄ хо̄тпат ӯйхул о̄щсыт, тэ̄пкант са̄всыр тэ̄нут янмалтасыт. Атнэ пиланув тыт рӯпитам заводыт са̄всыр тэ̄нутыг – са̄ккар ёт па̄йтым пилыг, айнэ витыг, винаг ва̄рве̄сыт. Са̄в та̄л та заводыт ам омам Клавдия Никитична Панова рӯпитас. Па̄влувт хӯл щё̄питан завод, ӯйхул янмалтан ферма, клубкол ӯнттуве̄сыт. Пилыщмаӈ ла̄тыӈ. Акв порат ла̄тыӈ тотвес, яныг хо̄нт о̄вылтахтам. Ам а̄тям Григорий Егорович Иженяков та̄ра хо̄нтлуӈкв та вуйвес. Аквта порат тав ягпыгаге Михаил ос Пётр тотвесы̄г. Пуссын ла̄кква ма̄н е̄мтсыт. 1941 та̄л сака та̄рвитыӈ о̄лыс, а̄тям та урыл потыртаӈкве щар ат ка̄сащас. Немцыт товлыӈха̄пыл таса̄вит ӯсыт, па̄влыт сакватасыт, ма̄ мо̄т талиӈ ё̄ӈхтавес, таса̄вит миркве порыславес. А̄тям 1942 та̄лт Ленинград нупыл хо̄нтлыс. То̄нт ювле лаквуӈкв щар ат ро̄выс, щар акв ӯсыл ювле ва̄руӈкве ат тайис, «За Родину! » ла̄тӈыт ро̄ӈхим, па̄тлуптым са̄лтатыт э̄лаль ха̄йтсыт. А̄тям тот сакватавес, пуӈке̄н тит те̄рло̄мтыг хо̄яме̄н мус тӣврын щалтсы̄г. Госпитальт акватэ хотвиӈкве ве̄рмувес, то̄нт нила э̄тпос потыртаӈкве щар ат ве̄рмыс. Мо̄тыт те̄рло̄мт пуӈке̄т тох та хультыс, ле̄ккарыт таве̄н ла̄всыт, аквман налыман та̄л мус туп о̄луӈкве тах ве̄рми. Тав 73 та̄л о̄лыс. Войнаныл юв те̄твес, инвалид о̄выл группал хасвес. Хо̄нт оигпам юипа̄лт а̄тям ягпыгаге Михаил ос Пётр юв ёхтысы̄г. Хунь тотве̄сыт, пуссын та̄ксар, ма̄ньлат хумыт о̄лсыт, юв ёхтуманылт сакватым, а̄гмлахтан хо̄тпаг е̄мтмыт. О̄пагумщаще̄кагум ща̄гтсы̄г, матъёмас лылыӈыт юв ёхытхатсыт. Нэ̄ хо̄тпат рӯпитасыт. Война порат нэ̄ хо̄тпатын о̄с сака та̄рвитыӈ о̄лыс. А̄гит ос ня̄врам та̄л нэ̄т нор яктуӈкве во̄рн те̄тавет. Та̄н халанылт ам омам рӯпитас. Нэ̄матыр техника а̄тим о̄лыс, пуссын та̄нти ё̄рыл рӯпитасыт. Сартнэ те̄рыл яныг йӣвыт сартсыт, йӣв товыт са̄грапыл са̄грысаныл ос норыт акв аняг поварттасаныл. Тэ̄лы тӯйт тӣвырт, ащирмат, туи вощлах халт лё̄мвоил ат пилым тох та рӯпитасыт. Хотьют по̄льтахтыглас, а̄гмыл е̄мталас те, хоса ӯщлахтуӈкве ат та̄ртвес. Титхӯрум хо̄тал ащирмаӈ колсовт те̄ркӯр ляпат исылтахтым пусмалтахтэ̄гыт, тувыл о̄с э̄лаль рӯпитаӈкве та те̄тавет. Торыӈ ёмас маснут ат о̄щсыт, кӯр ляпат мощ то̄слыяныл о̄с та масапияныл. То̄ват пе̄нтхатнэ маснут ат пыл о̄щсыт. Тох акваг рӯпитаӈкве марщум о̄лыс, ва̄им халанылт ощхуль ва̄рсыт. Омам ка̄ркам, ощхуль ва̄рнэ а̄гииг о̄лыс, э̄типа̄лаг ӯщлахтын порат э̄ргысыт, То̄рум нупыл по̄йкщасыт, моляхнув хо̄нт вос по̄йты. Ты ёмас номтыл туп э̄лаль о̄лсыт. Хо̄нт оигпам юипа̄лт омам «Труженик тыла» ме̄талил майвес. Йильпи колта̄гыл. 1943 та̄лт омагума̄тягум акванминасы̄г. А̄тям хӯл щё̄питан завод па̄лыл хӯл алыщлан ма̄л майвес. Ты ма̄ 15 ве̄рыстат Кондинское па̄вылныл о̄лыс. Тот тэ̄н о̄влэ̄т ма̄ньнув кол, ётыл ос яныг, ёмас кол ӯнттысы̄г. Ма̄н тот са̄т ня̄врам самын патсӯв. То̄нт ще̄мьят пуссын янгыт о̄лсыт, ма̄ньта̄гыл рӯпитаӈкве ханищтавесӯв. А̄тяв хӯл алыщлас. Камкат, пителит такви ва̄рыс, хӯлпыт о̄с такви туис. Са̄лы совныл ма̄навн ла̄гыл маснут ю̄нтыс, ма̄нь суныт, яныг суныт такви ва̄рыс. А̄мпанэ но̄хте̄рсас, тав ат а̄мп сун та̄гыл о̄ньщас. Ма̄н ос ма̄нь сунсовыл сыпт акваг тахсысӯв. Омав осыӈ нуил супыт, ёлысовыт ю̄нтыс, а̄мп пуныл носкит, па̄ссат сагыс. Война юипа̄лт о̄лупсав иӈ та̄рвитыӈ о̄лыс, тэ̄нут карточка щирыл майвес. Тэ̄лы а̄тяв палт хум ма̄хум ёхталасыт, пувум хӯланэ сунытын та̄глэкв та̄лттавет, нумыл парщиныл лаппантавет, ёмщаквег ёлхасавет ос Кондинское па̄вылн та тотавет. Туи ма̄н омав ёт яныг пӯщкатын хӯл солвалтэ̄в, тувыл то̄слаӈкве но̄хтагатыянӯв. То̄нт яныг хӯл са̄в о̄лыс. Сорт, хулюмхӯл, тӯрхул, сымри, та̄рка – тамле хӯл а̄тяв пувиньтас. Та̄лыт молях минэ̄гыт. Ловмантем та̄лум порат ам номилум, хумус ма̄н мисув ма̄гсыл пув ва̄рсӯв, тэ̄пкант картёпка пинсӯв, сартнэ те̄рыл на̄йив сартсӯв. Таквсы са̄в сӯйпил ва̄тыгласӯв, а̄тявн заготконторан мивет, та олнытыл школан миннэ маснутыл, нэ̄пакытыл, сумкатыл ёвтаве̄в. Пил ва̄туӈкве хоса ма̄н яланта̄лсӯв, номилум, хумус па̄йпыӈ та̄гыл я̄ӈкылмат ӯлтта та ё̄ме̄в. Та̄рвитыӈ кос о̄лыс, мощ ӯщлахтэ̄в ос э̄лаль та рӯпитэ̄в. Нэ̄мхотьютув ат лю̄ньщиглас, рӯпатаныл по̄хын ат оиглас. Ащирмаг е̄мтнэ мус ня̄рла̄глыл ха̄йтыгтасӯв, нэ̄матыр а̄гмыл ат е̄мталасӯв. Ма̄нь порав та̄рвитыӈ кос о̄лыс ос ма̄н таве со̄тыӈыг номилӯв. Ма̄н то̄нт о̄лупсавн та̄кмалтавесӯв. Ёмас ос са̄в маснут ат о̄щсӯв, юн то̄выль тармыл хуясӯв, ос тыи яныг ва̄рмаль хунь, ма̄н омавн э̄руптым ос та̄глыӈ со̄ргыл ха̄йтыгтым янмалтавесӯв. ЯНЫГМАМ МА̄ТЕ̄В Яныгмамӯв сыс, са̄в ма̄квет ла̄хс атым, пил ва̄тым, па̄кв паттым ла̄глыл ха̄йтсанӯв. Са̄вни, та̄хтпил, морах, сӯйпил, саӈквлыпил ва̄тсӯв. Ос ма̄н, Хо̄нтаӈ ма, пиланув та̄н ты сака атыӈыт. Во̄рт ё̄мыгтым са̄всыр ӯйхул ва̄щиньтасӯв: са̄лыт, лэ̄ӈныт, ра̄щит, кощарыт, во̄нтырыт, анта̄трыт. Тот о̄лум во̄рув, витув сака нё̄тнэт, щёлыӈыт о̄лсыт. Хо̄талкве ёлӯнтнэ порат во̄р нас суртги, нас вольги. Тӯранув, я̄нув сака сыстамыт о̄лсыт. А̄тявн тот о̄луӈкве ос рӯпитаӈкве сака ёмас о̄лыс, тав ма̄витэ э̄руптастэ. Пуссын ты рӯпата ва̄руӈкве таве̄н омав нё̄тыс, тэ̄н акваг акваннё̄тхатым рӯпитасы̄г. А̄тяв войнат пилта̄л хо̄нтламе ма̄гыс тамле по̄сытыл майвес: – Орден Отечественной войны I степени; – Медаль за отвагу; – Медаль за оборону Ленинграда; – Медаль за Победу над фашистской Германией. Ма̄н акв ва̄с о̄лтыл хольт молях яныгмасӯв, Ла̄кква ма̄н та тыламласӯв, Колув ма̄нав ат ва̄щиньтым, Савалапыг та хультыс. Ам ла̄щлаквег колтем ляпан ё̄мантэ̄гум, Ос ла̄щлаквег ла̄ве̄гум: «Паща, колтем! » Самвитанум ёлаль та̄нти та овтэ̄гыт, Тыт ам нэ̄мхотьютын воссыг ат уравем Яныг ялпыӈ хо̄талув – Победа хо̄талув ка̄сыӈ хо̄тпан тыныӈ! Ты ялпыӈ хо̄тал порат номтанув ёмасыт, матъёмас яныг ма̄хманув странав вуянтаӈкве ё̄раныл ёхтыс, ма̄н ань мирыӈ порат о̄лэ̄в ос ма̄нти Родинав э̄руптылӯв. Пуссын пуста̄гыл вос о̄лэ̄гыт, ветераныт э̄руптым ос янытлым вос о̄ньщавет. Со̄т ос щунь на̄нан посыӈ хо̄талт о̄луӈкве! Л. Обросова потре Г. Кондинан ма̄ньщи ла̄тӈыл хасвес.

1051 2013.05.10. Тамара МЕРОВА

Учёныит акванатхатыгласыт. А̄с-угорский институтт рӯпитан хо̄тпат «Этнокультурное и социальноэкономическое развитие коренных малочисленных народов Севера» нампа конференция щё̄питасыт. Тав Ханты-Мансийск ӯст кит щёс ва̄рыглаве ос тот доктор наук нам о̄щнэ кит хо̄тпаг янытлаве̄г. О̄влэ̄т яныгпо̄ль э̄тпост Е. И. Ромбандеева 85 та̄лэ то̄влуме кастыл ханты ос ма̄ньщи ла̄тӈыг ханищтан ма̄хум акванатыглаве̄сыт. Ос я̄ӈк на̄тнэ э̄тпост Т. Г. Харамзин 75 та̄лэ то̄влынэ̄т кастыл мо̄т учёныит тах акванхо̄нтхатыглэ̄гыт. Ань о̄выл конференцият Евдокия Ивановна са̄в ма̄хумн янытлавес. Таи туп са̄ль о̄лыс, такви конференциян ёхталаӈкве ат ве̄рмыс, пӯльницан пинвес. Ос таве̄н ла̄вим ёмас ла̄тӈыт, тав ма̄гсылэ са̄ӈквылтым «Па̄йпыӈо̄йка» та̄н тав сыме̄н вос ёхтэ̄гыт. Ма̄н ос ты урыл газетат хансэ̄в. В. М. Куриков, округ Думат советникыг о̄лнэ хум, ла̄выс: «Ам номилум, хумус ма̄н ты яныг намыӈ хо̄тпа Москваныл тыг ёхтуӈкве во̄выслӯв. То̄нт соссаӈ ма̄хум институт ущты ва̄руӈкве о̄вылтаслӯв. Тав ёхтуме па̄сныл ма̄н соссаӈ мирагув наука ма̄гыс сака са̄в ва̄рыс. Ань тав ла̄внэ мӯтраӈ ла̄тӈанэ на̄н номим вос о̄щсаны̄н, ос та̄наныл э̄лаль ёмас тэ̄лаг вос ва̄рсаны̄н». Округ архивколт рӯпитан кӯщаиг В. М. Комаров-Распутин ос Л. Д. Сажаева таве̄н паща ла̄тыӈ ке̄тсы̄г. Вячеслав Михайлович ла̄выс: «Ань ты яныгпа̄ла хо̄тпа урыл рущ ла̄тӈыл ла̄вуӈкве ке, тав – «человеческий оберег» манси. Тав такви мирке̄тэ сака э̄руптытэ ос ӯргалытэ». Людмила Дмитриевна Евдокия Ивановна ёт хосат та̄гыл ва̄йхатэ̄г, тав ос тох потыртас: «Ты э̄лумхо̄лас ам ма̄гсылум о̄лнэ хо̄талт посыӈ поскве. Тав са̄в ма̄хум матыр о̄вылтыт номсахтуӈкве ханищтас, та̄в хансум нэ̄паканэ ловиньтым, аквтуп йильпииг о̄луӈкве ханищтахтэ̄в». Тувыл конференциян атхатам ма̄хумн Валентина Перова Саранпа̄вылныл ке̄тум паща ла̄тӈе ловиньтавес. Эстер Рутткай-Миклиан, Венгрияныл ёхталам нэ̄н, Будапештыт ла̄тӈыт ханищтан институтныл Марта Чепреги ос Анна Вандор э̄квагныл о̄с щуньпаща ла̄тӈыл тотвес. Евдокия Ивановна венгр ма̄хманэ̄н нэ̄пак хурип хорамыӈ то̄тапсовыл ва̄рима ос хансум паща ла̄тӈаныл та то̄тап кӣвырн пинманыл. Ма̄ньщи мирке̄в Венгрия ма̄т ёмщаквег ва̄ве, та̄н ма̄н нупылув сымыӈыщ сунсэ̄гыт, ос ма̄нав ляпа рӯтыг ловиньтыяныл. Образование ос наука департаментныл кӯщай ва̄ӈын нэ̄ В. А. Безуевская потыртас: «Ща̄нь ла̄тыӈ ма̄ньта̄гыл ва̄ӈкве – тыи сака яныг со̄т. Ань туп таи лю̄ль, лӯима̄ ма̄хум та̄нки ла̄тӈаныл молях ёрувлаӈкве патсаныл. Ма̄ньщи ма̄хум ща̄нь ла̄тӈаныл ул вос ёрувласаныл, Евдокия Ромбандееван са̄в ханищтан нэ̄пакыл хасве̄сыт. Ань ты нэ̄пакыт хосыт ня̄врамыт школат ос мо̄т ханищтахтын колытыт ма̄ньщи ла̄тӈыл потыртаӈкв ханищтавет. Округ янытыл кит со̄тыра са̄вит ня̄врам школанылт ос 180 соссаӈ студентыт са̄всыр институтыт ос колледжитт ханты манос ма̄ньщи ла̄тыӈ ханищтэ̄гыт». Т. В. Пуртова, окружной библиотекат рӯпитан э̄ква, Евдокия Ивановна самын патум ма̄тэ ос о̄лупсатэ урыл потыртас. Ма̄хумн тав хуриянэ суссылтаве̄сыт. Т. С. Гоголева ос С. С. Динисламова ма̄хум э̄лыпа̄лт ма̄ньщи ла̄тӈыл мощ потыртасы̄г. Светлана Селивёрстовна Санкт-Петербургныл А. И. Герцен нампа универститетныл ке̄тым паща ла̄тыӈ ловиньтастэ. Ос тувыл потыртас: «Акв щёс А̄с-угорский институт рӯпитан ма̄хум сапра̄нин атхатыгла̄лсыт. Тот о̄с ма̄ньщи ма̄хманув о̄вылтыт потыртасӯв, тувыл ам Евдокия Ивановна нупыл а̄ӈкватасум. Тав иснас по̄хат лю̄лис, ос сунсэ̄гум, самвитанэ нэ̄глумыт. Ам хотрохтысум ос китыглылум: маныр е̄мтыс, матыр та̄рвит о̄ньщи? Тав а̄нумн то̄нт ювлела̄выс: «Ам ма̄ньщи мирум моще̄ртын хотталь ты со̄йми, ла̄тӈе моще̄ртын ты ёрувлахты. Ам ос тыт амккем щар нэ̄матыр ва̄руӈкве ат ве̄рме̄гум». Ты ла̄вум ла̄тӈанэ ань тыг мус номтумт о̄ньщиянум. Ос ма̄ньщи ла̄тӈув нэ̄мхотьют ул вос ёрувлавес, ня̄врамыт ла̄тыӈ вос ханищтасыт, та па̄сныл та̄н ма̄гсыланыл потрыт хансуӈкве патсум». Тувыл хо̄тал палыт 19 хо̄тпа та̄нки хасум научный потраныл ловиньтасаныл. Мо̄тыт хо̄талт Т. С. Гоголева ма̄хум я̄нас атыгласанэ. Ты о̄вылтыт мо̄т газетат тах хансэ̄гум.

1051 2013.05.10. Валентина УЗЕЛЬ

Та̄нтирот о̄лнэ ос рӯпитан ма̄хум. Белоярский район Касум па̄выл ляпат «Осетные» нампа община рӯпиты. «Осетыг» пе̄с ханты па̄выл ла̄ввес, тот хосат нэ̄мхотьют ат о̄лы. Ос та община кӯщай Андрей Александрович Ерныхов та ма̄ныл о̄лы, таима̄гыс общинатэ тамле намыл пиныстэ. Тув нила ще̄мья хансым о̄лэ̄гыт. Та̄н общинанылт титса̄т арыгтем са̄лы о̄ньще̄гыт. Мо̄лты та̄л та̄н акв миллион солко̄вил майлуве̄сыт, ты олныт во̄рт о̄лнэ колыт ӯнттын ма̄гыс, са̄лы пӯсас ва̄рнэ ма̄гыс мивет. Ты та̄л о̄с 185 со̄тыра арыгтем солко̄ви тах мивет, Ань ка̄сыӈ са̄лы ма̄гыс олн ойтаве, ты олныт субсидияг ла̄вавет. Тав э̄кватэ наме Татьяна Филипповна Ерныхова. Тэ̄н нила ня̄врам янмалтасы̄г: тит а̄ги, тит пыг, та̄н пуссын янгыт. Тэ̄нти ос ань яныгпа̄лаг е̄мтсыг, о̄йка 70 та̄лэ то̄влыс, э̄ква – 65 та̄лэ. Марина яныг а̄гитэ̄н хуме саран, сас та общинат рӯпитэ̄г, ща̄няге̄на̄щаге̄н са̄лы ӯруӈкв нё̄тэ̄г. Татьяна Филипповна ты а̄гитэ ёт тэ̄лы маснут ос пурка ю̄нтэ̄г, тувыл тыналыянэ̄н. Туи са̄в пил ва̄тэ̄гыт, Казымский рыбкоопн мыганыл. Саӈквлыпил акв кила тынэ 75 солко̄ви, сӯйпил ма̄гыс ос 85 солко̄ви ойтаве. Ты хосыт та̄н олн о̄с сэ̄лэ̄гыт. Мо̄т а̄гитэ̄н Ирина, тав Санкт-Петербург ӯс университетт ханищтахтас. А̄стластэ, юв ёхтыс. Са̄лыӈ ма̄хум ялпыӈ хо̄таланыл о̄лум порат Касум па̄вылн мо̄т хо̄н ма̄ныл са̄в туристыт ёхталасыт, пуссын рущ ла̄тӈыл потыртаӈкв ат ха̄сэ̄гыт. Ирина та̄н ётаныл английский ла̄тӈыл потыртас. Мо̄лты та̄л тав школан рӯпитаӈкв вуйвес, ань ня̄врамыт та хащта̄л ла̄тӈыл потыртаӈкв ханищтыянэ. Ты ще̄мья палт Максим Григорьевич Тарлин о̄лы, ты яныгпа̄ла ханты о̄йка 85 та̄лэ то̄влыс. Тав хосат такте̄т хультыс, э̄кватэ а̄тимыг е̄мтыс, ня̄врам тэ̄н ат о̄щсы̄г. А. А. Ерныхов таве̄н рӯтыг о̄лы, таима̄гыс ты та̄нти палтаныл висаныл. Ма̄ньполь э̄тпос та е̄рн Наталья Комарова губернаторув ялыс, тав «Осетные» нампа общинан тотыглавес. Та ма̄хум титыгласанэ, хумус та̄н о̄лэ̄гыт, матхурип ва̄рмаль о̄ньще̄гыт ман а̄ти, та̄н ётаныл ща̄й аис. То̄нт ты тав ла̄выс, община ты та̄л олныл о̄с тах миве.

1051 2013.05.10. Анна АЛГАДЬЕВА

Яныг лё̄ӈх ва̄та ма̄нь па̄влыт. Ӯйхул о̄щнэ хо̄тпат нё̄туӈкв патыме̄ныл па̄сныл, са̄в ма̄хум ӯйхул рӯтмалтаӈкв патсыт. Хо̄ӈха мис ман лув о̄ньщи, та̄л сыс акв щёс государство па̄лыл олныл ойтыглавет. Акв мис ма̄гыс лов со̄тыр солко̄ви, лув ма̄гыс хӯрум cо̄тыр атса̄т солко̄ви миве. Ха̄р мисыт, ха̄р лувыт тай ат ойтавет. Ӯйхулыт акваг уральтым о̄ньщавет, са̄всыр прививкал ва̄равет. Са̄ро̄вылт э̄лы ма̄т о̄лнэ па̄влыт уральтавет. Лё̄ӈх о̄лнэ торыг ӯйхул ле̄ккарытн рӯпатаныл ва̄руӈкв а̄лымаӈкв э̄ри. Тох лё̄ӈх о̄лум торыг Хулюмсӯнтыӈ ос Ня̄хщамво̄лиӈ ӯйхул ле̄ккарыг Людмила Мартыновна Алгадьева ос Семён Константинович Артеев ӯянэ̄н yральтаӈкв Ма̄ньясӯнтын ос Яныгпа̄вылн ялсы̄г, мисыт, кӯтьвыт, лувыт прививкал ва̄рсы̄г. Ам о̄с тэ̄н ётэ̄н ялсум. Яныг лё̄ӈх. Ялум лё̄ӈхув Яныгпа̄выл та̄ра Ма̄ньясӯнт па̄выл мус о̄лыс. Мощ мо̄лтынув мус ты лё̄ӈх яныг лё̄ӈхыг ла̄ввес. Матыр йис па̄сныл о̄лум ма̄к яныг лё̄ӈх. Са̄лыӈ суныл, лувыӈ суныл ты хосытыл сӯлттавес. Лӯйсуп ма̄хум, алысуп ма̄хум пуссын ты лё̄ӈх хосыт нё̄ргала̄ласыт. Мӯйлым ман рӯпата щирыл пормас хартым пуссын тыгыл яласасыт. Купсат тэ̄нутпормас хартсыт. Ссылкан ке̄тыглым ма̄хум, улпыл, о̄с ты та̄ра тотве̄сыт. Бензин ос соляра Са̄псаныл тыгле хартвес. Тыгыл тувле ос во̄руй сов, хӯл тотвес. Ань ты лё̄ӈх ат э̄рнэг патыс. Ма̄ньясӯнтыл э̄лаль Са̄пса нупыл воссыг ат щё̄пита̄лаве. Йильпи лё̄ӈхыт Агириш па̄выл ос Нягань ӯс та̄ра ва̄рве̄сыт. Ма̄ньясӯнт па̄выл – хум ма̄хум па̄выл. Ма̄ньясӯнт па̄выл хуньт янгыг кос о̄лум. Ань нила кол тyп о̄лаве. Нэ̄матыр ла̄пка, пе̄карня, пӯльница а̄тим. Та̄нки ё̄ранылтыл ма̄хум о̄лэ̄гыт. Ня̄нь та̄нки ва̄ре̄гыт. Тэ̄нут ма̄гыс Ня̄хщамво̄ль па̄вылн ялантэ̄гыт. Матарн ул вус я̄рме̄гыт лё̄ӈх о̄лнэ торыг са̄внув тэ̄нут ёвтэ̄гыт, со̄пас ва̄ре̄гыт. Я̄ па̄лыг паты, тӯяг ос таквсы я̄ хосыт яласаӈкв ро̄ви. Туи яласаӈкв та̄рвитаӈ, витэ ма̄ниг е̄мты. Я̄ хосытыл Ня̄хщамво̄ль па̄выл мус 90 ве̄рыста, лё̄ӈх хосыт 45 ве̄рыста. Я̄тэ наме Та̄гт, Та̄гт талях Нё̄рО̄йканыл овты. Па̄выл алыо̄вылт Семён Семёнович Самбиндалов о̄лы, акв мис о̄ньщи. Ма̄н ёхталамув порат такке̄тэ о̄лыс. Пётр ягпыге ла̄ви, Ханты-Мансийск ӯсн пӯльницан пусмалтахтуӈкв минас. Рӯтанэ, апганэ ва̄тихал тав палтылэ ёхтала̄лэ̄гыт. Мо̄лты тув ла̄ви, Ма̄ньясӯнт па̄вылныл налыман ве̄рыстат «Арбыньят» рущит палт рӯпитас, тув палыт ня̄нь ва̄рыс. Тот со̄рни ловтнутыт рӯпитасыт. Ань колнор тот яктаве, ла̄ве̄гыт, щёлыӈ ма̄хум ма̄гыс па̄выл ва̄руӈкв кусаве. О̄с акв Ма̄ньясӯнтыт о̄лнэ хум – Валентин Ильич Ануфриев. Таве̄н 62 та̄л, такке̄тэ о̄лы, акв поснэ мис ос хӯрум мис пыгрищ о̄ньщи. Потрыӈ, ка̄ркам яныг хо̄тпа. Юрий Анатольевич Ивукин – са̄в мисыӈ хум, о̄с Ма̄ньсунт па̄вылт кол о̄ньщи. Ма̄н тув ёхталамувт такке̄тэ о̄лыс. Тав ётэ о̄лнэ кит ягпыгаге Анатолий ос Иван юн а̄тимыг о̄лсы̄г. Пуссын аквъёт нилахуйплов мис, хӯрум лув о̄ньще̄гыт. Ма̄н ялмув порат то̄ва мисанэ иӈыт ӯнттэ̄гыт, ань мус ущпыл са̄выг е̄мтсыт. Та коныпал ос кӯтьвыт о̄нще̄гыт. Акв ё̄рыл, акв номтыл, акваннё̄тхатым тох та о̄лэ̄гыт. Щаквитаныл мисво̄йиг, творогыг ва̄рияныл, тувыл Ня̄хщамво̄льн тыналаӈкв тотъяныл. Ха̄р мисаныл таквсы нё̄влиг ра̄тъяныл, о̄с олныг минэ̄гыт. Па̄выл щар лӯйо̄вылт Алексей Владимирович ос Пётр Владимирович Самбиндаловыг колэ̄н ӯнлы, о̄с тэ̄нкетэ̄н нэ̄ хо̄тпа та̄л о̄лэ̄г. Яныгпа̄выл. Ювле йимувт ущ Яныгпа̄вылн хо̄игласӯв. Ня̄хщамво̄ль па̄вылныл Яныгпа̄выл мус лё̄ӈх хосыт 12 ве̄рыста, я̄ хосыт 25 ве̄рыста. Хуньт Яныгпа̄влыг ла̄вим па̄вылт кит о̄лнэ кол туп хультсы̄г. Акв колт Пётр Николаевич Самбиндалов ще̄мьяӈ та̄гыл о̄лы. Коланылт нила хо̄тпа – э̄кватэ Дарья, котиль а̄гитэ – Галина ос пыге Иван о̄лэ̄гыт. Мис о̄ньще̄гыт. Ка̄сыӈ во̄рт о̄лнэ ма̄ньщи хо̄тпа хольтыл во̄раян кӯтьвыт о̄ньще̄гыт. Ма̄н ёхталамув торыг колыӈ ма̄хум Ня̄хщамво̄льт яласасыт. Юн яныг а̄гиятэ Светлана о̄лыс, тав нас юв ёхталас, такви Хулюмсӯнт па̄вылн хум ва̄рыс, ань тот о̄лы. Китыт колт Алексей Андреевич Самбиндалов такке̄тэ о̄лы, (омагеа̄тяге ёт о̄лме щирыл) мис о̄ньщи. Ӯнтари ягпыге мо̄лты та̄л а̄тимыг е̄мтыс. Оматэ Евдокия Николаевна, а̄ги о̄парищ наме Аментьева, хӯрмит та̄л хотталь щалтыс. А̄щаныл Андрей Ефимович хосат а̄тимыг е̄мтыс. Прокопий Кириллович ос Василий Кириллович Самбиндаловыг тыт кол о̄ньще̄г. Тэ̄нки ще̄мьяӈ та̄гыл Ня̄хщамво̄ль па̄вылт о̄лэ̄г. Рӯтанэ̄н ос ня̄враманэ̄н нас тыг ёхталэ̄гыт. О̄с акв кол – ты Тимофей Константинович Самбиндалов тав колэ. Такви Ня̄хщамво̄ль па̄вылт о̄лы. Омагеа̄тяге о̄лум колн ва̄тихал яланты, тыт во̄раи, хӯл алыщлы, нас ӯщлахты. Ма̄нь па̄влыӈ ма̄т та̄рвита̄ӈ о̄луӈкв. Ульйив, вит тотуӈкв э̄ри. Колыт исум тур ре̄гыл ат исыглэ̄гыт, кол кӣвырт вит ат со̄схаты. Ма̄хум о̄лэ̄гыт, ӯйхул янмалтэ̄гыт. Пил понсы, пил ва̄тэ̄гыт. Са̄внув ва̄тэ̄гыт, тыналыяныл. Ла̄хыс атэ̄гыт. Па̄кв паттэ̄гыт, па̄квсам ва̄ре̄гыт. Во̄рае̄гыт, хӯл алыщлэ̄гыт. Тох та яныг лё̄ӈх ва̄тат ма̄нь па̄влыӈ ма̄хум о̄лэ̄гыт.

1051 2013.05.10. Галина КОНДИНА

Округ кӯщаюв рӯпататэ ёмщакв ва̄ритэ. Округ губернаторув Наталья Комарова яныгполь э̄тпос оигпам порат Правительствав 2012 та̄л сыс ва̄рум рӯпататэ урыл депутатыт э̄лыпа̄лт потыртас. Ты потре ва̄т нупыл титыт сапра̄нит ловиньтастэ. Тав ла̄выс: «Ма̄н ва̄рум рӯпатав урыл хансум потрум интернетын щё̄питаслӯв ос тот ты э̄тпос лов хо̄талныл ма̄хум таве ловиньтаӈкве патсаныл. Мирув пуссын акван те ловиньтаӈкве, хо̄т со̄тыр атса̄т э̄лумхо̄лас ты потрыл пӯмщалахтасыт. Та̄н ма̄н ва̄рнэ рӯпатав са̄выӈпа̄лэ ёмасыг ла̄всаныл. То̄ва хо̄тпат та̄нти номтаныл тув хӯлтсаныл. Мо̄лты та̄л сыс ма̄хманув сэ̄лум олнаныл 12, 2 процентын но̄хяныгмасыт ос котиль зарплатав 51 со̄тыра 60 солко̄ви са̄витыг е̄мтыс. Ханищтан хо̄тпат, ле̄ккарыт ос мо̄т бюджетный ма̄т рӯпитан ма̄хум олнаныл акваг но̄хнё̄тавет. Рӯпата та̄л о̄лум ма̄хум – па̄лэ ань рӯпатал хо̄нтсанӯв. Округув янытыл та̄л сыс акв миллион кв. метра о̄лнэ кол ӯнттуӈкве а̄лымасӯв. Юио̄выл ва̄т нупыл ат та̄л сыс тыса̄вит о̄лнэ кол нэ̄мхуньт ат ӯнтталавес. Ты ос мо̄т тэ̄ланув ма̄гсыл ма̄н са̄в олн та̄стыгласӯв. Савалап ня̄врамыт, яныгпа̄ла хо̄тпат ос ма̄нь ня̄врамыт ма̄гсыл ойтнэ олныт ма̄н о̄с акваг но̄хнё̄тыянӯв. Ще̄мьят са̄в ня̄врамыӈыг е̄мтэ̄гыт. Ща̄нит хӯрмит ня̄враманыл ма̄гсыл «Югорский семейный капитал» олныл о̄с ойтавет. Та̄л сыс округувт 27 686 ня̄врам самын патсыт. Тыгыл 56 процент ще̄мьят титыт манос хӯрмит ня̄враманыл. Самын патнэ сака ма̄нь ня̄врамыт «перинатальный центрыг» ла̄внэ пӯльницатыт пусмалтавет ос янмалтавет. О̄лнэ те̄мыг хунь е̄мтэ̄гыт, юв ущ мивет. Ма̄н номсэ̄в, хӯрум та̄л сыс пуссын ня̄врамыт садикыӈыг е̄мтэ̄гыт. Ань Лангепас, Радужный, Когалым ӯсытт, Советский, Белоярский ос Нефтеюганский районытыт ня̄врамакв ань пуссын садикын ялантэ̄гыт. Культура ос спорт урыл о̄с ат ёрувлэ̄в. Та̄л сыс хо̄т йильпи культуракол рӯпитаӈкве патсыт. Каснэ ма̄гсыл о̄с 57 кол ӯнттуве̄сыт». Наталья Владимировна потре а̄стум юипа̄лт депутатытн титыглавес. Н. Г. Алексеева, Саранпа̄вылныл о̄лнэ депутат нэ̄, ла̄выс, са̄в па̄влыт связь, на̄йпос ат о̄ньще̄гыт, та̄н хуньт ва̄равет ман а̄ти? Ос ва̄равет те – хоты порат? Кӯщаюв ювле потыртас: «2015 та̄л мус хансым «Цифровое эфирное телевидение» нампа федеральный программа рӯпиты. Та мус ловмантем цифровой телеканал ма̄хум сунсуӈкве патэ̄гыт. «Ростелеком» ос Газпромкосмос» э̄лн о̄лнэ па̄влытын интернет ва̄ре̄гыт. Ты та̄лн 3 миллион солко̄ви та̄стым о̄лы, та̄л оигпан мус та̄н хо̄т муниципалитетыт, ла̄ве̄гыт, рӯпатаныл а̄стлыяныл. Ань округувт 60 па̄выл ЛЭП на̄йква̄лгытын о̄лтым ат о̄лэ̄гыт. То̄ва та̄нти ма̄нылт на̄йпос ва̄рнэ станция о̄ньще̄гыт. Та̄л оигпан мус 15 па̄выл ЛЭП на̄йква̄лгытын о̄лтавет. Мо̄т па̄влытыт аквтит со̄тыр хо̄тпа о̄лэ̄гыт. Тот на̄йпос ва̄рнэ станцияныл ёмащакв хотщё̄питавет». Кӯщаюв э̄лаль мо̄т депутатытн о̄с хоса титыглавес. Та̄н потраныл оигпам юипа̄лт мирн пе̄риим ма̄хум тав ва̄рум рӯпататэ ма̄гсыл пуссын нэ̄пак та̄ратасыт. Ос э̄лаль рӯпитан са̄в ёмас ла̄тӈыл ла̄всаныл. Ты сапра̄нит «О бюджете» нампа са̄ккон урыл потраныл о̄с о̄лыс. Губернатор ва̄ӈын нэ̄ В. Дюдина округувт олныт сэ̄лнэ ос олныт холтнэ урыл та̄нанылн потыртас. Ты та̄л округ бюджетын 155 миллиард 578 со̄тыра солко̄ви та̄ставе ос 177 миллиард 38 со̄тыра солко̄ви холтуӈкве номсаве. 22 миллиард солко̄ви ат то̄вылхаты, тав рущ щирыл «дефицитыг» ла̄ваве. Депутатыт ты са̄ккон о̄с пирмайтасаныл.

1051 2013.05.10. Людмила ТЕТКИНА

Са̄всыр ва̄рмалит урыл тав китыглавес. Ханты-Мансийск ӯст ля̄ххал тотнэ ма̄хум Наталья Комарова, губернаторув, ёт хо̄нтхатыгласыт. Округ Правительство 2012 та̄л сыс ва̄рум рӯпататэ урыл таве китыгласаныл. Та та̄л округувт са̄в о̄лнэ кол ӯнттувес, журналистыт ты ва̄рмаль урыл пӯмщалахтасыт. Кӯщай нэ̄ ла̄выс, щар са̄в ще̄мьят Ханты-Мансийск, Сургут ос Нижневартовск ӯсытт йильпи колн ва̄нтласыт. Щар мощща кол Сургутский районт ӯнттувес. Округувт 2012 та̄лт 9 со̄тыра э̄лумхо̄лас ипотекаолн висыт ос кол ёвтсыт. Са̄в ма̄хум Нижневартовск, Лангепас ӯсыгт ос Белоярский, Советский, Нефтеюганский районытт о̄лнэ колыл та та̄лт майве̄сыт. Ос иӈ са̄в ще̄мьят колыл миӈкве э̄ре̄гыт, та̄н пуссын очеридин хансым о̄лэ̄гыт. Когалым ӯсныл ля̄ххал тотнэ нэ̄ многофункциональный центрыт урыл китыглахтас, хунь тамле кол та̄н ӯсанылт ӯнттаве. Наталья Комарова ты урыл ла̄выс: «Когалым ӯст тамле центр 2013 та̄лт рӯпитаӈкве о̄вылтахты. Ань округувт нила центр о̄лы. Ты та̄л сыс 15 тамле кол пӯнсаве. Та̄н, тот рӯпитан хо̄тпат, ка̄сыӈ э̄лумхо̄ласн нё̄туӈкве тах патэ̄гыт. 2012 та̄лт Ханты-Мансийск ӯст о̄лнэ центрын хо̄т со̄тыра хо̄тпа ёхталасыт. Тот са̄всыр нэ̄пакыт моляхнув ва̄руӈкве нё̄тве̄сыт. Мо̄т ма̄т нэ̄пакыт акванатуӈкве ань щар ат э̄ри». Туризм урыл потыр ос о̄лыс. Ты хосыт о̄с са̄в рӯпата ва̄раве. Ты урыл кӯщай нэ̄ таи потыртас: «Пе̄с йис та̄гыл тыт соссаӈ ма̄хум о̄лэ̄гыт. Та̄н культурал са̄в мир пӯмщалахтэ̄гыт ос о̄лупсаныл сунсуӈкве ка̄саще̄гыт. Ань Ха̄льӯс по̄хат «Со̄рни сэ̄й» нампа па̄выл ӯнттувес. Тот рӯпитан соссаӈ ма̄хум та̄нки пе̄с йис ва̄рмаляныл ёмащаквег ва̄ганыл ос мӯй хо̄тпат тув ӯрияныл. Йильпи та̄л хоталытт 45 со̄тыра мӯй хо̄тпа Ханты-Мансийск ӯсн мӯйлуӈкве ёхталасыт. Аквта порат 155 со̄тыра мӯй ма̄хум Юграт ты ялпыӈ хо̄тал янытласыт. Финляндият са̄в э̄лумхо̄лас Йильпи та̄л янытлэ̄гыт, тыил тот ма̄хум са̄в олн сэ̄лэ̄гыт. Ма̄н о̄с лӯима̄т о̄лэ̄в, тыт о̄с мӯйлуӈкве ро̄ви, махум тыг во̄виньталуӈкве акваг патэ̄в». Ма̄нь па̄вылквет о̄лнэ мир хумус нё̄тавет, кӯщай нэ̄ тох ла̄выс, тамле ма̄т ма̄ньщит, хантыт ос ё̄рн ма̄хум о̄лэ̄гыт. Ты ва̄рмаль урыл пуӈктотнэ ма̄хум ат ёрувлэ̄гыт ос ка̄сыӈ па̄вылн нё̄тэ̄гыт. Соссаӈ ма̄хум та̄нки ма̄нылт о̄лым пе̄с ва̄рмаляныл э̄лаль вос тотыяныл. Журналистыт са̄всыр мо̄т рӯпата урыл таве о̄с китыгласаныл.

1051 2013.05.10. Людмила ТЕТКИНА

Та̄н ма̄вит ӯргалэ̄гыт. Округувт ма̄вит ӯргалан службат Сергей Пикунов кӯщаиг о̄лы. Тав ля̄ххал тотнэ ма̄хум э̄лыпа̄лт ва̄рнэ рӯпатаныл урыл потыртас. Кӯщай хум ла̄выс, ма̄вит ӯргалан ва̄рмаль хосыт о̄влэ̄т акв департамент, тувыл мо̄т департамент рӯпитас. Ань тох е̄мтыс, ма̄хум сака ат ва̄гыт, хотьют ты рӯпата ва̄ри. Ма̄хум хоты ма̄т порс а̄нят ке ка̄салэ̄гыт манос нефтяникыт ма̄вит ке па̄ӈктэ̄гыт – та̄нанылн ты службавн хансуӈкве ос хурит ке̄туӈкве ро̄ви. Хащта̄л хо̄тпат во̄р ке са̄гре̄гыт манос на̄йн ке ё̄саве ты урыл о̄с та̄н палтаныл ла̄тыӈ вос ке̄тэ̄гыт. Мавит ӯргалан хо̄тпат во̄раян ма̄хум ёт ань о̄с рӯпитэ̄гыт. Ма̄хмытын охотничий билетыт хасылтэ̄гыт ос хунь ва̄с ос мо̄т товлыӈ ӯй па̄тлуптаӈкве ро̄ви, ла̄тыӈ хӯлтэ̄гыт. Ӯйхул па̄тлуптаӈкве лицензиянэ̄пак о̄с та̄н тыналэ̄гыт. Ань та̄н сака са̄в рӯпата о̄ньще̄гыт. Ма̄вит ӯргалым округ янытыл акваг яласэ̄гыт. Юграт нефтяникыт рӯпитэ̄гыт, та̄н ва̄тихал ма̄ тармыл нефть со̄сантэ̄гыт. Ты та̄л хӯрум э̄тпос сыс та̄н палтаныл 734 лю̄ль нак е̄мталас ос таима̄гсыл яныг штрафолныл пинве̄сыт. Ювле хультум та̄лт та̄н пуссын ма̄вит ӯргалан са̄всыр организациятын 6 миллион солко̄ви штарфолныл пинве̄сыт. Ювле та̄н 5 миллион 300 со̄тыра солко̄ви ойтсыт. Тамле яныг олныл таима̄гсыл хансавет, ма̄витув сыстамыг ос ӯргалым вос о̄ньщияныл. Журналистыт пе̄с йис ма̄т о̄лнэ соссаӈ ма̄хум урыл о̄с китыглахтасыт. Та̄н о̄лнэ ма̄нылт нефтяникыт то̄ва порат порс хультуптэ̄гыт, ювле хультум та̄лт во̄рт о̄лнэ манаса̄вит ханты хо̄тпа та̄н палтаныл ёхталасыт манос ты урыл пищма хансыгласыт. Сергей Пикунов ювле ла̄выс: «Тамле ма̄т о̄лнэ ще̄мьят ат ва̄гыт, хоты кӯщаин ты лю̄ль ва̄рмалит урыл п от ы рт а ӈ к в е . 2 0 1 2 та̄л сыс туп лов ханты хо̄тпа ма̄н палтув ты урыл пищма хансыгласыт. Ма̄н нефтяникыт ёт потыртахтасӯв, та̄н соссаӈ ма̄хум о̄лнэ ма̄наныл хотсыстамтасаныл. Ам номсэ̄гум, тамле лю̄ль ва̄рмаль са̄внув кос о̄лыглы, ос хантыт та̄нки нефтяникыт ёт потыртахтэ̄гыт, «Бураныл», ха̄пыл манос моторыл маяпавет, та̄н э̄лаль о̄лэ̄гыт». Во̄раян хо̄тпат урыл Сергей Пикунов ла̄выс: «2012 та̄л сыс 40 э̄лумхо̄лас писаляныл хотвисанӯв. Та̄н разрешениенэ̄пак ос охотничий билет ат о̄щсыт. Округувт 78 со̄тыра э̄лумхо̄лас тамле нэ̄пак о̄ньще̄гыт. Ма̄н во̄раян хо̄тпат йильпи охотничий билетыл мыганув. Ань 58 со̄тыра хо̄тпа йильпи нэ̄пак о̄ньще̄гыт. Мо̄таныт пе̄с нэ̄паканыл пе̄нтуӈкве тыг о̄с вос ёхталэ̄гыт». Ань ма̄вит ӯргалан хо̄тпат во̄рт най о̄с харыгтэ̄гыт. Ты та̄л тэ̄лы тӯйт са̄в патыс, я̄ӈк на̄тнэ э̄тпос ты ёхтыс, тӯйт пуссын иӈ ат толыс. Кӯщай хум ла̄выс, тыи сака ёмас, э̄рыӈ, ты тув сыс са̄в во̄р на̄йн ат тэ̄ве. Во̄р са̄грын урыл тамле ла̄тыӈ ла̄выс. Ты та̄л хӯрум э̄тпос сыс во̄р хартын яныг ма̄шинат ялнэ лё̄ӈханылт пуссын уральтаве̄сыт. Тамле рӯпата о̄с ва̄тихал ва̄рыглаӈкве патаве, са̄всыр по̄х хо̄тпат тыт во̄р ул вос са̄гре̄гыт.

1051 2013.05.10. Александр ВЬЮТКИН

Йильпииг паттым кӯщай. Ань э̄тпостемыг ты е̄мтыс, губернаторув то̄ва ва̄ӈын хо̄тпанэ хотпе̄нтсанэ. И. С. Петров пе̄нтсыл А. С. Филатов кӯщаиг ӯнттувес. Ты хум ля̄ххал тотнэ ма̄хмытын титыглавес. Потыртамув порат «Югория» телекомпаният корреспондентыг рӯпитан нэ̄ Ольга Ефремова ля̄ххал тотнэ соссаӈ ма̄хум урыл титыглахтас: «Ла̄вен, ща̄нь ла̄тӈыл телевизор хосыт суссылтан программат ос ма̄ньщи, ханты ла̄тӈыл хаснэ газетаг ма̄н округувт э̄ре̄гыт манос а̄ти? Та̄наныл о̄щнэ щирыл округ бюджетныл олныт наска̄ссыг холтавет? » Андрей Сергеевич ювле ла̄выс: «Ханты ос ма̄ньщи ла̄тӈыл та̄ратан газетат ос журналыт ма̄гсыл ма̄н олн по̄хан щар ат па̄хвтэ̄в. Та̄н ты ма̄ тармыл ма̄к кӯщаиг о̄лэ̄гыт. Та̄нанылн акваг нё̄туӈкв э̄ри. Ты мирыг халт щар акв хо̄тпа те хульты, газетаг о̄с аквтох э̄лаль та̄ратаӈкв патэ̄в. Ма̄навн ты кастыл матыра̄ти пуссын ва̄руӈкв э̄ри. Ос пе̄с та̄гыл о̄лнэ о̄лупсаныл э̄лаль тотуӈкв нё̄тыянӯв. Ты коныпал ма̄н та̄н ла̄тӈанылтыл ва̄рнэ ля̄ххаланыл са̄вмалтаӈкве патыянӯв. Округувт газетат хумус ловиньтан ма̄хмыт палт тотавет, тыи уральтаӈкв э̄ри». Тувыл «Ханты ясаӈ» газетат рӯпитан нэ̄ Ирина Самсонова титыглахтас: «Манырсыр рӯпата на̄н соссаӈ нэ̄пакыт та̄ратан ма̄гыс ва̄руӈкв номсэгы̄н? » Кӯщаюв ла̄тӈанэ ты: «Ам мощ мо̄лалнув ты рӯпитан ма̄н паттуве̄сум. О̄влэ̄т ань на̄н а̄нумн нё̄тмил ва̄ре̄н. Кӯщаянын ёт ам хо̄нтхатыгланэм юипа̄лт ущ ла̄ве̄гум, хумус на̄нан нё̄туӈкв э̄ри». Ам округув янытыл ля̄ххал тотнэ газетат, журналыт ос телевидениет рӯпитан ма̄хум ёт хо̄нтхатыглаӈве ос ва̄йхатуӈкв таӈхе̄гум. На̄н о̄щнэ номтанын а̄нумн потыртэ̄н, маныр ёмаснувег ос хумус ва̄руӈкв. Тувыл ам на̄нан нё̄тыянум. На̄н туп рӯпатан мӯсхал щирыл ва̄релы̄н».

1051 2013.05.10. unknown author

Ты тӯя яныг вит ат ва̄ри. Та э̄тпост округ МЧС яныг кӯщае Александр Тиртока журналист ма̄хум акванатыгласанэ. Тав потыртас, ты та̄л я̄ӈк на̄тнэ юипа̄лт вит сака о̄нты ман а̄ти. Ка̄сыӈ тӯя кастыл яныг кӯщаит ос МЧС ма̄хум тэ̄лы па̄сныл щё̄питахтуӈкв о̄вылтахтэ̄гыт. Та̄н та̄нти ос округувт о̄лнэ мир нэ̄мхотьют ат ва̄г, тӯя манхурипаг е̄мты. Ань я̄ӈк на̄тнэ э̄тпос ты о̄вылтахтас. Тэ̄лы сака ат тӯйис, таима̄гыс яныг вит ат ва̄ри. Ос ты ва̄рмаль туп тӯйтныл хунь е̄мты, Россия янытыл вит акванатнэ «гидротехнический сооруженияг» ла̄внэ тӯр хурип утыт рӯпитэ̄гыт. То̄ват Алтай ма̄т ӯнттым о̄лэ̄гыт. Хунь тот са̄в вит атхаты, та ляпат овтнэ я̄тытн та̄ртаве. То̄нт ты то̄ва па̄влыт а̄маравет ос яныг пилыщмаӈ нак та е̄мты. А. Тиртока ань ла̄выс, я̄ӈк Иртыш я̄ хосыт сака атхаты, таима̄гыс ань э̄тэхо̄тал ма̄хум ты я̄ уральтыяныл. Ос ма̄лтыпыг е̄мтме па̄сыл округув янытыл 18 группа рӯпитэ̄гыт та ма̄хум я̄т пуссын уральтым о̄ньщияныл. «Центро-Спас Югория» акв бригада атсыт, тот о̄лнэ ма̄хум я̄ӈк взрывчаткал пиныяныл ос та щирыл сакватыяныл, витэ молях вос мины. Э̄лаль тав ла̄выс, то̄ва ма̄хум коланыл тӯяг витн ул вос а̄маравет, Россия Президентын манос округ губернаторн пищма хансэ̄гыт. Тамле ма̄хум ёт я̄нас потыртаӈкв э̄ри, та̄н ма̄гсыланыл нэ̄пакыт щё̄питаӈкв – тот вос хансаве, яныг вит порат та̄нанылн хоталь минуӈкв э̄ри, хоталь звонитаӈкв ро̄ви.

1051 2013.05.10. Валентина УЗЕЛЬ

О̄лнэ колыт акваг уральтаӈкв патавет. Ань о̄лнэ колыт пуссын акв хотты управляющий компания нупыл хансым о̄лэ̄гыт. Ты компаният вит, на̄й ос ре̄г ма̄гыс ма̄хумныл олн атэ̄гыт. Ос э̄лаль ты олныт хумус холтавет, нэ̄мхотьют аты ва̄г. Ань таима̄гыс Россия Правительство йильпи постановлениела̄тыӈ хансыс. Олн атнэ компаният рӯпатаныл уральтан окружной Службат ань кӯщаиг Кирилл Минулин о̄лы, тав журналист хо̄тпат акванатыгласанэ ос ты урыл потыртас. Ань пуссын управляющий компаният нэ̄пакыл мивет, тот тах хансаве – маныр та̄нанылн уральтаӈкв э̄ри, хоты колыт ёмащакв щё̄питаӈкв э̄ре̄гыт. Ань тув яныгса̄т арыгтем ва̄рмаль хансым о̄лы. Ты подъездыт, кол ляпат пиным лё̄ӈхыт, йӣвыт о̄с та̄н вос ӯнттэ̄гыт, порс ка̄сыӈ хо̄тал хот вос выганыл, ня̄врамыт ма̄гыс ёнгын площадкат вос ва̄ре̄гыт. Ос колытт о̄лнэ ма̄хум та̄нти акван те потыртахтэ̄гыт, ты управляющий компаният о̄с уральтаӈкв ве̄рмияныл.

1051 2013.05.10. Валентина УЗЕЛЬ

Колыт тынта̄лнувег вос ва̄равет. Ты та̄л о̄лнэ колыт акв квадратный метра тынэ сака яныгмас. Ты таима̄гыс тох е̄мтыс, ань округувт о̄лнэ ма̄хум субсидиял мивет. Та̄н ипотекаолн выгыт, процент мощща ойтэ̄гыт. Округ Правительства па̄лыл ты ма̄хум нё̄тавет. Ос 2014 та̄лныл ты рӯпата мо̄т щирыл ва̄руӈкв патаве. Колыт тынаныл мощщанувег вос е̄мты, округ бюджетныл са̄выӈпа̄лэ олныт кол ӯнттын ма̄гыс холтуӈкв патавет.

1051 2013.05.10. Татьяна Бахтиярова

Паща ла̄тыӈ ще̄мь ямн к е̄тэ̄гум. Щāнюм мо̄рсыӈыщ ва̄щиньтылум, тāл кит щёс. Тав Ке̄расколыӈъя пāвылт о̄лы. 2010 тāлт ам ишкола холтсум, тувыл Ханты-Мансийск ӯсн ханищтахтуӈкве минасум. Та па̄сыл ме̄н мо̄рсыӈыщ ва̄щиньтахтыглыме̄н, юв туи ёхтала̄лэ̄гум, тувыл тэ̄лы. Кāсум сака та̄кыщ холы. Ма̄ньщи ма̄хум тох та о̄лэ̄гыт, рӯтаныл янгыг е̄мтэ̄гыт, ла̄кквамингалэ̄гыт. таквсы хо̄тал, Сымум кāсэ акваг холы. Наӈ, ща̄ня, хосат о̄лэ̄гын, Ам яныг а̄гииг е̄мтсум, Щёровн наӈ та̄лын о̄луӈкв лю̄ль, Мовиньтэ̄гум наӈ ма̄гсылын, Э̄рге̄гум наӈ ма̄гсылын, Ханищтахтэ̄гум наӈ ма̄гсылын, Наӈ туп ёмащакве о̄лэ̄н, ща̄нюм, Йирищум, тувыл а̄пщирищум янмалтэн, Тэ̄н иӈ сака ма̄ньрищиг Ам ёхтэ̄гум тыгыл, Мовиньтаӈкв на̄н ма̄гсылын патэ̄гум, Э̄ргуӈкв на̄н ма̄гсылын патэ̄гум, На̄н туп ёмащакв о̄лэ̄н, Ам тай ёхтэ̄гум, Тэ̄лыиг е̄мты, туииг паты, Лильпи та̄л ёхты пе̄нтхатуӈкв ты та̄л ёт, Тōнт ам а̄вин лохуӈкв та патэ̄гум! ! ! Ща̄нюмн яныг паща ла̄тыӈ ке̄тэ̄гум, вос таквитэ ӯргалытэ, йигрищагумягпыгагум вос ёмщакв янмалты. Та̄нанылн во̄р па̄вылт та̄рвитаӈ о̄луӈкв, вос ва̄ганыл, ам пуссын ще̄мьям сака янытлыянум. Светлана Пеликова ам яга̄гим, тувыл а̄щум П. Т. Бахтияров, ягпыгум Бахтияров Сергей – та̄н о̄с во̄р па̄вылт о̄лэ̄гыт, пуссын ма̄хманумн яныг паща ла̄тыӈ о̄с ке̄тэ̄гум, пуста̄гыл ос акваннё̄тхатым вос о̄лэ̄гыт.

1051 2013.05.10. Галина КОНДИНА

Ва̄т нупыл ат пормас. Мо̄лты та̄л оигпам порат «То̄рум Маа» музей рӯпитанэ̄тэ па̄сныл 25 та̄лэ то̄влыс. То̄нт та̄н тамле мӯйлуптан ва̄рмаль ва̄рыгласыт. Ва̄т нупыл ат та̄л кастыл ма̄хмытын ва̄т нупыл ат пормасыл вос мӯйлуптавет. Та̄н то̄нт музейн ханты ос ма̄ньщи ма̄хманувн хо̄тпан нупыл акв пормасыл тотве̄сыт. Та̄н та пормасыт пуссын ёмщакв ханищтасаныл, нэ̄пакн хассаныл ос суссылтап та ва̄рсыт. Ань ос ма̄хум мӯйлуӈкве, пормасыт сунсуӈкве во̄вияныл. Выставканыл «Дары и дарители» намыл намтсаныл. Суссылтап о̄вылтым порат музей кӯщаяныл В. Н. Кочетыгова пормас мӯйлуптам хо̄тпатын яныг пӯмащипа ла̄тыӈ ла̄выс. Н. Чайникова пе̄с ма̄ньщи са̄ӈквылтап мӯйлуптам, ты Тӯрва̄т па̄вылныл тотым са̄ӈквылтап 18 нот порат ва̄рим о̄лыс. Ты коныпал са̄сныл ю̄нтым са̄всыр а̄ныса̄ныт, а̄канит, касаит сыпалиӈ та̄гыл маимат. Е. А. Нёмысова тав ва̄т нупыл ат пормас музейн мӯйлуптам, са̄всыр а̄канит, супыт, турло̄псыт, пальсакыт ос сакныл хартым хорамыт. Е. А. Белявская, Саранпа̄вылт о̄лнэ э̄ква, ще̄пт о̄щнэ телефон пинумтан хӯрыгсов мӯйлуптас. Хӯрыгсове са̄лы совныл ю̄нтыстэ ос хорамыл по̄слыстэ. Владимир Шесталов Софья э̄кватэ̄нтыл Юван Николаевич ма̄ньщи супе о̄с та музейн тотыстэ̄н, мӯйлуптастэ̄н. Юван Шесталов тав ты музей ва̄руӈкве о̄вылтастэ ос са̄в ё̄ре ты ёмас тэ̄ла ма̄гсыл пиныстэ. Ань ма̄ньщи поэтув супе тот сунсыглым о̄ньщуӈкве патаве. Ма̄н номсэ̄в, са̄в мир тав пормасэ сунсыглаӈкве ёхталаӈкве патэ̄гыт. Музейт рӯпитан нэ̄ И. С. Ксенофонтова ка̄сыӈ пормас урыл ёхталам ма̄хумн потыртас. Колледжит ханищтахтын а̄гит А. Р. Станиславец ос И. М Молданова ёт тув ёхталасыт. Ма̄ньлат хо̄тпатын соссаӈ мир урыл матыр а̄ти ва̄ӈкве, ва̄им, пӯмыщ. Та̄н тот татем ты ёмщакв хӯнтлысыт ос маныр ат торгамтасыт, тот рӯпитан ма̄хум титыгласаныл.

1051 2013.05.10. Тамара МЕРОВА

Ма̄ньщит – То̄рум-А̄щ ня̄врамаквет. «Хо̄тал» нампа А̄с-угорский театрыт йӣквнэ ма̄хум акваг йильпи спектаклит щё̄пита̄лэ̄гыт. Ос таквсы порат артистыт рӯпатаныл акв хотты ёнгилыл о̄вылтыяныл. Мо̄лты таквс та̄н «Дети неба» нампа спектакль суссылтасыт. Йильпи щё̄питам ёнгиланыл артистыт ма̄ньщи ма̄хум ма̄ тэ̄лум ос ма̄ ӯнтхатам ялпыӈ мо̄йт щирыл ва̄рсаныл. Ты ялпыӈ мо̄йтыт ос э̄ргыт ань рущ ла̄тӈын Евдокия Ивановна Ромбандеева толмащласанэ. Ос «Героический эпос манси (вогулов)» нэ̄пакыг ва̄рсанэ. Ёнгил щё̄питаманыл порат Анна-Ксения Вишневская, театрыт режиссёрыг рӯпитан нэ̄н, ос таве̄н нё̄тнэ кит рущ хо̄тпагн ханты ос ма̄ньщи ма̄хум йис мо̄йтыт ловиньтаӈкве ос хащта̄л пищит торгамтаӈкве э̄рсыт. Тувыл ты мирыг культуранэ̄н акван ул вос тэ̄лыгтавесы̄г, та̄н туп ма̄ньщи ялпыӈ мо̄йтыт ханищтаӈкве патсыт. То̄ва пе̄с йис накыт ат торгамтаманыл порат, маныр ма̄гыс манос хумус та̄н о̄лэ̄гыт, Светлана Алексеевна Попова китыгласыт. Тав ань ма̄ньщи ма̄хум пе̄с потрыт ос мо̄йтыт ёмщаквег ханищтыянэ, тувыл диссертация нэ̄пакыг хансыянэ. Ты ва̄рмалитыл аквтох Александр Тургачёв пӯмщалахты, тэ̄н акваннё̄тхатым спектаклин э̄рнэ ла̄тӈыт хӯлтсы̄г. Пе̄с йис ялпыӈ потранув ос мо̄йтанув рущ мир ёнгилыг щё̄питаӈкве, ты о̄с ялпыӈ накыг е̄мты. Мори матыр ва̄руӈкве, суссылтаӈкве ос ля̄галаӈкве На̄йО̄тыранувн ма̄н ат та̄ртаве̄в. Мария Литвинова ос Вячеслав Игнатов, Москваныл ёхтум режиссёрыг, тамле тэ̄ла о̄с торгамтастэ̄н. Тувыл э̄лумхо̄ласын На̄йО̄тырыг ёнгуӈкве о̄с ат ро̄ви. Тащирил ке маныр ва̄руӈкве? То̄нт режиссёрыт ёмас номтын хӯлтве̄сыт. Та̄н хурит по̄слысыт ос та хурит на̄йил постым ма̄ тэ̄лум ос ма̄ ӯнтхатам ялпыӈ мо̄йтыт ма̄хумн потыртасыт. Рущ щирыл ке ла̄вуӈкве, та̄н «теневой театр» ва̄рсыт. Ты ва̄рмалит ва̄рнэ ма̄гсыл та̄нанылн Вячеслав Зайчиков ос Павел Мизёв сака ёмщаквег нё̄тсы̄г. Вадим Важенин хум хо̄тпа потрыт сымыӈыщ ловиньтасанэ ос на̄йил постым На̄й-О̄тыранув хурияныл суссылтас. Тав ляпатэ̄т Юлия Яркина ӯнлахо̄лыс ос матыра̄ти нэ̄ хо̄тпа тэ̄лат ва̄рыс. Ты спектаклит во̄т суй, щахыл кургын суй, мо̄т сыресыр лӯргын манос са̄ӈлын суит хӯнтлысанӯв. Тот звукорежиссёр о̄с ёмщаквег рӯпитас. Яныгпо̄ль э̄тпост соссаӈ артистанув ты ёнгиланыл Санкт-Петербург ӯст «Арлекин – 2013» нампа фестивалит суссылтасаныл. Са̄ртын жюри хо̄тпат са̄в театрытын щё̄питым 65 спектакль суссыт. Та̄н тувыл туп нёлолов спектакль э̄лаль каснэ ма̄гыс пе̄риясыт. «Дети неба» нампа ма̄н спектаклюв о̄с тув во̄ввес. Ань ты касылыт ма̄хманув нила номинацият но̄хпатсыт. Тыи «Лучшее художественное оформление спектакля», щар ёмас премия – «Глазами детей» ос Юрий Пронин «Лучшая работа драматурга» премиял майве̄сыт. Вячеслав Игнатов ос Мария Литвинова жюрихо̄тпатытн «Эксперимент» я̄нас премиял мӯйлуптавесы̄г. Та̄н ма̄гсыланыл ма̄н о̄с ща̄гтым о̄лэ̄в.

1051 2013.05.10. Людмила ТЕТКИНА

Та̄н культурат са̄в рӯпата ва̄ре̄гыт. Ань округувт 400 арыгкем са̄всыр культураколытт 13 со̄тыра э̄лумхо̄лас рӯпитэ̄гыт. Яныгполь э̄тпос 25 щислат ка̄ркамыг рӯпитан хо̄тпат Ханты-Мансийск ӯсн во̄виньта̄лве̄сыт. Библиотекат, музейт, культураколт рӯпитан хо̄тпат ос са̄в мо̄т ма̄хум тыт янытлаве̄сыт. Та хо̄талыт та̄н Ханты-Мансийск ӯст о̄лнэ музеит сунсуӈкве ос Геннадий Райшев, ка̄тыл хурит по̄слан хум, ёт хо̄нтхатыглаӈкве тотыглаве̄сыт. Ос итипа̄лаг искусство центрколт ма̄хум кӯщаитн янытлаве̄сыт. Алексей Путин, губернатор ва̄ӈын хум, та̄нанылн ла̄выс: «Юграв щёлыӈ ма̄, тыт са̄в ка̄ркам, ёмас, сымыӈ ма̄хум о̄лэ̄гыт. На̄н на̄нки рӯпатан ва̄рим тыт о̄лнэ ма̄хумн са̄в ща̄гт тотэгы̄н. Округувт ань яныг ӯсытт манос ма̄нь па̄вылквет библиотекат, музеит, культураколыт ӯнттавет. Ма̄н аквъёт ва̄тихал са̄всыр мирхал фестивалит, конференцият тыт щё̄пита̄лэ̄в, на̄н ты рӯпата мӯсхалыг ва̄рилы̄н. Тыима̄гсыл на̄нан яныг пӯмащипа ла̄тыӈ ла̄ве̄гум . О круг правительство акв э̄рнэ нэ̄пак ань щё̄питы, тав тох намаим о̄лы: «Стратегия развития культуры в ХМАО– Югре до 2020 года». Ты нэ̄пак хосыт ма̄н са̄всыр культура колыт округувт ӯнттуӈкве э̄лаль патэ̄в. Ос тув ма̄н акв э̄рнэ тэ̄ла хассӯв, культурат рӯпитан ма̄хум сэ̄лнэ олнаныл тах о̄с но̄хнё̄тыянӯв». Тув ёхталам ма̄хум са̄всыр янытлан нэ̄пакытыл, «Почётный грамотал», «Благодарственный пищмал» ос «Заслуженный деятель культуры» намыл майве̄сыт. Ос акв та порат грантолн вим хо̄тпат янытлаве̄сыт. Ты олн винэ ма̄гсыл ма̄хум 2012 та̄лт нэ̄паканыл ке̄тыгласаныл. Но̄хпатум лов хо̄тпа сертификатнэ̄пакыл миӈкве Людмила Алфёрова ёхталас. Ты лов э̄лумхо̄лас халт А̄с-угорский ма̄ньлат ма̄хум организацият рӯпитан а̄ги Виктория Сязи но̄хпатыс. Тав «Человек рисующий» проектэ ва̄рнэ ма̄гсыл олныл майвес. Андрей Тарханов «Иволга поёт» ня̄врамыт ма̄гсыл хансум нэ̄паке олныл о̄с та̄стувес. Еремей Айпин, округ Думат рӯпитан депутат, ма̄хум о̄с янытласанэ, Благодарственный пищмал мӯйлуптасанэ. Тав пӯмащ ла̄тыӈ ла̄выс: «Пе̄с пора та̄гыл культурат рӯпитан ма̄хум мощща олныл ойтавет. Та̄н акваг тэ̄та̄л о̄лым, са̄в ёмас нэ̄пакыт хассыт, са̄в нё̄тнэ хурит по̄сласыт ос э̄ргынта̄ныт хассыт. Ань ма̄н ты нэ̄пакыт ловиньтыянӯв , музыка хӯнтлэ̄в ос хурит сунсуӈкве музейн ялантэ̄в. Э̄лумхо̄лас хунь сыме э̄тгалаве, то̄нт ёмащакве номсахтуӈкве ве̄рми, хунь тэ̄г ос со̄рге та̄гиньты, нёвсуӈкве ат ве̄рми, номсахтуӈкве ат таӈхи. Ам ты урыл таима̄гсыл потыртэ̄гум, на̄н ань культурат рӯпитым ос мощща олн сэ̄лым, улпыл, мощ тэ̄та̄л о̄лэгы̄н, тыщирыл са̄в э̄рнэ тэ̄ла ос ща̄гт мир тотэгы̄н. Ты ощхуль ла̄тыӈ пӯмащ ма̄гсыл ла̄выслум. Ма̄н ань мо̄т порат о̄лэ̄в, ка̄сыӈ хо̄тпан ёмащакве тэ̄ӈкве э̄ри. Ань культуранув урыл ат ёрувлэ̄в, на̄н пуссын сэ̄лум олнаны̄н но̄х тах нё̄тавет. То̄нт на̄нтыгыл са̄внув рӯпата тах ва̄регы̄н». Тав ма̄ньщи ос ханты пе̄с йис ва̄рмалит э̄лаль тотнэ ма̄хум янытлан нэ̄пакыл мисанэ. Ты ма̄хум халт Виктор Журавлёв, «Югра» телекомпаният рӯпитан хум, янытластэ. Тав «Северный дом» нампа передачат са̄в та̄л кӯщаиг о̄лы. Тот рӯпитан ма̄хум соссаӈ хо̄тпат культураныл, о̄лупсаныл, та̄рвитыӈ ва̄рмаляныл урыл потыртэ̄гыт. Са̄в ма̄хум ты передача сунсэ̄гыт. Валентина Перова, Саранпа̄вылт искусство школат кӯщай нэ̄, тыг о̄с во̄виньта̄лвес. Та школат ня̄врамыт са̄ӈквылтапыл са̄ӈквылтаӈкве, ма̄ньщи э̄ргыт э̄ргуӈкве ос йӣквуӈкве ханищтавет. Ня̄врамыт ханищтан нэ̄ о̄с э̄сгын нэ̄пакыл майвес. Аграфена Сопочина Сургутский районныл тыг ёхталас. Тав та районт о̄лнэ соссаӈ ма̄хманэ ма̄гсыл са̄всыр кӯщаит ёт са̄в та̄л воритоты. Ханты э̄ква акваг нефтяникыт ёт потыртахты, такви ма̄хманэ уркуптаӈкве щар ат мыг. Аграфена Сопочина пе̄с йис ма̄т са̄лыянэ ӯрим о̄лы ос А̄с-угорский институтыт рӯпиты. Ханты ла̄тӈыл сургутский диалетыл ханищтан нэ̄пакыт хансы. Еремей Айпин ты э̄ква о̄с янытластэ. Культурат са̄в та̄л рӯпитам яныгпа̄ла хо̄тпат ялпыӈ хо̄талын о̄с во̄виньта̄лве̄сыт. Та̄н о̄с пуссын янытлан нэ̄пакыл майве̄сыт. Евлампий Осокин хо̄нтлаӈкве ялум о̄йка, ос война юипа̄лт налыман арыгкем та̄л культурат рӯпитас. Тав «Почётный грамотал» майвес ос 9 май кастыл янытлавес.

1051 2013.05.10. Тамара МЕРОВА

Йис о̄лупсаныл э̄руптыяныл. Ам Варъёган па̄вылн ялмум порат интернатыт о̄лнэ соссаӈ ня̄врамыт ёт ва̄йхатсум. Та̄н оманыла̄тяныл во̄рт о̄лэ̄гыт ос а̄гирищитпыгрищит тув ханищтахтуӈкве тотыглавет. Ам кит пыгрищаквег потранэ̄н на̄нан толмащласагум. Тэ̄н хотыл ёхтысы̄г, во̄рт о̄лнэ сыс маныр ва̄ре̄г, тыт хумус о̄лэ̄г, та урыл потыртасы̄г. – А̄нумн нёлолов та̄л, тыт о̄выл классыт ханищтахтэ̄гум. Омагума̄тягум во̄рт са̄лыт янмалтэ̄г. Тэ̄н ётэ̄н кит а̄пщиягум ос акв ма̄нь йигрищкем тот о̄лэ̄гыт. Та̄н та̄ланыл ка̄сум холы, ос тахольт каникулыт а̄тямн юв тотыглавем. Стойбищав мус ма̄шинал манос «Бураныл» яласэ̄в. Во̄рт о̄лнэ па̄влув Покачи ӯс ляпат о̄лы. Ос та ӯст ханищтахтуӈкве ос о̄луӈкве ма̄навн та̄рвит. Аган па̄вылт интернат лаппантвес, таима̄гыс ман, соссаӈ ня̄врамыт, пуссын тыг ке̄твесӯв. Ань та̄лохса сыс Варъёган школаинтернатыт о̄лэ̄гум. Арсений ос Кирилл, ам ётум ханищтахтын пыгрищиг ёт, румалахтасум. Ка̄сыӈ хо̄тал нила урокыл ва̄раве̄в. А̄нумн математика ханищтаӈкве ос окружающий мир урок мӯсты. Акв колнакт о̄лнэ яныгнув юртанумн ищхӣпыӈ утыл рӯпитаӈкве ханищтавем. Ты Артём нёлолов классыт ханищтахты, Андрей онтоловит классыт ос Сергей лов классыт. Ма̄нки халувт хосат та̄гыл ва̄йхатэ̄в ос пуссын акваннё̄тхатэ̄в. Ханты ла̄тӈум ам ва̄глум, ма̄н юн омава̄тяв ёт потыртэ̄в. Стойбищат о̄луӈкве сака ёмас ос пӯмыщ. Ма̄н коныпалув тот ат ще̄мья о̄с о̄лэ̄гыт. Сергей Тылчин – Ам Ватьеган я̄ тольхыт о̄лнэ ма̄ныл тыг ёхтысум. Ты а̄тям тав самын патум ма̄тэ, ты ма̄в Покачи ӯсныл са̄т ве̄рыстат о̄лы. Варъёган школат лов классыт ханищтахтэ̄гум. Ма̄н тыт хӯрум а̄пщиянум ос йигрищум интернатыт о̄лэ̄в. Юн са̄лы ма̄нки ань ат о̄ньще̄в, а̄тям ос о̄ньгум хӯл алыщлэ̄г ос во̄рае̄г. Аким тав са̄лы янмалты, тэ̄н таве̄н нё̄тэ̄г. Тувыл сасгум о̄с са̄лы о̄ньщи. Тот о̄лнэ ма̄вт рӯтанум ат кол ӯнттысыт. Ня̄врамыт нила класс мус ханищтахтын колыл ва̄рве̄сыт. Ам са̄ртын о̄с тот ханищтаве̄сум. Тувыл Аган па̄вылн ке̄тыглавесӯв, мо̄лты та интернатув лаппантвес. Ты та̄л тыг тотвесӯв. Та школат ханищтам хо̄тпанум акваг номиянум: Ольга Валерьевна Тэвлина, Лидия Николаевна Айваседа, Лидия Фёдоровна Сидорова ос Людмила Николаевна Каюкова. Та̄н ма̄нав ханты ла̄тӈыл ёмщакв потыртаӈкве ханищтасаныл. Та̄нанылн пӯмащипа ла̄тыӈ ла̄ве̄гум. Омам ос а̄тям ты кос сас ханты хо̄тпаг, ос ма̄н юн матрыг акваг рущ ла̄тӈыл потыртасӯв. Варъёган школан ос интернатын ущ ханьщувлаӈкве патсӯв. Тыт а̄пщиянум, йигрищум ёт пуссын акв ляпат о̄лэ̄в. Мо̄т ня̄врамыт ёт ань о̄с румалахтасӯв. Тэ̄лы ӯщлахтын порат «Бураныл» юв тотыглавесӯв. Са̄ртын Аган па̄вылныл о̄лнэ ма̄в мус атпанкем ве̄рыста минуӈкве э̄рыс. Ань тыгыл хо̄тпан ве̄рыста минэ̄в. Юн хӯлпыл хӯл алыщлэ̄в. Ань моторха̄пыл амки яласаӈкве патсум. Мо̄лты та̄л а̄тям ёт во̄раяӈкве ялсуме̄н. Писалил о̄выл щёс майлуве̄сум, та̄ра ва̄с па̄тамтасум. Янгуй ка̄тынпаттуӈкве хум хо̄тпат та̄нки ялантэ̄гыт. Ты школат ам «Охотоведение» ос «Краеведение» кружокын хасхатсум. Сака пӯмыщ, са̄всыр э̄рнэ ва̄рмалит та̄рапаттыянум. Туи во̄рт о̄лмув сыс ма̄н ма̄ке̄в тахольт яныг на̄йн ат ёхталавес. На̄й мощ по̄ханыл минас. Ма̄н о̄лнэ ма̄вныл э̄лаль сунсуӈкве ке, тыгыл Аган я̄ хосыт, ат ве̄рыстат на̄й тэ̄с. Тахольт ма̄н ляпавт ма̄во̄й ат хилаве ос матъёмас нефтяникытныл э̄лыннув о̄лэ̄в, таима̄гыс во̄рув ляпат по̄х хо̄тпат сака ат яласэ̄гыт. Ма̄ке̄в иӈ сыстамыг о̄лы.

1051 2013.05.10. Тамара МЕРОВА

Хурит по̄слын юртхумыг. Ханты-Мансийскат Г. С. Райшев рӯпитан галлерея колэ̄т «Берега» нампа суссылтап ва̄рвес. Тот Алексей Бачурин ка̄тыл по̄слум хуриянэ ма̄хумн суссылтавет. Ты хум Екатеринбург ӯсныл тыг ёхтыс ос искусство колледжит а̄гитпыгыт по̄слуӈкве ханищтыянэ. Геннадий Райшев ос Алексей Бачурин ка̄тыл по̄слум хуриянэ̄н мощ аквхурипаг сусхатэ̄гыт. На̄н тэ̄н по̄слум картинанэ̄нт ма̄вит, сыресыр пормасыт ос э̄лумхо̄лас ма̄к хурияныл ат ка̄салыяны̄н. Тэ̄н сас тэ̄нки щирыл по̄слэ̄г. Щуртмиланэ̄н са̄всыр о̄льпыл сартыянэ̄н. Тувыл по̄слум утанэ̄н нупыл хоса сунсуӈкве ос номсахтуӈкве ке, то̄нт ущ хурияныл та̄рапатэ̄гыт. Ань ты йильпи искусство урыл потыртаӈкве тэ̄н сас ӯсыӈ ма̄хум ёт хо̄нтхатыгласы̄г. Алексей Бачурин ма̄хумн китыглавес, тав суссылтапе манрыг «Берега» ла̄тӈыл намтыстэ. Тав ювле потыртас: «Ме̄н Геннадий Степанович ёт, насати, сас я̄ ва̄тат ӯнлахо̄луӈкве сака тахнэме̄н. Нё̄тнэ ма̄виткве, нас вит нупыл пӯмщалахтым сунсуӈкве, витэ хоталь нупыл овты, я̄ мо̄тпал ва̄татэ сунсыглым, тыи ме̄н ме̄нки щирме̄нтыл э̄лаль по̄слыянме̄н. То̄ва суссылтан хуриянум ам Ханты-Мансийскат 2009 та̄лт «Большая вода» о̄лум фестиваль порат по̄слысанум».

1051 2013.05.10. Светлана Садомина

Ӯринэ̄квав Эстоният хӯрум хōтал янытлавес. Эстоният ма̄н Ӯринэ̄ква хōталув хӯрум хōтал сыс мӯйлувес. Тув хӯрум хōтпа ялсыт: Татьяна Мерова, Любовь Зорина, Светлана Динисламова. Ӯринэ̄ква хōтал мӯйлын ва̄рмаль Эстоният титынтыг ты ва̄раве, та минам та̄лт тув ханты хōтпат ялсыт, ты та̄л ма̄ньщи хōтпанув тув во̄виньта̄лве̄сыт. Ма̄ньщи хōтпат ща̄гтым молях атапахтасыт, яныгполь э̄тпос 7 щислат СанктПетербург ӯсн товлыӈха̄пыл та минасыт. Тот визанэ̄паканыл кӯстырыг, тагапан та̄л, ва̄рапасаныл, 10 щислат автобусыл Эстония Таллинн ӯсн та ёхтысыт. Таллинн ӯсн ёхтуманылт – хум хо̄тпан, тав наме Яак Прозес, гостиницан тотве̄сыт, тувыл та̄ранув Музыка колн концерт ва̄руӈкве та ва̄нттаве̄сыт. Музыка колт яныг колнакт каминыг ла̄внэ нё̄тнэ щовал ва̄рим о̄лы, ма̄ньщи нэ̄т щовал па̄лтсаныл, на̄йкве по̄хат концертаныл та о̄вылтасаныл. Са̄ртын та̄н хӯрум ла̄тӈыл: ма̄ньщи, эстонский ос рущ ла̄тӈыл пащалахтасыт, та̄нти уранылт аквтит ла̄тыӈ ла̄всыт ос кина суссылтасыт. Ты Татьяна Мерова тав по̄слум кинатэ, тот Галина Константиновна Алгадьева суссылтавес. Ты э̄лыпа̄лт Татьяна ла̄выс: «Я̄тил миркве! Ма̄н ма̄ньщи мирув такви о̄лнэ ма̄тэ̄т о̄лнэ те̄м о̄лы, на̄н ань на̄нти ка̄салэгы̄н: хумус ма̄нь па̄вылт ма̄хум о̄лэ̄гыт, маныр ва̄ре̄гыт, маныр ма̄щтырлэ̄гыт » Кина ма̄ньщи ла̄тӈыл о̄лыс, ос атхатам мирн нэ̄матыр толмащлаӈкв ат э̄рыс – та̄н Галина Константиновна нупыл сунсым, та̄нти торгамтасаныл: ма̄ньщи мирув ёмасыг о̄лы, ма̄хум та̄нти ща̄нь ла̄тӈыл потыртэ̄гыт, э̄ргыт э̄рге̄гыт, нё̄тнэ пормасыт ю̄нтэ̄гыт. Кина а̄стум юипа̄лт Светлана Динисламова ма̄ньщи мир урыл ла̄тыӈ ла̄выс, Ӯринэ̄ква урыл ма̄хумн потыртас. Тувыл тит ма̄ньщи хо̄тпаг – э̄кваго̄йкаг Марья ос Юван сценан та нэ̄глапасы̄г, тэ̄н татемта пӯмщиг ёнгысы̄гэ̄ргысы̄г, ма̄хум маттем ка̄тпатта та ра̄тсыт. На̄н улпыл та̄ра паттыслын: сценка Татьяна Мерова ос Любовь Зорина ёнгысы̄г, тэ̄н щар артистканэ̄г олнэтэ̄н. Ты юипа̄лт хӯрум ма̄ньщи нэ̄т пӯрлахтын пасан щё̄пита̄лсыт, са̄всыр тэ̄п а̄нысупытн пинсыт, хӯрум ща̄рка ӯнттысыт, со̄с косамтасыт, тувыл ма̄ньщи ла̄тӈыл Ӯринэ̄ква янытлан ла̄тыӈ С. Динисламова ла̄выс, ты ла̄тӈыт рущ ла̄тӈыг Татьяна Мерова толмащласанэ. Ла̄тӈыт тох ты о̄лсыт: «Ты та̄л Ӯринэ̄ква а̄квув мо̄ртым хумпа хумпыӈ ма̄ныл Эстония ма̄т о̄лнэ саӈквлыпил са̄т я̄ӈкыл манисуӈкве матъёмас номылматам. Ты нё̄тнэ ма̄т, ты щуниӈ ма̄т ма̄нь а̄ги, ма̄нь пыг са̄в вос нёвитануве, са̄в вос янмалтануве. Ты хосыт тах Ӯринэ̄ква по̄лим ла̄глаге, по̄лим ка̄таге та̄н са̄п анянылт толтыглыянэ, ре̄гылттыянэ » Со̄лькве, Эстония ма̄хумн ты ла̄тӈыт хӯнт амлаӈкве пӯмыщ о̄лыс, та̄н кӯньгиммовала̄лым хӯнтласыт, тувыл ка̄сыӈ хо̄тпа йӣв товытн а̄ссын тагатас ос пӯрлахтам тэ̄п а̄рталасыт, ща̄ркат ка̄тын вуйласыт. Ты юипа̄лт та̄н ма̄ньщи нэ̄т ёт йӣквсыт, титыглахтасыт: хумус ман мирув о̄лы, хо̄т ма̄хум рӯпитэ̄гыт, маныр ва̄ре̄гыт. Тамле концерт тит щё̄скем минас, ма̄ньщи нэ̄т концертаныл хӯрум ӯс щирыл ва̄рсаныл. Титыт хо̄тал та̄н Тарту ӯст ма̄хум пӯмщаласыт, тот Ӯринэ̄ква яныг Музеит янытласаныл; хӯрмит хо̄тал мир Варна ӯст атхатыгла̄лсыт, тот библиотекат ёнгын кол ва̄рыглавес. Ка̄сыӈ ма̄т ма̄ньщи нэ̄т ёт корреспондентыт потыртасытта̄н учёный хо̄тпат ёт, писателит ёт, кӯщаит ёт хо̄нтхатыгла̄лсыт. Са̄в ёмас ла̄тыӈ тан хӯнтласыт, са̄в ёмас ла̄тыӈ та̄н та̄нти Эстония ма̄хумн ла̄всыт. Ань ма̄ньщи нэ̄т юв, та̄нти о̄лнэ ма̄нанылн ёхтысыт, ка̄сыӈ хо̄тал Эстонияныл пищмал ёхтавет. Маныр ла̄вуӈкве хо̄йхаты? Ма̄ яныт о̄лнэ мир акв Со̄рниӈ хо̄талаквен о̄лнэ лё̄ӈханыл поставет, ма̄ янытыл о̄лнэ мир акв вит ае̄гыт, акв лылые̄пыл лылтэ̄гыт. Ка̄сыӈ хо̄тпа такви ла̄тыӈ о̄ньщи, такви ма̄ о̄ньщи. Хо̄тпат та̄нти халанылт нэ̄матыр нур ат тинсэ̄гыт, нэ̄матыр лю̄ль номт ат о̄ньще̄гыт. Ка̄сыӈ ма̄т ща̄гтым ӯравет, ща̄гтым о̄ньщавет. Туп мирыт халт нэ̄матыр лю̄ль нак ул вос е̄мтапи, вос э̄лаль са̄в хо̄тал, са̄в йис юртыӈыщ о̄лэ̄гыт. Яныг пӯмащипа ла̄тыӈ Эстоният о̄лнэ Яак Прозес хумкве̄н «Лӯима̄ нэ̄т» ла̄ве̄гыт. Ос Тарту ӯст о̄лнэ хум Эдгар Саар газета хосыт пащалахтын ла̄тыӈ Евдокия Ивановна Ромбандеева ма̄гыс те̄ты. Ты хум са̄в щёс ма̄н о̄лнэ ма̄вн ёхталас, са̄в хо̄тпат ва̄г, та̄н уранылт титыглахтас, пӯмщалахтас. Эстониян ялмув ма̄гыс пӯмащипа ла̄тыӈ Ӯринэ̄квавн о̄с ла̄ве̄в!

1052 2013.05.24. Александр ВЬЮТКИН

Нила хо̄тал акв хо̄тал хольт минасыт. Ва̄с па̄тлуптан ва̄р маль округув янытыл та оигпас. Ты э̄лыпа̄л ӯйхул ӯргалан ма̄т рӯпитан тит кӯщаиг ёт прессконференция о̄лыс. А. Н. Залибеков ос Ю. В. Василенко тэ̄н сас во̄рт о̄лнэ ӯйхул ӯргалан ма̄т кӯщаиг рӯпитэ̄г. Та порат ла̄всы̄г: «Ва̄с па̄тлуптан кастыл винэ лицензия нэ̄пак Россия янытыл акв тыныл о̄лы – 420 солко̄ви». Ам хунь та нэ̄пак ма̄гсыл минасум, 840 солко̄ви ойтуӈкв ла̄вве̄сум. Тынэ урыл ам тот та̄ра титыглахтасум. Та̄н ла̄всыт: «Залибеков ос Василенко тэ̄н тэ̄нти нэ̄матыр ат ва̄гы̄г, хо̄т манырсыр тын щирыл о̄лы». Хунь тын урыл титыглахтасум, алыщлан ма̄хум о̄с а̄нумныл титыглахтасыт: «Кӯщаяныл ман со̄ль тох ла̄всыт, манос наӈ нас тох мовиньтэ̄гын? » Та̄н ты урыл ва̄ӈкв ат ва̄гыт, хӯлуӈкв ат хӯлыгласыт. Манырсыр тыныл ла̄вавет, таса̄вит та ойтэ̄гыт. Та юипа̄лт ам ва̄нэ ма̄хманум палт Сургут, Нефтеюганск ос Нягань ӯсытын тын та̄рапаттын ма̄гсыл звонитасум. Та̄н ӯсанылт ты нэ̄пак тынэ 420 солко̄ви са̄вит о̄лнэ̄тэ. Тӯяг ёхтын ва̄с та̄л ма̄н о̄луӈкв ат ве̄рме̄в. Во̄рн нила хо̄талын юрт хо̄тпанув палт Владимир Меров ёт ялсуме̄н. Победа хо̄талт ме̄н Шапша па̄выл нупыл Анатолий Вадичупов во̄раян ма̄н минасме̄н. Ва̄с ӯрмувт аквписыг лӯима̄ е̄рныл ащирма тӯйтыӈ ос раквыӈ во̄т во̄тыс. Улпыл таима̄гсыл ты во̄раян сыс яныг аняӈ ва̄с щар ат ва̄сув. Торыӈ щирыл ва̄с па̄тлуптаӈкв ат а̄ртмалас. Тӯрт вит ва̄та я̄ӈкыл по̄лиглавес, хо̄тыл о̄с няӈра ащирмаӈ во̄тл во̄тыс. Ла̄вуӈкве те, ва̄с ӯрнэ ва̄рмаль ты та̄л щар ат а̄ртмыс. Ты пор ва̄с па̄тлуптан ва̄рмаль мощ ётылнув ва̄руӈкв кос э̄рыс.

1052 2013.05.24. Галина КОНДИНА

Мӯй нэ̄ мощщаг хультум мирытыл пӯмщалахты. Финляндияныл ма̄н ма̄вн мӯй ма̄хум ёхталасыт. Хелена Аутио Мелони, Москва ӯст посольстват рӯпитан нэ̄, соссаӈ мир Ассамблеян во̄виньтавес. Тот хӯрум депутатанув Е. Айпин, Н. Алексеева ос А. Филипенко тав ётэ потыртасыт. Хелена ла̄выс, та̄н та̄нти щирыл о̄лнэ ма̄хум, тыг ёхтыс сунсуӈкве, хумус мощщаг хультум мирыт мо̄т яныг мирыт халт о̄лэ̄гыт. Хумус та̄н культураныл э̄лаль тотыяныл, та̄нти ла̄тӈыл потыртэ̄гыт, манхурип та̄рвитыӈ ва̄рмалит о̄ньще̄гыт. Тамле яныг округт акв миллион атса̄т со̄тыра э̄лумхо̄лас халт туп хус со̄тыра соссаӈ хо̄тпа о̄лэ̄гыт. Еремей Данило вич ювле потыртас, соссаӈ мир Ассамблея хо̄тхуйплов та̄л рӯпиты, ты сыс соссаӈ ма̄хум ма̄гсыл са̄в са̄ккон пирмайта̄лвес, то̄ват хотарыгтаптуве̄сыт. Ань ма̄н ма̄гсылув титхуйплов са̄ккон о̄лы. Ты ща̄нь ла̄тыӈ ӯргалан са̄ккон, пе̄с йис э̄ргыт, мо̄йтыт, потрыт, ялпыӈ ма̄т, общинат, са̄лы ӯрнэ ма̄хум ма̄гсыл ос мо̄т са̄кконыт хансым о̄лэ̄гыт. Ты коныпал округувт атпан нупыл нёлолов са̄кконт о̄с я̄нас ло̄мтыт ма̄ньщит, хантыт ос ё̄рныт ма̄гсыл хасве̄сыт. Россияв янытыл нэ̄мхот ты ма̄т тыса̄вит са̄ккон а̄тим. Ма̄н округ Думавт таи ёмас, хунь матхурип са̄ккон щё̄питаве, Ассамблея депутатыт номтаныл ат те паты, тав э̄лаль ат пирмайтаве. Тув ат ро̄внэ ла̄тӈыт хунь мӯсхал щирыл хансавет, то̄нт ущта пирмайтаӈкве та̄ртаве. Ты урыл Дума Устав нэ̄пакт тох хансым о̄лы. Хелена ёт театрыт рӯпитан ма̄хум ёхталасыт. Та̄н тыт ӯст Еремей Айпин хансум потре щирыл спектакль суссылтасыт. Ты урыл мо̄тыт газетат тах ловиньтэ̄н.

1052 2013.05.24. unknown author

Во̄рув ӯргалым о̄ньщелы̄н. Я̄ӈк на̄тнэ э̄тпос нилахуйплов хо̄талныл округувт во̄р ӯргалан ва̄рмаль о̄вылтавес. Ты урыл природный ресурс ос несырьевой сектор экономика департаментныл ла̄тыӈ те̄твес. Мо̄лты тув сыс сака са̄в ма̄т во̄рув на̄ин та̄йвес. Таима̄гыс ты та̄л на̄й харыгтан са̄в хо̄тпа рӯпитаӈкве вуйвес. Ань округув янытыл 1005 хо̄тпа ты рӯпата ва̄руӈкв патэ̄гыт. Са̄всыр ма̄шинат ос э̄рнэ пормасыт ёвтве̄сыт. Хусахтем Ми-8 вертолёт ос Ан-2 товлыӈха̄п ты кастыл щё̄питаве̄сыт. Акв ищхӣпыӈ товлыӈха̄п о̄лы, тав э̄лумхо̄лас та̄л тыламлы ос та хосыт на̄й тэ̄нэ ма̄т хо̄нтавет. Ты товлыӈха̄п рущ ла̄тӈыл «беспилотный летательный аппарат» ла̄ваве.

1052 2013.05.24. unknown author

Пенсия винэ хо̄тпат олнаныл но̄хнё̄тве̄сыт. Пенсия олн винэ ма̄хум Ханты-Мансийский Негосударственный Пенсионный Фондын ты э̄тпос олнаныл но̄хнё̄тве̄сыт. Ты кастыл яныгполь э̄тпост округ правительство кӯщаянув пенсият ос социальный пособият 5, 5 процентын но̄хнё̄тнэ ма̄гсыл нэ̄пак хассыт ос округ думав таве пирмайтасаныл. Ты олныт ма̄хум «губернаторский» олныг ла̄вияныл. Ань ты олныт та̄л о̄вылтахтам па̄сныл ловиньтавет ос я̄ӈк на̄тнэ э̄тпост (нила э̄тпос сыс) ойтавет. Хӯрум та̄л сыс ты олныт акваг но̄хнё̄тавет. Ханты-Мансийский НП Фондыныл 200 со̄тыр хо̄тпа пенсияолныл ойтавет. Та̄н Россияв янытыл о̄лэ̄гыт. Хуньт тыт рӯпитасыт ос ӯщлахтуӈкв минаманыл порат мо̄т ма̄н о̄лмыгтасыт. Йильпи са̄ккон щирыл тыт округувт ро̄ви ат о̄луӈкве.

1052 2013.05.24. unknown author

Па̄вылн миннэ ле̄ккарыт олныл ойтавет. Наталья Комарова, губернаторув, такви ва̄ӈын хо̄тпанэ ка̄сыӈ са̄т акванатыглыянэ. Тот та̄н са̄всыр постановление ос распоряжениела̄тыӈ пирмайтэ̄гыт. Ань тамле сапра̄нит кӯщаит ма̄ньлат ле̄ккарыт ма̄гсыл хансым нэ̄пак урыл потыртасыт. Ханищтахтын ма̄ныл а̄стын ма̄ньлат хо̄тпа па̄вылн ле̄ккарыг рӯпитаӈкве ке мины, тав акв миллион солко̄вил ойтаве. Рущ ла̄тӈыл ты олныт «подъёмныиг» ла̄вавет. 2012 та̄л сыс 22 ма̄ньлат ле̄ккар са̄всыр па̄влытн ма̄хум пусмалтаӈкве минасыт. Ань йильпи пирмайтым нэ̄пак щирыл ма̄нь ле̄ккарыт олныл о̄с нё̄туӈкве патавет. Акушерыг ос фельдшерыг ханищтахтын ма̄ньлат а̄гитпыгыт хоты ма̄нь па̄вылн рӯпитаӈкве ке минэ̄гыт, та̄н о̄с 500 со̄тыра солко̄вил тах мивет. Наталья Комарова ла̄выс: «Ты та̄л сыс округ янытыл ма̄нь па̄вылкветт йильпи ФАПыт та хӯнттавет. Ма̄ньлат хо̄тпат йильпи пӯльницан рӯпитаӈкве вос ёхтэ̄гыт». Тамле пӯльница по̄хыт ӯнттым колытт па̄вылн ёхтум ле̄ккарыт о̄лнэ̄ колыл мивет. Аквта сапра̄нит ма̄хум о̄с акв нё̄тмил урыл потыртасыт. Пирмайтым нэ̄пак щирыл 16 ӯсыт ос районыт олныл та̄ставет. Та̄н халанылт акв миллиард солко̄ви ла̄кквауртаве. Ты хосыт та̄н мир ма̄гсыл рӯпитан ма̄хум сэ̄лнэ олнаныл но̄хнё̄тыяныл. Ма̄шинал яласан лё̄ӈхыт урыл потыр о̄лыс. Ты рӯпата ма̄гсыл ань о̄с яныг олн та̄стувес. Ты та̄л та̄стым олнытыл Вах я̄ ӯлтта унсах ва̄раве. Ос ты коныпал о̄с са̄в лё̄ӈхыт ёмащакв щё̄питавет.

1052 2013.05.24. Тамара МЕРОВА

Пыгыт лусытаӈкве тотве̄сыт. Мо̄лал ля̄ххал тотнэ хо̄тпат Юрий Буров, округувт рӯпитан комиссаркӯщай, ёт хо̄нтхатыгласыт. Хум журналистытн ма̄ньлат пыгыт лусытан о̄вылтыт ос Победа янытлан хо̄тал урыл китыглавес. Тав ювле маныр ла̄выс, потре э̄лаль ловиньтэ̄лын. Яныгпо̄ль э̄тпос о̄выл хо̄талэ̄ныл ма̄ньлат пыгыт армиян винэ э̄лыпа̄лт ле̄ккарытын сунсуӈкве патве̄сыт. Округ янытыл 22 комиссия рӯпитасыт. Ань Югра ма̄вныл 1 со̄тыра 427 пыг армиян минэ̄гыт. Ты э̄тпос атхуйплов щислат о̄выл атхуйплов пыг Президентский нампа полкын лусытаӈкве тотве̄сыт. Мо̄таныт лӯпта э̄тпост тах ке̄тавет. Ма̄н пыганув са̄всыр ӯсыӈ манос па̄влыӈ ма̄н тотавет. Ос пыгыт хоталь вивет, округ комиссар ос мо̄т военный хо̄тпат ат ва̄ганыл. Тамле ва̄рмалитыл Генеральный штабт рӯпитан ма̄хум та̄нки кӯщайлахтэ̄гыт. Та кӯщаитн ла̄тӈыл ке̄тавет, округныл манаса̄вит пыг армиян атуӈкве э̄ри, та̄н тащирыл э̄лаль та рӯпитэ̄гыт. Тувыл ма̄н са̄лтатанув янгыщ пуссын то̄сам ма̄ тармыл лусытэ̄гыт, ос хӯрумса̄т са̄вит пыг Морфлотын во̄вавет. Ос сака та̄ксар ма̄ньлат хо̄тпат ВДВ, ФСБ, ДРУ нампа ма̄н вивет. Тот пуссын ёмщаквег ханищтавет. Военный армият лусытаӈкв ат тахнэ пыгыт нас рӯпитан щирыл патхатэ̄гыт. Рущ щирыл тав «альтернативный службаг» ла̄ваве. Тох ма̄ньлат хо̄тпат пӯльницан рӯпитаӈкве вивет, колкан ловтнэ манос мо̄т рӯпатан ке̄тавет. Тыт то̄ва пыгыт Нижневартовскат матумпа̄ла ос а̄гмыӈмосыӈ, сакватахтам хо̄тпат о̄щнэ интернатколт рӯпитэ̄гыт. Ос армияныл тӯйтыглахтын хо̄тпат та̄н та̄нки ат кинсыяныл, таима̄гыс то̄ва пыгыт лусытан та̄ланыл то̄влынэ̄ныл мус (ва̄т нупыл са̄т та̄л) хо̄т тӯйтыглахтэ̄гыт, тувыл армиян воссыг ат вивет. Военный комиссариат ань полиция ос УФМ службаг ёт акваннё̄тхатым рӯпитаӈкве ла̄вхатсыт. Ма̄ньлат пыгыт нэ̄мхо̄т ат ке лусытэ̄гыт, та̄н государство па̄лыл нэ̄матыр нё̄тмилыл ат мивет манос тамле хо̄тпа ётыл кӯщаиг рӯпитаӈкве тах ат та̄ртаве. Та та̄ланэ то̄влын мус туп сутытым хо̄тпа армиян ат виве.

1052 2013.05.24. unknown author

Тот титыглахтуӈкве ро̄ви. Мо̄лалнув па̄сныл округувт Единый информационносправочный служба ва̄рвес. Ань ка̄сыӈ хо̄тпа тув свонитаӈкве ве̄рми, тав тот хӯлтаве, хоты департаментыт манос хоты кӯщай ёт потыртаӈкве ве̄рми. То̄ва э̄лумхо̄лас щар ат ва̄гтэ, такви та̄рвитыӈ ва̄рмалянэ ёт хоталь минуӈкве, хотьют титыглаӈкве. Ань 8-800-100-8472 телефон хосыт свонитаӈкве ве̄рмегы̄н. Тыи ма̄гыс олн щар ат виве, ще̄пт о̄щнэ телефоныл те потыртэгы̄н, о̄с олн щар ат пуваве.

1052 2013.05.24. Людмила ТЕТКИНА

Москваныл ёхталам кӯщай. Александр Сергеевич Галушка «Деловая Россия» нампа организацият рӯпитан кӯщай хум Ханты-Мансийск ӯсн ёхталас. Ты организация 2011 та̄лт я̄ӈк на̄тнэ э̄тпост рӯпитаӈкве о̄вылтахтас. Тот «Почта России, «Российские железные дороги» ос мо̄т са̄всыр организацият акваннё̄тхатым рӯпитэ̄гыт. Александр Галушка округ кӯщаит ёт хо̄нтхатыглас ос са̄всыр рӯпата урыл та̄н ётаныл потыртас. Ос тыт предпринимателит хумус рӯпитэ̄гыт, ты урыл тав о̄с пӯмщалахтас. Югра ма̄вт манаса̄вит ма̄во̄й но̄хвиве, ты урыл округ губернатор ва̄ӈын хум Александр Ким ла̄тыӈ ла̄выс. Ма̄н округув ты рӯпатал са̄в олн сэ̄лы. Юио̄выл хӯрум та̄л сыс акваг мощщанув ма̄во̄й но̄хвиве. Округувт 16 ӯс о̄лы, та̄н туп ты рӯпата ва̄рим олн сэ̄лэ̄гыт. Ты ӯсытт ос округув янытыл мир хумус э̄лаль о̄луӈкве паты, ань номсахтуӈкве э̄ри. Тыима̄гсыл тамле предпринимателит тыт о̄с сака э̄ре̄гыт. Ты та̄л сыс Россия янытыл 450 со̄тыра предпринимателит рӯпата та̄л хультсыт. Та̄н пуссын та̄нки рӯпатаныл хосыт ще̄мьяныл тыттысаныл ос та̄н палтаныл рӯпитам хо̄тпат о̄с по̄хын та ке̄тсаныл. Ты яныг та̄рвитыӈ ва̄рмаль урыл та̄н Россия Президентын потыртасыт. Ты ма̄хум ва̄рмаляныл хотёрувлаӈкве ат ро̄ви. Та̄н мӯсхалыг ке рӯпитэ̄гыт о̄с са̄в олн сэ̄лэ̄гыт, Россияв ты хосыт о̄с щёлыӈыг е̄мты. Ты юипа̄лт кӯщай хум ля̄ххал тотнэ ма̄хум ёт хо̄нтхатыглас. Ос та̄нки организацияныл ва̄рнэ рӯпататэ урыл потыртас. Лӯпта э̄тпост та̄н яныг съездын тах атхатыглэ̄гыт, то̄т ка̄сыӈ ка̄сащан э̄лумхо̄лас «Общественный народный фронд» нампа организациян хасхатуӈкве ве̄рми. Ань тув са̄всыр партият хансым о̄лэ̄гыт.

1052 2013.05.24. Людмила ТЕТКИНА

Яныг ӯст о̄лум суссылтап. Ты э̄тпост «Сокровища Севера – 2013» нампа суссылтап Москва ӯст рӯпитас. Ма̄н округувныл ма̄хум ма̄ньщи, ханты са̄всыр пормасыт, маснутыт суссылтаӈкве ос тэ̄нут тыналаӈкве тув ялсыт. Тув хо̄т община «Колмодай», «Росомаха», «Обь», «ВерхнеВахская», «Лангки», «Регион-К» во̄виньта̄лве̄сыт. Та̄н нё̄выль, хӯл, пил, ла̄хыс, па̄квсам ос са̄в мо̄т тэ̄нут тот тыналасыт. Тув тотыглам тэ̄нутаныл ат хо̄тал сыс пуссын тыналасаныл. То̄ва общинат 150 со̄тыра солко̄ви сэ̄лсыт, мо̄таныт тыгыл са̄внув 400 со̄тыра солко̄ви. Ма̄щтыр хо̄тпат та̄нки ва̄рум, ю̄нтум, сагум пормасаныл суссылтаӈкве тув о̄с тотыгласаныл. Тот турло̄псыт, пальсакыт, са̄сныл ва̄рим са̄всыр то̄тапыт, ра̄ктыл по̄щгим а̄ныса̄ныт сусылтаве̄сыт ос тыналаве̄сыт. Ма̄щтыр хо̄тпат суссылтапын ёхталам ма̄хум ма̄щтырлаӈкве ханищтасаныл. Та̄н сакныл хорамыт хартсыт, а̄канит ю̄нтсыт ос мо̄т са̄всыр щирыл ма̄щтырласыт. Суссылтап рӯпитам сыс округ ма̄хманув тот янытлаве̄сыт. Тыгыл тотыглым выставка «Диплом I степени» нэ̄пакыл майвес. Ты коныпал ка̄сыӈ ма̄щтыр хо̄тпа о̄с янытлан нэ̄пакыл мӯлуптавес.

1052 2013.05.24. Николай Меров

Па̄вылт рӯпитан миркол хум. Ха̄льӯс район Саранпа̄вылт миркол кӯщаиг Николай Никитович Артеев китыт та̄л рӯпиты. Тав тув пе̄риим порат та̄ра ма̄нь па̄влытын ялыс. Сунсыс, хумус тот ма̄хум о̄лэ̄гыт, маныр ва̄рмаль та̄н о̄ньще̄гыт. Ты э̄лыпа̄лт Николай Никитович мо̄т ма̄т о̄лыс. Университет а̄стламе юипа̄лт хӯрум та̄л Саранпа̄выл школат кӯщаиг рӯпитас. Тувыл ос ня̄враманэ̄н тот о̄луӈкве ат а̄ртмыс. Таима̄гыс тав ще̄мьяӈ та̄гыл мо̄т ма̄н о̄луӈкве ва̄нтлыс. Та па̄сныл пуссын аквъёт ва̄т нупыл са̄т та̄л па̄вылт а̄т о̄лыс. Ань ня̄враманэ пуссын янгыт, та̄нки ще̄мьяӈыг е̄мтсыт. Хум яныгмам ма̄тэ та̄л ка̄сэ холас, таима̄гыс ювле ёхтыс. Тав хунь Саранпа̄вылн ёхтыс, тот миркол кӯщай пе̄риян пора ляпамас, тав о̄с тув пе̄рияхтуӈкве номылматас. Э̄рнэ нэ̄паканэ атсанэ. Мощ о̄лыс, пе̄рияп та е̄мтыс. Тав тот о̄лнэ мирн ёмщакв ва̄ве. Таима̄гыс па̄влыӈ ма̄хум са̄внув нэ̄пак тав ма̄гсылэ та̄ратасыт. Николай Никитович тох ла̄выс: «Ам ма̄нь па̄влыт ма̄гыс сымум сака ща̄рги. Таима̄гыс тыг ёхтысум, матыр э̄рнэ тэ̄ла ма̄хум ма̄гыс ва̄руӈкве таӈхе̄гум. Та̄н о̄лупсаныл кӯпнитнувег ке ва̄рилум, а̄нумн ёмас паты. Хумус ве̄рме̄гум, таил нё̄тэ̄гум. Ма̄нь па̄влыт но̄хво̄рмалтаӈкве э̄ре̄гыт. Сӯкыръя, Сортыӈъя, Ло̄пмус ос мо̄т ма̄нь па̄влытт са̄в та̄рвит ва̄рмаль о̄лы. Пе̄с порат ма̄хум акваннё̄тхатым о̄лсыт. Па̄влытт мирн пуссын рӯпата о̄щсыт. Ӯйхул янмалтасыт, хӯл алыщласыт ос во̄раим яласасыт. Ань торыӈ рӯпата а̄тим. Хуньт са̄в мирн о̄лым па̄влыт ань акваг вуньщалыг патэ̄гыт, ма̄ньлат хо̄тпат э̄л миныглэ̄гыт. Ань тамле номт тотуӈкве э̄ри, ма̄хум акванюрщхатым вос о̄лэ̄гыт. Аквъёт ма̄н са̄в э̄рнэ тэ̄ла ва̄ре̄в. Э̄рыӈ ла̄щалла̄щал па̄вланув но̄хво̄рмалтыянӯв».

1052 2013.05.24. Тамара МЕРОВА

Са̄в пормас атсыт. Нижневартовскан ялмум порат ам Лариса Хайрулина, музейт рупитан нэ̄, ёт ва̄йхатасум. Ме̄н рущ ма̄хум музейколт акванхо̄нтхатсуме̄н ос тав рӯпататэ о̄вылтыт а̄нумн потыртас. Та̄н ӯсанылт краеведческий музей о̄лы. Яныг таквс э̄тпос о̄выл хо̄талэ̄т та кол 40 та̄лэ то̄влы. Лариса Алтафовна ла̄выс: Мо̄т музеит пуссын ётыл ва̄рве̄сыт. Ос ты краеведческий музей Т. Д. Шуваев намыл пиным о̄лы. Ты о̄йка тав тамле кол щё̄питаӈкве номылматас. Тимофей Дмитриевич 1970 та̄лытыт история урокыт ня̄врамытн ханищтас. Лӯима̄н о̄луӈкве ёхтуме̄т, ты ма̄ о̄вылтыт мощща ва̄с. Тувыл соссаӈ ма̄хмытыл ос та̄н о̄лупсал пӯмщалахтуӈкве патыс, такви соссаӈ ма̄хум палт ялантас, та̄н ётаныл румалахтас. Ханты ос ё̄рн ма̄хум, та̄н щёлыӈ ма̄наныл урыл ня̄врамытн потыртас. Ос тувыл тотум пормасыт а̄гитынпыгытын суссылтас. Школанылт акв колнак ва̄рсыт, пормасыт тув атуӈкве патсаныл. Ётыл Тимофей Шуваев ӯст музей ва̄руӈкве номылматас. Тав акванатум пормасанэ ань пуссын ма̄н фондувт о̄лэ̄гыт. Тыи янгыщ Нижневартовский районт о̄лнэ хантыт ос ё̄рныт та̄н пормасаныл. Та̄н хоты ма̄ныл, хотьютн ос хунь тотве̄сыт – ма̄н пуссын нэ̄пакн хассанӯв. Ты коныпал Тимофей Дмитриевич ма̄хумныл са̄всыр потрыт хансыс. Ань научный рӯпата э̄лаль хаснэ̄в порат, та̄н сака э̄рмыгла̄лэ̄гыт. Тувыл Юрий Вэлла музейн минэ ма̄гыс акв сӯмъях хо̄нтыс. Тыи Сардаковыт ще̄мья та̄н сӯмъяханыл тыг тотвес. О̄йка ва̄нэ̄тэ щирыл ё̄рнкол тӯщтуӈкве о̄с нё̄тыс, хумус э̄ри хӯлтыглас. 2010 та̄лт краеведческий колув ёмщакв хотщё̄питан ма̄гыс лаппантвес. Музеюв онтолов накпа лю̄лит яныг колт щар ёлы наке̄т о̄лы, тот яныг колнакыт о̄ньще̄в. Та̄н щё̄питаӈкве о̄вылта̄лве̄сыт кос, тувыл на̄й ке̄рква̄лгыт ос ке̄ртурыт мо̄т щирыл мощ ва̄руӈкве э̄рсыт. Ань тамле колыт пуссын ищхӣпыӈ утыл ёвтавет, кумыскаӈ а̄вил ва̄равет ос са̄в лампочкал тагатавет. Таима̄гыс олн са̄в э̄рмыглас, рӯпата хосан ёлпо̄илтта̄лвес. Тув та̄стыглым олныт ат то̄вылхатсыт, о̄с йильпииг ловиньтаве̄сыт. Ётыл олн ущ тув та̄стысыт. Ань яныг таквс э̄тпос мус щё̄питаӈкве ве̄рмияныл ке, такем ёмас о̄лнув. Ма̄н тыт тэ̄ла та̄л о̄с ат ӯнлантэ̄в. Ты колув «музей истории русской избы» рущ щирыл ла̄ваве. Тав краеведческий музеюв нупыл ловиньтахты. Тыг са̄в ма̄ныл мӯй ма̄хум ёхталэ̄гыт, ханищтан ня̄врамыт тыг тотыглавет. Ма̄нки о̄с школатын, культура колытын ялантэ̄в, тот суссылтапыт ва̄рыглэ̄в. Тувыл ищхӣпыӈ утыл рӯпитаӈкв ха̄снэ ма̄гыс ханищтаве̄в. Ханты-Мансийскан о̄влэ̄т «Ма̄вит ос э̄лумхо̄лас» ос ётыл «Ма̄во̄й ос газ» нампа музеигн ханищтахтуӈкве во̄виньта̄лвесӯв. Округт культура проектыт ма̄н о̄с щё̄питэ̄в ос вуянтыянӯв. Ма̄н ётув рӯпитан нэ̄ Ирина Игонина олныл майлувес, ос тав «Лук. Облас. Берёсто» нэ̄пак щё̄питас ос та̄ратас. Нэ̄паке̄т ваховский хантыт хумус ня̄лыт, ма̄ньхапыт ва̄ре̄гыт ос са̄с ёт хумус рӯпитаӈкве ха̄сэ̄гыт – пуссын тув хасве̄сыт. Ты ха̄снэ ва̄рмаляныл Г. М. Дмитриев-Садовниковын 1920 та̄лт хасве̄сыт ос хурин по̄слуве̄сыт. Ирина Владимировна ты потрыт ос хурит Тобольский музейт хо̄нтсанэ ос тувыл тахольт нэ̄пак та̄ратас. Ань ос «Исчезнувшие технологии ваховских ханты» мо̄т проект щё̄питасӯв. Тот «чип» ос «сарга» та ма̄хумн ва̄нэ пе̄с накыг урыл потрыт хансуӈкве таӈхе̄в. Ань музейный фондувт маныр пормасыт о̄ньще̄в, пуссын нэ̄пакн хансыянӯв. Ты хо̄тал мус пе̄с пораныл акванатнэ маснутыт, пормасыт, ма̄ ёлыпа̄лт хо̄нтым пе̄с утыт, са̄всыр хурит, документыт о̄ньще̄в. Пуссын аквъёт 600 со̄тыра са̄вит пормас атхатас.

1052 2013.05.24. unknown author

Щисуп о̄йка. Хосат, хунь āщум мощ мāньнувег о̄лме порат о̄памн потрыл потыртавес. Свердловский область Ивдельский районт Кимыӈщупа пāвыл о̄лы. Тот ам самын патсум. Пēс тот ам о̄пагумщаще̄квагум о̄лсы̄г, Тимофей Прокопьевич ос Анастасия Михайловна Бахтияровыг. Пāвыл нё̄р ляпат о̄лы, лов ве̄рыстат Щисуп о̄йка ӯнлы. Пēс о̄пам ла̄выс, тот ат ро̄ви ӣтипа̄лаг ро̄ӈхуӈкв, кисгуӈкв, тувыл мори щисгуӈкв ме̄ӈквыт ва̄глэ̄гыт. Āщум то̄нт сāлы о̄ньщас, акв ва̄тихал нё̄рт о̄лыс. Та юио̄выл порат āщум сāлыяныл Тумпя̄ӈкыт ӯрсаныл, Щисуп о̄йка ляпат. То̄нт āщум щāнюм ущ нэ̄гыг тотастэ. Тувыл юв ялантаӈкв ляпанув о̄лыс, ща̄нюм то̄нт нё̄туӈкв э̄рыс, мāн иӈ мāнит о̄лсӯв. Пēс мāхум о̄с ка̄сащасыт воращлаӈкв. Акв порат āщум ла̄ви, о̄пам сāлы ӯрын ма̄хманэ̄н ты Щисуп о̄йка урыл потыр потыртас. Анямов Улякщи ат агтыс, ла̄ви: «Ам тай ань кон ты ялапа̄лэ̄гум, кисувлэ̄гум, щар нэ̄матыр тах а̄ти! » Квāлапас, кон ё̄мантас, тувыл та кисувлас. То̄нт акв ювле аквтащир Щисуп о̄йканыл та щисувлас. Ма̄хум пуссын хотьют о̄лыс, сома по̄лям витыл равтасаве̄сыт, суйта̄л та патапасыт. Молях юв щалтапасыт. Та юипа̄лыт воссыг нэ̄мхотьют ат воратас воращлаӈкв. Ётылнув а̄щум Улякщил Щисуп ва̄тат ӣтипа̄лаг ё̄ме̄г, тавант, та порат во̄т щар ат во̄тыс. Йӣвыт хотьютна сома нас хо̄илтавет, тэ̄н юипа̄лэ̄нт акваг та хосгавет, сома хотьют ат на̄ӈкын яныг хо̄тпа юйит ё̄ми. Щар ювле ат сунсым суйта̄л са̄лы ӯрын ё̄рнколэ̄н молях та ё̄мсы̄г. Тахольт ляпаннув патсы̄г, ат на̄ӈкнэ матарен юит та хультыс. То̄нт а̄ртмын ва̄рмаль о̄лыс, ляпат ё̄рнколэ̄н о̄лыс. Хо̄т хосат ке турманлавесы̄г, улпыл то̄нт та лапаяптувесы̄г. Нас пилтвесы̄г. Пе̄с ат ро̄выс тох паль по̄х тамле потыр та̄ртаӈкв, э̄рыс хӯнтлаӈкв, тувыл ва̄руӈкв тох, хомус яныг хо̄тпат ла̄ве̄гыт. Ат ро̄ви ке ат ро̄ви. Тамле сака воращлан ма̄хмыт ме̄ӈквытн щар во̄рн тотуӈкв ве̄рмынувет. Наска̄ссыг хунь Щисуп наме тамле, улпыл щар пе̄с ма̄хмыт ёмщакв ва̄саныл ты ва̄рмаль, тувыл то̄на та тох намтсаныл.

1052 2013.05.24. Татьяна Бахтиярова

Ме̄ӈкв ва̄глум потыр. Мария Тасманова потыртам потыр. Тав щар са̄ртын ня̄йт хум о̄ньщас, наме о̄лыс Василий Миронович Самбиндалов. Тав пе̄с о̄с са̄лы ӯрыс. Мариял акваг нё̄рт яласасы̄г, ня̄врам ат о̄щсы̄г. Акв порат туи нё̄рт са̄лы кинсым ё̄мсы̄г. Ва̄гтал патсы̄г, ёлӯнтсы̄г. Сунсэ̄г мувал, са̄лыянэ̄н кос кинсэ̄г. Аквмат порат, хосат, нё̄р о̄вылт матырсырмат сэ̄мыл поталы нэ̄глыс. Ващька ла̄ви: «Ул во̄рто̄лн о̄йка. Хосат, ос аманур такем яныг? » Э̄лаль сунсыглахтэ̄г. То̄н май та э̄ртум ла̄вум во̄рто̄лн о̄йкатэ̄н акваг тэ̄н палтылэ̄н молях та ё̄ми. Щар во̄рто̄лн о̄йка хурип а̄ти. Яныг, пуныӈ поталы э̄лумхолас хурип. Ващка ань ня̄йт о̄лыс. Ня̄йтн та ёхтувес, ос воссыг нэ̄матыр ат ве̄рме̄г ва̄руӈкв, тох ке ты пуваве̄г. Потыртас, ня̄йтыс, ня̄йтыс. Ме̄ӈкве̄н та пе̄румтахтас, самаге̄н сунсым щар мо̄т ляльт тувыл та минас. Та юипа̄лт воссыг нэ̄мхуньт ат ва̄щиньтастэ̄н. Мария такви тамле ва̄рмаль ат ва̄нэ нэ̄, сака хотрохтыс, ла̄ви, сака пилыщмаӈ, хунь тамле ма̄н е̄мтэ̄гын. Ня̄йт ма̄хум ё̄рыт о̄лсыт, лю̄ль матыр щеркит, са̄й ут нэ̄глы ке, та̄н ве̄рмысыт молях ня̄влуӈкв. Та̄н ё̄рт о̄лсыт, пе̄с тэ̄найнут та̄наныл пилсыт. Ань тамле э̄лмхо̄лас а̄тим. Са̄й утыт ӣти юн ё̄муӈкв патсыт, э̄лмхо̄ласыт анькег акваг пилата̄луӈкв патве̄сыт, пилэ̄гыт. Ты хурит Мария Тасманова по̄слым о̄лы.

1052 2013.05.24. Галина КОНДИНА

Пе̄с пормасыт ёмщакв о̄ньщавет. Я̄ӈк на̄тнэ э̄тпос нёлоловхуйплов щислат музеит янытлан мирхал хо̄талыг о̄лы, таве 1978 та̄л па̄сныл янытлаве. Ма̄н округувт соссаӈ мир культура суссылтым са̄в музеит рӯпитэ̄гыт. Тот са̄всыр маснутыт, ёсат, а̄пат о̄ньщавет ос хунь э̄ри, выставкат ва̄рыглавет, пе̄с йис пормасыт мирн суссылтавет. Ма̄н ма̄ньщи ос ханты пормасанув «То̄рум Маат» о̄ньщавет ос тув та̄л сыс 20 со̄тыра хо̄тпа ёхталэ̄гыт. Музейт рӯпитан ма̄хум та̄нти ялпыӈ хо̄таланыл янытлан ма̄гсыл, пормасыт мӯйлуптам хо̄тпат ос мо̄т мӯй ма̄хум тув во̄виньта̄лсаныл. Пормасыт коныпал З. С. Рябчикова ловиньтан нэ̄пакыт тотыс. Тав ла̄выс: «Ам хота̄ти финноугорский мирыт о̄лнэ ма̄тын ялантасум, са̄всыр ёмас нэ̄пакытыл мӯйлуптаве̄сум, ань та̄наныл на̄н музеин мыганум. Ка̄сащан хо̄тпат тыг вос ёхталэ̄гыт ос тыт тах ловиньтэ̄гыт». Г. С. Райшев такви по̄слум картинатэ хуньт ты музеин мӯйлуптастэ. Тот ӯльпа по̄слым о̄лы. Ла̄выс, хунь ӯльпат по̄слы, акваг «То̄рум Маа» номтын ёхты. Со̄ль, картинатэ щар та ма̄ хурипаг сусхаты. Са̄всыр пормасыт мӯйлуптам хо̄тпат музей кӯщай нэ̄н В. Н. Кочетыгован нё̄тнэ а̄нытыл ос тынта̄л экскурсиятын ялантан нэ̄пакло̄мтытыл мӯйлуптаве̄сыт, пӯмащипа ла̄тӈыл ла̄вве̄сыт. М. К. Волдина нила сампа нуй тармыл ю̄нтум А̄яс о̄йка хансатэ о̄с ты музейн мистэ. Тав ла̄выс: «Ты ам э̄ргын ос йӣквнэ ансамблюм ма̄гсыл ю̄нтыглам нуюм. Ань таве о̄щнэм ва̄т нупыл хӯрум та̄лыг е̄мтыс. Йильпииг ю̄нтуӈкве таӈхе̄гум, таима̄гыс тыим музейн мӯйлуптылум. Амти мо̄тан ю̄нтэ̄гум, ты нуй тармыл ю̄нтум хансам ма̄н хо̄та̄ти яласым ёттотыгласлӯв, е̄ранэ мощ хотрасмуӈкве патсыт. Ам ва̄глум, тыт «То̄рум Маат» тав мӯсхал щирыл о̄ньщаве. Хуньт ня̄врамытын, апганумн сунсыглаӈкве тах патаве». Мо̄тыт ёмас тэ̄ла тамле о̄лыс: тот рӯпитан учёный э̄ква Е. А. Нёмысова 77 та̄лэ то̄влыс. Тав тот ма̄хмытын янытлавес, са̄в ёмас ла̄тӈыл ла̄ввес, са̄всыр мӯйлупсатыл мӯйлуптавес. Тит са̄т щислаге ма̄гсыл атыӈ тэ̄нутыӈ пасан ва̄рыглас, хӯлыӈ ос нё̄влиӈ ня̄нил ма̄хум тыттуве̄сыт, ща̄ил айтве̄сыт. Ань о̄лнэ то̄рмувт сыреса̄т ищхӣпыӈ ут о̄лы. Тох ты музей ма̄гсыл тамле лов ищхӣпыӈ уткве ёвтвес, рущ ла̄тӈыл та̄н «аудиогид» ла̄вавет. Тув З. Н. Лозямова ос В. Ю. Кондин музей урыл потыртан экскурсиянэ̄н хансым о̄лэ̄гыт. Мӯй хо̄тпа тамле утыл миве, тав музей янытыл ё̄мыгты, та ищхӣпыӈ утэ таве̄н та потырты. Тув английский ла̄тӈыл потыр о̄с хансым о̄лы, мо̄т хо̄н ма̄ныл ёхтын мӯй хо̄тпат о̄с аквта щирыл соссаӈ ма̄хум музейт ё̄мыгтаӈкве патэ̄гыт. Ань йист тох та е̄мтыс, ма̄ньщи ос ханты пормасыт са̄выӈпа̄лэ туп музейт ка̄салаӈкве ве̄рмиянӯв. Тамле ма̄т рӯпитан хо̄тпат культурав э̄лаль ялтуптан ма̄гсыл сака ёмас ос э̄рнэ тэ̄ла ва̄ре̄гыт. Та̄наныл ма̄н ялпыӈ хо̄талыл янытлыянӯв, о̄с аквтох сымыӈыщ э̄лаль вос рӯпитэ̄гыт.

1052 2013.05.24. Людмила ТЕТКИНА

А̄ги ты ще̄мьят э̄руптаве. Ты хурит Ольга Тимофеевна Чистякова ос Аня Дунаева по̄слым о̄лэ̄г. Тэ̄натэ̄н ам Советский ӯст Ӯринэ̄ква хо̄тал янытлан порат по̄слысагум. Тэ̄н тув Советский район Таёжный па̄вылныл ёхталасы̄г. Ольга Тимофеевна о̄йкатэ̄нтыл кит пыг о̄ньще̄г. Яныг пыге̄н Алексей колта̄глэ ёт Югорск ӯст о̄лы. Ань ма̄во̄й винэ ма̄т рӯпиты. Ма̄нь пыге̄н Павел ос нёлолов классыт ханищтахты. Ольга Тимофеевна такви Советский район Тимкапа̄вылныл о̄лы. Та па̄выл по̄хыт тав родовой угодие о̄ньщи. Ма̄ньщи нэ̄ ла̄выс, о̄лнэ ма̄тэ ма̄гсыл нэ̄паканэ̄н сака хоса ва̄рсы̄г. Ань о̄йкатэ Сергей Павлович пенсият о̄лы, во̄раим ос хӯл алыщлым акваг тот яласы. Аня ща̄нягеа̄щаге ёт Тимкапа̄вылт о̄лыс. Школан минаме порат Советский ӯсн интернатын ке̄твес. То̄нт Ольга Тимофеевна каӈке а̄гирищкве такви палтэ вистэ. Аня Таёжный па̄выл школат ханищтахтуӈкве патыс. Сымыӈ нэ̄кве ты урыл таи ла̄выс: «Ам амки яныгмам порам ёмащакв номилум, ма̄нь па̄вылквеныл яныг ӯсн интернатын о̄луӈкве ке̄твесӯв. Интернатыт о̄лым акваг юв воратасӯв. Тыима̄гсыл каӈкум а̄гирище Таёжный па̄вылн амки палтум о̄луӈкве тотыслум». Аня школат ханищтахтме̄т ӯщлахтын порат ща̄нягеа̄щаге палт юв ялантас. А̄тятэ хунь а̄тимыг е̄мтыс, оматэ палт ня̄врам ат хультуптавес. То̄нт Ольга Тимофеевна а̄гирищакве нэ̄паканэ пуссын ва̄рсанэ, ань тав опекунхо̄тпаг ловиньтахты. Тэ̄н о̄йкатэ̄нтыл Аня тэ̄нки ня̄врамакве̄н хольт э̄руптым янмалтытэ̄н. Ам ты колта̄гыл ще̄мья янытлан хо̄талыл янытлылум, пуста̄гыл э̄лаль вос о̄лэ̄гыт. Са̄в со̄т, са̄в щунь та̄нанылн. То̄румн, О̄тырн вос ӯргалавет.

1052 2013.05.24. Александр ВЬЮТКИН

Ка̄тыл по̄слым ёмас хурит. Я̄ӈк на̄тнэ э̄тпос котильт Ханты-Мансийск ӯст В. А. Игошев нампа музейколт выставка ва̄рвес. Ты кол ма̄нь таквс э̄тпос 2001 та̄лт пӯсвес, то̄нт В. А. Игошев, ка̄тыл хурит по̄слум о̄йка, 80 та̄лэ то̄влыс. Ань ты суссылтап Сочи ӯст ва̄рнэ яныг касыл 2014 та̄л кастыл ва̄рвес. Выставка о̄вылтан ма̄гсыл Россия ма̄ янытыл ка̄тыл по̄слын ма̄хум ёхталасыт. Та̄н халанылт Сергей Леонидович Подверсткий о̄лыс. Тав ма̄ янытал са̄в ма̄т яласас, ёмщаквег ва̄ве. Хум ла̄выс: «Ам хунь Ханты-Мансийск ӯсн ёхталаӈкв во̄вве̄сум, амтирот номсэ̄гум, лӯима̄т о̄лнэ ма̄нь ӯст маныр тот а̄нумн пӯмащ о̄лы. Хунь ам ёхтысум, на̄н ӯсын мо̄т хо̄н ма̄ ӯс хольт сыстамыг сусхаты. Аквтупмат, со̄ль, хотты мо̄т ма̄н ёхтысум. Тыт о̄лмум сыс хӯрум музеин ялсум. Та̄н а̄нумн пуссын мӯстысыт». Потраныл оигпам юипа̄лт хурит суссылтан ва̄рмаль щар нуми колнакыл о̄вылтавес. О̄влэ̄т Владимир Александрович Москва ӯст о̄лме порат юио̄выл по̄слум хуриянэ суссылтаве̄сыт. Тот тав мо̄т хо̄н ма̄т о̄лнэ мир по̄слуманэ. Ёлынув колнакт округувт о̄лме порат по̄слум хуриянэ суссылтаве̄сыт. Са̄выӈпа̄лэ хуриянэ̄т Ня̄хщамво̄ль ос Сӯева̄т па̄выл ма̄ньщи ма̄хманув по̄слым о̄лсыт. Ка̄сыӈ хуритэ̄т янгема̄не пуссын та̄нти щир пӯмащиг тэ̄лсыт. Хунь хосанув хуриянэ нупыл сунсэ̄гын, аквтупмат наӈ тот по̄слым ма̄хмыт ёт ва̄йхатым о̄лэ̄гын. Ёхталам ма̄хум пуссын ёмас, сыстам номтыл тувыл сысы минасыт. Ка̄сыӈ хо̄тпа тув ялуӈкв ве̄рми. Э̄рыӈ на̄н ва̄нэ ма̄хманы̄н тот ка̄салыяны̄н.

1052 2013.05.24. Тамара МЕРОВА

Ня̄врамыт ул вос марщумлавет. Варъёган па̄вылт 2005 та̄л па̄сныл ня̄врамыт йильпи школат ханищтахтуӈкве патсыт. Интернатаныл о̄с аквты колт о̄лы. Тот ня̄врамыт хумус ханищтавет, маныр пӯмыщ ва̄ре̄гыт, ты урыл школа кӯщай ва̄ӈын нэ̄ Наталья Сергеевна Карабаева потыртас. Ам тыт 1988 та̄л па̄сныл рӯпитэ̄гум, о̄выл классыт ня̄врамыт ханищтасанум. Та̄н хосат школав а̄стласыт, ань та̄нки ня̄враманыл тыг ялантэ̄гыт. Ётыл ханищтан тэ̄латыт пуӈктотнэ хо̄тпаг рӯпитасум, мо̄лты ос кӯщай ва̄ӈыг хо̄тпаг паттуве̄сум. Ты та̄л тыт 122 а̄ги – пыг ханищтахтэ̄гыт, та̄н халанылт 111 – ты соссаӈ ня̄врамыт. Хус ня̄врам во̄рт о̄лнэ ма̄ныл тыг тотве̄сыт, та̄н пуссын интернатыт о̄лэ̄гыт. Варъёгант о̄с са̄в соссаӈ ма̄хум о̄лы. Щар яныг ханты колта̄глыг тыт Айпиныт, Казамкиныт ос Сардаковыт ловиньтахтэ̄гыт. Ос ё̄рн яныг колта̄глыт тыи Иуси ос Айваседа. Ма̄н школав национальныиг ла̄ваве, та̄нки ща̄нь ла̄тӈыл потыртаӈкве ханищтавет. Тувыл лӯима̄ ма̄хум литература ос история Югры нампа урокыл ва̄равет. Ты коныпал та̄н кружокытын ялантэ̄гыт. Тот а̄гит сакныл пальсакыт, турло̄псыт хартэ̄гыт ос хорамыӈ супыт ю̄нтэ̄гыт, пыгыт матыр са̄гре̄гыт, ёрге̄гыт. Совныл манос пунныл ёмас пормасыт ма̄щтырлэ̄гыт. А̄гит сов ю̄нтуӈкве ос сак хартуӈкве Дарья Даниловна Айваседан ханищтавет. Та̄н аквъёт такем хорамыӈ пормасыт ва̄ре̄гыт. Ва̄рум утаныл мӯй ма̄хумн та̄ра ёвтавет. Пыгытн «Охотоведение, рыболовство» кружок мӯсты. Ня̄врамыт ёт тот Семён Алексеевич Айпин рӯпиты. Тав йӣвныл хорамыӈ щаӈквыт ёргуӈкве ха̄сы, таима̄гыс РФ ма̄щтыр нам о̄ньщи. Тувыл я̄ ва̄тавт «учебнопромысловый база» нампа колыл ӯнттувесӯв. Тот во̄руйвитхӯл алыщлан пормасыт ня̄врамытн суссылтавет. Ты пормасыт труд урокыт та̄нки ва̄руӈкве о̄с вос ве̄рмияныл. Пыгрищит тот лэ̄с ӯнттуӈкве ханищтавет ос ка̄ркамыг хӯл алыщлэ̄гыт. А̄гит хӯл исмит па̄йтэ̄гыт. Тув ялнэ хо̄талыт ня̄врамытн сака мӯстэ̄гыт. Ня̄врамыт акв сменал ханищтахтэ̄гыт, обед юипа̄лт 1-6 классытт ханищтахтын а̄гитпыгыт продлёнкан хультэ̄гыт. Мо̄т аныткружокытын ха̄йтэ̄гыт. Па̄вылт манос интернатт о̄лнэ ня̄врамыт тыт нэ̄мхуньт ат марщувлавет, тэ̄ла та̄л ат о̄лэ̄гыт. Школавт аквхуй плов сыресыр кружок рӯпитэ̄гыт. Ма̄н «Театр народной сказки» о̄ньще̄в, ня̄врамыт тыт ёнгалтым ща̄нь ла̄тӈыл потыртаӈкве ханищтавет. Тувыл каснэ ма̄н ялантэ̄гыт. Ма̄нки палтув рӯпитан хумыт коныпал Новоаганск па̄вылныл «Олимп» нампа центр хо̄тпат ня̄враманув тренировайтаӈкве тыг о̄с ёхталэ̄гыт. Ханищтан хо̄тпат ос воспитателит тыт тахольт то̄вылхатэ̄гыт. Ма̄н ты ма̄хманув ёт хосат та̄гыл аквъёт рӯпитэ̄в. Туп ма̄ньлат хо̄тпа тыт мощща, та̄н ня̄врамыт ёт рӯпитаӈкве ул хурахлэ̄гыт. Ос таи ёмас, ма̄н школав а̄стлан а̄гитпыгыт тыт о̄с рӯпитаӈкве патсыт. Роза Гордеевна Казамкина Ханты-Мансийскат колледж а̄стламе юипа̄лт тыг рӯпитаӈкве ёхтыс. Мо̄т а̄ги Излучинск па̄вылн рӯпитаӈкве минас. Школа а̄стлам а̄гиянувпыганув са̄выӈпа̄лэ Нижневартовск ӯсн строительный манос педагоический колледжин э̄лаль ханищтахтуӈкве минэ̄гыт. То̄ват Ханты-Мансийскан минуӈкве ка̄саще̄гыт. Ты та̄л ма̄н аквхуйплов класс ат о̄ньще̄в, мо̄лты та̄л онтолов классыт ханищтахтам ня̄врамыт пуссын ла̄кквамингаласыт. Ос ты та̄лт ат ня̄врам лов классыт ханищтахтэ̄гыт. Интернатт о̄лнэ ня̄врамыт ул вос марщувлаве̄сыт ос ёмщаквег вос ханищтахтасыт, ма̄н тыт матыр пӯмащ тэ̄лат акваг ва̄рыглэ̄в.

1052 2013.05.24. Валентина УЗЕЛЬ

Та̄н ща̄нь ла̄тӈыл потыртаӈкв ат ка̄саще̄гыт. Касум па̄выл интернатт са̄в соссаӈ ня̄врам о̄лы, та̄н тув Нумто ос Юильск па̄влыгныл тотавет. Ща̄няныла̄щаныл пуссын са̄лы ӯре̄гыт, ос та ма̄нь па̄влыгт школа а̄тим, таима̄гыс ты та̄н интернатн атавет. Ань тув 45 ханты ос ё̄рн ня̄врам тотыглавет. Ма̄ньнув ня̄врамыт о̄выл этажт о̄лэ̄гыт, яныг ня̄врамыт ос нумын. Тув ялмув хо̄талт тот са̄лыӈ ма̄хум ялпыӈ хо̄таланыл о̄лыс. Кос а̄лпыл са̄т щё̄с о̄лыс, ма̄нь ня̄врамыт нэ̄мхотьют ат хуяс, пуссын коридорт ӯнлахо̄лсыт манос тыглетувле нас ё̄мыгтасыт. Э̄ти рӯпитан нэ̄ Валентина Евтифеевна Багишева та̄н ётаныл ӯнлыс, то̄ва а̄гирищит а̄таныл сагсанэ. Пыгрищит ос пуссын ляпат роттыг ӯнлантасыт. Нэ̄ титыгласлӯв, ущты са̄т щё̄сыг е̄мтыс, ня̄врамыт манрыг ат хуе̄гыт, тав ювле ла̄выс: «Ща̄няныла̄щаныл во̄рныл касуӈкв тыг ёхтысыт, таима̄гыс ня̄врамыт та̄наныл ӯрим ӯнлантэ̄гыт, ань тах рӯтанылн юв вивет». Интернат урыл тав ла̄выс, ня̄врамыт школан миннэ пораныл хунь ёхты, интернатн тотавет. Туп тэ̄лы каникул порат юв ялэ̄гыт. Ань тыгыл маснутыл ат мивет, ляпа рӯтанылн ёвтавет. Интернатт о̄лнэ̄ныл порат ка̄саныл сака холы, юв воратэ̄гыт. «Татем та̄наныл са̄ль», – нэ̄ ла̄выс. Такви В. Багишева о̄с Касум па̄вылныл о̄лы, тот самын патыс, хум ва̄рыс, пыге ань яныг, 24 та̄лэ то̄влыс. Интернатт нёлолов та̄л рӯпиты, нэ̄мхо̄т ат ханищтахтас, ты рӯпатал та майвес. Па̄вылт рӯпитан ма̄ воссыг а̄тим. Воспитателиг та хо̄талт Любовь Викторовна Захарова о̄лыс. Тав школат о̄выл класс учителиг рӯпиты, нас та хо̄талт интернатн рӯпитаӈкв во̄ввес. Тав ётэ потыртамме̄н порат та̄рапатыс, Мария Волдина – тав а̄кве, оматэ Валентина Кузьминична таве̄н э̄щиг о̄лум. Л. Захарова школат хус та̄л рӯпиты. Ня̄врамыт урыл ла̄выс, ань ханты ос ё̄рн ня̄врамыт во̄рт ща̄няныла̄щаныл ёт кос о̄лэ̄гыт ос ща̄нь ла̄тӈаныл ат ва̄ганыл. Халанылт янгема̄не пуссын рущ ла̄тӈыл потыртэ̄гыт. То̄ват торгамтэ̄гыт кос ос матыр ла̄вуӈкв сака э̄ссамтэ̄гыт. Яныг классыт ханищтахтын ня̄вра мыт то̄ват о̄с кос потыртаӈкв ха̄сэ̄гыт, ос та̄н хунь матыр потыртаӈкв во̄вавет, ювле ла̄ве̄гыт: «А̄нумн ханты ла̄тыӈ щар ат э̄ри, нэ̄мхуньт аты э̄рмыглы». Ханищтан нэ̄ титыгласлум: «Манрыг тох е̄мтыс? » Тав ла̄выс: «Ты ща̄нит ос а̄щит та̄н ня̄враманыл ёт юн ат потыртэ̄гыт». Ам таве э̄лаль титыглылум: – Наӈ о̄йкан хотьют? – Ханты. – Нэ̄н юн нэ̄нти халынт ханты ла̄тӈыл потыртэгы̄н? – А̄ти, то̄ванакт, хунь ня̄врамагме̄нныл матыр ёлтӯйтуӈкв э̄ри. – Ня̄врамагын ла̄тыӈ торгамтэ̄г манос потыртэ̄г? – А̄ти, сас туптуп, аквтит ла̄тыӈ торгамтэ̄г. Тох ты е̄мтыс, ма̄нти ла̄тыӈ ва̄гув кос, ос ня̄враманув ла̄тӈув щар ат ва̄ганыл. Ва̄им, ты ва̄рмаль ма̄ янытыл о̄лы. Лӯима̄ янытыл о̄лнэ мощщаг хультум мирыт пуссын тамле ва̄рмальн ань я̄рмысыт. Э̄лаль Любовь Захарова акв ё̄рн а̄ги урыл потыртас. Ты а̄гирищкве школан 1996 та̄лт тотвес, рущ ла̄тӈыл щар ат потыртас, аты торгамтас. Школат ханищтахтаме сыс рущ ла̄тӈын ханищтавес. Школа а̄стластэ, хум ва̄рыс, ань хо̄т Дагестан ма̄н тотвес, тот о̄лы. Ань ма̄ньщи, ханты ман ё̄рн ла̄тыӈ э̄лаль тотнэ ма̄гыс са̄в рӯпата кос ва̄раве – са̄кконыт хансавет, хотьют ща̄нь ла̄тыӈ ёт рӯпиты, олныл ойтавет. Ос матрыг ла̄тӈанув та ёрувлахтэ̄гыт.

1052 2013.05.24. Николай Меров

Са̄лыӈ колт яласан нэ̄кве. Тэ̄лы порат ам Ха̄льӯс район Саранпа̄вылн рӯпатам щирыл ялсум. Тот акв нэ̄ ёт потрамасум. Тав наме Анна Дмитриевна Ромбандеева. Ты ма̄ньщи нэ̄ Ха̄льус район Ло̄пмус па̄вылт яныг ще̄мьят 1970 та̄лт самын патыс. Кульпас па̄выл школат нёлолов класс а̄стлас. Та юипа̄лт 1987 та̄лт хум ва̄рыс. Тувыл о̄йкатэ̄н са̄лыӈ колн тотвес. Та па̄сныл акваг тот ты рӯпиты. Хунь са̄лыӈ колн о̄выл щёс ёхтыс, тот рӯпитаӈкве та̄рвитыӈ о̄лыс. Ётыл ла̄щалла̄щал ханьщувлас. Анна Дмитриевна ё̄рнколт са̄лы совныл са̄всыр маснут ю̄нты, тэ̄нут па̄йты. О̄йкатэ наме Василий Владимирович Ромбандеев. Тав са̄в та̄л са̄лыӈ колт рӯпиты. Нэ̄кхумыг ат ня̄врам янмалтасы̄г. Яныг а̄гитэ̄н Людмила Ханты-Мансийск ӯст нэ̄пак ловиньтан колт рӯпиты. Кит а̄гияге̄нпыгаге̄н Ханты-Мансийскат ханищтахтэ̄г. Пити патта ня̄враме̄н Женя иӈ ма̄нь, тэ̄н ётэ̄н о̄лы. Яныг пыге̄н Яков школа а̄стламе юипа̄лт о̄с тэ̄н палтэ̄н рӯпитаӈкве минас. Ты та̄л са̄лыл каснэ ва̄рмаль о̄лыс. Та̄н пуссын касылын на̄лув ва̄гылсасыт. Са̄лыӈ нэ̄ ла̄ви, рӯпататэ ма̄гыс сака мощща олныл ойтаве. Э̄тпос сыс нилахуйплов со̄тыра солко̄вил туп миве. Ты ва̄рмаль ма̄гыс совхоз кӯщай палт са̄в щёс потрамаӈкве ёхталас. Ос олныт но̄х аты нё̄тве̄сыт. Таима̄гыс ма̄ньлат хо̄тпат са̄лыӈ колт рӯпитаӈкве ат касаще̄гыт. Ты та̄л рупата олныт но̄хнё̄туӈкве ла̄вве̄сыт кос, ос манса̄вит ат ва̄ганыл, ань ма̄хум ӯрхатэ̄гыт. Анна Дмитриевна оматэ Наталья Григорьевна ос а̄тятэ Дмитрий Петрович Таратовыг Ло̄пмус па̄вылт о̄лсы̄г. Э̄кваго̄йкаг о̄лме̄н палытыл хӯл алыщлым ос во̄раим яласасы̄г. Ань сас а̄тимыг. Ам Анна Дмитриевна колта̄глэ янытлан ла̄тӈыл ке̄тылум. Ня̄враманы̄н, рӯтаны̄н, юртаны̄н ос ва̄нэ хо̄тпаны̄н ёт пуста̄гыл са̄в та̄л э̄лаль о̄лэ̄н.

1052 2013.05.24. Тамара МЕРОВА

Соссаӈ мирыт посыӈ хо̄талн агтэ̄гыт. А̄с-угорский институтт рӯпитан хо̄тпат китынтыг конференциян атхатыгласыт. Тыг са̄всыр яныг ӯсытныл ос мо̄т ма̄ныл учёныит ёхталасыт. Та̄н «Современные проблемы природопользования и вопросы традиционной культуры коренных народов Севера» ва̄рмалит урыл потыртасыт. Ос о̄влэ̄т ма̄хум кит учёный хо̄тпаг янытласыт, тыи Т. Г. Харамзин ос С. А. Попова. Ханты о̄йка Терентий Герасимович Харамзин 75 та̄лэ то̄влыс. Тав соссаӈ ма̄хманув та̄рвитыӈ ва̄рмалит та̄рапаттыянэ, та̄наныл мӯсхалыг ханищтыянэ ос ётыл э̄рнэ̄г щё̄питан нак кинсы. Ма̄вит ӯргалан ва̄рмалит ос са̄лы янмалтан урыл са̄всыр потрыт ос нэ̄пакыт хансыс. О̄йка социология наукат доктор нам о̄ньщи, ты коныпал «Заслуженный деятель науки РФ» яныг намыл майвес. Светлана Алексеевна Попова 60 та̄лэ̄тыл янытлавес. Тав история наукат кандидат нам о̄ньщи, ань ос наука доктор нам ма̄гыс э̄лаль рӯпататэ хансытэ. Нэ̄ диссертация нэ̄паке̄т ма̄ньщи ма̄хум пе̄с йис о̄лупса ва̄рмалит акванатыянэ. Тав 1993 та̄лт Ха̄льӯст мо̄йтыт, пе̄с йис потрыт акванатнэ фондкол пӯнсыс. Ань тыг ёхталам учёныит кит секциян уртхатым рӯпитасыт. О̄выл секцият историкыт, культорологыт ос лингвистыт акванатхатыгласыт. Та̄н «Вопросы реконструкции традиционных праздников и обрядов в современных условиях» ва̄рмалит урыл потыртасыт. Ань пе̄с йисныл о̄лнэ наканув янытэ̄т оснпаттуӈкве э̄ре̄гыт манос а̄ти, хумус та̄наныл э̄лаль тотуӈкве, маныр суссылтаӈкве ро̄ви, ма̄ньлат а̄гитпыгыт На̄йО̄тыранувн агтэ̄гыт манос а̄ти – пуссын ты о̄вылтыт акванатхатам ма̄хум та̄нки халанылт мощ воращласыт ос ётыл акв тэ̄ла ва̄рнэ ла̄тыӈ хассыт. Пе̄с ма̄хманув мо̄т мирыт ёт хурахлым о̄лсыт, та̄наныл ляпан ат та̄ртыгласаныл. Ялпыӈ ма̄т ӯргаласаныл, пӯрлахтын канын по̄х хо̄тпа щар ат во̄виньта̄лсыт. Тувыл ка̄сыӈ са̄т та̄л хум хо̄тпат та̄нки На̄й-О̄тыр канытн йирхатуӈкве ялсыт. Нэ̄ хо̄тпат о̄с та̄нки пӯрлахтын ма̄ о̄щсыт. Тамле тэ̄лат хунь ва̄рыглаӈкве, ул ня̄йт хо̄тпатн хӯлтыглаве̄сыт ос э̄лын о̄лнэ хум ма̄хум акв порат акванхо̄нтхатыгла̄лсыт. Ань тай мо̄т пораг е̄мтыс, хум ма̄хум ка̄сыӈ са̄т та̄л ялпыӈ ма̄н ат ялантэ̄гыт. Ты нак ань иӈ э̄ри ман а̄ти, хумус та̄наныл э̄лаль тотуӈкве ро̄ве̄гыт, ты урыл Т. А. Молданов, Е. И. Ромбандеева, М. К. Волдина, Л. В. Кашлатова та̄нки номтаныл ла̄всаныл. Ма̄ньлат пыгыт ты тэ̄лан вуйхатэгы̄т ке, хумус та̄нанылн нё̄туӈкв ро̄ви. Пе̄с йис наканув ань ёрувлаӈкве патве̄сыт, яныгпа̄ла хо̄тпат матыр сака ат потырта̄лсыт. Хунь ялпыӈ канн атхатыглаӈкве, маныр ва̄руӈкве ты тэ̄лат торыӈ ёмщаквег ат ханищта̄лве̄сыт ос нэ̄пакн ат хансыглаве̄сыт. Ма̄ньщит ос хантыт туп мо̄т ма̄хумн ла̄ве̄гыт: «Тыи ат ро̄ви, таи ат тайи, тув ул новхатэ̄н, тув ул пӯхтэ̄н». Ос маныр ма̄гыс ат ро̄ви, манрыг ат та̄ртаве манос о̄лы? Тыгыл э̄лаль ат хӯлтыглавет, ма̄нки о̄с тӯйтыглахтэ̄в. Тувыл рущ манос мо̄т хащта̄л ма̄хум ялпыӈ ма̄н минэ̄гыт, хо̄т ат э̄ри ха̄хталахтэ̄гыт, пе̄с пормасыт новияныл, тармыл ялыглыяныл манос ёт а̄лмайияныл. Таима̄гыс соссаӈ ма̄хманувн лю̄ль е̄мты, ёмас о̄лнэ хо̄тал ат хо̄нтэ̄гыт, номтаныл саватавет. Ань тамле тэ̄лат ёлпо̄илттан ма̄гыс ма̄хум ёт ёмщаквег потыртаӈкве э̄ри. Матыр хӯлтыглан ла̄тыӈ «Памятка» нэ̄пакло̄пс щё̄питануве ке, ёмас о̄лнув. Ос соссаӈ ма̄ньлат а̄гитпыгыт ёт ва̄тихал акван хо̄нтхатыглаӈкве э̄ри, та̄нанылн пе̄с йис ва̄рмалит урыл потыртаӈкве. Мо̄т секцият социолог ос экономист учёныит акванатхатыгласыт. Та̄н ос ма̄вит ӯргалан ва̄рмалит урыл потыртасыт. Са̄лы тэ̄пыӈ ма̄ са̄в хультыс ман а̄ти, хумус та̄н ӯргалавет – та урыл ла̄тыӈ хассыт.

1052 2013.05.24. Людмила ТЕТКИНА

Са̄в ня̄врам о̄ньще̄г. Зоя Васильевна Кирилишина ще̄мьяӈ та̄гыл Сургутский район Русскинская па̄вылт о̄лы. О̄йкатэ̄нтыл хо̄т савалап ня̄врам янмалтэ̄г. Тэ̄нки а̄гитэ̄н янгыг е̄мтыс, такви ще̄мьяӈ. Зоя Васильевна ла̄выс: «А̄гим янгыг е̄мтыс, ам савалап пыгрищ янмалтаӈкве патсум, то̄нт тав кит та̄лэ то̄влыс. Ты юипа̄лт о̄с акв ма̄нь савалап а̄гирищ вислум. Ты ня̄врамаквег ам амки нупылум хассагум, то̄нт нэ̄мхотьют а̄нум ат ла̄выс, тыщир ва̄руӈкве ат кос э̄рыс. Ань тэ̄н савалап ня̄врамыг воссыг ат ловиньтахтэ̄г. Пособиеолныл ойтаве̄г кос, тувыл са̄всыр льгота ат о̄ньще̄г. Ос хунь яныгме̄г, савалап ня̄врам хольт о̄лнэ колыл тах ат миве̄г. Ты а̄гирищигпыгрищиг янмалтым ам о̄с нила ня̄врамакве амки палтум висанум. Ты ня̄врамыт нэ̄паканыл хунь ва̄рсанум, то̄нт ла̄вве̄сум, амки нупылум воссыг ул вос хансыянум. Тыщирыл та̄н са̄внув льгота о̄ньще̄гыт ос са̄внув олныл ойтавет. Ос янгыг хунь е̄мтэ̄гыт, колыл мивет. Па̄влувт ань рӯпата а̄тим, ня̄врамыт янмалтан ма̄гсыл о̄йкаме̄нтыл олныл ойтавеме̄н. Ты ва̄рмаль рущ ла̄тӈыл «замещающая семья» ла̄ваве. Та̄наныл пуссын ма̄ниг о̄лманыл порат висанме̄н. Ме̄наме̄н ща̄нига̄щиг ла̄вияныл. Яныг пыгум са̄т та̄лэ хунь то̄влыс, ма̄н Русскинская па̄вылн ва̄нтласӯв. Ты э̄лыпа̄лт та̄л сыс во̄рт о̄лсӯв. Ань туп туи порат пе̄с йис ма̄вн ялантэ̄в. Тот ма̄н са̄лы ӯрим, во̄раим, хӯл алыщлым о̄лэ̄в. Ня̄враманме̄н са̄всыр национальностил о̄лэ̄гыт, та̄н ётаныл ам ханты ла̄тӈыл туп потыртэ̄гум, ла̄тӈув о̄с вос ва̄ганыл. Рущ ла̄тӈыл потыртаӈкве школат ханищтавет. Ань ам кӯщаит палт акв та̄рвитыӈ ва̄рмаль ёт ялантэ̄гум. Таса̄вит ня̄врам о̄ньщиме̄н, колув сака ма̄нь. Ань са̄в ня̄врамыӈ ще̄мьят ма̄л мивет. Ам о̄с заявлениенэ̄пак очередь ма̄гыс хассум . О̄йкам ёт субсидияолн виӈкве нэ̄паканме̄н ке̄тсанме̄н. Русскинская па̄вылт яныг кол ӯнттуӈкве таӈхиме̄н. Олн винэ очередь моще̄рт ты ёхты, ма̄ ат о̄ньщиме̄н. Па̄влувт кол ӯнттын ма̄ ат то̄вылхаты. Сергей Черкашин, Сургутский район миркол кӯщай ва̄ӈын хум, Русскинская па̄вылт сапра̄ни ва̄рыглас. Ам таве̄н амки та̄рвитыӈ ва̄рмалюм урыл потыртасум. Кӯщай хум нё̄туӈкве ла̄вхатас, ма̄л мивеме̄н, мощ ӯрхатуӈкве туп э̄ри». Ам ты нэ̄гхумыг ще̄мья янытлан хо̄талыл янытлыягӯм. Ня̄враманэ̄н са̄в ща̄гт тэ̄натэ̄н вос тотэ̄гыт. Кол ӯнттын ма̄л моляхнув вос миве̄г, йильпи кол ӯнттын порат туп ня̄врамыт мовиньт тот вос сӯйты.

1052 2013.05.24. Николай Меров

Саран ма̄хум акванатхатыгласыт. Ха̄льӯс район Саранпа̄вылт са̄лыл каснэ ва̄рмаль о̄лум порат саран ма̄хум тэ̄нэ колт акванатхатыгласыт. Атыӈ тэ̄нутыӈ пасаныт щё̄пита̄лве̄сыт. Тот ща̄й айсыт ос пе̄с йис о̄лупса номылматыгла̄лсыт. Э̄лыл ёхталам мӯй ма̄хум о̄с тув во̄виньта̄лве̄сыт. Маныр урыл та̄н тот потыртасыт, на̄н ань э̄лаль ловиньтэ̄н. Ка̄сыӈ хо̄тпан ва̄ӈкве э̄ри, хо̄тыл тав о̄патэ, ащо̄йкатэ о̄лэ̄гыт. Саран ма̄хум тув хуньт Коми Республиканыл ва̄нтлысыт. Пе̄с порат нё̄р тапалыт сараныт са̄лыяныл матыр а̄гмыл е̄мтсыт. Ты хосыт са̄в са̄лы патыглас. Ма̄хум яласан ут ос тэ̄нут та̄л хультсыт. Таима̄гыс онтоловхуйплов нот о̄вылтахтам порат то̄ва саран хо̄тпат хультум са̄лыяныл ёт нё̄р ӯлтта тыг ва̄нтлысыт. Ма̄нья хосыт порыл ло̄ӈхаль та̄ртахтасыт. О̄влэ̄т Я̄сунт па̄вылн ёхтысыт. Па̄влыӈ хо̄тпатн тэ̄нутыл майве̄сыт. Ос о̄луӈкве тот ат та̄ртве̄сыт. Тувыл та̄н ло̄ӈхальнув на̄тылтасыт. Саквъя̄ ва̄тат карснув ма̄ хо̄нтсыт, тот ё̄рнколаныл тӯщтысаныл. Тӯяг та ма̄ витын ат а̄мараве. Ань ты па̄выл Саранпа̄влыг ла̄ваве. Хум хо̄тпат тӯяг кол ӯнттын ма̄гыс норыт яктысыт. То̄ва ма̄хум ма̄колт о̄лсыт. О̄выл колыт Филипповыт, Каневыт, Артеевыт ӯнттысыт. Тыгыл э̄лаль Ануфриевыт, Истоминыт, Хозяиновыт, Рочевыт, Кустышевыт, Семяшкиныт, Вокуевыт о̄с ӯнттуӈкве патсыт. Э̄лыл ёхтум ма̄хум во̄руиӈ, хӯлыӈ, пилыӈ ма̄ тармыл яныг ща̄гтыл о̄лмыгтасыт. Та па̄сныл са̄в та̄л минас. То̄ва хо̄тпат ань тыг мус та рӯтаныл ёт ва̄йхатэ̄гыт. Ва̄тихал мӯйлуӈкве нё̄р тапалын ялантэ̄гыт. Тувыл то̄ва хо̄тпат рӯтаныл Саранпа̄вылн ёхталэ̄гыт. Саранпа̄вылт ма̄тэ сака нё̄тнэ, атырхари хо̄талытт нё̄рквет нас вольге̄гыт, сыстам я̄т сак хольт овантэ̄гыт. Мӯй ма̄хумн тот ӯщлахтуӈкве сака мӯсты. То̄ва хо̄тпат ос та̄нки рӯтаныл ань тыг мус ат ва̄ганыл. Нё̄р ӯлтта ва̄нтлуманыл па̄сыл ат ва̄щиньтахтасыт, иӈ кисхатэ̄гыт. Тувыл ос я̄нас миннэ тованыл урыл потыртасыт. 1903 та̄лт Саранпа̄вылн Иван Ефимович Истомин Евдокия э̄кватэ̄нтыл ёхтысы̄г. Тэ̄натэ̄ныл ты Саранпа̄вылт о̄лнэ Истоминыт э̄лаль са̄вме̄гыт. Э̄кваго̄йкаг ще̄мьят ат ня̄врам янмалтасы̄г. Истоминыт ань тыг мус яныгса̄т лов та̄л Саранпа̄вылт о̄лэ̄гыт. Яныг хо̄нт о̄лум порат Саранпа̄вылныл са̄в саран хо̄тпа хо̄нтлуӈкве тотве̄сыт. То̄ва хо̄тпат юв ат ёхтысыт, та̄н уранылт ань о̄лнэ ма̄хум акваг номияныл. Ты та̄л па̄вылт са̄лыл каснэ ва̄рмаль о̄лум порат Нё̄р тапалыл Коми Республиканыл саран ма̄хум ёхталасыт. Та̄н рӯт ма̄хманыл ялпыӈ хо̄тал кастыл сака янытласаныл. Ань нё̄р тапалт о̄лнэ саран хо̄тпат са̄лыл каснэ ва̄рмаль ат ва̄рыглэ̄гыт. Та̄нанылн тыи сунсуӈкве сака пӯмащ о̄лыс. Тувыл о̄с акв тэ̄ла урыл потыртасыт. Саран ма̄хум пе̄с йис порат нё̄р ӯлтта минам лё̄ӈханыл хотщё̄питаӈкве номсыяныл. Хуньт тувыл яласаӈкве э̄рыӈ патэ̄гыт. Та лё̄ӈх палытэ нёлса̄ткем ве̄рыста о̄лы. Сапра̄ни о̄лум порат Ха̄льӯс район кӯщай Любовь Константиновна Коротун о̄с тот о̄лыс. Тав ма̄хум пуссын янытласанэ. То̄ва саран хо̄тпат мӯйлупсал ос янытлан нэ̄пакыл мисанэ. Ты нё̄тнэ ма̄хумакветн са̄в сымыӈ ла̄тыӈ ла̄выс. Ты ва̄рмаль оигпам юипа̄лт саран ма̄хум аквъёт по̄слахтасыт. Ва̄тихал акванатхатыглаӈкве ла̄вхатсыт.

1052 2013.05.24. Людмила ТЕТКИНА

Ягрим па̄вылт о̄лнэ нэ̄. Аквнакт ам Ха̄льӯс район Ягрим па̄вылн тэ̄ла мус ялсум. Ма̄нки па̄вланувт хо̄тал кито̄вылт миннэ ё̄р ат яласы. Матыр тэ̄ла ма̄гыс хоталь минмыгтэ̄гын, матпалыт та яласэ̄гын. Ягрим па̄вылт акв ма̄ньщи нэ̄ ёт хо̄нтхатыгласум, наме Зоя Алексеевна Мелентьева. Мен потруме̄н э̄лаль ловиньтэлы̄н. Зоя Алексеевна, наӈки урынтыл мощ потыртэн. Омагна̄тягн хотыл о̄лсы̄г? Хумыс наманэ̄н? – Омам Ульяна Алексеевна Саратина, а̄тям Алексей Спиридонович Мелентьев Люлюкары па̄вылт о̄лсы̄г, тот акванхо̄нтхатсы̄г. Хунь Ягримн ва̄нтласы̄г, омам совхозт рӯпитас, а̄тям на̄й харыгтан ма̄т рӯпитас. О̄пам Спиридон Лазаревич, а̄тям тав а̄тятэ, лю̄лиг ё̄ӈхтахтыглым порат Сортыӈъят репрессировайтавес. Щаще̄квам нила ня̄врамыӈ та̄гыл ювле Люлюкары па̄вылн ва̄нтласыт. – Яга̄ги, ягпыга̄пщи о̄ньще̄гын? – Ма̄н нила о̄лсӯв, Геннадий, Валерий, Григорий ос ам. Кит ягпыгагум а̄тимыг. Яныг ягпыгум Краснодар ӯс нупыл ва̄нтла̄лас, Кубаньт о̄лыс. Тот на̄й харыгтан ма̄т рӯпитас, олн атыс, кол ёвтыс. Э̄ла минас, сыме̄тыл лю̄лиг е̄мтыс. Пыгаге ос э̄кватэ хультсыт, тот о̄лэ̄гыт. То̄ва порат та̄н палтаныл яланта̄лэ̄в. Акв ягпыгум витн патыс. Ме̄н Григорийме̄нтыл тыт Ягримт о̄лыме̄н. – Хо̄т ханищтахтасын? Хо̄т рӯпитэ̄гын? – Школа а̄стламум юипа̄лт Ханты-Мансийск ӯст педучилищат нила та̄л ханищтахтасум. Педучилище а̄стламум юипа̄лт ювле ёхтысум, садикт рӯпитаӈкв патсум. 2000 – 2007 та̄лытт Санкт-Петербург ӯсн Герцен нампа институтн ханищтахтуӈкв ялантасум, «Культурология ос учитель родного языка и литературы» факультет а̄стласум. Ма̄ньщи ла̄тыӈ торгамтэ̄гум, мощнув потыртэ̄гум, сак хартэ̄гум. Садикт рӯпитамумт «национальный кружок» ва̄рыгласум, ма̄ньщи о̄лнэ ва̄рмаль ня̄врамытн ханищтасум, мо̄йтыт, ёнгыт, ёнгынутыт, ӯйхул ос ма̄витув урыл потыртасум. 26 та̄л садикт рӯпитасум, стажум то̄влыс ань ат рӯпитэ̄гум. Юн о̄лэ̄гум, матыр ва̄ре̄гум, юн о̄с рӯпата то̄вылхаты. Рӯщ ла̄внэ щирыл «Древо жизни» хассум. Рӯтанум пӯссын ёлхассанум. Щаще̄квамныл Ульяна Петровнаныл о̄вылтахты. О̄пав репрессировайтавес, хуритэ о̄с ат хультыс. Тамле потыр Зоя Алексеевна такви уре̄тыл потыртас. Ты потруме̄н ме̄н мо̄лты та̄л ёлхансысламе̄н, ань Зоя Алексеевна детскоюношеский Центрколт рӯпиты, ня̄врамыт ма̄ньщи ла̄тӈыл ханищты ос сак хартнэ ва̄рмаль суссылты. Ты ка̄ркам, нёмса, сымыӈ хо̄тпан ам паща ла̄тыӈ ке̄тэ̄гум. Пуста̄гыл вос о̄лы, со̄тыӈыг, щуниӈыг вос о̄лы. О̄выл хурит З. А. Мелентьева Санкт-Петербург ӯст ма̄ньщи ла̄тыӈ экзамен миме порат по̄слыма. Китыт хурит та̄в яблоня йӣв по̄хыт лю̄ли. Ёлы хурит аквъёт ханищтахтам нэ̄т: Н. К. Маслова, З. А. Мелентьева, Н. К. Тасманова, Е. И. Адина.

1053 2013.06.07. Тамара МЕРОВА

111 со̄тыӈ та̄лыл янытлылӯв. Мо̄лал редакциявн ищхӣпыӈ ут хосыт пищмал ке̄твесӯв. Тыи Р. М. Капшук, Саранпа̄выл школат са̄в та̄л ня̄врамыт ханищтан нэ̄, ма̄навн ля̄ххал хансыс. Ты потыр тав ётэ рӯпитан нэ̄н Т. В. Хатанзееван ма̄ньщи ла̄тӈыг толмащлавес. Ань тэ̄н хансум ля̄ххалэ̄н э̄лаль ловиньтэ̄н. Саранпа̄выл школа 2013 та̄лт сака янытлылӯв . Мо̄лалма̄н номсысӯв, хумус ты ханищтан колув яныгса̄т та̄лыл янытлаӈкве патылӯв. Тувыл научнопрактический конференциян щё̄питахтамув порат пе̄с нэ̄пакыт щирыл та̄рапатыс – Саранпа̄выл школа яныгполь э̄тпос о̄выл хо̄талэ̄т 1902 та̄лт пӯнсыма. Ты э̄лыпа̄лт ня̄врамыт Сӯкыръят ханищтаве̄сыт. Та школа 1893 та̄л па̄сыл рӯпитас (тав ос 120 та̄лэ то̄влыс). А̄гирищитпыгрищит ханищтаӈкве патве̄сыт, па̄выл та̄ра са̄в номтыӈ хо̄тпал са̄вмыс. Та па̄сныл ня̄врамыт ханищтан ва̄рмаль акваг э̄лаль тотвес. Ань Саранпа̄вылт ханищтан кол коныпал искусство школа о̄лы, тувыл «Поиск» нампа центр рӯпиты. Ты колыгт а̄гитпыгыт йӣквуӈкве, э̄ргуӈкве ос са̄всыр каснэ тэ̄латн ханищтавет. Та̄н ты щирыл та̄ксарнуве̄г ос пуста̄гыл яныгме̄гыт. Ма̄н школав яныгса̄т та̄лэ янытлан ма̄гыс «Ханищтан кол 100 та̄лэ» нампа проект щё̄пита̄лсӯв. Ань та проектув хосыт э̄лаль рӯпитэ̄в. Таве школа яныгса̄т аквхуйплов та̄лэ янытлан кастыл мо̄т ла̄тӈыл хансыслӯв. 111 та̄л – ты о̄с са̄в со̄тыӈ ос пӯмащ ва̄рмаль. Ты проект щирыл ма̄хум ань рӯпитаӈкве о̄вылтахтасыт. Любовь Николаевна Гребенева ханищтан хо̄тпат пе̄с хурияныл акванатыянэ ос нэ̄пакн хансыянэ. 1930 та̄л порат по̄слым хурит тав о̄с хо̄нтыс. Агния Егоровна Рокина са̄в та̄л школат рӯпитас, хосат пенсиян патхатас кос, ос ань пионерыт о̄лум урыл потрыт хансуӈкве ка̄ркамыг вуйхатас. Наталья Евгеньевна Фомина «Одноклассники» ос «Вконтакте» хосыт школа а̄стлам хо̄тпат кинсыянэ ос та̄н ётаныл нё̄тмил ва̄рнэ ма̄гыс потыртахты. Та̄н пуссын ты проект урыл вос ва̄гыт ос пе̄с хурит манос ханищтахтам пораныл о̄вылтыт матыр потыр вос хансэ̄гыт. Онтолов классыт ханищтахтын а̄гииг Наташа Кудус ос Люба Артеева о̄с са̄всыр рӯпатат нё̄тэ̄г. Пуссын ты рӯпата ва̄рнэ ма̄гыс манса̄вит олн холтаве, тыи Любовь Павловна Стаканова сметанэ̄пак щё̄питас. Ха̄льӯс образование комитетыт рӯпитан хо̄тпат о̄с нё̄туӈкве ла̄вхатсыт. Ты проектув «Нот палыт о̄лэ̄н ос нот палыт ханищтахтэ̄н» намыл пиныслӯв. Тав сӯкыр э̄тпос мус рӯпитаӈкве паты ос ма̄нь таквс э̄тпост оигпан э̄лыпа̄лт ялпыӈ хо̄тал тах ва̄рыглэ̄в. Ань ос та кастыл ма̄хум щё̄питахтэ̄гыт. Ма̄н касыл ва̄ре̄в ос на̄нан нё̄туӈкве во̄виянӯв. Хотьют школа ма̄гыс, тувыл спортивный ос номт тотнэ касылыт палт щар ёмас герб манос эмблема щё̄питы, ханищтахтын маснут палт эмблема по̄слы ос пӯмыщ гимнэ̄ры хансы– ма̄навн вос ке̄тыяныл. Ня̄врамыт ос хурит по̄слуӈкве, потыр хансуӈкве ве̄рме̄гыт. Ань хотьютматыр рӯпата ва̄руӈкве ка̄сащи ке, на̄н Саранпа̄выл школан Вокуев ӯсхулы, 12 кол адресын пищма хансэ̄н манос sch86-saranpaul. na-rod. ru ищхӣпыӈ ут щирыл ла̄тыӈ ке̄тэ̄н. Хунь конференция ва̄ре̄в, тот тах тамле ва̄рмалит урыл потыртэ̄в: – Ам омагума̄тягум пионерыг о̄лсы̄г; – Школа а̄стлам хо̄тпанув янытлыянӯв; – Школа о̄лупса; – Ты сака ёмас ханищтан хо̄тпат; – Мо̄рсыӈ пормасыт; – Ва̄та̄л ва̄рмалит та̄рапаттавет. 1958 та̄л па̄сныл 1 со̄тыра 500 арыгкем хо̄тпа Саранпа̄выл школа а̄стласыт. Та̄н ань Россия янытыл ла̄кква ма̄н мингаласыт. То̄ват мо̄т хо̄н ма̄н о̄луӈкве минасыт. Ма̄н номсэ̄в, ань ты проектын акванюрщлаве̄в, акванхо̄нтхатэ̄в, школат ханищтахтам порав номылматылӯв ос сымын ро̄внэ са̄в пӯмыщ ла̄тыӈ ла̄ве̄в.

1053 2013.06.07. Николай МЕРОВ

Йильпи суссылтап рӯпиты. Я̄ӈк на̄тнэ э̄тпос 18 щисла музеит янытлан мирхал хо̄талыг о̄лы. Ялпыӈ хо̄тал кастыл Ханты-Мансийск ӯст «Геология, нефть ос газ» музей кӯщай нэ̄ Татьяна Кондратьева ос пе̄с йис суссылтапыт щё̄питан хум Андрей Головнёв ля̄ххал тотнэ ма̄хум ёт ва̄щиньтахтасы̄г. Ты этнограф хум исторический наукат доктор нам о̄ньщи, Екатеринбург ӯст о̄лы. Ты музейкол хус та̄л рӯпиты. Рӯпитанэ̄тэ сыс хорамыӈ яныг кол ӯнттувес ос йильпи ищхӣпыӈ утыл ёвтвес. Тот ань пуссын аквъёт 33 со̄тыра арыгкем са̄всыр пормас атым о̄лы. Суссылтап ва̄рнэ ма̄гыс яныг колнакыт та̄стуве̄сыт. Ань аквторыг тот 4-6 выставка ва̄руӈкве ро̄ви. Тувыл ань ты музей колт «Энергия Югры» нампа йильпи проект ва̄рвес. Ты выставка акваг рӯпитаӈкве паты. Хӯрум накпа лю̄лит колт суссылтап паты. Пуссын э̄рнэ пормасыт тув атнэ ма̄гыс хӯрмахкем та̄л тах мины. Ты ва̄рмаль щё̄питан хум Андрей Головнёв ла̄выс: «Ма̄н тох ва̄ре̄в, суссылтапын ёхталан хо̄тпа, аквтупмат ма̄во̄й но̄хвинэ ма̄н вос ликми. Хумус ма̄во̄й но̄хвиӈкве о̄вылтавес, манарыл но̄хняртаве ос мо̄т тэ̄лат урыл тот ка̄сыӈ хо̄тпа такви ка̄салы ос ёмщакв та̄рапаттыянэ». О̄выл колнакт ма̄ ё̄лыпа̄лт о̄лнэ щунит суссылтаӈкве патавет. Тувыл хо̄тпа буровой вышка хосыт китыт накпа колн ха̄ӈхылтап хосыт но̄ӈхаль ха̄ӈхи. Ос ма̄ нумипа̄лн хумус ма̄во̄й но̄хвиве, таи суссылтаве. Хӯрмит накпа колт ос ищхӣпыӈ утыл ма̄во̄йныл маныр ва̄раве, та урыл суссылтап щё̄питаве. Тамле ты пӯмащ ва̄рмаль та̄стувес. Ты музей кӯщай нэ̄ Татьяна Валентиновна ялпыӈ хо̄тал кастыл музейт рӯпитан хо̄тпат ос суссылтапын ёхталан ма̄хум пуссын сымыӈыщ янытласанэ. Ма̄хумаквет, на̄н ос тамле пӯмащ тэ̄ла сунсуӈкве хуньт ты музейн ялэ̄н. На̄нан ты ва̄рмаль тах сака мӯсты.

1053 2013.06.07. Александр ВЬЮТКИН

Та̄л сыс туп акв э̄т ёхталаӈкв ро̄ви. Я̄ӈк на̄тнэ э̄тпост «Ночь в музее» нампа мирхал акция округувт титыт та̄л ва̄рыглавес. Ханты-Мансийск ӯст «Ма̄вит ос э̄лумхо̄лас», «Ма̄во̄й ос газ» ос «Картинная галерея Г. С. Райшева» нампа хӯрум музей э̄ти рӯпитасыт. Та э̄т сыс акв со̄тыр атса̄т хо̄тпа музеитын ёхталасыт. Хӯрум музей халт са̄всыр пӯмащ о̄лыс. «Ма̄вит ос э̄лумхо̄лас» музейт ка̄сащан ма̄хум пе̄с пора хольт ю̄нтым маснут масыглаӈкв ос тох по̄слахтуӈкве ве̄рмысыт. «Ма̄во̄й ос газ» колт ос са̄всыр химия утыт аквантэ̄лыгтым суссылтаве̄сыт. Г. С. Райшев ка̄тыл по̄слын колэ̄н ёхталам ма̄хум та̄нти матыр по̄слуӈкв ве̄рмысыт. Ам та э̄типа̄лаг ка̄тыл по̄слын ханты о̄йка палт ялсум. Ёхталам ма̄хум ще̄мьяӈ та̄гыл о̄лсыт. Ма̄нь ня̄врамыт ёнгасан ма̄гсыл колса̄м ва̄рим о̄лыс. Тот та̄н ёнгысыт ос по̄слысыт. Та̄н ма̄гсыланыл тот ёнгынут ос по̄слынут пуссын щё̄питым о̄лсыт. Оманыл, а̄тяныл Геннадий Степанович по̄слум хуриянэ сунсыглым ос та урыл хӯнтлым колэ янытыл ё̄мыгтасыт. То̄ва мӯй ма̄хум пуссын ты хӯрум музейн э̄ти сыс щалтсасыт. Та̄н ла̄всыт, тыи сака пӯмащ, са̄внув тамле хо̄талыт о̄лсыт те, та̄н аквписыг ёхталанувыт.

1053 2013.06.07. Александр ВЬЮТКИН

Во̄рув са̄литым о̄ньщелы̄н. Ма̄н округувт ма̄вит ӯргалан щирыл рӯпитан ва̄рмаль я̄ӈк на̄тнэ э̄тпост аквхойпловитыг о̄вылтавес. Ты кастыл Ханты-Мансийск ӯст са̄всыр пӯмащ тэ̄лат ва̄рыглавет. Ӯсянытылмо̄тмо̄т ма̄т ма̄нь йӣвыт ӯнттуве̄сыт. Ты акция о̄вылтым хо̄талт ос субботник ва̄рыглавес. Ма̄хум ӯс янытыл мори па̄хвтым порсыт акванатсыт. Ты коныпал ня̄врамыт ма̄гсыл ма̄вит ӯргалан са̄в ханищтапыт тах ва̄рыглавет. Ань ты «Спасти и сохранить» нампа акция округувт лӯпта э̄тпос оигпан мус рӯпитаӈкв паты. Ма̄вит ӯргалан акция «Археопарк» нампа ма̄т рӯпататэ о̄вылтавес. Округ губернаторув Наталья Комарова тув ёхталас ос мирн ёмас ла̄тӈыт ла̄выс: «Ам номсэ̄гум, хунь мо̄т хо̄н ма̄т ма̄н округув урыл потыртаве, та̄н потраныл а̄ти туп ма̄во̄й ос газ но̄хвинэ урыл мины. Та̄н ань о̄лнэ ма̄вит ӯргалан акцияв урыл о̄с са̄в ва̄гыт ос потыртэ̄гыт. Ты хо̄тал Россия янытыл са̄в яныг ӯсыӈ ма̄т о̄с акв тамле ма̄вит ӯргалан ва̄рмалит рӯпитэ̄гыт».

1053 2013.06.07. Людмила ТЕТКИНА

Кол ӯнттын ма̄нанын на̄нки нупылын хансэ̄н. Наталья Комарова, губернаторув, па̄влыӈ ос ӯсыӈ миркол кӯщаит ак¬ванатыгласанэ. О̄влэ̄т тав кит хо̄тпаг яныт¬ласаге. Россия янытыл миркол кӯщаит ка¬сылыл ва̄рыглавет. Та̄н тув та̄нки ва̄рум рӯпатаныл ос проектаныл ке̄тыглыяныл. 700 ке̄тум заявканэ̄пакыт халт ма̄н окру¬гувныл кит проектыг но̄хпатсы̄г. Ханты-Мансийск ӯс миркол «Лучший му¬ниципальный проект» нампа номинацият хӯрмит места вис. Сургут ӯст миркол кӯщай Дми¬трий Попов мо̄т мир¬кол кӯщаит халт но̄хпатыс, китыт местал майвес. Наталья Кома¬рова тэ̄натэ̄н ты яныт¬ласаге. Ты юипа̄лт та̄н налоголн урыл потыртасыт. Ань рӯпитан са̄кконыт щирыл ма̄ о̄щнэ хо̄тпат налоголн ойтэ̄гыт, тыил государствав о̄с са̄в олн сэ̄лы. Па̄влыӈ ма̄хум ко¬ланыл ӯнлын ма̄ та̄нки нупыланыл хансуӈкве ань о̄с ла̄вавет. Сапра̄нит миркол кӯщаит китыглаве̄сыт, манаса̄вит олн та̄н тыил сэ̄лэ̄гыт ос хумус ма̄хум ёт ты тэ̄ла хосыт рӯпитэ̄гыт. Вячеслав Куликов, Урай миркол кӯщай хум, рӯпатаныл урыл тамле ла̄тыӈ ла̄выс. Кит та̄л сыс акваг мощщанув ма̄хум налоголн ойтуӈкве пат¬сыт. 2010 та̄лт Урай ӯст о̄лнэ мир пуссын аквъёт 28 миллион солко̄ви ойтсыт, 2012 та̄лт туп 16 миллион. Ань са̄всыр льготат ва̄рве̄сыт, са̄в ма̄хум ты олныл воссыг ат хансавет. Та̄н мирко¬ланылт рӯпитан ма̄хум ань са̄всыр акцият ос ре¬клама ва̄рыглэ̄гыт, кол ӯнттум, гараж ӯнттум ма̄наныл ма̄гсыл ма̄хум нэ̄паканыл моляхнув вос ва̄рияныл. О̄с та порат кӯщаит акв тэ̄ла урыл потырта¬сыт. Ань мо̄т хо̄н ма̄ныл ёхтын таджикыт, узбе¬кыт, киргизыт ос мо̄т по̄х хо̄тпат тыт ма̄ ёвтэ̄гыт ос та̄нки нупыланыл молямтахтым хаслыг¬тыяныл. Кӯщаит китыглахтасыт, ты ма̄хум ма̄ тыт ёвтуӈкве манрыг та̄ртавет. Прокуратурат рӯпитан нэ̄ Валентина Балута ювлела̄выс, са̄ккон щирыл та̄н олн ке о̄ньще̄гыт, кос хо̄т Рос¬сия янытыл ма̄ ёвтуӈкве ве̄рме̄гыт. Сапра̄нит о̄с акв на¬лог урыл потыр о̄лыс. Ань многоквартирный колт о̄лнэ ще̄мьят ты олныт ойтуӈкве о̄с ла̄вавет. Кӯщаит ань тыг мус ты тэ̄ла хумус мӯсхалыг ва̄руӈкве, та̄нки ат торгамтэ̄гыт. Яныг колт о̄лнэ ма̄хум халт ты олныт хумус уртуӈкве ос кол по̄хат о̄лнэ ма̄тэ ма̄гсыл налоголн виӈкве ман а̄ти о̄с ат ва̄гыт. Тамле колт о̄лнэ ма̄хмытын та̄нкина̄нылн ты нэ̄пакыт щё̄питаӈкве э̄ри. Нэ̄пакыт ва̄руӈкве та̄н о̄с ат ка̄саще̄гыт. Ты та̄рвитыӈ ва̄рмаль ань яныг ӯсытт о̄лы, тот там¬ле кол са̄в ӯнттаве. Сергей Зайцев, Горно¬правдинск па̄выл миркол кӯщай, о̄с акв та̄рвитыӈ ва̄рмаль урыл ла̄выс. Тав па̄влыӈ ма̄хманэ кол ӯнттын ма̄наныл та̄нки нупыла¬ныл хансуӈкве пуссын кос таӈхияныл. Ма̄ ур¬тнэ (межевание) ва̄рнэ хо̄тпат тув ат ёхталэ̄гыт. Ань ты рӯпата вос ва̄раве, па̄вылт лов хо̄тпа заявлениенэ̄пак х а с ы т, т а̄ л с ы с т ы ӯрхатэ̄гыт. Моляхнув нэ̄паканыл ва̄рсаныл ке, налоголн ойтуӈкве о̄вылтахтынувыт. Ма̄ уртнэ хо̄тпат ювле ла̄всыт, тамле рӯпата ва̄руӈкве э̄лумхо̄лас ат то̄вылхаты, тувыл ка̄сыӈ ма̄нь па̄вылн акв хо̄тпа о̄лнэ ма̄тэ по̄слуӈкве ос нэ̄паканыл ва̄руӈкве, та̄н о̄с ат ве̄рме̄гыт. Тыи ма̄гсыл ма̄хум хоса та ӯрхатэ̄гыт. Та сапра̄нит кӯщаит ма̄вит ӯргалан урыл о̄с потыртасыт. Ань мир¬кол кӯщаит ка̄сыӈ па̄выл по̄хат порс ул вос атэ̄гыт, порс атнэ полигоныт вос щё̄питэ̄гыт. Наталья Комарова ла̄вме щирыл, округувт акв програм¬ма пирмайтавес ос ты хосыт мирколыт олныл та̄ставет. Советский рай¬он миркол кӯщай хум Вячеслав Толстогузов ла̄выс, та̄н та̄нки райо¬нанылт порс атнэ акв по¬лигон щё̄питасыт, Пионерский, Малиновский, Таёжный ос Алябьево па̄влытныл порс тув то¬таве. Наталья Комарова ты программа хосыт пус¬сын кӯщаит рӯпитаӈкве ла̄всанэ. Ос ка̄сыӈ рай¬онт тамле порс атнэ ма̄ вос ва̄раве, па̄влыт ля¬пат ма̄хум ма̄ныл ул вос па̄ӈктыяныл.

1053 2013.06.07. Валентина УЗЕЛЬ

Кол ёвтнэ ма̄гыс минэ олн мощщан ёлпо̄илтта̄лаве. Тӯяг а̄ти сака хосат округ губернаторув Н. Комарова ла̄выс, ань округув янытыл о̄лнэ колыт тынаныл сака янгыг е̄мтсыт. Ты ва̄рмаль таима̄гыс осннэ̄глыс, ма̄хум субсидиял мивет ос ипотекаолн винэ порат процент акв па̄лэ Правительство па̄лыл ювлеойтаве. Кол ӯнттын округ Департаментыт кӯщай ва̄ӈын хо̄тпа Андрей Кривуляк ос анти монопольный службат рӯпитан хум Василий Иванов журналист ма̄хум акванатыгласанэ̄н ос ты ва̄рмаль урыл потыртасы̄г. Ань яныг ӯсытт са̄в кол ӯнттаве, ма̄хум тот кол ёвтуӈкв та̄ра ат ве̄рме̄гыт. Ты колыт о̄влэ̄т са̄всыр по̄х хо̄тпатн ёвтавет, та̄н «посредникыг» ла̄вавет. Тувыл та хо̄тпат квартират э̄лаль та тыналыяныл. Ты хосыт ань колыт сака тыныӈыг е̄мтсыт, акв квадратный метра 100 со̄тыра солко̄ви ляпатемн ёхтыс. Ань округ миркол кӯщаянув мо̄т щирыл ва̄руӈкв таӈхе̄гыт – ты та̄л лӯпта э̄тпос о̄выл хо̄талэ мус квартират хо̄нтум ма̄хум туп та̄н субсидиял мивет ос ипотека процентаныл ойтуӈкв нё̄тавет. Ос та юипа̄лт очередит о̄лнэ ма̄хум хумус э̄лаль нё̄туӈкв патавет, ань ты кӯщаиг тох ла̄всы̄г – ты ма̄хум ма̄гыс 2014-2020 та̄лытн мо̄т йильпи жилищный программа хансаве. А. Кривуляк ла̄выс, ань субсидия винэ ма̄гсыл ма̄хум очередин хансуӈкв ат патавет, ты рӯпата мощщан ёлпо̄илтта̄лаве. Ос 2013 та̄л сыс жилищный программат пе̄с щирыл ёмащакв рӯпитаӈкв патэ̄гыт. Тувыл э̄лаль кӯщаит маныр номылматэ̄гыт – манос о̄лы. Ты та̄л оигпан мус ань ма̄ньлат ще̄мьят ма̄гыс 1 млрд. 270 млн. солко̄ви та̄ставе. Соссаӈ ма̄хум программан 404 млн. солко̄ви. Ань юио̄выл тит та̄лыг сыс округувт о̄лнэ кол сака мощща ӯнттувес, ос са̄в ма̄хум субсидияолныл майве̄сыт. Колыт тыналан ма̄хум таима̄гыс ты тох сака тыныӈыщ кол тыналэ̄гыт. Ань ос кол ӯнттын ма̄гыс олн са̄выӈпа̄лэ бюджетныл миӈкв патаве. Строительный компаният пуссын нё̄туӈкв патавет – ма̄ло̄мтыл мивет, межевание ва̄руӈкв те э̄ри, о̄с тах нё̄тавет. Тувыл э̄лы ма̄ныл кол ӯнттын са̄всыр э̄рнэ пормасыт ман мо̄т утыт ул вос тотавет, стройматериалыт тыт ва̄руӈкв ос тыналаӈкв патавет. Тувыл кӯщаиг титыглавесы̄г, акв квадратный метра тынэ хумус ловиньтаве, манрыг субсидия винэ порат акв метра ма̄гыс Сургут ӯст 50 со̄тыра солко̄ви миве, ос тыгыл са̄внув манрыг ат миве? А. Кривуляк ла̄выс, ань Минрегионразвитият рӯпитан ма̄хум та̄н ловиньтэ̄гыт, Россия янытыл хо̄т ос манах тын хансуӈкв ос манса̄вит солко̄ви субсидия ма̄гыс миӈкв э̄ри. Ка̄сыӈ ӯст манос районт субсидияолн са̄всыр са̄витыг хансым о̄лы, колыт ма̄гыс тыныт пуссын са̄всырыт. Ань лӯпта э̄тпос о̄выл хо̄талэ ювле та хультыс. Э̄лаль хумус субсидияолн миве, на̄н тах ля̄ххалыт акваг ловиньтэ̄н. Округувт 2013 та̄л о̄выл хӯрум э̄тпос сыс ань акв кв. метра ма̄гыс тыса̄вит субсидияолн миве: – Сургут ӯс 50 286 солко̄ви, – Ханты-Мансийск ӯс 50 308 солко̄ви, – Урай ӯс – 43 567 солко̄ви, – Нижневартовск ӯс – 49 004 солко̄ви. – Нефтеюганск ӯс – 46 196 солко̄ви; – Мегион ӯс – 49 321 солко̄ви; – Когалым ӯс – 44 986 солко̄ви; – Югорск ӯс – 45 966 солко̄ви; – Радужный ӯс 44 830 солко̄ви; – Пыть-Ях ӯс – 45 799 солко̄ви; – Нягань ӯс – 43 102 солко̄ви; – Лангепас ӯс – 50 007 солко̄ви; – Покачи ӯс – 40 177 солко̄ви; – Советский район – 43 732 солко̄ви; – Нижневартовский район – 47 198 солко̄ви; – Нефтеюганский район – 46 228 солко̄ви; – Белоярский район – 45 281 солко̄ви; – Сургутский район – 44 400 солко̄ви; – Кондинский район – 42 543 солко̄ви; – Ханты-Мансийский район – 46 025 солко̄ви; – Октябрьский район – 47 164 солко̄ви; – Бере̄зовский район – 41 698 солко̄ви.

1053 2013.06.07. Галина КОНДИНА

Сэ̄лнэ олнаныл та̄нти ма̄нылт вос о̄ньщияныл. Мирн пе̄риим ма̄хум тӯя хо̄талыт оигпан порат акванатхатыгласыт. Та хо̄тал та̄н хусахтем са̄ккон пирмайтасыт ос то̄ва кӯщаит ва̄рум рӯпатаныл урыл потраныл хӯнтлысыт. Щар яныг тэ̄лаг таи о̄лы – округ олнанув хумус холтавет. Та урыл потыртаӈкве В. А. Дюдина во̄виньта̄лвес, тав губернатор ва̄ӈын хо̄тпаг рӯпиты ос олн ловиньтан Департаментыт кӯщаиг о̄лы. Вера Аркадьевна ла̄выс: «Ты та̄л о̄выл хӯрум э̄тпос сыс бюджетувн 21 миллиард 800 арыгтем солко̄ви пинвес. Мо̄лты та̄л аквты э̄тпосыт сыс лов миллиард солко̄виныл са̄внув атыгласӯв. Ты таима̄гыс тох о̄лы, ма̄во̄й тынэ мощщаг е̄мтыс. Мо̄лты аквты порат ма̄во̄й тынэ баррель ма̄гыс 117, 5 доллар о̄лыс, ань – 111, 4 доллар. На̄локолн о̄с аквта щирыл организацият кос ойтэ̄гыт. Ос ты тӯя ма̄ньполь э̄тпос ва̄т щислатэ ӯщлахтын хо̄талын е̄мтыс. Таима̄гсыл та̄н са̄выӈпа̄лэ туп яныгполь э̄тпос о̄выл хо̄талт олнаныл ойтсаныл. Та̄лув о̄выл хӯрум э̄тпосанэ сыс 27 миллиард арыгтем солко̄ви ма̄н са̄всыр ва̄рмалитын та̄стысӯв ос мисанӯв. Ты олнытыл мир пусмалтан ма̄гыс – 26, 5 %, ханищтан ма̄гыс – 23, 6 %, мирн нё̄тнэ кастыл – 18, 7 % та̄стысӯв». Олн ловиньтан кӯщаюв ла̄тӈе щирыл, хӯрум э̄тпос сыс ат миллиард 800 миллиард арыгтем солко̄ви ат то̄вылхатас, рущ щирыл тав «дефицитыг» ла̄ваве. Мир пусмалтан са̄кконт то̄ва ла̄тӈыт о̄с мо̄тнув щирыл хасве̄сыт. Ань ма̄ньлат ле̄ккарыт ма̄нь па̄влытын рӯпитаӈкве минуӈкве вос ка̄саще̄гыт, та щирыл ва̄раве. Мо̄лты рӯпитам са̄ккон о̄с э̄лаль ты та̄лн хасвес, 2013 та̄л сыс па̄влын миннэ ле̄ккарыт акв миллион солко̄вил, фельдшерыг ос акушерыг рӯпитан хо̄тпат 500 со̄тыр солко̄вил ойтавет. Депутатыт та̄нти ма̄гсыланыл ос са̄всыр мирколт рӯпитан кӯщаит ма̄гсыл тамле са̄ккон пирмайтасыт. Ань мо̄т хо̄ныӈ ма̄т банкыт та̄нти олнаныл о̄ньщуӈкве ат ро̄ви. Туп тыт Россият банкытын вос пиныяныл. Ты щирыл кӯщаитын, тувыл та̄н э̄кванылн ос нёлоловхуйплов та̄ланыл ат то̄влум ня̄враманылн ты са̄ккон хосыт о̄луӈкве э̄ри. Акв тамле са̄ккон Государственный Думат пирмайтавес, таима̄гыс округувт о̄с тох ва̄руӈкве э̄рыс.

1053 2013.06.07. Тамара МЕРОВА

Сыстам ма̄т о̄луӈкве пуссын таӈхе̄гыт. Ханты-Мансийскат ма̄вит ӯргалан кастыл мирхал конференция ва̄рыглавес. Тот учёныит коныпал ня̄врамыт хансум потраныл о̄с хӯнтлуве̄сыт. Мо̄лал ЮНЕСКО хо̄тпат ты конференция В. И. Вернадский, учёный хум, 150 та̄лэ то̄влын кастыл тав наме̄тыл намтысаныл. О̄йка о̄лме сыс ма̄ ос то̄румыт о̄лнэ са̄всыр тэ̄лат та̄рапаттыс ос наука ма̄гыс са̄в рӯпата ва̄рыс. Ань ты ва̄рмалит о̄вылтыт мо̄т учёныит о̄с потыртэ̄гыт. Тувыл ма̄ янытыл о̄лнэ мирув ма̄витув ӯргалан урыл та̄нки о̄с номсуӈкве патсыт. Ма̄ке̄в ань сыстамыг о̄ньщуӈкве ат ке патылӯв, ётыл ма̄н юипа̄лувт самын патнэ ня̄врамыт лю̄льсаӈ о̄луӈкве патэ̄гыт тах. Ня̄врамытн ты о̄вылтыт ва̄тихал потыртаӈкве э̄ри. Ань экология урыл та̄н хумус ханищтаӈкве э̄ре̄гыт, образованият рӯпитан кӯщаит аквъёт номсахтасыт. Анатолий Захлебный, Российский академият экологический образование ма̄гыс пуӈктотнэ хум, ла̄выс: «Учёныит ва̄тахкем та̄л аквъёт номсахтэ̄гыт, хумус лылые̄п, ма̄витэ сыстамыг хультуптаӈкве ро̄ви. То̄ва мирыт сэ̄иӈ ма̄т, тунра манос хара ма̄т о̄лэ̄гыт. Ка̄сыӈ мир такви ма̄тэ̄т о̄луӈкве ханьщувлас ос ма̄витув ӯргалым о̄ньщитэ. Ань та̄н аквтох о̄лнувыт ке, мо̄т ма̄ныл ёхтын ма̄хмыт ханищтанувыт, та̄н са̄в та̄лын сака ёмас по̄льса э̄лаль тотнувыт». Ханищтап ос ма̄ньлат ма̄хум Департаментыт кӯщаиг о̄лнэ нэ̄ Антонина Урсу-Архипова потыртас: «Ты таквс школатыт ма̄нь ня̄врамыт ма̄гыс ханищтан хо̄тпанув щар о̄выл урокытыт ма̄вит ӯргалан урыл тах потыртэ̄гыт. Ань ка̄сыӈ ня̄врам такви самын патум ма̄тэ э̄руптаӈкве патытэ ке, тав мо̄т ма̄ о̄с ӯргалытэ». Японияныл ёхталам нэ̄ Йоко Мошизуки ла̄выс: «Ам ос ня̄врам ы т н л а̄ в е̄ г у м , х умус та̄н о̄лнэ ма̄в ань ёмасыг ва̄руӈкве ве̄рмияныл. Ка̄сыӈ э̄лумхо̄лас ма̄ньта̄гыл вос номсахты, о̄лнэ̄тэ сыс тэ̄лата̄л вит ул вос со̄сы, на̄й лампочкат наска̄ссыг ул вос постэ̄гыт, порыс хо̄та̄ти ул вос па̄хвты. Туп аквкит хо̄тпа ты ма̄нь тэ̄лат ва̄рнэ̄ныл юипалт ма̄витув маткем сыстамыг е̄мтнув, ос ка̄сыӈ хо̄тпа тох ке ва̄рнув – ма̄ке̄в са̄в та̄лын со̄тыӈыг хультнув». Стефани Ходж ЮНИСЕФ образование тармыл рӯпитан нэ̄, йильпи щё̄питым проектыт урыл потыртас. Ма̄ янытыл о̄лнэ мирыт ма̄в ӯргалаӈкве акван вос юрщхатэ̄гыт ос акван вос нё̄тхатэ̄гыт. Югра ма̄вт экология урыл хосат та̄гыл са̄в потыртэ̄гыт, ёмас тэ̄лат ва̄ре̄гыт. Таима̄гыс ань мирхал конференция тыт ва̄рыглавес ос са̄в ма̄хум акванхо̄нтхатыгласыт, та̄нки халанылт аквъёт рӯпитан щирыл потыртахтасыт.

1053 2013.06.07. Николай МЕРОВ

Пенсияолн са̄ртын атэ̄н. Та э̄тпост Ханты-Мансийск ӯст прессконференция о̄лыс. Тув кит кӯщай хо̄тпаг ёхталасы̄г. Ты Алексей Путин, округ губернатор ва̄ӈын хум, ос Алексей Охлопков, Ханты-Мансийский негосударственный пенсионный фондыт рӯпитан кӯщай. Тэ̄н ля̄ххал тотнэ хо̄тпатн пенсияолн та̄стын урыл потыртасы̄г. На̄н э̄лаль тэ̄н потре̄н ловиньтэлы̄н. Ань рӯпитан хо̄тпат п е н с и я о л н т а̄ н к и атуӈкве ве̄рме̄гыт. Ты кастыл бюджетный организациятт рӯпитан хо̄тпат ма̄гыс тамле тэ̄ла щё̄питавес. Хо̄тпа та̄л сыс китхуйплов со̄тыра солко̄ви Ханты-Мансийский негосударственный пенсионный фондын ке̄туӈкве паты ке, округ па̄лыл ос аквтаса̄вит олныл нумыл тув тах пинаве. Ты ва̄рмаль ма̄гыс на̄нан рӯпатанынт заявлениенэ̄пак хансуӈкве э̄ри. Пенсия ма̄гыс атнэ олнанын тув вос пинавет. Ты хосыт пенсияолныт кит щёс но̄хса̄вме̄гыт. Яныгпа̄ла хо̄тпаг е̄мтнэ̄н порат ёмас са̄вит олныл ойтуӈкве тах патаве̄н. Негосударственный пенсионный фондын олнанын пинуӈкве ул пилэ̄н. Нэ̄мхотталь ат тотавет, та̄н тот ӯргалым о̄ньщавет. Ты коныпал на̄н хунь ка̄сащегы̄н, ты олнаны̄н аквторыг ювлевиӈкве ве̄рмияны̄н. Тувыл ань китса̄т со̄тыра яныгпа̄ла хо̄тпа пенсияолн выгыт. Кӯщаиг ань ла̄внэтэ̄н щирыл, ка̄сыӈ та̄лныл акваг са̄внув хо̄тпа тув ёхтэ̄гыт. Са̄ртыннув олнаны̄н тув пинуӈкве патыяны̄н ке, пенсиян патнэ̄н мус са̄в олн атхаты. Ты ва̄рмаль урыл ань номсахтуӈкве э̄ри. Са̄выӈпа̄лэ ма̄хум налыман нупыл ат та̄ланыл то̄влын порат пенсияныл урыл ущта номсахтуӈкве о̄вылтахтэ̄гыт. На̄н о̄с хоса ул ӯрхатэ̄н, матнэ̄н порат са̄внув пенсияолн виӈкве таӈхегы̄н ке, олнаны̄н ань тув пинэ̄н. На̄нки о̄с ёмщакв номсахтэ̄н.

1053 2013.06.07. Галина КОНДИНА

Пе̄с э̄ргыт, мо̄йтыт, потрыт нэ̄пакн вос хансавет. Соссаӈ мир Ассамблея депутатыт Дума сапра̄ни ва̄рнэ э̄лыпа̄лт акванатхатыгласыт. Е. Д. Айпин ос А. В. Филипенко мо̄т ма̄н хотталь во̄виньтавесы̄г, таима̄гыс тув ат а̄лымасы̄г. Надежда Геннадьевна Алексеева, соссаӈ м а̄ х у м Ас с а м б л е я т кӯщай ва̄ӈын хо̄тпаг рӯпитан нэ̄, сапра̄ни о̄вылтастэ. Тув округ депутат Т. С. Гоголева, ханты ос ма̄ньщи учёныянув, ля̄ххал тотнэ хо̄тпат ос культура департаментыт рӯпитан нэ̄ Н. М. Казначеева ёхталасыт. Тот пе̄с йис потрыт, мо̄йтыт, а̄мщит, э̄ргыт ос Ӯй йӣквнэ ва̄рмаль урыл потраныл о̄лыс. Округувт 1991 та̄л па̄сныл фольклорный архивыт рӯпитаӈкве патсыт. Щар са̄ртын Белоярский районт, тувыл 1993 та̄лт Ха̄льӯст тамле кол пӯсвес. Ань Нижневартовский ос Сургутский районыгт архивколы̄г о̄с рӯпитэ̄г. Ты рӯпата щар о̄влэ̄т м а̄ н о к р у г у в т Е в а Шмидт, венгр учёный нэ̄, ва̄руӈкве патыс. Тав ты архивколыт рӯпитан ма̄гсыл са̄в ё̄ре тув пиныс, тот о̄лнэ то̄ва ма̄хум ханищтас, хумус потрыт, мо̄йтыт хансуӈкве э̄ри, ищхӣпыӈ утыл хумус рӯпитаӈкве – суссылтас. Ётыл, а̄тимыг е̄мтме э̄лыпа̄лт тав нэ̄пак хансум ос хультуптам, та нэ̄пак щирыл тав хансум ос атум са̄всыр рӯпатанэ хус та̄л новуӈкве ат ро̄ве̄гыт. Туп 2022 та̄лт та̄наныл ловиньтаӈкве ос нэ̄пакыг та̄ратаӈкве тах ро̄ви. Ань нэ̄мхотьютын новхатуӈкве ат э̄ри. Ос матрыг А̄с-угорский институтт рӯпитан ма̄хум тав 1980 та̄лт ёлхансум Г. Г. Гришкин мо̄йтанэ нэ̄пакыг ва̄рманыл. Та институтт рӯпитан кӯщай нэ̄ В. И. Сподина о̄с ты сапра̄нин кос во̄виньта̄лвес, тав тув ат ёхталас. Ань сапра̄нин атхатыглам ма̄хум округ кӯщаювн пищма щё̄питэ̄гыт ос пуссын тот хасхатэ̄гыт. Ты ва̄рмаль тох хультуптаӈкве ат ро̄ви. В. И. Сподина ань па̄влыӈ ма̄т архивколытыт рӯпитан хо̄тпат ла̄щалла̄щал по̄хын те̄тыянэ. Тав ла̄внэ̄тэ: «Э̄ргыт, мо̄йтыт пуссын хасве̄сыт, маныр ань та̄н ва̄руӈкве патэ̄гыт». Ма̄н соссаӈ мир депутатанув, ва̄им, тох номтаныл ат патэ̄гыт. Яныг ма̄хманув ка̄сыӈ номнэ мо̄йтаныл, потраныл, э̄рганыл вос хансавет. Ос пе̄с порат хансым пе̄с йис потрыт, мо̄йтыт ищхӣпыӈ утытныл нэ̄пакн хансуӈкве э̄ри, кассетат плёнканыл пе̄сыг е̄мтэ̄гыт, ла̄кквапарге̄гыт, ань ты а̄лымаӈкве э̄ри. Су р г у т с к и й р а й онт «Яун-Ях» общинат рӯпитан ма̄хум 2008 та̄лт грантолныл майве̄сыт. Та̄н ань ка̄сыӈ хо̄тпа по̄слыяныл, о̄лупсатэ урыл потыр хансэ̄гыт ос тав матыр потыр, мо̄йт ва̄г – пуссын диктофонын хансыяныл. Ты сака ёмас ос э̄рнэ тэ̄ла ва̄ре̄гыт. Культура Департаментыт рӯпитан нэ̄ та̄нти ва̄рнэ рӯпатаныл урыл депутатытн потыртас. Мо̄лты та̄л сыс округув янытыл со̄тыр са̄тхуйплов са̄всыр фестивалит, конференцият ос ялпыӈ хо̄талыт ва̄рыгласыт. Тот хантыт ос ма̄ньщит культураныл суссылтаве̄сыт. Округувт 34 э̄ргын ос йӣквнэ коллектив о̄лы. Та̄н ва̄тихал э̄ргуӈкве ос йӣквуӈкве хо̄та̄ти во̄виньта̄лавет.

1053 2013.06.07. Александр ВЬЮТКИН

Са̄лыӈ ма̄хум палт ялсӯв. Тӯяг Татьяна Гоголева ма̄хманэ ёт Савелий Самбиндалов палт Тӯрва̄т па̄вылн са̄лыт по̄стын ос ма̄хум ханищтан щирыл ат хо̄талын ялсыт. Щар юио̄выл щёс та̄н тув тэ̄лы са̄лыӈ суныл яласан хо̄пт ханищтаӈкв ялсыт. Та порат акв са̄лыӈ суныл яласан ма̄гсыл хӯрум хо̄пт те̄рыгласыт. Ань тув ялум хо̄таланыл урыл а̄нумн Елена Фризоргер потыртас. Тыгыл э̄лаль тав потре ловиньтэлы̄н: – Х а н т ы М а н с и й с к ӯсныл ма̄н Советский ӯс та̄ра минасӯв. Ялум ма̄хум ты: Т. С. Гоголева, А. Р. Станиславец, Х. Х. Хужахметов ос тувыл Ханты-Мансийский технологопедагогический колледжит ханищтахтын студентыт Галина ос Сергей Ромбандеевыг ос Анастасия Хозумова. Хайдарян Хужахметов Советский район Усть-Тапсуй па̄вылт ӯйхул янмалтан ма̄т рӯпиты. Тав тыгыл э̄лаль са̄лыт са̄вмалтан ма̄гсыл са̄лы ёвтуӈкв номсы. Таима̄гсыл ань тав Тӯрва̄т ма̄хманув палт ялыс. Хум ла̄выс, улпыл тэ̄лы порат матахтам са̄лы тах ёвты. Тув тотыглым ма̄ньлат студентыт пуссын ма̄ньщит. Та̄н ос са̄лыт палт ханьщувлан ма̄гсыл т у в т о т ы гл а в е̄ с ы т. Э̄рыӈ хотьютаныл са̄лы о̄ньщуӈкв паты. Ма̄н Тӯрва̄тн вертолётыл ёхтысӯв, та юипа̄л хо̄талт Савелий Дмитриевич пыганэ ос тав палтэ ёхталам хум ма̄хманэ ёт са̄лыянэ акванатуӈкв ялсыт. Хо̄нтум са̄лыяныл кол по̄хат о̄лнэ яныг пӯсас тӣврын по̄ссаныл. Савелий яныг пыге Олег потырты: «Хунь са̄лыянув палт минэ̄в, та̄н э̄лумхо̄лас юипа̄лт о̄лтхатым Тӯрва̄т па̄выл мус ёхталэ̄гыт. Ня̄нь тэ̄гыт ос акв ювле ща̄рканыл о̄лнэ ма̄н та минэ̄гыт. То̄ва порат ос та̄нти ёхталэ̄гыт». Ты тӯя та̄н онтолов нэ̄ви са̄лыяныл ӯнттысыт. Ань та̄н халанылт сэ̄мыл, я̄ӈк, выгыр ос хансаӈ па̄сыгрищит ха̄йтыгтэ̄гыт. Тӯяг Тӯрва̄т па̄выл ляпан са̄лыт ла̄щиглым пупа̄пщите̄в ёхталас. Таима̄гсыл м а̄ н ь п а̄ с г ы ӈ н э̄ в и са̄лыяныл сака э̄л, во̄рн ат ялантэ̄гыт. Во̄рто̄лнут по̄хан ӯрнэ ма̄гсыл Савелий пыганэ пӯсасаныл мувлахи, коныпа̄лт аквписыг а̄ращит па̄лтыглэ̄гыт. Ты та̄л Савелий Дмитриевич йильпи о̄лнэ кол ӯнттын ма̄гсыл субсидия олныл майвес. Та кол ты тув сыс Та̄гт я̄ ос Сысъя̄ акванпатнэ ма̄т ӯнттыяныл. 2010 та̄лт хум ма̄хум тот са̄лы о̄щнэ пӯсас ва̄рсыт. Та юипа̄лт яныгнув пыгыг Олег ос Илья пӯсас по̄хат во̄раян кол ӯнттысы̄г. Ты та̄л ос яныг ёмас кол тот ӯнттэ̄гыт. Са̄лыяныл пуссын тув по̄сыяныл. Сысъя̄ ос Та̄гт я̄ акванпатнэ ма̄н ам ялсум. Во̄ре са̄лы о̄щнэ ма̄гсыл сака ёмас. Ща̄рк тот тэ̄пыӈ, нюсыӈ ос са̄всыр лӯптапумыӈ. Тувыл нё̄раныл мус щар а̄ти хоса. Та ма̄наныл мус тэ̄лы порат «Бураныл», туви ос нас ла̄глыл ёхтуӈкв ро̄ви. Таима̄гсыл ты Савелий Дмитриевич са̄лыянэ тув по̄суӈкв номсыянэ. Ма̄н, ӯсыӈ ма̄ныл ёхталам ма̄хум, аквп и с ы г в а̄ с н ё̄ в л и л ос сыстам я̄т уигтан хӯлыл па̄йтыглавесӯв, тыттувесӯв. Ювле пуссын ёмас, сыстам номтыл та минасӯв».

1053 2013.06.07. Александр ВЬЮТКИН

«Выгыр нэ̄пак». Ма̄вит ӯргалан ва̄рмаль щирыл «То̄рум Маа» музейколт о̄с акв суссылтап о̄вылтавес. Рӯщ ла̄тӈыл: «Красная книга Югры глазами детей» ла̄ваве. Ань округув янытыл 71 са̄всыр ӯйхул, 140 са̄всыр нампа лӯптапум «Выгыр нэ̄пакн» тув хансым о̄лэ̄гыт. Ма̄вит ӯргалан ма̄хум ла̄ве̄гыт: «Ань о̄лнэ «вы¬гыр нэ̄пакув» йильпииг э̄ри хансуӈкв. То̄нт тав осыӈнувег е̄мты. Ка̄сыӈ та̄л округт о̄лнэ ӯйхул ос лӯптапум мощщами, тыи ты сака лю̄ль». «Выгыр нэ̄пакн» хансым ӯйхулыт ня̄врамыт пумныл сагсыт, то̄рныл та̄нти ю̄нтсыт ос по̄слысаныл, ты хурит ань выставкан щё̄питаве̄сыт. Суссылтапын савалап ня̄врамыт тотыглаве̄сыт. Та̄н ётаныл ты сус¬сылтап тотум нэ̄ Оль¬га Павловна Стытьюх потыртас. Тав Талинка па̄вылт ня̄врамыт ха¬нищтахтын колт о̄лнэ музейт кӯщаиг рӯпиты. Ня̄врамытын тав ла̄выс: «Ма̄ янытыл са̄в мир о̄лы. Таима̄гсыл ка̄сыӈ хо̄тал са̄в порс па̄хвтаве. Таи туп ёмасыг о̄лы, хунь па̄хвтын порсыт акв аняг пинавет. Ма̄н халувт са̄в ма̄хум о̄лэ̄гыт, та̄н ма̄в сыстамыг ат о̄ныщияныл, ат ӯргалыяныл. Тыима̄гсыл са̄в ӯйхулыт, са̄всыр те̄рыӈхомлахыт ос лӯптапумыт хотталь та со̄йме̄гыт». Ань ва̄рум акцияныл са̄выӈпа̄лэ ня̄врамыт ёт рӯпитан щирыл о̄лы. Но̄х яныгман хо̄тпат ма̄ньта̄гыл ма̄витув ӯргалаӈкв вос ханьщувлэ̄гыт. То̄нт о̄лнэ ма̄в хосан сыстамыг хульты.

1053 2013.06.07. Николай МЕРОВ

Ма̄вит ӯргалан хо̄тпат потыртасыт. Яныгполь э̄тпост Терентий Герасимович Харамзин, социологический наукат доктор нам о̄щнэ ханты о̄йка, 75 та̄лэ то̄влыс. Ты кастыл учёный хо̄тпат акванатхатыгласыт ос ма̄вит ӯргалан ва̄рмаль урыл потыртасыт. Ма̄вит ӯргалан хо̄тпат ва̄тихал я̄т уральтым округув янытыл яласэ̄гыт. Наталья Владимировна Мирошкина ма̄вит ӯргалым рӯпиты. Тав ла̄внэ̄тэ щирыл, «Кондинские озёра» ос «Нумто» заповедникыг о̄лнэ ма̄нэ̄н сака па̄ӈктымаг. Тот о̄лнэ я̄тныл ос тӯрытныл вит а̄рталан ма̄гыс вуйлувес. Та витыт арген са̄в ртуть хо̄нтвес. Ртуть ты сака лю̄ль ут, э̄лумхо̄лас тамле утыл тэ̄лыгтым вит аи ке, тав са̄всыр та̄рвит а̄гмыл е̄мтуӈкве ве̄рми. Округувт Приполярный Уралт нё̄р а̄хвтас, ма̄во̄й, газ ос мо̄т са̄всыр ма̄щунь но̄хвиве. Таима̄гыс экологыт ты ма̄в акваг уральтым о̄ньщияныл. Ос манрыг витын ртуть патыс, Ханты-Мансийск ӯст о̄лнэ лабороторият рӯпитан хо̄тпат ма̄ ё̄лыпа̄лт, ма̄ нумипа̄лт ос я̄ӈкылмат витэ ёмщакв ханищтасаныл ос тох ла̄всыт. Ртуть вит хурипа ка̄миньт, тав ма̄ па̄лыгпатнэ асыл, тувыл ос газ но̄хвинэ порат витын овтуӈкве ве̄рми. 2001-2002 та̄лыгт Та̄гт ос Ма̄нь А̄с я̄г уральтавесы̄г. Тот о̄с арген са̄в ртуть витыт хо̄нтвес. Саранпа̄вылныл алгаль Ма̄нья витэ о̄с уральтавес, нэ̄матыр лю̄ль ат хо̄нтвес, тот витэ сыстам. Ма̄н ань нё̄ранувт тыныӈ а̄хвтас но̄хвиве, тот са̄в предприятият рӯпитэ̄гыт. Та предприятият ма̄вит ӯргалан хо̄тпатын пуссын уральтаве̄сыт. Тот рӯпитан хо̄тпат вит ат па̄ӈктыяныл, ма̄витув такви тамле та̄рвит тэ̄ла тоты.

1053 2013.06.07. Тамара МЕРОВА

Ща̄гт тотнэ ма̄гыс са̄в рӯпитэ̄гыт. Дарья Белова Югорск ӯст о̄лы. Ма̄навн тав мо̄лал пищма ке̄тыс, ос ань тав потре хансылӯв. Тав «Прометей» нампа колт рӯпатан о̄вылтыт потыртас. Ань ханищтан хо̄тпат хумус ня̄врамыт ёт рӯпитэ̄гыт, маныр ва̄ре̄гыт, та урыл ловиньтэ̄н. Ты центрыт хус са̄всыр кружок рӯпитэ̄гыт. Тот ка̄сыӈ а̄гирищкве ман пыгрищакве такви сыме̄н э̄рнэ тэ̄ла хо̄нты. Тув нила та̄лныл ос онтоловхуйплов та̄ланыл то̄влын мус ня̄врамыт ялантэ̄гыт. Та̄н та̄нки халанылт румалахтэ̄гыт ос аквъёт юртыӈыщ о̄лэ̄гыт, ма̄ янытыл о̄лнэ ма̄хум культураныл ос э̄рганыл, йӣкваныл ханищтэ̄гыт. Ма̄витув э̄руптым ос ӯргалым о̄луӈкве ханищтавет. Кӯщай нэ̄ Н. А. Антонова такви рӯпататэ сака ёмщакв ва̄ритэ. Тав ня̄врамыт ман яныг хо̄тпат ёт кӯстырыг потыртахтуӈкве ха̄сы. Аквъёт матыр ва̄рмалин вуйхатым, акваннё̄тхатым, та̄н са̄в ёмас тэ̄ла ва̄ре̄гыт. 2007 та̄лт Сургут ӯст ва̄рыглым касылт «Прометей» нампа ня̄врамыт ханищтан кол щар ёмасыг ла̄ввес. То̄нт таима̄гыс кӯщаяныл я̄нас мӯйлупсал майвес. Ос 2008 та̄лт ты центр «Лучшее учреждение дополнительного образования» округ номинация щирыл э̄сгувес. Тот ня̄врамыт ханищтан хо̄тпат та̄нки рӯпатаныл э̄руптым, мӯсхалыг ва̄рияныл. Та̄н ня̄врамыт нё̄тнэ̄г э̄ргуӈкве ос йӣквуӈкве, ма̄щтырыг по̄слуӈкве ос мо̄т тэ̄латын ханищтыяныл. Ка̄сыӈ ня̄врам то̄румын хӯлтым такви ха̄стулэ э̄лаль тотуӈкве ос са̄вмалтаӈкве вос ве̄рмыстэ, ты колт пуссын нё̄тавет. Ня̄врамаквет э̄рнэ торыг тот ёмас ла̄тыӈ хӯнтамлэ̄гыт, аквъёт юртыӈыщ тот ёнгасэ̄гыт. Тувыл мощ поргащлаӈкве та̄ртавет, таима̄гыс нэ̄мхуньт ат ля̄выльттавет. А̄гирищитпыгрыщит мощ ёнгасэ̄гыт, тувыл та̄нки ёл та ротме̄гыт ос та юипа̄лт э̄лаль сэ̄ръёрыг рӯпитэ̄гыт. Маныр ва̄руӈкв ханищтаве̄сыт, таи ӯст о̄лнэ ма̄хумн суссылтыяныл, тувыл хо̄та̄ти касэ̄гыт. А̄гитпыгыт э̄ с г а в е т о с х а н и щ тан ма̄хманыл ёт ёмащакв ва̄рум рӯпатаныл ма̄гыс дипломнэ̄пакыл мӯйлуптавет. 2012 та̄лт яныг таквс э̄тпост касыл о̄лыс, тот Л. Е. Микушина но̄хпатыс. А. П. Феофанова ос Д. И. Белова тот дипломнэ̄пакыл мӯйлуптавесы̄г. Д а р ь я И в а н о в н а п и щ м а т э̄ т м а̄ н а в н хансыс: «Ам декорат и в н о п р и к л а д н о й искусство кружокыт ханищтан хо̄тпатн яныг пӯмащипа ла̄тыӈ ке̄т э̄ г у м . Т а̄ н а̄ н у м н ищхӣпыӈ утыл суссылтап ва̄руӈкве нё̄тсыт. Тувыл хӯрум хо̄тал сыс ма̄н ня̄врамыт ёт ма̄ньщи йӣкв йӣквуӈкве ханищтахтасӯв. Тумраныл Анна Владимировна Зайцева ёнгыс, тав «Югра лылыеп» ассоциацият рӯпиты. Ты йӣквув ма̄гыс «Приз зрительских симпатий» дипломыл майвесӯв. Й и л ь п и т а̄ л ё х тын кастыл ня̄врамыт ма̄гыс акваг ялпыӈ хо̄тал ва̄рыглэ̄в. Та̄наныл са̄всыр щирыл ёнгалтыянӯв. То̄нт О. Н. Шульга рущ ос лӯима̄ ма̄хум мо̄йтыт щирыл Татья – ма̄ньщи а̄ги урыл ёмас спектакль щё̄питас. Ольга Радченко Татья а̄гииг о̄лыс. Ня̄врамыт во̄рт пилуптахтын утыт урыл спектакль суссыт. Артистыт ос мӯй хо̄тпат пуссын аквъёт ёнгысыт, поргысыт, капыртасыт. Ты йильпи та̄л янытлан хо̄тал та̄нанылн сака мӯстыс, са̄в ща̄гт тотыс. Центрыт рӯпитан хо̄тпат са̄в ёмас сымыӈ ла̄тӈыл ла̄вве̄сыт». Ма̄н ты ма̄хум ос ня̄врамаквет лӯпта э̄тпос о̄выл ялпыӈ хо̄талыл янытлыянӯв. Туи сыс ёмщакв вос ӯщлахтэ̄гыт, пусмалтахтэ̄гыт, таквсы кастыл та̄ксарыг е̄мтэ̄гыт ос ёмас номтыл э̄лаль ханищтахтуӈкве вос ёхтэ̄гыт. Д. И. Белова Югорск ӯсныл ке̄тум пищматэ ма̄ньщи ла̄тӈыг Тамара МЕРОВАН толмащлавес.

1053 2013.06.07. Тамара МЕРОВА

А̄лпыл сэ̄рипо̄с Финляндият постыс. Финныт «Ханты, или Звезда утренней зари» Еремей Айпин нэ̄паке щирыл спектакль ва̄рсыт ос суссылтан ма̄гыс тыг Ханты-Мансийскын ёхталасыт. Кит хумыг щё̄с арыгкем тэ̄нки халэ̄нт потыртасы̄г. Суснэ ма̄хум халт уральтахтым режиссёрхум Ари-Пекка Лахти о̄лыс. Ты ма̄ньлат хо̄тпат Коккола ӯсныл тыг ёхталасыт, та̄н тот театрыт рӯпитэ̄гыт. Еремей Данилович хансум потре щирыл та̄н режиссёраныл спектакль ва̄руӈкве номылматас. Ты потыр ловиньтаме юипа̄лт тув хансым номтыт таве̄н сака сымын хо̄ясыт. Э̄лумхо̄лас о̄лнэ̄тэ сыс такви о̄лупсатэ урыл акваг номсахты, хумус тав о̄лы. Ёмас тэ̄лат лю̄ль пищит ёт аквантэ̄лыгтахтэ̄гыт. Э̄лумхо̄лас номтэ савалы – хоталь таве̄н патхатуӈкве ос хотьютн агтуӈкве ро̄ви, хумус э̄лаль о̄луӈкве э̄ри. Ань ты номтанэ тав ма̄хумн потыртыянэ. Демьян пыгыг Яркко Лахти о̄лыс, ос Томас Роунакари о̄влэ̄т ня̄йт хумыг, тувыл мо̄т хо̄тпаг, тэ̄н спектаклит сака ма̄щтырыг ёнгасасы̄г. Щё̄с арыгкем сыс спект а к л ь суснэ ма̄хум Демьян о̄лупсатэ урыл са̄всыр о̄лыглам ва̄рмалит суссыт ос хӯнтлысыт. Томас «ня̄йт хо̄тпа» э̄рыг э̄ргыс ос наръсюхыл, тувыл са̄ӈквылтапыл са̄ӈквылтас. Тав э̄рыг ла̄тӈыт ос э̄рыгсов та̄ныт такви хассанэ, тув ровнэ̄г щё̄питасанэ. Яркко ётыл а̄нум потыртас: «О̄влэ̄т ёнгуӈкве сака та̄рвит о̄лыс, то̄ва хащта̄л ва̄рмалит ам ат торгамтасанум. Та̄наныл ла̄щмарт ханищтасанум ос та̄рапаттысанум. То̄нт ма̄н х а н т ы м а̄ х у м о̄л н э ма̄нылн ялсӯв, та̄н ётаныл стойбищат о̄лсӯв. Тот ка̄сыӈ ла̄вум ла̄тыӈ хӯнтлысӯв. Ма̄н суссӯв, хумус та̄н иӈ пе̄с щирыл о̄лэ̄гыт. Ань ты тэ̄лат пуссын та̄рапаттысанӯв, пормасыт, маснутыт э̄рнэ̄г щё̄питасанӯв. Демьян пыг ёнгынэм порат, ам та ханты ма̄хум о̄вылтыт номсэ̄гум ос то̄нт тав о̄лум о̄лупсатэ суссылтэ̄гум». Та̄н нупыланыл сунсуӈкве пӯмщиг о̄лыс. Тот ня̄врам турсуйил Яркко пыге, Вильям Лахти, потыртас. Ханты-Мансийскат о̄лнэ ма̄хум финн ла̄тыӈ ат ва̄гыт кос, ос хумус хумы̄г потыртасы̄г, маныр тот ва̄рсы̄г, та̄н торгамтасыт. Режиссёр о̄с сэ̄ръёрыг, номсахтым рӯпитас, ёмас спектакль ва̄рыс. Ты о̄вылтыт хурит по̄слын о̄йка Г. С. Райшев, губернатор ва̄ӈыг хумыг Г. Ф Бухтин ос А. А. Путин ла̄всы̄г. Спектакль о̄вылтахтан э̄лыпа̄лт Еремей Данилович Айпин ос Хелена–Аутио Мелони, Москват Финляндия посольстват рӯпитан нэ̄, А̄с-угорский театрыт рӯпитан а̄гитпыгыт ос журналистыт ёт хо̄нтхатыгласы̄г. Мӯй нэ̄ культура ва̄рмалит ёт рӯпиты, тав ла̄выс: «Финн ма̄хум театрколн ялуӈкве сака э̄руптэ̄гыт. Финляндият ка̄сыӈ ӯст театр о̄лы, ань тот 600 театркол рӯпитэ̄гыт. Та̄н са̄всыр мирыт потраныл щирыл спектаклит ва̄рыглэ̄гыт. Финский пе̄с потрыт рущ ла̄тӈыг толмащлавет ос ма̄хумн суссылтавет. Тох Московский художественный академический театр та̄н ётаныл рӯпиты. На̄н А̄с-угорский мир театр о̄ньщегы̄н, ты сака ёмас. Ва̄глум, та̄н российский театральный касылт лауреатыг е̄мтсыт, са̄всыр янытлан нэ̄пакыл мӯйлуптаве̄сыт. Туп артистыт та̄нки рӯпитан кол ат о̄щнэ̄ныл, манрыг тох? Тувыл ӯст о̄лнэ ма̄хум театрколыӈыг е̄мтэгы̄т ке, тыи о̄с ёмас о̄лнув». Ам ос на̄нан таи ла̄вуӈкве таӈхе̄гум, 1996 та̄лт Финляндият о̄лмум порат ма̄ньщи ма̄хум о̄вылтыт спектакль суссум. Ты спектакль «Когда качало меня солнце» Юван Шесталов хансум потре щирыл ва̄рыглавес. Тот акв нэ̄ хо̄тпа туп ёнгыс, наме Мерья о̄лыс, о̄парищ наме хотёрувлслум Финныт рӯтыг о̄лнэ мирыт ва̄ганыл, ты урыл пӯмщалахтэ̄гыт ос та̄нки ма̄хманылн потыртэ̄гыт. Тамара МЕРОВА Ты хурит Томас Роунакари по̄слым о̄лы.

1053 2013.06.07. Людмила ТЕТКИНА

Советский ӯст рӯпитан суссылтап. Ка̄сыӈ та̄л я̄ӈк на̄тнэ э̄тпос 18 щислат Россият музеит ӣти рӯпитэ̄гыт. Тамле ва̄рмаль о̄лум порат Ханты-Мансийск ӯст са̄в мир музейн ёхталасыт. Ты тэ̄ла таима̄гсыл ва̄рыглаве, ма̄хум ва̄тихалнув тув вос ялантэ̄гыт ос культурал вос пӯмщалахтэ̄гыт. Советский ӯст о̄лнэ музейн акваг са̄в ма̄хум ёхталэ̄гыт. Тот рӯпитан хо̄тпат са̄всыр суссылтапыт, ялпыӈ хо̄талыт ва̄рыглэ̄гыт, ня̄врамыт ос яныг ма̄хум та̄нки палтаныл во̄виньтыяныл. 1970 та̄лыт Советский ӯст о̄лнэ ма̄хум акв колнакт пе̄с нэ̄пакыт, пормасыт акванатуӈкве патсаныл. Ӯст музей а̄тим о̄лыс, акванатум пе̄с пормасаныл, акв колныл мо̄т колн ва̄нлупта̄лве̄сыт. Акв порат суссылтап школат ва̄рыглавес, тувыл «Малая Сосьва» нампа заповедникыт рӯпитан хо̄тпат та̄нки коланылт пе̄с пормасыт суссылтасаныл. Тох тыглетувле выставкат тотыглаве̄сыт, то̄ва пе̄с нэ̄пакыт, пормасыт хотӯстуве̄сыт. Советский ӯст туп 1985 та̄лт районный музей ва̄рвес. Заповедникыт рӯпитан хо̄тпат музейн акваг нё̄тсыт. Ань тув ёхталан ня̄врамыт «Малая Сосьва» заповедник урыл ос Советский районт манхурип ӯйхул о̄лы, манхурип йӣвыт, пилыт, ла̄хсыт тот яныгме̄гыт, ты урыл о̄с потыртавет. Музейт 27 со̄тыра арыгкем са̄всыр пе̄с пормасыт, хурит, нэ̄пакыт акванатве̄сыт. Тот Советский район историятэ урыл суссылтап о̄лы, мо̄т ма̄т ма̄ньщи ма̄хум пе̄с пормасаныл суссылтавет. Ма̄ньщи маснутыт ос пормасыт 2000 та̄л па̄сныл суссылтаӈкве о̄вылтаве̄сыт. Ты э̄лыпа̄лт музейт рӯпитан хо̄тпат тот о̄лнэ ма̄ньщит палт ялантасыт, о̄лупсал пӯмщалахтасыт ос пе̄с пормасыт ханищтасаныл, то̄ват музейн тотсаныл. Ань тот археологический суссылтап ва̄рвес, Советский районт хо̄нтым ра̄кт, ке̄р пе̄с пормасыт тот о̄лэ̄гыт. Музейт рӯпитан ма̄хум округувт о̄лнэ музеит ёт ва̄йхатэ̄гыт ос рӯпитэ̄гыт. Са̄всыр конференцият ос мо̄т ханищтан тэ̄лат о̄лыглан порат та̄н о̄с во̄виньта̄лавет. Тот рӯпитан хо̄тпат та̄нки музеяныл урыл нэ̄пакыт хансэ̄гыт, хансум научный статьяныл ос нэ̄пакыг щё̄питыяныл. Ань музей акв та̄рвит о̄ньщи, рӯпитан хо̄тпа тот а т то̄ в ы л х а т ы . Ма̄ньлат ма̄хум тамле рӯпатал щар ат пӯмщалахтэ̄гыт. Надежда Михайловна Гисс, музей кӯщай нэ̄, ла̄выс, ань ма̄хум тот мощща олныл ойтавет ос тыима̄гсыл нэ̄мхотьют рӯпитаӈкве ат ка̄сащи. Ты коныпал о̄с акв та̄рвит музей пе̄с колт о̄лы. Ты э̄лыпа̄лт тот садик о̄лыс. Тамле колт са̄всыр пе̄с пормасыт о̄ньщуӈкве, ӯргалаӈкве та̄рвитыӈ. Кӯщай нэ̄ ла̄вме щирыл, музей йильпи колыл ке ӯнттувес, то̄нт та̄н са̄всыр йильпи суссылтапыт ва̄руӈкве ве̄рмынувыт, са̄внув ма̄хум тув во̄виньта̄лнувыт. Ос тамле ёмас йильпи музейколн, э̄рыӈ, ма̄ньлат хо̄тпат рӯпитаӈкве ёхтынувыт.

1053 2013.06.07. Анна АЛГАДЬЕВА

Ня̄врамыт йӣвыт ӯнттысыт. Мо̄лты та̄л па̄сныл Хулюмсӯнтыӈ ня̄врамыт ханищтахтын та̄л оигпан ляпат йӣв ӯнттуӈкв патсыт. Ты ва̄рмаль кастыл са̄ртын та̄гыл щё̄питахтэ̄гыт. Манырсыр йӣв, хоты ма̄н ӯнттуӈкв потыртахтэ̄гыт. 9 ос 11 классыт ханищтахтын ня̄врамыт ка̄сыӈ торгыл ля̄мйив, пащарйӣв ман ха̄льпыгрищ ӯнттэ̄гыт. Мо̄т классыӈ ня̄врамыт хо̄ӈха ка̄сащи, аква ман китыг йӣв аквъёт ӯнттэ̄гыт. Йӣваныл па̄вылкан лё̄х по̄хан ӯнттыяныл, та̄раныл ке вуйхатэ̄гыт – ёмщакв яныгмаӈкв патэ̄гыт, тӯяг пил лӯптал щё̄риявет, па̄вылканув нё̄тнэг паты. 2 «А» классыт ханищтахтын а̄гирищит школа по̄хыт акв ха̄льпыгрищ ӯнттысыт, хорамыӈ то̄рса̄лмыл нэ̄гсаныл. То̄рса̄лманыл нэ̄гманыл порат пуссын акв номт о̄щсыт – мо̄тыт та̄л, таквсы ханищтахтын та̄ланыл, та̄нки школанылт вос о̄вылтыяныл. Ты та̄л палыт ня̄врамыт ла̄кква ма̄т ханищтахтасыт, халанылт торыӈ ат ва̄щинтахтыгласыт. Аквъёт акв колт пуссын самт о̄лэ̄гыт. Йӣв ӯнттум хо̄талувт мощнув ащирм во̄тыӈ хо̄тал о̄лыс, таима̄гыс о̄выл классыт ханищтахтын ня̄врамыт та хо̄тал йӣв ат ӯнттысыт. Та̄н я̄ӈк на̄тнэ э̄тпос 21 хо̄талт ущ акванатыглаве̄сыт. Ущта ёрыӈ номтыл пуссын ве̄траӈ, ке̄рма̄нтыӈ та̄гыл школа по̄хын ёхтысыт. Йӣвыт ӯнттынэ̄ныл э̄лыпа̄лт 7 ос 8 классыт ханищтахтын ня̄врамыт о̄влэ̄т ӯльпат, таргыт урыл потыртасыт. Хумыс ос ман палыт йӣв яныгми, маныр во̄рныл ва̄раве потыртасыт. Тувыл аквъёт, акв ё̄рыл 19 ма̄нь ӯльпа школа пӯсас кӣвырт ӯнттысыт. Рущ мир халт тамле ла̄ттальпи о̄лы: «Акв йӣв ке ӯнттэ̄гын, То̄рум наска̄ссыг ат о̄лэ̄гын». Ёмас ва̄рнэ ва̄рмаль – кос хунь э̄рнэ ва̄рмаль. Ва̄им, ня̄врам ка̄тыл ӯнттым йӣвыт та̄раныл ёмщакв вуйхатэ̄гыт ос янгыг, та̄кыг э̄лаль яныгме̄гыт. Ня̄врамыт сыманылт, номтанылт ты ва̄рмаль ма̄кыг хульты ос о̄лнэ ма̄ныл э̄руптаӈкв, ма̄вит, во̄р сыстамыг о̄ньщуӈкв патыяныл.

1053 2013.06.07. Галина КОНДИНА

Та̄л сыс маныр ва̄руӈкв ханищтаве̄сыт. «Лылынг союм» нампа колн ялантан ня̄врамыт та̄л сыс маныр ва̄руӈкве ханищтаве̄сыт, таи суссылтан ма̄гсыл та̄н я̄ӈк на̄тнэ э̄тпос ва̄т нупыл хо̄тыт хо̄талт пуссын тув атыглаве̄сыт. Кол тӣвырн хунь щалтэ̄гын, та̄ра ка̄салылын манса̄вит ня̄врам тот ханищтахтэ̄гыт, таса̄вит нё̄тнэ рисункат та̄н по̄слумыт. Норт онтсыл са̄всыр о̄льпыл по̄слым хурит ханэ̄гыт. Ня̄врамыт мо̄йтаныл тащир о̄вылтавес. Та̄н палтаныл Евтя намп а х а н т ы х у м А̄с я̄ныл тув аквтупмат ма̄ньхапыл товантас, ма̄ньхапыл тув ёхтыс. А̄гирищитпыгрищит титыглыянэ: «Ам хӯлыгласлум, тыт ня̄врам ы т с а к а ё м щ а к в йӣквуӈкве, са̄ӈквылтаӈкве ха̄сэ̄гыт. А̄нумн суссылтэ̄н. Ам тах хунь юв, амти ма̄мн, ёхтэ̄гум, тот о̄лнэ ма̄хманумн потыртэ̄гум. А̄сн са̄в я̄квет, посалыт овтэ̄гыт, та̄н ва̄таныл хосыт ханты, ма̄ньщи мир о̄лэ̄гыт, ӯсыӈ ня̄врамыт маныр ха̄сэ̄гыт – та̄нанылн хӯнтлаӈкве сака пӯмыщ паты». Яты, о̄влэ̄т Е. Комарован ханищтан ма̄нь а̄гирищквет «Эвие» йӣкв йӣквсыт. Екатерина такви фортепианал ёнгыс, Алексей Рещиков са̄ӈквылтапыл са̄ӈквылтас. Тот соссаӈ а̄гирищквет коныпал мо̄т мирыл о̄лнэ а̄гирищиг о̄с татем ёмщакв ханьщувламы̄г, маттем та йӣкващласыт. Та а̄гирищквет юипа̄лт Алексей Рещиковын ханищтан ня̄врамыт са̄всыр та̄ныт са̄ӈквылтасыт. Та̄н ансамбляныл «Торые» намыл пиным о̄лы. Лиза Посохова «Куккук» ос Алика Воеводкина Ангашупов о̄йка та̄нэ та̄рыгсыплувйӣвыл са̄ӈквылтасы̄г. Акв та̄н хӯрум са̄ӈквылтапыл ос тит та̄рыгсыплувйӣвыл са̄ӈквылтасыт. Ты са̄всыр та̄ныт аквторыг ёнгысаныл, рущ щирыл «музыкальная сюита» ла̄ваве. Владимир Меров ханищтан пыгрищаквет а к в а л а к в а л с а̄ ӈ квылтаӈкве во̄виньтаве̄сыт. Пуссын ма̄щтырыг ха̄сэ̄гыт, тулё̄вланыл татем ты молях капыртэ̄гыт. Арсентий Ли ос Игорь Хромов ня̄лыт ёт хум йӣкв йӣквсы̄г, Владимир Савельевич ты мус койп ра̄тыс. Любовь Федоркив (Молданова) ёт ханты ла̄тыӈ ханищтан ня̄врамыт Вова Хромов, Миша Хромов А̄с ла̄тӈыл стихотвореният ловиньтасыт, Маша Федоркив «Тёйтёй, рапщрапщ» ма̄нь ня̄врам ёлоилтан э̄рыг э̄ргащлас, ты мус рущ куклатэ ка̄тыт нёвитас. Маша Гришкина «Кӯринька» такви э̄ргыс ос йӣквыс. А̄ги щар ма̄к пе̄с ма̄хманув хольт ха̄снэ̄тэ. Щар яныг кӯщаиг тот Татьяна Вадичупова о̄лы. Тав пуссын а̄гирищитпыгрищит грамотатыл мӯйлуптасанэ, то̄ват хӯрмахылнилахыл мисанэ. Та̄н са̄в ма̄т ханищтахтуӈкве а̄лымасыт, ла̄тыӈ ханищтасыт, по̄слысыт, сакныл хорамыт хартсыт, са̄ӈквылтасыт ос йӣквсыт. Татьяна Савельевнан ос тот рӯпитан хо̄тпатын та̄н ёмас ӯщлахтын хо̄талытыл ла̄вве̄сыт. Тув сыс ёмщакв вос ӯщлахтэ̄гыт, та̄ксарыг, ё̄рыг вос е̄мтэ̄гыт ос таквсы аквт ох с ы м ы ӈ ы щ в о с ханищтахтэ̄гыт. Ща̄нита̄щит пӯмащипа ла̄тӈыӈ пищмал мисанэ, ня̄врамыт ка̄сыӈ хо̄тал тув тотыглыяныл, ты та̄н ё̄раныл хосыт ня̄врамыт са̄в ва̄ӈкве ос ха̄суӈкве патэ̄гыт. Юио̄вылт Татьяна Савельевна пуссын ка̄сащан хо̄тпат «Кӯринька» йӣквуӈкве во̄всанэ. Вероника Мумракова «Рябиновый пир» А. С. Тарханов рущ ла̄тӈыл хансум стихотворение ловиньтастэ. Та̄н нупыланыл сунсуӈкве сака ка̄сыӈ о̄лыс. Та̄н э̄рыӈ хуньт ёмас артистыг манос ка̄тыл по̄слын, м а̄ щ т ы рл а н хо̄т п а г е̄мтэ̄гыт ос э̄лаль о̄лнэ посыӈ хо̄тал хо̄нтэ̄гыт. Ня̄врамыт та̄л сыс ка̄тыл ма̄щтырлам пормасаныл пуссын тот кумыска норма тармыл пиным о̄лэ̄гыт. Мӯй ма̄хум ос ща̄нита̄щит маттем о̄щатахтыглым тот та сунсыглахтасыт. Ня̄врамыт ёт тот са̄в ханищтан хо̄тпат рӯпитэ̄гыт. Ма̄ньщи ос ханты ла̄тӈыг ня̄врамыт Ольга Норова (Анямова) ос Любовь Федоркив ёт ханищтэ̄гыт. Са̄ӈквылтапыл, нарсъюхыл са̄ӈквылтаӈкве, хум йӣквыт йӣквуӈкве пыгрищит Алексей Рещиков ос Владимир Меров ханищтыянэ̄н. А̄гирищквет Екатерина Комарован о̄выл та̄л йӣквуӈкве ос э̄ргуӈкве ханищтавет. Ты коныпал са̄в ня̄врамаквет сакныл са̄всыр пальсакыт, ка̄тсор хорамыт хартуӈкве ха̄сэ̄гыт. Ты ёмас ва̄рмальн та̄н Евгения Вьюткина, Галина Молданова, Раиса Гаврильчик (Анямова) ёт ханищтахтэ̄гыт. Ня̄врамаквет туи сыс ёмщакв вос ӯщлахтэ̄гыт ос То̄рум ёт, О̄тыр ёт со̄тыӈыг вос яныгме̄гыт.

1053 2013.06.07. Людмила ТЕТКИНА

А̄гирищкветпыгрищаквет тот ӯщлахтуӈкве ӯравет. Югра янытыл туи пора сыс 468 ма̄ньщи, ханты ос ё̄рн ня̄врамыт этностойбищат, этноцентрыт ос этнолагерит ӯщлахтуӈкве ӯравет. Ня̄врамыт тот ща̄нь ла̄тӈыл потыртаӈкве, са̄всыр щирыл ма̄щтырлаӈкве, йӣквуӈкве, э̄ргуӈкве ос са̄в мо̄т пе̄с йис ва̄рмалитын ханищтавет. Ты та̄л ма̄ньполь э̄тпост туп 15 хо̄тпа та̄нки хансум 16 проектаныл Ханты-Мансийск ӯсн ке̄тыгласаныл. Мо̄лты аквты порат 29 проект халт щар ма̄к ёмас ӯщлахтын ма̄т пе̄рияве̄сыт. Ты та̄л Кондинский, Белоярский, Ханты-Мансийский, Ха̄льӯс районытыт ос Урай ӯст ня̄врамыт тах ӯщлахтэ̄гыт. Ма̄хум та̄нки проектаныл мӯсхал щирыл вуянтасаныл ос олныл майве̄сыт. Ты та̄л округ Думат, «Центроспас-Югория», образование Институтыт, ЮГУт, «Югра лылыеп» нампа организацият ос культура департаментыт рӯпитан ма̄хум жюрихо̄тпаг рӯпитасыт. Та̄н касыл щирыл лов хо̄тпа грантолныл мисаныл. «Комплексный проект» нампа номинация: Белоярский район Касум па̄вылт «Нумсанг ёх» этностойбищат кит сменат 50 ня̄врам тах ӯщлахтэ̄гыт. Кондинский район Кондинское па̄вылт «Ня̄врамыт ӯс» этнолагерин хо̄т сменан 90 ня̄врам во̄виньта̄лавет. «Трудовой проект» нампа номинация: Ха̄льӯс район Я̄сунт па̄вылт «Ма̄нь Ӯскве» этностойбищат кит сменат 60 ня̄врам ӯщлахтуӈкве патэ̄гыт. Белоярский район Касум па̄вылт «Пяшие» этноплощадка акв смена ва̄ри, тав 30 ня̄врам ма̄гсыл тах рӯпиты. Ханты-Мансийский район Кышик па̄вылт «Ка̄ркам ёш» стойбищат 25 а̄гирищпыгрищ акв сменан тах ёхталэ̄гыт. «Историкокраеведческий проект» нампа номинация: Урай ӯст «Юрсил» ӯщлахтын ма̄т кит сменан 50 ня̄врам во̄вавет. «Специальный проект» нампа номинация: Белоярский район Касум па̄вылт «Нумсанг ёх» этностойбищат акв сменат 35 ня̄врам ӯщлахтуӈкве ве̄рме̄гыт. Х а̄ л ьӯ с т п о̄ х а т «Со̄рни сэ̄й» ӯщлахтын ма̄т хӯрум сменан 78 ня̄врам ӯравет. «Спортивнооздоровительный проект» нампа номинация: Ханты-Мансийский район Луговской па̄вылн 20 ня̄врам акв сменан во̄виньта̄лавет. Белоярский район Касум па̄вылт 30 ня̄врам ма̄гсыл кит сменаг рӯпитаӈкве патэ̄г. Культура Департаментныл ке̄тым потыр ма̄ньщи ла̄тӈыг Людмила ТЕТКИНА хансыстэ.

1054 2013.06.21. Светлана РОМБАНДЕЕВА

Ёмас тэ̄лат урыл потыртэ̄н. Округ губернаторув Наталья Комарова ня̄врамыт матарыл акваг нё̄тумта̄лыянэ. Та̄наныл янытлан мирхал хо̄талт, лӯпта э̄тпос о̄выл хо̄талэ̄т, тав о̄с а̄гирищитпыгрищит са̄всыр мӯйлупсатыл мисанэ. 2013 та̄л округув янытыл ёмас тэ̄ла ва̄рнэ та̄лыг намаявес. Тувыл ань ля̄ххал тотнэ ма̄хум ка̄сыӈ ёмас тэ̄ла урыл хо̄та̄ти акваг вос потыртэ̄гыт. Телевизор хосыт са̄в ёмас передачат суссылтавет, хумус ма̄хум ня̄врамытын ман а̄гмыӈмосыӈ хо̄тпатын нё̄тэ̄гыт. Ма̄к ёмас передачат тах 2014 та̄лт та̄л котиль э̄тпосэ̄т ла̄вавет ос ты передачат ва̄рнэ ма̄хум янытлавет, мӯйлупсатыл мӯйлуптавет. Округувт 15 районыт ты ёмас ва̄рмаль ва̄руӈкве ка̄сащасыт. Ха̄льӯс район кӯщаит ань районаныл ялпыӈ хо̄талэ кастыл 420 са̄виттем ёмас тэ̄ла ва̄руӈкве ла̄всыт. Интернет щирыл «Карта добрых дел Югры» нампа программа хосыт ма̄хум халанылт потраме̄гыт ос румалахтэ̄гыт, хотьют ве̄рми, нё̄тмил ӯрнэ хо̄тпан нё̄тумты. Ты э̄рнэ программа хосыт са̄в хо̄тпа о̄лупсаныл урыл хассыт. Округ кӯщаюв ка̄сыӈ пищма ловиньтастэ, ка̄сыӈ хо̄тпан нё̄тыс, мӯйлупсат мӯйлуптас, са̄в ёмас, сымыӈ ла̄тыӈ ла̄выс. Губернатор прессслужбаныл ке̄тым ля̄ххал ма̄ньщи ла̄тӈыл С. Ромбандеева толмащластэ.

1054 2013.06.21. Светлана РОМБАНДЕЕВА

Кӯщаянув тох ты уральтаӈкве патыянув. Лӯпта э̄тпос атыт хо̄талэ̄т Ханты-Мансийск ӯст «Югра» телекомпания колт ля̄ххал тотнэ ма̄хум акванатыглаве̄сыт. Москва ӯсныл Россия Общественный палатат рӯпитан нэ̄ Елена Анатольевна Лукьянова ёхталас. Тав МГУ юридический факультет кафедратэ̄т профессорыг о̄лы. Тувыл тув о̄с акв нэ̄ во̄виньта̄лвес, Наталья Рудегеровна Маслова. Тав ань округ Общественный палатат рӯпиты, ты коныпал Томский область кӯщай хумн нё̄тым рӯпиты. Акв хум о̄с о̄лыс, Виктор Владимирович Заболоцкий, тав округув Общественный палатат кӯщаиг о̄лы. Ты нэ̄г ос хум ля̄ххал тотнэ ма̄хум ёт ань округув янытыл электронный демократия тэ̄ла урыл потыртасыт. Акв журналист хум китыглахтас: «Ань Россия янытыл ка̄сыӈ областьт ос округт ма̄хум акв йильпи хащта̄л тэ̄лаханищтэ̄гыт, ла̄ваве электронный п р а в ительство. Ос «ГосМенеджмент » журналт тамле ля̄ххал хансыма, ань ма̄н округув ты хащта̄л ва̄рмаль ханищтан ма̄т ма̄нь таквс э̄тпост 2012 та̄лт 21 местан хансым о̄лыс, ос та̄л котиль э̄тпост 2013 та̄лт 41 местан хасвес. Аман манрыг тох? Ма̄н округувт матыра̄ти пуссын о̄лы, олнта̄л о̄с сака ат савалэ̄в». Профессор нэ̄ Е. А. Лукьянова ла̄выс: «А̄ти, ты на̄н лю̄льсаӈ о̄лнэ̄н ма̄гыс хунь, округынт о̄лупсан ёмас, то̄ва областит ма̄хум сака нусаг о̄лэ̄гыт. Нас ань са̄в ма̄т тамле электронный демократия тэ̄ла ёт ма̄хум рӯпитаӈкве патсыт. Са̄в хо̄тпа ханищтахтэ̄гыт электронный правительство нампа йильпи программа ёт рӯпитаӈкве. Тувыл ма̄хум интернет хосыт па̄выл манос ӯс кӯщаяныл ёт вос потыртэ̄гыт, матыр тэ̄ланыл урыл таве̄н вос хансэ̄гыт. Ань кӯщаяныл хумус рӯпиты, ёмащакв ман лю̄льсаӈ, ты урыл тув о̄с вос хансэ̄гыт. Кӯщаянылн ат те нё̄тавет, ат те хӯнтлавет, тав тах аквта та̄ра рӯпататэ̄ныл по̄хан минуӈкве ла̄ваве. Па̄выл ман ӯс кӯщаит ань тох номсуӈкве ханищтахтэ̄гыт: та̄н нас кӯщаит хунь, та̄н мирн пе̄риим хо̄тпат, ос мир ма̄гыс вос рӯпитэ̄гыт. Рӯпатаныл хумус ва̄рияныл, пуссын на̄ӈки. Тувыл ка̄сыӈ хо̄тпа кӯщае урыл пищмало̄мт хансы, электронный адрес хосыт ке̄тасаптытэ, пищматэ аквта щё̄с тув та ёхтыгпи. Ма̄хум ва̄тихал матыр ла̄вуӈкве ос кӯщаяныл урыл пилта̄л потыртаӈкве патэгы̄т те, то̄нт пуссын тах на̄ӈки, кӯщай хо̄тпа мӯсхалыг рӯпиты ман а̄ти. Кӯщай то̄пал те, мо̄т мӯсхал хо̄тпа пе̄рияве, то̄нт о̄лупса ёмаснувег е̄мты». Н. Р. Маслова ос тох потыртас: «Ат та̄л сыс молях рӯпитан интернет ка̄сыӈ ма̄нь па̄вылт тах ва̄раве. Компьютер ва̄нэ ма̄хум тах ка̄сыӈ ма̄нь па̄вылн ялантаӈкве патэ̄гыт, яныг ман ма̄нь ма̄хум пуссын ханищтаӈкве э̄ре̄гыт. Та̄н хунь ханьщувлэ̄гыт, интернет та̄рапаттыяныл, о̄с тах пищма хансуӈкве ве̄рме̄гыт. Хоты са̄ккон та̄нанылн ат те мӯсты, ты урыл о̄с хансуӈкве э̄ри. Тувыл тах ты электронный демократия щирыл пуссын на̄ӈкуӈкве паты, хоты са̄кконыт мирн э̄ре̄гыт. Кӯщаянув тах туп ма̄к э̄рнэ са̄кконыт пирмайтаӈкве патэ̄гыт».

1054 2013.06.21. Галина КОНДИНА

Я̄нув э̄рыӈ хӯлыӈыг е̄мтэ̄гыт. Ма̄н округувт Ханты-Мансийск ӯст 2011 та̄л па̄сныл Иртыш я̄ ва̄тат Югорский рыбоводный завод рӯпиты. Тот по̄рныл ма̄нь хӯлыт янмалтавет. Мо̄лал щар о̄выл щёс лӯпта э̄тпос са̄тыт щислат тит та̄л янмалтым хӯлыт я̄н та̄ртве̄сыт. Ты 2 со̄тыра 400 сӯкыр ос 2 со̄тыра 700 нялк хӯл. Ань завод акв цехе туп рӯпиты, мо̄т колнакыт иӈ ва̄равет. Кӯщаит ла̄ве̄гыт, 2015 та̄л мус тав янытэ̄тыл ӯнттын ма̄ныл а̄стлаве. Ос ка̄сыӈ та̄л тах 50 миллион са̄вит са̄всыр ма̄нь хӯлкве я̄н та̄ртуӈкве патаве, ты халт 1, 5 миллион супыгхӯл та̄ртаве. Василий Алексеевич Сысуев тот кӯщаиг рӯпиты, тав ла̄выс: «Ты туп о̄выл ма̄нь ӯсыл, ты яныг ос э̄рнэ тэ̄ла ма̄гыс иӈ са̄в рӯпата ва̄руӈкве э̄ри. Моще̄ртын ма̄н ма̄нти нэ̄паканув государственный касылын те̄туӈкве ве̄рмиянув, тувыл э̄рыӈ квотал миӈкве патаве̄в. Квота щирыл заводув ёл ат по̄илттаве, акваг рӯпитаӈкве паты». Природный ресурс ос несырьевой сектор экономика Департаментныл те̄тым ля̄ххал ма̄ньщи ла̄тӈыл Галина КОНДИНА хансыстэ.

1054 2013.06.21. Людмила ТЕТКИНА

Ка̄сыӈ хо̄тпа тав палтэ ялуӈкве ве̄рми. Ханты-Мансийский округувт 2011 та̄лныл акв йильпи кӯщай рӯпитаӈкве паттувес, Александр Сидоров тав ань «Уполномоченный по правам человека» хо̄тпаг рӯпиты. Тав палтэ ка̄сыӈ э̄лумхо̄лас такви та̄рвитыӈ ва̄рмалянэ ёт ялуӈкве ве̄рми. Ты э̄лыпа̄лт хум са̄в та̄л Сургут ӯс кӯщаиг рӯпитас. Ля̄ххал тотнэ ма̄хум ёт хо̄нтхатыгламе̄т тав 2012 та̄л сыс ва̄рум рӯпататэ урыл потыртас. Кӯщай хум та урыл ла̄выс, ань Россия янытыл ка̄сыӈ округт ман областьт тамле хо̄тпа рӯпиты. Тувыл таи лю̄ль, та̄нанылн прокуратура, сут, полиция ос мо̄т организацият ёт хумус рӯпитаӈкве э̄ри, са̄кконыт мӯсхалыг ат хасве̄сыт. Тыима̄гсыл то̄ва организацият ёт та̄нанылн рӯпитаӈкве сака та̄рвитыӈ. 2012 та̄л сыс ты кӯщай палт 400 арыгкем э̄лумхо̄лас та̄нки та̄рвитыӈ ва̄рмаляныл ёт ёхталасыт. Ты халт щар са̄в ма̄хум о̄лнэ коланыл урыл потыртасыт. Акв ще̄мья общежитияныл коння̄влаве, мо̄таныт субсидияолн винэ ма̄гсыл очередин ат хансавет. Рӯпатаныл по̄хын ке̄тым, сутытым ма̄хум та̄нки ва̄рмаляныл урыл таве̄н пищма о̄с хансэ̄гыт. Кӯщай хо̄тпа ла̄выс, ос таи лю̄ль, э̄лумхо̄лас ёхты, нё̄тмил во̄ви, аквтыщёс таве̄н нё̄туӈкве тав о̄с ат ве̄рми. О̄влэ̄т акв кӯщай, тувыл мо̄т кӯщай палт пищма хансы, тувыл акв э̄тпос сыс пищма ювле ӯруӈкве э̄ри. Тыщирыл са̄в хо̄тал ювле та хульты, хо̄тпа та ӯрхаты. Та та̄л сыс янгыщ Сургут ӯсныл щар са̄в э̄лумхо̄лас пищма хансыгласыт, ос Покачи ӯсныл щар мощща хо̄тпа Александр Сидоров палт та̄рвитыӈ ва̄рмаляныл ёт ёхталасыт манос пищма хассыт. Кӯщай хум китыглавес, ма̄ньщи ос ханты ма̄хум тав палтэ нё̄тмил во̄вуӈкве ёхталасыт ман а̄ти. Тав ювле ла̄выс: «Пе̄с йис ма̄т о̄лнэ хантыт тав палтэ пищма хансыгласыт. Та̄н нефтяникыт ёт воритотэ̄гыт. Ма̄во̄й но̄хвинэ ма̄хум хантыт о̄лнэ ма̄т рӯпитасыт, соссаӈ ма̄хум туп пропускнэ̄пак щирыл тув та̄рата̄лсаныл. Тувыл, улпыл, хотёрувлахтасыт, такем кӯщайлахтуӈкве тот патсыт, ханты ще̄мья та̄нки о̄лнэ ма̄нанылн та̄ртуӈкве ат патсаныл. Ма̄н ты компания ёт потыртасӯв, ань пе̄с йис ма̄т о̄лнэ ма̄хум са̄всыр нэ̄пак та̄л та̄нки о̄лнэ ма̄нылн ялантэ̄гыт. О̄с акв ханты пыг ам палтум ёхталас, тав 18 та̄лэ то̄влыс. Во̄р па̄вылт о̄лы, писаль о̄щнэ ма̄гсыл разрещениенэ̄пак ва̄руӈкве таӈхыс. Таи пӯмащ, хунь ня̄врамыг о̄лыс, тамле нэ̄пакыл майвес, писалил па̄тлуптаӈкве ро̄выс. Ань янгыг е̄мтыс, ты нэ̄пакыл ат миве. Ос та ма̄т рӯпитан полиция ёт хоса потыртасув, рӯпитасӯв, ань пыг ты нэ̄пакыл ва̄рвес.

1054 2013.06.21. Светлана РОМБАНДЕЕВА

Савалап ня̄врамаквет нё̄тавет. Лӯпта э̄тпос аквхуйпловит хо̄талэ̄т ля̄ххал тотнэ ма̄хум ос Елена Владимировна Немчинова савалап ня̄врамаквет урыл потыртасыт. Елена Владимировна Югра ма̄вт мирн нё̄тнэ Департаментыт кӯщай ва̄ӈын нэ̄г рӯпиты. То̄ва ня̄врамыт ща̄ньа̄щ о̄ньще̄гыт кос, ос юн мӯсхал щирыл ат янмалтавет, нэ̄мхотьютн ат уральтавет, ӯльнаг ха̄йтэ̄гыт. Ты а̄гирищитпыгрищит ос савалапыг хультум ня̄врамыт аквъёт о̄лэ̄гыт, государствавн аквте̄м нё̄тавет, пуссын о̄лнэ колыл мивет, маставет, тыттаветайтавет. Елена Владимировна китыглавес: – Округувт ня̄врамыт хумус нё̄тавет? – Ма̄н Югра ма̄вт савалап ня̄врамаквет манос ща̄ньа̄щныл хотвуим ня̄врамаквет янгыщ колта̄глытыт о̄лэ̄гыт. Ты тэ̄ла щирыл ма̄н округув Россия янытыл атыт местат хансым о̄лы ань мо̄ртым ма̄т о̄лнэ республикат халн хансыма. Та ма̄т май туп мо̄рсыӈ порат ня̄врам ща̄ньа̄щта̄л хульты. Округувт ня̄врам о̄щнэ колт ань 383 ня̄врамакве о̄лэ̄гыт. Та̄н о̄с пуссын колта̄глыт о̄ л у ӈ к в е т а ӈ х е̄ г ы т, ӯрхатэ̄гыт, э̄рыӈ хотты хо̄тпан вивет. Колта̄глын о̄лмыгтанувыт, ща̄ньа̄щ о̄щнувыт. Горноправдинск па̄вылт ос Ха̄льӯст ня̄врам о̄щнэ колыг лаппантвесы̄г. Тот о̄лум ня̄врамыт пуссын ще̄мьятын вуйве̄сыт. Ань савалап колт хультум а̄гирищитпыгрищит ще̄мья хольт о̄лэ̄гыт, колнакт акв ман кит ня̄врам тӯп о̄лы. Та̄н ань ще̄мьян винэ̄ныл ма̄гсыл ма̄н сака яныг рӯпата ва̄ре̄в. Тувыл ос тамле йильпи ва̄рмаль номылматсув: ня̄врамыт ань пе̄рнаӈ а̄щ ман пе̄рнаӈ ща̄нь вос о̄ньще̄гыт, та̄н палтаныл юв вос ялантэ̄гыт. Пе̄рнаӈ ща̄ньа̄щаныл ёт матыр ва̄руӈкве ве̄рме̄гыт, щаквщуӈкве манос матыр рӯпата ва̄руӈкве. Тох ла̄щалла̄щал о̄луӈкве ханьщувлэ̄гыт. Ма̄ныр ла̄вуӈкве, рӯпатав нас тох тай ёмас щирыл мины, ос туп таи та̄рвитыӈ: яныгнув ня̄врамыт, 12-18 та̄л яныт, ще̄мьятын сака ат вивет. Ма̄хум акваг ма̄ньнув ня̄врам виӈкве таӈхе̄гыт манос ущ самын патум ня̄врам. То̄ва ма̄ньта̄гыл янмалтаӈкв таӈхитэ, ань а̄ти тав самынпаттыстэ, та̄ра ул вос паты. Округувт сака са̄в хо̄тпа савалап ня̄врам янмалтанувыт, ос ущты ла̄всум, янгыщ ущ самын патум ня̄врам янмалтаӈкве ка̄саще̄гыт. Тувыл ос округувт тамле ня̄врам мощща, ма̄хум Россияв янытыл мо̄т ма̄т а̄гирищит ос пыгрищит выгыт, тыг тотыяныл. Мо̄лты та̄л округувн 322 ня̄врам тотвес. Мо̄т ма̄ныл ня̄врам тотуӈкве ро̄ви, са̄кконт ты урыл хансым о̄лы. – Ня̄врамыт ань мо̄т хащта̄л хо̄тпан вивет, янмалтавет, ос тох о̄лыглы: тав та колта̄глыт лю̄камтаве манос нас ювле тотаве? Ювле атхунь тотыглавет. Мо̄лты та̄л 36 ня̄врам ювле тотве̄сыт, ты э̄лыпал та̄лт ос 42 ня̄врам. Ма̄н ка̄сыӈ тамле колта̄гыл ёт потыртэ̄в, китыглыянув, манрыг аквъёт о̄луӈкве ат ве̄рме̄гыт. Тувыл та̄н халанылт воссыг ат те кантлэ̄гыт, лю̄ль номт ат те о̄ньще̄гыт, о̄с э̄лаль аквъёт та о̄лмыгтэ̄гыт. Тох о̄лыглы, хунь ня̄врам кол т а̄ г ы л т с а̄ в т а̄ л о̄лыс, яныгмас. Ка̄сыӈ колта̄гылт маныр ат о̄л ы гл ы , н я̄ в р а м ы т ща̄ньа̄щаныл ёт халмалтахтыглэ̄гыт, ля̄втыгла̄лэ̄гыт, тувыл о̄с э̄лаль та о̄лэ̄гыт. Тыт о̄с аквтох. То̄ва ня̄врам пуӈк а̄гм о̄ньщи, мори капырты, ат ве̄ритаптаве, тувыл ювле та тотаве. То̄ванакт ос ща̄нь ман а̄щ а̄гмыӈыг е̄мты, ня̄врам ювле виве. – Хунь яныгме̄гыт, училищат ман институтыт ханищтахтынэ̄ныл порат улпыл о̄с нё̄тавет? – Атхунь нё̄тавет. Стипендия олныл ойтавет, тэ̄нут, маснут ёвтын ма̄гсыл олныл мивет. Э̄лнаӈ 23 та̄л мус туп ойтве̄сыт, ань ос ханищтахтын ма̄ныл а̄стынэ̄ныл мус ойтавет. 18 та̄ланыл то̄влынэ̄ныл юипа̄лт о̄лнэ колыл мивет. Ань ня̄врам колыл миве, ат та̄л уральтаве, хумус о̄лы. Йильпи са̄ккон щирыл, ты та̄лыт сыс тав колэ тыналаӈкве манос мо̄т колын пе̄нтуӈкве ат ве̄рмитэ. Тувыл колэ̄т о̄лнэ̄тэ ат та̄л то̄влы, ёмащакв те о̄лы, рӯпиты, колэ тав нуплэ та паты. Такви нуплэ хансуӈкве ве̄рмитэ, таӈхи те, мо̄т ӯсын пе̄нтытэ манос тыналытэ. Хунь ты са̄ккон а̄тим о̄лыс, ня̄врам колыл миве, хотты ощмарыӈ хо̄тпан уркуптаве, колэ̄ныл хотня̄влаве ос колэ э̄лтыналаве. Тувыл ня̄врам кон та хульты, о̄с та савалы. Округувт ты та̄л, ат э̄тпостем сыс, 180 хо̄тпа о̄лнэ колыл майве̄сыт. Ос тыгыл э̄лаль 400 са̄виттем хо̄тпа о̄лнэ колыл тах мивет. Ты ня̄врамаквет ань государствавн ущпылнэ̄г такыщ ӯргалавет, таима̄гсыл та̄наныл ро̄внэ са̄всыр са̄кконыт та хансэ̄в. Ща̄ньа̄щ ат о̄ньще̄гыт, воссыг ты а̄ти, хоталь щалтэ̄гыт, сакати о̄лнэ кол вос о̄ньще̄гыт.

1054 2013.06.21. Александр ВЬЮТКИН

Тэ̄рпит урыл ля̄ххал. Мощ мо̄лалнув Ханты-Мансийск ӯст мир пусмалтан Департаментыт ва̄ӈын кӯщаиг рӯпитан хум Сергей Щукин ос тэ̄рпит уртнэ ма̄т кӯщаиг о̄лнэ нэ̄ Наталья Тайлакова ёт прессконференция о̄лыс. О̄влэ̄т С. В. Щукин олн ойтта̄л тэ̄рпи винэ ма̄хум урыл потыртас: – 2013 та̄лт ты кастыл округ бюджетныл 2 млрд. солко̄ви майвес. Округув янытыл 216 со̄тыра 919 са̄вит хо̄тпа са̄всыр а̄гм о̄ньще̄гыт. Олн ойтта̄л 561 хо̄тпа тэ̄рпил мивет. Та̄н халанылт то̄ва ма̄хум э̄тпос сыс айнэ тэ̄рпияныл тынэ 45 – 50 со̄тыра солко̄ви са̄витыг е̄мты. Тыгыл мо̄т хультум ма̄хум тынэ акв па̄лэ ойтым тэ̄рпил тыналавет. Ты та̄л та̄рвитыӈ а̄гмыт пусмалтан ма̄гсыл Россиявт иӈ акв са̄ккон пирмайтавес. Та са̄ккон щирыл пусмалтан ма̄хум а̄гманыл«Орфанные» нампа ла̄тӈыл ла̄вавет. Тыи мо̄рсыӈ а̄гмытыл 100 со̄тыра мир халт лов хо̄тпа туп тамле а̄гмыл е̄мтэ̄гыт. Россия янытыл 24 са̄всыр та̄рвитыӈ а̄гм о̄лы. Округувт ос 175 хо̄тпа 17 тамле а̄гмытыл пусмалтавет. Ты кастыл округ бюджетныл 173 млн. 480 солко̄ви та̄стувес. Ля̄ххал тотнэ хо̄тпат титыглахтасыт: «А̄гмыӈ хо̄тпа хумус та̄рапаттуӈкв ве̄рмитэ, тав льгота о̄ньщи ман а̄ти? » Ты урыл ювле Н. И. Тайлакова потыртас: – Тыи ма̄гсыл а̄гмыӈ хо̄тпан такви пусмалтан ле̄ккаре̄ныл анализ ос обследование нэ̄пакло̄мтыт виӈкв э̄ри. Ле̄ккарытын сунсаве, та юипа̄лт ущ та̄рапаты, тав олн ойтта̄л тэ̄рпил миве ман а̄ти. Кущай нэ̄ о̄с акв ва̄рмаль урыл титыглавес: «Округув янытыл э̄лын о̄лнэ па̄влыт мус ма̄хум тэ̄рпил хумус тотыглавет ос ле̄ккарыт тув хумус ялантэ̄гыт? – Ма̄н округувт са̄в па̄влыт о̄лэ̄гыт, тув ма̄н та̄л сыс тит щёс ёхталаӈкв туп ве̄рме̄в. Тэ̄лы ма̄шинал, тӯи ос н а̄ и ӈ х а п ы л . Та м л е п а̄ в л ы т ы н м а̄ н х ӯрумнила э̄тпосын то̄вылхатнэ са̄вит тэ̄рпи тотэ̄в. То̄ванакт тэ̄рпи вертолётыл те̄тыглэ̄в. Тыима̄гсыл округувт ма̄хум тэ̄рпил пуссын то̄влавет. Я̄тил ма̄хумаквет, на̄н матыр тэ̄ла ат те торгамтэгы̄н, мир пусмалтан Департаментын ты телефоныг хосыт звонитаӈкве ве̄рмегы̄н: 8(3467) 35-16-94 ос 33-47-09

1054 2013.06.21. Тамара МЕРОВА

На̄нки та̄рвит о̄с ул ва̄ре̄н. Округ янытыл ня̄врамыт тэ̄ланыл ӯргалан кӯщай нэ̄ Татьяна Дмитриевна Моховикова журналистыт ёт хо̄нтхатыглас. Тав рӯпататэ о̄вылтыт таи потыртас: – Ам палтум 2012 та̄л сыс 527 нё̄тмил ва̄рнэ ла̄тыӈ ке̄тыглавес. Тот 566 са̄всыр та̄рвит тэ̄латыт нё̄туӈкве э̄рыс. Ты э̄лыпа̄л оигпам та̄лт ма̄хум таса̄вит пищма ат хансыгласыт, то̄нт са̄в хо̄тпа ма̄н рӯпатав о̄вылтыт ат ва̄сыт. Ань ке̄тым пищмат пуссын уральтасанӯв ос 70 процент тув хансым тэ̄лат ма̄кыг та̄рвит о̄ньще̄гыт. Са̄выӈпа̄лэ ма̄хмытын нё̄тмил ва̄рсӯв, хультум тэ̄лат ёт иӈ рӯпитэ̄в. То̄ва ща̄нита̄щит ёт нас потрамаӈкве, мощ ханищтаӈке э̄рыс. Ма̄хум янгыщ кол ат о̄щнэ ма̄гыс ма̄навн хансэ̄гыт. Тыи а̄гмыӈмосыӈ, сакватахтам ня̄враманыл ёт са̄в та̄л кол ӯре̄гыт. Савалап а̄гитпыгыт то̄внакт очередин та̄ра ат хансавет, сыресыр нэ̄пакыт акванатуӈкве ла̄вавет. Тувыл ма̄ньлат ще̄мьяӈ хо̄тпат о̄с ма̄н палтув нё̄тмил кинсэ̄гыт. Ты ма̄хум 35 та̄ланыл то̄влын юипа̄лт колыл минэ программаныл по̄хан вивет. Та̄н субсидия олныл воссыг ат ойтавет ос ня̄врамыӈ та̄гыл кол та̄л та хультэ̄гыт. То̄ват са̄ртыннув кол ёвтэ̄гыт кос, мощщалмощщал та̄нки ойтхатэ̄гыт, ос олннё̄тмил ма̄гыс очередит э̄лаль ӯрхатэ̄гыт. Тувыл аквта та̄ланыл то̄влэ̄гыт, та̄н по̄хан та вивет. То̄нт, ва̄им, та̄нки сэ̄лнэ олныл коланыл ма̄гыс э̄лаль ойтхатуӈкве ат ве̄рме̄гыт. Ань тыг мус та программаныл 1205 ма̄ньлат хо̄тпа по̄хан ты вивет. Тамле хо̄тпат сакати ня̄враманыл ма̄гыс ма̄навныл нё̄тмил кинсуӈкве ве̄рме̄гыт. Мо̄т та̄рвитыӈ лю̄ль ва̄рмалиг тыи ща̄ньа̄щит та̄нки ня̄враманыл лю̄льсаӈ янмалтыяныл. То̄ в н а к н т а̄ н а н ы л н тэ̄ла а̄тим, а̄гияныл манос пыганыл хумус ханищтахтэ̄гыт, хо̄т кон мори ха̄йтыгтэ̄гыт, маныр ва̄ре̄гыт. Тувыл тамле ма̄хмыт ёт рӯпитан хо̄тпанув то̄внакт та̄нки о̄с лю̄льсаӈ потыртэ̄гыт. Э̄рнэ торыг ёмас ла̄тыӈ ат ла̄ве̄гыт, та̄н ётаныл ос ювле ля̄втуӈкве о̄вылтахтэ̄гыт. Пуссын ты тэ̄лат ёт ма̄н акваг рӯпитэ̄в ос та̄наныл уральтым о̄ньщиянӯв.

1054 2013.06.21. Анна АЛГАДЬЕВА

Ёвтымсо̄с хум пыг ня̄врамыт. Тыкос ща̄нь ла̄тыӈ ос йис о̄лупса ханищтан урыл са̄всыр сапра̄ни ва̄рыглаве. Ла̄тыӈ ва̄нэ хо̄тпа са̄выг ат е̄мты. Ма̄ньщи ла̄тыӈ ва̄нэ хо̄тпа ос толмащлан хо̄тпа ань сака мощща хультыс. Туп во̄р па̄вылт яныгман ня̄врамыт ща̄нь ла̄тӈыл потыртэ̄гыт. Рущ халт па̄влыӈӯсыӈ ма̄т о̄лнэ ма̄хум аман э̄ссамтэ̄гыт, аман нас ат таӈхе̄гыт та̄нки ла̄тӈанылтыл потыртаӈкв. Тыкос а̄гитпыгыт институтыт ман педагогический колледжит а̄стлэ̄гыт, па̄вланылн рӯпитаӈкв ювле ат ёхтэ̄гыт. Мощ мо̄лалнув Ня̄хщамво̄лиӈ школат рӯпитан хо̄тпа ёт хо̄нтхатыгласум, тав са̄в та̄л ма̄ньщи ла̄тыӈ ханищтан нэ̄г о̄лы. Ань ме̄н потруме̄н э̄лаль ловиньтэ̄лан: – Наталья Константиновна, наӈ хо̄т самын патсын? – Искарский па̄вылт, па̄выл о̄вылт яныг хо̄вт ёлыпа̄лт ма̄ньколт самын патсум. Ты Яныгпа̄выл, пе̄с наме тох о̄лыс. Китхуйплов нот порат сараныт ӯнттум ӯс. Тувыл хо̄тхуйплов нотыт хантытн ӯс хотвуйвес, нёлоловхуйплов нот юипа̄лт ма̄ньщи Искарский ӯсыг патыс. Ань о̄лнэ Яныгпа̄выл я̄ мо̄т па̄лэ̄т ты ӯс о̄лыс. Кит яныг во̄ӈхаг ань мус о̄лэ̄г. Ма̄н ма̄нь поравт тув новхатуӈкв ат та̄ртавесӯв. – Омагна̄тягн хотьютыг, хотыл о̄лсы̄г? –А̄щум Ёвтымсо̄с хум рӯт, Самбиндалов Константин Васильевич о̄лыс. Ща̄нюм Мария Григорьевна Тасманова, Халпа̄выл нэ̄ о̄лыс. Манрыг Ёвтымсо̄с ты ам йис о̄пам, хуньт ты ма̄н ёхтыс, ва̄т нёхс ма̄гыс ты ма̄ ёвтыстэ ос э̄лаль тот о̄луӈкв патыс. А̄щум такви хо̄т лӯнн са мын патыс. Э̄лнаӈ во̄иӈ хӯл алыщлым хоса ма̄ яласасыт, тув палыт хӯл алыщлым я̄ палытыл ва̄нтала̄лсыт. Ма̄н колувт са̄т ня̄врам нила а̄ги, хӯрум пыг о̄лсӯв. Ам питипатта. Яныг яга̄гим Галина Константиновна Алгадьева а̄гипыг ня̄враманэ ёт Хулюмсӯнт па̄вылт о̄лэ̄гыт. Анна Константиновна Самбиндалова Тэ̄к па̄вылт а̄гиянэ, а̄ги ня̄враманэ ёт о̄лэ̄гыт, школат ханищтан нэ̄г рӯпиты. Тимофей Константинович Самбиндалов ща̄нягеа̄щаге о̄лме̄н порат Яныгпа̄вылт о̄лыс, рӯпитас, во̄раяс. Пенсиян патыс, Ня̄хщамво̄льн о̄лмаяс. Елена Константиновна Самбиндалова ще̄мьятэ ёт Хӯлюмсӯнтыт о̄лыс, пенсиян патыс, Ня̄хщамво̄льн о̄лмыгтас, ла̄пкат пирикаскаг рӯпиты. Нэ̄пак хаснэ ма̄хум ма̄ньщи ва̄рмаль урыл матыр китыглаӈкв та̄н палтаныл ва̄тихал ёхталэ̄гыт: Е. Г. Федорова ос В. С. Иванова Санкт-Петербург ӯсныл о̄лнэ учёный нэ̄г, Ханты-Мансийск ӯсныл Т. Д. Слинкина, С. А. Попова, С. С. Динисламова. – Хо̄т о̄лэ̄гын? Хо̄т рӯпитэ̄гын? Ня̄хщамво̄ль па̄вылт о̄лэ̄гум, налыман нупыл кит та̄л школат рӯпитэ̄гум, ма̄ньщи ла̄тыӈ ос литература ханищтан нэ̄г рӯпитанэм хус та̄лыг е̄мтыс. Яныг классыт ос история ХМАО-Югры ханищтэ̄гум. Хӯрум ня̄врам о̄ньще̄гум. Яныг а̄гим такви колылще̄мьял о̄лы. Пыгум о̄с такви а̄ще колт я̄нас о̄лы. Ма̄нь а̄гим амки ётум о̄лы, ты тӯя нёлолов класс а̄стлас. – Наӈки хо̄т ханищтахтасын? – Салехард ӯст библиотекариг кит та̄л ханищтахтасум, ётыл Санкт-Петербург ӯст культурологыг ос ма̄ньщи ла̄тыӈ ханищтан нэ̄г ханищтахтасум. Яныг а̄гим Настям кит ня̄врам о̄ньщи, о̄с школат ханищтан нэ̄г рӯпиты. Хунь ам хотталь командировкан тэ̄ла мус минэ̄гум, ам пе̄нтсылум ма̄ньщи урокыт ханищтаӈкв тав патталаве. – Ма̄ньщи ла̄тыӈ ва̄нэ ня̄врам школат о̄лы? Ня̄врамыт ла̄тыӈ ханищтаӈкв ка̄саще̄гыт? – Ловманкем ня̄врам ма̄ньщи ла̄тӈыл потыртэ̄гыт, ва̄тахкем словарь хосытыл толмащлэ̄гыт. Са̄выӈпа̄лэ ня̄врамыт ла̄тыӈ ханищтаӈкв ка̄саще̄гыт. Хоты ат ка̄сащи, юн улпыл лю̄ль номтыл ма̄ньщит нупыл о̄лэ̄гыт. Ка̄сащан ня̄врамыт са̄всыр районный, окружной конкурсыт, конференцият, олимпиадат касэ̄гыт. О̄выл местат вуйла̄лэ̄гыт. Па̄влыӈ клубколт ма̄ньщи йӣквыл йӣкве̄гыт, э̄рге̄гыт. «Лӯима̄ сэ̄рипос» газетан потырмо̄йт ке̄тыглэ̄гыт. Туи ӯщлахтын порат хӯрум накыл Саранпа̄выл ляпат о̄лнэ «Ма̄нь Ӯсквен» ня̄врамыт ёт ялсум. Тот яныг ма̄хум пе̄с йис ма̄ньщи ва̄рмалит койгалаӈкв ня̄врамытн нё̄тэ̄гыт. Ня̄врамыт ка̄саще̄гыт тамле ма̄т яласаӈкв. Ханты-Мансийск ӯсн 2008 та̄лт атыт финноугорский конгрессын ялсум. Таквсы мо̄т хо̄ныӈ ма̄н Венгриян во̄выглаве̄сум. Ма̄н школаӈ ня̄врамыт ёт В. А. Игошев посла̄лам э̄лумхо̄ласыт урыл потрыт кинсэ̄в, о̄лнэ ва̄рмаляныл урыл та̄н рӯтаныл ёт потрыт щё̄питэ̄в. Хунь потранув са̄выг е̄мтэ̄гыт, музейт рӯпитан хо̄тпат та потрыт щирыл нэ̄пак та̄ратэ̄гыт. Хуньт ты о̄йка по̄слам хуриянэ ла̄тӈыӈыг вос е̄мтэ̄гыт. Игошев о̄йка са̄в щёс Ня̄хщамво̄льн ёхтала̄лас. Ос Сӯйва̄т па̄выл ма̄хум са̄в хурит по̄слым о̄лэ̄гыт, Ханты-Мансийск ӯст музей колэ̄т ты по̄слам хуриянэ ханэ̄гыт. Наталья Константиновна ща̄нягеа̄щаге нотэ̄н палытыл ма̄ньщи щирыл о̄лсы̄г, ма̄ньщи о̄лнэ ва̄рмаль ня̄враманэ̄н хӯлистэ̄н. Таима̄гыс ты Ёвтымсо̄с пыг ня̄врамыт ма̄ньщи ва̄рмаль, ма̄ньщи ла̄тыӈ ёмщакв ва̄ганыл ос э̄лаль ня̄враманылн ханищтыяныл.

1054 2013.06.21. Александр ВЬЮТКИН

Лӯи Ня̄рихумит па̄выл о̄лупсатэ. Октябрьский районын ялмум порат, Александр Георгиевич Фомин ёт хо̄нтхатыгласум. Тав Октябрьский район Лӯи Ня̄рихумит па̄вылт миркол кӯщаиг рӯпиты. Хумус ма̄хманув тот о̄лэ̄гыт ос хо̄т рӯпитэ̄гыт, тав потре э̄лаль ловиньтэлы̄н. – Лӯи Ня̄рихумит па̄выл мирколэ Перегрёбный па̄выл нупыл ловиньтахты. Па̄влувт пуссын аквъёт 530 хо̄тпа о̄лэ̄гыт. Тувыл акв па̄лэ соссаӈ ма̄хум. Ань па̄влувт рӯпитан ма̄ мощща. Олн сэ̄лнэ ма̄гсыл та̄н па̄выл янытыл са̄всыр рӯпата ва̄ре̄гыт, яныгпа̄ла хо̄тпатын нё̄тэ̄гыт. Тыима̄гсыл туп рӯпата та̄л о̄лнэ нэ̄пакыт щирыл олнло̄мт выгыт. Тувыл рӯпата та̄л о̄лнэ ма̄хум па̄влув янытыл са̄в. Та̄н халанылт ма̄хум во̄рае̄гыт ос хӯл алыщ лэ̄гыт, ка̄тынпаттын утаныл э̄лаль тыналым олн сэ̄лэ̄гыт. Рӯпатаныл ат пилнэ ма̄хум рӯпата та̄л ат о̄лэ̄гыт. Хотьют савлахты, тав такви рот ла̄щал та о̄лы. Па̄влувт матыр рӯпата те е̄мты, та̄ра хотьют тув та паттаве. Ты та̄л ойттур э̄тпост на̄й харыгтан кол пӯнсаве. Тув атхуйплов ма̄ньлат хум пе̄риясӯв. Пе̄риян ма̄хманув халт тит ханты ос нила ма̄ньщи пыг. Та̄н вина ул вос ае̄гыт, ул вос алхатэ̄гыт ос рӯпитан номтаныл ёмасыг вос о̄лы. Тыима̄гсыл ма̄н та̄наныл пе̄риясанӯв. Ты та̄л па̄влув сыспалт аквхуйплов кварт и р а ӈ й и л ь п и кол ӯнттувес. Йильпи колыл са̄выӈпа̄лэ пе̄с колт о̄лум ще̄мьят тах мивет. Та̄н халанылт ат ма̄ньщи колта̄гыл тув о̄лмыгтэ̄гыт. Ты таквс о̄с ат йильпи о̄лнэ кол ӯнттуӈкв о̄вылтаве. Ма̄н иӈ ат ва̄глув, манса̄вит ще̄мья ма̄гсыл та кол ӯнттуӈкв патаве. Юи о̄ в ы л т Я г р и м мус ялнэ лё̄ӈх урыл потыртасме̄н. Тав ла̄выс: «Ягримныл Лӯи Ня̄рихумит па̄выл нупыл мо̄лты онтолов ве̄рста лё̄ӈх асфальтыл пинвес. Тувыл э̄лаль лё̄ӈхув ма̄нь а̄хвтасыл со̄сантавес ос тувыл та. Тӯяг ос таквсы раквнэ порат ты лё̄ӈх халэ ма̄шинал яласаӈкв щар ат хо̄йхаты, раквыл лё̄ӈхув яныг во̄ӈхаг хотловтаве. Тув палыт Ха̄льӯс район ма̄хум са̄выӈпа̄лэ ма̄н па̄влув ӯлтта яласэ̄гыт. Ты коныпал са̄т хо̄тал сыс Приобье па̄вылныл ма̄шина тотнэ хӯрум яныг паром ма̄н та̄лтувн пӯхталэ̄гыт. Мощ мо̄лалнув ам Е. Д. Айпин палт лё̄ӈхув щё̄питан ма̄гсыл нё̄тмил во̄внэ пищма те̄тыгласум. Ань ӯрхатэ̄в, хунь манырсыр ля̄ххал ма̄навн тав те̄ты. Ты урыл ты Александр Георгиевич ёт потруме̄н о̄лыс.

1054 2013.06.21. Тамара МЕРОВА

Тав яныгпа̄ла хо̄тпат пусмалты. Светлана Петровна Парфёнова ёт ме̄н тав рӯпитан ма̄тэ̄т акванхо̄нтхатыгласме̄н. Нэ̄ матумпа̄ла хо̄тпат пусмалты. Ме̄н акв колн аквъёт щалтсасме̄н. Тот Маина Михайловна Ярославцева такке̄тэ о̄лы, тав 1934 та̄лт Кальманово па̄вылт самын патыс. А̄ще ханты, наме Михаил Аптышев о̄лыс, хо̄нтлын ма̄н тотвес, тот порыславес. Светлана Петровна ос такви уре̄тыл таи потыртас: – Ам амки о̄парищ н а м у м В ы н г и л е в а , а̄тям Пётр Егорович о̄с хо̄нтлыс. Ам яныг ще̄мьят яныгмасум. Ма̄н колта̄глувтыл Няхлаӈ па̄вылт о̄лсӯв. Ам школа а̄стламум юипа̄лт Ханты-Мансийскан медучилищан ханищтахтуӈкве минасум. Тот фельдшерыг ханищтахтасум. О̄влэ̄т Хо̄нтаӈ ма̄н рӯпитаӈкве ке̄тыглаве̄сум. Тувыл кит та̄л Саранпа̄выл ляпат Нёро̄йка па̄вылт о̄йкаме̄нтыл о̄лсуме̄н. Нё̄рт о̄йкам ма̄шинал яласас, ам ос ма̄хум пусмалтасум. Тувыл Ягрим па̄вылн ва̄нтлысме̄н. Та па̄вылт ам китхуйплов та̄л о̄с ле̄ккарыг рӯпитасум. Тувыл Ха̄льӯсн о̄лмыгтасме̄н. Ам тот районный пӯльницан рӯпитаӈкве патхатыгласум. Ань са̄т та̄л Ханты-Мансийскат о̄лэ̄гум, тыт «Светлана» нампа колт ле̄ккарыг рӯпитэ̄гум, матумпа̄ла ма̄хмытын нё̄тмил ва̄ре̄гум. Ты рӯпатам а̄нумн мӯсты. Ам ка̄сыӈ хо̄тал яныгпа̄ла хо̄тпат палт ялантэ̄гум ос э̄рнэ торыг пусмалтыянум. Давленияныл сунсыянум, аптекат тэ̄рпил ёвтыянум, уколыл тӯщтыянум, сартхатнэ тэ̄рпил сартыянум ос матыр колсори рӯпата ва̄руӈкве о̄с нё̄тыянум. Та̄н ам ётум ёмщакв потыртэ̄гыт, ам та̄н ётаныл о̄с юртыӈыщ о̄лэ̄гум. Ма̄н акв ляльт сымыӈыщ сунсэ̄в. «Светлана» нампа колувт кӯщаиг Олег Валерьевич Яковлев о̄лы, ос ва̄ӈын нэ̄в наме Ольга Викторовна Шайхудинова. Тэ̄н ёмас сымыӈ хо̄тпаг. Тувыл ты колувт акв ма̄ньщи ле̄ккар нэ̄ о̄с рӯпиты, тыи Людмила Рудольфовна Мерова. Ам ты ма̄хманум пуссын ле̄ккарыт ялпыӈ хо̄талыл янытлыянум ос пуста̄гыл о̄лнэ ла̄тыӈ ке̄тэ̄гум.

1054 2013.06.21. Тамара МЕРОВА

Та̄хтыт ла̄кква ма̄н тотве̄сыт. Ханты-Мансийскат «Спасти и сохранить» нампа акция рӯпитам порат ос ты э̄тпос нилыт хо̄талэ̄т о̄с аквты щирыл намтым XVII телефестиваль Борис Лосев нампа ӯскант о̄вылта̄лвес. Ёмас ма̄лтып э̄типа̄лаг мӯй ос ӯсыӈ ма̄хум тув акванатхатсыт. Та̄н ма̄гсыланыл о̄влэ̄т «Хо̄тал» нампа А̄с-угорский театрыт рӯпитан хо̄тпат йӣквсыт ос э̄ргысыт. Са̄тхуйплов та̄л яныт а̄гитпыгыт тыглетувле поргащласыт, йӣквсыт. Ты фестиваль рӯпитаӈкве о̄вылтахтам порат ты ня̄врамыт ущты самын патсыт. Тувыл са̄всыр кӯщаит мӯй ма̄хум ёт пащалахтасыт. Ӯс кӯщай хум Василий Филипенко, «Югория» нампа телерадиокомпания кӯщай э̄ква Тамара Сутягина ос губернатор ва̄ӈын хо̄тпаг рӯпитан хум Сергей Полукеев «Спасти и сохранить» па̄нт вольгын па̄рт тармыл хансым ла̄тӈыт Ханты-Мансийскат о̄лнэ ма̄хумн мӯйлуптасыт. Ты па̄рт памятник щирыл ты ӯскант тах ма̄н ёлпинаве. Ма̄хум ёмщакв ӯщлахтын ма̄гыс тот а̄канит ма̄щтырлаӈкве ос са̄всыр ӯйрищит по̄слуӈкве ханищтаве̄сыт. Оркестр са̄всыр ёмас э̄рыгсовыт ёнгыс. Мо̄т хо̄таланылт телевидение ма̄гыс по̄слуӈкве ха̄снэ ханищтапыт ва̄рыглаве̄сыт. О̄выл хо̄талт Удмуртияныл ёхталам кина по̄слын хум Лев Вахитов ма̄хум ёт рӯпитас. Мо̄тыт хо̄талт Екатеринбургныл «Этно Кино» нампа фестивалит кӯщаиг о̄лнэ хум Иван Головнёв ёмас кина по̄слуӈкве ма̄хманэ ханищтасанэ. Ос та сыс телефестивальт рӯпитан жюри хо̄тпат ма̄вит ӯргалан урыл ма̄нь кинат суссыт ос щар ёмас утыт пе̄риясыт. Ты та̄л телефестивалит 35 ма̄ныл 350 по̄слым са̄всыр кинат сусве̄сыт. Та̄н лов номинация щирыл ла̄кквауртве̄сыт. Тувыл ты касылыт но̄хпатум хо̄тпат Ханты-Мансийс к а н во̄виньтаве̄сыт ос та̄хт хуриӈ статуэткал мӯйлуптаве̄сыт. Ань о̄выл щёс ня̄врамытын по̄слым кинат касылн ке̄тыглаве̄сыт. Тот Ярославль ӯсныл «Детектив» нампа студия статуэткал майвес. Яныг ма̄хум халт Новосибирсканыл «Промысел» намыл пиным кина но̄хпатыс. Екатеринбург ӯст о̄лнэ хо̄тпат ня̄врамытын ёмас телепередачат ва̄рнэ ма̄гыс э̄сгуве̄сыт. Хо̄т мӯйлупса Москва, Салехард, Санкт-Петербург, Якутск ӯсытын ос Тыва, Белоруссия ма̄н тотве̄сыт. Мо̄т хо̄н ма̄т халт Норвегия щар ёмас операторский рӯпата ма̄гыс ос Англия щар ёмас публицистический программа ма̄гыс мӯйлуптавесы̄г. «Югория» нампа тел е р а д и о к о м п а н и я т рӯпитан хо̄тпат о̄с кит щёс но̄хпатсыт. Та̄н акв рӯпатаныл «Лучший журналистский дебют» щирыл я̄нас мӯйлупсал щё̄питаве̄сыт. Ос «Журналисткое расследование» нампа номинацият Наталья Маковецкая ос Дмитрий Никитин «Тром-Аган: опалённые огнём» по̄слум кинатэ̄н ма̄гыс э̄сгувесы̄г. Ты коныпал «Югория» нампа рӯпитан коланыл ГранПри яныг мӯйлупсал майвес. Та̄н 100 со̄тыра солко̄вил та̄стуве̄сыт. Т. Е. Сутягина, кӯщаиг о̄лнэ э̄ква, ла̄выс: «Ма̄н ты олныт «ЛянторИнформ» телекомпаниян тах мыганӯв. Та̄н ты олнытыл ма̄вит ӯргалан ма̄гыс кинат о̄с вос по̄слэ̄гыт, тувыл ты фестивальн касуӈкв вос ке̄тыяныл. То̄внакт тот рӯпитан ма̄хумн ёмас тэ̄ла ва̄руӈкве олныл ат то̄влавет, ма̄н ань та̄нанылн нё̄тэ̄в».

1054 2013.06.21. Александр ВЬЮТКИН

Яныг колта̄глыӈ хум. Ты хурит Сергей Андреевич Евлахов по̄слым о̄лы. Тав А̄с я̄ ва̄тат о̄лнэ Алы Ня̄рихумит па̄вылт самын патыс. Ань Лӯи Ня̄рихумит па̄вылт о̄лы. А̄тятэ наме Андрей Кириллович Евлахов во̄раян ос хӯл алыщлан хумыг о̄лыс, ты коныпал тав Саранск ӯст олн ловиньтан хо̄тпаг ханищтахтас. Па̄влэ̄т колхоз о̄лум порат, Андрей Кириллович тот ма̄хум сэ̄лнэ олнаныл ловиньтым рӯпитас. Оматэ наме Фёкла, Посал па̄вылныл о̄лыс. Тав о̄лме палытыл хӯл алыщлас, ня̄врамыт янмалтас. Нэ̄гхумыг нёлолов ня̄врам о̄щсы̄г – та̄н халанылт ат а̄ги, хӯрум пыг. Сергей Андреевич щар яныг увщитэ наме Татьяна, тав ань Лӯи Н я̄ р и х у м и т п а̄ в ы л т ще̄мьяӈта̄гыл о̄лы. Титыт увщитэ Глафира. Тувыл Светлана, тав ань Ханты-Мансийск ӯст о̄лы. Нилыт ня̄врамыг Сергей о̄лы. Тав ёлыпа̄лэ̄т Екатерина э̄ще ще̄мьяӈта̄гыл Радужный ӯст о̄лы. Катя ёлыпал а̄пщитэ наме Алексей. Таве̄ныл ма̄ниг о̄лнэ э̄щаныл наме Александра. Тав ань о̄с Радужный ӯст о̄лы. Тувыл питипатта а̄пщияныл Николай. Тыи ты акв яныг юртыӈ колта̄гыл. Сергей о̄выл хӯрум класс Алы Ня̄рихумит па̄вылт а̄стлас. Тувыл тав Перегрёбный па̄вылн ханищтахтуӈкв те̄твес. Тот н ёл ол о в к л а сс а̄стламе юипа̄лт Тюмень по̄хат о̄лнэ Успенка ӯсын тракторыл яласан хумыг ханищтахтуӈкв минас. Тот тав хӯрум та̄л ханищтахтас. Ос та̄ра ювле такви па̄влэ̄н ёхтыс. Тыт тав трактористыг совхозын рӯпитаӈкв вуйвес. То̄нт трактор мощща о̄лыс, рӯпата то̄вылхатас. Э̄тэхо̄талэ кол ӯнттын ма̄гсыл нор, кӯр па̄лтыглан на̄йив район янытыл хартыглас. Тэ̄лы ос осыӈ тӯйт порат лё̄ӈх ялыглым аквписыг яласас. Тракторыл ва̄тахтем та̄л рӯпитас. Та сыс манырсыр тракторыт о̄лсыт, пуссын яласасанэ. Мо̄лты Октябрьский па̄вылт тракторыл яласан ма̄гыс э̄рнэ нэ̄паканэ йильпииг щё̄питасанэ. Ань та ат са̄всыр нампа тракторыл ос ма̄шинал яласаӈкв ве̄рми. Сергей Андреевич ань такте̄т о̄лы. А̄нумн тав ла̄выс: «Ме̄н э̄кваме̄нтыл акван ёмщакв ро̄влахтаӈкв ат ве̄рмысме̄н». Тэ̄н ще̄мьятэ̄н яныг, ат ня̄врам янмалтасы̄г. Щар яныг а̄гитэ̄н наме Татьяна. Тав ань Турция мо̄т хо̄н ма̄т о̄лы. Тыт о̄лме порат Ханты-Мансийск ӯст ле̄ккарыг ханищтын кол а̄стлас. Та юипа̄лт та̄ра мо̄т хо̄н ма̄н о̄луӈкв минас. Та̄л сыс акв щёс юв мӯйлуӈкв аквписыг ёхталы. А̄гитэ̄н ёлыпал пыг о̄ньще̄г, наме Андрей. Тав ос Ягрим па̄вылт йӣвныл матыр ма̄щтырлан хумыг ханищтахтас. Титыт пыге̄н наме Володя, тав юн о̄лы. Школа а̄стлас ос автомеханикыг ханищтахтас. Па̄вылт тамле рӯпитан ма̄ а̄тим, та пе̄нтсыл ань тав клубт сторожиг рӯпиты. Хӯрмит пыге̄н наме Юра. Тав Ханты-Мансийск ӯст инженермеханикыг юио̄выл та̄л ханищтахты. Щар ма̄нь а̄гитэ̄н наме Лидия. Тав мощ мо̄лалнув ма̄нь ня̄врамыӈыг е̄мтыс. Ня̄врам а̄тятэ моще̄ртын армияныл юв ты ёхты. Тамле ёмас ма̄ньщи хумын ам са̄в щуньпаща ла̄тыӈ те̄тэ̄гум. На̄й-О̄трын ще̄мьятэ вос ӯргалаве. Сергей Андреевич са̄в та̄л пуста̄гыл вос о̄лы.

1054 2013.06.21. Тамара МЕРОВА

Ма̄нки ё̄рыл та о̄лэ̄в. Марк Тэвлин ханты пыг ёт ам Нижневартовский район Варъёган интернатыт хо̄нтхатыгласум. Тав школа мо̄лты та̄л а̄стлас, ос тув йигирище уральтаӈкве щалтсас. Ам пыг о̄лупсатэ урыл китыгласлум. Марк иӈ номсахты, па̄вылт о̄луӈкве хульты манос ювле во̄рн мины. Марк таи потыртас: – А̄нумн нёлоловхуйплов та̄л. Ам Русскинская па̄выл школат ханищтахтасум ос тот интернатыт о̄лсум. Ма̄н са̄ртын та па̄выл ляпат о̄лсӯв. Омагума̄тягум во̄рт са̄лы янмалтым акваг о̄лсы̄г, тэ̄н акванминаме̄н порат са̄т са̄лы туп о̄щсы̄г, ётылнув ущ щёлыӈыг е̄мтсы̄г. Ань Лана йигирищум Варъёган интернатыт о̄лы, ам таве уральтан ма̄гыс тыг ёхталэ̄гум. Ты е̄рт ма̄н а̄ти сака хосат о̄луӈкве патсӯв. А̄тяв а̄тимыг е̄мтум юипа̄лт, омам ётыл мо̄т хум ва̄рыс, ос ма̄н тыгле яглаӈув о̄лнэ ма̄тэ̄н ва̄нтлысӯв. Тыгыл ма̄н па̄влув 60 ве̄рыстат о̄лы. Ма̄н ще̄мьяв коныпал тот Айваседа, Покачевыт, Айпиныт о̄с о̄лэ̄гыт. Пуссын аквъёт атпан арыгкем са̄лы о̄ньще̄гыт. Тыи та̄нки янмалтам са̄лыяныл, нэ̄мхуньт мо̄т ма̄ныл ат ёвтыгласыт. Юн акв каӈкум ос а̄пщим хультсы̄г, омавн ос яглаӈувн нё̄тэ̄г. Ос акв йигирищув нила та̄лэ то̄влыс. – Во̄рт о̄лнэ ма̄хманын хумус о̄лэ̄гыт, та̄н матыр та̄рвит о̄ньще̄гыт ман а̄ти? – Мо̄лты тув са̄лыянув тэ̄лы о̄щнэ ма̄в ляпат на̄й пе̄ламлас. Ма̄н матахкем хо̄тал та ма̄н ялантасӯв ос хумус ве̄рмысӯв, ма̄нки ё̄рувтыл на̄й та харыгтаслӯв. Мувлахи ма̄ хилым ос на̄й сэ̄йил лаппа̄хвтым тот та кап ы рт а с ӯ в . В и т л я пат а̄тим о̄лыс. Стойбищаныл ма̄н ловманкем хо̄тпа аквана тх а т ы гл а с ӯ в . Р у щ па̄вылныл манос ӯсныл щар нэ̄мхотьют ма̄навн нё̄туӈкве ат ёхталас, ла̄тыӈ ке̄тыгласув кос. Ма̄во̄й но̄хвинэ хо̄тпат манос пожарникыт туи вертолётыл манос ма̄шинал тыг ат иӈ ёхталэ̄гыт. Тэ̄лы па̄влувт колув туп на̄йн ат новвес ос са̄лыянув тэ̄пыӈ ма̄тэ витыг та тотвес. Са̄лы тэ̄пыӈ ма̄ о̄с иӈ о̄ньще̄в кос, ос та е̄рт ма̄во̄й но̄хвинэ ма̄хум манос мо̄т рӯпатат ва̄рнэ хо̄тпат тыглетувле яласэ̄гыт. Та̄н ёмас тэ̄пыӈ ма̄ яныг ма̄шинал пулигялыгласаныл. Ань та ляпат лё̄х ва̄рсыт, са̄в ма̄хум ма̄шинал яласаӈкве патсыт, са̄лыянув пилэ̄гыт ос ла̄ккваха̄йтэ̄гыт. Район кӯщаянувн пищма хансыгласӯв, ань тыг мус нё̄тмил ӯре̄в. Ма̄во̄й хилнэ ма̄хум ёт потранув акван ат ёхтэ̄гыт. Та̄н ос район кӯщаянув ма̄н тэ̄ланув ювле лаквтыяныл, мощ ӯрхатуӈкве ла̄ваве̄в, э̄рттам матыр договор– нэ̄пак хансэ̄гыт. Та сыс ма̄во̄й но̄хвинэ ма̄хум а̄лыматта̄л тот э̄лаль рӯпитэ̄гыт. Ос кӯщаит хо̄т суйта̄л о̄лэ̄гыт. Ма̄навн хота мус тох э̄лаль о̄луӈкве ро̄ви? Пе̄с щирыл о̄луӈкве манаре кос лю̄ль, ма̄хманув та̄рвит порат пуссын акваннё̄тхатым ос акванпотыртахтым о̄лсыт. Во̄р ӯргалым, сыстамыг о̄щсаныл. О̄лнэ ма̄наныл ляпат тамле яныг на̄й ат ва̄щинтасыт. Таима̄гыс ма̄н на̄й харыгтан са̄всыр утыт урыл нэ̄мхуньт ат номсысӯв. Тувыл ва̄глӯв, на̄й харыгтан хо̄тпат хо̄т рӯпитэ̄гыт, ма̄н тах о̄с нё̄таве̄в. Ань тай хотьютн агтуӈкве ро̄ви ман а̄ти, ат ва̄глув. Пыг а̄нум тамле ты савалан номтанэ ла̄выс. Та̄н кӯщаитн ты тув на̄й харыгтан утыл тотуӈкве ос олныл нё̄туӈкве ла̄вве̄сыт. Ос туп са̄лы тэ̄пыӈ ма̄нылт нэ̄матыр ва̄руӈкве ат ве̄рме̄гыт. Акв тэ̄пыӈ ма̄ныл пулиго̄хтыртавес, мо̄т ма̄ныл на̄йин ё̄свес. Ань са̄лы тэ̄п воссыг хунь тот тэ̄лы, сака са̄ль. Тувыл та ма̄т о̄лнэ ма̄хумке̄нув ма̄витаныл ма̄гыс сыманыл ща̄рге̄гыт. Ос ӯст о̄лнэ кӯщаит ёмщакв о̄лэ̄гыт, номтаныл ат савалэ̄гыт. Та̄н та̄нки апганылн э̄лаль о̄лнэ посыӈ хо̄талыт урыл аман ат номсахтэ̄гыт.

1054 2013.06.21. Тамара МЕРОВА

70та̄лэ̄тыл янытлылӯв! Ты э̄тпос нила щислат Дмитрий Иванович Юхлымов 70 та̄лэ то̄влыс. О̄йка ма̄вит ӯргалан округ Департамент па̄лыл нам хо̄талэ̄т янытлавес. Ма̄н, газетат рӯпитан нэ̄тхумыт, таве о̄с янытлылӯв ос щуньпаща ла̄тыӈ ке̄тэ̄в. Дмитрий Иванович Ха̄льӯс районыт акваг во̄р ӯргалан хо̄тпаг рӯпитас. О̄влэ̄т ва̄т нупыл кит та̄л Касум па̄выл лесничестват рӯпитас. Ос 1992 та̄лт тав Ха̄льӯс лесхозколн кӯщаиг паттувес. Тот 2005 та̄л мус пуӈктотыс. Ты о̄йка са̄в хо̄тпан э̄руптаве, тав ма̄кыг ва̄рум тэ̄ланэ ань тыг мус ма̄хумн номавет. Са̄в мӯтраӈ ва̄рмалитын таве̄ныл ханищтахтасыт. Ма̄вит ӯргалан хо̄тпат ты э̄лумхо̄ласын пуссын яныг пӯмащипа ла̄тыӈ ла̄ве̄гыт, о̄с са̄в ёмас посыӈ хо̄тал ще̄мьятэ ёт э̄лаль вос о̄лы. Ма̄н ос ма̄ньщи щирыл та̄наныл янытлыянӯв, тамле со̄тыӈ ла̄тӈыл ке̄тыянӯв пус ка̄т, пус ла̄гыл, То̄рум ёт, О̄тыр ёт вос о̄лэ̄гыт!

1054 2013.06.21. Тамара МЕРОВА

«Хо̄тал» аквтох посыӈыг вос посты. «Хо̄тал» нампа А̄с-угорский театр рӯпитанэ̄тэ па̄сыл мо̄лты таквс лов та̄л ты то̄влыс. То̄нт кӯщаит йӣквнэ ос э̄ргын ма̄хум янытлаӈкве та̄ра ат ве̄рмысаныл. Тувыл артистыт мо̄т хо̄н ма̄т ёнгим са̄в яласасыт. Ты ма̄хум пуссын ань я̄ӈк на̄тнэ э̄тпост ущ акванхо̄нтхатсыт ос ялпыӈ хо̄тал ва̄рыгласыт. Спектаклит сунсуӈкве э̄руптан ма̄хум «ЮграКлассик» яныг колн во̄виньта̄лве̄сыт. Тув щалтмув порат ма̄н пӯмащ суссылтап ка̄саласӯв. Йӣквнэ ос э̄ргын хо̄тпат пуссын такем нё̄тнэ̄г нас хаснэйӣвыл хурин по̄слымат. Ты хурит Павел Мизёв по̄слысанэ. «Сэ̄мыл э̄рыг» нампа спектаклил о̄с то̄ва накыт по̄слым о̄лсыт. Таит Вячеслав Зайчиков по̄слуӈкве номылматас. Ты ма̄ньлат хо̄тпаг сас театрыт рӯпитэ̄г. Са̄всыр ёнгилыт порат тэ̄н сцена хорамтытэ̄н, хо̄т э̄ри, лампочкал постытэ̄н ос мо̄т са̄всыр пормасыт щё̄питэ̄г. Тувыл кӯщаит о̄влэ̄т йӣквнэ ос э̄ргын хо̄тпат янытласыт, сымыӈ ла̄тӈыт ла̄всыт ос мӯйлупсал мисаныл. Владимир Букаринов, Ханты-Мансийск ӯс кӯщай ва̄ӈын хум, потыртас: «Ам ма̄ньта̄гыл ты ӯст самын патум ма̄хманум ёт театр о̄вылтыт акваг о̄с номсысум. Ань матумпа̄лаг ты е̄мтсӯв, тахольт ты номтув тэ̄лаг е̄мтыс. Ма̄нки соссаӈ ма̄хум артистыт о̄ньще̄в, та̄н ёнгиланыл сунсуӈкве ща̄гтым ёхталэ̄в. Туп та̄н ма̄гсыланыл театркол ӯнттуӈкве э̄ри, ма̄н ты ва̄рмаль э̄лаль о̄с уральтылӯв». Игорь Ширматов ос Надежда Алексеева округ Дума па̄лыл нэ̄тхумыт ёмас рӯпатаныл ма̄гыс о̄с пӯмащипа ла̄тыӈ ла̄всы̄г. «Югра лылыеп» ассоциация кӯщай хум Александр Новьюхов ос округ культура Департаментыт рӯпитан хо̄тпат ёмас ла̄тыӈ ла̄всыт. Ты кӯщаит пуссын артистыт са̄всыр грамотал мӯйлуптасаныл. АннаКсения Вишневская, режиссёр нэ̄, сысы ул вос мины, тыт акваг э̄лаль рӯпитаӈкве во̄ваве. Москваныл Лидия Богова, А. П. Чехов нампа МХАТ редакторыг о̄лнэ нэ̄, ёхталас. Марина Корнакова, Санкт-Петербург ӯст «Зазеркалье» нампа ня̄врамыт ма̄гыс ёнгын театрыт кӯщай нэ̄ тыг во̄виньта̄лвес. Ты нэ̄г российский театральный касылыт сака ёмас рӯпата ва̄ре̄г, тэ̄н ты искусстват мӯтраӈ хо̄тпаг ос са̄в ва̄гы̄г. Нэ̄г сас соссаӈ ма̄хум театрув э̄сгыстэ̄н, тэ̄н ла̄внэтэ̄н щирыл, ма̄н артистанув ма̄кыг рӯпитаӈкве ха̄сэ̄гыт. Театрув «Золотая маска» ос «Арлекин» нампа фестивалит наска̄ссыг хунь дипломыл майвес. Та юипа̄лт мӯй ма̄хум пуссын «Любить» нампа спектакль суссыт. Ты ёнгил Еремей Айпин хансум ма̄нь потранэ щирыл щё̄питавес. Тот тав ма̄нь поратэ ос ма̄ньлат порат о̄лыглам тэ̄лат суссылтаве̄сыт. Вадим Важенин ма̄щтырыг ёнгыс, ос ма̄нь поратэ Игорь Хромовын ёнгувес. Ты пыгрищакве я̄ӈк на̄тнэ э̄тпос ва̄т нупыл нёлолов хо̄талт о̄с лов та̄лэ то̄влум. Тэ̄н ты театр ёт акв янытыг о̄лнэтэ̄н, аквъёт ёмщакв ос щуниӈыг э̄лаль вос яныгме̄г. Те а т р ы т рӯ п и т а н нэ̄тхумыт са̄выӈпа̄лэ о̄с ня̄врамыӈыг е̄мтсыт. То̄ва нэ̄квет юн ма̄нь ня̄враманыл янмалтэ̄гыт, мо̄таныт ань та̄рвитыӈыщ о̄лэ̄гыт. Мӯй ма̄хум мовиньтэ̄гыт, та̄н та̄нки ма̄гсыланыл мо̄т ёмас соссаӈ артистыт янмалтэ̄гыт. Ма̄н «Хо̄тал» нампа театрын щуньпаща ла̄тыӈ ке̄тэ̄в. Та̄н пуста̄гыл, акваннё̄тхатым ос юртыӈыщ вос о̄лэ̄гыт. Са̄в ща̄гт ма̄хумн э̄лаль вос тотэ̄гыт.

1054 2013.06.21. Галина КОНДИНА

Туи ёхтын хо̄тал янытлавес. Лӯпта э̄тпос о̄выл хо̄талт «То̄рум Маа» музейт ня̄врамыт ма̄гсыл ялпыӈ хо̄тал ва̄рыглавес, пе̄с порат та хо̄тал хо̄нтаӈ ма̄ньщит «Ворщик хо̄тал» янытламыт. Ворщик хунь ма̄н ма̄вн ёхты, я̄ӈк тармыл исы, лэ̄ге хосгащлым я̄ӈкыт э̄рттам та сакватыянэ. Тав ёхтынэ̄т порат, туииг та е̄мты. Ты урыл Анна Митрофановна Конькова ловиньтан нэ̄паке̄т хансым о̄лы. Пе̄с порат хо̄нтаӈ ма̄т па̄влыӈ ма̄хум пуссын акванатхатэ̄гыт, ка̄сыӈ нэ̄ хо̄тпа юил тэ̄нут тоты. Акв яныг э̄ква пе̄рияве, тав Ща̄нит Ща̄ниг ла̄ваве. Та̄н на̄лми ва̄тат пасан ва̄ре̄гыт, ул пӯрлахтэ̄гыт. Пыгрищит ма̄гсыл Комполэн нампа пилуптахтын ут вильтхопитэ са̄снёлыг ва̄раве. Та са̄снёл нупыл пыгрищит ня̄л па̄хвтэ̄гыт, халанылт касэ̄гыт. А̄гирищит ос йӣкве̄гыт, э̄рге̄гыт. Тох ты ялпыӈ хо̄тал янытласаныл. Пыгрищит па̄тлуптаӈкве, ворт ё̄мыгтаӈкве ул вос пилсыт, таима̄гсыл са̄снёл нупыл ня̄л та̄ртуӈкве та ханищтаве̄сыт. А̄гирищит ос ул вос э̄ссамтасыт, йӣквуӈкве ос э̄ргуӈкве вос ха̄ссыт. Ань пе̄с йис ва̄рмалит хот ул вос ёрувлахтасыт, таима̄гыс ка̄сыӈ порат соссаӈ хо̄тпат музейн ты ялпыӈ хо̄тал янытлан ма̄гыс ёхталаӈкве патэ̄гыт. «Ворщик хо̄тал» рущ ялпыӈ хо̄талн паты, то̄нт мир янытыл ня̄врамыт янытлан хо̄талыг о̄лы. Ня̄врамыт ма̄гсыл са̄всыр ёнгын ма̄т ва̄рыглавет, та̄н тот та̄нти халанылт касэ̄гыт, ёнге̄гыт. «То̄рум Маа» музейт ня̄врамыт ма̄гсыл А̄с-угорский театрыт рӯпитан ма̄хум концерт ва̄рыгласыт. Нё̄тнэ супыл масхатам нэ̄ сценан нэ̄глапас, аквтуп та исгащлы, та поргащлы, щар ворщик ӯйрищакве хольт. Ня̄врамыт ща̄няныла̄щаныл ёт янытласанэ. Ка̄сащам ня̄врамыт туи пора урыл стихотвореният потыртасыт. Ка̄сыӈ ня̄врам ма̄нь мӯйлупсал майвес. Та юипа̄лт а̄мщил а̄мщуве̄сыт, хотьют а̄мщ ханьщис, ос ма̄нь ёнгынутыл майвес. Ня̄врамыт татем ка̄сащим стихотвореният потыртасыт, туйхатым сценан воратасыт. Та юипа̄лт «Лылыӈ со̄юм» колн ялантан ня̄врамыт са̄ӈквылтасыт ос йӣквсыт. Сып но̄ӈхальнув ня̄врамыт ма̄гсыл каснэ ма̄ о̄лыс. Тот тит хо̄тпа акв ляльт то̄выль тармыл ӯнтэ̄г ос йӣво̄выл титтыгхартытэ̄н. Хотьют ка̄тэ̄т йӣв хульты – тав но̄х та паты. Сун ӯлтта поргысыт. Тот о̄с халанылт туйхатым воратасыт. Ка̄сыӈ ня̄врам касуӈкве таӈхыс, ва̄им тот ос ёнгынутыл майве̄сыт. Та хо̄тал ащирмаӈ кос о̄лыс, тыхал тӯйтсамыл паргыс. Ос ня̄врамыт ха̄йтыгтым, ёнгасым атыпыл по̄льве̄сыт. Ёнганыл а̄стум юипа̄лт пуссын ёхталам ма̄хум, ня̄врамыт ща̄ил айтве̄сыт, ка̄миньт, атыӈ ня̄нил тыттуве̄сыт.

1054 2013.06.21. Валентина УЗЕЛЬ

Тав са̄в пе̄с потыр ос мо̄йт атыс. Ты та̄л лӯпта э̄тпос 28 хо̄талэ̄т Ева Шмидт 65 та̄лэ то̄влынӯв. Ос тав хотталь ловумтаме па̄сыл ань аквхуйплов та̄лыг ты е̄мтыс. Тэ̄лы Белоярский ӯст о̄лмувт тав рӯпитам архивколн щалтсасӯв, ты кол Ева Шмидт ё̄ре̄тыл пӯсвес. Тав 1948 та̄л лӯпта э̄тпос 28 хо̄талэ̄т Венгрия ма̄т Будапешт ӯст самын патыс. А̄щагеща̄няге а̄гитэ̄н Еваг намтыстэ̄н, пыге̄н ос Адам намыл. 1966 та̄лт тав художественный училище а̄стластэ, тувыл Будапештский университетт та̄ра тит специальность щирыл э̄лаль ханищтахтуӈкв патыс – венгр ла̄тыӈ ос литература, английский ла̄тыӈ ос литература. Титыт курсыт мо̄т факультетн минас, финноугроведение, этнография ос фольклор ханищтас. Та университетт ханищтахтаме̄т 1969-1970 та̄лыгт Ленинград ӯсн ялыс, тот ханты ла̄тыӈ ханищтас. Тот о̄лме̄т студентыт ёт тэ̄лы Тугияны ос Полноват па̄влыгн ялыс. Та па̄сныл ты тав ханты ма̄хум ёт ва̄йхатуӈкв патыс. 1984 та̄лт ЦК КПСС яныг кӯщаитн хансум. Ос 1992 та̄лт Белоярский ӯст архивкол рӯпитаӈкв о̄вылтахтас, ты кол кӯщаиг Ева Шмидт патыс. То̄нт тав ётэ рӯпитам А̄с ма̄хум (ты Тимофей ос Татьяна Молдановыг, Людмила Хомляк, Тамара Пятникова ос мо̄т хо̄тпат) ханты мир пе̄с йис потраныл, мо̄йтаныл акванатуӈкв патсаныл. Та юипа̄лт Ха̄льӯст архивкол пӯсвес. Ты яныг учёныиг о̄лум хо̄тпа сака са̄в потыр атыс. Мо̄йтыт ос пе̄с потрыт потыртам ма̄хум пуссын тинан по̄слуманэ, пуссын аквъёт 400 щё̄с по̄слыс, 300 арыгтем потыр «диктофоныг» ла̄внэ ищхӣпыӈ утын хассанэ. Са̄в потыр нас нэ̄пакн хансым о̄лэ̄гыт. Ань та архивколт Тамара Романовна Пятникова кӯщаиг о̄лы, тав ла̄выс: «Ева сака ёмащакв ос са̄в рӯпитаӈкв ха̄сыс. Потыртаве, хотты ма̄нь па̄вылт яныгпа̄ла хо̄тпа о̄лы, тав о̄влэ̄т та хо̄тпа ёт потыртахты, титыглахты – тав ётэ хунь хо̄нтхатыглахтуӈкв ро̄ви. Тувыл ущ тав палтэ мины. Кос хоты хо̄тпа ёт хо̄нтхаты, акваг са̄в потыр ман мо̄йт та хо̄тпаныл хансы. То̄ванакт сака э̄лы ма̄т о̄лнэ ханты ма̄хум палт яланта̄лыс, рюкзаке ёмащакв щё̄питытэ, по̄слын ут, хаснэ ут, тина ва̄рнэ ут пуссын ётвыганэ, ёт та харттыянэ. Са̄в ве̄рыста ла̄глыл ё̄мыглас. Ювле ёхты, татем ва̄гтал патнэ̄тэ, ос ма̄н таве̄ныл нэ̄мхуньт ща̄ргын ла̄тыӈ ат хӯлыгласӯв. Яныг хо̄тпанув пуссын янытласанэ, э̄руптасанэ. Сака ёмас сымыӈ хо̄тпаг о̄лыс». Хунь тав а̄тимыг е̄мтыс, Венгрия ма̄ныл нила хо̄тпа та архивколн ёхталасыт, та̄н Еван атым потрыт копияг ва̄рсаныл ос пуссын ёттотсаныл, ань та̄н Венгерский Академия наук языкознание институтт тот хо̄т о̄лэ̄гыт. Ева Шмидт ханты ла̄тӈыл сака ёмащакв потыртас, ма̄ньщи ла̄тӈыл о̄с ха̄сыс. Аквхуйплов та̄л округувт о̄лме сыс наука ма̄гыс сака са̄в рӯпата ва̄рыс. Ань Белоярский ӯст рӯпитан архивкол тав наме̄тыл пиным о̄лы. Тав ётэ рӯпитам ма̄хум таве пуссын номияныл.

1054 2013.06.21. Галина КОНДИНА

Саран ла̄тӈыл хаснэ газета 95 та̄лэ то̄влыс. Саран ма̄хум о̄лнэ ма̄т Коми Республикат «Коми му» нампа газета та̄ратаве. Лӯпта э̄тпос лов щислат ты газета 95 талэ то̄влыс. То̄нт са̄в ма̄ныл Марий Эл, Удмуртияныл, ма̄н округувныл са̄всыр газета кӯщаит ёхталасыт ос та̄нти ва̄рнэ рӯпатаныл урыл потыртасыт. Российский ассоциациян хасхатам финноугорский журналистыт 2013-15 та̄лыт сыс маныр рӯпата ва̄руӈкве патэ̄гыт – та урыл потыртахтасыт. Финноугорский пресса хо̄тыт фестивалин ты таквс тах атхатыглэ̄гыт. Ты та̄л хурит по̄слын хо̄тпат ма̄гсыл ханищтап Марий Эл ос Ямал ма̄т ва̄рыглэ̄гыт. «Коми му» газета янытлан ма̄гсыл ма̄хум ня̄врамыт ханищтахтын гимназият аквана тх а т ы гл а с ы т. Щ а р о̄влэ̄т 1918 та̄лт хунь газета та̄ратаӈкве патвес, то̄нт «Зырянская жизнь» намыл хансым о̄лыс. Яныгса̄т нупыл ат та̄л сыс хо̄тхуйплов кӯщай пе̄нтхатас. Ань рӯпитан хо̄тпат газетаныл яныгса̄т та̄лэ то̄влын кастыл нэ̄пак та̄ратаӈкве таӈхе̄гыт. Та хосыт ловиньтан ма̄хум ва̄ӈкв патыяныл, хумус газета ва̄раве ос хумус та хо̄тпаныл рӯпитэ̄гыт. Вячеслав Гайзер Коми Республикат кӯщаиг олнэ хум ла̄выс, ты газета хосыт са̄в ёмас хо̄тпа э̄лаль о̄лнэ посыӈ лё̄х хо̄нтсыт. Редакцият Виктор Савин, Вениамин Чисталев, Михаил Лебедев ос мо̄т намыӈсуиӈ хо̄тпат рӯпитасыт. Саран ма̄хум кӯщаяныл ла̄выс, та̄н ты ма̄кыг культура ныл ос ща̄нь ла̄тӈаныл э̄лаль ялтуптыяныл. Тав тот рӯпитан хо̄тпат пуссын янытласанэ ос янытлан нэ̄пакыл мӯйлуйптасанэ. «Коми му» издательский колт кӯщаиг рӯпитан нэ̄ Надежда Быковская «Заслуженный работник Республики Коми» намыл майвес. Ашот Джазаян, журналистыт Союзт секретариг рӯпитан хум, тамле ты номтэ тот ла̄выс, «Коми му» нампа премия ва̄руӈкве э̄ри ос журналитыг ёмщакв ханищтахтын а̄гитын ос пыгытын миӈкве. Ты коныпал каснэ ва̄рмаль ва̄рыглаӈкве, таве ос тамле намыл намтуӈкве – «От «Коми му» к «Коми ру». Ёхталам ма̄хум та газетат рӯпитан хо̄тпат п у с с ы н я н ы тл а с а ныл, са̄в сымыӈ ла̄тыӈ ла̄всыт ос мӯйлупсат мӯйлуптасыт. Раиса РЕШЕТНИКОВА хансум потре ма̄ньщи ла̄тӈыл Галина КОНДИНА толмащластэ.

1054 2013.06.21. unknown

Тэ̄кыӈ Коля. Ты мо̄йтпотрыг Николай Иванович Хозумов потырта̄лсаге, тав Ха̄льӯс район Хо̄рыӈпа̄вылт самын патыс. Ань а̄гитэ палт Ханты-Мансийск ӯсын ва̄нтлыс. Тэ̄кыӈ Коля сака мӯтраӈ хум ōлыс, ня̄йт хум ōлыс. Юн колта̄гыл ōньщис. Милицияныл ва̄ӈнаныл пōсыӈ утыт ёхтэ̄гыт таве пувуӈкве, а̄ви пунсэ̄гыт, ювщалтэ̄гыт. Тав Тэ̄кыӈ Коля пасан ва̄тат ӯнлы, тув мус та мӯтраӈ ōлыс, шуба ōньщи. Тайит ювщалтэ̄гыт, ла̄ве̄гыт: «О! Юн ōлэ̄гын, наӈын ты пувилув». Тэ̄кыӈ Коля шубатэ нёвумты, лапаяптытэ, нōхмасапитэ, та̄н та̄раныл кон та тахи. Та̄н шубатэ штыкыл такос пувтыяныл, акваныл тох та мины, пувуӈкве ат ве̄рмияныл. Тувыл пуваве, тотаве сутытаӈкве ка̄снаколн, тот саватаве. Не̄лме конхасумтаве, ва̄ӈкрипыл мастапаве, ка̄тпалэ̄тыл нōхтагатаве, тох та саватаве. Пōханква̄лэ̄гыт, а к в х у м и я н ы л ёл ы н ё̄мыгты. Тув мус та мӯтраӈ ōлыс, ня̄йт ōлыс, номсэ̄гыт та пувсаныл. Ōс пувияныл, хотмуса̄ти та утыяныл, сунсэ̄гыт, акваныл ōс лыпащ ōлы. Сыреса̄т щирыл такос саватасаныл, тōванакт э̄рттам та аласаныл. Ка̄тэла̄глэ хотякытлыяныл, ла̄кквапа̄хвтыяныл. Тувыл пōхыннув минэ̄гыт, нё̄влянэ та сыпге̄гыт, акван та натыглахтэ̄гыт. Сунсэ̄гыт, акваныл ты ё̄ми, юипа̄лыл такос па̄тлуптыяныл, тоха та мины, алуӈкве ат ве̄рмияныл. Тувыл ос ма̄ныр ва̄руӈкве, тове̄ртын кинсаве, юн а̄тим. Колта̄глэ ня̄враманэ саватаӈкве патве̄сыт. Ёхтэ̄гыт, юн а̄тим, китыглаве хоталь минас, ня̄враманэ ма̄ныр ла̄ве̄гыт. Тэ̄кыӈ Коля ла̄ви: «Маныр а̄нум наска̄ссыг ня̄влалылы̄н, на̄н а̄нум алуӈкве ат ве̄рмилы̄н». Тувыл таквина̄тэ хӯлтытэ: «Амти палтум пе̄рна ва̄рим ōлы, пупыг ня̄лыл а̄нум те па̄тамтылын, ущта алуӈкве ве̄рмилы̄н. Нас тох тай а̄нум алуӈкве ат ве̄рмилы̄н». Тувыл хунь ва̄ве, аман аласаныл, аман а̄ти. Улпыл нас сам пе̄нтыс, самсайн патхатас. Тамле та Тэ̄кыӈ Коля ōлыс. Тав уре̄т ам са̄в ма̄т, са̄в щёс хӯнтла̄лсум, ма̄хум акваг потырта̄лэ̄гыт.

1054 2013.06.21. Светлана Ромбандеева

Кит савыӈ утыг. Пе̄с кит савыӈ матарыг о̄лсы̄г, ма̄ньлатнув пыгрищиг. Тув мус савыӈыг, нōх ат ква̄лэ̄г, акваг та хуе̄г. Акв пӯтит хуе̄г, такос нōхква̄лттаве̄г, са̄ӈвхаве̄г. Акватэ а̄ла ква̄лы, мōтанэ̄н туяве: – Ул нёвсэн, нас хуен, сав а̄ти? ! Тох та хуе̄г акваг, нōхква̄луӈкве ат ве̄рме̄г. Тувыл ма̄ныр ва̄руӈкве тамле савыӈ хо̄н нёлыг ман хо̄ныӈ лэ̄ниг ёт, тэ̄н тох ла̄ввесы̄г. Нёвсалтаӈкве патаве̄г, акватэ ла̄ви: – Тэ̄хам, ул нёвсэня, нас хуен, сав а̄ти? ! Тамле савыӈ утыг хумле ва̄руӈкве, нōхква̄лттуӈкве ат ве̄рмаве̄г. Тувыл колта̄гыл ма̄хманэ̄н ща̄няге̄на̄щаге̄н ёт номылматсыт: «Тэ̄н пōхе̄нт на̄й па̄лтэ̄в, котараӈкве патаве̄г, тах нōхква̄лапе̄г». Яты, на̄йил па̄лтвесы̄г, акватэ котараӈкве патвес: – Тэ̄м, нōхква̄лыме̄н. – Тэ̄м, нас хуен, нōхква̄луӈкв сав а̄ти? ! Тох та на̄йин порславесы̄г савыӈ утыг, нōх ат иӈ ква̄лсы̄г. Ты мо̄йтпотрыг нэ̄пакн Светлана Ромбандеева хассаге.

1054 2013.06.21. Мария Михайловна Мелентьева

Уля ра̄туӈкве ат ро̄ви. (мо̄йтпотыр) Э̄ к в а о̄л ы с , м а̄ н ь а̄гирищ о̄ньщас. Ма̄нь а̄гирище са̄сн ӯнттыстэ, щёвал по̄хан ӯнтыс. Та порат щёвал па̄лтыглавес, щёвал ва̄тан ӯнтсыг. Лотых йӣв вис, уля та ра̄тытэ, та ра̄тытэ. А̄гирище̄нтыл тай, ань а̄гирище са̄сын ӯнттыстэ, та мовиньтэ̄г, та мовиньтэ̄г. Аквмат мовиньтасы̄г, мовиньтасы̄г, лотых йӣвыл лотхыт та ра̄тыянэ, Уляэ̄ква кантмаявес, а̄гирищ ка̄тпаттан ма̄нь лотых патыс. А̄гирищ ань ка̄тпаттатэ ща̄ргуӈкве патыс, лю̄ньщи. А̄ӈке̄н такос по̄илттаве, а̄гирищ лю̄ньщи, ка̄тэ ща̄ргаве. Э̄ква патыс ля̄выльттаӈкве уля: Наӈ тамле, тымле, ам наӈын ульйӣвыл тотылум, па̄лтыглылум. Лавум ке ёхты, ам са̄грап выгум, наӈын щар ра̄выг са̄грилум, витыл со̄сылум. А̄гирищ акваг лю̄ньщ и , л ю̄ н ь щ и . Э̄ к в а кантмаявес, со̄ль, вистэ са̄грап, а̄ращщёвал ра̄выг са̄грыстэ, вит ве̄тра вис, витыл лапсо̄сантастэ, уля та харыглас. Хо̄тал о̄лсы̄г, э̄тэ о̄лсы̄г, кол ащирмаӈыг е̄мтыс, колт по̄люӈкве патвесы̄г. Номсы: хоталь минуӈкве, ащирмаӈ колт тах тувпо̄лявеме̄н. Кон минас, колэ по̄хат матум э̄ква о̄лыс, матум э̄кваныл уля во̄ви: – А̄нум уля маен. А̄ви пӯнсуӈкве патыстэ, матум э̄ква щёвалэ уля лап та харыглас. Матум э̄ква ла̄ви: – Наӈ улпыл матыр уля ёт ва̄рсын? Ань ма̄н ты па̄вылт тах сох ащирман тэ̄ве̄в. Ам улям лапхарыглас. Манрыг уля ра̄тыслын, лотых йӣвыл ос витыл манрыг со̄сыслын? Уля ёт ёнгуӈкве ат ро̄ви. Минас мо̄т колн, мо̄т колн а̄ви пӯнсытэ, о̄с уля та харыглы. Манса̄вит кол о̄лы, сох яласасанэ, сох колыӈ ма̄хум улята̄л хультсыт, по̄люӈкве патве̄сыт. Ос юв ёхтыс, ань колэ по̄хат о̄лнэ матум э̄кватэ палт минас, ла̄ви: – Маныр ва̄руӈкве? Ащирман ты тэ̄ве̄в, па̄вылт ма̄хум ащирман по̄лявет. Э̄ква ань кантмаявес: – А наӈ манрыг ра̄тыслын уля, са̄грыслын, витыл манрыг со̄сыслын? ! Тэ̄н потыртанэтэ̄н сыс, тэ̄н э̄лыпа̄лэ̄нт уляӈ кӯщай лю̄ли, ла̄гланэка̄танэ щар лотах хурипат, сэ̄млыт, алпитэ ос восых хурипа. Э̄ква нупыл потырты: – Наӈ маныр ва̄рсын ам ётум? Сунсэн, ам хумус е̄мтсум, алпим восых хурипа, ка̄танумла̄гланум сэ̄млыт. Маныр ва̄руӈкве, матум э̄ква по̄йки: – Пе̄ламлэн но̄х, ма̄н ащирман ты по̄ляве̄в. – Ам то̄нт пе̄ламлэ̄гум, хунь ань та уля ра̄тум нэ̄ сыме а̄нум мыгтэ, ам то̄нт но̄хпе̄ламлэ̄гум. Нэ̄ а̄гирище вистэ, анигластэ, сыпыгластэ, акв ляпат о̄лнэ матум э̄кван мистэ о̄ньщуӈкве. Матум э̄ква анигластэ, сыпыгластэ, ла̄ви: – А̄гирищум янмалтэ̄лын, наӈ о̄ньще̄лын. Такви та порыгмас уля кӯщай палт, акванпӯхтысы̄г, уля та пе̄ламл а с . Н о̄хп е̄л а м л а с , щар ма̄н хо̄тлы, хоты са̄м нупыл а̄ӈкватэ̄гыт, акваг уля хорги, та хоргуӈкве патыс. Таима̄гыс ты йис потыр щирыл, яныг хо̄тпа акваг ма̄нь хо̄тпан потырты, ма̄нь ня̄врамын: уля ра̄туӈкве ат ро̄ви. Ты мо̄йтпотыр Мария Михайловна Мелентьева Восыӈтӯр па̄вылт потырта̄лыстэ, тав а̄ги о̄парищ наме Хозумова о̄лыс. М. М. Курлинын хасвес.

1055 2013.07.12. Светлана РОМБАНДЕЕВА

Ма̄ньлат ма̄хум мӯйлысыт. Ма̄н о̄лнэ ма̄вт, Россиявт, са̄в мир о̄лы, таима̄гыс ма̄в рущ щирыл та ла̄ваве: многонациональное государство. Округувт о̄с аквтох – тыг хотыла̄ти са̄в мир та ювыт, Россияв янытыл ман э̄лы хо̄н ма̄ныл тыг та ёхтахтэ̄гыт, о̄лмыгтэ̄гыт. Тыт ань рӯпата хо̄нтыгпе̄гыт, олныл ойтавет. То̄ва ха̄снэ ма̄хум, ка̄ркам ма̄хум, та̄нти ма̄гсыланыл рӯпитэ̄гыт, яныг олн сэ̄лэ̄гыт. Тувыл тыт о̄луӈкве ханьщувлэ̄гыт, ще̄мьяныл тыг тотыяныл, ня̄враманыл тыт ханищтахтэ̄гыт. Са̄всыр мирыт акв по̄хат о̄лнэ̄ныл порат то̄ванакт ла̄тӈаныл акван ат ёхтэ̄гыт, тувыл халанылт халмалтахтэ̄гыт, воритотэ̄гыт. Яныгх о̄ т п а н т а̄ р в и т ы ӈ , ос ня̄врамытын манос ма̄ньлат хо̄тпатын, в а̄ и м , у щ п ы л н э̄ г та̄рвитыӈ. Та̄нанылн э̄ри юртыӈыщ о̄луӈкве, а к в ъё т ё н г а с а ӈ к в е , потрамаӈкве, ос ты пе̄нтсыл та̄н халанылт ля̄втэ̄гыт, алхатэ̄гыт. Ань тамле ва̄рмаль хотмус ёлпо̄илттан ма̄гыс Россия ос округ янытыл ма̄ньлат мир са̄всыр организациятыт рӯпитан ма̄хум та̄н вуйхатасыт. Лӯпта э̄тпос 27 хо̄талт образование ос молодежный политика Департаментыт рӯпитан хум А. Е. Тимкин, Российский Союз молодежи общественный организация кӯщай М. В. Смехов ос округ А̄с-угорский ма̄ньлат ма̄хум организацият рӯпитан нэ̄ Н. А. Молданова ля̄ххал тотнэ ма̄хум ёт акванхо̄нтхатыгласыт. Та̄н, насати, ма̄ньлат мир ма̄гыс фестиваль ва̄руӈкве номылматмыт. А н то н Тимкин ла̄выс: Мо̄лты та̄л ма̄н ма̄ньлат мир аквхуйплов организацият аквъёт рӯпитаӈкве пот ы р т а х т а с у в , с а̄ в э̄рнэ нэ̄пакыт хассӯв, щё̄питасӯв. Ань округ янытыл о̄лнэ ма̄ньлат ма̄хум ва̄тихал акван вос хо̄нтхатыглэ̄гыт, вос румалахтэ̄гыт. Ка̄сыӈ та̄л фестиваль ва̄руӈкве патэ̄в, тох намаяслӯв: «Через многообразие к единству». Ты та̄л Ханты-Мансийск ӯст лӯпта э̄тпос 28 хо̄талэ̄т е̄мты. Мо̄лты та̄л Нижневартовск ӯст ва̄рыгласлӯв. Тот нёлолов са̄всыр мир э̄ргысыт ос йӣквсыт, ты та̄л ос аквхуйплов мир мӯйлуӈкве ка̄сащасыт. Борис Лосев нампа паркыт ка̄сыӈ мир такви о̄лупсатэ суссылты: тэ̄нутаныл, маснутаныл, ка̄тыл ва̄рим пормасаныл. Мощ э̄лнуве сцена ва̄раве, тот ма̄хум йӣквуӈкве ос э̄ргуӈкве патэ̄гыт. Я̄нас пасан ӯнттэ̄в, ка̄сыӈ хо̄тпа тув ляпан ро̄влахтыглаӈкве ве̄рми, хотты номт о̄ньщи те, вос ла̄ви, тамле ялпыӈ хо̄тал таве̄н мӯсты ман а̄ти. Ма̄хум тот тах касэ̄гыт, ка̄сыӈ мир та̄нти касыланыл суссылтэ̄гыт. Ам номсэ̄гум, ка̄сыӈ хо̄тпан э̄ри тув ялуӈкве, самыл ка̄салаӈкве, сака пӯмыщ. Э̄лаль Максим Смехов потыртас: Тыг украинцыт, белоруссыт, рущит, ма̄ньщит, хантыт, татарыт, киргизыт, казахыт, таджикыт, узбекыт, азербайджанцыт ёхтэ̄гыт. Ка̄сыӈ мир маныр ха̄сы манос о̄лупсатэ манхурипа – ма̄хум вос сунсэ̄гыт, вос ка̄салэ̄гыт, са̄всыр мирыт хумус юртыӈыщ ве̄рме̄гыт о̄луӈкве, аквъёт йӣкващлэ̄гыт, аквъёт ощхулит ва̄ре̄гыт. Надежда Молданова о̄с аквкит ла̄тыӈ ла̄выс: Ма̄н соссаӈ ма̄хманув ка̄тыл ва̄рум пормасаныл мирн суссылтыяныл. Ханты а̄гиюв Лариса Миляхова йӣкви ос э̄рги. Тав турсуе сака нё̄тнэ. Акв ма̄ньщи ос акв ханты ансамблиг э̄ргуӈкве ос йӣквуӈкве патэ̄г. Кит проектыг щё̄питасагӯв: «Время поющих стрел» (Евгения Вьюткина тав хансыс) ос «Фестиваль национальных фотографий». О̄выл рӯпата ня̄врамыт та̄н «Ма̄нь Ӯскве» стойбищаныл урыл, китыт рӯпата ос по̄слын хурит урыл. Ань ты фестиваль порат ка̄сыӈ мир мо̄т хотты ма̄хум по̄слуӈкве патыяныл. Тувыл яныг таквс э̄тпост, «День народного единства» хо̄тал порат, пуссын хурит тах колнорн но̄хтагталавет, сунсыглаӈкве патыянув. Ты проектыг но̄х те патэ̄г, ма̄н пуссын хотща̄гтэ̄в. Акв тамле ёмас проектув но̄хпатыс, тох намаим о̄лы: «Мастерская по изготовлению одежды обских угров». Таквсы порат ма̄хум соссаӈ мир маснут ю̄нтуӈкве о̄вылтахтэ̄гыт. Пуссын ты ва̄рмалит ма̄н таимагыс ва̄ре̄в, ань са̄всыр ма̄хум халанылт вос ва̄йхатэ̄гыт, акван вос румалахтэ̄гыт, юртыӈыщ вос о̄лэ̄гыт. Ма̄н, ма̄ньщи ос ханты ма̄хум, э̄лы хо̄н ма̄хум ляльт ка̄миньт номтыл сунсэ̄в. Та̄н ётаныл сымыӈыщ о̄лнувув, ос туп та̄н ма̄навн нэ̄матыр лю̄ль ул вос ва̄рнувыт, ма̄н ма̄вт нас роттыг вос о̄лнувыт. Ты хӯрум ка̄ркам, номтыӈ а̄гипыг тамле потыр та о̄щмыт. Ла̄вум потраныл тэ̄лаг вос е̄мты, кӯщаитын вос нё̄тавет, ма̄к ёмас проектаныл но̄х вос патэ̄гыт. Э̄рыӈ, со̄ль, тах ма̄ньлат ма̄хум халанылт юрщмахтэ̄гыт, мо̄т мир о̄лупса ва̄ӈкве ос янытлаӈкве патэ̄гыт. Хурит Максим Смехов, Антон Тимкин ос Надежда Молданова послым о̄лэ̄гыт.

1055 2013.07.12. unknown

Мирн пе̄риим ма̄хум ӯщлахтуӈкве минасыт. Са̄ккон пирмайтан хо̄тпанув туи ӯщлахтуӈкве миннэ̄ныл э̄лыпа̄лт лӯпта э̄тпос оигпан порат са̄пранин акванатхатыгласыт. Тот та̄н ва̄т нупыл нила са̄ккон урыл потыртасыт ос та̄наныл пирмайтасыт. Та хо̄тал, лӯпта э̄тпос ва̄т нупыл са̄тыт щислат, Е. Д. Айпин 65 та̄лэ т о̄ в л ы с . З а сед а н и е о̄вылтахтам порат таве янытлаӈкве Г. Ф. Бухтин, губернатор ва̄ӈын хум, ёхталас. Геннадий Федорович губернаторн те̄тым ла̄тӈыт ловиньтас ос такви о̄с ёмас, сымыӈ ла̄тӈыт ла̄выс, хорамыӈ лӯптал мӯйлуптастэ. В а̄ т н у п ы л н и л а са̄ккон халт ма̄н соссаӈ ма̄хманув ма̄гсыл хансым са̄кконыг «О развитии северного оленеводства» ос ма̄ньщи, ханты ла̄тӈыл та̄ратан газетаг, передачат урыл тот потыр о̄лыс. Округувт са̄лыт янмалтым тит предприятияг рӯпитэ̄г, тот пуссын аквъёт 18 445 са̄лы о̄ньщаве. «Осетные», «Юильские оленеводы», «Ильгиборская», «Вар», «Айтупос» общинат 796 са̄лы янмалтэ̄гыт. Белоярский районт ва̄т нупыл акв фермерский хозяйство о̄лы, тот 3 206 са̄лы о̄ньщаве. Ты коныпал ма̄хум та̄нти са̄лы о̄с о̄ньще̄гыт, та̄н 14 571 са̄лы янмалтэ̄гыт. Югра янытыл пуссын са̄лыт аквъёт те ловиньтаӈкве – 37 018 са̄лы ма̄н округувт ха̄йтыгты. Та̄н акваг уральтым о̄ньщавет. Са̄всыр тэ̄рпиӈ уколыл ва̄рыглавет. Са̄лы нё̄выль тыналан э̄лып а̄ л т, л е̄ к к а р ы т ы н ё м щ а к в у р а л ьт а в е . 2012 та̄лт 248, 5 тонна нё̄выль тыналавес. Са̄р та̄лныл 4, 9 процентын са̄внув о̄лыс. Тох о̄лы, тыт ӯйхул нё̄влянув ат то̄вылхатэ̄гыт, мо̄т ма̄ныл о̄с тотаве. Округувт тит газетаг ханты ос ма̄ньщи ла̄тӈыл хансаве̄г. Ты коныпал тӯя па̄сыл сайтыг ла̄внэ ищхӣпыӈ ма̄т газетаг тув о̄с ва̄раве̄г. Тот www. khanty-yasang. ru ля̄ххалыт рущ, ма̄ньщи ос ханты ла̄тӈыл хансым о̄лэ̄гыт. Т. С. Гоголева ла̄выс: «Югория» телекомпания округ бюджетныл та̄л сыс 180 миллион солко̄вил та̄стувес. Телевизор хосыт ханты ла̄тӈыл та̄л сыс са̄т щё̄с ля̄ххалыт суссылтавет ос ма̄ньщи ла̄тӈыл та̄л сыс туп 90 минута. Тот ма̄ньщи ла̄тӈыл потыртан акв хо̄тпа рӯпиты. Ам губернаторувн ты урыл пищма хансыгласум, ювле ла̄тыӈ те̄тсыт, са̄внув щё̄с уртуӈкве та̄н ат ве̄рме̄гыт. Ты урыл ам кӯщаит ёт иӈ э̄лаль рӯпитаӈкве патэ̄гум. Тох сунсуӈкве те, Марий Эл ма̄т тот ка̄сыӈ хо̄тал титхуйплов щё̄с ща̄нь ла̄тӈыл передачат ва̄равет. Ма̄н ма̄вт та̄л сыс ты са̄витын ат ёхты».

1055 2013.07.12. Николай МЕРОВ

Хӯл ла̄щал янмалтаве. Округув я̄т мохсаӈ, ӯсхул, ка̄рай, супыг ос нялк хӯлыт ка̄сыӈ та̄лныл мощщаме̄гыт. Та̄наныл са̄вмалтан ма̄гыс 2008 та̄лт хӯл янмалтан завод ӯнттуӈкве патвес. Ты ма̄гыс округ бюджетныл кит миллиард солко̄ви майлувес. Ос завод ӯнттын сыс то̄ва тэ̄лат э̄рнэ щирыл ат ва̄рве̄сыт. Ань ты ва̄рмалит мӯсхалыг щё̄питан ма̄гыс иӈ акв миллиард солко̄ви майвес. То̄нт кӯщаит ла̄всыт, завод 2013 та̄лт рӯпитаӈкве о̄вылтахты. Со̄ль, ань ты та̄л лӯпта э̄тпост округ рыбокомбинатыт ос хӯл янмалтан пе̄рмат рӯпитан хо̄тпат Ханты-Мансийск ӯсн ёхталасыт. Югорский рыбзаводыт конференция о̄лыс. Хӯл янмалтан ма̄хум сыресыр ва̄рмалит урыл потраныл ловиньтасыт. Та заводыт кӯщаиг Василий Сысуев рӯпиты. Тав ла̄внэ̄тэ щирыл, хӯл янмалтан хо̄тпат ищхӣпыӈ утыт ос ма̄нь хӯлыт тыттын тэ̄нут та̄нки ёвтэ̄гыт. Ты ма̄гыс банкыт кредитолн выгыт. Ос ётылнув акв тонна хӯл янмалтан порат округ бюджетныл са̄тлов со̄тыра солко̄ви са̄вит компенсацияолныл ойтавет. Ты олныт ос то̄нт ойтавет, хунь хӯлыт яныгме̄гыт. Тувыл ань я̄нас рӯпата ва̄рнэ хо̄тпа ма̄нь тӯр аукцион щирыл лов со̄тыра солко̄ви ойтым ёвтуӈкве ве̄рмитэ. Ос ты тэ̄ла ва̄нэ хо̄тпат ла̄внэ̄ныл, а̄ти ка̄сыӈ тӯр сортыл та̄гиньтаптуӈкве ро̄ви. То̄ва тӯрыт э̄лын о̄лэ̄гыт, тот лё̄ӈх ос на̄йпос а̄тим. Ты та̄л Югра ма̄т туп налыман са̄вит тӯр хӯл алыщлан ма̄гыс тыналавес. Ос акв тамле ва̄рмаль ань о̄лы. Та̄нки рӯпата ва̄рнэ хо̄тпат ма̄нь хӯл э̄лаль янмалтан ма̄гыс нэ̄мхо̄т ёвтуӈкве ат ве̄рме̄гыт. Югорский завод туп та̄л арыгтем рӯпиты. Тот иӈ са̄в та̄рвит ва̄рмаль о̄лы. То̄ва ищхӣпыӈ утыт иӈ ат ӯнттуве̄сыт. Ань а̄рталан ма̄гыс ма̄нь цех рӯпиты. Югра ма̄т яныгса̄т арыгтем предприятиятыт ма̄хум хӯл алыщлым рӯпитэ̄гыт. Мо̄лты та̄л сыс та̄н онтоловиткем со̄тыра тонна хӯл пувсыт. Са̄р та̄лныл нила процентын са̄внуве̄г о̄лы. О к р у г у в я н ы т ы л тӯрытыт ос я̄тыт пуссын аквъёт ва̄тахкем са̄всыр хурип хӯл уигты. Са̄выӈпа̄лэ сорт, хулюмхӯл, ка̄сэв ос щапак тыт о̄лы. Ты хӯлыт а к в а г а л ы щ л а ӈ к в е р о̄ в е̄ г ы т. М а н а с а̄ в и т ка̄сащегы̄н, таса̄вит пувуӈкве ве̄рмегы̄н. Мохсаӈ тай хӯрум та̄л сыс кит щёс мощщаг е̄мтыс. Таима̄гыс ты хӯл мори алыщлаӈкве ат та̄ртаве, нэ̄пак та̄л хӯл пувнэ хо̄тпат яныг штрафолныл пинавет. Мо̄тынтыг мохсаӈ пувнэ ма̄гыс квота мощщаг ва̄раве, 7 тонна туп пувуӈкве тах та̄ртаве. Ты ва̄рмаль ханищтан специалистхо̄тпат ла̄внэ̄ныл щирыл, 2015 та̄л мус мохсаӈ щар мощщаг е̄мты, выгыр нэ̄пакын хансаве тах. Таима̄гыс ань хӯл янмалтан завод округувт сака ты э̄ри. Тот рӯпитан ма̄хум т ох н о м с э̄ г ы т, а н ь хӯрум та̄л сыс завод иӈ ва̄рияныл, ётыл ёмщакв рӯпитаӈкве паты. Тувыл э̄лаль ты колныл ка̄сыӈ та̄л атпан миллион ма̄нь мохсаӈ хӯлкве Иртыш я̄н та̄ртуӈкве номсэ̄гыт. Ты хосыт я̄т о̄с э̄рыӈ атыӈ хӯлыл са̄вме̄гыт тах. Ты коныпал тот ань тыналан ма̄гыс хӯл о̄с янмалтаӈкве патаве.

1055 2013.07.12. Тамара МЕРОВА

Э̄лумхо̄лас тэ̄ланэ уральтавет. Ханты-Мансийскан са̄всыр ма̄ныл э̄лумхо̄лас тэ̄лат ӯргалан кӯщаит ёхталасыт. Рущ щирыл та̄н «Уполномоченный по правам человека» ла̄вавет. Ма̄н округувт тамле кӯщаиг Александр Сидоров о̄лы. Ос Россия янытыл э̄лумхо̄лас тэ̄лат ӯргалан хо̄тпаг Владимир Лукин рӯпиты. Ты хо̄тпат ань та̄нки рӯпатаныл о̄вылтыт потыртасыт ос ма̄н соссаӈ ма̄хманув урыл пӯмщалахтасыт. О̄выл хо̄тал са̄в ма̄ныл ёхтум мӯй хо̄тпат «Югра лылыеп» ассоциация колн ялсыт. Тот ассоциацият пуӈктотнэ хум, Совет старейшин, ма̄ньлат ма̄хум организация ос ӯйхул алыщлан община кӯщаит ёт акванхо̄нтхатыгласыт. Кӯщаянув ма̄нав ӯргалан ва̄рмалит урыл потыртасыт. Ма̄н, насати, нэ̄мат сака та̄рвит ат о̄щнэ̄в. Хоты хо̄тпа та̄н палтаныл нё̄тмил ма̄гыс пищма хансы, та̄н тав тэ̄ланэ ёмщакве̄г щё̄питаӈкве нё̄тэ̄гыт. Ань йильпи российский паспортыт э̄лумхо̄лас национальносте хансуӈкве ат патвес. Ос матыр нё̄тмил киснэ порат та̄н хотыл ва̄вет, хоты ще̄мьяныл о̄лэ̄гыт, нас ла̄тӈын ат агтавет. То̄ва хо̄тпат сут щирыл нэ̄паканыл щё̄питасаныл. Тувыл ма̄хум округ кӯщаянувн нэ̄пак хансыгламыт, т а ю и п а̄ л т со сс а ӈ ма̄хум пе̄с паспортаныл ка̄тн маимат. Ня̄врам намнэ̄паке̄т национальность тахольт хультуптавес. Ос то̄ванакт щар по̄х ма̄хум та̄нкина̄ныл м а н о с н я̄ в р а м а н ы л ма̄ньщииг манос хантыиг хансыяныл, тох соссаӈ ма̄хум са̄вми. Ла̄тӈагув ос культурав та̄н ат ва̄ганыл, ханищтаӈкве о̄с ат таӈхияныл. А̄нумн таи са̄ль, соссаӈ ма̄хум ма̄гыс та̄стым олннё̄тмилыт наска̄ссыг ла̄кква та уртгалавет, ос щар ма̄к ма̄ньщит ос хантыт вуньщалыг хультэ̄гыт. Программат мӯсхалыг ке рӯпитанувыт, соссаӈ ма̄хманув пуссын хосат та̄гыл колыӈыг е̄мтнувыт, нуса ат тотнувыт. Мо̄тыт хо̄талт мӯй ма̄хум е̄ӈта пасан ва̄тат акванатхатыгласыт. Та̄н «Коренные народы в контексте бизнеса и прав человека» ва̄рмалит урыл потрыт хӯнтлысыт. Мӯй ма̄хум ёт округ губернаторув Наталья Комарова пащалахтас ос соссаӈ ма̄хум ӯргалан са̄всыр программат урыл потыртас. Женева ӯсныл Самия Слимэин, ООН колыл ёхталам нэ̄, ма̄ янытыл соссаӈ ма̄хум ма̄гыс манхурип мирхал са̄кконыт о̄лэ̄гыт ос маныр ӯргалан статьят та̄н о̄ньще̄гыт, хумус та̄н щиранылт э̄лумхо̄лас тэ̄ланэ вуянтавет – ты урыл потыртас. Тувыл семинар оигпам юипа̄лт Владимир Лукин журналистыт ёт хо̄нтхатыглас, тав ла̄выс: «Ма̄н са̄в э̄рнэ рӯпата тыт ва̄рсув, с а̄ в с ы р т э̄л а т т а̄ р а паттысанӯв. На̄н соссаӈ ма̄хманын палт, со̄ль, са̄в та̄рвит ат о̄щнэ̄н. Россия коныпал 70 арыгкем мо̄т хо̄н ма̄тыт мощщаг хультум соссаӈ ма̄хум ва̄рмаляныл ёт о̄с акваг рӯпитэ̄гыт. Ма̄н ань аквъёт ханищтахтэ̄в, хумус тэ̄лат мӯсхалыг щё̄питаӈкве акванн ё̄ т х а т э̄ в . Т ы т о с акв тэ̄ла э̄лаль ёмща к в х а н ищт а ӈ к в е о с т о р г а м т а ӈ к в е таӈхилӯв. Югра ма̄т газ ос ма̄во̄й но̄хвиве, ты ва̄рмалит ма̄гыс ма̄во̄й ёт рӯпитан кӯщаит соссаӈ ма̄хманын ёт халмалтахтэ̄гыт, пот р а н ы л а к в а н а т ёхтэ̄гыт. Хотьютаныл ёт потыртахтуӈкве ро̄ви ос хумус нё̄туӈкве, ма̄н иӈ та̄ра ат паттылӯв. Соссаӈ ма̄хум праваныл вуянтан ма̄гыс хотьютаныл ёт потыртахтуӈкве э̄ри, туп хантыт, ма̄ньщит ёт манос та̄н са̄всыр кӯщаяныл ёт? Тот ка̄сыӈ хо̄тпа тэ̄ла такви щире̄т пе̄рыгтытэ, таима̄гыс са̄всыр тэ̄лыгтан накыт е̄мтэ̄гыт. Ма̄во̄й ёт рӯпитан кӯщаит са̄в олн сэ̄лнэ ма̄гыс ла̄палахтыглэ̄гыт. Ма̄н ань тыт мощ сунсыглахтасӯв, нэ̄пакыт ловиньтасанӯв ос матыр ла̄тыӈ э̄лаль тах тотэ̄в».

1055 2013.07.12. Тамара МЕРОВА

Ня̄врамыт яныгхо̄тпат ханищтыяныл. Мо̄лал «Спасти и сохранить» нампа акция оигпас. Тот маныр ёмас тэ̄лат ва̄рве̄сыт ос э̄лаль хумус рӯпитаӈкве патэ̄гыт – ты ва̄рмалит урыл журналистытн губернатор ва̄ӈын хум Сергей Полукеев, ма̄вит ӯргалан Департаментыт кӯщай хум Борис Костюхин ос ма̄вит осэ уральтан экспертнэ̄ Виктория Кравцова потыртасыт. Ня̄врамыт ма̄витув ӯргалаӈкве сака ёмщакв нё̄тэ̄гыт. Ка̄сыӈ е̄мт са̄в ня̄врам йӣвыт ӯнттэ̄гыт, порсыт акванатыяныл, та̄нки порс мори ат па̄хвтэ̄гыт ос аквта щирыл о̄луӈкве яныг хо̄тпат ханищтэ̄гыт. Мо̄лты та̄л Сургут ӯс по̄хат дачат о̄лнэ ма̄т ня̄врамыт ма̄вит ӯргалан урыл хансым нэ̄пакло̄мтыт ос порс атнэ хӯрыгсовыт ма̄хумн майласыт. Та па̄сныл ма̄хум порсаныл хо̄та̄ти па̄хвтуӈкве ат патсыт ос та̄нки о̄лнэ ма̄наныл ёмщакве̄г хотщё̄питасаныл. Нижневартовск ӯс нупыл ма̄шинал яласан лё̄ӈх хосыт са̄в ма̄т па̄ртло̄мтыт тӯщтуве̄сыт, тот хансым о̄лы: «Ты ма̄ ма̄нь ня̄врамытн сыстамтавес! » Ань та юипа̄лт, со̄ль, ты лё̄ӈх палытэ̄т щар сыстамыг е̄мтыс, тот нэ̄мхотьют воссыг порс ат па̄хвты. Акция ва̄рыглым сыс Югра янытыл ань 76 со̄тыра ӯльпа ос лов со̄тыра лӯптаӈ йӣв ӯнттуве̄с. Телефестиваль о̄лум порат Китай, Австралия, Новая Зеландия ос США ма̄ныл о̄выл щёс мӯй ма̄хум ёхталасыт. Тувыл ма̄во̄й но̄хвинэ ма̄т рӯпитан хо̄тпат III эколог Съёзд тыт ва̄рыгласыт. Тыт яныгса̄ткем хо̄тпа акванхо̄нтхатыгласыт о с с а̄ в с ы р т а̄ р в и т ва̄рмалит урыл потыртасыт. «Спасти и сохранить» нампа акция тэ̄лат округ коныпал мо̄т ма̄т ва̄рыглавет тах. Ань ты акция щирыл ма̄хум Ямал ма̄т, Коми республикат ос Свердловский областит рӯпитаӈкве патэ̄гыт.

1055 2013.07.12. Тамара МЕРОВА

Россиян о̄луӈкве ёхтэ̄гыт – рущ ла̄тыӈ вос ва̄гыт. Округ губернаторув Наталья Комарова са̄всыр национальностил о̄лнэ кӯщаит акванатыгласанэ. Та̄н Юграт о̄лэ̄гыт ос та̄нки мираныл торыг пуӈктотэ̄гыт. Округ кӯщаюв культура ос рущ ла̄тыӈ ханищтан урыл та̄н ётаныл потыртас. Тав ла̄выс: «Яныгполь э̄тпост Владимир Путин, Россия Президентув, 2014 та̄л культура та̄лыг ва̄руӈкве ла̄выстэ. Ань таима̄гыс пе̄с йис накыт э̄лаль тотыянӯв, нэ̄пакн хансыянӯв ос та̄рвит в а̄ р м а л и т ё м щ а к в щё̄питыянӯв. Россия культурав ма̄ янытыл о̄с суссылтылӯв. Мо̄т ма̄ныл ёхтум ма̄хум ма̄гыс ма̄н о̄с са̄всыр программат манос проектыт щё̄питаӈкве ве̄рме̄в. Ань щар э̄рнэ тэ̄лаг таи о̄лы ты хо̄тпат рущ ла̄тӈыл ханищтаӈкве э̄ре̄гыт. Любовь Ковешникова, образование, наука ос ма̄ньлат хо̄тпат тэ̄ланыл ёт рӯпитан Департаментыт кӯщай нэ̄, потыртас: «Округувн мо̄т ма̄ныл ёхтум ня̄врамыт сака та̄рвитыӈ ханищтаӈкве. Ань 30 ня̄врам рущ ла̄тыӈ щар ат ва̄гыт, 400 са̄виткем рущ ла̄тыӈ мощ торгамтэ̄гыт кос ос школат лю̄льсаӈ ханищтахтэ̄гыт. Рущ ла̄тыӈ ва̄нэ ня̄врамыт ёт о̄с са̄в рӯпитэ̄в. Та̄н мо̄т хо̄н ма̄ныл ёхтум ня̄врамыт ёт юртыӈыщ вос о̄лэ̄гыт, акван вос нё̄тхатэ̄гыт». Кӯщаит потыртасыт, ань тамле ня̄врамыт я̄нас ханищтаӈкве э̄ре̄гыт. Ханищтапыт туи порат вос ва̄рыглавет. Ня̄врамыт ща̄няныла̄щаныл ёт аквторыг вос ханищтавет. Та̄н са̄выӈпа̄лэ рущ ла̄тыӈ о̄с ат ва̄гыт, юн та̄нки ща̄нь ла̄тӈыл туп потыртэ̄гыт. Ня̄враманыл тыг тотыяныл ос маныр та̄рвит та̄н тыт о̄ньщуӈкве патэ̄гыт, хумус ханищтахтэ̄гыт, ща̄нита̄щит ат номсахтэ̄гыт. Таима̄гыс са̄всыр национальностил о̄лнэ кӯщаит та̄нки респ у бл и к а н ы л ё х т у м ма̄хумн нё̄туӈкве ла̄вве̄сыт. Александр Новьюхов, «Югра лылыеп» ассоциация кӯщай хум, округт о̄лнэ ма̄хум соссаӈ хо̄тпат пе̄с йис наканыл ӯргалаӈкве ла̄всанэ. Тав потыртас: «Ханты ос ма̄ньщи пе̄с потрыт манос йис мо̄йтыт ва̄нэ хо̄тпа моще̄ртын щар ат хульты. Тамле хо̄тпат ань туп щар сытам во̄р ма̄т хультсыт, тув мо̄рсыӈ порат мо̄т ма̄хум ёхталэ̄гыт. Ма̄н тот та̄мле та̄рвит о̄ньще̄в, ты ма̄хманув палт мо̄т то̄рмын по̄йкщан хо̄тпат о̄лмыгтамыт. Та по̄х хо̄тпат соссаӈ ма̄хманувн та̄нки то̄рманыл урыл потыртэ̄гыт. Тувыл ма̄н ма̄хманув номтаныл тэ̄лыгтыяныл ос та юипа̄лт аквъёт ялпыӈ ма̄н минэ̄гыт ос тот пе̄с йис тагыл акванатым пормасыт но̄хпе̄ламтыяныл. Тамле лю̄ль, пилыщмаӈ пищит ёлпо̄илттаӈкве э̄ре̄гыт. Ма̄н на̄нан ханты ос ма̄ньщи пе̄с йис наканув ӯргалаӈкве о̄с ла̄виянӯв». Акванатхатыглам ма̄хум «Диалог национальных культур» нампа проект щирыл аквъёт рӯпитаӈкве патэ̄гыт. Ос культура Департаментыт рӯпитан хо̄тпат ма̄нь таквс э̄тпос мус «Реестр объектов нематериального культурного наследия Югры» нэ̄пак тах щё̄питыяныл. Ань пуссын тув хансым пе̄с йис потрыт, мо̄йтыт, э̄ргыт, йӣквыт ма̄кыг ӯргалаӈкве патавет, ос ялпыӈ ма̄н воссыг нэ̄мхотьют ул вос новхаты.

1055 2013.07.12. Светлана РОМБАНДЕЕВА

Кульпас па̄выл тох ты о̄лы. Хурит Назарова Светлана (15 та̄л), Албина Фаина (14 та̄л), Садомина Татьяна (14 та̄л) ос Батманова Раиса (16 та̄л) по̄слым о̄лэ̄гыт. Та̄н миркол па̄лыл рӯпитаӈкве патхатасыт. Ань май са̄ккон щирыл 14 та̄л яныт ня̄врамыт туи каникуланыл порат рӯпитаӈкве ве̄рме̄гыт, хотьют ка̄сащи. Тувыл тах олнло̄мтыл ойтавет. Хо̄тал сыс кит щё̄с арыг тӯп ро̄ви рӯпитаӈкве. Лӯпта э̄тпост та̄н ань са̄т ня̄врам ты рӯпитэ̄гыт, па̄выл янытыл матыр э̄рнэ рӯпата ва̄ре̄гыт, порс атэ̄гыт, сырыт о̄льпыл сартыяныл ос мо̄т са̄в ма̄т рӯпитым яласэ̄гыт. А̄гит ла̄внэ̄ныл щирыл, рӯпитаӈкве та̄нанылн мӯсты, янгыщ та порат пӯмыщ, хунь матыр о̄льпыл сартлэ̄гыт. Тамле ка̄ркам а̄гит Кульпас па̄вланыл о̄льпыл ёмащакв та нопитыяныл, ялпыӈ хо̄тал кастыл щё̄питыяныл. Пуссын пуста̄гыл вос о̄лэ̄гыт. Хурит Лелятова Полина ос Гындыбина Вика по̄слым о̄лэ̄г. Полина нёлолов та̄лэ, таквсы порат тах хӯрмит классын ханищтахтуӈкве мины. Оматэ Тамара Петровна, а̄ги о̄парищ наме Чупрова. А̄тятэ Аркадий Иванович. Полина увщитэ наме Оля. Вика ос лов та̄лэ, атыт классыт ханищтахтуӈкве паты. Оматэ Наталья Владимировна, а̄ги о̄парищ наме Лелятова. А̄тятэ Николай Абрамович. Люда увщи о̄ньщи, ос а̄пщитэ Абрам. А̄гирищиг ла̄внэтэ̄н щирыл, тэ̄н ёмащакв ханищтахтэ̄г, школан ща̄гтым ялантэ̄г. Ты я̄тил ма̄ньщи ня̄врамакве̄г пуста̄гыл вос о̄лэ̄г, со̄тыӈыщ вос яныгме̄г.

1055 2013.07.12. Николай МЕРОВ

Ма̄ньха̄пыл кассыт. Лӯпта э̄тпост Сургут ӯсн соссаӈ ма̄хум са̄в па̄лыл акванатхатыгласыт ос тот ма̄ньха̄пыл кассыт. Пе̄с порат ма̄хум туи о̄вылтахтын порат касыл ва̄рыгласыт, хунь я̄т ӯсхул нёвумты. Сургут ӯст ты ялпыӈ хо̄тал 2000 та̄лныл янытлаве. Ма̄ньха̄пыл товнэ хо̄тпат о̄влэ̄т «Витхон» янытлан ма̄гыс пуӈк пинсыт. Тувыл каснэ хо̄тпат ма̄ньха̄п тармыл ӯнлым олнке̄р витын та̄ратасыт. Сайма я̄н На̄й-О̄тыранув вос сэ̄гамалэ̄гыт, нэ̄матыр лю̄ль нак ул вос е̄мты. Та юипа̄лт ма̄хум касуӈкве о̄вылтахтасыт. Я̄ ва̄тат пуссын аквъёт 28 каснэ хо̄тпа о̄лыс. Сургутский район ТромАган, Сытомино, Русскинская, Чеускино па̄влытныл ос Сургут, Лянтор, Ханты-Мансийск ӯсытныл ма̄хум ёхталасыт. Ка̄сыӈ хо̄тпа ка̄ркамыг товыс. Каснэ ва̄рмаль оигпам юипа̄лт ка̄сыӈ хо̄тпа янытлан нэ̄пакыл ос мӯйлупсал майвес. Хум хо̄тпат халт о̄выл места Леонид Русскин, китыт места Данил Сопочин, хӯрмит места Руслан Богордаев висыт. Нэ̄т халт ос о̄выл места Ирина Мултанова, китыт места Лилия Покачева, хӯрмит места Любовь Кузнецова висыт. Владимир ЕНОВ потре ма̄ньщи ла̄тӈыл Н. МЕРОВ хансыстэ.

1055 2013.07.12. Александр ВЬЮТКИН

Тэ̄нут щё̄питан кол. Ханты-Мансийск ӯст «Югралесхоз» колт сапра̄ни о̄лыс. Тот во̄рт о̄лнэ ӯйхулыт ос во̄рт яныгман пилыт, ла̄хсыт тэ̄нутыг щё̄питан урыл потыр о̄лыс. Сапра̄ни э̄лыпа̄лт о̄влэ̄т ма̄н, тув ёхталам ма̄хум, тэ̄нут щё̄питан колыл суссылтавесӯв. Хумус тот са̄лы нё̄выль ма̄ниг сакватаве, то̄славе ос тушёнкаг ва̄раве – суссӯв. Тот пилныл варенье па̄йтаве, по̄лям та̄гыл тыналан ма̄гсыл ла̄кквапинтлан колнакн о̄с щалтсасӯв. Та юипа̄лт ӯльпа па̄квсамыт щё̄питан колнак суссӯв. Колнак ёмщакв рӯпитан ма̄гсыл мощнув иӈ ат а̄стлавес. Па̄квсамыл во̄й пащиртан ма̄шина иӈыт ӯнттавет. Сапра̄ни о̄вылтым порат о̄влэ̄т губернатор ва̄ӈын хо̄тпатэ Сергей Полукеев потыртас, тав ла̄выс: «Тыхо̄тал тэ̄нут щё̄питан кол янытыл ё̄мыгтым ам таи ка̄саласум, ань тыт рӯпитан ма̄хум та̄нти рӯпатаныл ёмщакв ва̄ганыл, таима̄гсыл мӯсхал щирыл ва̄рияныл. Ма̄ янытыл о̄лнэ мир ань сыстам ма̄т яныгман тэ̄нут тинсэ̄гыт. Ма̄н округ во̄рувт яныгман тэ̄нут са̄в. Ань ма̄навн округув янытыл па̄влыӈ ма̄т са̄внув тамле завод ӯнттуӈкв э̄ри. То̄нт ма̄хум рӯпатаӈыг е̄мтэ̄гыт». С. М. Полукеев юипа̄лт «Югралесхоз» кӯщай Алексей Николаевич Павлов та̄нти ва̄рнэ рӯпатаныл урыл потыртас: «ГП «Югралесхоз» кол 2008 та̄лт пӯсвес. Та па̄сныл тот са̄всыр проектыт щирыл рӯпитасӯв. Нё̄выль, пил по̄льтын яныг холодильник 2009 та̄лт ёвтсӯв. Тав тынэ 24 млн. 727 со̄тыра солко̄ви. Пил ос па̄квсам ма̄ниг сакватан утыт 2010 та̄лт ёвтве̄сыт, 117 млн. солко̄ви та̄н ма̄гсыланыл ойтсӯв. Таи ты лю̄ль, пилыт, ла̄хсыт, нё̄выль мо̄т тэ̄нутыг ва̄рнэ утыт пуссын атуӈкв иӈ ат ве̄рмиянӯв. Ма̄н ты мӯтрат ма̄гсыл олн та̄ра кос ойтсӯв. Та̄наныл ва̄рнэ ма̄т матрыг хосанув о̄щве̄сыт, мощ мо̄лалнув ущта тотве̄сыт. Ань э̄рнэ щирыл ӯнттавет, ёмщакв ва̄руӈкв э̄ре̄гыт, тувыл та. Ань тыналан тэ̄нутанув иӈ сака мощщат. Ам номсэ̄гум, таквсы тах ма̄н ма̄нти хусапсовыт тӣврын пиным пил, ла̄хс ос па̄квсам округув янытыл тыналаӈкв патэ̄в. Ва̄рнэ тэ̄нутанув тыналан ма̄гсыл ла̄пка пӯнсэ̄в. 2012 та̄лт нё̄выль тэ̄нутыг ёмщакв щё̄питан кол ӯнттысӯв. Тот ань фарш, котлета, пельмень ос то̄сам нё̄выль пуссын са̄лы нё̄влил ва̄раве. Са̄лы нё̄выль Ямал ма̄ныл тыг тотэ̄в. Ма̄нти округувт са̄лы нё̄выль кила ма̄гсыл 280 солко̄ви во̄ваве. Ты тынэ ма̄навн сака яныг. Лӯи ма̄ныл тотнэ нё̄выль т ы н э 1 6 0 сол ко̄ в и . Ма̄навн э̄лы ма̄ныл ёвтуӈкв тынта̄лнуве. Ань о̄щнэ холодильникувн 220 тонна нё̄выль ла̄пи. Тэ̄лы порат ма̄н таве та̄глэ̄кв нё̄влил тотыгласлӯв. О к р у г у в я н ы т ы л 90 община о̄лы. Ма̄н ётув «Рахтынья», «Колмодай», «Вар», «Карым», «Устрём», «Сетави», «Ямал хо̄тал» ос «Ӯльпа» нампа общинат рӯпитэ̄гыт. Та̄н ётаныл договорнэ̄пак хассӯв. Хӯл, нё̄выль, ӯльпа па̄кв, пил ма̄гсыл ма̄н олныл ойтхатэ̄в. Хо̄т та̄л сыс общинат рӯпитан ма̄хмытын ма̄н 23 млн. солко̄ви ойтсӯв. Округ янытыл 320 хо̄тпа ёт рӯпитэ̄в». С а п р а̄ н и о и г п а м юипа̄лт ма̄н то̄сам ос па̄йтым нё̄влил, колпасыг ва̄рим нё̄влил, сакватым са̄всыр са̄ккарыӈ пилыл ос атыӈ па̄квсамыл тыттувесӯв. Пуссын атыӈыг щё̄питым о̄лсыт.

1055 2013.07.12. Тамара МЕРОВА

Та̄наныл акваг номиянӯв. Ха̄льӯс район Ягрим па̄выл ляпат хуньт Люлюкары пе̄с ма̄ньщи па̄вылкве о̄лыс. Е. И. Ромбандеева нэ̄паке̄т тав ма̄ньщи ла̄тӈыл Ялъю̄с па̄влыг хансым о̄лы. Ань тот туп хара ма̄ хультыс. Хум хо̄тпат пуссын хо̄нтлуӈкве минасыт ос хо̄та̄ти порславе̄сыт. Тувыл 1960 та̄лытт ма̄нь па̄влыт акв яныг па̄вылн тотве̄сыт. Ялъю̄ст хультум ще̄мьят о̄с мо̄т ма̄н ва̄нтлуптаве̄сыт. Ос ты па̄вылквет самын патум ма̄хум та̄нки ма̄ке̄ныл нэ̄мхуньт ат ёрувла̄лыяныл, акваг номияныл. Та̄н хо̄нтлам ма̄н тотым рӯтаныл ма̄гыс памятник ва̄рсыт. Россия янытыл лӯпта э̄тпос 22 щисла хо̄нтлан ма̄т порслым ма̄хум ка̄стын хо̄талыг о̄лы. Ань Ялъю̄с па̄вылкве̄т памятник ва̄рвес ос та хо̄тал о̄выл щёс ма̄хумн суссылтавес. А̄лпыл ма̄хум тув катерыл тотве̄сыт, мо̄таныт моторха̄пыл минасыт. Тамле ёмас ва̄рмаль «Наследие» нампа клубт пуӈктотнэ нэ̄ Людмила Галкина щё̄питас, ос таве̄н ма̄ньщи э̄кват нё̄тсы̄т. Та̄н пуссын Ягрим па̄вылт о̄лэ̄гыт. Людмила Григорьевна потыртас: «Тыт памятник ва̄руӈкве а̄нумн хосат та̄гыл Ялъю̄ст самын патум нэ̄т ла̄выгласыт. Ам туи порат ханищтахтын ня̄врамыт тыг ӯщлахтуӈкве тотыгласанум. Тыт сака нё̄тнэ сыстам ма̄. Ня̄врамыт хара ма̄т ха̄йтыгтасыт, я̄т пувлысыт ос ма̄нки нялк алыщласӯв. Ма̄н т ы м а̄ у р ы л э̄л а л ь пӯмщалахтуӈкве патсӯв. Н. К. Захарова (Саратина) ёт ва̄йхатасӯв, тав ты па̄вылт самын патыс. Э̄ква ма̄навн са̄в потыртас, мо̄т ма̄хум ёт о̄с хо̄нтхатыгласӯв. Тувыл ты ма̄хманув ёт 2005 та̄лт Ялъю̄с на̄лми ва̄тат акванатхатыгласӯв ос то̄нт аквъёт тыт памятник ва̄рнэ урыл потыртахтасӯв». Та сыс са̄в та̄л ювлехультыс кос, ма̄ньщи ма̄хманув акваг ӯрхатсыт. Та̄н ос Людмила Галкина, Ягрим миркол кӯщай, ос пыгыт армиян винэ комиссият рӯпитан хо̄тпат нё̄туӈкве во̄всаныл. Ня̄врамыт ты яныгпа̄ла хо̄тпатныл атум потраныл нэ̄пакн хассаныл ос са̄всыр касылын ке̄тыгласаныл. Тот но̄хпатсыт, олныл майлуве̄сыт. Та щирыл пуссын ва̄гыт, тыи сака э̄рнэ ва̄рмаль, таве э̄лаль тотуӈкве э̄ри. Ань памятник тахольт а̄стлавес. Тав Ягримт катерыт щё̄питан ма̄хумн ва̄руӈкве нё̄твес. Та̄н памятник ос пӯсас ва̄рсыт. Тувыл ма̄хум Ялъю̄сн тотыглан ма̄гыс о̄с та̄н катер майласыт. Хо̄нтлым ма̄н тотым хо̄тпанув наманыл миркол кӯщаитын вольгын па̄рт тармыл хасве̄сыт. Ты па̄рт Нягань ӯсн ва̄рылтасаныл. Ялъю̄ст самын патум ма̄ньщи ма̄хманув ань пуссын ёмас номтыл о̄лсыт. Та̄н а̄гиянылпыганыл, апганыл ёт тув ялсыт. Хо̄тал палыт нё̄тнэ ма̄кве сунсыгласыт, ма̄нь пораныл номылматыгласыт ос ты урыл потыртасыт. Надежда Константиновна Захарова ос Анна Николаевна Гындыбина памятник лаппантым то̄р хотвистэ̄н. Евгений Мельник, ялпыӈколт рӯпитан хум, по̄йкщан ла̄тыӈ ловиньтас ос ялпыӈ вит паргалтас. Мо̄т мӯй хо̄тпат о̄с ёмас ла̄тӈыт ла̄всыт, ня̄врамыт стихыт ловиньтасыт, хо̄нт урыл э̄ргыт э̄ргысыт. Тувыл пуссын хорамыӈ лӯптат памятник по̄хан пинсыт. Ёхталам ма̄хум пасан ва̄рыгласыт. Тот К. К. Пуховец (Саратина) атыӈ тэ̄нут па̄йтыс. Ма̄н порслым ма̄хумке̄нув ка̄стысанӯв.

1055 2013.07.12. Светлана РОМБАНДЕЕВА

Кульпас па̄выл 80 та̄лэ то̄влыс. Ты та̄л лӯпта э̄тпос 29 хо̄талэ̄т Ха̄льӯс район Кульпас па̄вылт ма̄хум мӯйлысыт. Па̄выл ань 80 та̄лэ то̄влыс. Ты яныг ялпыӈ хо̄тал э̄лыпа̄лт Кульпаст ам па̄выл кӯщай палт ялсум, тав наме Тихонова Людмила Тихоновна. Китыглахтасум, ань та̄н хумус мӯйлуӈкве патэ̄гыт, ялпыӈ хо̄тал кастыл маныр щё̄питэ̄гыт. Людмила Тихоновна тох ты потыртас: – Кульпас па̄вылн ма̄хум о̄лмыгтаманыл па̄сыл 80 та̄л ты то̄влыс. Ты ялпыӈ хо̄тал кастыл ма̄н са̄в ма̄хум оргкомитетын пе̄риясӯв, тувыл рӯпитаӈкве та о̄вылтахтасӯв. Россия янытыл о̄лнэ ма̄хманувн нёлса̄т ляпатем пищма манос открытка ке̄тсӯв. Ма̄хум тыг во̄виянув, хотьютаныл ве̄рми, вос ёхталы. Омск ӯсн ке̄тсӯв, Тюмень ӯсн, округув янытыл о̄лнэ ма̄хманувн ке̄тсув. Та̄н пуссын хуньт тыт о̄лсыт, рӯпитасыт. Тувыл мо̄т ма̄н о̄луӈкве ва̄нтлысыт, ос Кульпас па̄вланыл акваг номим о̄ньщияныл. Ва̄им, та̄н тыт о̄лсыт, яныгмасыт, ханищтахтасыт, рӯпитасыт, ня̄враманыл янмалтасыт. Па̄вланыл хумус ёрувлыяныл. Тыт тах акванхо̄нтхатыглэ̄гыт, п о т р а м е̄ г ы т, ю в л е хультум та̄ланыл номылмата̄лыяныл. Ка̄сыӈ хо̄тпа мӯйлупсал щё̄питаслув, то̄ва ма̄хманув почетный грамотатыл мыганӯв. Ялпыӈ хо̄тал ловм а н те м щ ё̄ с п о р а т па̄вылкант ня̄врамыт ма̄гсыл сыреса̄т касыл ва̄раве. Тувыл аквта торыг тот тах выставка щё̄питаве, ма̄щтыр ма̄хум ка̄тыл ва̄рум пормасаныл суссылтавет. Клуб колт ос «Ам па̄влум» нампа выставка рӯпитаӈкве паты. Тот тах кина хосыт пе̄с хурит суссылтавет, па̄выл э̄лнаӈ манхурипаг о̄лыс, пе̄с колыт та маныр пуссын по̄слым о̄лэ̄гыт. Китхуйплов щё̄с порат ма̄хум пуссын клубын атхатэ̄гыт. Ха̄льӯс район кӯщай ла̄тыӈ ла̄ви, ма̄хум мӯйлупсатыл мӯйлуптыянэ, грамотал мыганэ. Та юипа̄лт конква̄лэ̄в, кон мӯйлэ̄в, яныг сцена ва̄раве. Тыт, Кульпаст, о̄лнэ а р т и с т а н у в к о н ы пал э̄ргын ос йӣквнэ ма̄хум Саранпа̄вылныл ос Ло̄пмус па̄вылныл ёхтэ̄гыт. Хо̄тал палыт маттем та э̄рге̄гыт, йӣкве̄гыт. Клуб кол ляпат тах матыр тыналаӈкве п а т а в е , т э̄ н у т м а н ка̄тыл ва̄рим пормасыт. Ма̄хум я̄ ва̄тат ё̄мыгтаӈкве ве̄рме̄гыт, ӯнлахо̄луӈкве. Па̄влув ань ущпылнэ̄г нё̄тнэ̄г е̄мтыс, йильпииг са̄в йӣв яныгми, лылые̄пе с ы ст а м , л ы л т у ӈ к в е кӯпнит. Э̄типа̄лаг концерт ва̄раве, выступайтан ма̄хум тах э̄рге̄гыт, й ӣ к в е̄ г ы т. Та ю и па̄лт ма̄ньлат хо̄тпат ос яныгхо̄тпат ма̄гыс йӣквнэ кан ва̄раве. Па̄выл кӯщай тамле потыр та потыртас. Тувыл ялпыӈ хо̄тал минаме юипа̄лт ам Кульпас па̄вылн звонитасум, ма̄ньщи ма̄хманув китыгласанум, хумус та̄н мӯйлысыт. Лидия Дмитриевна Кугина (а̄ги о̄парищ наме Таратова) ла̄внэ̄тэ щирыл, ялпыӈ хо̄таланыл та̄нанылн мӯстыс, па̄выл мир ёмащакв мӯйлысыт. С а р а н п а̄ в ы л н ы л о с Ло̄пмус па̄вылныл э̄ргын, йӣквнэ ма̄хум ёхталасыт, сака пӯмщиг выступайтасыт. А̄лпыл клубт сапра̄ни ва̄рыглавес, Ха̄льӯс район кӯщай потыртас, па̄выл мир янытласанэ, са̄в ёмас, сымыӈ ла̄тыӈ ла̄выс. «Рыбкооп» организация ос «Рахтынья» община па̄лыл ма̄хум са̄всыр тэ̄нут тыналасыт, тортыт ман шашлыкыт ва̄рыгласыт. Тох тай пӯмыщ кос, ос туп та хо̄тал сака ащирмаӈ ос во̄тыӈ олыс. Таима̄гыс мир хоса ат мӯйлыс, юв молямлас.

1055 2013.07.12. Светлана РОМБАНДЕЕВА

Школат рӯпитам хо̄тпа потре. Ханты-Мансийск ӯст ам Владимир Вячеславович Хромов хо̄нтыгласлум. Ты хо̄тпа са̄в та̄л Кульпас па̄вылт о̄лыс, школат ня̄врамыт ханищтым рӯпитас, кӯщаиг са̄в та̄л о̄лыс. Ётыл колта̄глэ ёт Ханты-Мансийск ӯсн ва̄нтлыс, тыг о̄лмыгтас. Таве ам Кульпас па̄выл урыл китыгласлум, хумус тот о̄лыс, рӯпитас. На̄н ань э̄лаль тав потре ловиньтэ̄лын: Кульпас па̄выл са̄в мирн ӯнттувес. Пе̄с порат ма̄хум э̄лы хо̄н ма̄ныл ёхталасыт, колыт ӯнттысыт ос мо̄т са̄в рӯпата ва̄рсыт. Мо̄т ма̄ныл ёхталам ма̄хум коныпал па̄выл о̄с аквтох соссаӈ ма̄хумн ӯнттувес. Адиныт, Анямовыт, Гындыбиныт, Сековыт, Пакиныт, Лелятовыт, Кугиныт рӯпитасыт. Лувыӈ суныл э̄рнэ пормасыт тотсыт, кол ӯнттын ма̄т рӯпитасыт, то̄ват ла̄тыӈ толмащлаӈкве нё̄тсыт. Тамле о̄парищ нам о̄щнэ ма̄хум ань ты хо̄тал мус тот о̄лэ̄гыт. Ты урыл ам «Очаг культуры» нэ̄пакт хансыгласум. Та порат рыбоучасток ӯнттувес, ма̄хум хӯл алэ̄гыт, тув тотыяныл. Хӯланыл ётыл Ха̄льӯсн тотантавет, тот панка тӣвырн пинавет, лаппантавет, тыналан ма̄гыс э̄л та ке̄тавет. Ма̄хум во̄раясыт, во̄руй алыщласыт, план то̄варттан ма̄гыс ПОХколн майласыт. То̄нт ты олимпиада ва̄руӈкве патвес, ма̄хум мӯйлысыт, са̄всыр касыл ва̄рыгласыт, кассыт. Ш к о л а ӯ н т т у ӈ к в е о̄вылтавес. Алексей Васильевич Голошубин, ня̄врамыт ханищтан хум, о̄влэ̄т Ло̄пмус па̄выл школат рӯпитас, тувыл Кульпас па̄выл йильпи школан кӯщаиг паттувес. Тав тот рӯпитаме порат ня̄врамыт ма̄гыс ма̄ньщи ла̄тыӈ урок ва̄рвес. О̄йка такви о̄с ма̄ньщи ла̄тӈыл потыртас. Ам тув колта̄глум ёт 1970 та̄л во̄ртур э̄тпост ёхтысум. Па̄выл то̄нт ма̄нь о̄лыс, ӯсхуланэ ощщат, та порат машинат хунь яласэ̄гыт. На̄йпос т у п а̄ л п ы л м о щ щ а н пе̄ламта̄лвес. Ха̄льӯсныл образование кол па̄лыл Валентина Ивановна Ахтямова ёхталас, ма̄н та̄ра колыл ёвтвесув, Фаина Алексеевна Артеева тав колэ. Э̄квам Анфиса Михайловна, а̄ги о̄парищ наме Гындыбина о̄лыс. Кит пыг янмалтасме̄н. Яныг пыгме̄н Вася, та та̄л хӯрмит классыт ханищтахтуӈкве патыс. Ма̄нь пыгме̄н Серёжа, о̄выл классын ущ минас. Школа сака пе̄с о̄лыс, ма̄н ёляныгмас, т о т р ӯ п и т а ӈ к в е т а о̄вылтахтасум. 1975 та̄лт ам ща̄ньа̄щ комитетт рӯпитан ма̄хум акванатсанум, ла̄всум, ма̄навн э̄ри йильпи школа ӯнттуӈкве. Тувыл Тюмень ӯст о̄лнэ областной Совет Трудящихся колн ма̄н пищма хассув, ань йильпи школал вос ӯнттаве̄в. Хассув, тыт рӯпитаӈкве сака та̄рвитыӈ, ащирмаӈ порат ня̄враманув по̄лявет. Кӯ щ а и т к а̄ с а щ а с ы т, кит та̄л сыс школав та ӯнттувес. 1978 та̄л порат ма̄н ща̄гтым йильпи школан та ва̄нтлысув. Ханищтахтан колнакыт янгыт, йильпи партат, уласыт тотве̄сыт. Ре̄гыӈ, кӯр па̄лтуӈкве ат э̄ри. Пе̄с школат Вынгилева э̄ква тав акваг кӯрыт палтыс, тот и о̄лыс. На̄йив са̄гри, а̄лумтыянэ, рущ ла̄тӈыл потыртаӈкве щар ат ха̄сыс. Пыгрищитын акваг нё̄твес, та̄н во̄рн на̄йвын ялантасыт, кит лув о̄щсув. Та о̄лупсав урыл потыр са̄в о̄лы. Кульпас школат ме̄н э̄кваме̄нтыл ва̄т нупыл са̄т та̄л рӯпитасуме̄н. Ам рӯпатамт ты ма̄к ёмас та̄ланум о̄лсыт. То̄ванакт та̄рвитыӈ о̄лыс, то̄ванакт ос ёмас хо̄талыт о̄лсыт. Са̄в мутраӈ ма̄хум ня̄врамыт ханищтасыт: Тамара Ивановна Костина (Отличник народного образования), Татьяна Яковлевна Шишигина – математика ханищтас, Мария Брандис, Екатерина Федоровна Елфимова, Агния Николаевна Пакина, Ульяна Павловна Гындыбина, Лидия Павловна Бешкильцева, Дарья Никитична Голошубина, Лидия Григорьевна Вовк. Пётр Парамонович Кимлобазов география урок ханищтас, ты о̄с сака ёмас, мутраӈ о̄йка о̄лыс. Математика урок ханищтас Леонид Тарасович Костин. Ос мо̄т са̄в ёмас ма̄хум тот рӯпитасыт. Хунь ам Кульпасн ёхтысум, ма̄ньщи ма̄хум янгыщ пуссын ща̄нь ла̄тӈыл потыртасыт. Сака ёмащакв потыртасыт Лопмус ос Кимкьясуй ня̄врамыт. 70й та̄лыт порат ма̄хум сака йӣквсыт, э̄ргысыт. Г а р м о ш к а л С к в о р цов о̄йка ёнгасас, сака пӯмщиг ха̄сыс. Ты э̄лыпа̄лт ам колта̄глум ёт Саранпа̄вылт о̄лсум, тот ма̄хум сака ат выступайтасыт, тох ат э̄ргысыт. Э̄ргын ма̄хманув пуссын номиянум: Т. Е. Усольцева, А. Н. Пакина, Н. А. Кузнецова, Д. Н. Голошубина ос мо̄т са̄в нэ̄квет. Та̄н сака нё̄тнэ турсуил э̄ргысыт. Тыт о̄лнэм атхуйплов та̄лыг ты е̄мтыс, э̄квам хосат а̄тим. Пыгагум ос апыгрищанум ёт о̄лэ̄гум. Нэ̄пакыт хансэ̄гум. Ты э̄тпос сыс эвенкийский ла̄тӈыл календарь щё̄питэ̄гум, ты ам ща̄нь ла̄тӈум. Ка̄сыӈ э̄тпос урыл хассум, хурит тув ва̄рсум. Апыгрищанум ма̄ньщи йӣкв йӣкве̄гыт, э̄рге̄гыт. Амти яныгмам ма̄м нупыл ялуӈкве таӈхе̄гум, хурит ёт выгум, тот тах ла̄ве̄гум, сунсэ̄н, ма̄ньщи ос ханты ня̄врамыт пе̄с йӣкв йӣкве̄гыт, ла̄тӈанылт потыртэ̄гыт. Владимир Вячеславович, ты я̄тил сымыӈ хо̄тпав, пуста̄гыл вос о̄лы, о̄с са̄в ёмас нэ̄пак вос хансы.

1055 2013.07.12. Николай МЕРОВ

Йис о̄лупса э̄лаль тотытэ̄н. Ха̄льӯс районт Саранпа̄выл совхозт са̄лы ӯрим ань нила бригада хультыс. Тэ̄лы порат тот са̄лыл каснэ ва̄рмаль о̄лыс. Ты кастыл Валентина Анатольевна Хозяинова па̄вылн ёхталас. Тав китыт бригадат рӯпиты. Валентина ща̄няге̄на̄щаге̄н ма̄нь та̄гыл са̄лыӈ колт тотыглавес, тот акваг яныгмас. Тав Нё̄рыт сака э̄руптыянэ. Таима̄гыс хум ва̄рме юипа̄лт, та̄ра тув минас. О̄выл порат мощ та̄рвитыӈ о̄лыс. Ань матыра̄ти кӯстырыг ва̄ри. Тэ̄лы ляпат вит а̄тим, нэ̄ хо̄тпат тӯйт а̄лумтэ̄гыт ос толтыглэ̄гыт. Па̄стухыт ма̄гыс тэ̄нут па̄йтэ̄гыт. Ё̄рнколт нила ще̄мья о̄лэ̄гыт. Ка̄сыӈ нэ̄ такви са̄ме̄т пормасанэ о̄ньщиянэ. Кот тынтлэ̄гыт, маснут ю̄нтэ̄гыт ос мо̄т са̄всыр рӯпата ва̄ре̄гыт. Ты ва̄рмалин ма̄нь та̄гыл ханищтахтэ̄гыт. Мольщаӈ, ня̄ра, са̄хи, ва̄й, са̄всыр пормасыт мащтырыг ю̄нтыяныл. Ащирмаӈ ос во̄тыӈ хо̄талыт хо̄тпа тамле маснутыл ат по̄ляве. Бригаданылт та̄нки с а̄ л ы я н ы л о с с о в х о з с а̄ л ы т а к в ъ ё т о̄ньщияныл. Ань та̄н пӯӈанылт хӯрум со̄тыра са̄вит са̄лы о̄ньщаве. Та̄л палыт ва̄нтлым яласэ̄гыт, туп тэ̄лы порат хӯрум э̄тпос акв ма̄т лю̄ле̄гыт. Туи кастыл са̄лыяныл ос Нё̄рн ва̄нтлуптыяныл. Валентина Анатольевна о̄йкатэ саран хум, наме Яков Яковлевич Хозяинов, китыт бригадат кӯщаиг олы. Тав ща̄нягеа̄щаге о̄с йис та̄гыл са̄лы ӯрим яласасы̄г. Ань нэ̄гхумыг рӯтанэ̄н щирыл йис о̄лупса э̄лаль тотытэ̄н. Э̄лнаӈ ма̄хум са̄в са̄лы о̄щсыт. Ётыл сыресыр ва̄рмаль щирыл ла̄щалла̄щал холасыт. Тувыл ань ё̄рнколт са̄выӈпа̄лэ яныг хо̄тпат хультсыт. Ма̄ньлат хо̄тпат мо̄рсыӈ порат тув рӯпитаӈкве ёхтэ̄гыт. Ня̄врамыт школа а̄стланэ̄ныл юипа̄лт э̄л ханищтахтуӈкве минэ̄гыт. Са̄лыӈ колт о̄луӈкве ат ка̄саще̄гыт. Валентина Анатольевна о̄йкатэ̄нтыл кит ня̄врам янмалтэ̄г. Тэ̄н ханищтахтынэ̄тэ̄н порат Саранпа̄выл интернатт о̄лэ̄г. А̄гитэ̄н нилахуйплов та̄лэ, пыге̄н ос нёлолов та̄лэ то̄влыс. Туи ӯщлахтын порат тэ̄н са̄лыӈ колн ёхталэ̄г. Ще̄мьят рущ ла̄тӈыл потыртэ̄гыт. Ня̄врамаге̄н саран ла̄тыӈ ат ва̄гы̄г. Ань а̄гитэ ла̄ви: «Омакве, ам ё̄рнколт о̄луӈкве ат таӈхе̄гум, э̄лаль ханищтахтуӈкве минэ̄гум». Ма̄ньлат ма̄хум ань номтаныл тувле ат паты. Н э̄ гх у м ы г с а̄ л ы ӈ колн ёхтуме̄н па̄сныл ань хо̄тхуйплов та̄лыг то̄влыс. О̄с аквтыса̄вит та̄л тот о̄луӈкве номсэ̄г. Валентина Анатольевна а̄ще ё̄рн хум, оматэ ос ма̄ньщи нэ̄ о̄лыс. Оматэ акваг саран ма̄хум ёт о̄лыс. Таима̄гыс саран ла̄тӈыл ёмщакв потыртас. Валентина ос ма̄ньщи ла̄тыӈ мощ торгамты, оматэ̄н ханищта̄лвес. Ам ты ще̄мьян пуста̄гыл о̄лнэ ла̄тыӈ ла̄ве̄гум. То̄румн вос ӯргалавет. Пус ка̄т, пус ла̄гыл вос о̄лэ̄гыт.

1055 2013.07.12. Валентина УЗЕЛЬ

Та̄н сака ёмас рӯпата ва̄ре̄гыт. Ханты ма̄хманув са̄выӈпа̄лэ Белоярский районт о̄лэ̄гыт. 1992 та̄л па̄сныл тот архивкол рӯпиты, ань тыг мус тот рӯпитан ма̄хум сака са̄в пе̄с потыр, мо̄йт, э̄рыг атсыт. Ань кӯщаиг тот Тамара Романовна Пятникова о̄лы. Ва̄рнэ рӯпатаныл урыл тав потре ловиньтэлы̄н. – Ам ма̄нь ня̄врамыт садикколт рӯпитаӈкв о̄вылтахтасум. Матахмат та̄л тот рӯпитасум, тувыл 1990 та̄лытт «Югра лылыеп» ассоциация рӯпитаӈкв тыт о̄вылтахтас. Ам та̄ра тув минасум, то̄нт ма̄н, со̄ль, са̄в ёмас ва̄рмаль соссаӈ ма̄хманув ма̄гыс ва̄рсӯв. Пуссын юртыӈыщ, акваннё̄тхатым рӯпитасӯв. Тувыл ам Лӯима̄ комитетн специалистхо̄тпаг во̄вве̄сум. Та порат ты ам Ева Шмидт ёт ва̄йхатасум. Аквщёс ма̄н рӯпатавн рущ о̄йка ёхтыс. Ка̄тэ̄т тетрадка о̄ньщас, а̄нумн суссылтытэ – тот ханты ла̄тӈыл са̄всыр потрыт ос мо̄йтыт хансымат. Рущ ла̄тӈыг та̄наныл толмащлаӈкв а̄нум во̄выстэ. Ам хумус ве̄рме̄гум, та щирыл та хассанум. Тувыл тав ханты букват урыл титыглахтуӈкв патыс, ам хотыл ва̄глум, та̄н хумус хансавет. Ева палт та те̄тыслум. Мощ ётылнув Ева Шмидт такви ам палтум ёхтыс, титыглахты – ханты ла̄тыӈ ам ёмащакв ва̄глум ман а̄ти. – Ва̄глум кос, таве̄н ювле ла̄ве̄гум. – Ам архивкол пӯнсылум, потрыт рущ ла̄тӈын толмащлаӈкв щар ат а̄лыме̄гум, а̄нумн нё̄тэ̄гын? титыглахты. – Ва̄им, нё̄тэ̄гум. Тох ты ам архивколт рӯпитаӈкв патсум. Ань тот рӯпитанэм нёлоловхуйплов та̄лыг ты е̄мтыс. Ты та̄лыт сыс ма̄н са̄в рӯпата ва̄руӈкв а̄лымасӯв, э̄лаль иӈ ва̄ре̄в. Ма̄навн йис потрыт, мо̄йтыт мо̄йтыглам ань са̄в хо̄тпа а̄тимыт. Ань ты йист о̄лнэ ма̄хум тох потыртаӈкв ат ха̄сэ̄гыт, мо̄йтуӈкв ат ве̄рме̄гыт. Матъёмас ма̄н ты рӯпата ва̄рим пе̄с ма̄хманув потраныл нэ̄пакн хассанӯв. Ка̄сыӈ хо̄тпа хурин по̄слыслӯв, я̄нас нэ̄пакло̄мтын о̄лупсатэ хансыслӯв. Пуссын аквъёт яныгса̄т арыгтем хо̄тпа е̄мты. Ань ам ётум рӯпитэ̄гыт – Римма Слепенкова, Евдокия Каксина, Елена Юрьева, Римма Потпот. Ань рӯпитаӈкв ма̄навн та̄рвитыӈ, сака мощща олныл миве̄в. Ма̄нь па̄влытт о̄лнэ ма̄хум ёт туп ялпыӈ хо̄талыт о̄лнэ порат ва̄щинтахтэ̄в. Ма̄нти хунь во̄ваве̄в, то̄нт минэ̄в. Тыт ӯсувт яныг хо̄тпат ма̄гыс я̄нас кол рӯпиты, рущ ла̄тӈыл «дом престарелых» тох ла̄ваве. Хотьют ляпа рӯт ат о̄ньщи, та̄н тув тотавет, тот о̄ньщавет. Мо̄лтынув тот акв яныгпа̄ла о̄йка о̄лыс, Яков Рандымов. Ма̄н тав палтэ акваг ялантасӯв, тав ма̄навн са̄в пе̄с потыр потырта̄лыс. Тав о̄с а̄тимыг е̄мтыс. Ань ос тот тит ханты э̄кваг о̄лэ̄г, тэ̄натэ̄н Римма ёт акваг уральтыягме̄н. Тэ̄н о̄с са̄в номе̄г, са̄в потыртэ̄г. Яныг хо̄тпа ёт потыртанэ̄в порат, маныр ма̄навн ва̄ӈкв э̄ри, та урыл та̄ра титыглахтэ̄в. Та̄ра ат те титыглылӯв, тувыл та мины. Матах та̄л минам юипа̄лт ман «филиалыг» ва̄рвесӯв. Яныг колув Ханты-Мансийск ӯст о̄лы. Кӯщаиг тот Ольга Даниловна Ерныхова рӯпиты. Ма̄н нэ̄пакн хансум потранув, мо̄йтанув тув те̄тыянӯв. Та̄н тот ищхӣпыӈ утн хансыяныл, копия ва̄ре̄гыт. Тувыл ювле тыг та те̄тыяныл. Тамара Романовна титыгласлум, та̄н таса̄вит рӯпата наука ма̄гыс ва̄ре̄гыт, ос манрыг хотты наукат кандидатыг ат ханищтахтэ̄гыт? Тав ювлела̄выс: «Ма̄н – пенсият о̄лнэ ма̄хум. Сака илямтаӈкв те патаве̄в, молях пенсиян минэ̄в. Ань та̄ланув ма̄нит хунь, ӯщлахтуӈкв о̄с э̄ри». Тамле ты ёмас хо̄тпат ёт ма̄н хо̄нтхатыгласӯв. Та̄н рӯпатаныл э̄лаль вос ва̄рияныл, ма̄ньлат ма̄хум та̄н палтаныл рӯпитаӈкв вос ёхтэ̄гыт ос ты сака э̄рнэ рӯпата э̄лаль вос тотыяныл.

1055 2013.07.12. Александр ВЬЮТКИН

Э̄ргыт, йӣквыт суссылтым кассыт. Лӯпта э̄тпост Чувашия республикат Чебоксары нампа ӯст Россия янытыл о̄лнэ мирыт халт э̄ргын ос йӣквнэ фестиваль ва̄рыглавес, та̄н тот халанылт кассыт. Рущ ла̄тӈыл тох о̄лыс «Вместе мы – Россия» Ты фестиваль В. В. Путин Президентув номтэ щирыл ва̄рыглавес. Тыи Россия мирыт халанылт юртыӈыщ вос о̄лэ̄гыт. Ма̄н округувныл тув ат коллектив ялсӯв: рущит «Калинка» ос «Млада», тит ханты коллективы̄г «Торые» ма̄ньщи щирыл – «Лунт», тувыл ос «Мощ хот» «Мо̄йтыӈ кол». «Мощ хот» ма̄хум Ханты-Мансийский район Кышик нампа ханты па̄вылныл о̄лэ̄гыт. Ма̄н «Э̄ргыт, йӣквыт пувлын ма̄хум» нампа ма̄ньщи коллектив о̄с тув ялсӯв. Та кастыл щё̄питахтамув порат, ма̄н йӣкванув, э̄рганув ос са̄ӈквылтан та̄нанув акв юипа̄лт суссылтан ма̄гыс ва̄рсанӯв. О̄влэ̄т ма̄н, ма̄ньщит о с х а н т ы т, а к в а н нё̄тхатым йӣквсӯв ос с а̄ ӈ к в ы л т а с ӯ в . М а̄ н юипа̄лувт округувныл о̄лнэ рущит йӣквсыт ос э̄ргысыт. Ма̄нав тот йӣквуӈкве ос э̄ргуӈкве щё̄питан режиссерхо̄тпаг Михаил Панков о̄лыс. Тав ань соссаӈ мир пе̄с йӣквыт ма̄ньлат ма̄хмытын ханищтым рӯпиты. Чебоксар ӯст акв со̄тыра ляпатем хо̄тпа нёлоловхуйплов ма̄ныл акванатхатыгласыт. Ка̄сыӈ ёхталам мир та̄нти йӣкваныл, э̄рганыл ос са̄ӈквылтан та̄наныл суссылтасыт. Ма̄н халувт кассӯв, жюрихо̄тпат ос но̄хпатум ма̄хмыт пе̄риясыт. Фестиваль хӯрум хо̄тал рӯпитас, та сыс са̄тлов нупыл хӯрум са̄всыр коллектив сусвес. Но̄хпатум ма̄хум Москва ӯсн Кремль нампа колн тах во̄вавет. I степень дипломнэ̄пакыл «Торые» а̄гитпыгыт са̄ӈквылтапыл с а̄ ӈ к в ы л т а м а н ы л ма̄гсыл мӯйлуптаве̄сыт. Тувыл мо̄т хӯрум коллективыт «Млада», «Калинка» ос «Э̄ргыт, йӣквыт пувлын ма̄хум» II степень дипломнэ̄пакыл майве̄сыт. III степень дипломнэ̄пакыл «Мощ хот» мӯйлуптавес. Ам та урыл ла̄вуӈкв таӈхе̄гум, ханты ма̄хманув тув тотыглам йӣкваныл ос са̄ӈквылтан та̄наныл – тыи са̄выӈпа̄лэ п у с с ы н м а̄ н ь щ и йӣкванув, та̄нанув. Та̄н ос ла̄ве̄гыт, э̄рттам, ты Кышик па̄вылт о̄лнэ ханты ма̄хум та̄н утаныл. Тох ва̄руӈкве щар ат кос ро̄ви.

1055 2013.07.12. Мария КУМАЕВА

Э̄квапыгрищ урыл мо̄йт (ма̄ньщи мо̄йт). Дарья Степановна Самбиндалова мōйтыглам мōйт ам Ха̄льӯс район Хулюмсӯнт пāвылт 1996 тāлт хансыгласлум. Э̄кваг-ōйкаг ōлэ̄г, ня̄врам ат ōньщēг. А к в м а т э̄ р т ō й к а э̄кватэ вōрт ё̄ми, сунсы: мāнь ня̄врам āпат хуи. Ня̄врам юв тотыстэ. О̄йкатэ̄н лāви: «Ам ня̄врам вōрт хōнтсум āпат». Ōйкатэ лāви: «Нōхпēсталэ̄лн, маныр ня̄врам? Тав хотьют арыгтаптам ня̄враме тув ӯнттыгпамтэ? » «Тав ул арыгтаптувес». Э̄ква пēсталастэ ня̄врам – пыгрищ. Э̄квапыгрищ – наме э̄лаль тащир та пинвес. Э̄рыгхум, мōйтхум хоса хунь яныгми. Пыгрищ āще нупыл лāви: «Āнум ё̄вт вāрен, ня̄л вāрен. Ня̄врамыт такем ё̄втыӈня̄лыӈ тāгыл хāйтыгтэ̄гыт. Ам о̄с таӈхе̄гум ё̄втыӈня̄лыӈ тāгыл хāйтыгтаӈкв, ёнгуӈкв». Ё̄втыл вāрвес, ня̄лыл вāрвес. Кон та хāйтыгты, ёнгасы. А̄ще аквмат āгмыл та ēмтыс, хотталь та щалтыс. Ӯс тāгыл, пāвыл тāгыл мирн вōрн та тотвес. Пāг щё̄питавес. Пыгрищ āкве нупыл лāви: «Ам ос мощ кон хāйтыгтэ̄гум, ёнгēгум». «Я, наӈ мощ ёнгасэн, хāйтыгтэн. Наӈ ня̄врам, юн ӯнлуӈкв наӈын марщум». Пыгрищ кон хāйтыгты, ёнгасы. Ӯйрищ алыщлы. Аквмат щёпыр алас, юв хāйттастэ, рōӈхи: «Āква, āква! Ам танай тамле та ӯй аласум! » «Тыя, апыгкве, щёпыр», э̄ква лāви. Э̄квапыгрищ хоса хунь яныгми, акваг янгыг та ēмтанты. Акваг ос ман вāс, ман ӯйхул та алыщлы. Аквматэ̄рт сытый та ēмтсыг āквēнтыл. Аквмат пыгрищ вōрн минас. Ё̄ми, сунсы: я, йӣвыт кӯтюв ӯнлы. П ā т а м т а ст э н я̄ л ы л , кӯтюв ёл та рагатас. Ята, юв та харттытэ. Юв харттастэ, рōӈхи: «Āква, āква! Ам рущ кӯтюв аласум! » «Тыя ман рущ кӯтюв, тыя тӯлмах, тав вōрт ōлы». Āкве нупыл лāви: «Я, хомус тав нуяве? » А̄квēн хотнуйвес, тōславес. «А, тащир та нуйнэ, тащир та тōсланэ», āкве нупыл лāви. «Ам тах о̄с хуньт алэ̄гум, тах тыщир та нуилум, тащир та тōслылум». Тōсластэ̄н. Āкве лāви: «Ам тах мāнь вāтахум палт тотылум. Тэ̄нутыл, лӯтыл тах мивемēн. Пыгрищ тай āкве хунь хӯнтлы, лāви: «Āква, āква, ам тотылум». «Ам ты хӯрыг кӣвырн мāнигтаслум, пēраслум, наӈ тах нōх ул лэ̄ватэ̄лн. Яныг вāтахумн тах хот āлмаяве, тэ̄нутыл ат мивемēн, нэ̄матарыл ат мивемēн. Ня̄нь лōмт ōс ат ōньщимēн. Юиōвыл колас лōмтумēн уляня̄ниг ты тōслылум», ща̄не лāвыс. «Ам тах āти, āти, нōх ат суссылтылум. Ам тах тотылум мāнь вāтахум палт», пыгрищ лāвыс. Я, тувыл мощ тувнув патыс, āлмаястэ хӯрыгсове, тай ӯс котильт кāт та хосгитэ: «Я, сунсэ̄н, сунсэ̄н! » Пāвыл тāгыл ня̄врамыт нупыл та рōӈхи: «Ам танай, тӯлмах аласум! Ань мāнь вāтахум палт тотылум, тэ̄нутыт мāгыс. Коласыл тах мивем». Я н ы г в ā т а х у м н кāсалавес, конквāлапас, та рōӈхи: «Пыгрищ, пыгрищ! Тыг тотэ̄лн, ам выглум! » А тав ман ӯрум хум, тув та хāйтыс, лāви: «Āти, ам āквум лāвыс: мāнь вāтахум палт тув тотэ̄лн. Мēнамēн о̄с тэ̄нут э̄ри, ты колас мāгыс». Яты, вāтахум лāви: «Ам мыглум, мыглум, юв кол кӣвырн щалтымēн». Тувыл юв та щалтсы̄г. Юв щалтсы̄г, тӯлмах хот та няртумтавес, такви кон пувтмавес. Тувыл яныг вāтахум та рōӈхи: «Минэн, минэн! Тӯлмах аласлын, ам наӈын манрыг мыглум». Яты, пыгрищ юв та вораты, юв та вораты, юв та щалтыс. Яныг вāтахум лāви: «Наӈ мāныл тэ̄лум, витыл тэ̄лум яныг сōрниӈ лӯптап хāль тыг ат ке тотылын, ам наӈын алылум ты тӯлмахын мāгыс». Тувыл пыгрищ юв та минас лю̄ньщим, тыстым. Юв минас, āкве лāви: «Я, хумле? Майвēсын колас ы л ? » « Ā т и , я н ы г вāтахумн тӯлмахум х о т н я р т у м т а в е с . Хӯрыгсовт ōньщаслум, āнум кāсалас, āнум юил ня̄влыстэ, тӯлмахум хотняртумтастэ, хӯрыгсовум. Юв тӯлыгпавēсум, тувыл тох лāви: «Минэн, мāныл тэ̄лум, витыл тэ̄лум сōрниӈ лӯптап яныг хāль тыг тотэ̄лн. Ты мōрсыӈ, та мōрсыӈ мāт». «Ты, пыгкве, ща̄не лāви, таи тотуӈкв маныр мат хоса хунь, тотылын. Тав тай тах тыг хунь пōйты, акв хумин тах, тыг тав ат пōйты, акв э̄лумхōлас хунь тāяпāлас, акв э̄лумхōлас хунь алапāлас. Ань тай тāен, тувыл ёлхуен, холытан тах тай āлпыл квāлэн». Тувыл сōль, пыгрищ тэ̄с, āстыс, ёл та хуяс лю̄ньщим, тыстым. Ёлхуяс, а а̄кве ё̄хтлаттāл ё̄рнхӯрыг паттатэ нōхё̄хтлатастэ, сōрни лумтэ сэ̄тап поталытэ нōхвистэ – акв сōрнитэ кон овты, акв сōрнитэ кол кӣвырн овты. Я, тувыл āлпылыг ēмтыс. Э̄квапыгрищ нупыл лāви: Квāлэн, апыг, минэн, ань хōтал ты нэ̄глы». Сōль, нōхквāлыс, конквāлыс, ювщалтыс, хотловтхатас. Хōтал акваг сэ̄рипос тэ̄лам. Яты, тэ̄пъялас, аис, сэ̄тап поталыл ма̄йвес, мāнь хӯнтсовыл майвес. «Ты ня̄нь лōмтын тах тув ёхталэ̄гын, хōталъяткем порат тув ёхтэ̄гын, ты щакни вāрнэ, хоталь ōлн хансаӈ вāрт вāрнэ касаюм, хоталь ōлн лылыӈ вāрт вāрнэ касаюм тытты тыя ёттотэ̄лн, хōтал пāлнэ сунсэ̄гын. Лӯпта, сāт лӯпта ханэ̄гыт. Нōххāхсэн, сāграпēн тытаныл, тувыл ты хӯрыг кӣвырн тыг мāгēн». Сōль, пыгрищ тув минас. Хāйтыс, хāйтыс, вāгтāл патыс. Тув ёхтыс, нōӈхаль сунсы: хāль, хōтал нэ̄глапан пāлыл сāт лӯпта ханэ̄гыт. Щар сōрнияныл ёлаль пāсгēгыт, сōрнияныл нōӈхаль суртгēгыт, нас хōтыллы. Нōх та хāӈхыс, нōххāхсас, та сāграпасанэ. Āкве майлам совхӯрыг кӣвырн та мāгсанэ, ёлвāглыс. Ня̄нь лōмтэ тōвтащлас. Сэ̄тап поталытэ тāрматас, та юипāлт та хāйты. Э̄т котилькем порат юв ёхтыс. Ща̄не лāви: «Минэн, хāйтэн. Тыт ты вит āнысуп, тыянын тах иснас кол ёлыпāлн тув тӯщтыгпен, ос ты витыл сōсыгпēн. Ты хāль тах тув тэ̄лы. Сōль, пыгрищ хāйттасанэ тув, кол иснас ёлыпāлн сома тӯщтыгпасанэ, витыл сōсыгпасанэ. Нōӈхаль та лю̄люмтасыт хāль лӯптат. Такви юв хāйтыс, тэ̄пъялас, лӯтыс, ёлхуяс. Āлпыл тув минас, лāви: «Я, ань тай ойтхатэн, ань тотаслум». Яныг вāтахумитэ иснасныл кональ сунсы: сōль, хāль лю̄ли. «Я, ты маныр сар сāт ощмарп хум! Манур тотастэ? Āти, ам ат ойтхатэ̄гум. Наӈ ань щāрщ котильт аквантэ̄лум сāт тӯр тыг ат ке тотъянын, ам наӈын ты тӯлмахын мāгыс алылум. Ты Тōрум тав ōщнэ ӯй ōлас, манрыг аласлын? » Пыгрищ лāви: «Ам сымум э̄тгалаве, манрыг ат алылум». «Наӈ ос манрыг вōрн ат минэ̄гын? Вōрн минэн, о̄с алыщлэн. Юн хот ёралахтэ̄гын? » Тав такос воритотас, кон пувтмāлаве, юв щалтапи, кон пувтмāлаве, юв щалтапи. «Ам наӈын лāвсасум, та сāт тӯрыт тыг тотэ̄н». Кон пувтмавес, ос лю̄ньщим, тыстым юв та ё̄мантас. Āкве лāви: «Тав хум ос такем вāрмаль. Тах та тотылын, хӯрмит мāн тах ōс кēтавен». «Хомус тотылум? Тот тах алавем. Тав воссыг ул ат кēтавем. Тыятэ тах тотуӈкв ке вēрмилум, ам тах таве такви алылум». Āкве лāви: «Наӈ тэ̄пъялэн, тувыл ёлхуен, ам матыр пищ, матыр ощмар вāрēгум». Пыгрищ тэ̄пъялас, ёлхуяс. Āкве вōрн минас, товтыг сāгрыс, ты касаēтыл. Товтыг йӣвныл э̄т палыт вāрыс. Та āстысы̄г. Аквматэ̄рт лāви: «Я, квāлэн, апыгрищ, ань минэн». Нōхквāлттастэ. Кон пыгрищ кāсалас, сунсы: сōль, хōтал сэ̄рипос тэ̄лам. Юв щалтыс, ловтхатас, лӯтыс, тэ̄пъялас. Лущвитыл, полхвитыл тыттыстэ, уля ня̄ньлōмт о̄с та щēпын мāгумтас. Ща̄не лāвыс: «Ань ты касаин ёт вуēлын, товтыг тыт ты. Тув ёхтэ̄гын тах, сāт тӯр котильт яныг тӯр. Яныг тӯр котильт сāт сорт ӯнлэ̄гыт. Тыт ты сыгсов хӯрыгсов наӈын мыглум. Ты сыгсов хӯрыгсов кӣвырн вит āмарматэн. Та ё̄хнэн мос сыс та̄ӈхе сāграпēлн. Тав тах сыгсов хӯрыг кӣвырн такви рагаты. Тая яныг сорт тах». Я, тувыл пыгрищ та минас. Минас, аквматэ̄рт хōталъят кēмыг улпыл та ēмтыс. Тув ёхтыс, сунсы: щар сортыт осаныл нас суртгēгыт. Сунсы: сортыт халт, сōль, акв сорт яныг. Вит āмарматас сыгсов хӯрыг кӣвырн. Сорт та сāграпастэ, тувыл та сыгсов хӯрыг кӣвырн нас нёпатāлас. Тувыл пāг ёхтыс, ёсаге тармыл ворил лю̄ли. Тāкыщ ӯргалахтым пāг ёхтыс. Сунсы: мат яныт мā тӯрыг та равмтавес та сортытна. Пāг ёхтыс, ня̄нь лōмтэ тōвтащластэ, сыгсов хӯрыгсов лапн э̄ г у м т а с т э . Н ō х хӯнтмыгтастэ, ос ёсаге тармыл лю̄лис, юв та нуигтавес. Товтагēтыл юв нуигтавес. Аквматэ̄рт юв та ёхтыс э̄т котилькēм порат. Āквелāви: «Наӈ минэн тув сōсыгпēн сорт та̄ӈхыт, манарыт». Тув минас пыгрищ, сōсыгпасанэ сорт та̄ӈхыт, кол сысын тув равтасасанэ. Аквмат юв та минас. Пуӈке, саме мāньмыгтас, ёл та хуигпас. Āлпыл нōхквāлас, ат тэ̄пъялас, тох тув хāйтыс яныг вāтахум палт. Утэ нōхквāлум. Пыгрищ тав нуплэ лāви: «Я, ань тай ойтхатэн». Яныг вāтахум кональ сунсы: сōль, щар ованыл, вōт хумп вāрыс, нор кол хольт та поварēгыт. Мо̄йт э̄лаль мо̄тыт газетат ловиньтэ̄н.

1055 2013.07.12. Анна АЛГАДЬЕВА

Ма̄ньщит ща̄рыщн ялсыт. Туи пора – ӯщлахтын пора ёхтыс. Кос хоталь ро̄ви минуӈкв – туп олн вос о̄лыс. Анькег ма̄хум акваг мо̄тпал хо̄ныӈ ма̄т ӯщлахтым яласэ̄гыт: Турциян, Египетн Ма̄н о̄с Хулюмсунтыӈ ма̄хум ос Ня̄хщамво̄лиӈ китыг, пуссын аквъёт китхуйплов хо̄тпа Краснодарский крайн ща̄рщ ва̄тан ялсӯв. Ня̄враманув туп школаныл а̄стапасыт, та̄ра та та̄лматсӯв. Ма̄нь ма̄хум, ня̄врамыт та̄н акваг ӯрхатым о̄лсыт, хунь сар, хунь минмыгтэ̄в. То̄ва м а̄ х м а н у в щ а̄ р ы щ т о̄лыгла̄лсыт, то̄ват о̄выл щёс ща̄рщ сунсуӈкв минуӈкв а̄стысыт. Э̄лаль минамувт нила хо̄тал ма̄ сунсыглым поездыл минасӯв. Поезд иснасыл кональ сунсэ̄гын, такем нё̄тнэ па̄влыт, яныг тэ̄пканкапаит та хультэ̄гыт, Нё̄рыт, урыт халт та минэ̄в, матыр я̄т ӯлтта та тотаве̄в. Волга я̄ ӣти минаслӯв, хуньт хультыс – аты мосталаслӯв. Волгоград ӯст о̄лнэ «Родина-Мать зовёт» скульптуракапай тай хосаныл на̄ӈки. Хунь та та̄ра минасӯв, ня̄врамыт маткем та о̄щатахтыгласыт, вагонт о̄лум ма̄хум о̄с пуссын иснасын ка̄ртсыт. Ща̄рыщн ёхтысӯв – со̄ль, матыр ла̄тыӈ ла̄внэ щирыл: «щар ща̄рщ хурип» яныг о̄лнэ̄тэ, йӣванэхуранэ ат на̄ӈке̄гыт, витэ то̄румл акванови, акванке̄лы. Ща̄рщ ва̄тат соссаг о̄лнэ ма̄хум туи ат ӯщлахтэ̄гыт, ты ма̄хум туп туи порат олн сэ̄лэ̄гыт. Туи сака са̄в ма̄хум ща̄рыщн пувлуӈкв ёхты. Хотьют о̄лнэ кол ман гостиница ке о̄ньщи, та ма̄хум тай ёмщакв олн сэ̄лэ̄гыт. Акв яныг хо̄тпа, таксил яласан о̄йка, ла̄ви: «Туи шортал ке ё̄мыгтэ̄гын – тэ̄лы о̄с шорта пис ё̄мыгтаӈкв патэ̄гын». Тав таи ла̄ви, туи ӯщлахтэ̄гын ке, тэ̄лы ёлысуп та̄л патэ̄гын. Ма̄н тай маныр, ман ӯщлахтуӈкв ёхтум ма̄хум. Кит са̄т ща̄рщ ва̄тат о̄лсӯв, ты сыс кит хо̄тал туп турап хо̄талыг о̄лсы̄г. Мощ ты пувлысӯв, хо̄тал ля̄льт исылтахтасӯв, понслахтасӯв. Я̄ по̄х ос ща̄рщ ва̄та хосыт таса̄вит са̄всыр ёнгын ма̄: писалил па̄тлуптаӈкв, са̄всыр ма̄нь ма̄шинал тахсаӈкв, хӯл пувуӈкв, кина сунсуӈкв ро̄ви. Таса̄вит тэ̄нэайнэ колпа̄лыт, тыналахтанва̄талахтан колхусапыт. Акв хо̄тал дельфиныт сунсуӈкв ялсӯв ты номтыӈ, пӯмащ ӯит. Маткем та суссӯв. Ня̄враманув иӈ хоса ты урыл потыртаӈкв патэ̄гыт тах. Аквщёс Сочи ӯсн «Ривьера» нампа паркын ялсӯв. Такем нё̄тнэ ма̄, та щё̄ри, таса̄вит са̄всыр йӣв. Тот тай ма̄к са̄в ос са̄всыр ёнгын ма̄. Ам аквщёс акваг ё̄хнэ ма̄нн та̄лсасум, матыр карсытыл та ё̄хтавесӯв. Та юипа̄лт матпалыт сымум нас хантас, воссыг нэ̄матхуньт тамле ма̄н ат та̄лэ̄гум. Ня̄врамыт тай нэ̄матараныл а̄ти, мо̄тмо̄т ма̄т ёнгим та ха̄йтэ̄гыт, ха̄хталахтэ̄гыт, туп олн ойтэн. Аквапаркын ялсӯв, тот о̄с пӯмащ о̄лыс. Ня̄врамыт сыпныл тахамтэ̄гыт, витн та пӯсатэ̄гыт. Ща̄рыщ ва̄тат тахсан ма̄гыс катер о̄лы. Ман о̄с та катерн та̄лсасув. Щё̄с арыг ща̄рыщ хосыт яласасӯв. «Гора Киселёва» ке̄расн тотыглавесӯв. Хуньт ты ке̄рас по̄хыт ва̄нэ кина «Бриллиантовая рука» по̄славес. Андрей Миронов ты ке̄рас ёлыпа̄лт ща̄рщ ва̄тат ты ё̄ми. О̄лум па̄влувӯсув я̄тэ Небуг, па̄влэ о̄с Небуг. Па̄выл такем нё̄тнэ ма̄т о̄лы, мувал акваг урыт, соссаӈ ма̄хум Нё̄рыг ла̄вияныл, тувыл ща̄рщ акв тыт. Я̄тэ тай то̄сам, туп а̄хвтасанэ хуе̄гыт. Такем хащта̄л э̄тыт турманыт. Онтолов щё̄ст ла̄мпа пе̄ламтан пораг та е̄мты, лов щё̄ст щар турман, хо̄тса̄т щё̄ст ущ постыглы. Ты яласамув сыс са̄всыр ма̄хмыг та ла̄ваве̄в. То̄ват китыглахтэ̄гыт: «На̄н хотыл о̄лгӣн? » То̄ват ла̄ве̄гыт: «На̄н хатанит? » Казахыг, марийцыг та патсэ̄в. Ма̄ньщи хо̄тпа ат ва̄гыт. Ма̄н ла̄ве̄в: «Ма̄н лӯима̄ е̄рыл о̄лэ̄в». Косманкем ща̄рщ ва̄тат ёмас, наӈки ма̄ке̄нт ёмаснув. Ювле ягмыгтасӯв, ня̄врамыт сома хотща̄гтмыт. Тувле ща̄гтым минасӯв ща̄рыщн минэ̄в. Ювл е у щ п ы л щ а̄ г т ы м минэ̄в – юв минэ̄в. Такем ка̄сув холас, ювле товлыӈха̄пыл йисӯв, молях та юв ёхтыгпасӯв. Ань ты ялум лё̄ӈхув иӈ хоса потыртаӈкв патылӯв ос по̄слам хуриянув сунсыглыянӯв.

1056 2013.07.26. Людмила ТЕТКИНА

Кӯщаюв ма̄ньщит ёт хо̄нтхатыглас. Наталья Комарова губернаторув са̄всыр кӯщаянэ ёт Ха̄льӯс районын Ло̄пмус, Кульпас ос Кимкъясуй па̄влытт о̄лнэ ма̄хум палт ялыс. О̄влэ̄т тав Ло̄пмус па̄вылт о̄лнэ мир ва̄рмаляныл урыл пӯмщалахтас. Та па̄вылт акв яныг та̄рвит о̄лы таквсы ос туи порат тув нэ̄мхотмус минуӈкве. Наталья Комарова мирн ла̄выс: «Ман ты ва̄рмаль урыл ёмащакв ва̄глӯв, ань акваг номсахтэ̄в, маныр рӯпата ва̄руӈкве, на̄н та̄л сыс тыглетувле яласаӈкве вос ве̄рмысы̄н. Ма̄н ань тох ва̄руӈкве таӈхе̄в: тыт о̄лнэ вертолёт и с ы гл а н м а̄ ё м а щакв вос щё̄питаве, ос Ха̄льӯсныл Кульпас па̄выл мус яласан вертолёт тыт о̄с вос исыгла̄лы. Тыщир на̄н тах таквсы ос туи порат яласаӈкве ве̄рмегы̄н. Ты коныпал ань «Марс 2000» нила на̄иӈха̄п ёвтсӯв. Кит на̄иӈха̄п Ха̄льӯс районын ке̄таве̄г. Ты на̄иӈха̄пыг я̄ хосыт ос ма̄ тармыл яласаӈкве ве̄рме̄г. Аквторыг 18 э̄лумхо̄лас тув та̄луӈкве ве̄рми. Ты ха̄п Кульпасныл Саранпа̄вылн мус миннэ̄тэ порат тыг о̄с вос пӯхталы. Вертолётыл ман на̄иӈха̄пыл яласаӈкве ка̄сащегы̄н ке, на̄нки номсахтэ̄н». Мо̄т та̄рвитаныл ос тамле – ёмас связь ос интернет тот а̄тим. Ты ва̄рмаль урыл ма̄хум кӯщайн о̄с потыртасыт. Та̄н ла̄вве̄сыт, Ло̄пмус па̄вылт 2014 та̄лт сотовый связь ва̄раве. Клубкол ӯнттын ва̄рмаль урыл кӯщай нэ̄ таи ла̄выс, ма̄нь п а̄ в ы л к в е т т а м ле кол ӯнттын э̄лыпа̄лт номсахтуӈкве э̄ри, хумус мӯсхалыг ва̄руӈкве ро̄ви. Ха̄льӯс район миркол кӯщай нэ̄ Любовь Коротун ла̄вме щирыл, та̄н хӯрум ма̄нь па̄вылквет Ло̄пмуст, Кимкъясуйт ос Сӯкыръя па̄вылт клуб тах ӯнттэ̄гыт. Ань ка̄сыӈ ма̄нь па̄вылт йильпи пӯльница о̄с ӯнттаве. Акв тамле ФАПкол Ло̄пмуст рӯпитаӈкве паты. Ты та̄л я̄ витэ молях ма̄ниг е̄мтыс, ты кол ӯнттын ма̄гыс норыт ос мо̄т утыт па̄вылн тотуӈкве ат а̄лымаве̄сыт. Губернатор кӯщаит ты хосыт э̄лаль рӯпитаӈкве ла̄всанэ. Ты пӯсмалтан колыт ма̄нь па̄влытт 2014 та̄л мус ӯнттуӈкве э̄ре̄гыт. О̄с акв ва̄рмаль па̄вланылт «Югра» нампа акв телеканал туп суссылты. Ма̄хум китыглахтасыт, телевидениял хунь ва̄равет. Та̄н па̄вланыл цифровое телевидение 2015 та̄лныл суссылтаӈкве о̄вылтаве. С а п р а̄ н и о̄ л у м порат Наталья Ком а р о в а п а̄ в л ы ӈ ма̄хум мӯйлупсал мӯйлуптасанэ. Па̄вылт с п о рт и в н ы й п л о щадка тах ва̄раве. Ня̄врамыт тот футболыл, волейболыл, баскетболыл ёнгуӈкве патэ̄гыт. Ло̄пмуст кӯщаюв ма̄щтыр хо̄тпат ёт о̄с хо̄нтхатыглас, та̄н рӯпатаныл урыл пӯмщалахтас. Та̄н пуссын «Рахтынья» нампа общинат рӯпитэ̄гыт. Нэ̄т са̄всыр нё̄тнэ турло̄псыт, па̄льсакыт ос мо̄т утыт сакныл хартэ̄гыт. Хум хо̄тпат йӣвха̄пыт ос ма̄ньха̄пыт, тупыт ос мо̄т э̄рнэ пормасыт ва̄ре̄гыт. Ты община Кульпас па̄вылт са̄в та̄л рӯпиты. Ань Ло̄пмус па̄вылт о̄лнэ ма̄хум тув рӯпитаӈкве о̄с вивет. Та хо̄талт Кульпаст хӯл алыщлан ма̄хум янытлаве̄сыт. Н а т а л ья Ко м а р о в а м а̄ х у м я л п ы ӈ хо̄талыл янытлаӈкве тув о̄с ялыс. Па̄влыӈ мир янытламе порат Павел Хозумов Благодарностьнэ̄пакыл мистэ. Ты юипа̄лт кӯщай нэ̄ Кимкъясуй па̄вылн тотыглавес. Тот о̄лум сапра̄нит ма̄хум о̄влэ̄т пусмалтахтын ва̄рмаль урыл китыглахтасыт. Кит та̄л «Николай Пирогов» нампа на̄иӈха̄п ма̄хум п у с м а л т а ӈ к в е о с уральтаӈкве тув ат ёхталы. Тэ̄лы лё̄ӈх о̄лнэ порат ле̄ккарыт та̄наныл уральтаӈкве о̄с ат ёхталэ̄гыт. Ты ва̄рмаль урыл Виктор Рыбалко, Ха̄льус районный пӯльницат кӯщай, ювле ла̄выс, п л а в п ол и к л и н и к а тув ёхталаӈкве ат а̄лыми, я̄ витэ молях ёлмины. Наталья Комарова кӯщаит пуссын ла̄всанэ, ма̄нь па̄вылквет о̄лнэ мир урыл ул вос ёрувлэ̄гыт. Ле̄ккарыӈ на̄иӈха̄п яласан планын тамле па̄влыт о̄с вос хансавет. Па̄влыӈ ма̄хум пӯмщалахтасыт, Кульпаст йильпи интернат рӯпитаӈкве хунь о̄вылтахты. Ла̄вве̄сыт, ты интернаткол яныг таквс э̄тпос а̄стлаве, та̄н ня̄враманыл тув тах ва̄нтлэ̄гыт. Ты коныпал ма̄хум ФАП, сотовый связь, во̄раян ва̄рмаль ос са̄в мо̄т тэ̄лат урыл яныг кӯщай нэ̄ китыгласыт.

1056 2013.07.26. Светлана РОМБАНДЕЕВА

Са̄внув та̄л рӯпитаӈкве патэ̄в. Ханты-Мансийск ӯст о̄лнэ Пенсионный фонд колн ля̄ххал тотнэ ма̄хум акванво̄выглаве̄сыт. Тот М. А. Топилин хум, Россия янытыл рӯпитан Министр труда ос социальный защита, телевизор хосыт потыртас. Тав ла̄внэ̄тэ щирыл, Россиявт та̄л котиль э̄тпосныл 2015 та̄лт Пенсионный фонд йильпи са̄ккон щирыл рӯпитаӈкве паты. Ань хо̄тпа рӯпитанэ̄тэ палыт рӯпата олнанэ̄ныл манса̄вит солко̄ви пенсионный страхова ниян ке̄таве, пенсиян патхатнэ̄тэ порат олныл тувыл ловиньтаве. Манах та̄л рӯпиты, сака ат ловиньтаве, пенсия олн ма̄гыс ма̄кыг ат о̄лы. Тувыл са̄в та̄л рӯпитан хо̄тпа ос мощща та̄л рӯпитан хо̄тпа пенсия олн а̄ла ты аквтем выгы̄г. Ос ань йильпи са̄ккон щирыл хо̄тпа ка̄сыӈ рӯпитан та̄лэ ловиньтаве. Нэ̄ хо̄тпа 35 та̄л, хум хо̄тпа – 40 та̄л манос тыгыл са̄внув рӯпиты те, пенсия олнэ арген но̄хлапи. Ты коныпал нэ̄ хо̄тпа 30 та̄лныл 40 та̄л мус (хум хо̄тпа ос 35 та̄лныл 40 та̄л мус) рӯпитан та̄ланэ ма̄гыс щар яныг пенсиял хансаве. Ма̄ньлат ма̄хум армиян ялнэ та̄ланыл ос нэ̄ хо̄тпат юн ня̄врам янмалтан та̄ланыл пуссын ловиньтаӈкве патавет. Ты йильпи са̄ккон щирыл, э̄лумхо̄лас са̄в та̄л рӯпиты те, яныг олныл ойтуӈкве патаве. Э̄ква 55 та̄л ос о̄йка 60 та̄л то̄влын порат пенсиян ущ патхаты те, сака яныг пенсия олныл хансаве. Ты коныпал хо̄тпа рӯпата олныл са̄в ойтаве те ос са̄в та̄л рӯпитас те, щар ма̄к яныг пенсия олн тав та виӈкве паты. 2025 та̄л порат щар мощща рӯпитан та̄л – 15 та̄лыг е̄мты. А̄щта̄л манос омата̄л хультум ня̄врамыт ос а̄гмыӈмосыӈ ма̄хум пенсия олнаныл ань хумус ойтавет, аквта щирыл о̄с э̄лаль ойтуӈкве патавет.

1056 2013.07.26. Светлана РОМБАНДЕЕВА

Тэ̄н о̄с янытлавесы̄г. Ойттур э̄тпос 8 хо̄талэ̄т Ханты-Мансийск ӯст Э̄лумхо̄лас ос Ма̄вит нампа музейт ма̄хум янытлаве̄сыт. Та хо̄тал ань май колта̄гыл ос э̄рупса янытлан ялпыӈ хо̄талыг о̄лы. О̄выл ла̄тыӈ округ губернатор Наталья Комарова тав ла̄выс: «Ма̄н Колта̄гыл совет ва̄рыгланэ̄в порат округ янытыл о̄лнэ ма̄хманув акваг янытла̄лыянӯв. То̄ в а хо̄т п а н у в с а̄ в ня̄врам янмалтэ̄гыт, то̄ва культура тэ̄ла палт матыр ёмас ва̄рмаль ва̄ре̄гыт ос то̄ванув ня̄врамытын манос яныгпа̄ла хо̄тпатын нё̄тэ̄гыт. Тыхо̄тал ма̄н о̄с сома колта̄гыл, пуссын акванёхтысӯв, ма̄хманув янытлыянӯв». Мо̄лты та̄л Юван Николаевич Шесталов намыл пиным премия ва̄рвес. Ань соссаӈ мирныл, ма̄ньщи ос ханты ма̄хум халт, хотьют матыр ёмас, хо̄йхатнэ тэ̄ла ва̄ри те, тамле премиял миве – янытлан нэ̄пакыл ос олныл миве. Та хо̄тал ань кит соссаӈ нэ̄г янытлавесы̄г, Шесталов о̄йка нампа премиял майвесы̄г – Ханты-Мансийск ӯст Югорский университетт ма̄ньлат ма̄хум ханищтан ма̄ньщи нэ̄ Светлана Селиверстовна Динисламова ос Белоярский район Ванзеват па̄выл библиотекат рӯпитан ханты нэ̄ Нина Васильевна Шабаршина. Ань тыгыл э̄лаль соссаӈ ма̄хманув тох ва̄тихал янытлаӈкве патавет, хотьют культура палт, каснэ ма̄т манос ма̄щтырлан ма̄т матыр мӯтраӈ тэ̄ла ва̄рапи. Ю. Н. Шесталов ма̄ньщи ла̄тӈыл о̄выл нэ̄пакыт тав ты хансыс. О̄йка о̄лме палытыл ма̄ньщи мире сака янытластэ, ща̄нь ла̄тӈе сака э̄руптастэ. Мо̄т ма̄хум о̄с янытлаве̄сыт. Нижневартовск ӯст культура Центрыт рӯпитан нэ̄ Инна Сергеевна Антонова «Заслуженный деятель культуры Югры» намыл майвес. Ты коныпал хо̄тхуйплов ма̄ньлат ма̄хум янытлаве̄сыт, то̄ва ханищтахты, янгыщ рӯпитэ̄гыт. Пуссын наманыл ла̄вве̄сыт, янытлан нэ̄пакыл ос хорамыӈ лӯптал майве̄сыт.

1056 2013.07.26. Николай МЕРОВ

Мощщаг хультум мирыт китыт лов та̄ланыл та минэ̄гыт. Мо̄тынтыг сӯкыр э̄тпост хо̄н ма̄т ООН мирхал организацият рупитан хо̄тпат яныг конференция ва̄ре̄гыт. То̄нт ма̄ янытыл мощщаг хультум мирыт китыт лов та̄ланыл (2005-2014 та̄лыт) ювле та хультэ̄гыт. Ань ты кастыл лӯпта э̄тпост Норвегия ма̄т, Альта ӯст мир янытыл о̄лнэ соссаӈ ма̄хманув акванатхатыгла̄сыт. Югра ма̄ныл округ Дума депутатыг Надежда Алексеева ос Татьяна Гоголева тув ялсы̄г. Ты урыл Надежда Геннадьевна тыи потыртас: «Хо̄н ма̄т конференция е̄мтнэ урыл ме̄н хо̄т нас хӯнтамласме̄н. Молях округ Дума па̄лыл тув ялуӈкве во̄вхатсуме̄н. Ма̄н, мощщаг е̄мтум ма̄хум, таима̄гыс тув атхатыгласӯв, соссаӈ мирын нё̄тмил ва̄рнэ нэ̄пакыт аквъёт хассӯв. ООН мо̄тыт мирхал конференция о̄лнэ порат, ты пирмайтам рекомендацият э̄лаль тах тотыянӯв. Ма̄в янытэ̄т са̄т геополитический регион щирыл ла̄кквауртым о̄лы тыи Южная Америка, Северная Америка, Карибы, Африка, Тихоокеанский регион, Арктика ос Россия. Ка̄сыӈ ма̄ныл соссаӈ хо̄тпат тув минэ̄гыт. Россияныл тув о̄с ма̄хум ялэ̄гыт. Ты сапра̄нит нила ва̄рмаль щирыл э̄рнэ нэ̄пакыт щё̄питасанӯв. О̄выл нэ̄пак ма̄ ос соссаӈ ма̄хманув йис та̄гыл о̄лнэ ма̄нанылт ма̄щунит урыл потыр хасвес. Хумус ты ва̄рмаль ӯргалаӈкве ос маныр ва̄руӈкве тот ро̄ви. Китыт тамле тэ̄ла хасвес ООН организацият соссаӈ мирытн нё̄тнэ ма̄гыс я̄нас структура вос ва̄раве. Ань тот соссаӈ ма̄хум нас представителяныл рӯпитэ̄гыт. Хӯрмит тэ̄ла соссаӈ ма̄хманув ёмщакв ӯргалаӈкве ос нё̄туӈкве э̄ре̄гыт. Нилыт тэ̄ла я̄нас щё̄питавес, тот хасвес ка̄сыӈ государстват, хо̄т соссаӈ ма̄хум о̄лэ̄гыт, та̄н ты пирмайтым ва̄рмалит щирыл нё̄тмилыл вос ва̄равет». Ты потрыт пуссын нэ̄пакн хасве̄сыт. Ань та̄н хотты порат, э̄рыӈ, соссаӈ мирн э̄рмыглэ̄гыт.

1056 2013.07.26. Валентина УЗЕЛЬ

Таквсы пе̄риян ва̄рмаль ва̄раве. Сӯкыр э̄тпос 8 хо̄талэ̄т округув то̄ва ӯсытт ос то̄ва па̄влытт пе̄риян ва̄рмаль ва̄раве. Таквсы 186 избирательный участкат ма̄хум нэ̄пак та̄ратаӈкв патэ̄гыт, 59 па̄влыӈ ос ӯсыӈ ма̄т кӯщаит тах пе̄риявет. Ос 71 па̄влыӈ ман ӯсыӈ Советын депутатыт атавет. Ты кастыл ань Координационный совет ва̄рвес. Тот ань пе̄риян ва̄рмаль щё̄питан ма̄хум, полиция ма̄хум ос са̄всыр кӯщаит рӯпитэ̄гыт. Округ кӯщаюв Н. Комарова ты э̄тпост о̄выл щёс та̄наныл акванатыгласанэ ос тох ла̄всанэ: та̄н пуссын ёмащакв вос рӯпитэ̄гыт, ма̄хманув т а̄ н т и х о т ы х о̄ т п а пе̄рияӈкв таӈхе̄гыт, та хо̄тпа вос пе̄рияныл. Округув янытыл 688 «избирательный участкаг» ла̄внэ нэ̄пак та̄ратан ма̄ ва̄рим о̄лы. Тот 7 со̄тыра арыгтем хо̄тпа рӯпиты. Ка̄сыӈ политический партия такви хо̄тпанэ тот о̄с о̄лэ̄гыт. Ань титхуйплов партияныл ма̄хум пе̄рияхтуӈкв тах патэ̄гыт. Яныг кӯщаюв ка̄сыӈ хо̄тпа ла̄выстэ, ты пе̄риян ва̄рмаль ёмащакв вос мины. Ма̄хум нэ̄пак хумус та̄ратаӈкв патэ̄гыт, ты рӯпата акваг вос уральтаве.

1056 2013.07.26. Людмила ТЕТКИНА

Миркол кӯщаит акванатыглаве̄сыт. Ханты-Мансийск ӯст Правительство колт акв яныг сапра̄ни о̄лыс. Округ янытыл рӯпитан миркол кӯщаит пуссын тыг во̄виньта̄лве̄сыт. Кӯщаит ЖКХа урыл потыртасыт. О̄йттур э̄тпос о̄выл хо̄талныл вит, ре̄г, на̄йпос ойтнэ олн но̄хнё̄тве̄сыт. Н. Комарова, губернаторув, ты ва̄рмаль акваг уральтаӈкве кӯщаит ла̄всанэ. Ты олныт но̄хнё̄тым, ма̄хум ул вос урккуптавет, сака са̄в олн та̄нанылныл ул вос виве. Раис Закиевич Салахов, Югорск ӯст миркол кӯщай, ты урыл таи ла̄выс, та̄н са̄всыр программат щирыл ЖКХа нупыл са̄в олн кос та̄стэ̄гыт. Тувыл вит тотнэ турпат, на̄йпо̄с ква̄лгыт ос мо̄т утыт пе̄нтуӈкве иӈ сака са̄в олн э̄ри. То̄ва ма̄хум вит, ре̄г, на̄йпо̄с ма̄гсыл ойтхатуӈкве о̄с ат молямлэ̄гыт. Нуса ще̄мьят субсидияолныл ань нё̄тавет. Ты олн ка̄тынпаттым та̄ра о̄с ат ойтхатэ̄гыт. Ань предприятият мӯсхалыг рӯпитаӈкве ос олн сэ̄луӈкве ат ве̄рме̄гыт. Мо̄т миркол кӯщаит ты тэ̄ла хосыт хумус рӯпитэ̄гыт, о̄с потыртасыт. Та юипа̄лт библиотекаколыт урыл потыр о̄лыс. Ань округувт 237 нэ̄пак ловиньтанкол рӯпиты. 2012 та̄л сыс тув 267 со̄тыра арыгкем йильпи нэ̄пак ёвтвес. Ань пуссын ловиньтанколыт са̄всыр нэ̄пакыл ёвтнэ ма̄гсыл иӈ 56 миллион солко̄ви э̄ри.

1056 2013.07.26. Людмила СПИРЯКОВА Тамара МЕРОВА

Соссаӈ мир ла̄тӈагув ӯргалаве̄г. Ты э̄тпос о̄выл хо̄таланэ̄т Когалым ӯст «Законодательное обеспечение и вопросы развития языка, литературы и сохранения фольклорного наследия коренных малочисленных народов Севера Ханты-Мансийского автономного округаЮгры» мирхал конференция о̄лыс. Тав округ Дума хус та̄л рӯпитанэ̄тэ кастыл ва̄рыглавес. 2014 та̄лт яныгполь э̄тпос хо̄тыт хо̄талэ̄т хус та̄лэ тах то̄влы. Ты конференцият округ Дума Ассамблеят кӯщай хум Еремей Айпин пуӈктотыс. О̄влэ̄т конференция о̄ в ы л т а х т а м п о р а т Светлана Динисламова На̄й-О̄тыранув нупыл по̄йкщан ла̄тыӈ ла̄выс. Ма̄хум тэ̄ланыл ёмасыг о̄лнэ̄ныл ма̄гыс пуссын по̄йкщасыт. Еремей Данилович округ Дума рӯпататэ о̄вылтыт потыртас. Та̄н Ассамблеянылт щар о̄выл са̄ккон ханты ос ма̄ньщи ла̄тӈыг урыл хассыт. Ка̄сыӈ соссаӈ мир такви ла̄тӈе э̄лаль тотуӈкве вораты. Таи ма̄гыс та̄н ла̄тыӈ урыл са̄ккон, тувыл соссаӈ ма̄хум ла̄тӈыл потыртан радиопередачат, телепередачат щё̄питан ос газетат ва̄рнэ са̄кконыт щё̄питасыт. Тувыл ялпыӈ ма̄наныл ӯргалан са̄ккон ос мо̄т э̄рнэ тэ̄лат ма̄гыс рӯпитасыт. Округ Дума кӯщай Борис Хохряков соссаӈ ма̄хумн ке̄тум пищматэ Игорь Шимановн ловиньтавес. Ос са̄всыр йильпи са̄кконыт урыл хум потыртас, тав яныг кӯщайн нё̄тнэ хо̄тпаг рӯпиты. Губернатор ва̄ӈын хум Геннадий Бухтин ке̄тум паща ла̄тӈе Людмила Алфёрован ловиньтавес, э̄лаль э̄ква ла̄выс: «Ущнув касыл о̄лыс, ёмас проектыт но̄хпатсыт. Тох ханты ос ма̄ньщи ла̄тӈыл та̄ратан журналыг ма̄гыс субсидияолн та̄стувес. 2014 та̄лныл ханты ла̄тӈыл «Шоврие» нампа журнал ва̄раве, ос ма̄ньщи ня̄врамыт ма̄гыс «Витсам» нампа журнал. Ты коныпал сургутский диалектыл потыртан хантыт ма̄гыс я̄нас газета та̄ратаӈкве патаве. Мо̄т хо̄н ма̄ныл ёхталам мӯй хо̄тпат Россияв ёт акванюрщхатым о̄с са̄в рӯпитэ̄гыт. Марьё Мяенпяа, образование ос культура тэ̄лат советникыг о̄лнэ финка нэ̄, таи хӯлтыс: «Еремей Айпин «Ханты, или Звезда утренней зари» хансум потре финн ла̄тӈын толмащлавес. Са̄в финн хо̄тпат ты мир о̄лупсатэ о̄вылтыт о̄выл щёс матыр ва̄ӈкве патсыт. Ань Е. Айпин китыт потре «Божья матерь в кровавых снегах» толмащлыяныл. Ты рӯпата ва̄руӈкве, грантолн висыт». Франция ма̄ныл ёхталам э̄ква Ева Тулуз потыртас: «Ма̄н Сорбонский универститетувт ассоциация о̄лы, тот 2008 та̄лныл аквкит хо̄тал финноугорский ма̄хум о̄вылтыт потыртан нак ва̄рыглаве. Тот марийцат ос удмуртыт ёт акванхо̄нтхатыгласӯв, ты таквс мордва ма̄хум ёт ва̄щинтахтэ̄в тах. Мо̄тыт та̄л хантыт ос ма̄ньщит ёт хо̄нтхатыглаӈкве таӈхе̄в. Тувыл ё̄рн о̄йка Юрий Вэлла ос ханты о̄йка Еремей Айпин хансум потранэ̄н французский ла̄тӈын толмащлавет». Тав ётэ ёхталам хум Доминик Самсон Норман де Шамбур лов та̄л Лӯима̄т о̄лнэ мирыт ёт ва̄йхаты. Тэ̄н «Идентичность в движении» проект щирыл сас рӯпитэ̄г. Хо̄тал нэ̄глын е̄рт о̄лнэ ма̄хум ла̄тӈыт ханищтан институтт «Сибирские языки» ос «Ненецкий для начинающих» йильпи ханищтапыг ва̄рвесы̄г. Ты кит хо̄тпаг ханты ос ма̄ньщи ма̄хум ла̄тӈыг ос культурав ханищтэ̄г, пе̄с ва̄рмалянув пуссын пӯмщалэ̄г. Тэ̄н маныр ва̄гыг, тэ̄нки ма̄хманэ̄н акваг потыртэ̄г. Ань нэ̄пакыт та̄ратан ма̄гыс щар мощща олн та̄стуӈкве патвес. Москва ӯсныл ёхталам мӯй хо̄тпа Вячеслав Огрызко таима̄гыс то̄ва кӯщаит мощ ля̄выльттасанэ. Тох воссыг ул вос ва̄ре̄гыт, лӯима̄ мирыт о̄лупсаныл урыл мо̄т ма̄хум о̄с вос ва̄ганыл. Л. СПИРЯКОВА хансум потре ма̄ньщи ла̄тӈыл Тамара МЕРОВА хансыстэ

1056 2013.07.26. Светлана РОМБАНДЕЕВА

Кульпас па̄выл школа. Ха̄льӯс район Кульпас па̄вылн ялмум порат ам школан щалтсасум. Ня̄врамыт ханищтахтан ма̄ныл а̄стысыт, экзаменаныл мисаныл. Ос тот рӯпитан ма̄хум иӈ пуссын рӯпитэ̄гыт, школаныл сыстамтыяныл, таквсы кастыл щё̄питыяныл. Ханищтахтын колнакытын щалтсасум, нэ̄квет иснасыт о̄льпыл сартэ̄гыт. Тэ̄нут пайтнэ колт манос нэ̄пакыт о̄щнэ колт о̄с пуссын рӯпитэ̄гыт, колхусапаныл ловтыяныл. Кӯщай нэ̄ колнакын щалтсасум, наме Наталья Александровна Слепцова. Ань лӯпта э̄тпос юио̄выл хо̄таланэ хультсыт, таве̄н о̄с рӯпатаӈ. Отчётнэ̄пак хансуӈкве э̄ри, экзаменыт мим ка̄сыӈ ня̄врам нэ̄паканэ щё̄питаӈкве э̄ре̄гыт. Ам Наталья Александровна школа урыл китыгласлум: Наталья Александровна, экзамен минэ ва̄рмалин хумус о̄лыс? Ты та̄л ня̄врамыт экзаменаныл пуссын ёмащакв мисаныл. 11 класс – са̄т хо̄тпа а̄стласыт, 9 класс – онтолов хо̄тпа а̄стласыт. Тох мощща хо̄тпа нэ̄мхуньт а̄тим о̄лыс. Ос таи ёмас, ань таквсы порат о̄выл классын ва̄т нупыл акв ня̄врам ёхты. Юио̄выл та̄лыт сыс школав рӯпататэ ёмас щирыл мины. Ма̄н ня̄враманув ёт са̄всыр олимпиадат касыглэ̄в, грантолн винэ ма̄т то̄ванакт но̄хпатыглэ̄в. Школавныл са̄всыр ма̄т 171 ня̄врам кассыт, 37 ня̄врам но̄хпатсыт о̄выл, китыт ос хӯрмит места висыт. «Спасти и сохранить» акцият о̄лум порат па̄выл янытыл са̄в йильпи йӣвыт ӯнттысӯв. «Аллея выпускников» ва̄рсӯв, школа а̄стлан ка̄сыӈ хо̄тпа ма̄нь йӣв ӯнтты. Интернатт манах ня̄врам о̄лы? Ты та̄л тот налыман нупыл акв ня̄врам о̄лыс, мо̄тыт та̄л налыман нупыл ат ня̄врам ханищтахтуӈкве ёхты. Сортыӈъя, Ло̄пмус ос Кимкъясӯй па̄вылныл о̄лэ̄гыт. Интернатын тай сака хоса та ӯнттаве. Хунь а̄стлаве? Со̄ль, такос ӯнттаве, аман хунь а̄сты, ат ва̄глӯв. Ань тот рӯпитан ма̄хум ла̄внэ̄ныл щирыл, яныг таквс э̄тпост ты а̄стлапияныл. Ювле хультум кит э̄тпос сыс ма̄хум ёмащакв рӯпитэ̄гыт, кол китыт наке ӯнттуӈкве о̄вылтавес. Ӯрхатэ̄в, номсэ̄в, моще̄ртын ня̄враманув йильпи интернатн о̄лмыгтэ̄гыт. Школант манах ня̄врам ханищтахты? Ты та̄л 171 ня̄врам ханищтахтас, таквсы ос 189 ня̄врам ёхты. Ань май са̄всыр йильпи ищхӣпыӈ утыт, компьютерыт, та маныр, ква̄лтапаптуве̄сыт, тамле матарыт на̄н о̄с о̄ньщегы̄н? Матыра̄ти э̄рнут ма̄н пуссын о̄ньще̄в, ня̄врам ханищтан ка̄сыӈ хо̄тпа компьютер ман ноутбук о̄ньщи. Интернет рӯпиты, ка̄сыӈ колнакувт электронный па̄рт о̄лы. Ло̄пмус па̄вылн тамле па̄рт о̄с тотэ̄в тах. Кимкъясӯй па̄выл школа Саранпавыл нупыл паттувес, олныл ань тувыл нё̄таве. Ня̄врам ханищтан хо̄тпа то̄вылхаты? Аквхотты порат школант английский ла̄тыӈ ханищтан хо̄тпа а̄тим о̄лыс. Ань тай ханищт а н м а̄ х у м п усс ы н о̄л э̄ г ы т, рӯ п и т э̄ г ы т. Таквсы кастыл хӯрум хо̄тпа ёхтысыт, география, обществознание ос физкультура урок ханищтаӈкве патэ̄гыт. Ка̄сыӈ хо̄тпа образование о̄ньщи. Интернатт рӯпитан ма̄хум о̄с о̄лы. Школант ёмащакв ханищтахтан ня̄врам са̄в о̄лы? Са̄в ня̄врам ёмащакв ханищтахты, отличникыт о̄ньще̄в, ударникыг са̄в ня̄врам о̄лы. Школавт ня̄врамыт халт 34% ёмащакв ханищтахты. Та̄н ёмащакв ханищтахтанэ̄ныл коныпал мо̄т са̄в э̄рнэ рӯпата ва̄ре̄гыт, тамле ка̄ркамыт, ханищтан ма̄хманылн акваг нё̄тэ̄гыт. Наталья Александровна , н а̄ н н я̄ в р а манын па̄вылт о̄лнэ яныгхо̄тпатын матыр нё̄тмил ва̄рыглэ̄гыт? Атхунь нё̄тыглэ̄гыт. «Акция милосердия» ва̄тихал ва̄рыглэ̄в. Тувыл ма̄хум школавн нэ̄пак хансэ̄гыт, пӯмащипа ла̄тыӈ ла̄ве̄гыт, ма̄н о̄с та ня̄врамыт янытлыянӯв. Мо̄тынтыг ма̄нь таквс э̄тпост школав 80 та̄лэ то̄влы. Ос ты ялпыӈ хо̄талув 2015 та̄лт тах ущ ва̄рилӯв. Ань ма̄нь таквс э̄тпост тыг нэ̄мхотьют ёхтуӈкве ат ве̄рми, та порат я̄ ущ поляве. Таима̄гыс ма̄н та юипал та̄лт ма̄ньполь ман лӯпта э̄тпост мӯйлуӈкве номсэ̄в. Иӈ ат ва̄глӯв, хоты э̄тпос пе̄рие̄в, хунь та̄рапаты, тах ла̄ве̄в. Ялпыӈ хо̄тал кастыл ма̄н ань щё̄питахтэ̄в, район кӯщаитын пищмат хассӯв, тыт рӯпитам ос ань рӯпитан ма̄хманув пуссын янытлан нэ̄пакыл вос мивет, матыр мӯйлупсал вос мӯйлуптавет. Ты ляпа та̄лыт сыс ань ты школав пе̄нтсыл йильпи школа ӯнттаве тах. Интернат по̄хан ӯнттаве, аквано̄лтаве̄г, халэ̄нт ре̄гыӈ унсах ва̄раве. Тох тай ты школав иӈ ёмас, ре̄гыӈ, тыг ёхталан ка̄сыӈ хо̄тпан тав мӯсты, ма̄навн ос тыт рӯпитаӈкве сака ёмас. Ма̄н туп ёмас номтыл рӯпитэ̄в, ёмас номтыл э̄лаль сунсэ̄в, ня̄врамыт ханищтэ̄в, янмалтэ̄в. Тох ты потыртас школа кӯщай нэ̄ Наталья Александровна. Татем ёмас сымыӈ нэ̄, сусте̄мт, ня̄врамыт э̄руптыянэ, школат рӯпитан ма̄хум янытлыянэ. Газетан ва̄рнэ ма̄гыс хурит мис. Школа янытэ̄т суссылтастэ, мощ ё̄мыгтасме̄н. Ханищтан колнакытн щалтсасуме̄н, тот ань нэ̄квет рӯпитэ̄гыт, иснасыт о̄льпыл сартэ̄гыт манос колкан ловтэ̄гыт. Со̄ль, ка̄сыӈ колнакт колнорн электронный партыт тагатым о̄лэ̄гыт, компьютерыт, та маныр пуссын о̄лы. Школат рӯпитан я̄тил ма̄хум ос ня̄врамаквет пуссын пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт.

1056 2013.07.26. Тамара МЕРОВА

Ялъю̄с сымын э̄рнэ ма̄кве. Ягримт а̄лпыл но̄хква̄лсум, кон ма̄нь раквсамыл раквыс. Э̄типа̄ла па̄сныл тот о̄лнэ ма̄ньщи ма̄хманув ёт Ялъю̄с па̄вылн ялуӈкве щё̄питахтасӯв. Та хо̄тал хо̄нтлан ма̄т порслым ма̄хум ка̄стыглан хо̄талыг о̄лыс. Тав кос ащирмаг, тав кос раквыг вос о̄лы ма̄н о̄выл щёс памятник сунсуӈкве тув минэ̄в. Тувыл Ялъю̄сын ёхтумув порат тулыт хотталь та во̄тасаве̄сыт ос посыӈыг та е̄мтыс, хо̄талэ но̄х та нэ̄глыс. Акв щё̄ст тув ёхтум ма̄хум пуссын памятник по̄хат акванатхатасыт. О̄выл ла̄тыӈ кӯщаит ла̄всыт. Ма̄ньщи хо̄тпанув, та̄н ня̄враманыл, апганыл о̄с потыртасыт. Тот памятник па̄ртэ тармыл хансым хум хо̄тпат о̄парищ наманыл ловиньтасанув ос та̄рапатыс – тот кит ще̄мьяныл хум хо̄тпат пуссын хо̄нтлуӈкве тотымат ос тот хо̄т порслымат. Надежда Констатиновна Захарова (Саратина) са̄в рӯтанэ ёт тув ёхталас. Тав ла̄выс: « А̄тяв Константин Алексеевич Саратин хо̄нтлан ма̄ныл юв ёхталас, ла̄глаге сакватым о̄лсы̄г. Тав колхозт рӯпитас, Лёня а̄пщив 1946 та̄лт самын патыс. Ма̄н пуссын тыт Ялъю̄ст о̄лсӯв, яныгмасӯв. Ань ты сымн э̄рнэ ма̄ке̄вн ма̄н рӯтанув ка̄стуӈкве акваг ёхталаӈкве патэ̄в». Саратин колта̄глыныл ат хум хо̄тпа ты ма̄нь па̄вылныл хо̄нтлуӈкве тотве̄сыт: Саратин Артём Васильевич (Саратовский областьт ёлщё̄питавес), Саратин Василий Николаевич (хоттыпыс), Саратин Константин Алексеевич (1945 та̄лт юв ёхтыс), Саратин Тихон Николаевич, Саратин Ион Елисеевич – тэ̄н уре̄нт «Книга памяти» нэ̄пакт нэ̄матыр хансым ат о̄лы. Ань хотты рӯтаныл матыр ла̄тыӈ ке̄тнувыт ке, сака ёмас о̄лнув. Ягримт тамле потрыт Людмила Галкина нэ̄пакн хансыянэ. Ма̄хум ла̄ве̄гыт, хо̄нт порат са̄выӈпа̄лэ хум хо̄тпат Ленинград ӯс по̄хат порславе̄сыт. Анна Николаевна Гындыбина Кимкъясуй па̄вылныл тув ёхталас. Э̄ква о̄с Ялъю̄ст самын патыс, тав а̄ще Николай Егорович Сангилев та па̄вылныл хо̄нтлан ма̄н тотвес, тот хоттыпыс. Мо̄т ма̄хмыт наманыл памятникн о̄с хансым о̄лэ̄гыт: Сангилев Иван Егорович (Латвия ма̄т ёлщё̄питавес), Сангилев Дмитрий Егорович (1947 та̄лт юв ёхтыс), Сангилев Алексей Степанович (нэ̄пакыт Александр намыл хансыма, тав Колпино ӯст Ленинградский областьт ёлщё̄питавес), Сангилев Артём Степанович (Саратовский областьт ёлщё̄питавес), Сангилев Пётр Степанович (хоттыпыс), Сангилев Василий Степанович, Сангилев Василий Петрович (тэ̄н нэ̄пакн хансым ат о̄лэ̄г), Сангилев Николай Алексеевич (нэ̄пакт Александровичиг хансым о̄лы, аман тав? Саранпа̄вылт о̄лыс, 1944 та̄лт а̄тимыг е̄мтыс). Тувыл Гындыбин Семён Иванович (1945 та̄лт юв ёхтыс) ос Марсьянов Михаил Романович, Марсьянов Пётр Романович хансым о̄лэ̄гыт. Та̄н палтаныл апганыл ёхталасыт. Ягрим депутат хум Сергей Байбародов ма̄хумн ёмас ла̄тыӈ ла̄выс: «Ань Ялъю̄с ма̄ньщи па̄вылкве хосат та̄гыл а̄тим кос, ос ма̄н пуссын ва̄глӯв, тыт ёмас, ка̄ркам хо̄тпат о̄лсыт. Нэ̄квет ня̄враманыл ёт та̄нккеныл хультсыт. Ос та̄н хо̄нтлан ва̄рмальт о̄лум хум хо̄тпат ма̄гыс п усс ы н рӯ п и т а с ы т, са̄в хӯл алыщласыт, во̄раясыт. Са̄всыр тэ̄нут фронтын ке̄тыгласыт. Та па̄сныл са̄в та̄л ювле хультыс, яныгпа̄ла ма̄хмыт а̄тимыг е̄мтсыт. Ос на̄н, то̄нт ня̄врамыг о̄лум хо̄тпат, та пора номилы̄н о с э̄л а л ь т от ы л ы̄ н . А̄тяны̄н, о̄паны̄н ма̄гыс тыхо̄тал ёмас ва̄рмаль ва̄рсы̄н. Ма̄н на̄нан яныг пӯмащипа ла̄тыӈ ла̄ве̄в».

1056 2013.07.26. Николай МЕРОВ

Са̄лыӈ хум пенсиян патыс. Тэ̄лы Саранпа̄вылт Сергей Георгиевич Чупров ёт хо̄нтхатыгласум. Тав ма̄ньлат поратэ̄т са̄лыӈ колн рӯпитаӈкве минас. Ще̄мьятэ ёт тот о̄лы. Ам ты хум о̄лупсатэ урыл китыгласлум. На̄н тав уре̄тыл потырохса э̄лаль ловиньтэ̄н. Сергей Георгиевич Ха̄льӯст самын патыс. Тот школат хӯрум класс а̄ стл а с . Т у в ы л т а̄ н колта̄глыл Саранпа̄вылн ва̄нтлысыт. Ща̄нягеа̄щаге тот са̄лыӈ колт рӯпитаӈкве патсы̄г, Ще̄рки ос ханищтахтас, Саранпа̄вылт о̄лыс. Тувыл 1979 та̄лт нёлолов класс а̄стламе юипа̄лт та̄ра са̄лыӈ колн рӯпитаӈкве минас. Та па̄сныл са̄лыт ӯрим ань тыг мус яласы. Са̄ртын, са̄внув бригада о̄лум порат, тав бригадирыг рӯпитас. Тувыл салыт мощщамасыт, то̄ва бриг а д а т а к в а н т от в е̄ сыт. Ань о̄йка китыт бригадат па̄стухыг рӯп и т ы . А̄тя т э н а м е Егор Георгиевич Чупров, оматэ ос Евдокия Сергеевна Чупрова. Тэ̄н о̄лме̄н палытыл акваг са̄лыӈ колт яласы̄г. Ще̄рки э̄кватэ наме Марина Алексеевна, тэ̄н кит пыг янмалтэ̄г. Яныг пыге̄н Ханты-Мансийск ӯст катерыл яласаӈкве ханищтахты. Ма̄ньнув пыге̄н ос Саранпа̄выл школат ловит класс а̄стлас. Ре̄тыӈ ю̄свой э̄тпос 25 щислат Сергей Георгиевич намхо̄талэ о̄лыс. Са̄лыӈ хум 60 та̄лэ то̄влыс. Ань пенсиян патыс, ос э̄лаль иӈ рӯпиты. Тав ла̄выс, нэ̄матыр ва̄рмаль а̄тим кос, ос са̄лы ӯрнэ рӯпата сака та̄рвитыӈ, олн о̄с сака мощща ойтаве. Ам ты ще̄мьян щуньп а щ а л а̄ т ы ӈ к е̄ т э̄ гум. О̄лупсаныл кӯпнитыг вос о̄лы. Колта̄гланыл, рӯтаныл, юрт хо̄тпаныл ёт са̄в та̄л пуста̄гыл э̄лаль вос о̄лэ̄гыт.

1056 2013.07.26. Александр ВЬЮТКИН

Ма̄н таве сымыӈыщ янытлылӯв. Ты хурит Октябрьский па̄вылт о̄лнэ ма̄ньщи нэ̄ Альбина Петровна Волосовская по̄слым о̄лы. Такви а̄ги о̄парищ наме Анямова. Ойттур э̄тпос о̄выл хо̄талт тав хо̄тпан та̄лэ то̄влыс. Альбина Петровна са̄в та̄л па̄выл пӯльницат ле̄ккарыг рӯпиты. Па̄выл ма̄хманэ̄н тав ёмщакв ва̄ве ос э̄руптаве. Пенсиян минаме юипа̄лт юн ӯнлуӈкв ат ка̄сащи, таима̄гсыл тав иӈ рӯпиты. Тамле ёмас ма̄ньщи э̄кван ам са̄в щуньпаща ла̄тыӈ т е̄ т э̄ г у м . Н а̄ й О̄ т ы р а н э н ще̄мьятэ вос ӯргалаве ос са̄в та̄л ма̄хум пусмалтым такви пуста̄гыл вос о̄лы.

1056 2013.07.26. Николай МЕРОВ

Ма̄хманув ма̄ньха̄пыл кассыт. О̄йттур э̄тпос 5-7 хо̄талытт Нефтеюганский районт «Сказка» нампа ӯщлахтын ма̄т ханты ос ма̄ньщи хо̄тпат ма̄гыс ма̄ньха̄пыл каснэ ва̄рмаль щё̄пита̄лвес. Ты касыл Пойковский па̄вылт 2002 та̄лныл ва̄рыглаве. 2011 та̄лныл ты каснэ ва̄рмаль «Кубок губернатора по гонкам на обласах» намыл пинвес. Ка̄сыӈ та̄л са̄всыр районытныл ос ӯсытныл соссаӈ ма̄хманув касуӈкве тув ёхталэ̄гыт. Ань ты та̄л китхуйпловит щёс ма̄хум тот акванатхатыгласыт. Соссаӈ мирыт пе̄с пораныл ма̄ньха̄пыл яласэ̄гыт. Ты хосыт ма̄н о̄лэ̄в, я̄т хӯл алыщлэ̄в, во̄рае̄в, таима̄гыс ка̄сыӈ ма̄ньщи ос ханты хо̄тпа ма̄ньха̄пыл кӯстырыг яласаӈкве ха̄сы. Ты та̄л округ са̄всыр ӯсытныл, па̄влытныл ос Тюменский областиныл 17 команда касуӈкве тув ёхталасыт. Пуссын аквъёт яныгса̄т атпан са̄виткем хо̄тпа о̄лыс. О̄выл хо̄тал каснэ ва̄рмаль пуснэ кастыл округ губернатор ва̄ӈын хум Геннадий Бухтин, Нефтеюганский район кӯщай Владимир Семёнов ос Россия янытыл этноспорт э̄лаль тотнэ хум Алексей Кыласов ёхталасыт. Та̄н пе̄с йис тэ̄ла э̄лаль тотнэ ма̄гыс ма̄хум пуссын янытласаныл. Нефтеюганский район кӯщай ла̄выс: «Ма̄н, тыто̄лнэ ма̄хум, ты ва̄рмалил сака янытлахтэ̄в. Ка̄сыӈ та̄л мӯй ма̄хум яныг ща̄гтыл тыт ӯриянӯв. Каснэ ма̄хум а̄ти туп о̄выл места винэ ма̄гыс тыг ёхтысыт, щар яныг ва̄рмаль ты пе̄с о̄лум нак но̄хво̄рмалтэ̄в, э̄лаль тотылӯв. Каснэ хо̄тпатын но̄хпатуӈкве ла̄виянум. Суснэ ма̄хум, та̄нанылн о̄с ёмщакв нё̄тэ̄н. Пуста̄гыл о̄лэ̄н, То̄румн вос ӯргалаве̄н». Тувыл хо̄талъятт ос округ губернатор Наталья Комарова каснэ ма̄хум янытлаӈкве ёхталас. Тав о̄с янытлан ла̄тыӈ ла̄выс: «Я̄тил соссаӈ ма̄хумаквет, ты сака ёмас ва̄рмаль, на̄нки йис о̄лупсаны̄н э̄лаль тотылы̄н. Ты ялпыӈ хо̄талт ка̄ркам, та̄ксар нэ̄ ос хум хо̄тпаквет к а с н э̄ н ы л ё̄ р а н ы л т арталахтэ̄гыт. Ка̄сыӈ хо̄тпа такви командатэ ма̄гыс сыме вос ща̄рги. Каснэ хо̄тпат моляхнув вос тове̄гыт, налми ва̄тат лю̄льнэ ма̄хум руманыл сака нё̄тэ̄гыт. Ты хосыт каснэ хо̄тпат ё̄р хо̄нтэ̄гыт, та̄кыщ э̄лаль тове̄гыт. Таима̄гыс ты ва̄рмаль нупыл сунсуӈкве сака пӯмащ. Ты касыл 2001 та̄лныл губернатор мӯйлупса щ и р ы л в а̄ р ы гл а в е . Ос акв ёмас ва̄рмаль о̄лы: ты ялпыӈ хо̄тал ма̄тъёмас тув котильт о̄лы. Ма̄хум яныг ща̄гтыл т ы г ӯ щ л а х т у ӈ к в е ёхталэ̄гыт. Ты коныпал ойттур э̄тпос 7 хо̄талэ̄т «Иван Купала» христиан ма̄хум ялпыӈ хо̄талыг о̄лы. Таима̄гыс тув атхатыглам ма̄хум Витхонын по̄йкщасыт, вит тармыл нэ̄матыр лю̄ль ул вос е̄мты. Ань нёлоловхуйплов та̄л яныт ня̄врамыт ма̄гыс о̄с я̄нас мӯйлупса щё̄питасӯв. Та̄н ты каснэ ва̄рмаль са̄в нотын э̄лаль тах тотыяныл. Ма̄н ос хумус ве̄рме̄в, та̄нанылн нё̄тэ̄в. Мо̄тынтыг ма̄ньха̄пыл каснэ ва̄рмаль коныпал тыт по̄йкщан ос пӯрлахтын ва̄рмаль щё̄питэ̄в. Ты кастыл пе̄с йис тэ̄лат ва̄нэ яныгпа̄ла хо̄тпат тыг во̄виянӯв тах. Йӣквнэ, э̄ргын ос са̄ӈквылтан хо̄тпат о̄с мӯйлуӈкве во̄выглыянӯв. Ам ань ты сунсэ̄гум, хумус на̄н тыт ӯщлахтэгы̄н. А̄нумн тыт о̄с сака мӯсты. Ты каснэ ва̄рмальт но̄хпатнэ хо̄тпат ам пуссын янытлыянум. Ам номсэ̄гум, ма̄н аквъёт ты пӯмащ ва̄рмаль са̄в та̄лн э̄лаль тотуӈкве ве̄рмилӯв». Тувыл округ кӯщаюв каснэ мир халт но̄хпатум хо̄тпат мӯйлупсал ос янытлан нэ̄пакыл мисанэ. А̄гит халт о̄выл места – Ксения Айваседа Нижневартовский районныл, китыт места – Нина Покачева, о̄с Нижневартовский районныл, хӯрмит места Анастасия Сироткина Нефтеюганский районныл висыт. Пыгыт халт ос о̄выл места – Степан Микушин Нефтеюганский районныл, китыт места–Василий Сардаков, Нижневартовский район, хӯрмит места – Константин Антонов Сургут ӯсныл висыт. Губернатор нэ̄ ты ня̄врамыт ищхӣпыӈ утыл (компьютерыл) мӯйлуптасанэ. Ос щар молях каснэ ма̄хум пуссын аквъёт ловиньтаве̄сыт, е̄мтыс тох: о̄выл места – Нижневартовский районныл ёхталам хо̄тпат висыт, китыт местат Нефтеюганский районныл ёхталам ма̄хум, хӯрмит места о̄с Нижневартовский районныл ёхталам хо̄тпат висыт. Но̄хпатум хо̄тпат пуссын мӯйлупсал майве̄сыт. Нижневартовский район китхуйпловит щёс губернатор кубоке юв тотсаныл. Ха̄льӯс районныл са̄т хо̄тпа ёхталас. Ты Валентина Вьюткина, Василий Артеев Саранпа̄вылныл, Эдуард Лещук, Ирина Сайнахова, Любовь Кустышева Сӯкыръяныл, Леонид Бабанин Ха̄льӯсныл ос Надежда Челданова Ло̄пмусныл ёхталасыт. Та̄н ты кос ка̄ркамы̄г товсыт, ос ты а̄ти, юв хультсыт. Ань хащта̄л ха̄пыл товуӈкве та̄рвитыӈ. То̄ва хо̄тпатн товуӈкве ат а̄ртми. А̄с ма̄хум ма̄ньха̄п янытэ̄т акволп йӣвыл са̄грияныл. Тамле ха̄пыл яласаӈкв о̄с мощ ха̄суӈкве э̄ри. Ань мо̄тынтыг, э̄рыӈ, тамле ха̄пыл ва̄равет. Губернатор нэ̄ ты ва̄рмаль щирыл нё̄тмил ва̄руӈкве ла̄вхатас. Таве̄н ты касыл сака мӯстыс. Э̄лаль маныр е̄мты, мо̄тынтыг тах та̄ра паты.

1056 2013.07.26. Людмила ТЕТКИНА

Хо̄нтаӈ нэ̄ ва̄рнэ рӯпататэ. Ма̄ньщи ос ханты культураг но̄хво̄рмалтан урыл ань акваг са̄в потыртаве. Округувт ва̄тихал конференцият, семинарыт ос са̄всыр ханищтапыт ва̄рыглавет – соссаӈ ма̄хум та̄нки пе̄с йис ва̄рмаляныл ул вос ёрувлыяныл ос э̄лаль вос тотыяныл. Светлана Кузьмина ю̄нсхатуӈкве, сакныл х а рт у ӈ к в е о̄ с с а к а э̄рупты. Ты ма̄ньщи нэ̄ Кондинский район Половинка па̄вылт самын патыс. Та ма̄т о̄л н э м а̄ н ь щ и т п е̄ с йис ва̄рмаляныл хосат хотёрувласаныл, ща̄нь ла̄тӈыл о̄с ат потыртэ̄гыт. Светлана Викторовна ма̄ньта̄гыл рущ ма̄хум халт яныгмас, такви ма̄ньщи пе̄с йис ва̄рмалит нупыл сака ат сунсыс. Советский ӯсн о̄луӈкве хунь ва̄нтлыс, садикт местодистыг рӯпитаӈкве патыс. То̄нт тав акв колнакыт са̄всыр ма̄ньщи пормасыт, ня̄врам ёнгын утыт акванатуӈкве ос суссылтаӈкве ла̄ввес. Та па̄сныл тав ма̄ньщи культурал пӯмщалахты. Ханты-Мансийск ӯст са̄всыр ханищтапыт о̄лнэ порат акваг тув ялантас. Тот тав ю̄нсхатуӈкве, сакныл хартуӈкве ханищтахтас. Ма̄щтыр хо̄тпат ёт хо̄нтхатыгламе̄т, та̄нанылныл са̄всыр ва̄рмалит урыл пӯмщалахтас. Ань тав Мария Волдина, Зоя Лозямова, Сургутский ос Нефтеюганский районыгт о̄лнэ ма̄щтыр хо̄тпат ёт ва̄йхаты ос ханищтахты. Ты юипа̄лт Советский ӯст музей–колт «Ханса» нампа кружок ва̄рыглас, тув ня̄врамыт, нэ̄ хо̄тпат сакныл хартуӈкве, ю̄нсхатуӈкве во̄виньта̄лсанэ. Са̄в ма̄хум тув ёхталасыт. Тамле кружокыт тав ма̄ньщи ос ханты культураг урыл та̄нанылн п от ы рт а с . М а̄ щ т ы р нэ̄ ла̄выс, таи лю̄ль ты кружок хоса ат рӯпитас, лаппантвес. Ань тав туп садикт ня̄врамыт ю̄нсхатуӈкве ханищтыянэ. Ты коныпал Советский ӯст училищат а̄гит ёт турло̄псыт, пальсакыт сакныл харты ос а̄канит, тучаӈыт ю̄нты. Тамле ка̄ркам нэ̄ ӯст ёмащакв ва̄ве, ялпыӈ хо̄талытын акваг во̄виньта̄лаве. Ты та̄л ма̄ньщи ос ханты ма̄хум Ӯринэ̄ква хо̄таланыл янытлым порат тав мир э̄лыпа̄лт со̄с косамтас ос То̄румныл пуста̄гыл о̄лнэ хо̄тал по̄йкщас. Тув ёхталам а̄гирищитп ы г р и щ и т м а̄ г с ы л са̄всыр ёнгыт ос касылыт ва̄рыглас. Тав о̄с та̄н ётаныл то̄рса̄лмыт йӣвн нэ̄гсалас. Тамле ялпыӈ хо̄талытт тав такви ва̄рум, ю̄нтум пормасанэ суссылтыянэ. Ам ты хо̄нтаӈ ма̄ньщи нэ̄н паща ла̄тыӈ ке̄тэ̄гум. Пуста̄гыл э̄лаль вос о̄лы, аквты щирыл ма̄ньщи культурал э̄лаль вос пӯмщалахты. Ня̄врамыт ма̄щтырлаӈкве э̄лаль вос ханищтыянэ.

1056 2013.07.26. Галина КОНДИНА

Ма̄щтырлаӈкв ма̄нь та̄гыл вос ха̄сэ̄гыт. Ка̄сыӈ тув Я̄сунт па̄вылт «Ма̄нь Ӯсквег» ла̄внэ ма̄т ня̄врамыт мовиньт суй та сумыллы. Та̄н тув ща̄гтым атхатэ̄гыт. Ӯщлахтын коныпал ня̄врамыт ос ханищтахтэ̄гыт. А̄лпыл ня̄врамыт гитарал ёнгим но̄хса̄йкатавет. Тувыл луваныл са̄маныл ка̄мнямтым зарядка ва̄ре̄гыт, ловтхатэ̄гыт ос тэ̄ӈкв та ха̄йтэ̄гыт. Тэ̄нэ юипа̄лт ё̄рнколаныл хот щё̄питыяныл , колкан хотхосге̄гыт, па̄вылкант порссаквыт хотатэ̄гыт. Ос ущ ханищтахтуӈкве о̄вылтахтэ̄гыт. Ты тув хӯрум смена ва̄рыглаве. Ам о̄выл сменан во̄виньтаве̄сум. Тав ма̄щтырлан сменаг ла̄ваве ос тох намаим о̄лы: «Ане̄квам ханса». Ты смена ам омам Аксинья Степановна Мерова номнэ ос ка̄стыглан ма̄гсыл тох намтвес. Тав 1996 та̄л па̄сыл ка̄сыӈ туи тув ялантас. Ня̄врамыт ёт са̄сныл со̄втыт, са̄ныт, ма̄нь а̄пат, са̄с а̄канит ю̄нтыс ос са̄всыр ма̄ньщи мӯтратын та̄наныл ханищтасанэ. Ань ос ам та̄наныл ма̄ньщи ла̄тӈыл потыртаӈкве ханищтасанум. Ос то̄ва а̄гирищитпыгрищит ёт са̄сныл со̄втыт, са̄ныт ю̄нтсӯв. Ня̄врамытын са̄с ю̄нтуӈкве, ва̄им, та̄рвит. Та̄н тулё̄вланыл ва̄гталыт, тох о̄лы, матыр та ю̄нтсӯв. Мат хал Г. К. Алгадьева е̄мты, та̄н ам палтум та ёхтыгпа̄лэ̄гыт. Пуссын аквторыг та̄н ётаныл рӯпитаӈкве хунь ве̄рме̄гум, таима̄гсыл хӯрмахнилах ня̄врамыл ёхталасыт. О̄влэ̄т ня̄врамыт мохлыл ва̄руӈкве ат ха̄сэ̄гыт. Та̄наныл ам ла̄щал ханищтасанум. То̄ва порат тулё̄вланыл пе̄лтэ̄гыт, ле̄ккар палт ха̄йтталэ̄гыт, тэ̄рпил сартавет о̄с э̄лаль та рӯпитэ̄гыт. Нэ̄мхотьют мори ат ня̄ӈхыс. Пыгрищит ёт рӯпитаӈкве Вячеслав Юрьевич Кондин ёхталас. Тав хум хо̄тпа э̄нтап ва̄руӈкве пыгрищит ханищтасанэ. Са̄лы а̄ньт э̄рнэ янытаг сартытэ, хорамыл пыгрищит та̄нти ва̄рияныл. Са̄всыр яныт корпиныл асыт сартэ̄гыт, ка̄ралэ̄гыт, тох а̄ньтлӯптат хорамыӈыг та е̄мтэ̄гыт. Акв э̄нтап ма̄гсыл са̄т лӯпта э̄ри. Э̄нтап та̄йтыт Вячеслав Юрьевич такви ва̄рсанэ. Пыгрищит ка̄таныл иӈ ва̄гталыт, ты та̄рвитыӈ рӯпата мӯсхал щирыл ва̄руӈкве иӈ ат ве̄рмияныл. Игорь Тихонов сака ма̄щтырыг э̄нтапе ва̄рыстэ. Хорамыӈ лӯптат хумус совн ю̄нтуӈкве, тав Вячеслав Юрьевичин суссылтавес ос э̄лаль такви ва̄рыс. Са̄лы а̄ньт мощща о̄щсыт, таима̄гыс то̄ва э̄нтапыт та̄сыг ва̄рим аргин лӯптал ю̄нтсаныл. О̄выл хо̄тал пыгрищит ос са̄сныл сыпаль ва̄рсыт. Хумус варуӈкве, та̄н о̄с Вячеслав Юрьевичин ханищтаве̄сыт. А̄гирищит ёт Мария Сергеевна Мерова ос Галина Константиновна Алгадьева ва̄таӈ то̄рыт ос ма̄ньщи супыт ю̄нтсыт. Ма̄ньнув а̄гирищит то̄рыл йинве̄сыт, ва̄таӈ то̄р ю̄нтсыт. Яныг а̄гит «Время поющих стрел» смена кастыл супыт та̄нтина̄нылн ю̄нтэ̄гыт. Хотьют суп ат ю̄нты, та сменан ат виве. То̄ва яныг а̄гит хо̄тал палыт ӯнлэ̄гыт, мощщан хотпо̄йтсэ̄гыт ос э̄лаль та ю̄нсхатэ̄гыт. Галина Константиновна Ха̄льӯс район Хулюмсӯнт па̄вылныл ёхталас. Тав ётэ ня̄врамыт ханищтаӈкве Хулюмсӯнтныл ос акв нэ̄ Надежда Константиновна Маслова ёхталас. Та̄н аквъёт по̄слысыт ос сакныл са̄всыр хорамыт хартсыт. Са̄выӈпа̄лэ ня̄врамыт ка̄тсорт о̄щнэ хорамыт ва̄рсыт. Пальсак манос турло̄пс хоса ва̄руӈкве э̄ри, моляхыл а̄стлаӈкве ат а̄лымияныл. По̄слуӈкве ня̄врамыт о̄с пуссын ялантасыт. Хотьют ат ха̄сыс, о̄с ханищтахтасыт. Ханищтахтынэ̄ныл коныпал ня̄врамытын, ва̄им, ёнгасаӈкве э̄ри. Ёмас хо̄талт та̄н кон та ха̄йтыгтэ̄гыт, ёнгасэ̄гыт. Ты кастыл са̄всыр яныт мячикыт о̄ньще̄гыт. Ос та̄н сака э̄руптан ёнгиланыл ты «титхуйплов йӣво̄выл», рущ щирыл «двенадцать палочек» ла̄вияныл. Ма̄н ня̄врамытын ос та̄н ётаныл рӯпитан хо̄тпатын пуста̄гыл о̄лнэ ла̄тыӈ те̄тэ̄в. А̄гирищитпыгрищит туи сыс ёмщакв вос ӯщлахтэ̄гыт, та̄ксарыг, ка̄ркамыг вос яныгме̄гыт.

1056 2013.07.26. Мария КУМАЕВА

Э̄квапыгрищ урыл мо̄йт (ма̄ньщи мо̄йт). Дарья Степановна Самбиндалова мōйтыглам мōйт ань э̄лаль ловиньтэлы̄н, о̄выл охсатэ №13 газетат хансым о̄лы. Ань тай ойтхатэн, пыгрищ лāви. Āти, ам сар ат ойтхатэ̄гум. Сāт ё̄рн потыртан пупыг тыг ат ке тотэ̄гын, ам наӈын ты тӯлмахын мāгыс алылум. Пыгрищ лāви: Вос тав, матар ю̄рм вāг хосытыл, матар вōньщам вāг хосытыл та сāт ё̄рн потыртан пупыг тыг ке тотэ̄гум, ам тах наӈын алылум. Тувыл ос кон та пувтмавес. Пыгрищ юв та минас, лю̄ньщим, тыстым. Āкве лāви: – Я, хумле, майвēсын? – Манаре мыг, сāт ё̄рн потыртан пупыг хōт щāрыщ вāтат ōс лāвылты. Манос ōлы, ос хомус тотуӈкв? Ам тув ос ялэ̄гум, сэ̄тап поталын ōс майлэ̄лн, пыгрищ лāвыс. – Ань тай урм холас, пищум холас. Ань тай ягāгим палт тах ты сэ̄тап поталын ёт холытан минэ̄гын. Вāпсагумягāгиягум матар ощмар ōньщēг, матар пищ ōньщēг, тэ̄н та нё̄тэ̄г. Тув кēтсам э̄лмхōласыт нэ̄мхотьют юв ат ёхталас. Наӈ, танай, манос ōлы, ягāгиягумвāпсагум хосытыл та ёхтэ̄гын. Пыгрищ пуӈке, саме мāньмыгтас, ёл та хуигпас. Āлпыл ща̄не̄н о̄с та квāлттаве: – Квāлэн, тувыл минэн. Сэ̄тап поталытэ майвес. Тэ̄с, āстыс ос тувыл та минас. Сэ̄тап поталытэ тāрматастэ. Сэ̄тап юипāлт та хāйты. Хāйтыс, хāйтыс, вāгтāл та патыс. Вāгтāл патыс, сунсы: кит хāль āӈквалыг лю̄лēг. Номсы: «Я, ты яныг хāль āӈквалыг пōхын ёлӯнтэ̄гум, ня̄нь лōмтум ювтōвтащлылум». Аквматэ̄рт āкарыгщ ā щ и г т у в ы л ко н квāлапасы̄г. Щар ты пураве, та пураве. Яты, кос хомус щāнтыглахты, а к в м а т э̄ р т ю н н э̄ потыртанэ̄т суйты: – Нэ̄нан рōвнэ э̄лмхōлас ке ёхтыс, тӯйтэ, я̄ӈке нёлувлэлан, ювпувтмелан. Нэ̄нан ат рōвнэ э̄лмхōлас ке ёхтыс, пāсса тōвлиг маныгтэлан, ня̄ра тōвлиг маныгтэлан. Аквматэ̄рт тӯйтэ, я̄ӈке нёлмтавес, колын юв тāрматавес. Ща̄не ягāги лāви: – Сōрникве, наӈ ос манарн тыт кинсэ̄гын? Манарын тыт вāрēгын? Маныр я̄рмын патсын, маныр вōньщумн патсын? Матъёмас вāпсын вōрт ат хōнтвēсын, ювтāяпанувен. Аквматэ̄рт сōрӈтэ̄п, мāгыӈтэ̄п пасанн ӯнттувес, тэ̄с, аис. Тэ̄нэ мāтэ̄ныл пōйтуӈкв ты патыс, кол пāӈк салатас. Ща̄не ягāгитэ лāви: – Вāпсын ювле ты ё̄ӈхыс лё̄х паттатэ̄ныл. Потыртасы̄г, матарасы̄г. Пыгрищ лāви: – Ам тыг кēтвēсум сāт ё̄рн потыртан пупыг палт. Э̄ква лāви: – Вāпсын ке матыр ощмар пищ ōньщи, вāпсын ощмар хосытыл сāт ё̄рн потыртан пупыг кāтын та паттэ̄гын. Вāпсын матыр ощмар, матыр пищ ат ке ōньщи, миннэн мāт тот та алавен. Сāт ё̄р нё̄тмил хоталь вēритэ̄гын наӈ кēмын э̄лмхōлас. Наӈ э̄лыпāлынт мансāвит э̄лмхōлас кēтсыглавес. Сāтнёлолов э̄лмхōлас. Та мāхмыт юв ат ёхталасыт, наӈ юв ат ёхтэ̄гын. Аквматэ̄рт китынтыг сāм кол пāӈк салатас. Э̄квапыгрищ накаматастэ, мокаматастэ – ощща ю̄нтупыг вāрапастэ, сунтук паттан тув мāгумтастэ, пувтмастэ. Хӯрмиттыг ёса паттал кол пōх салатас. Вāпсэ ёса паттаге рāтуӈкв та патсаге, щахыл турыл миргēг, щахыл турыл поклэ̄г. Юв щалтыс, лāви: – Я, колын тай ты самльтты, пальтты. – Ос хōт ялымен, матар тāяпасын, кисувласын. Ам колум манарыл самльтты, пальтты? э̄кватэ лāви. – Āти, наӈ колын самльтты, пальтты, ōйкатэ лāвыс. Хӯрминтыг ōйкатэ лāви: – Я, маныр тав, ул ӯп ня̄врамрищин тыг ёхтыс? Ос хōт ōлы? – Ос наӈ юв илттыг щалтэ̄гын, ам пилэ̄гум, атиӈк вāгтāл патнэн урыл ювтāяпилын, э̄кватэ лāви. Лōхса̄м паттан хāхсас, накаматастэ, мокаматастэ, э̄лмхōласыг колкан тӯщтыгпастэ. Ята, та аниглаве, сыпыглаве. Яты, котьле пāс юв аялāлытэ, кон а̄йтапитэ. Колканын тāрматастэ, китыглытэ: – Я, маныр вōньщумн патсын, ня̄врам? Маныр я̄рум? – Я, наӈ хум тэ̄пъялэн, аен, тувыл ущ китгалэ̄лн. Маныр я̄румн, маныр вōньщумн патыс? Тав такви оссаме паттат, маныр я̄рум тоты, маныр вōньщум тоты, таимāгыс тыг ты ёхтыс, э̄кватэ лāвыс. Тувыл ӯнлын āнытэ щар тāглэ тэ̄нутыл хӯнвес, нё̄влил щар тāглэ. Акв ōвлыӈ āнытэ пуссын тāяпастэ, мōт ōвыл āнытэ пыгрищ тōвтащлас, пуращлахтас. Э̄кватэ мощ тэ̄пъялас. Яты, āнытэ пуссын тав та тāяпастэ. Исмит пӯт котьле мос юваяластэ, сāт палюп аргин пӯтэ. Тувыл апге нупыл лāви: – Я, маныр я̄рм? – Тав маныр я̄рм, маныр вōньщум? Тав тӯлмах алыглам, яныг вāтахумын маяпаме. Ман мулм кāтэ̄тыл, ман мулм лāглэ̄тыл хāйтыгтэмēтэ, таимāгыс тӯрыг, хāлиг тотмаге. Сāт ё̄рн потыртан пупыг палт кēтыма. Ос таитэ тотуӈкв ёхтыс. Наӈ матар ощмар ōньщēгын, матар пищ ōньщēгын? Наӈ ё̄рынтыл тах кāтын та паттыглан, э̄кватэ лāвыс. – Я, тав такем вāрмаль, сāт ё̄рныт, тāн мōтхōтал тах йирхатэ̄гыт, пупганыл йирēгыт, вина аēгыт. Тав тах кāтын ман хосал паты, мēн кāтагмēн, ōйкатэ лāви. Тувыл сāграпе кӣвтастэ, касаянэ кӣвтсанэ, ёл та хуяс. Пыгрищ мулыпāлн хуяс. Хуясыт, тувыл та оилматвēсыт. Āлпыл ōйка нōхквāлыс. Э̄кватэ тэ̄нут вāрыс, лӯтыс. Ōйка тэ̄пъялас, лӯтыс. Сāграпе, касае вис, та минас. Миннэ̄тэ э̄лыпāлт э̄кватэ лāвыс: – Пыгрищ тах нōхквāлы. Аман хомле тах вāрыглаӈкв? Тав кон мори хāйтыгтаӈкв паты, э̄кватэ лāви. – А тав тах тув ке кēтылын, лāвēлн, тах тув э̄ргим, кисгим вос мины, ам палтум. Ам тах вāглум, тав пāвыл пāлыл тах юв, ōйкатэ лāвыс. Тувыл тав ман э̄рыгхум, мōйтхум нōхквāлыс. Тэ̄пъялас, лӯтыс. Āкве агāгитэ нупыл лāви: – Ам сар мощ кон ёнгим хāйтыгтэ̄гум. – Я, наӈ хāйтыгтэ̄гын, хāйтыгтэн. Пыгрищ лāви: – Я̄ тапāл урт аман хотьют сāгырхатнэ̄т суйты. Āкве лāви: – А тая тай наӈ вāпс ōйкан суйты. Тав сāгырхаты. Тувыл ос кон та хāйтыгты, ёнгасы. Кон хāйтыгты, тувыл ос юв щалты, лāви: – Ам сар тув хāйтталэ̄гум. – Я, наӈ илттыг тув ул хāйтэн, наӈын ювтāяпитэ. – Я, ос хомус минуӈкв? – Наӈ тыгыл минэн, э̄рген, кисген, рōӈхен, тащир минэн, э̄ква лāви. Тувыл ос тэ̄пъялас, аис. Āквен тыттувес, айтвес, тувыл та минас. Э̄ргим, щисгим, кисгим, рōӈхим тув та ёхтыс, сунсы: вāпсэ тай товлыӈ хāпе āстам. Пыгрищ китыглахты: – А тыя маныр? – Тыя тай ам товлыӈ хāп вāрсум. Э̄рыг йисхум, мōйт йисхум порат тамле мōйт тах нас мōйтаве. Хōяӈ рущхум пыг āртэ̄н паты, хōяӈ юхурпыг āртэ̄н паты, ты вāрмаль тах э̄лмхōлас исыӈ тōрм паты и э̄лмхōлас нотыӈ тōрм паты, э̄лмхōласытна тах ты вāрмаль э̄лаль тотуӈкв патаве. Ос мощ матар аньщаранэ волкалтасанэ. Тувыл та тāлсы̄г. Та тыламласы̄г юв, юв ёхтысы̄г. Ōйка лāви: – Тав ты аньщаре, та аньщаре ат тōвлы. Пыгрищ лāви: Ам сар ань тыламлэ̄гум. – Āти, вāпс ōйкатэ лāви, холытан тах ущ тыламлэн. Холытан тах ё̄рныт йирхатэ̄гыт, пуӈканыл тах а̄гмыӈыг ēмты – сомъяхыт ӯнлы. Наӈ тах āлымēгын таве виӈкв. Тувыл вāпсэ ос тэ̄пъялас, аис, ос товлыӈхāпе ёмащакв щё̄питастэ. Нōхтыламласы̄г: я, ёмащакв рӯпиты! Ёлӯнтсы̄г, йӣвна нэ̄гыстэ̄н. Акитэ лāви: –Э̄рыӈ тах такви атиӈк тыламлы, вōтыг ēмты. Йӣвна ёлнэ̄гыстэ̄н. Тувыл ёл та хуясы̄г. Аквматэ̄рт тувыл āлпыл пыгрище ханищтаӈкв та патыстэ: – Наӈ тах тув ёхтэ̄гын, сунсэн, э̄лыл сунсэн. Наӈ тах сунсэ̄гын, тāн юв та щалтэ̄гыт, наӈ нумыл тах о̄влэ̄т ё̄ӈхен. Тāн тах наӈ нуплын ман тэ̄ланыл ōлы. Та̄н аēгыт, сāлы нё̄вляныл, лӯтаныл тах щё̄питэ̄гыт. Тāн юв щалтын порат тах сомъяханыл пāлыгхуи, наӈ тах ёлисапāлэн. Тав тах ты пуклатэ̄тыл консыгтэ̄лн, тав тах пōйтыгпа̄лы. Исапāлэн, тāлтапēлын, тувыл тармыл ӯнтэ̄лн. Тав тох хотквāлапи, порыгми. Акитэ лāвыс: – Наӈ тах номылматэн, матыр лю̄ль ке ēмтуӈкв паты, наӈ āнум номылматэн. Ам тах тāнаныл щё̄питыянум. Та халт наӈ оигпēгын. Āлпыл пыгрищ тув та минас, тув ёхтыс. Нумыл тай та ё̄ӈхи товлыӈхāпēтыл. Аквматэ̄рт ё̄рныт та тэ̄пъяласыт, лӯтсыт. Такви тай пыгрищ такем тэ̄ӈкв таӈхи кос, номсы: «Ам сар юв ёхтын мос вēритэ̄гум». Сунсы: акваг нё̄влит, лӯтыт щё̄питаве̄сыт. Тувыл юв та щалтсыт. Юв щалтнэ̄ныл халт, пыгрищ ёлисапас. Сōль, сомъяхыт пупыг та э̄рги такви урēт, та каи. Консыгтастэ, āлмаястэ, т о в л ы ӈ х ā п к ӣ в ы р н щēлтумтастэ, тармыл ӯнтылматастэ. Товлыӈхāпе квāлтапаптастэ, нōх та тыламлас. Тыламлас, та мины. А таятэ тай та рōӈхи, пыгрищ манакем вēрми, та мины. Аквматэ̄рт ювле сунсы, вāпсэ̄н лāвсавес: «Наӈ ювле уральтахтым минэн». Ювле сунсы: сāт хулахыг ēмтапасыт. Сāт хулахыг та тыламласыт. Яты, юил та ня̄влаве, юил ты ёхтаве. Аквматэ̄рт номылматас: «Яты, вāпс ōйк, ам ты алавем тах». Аквматэ̄рт э̄лыпāлыл сунсы: лунт нэ̄глапас. Лунт нэ̄глапас, ювле сунсы: тай хулаханэ ювле лунтна та ё̄хтавēсыт. Лунтна ювле ё̄хтавēсыт, ювле ос āӈкватāнты: хулаханэ ёлаиссыт, лунт ōс тув ёлисас. Аквмат щāрыщта та ловтхаты, та манари. Аквматэ̄рт товлыӈхāп вāрум урн пыгрищ та ёхтыс. Ювле сунсы: лунт ōс тыламлас, тав юйпа̄лэ̄т та юв. Тав ос тот нумыл та ё̄ӈхи. Ёлисас (пыгрищ), юв щалтыс. Вāпс ōйкатэ маснутанэ хотāӈхвиянэ, щар та хащлумыт, та манарыт. Пыгрищ китыглахты: – Я, вāпс ōйк, наӈ ос маснутанын манрыг тох ēмтсыт? Хоталь ялсын? – Наӈ ос сāртын номылматуӈквкен, сāртын ля̄галаӈквен, таят тай хулахыг та ēмтапасыт, тэ̄лапасыт. Наӈ ань илттыг номылматсын, ам ань нāӈк урта, ӯльпа урта наӈ сāинтта хāйтымем маснутанум пулигманыгтавēсыт. Н а ӈ ы н л э̄ с т а л а ӈ к в хāйтсум. Мо̄йт э̄лаль мо̄тыт газетат ловиньтэ̄н.

1057 2013.08.09. Людмила ТЕТКИНА

Пил ва̄тнэ ма̄ ма̄гсыл олн ойтуӈкве э̄ри. Ханты-Мансийск ӯст мирколт рӯпитан ма̄хум сапра̄ни ва̄рыгласыт, округувт рӯпитан общинат ос мо̄т предприятият кӯщаяныл тув во̄виньта̄лсаныл. Ань ма̄н округувт пил ва̄тнэ, ла̄хыс атнэ, па̄квсам ва̄рнэ, тэ̄рпиӈ лӯптат атнэ общинат, предприятият субсидияолныл нё̄тавет. Ань йильпи са̄кконыт щирыл, ма̄хум пил ва̄тнэ̄ ма̄наныл та̄нкина̄нылн хансуӈкве ве̄рме̄гыт. Туп акв ва̄рмаль о̄лы– тыи ма̄гсыл арендаолн ойтуӈкве э̄ри. Ма̄хум тамле нэ̄пакыт щё̄питаӈкве ат молямлэ̄гыт. Ты тэ̄ла урыл ма̄хум о̄лум сапра̄нит потыртасыт. Округувт Ханты-Мансийский, Белоярский, Кондинский, Нижневартовский, Октябрьский, Сургутский ос Ха̄льӯс районытт туп 34 хо̄тпа во̄р арендан винэ нэ̄паканыл щё̄питасаныл. Са̄кконыт щирыл та̄н 10-40 та̄лн та̄нки нупыланыл та во̄р хансуӈкв ве̄рме̄гыт. Ма̄хум ос ла̄всыт, о̄влэ̄т ты нэ̄пакыт ва̄руӈкве та̄н ка̄сащасыт, тувыл ловиньтасыт, манаса̄вит олн ойтуӈкве патэ̄гыт, э̄лаль нэ̄пакыт атуӈкве ат патсыт. Олег Шатин, «Союз общин» рӯпитан кӯщай, тох ла̄выс: «Пил ва̄тнэ во̄рум ма̄гсыл 3 миллион солко̄ви ойтуӈкве э̄ри. Ос на̄нан китыглыянум: манаса̄вит тонна пил, ла̄хыс ос мо̄т тэ̄нут ма̄навн тыналаӈкве э̄ри, ты олн сэ̄лнэ ма̄гсыл. Ты та̄л пил ат ке тэ̄лы, а̄нум маныр ва̄руӈкв, хотыл таса̄вит олн выгум. Ань па̄влыӈ ма̄хумныл манос по̄х хо̄тпаныл пил ёвтуӈкве патэ̄гум, амки ма̄хманум во̄рн аты ке̄тыянум. Ты э̄лыпа̄лт туп соссаӈ ма̄хум ты рӯпата ва̄рсыт, та̄н са̄всыр субсидияолныл ойтве̄сыт, нё̄тве̄сыт. Ань тай пуссын предприятият ты олныл мивет. Ты щирыл э̄лаль ке мины, соссаӈ ма̄хум ты рӯпата ва̄руӈкве ат патэ̄гыт». Александр Киселев, та департаментыт рӯпитан хум, ла̄выс, ань во̄р пил ва̄тнэ хо̄тпат пуссын субсидиял нё̄тавет, йильпи са̄кконт тох хансым о̄лы. Пётр Монин, Ханты-Мансийский районныл ёхталам хум, ты та̄рвитыӈ ва̄рмаль урыл тох ла̄выс: «Ам общинам ма̄гсыл во̄р арендан вислум ос олн ойтэ̄гум. Тувыл тамле ва̄рмаль е̄мтыс, ам олн ойтэ̄гум ос ка̄сыӈ по̄х хо̄тпа ам о̄лнэ ма̄мт пил ва̄туӈкве ве̄рми. Ань ты китыглахтуӈкве т а ӈ хе̄ г у м , т а̄ н п и л ва̄тэ̄гыт ос манрыг ам олн ойтэ̄гум? » Кӯ щ а и т о с ю в л е ла̄всыт, та̄н нэ̄матыр ва̄руӈкве ат ве̄рме̄гыт, ань тамле са̄ккон Россия янытыл рӯпиты. Ос ма̄хумн ты нэ̄пакыт атуӈкв нё̄туӈкве ла̄вхатсыт.

1057 2013.08.09. Людмила ТЕТКИНА

Тэ̄ла урыл тот потыртасыт. Округувт соссаӈ ма̄хумн нё̄тнэ ос та̄н пе̄с йис ва̄рмаляныл э̄лаль тотнэ ма̄гсыл «Социальноэкономическое развитие КМНС» нампа программа 2013 та̄л оигпан мус рӯпиты. Ань ты нэ̄пак йильпииг хансаве, ос 2014-2020 та̄лытн пирмайтаве, акв миллиард 205 миллион 912 со̄тыра солко̄ви тув тах та̄ставе. Ань природный ресурс департамент ты программа щирыл пуӈктоты. Мощщаг хультум мирыт культураныл э̄лаль тотнэ ма̄гсыл 8 департаментыт олныл мивет. Ты хосыт культура департамент са̄всыр фестивалит, ханищтапыт, ялпыӈ хо̄талыт ва̄рыглы. Спорт департамент ос Нефтеюганский районт ка̄сыӈ та̄л ма̄ньха̄пыл каснэ касыл щё̄пита̄лы. Мо̄таныт пе̄с йис ва̄рмалит но̄хво̄рмалтан ма̄гсыл олныл та программаныл о̄с та̄ставет. Манхурип э̄рнэ тэ̄лат йильпи программан хансуӈкве э̄ре̄гыт, ты ма̄гсыл соссаӈ ма̄хум сапра̄нин акванатыгл а в е̄ с ы т о с к и т ы главе̄сыт. Еремей Айпин, округ Дума депутат, тув о̄с во̄виньта̄лвес. Тав ла̄вме щирыл, ты нэ̄пак мӯсхалыг иӈ ат хасвес. Ос ка̄сыӈ департамент китыгластэ, соссаӈ ма̄хумн нё̄тнэ ма̄гсыл та̄нанылн манаса̄вит олн э̄ри. Культура департамент акв та̄лн туп кит миллионыл тах миве, та̄н лов миллион кос во̄всыт. Спорт щирыл рӯпитан департаментыт о̄с са̄в олн тув хансыгласыт, о̄с мощща олныл хасве̄сыт. Мо̄таныт о̄с акв тыщирыл мощща олныл тах мивет. Тыи ма̄гсыл Еремей Айпин кӯщаит пуссын ты ва̄рмаль урыл э̄лаль потыртаӈкве сӯкыр э̄тпост тах во̄выглыянэ. Степан Молданов, Белоярский ӯст о̄лнэ ханты хум, сапра̄нит ла̄выс: «Ань община ва̄рнэ порат са̄в нэ̄пак атым, Ханты-Мансийск ӯсн акваг ялантаӈкве э̄ри. Ма̄нь па̄вылт о̄лнэ ма̄хманув тыглетувле яласаӈкве таса̄вит олн хо̄т выгыт? Программан та̄н тыглетувле ялнэ лё̄ӈхолнаныл тув вос хансавет». Советский район Коммунистический па̄вылт о̄лнэ Николай Проскуряков, ле̄ккар хум, ос тамле тэ̄ла урыл ла̄тыӈ ла̄выс. Ань ма̄ньщит, хантыт щар пуссын со̄рыгӯй о̄ньще̄гыт, пусмалтахтуӈкве ат ка̄саще̄гыт, ты а̄гмыл са̄в хо̄тпа а̄тимыг е̄мты. Та̄н санаториян ты а̄гм пӯсмалтаӈкве вос ке̄тыглавет. Ань та̄н ӯщ лахтын ма̄н кос ялантэ̄гыт. Тувыл нэ̄мхотьют ат ва̄г, манса̄вит э̄лумхо̄лас пусмалтахтуӈкве яланты. Акв программа хосыт ке пусмалтавет, то̄нт тай ёмаснувег паты». Сапра̄нит ма̄хум ты яныг нэ̄пак урыл хоса потыртасыт. Евгений Платонов, природный ресурс департаментыт кӯщай хум, ла̄выс, пуссын потыртам тэ̄лат ёмащакв ханищтыяныл ос а̄ртме̄гыт ке, ты программанэ̄пакн хансыяныл.

1057 2013.08.09. Людмила ТЕТКИНА

А̄гирищитпыгрищит ӯщлахтэ̄гыт. Ня̄врамыт ӯщлахтын ва̄рмаль кӯщаит акваг ӯральтым о̄ньщияныл. Ань ты накт Ханты-Мансийск ӯст ты ва̄рмаль палт рӯпитан ма̄хмыт акванатыглаве̄сыт ос о̄выл сменат ня̄врамыт хумус ӯщлахтасыт, та урыл китыглаве̄сыт. Лӯпта э̄тпост округ янытыл 428 са̄всыр ӯщлахтын ма̄ рӯпитас, тот 28 со̄тыра 471 а̄гирищпыгрищ ӯщлахтасыт. Ты халт 120 ня̄врам этностойбищатн ялсыт. 4 со̄тыра 862 ня̄врам ща̄рыщ ва̄тан тотыглаве̄сыт. Елена Немчинова, мир ӯргалан департаментыт рӯпитан кӯщай нэ̄, ла̄выс, ӯщлахтын коныпал ня̄врамыт пӯсмалтавет. Акв тэ̄ла урыл та̄н хоса потыртасыт. Нягань ӯст о̄лнэ ӯщлахтын ма̄н акв а̄гмыӈ ня̄врам ке̄твес, хо̄тал палыт акв ма̄т о̄лым, аквъёт ёнгим 12 а̄гирищпыгрищ о̄с агмыӈыг е̄мтсыт. Тыи ма̄гсыл ка̄сыӈ ӯщлахтын ма̄т ле̄ккарыт пуссын мӯсхалыг рӯпитаӈкве ла̄вве̄сыт. Майя Соловьёва, Роспотребнадзорыт рӯпитан нэ̄, тув ёхталам кӯщаитн ла̄выс, ёмащакв вос ловиньтэ̄гыт, хоты ма̄т ос манаса̄вит ня̄врам ӯщлахты. Та̄н мир ӯргалан департаментын акв нэ̄пак ке̄тэ̄гыт, тув мо̄т нэ̄пак ёхты. Та̄н аты ва̄ганыл, манаса̄вит ня̄врам о̄выл сменат ӯщлахтасыт.

1057 2013.08.09. Людмила ТЕТКИНА

Номтыӈ ня̄врамыт Юграт о̄лэ̄гыт. Любовь Ковешникова, образование департаментыт рӯпитан кӯщай нэ̄, ля̄ххал тотнэ ма̄хум э̄лыпа̄лт ЕГЭ урыл потыртас. Ты та̄л округув янытыл 11 со̄тыра 508 а̄гитпыгыт ЕГЭ хассыт. Рущ ла̄тыӈ ос математика та̄н пуссын хансэ̄гыт, мо̄т хотты предмет та̄нки пе̄рие̄гыт. Ты та̄л 5 со̄тыра 622 ня̄врам обществознание хассыт. Ань 104 ня̄врам щар ма̄к ёмащакв ЕГЭ хассыт, 2012 та̄л туп 19 тамле ня̄врам о̄лыс. Кӯщай нэ̄ ла̄вме щирыл, ань школат ня̄врамыт мӯсхалыг ханищтавет, та̄нки ос ёмащакв ханищтахтуӈкве ка̄саще̄гыт. Ты та̄л акв пыг хӯрум экзамен 100 баллыл хассанэ. Ты мус нэ̄мхотьют тох ты экзаменыт ат хансыглас. Номтыӈ пыг ань э̄лаль ханищтахтуӈкве са̄в университетытн во̄ваве. Кӯщай нэ̄ ос акв ва̄рмаль урыл ла̄выс. Ань ЕГЭ пуссын акв ма̄н атавет, рущ ла̄тӈыл «региональный центр обработки информации» тох намаим о̄лы. Ня̄врам э̄лаль университетын манос мо̄т ханищтахтын колн туп такви нэ̄паканэ мыганэ, «свидетельство ЕГЭ» ке̄туӈкве тув ат э̄ри. Ханищтан колытт рӯпитан хо̄тпат ня̄врамыт хансум ЕГЭ нэ̄паканыл та̄нки тот сунсуӈкве ве̄рме̄гыт.

1057 2013.08.09. Николай МЕРОВ

Та̄нки рӯпата ва̄рнэ хо̄тпат ӯргалавет. Мо̄лал Ханты-Мансийск ӯст предпринимателит ёт рӯпитан кӯщай пе̄риявес. Тот нила хо̄тпа рӯпитаӈкве ка̄сащасыт: ты Юрий Кирзнер, Олег Шиян, Наталья Литвинова ос Ольга Белоножкина. Ка̄сыӈ хо̄тпа такви программатэ урыл потыртас, хумус ты ма̄хумн тав нё̄туӈкве паты. Пе̄рияп са̄ткем хо̄тал минас. Ма̄хум са̄внув нэ̄пак Ольга Белоножкина ма̄гыс та̄ратасыт. Ойттур э̄тпос юио̄выл хо̄талытт окружной совет о̄лыс. Тот малый ос средний бизнес ва̄рнэ кӯщай хо̄тпат акванатхатыгласыт. Муниципалитет кӯщаит кина суснэ то̄тап хосыт та̄н ётаныл са̄всыр ва̄рмалит урыл потыртасыт. Ты коныпал Москва ӯсныл тыг яныг кӯщай Борис Титов ёхталас, тав Президентув палт предпринимателитн нё̄тым рӯпиты. Та сапра̄нит губернатор нэ̄ Наталья Комарова йильпи кӯщаиг Ольга Белоножкина паттыстэ. Ты ма̄гыс яныг кӯщай нэ̄ э̄рнэ нэ̄пакт хасхатас. Ольга Белоножкина ла̄выс: «Ам ты э̄лыпа̄лт прокуратурат хо̄тахкем та̄л рӯпитасум. Арбитражный сутыт ма̄хумн нё̄тсум. Ос тамле тэ̄ла о̄лы, то̄ва хо̄тпат са̄кконыт ёмщакв ат ва̄ганыл. Са̄выӈпа̄лэ ты ма̄гыс та̄рвит ва̄рмаль е̄мты. Ам са̄кконыт пуссын ёмщакв ва̄ганум. Я̄нас миннэ тов щирыл рӯпата ва̄рнэ хо̄тпатн нё̄туӈкве патэ̄гум». Борис Титов кӯщай нэ̄ о̄с янытластэ. Тувыл ты сапра̄нит кӯщай хо̄тпат ос са̄всыр мо̄т тэ̄лат урыл потыртасыт.

1057 2013.08.09. Николай МЕРОВ

Я̄ӈк хӯланув са̄вмалтавет. Хультум э̄тпос 14 хо̄талэ̄т Россият хӯл алыщлан ма̄хум ялпыӈ хо̄таланыл о̄лыс. Ты природный ресурс Департамент кӯщай Евгений Платонов мирколт хӯл янмалтан ос хӯл алыщлан хо̄тпат акванатыгласанэ. Ты ва̄рмалин общинат рӯпитан хо̄тпат, хӯл са̄вмалтан заводыт рӯпитан ма̄хум ос некоммерческий организацият са̄всыр кӯщаит тув во̄виньта̄лве̄сыт. Яныг кӯщай ва̄ӈын хум Александр Киселёв ла̄выс, ань Югра ма̄т хӯл пувим 164 предприятие рӯпиты. Та̄н ка̄сыӈ та̄л 15-17 тонна я̄ӈк хӯл алыщлэ̄гыт. Мо̄лты та̄л сыс онтоловкем со̄тыра тонна хӯл пувсыт. Ос ювле хультум хӯрум та̄лытныл ты пора сака мощща хӯл катынпаттувес. Ты таима̄гыс тох е̄мтыс, ань сака са̄в хо̄тпа мори хӯл алыщлэ̄гыт. Тувыл ос акв тэ̄ла хосыт хӯланув мощщаме̄гыт, округувт ма̄щунит но̄хвивет, тыил я̄т витаныл сака па̄ӈктавет. Хӯл алыщлан ма̄хум ла̄всыт, па̄ӈкыӈ вит урыл нэ̄мхо̄т щар нэ̄матыр потыр ат о̄лыглы, тыи ос мо̄т та̄рвитыт ёлтуйтыглым о̄ньщавет. Ань матъёмас округувт хӯл са̄вмалтан завод ӯнттувес. Тот мохсаӈ, ӯсхул, ка̄рай ос мо̄т я̄ӈк хӯлыт янмалтавет. Мощ яныгманэ̄ныл юипа̄лт та̄н я̄тытн, тӯрытн та̄рталавет. Хӯл са̄вмалтан ма̄гыс 20112013 та̄лытн окружной программа пирмайтавес. Ты хосыт 2011 та̄лт хӯл янмалтан ма̄гыс 111 миллион солко̄ви, 20122013 та̄лт 120 миллион солко̄ви холтвес. Муниципалитет кӯщаит хӯл алыщлан хо̄тпатын о̄с нё̄тэ̄гыт. Тох ты та̄л 68 миллион солко̄ви са̄всыр ва̄рмалит ма̄гыс холтвес. Евгений Платонов ла̄выс: «Округ правительство кӯщаянув хӯл алыщлан ма̄хум та̄рвит в а̄ р м а л я н ы л у р ы л ва̄ганыл. Ты тэ̄лат мӯсхал щирыл щё̄питаӈкве нё̄тэ̄гыт. Югра ма̄т нот па̄лытыл тыныӈ хӯл пуваве. Таима̄гыс ты ва̄рмаль ма̄н та̄кыщ уральтаӈкве патылӯв».

1057 2013.08.09. Николай МЕРОВ

Молях ха̄йтнэ пыг. Мо̄лалнув Италия ма̄т Риета ӯст мирхал касыл о̄лыс. Ма̄н округувныл тув Павел Иващенко касуӈкве ялыс. Тав са̄всыр ма̄ныл ёхталам пыгыт ёт касыс. О̄влэ̄т ниласа̄т метра акв юипа̄лт ха̄йтым са̄ртын ёхтыс, тувыл пуссын аквторыг ха̄йталтахтынэ̄ныл порат о̄с но̄хпатыс. Ойттур э̄тпос 25 хо̄талт ты пыг Ханты-Мансийск ӯсн юв ёхталас. Павел ма̄гылн тагатан кит со̄рни по̄с тотыс. Ань тав двухкратный чемпион Европы е̄мтыс. Россия янытыл о̄лнэ ма̄ньлат хо̄тпат халт тав щар молях ха̄йты. Ты э̄лыпа̄лт Юрий Борзаковский чемпионыг о̄лыс. Павел таве̄ныл хӯрум секундан моляхнув ёхтыс. Ос таи ла̄вуӈкве э̄ри. Тав ань Сургут ӯс университетыт ханищтахты, китыт та̄л а̄стлас. Университет кӯщай пыг урыл тох ла̄выс: «Павел ханищтахтын ма̄н акваг яланты, юв ат хульты». Тав тот ханищтахтуӈкве о̄вылтахтаме порат ха̄йтыгтаӈкве патыс. Кит та̄л лёгкий атлетика щирыл Ханты-Мансийск ӯст о̄лнэ хум Владимир Власов таве ханищтас. Ты хум каснэ ва̄рмаль ёмщакв ва̄гтэ, тав хосытэ ты ма̄ньлат пыг чемпионыг е̄мтыс. Павел а̄лпыл нила щё̄ст товлыӈха̄пыл э̄лы ма̄ныл Сургут ӯсн ёхтыс. Аэропортыт ща̄нягеа̄щаге, тувыл университет кӯщай ос тав ётэ ханищтахтын а̄гитпыгыт яныг ща̄гтыл таве ӯрсаныл. Яныг нэ̄пак тагатасыт, тот тав уре̄тыл янытлан ла̄тыӈ хассыт. Ты касыл урыл та̄н хоса потыртасыт, пыг маттем та янытласаныл. Ань э̄лаль во̄ртур э̄тпос 10-18 хо̄талытт о̄с акв тамле касыл Москва ӯст щё̄питаве. «Лужники» нампа стадионт ха̄йтнэ лё̄ӈхыт ва̄рве̄сыт. Россият тамле ва̄рмаль китыт щёс тах мины. Са̄ртын 2006 та̄лт аквхуйпловит касыл щё̄пита̄лвес. Ань нилахуйпловит касыл о̄с ма̄н ма̄вт е̄мты. Павел ань тув щё̄питахты. Ма̄н таве̄н пуста̄гыл о̄лнэ ла̄тыӈ ке̄тэ̄в. Ты ка̄ркам пыгкве та касылт но̄х вос паты. Ма̄н таве сака янытлылӯв.

1058 2013.08.23. Людмила ТЕТКИНА

Рӯпатаныл по̄хын ке ке̄таве̄н, тув хансэ̄н. Элумхо̄лас сэ̄лум олнанэ ат ке ойтавет манос рӯпатаныл по̄хын ке ке̄таве, Государственный инспекцият рӯпитан хо̄тпатн хансуӈкве ро̄ви. Ты инспекция кӯщай хо̄тпаг Евгений Кривобоков о̄лы. Тав округувт рӯпитан организацият пуссын уральтыянэ. Кӯщай хум ля̄ххал т о т н э махум ёт хо̄нтхатыглас ос ты та̄л хо̄т э̄тпос сыс ва̄рум рӯпатаныл урыл потыртас. Ты пора сыс акв со̄тыра800 арыгкем э̄лумхо̄лас та̄нки ва̄рмаляныл урыл Государственный инспекциян хассыт. Ань 700 обращениенэ̄пакщирыл инспекция иӈ рӯпиты. Ты сыс 157 э̄лумхо̄лас рӯпитым сакватахтасыт, та̄нхаланылт 12 хо̄тпаа̄тимыге̄мтсыт. Ань ма̄хумрӯпатаолныл ат ке ойтавет, организацият о̄сяныгштрафолныл пинавет. Округувт ЗАО «Аган-Бурение» ос ЗАО «Нефтемонтажспецстрой» нампа ма̄трӯпитанма̄хум3-4 э̄тпосолнылатойтавет. Ань государственный инспекция хо̄тпаттот рӯпитэ̄гыт Евгений Кривобоков «Электронный инспектор» нампа акв йильпи тэ̄ла урыл потыртас та̄н палтаныл ань интернет хосыт ла̄тыӈ ке̄туӈкве манос китыглахтуӈкве ро̄ви Тыщирыл та̄н ма̄хумн моляхнув нё̄туӈкве патэ̄гыт. Кӯщай хум округувт о̄лнэ мирн тамле ла̄тыӈ ке̄тыс «Тамле та̄рвитыӈ ва̄рмаль ке о̄ньщегы̄н нас тох ул ӯнлэ̄н ма̄нпалтув ёхталэ̄н манос ла̄тыӈ хансэ̄н».

1058 2013.08.23. Валентина УЗЕЛЬ

О̄лнэ кол. Ань ка̄сыӈ та̄л ма̄н округувт о̄лнэ кол мощща ӯнттаве Ты ва̄рмаль урыл потыртан ма̄гсыл Ханты-Мансийск ӯст яныг кӯщаит акванатыглаве̄сыт Та̄н потыртасыт, маныр э̄лаль ва̄руӈкв э̄ри са̄внув о̄лнэ кол во сӯнттаве. Ты э̄лыпа̄лт округ кӯщаюв Н. Комарова тамле ла̄тыӈ ла̄выс, акв та̄л сыс 1 миллион са̄вит квадратный метра кол ӯнттуӈкв э̄ри. Ань нёлолов э̄тпос сыс округув янытыл туп 276 со̄тыра метра ӯнттыма. Дмитрий Шаповал губернатор ва̄ӈын хумыг рӯпиты, тав тох ла̄выс. Радужный ӯс, Ханты-Мансийск ӯс ос Советский районт о̄лнэ кол щар мощща ӯнттувес. Туп Югорск ӯст, Сургутский ос Октябрьский районыгт план щирыл колыт ӯнттавет. Ань та сапра̄нит та̄н нэ̄пакн хансым плананыл пуссын ёмащакв ловиньтасаныл, суссаныл, иӈ манах метра кол ӯнттуӈкв э̄ри. Ос тот та̄рапатыс, кол ӯнттын ма̄гыс сака мощща олн округ бюджетныл та̄ставе . Округувт «Союз строителей Югры» рӯпиты. Та̄н ты олныл лю̄льсаӈ мивет. Ос олн та̄л колыт хумус ӯнттуӈкв. Тувыл иӈ тамле ва̄рмаль та̄н о̄ньще̄гыт кол ӯнттын ма̄гыс ма̄ ёвтуӈкв э̄ри Вит ос ре̄г тотнэ тӯрпат тув мус хартуӈкв э̄ре̄гыт Тыи ма̄гыс о̄с са̄в олн э̄ри . Ос ты яныг кӯщай ла̄выс ты та̄л оигпан мус хультум нила э̄тпоссыс та̄н700 со̄тыра са̄вит квадратный метра кол тах ӯнттэ̄гыт акв миллион метраг тах е̄мты Мо̄лты2012 та̄лсыста̄н1 миллион. 21, 8 со̄тыра са̄вит метра ӯнттумыт.

1058 2013.08.23. Людмила ТЕТКИНА

Ле̄ккарыт палт. Александр Филимонов, мир пусмалтан Департаментыт кӯщай, ос мо̄т ле̄ккарыт ля̄ххал тотнэ хо̄тпат ёт хо̄нтхатыгласыт. Та̄н мир пӯсмалтан ва̄рмаль урыл потыртасыт. Ань ма̄хум уральтахтуӈкве ле̄ккарыт палт во̄вавет. Александр Филимонов ла̄выс: «Ма̄хманув а̄гмыл е̄мтнэ̄ныл порат туп то̄нт пӯльницан минэ̄гыт. Ань Юграт 45% хо̄тпат сым а̄гмыл а̄тимыг е̄мтэ̄гыт, 16% рака̄ г м ы л хот т а л ь щалтэ̄гыт. Пӯльницан са̄ртынув ке ёхтынувыт, а̄гманыл пусмалтаӈкв ро̄ви. Ты та̄л 15 хо̄тпа уральтахтыманыл порат рака̄гманыл хо̄нтве̄сыт. Та̄н а̄гмыл ущ е̄мтсыт, пуссын пусмалтаве̄сыт. Тыи ма̄гсыл ле̄ккар палт ва̄тихал ялуӈкв э̄ри. Ань са̄в хо̄тпат вина аим, хохса хартым ос са̄в та̄им а̄гмыл е̄мтэ̄гыт. Ты ма̄хмытын ле̄ккарыт о̄с нё̄туӈкве ве̄рме̄гыт». Та т ья н а М о г и л ь н и ц к а я , о к р у ж н о й пӯльницат рӯпитан ле̄ккар нэ̄, ты ва̄рмаль урыл ос тох ла̄выс: « У р а л ь т а х т у ӈ к в е к а̄ с а щ а н х о̄ т п а терапевтле̄ккар палт в о с м и н ы . Л е̄ к к а р таве̄н направлениенэ̄пакыт пуссын мыганэ. Акв хо̄тал сыс са̄всыр ле̄ккарыт палт ялуӈкве ро̄ви. А̄гм ке хо̄нтаве, э̄лаль уральтахтуӈкве ла̄ваве. То̄нт тай са̄внув хо̄тал э̄рмыглы. Ань федеральный са̄ккон щирыл, рӯпитан хо̄тпа пӯльницан ялнэ ма̄гсыл кӯщайн акв хо̄талн та̄ртаве. Ам номсэ̄гум, ты ва̄рмаль урыл ка̄сыӈ организация кӯщай ёмащакв ва̄гтэ. Ты «диспансеризацияг» ла̄внэ ва̄рмаль щирыл, 200 со̄тыра арыгкем хо̄тпа уральтаӈкве э̄ри. Ань туп 85 со̄тыра 490 э̄лумхо̄лас пӯльницан ёхталасыт. Округувт о̄лнэ ма̄хум, на̄нки урынт ул ёрувлэ̄н, пӯльницан ёхталэ̄н.

1058 2013.08.23. Валентина УЗЕЛЬ

Пе̄риян ва̄рмаль о̄ста ва̄раве. Сӯкыр э̄тпос 8 хо̄талэ̄т округувт то̄варайонытт ос па̄влытт пе̄риян ва̄рмаль ва̄раве. Районный манос па̄влыӈ. Советытн депутатыт ос то̄ва ма̄т па̄выл кӯщаит пе̄рияӈкв патавет . Ты ювле хультум са̄тыт избирательный комиссия кӯщай хум Андрей Павкин ос таве̄н нё̄тнэ хум Денис Корнеев потыртасы̄г ты пе̄риян ва̄рмаль кастыл та̄н ань хумус щё̄питахтасыт маныр рӯпата ва̄рсыт . Э̄лы ма̄т ос во̄рт о̄лнэ соссаӈ ма̄хум вахта щирыл рӯпитан хо̄тпат ты э̄тпос 21 хо̄талныл нэ̄пак та̄ратаӈкв тах патэ̄гыт. Та̄н палтаныл ялнэ ма̄гыс вертолётыт ман мо̄т техника миве. Сӯкыр э̄тпос 3 хо̄талэ мус досрочный голосование тах ва̄раве . Округувт 186 пе̄риянма̄ пӯнсаве. 59 па̄влытт кӯщаит пе̄рияӈкв э̄ри. Аньтув 171 хо̄тпа пе̄рияхтуӈкв ка̄сащи. Па̄выл ман район депутатыг 1 со̄тыра 145 хо̄тпа пе̄рияхтэ̄гыт ос та̄н халанылт туп 819 хо̄тпа ма̄гыс нэ̄пак та̄ратаӈкв э̄ри . Ос таи ты кӯщаиг ла̄всы̄г? ты пе̄рияхтын ма̄хум халт са̄выӈпа̄лэ ма̄хум та̄ланыл янгыт, та̄н 50 59 та̄ланыл то̄влысыт Ма̄ньлат ма̄хум мощща та̄нос 30 та̄ланыл иӈ ат то̄влысыт. Ань са̄в нэ̄ кӯщаиг ман депутатыг о̄с рӯпитаӈкв ка̄саще̄гыт.

1058 2013.08.23. Людмила ТЕТКИНА

Во̄рт о̄лнэ хантыт. Сургутский районт ань хӯрум со̄тыра арыгкем соссаӈ ма̄хум пе̄с йис щирыл о̄лэ̄гыт. Тот нефтяникыт ма̄во̄й но̄хвуим рӯпитэ̄гыт. Ханты ще̄мьят о̄лнэ ма̄т рӯпитым, та̄нанылн компенсацияолн ойтэ̄гыт, моторыл, ха̄пыл ос са̄всыр мо̄т пормасыл мыганыл. Та районт кӯщай ва̄ӈын хум Сергей Черкашин ты соссаӈ ма̄хумн нефтяникыт ёт потыртахтуӈкве нё̄ты. Районанылт 157 родовой угодия о̄лы рущ ла̄тӈыл та̄н «территории традиционного природопользования» намаим о̄лэ̄гыт. Кӯщай хум ла̄вмещирыл родовой угодият урыл постановление рӯпитам порат, Сургутский районт 107 хо̄тпа пе̄с йис ма̄наныл «родовой угодияг» хассаныл ос 50 хо̄тпа тамле нэ̄пак ань ат о̄ньще̄гыт та̄н о̄с пуссын во̄рт кос о̄лэ̄гыт. Ты э̄лыпа̄лт нефтяникыт тамле нэ̄пакытат о̄щнэ ханты ще̄мьят ёт договор хансуӈкве ос та̄нанылн нё̄туӈкве ат ка̄сащасыт Сергей Черкашин ты урыл ла̄выс «Ма̄н юристхо̄тпат ёт номсахтасӯв, маныр ва̄руӈкве ты ханты ще̄мьят о̄с воснё̄тавет Та̄н наманыл акв нэ̄пакн хассанӯв, рущ ла̄тӈыл тох намаяслӯв «список семей, ведущих традиционный образ жизни», ты нэ̄пакщирылнефтяникыт ёт ань э̄лальрӯпитэ̄в. Акв та̄рвит о̄ньще̄вма̄хманув о̄лнэ ма̄наныл та̄нки на̄нылн хансуӈкве ань ты мус ат ве̄рме̄гыт. Ты нэ̄пакыт Москва ӯст ва̄равет» . Ань округ постановление щирыл пе̄с йис ма̄т пуссын реестр нэ̄пакын хансавет. Тыхосыт кӯщаит, нефтяникыт ва̄ӈквепатэ̄гыт хоты ма̄т соссаӈ ма̄хум о̄лэ̄гыт. Ань ты рӯпата Сургутский ос Нижневартовский районыгт ва̄раве Тувыл мо̄трайонытт во̄рт о̄лнэ ще̄мьят реестр нэ̄пакн хансуӈкве патавет. Э̄лаль ты кӯщай хум тамле ва̄рмаль урыл потыртас: «Сургутский районт са̄в ще̄мья са̄лы о̄ньще̄гыт. Тыил мо̄т та̄рвит тэ̄пыӈ ма̄ ань ат то̄вылхаты. Э̄кваго̄йкаг ня̄враманэ̄н яныгме̄гыт, я̄нас о̄лмыгтэ̄гыт ос та̄нки са̄лыяныл ӯруӈкве о̄вылтахтэ̄гыт. Тыт ханты ма̄хум йис та̄гыл о̄лэ̄гыт, ка̄сыӈ ще̄мья такви са̄лы ӯрнэ ос во̄раян ма̄ о̄ньщи. Та̄н тай са̄всыр нэ̄пак та̄л ва̄гыт, хо̄т границаныл о̄лэ̄гыт. Ань ма̄ ат то̄вылхаты, хантыт та̄нки халанылт воритотэ̄гыт, ля̄втэ̄гыт, мо̄т ще̄мьят о̄лнэ ма̄н са̄лыяныл ёт воратэ̄гыт. Ты ва̄рмаль урыл Наталья Комарова, губернаторув, о̄с ёмащакв ва̄гтэ. Туи порат Сургутский районт во̄рт о̄лнэ ще̄мьят ёт хо̄нтхатыглас. Тав та̄нанылн ла̄выс, ты родовой угодият границаныл, э̄рыӈ, хотвиӈкве, ка̄сыӈ ще̄мья хоты ма̄т таӈхи, тот такви са̄лыянэ вос о̄ньщиянэ. Тыщирыл ва̄руӈкве хантыт ат ка̄сащасыт. Ань э̄лаль хумус рӯпитаӈкве, номсахтэ̄в. Ла̄выгласанӯв, са̄лыяныл акв ма̄т вос о̄ньщияныл ос мисыт хольт комбикормыл вос тыттыяныл. То̄нт ма̄ тах то̄вылхаты. Ма̄хманув ювле ла̄ве̄гыт, комбикорм акваг ёвтуӈкве са̄волнэ̄ри ты щирыл ва̄руӈкве о̄с ат артми. 2012 та̄лт туи порат са̄в во̄р на̄ин ё̄свес ос са̄лыӈ тэ̄пыӈ ма̄ мощща хультыс. То̄ва ще̄мьят о̄лнэ колт а̄лхультсыт. Ань о̄с аквты щирыл ул вос е̄мтыс ма̄н во̄рт о̄лнэ ще̄мьят огнетушителил мисанӯв. Тувыл пуссын торгамтэ̄в хунь о̄выл е̄мтапи тамле утыл нэ̄матыр ва̄руӈк ве ат а̄лыме̄гыт. Та̄н р а й о н я н ы т ы л о̄лэ̄гыт ка̄сыӈ ще̄мья по̄хыт на̄й харыгтан хо̄тпат ат рӯпитэ̄гыт ма̄шинал миӈкве о̄с ат ве̄рмиянӯв». Та районт во̄рт о̄лнэ ще̄мьят та̄л сыс акв щёсяныг сапра̄нин акван атхатыглэ̄гыт кӯщаитн та̄рвитыӈ ва̄рмаляныл урыл потыртэ̄гыт Сергей Черкашин тув ка̄сыӈ та̄л ёхталы тыи ма̄гсыл та̄н о̄лупсаныл ёма щакв ва̄гтэ.

1058 2013.08.23. Светлана РОМБАНДЕЕВА

Ня̄врамыт ханищтам хо̄тпа. Кульпас па̄вылт ня̄врамыт ханищтам ма̄хум са̄в о̄лы Та̄н халаныл такв тамле ёмас ма̄ньщи хо̄тпаУльяна Павловна Гындыбина, а̄ги о̄парищ наме Пуксикова. Лӯпта э̄тпост Кульпасн ялмум порат тав колэ̄н щалтсасум ӯнлахо̄лсуме̄н потрамасме̄н Ульяна Па̄вловна школат са̄в та̄л рӯпитас о̄выл классытт ханищтаннэ̄г о̄лыс. На̄н ань тав потре ловиньтэлын: – Ам Алы Няхлаӈ па̄вылт самын патсум 1942 та̄лт ва̄т са̄грапнал э̄тпост. Па̄влув яныг о̄лыс тот ма̄нь школа пӯльница, почта о̄лыс Са̄выӈпа̄лэ ма̄ньщи ма̄хум, э̄лылёхталам рущит о̄с о̄лсыт са̄всыр ма̄трӯ питасыт пӯльницат, школат, почтат, ла̄пкат О̄влэ̄т тот ханищтахта сум. Тувыл та юипа̄лт Кульпас школат ханищтахтасум, 1958 та̄лтшко ла а̄стласум Аквта̄люн о̄лсум Э̄лнаӈня̄в рамыт туп педучилищан ман медучилищан поступайта̄лсыт то̄ват хотьют тахсыт, Салехардын зоовет техникумын минуӈкве ка̄сащасыт Ту выл 1959 та̄лтам Ханты-Мансийск ӯс педучилищан ханищтахтуӈкве минасум. Тот нила та̄л ханищтахтасум, 1963 та̄лта̄стласум То̄нтпедучилищат ма̄ньщиня̄в рам сака са̄ва̄тимо̄лыс Ма̄н группавт тай Ха̄льӯс район ма̄ньщи ханищтахтасыт, рущ ня̄врамыт о̄с о̄лсыт. Училище а̄стласум Кимкъясуй школат нила та̄л рӯпитасум Тувыл. Сортыӈъя̄н ке̄тве̄сум, тот атхуйплов та̄л рӯпитасум. Па̄вылт интернат о̄лыс, ня̄врамыт тув са̄в ма̄ныл тотыглаве̄сыт Октябрьский районныл, Ха̄льӯс, Кульпас, Ло̄пмус, Кимкъясуй па̄влытныл о̄лсыт. Ма̄нь ня̄врамыт ханищтаӈкве а̄нум сака мӯстыс. Ханищтам ня̄враманум пуссын номиянум. Школа кӯщаиг то̄нт Докукин о̄йка о̄лыс. То̄ванакт ла̄тыӈ ат хӯнтлын ня̄врам тотаве, та̄ра ам классум та ӯнттыгпаве. Ам ла̄ве̄гум: «Ам классумт сака са̄в ня̄врам, пуссын ат ве̄ритаптыянум». Кӯщай о̄йкав ла̄ви: «Наӈ ве̄рмегын, наӈ палтын та̄н роттыг о̄лэ̄гыт! » Ня̄врамыт ляльт ам нэ̄мхуньт ат ро̄хсум, ат ля̄выльтта̄лсанум. Нас ла̄виянум, та̄н ротме̄гыт, мӯсхал щирыл ӯнлэ̄гыт, урок хӯнтлэ̄гыт. Акв щёс сака пӯмыщ о̄лыс, ам ань Рая а̄гим порат а̄гмыл о̄лсум, ат рӯпитасум. Класс журнал ам палтум о̄лыс, ань кисмаяве. Акв пыгрищ ам палтум ялуӈкве во̄вхатас, о̄парищ наме Верёвкин, э̄лы хо̄н ма̄ныл о̄лыс. Ханищтан нэ̄ нупыл ла̄вум: «Журнал ма̄гыс ам ялэ̄гум». Колумн щалтыс, сусте̄мт тамле ка̄ста̄л, ам нуплум кантыӈыщ ла̄ви: «Ульяна Павловна, манрыг наӈ ма̄нав ат ханищтылын? ! Ам таӈхе̄гум, ма̄нав наӈ вос ханищтанувлын». Ань ты хо̄тал мус таве номилум. Ущ рӯпитаӈкве патнэм порат, о̄выл ня̄врамыт сака пӯмщит о̄лсыт. Та̄н ань пуссын пенсионерыг е̄мтсыт. 1982й та̄лт школав лаппантвес, са̄всыр ма̄н ке̄твесув, хотьют Хулюмсӯнтын, Светлыйин. Ам тай Кульпасн во̄вхатасум, ма̄хманум ляпан. Омам Дарья Петровна, онтырса̄т та̄лэ то̄влуме порат а̄тимыг е̄мтыс, юио̄выл та̄ланэ̄т тав Кимкъясуй па̄вылт о̄лыс. А̄тям 1948 та̄лт хотталь щалтыс, а̄гмыӈыг о̄лыс. Каӈк о̄щсум, наме Кущта. Кит увщи о̄щсум, Соня ос Настащи. Ань та̄н пуссын а̄тимыт. Ойкам ёт Кимкъясуй па̄вылт акванхо̄нтхатсуме̄н, тав тот киномеханикыг рӯпитас, клубт кӯщаиг о̄лыс. Ты э̄лыпа̄лт Салехардыт ханищтахтас. Ме̄н нила ня̄врам о̄щсуме̄н, китгагме̄н а̄тимыг, о̄йкам о̄с а̄тим. Людам Тюмень ӯст яныг леккарыг ханищтахтас, а̄гипыг о̄ньщи. Ма̄нь пыгум Витям тыт, Кульпаст, ще̄мьятэ ёт о̄лы, ат ня̄врам о̄ньщи. Школат налыман нупыл нёлолов та̄л рӯпитасум, тувыл пенсиян минасум. Пенсиян миннэм юипа̄лт Кимкъясуй школан рӯпитаӈкве во̄выглаве̄сум, ханищтан хо̄тпаныл ня̄врам урим юн о̄лыс. Ам ка̄сащасум, та̄л арыгтем тот рӯпитасум, тувыл та по̄йтсум. Ань пенсият о̄лэ̄гум, пенсия олныл ойтавем. Пыгумн нё̄тавем, хӯлыл тотыглавем. О̄лнэ колум пе̄с, раквнэ порат витэ юв посы. Йильпи кол ӯнттын ма̄гыс субсидия олн во̄выгласум. Ювле пищмал ёхтуве̄сум, кол уртнэ кӯщаит хансэ̄гыт, ам ань кол о̄ньще̄гум, колум яныг. Пе̄с колумт тох та о̄лэ̄гум. Нас тох тай колум ёмас ма̄тӯнлы я̄ ва̄тат . Ульяна Павловна, я̄тил хо̄тпав са̄вта̄л пуста̄гыл восо̄лы На̄й О̄тыранэ̄н вос ӯргалаве.

1058 2013.08.23. Валентина УЗЕЛЬ

Та̄н ща̄нь ла̄тӈаныл. Ань соссаӈ мир ня̄врамыт ханищтаӈкв та̄рвитыӈ та̄н ща̄нь ла̄тӈаныл ат ва̄ганыл ёмас ос э̄рнэ ханищтан нэ̄пако̄с а̄тим. Нэ̄пакыт хансавет кос ос ня̄врамыт та нэ̄пакыт щирыл ханищтахтуӈкв ат ве̄рме̄гыт школа ма̄гыс та̄ щар ат а̄ртме̄гыт. Ты урыл Касум па̄вылшкола кӯщай э̄квапотыртас, тав наме Татьяна Павловна Чагина. Касум па̄вылнтав 2009 та̄лтёхтыс та̄ра школа кӯщаиг рӯпитаӈкв патыс. Тот рӯпитанэ̄тэ ань атыт та̄лыг ты е̄мтыс. Ты э̄лыпа̄лт тав Сургутский район Русскинские па̄выл школат кӯщаиг о̄лыс тувылтав ты па̄вылнте̄твес Рӯпитан та̄ланэ акванте ловиньтаӈкв, налыман та̄лт авшколат рӯпиты Ань ты школат 215 ня̄врам ханищтахты 177 – ты ханты ос ё̄рн ня̄врамыт са̄в саран ня̄врам То̄ват ща̄няныл а̄щаныл са̄лы ӯрим са̄лыӈ колт яласэ̄гыт таима̄гыса̄ гиянылпыганыл ханищтахтынэ̄ныл порат интернатт о̄лэ̄гыт Тувыл Юильск ос Нумто па̄влыгнылня̄врамыттувтотавет. Ты ма̄нь па̄влыг сака э̄лы ма̄т о̄лэ̄г школатот а̄тим Ш к о л а н ы л Татьяна Павловна такви ма̄навн суссылтастэ. Та яныг колкапай 2008 та̄лт ӯнттыма Ма̄нтот щар ка̄сыӈ кабинетн щалтсасӯв. Ханты ла̄тыӈ ханищтан кабинет, музей колнаке татем пӯмщиг ва̄римаг. Щар маныр ро̄ви ханты, ё̄рн ос саран мирыт пе̄с пормасаныл маснутаныл, алыщлапаныл пуссын тув атым о̄лэ̄гыт Ань школат 80 хо̄тпа рӯпиты, та̄н халанылт 44 хо̄тпа – ты пуссын ханты ман ё̄рн хо̄тпат. Ань па̄вылт яныгмам ма̄хум э̄лаль ханищтахтуӈкв ялэ̄гыт те, рӯпитаӈкв ювле ювыт. 53 хо̄тпа – ты та̄н па̄влыӈ ма̄хманыл. Ань 39 хо̄тпа ня̄врамыт ханищтэ̄гыт. То̄ва предметыт ханищтан ма̄гыс учитель ат твылхаты. Тит та̄л ювле хультум порат мо̄т хо̄н ла̄тыӈ, история ос рущ ла̄тыӈ ханищтан ма̄гыс специалист хо̄тпат тув во̄вве̄сыт. Акватэ Омск ӯсныл, мо̄танэ Самара ӯсныл ёхтысы̄г. Мо̄т хо̄н ла̄тӈын ня̄врамыт ань Ирина Александровна Молданован ханищтавет. Ты а̄ги Санкт-Петербург ӯст ханищтахтас. Та мо̄т мир ла̄тӈе татем ёмащакв ва̄гтэ туристыт ёхталанэ̄ныл порат тав ла̄тыӈ акваг толмащлы. Ханты ня̄врамыт ань о̄выл классныл ща̄нь ла̄тӈыл потыртаӈкв ханищтавет. Та̄н янгыщ потыртаӈкв ат ха̄сэ̄гыт. Аквтит ня̄врам туп, мо̄таныт рущ ла̄тӈыл потыртэ̄гыт. А̄щанылща̄няныл пуссын та̄нти ла̄тӈаныл ва̄ганыл, са̄лы ӯрим та̄нти ще̄мьяӈ та̄гыл та̄лэтуве во̄рт о̄лэ̄гыт. Ос матрыг ня̄враманыл ёт рущ л а̄ т ӈ ы н х а н и щ т ы яныл. Ос ла̄тыӈ ва̄нэ ня̄врамыт ханты ла̄тӈыл потыртаӈкв э̄ссамтэ̄гыт. Ханты ла̄тыӈ ханищтан нэ̄ ма̄навн ла̄выс, ня̄врамыт таима̄гыс ла̄тӈаныл ханищтаӈкв ат ка̄саще̄гыт, та̄н пуссын ла̄ве̄гыт – ханты ла̄тыӈ та̄нанылн щар ат э̄ри, нэ̄мхуньт та̄нанылн ат э̄рмыглы. Ты па̄выл школа, рущит ла̄внэ̄ныл щирыл, «экспериментальный площадкаг» ла̄ваве. Ма̄нь ня̄врамыт хо̄талъят мус ханищтахтэ̄гыт, тувыл та̄н ётаныл ат щё̄с мус воспитателит рӯпитэ̄гыт. Акв колнакт нёлолов хуйнэ ма̄ щё̄питым о̄лы. Э̄рыӈ хотты ня̄врам сака ва̄гтал паты, тав мощ хуюӈкв тот ве̄рми. То̄ва ханищтан ма̄хум ёт потыртамув порат та̄н тох ла̄всыт, ты кӯщай э̄ква рӯпитаӈкв о̄вылтахтаме порат школаныл щар ёмащакв рӯпитаӈкв патыс. Ка̄сыӈ та̄л щар матыр йильпи мебелил, мо̄т матыр э̄рнэ утыл та ёвтавет. Рӯпитаӈкв пӯмыщ, та̄н тох ла̄ве̄гыт.

1058 2013.08.23. Светлана РОМБАНДЕЕВА

Во̄ртур э̄тпос 9 хо̄талэ –ма̄ янытыл о̄лнэ соссаӈ мирыт хо̄таланыл! Ма̄ янытыл о̄лнэ соссаӈ мирыт хо̄таланыл ООН Генеральный Ассамблеят рӯпитан ма̄хум1994 та̄лт ва̄т са̄грапнал э̄тпосэ̄т ва̄руӈкве ка̄сащасыт. Ты э̄лыпа̄лт ос ты хо̄тал номылматан ма̄хум1992 та̄лт во̄ртур э̄тпос 9 хо̄талэ̄т о̄выл щёс акван хо̄нтхатыгласыт ты хо̄тал урыл потыртасыт Тувыл э̄лаль во̄ртур э̄тпос 9 хо̄талэ ма̄ янытыл о̄лнэ соссаӈ мирыт хо̄талыг та ла̄ввес. Ма̄ янытыл 70 странатт 370 миллион са̄вит соссаӈ хо̄тпа о̄лы. Халанылт та̄н ат со̄тыра ляпатем са̄всыр ла̄тӈытыл потыртэ̄гыт. Соссаӈ ма̄ху ань ты хо̄тал мус йис пора щирыл о̄лэ̄гыт о̄лнэ ма̄наныл э̄руптыяныл янытлыяныл. Ма̄витаныл во̄раныл сыстамыг о̄ньщияныл ӯйхуланыл мори ат алыщлыяныл, ӯргалым о̄ньщияныл. Мирхал наследие щирыл, соссаӈ мирыт йис пора о̄лупсанылт планетавн (о̄лнэма̄вн щарма̄кёмас тэ̄лава̄ре̄гыт? о̄лнэма̄ ӯргалым о̄ньщияныл тав ань ул вос па̄ӈктаве наска̄ссыг ул вос хилаве, хурщипыг ул вос е̄мты Ты коныпал соссаӈ мирыт культураныл, ла̄тӈаныл йис потраныл мо̄йтаныл э̄рганыл мирхал наследиян ӯргалым о̄ньщавет сака э̄руптавет янытлавет. Округувт са̄в соссаӈ мирыт о̄лэ̄гыт? ма̄ньщит хантыт ненцыт, селькупыт, эвенкыт, саамыт, шорцыт. Ос та̄н халанылт ма̄к соссаӈ мирыт? ма̄ньщит(12 со̄тыра272 хо̄тпа, хантыт(19 со̄тыра528 хо̄тпа осё̄рныт(1 со̄тыра273 хо̄тпа. Ты ма̄хумныл са̄выӈ па̄лэ Ха̄льӯс район то̄лэ̄гыт(18, 5%), Кондинский (16, 8%), Сургутский (9, 4%), Ханты-Мансийск ӯст (9, 1%), мо̄т районытыт остыгыл мощщанув ма̄хум о̄лэ̄гыт. ОКРУГ КӮЩАЮВН ЯНЫТЛАВЕСУВ. Округ кӯщаюв Наталья Комарова Югра ма̄вт о̄лнэ мир соссаӈ ма̄хум ялпыӈ хо̄таланылт янытласанэ. Мирколт рӯпитан ма̄хум рӯпатаныл щирыл акванатхатыгламаныл порат Наталья Комарова тох ла̄выс ? ООН ка̄сыӈ та̄л акв хотты ва̄рмаль ты хо̄тал кастыл щё̄питы ма̄хум тот ма̄к э̄рнэ манос та̄рвитыӈ ва̄рмаль урыл потыртэ̄гыт. 2013 та̄лт та урыл потыр о̄лыс «Ма̄ янытыл о̄лнэ соссаӈ мирыт э̄рнэ нэ̄паканыл (савсырдоговорыт) хаснэ̄ныл щё̄питанэ̄ныл ма̄гыс та̄к организацият ва̄руӈкве э̄ри» . Округувт тамле кол о̄с э̄ри ва̄руӈкве тот туп номтыӈма̄хумвос рӯпитэ̄гыт мутраӈюристытвос рӯпитэ̄гыт соссаӈ мирн э̄рнэ нэ̄пакыт хансуӈкве вос нё̄тэ̄гыт. Тыт о̄лнэ соссаӈ мир(ма̄ньщит хантыт, ё̄рныт осма̄во̄й но̄хвинэ ма̄хум то̄ванакт ла̄тӈаныл акван ат ёхтэ̄гыт Та̄нанылн нё̄туӈкве э̄ри ань акванпотыртахтуӈкве вос ве̄рмынувыт. Нё̄туӈкве патавет те то̄нт нэ̄паканыл пуссын мӯсхал щирыл хансыяныл, ёлынт хасхатэ̄гыт Тувыл тах ма̄во̄й но̄хвинэ ма̄хум соссаӈ мир ла̄палаӈкве ат ве̄рме̄гыт та̄н ётаныл мӯсхал щирыл о̄луӈкве потыртаӈкве патэ̄гыт . О̄ЙКА СА̄В ЁМАС ЛА̄ТЫӇ ЛА̄ВЫС. Округ дума кӯщай Борис Хохряков соссаӈ мирн о̄ссавёмас сымыӈ ла̄тыӈ ла̄выс: – Югра ма̄т о̄лнэ я̄тил ма̄хум ма̄н округ Думадепутатыт на̄нан ма̄ янытыл о̄лнэ соссаӈ мирыт хо̄таланылт янытлыянӯв . Йис та̄гыл ты ма̄т ма̄ньщи ос ханты ма̄хум о̄лсыт ос ань ты хо̄тал мус та̄н йис пора щирыл о̄лэ̄гыт та̄нти На̄й-О̄тыраныл янытлыяныл. Югра ма̄вт о̄лнэ соссаӈ ма̄хум Россия культуратэ ма̄гыс щар ма̄к яныг парыс тотэ̄гыт. Ты ма̄хманув ёт странав ущпылнэ̄г янытлаве, ущпылнэ̄г пӯмщиг о̄лы Таима̄гыс Думат ос округ мирколт рӯпитан хо̄тпат соссаӈ ма̄хманувн акваг нё̄тэ̄гыт? та̄н ань о̄лнэ кол вос о̄ньще̄гыт по̄х хо̄тпатын ул вос лю̄камтавет са̄всыр общинат вос ва̄ре̄гыт вос рӯпитэ̄гыт ща̄нь ла̄тӈанылт вос потыртэ̄гыт та̄нти касыланылт вос касэ̄гыт ӯйхул вос алыщлэ̄гыт. Ос мо̄т э̄рнэ ва̄рмалит палт соссаӈ ма̄хманув акваг нё̄тыянӯв та̄н ма̄гсыланыл са̄всыр са̄кконыт хансэ̄в акв та та̄ра пирмайтыянӯв . Ам номсыте̄мт ты ма̄ пе̄с йис о̄лупсатэ, йис потранэ ос мо̄йтанэ ма̄н пуссын аквъёт ӯргалаӈкве патыянӯв. Я̄тил ма̄хум пуссын пуста̄гыл о̄лэ̄н туп ёмас номт вос о̄ньщегы̄н со̄тыӈыщ щуниӈыщ о̄лэ̄н !

1058 2013.08.23. Александр ВЬЮТКИН

Па̄влыӈ ня̄врамыт ханищтан кол. Октябрьский район Лӯи Ня̄рихумит па̄вылн ялмум порат ня̄врамыт ханищтахтын колн щалтсасум, тот ва̄ӈын кӯщаиг рӯпитан нэ̄ ёт хо̄нтхатыгласум. Тав наме Елена Владимировна Максимова. Елена Владимировна а̄нумнпотыртас «Ты та̄л ма̄н Лӯи Ня̄рихумит па̄вылт о̄лнэ школав 85 та̄лэ то̄влыс Ты йильпи ёмас, кирпащил ӯнттым яныг колн 2000 та̄лт ва̄нтлысӯв. Пуссынак въёт онтырса̄т нупыл хӯрум ня̄врам тув яланты. Та̄н халанылтхо̄тпан нупыл хӯрум соссаӈ ня̄врамыт. Таима̄гсыл ма̄н школав ма̄ньщи ла̄тыӈ ханищтан колыг ловиньтахты. Ма̄ньщи ла̄тыӈ ня̄врамыт щар о̄выл классныл ханищтыяныл. Ща̄нь ла̄тӈыл потыр таӈкве Клавдия Семеновна Плеханован, тав а̄ги о̄парищ наме Яркина, ханищтавет. Яныгнув классыт а̄гит пыгыт ма̄ньщи литература урок ос округт ма̄вит ӯргалан урок ханищтэ̄гыт Пыгрищит во̄раяӈкв ос хӯлалыщ лаӈкв ханищтавет, та̄н во̄раяӈкв восха̄сэ̄гыт во̄рт хот ул вос тыпе̄гыт ос ха̄пылв ос яласэ̄гыт. Таи лю̄ль ма̄н ня̄враманув во̄рн ат тотыглыянӯв тот ма̄ ато̄ньще̄в. Та̄л сыс титаххӯрмах щёс ня̄враманув во̄рн тотыглаӈкве те, та̄нма̄гс ы л а ны л п ӯ м ы щ о̄лнӯв. А̄гирищанув«Миснэ»нампа кружокн ялантэ̄гыт ка̄тыл матыр акваг ма̄щтырлэ̄гыт. Та̄наныл Лариса Николаевна Карпенко (Хозумова) ханищты. Тот та̄н а̄канит ю̄нтэ̄гыт сакныл са̄всырхорамыт хартэ̄гыт хуритпо̄слэ̄гыт. Ма̄н па̄влыӈ ня̄враманув халанылт юртыӈыщ о̄лэ̄гыт «Ребячья республика» нампа кружок ва̄рсӯв Тувяныгнув классыт ханищт а х т ы н н я̄ врамыт ялантэ̄гыт. Са̄всыр сапра̄ни о̄лыглан порат аквписыг ёхталэ̄гыт. Ма̄нь ня̄врамытын ханищтахтуӈкв о̄с нё̄тэ̄гыт. Яныг хо̄тпат нупыл ёмас самыл сунсэ̄гыт. Тыи ма̄гыс ма̄н сыманув ща̄гтым о̄лэ̄гыт Таи туп лю̄ль ма̄ньлат ма̄хум па̄влыӈ ма̄т рӯпитаӈкв ат ка̄саще̄гыт. Мо̄лты мо̄т хо̄н ма̄ ла̄тӈыл потыртаӈкв ня̄врамыт ханищтан ма̄ньлат а̄ги ёхтыс. Тыт рӯпитанэ̄тэ моще̄ртын та̄лыг ты то̄влы. Тав, матъёмас, тыгыл сысы минуӈкв ат таӈхи».

1058 2013.08.23. Александр ВЬЮТКИН

Ва̄с па̄тлуптан пора ты ёхты. Округувт ӯйхул ӯргалан Департамент колт прессконференция о̄лыс. Алы ма̄н миннэ товлыӈ ӯит ка̄тынпаттын урыл ма̄н ётув потыртаӈкв ӯйхул ӯргалан хӯрум кӯщай ёхталасыт. Акватэ наме Юрий Васильевич Василенко, тав округув янытыл во̄рӯйхул ӯргалан кӯщаиг о̄лы Мо̄т хум наме Леонид Николаевич Перевозкин, тав Ханты-Мансийск ӯс ляпат «Имитуй» нампа ӯщлахтын ма̄ тармыл кӯщай ва̄ӈын хумыг рӯпиты. Хӯрмит хумияныл Владимир Альбертович Борноволоков, тав ос округ янытыл во̄рӯйхул ловиньтан колт ва̄ӈын кӯщаиг о̄лы. Таквсы ӯйхул ка̄тын п а т т ы н в а̄ рмаль о̄влэ̄ тво̄ртур э̄тпост са̄тхойплов хо̄талыт пӯнсуӈкв номсысыт. То̄нт мо̄ртым ма̄ нупыл миннэ товлыӈ ӯит товланылн иӈыт лапе̄гыт. Таима̄гсыл ань округувт ӯйхул ӯргалан ма̄хум во̄раян ва̄рмаль мощётылнув ла̄всаныл. Ты пора во̄ртур э̄тпос оигпан хо̄талытт та хпӯнсаве. Акв э̄т сыс нила ва̄с ос акв лӯнт па̄тамтаӈкв рови Ва̄с ма̄гсыл лицензия нэ̄пактынэ 420 солко̄ви. Ка̄тынпаттым ӯйит та̄ра лицензия нэ̄пакн хансуӈкв э̄ре̄гыт Ос во̄раян ма̄хум тот нэ̄матыр ат те хансэ̄гыт штрафыл пинавет. Акв ва̄сма̄гсыл – 900 солко̄ви лунт ос 1 со̄тыра 500 солко̄ви . Мансын, щёпыр, тисупа ос а̄ӈха ма̄гсыл во̄раян ва̄рмаль сӯкыр э̄тпос котиль хо̄талытт тах е̄мты Во̄раян сыститмансын, ат щёпыр ос акв хо̄тал сыс тит а̄ӈха ос тит тисупарищ па̄тамтаӈкв та̄ртаве . Округ янытыл ӯйхул ӯргалан ма̄гсыл ва̄т бригада рӯпиты. Та̄нанылн полиция ос казакыт нё̄тэ̄гыт. М а̄ньщи ма̄хум, во̄раян кастыл э̄рнэ нам нэ̄паканын акв писыгёт тотыглэ̄н.

1058 2013.08.23. Анна АЛГАДЬЕВА

Пусумлахтын ос ӯщлахтын ма̄. Хус ве̄рыстат Нефтеюганск ӯсныл пусумлахтын ос ӯщлахтын ма̄ о̄лы наме«Юган». Ты ма̄ «санаторияг» ла̄ваве Санаторий пунсыме̄тэ па̄сныл ва̄т та̄лыг е̄мтыс. Тыт ма̄к матыр а̄гммос хо̄нтнэ ле̄ккар а̄тим. Матарын ке а̄гмыӈ, тыг йинэ э̄лыпа̄лт хо̄т яныг ле̄ккарыӈ ма̄т суссылтахтуӈкв э̄ри. Тыт а̄ртмын хурип пусумлан пищил (процедурал) ла̄ваве̄н. Хо̄ӈха ва̄тихал а̄гмыӈ, са̄всыр витаминаӈ ща̄ил айтавет, не̄рыл тыттавет. Тур а̄гмыӈ, ка̄квполх а̄гмыӈ ма̄хум ингаляциял, тэ̄рпиӈ витуп ва̄ннал ва̄равет. Сыс а̄гмыӈ, ка̄т нак –са̄с нак а̄гмыӈ хо̄тпат сэ̄мыл исве̄щал, магнитыл исылта̄вет. Солвалыл о̄с пусумлавет. Солвалыӈ колнак о̄лы, хо̄т солвалыӈ э̄пыл щё̄с охсакем лылтуӈкв э̄ри. Пуӈк а̄гмыӈ хо̄тпат матырмат орпыл пуӈканыл оргавет. Хо̄ӈхан укол э̄ри, уколыл о̄с ва̄равет. Са̄всыр массаж, гимнастика ва̄рнэ ма̄ о̄лы. Ня̄врамыт ма̄гыс ёнгын колнак, кон тай таса̄вит са̄всыр тахсан, тятялахтын, ха̄хталахтын ут ва̄рим о̄лы. Тэ̄нэ колнак яныг, са̄всыр тэ̄нутыл ёмщакв тыттавет, о̄лнэ колнакыт сыстамыт, телевизор, холодильник, ловтхатнэ ма̄ о̄ньще̄гыт. Хӯрмит ос нилыт корпусыгт о̄лнэ ма̄хум тэ̄ӈкв мо̄т колн ялантэ̄гыт, наӈки тэ̄лал ялнэ коланыл коридорат о̄лы. Ӯщлахтын ос пусумлахтын нэ̄пак па̄влыӈ пӯльница па̄лыл миве, манос нас ёвтуӈкв о̄с ро̄ви. Ма̄нь ня̄врамыт тыг ат вивет, туп нила та̄лныл ос тыгыл янгыг о̄лнэ ня̄врамыт тыг ке̄тавет. Омата̄тят, о̄парищит, ане̄кват, пенсият о̄лнэ ма̄хум, н я̄ в р а м у р ы л о̄л н э э̄кват, пусумлахтуӈкв ос ӯщлахтуӈкв ка̄сащан хо̄тпат тыг ёхтэ̄гыт. Ӯщлахтын ма̄ сыстам во̄р кӣвырт о̄лы. Тыт пил о̄с тэ̄лы, ма̄хум такем са̄вни (пил) таим ё̄мыгтэ̄гыт. Лэ̄ӈныт, со̄врыт ха̄йтыгтэ̄гыт. С а̄ т п у ӈ к хо̄т а л т л е̄ к к а р ы т юв миныглэ̄гыт, та хо̄тал нэ̄матыр процедура а̄тим, ма̄хум нас о̄лэ̄гыт. Ӯщлахтын хо̄талытт хотталь ялнэ экскурсия ва̄раве. Итипа̄лаг йӣквнэ колнак пӯнсаве. Мо̄рсыӈыг э̄ р г ы н а р т и с т а т ёхталэ̄гыт. Тох акв хо̄тал Нефтеюганск ӯст о̄лнэ э̄ргын хум Агаев ёхталас, такем са̄в ёмас пе̄с ос йильпи хансым э̄ргыт нё̄тнэ̄г э̄ргыс. Ма̄хум маткем та хӯнтла̄сыт ос ка̄тпатта ра̄тсыт. Тох ты ма̄хум ӯщлахтэ̄гыт ос пусумлахтэ̄гыт.

1058 2013.08.23. Людмила ТЕТКИНА

Соссаӈ ма̄хум. Ты туи порат Швейцария Женева ӯст ма̄ янытыл о̄лнэ соссаӈ ма̄хум акванатхатыгласыт. Тот Организация Объединённых Наций та̄н ма̄гсыланыл ханищтап ва̄рыглас. Ты организация соссаӈ ма̄хум ва̄рмаляныл ӯральтым о̄ньщиянэ. Ты кастыл китынтыг лов та̄л(2004-2014) ты мирыт янытлан та̄лыгла̄всанэ. Ты лов та̄лыт оигпан порат 2014 та̄л Нью-Йорк ӯст мирхал конференция ва̄раве Ос лов та̄л сыс мирыт хумус нё̄тве̄сыт хумус ос э̄лаль нё̄туӈкве э̄ри тыурыл потыртаӈкве тах патэ̄гыт Та̄н та̄рвитыӈ ва̄рмаляныл урыл кӯщаит ул вос ёрувлэ̄гыт са̄всыр ялпыӈ хо̄талыт ва̄рыглавет. Ань ка̄сыӈ та̄л ре̄тыӈ юсвой э̄тпос 21 хо̄талэ ща̄нь ла̄тӈыт янытлан мирхал хо̄талыг о̄лы. Ос во̄ртур э̄тпос 9 щислат ма̄ янытыл о̄лнэ соссаӈ ма̄хум ялпыӈ хо̄талыг ла̄ваве. Ань та о̄лум ханищтапт ты организация рӯпататэ ос соссаӈ ма̄хум хумус нё̄туӈкве ве̄рмавет та урыл потыртасыт. Ма̄н округувныл Ольга Власова тув ялыс. Тав А̄с-угорский ма̄ньлат ма̄хум организацият рӯпиты. Ханты нэ̄ ла̄выс та̄н тот са̄в э̄рнэ тэ̄ла урыл хӯлтве̄сыт. Тамле организация мирн ёмащакв нё̄ты туп таи лю̄льсоссаӈ мирыт ты урыл ат ва̄гыт тыи ма̄гсылань тамле ханищтапыт ва̄рыглавет. Са̄лы ӯрнэ хо̄тпат ма̄во̄й но̄хвинэ ма̄хум ёт воритотэ̄гыт ке ла̄тӈаныл акван ат ке ёхтэ̄гыт ты та̄рвитыӈ ва̄рмаляны лурыл ООН ма̄н пищма хансуӈкве ве̄рме̄гыт. Ань тамле пищма интернет хосыт ООН Управление Верховного Комиссара по правам человека тув ке̄туӈкве www. ohchr. org э̄ри.

1058 2013.08.23. Александр ВЬЮТКИН

Ня̄врамыт ханищтан ма̄ньщи нэ̄кве. Ты хурит Лӯи-Ня̄рихумит па̄вылт ня̄врамыт ханищтахтын колт рӯпитан ма̄ньщи нэ̄ по̄слым о̄лы Тав наме Лариса Николаевна Карпенко, а̄ги о̄парище наме Хозумова. Ха̄льӯс район Хо̄рыӈпа̄вылт самын патыс. А̄тятэ наме Николай Иванович Хозумов, во̄раян ос хӯл алыщлан хумыг ма̄ньта̄гыл рӯпитас. Яныг хо̄нт о̄вылтахтам порат Николай Иванович лов та̄л яныт пыгрищиг о̄лыс. Тав ань Ханты-Мансийск ӯст Люда ма̄нь а̄гитэ палт о̄лы. Н и к о л а й И в а н о вич потре ло̄виньтэлы̄н: «Хӯл алыщлаӈкве аквписыг А̄с я̄н те̄тыглавесӯв. То̄нт хосасо р п р е з и н а ӈ со̄пак ат о̄щсӯв, таквсы а̄щирмаӈыг е̄мтнэ порат ма̄тэ по̄ляве, таима̄гсыл ла̄гланув витын тартыянӯв, тох толтыглахтасӯв. Акв щёс тӯйт патнэ э̄лыпа̄лт ма̄н хӯрум хум. Хо̄рыӈпа̄влувн оясӯв». Лариса оматэ наме Аксинья Михайловна Хозумова, тав Хо̄слох па̄вылныл о̄лыс. Оматэ о̄лме̄т хӯл алыщлас, са̄в ня̄врам янмалтас. Нэ̄гхумы̄г са̄т ня̄врам о̄щсы̄г: хӯрум а̄ги, нила пыг. Лариса Николаевна ня̄врамыт ханищтан кол Саранпа̄вылт а̄стлас. Тувыл та̄ра Ханты-Мансийск ӯсн э̄лаль ханищтахтуӈкв минас. 1993 та̄лт педагогический училище а̄стламе юипа̄лт. ЛӯиНя̄рихумит па̄вылн ня̄врамыт ханищтан нэ̄г рӯпитаӈкв те̄твес. Ты та̄л рӯпитанэ̄тэ хус та̄лыг ты то̄влыс. О̄йкатэ̄нтыл тэ̄н хӯрум ня̄врам янмалтэ̄г. Щар яныг пыге̄н наме Сергей, тав ань Ханты-Мансийск ӯст машинал яласан хумыг ханищтахты. Котиль а̄гирище̄н наме Лена. Тав нёлолов класс а̄стлас. Щар ма̄нь пити патта пыгрищ наме Вова. Ань ты во̄ртур э̄тпост хӯрум та̄лэ то̄влыс. Тамле ёмас ма̄ньщи ще̄мьян ам са̄в щуньпаща ла̄тыӈ те̄тэ̄гум. На̄й-О̄тыранылн вос ӯргалавет. А̄тяныл, о̄паныл, ащо̄каныл Николай Иванович са̄в та̄л пуста̄гыл вос о̄лы.

1058 2013.08.23. Светлана РОМБАНДЕЕВА

Кульпаст «Рахтынья» община рӯпиты. Ха̄льӯс район Кульпас па̄вылт «Рахтынья» нампа община рӯпиты. Кӯщаиг Александр Игоревич Голошубин тав о̄лы. Тот яныгса̄т арыгтем хо̄тпа рӯпитэ̄гыт. Ма̄хум янгыщ хӯл алыщлэ̄гыт. Община ла̄пка о̄ньщи, та̄лэтуве тув тэ̄нут ман са̄всыр э̄рнэ пормас тотаве, тыналаве. На̄н ань э̄лаль Александр Игоревич потре ловиньтэлын. «Рахтынья» община коныпал ос кит предприятияг рӯпитэ̄г«ИП Голошубин» ос «Северная Сосьва». О̄выл предприятияв ма̄к яныг тавты. Ма̄хум янгыщ тот рӯпитэ̄гыт яныгса̄т арыгтем хо̄тпа Хӯл алыщлан хо̄тпа ат то̄выл хаты Ань ты тэ̄лы хӯл щар мощща о̄лыс Ло̄пмус па̄вылныл онтоловхуйплов хо̄тпа акваг рӯпитэ̄гыт то̄ват ос договор щирыл вуйлыянув рӯпатаныл ва̄рияныл олныл ойтавет, тувыл по̄хан та минэ̄гыт. Кульпаст, Ло̄пмустос Кимкъясуйт хӯл п и р м а й т э̄ в. Ма̄хум хӯлпъе̄гыт хӯланыл мыганыл, олныл та̄ра ойтыянӯв. Пил, ла̄хс манос па̄квсам пирмайтэ̄в Ка̄тыл ва̄рнэ ка̄тыл щаквщин са̄всыр пормасыт ёвтэ̄в– йӣвныл ма̄щтыр лама̄ныс а̄нытсакныл хартым олнкасыт, турло̄псыт пальсакыт, нуйил ман суп ю̄нтнэ то̄рыл ю̄нтым маснут, тувыл са̄сныл ва̄рим са̄всыр хусапсовыт, со̄втыт та маныр. Ха̄пыт ма̄ньха̄пыт тӯпыт ва̄рылтэ̄в. Хӯлалыщлан ос мо̄т рӯпата ва̄рнэ ма̄хманув пусс ы н р ӯ п а т а м а с н у т ы л м а й л ы я н ӯ в . Ты та̄л хӯл мощща. Аньмунт ам Горковский (Ямало-Ненецкий автономный округ) ос Ха̄льӯс рыбзаводыгн звонита̄лсум кӯщаит ёт потыртасум. Та̄н ла̄внэ̄ныл щирыл, ань тыгыл э̄лаль китахтем та̄л хӯл ма̄ннуплув ат ёхты. Юио̄выл та̄лытт витэ ма̄нь о̄лыс хӯлыт сэ̄рнэ юипа̄лт по̄раныл ма̄ тармыл хультсыт, пум халн тэ̄лыгласыт тувто̄ссыт Ты та̄лтайвитэяныг . « Р а х т ы н ь я » о б щина кӯщаиг тамле ка̄ркам номтыӈхумта о̄лы Александр Игоревич ще̄мья о̄ньщи э̄кватэ наме Марина кит ня̄врам янмалтэ̄гэ. Ты я̄тил сымыӈ хо̄тпав ще̄мьятэ ёт пуста̄гыл вос о̄лы па̄выл ма̄хманэ̄н ос общинат рӯпитан ма̄хманэ̄н вос нё̄ты . Нэ̄гхӯлщё̄питэ̄г. Ты хурит ос ма̄ньщи нэ̄кве̄г Любовь Константиновна Кожемяка (а̄ги о̄парищ наме Волдина) ос Ольга Семеновна Хозумова (а̄ги о̄парищ наме Носкина) по̄слым о̄лэ̄г. Тэ̄н о̄с «Рахтынья» общинат рӯпитэ̄г. Хӯл щё̄питан колт пӯщкат ловтэ̄г, хӯргыт посэ̄г, хӯл пирмайтан ма̄гыс колнакыт сыстамтэ̄г. Кӯщае̄н Александр Игоревич янытлытэ̄н. Люба ос Ольга Кульпаст яныгмасыг, школа тот и а̄стласыг Люба та̄л котиль э̄тпост1969 та̄лт самын патыс Аквпыг о̄ньщи наме Никита. Ольга ва̄т са̄грапнал э̄тпост 1971 та̄лт самын патыс. Тав ос ат а̄гио̄ньщиАлена Лида Ольга, Рая ос Настя. Ты нэ̄квег Кульпас па̄влэ̄нэ̄ руптытэ̄н ла̄ве̄г па̄влэ̄н сака нё̄тнэ лылые̄пе сыстам. Са̄в йильпи колыт ӯнттуве̄сыт ня̄врамыт ёнгасан ма̄гыс яныг площадка ва̄рвес . А̄гитэ̄нуттыналы. Хурит ма̄ньщиа̄гиЮлия Павловна Радостева по̄слымо̄лы Тав«Рахтынья» община ла̄пкаттыналахтан нэ̄грӯпиты Ла̄пкатрӯпитанэ̄тэкитыт та̄лыгтыто̄влы Юлия ла̄внэ̄тэщирыл рӯпитаӈкве таве̄нмӯс ты. Кӯ щ а я н ы л А л е ксандр Игоревич Голошубин ёмас хум, матыр та̄рвитва̄рмалье̄мтапи тав аквта щё̄сёхтыгпи, нё̄тумтавет Йильпитэ̄нутва̄тихалтотаве тынаныл сака мат яныг а̄ти Юлия во̄ртурэ̄тпостсамын патыс 1989 талт. Оматэ Екатерина Савельевна, а̄гио̄парищнаме Хозумова. Юлия каӈк о̄ньщиМаксим а̄пщиигОлегосЖеня аквйӣгрищ о̄ньщи намеП а н а . Та м л е я̄ тилма̄ньщиа̄гиювще̄мьятэёт пуста̄гылвосо̄лы То̄рум ёт, О̄тырётвосо̄лы!

1058 2013.08.23. unknown

Соссаӈ мир культура Культура коренных народов Севера. Ма̄ янытыл о̄лнэ соссаӈ мир хо̄таланыл порат Ханты-Мансийск ӯст о̄лнэ ма̄ньщи ос ханты ма̄хум «Торум маа» музейт мӯйлысыт. Ань ты хуритыт та̄н по̄слым о̄лэ̄гыт.

1058 2013.08.23. Светлана РОМБАНДЕЕВА

Соссаӈ мир ялпыӈ хо̄тал. Во̄р турэ̄тпос 9 хо̄талэ ма̄ янытыл о̄лнэ соссаӈ мир хо̄талыг ла̄ввес Ханты-Мансийск ӯст «Югра» нампа колт ля̄ххал тотнэ ма̄хум акванатыглаве̄сыт. Тотань округ кӯщай ва̄ӈынхум ёт рӯпитан нэ̄ Людмила Александровна Алферова ос «Союз общин коренных малочисленных народов Севера» нампа организация кӯщай хум Олег Густавович Шатин соссаӈ мир хо̄тал урыл потыртасыг. О̄выл ла̄тыӈ Людмила Александровна тав ла̄выс. – Округт о̄лнэ мир ты ялпыӈ хо̄талыл ам пуссын янытлыянум. Тыт ань 31 со̄тыра арыгтем соссаӈ хо̄тпа о̄лы. Округув янытыл та хо̄талт 181 ӯсытт ос па̄влытт ма̄хум мӯйлысыт. Нижневартовский районт 16 ма̄т ма̄хум мӯйлысыт Нягань ӯст 8, Октябрьский районт 10, Ханты-Мансийск ӯст 11, Ха̄льӯс районт 16, Советский районт 6 ос мо̄т са̄в ма̄т маттем та мӯйлысыт. Ты я л п ы ӈ хо̄тал ва̄руӈкве са̄в ма̄хум с а̄ в организацият вуйхата̄лсытбиблиотекат, культура центрыт, школат, туи порат ва̄рыглан ня̄врамыт площадканыл, кина ва̄рнэ центрыт этнографический музеит. Са̄всыр выставкат ва̄рыглаве̄сыт касылыт ёнгилыт, экскурсият. Ма̄хум матыр ю̄нтуӈкве м а н ща к в щ у ӈ к в е ханищтаве̄сыт Сургутский ос Нижневартовский районыгт о̄лнэ соссаӈ ма̄хманув ма̄щтыр лаӈкве сака ха̄сэ̄гыт са̄всыр мастерклассыт ва̄ти хал ва̄рыглэ̄гыт яныг хо̄тпат ос ня̄врамыт ханищтэ̄гыт. Хотьют ка̄сащас хотьют ве̄рмыс тав та мӯйлыс. Ха̄льӯс па̄вылт кит экскурсия ва̄рыглавесы̄г акватэ тох намая̄лвес «Я творчество своё народу посвятил». Тот ань ма̄н ма̄ньщи хо̄тпав Пе̄тр Ефимович Шешкин ва̄рум рӯпатанэ мирн суссылтаве̄сыт. Китыт экскурсия «Гармония и мир», тот ос ханты о̄йка Митрофан Алексеевич Тебетев ка̄тыл по̄слум хуриянэ суссылтаве̄сыт Ха̄льӯсрайон Восыӈтӯр па̄вылт «Этот великий Юван» выставка ва̄рыглавес ма̄хум библиотека такванатхатыгласыт, ма̄ньщи хо̄тпав Юван Николаевич Шесталов урыл потыртасыт. Та ялпыӈ хо̄талт ка̄сыӈ ма̄т ма̄хум ма̄ньщи ос ханты хо̄тпанув урыл потыртасыт, хотьют такви мире ма̄гыс ща̄нь ла̄тӈе ма̄гыс са̄в ёмас тэ̄ла ва̄рыс . О к р у г у в я н ы т ы л ка̄сыӈ районт-Советский, Октябрьский, Кондинский, Сургутский . , ка̄сыӈ ӯст са̄в выставкат ва̄рыглаве̄сыт то̄ваныл тох намая̄лве̄сыт «Радуга традиций», «Родинки народные», «Край мой гордость моя», «Приглашают в гости угры», «Под открытым зонтиком добра», «У нас единая семья», «Народов малых не бывает», «Язык моих предков угаснуть не должен». Сунсэ̄н ань ты выставкат наманыл щирыл на̄ӈки хумус ма̄хум та̄нти о̄лнэ ма̄наныл э̄руптыяныл ка̄сыӈ мир ка̄сыӈ ла̄тыӈ янытлыяныл. Ня̄врамыт мощ с у с сыт, т у в ы л т а х ла̄щмарт та̄нти о̄лнэ ма̄наныл э̄руптаӈкве ханищтахтэ̄гыт ща̄нь ла̄тӈаныл янытлаӈкве патыяныл, йис пора о̄лупса урыл ва̄ӈкве патэ̄гыт . Ханты-Мансийск ӯст ос «То̄рум маа» музейт ма̄хманув акванатхатыгласыт, тот са̄всыр касылыт ва̄рыглаве̄сыт артистанув э̄ргысыт ос йӣквсыт. Клуб колт ханты мир урыл «Красный лёд» нампа кина суссылтавес, библиотекат «Сохраняя культуру и традиции» выставка ва̄рыглавес Ремёсла центр «Река, лодка, жизнь» нампа выставкан ос ма̄хум во̄ртур э̄тпос сыс ялуӈкве ве̄рме̄гыт . Людмила Александровна тох та потыртас. Тав юипа̄лэ̄тос Шатин хум ла̄тыӈ вис Тав ля̄ххал тотнэ хо̄тпатын общинат ва̄рмаляныл урыл китыглавес. Олег Густавович тай сака хоса потыртас, ам туп потырохс атэ нэ̄пакын хансыслум, на̄н ань ловиньтэлы̄н О к р у г у в т а н ь 102 община рӯпиты, нёлса̄т арыгтем государствавн нё̄тавет. Налыман общинат хӯл алыщлэ̄гыт то̄ват ос во̄руй алыщлэ̄гыт пил ла̄хсатэ̄гыт щё̄питэ̄гыт 2012 та̄лсыс общинат кит со̄тыра са̄вит тон на хӯл пувсыт. То̄ват та̄нти хӯл щё̄питэ̄гыт солвалтэ̄ыт тыналэ̄гыт . Кондинский районт «Карым» община о̄лы кӯщаиг тот Евгений Александрович Вахрушев тав рӯпиты. Ты сака ёмас, ка̄ркам о̄йка АВ Филипенко рӯпитаме порат Евгений Александрович о̄лнэ ма̄тэ̄н ялум та юи па̄лт таве̄н хӯл щё̄питан кол ӯнттуӈкве нё̄тыс. Ты кол сака тыныӈ, хӯл щё̄питан (яктынман солвалтан) ма̄гыс са̄всыр колнакт(цехыт) о̄ньщи Ань Евгений Александрович общинатэ рӯпиты, ма̄хум та̄нти ма̄гсыланыл олн та̄нти сэ̄лэ̄гыт. Мо̄тма̄т (Советский, Октябрьский, Ханты-Мансийский ос мо̄т районытт ма̄хум о̄с аквты щирыл рӯпитэ̄гыт олн сэ̄лэ̄гыт. Тамле номтыӈ, ка̄ркам ма̄хум са̄в вос о̄лнув. Кӯщаянув ма̄навнакваг нё̄тэ̄гыт Са̄вёмасла̄тыӈ пӯмащипала̄тыӈА. В. Филипенкан ос Н. В. Комарован ла̄ве̄в Наталья Владимировна округ янытыл улпыл ка̄сыӈпа̄вылто̄лыс. Мо̄рсыӈ кӯщай тох яласы, ма̄хум уральтыянэ, хумус о̄лэ̄гыт матыр та̄рвит о̄ньще̄гыт ман а̄ти. Олег Густавович ос та урыл ла̄выс, ань округт о̄лнэ ханты ос ма̄ньщи ма̄хум лувыт о̄ньщуӈкве патэ̄гыт. Лув о̄щнэ, лув янмалтан ма̄гыс та̄н ань ма̄ кинсэ̄гыт, ма̄ щё̄питэ̄гыт. Аквкит ла̄тыӈ туризм урыл ла̄выс. М а̄ х у м э̄ л ы х о̄ н ма̄ныл округувн вос ёхталэ̄гыт, тыт округув янытыл вос яласэ̄гыт, вос ӯщлахтэ̄гыт, соссаӈ мир о̄лупсанылт вос пӯмщалахтэ̄гыт. Хотьют ка̄сащи, хӯл вос алыщлы, вос во̄райи. Ты хум ла̄внэ̄тэ щирыл, ань турист ма̄хум тыг ёхталанэ̄ныл кастыл са̄в рӯпата ва̄руӈкве э̄ри, о̄лнэ колыт та маныр ӯнттуӈкве э̄ри.

1058 2013.08.23. Светлана РОМБАНДЕЕВА

Ма̄хум маттем та мӯйлысыт. Ханты-Мансийск ӯст «Торум маа» музейт ма̄ янытыл о̄лнэ соссаӈ мирыт ялпыӈ хо̄тал ва̄рыглавес Тув са̄в мир атхатыгласяныг кӯщаит о̄лсыт э̄ргын ос йӣквнэ ма̄хум яныгхо̄тпат ня̄врамыт. Яныг сцена ва̄рыглавес тот артистанув ма̄ньщи ос ханты э̄ргыт э̄ргысыт йӣквсыт са̄всыр пӯмыщ сценкат суссылтасыт о̄щхульласыт. Тувыл пе̄с ма̄хманув хольт кассытсув тыньщаӈ нумпа̄лн ре̄пыгтасыт са̄грап ос ня̄л па̄хвтысыт са̄лыӈ сун ӯлтта поргысыт. Ня̄врамаквет тот щар ща̄гтым кассыт та̄нанылн ня̄л па̄хвтуӈкве ман поргащлаӈкве атхунь пӯмыщ. Но̄хпатум ма̄хум пуссын почётный грамотатыл ос мӯйлупсатыл майве̄сыт. Ялпыӈ хо̄тал оигпаме э̄лыпа̄лт мӯй ма̄хум хӯл исмит ос исум ща̄й айсыт со̄ламат тэ̄сыт.

1058 2013.08.23. Александр ВЬЮТКИН

Нё̄рн ялнэ пӯмащ. Ты тув «Ма̄нь ӯскве» ня̄врамыт Нё̄рн тотыглан ма̄гсыл олн ат та̄стлавес. Та пе̄нтсыл ма̄нти Нё̄рт ӯщлахтан хо̄талыт ва̄рыгласӯв. Пуссын аквъёт титхойплов хо̄тпа о̄лсӯв. Нё̄рыт мус ма̄нав тотнэ ма̄шина ёт ос тэ̄нут ёвтнэ ма̄гсыл ма̄н акванпинхатам олныл ойтхатсӯв. Сменав Луссуп нё̄р мус ялнэ щирыл о̄лыс. Ойттур э̄тпос котиль хо̄талт Саранпа̄вылныл Торговый я̄ нупылма̄няныг колёсаӈ ма̄шинал Р. Р. С е м я ш к и н ы н тотвесӯв. Тав ма̄навн Пуйва я̄ ляпат о̄лнэ урнумпа̄лн туп тотуӈкве ве̄рмыстэ. Тувыл э̄лаль ма̄н яныг хӯнтхӯргыл хӯнтхатым Торговый я̄ нупыл та ё̄мсӯв . Э̄ти титхойплов щё̄с порат палаткат ӯнттын ма̄н ущта ёхтысӯв. Я̄ ва̄тат э̄тхӯлымав тэ̄пъяласӯв Л. П. Стаканова ос щар ма̄нь пыгрищ Коля Семяшкин тот хультуӈкв ка̄сащасы̄г. Ма̄нос э̄лаль Коми р е с п у бл и к а н у п ы л о̄внэ Патак ма̄нь я̄рищ ва̄тан ва̄глысӯв. Палаткат ӯнттымав юипа̄лтме̄н Володя Меров ёт кумхӯл нясыл пувуӈкв мощщаквен ялсуме̄н Ловмантем минута сыс хӯрумхойплов хӯл па̄г харттысме̄н. Ань тот ма̄нь Патак я̄т нэ̄мхотьют ат ня̄слыглы таима̄гсыл тот хӯлэ са̄в пуссынянгыт ос во̄йиӈыт. Мо̄т а̄лпыл онтолов щё̄с порат я̄ ло̄ӈхаль Луссуп нё̄р нупыл э̄лаль минмыгтасӯв. Тувыл э̄лалье̄ри яныг а̄хвтасы ма̄н е̄мтсӯв тамлема̄ щирыл ё̄муӈкв лю̄ль. Ты коныпал ре̄гыӈ хо̄талт тамле ё̄мнэ ма̄т ва̄гтал патсӯв. Хо̄тыл тэ̄нэ ма̄гсыл ма̄н я̄ ва̄тан ва̄глысӯв. Тэнэ̄в юипа̄лт я̄ ва̄татэ хосыт ё̄мсӯв. Акваг те тох ё̄муӈкве ма̄н э̄типа̄лаг Луссуп нё̄р мус ёхтуӈкв а̄лыманувӯв. Тот ё̄мимавт хо̄талув тул са̄йн та па̄тырас Э̄типа̄лаг ос раквуӈкв о̄вылтахтас . Ракв витын та̄рапосвесӯв. Э̄лаль ё̄мнэ̄в порат а̄хвтасыт раквыл ёсыманыл юипа̄лт ла̄гыл паттат хислуӈкв патсыт. Таима̄гсыл ма̄н тот э̄т хӯлуӈкв хультсӯв Палатканув ӯнттысанӯв, тувыл ме̄н Сергей Стаканов ёт няслуӈкв ялсуме̄н. Х ӯ л т о т ы м а м е̄ нт, ма̄хманув та̄ра хӯл исмит па̄йтнэ ма̄гсыл пӯта̄ращ нумпа̄лын тагатасыт. Во̄рыт ма̄н нёлолов хо̄тал о̄лымавт ка̄сыӈ хо̄тал хӯл та̄л тэ̄ӈкв щар ат ӯнтсасӯв. Ка̄сыӈ е̄мт тэ̄нэ̄в порат солвалыл расалтым хӯл, ня̄рхӯл, па̄йтым ос а̄ращ посымыт во̄сытым кумхӯл пасаныт о̄лыс. Нас тыи ма̄гсыл. Нё̄рын ялуӈкв р о̄ в и . Ё т т от ы гл а м тэ̄нутанув са̄выӈпа̄лэ нас тох хультсыт. Тот э̄т хӯлымав юипа̄лт о̄выл э̄т хӯлнэ ма̄ нупыл минмыгтасӯв. Ювле о̄с тит хо̄тал ё̄мсӯв. Торговый я̄н ёхтумувт Любовь Павловна Колятэ̄нтыл ма̄навн ла̄всы̄г, тэ̄н иӈ тит хо̄тал ӯрхатуӈкв номсысы̄г. Ма̄н Луссуп нё̄р нумпа̄лын ат ялсӯв, т а и м а̄ г с ы л с а̄ р т ы нёхтысӯв. Тот ма̄н нас ӯщлахтым, иӈ тит хо̄тал о̄лсӯв. Ре̄гыӈ хо̄талыӈ хо̄талыт лё̄мво̄й та̄л о̄лсыт. Хо̄тал палыт самвит хольт сыстам. Торговый я̄ витыт пувлысӯв. Юио̄выл хо̄талувт Саранпа̄выл нупыл о̄с аквта лё̄ӈхыл ювле минасӯв.

1058 2013.08.23. Людмила ТЕТКИНА

Ма̄ньлат хо̄тпат акванатхатыгласыт. Финляндия ма̄т Хельсинки ӯст финноугорский ма̄ньлат ма̄хум XI мирхал Конгрессаныл рӯпитас. Эстонияныл, Финляндияныл ос Россия янытыл о̄лнэ яныгса̄т арыгкем хо̄тпа тот акванатхатыгласыт. Ма̄н округувныл Ольга Власова, Алла Иштимирова-Посохова ос Ирина Самсонова тув ялсыт. Конгресс о̄вылтахтам порат о̄влэ̄т Василий Немечкин, финноугорский ма̄ньлат хо̄тпат Ассоциацият кӯщай хум, кит та̄л сыс ва̄рум рӯпатаныл урыл потыртас. Ты юипа̄лт ка̄сыӈ финноугорский регион маныр рӯпата ва̄рыс, та урыл ла̄выс. Ма̄н округувт ма̄ньщит ос хантыт пе̄с йис о̄лупса но̄хво̄рмалтан ма̄гсыл манхурип рӯпата ма̄хум ва̄ре̄гыт, ты урыл Ольга Власова ос Алла Иштимирова-Посохова потыртасы̄г. Тэ̄н «Сохраним язык в семье», «Развитие традиционных видов спорта», «Информационнопознавательный этножурнал» ос са̄в мо̄т проектыт урыл тот потыртасы̄г. Ма̄ньлат хо̄тпат мирхал ассоциацияныл хосат та̄гыл рӯпиты. Ос акваг са̄в ма̄хум тув пирмайтаве. Конгресс о̄лум порат 13 финноугорский организацият тув хасхатуӈкве ка̄сащасыт. Ты организацият Финляндият, Эстоният, Мурманский областьт, Санкт-Петербург ос Москва ӯсыгт рӯпитэ̄гыт, та̄н о̄с пуссын тув хасве̄сыт. Китыт хо̄талт ма̄хум хӯрум секциян ла̄кквауртхатым рӯпитасыт. Акв секцият хансум проектаныл урыл потыртасыт. Та̄н са̄всыр йильпи тэ̄лат ва̄руӈкве номылматэ̄гыт. Финноугорский рокфестиваль ва̄руӈкве, тувыл интернет сайт щирыл са̄всыр мирыт пе̄с пормасаныл тыналаӈкве, са̄всыр словарит та̄ратаӈкве, ты коныпал «Финноугр года» касыл ва̄рыглаӈкве таӈхе̄гыт. Ос са̄в мо̄т фестивалит, ханищтапыт ос йильпи ва̄рмалит та̄нки рекомендациянэ̄пакн хассаныл. Мо̄т секцият ос ООН ос ЮНЕСКО ма̄т ты мирхал ассоциация хумус э̄лаль рӯпитаӈкве паты, ты урыл потыртасыт. 2014 та̄лт я̄ӈк на̄тнэ э̄тпост ООН ма̄т форум рӯпитанэ̄тэ порат ма̄ньлат хо̄тпат ассоциация ос финноугорский ма̄хум янытлан хо̄талыт ва̄рыглаӈкве номсы. Ос та юипа̄лт ма̄хум йильпи президентхо̄тпа ос МАФУН правлениет рӯпитан ма̄гыс йильпи э̄лумхо̄ласыт пе̄риясыт. Ма̄н округувныл Алла ИштимироваПосохова тот рӯпитаӈкве паты. Президентхо̄тпаг хӯрум хо̄тпат Сампса Холопайнен (Финляндия), Норманн Лангерак (Финляндия) ос Лаур Лехмус (Эстония) рӯпитаӈкве ка̄сащасыт. Са̄внув хо̄тпа Сампса Холопайнен ма̄гсыл катпос пинсыт. Тав ань э̄лаль кит та̄л сыс ты Ассоциацият президентыг рӯпитаӈкве паты. Россияныл кит хо̄тпаг Яна Сажина ос Василий Немечкин президент ва̄ӈын хо̄тпаг пе̄риявесы̄г. Эстония, Коми республика ос Санкт-П е т е р бу р г ӯс х а л т XII мирхал Конгресс рӯпитан ма̄ пе̄риявес. Мо̄тыт щёс ма̄ньлат хо̄тпат Эстоният акван тах атхатыглэ̄гыт. Ты та̄л сыс финноугорский ма̄т халт «Культурная столица финноугорского мира» нампа касыл ва̄рыглавес. Тув 8 заявканэ̄пак ке̄тыглымат, та̄н халанылт туп хӯрум проект пе̄риявес: Вешкелица па̄выл (Коми Республика), Обиница па̄выл (Эстония) ос Старые Быги па̄выл (Удмуртия). Конгресс оигпам э̄лыпа̄лт ос ты касылт но̄хпатум Старые Быги па̄выл ла̄ввес. Ань Удмуртия ма̄т о̄лнэ ты па̄вылкве «Культурная столица финноугорского мира» нам о̄ньщи.

1058 2013.08.23. Тамара МЕРОВА

Яныг ӯсн о̄лмыгтам э̄ква. Ягрим па̄вылт ам Глафира Васильевна Саратина ёт ва̄щинтахтасум. Ме̄н хосат та̄гыл ва̄йхатыме̄н кос, ос ам туп Анатолий Константинович о̄йкатэ урыл хансыгласум. О̄йкатэ хосат а̄тимыг е̄мтум. Ам ань э̄ква такви о̄лупсатэ урыл китыгласлум. Глафира Васильевна тох потыртас: Ам Алы Нярихумит па̄вылт самын патсум тот яныгмасум. Школа а̄стламум порат Ханты-Мансийскан минасум, тот 1954-1958 та̄лытт педучилищат ханищтахтасум. Тувыл кит та̄л Сургутский районт во̄рт о̄лнэ ня̄врамыт о̄вылт классыт ханищтасанум. Ты юипа̄лтЛенинград ӯсн А. И. Герцен нампа институтн э̄лаль ханищтахтуӈкве ке̄тве̄сум. Тот 1960-1965 та̄лыт сыс ханищтахтасум. Педагогический институт а̄стламумпорат Ягримн ёхтысум, тыг та о̄лмыгтасум. Тот колыл майве̄сум колумт ащирмаӈ, вит тотуӈкве о̄сэ̄рыс. Школат са̄в тэ̄ла юв ёхтэ̄гум колсори рӯпатат ва̄риянум. Тетрадкат сунсуӈкве щар э̄типа̄лаг ӯнтэ̄гум кӯр па̄лтта̄л ёлӯнтэ̄гум ке, ка̄тагум тувполяве̄г нэ̄матыр хансуӈкве ат ве̄рме̄гум. Тувыл па̄влыӈ а̄гииг Надя Саратина ос Валя Ульянова ёт юрщхатасум, акваг акваннё̄т хатсӯв. Тэ̄лы Надя Саратина а̄нум такви палтэ о̄луӈкве во̄выстэ . Тэ̄н каӈке̄т тэ̄нки колэ̄нт о̄лсы̄г. Тув ёхтэ̄гын коланыл акваг ре̄гыӈ по сыӈ. Амкина̄мн ка̄сыӈ хо̄тал кӯр па̄лтуӈкве вит тотуӈкве ат э̄рыс ёмас. Тэ̄гув ос тетрадканум сунсуӈкве та̄ра та ӯнтылматэ̄гум Надя Анатолий каӈке ёт ва̄йхатсум тувыл нэ̄г татотве̄сум. О̄йка ме̄нтыл а̄ги ос пыг янмалтасме̄н. А̄гиме̄н Марина Марьямова Тюмень ӯст о̄лы бухгалтер кӯщаиг рӯпиты. Пыгме̄н Алексей Миасс ӯст о̄лмыгтас рынкан нё̄выль ма̄шинал тотыглы. Ам о̄йкам а̄тимыг е̄мтме юипа̄лт Тюмень ӯсн о̄с ва̄нтлысум. Анатолий Константинович са̄вта̄л «Игримгаз» колт рӯпитас, ме̄н тувыл квартирал майвесме̄н. 2007 та̄лт тув о̄лмыгтасум ла̄щмарт ӯсн ханьщувласум. Тюменит «Югра» нампа организация о̄лы тот са̄в хо̄тпат акван атхатыглэ̄гыт. Пуссын пенсиян патхатам ма̄хум, округув янытыл хо̄та̄ти рӯпитасыт. Та̄н са̄всыр ялпыӈ хо̄талыт ва̄рыглэ̄гыт аквъёт матыр пормасыт сагуӈкве, маснут ю̄нтуӈкве манос э̄ргуӈкве акван хо̄нтхатыглэ̄гыт «Строитель» нампа культура колн о̄сялантэ̄гум. Тот Любовь Собянина ханты ос ма̄ньщи ма̄хум акванатыглыянэ. Тувыл «Миснэ» нампа э̄ргынкружокт э̄рге̄гум Ма̄н са̄всыр ялпыӈ хо̄талыт э̄ргуӈкве во̄виньта̄лаве̄в. Таима̄гыс яныгпа̄ла хо̄тпат театрын ялнэ ма̄гыс олнта̄л билетыл мивет. Та щирыл ма̄н сыресыр спектаклит сунсуӈкве ве̄рме̄в. Сэ̄тапыл сагим пормасанув савалап ня̄врам колын ёвтавет манос мо̄т матумпа̄ла хо̄тпатын майлавет. Тувыл Галина Проскурякова «Посиделки» нампа кружок ва̄рыс. Ма̄н тот ма̄нкио̄щнэ хансаӈ супыт ю̄н туӈкве ханищтахтэ̄в. Марщумлаӈкве ат а̄лы ме̄в акваг матыр а̄ти ва̄рыглэ̄в. Поравакв ты щёс мины. Ам ос ка̄сыӈ туи тыг Я̄гримн ёхталэ̄гум. Надежда Констатиновна палт мощ о̄лэ̄гум. Нярихуми лӯи па̄вылн рӯтанум палт ялапа̄лэ̄гум ос ювлеӯсн та минэ̄гум. Наӈ на̄нки омагына̄тягын урыл о̄с мощ потыртэ̄н Ам амки о̄парищн а м у м Е н и з о р о в а о̄лыс А̄щум Василий Мануйлович Енизоров хо̄нтлуӈкве тотыг лавес а̄гмыӈмосыӈыг ювёхтыс. Вежакоры ос Мулигорт колхозыт председателиг пе̄риявес рӯпитас Тот хӯл алыщлан артелит о̄лсыт Омам Евдокия Ивановна Паштор па̄вылныл о̄лыс тав са̄ртын а̄тимыг е̄мтыс. Омагума̄тягум хӯрум пыг ос акв а̄гио̄щсы̄г янмалтасы̄г. П ӯ м а щ ӣ п а . Ам ва̄глум наӈ налыман та̄л школат рӯпитасын са̄в ня̄врам ханищтасын. Ты та̄л ма̄ньполь э̄тпост 75 та̄лын то̄влыс. Ма̄н газетат рӯпитан хо̄тпат наӈын янытлылӯв! Пуста̄гыл э̄лаль о̄луӈкве ла̄вилӯв, са̄в сымыӈ хо̄тпа ляпат вос о̄лэ̄гыт а̄гин пыгын ос апганын ӯргалым вос о̄ньщаве̄н. Ханищтан ня̄врамытн акваг вос номавен, матыр номт о̄ньще̄гынке тэ̄лагвосе̄мты. Пуска̄т пус ла̄гыл. То̄румёт О̄тырёт.

1059 2013.09.06. Анна АЛГАДЬЕВА

Ханищтахтын та̄л ты о̄вылтахтас. Сӯкыр э̄тпос о̄выл хо̄талэ та ёхтыс. Ка̄сыӈ школа а̄висӯнтэ я̄ӈк бантыл сагхатым, формал ос костюмыл масхатым, хорамыӈ, щё̄риӈ ка̄тыӈ ня̄врамытыл та та̄гиньты. Ты хо̄тал о̄выл та̄л ха нищтахтуӈкв миннэ ня̄врамыт ма̄к ща̄гтэ̄гыт. Ты хо̄тал та̄н сака ӯрияныл. Ӯрхатэ̄гыт, хунь о̄выл щёс школан щалтэ̄гыт, парта ва̄тан ӯнтэ̄гыт. Ха̄льӯс район Хулюмсӯнт па̄выл школан ты та̄л са̄в ма̄ньщи ня̄врам о̄выл классн минас. Школав ханищтахтын кастыл атнув а̄стыс. Таима̄гыс ханищтан хо̄тпат, ня̄врамыт, ща̄нита̄щит ос мо̄т рӯтыт пуссын ты хо̄тал ФОК кол а̄висӯнтын атхатыгла̄лсыт. Ишкола директор нэ̄ Г. В. Третьякова ня̄врамыт школат рӯпитан хо̄тпанэ ос тыг атхатыглам ма̄хум пуссын янытласанэ, ёмщакв рӯпитан хо̄тпат грамотал мӯйлуптасанэ ос о̄выл та̄л ханищтахтуӈкв ёхтум ня̄врамыт нупыл тох ла̄выс: «Ка̄сыӈ школа кӣвырт хащта̄л нак о̄лы, рущ ла̄внэ щирыл – чудо. Ма̄нки ханищтахтын колувт о̄с тамле хащта̄л нак о̄лы. Ты хащта̄л нак ка̄сыӈ хо̄тал на̄нан ӯритэ. Ка̄сыӈ хо̄тал на̄н йильпи номт пуӈкын выгын, тувыл ты номтанын ка̄сыӈ та̄лыл са̄выг атыяны̄н. (Тыячудагтыла̄ваве. ) Ты ка̄сыӈ хо̄тал ханищтан номтын та̄кыщ пуӈкын ке вуйхаты, нэ̄мхуньт нэ̄матхотьютн хотвиӈкв ат ве̄рмаве » Со̄ль, ёмащакв ханищтахтын ня̄врам нотэ палытыл номтыӈыг о̄луӈкв паты . Ханищтахтын та̄л о̄вылтахтас. Пуссын ханищтахтын ня̄врамыт посыӈ номтыл ёмащакв вос ханищтахтэ̄гыт, ханищтан хо̄тпаныл ла̄тыӈ вос хӯнтлэ̄гыт, халанылт ёмащакв вос торгамтахтэ̄гыт. Ханищтан хо̄тпат ос ня̄врамыт палт рӯпитан ма̄хум та̄ксарыг ос ёмас номтыл вос рӯпитэ̄гыт, пуста̄гыл вос о̄лэ̄гыт» .

1059 2013.09.06. Людмила ТЕТКИНА

Округ губернаторув Наталья Комарова Юграт. Округ губернаторув Наталья Комарова Юграт о̄лнэ мир сӯкыр э̄тпос о̄выл ханищтахтын хо̄талыл ня̄врамыт, та̄н ща̄няныла̄щаныл ос ма̄во̄й, газ но̄хвинэ хо̄тпат хо̄талыл янытласанэ. Яныг кӯщай нэ̄ ла̄выс. «Ты та̄л кит ялпыӈ хо̄талы̄г акв хо̄талн е̄мтсы̄г. Ос ма̄в янытыл ма̄хум акв хо̄талт мӯйлысыт. Ты э̄лыпа̄лт ма̄во̄й ос газкиснэ хо̄тпат ка̄ркамыг тыт рӯпитасыт, та̄н нупыланыл сунсым ма̄но̄с ка̄ркамыг рӯпитаӈкве ханищтахтэ̄в. Ветеранхо̄тпат ос ань нефть ос газ но̄хвинэ ма̄хум пуста̄гыл э̄лаль о̄луӈкве ла̄виянум. Ханищтан хо̄тпат, школан миннэ ня̄врамытын ос та̄н ща̄няныла̄щаныл са̄в ёмас ла̄тӈыл ке̄тыянум ос са̄в сымыӈ ла̄тыӈ ла̄ве̄гум».

1059 2013.09.06. Людмила ТЕТКИНА

Я̄тил ня̄врамыт, ханищтан хо̄тпат, ща̄нита̄щит! Я̄тил ня̄врамыт, ханищтан хо̄тпат, ща̄нита̄щит! Округ Думат рӯпитан депутатыт ос ам на̄нанн о̄выл ханищтахтын хо̄талыл янытлыянӯв. Сӯкыр э̄тпос о̄выл хо̄талт та ма̄хум янытлавет, хотьют ханищтахтуӈкве ка̄сащи, хотьют йильпи ос пӯмащ ва̄рмалит урыл ва̄ӈкв таӈхи. Ты хо̄тал ос студентыт, ханищтан хо̄тпат, о̄выл классын минам ня̄врамыт пуссын ӯре̄гыт. Ань тамле порат школат а̄гитпыгыт са̄всыр ищхӣпыӈ утыт щирыл ханищтавет. Тох та̄н са̄внув ва̄ӈкве патэ̄гыт ос номтыӈыг яныгме̄гыт . Ханищтап тэ̄ла хосыт рӯпитан кӯщаит, ня̄врамыт ханищтан хо̄тпат, ща̄нита̄щит та̄н пуссын аквъёт акв э̄рнэ тэ̄ла ва̄ре̄гытня̄врамыт ханищтэ̄гыт. Я̄тил юртыт! Ня̄врамыт, студентыт, э̄лаль туп ёмащакв ханищтахтэ̄н, ща̄нита̄щит о̄с мӯтраӈыг е̄мтэ̄н ос на̄нки ня̄враманын э̄руптэ̄н ос ханищтан хо̄тпан аквтох э̄лаль э̄рнэ рӯпата мирн ма̄гсыл ва̄ре̄н. Ханищтан та̄л сыс пуста̄гыл пуссын о̄лэ̄н!

1059 2013.09.06. Александр ВЬЮТКИН

Соссаӈ ма̄хум акванатхатыгласыт. Во̄ртур э̄тпос ва̄т нупыл титыт хо̄талт Сургут ӯст соссаӈ ма̄хум ма̄во̄й но̄хвинэ ма̄т рӯпитан хо̄тпат ёт сапра̄ни ва̄рыгласыт, рущ ла̄тӈыл«Коренные народы. Нефть. Закон» намаим о̄лыс. Ты ва̄рмаль тит хо̄тал минас. Округув янытыл са̄в соссаӈ ма̄хум ос кӯщаит тув ёхталасыт. Соссаӈ хо̄тпат халт яныг кӯщаиг Еремей Данилович Айпин о̄лыс. Тав соссаӈ мир Ассамблеят председателиг о̄лы. Тувыл ос Григорий Петрович Ледков о̄лыс. Тав тыта̄лт Россия Лӯима̄ янытыл са̄всыр ла̄тӈыл потыртан соссаӈ ма̄хум Ассоциациянылт кӯщаиг пе̄риявес. Лӯима̄в сака яныг, ты минам та̄л сыс тав са̄в ма̄т о̄лыс, мощщаг хультум мирыт уральтасанэ. Ма̄во̄й ос газ но̄хвинэ ма̄хум ёт потыртан ма̄гыс Нижневартовский, Белоярский, Сургутский ос Ханты-Мансийский районытт о̄лнэ ханты хо̄тпат конференциян ёхталасыт. Та̄н пуссын са̄лы о̄ньще̄гыт во̄рт о̄лэ̄гыт. Нефтяникма̄хум са̄выӈпа̄лэ та̄н о̄лнэ ма̄нанылт рӯпитым яласэ̄гыт. То̄ва ма̄т ма̄во̄й, газ но̄хвинэ вышкат ос те̄ртур хосыт газ мо̄т ма̄н няртнэ насосыт ӯнттым о̄лэ̄гыт. Ма̄ ялыгланэ̄ныл ма̄гсыл са̄лы тэ̄п мощщами. Ты ма̄гсыл ханты ма̄хум акваг сака кантлэ̄гыт ос та̄кыщ вуянтахтым о̄лэ̄гыт. Сургутский районт о̄лнэ ханты ма̄хум урыл Дмитрий Васильевич Макущенко потыртас. Тав та район кӯщаиг пе̄риим о̄лы, тав ла̄выс: «Тыт пе̄с йис ма̄т 157 ханты ще̄мьят во̄раим ос са̄лы ӯрим о̄лэ̄гыт. Аквъёт пуссын хӯрум со̄тыра ляпатем хо̄тпа та̄нти ма̄нылт во̄р коланылт о̄лэ̄гыт. Сургутский районт хус нефтяной компаният 110 буровой вышканыл ма̄во̄й но̄хвим рӯпитэ̄гыт. Округув янытыл тот щар са̄в ма̄во̄й ма̄ныл но̄хвиве. Нефтяникыт ханты ма̄хмытын аквписыг нё̄тэ̄гыт. «Бураныл», яласан ма̄гсыл олнта̄л бензиныл, во̄йил, соляркал ос колыт ӯнттын норыл, па̄ртыл, те̄рсолил ос колала лаппантнэ те̄рыл нё̄тыяныл. 2012 та̄л сыс хӯрум млн. солко̄вил ойтсаныл». Та ма̄т о̄лнэ ханты ма̄хмыт ос тох потыртасыт: «Са̄лыянув ка̄сыӈ е̄мт буровой вышка ляпан минэ̄гыт. Тот ма̄тэ ма̄шинал но̄хо̄хтыртым о̄лы. Са̄всыр лю̄ль ут ма̄ тармыл со̄сантыма. Са̄лыянув тот атыньтахтынэ̄ныл юипа̄лт, а̄гмыл та е̄мтэ̄гыт. Тувыл ма̄во̄й но̄хвинэ ма̄т рӯпитан ма̄хум са̄лы тэ̄ттын ма̄гсыл минэ сыртэп о̄с хоттымат лю̄ль а̄гм о̄ньщи». Щар со̄ль, хунь са̄лы а̄гманыл урыл потыр о̄лыс, ӯйхул пусмалтан ма̄т рӯпитан нэ̄ ла̄выс: «Хо̄т ань ма̄во̄й ос газ но̄хвинэ ма̄хум рӯпитэ̄гыт, тот са̄в мосыӈ са̄лы о̄лы. Са̄выӈпа̄лэ мосыӈ са̄лы Сургутский ос Нижневартовский районыг халт о̄лэ̄гыт. Таима̄гсыл ма̄н са̄лыӈколт яласан ма̄хмытын такос ла̄ве̄в, ня̄р нё̄выль сака ул вос тэ̄гыт, па̄йтым щирыл туп тэ̄ӈкв ро̄ви». Са̄лы о̄щнэ ё̄рн хум Юрии Кылевич Вэллэ ты урыл о̄с потыртас. Тав ос мо̄т ва̄рмале ма̄гсыл Сургут ӯсн ёхталас. Тав о̄лнэ ма̄тэ̄т «ЛУКОЙЛ» компания рӯпиты, та о̄лнэ ма̄тэ ляпат нефтяникма̄хум ма̄шинал ӯлтта лё̄ӈх ялыгласыт. Юрий Кылевич хунь ты урыл потыртас, тот рӯпитан хум ювле тох ла̄выс: «Ма̄навн хо̄т э̄ри, тот яласэ̄в! » Аграфена Семёновна Сопочина ос ялпыӈ ма̄т урыл потыртас: «Во̄рт рӯпитан ос во̄раим яласан по̄х ма̄хум ялпыӈ ма̄н новхатуӈкв патсыт. Ялпыӈ канын пиным пе̄с йис пормасыт, те̄р олныт та̄н пуссын ёт выганыл. Ты урыл о̄с хотмус ёмщакв номсахтаӈкв ос матыр ма̄навн ва̄руӈкв э̄ри». Тит хо̄тал рӯпитамув сыс са̄в тэ̄ла урыл потыр о̄лыс. Конференция оигпам порат кӯщаит соссаӈ ма̄хмытын э̄рнэ са̄в йильпи са̄кконыт пирмайтаӈкв ла̄всыт.

1059 2013.09.06. Людмила ТЕТКИНА

Ӯсув 420 та̄лэ то̄влыс. Во̄ртур э̄тпос оигпам э̄лыпа̄лт Ха̄льӯст о̄лнэ ма̄хум ялпыӈ хо̄талыл ва̄рыглаве̄сыт. Та̄н па̄вланыл 420 та̄лэ то̄влыс ос 60 та̄л ювле хультум порат тот газ хо̄нтвес. Округ Правительство Ха̄льӯст ты ялпыӈ хо̄тал ва̄рнэ ма̄гсыл, краеведческий музей, Искусство школа ремонтыл ва̄рнэ ос па̄выл хотщё̄питан ма̄гсыл олн та̄стыглас. Ос ня̄врамыт ёнгын ма̄гсыл кит йильпи площадкаг ёвтвесы̄г . Та порат газ хо̄нтум хо̄тпат ань яныгпа̄лаг е̄мтсыт. Та̄н пуссын Россия янытыл са̄всыр ма̄т о̄лэ̄гыт. Ялпыӈ хо̄талн мӯйлуӈкве тув во̄виньта̄лве̄сыт. Та̄наныл янытлаӈкве Наталья Комарова, округ губернаторув, Ха̄льӯсн ёх т а л а с . Ка̄ркамыг рӯпитан ма̄хмыт янытлан нэ̄пакыл мисанэ. Са̄всыр ма̄ныл ёхталам яныг хо̄тпат маткем тот та потыртасыт, ос та пора номылматыгласыт. Тувыл яныгпа̄ла хо̄тпат Ха̄льӯс ос тот рӯпитан музей сунсуӈкве тотыглаве̄сыт. Па̄выл на̄лми ва̄тат на̄иӈха̄пыт па̄гпухтын яныг авторечвокзалкапай ӯнттаве. Акв па̄лэ ялпыӈ хо̄тал э̄лыпа̄лт а̄стлавес, мӯй ма̄хум ты ут сунсуӈкве во̄виньта̄лве̄сыт. Акв та порат Ха̄льӯст «Скважина Р-1» нампа мемориал пӯсвес. 60 та̄л ювле хӯльтум порат газ хо̄нтум ма̄т тӯщтувес. Ос Ха̄льӯс 420 та̄лэ то̄влуме кастыл «Петру и Февронье» нампа памятник ва̄рвес. Яныгпа̄ла хо̄тпат таве сунсыглаӈкве о̄с ялсыт. Та хо̄талт Ха̄льӯст са̄всыр организациятт рӯпитан ма̄хумакван атхатыгласыт ос са̄в хорамыӈ лӯптат, шарикыт ка̄тыт пувим па̄выл хосыт ё̄мсыт. Та̄н ётаныл ма̄ньщит, хантыт калмыкыт, рущит, хатанит ос мо̄т мирыт та̄нки маснутыл масхатым ё̄мсыт. Аквъёт пуссын такем нё̄тнэ̄гсусхатасыт . Ха̄льӯс кант ма̄ньщит, хантыт са̄с то̄тапыт турло̄псыт ос ка̄тыл ва̄рим мо̄т са̄всыр пормасыт суссылтасыт, тыналасыт. «Элаль» нампа предприятие тот ё̄рнкол тӯщталас, ма̄хум тот хӯлыл, хӯл исмитыл тыттысаныл ос ща̄ил айтысаныл. Мо̄т ё̄рнколт ос са̄всыр сувенирыт тыналаве̄сыт. Ӣтипа̄лаг Любовь Коротун, Ха̄льӯс район миркол кӯщай нэ̄, ӯскант акванатхатам мир янытластэ. Тав ла̄выс: «Я̄тил Ха̄льӯст о̄лнэ ма̄хум ос газ хо̄нтум хо̄тпат, ам на̄нан ты кит ялпыӈ хо̄талыл янытлыянум. Щар со̄ль, ма̄н ӯсув Россия янытыл мирн ва̄ве. Ма̄н районувт сымыӈ, ка̄ркам ма̄хум о̄лэ̄гыт. Ма̄н пуссын ма̄нки о̄лнэ ма̄в э̄руптылӯв, ос аквъёт э̄лаль Ха̄льӯс районув ма̄гсыл рӯпитаӈкве патэ̄в». Тувыл тав ка̄ркамыг рӯпитан хо̄тпат янытлан нэ̄пакыл мӯйлуптасанэ. Татьяна Гоголева, округ Думат ма̄ньщи депутат, тот о̄с янытлавес. Тав «Почётный гражданин Берёзовского района» намыл майвес. Ольга Филиппова, «Элаль» нампа предприятие кӯщай нэ̄, тув янытлаӈкве о̄с во̄виньта̄лвес. Тав «Лауреат премии ХМАОЮгры» За развитие культуры малочисленных народов Севера» нампа Почётный намыл майвес. Ялпыӈ хо̄талт ня̄врамыт ёнгалтаве̄сыт ос са̄всыр касылыл ва̄рыглаве̄сыт. Концерт о̄лум порат район янытыл ос Ханты-Мансийск ӯсныл ёхталам артистыт ӣти мус тот э̄ргысыт йӣквсыт. Ма̄хум маткем тот та мӯйлысыт. Ты та̄л Ха̄льӯс район 90 та̄лэ то̄влыс. Район янытлан кастыл тот та̄л сыс са̄всыр суссылтапыт, ялпыӈ хо̄талыт ва̄рыглавет. Ос акв яныг ялпыӈ хо̄талн ма̄хум яныг таквс э̄тпост Ха̄льӯст тах акван атхатыглэ̄гыт.

1059 2013.09.06. Александр ВЬЮТКИН

Та̄н мирн нё̄туӈкв патэ̄гыт. Ювле хультум во̄ртур э̄тпост Ханты-Мансийск ӯс мирколт рӯпитан ма̄хум «Народный фронт «За Россию» нампа сапра̄ни ва̄рыгласыт. Тув округув янытыл нёлса̄т нупыл хо̄т хо̄тпа ёхталасыт. Та̄н пуссын са̄всыр ма̄тт о̄лэ̄гыт ос рӯпитэ̄гыт. Ань та̄н акваннё̄тхатуӈкв ла̄вве̄сыт. Ты э̄тпос 8 хо̄талэ̄т округувт пе̄риян ва̄рмаль тах ва̄раве. Ты «Народный фронтыг» ла̄внэ ма̄т пуӈк тотнэ хумыг Россия Президент В. В. Путин о̄лы. Ос ты о̄лум сапра̄ни кӯщаиг Лариса Белоцерковцева о̄лыс, тав Москва ӯсныл тыг ёхталас. Акванатхатыгламаныл порат ла̄вве̄сыт, округувт региональный штаб тах ва̄раве, тот ва̄т нупыл хо̄т хо̄тпа рӯпитаӈкв патэ̄гыт. Тувыл та̄н халанылт иӈ хӯрум ва̄ӈын кӯщаит пе̄рияве̄сыт. Ты пе̄риим ма̄хум округув янытыл мирн нё̄туӈкв патэ̄гыт.

1059 2013.09.06. Валентина УЗЕЛЬ

Са̄в ня̄врамыӈ ще̄мьят олныл нё̄тавет. Ма̄хум са̄внув ня̄врам вос о̄ньще̄гыт, са̄всыр нё̄тмил ва̄раве – о̄лнэ колыл, олныл акваг мивет. Ань ты ёмас рӯпата кӯщаит ва̄рнэ̄ныл ма̄гсыл, юио̄выл та̄лыт сыс ще̄мьяӈ ма̄хум са̄в ня̄врам о̄ньщуӈкв таӈхе̄гыт. Округувт рӯпитан кӯщаянув, дума депутатанув ты хосыт о̄с рӯпитэ̄гыт. Са̄всыр са̄ккон ос постановлениела̄тыӈ та̄н акваг та пирмайтэ̄гыт. Ань тамле йильпи ла̄тыӈ та̄н та хассыт. Ты та̄л о̄вылтахтам па̄сныл са̄в ня̄врамыӈ ще̄мьят ма̄гыс акв йильпи нё̄тмил округувт ва̄раве. Хӯрум ня̄врам ос тыгыл са̄внув ня̄врам о̄щнэ ще̄мьят ка̄сыӈ э̄тпос 9 со̄тыра 6 солко̄вил ойтуӈкв патавет. Ос ка̄сыӈ ще̄мья тох ат нё̄таве. Та̄н ня̄враманыл 2013 та̄лт та̄л котиль э̄тпос о̄выл хо̄тал юи па̄лт самын те патсыт то̄нт ущ. Ты э̄лыпа̄лт самын патум ня̄врамыт тамле пособияолныл ат ойтавет. Ты олннё̄тмил винэ ма̄гыс ща̄нига̄щиг мощща олн вос выгы̄г «прожиточный минимум» тыгыл са̄внув олн ул вос сэ̄лэ̄г. Тыи ма̄гыс юи о̄выл хӯрум э̄тпос сыс рӯпатанылт справканэ̄пакыл вос мивет тот сэ̄лум олнаныл вос хансавет. Акв та̄л мины, тувыл ос нэ̄пакыт пуссын йильпииг атуӈкв э̄ре̄гыт. Ань нёлолов э̄тпос сыс округувт туп 585 ще̄мья ты олныл ойтавет. Та̄л оигпан мус акв со̄тыра арыгтем тамле ще̄мья е̄мты.

1059 2013.09.06. Валентина УЗЕЛЬ

Округ Дума кӯщай Ха̄льӯсн ялыс. Та э̄тпос котиль хо̄таланэ̄т округ Дума кӯщай Борис Хохряков Ха̄льӯсн ялыс. О̄влэ̄т тав я̄ ва̄тан тотыглавес, тот авторечной вокзал ӯнттаве. Та юипа̄лт пӯльницан минас. Тот рӯпитан ма̄хум пуссын акванатыглаве̄сыт, округ Дума депутатыт рӯпатаныл урыл тав та̄нанылн потыртас. Тувыл ма̄хум мощ титыглахтасыт ос та̄нти та̄рвитыӈ ва̄рмаляныл урыл таве̄н потыртасыт. Ты та̄л сыс Ха̄льӯс пӯльница са̄всыр йильпи ищхӣпыӈ утыл ёвтвес, та̄н хосытаныл а̄гмыт моляхнув хо̄нтуӈкв ро̄ве̄гыт. Хӯрум «скорый помощь» йильпи ма̄шинат ёвтве̄сыт, поликлиника кол ёмащакв щё̄питавес, ӯлщ пуӈкыт пусмалтан пӯльница моще̄рт я̄насыг ӯнттаве. Ань округ бюджетныл тув 60 миллион солко̄ви тах та̄ставе. Э̄лаль кӯщай о̄йкаполицият рӯпитан ма̄хумёт хо̄нтхатыглас. Ты 2013 та̄л сыс Саранпа̄вылт, Приполярныит, Хулюмсӯнтыт, Кульпаст, Светлыйт ос Ха̄льӯст «участковый пунктыг» ла̄внэ рӯпитан колыт тах ӯнттавет. Тув ань 20 миллион солко̄ви миве. Тувыл иӈ са̄в олн мир уральтан ва̄рмаль ма̄гыс холтаве, са̄всыр ма̄тт «видеоконтролиг» ла̄внэ ищхӣпыӈ утыт тах ва̄равет. Э̄тэхо̄талэ ма̄хум камера хосыт сунсыглаӈкв патавет. Ты рӯпата таима̄гыс ва̄раве, полицият рӯпитан ма̄хум ёмащакв вос рӯпитэ̄гыт ос матыр лю̄ль нак е̄мтнэ порат та̄ра вос ка̄салыяныл.

1059 2013.09.06. Людмила ТЕТКИНА

Ха̄льӯс район ма̄ янытыл ва̄ве. Округувт «Стратегия социальноэкономического развития ХМАО-Югры до 2020 года и на период до 2030 года» нампа нэ̄пак щирыл кӯщаит рупитэ̄гыт. Ты э̄лыпа̄лт ты программа урыл ка̄сыӈ э̄лумхо̄лас интернетт ловиньтаӈкве ос ла̄тыӈ ке̄туӈкве ве̄рмыс. Та̄н ловиньтаманыл юипа̄лт ты программа пирмайтавес. Ха̄льӯс район Общественный советт рӯпитан хо̄тпат Ха̄льӯст акванатхатыгласыт. Та̄н районный мирколаныл ты нэ̄пак щирыл э̄лаль хумус рӯпитаӈкве паты, яныг сапра̄нит потыртасыт. Наталья Комарова, губернаторув, тув о̄сёхталас. Ма̄хумн тав ла̄выс «60 та̄л ювле хультум порат Ха̄льӯст газ хо̄нтвес, та пораныл округув ма̄во̄й, газ но̄хвиве. Ты щёлыл Россия ос Югра са̄в олн сэ̄лы. Тувыл таи лю̄ль, Ха̄льӯс районт то̄ва ма̄хум нуса тотым о̄лэ̄гыт. Тыт ёмас яласаӈ лё̄ӈх а̄тим, связь, ЖКХ лю̄льсаӈ рӯпитэ̄гыт са̄в э̄лумхо̄лас рӯпата ат о̄ньще̄гыт. Ха̄льӯс районт мир ёмаснувег о̄лнэ̄ныл ма̄гсыл ма̄н акваг олн та̄стыглэ̄в, 2011 та̄л округбюджетныл 74 млн. солко̄ви тыг ке̄тыгласӯв, 2012 та̄л90 млн. солко̄ви. Ты коныпал са̄всыр грантыт щирыл предпринимательхо̄тпат о̄с олныл мивет. Ха̄льӯсныл Ягрим мус ос Ягримныл Приобье мус ма̄шинал яласан лё̄ӈх тах ва̄раве. Ты лё̄ӈх проектнэ̄паке ань щё̄питаве. Тамле рӯпата ма̄гсыл олн ма̄н ань хассув». Ма̄хум э̄лыпа̄лт потыртым, тав районный миркол кӯщаит лю̄льсаӈ ва̄рнэ рӯпатаныл урыл ла̄выс. Таса̄вит олн та̄стыглаве, олнаныл номсахтым холтуӈкве э̄рыс. Тыи ма̄гсыл тав та̄наныл по̄хын минуӈкве манос ханищтахтуӈкве ла̄всанэ. Кӯщай нэ̄ ла̄вме щирыл, Ха̄льӯс район са̄в щёл о̄ньщи. Та̄гт я̄т о̄лнэ нялк, нё̄тнэ Нё̄рыт урыл ма̄хум ма̄ янытыл ва̄гыт ос тув ёхталаӈкве ка̄саще̄гыт. Са̄в мӯй хо̄тпат тув ёхтала̄лэ̄гыт ке, са̄в о̄лн сэ̄луӈкве ро̄ви. Туп ка̄ркамыг ос номсахтым рӯпитаӈкве э̄ри . Любовь Кашлатова, Ха̄льӯст А̄с-угорский институт филиалэ̄т рӯпитан э̄ква, акв тэ̄ла урыл сапра̄нит потыртас. Тот соссаӈ ма̄хум ма̄гсыл Культура центр а̄тим, ты ва̄рмаль урыл лов та̄л сыс са̄всыр сапра̄нит кӯщаитн акваг потыртэ̄гыт. Ва̄тихал туристыт ёхталэ̄гыт, та̄н пуссын ма̄ньщит, хантыт культурал пӯмщалахтэ̄гыт. Ань Ха̄льӯст национальный творчество отдел ма̄нь пе̄сколт о̄лы, мӯй ма̄хум тув во̄выглаӈкве та̄н эссамтэ̄гыт. Ма̄ньщи архив хус та̄л палыт о̄с сака пе̄с колт рӯпиты. Архивколаныл ань А̄с-угорский институт нупыл ловиньтахты. Любовь Кашлатова ла̄выс, тамле Культура центр Ха̄льӯст хосат та̄гыл ва̄руӈкве э̄ри. Тамле кол туристын суссылтаӈкве э̄сырма ат паты. Наталья Комарова ханты э̄ква хунтлым, ювле таи ла̄выс: «Ань ма̄н туризм щирыл пуссын рӯпитэ̄в. Тамле Культура центрыт са̄в пӯмащ ва̄рмаль сунсуӈкве, улпыл со̄ль, ро̄ви. Тувыл мӯй ма̄хум а̄ти тыи ма̄гсыл тыг ёхталэ̄гыт, ма̄нь па̄вылквет ма̄ньщит, хантыт хумус о̄лэ̄гыт ос тот та̄нки пе̄с йис ва̄рмаляныл э̄лаль хумус тотыяныл, та̄нанылн тыи пӯмащ. Ам номсэ̄гум, тамле яныг центр ӯнттуӈкве тыт ат э̄ри. Ос на̄н миркол кӯщаитн ла̄ве̄гум, на̄н ма̄гсылын мо̄т рӯпитан колыт вос ӯнттэ̄гыт манос ёвтэ̄гыт». Туризм ва̄рмаль урыл Владислав Панкин, ООО «Бедкаш» нампа предприятият кӯщай хум, о̄с ла̄тыӈ ла̄выс. Та̄н са̄в та̄л сыс Ха̄льӯс районын мӯй хо̄тпат хӯл алыщлаӈкве, во̄раяӈк ве тотыглыяныл. Ань та̄наныл Нё̄рн ялуӈкве во̄виньтыяныл. Ос са̄внув ма̄хум тув вос яласанувыт, Саранпа̄вылт яныг гостиницакол ӯнттуӈкве э̄ри. Тамле колт аквторыг 50 э̄лумхо̄лас о̄луӈкве вос ве̄рми. Ты хум ла̄вме щирыл та̄н таяныт колкапай ӯнттуӈкве олн ат о̄ньще̄гыт. Наталья Комарова ты ва̄рмаль о̄с ёмас тэ̄лаг ла̄выстэ, ювле олн миӈкве ат ка̄сащас. Ань округувт предпринимателит са̄всыр олннё̄тмилыл мивет, та̄н са̄всыр кредитыт виӈкве ос са̄всыр грантолн ма̄гсыл нэ̄паканыл ке̄туӈкве ве̄рме̄гыт ос ты хосыт гостиницакол ӯттуӈкве. Сапра̄нит Нё̄рт са̄всыр тыныӈ а̄хвтасыт киснэ рӯпата урыл потыр о̄лыс. Учёныит та ма̄т о̄лнэ щёлыт ань мӯсхалыг ханищтыяныл. Кӯщай нэ̄ тувле номтэ о̄с ат патыс. Тав ла̄выс, Нё̄рыт пулигхилым тот сыстам я̄квет, нё̄тнэ ма̄квет па̄ӈктавет. Тамле рӯпата о̄вылтан э̄лыпа̄лт ма̄вит ӯргалан ва̄рмаль урыл номсахтуӈкве э̄ри.

1059 2013.09.06. Анна АЛГАДЬЕВА

Ке̄расколыӈъя̄ ня̄врамыт. Ты хурит Ке̄расколыӈ па̄выл ня̄врамыт по̄слым о̄лэ̄гыт. Ке̄расколыӈъя̄ па̄выл – ты ам яныгмам па̄влум. Ам яныгмамумт па̄влув яныг о̄лыс: налыман арыг э̄лумхо̄лас, нёлолов о̄лнэ кол, ка̄сыӈ колт ня̄врамыт о̄лсыт. Са̄в ня̄врам аквъёт яныгмасӯв . П а̄влув суиӈ, мо̄тмо̄т ма̄т туп ро̄хтахтын суюв. Тэ̄лы порат тахсан сыпув тох та ва̄рилӯв, яласан ма̄ссынат сыпын но̄хха̄ӈхуӈкв ат ве̄рме̄гыт, ха̄ӈраӈ урыл ювле тотавет. Ань па̄влувт кит о̄лнэ кол туп хультыс. Акв колт ам ща̄нюм Александра Васильевна, Валера ягпыгум ос Лиза яга̄гим ма̄нь а̄гиягепыгаге ёт о̄лэ̄гыт. Китыт колт Михаил Тимофеевич Пеликов э̄кватэ̄нтыл о̄лэ̄г кит ня̄врам о̄ньще̄г. То̄ва ма̄хманув Висумтыт па̄вылнва̄нт ласыт. Тот Лусумыг-Висмаг акванпатнэ ма̄т мощ мо̄лтынув онтолов кол ӯнттувес. Арыгтамкем Лӯсум ма̄ньщит тот та о̄лэ̄гыт. Нэ̄матыр рущ рӯпата тыт а̄тим по̄льница ла̄пка пекарня, школа, садик а̄тим. Ма̄хум пе̄с йис нот щирыл о̄лэ̄гыт. Пос о̄с а̄тим. Пос пе̄ламтан станция пуссын кос о̄ньще̄гыт, туп ка̄сыӈ хо̄тал ман э̄таӈхо̄тал курыгтаӈкв бензинсоляра э̄ри. Ма̄н пуӈк пе̄лы, ка̄сыӈ е̄мт ёвтуӈкв. Рущ па̄вылн ёхтэ̄гын, са̄ро̄вылт тэ̄нут ломт ёвтуӈкв э̄ри. Пе̄с Сӯйва̄т па̄выл о̄лум порат Сӯйва̄т па̄вылт ла̄пка о̄лыс ка̄сыӈ э̄тпос пирикаска ёхталас. Та порат са̄в ма̄ньщи о̄лыс. Ка̄сыӈ э̄тпос 20 хо̄талт ма̄хум тув ялантасыт, маныр э̄ри тот ёвтыгласыт . Ань Висумтыт павылт тох ке ва̄рнуве ка̄сыӈ е̄мт яласаӈкв ат э̄рнув. Туп хунь матарн сака ке я̄рме̄гын, ущ хотталь минуӈкв ос ня̄в рамыт уральтаӈкв ялуӈкв. Ня̄врамыт Полуночное па̄вылт интернатт ханищтахтэ̄гыт, туп каникулытн юв ёхтала̄лэ̄гыт. Ты во̄р па̄влыгт о̄лнэ ма̄ньщит пуссын та̄нки ща̄нь ла̄тыӈке̄нылтыл потыртэ̄гыт . Туп таи лю̄ль. Нё̄рн миннэ ос Лӯсум алгаль миннэ лё̄ӈх ты та̄ра о̄лы. Туи ос таквсы щар кӯм а̄ти, ка̄сыӈ хо̄тал ма̄шинат ёл ат по̄йтса̄лэ̄гыт. Нё̄рн миннэ утНё̄рн мины, Са̄псан миннэ ут Са̄псан мины. Я̄ хосытыл та на̄тылтэ̄гыт. Туп тэ̄лы ос тӯяг, яныг вит порат мощ сытамнуваг патса̄лы, сака ат яласэ̄гыт. Висумтыт па̄выл урыл мо̄тынтыг тах хансэ̄гум.

1059 2013.09.06. Александр ВЬЮТКИН

Хӯлупъян урыл потыр. Сургут ӯст «Коренные народы. Нефть. Закон» нампа конференция ва̄рыглым порат са̄в ва̄рмаль урыл потыр о̄лыс. Акв тамле потыр округ янытыл вит ӯргалан тармыл кӯщай ловиньтас. Тав наме Виктор Евгеньевич Харламов. Докладэ̄т тав вит ӯргалан ма̄хум ва̄рнэ рӯпатаныл урыл потыртас. Виктор Евгеньевич ла̄выс «Ка̄сыӈ та̄л А̄с я̄т о̄лнэ хӯлэ мо̄щщами. Хӯрум та̄л ювле хультум порат хӯл са̄в о̄лыс, ань мощща ос пуссын ма̄нит. Хӯл алыщлан ма̄хум та̄нти о̄с лю̄ль ва̄ре̄гыт. Ка̄рай хӯл алыщлан хӯлп саманыл 28-30 мм. , тамле хӯлпыл на̄тылтэ̄гыт. Тох алыщланэ̄ныл, хӯл сэ̄рнэ ма̄наныл мус хумус ёхты. Я̄т хоты хӯл о̄лы, тамле ма̄нь хӯлпыл пуссын пувавет. Ты та̄л сыс округув янытыл 3 млн. со̄лкови са̄виттем штрафолныл ма̄хум пинве̄сыт. Штрафат ойтнэ хо̄тпа ха̄пе, моторе хотвуйлаве. Ос олн ойтнэ юипа̄лт пормасыт кӯщаянылн ювле мивет. Тох 2012 та̄лт о̄лыс, нэ̄пак та̄л хӯл пувнэ хо̄тпат хӯл ӯргалан ма̄хум нупыл алхатым ква̄лапа̄лсыт. Та нак щирыл алхатнэ ма̄хум сутытаве̄сыт. Нэ̄мхотьют турманколн ат ӯнттувес, нас штрафыл пинве̄сыт . Мощ мо̄лалнув Ханты-Мансийский районт хӯл алыщлан хо̄тпаг тэ̄нти халэ̄нт алхатсы̄г. Акватэ мо̄т хумитэ такви э̄лыпа̄лэ̄н на̄тылтаӈкв ат кос та̄ртыстэ. Тав э̄лыпа̄лэ̄н воратан хум «травматический пистолет» нампа писаль ёт о̄ньщум. Мо̄т хумитэ вильтыт па̄тамтастэ. Па̄тамтам хо̄тпатэ саме̄т хо̄йвес, ань тав саме пусмалтым пӯльницат хуи. Ты та̄л округувт 3 со̄тыра122 соссаӈ хо̄тпан «квота» нампа хӯл алыщлан нэ̄пак майвес. Хӯл алыщлан порат квотанэ̄пакыт ёт тотыглаӈкв э̄ре̄гыт. Нэ̄пак юн те хультуптылы̄н, та̄нанылн суссылтан мус хӯлпанын хотвиӈкв ве̄рмавет. Хӯл пувнэ порат, но̄ххартнэ хӯланын та̄ра нэ̄пакын по̄стуӈкв э̄ре̄гыт. Нэ̄пакыт ат те по̄ставет, ёмас са̄вит штрафыл пинаве̄н. То̄ва соссаӈ ма̄хум та̄нти яласан мотораныл, ха̄паныл ос квота нэ̄паканыл мо̄т по̄х хо̄тпан хасылтыяныл. Тох ва̄руӈкв щар ат ро̄ви . Хӯл ӯргалан ма̄хум титыглахтэ̄гыт «Мо̄т хо̄тпа нэ̄паканэ манрыг на̄н палтылын о̄лэ̄гыт? » Ювле ла̄ве̄гыт: «Тав нэ̄паканэ ма̄навн хӯл алыщлан ма̄гсыл такви мисанэ». Со̄ль, то̄ва соссаӈ ма̄хум нэ̄паканылт нотариус палт хӯл алыщлан ма̄хум наманыл хансыяныл. Та щирыл о̄с ат ро̄ви. На̄нти квота нэ̄паканын нэ̄мхотьютын ул мае̄н . Са̄в хӯл пувуӈкв ма̄хум та̄ртыянув те, иӈ акв та̄л мохсаӈ ос ка̄рай тэ̄гӯв. Та юипа̄лт я̄т та̄тылаг та е̄мтэ̄гыт. Таима̄гсыл ты ма̄н са̄в тыныӈ хӯл пувуӈкв ат та̄ртахтэ̄в. Моще̄ртын атыӈ во̄йиӈ мохсаӈ ос ка̄рай хӯлагув Тюменский область «Выгыр нэ̄пакын» хансуӈкв ве̄рмаве̄г. Хӯл алыщлан браконьерыт пе̄нтсыл иӈ са̄в хӯл ма̄во̄й ос газ но̄хвинэ компаният порслэ̄гыт. Я̄ хосыт яласан на̄иӈха̄пыт А̄с я̄ витын са̄всыр арыгтаптам во̄яныл со̄сантыяныл. Ма̄н та̄наныл ва̄тиха̄л уральтыянӯв. Ма̄н ат ке рӯпитасӯв, юио̄выл хӯланув хосат ювта̄япанувет» .

1059 2013.09.06. Светлана РОМБАНДЕЕВА

Музейт акванхо̄нтхатыгла̄лсув. Ханты Мансийск ӯст «Торум Маа» музейт рӯпитан ма̄хум мо̄т са̄всыр ма̄т рӯпитан ма̄ньщи ос ханты ма̄хум та̄нти палтаныл ва̄тихал во̄виньта̄лыяныл. Аквъёт ӯнлахо̄лэ̄гыт, ща̄й ае̄гыт, акв хотты ва̄рмаль урыл потраме̄гыт. Во̄ртур э̄тпос ва̄т нупыл хо̄тыт хо̄талэ̄т ма̄н, ма̄ньщи ос ханты газетаг редакцият рӯпитан ма̄хум, тув о̄с ялсув. Ты щёс ос ма̄хум та урыл потыртасыт, ань ё̄рнколт хум хо̄тпа па̄л ос нэ̄ хо̄тпа па̄л о̄лы. О̄лнэ колт май о̄с аквтох. Пе̄с порат ма̄хманув сака ӯргалахтасыт. Нэ̄ хо̄тпа хум хо̄тпа па̄лн нас тох ат щалтсас, туп па̄л сыстамтанэ̄тэ манос колкан ловтнэ̄тэ порат тув ё̄масаӈкве ве̄рмыс . Аграфена Семёновна Сопочина Сургутский хантыянэ урыл потыртас, ма̄хум са̄лыӈ коланылт хумус о̄лэ̄гыт. Та̄н ты хо̄тал мус пе̄с ма̄хманыл хольт о̄лнэ̄ныл, ка̄сыӈ хо̄тпа такви па̄лэ ва̄гтэ. Аграфена Семёновна ка̄сыӈ ма̄ нэ̄пак тармыл хаснэ йӣвыл щуртыстэ хум хо̄тпа па̄л, нэ̄ хо̄тпа па̄л, ня̄врам а̄патэ ханнэ ма̄. Коны ма̄т о̄с аквтохкол ман ё̄рнкол ляпат на̄йиваня лю̄ли, а̄мпкол, ня̄нь ва̄рнэ кӯр манос пӯткол ӯнлэ̄гыт. Ка̄сыӈ кол манос кӯр мори ат ӯнттыгпаве, ка̄сыӈ такви я̄нас ма̄ о̄ньщи. Кон о̄с э̄кван мори ё̄мыгтаӈкве ат ро̄ви, тав ма̄гсылэ я̄нас ма̄ о̄лы. Ка̄сыӈ хо̄тпа ма̄нь та̄гыл ва̄гтэ, хумус таве̄н э̄ри о̄луӈкве, хо̄т ё̄мыгтаӈкве, хо̄т хуюӈкве э̄ри. Ты ханты э̄ква щё̄с арыгтем потыртас. Тав ла̄внэ̄тэ щирыл, ка̄сыӈ э̄лумхо̄лас такви щире̄т ялпыӈ. Э̄лумхо̄лас щар ма̄к ялпыӈ ма̄тэ пуӈке ос ва̄ӈнаге, тэ̄н То̄рум ляпат о̄лэ̄г. Таима̄гыс ке̄нтыт ман пуӈкто̄рыт мори па̄хвтуӈкве ат ро̄ви. Ты коныпал тав во̄рт яныгман йӣвыт ос товлыӈ ӯит урыл о̄с сака хоса потыртас. Аграфена Семёновна тамле мӯтраӈ ханты хо̄тпа, са̄в мӯтра ва̄г, са̄в потыр о̄ньщи. Таве хӯнтлуӈкве ма̄навн сака пӯмыщ о̄лыс.

1059 2013.09.06. Евдокия Ивановна РАМБАНДЕЕВА

Ёмас ля̄ххал. «Пупа а̄пщите̄в э̄ргыт» ты о̄вылтыт нэ̄пак хассум, яныг нэ̄пак капай 658 страница о̄ньщи. Ты нэ̄пак урыл профессор ойка Евгений Александрович Игушев тох хансыс: «Ты э̄ргыт йисэнотэ па̄сыл ущ ты рущ ла̄тӈыл толмащлымат. Пе̄с йис ма̄ньщи ма̄хумте̄ныл та̄наныл Ӯй йӣквнэ порат пупа а̄пщияныл э̄лыпа̄лт лю̄лим э̄ргыгласаныл. Мир та̄глын колт ма̄хум э̄ргыт та хӯнтлыяныл, руталиг хӯнтлым янгема̄не̄тыл та ӯнлэ̄гыт. Ты нэ̄паккапайт хансым ма̄ньщи э̄ргыт венгерский учёныигн Антал Регули ос Бернат Мункачи тэ̄н хансыгласанэ̄н 1843 -1889 та̄лытыт. Евдокия Ивановна э̄ргыт рущ ла̄тӈыл толмащласанэ, научный комментарият о̄с такви хассанэ . Ань йис ма̄хум ты э̄ргыт ловиньтате̄вт, алпихаранув нас нуйгалахтэ̄гыт, тувмос та ёмас э̄ргыглымат, тувмос та ма̄хумте̄ныл номтыӈыт о̄лмыт. Венгрия хумыгучёныиг ёт рӯпитамыт: Василий Кириллович Номин (Ня̄хщамволь хум), Илья Егорович Волков, Родион Семёнович ос Василий Григорьевич Ромбандеевыг (Сакв ма̄хум), Гаврил Петрович Сотин (Нюрум па̄влыӈ хум), Анисим Кириллович Сотин (А̄нъя па̄влыӈ хум), Илья Филиппович Тасманов (Хал па̄влыӈ хум), Михаил Иванович Укладов (Лӯсум талих хум), Ефим Петрович Юрьев (Ме̄сыг па̄влыӈ хум) та̄н о̄вылтытаныл 585 страницат сунсэлы̄н. Хансым э̄ргыт ма̄щ тыраквет, та̄н ма̄нав о̄луӈквехӯлуӈкве ханищтыяныл, номтыл хӯлтаве̄в. Ты нэ̄пак «Пупа а̄пщите̄в э̄ргыт» ловиньтан хо̄тпа вос ва̄гтэ, ма̄ньщи ма̄хум (вогулыт) тамле ма̄щтыр йис э̄ргыт та о̄щмыт. Та̄н нэ̄пакыл ат ха̄ссыт, э̄рганыл пуссын номтыт о̄щсаныл, номтыл потырта̄лсаныл. Турман э̄тыт, на̄йта̄л колт та̄н та э̄рге̄гыт, та мо̄йтэ̄гыт. Та̄наныл хӯнтлаӈкве пӯмщиг о̄лыс» . Ма̄ньлат ма̄хумате̄нувн ты йис э̄ргыт, потрыт вос ловиньтавет, номтыг вос пувавет. Пе̄с йис ма̄хманув хольт нёмсаг, роттыг о̄луӈкве вос ха̄сэ̄гыт, тамле нэ̄пакыт хосыт вос ханищтахтэ̄гыт, намыӈ суиӈ э̄лмхо̄ласыг вос е̄мтэ̄гыт. Ма̄н ма̄ньщи мирте̄в халт номтыӈ а̄гиквет, пыгквет о̄лэ̄гыт . Ма̄ньлат ма̄хумте̄в халт ёмас э̄лмхо̄ласаквет о̄ньще̄в, ня̄враманув та̄н ханищтэ̄гыт школатт, университетт. Туи хо̄талыт ня̄врамате̄нув ӯщлахтуӈкве атыглыяныл, тыттыяныл, ӯргалыяныл, йис ва̄рмалянув та̄нанылн хӯлтыглэ̄гыт, ла̄тӈув ханищтэ̄гыт, ня̄врамыт мори ат капыртэ̄гыт . Ты ва̄рмаляныл ма̄гыс Любовь Павловна Стаканован (Саранпа̄вылт, Надежда Константиновна Маслован ос Елена Ильинична Адинан (Хулюмсӯнтыт) яныг пӯмащипа ла̄ве̄в, та̄н ётаныл рӯпитан ма̄хумакве̄тн о̄с акв тох ла̄ве̄в. Пус ка̄т, пус ла̄гыл вос о̄лэ̄гыт, На̄янувн-О̄тыранувн вос ӯргалавет, вос са̄ялта̄лавет. Саранпа̄выл музыкальный школат о̄с ёмас номтыӈ ма̄хумакве рӯпитэ̄гыт – Дмитрий Георгиевич Агеев ос тав а̄гитэ, ва̄псэ. Та̄н ханищтам а̄гияныл пыганыл ань Ханты-Мансийскат рӯпитэ̄гыт («Лылыӈ со̄юмт», «Ма̄ньщи театрыт»). Ма̄нти ма̄ньщи ла̄тӈыӈ газетате̄вт «Лӯима̄ сэ̄рипос» палт о̄с сака ёмас ма̄хумакве рӯпитэ̄гыт, газетате̄в сака номтыӈ щирыл ва̄раве, ма̄хумаквет тот ёмщакв по̄слынэ̄т. Сунсыглаӈкве, ловиньтаӈкве пӯмщиг о̄лы. Ме̄н Евгений Александрович ёт пуссын ма̄ньщи ма̄хумакве̄н со̄т по̄йкиме̄н, нот по̄йкиме̄н.

1059 2013.09.06. Светлана РОМБАНДЕЕВА

Кимлобазов рӯт нэ̄. Хурит Наталья Николаевна Кимлобазова по̄слым о̄лы. Ты ма̄ньщи нэ̄ Ха̄льӯс район Кульпас па̄вылт самын патыс, ма̄нь таквс э̄тпост 1968 та̄лт. Школат рӯпитанэ̄тэ хусахтем та̄лыг ты то̄влы. На̄н ань На̄таля потырохсатэ ловиньтэлы̄н: Омам Дарья Александровна (а̄ги о̄парищ наме Анемгурова) Ня̄хщамво̄ль па̄вылныл о̄лыс, а̄тям Николай Васильевич Кимлобазов. Ще̄мьявт ма̄н са̄т ня̄врам самын патыгласӯв. Щар яныг каӈкум Пе̄тр, тувыл Саша, Кӯщта, Альбина, Валера, Сережа ос ам щар ма̄нь. Та̄н ань пуссын а̄тимыт, ам амттем хультсум. Школа тыт а̄стласум, лов класс. Э̄лаль ханищтахтуӈкве тахсум кос, а̄гирищит ёт Ханты-Мансийск ӯс мус ялсӯв. Та порат сака са̄в ня̄врам поступайта̄лсыт, местал ат то̄влувесув, тох иӈ ат вуйвесув, ювле та йисув. Ань тыт школат колкан ловтым рӯпитэ̄гум. Кит пыг о̄ньще̄гум. Яныг пыгум Саша, ва̄т нупыл ат та̄лэ, интернат кол ӯнттын ма̄т рӯпиты. Ма̄нь пыгум Ваня, хо̄тхуйплов та̄лэ то̄влыс, школат ханищтахты, ты таквсы ловит классын мины. На̄таля тамле нёмса, сымыӈ нэ̄. Ты я̄тил ма̄ньщи хо̄тпав пыгаге ёт пуста̄гыл вос о̄лы, На̄й-О̄тыранэ̄н вос ӯргалаве.

1059 2013.09.06. Людмила ТЕТКИНА

Ма̄хум хӯрум хо̄тал мӯйлысыт. Ха̄льӯст ялпыӈ хо̄талыт о̄лум порат са̄в мир акванатхатыгласыт. Район янытыл са̄в ма̄хум тув мӯйлуӈкве во̄виньта̄лве̄сыт. Ха̄льӯст о̄лнэ соссаӈ ма̄хум ты ялпыӈ хо̄тал янытлаӈкве о̄с ёхталасыт. «Югра лылыеп» та па̄вылт о̄лнэ отделеният рӯпитан хо̄тпат мо̄т мирыт ёт па̄выл хосыт парадыт о̄с ё̄мсыт. Культура центр рӯпитан ма̄ньщит, хантыт та̄нки ва̄рум рӯпатаныл суссылтасаныл. Та̄н ты кастыл са̄всыр сувенирыт ос мо̄т нё̄тнэ утыт ю̄нтсыт ман ка̄тыл ва̄рсыт ос ӯскант тыналасаныл.

1059 2013.09.06. Светлана РОМБАНДЕЕВА

Ма̄хум лув сыс тармыл кассыт. Во̄ртур э̄тпос 22-25 хо̄таланэ̄т Ханты-Мансийск ӯст «Мустанг» нампа конноспортивный комплексыт лувыл каснэ ва̄рмаль о̄лыс. Ты мирхал касыл атыт щёс ва̄рыглавес, ма̄хум ань ос Ханты-Мансийск ӯст кассыт. Та̄н са̄в ма̄ныл ёхталасыт Германияныл, Бельгияныл, Люксембургныл, Эстонияныл, Латвияныл, Польшаныл, Украинаныл, Белоруссияныл, Кыргызстаныл ос Казахстаныл, атпан нупыл ат хо̄тпа о̄лыс Тыкасыл намаявес «Кубок Югры». Но̄хпатум хо̄тпа 56 со̄тыра са̄вит э̄лы хо̄н ма̄ евро нампа олныл майвес. Ты яныг касыл э̄лыпал хо̄талытт конноспортивный клубт ня̄врамыт ма̄гыс са̄всыр конкурсыт, мастерклассыт, ёнгилыт ва̄рыглаве̄сыт. Са̄всыр хурит ка̄тыл по̄слысыт ка̄сыӈ ня̄врам мӯйлупсал майвес. 24 щислат, э̄типа̄лаг, хо̄тахтем щё̄с порат, мир ла̄щалла̄щал акванатхатас. Россия гимн э̄рыгсуе та сумыллас, ма̄хум пуссын но̄хлю̄льсыт, суйта̄л та лю̄лянтэ̄гыт. Сунсэ̄в, ань каснэ ма̄хманув лув сыс тармыл ӯнлым та нэ̄глысыт. Луваныл тамле нё̄тнэт карсыт. О̄траныл о̄с татем нё̄тнэ̄г масхатамыт, то̄ваныл выгыр пальтасовыл о̄лэ̄гыт, то̄ваныл ос сэ̄мыл. Лувыт пуссын акв юипа̄лт та ё̄ме̄гыт. Та̄кыщ потыртан микрофон хосыт ка̄сыӈ хо̄тпа, ка̄сыӈ лув наме ла̄ввес, хотьют хотыл о̄лы, каснэ ма̄т манах щёс но̄хпатыглас. Хум хо̄тпат халт нэ̄ хо̄тпат о̄лнэ̄ныл. Са̄выӈпа̄лэ тыг ань Россият о̄лнэ ма̄хум ёхтысыт. Наманыл ла̄вве̄сыт, луваныл суссылтасаныл, лув сыс тармыл ӯнлым ма̄хум мощ ё̄ӈхатахтыгласыт, ты юипа̄лт пуссын ювле та минасыт. Тамле ва̄рмаль рущ щирыл ла̄ваве – открытие, та па̄сыл ань касыл рӯпататэ та о̄вылтахтас. Тувыл мо̄т лувыӈ ма̄хум тыгле нэ̄глысыт – нила хум лув сыс тармыл ӯнлэ̄гыт. Та̄н тыг, насати, Москва ӯсныл ёхтумыт, мир э̄лыпа̄лт выступайтан ма̄гсыл во̄вимат. Лув сыс тармыл сӯлыньтасыт, сыресыр ищхип щирыл капыртасыт, ань тӯлыглахтан ма̄хманув хольт мир ма̄гыс пӯмыщ ва̄рсыт. Ты нила хум яласанэ̄ныл ма̄гсыл ёмас яныт ма̄ щё̄питавес. Аква лув сыс тармыл лю̄лим сӯлыньты ка̄тэ̄т Россия флаг пуви. Мо̄тан ос лув сыс тармыл ня̄лытё̄втыт ёт сӯлтты та па̄тамты, шарик палт ман йӣв па̄рт тармыл ня̄лэ тув та хо̄и. То̄ва ос сырай ка̄тэ̄т пуви, арбуз нампа пил капай манос витыл та̄глыӈ капрон сулья та са̄грапитэ. Китыг ос акв лув сыс тармыл акв ляльт ӯнтмыг, ма̄н та̄рав нуйхатэ̄г, яты, ос ка̄ртал ёнге̄г. Акваныл ос лув сыс тармыл миннэ̄тэ сыс ка̄таге̄тыл но̄хво̄ртумтахты, хоми пуӈкыл та тотаве, тувыл акв тув ювле ӯнтылматы. Мо̄тананыл лув сыс тармыл миныматэ, ма̄ннёл ню̄нсыгта̄лы, тот хуям ке̄нт манос то̄рло̄мт но̄ха̄лмаитэ. Лувыӈ ма̄хум тох та ощхульласыт. Та пӯмыщ, та мовиньт, ма̄хум маттем та о̄щатахтыгласыт. Юио̄выл хо̄талт, 25 щислат, ма̄к яныг касыл о̄лыс. Ма̄хум луваныл ёт маттем та кассыт. Ка̄сыӈ хо̄тпа луве̄нтыл каснэтэ̄н э̄лыпа̄лт, наманэ̄н ла̄ваве̄г, каснэ кан котильн нэ̄глэ̄г хо̄тпа лув сыс тармыл ӯнлы. Щё̄сэ̄н ёхты, лув та нёвумты. Мощ ха̄йты, тувыл сыр ӯлтта та порыгми, э̄лнув ха̄йты, о̄с та порыгми. Сырыт ма̄нныл 1м. ос 50 см. лю̄литтем но̄хва̄рим о̄лэ̄гыт. Лув ловмантем ма̄т порыгма̄лы. То̄ва сыр ёлпаттытэ, то̄ва ос нумыл татем кӯпнитыӈыщ порыгми. Акв хум луве поргуӈкве щар ат ве̄рмыс сырыт акваг ёл та патталыянэ, порыгманэ̄тэ порат тоӈханэ сырн хо̄е̄гыт. То̄ва лув ань по̄ри хуйнэ сыр э̄лыпа̄лт ёллю̄люмты, мощ лю̄ли, тувыл ос илттыг порыгмаӈкве ат ве̄рми. Ма̄хманув тох та кассыт, щё̄с арыгтем яласасыт. Тув ёхталам мир пӯмщалахтым суссыт. И пумыщ о̄лыс, и пилыщмаӈ о̄лыс. Ва̄им пилыщмаӈ, ты карсыт ма̄ ӯлтта лувыт аман хумус порге̄гыт, та̄нти та ва̄ганыл. Касыл оигпаме юипа̄лт, но̄хпатум хо̄тпа наме ла̄ввес ты Виктория Крашевич, луве Ариньо. Виктория Московский областьт о̄лы. Китыт места о̄с Россия хум Геннадий Гашибаязов тав вис, луве тай ос Фелю. Хӯрмит места Украинаныл ёхталам хум Константин Ярошенко ос луве Овиван тэ̄н висы̄г. Виктория нэ̄ ты э̄лыпа̄лт, насати, Свердловский областьт но̄хпатум, тот о̄с касыл ва̄рыглыма. Тав тамлета ка̄ркам, ё̄р нэ̄ о̄лнэ̄тэ. Мо̄тынтыг Ханты-Мансийск ӯст тамле касыл тах о̄с ва̄раве.

1059 2013.09.06. Тамара МЕРОВА

Пе̄тра хо̄талт пӯрлахтасыт. Ойттур э̄тпост ам марий ма̄хум палт мӯйлуӈкве ялсум. Та̄н палтаныл акв пе̄с ялпыӈ нак суссум. Марийцат пе̄с йис та̄гыл «Сюрем» нампа ялпыӈ хо̄тал янытлэ̄гыт, тав Пе̄тра хо̄талт ва̄рыглаве. Тамле тэ̄ла ма̄хум пум са̄грын э̄лыпа̄лт ос ня̄ньпум атнэ о̄вылтан мус ва̄рыгласаныл. Ань ма̄н финно угорский журналистыт, Пе̄тра хо̄талт Шоруньжа па̄вылн о̄с тотыглавесӯв. Тот пе̄с та̄гыл ва̄рум ва̄рмаляныл ва̄щиньтасӯв. Ты па̄выл по̄хат марий ма̄хум пӯрлахтын кан о̄ньще̄гыт. Та̄н тув акваг атхатыглэ̄гыт. Ка̄сыӈ хӯрмит та̄лэ̄т тот яныг пӯрлахтын нак ва̄раве, тув са̄всыр ма̄ныл са̄в ма̄хум ёхталы. Ты э̄лыпал та̄лыт порат Шоруньжа па̄влыӈ ма̄хум та̄нти тот акванхо̄нтхатыгласыт. Та во̄рт ат хара ма̄ о̄лы, ка̄сыӈ ма̄т я̄нас а̄ращ па̄лтаве. Ка̄сыӈ ма̄ ло̄мтаныл ос а̄ращаныл хотты На̄йО̄тыраныл кастыл ва̄рим о̄лэ̄гыт. Тувыл ма̄хум та̄нкина̄нылн э̄рнэ канын минэ̄гыт ос а̄гманыл пусмалтан о̄вылтыт манос со̄т, щунь во̄внэ ма̄гыс тот по̄икще̄гыт. Яныг ялпыӈ хо̄талыт ва̄рнэ порат хум хо̄тпат а̄ращит пуссын па̄лтыяныл ос тэ̄нут па̄йтэ̄гыт. Ты э̄лыпа̄лт а̄лпыл та̄н йир ва̄ре̄гыт. Нуми -То̄руманылн «Сюрем юмо» йирыг не̄выр тотэ̄гыт, То̄рум ля̄ххал тотнэ о̄тыранэ̄н (рущ щирыл вестник) ма̄гыс ва̄с ос таве ӯргалан о̄тыранэ̄н («хранителиг» ла̄вавет) ма̄гыс па̄ля тотэ̄гыт. Ты во̄р канын щалтнэ ма̄гыс та̄н хӯрум пӯсас о̄ньще̄гыт. Акв пӯсасыл йирыг тотнэ ӯйхул ёт щалтэ̄гыт, китыт пӯсас та̄ра вит а̄лумтэ̄гыт. Та ма̄ ляпат со̄юм овты, ма̄хум тувыл сыстам, атыӈ вит выгыт. Ос мо̄т пӯсасныл тув ёхталан мӯй ма̄хум щалтэ̄гыт, мо̄т ма̄ныл тув щалтуӈкве та̄нанылн ат ро̄ви. Ань пуссын матыра̄ти э̄рнэ тэ̄лат хум хо̄тпатн ва̄равет. Та̄н та̄нки исмит пӯт па̄йтэ̄гыт ос ма̄хум тыттэ̄гыт. Нэ̄ хо̄тпат тот ат пувиньтахтэ̄гыт, та̄н юн нас щаньканя̄нь ва̄ре̄гыт ос пасанын ӯнттыяныл. Ётыл ты щаньканя̄няныл ла̄кквауртыяныл ос мӯй ма̄хумн мыганыл. Та пасан карс йӣвыт ляпат ӯнттаве. Тувыл акв хотты йӣв ялпыӈыг щё̄питаве, ма̄хум тав по̄хатэ̄т акванатхатыглэ̄гыт. Ка̄сыӈ канытыт яныг хум хо̄тпа пе̄рияве, тав ялпыӈ йӣв по̄хат лю̄ли ос ма̄хум ла̄внэ ла̄тӈыт хӯнтлыянэ, тувыл тав но̄ӈхальсунсым такви э̄лаль То̄румн потырты. Марийцат тамле хум хо̄тпат «картыг » намтысаныл ос та̄н ня̄йт хо̄тпа хольт та̄наныл о̄ньщияныл. Ма̄хум таве̄н матыр пуӈкто̄р манос вильт сэ̄гнэ то̄р мигыт, олн тув пинэ̄гыт ос та̄нки та̄рвит тэ̄ланыл о̄вылтыт потыртэ̄гыт. Тувыл ты мӯйлупсат «карт»хо̄тпан но̄хщё̄питавет. Ты та̄лт тот хӯрум а̄ращ па̄лтыглавес ос хӯрум я̄нас ма̄т ма̄хум по̄икщасыт. Ма̄н тот яныгпа̄ла ма̄хум халт са̄в ма̄ньлат хо̄тпат ка̄саласанӯв. Тыи сака ёмас, та щирыл пе̄с йис ва̄рмалит иӈ э̄лаль тотуӈкве патавет ос молях хот ат ёрувлавет тах. То̄ва ма̄ньлат ма̄хум рӯпата ат о̄щнэ̄ныл ма̄гыс ань мо̄т ӯсыӈ ма̄н о̄лмыгтасыт. Ос ты ялпыӈ нак ва̄рнэ порат та̄н юв акваг ёхталэ̄гыт. Тот кит ма̄ньлат пыгыг ёт потыртасӯв, тэ̄н ань, насати, Сургут ӯст о̄лэ̄г рӯпитэ̄г ос ка̄сыӈ та̄л тув ёхталэ̄г. Мо̄таныт Иркутск, Тюмень, Екатеринбург ӯсытт хо̄т рӯпитэ̄гыт. Марийцат коныпал рущит ос мо̄т мирыт о̄с тот мӯйлуӈкве патсыт. Та̄н о̄с пуста̄гыл о̄луӈкве таӈхе̄гыт, э̄лаль о̄лнэ посыӈ, ёмас хо̄тал тот кинсэ̄гыт . «Передовик» нампа сельхозпреприятият кӯщаиг рӯпитан хум Юрий Игнатов ла̄выс: «Ма̄н ма̄ньта̄гыл Нуми-То̄румн агтуӈкве ханищтавесӯв, ты пе̄с йис ва̄рмалянув ань тыг мус э̄лаль тотыянӯв. Ты вераагтув рущ щирыл «язычестваг» ла̄ваве. То̄ват нёсаралым ма̄н нупылув сунсэ̄гыт, лю̄льсаӈ мовиньтэ̄гыт. Яа, тав кос. Ма̄н тыт матыр лю̄ль хунь ва̄ре̄в. Ма̄н о̄с християнство, ислам, буддизм верат хольт, туп во̄р халт ма̄нки щирыл Нуми-То̄рмув нупыл по̄икще̄в. Ма̄ви тув янытлэ̄в, таве̄ныл вим тэ̄нэайнэ тэ̄нутанув ма̄гыс пӯмащипа ла̄тыӈ ла̄ве̄в, исылтахтын ос тэ̄нут па̄йтнэ ма̄гыс на̄йлылы янытлэ̄в. Э̄лаль ёмас, со̄тыӈыщ о̄луӈкве воратэ̄в. Тувыл тыт э̄лумхо̄лас э̄лаль о̄лнэ ё̄р, посыӈ номт выг, лю̄ль номтанэ̄ныл хотсыстамтахты, пуӈке ат тэ̄лыглы». Ам о̄с тох номсэ̄гум. Нуми-То̄румн агтым пуссын пе̄с йис ма̄ньщи ма̄хманув о̄лсыт, ты хосыт са̄в со̄тыра нот э̄лаль о̄лсыт, щуньсыт. Та щирыл э̄лаль о̄луӈкве ма̄нав о̄с ханищтасаныл. Со̄ль, ма̄н номтанув Нуми-То̄румн ёхтэ̄гыт, тувыл та̄рвит порат маныр ёмас тэ̄ла ва̄руӈкве, аквтупмат нас хӯлтыглаве̄в. Ты щирыл ма̄н Ма̄витув о̄с ёмщаквег ӯргалылӯв. Таве наска̄ссыг ат па̄ӈктылӯв, мори вит ат со̄сантэ̄в, э̄типа̄лаг суй ат ва̄ре̄в, пе̄с ма̄хманув ла̄внэ̄ныл щирыл, э̄тпос яныгман порат пӯрлахтэ̄в. Са̄всыр хо̄нтлан пилыщмаӈ нак ат ва̄рыглэ̄в, мо̄т мирыт нупыл сымыӈыщ сунсэ̄в. Ань марий ма̄хумпалт ялмум юипа̄лт ам ва̄глум, та̄н о̄с ма̄н хольтув Нуми-То̄румн агтым о̄лэ̄гыт. Та̄н та̄нки На̄й-О̄тыранылн пуӈк пинэ̄гыт, йир ва̄ре̄гыт. Хум хо̄тпат пе̄с ма̄хманыл щирыл маныр хумус ва̄рсыто̄с аквта хольт йис наканыл э̄лаль тотыяныл. Ты рӯтыг о̄лнэ марий ма̄хумн ам яныг пӯмащӣпа ла̄тыӈ ке̄тэ̄гум. «Картыг» ла̄внэ яныг ня̄йт хо̄тпа журналистытныл пӯмщалахтас, хоты ма̄ныл ма̄н о̄лэ̄в. Тувыл ка̄сыӈ хо̄тпа ос тав мире ма̄гыс Нуми То̄румн о̄с по̄икщас. Ма̄н о̄с ла̄ве̄в: «Пус ка̄т, пус ла̄гыл, То̄рум ёт, О̄тыр ёт марий ма̄хум вос о̄лэ̄гыт».

1059 2013.09.06. Валентина УЗЕЛЬ

Сака пе̄с хурит суссылтаве̄сыт. Тамара Степановна Траки Касум па̄выл музейн тэ̄лы мощщан рӯпитаӈкв во̄выглавес. То̄нт са̄лы ӯрнэ ма̄хум каснэ хо̄таланыл о̄лыс. Ос татем пӯмыщ выставка тот ва̄рыглавес, тав ты выставка урыл мӯй ма̄хумн потыртас. Та суссылтап ханты ма̄хум ла̄тӈыл тох намаим о̄лыс – «Йис ёх, йис вер», (ма̄ньщи ла̄тӈыл те ла̄вуӈкв, тох толмащлаӈкв ро̄ви – «Йис ма̄хум, йис ва̄рмалит»). Та па̄вылн Санкт-Петербург ӯст о̄лнэ Российский этнографический музейныл сака пе̄с хурит тотыглаве̄сыт. Ты хурит Сергей Иванович Руденко 1910 та̄л порат по̄слуманэ. Ты хум яныг учёныиг о̄лум, антрополог, археолог, технический наукат доктор намыт о̄ньщум. Тав 1909 та̄л порат я̄ӈк на̄тнэ э̄тпосныл ре̄тыӈ ю̄свой э̄тпос мус ма̄ньщи ос ханты ма̄хум палт тыг ёхталам. А̄с я̄, Сакв я̄, Та̄гт я̄, Сыня, Вогулка ос Войкар я̄т хосыт о̄лум соссаӈ ма̄хум палт ялыс. Та̄наныл пуссын хурин по̄слысанэ. То̄нт, пе̄с порат, фотоаппаратыт хунь о̄лсыт, тав кумыскал ва̄рим негативыт ёттотыгласанэ. Хо̄тса̄т арыгтем хури ва̄рум. Ялум лё̄ӈхе, маныр пӯмыщ тав ка̄сала̄лыс, тав пуссын нэ̄пакн хассанэ. Ань тав по̄слум пе̄с хуриянэ туп Санкт-Петербург ӯст о̄лнэ музейт ка̄салаӈкв ро̄ви. Касум па̄вылн тотыглым хурит ань ювле этнографический музейн тотве̄сыт. Ты хӯрум пе̄с хури С. И. Руденко по̄слуманэ. Ань ты хури сунсыглэ̄н. Э̄рыӈ на̄н пе̄с рӯтанын тот по̄слым о̄лэ̄гыт. Са̄литан ла̄тыӈ Ма̄н Зоя Валентиновна Пахомован ос тав ще̄мьятэ̄н са̄литан ла̄тыӈ ке̄тэ̄в. Ты ма̄ньщи э̄ква Сургут ӯст о̄лы. Во̄ртур э̄тпост Дмитрий пыге а̄тимыг е̄мтыс. Ты ёмас сымыӈ хум хо̄тпа о̄лыс. Тав акваг ӯсыӈ ма̄т о̄лыс кос, ос хӯл алыщлаӈкве, во̄раяӈкве сака ха̄сыс. Оматэ ат а̄лыманэ̄тэ торыг хӯлыт такви нилиянэ, исмитыг па̄йтыянэ манос нас саритыянэ. Ма̄ньнувег о̄лме̄т тав Хо̄рыӈпа̄вылн тотыглавес, тот рӯт ма̄хманэ̄ныл са̄всыр мӯтраӈ ва̄рмалитыл пӯмщалахтас. Ос ӯст о̄лме̄т ма̄ньщи телепередачат суссылтан пора урыс о̄с сунсыс. Тувыл такви колнаке акваг сыстамыг о̄ньщистэ. Руманэ тав уре̄т о̄с са̄в ёмас потрыт потыртасыт, во̄рт о̄лнэ са̄всыр та̄рвит ва̄рмалитын та̄н Диман ханищтаве̄сыт Зоя Валентиновна Владимир Петрович о̄йкатэ̄нтыл номтыӈ пыг янмалта̄лсы̄г. Ань ты рӯт ма̄хум э̄лаль о̄лнэ хо̄талытн пуссын вос та̄кмалтахтэ̄гыт.

1059 2013.09.06. Светлана РОМБАНДЕЕВА

Э̄квапыгрищ мо̄йт. Э̄квапыгрищ ща̄нягеа̄щаге ме̄ӈквын алвесы̄г ман та̄йвесы̄г. Тав савалап пыгрищ а̄квынэ̄кватэ̄н янмалтавес. Тувыл яныгмас, манарас, а̄квынэ̄кватэ̄н кон ат та̄ртаве ла̄ви: Э̄л ул минэн, тыт ме̄ӈквыт о̄лэ̄гыт манса̄вит. А̄щагын ща̄нягын ме̄ӈквытын алвесы̄г, та̄йвесы̄г. Та в ё̄рыг е̄мтыс, ме̄ӈкв хо̄лат пуссын тав ты по̄кыльтасанэ алыщласанэ. А н ь а̄квэ̄кватэ̄н хунь хӯнтлы, акв ла̄гылсоре̄ныл ня̄л ва̄рыс, мо̄т ла̄гылсоре̄ныл ё̄вт ва̄рыс, сорлуве̄ныл. Тувыл а̄квэ̄кватэ нупыл ла̄ви: Ам кон ква̄ллэ̄гум, кон ёнге̄гум, ӯйрищит матыр па̄хвтэ̄гум, алыщлэ̄гум. А̄квэ̄кватэ̄н ат та̄ртаве: Ул минэн, ул минэн, э̄л ул минэн! Ме̄ӈквын хо̄нтавен тах, алавен! Тав ка̄сыӈ хо̄тал та яласы, ӯйрищит алыщлы, та мaныр, ё̄мыгты. Мощ э̄лнув, мось э̄лнув, тоха та э̄лаль мины. Аквматэ̄ртн хӯрмит хо̄талыг е̄мтыс, а̄кве̄н ты тыпылтавес. Лю̄ньщим кинсытэ, ё̄мыгты. А тав, Э̄квапыгрищ, э̄лнув минас, хӯрмит хо̄тал, сунсы, ме̄ӈкв о̄йка ты ё̄ми, пувумтавес, лапаяптувес, такос щисги, ро̄ӈхи, та тотаве. Тувыл тотвес, хоса ман ва̄ти тотвес, со̄ль аквмат колрищин ты тӯлвес. Та ме̄ӈкв о̄йка а̄гирищигпыгрищиг о̄ньщи, ань хотща̄гтсы̄г, ла̄ве̄г: А̄щме̄н лылыӈ ке̄лп ман лылыӈ нё̄выль тотыс. А тав, Э̄квапыгрищ, ла̄ви: Наӈ тай а̄нум ань ул алэ̄лн, сунсэн, ам урум ман мaныр. Нё̄влюм ман нё̄выль атыл пасы, мущ о̄ньще̄лн тувыл ущ алэ̄лн а̄нум. Тувыл ме̄ӈкв о̄йка номсы: «Тав со̄ль, мощ тыттылум, тах нё̄влете̄лпе атыӈыг е̄мты, ёмасыг е̄мты». Ёлхуясыт. Ань Э̄квапыгрищ ул вос ояс, ме̄ӈкв о̄йкан такви пӯтитэ̄н хуюптавес. Таяныт ме̄ӈкв поталы, лылые̄пе та хурип та, торгиньты ман лылы хасумты, юв а̄лты аялаве, тот та тыгтув хартата̄лаве лылтнэ̄тэ мус. Хотмус хуясыт ман манарасыт, а̄лпылыг е̄мтыс. Ме̄ӈкв хотталь минуӈкве ты щё̄питахты, улпыл о̄с алыщлаӈкве хотталь во̄рн мины, матыр ӯйхул ма̄гыс. Э̄квапыгрищ та̄кыщ ёлпе̄рсаластэ, тыттыстэ, ня̄врамаге̄н ла̄выс: Сунсэ̄н, хот ул та̄ртэлы̄н! Хот те та̄ртылы̄н, нэ̄н тах алаве̄н. Тав, Э̄квапыгрищ, мӯтраӈ, ве̄рми матыр ва̄рапаӈкве. А̄ти, ме̄н ат та̄ртыламе̄н. Тувыл та минас во̄рн ё̄мыгтаӈкве, ёсаге масыс. Э̄квапыгрищ тэ̄натэ̄н китыглыяге: Нэ̄н, а̄гирищигпыгрищиг, ӯмпи матыр о̄ньщегы̄на? А ме̄н ӯмпил маныр ва̄риме̄н. А̄нум алэгы̄н тах, исум те̄лп ман маныр аюӈкве. А̄ти, ат о̄ньщиме̄н. Ат те о̄ньщегы̄н, ам ха̄сэ̄гум, нэ̄нанн ӯмпил матарыл ва̄риягум. А̄щин матыр са̄грапкасай о̄ньщи? Тэ̄н ва̄гтэ̄н, ла̄ве̄г: О̄ньщи. О̄ньщи те, тотэ̄н сaграпкасай, пе̄лпыт? Ам нэ̄нанн те̄лп аюӈкве ӯмписовыл ва̄риягум, а̄нум алэгы̄н, те̄лп аюӈкве патэгы̄н. Тав со̄ль, йильпи ӯмпил те̄лп айиме̄н. А̄нум хотта̄ртэлы̄н, нэ̄нанн ӯмпил ва̄риягум, тувыл а̄нум тах ущ ёлнэ̄гелы̄н. О̄влэ̄т са̄грапкасай тотэ̄н, ӯмпи ва̄руӈкве э̄ри, ӯмпи ва̄руӈкве патэ̄гум. Тэ̄н маныр, номсэ̄г со̄ль, ха̄йтсы̄г, са̄грапкасай тотсы̄г. Э̄квапыгрищ лави: Ань а̄нум хотта̄ртэлы̄н, а̄щин ялнэ̄тэ сыс ам нэ̄нанн ӯмпил ва̄риягум те̄лп аюӈкве. Номсэ̄г со̄ль тав тах, тувыл хотта̄ртвес. Э̄квапыгрищ йӣв са̄грыс, йӣвсупыт пиныс, ла̄ви: Тыг хуигпа̄лэрищин, ам нэ̄нан мо̄ртым ӯмпи ва̄ре̄гум. Ам нэ̄нан мо̄ртыягум, тыг йӣвсупыт палт хуигпе̄н, ман яныт э̄ри, ам мо̄ртэ̄гум. Тувыл акватэ та хуигпас, хуигпас, сыплуве супыг та са̄грапастэ. Мо̄танэ̄н о̄с ла̄выс хуигпаӈкве, тувыл таитэ хуигпас, о̄с пуӈке мaн сыплуве хот та са̄грапастэ. Тувыл маныр ва̄руӈкве, пуӈканэ̄н висаге, колошкаг ва̄рыс. (Ме̄ӈкв о̄йка аман хоталь ё̄мыс, аман йӣв са̄грысёргыс). Тув а̄ӈквал тӯщтыгпас, а̄ӈквал пуӈк паттан пуӈканэ̄н тув мастысаге, вильтанэ̄н а̄ще̄н йинэ лё̄ӈх ляльт тӯщтыгпасаге. Тувыл молямтахтым нё̄выль якытлапыс, на̄лув па̄йтлыгтас, мощ па̄йтахтас ман манарас. Моще̄ртын ме̄ӈкв хо̄ла ты ёхты, молямтахтым а̄ны хӯнумтас, тав йӣнэ лё̄ӈх сӯнтэ̄н тув ӯнттыгпастэ. Та торыг ме̄ӈкв о̄йка тув нэ̄глапамисум а̄ны, исум пӯт ӯнттымаг, сэ̄ӈвкыл иӈ па̄йтахтэ̄г. Номсалы: «Ты улпыл а̄гирищагумпыгрищагум Э̄квапыгрищ аластэ̄н, па̄йтыстэ̄н, тыг ӯнттыгпасыг а̄ны». Тувыл ёмас щирыл нё̄выльло̄мт вис, та то̄втытэ. Илттыг консалямитэ, ла̄ви: Анана̄, амти лувумнё̄влюм атыл пасы. Мо̄т а̄ны атыньты, пуссын такви лувенё̄вле атыл пасы. Тувыл номсахты: «Тэ̄н улпыл Э̄квапыгрищ хотта̄ртыстэ̄н, ня̄врамагум алвесы̄г». Ань пуӈканэ̄н та ма̄ныр хо̄нтсанэ, такви ня̄врамаге пуӈкы̄г. Та кантмувес, аа, Э̄ква пыгрищ хот та оигпас. Лю̄ньщимтыстым юв ты щалты, со̄ль ня̄врамаге а̄тимыг. Та халт Э̄квапыгрищ ойи юв колэ̄н, юв щалты а̄квынэ̄кватэ̄н хо̄нтаве, та аниглаве: Ма̄ныр ты палыт сыс во̄рт ва̄рсын? Ам ме̄ӈквын пувиньтаве̄сум, а̄лты алве̄сум тэ̄ӈкв. Ам по̄йкыслум таве, тувыл хультуптаве̄сум. Нё̄влюм, ла̄ве̄гум, маныр атыл пасы, мощ о̄ньще̄лын, ам тах нё̄влюм ялты, ёмащакв тыттэ̄лын, ущ а̄нум алэ̄лын, по̄йкщислум. Хунь ёлхуясув, тав лылтыторгиньты, ам тыгтув та нуйгата̄лавем, лылаянэ̄тэ сыс а̄лты юваялавем. Тувыл а̄лпыл ёлнэ̄гсалаве̄сум, такви во̄рн минас, та сыс ам ня̄врамаге аласагум, амти оясум. А̄кве̄н аниглавесыпгаве, та лю̄ньщи: Ам ты ла̄ве̄гум воссыг э̄л ул минэн . Тав Э̄квапыгрищ та кантмувес, воссыг а̄кве ла̄тыӈ хӯнтлуӈкве ат патыс. Акв хо̄тал о̄лэ̄г, о̄с э̄л ат та̄ртаве а̄кве̄н, атав ва̄гтэ ме̄ӈкв о̄йка лё̄ӈх, хоталь тотвес, колэ хо̄т о̄лы. Э̄типа̄лаг а̄кве̄н о̄с та тыпылтавес, тыстылю̄ньщи, номсы: «О̄с та пуввес апыгтем, алаве тах». Э̄квапыгрищ ме̄ӈкв о̄йка колэ̄н ёхтыс, юн а̄тим, хотталь минам. А̄раще̄ныл ве̄тра выг, хӯлюм ве̄тран пины та̄глэ̄кв, но̄х колалан та ха̄хтытэ. А̄лпыл хӯнтлы ты йинэ̄т суйты, хоттӯйтхатас, тувщакыртахтас. Пе̄с ань щовалыт о̄лсыт, а ме̄ӈкв о̄йка колэ щовалыӈ, тувыл щовал сӯнтын тув хотталь тӯйтхатас, я̄ртхатас. Ме̄ӈкв о̄йка ос юн тэ̄нут ва̄рыс, ӯй ман матыр алам, па̄йты. Тав ос Э̄квапыгрищ хунь пилы, сэ̄й хулюм кос та̄гыл выг, щовал ас хосыт сӯнтыл юв та та̄рталы, пӯт сӯнтэ̄н та патыглэ̄гыт. Пӯтэ мощ па̄йтахты, а̄рталытэ: «Я а, манырман сэ̄й ман ма̄ныр, аман витум тамле». Та̄глэ̄кв утыстэ, тэ̄нэ хурип пыл а̄ти . Тавагт, такви тувыл аман ояс, ат номилум. Ме̄ӈкве аман та̄ра алыстэ, манос ётыл ёхтыс, ня̄лыл вусщкасастэ.

1059 2013.09.06. Татьяна Дмитриевна Слинкина

Кар ос ощща урыӈ ю̄нтуп. Татьяна Дмитриевна Слинкина ня̄врамыт ма̄гыс мо̄йт нэ̄пак хансыс «Кар ос ощща урыӈ ю̄нтуп». Ты мо̄йт Е. И. Ромбандеева хосат ёлхасме, таве̄н Овёсова Ульяна Иосифовна мо̄йтыглас. На̄н ань э̄лаль ты мо̄йт ловиньтэлы̄н. Карыг ос ощща урыӈ ю̄нтпыг тэ̄нттетэ̄н ма̄т во̄рт о̄лэ̄г. Тох о̄лыматэ̄н аквэ̄рт акватэ̄н ла̄ви: Во̄рн ялырищме̄н. Тот та та̄лтхатсыг, минэ̄г, ва̄ӈныл хартэ̄г. Урыӈ ю̄нтпе та харты сунэ, каре коныл товлыл мины. Тох миныматэ̄н, урыӈ ю̄нтпе тахурип тарыгкве хо̄нтыс: Маныр ӯй норма па̄рт са̄грынэ хурип йӣвкве, па̄ртыг тах! Ань каре та ро̄ӈхитэ: Каро̄в! Пуна ю̄хрых, пуна ю̄хрых! Щиньхпиньх ла̄пщих! Ань кар тыг ёхтыгпас, ла̄ви: Хумле? Ам тахурип ӯй норма ва̄рнэ хурип па̄ртквет ма̄гыс тарыг хо̄нтсум! Я, ӯй хо̄т ка̄тынпаттыме̄н? Яты, ань ощща урыӈ ю̄нтуп каре̄н тарге палт ю̄ныгтавес, тот та харты, тот та лэ̄вата̄нты, аквэ̄ртын та лэ̄гматас, о̄с та хартанты, мины. Тох хартыматэ тахурип ха̄ль хо̄нтыс, ӯй э̄лыпа̄л са̄н ва̄рнэ са̄с о̄ньщи. Ам ань картем вос ро̄ӈхыгланувлум: Каро̄в! Пуна ю̄хрых, пуна ю̄хрых! Щиньхпиньх ла̄пщих! Каре о̄ста ла̄пщатас, тав палтэ ёхтыс, ла̄ви: Хумле? Ӯй э̄лыпа̄л са̄н ва̄рнэ са̄скве хо̄нтсум. Тэ̄хам, ме̄н ӯй хо̄т ка̄тынпаттыме̄н? Ань каре̄н о̄ста тув ле̄ӈктапавес. О̄ста тот лэ̄ватахты, та харты. Аквматэ̄рт та лэ̄гматас, о̄ста э̄лаль хартанты. Тох хартыматэ, но̄ӈхаль сунсы: тахурип со̄скве, ӯй э̄лыпа̄лт со̄с косамтаӈкве. Ам ань карум вос ро̄хнувлум: Каро̄в! Пуна ю̄хрых, пуна ю̄хрых! Щиньхпиньх ла̄пщих! Я, тыг та ла̄пщатас каре. – Я, хумле? – ла̄ви. – Тахурип ӯй э̄лыпа̄лт косамтан хурип со̄скве, хусатылме̄н! Ань ощща ю̄нтуп со̄сэ̄нн тув та ле̄ӈктыгпавес! Каре та тахас, о̄ста хультыс, о̄ста лэ̄ватахты, аквматэ̄ртн та лэ̄гматас. Э̄лаль о̄луӈкв ла̄вим ут хотум хунь е̄мты! О̄ста хартанты. Аквматэ̄рт ня̄рн нэ̄глыс, татем морхыӈ! Пупакве тот морых ва̄ты, лакватахтыглы. Тот утыматэ, ань ощща урыӈ ю̄нтуп яныг морах тинсыс, та тӣвырн тув щалтапас, ань пупакве̄н ювва̄тасавес. Воссыг ма̄ныр ӯрум хум! Пищпище хольт та щалтсы. Пупатэ ка̄тнпаттыстэ конква̄лапас. Ам ань карум вос ро̄хнувлум: -Каро̄в! Пуна ю̄хрых, пуна ю̄хрых! Щиньхпиных ла̄пщих! Ань каре, я, тыг та ла̄пщатас. Я, сунсэн, мо̄лхо̄тал ат агтэ̄гын, аньсунсэ̄н! Ятэ, та ёнге̄г, та капыртэ̄г тэ̄нттетэ̄н. Яты, ва̄ӈын сунэ̄нн та̄лттапастэ̄н, та хартэ̄г, та хартэ̄г. Ань со̄сэ̄н хусатасы̄г, ха̄ле̄н нуйсы̄г, тарге̄н са̄грысы̄г, колэ̄нн та хартэ̄г. Ёхтысы̄г, ӯе̄н ӯнттысы̄г. Каре са̄ӈквылты, урыӈ ю̄нтпе йӣкви! Урыӈ ю̄нтпе са̄ӈквылтаӈкве паты, каре йӣкви. Тот та кае̄г, аман ань иӈ та йӣкве̄г. Ань та хӯлэ̄г, ань та щуне̄г мат хомлыг! Утьща ӯй ка̄тнпаттысы̄г! Нас ощща ю̄нтуп ё̄ре тамле та!

1060 2013.09.20. Александр ВЬЮТКИН

Ща̄нь ла̄тӈыл ня̄врамыт ханищтан нэ̄. Хурит ма̄ньщи нэ̄ Клавдия Семёновна Плеханова по̄слым о̄лы. Тав Октябрьский район Лӯи Ня̄рихумит па̄вылт колта̄глэ ёт о̄лы. Клавдия Семёновна Алы Ня̄рихумит па̄вылт самын патыс. Ты па̄выл урыл Клавдия Семёновна потырты: «Та Алы Ня̄рихумит па̄выл ураме̄т щар о̄влэ̄т тув хотты порат саран ма̄хмыт о̄лмыгта̄лсыт. Хумус ты урыл ва̄ве? Пе̄с порат сараныт тит накпа лю̄лит колыл о̄лсыт. Кол ёлы наке̄т ӯйхуланыл о̄щсаныл. Нумын ос та̄нти о̄лсыт. Та па̄вылт ань мус иӈ акв ёллоньхатам кол ёр по̄хе хультыс. Тувыл ущ са̄т Яркин пыг тув о̄лмыгтасыт. Яркин о̄парищ наманыл щирыл тан Ка̄рай рӯт ма̄хмыг о̄лэ̄гыт». Клавдия Семёновна оматэ ос рӯтанэ урыл а̄нумн потыртас. Оматэ наме Александра Кирилловна Яркина о̄лыс. Тав 1914 та̄лт самын патыс. Александра Кирилловна хӯрум та̄л яныт порат корь а̄гмыл е̄мталас. Та а̄гм паттат самаге посталыг е̄мтсы̄г. Мощ ка̄салан самаге̄тыл тав юн о̄лнэ рӯпата пуссын ва̄рыс. Та коныпал хӯл алыщлым ос пил ва̄тым ма̄хманэ ёт яласас. Хо̄тал сыс уча ве̄тра пил ва̄туӈкв ве̄рмыс. Ма̄ньлатыг о̄лме порат Александра Кирилловна самаге пусмалтаӈкв ве̄рмувесы̄г кос, тав матрыг такви ат ка̄сащас. Э̄ква са̄р о̄йкатэ Камратка па̄вылныл о̄лыс, наме Семён Адин. Аквъёт о̄лыматэ̄н о̄йкатэ а̄тимыг е̄мтыс. Нэ̄кве ма̄нь ня̄враманэ ёт такви па̄влэ̄н о̄луӈкв ва̄нтлыс. Клавдия Семёновна оматэ акв увщи, тит каӈк ос акв а̄пщи о̄ньщас. Увщитэ Матрёна, тав ёлыпал каӈке наме Николай. Тав Финский хо̄нт порат тот пулемётчикыг хо̄нтлас. Хо̄нтыт пистыглавес. Военный госпиталит пусмалтахтаме юипа̄лт Ха̄льӯсн пусмалтахтуӈкве те̄тыглавес. Пуссын кос ёмас такви о̄лнэ ма̄тэ̄т, аквматэ̄ртын тав сепсис а̄гмыл е̄мтыс. Ты лю̄ль а̄гмын хотталь та тотвес. Титыт каӈке наме Григорий. Тав яныг хо̄нт э̄лыпа̄лт Ханты-Мансийск ӯсын ханищтахтуӈкв те̄тыглавес. Ӯс мус минаманылт лувыӈ сунаныл я̄ӈк ёлыпа̄лн ра̄гматыглас. Пыгрищ по̄льтахтас ос та юипа̄лт а̄гмыл е̄мтыс, тувыл нэ̄мат хоса ат о̄лыс. Питипатта а̄пщитэ наме Борис. Яныг хо̄нт о̄лум порат 1944 та̄лт Борис нёлоловхуйплов та̄лэ туп то̄влыс, та̄ра хо̄нтлын ма̄н вуйвес. Тав лусытам ма̄тэ̄т онтоловхуйплов ма̄ньщи хум о̄лсыт. Та̄н халанылт Борис рущ ла̄тӈыл такте̄т потыртас. Хо̄нт юипа̄лт Кульпас па̄вылныл аквъёт хо̄нтлум акв юрт хумитэ ёт туп ва̄щиньтахтас. Клавдия Семёновна ань ня̄врамыт школат ма̄ньщи ла̄тыӈ ос ма̄ янытыл о̄лнэ я̄т, тӯрыт, нё̄рыт ос ща̄рщит ханищтан нэ̄г рӯпиты. Та коныпал тав округ янытыл ня̄врамыт ща̄нь ла̄тӈыл ханищтан ма̄хум халт аквписыг касы. Ты касыланыл Ханты-Мансийск ӯст ва̄рыглаве. Клавдия Семёновна ва̄тихал но̄хпатыглы. Тамле ёмас ка̄ркам хо̄тпа янытлаӈкв ос ӯргалаӈкв э̄ри. Таима̄гсыл Клавдия Семёновнан ам са̄в щуньпаща ла̄тыӈ те̄тэ̄гум. На̄й-О̄тыранылн ще̄мьятэ вос ӯргалаве, са̄в та̄л пуста̄гыл вос о̄лы.

1060 2013.09.20. Тамара МЕРОВА

Э̄рнэ нэ̄пакыт акв колт ва̄равет. Округув янытыл та̄л сыс «Многофункциональный центр Югры» нампа колыт рӯпитэ̄гыт. Мо̄т щирыл та̄н МФЦ Югры хансавет. Тот ма̄хум са̄всыр справканыл, э̄рнэ нэ̄паканыл са̄в ма̄ныл акванатуӈкве нё̄тавет. Ханты-Мансийскат ты колыт рӯпитан кӯщай Александр Сучков ла̄выс: «Ань та̄л сыс ма̄н палтув хус со̄тыра са̄вит э̄лумхо̄лас та̄нки тэ̄ланыл ма̄гыс нё̄тмил во̄вуӈкве ёхталасыт. Ма̄хум сака са̄в э̄рнэ нэ̄паканыл Россия янытыл киссанӯв. Ты ка̄сыӈ хо̄тпа хо̄т о̄лыс, хоты ма̄ныл тыг ёхтыс, ма̄н ищхӣпыӈ утыт хосыт тув ла̄тыӈ ке̄тыглэ̄в ос ювле пищмал хансаве̄в. Ма̄н палтув янгыщ нё̄тмил ва̄рнэ ма̄гыс, миграция ос налог службаныл сыресыр э̄рнэ нэ̄пакыт ва̄руӈкве ёхталэ̄гыт. Ань тамле нэ̄пакыт пуссын мӯсхалыг щё̄питан ма̄гыс, ма̄н са̄всыр ӯсыӈ колыт ёт аквъёт рӯпитан щирыл потыртахтасув. Тувыл хоты ӯст, хоты колыт ёт ма̄н рӯпитаӈкве ве̄рме̄в, на̄н на̄нки ищхӣпыӈ ут хосыт: http: //mfchmao. ru. ты урыл ловиньтэ̄н. Манос 8-800-101-0001 телефон хосыт ма̄н ётув потыртаӈкве ве̄рмегы̄н. Пуссын тамле тэ̄лат ма̄гыс на̄нан олн ойтуӈкве ат э̄ри». О̄с акв тамле МФЦ колыт Мегион, Нижневартовск, Нефтеюганск, Нягань, Пыть-Ях, Сургут, Урай, Югорск ӯсытыт ос Ха̄льӯст рӯпитэ̄гыт.

1060 2013.09.20. Людмила ТЕТКИНА

Тот ма̄к тэ̄лат урыл хансым о̄лы. Округувт этнотуризм щирыл рӯпитан ма̄хум грантолн ма̄гсыл та̄нки нэ̄паканыл ке̄туӈкве ве̄рмияныл. Ань са̄в предприятият, община мӯй хо̄тпат Нё̄рн ялуӈкве, хӯл алыщлаӈкве, во̄раяӈкве ос во̄рт о̄лнэ соссаӈ ма̄хум палт мӯйлуӈкве во̄вияныл. Ты хосыт са̄в ма̄хум рӯпитаӈкве, олн сэ̄луӈкве ань ка̄саще̄гыт. Ос та̄нки проектаныл Ханты-Мансийск ӯсн касылн ке̄тыглыяныл. Тувыл то̄ват но̄хпатуӈкве ат ве̄рме̄гыт, нэ̄паканыл мӯсхалыг ос э̄рнэ щирыл ва̄руӈкве ат ха̄сэ̄гыт. Природный ресурс департамент сборникнэ̄пакыт та̄ратас. Тот са̄в э̄рнэ тэ̄ла урыл ловиньтаӈкве ро̄ви. Са̄всыр резюменэ̄пак, бизнеспланыт, финансовый план ос са̄в мо̄т нэ̄пакыт хумус ёмащакв ва̄руӈкве э̄ри – тот пуссын хансым о̄лэ̄гыт. Ка̄сыӈ хо̄тпа ты нэ̄пак хосыт ханищтахтуӈкве ве̄рми.

1060 2013.09.20. Людмила ТЕТКИНА

Пе̄риян хо̄тал о̄лыс. Ты э̄тпос 8 щислат Россия янытыл пе̄риян хо̄тал о̄лыс. Ма̄н округувт то̄ва ӯсытт ос па̄влытт ма̄хум миркол кӯщаит ос депутатхо̄тпат пе̄риясыт. Округувт избирательный комиссият рӯпитан кӯщаит ля̄ххал тотнэ ма̄хум ёт хо̄нтхатыгласыт ос ты ва̄рмаль урыл потыртасыт. Югра янытыл 688 избирательный участок о̄лы. Ты э̄тпос 8 щислат 186 пе̄риян кол рӯпитасыт, 266 со̄тыра э̄лумхо̄лас нэ̄пак та̄ратаӈкве тот ве̄рмысыт. Тот о̄лнэ мир 50 йильпи миркол кӯщай ос 719 депутатхо̄тпа пе̄риясыт. Щар са̄внув э̄лумхо̄лас Белоярский, Нефтеюганский ос Ханты-Мансийский районытыт ка̄тпос пинсыт. Ос сака мощща ма̄хум Сургутский ос Нижневартовский районыгт избирательный участкан ёхталасыт. Ты ва̄рмаль урыл ма̄хум ул вос ёрувласыт, округувт ань пе̄риян участкат мирн ва̄нэ ма̄хум намыл пинавет. Округувт 14 тамле кол ань о̄лы. Ха̄льӯс район Восыӈтӯр па̄вылт избирательный участок Юван Шесталов намыл намаявес. Андрей Павкин, округ избирательный комиссия кӯщай хум, ла̄вме щирыл ма̄хум миркол кӯщаит ос депутатхо̄тпат пе̄рияӈкве ще̄мьяӈ та̄гыл ёхталасыт. Кондинский район Междуреченский па̄вылт Татьяна ос Владислав Ульяновыг та хо̄тал пӯри ва̄рсы̄г ос ка̄тпос пинуӈкве пуссын мӯй ма̄хманэ̄н во̄всы̄г. Ха̄льӯст Вертковыг э̄кваго̄йкаг хо̄т ня̄враманэ̄н ёт ӯс миркол кӯщай ос депутатыт пе̄рияӈкве ёхталасы̄г. Ха̄льӯст Кирилл Егорович Семяшкин щар яныг о̄йка наблюдателиг рӯпитас. Тав 82 та̄лэ то̄влыс, «Труженик тыла» нам ос ма̄гылн та̄гатан са̄всыр по̄сыт о̄ньщи. Варъёган па̄вылт 90 та̄л яныт э̄ква Акиния Соболевна Казамкина нэ̄пак та̄ратаӈкве ёхталас. Округувт пе̄риян хо̄тал о̄лум порат 48% арыгкем ма̄хум та̄нки кандидатаныл ма̄гсыл хасхатуӈкве ёхталасыт. Ксения Дмитриева, округ избирательный комиссият рӯпитан нэ̄, ла̄выс: «Сӯкыр э̄тпос 8 хо̄талэ̄т йильпииг пе̄риим 50 миркол кӯщаит халт 44 хо̄тпа «Единый Россия» нампа партияныл о̄лэ̄гыт, хӯрум хо̄тпа КПРФ хасхатым о̄лэ̄гыт, акв хо̄тпа ЛДПР рӯпиты ос «самовыдвиженцыг» ла̄внэ щирыл кит хо̄тпаг пе̄риявесы̄г. Ты коныпал ма̄хум 719 депутат пе̄риясыт. Та̄н пуссын ӯсыӈ, районныӈ манос па̄влыӈ Думат депутатыг рӯпитаӈкве тах патэ̄гыт».

1060 2013.09.20. Александр ВЬЮТКИН

Лё̄ӈхыт ӯргалахтым о̄лэ̄н. Ка̄сыӈ таквс акв порат са̄в ма̄нь ня̄врамыт о̄выл щёс оманылн, а̄тянылн ханищтахтын колытын ва̄нттавет. Ня̄врамын лё̄ӈхыт матыр ва̄нэ урыл ёмщакв потыртаӈкв э̄ри. Тав таквирот матыр ёмас тэ̄ла ва̄рнэ̄тэ ма̄гсыл на̄н таве э̄рнэ пормасыл мӯйлуптэлы̄н. Ханищтахтын колн миннэ ня̄врам ма̄гсыл щар ёмас мӯйлупса, таи а̄лпыл са̄йкатан щё̄с, тав будильникыг ла̄ваве. Таве̄н мӯйлуптым щё̄с такви ӯнттуӈкве вос ха̄сытэ, о̄с ханищтэлы̄н. Омат, а̄тят, ня̄врамын ва̄нэ титыт ва̄рмаль, таи тав ханищтахтын колэ мус миннэ лё̄ӈхе ёмщакв вос ва̄гтэ. Ня̄врамын ёт ловмантем щёс та лё̄ӈхыл э̄лаюв ялэ̄н. Лё̄ӈхыт ӯлтта миннэ ма̄т ёмщакв потыртэлы̄н. Хоты нупыл, хунь э̄ри сунсуӈкв ос хоты порат лё̄ӈх ӯлтта ё̄мантаӈкв ро̄ви. На̄нти та урыл ханищтанэ̄н коныпал, ты урыл школат о̄с потыртавет.

1060 2013.09.20. Александр ВЬЮТКИН

Яныг вит ва̄рыс. Сӯкыр э̄тпос титхуйплов хо̄талэ̄т Ханты-Мансийск ӯст журналистыт нупыл потыртан ма̄гсыл тит кӯщаиг ёхталасы̄г. Сергей Малый, округ янытыл мир ӯргалан департаментыт ва̄ӈын кӯщайиг о̄лы ос Людмила Низамова, тав мирн нё̄тмил ва̄рнэ департаментыт ва̄ӈын кӯщаиг рӯпиты. Тэ̄н Дальний Восток ма̄т яныг вит ва̄рум урыл потыртасы̄г. О̄влэ̄т Сергей Малый коланыл а̄марим ма̄хум ма̄гсыл ва̄рнэ нё̄тмил урыл потыртас. Тав ла̄выс: «О̄выл яныг вит хунь ёхтыс, ма̄н округ мирколувт та̄ра сапра̄ни ва̄рыгласӯв. Та юипа̄лт Благовещенск ӯст э̄рнэ пормасыт хӯрум хо̄тал сыс атсӯв ос Ханты-Мансийск ӯсныл та тотве̄сыт. Аквъёт пуссын 8 млн. 600 со̄тыра солко̄ви са̄вит са̄всыр пормас тув ёвтсӯв. Ань титыт яныг товлыӈха̄п Сургут ӯсныл Хабаровск ӯсн те̄туӈкв щё̄питэ̄в. Тув те̄тнэ пормасанув 12 тонна 500 кила та̄рвитын ёхты. Те̄тнэ пормасыт халт па̄лтыглахтын кӯрыт, на̄йпос ва̄рнэ генераторыт, вит хартнэ помпат ос ре̄гыӈ маснутыл те̄тыянӯв. Сургут ӯст товлыӈха̄пыт тыламлан ма̄ по̄хат пормас, тэ̄нут атнэ кол щё̄питавес. Пормасыт пирмайтан кол э̄тэхо̄талэ, ӯщлахтын хо̄талыт та̄л рӯпиты. Округувт рӯпитан «Центроспас Югория» ма̄хманув щё̄питахтым о̄лэ̄гыт, э̄рмыглэ̄гыт те, тув миннэ кастыл акв щё̄с сыс атапахтэ̄гыт. Ма̄навн нё̄тмил ва̄рнэ̄ныл ма̄гсыл ам Ханты-Мансийск ос Сургут ӯсыгт товлыӈха̄пыт тыламлан колагувт рӯпитан хо̄тпатын яныг пӯмащипа ла̄тыӈ те̄тэ̄гум». Хум юипа̄лт Людмила Низамова потыртас: «Сӯкыр э̄тпос хо̄тыт хо̄талныл округув янытыл маснут ос тэ̄нут пирмайтан налыман нупыл ат кол рӯпитэ̄гыт. Тот сӯкыр э̄тпос оигпан мус тэ̄нут ос пормас тах пирмайтаве. Хотьют ка̄сащи, ре̄гыӈ маснут ос хосанув о̄щнэ тэ̄нут тув тотэ̄н. Ты коныпал ма̄хум олн тув те̄туӈкв ве̄рме̄гыт. Олн те̄туӈкве ка̄сащан хо̄тпат ты урыл почта колт вос титыглахтэ̄гыт. Тот на̄н ёмщакв хӯлтаве̄н. Хо̄т хо̄тал сыс округув янытыл 4 млн. со̄тыра солко̄ви тув те̄твес. Ты ма̄гсыл ам яныг пӯмащипа ма̄хманувн ла̄ве̄гум». Со̄ль, ма̄хум хотьют ве̄рми ос ка̄сащи, пормасыт пирмайтан ма̄н ялэ̄н, накын патум мир матарыл нё̄тэ̄н. Ханты-Мансийскыт тамле кол адресэ: Энгельса ӯсхулы, 45 кол, блок А. Телефон тот 8 (3467) 301-494. Ам мощ мо̄лалнув тув ялсум, ащирмат о̄щнэ маснут тотсум. Олн те̄туӈкве ты утыт хосыт ро̄ви: ИНН 2801123618, КПП 280101001, получатель: УФК по Амурской области (минфин АО л/с 04232003600), Р/С 40101810000000010003, Банк: ГРКЦ ГУ БАНКА РОССИИ ПО АМУРСКОЙ ОБЛАСТИ г. Благовещенск БИК 041012001, ОКАТО 10401000000, КБК 015 2 07 02030 02 0000 180.

1060 2013.09.20. Людмила ТЕТКИНА

Та̄н яныг ӯсн суссылтап тотыгласыт. Мощ мо̄лалнув Челябинск ӯст суссылтап ва̄рыглавес. Уральский округныл тотым са̄всыр тэ̄нут акв ма̄т ёвтуӈкве ро̄выс. Ма̄н округувныл 21 предприятият рӯпитан ма̄хум тув ялсыт. Та̄н нё̄выль, хӯл, щаквит, пил, ла̄хс ос са̄в мо̄т тэ̄нут суссылтапын тотыгласыт. Та выставкат щар ма̄к ёмас солвалыӈ хӯл, атыӈ мисво̄й ос мо̄т тэ̄нут касыл щирыл пе̄рияве̄сыт. Округувныл ялум ма̄хум «Высокое качество продукции» ос «Новый вид продукции» номинацият кассыт. – Ха̄льӯст ОАО «Сибирская рыба» нампа хӯл щё̄питан предприятие солвалыӈ нялк ма̄гсыл дипломыл ос ме̄талил майвес. – Ханты-Мансийск ӯст о̄лнэ хӯл щё̄питан комбинат о̄с солвалыӈ мохсаӈ хӯл ма̄гсыл янытлавес. – Ханты-Мансийск ӯст «Лесосервисная компания «Югралесхоз» ос са̄лы нё̄влил ва̄рнэ тэ̄нутаныл тот суссылтасыт. Тыима̄гсыл та̄н ос дипломыл майве̄сыт. – Ханты-Мансийский районт «Обь» общинат рӯпитан соссаӈ ма̄хум пе̄с йис ва̄рмалит э̄лаль тотнэ̄ныл ма̄гсыл янытлан нэ̄пакыл майве̄сыт. – Ханты-Мансийский райот рӯпитан «Колмадай» община ты суссылтапын о̄с ялсыт, тувыл дипломнэ̄пак юв тотсыт. – Югорск ӯст рӯпитан ОАО «Югорское» предприятие щаквит ма̄гсыл о̄с янытлавес. Тот дипломнэ̄пакыл, ме̄талил майвес. – Сургут ӯст рӯпитан ООО «Обьрегион» нампа птицефабрика ань о̄с дипломнэ̄пак, ме̄таль о̄ньщи. Та ӯсыт ёмас мӯӈит ос атыӈ щищкурек нё̄выль тыналаве. – Белоярский ӯст «Лагуна» хӯл щё̄питан кол ос солвалтым, па̄йтым хӯл суссылтапын тотыглас. Хӯл щё̄питан кол тот дипломнэ̄пакыл ос ме̄талил майвес.

1060 2013.09.20. Тамара МЕРОВА

Са̄лыянэ о̄щнэ хум. Виталий Казамкин ёт ме̄н Варъёган па̄вылт ва̄йхатсуме̄н. Тав тув са̄лыл яласан касылын ёхталас. Ты па̄выл по̄хат ща̄нягеа̄щаге во̄рт са̄лы янмалтым акваг о̄лсы̄г, Виталий тот самын патыс. Каснэ э̄лыпа̄лт хум са̄лыянэ по̄хат лю̄лим ам ётум мощ потыртас: – Ам са̄лыл яласан касылын хӯрмиттыг манос нилыттыг ёхтысум. Мо̄лты та̄л Аган па̄вылн касуӈкве ялсӯв, ты та̄лт тахольт Варъёганыт ва̄раве. А̄щум Егор Андреевич ос ща̄нюм Екатерина Константиновна ань о̄с тыт о̄лэ̄г. Тэ̄н хӯл ос пил тыналэ̄г, тащирыл мощ олн сэ̄лэ̄в. Ме̄н Нэля э̄кваме̄нтыл касуӈкве тах патыме̄н. Тувыл Варъёгант ня̄врамагме̄н ханищтахтэ̄г ос тэ̄н ётэ̄н ва̄щиньтахтыме̄н. Максим пыгме̄н лов классыт ханищтахты, Виолетта а̄гиме̄н нёлолов классыт. Амки о̄с ты па̄вылт школа а̄стласум. Антон ма̄нь пыгме̄н ёт тотыглылме̄н, тав садикн яланты. – Колта̄глыл акваг во̄рт манос хотты мо̄т ма̄т о̄лэ̄гын? – Ма̄н во̄рт о̄лнэ ма̄в Варъёган па̄вылныл ва̄т ве̄рыстат о̄лы. Ань та колувн мӯйлын ма̄хум ёхталэ̄гыт. Мо̄лал ам этнотуризм щирыл проект щё̄пита̄лсум ос таима̄гыс грантолныл майвесӯв. Ты проект ам Нижневартовскат «Спутник» нампа колт рӯпитан хо̄тпат ёт ва̄рилум. Та̄н соссаӈ ма̄хум о̄лупса пӯмщалаӈкве са̄всыр туристыт ам стойбищамн тотыглыяныл. Ты э̄лыпа̄л пуссын Варъёганыт музейн щалтсэ̄гыт, тот соссаӈ мир культура о̄вылтыт матыра̄ти потыртаве. Ос тувыл ущ ам палтум тотавет. Ань Радужный, Нижневартовск ӯсыгт о̄лнэ ма̄хум ос мо̄т хо̄н ма̄ныл ёхталам хо̄тпат мӯйлысыт. Та̄н туп хо̄тал па̄лыт мӯйлэ̄гыт, э̄типа̄лаг ювле минэ̄гыт. Тот о̄лнэ коланув, сӯмъяхыт, пормасанув сунсыглэ̄гыт, ханты маснутыл масхатыглэ̄гыт ос по̄слахтэ̄гыт. Тувыл та̄нанылн са̄лыӈ суныл яласаӈкве сака мӯсты. Ма̄н пе̄с щирыл хӯл манос нё̄выль исмитыл па̄йтыянув, тувыл по̄лям ня̄рхӯлыл о̄с тыттыянӯв. Хо̄талыӈ хо̄талт мӯй хо̄тпат та̄нки хӯл алыщлаӈкве ве̄рме̄гыт. Хӯл камкал алыщлаӈкве ханищтыянӯв. Этнотуризмыл са̄в олн ат кос сэ̄лэ̄в, ос ма̄н, ханты ма̄хум, хумус о̄лэ̄в, таил пӯмщалахтэ̄гыт. – Ос на̄н ма̄во̄й но̄хвинэ хо̄тпатын хотмус нё̄таве̄н ман а̄ти? – Ма̄н договорнэ̄пакыт щирыл э̄тпос сыс акв э̄лумхо̄лас ма̄гыс хо̄тса̄т солко̄вил ойтаве̄в. Тыи ман олн? Ня̄враманув аквты тыттуӈкве, мастуӈкве э̄ре̄гыт. Са̄ртын ам ма̄во̄й но̄хвинэ ма̄т электросварщикыг рӯпитасум, ос номтум савалас – са̄лы о̄ньщуӈкве тахсум. Таима̄гыс этнотуризм рӯпатан вуйхатасум, ты тэ̄лам пӯмыщ кос, туп са̄всыр налоголныт ойтуӈкве ос нэ̄пакыт ювле хансуӈкве э̄ри. Тувыл 2012 та̄лт туи па̄сныл ам во̄рт о̄лнэ ма̄мт мӯй хо̄тпат ат мӯйлысыт. Та ляпат геофизикыт рӯпитасыт, са̄лыянув ма̄шина суйил пилэ̄гыт ос ла̄ккваха̄йтэ̄гыт. Са̄лы тэ̄пыт пулиг ул вос ялыглаве̄сыт ос на̄йин ул вос пе̄ламлаве̄сыт, ма̄нки акваг ӯргаласанӯв. Тох ат ке ӯргаласанӯв – вуньщалыг патнувӯв. На̄й харыгтан утыт торыӈ о̄с ат о̄щсӯв. Районный кӯщаитн нё̄тмил ва̄рнэ ма̄гсыл китыгласанум, нэ̄матыр ат мисыт. Ла̄ве̄гыт: «На̄н ма̄во̄й но̄хвинэ ма̄ныл олныл нё̄таве̄н, на̄нки ёвтэ̄н». Ма̄н договорнэ̄паканувт тамле тэ̄лат о̄вылтыт щар акв ла̄тыӈ хансым ат о̄лы. Тувыл хо̄тса̄т солко̄ви манарыг то̄вылхаты. Ма̄навн э̄рнэ щирыл мо̄т ла̄тыӈ тув хансуӈкве о̄с ат ка̄саще̄гыт, тох та о̄лэ̄в. Ань са̄лыл яласан каснэ ва̄рмалит о̄вылтыт таи ла̄ве̄гум, тамле касылыт ка̄сыӈ та̄л вос ва̄рыглавет. Ӯсытыт о̄лнэ ма̄хумн тыи пӯмыщ, ма̄нки са̄лы о̄щнэ ма̄хманув о̄с тыг акванатхатыглэ̄гыт. Хӯл алыщлан ос во̄раян хо̄тпат о̄с тыт касэ̄гыт, тувыл ма̄ньлат а̄гитпыгыт та̄нки халанылт ва̄йхатуӈкве патэ̄гыт. Тыи ёмас.

1060 2013.09.20. Тамара МЕРОВА

Хосат та̄гыл Ялъӯсн ат ёхталас. Ха̄льӯс район Ялъӯс на̄лми ва̄тан о̄с акв моторха̄п па̄гпӯхтыс. Ма̄хум йильпи памятник сунсуӈкве тув ёхтысыт. Сунсэ̄гум, ха̄пныл хорамыӈ супыл масхатым акв ма̄ньщи э̄ква па̄гква̄луӈкве нё̄твес. А̄врах ва̄тат лю̄льнэ нэ̄ хо̄тпат потыр суяныл хӯнтамласлум: «Яа, Нюра ёхтыс? Со̄ль, тав ты о̄лнэ̄тэ! » Та сыс э̄ква на̄лми ва̄таныл па̄гле а̄ӈкватас, мощ сунсыглахтас ос сэ̄й хосыт па̄гле та ё̄мантас. Тыи Анна Николаевна Гындыбина о̄лум. Тав Ялъӯс па̄вылт самын патыс, тот яныгмас. Ос хум ва̄рме юипа̄лт Кимкъясӯй па̄вылн тотвес, та па̄сныл тав Ялъӯсн ат ёхталас. «Па̄вылкем тыттыя, щар ня̄ртпум оспаг е̄мтум! Ам хо̄тпан та̄л тыг ат ёхталасум. Ме̄н тумпуме̄н, хо̄т хасап нэ̄гыгласме̄н, та янытаг та е̄мтум. Хориме̄н тыи? » э̄ква ма̄ньта̄гыл о̄ньщнэ Надя юрта̄гитэ китыгластэ. Надежда Константиновна Захарова ла̄выс: «Нюраме̄нтыл ма̄нь таргыт ёлыпа̄лт хасап нэ̄гиме̄н, ва̄тихал тот ӯнлахо̄лсуме̄н. Хасап кӣвырт тав маньнэ нё̄тнэ хансаӈ суп ос хорамыӈ то̄рыт ю̄нтым ӯнлыс, пӯри ва̄руӈкве щё̄питахтас». Аннэ э̄ква мовалас, пуӈке хӯтувьяптастэ: «Аа, ам то̄нт хорамыӈ а̄кань о̄с ю̄нтсум». Э̄кваг ма̄ньпора та̄ланэ̄н номылматыглым, хуньт тэ̄нки о̄лум ма̄тэ̄нт ё̄мыгтасы̄г, ань ос туп хара ма̄ хультыс. Тувыл хоты кол, хоты ще̄мья тот о̄лсыт, тэ̄н таи потыртасы̄г. «Манах кол ос манса̄вит ма̄хумаквет тыт о̄лсыкет. Ка̄сыӈ колта̄гыл ня̄врамыл та̄глэ̄кв. Ма̄н пуссын тыт ха̄йтыгтасӯв, ёнгасасӯв, йӣвын ха̄ӈхыгласӯв, – Анна Николаевна потырты, тувыл акв ма̄т ёллю̄люмтас, О̄пам кол ёре тох та пумын яныгмима. Ма̄н колта̄глувт ат пыг, ам амккем а̄гирищ о̄лсум. Ня̄врамыг о̄лмувт ня̄р ла̄глыл пуссын тыт ха̄йтыгтасӯв, мувлахи сэ̄й о̄лыс. Ань сунсэ̄н, ты ма̄в пумын, нирщахлын лапяныгмима. О̄пам наме Егор Петрович Сангилев о̄лыс, щаще̄квам Матрёна Николаевна Нахрачёва. Тэ̄н мисытлувыт о̄щсы̄г. Хо̄нтлан ва̄рмаль е̄мтум порат Ёхор о̄пам хӯл алыщлаӈкве пиркатирыг паттувес. Анана, то̄нт 10-13 та̄л яныт ня̄врамыт, пуссын хӯл алыщлаӈкве тотыглаве̄сыт. Ам ётыл о̄памн о̄с ёттотыглаӈкве патве̄сум. Сака та̄рвит пора о̄лыс. Са̄в хӯл алыщласӯв, пувнэ хӯланув хо̄нтлан ма̄хманув палт ке̄тыглаве̄сыт. Акв щёс толыг хартым ам ква̄лгыӈ та̄гыл витн хасумтаве̄сум. О̄пам ка̄саластэ, ро̄ӈхувлас: «А̄гикве, ӯрхатэ̄н сар, ӯрхатэ̄н! » А̄нум пувумтаӈкве а̄лымас. Ма̄н иӈ ня̄врамыг о̄лсув, юв ёхтэ̄в, тэ̄гув ос кон ха̄йтыгтаӈкве та атхатэ̄в. Э̄типа̄лаг мус та ёнгысӯв, рӯпитан та̄рвитув хот та ёрувлылӯв. Ос а̄лпыл о̄памн но̄хса̄йкатавем, о̄ста хӯл алыщлаӈкве минэ̄в. Омам Евдокия Андреевна а̄ги о̄парищ наме Явлина о̄лыс, тав А̄нъя па̄вылныл о̄лум нэ̄. А̄тям Николай Егорович Сангилев армиян тотвес, ам ат та̄лум то̄влыс. То̄нт, номилум, ам маткем та лю̄щсум. Хум хо̄тпат на̄иӈхапын та̄лттуве̄сыт, Ха̄льӯсн тотве̄сыт, ос тувыл хо̄нтлуӈкве ке̄тве̄сыт. Та па̄сныл а̄тям воссыг ат та ва̄щиньтаслум. Ань Ялъӯс о̄лнэ ма̄ньщи ма̄ке̄вт такем ёмас ва̄рмаль тыт ва̄рсыт. Тыг ёхтысум, мощ ё̄мыгтасум, номтум ёмас. Ань тай тыг ва̄тихал вос тотыглавем тах! » э̄ква мовалас. Ма̄ньщи мирув иӈ са̄в нот сыс пе̄с йис ма̄хманэ вос ка̄стыянэ ос номиянэ. А̄що̄йкануво̄панув номуӈкве патыянув ке, тащирыл ма̄н та̄кыг э̄лаль о̄лэ̄в.

1060 2013.09.20. Александр ВЬЮТКИН

Соссаӈ мир культура кол ат та̄лэ то̄влыс. Сӯкыр э̄тпос атыт хо̄талт Нягань ӯст рӯпитан соссаӈ мир культура кол ты таквс ат та̄лэ то̄влыс. Тыи янытлан кастыл са̄в ма̄хум ёхталасыт. Кол кӯщай нэ̄ наме Дина Фалиевна Батришина. Ты кол ханты ос ма̄ньщи ня̄врамыт ёт рӯпитан ма̄гсыл ӯнттувес. Ня̄врамыт тот ра̄ктыл а̄ныт пощгуӈкве, йӣвныл матыр ёргуӈкв, сакныл хорамыт хартуӈкв ос са̄сныл са̄всыр хусапсовыт, со̄втыт, па̄йпыт ю̄нтуӈкв ханищтавет. Та̄наныл ханищтан ма̄хум ла̄ве̄гыт: «Щар акваг ёхталан ос ёмщаквег ханищтахтын хо̄тпат, таи ат ос хо̄т та̄л яныт ня̄врамыт. Та̄н ханищтахтын щё̄саныл коныпал намыл иӈ хультуптахтэ̄гыт. Таи ты ёмас, оманылн, а̄тянылн ня̄врамыт ё̄р ва̄гыл юв ат во̄вавет. Ня̄враманыл ма̄щтырлан пормас а̄стлын мус аквъёт ва̄рияныл». Соссаӈ мир культура кол ат та̄лэ то̄влуме кастыл Нягань ӯс кӯщай Александр Рыженков ос тав ва̄ӈын хо̄тпатэ Иван Ямашев ма̄хум янытлаӈкве ёхталасы̄г. Тэ̄н тув ёхтуме̄нт ма̄хум ханты ос ма̄ньщи хорамыӈ супыл масхатасыт. Ханты-Мансийск ӯсныл ос Людмила Алфёрова ёхталас. О̄влэ̄т мӯй ма̄хум соссаӈ мир культура колыл суссылтаве̄сыт. Та юипа̄лт ма̄хум янытлан ва̄рмаль о̄вылтасыт. Пе̄с йис о̄лупса щирыл рӯпитан ма̄хум пӯмащипа ла̄тӈыӈ пищмал ос дипломнэ̄пакыл мӯйлуптаве̄сыт. Ме̄н Владимир Меров ёт та̄н ма̄гсыланыл са̄ӈквылтасме̄н ос йӣквсуме̄н. Тот о̄лнэ то̄ва ма̄хум са̄ӈквылтапыл са̄ӈквылтан та̄н щар нэ̄мхотты порат ат хӯлыгласыт. Та̄н ма̄гсыланыл тыи сака пӯмыщ о̄лыс. Александр Рыженков ма̄хум янытламе юипа̄лт ла̄выс: «На̄н ва̄рнэ рӯпатан ма̄гсыл ам яныг пӯмащипа ла̄тыӈ ла̄ве̄гум. Округув янытыл са̄внув тамле кол о̄лыс те, соссаӈ ня̄врамыт мир халт ат тыпылтахтынувыт. Ань ня̄врамыт са̄выӈпа̄лэ та̄нти мираныл пе̄с о̄лупса ат ва̄ганыл. Ма̄н ӯсувт о̄лнэ ня̄враманувн ты ва̄рмаль сака мӯстыс». Ялпыӈ хо̄тал оигпаме юипа̄лт ма̄хум халанылт хоса потрамасыт ос ла̄кква минуӈкве ат молямласыт.

1060 2013.09.20. Анна АЛГАДЬЕВА

Яласан лё̄ӈханув. Туи пора та минас. Ӯщлахтым яласам ма̄хум па̄вланылн ювле ювыт. Хулюмсӯнт, Ня̄хщамво̄ль ос Приполярный па̄влытн миннэ хо̄тпат. Хо̄ӈха ке̄р лё̄ӈх хосыт Советский ӯс та̄ра вертолётыл юв, яныг та̄рвитал та ювыт. Советский ӯсн ёхтэ̄гыт, Ютэйр вертолётн билет ёвтнэ очередин э̄т котиль па̄сныл лю̄люӈкв э̄ри. Хӯрумнила ат щё̄с па̄сныл аэропорт кол а̄висӯнтыт та лю̄лянтэ̄гыт, по̄льлахтэ̄гыт. То̄ват ма̄шинал ёхтэ̄гыт ос э̄т палытыл ма̄шина кӣвырт ӯнлэ̄гыт. Аэропорт нёлолов щё̄ст ущ па̄лыгпӯнсаве, онтолов щё̄ст касса пӯнсаве. Мо̄лты та̄л са̄ртын ювле хасхатуӈкв ро̄выс. Ма̄хум э̄лаль миннэ̄ныл мус та̄ра ювле хасхатэ̄гыт, матпалыт яласэ̄гыт, ювле ёхтэ̄гыт, номсахтуӈкв ат э̄ри, ва̄ганыл тыламлэ̄гыт. Ты тӯя хотьют ля̄втум. Та па̄сныл воссыг нэ̄мхотьют ёл ат хансаве. Хотьют са̄ртын ёхты ос хотьют ка̄тэ хоса тав та тыламлы. Газпром АВИА вертолёт о̄с о̄лы, суббота коныпал, ка̄сыӈ хо̄тал яласы. Хулюмсӯнт мус билет тынэ 7800 солко̄ви, Приполярный мус 11310 солко̄ви. Хо̄ӈха рӯпата па̄лыл ӯщлахтым яласэ̄гыт, лё̄ӈх олнаныл ювле ойтавет, тай тыныӈ рейсыл яласэ̄гыт. Хотьют матыр тэ̄ла мус яласы, хо̄ӈха лё̄ӈх олнанэ ат ойтавет, то̄ва ма̄хум колта̄гыл пуссын – ман пуӈк пе̄лы билет ёвтуӈк. П. Завальный «Тюменьтрансгаз» кӯщаиг о̄лме порат ты урыл тох ла̄выс: «Хотьют ще̄пе лощит а̄ти, тынта̄л вертолётыл вос яласы». Тынта̄л рейс са̄т сыс нила щёс кос яласы, аквторыг хӯрум па̄выл мус мины. Билет олн тынэ Хулюмсӯнт мус 2260 солко̄ви, Ня̄хщамво̄ль мус 2400 солко̄ви, Приполярный мус 3700 солко̄ви. Таквсы са̄в ма̄хум отпусканыл ювле ювыт, билетыл ат то̄влавет, китхӯрум хо̄тал Советский ӯст та ӯнлэ̄гыт. Хотьют сака молямлы, тай воссыг хоталь щалты, тыныӈ билет та ёвты.

1060 2013.09.20. Светлана РОМБАНДЕЕВА

Ма̄хманув ма̄щтырласыт. Ты э̄тпос 9-13 хо̄талытт Ханты-Мансийск ӯст ма̄ньщи ос ханты ма̄хум ма̄гыс научнопрактический семинар ва̄рыглавес. Хум хо̄тпат хӯл алыщлан пормасыт ва̄рсыт, нэ̄ хо̄тпат ос са̄сныл са̄всыр пормасыт ю̄нтсыт. Ма̄хманув са̄ттем ма̄щтырласыт. Семинар «Торум Маа» музейт ва̄рыглавес. Аквты хольт ма̄хум о̄выл щёс тот 1999 та̄лт атхатыгласыт. Ювле хультум атхуйплов та̄л сыс ма̄н ма̄щтыр ма̄хманув са̄в рӯпата суссылтасыт – са̄сныл са̄всыр пормасыт, хорамыӈ супыт ю̄нтсыт, са̄пса сагсыт, ма̄ньха̄пыт ва̄рсыт ос са̄в мо̄т щирыл ма̄щтырласыт. То̄ва пормасыт ань йист ат ва̄равет, хотёрувлаве̄сыт. Ос ма̄ньщи ман ханты мир халт пе̄с йис мӯтра ва̄нэ хо̄тпат то̄ва ма̄т иӈ о̄лэ̄гыт. Музейт рӯпитан ма̄хумн та̄н та̄рапаттавет ос ты ӯсн во̄выглавет. Ты порат тот нила ма̄ньщи ос нила ханты ма̄щтыр хо̄тпа рӯпатаныл мирн суссылтасаныл. О̄выл хо̄тал ма̄хум научный докладыт хӯнтлын ма̄гыс яныг библиотекан во̄виньта̄лве̄сыт. Са̄в хо̄тпа о̄лыс учёныит, ма̄щтыр ма̄хум, студентыт, ля̄ххал тотнэ хо̄тпат. То̄ва хо̄тпат Ха̄льӯс, Белоярский, Сургутский районытныл ёхталасыт. Акв яныг учёный э̄ква Елена Геннадьевна Фёдорова Санкт-Петербург ӯсныл ёхталас. Тав исторический наука кандидатыг о̄лы, антропология ос этнография музейт (Кунсткамерат) старший научный сотрудникыг рӯпиты. Ловиньтам потре тох намаим о̄лыс: «Ханты и манси – рыболовы бассейна Оби». Ха̄льӯс район Тэ̄к па̄вылныл ёхталам нэ̄ Галина Михайловна Курганова та урыл потыртас, ань школат ня̄врамыт ханищтахтынэ̄ныл сыс, тав та̄наныл са̄сныл са̄всыр хусапсовыт ва̄руӈкве ханищтыянэ. Галина Михайловна ты коныпал тот география учителиг о̄лы. Никита Калистратович Партанов А̄с ма̄ньщит хӯл алыщлан пормасаныл урыл потыртас. Тав «Торум Маа» музейт научный сотрудникыг рӯпиты. Докладыт янгыщ Ханты-Мансийск ӯст о̄лнэ ма̄хманув, учёныянув та̄н ловиньтасыт. Китыт хо̄тал ма̄хум пуссын «Торум Маа» музеин минасыт. А̄лпыл, лов щё̄с порат, рӯпатаныл та о̄вылтахтас. О̄влэ̄т музей кӯщай Валентина Николаевна Кочетыгова потыртас. Акванатхатам мирн тав са̄в ёмас, сымыӈ ла̄тыӈ ла̄выс, ма̄щтыр ма̄хманув наманыл пуссын ла̄всанэ, та̄н халанылт вос ва̄йхатэ̄гыт. Ты юипа̄лт ма̄хум рӯпитаӈкве, ханищтахтуӈкве та вуйхатасыт. Ка̄сыӈ хо̄тпа маныр ва̄руӈкве таӈхыс, таве̄н ро̄внэ ма̄щтыр хо̄тпатэ палт минас, тав ётэ рӯпитас, матыр пормас ва̄рыс, щаквщис. Аквкит ла̄тыӈ ма̄щтыр ма̄хум урыл хансэ̄гум. О̄влэ̄т ма̄ньщи ма̄хманув наманыл ла̄виянум: ты Анатолий Николаевич Хомяков, хо̄нтаӈ ма̄ньщи, Кондинский район Половинка па̄вылныл ёхталас. О̄йка па̄влэ̄т Учинский историкоэтнографический музей ӯнттыс. Анатолий Николаевич хӯл алыщлан камка ва̄рыс. Камка ва̄рнэ йӣв охса тав юил тотыс, тав ла̄внэ̄тэ щирыл, тыт илттыг хо̄т хо̄нтыгпе̄гыт. Таима̄гыс тав тыг тотум э̄рнэ пормасанэ хосатта̄гыл атсанэ. Са̄глат тыт ёргысанэ, ӯльпа та̄р о̄с тыт щё̄питас. Рудольф Васильевич Меров Ха̄льӯс район Хо̄рыӈпа̄вылныл ёхталас. Тав ос толыг хасыс. Ты э̄лыпа̄лт тав э̄тпостем са̄глат ёргыс, та̄р щё̄питас. Хӯрмит ма̄щтыр хо̄тпав ты Рудольф Васильевич тав а̄гитэ Галина Рудольфовна Кондина. Тав Ханты-Мансийск ӯст о̄лы, ты ма̄ньщи газетавт кӯщаиг рӯпиты. Галина па̄йп ю̄нтыс, та халт ханищтахтын а̄гит, ёхталам нэ̄квет со̄втыт, са̄ныт, ма̄нь па̄йпыт ю̄нтуӈкве ханищтасанэ. Тав ётэ ка̄сыӈ хо̄тал ловмантем хо̄тпа рӯпитас. Анатолий Васильевич Вадичупов о̄с Ханты-Мансийск ӯст о̄лы, «Торум Маа» музейт рӯпиты. Тав са̄сныл витвит ва̄рыс, ма̄хум тав нупылэ суссыт, пӯмщалахтасыт. Ханты ма̄хумныл о̄с нила хо̄тпа ма̄щтырласыт. Ханты-Мансийск ӯст о̄лнэ о̄йка Юрий Григорьевич Кондин овам камка ва̄рыс. Ты камка ва̄рнэ ма̄гыс Рудольф Васильевич са̄глат ёргыс, та̄р щё̄питас. Ос хӯрум нэ̄ хо̄тпат са̄сныл са̄всыр пормасыт ю̄нтсыт ты Галина Михайловна Курганова Ха̄льӯс район Тэ̄к па̄вылныл ёхталас, Жанна Александровна Хохлянкина Нижневартовский район Корлики па̄вылныл о̄лыс ос Зоя Никифоровна Лозямова, Ханты-Мансийск ӯст о̄лнэ э̄ква. Та хо̄талыт сыс ты музейт рӯпитан хум Вячеслав Юрьевич Кондин ос косум ва̄рыс. Тав са̄с ӯльпа та̄рыл акваню̄нтыстэ, косум сӯнтэ ос паттатэ ля̄мйив тэ̄лыщ та̄рыл ю̄нтыстэ. Музейн ёхталам мир ма̄щтыр хо̄тпат ёт са̄всыр пормасыт ва̄рсыт, та̄нанылныл ханищтахтасыт, ма̄щтырласыт. Хотьют ка̄сащас, нэ̄ хо̄тпат ёт са̄сныл матыр ва̄рыс, ю̄нтыс. То̄ва хум хо̄тпат ёрыгхатсыт, камка манос толыг ва̄руӈкве нё̄тсыт, ханищтахтасыт. Юио̄выл хо̄тал, э̄типа̄лаг, ма̄щтыр ма̄хум ос ханищтахтам ма̄хум ва̄рум пормасаныл аквантотсаныл, суссылтасаныл. Ты хо̄талыт сыс та̄н аквъёт насати 47 пормас ва̄рмыт, ма̄щтырламыт. Музей кӯщай В. Н. Кочетыгова ла̄тыӈ ла̄выс, ма̄хум янытласанэ. Валентина Николаевна ла̄внэ̄тэ щирыл, ты пормасыт пуссын та̄нти палтаныл хультуптыяныл, ка̄сыӈ хо̄тпа наме тув хансаве, тав ань музей ма̄гыс яныг тэ̄ла та ва̄рыс.

1060 2013.09.20. Людмила ТЕТКИНА

Ма̄ньщиянув Нё̄р тапалн мӯйлуӈкве ялсыт. Коми республикат Ижимский районт саран ма̄хум о̄лнэ ма̄т ка̄сыӈ та̄л ойттур э̄тпост «Луд» нампа ялпыӈ хо̄тал ва̄рыглаве. Ты та̄л ма̄н округувныл ма̄ньщит тув о̄с ялсыт. Валентина Дорофеевна Саратина ты ва̄рмаль урыл ма̄ньщи газета ма̄гсыл потыртас: – Ма̄н хӯрум ма̄ньщи Тамара Семёновна Мезенцева, Марина Сергеевна Вынгилева ос ам, Коми республикан «Луд» ялпыӈ хо̄тал янытлаӈкве минасӯв. Ха̄льӯст о̄лнэ творчество центрыт рӯпитан нэ̄т тув во̄виньта̄лве̄сыт. Та̄н тув ялуӈкве ат ве̄рмысыт. Ма̄н, пенсият о̄лнэ хӯрум э̄ква, тув та минасӯв. Лё̄ӈхув Салехард ӯс та̄ра о̄лыс. Тот Лабытнанги ӯст поездын та̄лсӯв ос станция Ираёль мус йисӯв. Тув ёхтысӯв, матъёмас тот ӯрвесӯв ос Ижма па̄влын тотвесӯв. О̄выл хо̄тал ма̄н, мӯй ма̄хум, Мохча па̄выл сунсуӈкве во̄виньта̄лвесӯв. Ма̄н тай, хӯрум ма̄ньщи э̄кват, ювхультсӯв. Тувыл о̄йка ма̄н ляльтув ма̄шинал мины, ма̄нав китыглы: «На̄н Ханты-Мансийский округныл о̄лэгы̄н? » Ма̄шинан та̄лттувесӯв, Мохча па̄вылн та тотвесӯв. Та па̄выл школат Раиса Сметанина ос Василий Рочев, ёсал ха̄йтнэ спортсменыг, ханищтахтасы̄г. Тот о̄лнэ ма̄хум тыил сака янытлахтэ̄гыт, тэ̄н ханищтахтам школатэ̄н ма̄навн суссылтавес ос экскурсиял ва̄рыглавесӯв. Китыт хо̄тал ялпыӈ хо̄талув та о̄вылтахтас, ма̄н ос тот ма̄ньщи э̄ргыт э̄ргысӯв. Акваме̄н Тамара Семёновна туре а̄гмыӈ о̄лыс, э̄ргуӈкве ат ве̄рмыс. Ме̄н Марина Сергеевнал «Со̄выркве» э̄рыг э̄ргиме̄н, тав ос суссылты, хумус со̄выркве па̄сса саги, хумус па̄сса масы. Ос тувыл «Куккук» китыт э̄рыг э̄ргысме̄н. Ӣтипа̄лаг ма̄хум пуссын акв ма̄н атхатсыт, ма̄н о̄с тув ялсӯв. Пуссын нуй сахил, ма̄ньщи супыл масапахтасӯв. Ма̄нав ка̄саласыт, та пӯмщалахтэ̄гыт, та китыглахтэ̄гыт, хотыл ёхтум мӯй ма̄хум. Та̄н ётаныл маткем та по̄слахтасӯв. Та̄нанылн ос пӯмащ, ма̄ньщит хунь ва̄щиньтасыт. Сараныт та̄нки ос щар пуссын саран маснутыл масхатым о̄лсыт. Ос та̄нки ла̄тӈыл потыртэ̄гыт, э̄рге̄гыт, йӣкве̄гыт. Та̄н саран ла̄тӈыл потыртэ̄гыт, ам ты ла̄тыӈ мощ хӯлылум, торгамтылӯм. «Луд» ялпыӈ хо̄тал урыл са̄всыр финноугорский ма̄т ань ва̄ве. Тув ёхталам мӯй ма̄хум ма̄навн та̄нки о̄лнэ ма̄нылн мӯйлуӈкве во̄всаныл. Ам амкирот номсэ̄гум, лё̄ӈхув ке ойтвес, ма̄н ялнувӯв. Ижма па̄вылн ма̄нки ялсӯв. Ма̄н пенсият о̄лэ̄в, са̄в олн хунь о̄ньще̄в. Спонсорхо̄тпат такос киссӯв, тув звонитасӯв, тыг звонитасӯв, ювле ла̄ввесӯв, са̄ртын ла̄тыӈ ке̄туӈкве э̄рыс. Ма̄нки мувиньтэ̄в, нё̄тнэ ма̄ньщи суп ю̄нтэ̄в э̄лаль тыналэ̄в, тыщир олн сэ̄лэ̄в. Ос ты ё̄рыл э̄лаль о̄лэ̄в. Ижма па̄вылт ма̄н о̄с суссылтап ва̄рыгласӯв, ма̄ньщи пормасыт тот суссылтасӯв. Китгагум ю̄нтум пормасанэ̄н тот тыналасы̄г, ма̄хум такем ёвтсыт. Ам нэ̄матыр ат тыналасум, нас суссылтаӈкве тотыгласум. Ялпыӈ хо̄талт «Хоровод невест» нампа касыл ва̄рыглавес. Тамле пӯмащ кас, а̄гит о̄влэ̄т та̄нки уранылт потыртасыт, тувыл ка̄тыл ва̄рум манос ю̄нтум пормасаныл суссылтасыт. Ос э̄ргысыт, йӣквсыт, хотъют маныр ха̄сы, таи та суссылтас. Ма̄н ётув Салехард ӯсныл ёхталам а̄ги ос касыс, тот китыт места вис. Тох тай ма̄навн ты ялпыӈ хо̄тал сака мӯстыс, ёмащакв мӯйлысӯв, ща̄гтым ювле ёхтысӯв. Ам Валентина Дорофеевна потре ма̄гсыл пӯмащипа ла̄тӈыл ла̄вилум. Ялпыӈ хо̄талт суссылтап ва̄рыглым ос ма̄ньщи э̄ргыт э̄ргим, ма̄ньщи культурав мо̄т мирн суссылтасаныл. Ос Нё̄р тапалт о̄лнэ ма̄хум, хумус мӯйлэ̄гыт, та̄н суссыт, тыи о̄с ёмас тэ̄ла. Ты коныпал ам Валентина Дорофеевна самын патум хо̄талыл янытлылум, ты тӯя тав 60 та̄лэ то̄влыс. Ёмас, сымыӈ ла̄тыӈ ке̄тэ̄гум. То̄рум ёт, О̄тыр ёт, пус ка̄т, пус ла̄гыл вос о̄лы.

1060 2013.09.20. Светлана Динисламова

Туи пора. Ты потыр Светлана Динисламова «Мы есть » нампа нэ̄паке̄т рущ ла̄тӈыл хансым о̄лы. Ма̄ньщи ла̄тӈыг М. Т. Двинянинован толмащлавес. Ты хо̄тал ма̄н такем ёмас рӯпитасӯв. Э̄лыннув о̄лнэ пуманув ре̄псӯв, кит яныг са̄при ва̄рсӯв. Тувыл а̄щув минмыгтас “завеска”сунсуӈкв, ма̄нь хӯлыт хотатуӈкв ос порыс саквыт хотпа̄хвтуӈкв, овын хӯлуп онтсыл роплавет. «Завеска» ам хӯлнэм щирыл аквтуп занавеска, тувыл тэ̄н аквхурипаг о̄лэ̄г. Ма̄нь я̄кве ӯлтта ӯсмал хартым о̄лы, кит о̄выл мус, я̄ китпалын, йӣвын ёланэ̄гсалым ӯсма о̄лы. Э̄лыл сунсым ты ищхип сагим то̄рыгтюлиг а̄ӈкватахты. Тове̄рт номсэ̄гум: хотяктапаӈкв тамле ло̄мткве, тувыл ке̄лылыл ке̄ллаӈкв ос колувт тагатаӈкв иснас то̄р пе̄нтсыл, улпыл хорамыӈ о̄лнув. Туп омам ат та̄ратахты тох ва̄руӈкв, таима̄гыс тувыл номсан номтанум ам ётум та о̄лэ̄гыт. А̄щум ха̄пнёлэ на̄лувнарумтамув юипа̄лт, ме̄н омаме̄нтыл минмыгтасме̄н сосыг ва̄туӈкв, хӯрум ма̄нь э̄щанум ра̄ӈнум а̄ращ ва̄тат, посым ре̄г ляпат, а̄канил ёнгасым хультсыт. Ты та̄л сосыг такем усырыг о̄лы. Пил та̄глыӈ тованыл, щар ма̄н хо̄йнэг хӯтнэ̄ныл, пум тармыл хуе̄гыт. Ка̄сыӈ сосыгйӣв анял та пӯмщалахтэ̄гум, ка̄сыӈ пил та̄глыӈ товыл, пил мо̄рил, тамле хорам, тамле щёл нэ̄мхо̄т а̄тим. Пӯмащ, омам тох о̄с номсы? Титапаӈкв таве ты урыл хурахлэ̄гум, тувыл ос э̄лын ань о̄лы. Самагумтыл кинсэ̄гум агтпи, То̄рум нупыл а̄ӈквата̄лэ̄гум, хотьют ул кос ва̄гтэ тамле щунь о̄лнэ урыл. Матахмат ӯйрищакве тыламлас, нумын кар ёхты, хо̄т халэв ро̄ӈхыгланэ̄тэ суйты, та̄н пуссын сосыг нупыл тэ̄ланыл а̄ти. Самсаил тай хотьют сунсы, о̄лнэ хо̄тал мим самсайут. Тав пуссын сунсыглыянэ, маныр щирыл ёлын о̄лэ̄гыт, ка̄сыӈ урыл пуссын ва̄гтэ. Тав ма̄гсылэ пуссын аквхурипат ма̄хум, ӯйхулыт, ӯйрищит, пумыт . Аквмат, мостыслум, аквтуп хотьют ам нупылум сунсы. Ща̄гтым ос мостын щирыл кӯньге̄гум тав яссатэ. Ла̄тыӈ мыгум ёмас хо̄тпаг о̄луӈкв ла̄ве̄гум. Ам ва̄глум, ма̄н То̄румн ла̄ввесӯв ёмас ва̄руӈкв, янгыщ ёмас ка̄с миӈкв ляпа ма̄хманувн. Ам ёмас ще̄мьят о̄лэ̄гум. Ма̄н ща̄нягувна̄щагувн э̄руптым о̄ньщаве̄в. Ам номсэ̄гум, мир халыт хумус о̄лы ос то̄рум тэ̄лтан пумтар. Ань ты сосыгйӣв щахыл. Тав ща̄гтыл пиланэ мыг, танай тав пиланэ хунь ма̄н хотва̄тэ̄в тованэ та̄тламе̄гыт. Тувыл сохтыл нюсэ̄гыт. Э̄лумхо̄лас со̄втэ та̄гиньты, о̄с ща̄гты. Атхунь, пилыт атыӈыт ос по̄ртыӈыт. Тох номсэ̄гум, тымус молямтахтым сосыг ва̄тэ̄гум. Молямлан ва̄рмаль ма̄н омавыл о̄ньще̄в. Тав по̄хе̄т матыр ла̄щал ва̄рункв ат ве̄рме̄в. Ма̄н рӯпитэ̄в тох, аквтуп хотталь молямлэ̄в. Тыщирыл тувыл ва̄тум пиланув порыс ул вус о̄ньще̄гыт, пумкан коснэ порат, пумтар ул вус хульты, хӯлпыт ма̄нь хӯлкве ул вус хульты. Ёмас рӯпатав ма̄гысща̄нягува̄щагув ма̄н нупылув ща̄гтальпиӈ самыл а̄ӈквата̄лэ̄г. Омам самыл кинсылум. Тав та̄глыӈ со̄втыл ам нупылум юв. Ве̄трагме̄н та̄гиньтасы̄г, ос я̄ ва̄тан а̄лумтыягме̄н, тувыл ме̄нки мощщан посым ляпан ёлаӯнтсыме̄н ӯщлахтуӈкв. Омам ты халт э̄щанум пуӈк а̄тыт нюсы ос саги, ам тай та̄нанылтыл пӯмщалахтэ̄гум. Ма̄хманум пуссын сэ̄мыл самыл, щар сосыгсам хольт сусхатэ̄гыт. Висум кит яныг сосыг пил ос ма̄нь йигирищум самыгн а̄рталыягум аквхурипаг о̄лэ̄г. Тахмаясум мощ ёнгуӈкв, пилуптым ла̄ве̄гум: «Ам наӈ самагын ювтаяпиягум! Ам! » тувыл та таяпиягум пилсамы̄г. Омам ла̄ви: «Тыщир ат таи, тох ат ро̄ви». Йигирищанум тай ос тох ёнгуӈкв о̄вылтахтасыт. Аквматэ̄рт мотор суй сумыллас, ляпан ёхты. Ща̄гтым на̄лув ха̄йтэ̄в, хотьют са̄ртын ха̄пнёл ка̄салытэ. Омав тай та халт пормасанув аты, посым лапхарыгты. А̄щув ёхтыс, пормасанув ос пиланув та̄лттапасӯв, ма̄нки ха̄пын та̄лсӯв, тувыл та минмыгтасӯв, хоса атке̄пыл минуӈкв, ма̄навн ка̄сащан лё̄ӈх. Миннэ халув сака тыныӈ. Тыныӈ таима̄гыс, ха̄пыл миннэ̄в сыс лё̄мвоит, ма̄ньуит ювле хультэ̄гыт, тувыл сэ̄кв во̄т ре̄гын во̄тгащлаве̄в, та̄рвитыӈ рӯпата юипа̄лт алпиянуввильтанув ӯщлахтэ̄гыт. Нас ӯнлэ̄в, ӯщлахтэ̄в, тымус тыглетувле сунсыглахтэ̄в, тулыт нупыл пӯмщалахтэ̄в. Халанылт каснэ хольт акв юипалт та нуйхатэ̄гыт. Кӯтюванув ос ва̄та хосыт ха̄йтэ̄гыт, та̄н ха̄йтым лё̄хъяскве ня̄ксыт. Тове̄рт тыпщахыл са̄йл ва̄сыт тыламлэ̄гыт, кӯтювытн рохтуптавет, ос ма̄нь ва̄спыгрищит витын ла̄кквауйлыгтапе̄гыт. Ва̄с ще̄мьят рущ щирыл выводокыг ла̄вавет. Ты торгамтахты тыщирылмӯӈиныл ва̄с ква̄лапас. Ам номтыл самагумтыл сунсылум, хумус ва̄сыт ня̄враманыл ёт яласэ̄гыт. То̄сам ма̄т ат ва̄щиньтасанум, вит тармыл тай ва̄щиньтэ̄гум такем ёрыӈыщ, сытхатым уйгалэ̄гыт, оманыл сусхаты: «Сунсэ̄н, маныр нё̄тнэ ня̄врамаквет ам о̄ньще̄гум, та̄н ам хольтум щар нё̄тнэт ос номтыӈыт». Ня̄враманэ, улпыл, о̄с тыщирыл номсэ̄гыт, оманыл юипа̄лт уйгалым. Лё̄хквет акваг халэвыт ма̄н юипа̄лувт ро̄ӈхим яласэ̄гыт. Тув мус ро̄ӈхе̄гыт, тове̄рт мотор суй ат суйты. Хоты хурахлатта̄л тай щар хӯл то̄тапын тув исапи. Ща̄нягува̄щагув ат суснэ халт, ма̄н ма̄нь хӯлквет витн та па̄хвтэ̄в, номтанувтыл халэвыт мӯйылтэ̄в. Та̄н такем апрыӈыг ос мащтырыг а̄лмаияныл ос ювта̄япияныл. О̄с акв во̄ль хультыс, тувыл юв ма̄н о̄лнэ па̄влувн ёхтэ̄в, тумп сэ̄мыл оляӈ карыс ховтыӈ ос ӯльпаӈ ма̄. Ма̄навн тувле нупыл сунсуӈкв ос тот ё̄мыгтаӈкв ат ро̄ви. Та ма̄т ма̄н пупганувто̄рманув о̄лэ̄гыт. Самыл пупганувто̄рманув атке̄пыл на̄ӈке̄гыт, ма̄н тӯлмахыл тох та а̄ӈквата̄нтэ̄в ты сэ̄мылоляӈ во̄р нупыл. Тове̄рт, я̄ртуп, сусхатэ̄гыт йӣвыт са̄йт сэ̄мыл хурит. Та порат ялыщмаг о̄лы. Тувыл хунь во̄р ювле хульты, ма̄н сысы патэ̄в, аквтуп, хотьютын юил сунсаве̄в. Таххаты ювле а̄кватаӈкв, тувыл ос пилыщмаӈ. Ты ма̄ та̄ра миннэв порат ща̄нягува̄щагув вильтанэ̄н мо̄т хурипаг е̄мтапе̄г, саманэ̄н лапнув то̄рыл хартым ос пуӈканэ̄н ёлаль та̄ртым. Аквматэ̄рт па̄влувн ты нэ̄глысӯв, ма̄н таве колыг ла̄вилув. Ма̄н колув яныг парщин палатка. А̄ращ па̄лтнэ ма̄в алатэ па̄ртыл лапва̄рим о̄лы, э̄лыннув пасанув ос ӯнлын хоса уласыт ма̄н ёла рамим о̄лэ̄гыт. Палатка колув хӯрум са̄ме во̄рын ё̄ӈхаве. Кӯтюванув ща̄гтым о̄тылахтуӈкв ля̄льт ха̄йтэ̄гыт, а̄лымасыт ма̄н э̄лыпа̄лувт ха̄йтлыгтаӈкв. Ха̄пув туп па̄г карсатас, акв кӯтюв щисгим ха̄пын порыгмас, улпыл номсы, тав ма̄гсылэ пӯхтысӯв. Тав порыгмаме мус ха̄пув на̄лув хульмытас, яты, ма̄н тыт та ро̄ӈхе̄в, кӯтюв нупыл ка̄т хосге̄в. Тав ха̄пныл хотпорыгмас, ма̄н ущпыл на̄лув лохщувесӯв, ос па̄г тӯпыл товсӯв, тох о̄лы ка̄сыӈ ха̄пыл яласанэ е̄мт. Яты, ань тай ма̄н юн. Ёмас ка̄сыл о̄лэ̄в. Ма̄нки ма̄гсылув ос кӯтюванув ма̄гыс тэ̄нут кит а̄ращит па̄йтэ̄в. Рӯпатав такви хӯлтыглахты: хӯл якытлэ̄в, на̄йив во̄рныл а̄лумтэ̄в ос кӯтюврищанув посымыл пинэ̄в. Ка̄сыӈ кӯтюв такви торыг колхусап о̄ньщи, та̄нки йӣв та̄р ёлыпа̄лн ва̄рапасыт. Э̄лумхо̄ласыт хольт кӯтювыт коланыл аквхурипат, а̄ти са̄всырыт. То̄ват коланыл такем а̄ртме̄гыт, тыт турап порат, лё̄мвоитыл тӯйтыглахтэ̄гыт, тэ̄лы ащирманыл вуянтахтэ̄гыт. Ам вит тотуӈкв ла̄вве̄сум, та̄рвитыӈ рӯпата а̄ти. Я̄ акв тытты, ве̄трам о̄с яныг а̄ти. Юн па̄влувт (Кульпаст) тай вит тотуӈкв та̄рвитыӈ, сыпе сака карыс. Тот тай кит ве̄тра вит тотнэ йӣвл а̄лумтэ̄в, щар та̄рвитыӈ хунь сыпн но̄ӈхаль ха̄ӈхе̄в. Та̄л ювле, ам хунь сыпын но̄хёхтэ̄гум, ӯщлахтэ̄гум. Ты та̄л йильпи щирыл тотэ̄гум – сып но̄ӈхаль ха̄йтпарыл ювум, тыщирыл ва̄гтал ат патэ̄гум. Омам нас та мовиньты, хумус тох ве̄рме̄гум, тыт во̄рыт пӯмащ вит тотуӈкв. Ляпат я̄ о̄лы. Ӣтипа̄лаг я̄ такем сэ̄кв ре̄гыг е̄мты, атыӈ ат пасы, хо̄тал палыт хо̄тал ре̄гыл тотнэ атыӈ пумтар ат пуссын витын пӯхты. Я̄ ва̄тат о̄лнэм накыт, са̄всыр урыл номсахтэ̄гум: о̄лнэё̄мыгтан ма̄ урыл, маныр са̄вит мир о̄лы, ма̄н во̄р кӣвырыт о̄лнэ ма̄хум урыл, хумле а̄ращ ва̄тат ӯнлахо̄лэ̄в. Мир о̄лнэ со̄т урыл. Ка̄сыӈ хо̄тпа такви щирыл со̄тыӈ. Ам со̄тум сунсылум ос хӯлылум тыныӈ во̄румвитум атыл, ӯйрищ луйгын суйквел, со̄рниӈ хӯлкве уйгалан суил ос я̄тил рӯтте̄нум ёт. Та̄н уранылтыл номсанэм порат, сымум ща̄гтым путги ос алпихар нё̄влюм сымта̄ра ле̄нтгасым та хасумты. О̄лнэ палаткав нупыл самагум патапе̄г; сунсэ̄гум, мӯлгын посым ос э̄щанум на̄ӈке̄гыт ёнгим, мокара̄лым ос омам хӯл со̄мхилты, а̄тям коснэйӣв пуӈк ёрги. Лылые̄п юв пувим, амкирот восге̄гум: «Таӈхе̄гум акваг тыщирыл вос о̄лы. Ща̄нягува̄щагув аквписыг ма̄н по̄хувт вус о̄лэ̄г. Ам пуссын э̄руптыянум, таима̄гыс вус ӯргалаве̄н матпӯсум а̄гумныл. Ты ла̄тӈыт акваг ла̄всыянум, хосат та̄гыл улпыл атахкем та̄лыг е̄мтыс. Щаще̄квам о̄лум порат о̄с акваг ла̄всум: «Щаще̄квав вус о̄лы ма̄н ётув. Туп мо̄лты таквсы тав а̄тимыг е̄мтыс. Тав юипа̄лэ̄т ма̄навн та̄рвитыӈ о̄лыс, ӯстыгпаслӯв илторыг ат ха̄схаты. Та па̄сыл торгамтаслум, хо̄тпа ӯстын та̄рвит ос сымум аквтуп нирасахтас. Пилуӈкв патсум акваг, хунь матыр лю̄ль хӯлэ̄гум, сымум нас то̄рги, ща̄нягума̄щагум ма̄гыс номсэ̄гум. Тэ̄н та̄лэ̄н со̄тув та холы, воссыг э̄лаль щуньнэ хо̄тал а̄тим. Со̄т, ты маныр? Яртуп ты нас хо̄тпа номсан номт, тамле номт вус о̄лыс э̄ри матыр акволп ут, хунь ла̄ве̄гын тох: «Ам мощнув со̄тыӈ манос аквпал со̄тыӈ». Э̄руптахтан хо̄тпа со̄тэ, хунь ювле хӯлы аквтыхурип э̄рпыщ, ома со̄тыӈ, хунь ня̄враманэ пусыт, сытыт. Ня̄врам со̄тыӈ, хунь оматэ тав ётэ о̄лы. Ам пуста̄глыӈ со̄тум ще̄мьям ёт о̄лэ̄гум. Э̄лыл ма̄хманум юипа̄лт сунсэ̄гум, самвитум нэ̄глы, сымум ща̄гтым путги, маныр ёмас ще̄мьям ёт ё̄ӈхуӈкв. Я, то̄влы, тыгыл минуӈкв э̄ри, тох хоса ялпыӈ виткем ва̄тат рощасасум. Ма̄н тэ̄пъялэ̄в. Пасан котильт хоса а̄ныт хӯл хӯным о̄лы ос ка̄сыӈ такви торыг хӯл исмит курыскатэ ӯнлы. А̄ныпис кӣвырт ос солвал вит, тув хӯл пувтма̄нтэ̄в. Сака атын ты щирыл тэ̄ӈкв туи хара ма̄т ос а̄ращ ва̄тат. Потыр э̄лаль мо̄тыт газетат ловиньтэлы̄н.

1060 2013.09.20. Людмила ТЕТКИНА

Та̄нанылн тот ӯщлахтуӈкве мӯстыс. Китыт та̄л туи порат Ха̄льӯс по̄хыт «Со̄рни сэ̄й» нампа ня̄врамыт ӯщлахтын ма̄ рӯпиты. Ты та̄л хӯрум смена сыс 80 арыгкем ня̄врам тот ӯщлахтасыт. Тамле ӯщлахтын ма̄ «Элаль» нампа предприятие ва̄рыглы ос а̄гирищитпыгрищит тув во̄виньтыянэ. Тот Ольга Константиновна Филиппова кӯщаиг о̄лы. Ня̄врамыт хумус ты туи порат ӯщлахтасыт, та урыл таве китыгласлум. Ольга Константиновна тамле ла̄тыӈ ла̄выс: – Ма̄н нила та̄л ювле хультум порат Восыӈтӯр па̄выл по̄хат Чуанели ӯщлахтын ма̄т ня̄врамыт о̄выл щёс акванатыгласанӯв. Тувыл грантолн ма̄гсыл нэ̄паканув щё̄питасанӯв ос Ханты-Мансийск ӯсн ке̄тсанӯв. Тот касыл щирыл олныл майвесӯв ос Ха̄льӯс по̄хат «Со̄рни сэ̄й» ӯщлахтын ма̄ ӯнттуӈкве о̄вылтахтасӯв. О̄выл та̄л ня̄враманув ё̄рнколт о̄лсыт. Ты та̄л грантолныл пувлынкол ӯнттысӯв, вит айнэ скважинал ва̄рвесӯв. Аквторыг пуссын рӯпата ва̄руӈкве олн ат о̄ньще̄в, ты та̄л о̄с тах грантолн ма̄гсыл нэ̄паканув ке̄тыянув, э̄рыӈ матыр олныл о̄с тах миве̄в. Ань туи порат «Со̄рни сэ̄й» ӯщлахтын ма̄н Ханты-Мансийск ӯсныл, Тэ̄к, Восыӈтӯр, Кульпас, Саранпа̄выл, Шайтанка ос Ха̄льӯсныл ня̄врамыт ёхталасыт. Ма̄н савалап ня̄врамыт, яныг ще̄мьят яныгман, нуса тотнэ а̄гирищитпыгрищит тыг выганӯв. Тӯяг ма̄н район янытыл рӯпитан миркол кӯщаит ёт потыртасӯв, па̄влыӈ ня̄враманыл ма̄н палтув вос ке̄тыглыяныл. Нэ̄паканув щирыл акв сменат 26 ня̄врам ӯщлахтуӈкве ве̄рмысыт. Тох тыгыл са̄внув ня̄врам ёхталас. Ка̄сыӈ сменат та̄н ма̄ньщи культура урыл потыртаве̄сыт ос са̄всыр щирыл ёнгалтаве̄сыт. Акв смена «спортивныиг» ла̄выглавес, мо̄т «экологическииг» ос хӯрмит смена «туристическииг» намаяслӯв. Во̄рт хот ул вос тыпе̄гыт, хумус а̄ращ па̄лтуӈкве ос тот ща̄й па̄йтуӈкве ня̄врамыт ханищтаве̄сыт. Ос са̄в мо̄т э̄рнэ ва̄рмалит ва̄ӈкве та̄н патсыт. Ма̄н МЧС рӯпитан хо̄тпат, ма̄вит ӯргалан хо̄тпат тыг во̄виньта̄лсанӯв, та̄н о̄с э̄рнэ тэ̄лат урыл ня̄врамытын потыртасыт. Ма̄ньщи ла̄тыӈ ос культура ва̄нэ ма̄хум ёт ма̄н акваг рӯпитэ̄в. Та̄наныл «Со̄рни сэ̄й» ӯщлахтын ма̄н о̄с во̄виньта̄лыянӯв. Учёныйхо̄тпат ёт ва̄йхатэ̄в. Ты та̄л ма̄н палтув Светлана Алексеевна Попова ёхталас. Ма̄ньщи учёный са̄в та̄л сыс ма̄ньщи культура урыл нэ̄пакыт хансы. Тав ня̄врамыт ёт рӯпитаӈкве сака ха̄сы. А̄гирищитнпыгрищитын тав ётэ пӯмащ о̄лыс, ёнгил щирыл са̄всыр ребусыт хассыт, спектаклит, тӯлыглапыт ва̄рыгласыт. Светлана Алексеевна туп акв сменан ёхталас. Ня̄врамыт акваг китыглахтасыт, хунь Светлана Алексеевна о̄с тув ёхталы. Ёнгил щирыл ма̄ньщи культура урыл потыртаве̄сыт, та̄нанылн тох сака пӯмащ. Ня̄врамытын тыт ӯщлахтуӈкве сака мӯстыс, ань ва̄тихал китыглахтэ̄гыт, хунь о̄с ӯщлахтын ма̄в рӯпитаӈкве о̄вылтахты. Ма̄н тэ̄лы порат о̄с ӯщлахтын сменат ва̄руӈкве таӈхе̄в. Ань тэ̄нут па̄йтнэ кол ӯнттэ̄в, тэ̄лы ӯщлахтын порат тув ня̄врамыт акванатыянув. Ма̄н ётув предприятият, школат рӯпитэ̄гыт, ня̄враманыл ос тыг ке̄тыглаӈкве ка̄саще̄гыт. Тыи ма̄гсыл олн ойтуӈкве патэ̄гыт. Ань ты ва̄рмаль хосыт ты рӯпитэ̄в.

1061 2013.10.04. Светлана РОМБАНДЕЕВА

Лусытан ос пенсия олн урыл. «Югра» телерадиокомпаният ля̄ххал тотнэ ма̄хум акванатыглаве̄сыт. Тув Москва ӯсныл Совет Федерация Комитетт рӯпитан хум Н. А. Федоряк ёхталас. Ты хум тот рӯпитан ма̄гыс округувныл пе̄риявес, оборона ос безопасность ва̄рмаль палт пуӈктоты. Николай Александрович ля̄ххал тотнэ хо̄тпатын армия урыл, пенсия ва̄рмаль, э̄лы хо̄н ма̄ныл ёхталан ма̄хум ос мо̄т тэ̄лат урыл китыглавес. Тав ла̄выс, 2020 та̄л ляпат ма̄н армиявт туп ма̄к ха̄снэ ма̄хум лусытаӈкве патэ̄гыт. Ма̄ янытыл о̄лнэ мир туп ё̄р государстват э̄руптэ̄гыт. Пенсия ва̄рмаль урыл аквкит ла̄тыӈ ла̄выс. Ань йильпииг ва̄руӈкве номсаве, олнло̄мтанув э̄рттам но̄хнё̄тавет. Пенсиян миннэ хо̄тпа олныл мӯсхал щирыл вос ойтаве, ул вос савалы, сыме ул вос э̄тгалаве. Ань ма̄н ма̄вн мо̄т хо̄н ма̄ныл са̄в мир юв, тыг нё̄ргалэ̄гыт, тыт рӯпата кинсэ̄гыт. Ты урыл тав тох ла̄выс: «Сака са̄в мир Россияв янытыл янгыщ Москва ос Санкт-Петербург ӯсн минэ̄гыт, Ставропольский ос Краснодарский крайиг янытыл нё̄ргалэ̄гыт. Ты ва̄рмаль палт ма̄н са̄в рӯпитэ̄в, э̄рнэ нэ̄пакыт хансэ̄в. Йильпи са̄ккон хосыт тыг нэ̄мхотьют мори ёхтуӈкве ат ве̄рми, рӯпата тыт тах сака ат хо̄нтэ̄гыт. Ма̄нти ма̄хманув сака рӯпитаӈкве ат таӈхе̄гыт, та̄н ла̄внэ̄ныл щирыл, рӯпата олнаныл сака мощща. Ань май пуссын высший образование ма̄гыс ханищтахтэ̄гыт, ос училищат ханищтахтуӈкве ат ка̄саще̄гыт. Пуссын юристыг ман психологыг рӯпитаӈкве таӈхе̄гыт. Ма̄н ань училищатт ханищтахтан ва̄рмаль но̄хво̄рмалтаӈкве номсэ̄в. Ма̄ньлат ма̄хум тот вос ханищтахтэ̄гыт, ёмас рӯпата вос о̄ньще̄гыт, олныл мӯсхал щирыл вос ойтавет».

1061 2013.10.04. unknown

Таве ма̄н сымыӈыщ янытлылув. Ты йист ма̄нки мирув халт пе̄с йис ва̄рмаль ос пе̄с накыт ва̄нэ хо̄тпа сака мощща хультыс. Тамле хо̄тпат ва̄ӈкв, янытлаӈкв ос ӯргалаӈкв э̄ре̄гыт. Ха̄льӯс район Хулюмсӯнт па̄вылт Галина Константиновна Алгадьева о̄лы. Ты хо̄тпа са̄в пе̄с ва̄рмаль, потыр, э̄рыг ва̄г. Ща̄няге̄на̄щаге̄н тав ма̄нь та̄гыл ма̄ньщи щирыл янмалтавес. Таима̄гыс тав ма̄ньщи о̄лнэ ва̄рмаль ёмщакв ва̄гтэ ос э̄лаль ня̄враманэ̄н, манянэ̄н, а̄гиа̄гиянэ̄н, а̄гипыганэ̄н, пыгпыганэ̄н, пыга̄гиянэ̄н, апганэ̄н ма̄ньщи ва̄рмалит хӯлтыглыянэ, ханищтыянэ. Хотьют матыр китыглаӈкв тав палтылэ ёхты – кос хунь нё̄тытэ, хӯлтыглытэ. Ма̄ньлат ма̄хум, ня̄врамыт ёт ос акваг рӯпиты. Я̄сунтыт «Ма̄нь Ӯсквен» ва̄тихал яланта̄лы, тот пе̄с о̄лум ва̄рмалит койгалаӈкв нё̄ты, ня̄врамыт ю̄нсхатуӈкв ханищты. Ма̄нь таквс э̄тпос 3 хо̄талт Галина Константиновна самын патум хо̄талэ. Та хо̄тал тав 70 та̄лэ то̄влыс. Та ёмас, сымыӈ, ка̄ркам, нёмса омаке̄в, щаще̄квав ос ане̄квав самын патум хо̄талэ̄тыл сымыӈыщ янытлылӯв ос пуста̄гыл о̄лнэ хо̄тал, со̄тыӈыг о̄лнэ хо̄тал таве̄н ла̄ве̄в. Хоса нот ос щунь таве̄н. Ма̄н таве э̄руптылав ос аниглылав. Тав ня̄враманэ, ня̄враманэ ня̄врамыт, манянэ, ва̄псанэ, э̄щанэ, а̄пщитэ ос апганэ.

1061 2013.10.04. Людмила ТЕТКИНА

Яныг вит пилыщма тотыс. Югра ма̄т рӯпитан предпринимательхо̄тпат о̄с нё̄тмил ва̄рсыт. Ты э̄рнэ тэ̄ла урыл Ольга Сидорова, «Фонд предпринимателей Югры» нампа ма̄т кӯщай нэ̄, ос Альфия Павкина, Торговопромышленный палатат кӯщай нэ̄, ля̄ххал то̄тнэ ма̄хум э̄лыпа̄лт потыртасы̄г. Округувт ань 85 со̄тыра э̄лумхо̄лас та̄нки ма̄гсыланыл рӯпитэ̄гыт. Ка̄сыӈ та̄лныл предпринимателит са̄внувег е̄мтэ̄гыт. Ольга Андреевна ла̄вме щирыл, та̄н та̄нки ма̄гсыланыл ка̄ркамыг рӯпитэ̄гыт, олн сэ̄лэ̄гыт. Та̄н пуссын аквъёт Дальний Востокт о̄лнэ мир ма̄гсыл о̄с са̄в пормас, олн атсыт. Тувыл э̄лаль тав Николай Колоб, Лангепас ӯст о̄лнэ хум, урыл потыртас. Тав ос мо̄т предпринимателит акв тонна арыгкем са̄всыр пормас, тэ̄нут атсыт ос тув ке̄тсыт. Та̄нанылн тыима̄гсыл яныг пӯмащипа ла̄тыӈ ла̄выс. Альфия Ансаровна Павкина ла̄выс: «Дальний Востокыт яныг вит порат са̄в колыт а̄мара̄лве̄сыт, ма̄хум тэ̄пкананыл вит ёлыпа̄лт кит э̄тпос ӯнлысыт. Ань са̄в ма̄хум коланыл, пормасаныл та̄л вуньщалыг хультсыт. Тыт лӯима̄т, ёмас, сымыӈ ма̄хум о̄лэ̄гыт, ма̄н пуссын аквъёт иӈ нё̄тмил ва̄руӈкве патэ̄в». Ань округ янытыл 35 центр рӯпиты, тот пормасыт, тэ̄нутыт пирмайтавет. Ка̄сыӈ э̄лумхо̄лас тув матыр ке̄туӈкве ве̄рми.

1061 2013.10.04. Тамара МЕРОВА

Ня̄врамыт э̄руптым янмалтэ̄н. Ты э̄лыпа̄лт кӯщаит акв тамле о̄выл сапра̄нин Бурятият акванатхатыгласыт. Мо̄лты Америкат Чикаго ӯст о̄лыс. Ма̄н округувт ня̄врамыт ёмащакв ос пуста̄гыл о̄лнэ̄ныл ма̄гыс правительствав са̄в рӯпиты. Та̄н ма̄гсыланыл сыресыр ханищтахтын центрыт, пусмалтахтын колыт ӯнттавет. Савалап колытныл ня̄врамыт ань са̄выӈпа̄лэ хотты ще̄мьятын вивет. Юио̄выл хультум ат та̄л сыс округувныл ня̄врамыт нэ̄мхотьют мо̄т хо̄н ма̄н ат тотве̄сыт. Ань пуссын тамле ва̄рмалит та̄рапаттын ос ня̄врамыт ёт рӯпитан колыт уральтан ма̄гыс са̄в ма̄ныл мӯй ма̄хум тыг атхатыгласыт. Павел Астахов, Россия янытыл ня̄врамыт тэ̄ланыл ӯргалан хум, сапра̄нит о̄выл ла̄тыӈ ла̄выс. Наталья Комарова губернаторув ос мо̄т хо̄тпанув рӯпатаныл ёмщакв ва̄рнэ̄ныл ма̄гыс мӯйлупсал мисанэ. Тувыл ма̄хум ла̄кквауртхатым рӯпитасыт. Та̄н са̄всыр тэ̄лат ос ня̄врам ӯргалан о̄вылтыт хансым са̄кконыт урыл потыртасыт. Хоты ла̄тӈыт тэ̄ла мус тот хо̄йтхатэ̄гыт, хоты ла̄тӈыт мо̄т щирыл хансуӈкве э̄ре̄гыт. США ма̄ныл ёхталам мӯй хо̄тпат та̄нки палтаныл о̄лум тэ̄лат хӯлтсыт. Ос ма̄н ма̄хманув ма̄гыс са̄всыр ханищтапыт ва̄рыгласыт. То̄ванакт яныг хо̄тпат, ща̄нита̄щит ма̄нь ня̄врамыт ёт сака кантыӈыщ потыртэ̄гыт, ля̄выльттыяныл, лю̄льсаӈ о̄ньщияныл ос ра̄тыяныл. Тащирыл о̄щнэ а̄гирищитпыгрищит о̄с лю̄ль, кантыӈ хо̄тпаг яныгме̄гыт. То̄ват номтаныл савалэ̄гыт ос тыгыл а̄гмыӈыг е̄мтэ̄гыт. Тамле ня̄врамыт ёт са̄в рӯпитаӈкве ос э̄рнэ торыг та̄наныл пусмалтаӈкве э̄ри. Ань ханищтан хо̄тпатытн, ле̄ккарытын ос нё̄тмил ва̄рнэ ма̄хумн хумус ня̄врамыт ёт рӯпитаӈкве э̄ри – таит та̄н ханищтасыт. Алексей Путин, губернатор ва̄ӈын хум, ла̄выс: «Мӯй хо̄тпатын пуссын ма̄н ва̄рнэ рӯпатав суссылтаслӯв, та̄нанылныл матыра̄ти тэ̄латн ханищтахтасӯв. Ань ня̄врамыт то̄ва та̄рвит тэ̄ланыл хумус ма̄кыг щё̄питаӈкве, о̄с ва̄глув. Ма̄н округувт «Единый Россия» партия ка̄сыӈ та̄л «Мирн э̄руптан ле̄ккар», «Мирн э̄руптан ханищтан хо̄тпа», «Мирн э̄руптан ма̄нь ня̄врамыт ёт рӯпитан хо̄тпа» са̄всыр тамле касылыт ва̄рыглы. То̄нт округт о̄лнэ ма̄хум та̄нки щар ёмас хо̄тпа пе̄рие̄гыт ос та хо̄тпа ма̄шинал мӯйлуптаве. Ты та̄лт «Любимый соцработник» касыл о̄лыс. Тот Ирина Смирнова Сургут ӯсныл но̄хпатыс, тав та ӯст ня̄врамытн нё̄тмил ва̄рнэ колт рӯпиты. Ма̄н таве ёмас рӯпататэ ма̄гыс янытлылӯв». Тувыл нэ̄ э̄сгын нэ̄пакыл ос ма̄шинал мӯйлуптавес.

1061 2013.10.04. Валентина УЗЕЛЬ

Ма̄ньщи ла̄тыӈ хо̄т ханищтаве. Ха̄льӯс районт ма̄ньщи ла̄тыӈ ханищтан ня̄врамыт пуссын аквъёт ловиньтаӈкв те, атса̄т ня̄врам ат е̄мты. Саранпа̄вылт, Кульпаст, Ня̄хщамво̄льт, Восыӈтӯрт, Кимкъясӯйт, Ло̄пмуст ос Сӯкыръят о̄лнэ ня̄врамыт туп тот ща̄нь ла̄тӈыл потыртаӈкв ханищтавет. Са̄выӈпа̄лэ ма̄ньщи ма̄хманув тот ты о̄лэ̄гыт. Кондинский районт о̄с ма̄хманув кос о̄лэ̄гыт, ос тот туп Шугур па̄выл школат о̄выл классытт хусахтем ня̄врам потыртаӈкв ханищтавет. Яныг классыт ла̄тыӈ щар ат ханищтаве. Нижневартовский районт Сосновоборск па̄выл о̄лы. Ты па̄выл наме ат хӯлыгласлӯв, ос ма̄ньщиянув та палыт ма̄н о̄с о̄лмыгтамыт. Тот ос нила ня̄врам ма̄ньщи ла̄тӈын ханищтавет. Октябрьский районт Лӯи Ня̄рихуми па̄вылт о̄с са̄в ма̄ньщит о̄лэ̄гыт. Ня̄врамыт школат Лариса Николаевна Карпенкан ос Клавдия Семеновна Плеханован ханищтавет, пуссын аквъёт атпан ня̄врам ат е̄мты. Округув янытыл лов школатт ня̄врамыт ма̄ньщи ла̄тӈыл потыртаӈкв ханищтавет, 16 школатт – ханты ла̄тӈын, 1 школат – ё̄рн ла̄тӈын, ос Саранпа̄выл школат – иӈ саран ла̄тӈын. Хӯрум со̄тыра арыгтем ня̄врам та̄нти ща̄нь ла̄тӈаныл ханищтыяныл, та̄н халанылт акв со̄тыра арыгтем – ты ма̄ньщи ня̄врамыт. Тыг школан, садикн ос образовательный центрытн ялантан ня̄врамыт пуссын ловиньтаве̄сыт. Ты ня̄врамыт округ образование департаментыт рӯпитан ма̄хумн ловиньтаве̄сыт. Ос ма̄ньщи ла̄тӈыл потыртан ка̄сыӈ хо̄тпа ва̄гтэ – ань яныгман ня̄врамыт, ма̄ньлат хо̄тпат халт янгыщ нэ̄мхотьют потыртаӈкв ат ве̄рми. Туп то̄ва ма̄нь па̄влытт о̄лнэ аквтит ще̄мьят ня̄враманыл потыртаӈкв ха̄сэ̄гыт.

1061 2013.10.04. Людмила ТЕТКИНА

Ма̄во̄й ос газ тыт иӈ са̄в о̄лы. 50 та̄л сыс округувт 10 миллиард тонна ма̄во̄й но̄хвуйвес. Наталья Комарова ла̄вме щирыл, тыт 20 миллиард тонна иӈ о̄лы. Ты ва̄рмаль урыл яныг кӯщай нэ̄ прессконференция о̄лум порат ла̄выс. Тав ос Дмитрий Кобылкин, Ямал ма̄ губернатор, 60 та̄л ма̄во̄й ос газ хо̄нтым кастыл ля̄ххал тотнэ ма̄хум ёт хо̄нтхатыгласы̄г. Москва, Ханты-Мансийск ос Салехард ӯсытыт о̄лнэ журналистыт пӯмщалахтасыт ма̄во̄й ос газ ань хумус но̄хвиве, ос манаса̄вит та̄лын ты ма̄ щунь иӈ тах то̄вылхаты. Наталья Комарова ла̄выс, Юграт то̄ва месторожденият иӈ сака са̄в ма̄во̄й о̄лы. Ты э̄лыпа̄лт нефть молях но̄хвуйвес, тав а̄ти мил ма̄т о̄лыс. Ань сака милыщ хультыс, таве но̄хвиӈкве та̄рвитыӈ. Дмитрий Кобылкин ла̄вме щирыл, Ямалт о̄с иӈ са̄в газ о̄лы. Ты мус тот 16 триллион кубометра газ но̄хвуйвес. Ань 147 триллион ма̄ ёлыпа̄лт иӈ о̄лы. О̄с са̄в та̄лн тах то̄вылхаты. Ма̄во̄й киснэ ва̄рмаль урыл ля̄ххал тотнэ ма̄хум китыглахтасыт. Наталья Комарова ла̄выс, ань ма̄н округ янытыл туп 30% ма̄т нефтяникыт рӯпитэ̄гыт ос тот ма̄во̄й но̄хвыгыт. То̄ва ма̄нув мӯсхалыг иӈ ат ханищтаве̄сыт. Ювле хультум та̄лт федеральный бюджетныл ма̄во̄й киснэ ма̄гсыл Югра 407 миллион солко̄вил майвес. Мо̄тыт та̄лыт тах 634 миллион солко̄вил округув тах та̄ставе. Ма̄во̄й но̄хвинэ компаният та̄нки ты та̄л сыс 25 миллиард солко̄ви ма̄во̄й кинсым холтэ̄гыт. Мо̄тыт та̄л 29 миллирад солко̄ви тувле нупыл мыгыт. Ямалыт газ ос ма̄во̄й киснэ ма̄гсыл о̄с сака са̄в олн та̄ставе. Ма̄хум газ кинсым хосат ща̄рыщ ва̄тан ёхтысыт, ань тот рӯпитэ̄гыт. Та̄н Карский ща̄рыщт витпа̄лыт газ но̄хвыгыт ос тот йильпи месторожденият кинсэ̄гыт. Дмитрий Кобылкин ты ва̄рмаль урыл потыртым ос ма̄вит ӯргалан ва̄рмаль урыл ла̄выс. Та ма̄т хо̄т э̄лумхо̄лас о̄луӈкве ат ве̄риты, са̄в ӯйхӯл о̄лы, тыима̄гсыл тув ёхтын ос рӯпитаӈкве о̄вылтахтын хо̄тпат щар о̄влэ̄т ма̄вит урыл номсахтэ̄гыт ос ӯргалым о̄ньщияныл. Ты коныпал кущай хум ос акв ва̄рмаль урыл потыртас. Ань йильпи са̄кконыт щирыл мавой ос газ нохвинэ компаният мощщанув налоголн ойтуӈкве патсыт. Тыимагсыл та̄нанылныл округ бюджетн о̄с мощщанув налоголн ёхтыс. Тувыл таи ёмас, газовикыт са̄всыр пӯльницат, ханищтан колыт ос мо̄т э̄рнэ колыт ӯнттуӈкве ань нё̄тэ̄гыт. Ямалт сака ащирмаӈ, то̄ва ма̄хум о̄луӈкве тот ат ве̄ритэ̄гыт. Тув ёхтум лов хо̄тпан халт туп аква о̄луӈкве тот хульты. Кӯщай ла̄вме щирыл, та̄н ты урыл ёмащакв ва̄гыт, тот хультум ма̄хум ма̄гсыл йильпи колыт, яныг школат, ёмас пӯльницат ӯнттэ̄гыт. Ты э̄лыпа̄лт ма̄хум Екатеринбург, Тюмень, Ханты-Мансийск ос мо̄т ӯсытын пусмалтахтуӈкве ке̄тыглаве̄сыт. Ань тот о̄лнэ мир та̄нки ма̄нылт уральтавет ос пусмалтавет. Ня̄враманыл ёмас, ре̄гыӈ школат ханищтахтэ̄гыт. Тамле ащирмаӈ лӯима̄т о̄лнэ мир о̄лупсаныл мощ кӯпнитыг ва̄рияныл. Ма̄н округувт о̄с са̄в рӯпата ва̄раве, Наталья Комарова ла̄выс, 2012 та̄л сыс Юграт 27 со̄тыра арыгкем ня̄врам самын патыс. Ты э̄лыпа̄лт таса̄вит ня̄врам нэ̄мхуньт самын ат патыглас. Ка̄сыӈ та̄лныл тыт мир са̄вми. Округувт са̄в ще̄мьят хӯрум ня̄врам янмалтэ̄гыт. Та̄н пуссын Югра ма̄ э̄руптыяныл ос та̄нки колыг ловиньтыяныл. Ос мо̄т ма̄н ва̄нтлуӈкве ат таӈхе̄гыт. Ля̄ххал тотнэ ма̄хум ёт потыртым Наталья Комарова ла̄выс, тыт ма̄во̄й иӈ са̄в кос о̄лы, тувыл та̄н во̄р, хӯл, на̄йпос ос мо̄т щёлыт урыл ат ёрувлэ̄гыт, ты хосыт о̄с са̄в рӯпитэ̄гыт.

1061 2013.10.04. Галина КОНДИНА

Ма̄хманув хумус о̄лэ̄гыт. Потыр ювле хаснэ нэ̄пакт ма̄хмытын наманыл хансуӈкве ат э̄рыс, таима̄гыс та̄н ат э̄ссамтым матыр та̄рвитыӈ ва̄рмалит урыл тот хассыт. Соссаӈ хо̄тпанув янгыщ о̄лнэ кол урыл, рӯпата ос пусмалтахтын ва̄рмалит урыл ла̄всыт. Титыглым ма̄ньлат ма̄хум халт 40% са̄вит хо̄тпа насати рӯпата хо̄нтуӈкве ат ве̄рме̄гыт. Таима̄гыс ос туп пособиеолн вуим нусаг о̄лэ̄гыт. Саранпа̄выл миркол хум Николай Артеев ла̄тӈе щирыл, па̄вланылт хӯрум со̄тыратем э̄лумхо̄лас о̄лы, ты халт 30% рӯпата ат о̄ньще̄гыт. Олнта̄л о̄лым та̄н коланылт вит, ре̄г ос на̄йпос ма̄гсыл ойтхатуӈкве ат ве̄рме̄гыт, ЖКХат яныг а̄рнта о̄ньще̄гыт. То̄ва ще̄мьят материнский капитал урыл аты хӯлыгламыт, хумус тув нэ̄пакыт атуӈкве – аты ва̄ганыл. Акв ма̄ньлат ня̄врамыӈ нэ̄ ты урыл титыглавес, тав ла̄выс, ат ва̄гтэ ос нэ̄мхотталь справканэ̄пакыт ат атыглас. Тамле потрыт хӯнтлым, таи туп ла̄вуӈкве ро̄ви. Кӯщаитын са̄всыр нё̄тмилыт урыл па̄влыӈ мирн акваг потыртаӈкве кос э̄ри. Рӯпата та̄л о̄лнэ хо̄тпат са̄выӈпа̄лэ хӯл алыщлым ос во̄раим о̄лэ̄гыт. Ос та̄нти ма̄ныл мо̄т ма̄н нэ̄мхотталь ва̄нтлуӈкве ат таӈхе̄гыт. Ма̄н та̄наныл титыгласанӯв: «На̄н о̄лнэ ма̄нынт манарыл янытлахтэгы̄н манос ёралахтэгы̄н? » Та̄н ювле нё̄тнэ ма̄те̄ныл ос пе̄с йис о̄лупсаныл урыл потыртасыт. Са̄лыӈ колт рӯпитан акв ма̄ньлат хум та урыл ла̄выс, са̄лыӈ ма̄хум рӯпата олнаныл но̄х те нё̄тве̄сыт ос па̄вылт колыл те майве̄сыт, э̄рыӈ то̄нт ма̄ньлат а̄гитпыгыт ты та̄рвитыӈ рӯпатан вуйхатнувыт. Са̄в ма̄ньлат ще̄мьят ос та̄н оманыла̄тяныл ёт потыртасӯв, таима̄гсыл ма̄н та̄нанылн пӯмащипа ос пуста̄гыл о̄лнэ ла̄тыӈ те̄тэ̄в. Та̄н потраныл ма̄н пуссын акв нэ̄пакн хансыянӯв ос округ миркол кӯщаитын мыганӯв. Тувыл э̄лаль кӯщаит номсахтуӈкве патэ̄гыт, хумус ты та̄рвитыӈ ва̄рмалит ёт та̄н рӯпитаӈкве патэ̄гыт.

1061 2013.10.04. Светлана РОМБАНДЕЕВА

Мо̄т хо̄н ла̄тыӈ ханищтан нэ̄. Ха̄льӯс район Кульпас па̄выл школат мо̄т хо̄н ла̄тыӈ ханищтан нэ̄г Людмила Васильевна Николаева рӯпиты. Тав ня̄врамыт английский ла̄тӈыл ханищтыянэ. Людмила Васильевна Кульпасн Марий Эл республиканыл ёхтыс, тот о̄лнэ̄тэ хӯрумхуйплов та̄лыг ты то̄влыс. На̄н ань э̄лаль тав потре ловиньтэлы̄н: – Ам Марий Эл республикат Звениговский районт 1977 та̄лт самын патсум, тот яныгмасум. Марийский государственный университет а̄стласум, марийский ла̄тыӈ ос литература, английский ла̄тыӈ ос литература учителиг ханищтахтасум. Университет а̄стламум порат, профессор о̄йка ам нупылум ла̄выс: «А̄гикве, наӈ Кульпас па̄вылн рӯпитаӈкве минэн, ёмас па̄выл, наӈын тах тот о̄луӈкве мӯсты». Ам ка̄сащасум, ань тыт школат английский ла̄тыӈ ханищтан учителиг рӯпитэ̄гум. Тыт ще̄мьям ёт о̄лэ̄гум, о̄йкам наме Валера, хӯрум пыг о̄ньщиме̄н. Яныг пыгме̄н Никита, хӯрумхуйплов та̄лэ то̄влыс, тувыл Костя, таве̄н лов та̄л. Ань ка̄тыт ты пувилум, ты щар ма̄нь пыгме̄н, наме Илья. Омам наме Лидия Викторовна, са̄тлов нупыл хӯрмит та̄лэ ты то̄влыс. А̄тям а̄тимыг е̄мтыс. Омам марийский ос рущ ла̄тӈыл потырты. Мари-Луговая па̄вылт о̄лы, ты сака нё̄тнэ па̄вылкве Волга я̄ ва̄тат ӯнлы. Марий Эл ма̄т луговой ос горный марийцыт о̄лэ̄гыт, ам ще̄мьям – луговой марийцыт. Ма̄н ма̄ньщи ос ханты ма̄хум ёт ща̄нь ла̄тӈанув щирыл рӯтыӈыщ о̄лэ̄в, та̄н хольтаныл ма̄н о̄с финноугорский ма̄хум. Людмила Васильевна ла̄внэ̄тэ щирыл, Кульпаст о̄луӈкве та̄нанылн ёмас, ханьщувласыт. Па̄вылт хо̄тпа нупыл сымыӈ ма̄хум о̄лэ̄гыт. Ос туп таи та̄рвитыӈ, па̄влыт халанылт сака э̄лынт о̄лэ̄гыт, тыгтув яласаӈкве рӯпатаӈ. Са̄в хо̄тал ӯрхатэ̄гыт, тувыл Ха̄льӯсн ущ та тыламлэ̄гыт манос на̄йиӈхапыл минэ̄гыт. Тамле ёмас, сымыӈ нэ̄ ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве.

1061 2013.10.04. Светлана РОМБАНДЕЕВА

Ло̄пмус па̄выл а̄ги. – Омам Елена Константиновна Хозумова, а̄ги о̄парищ наме Юрьева, Ме̄сыг па̄вылныл о̄лыс. А̄тям Владимир Устинович Хозумов Пупйисум па̄вылт самын патыс, тот яныгмас. Тэ̄н ань сас а̄тимыг. Ам нила каӈк о̄ньще̄гум – Валера, Саша, Сережа ос Лёня. Котиль каӈкагум – тэ̄н юртыӈ ня̄врамы̄г. Та̄н пуссын Ло̄пмус па̄вылт о̄лэ̄гыт, ще̄мья о̄ньще̄гыт. Кульпаст ам нёлолов класс а̄стласум, тувыл э̄лаль Иваново ӯсн ханищтахтуӈкве минасум. Тот текстильный фабрикат ленточницаг кит та̄л рӯпитасум. 1984 та̄лт хум ва̄рсум, наме Журакул Хамраевич, Узбекистан ма̄ныл о̄лы. Кит ня̄врам о̄ньщиме̄н, пыгме̄н наме Умид, а̄гиме̄н ос Гульнара. Тэ̄н мощ яныгмасы̄г, тувыл ма̄н Узбекистанын минасӯв, тув о̄лмыгтасӯв. Кол ӯнттысӯв, ня̄врамагме̄н школан минасы̄г. Тот атхуйплов та̄л о̄лсув. Сака ре̄гыӈ ма̄ кос, ос ам тув татем ханьщувласум, ла̄тӈаныл ханищтаслум, потыртаӈкве ха̄сэ̄гум. Гуля нёлолов класс а̄стламе юипа̄лт, ма̄н тыгле йисӯв. Тыт тав аквхуйплов класс а̄стлас, тувыл Узбекистанын минас, тот педагогический университетт нила та̄л ханищтахтас. Ань школат учителиг рӯпиты. Хум ва̄рыс, наме Бохатыр. Пыгрищ о̄ньще̄г, наме Буниёт. Пыгме̄н ще̄мьяӈ та̄гыл Кульпаст о̄лы, кит пыг о̄ньщи. Э̄кватэ ма̄ньщи нэ̄, наме Надя. Ам тыт интернатт рӯпитэ̄гум, ня̄врамыт ма̄гыс тэ̄нут па̄йтэ̄гум, рӯпатам э̄руптылум. Школа кӯщаюв ёмас нэ̄, матыр та̄рвит е̄мтапи те, тав ка̄сыӈ хо̄тпан нё̄ты. О̄йкам ос кол ӯнттын ма̄т рӯпиты, та̄н ань интернат ӯнттэ̄гыт. Кульпас па̄вылт о̄луӈкве ма̄навн мӯсты. Тыт о̄лнэ̄в ань са̄тыт та̄лыг ты е̄мтыс. Ты я̄тил ма̄ньщи нэ̄кве ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве.

1061 2013.10.04. Тамара МЕРОВА

Тэ̄н ща̄нь ла̄тӈыл ханищтэ̄г. – Ам намум Роза Гордеевна Казамкина. Ты школат ам ня̄врамыт ханты ла̄тӈыл потыртаӈкве ханищтыянум. Ма̄н, ты е̄рт о̄лнэ ханты ма̄хум, ла̄тӈув ваховский диалектыг ла̄ваве ос потранув мощ сургутский диалект хурипаг о̄лэ̄гыт. Ваховский ла̄тӈыл потыртан хо̄тпа а̄ти сака са̄в. Ма̄н ла̄тӈув щирыл хансым ханищтан нэ̄пакыт ат о̄ньще̄в. Ань матахмат ханищтан нэ̄пак сургутский диалектыл хасвес. Ам школат ня̄врамыт та нэ̄пакытыл ханищтыянум. Ма̄н аквъёт та потрыт ваховский диалектын толмащлыянӯв. Ос букват ма̄нки о̄щнэ суянув щирыл ла̄виянӯв, таима̄гыс то̄ва ла̄тӈыт мощ мо̄тнув по̄сыл хансыянӯв. Ня̄врамыт ща̄нь ла̄тыӈ китыт классныл са̄т класс мус ханищтэ̄гыт. Ань са̄тыт классыт аквхуйплов ня̄врам ла̄тыӈ ханищтэ̄гыт, щар мощща ня̄врам китыт классыт о̄лы, тот нила хо̄тпа. Акв са̄т сыс акв щё̄с туп ханищтыянум. Ты, ва̄им, мощща. Мо̄тыт щёс та̄н палтаныл ёхтэ̄гум, ня̄врамыт ла̄тӈыт ос э̄рнэ потрыт хотёрувлыяныл. Ам 2003 та̄лт Ханты-Мансийский педколледж а̄стласлум. О̄влэ̄т Аган па̄выл музейт рӯпитасум, тувыл ня̄врам о̄щсум ос тав ётэ юн о̄лсум. Та юипа̄лт Варъёган па̄вылн ва̄нтлысӯв, тыт о̄с музейн патхатыгласум. 2011 та̄лт школан рӯпитаӈкве во̄вве̄сум. Ща̄нь ла̄тӈум ам ма̄ньта̄гыл ва̄глум, ма̄н во̄рт о̄лсӯв, тот яныгмасӯв. Ос рӯтанув ёт ма̄нки халувт ханты ла̄тӈыл потыртасӯв. Омагума̄тягум са̄лыӈ хо̄тпаг о̄лсы̄г. Туп а̄тям ат номилум, ам э̄тпосум ущ то̄влыс, тав а̄тимыг е̄мтыс. Тувыл аквхуйплов та̄лум порат омам та̄л хультсум. Та̄рвит о̄лыс, ос хо̄та̄ти рӯтанумн, мо̄т ма̄хумн нё̄тве̄сум. Ань э̄лаль ханищтахтуӈкве о̄с номсэ̄гум. Тувыл тыт акв ма̄т ат ӯнлантэ̄в, сыресыр ханищтапыт ва̄рыглавет, ма̄н тув ялантэ̄в. Китыт нЭ̄ потре – Ам намум Валентина Вальчевна Комарова, ня̄врамыт ё̄рн ла̄тӈыл потыртаӈкве ханищтыянум. Тыт китыт классыт ханищтахтын ня̄врам ма̄гыс ща̄нь манос а̄щь заявление хансы. Ос ня̄враме хоты ла̄тыӈ ханищты, таи тот хӯлты. Тувыл ме̄н Роза Гордеевна ёт са̄т класс мус та̄наныл ханищтыянме̄н. Ам палтум ань китыт классыт лов ня̄врам ханищтахты, ты сака ёмас. Ня̄врамыт та̄нки ща̄нь ла̄тӈыл потыртаӈкве ат ха̄сэ̄гыт. То̄ват ща̄няныл хантыт, а̄щаныл ё̄рныт, юн ты ла̄тӈыгтыл ат потыртэ̄гыт. Тувыл школан тотавет, ма̄н та̄наныл тыт ущ ханищтаӈкве о̄вылтыянӯв. Ма̄н, Юграт о̄лнэ ё̄рныт, Ямал ма̄т о̄лнэ ё̄рнытыл ла̄тӈув мо̄т хурипаг о̄лы. Ма̄нки ханищтан нэ̄пак о̄с ат о̄ньще̄в. Ямальский ё̄рн ла̄тӈыл ма̄н ня̄враманув ханищтаӈкве мощ та̄рвитыӈ. То̄ва ла̄тӈанув акван щар ат ёхтэ̄гыт. Тувыл ма̄н та̄н щиранылт потыртаӈкве ат ве̄рме̄в. Ань ня̄враманум ул вос тэ̄лыгтахтасыт, ам амки йильпи нэ̄пак та̄ратасум. То̄ват рущ букват хотвисанум, ма̄нки щирыл ла̄внэ суйит тув хассанум. Тох кӯпнитнувег ла̄тӈув ханищтаӈкве патыс. Тувыл ня̄врамыт юн та̄нки ща̄няныл манос а̄щаныл торгамтыяныл. Нэ̄пакыт ам Ханты-Мансийскат А̄с-угорский институтыт рӯпитан ма̄хум ёт акваннё̄тхатым щё̄питыянум. О̄выл классыт ханищтахтын ня̄врамыт ма̄гыс нэ̄пак ос я̄нас тетрадь ва̄рсум. Ань мо̄тыт классыт ма̄гыс хансэ̄гум. Ам Роза Гордеевнан ос Валентина Вальчевнан пӯмащипа ла̄тыӈ ла̄ве̄гум. Ос ханищтан хо̄тпатын ялпыӈ хо̄таланыл кастыл пуста̄гыл о̄лнэ ла̄тыӈ ке̄тэ̄гум.

1061 2013.10.04. Светлана РОМБАНДЕЕВА Светлана ХОЗУМОВА

Ханты ла̄тӈе э̄руптытэ. Хурит Ханты-Мансийск ӯст о̄лнэ ханты э̄ква Евдокия Андреевна Немысова по̄слым о̄лы. Евдокия Андреевна о̄лнэ̄тэ палытыл ня̄врамыт ханищты ос школат ма̄гыс нэ̄пакыт хансы. Рӯпитанэ̄тэ атпан та̄лыг ты е̄мтыс. «Отличник народного просвещения» ос «Заслуженный работник образования ХМАО-Югры» намыл маим о̄лы. Школа а̄стламе юипа̄лт Ханты-Мансийск ӯст педучилищат ханищтахтас, ты юипа̄лт Ленинград ӯст А. И. Герцен нампа институт а̄стлас. Ханты ла̄тыӈ ос рущ ла̄тыӈ учителиг са̄в та̄л рӯпитас, А̄с-угорский институт кӯщаиг о̄лыс, ЮГУт Научный языковой центр ва̄рыс. Евдокия Андреевна ань «Торум Маа» музейт научноисследовательский ос методический деятельность отделт рӯпиты.

1061 2013.10.04. Светлана РОМБАНДЕЕВА

Тав са̄в та̄л школат рӯпитас. Дарья Никитична школат ня̄врамыт ханищтым атпан нупыл нила та̄л рӯпитас, «Заслуженный учитель Российской Федерации» яныг намыл майвес. Ты тув Кульпасн ялмум порат, ам тав палтэ щалтсасум. Дарья Никитична ёт ме̄н ӯнлахо̄лсуме̄н, потрамасме̄н. На̄н ань э̄лаль тав потре ловиньтэлы̄н. – Ам Кимкъясӯй па̄вылт 1940 та̄л порат ма̄нь таквс э̄тпос 26 хо̄талт самын патсум, тот яныгмасум. О̄выл классытыт Няхлаӈ па̄вылт ханищтахтасум, то̄нт Кимкъясӯй па̄влувт школа а̄тим о̄лыс. Атыт классын ос тыг, Кульпасн тотвесӯв, школа тыт а̄стласум. Ханты-Мансийск ӯсн минасум, тот педучилищат нила та̄л ханищтахтасум. Тувыл ювле йисум, о̄выл классытыт ня̄врамыт ханищтым акваг тыт та рӯпитасум. Рӯпитанэм порат юио̄выл та̄лытт яныг классытт ханищтахтам ня̄врамыт ма̄ньщи ла̄тӈыл ханищтасанум. Омам наме Варвара Васильевна, а̄ги о̄парищ наме Канева. А̄тям Никита Павлович Рокин. Тэ̄н нё̄рт яласасы̄г, са̄лыӈ колт о̄лсы̄г. Ам хом ты номилум, тэ̄н нё̄рн минэ̄г, а̄нум то̄ванакт На̄ста щаще̄квам палт хультуптытэ̄н. Ще̄мьявт ма̄н лов ня̄врам о̄лсӯв. О̄йкаме̄нтыл ме̄н Кимкъясӯй па̄вылт акванхо̄нтхатасме̄н, тав о̄с тот яныгмас, наме Игорь Алексеевич. Ма̄ньщи ла̄тӈыл потыртаӈкве сака ха̄сыс, рыбакыг рӯпитас, бригадирыг о̄лыс. Хотталь щалтме китхуйплов та̄лыг ты е̄мтыс. Хӯрум ня̄врам о̄ньщиме̄н. Яныг пыгме̄н Олег, ще̄мьяӈ та̄гыл тыт о̄лы. Люда а̄гиме̄н Ягримт о̄лы, ня̄врам садикыт воспитателиг рӯпиты. Ще̄мья о̄ньщи, пыгаге янгыг. Ма̄нь пыгме̄н Саша о̄с тыт о̄лы, кит ня̄врам о̄ньщи. Ам пенсиян минамум юипа̄лт школат иӈ нилахуйплов та̄л рӯпитасум. Ань ат рӯпитанэм, онтолов та̄лыг ты е̄мтыс. О̄влэ̄т номсэ̄гум, рӯпитаӈкве ат патэ̄гум, юн маныр ва̄ре̄гум. Юн, насати, са̄в тэ̄ла о̄лы. Ам ань ане̄ква ос яныг щаще̄ква, хо̄т апыгрищ ос акв апыг апыгрищ о̄ньще̄гум. Дарья Никитична тамле ёмас, сымыӈ хо̄тпа. Тав ань юн колсори рӯпата ва̄рнэ̄тэ коныпал, ка̄тыл са̄всыр пормасыт ма̄щтырлы, щаквщи. Ань ты э̄тпос 26 щислат тав самын патум хо̄талэ. Ма̄н, редакцият рӯпитан ма̄хум, ты я̄тил хо̄тпав нам хо̄талыл ос ня̄врам ханищтан ма̄хум ялпыӈ хо̄талыл янытлылув! Са̄в та̄л пуста̄гыл вос о̄лы, На̄янэ̄н-О̄тыранэ̄н вос ӯргалаве.

1061 2013.10.04. Анна АЛГАДЬЕВА

Щисуп. Пе̄с ма̄хманув потырта̄ласыт: «Хунь То̄рум со̄схатам порат Нё̄рыт исум витн лапа̄мара̄лве̄сыт. Туп то̄ва Нё̄рыт Нё̄рала ма̄нь ло̄мтке̄ныл хультса̄лмыт. Щисупат ня̄врам щисгын суй суйтнэ палыт ма̄ арыгта̄лам. Таима̄гыс Щисупаг ты ла̄ва̄ве. Яныгкоть, Ма̄нькоть нампа Нё̄рыг о̄лэ̄г. Тыт о̄с яныг кот ос ма̄нь кот яныт ма̄ ло̄мты̄г, Нё̄р алат хультсамы̄г». Ма̄ янытыл ла̄вылтан Хо̄латщахл, рущ щирыл гора Дятлова, ла̄ве̄гыт, акв хо̄ла – акв э̄лумхо̄лас ла̄пнэ, хуйнэ яныт ма̄ арыгта̄лам. Таима̄гыс тох ты ла̄ваве. Хуньт, пе̄с порат онтолов ма̄ньщи тот порсыгламыт. Туристат тай ётыл ущ тот порсысыт. Потрув э̄лаль Щисуп урыл мины. Ке̄расколыӈъя̄ па̄вылныл ос Висумтыт па̄вылныл Щисуп ёмщакв на̄ӈки. Ке̄расколыӈъя̄ныл Щисуп мус ва̄т нупыл атахкем ве̄рыста. Висумтытныл ущпыл ляпа. Мо̄лты, хунь ты ма̄ӈ ма̄хум са̄лыӈыт о̄лсыт, са̄лыяныл тэ̄лы порат то̄ванакт Щисупан по̄сыгла̄лсаныл. Щисуп яныг Нё̄р, палытэ хоса, тэ̄пево̄ре то̄вылхаты. Туп нумитэ сака яныг а̄хвтасыӈ ос яныг курщип во̄ӈхаӈ. Са̄лы тув ке рагаты, тот та порсы. 1980 та̄лытт Щисуп ва̄тат Серов ӯс па̄лыл са̄лтатыт о̄лсыт. Матахмат та̄л военный часть тот о̄лыс. Та са̄лтатыт о̄влэ̄т матпалыт Щисуп алан лё̄ӈх ва̄рсыт. Тувыл щар нумын Нё̄ралат а̄нах ке̄рыл ос фанера па̄ртыл ва̄рим кит яныг локаторыг тӯщтала̄лсыт. Висумтыт ос Ке̄расколыӈъя̄ па̄влыгныл ты локаторыг ёмщакв на̄ӈксы̄г. Вижай па̄вылныл порыгтурыл ро̄всы̄г ка̄салаӈкв. Матыр ма̄гыс ва̄рыглавесы̄г – я̄ссаг ат ва̄йхаты. Военный ма̄хум мори ат потыртасыт, нас э̄лумхо̄ласыт тот яласаӈкв ат та̄ртве̄сыт. Тувыл нэ̄мат хоса та локатораганыл ат ве̄ритасы̄г, во̄тн пулигманлыгтавесы̄г. Хара Нё̄ралат маныр ве̄риты? Са̄лтатыт та̄нки о̄с хоса ат о̄лсыт, ювле ва̄нтласыт. Ювле минаманылт ма̄хумн ва̄йве̄сыт, ла̄ве̄гыт, та̄глэкв та̄лттым хусахкем ма̄шина акв юипа̄лт ва̄нтласыт. Кӯщаянылгенераланыл о̄с о̄лсыт. Хультум локатор ло̄мтаныл ань мус Нё̄ралат во̄тгащлавет. Ань мус ма̄ньщит ты фанера ло̄мтытыл нып ва̄ре̄гыт. Колъёраныл о̄лум ма̄т ань мус са̄всыр ке̄рло̄мтыт хо̄нтавет. Аквнакт Са̄псаныл о̄лум ке̄р атнэ я̄мсыкыт ке̄р атуӈкв ялмыт. Ке̄р атсыт ман а̄ти, та̄нки ва̄ганыл. Ӣти тахольтыл та пилтуптымет. Таяныт а̄хвтасыт патыглаӈкв та патмыт – акв ла̄гл о̄щмыт, ӣти Висумтыт па̄вылн та оямыт. Такем рохтумыт, пуӈк пинсыт, акваг воссыг тув ат минэ̄гыт. О̄с потыр о̄лы. Пе̄с, ла̄ве̄гыт, акв о̄йка во̄рн минам. Во̄рн минам – хот– ӯстыме. Юн ма̄хманэ такос ӯрхатнэ̄ныл – ат ёхты. Кинсуӈкв патыме – Щисуп ва̄тат хо̄нтыме, по̄хе̄н яныг на̄ӈк товсуп вущкасыме. Нэ̄матыр лё̄ӈх а̄тим, на̄ӈкыт та ляпат о̄с ат яныгме̄гыт. Пе̄с ня̄йтыт ла̄внэ̄ныл, матыр во̄р утын порславес, на̄ӈк товсупыл ю̄ныгта̄вес. Туристаг яласан ма̄хум Щисупан торыӈ ат ялантэ̄гыт. Э̄рыӈ, хотьют ос рохтупта̄лыгла̄лаве. Ка̄с кинсым, ма̄ сунсыглым ос йильпи ма̄ ханищтым яласан ма̄хум пуссын акв лё̄ӈх о̄ньще̄гыт – Хо̄лат-Щахл ос Ма̄ньпупыг Нё̄р. Акваг ты Нё̄рыгн минуӈкв воратэ̄гыт. Тӯяг Хо̄лат-Щахл телевизор хосыт суссылтаӈкв ква̄лтапа̄лвес. Манах канал о̄лы, улпыл пуссын ты урыл передача ва̄рыгласыт. Нэ̄мхотьют я̄ссаг ат и ла̄выс, 1959 та̄лт маныр е̄мталас. Нё̄р палытыл ка̄сыӈ а̄хвтас, ка̄сыӈ урам я̄нас йис потыр, э̄рыг кос о̄ньщи. Туп хотьют ань ты урыл китыглаӈкв? Хо̄лат-Щахл пилтахтынэ̄тэ ам ат хӯлыглылум. Щисуп тай, со̄ль, пилтахты, во̄ре вуянтахты, Щисуп о̄выл ме̄ӈкванэ̄н ма̄тэ ӯргалаве. Наска̄ссыг хунь рущ ма̄хманув пилата̄лыглавет. Порыгтур – суснэтур Нып – матыр та̄рвитаӈ ут а̄лумтан хӯнт Кисуӈкв – кисгуӈкв Щисгуӈкв – такыщ лю̄ньщуӈкв Я̄мсык – кос хоты мо̄т хо̄тпа.

1061 2013.10.04. Светлана РОМБАНДЕЕВА

Хӯл алыщлан камка. – Ам камка ва̄рнэ ма̄гыс са̄глат ёрге̄гум (тав та̄наныл рущ ла̄тӈыл жалинкаг ла̄виянэ). Камка ань улпыл нэ̄мхо̄т ат ва̄раве. Половинка па̄влумт, хунь ам музей ва̄руӈкве о̄вылтаслум, камка урыл номылматсум. Камка кисмаясум, акв ма̄ньщи хо̄тпа Илья Григорьевич Мотышев палт хо̄нтсум. Тав камкатэ ке̄рта̄ныл ва̄рим о̄лы. Хумус ва̄раве, тав номыстэ, ха̄сыс ва̄руӈкве, ос ӯльпа та̄р ат о̄ньщис, проволкал ва̄рыстэ. Ты камка музеювт о̄лы. Тувыл Карым па̄вылт кит камка хо̄нтсум, насати ма̄ньщи хум тав ва̄рыгламаге. Ӯльпа та̄рыл татем ма̄щтырыг сагим о̄лэ̄г. Хӯрмах та̄л ювле хультум порат, ам амти о̄с акв камка ва̄рсум. Ты хӯрум камкат пе̄с щирыл ва̄рим о̄лэ̄гыт. Ам ащо̄йкам наме Иван о̄лыс, тамле талква о̄йка, ос Марья ане̄квам сас ма̄ньщииг о̄лсы̄г. Тэ̄н акваг камка ва̄рсы̄г, яныг хо̄нт порат ущпылнэ̄г са̄в ва̄рсы̄г. Хӯл алыщласы̄г, тыхал камка сагсы̄г. Колхоз па̄лыл ма̄хум тэ̄натэ̄н камка ва̄рылтэ̄гыт, заявканэ̄пак хансэ̄гыт. Туи порат са̄глат щё̄питэ̄г, йӣв та̄рыт хилэ̄г, тувыл та̄рыт ёмащакв щё̄питыянэ̄н, аквансо̄хтыянэ̄н. Тэ̄лы ос камкат ва̄рсы̄г. Ащо̄йкагумане̄квагум рӯпататэ̄н тамле та о̄лыс. Ам пуссын номилум, хумус тэ̄н ма̄щтырласы̄г. Э̄лнаӈ май тэ̄лы порат матыр пормас юн ва̄раве. Тэ̄н о̄с юн рӯпитасы̄г. Ань ты хо̄тал мус номилум, камка яныг, карс, колала мус а̄ла ты ёхты, ащо̄йкам уласн но̄хлю̄ли, тох та саги. Тэ̄н холаме̄н юипа̄лт, са̄в пормас хультыс, щё̄питалум йӣванэ̄н, хилыглам та̄ранэ̄н, та маныр. Ётыл ам о̄с та патсум ма̄щтырлаӈкве. О̄влэ̄т акв камкам ва̄рыслум, тувыл китыт, хӯрмит. Аквам щар пе̄с щирыл на̄ӈк йӣвыл, ӯльпа та̄рыл сагыслум. Дуня а̄квум та̄ра кит камка ёвтыс. О̄влэ̄т ам таве̄н миӈкве ат кос ка̄сащасум, тав а̄нум мӯӈи, щищкурек ос олн тотыс, по̄йкщим во̄всаге. Омам ла̄ви: «Мае̄гын, таве̄н сака э̄ре̄г, наӈтина̄н тах мо̄тан ва̄ре̄гын». То̄нт хум хо̄тпат хо̄нтлын ма̄н вуйве̄сыт, э̄кват та̄нти хӯл алыщласыт. Ра̄хта я̄т а̄рпи о̄лыс, камкаге тув ӯнттысаге, тувыл уральтаӈкве такви ялантас, вит во̄ӈха ва̄ри. Ты юипа̄лт ос хус арыгтем ва̄рыгласум. Акв камка хӯрмах хо̄тал ва̄раве, хо̄тал палыт туп таве те ва̄руӈкве. Ос ты э̄лыпа̄лт йӣв щё̄питаӈкве э̄ри, ӯльпа щахылт та̄р хилуӈкве та маныр, тай сака хоса, сака рӯпатаӈ. Яныг хо̄нт порат э̄кват о̄с ва̄рсыт. Ам юн воссыг ат ва̄ре̄гум, ань камкал хӯл ат алыщлэ̄в. Ань ос тыг семинарын во̄вве̄сум. Никита Партанов ам палтум ёхталас, ме̄н тав ётэ э̄рнэ йӣвыт щё̄питасме̄н, тыг тотсанаме̄н, ань тыт ты ёргащлыме̄н. Анатолий Николаевич ам ща̄нягеа̄щаге урыл китыгласлум, хо̄т яныгмас. Э̄лаль о̄йка мощ о̄с потыртас: – Омам Анастасия Ивановна ма̄ньщи нэ̄ о̄лыс, Учинья па̄вылт самын патыс. Тот пуссын ма̄ньщит о̄лсыт, о̄парищ наманыл Кауртаевыт. А̄тям ос рущ, Николай Власович, ма̄ньщи ла̄тӈыл ёмащакв потыртас. Учинья па̄выл ло̄ӈхаль Та̄п па̄выл ӯнлыс, Иван ащо̄йкам ты па̄влыг халт, Ра̄хта я̄т, хӯл алыщлан ма̄л майвес. Тав тот о̄лнэ кол ӯнттыс, тувыл мо̄т ма̄хум о̄с тув о̄лмыгтасыт. Ло̄ӈхаль Учинья па̄выл мус минуӈкве хус ве̄рыста, ос алгаль Та̄п па̄выл мус хус ве̄рыста. Тувыл тув о̄лмыгтам ма̄хум па̄вланыл Половинкаг ла̄вуӈкве та патсаныл. Ам ань онтырса̄т нупыл хӯрмит та̄лум ты то̄влыс. Ат ня̄врам о̄ньще̄гум, пыгум а̄тимыг е̄мтыс. А̄гиянум хум ва̄рсыт, ня̄враманыл янмалтэ̄гыт. Са̄в апыг о̄ньще̄гум, аман манах, ловиньтаӈкве э̄ри. Анатолий Николаевич тамле ка̄ркам, мӯтраӈ о̄йка, сымыӈ хо̄тпа, ощхульлы, потрами. Такви та̄ланэ янытаг ат сусхаты, ма̄ньнуве̄г а̄ӈкватахты. Ты я̄тил хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалав.

1061 2013.10.04. Светлана РОМБАНДЕЕВА

Па̄выл ле̄ккар потре. Ты тув Ха̄льӯс район Кульпас па̄вылн ялмум порат ам пӯльницан щалтсасум. Яныг ле̄ккарыг тот Инесса Анатольевна Мельникова рӯпиты. Ты нэ̄ ёт ам потыртасум, таве пӯльница рӯпататэ урыл китыгласлум. На̄н ань Инесса Анатольевна потре ловиньтэлы̄н. – Россияв янытыл ань пусмалтан ва̄рмаль йильпи щирыл ва̄раве. Ма̄нь па̄влытыт э̄тэхо̄талэ рӯпитан пӯльницат лаппантуӈкве патве̄сыт, 70 % са̄вит лаппантвес. Пӯльницан ма̄хум ань туп хо̄тыл порат ёхталэ̄гыт. Тот о̄с аквта щирыл пусмалтавет, тэ̄рпиӈ ю̄нтпыл ва̄равет, тэ̄рпил мивет, тувыл юв та минэ̄гыт, тот э̄т ат хӯлэ̄гыт. Россия здравоохранение щирыл, тамле ма̄нь пӯльницат нэ̄мат польса ат тотэ̄гыт, лаборатория, та маныр та̄н ат о̄ньще̄гыт, тамле кол пӯльницаг ла̄вуӈкве ат ро̄ви. Тыт, Кульпаст, о̄с аквтох. Тувыл ань лабораторият рӯпитан хо̄тпа тыг во̄вуӈкве э̄ри, таве̄н о̄лнэ кол о̄с э̄ри. Ам тыт нилыт та̄л ты о̄лэ̄гум, о̄лнэ кол ат о̄ньще̄гум, пӯльница па̄лыл колнакыл майве̄сум, тыт ты о̄лэ̄гум. Э̄лнаӈ ка̄сыӈ тамле пӯльницат са̄в хо̄тпа рӯпитас, пуссын рӯпата олныл ойтуӈкве э̄рыс. Ты ва̄рмаль сака рӯпатаӈ, са̄в олн тув минас. – Ос хотты хо̄тпа илттыг те а̄гмыл е̄мтапи, таве хо̄т пусмалтылы̄н? – Ма̄н та̄ра санборт во̄ве̄в, хо̄тпа вертолётыл Ха̄льӯсн тотаве. Хо̄тыл порат ма̄хум тыг ёхталэ̄гыт, та̄наныл ма̄н пусмалтыянӯв. Ӯщлахтын хо̄талт пӯльница ат рӯпиты. Здравоохраненият рӯпитан кӯщай ма̄хум пуссын ты накыт урыл номсысыт, олныт ловиньтасаныл. Тувыл та̄рапаттысаныл, ань та̄н ла̄внэ̄ныл щирыл, санборт во̄внэ порат олн са̄в ат холтэ̄гыт, ос пӯльницат э̄тэхо̄талэ рӯпитаманыл порат сака са̄в олн холтсыт. Ты пӯльницат ма̄н ань ловмантем хо̄тпа рӯпитэ̄в. – Тэ̄рпи о̄ньщегы̄н? – Э̄рнэ тэ̄рпи ма̄н Ха̄льӯсныл во̄ве̄в, сака мат ат миве̄в, мощщал ке̄таве̄в. То̄ванакт во̄внэ тэ̄рпиянув ат иӈ ке̄тавет. Ань май страховой медицина ква̄лтапаптувес, ты йильпи ва̄рмаль щирыл, ма̄н олн ма̄нти вос сэ̄лэ̄в – рӯпата олн манос тэ̄рпи ёвтнэ олн. Хумус ма̄н сэ̄лэ̄в, олнло̄мтрищанув сака хоталь то̄вылхатэ̄гыт. Тох хотмус та рӯпитэ̄в. – Ня̄врамыт са̄всыр прививкатыл тыт ва̄равет манос Ха̄льӯсн тотыглавет? – Прививкат пуссын тыт ва̄равет. – Инесса Анатольевна, ты па̄вылт о̄луӈкве наӈын мӯсты? – Кульпас – ты ёмас, нё̄тнэ па̄вылкве. Ос туп таи лю̄ль, тыглетувле яласаӈкве сака ат ве̄рме̄в, лё̄ӈх та̄л ма̄т о̄лэ̄в. Торыӈ лё̄ӈх о̄лыс те, матыр те яласанув, санборт ва̄тихал ат во̄выгланувӯв. Товлыӈха̄панув Саранпа̄выл, Ягрим ман Ня̄хщамво̄ль та̄ра минэ̄гыт, ма̄хум местал ат то̄влавет, матах хо̄тал тыт та ӯрхатэ̄гыт. Ха̄льӯсныл тыг ёхтуӈкве о̄с рӯпатаӈ. Па̄выл ле̄ккар Инесса Анатольевна тох та потыртас. Таве̄н ма̄н са̄в ёмас, сымыӈ ла̄тыӈ ла̄ве̄в, пус ка̄т, пус ла̄гыл вос о̄лы. Йильпи пА̄вылныл О̄лнэ нЭ̄ Ты пӯльницат яныг ле̄ккар ва̄ӈын хо̄тпаг ма̄ньщи нэ̄ рӯпиты, Тамара Сергеевна Логвиненко, а̄ги о̄парищ наме Сюмина. Таве ам рӯпататэ урыл о̄с китыгласлум, на̄н ань Тамара Сергеевна потре ловиньтэлы̄н. – Тыт ам 1989 та̄л па̄сныл рӯпитэ̄гум. Хӯрум та̄л ювле хультум порат ам ма̄нь ле̄ккарыг рӯпитан щирыл йильпииг ханищтахтасум. Ань яныг леккар ёт рӯпитэ̄гум. Ты э̄лыпа̄лт ос ня̄врамыт пусмалтан леккарыг рӯпитасум. Медучилищат ам фельдшерыг ханищтахтасум. Прививкат тыт пӯльницат ня̄врамытын ос яныгхо̄тпатн ва̄ре̄в. Ам Йильпи па̄вылт (Новинские па̄вылт) самын патсум. Омам Валентина Алексеевна Сюмина, а̄тям Сергей Романович Лыпщиков. Тэ̄н акван ат хасхата̄лсы̄г, таима̄гыс ам омам о̄парищ намыл яныгмасум. А̄тям тэ̄пхӯрге а̄гмыӈ о̄лыс хотталь щалтыс. Омам нёлса̄т нупыл китыт та̄лэ то̄влыс. Тав акваг Восыӈтӯр па̄вылт о̄лыс, ань а̄гмыӈыг е̄мтыс, Тэ̄к па̄вылн яныг увщим палт тотвес, тот о̄лы. Оматем палт ам ва̄тихал ялантэ̄гум, тэ̄лы порат ялсум, уральтаслум. Ве̄рмынэ̄тэ порат тав тыг такви акваг ёхталас. Ма̄н хӯрум яга̄ги о̄лэ̄в, акв а̄пщи о̄щсӯв, ма̄ньлат порат а̄тимыг е̄мтыс. Ам тыт хум ва̄рсум, наме Владимир Анатольевич. Ме̄н хӯрум ня̄врам о̄ньщиме̄н. Яныг пыгме̄н ва̄т нупыл акв та̄лэ, а̄гиме̄н са̄тхуйплов та̄лэ, ма̄нь пыгме̄н хӯрумхуйплов та̄лэ то̄влыс. Ты па̄вылт о̄луӈкве ёмас, ня̄враманум тыт яныгме̄гыт, ты ма̄ ам э̄руптылум. Хотталь ялнэм порат, номтум ювле та о̄лы, ювле та молямлэ̄гум. Тамара Сергеевна хо̄тпа нупыл сымыӈ нэ̄, мӯтраӈ ома. Ты я̄тил ма̄ньщи хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалаве.

1061 2013.10.04. Людмила ТЕТКИНА

Э̄ква ӯсн мӯйлуӈкве ялыс. Тох Нина Алексеевна Таратова ёт ам ва̄йхатсум ос тав ётэ потыртасум. Тав лӯпта э̄тпост самын патум ма̄тэ̄н мӯйлуӈкве ялыс. Яныг э̄ква ла̄выс: «Хӯрум э̄тпос яласасум, маткем та мӯйлысум. Кимкъясӯй па̄вылн рӯтанум палт ялсум. Ань ювле Касум па̄вылн минэ̄гум. О̄йкам тав рӯтанэ палт тыт о̄лэ̄гум, юв минуӈкве кусыгласум, Алёшам э̄кватэ Ольга ла̄выс, тыт ялпыӈ хо̄талн вос хультэ̄гум. Ялпыӈ хо̄тал янытлаӈкве та хультсум. Ма̄ньщит ёт тыт, э̄рыӈ, ва̄щинтахтэ̄гум, потраме̄гум. Касум па̄вылт ма̄ньщи тай а̄тим. Тот ханты ла̄тыӈ хӯлуӈкве патсум, потыртаӈкве сака ат ха̄сэ̄гум, рущ ла̄тӈыл тай ханьщувласум, рущ э̄кваг ты е̄мтсум. Ань Кимкъясӯй па̄вылт омам э̄ще ня̄врамыт Лыткиныт о̄лэ̄гыт. Та̄н ам рӯтанум ты, нэ̄мхотьют воссыг ат о̄ньще̄гум. Ма̄нь порат Няхлаӈ па̄выл школат кит та̄л туп ханищтахтасум, тувыл ам аквписыг а̄гмыӈ о̄лсум. Омам ханищтан нэ̄н ла̄выс: «Ханищтахтуӈкве ат ве̄рми, та̄ртэ̄лн, юн вос о̄лы». Тувыл та̄ртве̄сум, юн та о̄лсум. Омам а̄гмыӈыг е̄мтыс, колхозт рӯпитаӈкве патсум. Тот рӯпитым са̄в олныл ат ойтвесӯв, ань пенсия олнум щар мощща. Кульпаст зверофермат рӯпитым, хум ва̄рсум. Акв порат хӯлылум, са̄лы сун та юв. Ха̄йталаве̄сум, Нё̄рн са̄лыӈ колн та тотыгпаве̄сум. О̄йкам Николай Степанович Новьюхов о̄лыс. О̄йкаме̄нтыл Нё̄рт са̄лыӈ колт яласасме̄н. Тувыл Тутлеймын о̄йкам па̄вылн ювле йисме̄н. Ань тот воссыг нэ̄мхотьют а̄тим, то̄нт яныг па̄вылт са̄в мир о̄лыс. О̄йкам хотталь щалтыс, та па̄вылныл Касумн ва̄нтласум. Саранпа̄выл совхозт са̄лы ӯрим китыт бригадат рӯпитасме̄н. Ань тай мувиньтэ̄гум, улпыл, са̄лы нё̄выль тэ̄ӈкве тахсум, таима̄гсыл са̄лыӈ хум ва̄рсум. То̄нт тай са̄лыӈ ма̄хум щёлыӈыт о̄лсыт. Амки ня̄врам ат о̄ньщигласум, о̄йкам тав хӯрум пыганэ, хӯрум а̄гиянэ янмалтасанум. Та̄н а̄нум омаг ла̄вияныл. То̄нт пуссын ма̄ниг о̄лсыт. Ня̄враманум ёмасыт, ёмщакв о̄ньщавем. Касум па̄вылт пуссын о̄лэ̄гыт, ам о̄с тув та ва̄нтласум. Мӯйлуӈкве рӯтанум палт хунь минасум, а̄гим ва̄псум ёт билет ёвтсы̄г. Тыг Ха̄льӯсн та тыламласум. Тыт ос на̄иӈхапын та̄лсум ос Кульпас па̄выл нупыл минасум. Валя яныг а̄гим ос звонитас, китыглахтас, хумус тыт о̄лэ̄гум, мӯйлэ̄гум, ла̄выс, мощщаквен минуӈкве кусыгласум, мӯйлым хӯрум э̄тпосыг ты е̄мты. Тох тай потыр са̄внув кос олы, номылматаӈкве э̄ри». Нина Алексеевна а̄тятэ война о̄вылтахтам порат хо̄нтлаӈкве вуйвес, юв воссыг ат ёхталас. Тав а̄тятэ та̄л яныгмас. Та та̄рвитыӈ порат ма̄ньта̄гыл рӯпитаӈкве о̄вылтахтас. Пенсиян миннэ̄тэ мус ка̄ркамыг рӯпитас. Ам таве яныгпа̄ла хо̄тпат янытлан хо̄талыл янытлылум. Паща ла̄тыӈ таве̄н ке̄тэ̄гум. То̄рум ёт, О̄тыр ёт. Пус ка̄т, пус ла̄гыл вос о̄лы.

1061 2013.10.04. Александр ВЬЮТКИН

Хурит по̄слуӈкв вос ха̄сэ̄в. Санкт-Петербургныл тит хо̄тпаг о̄лсы̄г. Александр Иосифович Беленький, Алексей Николаевич Смышляев тэ̄н ты ма̄нав ханищтасы̄г. Александр Беленький фотоаппаратыл по̄слын ма̄хум халт тав намыӈсуиӈ хо̄тпаг о̄лы. Ты коныпал тав университетт фотожурналистика факультетт ма̄ньлат ма̄хум ханищты. Алексей Смышляев ос ма̄ньлат ма̄хум, ня̄врамыт ханищтан кол о̄ньщи. Ты та̄л колэ рӯпитанэ̄тэ лов та̄лыг е̄мтыс. О̄выл э̄типа̄лаг, хунь ма̄н Салехард ӯст пуссын акванатхатсӯв, А̄с я̄ ва̄тат ма̄хар памятник палт тотыглавесӯв. Тот ханты ос ё̄рн ма̄хмыт э̄ргысыт ос йӣквсыт. Хури по̄слын семинарн ёхтум ма̄хум о̄влэ̄т та̄нтина̄ныл ёмас хурит по̄слын хо̄тпаг ловиньтасаныл. Та̄н ла̄всыт: «Манрыг ма̄н акв ма̄т ӯнлын, потрыт хӯнтлын тамле ханищтапыл ва̄рвесӯв. Ма̄н ма̄нти хотьют э̄ри, ханищтаӈкв ве̄рме̄в». Хунь ханищтапув о̄вылтахтас, ма̄хманув астал о̄лым, акв ма̄т ӯнлантым хӯнтлысыт. Э̄типа̄лаг ос ма̄нти хуриянув суссылтасанӯв. Тэ̄н ос ма̄н хуриянув урыл маныр ёмас ос лю̄ль хӯлтыгласы̄г. Титыт хо̄талт Александр Беленький такви по̄слум хуриянэ ма̄навн суссылтасанэ. Хо̄талъят юипа̄лт ос музей колн по̄слуӈкв тотыглавесӯв. Та э̄лыпа̄лт ма̄нав ханищтан хум ла̄выс: «На̄нан ань аквтит ёмас хури по̄слуӈкв э̄ри». Ма̄н тот хумус ве̄рмысӯв ос самув хумус ка̄салас, са̄всыр щирыл лю̄люмта̄лым, та по̄слысӯв. Мо̄т хо̄талт «И. С. Шимановский» нампа музейт ма̄н ва̄рум хуриянув сусве̄сыт. Александр Беленький ка̄сыӈ хо̄тпа по̄слум хуритытныл аквтит хури пе̄рияс. Вим хурит урыл таи ла̄выс: «Хунь хӯрмит хуриӈ нэ̄пакын ва̄раве, ам то̄нт на̄н хуриянын ёлыпа̄лт наманын хансыянум. Ма̄хум вос сунсэ̄гыт ос ханищтахтэ̄гыт». Та юипа̄лт Алексей Николаевичин ханищтаӈкв о̄вылтавесӯв. Тав ма̄навн фотоаппаратыл хурит по̄слын порат на̄й но̄ххорая̄лнэ урыл потыртас. Хунь, хоты порат ос хумус на̄й ёт по̄слуӈкв ро̄ви хӯлтыглас. Тувыл ос хумус яныг ӯсыӈ ма̄т по̄слуӈкве э̄ри, таи потыртас. Яныг ӯст то̄ва ма̄т ос то̄ва порат по̄слуӈкв щар ат ро̄ви. Таима̄гсыл хансым са̄кконыт ва̄ӈкв э̄ри. Атиӈк по̄слын утын полициян хотвиӈкв ве̄рмаве. Ты коныпал ос мо̄т хотты по̄х ма̄хмытын яныг тынпа фотоаппаратын пулигве̄латаӈкв ос на̄нти ра̄туӈкв ве̄рмаве̄н. Са̄ккон ва̄им, на̄нан та̄н ётаныл кӯстырыг потыртаӈкв а̄ртми. Э̄типа̄лаг ос Салехард ӯс сунсуӈкв тотыглавесӯв. Алексей Николаевич ма̄навн хащта̄л ма̄хум по̄слуӈкв ла̄выс. Ма̄нав ат ва̄нэ хо̄тпат то̄ват мовиньтэ̄гыт, титыглахтэ̄гыт, мо̄таныт кантыӈ самыл сунсэ̄гыт ос лю̄ль ла̄тӈыл ля̄втэ̄гыт. Ханищтан хум ла̄выс: «Хунь тох е̄мталанэ порат на̄н ущ торгамтылы̄н, фотоаппарат манырсыр яныг ё̄р о̄ньщи». Юио̄выл хо̄талувт ка̄сыӈ хо̄тпа ханищтахтаме урыл потыртас. Тамле ханищтап ма̄навн мӯстыс. Ка̄сыӈ хо̄тпа таквина̄тэ̄н матыр пӯмащ ос ёмас номт хансыс. Э̄типа̄лаг Горнокнязевск па̄влын тотыглавесӯв. Тот ё̄рн ма̄хум са̄лыӈ коланыл ос пе̄с йис о̄лупсаныл урыл музей кант экскурсиял ва̄рыглавесӯв. Ё̄рнколт пасаныл щё̄пита̄лвесӯв. Тот ма̄н во̄иӈ мохсаӈ хӯлыл, атыӈ са̄лы нё̄влил ос са̄ккарыл тэ̄лыгтым морахыл тыттувесӯв.

1061 2013.10.04. Тамара МЕРОВА

Ялпыӈ ма̄т урыл. Ам марий ма̄хум та̄н ялпыӈ ма̄наныл урыл хансэ̄гум. Марийцыт тахольт тамле ма̄наныл ань тыг мус ӯргалым о̄ньщияныл, ос ты урыл ма̄ньлат хо̄тпатн потыртэ̄гыт, э̄лаль ӯргалаӈкве ханищтыяныл. Пе̄с тамле ма̄ныл коммунист кӯщаитытн о̄с хотсакватаӈкве тахве̄сыт. То̄нт мо̄т щирыл о̄лвес, э̄лумхо̄лас ка̄сащи манос а̄ти, ос яныг кӯщаит ла̄тӈын хӯнтлуӈкве э̄рыс. Тувыл тӯйтыглахтым то̄ва ялпыӈ ма̄т марийцыт сытамыг о̄щсаныл. Та̄нки са̄в та̄л тув ат ялантасыт, нэ̄мхотьютын ат хӯлтыгласаныл. Ётыл йильпииг пе̄риим кӯщаит о̄лупса нупыл мо̄т щирыл сунсуӈкве патсыт. То̄нт пе̄с йис веран агтнэ ма̄хум ялпыӈ ма̄ныл палт ва̄тихал ёхталаӈкве патсыт. Марий ма̄т Моркинский районыт Ю. Н. Алексеев кӯщайлахтын та̄ланэ сыс ты ялпыӈ ма̄т ӯргалан ма̄гыс са̄в рӯпата ва̄рыс. Ма̄хмыт ёт акваннё̄тхатым пӯрлахтын ма̄т ёмщаквег хотщё̄питасаныл. Ань тув са̄в ма̄ныл ма̄хум пӯрлахтуӈкве манос э̄лаль о̄лнэ ёмас номт во̄вуӈкве ёхталэ̄гыт. То̄ват пусмалтахтын ма̄гыс тув ялантэ̄гыт. Туи порат ма̄н, финноугорский журналистыт, тамле ма̄н тотыглавесӯв. Э̄типа̄лаг Юрий Никитич ос Елизавета Арсентьевна Алексеевыг ёт хо̄нтхатыгласӯв. Ма̄н аквъёт пе̄с йис о̄лупса урыл са̄в потыртасӯв. Ты э̄лыпа̄лт о̄йка няслуӈкв ялум ос тэ̄н э̄кватэ̄нтыл атыӈ хӯл исмит па̄йтмыг, ты коныпал нё̄влил тыттувесӯв. Э̄кваго̄йкаг мо̄лтынув пенсиян патхатсы̄г. Тэ̄н атпан нупыл акв та̄л аквъёт о̄лэ̄г, ань пыгаге̄на̄гияге̄н ня̄врамыт янмалтаӈкве нё̄тэ̄г. Тыгыл э̄лаль пӯрлахтын ма̄ урыл хансэ̄гум. Ё̄р ма̄ Акв ялпыӈ ма̄ныл марийцыт рущ щирыл «Гора золы» ла̄вияныл. Таве та̄н сака ё̄р ма̄г ловиньтыяныл. Тот пе̄с йис пораныл ма̄хум акванатхатыгласыт, пӯрлахтасыт, йирхатсыт ос а̄ращ па̄лтыгласыт. Тувыл а̄ращныл хӯльм хотхосгыгласаныл ос мо̄т хара ма̄н акванатыгласаныл. Та па̄сныл хӯльм урыт янгыг е̄мтсыт, таима̄гыс ты ялпыӈ ма̄ тамле намыл пинвес. Ты ма̄ щар во̄р щахылт о̄лы, акв ма̄т ощща лё̄ӈх хосыт ма̄шинал тотвесӯв. Тувыл во̄р хосыт ла̄глыл мощ ё̄мсув, ос хара ма̄н нэ̄глапасӯв. Тот па̄рт колыт ӯнттым о̄лсыт, то̄ва йӣвытын са̄всыр то̄р са̄лмыт, пуӈк то̄рыт нэ̄гсалым о̄лсыт. Ма̄н тот мо̄т па̄лыл ощща лё̄хъяс хосыт ёлва̄глуӈкве ла̄ввесӯв. Тот сыстам со̄юмт по̄лям вит айсӯв, вильтанув ловтсанӯв ос ювле во̄ввесӯв. Ты лё̄хъяс хосыт минамувт, ма̄н са̄всыр йӣвыт ка̄сала̄лсӯв ос потыртавесӯв, хоты йӣвын манхурип мӯйлупсат ма̄хум тагатэ̄гыт. Ос но̄хйинэ̄в сыс ма̄нки матыр номт во̄вуӈкве ос мӯйлупса хультуптаӈкве ве̄рмысув. Хум ва̄рнэ ма̄гыс нэ̄ хо̄тпат манос нэ̄ тотнэ ма̄гыс хум хо̄тпат йӣвытын пуӈкто̄р нэ̄гсалэ̄гыт. Тот акв та̄рныл кит йӣвыг яныгме̄г ке, тамле йӣвыгн мӯйлупсат нэ̄гсалавет. Хум хо̄тпат ос нэ̄ хо̄тпат та̄нки я̄нас йӣвыт о̄ньще̄гыт. Мо̄т йивытын ма̄хум щуниӈыг ос пуста̄гыл о̄лнэ ма̄гыс, вильт сэ̄гнэ то̄рыт, то̄р са̄лмыт нэ̄гсалэ̄гыт. Хум хо̄тпат то̄ва йӣвытын носкит тагатэ̄гыт, маныр ма̄гыс тай ма̄н, нэ̄ хо̄тпат, ат хӯлтвесӯв. Ня̄врам ат о̄щнэ ма̄хум о̄с тот по̄йкще̄гыт, ма̄нь ня̄врам маснут тув тотэ̄гыт. Тот, со̄ль, ма̄тэ ё̄рыг о̄лы ос сытам. Ӯйрищит хо̄т луйгынэ̄ныл суйтэ̄гыт, со̄юмт витэ овтнэ̄тэ суйты, то̄ванакт во̄трег хо̄иглы. Номтанув ёмасыг е̄мтэ̄гыт, ос ма̄нки ё̄ранув аквтуп ювлеёхтэ̄гыт. Карман Курык Ты ма̄ заповедникыг ла̄ваве, ты сака нё̄тнэ ма̄. Карман курык – тыи яныг уркапай. Тот акв ма̄т са̄всыр йӣвыт яныгме̄гыт, мо̄т па̄лэ хара. Ма̄ тот са̄всыр лӯптал ос пилыл яныгмаве. Тот хоты лӯптал манос пилыл яныгман ма̄тэ̄т лю̄ле̄гын, тот аквта хурип атэ нёлсамасагын атаяхты. Ам хосат та̄гыл тамле хорамыӈ ма̄ ат ва̄щинтасум ос са̄всыр лӯптаӈ атыл ат лылтсум. Тув яныг ӯсыӈ ма̄т о̄лнэ ма̄хум вос ёхталанувыт, ма̄витув пе̄с йис та̄гыл хумле щирыл о̄лы ос маныр ма̄навн мыг, вос суснуваныл, ма̄ атэ атая̄лнуваныл. То̄нт ул торгамтэ̄гыт, маныр ма̄гыс ма̄ке̄в сыстамыг о̄ньщуӈкве э̄ри. Марий ма̄т о̄лмумт ам тамле номтын ёхтуве̄сум. Та̄н пе̄с йис щирыл ань тыг мус по̄йкще̄гыт, ялпыӈ ма̄наныл акваг ӯргалым о̄ньщияныл, То̄румн та̄нки о̄с ӯргалавет, ань ул таима̄гыс та̄н ма̄нанылт са̄в со̄юм о̄лы. Тот щар сыстам атыӈ вит овты. Ма̄хум са̄в ма̄т со̄юмныл вит аюӈкве ве̄рме̄гыт. Тувыл то̄ва ма̄т пувлынколыт ва̄римат, ма̄хум по̄лям витыл со̄сантахтуӈкве тув щалтсэ̄гыт, пусмалтахтэ̄гыт. Та щирыл та о̄лэ̄гыт.

1061 2013.10.04. Мария Двинянинова

Туи пора. А̄ӈкватэ̄гум, хумус ма̄нь э̄щум оматэ юипа̄лт койхатым, хӯл солвал витын пувтма̄нтым тэ̄г. Номтэ̄тл, улпыл, яныг хо̄тпаг таквина̄тэ номсытэ. Ам тай яныг. А̄нумн атхуйплов та̄л. Туп тыщирыл номылматаӈкв а̄лымасум, омам ла̄выс, тэ̄н а̄щумтыл холытан тэ̄нут ма̄гсыл Кульпасн минэ̄г. А̄нум янгыг хультуптытэ̄н. Омам тымус ӯрыс пищмала̄тыӈ яныг ня̄врамаге̄ныл. Тэ̄н э̄лы са̄м ӯст о̄лэ̄г. Таима̄гыс омам сыме сака ща̄рги ос номсахты. Ты потыр хӯлмум юипа̄лт, ат ва̄глум маныр ва̄руӈкв: хумус ма̄нкке̄в во̄рт хультэ̄в? По̄ри ла̄вуӈкв куссум, тувыл ат ве̄рмысум. Ты щирыл, яныг хо̄тпа хольт о̄луӈкв патэ̄гум! Э̄щанум хӯнтлым хумус ла̄ве̄гум, ам пилэ̄гум ка̄сыӈ матыр сырыхтан суил, ӯйрищ илтторыг луйгасан суил. Матырсыр во̄рӯйн те нэ̄главе̄в? Норкол кӣвырыт те о̄лсӯв, тай ос мо̄т ва̄рмаль, ты парщинпалатка са̄й хунь ва̄ри. Хоталь щалтапе̄в, матарын те ёхтаве̄в? Йӣвн но̄хха̄ӈхуӈкв э̄щанум ат ве̄рме̄гыт, иӈ ма̄нит. Писалил хультуптаве̄в манос а̄ти? Улпыл, хультуптаве̄в. А̄ращ туп, тя̄какв тав ве̄рми во̄рт ма̄нав вуянтаӈкв. Э̄ри са̄внув ӯльйив тотуӈкв. Ты хо̄тал хунь, тах номылматавемхурахлэ̄гум. Хурахлан ва̄рмаль тай лю̄ль. Хунь ща̄нягума̄щагум о̄лэ̄г, ам хурахлан нупыл тэ̄лам а̄ти, коспыл э̄лын вус о̄лэ̄г. Ма̄н ётув яныг кӯтюв о̄йкав, таима̄гыс номтанув мощ та̄кыт. Та̄к номтыӈыг ва̄рхатым, китыглахтэ̄гум. – Хунь ёхтэгы̄н? – Хо̄т щё̄с юипа̄лт, ӣтипа̄лаг, – омам ла̄ви. – А̄лпыл ла̄пкан ялэ̄гум, пиланув промхозн мыгум ос пищма хаслыгтапе̄гум – ке̄тэ̄гум. Тувыл мисагум послыгтэ̄гум щаквит тыг тотуӈкв. Ӣтипа̄лаг тэ̄пъяламув юипа̄лт, ка̄сыӈ хо̄тал ва̄рнэ рӯпатав о̄вылтахтас. Омав хӯл то̄слаӈкв щё̄питы, йильпи ма̄нь ка̄сэврищитыл ёхул ва̄ри ос сорых хӯлныл ёхул щё̄питы. То̄слым хӯл ос ёхул тэ̄лы кастыл кӯтюв пӯт па̄йтуӈкв та̄сытлыянэ. А̄щум хӯлпанэ щё̄питы. Ам ос тӯр ва̄тат а̄ны ловтэ̄гум, тӯр ляпатнув о̄лы, я̄ мус хоса. Тӯр ма̄нькве, таима̄гыс хӯл ат о̄ньщи, туп ондатрыт уйгалэ̄гыт. Мощ улпыл ондатр о̄лы, йильпи пум саквыт ты на̄тгащлавет. Тӯр ва̄тат ма̄н ха̄ӈхуп о̄ньще̄в, хунь ё̄мнэ порат такем ёмащакв хосгащлахтэ̄гыт. Та̄рвитыӈ матыр тотнэ порат витн ёла щалтапи. Ам тай ха̄ӈхылтап оигпан ма̄т а̄ныса̄н ловтэ̄гум, кӯпнит ма̄гыс витын ат а̄мараве. Хо̄тал ӯнтнэ ма̄ нупыл сунсэ̄гум, тӯп йӣв тальхыт са̄йт ты на̄ӈки, тыгыл э̄т котилиг е̄мты. Хо̄тал ӯнтнэ ма̄тэ выгрыг те̄лум, холытан тах во̄тыӈ хо̄талыг паты. Тувыл омамн нё̄тсум ёхул тагталаӈкв. Тав ща̄гтым ла̄ви: «Холытан ёмас, во̄тыӈ хо̄тал, ёхланув ёмащакв во̄тавет, то̄сэ̄гыт. Хорёхланум ёмщакв то̄сэ̄гыт, Ленинградн ня̄врамагум палт ке̄тэ̄гум » Омам такви о̄с во̄т во̄внэ мӯтра ва̄г. Тыщирыл о̄лыглы, хунь пум то̄слан порат, пумканыт. Ӯщлахтуӈкв ӯнтэ̄в, э̄щагум саглэ̄г – сака ре̄гыӈ, тувыл омам но̄хлю̄ли, а̄рталытэ, хотыл ве̄рми во̄трег йиӈкв ос о̄вылтахты кисгащлаӈкв, во̄т аки во̄вуӈкв, тай такви ве̄саре ва̄гтэ, э̄рнэ щирыл та кисгащлы. Ма̄н тай лылтасаттал, суйта̄л та ӯнлэ̄в. Тувыл, со̄ль, во̄трег ла̄щалакв ты ёхты, тав ма̄н та̄рав тахы ос пум кӯпнат ёт ёнгим, пум ло̄мт но̄хлаплым та мины. Омам тав по̄йкитэ: «Во̄тэнво̄тэн во̄трег Лё̄моит, ма̄ньуйит хотнуясаптэ̄н. Ня̄враманум вус ӯщлахтэ̄гыт». Яты! Тувыл ӣтипа̄лаг мус ман ос пумканув та во̄таве̄в. Колсори рӯпатав а̄сты, ёлхуюӈкв щё̄питахтэ̄в. Яныг ситец то̄рыл ю̄нтым хасап кӣвырт хуе̄в, палатка кӣвырн нэ̄гсалым о̄лы. Хасапув са̄всыр хорамыӈыг толтым ситецыл ю̄нтым о̄лы. Нумитэ ос хасап китпа̄лаге – вуйкан атырхари оспа хорамыӈ лӯпта ситец. Са̄манэ – солиг щирыл иныг щё̄ри оспа нила са̄мп хансаӈ ситец. Мо̄т о̄влаге ос хо̄тахтем сыр хансап то̄рыл. Ма̄н ёлойнэ̄в мус тыт та щӯрнитэ̄в, хотьют маныр ты то̄рытыл ю̄нтыс, тувыл питасыӈ лё̄мой пангын суил ёл та ояве̄в. Омам турсуил но̄хса̄йкалэ̄гум: «А̄гикве, ква̄лэн». Ла̄щлакв хасапныл конква̄лэ̄гум, хасап о̄вланэ ёмащакв ёлатохрим, лё̄мой ул вус щалты. Такем посыӈ, хо̄талыӈ хо̄тал. Лургимщиньгим ха̄пка йӣв лӯптат лэ̄нтге̄гыт, ӯйрищаквет хо̄та̄ти луйге̄гыт. Ӯлмум хотрагатас, туп номтын патапас китгагум миннэ лё̄ӈх. Тувыл ос ёлыпал номтумт – номсэ̄гум, э̄рыӈ пуссын аквъёт минэ̄в. Тӯр ва̄тан минэ̄гум ловтхатуӈкв. Вит ат атае̄гум, маныр ёт аквхурипаг о̄лы? Ма̄нь порам ёт, омам ёт манос тыныӈ ма̄тем ёт? Маныр ёт? Омам ёхтыс, китыглылум: «Ома, вит маныр атыл пасы? » Куньгасым ла̄ви: «Вит атыл. Маныр пуссын такви ат о̄ньщи». Омам а̄нумн ла̄ви маныр ва̄руӈкв. Такем ка̄смоста̄л патсум, со̄ль, тэ̄н минэ̄г. Савакыт хӯланув ханэ̄гыт, матыр хащта̄л мотор суй сумыллы, ёхланув хотталь во̄рын вус тӯйтыянӯв. Ань сорых пувуӈкв ат ро̄ви, а̄щув истрапыл пинаве. Ща̄нягува̄щагув молях минасы̄г. Мотор суе̄н ла̄щалла̄щал оигпи, аквмат суе щар та холас. Хурахлаӈкв патсум. Акваг хӯнтала̄лэ̄гум. Кӯтюванум нупыл сунсэ̄гум, роттыг о̄лэ̄гыт, ро̄ви ат пилуӈкв. Э̄ри о̄вылтахтуӈкв матыр ва̄руӈкв, то̄сам йӣв а̄ращ по̄хан тотуӈкв. Ты рӯпата ва̄рим э̄щагум а̄нум ка̄саластэ̄н, таима̄гыс тэ̄нэ̄в юипа̄лт е̄мталасы̄г тӯйтыглахщтым ёнгуӈкв, ам э̄ла ат та̄ратасагум. Тувыл кукланэ̄н ёт ёнгуӈкв патсыг, ам а̄кань супыл ю̄нтсагум. Ат и мо̄сталаслӯв, хунь хо̄талъ я̄тыг е̄мтыс. Аквматэ̄рт мотор суй сумыллас, ма̄н о̄лнэ ма̄в нупыл ты нуйхаты. Ёла ва̄ӈклата̄лым молях ёхланум во̄рн та а̄лумтыянум. Пасант яныг касай а̄лмаясум, э̄щагум во̄власум – во̄рн та ха̄йтэ̄в. Хунь то̄сам йӣв атмум порат ёлахусылам яныг йӣв ва̄сум, тыгыл но̄хха̄ӈхе̄гын, о̄лнэ ма̄в ёмащакв на̄ӈки. Рущ о̄йка ёхтыс хопсат а̄тыӈ, щаклиӈ пуӈкыӈ. Ам таве ва̄глум, тав пиркатирыг о̄лы, хӯл алнэ ма̄хум тармыл. Палатка ляпан йис, кӣвырн а̄ӈквата̄лыс, тувыл пасан ва̄тан йис, ща̄йпут поньсалас, улпыл а̄рталастэ исум манос а̄ти. А̄ращ ва̄тат мощ лю̄ляхо̄лыс, ро̄ӈхувла̄лыс, а̄щум во̄выс, тувыл со̄пасыг китах щёс патамта̄лыс. Тувыл нэ̄пакло̄мт хансыс ос та минас. Ма̄н во̄рт мощ о̄с о̄лсӯв, тувыл палаткав ляпан йисӯв. Надя э̄щум китыглахты: – Наӈ манрыг касай висын? – Нэ̄нан вуянтаӈкв. – Хотьютыл вуянтаӈкв? – Э̄рыӈ, мори матарыт ёхтысыт. Нэ̄пакло̄мт ловиньтылум: «Селивёрст, Па̄льят ка̄сэвыт минмыгтасыт, э̄ри тув минуӈкв, хӯл алыщлаӈкв». Аквматэ̄рт пилыщмам хотталь минас, такем ёмас патыс. Амкирот номсэ̄гум, во̄рте̄мын вуянтавем, са̄йлавем. О̄с хӯлэ̄гум мотор, о̄с э̄щагум во̄рн тотыягум. Тот тай ма̄н нэ̄мхотьютын ат новаве̄в. Ань а̄ращ ва̄тат хунь ӯнлэ̄в, э̄ри во̄рт о̄лнэ рӯпата ва̄руӈкв. Кӯтюванув лыпащ та̄ратасанӯв, минасӯв э̄лы тӯрын, хӯлпанув сунсуӈкв. Са̄в хӯл пувсӯв, ма̄нки щё̄питасанӯв, тувыл пӯт пе̄тсӯв, ӣтипа̄лаг е̄мтыс, омагува̄тягув ёхтэ̄г. Тувыл ха̄йтталасум сосыг ва̄туӈкв, ве̄тра та̄гыл ва̄тсум ос аквматэ̄рт мотор сумыллас, ты тай ма̄н моторув суй. Тав суе ма̄н мо̄таныт ёт ат тэ̄лыгтылӯв. Ща̄гтым со̄втанув ве̄тран равтасасӯв, нир халыт вораталым, на̄лув ха̄йтэ̄в. Хотьютув са̄ртын а̄лыми на̄лув ёхтуӈкв. Атхунь, ма̄н э̄лыпа̄лувт кӯтьванув на̄яныл палт нуйхатэ̄гыт. Ма̄н о̄с ха̄йтсӯв, омав палт сынумтахтасӯв, хоса сынгатахтыгласӯв. Омате̄в атыл лылтсӯв, ма̄кыг ма̄н атув. Такем солгев, ща̄гтым потыртэ̄в, тымус тэ̄пъялэ̄в. Омав ма̄навн пищмат ловиньтас: увщим Валя ос каӈкум Слава хансум пищманэ̄н. Тахольт ёмащакв, пуста̄гыл о̄лэ̄г. Ма̄н ос тыт о̄лнэ потранув халувт торастахтым потыртэ̄в. Ва̄гтал патнэг мовиньтым, пиркатир ёхталам урыл потыртэ̄в, тох та минас торгамтатта̄л, а̄ращ тэ̄г, курыскат ща̄иӈ та̄гыл ӯнлэ̄гыт, нэ̄мхотьют а̄тим Туп а̄щув тав супне̄лум та̄л ӯнлыс, нэ̄матыр ат ла̄выс, суйта̄л пӯмщалахтым ма̄нав хӯнтлас. Ос тове̄рт ля̄галанты ма̄нав пуӈкыт вотгащлым: «Надятем, Маринатем, Светатем». Манарыл майве̄сум ос хультуптаве̄сум ам номтумт ты хосахоса туи хо̄талакве̄н? Ёлыпал номтумт номсэ̄гум, ам ве̄рме̄гум во̄рт о̄луӈкв. Хумус во̄рт о̄луӈкв э̄ри – ха̄сэ̄гум. Во̄ртем э̄ри янытлаӈкв, ӯехӯлэ ёт э̄руптаӈкв. Тав таима̄гыс са̄в пӯмащ, со̄т мыг. Сыстам во̄рквет сыстам номт ёхты, о̄лнэхӯлнэ ка̄сын пӯмащигщуниӈыг е̄мты. Посыӈ то̄румн сунсавен, лӯр гын хо̄талаквен ё̄ӈхавен!

1062 2013.10.18. Галина КОНДИНА

Са̄в о̄лнэ кол ӯнттаве. Округ губернаторув Наталья Комарова ва̄ӈын хо̄тпанэ акванатыгламе порат ла̄выс, ты та̄л ювле хультум нёлолов э̄тпос сыс 308 со̄тыра кв. метра са̄вит о̄лнэ кол ӯнттувес. Мо̄лты округув янытыл ты э̄тпосыт сыс о̄с аквты са̄вит ӯнттуӈкве а̄лымавес. «Ань иӈ са̄в колыт моще̄ртын ты а̄стлавет, ма̄хмытын тув о̄лмыгтан ма̄гсыл туп нэ̄пакыт мӯсхал щирыл ва̄руӈкве хультыс. Та̄лув оигпан мус иӈ тит э̄тпос о̄лы. Ӯнттуӈкве о̄вылтым колыт пуссын а̄стлаӈкве э̄ре̄гыт», округ кӯщаюв ла̄выс.

1062 2013.10.18. Николай МЕРОВ

Лю̄ль пищ ла̄щал мощщами. Мо̄лал округ полиция кӯщай Василий Романица ля̄ххал тотнэ ма̄хум ёт ва̄щинтахтас. Ань округувт лю̄ль пищ ва̄рнэ нак хомлег о̄лы, тав ты урыл потыртас. Кӯщай хум ла̄внэ̄тэ щирыл, ты та̄л онтолов э̄тпос сыс округ полицият рӯпитан хо̄тпат хо̄тса̄т арыг коррупция ва̄рмаль та̄рапаттысыт. Коррупция ты хунь ма̄хум хотты кӯщаитн матыр ва̄рмаляныл ма̄гыс взяткаолн мыгыт. Ос таи ёмас, мо̄лты та̄лныл ань мощщаннув тамле пищ ва̄раве. Полицият рӯпитан хо̄тпат ты тэ̄ла та̄кыщ уральтым о̄ньщияныл. Таима̄гыс ань округувт тамле преступление морсыӈ порат е̄мталы. Та сыс, иӈ са̄в рӯпата ва̄руӈкве э̄ри. Ты та̄л коррупция ва̄рмаль китса̄ткем миллион солко̄ви са̄вит та̄рвит тотыс. Ты олнытыл туп налыман нупыл кит миллион ювле ойтвес. Мо̄лты та̄л ос са̄тпан нупыл хо̄т миллионныл туп китхуйплов миллион ювле ойтвес. Тамле лю̄ль пищ са̄выӈпа̄лэ Сургут, Ханты-Мансийск, Нижневартовск, Нягань ӯсытт ос Сургутский районт о̄лы. Ты о̄щмарлап янгыщ мир пусмалтан ос ханищтап ва̄рмалигт е̄мталы. Взяткаолн винэ манос майлын хо̄тпат пувуӈкве сака та̄рвитыӈ. Ань хо̄тпа полициян то̄нт мины, хунь тав такви олнанэ э̄л миӈкве ё̄рыл яртаве. Полиция кӯщай э̄лаль ла̄выс: «Мир пусмалтан хосыт са̄выӈпа̄лэ тамле ва̄рмаль е̄мталы, ма̄хум юн ӯщлахтынэ̄ныл ма̄гыс а̄гмта̄л ле̄ккарыт палт пӯльница нэ̄пак ёвтэ̄гыт. Тувыл ос матыр рӯпата ва̄рнэ ма̄гыс арге̄н са̄в олн во̄ве̄гыт. То̄ва организацият ос тох ва̄ре̄гыт: хо̄тпа хосат та̄гыл тот ат рӯпиты ос тав ма̄гсылэ олн выгыт. Ты коныпал ос мо̄т са̄в о̄щмарлан ва̄рмаль о̄лыглы. Ос ханищтап ва̄рмалит таи ёмас о̄лыс, ты та̄л экзамен ос ЕГЭ о̄лум порат взяткаолн минэ нак ат е̄мталас».

1062 2013.10.18. Людмила ТЕТКИНА

Соссаӈ ма̄хум тах нё̄тавет. Во̄ртур э̄тпос порат Ханты-Мансийск ӯст соссаӈ ма̄хум акванатыглаве̄сыт ос «Социальноэкономическое развитие коренных малочисленных народов Севера на 2014-2020 годы» нампа йильпииг хансым программа урыл китыглаве̄сыт. Сапра̄нин во̄виньта̄лым ма̄хум та̄нки о̄щнэ номтаныл урыл тот потыртасыт. Ты ва̄рмаль хосыт рӯпитан кӯщаит ёхтум мир хӯнтлысаныл ос ювле ла̄всыт, та̄н потыртам тэ̄ланыл ке артме̄гыт, ты йильпи программан тах хансыяныл. Ма̄нь таквс э̄тпос о̄вылтахтам порат Правительство кӯщаит йильпи щирыл хансым нэ̄пак та пирмайтасаныл. Ты программа хосыт соссаӈ ма̄хум культура э̄лаль тотаве, общинат нё̄тавет ос са̄в рӯпата ты мирыт ма̄гсыл ва̄раве. Ты коныпал этнотуризм, ма̄ньлат хо̄тпат ханищтан ма̄гсыл, о̄с ты программанныл олн тах та̄ставе. Са̄т та̄л сыс соссаӈ ма̄хмытын нё̄тым округ бюджетныл 1 млрд. арыгкем солко̄ви тах хансаве. Акв та̄л сыс 700 миллион солко̄ви ты программан тув та̄ставе. Кӯщаит ла̄внэ̄ныл щирыл, щар ка̄сыӈ ма̄ньщи, ханты, ё̄рн хо̄тпа нё̄туӈкве патаве. Аквта сапра̄нит яныгпа̄ла хо̄тпат урыл кӯщаит потыртасыт. Ва̄т са̄грапнал э̄тпост округув янытлан хо̄тал кастыл пенсият о̄лнэ ма̄хум олныл ойтавет. Округувт о̄лнэ яныгпа̄ла ма̄хум акв со̄тыра солко̄вил ос Тюменский областьт о̄лнэ хо̄тпат 650 солко̄вил мивет. Округув янытлан кастыл ты олныл 221 со̄тыра э̄лумхо̄лас ойтаве. Наталья Комарова, округ кӯщай нэ̄, ла̄выс: «Ты олн ат рӯпитан хо̄тпат та̄н мивет, та̄нанылн са̄всыр заявлениенэ̄пак хансуӈкве ос очередит лю̄люӈкве ат э̄ри. Ты ма̄хум округув янытлан хо̄тал э̄лыпа̄лт ты олныл тах ойтавет. Ам номсэ̄гум, та̄н пуссын ты ялпыӈ хо̄тал ёмас номтыл тах янытлыяныл».

1062 2013.10.18. Валентина УЗЕЛЬ

Та̄н акв щирыл вос рӯпитэ̄гыт. Округувт «предпринимателиг» ла̄внэ са̄в хо̄тпа рӯпиты. Та̄н та̄нти ва̄рнэ рӯпатаныл са̄кконыт щирыл ва̄рияныл. Ос кӯщаитн сака ул вос лю̄камтавет, ФАСыг ла̄внэ федеральный антимонопольный служба рӯпиты. Та ма̄т кӯщай ва̄ӈын хумыг Илья Тарханов о̄лы. Тав ля̄ххал хаснэ ма̄хумн ва̄рнэ рӯпатаныл урыл потыртас. Ты йист та̄нти я̄нас рӯпитан предпринимательхо̄тпат матыр рӯпата та̄нти тинсэ̄гыт. Ос та̄н та рӯпатал та̄ра ат мивет, о̄влэ̄т акв тамле рӯпата ва̄рнэ хо̄тпат халанылт касуӈкв ла̄вавет. Хотьютаныл мощщанув олн во̄ви манос та рӯпата ёмащаквнувег ва̄ритэ, тав ты но̄хпаты. Рущит ты ва̄рмаль «госзаказыг» ла̄вияныл. Ос то̄ва кӯщаит та̄нти ва̄нэ предпринимательма̄хманыл туп таит рӯпатал мыганыл. Мо̄таныт по̄хат та хультэ̄гыт. Ты лю̄ль ва̄рмалит та̄рапаттын ма̄гыс ФАС ты рӯпиты. Ань ты мус та̄нанылн 1 со̄тыра 200 хо̄тпа полщ тотнэ пищма хассыт, та̄н хансум ва̄рмаляныл пуссын уральтаве̄сыт, ос лю̄ль ва̄рум кӯщаит штрафыл пинве̄сыт. Пуссын аквъёт та̄н 8 млн. солко̄ви штрафолн ойтсыт. Ос ань са̄кконытт кӯщаит урыл тох хансым о̄лы. Та̄н акв та̄л сыс хӯрум щёс матыр лю̄ль ва̄рмаль те ва̄ре̄гыт, туп то̄нт та̄н штрафыл пинавет, 15 со̄тыра солко̄ви ойтэ̄гыт. Штрафолн ойтэ̄гыт, тувыл э̄лаль та рӯпитэ̄гыт. Тох ва̄руӈкв ат кос ро̄ви. ФАСт рӯпитан ма̄хум ань то̄ва са̄кконытт мо̄т щирыл хансуӈкв таӈхе̄гыт. Акв щёс матыр лю̄ль ва̄рум кӯщай тав та̄ра по̄хан вос те̄таве, матах та̄л кос хо̄т кӯщаиг рӯпитаӈкв щар ул вос та̄ртаве.

1062 2013.10.18. Людмила ТЕТКИНА

Савалап ня̄врам янмалтан ще̄мьят урыл. Ты э̄тпост округ Дума депутатыт акванатхатыгласыт ос 42 са̄ккон пирмайтасыт. Та̄н савалап няврамытын ойтнэ пособиеолныт, пенсият, ханищтап ва̄рмаль, округ бюджет ос са̄в мо̄т э̄рнэ тэ̄лат урыл потыртасыт. Сапра̄ни о̄вылтахтам порат депутатыт стихыт хансум ё̄рн хум Юрий Вэлла ка̄стысаныл. Борис Хохряков, округ Дума кӯщай, ла̄выс: «Сӯкыр э̄тпост Юрий Вэлла а̄тимыг е̄мтыс. Тав соссаӈ ма̄хум пе̄с йис ва̄рмалит но̄хво̄рмалтан ма̄гсыл яныг рӯпата ва̄рыс. Округув тамле мӯтраӈ хо̄тпа та̄л та хультыс». Ты юипа̄лт ма̄хум рӯпитаӈкве о̄вылтахтасыт. Та̄н савалап ня̄врамыт ӯргалан ва̄рмаль урыл са̄ккон пирмайтасыт. Ты ня̄врамыт янмалтан ма̄хум ань са̄в олныл мивет. Тамле ня̄врамыт вим нэ̄гхумыг сас акв э̄тпос сыс 10 со̄тыра арыгкем солко̄вил ойтаве̄г. Та̄нанылн ойтнэ олныт о̄с тах но̄хнё̄тавет, акв э̄тпос сыс акв хо̄тпа 13 со̄тыра солко̄вил ойтуӈкве патаве. Ма̄хум яныг а̄ги ман пыгыт виӈкве сака ат ка̄саще̄гыт, тыима̄гсыл яныгнув ня̄врамыт янмалтым, мощ са̄внув олныл тах ойтавет. 12 та̄лныл яныгнув савалап ня̄врам ще̄мьян о̄с ке виве, ты ня̄врам ма̄гсыл 1 со̄тыра 775 солко̄вил са̄внувег миӈкве патавет. Сапра̄нит депутатыт ос «прожиточный минимум» урыл хансым са̄ккон урыл потыртасыт. Ты олныт мо̄тыт та̄лныл о̄с тах но̄хнё̄тавет. 2014 та̄лт яныгпа̄ла ма̄хум 8 со̄тыра 985 солко̄виныл мощщанув ке выгыт, та̄н ты са̄вит мус олнаныл но̄хнё̄тавет. Рущ ла̄тӈыл ты тэ̄ла «социальный доплатаг» ла̄ваве. Мо̄тыт та̄лт округувт 20 со̄тыра 619 э̄лумхо̄лас тамле доплатаолныл тах ойтаве. Ханищтап ва̄рмаль урыл депутатыт о̄с потыртасыт. Соссаӈ ма̄хум Ассамблеят рӯпитан хо̄тпат акв э̄рнэ рӯпата ань ва̄ре̄гыт. Та̄н ё̄раныл хосыт ма̄ньлат хо̄тпат ос ханищтап щирыл рӯпитан департаментыт соссаӈ ма̄хум отдел тах ва̄раве. Тот хӯрум э̄лумхо̄лас ма̄ньщи, ханты ос ё̄рн ма̄ньлат ма̄хум, ня̄врамыт ханищтан тэ̄ла щирыл рӯпитаӈкве патэ̄гыт. Еремей Айпин ла̄выс, ань тот 30 арыгкем э̄лумхо̄лас рӯпитаӈкве ка̄саще̄гыт. Та̄н халанылт каснэ̄ныл юипа̄лт хӯрум хо̄тпа тах пе̄риявет. Округт рӯпитан депутатыт «депутатский фондыг» ла̄внэ олн пуссын о̄ньще̄гыт. Ты олнаныл урыл депутатыт о̄с потыртасыт. Ань ка̄сыӈ э̄лумхо̄лас манос организация та̄нанылныл нё̄тмил во̄вуӈкве ве̄рми. Та̄лув оигпан э̄лыпа̄лт хӯрум э̄тпосн депутатыт пуссын аквъёт 55 миллион солко̄вил тах та̄ставет. То̄ва депутатыт олнаныл хоталь холтыяныл ань ва̄ганыл. Та̄н ты олныл ханищтан колыт, культура колыт ос пӯльницат са̄всыр ищхӣпыӈ утыл тах ёвтыяныл. Ханты-Мансийск ӯст рӯпитан пӯльница са̄всыр оборудованиял ёвтаве. Ха̄льӯст о̄лнэ районный пӯльница ма̄хум пусмалтан ма̄гсыл ищхӣпыӈ утыл о̄с тах та̄ставе. Округув янытыл рӯпитан садикыт тувыл о̄с олн во̄ве̄гыт. Ма̄нь ня̄врамыӈ колыт депутатыт са̄всыр ёнгынутыл, мо̄т э̄рнэ пормасыл ёвтнэ ма̄гсыл о̄с тах олныл мыганыл.

1062 2013.10.18. Светлана РОМБАНДЕЕВА

Ня̄врамыт ёмащакв ӯщлахтасыт. Ханты-Мансийск ӯс мирколт кӯщаиг о̄лнэ ма̄хум ос ля̄ххал тотнэ хо̄тпат акванатыглаве̄сыт. Ань туи порат округ янытыл манах ня̄врам хо̄т ӯщлахтасыт ос пусмалтахтасыт, ты ва̄рмаль ма̄гсыл округ бюджетныл манах солко̄ви та̄стыглавес – пуссын ты урыл тот потыр о̄лыс. О̄выл ла̄тыӈ А. А. Путин тав ла̄выс, ты хум ня̄врамыт ӯщлахтын тэ̄ланыл палт рӯпитан комиссият кӯщаиг о̄лы. Тав ла̄внэ̄тэ щирыл, ты туи округ янытыл ня̄врамыт ӯщлахтын ва̄рмаляныл мӯсхал щирыл о̄лыс. Са̄в ня̄врам ӯщлахтас, то̄ват пусмалтаве̄сыт. Ос ма̄к таи ёмас, о̄лыс, туи сыс нэ̄мат лю̄ль ва̄рмаль ат е̄мталас, мо̄т хо̄н ма̄н ялум ня̄врамаквет пуссын пуста̄гыл юв ёхтысыт. Тав юипа̄лэ̄т ня̄врамыт ос ма̄ньлат ма̄хум ёт са̄всыр ма̄тт рӯпитан нэ̄хумит потыртасыт. Савалапыг хультум ня̄врамыт урыл Департамент кӯщай ва̄ӈын нэ̄ Е. В. Немчинова тох ла̄выс: «Кос хоты колта̄гыл ня̄враме ӯщлахты те, ща̄ньа̄щин ёмас, ань ня̄враме туи та ӯщлахтас, мо̄т хотты ма̄н та ялыс. Округ янытыл о̄лнэ ня̄врамыт ӯщлахтынэ̄ныл ос пусмалтахтынэ̄ныл ма̄гыс округ бюджет ты туи 1 миллиард 56 миллион 998 со̄тыра арыгкем солко̄ви ойтыс. Округувт ня̄врамыт ма̄гыс 488 ӯщлахтын ос пусмалтахтын колыт рӯпитасыт, тув 42 со̄тыра 475 ня̄врам тотыглавес». Ты нэ̄ са̄в потыртас, ань хоты колт манах ня̄врам ӯщлахтас, манах пусмалтахтас, хоты колт ма̄хум щар ма̄к ёмащакв рӯпитасыт, хоты организацият ня̄врамытын нё̄тсыт, олн майласыт, манах а̄гмыӈмосыӈ ня̄врам, манах савалапыг о̄лы, та маныр. Пуссын та̄рапаттым о̄щнэ̄ныл, нэ̄пакын ёмащакв хасманыл.

1062 2013.10.18. Людмила ТЕТКИНА

Яныг кӯщаит сапра̄нин ёхталасыт. Москва ӯст Совет Федерацият рӯпитан кӯщаит ма̄н округувн ёхталасыт ос тыт Думат сапра̄ни ва̄рыгласыт. Ань Совет Федерацият лов комитет рӯпитэ̄гыт, тот кӯщаит са̄всыр ва̄рмалит щирыл пуӈктотэ̄гыт. Акв тамле комитетт Россият о̄лнэ соссаӈ ма̄хум ва̄рмаляныл щирыл та̄н рӯпитэ̄гыт. Ань та̄нки рӯпатаныл урыл Ханты-Мансийск ӯст потыртасыт. Конституция щирыл Государственный Думат рӯпитан депутатыт Россия янытыл о̄лнэ мирн пе̄риявет. Ос Совет Федерациян рӯпитаӈкве ка̄сыӈ округныл, краил манос областил кит хо̄тпа ке̄таве, та̄н сенаторыг ла̄вавет. Акв хо̄тпа депутатытныл пе̄рияве ос китыт хо̄тпа губернатор такви пе̄рии ос тув ке̄тытэ. Вадим Тюльпанов, Совет Федерацият рӯпитан кӯщай хум, ты урыл ла̄выс: «Ты ва̄рмаль урыл тох Россия Конституцият хансым о̄лы, ка̄сыӈ регион кит э̄лумхо̄лас ке̄ты, тэ̄натэ̄н мир ат пе̄рии. Тувыл ань са̄в ма̄хум таи ла̄ве̄гыт, сенаторыт о̄с пе̄рияӈкве э̄ри, по̄х хо̄тпат тот ул вос рӯпитэ̄гыт. Ты ва̄рмаль урыл ма̄н акваг номсахтасӯв ос йильпи са̄ккон хассӯв, ань губернатор такви хо̄тпатэ депутатыт халт о̄с пе̄рияӈкве ве̄рми. Сӯкыр э̄тпост пе̄риян хо̄тал о̄лум юипа̄лт ма̄н палтув 26 регионныл йильпи сенаторыт рӯпитаӈкве ёхтысыт. Аман Тулеев улпыл ты йиильпи са̄ккон мӯсхалыг ат ловиньтастэ ос ма̄н палтув такви ва̄ӈын хуме рӯпитаӈкве ке̄тыстэ. Ма̄н таве ювле минуӈкве ла̄выслӯв, ань А. Тулеев такви сенаторе депутыт халт пе̄рияӈкве тах паты». Сапра̄нит Борис Хохряков ос округ Думав рӯпататэ урыл потыртас. Ты халт ос соссаӈ ма̄хум Ассамблея урыл ла̄тыӈ ла̄выс. Тот рӯпитан депутатыт ма̄ньщи, ханты ос ё̄рн мирыт ма̄гсыл са̄всыр э̄рнэ са̄кконыт хансэ̄гыт. Тамле Ассамблея Россия янытыл воссыг нэ̄мхо̄т а̄тим. Виктор Пичугов, Совет Федерацият ма̄н округувныл рӯпитан хум, ос парламентыт ва̄рум рӯпатаныл урыл потыртас. Ань Россия янытыл ка̄сыӈ ма̄т та̄нки са̄кконыт пирмайтым депутатыт рӯпитэ̄гыт. Тувыл таи лю̄ль, щар ка̄сыӈ ма̄т та̄н са̄всыр щирыл намаим о̄лэ̄гыт: Областной Собрание, Государственный Собрание, Народный Собрание ос са̄в мо̄т нам о̄ньще̄гыт. Ма̄н округувт Думаг намаим о̄лы. Виктор Пичугов ла̄вме щирыл, региональный парламентыт пуссын ань акв щирыл намаяӈкве э̄ре̄гыт. Ты коныпал ос депутатыт сэ̄лнэ олнаныл урыл потыртас. Москва ӯст рӯпитан депутатыт щар са̄в олныл ойтавет. Та̄н са̄в э̄рнэ ос ёмас са̄ккон Государственный Думан ке̄тыгласыт. Ма̄н округ Думав рӯпитан ма̄гсыл 2012 та̄л сыс 448 миллион солко̄вил та̄стыглавес. Мо̄т са̄кконыт пирмайтын парламентыт халт тыи а̄ти сака мощща. Виктор Пичугов ловиньтам спискатэ̄т округ Думав са̄тытыг хансым о̄лыс. Ос ты та̄лыт сыс ма̄н депутатанув Государственный Думан туп нила са̄ккон ке̄тсыт, тыи мощща а̄ти.

1062 2013.10.18. Николай МЕРОВ

Сӯкыръя па̄выл хо̄тпаг потре̄н. Туи порат Нефтеюганский районт ма̄ньха̄пыл каснэ ва̄рмаль щё̄пита̄лвес. Округныл са̄всыр па̄влытныл ос ӯсытныл соссаӈ ма̄хманув касуӈкве акванатхатыгласыт. То̄нт Ха̄льӯс районныл Сӯкыръя па̄вылныл кит хо̄тпаг тув ёхталасы̄г. Ты Ирина Даниловна Сайнахова ос Эдуард Николаевич Лещук. Ты хо̄тпаг а̄нумн тэ̄нки уре̄нтыл мощ потыртасы̄г. Ирина Даниловна Сӯкыръя па̄вылт ма̄ньщи ще̄мьят яныгмас. Ща̄нягеа̄щаге хо̄т ня̄врам янмалтасы̄г: хӯрум пыг, хӯрум а̄ги. Ирина Саранпа̄выл школа а̄стламе юипа̄лт, э̄лаль ханищтахтуӈкве ат минас, ня̄врамыӈыг е̄мтыс. Таима̄гыс Сӯкыръят о̄луӈкве хультыс. Тот са̄всыр ма̄т рӯпитым ла̄щал о̄ланты. О̄йкатэ наме Евгений Петрович Сайнахов, ма̄ньщи хум, о̄с Сӯкыръяныл о̄лы. Тав хӯл алыщлым рӯпиты. Нэ̄гхумыг аквъёт са̄в та̄л о̄лэ̄г. А̄гитэ̄н ань янгыг е̄мтыс, наме Светлана, ще̄мьяӈ та̄гыл я̄нас о̄лы. Ла̄пкат тэ̄нут тыналы. Светлана о̄йкатэ саранхум, ма̄шинал яласым рӯпиты. Эдуард Николаевич о̄с Сӯкыръя па̄вылт ще̄мьяӈ та̄гыл о̄лы. Тав ань ты накт ат рӯпиты. Юн са̄всыр рӯпата ва̄ри. Ӯйхул о̄ньщи, хӯл алыщлым ос во̄раим яласы. Э̄кватэ ма̄ньщи нэ̄, наме Галина Петровна, такви о̄парищ наме Сайнахова. Ма̄нь ня̄врам колт ня̄врамыт ӯргалым рӯпиты. Тэ̄н аквъёт хӯрум ня̄врам янмалтасы̄г. Кит пыгаге̄н Пётр ос Иван юртыӈ ня̄врамыг. Тэ̄н Саранпа̄выл школа а̄стламе̄н юипа̄лт э̄лаль Ханты-Мансийск ӯсн медицинский академиян фельдшерыг ханищтахтуӈкве минасы̄г. Ма̄нь а̄гитэ̄н наме Анастасия, тав школат иӈ ханищтахты. Ты хо̄тпаг ёт каснэ ва̄рмалин мо̄т ма̄хум о̄с ёхталасыт. Ха̄льӯсныл Леонид Бабанин, тав ань рӯпата та̄л о̄лы. Кульпас па̄вылныл Надежда Чалданова, ма̄ньщи а̄ги, ёхталас. Тав ос школат ня̄врамыт ханищты. Тувыл ос пенсият о̄лнэ кит хо̄тпаг ёхталасы̄г. Ты Василий Артеев, Сӯкыръя хум, ос Валентина Вьюткина, Саранпа̄вылт о̄лнэ нэ̄. Ка̄сыӈ та̄л ты каснэ ва̄рмальн Ха̄льӯс районныл ма̄хманув ёхталэ̄гыт. Ос та̄н ты урыл потыртасыт. Ханты ма̄хум ха̄паныл мо̄т хурипат, янытэ̄т акволпа йӣвныл са̄грим о̄лэ̄гыт. Ма̄ньщи хо̄тпатн тамле хащта̄л ха̄пыл товуӈкве ат а̄ртми. Таима̄гыс акваг юв хультэ̄гыт. О̄лнэ ма̄нанылт тамле ха̄п о̄щнувыт ке, ла̄щалла̄щал ханищтахтынувыт. Мо̄т районытныл ёхталан ханты хо̄тпат пуссын тамле ха̄п о̄ньще̄гыт, каснэ ва̄рмаль э̄лыпа̄лт та̄н юн пуссын товыгтэ̄гыт. Ань губернаторув ты ва̄рмальт нё̄туӈкве ла̄вхатас. Мо̄тынтыг тамле ха̄пыл ёвтавет ке, ма̄ньщи хо̄тпанув о̄с мӯсхал щирыл щё̄питахтуӈкве патэ̄гыт тах. Тувыл о̄с акв ва̄рмаль урыл потыртасыт. Ка̄сыӈ та̄л ты кос касуӈкве ёхталэ̄гыт, ос аквта хо̄тпат но̄хпатэ̄гыт. Тав кас, ос ма̄хум ка̄ста̄л сысы минэ̄гыт, ань то̄ват воссыг тув ёхталаӈкве ат ка̄саще̄гыт. Ювле хультум командат нас пӯмащ ма̄гыс матыр мӯйлупсал ке майлынувет ос ёмас о̄лнув.

1062 2013.10.18. Светлана РОМБАНДЕЕВА

Нё̄тмил ва̄рмаль урыл. Хурит Ольга Алексеевна Ануфриева по̄слым о̄лы. Тав Ха̄льӯс район Кульпас па̄выл мирколт рӯпитас, соцзащита па̄лыл хо̄тпатын э̄рнэ нэ̄пакыт хансуӈкве ос акванатуӈкве нё̄тыс са̄всыр нё̄тмил ма̄гыс манос ня̄врамыт олнло̄мтаныл винэ ма̄гыс нэ̄пакыт хансыс. Туи Кульпасн ялмум порат, мирколт ам Ольга Алексеевна хо̄нтыгласлум, рӯпататэ урыл китыгласлум. На̄н ань тав потре ловиньтэлы̄н: – Кульпас, Ло̄пмус ос Кимкъясӯй па̄влытт 36 а̄гмыӈмосыӈ хо̄тпа о̄лы, 40 ще̄мья са̄в ня̄врам о̄ньще̄гыт, 2 ще̄мьягт ня̄врамыт ома ат о̄ньще̄гыт, 8 ще̄мьятт а̄гмыӈмосыӈ ня̄врамыт яныгме̄гыт, 10 ня̄врам ща̄ньа̄щ ат о̄ньще̄гыт, рӯтанылн ман по̄х хо̄тпан янмалтавет, 3 хо̄тпа яныг хо̄нт порат рӯпитасыт, 28 хо̄тпа «Ветеран труда ХМАО-Югры» ос 32 хо̄тпа «Ветеран труда Российской Федерации» намыл маим о̄лэ̄гыт. Та̄н пуссын соцзащита па̄лыл нё̄тавет, олныл ойтавет манос мо̄т нё̄тмилыл майлавет. Ольга Алексеевна яныг таквс э̄тпос 1980 та̄лт самын патыс. Хӯрум а̄ги о̄ньщи яныг а̄гитэ нилахуйплов та̄лэ, котиль а̄гитэ аквхуйплов та̄лэ, щар ма̄нь а̄гитэ хо̄т та̄лэ. Мо̄лты та̄л о̄йкатэ Евгений Анатольевич а̄тимыг е̄мтыс. Ня̄враманэ такте̄т янмалтыянэ. Оматэ ма̄ньщи нэ̄, Анна Павловна Гындыбина, Кульпас па̄вылт самын патыс. Ольга Алексеевна ма̄ниг о̄лме порат, оматэ̄н Светлый па̄вылн тотвес, тув о̄лмыгтасы̄г, тав тот яныгмас. Ань о̄йкатэ холам юипа̄лт, тав ня̄враманэ ёт яныгмам па̄влэ̄н минуӈкве номсы. Ольга Алексеевна ла̄внэ̄тэ щирыл, рӯпататэ ёмас кос, э̄руптытэ. Ты ма̄ньщи нэ̄кве ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве!

1062 2013.10.18. Светлана РОМБАНДЕЕВА

Яныг колта̄гыл а̄ги. Ты хурит ма̄ньщи нэ̄ Евдокия Митрофановна Михайлова по̄слым о̄лы, а̄ги о̄парищ наме Сайнахова. Тав Ха̄льӯс район Кульпас па̄вылт о̄лы, школат тэ̄нут па̄йтнэ колнакт рӯпиты. О̄йкатэ̄нтыл тэ̄н кит савалап ня̄врам янмалтэ̄г, кит пыгрищ. Евдокия Митрофановна ре̄тыӈ ю̄свой э̄тпост 1967 та̄лт самын патыс. Оматэ Ирина Алексеевна, а̄ги о̄парищ наме Кугина, Ме̄сыг па̄вылт самын патыс, тот яныгмас. А̄тятэ Митрофан Ильич, Ма̄нья па̄вылныл о̄лыс. Оматэ рыбучасток зверофермат рӯпитас, охсарыт ма̄гыс тэ̄нут па̄йтыс. А̄тятэ ос колыт ӯнттын ма̄т ман па̄рт сылнэ ма̄т рӯпитас, йӣв ха̄пыт ва̄рыс. Э̄кваго̄йкаг хотталь щалтме̄н хо̄тса̄т та̄лыг ты е̄мтыс. Тэ̄н са̄т ня̄врам янмалтасы̄г – Ольга, Илья, Альбина, Ще̄рти, Дуся, Володя ос Света. На̄н ань э̄лаль Евдокия потре ловиньтэлы̄н: – Ам школат рӯпитанэм са̄тхуйплов та̄лыг ты е̄мтыс, ня̄врамыт ма̄гыс тэ̄нут па̄йтэ̄гум. Ты э̄лыпа̄лт лов арыгтем та̄л рыбучасткат звероводыг рӯпитасум. Тувыл рыбучасткав лаппантвес, охсарыт о̄ньщуӈкве ат патве̄сыт, ма̄н рӯпата та̄л хультсӯв. Ётыл ам школан та патхатасум. О̄йкам Александр Генрихович Михайлов Сыктывкар ӯст яныгмас. Хӯл алыщлан ос во̄раян хумыг о̄лы. Рӯпататэ̄т янытлаве, мо̄лты та̄л сака са̄в нё̄хыс ка̄тынпатталас. Ме̄н кит ня̄врам о̄ньщиме̄н, пыгме̄н Руслан, а̄гиме̄н Лена. Тэ̄н сас ще̄мьяӈыг, ня̄врамыӈыг, пуссын тыт, Кульпаст, о̄лэ̄гыт. Руслан рыбкоопт рӯпиты, Лена о̄с школат рӯпиты. Ме̄нти ня̄врамагме̄н яныгмасы̄г, ань кит савалап пыгрищиг янмалтыме̄н, Никита ос Ваня. Никита оматэ ты па̄вылт о̄лы, тэ̄н колэ̄н хотё̄свес, таима̄гыс пыгрищ ань ма̄н палтув о̄лы. Оматэ̄нтыл ва̄щинтахтэ̄г, тав ма̄н палтув ёхталы, Никита то̄ванакт оматэ палт о̄с яланта̄лы. Ваня ос савалап ня̄врам, тамле номтыӈ пыгрищакве, ёмащакв ханищтахты. Ня̄врамыг ань ща̄рщ ва̄тат Геленджик ӯст ӯщлахтэ̄г, пувлэ̄г. Тамле ёмас потыр Евдокия Митрофановна та потыртас. Ты я̄тил сымыӈ хо̄тпав колта̄глэ ёт пуста̄гыл вос о̄лы!

1062 2013.10.18. Александр ВЬЮТКИН

Мирн нё̄тмил ва̄рнэ ма̄хум. Ты э̄тпос нилыт хо̄талэ̄т Россия янытыл нё̄тмил ва̄рнэ МЧС рӯпитанэ̄ныл онтырса̄т нупыл акв та̄лэ то̄влыс. Ты кастыл та э̄лыпал хо̄талт Ханты-Мансийск ӯст МЧС колт ля̄ххал тотнэ ма̄хум ёт А. Н. Некрасов хо̄нтхатыглас. Тав полковник нам о̄ньщи, округ МЧС тармыл кӯщаиг о̄лы. Тав потыртас, хумус МЧС ва̄рвес: «Тамле рӯпата 1932 та̄лт ва̄руӈкв патвес. То̄нт мо̄т щирыл ла̄ввес – «Местная противовоздушная оборона» (МПВО). Та̄н палтаныл мир пусмалтан, на̄й харыгтан ос кол ӯнттын ма̄хум хасхатым о̄лсыт. О̄влэ̄т та̄н ва̄рум рӯпатаныл ма̄гсыл олн ат висыт. Яныг хо̄нт юипа̄лт ущ олн винэ рӯпатаг ва̄рвес. Противоздушный оборонаг 1991 та̄л мус намтым о̄лыс. Тувыл э̄лаль Россия МЧСыг намтвес. Ань щар ма̄к мирн нё̄тмил ва̄рнэ яныг колыг ловиньтахты. Ма̄ янытыл воссыг нэ̄мхотты мир тамле нё̄тмил ат о̄ньще̄гыт. МЧС Россия ма̄в янытыл о̄лнэ ма̄хум ӯргалым рӯпиты. Ма̄н округувт ос акв тамле нё̄тмил «Центроспас Югория» ва̄ри. Ма̄н акваннё̄тхатым акв рӯпата ва̄ре̄в. Мо̄лты округ бюджет олнытыл «Центроспас Югория» ма̄гсыл палаткаӈ па̄выл ёвтвес. Тамле колыӈ па̄выл воссыг нэ̄мхо̄т а̄тим. Тав тынэ 17 млн. солко̄ви. Пӯльница, ня̄врамыт садик, ханищтахтын ос пувлынкол тот о̄лы. Пуссын аквъёт хӯрум со̄тыра хо̄тпа тув о̄луӈкве ла̄пи. МЧС янытлан хо̄талувт ма̄н ётув рӯпитан ма̄хум ма̄гыс яныг ханищтап ва̄раве. Ка̄сыӈ ӯст мо̄тмо̄т ханищтапыл ва̄раве̄в. Хоты ӯст манырсыр ханищтап е̄мты, ма̄н та̄ра Москва ӯсныл ат ла̄ваве̄в. Таве хунь а̄стлылӯв, та̄ра ювле ла̄тыӈ те̄тэ̄в»

1062 2013.10.18. Александр ВЬЮТКИН

Са̄лыт пуста̄гыл вос о̄ньщавет. Сургут ӯст соссаӈ хо̄тпат ос ма̄во̄й, газ но̄хвинэ ма̄т рӯпитан ма̄хум сапра̄ни ва̄рыгласыт, та̄н тот са̄всыр ва̄рмаль урыл потыртасыт. Аквта порат округувт са̄лыт янмалтан урыл потраныл о̄лыс. Ветеринарыг о̄лнэ нэ̄ Н. В. Ососова такви рӯпататэ урыл потыртас. Наталья Владимировна округувт ӯйхул пусмалтан ва̄ӈын кӯщаиг ос государственный инспекторыг рӯпиты. Тав ла̄выс: «2012 та̄л порат округув янытыл налыман нупыл са̄т со̄тыра са̄лы о̄щвес. Тӯяг са̄лыт ӯнттуманыл юипа̄лт хо̄т со̄тыран пӯӈ са̄внувег е̄мтыс. Щар ма̄к манса̄вит, нэ̄мхотты порат ёмщакв ловиньтаӈкв ат ве̄рмаве. Са̄в са̄лыт та̄нтирот, ӯльнаг яласэ̄гыт. Юио̄выл ат та̄л сыс са̄лыянув бруцеллёза̄гмыл ха̄хтуве̄сыт. Ма̄н, ӯйхул ӯргалан ма̄хум, та а̄гм хотыл ёхтыс, уральтаслӯв. Са̄выӈпа̄лэ ты ма̄во̄й ос газ ёт рӯпитан ма̄хмытн тотнэ комбикормыныл ты а̄гмыл са̄лыянув ха̄хтуве̄сыт. Та сыртэпыл тыттын са̄лыт нё̄вляныл ос те̄лпаныл тамле атыӈыг ос ёмасыг ат е̄мтэ̄гыт. Хо̄т ань ма̄во̄й ос газ но̄хвинэ ма̄хум рӯпитэ̄гыт, тот са̄в мосыӈ са̄лы о̄лы. Са̄выӈпа̄лэ мосыӈ са̄лыт Сургутский ос Нижневартовский районыг халт о̄ньщавет. А̄гм та̄л, нё̄вляныл сыстам са̄лыт Ха̄льӯс ос Белоярский районыгт ха̄йтыгтэ̄гыт. Та ма̄т яласан са̄лыӈ ма̄хмыт ка̄сыӈ таквс са̄лыяныл ловиньтавет ос те̄лпаныл уральтаӈкве вивет. Ва̄гталнув са̄лыяныл, ма̄нь па̄сыгрищаныл ос са̄лыӈ а̄мпаныл тэ̄рпиӈ уколыл тӯщтаве̄т. Бруцеллёза̄гмыл е̄мтум са̄лы то̄слым ос по̄льтым нё̄вле палт а̄гм иӈ хоса о̄луӈкв ве̄рми. Па̄йтнэ порат лю̄ль утанэ ущта хотталь холтавет. Таима̄гсыл ма̄н са̄лыӈколт яласан ма̄хмытын такос ла̄ве̄в: «Ня̄рта̄гыл ос то̄слым са̄лы нё̄выль ул та̄е̄н, ювӯрхатым о̄лэ̄н. На̄нти ты лю̄ль а̄гмыл е̄мтуӈкв ве̄рмегы̄т. Пусмалтахтуӈкве тах са̄в тэ̄рпи ос са̄в хо̄тал э̄рмыглы». Ӯйхул пусмалтан ма̄хум та бруцеллёза̄гм коныпал са̄лыт о̄щнэ по̄хӯйит алыщлан тэ̄рпил тӯщтыяныл. Акв по̄х ӯй са̄лы лылыӈ та̄гыл ва̄тахтем грамм са̄вит нё̄вле тэ̄г. Са̄в по̄хӯй о̄щнэ са̄лы ты ӯйитн то̄славе, ты мосыӈ ӯйхул хоса ат о̄лы. А̄гмыт уральтан ма̄гыс ос э̄лаль та̄н ул вос та̄рамлэ̄гыт, округув янытыл ка̄сыӈ та̄л ат со̄тыра чип нампа ищхӣпыӈ ут са̄лы сов ёлыпа̄лн ӯнттаве. Ка̄сыӈ чип такви номерыӈ, та номере щирыл са̄лы тах уральтаве». Наталья Владимировна потре оигпам порат ос ла̄выс: «Манырсыр ӯйхул нё̄выль о̄ньщегы̄н, ня̄р та̄гыл ул та̄е̄н. А̄ртмын порат ма̄н палтув уральтаӈкв тотыглэлы̄н». Хурит Алексей Хозяинов по̄слым о̄лы. Тав Саранпа̄вылт ӯйхул пусмалтан ле̄ккарыг рӯпиты.

1062 2013.10.18. Тамара МЕРОВА

Та̄н налыман та̄л ат ва̄щинтахтасыт. Мо̄лалнув Ханты-Мансийск ӯст са̄всыр ма̄ныл ёхталам лов э̄ква акванхо̄нтхатыгласыт. Та̄н пуссын 1969 та̄лныл ос 1973 та̄л мус Ханты-Мансийский педучилищат ханищтахтасыт. Тувыл то̄ват педучилище а̄стламаныл па̄сныл та̄нки халанылт щар ат ва̄щинтахтасыт. Ань налыман та̄л юипа̄лт ущты акванатхатыгласыт. Та̄н 93 номер группанылт ня̄врамыт о̄выл классытт ханищтан хо̄тпаг ва̄т нупыл нёлолов а̄ги ханищтахтасыт. Тыг ань лов хо̄тпа туп ёхталасыт, мо̄т ловманкем хо̄тпа ёхталаӈкве ла̄вхатсыт кос, ос тувыл ат а̄лымасыт. То̄ваныл хо̄т о̄лэ̄гыт ат ва̄ганыл, ищхӣпыӈ ут хосыт кисхатсыт ат хо̄нтманыл. Мо̄таныт урыл хӯлыгласаныл а̄тимыг е̄мтмыт. Нэ̄ хо̄тпат пуссын Софья Ильинична Власенкован атыглымат. Мо̄лты та̄лт тав аквъёт ханищтахтам а̄гиянэ ищхӣпыӈ то̄тап хосыт киссанэ ос тувыл Ханты-Мансийскат акванатхатыгланэ урыл та̄н ётаныл потыртахтас. Софья Ильинична такви о̄парищ наме Рукова, тав А̄нъя па̄вылт яныгмас, Сортыӈъя школат ханищтахтас. Э̄ква хосат та̄гыл Жиздра ӯст Калужский областит ще̄мьятэ ёт о̄лы. Тав та ӯсныл холодильникын ханувъяптын ма̄нь ӯс хурит ос ка̄т сэ̄гнэ то̄рыт тотыс, ос аквъёт ханищтахтам юртанэ̄н мӯйлуптас. Та̄н пуссын хотща̄гтсыт ос ла̄всыт: «Ты маныр ёмас сымыӈ э̄лумхо̄ласакве, ма̄нав пуссын тыг атсанэ, мӯйлупсал тотвесӯв, такви та палыт хоса ма̄ныл тыг ёхтыс! » Софья Ильинична пуссын сыныгтасаныл, анигласаныл. Ты э̄кват Малый Атлым, Перегрёбное, Приобье, Октябрьский, Болчары, Нялино па̄влытныл ос Урай, Нижневартовск ӯсыгныл тыг ёхталасыт. Щар о̄выл хо̄талт ат хо̄тпа акванхо̄нтхатсыт, халанылт маткем та потыртасыт. Э̄типа̄лаг та̄н А̄с-угорский «Хо̄тал» нампа театрын ялсыт ос «И дольше века длится день» спектакль суссыт. Тот, насати, Надежда Денисовна Молданова (Яркина) Женя а̄гитэ рӯпитанэ̄тэ. Та спекталит Евгения Молданова о̄влэ̄т ща̄нь хо̄тпаг ос ётыл Витхо̄н нэ̄г ёнгыс. Мӯй хо̄тпатын соссаӈ артистанув ёнгиланыл сака мӯстыс. Такви Надежда Денисовна педучилище а̄стламе юипалт Ванзеват па̄вылн юв минас ос тот налыман нупыл нила та̄л ма̄нь ня̄врамыт колт рӯпитас. Ань пенсиян патхатас. Китыт хо̄талт Ханты-Мансийский педколледж а̄висӯнтыт та̄н мо̄т ёхтум хо̄тпаныл ёт акванхо̄нтхатасыт. Тот та̄нки халанылт мощ хащхатсыт. Тувыл педколледжит о̄лнэ музей колнакын щалтсыт. Тот са̄всыр хурит суссыт. О̄выл ханищтам хо̄тпаг Илья Демьянович Петровец о̄лыс, тувыл Евгения Тимофеевна Блохо, тэ̄н уре̄нтыл та̄н китыглахтасыт. Педучилищат рӯпитам хо̄тпат пуссын ёмас сымыӈ ла̄тӈыл ка̄стысаныл. Надежда Викторовна Азизова (Шкляева) тот такви хансум потранэ хо̄нтсанэ ос та̄наныл ловиньтасанэ. Александра Ивановна Готман (Бричко) ма̄хманэ̄н пӯмыщ хури суссылтас. Тот та̄н 93 группаныл пуссын аквъёт по̄слым о̄лыс. Акв хури тав музейн мӯйлуптастэ ос ма̄хманэ̄н о̄с акв тамле хурит мис. Тувыл э̄кват педучилище коридор хосыт мощ ё̄мыгтасыт, тот са̄всыр хурит, по̄сыт, янытлан нэ̄пакыт суссыт. Та̄н ханищтахтам коланыл мо̄т хурипаг е̄мтыс. Ӯс хосыт ё̄мыгтым, та̄н о̄с нэ̄матыр ат хащсыт, тав янгыг е̄мтыс, сака нё̄тнэ ос са̄в накпа лю̄лит колытыл ӯнттувес. Людмила Ивановна Гущина ла̄выс: «Ма̄н общежитият са̄в хо̄тпа о̄лсӯв. То̄нт кӯрыт на̄йивыл па̄лтыглаве̄сыт. 7 ноября хо̄талт са̄в мир ёт ӯсхулы хосыт ё̄мсӯв, педучилищат ханищтахтын а̄гиянувпыганув акробатический касылыт щё̄пита̄лсыт ос ма̄хумн суссылтасыт. Сака пӯмыщ о̄лыс». Ётыл та̄н тэ̄нэ колн щалтсыт, тот ӯнлахо̄лсыт, та̄нки о̄лупсаныл, школат манос ня̄врам ӯрнэ рӯпатаныл ос ще̄мьяныл урыл са̄в потыртасыт. О̄с хотты накт акванатхатыглаӈкве номсэ̄гыт. То̄нт аквъёт ханищтахтам хо̄тпаныл пуссын ёхталаӈкве вос ве̄рмынувыт.

1062 2013.10.18. Анна АЛГАДЬЕВА

Ма̄н о̄мав. Мощ мо̄лалнув ма̄н о̄мав самын патум хо̄талэ о̄лыс. Ма̄н о̄мав Галина Константиновна Алгадьева, тав Хулюмсунт па̄вылт ка̄сыӈ хо̄тпан ва̄ве. Хо̄ӈха матыр ма̄ньщи ва̄рмаль кисмаи, пуссын та̄ве китыглэ̄гыт. Галина Константиновна такви Яныгпа̄вылт самын патыс. Ща̄нягеа̄щаге Мария Григорьевна ос Константин Васильевич Самбиндаловыг о̄лсыг. Ня̄хщамво̄льт 8 класс а̄стлас. Ханты-Мансийск ӯст акв та̄л ле̄ккарыг ханищтахтас. Ня̄врамыт халт тав щар яныг о̄лыс, юн нё̄туӈкв э̄рыс. Ханищтахтуӈкв о̄с олн э̄рыс, ат минас. Та порат пуссын рӯпитаптуве̄сыт. Тох Яныг па̄выл а̄ги Хулюмсунтын охсарыт о̄ньщуӈкв ке̄твес. Тыт Илья Никитич Алгадьевыл акванминасы̄г. Тэ̄н интернатт ханищтахтаме̄н па̄сыл ва̄йхатым о̄лсы̄г, румаӈыщ о̄лсы̄г. Аквъёт хо̄т ня̄врам янмалтасы̄г. Мис, лув о̄щсы̄г, рӯпитасы̄г. Илья Никитич тракторыл яла̄сас, пос пе̄ламтан ма̄т рӯпитас, лесникыг о̄лыс, ЛПУ организацият слесариг рӯпитас, рущ рӯпата коныпал вораяӈкв а̄лымас. 2006 талт о̄пав, а̄щув, акиюв а̄тимыг е̄мтыс. Омав такке̄тэ хультыс. Ка̄сыӈ хо̄тал ня̄враманэ ёхталэ̄гыт, конюн та порге̄гыт. Ма̄н коланувн юв тахе̄в, омав ла̄ви: «На̄н юв тахейин, кол тупъер сэ̄квыг е̄мтапи, марщумыг патапи». Ня̄враманэ «ома» ла̄ве̄гыт, а̄гипы̄г ня̄враманэ ане̄кващаще̄ква пе̄нтсыл о̄с «ома» ла̄ве̄гыт. Колпо̄х ня̄врамыт то̄ват номсэ̄гыт, «Ома» – тав наме. Тох та пуссын «Ома» ро̄ӈхе̄гыт. Са̄р газетат ма̄н о̄мав самын патум хо̄талэ̄тыл янытласлӯв, ань потрум э̄лаль мины. – Наӈки урынтыл мощ потыртэн. Хо̄т, хумыс яныгмасын? –Яныгпа̄вылт яныгмасум. Ща̄нянува̄щанув колхозт рӯпитасыт, ӣти туп ва̄щинта̄лсагӯв. А̄лпыл та минэ̄г, ӣтипа̄лаг ущ юв ёхтэ̄г. Щаще̄квав ё̄рыл яныгмасӯв. Тав ма̄навн тэ̄нутлӯт па̄йты, тыттаве̄в, айтаве̄в. Туииг е̄мты, а̄щув рыбакыг ке̄таве, ма̄н юн о̄лэ̄в. Ща̄нюм о̄с туи юн ат о̄лы, Ня̄хщамво̄льн во̄ваве. Картопка ӯнттын пора е̄мты, картопка пинэ̄гыт, тувыл лю̄ль пумн тэ̄лавет – лю̄ль пум маныгтэ̄гыт, тувыл окучивайтыяныл. Таяныт пӯсаскапаит о̄лсыт, колхоз пӯсасыт. Тувыл о̄с парникыт, грядкат о̄лсыт. Таит пуссын витыл со̄сантаӈкв э̄рсыт. То̄нт ва̄ӈныл вит а̄лумта̄сыт. Пум ва̄рнэ мус тот та лоӈхитахтэ̄гыт. Янмалтан утаныл нэ̄глапе̄гыт, ма̄ньщи э̄кват пум ва̄руӈкв минэ̄гыт. Ос тот хультнэ саран э̄кват та̄н та таквсы мус тэ̄пкананыл со̄сантыяныл. – Хумыс, манарыл ёнгасасын? –Са̄выӈпа̄лэ а̄каньлахтасӯв, матпусум хал е̄мтапи. Ма̄нки то̄р а̄каньрищит ю̄нтэ̄в. Ётылнув пупсикыт нэ̄глысыт, ос щаще̄квавн рущ а̄кань о̄ньщуӈкв ат та̄ратаве̄в. Тамле рущ а̄канянме̄н тай тӯйтыглым Аннэ э̄щме̄нтыл о̄щсанме̄н. Щаще̄квав тыглетувле тэ̄нут ва̄рим конаюв ё̄ми, ме̄н а̄канянме̄н колканн ӯнттыянме̄н, тав ляпан йиӈкв паты, хоттуйтыгпиянме̄н, ма̄ньщи а̄канянме̄нтыл а̄каньлахтыме̄н. – Манрыг рущ а̄канил ёнгуӈкв ат та̄ртвесы̄н? – Ка̄тыӈла̄глыӈ ут, ӣти тыян кон хартаве̄н, ла̄ви. Пупсикыт нэ̄глын э̄лыпа̄лт интернатт о̄с ка̄тыӈла̄глыӈ то̄р а̄канит ю̄нтсӯв. Та̄н ётаныл о̄с туп интернатт ёнгысӯв. Супыл ю̄нтъянӯв. Таянувтыл тот та хо̄нтлэ̄в. – Манах та̄л яныт порат интернатн майве̄сын? – Матах та̄лум о̄лыс, ат номилум. 49 та̄лт школан минасум. Каникулн юв тотыглаве̄сум, ща̄нюм юн о̄лыс. Тувыл туп ханищтахтуӈкв минасӯв, Дарьяэ̄кв а̄квув тэ̄нут ма̄гыс са̄лыл ёхталас. Ам па̄лтум интернатын ёхтыс, ла̄ви, ня̄лыӈё̄втыӈ пыгрищин ёхтуве̄сын, пилым о̄лэн, ня̄лыл тах па̄тамтаве̄н. Ам то̄нт ат торгамтылум, матыр ня̄лыӈё̄втыӈ пыгрищ. Тувыл, ла̄ви, ща̄нин пыгрищ о̄ньщас, а̄пщирищин ёхтуве̄сын. Аннэ та порат иӈ юн о̄лыс. Мо̄лал Люба Морозова ла̄ви: «Ам наӈын торыӈ ат и номилум, интернатскийт аквъе̄мт по̄слахтэ̄гыт, наӈ нэ̄мхо̄т а̄тимын. Ма̄н матпӯсум ӯщлахтын хо̄тал манос холытан каникулыт ты о̄вылтахтэ̄гыт – юв ха̄йтэ̄в. Такем ма̄ – аквкитхуйплов ве̄рыста. Яныг ма̄хманув ва̄ганыл, ханищтахтын ма̄ныл ты а̄стэв, тэ̄лы ке, са̄лыл ёхтыгпа̄лаве̄в, юв тотыгпаве̄в. То̄нт тай са̄лыл, лӯв иӈ ат о̄щсӯв. Интернатыл а̄стумум юипа̄лт, ханищтахтуӈкв кос ялсум. Мощнув ханищтахтасум. Тувыл ще̄мьявт таса̄вит э̄лумхо̄лас. Ща̄нюв рӯпитаӈкв ат патыс. Щанюм, тувыл о̄с мо̄т э̄кват кӯпнит рӯпатан ла̄вве̄сыт. Ма̄ниг о̄лманылт са̄всыр колхоз пӯсасыт ва̄риме̄ныл, та̄рыӈ йӣвыт пе̄рыгтыме̄ныл пуссын грыжан яныгмаве̄сыт. То̄ва э̄кват тай операциял ва̄рыглаве̄сыт, то̄ват ат тахмаясыт. Тувыл а̄гманыл хо̄саг е̄мтсыт, тох о̄лсыт. Ос а̄юмкӣтум рӯпатан паттуве̄сыт, пум консуӈкв ялантасыт, пил ва̄туӈкв ро̄выс. Ульйив са̄груӈкв ат ро̄выс. Интернат, школа, садик ма̄гыс ульйив са̄грувес. Па̄влыӈ э̄кват са̄грысыт. Щанюм тай па̄выл хал ӯлта ат ялантас, тэ̄лы юн о̄лыс. Тувыл щаще̄квав мощнув са̄мпыльта̄л о̄лыс. Ма̄н ня̄врамыт са̄в. Хотьютн о̄ньщаве̄в? Хунь ам ма̄нь порамт, война порат, тай номилум, ща̄нюм са̄лыл яласас. Такке̄тэ а̄ти, юрт ёт. Ёрн э̄квагойкаг ёт, тувыл Рокин о̄йка ёт яласас. Са̄пса нупыл хӯл ман нё̄выль тотэ̄гыт, ювле керасин манос матыр тэ̄нут харттэ̄гыт. Тыт сака хӯл ат ала̄ве, ӯс па̄лыл тыг хӯл тота̄ве. Ты та̄ра ос Са̄пса нупыл ке̄р лё̄ӈхын. Са̄лыл харттаве. Колхоз са̄лыл яласа̄сыт. Хотьют такви са̄лы о̄ньщи, ве̄рмыс такви са̄лыянэ̄тыл сӯлттаӈкв. О̄пав такви сохт ханищталас, тай такви са̄лытэ саро̄вылн ке̄ри. – Колхоз са̄лы са̄в о̄лыс? – Колхоз са̄лы тай са̄в о̄лыс. Ка̄сыӈ па̄выл бригада щирыл о̄щсаныл. Ма̄ньясунт па̄выл та̄нки Нё̄рт тотыгласаныл. Ня̄хщамво̄льт та̄нки о̄щсаныл. Китхӯрум ще̄мьял яласасыт. Ня̄хщамво̄льт са̄выӈпа̄лэ сараныт яласасыт Рокиныт, Рочевыт. Ма̄ньясунт тай ма̄ньщит, Яча-Илья о̄йка тав пыганэ ёт са̄лы ӯрсыт. Та̄н Ма̄ньясунт нупыл ва̄нтласыт, о̄пав са̄лыянэ тувле сӯста̄лсанэ. Таквсы са̄лыт на̄лув нё̄рыгтавет, я̄н по̄савет. О̄парищув та порат ул хусва̄тахкем са̄лы о̄ньщас. Ётыл тай са̄тловке̄мыг е̄мталасыт. Сун по̄сумн са̄лы нэ̄ги, а̄иктаӈкв патыянэ, са̄лыянэ тав юипа̄лэ̄т та о̄лтумтахтэ̄гыт. Юв по̄сыглыянэ, э̄т хӯлэ̄гыт ос Лэ̄пла па̄вылн тотыянэ. Са̄лы о̄щнэ кол тот о̄щсӯв. Щаще̄квав Дарьял тув ва̄нтлуптаве̄г. Мисанэ̄н о̄с ёт ва̄нтлуптыянэ̄н. Са̄лыт Нё̄рн тотнэ мус тот та о̄лэ̄г. О̄пам наме Василий Устинович Самбиндалов о̄лыс. Щаще̄квам Мария Порфириевна о̄лыс. Порфирий нам ат ва̄г, тав ла̄ви Марья Прокопьевна, тувыл нэ̄паканэт о̄с тох хансым о̄лыс. Такви Сондина, А̄нъя нэ̄. Пе̄с о̄парищув хо̄т лӯнн ме̄тхумыг яласыме̄т хо̄нтам А̄нъя нэ̄тэ ёт та̄лтапастэ. Тохта пе̄с ма̄хманув яласасыт, о̄лсыт. Потрум оигпан ляпат о̄мав о̄с сымыӈыщ янытлылӯв. Пуста̄гыл вос о̄лы. Посыӈ хо̄тал, нотыӈ хо̄тал таве̄н ла̄ве̄в. Пус ка̄т, пус ла̄гыл.

1062 2013.10.18. Александр ВЬЮТКИН

Ханты ос ё̄рн ма̄хум па̄вланыл. Салехард ӯсн ялмув порат, ма̄н Горнокнязевск нампа ма̄нь па̄влын экскурсиян тотыглавесӯв. Та ханты па̄выл А̄с я̄ ва̄тат ӯнлы, Лӯима̄ ща̄рыщ ляпат о̄лы. Па̄выл урыл потыртам нэ̄ ла̄выс, Горнокнязевск па̄вланыл щар о̄влэ̄т XVII нот порат нэ̄пакыт хансым о̄лыс. Та па̄выл о̄лнэ урамн щар о̄влэ̄т Василий Тайшин ка̄нащ пе̄с порат тув о̄лмыгтас. То̄нт то̄пал пора о̄лыс, ма̄хум халанылт аквписыг хо̄нтласыт. 1607 та̄лт ма̄хум хунь пе̄рнапос пиннэ щирыл ка̄щилтаӈкве патве̄сыт, Москваныл ёхталам ка̄нащ ма̄хмытын Василий Тайшин порславес. Тав юипа̄лт Момрук нампа пыге ка̄нащ хумыг матнэ мус о̄лыс. Пыге юипа̄лт ос Ермак апыгрище та ляпа ма̄т тармыл кӯщайлахтас. Василий Тайшин ня̄враманэ Горнокнязевск па̄выл ӯнлын ма̄тэ̄т ань тыг мус о̄парищ наманыл хансым о̄лы. Тув ёхтумувт ма̄н музейн тотвесӯв. Музеяныл ма̄н «Торум Маа» музеюв хольт кон ва̄рим о̄лы. Музейн щалтнэма̄т ма̄н по̄лям мохсаӈ ня̄рхулыл ос атыӈ саӈквлыпилыл тыттувесӯв. Тот о̄лнэ соссаӈ ма̄хум пе̄с пораныл о̄щнэ алыщлап пормасаныл ма̄навн суссылтаве̄сыт. Э̄лаль ос са̄лыӈ ма̄хум яласан ва̄нтсунаныл урыл потыртавесӯв. Хумус та̄н ва̄нтлэ̄гыт ос ва̄нтсун хартнэ хо̄пт са̄лыяныл сунын хумус те̄равет. Тувыл ё̄рнкол тӣврын щалтуӈкв во̄ввесӯв, тот таве хумус тӯщтаве, та урыл потыртавесӯв. Мо̄т ё̄рнколт ма̄н ма̄гсылув пасан ва̄рыглавес. Ма̄н мохсаӈ хӯлыл, атыӈ са̄лы нё̄влил ос са̄ккарыл тэ̄лыгтым морахыл тыттувесӯв. Салехард ӯсн ёхталан мӯй ма̄хум акваг та̄н палтаныл тотыглавет. Тот рӯпитан ма̄хум ёхталан мир пе̄с щирыл та̄глыӈ пасан ва̄тан ӯнттыяныл ос мӯсхал щирыл тыттыяныл.

1062 2013.10.18. Светлана РОМБАНДЕЕВА

Тэ̄к па̄выл ма̄щтыр э̄ква. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ха̄льӯс район Тэ̄к па̄вылныл ханты э̄ква Галина Михайловна Курганова ёхталас. Тав са̄сныл са̄всыр пормасыт ва̄ри, со̄втыт, а̄ныса̄ныт, хусапсовыт, хорамыл щуртыянэ. Ты ма̄щтыр хо̄тпа щаквщинэ̄тэ сыс, ка̄тыл ва̄рум пормасанэ урыл китыгласлум, такви уре̄т ос хо̄т яныгмас. На̄н ань тав потре ловиньтэлы̄н: – Ты семинарт ма̄н нила хо̄тал рӯпитасӯв. О̄влэ̄т ам номсысум, тасавит хо̄тал, ма̄ныр тот ва̄руӈкве патэ̄в, тувыл ань та̄рапатыс, ты насати мощща. Матыр пормас мӯсхал щирыл ва̄руӈкве те, акв хо̄тал хунь мины. Ма̄щтыр хо̄тпа ма̄шина хольт хунь рӯпиты, тав о̄влэ̄т номсащлахты, тувыл ка̄таге̄тыл ущ рӯпиты, э̄лаль щаквщи. Мо̄лхотал со̄втум ва̄руӈкве о̄вылтаслум, тувыл хоса номсахтасум, э̄лаль ос хумус ва̄рилум. Ята, ва̄рыслум, хорамыл щуртыслум, ос тувыл номтум ат паты. Аман манаре мӯсхал щирыл ат ва̄рыслум, тавагт. Ам номсэ̄гум, ты ма̄гсыл тох, ань молямласум. Атхунь, хумус тыт ёмащакв ва̄руӈкве, номсуӈкве, ма̄н тыт пуссын молямлэ̄в, ва̄рнэ пормасанув а̄стлаӈкве вос а̄лыме̄в. Мо̄т хо̄тпа ханищтаӈкве о̄с э̄ри, тав ётэ потыртаӈкве та маныр, пуссын а̄лымаӈкве э̄ри. Акв ма̄нь со̄вт ва̄рнэ порат китаххӯрмах хо̄тал э̄ри. Тыг ёхталам ма̄ньлат ма̄хум пӯмщалахтым рӯпитасыт, ма̄щтырласыт. Ты тэ̄ла та̄н ва̄ӈкве тахмаясыт, татем ёмащакв рӯпитасыт, акваг китыглахтасыт, ты ло̄мтэ, та ло̄мтэ хумус ва̄руӈкве, ханищтахтасыт. Ам ос номтум татем ёмас. Матыр пормас наӈти ка̄тагынтыл ва̄рилын те, тав воссыг нэ̄мхотты пормас ёт аквхурипаг ат паты. Та̄н ань са̄с ва̄ӈкве патыяныл, хумус рӯпитаӈкве, тулял ю̄нтуӈкве ханищтахтасыт. Туля та̄л са̄сныл нэ̄матыр ю̄нтуӈкве ат ве̄рме̄в, туля та̄л сака та̄рвитыӈ. Сакати мощ ханищтахтасыт, матыр ва̄рсыт, щаквщисыт. Ань ты тэ̄ла э̄лаль тотуӈкв патыяныл. Ам во̄ртур э̄тпос 1947 та̄лт Тэ̄к па̄вылт самын патсум, а̄ги о̄парищ намум Новьюхова. А̄тям Михаил Андреевич о̄лыс, тав хо̄нтлын ма̄т саквата̄лвес, юв ла̄гыл па̄лыг ёхтыс. Тох та хӯл алыщлас, во̄раяс. Омам Екатерина Семёновна, а̄ги о̄парищ наме Рябчикова, Пугоры нампа пе̄с па̄вылт самын патыс. Ма̄н нёлолов ня̄врам о̄лсув, китгагув яныг хо̄нт э̄лыпа̄лт самын патсы̄г, ма̄н ос, хо̄т ня̄врам, ётылнув самын патсӯв. Юио̄выл кит йигтегӯва̄пщиягӯв юртыӈ ня̄врамыг. Ма̄н рӯтанув халт са̄в тамле ня̄врам самын патыглы. Ам ань кит апыгрищагум юртыӈ ня̄врамыг. Ам Тэ̄к па̄вылт яныгмасум, тот школат нила класс мус ханищтахтасум. Омагума̄тягум пе̄с Тэ̄к па̄вылт о̄лсы̄г, ам ос йильпи Тэ̄к па̄вылт ханищтахтасум, тот интернатт о̄лсум. Э̄лаль ханищтахтуӈкве Ха̄льӯсн тотве̄сум, интернатт о̄лсум, тот лов класс а̄стласум. Ма̄нь та̄гыл омагума̄тягум ёт торыӈ ат иӈ о̄лсум, интернатт яныгмасӯв. Тувыл Челябинский область Миасс ӯсн минасум, тот Геологоразведочный техникумт ханищтахтасум. Техникум а̄стламум порат, техникгеофизик нэ̄пакыл майве̄сум, рӯпитаӈкве Ташкент ӯсн ке̄тве̄сум, Узбекистанын. Тот ам ва̄т нупыл ат та̄л о̄лсум. Сэ̄йиӈ ма̄т (пустынят) ос нё̄рт рӯпитасум, вит киссув. Хум ва̄рсум, кит пыгагум самын патсы̄г, аквам ма̄нь та̄гыл а̄тимыг е̄мтыс. Хунь Советский Союз ла̄кквауртвес, ам ще̄мьям ёт ювле йисум, амти яныгмам па̄влумн ва̄нтлысӯв. Пыгум наме Дима, Тэ̄к па̄выл школат информатика учителиг рӯпиты. Ам о̄с та школат ня̄врамытын география урок ханищтэ̄гум. Ты коныпал атыт классныл са̄тыт класс мус Культура народов Севера урок ханищтэ̄гум. Школат ма̄н «Северяночка» нампа кружок о̄ньще̄в, тот ам ня̄врамыт са̄сныл матыр ю̄нтуӈкве ханищтыянум, са̄всыр хусапсовыт ва̄ре̄в, со̄втыт, па̄йпыт ма̄щтырлэ̄в, хансал щуртыянӯв. Э̄лнаӈ Тэ̄к па̄вылт ма̄хманув хумус ма̄щтырласыт, ма̄н ня̄врамыт ёт ты ва̄рмаль та̄рапаттылӯв, пуссын аквъёт ханищтахтэ̄в, щаквще̄в. Ка̄сыӈ пормас пе̄с ма̄хманув ва̄рум хольт щё̄питылӯв, йильпи щирыл нэ̄матыр тув ат нё̄тэ̄в. Э̄лаль ам таве ща̄нь ла̄тӈаныл урыл китыгласлум, школанылт хумус ханищтаве. Тав ла̄внэ̄тэ ширыл, ня̄врамыт ща̄нь ла̄тӈыл ат потыртэ̄гыт, то̄ват мощ торгамтэ̄гыт, ос ювле рущ ла̄тӈыл ла̄ве̄гыт. Са̄т сыс ханты ла̄тыӈ ханищтан акв урок туп о̄лыглы. Па̄выл ма̄хум юн ня̄враманыл ёт ща̄нь ла̄тӈыл ат потыртэ̄гыт, нас та̄нти халанылт ханты ла̄тӈыл мощ потраме̄гыт, са̄выӈпа̄лэ рущ ла̄тӈыл потыртэ̄гыт. Галина Михайловна тамле ёмас, сымыӈ э̄ква, мӯтраӈ учитель. Пуста̄гыл вос о̄лы, На̄янэ̄н-О̄тыранэ̄н вос ӯргалаве!

1062 2013.10.18. Тамара МЕРОВА

Нот палытыл о̄лнэ пе̄с накыт. «Хо̄тал» нампа А̄с-угорский театрыт рӯпитан ма̄хум туи сыс ӯщлахтаcыт ос ущтынув рӯпитаӈкве патсыт. Ты э̄лыпа̄лт, я̄ӈк на̄тнэ э̄тпост, «И дольше века длится день» намаим спектакляныл ма̄хумн суссылтасыт. Ань та̄н таквсы о̄с таве̄тыл рӯпатаныл о̄вылтасаныл. Анна-Ксения Вишневская, режиссёр нэ̄, ос таве̄н нё̄тнэ хо̄тпат ты ёныг Чингиз Айтматов, киргиз о̄йка, хансум потранэ щирыл щё̄питасыт. Та̄н спектакляныл кит потыр охсаг уртым ва̄рсаныл. Акватэ «И дольше века длится день», мо̄танэ «Пегий пёс, бегущий краем моря». Артистыт тот потрыт ханты манос ма̄ньщи ла̄тӈыл о̄влэ̄т ля̄галыяныл, ос аквторыг та̄н рущ ла̄тӈыл толмащлавет. Спектакль суснэ ма̄хум тот о̄выл щёс хащта̄л э̄рыгсов та̄ныт хӯнтамласыт. Турыл э̄ргын суйит Вадим Важенин э̄ргысанэ, Татьяна Огнёва о̄с са̄всыр турсуйил э̄ргыс. О̄выл потраныл Найман-Аны ща̄нь хо̄тпа урыл о̄лыс, (ты Евгения Молданова ёнги). Тот пе̄с порат о̄лум накыт суссылтаве̄сыт. Сарозекский сэ̄йиӈ ма̄т жуньжуанма̄хум мо̄т найман ма̄хум нупыл нур тотым о̄лсыт. Жуньжуаныт найман хум хо̄тпат пувнэ̄ныл юипа̄лт тув мус та̄наныл саватанэ̄ныл, пыгыт номт та̄л хультнэ̄ныл. Наманыл хумус, хоты ща̄ньа̄щныл манос хоты мирныл та̄н о̄лсыт ос маныр ва̄рсыт щар нэ̄матыр ат номсыт. Тамле хо̄тпа китхалпаты, ос тав тот «манкуртыг» ла̄ваве. Та па̄сыл манкурт кӯщай о̄ньщи, та утэ та кӯщайлахты. Ань акв тамле пилыщмаӈ накн патум пыг (ты Валентин Тарлин ёнги) ща̄не̄н кисмаявес. Нэ̄ пыге хо̄нтыстэ, тав ётэ потырты ос юв во̄витэ. Ма̄ньлат пыг нэ̄матыр ат номи, ща̄не ат ханьщитэ. То̄нт ща̄не лю̄ньщим ла̄выс: «Э̄лумхо̄лас такви о̄лнэ ма̄ та̄л вос хультыгланув, щёлэ кос вос хотвинуве, ос хоты сымта̄л о̄лнэ хо̄тпан тав номтэ хотвиӈкве э̄рмыглас». Нэ̄ наска̄ссыг тув минас, пыге ань туп йильпи кӯщай ла̄тӈе хӯнтлы. Ща̄нь пыге̄н та алвес. Китыт пӯмыщ ёнгиланыл пе̄с мо̄йт хольт мо̄йтсаныл. О̄влэ̄т хӯрум ягпыг нэ̄тыл ха̄йталаве̄сыт. Артистыт тот ма̄ньщи ла̄тӈыл потыртасыт. Яныгнув пыг са̄лыӈ хумыг о̄лыс, котиль пыг во̄раян хум. Апщитэ̄н но̄хыс, тав хӯл алыщлан хо̄тпа, ос а̄гитн хумыг виӈкве ат тахмаявес. Пыг (ты Александр Тургачёв ёнги) хӯл алыщлым такке̄т та о̄лантас. Ты китыт мо̄йт щирыл, э̄рттам, ма̄хум ща̄рыщ ва̄тат о̄лэ̄гыт. Тот па̄ртныл ха̄п ва̄рапасыт, витыл равтхатэ̄гыт. Нумыл о̄с вит со̄ссыт, э̄рттам раквалтахтас. Пуссын тамле пӯмащ рӯпатат Павел Мизёв, художникпостановщик, ва̄рыс. Но̄хнэ пыг акв щёс Витхон нэ̄н нэ̄глапавес. Тэ̄н акванюрщхатсы̄г. Тувыл Витхон нэ̄ тав хотталь та тыпылтастэ, а̄тим. Ётылнув ха̄пе̄т ня̄врам лю̄щ хӯнтамлас. Хум ня̄врам ка̄тынвистэ ос па̄г та минас. Ня̄враме, пыгке̄тэ, (Игорь Хромов ёнги) такви янмалтастэ, тэ̄н аквъёт хӯл алыщлаӈкве ялантасы̄г. Ос хум Витхон нэ̄тэ та̄л ка̄смоста̄лыг о̄луӈкве патыс, акваг таве та кинсыгла̄лыстэ, ӯлмаястэ. Аквматнакт ща̄рыщн та вущкасахтас. Потыр та оигпас. Татьяна Огнёва по̄слум хурииг.

1062 2013.10.18. Людмила ТЕТКИНА

Мӯйлуӈкве тув во̄вавет. Са̄в та̄л ювле хультум порат Ха̄льӯс район Саранпа̄вылт «Элаль» нампа предприятие рӯпитаӈкве о̄вылтахтас. Тот Ольга Константиновна Филиппова кӯщаиг о̄лы. Саранпа̄вылт та̄н ма̄ньщи супыт, буркат ос са̄всыр мо̄т пормасыт ю̄нтсыт, са̄всыр сувенирыт ва̄рсыт. Хо̄т та̄л сыс ты предприятие Ха̄льӯст рӯпиты. Ольга Константиновна «Элаль» нампа предприятие рӯпататэ урыл ма̄ньщи газетав ма̄гсыл потыртас. – Та порат ма̄н Саранпа̄вылт о̄лнэ ма̄щтыр ма̄хум акванатсанӯв, са̄всыр ма̄ньщи пормасыт ю̄нтуӈкве патсӯв. Та па̄вылт совхоз рӯпиты, тыи ма̄гсыл ма̄н тот цех пуссӯв, ма̄щтыр ма̄хум пуркат ю̄тсыт ос са̄лы со̄выл са̄всыр сувенирыт ва̄рсыт. Тувыл са̄всыр то̄рыт, нуй, сак та палыт ма̄н тотуӈкве сака та̄рвитыӈ о̄лыс. То̄нт акваг налоголн ойтуӈкве ос ма̄хум сэ̄лым олнаныл та̄нанылн ойтуӈкве ат ве̄рмысӯв. Ос ю̄нтым пормасанув э̄лаль хоталь тыналаӈкве, о̄с ат ва̄слӯв. Яныг суссылтапын ке во̄ваве̄в, тот пормасанув ке тыналыянӯв, тай ёмас. Тох рӯпитым ма̄н номсахтуӈкве патсӯв, э̄лаль рӯпитаӈкве ке таӈхе̄в, мощ мо̄т щирыл ос мо̄т ма̄т рӯпитаӈкве э̄ри. То̄нт Ха̄льӯсн «Элаль» предприятие ва̄нтлуптаслӯв. Тыт о̄лым ма̄н районувт о̄лнэ ма̄щтыр ма̄хум ёт рӯпитаӈкве патсӯв. Ань тай округ янытыл ва̄ве̄в, акваг са̄всыр суссылтапын ялантэ̄в, то̄ва порат Москва ӯсн манос мо̄т хо̄н ма̄н во̄виньта̄лаве̄в. Са̄в та̄л сыс рӯпитым ёмащакв ва̄глӯв, хоты выставкат манхурип пормас манос сувенир тыналаӈкве ро̄ви. Ка̄сыӈ та̄л «Товары земли Югорской» суссылтапыт ма̄н пӯркат пуссын молях тыналыянӯв. Ань ма̄хум ва̄ганыл, Саранпа̄вылт пӯркат ма̄щтырыг ю̄нтавет, хоса о̄ньщуӈкве ро̄ве̄гыт. «Дух огня» нампа кина суссылтан фестиваль о̄лыглан порат ос хӯл со̄выл ю̄нтым са̄всыр тучаӈыт, са̄сныл, то̄рыл ва̄рим а̄канит, турло̄псыт ос са̄в мо̄т нё̄тнэ сувенирыт тыналэ̄в. Акв порат ты фестивалин Лариса Долина ёхталас, хӯл со̄выл ю̄нтым ат тучаӈ ёвтыс. Манрыг таве̄н таса̄вит, аты ва̄глув. Биатлон о̄лнэ порат ос мо̄т пормасыт тыг тотыянӯв. Ма̄щтыр ма̄хум биатлон ма̄гсыл сувенирыт о̄с ва̄ре̄гыт. Мӯй ма̄хум тамле утыт о̄с сака ёмащакве ёвтэ̄гыт. О̄влэ̄т биатлон хунь туп о̄вылтахтас, ма̄н тув во̄виньта̄лвесӯв, акв ё̄рнколт тот тӯщтыгласӯв. Мӯй ма̄хум са̄лы нё̄влил, хӯл исмитыл тыттысанӯв, ща̄ил айтсанӯв. Ань Ханты-Мансийск ӯсн хунь ёхталэ̄в, таса̄вит ё̄рнкол тот тӯщтавет, таса̄вит сувенирыт тыналавет. Ам тамле ва̄рмаль ка̄салэ̄гум, сымумт такем ёмас, соссаӈ ма̄хманув та̄нки рӯпитэ̄гыт, олн сэ̄лэ̄гыт. Ма̄н Ха̄льӯсн хунь ва̄нтласӯв, ня̄врамыт ёт рӯпитаӈкве патсӯв. О̄влэ̄т Во̄сыӈтӯр по̄хат «Чуанели» ӯщлахтын ма̄т ня̄врамыт акванатыгласанӯв. Грантолн ма̄гсыл нэ̄паканӯв тув ке̄тыгласанӯв, тот кас щирыл но̄хпатсӯв. Ос ня̄враманув тув ӯщлахтуӈкве тотыгласанӯв. Ань Ха̄льӯс по̄хат «Со̄рни сэ̄й» нампа ӯщлахтын ма̄ ӯнттэ̄в. Тот туи порат ня̄врамыт ӯщлахтэ̄гыт, мо̄т порат ос мӯй ма̄хум тув мӯйлуӈкве во̄виньта̄лыянӯв. Ань «Югратур» ос «Спутник» нампа туроператорыг ёт рӯпитаӈкве патэ̄в. Тох э̄рыӈ са̄внув туристыт тыг ёхталаӈкве патэ̄гыт. Ня̄враманув туп туи порат ӯщлахтэ̄гыт, мӯй ма̄хум ка̄сыӈ хо̄тал о̄с ат ёхталэ̄гыт. Ма̄н ань ма̄нки ӯнттум па̄влувт Ха̄льӯст о̄лнэ ма̄хум пӯри ва̄руӈкве, намхо̄таланыл ос са̄в мо̄т ялпыӈ хо̄талыт тыт янытлаӈкве ве̄рме̄гыт. Тох ма̄н о̄с мощ олн сэ̄лэ̄в. Ань иӈ са̄в рӯпата тот ва̄руӈкве э̄ри. «Со̄рни сэ̄й» па̄влувт мӯй хо̄тпат ма̄гсыл колыт ӯнттуӈкве таӈхе̄в. Ювле хультум та̄л грантолныл ма̄н тот пӯвлыӈкол ӯнттыслӯв, скважина вит ма̄гсыл хилсӯв. Тув иӈ сака са̄в олн э̄ри, ань ос грантолн ма̄гсыл нэ̄паканув о̄с тах ке̄тыянӯв. Тамле олныт ма̄навн сака ёмащакве нё̄тэ̄гыт.

1062 2013.10.18. Светлана Динисламова

Россият о̄лнэ финноугор ма̄хум атыт съезданыл о̄лыс. Сӯкыр э̄тпос 26-28 щислат Мордовия ма̄т Саранск ӯст Россият о̄лнэ финноугор махум атыт съездын атхатыгласыт. Тув са̄в ма̄ныл 214 делегат ёхталасыт, ты коныпал наблюдателиг пе̄риим 96 хо̄тпа о̄лсыт, ос во̄виньта̄лым яныг кӯщаит манос учёныит 25 хо̄тпа о̄лсыт, ты халт Финляндияныл, Венгрияныл, Эстонияныл ёхталасыт. Атхатам мир потраныл финноугор мир урыл о̄лыс, ос хумус акв ма̄т, Россият, о̄лнэ мирыт юртыӈыщ, акваннё̄тхатым вос о̄лнувыт. О̄выл ла̄тыӈ М. Магометов ла̄выс, тав В. В. Путин щё̄питам ла̄тӈе ма̄хумн ловиньтас. Президентув тамле ла̄тӈыт ты те̄тыс: "Финноугор мирыт са̄в ёмас ва̄рмалит наукат, образованият, искусстват Россияв ма̄гыс ва̄ре̄гыт. Та̄н о̄щнэ ос э̄лаль тотнэ пе̄с йис потраныл, о̄лтуланыл, ялпыӈ хо̄таланыл ма̄н янытлыянӯв, туп ка̄сыӈ мир хосыт ма̄н Россияв ё̄рыг ты о̄лы". Тав юипа̄лэ̄т атхатам ма̄хмытын В. Д. Волков ла̄тыӈ ла̄выс, тав Мордовият пуӈк кӯщаиг о̄лы. Хум мир ёт сымыӈыщ пащалахтас, потре ма̄тэ урыл о̄лыс. Тав ла̄выс: «На̄н ань ка̄саласлы̄н, манхурип нё̄тнэг ма̄н ӯсув е̄мтыс, са̄в йильпи кол ӯнттувес, ӯсхулыт па̄хвыӈыг ва̄рве̄сыт, хотхорамтаве̄сыт. 2018 та̄лт тыт мирхал касыл ва̄раве – футболыл ёнгын Чемпионат». Финноугор ассоциацият кӯщаиг о̄лнэ хум П. Н. Тултаев ёхталас. Таве хӯнтлаӈкве сака пӯмыщ о̄лыс: "Нила та̄л минам порат ма̄н рӯпатав хосыт са̄в ва̄рмаль ат торгамтасӯв, мощ хурахласӯв, сыманув то̄ргим то̄ванакт путгысыт. Ва̄им, то̄нт ма̄н нупылув сунсуӈкве, ма̄нав хӯнтлаӈкве кӯщаит ат тахсыт. Ань мо̄т щирыг е̄мтыс, тыхо̄тал ма̄н ва̄рмалянув э̄сгавет, янытлавет. Ма̄н ань акванюрщхатым рӯпитэ̄в, ла̄тӈанув но̄хво̄рмалтэ̄в. Кӯщаитын хӯнтлаве̄в, нё̄туӈкве патвесӯв". Овыл хо̄тал кӯщаит та̄нти ла̄тӈаныл потыртасаныл, та юипа̄лт делегатыт потраныл ловиньтасаныл. Ка̄сыӈ мирныл акв хо̄тпа такви ща̄нь ла̄тӈе̄тыл потыртас. Ханты мирныл Т. В. Волдина докладэ ловиньтастэ, ма̄ньщи мирныл доклад ам щё̄пита̄лсум. 27 щислат съезд титыт хо̄тал рӯпитас. Нила секциян уртхатсӯв, хо̄тпат потраныл тот ловиньтасаныл. Ма̄ньлат хо̄тпат ма̄гыс я̄нас секция о̄лыс. Тот ма̄ньлат хо̄тпат та̄нти рӯпатаныл урыл потыртасыт, маныр та̄н пӯмыщ ва̄рмалит, проектыт щё̄питасыт, маныр та̄рвит рӯпатанылт о̄лыгла̄лы. 28 щислат ма̄хум о̄с акванатхатсыт, резолюцияг ла̄внэ нэ̄пак ёт рӯпитасыт. Съезд рӯпататэ а̄стлан э̄лыпа̄лт пе̄риян ва̄рмаль о̄лыс, финноугор ассоциация кӯщаиг Пётр Николаевич Тултаев о̄с э̄лаль пе̄риявес. Ты хо̄тпа, со̄ль, сака са̄в ва̄рмаль ма̄н миранув ма̄гыс ва̄ри, ёмас хо̄тпат тав ётэ рӯпитэ̄гыт, са̄в рӯпата ва̄руӈкв а̄лыме̄гыт. Кӯщаиг о̄луӈкве таве̄н, ва̄им, хо̄йхаты. Ловиньтам потрум ты: «Ам ма̄ньщи ма̄м – ам колум» Паща о̄лэ̄н, я̄тил финноугор рӯтанум! Ам тыг ма̄ньщи ма̄ныл ёхтысум, ам ма̄ньщи хо̄тпа. Ка̄сыӈ мир о̄лупсатэ хосыт такви ла̄тӈе та̄л о̄луӈкве ат ве̄рми. Ла̄тыӈ хосыт са̄всыр номт, сымныл миннэ са̄всыр ла̄тыӈ ля̄галаӈкв ро̄ви. Пе̄с йис потранув, йильпииг хаснэ потранув, хумус пе̄с порат ма̄н мирув о̄лыс, э̄лаль потыртаӈкв ве̄рмиянӯв. Тыхо̄тал 12 со̄тыра 269 ма̄ньщи хо̄тпаныл туп со̄тыраныл мощщанув э̄лумхо̄лас ща̄нь ла̄тӈыл потыртэ̄гыт. Ма̄н ма̄ньщи ла̄тӈув тыпылтаӈкве ве̄рмилӯв, ты урыл сыманув лов та̄л минам порат ща̄ргысыт, то̄нт щар ма̄к ла̄тӈув урыл номсахтуӈкве ты патсӯв. Ос тыса̄вит та̄л ювле хультыс, ханты ос ма̄ньщи миранув халт номтыӈ, ка̄ркам хо̄тпат ялтсыт, та̄н са̄в ва̄рмаль ва̄руӈкве о̄вылтахтасыт. Та̄н хосытанылт ма̄ньщи мирув такви о̄лупсатэ ос ла̄тӈе торгеннув янытлаӈкве патыстэ. Та минам та̄лытт ма̄н округувт яныг кӯщаянув ма̄н ётув э̄рнэ щир рӯпитасытнё̄тсыт. Округувт я̄нас Департамент о̄лыс, тот соссаӈ ма̄хманув нё̄тмилыл ва̄рве̄сыт. Ань ты Департамент хотвуйвес, ос ань Югорский университетт о̄лум институт, хо̄т ханты ос ма̄ньщи а̄гитпыгыт ханищтахтасыт, лаппантвес. 2010 та̄лт ма̄ньщи, ханты ла̄тӈыг ханищтан ос «Финноугроведение» кафедра о̄с лап пантве̄сыт. Та урыл тох е̄мтыс: сака мощща студентыт ма̄н институтувн ханищтахтуӈкве ёхталасыт: тот ханищтахтын ма̄гыс та̄нанылн иӈ тит экзамен миӈкве э̄рыс. Ос школа а̄стлан порат ты экзаменыг миӈкве хотпе̄рнямавет, тот рӯпитан хо̄тпат хурахлэ̄гыт: ня̄врамыт лю̄льсаӈ ул вос хансэ̄гыт. Ань ма̄ньщи ла̄тыӈ ханищтан школат щар мощщаг е̄мтсыт. Тот са̄т сыс туп акв урок ва̄раве. Тыхо̄тал ма̄ньщи ла̄тыӈ ханищтан са̄т школа туп хультыс: тыи Саранпа̄вылт, Та̄гт па̄вылт, Восыӈтӯрт, Ня̄хщамво̄льт, Ло̄пмуст ос Кимкъясӯйт. Акв тамле школа Октябрьский районт о̄лы Ня̄рихумит па̄вылт. Ос Хо̄нтаӈ район Шугур па̄вылт ня̄врамыт ма̄ньщи ла̄тыӈ кружокт ханищтыяныл. Са̄т сыс акв урок, ва̄им, сака мощща. Образование Департаментыт рӯпитан хо̄тпат ловиньтасыт, минам та̄л сыс ма̄ньщи ла̄тыӈ 372 ня̄врам ханищтасыт. Ань э̄лаль ёмас ва̄рмалит урыл потыртэ̄гум. 2007 та̄л порат Ханты-Мансийск ӯст "Лылыӈ со̄юм" центр пӯсвес. Тот ня̄врамыт ёт ла̄тыӈ ва̄нэ хо̄тпат рӯпитэ̄гыт, та̄н ня̄врамыт нарсъюхыл ос са̄ӈквылтапыл са̄ӈквылтаӈкве, э̄ргыт э̄ргуӈкве ос йӣквыт йӣквуӈкве ханищтыяныл. Ты ва̄рмаль Алексей Рещиков ос Владимир Меров ва̄ре̄г. Тэ̄н коллективанэ̄н намаим о̄лэ̄г – «Торые» ос «На̄й султум». Ка̄сыӈ туи сыс ня̄врамыт ма̄гыс тот лагерь рӯпиты, тав ла̄ваве «Лӯима̄ мо̄йт», ты та̄л тув 23 ня̄врам ялсыт. Ты тув сыс та̄н мирн ва̄нэ хо̄тпат ёт хо̄нтхатыгласыт, по̄слуӈкве ман ма̄щтырлаӈкве ханищтахтасыт. Яныг нё̄тмил этностойбищат ва̄ре̄гыт. Акв тамле рӯпитан ма̄ намаим о̄лы – «Ма̄нь Ӯскве», тав Ха̄льӯс район Я̄сунт па̄вылт о̄лы, 1994 та̄л порат тав рӯпататэ о̄вылтавес. Ка̄сыӈ тув сыс тот хӯрум смена рӯпиты – тыи ма̄щтырлахтын смена «Ане̄квам ханса», тот ня̄врамыт йинуӈкве, ю̄нсхатуӈкве ос йӣвныл матыр ёргуӈкве ханищтавет, титыт сменат яныг ня̄врамыт Нё̄рн тотыглавет, «Э̄ргын ня̄лыт пора» сменан 40 ня̄врам ёхталэ̄гыт. "Ма̄нь Ӯсквет" ня̄врамыт ёт ма̄к ла̄тыӈ ос ма̄ньщи пе̄с йис о̄лупсав ва̄нэ хо̄тпат рӯпитэ̄гыт. Ня̄врамыт хунь та̄нти ла̄тӈаныл акваг те хӯлэ̄гыт, то̄нт ща̄нь ла̄тӈаныл моляхнуве номылматэ̄гыт ос та̄нти мираныл о̄лупса ва̄ӈкв патэ̄гыт. Хо̄тпа такви мире урыл хунь са̄в ва̄г, то̄нт таве̄н кӯстырнувег о̄луӈкве тах паты. Ос та урыл ла̄ве̄в: Ханты-Мансийск ӯст ты та̄л №3 школат ос №1 гимназият ня̄врамыт соссаӈ мир ла̄тӈын ос литературан ханищтавет. Ос педколледжит соссаӈ мир ма̄гыс я̄нас отделение пӯсвес. Ма̄н округувт матъёмас ма̄ньщи ра̄дива, кина по̄слын ма̄ иӈ рӯпитэ̄гыт, "Лӯима̄ сэ̄рипос" нэ̄пак та̄ратаве, ловиньтан нэ̄пакыт хансавет. А̄с ма̄хум институтт КАМИС нампа йильпи программа ва̄рвес, тот ма̄ньщи ос ханты пе̄с йис потрыт ёлхансавет, ка̄сыӈ хо̄тпа ве̄рми тыи хӯнтлаӈкве. Ла̄ве̄гыт, та ла̄тӈыт молях ёрувлахтэ̄гыт, хоты ла̄тӈыл нэ̄пак ат та̄ратаве ос ла̄тыӈ школат ат ханищтаве. Номтанув ёмасыт кос, ос сыманув иӈ ща̄рге̄гыт: ра̄дива хосыт са̄т сыс туп 40 минута потыртаве , телевизор хосыт ма̄ньщи ла̄тӈын 2 кина туп э̄тпос сыс суссылтаве. «Лӯима̄ сэ̄рипос» нэ̄пакув мощ мо̄лалнув ка̄сыӈ са̄т сыс та̄рата̄лвес, ань э̄тпос сыс туп тит щёс та̄ратаӈкве патвес. Таи ёмас ань ма̄ньщи мирув газета ма̄гыс олн та̄нти ат ойтэ̄гыт, ка̄сыӈ хо̄тпан тамле нэ̄пак олнта̄лтотаве. Ма̄н номсэ̄в, ма̄ньщи мир ёт акваг хо̄нтхатыглаӈкв э̄ри, ла̄тыӈ урыл ос о̄лупса урыл та̄н ётаныл акваг потыртаӈкве. Ты ва̄рмаль Ха̄льӯс районт о̄лнэ соссаӈ мир ма̄гыс ва̄руӈкве э̄ри. Та̄н ла̄тӈаныл ёмащакв кос ва̄ганыл, ос та̄нти ня̄враманылн пе̄с йис о̄лупса урыл ат потыртэ̄гыт, ща̄нь ла̄тӈын ня̄враманыл ат ханищтыяныл. Ты хо̄тпат ма̄гыс программат ва̄руӈкве э̄ре̄гыт, тот са̄всыр лекцият ос семинарыт урыл хансуӈкве э̄ри, ос ты ва̄рмаль ва̄рнэ ма̄гыс олн тинсуӈкве э̄ри па̄влытн миннэ лё̄ӈх олн. Та минам та̄лт ЮГУт "Нёхс пити" ла̄тыӈ ханищтан курсыт ва̄рыгла̄лсӯв. Ма̄н палтув ма̄ньлат ма̄ньщи хо̄тпат, рӯпитан хо̄тпат ёхтала̄лсыт. Ты курсыт 3 хо̄тпа ва̄рсыт, та̄н потраныл туп та̄нти ла̄тӈыл о̄лыс, са̄в потыр потыртасыт, мо̄йтсыт, пе̄с йис потрыт номылматыгла̄лсыт. Ёхталам хо̄тпат, хотьют ма̄ниг о̄лманыл порат ма̄ньщи ла̄тыӈ хӯлыгласыт, та̄н титынтыг ёхтуманыл порат та̄нти ла̄тӈанылтыл потыртаӈкве та патсыт, ла̄тӈаныл та номылматсаныл. Та̄наныл хӯнтлым сыманув ща̄гтсыт – ла̄тӈув суе ат соймыс. Ты ма̄ньлат хо̄тпатын ла̄тӈув э̄лаль ӯргалаӈкве патаве.

1062 2013.10.18. Александр ВЬЮТКИН

Ма̄ньщи йӣкванув мирн суссылтасанӯв. Сӯкыр э̄тпос ва̄т нупыл хо̄тыт хо̄талт Мордовия республикат Саранск ӯст Россия ма̄ янытыл о̄лнэ мирыт «Финноугорский транзит родственных встреч» нампа э̄ргын ос йӣквнэ фестиваль о̄лыс. Саранск ӯст таве юио̄вылт ва̄рыглавес. Ты кастыл округувныл соссаӈ ма̄хум ма̄н туп хӯрум коллектив тув во̄винта̄лвесӯв. Халувт акв коллективув тув минуӈкв ат ве̄рмыс. Ха̄льӯс район Саранпа̄вылт о̄лнэ «Са̄лыӈ лё̄ӈх» ня̄врамыт Ханты-Мансийск ӯсн ёхтуӈкв ат ве̄рмысыт. Ха̄льӯсныл тыг тыламлан хо̄талт турапыг о̄лыс, то̄рмувн ат та̄ртве̄сыт. Ма̄н та̄наныл хо̄тал палыт товлыӈха̄пыт иснэ колт ӯрсанӯв. Хунь самолёт мо̄т хо̄талн ла̄ввес, ма̄навн мощ марщумнувег е̄мтапас. Ма̄н, «Э̄ргыт, йӣквыт пувлын ма̄хум», хуньт пуссын Д. Г. Агеев палт ялантасӯв. Манырсыр са̄ӈквылтан та̄н ос йӣкв ха̄сэ̄в тыи пуссын Дмитрий Георгиевичин ханищтавесӯв. Таима̄гсыл ма̄н таве̄н яныг пӯмащипа ла̄тыӈ те̄тэ̄в. «Лылыӈ со̄юм» колн ялантан ня̄врамыт ма̄н ётув Саранск ӯсн ялсыт. Ты «Торые» а̄гитпыгыт са̄ӈквылтапыл, нарсъюхыл ос та̄рыг сыплув йӣвыл са̄ӈквылтэ̄гыт. Торые ма̄ньщи щирыл «лунт» тох ла̄ваве. Ма̄н ты лов хо̄тпа Мордовия республикан ялсӯв. Тув те̄р лё̄ӈх хосыт тит хо̄тал минасӯв. Саранск ӯсн ёхтумувт, акв хо̄талын ювхультмув. Коллективыт та э̄лыпал хо̄талт суссылтапаныл пе̄рияве̄сыт. Ма̄н ёхтумув хо̄талт та̄н республика янытыл экскурсиял ва̄рыглаве̄сыт. Э̄типа̄лаг та̄н ётаныл ущта ва̄йхатасӯв. Ма̄н яныгпа̄ла ос а̄гмыӈмосыӈ ма̄хум пусмалтан «Надежда» нампа пансионатколт о̄лсӯв. Та кол Саранск ӯсныл ва̄т ве̄рыста мощ по̄хатнув о̄лы. Ка̄сыӈ хо̄тал а̄лпыл онтолов щё̄с порат тувыл ӯсн тотаве̄в, э̄типа̄лаг ос аквхуйплов щё̄с порат ювле ущ тотыглавесӯв. О̄выл хотал ма̄н йӣкванув сусве̄сыт ос пе̄рияве̄сыт. Тув ма̄н коллективувтыл нила суссылтап щё̄пита̄лсӯв: са̄ӈквылтапыл са̄ӈквылтан тит та̄н ос тит ма̄ньщи хум йӣквы̄г. Тувыл ма̄н акв йӣквув туп пе̄риявес. «Торые» ня̄врамыт йӣкв ат о̄щсыт, та̄н акв са̄ӈквылтан та̄наныл пе̄риявес. Ты фестиваль о̄лум порат Российский Федерация Ассоциация финноугорский миранэ атыт съездэ о̄лыс. Та̄н съезданыл оигпам хо̄талт ма̄н ос ма̄к концертув ва̄рыглавес, та кастыл щё̄пита̄лум э̄рганув, йӣкванув та̄нанылн суссылтасанӯв. Россия ма̄ янытыл са̄всыр ла̄тӈыл потыртан мирыт халт э̄ргын ос йӣквнэ суссылтан фестиваль хӯрум та̄л сыс ва̄рыглаве. Ты сыс хӯрумса̄ттем са̄всыр коллективныл юио̄выл концерт мус туп нёлоловхуйплов хультуптавес. Ка̄сыӈ ма̄хум та̄нти щир ёмас э̄рыг, йӣкв ос са̄ӈквылтан та̄н о̄ньще̄гыт. Ма̄навн та̄н нупыланыл сунсуӈкв нас пӯмащиг о̄лыс. Концертув оигпам юипа̄лт пӯмащипа ла̄тӈыӈ пищмал ос дипломнэ̄пакыл мӯйлуптавесӯв. Титыт хо̄тал а̄лпыл ос Темниково па̄выл сунсуӈкве тотыглавесӯв, тот ма̄н о̄с йӣквсӯв, э̄ргысӯв. Ма̄н ётув Наръян-Мар ӯсныл ос Эстония ма̄ныл ма̄хум тув ялсыт. Мордва ма̄хум ма̄ныл яныг. Па̄выл нупыл нила щё̄с минамув сыс, ма̄н я̄ӈкылмат ос во̄рыт торыӈ щирыл ат ва̄санув, тот мощща. Са̄выӈпа̄лэ тот са̄всыр сыртэп янмалтан тэ̄пканкапаит о̄лэ̄гыт. Па̄вылн ёхтумувт, ма̄н ка̄миньт ня̄нил ля̄льт ӯрвесӯв. Ма̄н исум ня̄ньломт сакватасӯв ос солвал а̄нын пувтмалым тэ̄сӯв. Ты Россия янытыл мӯй ма̄хум тох ӯравет. Та хо̄тал ащирмаӈ, во̄тыӈ хо̄талыг о̄лыс. Таима̄гсыл ма̄н ма̄гсылув щё̄питым пасан клубколт ва̄рыглавес. Мордва ма̄хум тэ̄нутаныл та̄нти щирыл атыӈыг о̄лсыт. Э̄типа̄лаг ма̄н, ёхталам мӯй ма̄хум, концерт ва̄рыгласӯв. Щё̄стем са̄ӈквылтасӯв, йӣквсӯв, э̄ргысӯв ос тувыл о̄лнэ колувн та тотвесӯв. Хӯрмит хо̄тал ювле о̄лнэ ма̄нувн та минмыгтасӯв.

1063 2013.11.08. Валентина УЗЕЛЬ Валентина Хозумова

Округ миркол кӯщаит сапра̄нияныл. Моще̄рт ты та̄л ты оигпи. Таима̄гыс йильпи та̄л кастыл манах олн ань та̄ставе, ты урыл потыртан ма̄гыс округ правительстват рӯпитан кӯщаит акванатыглаве̄сыт. Ма̄н округув налоголн хосыт о̄лы. Манах олн атаве, таса̄вит олн ла̄кква та уртаве. Ка̄сыӈ та̄лныл ма̄во̄й мощщами, ань газ ёт рӯпитан организацият округ па̄лыл нё̄туӈкв патавет. Та̄н туп 50% са̄вит налог ойтуӈкв патэ̄гыт. Газыл яласан ма̄шинат о̄с мощща налоголныл тах пинавет. Ты рӯпата таима̄гыс ва̄раве, ма̄витув сака ат па̄ӈктаве ос округув янытыл о̄лнэ па̄влыт ос ӯсыт мус газ тотнэ турпат моляхнув вос пинавет. Та̄рвитыӈ а̄гмыт урыл кӯщаит о̄с потыртасыт. Ты та̄л Ханты-Мансийск ӯст ос Ханты-Мансийский районто̄лнэ са̄в хо̄тпа туляремияа̄гмыл е̄мтсыт. Э̄лмхо̄лас ты а̄гмыл ма̄порсӯитн, лё̄мвоитн ха̄хтаве. Ань ты а̄гм э̄лаль ул вос та̄рамлы, миркол кӯщаит нила миллион солко̄ви ӯс ма̄гыс ос 2 миллион солко̄ви район ма̄гыс та̄стысыт. Ань ты олныт хосыт ла̄пкат, тэ̄нут о̄щнэ колыт ма̄порсӯит алнэ ма̄гыс тэ̄рпил акваг паргалтавет. Ӯс ляпат о̄лнэ вит во̄ӈхат, лё̄х по̄хыт лю̄льнэ во̄р о̄с тэ̄рпил со̄сантавес. Ань ты рӯпата акваг ва̄руӈкв патаве. Хо̄псы а̄гмыл о̄с са̄в хо̄тпа а̄гмыӈыт. Та̄наныл пусмалтан ма̄гыс ань иӈ са̄в олн округ бюджетныл тах миве. Кол ӯрнэ ма̄хум ма̄гыс ос тамле нэ̄пак пирмайтавес. Ань жилищный программа арыг 560 миллион солко̄вил хасвес. Ты олнытыл йильпи колыт ӯнттуӈкв патавет, рущ щирыл ла̄вавет – арендный дом. Ос тот туп ма̄ньлат ще̄мьят, ма̄ньщи ман ханты ще̄мьят ос бюджетникыт колыл тах мивет. Та кол тыналаӈкв ат ро̄ви, туп аренда щирыл тот ма̄хум о̄луӈкв тах патэ̄гыт.

1063 2013.11.08. Людмила ТЕТКИНА

Ты а̄гм 87 хо̄тпа палт хо̄нтвес. Та э̄тпост 7 хо̄талныл 10 хо̄талэ мус «Диабет. Время действовать» нампа акция ва̄рыглавес. Нижневартовск, Ханты-Мансийск, Сургут ӯсыт ос Сургутский район янытыл «мобильный диабетцентрыг» ла̄внэ ма̄шина яласас. Ка̄сыӈ ка̄сащан хо̄тпа тув ялыс, тав «сахарный диабет» а̄гм о̄ньщи ман а̄ти, уральтавес. Ле̄ккарыт хо̄тпа ке̄лп анализе хосыт ты а̄гм молях хо̄нтуӈкве ве̄рме̄гыт. Хӯрум хо̄тал сыс акв со̄тыра 500 арыгкем э̄лумхо̄лас ле̄ккарытын уральтаве̄сыт. Ань 87 хо̄тпа палт ты а̄гм хо̄нтвес. Ты ма̄хум тамле та̄рвитыӈ а̄гм о̄ньще̄гыт, та̄н аты ва̄мыт. Ле̄ккарыт ла̄ве̄гыт, а̄гм «сахарный диабетыг» таима̄гсыл ла̄ваве, ма̄хум о̄лэ̄гыт, номсэ̄гыт, а̄гм ат о̄ньще̄гыт. Ты а̄гм щар ат суйты. Ос э̄лаль ле̄ккарытн воссыг пусмалтаӈкв ат ве̄рмаве. А̄гмыӈ хо̄тпа о̄лнэ̄тэ сыс туп инсулинтэ̄рпи укол таквинатэ̄н тӯщтым э̄лаль о̄лы. Тамле та̄рвитыӈ нак ул вос е̄мтыс, ма̄хум пуссын ва̄тихал уральтахтуӈкве ла̄вавет. Ле̄ккарытн ке̄лп виве, ос тот са̄ккар са̄внув ке хо̄нтаве, а̄гм та̄ра пусмалтаӈкве о̄вылтаве. Ань ты диамобильма̄шина туп яныг ӯсыт ос Сургутский район хосыт яласас. Тэ̄лы лё̄ӈхыт хунь ва̄равет, ле̄ккарыт ма̄нь па̄влытын минэ̄гыт, тот о̄лнэ ма̄хум о̄с тах уральтыяныл. Ма̄н округувт 45 со̄тыра арыгкем хо̄тпа сахарный диабет а̄го̄ньще̄гыт, ос манаса̄вит хо̄тпа ат уральтахтасыт ос ты а̄гм о̄ньще̄гыт, нэ̄мхотьют ань ат ва̄г.

1063 2013.11.08. Александр ВЬЮТКИН

Са̄в ул вос тулмантэ̄гыт. Мощ мо̄лалнув Ханты-Мансийск ӯст прокуратурат рӯпитан тит кӯщай хумыг Александр Кондратьев ос Ринат Кунсбаев ёт прессконференция ва̄рыглавес. Хумыг та урыл потыртасы̄г, хумус ла̄палахтыглым яныг кӯщаиг рӯпитан ма̄хмытныл олн во̄ве̄гыт. «Ты та̄л сыс округув янытыл нёлса̄т ва̄т са̄всыр тамле ва̄рмаль щирыл прокуратурат рӯпитан ма̄хум тэ̄ла пӯнсыгласыт. Тувыл нёлса̄т ляпатем кӯщаит олн во̄внэ̄ныл ма̄гсыл пувве̄сыт. Щар са̄в тамле лю̄ль ва̄рмаль Сургут ос Нижневартовск ӯсыгт рӯпитан ма̄т хо̄нтвес. Са̄выӈпа̄лэ тыи са̄в мирыӈ ос са̄в олн винэ ма̄т е̄мталы. Ма̄н округувт пӯльницатыт ос ня̄врамыт ханищтан колытыт нэ̄пакыт пе̄нтым ос олн та̄нтина̄нылн пиным щар са̄в лю̄ль ва̄рыглавес. Са̄в ма̄хум ма̄навн та̄нти потыртэ̄гыт. Хумус та̄нанылныл хотты кӯщай матыр во̄ви, та̄н ма̄навн та урыл ла̄тыӈ те̄тэ̄гыт. Ма̄н аквты та̄ра та кӯщай уральтылӯв. Кӯщаиг о̄лнэ ма̄хум ма̄н та̄наныл ва̄тихал уральтым о̄ньщиянӯв. Та̄н ты урыл кос ва̄гыт, та̄нти э̄лаль аквта щиранылт лю̄ль ва̄ре̄гыт. Мощ мо̄лалнув кӯщаиг о̄лнэ акв ле̄ккар ва̄нэ юрт хо̄тпатэ аквтуп рӯпитаӈкв ат ве̄рмынэ̄тэ ма̄гсыл нэ̄пакыл ва̄рыстэ. Та нэ̄пак щирыл тав пенсиян минас. Ос та̄ланэ ат кос то̄влысыт. Тэ̄н о̄с пуввесы̄г.

1063 2013.11.08. Людмила ТЕТКИНА

То̄ва са̄кконыт йильпи щирыл хасве̄сыт. Округ Думат рӯпитан депутатыт сапра̄нин акванатхатыгламаныл порат хусахтем са̄всыр са̄ккон пирмайтасыт. Ты халт та̄н о̄лнэ колыт урыл потыртасыт. «О регулировании отдельных жилищных отношений» нампа са̄ккон щирыл округувт колыт ӯнттуӈкве тах патавет. Борис Хохряков, округ Дума кущай хум, ла̄выс, ты са̄ккон округ Думат Молодёжный палатат рӯпитан ма̄ньлат хо̄тпат хансуӈкве номылматсыт. Ты нэ̄пак щирыл тамле колт о̄лнэ ще̄мьят мощща олн ойтуӈкв патэ̄гыт. Тамле колыт Нефтеюганск, Ханты-Мансийск ос Сургут ӯсытт тах ӯнттавет. Тамле колыт ӯнттым округув олн тах сэ̄лы. Мо̄т са̄ккон «Обеспечение доступным и комфортным жильём жителей Югры 2014-2020 годы» хосыт ма̄хум йильпи щирыл кол ёвтуӈкве тах патэ̄гыт. Ань рӯпитан программа хосыт соссаӈ, ма̄ньлат ще̄мьят, бюджетыт рӯпитан ма̄хум субсидияолныл кол ёвтнэ ма̄гсыл мивет. Йильпи 2014 та̄лныл кол ёвтуӈкве ка̄сащан хо̄тпат та̄нки олн атуӈкве патэ̄гыт ос ипотечный агентстван олнаныл тах пиныяныл. Тувыл 2018 та̄л юипа̄лт та̄н ты олныл кол ёвтуӈкв тах нё̄тавет. Кӯщаит ла̄всыт, округувт ты программа хосыт 5 со̄тыра арыгкем э̄лумхо̄лас кол тах ёвтэ̄гыт. Ос акв са̄ккон щирыл яныг ма̄шинал манос автобусыл яласан хо̄тпат «транспортный налогыг» ла̄внэ олн ань туп 50% са̄вит ойтуӈкв патэ̄гыт. «Природный газыл» яласан ма̄шина о̄щнэ хо̄тпат туп та̄н мощщанув налоголн тах ойтэ̄гыт. Ты коныпал сапра̄нит ма̄хум са̄в та̄л рӯпитан хо̄тпат Почётный грамотал мисаныл. Тувыл судьяхо̄тпат пе̄риясыт. Ос са̄в мо̄т э̄рнэ са̄кконыт тот пирмайтасыт.

1063 2013.11.08. Николай МЕРОВ

Нэ̄хо̄тпат уйигтым ёнгысыт. Ма̄нь таквс э̄тпост округувт акв пӯмащ ёнгын ва̄рмаль ва̄рыглавес. Нэ̄т витыт уйигтым мечикыл ёнгысыт. Рущ щирыл ты ёнгил «Водное поло» ла̄ваве. Россия янытыл Нижний Новгород, Кириши, Москва ӯсытныл нэ̄ хо̄тпат тыг ёхталасыт. Ма̄н округувныл а̄гиквет о̄с ёнгысыт. Ханты-Мансийск ӯст Югорский университет колнаке̄т ты ёнгын ва̄рмаль ма̄гыс бассейн щё̄питым о̄лы. Нэ̄ хо̄тпат хӯрум хо̄тал тот кассыт. Ты ёнгын тэ̄ла округт о̄лнэ ня̄врамытн сака мӯсты. А̄гитпыгыт тамле касылын ханищтахтуӈкве сака ка̄саще̄гыт. Ты ёнгын ва̄рмаль э̄лаль акваг тыт ва̄рыглаӈкве тах патаве. На̄н хуньт ты ёныг урыл хӯнтамлэгы̄н ке, пӯмащ ма̄гыс тув о̄с ялэ̄н, мощ сунсэ̄н.

1063 2013.11.08. Тома мерова

Олныт ловиньтаве̄сыт ос э̄лаль ла̄кквауртве̄сыт. Югра правительстват рӯпитан кӯщаит 2014 та̄лн ос тыгыл э̄лаль 2015-2016 та̄лыг кастыл бюджет олныт ёмщакв ловиньтасаныл ос са̄всыр программат щирыл ма̄кыг ла̄кквауртсаныл. Ты о̄вылтыт губернатор ва̄ӈын нэ̄ Вера Аркадьевна Дюдина журналистытн потыртас. Округувт та̄л сыс манса̄вит тонна ма̄во̄й но̄хвиве ос ма̄ янытыл акв баррель ма̄гыс манса̄вит тын пинаве, кӯщаит тув ро̄влахтым олныт э̄лаль ловиньтыяныл. Мо̄тыт та̄лт 253, 5 млн. тонна ма̄во̄й тах но̄хвиве. Ос баррель ма̄гыс та̄н 101 доллар са̄вит тын пинсыт. 2015 та̄лт 249, 7 млн. тонна, 2016 та̄лт 247 млн. тонна ма̄во̄й виӈкве таӈхе̄гыт ос 100 доллар са̄вит тыныл тыналаӈкве хассаныл. Тувыл та щирыл пуссын сэ̄лнэ олныт РФ янытыл са̄всыр ма̄н ла̄кквауртавет. Ань 2014 та̄лн округ бюджет ма̄гыс 166, 4 млрд. солко̄ви та̄стувес. Та̄н 25 са̄всыр программа щирыл тах холтавет. 2015 та̄лн 172, 3 млрд. солко̄ви, ос 2016 та̄лн 178, 9 млрд. солко̄ви ловиньтасыт. Ты коныпал «резервный фонд Югры» ла̄внэ олн атнэ ма̄н 13 млрд. солко̄ви со̄пасыг пинсыт. Ка̄сыӈ та̄л кол ӯнттын программан са̄внув олн та̄ставе, пе̄с колыт хоткуритаӈкве ос ЖКХат са̄всыр ва̄рмалит ёмщакв щё̄питан ма̄гыс о̄с я̄нас олн та̄стэ̄гыт. 2014 та̄л «Культура та̄лыг» ла̄ввес. Таима̄гыс тув хансым программатытн 538 млн. солко̄ви миве. Тыгыл 400 млн. солко̄ви культурный центрыт, клубыт манос театрыт ӯнттын ма̄гыс холтавет тах. Мо̄т программат олн та̄л о̄с ат хультэ̄гыт.

1063 2013.11.08. Валентина УЗЕЛЬ Валентина Васильева

Ма̄нь таквс э̄тпос 30 хо̄талэ – 1937-39 та̄лытт наска̄ссыг порслым ма̄хум ка̄стын хо̄тал. Ханты-Мансийск ӯст ты ма̄хум ма̄гыс памятник тӯщтым о̄лы. Ка̄сыӈ та̄л та хо̄талт тот са̄в мир акванатхатыгла̄лы. Кӯщаит, яныгпа̄ла хо̄тпат та пилыщмаӈ пора номылматыгла̄лыяныл. Ань мир нупыл такви рӯтанэ урыл акв матум рущ э̄ква потыртас, тав наме Надежда Ивановна Кумирова. Тав ща̄нягеа̄щаге ма̄ньлатыг о̄лсы̄г, хунь та̄н ще̄мьяныл тыг те̄твес. Ань э̄ква та та̄рвитыӈ пора урыл лю̄ньщим потыртас. Тав ла̄выс, ты наска̄ссыг порслым ма̄хум наманыл нэ̄мхуньт ул вос ёрувлавет.

1063 2013.11.08. Людмила ТЕТКИНА

Та̄н ма̄хумн нё̄тэ̄гыт. Округ янытыл Ханты-Мансийск ӯсн са̄в ма̄хум ёхталасыт. Та̄н пуссын общественный объединеният рӯпитэ̄гыт, та̄н ма̄гсыланыл ты сапра̄ни ва̄рыглавес. О̄с аквта порат «Социальная ярмарка некоммерческих организаций ХМАО-Югры» о̄лыс. Ка̄сыӈ общественный организация тот я̄нас суссылтап ва̄рыглас. Та̄н мирн суссылтасыт, манхурип рӯпата ва̄ре̄гыт. Ты организацият рӯпатаныл хосыт яныг тэ̄ла ва̄ре̄гыт та̄н ма̄хумн нё̄тэ̄гыт. Ань та̄н та̄нки халанылт вос ва̄йхатэ̄гыт, акванюрщхатым ос мирн нё̄тым э̄лаль ёмащакв вос рӯпитэ̄гыт. Суссылтапын ёхталам ма̄хум, ветераныт, а̄гмыӈмосыӈ хо̄тпат, яныгпа̄ла хо̄тпат, са̄в мо̄т организацият рӯпатаныл урыл пӯмщалахтасыт. Соссаӈ ма̄хум организацият тув о̄с во̄виньта̄лве̄сыт. А̄с-угорский ма̄ньлат хо̄тпат организация, «Югра лылыеп» Белоярский отделениятэ суссылтапыг тот о̄с ва̄рыгласы̄г. Ярмарка ос форум о̄лум порат ма̄хум са̄всыр ва̄рмаль урыл потыртасыт. Округувт о̄лнэ са̄всыр мирыт та̄нки халанылт хумус о̄лэ̄гыт, «Многонациональная Югра» нампа секцият ма̄хум тот ты урыл потыртасыт. Сапра̄ни оигпам юипа̄лт та̄н нэ̄пакн хассыт, ань са̄всыр мирыт халанылт юртыӈыщ вос о̄лэ̄гыт, Общественный палата, культура департамент, районный миркол кӯщаит са̄всыр фестивалит, ялпыӈ хо̄талыт ос са̄в мо̄т э̄рнэ рӯпата ва̄тихал вос ва̄ре̄гыт.

1063 2013.11.08. Валентина УЗЕЛЬ Валентина Хозумова

Кол ёвтнэ ма̄гыс хоса ӯрхатуӈкв э̄ри. Ма̄н округувт о̄лнэ кол манос субсидияолн ма̄гыс 53 со̄тыра ще̄мья очередин хансым о̄лэ̄гыт. Тув ма̄ньлат ще̄мьят, ма̄ньщи ос ханты хо̄тпат ос бюджетный ма̄тт рӯпитан ще̄мьят ловиньтаве̄сыт. Ань кӯщаянув йильпи программа хассыт 2014-2020 та̄лыт сыс округувт о̄лнэ ма̄хум колыл хумус миӈкв патавет. Ты урыл губернатор ва̄ӈын хум Д. Шаповал, Ипотечный агентстват кӯщай хум Е. Чепель ос кол ӯнттын департаментыт кӯщай А. Кривуляк потыртасыт. Округ мирколт рӯпитан хум Дмитрий Шаповал ла̄выс, ань ты программа таима̄гыс щё̄питавес, юиовыл та̄лыт сыс са̄в ма̄хум субсидияолныл, социальный квартирал майве̄сыт. Кол ӯнттын ва̄рмальн округ бюджетныл сака са̄в олн мины. Округувн ущты ёхтум ма̄хум, са̄в та̄л тыт о̄лнэ манос тыт яныгмам ма̄хум пуссын акв щирыл очередин хансавет ос кол ёвтнэ ма̄гыс субсидияолныл мивет. Ань кӯщаянув ты ва̄рмаль та̄рапаттысыт, ос таима̄гыс та̄н ты программа мо̄т щирыл хассаныл. Ань субсидияолныл манос квартирал та хо̄тпат мивет, хотьют 15 арыгтем та̄л акваг тыт о̄лэ̄гыт манос тыт яныгмасыт, рущ ла̄тӈыл ты ва̄рмаль «ценз оседлости» тох ла̄ввес. 2014-2020 та̄лытн колыт ма̄гыс туп 26 миллиард солко̄ви миве. Мо̄тыт 2014 та̄лн 8, 9 млрд. солко̄ви. Олн кос миве, ос кӯщаянув ань ла̄всыт, субсидияолн ӯрнэ ма̄хум хосанув ӯрхатуӈкв патэ̄гыт. Ты э̄лыпал та̄лытт ма̄хум титаххӯрмах та̄л очередит ӯрхатсыт, ань лов та̄л мус ӯрхатуӈкв патэ̄гыт. Тувыл иӈ тамле йильпи ва̄рмаль ань ва̄рвес, рущ ла̄тӈыл «накопительный ипотекаг» ла̄ваве. Ань кол ёвтуӈкв ка̄сащан хо̄тпат та̄нти олн атуӈкв вос о̄вылтахтэ̄гыт. Округувт «Ипотечный агентства» рӯпиты, тув хӯрум та̄л ка̄сыӈ э̄тпос 6 со̄тыра 250 солко̄ви хо̄тпа пинуӈкв те паты, тав кол ёвтнэ̄тэ порат округ бюджетныл ос 450 со̄тырал тах нё̄таве.

1063 2013.11.08. Николай МЕРОВ

Нэ̄пак та̄ратан урыл потыр. Ты та̄л Россия Конституция рӯпитанэ̄тэ па̄сныл хус та̄лэ то̄влы. Ты кастыл Ханты-Мансийск ӯст нэ̄пак та̄ратан ва̄рмаль урыл яныг сапра̄ни ва̄рыглавес. Россия янытыл са̄всыр ма̄ныл яныг кӯщаит тыг ёхталасыт. Рущ щирыл ты ва̄рмаль «Избирательная политика и избирательная система России» намаим о̄лыс. Ань юио̄выл та̄лытт ты ва̄рмаль урыл ма̄хум ва̄тихал потыртэ̄гыт. Ты а̄ти, нэ̄пак та̄ратан порат ощмарлан нак иӈ е̄мталы. Ос Россия янытыл Уральский Федеральный округт пе̄рияпыт ма̄к ёмасыг минэ̄гыт. Тыг ёхталам кӯщай хо̄тпат ла̄всыт: «Нэ̄пак та̄ратан порат са̄внув мир вос ёхталы. На̄н хоты хо̄тпа пе̄риегы̄н, тох та э̄лаль о̄луӈкве патэгы̄н. Ань матъёмас юио̄выл та̄лытт пе̄рияп мӯсхал щирыл мины, нэ̄пак та̄ратан ма̄хум ты ва̄рмаль та̄нки о̄с уральтым о̄ньщияныл. Ощмарлан ва̄рмаль молях та̄рапаттаве. Нэ̄мхотьют ул хӯнтлэ̄н, хотты кӯщай нупыл номтын паты, ёхтэ̄н, тав ма̄гсылэ нэ̄пак та̄ратэ̄н».

1063 2013.11.08. Николай МЕРОВ

Ма̄нки са̄всыр тэ̄нут ва̄ре̄в. Мо̄лалнув округ губернаторув ва̄ӈын хум Сергей Полукеев ля̄ххал тотнэ ма̄хум ёт хо̄нтхатыглас. Тав агропромышленный комплекс уральтан кӯщаиг рӯпиты. Ань ты ва̄рмаль э̄лаль хумлег о̄лы, тав ты урыл потыртас. Округ агропромышленный комплекс э̄лаль тотнэ ма̄гыс ань ма̄хум субсидиял майлавет. Ка̄сыӈ та̄лныл ты ва̄рмаль 6-7 процентын но̄хса̄вми. Югра ма̄т мис о̄щнэ хо̄тпат та̄л сыс хусахкем со̄тыра са̄вит литра щаквит, онтоловхуйпловкем со̄тыра кила нё̄выль тыналан ма̄гыс та̄стэ̄гыт. Ты коныпал мо̄лалнув Сургутский район Белый Яр па̄вылт щищкуре̄кыт янмалтан яныг пе̄рма пӯсвес, тувыл са̄в мӯӈи тыналаве. Ань мус ма̄н предприятиянув 41 процент са̄вит са̄всыр хӯл, 9, 5 процент нё̄выль, 3, 5 процент щаквит, 51 процент карто̄пка Югра ма̄т о̄лнэ мир ма̄гыс тыналэ̄гыт. Тыгыл э̄лаль ос ма̄вит ӯргалан урыл потыр о̄лыс. Округувт ма̄щунь но̄хвуим ма̄витув сака ат па̄ӈктаве кос, ос 1986-2006 та̄лыт сыс ма̄во̄ил со̄сантым ма̄ ань 2020 та̄л мус хотсыстамтаӈкве тах э̄ри. Ань ос хоты ма̄т ма̄во̄й ма̄н посы ке, та ма̄ та̄ра хотсыстамтаве, тох ат оссувлаве. Тувыл кӯщай хум ос мохсаӈ хӯл урыл потыртас. Ань ка̄сыӈ та̄лныл ты хӯл мощщами. Тыт хӯл янмалтан завод рӯпиты кос, ос хунь э̄рнэ са̄вит хӯл е̄мты, ӯрхатуӈкве э̄ри. Мо̄лал Ямал ма̄ губернатор Дмитрий Кобылкин ла̄выс, Югра ма̄т мохсаӈ хӯл пувуӈкве акв та̄лн ёлпо̄илтта̄лаве ке, Ямал ты ма̄гыс компенсацияолн ойты тах. Сергей Полукеев ты урыл тох ла̄выс: «Тыи ёмас ва̄рмаль о̄лнув. Ма̄нь мохсаӈ хӯлыт хӯрум та̄ланыл то̄влын мус Ямалт А̄с я̄т ӯйигтэ̄гыт. Ётыл ущ та̄н Ханты-Мансийский округн ма̄н А̄с я̄вн та̄ратахтэ̄гыт. Ос ань ты хӯлыт пувуӈкве щар хот ат по̄илттаве. Мо̄тыт та̄лныл ма̄н учёный хо̄тпат ёт ты ва̄рмаль ёмщакв ханищтылӯв. Тувыл ущ хӯланув са̄вмалтан ма̄гыс э̄рнэ тэ̄ла ва̄ре̄в. Ма̄н ты вармаль туп акваннё̄тхатым мӯсхал щирыл щё̄питаӈкве ве̄рмилӯв».

1063 2013.11.08. Светлана РОМБАНДЕЕВА

Пусмалтан ва̄рмаль. Ханты-Мансийск ӯст округ здравоохранение Департамент колт ля̄ххал тотнэ ма̄хум акванатыглаве̄сыт. Ань округув янытыл пусмалтан ва̄рмаль палт ма̄к яныг кӯщаиг Александр Вячеславович Филимонов о̄лы. Ты хум китыглавес, ма̄н ма̄вт пусмалтан ва̄рмаль манхурипаг о̄лы, ма̄хум пусмалтан ма̄гыс олн то̄вылхаты ман а̄ти. На̄н ань э̄лаль тав потре ловиньтэлы̄н: – Ма̄н, округт о̄лнэ ма̄хум, э̄лы хо̄талув урыл номсуӈкве ве̄рме̄в. Ты ма̄гыс олн о̄ньще̄в. Пӯльницанувн са̄всыр тыныӈ оборудованият ва̄тихал ёвтыглэ̄в, йильпи пӯльницат ӯнттэ̄в, округувн номтыӈ ле̄ккарыт во̄ве̄в, рӯпата олныл мӯсхал щирыл ойтуӈкве ве̄рмиянӯв. Россияв янытыл воссыг нэ̄мхотты область ман округ тох ат о̄лы, тыса̄вит олн ат о̄ньщи. Округувт ма̄хум янгыщ давление а̄гмыл савалэ̄гыт, ке̄лпаныл келпта̄рс хосыт мӯсхал щирыл овуӈкве ат ве̄рми. Ущ самын патум са̄в ня̄врам а̄тимыг е̄мты. Хо̄псы ос бронхиальная астма а̄гмыл о̄с сака са̄в хо̄тпа савалы. Са̄в наркоманыт о̄лэ̄гыт, вина айнэ ос хохса хартнэ хо̄тпа о̄с са̄в. Описторхоз ос туляремия а̄гмыл сака са̄в хо̄тпанув а̄гмыӈыт. Ма̄н тыт ань хӯлыӈ ма̄т о̄лэ̄в, таима̄гыс описторхоз а̄гмыл ма̄хманув е̄мтэ̄гыт. Ты сака пилыщмаӈ а̄гм, ма̄йт ӯйитын щалтаве, тувыл рак нампа а̄гмыл э̄лумхо̄лас та е̄мты. Тамле а̄гм пусмалтаӈкве та̄рвитыӈ, хо̄тпа хоса пыл ат савалы, а̄тимыг та е̄мты. Ты а̄гм пусмалтаӈкве э̄ри, ма̄йт ӯйит алуӈкве э̄ре̄гыт. Ты а̄гм щирыл Россияв янытыл ма̄н о̄выл местат хансым о̄лэ̄в. Ам номсыте̄мт, ма̄ янытыл ма̄н о̄с о̄выл местан хаснуве̄в. Са̄в ма̄хум ма̄шинал яласан порат лё̄ӈхыт холэ̄гыт. Ты о̄с сака пилыщмаӈ ва̄рмаль. Тамле ма̄т са̄в ня̄врам порсы, то̄ват ос лылыӈ та̄гыл хультэ̄гыт те, а̄гмыӈмосыӈыг е̄мтэ̄гыт. Мир пусмалтан ма̄гыс, ма̄н округт о̄лнэ ле̄ккарыт ёт яныг рӯпата ва̄ре̄в. Ма̄нь па̄влытыт о̄лнэ пӯльницат ань пуссын лаппантыянӯв, ма̄хум туп хо̄тыл тот пусмалтавет. Ос матыр та̄рвитыӈ а̄гм та̄рапаттаве те, хо̄тпа яныг ле̄ккарыӈ ма̄н тотаве, тот мӯсхал щирыл уральтаве, пусмалтаве. Тамле пӯльницатын номтыӈ ле̄ккарыт во̄вуӈкве э̄ре̄гыт. Ле̄ккар хо̄тпа ма̄нь па̄вылн ёхтуӈкве ка̄сащи те, тав акв миллион солко̄вил ойтаве, о̄лнэ колыл миве. Ма̄нь хо̄тпа ман яныг хо̄тпа ты э̄лыпа̄лт хо̄т рӯпитас ман а̄ти – ты нупыл сунсуӈкве ат патэ̄в. Ма̄к таи, ань хо̄тпа рӯпитаӈкве вос тахнув ос рӯпататэ ёмащакв вос ва̄гтэ. Округув янытыл ка̄сыӈ пе̄с пӯльница пе̄нтсыл, йильпи пӯльница ӯнттэ̄в, иӈ налыман нупыл ат пӯльница ӯнттын щирыл о̄лы. Округт о̄лнэ я̄тил тыныӈ ма̄хум, матыр а̄гмын сумыллы те, ле̄ккар палт та̄ра минэ̄н, уральтахтэ̄н. То̄ванакт пилыщмаӈ а̄гм ущ суйтнэ̄тэ порат та̄рапаттаве те, пусмалтаве, хо̄тпа э̄лаль о̄с са̄в та̄л о̄лы. Пуссын пуста̄гыл о̄лэ̄н!

1063 2013.11.08. Тамара МЕРОВА

Ня̄врамыт ма̄гыс олн ат са̄литэ̄гыт. Туи сыс манса̄вит ня̄врам, хоты ма̄т ӯщлахтасыт, хо̄т пусмалтаве̄сыт, манса̄вит олн тув ойтвес, пуссын ты о̄вылтыт ля̄ххал тотнэ ма̄хум э̄лыпа̄лт хӯрум кӯщай хо̄тпа потыртасыт. Елена Немчинова, нё̄тмил ва̄рнэ департаментыт кӯщай ва̄ӈын нэ̄, ла̄выс: «2013 та̄лт ня̄врамыт ӯщлахтын ма̄гыс округ бюджетныл 800 млн. солко̄ви та̄стувес. Та̄рвит ва̄рмальн я̄рмум ще̄мьят ня̄враманыл ӯщлахтын манос пусмалтан ма̄гыс российский бюджет па̄лыл 40 млн. солко̄ви та̄стувес ос мо̄т олныт са̄выӈпа̄лэ са̄всыр муниципальный образованияныл майве̄сыт. Ань пуссын ты олныт хосыт 60 со̄тыра а̄гитпыгыт са̄всыр ма̄т ӯщлахтасыт». Юграв янытыл туи сыс 486 ня̄врам ма̄гыс ӯщлахтын ос пусмалтахтын колыт рӯпитасыт. То̄ва лагерит школатт щё̄питым о̄лсыт. Тот ня̄врамыт тыттуве̄сыт, студентыт та̄н ётаныл ёнгысыт, матарыл пӯмщалаве̄сыт, ос хӯрум щё̄с юипа̄лт юв та та̄ртыглаве̄сыт. Ты коныпал округ янытыл 22 палаткаӈ лагерит ва̄рыглаве̄сыт. Мо̄тынтыг тот ня̄врамыт ёмщакв тыттын ма̄гыс субсидия щирыл са̄внув олныл та̄ставет. Тувыл Ха̄льӯс, Хо̄нтаӈ, Белоярский, Ханты-Мансийский районытыт ос Урай ӯст соссаӈ ня̄врамыт ма̄гыс этноцентрыт рӯпитасыт. Тув ханты, ма̄ньщи а̄гитпыгыт коныпал мо̄т мир ня̄врамыт о̄с ӯщлахтуӈкве ялантэ̄гыт. Та̄нанылн тот сака мӯсты. Тамле этноцентрыт ос этнолагерит ва̄рнэ ма̄гыс соссаӈ хо̄тпанув округ па̄лыл грантолныл э̄лаль вос нё̄тавет. Антон Тимкин, образование департаментыт кӯщай ва̄ӈын хум, о̄с потыртас. Та̄н ня̄врамыт ӯщлахтын ос пусмалтан тэ̄лат та̄л палыт уральтэ̄гыт. Каникулыт порат то̄ва ня̄врамыт лагерьн ялуӈкве ве̄рме̄гыт. Та̄н са̄всыр ёмас тэ̄лат ва̄руӈкве студентытн акваг нё̄тавет. Ты та̄л туи сыс 682 студент ня̄врамыт ёт лагерьн ялнэ коныпал 452 кол по̄хат ос 283 школьный клубыт рӯпитасыт. Игорь Крутько, спорт тэ̄лат палт кӯщай ва̄ӈын хум, ла̄выс: «Округ янытыл 239 спортивный площадкат рӯпитасыт. Туи сыс 75 со̄тыра арыгкем ня̄врам тув ялантасыт. Ла̄тыӈ ат хӯнтлын подросткат ты площадкатын о̄с во̄виньта̄лсанӯв. Та̄н ма̄ньлат спортсменыт ёт ме̄чикыл ёмщакв ёнгуӈкве, поргуӈкве ос пувлуӈкве ханищтаве̄сыт». Тувыл туи ӯщлахтын колыт рӯпитанэ̄ныл сыс нэ̄мхотты ня̄врам ёт лю̄ль ва̄рмаль тот ат е̄мталас. Пуссын пуста̄гыл юв ёхтысыт, хо̄та̄ти ёмщакв ӯщлахтасыт, пусмалтахтасыт. Та̄н ётаныл рӯпитан хо̄тпат ва̄гтал сака ат патсыт.

1063 2013.11.08. Александр ВЬЮТКИН

Такви ё̄ре ва̄нэ хум. Ма̄нь таквс э̄тпос онтоловхуйплов хо̄талт Америкат Колорадо нампа ма̄т Денвер ӯст ма̄ньщи боксёрув Руслан Проводников Майк Альварадо ёт алхатым касыс. Боксёрув янытлан щирыл округувныл ма̄н нёлолов хо̄тпа тув ялсӯв. Ма̄н ётув Руслан оматэ Раиса Алексеевна о̄лыс, тав пыге каснэ ма̄н щар о̄выл щёс ялыс. Ма̄ньлат хумиюв касуӈкв щё̄питахтын кастыл иӈ ойттур э̄тпост тув минас. Руслан ёт касум хум та̄ксар ос ё̄р боксёрыг ловиньтахты. Ты э̄лыпа̄лт тав налыман нупыл ат щёс рингыт алхатас. Налыман нупыл нила щёс но̄хпатыглас. Тав ётэ алхатам ма̄хманэ ва̄т нупыл нила щёс ёлса̄ӈала̄лым ра̄тсанэ. Такви акв щёс туп ра̄тыглавес. Русланын манрыг та̄рвитыӈ о̄лыс? Ты касыл Альварадо о̄лнэ ӯст ва̄рыглавес. Таима̄гсыл Русланын мощ та̄рвитыӈнув о̄лыс. Тот о̄лнэ мир са̄выӈпа̄лэ та̄нти боксёраныл сака янытлыяныл. Хунь ма̄н са̄тхуйпловит щислат тув ёхтысӯв, Руслан ёт рӯпитан хум Вадим Корнилов ма̄н ётув пащалахтуӈкв та̄ра ёхтыс. Та̄н ма̄нав гостиницан о̄луӈкв тотсаныл. Руслан ос Альварадо халэ̄нт потыртан прессконференциян ма̄н Вадимын во̄ввесӯв. Вадим то̄нт ла̄выс: «Руслан такви ма̄хманэ тыг ёхтысыт, таима̄гсыл тав номтэ ёмасыг е̄мтыс». Хунь ма̄н прессконференциян ёхтысӯв, Руслан ла̄выс: «Ам ма̄хманум тыхо̄тал ёхтысыт, ань та̄н пуссын тыт о̄лэ̄гыт. Та̄н халанылт тыт ам омам о̄лы». Фотоаппаратыл по̄слын ма̄хум та̄ра Раиса Алексеевна по̄слуӈкв патсаныл. Тув ёхтумувт, со̄ль, Альварадо янытлан ма̄хум са̄в. Прессконференция оигпан э̄лыпа̄лт Руслан Альварадон футболкал мӯйлуптавес, тот Альварадо наме хансым о̄лыс. Мо̄тыт хо̄талт каснэ хумыг ве̄скалавесы̄г. Альварадо Русланныл 420 грамм та̄рвитыӈнувег о̄лыс. Таима̄гсыл тав мощ кӯпняман ма̄гсыл тит щё̄сыл майлувес. Альварадо та̄рвитэ э̄рнэ мус ат те а̄лымастэ ва̄руӈкв, халэ̄нт касуӈкве ат та̄ртнувег. Каснэ хо̄талт ма̄н Руслан ёт хо̄тыл порат мощщакве̄н акванхо̄нтхатыгласӯв. Тав ма̄хманэ ёт тувыл та̄ра касылын щё̄питахтуӈкв минас. Э̄типа̄лаг ма̄н ма̄ньщи маснутанув массанӯв, койпанув ёт висанӯв ос тув минасӯв. Тув ёхтумувт, полициян койпанув тӯлуӈкв ат та̄ртвесӯв. Ты коныпал ма̄навн Руслан ёт ринг мус минуӈкв э̄рыс. Тув ма̄н о̄с ат та̄ртвесӯв. Щалтнэ а̄виныл та̄ра касыл сунсуӈкв те̄твесӯв. Каснэ мус Русланув иӈ щё̄с арыгтем такте̄т о̄лыс. Аквматэ̄ртын Руслан Проводников наме ла̄ввес, рингын та нэ̄глыс. Хумыг каснэ ва̄рмале̄н та о̄вылтахтас. Руслан тав ётэ каснэ хумитэ о̄выл раундыл ра̄туӈкв о̄вылтастэ. Альварадо хотмус такви щире̄т аквписыг ювле лаквим ринг янытыл со̄выррищ хольт ха̄йтыгтас. Руслан таве нёлоловит раундыт тит щёс ёлпаттыгластэ. Рефери хум Тони Викс та̄ра ловиньтаӈкв патыс. Руслан тӯяг Тимоти Бредли ёт касме порат, рефериг о̄лнэ хум о̄влэ̄т ӯрхатас, хунь Тимоти пуӈке мощ ёмаснувег е̄мты, тувыл ущ ловиньтаӈкв о̄вылтахтас. Ань ловит раундыт Руслан Альварадо хӯрмиттыг та̄кыщнув вильтэ̄т ю̄ныгтастэ. Альварадо ринг янытыл тыглетувле тотыглаӈкв патвес, ворил ты ве̄ритас. Ринг са̄мын такви минуӈкв ат ве̄рмыс, ань пуӈке сака торнувес, таима̄гыс ринг мо̄т са̄ме нупыл ё̄мыс. Тони Викс Альварадо э̄лаль каснэ урыл титыгластэ. Майк Альварадо э̄лаль алхатуӈкв воссыг ат ка̄сащас. Ма̄н то̄нт пуссын но̄хква̄лапасӯв, аквансыныгтахтым, аниглахтым «Русланчемпион» ро̄ӈхуӈкв та патсӯв. Раиса Алексеевна ос Татьяна Степановна ринг тӣврын Руслан палт во̄ввесы̄г. Тот о̄лнэ ма̄хум йильпи чемпион хум янытласыт. Пуссын ла̄ве̄гыт: «Чемпион э̄нтап Руслан Проводниковын хосат миӈкв э̄рыс». Касыл юипа̄лт Руслан янытлаӈкве ма̄н таве кон ӯрыслӯв. Хунь тав ма̄хманэ ёт конква̄лыс, ма̄н ё̄р ка̄тыӈ хумиюв э̄лыпа̄лт ма̄ньщи хум йӣкв йӣквсӯв. Тох ты ма̄н, нёлолов хо̄тпа, Руслан Проводников, йильпи чемпионув, янытлан ма̄гсыл яныг ща̄рщ ӯлтта Американ ялсӯв.

1063 2013.11.08. Светлана РОМБАНДЕЕВА

Школат рӯпитан нэ̄. Белоярский район Полноват па̄вылт акв ка̄ркам, сэ̄ръёр ма̄ньщи нэ̄ о̄лы, Надежда Ивановна Слинкина, а̄ги о̄парищ наме Хозумова. Школат тав ва̄т нупыл нёлолов та̄л рӯпиты, рущ ла̄тыӈ ос литература урок ня̄врамытн ханищты. Тав Саранпа̄вылныл о̄лы, тот самын патыс, яныгмас. Школа а̄стламе юипа̄лт Тобольск ӯсн минас, тот Д. И. Менделеев нампа институтт ханищтахтас. Институт а̄стламе юипа̄лт Полноват па̄вылн рӯпитаӈкве ке̄твес. Тот хум ва̄рыс, о̄йкатэ Александр Вячеславович. Кит ня̄врам о̄ньще̄г, а̄гитэ̄н Ольга, пыге̄н Евгений. Ня̄врамаге̄н школат ёмащакв ханищтахтасы̄г, школа а̄стламе̄н порат со̄рни металил майвесы̄г. Ма̄нь таквс э̄тпос хо̄тхуйплов хо̄талэ̄т Надежда Ивановна атпан та̄лэ то̄влыс. Намхо̄талэ кастыл таве̄н ма̄н са̄в ёмас, сымыӈ ла̄тыӈ ла̄ве̄в. Пус ка̄т, пус ла̄гыл, со̄тыӈыщ, щуниӈыщ вос о̄лы! Хурит Надежда Ивановна э̄щаге ня̄врамыг ёт по̄слым о̄лы. Рӯт ма̄хманэ.

1063 2013.11.08. Валентина УЗЕЛЬ Валентина Васильева

Хурит по̄слуӈкв ханищтаве̄сыт. Округувт ма̄ньщи ос ханты ма̄ньлат ма̄хманув организацияныл рӯпиты, рущ ла̄тӈыл тох ла̄ваве – молодёжная организация обскоугорских народов ХМАО-Югры. Кӯщаиг тот ка̄ркам ханты а̄ги Надежда Молданова о̄лы. Ювле хультум э̄тпост та̄н ка̄тыл хури по̄слын ма̄хум Ханты-Мансийск ӯст акванатыгласаныл, ханищтап та̄н ма̄гсыланыл ва̄рыгласыт, «Человек рисующий» тох намаясаныл. Ха̄льӯс, Белоярский, Сургутский районныл хурит по̄слуӈкв ха̄снэ ма̄хум тув ёхталасыт. Та̄н са̄всыр ма̄тт рӯпитэ̄гыт, художникнам нэ̄мхотьют ат о̄ньщи. Та̄нти ла̄щал матыр по̄слэ̄гыт, то̄ванакт хурияныл ловиньтан нэ̄пакытн ва̄равет. Та̄наныл хури по̄слуӈкв ханищтан ма̄гыс ань акв ё̄рн хум во̄выглавес, тав наме – Леонид Лар. Тав мирн ва̄нэ художникхо̄тпаг о̄лы. По̄слум хуриянэ са̄всыр выставкат суссылтавет, мо̄т хо̄н ма̄н тотыглавет. Леонид Ямал ма̄т самын патыс, тот яныгмас. Ща̄нягеа̄щаге сас ё̄рныг о̄лсы̄г. Ма̄ниг о̄лме порат тав такви ляпа рӯтанэ ёт ялпыӈ ма̄н ялантас, ма̄хманэ хумус пӯрлахтасыт, ня̄йт хо̄тпат хумус кайсыт, пуссын сунсыс. Тав школат ханищтахтаме̄т ща̄ньа̄щ та̄л хультыс. По̄слуӈкв ул ёмащакв ха̄сыс, таима̄гыс Москва ӯсн училищан ханищтахтуӈкв те̄твес. Рӯпитаӈкв юв ёхтыс, Салехард ӯст ня̄врамыт ханищтасанэ. Тувыл Тобольск ӯсн минас. Тот ханищтахтуӈкв а̄стламе юипа̄лт, тув о̄лмыгтас. Тобольский педагогический академият хусахтем та̄л преподавателиг рӯпиты, лекцият ловиньты. Та сыс наука рӯпата ва̄руӈкв патыс, кандидат нам о̄ньщи. Тав «шаманизм» тэ̄лал пӯмщалахты. Ты урыл са̄в научный нэ̄пак хансыс. Рӯпитанэ̄тэ сыс хурит акваг по̄слы. Хуриянэт такви ё̄рн ма̄хманэ, та̄н о̄лупсаныл, са̄всыр ялпыӈ ва̄рмалит по̄слы. Тобольск ӯст рӯпитаӈкв о̄вылтахтаме порат тав юв командировкан те̄твес. Наука рӯпататэ ва̄рнэ ма̄гыс, таве̄н ня̄йт хо̄тпа хо̄нтуӈкв э̄рыс. Ня̄йт хо̄тпа тот хо̄нтыс, та хо̄тпа таве̄н ла̄выс, ты ве̄сар ва̄нэ ма̄гыс мощ ханищтахтуӈкв э̄ри. Ямал ляпат Лӯи щарыщ нупыл тумп о̄лы, ла̄ваве – Белый остров. Та тумп ё̄рн ма̄хум ма̄гсыл сака ялпыӈыг о̄лы. Тув ты Леонид ня̄йт хо̄тпан те̄твес, тэ̄нутыл ёт щар ат майвес. Ла̄ввес, тит са̄т тот вос о̄лы, тэ̄нут такви вос тинсы. Ань атхатыглам мир нупыл хум ты урыл тох ла̄выс: «Тит са̄т тот о̄лмум сыс ам ка̄тыл хӯл пувсум. Со̄ль, хо̄тпа тэ̄та̄л о̄лнэ̄тэ порат номсахтуӈкв мо̄т щирыл паты, о̄лупсатэ о̄с щар мо̄т щирыл мины. Амти На̄янум, амти О̄тыранум нупыл акваг по̄йкщасум. Аквтуп тот матарын ёхталаве̄сум. Хо̄таланум ювле хультсыт, ам ювле ня̄йт о̄йка палт та ёхтысум. То̄нт ам койп ка̄тын виӈкв та̄ртве̄сум. Тав а̄нумн такви койпе ат мистэ, ла̄выс амти ма̄гсылум койп амти вос ва̄ре̄гум. Тох ты койп ра̄туӈкв та̄ртве̄сум». Хус арыгтем та̄л сыс ты хум ё̄рныт о̄лнэ са̄всыр ма̄н ялантас – Архангельский областьн, Красноярский крайн. Тот о̄с ня̄йт ма̄хум ёт хо̄нтхатыглас. То̄ват тав ётэ ва̄щинтахтуӈкв ос потыртаӈкв ат ка̄сащасыт. Леонид тох ла̄выс: «Ат ро̄внэ ма̄н ам нэ̄мхуньт ат ялсум. Яныг ма̄хум ла̄тӈын хӯнтлысум ос ань тыг мус хӯнтлэ̄гум». Са̄всыр ма̄т яласым, тав ялпыӈ ма̄т хурин по̄слыянэ. Ань та хурит мирн суссылтасанэ. Ань ты о̄лум ханищтапт тав ма̄хум ка̄тыл хурит по̄слуӈкв ханищтасанэ. Тувыл ты хурит акванатавет ос нэ̄пакыг тах ва̄равет.

1063 2013.11.08. Николай МЕРОВ

Лӯима̄ касылыт э̄лаль тотавет. Округувт са̄всыр мирыт аквъёт юртыӈыщ о̄лнэ кастыл, ма̄нь таквс э̄тпос 21-25 щислат Сургутский район Солнечный ос Белый Яр па̄влыгт ня̄врамыт ма̄гсыл каснэ ва̄рмаль ва̄рыглавес. Рущ щирыл ты тэ̄ла «Зимние первенства по северному многоборью» ла̄ваве. Ты ва̄рмаль Ханты-Мансийский округт «Этнос» нампа соссаӈ мирыт каснэ колт рӯпитан ма̄хум та̄н щё̄пита̄лсаныл. Кӯщаиг тот Олег Андреевич Хатанев, ма̄ньщи хум, рӯпиты. Сургутский район янытыл касыл кӯщаиг Григорий Николаевич Рабий о̄лы. Тав Молдавия ма̄т самын патыс. Школат ханищтахтаме порат пыгрищит ёт пе̄рщуӈкве ялантас. Ты ва̄рмаль щирыл «мастер спорта» намыл майвес. Сургут ӯсн 1978 та̄лт комсомольский путевка щирыл ёхтыс. 1983 та̄лт ты каснэ тэ̄лан минас. Ань ва̄т та̄л ня̄врамыт ты каснэ ва̄рмальн ханищтыянэ. Тав ты урыл а̄нумн мощ потыртас: Тамле касыл ма̄н ва̄тихал ва̄рыглэ̄в. Ка̄сыӈ та̄л са̄всыр па̄влытныл, ӯсытныл ня̄врамыт акванатыглыянӯв. Хотьютаныл ка̄ркамнувег о̄лэ̄гыт, тыт та̄н ё̄раныл а̄рталэ̄гыт. Ты сака э̄рнэ касыл, та̄л сыс кит щёс щё̄пита̄лылӯв. Таквсы порат ня̄врамыт Солнечный па̄вылт касэ̄гыт. Тӯяг ос Нижневартовский район Излучинск па̄вылн тотыглыянӯв. Тот о̄с акв тамле каснэ кол та̄стым о̄лы. Ты ва̄рмальн маныр э̄ри, пуссын ёмщакв щё̄питэ̄в. Ня̄врам хотум ул вос е̄мтыс, каснэ коланувт ле̄ккарыт рӯпитэ̄гыт. Посыӈ, лощит колнакыт та̄н э̄т хӯлэ̄гыт, ёмщакв ӯщлахтэ̄гыт. Хо̄тыл сыс хӯрум щёс тэ̄нутыл тыттыянӯв. Ня̄врамытн тыт касуӈкве сака мӯсты. Та̄н тыг яныг ща̄гтыл ёхталэ̄гыт. О̄выл щёс ёхталам ня̄врамыт ань ка̄ркамнувег ос та̄ксарыг е̄мтсыт. Каснэ колт ня̄врамыт мӯсхал щирыл пирмайтыянӯв ке, та̄н номтаныл ёмасыт, касыл порат но̄хпатнэ̄ныл ма̄гыс та̄н са̄в ё̄р пинэ̄гыт. Ань таквсы касылн 12-13, 14-15, 16-17 та̄л яныт ня̄врамыт ёхталасыт. Тувыл ос акв тамле пӯмащ о̄лы, таквсы касылн ёхталан а̄гит та̄н пыгыт ёт аквте̄м касэ̄гыт. Таима̄гыс таквсы порат щар ё̄р, та̄ксар ня̄врамыт тыг тотыглавет. Ма̄н ка̄сыӈ та̄л ат ва̄рмаль щирыл касыл ва̄рыглэ̄в. О̄выл ва̄рмаль: кит ла̄глыл хӯрум щёс э̄лаль порыгме̄гыт – ты сака та̄рвитыӈ касыл. Ка̄сыӈ ня̄врам тох порыгмаӈкве ат ве̄рми. Ань Магадан ӯсныл о̄лнэ хо̄тпа 11 метра 81 сантиметра рекорд ва̄рыс. Э̄рыӈ иӈ хоса нэ̄мхотьют тыгыл са̄внув порыгмаӈкве ат ве̄рми тах. Китыт ва̄рмаль: йӣво̄выл ёт ха̄йтэ̄гыт, таве мо̄танынмо̄танын таве майлыяныл. Ма̄ньнув ня̄врамыт акв ве̄рыста ха̄йтэ̄гыт. Яныг ня̄врамыт халт а̄гит кит ве̄рыста, пыгыт хӯрум ве̄рыста ха̄йтэ̄гыт. Хӯрмит ва̄рмаль: са̄грап па̄хвтаве. Йис потыр щирыл, пе̄с ма̄хум ма̄к тамле са̄грапыл во̄раяӈкве ялантасыт. Ка̄ркам хо̄тпат тыламлан манос вит тармыл уйигтан товлыӈ ӯйит алыщласыт. То̄ванакт тамле са̄грап вущкасым янгуй манос са̄лы алыгласыт. Ӯй та̄кыщ ке хо̄яве, э̄л минуӈкве ат ве̄рми. Во̄раян хо̄тпа таве лё̄ӈхе хосыт юил коитэ, тыщир нё̄выль ка̄тын ты паттыгласыт. Нилыт ва̄рмаль: тыньщаӈ па̄хвтаве. Ты о̄с сака пӯмащ касыл, ня̄врамытн сака э̄руптаве. Атхуйпловкем метран э̄лнув сув тӯщтаве, тыньщаӈыл та йӣв ре̄пыгтаӈкве э̄ри. Ты касылт са̄лыӈ колт яныгман ня̄врамыт та̄н щар ма̄щтырыг па̄хвтэ̄гыт. Ты а̄ти, рущ, хатань, молдован, украинец ня̄врамыт халт са̄в ма̄щтыр хо̄тпа о̄с о̄лы. Та̄н ань ос тыньщаӈ ёмщакв па̄хвтуӈкве ханищтахтасыт. Ань о̄лум касылыт тыньщаӈ па̄хвтынэ̄ныл порат соссаӈ ня̄враманув о̄выл хӯрум местан ат ликмысыт. Ма̄ньнув ня̄врамыт халт тай ос Русскинские па̄вылт о̄лнэ ханты пыгрищит но̄хпатсыт. Атыт ва̄рмаль: сун ӯлтта поргын касыл. Тот щар ё̄р хо̄тпат о̄выл местат вуйлэ̄гыт. Ты щирыл ловиньтаве, команда хоты места выг. Ка̄сыӈ хо̄тпа ва̄гтэ, тав манаса̄вит балл о̄ньщи. Хо̄тпа поргын порат сун ла̄глыл хо̄илтытэ манос акв ла̄глэ но̄ха̄лмаитэ ке, касыл та̄ра ёлпо̄илттаве. Таима̄гыс ты касылт сака ӯргалахтым поргуӈкве э̄ри. Хоты команда са̄внув щёс сун ӯлтта порыгми, та̄н но̄х та патэ̄гыт. Ты каснэ ва̄рмаль хо̄тал палыт мины. Хо̄тпа поргынэ̄тэ порат са̄в ё̄р, номт пины. Туп ха̄снэ щирыл поргын хо̄тпат но̄хпатэ̄гыт. Ань ты накт ма̄нь ня̄врамыт халт акв пыг китса̄т хус щёс сун ӯлтта порыгмас. Яныгнув ня̄врамыт халт пыг атса̄т хус щёс, а̄ги ниласа̄т акв щёс сун ӯлтта порыгмасы̄г. Ня̄врамыт ла̄внэ̄ныл щирыл, колкан ат а̄ртми, поргуӈкве та̄рвитыӈ, са̄внув щёс порыгмаӈкве кос ро̄выс. Тыгыл э̄лаль ты каснэ ва̄рмальт хотьютаныл но̄хпатсыт, 16-17 та̄л яныт ня̄врамыт халт щар та̄ксар ат пыг, нила а̄ги вивет, я̄нас команда щё̄питаве. Та̄н э̄лаль Краснодарский крайн Россия касылн ма̄н округув ма̄гыс касуӈкве минэ̄гыт тах. Ня̄врамыт тув ликмуӈкве сака таӈхе̄гыт. Таима̄гыс ва̄гтал патнэ̄ныл мус та касэ̄гыт. Тот о̄с аквтох ат ва̄рмаль щирыл касыл е̄мты тах. Григорий Николаевич ма̄щтыр нам о̄ньщи. Тав Россия янытыл рекордсменыг о̄лы. Ты касылн ханищтахтуӈкве Солнечный па̄вылт о̄вылтахтас. Ка̄сыӈ хотал Сургут ӯсныл такви касуӈкве тув ялантас. Ань тав тот кӯщаиг рӯпиты. Ты ва̄рмаль та̄л сыс акв щёс Сургутский районт школат халт ва̄рыглаве. Ань Сургутский район янытыл ниласа̄т арыг ня̄врам ты касылн ялантэ̄гыт. Ты сака ёмас тэ̄ла, ня̄врамыт лӯима̄ мирыт касылыт э̄лаль тотыяныл. Тувыл ос касыл оигпаме юипа̄лт Олег Андреевич тув ёхталам ня̄врамыт пуссын янытласанэ. Но̄хпатум а̄гитпыгыт пуссын ма̄гылн тагатан по̄сыл мисанэ. Ос ма̄к яныг кубок Нефтеюганский районныл ёхталам ня̄врамыт висаныл, та̄н та̄ксарнувег кассыт, о̄выл места висыт. Котиль кубок ос Сургутский район вис, та̄н китыт ме̄стан е̄мтсыт. Ма̄нь кубок ос Ханты-Мансийск ӯсныл ёхталам ня̄врамыт юв тотсаныл, та̄н хӯрмит местан патсыт.

1063 2013.11.08. Тамара МЕРОВА

Канащиг о̄лум Молтан о̄йка рӯтанэ. «Торум Маа» музейт рӯпитан хо̄тпат «История семьи в истории страны след прожитой жизни» нампа проектаныл щирыл э̄лаль рӯпитэ̄гыт. Та̄н ань Молданов яныг рӯт урыл йильпи суссылтап щё̄питасыт ос таве «Хранители Казымской богини» намтсаныл. Ань Ханты-Мансийскат Молдановыт музейн акванатыглаве̄сыт, тот та̄н та̄нки пе̄с рӯтаныл о̄вылтыт ос та̄нки урыл потыртасыт. Касум ма̄т XIV нотыт Молтан нампа канащ хум о̄лум. Ты урыл Ольга Кравченко (Молданова) пе̄с нэ̄пакытт потыр хо̄нтум. Тот 1483-1485 та̄лытыт канащаныл ёт о̄лыглам ва̄рмалит хансым о̄лсыт. Тувыл «Югра» телерадиокомпания та йис ва̄рмалит о̄с та̄рапаттысаныл ос та̄наныл «Фамилии Югры» программа ма̄гыс кинан по̄слысаныл. Та кина ань мӯй ма̄хумн суссылтавес. Мо̄т пе̄с нэ̄пакт тамле ля̄ххал хо̄нтсыт: «1782 та̄лт Юильск па̄вылт Молданов о̄парищ намыӈ 11 хум ос 11 нэ̄ хо̄тпат о̄лсыт». Са̄тпан арыгкем та̄л ювлехультум порат тамле о̄парищ намыл 74 э̄лумхо̄лас ловиньтавес. 1990 та̄л па̄сныл Татьяна Александровна Молданова рӯт ма̄хманэ пуссын акванхансуӈкве патсанэ. Ань тав яныг рӯтэ пуссын нэ̄пакло̄псын хансыстэ. Тот са̄т аква̄рт Молдановыт акванатым о̄лэ̄гыт. Ниласа̄т арыгкем хо̄тпа наманыл тув хансымат. Та̄н Югра ос Ямал ма̄н ла̄кквао̄лмыгтамыт ос то̄ват мо̄т о̄парищ нам о̄ньще̄гыт, тыи Вагатовыт, Вэнку, Лозямовыт, Кетовыт, Рандымовыт, Сенгеповыт, Тарлиныт, Тасьмановыт, Тоголмазовыт, Шугановыт. То̄ваныл иӈ та̄ра ат паттыяныл, ты рӯпататэ Татьяна Александровна тах э̄лаль тотытэ. Ты яныг рӯт ма̄хумныл то̄ват хӯл алыщлэ̄гыт, во̄рае̄гыт, са̄лы янмалтэ̄гыт, то̄ват ня̄врам ханищтэ̄гыт, ма̄хум пусмалтэ̄гыт, ханты культура ос наука ма̄гыс са̄в тэ̄ла ва̄ре̄гыт. Репрессия та̄лыт порат то̄ва хум хо̄тпаныл порславе̄сыт, мо̄тананыл хо̄нтлуӈкве тотве̄сыт. Ань музейн ёхталам Молдановыт халт ка̄сыӈ хо̄тпа такви уре̄тыл ос ще̄мьятэ урыл потыртас. Татьяна Александровна ос Тимофей Алексеевич история наукат сас кандидат нам о̄ньще̄г. Тэ̄н ханты пе̄с йис накыт ханищтэ̄г ос нэ̄пакыт хансэ̄г. Ольга Кравченко а̄ще, Александр Михайлович Молданов, урыл потыртас. Тав «Казымский» нампа совхозт бухгалтерыг рӯпитас. Суссылтапыт пе̄с хурит сунсыгласанӯв, ты то̄ва хурит а̄ще̄н по̄слымат. Хурит коныпал выставкат мо̄т са̄всыр пормасыт суссылтаве̄сыт. Тыи пуссын та̄н рӯт ма̄хманылн ва̄рим пормасыт. Нэ̄ хо̄тпат ма̄щтырыг маснут ю̄нтэ̄гыт, сак хартэ̄гыт, хум хо̄тпат йӣвныл матыр ёрге̄гыт. Мария Кузьминична Волдина ос Ульяна Николаевна Шульгина ты рӯтныл о̄лэ̄г, мо̄лал тэ̄н ты музейн тэ̄нки ю̄нтум хорамыӈ супанэ̄н, лэ̄пта мӯйлуптасы̄г. Ульяна Николаевна ань Молданов рӯтанэ ма̄гыс такви э̄ргаге э̄ргысаге. Любовь Федоркив, Ирина ос Надежда Молдановыг о̄с та̄нки ща̄ньа̄щаныл урыл потыртасыт. Любовь «Лылынг союм» нампа колт ос Ирина технологопедагогический колледжит ня̄врамыт ханищтэ̄г, Надежда соссаӈ ма̄хум культура колт рӯпиты. Молдановыт та̄нки халанылт э̄руптахтым о̄лэ̄гыт, нэ̄мхотьютаныл о̄вылтыт ат ёрувлэ̄гыт. Ань акваннё̄тхатым рӯтаныл нэ̄пакын э̄лаль хансуӈкве тах патыяныл. Ты хурит Ханты-Мансийскат о̄лнэ Молдановыт по̄слысанум.

1063 2013.11.08. Тамара МЕРОВА

Йис потрыт, э̄ргыт рущ ла̄тӈыл хасве̄сыт. Юван Шесталов хуньт о̄вылтам рӯпататэ рӯтанэ̄н ос руманэ̄н э̄лаль ва̄раве. Ань та̄н «Именитые богатыри обского края» нампа китыт нэ̄пак та̄ратасыт. Аквта щирыл намаим о̄выл нэ̄пак 2010 та̄лт та̄ратавес. Та нэ̄пак та̄ратан ма̄гыс лӯима̄ ма̄хум департаментныл олныл та̄стыглаве̄сыт. То̄нт потрыт Юван Николаевич такви щё̄питасанэ. Ос ма̄ньщи На̄й-О̄тыранув урыл пе̄с йис потрыт, мо̄йтыт рущ ла̄тӈын толмащлаӈкве кит ма̄ньщи нэ̄ хо̄тпаг нё̄тсы̄г, тыи Светлана Динисламова ос Альбина Мехнина. Рущ потрыт ёт э̄лаль Ирина Рябий, Вадим Орлов (Югорский университетт рӯпитан хо̄тпаг) ос Герман Ионин (Санкт-Петербург ӯсныл) рӯпитасыт. Та̄нанылн Юдит Дмитриева нё̄тыс. Тав ЮГУт венгерский ла̄тыӈ ханищтан нэ̄г рӯпитас. Хунь ма̄ньщи потрыт рущ ла̄тӈын та̄рвитыӈ толмащлаӈкве о̄лыс, Юдит тав о̄влэ̄т венгерский ла̄тӈыл хансым потрыт ловиньтасанэ, ос та юипа̄лт рущ ла̄тӈыл потыртасанэ. Тох ма̄ньщит, рущит ос венгр нэ̄ халанылт хӯлтыглахтым потрыт ёмщакв хассаныл. Ань таима̄гыс «Именитые богатыри обского края» нампа нэ̄пакыг хӯрум ла̄тӈыл хансым о̄лэ̄г. Ты пе̄с потрыт, мо̄йтыт Антал Регули ос Бернат Мункачи, венгр учёный о̄йкагн, хуньт ма̄ньщи ма̄хумныл атве̄сыт. Тувыл 1892-1921 та̄лыт сыс та̄н венгерский ла̄тӈын толмащлаве̄сыт ос нила нэ̄пакыг ва̄рве̄сыт. Ётыл 1952 ос 1963 та̄лытт Бела Кальман, венгр учёный хум, то̄ва потрыт немецкий ла̄тӈыл хассанэ ос кит нэ̄пак та̄ратас. Та нэ̄пакыт урыл са̄всыр учёныит пӯмщалахтэ̄гыт. Рущ ла̄тӈын та̄н нэ̄мхотьютн ат толмащла̄лве̄сыт. Хосат венгрыт Бернат Мункачи хансум нэ̄пакыт Юван Шесталовн мӯйлуптасыт. Та па̄сыл тав ма̄ньщи пе̄с потрыт рущ ла̄тӈыл хассанэ. Ань тав о̄вылтам рӯпататэ тахольт аквта руманэ̄н, рӯтанэ̄н э̄лаль тотаве. Та̄н китыт нэ̄пак ущты та̄ратасыт. Тот редакторыг Вадим Орлов о̄лы. Ты та̄л Светлана Селивёрстовнан ос Альбина Николаевнан ма̄н ма̄ньщи учёный хо̄тпав Анастасия Ильинична Сайнахова нё̄тыс. Тувыл потрыт Динара Саидовна а̄гитэ̄н пуссын ищхӣпыӈ утын печатайтаве̄сыт. Ты нэ̄пакыгн потрыт, тув по̄слым хансат Ирина Семёнован ёмщакв щё̄питаве̄сыт. Китыт нэ̄паканыл ма̄гыс ма̄хманув округ па̄лыл олныл нё̄тве̄сыт. Ты рӯпатаныл та̄н соссаӈ ма̄хум культура ӯргалан ос но̄хво̄рмалтан проект хосыт ва̄рсаныл. Ма̄ньщи пе̄с йис потрыт кит щёс рущ ла̄тӈыл нэ̄пакыгт хансым о̄лэ̄гыт. О̄влэ̄т потрыт Светлана Динисламован рущ ла̄тӈыл хумус толмащлаве̄сыт, та щирыл хасве̄сыт. Та̄н рущ щирыл «подстрочный переводыг» ла̄вавет. Ос та юипа̄лт ты потрыт «литературный переводыг» рущ хо̄тпатн ёмащакв щё̄питаве̄сыт. Тох рущ ма̄хум о̄выл нэ̄пакт А̄скотиль о̄йка, Аяс-То̄рум тэ̄рниӈ э̄рге, тав мо̄йтанэ ос Ларӯс о̄тырыт тэ̄рниӈ э̄рыг ловиньтаӈкве ве̄рме̄гыт. Ань йильпи та̄ратым нэ̄пакт та̄н Мир-Суснэ-Хум, Э̄квапыгпыгрищ тэ̄лум мо̄йт, Мир-Суснэ-Хумто̄румпыг яныгманэ э̄рыг, тӯрхотаӈ, А̄схотаӈвойкано̄тыр, Та̄гтталих о̄йка тэ̄рниӈэ̄рге вос ловиньтэ̄гыт. Ма̄ньщи пе̄с мӯтрат та̄рапаттыяныл. Пуссын ты ма̄хмытын ма̄н яныг пӯмащипа ла̄тыӈ ке̄тэ̄в. Та̄н э̄лаль о̄лнэ са̄в нот кастыл сака э̄рнэ рӯпата ва̄рсыт. XVII-XX нотыт о̄лум венгр, финн учёныит мӯсхалыг ва̄рум рӯпатаныл щирыл ма̄ янытыл ва̄вет. Ань ты рущ нэ̄пак ва̄рум хо̄тпанув аквтох вос ва̄ве̄т, та̄н о̄с та̄рвит рӯпата ва̄рсыт. Ам номсыке̄мт, та̄н наманыл хуньт тах суиӈыг е̄мтэ̄гыт.

1063 2013.11.08. Светлана РОМБАНДЕЕВА

Нэ̄пак ловиньтан колнак. Ха̄льӯс район Кульпас па̄выл школат нэ̄пак ловиньтан колнак о̄лы. Кӯщаиг тот Елена Анатольевна Вовк рӯпиты. Школан щалтсамум порат ам ты нэ̄ ёт потрамасум, рӯпататэ урыл китыглахтасум, на̄н ань тав потре ловиньтэлы̄н: Йильпи нэ̄пакытыл ма̄н мо̄рсыӈыщ тотыглаве̄в. Ня̄врамыт ловиньтанэ̄ныл ма̄гыс торыӈ нэ̄пак а̄тим, колнакувт янгыщ ань пе̄с нэ̄пакыт о̄лэ̄гыт. Ка̄сыӈ та̄л ма̄н па̄выл яныт мирн ла̄выглэ̄в, ань хотьют юн арыг нэ̄пак о̄ньщи те, манос хотты нэ̄паке са̄ль а̄ти те, ма̄н палтув вос тотытэ. Сакати ты нэ̄пакыт ня̄врамыт ловиньтэ̄гыт. Ань май интернет нампа ищхӣпыӈ ут о̄лы, та ут та̄ра ма̄н са̄в ма̄хум ёт потраме̄в, халанувт пищма хансэ̄в. Акв хум ёт потыртахтасӯв, тав ма̄навн нэ̄пак ке̄туӈкве ла̄выс. Соссаӈ ма̄хум литература о̄с сака мощща, нэ̄пакыт пуссын пе̄сыт. Ань йис ня̄врамыт ловиньтан нупыл тэ̄ланыл сака пыл а̄ти, юн са̄всыр компьютерт ман интернет о̄ньще̄гыт, номтаныл тувле нупыл мины. Тыт ханищтахтан ня̄врамыт ёт ма̄н са̄всыр конкурсыт ос выставкат ва̄рыглэ̄в. Тӯяг ма̄н С. Я. Маршак хансыглам «Кошкин дом» потре щирыл спектакль суссылтасӯв. Ня̄врамыт ёт ам акваг рӯпитэ̄гум ка̄тыл са̄всыр хурит по̄слэ̄в, библиотечный урокыт ва̄рыглэ̄в. Ты коныпал интернет хосыт ма̄н са̄всыр олимпиадатт ос Россияв янытыл ва̄рыглан конкурсытт участие пирмайтэ̄в. Та̄н туп ловиньтаӈкве вос тахнувыт, нэ̄пак хаснэ ма̄хум наманыл вос ва̄нувыт. Кит а̄гирищиг, Ксюша Черникова ос Лолита Солкуцан, а̄нумн акваг нё̄тэ̄г, библиотечный советн ёхталэ̄г. Пе̄с нэ̄пакыт хотманыгтахтам ма̄наныл э̄льмыл акванханлыянув, лолтал пиныянув. Елена Анатольевна о̄йкатэ наме Андрей Михайлович. Кит ня̄врам о̄ньще̄г а̄гитэ̄н нёлоловхуйплов та̄лэ, пыге̄н хӯрумхуйплов та̄лэ. Ма̄ньнув э̄ще о̄с Кульпаст о̄лы, хӯрум ня̄врам о̄ньщи. Яныгнув э̄ще самын патум ма̄нанылн ювле минас, тот о̄йка ва̄рыс, о̄с хӯрум ня̄врам янмалты. Ты хӯрум яга̄гит иӈ ма̄ниг о̄лманыл порат оманыл ёт Кульпасн ва̄нтлысыт, а̄ги о̄парищ наманыл Скитёва. Та̄н Свердловский область Асбест ӯст самын патсыт, тот о̄лсыт. Оманыл хотталь щалтме ат та̄лыг ты е̄мтыс. Сака ёмас, хо̄тпа нупыл сымыӈ э̄ква о̄лыс, Кульпас па̄выл ла̄пкат са̄в та̄л рӯпитас. Елена Анатольевна тамле ёмас, каркам нэ̄. Школат тав ня̄врамытын э̄руптаве, тав ётэ матыр ва̄руӈкве та̄нанылн пӯмыщ. Ты я̄тил нэ̄те̄в кӯщаянэ̄н вос нё̄таве, са̄в ёмас нэ̄пакыл вос тотаве. Ще̄мьятэ ёт пуста̄гыл вос о̄лы, пус ка̄т, пус ла̄гыл! Хурит Ксюша Черникова, Елена Анатольевна ос Лолита Солкуцан по̄слым о̄лэ̄гыт.

1063 2013.11.08. Тамара МЕРОВА

Лӯима̄ мир сунсуӈкве ёхталэ̄н. Ханты-Мансийскат Ма̄вит ос Э̄лумхо̄лас нампа музейт са̄всыр суссылтапыт щё̄питым о̄лэ̄гыт. То̄ват аквписыг тот рӯпитэ̄гыт, пе̄с йис порат о̄лум ӯйхулыт, соссаӈ ма̄хум пе̄с о̄лупсаныл ос нё̄р а̄хвтасыт суссылтавет. Мо̄т выставкат йильпииг ва̄равет, та̄н китхӯрум э̄тпос юипа̄лт мо̄т ӯсн э̄лаль тотавет. Ань ты музейт «Путешествие по Северу» нампа суссылтап ва̄рвес. Тув щалтнэ ма̄хум тот са̄всыр по̄слым хурит ка̄салэ̄гыт. Хурит 1970-1986 та̄лыт порат по̄слуве̄сыт. Са̄выӈпа̄лэ сэ̄мыл хаснэйӣвыл по̄слым хурит о̄лсыт кос, ос лӯима̄ ма̄хум о̄лупсаныл та та̄лыт порат хумле о̄лыс, пуссын та̄н тэ̄ланыл ма̄щтырыг ос сака нё̄тнэ̄г та хурит сусхатэ̄гыт. Хурит по̄слум хо̄тпат С. В. Смирнов, К. Б. Назаров, Э. С. Сивцев, В. Н. Петров-Камчатский, М. А. Рахлеева соссаӈ ма̄хум палт Архангельский областин, Бурятиян, Чукоткан, Якутиян, Красноярский е̄рн ос Ненецкий автономный округын ялсыт ос тот рӯпитасыт. Хосат та̄н по̄слум хурияныл «РОСИЗО» нампа Москват о̄лнэ центрын ёвтве̄сыт ос тувыл са̄всыр музеитытн ла̄кквауртве̄сыт. 2010 та̄лт то̄ва хурит Ханты-Мансийскан тотве̄сыт ос Ма̄вит ос Э̄лумхо̄лас музейн мӯйлуптаве̄сыт.

1063 2013.11.08. Валентина УЗЕЛЬ

Халувт юртыӈыщ вос о̄лэ̄в. Яныг таквс э̄тпос 4 хо̄талэ ялпыӈ хо̄талыг о̄лы, рущ ла̄тӈыл тох ла̄ваве – День народного единства. Ань са̄всыр мирыт халанылт юртыӈыщ вос о̄лэ̄гыт, та хо̄талт та̄н акванатыглавет. Та̄нти маснутаныл, йӣкваныл, э̄рганыл мо̄т мирн суссылтыяныл. Ты хо̄тал кастыл Ханты-Мансийск ӯст «Югра многоликая» фестиваль ва̄рыглавес. Округув янытыл са̄всыр ӯсытт о̄лнэ национальный объединеният ма̄н ӯсувн пуссын во̄выглаве̄сыт. Са̄в ма̄щтыр хо̄тпат тот о̄с о̄лсыт. Соссаӈ ма̄хумныл ты та̄л тув акв ма̄щтыр хо̄тпа во̄выглавес, Шиянова Галина Токчевна. Тав ё̄рн э̄ква, ще̄мьяӈ та̄гыл са̄в та̄л тыт ӯсувт о̄лы. Тав са̄всыр сувенирыт, маснут ю̄нты. Са̄лы совныл ла̄гыл маснут, пӯркат ю̄нты. Тувыл тыналыянэ, тох мощ олн сэ̄лы. Мо̄т ма̄щтыр хо̄тпа Галина Молданова, тав ос «Лылыӈ союм» студия па̄лыл тув во̄выглавес. Та центрын ялантан ня̄врамыт ос тот рӯпитан ма̄хум ма̄ньщи ос ханты супыл ю̄нтыянэ, сакныл турло̄псыт ос пальсакыт харты. Тав сака ма̄щтырыг ю̄нсхатуӈкв ха̄сы, хораманэ татем ма̄ниг ю̄нтыянэ. Мо̄т мирныл тот хатань, азербайджан ма̄хум, рущ ос украина ма̄хум о̄лсыт. Ӯс кӯщаиг рӯпитан хум Василий Филипенко ос мо̄т кӯщаит тув ёхтуманыл порат та̄н ма̄гсыланыл азербайджан ня̄врамыт татем ёмащакв йӣквсыт. Ты фестивальн ёхталам ка̄сыӈ мир, ка̄сыӈ ма̄щтыр хо̄тпа янытлавес. Та̄н пуссын дипломнэ̄пакыл майве̄сыт. Та юипа̄лт концерт о̄лыс, мирыт та̄нти ща̄нь ла̄тӈыл э̄ргыт э̄ргысыт, йӣквсыт.

1063 2013.11.08. Тамара МЕРОВА

Ща̄гтым акванхо̄нтхатыгласыт. Саранпа̄выл школа рӯпитанэ̄тэ па̄сыл 111 та̄лэ то̄влыс. Тыса̄вит та̄лыт мо̄лал пе̄с документ хосыт та̄рапаттуве̄сыт. Тувыл школат рӯпитан хо̄тпат конференция ва̄руӈкве номылматсыт. Таве ма̄нь таквс э̄тпос о̄выл са̄тыт ва̄рыгласаныл. Наталья Михайловна Шиятая, Ханты-Мансийск ӯст искусство центрыт рӯпитан нэ̄, тув мӯйлуӈкве во̄выглавес. Ам таве мӯйлын тэ̄лат урыл мощ китыгласлум, на̄н потруме̄н э̄лаль ловиньтэлы̄н. – Саранпа̄вылн ялмум ма̄гыс ань тыг мус хотща̄гтым о̄лэ̄гум. Тот ам школат са̄тхуйплов та̄л ня̄врамыт английский ла̄тӈыл потыртаӈкве ханищтасанум. Ань хо̄тхуйплов та̄л Ханты-Мансийск ӯст о̄лэ̄гум, са̄всыр искусстван ханищтахтын ня̄врамыт ёт э̄лаль рӯпитэ̄гум. Ос ам та па̄сыл Саранпа̄вылн ат ялсум. Ма̄н ань тув хунь иссӯв ос товлыӈха̄пныл тӯйт тармыл ва̄глысӯв, кон ащирмаӈ о̄лыс. То̄нт Ханты-Мансийскат иӈ ма̄лтып о̄лыс, ос раквыс. Па̄выл щар мо̄тхурипаг е̄мтум, са̄в колыт ӯнттуве̄сыт. Йильпи яныг школа ам ка̄саласлум ос тув ща̄лтмум порат а̄нумн тот сака мӯстыс. Коланыл посыӈ, сыстам, пормасыт, нэ̄пакыт пуссын та̄нки э̄рнэ ма̄т о̄лэ̄гыт, иснасха̄пытт хорамыӈ лӯптат янмалтавет. Ня̄врамыт ханищтахтын пасананыл, уласаныл о̄с сыстамыт. Та щирыл школат рӯпитан кӯщаит та̄н ва̄рум ва̄рмаляныл оснпатэ̄гыт. Ам амки хосат та̄гыл школат рӯпитэ̄гум, ос ва̄глум, хумус ня̄врамыт хо̄та̄ти мори по̄слэ̄гыт, хансэ̄гыт. Тувыл ты ялпыӈ хо̄таланыл ма̄гыс пуссын ёмщакв щё̄питахтамыт. Саранпа̄выл школа а̄стлам хо̄тпат та̄ланыл щирыл я̄нас нэ̄пакло̄псын хансым о̄лсыт. Тот пуссын ханищтахтам ос са̄в та̄л рӯпитан ма̄хум хуритыт суссанум. Ялпыӈ хо̄тал ва̄рнэ яныг колнакт са̄в ма̄хум атхатсыт. Ам тот аквъёт рӯпитам ма̄хманум ёт хо̄нтхатсум, пуссын хотща̄гтсӯв. Та̄н наманыл газетат ла̄вуӈкве таӈхиянум, тыи М. А. Истомина, Н. К. Филиппова, Э. И. Артеева, Е. С. Квашнина, Н. Г. Рочева, Э. Н. Илюшникова, А. Е. Рокина, Н. Н. Сироткина, Е. Н. Артеева, Л. Я. Мотоусова. Валентина Александровна Кустышева ёт ётыл акванхо̄нтхатыгласме̄н, тав ла̄глэ сакватам. Мо̄т ханищтан хо̄тпанув Саранпа̄вылн ёхтуӈкве ат ве̄рмысыт. Сака са̄ль, та̄н уранылт о̄с потыртасӯв, ос паща ла̄тыӈ та̄нанылн ке̄тэ̄в. Тыи А. Б. Скрипниченко, Н. Ф. Денисова, Н. М. Кугаевская, А. Ф. Козельская, Л. М. Копыльцова ос мо̄таныт. Та̄н та̄нки о̄с яныг паща ла̄тыӈ хасмыт ос тув ке̄тмыт. Мо̄т хо̄тпат ке̄тум ла̄тӈаныл ос тот ловиньтаве̄сыт. Акванхо̄нтхатыглам порав сака ёмасыг минас, Дмитрий Георгеевич Агеев ханищтан ня̄враманэ сака нё̄тнэ̄г э̄ргысыт, йӣквсыт. Раиса Михайловна Капшук, Саранпа̄выл школа кӯщай ва̄ӈын э̄ква, ма̄навн пе̄с документнэ̄пак суссылтастэ ос са̄в та̄л сыс школат рӯпитам кӯщаит наманыл ла̄всанэ. Андрей Дмитриевич Попов, школа кӯщай хум, са̄в та̄л рӯпитан хо̄тпат пуссын э̄сгысанэ, мӯйлупсал мисанэ. Вера Павловна Комкова та̄н уранылт потыртас. Тувыл хосат школа а̄стлам ма̄хум та̄нки ханищтахтум та̄ланыл ка̄стысаныл. Та̄н потыртаманылт ищхӣпыӈ ут хосыт сыресыр хурит такталаве̄сыт. Пуссын «последний звонок» ялпыӈ хо̄таланыл, «зарница» ёнгиланыл сымыӈыщ номияныл. Тувыл ам рӯпитамум порат ханищтам ня̄враманум ёт хо̄нтлам хо̄тпат палт колсори рӯпата ва̄руӈкве ялсӯв. Школат ханищтахтам ос рӯпитам та̄ланув сака пӯмщиг о̄лсыт. Наталья Михайловнан яныг пӯмащипа ла̄тыӈ ла̄ве̄гум. Ма̄н, газетат рӯпитан хо̄тпат, о̄с Саранпа̄выл школа а̄стлысӯв, таве ялпыӈ хо̄талыл янытлылӯв.

1064 2013.11.22. Валентина УЗЕЛЬ Валентина Хозумова

Мирн пе̄риим хо̄тпат рӯпатаныл. Ты э̄тпос 7 хо̄талэ̄т округ Думат рӯпитан депутатыт акв хо̄тал сыс тит заседание ва̄рыгласыт. А̄лпыл та̄н атхуйплов кӯм (минута) сыс округув щар ма̄к яныг бюджетнэ̄паке пирмайтасаныл. Ань тув хансым олныт хосыт ма̄н э̄лы хӯрум 2014-15-16 та̄лыт сыс о̄луӈкв патэ̄в. Хо̄талъят юипа̄лта̄н титынтыг атхатыгласыт. Ва̄тахтем кӯм сыс атхуйплов са̄ккон пирмайтасыт. Ань то̄ва са̄ккон урыл я̄нас потыр хансэ̄в. Округ Думат са̄всыр партия па̄лыл депутатхо̄тпат рӯпитэ̄гыт. Ма̄к воритотнэ хо̄тпаг ЛДПР ма̄хум ловиньтахтэ̄гыт. Кос хоты са̄ккон пирмайтаве, та̄н акваг матыр по̄ри ла̄тыӈ ля̄галэ̄гыт. Ань ты заседание э̄лыпа̄л хо̄талт кӯщаит са̄всыр комиссиятт рӯпитасыт, та̄н ловиньтасыт – манах олн хӯрум та̄лн э̄рмыглы. То̄нт ЛДПР депутатыт сака ля̄втсыт, та̄н ты округ бюджет пирмайтаӈкве щар ат ка̄сащасыт. Мо̄тыт хо̄тал Дума заседаниятэ ты о̄лыс. Та̄н пуссын тув ат ёхтысыт. Ос ля̄льт ла̄внэ хо̄тпа хунь а̄тим, депутатыт рӯпатаныл сака молях ва̄рапияныл, атхуйплов кӯм сыс округ бюджет та пирмайтасаныл. Ань та̄н тамле олныл округув хассаныл: – 2014 та̄л – 166, 4 млрд. солко̄ви; – 2015 та̄л – 172, 3 млрд. солко̄ви; – 2016 та̄л – 178, 9 млрд. солко̄ви. Ос ань таи та̄рапатыс, «дефицитыг» ла̄внэ ва̄рмаль о̄с ловиньтавес. Сака са̄в олн тах ат то̄вылхаты: – 2014 та̄лт – 21 млрд. солко̄ви; – 2015 та̄лт – 20, 5 млрд. солко̄ви; – 2016 та̄лт – 15, 7 млрд. солко̄ви. ЛЕ̄ккарыт мА̄нь пА̄влытн вос минЭ̄гыт Ма̄нь па̄влыӈ ма̄т ле̄ккар ань ат то̄вылхаты. Ма̄хум институт ман училище а̄стланэ̄ныл юипа̄лт тув вос минэ̄гыт, ань та̄нанылн нё̄тнэ са̄ккон мо̄т щирыл хасвес. Ты э̄лыпа̄лт 35 та̄ланыл иӈ ат то̄влын ма̄хум туп та̄н нё̄тве̄сыт, ань ос та̄ланыл уральтаӈкв ат патавет. Ань кос хотьют ма̄нь па̄влыт рӯпитаӈкв те ка̄сащи, та̄н пуссын акв щирыл тах олныл ойтуӈкв патавет. Ле̄ккар хо̄тпат 1 млн. солко̄вил тах мивет, фельдшерыг ла̄внэ ле̄ккарыт – 500 со̄тырал миӈкв патавет. МА̄щтыр мА̄хум мА̄гыс сА̄ккон Ма̄н округувт са̄в ма̄хум сака ёмащакв ма̄щтырлаӈкв ха̄сэ̄гыт. Ань та̄наныл янытлан ма̄гыс йильпи са̄ккон хасвес, рущ ла̄тӈыл тох ла̄ваве – «О народных художественных промыслах в ХМАО-Югре». Тот тох хансым о̄лы, ань туп ма̄к ма̄ньщи ман ханты пормас ва̄рнэ хо̄тпа туп тав ма̄щтырыг ла̄вуӈкв патаве. Хотьют са̄всыр щирыл ма̄щтырлы, такви щире̄т пормасыт ю̄нты, тав тамле намыл миӈкв ат патаве. Ма̄ньщи мирув халт са̄в хо̄тпат «Народный мастерыг» ла̄вуӈкв кос э̄ре̄гыт. Ос та̄нанылн акваг са̄всыр выставкат ва̄руӈкв э̄ри, акв та̄л сыс са̄в пормас ман маснут ю̄нтуӈкв э̄ри. Та̄н ма̄нь па̄влытт о̄лыманыл нэ̄мхотталь ялуӈкв ат ве̄рме̄гыт. Тох э̄лаль та о̄лантэ̄гыт. Ань ты са̄ккон щирыл та̄н тах нё̄туӈкв ос янытлаӈкв патавет. Соссаӈ мА̄хум мА̄гыс олныт урыл Еремей Айпин титыглавес, соссаӈ ма̄хум программан манах олн хасвес. Тав ювлела̄выс, ка̄сыӈ та̄л туп 100 млн. солко̄ви ты программан миӈкв патаве, ты олнытныл 75 млн. солко̄ви колыт ма̄гыс тах миве. Э̄лаль тав ла̄выс: «На̄н ань на̄нти ловиньтэ̄н, 166 млрд. солко̄витныл 100 млн. солко̄ви, тыи манах процент са̄витыг е̄мты? Сака мощща». Тав потыртаме юипа̄лт Дума кӯщай хум Борис Хохряков ла̄выс, ты э̄лыпа̄лт тит та̄л ювле хультум порат ма̄ньщи ос ханты ще̄мьят кол ёвтнэ субсидияолн ма̄гыс 1 млрд. арыгтем солко̄ви майлувес, ты олныт о̄с ловиньтаӈкв э̄ри. Мо̄т ма̄хум о̄с аквтох ёмащакв нё̄туӈкв э̄ре̄гыт.

1064 2013.11.22. Тамара МЕРОВА

Пенсия урыл ва̄е̄н. Ты э̄тпос о̄выл щислат Россия янытыл Пенсионный фондыт рӯпитан хо̄тпат Министерство труда ос ма̄хум нё̄тмил ва̄рнэ кӯщай Максим Топилин ёт, статссекретарь Андрей Пудов ёт, Председатель Правления ПФР ва̄ӈын хо̄тпа Александр Кустин ёт видеоконференция хосыт потыртасыт. Ань пенсиян миннэ тэ̄лат йильпи щирыл ханищтаве̄сыт ос са̄кконыг щё̄питаве̄сыт. Россия Правительство па̄лыл та̄н о̄с уральтаве̄сыт. Ос 2015 та̄л о̄вылтахтын порат ӯщлахтуӈкве патхатам ма̄хум пенсияолнаныл йильпииг ловиньтаӈкве тах патавет. Ань пенсиян миннэ ма̄гыс ма̄хум рӯпитан та̄ланыл э̄лаль но̄хнё̄тавет, та̄н 6 та̄лныл 15 та̄лыт мус ва̄равет. Тыи ка̄сыӈ та̄лт рӯпитаӈкве ёхтум хо̄тпат та̄н рӯпитан стаж та̄ланыл э̄лаль са̄вмалтавет. Ты коныпал 2015 та̄лныл 6, 6 пенсионный коэффициентаныл 2025 та̄л мус ла̄щал 30 са̄витыг тах яныгми. Тувыл страховой взнос ойтнэ олныт о̄с са̄вме̄гыт, тыи 2015 та̄лт хо̄тпа сэ̄лум олнанэ̄тыл 7, 39 пенсионный коэффициентэ виӈкве тах патаве, ос 2021 та̄лыт мус тах 10 са̄витке̄мыг е̄мты. Тох 2015 та̄лт рӯпитаӈкве ущты патхатам хо̄тпат пенсияныл щар йильпи са̄ккон щирыл ойтуӈкве тах патавет. Ань рӯпитан хо̄тпат пенсияныл 2014 та̄л па̄сыл мо̄т щирыл ла̄щал о̄с ловиньтавет. Йильпи са̄ккон щирыл хум хо̄тпат армиян ялнэ та̄ланыл, нэ̄ хо̄тпат 1, 5 та̄л яныт мус ма̄нь ня̄враманыл ёт, а̄гмыӈмосыӈ, сакватахтам ня̄врам ёт, 80 та̄лэ то̄влум юипа̄лт а̄гмыӈ матумпа̄ла хо̄тпа ёт юн ӯнлум та̄ланыл пуссын рӯпитан стажиг ловиньтаӈкве патавет. Тувыл ты са̄ккон хосыт э̄лумхо̄лас та̄ланэ то̄влум порат пенсиян та̄ра ат ке мины, тав ат та̄л э̄лаль рӯпитаме сыс пенсия олнанэ э̄лальнув са̄вме̄гыт. Та̄н «премиальный коэффициентыг» ла̄ваве̄т. Ань ты са̄кконын хансым пуссын йильпи ва̄рмалит урыл радио, телевидение хосыт иӈ потыртэ̄гыт манос газетат тах хансэ̄гыт. Ос на̄н матыр э̄рнэ ля̄ххал Пенсионный Фондыт рӯпитан хо̄тпатныл о̄с китыгла̄лэ̄н.

1064 2013.11.22. Людмила ТЕТКИНА

Ня̄врамыт ля̄ххалыт хансуӈкве ханищтаве̄сыт. Ты э̄тпос Ханты-Мансийск ӯст ня̄врамыт ма̄гсыл «СМИшка» нампа фестиваль рӯпитас. Округ янытыл 57 ня̄врам хӯрум хо̄тал сыс Югорский университетыт ханищтахтасыт. Фестиваль ва̄рыглам хо̄тпат ла̄ве̄гыт, та̄н хӯрмит та̄л ня̄врамыт тыт акванатыглэ̄гыт ос ля̄ххалыт хансуӈкве ханищтыяныл. Фестиваль «СМИшка против наркотиков» нам о̄ньщи. Илья Стечкин, ЮГУт рӯпитан хум, таи ла̄выс: «Тамле намыл пиным та урыл номсысув, а̄гирищитпыгрищит тамле лю̄ль пищ нупыл ул вос сунсэ̄гыт». Ты э̄лыпа̄лт округ янытыл 25 команда та̄нки рӯпатаныл ке̄тыгласаныл ос та̄н халанылт 19 команда пе̄рияве̄сыт ос тыг во̄вве̄сыт. Ня̄врамыт «Югра» телерадиокомпаният ос «Новости Югры» нампа газетат ма̄хум хумус рӯпитэ̄гыт – суссылтаве̄сыт. Ня̄врамыт хӯрум щирыл кассыт ты интернет, газета ос телерадиокомпания. Тот но̄хпатум а̄гитпыгыт школа а̄стланэ̄ныл юипа̄лт Югорский университетын ханищтахтуӈкве вивет. Тамле фестиваль общественный связь ос внутренний политика департаментыг, ЮГУ, «Новости Югры» нэ̄пак та̄ратан кол ос «Югра нампа телерадиокомпания аквъёт ва̄рыглэ̄гыт, ля̄ххал тотнэ ма̄т са̄внув а̄гитпыгыт рӯпитаӈкве вос ка̄сащасыт. Ос э̄лаль ты профессия щирыл вос ханищтахтасыт.

1064 2013.11.22. Александр ВЬЮТКИН

Лӯима̄ мирыт тармыл о̄лнэ кӯщай. Григорий Петрович тот такви рӯпататэ урыл потыртас: «Ты та̄л ма̄ньполь э̄тпост «VII Съезд коренных малочисленных народов Севера, Сибири и Дальнего Востока» о̄лум порат тот ты кӯщаиг пе̄рияве̄сум. Та юипа̄лт ам та̄ра хо̄тал нэ̄глын е̄рт о̄лнэ мощщаг хультум ма̄хманув уральтасанум. Рӯт ма̄хманувн аквписыг матыр нё̄тмилыл нё̄туӈкв э̄ре̄гыт. Таима̄гсыл ты ам ма̄ янытыл ма̄хманув о̄лупсаныл сунсым яласэ̄гум. Ань на̄н палтын ты ёхтысум. Россия ма̄в лӯипалъе̄р ма̄тэ̄т са̄всыр ла̄тӈыл потыртан соссаӈ ма̄хум о̄лэ̄гыт. Ма̄нти о̄лупсав ос ла̄тӈанув ул вос ёрувлэ̄в, ты кастыл са̄в ва̄руӈкв э̄ри. Э̄лаль хумус рӯпитаӈкве, таи сунсым ам яласэ̄гум. Мо̄т съездын хунь атхатыглэ̄в, то̄нт э̄лаль рӯпитан хо̄таланув ма̄гсыл план щё̄питэ̄в. Та план хосыт э̄лаль рӯпитаӈкв о̄вылтахтэ̄в».

1064 2013.11.22. Людмила ТЕТКИНА

Кӯщаит кол ӯнттын ва̄рмаль урыл потыртасыт. Югра янытыл ты та̄л лов э̄тпос сыс 472 со̄тыра арыгкем квадратный метра кол ӯнттувес. Ты ва̄рмаль ма̄гыс Наталья Комарова, губернаторув, такви ва̄ӈын хо̄тпанэ акванатыгласанэ. Владимир Путин, Россия Президентув, 2012 та̄лт я̄ӈк на̄тнэ э̄тпос 7 хо̄талэ̄т Россия янытыл о̄лнэ мирн ла̄тыӈ ке̄тыс, то̄нт кол ӯнттын ва̄рмаль урыл потыртас. Тав пуссын кӯщаит ты тэ̄ла та̄рапаттым о̄ньщуӈкве ла̄всанэ. Са̄внув ще̄мья йильпи колн вос ва̄нтлэ̄гыт, график щирыл колыт вос ӯнттавет. Ма̄н округ яныг кӯщай нэ̄в ты рӯпата акваг уральтым о̄ньщитэ. Такви ва̄ӈын хо̄тпанэ э̄лыпа̄лт тав ла̄выс: «Ань ты рӯпата ма̄н график щирыл ва̄рилӯв. Акв ва̄рмаль урыл ла̄ве̄гум, ты та̄л мощща ма̄ньлат ще̄мья о̄лнэ кол ёвтсыт. Ты программа хосыт рӯпитан кӯщаитн мӯсхалыг ос ка̄ркамыг э̄лаль рӯпитаӈкве ла̄виянум. Ты рӯпата ёмащакв ва̄релы̄н, ма̄хум ӯрхатэ̄гыт. Та̄л оигпан мус са̄внув ма̄ньлат ще̄мьят йильпи колн вос ва̄нтлэ̄гыт». Сапра̄ни о̄лум порат кӯщаит потыртасыт, округув янытыл хумус колыт ӯнттавет. Наталья Комарова ла̄выс, мо̄лты та̄л о̄с акв ты лов э̄тпос сыс мощщанув кол ӯнттувес. Ты та̄л са̄внув йильпи кол тах ӯнттаве. Тувыл губернатор пуссын ӯсыӈ, районыӈ ос па̄влыӈ миркол кӯщаит ӯнттым йильпи колыт ёмащакв ловиньтаӈкве ла̄всанэ. Та̄н акв нэ̄пакт аквса̄вит квадратный метра хансэ̄гыт, мо̄т нэ̄пакт мо̄т хурип щисла хансэ̄гыт. Кӯщай нэ̄ ла̄выс: «Ань та̄н ке̄тум нэ̄паканыл щирыл мощща кол Нягань, Покачи, Радужный, Мегион, Ханты-Мансийск, Сургут ӯсытт ос Нефтеюганский, Нижневартовский, Советский районытт ӯнттувес. Тот кӯщаит пуссын мӯсхалыг рӯпитаӈкве ла̄виянум». Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1064 2013.11.22. Александр ВЬЮТКИН

Тэ̄ланыл ма̄гсыл во̄внэ нё̄тмиланыл. Ма̄н ӯсувт грант нампа нё̄тмил ма̄гсыл каснэ ма̄хум акванатыглаве̄сыт. Округув янытыл аквъёт пуссын 26 заявканэ̄пак тотыглавес. Тит хо̄тал сыс Природный ресурс ос несырьевой сектор экономика департаментыт рӯпитан кӯщаитын та̄н хӯнтлуве̄сыт. Ты та̄л сыс округув янытыл са̄в йильпи община пӯсвес. Cа̄выӈпа̄лэ соссаӈ ма̄хум та̄нти ва̄рум общинаныл. Тот рӯтыг о̄лнэ ма̄хманыл рӯпитэ̄гыт. Олн сэ̄лнэ ма̄гсыл са̄всыр пормас ма̄щтырлэ̄гыт, во̄рт пил ва̄тэ̄гыт, ӯльпа па̄квсам щё̄питэ̄гыт ос ла̄хс то̄слэ̄гыт. Та коныпал пувнэ хӯланыл хӯл щё̄питан колн тыналыяныл. Сэ̄лнэ олнанылтыл та̄нтина̄нылн э̄рнэ пормаc ёвтэ̄гыт. Департамент колт туризм щирыл рӯпитан нэ̄ Ирина Арканова ла̄выс: «Округувн ёхталан мӯй ма̄хмыт соссаӈ мир пе̄с йис о̄лупсал пӯмщалахтэ̄гыт. Ма̄н округув Бурятия ос Саха (Якутия) республикаг ёт акв ляпа щирыл мӯй ма̄хум тыг тотыглаӈкв ве̄рме̄в. Со̄ль, соссаӈ ма̄хум рӯпитаӈкв ка̄саще̄гыт, таӈхе̄гыт ос ве̄рме̄гыт. Туристыт ёт округувт иӈ мощща рӯпитэ̄в. Пе̄с йис пораныл тыт о̄лнэ ма̄хмытын хумус ве̄рме̄в, та щирыл та нё̄тэ̄в. Турист ма̄хум ёт рӯпитанэ̄в хӯрум та̄лыг ты то̄влыс. Ты та̄лыт сыс округувт атхуйплов община тэ̄ланыл ёмас минасыт». 2013 та̄лт округ бюджетныл титхуйплов миллион солко̄ви та̄стувес. Ты порат щар яныг нё̄тмил хӯрум миллион атса̄т со̄тыра солко̄ви во̄виньта̄лвес. Кӯщаит тамле яныг олн миӈкв ат ве̄рме̄гыт.

1064 2013.11.22. Тамара МЕРОВА

Потыртахтын ма̄гыс акванатхатыгласыт. Мо̄лал Тюмень ос Салехард ӯсыгныл са̄кконыт ёт рӯпитан кӯщаит Ханты-Мансийскан ёхталасыт ос са̄всыр тэ̄лат аквъёт ва̄рнэ щирыл потыртахтасыт. О̄влэ̄т акванатхатам кӯщаит депутатыг о̄лнэ нила хо̄тпа ёмас рӯпатаныл ма̄гыс э̄сгын нэ̄пакыл мӯйлуптасаныл: тыи С. М. Сарычев, Е. Д. Айпин, Л. А. Чистова ос Е. Г. Зленко. Та̄н Тюменский областьт, Ямалт ос Юграт ма̄хум ёмщакв о̄лнэ̄ныл ма̄гыс ка̄ркамыг рӯпитэ̄гыт, са̄кконыт мӯсхалыг щё̄питэ̄гыт. Тувыл кӯщаит са̄всыр мо̄т э̄рнэ тэ̄лат урыл потыртасыт. Ты та̄л ва̄т са̄грапнал э̄тпос китхуйплов хо̄талт РФ Конституция хус та̄лэ то̄влы. Ос ты йильпи Конституция щирыл Россият о̄лнэ са̄всыр округыт, республикат, областит манос крайит то̄ва ва̄рмаляныл палт та̄нки кӯщайлахтуӈкве патсыт. Ма̄н ма̄вт Тюменский область, Ямал ос Югра та̄нки я̄нас Дума ва̄рсыт, та̄н та̄нки мирн э̄рнэ са̄кконыт щё̄питэ̄гыт ос пирмайтэ̄гыт. Мо̄тыт та̄л во̄ртур э̄тпос нилахуйплов хо̄талт Тюменский область о̄лнэ̄тэ па̄сыл 70 та̄лыг е̄мты. Ос аквты э̄тпос атхуйплов хо̄талэ̄т Александр Протазанов яныгса̄т та̄лэ тах то̄влы. Ты о̄йка 1960-1962 та̄лытыт Тюменский облисполкомыт кӯщаиг о̄лыс, ма̄во̄й но̄хвинэ ма̄т са̄в тэ̄лат но̄хво̄рмалтас. Ты ялпыӈ хо̄талыг янытлан ма̄гыс ма̄хум са̄всыр пӯмыщ культурный программал щё̄питавет. Ань ты кастыл хӯрум Дума кӯщаянув ос та̄н ва̄ӈын хо̄тпаныл ты ва̄рмалит та̄рапаттысаныл ос олн нё̄тмилыл та̄стуӈкве ла̄вхатсыт. Тувыл та̄н ма̄ньлат ма̄хум ёт мо̄т колнакт акванатхатыгласыт. Тот общественный организацият рӯпитан ма̄ньлат хо̄тпат потраныл хӯнтлысыт. Сергей Ямкин, Ямалныл ёхталам хум, ла̄внэ̄тэ щирыл, ань ма̄ньлат хо̄тпат депутатыг о̄с вос пе̄рияӈкве та̄ртавет. Та̄н та̄нки ма̄ньлат мир та̄рвит тэ̄ланыл пуссын ва̄ганыл ос государство янытыл та̄наныл э̄лаль ёмщакв тотнэ ма̄гсыл мӯсхалыг, ве̄щкатыг тах рӯпитаӈкв патэ̄гыт. Думат рӯпитан кӯщаит ка̄сащасыт кос, ос таи ювлела̄всыт, та̄н са̄в та̄л о̄лэ̄гыт, са̄всыр накыт ва̄щинтэ̄гыт, са̄в ёмас ва̄рмалитн ханищтахтасыт, ос са̄всыр са̄кконыт хаснэ порат таи номияныл ос тув а̄рталахтым та̄н са̄кконыт ма̄кыг щё̄питыяныл. Тувыл акванатхатам ма̄хум «Сотрудничество» программа щирыл аквъёт э̄лаль рӯпитаӈкве потыртахтасыт ос документнэ̄паканылт хасхатасыт.

1064 2013.11.22. Валентина УЗЕЛЬ

Са̄лы ӯрнэ хум. Ты хурит ханты хум Николай Анатольевич Тасьманов по̄слым о̄лы. Тав Касум па̄вылт самын патыс, тот яныгмас. Ань тав са̄лы ӯрнэ хумыг о̄лы, са̄лыянэ ма̄гыс нэ̄пакыт атыянэ. Рущит ла̄внэ̄ныл хольт – «Оленеводческое крестьянскофермерское хозяйство» ва̄ри. Иш-Юган нампа ма̄т са̄лыянэ ӯруӈкв паты, ты ма̄ Касум па̄вылныл хусахтем ве̄рыстат о̄лы. Ань тот са̄лы о̄щнэ пӯсас ва̄ри, колыт ӯнтты. Са̄лыяныл а̄пщиянэ ос акитэ ёт о̄ньщуӈкв патыянэ. Та̄н о̄влэ̄т тав ётэ рӯпитаӈкв ат ка̄сащасыт. Ань акванпотыртахтым матах са̄лы иӈ тах ёвтэ̄гыт. Николай ла̄выс: «Ань ма̄к са̄лы ӯрнэ яныгхо̄тпат а̄тимыг е̄мтэ̄гыт, са̄лыт ос молях мощщаме̄гыт, са̄в са̄лы во̄рт ха̄йтыгтыманыл во̄р са̄лыт халн тэ̄лыглэ̄гыт. Ань амти са̄лыянум па̄вылныл мощ э̄лыннув о̄лэ̄гыт, моще̄рт па̄выл ляпаннув тах ня̄влыянум».

1064 2013.11.22. Николай МЕРОВ

Саквъя̄н хӯл ёхтуӈкве ат ве̄рми. Ре̄тыӈ ю̄свой э̄тпост Ха̄льӯс район кӯщай нэ̄ Любовь Коротун Саранпа̄вылт о̄лнэ ма̄хум ёт ва̄йхатуӈкве ёхталас. Тав школа ос ма̄нь ня̄врам колыт уральтас. Любовь Константиновна Саранпа̄выл мир клубколн акванатыгласанэ. Тав ётэ потыртаӈкве са̄в хо̄тпа тув ёхталас. Любовь Константиновна о̄влэ̄т ювле хультум та̄л сыс ва̄рум рӯпата урыл потыртас. Тувыл ма̄хманув кӯщай нэ̄ са̄всыр ва̄рмалит урыл китыгласаныл. Ос са̄выӈпа̄лэ хум хо̄тпат сорых хӯл пувнэ урыл китыглахтасыт. Саранпа̄вылт о̄лнэ хум Николай Николаевич Фролов ла̄выс: – Ма̄н я̄вн ка̄сыӈ та̄л сорых, сӯкыр, нялк ос мо̄т са̄всыр хӯлыт сэ̄руӈкве ювыт. Ма̄хум йис та̄гыл хӯл алыщлым о̄лэ̄гыт. Ос юио̄выл та̄лытт сорых хӯл щар мощщаг е̄мтыс. Таима̄гыс мо̄лты та̄л ты хӯл пувуӈкве хотпо̄илтта̄лвес. Са̄всыр ма̄ныл тыг рыбинспекторыт ёхталасыт. Хотьют пувыглавес, та̄н яныг штрафолныл хасве̄сыт. Ма̄хум тӯйтыглахтым хӯл алыщласыт. Та сыс, хӯл алыщлан общинат сорых э̄лаль тох та пуве̄гыт. Кульпас па̄вылт «Рахтынья» нампа община о̄лы. Та община кӯщаиг Александр Голошубин рӯпиты. Хӯл алыщлан ма̄наныл хускем ве̄рыста палытэ. Хӯл сэ̄руӈкве па̄гле миннэ порат, та̄н Та̄гт я̄ яныг толгыл лапто̄варттыяныл. Таима̄гыс Саквъя̄н хӯл ёхтуӈкве ат ве̄рми. Тувыл ос ань юио̄выл та̄лытт туп ма̄нь сорх сэ̄руӈкве Саквъя̄н юв, яныгмаӈкве ат а̄лыми, алыщлаве. Ам таи китыглаӈкве таӈхе̄гум, хотьютын ты община рӯпататэ уральтаве, ос манрыг та̄нанылн сэ̄рнэ хӯл пувуӈкве ро̄ви, нас о̄лнэ хо̄тпат ос ат та̄ртавет? Ха̄льӯс район кӯщай ёт Вадим Васильевич Максимов ёхталас, тав ты ва̄рмаль ёмщакв ва̄гтэ, ты урыл тох ла̄выс: – Александр Голошубин хӯл э̄лаль са̄вмалтан ма̄гыс сорых по̄р аты ос государстван мыг. Таима̄гыс таве̄н ты хӯл пувуӈкве ро̄ви. Отчётнэ̄паке щирыл тав туп ро̄внэ са̄вит хӯл пуви. Ты коныпал рыбоинспекторыт ва̄тихал таве уральтаӈкве тув ялантэ̄гыт. Ань ты хо̄тал мус нэ̄матыр лю̄ль ва̄рмаль ат хо̄нтвес. Тав матыр ощмар ва̄ри ке, на̄н рыбинспекторн ла̄ве̄н. Тувыл о̄с акв хум потре э̄лаль минас: – Николай Николаевич щар со̄ль ла̄ви. Таве̄н та я̄ ломт хӯл алыщлан ма̄гыс майвес. Ма̄н ты ва̄рмаль урыл са̄всыр кӯщаитн потырта̄лсӯв, хотальа̄ти нэ̄пак хансыгласӯв, ты тэ̄ла хумус о̄лыс, тохи хультыс. Хумус тох е̄мтыс, Саквъя̄т, Ма̄нья̄т хӯл сэ̄рнэ порат алыщлаӈкве ат ро̄ви, Та̄гт я̄т ос хӯл алыщлаӈкве та̄ртаве? Любовь Константиновна ювлела̄выс: – Нан ва̄глын, ты федеральный са̄ккон а̄ти ма̄н пирмайтасӯв. Ты хӯл Голошубин а̄ти такви ма̄гсылэ алыщлы. Тав Тюмень ӯс институт ёт договорнэ̄пак хансыс. Та институт сорых хӯл са̄вмалтым рӯпиты. Мо̄лалнув ма̄н палтув округ губернаторув Н. Комарова ёхталас. Ме̄н Шайтанка ос А̄нъя па̄влыгн ялсуме̄н. А̄нъя па̄вылт Владимир Ендырев ме̄н ёхтынэ̄ме̄н кастыл ёмщакв щё̄питахтас. Атхатам ва̄рмалит пуссын таве̄н потыртасанэ. Тав ла̄выс, хус та̄л сыс ма̄нь сорых хӯл сака мощщаг е̄мтыс, яныгмаӈкве ат а̄лыме̄гыт, та̄ра пувавет. Э̄лаль тыщир паты ке, ма̄н хӯл та̄л хультэ̄в. Сорых яныгмаӈкве вос а̄лымас, ты хӯл хотты порат пувнэ ма̄ныл хотпо̄илтта̄луӈкве э̄ри. Ты ва̄рмаль щирыл яныг сапра̄ни ва̄рыглан ма̄гыс, губернатор нэ̄ таве округ правительстван ёхтуӈкве ла̄выстэ. Китыт тэ̄ла, ань Николай Николаевич ла̄вум ва̄рмалит урыл китыглахтас. А. Голошубин о̄с тот о̄лыс. Тав тот ты ла̄выс, сорых хӯл по̄р минэ ма̄гыс алыщлы. Ты сапра̄ни юипа̄лт аквты хо̄тал ам Александр Голошубин ёт ва̄щинтахтасум. Ты ва̄рмаль урыл таве китыгласлум. На̄н ме̄н потруме̄н мо̄т газетат э̄лаль ловиньтэ̄н тах.

1064 2013.11.22. Николай МЕРОВ

Ма̄н редакциявн округ Дума колыл пищма ёхтыс. Людмила Тимофеевна Юдина, са̄в та̄л пӯльницат ле̄ккарыг рӯпитам э̄ква, 74 та̄лэ то̄влум порат а̄тимыг е̄мтыс. Тав «Заслуженный работник здравоохранения автономного округа», Почётный донор России, «Ветеран труда РФ» намыт о̄ньщас. Юио̄выл та̄лытт Людмила Тимофеевна соссаӈ мир Ассамблеят ветеран хо̄тпат Советыт рӯпитас. Тав ётэ рӯпитам хо̄тпат ла̄ве̄гыт, тав сака сымыӈ, ка̄ркам ос номтыӈ э̄лумхо̄ласыг о̄лыс. Ма̄н таве сака э̄руптаслӯв. Ты мӯтраӈ э̄ква ма̄н акваг номуӈкве патылӯв. Ляпа рӯтанэ̄н ос таве ва̄м хо̄тпатн сым ща̄ргын ла̄тыӈ ке̄тэ̄в. Округ Дума Ассамблея ке̄тум ла̄тыӈ ма̄ньщи ла̄тӈыг Н. МЕРОВ хансыстэ.

1064 2013.11.22. Людмила ТЕТКИНА

Мо̄тынтыг Леуши па̄выл 430 та̄лэ то̄влы. Леуши па̄выл Кондинский район Туман нампа ӯрай ва̄тат ӯнлы. Ань ты па̄выл нупыл мо̄т хӯрум па̄выл Лиственичный, Ягодный ос Дальний о̄с ловиньтахтэ̄гыт. Елена Кульчицкая, Леуши па̄вылт ня̄врамыт ханищтан нэ̄, пе̄с нэ̄пакытт кисхатым таи хо̄нтыс, та̄н па̄вланылн 1584 та̄л порат ма̄хум о̄лмыгтасыт. Мо̄тыт та̄л Леуши тах 430 та̄лэ то̄влы. Ма̄хум ты ялпыӈ хо̄тал янытлаӈкве ань щё̄питахтэ̄гыт. Леушит 1300 арыгкем э̄лумхо̄лас о̄лы, та̄н халанылт 200 хо̄тпа ма̄ньщииг ловиньтахтэ̄гыт. Рущит ос мо̄т мирыт хосат тув о̄луӈкве ёхтысыт, хо̄нтаӈ ма̄ньщиянув мо̄т мирыт халн тэ̄лыгласыт. Та̄н ань та̄нки пе̄с йис ва̄рмаляныл ат ва̄ганыл, ща̄нь ла̄тӈаныл о̄с хотёрувласаныл. Ты э̄лыпа̄лт тот во̄р яктын яныг леспромхоз о̄лыс, па̄влыӈ ма̄хум пуссын тот рӯпитасыт. Ань туп школат, садикыт, клубт ос пӯльницат рӯпитан ма̄ о̄лы. Ты коныпал воссыг мо̄т рӯпата а̄тим. Таи ёмас, Леуши Междуреченский па̄выл по̄хат о̄лы, ка̄ркамыг о̄лнэ хо̄тпат тув рӯпитаӈкве ялантэ̄гыт. Ань па̄вланыл ляпат ӯйхул янмалтан нила предприятие рӯпитэ̄гыт, тувыл мӯсхалыг рӯпитаӈкве о̄с ат ве̄рме̄гыт. Акв фермат предпринимательхо̄тпа перепёлкаг ла̄внэ товлыӈ ӯйрищит янмалты. Акв хо̄тал сыс 600 арыгкем мӯӈи тотэ̄гыт. Тыи ёмас ва̄рмаль кос, тувыл фермат рӯпитан ма̄хум мӯӈи э̄лаль тыналаӈкве ат ве̄рме̄гыт. Сӯкыр э̄тпост пе̄риян хо̄тал о̄лум порат ты нила па̄влытт о̄лнэ мир Владимир Зольколин миркол кӯщаиг пе̄риясыт. Кӯщай хум ка̄ркамыг рӯпитаӈкве вуйхатас. Тав ё̄ре хосыт па̄вылт на̄й ке̄рква̄лгыт йильпииг ва̄рве̄сыт. Па̄выл лё̄ӈхыт о̄с ёмасыг щё̄питаӈкве о̄вылтаве̄сыт. Леушит о̄лнэ мир па̄вланыл янытлан хо̄тал ӯре̄гыт ос ты кастыл ань щё̄питахтуӈкве патсыт. Ирина Самсонова хансум потре ма̄ньщи ла̄тӈыл Людмила ТЕТКИНА хансыстэ.

1064 2013.11.22. Светлана РОМБАНДЕЕВА

Ма̄хманув акванхо̄нтхатыгласыт. Сургут ӯст ма̄ньщи ос ханты ма̄хманув ма̄гыс научнопрактический конференция ва̄рыглавес, тох намаим о̄лыс: «О подготовке ХМАО-Югры к Всемирной конференции Организации Объединенных Наций по правам коренных народов». Ма̄хум тув са̄в ма̄ныл ёхталасыт – Россия янытыл о̄лнэ яныг учёныит, профессорыт, юристыг рӯпитан нэ̄тхумит. Округ ма̄ньщиянув ос хантыянув о̄с о̄лсыт – Сургутский ос Нижневартовский районыгныл са̄лыӈколыӈ ма̄хум о̄лсыт, Белоярский ос Ха̄льӯс районыгныл нэ̄квет ёхталасыт. Са̄в хо̄тпа ма̄ньщи ос ханты супыл масхатыгласыт. Сургут ӯст насати яныг университет ӯнттыма, атах ман хо̄тах накпа лю̄лит нё̄тнэ кол капай. Конференцияв тот ты о̄лыс. Са̄в хо̄тпа доклад ловиньтасыт. О̄выл ла̄тыӈ Сургутский университет кӯщай о̄йка Сергей Михайлович Косенок тав ла̄выс: «Ма̄ янытыл 370 млн. са̄вит соссаӈ хо̄тпа о̄лы (ма̄ янытыл о̄лнэ мирныл – 5%). Та̄н 70 государстватт о̄лэ̄гыт. Соссаӈ мир – ты сака та̄к ма̄хум. Та̄н пе̄с о̄лупса щирыл ань ты хо̄тал мус о̄лэ̄гыт, ща̄нь ла̄тӈанылт потыртэ̄гыт. То̄ваныл са̄лыӈколыӈ ма̄хум, са̄лы ӯре̄гыт, янмалтэ̄гыт. Округувт о̄лнэ ма̄ньщи ос ханты ма̄хманув халт са̄лыӈ ще̄мьят о̄с о̄лэ̄гыт. Та̄нанылн э̄ри нё̄туӈкве, ты урыл кӯщаит вос номсэ̄гыт, э̄рнэ са̄кконыт вос хансэ̄гыт. Ань май Красноярский крайт Институт по правам человека о̄лы. Ма̄н округувт тамле Институт о̄с э̄ри ва̄руӈкве. То̄нт соссаӈ ма̄хманув мӯсхал щирыл нё̄туӈкве патавет». Сергей Михайлович сака хоса потыртас, ма̄ньщит ос хантыт урыл са̄в ёмас ла̄тыӈ ла̄выс. Профессор о̄йка, юридический наука доктор Владимир Алексеевич Кряжков тох ты потыртас: «Ма̄н странав соссаӈ мирн нё̄туӈкве вуйхатас, са̄всыр э̄рнэ са̄кконыт хасве̄сыт, ань ты хо̄тал мус иӈ хансавет, щё̄питавет. О̄выл са̄кконыт СССР о̄лум порат хансуӈкве о̄вылтаве̄сыт. Та порат ты родовой угодият урыл о̄выл щёс потыр о̄лыс. Ос туп таи лю̄ль, са̄кконт хансым ат о̄лы, ань э̄лумхо̄лас о̄лнэ ма̄тэ, алыщлан ман во̄раян ма̄тэ, тав а̄тимыг е̄мтнэ̄тэ юипа̄лт ня̄враманэ нупыл вос паты. Ты урыл ос мо̄т са̄в ва̄рмалит урыл э̄рнэ са̄кконыт ань ты хо̄тал мус иӈ ат та хасве̄сыт. Са̄кконыт пуссын пе̄сыг е̄мтсыт, та̄наныл э̄ри йильпииг хансуӈкве». Татьяна Степановна Гоголева, округ Дума депутат, ла̄выс: «Ма̄н округ депутатыт ёт 1989 та̄л па̄сныл, ловмантем та̄л сыс, ма̄к э̄рнэ са̄в са̄ккон та порат ты хассӯв. «Спасение Югры» организация ма̄ньщи ос ханты ма̄хманувн са̄в нё̄тмил ва̄рыс. Ань ты организация рӯпататэ щар ат на̄ӈки, аман маныр ва̄ре̄гыт, тавагт. Ща̄нь ла̄тӈыл потыртан мир сака молях мощщами, ма̄ньлат ня̄врамыт ань та̄нти ла̄тӈанылт ат потыртэ̄гыт». Москва ӯсныл яныг э̄ква ёхталас – Евдокия Александровна Гаер. Тав исторический наукат доктор намыл маим о̄лы, РАЕН академик, Россия янытыл о̄лнэ соссаӈ мирытн нё̄ты. Мо̄тыт та̄л тав нёлса̄т та̄лэ то̄влы. Тамле талква э̄ква, ла̄щлакв лакватахтыглы, щёл сака ат о̄ньщи, ос тот ла̄вылтам та̄рвитыӈ тэ̄ланув ма̄гыс сыме ща̄рги. Таима̄гыс Сургутын ты ёхталас, о̄с хоса потыртас. Тав ла̄внэ̄тэ щирыл, ня̄врамыт ща̄нь ла̄тӈыл потыртаӈкве юн вос ханищтавет, та̄н ётаныл юн акваг потыртаӈкве э̄ри. Школат тай нас грамотан ханищтавет, ла̄тыӈ сака мат хунь ханищтэ̄гыт. Хо̄талъя̄т юипа̄лт ма̄хум ла̄кквауртхатасыт, ат ва̄рмаль щирыл рӯпитасыт. Ка̄сыӈ ва̄рмаль урыл потыр я̄нас колнакт о̄лыс. Ам «Язык, образование и этнические процессы обскоугорских народов: будущее и современность» урыл потыр хӯнтлысум. Тот о̄с ма̄хум докладыт ловиньтасыт. Мо̄т колнакытыт са̄лыӈколыӈ ма̄хманув ос ма̄во̄й но̄хвинэ хо̄тпат урыл потыр о̄лыс. Та̄н ань акван ат ла̄пе̄гыт, потраныл акван ат ёхтэ̄гыт. Мирхал са̄кконыт урыл потыр о̄лыс, э̄лы хо̄н ма̄т ма̄хум хумус рӯпитэ̄гыт, са̄кконаныл ёмасыт ман а̄ти. Акв колнакыт ос ма̄хманув пуста̄гыл о̄лнэ урыл потыртасыт. Ма̄н, ма̄ньщит ос хантыт, ань манхурип а̄гм о̄ньще̄в, пусмалтахтэ̄в ман а̄ти. Конференция оигпаме э̄лыпа̄лт, э̄типа̄лаг, ма̄хум о̄с акванатхатасыт. Кӯщай хо̄тпат ла̄внэ̄ныл щирыл, та̄н ань ма̄н та̄рвитыӈ ва̄рмалянув пуссын нэ̄пакын хансыяныл, ООН организациян ке̄тыяныл.

1064 2013.11.22. Галина КОНДИНА

Атыӈ тэ̄нут па̄йтнэ нэ̄квег. Туи порат хунь ам «Ма̄нь Ӯскве̄н» ялсум, то̄нт тит ма̄ньщи нэ̄г ня̄врамыт ма̄гсыл тэ̄нут па̄йтым рӯпитасы̄г. Надежда Савельевна Пузина (Мерова) хосат та̄гыл тув рӯпитаӈкве туи порат ёхталы. Татьяна Николаевна Мерова (Кугина) ты тув ущ о̄выл щёс тув рӯпитаӈкве во̄ввес. Тэ̄натэ̄н ам ма̄нь та̄гыл ва̄гагум. Акв па̄вылт яныгмасӯв, акв школат ханищтахтасӯв. Надежда Савельевна такви а̄ги о̄парищ наме Мерова, тав Хо̄сло̄х па̄вылныл о̄лы. Та̄н колта̄гыл пуссын тот яныгмасыт. А̄тяныл Савелий Прокопьевич наме о̄лыс, оманыл Лидия Анатольевна ань Саранпа̄вылт ня̄враманэ палт о̄лы. Хунь ханищтахтын пора ёхты, а̄тянылн Саранпа̄выл интернатын тотавет, тот о̄лсыт ос ханищтахтасыт. Надежда школа а̄стлас, э̄лаль ханищтахтуӈкве минас, са̄всыр атыӈ са̄ккарыӈ ня̄нит ва̄руӈкве ханищтахтас, рущ щирыл кондитерыг ла̄ваве. Тувыл юв ёхтыс ос рыбкоопт са̄в та̄л ня̄нь ва̄рим рӯпитас. Тав пе̄карнит рӯпитаме̄т сака атыӈ ня̄нь ва̄рвес. Ань тав садикыт рӯпиты, ма̄нь ня̄врамыт ма̄гсыл тэ̄нут па̄йты. Надежда Савельевна тит пыг о̄ньщи. Яныг пыге Женятэ школа а̄стламе юипа̄лт Ханты-Мансийск ӯст ма̄шинал яласан хумыг ханищтахтас. Па̄влэ̄т ханищтахтаме̄т национальные виды спорта каснэ ма̄н акваг ялантас. Туи оматэ ла̄ви, пыге па̄вылт рӯпата хо̄нтуӈкве ат ве̄рми, хо̄та̄ти пуссын рӯпата та̄лыт о̄щнэ хо̄тпа виве. Тав ханищтахтын ма̄ныл туп а̄стыс, рӯпитан та̄лыт хотыл выг. Ма̄нь пыге наме Миша, тав иӈ школат ханищтахты. Туи оматэ ёт тот «Ма̄нь Ӯсквет» ӯщлахтас. Татем ка̄ркам, ёмас пыгрищакве. Ам ня̄врамыт са̄сныл матыра̄ти ю̄нтуӈкве ханищтасанум. Миша ам по̄хумн ӯнты, ёмщакв сунсы, хумус э̄ри ва̄руӈкв, тувл такви та о̄вылтахты со̄вткве ю̄нтуӈкве. Ам туп то̄ванакт мощ хӯлтыглылум. Тулял ат ха̄сы, тох хотмус та ве̄рми. Акв матах хо̄тал сыс ма̄нь со̄вткве, тувыл мощ яныгнув со̄вт, са̄нсов ю̄нтыс. Рӯпататэ хунь а̄стлытэ, оматэ палт та ха̄йты, оматэ̄н суссылтыянэ. Ю̄нтум а̄ныса̄нанэ сака ма̄щтырыг тэ̄лсыт. Оматэ ла̄ви, тав Саранпа̄вылт боксыл каснэ ма̄н яланты. Ам таве̄н ё̄рыг яныгман ла̄тыӈ те̄тэ̄гум. Э̄рыӈ хуньт намыӈсуиӈ хо̄тпаг е̄мты. Надежда Савельевна пыгаге ёт пуста̄гыл вос о̄лэ̄гыт. Ня̄врамаге таве̄н туп ща̄гт вос тотэ̄г, На̄й-О̄тыранылн вос ӯргалавет. Надежда Савельевна сака ка̄ркам ос хо̄тпа нупыл ёмас нэ̄, тав ощхультым, мовиньтым ня̄врамытын атыӈ тэ̄нут ва̄ри. Татьяна хурит ма̄нь пыгте̄тэ ёт по̄слыслум. Тэ̄н тув рӯпитаӈкве аквъёт ёхтысы̄г, пыгрищате̄тэ та̄л арыгтем яныт. Яныг пыгаге Вася ос Костя школат ханищтахтэ̄г. Та порат хотталь ща̄рыщн ӯщлахтуӈкве тотвесы̄г. Татьяна омагеа̄тяге сас ма̄ньщи хо̄тпаг о̄лсы̄г, оматэ Клавдия Герасимовна Солянова, а̄тятэ Николай Кугин. Ма̄ньлат порат са̄лыӈ колт яласасы̄г, ётыл ос на̄лув ва̄глысы̄г, па̄вылт о̄лсы̄г. Ань сас а̄тимыг е̄мтсы̄г. О̄лме̄нт хӯрум ня̄врам янмалтасы̄г: Татьяна, Евгений ос Лилия. Ты ма̄ньщи нэ̄квег Надежда Савельевна ос Татьяна Николаевна Ща̄нь хо̄талыл янытлыягӯв. Ка̄сыӈ та̄л яныг таквс э̄тпост Ща̄нит янытлавет, рущ щирыл ла̄ваве – День матери. Тэ̄н сас ня̄врамыӈ нэ̄г, пыганэ̄н пуста̄гыл вос яныгме̄гыт, э̄лаль о̄лнэ ёмас хо̄тал вос хо̄нтэ̄гыт. Ка̄сыӈ ома хунь ня̄враме ёмщакв о̄лы, таве̄н тыи ты со̄т.

1064 2013.11.22. Людмила ТЕТКИНА

Леуши па̄выл ще̄мьят йильпи колн ва̄нтласыт. Кондинский район Леуши па̄вылт пе̄с пора та̄гыл ма̄ньщит ос мо̄т мирыт о̄лэ̄гыт. Ма̄хум хумус о̄лэ̄гыт, тув ялмум порат, ам Владимир Зольколин миркол кӯщай, китыгласлум. – Владимир Константинович, ань ма̄нь па̄влыт пуссын акв та̄рвит о̄ньще̄гыт, са̄в ма̄хум рӯпата та̄л тот о̄лэ̄гыт. Тамле ва̄рмаль тыт о̄с о̄лы? – Леуши, ос ты коныпал Лиственичный, Дальний ос Ягодный тыг ловиньтахтын па̄влытт, туп 43 э̄лумхо̄лас ат рӯпитэ̄гыт. Ты э̄лыпа̄лт Кондинский совхозт ос Леушинский леспромхозт ма̄хум пуссын рӯпитасыт. Ань тыт ӯйхул янмалтан нила ферма о̄лэ̄гыт, школат, садикт, пӯльницат, клубт рӯпитан ма̄ о̄с о̄лы. Ань Кондинский районт щар ка̄сыӈ па̄вылт пил, ла̄хыс, па̄квсам пирмайтан колыт рӯпитэ̄гыт, пил ва̄тым олн сэ̄луӈкве о̄с ро̄ви. Пирмайтым пилыт Междуреченский па̄вылн тотавет. Тот завод ӯнттувес, пилныл са̄всыр тэ̄нут ва̄раве. Ты завод «Сады России» нампа фирма ёвтыс, ма̄хманув пуссын тув пил тыналэ̄гыт. Ма̄н о̄лнэ ма̄вт тай пил ёмащакв тэ̄лы, са̄в ва̄туӈкве ро̄ви. Ам таи ла̄ве̄гум, туп савыӈ хо̄тпа рӯпата ат хо̄нты. – Па̄вылт о̄лнэ соссаӈ ма̄хум кол ёвтнэ ма̄гсыл субсидияолныл мивет. На̄н ма̄хманы̄н кол тыт ӯнттэ̄гыт манос мо̄т ма̄т кол ёвтэ̄гыт? – Ма̄ньщит ос хантыт акторыг кит очеридин хасхатэ̄гыт, акв ма̄т та̄н соцнайм щирыл кол ӯре̄гыт, китыт ма̄т ос субсидияолн ма̄гсыл хансавет. Соцнайм щирыл ке мивет, мо̄т очередил хотвивет. Ты та̄л сыс хӯрум соссаӈ ще̄мья субсидияолныл майве̄сыт. Та̄н пуссын тыт о̄лнэ кол ёвтсыт. Ань ла̄ве̄гыт, округувт о̄лнэ соссаӈ ма̄хум субсидияолныл ке мивет, та̄н яныг ӯст манос па̄вылт кол ёвтэ̄гыт. Ма̄н ма̄хманув пуссын тыт кол ёвтэ̄гыт, тыт о̄луӈкве хультэ̄гыт. Тувыл та̄нки кол ӯнттуӈкве ат ка̄саще̄гыт, ёвтэ̄гыт. Ос ты та̄л сыс хо̄т соссаӈ ще̄мья соцнайм щирыл колыл майве̄сыт. Па̄влувт ты та̄л яныгполь э̄тпост соцнайм щирыл онтолов кол ӯнттуӈкве о̄вылтаве̄сыт. Сӯкыр э̄тпос са̄т ще̄мья йильпи колн о̄луӈкве ва̄нтласыт. Акв кол моще̄ртын о̄с тах а̄стлаве. Ты халт кит колыг савалап ня̄врамыг ма̄гсыл ӯнттувесы̄г. Та̄н уранылт ма̄н о̄с ат ёрувлэ̄в. Ань йильпи щирыл ма̄н рӯпитэ̄в. Са̄ртын аукцион ва̄ре̄в, хоты кол ӯнттын компания но̄хпаты, тыт та рӯпиты. Ма̄н па̄влувт ты онтолов кол кит предпринимателиг ӯнттысы̄г. Акватэ тай молях хо̄т кол а̄стласанэ, мо̄танэ тох молях рӯпитаӈкве ат ве̄рми, ла̄ви, олнанэ холасыт. Колаге хунь а̄стэ̄г, ма̄н туп то̄нт ты колыг ма̄хманув ма̄гсыл выгагӯв. О̄влэ̄т предпринимателит та̄нки олныл колыт ӯнттэ̄гыт, ма̄н туп а̄стлым колыт ёвтэ̄в. Тох тай ёмас кос, тувыл акв компания олн ат о̄ньщи, ще̄мьяг та ӯрхатэ̄г. Ты э̄лыпа̄лт ма̄хманув соцнайм щирыл кол са̄в та̄л ӯрсыт. Ань моляхнув колыл мивет. Па̄влувт са̄в ще̄мьят савалап ня̄врамыт янмалтэ̄гыт. Тамле ня̄врам янмалтым ань то̄вылхатнэ са̄вит олныл ойтавет, тыима̄гсыл ма̄н па̄влувт тамле ще̄мья са̄в е̄мтыс. Ты ще̄мьят йильпи колн о̄с моляхнув ва̄нтлэ̄гыт. – Ань на̄н па̄влын ёхтум ле̄ккарыт, ня̄врам ханищтан хо̄тпат манос мо̄т специалистыт рӯпитаӈкве ке ёхтэ̄гыт, о̄лнэ колыл мивет? – Ань школат ханищтан хо̄тпат э̄ре̄гыт, тувыл тыг ёхтуӈкве ос тыт рӯпитаӈкве, ма̄хум сака ат ка̄саще̄гыт. Ня̄врамыт ханищтан хо̄тпат ке ёхтэ̄гыт, «служебныиг» ла̄внэ колыл мыганӯв. Тамле кол ма̄н о̄ньще̄в. Ань па̄влувт полицейскийхо̄тпа а̄тим. Ты хо̄тпа ма̄гсыл яныг кол ӯнттуӈкве о̄вылтавес, аквпа̄лэ̄т тав о̄лнэ колыл ва̄раве, мо̄т па̄лэ̄т ос полицейский участок рӯпитаӈкве паты. 2014 та̄лт я̄ӈк на̄тнэ э̄тпост кол ӯнттуӈкве а̄стлаве. Ам номсэ̄гум, то̄нт тах ма̄н палтув участковый рӯпитаӈкве ёхты. Пӯльница урыл ке ла̄вуӈкве, ле̄ккарыт тыт о̄лэ̄гыт, та̄н пуссын о̄лнэ кол о̄ньще̄гыт. Ма̄хум тыт пусмалтаӈкве ат ке ве̄рмавет, Междуреченский па̄вылн тув ке̄тавет, тот районный пӯльница рӯпиты. Матъёмас, ты яныг па̄выл ляпат о̄лэ̄в, тув мус са̄т ве̄рыста. Ань ка̄сыӈ ще̄мья такви ма̄шина о̄ньщи, тув ялуӈкве пуссын ве̄рме̄гыт.

1064 2013.11.22. Светлана РОМБАНДЕЕВА

Ма̄щтыр ма̄хманув урыл. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Ань ос кит ханты нэ̄кве̄г потранэ̄н ловиньтэ̄н, тэ̄н са̄сныл со̄втыт, а̄ныса̄ныт, са̄всыр хусапсовыт ва̄рсы̄г. Корлики пА̄выл нЭ̄ Жанна Александровна Хохлянкина Нижневартовский район Корлики па̄вылт 1967 та̄лт самын патыс. На̄н ань тав потре ловиньтэлы̄н: – Омам наме Раиса Петровна. Ма̄н ще̄мьявт хо̄т ня̄врам о̄лэ̄в, омавн янмалтавесӯв, а̄тяв хосат а̄тимыг е̄мтыс. Омам са̄сныл са̄всыр пормасыт ма̄щтырлы, са̄с тармыл хорамыт щурты, а̄нум тав ты ханищтастэ. Тав ань онтырса̄т нупыл нила та̄лэ ты то̄влыс. Ам нила ня̄врам о̄ньще̄гум, кит а̄ги, кит пыг. Ма̄нь а̄гим щаквщуӈкве о̄с ханищтылум, таве̄н ат та̄л. Рӯпитанэм порат, матыр по̄слэ̄гум ман яктэ̄гум, таве во̄вилум, вос сунсы, ма̄нь та̄гыл вос ханищтахты. Ам па̄квпалыӈ суп ю̄нтэ̄гум, сакныл турло̄пс ман пальсак хартэ̄гум. Ты семинарт рӯпитаӈкве а̄нум сака мӯстыс. Ам ётум ловмантем нэ̄ хо̄тпат ма̄щтырласыт. Та̄нанылн пӯмыщ о̄лыс, пӯмщалахтым рӯпитасыт. Ка̄сыӈ китхӯрум пормас ва̄рыс, акваныл тыт хӯлияныл, мо̄тананыл ос ёт выганыл. Нэ̄квет ла̄внэ̄ныл щирыл, ка̄тыл ва̄рум утаныл тыт хӯлюӈкве татем са̄ль. Тыг ос хуньт во̄вавем те, атхунь ёхтэ̄гум. Ма̄хманувн ма̄н тыт акваг тыттувесӯв, хӯлыл па̄йтыглавесӯв, исум исмитыл ос ща̄ил айтвесӯв. Сургут ӯст О̄лнэ нЭ̄ Любовь Кузьмовна Тарлина Сургут ӯст о̄лы, «Старый Сургут» нампа Историкокультурный центрыт методистыг рӯпиты. Тав тох ты потыртас: – Тыт музейт о̄луӈкве, рӯпитаӈкве а̄нум сака мӯстыс. Са̄с ёт, ля̄мйив ёт рӯпитасум, пе̄с вармалит номылматсанум. Суссум, хумус ӯльпа та̄р щё̄питаве. Тыхо̄тал ам толыг хасуӈкве Рудольф Васильевич Меровын нё̄тсум, таве̄ныл ханищтахтасум. Нила хо̄тал сыс са̄сныл ам хӯрум пормас ва̄рсум – кит ма̄нь хусапсовыг ос акв со̄вт. Хусапсовагум тай нас пӯмыщ ма̄гыс ва̄рсагум, со̄втыл ос во̄рт пил ва̄туӈкве ро̄ви. Ам Комсомолец па̄вылт самын патсум. Ты па̄выл Сургутский районт о̄лыс, ань а̄тим, нэ̄мхотьют тот ат о̄лы. Э̄лнаӈ тот хантыт, рущит, калмыкыт о̄лсыт, э̄лыл хотыл тув ке̄тыглаве̄сыт. Па̄влувт школа ос ла̄пка о̄лыс. Э̄лы ма̄ныл ёхталам хо̄тпат соссаӈ ма̄хманув хольт пуссын во̄раясыт, хӯл алыщласыт. Ще̄мьявт ма̄н нила а̄ги о̄лэ̄в – Мария, Елизавета, Нина ос ам. Омав Фёкла Яковлевна Каткалева, 78 та̄л о̄лыс. А̄тяв наме Кузьма Афанасьевич Манин. Ам тыт, Ханты-Мансийск ӯст, педучилище а̄стласум, э̄лаль Ленинград ӯст ханищтахтасум. Школат психология специальность щирыл ва̄т нупыл ат та̄л рӯпитасум. Тувыл са̄тхуйплов та̄л социальный службат рӯпитасум. Ам 1951 та̄лт самын патсум, хӯрум ня̄врам о̄ньще̄гум. Яныг а̄гим Наталя ля̄ххал тотнэ ма̄т рӯпиты. Татья а̄гим тыт, Ханты-Мансийск ӯст, округ Дума ханты депутатув Е. Д. Айпин палт нё̄тнэ нэ̄г о̄лы. Евгений пыгум ос кол ӯнттын ма̄т рӯпиты. Ты я̄тил ма̄щтыр ханты хо̄тпагув тох та потыртасы̄г. Тэ̄натэ̄н са̄в ёмас сымыӈ ла̄тыӈ ла̄ве̄в, пуста̄гыл вос о̄лэ̄г, На̄янэ̄н, О̄тыранэ̄н вос ӯргалаве̄г!

1064 2013.11.22. Александр ВЬЮТКИН Александр АНЯМОВ

Олн сэ̄лнэ ханищтап. Ханты-Мансийск ӯст соссаӈ ма̄хум ма̄гсыл ханищтап ва̄рыглавес, рущ щирыл «Организация и планирование деятельности некоммерческих организаций обскоугорских народов Югры» ла̄ваве. Ты кастыл Екатеринбургныл тит ма̄ньлат а̄гииг ёхталасы̄г – Анастасия Рагулина ос Александра Лисечко. Рӯпитан проектаныл рущ ла̄тӈыл «Дорогами добра» ла̄ваве. Тэ̄н рӯпитан колэ̄н а̄гмыӈмосыӈ ос савалап ня̄врамытын нё̄ты. Ня̄врамыт пусмалтан ма̄гсыл са̄всыр щирыл олн атэ̄гыт. Та̄нанылн нё̄тнэ щирыл савалап ня̄врамыт о̄с нё̄тэ̄гыт. Ня̄врамыт та̄нти ка̄тыл ма̄щтырлан пормасаныл по̄хан тыналыяныл ос олнаныл аквпа̄лэ а̄гмыӈ ня̄врамыт пусмалтан ма̄гсыл э̄рнэ тыныӈ тэ̄рпил ёвтнэ ма̄н мыганыл. Олн сэ̄лнэ титыт мӯтраныл рущ ла̄тӈыл «Конверт сбора пожертвования» ла̄ваве. Та конвертаныл хотты кӯщаитн манос са̄в олн сэ̄лнэ ма̄т рӯпитан хо̄тпатын мыганыл. Конвертаныл ювле ёхтын ма̄гсыл, тав аквпа̄лэ̄т адресэ хансым о̄лы. Тох те̄тым, са̄в пищма ювле ат ёхталы. Хотьютаныл пищманыл ювле те̄тыс, та ма̄хум пищманыл ёхтыс ман а̄ти – та̄нти уральтыяныл. Александра ла̄выс: «Ма̄навн нё̄тмил те̄тум хо̄тпа ма̄н нэ̄мхуньт ат ёрувлылӯв. Мо̄тмо̄т ма̄т та̄наныл телевизор ос нэ̄пакыт хосыт ва̄тихал номылматыглыянӯв, янытлыянӯв». Ма̄н ётув тэ̄н хо̄тал палыт рӯпитасы̄г. Анастасия «Ма̄нь Ӯскве» ня̄врамыт ӯщлахтын ма̄н ёхталанэ̄тэ, тит та̄лыг ты е̄мтыс. Тав ва̄гтэ, тот хумус ня̄врамыт о̄лэ̄гыт. Таима̄гсыл ма̄нав ты ханищтыянэ.

1064 2013.11.22. Александр ВЬЮТКИН

Мирн ва̄нэ хум такви ма̄тэ̄т сака ӯрвес. Яныг таквс э̄тпос о̄вылтахтын хо̄талт Ханты-Мансийск ӯсн ма̄ньщи мирув халт та̄ксар ма̄ньлат хумиюв Руслан Проводников ёхталас. Американыл юв Ха̄льӯсн миннэ лё̄ӈхе̄т Москва, Екатеринбург, Сургут, Нижневартовск ос Ханты-Мансийск ӯсытын хо̄иглас. «Чемпион мира» намыӈыг ань е̄мтыс, тав са̄в ма̄н ёхталаӈкв во̄ввес. Таима̄гсыл Руслан юв миннэ лё̄ӈхе̄т округ ӯсыт та̄ра минас. Ханты-Мансийск ӯсн ёхтум хо̄талэ̄т товлыӈха̄пыт иснэ колт ма̄ньлат соссаӈ ма̄хум таве хо̄тал палыт ӯрсаныл. Та хо̄тал сэ̄ӈквыӈ хо̄талыг о̄лыс. Руслан ӯсувн хӯрум щё̄с юипа̄лт ущ та ёхтыс. Тувыл таве округ губернаторув Наталья Комарова такви палтэ та̄ра ёхталаӈкв во̄выстэ. Ты кастыл телевизор хосыт Сургут, Нижневартовск ӯсыг ос Ха̄льӯс ёт акв ля̄льт потыртан ва̄рмаль ва̄рыглавес, рущ щирыл «видеомостыг» ла̄ваве. Руслан Наталья Владимировна ёт хо̄нтхатыгламе̄т такви номтанэ э̄лаль потыртасанэ. Тав са̄выӈпа̄лэ Ха̄льӯс район урыл ла̄тыӈ ла̄выс: «Тӯяг, хунь ам Саранпа̄вылн ялсум, школат ханищтахтын ня̄врамыт ёт хо̄нтхатыгласум. Тот о̄лнэ ня̄врамыт компьютерыт нупыл сака иӈ ат сунсэ̄гыт, аквписыг кон ха̄йтыгтэ̄гыт. Ханищтахтын коланыл по̄хат ме̄чикыл ёнгын ёмас ма̄ о̄ньще̄гыт, тот ме̄чик са̄ӈвхим порге̄гыт. Тэ̄лы порат ос ханищтахтын коланылт о̄лнэ спортзалыт ёнге̄гыт. Ня̄врамыт ма̄гсыл па̄вланылт каснэ кол ӯнттуӈкв э̄ри. То̄нт та̄н та̄нти пе̄рие̄гыт, маныр э̄лаль о̄лнэ ма̄гсыл та̄нанылн э̄ри. Пуста̄гыл о̄лнэ ё̄р ня̄враманув – та̄н ма̄н намув э̄лаль тотуӈкв патыяныл». Наталья Владимировна ювлела̄выс: «Ма̄н округувт бокс касылын ханищтахтын ма̄ньлат ма̄хум ка̄сащим ялантэ̄гыт. Ма̄н боксёранув Россия мир халт каснэ̄ныл порат аквписыг но̄хпатыглэ̄гыт. Боксын щё̄питахтын ма̄хум – нэ̄матарыл ат пилнэ ос ма̄к ё̄р хо̄тпат. 2015 та̄л оигпанэ̄тэ мус Ха̄льӯст бокс касылын ханищтахтын яныг кол ӯнттаве. Касыл ма̄гсыл э̄рнэ пормасыт пуссын округ па̄лыл тах ёвтавет». Тувыл губернаторув телевизор хосыт потыртан ма̄хманэ титыгласанэ: «Йильпииг ӯнттын каснэ колув манырсыр намыл пинылӯв? » Ха̄льӯс район тармыл кӯщаиг о̄лнэ нэ̄ Любовь Коротун та̄ра ла̄выс: «Наталья Владимировна, ты урыл хоса номсахтуӈкв ат э̄ри. Ам номсэ̄гум, та йильпи каснэ кол «Руслан Проводников» намыл пинуӈкв э̄ри». Та юипа̄лт Сургут ос Нижневартовск ӯсыгт бокс касылын ня̄врамыт ханищтан ма̄хмыт Русланын э̄лаль ёмщакв каснэ ла̄тӈыт ла̄всыт. Мо̄тыт хо̄талт Руслан ӯст о̄лнэ соссаӈ ма̄хум ёт «Миснэ» гостиницат тэ̄нэ колт акванхо̄нтхатыглас. Аквъёт пуссын налыман ляпатем хо̄тпа Руслан ёт потыртаӈкв пасан ва̄тан атхатыгласыт. Тув ёхталам яныгпа̄ла ма̄ньщи ос ханты ма̄хумн ма̄ньлат хумув са̄в янытлан ла̄тӈыл ла̄ввес. Э̄лаль аквта щирыл каснэ ё̄р вос о̄ньщи. Мария Сергеевна Мерова такви ю̄нтум ма̄ньщи супе Руслан Проводниковын мӯйлуптастэ. Руслан ла̄выс: «Ам ты ёмас, хорамыӈ ма̄ньщи суп акваг масыглаӈкв патылум». Тувыл Светлана Динисламова такви ма̄ньщи ос рущ ла̄тӈыл нэ̄пакн хансум стиханэ ос э̄рганэ Русланын мӯйлуптасанэ. Русланын тамле мӯйлупса мӯстыс. Хум ла̄тӈанэ ты: «Тыгыл хотты стих тах ханищтаӈкв э̄ри».

1064 2013.11.22. Людмила ТЕТКИНА

Тыг са̄в э̄лумхо̄лас мӯйлуӈкве ёхталы. Ты э̄тпос 14-16 хо̄талытт Ханты-Мансийск ӯст «ЮграТур – 2013» нампа суссылтап рӯпитас. Округ янытыл общинат ос са̄в мо̄т организацият рӯпитан ма̄хум тыг ёхталасыт. Выставкат та̄нки рӯпатаныл урыл потыртасыт ос са̄всыр сувенирыт тыналасыт. Та̄н суссылтапын ёхталам ма̄хум та̄нки палтаныл мӯйлуӈкве во̄всаныл. Тамле суссылтап ка̄сыӈ та̄л таима̄гсыл ва̄рыглаве, са̄внув ма̄хум туризм щирыл вос рӯпитэ̄гыт, то̄нт са̄внув мӯй хо̄тпат тыг ёхталаӈкве патэ̄гыт. Ань округ Правительство кӯщаит туризм та̄рапаттым о̄ньщияныл. Тамле тэ̄ла щирыл рӯпитаӈкве ка̄сащан хо̄тпат та̄нки проектнэ̄паканыл грантолн ма̄гсыл ке̄туӈкве ве̄рме̄гыт. Соссаӈ общинат этнотуризм щирыл рӯпитаӈкве о̄с о̄вылтахтасыт, мӯй ма̄хум та̄нки палтаныл мӯйлуӈкве во̄виньта̄лыяныл. Та̄н ка̄сыӈ та̄л та̄нки нэ̄паканыл грантолн винэ ма̄гсыл ке̄тыглыяныл. Ты та̄л касыл щирыл но̄хпатум общинат ос организацият янытлаӈкве Наталья Комарова, губернаторув, ёхталас. «Самутнёл» Белоярский районт рӯпитан соссаӈ община «Развитие инфраструктуры этнотуризма» номинацият но̄хпатыс. Ты коныпал Ханты-Мансийский районт рӯпитан «Обь» община грантолныл майвес. «ЮграМегаТур» нампа компания ня̄врамыт ос ще̄мьят ӯщлахтын ма̄гсыл олныл тах та̄ставе. Нижневартовск ӯст «Спутник» нампа турфирма о̄с грантолныл майвес. Та̄н мӯй ма̄хум Нижневартовский районт соссаӈ ще̄мьят о̄лнэ пе̄с йис ма̄н тотыглыяныл. Ханты-Мансийск ӯст о̄лнэ предпринимательхо̄тпа Александр Кахнович са̄всыр сувенирыт ва̄рнэ ма̄гсыл олныл майвес. «Медиахолдинг» нампа компания касылт о̄с но̄хпатыс. Округ яныг кӯщай нэ̄ ты компаният пуссын янытласанэ. Ма̄хум э̄лыпа̄лт Наталья Комарова ла̄выс: «Тыхо̄тал но̄хпатум хо̄тпат пуссын яныг рӯпата ва̄ре̄гыт, ма̄н палтув мӯй ма̄хум во̄ве̄гыт. Ам ма̄ янытыл яласым ос тот о̄лнэ мир ма̄н палтув мӯйлуӈкве акваг во̄виянум. Акв щёс тыг ёхталэ̄гыт ке, та̄н пуссын ма̄н о̄лнэ ма̄вн ва̄тихалнув ёхталаӈкве тах патэ̄гыт. Пе̄с йис та̄гыл ты ма̄т соссаӈ ма̄хум о̄лэ̄гыт, та̄н культурал, о̄лупсал са̄в ма̄хум пӯмщалахтэ̄гыт ос тыг ёхталаӈкве ка̄саще̄гыт». Кӯщаит ла̄внэ̄ныл щирыл, ювле хультум та̄лт ма̄н округувн 450 со̄тыра э̄лумхо̄лас мӯйлуӈкве ёхталас. Ань ты та̄л лов э̄тпос сыс ос аквтаса̄вит хо̄тпа соссаӈ ма̄хум о̄лупсал пӯмщалахтуӈкве, хӯл алыщлаӈкве, во̄раяӈкве ос нё̄рыт сунсыглаӈкве ёхталасыт. Аквта порат ка̄ркамыг рӯпитан ма̄хум о̄с са̄всыр янытлан нэ̄пакыл майве̄сыт. Та̄н халанылт Анатолий Кауртаев, Нижневартовский районт «Югра лылыеп» организация отделениятэ̄т рӯпитан о̄йка, янытлавес. Тав лов арыгкем та̄л ювле хультум порат соссаӈ ма̄хум халт ма̄ньха̄пыл каснэ ва̄рмаль ва̄руӈкве номылматас. Ань ка̄сыӈ та̄л округ янытыл ма̄ньщит, хантыт ос ё̄рныт Нефтеюганский районын акванатхатыглэ̄гыт. Анатолий Кауртаев такви ма̄хманэ ёт о̄с ка̄сыӈ та̄л тот касы. Ань ты та̄л суссылтапын Болгария, Словакия, Чешская республика ос мо̄т хо̄н ма̄ныл, ма̄хум та̄нки суссылтапаныл тыг о̄с тотыгласаныл. Тыт о̄лнэ мир та̄нки палтаныл мӯйлуӈкве во̄всаныл.

1064 2013.11.22. Александр ВЬЮТКИН

Та̄н ё̄раныл а̄рталасаныл. Яныг таквс э̄тпост Сургутский район Русскинские па̄вылт ханты ма̄хум халт «Нюлтахли» акванпӯхтым пе̄рщин касыл нампа ва̄рыглавес. Тох тав ханты ла̄тӈыл ла̄ваве, ма̄ньщи щирыл нас «Пе̄рщиме̄н» паты. Хуньт хосат аквтох соссаӈ ма̄хум аквписыг ё̄раныл а̄рталым пе̄рщисыт. Таима̄гсыл физкультура ос спорт Департаментыт рӯпитан кӯщаитын ты соссаӈ мир касылув мо̄лты но̄хялтуптаӈкв номылматвес. Ты пе̄рщин касыл щирыл та̄н та̄л сыс рӯпитаманыл юипа̄лт ма̄нь таквс э̄тпост «Нюлтахли» Санкт-Петербург ӯсн суссылтым тотыгласаныл. Тот са̄всыр каснэ ма̄хмытын ма̄н соссаӈ мир пе̄рщилув мӯстыс. Ань э̄лаль ма̄ньщит ос хантыт халт ялтуптаӈкв таве номсаве. Хум хо̄тпат Русскинские па̄вылт халанылт ё̄рыл а̄рталахтасыт, касыл округувт щар о̄выл щёс ва̄рыглавес. Пе̄рщин э̄лыпа̄лт па̄выл миркол хум Александр Сытов ла̄выс: «Хунь ты касыл ма̄н па̄влувт ва̄руӈкве щё̄питахтасув, па̄влыӈ ма̄хманув хотща̄гтсыт. Ань ты юипа̄лт округув янытыл ты касылув э̄лаль ва̄рыглаӈкв патаве. Яныг пӯмащипа ла̄тыӈ ам касыл щё̄питан ма̄хмытын ла̄ве̄гум». Губернаторув ва̄ӈын хо̄тпатэ палт рӯпитан советникхум Михаил Савченко о̄с ла̄выс: «Соссаӈ ма̄хум ма̄гсыл ты касыл иӈ акв ёмас, э̄рнэ пӯмащ. Халынт ё̄рыл а̄рталахтын ва̄рмаль ма̄гыс на̄нан маныр нё̄тмил э̄рмыглы те – нё̄тэ̄в». Анатолий Тедорадзе, судьяг о̄лнэ хум, ла̄тыӈ ла̄вуӈкв во̄виньта̄лвес. Анатолий каснэ ма̄хум нупыл сунсым рӯпитас, ань хотьютаныл ёрнуве манос ва̄гталнуве – пе̄рияс. Тав ла̄выс: «Ты «Нюлтахли» касыл ма̄н округувт о̄лнэ яныгпа̄ла соссаӈ ма̄хум халт хо̄нтыслӯв. Ань ты пе̄рщил хумус пе̄с порат ма̄хманув пе̄рщисыт, таве тащирыл ты ва̄рыслӯв. Округув о̄лнэ ма̄тэ яныг, таима̄гсыл ка̄сыӈ па̄вылт та̄нти щирыл пе̄рщисыт. Ань тыт Русскинские па̄вылт каснэ ма̄т ла̄гыл нёлыл хо̄тпа ёлпаттуӈкве ва̄ӈкырлым щар ат ро̄ви. Ка̄танын мо̄т хум сыспа̄лн акванпувим ё̄р ва̄гыл пе̄рщуӈкв э̄ри. Ам касуӈкве ёхтум ма̄хмытын яныг пӯмащипа ла̄ве̄гум. Халынт ла̄палахтта̄л ос сакватахтын та̄л пе̄рще̄н». «Нюлтахли» пе̄рщин ма̄н хус хо̄тпа ёхталасыт. Когалым, Нижнесортымский, Сургут, Ханты-Мансийск ӯсытныл ос Русскинские па̄вылныл ма̄хум о̄лсыт. Та̄н халанылт щар яныг хум Алексей Русскин касыс, тав Русскинские па̄вылт о̄лы. Ты та̄л таве̄н атпан нупыл онтолов та̄л то̄влыс. Пе̄рщин э̄лыпа̄лт ве̄скалаве̄сыт ос та̄рвитаныл щирыл ла̄кквауртве̄сыт. Кӯпнитнув ма̄хум та̄рвитаныл 72 кила мус. Мо̄таныт ос щар та̄рвитыӈ хумияныл 112 кила са̄вит о̄лыс. О̄влэ̄т ма̄хум халанылт пе̄рщисыт. Та̄н щё̄с арыгтем капыртасыт. Тувыл та̄рвитыӈнув ма̄хум касуӈкв пӯхтыгласыт. Та̄н о̄с щё̄стем пе̄рщим повара̄лсыт. Аквты та̄рвитпа хумыт пе̄рщуманыл юипа̄лт «Абсолютный» нампа ё̄раныл а̄рталан ва̄рмаль о̄вылта̄лвес. Хӯрмит нампа касылт ве̄скалахтын та̄л пе̄рщисыт. Ханты ма̄хум халт щар ма̄к ё̄р хум Мултанов Виталий, тав Нижнесортымский па̄вылт о̄лы. Тав ётэ касум ма̄хманэ пуссын ёлпаттысанэ. Каснэ ма̄хум ё̄раныл сунсум хум Анатолий Северьясович касыл оигпан порат ла̄выс: «Ам номсэ̄гум, ма̄н на̄н ётын хосан ла̄кква ат минэ̄в. Щё̄питахтэ̄н, пуста̄гыл о̄лэ̄н». Тащирыл ты соссаӈ мир халт «Пе̄рщиме̄н» нампа щар о̄выл пе̄рщил минас. На̄н о̄с халынт пе̄рщим, пуста̄гыл о̄лэ̄н.

1064 2013.11.22. Тамара МЕРОВА

Хурит хосыт о̄лупса ва̄глӯв. Мо̄лалнув ам Удмуртияныл ёхтысум. Ма̄н тув хуритныл ва̄рим суссылтапын во̄виньта̄лвесӯв. Тот Ольга Чичирко, «Увинская газета» нампа колт рӯпитан нэ̄, такви по̄слум хуриянэ ма̄хумн суссылтасанэ. Тав ля̄ххалыт хаснэ хо̄тпаг ханищтахтас ос мо̄лты та̄лт рӯпататэ ёмащакв ва̄рнэ ма̄гыс «Заслуженный журналист Удмуртской республики» намыл майвес. Тав лов та̄л ювле хультум пораке̄мт хурит по̄слын ва̄рмалил пӯмщалахтуӈкве патыс. Нэ̄ са̄всыр ля̄ххалыт, потрыт газетан хансы ос такви по̄слум хуриянэ тув ва̄риянэ. Ма̄хумн тав хуриянэ сака мӯстэ̄гыт. Ань са̄всыр ма̄т по̄слум хуриянэ тав Ува па̄выл ма̄хманэ̄н суссылтаӈкве о̄с акванатсанэ. Суссылтап «Маленькие истории большой России» намаястэ. Тав краеведческий музеит ва̄рвес ос ты та̄л оигпан мус тах рӯпиты ос тувыл мо̄т ма̄н тотыглаӈкве патаве. Тот ань яныгса̄ткем хуриянэ̄т са̄всыр ӯсыӈ манос па̄влыӈ ма̄хум по̄слым о̄лэ̄гыт. Ма̄н ханты, ма̄ньщи ос ё̄рн ма̄хманув ма̄нки о̄щнэ хорамыӈ маснутыл масхатым о̄с тот ка̄саласанӯв. Ольга мо̄лты та̄л Ханты-Мансийск ӯсн ос Шеркалы па̄вылн, тувыл ты таквсы Салехард ӯсн финноугор ма̄хум хурит по̄слын ханищтапын ёхталас. Ты коныпал Нумто тӯр ва̄тат ханты ос ё̄рн ма̄хум пӯри ва̄рнэ порат о̄с тув ялыс. Ты яласам ма̄нэ̄т по̄слум хуриянэ такем нё̄тнэ̄г ос пӯмщиг сусхатэ̄гыт. Суссылтапын ёхталам мӯй хо̄тпат пуссын тыи сака пӯмщаласаныл ос мо̄т са̄всыр ва̄рмалит урыл ма̄нав о̄с китыгласаныл. То̄ват ханты ос ма̄ньщи хо̄тпат щар ат ва̄щиньтасыт, тувыл ма̄н я̄нас кит мирыг о̄лнэ̄в урыл ущты та̄рапаттысаныл. Ма̄н о̄с та̄н о̄лупсаныл ты хурит щирыл ка̄саласлӯв. Тув ёхталам мӯй хо̄тпат ты хурит хосыт са̄всыр мо̄т мирыт лӯима̄т хумус о̄лэ̄гыт, са̄в ва̄ӈкве патсыт. Светлана Сунцова ос Надежда Воронцова ищхӣпыӈ ут хосыт ты суссылтап урыл сака ёмас кина щё̄питасы̄г. Владимир Головин, Ува па̄влыӈ кӯщай, тувыл Удмуртият са̄всыр газетат рӯпитан хо̄тпат, финноугорский ма̄ныл ёхталам мӯй хо̄тпат, юртанэ Ольга по̄слум пӯмыщ хуриянэ ма̄гыс са̄в сымыӈ ла̄тӈыл ла̄ввес. Ольга Чичирко оматэ номтэ о̄с ёмасыг е̄мтыс, тав потырты, а̄гитэ мо̄лал ля̄выльтта̄лытэ. Тав ман ат та̄л журналистыг наска̄ссыг ханищтахтас, ань мо̄тмо̄т ма̄т яласы ос тулё̄влыл фотоаппарат кнопочкатэ туп понюмта̄лытэ, тувыл маныр? Ань Галина Георгиевна а̄гитэ ма̄к рӯпататэ ущты торгамтастэ ос аквтох ёмщакв рӯпитаӈкве ла̄выстэ.

1064 2013.11.22. Тамара МЕРОВА (MNS) Р. Решетникова (RUS)

Ханты газета ва̄рум о̄йка. Григорий Дмитриевич Лазарев о̄лыс ке, 2012 та̄лт 95 та̄лэ то̄влынув. Тав о̄лум та̄ланэ ос рӯпататэ ма̄хумн вос номавет, наме янытлан ма̄гыс «Григорий Лазарев. Страницы жизни и творчества» нэ̄пак та̄ратавес. Ты э̄лыпа̄лт Эдуард Нестеров проект хансыс ос тувыл округ Правительство па̄лыл грантолныл майвес. Нэ̄пакн хансым потрыт С. Н. Нестерован, С. П. Берендееван, М. А. Лапинан ос Ф. М. Лельхован щё̄питаве̄сыт. Григорий Лазарев Большой Атлым па̄вылт самын патыс. Ма̄нь та̄гыл ща̄няге̄на̄щаге̄н хӯл алыщлаӈкве, во̄раяӈкве тотыглавес. Школа а̄стламе юипа̄лт Остяко-Вогульск (ань Ханты-Мансийск) ӯсн педучилищан ханищтахтуӈкве минас. Пыг тот ты потрыт, стихыт хансуӈкве патыс. Тувыл В. Сенкевичин ос И. Гудковын, кит ханищтан хо̄тпагн, лӯима̄ ма̄хум творчество кружокын во̄ввес. Ётыл «Ханты-Манчи Шоп (Шой)» газетат литературный кружок ва̄рвес, тав такви хансум потранэ тув майлысанэ. Ос 1935 та̄лныл ты газетат тав стиханэ ханты ос рущ ла̄тӈыл хасве̄сыт. Училище а̄стламе юипа̄лт тав акв та̄л школат рӯпитас. Тувыл рӯпататэ ка̄ркамыг, ве̄щкатыг ва̄рме ма̄гыс, Григорий Лазарев Свердловский партийный школан э̄лаль ханищтахтуӈкве ке̄твес. Ханты-Мансийскан ювле ёхтуме порат Григорий Дмитриевич «Стахановец» нампа газетат рӯпитас. Ос 1939 та̄лт тав «Остяко-Вогульская правда» газетат рущ ла̄тӈыл хансым ля̄ххалыт ханты ла̄тӈыг толмащлаӈкве во̄ввес. Тот акв ло̄пс ханты ла̄тӈыл хасвес. То̄нт хум я̄нас ханты газета ва̄руӈкве номылматас ос таима̄гыс са̄всыр э̄рнэ нэ̄пакыт щё̄питаӈкве патыс. 1957 та̄лт Григорий Лазарев «Ленин патн хуват» («По ленинскому пути») нампа ханты газетат кӯщаиг паттувес ос тот рӯпитас. Тав 1973 та̄лт пенсиян минас ос тыгыл Конотоп, ётыл Омск ӯсын ва̄нтлыс. 1979 та̄лт ма̄нь таквс э̄тпос хусыт щислат а̄тимыг е̄мтыс. Ань нэ̄пак щё̄питан нэ̄т Г. Д. Лазарев о̄лум та̄ланэ о̄вылтыт ос тав ётэ рӯпитам манос таве ва̄м хо̄тпат потраныл акванатсаныл. Тот тав о̄выл стиханэ, потранэ, мо̄йтанэ, газетан хансыглам то̄ва ля̄ххаланэ ва̄рим о̄лэ̄гыт. Тувыл о̄йка хо̄т яныгмас, хоты ма̄т ханищтахтас ос маныр ва̄рыс, тыи пуссын «Основоположник» нампа глават ма̄хум ловиньтаӈкве ве̄рме̄гыт. Ханты ма̄хум литератураныл Г. Д. Лазаревын хансуӈкве о̄вылтавес. Ты коныпал тав ханты ла̄тӈыл я̄нас газета ва̄рыс, таима̄гыс тав «основоположникыг» ла̄ваве. М. К. Волдина тав юипа̄лэ̄т ты газетат кӯщаиг рӯпитас, э̄ква Григорий Дмитриевич урыл са̄в ёмас ла̄тыӈ ла̄выс. А. С. Глухих тав уре̄т «Новости Югры» рущ газетат потыр о̄с хансыглас. Ань ты потрыг сас нэ̄пакт 208-227 ло̄псыт хансым о̄лэ̄г. Тувыл Е. С. Роговер, педагогический наукат доктор нам о̄щнэ хо̄тпа, тав театр ос литература хосыт са̄всыр мирыт культураныл ханищтас. Ты о̄йка Григорий Лазарев творчестватэ мӯсхалыг та̄рапаттыстэ ос ты о̄вылтыт методический рӯпата хансыс. Григорий Дмитриевич хо̄нтлан ма̄н о̄с ялыс. Тав 1941 та̄л ма̄нь таквс э̄тпос атхуйплов хо̄талт хо̄нтлуӈкве тотвес. 83 полкыт лусытам ма̄хманэ ёт Сталинград ӯсныл Прага (Чехословакия ма̄ яныг ӯсэ) мус ёхтысыт. Юв ёхтуме̄т о̄йка са̄в щёс разведкан аквъёт ялантам юртанэ номылматыгла̄лыс. Хо̄нт оигпам юипа̄лт ла̄кквамингаласыт, та̄нки халанылт хоттыпсыт. Тувыл акв юрт хумитэ, Миша Шилин, военкомат хосыт таве хо̄нтме. Михаил то̄нт Алтай ма̄н целинан рӯпитаӈкве минам, тот о̄лум. Ос хо̄нт юипа̄лт хунь ва̄т та̄л ювле хультыс, тав ты юртэ ёт Украинат хо̄нтхатыглас. Григорий Дмитриевич «Орден Красной Звезды», «Орден Отечественной войны II степени», ты коныпал тав «За оборону Сталинграда», «За победу над Германией в Великой Отечественной войне 1941-1945 гг. » ме̄талит о̄ньщас. Р. Решетникова рущ ла̄тӈыл хансум потре ма̄ньщи ла̄тӈыг Т. МЕРОВАН толмащлавес.

1064 2013.11.22. Николай Иванович ХОЗУМОВ Светлана РОМБАНДЕЕВА

Ё̄рныт ёт хо̄нтлум пыг. Акв хум яга̄гитэ̄нтыл тэ̄нттетэ̄н о̄лсы̄г. Такви нэ̄ ат о̄ньщис, яга̄гитэ о̄с о̄йка ат о̄ньщис. То̄рум са̄лыт, О̄тыр са̄лыт о̄щсы̄г, ӯрсы̄г. Во̄рт о̄лэ̄г, са̄в са̄лы о̄щсы̄г. Хӯрум сун са̄вит са̄лы о̄щсы̄г, са̄кваляк сампа хӯрум хо̄птыт, хансаӈ, хорамыӈ хо̄птыт мутраӈыт о̄лсыт. Аквмат хо̄тал ща̄ркыл юв ёхтыгпасыт, О̄тыраныл мувылтахи ё̄хсыт, самвитаныл пуссын во̄ртыпал нупыл овтмыт, ла̄ве̄гыт: – О̄тыракве, О̄тыракве, тыхо̄талхӯрмит хо̄тал ма̄н тах ё̄рн хо̄нын ты ёхтаве̄в, хотталь ое̄в ман тӯйтхатэ̄в. Тав са̄лыянэ̄н ат хӯнтлы, та̄н нупланыл ла̄ви: – Ул хурахлэ̄н, вос ёхтэ̄гыт. Тамле потыр тотсыт о̄тыранылн, тувыл о̄с ща̄ркын та минасыт. Хӯрмит хо̄талыг е̄мтыс, ёсаге массаге, са̄лыянэ уральтаӈкве ща̄ркын минас, ёвтня̄л ёт ат вис. Яга̄гитэ такте̄т юн хультыс. А̄мпыт хорталтахтэ̄гыт, нэ̄ конква̄лы, хӯрум ё̄рн хо̄ла ты ёхтыгпасыт, со̄ль, ё̄рн хо̄нын ёхтуве̄сыт. Яты, маныр ва̄ри, лю̄ньщимтыстым та ё̄мыгты. Ё̄рнытын китыглаве: – А̄пщин хоталь минас? – Такви тэ̄латэ̄т хотталь во̄рн минас ё̄мыгтаӈкве. Таит ла̄ве̄гыт: – Колын паттэ̄лын, сунанын щё̄питэ̄н, наӈын ёттотылӯв. Нэ̄ тувыл рохтыс, са̄лыянэколанэ та вивет, ягпыге хо̄т тах алаве. Лю̄ньщимтыстым та ё̄мыгты ща̄рк лё̄хт, са̄лыянэ̄н тотыглым лё̄хт. Сытамыл таит ва̄та̄л ня̄ланэёвтанэ вис, пӯтин ма̄гсанэ, та лё̄х ва̄тан тотсанэ, йӣвн тув но̄хтагатасанэ. Номсы, а̄пщитэ ёхты тах колэ уральтаӈкве, ка̄салыянэ. Тэ̄нутыл о̄с пиныстэ хӯрыгсовн, акв по̄хан тагатасанэ, такви лю̄ньщи, ла̄ви: – Тах э̄рыӈ хо̄нтыянэ, тэ̄ӈкве тахмаи, тэ̄ганэ. Тувыл маныр, колэ паттувес, сунанэ та̄лттуве̄сыт. Яты, ща̄ркын минасыт, са̄лыт па̄ланыл мантем хо̄нтсыт, висыт, та хӯрум хо̄пт о̄с вуйве̄сыт. Хотьют ве̄рмысыт, та висаныл, хотьют ат ве̄рмысыт, хо̄та̄ти та хультсыт. Пуссын хунь ве̄рмавет ёт виӈкве, сака са̄в. Са̄лыт пувсыт, нэ̄ а̄насанэ акванатсанэ, та̄лтхатас, лю̄ньщимтыстым са̄лыӈлӯтыӈ та̄гыл та нёвумтаптуве̄сыт, та тотавет. Хоса ман ва̄ти минасыт, о̄лнэ ма̄нанылн ёхтысыт. Сунаныл, коланыл тӯщтысыт, са̄лыяныл та̄ртысаныл, тот та о̄лмыгтасыт. Акв осыӈ, яныг пукип ё̄рынрищ кӯщаиг о̄лы, тав а̄ги ё̄рыл нэ̄г вистэ. Тувыл хӯрум хо̄пт урыл ла̄ви: – Ты са̄лыт тах ам о̄ньщуӈкве патыянум. Щёлыӈыг е̄мтсыт, са̄лы алэ̄гыт, тэ̄пъялэ̄гытманаре̄гыт. Аквмат хо̄тал та кӯщаиг о̄лнэ утаныл ла̄ви: – Мощ касэ̄в, хотьютув но̄хпаты. Ты хӯрум хо̄пт ам пувиянум, ке̄риянум, ам та̄нанылт яласэ̄гум, на̄н ос мо̄таныт пе̄рие̄н. Са̄лыт пувве̄сыт, ке̄рве̄сыт, та̄н ань мӯтраӈыт, та сӯлттэ̄гыт, яласэ̄гыт. Ань хум (а̄ги ягпыге) ялыялы, юв ёхты, колэ ос са̄лыянэ а̄тимыт, колэ паттыма, та̄тыл колъёре о̄лы. Колъёре̄т лю̄ньщимтыстым та ё̄мыгты, номса̄лы: «Са̄кваляк сампа хӯрум хо̄птум матырпищ тыг вос ёхтынувыт». Са̄лыт та касэ̄гыт, сӯлттэ̄гыт, ань хунь О̄тыраныл тох номылматас, та̄н ха̄йтнэ̄ныл щирыл илттыг ювле ё̄ӈхыгпасыт, ань ё̄рн о̄йка капай сунэ̄ныл э̄л та рагатас. Ос хӯрум хо̄пт тотым лё̄ӈханыл хосыт О̄тыраныл палт та тахасыт, та нуйхатэ̄гыт. Аквматэ̄ртын О̄тыраныл палт лылтым тув та куратасыт, не̄лманыл ӯлщ ӯлтта патмыт. Ань са̄лыянэхо̄птанэ тав палтэ ёхтыгпасыт, хум ща̄гтыс. Ня̄ланэёвтанэ хо̄нтсанэ ос йим о̄вланыл хо̄т о̄лэ̄гыт, та минэ̄гыт са̄лыянэ. Та палыт ма̄, э̄тимаӈкве ты патыс. Тув колн ёхтэ̄гыт, са̄лыт О̄тыраныл нупыл ла̄ве̄гыт: – Тыт ты о̄лэ̄гыт. Тав тувыл нёлква̄лге ёл ат нэ̄гыстэ, ёлпиныстэ, суве о̄с пиныстэ та̄лматан щирыл. Та̄н мӯтраӈ са̄лыт, тав та̄лэ хоталь тахе̄гыт. Тувыл хум сунэ̄ныл ёлва̄глыс, ня̄ланэёвтанэ вис, кол по̄хе̄н лаквхатас, хӯнтлы. Юн мӯйлэ̄гыт, ае̄гыт ман матаре̄гыт, суяныл суйты. Тав ла̄щлакв совъя касаил па̄лыгяктыстэ, ма̄нь халыл сунсы ювле, таса̄вит са̄лы нё̄выль, та маныр па̄йтэ̄гыт. Та яныг пукип ё̄рн о̄йка хо̄нысо̄рыл хуи, лылты, со̄рыг ва̄рим повара̄лы, ань со̄рге сыт, та маныр. Щар тав торгылэ тыт ты хуи о̄йка. Тувыл та асныл ня̄ланэ нарыгтасанэ, хартсанэ, пукит та по̄хсатаптытэ ня̄лыл, кивтасаптытэ, хо̄ла та холас. Тувыл ха̄йтыс са̄лыянэ палт, сунэ̄н та̄лматас, са̄лыянэ̄н аквтув та нуясаптувес. Кӯщай о̄йка алыстэ, та юипа̄лт ё̄рыг е̄мтыс. Ань кит хо̄ла хультсы̄г. Ёты хо̄тал тув ос са̄лыянэ̄т минас, та утыг о̄с ня̄лыл па̄хвтысаге, щамакивтасаптысаге. Увщитэ̄нтыл колэ̄н паттысы̄г, пормасанэ̄н сунын та̄лттысанэ̄н, та нёвумтасы̄г. Са̄лыянэ̄н мӯтраӈыт, та̄нти та нёвумтасыт о̄лум ма̄нанылн. Та щирыл та аласанэ пуссын ё̄рн хо̄лат. Увщитэ̄нтыл ань та о̄лэ̄г, щуне̄гхӯлэ̄г. Ты мо̄йт Николай Иванович Хозумов тав мо̄йтыстэ, нэ̄пакын С. РОМБАНДЕЕВАН хасвес.

1065 2013.12.06. Николай МЕРОВ

Суссылтап щё̄пита̄лвес. Яныг таквс э̄тпос 21-22 хо̄талыгт Ханты-Мансийск ӯст ханищтап щирыл выставка ва̄рыглавес. Рущ ла̄тӈыл ты ва̄рмаль «Образование Югры – 2013.Непрерывное образование» ла̄ввес. Округ губернаторув Наталья Комарова тув о̄с ёхталас. Ань ханищтан хо̄тпат ос ня̄врамыт са̄всыр пӯмащ ва̄рмаль ва̄ре̄гыт. Ка̄сыӈ та̄л йильпи проектыт щё̄питэ̄гыт. Тыима̄гыс ань ва̄рыглым суссылтапт яныг ос ма̄нь школатт рӯпитан ма̄хум, дошкольный образование э̄лаль тотнэ хо̄тпат та̄нки проектаныл суссылтасыт. Пуссын аквъёт са̄тлов арыгкем учреждение та̄нки рӯпатаныл суссылтаӈкве ёхталасыт. Ань акушерыт, фармацевтыт ос ма̄нь ле̄ккарыт манарыл ханищтавет, ты ищхӣпыӈ утыт яныг кӯщаин суссылтаве̄сыт. Тувыл Нижневартовск ӯс ня̄врамыт ос ханищтан хо̄тпат «Робототехника в образовании» нампа проект суссылтасыт. Та̄н са̄всыр военный техника ос мо̄т э̄рнэ тэ̄ла ва̄рсыт. Ты рӯпатаныл ма̄гыс кӯщаювн янытлаве̄сыт. Ты коныпал Наталья Комарова ос мо̄т са̄в рӯпатат суссанэ. Тав ёхталам ма̄хум пуссын янытласанэ. Ос ла̄выс, мо̄тынтыг ты выставка тох ва̄руӈкве э̄ри, ты технология хумус рӯпиты, сунсуӈкве ёхталан хо̄тпат та̄нки уральтаӈкве вос ве̄рмысаныл.

1065 2013.12.06. Александр ВЬЮТКИН

Ка̄сыӈ таквс аквты порат. Консультативный комитетт рӯпитан финноугорский хо̄тпат яныг таквс э̄тпос ва̄т нупыл хо̄тыт хо̄талт Москва ӯст заседаниен атхатыгласыт. Ты порат ва̄рыглым заседание «промежуточныиг» ла̄ваве. Ань тав Москва ӯст саран ма̄хум представительство колт ва̄рыглавес. Акв хо̄тал минас. Ты кастыл халувт потыртан ма̄гсыл са̄в ма̄ныл, са̄всыр ла̄тӈыл потыртан мир тув ёхталас. Аквъёт пуссын ва̄т нупыл ат хо̄тпа о̄лыс. Ёхталам ма̄хум ма̄ янытыл о̄лнэ рӯт мирыт янытлан ос юртыӈыщ о̄лнэ урыл потыртасыт. Консультативный комитет мо̄т хо̄н ла̄тӈыл потыртан Венгрия, Эстония, Финляндия мирыт ёт рӯпиты. Рӯпатаныл акваннё̄тхатым ва̄рияныл. Са̄в тэ̄лат урыл потыртан ма̄гсыл Москва ӯсн ёхталасыт: «Финляндия-Россия» обществат рӯпитан Генеральный секретарь Мерья Ханнус, Эстонияныл Андрес Хейнапуу, Эстония ма̄т Тарту ӯс университетт ма̄ньщи ос ханты ла̄тӈыг ханищтан хум Тыну Сейлентхаль оc Венгрияныл Д. Нановски. Ма̄ янытыл о̄лнэ ма̄хум ма̄гсыл 2014 та̄л сӯкыр э̄тпос 22-24 хо̄таланэ̄т Америка ма̄т Нью-Йорк ӯст конференция тах ва̄раве. Тот мо̄т хо̄н ма̄т «Ма̄ янытыл о̄лнэ соссаӈ ма̄хум э̄лаль о̄лнэ хо̄талыт урыл» потыртаӈкв патэ̄гыт. Та урыл э̄лаль мо̄т щёс тӯя̄г ма̄ньполь э̄тпост акванатхатыглахтанэ̄в порат потыртаӈкв ла̄вхатсӯв.

1065 2013.12.06. Валентина УЗЕЛЬ

Округ кӯщаюв ля̄ххал тотнэ ма̄хум ёт потыртас. Ювле хультум э̄тпост Ханты-Мансийск ӯсувт журналистма̄хум акванатыглаве̄сыт. О̄выл хо̄тал а̄лпыл та̄н ётаныл потыртан ма̄гсыл Наталья Комарова губернаторув ёхталас. Акв щё̄с арыгтем сыс тав са̄всыр ва̄рмалит урыл титыглавес. Ань округувт о̄лнэ ма̄хум ма̄гыс о̄лнэ колыт ӯнттын ва̄рмаль ос субсидияолн минэ ва̄рмаль щар ма̄к яныг тэ̄лаг о̄лэ̄г. Сургут ӯсныл ёхталам журналистхо̄тпатн кӯщай нэ̄ ты урыл титыглавес. Та̄н ӯсанылт сака са̄в о̄лнэ кол ӯнттаве. Ос са̄в та̄л ӯст о̄лнэ ма̄хум аквтох э̄лаль пе̄с колытт манос балокытт о̄лэ̄гыт. Йильпи колт акв метра ма̄гыс 90 со̄тыра арыгтем солко̄ви ойтуӈкв э̄ри. Колыт сака тыныӈыт, мощща олн винэ ма̄хум та̄нти кол ёвтуӈкв ат ве̄рме̄гыт. Ты ма̄хум колыл о̄с вос мивет, э̄лаль кӯщаянув ты хосыт рӯпитаӈкв патэ̄гыт. Наталья Комарова ювле тох ла̄выс, пе̄с колытт, балокытт о̄лнэ ма̄хум ос очередин хансым ма̄хум, ва̄им, э̄лаль нё̄туӈкв патавет. Ос та̄н ма̄гсыланыл колыт аквтит та̄л сыс хунь ӯнттавет, ты ва̄рмаль ма̄гыс 150 миллиард солко̄ви э̄ри. 50 со̄тыра арыгтем ще̄мья нё̄туӈкв э̄ре̄гыт. Ос тыгыл мо̄т ва̄рмаль осннэ̄глы – кол ӯнттын ма̄гыс ма̄ э̄ри, ты ма̄ло̄мтыт ёмащакв щё̄питаӈкв, са̄всыр тӯрпат тув мус хартуӈкв. Ты рӯпата ва̄рнэ ма̄гыс мо̄т программанныл о̄с са̄в олн та̄стуӈкв э̄ри. О̄лнэ кол ӯрнэ ма̄хумн хоса ӯрхатуӈкв э̄ри, воссыг маныр ва̄руӈкв. Приобье па̄вылт вокзал хунь ӯнттаве, ты урыл кӯщаюв о̄с титыглавес. Тав ла̄выс, ань РЖД (Российские железные дороги) та̄н вокзалкол ӯнттуӈкв вуйхатасыт. Ос А̄с я̄ ӯлтта ӯнсах ӯнттын ма̄гыс 25 миллиард солко̄ви э̄ри. 2014-2015 та̄лыгт проектва̄рмаль щё̄питаӈкв ос ты рӯпата ва̄руӈкв ущ о̄вылтахтэ̄гыт. «Урал Промышленный Урал Полярный» проект рӯпататэ ань мощщан ёлпо̄илттавес. Округ губернаторув титыглавес, э̄лаль рӯпитаӈкв те патэ̄гыт, ма̄витув хотьютн ӯргалаӈкв патаве. Тав ла̄выс, ань ты яныг проект хосыт лё̄ӈхыт пинавет, электростанцият ӯнттавет. Ос хунь та̄н ма̄к Ха̄льӯс районт рӯпитаӈкв патэ̄гыт, то̄нт ты та̄н рӯпатаныл сака уральтаӈкв патаве. Ань туп Нё̄ранув ляпат сыстам ма̄виткве хультыс.

1065 2013.12.06. Людмила ТЕТКИНА

Кол ӯнттын ма̄ урыл. Округ яныг кӯщай нэ̄ Наталья Комарова па̄выл ос ӯс миркол кӯщаит акванатыгласанэ. Та̄н общественный организацият ва̄рнэ рӯпатаныл урыл ос кол ӯнттын ма̄ урыл потыртасыт. Губернатор кӯщаит э̄лыпа̄лт ла̄выс: «Ма̄нь таквс э̄тпост Ханты-Мансийск ӯст общественный организациятт рӯпитан ма̄хум акванатхатыгласыт. Та̄н ва̄рыглам суссылтапанылт округ янытыл щар ма̄к ёмас проектыт суссылтаве̄сыт. Ты организациятт рӯпитан хо̄тпат хумус мирн нё̄тэ̄гыт, та̄н та урыл потыртасыт». Э̄лаль тав ла̄выс, то̄ва тамле организацият сака ёмащакв рӯпитэ̄гыт ос то̄ват щар ат рӯпитэ̄гыт. Покачи ӯст ос Кондинский районт мирн нё̄тнэ тамле организация щар а̄тим. Ос общественный связь департамент ты ва̄рмаль мӯсхалыг ханищтаӈкве ос акв яныг программа хансуӈкве ла̄вхатас. Тамле некоммерческий организацият Югра янытыл хо̄та̄ти вос рӯпитэ̄гыт. Алла Бадина, Нижневартовск ӯс миркол кӯщай нэ̄, ла̄выс, та̄н ӯсанылт 260 общественный организацият рӯпитэ̄гыт, та̄н пуссын мирн нё̄тэ̄гыт. А̄гмыӈмосыӈ хо̄тпат ма̄гсыл рӯпитан организацият ма̄хумн нё̄тым олн ат сэ̄лэ̄гыт, тыи ма̄гсыл тамле рӯпата ва̄рнэ организацият та̄нки грантолныт ос са̄всыр мо̄т нё̄тмил во̄вуӈкве ве̄рме̄гыт, ты хосыт э̄лаль о̄лэ̄гыт ос мирн нё̄тэ̄гыт. Кол ӯнттын ма̄ урыл потыртыманыл порат ос губернаторнэ̄ таи ла̄выс: «Ань то̄ва организацият молях колыт ӯнттуӈкве таима̄гсыл ат ве̄рме̄гыт, кол ӯнттын ма̄ ма̄гсыл нэ̄пакыт мӯсхалыг щё̄питаӈкве сака са̄в хо̄тал манос э̄тпос э̄ри. Э̄рнэ нэ̄пакыт ӯрим са̄в э̄тпос наска̄ссыг ювле та хульты». Вячеслав Арчиков, Нефтеюганск ӯс миркол кӯщай хум, ӯсанылт ты рӯпата хумус мины, та урыл потыртас. Нефтеюганскыт ты та̄л лов э̄тпос сыс кол ӯнттын ма̄гсыл 377 участок майвес. Ювле хультум та̄л сыс 362 участок та̄н ма̄хум халт уртсаныл. Дмитрий Макущенко Сургутский район миркол кӯщаиг о̄лы, тав ла̄выс, та̄н районанылт Белый Яр, Солнечный ос Барсово па̄влытт кол ӯнттын ма̄ а̄тим. Та па̄влытт иӈ са̄в ще̄мья кол ӯнттын ма̄ ӯре̄гыт. Ты па̄влыт пуссын Сургут ӯс ос я̄ ва̄та ляпат ӯнлэ̄гыт. Ос тот «Барсова гора» нампа заповедникыг ла̄внэ ӯргалан ма̄ о̄лы. Таима̄гсыл тот та̄н кол ӯнттын ма̄ло̄мт щар ат о̄ньще̄гыт. Сапра̄ни оигпаме э̄лыпа̄лт кӯщаит та̄нки Советанылн мо̄т хо̄тпат пе̄риясыт, тот миркол мо̄т кӯщаит рӯпитаӈкве тах патэ̄гыт. Ань тыг мус рӯпитам хо̄тпатын губернаторув яныг пӯмащипа ла̄тыӈ ла̄выс.

1065 2013.12.06. Галина КОНДИНА

Олннё̄тмил. Округув 83 та̄лэ то̄влын кастыл пенсия винэ ос ат рӯпитан хо̄тпат яныг таквс э̄тпос ва̄т нупыл са̄тыт щисланыл олннё̄тмилыл ойтуӈкве о̄вылтавет, рущ ла̄тӈыл тав «единовременный выплатаг» ла̄ваве. Ос ва̄т са̄грапнал э̄тпос лов хо̄талэ мус та̄н пуссын ты олныл мивет. Тамле ля̄ххал мирн нё̄тнэ департаментыт рӯпитан хо̄тпат ла̄всыт. Та̄н ловиньтанэ̄ныл щирыл, 221 со̄тыра э̄лумхо̄лас тамле олннё̄тмилыл ойтавет. Ма̄н округувт о̄лнэ ма̄хум акв со̄тыра са̄витыл ойтавет, ос хотьют Тюменский областин ва̄нтлыс, та̄н 650 солко̄вил те̄тавет. Ты олннё̄тмил округ правительствав хунь ма̄нь таквс э̄тпост акванатхатыгласыт, то̄нт тамле ла̄тыӈ пирмайтасыт.

1065 2013.12.06. Галина КОНДИНА

Ще̄мьят моляхнув колыӈыг вос е̄мтэ̄гыт. Ма̄н округувт са̄в ще̄мьят субсидияолн минэ манос кол ӯрнэ очередин хасхатым о̄лэ̄гыт, ос та̄н матса̄вит та̄л тот та ӯрхатэ̄гыт. Таима̄гыс ань кӯщаянув йильпи ва̄рмаль номылматсыт ва̄руӈкве – «арендное жилье в Югре» ла̄ваве. Ты кастыл Москваныл ос Нижегородский областил тыг мӯй хо̄тпат во̄виньта̄лсыт. Кӯщаит халанылт потыртасыт, хумус тамле программа ёт рӯпитаӈкве ро̄ви. Ань округувт хӯрум ӯст – Нефтеюганскыт, Ханты-Мансийскыт ос Сургутыт хӯрум кол ӯнттуӈкве таӈхе̄гыт, тот 600 квартира паты. Ос мо̄тыт та̄л лӯпта э̄тпост ты колыт вос а̄стлавет. Ты та̄л Нефтеюганск ӯст 94 квартираӈ кол ӯнттуӈкве о̄вылтавес. Тот са̄выӈпа̄лэ акв колнакыӈ квартират ва̄равет. Тамле колыт ӯнттын ма̄гсыл кӯщаянув инвесторыт тинсэ̄гыт. Инвесторыт ты олныӈ хо̄тпат манос компаният колыт ӯнттын ма̄гсыл олн та̄стэ̄гыт. Ос ты колытын о̄лмыгтан хо̄тпат ювле ла̄щалла̄щал ойтхатэ̄гыт. Арендное жилье нампа колыл соссаӈ хо̄тпат ос бюджетыт рӯпитан ма̄хум мивет. Ос та̄н ка̄сыӈ э̄тпос олн ойтым тот о̄лэ̄гыт, ты квартира та̄нти нупыланыл хансуӈкве тах ат ве̄рмияныл. Ты кастыл я̄нас очередин ма̄хмытын хасхатуӈкве э̄ри. Округувт ты программа 2020 та̄л мус рӯпитаӈкве паты, та сыс 250 со̄тыра квадратный метр са̄вит о̄лнэ кол кӯщаянув ӯнттуӈкве номсэ̄гыт.

1065 2013.12.06. Светлана РОМБАНДЕЕВА

Яныгхо̄тпат о̄лнэ кол. Сургут ӯс ляпат Снежный нампа па̄вылт «Геронтологический центр» о̄лы. Ты хащта̄л ла̄тыӈ «геронтология» – греческий ла̄тыӈ, ма̄ньщи ла̄тӈыл те толмащлаӈкве – ты «матум хо̄тпа» манос пе̄сыг е̄мтнэ ва̄рмалит ханищтан наука. Э̄лумхо̄лас хунь матумыг е̄мты, ты наукан о̄с ханищтаве. Та центрыт яныгхо̄тпат о̄лэ̄гыт. О̄лнэ коланыл яныг, са̄в я̄нас кол ӯнттым о̄лы, корпусыг ла̄вавет. Центр Калинки нампа я̄ ватат ӯнттувес, сыстам ма̄т, ляпат нэ̄матыр промышленный кол а̄тим. Э̄лнаӈ тот нор колыт о̄лсыт, пе̄с мат колхусапыт, 1982 та̄лт ӯнттыглаве̄сыт. Ань тай йильпи нё̄тнэ колквет ӯнлэ̄гыт, халанылт ре̄гыӈ унсахыл о̄лтве̄сыт. Кӯщаиг Андрей Иванович Чирков тав о̄лы. 1994 та̄л па̄сныл акв отделение туп рӯпитас, 30 хо̄тпа тот о̄лсыт. Ань ос 10 са̄всыр отделение рӯпитэ̄гыт, 250 хо̄тпа аквторыг о̄луӈкве ве̄рми. Ты центрын 50 та̄л то̄влум э̄кват ос 55 та̄л то̄влум о̄йкат о̄луӈкве вивет. Э̄лы хо̄н ма̄ныл ёхтум хо̄тпа тув ат виве, туп округт о̄лнэ ма̄хум тот о̄лэ̄гыт. Хо̄тпа ня̄врам ос рӯт ат те о̄ньщи, центрыт акваг о̄лы. Матум хо̄тпа манос сака а̄гмыӈ э̄лумхо̄лас тот о̄ньщаве, пусмалтаве. Тув путёвканэ̄пак щирыл ялуӈкве ро̄ви, хо̄тпа ле̄ккаре̄н 14 манос 21 са̄вит хо̄талыл хансаве. Ты нэ̄паке щирыл тот о̄лы, ӯщлахты, пусмалтаве, тувыл юв мины. Ам тув ялмум порат кӯщай хум ёт потрамасум. Тав ла̄внэ̄тэ щирыл, та̄н коланыл матум хо̄тпа ос ва̄гтал хо̄тпа ма̄гыс о̄лы. То̄ва ня̄врам ман рӯт ат о̄ньщи, нэ̄мхотьютын нё̄туӈкве ат ве̄рмаве. То̄ва ос пуӈк а̄гм о̄ньщи, юн ма̄хманэ̄н ат ве̄ритаптаве, таве̄н акваг ле̄ккарыт ляпат о̄луӈкве э̄ри. Тамле ма̄хум тыт о̄лэ̄гыт, ка̄сыӈ хо̄тпа мӯсхал щирыл о̄ньщаве, тыттавеайтаве. А̄гмыӈ хо̄тпа ос пусмалтаве. Ты кол ще̄мьяӈ кол хурипа, хо̄тпа сома юн о̄лы, тыт тав э̄руптаве, янытлаве. Центрыт туп сымыӈ ма̄хум рӯпитэ̄гыт. Кӯщай хум коныпал ва̄ӈын нэ̄гаге ёт потрамасум – акватэ Яна Владимировна Зубарева, мо̄танэ ос Екатерина Александровна Дереповская. Татем ёмас, сымыӈ нэ̄кве̄г. Ма̄хум о̄лнэ колнакыт суссылтасы̄г, центр урыл потыртасы̄г. Со̄ль, яныгхо̄тпат татем ёмащакв о̄ньщавет, ре̄гыӈ, сыстам колнакытыт о̄лэ̄гыт. Ма̄хум ӯнлахо̄лэ̄гыт, халанылт потраме̄гыт, то̄ва хуйгала̄лы. Спортивный колнак о̄ньще̄гыт, тот нёвсынэ ман хӯтсан ма̄гсыл са̄всыр те̄рсупыт о̄лэ̄гыт. Яна Владимировна ла̄внэ̄тэ щирыл, ты колнак яныгхо̄тпат сака э̄руптыяныл, тув ва̄тихал щалтсэ̄гыт, хӯтсэ̄гыт манос матыр зарядка ва̄ре̄гыт. Яныгхо̄тпат Сургут ӯсн тотыглавет, тот са̄всыр музеитын ялантэ̄гыт, пӯмщалахтэ̄гыт. Нэ̄кве̄г китыгласагум, тот ма̄ньщи ос ханты ма̄хум о̄лэ̄гыт? О̄лэ̄гыт, насати, онтолов хо̄тпа – Ханты-Мансийский, Октябрьский ос Ха̄льӯс районытныл ёхтысыт. Акв ма̄к яныг э̄ква о̄лы, Мария Ермолаевна Выртыпенкова, 1918 та̄лт самын патыс, таве̄н ань яныгса̄т нупыл ат та̄л. Мария Ермолаевна ханты э̄ква, Ха̄льӯс район Тэ̄к па̄вылт самын патыс, а̄ги о̄парищ наме Макарова. Тав ла̄внэ̄тэ щирыл, ня̄врам ат о̄ньщиглас, рӯт ма̄хманэ пуссын а̄тимыт, хум хо̄тпат хо̄нтлын ма̄т патсыт. Ты центрын кос хоты хо̄тпа минуӈкве ве̄рми, тув о̄лмыгтаӈкве. Ты урыл китыглахтан адрес: г. Сургут, ул. Мира 44-2. Хотьют ка̄сащи те, акв э̄тпосныл хо̄т э̄тпос са̄вит тот о̄луӈкве ве̄рми. Хо̄тпа олнло̄мт ойты, тот мощ о̄лы, ӯщлахты. Ты урыл ос центрын звонитэ̄н, телефонаныл: 8 (3462) 74-78-44, 74-78-05.Адресаныл: г. Сургут, пос. Снежный, ул. Еловая д. 4. Тув пуӈк а̄гм о̄щнэ хо̄тпа ат виве, вина айнэ ос наркоман хо̄тпа, хо̄псы а̄гм, рак, ВИЧинфекция, СПИД, са̄всыр алписов а̄гм, инфекционный ос венерический а̄гм о̄щнэ хо̄тпа ат виве. Хотьют ты центрыл пӯмщалахты те, тув звонитэ̄н, китыглахтэ̄н. Тот ёмас ма̄хум рӯпитэ̄гыт, на̄нан та̄н э̄рнэ тэ̄лат урыл потыртэ̄гыт.

1065 2013.12.06. Людмила ТЕТКИНА

А̄гирищ ты ще̄мьят э̄руптым янмалтаве. Ань савалап ня̄врам янмалтан ма̄гсыл нэ̄тхумит са̄всыр пособиеолныл мивет ос зарплатаолныл ойтавет. Кондинский район Леуши па̄вылт ань са̄в ще̄мьят савалап ня̄врамыт янмалтэ̄гыт. Алевтина Альбертовна Бельтюкова о̄йкатэ ёт о̄с ма̄нь а̄гирищ Урай ӯст висы̄г. Ма̄ньщи нэ̄ а̄нумн ты урыл тох ла̄выс: –Ам акваг са̄в ня̄врам о̄ньщуӈкве тахсум. Ме̄н о̄йкаме̄ныл кит ня̄врам янмалтасме̄н. Пыгме̄н такви рӯпиты, а̄гиме̄н Екатеринбург ӯст ханищтахты. Тэ̄н сас мо̄т ма̄т о̄лэ̄г, о̄йкаме̄нтыл ме̄нккеме̄н хультсуме̄н. Ня̄врам та̄л о̄луӈкве марщум. Номсахтуӈкве патсум ос о̄йкамн ла̄всум, э̄рыӈ, Урай ӯсн ялыме̄н ос тот савалап ня̄врам выгме̄н. Тув минасме̄н, тот ам Кира ма̄нь а̄гирищакве ка̄саласлум, та порат таве̄н туп ат э̄тпос то̄влыс. А̄гирищакве ка̄тын вислум, тав о̄влэ̄т сака хоса ам нупылум сунсыс, тувыл мувиньтаӈкве патыс. То̄нт та̄ра та торгамтасум ты ам а̄гирищум. Ты та̄л Кира са̄т та̄лэ то̄влыс. Тав о̄выл классыт ханищтахты. Урай ӯст щар ма̄нь ня̄врамаквет о̄ньщавет, рущ ла̄тӈыл ты кол «специализированный дом ребёнка» намаим о̄лы. Тув ялуӈкве сака та̄рвитыӈ о̄лыс, таса̄вит а̄гирищитпыгрищит ща̄няныла̄щаныл та̄л о̄лэ̄гыт. Хумус сым та̄л нэ̄т та̄нки самын паттум ня̄врамакве̄ныл пӯльницат хультуптаӈкве ве̄рмияныл? А̄гирищум нэ̄паканэ акв э̄тпос сыс щё̄питасанӯв, ты э̄тпос мӯсхалыг хуюӈкве ат ве̄рмысум. Такем сымум ща̄ргыс, акваг номсахтасум, моляхнув нэ̄паканум вос ва̄равет. Полициял акв справканэ̄пак сака хоса ӯрыслум. Ам амки пӯльницат са̄в та̄л рӯпитасум, ле̄ккар кӯщаит а̄нумн нё̄тсыт. Ань тай ла̄ве̄гыт, савалап ня̄врамыт винэ ще̄мьят тыгыл са̄внув э̄тпос ӯрхатэ̄гыт ос сака са̄в справканэ̄пакыт атэ̄гыт. Кира ме̄наме̄н омага̄тяг ла̄вияге. Ма̄ньнув о̄лыс, та урыл хунь номсахтас, школан минас, китыглахтуӈкве патыс, манрыг тав мо̄т о̄парищ нам о̄ньщи. Ла̄выслув, тав ане̄кватэ о̄парищ намыл мислӯв. Хунь янгыг е̄мты, ущ тах ла̄вилӯв. Ма̄нь па̄вылт о̄лэ̄в, пуссын ва̄гыт, хо̄т ма̄н Кирав вислӯв, ань пилэ̄гум, нэ̄мхотьютын ул вос потыртаве. Ты та̄л тав ханищтахтуӈкве патыс, школан минас, ам рӯпатаныл по̄хын минасум. А̄гирищум а̄лпыл школан ва̄нттылум, ханищтахтын ма̄ныл а̄сты, са̄всыр кружокытын ос тотыглылум. Ёмащакв кос о̄лэ̄в, тувыл акв та̄рвит о̄ньще̄в, колув я̄ ва̄тат ӯнлы. Кит ма̄н хӯрум та̄л сыс тӯя̄г па̄выл ва̄татэ такем молях ёлнилюӈкве патвес. Ань пилым о̄лэ̄в, я̄ ва̄татэ ма̄н пӯсасув мус ты ёхтыс. Колув ва̄т арыгкем та̄л ты ма̄т ӯнлы. Па̄влыӈ миркол кӯщай ма̄н ва̄рмалюв урыл ёмащакв ва̄гтэ. Тувыл нэ̄матыр ва̄руӈкве ат ве̄рми. Мо̄т кол ма̄гсыл очередин о̄с ат хансаве̄в, ты колув ёмас. Тыналаӈкве ос мо̄т ма̄т ёвтуӈкве о̄с ат ве̄рме̄в, тамле ма̄т ӯнлын кол хотьютн ёвтаве. Ам ты та̄рвитыӈ ва̄рмаль урыл мо̄тмо̄т кӯщаитын такос хансэ̄гум. МЧС рӯпитан хо̄тпат ёхталасыт, я̄ ва̄та ос колув сунсыгласыт. Тувыл ювлела̄всыт, колув ёмас, э̄лаль вос о̄лэ̄в, ул вос пилэ̄в. Ос ла̄всыт, са̄кконыт щирыл тох о̄лы, туп та ще̄мья мо̄т колыл миве, хотьют кол та̄л хультыс манос коланыл на̄йн ё̄свес, ман яныг витын а̄мара̄лвес. Ты урыл хансым нэ̄пакыт а̄нумн ке̄туӈкве ла̄вхатсыт, ань тыг мус ма̄н ӯрхатэ̄в. Ма̄н по̄хавт о̄лнэ кит ще̄мьяг о̄с акв тамле та̄рвитыӈ ва̄рмаль о̄ньще̄г. Та̄н картопка ӯнттын тэ̄пкананыл о̄с ёлнильвес. Ты колт ма̄н соцнайм щирыл о̄лэ̄в. Ме̄н о̄йкаме̄нтыл кол ӯнттуӈкве кос тахсуме̄н, нас тох ӯнлахо̄луӈкв ос ӯрхатуӈкв, хунь колув ёллоньхаты, ат ка̄сащиме̄н. Тувыл ма̄ло̄мтыл о̄с ат миве̄в, миркол кӯщай ювлела̄ви, па̄влувт кол ӯнттын ма̄ щар а̄тим. Э̄лаль маныр ва̄руӈкве ат ва̄глум.

1065 2013.12.06. Тамара МЕРОВА

50та̄лэ̄тыл янытлылӯв. Ты э̄тпос хо̄тыт щислат Раиса Калистратовна Бардина (Партанова) 50 та̄лэ то̄влы. Ма̄н нэ̄ намхо̄талэ̄тыл янытлылӯв ос э̄лаль тав уре̄тыл потыр хансэ̄в. Тав Ха̄льӯс район Йильпи па̄вылт самын патыс. Школа а̄стламе юипа̄лт Ленинград (ань Санкт-Петербург) ӯст А. И. Герцен нампа институтыт «художественная графика» факультетыт ханищтахтас. Тувыл Ханты-Мансийск ӯсн о̄лмыгтас. О̄влэ̄т та̄л арыгкем телевидение ос радиовещание колт рӯпитас. Тот ма̄ньщи ла̄тӈыл передачат ва̄рыс. Ты юипа̄лт округ краеведческий музейт, обскоугорский ма̄хум институтыт, «Торум Маа» нампа музейт соссаӈ ма̄хум о̄лупсав ханищтым са̄в та̄л рӯпитас. Ос 1995 та̄лныл 1998 та̄л мус «Лӯима̄ сэ̄рипос» газетан рӯпитаӈкве патхатыглас. То̄нт А̄с ма̄ньщи ла̄тӈе̄тыл ля̄ххалыт, потрыт хансыс. Раиса Калистратовна пуссын ты колытыт рӯпитаме̄т са̄в па̄влытын ялантас. Соссаӈ мирныл пе̄с потрыт, мо̄йтыт, э̄ргыт китыглас ос та̄наныл ищхӣпыӈ утын хассанэ. То̄ва ма̄ньщи потрыт ма̄хум радио хосыт хӯнтлысаныл. Аквматнакт тав палтэ Н. М. Садомин ёхталас ос такви хансум стихотворениятэ «Радио-Рая, радио-Рая» мӯйлуптастэ. Ты о̄йкан нэ̄ са̄в щёс нё̄тыгла̄лвес, матыр ёмас хӯлтыглан ла̄тӈыл потырта̄лвес. Ань нэ̄кве таве ёмас номтыл ка̄стытэ. Тав Рая потранэ̄тыл ощхуль ва̄рыс ос ла̄выс: «А̄с ма̄ньщит щар ма̄нь ня̄врамыт хольт ла̄тӈаныл ля̄галыяныл». Николай Михайлович «Рущ ла̄тыӈо̄йка» такви хансум пӯмыщ потре о̄с радио хосыт ма̄хумн ловиньта̄лыстэ, аквта порат А. Р. Станиславец «Лӯима̄ сэ̄рипос» газетан ты потыр хансыстэ. Таи ёмас, Раиса ма̄ньщи ос ханты ма̄хманув хуритын по̄слыс. Ос акванатум потранэ, хуриянэ ётыл о̄с э̄рмыгласыт. Тав Новосибирский госуниверситетт ос Томский госуниверситетт учёный хо̄тпат ёт ва̄йхатас. То̄нт соссаӈ ма̄хум история ос этнография тэ̄лат пӯмщалаӈкве патсанэ ос научный нэ̄пак щё̄питаӈкве о̄вылтахтас. Хо̄тхуйплов са̄всыр научный потыр хансыс. 2007 та̄лт Раиса Каллистратовна Томск ӯст «Этносоциальная история обских и нижнесосьвинских манси в конце XVIII– начале XXI вв. » диссертациятэ вуянтастэ, та щирыл тав исторический наукат кандидатыг е̄мтыс. Нэ̄ мо̄лты та̄л па̄сыл такви рӯпитан щирыл проект щё̄питас ос ань «индивидуальный предпринимателиг» о̄лы, тав наука рӯпатат такви э̄лаль тотыянэ. Потрыт хансы ос та̄наныл нэ̄пакыг ва̄рнэ ма̄гыс такви олнанэ ойтыянэ манос то̄внакт хотты по̄х хо̄тпатын олныл нё̄тыглаве. Тувыл та та̄ратан нэ̄паканэ̄тыл мощ олн сэ̄лы. Раиса Бардина хансум хӯрум нэ̄паканэ тыи: «Обские и нижнесосьвинские манси: этносоциальная история в конце XVIII – начале XXI века», «Материалы по этносоциальной истории обских и нижнесосьвинских манси в XX– начале XXI века» ос «Угорское население Нижнесосьвинского Приобья (XVIII– начале XXI века)». Та̄н пуссын 2009, 2010 ос 2011 та̄лытт Новосибирскат СО РАН издательство колыт та̄ратаве̄сыт. Ань тав «Портреты обских угров» йильпи хуриӈ нэ̄пак янытэ̄т щё̄питастэ, ва̄рыстэ ос ань та̄ратаӈкве олныл ат то̄влаве. Тав мо̄тыт та̄лт тах ущ та̄ратаве. Ты пӯмыщ нэ̄паке̄т са̄всыр ма̄хум 1930-1970 та̄лыт порат хурин по̄слуве̄сыт. Тот хантыт ос ма̄ньщит пе̄с щирыл масхатым о̄лэ̄гыт. Ос ты урыл А. А. Богордаева «Традиционная одежда обских угров в 1930-1970 гг. » потыр хансыс. Тамле ва̄рмалит этнографытн, историкытн ос соссаӈ ма̄хум о̄лупсал пӯмщалахтын хо̄тпатын, ханищтахтын ня̄врамытын сака э̄рмыглэ̄гыт. Ам ань Раиса такви ма̄ньпора о̄лупсатэ урыл китыгласлум, тав потре э̄лаль ловиньтэлы̄н. МА̄ньпора тА̄ланум номиянум – Ам Йильпи па̄вылт самын патсум, яныг колта̄гылт яныгмасум. Са̄в яныг ягпыг о̄щсум: Володя, Юра, Гена, Никита ос Костя. Ам питипатта ма̄нь а̄гииг о̄лсум. А̄щумн сака э̄руптаве̄сум, ам тав а̄ӈке̄н (оматэ̄н) ля̄хтхатасум. Номилум, а̄ӈкум ягпыганум ёт пум ва̄руӈкве ялэ̄гыт, а̄щум акв хотты каӈкум ёт хӯл алыщлаӈкве мины. Ам ос юн хультуптавем, матыр колсори рӯпата ва̄ре̄гум, а̄ныса̄ныт ман колкан ловтэ̄гум, тэ̄нут па̄йтэ̄гум. Хунь яныгнувег е̄мтсум, ма̄хманув маснутаныл посуӈкве патсум. Ты щирыл ма̄нь та̄гыл юн та рӯпитасум. А̄ӈкум хотталь мӯйлуӈкве мины, ягпыганум хӯл тотэ̄гыт. Ам хӯл са̄м нилюӈкве ос хӯл якытлаӈкве щар ат тахсум, ты хӯл а̄ным а̄мпарн тӯлыгпилум, тув та ӯнттыгпилум. Ягпыганум воращлэ̄гыт: «Манрыг хӯлыт ат щё̄питыянын? » Та̄нанылн ювлела̄ве̄гум: «Ам хӯл нилюӈкве щар ат ха̄сэ̄гум, на̄нки щё̄питэ̄н». Ос тот та пувтавем, ам лю̄ньщуӈкве о̄вылтахтэ̄гум, ты мус я̄ртхатэ̄гум, хӯл рӯпатан воссыг ат пувхатэ̄гум. Мис о̄с о̄щсӯв. Мис посуӈкве ӯнттуве̄сум. Тав посуӈкве мори ат майхатас, сака вориӈ мис о̄лыс. Ка̄тагум мис посуӈкве ат ве̄рмысы̄г. Тамле рӯпата ва̄руӈкве о̄с маткем воритотсум. Ма̄н а̄щув Ялпӯс па̄вылт самын патыс, тав хунь ще̄мьяӈыг е̄мтыс, а̄ӈкум о̄лнэ Сакырпа̄вылн о̄лмыгтас. Тувыл ма̄н Йильпи па̄вылн ва̄нтлысӯв, ётыл ос Ёлка-Шапкат о̄лсӯв. Ка̄сыӈ туи Ялпӯсын тотыглавесӯв. Ты па̄вылт туп кит колыгт ма̄хум о̄лсыт. Акв колт Василий Костин э̄кватэ ёт, мо̄т колт Тарас Григорьевич Костин о̄лыс. Ма̄н хунь ёхтэ̄в, тав колэ̄т мӯйлысӯв. Ам номилум, о̄йка колкан хосгын ла̄пкаӈ куращ (хоссуп) о̄ньщис. Ам тамле ут иӈ ат ва̄щинтасум, таве̄тыл сака пӯмщалахтасум. Тот о̄лнэ̄в сыс ты куращил аквписыг колкан та хосгилум, та хосгилум. А̄нумн ты куращ такем та мӯстыс. Ялпӯст Ялпыӈ кан, Тоя па̄выл кан, Щохрыӈо̄йка кан пуссын яласыянӯв, тувыл э̄лаль ювле минэ̄в. Шамаш па̄вылн (Чемаши) Кирилл аким палт мӯйлуӈкве о̄с яланта̄лэ̄в. То̄ва порат Тукъякын Микула мо̄т акиюв палт тотыглаве̄в. Тыи а̄щув тав ягпыгаге. Тащир та о̄лантасӯв. А̄щув Калистрат Прокопьевич Партанов хӯл алыщлам хо̄тпаг о̄лыс. Тав Ха̄льӯс рыбокомбинатыт рӯпитас. Рӯпататэ сака ка̄ркамыг ва̄рме ма̄гыс тав са̄всыр э̄сгын нэ̄пакыл ос ма̄гыл по̄сыл мӯйлупта̄лвес. Тав «Победитель соцсоревнования» ос «Ударник коммунистического Труда» по̄сыгыл майлувес. 1943 та̄лт хо̄нтлуӈкве тотыглавес, юв 1947 та̄лт ёхтыс. Аӈкум Анна Петровна Тынзянова Камратка па̄вылт ос ётыл Вежакоры ла̄пкат рӯпитас. Тэ̄н акванминасы̄г, ня̄врамыӈыг е̄мтсы̄г, ма̄нав янмалтасаге̄н. Ань ме̄н Никита каӈкуме̄нтыл хультсуме̄н, сас Ханты-Мансийскан о̄лмыгтасме̄н. Мо̄т рӯтанув ёт о̄с ва̄йхатыме̄н. Ма̄н ане̄квав Пелагея Макаровна Тынзянова яныг колта̄гылт яныгмас, тот атхуйплов ня̄врам о̄лыс. Ань тав акв а̄гитэ Тарья Ермачкова, оньгаме̄н Ягримт о̄лы. Кирилл аким, та е̄р рӯтанув, Шамашыт ос Кевавтнёл па̄вылт (Перегрёбныит) о̄лэ̄гыт. Костя ягпыгме̄н а̄ги ос пыг о̄ньщас, ня̄врамаге Ягримт ос Восыӈтӯр па̄вылт о̄лэ̄г. Ма̄н, газетат рӯпитан хо̄тпат, Раиса Калистратовна намхо̄талэ̄тыл янытлылӯв. Мӯтраӈ номтыт, потрыт нэ̄пакын хаснэ̄тэ ма̄гыс яныг пӯмащипа ла̄тыӈ таве̄н ла̄ве̄в. Пус ка̄т, пус ла̄гыл! То̄рум ёт, О̄тыр ёт э̄лаль вос о̄лы!

1065 2013.12.06. Николай МЕРОВ

Сорых Кульпас торыг сэ̄руӈкве ӯнты. Мо̄лал Ха̄льӯс район кӯщай нэ̄ Любовь Коротун Саранпа̄вылт сапра̄ни ва̄рыглас. Па̄влыӈ ма̄хум хӯл алыщлан ва̄рмаль урыл таве̄н потыртасыт. Та̄н ла̄внэ̄ныл щирыл, Кульпас па̄вылт «Рахтынья» нампа общинат рӯпитан ма̄хум сорых хӯл сэ̄руӈкве алгаль миннэ̄тэ порат Та̄гт я̄ толгыл па̄ӈвхитэ̄т лапто̄варттыяныл. Ма̄хум потраныл щирыл, ань тыима̄гыс юио̄выл та̄лытт Саранпа̄вылн мощща хӯл ёхты. Хумус тох е̄мтыс, Саквъя̄ ма̄хум хӯл алыщлаӈкве ат та̄ртавет, «Рахтынья» общинан ос хус ве̄рыста я̄ палытэ̄т сорых пувуӈкве ро̄ви. Аман хотьютын та̄н хӯл сэ̄рнэ порат я̄т хӯл алыщлаӈкве та̄ртве̄сыт. Ам ты урыл са̄р нэ̄глум газетат хансыгласум. То̄нт ам Александр Голошубин, «Рахтынья» община кӯщай, ёт хо̄нтхатыгласум. Ты ва̄рмалит урыл таве китыгласлум. Маныр ты урыл тав потыртас, на̄н ань э̄лаль ловиньтэ̄н: – Александр Игоревич, наӈки общинан урыл потыртэн. Хумус наӈ хӯл алыщлан ва̄рмаль щирыл рӯпитаӈкве о̄вылтахтасын? – Советский Союз ла̄кквапатме порат предприятият пуссын вуньщалыг е̄мтсыт. Та порат туп савыӈ хо̄тпа ат тӯлмантас. Са̄выӈпа̄лэ па̄влыӈ ма̄хум рӯпата та̄л хультсыт. О̄лнэ ма̄тем ма̄гыс сымум сака ща̄ргыс. То̄нт ам хӯл алыщлым рӯпитасум. А̄щум ма̄н палтув бригадирыг о̄лыс. Тувыл 2001 та̄лт ам хӯл алыщлан община ва̄руӈкве номылматасум. Община ва̄рмум порат нэ̄матыр ат о̄щсум. Амки ё̄румтыл ла̄щалла̄щал матыра̄ти ёвтсум, а̄щумн нё̄тве̄сум. Моторанум, «Бурананум» тыналасанум. Ты олнанум пуссын община э̄лаль тотнэ ма̄гыс ойтсанум. То̄нт ам ётум хӯл алыщлым мощща хо̄тпа рӯпитас. Пувум хӯланув амки па̄га̄лумтасанум, тыналаӈкве тотыгласанум. Тыщир ты ла̄щлакв общинам но̄хво̄рмалтаслум. Ань рӯпитанэ̄в па̄сныл китхуйплов та̄лыг е̄мтыс. Хӯрум предприятие о̄ньще̄гум. Пуссын аквъёт китса̄т хо̄тпа ам палтум рӯпитэ̄гыт. О̄влэ̄т пувум хӯланув нас тыналасанӯв. Ань ва̄тахкем процент са̄вит пувум хӯланув ма̄нки тэ̄нутыг ва̄риянӯв. Хӯланув солвалтэ̄в, то̄слэ̄в, восытэ̄в, пельменит, котлетат, фарш ва̄ре̄в. Ха̄льӯст, Ягримт, Кульпаст ла̄пкат пуссӯв. Ва̄рнэ тэ̄нутанув тот тыналэ̄в. Ты коныпал ма̄н округ янытыл ос э̄лаль мо̄т ма̄н тэ̄нутанув тыналаӈкве тотыянӯв. – Саранпа̄выл ма̄хум ла̄ве̄гыт, на̄н община хо̄тпанын я̄ па̄ӈхвитэ хоса толгыл янытэ̄т лапто̄варттыяныл. Тыима̄гыс Саквъя̄н сорых сэ̄руӈкве сака мощща ёхты. Наӈ ты урыл хомле номсэ̄гын? – А̄ти, тыи сумп потыр. Ма̄н квотал миве̄в. Тыгыл са̄внув хӯл ат пуве̄в. Ты ва̄рмаль а̄ти я̄ то̄варттан хосыт е̄мты. Сорых хӯл ка̄сыӈ та̄лныл матрыг акваг ло̄ӈхальнув сэ̄руӈкве ӯнты. Ам номсэ̄гум, Саквъя̄ то̄самыг е̄мтнэ ма̄гыс хӯл алгаль ат мины. Са̄ртын ма̄н рыбаканув тэ̄лы порат хӯл алыщлаӈкве Саранпа̄вылн ялантасыт. Ань юио̄выл хо̄тахкем та̄л сыс сорых Та̄гт я̄т сэ̄руӈкве ӯнты. Са̄ртын тот хӯл щар мощща хультсас. Мо̄лты та̄л тох о̄лыс. Хӯл сэ̄рнэ порат я̄т витэ ма̄ниг е̄мтыс. Тыима̄гыс хӯл по̄р то̄ва ма̄т па̄гто̄свес. Тувыл ос то̄ва сорхыт со̄рганыл щар та̄тылат, кӣвырт няльщ туп хо̄нтыгласӯв. Я̄ витэ ма̄нь, хӯлытн тэ̄ӈкве нэ̄матыр, э̄лаль яныгман ва̄рмаль а̄тим. Таима̄гыс ты мощщами. – Ха̄льӯс район кӯщай ла̄выс, на̄н сорых хӯл са̄вмалтан ма̄гыс по̄р государстван мыгы̄н. – Ма̄н Тюмень ӯс наука институт ёт договорнэ̄пак хассӯв. Аквхуйпловкем та̄л палыт хӯл по̄р тув та̄стэ̄в. Та по̄р Тобольск ӯсн хӯл янмалтан заводн тотаве. Акв па̄лэ ювле я̄н та̄ратаве. Мощло̄мт ос ла̄пкат тыналаве. – Саранпа̄выл ма̄хум ла̄ве̄гыт, на̄н хӯл алыщлаӈкве та̄нанылн ат мыгы̄н, хӯл алгаль ёхтуӈкве ат ве̄рми. – Ятаты, хумус ат мыгӯв. Я̄ тармыл ка̄сыӈ хо̄тпа хӯл алыщлаӈкве ве̄рми. Саранпа̄выл, Ло̄пмус, Кимкъясӯй, Кульпас, Ягрим па̄влытт о̄лнэ ма̄хум пуссын аквте̄м алыщлэ̄гыт. Нэ̄матыр ат ла̄ве̄в. – Та̄нанылн ты урыл маныр ла̄ве̄гын? – Та̄н та̄нки ма̄вит па̄ӈктысаныл. Арген са̄в сыресыр техника тот яласы. Тэ̄лы порат я̄ хосыт «Бураныл» яласэ̄гыт, я̄ӈк то̄рнаве, хӯл рохтуптахты. Тувыл нё̄рт со̄рни ловтаве. Тыил о̄с я̄ витэ сака па̄ӈктаве. Таима̄гыс хӯл тув минуӈкве ат таӈхи. Ты коныпал та̄нки о̄с хӯл сака мори алыщлэ̄гыт. Сорых, сӯкыр, нялк миннэ порат а̄лыматта̄л пуве̄гыт. Ётыл ос ла̄ве̄гыт, э̄рттам ма̄н общинав хосыт хӯл мощщами. Саквъя̄ ма̄хум ос община кӯщай потраныл тох акван аты ёхтысыт. Ос та сыс, ка̄сыӈ та̄лныл я̄нанувт матыр ва̄рмаль щирыл сорых акваг та мощщами. Ты тэ̄ла учёный хо̄тпатн ёмщакв ханищтаӈкве э̄ри. Атиӈк хотты порат хӯл та̄л хультэ̄в тах.

1065 2013.12.06. Людмила ТЕТКИНА

Самутнёлн ӯщлахтуӈкве во̄ваве̄н. Яныг таквс э̄тпост Ханты-Мансийск ӯст «ЮграТур -2013» нампа суссылтап рӯпитас. Наталья Комарова, округ губернаторув, тув о̄с ёхталас. Тав грантолн вим ма̄хум янытласанэ ос сертификатнэ̄пакыл мӯйлуптасанэ. Ты та̄л грантолн винэ ма̄гсыл округ янытыл Ханты-Мансийск ӯсн 26 заявка ке̄тыглавес. Тамле касылыт но̄хпатум общинат манос организацият 500 со̄тыра солко̄ви ос 3 миллион 500 со̄тыра солко̄ви са̄вит грантолныл майве̄сыт. Валентина Ирган (Юрьева), Белоярский район «Самутнёл» нампа общинат кӯщай нэ̄, «Развитие инфраструктуры этнографического туризма» нампа номинацият но̄хпатыс. Ам Валентина Дмитриевна общинатэ урыл китыгласлум. Тав ювле таи потыртас: –Ма̄н общинав са̄в та̄л рӯпиты. О̄влэ̄т ма̄н хӯл алыщлым, пил ва̄тым, ӯльюв сартым олн сэ̄лсӯв. Хӯрум та̄л ювле хультум порат о̄с акв тамле суссылтапын ёхталасӯв, хӯл, пил, ӯйхул совыт тыналасӯв. Акв хум ма̄нав китыгластэ, ма̄н о̄лнэ ма̄вн хӯл алыщлаӈкве ёхталаӈкве ро̄ви ман а̄ти. Ма̄н таве Самутнёл па̄вылн няслуӈкве, ӯщлахтуӈкве во̄выслӯв. Тав такви юртанэ ёт туи хӯл алыщлаӈкве ёхталас. Ань ка̄сыӈ та̄л са̄в мӯй ма̄хум ма̄н па̄влувт мӯйлы. Общинав Самутнёл па̄вылт ва̄рыслӯв ос акв тамле намыл пиныслӯв. Ань тот нэ̄мхотьют ат о̄лы, ма̄н туп хӯл алыщлаӈкве тув ёхталэ̄в. Ты па̄выл Ванзеват ляпат о̄лыс. Па̄влыӈ мир мо̄т ма̄н ва̄нтласыт ос та̄нки пе̄с коланыл, со̄мьяханыл тот хультсыт. Ма̄нки о̄лнэ кол тот ӯнттысӯв. Мӯй ма̄хманув ма̄н культурав урыл о̄влэ̄т сака ат пӯмщалахтасыт. Тувыл акв порат китыглахтасыт, со̄мьях по̄хат по̄слахтуӈкве ро̄ви ман а̄ти. Ам ювлела̄всум: «Манрыг ат ро̄ви, по̄слахтэ̄н». Ты юипа̄лт та̄н са̄всыр ва̄рмалит урыл китыглахтуӈкве патсыт, манрыг тамле со̄мьях ӯнттаве, хумус пе̄с порат хантыт о̄лсыт, хумус хӯл алыщласыт. Ма̄хум ёт потыртым тыи торгамтасум, туристыт а̄ти нас няслуӈкве тыг во̄виньтаӈкве э̄ри. Ма̄нки ханты ос ма̄ньщи культурагув урыл потыртаӈкве о̄с э̄ри, то̄нт са̄внув ма̄хум ёхталаӈкве тах патэ̄гыт. Туи ка̄саще̄гыт ке, пил ва̄туӈкве, ла̄хыс атуӈкве тотыглыянӯв. Ос суссылтыянӯв, хантыт па̄йтнэ ма̄гсыл хӯл хумус яктыяныл, хумус солвалтыяныл ос то̄слыяныл. Ань округувт «Беткаш» нампа организация рӯпиты. Та̄н уранылт са̄в туристыт ва̄гыт, са̄в э̄лумхо̄лас тув яланта̄лы. Ма̄н пе̄с йис ва̄рмалянув урыл потыртым, о̄с са̄внув олн сэ̄луӈкве ве̄рме̄в. Ань таи ёмас, ты рӯпата ва̄рнэ ма̄гсыл грантолн миве. То̄нт ма̄н проектнэ̄пак хассӯв ос тыг ке̄тсӯв. Ты олныл ма̄н Самутнёл па̄вылт мӯй ма̄хум ма̄гсыл о̄лнэ колыт ӯнттуӈкве тах патэ̄в. Ань па̄влувт акв яныг кол о̄лы, аквторыг тот 12 э̄лумхо̄лас о̄луӈкве ве̄рми. Ты коныпал тот ма̄н пувлынкол ӯнттэ̄в. Ты э̄лыпа̄лт хум хо̄тпат туп хӯл пувуӈкве ёхталасыт. Тамле колыт ке ӯнттэ̄в, ма̄хум ще̄мьяӈ та̄гыл тот ӯщлахтуӈкве патэ̄гыт. Ос таи ёмас, Белоярский район миркол кӯщаит ма̄навн о̄с нё̄тэ̄гыт. Ты э̄лыпа̄лт ма̄н районный грантолн ма̄гсыл нэ̄паканув ке̄тыгласанӯв. Тувыл олныл майвесӯв, то̄нт ма̄н ё̄рнкол ёвтсӯв. Касум па̄выл нупыл о̄лнэ ма̄хум са̄лыяныл ёт яласым ё̄рнколт о̄лсыт. Ма̄н, А̄с я̄ хосыт о̄лнэ хантыт, тамле кол ат о̄щсӯв. Туристыт ма̄гсыл тӯщтыслӯв, та̄нанылн тыи пӯмащ. Туи порат ка̄саще̄гыт ке, тот хуюӈкве ве̄рме̄гыт. Мӯй хо̄тпанув акв хо̄тал ма̄гсыл ат со̄тыра солко̄ви ойтэ̄гыт. Ма̄хум Москва ос мо̄т э̄лы ма̄ныл тыг ёхталэ̄гыт, та̄н ма̄гсыланыл ты а̄ти са̄в олн. Аквторыг яныг группа 10-12 э̄лумхо̄лас ёхты ке, та̄н пуссын аквъёт туп 15 со̄тыра солко̄ви ойтэ̄гыт. Ань са̄в рӯпата о̄лы, соссаӈ хо̄тпанув тыг рӯпитаӈкве выганӯв. Таса̄вит ма̄хум ма̄гсыл тэ̄нут па̄йтуӈкве, пувлынкол па̄лтыглаӈкве ос няслуӈкве тотыглаӈкве, рӯпитан хо̄тпа са̄в э̄ри. Ӣтипа̄лаг ос та̄нанылн пе̄с йис мо̄йтыт, а̄мщит, потрыт потыртэ̄в. Тамле рӯпата туп соссаӈ ма̄хманув ва̄руӈкве ха̄сэ̄гыт.

1065 2013.12.06. Валентина УЗЕЛЬ

Са̄в номтыӈ ма̄хум Ха̄льӯсн ёхталасыт. Ха̄льӯст Российский научный конференция о̄лыс, «Меншиковские чтения – 2013». Тув са̄всыр ма̄ныл наука рӯпата ва̄рнэ ма̄хум ёхталасыт. Ты конференция 2003 та̄л па̄сныл ва̄рыглаве, тит та̄л сыс акв щёс. КА̄нащ О̄йка урыл Меншиков Александр Данилович – тав хо̄нын нё̄тум хумыг о̄лыс, ка̄нащ нам о̄ньщис. 1673 та̄лт самын патыс, ще̄мьяныл щёлыӈыг сака ат о̄лыс, таима̄гыс та̄ра лусытаӈкве вуйвес. Тот ты тав сака ка̄ркамыг о̄лме ма̄гыс, яныг кӯщаитн ка̄салавес. Хус та̄лэ то̄влуме порат тав Петр I хо̄н ляпан рӯпитаӈкв во̄ввес. Та порат ма̄хум халанылт сака хо̄нтлысыт, Александр Меншиков са̄всыр ма̄т хо̄нтлым яласас. 1711 та̄лт Пётр I Молдавия ма̄ нупыл хо̄нтлуӈкве минас, ты юртэ Санкт-Петербург ӯст хультуптастэ. Акв та̄л сыс Меншиков ё̄ре хосыт ты ӯс са̄в хорамыӈ дворецколытыл ӯнттувес, та̄н ань пуссын «памятникыг» ла̄вавет. Ос ты хум акв лю̄ль пищ о̄ньщис – олн сака тӯлмантас, мо̄т щёлыӈ ма̄хум коланыл, ма̄наныл пуссын такви нупылэ хассанэ. Ты лю̄ль ва̄рмалит урыл хо̄нув ма̄хмытын акваг потырта̄лвес, аквмат порат тав туре̄н ёхтыс ос ляпа юртэ Александр Меншиков ла̄выстэ, таитэ тӯлмантам олнанэ пуссын ювле вос мыганэ. Тувыл ты яныг хо̄н хотталь щалтыс, мо̄т ма̄хум тув воратаӈкв патсыт. Та̄н А. Меншиков ат э̄руптасаныл, пуссын ты о̄лум ва̄рмалит Пётр II йильпи хо̄нын потыртасыт. 1727 та̄лт Александр Меншиков та пуввес, ще̄мьятэ ёт тыг Лӯима̄н Ха̄льӯсн те̄твес. Ты е̄рн минаманыл порат лё̄ӈхыт э̄кватэ а̄тимыг е̄мтыс, хум пыге ос а̄гиянэ ёт та хультыс. Ха̄льӯсн ёхтуманыл порат Мария а̄гитэ холас. Такви тав о̄с тит та̄л туп о̄лыс, тувыл хотталь щалтыс. Ты йис урыл Ань лов та̄лыг ты е̄мтыс, са̄всыр яныг учёныит Меншиков ка̄сталан ма̄гсыл Ха̄льӯсн ёхталэ̄гыт. Ты та̄л о̄с аквтох – Москва, Тюмень, Омск ӯсытныл, Оренбургский областьныл ос ма̄н округувныл ма̄хум тув ялсыт. Та̄н халанылт са̄выӈпа̄лэ пуссын ты ка̄нащ о̄лупсатэ урыл потыртасыт. Нижневартовск ӯсныл история наукат доктор нам о̄щнэ хум В. В. Цысь ёхталас, тав ос ты урыл потыртас – Ха̄льӯс ма̄т советский власть хумус ва̄рвес. Ма̄хум о̄лэ̄гыт, аты ва̄гыт – мо̄т власть кӯщаит ёхтумыт. О̄лэ̄гыто̄лэ̄гыт, власть о̄с мо̄таныг та е̄мтум. Ха̄льӯс школат ханищтахтын ня̄врамыт Ира Кустышева, Саша Белоцерковцева ос Наташа Левданская Сергей Собянин урыл потыр щё̄пита̄лсыт, хумус тав Ня̄хщамво̄льт яныгмас, хо̄т рӯпитас. Потыртаманылт сыс пе̄с хурит мирн суссылтасыт. Тит ханты нэ̄ хо̄тпаг М. Лапина ос Р. Решетникова о̄с потыртасы̄г. Маина Лапина Тэ̄к па̄влэ урыл потыртас. Раиса Решетникова та урыл ла̄тыӈ ла̄выс, ма̄ньщи ос ханты газетагт хоты та̄л па̄сныл пе̄с ва̄рмалянув, пе̄с наканув урыл ма̄хум потрыт хансуӈкве патсыт.

1065 2013.12.06. Светлана РОМБАНДЕЕВА

Хо̄рыӈпа̄выл ма̄щтыр хум. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Ха̄льӯс район Хо̄рыӈпа̄вылныл ма̄ньщи хум Рудольф Васильевич Меров ёхталас. Тав ос толыг хасыс. Ты э̄лыпа̄лт э̄тпостем тав са̄глат ёргыс, та̄р щё̄питас. Ам таве китыгласлум, тав ма̄нь та̄гыл толыг хасы? На̄н ань э̄лаль Рудольф Васильевич потре ловиньтэлы̄н. – Ма̄нь порат тай нас сунсэ̄в, яныгнув е̄мтсув ос хо̄т матыр нё̄тэ̄в. Ӯсма хосатнув туйсув, ма̄нти сэ̄тапыл, то̄нт ёмщакв хӯлп ат нэ̄глы, ӯсма а̄тим. Ла̄пка сэ̄тапыл, 10й номерыл, нас хлопчатобумажный осыӈнув сэ̄тапыл ӯсма туе̄в. Ве̄рмуӈкве патсув, тай а̄тянувн нё̄тэ̄в, туе̄в, нэ̄гсалэ̄в. Ӯнлуӈкве э̄ри хоса, нэ̄гсалаӈкве, матараӈкве. Хасуӈкве тай ма̄нь порат ат ха̄сэ̄в, а̄тям такви хасыянэ. Ӯсма туйнэ ма̄т тай нё̄тэ̄гум, ве̄рмуӈкве патсум, ханьщувласум. Хӯлпыт то̄ват па̄лиг туюӈкве э̄ри, то̄ва хараг. Нялк ма̄гыс тай сака ма̄нь, та̄рвитыӈ туюӈкве ӯсма. Хара ут тай кӯстырнуве, пувиньтахтуӈкве ка̄т лапсы. – Ла̄пкат ань май матырсырмат китайский хӯлпыт тыналавет, таит улпыл во̄втат? – Таит тай сака во̄втат. Ань пуссын рущ щирыл о̄луӈкве патсыт, ла̄пканыл хотыла̄ти выгыт. Та̄н о̄с са̄всырыт, тувыл саманыл о̄с са̄всыр самыл о̄лэ̄гыт, хотьют хара, хотьют па̄ль. Ащирма порат та̄нанылт пувиньтахтуӈкве сака торас, ка̄миньтыт, то̄ват тув хотталь тэ̄лумтэ̄гыт. О̄влэ̄тнув ат ха̄ссум тамле хӯлпытыл алыщлаӈкве, ха̄пыт сака таглэ̄гыт. Тувыл ань тай ханьщувласум, ущты мощ алыщлэ̄гум. Нас капрон ӯсмал ва̄рнэ хулпыт ань сака тыныӈыт, китайский утрищит тай тынта̄лнувет, жилканыл ва̄рим утыт. Пенсия винэ хо̄тпа аквман хӯлп выг, пенсиятэ тув та мины. Ты семинарт ам са̄всыр рӯпата ва̄рсум са̄гла ва̄рсум, та̄р щё̄питасум. Та̄р ма̄гыс ма̄н Иртыш я̄ ӯлтта ялсув, хусахтем ве̄рста ма̄шинал во̄рн минасув. Ӯльпа та̄р висув, тот са̄выӈ ма̄т осытнув о̄лэ̄гыт. Мо̄т та̄рыт саквалэ̄гыт, ӯльпа та̄р мощ нюпыщнуве, мори ат саквалы. Ань ос тыхо̄тал хӯлпум ёт капыртэ̄гум. Толгум акв па̄лэ, тыхо̄тал аман а̄сты. Атхуйплов метра ва̄рсум, иӈ ловмантем метра хультыс. – Рудольф Васильевич, наӈ хо̄т самын патсын? – Ам Хо̄сло̄хт самын патсум, 1947 та̄лт ойттур э̄тпост. О̄влэ̄т Ло̄пмуст ханищтахтасум нила класс мус. Э̄лаль Кульпаст ханищтахтасум, тот нёлолов класс а̄стласум. Тувыл ханищтахтын ма̄ныл та по̄йтсум, рӯпитаӈкве патсум. А̄тям Василий Никитич Меров, Мувыӈте̄сныл о̄лыс, соссаӈ. Колхоз ва̄руӈкве патвес, пуссын акванатве̄сыт, Хо̄сло̄хн ва̄нтлысыт. Омам Мария Николаевна Гоголева, тав тай Кӯртъя па̄вылныл о̄лыс, А̄нъя по̄хат. А̄тям ань хӯл алыщлым яласэ̄гыт, А̄сн хо̄та̄ти, яласанэ̄тэ мус хо̄т акванхо̄нтхатсы̄г, тувыл Хо̄сло̄хн та ёхтысы̄г. Ма̄н онтолов пыг о̄лсув, кит яга̄ги. Ам котиль. Ань хум хо̄тпаныл амттем хультсум, йӣгрищум наме О̄лька, Ня̄хщамво̄льт о̄лы. Ам Хо̄рыӈпа̄вылт рӯпитаӈкве патсум. Тот известка ва̄рнэ промкомбинат о̄лыс, известка щаритасӯв. Известка щаритым лов та̄л рӯпитасум, тувыл завод хотпо̄илттавес, известка воссыг ва̄руӈкве ат патвес. Ань туп колъёре о̄лы, кӯрыг о̄лум утыт та маныр, ёл ты нилявет. Та юипа̄лт акв та̄л ла̄пкат рӯпитасум, рӯпата е̄мты, са̄всыр рӯпатан патхата̄лсум. Ань тай ня̄враманум яныгмасыт, ма̄нь а̄гим тыт Ханты-Мансийск ӯст ще̄мьятэ ёт о̄лы. Э̄лнаӈ Хо̄рыӈпа̄вылт са̄в мир о̄лыс. Ань ма̄н хӯрмахнилах хо̄тпа хультсӯв, тармыл аквагнув о̄лэ̄в. То̄ват ёхталэ̄гыт, минэ̄гыт та̄ра, коланыл хом ӯнлэ̄гыт кос. Рӯпата а̄тим, нэ̄матыр ва̄руӈкве, пуссын миныгласыт, хо̄т рӯпата о̄лы. Хӯл алыщлаӈкве тамле та̄рвитыӈнув рӯпата, ань хӯлэ пыл а̄тим, тох ат та̄ртаве мори алыщлаӈкве. Хосатнув те, хо̄т хӯл матыр алыщлэ̄в, рыбкоопн ман хотталь мыганӯв, вуйве̄сыт. Ань нэ̄пакло̄мт ат те о̄ньще̄гын, алыщлаӈкве ат та̄ртавен. Ань тэ̄нэ хӯлув ма̄гыс нэ̄пакыл миӈкве ат патвесӯв, ат та̄ртуӈкве патвесӯв. Ляпат тэ̄нэ хӯл алуӈкве ат ве̄рме̄в, хӯлэ а̄тим, ань сорых а̄тим. Рудольф Васильевич тох та потыртас. Ты я̄тил ма̄ньщи хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалаве.

1065 2013.12.06. Тамара МЕРОВА

Ощхуль ва̄рнэ э̄типа̄ла о̄лыс. Ты э̄тпос атхуйплов щислат Ханты-Мансийскат о̄лнэ ма̄хум са̄выӈпа̄лэ «Югра-Классик» колын щалтсуӈкве тахсыт. Ка̄тыт билет о̄щнэ ма̄хум молямтахтым тув щалтсыт, мо̄таныт кон мо̄т хо̄тпат халт ё̄мыгтасыт ос арыг билет китыгласыт. Та э̄типа̄лаг тот «Тэ̄лы пора КВН» касыл ва̄рыглавес. Ханты-Мансийск ӯсн нила команда ёхталасыт, тыи: «Союз» Тюменский областьныл, «Парапапарам» Москваныл, Сборная физтеха Долгопрудный ӯсныл ос Астраханский е̄рныл Камызяк ӯсныл мӯй хо̄тпат. Та̄н пуссын хӯрум касылыт ощхуль ва̄рим та̄нки халанылт кассыт. Жюрихо̄тпаг тот Государственный Думат рӯпитан депутат Леонид Симановский, округ Дума кӯщай Борис Хохряков, телевидениет рӯпитан хум Вячеслав Смуров, чемпионыг о̄лнэ боксёр Руслан Проводников ос Мариинский театрыт э̄ргын нэ̄ Ольга Кондина о̄лсыт. Ка̄с ва̄рнэ ма̄хум халт «Союз» командат акв нэ̄ туп о̄лыс, мо̄т команданылт нэ̄ хо̄тпа ёныг пыгытн ёнгуве̄сыт. Ань Камызякыт палт акв та̄лква хум сака пӯмащиг ощхуль ва̄рыс. Акв касыл ва̄рнэ порат «Парапапарам» намаим пыгыт залныл кит а̄ги во̄виньта̄лсыт. Тэ̄натэ̄н турсуил са̄всыр суит ва̄руӈкве э̄рыс, тыи а̄ви хумус щихыртым па̄лыгпӯсхаты, матыр са̄ӈлатым ёлпаттаве ос са̄всыр э̄рыгсовыт. Ма̄хум маткем тот та мовиньтасыт. Тувыл «Разминка» касылыт хоты хо̄тпа матыр китыглаӈкве ка̄сащи, такви микрофонын ла̄вуӈкве ве̄рмыс. Ос щар ощмарыӈ ла̄тӈаныл ма̄гыс та̄н хотты командан мӯстысыт, тувыл мӯйлупсал (футболкал) мӯйлуптаве̄сыт. Тамле пӯмащ ва̄рмалит аквта щёс молях оигпасыт. Ма̄хум са̄в мовиньтасыт, ёмащакв ӯщлахтасыт. Камызяк ӯсныл ёхталам пыгыт ва̄рум ощхуляныл жюри ос пуссын ма̄хмытн сака мӯстысыт, та̄н но̄хпатсыт. Китыт местан «Парапапарам» ос «Союз» командаг пе̄риявесы̄г. Долгопрудный ӯсныл ёхталам пыгыт хӯрмит места висыт.

1065 2013.12.06. Тамара МЕРОВА

Хо̄тпа ёт ёмащакв о̄луӈкв ханищтаве̄в. Ханты-Мансийск ӯст о̄выл щёс «Культура и развитие» нампа форум ва̄рыглавес. Культура тэ̄лат хосыт рӯпитан ма̄хум тыг акванатхатыгласыт. Хӯрум хо̄тал сыс э̄ргын ос йӣквнэ ханищтапыт, суссылтапыт, касылыт ос концертыт ва̄рыглаве̄сыт. О̄выл хо̄талт ӯсыӈ манос районыӈ культура колытт рӯпитан кӯщаит е̄ӈта пасан ва̄тан атыглаве̄сыт. Тот 2014 та̄л «Культура та̄лыг» намаим о̄вылтыт ла̄вве̄сыт. Ты кастыл манхурип тэ̄лат ва̄рыглаӈкве ос хоталь са̄внув олн холтуӈкве э̄ри, хоты ӯст манос па̄вылт йильпи культурный центрыт, клубыт ӯнттуӈкве ро̄ве̄гыт, ос театрыт манос э̄ргынйӣквнэ хо̄тпатын яласан ма̄гыс хотыл олн виӈкве, пуссын ты о̄вылтыт аквъёт потыртасыт. Тувыл са̄в мирыт та̄нки халанылт юртыӈыщ о̄луӈкве вос ха̄ссыт, ты о̄вылтыт о̄с я̄нас потрамасыт. Са̄всыр мирыт культураныл щирыл акванюрщхатым о̄с акваннё̄тхатэ̄гыт ке, ты сака ёмас о̄лнув. Рущ щирыл тыи «толерантность» ла̄тӈыг ла̄ваве. Округувт 130 са̄вит са̄всыр мирыт о̄лэ̄гыт, та̄н тыт та̄нки йӣкваныл, э̄рганыл э̄лаль суссылтаӈкве о̄с вос ве̄рмияныл. Таима̄гыс ня̄врамыт, ма̄ньлат хо̄тпат ма̄гыс касылыт, фестивалит вос ва̄рыглавет. То̄нт э̄ргынйӣквнэ ма̄хум та̄нки халанылт ва̄йхатуӈкве патэ̄гыт, ос матыр яныг номтыӈ тэ̄латытн аквъёт ханищтахтэ̄гыт. Ань округув янытыл о̄лнэ са̄всыр ӯсытныл манос па̄влытныл 24 э̄ргынйӣквнэ коллективыт ёхталасыт. Та̄н тыт «Возьмёмся за руки, друзья» нампа фестивальт кассыт. Ты коныпал та̄н са̄всыр ханищтапын, суссылтапын во̄виньта̄лве̄сыт. «Академический вокал» нампа ханищтап Ольга Кондина ва̄рыглас. Ты нэ̄ Мариинский театрыт нё̄тнэ турсуил э̄рги. Ос мо̄т хо̄тпат ма̄хум йӣквуӈкве, са̄ӈквылтан утыл ёнгуӈкве ханищтасаныл. Тамле ханищтапыт «Центры искусств Валерия Гергиева для юных дарований России» нампа проект щирыл ва̄рыглавет. Ты э̄тпос са̄т щисланыл ос лов щислатэ мус Сургут ӯст о̄с акв ханищтап тах ва̄раве. Тув культурат рӯпитан ма̄хум атыглавет, та̄н «Мир через культуру» урыл тах потыртэ̄гыт. Андрей Петренко, Мариинский театрыт хормейстерыг о̄лнэ хум, тот ма̄хум ханищтаӈкв патыянэ. Тувыл 2012 та̄л сыс «Событие» нампа касылыт но̄хпатум хо̄тпат э̄сгуве̄сыт. «Время молодых» ос Н. В. Лангенбах намыл пиным библиотечный тэ̄лагт касум ос но̄хпатум хо̄тпат олннё̄тмилыл мӯйлуптаве̄сыт. Ты олннё̄тмилыл ва̄рнэ рӯпатаныл та̄н аквтох ве̄щкатыг э̄лаль вос тотыяныл. «Возьмёмся за руки, друзья» касылыт са̄всыр ма̄ныл ёхталам хо̄тпат халт «Лылыӈ союм» ос «Са̄лы лё̄ӈх» э̄ргынйӣквнэ ня̄враманув са̄в номинациятт э̄сгуве̄сыт ос дипломыл майве̄сыт. Гран-При яныг мӯйлупса «Кавказ» нампа коллективын мӯйлуптавес. Та̄н российский фестивальн ялнэ путёвкал майве̄сыт. Ма̄ньлат а̄гитпыгыт Нижневартовсканыл тыг ёхталасыт, кӯщаяныл Ибрагим Ибрагимов та ӯст о̄лнэ университетыт рӯпиты.

1065 2013.12.06. Николай МЕРОВ

Па̄вланувт са̄в ма̄щтыр хо̄тпат о̄лэ̄гыт. Ха̄льӯс район Саранпа̄вылт ёмас музей рӯпиты. Ты пе̄с йис пормасыт атнэ кол 1990 та̄лт па̄вылт о̄лнэ ветеран Советт рӯпитан ма̄хум та̄н ва̄руӈкве номылматсаныл. Та̄н э̄рнэ нэ̄пакыт щё̄питасыт ос 1993 та̄лт «Этнографический центр» пӯссыт. Тувыл э̄лаль хотьют хури, хотьют пе̄с йис пормас тув тотуӈкве патыс. Ётылнув 1999 та̄лт ты этнографический центр музеиг намаявес. 2002 та̄лт музей Ха̄льӯс район нупыл пе̄с йис пормасыт атнэ кол палт хасвес. 2007 та̄лныл ты кол «Саранпаульский краеведческий музей» намыл майвес. Э̄лаль рӯпитан ма̄гыс Саранпа̄выл миркол па̄лыл олн ойтаве. Кульпас па̄вылт о̄лнэ «На̄й О̄тыр Маа» нампа музей о̄с Саранпа̄выл музей нупыл хансым о̄лы. Тот о̄с са̄в пӯмащ, пе̄с йис пормасыт атым о̄лэ̄гыт. Яныг хо̄нт порат о̄лум писалит, маснутыт ос са̄всыр пормасыт тот ты ка̄салаӈкве ро̄ви. Тувыл хо̄нтлум хо̄тпат юв ке̄тыглам пищманыл тот о̄ньщавет. Йис порат ма̄хум хумус о̄лсыт, пе̄с хурит хосыт ёмщакв та̄рапаттуӈкве ро̄ви. Па̄влыӈ музеянувт рӯпитан хо̄тпат са̄всыр конференцият, семинарыт ва̄тихал ва̄рыглэ̄гыт. Пе̄с йис о̄лупса урыл ня̄врамытн акваг потыртэ̄гыт. 2012 та̄лт Саранпа̄выл музей Ха̄льӯс район янытыл щар ёмас музеиг ла̄ввес. Та музейт кӯщаиг Вера Павловна Комкова рӯпиты. Тэ̄лы порат ам тув ялсум. Тот клубколт суссылтап о̄лыс. Ты суссылтап са̄лыӈ ма̄хум каснэ ва̄рмаль кастыл щё̄пита̄лвес. Вера Павловна ты урыл мощ потыртас. На̄н тав потре э̄лаль ловиньтэлы̄н: –Ты суссылтап ма̄н Саранпа̄выл ма̄щтыр ма̄хум ё̄рыл ва̄рыгласлӯв. Пормасыт тыт о̄лнэ хо̄тпат ос ня̄врамыт та̄нки ма̄щтырласаныл. Саран ос ма̄ньщи мир о̄лнэхӯлнэ наканыл ос йис о̄лупса суссылтасӯв. «Оленёнок» нампа ма̄нь ня̄врам колт ос «Альянс» нампа колн ялантан яныгпа̄ла хо̄тпат ю̄нтум ос сэ̄тапыл сагум пормасаныл о̄с суссылтаӈкве майлысаныл. Ты Елена Никитична Бешкильцева сэ̄тапыл сагум хорамыӈ то̄ранэ. Тувыл сакныл ва̄рим са̄всыр пормас тот о̄лыс. Галина Николаевна Ларионова, Екатерина Сергеевна Ларионова, ма̄ньщи ма̄щтыр нэ̄г, сакныл хартум хуриянэ̄н суссылтасанӯв. Ирина Спиридоновна Филиппова ма̄ньщи суп ос пальсак тотыглас. Татьяна Фёдоровна Розявченко такви ва̄рум тучаӈ хӯрге тотыгластэ. Валентина Назаровна Волчок о̄с са̄в пормас тыг тотыглас. Такви ю̄нтум ос сэ̄тапыл сагум пормасанэ майлысанэ. Надежда Михайловна Устенцова хорамыл ю̄нтым нё̄тнэ а̄канянэ суссылтасанӯв. Тувыл Лариса Геннадьевна Николаева сэ̄тапыл сагум пормасанэ о̄с тотыгласанэ. Тав клубколт «Спицы мастерицы» нампа кружокн яланты. Кӯщаиг тот Наталья Валерьяновна Салтыкова о̄лы. Ты коныпал ос мо̄т са̄в хо̄тпат та̄нки рӯпатаныл тыг тотыгласаныл. Ты музейт рӯпитан ма̄хум ос ма̄щтыр хо̄тпат ма̄н пуссын янытлыянӯв. Та̄н сака э̄рнэ рӯпата ва̄ре̄гыт, пе̄с йис ва̄рмалит э̄лаль тотыяныл.

1065 2013.12.06. Светлана РОМБАНДЕЕВА

Щахыл тōрум( ма̄ньщи мо̄йт ). Щахыл Тōрум Э̄квапыгрищил юртыӈыщ, румаӈыщ ōлсы̄г. Акв хōтал Э̄квапыгрищ Щахыл Тōрум палт мӯйлуӈкв ялуӈкве номылматас. Ёсаге масыс, та минмыгтас. Ё̄мыс, ё̄мыс, аквматэ̄ртн тольхыӈ нё̄р щахылн ёхтыс, Щахыл Тōрум ōлнэ мāн нэ̄глыс. Сунсы, Щахыл Тōрум ёсаге ущ тэ̄лум нирн, ущ тэ̄лум пумн нōхтагатамаге. Таквирот номсахты: «Лылыӈ во̄нтырсов ёсаге хумус тув ханасы̄г, татем пумн, татем нирн нōхтагатамаге». Хумус ё̄мыс, ёсарищаге тох ӯнттыгпасаге. Нё̄р щахыл сунсыглытэ, нэ̄матыр ас āтим, ёсаге ханэ̄г, лё̄ӈханэ ōлэ̄гыт. Сунсыглахтас, сунсыглахтас, мāнь мат хал хōнтыс. Ёмащакв сунсы, насати, āви, пӯнсыстэ, ювщалтыс. Та хурип нё̄тнэ кол, акв сōрнитэ ёлпаты, акв сōрнитэ нōххāӈхи. Нэ̄ ю̄нсхатым ӯнлы, ōйкатэ хуи. Э̄квапыгрищ пащалахтас. О̄йка пōхт касай хуи, нэ̄ ōйкатэ касаил тӯщтыгпастэ. Аквматэ̄рт кāкуӈкве патыс, тувыл ке̄лпыӈ полх сальгим нōх ты ӯнтыс, пащалахтас, лāви: – Тахурип та мӯйхум ёхтыс. Ул хосат ёхтыс, моляхнув āнум квāлттуӈквен. Тав лāвыс: – А̄ти, ам ущты ёхтысум. Тувыл пащалахтасы̄г, утсы̄г, э̄кватэ нупыл лāвыс: – Тэ̄нут ман матыр пасанн щё̄питэн, мӯй хōтпа ёхтыс. Э̄кватэ пасан вāрыс, Щахыл Тōрум ос Э̄квапыгрищ акванӯнтсы̄г, хоса ман вāти ӯнлысы̄г, сāт мӯйлысы̄г. Щахыл Тōрум тав нуплэ лāви: – Конквāллэн, ялэн матыр āнысāн ёт вōвен. Кон лāвен: «А̄ны-ōвыл, сāн-ōвыл ёт йӣен, ювщалтыме̄н». Э̄квапыгрищ конквāлыс, номсахтас, номсахтас, хотьют тыт ōлы, юв āла щалты. Ювщалтуӈкв āрталахтуӈкве патыс, аквматэ̄ртн ня̄рм ōвыл сове̄ныл та пувумтавес. Ювле āӈкваты, тахурип нё̄тнэ нэ̄, акв сōрнитэ ёлпаты, акв сōрнитэ нōххāӈхи. Акванпӯхтысы̄г, юв та щалтсы̄г. Тувыл та мӯйлэ̄гыт, тэ̄пъялэ̄гыт. Щахыл Тōрум лāви: – Та нэ̄н ты ам э̄щум. Тувыл акван та минасы̄г. Хоса айсы̄г ман вāти айсы̄г, тэ̄пъяласы̄г. Э̄квапыгрищ руматэ нупыл лāви: – Хоса айсуме̄н ман вāти айсуме̄н, ам амти мāм нупыл ювле номсэ̄гум, амти мāмн минуӈкве таӈхе̄гум. Руматэ лāви: – Наӈ юв минуӈкве те таӈхе̄гын, минэн, наӈти нāйиӈ-ōтырыӈ мāхум хум. Наӈ хом минэн, тыхōтал хӯрмит хōтал тах колынёрын хотщё̄питэ̄лын, нэ̄н тах ёхты такви. Аквматэ̄ртн сōль хӯрмит хōталыг е̄мтыс, кон матыр мирги ман матыр суйты, āмпанэ хортэ̄гыт. Колъёрт нэ̄гылттахты, нэ̄тэ āнысуныл, вāнтсуныл ты ёхтыс, тасавит сāлы, сāлыӈлӯтыӈ тāгыл ёхтыс. Э̄квапыгрищ хотща̄гтыс, юв щалтсы̄г. Тав пōхе̄т нэ̄мат хосат ōлы Ӯс ōтыр ōйка пыгрищ. Аквмат хōтал Ӯс ōтыр ōйка пыгрищ номылматы: «Ты май ам ань рума ōньще̄гум, тувле нэ̄гылттахтэ̄гум». Ёсаге масыс, та ё̄ми, аквматэ̄ртн Э̄квапыгрищ ōлнэ мāн тув ёхтыс. Оо! Э̄квапыгрищ татем щёлыӈыг е̄мтум, акваг колэ сōрнитэ ёмас, тасавит сāлы, та маныр. Тув ё̄мыс, ёсаге хотрāтсаге, нōхтӯщтысаге, тувыл юв повартты: – Тэ̄хам, маныр ёмас наӈын. Э̄квапыгрищ, маныр щирыл тох щёлыӈыг е̄мтсын? Тэ̄сы̄г ман утсы̄г, Э̄квапыгрищ лāви: – Маныр, ам Щахыл Тōрум румам палт ялсум, та урыл щёлыӈыг е̄мтсум. – Тэм, маныр ёмас наӈын, āнум тув тотыглэ̄лын. – Наӈ кāсаще̄гын те, ялыме̄н. Та ё̄ме̄гманаре̄г, Э̄квапыгрищ ань лё̄ӈх ман мā вāгтэ. Нё̄р щахылн ёхтысы̄г. Ань Ӯс ōтыр ōйка пыгрищ Щахыл Тōрум лылыӈ во̄нтырсов ёсаге кāсалыяге, ущ тэ̄лум нирн, ущ тэ̄лум пумн нōхтагатымаг. Тав ат ве̄риты, та рōӈхалтахты: – Хумус ханасы̄г ёсаг ущ тэ̄лум нирн, ущ тэ̄лум пумн? ! Э̄квапыгрищ ос мōлты ё̄мнэ̄тэ хольт хумус ё̄мыс, тох ёсаге āӈхвыгтасаге, хотпаргалтасаге, тӯйтын та ӯнттыгпасаге. Та пыгрищ ос ёсаге такос ханлы пумн, ёсаге ат лапе̄г, нирт ёлхӯтэ̄гыт. Тав Э̄квапыгрищ мӯтраӈыг ōлыс, тав мӯтратэ̄л хотталь ворил та ханлысаге ёсаге нōх. Ӯс ōтыр ōйка пыгрищ китыглахты: – Наӈ ос манрыг ат тагатыягын нōх? – Маныр ам ёсагум, вос хуе̄г, хоталь минэ̄г. Тувыл ювщалтсы̄г, ань Э̄квапыгрищ āви вāгтэ, ювле нэ̄глэ̄г, пащалахтэ̄г. Сунсэ̄г, кит кол са̄м нупыл ща̄няге-āщаге кит йӣвсуп ӯнттым ōлэ̄г. Та пыгрищ ат ве̄риты, лāви: – Вот пӯмыщ, хумус тав ща̄нягеа̄щаге питил ва̄рсаге, но̄хӯнттысаге? Э̄квапыгрищин кāтыл тыкос туяве: «Астал ōлэн, астал». Тон кӯмт нэ̄ ю̄нсхатым ӯнлы, о̄с ōйкатэ касаил тӯщтыгпастэ. Та пыгрищ оста рōӈхалтахас: – О̄йкатэ та аластэ! Аквматэ̄ртн Щахыл Тōрум нōхрохтыс, ке̄лпыӈ полх сальгим, лāви: – Мӯйхумыг ёхтумыг. Ул хосат ёхтысын, манрыг āнум тāра ат квāлттыслын? Тувыл аквмат ōйка нōхӯнтыс, полх сальгыс, э̄кватэ̄н лāви: «Мӯйхумыг ёхтумы̄г, āнум нōхквāлттуӈкве. Матыр тэ̄нут щё̄питэн, пасан вāрен». Э̄кватэ пасан вāрыс, пасан вāтан ӯнтсыт. Щахыл Тōрум та Ӯсыӈ ōтырыӈ пыгрищ конке̄тытэ: – Минэн, конквāллэн, рōӈхен, āны-ōвыл, сāн-ōвыл юрт вōвен. Конквāлыс, та хāйталахты, āны-ōвыл, сāн-ōвыл юрт урыл ат номсы, та рōӈхи: – А̄ны-ōвыл, сāн-ōвыл ёт нэ̄ йийен. Нэ̄мхотьют ат ёхты, номсы хōӈха ōлы, ос ювщалтуӈкве патыс, аквматэ̄рт сыспāлт та пувумтавес. Номсы, аман хотьютн пувумтавес, ювле āӈкваты, яа, сампал нэ̄. Тав ат кāсащас кос, тамле нэ̄л маныр вāри, тувыл юв та щалтсы̄г. Юв щалтсы̄г ос та мӯйлэ̄гыт, ӯнлахōлэ̄гыт. Яныг вāпсэ лāви: – Хом ты мӯйлысуме̄н, айсуме̄н, амти мāмн миныме̄н. Щахыл Тōрум яныг вāпсэ нупыл лāви: – Нэ̄н минуӈкве таӈхегы̄н, хотьют пуве̄гум, та минэгы̄н, нэ̄н кӯщай. Минэ̄н, нэ̄н нэ̄нти витыӈмāӈ хумыг. Тувыл та мат ут нупыл лāви: – Наӈ юв ёхтэгын, колн щё̄питэ̄лын, тах тыхōталхӯрмит хōтал э̄кван ёхты. Тав Ӯс ōтыр ōйка пыгрищ номсы: «Ам тамле сампалсӯппал нэ̄л маныр вāре̄гум». Щахыл Тōрум Ӯс ōтыр ōйка пыгрищ нупыл кантмувес, тав торгамтастэ, ань тайитэ тох номсы. Тувыл Э̄квапыгрищ вāпсэ нупыл лāви: – Тыхōталхӯрмит хōтал кон ул квāллэн, юн ōлэн. Ам раквсамыл, вōтсамыл ёхтавем, ат вāглум, маныр вāре̄гум. Нэ̄н палтын тах тыхōталхӯрмит хōтал ёхтэ̄гум. Тōнт иӈыт сака кантмаве, мощ ань торгамтастэ, манхурип тав Ӯсыӈ ōтыр ōйка пыгрищ, ман щёлыӈ ут. Сōль, тэ̄н минаме̄н юипāлт хӯрмит хōтал Щахыл Тōрум матыр та вāрыс. Кон щахыл курги ман матари, та мирги. Аквматэ̄ртн та нак холас, Э̄квапыгрищ конквāлы, яа, Щахыл Тōрум такви тав палтэ ёхтыс. Сāттем мӯйлысы̄г ман манарасы̄г, тувыл вāпсэ нупыл лāвсы: – Тōвлы, ялыме̄н ань та вāпсуме̄н палт, Ӯс ōтыр ōйка пыгрищ палт, хумус ōлы тав. Яты, тув ёхтысы̄г, хумус ё̄мсы̄г матыр ёсанэ̄н кон та вущкасасанэ̄н, юв щалтсы̄г. Ӯсыӈ ōтыр ōйка пыгрищ ща̄ниг-āщиг ōньщи, пōщгум колсāмн тув ханлыяге. Ща̄няге-āщаге нōх такос ханлыяге, манрыг нōх ат ханэ̄г, тэ̄н та рōӈхе̄г, щисге̄г, ня̄ӈхе̄г. О̄с Э̄квапыгрищ мӯтрал ворил та нōхханлысаге. Тувыл э̄кватэ касайил куратаптыстэ, акватэ акваг āла та хуяс, ōс Э̄квапыгрищ мӯтрал хотталь нōхсāйкатавес. Тувыл лāвса̄лы: – Мӯй китыг ёхтумы̄г. Ул хосат ёхтысы̄г, манрыг āнум нōх ат сāйкатаслын? Э̄квапыгрищ лāви: – Хосат хунь ёхтысаме̄н, ущ ёхтысаме̄н. Тувыл ӯп ōйкатэ вāрыглаӈкве та патыстэ. Щахыл Тōрум номтэ̄т татем тāрвитыӈ патыс, тувыл аквматэ̄рт яныг вāпсэ нупыл лāви: – Я, тōвлы, ме̄нти мāмме̄н миныме̄н. Э̄квапыгрищ вāпсэ̄нтыл та минасы̄г. Юн ōс мӯйлысы̄г, манарасы̄г. Щахыл Тōрум ōйка лаве та ёхтыс, вāпсэ нупыл лāви: – Тыхōталхӯрмит хōтал наӈ кон ул нэ̄гылттахтэн. Ам тах юв ёхтэ̄гум, хунь вāглум матыр вāре̄гум, матыр раквсамыл, вōтсамыл хōюӈкве патавем, кон ул нэ̄гылттахтэн. Тувыл сōль, хӯрмит хōтал е̄мтыс, матыр курыгтаве, мирыгтаве, щахлыт та утэ̄гыт, нас кургимирги. Щахыл минас, Э̄квапыгрищ коннэ̄гылттахтыглы. Ӯсыӈ ōтыр пыгрищ ōлум колъёре ман пāвылъёре тāтыл сэ̄ӈкв, щар витыг тотыма. Ань манрыг Щахыл Тōрум вāрыгластэ, витыг та тотвес.

1065 2013.12.06. Светлана РОМБАНДЕЕВА

Кульпас па̄выл ма̄ньщи нэ̄. Хурит ма̄ньщи нэ̄ по̄слым о̄лы, Евдокия Ильинична Сайнахова, а̄ги о̄парищ наме Оманова. Тав Ха̄льӯс район Кульпас па̄вылт самын патыс, ре̄тыӈ ю̄свой э̄тпост, 1976 та̄лт. Евдокия иӈ ма̄нь о̄лыс, акв та̄лэ туп то̄влыс, оматэ Галина Васильевна а̄тимыг е̄мтыс, а̄ги о̄парищ наме Лелятова о̄лыс. Евдокия увщияге ос а̄тятэ ёт яныгмас. А̄тятэ Илья Семёнович, увщияге Ольга ос Вика. Кульпас па̄выл школат онтолов класс а̄стлас. Китхуйплов та̄л пӯльницат рӯпитас. Ань май ма̄нь па̄влытт пӯльницат йильпи щирыл рӯпитаӈкве патсыт, Кульпаст о̄с аквтох, са̄в ма̄хум рӯпатаныл по̄хан ке̄тве̄сыт. Евдокия о̄с рӯпата та̄л хультыс. Ань школан патхатас, тот рӯпиты. А̄гипыг янмалты – Максим ос Валентина. О̄йкатэ наме Сергей Валерьевич, Ягрим па̄вылныл о̄лы. Яныг увщитэ Ольга ще̄мьятэ ёт о̄с Кульпаст о̄лы. О̄йкатэ Василий Лаверин, а̄гипыг о̄ньще̄г – Алена ос Андрей. Вика увщитэ хосатнув хотталь щалтыс, кит ня̄врамаге савалапыг хультсы̄г. Ня̄врамыг Евдокиян вуйвесы̄г, тав янмалтыяге Галя ань Ханты-Мансийск ӯст ханищтахты, нёлоловхуйплов та̄лэ то̄влыс, Кирилл ос ловит классыт ханищтахты, таве̄н хо̄тхуйплов та̄л. Ты я̄тил ма̄ньщи ще̄мьяв пуста̄гыл вос о̄лы. То̄рум ёт, О̄тыр ёт, пус ка̄т, пус ла̄гыл!

1065 2013.12.06. Анна АЛГАДЬЕВА

Ка̄тыл по̄слаӈкв ха̄снэ а̄гит. Мощ мо̄лалнув Хулюмсӯнт па̄выл школа искусств колн ялантан ня̄врамыт ханищтан хо̄тпаганыл ёт Белоярский ӯсн ялсыт. Тот «Северные Артдиалоги» нампа окружной конкурсвыставка ва̄рыглавес. Са̄в ма̄щтыр ка̄тыӈ ма̄хум ос ня̄врамыт тув атхатыгласыт, тот та̄н халанылт ханищтахтасыт ос по̄слам хурияныл суссылтасыт. Н. К. Маслова, ня̄врамыт ханищтан нэ̄, тав палтылэ ялантан китхуйплов та̄л яныт хӯрум а̄ги ёт тотыглас, ты Мария Лаверина, Екатерина Алгадьева ос Виктория Боженко. Конкурсн минуӈкв са̄в ня̄врам кос ка̄сащас, туп хӯрум ня̄врам ёт виӈкв ро̄выс. Ты а̄гирищит атыт та̄л Надежда Константиновна палт ялантэ̄гыт. Ты сыс са̄в матыра̄ти ва̄руӈкв ханьщувласыт. Ханищтан нэ̄ныл ёт та̄н о̄льпыл по̄слаӈкв, ю̄нтуӈкв ос сак хартуӈкв ханищтахтэ̄гыт. Ма̄щтыраныл а̄рталаӈкв миннэ̄ныл э̄лыпа̄лт суссылтаӈкв тотнэ картинаныл ёт таквсы каникул хо̄таланылт ка̄сыӈ хо̄тал рӯпитасыт. Пуссын аквъёт о̄льпыл по̄слым хӯрум картина ос сэ̄тапыл ю̄нтым, сакыл хартым са̄т панно ёт тотыгласыт. Рӯпатаныл порсыг ат минас, Анастасия Просункова ос Таня Сивцова сакыл хартым ос сэ̄тапыл ю̄нтым картинанэ̄н ма̄гыс о̄выл местал майвесы̄г, Виктория Боженко о̄льпыл по̄слам картинатэ о̄выл места вис. Ты коныпал ня̄врамыт пуссын грамотал майве̄сыт ос конкурс кубокыл мӯйлуптаве̄сыт. Ос акв по̄слан кружокт ханищтан нэ̄ А. А. Снегирёва о̄с хӯрум а̄гирищквет ёт аквты конкурсн ялсыт, та̄н о̄с ка̄тыл по̄слым ат хӯри суссылтан ма̄гыс ёт тотыгласыт. Ты Яна Таратова, Елизавета ос Дарья Абрамовыг. Лиза Абрамова о̄льпыл по̄слам хуритэ ма̄гыс китыт местал майвес. Ты ня̄врамыт иӈ ма̄ньнуват, торыӈ щирыл матыр ва̄руӈкв сака иӈ ат ха̄сэ̄гыт, ущ ханищтахтэ̄гыт. Яныг а̄гияныл нупыл сунсым ос мо̄т ма̄хмытн а̄ӈкваталым ханищтахтэ̄гыт, яласым ты ня̄врамыт та̄нкина̄нылн э̄рнэ номт пуӈкын выгыт, хуньт э̄рыӈ та̄н ты матарыг е̄мтэ̄гыт. Ам Мария Лаверина яласам лё̄ӈханыл урыл китгаласлум, ме̄н потруме̄н тох ты о̄лыс: – Хумус яласасы̄н? Маныр хащсы̄н? – Ёмщакв яласасӯв. А̄нумн Белоярский ӯс мӯстыс, ма̄нь ӯскве, коланэ такем нё̄тнэт, хорамаӈыт. Такем ёмас гостиницат о̄лсӯв. По̄слан хум Сергей Николаевич Устюжанин ёт румалахтасӯв, тав по̄слан урыл «мастеркласс» суссылтас. Касум па̄вылн тотыглавесӯв. – Маныр пӯмащ ва̄сын? – Музейн тотыглавесӯв. Тот ханты супыл масхатам а̄ги по̄сласлӯв, тувыл ханты супыӈ а̄ги а̄кане ёт о̄с по̄сласлӯв, нас ханты пормасыт щуртата̄лсӯв. По̄слым хурит сунсыгласӯв. Ос во̄р кӣвырт ё̄мыгта̄сӯв, ӯйхулыт ма̄гыс о̄лнэ са̄всыр алщит ва̄сӯв: тӯлмах, во̄рто̄лнут, охсар, щёпыр, лэ̄ӈын ма̄гыс о̄лнэ алщит, хӯл пувнэ камка. Колн щалтсасӯв, кол кӣвырт такем яныг па̄л, акв сэ̄мыл охсар сов, кит выгыр охсар совыг ва̄сув, тувыл ва̄йиг ос са̄всыр кол пормасыт о̄лсыт. Та̄н о̄с сӯмъях о̄ньще̄гыт, туп ха̄ӈхылтапаныл мо̄т хурипат. – Манхурипат? – Тамле пуврыт, ё̄маспил нас щёрхилтымат, тувыл е̄ри тӯщтыма. Ма̄н ха̄ӈхылтапанув мо̄тхурипат. Тамле ты потыр ме̄н потыртасме̄н. Ам Маша ла̄выслум, ма̄ньщи ма̄хум ха̄ӈхылтапаныл о̄с тамле пуврыт ос нас щёрхилтым о̄лсыт, щёрхилыӈ ха̄ӈхылтапыг ла̄вве̄сыт. Ань о̄щнэ сӯмъяханув са̄выӈпа̄лэ то̄сыӈ рущ ха̄ӈхылтап о̄ньще̄гыт, ёлано̄х кӯстырыг вос яласаӈкв. Пувыр ха̄ӈхылтапыл молямтахтым ла̄гыл хотхисатаӈкв, хотволкатаӈкв ве̄рми. Кӯстыр кинсым пе̄с ха̄ӈхылтапыт по̄хын патсыт. Ань ӯнттын йильпи сӯмъяхыт, хоса вос ве̄ритасыт, порсӯйит мори ул вус но̄хворатасыт, ке̄р ла̄глыл ва̄равет. Пе̄с ма̄хманув щёрхилыӈ ла̄глуп сӯмъяхыт ӯнттала̄лыгласыт. Ань са̄всыр ке̄р таса̄вит, хумус а̄ртми, маныр кӯпнитнуваг ва̄рапаӈкв – ма̄хум тащирыл матыр ӯнттэ̄гытва̄ре̄гыт. Тыгыл э̄лаль туп музеиӈ ма̄т ма̄к пе̄с сӯмъяхыт пӯмщалахтын ма̄гыс хультэ̄гыт.

1066 2013.12.20. Людмила ТЕТКИНА Людмила Алгадьева

Ты та̄л та̄н юио̄выл щёс акванатхатыгласыт. Та̄л оигпан э̄лыпа̄лт округ Думат юио̄выл щёс сапра̄ни ва̄рыглавес. Депутат хо̄тпат 30 са̄всыр са̄кконыт, постановлениенэ̄пакыт пирмайтасыт. О̄влэ̄т ма̄хум э̄лыпа̄лт Борис Хохряков, округ Дума кӯщай хум, ла̄тыӈ ла̄выс. Та̄наныл тав округув 83 та̄лэ ос Россия Конституция 20 та̄лэ то̄влын ка̄стыл янытласанэ. Борис Хохряков ла̄выс: «1993 та̄лт Конституция пирмайтым юипа̄лт округувт о̄лнэ мир йильпи щирыл о̄луӈкве патыс. Яныгполь э̄тпос 6 хо̄талэ̄т о̄выл щёс округ Думан пе̄риим депутатыт акванатхатыгласыт. Ты хус та̄л сыс са̄в рӯпата ва̄рвес, са̄в э̄рнэ са̄ккон пирмайтавес». Сапра̄нит депутатыт ханищтап, пӯсмалтан ва̄рмаль урыл ос мо̄т са̄в тэ̄лат урыл потыртасыт. Тувыл Александр Филимонов, мир пусмалтан департамент кӯщай, ла̄тыӈ ла̄выс. Депутатыт китыглахтасыт, ань ма̄нь па̄вылн рӯпитаӈкве миннэ ле̄ккарыт акв миллион солко̄вил ойтавет, округ янытыл о̄лнэ пӯльницатт ле̄ккар хо̄тпа то̄вылхаты ман а̄ти. Кӯщай хум ла̄внэ̄тэ щирыл, ань ка̄сыӈ па̄вылт ле̄ккар хо̄тпа о̄лы. Любовь Ковешникова, ханищтап департаментыт кӯщай нэ̄, садикыт урыл потыртас. Йильпи са̄ккон щирыл, ка̄сащан хо̄тпат та̄нки садик ва̄руӈкве ве̄рме̄гыт. Округувт туп акв тамле садик рӯпиты. Ты э̄лыпа̄лт ма̄нь ня̄врамыт ӯргалан кол ва̄рнэ ма̄гсыл сака са̄в нэ̄пак акванатуӈкве э̄рыс. Любовь Николаевна ла̄выс, «частный» садикыг ла̄внэ кол ань Юграт 17 э̄лумхо̄лас ва̄руӈкве ка̄сащи, та̄н пуссын нэ̄паканыл ань щё̄питыяныл. Депутатыт э̄лыпа̄лт Вера Дюдина, олн ловиньтан департаментыт кӯщай нэ̄, та урыл потыртас, ты та̄л нёлолов э̄тпос сыс округ бюджетныл манаса̄вит олн холтвес ос хоты программат халт уртве̄сыт. Ты э̄тпост бюджетын 96 миллиард арыгке̄м солко̄ви ёхтыс ос тувыл аквта торыг 110 миллиард солко̄ви холтвес. Та сапра̄нит ма̄хум э̄рнэ са̄ккон урыл о̄с потыртасыт. Ань пирмайтым са̄ккон щирыл, 1996 та̄л мус ӯнттым колыт ремонтыл ва̄рнэ ма̄гсыл субсидияолн та̄стуӈкве патаве. Ты э̄лыпа̄лт пе̄с колытт о̄лнэ ще̄мьят коланыл та̄нки хотщё̄питасаныл. Ос акв постановлениенэ̄пак ма̄хумн пирмайтавес. Ань ка̄сыӈ депутат такви «депутатский фонд» о̄ньщи, тот са̄в олн о̄лы. Йильпи та̄л о̄выл хӯрум э̄тпосанэ сыс хоталь та̄н ты олнаныл холтыяныл, ань нэ̄пакын отчёт хассыт. Округ Дума кӯщай Б. Хохряков ла̄выс, тамле ва̄рмаль щирыл депутатыт са̄в ма̄хумн манос са̄всыр организациятн нё̄тэ̄гыт.

1066 2013.12.20. Александр ВЬЮТКИН

Ля̄ххал тотнэ ма̄хум ханищтаве̄сыт. Ювле хультум яныг таквс э̄тпост Ханты-Мансийск ӯст «Информационный мир Югры» нампа форум онтоловит щёс ва̄рыглавес. Ма̄н округувт ты ва̄рмаль ка̄сыӈ та̄л акв ты порат о̄лыглы. Округув янытыл телевизор хосыт потыртан, газетатт рӯпитан журналистыт ханищтан кастыл акванатыглаве̄в. Ля̄ххал тотнэ ма̄хум ма̄гсыл – ты ма̄к э̄рнэ ханищтап. Ты та̄л терроризм, мо̄т хо̄н мирыт ос са̄всыр ла̄палахтын ва̄рмаль урыл хумус ля̄ххал мирн тотуӈкв э̄ри, та урыл потыртасыт. Ань та урыл са̄в ва̄ӈкв э̄ри. То̄ва порат лю̄льсаӈ хансым потыр ма̄гсыл ма̄хум сутытахтын мус тэ̄ланыл мины. Сутытахтын мус ва̄рмаль ул вос ёхты, та щирыл са̄в ва̄ӈкв э̄ри. Ань ма̄нав ханищтан ма̄гсыл са̄всыр яныг ӯсыӈ ма̄ныл ма̄хум тыг во̄виньта̄лве̄сыт. Та̄н ма̄навн э̄лаль ёмаснув рӯпитан ма̄гсыл са̄в ёмас номт хӯлтсыт. Ань ма̄ янытыл са̄всыр ищхӣпыӈ йильпи пормас о̄лы. Та утыт ёт э̄рнэ щирыл хумус рӯпитаӈкве э̄ри, о̄с хӯлтвесӯв. Форум о̄лум порат фотоаппаратыл по̄слым хурит тит суссылтапыгт суссылтаве̄сыг. «Югра в лицах» ос «Люди из Средней Азии» намаим о̄лсы̄г. Та коныпал иӈ журналистыг рӯпитан ма̄хум халт потрыт хаснэ щирыл касылыт о̄лсыт. «Информационный мир Югры» ханищтап о̄вылтан хо̄талт конкурсыт но̄хпатум ма̄хум ёмас, э̄рнэ ос тыныӈ мӯйлупсал мӯйлуптаве̄сыт.

1066 2013.12.20. Александр ВЬЮТКИН

Кӯщаиг е̄мтуӈкв щё̄питахтын ма̄хум. Мощ мо̄лалнув Ханты-Мансийск ӯс мирколт ма̄ньлат ма̄хум ма̄гсыл кӯщаиг рӯпитан хо̄тпат ёт ханищтап ва̄рыглавес. Ты ханищтап рущ ла̄тӈыл «УДАР» тох ла̄ваве, ос ка̄сыӈ букванэ щирыл те ла̄вуӈкв – «Учёба Для Актива Региона». Округув янытыл пуссын аквъёт са̄тса̄т ляпатем мирныл онтолов хо̄тпа туп тув пе̄риим о̄лыс. Та̄нти хансум проектаныл щирыл округ Дума колт тит хо̄тал рӯпитасыт. Тув ёхтуманыл порат, о̄влэ̄т Дума председателиг о̄лнэ хум Борис Хохряков палт щалтсасыт. Тав та̄нанылн э̄лаль ёмщакв рӯпитан кастыл янытлан ла̄тыӈ ла̄выс. Ты ка̄ркам ма̄хум халт акв ханты ма̄ньлат хум Руслан Богордаев о̄лыс. Руслан соссаӈ ма̄хум палт туристыг ёхталан мир урыл проект хансыс. Ты йильпи тэ̄ла ёмащакв щё̄питан ма̄гсыл Еремей Айпин ёт рӯпитас. Проектаныл э̄лаль рӯпитанэ̄ныл ма̄гсыл, та̄н кӯщаиг о̄лнэ ма̄хум э̄лыпа̄лт докладыт ловиньтасыт. Руслан проектэ щирыл э̄лаль рӯпитаӈкве кӯщаитн ат та̄ртвес. Ты урыл Руслан тох ла̄выс: «Ам проектум щирыл округувт мощща ма̄хум рӯпиты. Таима̄гсыл са̄в са̄ккон ва̄ӈкв э̄ри. Ань о̄лнэ са̄кконанув то̄ват тув щар ат ро̄ве̄гыт ос ат рӯпитэ̄гыт. Та̄н рӯпитанэ̄ныл ма̄гсыл, та̄наныл мощ мо̄тщирнуве̄г хансуӈкв э̄ри. То̄нт матыр ущ тах а̄ртми».

1066 2013.12.20. Людмила ТЕТКИНА

Номтыӈ а̄гитпыгыт олныл ойтуӈкве патавет. Ка̄сыӈ са̄тыт губернаторув Наталья Комарова такви ва̄ӈын хо̄тпанэ акванатыглыянэ. Акв тамле сапра̄нит кӯщаит йильпи нэ̄пак пирмайтасыт. Номтыӈ ос ёмащакв ханищтахтан ня̄врамыт ань олныл ойтуӈкве патавет. Тамле тэ̄ла таи ма̄гсыл ва̄раве, са̄внув а̄гирищитпыгрищит мӯсхалыг ханищтахтуӈкве вос патсыт. Российский манос окружной олимпиадатт но̄хпатум ня̄врамыт о̄с олныл миӈкве патавет. Яныг кӯщай нэ̄ ла̄выс, ма̄ньщи манос ханты ла̄тыӈ, литература ханищтан ня̄врамыт окружной олимпиадат но̄хпатэ̄гыт ке, ня̄врамыт о̄с тах олныл ойтавет. Ты коныпал ос ка̄сыӈ ханищтахтын та̄л ёмащакве а̄стлан а̄гитпыгыт о̄с янытлаӈкве патавет ос мӯйлупсал манос олныл мивет. Наталья Комарова ла̄выс: «Номтыӈ ня̄врамаквет акваг ӯргалым янмалтаӈкв э̄ре̄гыт. Та̄н школа а̄стлыманыл юипа̄лт э̄лаль вос ханищтахтэ̄гыт ос профессионалыг вос е̄мтэ̄гыт». Ханищтап ос ма̄ньлат хо̄тпат ёт рӯпитан департаментыт кӯщай нэ̄ Любовь Ковешникова ла̄вме щирыл, российский манос окружной касылт о̄выл места вим ня̄врамыт 5 со̄тыра солко̄вил миӈкв патавет, китыт места ма̄гсыл – 4 со̄тыра солко̄вил ос хӯрмит места вим а̄гитпыгыт 3 со̄тыра солко̄вил тах ойтавет. Ос лов класс ёмащакв а̄стлан ня̄врамыт 5 со̄тыра солко̄вил тах мивет ос школа мӯсхалыг ке а̄стлэ̄гыт, 10 со̄тыра солко̄вил ойтавет. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1066 2013.12.20. Людмила ТЕТКИНА

Ня̄врамыт школат ёмащакв вос тыттавет. Наталья Комарова такви ва̄ӈын хо̄тпанэ акванатыгламе порат ла̄выс: «Югра янытыл ка̄сыӈ ня̄врам школат мӯсхалыг вос ханищтаве ос ёмащакв вос тыттаве». Ань школан ялантан а̄гирищитпыгрищит а̄лпыл пуссын тыттавет, ща̄няныла̄щаныл ты ма̄гсыл олн щар ат ойтэ̄гыт. Йильпи та̄лныл школат ня̄врамыт тыттын ма̄гсыл округныл са̄внув олн та̄стуӈкве патаве. Ка̄сыӈ ня̄врам тыттын ма̄гыс округ бюджетныл 44 солко̄ви акв хо̄тал сыс тах холтаве. Нуса ос яныг ще̄мьят яныгман ня̄врамыт школат кит щёс тыттавет. Йильпи та̄лныл ты ня̄врамыт акв хо̄тал сыс 112 солко̄вил тах мивет. 2014 та̄лт ты вармаль ма̄гсыл бюджетныл 1, 7 миллиард солко̄ви тах та̄ставе. Акв та порат кӯщаит а̄гмыӈмосыӈ ня̄врамыт урыл потыртасыт. Ты ня̄врамыт ос ханищтахтуӈкве вос ве̄рмысыт, округувт са̄в программат пирмайтавет ос са̄в олн та̄ставе. Ты ня̄врамыт ханищтан, ӯргалан ма̄гсыл мо̄тыт та̄лт округув 60 миллион солко̄ви тах мыг. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ.

1066 2013.12.20. Александр ВЬЮТКИН

Яныг касыл е̄мты. Мощ мо̄лалнув тыньщаӈ ма̄щтырлан ва̄рмаль о̄лум порат «Югра лылыеп» организацият кӯщаиг о̄лнэ хум Александр Новьюхов ма̄хум нупыл потыртас, тав ля̄ххалэ э̄лаль ловиньтэлы̄н: – Ма̄н округув янытыл са̄в соссаӈ ма̄хум халанылт касуӈкв ка̄саще̄гыт. Ты ма̄гсыл мо̄тынтыг 2014 та̄лт тэ̄лы порат са̄лыӈколыӈ ма̄хум халт мирхал касыл ва̄рыглаӈкв номсэ̄в. Ты касыл о̄выл щёс тах е̄мты. Таве нэ̄мхо̄т ос нэ̄мхотты порат щар ат ва̄рыглавес. Мо̄тынтыг Ханты-Мансийск ӯст таве тах щё̄питаве. Каснэ ма̄гсыл ма̄н палтылув хӯрум мо̄т хо̄н ма̄ныл – Финляндияныл, Норвегияныл, Швецияныл саами ос ё̄рн са̄лыӈ ма̄хманув касуӈкв тыг тах ёхталэ̄гыт. Ань та̄н ётаныл нас потыртахтуӈкв э̄ри, тувыл та. Са̄лыӈ ма̄хум касыланыл коныпал, иӈ корякский ос ё̄рн ла̄тӈыл потыртан ма̄хум ёт ма̄нь ха̄пыл каснэ ва̄рмаль ва̄рыглаӈкв номсэ̄в. Та кастыл та̄н «каяк» нампа ма̄нь ха̄паныл ма̄нти ма̄гсылӯв во̄вуӈкве таӈхе̄в. Ты тит касылыгт но̄хпатнэ ма̄гсыл, ма̄нав са̄в щё̄питахтуӈкв э̄ри. Ам на̄нан ла̄вуӈкв таӈхе̄гум, пуста̄гыл о̄лэ̄н, касылын щё̄питахтэ̄н.

1066 2013.12.20. Людмила ТЕТКИНА Людмила Тасманова

Ща̄нь ла̄тыӈ ханищтан урыл тав потыртас. Ты та̄л «Единый Россия» нампа партия 12 та̄лэ то̄влыс. Ты кастыл ва̄т са̄грапнал э̄тпос о̄выл хо̄талэ̄т Россия янытыл партия отделениянэ пуссын рӯпитасыт, ка̄сыӈ э̄лумхо̄лас такви та̄рвитыӈ ва̄рмалянэ ёт депутат палт ялуӈкве ве̄рмыс. Та хо̄талт Ханты-Мансийск ӯст округ Дума депутат ос «Единая Россия» нампа партият рӯпитан нэ̄ Наталья Западнова палт нё̄тмил во̄вуӈкве ос та̄нки ва̄рмаляныл урыл потыртаӈкв 25 э̄лумхо̄лас ёхталас. Валентина Соловар, А̄с-угорский институтт рӯпитан учёный ханты нэ̄, тув о̄с ялыс. Тав ханты ла̄тыӈ ханищтан ва̄рмаль урыл Н. Западнован потыртас. Югорский университетт а̄гитпыгыт ма̄ньщит ос ханты ла̄тӈын хӯрум та̄л ат ханищтавет, тамле отделение лаппантвес, тот рӯпитан хо̄тпат пуссын рӯпатаныл по̄хын ке̄тве̄сыт. Тамле отделение ювле ва̄руӈкве э̄ри, ма̄ньлат хо̄тпат ща̄нь ла̄тыӈ вос ханищтэ̄гыт. Э̄лаль ты ханты нэ̄ ла̄выс, ань «О науке» нампа са̄ккон мощ мо̄т щирыл хасвес. Пирмайтым са̄ккон щирыл йильпи та̄лныл наукат рӯпитан ма̄хум, «учёный степень» о̄щнэ хо̄тпат са̄внув олныл тах ойтавет. Тувыл ос таи лю̄ль, ты нам ат о̄щнэ э̄лумхо̄ласыт сэ̄лнэ олнаныл но̄х ат нё̄тавет. Валентина Николаевна ла̄выс, А̄с-угорский институтт рӯпитан са̄в соссаӈ хо̄тпат тамле учёный нам ат о̄ньще̄гыт. Ань та̄н мощща олныл ойтавет, тыи ма̄гсыл то̄ват рӯпатан 8 щёс порат ёхтэ̄гыт ос ӣтипа̄лаг 19 щёс мус рӯпитэ̄гыт, тох рӯпитаӈкве сака та̄рвитыӈ. Та̄н э̄рнэ рӯпата ва̄ре̄гыт, ма̄ньщи ос ханты ла̄тыӈ ос пе̄с йис ва̄рмалит ханищтэ̄гыт ос нэ̄пакыт хансэ̄гыт. Ты ма̄ньлат ма̄хум урыл хотёрувлаӈкве щар ат э̄ри, та̄нанылн о̄с са̄внув олн ойтуӈкве э̄ри. Ос хӯрмит потыртам тэ̄латэ та урыл о̄лыс, Валентина Николаевна йильпи ханты алфавит хансыс. Ханты учёный ма̄хум акв «орфографический комиссия» ва̄рсыт, ты йильпи щирыл хансым алфавит урыл такос потыртэ̄гыт ос са̄в та̄л сыс ла̄тӈаныл акван аты ёхтэ̄гыт. Тав такви хансум алфавитэ щирыл ат нэ̄пак та̄ратас. Ань В. Соловар ла̄выс, школат ня̄врамыт ханищтаӈкве, са̄всыр нэ̄пакыт ос газета ты алфавит хосыт та̄ратаӈкве э̄ре̄гыт. Наталья Западнова ты ханты нэ̄ ёмащакв хӯнтлыстэ ос ювле ла̄выс: «Алфавит урыл таи ла̄ве̄гум, округувт ты тэ̄ла хосыт туп ма̄нкирот рӯпитаӈкве ат ве̄рме̄в. Образование министерстват ос наука щирыл рӯпитан хо̄тпат туп та̄н ты хосыт рӯпитэ̄гыт. Ма̄ньщи манос ханты ла̄тыӈ ханищтан студентыт, наука щирыл рӯпитан ма̄ньлат хо̄тпат та̄рвитыӈ ва̄рмаляныл ам мӯсхалыг тах ханищтыянум». Урай ӯст о̄лнэ ветераныт концертыт ва̄рыглым Югра янытыл яласаӈкве таӈхе̄гыт. Тыи ма̄гсыл та̄н депутатнэ̄ палт олн во̄вуӈкве ёхталасыт. Акв э̄ква Наталья Западнован такви та̄рвитыӈ ва̄рмале урыл потыртас. Тав 13 со̄тыра солко̄ви са̄вит пенсия выг, ос акв э̄тпос сыс тав о̄лнэ колэ, ре̄г, вит, на̄йпос ма̄гсыл са̄т арыгкем со̄тыра солко̄ви ойты, тэ̄нэ ма̄гсыл олн ат хульты. Наталья Леонидовна тав палтэ ёхталам ка̄сыӈ хо̄тпан нё̄туӈкве ла̄вхатас.

1066 2013.12.20. Тамара МЕРОВА

Са̄в ня̄врам тыт вос самын паты. Мо̄лалнув округ Общественный палата ма̄хум то̄ва кӯщаит ёт акванатхатыгласыт ос та̄н «демографическая ситуация» о̄вылтыт потыртасыт. Тувыл ка̄сыӈ кӯщай ла̄вум ля̄ххаланыл та̄н аквана̄рталасаныл ос матыр э̄лаль о̄лнэ ёмас ла̄тыӈ аквъёт киссыт. «Родители в защиту семьи и детства» нампа ва̄рмальт кӯщай нэ̄ Мария Федотова ла̄внэ̄тэ щирыл, ма̄н округув хо̄т та̄л сыс яныгса̄т со̄тыра са̄вит э̄лумхо̄лас са̄вмыс. Тох е̄мтыс, а̄ти са̄в ня̄врам самын патнэ ма̄гыс, тыи сака са̄в хо̄тпа по̄х ма̄ныл тыг о̄луӈкве ёхтэ̄гыт. Ань тыт округувт са̄внув ня̄врам самын вос патэ̄гыт, Мария Александровна аквъёт рӯпитан ма̄хманэ ёт сыресыр хӯлтыглан ла̄тӈыт щё̄питасыт. Рущ ла̄тӈыл та̄н «пути использования медикосоциальных инновационных ресурсов» тэ̄лаг хасве̄сыт. Александр Быстров, общественный связь Департаментыт рӯпитан хум, таи потыртас: «Ты та̄л лов э̄тпос сыс Юграт о̄лнэ ос рӯпитан ма̄гыс 188 со̄тыра 227 хо̄н ма̄ныл ёхтум хо̄тпа нэ̄паканыл ва̄руӈкве ке̄тсаныл. Та̄н халанылт туп са̄тпан нупыл акв э̄лумхо̄лас э̄лаль ханищтахтам высший образование о̄ньщи. Тувыл пуссын рӯпитан ма̄ныл тыт ат то̄влавет ос яныгпа̄лэ рущ ла̄тыӈ торыӈыщ ат ва̄ганыл». Та щирыл ма̄навн маныр ва̄руӈкве, ма̄навн ос хоталь ха̄йтуӈкве. Кӯщаит маныр номтыл о̄лэ̄гыт, ты урыл манрыг ат номсахтэ̄гыт. Тувыл пуп колт по̄йкщан хо̄тпат ос ле̄ккарыт мо̄т та̄рвит ля̄ххал тотсыт. Сергей Чесноков «За жизнь» намаим программа щё̄питас, тав ща̄ниг е̄мтнэ ва̄рмалит ма̄гыс пуӈктоты. Тох е̄мтыс, та̄рвитыӈыщ е̄мтнэ са̄в нэ̄т ань ня̄враманыл хотвинэ накын патхатэ̄гыт ос та̄нки пуста̄гыл э̄лаль о̄лнэ о̄вылтыт щар ат номсахтэ̄гыт. Тамле ва̄рмалит хотмус ёлпо̄илттаӈкве э̄ре̄гыт. Ань таима̄гыс ма̄ньлат ма̄хум ёт ва̄тихал ты урыл потыртаӈкве э̄ри, та̄нанылн са̄всыр хурит ос видеороликыт суссылтаӈкве э̄ре̄гыт. Та̄н ты урыл кина ва̄рсыт. Ще̄мья урыл о̄с я̄нас ла̄всыт, хунь э̄лумхо̄лас То̄рум нупыл агтта̄л о̄лы, то̄нт таве̄н ще̄мья ат э̄ри, ня̄врам ат э̄ри. Та щирыл э̄лаль о̄луӈкве ат ро̄ви. Округ здравоохранение департаментыт акушерство ва̄рмалит палт кӯщаиг о̄лнэ нэ̄ Софья Яковенко, ня̄врам хотвиӈкве тахнэ нэ̄т ёт хумус рӯпитэ̄гыт, маныр нё̄тмил та̄нанылн ва̄ре̄гыт, хо̄т та̄нанылн пусмалтахтуӈкве манос ханищтахтуӈкве ро̄ви, таит пуссын хӯлтсанэ. Тамле рӯпатаныл юипа̄лт то̄ва нэ̄квет ня̄врамыӈыг е̄мтэ̄гыт. Ос ня̄врам хотвинэ нак ва̄рнэ нэ̄ хо̄тпа тохилыӈ са̄в, ты та̄л онтолов э̄тпос сыс 10 со̄тыра 441 операция ва̄рвес. Мо̄лты аквты порат тыгыл са̄внув о̄лыс. Тувыл юио̄выл та̄лытыт нилахуйплов, атхуйплов та̄л яныт са̄внув а̄гит тамле операциян ёхталаӈкве патсыт. Сургутныл ёхталам ле̄ккар Анжелика Каспарова «Жизнь – как священный дар» нампа касыл о̄вылтыт потыртас. Ты проектаныл кастыл та̄н ня̄врам хотвинэ нак о̄с ёлпо̄илттэ̄гыт. Кит та̄л сыс 700 нэ̄т ня̄врамыӈыг е̄мтсыт. Ань тамле тэ̄лат акваг та̄рапаттым о̄ньщуӈкве ке, ве̄к ма̄хум номтыӈнуве̄г патнувыт ос маныр лю̄ль та̄н ва̄ре̄гыт, ань вос торгамтыяныл.

1066 2013.12.20. Александр ВЬЮТКИН

Пе̄рщил щё̄питан хум потре. Сургутский районт Русскинские па̄вылт ханты ма̄хум халт пе̄рщин касыл о̄лнэ порат Степан Кечимов ёт ва̄щинтахтасум. Степан Антонович округув янытыл са̄лыт о̄щнэ ма̄хум халт президентыг пе̄риим о̄лы. Ме̄н хо̄нтхатыглахтамуме̄н порат «Нюл-Тахли» пе̄рщин касылн щё̄питахтын урыл ам таве титыгласлум. – На̄н ты касыл э̄лаль ялтуптаӈкв хунь номылматыслы̄н? – Са̄в мир та̄нти щир пе̄рщин касыл о̄ньще̄гыт. Та̄н та̄нти ялпыӈ хо̄таланыл янытлан порат аквписыг пе̄рщим касэ̄гыт. Таима̄гсыл мо̄лты ма̄н Союз этноспорта колт рӯпитан ма̄хум ёт тамле касыл йильпииг, э̄лаль ялтуптаӈкв потыртахтасӯв. Акваннё̄тхатым ва̄рнэ рӯпатав щирыл ма̄н касыл урыл са̄в пӯмащ тарапаттысӯв. Округув янытыл ма̄хум са̄всыр щирыл пе̄рще̄гыт. Русскинские па̄вылт ань ты касыл ма̄к пе̄с хольт ва̄рыслӯв». – Сургутский районт пе̄рщуӈкв ка̄сащан ма̄ньлат ма̄хум са̄в манос мощща? Хунь ма̄н ты касылув урыл ля̄ххал те̄тсӯв, та̄рапатыс, са̄в хо̄тпа пе̄рщуӈкв ка̄саще̄гыт. Янге, ма̄не пуссын а̄нумн свонитаӈкв патсыт. Аквъёт пуссын яныгса̄т ляпатем каснэ хум та̄нтина̄ныл каснэ ма̄гсыл хасылтасаныл. Са̄в хо̄тпа юн ва̄рнэ тэ̄ланыл щирыл тыг ёхтуӈкв ат ве̄рмысыт. Ань Русскинские па̄вылн ляпат о̄лнэ ӯсытныл ос па̄влытныл ма̄хум кассыт. Хумус ма̄н номсэ̄в, аквты «Нюл-Тахли» пе̄рщил касылн са̄в соссаӈ мир тах ёхты. Ма̄н ма̄гсылув ты касыл иӈ акв э̄рнэ пӯмащ. Халанылт ё̄раныл а̄рталан ня̄враманув ё̄рнуве̄г е̄мтэ̄гыт».

1066 2013.12.20. Валентина УЗЕЛЬ Валентина Васильева

Н. И. Терёшкин яныгса̄т та̄лэ то̄влыс. Ханты ма̄хум халт ма̄к о̄выл учёныиг Николай Иванович Терёшкин ла̄ваве. Ань ты э̄тпос 25 хо̄талэ̄т ты хум яныгса̄т та̄лэ то̄влынув. Тав Согом па̄вылт 1913 та̄лт самын патыс, сака ма̄ниг о̄лме порат, а̄ще во̄рн минас, юв ат ёхтыс. Та юипа̄лт оматэ во̄раяӈкв минас, юв во̄рныл о̄с ат ёхтыс. Пыгрищакве такте̄т та хультыс, то̄нт тав туп тит та̄лэ то̄влыс. Ляпа рӯтанэ̄н вуйвес. 15 та̄лэ хунь то̄влыс, тав ущ о̄выл классын минас. Акв та̄л сыс та̄ра хӯрум класс а̄стлас. Э̄лаль тав Тобольск ӯсн ханищтахтуӈкв те̄твес, а̄стламе юипа̄лт Остяко-Вогульск (Ханты-Мансийск) ӯс педучилищан ёхтыс. Тот ханищтахтаме сыс, тав партийный школан те̄тым ма̄хум ханты ла̄тӈын ханищтасанэ. 1935 та̄лт тав ма̄нь па̄влыӈ ма̄н ня̄врамыт ханищтаӈкв те̄тыглавес. Акв та̄л тот рӯпитас, ювле ӯсн во̄ввес. Ханты-Мансийск ӯсныл тав Ленинград ӯсн народов Севера Институтн ханищтахтуӈкв минас. Тот тав Вольфганг Штейниц ёт ва̄йхатас. Та немец хум профессор нам о̄ньщис, ос та институтт ханищтахтын ма̄хум ханты ла̄тӈын ханищтасанэ. Николай такви ханты ла̄тӈе ёмащакв ва̄стэ, потыртас. Ос хунь тав ты немец хум палт ёхтыс, то̄нт ты та̄рапатыс, потыртаӈкв кос ха̄сы ос ла̄тныт э̄рнэ щирыл хансуӈкв ат ве̄рмиянэ. Та та̄лытт ма̄хум пувуӈкв та патве̄сыт. Акв хотты хо̄тал Николай Иванович ляпа юртэ вуйвес. Ка̄сыӈ хо̄тпа пилым о̄лыс. 1940 та̄лт Николай Терешкин институт а̄стластэ, аспирантурат э̄лаль вос ханищтахты, Ленинград ӯст хультуӈкв ла̄ввес. Ос яныг хо̄нт та о̄вылтахтас. Тав та̄ра хо̄нтлын ма̄н минас. 1944 та̄лт тав та̄кыщ сакватавес. Война порат институт Омск ӯсн тотвес. Николай Иванович пусмалтахтаме юипа̄лт тув ты минас. 1948 та̄лт аспирантура а̄стластэ. 1950 та̄лытт языкознание институт па̄лыл тав Тюменский областьн эспедициян са̄в щёс те̄тыглавес. Тот ты тав э̄кватэ хо̄нтыстэ. Таисья Дмитриевна школат рӯпитас, ня̄врамыт ос та̄н ща̄няныла̄щаныл хансуӈкв ос ловиньтаӈкв ханищтасанэ. Акванминаме̄н юипа̄лт Сергей пыге̄н самын патыс. 1968 та̄лт Николай Иванович учёный намыл майвес. Тав 1986 та̄лт а̄тимыг е̄мтыс, рӯпитаме палытыл са̄в научный нэ̄пак хансыс, ань ты мус то̄ва учебниканэ йильпиииг та̄ратавет ос та̄н хосытаныл ня̄врамыт ханты ла̄тӈыл потыртаӈкв ханищтавет. Ань тав пыге Сергей Николавич Санкт-Петербург ӯст о̄лы, студентыт ханищтыянэ, тав о̄с а̄ще хольт наука рӯпата ва̄ри, ханты ла̄тыӈ ханищтытэ ос са̄всыр нэ̄пакыт хансы. Ты потыр ма̄ньщи ла̄тӈыл Валентина Васильева хансыстэ.

1066 2013.12.20. Тамара МЕРОВА Тамара ХАТАНЕВА

Пасан ва̄тат ёмщакв ӯнлантасыт. Ты э̄тпос лов щислат «Югра лылыеп» ассоциация колн Ханты-Мансийскат о̄лнэ матумпа̄ла соссаӈ хо̄тпат во̄виньта̄лве̄сыт. Тот округув нам хо̄талэ янытлан кастыл Фаина Иштимирова ос Раиса Гаврильчик, «Лылынг союм» нампа студият рӯпитан нэ̄г, пасан ва̄рыгласы̄г. Аквта хо̄талт тот кит нэ̄г нам хо̄талэ̄н о̄лум. О̄влэ̄т Людмила Александровна Алфёрова мӯй ма̄хум ёт пащалахтас, та̄наныл янытласанэ ос тувыл тав нам хо̄талэ̄т янытлавес. Ос Наталья Николаевна Чайникова, насати, 50 та̄лэ то̄влум. Тав по̄лям ӯсхул тотыс, атыӈ хӯлыӈня̄нь ва̄рум. Мӯй ма̄хум таве̄н яныг пӯмащипа ос пуста̄гыл э̄лаль о̄лнэ ла̄тыӈ ла̄всыт. Ты хо̄нтаӈ ма̄ньщи нэ̄ мо̄лалнув тав Ханты-Мансийсканыл Сургут ӯс нупыл миннэ лё̄х ляпат 22 ве̄рыстат «Лылынг маа» нампа па̄выл ӯнттуӈкве номылматас. Та ма̄т ханты ос ма̄ньщи ще̄мьят кол ӯнттын ма̄ виӈкве ка̄щилтыянэ. Туи то̄ва ма̄хманув та во̄рыӈ ма̄ хотсыстамтасаныл, па̄хвыӈ лё̄хъяс ва̄рсыт. Ань хотъют ма̄ ёвтуӈкве таӈхи ке, Наталья Чайникова вос китыглэ̄гыт. Тувыл Раиса Мартыновна ос Фаина Павловна мӯй ма̄хум ма̄гыс сыресыр кас щё̄пита̄лсы̄г, а̄мщит а̄мщисы̄г, нё̄тнэ̄г «Куринька» йӣкв йӣквсы̄г. Пасан ва̄тат ӯнлын ка̄сыӈ мӯй хо̄тпан потыртаӈкве э̄рыс, хоты та̄л па̄сыл тав Ханты-Мансийскан о̄лмыгтас. То̄нт ӯс манхурипаг о̄лыс, хумус ма̄хум о̄лсыт. Ка̄сыӈ хо̄тпа потранэ сака пӯмщиг о̄лсыт, таса̄вит ёмас ма̄хум номылматыгласанӯв. Ань соссаӈ ма̄хманув ма̄гыс тамле ялпыӈ хо̄тал акваг вос ва̄рыгла̄лнуве, ма̄нки ва̄тихал акван вос хо̄нтхатыгланувӯв.

1066 2013.12.20. Светлана РОМБАНДЕЕВА

О̄лнэ ма̄наныл ӯргалыяныл. Ты хурит Владимир Алексеевич Кряжков ос ханты нэ̄г – Лилия Семёновна Петрушенко (а̄ги о̄парищ наме Ермакова) ос Елена Павловна Скрипникова (а̄ги о̄парищ наме Кечимова) по̄слым о̄лэ̄гыт. Сургут ӯст яныг таквс э̄тпост научнопрактический конференция о̄лме порат ты ма̄хум тув ёхталасыт. Кряжков о̄йка – юридический наукат доктор нам о̄ньщи, Москват о̄лы. Тав «Международноправовые нормы и российское законодательство в сфере защиты прав коренных малочисленных народов Севера» нампа доклад ловиньтас. О̄йка соссаӈ мир янытлытэ, са̄лыӈколыӈ ма̄хум тармыл патыянэ. Ханты нэ̄г Когалым ӯсныл ёхталасы̄г. Тэ̄н са̄лыӈ колт яласэ̄г, община кӯщаиг о̄лэ̄г. Лилия Семёновна ла̄внэ̄тэ щирыл, та̄н Когалым ӯст о̄лнэ кол о̄ньще̄гыт кос, ос янгыщ во̄рт о̄лэ̄гыт, са̄лыяныл ӯрияныл. Ма̄во̄й но̄хвинэ ма̄хум ёт акваг воритотэ̄гыт, са̄лыяныл ӯрнэ ма̄т та̄н ма̄во̄й но̄хвиӈкве ат та̄ратахтэ̄гыт. Тав а̄гипыг о̄ньщи, Елена Павловна о̄с ня̄врам о̄ньщи. Татем ёмас нэ̄кве̄г, мире̄н э̄руптытэ̄н, ща̄нь ла̄тӈе̄н янытлытэ̄н. Халэ̄нт тэ̄нти ла̄тӈыл потыртэ̄г. Хо̄тпа нупыл сымыӈ нэ̄кве̄г. Ты я̄тил ма̄хум пуссын пуста̄гыл вос о̄лэ̄гыт, пус ка̄т, пус ла̄гыл!

1066 2013.12.20. Светлана РОМБАНДЕЕВА Светлана ХОЗУМОВА

Лелятов рӯт нэ̄. Анна Владимировна Албина Ха̄льӯс район Кульпас па̄вылт о̄лы. Ты ма̄ньщи нэ̄ а̄ги о̄парищ наме Лелятова, 1969 та̄лт Ягрим па̄вылт самын патыс. Оматэ Матрена Ивановна Лелятова, а̄ги о̄парищ наме Монина, Харщум (Куги) па̄вылт самын патыс. На̄н ань э̄лаль Анна потре ловиньтэлы̄н: – Омам хосат а̄тимыг е̄мтыс. А̄тям Владимир Васильевич Лелятов, Шомы па̄вылт самын патыс. Тав ань 79 та̄лэ ты то̄влыс. Са̄в та̄л рыбоучастокт рӯпитас, бригадирыг о̄лыс. Ма̄н нила ня̄врам о̄лсӯв – кит каӈкагум Сергей ос Андрей, ам, тувыл ма̄нь йӣгрищув Наталя. Каӈкагум сас а̄тимыг, йӣгрищум о̄с тыт, Кульпаст, ще̄мьятэ ёт о̄лы. Хӯрум ня̄врам о̄ньщи – Люда, Вика ос Абрам. О̄йкатэ Николай Абрамович Гындыбин ты туи а̄тимыг е̄мтыс. Ам Кульпаст ханищтахтасум, лов класс а̄стласум. Акв та̄л ня̄врам ӯрнэ колт нянечкаг рӯпитасум. Тувыл Тюмень ӯсн минасум, тот почтовый связь училищат акв та̄л ханищтахтасум. Тыт почтат та̄л арыг рӯпитасум, тувыл школаинтернатын тэ̄нут па̄йтнэ нэ̄г рӯпитаӈкве патхатасум. О̄йкам Юрий Борисович Албин, Ло̄пмус па̄вылт самын патыс. 1993 та̄лт акванминасаме̄н. Кит ня̄врам о̄ньщиме̄н. Маша а̄гиме̄н 1994 та̄лт самын патыс. Тав Ханты-Мансийск ӯст медицинский академият, акушерский отделеният ханищтахты. Олег пыгме̄н 1997 та̄лт самын патыс, тав ань школат ловит классыт ханищтахты. Анна Владимировна тох та потыртас. Ты я̄тил ма̄ньщи нэ̄ ще̄мьятэ ёт пуста̄гыл вос о̄лы, На̄янэ̄н, О̄тыранэ̄н вос ӯргалаве!

1066 2013.12.20. Светлана РОМБАНДЕЕВА Светлана ХОЗУМОВА

Ма̄щтыр ханты э̄ква. Ты таквсы редакциявн акв пӯмыщ э̄ква щалтсас, наме Надежда Брониславовна Вялова. Тав нэ̄пакыл са̄всыр хурит яктуӈкве ха̄сы, ты рӯпататэ ма̄навн суссылтастэ. Со̄ль, ма̄навн татем пӯмыщ о̄лыс тав нуплэ сунсуӈкве. Я̄ӈк нэ̄пак выг, хӯрмах ман нилах щёс са̄гумтытэ, ё̄ӈхащлым якытлапитэ. Тувыл нэ̄паке састумыг пинумтытэ, яты, матыр хорам тэ̄лы ман хотты товлыӈӯй манос во̄рӯй. Тамле пӯмыщ рӯпата ва̄рнэ̄тэ коныпал, Надежда Брониславовна мо̄т са̄всыр тэ̄лат ва̄руӈкве ха̄сы – ханты суп ю̄нты, а̄канит ва̄ри, ня̄врамытн мо̄йтыт мо̄йты. Ма̄н э̄лыпа̄лувт а̄канянэ пасан тармыл тӯщталасанэ, театр хольт та ёнгалтыянэ. Та̄н э̄рттам та̄нти халанылт потраме̄гыт, ё̄ӈхатахтыглэ̄гыт. Ёт тав йӣво̄влыт тотыглы – ты о̄с ёнгынутыт. Йӣво̄вланэ ма̄н халувт уртгаласанэ, ань тав ётэ вос ёнгасэ̄в. Ка̄тын выганӯв, мощ но̄хнуве вущкасыянӯв, ка̄т алав тув тактапилӯв, матах тув та паты. Тувыл та̄наныл о̄с но̄хнув вущкаса̄лыянӯв, матах ве̄рме̄в пувуӈкве, та пувумтыянӯв. Хотьют са̄внув йӣво̄выл ка̄тынпатты, тав но̄х та паты. Тамле пӯмыщ ёнгил та. Ма̄н пуссын татем ёнгасасӯв, мовиньтасӯв, ня̄врамыт хольт маттем та ща̄гтакласӯв. Надежда Брониславовна Томск ӯсныл ёхталас. Тав ла̄внэ̄тэ щирыл, Кышик па̄вылн мины, тот хотты юрт нэ̄тэ о̄лы. Та па̄выл школан ялуӈкве номсы, ты мӯтранэёнгиланэ тот ня̄врамытын суссылтаӈкве таӈхи. Редакциявн тав Тамара Сергеевна Мерова палт щалтсас. Тэ̄н, насати, хосат ва̄йхатанэтэ̄н. Тав уре̄тыл Тамара «Луима сэ̄рипос» газетат 20й номерт 2010 та̄лт хансыглас. Э̄ква 1952 та̄лт самын патыс. Оматэ ханты нэ̄ о̄лум. Ащо̄йкатэ Семён Максимович Мурасов хӯл алыщлан, во̄раян хумыг о̄лыс. Тав ань Томский область Каргасокский район Бондарка па̄вылт ще̄мьятэ ёт о̄лы. О̄йкатэ̄нтыл ат ня̄врам янмалтасы̄г – кит пыг, хӯрум а̄ги. Та̄н ань пуссын янгыт, ще̄мьяӈыг е̄мтсыт. Пыгаге ащо̄йкатэ хольт хӯл алыщлаӈкве ман во̄раяӈкве о̄с сака ха̄сэ̄г. Надежда Брониславовна мӯтра тэ̄ланэ Россия янытыл са̄в ма̄т ва̄вет – Томский, Московский, Новосибирский областитыт, Хакасия Республикат. Са̄всыр фестивалит, конкурсыт ман мастерклассыт о̄лыгланэ̄ныл порат, тав тот акваг выступайта̄лы, тув яланта̄лы. Э̄ква са̄в Почётный грамотат ос ма̄глын тагатан по̄сыт о̄ньщи. Томский область губернаторын 2012 та̄лт грамотал ос премиял майвес. Ты мӯтраӈ э̄кван ма̄н пӯмащипа ла̄тыӈ ла̄всӯв. Тамле я̄тил ханты хо̄тпа пуста̄гыл вос о̄лы, пус ка̄т, пус ла̄гыл!

1066 2013.12.20. Александр ВЬЮТКИН

Тыньщаӈ сагнэ ханищтап. Яныг таквс э̄тпос оигпан хо̄талэ̄т Ханты-Мансийск ӯст тыньщаӈ сагнэ ханищтап ва̄рыглавес. Ты ханищтап А̄с-угорский ма̄ньлат организацият рӯпитан ханты пыг ва̄рыглаӈкв номылматастэ, тав наме Руслан Богордаев, ты ханищтап губернатор грантолн вуйлым щирыл ва̄рыгластэ. Тыньщаӈ сагуӈкв ханищтан ма̄гсыл Белоярский район Касум па̄вылныл Яков Никифорович Тарлин ма̄щтыр ханты хум во̄виньта̄лвес. Тав «Россия ма̄щтыр» нам о̄ньщи. Мастеркласс «Югра лылыеп» соссаӈ мир организация колт ва̄рыглавес. Ханищтап о̄вылтан порат Александр Новьюхов, «Югра лылыеп» кӯщаиг о̄лнэ хум, ла̄тыӈ ла̄выс: «Ма̄н, яныгнувег о̄лнэ ма̄хум, ма̄ньлат хо̄тпанув нупыл сунсым, хотща̄гтэ̄в. Тыньщаӈ сагнэ ханищтап округувт щар о̄выл щёс ва̄рыглавес. Са̄лыӈ ма̄хмыт ма̄к та̄н ты ва̄гыт, тыньщаӈ сагнэ рӯпата манырсыр та̄рвитыӈ рӯпатаг о̄лы. Ма̄н та̄н рӯпатаныл ӯст о̄лнэ ма̄хмытын таима̄гсыл суссылтыянӯв. Ты хорамыӈ, та̄к ква̄лыг хумус сагаве, вос ва̄гыт. Сунсэ̄н ос ханищтахтэ̄н». Александр Новьюхов потыртан ма̄ныл а̄стуме юипа̄лт, Надежда Молданова ла̄тыӈ ла̄выс. Тав А̄с-угорский ма̄ньлат организация тармыл кӯщаиг пе̄риим о̄лы. Тав ла̄выс: «Ам Руслан Богордаевын тыньщаӈ ма̄щтырлан номтэ э̄лаль тотнэ ма̄гсыл, яныг пӯмащипа ла̄ве̄гум. Ам ва̄глум, ма̄н округувт тэ̄пыӈ ща̄рк иӈ са̄в. Таима̄гсыл ма̄навн тыньщаӈыт сагуӈкв ань ты ханищтахтуӈкв э̄ри». Мастеркласс о̄вылтан э̄лыпа̄лт, Яков тыньщаӈ сагнэ ма̄гсыл ня̄р щё̄питан урыл мощ потыртас. Хоты порат, маныр щирыл са̄лы то̄выль хотнёлхаптуӈкв э̄ри. Тувыл ос ханищтахтуӈкве ёхталам ма̄ньлат хо̄тпат хотнёлхатам, витыӈ ня̄р атэ вос торгамтыяныл, витыӈ та̄гыл ёт тотыгластэ. То̄ват то̄выль хотнёлхатнэ саюм атыл нёлсамасаныл ка̄тыл лаппонюмтым, иснас па̄лыгпунсым э̄лаль хӯнтлысыт. Титыт хо̄талт тыньщаӈ сагнэ ма̄гсыл ощщахоса ня̄р ква̄лыг яктуӈкв ос ка̄миньтаптуӈкв о̄вылтахтасыт. О̄влэ̄т титэ̄лмиӈ касаил ня̄р сов ощщаг яктуӈкв о̄вылтан порат, ня̄р акв па̄ӈвхит ква̄лгыг яктуӈкв ат а̄ртмыс. Ма̄ньлат ма̄хум та хо̄талт хо̄тал палыт тыньщаӈ сагнэ ня̄р ква̄лгыт щё̄питасыт. Ня̄р ква̄лыг каминьтлан ос сове ню̄нслан порат са̄в ё̄р э̄ри. Таима̄гсыл тыньщаӈ сагнэ ханищтахтын хо̄тпанув халанылт ва̄тихал пе̄нтхатым рӯпитасыт. Ӯщлахтанэ̄ныл порат ос исум ща̄й айсыт. Юио̄выл хо̄тал Яков Никифорович ханищтан ма̄хманэ тыньщаӈ сагуӈкв ханищтаӈкв о̄вылтасанэ. О̄влэ̄т тав та̄нанылн хӯлтыглас, хумус нилаг яктым ня̄р ква̄лгыт акв та̄к хорамыӈ тыньщаӈыг сагуӈкв э̄ри. Хоты ква̄лге хоталь пинуӈкв, хоты тулё̄влыл та̄наныл пувуӈкв. Ты урыл ёмщакв ля̄льт потыртасанэ ос щир мус хӯлтсанэ. Ёхталам ма̄хманэ са̄выӈпа̄лэ та̄ра тыньщаӈ сагуӈкв ханьщувласыт. Щё̄питам ня̄р ква̄лганыл са̄всыр па̄ӈвхитыл яктыманыл ма̄гсыл тыньщаӈаныл ос мо̄тмо̄т осытыг тэ̄лсыт. Та хо̄тал нила тыньщаӈ сагуӈкв о̄вылтахтасыт. Руслан Богордаев ла̄выс: «Ма̄навн ань ты рӯпата а̄стлан ма̄гсыл ма̄щтырлан колнак э̄ри хо̄нтуӈкв. Ань о̄вылтам рӯпатав тах ва̄тихал а̄стлылӯв».

1066 2013.12.20. Светлана РОМБАНДЕЕВА

Ма̄щтыр ма̄ньщи хумиягӯв. Ханты-Мансийск ӯст «Торум Маа» музейт о̄лум семинар урыл потрум э̄лаль мины. Ма̄щтыр ма̄хманув тот ма̄щтырлахтынэ̄ныл сыс ка̄тыл ва̄рум пормасаныл урыл китыгласанум. Кит ма̄ньщи хумыг, Никита Калистратович Партанов ос Анатолий Васильевич Вадичупов, тот о̄с ма̄щтырласы̄г. Никита Калистратович ёргащлахтым ӯнлахо̄лыс, таве китыгласлум, маныр ёргащлы? – Хӯл алыщлан камка ва̄рнэ ма̄гыс са̄глат ёрге̄гум. Ты семинарув кастыл ам Хо̄нтаӈ ма̄ньщи хо̄тпав Анатолий Николаевич Хомяков палт Кондинский район Половинка па̄вылн ялсум, та ма̄щтыр о̄йка ёт ме̄н э̄рнэ йӣвыт щё̄питасме̄н. Во̄рн ялсуме̄н, ме̄наме̄н па̄выл пыгрищит нё̄тсыт. Тувыл йӣванаме̄н тыг ма̄шинал тотсанаме̄н, ань тыт ты ёргиянме̄н. – Камка ва̄руӈкве та̄рвитыӈ? – Атхунь та̄рвитыӈ, акв хо̄тал хунь ва̄раве. Ты сака та̄рвитыӈ рӯпата. Хунь нас сунсэ̄гын, номсэ̄гын, молях ва̄раве. А̄ти. Ме̄н ань нилыт хо̄талуме̄н ты ва̄рнэме̄н, ты э̄лыпа̄лт ля̄м йӣвыл ла̄кв ва̄рсуме̄н, тарыг йӣв атсуме̄н. На̄ӈк йӣвыл те ва̄руӈкве, тай ёмас, камка та̄к, хот ат саквалы. Тамле камка са̄в та̄л о̄ньщуӈкве ро̄ви. Хотты йӣв о̄влэ супыг те саквалы, мо̄т йӣвыл пе̄нтуӈкве ро̄ви. Э̄лнаӈ ма̄хманув ка̄сыӈ хо̄тал рӯпитасыт, камкат ос мо̄т са̄в э̄рнэ пормасыт ва̄рсыт. Таима̄гыс та̄нанылн матыр ва̄руӈкве сака та̄рвитыӈ ат о̄лыс. Пе̄с ма̄хманув ё̄рыт о̄лсыт. Ка̄сыӈ пормас та̄н э̄рнэ ма̄гыс ва̄рсыт – а̄рпи ва̄ре̄гыт, камка ӯнттэ̄гыт, хӯл пуве̄гыт. Ма̄н ос ань нас хӯлп ӯнттэ̄в, таима̄гыс ма̄навн камка ва̄руӈкве та̄рвитыӈ. Ань камкал алыщлаӈкве ат ро̄ви, рущ щирыл ла̄вавет – «браконьерские снасти», пувавен, штрафыл пинавен. Камка ва̄рнэ хо̄тпат иӈ о̄лэ̄гыт, та̄нанылныл ма̄н ханищтахтэ̄в. Рудольф Васильевич ос Анатолий Николаевич ха̄сэ̄г ва̄руӈкве, тэ̄натэ̄ныл ма̄н ханищтахтэ̄в. Тэ̄н а̄тимыг е̄мтэ̄г, хо̄ӈха ва̄руӈкве паты. Анатолий Николаевичин ань та̄рвитыӈ рӯпитаӈкве, яныгпа̄лаг е̄мтыс. Э̄рыӈ хо̄т о̄с о̄лэ̄гыт ты ва̄рмаль ва̄нэ хо̄тпат, хунь ва̄ве. Ка̄сыӈ хо̄тпа ханищтахтуӈкве ве̄рми, сунсы хумус ва̄руӈкве, тувыл э̄лаль та ханьщувлы. Ме̄н ань ты ва̄рсуме̄н – ты котиль камка, а̄ти сака яныг, ма̄нь о̄с а̄ти. – Ма̄нь порат наӈ камка ва̄рыгласын? – А̄тям ва̄рыглас, ам тай а̄ти. Пыгум о̄с ат ха̄сы. Лагерьт о̄лыгланэ̄ныл порат, ханищтанувет те, тай ва̄рнувыт, ханьщувланувыт. Омам со̄вт ю̄нтыс, па̄йп. Во̄рн акваг ялантасӯв, со̄вт ос па̄йп ка̄сыӈ о̄ньщас. Анатолий Вадичупов ос са̄сныл витвит ва̄рыс. Тав ляпатэ̄н ро̄влахтасум, китыглахтасум, хотьютн ханищтавес тох ма̄щтырлаӈкве? – Нэ̄мхотьютн ат ханищтаве̄сум. Юн, ма̄ньта̄гыл номилум, са̄сныл ва̄рим со̄втыт ман па̄йпыт о̄щсӯв. Ты нила хо̄тал сыс ам пус са̄с курщипыл ве̄тра ва̄рсум. Нуми па̄лыл о̄с са̄сыл пе̄рыслум, хӯрмиттыг о̄с пе̄рыслум, тав хӯрум писыг е̄мтыс. Осыӈ ве̄тра, тув пил пинуӈкве ро̄ви. Юн о̄щнэ ве̄тра, е̄ри ат паты. Ты музейт тамле ве̄тра о̄лы, пе̄с йис ве̄тра, яныгмамум порат тамле пормас ат ва̄сум. Ань ос са̄сныл улпыл нэ̄мхотьют пормас ат ва̄ри. Таима̄гыс тамле семинарыт ва̄рыглаӈкве э̄ри, ма̄нь ма̄хум вос ханищтахтэ̄гыт, пе̄с ма̄хманув маныр ва̄рыгласыт, хумус ма̄щтырласыт, вос ва̄ганыл. Тамле семинар э̄рыӈ хотмус мощ мо̄т щирыл ва̄руӈкве э̄ри, тыт сака ащирмаӈ, во̄тыӈ. Ма̄хум улпыл по̄лявет, тыг сака ат ю̄выт. То̄ванакт рӯпитаӈкве нас тай вуйхатэ̄гыт, тувыл по̄люӈкве патавет, хот та ое̄гыт. – Наӈ хо̄т самын патсын? – Кимкъясӯй па̄вылт 1964 та̄лт самын патсум, ам щар ма̄нь. Ат увщи о̄ньще̄гум – Аля, Анна, Галина, Лиля ос Вера. Та̄н юипа̄ланылт Слава каӈкум самын патыс 1962 та̄лт. Ам щар ма̄нь. Яныг увщим Саранпавылт о̄лы, тав ёлыпал кит увщиягум Сургут ӯст о̄лэ̄г, аквам Нефтеюганск ӯст, ма̄нь увщим Тюмень ӯст о̄лы. Омагма̄тягм хосат а̄тимыг. Тэ̄н сас са̄лыӈ ще̄мьяныл о̄лсы̄г. А̄тям Василий Николаевич Во̄лья (А̄рпи) па̄вылт самын патыс, ты Та̄гт па̄вылныл алгаль Са̄ӈкитӯр па̄выл. Омам Елена Ивановна Таратова, тав ос Нё̄р ёлыпал Во̄лиӈ па̄вылныл о̄лыс. Пе̄с порат яныг па̄выл о̄лыс. – Анатолий Васильевич, наӈ са̄сныл ма̄щтырланэн коныпал, матыр мо̄т пормас ва̄ре̄гын? – Мо̄т пормас ва̄ре̄гум – са̄ӈквылтап ос койп ва̄ре̄гум. О̄с амти ханищтахтасум. Салехард ӯст 1989-1990 та̄лытт ос йӣвныл ма̄щтырлаӈкве ханищтахта̄лсум. – Та яныг ӯсн, тапалыт ма̄, хумус тув минасын? – Тув ам амттем минасум, то̄нт Тюменьт о̄лсум. Салехард ӯст искусства училище о̄лы, 1984 та̄лт тув ёхтысум, ханищтахтуӈкве о̄вылтахтасум. Мо̄тыт та̄лт армиян вуйве̄сум, тувыл 1988 та̄л порат та̄л котиль э̄тпост о̄с аквтув ювле ёхтысум. 1990 та̄лт училище та а̄стласум. Та па̄сныл матыр акваг ва̄ре̄гум, ёрге̄гум. Юн то̄ва инструме̄нтыт о̄ньще̄гум. Ам ань тыт «Торум Маа» музейт рӯпитэ̄гум. Ты я̄тил ма̄ньщи хо̄тпагӯв тох та потыртасы̄г. Пуста̄гыл вос о̄лэ̄г, пус ка̄т, пус ла̄гыл!

1066 2013.12.20. Николай МЕРОВ

Ма̄н мирув урыл кина по̄слувес. Ва̄т са̄грапнал э̄тпост 3-6 хо̄талытт Ханты-Мансийский округн Коми республиканыл Сыктывкар ӯсныл кина по̄слын хо̄тпат ёхталасыт. Тот «Финноугорский центр национальной культуры» нампа организация о̄лы. Та ма̄ныл Анна Бушуева, Олег Митрошин ос Сергей Гулько тыг ёхталасыт. Та̄н финноугор рӯт ка̄сыӈ мир урыл кина ва̄ре̄гыт. Мо̄лты та̄л ханты ма̄хум урыл кина по̄слысыт. Ань ос ма̄ньщи ма̄хманув о̄лнэхӯлнэ наканыл кинан хансуӈкве ёхталасыт. О̄влэ̄т та̄н Кульпасн минуӈкве е̄мталасыт. Тот са̄в ма̄щтырлан, хӯл алыщлан, во̄раян ма̄ньщи хо̄тпа о̄лы. Ань та па̄выл мус тэ̄лы лё̄ӈх иӈ а̄тим, туп товлыӈха̄пыл тув ёхтуӈкве ро̄ви. Ос та̄н тыламлан билет ка̄тынпаттуӈкве ат ве̄рмысыт. Тыима̄гыс туп Ха̄льӯс мус ялсыт. Кина ва̄рнэ хо̄тпат тот о̄лнэ ма̄ньщит хӯрум хо̄тал по̄слысаныл. Ты мӯй хо̄тпат хащта̄л ма̄т хот ул вос тыпсыт, ам та̄н ётаныл тув ялсум. Маныр та̄н тот по̄слысыт ос хотьют ёт хо̄нтхатыгласыт, на̄н ты урыл э̄лаль ловиньтэ̄н. «Хо̄талъят порат товлыӈха̄пув Ха̄льӯсн исыс. Тэ̄пъяламув юипа̄лт та̄ра рӯпитаӈкве о̄вылтахтасӯв. О̄влэ̄т Ха̄льӯст о̄лнэ «Центр национальной Культуры» нампа колн минасӯв. Тот ханты ос ма̄ньщи ма̄хманув – Дина Тимофеевна Лисова, Клавдия Васильевна Койнова, Раиса Петровна Загороднюк, Зоя Захаровна Сидорова ос мо̄т нэ̄ хо̄тпат ӯрхатасыт. Та̄н ётаныл кина по̄слын ва̄рмаль урыл потыртахтасӯв ос краеведческий музейн минасӯв. Тот ма̄ньщи мир урыл са̄в пе̄с йис потрыт ос пормасыт атым о̄лэ̄гыт. Э̄типала мус тот рӯпитасӯв. Китыт хо̄тал ма̄н Ха̄льӯс по̄хыт ӯнлын па̄вылн ялсӯв. Ты па̄выл ма̄ньщи ла̄тӈыл «Со̄рни Сэ̄й» намаявес. Тот пе̄с щирыл во̄рколыт, а̄мпарыт ос сӯмъяхыт ӯнттым о̄лэ̄гыт. Э̄лыл ёхталан ма̄хум пӯмащ ма̄гыс тот ва̄тихал ӯщлахтэ̄гыт. Ты па̄выл Ха̄льӯс район янытыл рӯпитан «Э̄лаль» нампа предприятие хосыт ӯнттувес. Кӯщаиг тот О. К. Филиппова рӯпиты. Тот хум хо̄тпат хӯлпыт уральтасыт, во̄раян ва̄рмаль суссылтасыт. Нэ̄ хо̄тпат ос хӯл яктысыт, исмит па̄йтсыт. Кина ва̄рнэ хо̄тпат ты ва̄рмалит пуссын ёмщакв кинан по̄слысаныл. Хӯрмит хо̄тал ос Ха̄льӯс налми ва̄тан ялсӯв. Карс сып пуӈкыт на̄ӈк щахыл о̄лы. Пе̄с порат та ма̄ ялпыӈыг ла̄ввес. Ань ты хо̄тал мус соссаӈ ма̄хманув пӯрлахтуӈкве тув атхатыглэ̄гыт. Пуӈк пинэ̄гыт, На̄й-О̄тыранылн по̄йкще̄гыт, йир тӯщтэ̄гыт. Ты ма̄ урыл са̄в пе̄с потыр о̄лы. Пе̄с порат Ха̄льӯсн яныг ка̄нащ о̄йка Александр Меншиков ще̄мьяӈ та̄гыл ссылкан ке̄твес. Ты ка̄нащ хотталь щалтме порат та щахылт ёлщё̄питавес. Ётыл яныг вит ва̄рум порат, та а̄врах на̄лув ловумтавес. Ань тот ты канащ о̄йка кастылэ яныг памятник тӯщтым о̄лы. Ам ты ялпыӈ щахыл урыл ос ты кинат по̄слахтум хо̄тпат урыл ётылнув нэ̄глын газетатт э̄лаль тах хансэ̄гум.

1066 2013.12.20. Людмила ТЕТКИНА Людмила Тасманова

Не̄лм рӯтанув палт ялсыт. Ма̄н округувт «Языковое гнездо» нампа проект хосыт Белоярский ос Ха̄льӯс райныгт ат садик рӯпитэ̄гыт. Ха̄льӯс район Ня̄хщамво̄ль па̄вылт «Северяночка», Кульпаст «Брусничка» ос Сӯкыръят «Оленёнок» нампа садикытт ня̄врамыт ма̄ньщи ла̄тӈыл потыртаӈкве ханищтавет. Ха̄льӯс район Тэ̄к па̄вылт «Зайчик» нампа садикт ос Белоярский район Касум па̄вылт «Оленёнок» нампа садикт а̄гирищитпыгрищит ханты ла̄тӈыл потыртаӈкве ханищтавет. Ань тамле рӯпата Россия янытыл финноугрыт о̄лнэ ма̄нанылт ва̄раве. Ты садикытт рӯпитан хо̄тпат акв та̄л сыс акв щёс та̄нки рӯпатаныл урыл потыртаӈкве акванатыглавет. Ты та̄л воспитателит Мордовия республикан Саранск ӯсн во̄виньта̄лве̄сыт. Тот «Финноугорские языки и культура в дошкольном образовании: проблемы обучения, опыт, перспективы» нампа ханищтап яныг таквс э̄тпос 26 хо̄талныл ва̄т са̄грапнал э̄тпос о̄выл хо̄талэ мус ва̄рыглавес. Россия янытыл финноугорский мир о̄лнэ ма̄тт ма̄нь ня̄врамыт ёт рӯпитан 40 э̄лумхо̄лас тув ялсыт. Ма̄н округувныл нила хо̄тпа: Галина Войтова, Ня̄хщамво̄ль па̄выл садикт кӯщай нэ̄, Оксана Гоголева, Сӯкыръят воспитателиг рӯпитан нэ̄, Тэ̄к па̄вылныл садикт кӯщаиг рӯпитан нэ̄ Надежда Катрычева ос воспитатель Светлана Ковтун тув во̄виньта̄лве̄сыт. Ханищтап Мордовский педагогический институт ос «Поволжский центр культур финноугорских народов» щё̄питалсы̄г. Тамле ханищтап «Финляндия – Россия» нампа общество ва̄рыглаӈкве нё̄ты. Ханищтахтаманыл порат ма̄хум са̄всыр э̄рнэ тэ̄лат урыл хӯнтлысыт: – этнообразование щирыл манхурип ань йильпи са̄кконыт пирмайтаве̄сыт; – ня̄врамыт аквторыг кит ла̄тӈыл хумус ханищтаӈкв э̄ри; – са̄всыр планыт ос са̄в мо̄т нэ̄пакыт э̄рнэ щирыл хумус хансуӈкв. Ма̄н округувныл ханищтапын ялум ма̄хум та̄нки рӯпатаныл урыл тот о̄с потыртасыт. Тувыл та̄н Инсар ӯст рӯпитан садик сунсуӈкве тотыглаве̄сыт. Тув ялантан ма̄нь ня̄врамыт пуссын рущ ос мордовский ла̄тӈыл потыртэ̄гыт. Мӯй ма̄хум ма̄гсыл та̄н концерт ва̄рыгласыт. Галина Войтова ты урыл ла̄выс: «Тот ща̄нита̄щит ня̄враманыл ёт юн аквторыг кит ла̄тӈыл потыртэ̄гыт, тыи ма̄гсыл воспитателин тот рӯпитаӈкве мощ кӯпнитнув. А̄нумн тув ялуӈкве сака мӯстыс, ня̄врамыт такем ёмащакв э̄рге̄гыт, са̄всыр стихыт ханищтэ̄гыт. Ма̄н ты проект хосыт ты та̄лныл рӯпитаӈкве о̄вылтахтасӯв. Тувыл ма̄хманув ня̄враманыл ёт юн ща̄нь ла̄тӈыл ат потыртэ̄гыт, садикын ялантан а̄гирищитпыгрищит аквкит ла̄тыӈ туп ва̄гыт. Ань ня̄враманув ма̄ньщи ла̄тӈыл потыртаӈкве Нина Николаевна Курикова ханищтыянэ. Саран ня̄врамыт ос та̄нки ща̄нь ла̄тӈаныл ханищтаӈкве тах патэ̄гыт». 2012 та̄лт о̄с акв тамле ханищтап Коми республикат ма̄нь таквс э̄тпос 21-26 хо̄талытт рӯпитас. Россия янытыл «Языковое гнездо» нампа проектыт рӯпитан хо̄тпат тох акванатхатыгланэ̄ныл, та̄нки халаныл ва̄йхатэ̄гыт ос та̄нки ща̄нь ла̄тӈаныл э̄лаль тотыяныл.

1066 2013.12.20. Тамара МЕРОВА

Пе̄с накыт ӯргалыянэ̄н. Удмуртиян ялнэм порат ма̄н Узей-Тукля па̄вылн тотыглавесӯв. Тот ремесла колн щалтсасӯв, ос ма̄хум маныр тот ва̄ре̄гыт, таи пуссын та̄рапаттысӯв. Ты коланыл 1994 та̄лт рӯпитаӈкве патыс, кӯщаиг тот Геннадий Сидоров о̄лы. Щар э̄рнэ тэ̄лаг тот таи ла̄ве̄гыт удмуртыт та̄нки пе̄с рӯпитан наканыл но̄хво̄рмалтым ос э̄лаль ханищтым вос о̄щве̄сыт. Таима̄гыс ты колт онтолов пе̄с тэ̄лат щирыл рӯпитэ̄гыт: йӣвныл матыр ёрге̄гыт, сэ̄тап та̄нки ва̄ре̄гыт ос са̄всыр маснут саге̄гыт манос ю̄нтэ̄гыт, йӣв пормасыт тармыл хансат по̄слэ̄гыт, ра̄ктыл матыр по̄щге̄гыт, сак хартэ̄гыт, то̄сам пумныл саге̄гыт ос яныг йӣвсупныл са̄всыр хури яктэ̄гыт. Ты ремёсла кол ва̄рнэ ма̄гыс Геннадий Евгеньевич Ува районный кӯщаитын са̄всыр э̄рнэ нэ̄пакыт хансыглас. Таит таве о̄влэ̄т ат торгамтасаныл, нэ̄матыр ва̄руӈкве ат та̄ртсыт. Тувыл та хольт па̄вылт о̄лнэ хо̄тпат ёт акваннё̄тхатым пе̄с ма̄хманыл ва̄рум пормасаныл атсаныл ос ёмас суссылтап ва̄рсыт. Ка̄сыӈ пормас хумус ос манрыг ва̄рвес, ты урыл потыртасыт. Ань пе̄с йис та̄гыл о̄щнэ ма̄щтыр пормасаныл нэ̄мхотьютн э̄лаль ат ке тотавет – та̄н та ёрувлавет. Ос удмуртыт номтыт о̄щнэ э̄лаль о̄лнэ ва̄рмаляныл ёмас тэ̄лаг та е̄мтыс. Мо̄тыт та̄лт тах ты коланыл хус та̄лэ то̄влы. Та сыс пе̄с йис та̄гыл о̄лум накыт Геннадий Евгеньевич аквъёт рӯпитан хо̄тпанэ ёт пуссын та̄рапаттысаныл. Тот ань са̄т хо̄тпат ма̄щтыр нам о̄ньще̄гыт, акв хо̄тпа иӈ ханищтыяныл. Ты ма̄хум ва̄рум пормасаныл са̄в ма̄т ва̄вет, хо̄н ма̄н суссылтаӈкве тотыглавет. 2009 та̄лт ты ремесла коланыл Удмуртия ма̄т щар ёмас рӯпитан колыг ла̄ввес. Геннадий Сидоров ань «Заслуженный работник культуры Удмуртской республики» нам о̄ньщи. Такви рӯпататэ о̄вылтыт тав ла̄выс: «Пормасыт пе̄с щирыл ва̄рнэм э̄лыпа̄лт ам матумпа̄ла ма̄хманув китыгласанум, маныр ос хумус ва̄руӈкве э̄ри. Са̄ртын ма̄н ма̄хманув йӣв хотсартнэ, пум са̄грын э̄лыпа̄лт по̄йкщасыт ос тувыл ущ матыра̄ти ва̄рсыт. Ма̄н о̄с пормасыг ва̄рнэ утанув (то̄сам пум, ра̄кт, йӣв) ма̄витувн ялмалтавет, таи ма̄гыс о̄с по̄йкще̄в. Са̄в тэ̄лат Кузьма Иванович Куликов а̄нумн хӯлтсанэ, тав хосат та̄гыл пе̄с йис накыт та̄рапаттысанэ». Ам сусте̄мт, ты хум йӣвныл сака са̄в ма̄щтыр пормасыт ёргум. Ты утыт халт ма̄н э̄лумхо̄лас ос мо̄йтныл о̄лнэ са̄всыр хурит ка̄саласӯв. Удмуртыт «лунт» товлыӈ ӯй сака ӯргалым ос янытлым о̄ньщияныл. Та̄н щираныл тав «семейнородовой хранитель счастья» о̄лы. Районаныл янытыл ма̄нь па̄вланыл хотталь ул вос со̄ймысыт, тот махум ёмщакв э̄лаль вос о̄лсыт, Геннадий Евгеньевич йӣвныл ва̄рим лунтыт тӯщтуӈкве номылматас. Ань тав нилахуйплов ма̄нь па̄влыт ма̄гыс тамле лунтыт ва̄рыс. Йӣв ёргын коныпал Геннадий Сидоров ка̄тыл хурит по̄слы. Са̄всыр о̄льпыл по̄слум хорамыӈ хуриянэ тот о̄с суссанӯв. Э̄кватэ Надежда Родионовна Сидорова тот колнорн тагатан, колканн нортнэ пунняпыӈ сэ̄тапыл нё̄тнэ то̄рыт саги. Тамле рӯпата пе̄с «ткацкий станокыт» ва̄ритэ. Таве̄н ма̄хум удмуртский супыт, мо̄т маснутыт сагуӈкве акваг ва̄рылтэ̄гыт. Ты пормасыт ма̄щтырыг ва̄рнэ̄тэ ма̄гыс нэ̄ са̄в э̄сгын нэ̄пакыл мӯйлуптавес. Мо̄т рӯпитан нэ̄т ос пыгыт ма̄н ётув о̄с пащалахтасыт, мощ потыртасыт ос нёмсаг та̄нки рӯпатаныл э̄лаль ва̄рсаныл. Акв нэ̄ рактыл сыресыр ӯйхулыт по̄щгыс, мо̄т нэ̄г то̄р сагсы̄г. Кит пыгыг станокытыт йӣвсупыт па̄ртыг сылталасы̄г. Ётыл ам таи номылматсум, 2005 та̄лт Екатеринбург ӯсн финноугорский ма̄хум акванатхатыгламаныл порат, акв хум Удмуртияныл ёхталас. Тав йӣвныл ёргим пормасыт суссылтаӈкве ёт тотыглас. Мӯй ма̄хумн та̄н сака мӯстысыт, ам то̄нт кит ӯйрищ ёвтсум. Тыи насати Узей-Тукля ремесла колт ва̄рим утыг о̄лсы̄г. Ань тыг мус о̄ньщиягум.

1066 2013.12.20. Александр ВЬЮТКИН

По̄лям ма̄т хо̄нтым ма̄харакве. Таквсы Салехард ӯсн ялмум порат ам тот музейколн щалтсасум, тав «И. С. Шимановский» намыл пиным о̄лы. Хуньт хосат ё̄рн ма̄хум ё̄р ва̄гыл хащта̄л То̄рмын кащилтыманыл порат тув ты ёхтум пӯп о̄йка о̄парищ намыл музей намаявес. Ань тав йильпи яныг колыг ӯнттувес. Тот са̄в ёмас, пе̄с йис пормас атым о̄лы. Та̄н музеянылт ма̄ янытыл ва̄нэ акв пӯмащ о̄ньще̄гыт. Салехард ӯс ляпат хо̄нтым ма̄нь ма̄хар тот суссылтаве. Ты ма̄нь ма̄харакве 2007 та̄лт Юрибей я̄ ёлнилим а̄врах ва̄тат хо̄нтвес. Таве хо̄нтум хум наме Юрий Худи. Тав ще̄мьятэ ёт са̄лы ӯрим о̄лы. Та та̄лт Юрий та ма̄т са̄лыянэ ща̄рканыл мувылтым яласас. Ма̄хар хо̄нтме юипа̄лт тав аквта та̄ра молямтахтым ляпатнув о̄лнэ Яр-Сале па̄вылн ла̄тыӈ тотуӈкв минас. Па̄влын ёхтуме̄т тав тот о̄лнэ музей кӯщай хум Геннадий Зайцев палт щалтыс. Тувыл тэ̄н тамле хо̄нтум ут ёт рӯпитан ха̄снэ ма̄хум палт Салехард ӯсн свонитасы̄г. Салехард ӯс музей тамле рӯпата ва̄рнэ кастыл таса̄вит олн ат о̄щсыт. Таима̄гсыл музейкол «Единый Россия» партияныл нё̄тмил во̄всыт. Ма̄хар ханищтан ма̄гсыл манхурип нё̄тмил э̄рыс, «Единый Россия» па̄лныл пуссын нё̄тве̄сыт. Юрий Худи хунь учёный ма̄хманэ ма̄хар хо̄нтум ма̄н тотсанэ, ӯйе хо̄нтум ма̄тэ̄т туп нумыл пантыглам парщинэ хо̄нтыстэ. Лё̄ӈх коюӈкве минасыт ос Новый Порт па̄вылн ёхтысыт. Ма̄хар тув ё̄рн ма̄хумн тотыма, хо̄нтум утаныл ма̄ ёлыпалт ва̄рим по̄лям колн тӯлсаныл. Тувыл ма̄хар та̄н ё̄рнытныл хотвисаныл, ос ниласа̄т атпан ве̄рыста Салехард ӯс мус вертолётыл э̄лаль тотсаныл. Уяныл ул вос толы, таве яныг холодильникын пинсаныл. Тот тӣвре̄т нёлоловхойплов градус а̄щирма о̄лыс. Салехард ӯсн ма̄ янытыл о̄лнэ учёныит ма̄нь ма̄харакве ёт рӯпитаӈкве ёхталасыт. Та̄н хо̄нтум хум намыл ты ӯй намаяӈкв тахсаныл. Юрий Худи хоса ат номсахтас, такви э̄кватэ намыл «Любаг» намтуӈкв ла̄выстэ. Тот ма̄хараныл уральтыма юипа̄лт ӯй Япония ма̄н тотвес. Японият щар ёмас, йильпи са̄всыр ищхӣпыӈ мӯтра о̄лы. Тот ты та̄рапатыс, «Люба» порслыма порат тав иӈ ма̄ниг о̄лыс, хӯрмах э̄тпосэ туп. Ань щар о̄выл щёс хунь ве̄скалавес, та̄рвитэ атпан килаг ёхталас. Тав ётэ ма̄хум хоса рӯпитасыт. Ёлаль хуям па̄лэ па̄лыгвуйлавес. Тэ̄п хӯргеныл тэ̄м тэ̄нутанэ ханищтан ма̄гсыл вуйлуве̄сыт. Учёныит ма̄хар ханищтаманыл юипа̄лт ла̄всыт, тав 10–12 со̄тыра та̄л ювле хультум порат о̄лум. Ты ӯй ханищтаӈкве тотыглым порат Юрий Худи Санкт-Петербург ӯсн во̄виньта̄лвес. Са̄лыӈ хум ӯй хо̄нтме ма̄гсыл йильпи, яныг снегоходыл мӯйлуптавес. Ма̄харакве ул вос толы, кумыскаӈ хусапыл нумыл лаппантым о̄ньщаве. То̄тап тивре аквписыг хус градус ащирмаг о̄лы. Са̄всыр ат ва̄нэ нак ань ма̄ янытыл о̄лы, на̄й ла̄пхарыглан порат музей коланылт на̄й таквирот та̄ра но̄хпе̄ламлы. Ты ма̄гсыл на̄й пе̄ламтан электрогенератор нампа ут о̄ньще̄гыт. Тох ты тот о̄щнэ пе̄с йис пормасаныл пуста̄гыл ӯргалым э̄лаль о̄ньщияныл.

1066 2013.12.20. Тамара МЕРОВА

Йильпи нэ̄пак та̄ратавес. Ма̄н редакциявн то̄внакт акв саран о̄йка щалтса̄лы, ма̄ньщи ла̄тӈыл ма̄н ётув пащалахты ос тэ̄ланув о̄вылтыт пӯмщалахты. Ты о̄йка профессор Е. А. Игушев, филология наукат доктор нам о̄ньщи. Тав Югорский госуниверситет студентытн финноугор мирыт ла̄тӈаныл урыл потырты ос са̄всыр ёмас нэ̄пакыт хансы. Евгений Александрович рӯтыг о̄лнэ мирыт ла̄тӈаныл пуссын аквана̄рталыянэ, матыр тэ̄лат та̄рапаттыянэ ос ётыл научный потрыт хансы. Ань «Занимательная лексика мансийского языка» нампа йильпи нэ̄пак хансыс. Тав тот ма̄ньщит, хантыт, сараныт ос венгрыт ла̄тӈаныл хумус акванро̄ве̄гыт, хумус ла̄вавет манос манрыг та̄н мо̄т щирыл пе̄нтхатэ̄гыт, таи оснпаттыс. Тот ка̄сыӈ мир ла̄тӈе̄т манхурип суй о̄ньщи ос ты суе акв по̄хат о̄лнэ мо̄т суит паттыиг хумус пе̄нтхатас, хоты ла̄тӈыт акв та̄р пуссын о̄ньще̄гыт ос ётыл ма̄хум та̄нки щирыл ла̄вуӈкве патсаныл. Тувыл ты ла̄тӈыт хумус ма̄нки ла̄внэ суянув ёт аквантэ̄лыгтасанӯв, Евгений Александрович ёмщаквег ханищтасанэ ос пуссын ты тэ̄лат хӯлтсанэ. Венгр, ханты ос ма̄ньщи ла̄тӈыт акв угорский группаг ловиньтахтэ̄гыт. Учёныит ла̄внэ̄ныл щирыл, ма̄н хантыт ёт 40% ла̄тӈанув акванро̄влахтэ̄гыт. Ос венгрыт ёт ма̄н 27% ла̄тӈанув щар акв хурипаг о̄лэ̄гыт манос то̄ват мощ мо̄т суил ля̄галыянӯв. Кос выгӯв, ма̄ньщит ла̄ве̄гыт: «нэ̄», хантыт – «нэ», венгрыт –«nо̄», та̄лтал-tе̄l, яӈкеӈк-jе̄g, касайкеши-kе̄s. Венгерский ла̄тӈыт «о», «е» суиг мо̄т нуми по̄сыл хансаве̄г кос, тэ̄н нуми щӯртмил пе̄нтсыл кит ман акв но̄ӈхаль тӯщтым щӯртмилыл хансумтаве̄г («запятой» по̄с хурип). Ты по̄санэ̄н хосыт матыр я̄нас ла̄тыӈ хӯлты. Тувыл Евгений Игушев «Манрыг тох ла̄ве̄в? » я̄нас пӯмыщ потрыт хансыс. Тав «со̄выр», «тӯлмах», «яныг», «хӯлуп», «ё̄рн», «со̄т», «иснас», «морах» ос мо̄т ла̄тӈыт та̄раныл ёмщаквег ханищтасанэ ос хумус та̄н толмащлавет, маныр хӯлтэ̄гыт, таи потыртас. Ань ты ва̄рум рӯпататэ ма̄гыс ма̄н Евгений Александровичин яныг пӯмащипа ла̄тыӈ ла̄ве̄в. Тав ос ты нэ̄паке та̄ратаӈкве «Дорога жизни» благотворительный фонд па̄лыл олныл нё̄твес. Тот кӯщаиг о̄лнэ хумн Роман Иванович Кичановын яныг пӯмащипа ла̄тыӈ ке̄ты. Тамле ёмас сымыӈ хо̄тпат ман йильпи ёхтын та̄лыл янытлыянӯв, пуста̄гыл вос о̄лэ̄гыт, рӯпатаныл ос о̄лупсаныл э̄лаль со̄тыӈыг вос о̄лы.

1066 2013.12.20. Александр ВЬЮТКИН

Ащирма тотнэ о̄йкат ӯсувн ёхталасыт. -

1067 2014.01.10. Тамара МЕРОВА

Йильпи та̄лыл ос Рождество хо̄талыл на̄нан янытлыянум! Ты ялпыӈ хо̄талыгт са̄в ща̄гтыл ос о̄лыглатта̄л ёмас со̄тыл на̄н сыманын вос та̄гиньтэ̄гыт. На̄н ляпа рӯтанын ос юрт хо̄тпанын пуста̄гыл вос о̄лэ̄гыт. На̄нки халанынт юртыӈыщ ос э̄руптахтым о̄лэ̄н, са̄в со̄т, са̄в щунь. Ос номтыт о̄щнэ матыр тахнэ ва̄рмалянын тэ̄лаг вос е̄мтэ̄гыт! Ма̄н то̄ва тэ̄ланув аквъёт ва̄рнэ̄в ма̄гыс, яныг пӯмащипа ла̄тыӈ на̄нан ла̄ве̄гум. Наталья Западнова, округ Думат депутатыг о̄лнэ нэ̄, ке̄тум ла̄тӈе ма̄ньщи ла̄тӈыг Т. Мерован толмащлавес.

1067 2014.01.10. Тамара МЕРОВА

Ка̄сыӈ ня̄врам со̄тыӈыг вос о̄лы. Мо̄лалнув ня̄врамыт тэ̄лат ёт рӯпитан кӯщаит «России важен каждый ребёнок» нампа проект о̄вылтыт потыртаӈкве акванатхатыгласыт. Ханты-Мансийсканыл округт о̄лнэ ка̄сыӈ ӯст ман районт ты видеоконференция суссылтавес. Ань савалап ня̄врамыт, мо̄т ще̄мьятыт яныгман а̄гитпыгыт та̄н тэ̄ланыл Д. А. Медведевын «Единая Россия» партия па̄лыл акваг уральтым о̄ньщавет. Ос тыт, Юграт, ты партият рӯпитан депутат Н. Л. Западнова пуӈктоты. О̄влэ̄т мир ӯргалан департамент кӯщай нэ̄ Елена Немчинова потыртас. Округув янытыл 7 со̄тыра 471 савалап ос ща̄ньа̄щныл по̄хан вим ня̄врам о̄лы. Тыгыл ань 7 со̄тыра 114 а̄гитпыгыт мо̄т манос рӯт ще̄мьяӈ колт янмалтавет. А̄гмыӈмосыӈ ня̄врамыт ще̄мьян виӈкве ма̄хум о̄с ка̄саще̄гыт. 2013 та̄лт ВИЧ диагноз о̄щнэ 5 ма̄нь ня̄врам ос гепатит «С» о̄щнэ 2 ма̄нь ня̄врамыг ще̄мьян вуйве̄сыт. Савалап ня̄врам о̄щнэ колытыт янгыщ китхуйплов та̄л ос тыгыл яныгнув а̄гитпыгыт хультсыт. Ты яныт ма̄ньлат хо̄тпат то̄внакт та̄нки номтаныл щирыл о̄луӈкве воратэ̄гыт ос ла̄тыӈ щар ат хӯнтлэ̄гыт. Таима̄гыс мо̄т э̄лумхо̄ласыт хурахлэ̄гыт, номсэ̄гыт, тав ётэ та̄рвитыг паты тах. Та щирыл е̄мталы, ма̄хум ня̄врам выгыт ос ётыл ювле тотыяныл. Та̄н аквъёт юртыӈыщ о̄луӈкве ат ве̄рме̄гыт. Ты коныпал савалап ня̄врам такви ща̄ньа̄ще̄н хо̄нтаве ке, то̄нт тав мо̄т ще̄мьяныл ювле виӈкве ве̄рмаве. Ань савалап колт яныгман ня̄врамыт ле̄ккарытн сусве̄сыт. Татьяна Яковлева, здравоохранение департаментыт рӯпитан нэ̄ ла̄внэ̄тэ щирыл, са̄выӈпа̄лэ ня̄врамыт тэ̄п хӯрыгсов а̄гм о̄ньще̄гыт, сам а̄гм, лувта̄н нё̄влитыт (костномышечный) о̄щнэ а̄гм ос номтаныл лю̄лиг е̄мтнэ̄ныл ма̄гыс мори кантлэ̄гыт. Са̄всыр а̄гм о̄щнэ ня̄врамыт пуссын пусмалтаӈкве о̄вылтаве̄сыт, ӯщлахтан колн ке̄тыглавет. Наталья Леонидовна Западнова ты проект щирыл рӯпитан хо̄тпат пуссын э̄сгысанэ. Ка̄сыӈ ня̄врамытн со̄тыӈыг, пуста̄гыл о̄луӈкве ла̄выс.

1067 2014.01.10. Валентина УЗЕЛЬ

Тав э̄лаль кӯщаиг пе̄риявес. «Югра лылыеп» общественный организация Белоярский ӯст соссаӈ ма̄хум съездын акванатыгласанэ. Ань ты съезд ХI щёс ва̄рыглавес. Та районт 3 со̄тыра арыгтем соссаӈ хо̄тпа о̄лы. Таима̄гыс ты ма̄хум тот акванатхатыгласыт. Съездын округ правительства па̄лыл Г. Бухтин, округ дума депутат В. Сондыков ос мо̄т са̄всыр ма̄тт рӯпитан кӯщаит ёхталасыт. Ань хӯрум та̄л сыс акв щёс ханты ос маньщи ма̄хум акванатыглавет. Тот са̄в та̄л Александр Новьюхов кӯщаиг о̄лы. Тав тув акваг та пе̄рияве, ань ты съездыт о̄с аквтох о̄лыс, э̄лаль тав кӯщаиг та ӯнттувес. О̄выл ла̄тыӈ атхатам ма̄хум э̄лыпалт тав ты ла̄выс. Потыртас, та̄н ань хумус рӯпатаныл ва̄рияныл, са̄всыр проект хосыт хумус рӯпитэ̄гыт. Нефтяной компаният ёт о̄с ёмащакв потыртахтым о̄лэ̄гыт, таит тананыл олныл мыганыл. Та̄нанылн нё̄тнэ мо̄т организацият пуссын ла̄всанэ. Ань та съездын Всемирный банкыт рӯпитан ма̄хум ёхталасыт, та̄н ос общинатн нё̄тэ̄гыт. Россия янытыл та̄н 1 со̄тыра арыгтем са̄всыр йильпи проект хосыт рӯпитан ма̄хум олныл мыганыл. Ма̄н округувт рӯпитан общинатн нё̄туӈкв та̄н о̄с ка̄саще̄гыт. Та съездын ань сака са̄в ма̄хум ат ёхталас. Ос тот о̄лум делегатхо̄тпат пуссын та̄нти ва̄рнэ рӯпатаныл урыл потыртасыт. М. Антонова потыртас, матах та̄л минам юипа̄лт соссаӈ ма̄хум пуссын о̄лнэ колыл майлуве̄сыт, са̄в та̄л очередит мо̄т ма̄хум халт ӯрхатуӈкв ат э̄рыс. Ань ты ва̄рмаль ёт кӯщаит рӯпитаӈкв сака ат таӈхе̄гыт. Ма̄ньлат ма̄хум организация сака э̄сгувес, та а̄гитпыгыт, со̄ль, сака ка̄ркамыг о̄лэ̄гыт. Р. Решетникова хансум потыр ма̄ньщи ла̄тӈыл В. Хозумова хансыстэ.

1067 2014.01.10. Тамара МЕРОВА

Пенсия олныт урыл. 1967 та̄лт самын патум ос тыгыл ма̄ньлатыг о̄лнэ хо̄тпат пенсиян акванатнэ олнаныл йильпи щирыл ловиньтавет. Ань РФ Пенсионный фонд та̄н ма̄гсыланыл ла̄тыӈ ке̄тыс. 20142015 та̄лыгт та ма̄хум та̄нки вос пе̄рие̄гыт, хумле щирыл та̄н пенсия олнаныл акванатуӈкве патыяныл. Ань «обязательный пенсионный страхованиет» хасхатам атпан нупыл хо̄т та̄лэ то̄влум хо̄тпат ман тыгыл ма̄ньнув ма̄хум номсахтуӈкве ос кит та̄л сыс ла̄тыӈ ювле ке̄туӈкве э̄ри. Та̄н пенсиян атнэ олнаныл (рущ щирыл «накопительныиг» ла̄вавет) 6% щирыл э̄лаль аквтахольт акванатыяныл манос тох ат ка̄саще̄гыт ке, ос тув ойтум олнаныл «страховой» пенсия щирыл вос щё̄питавет. Ань э̄лумхо̄лас рӯпитан колэ̄ныл такви страховой пенсиятэ ма̄гыс 16% са̄вит сэ̄лнэ олнэ тув тах со̄пасыг атуӈкв патавет. Пуссын йильпи ва̄рум ля̄ххалыт ка̄сыӈ хо̄тпа такви о̄лнэ ма̄тэ̄т пенсионный фонд тармыл рӯпитан ма̄хумныл та̄ра вос паттыянэ. Негосударственный пенсионный фондын хасхатам ма̄хум та̄нки тэ̄ланыл тувыл вос китыглыяныл. Аквтох матыра̄ти ля̄ххал www. gosuslugi. ru сайтыт та̄рапаттуӈкве ве̄рме̄гыт. ХМАО-Югра ма̄т о̄лнэ Пенсионный фонд ке̄тум ла̄тӈе ма̄ньщи ла̄тӈыг Т. Мерован хасвес.

1067 2014.01.10. Александр ВЬЮТКИН

Маныр э̄ри, тот пуссын тыналавес. Ка̄сыӈ та̄л аквта порат округув янытыл о̄лнэ мир Ханты-Мансийск ӯст атхатыглы. Та̄н тыг ёхталан ва̄рмаляныл рущ ла̄тӈыл «Товары земли Югорской» тох ла̄ваве. Ма̄хум та̄нти ва̄рум пормасаныл, янмалтам ос щё̄питам тэ̄нутаныл «Юграэкспо» нампа колн тыналаӈкве тотыглыяныл. Округув онтырса̄т нупыл хӯрум та̄лэ то̄влын кастыл ты ва̄рмаль нёлоловхойпловит щёс ва̄рыглавес. Та ярмарка хӯрум хо̄тал рӯпитас. Тыналам утыт нё̄тнэ̄г, хорамыӈыг щё̄питым о̄лсыт. Ханты-Мансийск ӯст о̄лнэ ма̄хум ты тыналахтын ва̄рмаль сака ӯрияныл. Тот тэ̄нут ман пормас тынаныл ла̄пка тын щирыл ат о̄лэ̄гыт, атыӈнуве̄г ос мощ тынта̄лнуве̄г тэ̄нутыл ёмщакв ёвтхатуӈкв ро̄ви. Тот пӯрщ, мис, янгӯй нё̄выль, юн янмалтан со̄выр ос са̄всыр щирыл щё̄питым са̄лы нё̄выль тыналавес. Белоярский район Касум па̄вылныл ёхталам ханты ма̄хум тыналан ма̄гсыл са̄лы нё̄выль мощща тотыгласыт. А̄с я̄ я̄ӈке иӈ во̄вта, таи ма̄гсыл тох е̄мтыс. Касум па̄выл ма̄хум та̄н мо̄лты та̄лт колпасаг ос тушонкаг ва̄рим са̄лы нё̄вляныл ань тотыгласаныл. Ты та̄л Ханты-Мансийск ӯст о̄лнэ «Колмодай» община тамле щирыл щё̄питым тэ̄нут о̄с тыналасыт. Атыӈ тэ̄нутаныл ӯсыӈ ма̄хум акваг ёвтэ̄гыт. Ты хӯрум хо̄тал сыс ӯс ос ляпа па̄влытт о̄лнэ мир матыр ёвтнэ ма̄гсыл акваг тув щалтсасыт. Тэ̄нут коныпал тот иӈ тыныӈ нё̄хс, во̄нтыр, норка, лэ̄пык, о̄хсар, ха̄йтнут со̄вытныл ю̄нтым рущ сахит ос те̄нтыт тыналаве̄сыт. Ла̄гыл маснут, са̄всыр хансал ю̄нтым пӯркат тыналаве̄сыт. Пуркат тыналан ма̄хум са̄выӈпа̄лэ Салехард ӯсныл ос Саранпа̄вылныл о̄лсыт. Хотьютн манырсыр яныт ла̄глыӈ маснут э̄рыс, та̄н палтаныл ёвтуӈкв ве̄рмысыт. Пӯркат тыналан Ха̄льӯс районныл о̄лнэ ма̄хум ла̄всыт: «Ка̄сыӈе̄мт мощща тотыглэ̄в, ты та̄л ма̄н щар са̄в пурка тыг тотсӯв. Ат ва̄глув, ёвтавет манос а̄ти». Ка̄тыл ма̄щтырлан ма̄хум та̄нти ва̄рум рӯпатаныл тот суссылтасаныл. Ма̄щтырыг ва̄рим касаит, са̄грапыт, са̄всыр щирыл хорамтым писаль ло̄сыт ос янгӯй, са̄лы а̄ньтыл яктым а̄ньщарыт, по̄слым хурит тыналаве̄сыт.

1067 2014.01.10. Людмила ТЕТКИНА Людмила Тасманова

Соссаӈ ма̄хум Ассамблея сапра̄ни ва̄рыглас. 2013 та̄л оигпам э̄лыпа̄лт соссаӈ ма̄хум Ассамблеят рӯпитан ма̄хум яныгпа̄ла хо̄тпат, наука, культура ос искусство щирыл рӯпитан хо̄тпат, А̄с-угорский ма̄ньлат ма̄хум организацият рӯпитан а̄гитпыгыт тув во̄виньта̄лсаныл. Еремей Айпин ла̄выс: «Хус та̄л ювле хультум порат ва̄т са̄грапнал э̄тпос 12 хо̄талэ̄т щар ма̄к яныг са̄ккон Россия Конституция пирмайтавес. Та юипа̄лт окружной Дума рӯпитаӈкве о̄вылтахтас ос соссаӈ ма̄хум Ассамблея ва̄рвес. Ань ма̄ньщит, хантыт ос ё̄рн мирыт ёмащаквнув о̄лнэ̄ныл ма̄гсыл са̄кконыт ма̄н хансэ̄в ос Дума сапра̄нит о̄лыглан порат пирмайтыянӯв. Ты та̄лыт сыс Ассамблеят рӯпитан соссаӈ ма̄хум лов са̄ккон хассыт. Ты коныпал мо̄т 40 са̄кконыт, программат та̄н ма̄гсыланыл э̄рнэ тэ̄лат хансым о̄лэ̄гыт». Надежда Алексеева са̄кконыт урыл о̄с потыртас. «О территориях традиционного природопользования» нампа са̄ккон хосыт пе̄с йис ма̄т о̄лнэ ма̄ньщит, хантыт, ё̄рныт ма̄наныл та̄нки нупыланыл хансуӈкве ань ве̄рме̄гыт. «О святилищах» са̄ккон пирмайтым юипа̄лт ялпыӈ ма̄т ӯргалаӈкв патавет. Ос мо̄т са̄кконыт манхурип ёмас тэ̄ла соссаӈ ма̄хумн тотэ̄гыт, та урыл тав о̄с ла̄тыӈ ла̄выс. Э̄лаль потыртасыт, манхурип рӯпата йильпи 2014 та̄л сыс ва̄руӈкве тах патэ̄гыт. Ань та̄н «Об уполномоченном по правам КМНС» нампа са̄ккон щё̄питэ̄гыт. Тувыл «О святилищах» пирмайтым са̄ккон то̄ва ла̄тӈанэ мо̄т щирыл хансыяныл. Ос «О недропользовании» нампа са̄кконын пе̄с йис ма̄т о̄лнэ соссаӈ ма̄хум ма̄наныл ӯргалан ва̄рмаль урыл хансуӈкве таӈхе̄гыт. Ассамблея депутыт ос округувт са̄всыр ялпыӈ хо̄талыт кастыл ань о̄с щё̄питахтэ̄гыт. Са̄лы ӯрнэ ма̄хум, хӯл алыщлан хо̄тпат ялпыӈ хо̄таланыл, Ӯринэ̄ква хо̄тал ос са̄в мо̄т ялпыӈ хо̄талыт ма̄ньщит, хантыт ёт янытлаӈкв тах патэ̄гыт. Ты та̄л Елена Сагандукова, округувт яныг ле̄ккарыг о̄лум ханты э̄ква, 80 та̄лэ то̄влынув. Тав хо̄псы а̄гм пӯсмалтан пӯльницат са̄в та̄л рӯпитас. Таве кастын ма̄гсыл нэ̄пак ань щё̄питаве. Тувыл ты та̄л сыс конгрессыт, конференцият са̄всыр ма̄т ва̄рнэ порат тув тах ялэ̄гыт. Соссаӈ ма̄хум Ассамблея та̄л сыс са̄в рӯпата тах ва̄ри.

1067 2014.01.10. Александр ВЬЮТКИН

Щахныл алхатнэ касыл. Ва̄т са̄грапнал э̄тпост Ханты-Мансийск ӯст бокс касыл ва̄рыглавес, тав рущ ла̄тӈыл «Кубок мира нефтяных стран, памяти первооткрывателя нефти в Сибири Фармана Салманова» намаим о̄лыс. Ты та̄л тав аквхойпловит щёс минас. Яныгса̄т арыгтем каснэ хо̄тпа тыг ёхталас. Ма̄ янытыл «Кубок мира нефтяных стран» ты нампа касыл ёмщаквег ва̄ве. Са̄в мир та̄нти каснэ ма̄хманыл тыг тотыглаӈкв таӈхияныл. Ты та̄л 14 хо̄н ма̄ныл ма̄хум тыг ёхталасыт. Ма̄н округувныл ва̄т нупыл ат боксёр кассыт. Касыланыл о̄вылтан хо̄талт тит чемпионыг Р. Проводников ос Е. Гродович ёхталасы̄г. Округ янытыл боксёрыт халт кӯщаиг о̄лнэ хум Рамиз Гаджиев ла̄выс: «Юн ӯнлын ма̄ньлат ма̄хум тэ̄н нупыланэ̄н телевизор хосыт сунсыманыл юипа̄лт, э̄рыӈ, о̄с хоты каснэ ма̄н хасхатуӈкв номылматэ̄гыт. Ам ва̄тихал мо̄тмо̄т ма̄т Евгений ос Руслан урыл потыртэ̄гум, тэ̄н сас Ха̄льӯс районныл о̄лэ̄г. Ня̄врамытын тэ̄н уре̄тыл ва̄ӈкв пӯмащ. Таима̄гсыл ты ма̄н палтылув та̄н хасхатэ̄гыт. Хотьют ма̄к каснэ ма̄т ханищтахтуӈкв номсы, та ня̄врамыт ты хультэ̄гыт. Та̄н халанылт са̄в ёмас боксёр яныгми. Россия янытыл лов боксё̄р халт Руслан ос Евгений щар ма̄к яныг ос ё̄р боксёрыг пе̄риявесы̄г. На̄нти ва̄гын, маныр тэ̄н ха̄сэ̄г ос ве̄рме̄г». Руслан боксёрытн ла̄выс: «Ам ва̄глум, ты нампа кубок о̄лнэ хосыт са̄в ёмас каснэ ма̄хум яныгми. Тамле каснэ ма̄т боксёрыт ты ва̄вет. Тувыл э̄лаль хотьют маныр номсы, ос хо̄т касуӈкв тав ка̄сащи, тув та мины. Ам ты касылт хӯрум щёс кассум, ос но̄х ат патыгласум. То̄нт ты ам бокс щирыл э̄лаль минуӈкв номылматсум. Любительский боксныл «професионалыг» ханищтахтуӈкв минасум. Та юипа̄лт хумус номсысум, тох э̄лаль а̄ртмуӈкв та патыс. Ань хӯрум са̄всыр нампа э̄нтап о̄ньще̄гум». Евгений ос ты касылт акв щёс касыс. Тав то̄нт но̄хпатме юипа̄лт, та̄ра «профессиональный бокс» касылн контракт нампа нэ̄пакт хасхатас. Ань тав о̄с ма̄ янытыл ма̄к яныг боксёрыг ловиньтаве. Евгений ос Руслан халэ̄нт юртыӈыщ о̄лэ̄г. Акватэ каснэ порат, мо̄танэ акв тот юртэ янытлым ляпат о̄лы.

1067 2014.01.10. Светлана РОМБАНДЕЕВА

Кульпас па̄выл ма̄нь ле̄ккар. Ольга Николаевна Пуксикова Ха̄льӯс район Кульпас па̄вылт о̄лы, а̄ги о̄парищ наме Дудорева. Тав 1978 та̄лт лӯпта э̄тпост самын патыс. Кульпас школат аквхуйплов класс а̄стлас, э̄лаль Ханты-Мансийск ӯст медучилищат ханищтахтас. Оматэ Галина Федоровна, а̄тятэ Николай Николаевич, тэ̄н хосат а̄тимыг е̄мтсыг. Увщитэ Таня ос йӣгрище Евгения Советский ӯст о̄лэ̄г. Ольга Николаевна о̄йкатэ Сергей Васильевич Пуксиков, ма̄ньщи хум. Тав о̄с Кульпаст самын патыс, тот яныгмас. А̄ги о̄ньще̄г, наме Влада, таве̄н нёлолов та̄л. Йильпи кол ӯнттысы̄г, тот о̄лнэ̄ныл атыт та̄лыг ты е̄мтыс. Пӯльницат ма̄нь ле̄ккарыг тав онтолов та̄л арыг рӯпиты. Ам Ольга Николаевна китыгласлум, пӯльницат рӯпитаӈкве таве̄н мӯсты? Тав ювле ла̄выс: «Рӯпатам а̄нумн мӯсты, па̄выл ма̄хманувн тэ̄рпиӈ ю̄нтуп тӯщтэ̄гум, капельницат ва̄ре̄гум (ке̄лп та̄рс хосыт тэ̄рпи алпин та̄ратаве). Тэ̄рпи то̄ванакт мощща хультсы, ос илттыг а̄гмыӈыг е̄мтапан хо̄тпа ма̄гыс тай о̄ньще̄в. Во̄ртур э̄тпост э̄тэхо̄талэ рӯпитан пӯльницав лаппантвес, ань туп хо̄тыл порат рӯпиты. Тувыл ос ань дежурство ва̄рвес, ме̄н кит хо̄тпа Тамара Сергеевна Логвиненко ёт э̄тэхо̄талэ рӯпитыме̄н, акв хо̄тал тав, мо̄тыт хо̄тал ос ам. Э̄ткотильт хотьютув а̄гмыӈыг е̄мтапи те, пӯльницавн звонитэ̄гыт, акв хотьютаме̄н тув та мины. Рӯпата олнув сака кос яныг а̄ти, ос воссыг хоталь щалтэ̄в, тох та рӯпитэ̄в. Мощ но̄хнув те нё̄тумтануве, тай ёмас о̄лнув. О̄йкам о̄с тыт рӯпиты, машинал ма̄хум тыглетувле тотыглыянэ, пӯльницан э̄рнэ са̄всыр пормас ман тэ̄рпи тотыглы». Ольга Николаевна тамле нёмса, хо̄тпа нупыл сымыӈ нэ̄. Тав ла̄внэ̄тэ щирыл, Кульпаст самын патме ма̄гсыл, тав такви па̄влэ ос о̄лнэ ма̄тэ сака э̄руптытэ. Ты ёмас хо̄тпа пуста̄гыл вос о̄лы, ще̄мьятэ ёт со̄тыӈыщ, щуниӈыщ вос о̄лы!

1067 2014.01.10. Николай МЕРОВ

Йильпи та̄л кастыл ма̄ньщи нэ̄т янытлыянӯв. Татьяна Петровна Конева, а̄ги о̄парищ наме Пузина, Ха̄льӯс район Саранпа̄вылт самын патыс. Оматэ Анна Никоновна, а̄ще Пётр Ильич Пузиныг о̄лсы̄г. Татьяна иӈ ма̄ниг о̄лыс, а̄ще холас. Анна Никоновна такке̄т ня̄врамыт янмалтасанэ. Татьяна Саранпа̄выл школа а̄стламе юипа̄лт 1993 та̄лт Ха̄льӯсн ва̄нтлыс. Хум ва̄рыс, о̄йкатэ̄нтыл хӯрум ня̄врам янмалтэ̄г. Яныг пыге Ягрим па̄выл колледжыт ханищтахты. Кит а̄гияге иӈ школан ялантэ̄г. Ня̄враманэ мощ ма̄ньщи ла̄тыӈ торгамтэ̄гыт ос юн ща̄нь ла̄тӈыл мо̄рсыӈ порат потыртэ̄гыт. Татьяна Петровна ань нэ̄мхо̄т ат рӯпиты, а̄гияге янмалты ос юн о̄лнэ са̄всыр рӯпата ва̄ри. О̄йкатэ рущ хум, тав я̄ хосыт катерыл яласым рӯпиты. Анастасия Васильевна Вынгилева Ха̄льӯсн 1975 та̄лт ёхтыс. Тав пӯльницат ня̄врамыт пусмалтым ма̄нь ле̄ккарыг рӯпиты. Э̄ква хӯрум а̄ги янмалтас. Кит а̄гияге университет а̄стласы̄г, акватэ иӈ ханищтахты. Ня̄враманэ та̄нки ще̄мьял о̄лэ̄гыт. Ань тав хо̄т апыг о̄ньщи. Анастасия Кимкъясуй па̄вылт самын патыс. А̄ще Василий Селивёрстович Вынгилев Кимкъясуй па̄выл хум о̄лыс. Оматэ Домна Гавриловна ос Сӯкыръя па̄вылныл о̄лыс. Тэ̄н аквъёт атпан нупыл кит та̄л са̄виткем са̄лыӈ колт яласасы̄г. Юио̄выл та̄лытт Саранпа̄выл совхозт са̄лы ӯрим рӯпитасы̄г. Колта̄гланылт аквхуйплов ня̄врам яныгмасыт: са̄т пыг, нила а̄ги. Ань хӯрум та̄лыг е̄мтыс, а̄ще хотталь щалтыс. Оматэ ос 1996 та̄лт а̄тимыг е̄мтыс. А̄ще о̄лме̄т йӣвныл са̄всыр хурит ё̄ргыс. Са̄лыӈ суныт, ёсат, матыра̄ти пуссын ва̄руӈкве хасыс. Оматэ о̄с сака ма̄щтыр нэ̄ о̄лыс. Совныл са̄всыр пормасыт ю̄нтыс. То̄ва пормасанэ музейт о̄ньщавет, то̄ванэ ос э̄л тыналаве̄сыт. Ха̄льӯст ялпыӈ хо̄талыт о̄лыглан порат Анастасия Васильевна ва̄тихал тув во̄виньта̄лаве. Са̄ртын культура колн э̄ргуӈкве ялантас. Ань юио̄выл та̄лытт ты ва̄рмалин мо̄рсыӈ порат яланты. Рӯпататэ щирыл сака ат ве̄рми. Ирина Константиновна Поята Ха̄льӯс район Ло̄пмус па̄вылт самын патыс. А̄ще Константин Корнилович, оматэ Ольга Максимовна Албиныг о̄лсы̄г. Э̄кваго̄йкаг колта̄глэ̄нт китхуйплов ня̄врам янмалтасы̄г. Ань са̄т хо̄тпа хультыс. Ирина школа а̄стламе юипа̄лт Салехард ӯс медучилищан ханищтахтуӈкве минас. А̄стламе юипа̄лт Ямал ма̄н Тарко-Сале ӯс пӯльницан рӯпитаӈкве ке̄твес. Тот мощ рӯпитас ос хум ва̄рыс. О̄йкатэ̄н Молдавия ма̄н о̄луӈкве тотвес. Тувыл 1990 та̄лт тэ̄н ювле Ха̄льӯсн ще̄мьяӈ та̄гыл ва̄нтлысы̄г. Нэ̄ пӯльницат терапевтле̄ккарн нё̄тым нёловхуйплов та̄л рӯпитас. Та юипа̄лт ос физиотерапия ва̄рмаль щирыл э̄лаль ханищтахтас. Ань ты пӯсмалтан ва̄рмаль щирыл Ха̄льӯс пӯльницат китхуйплов та̄л рӯпиты. Ирина Константиновна о̄йкатэ̄нтыл кит ня̄врам янмалтасы̄г. Пыге̄н юридический академия а̄стлас. Ань Ха̄льӯст о̄лы. А̄гитэ̄н ос Ханты-Мансийск ӯс педколледжит нилыт та̄л ханищтахты. Ам ты ма̄ньщи ще̄мьят йильпи та̄л кастыл янытлыянум. О̄лупсаныл кӯпнитыг вос о̄лы. Йильпи та̄лт та̄н щуниӈыг вос е̄мтэ̄гыт. Рӯтаныл, юртаныл ёт са̄в та̄л пуста̄гыл вос о̄лэ̄гыт.

1067 2014.01.10. Тамара МЕРОВА

Я̄тил нэ̄кве̄в 50та̄лэ̄тыл янытлылӯв. Ты э̄тпос аквхуйплов щислат Альбина Романовна Станиславец нам хо̄талэ. Ань ты та̄лт нэ̄ атпан та̄лэ то̄влы. Ма̄н таве пуссын янытлылӯв ос тав уре̄т аквкит ла̄тыӈ хансуӈкве таӈхе̄в. Альбина Ха̄льӯс район Саранпа̄вылт самын патыс, а̄ги о̄парищ наме Хозумова. Тав яныг колта̄гылт яныгмас, та̄н Сӯкыръя па̄вылт о̄лсыт. Роман Хозумов а̄ще «Саранпаульский» совхозт рӯпитас, Евдокия оматэ юн ня̄враманэ янмалтас. Та̄н Агафья ане̄кванылн акваг нё̄тве̄сыт. Ня̄врамыт таве̄ныл са̄всыр пе̄с йис потрыт хӯлыгласыт. Ты ще̄мья лув, мис о̄щсыт. Туи акваннё̄тхатым пум са̄грысыт, пыгыт хӯл алыщлым, во̄раим яласасыт. Альбина Саранпа̄выл школа а̄стламе юипа̄лт Ленинград ӯсн э̄лаль ханищтахтуӈкве минас. Тот 1986 та̄лт А. И. Герцен нампа педагогический институт а̄стластэ ос тувыл Ханты-Мансийск ӯсн ёхтыс. Тыт тав педагогический училищат рӯпитаӈкве патыс, соссаӈ а̄гитпыгыт ма̄ньщи ла̄тӈыл потыртаӈкве ханищтасанэ. 1992 та̄лт тот «национальное отделение» пусвес, тав тот пуӈктотыс. Ётыл ты ханищтахтан кол колледжиг ва̄рвес ос Альбина Станиславец тот социальногуманитарный отделеният кӯщай нэ̄г паттувес. Та колт рӯпитанэ̄тэ па̄сыл ань ва̄т нупыл са̄т та̄лыг то̄влыс. Альбина Романовна тот ёмас ка̄ркам хо̄тпаг ва̄ве. Тав ма̄ньлат ма̄хманэ ёт сымыӈыщ рӯпиты, номтыӈыг ос мӯтраӈыг о̄луӈкве пуссын ханищтыянэ. Пе̄с йис накыт ос ща̄ньа̄щ ла̄тыӈ ва̄ӈкве акваг ла̄виянэ. Соссаӈ ма̄хум ла̄тыӈ ханищтан э̄рнэ ёнгыт, касылыт щё̄питы, са̄всыр потрыт, мо̄йтыт акваг кинсы. Ань студентыт ла̄внэ̄ныл щирыл, тав уроканэ пӯмщит, тувыл та̄н матыра̄ти номтыт ёмщакве̄г о̄ньщияныл. Та̄нанылн ётыл практика порат рӯпитаӈкве мощ кӯстырнуве. Нэ̄ ма̄ньщи ла̄тӈын ханищтан коныпал, ма̄ньлат хо̄тпат са̄всыр суссылтапын тотыглыянэ. Тувыл та̄н ётаныл ялпыӈ хо̄талыт щё̄пита̄лы, тот та̄н йӣкве̄гыт, э̄рге̄гыт. «Югорские встречи» ос «Ӯринэ̄ква ялпыӈ хо̄тал» ка̄сыӈ та̄л ва̄рыглэ̄гыт. Альбина ань тыг мус такви э̄лаль ханищтахты, тав педагогический рӯпататэ̄т са̄в ва̄нэ̄тэ ма̄гыс, са̄всыр курсыт хӯнтлуӈкве яланта̄лы. Финноугор рӯт ма̄хум Конгрессыт о̄лыгланэ̄ныл порат тув делегатыг пе̄рия̄лаве. Тох Финляндиян, Венгриян ялыс. Тувыл акв та̄лн, о̄с акв ма̄ньщи а̄ги Марина Хатанева ёт Венгриян ханищтахтуӈкве ке̄тыглавесы̄г. Альбина иӈ школат ханищтахтаме̄т акваг номтыӈыг ос ка̄ркамыг о̄лыс. Са̄т классыт ханищтахтаме порат тав тэ̄лы каникулт «Артек» нампа ня̄врамыт ӯщлахтын мирхал лагерьн ке̄тыглавес. Аля акв э̄тпос тот ӯщлахтас. Ань та тэ̄ла номылматаме̄т тав ла̄выс: «То̄нт Ха̄льӯсныл образование колныл Саранпа̄вылн ла̄тыӈ ке̄твес: «Акв хотты ма̄ньщи, ханты манос ё̄рн ня̄врамакве пе̄рияӈкве ос лагерьн тотыглаӈкве э̄ри». Ам то̄нт школат сак хартнэ кружокын ялантасум, ма̄щтырыг пальсакыт, турло̄псыт, олн пиннэ хӯрыгсовыт сакныл хартсум, тувыл сака ёмщакве̄г ханищтахтасум. Таима̄гыс тув ке̄тве̄сум. А̄нумн тот сака пӯмыщ о̄лыс, мо̄т ма̄ныл ёхталам са̄в а̄гитпыгыт пуссын акванюрщхатсӯв». Альбина Романовна институтт ханищтахтаме порат телевидение хосыт ам акв щёс ка̄сала̄лыслум, тот матырсырман телемост о̄лыс. Ань ты урыл тав тох потыртас: – Ты ва̄рмаль 1985 та̄лт о̄лыс. То̄нт СССР-Америка мирхал телемост ва̄рыглавес. Тав «Ленинград – Сиэтл: Встреча в верхах рядовых граждан» намаим о̄лыс. Тот кит яныг ӯсыгт о̄лнэ ма̄хум акванатыглаве̄сыт ос са̄всыр тэ̄лат урыл потыртасыт. Ма̄н, лӯима̄ ма̄ныл ханищтахтам студентыт, тув о̄с во̄виньта̄лвесӯв. Ты кастыл партком института акванатхатыглас ос лӯима̄ныл о̄лнэ ёмщакв ханищтахтан студентыт тув пе̄рияве̄сыт. Тувыл ма̄н Владимир Познер ёт акванхо̄нтхатыгласӯв ос маныр, хумус потыртаӈкве ро̄ви, мощ хӯлтыглавесӯв. Э̄лы хо̄н ма̄т Фил Донакью, мирн ва̄нэ журналист, такви ма̄хманэ ёт рӯпитас. Тувыл хо̄н ма̄хум пӯмщалахтасыт, СССРыт мощщаг хультум ма̄хум матыр права о̄ньще̄гыт манос а̄ти, мо̄т мирыт ма̄н ётув, со̄ль, юртыӈыщ о̄лэ̄гыт ман а̄ти? Ам ты о̄вылтыт, ва̄им, ёмас ла̄тыӈ ла̄всум. Мо̄т ла̄тыӈ ла̄вуӈкве хунь та̄ртавем. Ань мо̄т пораг е̄мтыс, ань ро̄ви». Альбина Романовна «Лӯима сэ̄рипос» газетан потрыт ос ля̄ххалыт хансыглас. Тав Оксана а̄гитэ янмалтым юн о̄лыс, ос ня̄врамыт ат ханищтанэ̄тэ халт, газетан рӯпитаӈкве во̄выглавес. Таве̄н то̄нт Т. С. Себурова, ханты газетат рӯпитам э̄ква, ёмщакв нё̄тыс. Альбина ля̄ххалыт манос потрыт юн хассанэ, ос Таисья Степановна тав палтэ щалтса̄лы, потрыт рӯпатан тотыянэ. Та̄н рӯпата колт печатайтавет ос та нэ̄н ювле сунсуӈкве тотыглавет. Ля̄ххалыт, потрыт уральтан юипа̄лт ущ газетан ва̄равет. Ос ётылнув мо̄т ма̄ньлат ма̄ньщи а̄гит тув рӯпитаӈкве ёхтысыт, Альбина ня̄врамыт э̄лаль ханищтаӈкве та патыс. Тувыл туи ма̄ньщи ла̄тыӈ ханищтахтан курсыт ва̄рыглаве̄сыт, тав о̄с ка̄сащим тот рӯпитас. Тох тав Ло̄пмусн матахмат щёс «Шешкинские чтения» нампа ханищтапн ялыс. А̄нъян ос Кимкъясуй па̄влыгн, Лӯсум ма̄ньщиянув палт о̄с ялыс. Сукыръян рӯт ма̄хманэ уральтаӈкве акваг яланта̄лы. Ты нэ̄ акв ма̄т ат ӯнлы, акваг матыра̄ти ва̄ри. Мо̄лалнув А. И. Герцен Российский государственный педагогический университет тармыл юил ёхталым аспирантурат ханищтахтуӈкве патыс. Научный яныг нэ̄пак ань щё̄питы. Рӯпататэ ка̄ркамыг ос ёмщакв ва̄рнэ̄тэ ма̄гыс Альбина Романовна са̄всыр янытлан нэ̄пакыл майлувес. Тав РФ Министерство образования па̄лыл, тувыл образование ос наука ХМАО-Югры па̄лыл янытлан нэ̄пакыл мӯйлуптавес. Юн тав Оксана а̄гитэ пыг янмалтаӈкве нё̄ты, тав а̄гитэ̄н сака э̄руптаве. Ма̄н ты сымыӈ нэ̄кве̄в нам хо̄талэ̄т янытлылӯв, пуста̄гыл вос о̄лы ос На̄й-О̄тыранэ̄н вос ӯргалаве, пус ка̄т, пус ла̄гыл!

1067 2014.01.10. Николай МЕРОВ

Са̄лы янмалтан ма̄ньщи ще̄мья. Ва̄т са̄грапнал э̄тпос округ Дума депутат Татьяна Гоголева, таве̄н нё̄тмил ва̄рнэ а̄ги Елена Фризоргер ос ам Ха̄льӯс район Тӯрват па̄вылн мӯйлуӈкве ялсӯв. Та па̄вылт Савва ос Татьяна Самбиндаловыг ня̄враманэ̄н ос апганэ̄н ёт о̄лэ̄г. Э̄кватэ Татьяна Владимировна, такви о̄парищ наме Тасманова, Лэ̄пла па̄вылт яныгмас. Э̄кваго̄йкаг акванминаме̄н па̄сныл ань налыман нупыл китыт та̄лыг ты е̄мтыс. Савва Тӯрват па̄вылт яныгмас. Пе̄с порат а̄ще са̄в са̄лы о̄ньщис. Ма̄ньщи хум нэ̄ тотме порат яныгса̄т атпан са̄лы иӈ о̄ньщис. Ётыл пастух ат е̄мтыс, ма̄хум нё̄рт са̄лы ӯруӈкве ат тахсыт, са̄лыяныл тот та̄нкирот о̄лсыт. Тыщир ты са̄лыт лащал ла̄ккваминыгласыт. Юио̄выл са̄лыянэ 1996 та̄лт Илья Монин ёт юв тотсанэ̄н, аласанэ̄н. То̄ванэ ос йирхатнэ ма̄гыс э̄л майлысанэ̄н. Ань нэ̄гхумы̄г хо̄т ня̄врам о̄ньще̄г. Яныг а̄гитэ̄н наме Ольга, тав Дима пыге ёт Ня̄хщамво̄ль па̄вылт о̄лы. Дима онтолов та̄лэ то̄влыс, школат хӯрмит классыт ханищтахты. Ольга ос школат а̄нысан ловтым рӯпиты. Олег, Илья, Унтари ос Алексей Тӯрват па̄вылт о̄лэ̄гыт. Илья ос Унтари Тӯрват па̄вылт самын патсы̄г. Мо̄т ня̄враманэ̄н пуссын Ня̄хщамво̄льт самын патсыт. Нила пыг пуссын во̄рае̄гыт, янгуй, нё̄хыс ос мо̄т са̄всыр во̄руй алыщлэ̄гыт. Ка̄сыӈ хо̄тпа такви «Буран» о̄ньщи. Таквсы сыс са̄в нёхыс ке̄рнялил алыщлэ̄гыт, акванатыяныл, тувыл тыналыяныл. Ма̄хум акв нёхс сов нила со̄тыра солко̄вил ёвтыяныл. Ты коныпал Самбиндаловыт нё̄выль ос пил тыналэ̄гыт. Тыщир ты олн сэ̄лэ̄гыт. Матыра̄ти та̄нки ёвтуӈкве ве̄рме̄гыт. Па̄вланылт на̄й постын станция о̄ньще̄гыт. Э̄типа̄лаг на̄й пе̄ламтэ̄гыт, кина суссылтан то̄тап сунсэ̄гыт, компьютер о̄с о̄ньще̄гыт. Улякщи по̄слын утыл са̄лыт, во̄раян ва̄рмаль ос яласан лё̄ӈх акваг по̄слы. Ос ётыл такви кина ва̄ри. Матыр э̄рыг тув ханувъяпты, татем пӯмащ кина тэ̄лы. Ты пыгыт та̄нки ёса, са̄лы сун ос мо̄т са̄всыр пормас ма̄щтырлэ̄гыт. Мо̄лал Алябьево па̄выл леспромхозт рӯпитан ма̄хум та̄н о̄лнэ ма̄нанылт нор яктысыт. Тот нор яктынэ̄ныл ма̄гыс Тӯрват па̄вылт йильпи кол ӯнттысыт. Ань та̄н пуссын та яныг колт ты о̄лэ̄гыт. Савва котиль а̄гитэ о̄с Тӯрват па̄вылт о̄лы. Тав наме Ирина, кит ня̄врам янмалты, Кристина ос Никита. Тэ̄н иӈ ма̄ниг, Кристина нила та̄лэ то̄влыс, Никита ос та̄л охса яныт пыгрищ. Ня̄врамы̄г ща̄нь ла̄тыӈ сас ёмщакв торгамтэ̄г. Ты колта̄гыл халанылт туп ма̄ньщи ла̄тӈыл потыртэ̄гыт. 2011 та̄лт округ Ассамблея депутат Татьяна Гоголева та̄н ма̄гсыланыл Ямал ма̄ныл нёлсат са̄лы ёвтыс. Та па̄сныл кит та̄л минас. Ань ты ще̄мья хумус о̄лы ос са̄лыяныл хумус о̄ньщияныл, тыи уральтан ма̄гыс кӯщай нэ̄ тув ты ялыс. Савва са̄лыянэ «Э̄ти пурн тӯрт» о̄ньщиянэ. Па̄вылныл тув миннэ лё̄ӈхе ва̄тахкем ве̄рыста. Ма̄н кит «Бураныл» тув ялсӯв. Та сӯйт са̄лы тэ̄пыӈ ма̄ сака ёмас. Мо̄лты та̄лныл тот о̄ньщияныл. Ань тынакт туп хус са̄лы хультыс. То̄ват оясыт, то̄ват туи порсысыт ос са̄лы пурнэӯйн алыщлаве̄сыт. Ты ха̄йтнутыт та̄л сыс акв щёс хотты ма̄ныл тув ёхталэ̄гыт. Сака ощмарыӈыт, туйтыглахтым о̄лэ̄гыт. Ойттур э̄тпост акв ма̄нь ха̄йтнут во̄ркол по̄хат алыманыл юипа̄лт, ха̄йтнутыт э̄т палыт орвиньтасыт, ул ма̄нь утаныл киссаныл. Тӯяг ос ма̄колыӈо̄йкат ёхталэ̄гыт. Таима̄гыс са̄лы тэ̄пыӈ ма̄ мувлахил пусас ва̄рсыт, ань са̄лыт ат новавет. Тох са̄лыт уральтаӈкве кӯстыр, э̄л ат минэ̄гыт. Тув миннэ̄в порат тӯр ва̄тат нолвитын щалтсасӯв. Ворил ты «Буранув» но̄ххартыслӯв. Тувыл са̄лыт лё̄ӈханыл хосыт минасӯв, во̄р щахылт хо̄нтсанӯв. Та̄н э̄лмхо̄ласыл ат пилэ̄гыт. «Ня̄ньня̄нь» ла̄тӈыл во̄виянын, та ёхтыгпе̄гыт. Савва ла̄выс, ты хультум са̄лыт ёмщакв ханьщувласыт, э̄л ат минэ̄гыт. Ань ос са̄лыяныл э̄лаль са̄вмалтан ма̄гыс та̄н Саранпа̄выл совхозныл иӈ па̄сыгрищит ёвтуӈкве номсэ̄гыт. Са̄лы урнэ ва̄рмаляныл э̄лаль хумус мины, ма̄н мо̄т щёс ты урыл тах о̄с хансэ̄в. Ам ты мутраӈ ма̄ньщи ще̄мьян щунь паща ла̄тыӈ ке̄тэ̄гум. Са̄лыяныл э̄лаль вос са̄вме̄гыт. Йильпи та̄л та̄нанылн яныг со̄т вос тоты. Пус ка̄т, пус ла̄гыл вос о̄лэ̄гыт.

1067 2014.01.10. Валентина УЗЕЛЬ Валентина Хозумова

Омамн паща ла̄тыӈ те̄тэ̄гум. Белоярский ӯст акв А̄с ма̄ньщи нэ̄кве ёт хо̄нтхатыгласум. Тав наме Виктория Ивановна Жемчужникова, а̄ги о̄парищ наме Бешкильцева. Тав а̄нумн такви уре̄тыл тамле потыр потыртас: Ам Полноват па̄вылныл о̄лэ̄гум. Омам Варвара Тарасовна Бешкильцева, тав ань Полноват па̄вылт о̄лы. Са̄в та̄л ня̄врамыт школат ханищтас. Та̄гт па̄вылт омам каӈке о̄лыс, Леонид Тарасович Костин. Тав са̄в та̄л школа кӯщаиг рӯпитас. Таима̄гыс омам тув минас, мощ тот о̄лыс. Ётыл Восыӈтур па̄вылт, Полноват па̄выл школат рӯпитас. А̄тям саран хум о̄лыс, Иван Иванович Бешкильцев. Тав Ня̄хщамво̄ль е̄рныл тувыл хотыл о̄лыс. Ам амти ма̄ньщи ла̄тӈум щар ат ва̄глум. Омамн акваг ла̄ве̄гум, манрыг ма̄нав ма̄ньщи ла̄тӈыл потыртаӈкв ат ханищтастэ. Ам школа а̄стламум юипа̄лт А. И. Герцен нампа институтт ханищтахтасум, рущ ла̄тыӈ ос литература учителиг хусахтем та̄л Сорум нампа па̄выл школат рӯпитасум. О̄йкам хотталь щалтыс, амти а̄гмыл е̄мтсум. Тувыл тыг Белоярский ӯсн ёхтысум, тыг а̄гиягум ёт о̄лмыгтасум. Яныг а̄гим ань Ханты-Мансийск ӯст о̄лы, журналистыг ханищтахтас, ань ма̄нь ня̄враме ёт юн о̄лы. Мо̄т а̄гим иӈ ма̄нь. Ме̄нттеме̄н о̄лыме̄н, тыг о̄лмыгтамуме̄н, ань тит та̄лыг ты е̄мтыс. Тюмень ӯст квартира о̄с о̄ньще̄гум, «переселение» нампа программа щирыл майве̄сум. Тув минэ̄гум ман а̄ти, ат ва̄глум. Тыт о̄луӈкв а̄нумн сака мӯсты, ты ӯс сака ёмас, сака яныг а̄ти. Омам а̄тятэ, ам ащо̄йкам, Тарас Григорьевич Костин Ялпӯс па̄вылт о̄лыс. Ма̄н тав палтэ акваг ялантасӯв. Ты мӯтраӈ хо̄тпакве сампыльта̄лыг о̄лыс, па̄влувн ёхты, ам таве рӯтанув палт та ва̄нттылум. Варвара Тарасовна омам ань пенсияолн вим о̄лы. Тав палтэ ма̄хум акваг ёхталэ̄гыт, пе̄с ва̄рмалянув, пе̄с наканув урыл титыглахтэ̄гыт. Са̄в та̄л школат рӯпитаме ма̄гсыл тав «Ветеран труда» нам о̄ньщи. Ам ань газетав ловиньтан ма̄хумн тамле ла̄тыӈ ла̄ве̄гум. Ща̄нь ла̄тӈе ва̄нэ хо̄тпа, пе̄с ва̄рмалянув э̄лаль тотнэ хо̄тпат – на̄н ты ва̄рмалитыл янытлахтым о̄лэ̄н. На̄н ма̄н мирув о̄лупса, ла̄тӈув э̄лаль тотылы̄н. На̄н щар ма̄к со̄тыӈ хо̄тпаг ты о̄лэгы̄н. Ам амти ла̄тӈум ат ва̄глум, тыи ма̄гыс сымум сака ща̄рги. Ань ка̄сыӈ хо̄тпа ялпыӈ хо̄тал кастыл янытлылум. Омам газета та̄ра паща ла̄тӈыл те̄тылум. Пуссын пуста̄гыл о̄лэ̄н, То̄рум ёт, О̄тыр ёт.

1067 2014.01.10. Валентина УЗЕЛЬ

Ха̄льӯс ляпат о̄лнэ «Со̄рни сэ̄й» нампа ӯщлахтын ма̄. Ты хурит яныг таквс э̄тпост по̄слуве̄сыт. То̄нт Ха̄льӯст о̄лум конференциян са̄в ма̄хум ёхталасыт. "Со̄рни сэ̄й" нампа ӯщлахтын ма̄т та̄н ханты ос ма̄ньщи ма̄хумн ӯрве̄сыт. Валентина УЗЕЛЬ ва̄рум хурит

1067 2014.01.10. Людмила ТЕТКИНА

Урай ӯс по̄хат ма̄хум ӯщлахтэ̄гыт. Ань округув янытыл общинат манос са̄всыр мо̄т организацият этнотуризм щирыл рӯпитэ̄гыт. Та̄н та̄нки палтыланыл мӯй ма̄хум во̄ве̄гыт. Урай ӯст по̄хат о̄лнэ «Силава» этностойбищан туристыт мӯйлуӈкве о̄с ёхталэ̄гыт. Кӯщаиг тот Ольга Александровна Фомичёва рӯпиты. Ювле хультум та̄л таквсы порат са̄всыр некоммерческий организацият Ханты-Мансийск ӯсн акванатыглаве̄сыт, то̄нт та̄н ма̄гсыланыл выставкаярмарка ва̄рыглавес. Ты суссылтапн «Силава» нампа этностойбищат рӯпитан хо̄тпат о̄с ёхталасыт. Тот ма̄хум та̄нки рӯпатаныл урыл потыртасыт ос та̄нки па̄вланылн мир мӯйлуӈкве во̄всаныл. Анна Изюмова ты этностойбищат хосат та̄гыл рӯпиты. Тав ла̄вме щирыл, тамле ярмаркат о̄лнэ порат са̄в мир ёт ва̄йхатэ̄гыт ос мо̄т ма̄т ма̄хум хумус рӯпитэ̄гыт, сунсэ̄гыт о̄с ханищтахтэ̄гыт. Ольга Фомичёва такви яныгмам па̄влэ о̄лнэ ма̄т ӯщлахтын ма̄ ва̄руӈкве номылматас, «Силава» нампа община ва̄рыс. Тот ма̄ньщи па̄выл ӯнттысыт. О̄выл щёс ня̄врамыт тув ӯщлахтуӈкве 2008 та̄лт ёхталасыт. Та ӯщлахтын ма̄ «Юрсил» намыл намаясаныл. Та̄н ос мо̄т общинат хольт грантолн винэ ма̄гсыл культура департаментын та̄нки нэ̄паканыл ке̄тыглыяныл. Ювле хультум та̄лт Урай ӯс по̄хат 50 а̄гирищитпыгрищит кит сменагт ӯщлахтасыт. Этностойбищат рӯпитан ма̄хум тамле рӯпата ва̄рим, туп тэ̄лы порат олн сэ̄луӈкве ве̄рме̄гыт. Та̄н ня̄врамыт таквсы, тэ̄лы ос туи каникуланыл порат тув ӯщлахтуӈкве во̄виньта̄лыяныл. Ты коныпал Урай ӯст о̄лнэ мир тот хӯл алыщлэ̄гыт манос нас ӯщлахтэ̄гыт. Ма̄хум ма̄гсыл та̄н программа ва̄ре̄гыт, ма̄ньщи пе̄с йис о̄лупса урыл потыртэ̄гыт. Анна Изюмова ла̄выс: «Ты рӯпата ва̄руӈкве о̄с са̄в олн э̄ри, природный ресурс департаментын ма̄нки нэ̄паканув грантолн винэ ма̄гсыл о̄с ка̄сыӈ та̄л ке̄тыглыянӯв. Ос са̄всыр спонсорхо̄тпат кинсэ̄в. Ма̄н Урай ӯст о̄лнэ са̄всыр организацият ёт рӯпитэ̄в. Этностойбищан яныгпа̄ла хо̄тпат во̄виньта̄лыянӯв, та̄н ма̄гсыланыл ӯщлахтын хо̄талыт ва̄рыглэ̄в. Тувыл ма̄хум та̄нки самын патум хо̄таланыл ос мо̄т са̄всыр ялпыӈ хо̄талыт то̄т янытлаӈкве ве̄рме̄гыт. Ювле хультум та̄лт ма̄н «Силава»» этностойбищавт «Чумбардия» нампа фестиваль ва̄рыглавес. Россия янытыл ма̄хум тув ёхталасыт. Ты э̄лыпалт хӯрум та̄л сыс ка̄сыӈ туи э̄ргуӈкве ха̄снэ ма̄хум ма̄н палтув ёхталасыт, а̄ращ ва̄тат ӯнлахо̄лсыт ос э̄ргыт э̄ргысыт. 2013 та̄лт Урай ӯс миркол ма̄хум ма̄навн сака нё̄тсыт. Ань тамле фестиваль ма̄н ка̄сыӈ та̄л ва̄рыглаӈкве патэ̄в». Этностойбище «Силава» ань э̄рнэ рӯпата ва̄ри, та̄н хо̄нтаӈ ма̄ньщит пе̄с йис ва̄рмаляныл но̄хво̄рмалтэ̄гыт. Пе̄с нэ̄пакыт щирыл хо̄нтаӈ ма̄ньщит супаныл нэ̄квет ю̄нтуӈкве ханищтахтасыт. Хунь рӯпитаӈкве о̄вылтахтасыт, та̄нанылн яныгпа̄ла ма̄ньщи э̄ква Нина Демьяновна Тихонова нё̄тыс. Тав Кондинский районт о̄лнэ ма̄ньщит пе̄с йис о̄лупса ёмащакв ва̄гтэ. Йильпи та̄л янытлан хо̄тал кастыл Урай ӯст о̄лнэ мир «Силава» этностойбищат хӯл алыщлаӈкве, нас ӯщлахтуӈкве ёхталасыт. Ань та ӯс ляпат мо̄т ӯщлахтын ма̄ воссыг а̄тим, ӯст о̄лнэ мир тув ёхталаӈкве ка̄саще̄гыт.

1067 2014.01.10. Светлана РОМБАНДЕЕВА

Хōсыӈ урыл потыр. Хōсыӈ Та̄рак сӯйт ōлыс, щёлыӈ ōйка ōлыс. Та̄рак сӯйт колъёре ōлы. Аквматнакт на̄лув Хōрыӈпа̄вылн минуӈкве номылматас матыр тэ̄нут ма̄гыс. Тōнт мир са̄выӈпа̄лэ тэ̄лы па̄вылт ōлэ̄гыт. Та̄лматы, та мины, э̄кватэ колэ̄т хульты. Та мины, матрыг ёллю̄льсас, тувыл сунэ̄н ӯнтуӈкве е̄мталас, хӯрум сун йисыт, ёлтахамтасыт, та мувылматвес. Тōнт ё̄рн хōла сака са̄в ōлыс, хӯрум та̄н ōлсыт, ё̄рнрищит. Хӯрмит ут тав палтэ ме̄тхумыг рӯпитам ут, ōс ё̄рн, пувима, ты тотаве. Лапмувылматвес, ёлпуввес, китыглаӈкве патвес, хōт ōлы, са̄лыянэ хōт ōлэ̄гыт, та нуйгалаве. Ё̄рныт ке̄р ёсал ōлэ̄гыт, ке̄р товтыл ōлэ̄гыт. Акв утын ке̄р товтыл ю̄ныгтавес пальтытт, пальтытэ па̄лыгтōлматы, ке̄лпыл та сōсхаты. Тав нэ̄матыр ня̄лё̄вт ёт ат ōньщас. Тав палтэ ме̄тхумыг ōщнэ ё̄рн ōйкатэ̄н са̄лиг е̄мтапас, сунэ̄н вущкасаве, та нуясаптувес, таийыг та хультсыг. Ме̄тхум ва̄гтэ, хōт колэ ōлы, юв та нуйвес, ювкуратаптувес. Тувыл ё̄рн сунэ̄н та̄лматас, хотталь та тахас. Хōсыӈ хотловтвес, пуӈке пе̄рсалавес, пусмалтавес. Ня̄лыӈё̄втыӈыг е̄мтыс, ё̄рнанэ пуссын аласанэ. Тувыл тав сака тэ̄пъяп ōйка ōлыс, са̄в тэ̄нэ ōйка ōлыс. Ӯй матыр ка̄тынпатты, пе̄щ па̄йты, пуссын тэ̄гтэ. Сака та̄йпайп ōйка ōлыс. Ос матыр щёпыр ман хансаӈ алы, маныгтытэ, пе̄тытэ, па̄йты. Лов лэ̄ӈын нё̄выль па̄йты, пуссын тэ̄ганэ, та савит та тэ̄г. Янгуй те па̄тамты, тōвыль сунын та̄лттытэ, аквторыг харттытэ. Нё̄влянэ ювхартты, та маныр, ӯй нё̄выль па̄йты. Таяныт пе̄щ капай пуссын па̄йтытэ, аквторыг тэ̄гтэ. Тох ань тэ̄г, таима̄гыс та ё̄р. Пе̄с ма̄хум па̄лн совыл ква̄лыг сылталэ̄гыт, э̄лнаӈ янгуйт сованыл сака осыӈыт ōлсыт, ам ва̄санум. Хōсыӈ хунь ӯй пуссын та̄лттытэ, такте̄т харттытэ суныл, тōвыль суныл. Хасумты, ань ква̄лге супыгтōлматы, ла̄ви: «Ты маныр саюм пум». Та осыт ква̄лыг капай, эрттам саюм пум. Тамле Хōсыӈ таяныт ва̄гыл та ё̄р ōлыс. Па̄лн – янгуй (сōруп) сов тох ла̄ваве, тав осыӈ сов, ма̄хманув тамле осыӈ совыл ква̄лыг яктыгласыт.

1067 2014.01.10. Светлана РОМБАНДЕЕВА

Та̄нвaрп э̄ква. Та̄нвaрп э̄ква тай мо̄йт сака ат о̄ньщас, акв потыр о̄лыс тав уре̄т. Ло̄пмуст май йильпи тотнэ мaньнэт э̄ти та̄н ва̄руӈкве ат та̄ртавет, э̄ти ат ро̄ви та̄н ва̄руӈкве. Тувыл акв йильпи тотым мaньнэ, ущ тотым нэ̄, ат ве̄ритас, марщум ман мaныр, номылматас та̄н ва̄руӈкве. О̄ныпаге̄накияге̄н ат та̄ртаве кос, тав тувыл ат агтыс, номсы: нэ̄матыр ва̄руӈкве, сар та̄н ва̄ре̄гум. Та̄н ва̄руӈкве ӯнтыс. Аквматэ̄ртн ань маньнэ та̄н ва̄рим ӯнлыматэ, кон а̄мп та ня̄ӈхалтахтаме суйты, тав хотрохтуптахтас, ла̄ви: – Маныр хомле е̄мтапас? А̄ви хо̄яве, пӯнсыгтаве, юв ты рагаты – Та̄нвaрп э̄ква тав. Та̄нвaрп э̄ква тулё̄вланэ пуссын акв тармыл о̄лэ̄гыт, тамле ка̄таге та. Ань ма̄ньнэ та̄ра хот та рохтыс. Акватэ ань тав по̄хен ӯнтыс, ла̄ви: – Ты нэ̄кве, ты нэ̄кве, ва̄риме̄н та̄н, хотьютаме̄н та̄н са̄ртын а̄сты, таиме̄н та алавеме̄н, ювтэ̄гавеме̄н. Тувыл тав та рохтыс. А та мат ут ня̄р, ке̄лпыӈ а̄мп сыстaн молях тулё̄влын та пе̄ритэ, мо̄ляхыл та̄н та ва̄ри. Са̄ртын та̄нэ а̄стыгпас, нэ̄ та пувумтастэ. Та̄нвaрп э̄ква май па̄выл о̄вылт о̄лыс, ань о̄лы, тольхыӈ мат урам ло̄мтыт, Ӯс щахылт. Ла̄ве̄гыт, пе̄с порат Та̄нвaрп э̄ква ма̄колт о̄лыс Ӯс щахылт. Тав Та̄нвaрп э̄ква кит а̄гирищигпыгрищиг о̄ньщас. Нэ̄ тув та нуясаптыстэ, тотыстэ, такос ро̄ӈхыс ман тисгыс. Тувыл ма̄хманэ но̄хрохтэ̄гыт, ня̄хнэро̄хнэ суйты, торгамтасаныл маньнэ̄ныл а̄тим. То̄нт, пе̄с порат, ня̄йт ма̄хум о̄лсыт, ня̄йтсыт, молямтахтым ква̄лапе̄гыт, ань маньнэ̄ныл тӯлмантавес. Аман та̄нти ня̄йт ман хо̄т во̄всыт ня̄йт о̄йка. Пупыг ман матыр ке̄тсыт, маньнэ Та̄нварп э̄ква колэ̄т ёхтыгпавес. Алуӈкве ат а̄лымияныл, тувыл пупыгн хот та вуйвес. Юв тотвес, ань пилуптавес ман рохтыс, пе̄с ла̄внэ щирыл исанэ хотрагатасыт, хосапыл ат о̄лыс, мощ о̄лыс, сорумн та патыс. Ло̄пмус па̄выл по̄хат е̄ӈтаг тӯр во̄ӈха о̄лы, та тӯр ам о̄с ва̄глум. Та̄нвaрп э̄ква пупыгн та тӯрн харттувес, ве̄латавес ман щама алвес. Та тӯрщахыл тувле о̄лы, ве̄латаме юипа̄лт та ма̄ тӯрыг е̄мтыс. Ты потрыг – мо̄йтыг Николай Иванович Хозумов тав потырта̄лсагемо̄йтыгласаге, нэ̄пакын С. Ромбандееван хасвесы̄г.

1067 2014.01.10. Николай МЕРОВ

Нэ̄пак хаснэ хум янытлылӯв. Андрей Семёнович Тарханов, ловиньтан нэ̄пак хаснэ о̄йка, о̄выл нэ̄пак та̄ртме па̄сныл ань атпан та̄лэ то̄влыс. Ты кастыл са̄в мир таве янытлаӈкве ёхталасыт. Тав 1936 та̄л ма̄нь таквс э̄тпос 13 хо̄талэ̄т Хо̄нтаӈ ма̄т Аманья па̄вылт самын патыс. Ань та па̄выл а̄тим. Андрей Семенович 1956 та̄лт Ханты-Мансийск ӯс педучилище а̄стлас. Ос кина по̄слын хо̄тпаг ханищтахтуӈкве минас, тувыл А. М. Горький нампа литература институтт ос Санкт-Петербургыт о̄лнэ А. И. Герцен нампа институтт ханищтахтас. Та юипа̄лт Юмас па̄выл школат ня̄врамыт акв та̄л ханищтас. Тыгыл э̄лаль Ханты-Мансийск ӯст газетат, телевиденият ос творчество колт матахмат та̄л рӯпитас. Тав Угро-Ямал нэ̄пак хаснэ ма̄хум организациянылт кӯщаиг са̄т та̄л о̄лыс. Ётыл ты «Союз писателей России» организация Ханты-Мансийск ӯс нупыл хасвес. Андрей Семёнович «Почётный житель города Ханты-Мансийска» нам о̄ньщи. 1997 та̄л «Дружбы народов» нампа ма̄гылн тагатан по̄сыл майвес. Ань тав финноугор мирыт нэ̄пак хаснэ хо̄тпат Ассоциацият кӯщай ва̄ӈын хумыг о̄лы. О̄йка стиханэ рущ ла̄тӈыл хансыянэ. 1958 та̄лт «Ленинская правда» газетат «Утро» щар о̄выл стихотворениятэ хасвес. Тувыл «Первая завязь» нэ̄паке та̄ртвес. Ётылнув «Снежная симфония» нампа нэ̄пак хансыс. Тыи ма̄гыс тав «Лауреат премии губернатора автономного округа в области литературы» намыл майвес. «Исповедь язычника» нэ̄паке ма̄гыс ос «Лауреат Всероссийской литературной премии А. Т. Твардовского» нам о̄ньщи. Тав ань ты хо̄тал мус ловиньтан нэ̄пак са̄в хансыс, пуссын ма̄вит урыл хансым о̄лэ̄гыт. Тав хансум нэ̄паканэ ловиньтаӈкве кӯпнит ос сака пӯмащ. Ма̄н ты о̄йка юбилейхо̄талыл сымыӈыщ янытлылӯв.

1067 2014.01.10. Людмила ТЕТКИНА

Хум ня̄врамыт ё̄раныл а̄рталасыт. Ка̄сыӈ та̄л ва̄т са̄грапнал саквалан э̄тпост Хулюмсунт школат ханищтахтын ня̄врамыт халт ФОК колт футболыл ёнгын касылыт ва̄рыглавет. Ты касыланыл «Кожаный мяч» намыл намаим о̄лы. Акв са̄т сыс 1-11 класс пыгрищит халанылт ёнге̄гыт, ё̄раныл а̄рталэ̄гыт ос но̄хпатнэ классыт мӯйлупсал мивет. Садикн юио̄выл та̄л ялантан пыгрищит о̄с ка̄сыӈ та̄л о̄выл классыт ханищтахтын пыгрищит ёт ё̄раныл а̄рталаӈкв ёхталэ̄гыт. Пӯмащ сунсуӈкв, хунь щар ма̄нь утквет ёнге̄гыт. То̄ва порат та̄нки воротанылн мечик са̄ӈхасаӈкв ве̄рме̄гыт, то̄ва та̄л садик но̄хпаты. Ты та̄л о̄выл класс но̄хпатсыт. 2-4 классыт халт 4 класс но̄хпатыс. 5-8 классыт халт 7 классыт ханищтахтын пыгрищит юртаныл ёлымтасаныл. 9-11 классыт халт 9 класс но̄хпатыс. 9 классыт ханищтахтын пыгрищит ты та̄л атынтыг но̄хпатыс. Футбол (ёныг) – хум ма̄хум та̄н ёнгиланыл. Ня̄врамыт ёнгын э̄лыпа̄лт ЛПУ организацият рӯпитан ма̄хум халанылт кассыт, газокомпрессорный служба ма̄хум но̄хпатсыт. Футбол тренерыг Д. Ю. Омельченко о̄лы. Ня̄врамыт тав палтылэ ялантаӈкв ка̄саще̄гыт, ханищтан хумияныл э̄руптыяныл. Яныг ма̄хум о̄с ка̄сыӈ хо̄тал ӣтипа̄лаг рӯпатаныл юипа̄лт спортзалт поргантэ̄гыт. Хо̄ӈха спорт нупыл ка̄сащи, лувесаме та̄ксарыг яныгми, пусыг о̄лы. Пусыг ке о̄лы – ё̄рыг о̄лы.

1067 2014.01.10. Анна АЛГАДЬЕВА

Ня̄врамыт мӯйлуӈкв ялсыт. Таквсы па̄сныл Хулюмсунтыӈ ня̄врамыт Ня̄хщамво̄льн ялнэ номт о̄щсыт. Тот о̄лнэ ня̄врамыт ёт рӯмалахтаӈкв, ва̄нэ хо̄тпат ёт потрамаӈкв, пе̄с о̄лум ва̄рмалит ханищтаӈкв. Ты кастыл ня̄врамыт ханищтан хо̄тпаныл ёт са̄ртын та̄гыл докладыт, мастерклассыт, йӣквтан щё̄питыгласыт. О̄влэ̄т янгема̄не̄тыл 15 хо̄тпа ялуӈкв куссыт. Тувыл Ха̄льӯс па̄лыл ла̄тыӈ ёхтыс, туп нёлолов хо̄тпа вос мины. Т. А. Головина биология, химия ос наука рӯпата ханищтан нэ̄ тав ялыс, са̄т ханищтахтын а̄ги ёт тотыглас. Татьяна Андреевна яласам лё̄ӈхе урыл тох потыртас: – Юио̄выл хо̄тал мус я̄ссаг ат ва̄слӯв, минэ̄в ман а̄ти. Хунь ла̄ввесӯв, ущ та ща̄гтсӯв, хӯнтанув щё̄питапсанӯв, та а̄стапасӯв. Миннэ нупыл патсӯв, щё̄сохса ат минасӯв, Ня̄хщамво̄льн та исапасӯв. Ёхтысӯв, та̄ра школан тотвесӯв, ёмщакв тыттувесӯв, ханищтан хо̄тпат ос ня̄врамыт ёт потрамасӯв. Ма̄н ма̄нки школав урыл потыртасӯв, хумыс тыт ханищтахтэ̄в, каникуланув хумыс минэ̄гыт, хумыс йильпи щирыл ханищтаве̄в. Школа янытыл ё̄мыгтасӯв, па̄выл сунсыслӯв. Во̄раян лус хумыс ю̄нтаве, манах ще̄п о̄ньщи, са̄грап тагатан колятэ хоталь со̄лтаве, суссылтавесӯв. Тувыл пыгрищит кассыт: Гаврил Ануфриев са̄т ме̄тра арыг палытын порыгмас, атпан нупыл кит щёс сун ӯлтта Сергей Новенченко порыгмас. Ты юипа̄лт Наталья Константиновна Тасманова ма̄ньщи пормасыт суссылтан выставка ва̄рыглас. Елизавета Ильинична Монина хумыс кот хаслыл тытылтаве, тынтлаве, манарыл ётылтаве, суссылтас. Новтхатнэ па̄ртэ ос новтупе 100 та̄лэ̄н то̄влыс. Ӣтипа̄лаг Ольга Саввична Самбиндалова, са̄лыӈколыӈ а̄ги, ёт ва̄щинтахтасӯв, тав ма̄нав ма̄ньщи суп йинуӈкв ханищтастэ. Ня̄хщамво̄ль ма̄нь па̄выл, яласан ма̄хмыт ма̄гыс арыг о̄лнэ кол а̄тим. Кит а̄гиягӯв щаще̄кватэ̄н палт минасы̄г, ма̄н ос пуссын Н. К. Тасманова палт минасӯв. Наталья Константиновна колэ яныг, йильпи, тэ̄нккетэ̄н а̄гитэ̄нтыл о̄лэ̄г. Колыӈ нэ̄ хо̄тпа нупыл ёмас, ёмщакв кощтитавесӯв, йӣквуӈкв ханищтавесӯв, «Пил ва̄тнэ а̄гит» йӣквтан хумыс йӣкваве, суссылтавесӯв. Ма̄нки китыт хо̄тал ущ ма̄нкина̄в суссылтаслӯв, докладанув потыртасанӯв. Ювле миннэ порав молях та ёхтыгпас, та̄лматсӯв, юн хо̄ясӯв. Ма̄нав ханищтан ос матыра̄ти хӯлтыглан хо̄тпатн пӯмащипа ла̄ве̄в. Ялум лё̄ӈхув ма̄гыс яныг пӯмащипа ла̄тыӈ па̄влыӈ кӯщай нэ̄вн О. В. Баранован, директор нэ̄вн Г. В. Третьякован ла̄ве̄в. Ня̄хщамво̄лиӈ школа директор нэ̄н Т. А. Сагандукован ос тот ма̄н ётув о̄лум, нё̄тум, ханищтам хо̄тпанувн о̄с яныг пӯмащипа ла̄ве̄в. Тох ты Хулюмсунтыӈ ня̄врамыт Ня̄хщамво̄льн ялсыт, тот о̄лнэ ма̄хум хумыс о̄лэ̄гыт, суссыт. Анна АЛГАДЬЕВА: 1. А̄гит йӣкве̄гыт. 2. Вика Боженко кот ётылтаӈкв ханищтахты. 3. Ня̄хщамво̄лиӈ ма̄хум хумыс о̄лэ̄гыт, тот хансым о̄лы.

1068 2014.01.24. Александр ВЬЮТКИН

Ля̄ххал тотнэ ма̄хум янытлаве̄сыт. Та̄л котиль э̄тпос хӯрумхойплов хо̄талт Россия янытыл журналистыг рӯпитан ма̄хум янытлан хо̄тал о̄лыс. Ты та̄л та̄н хӯрумса̄т аквхойпловитыг янытлаве̄сыт. Пе̄с порат, «Пётр I» хо̄н хумыг хунь о̄лыс, ты нампа хо̄тал щар о̄выл щёс янытлавес. Щар о̄выл нэ̄пак 1703 та̄лт нэ̄глыс. Та порат та̄ратам нэ̄пак «Ведомости» нэ̄пакыг ла̄ввес. Хо̄н хумув Пётр I такви тот рӯпитас. Такви номтанэ, о̄лыглан ля̄ххалыт тув хансыгласанэ. Аквъёт пуссын налыман нупыл онтолов нэ̄пак та̄ратавес. Ань рущ ла̄тӈыл ты хо̄тал «День российской печати» ла̄ваве. Ты та̄л округув янытыл телевизор хосыт потыртан, газетатт рӯпитан журналистыт халт са̄всыр нампа касыл ва̄рыглым о̄лыс. Щар ма̄к ёмащакв щё̄питым рӯпатаныл мирн пе̄рияве̄сыт. Но̄хпатум ма̄хум пуссын Ханты-Мансийск ӯсн во̄виньтӑлве̄сыт. Та̄наныл янытлан ос мӯйлупсал мӯйлуптан ма̄гсыл округ губернаторув Н. Комарова тув ёхталас. Щар о̄влэ̄т халанувт но̄хпатум журналистыт Диплом ос пӯмащипа ла̄тӈыӈ нэ̄пакыл мӯйлуптаве̄сыт. Та коныпал та̄н иӈ э̄рнэ ос тыныӈ ищхӣпыӈ пормасыл майве̄сыт. Э̄типа̄лаг ля̄ххал тотнэ ма̄хум мӑгсыл пасаныт щё̄питым о̄лсыт. То̄ват тот о̄с са̄всыр мӯйлупсал мӯйлуптаве̄сыт. Ма̄хум халанылт иӈ хоса потрамасыт ос ла̄ккваминуӈкве ат молямласыт.

1068 2014.01.24. Тамара МЕРОВА

Но̄хпатум хо̄тпат наманыл ла̄вве̄сыт. «Аргументы и факты» газета 35 та̄лэ то̄влынэ̄тэ кастыл ос «АиФ-Югра» газета ат та̄л та̄ратан кастыл тот рӯпитан ма̄хум округув янытыл «Герои времени» касыл ва̄рыгласыт. Ты касылт лов са̄всыр тэ̄лат щё̄питалве̄сыт ос та̄н халанылт кит касылыг ня̄врамыт ма̄гыс о̄лсы̄г. Округт о̄лнэ ма̄хум ищхӣпыӈ ут хосыт ка̄сыӈ номинациятэ̄т хотты хо̄тпа пе̄рияӈкве ве̄рмысыт. А̄ти сака хосат тот но̄хпатум хо̄тпат наманыл ла̄вве̄сыт. «За вклад в развитие Югры» касылт Александр Филипенко но̄хпатыс. Тав атхуйплов та̄л округт кӯщаиг о̄лме сыс са̄в ёмас тэ̄ла ва̄рыс, са̄в ма̄хум таве сымыӈ ла̄тӈыл номияныл. «Человек и гражданин» касылт Еремей Айпин пе̄риявес. Тав соссаӈ ма̄хум о̄лупсаныл ӯргалан ос та̄н о̄вылтанылт потрыт хаснэ о̄йкаг ла̄ввес. «Просвещение» номинацият Геннадий Райшев ка̄тыл хурит по̄слын о̄йка но̄хпатыс. Тав по̄слум хуриянэ са̄всыр ма̄тт суссылтавет, матахмат хурит Москва ӯст Третьяковский галереят о̄лэ̄гыт. Руслан Проводников, чемпионыг о̄лнэ боксёр, «За волю к победе» щар ё̄р хо̄тпаг пе̄риявес. Пыг ма̄ньта̄гыл боксыт алхатуӈкве ханищтахтас. 22 та̄лэ то̄влуме порат Американ минас, тот о̄с э̄лаль ханищтавес. Мо̄лты та̄лт та хо̄н ма̄т о̄лнэ хум Майк Альварадо ёт алхатсы̄г, тот Руслан но̄хпатыс. Владимир Васкевич «Герой нашего времени» номинацият воритотнэ хо̄тпаг ла̄ввес. Тав нилыт та̄лэ то̄влуме порат сампыльта̄лыг е̄мтыс. Ос ётыл хум сампыльта̄лыг о̄лнэ ма̄хум ма̄гыс «Деловой город» нампа программа щё̄питас. Тот сыресыр ханищтапыт ва̄рыгла̄лы, ты коныпал тав «гоуболу» нампа ёнгилт (ты суй ва̄рнэ ме̄чикыл ёныг) «Мастер спорта» нам о̄ньщи. «Помощь без границ» номинацият но̄хпатум хо̄тпаг Анна Кондратович ла̄ввес. Тав кӯщай та̄л хультум катит ос кӯтьвыт, а̄мпыт ма̄гыс матыр нё̄тмил тоты. Ты коныпал «Гордость Югры» нампа премия о̄с ва̄рыглавес. Тот «Преодоленияг» намтым номинацият 2 со̄тыра 174 хо̄тпатн Людмила Ставцева пе̄риявес. Тав ДЦП та̄рвит а̄гм о̄ньщи. Ос а̄ги хурит по̄слуӈкве сака ха̄сы, Радужный ӯст тав по̄слум хуриянэ суссылтаве̄сыт. Сергей Кушкин ма̄гыс 1 со̄тыра 946 хо̄тпа пе̄риясыт. Ты хум Нижневартовскат о̄лы, массажистыг рӯпиты. Афганистаныт лӯсытас, сапёрыг о̄лыс. Тот сакватавес, инвалидыг е̄мтыс. Ос юв ёхтуме порат ле̄ккарыг ханищтахтас, ань а̄гмыӈмосыӈ ня̄врамыт пусмалты. «Кавалер ордена Красной звезды» по̄с о̄ньщи. Юрий Новьюхов, Тэ̄к па̄вылт о̄лнэ ханты хум, ма̄гыс 681 хо̄тпа пе̄рияс. Тав тот хӯл алыщлым ос во̄раим о̄лы. Онтолов та̄лэ̄т ла̄глаге а̄гмыӈыг е̄мтсы̄г, ё̄мыгтаӈкве воссыг ат ве̄рмыс. О̄йка акваг матыр ва̄ри, такви кит тракторыг ёмащакв щё̄питасаге, са̄всыр ма̄шинат о̄с ёмащакв щё̄питыянэ, баяныл э̄рыгсовыт ёнги, шахматыл ёнгуӈкве ха̄сы. Во̄рт пилыӈ ма̄т пуссын ва̄ганэ. Ань пуссын ты хо̄тпат мӯйлупсал майве̄сыт, ма̄н та̄наныл о̄с янытлыянӯв. Пуста̄гыл вос о̄лэ̄гыт. Ля̄ххал ма̄ньщи ла̄тӈыг Т. Мерован хасвес

1068 2014.01.24. Светлана РОМБАНДЕЕВА

Соссаӈ ма̄хманув янытлавет. Ка̄сыӈ та̄л лӯпта э̄тпост Ханты-Мансийск ӯст соссаӈ ма̄хманув янытлаӈкве патавет. Ань ювле хультум та̄лт май округт о̄лнэ общественный связь департаментыт рӯпитан ма̄хум соссаӈ ма̄хманув ма̄гыс Юван Николаевич Шесталов нампа премия ва̄рсыт. Ханты ос ма̄ньщи ма̄хум халт хотты хо̄тпа матыр ёмас тэ̄ла ва̄ри те, нэ̄пак хансы манос мире ма̄гыс яныг парыс тоты, та хо̄тпа тамле премиял миве. Ка̄сыӈ та̄л акв организация ос кит хо̄тпа янытлаӈкве патавет (организация 200 со̄тыра солко̄вил миве ос кит хо̄тпагныл ка̄сыӈ 75 со̄тыра солко̄вил миве). Ань та департаментыл ма̄ньщи газетавн ла̄тыӈ ёхтыс, ма̄н, ля̄ххал тотнэ ма̄хум, ты урыл вос хансэ̄в, радио ос телевидение хосыт вос потыртэ̄в. Ю. Н. Шесталов нампа премия виӈкв ка̄сащан ма̄хум департаментын ла̄тыӈ вос ке̄тэ̄гыт, ма̄ньполь э̄тпос о̄выл хо̄талэ мус тув хансуӈкве ро̄ви. Но̄хпатнэ ма̄хум лӯпта э̄тпост тах наманыл ла̄вавет ос янытлавет. Ювле хультум та̄лт Ха̄льӯс район Саранпа̄вылт о̄лнэ «Са̄лы лё̄ӈх» э̄ргын ос йӣквнэ ансамбль ос кит нэ̄г – Нина Васильевна Шабаршина ос Светлана Селивёрстовна Динисламова та̄н но̄хпатсыт. Нина Васильевна ханты нэ̄, Ванзеват па̄выл библиотекат рӯпиты. Светлана Селивёрстовна ос ма̄ньщи нэ̄, Ханты-Мансийск ӯст Югорский университетт ма̄ньлат ма̄хум ханищтан нэ̄г о̄лы. Ты ма̄хманув пуссын Ханты–Мансийск ӯсн во̄ввесыт, округ губернаторувн янытлаве̄сыт, олныл ос хорамыӈ лӯптатыл майве̄сыт. Я̄тил тыныӈ ма̄ньщи ма̄хум, хотьют ка̄сащи те тот участие принимайтаӈкве, департаментын звонитэ̄н, телефон интернет хосыт хо̄нтэлы̄н: www. admhmao. ru. Ты ля̄ххал ма̄ньщи ла̄тӈыг С. Хозумован толмащлавес.

1068 2014.01.24. Тамара МЕРОВА Тамара ХАТАНЕВА

Ёмщакв рӯпитасӯв, э̄рнэ са̄кконыт пирмайтасӯв. Та хультум та̄л оигпаме э̄лыпа̄лт ля̄ххал тотнэ хо̄тпат Борис Хохряков, округ Дума кӯщай, ёт акванхо̄нтхатыгласыт ос таве са̄всыр ва̄рмалит о̄вылтыт китыгласаныл. Округ депутатыт рӯпатаныл хумус ва̄рсаныл, ма̄хум хумус о̄лэ̄гыт, ты о̄вылтыт Борис Сергеевич ювле потыртас: «2013 та̄л сыс ма̄н округ Дума депутатыт ёт лов сапра̄нин акванатхатыгласӯв ос аквъёт 130 са̄кконыт манос тув матыр хӯлтыглан ла̄тӈыт хассӯв ос пирмайтасӯв. Ты коныпал 400 са̄вит са̄всыр постановлениенэ̄пак щё̄питасӯв. О̄влэ̄т ма̄н бюджет пирмайтан са̄ккон щар э̄рнэ̄г ловиньтылӯв. Ма̄н та̄л сыс та бюджетнэ̄пак ёт акваг э̄лаль рӯпитэ̄в. Мо̄лты та̄л яныгпо̄ль э̄тпост, тувыл яныг таквс э̄тпост бюджет олныт ма̄н са̄вмалтасанӯв. Ты кастыл рӯпитан ма̄хум э̄рнэ торыг олныл ойтыгла̄лсанӯв, а̄ртна ат о̄щсӯв. Тувыл ӯсыӈ ос районный мирколыт о̄лнэ колыт ӯнттын ма̄гыс пуссын олныл та̄стыглаве̄сыт. Юио̄выл сапра̄нин атхатыгламув порат 2014-2016 та̄лыт кастыл округ бюджетув э̄рнэ̄г э̄лаль пирмайтаслӯв. Округув щёлыӈыг э̄лаль о̄лнэ ма̄гыс, ма̄хманув ёмщакв вос пусмалтаве̄сыт, ня̄врамыт номтыӈыг вос ханищтахтасыт, ка̄сыӈ ня̄врам садикн вос ялантас, ёмас лё̄ӈх хосыт мо̄т ма̄н машинал яласаӈкве ма̄хум та̄нки вос ве̄рмысыт – пуссын ты тэ̄лат кастыл са̄всыр программат щё̄питым о̄лэ̄гыт. Ос та̄наныл тэ̄лаг ва̄рнэ̄в ма̄гыс бюджетныл олныл та̄стыянӯв». Ань Югра, Ямал ос Тюменский область хӯрум Дума та̄нки халанылт акваннё̄тхатнэ урыл нэ̄пак о̄ньще̄гыт, рущ щирыл тав «соглашение о сотрудничестве» ла̄ваве. Ты нэ̄пак щирыл та̄н я̄нас о̄лэ̄гыт ос рӯпитэ̄гыт, я̄нас бюджет олныл мивет ос туп ва̄рнэ тэ̄ланылт акваннё̄тхатэ̄гыт. Тувыл Борис Хохряков Юграт о̄лыглам та̄рвит ва̄рмалит урыл китыглавес. Тав ла̄внэ̄тэ щирыл, округт са̄в ма̄хум янгыщ ёмас о̄лнэ кол кинсэ̄гыт. Ты ва̄рмалит ёт округ Правительство кӯщаит ос депутатыт о̄с са̄в рӯпитэ̄гыт. Колыт ӯнттын программат акваг уральтым о̄ньщияныл. Тот яныг ще̄мьят, са̄всыр льготат о̄щнэ ма̄хум, колыт ӯнттын ма̄гыс та̄нки олн ойтум ос ётыл урккуптым хо̄тпат (дольщикыт) ань я̄нас са̄ккон щирыл ӯргалавет. 2014 та̄л кастыл жилищный программан о̄с йильпи ла̄тыӈ хасвес. Тот округт самын патум ос тыт акваг о̄лнэ хо̄тпат льготал мивет манос субсидияолныл нё̄туӈкве патавет. Тувыл лӯима̄т атхуйплов та̄л тыт о̄лнэ ос рӯпитан хо̄тпат аквтох тув ловиньтавет тах. Тамле ва̄рмалит ань таима̄гыс э̄ре̄гыт, ань юио̄выл та̄лытыт хо̄н ма̄ныл тыг сака са̄в ма̄хум ёхтуӈкве патсыт. Та̄н молях рӯпата ос о̄лнэ кол хо̄нтыгпе̄гыт. Ма̄нки ма̄хманув са̄в та̄л йильпи кол ӯрим манос пе̄с коланылт о̄лыманыл насска̄сыг ул вос саваласыт, та̄нанылн хотмус нё̄туӈкве э̄ри. Мо̄т мирыт ма̄н ма̄хманув ёт халанылт ул вос халмалтахтасыт, та̄нанылн федеральный са̄кконыт ва̄ӈкве э̄ри. Ма̄н ма̄хманув та̄н ётаныл юртыӈыщ о̄с вос о̄лэ̄гыт. Рӯпата тэ̄лат о̄вылтыт Борис Сергеевич таи ла̄выс, ма̄н округув ма̄гыс ма̄во̄й но̄хвинэ ма̄хум, энергетикыт, коммунальный хозяйстват рӯпитан хо̄тпат мӯсхал щирыл ханищтаӈкве э̄ре̄гыт. Тувыл Владимир Путин са̄в ма̄н депутатыт нупыл тамле ла̄тыӈ ке̄тыс, моще̄ртын о̄выл щёс школан миннэ ня̄врамыт миллион са̄витыг е̄мтэ̄гыт. Ты кастыл номсахтэ̄н, ань садикыг ӯнттын колыт ат э̄рмыгланэ̄ныл порат, та̄н ётыл школаколыг вос ва̄равет. Ты ва̄рмалитыл ма̄н, ва̄им, номсахтэ̄в, округувт са̄в ня̄врам самын патнэ̄ныл коныпал мо̄т ма̄ныл са̄в ще̄мья тыг о̄луӈкве ёхтэ̄гыт. Округт о̄лнэ ма̄хум депутатанув палт та̄нки та̄рвит тэ̄ланыл ёт о̄с ёхталэ̄гыт, потыртэ̄гыт. Тувыл са̄в ма̄хум тэ̄ланыл ёмщакв ва̄рнэ ма̄гыс олныл нё̄тавет, пусмалтахтуӈкве ке̄тыглавет, колыл миӈкве нё̄тавет.

1068 2014.01.24. Александр ВЬЮТКИН

Та̄л котиль э̄тпос 25 хо̄талэ – студентыт янытлан хо̄тал. Ты хурит Хулюмсунт па̄вылт о̄лнэ ма̄ньщи пыг по̄слым о̄лы, тав наме Кирилл Алгадьев. Кирилл ань Ханты-Мансийск ӯст технологопедагогический колледжит электрикыг ханищтахты. Тыи ос ма̄ньщи супыл масхатым ма̄ньщи ма̄ньлат пыг наме Иван Гындыбин. Тав колта̄гыл рӯтанэ ос Ха̄льӯс районт Саранпа̄вылт о̄лэ̄гыт. Ваня ань Ханты-Мансийск ӯст о̄с та колт о̄выл та̄л ханищтахты. Ты хурит Тэ̄к па̄вылт о̄лнэ ма̄ньщи пыг по̄слым о̄лы, тав наме Антон Нахрачёв. Мо̄лты та̄л ня̄врамыт ханищтахтын кол а̄стламе юипа̄лт та̄ра Ханты-Мансийск ӯсн ханищтахтуӈкве минас. Ань тав ма̄шинат щё̄питан ос яласан хумыг ханищтахты. Ёлы хурит по̄слым ма̄ньщи пыг наме Максим Анямов. Тав Хулюмсунт па̄вылныл о̄лы. Ань технологопедагогический колледж колт о̄выл та̄л ханищтахты. Та э̄лыпа̄лт Максим Искусство центр школат о̄лым ханищтахтас. Хоты ма̄ныл, хоты витныл о̄лнэ ма̄ньлат ма̄ньщи пыганув са̄в ёмас ла̄тӈыл те̄тыянӯв. Ёмащакв вос ханищтахтэ̄гыт, пе̄с йис о̄лупса вос ва̄ганыл. На̄й-О̄тыранылн вос ӯргалавет, То̄рум ёт, О̄тыр ёт. Александр ВЬЮТКИН ва̄рум хурит

1068 2014.01.24. Людмила ТЕТКИНА

«Кантык-Ях» рӯпататэ урыл. Ка̄сыӈ та̄л Сургутский районт во̄рт о̄лнэ соссаӈ ма̄хум акв яныг сапра̄нин Русскинская па̄вылт акванатыглавет. Тамле сапра̄нит та̄н кӯщаитн та̄нки та̄рвитыӈ ва̄рмаляныл урыл потыртэ̄гыт. Ос акв та порат ка̄ркамыг рӯпитан во̄раян хо̄тпат тот янытлавет ос благодарственный пищмал манос мо̄т янытлан нэ̄пакыл мивет. Игорь Владимирович Когончин, «Кантык-Ях» нампа предприятие кӯщай, тамле сапра̄нин о̄с ёхталы, тав палтэ та̄л сыс ка̄ркамыг рӯпитан хо̄тпат тот такви янытлыянэ. «Кантык-Ях» нампа общинат 50 арыгкем э̄лумхо̄лас рӯпиты. Та̄н халанылт 29 ханты хо̄тпа, та̄н во̄рае̄гыт ос пил ва̄тым, ла̄хыс атым олн сэ̄лэ̄гыт. Пуссын Сургутский район Угут па̄выл ляпат о̄лэ̄гыт. 2005 та̄л па̄сныл «Кантык-Ях» община «Яун-Ях» нампа община ёт акваннё̄тхатым рӯпитэ̄г. Ты кит предприятияг Владимир Семёнович Когончин тав ва̄рсаге. Ань пыге Игорь Владимирович Когончин «Кантык-Ях» кӯщаиг о̄лы. Та̄н ань хумус рӯпитэ̄гыт, манхурип та̄рвитыӈ ва̄рмаль о̄ньще̄гыт, Игорь Владимирович ма̄ньщи газетав ма̄гсыл тох потыртас: – Угут па̄выл по̄хат во̄рт о̄лнэ ханты ще̄мьят са̄выӈпа̄лэ пуссын ма̄н палтув рӯпитэ̄гыт. Русскинская па̄выл ляпат о̄лнэ ма̄хманув ма̄н ётув рӯпитаӈкве сака ат ка̄саще̄гыт. То̄ва порат ёхталэ̄гыт, китыглахтэ̄гыт, тувыл сысы та минэ̄гыт. Ам такос потыртэ̄гум, ма̄н нупылув ловиньтахтуӈкв ке патэ̄гыт, та̄нки о̄лнэ ма̄нанылт э̄лаль о̄луӈкве патэ̄гыт, туп договорнэ̄пак хосыт ма̄навн во̄руй совыт ос пил, ла̄хыс, па̄квсам миӈкве патэ̄гыт. Ма̄н ка̄сыӈ э̄тпос зарплатаолныл тах ойтыянӯв, ты коныпал ос мо̄т са̄всыр льготал ва̄риянӯв. Са̄ккон щирыл охотникыг рӯпитан хум 50 та̄лэ то̄влынэ̄тэ порат пенсиян минуӈкве ве̄рми. Ань во̄рт о̄лнэ са̄в хантыт та̄нки во̄рае̄гыт, ка̄тынпаттум ӯяныл э̄лаль та̄нки тыналыяныл. Тувыл ма̄хманув ат номсахтэ̄гыт, пенсиян хунь патхатэ̄гыт, ёмас пенсияолныл ойтуӈкве ат патавет. Ма̄н акв та̄л сыс во̄руй сов, пил, ла̄хыс ос па̄квсам 6 миллион арыгкем солко̄ви са̄вит тыналасӯв. Ты олнытыл ма̄н хӯрум арыгкем миллион солко̄ви зарплатаолн ма̄хумн ойтсӯв. Хультум олныт ма̄н мо̄т тэ̄ла ма̄гсыл тах холтыянӯв. Мо̄лты та̄л ма̄н Русскинская па̄вылт ла̄пка ма̄гсыл кол ёвтсӯв, тувыл Таурова, Тайлаково ос Каюково па̄влытт во̄р тэ̄нут пирмайтын приёмный пунктыт о̄с ёмащакв щё̄питасанӯв. Ты коныпал са̄всыр техника ёвтэ̄в. Акв хотты та̄лт са̄в пил тэ̄лыс, ты хосыт са̄внув олн сэ̄лсӯв. Сэ̄лым олныл ос на̄иӈха̄п ёвтсӯв. Тӯя, тэ̄лы ос таквсы порат ты ма̄нь па̄влытн колас, са̄ккар ос мо̄т тэ̄нут тотэ̄в. Ма̄навн Русскинская ос Угут па̄влыг мирколыг о̄с ёмащакв нё̄тэ̄г, тыи ма̄гсыл ма̄н яныг пӯмащипа ла̄тыӈ та̄нанылн ла̄ве̄в. Ань акваг са̄кконыт мо̄т щирыл хансавет, пирмайтавет. «Лесной кодекс» нампа са̄ккон то̄ва ла̄тӈанэ ань мо̄т щирыл хасве̄сыт. Тот тамле йильпи ла̄тыӈ хасвес, та общинат манос мо̄т предприятият во̄рт пил ва̄туӈкве ке ка̄саще̄гыт, пилыӈ ма̄ло̄мт аукцион щирыл та̄нки нупыланыл хансуӈкве ве̄рме̄гыт. Тувыл та ма̄ло̄мт ма̄гсыл арендаолн ойтуӈкв ос хӯрум э̄тпос сыс отчётнэ̄пак кӯщаитн ке̄туӈкве э̄ри. Ам ты ля̄ххал о̄с хӯлыслум, Угутский лесничестван ялсум, ты тэ̄ла урыл ёмащакв китыглахтасум. Аренда ма̄гсыл са̄в олн ойтуӈкве ат кос э̄ри, ос таса̄вит нэ̄пакыт э̄рмыглэ̄гыт, та̄наныл атнэ нупыл са̄в ё̄р тах мины. Тувыл акв та̄л са̄в пил тэ̄лы, мо̄т та̄лт пил щар а̄тим, арендаолн ка̄сыӈ та̄л ойтуӈкве э̄ри. Ань общинат манос са̄всыр мо̄т предприятият пиланыл, во̄руй сованыл ма̄гсыл субсидияолн виӈкве ке ка̄саще̄гыт, тамле ма̄ло̄мт арендан виӈкве ла̄вавет. Ат ке выгыт, ты олннё̄тмилыл миӈкве ат патавет. Сургутский районт соссаӈ ма̄хманув пуссын пе̄с йис щирыл о̄лэ̄гыт. О̄лнэ ма̄наныл та̄нки нупыланыл хассаныл. Ос та̄н ляпанылт са̄в компаният ма̄во̄й но̄хвуим рӯпитэ̄гыт. Ма̄н о̄лнэ ма̄вт мо̄т та̄рвит о̄лы пил ва̄тнэ ма̄ тыт сака мощща. Ань йильпи са̄ккон ма̄навн таса̄вит та̄рвит та тотыс. Ва̄тум пиланув Сургут ӯст тыналыянӯв, тот о̄лнэ предприятият ёт договорнэ̄пак хосыт рӯпитэ̄в. Ӯй совыт Тобольск, Тюмень ӯсыгн тотыянӯв. Таса̄вит та̄л сыс рӯпитым ёмащакв ва̄глӯв, хо̄т тыналаӈкве э̄ри. Во̄раян хо̄тпанув та̄нки са̄лы о̄ньще̄гыт. Ос са̄лы нё̄выль тыналаӈкве ке э̄ри, та̄нанылн о̄с нё̄тэ̄в. Игорь Владимирович потыртаме юипа̄лт китыгласлум: ма̄ньлат хо̄тпат та̄н палтаныл рӯпитаӈкве минэ̄гыт ман а̄ти. Кӯщай хум ювле тох ла̄выс: – Ма̄ньлат ма̄хманув ма̄н палтув рӯпитаӈкве ат ка̄саще̄гыт. Ань тамле ва̄рмаль а̄ти туп соссаӈ ма̄хум халт о̄лы, мо̄т мирыт халт о̄с тамле та̄рвит о̄лы. Ань а̄гитпыгыт пуссын юристыг, экономистыг ос мо̄т са̄всыр профессиян ханищтахтэ̄гыт. Ма̄н ханты ма̄хманув ёт рӯпитэ̄в, о̄влэ̄т та̄н халанылт бухгалтер, юристхо̄тпа киссӯв. Та̄н во̄рт о̄лыманыл, мо̄т ма̄н ханищтахтуӈкве ат минэ̄гыт. Аквкит ханты хо̄тпа на̄иӈха̄пыт рӯпиты. Ос то̄ват ла̄пкат тыналан нэ̄г рӯпитэ̄гыт. Мо̄таныт пуссын во̄раян хо̄тпаг о̄лэ̄гыт. Бухгалтерыг ам по̄х хо̄тпа во̄выслум. Тамле рӯпата ва̄нэ хо̄тпа ханты ма̄хум халт ат хо̄нтсум. Ам амки юристыг ханищтахтасум, тамле профессия та̄л общинат рӯпитаӈкве та̄рвитыӈ о̄лнув. Са̄всыр са̄кконыт, постановленият ос мо̄т нэ̄пакыт ёмащакв ва̄ӈкве э̄ри. Людмила ТЕТКИНА Людмила Каюкова ва̄рум хурит

1068 2014.01.24. Анна АЛГАДЬЕВА

Хулюмсунт па̄выл. Тагт я̄ палытыл пе̄с та̄гыл ма̄ньщит о̄лэ̄гыт. Ань о̄лнэ Хулюмсунт па̄выл ӯнлын ма̄т В. Н. Чернецов тыт яласаме порат хӯрум о̄лнэ кол туп о̄лум. Война э̄лыпа̄лт са̄всыр а̄рталит, колхозыт ва̄руӈкв патве̄сыт, ма̄хум колыӈлӯтыӈ та̄гыл акванва̄нтлуптаве̄сыт. Ха̄ӈласам па̄выл та порат яныг па̄выл о̄лыс, са̄в ма̄хум Хулюмсунтын ва̄нтласыт. Йильпи нор мори са̄груӈкв ат та̄ртве̄сыт, о̄лум коланыл тыг ёт на̄тылтасаныл. Па̄выл янгыг е̄мтыс. Тувыл 1958 та̄л порат звероферма ва̄рвес. 1973 та̄лт Компрессорный станция ӯнттувес, рущ па̄выл ва̄рвес, о̄лнэ колыт ӯнттуве̄сыт. Мо̄лты рущ па̄влыг, ма̄ньщи па̄влыг халэ̄н ве̄рыстакем о̄лыс. Па̄влыг халт такем ёмас во̄р о̄лыс, матхурип пил туп а̄тим о̄лыс, па̄кв яныгмас. Ань тот пӯльница ӯнттувес. Йильпи колыт ӯнттуве̄сыт, па̄влыг акванёхтысы̄г. Па̄выл пӯльницаныл а̄лгаль ма̄ньщи па̄влыг ла̄ваве, пӯльницаныл ло̄ӈхаль рущ па̄влыг о̄лы. Хунь матыр янытлан хо̄тал е̄мты, ма̄хум акванатхатэ̄гыт, ялпыӈ хо̄тал ва̄ре̄гыт. Ты холам та̄лт Ха̄льӯс е̄р ма̄ (район) 90 та̄лэ то̄влыс, тувыл округ хо̄тал аквта ляпат о̄лыс, ты ма̄гсыл ишкола актовый зал колнакт ма̄н, па̄влыӈ ма̄хум, ос ня̄врамыт концерт ва̄рыгласӯв, ма̄хмыт акванатыгласӯв. Ва̄им, ты ва̄рмаль кастыл са̄ртын та̄гыл щё̄питахтасӯв. Йӣквтаныт, э̄ргыт ханищтасӯв. Нина Николаевна Гадебская ма̄хум хӯнтлан ма̄гыс суссылтан номерыт хансыс, такви хансум кит стихотворенияге ловиньтасаге, такем нё̄тнэ̄г «Та̄гт ва̄тат» э̄рыг э̄ргыс. Са̄в ня̄врамыӈ нэ̄кве̄г Марина Александровна ос Оксана Алексеевна Алгадьевыг такем са̄в э̄рыг э̄ргысы̄г, йӣкв йӣквсы̄г. Акв йӣквтан « Хӯл алыщлан ма̄хум урыл» пыгаге̄н ёт йӣквсы̄г. Максим ос Дима иӈ кос ма̄ниг, такем ты ма̄щтырыг, сома со̄лиӈыг толыг хартэ̄г. Такем ёмщакв йӣквсыт. Ам ос ня̄врамыт ёт «Хумыс ма̄таприщ ялымины» мо̄йт ханищтасӯв, тувыл ма̄хум э̄лыпа̄лт ёнгыслӯв, ма̄ньщи ла̄тӈыл потыртаслӯв. Коля Алгадьев ма̄таприщ э̄рыг ла̄тӈанэ щирыл такем ёмщакв э̄ргыстэ. Пыгрищит хум йӣквыл йӣквсыт, та̄н иӈ ма̄нит, о̄выл нак ущты йӣквсыт. Тахольтыл Серёжа Пуксиков ёхталас, тав янгыгнуваг о̄лы, 7 классыт ханищтахты, йӣквуӈкв такем ха̄сы. Пыгрищит тав юипа̄лэн о̄лтумтахтасыт, хотьют хумыс тэ̄лы, та порге̄гыт. Яныг пыгагув Максим Адин ос Денис Попов ты торыг ат а̄стысы̄г, классыт халт футболыл ёнгысы̄г, таима̄гыс ёхтуӈкв ат ве̄рмысы̄г. Надежда Константиновна Маслова э̄кват йӣквыл йӣквыс, тав Мария Сергеевна Мерова йӣквтан но̄хханищтастэ, тащирыл э̄рыг то̄тап хӯнтлым та йӣкви. Са̄ӈквылтан хо̄тпа ат о̄ньще̄в, са̄всыр диск кинсэ̄в, аппаратура тотэ̄в, тувыл та хосытыл тув хӯнтлым, хотум та йӣкве̄в, хӯталтахтыглэ̄в. Ма̄ньщи поэтув Ю. Н. Шесталов хансум «Миснэ» стихотворение пуссын аквъёт э̄ргыг э̄ргыслӯв. Мария Тихоновна Двинянинова такви хансум стихотворениятэ ловиньтас. Хумыс о̄влэ̄т ма̄ньщит сытам во̄рт о̄лсыт, тувыл газовикытн ёхтуве̄сыт. Ам тав стихотворениятэ ёлхансыслум, номсэ̄гум, ловиньтаӈкв пӯмащ паты. Тыт хумыс ва̄рмаль о̄лыс, тащирыл хансым о̄лы: МО̄т хурип О̄лупса Лӯи ма̄т, па̄ль во̄р, хара во̄р кӣвырт О̄лсытхӯлсыт соссаӈ мир. Са̄всыр о̄лупса о̄лыгла̄лас, Са̄всыр о̄лупса ювле хультыс. Ёмас, лю̄ль пуссын о̄лыс, Ань ос йильпи о̄лупса ёхтыс «Тамле о̄лупса, ань та е̄мтыс Маныр хо̄тал мус ма̄н о̄лыкев? » – О̄йка э̄кватэ нупыл ла̄ви, – Тымус э̄лаль хотталь сунсы. Сунсы, вертолёт тыламлы. «Ке̄лыгт тай, маныр о̄хтыртаве Та рущ сунн ӯлумт тох ат сунсылтаве Ты маныр тамле е̄мтыс? Манос о̄лы? Манос мирув китхал патыс? » Хумыс ве̄рми юн ӯнлуӈкв Ма̄тэвитэ со̄мпгалтан яныг о̄йка, Потырля̄ххал кинсуӈкв минас Хосава̄ти о̄йка минас, Аквматэ̄рт рӯма нэ̄глыс Газовикыг ла̄внэ хум. Потырля̄ххал та̄рапаттын ма̄гыс Яныг о̄йка китгалахтуӈкв патыс. «Ты хартаве газопровод Хильтал во̄р ос ке̄лгыт ӯлтта. Патэ̄гын машинал яласаӈкв! Лувын хот э̄ри ёрувлаӈкв! Цивильныиг тыт пуссын е̄мты». О̄йка нупыл рущ хум ла̄ви: «Газ тыгыл э̄лаль хартуӈкв Лё̄ӈхыл э̄ри пӯнсуӈкв, Ма̄нь па̄влыт ӯсынн ёхыттаӈкв». Тамле ля̄ххал хӯлме юипа̄лт Юв та о̄йка та̄лматас Юрткве, наӈ ул ка̄нсамлэн, Пуӈкын но̄хӯрим о̄ньще̄лын. Маныр ёмас о̄лнэ ка̄с Э̄лы хо̄талт ма̄нав ӯри! Ань тыг мус май хотталь минуӈкв Лё̄ӈхын хӯрмах хо̄тал мины. Тыгыл э̄лаль ӯнтэн вертолётын, Хоталь э̄ри тотыгпавен. Пуссын то̄рум ма̄гыс, ро̄щил та̄л Лё̄ӈх ос рӯпат ва̄рнэ сыс Тамле щунил мощ щуньлэ̄в, Тамле о̄лупсал мощ о̄лэ̄в! Со̄ль, та порат олн та̄л вертолётыл тыглата̄луӈкв ро̄выс. Потрум иӈыт оигпи. А̄гирищанув о̄с такем ёмщакв «Пил ва̄тнэ а̄гит» тан йӣквсыт. Тувыл акв рущ йӣквтан йӣквсыт. Па̄влыӈ ма̄хум ка̄тыл ва̄рум пормасаныл суссылтан ма̄гыс тотыгласаныл, хо̄ӈха тыналаӈкв ка̄сащас, тыналасаныл. Концертув а̄стум юипа̄лт ос Ня̄хщамво̄льн ялум ня̄врамыт, хумыс тот яласасыт, маныр ва̄щинтасыт – потыртасыт. Тамле хо̄талытн рущ ма̄хманув о̄с ёхталэ̄гыт, ма̄ньщи ва̄рмалит пӯмщалэ̄гыт. Мо̄т та̄л номсэ̄в, па̄влыӈ ма̄хум халт ма̄щтыр хо̄тпат, ма̄щтыр ка̄тке̄ныл ма̄гыс матыр мӯйлупсал ва̄руӈкв. Потрум та а̄стыс. Анна АЛГАДЬЕВА Хурит Хулюмсунт па̄выл ма̄хум ос ня̄врамыт по̄слым о̄лэ̄гыт.

1068 2014.01.24. Валентина УЗЕЛЬ Валентина Хозумова

Тамле хо̄тпа са̄внув вос о̄лы. Ань пе̄с потрыт, мо̄йтыт ос пе̄с нэ̄пакыт атнэ ма̄хум са̄в кос о̄лы. Ос ма̄к соссаӈ ма̄хум халт тамле хо̄тпа мощща. Ань тит ханты нэ̄кве̄г урыл округув янытыл са̄в хо̄тпа ва̄г, тэ̄н сас ка̄ркамыг ос сака э̄рнэ рӯпата ва̄ре̄г. Акватэ – Нина Васильевна Шабаршина, тав Ванзеват па̄вылт па̄влыӈ ма̄хманэ, пе̄с о̄лупса урыл са̄в потыр атыс. Ань тыг мус ты рӯпататэ э̄лаль тотытэ. Мо̄танэ – Софья Максимовна Каксина, тав Касум па̄вылт о̄лы, школат рӯпиты. Ня̄врамыт ханты ла̄тӈыл потыртаӈкв ханищтыянэ, тав о̄с са̄в та̄л пе̄с потрыт такви па̄влэ урыл, пе̄с ма̄хманэ урыл акванаты. Ань кос хоты хо̄тпа Касум па̄выл урыл матыр ва̄ӈкв те таӈхи, тав та̄ра Софья Максимовна палт те̄таве. Ме̄н тав ётэ о̄с хо̄нтхатыгласме̄н, тав такви рӯпататэ ос колта̄глэ урыл мощ потыртас. Тав о̄йкатэ щирыл Каксинаг о̄лы. Са̄в та̄л школат рӯпиты, ня̄врамыт о̄выл классытт ханищтыянэ. 1989 та̄лт та̄н школанылт музей ва̄рвес, та па̄сыл Софья Максимовна тот о̄с рӯпиты. 2011 та̄лт та̄н школаныл 80 та̄лэ то̄влыс. Ты та̄лыт сыс са̄в хо̄тпа школат рӯпитас, ка̄сыӈ хо̄тпа наме та̄рапаттувес, хоты та̄лытт тав рӯпитас, хуритэ хо̄нтвес. Пуссын акванатве̄сыт, нэ̄пакыг ань тыг мус ва̄руӈкв ат ве̄рмияныл, олн ат о̄ньще̄гыт. Софья Каксинан ханищтахтын ня̄врамыт о̄с сака нё̄тэ̄гыт. Та̄н яныг хо̄нтын ялум хо̄тпат, тувыл юв ат ёхтум хо̄тпат ос ань лӯсытан ма̄хум урыл потыр атсыт. Ня̄врамыт юн та̄нти а̄щанылща̄няныл, рӯтаныл ёмащакв титыгласаныл, хум хо̄тпат хурияныл школан тотсыт. Ты потрыт о̄с пуссын акванатве̄сыт, нэ̄пакыг ва̄рве̄сыт. Ты нэ̄пак та̄ратан ма̄гыс район кӯщаяныл Сергей Маненков олн майлыс, яныгса̄т са̄вит нэ̄пак туп ва̄рвес. Ань округув янытыл ул ка̄сыӈ школат акв тамле музеит рӯпитэ̄гыт. Ос Касум па̄вылт музеяныл сака ёмащакв щё̄питым о̄лы. Хусахтем та̄л сыс та̄н атса̄т арыгтем пе̄с пормас тув атсыт. Ос школат рӯпитан хо̄тпат пуссын ты музей ма̄гыс о̄с матыр акваг ва̄ре̄гыт, пуссын нё̄тэ̄гыт. Ханты нэ̄кве а̄нумн ла̄выс: «Ам ань ты рӯпата ва̄рнэм ма̄гыс па̄влувт о̄лнэ ма̄хум палт акваг ялантэ̄гум. Та̄н палтаныл юв ёхтэ̄гум, пе̄с хурит пуссын суссылтыяныл, пе̄с рӯтаныл урыл потыртэ̄гыт. Ань яныг ма̄хманув иӈ о̄лэ̄гыт, ты рӯпата акваг ва̄руӈкв э̄ри. Ня̄враманув ань са̄выӈпа̄лэ ща̄нь ла̄тӈаныл ат ва̄ганыл, пе̄с ва̄рмалянув, пе̄с наканув урыл юн о̄с сака ат потыртавет. Са̄в та̄л мины, ань ва̄рнэ рӯпатам тах сака э̄рмыглы». Касум па̄вылт сараныт о̄с о̄лэ̄гыт, та̄н пе̄с порат тув о̄лмыгтасыт. Та̄н ань пуссын та̄нти маснутыл масхатым о̄лэ̄гыт, ня̄враманыл мольщаӈыл, ва̄ил масхатым ха̄йтыгтэ̄гыт. Халанылт та̄нти ла̄тӈыл потыртэ̄гыт. Ос та̄н уранылт Софья Максимовна тох ла̄выс: «Ма̄н сарананув ма̄н нупылув сака ат сунсэ̄гыт. Саран пыгыт туп саран а̄ги нэ̄г тотыяныл, халанылт сака юртыӈыщ о̄лэ̄гыт. Ос та̄н са̄выӈпа̄лэ пуссын ма̄н ханты ла̄тӈув торгамтыяныл, ос ма̄н ханты ма̄хманув нэ̄мхотьют та̄н ла̄тӈаныл ат ва̄ганыл». Тыи, со̄ль, тох о̄лы. Ам тит матум о̄йкаг ва̄сагум, акватэ – ханты о̄йка, мо̄танэ – саран. Акватэ ханты ла̄тныл потырты, мо̄танэ ювле саран ла̄тныл матыр ла̄ви, ос потыртанэтэ̄н порат щар акв рущ ла̄тыӈ аты хӯлыгласум. Тох ты ма̄н пе̄с ма̄хманув о̄лсыт, титхӯрум ла̄тӈыл потыртаӈкв ве̄рмысыт. Ань ла̄щал ща̄нь ла̄тӈанув та ёрувлахтэ̄гыт. Ос ма̄н халувт тамле ёмас ос ка̄ркам хо̄тпа са̄внув о̄лнув те, то̄нт маныр яныг рӯпатакапай та̄н ва̄руӈкв ве̄рмынувыт.

1068 2014.01.24. Светлана РОМБАНДЕЕВА

Кимкъя па̄вылт самын патум нэ̄. Ты хурит Ха̄льӯс район Кульпас па̄выл ма̄ньщи нэ̄ Раиса Ивановна Долейко по̄слым о̄лы, а̄ги о̄парищ наме Таратова. Тав Кимкъясуй па̄вылт самын патыс ма̄ньполь э̄тпост 1968 та̄лт. На̄н ань э̄лаль Рая потре ловиньтэлын: – А̄тям Иван Иванович Таратов 1929 та̄лт Яныгво̄ль па̄вылт самын патыс. Ты па̄выл Хулимсунт по̄хат о̄лыс. Омам Домна Романовна Кугина 1935 та̄лт самын патыс, тав ос Ме̄сыг па̄выл нэ̄. Ты па̄выл Ло̄пмус алгаль о̄лыс, ань туп па̄вылъёре хультыс. Ма̄н ат ня̄врам о̄лсув. Люда увщим Украинан минас, тот о̄лы. Хӯрум ня̄врам ос ат апыг о̄ньщи. Коля каӈкум 1973 та̄лт Кимкъясӯй па̄вылт щаквт порсыс. Витя каӈкум 1966 та̄лт самын патыс, я̄ӈк на̄тнэ э̄тпост 1997 та̄лт а̄тимыг е̄мтыс. Тувыл ам самын патсум, ам ёлыпал а̄пщим Сергей, я̄ӈк на̄тнэ э̄тпост Победа хо̄талт самын патыс. Э̄кватэ Саранпа̄вылныл о̄лы, Людмила Тихонова. Кит ня̄врам о̄ньще̄г, Витя ос Лена. Школа ам тыт, Кульпаст, а̄стласлум. Э̄лаль 1985-1987 та̄лытт Украина ма̄т Донецкий область Крамоторск ӯст тэ̄нут па̄йтнэ нэ̄г ханищтахтасум. Практикам Крымт о̄лыс, тот пансионатыт я̄ӈк на̄тнэ э̄тпосныл ма̄нь таквс э̄тпос мус тэ̄нут па̄йтым рӯпитасум. Тувыл ювле амти ма̄мн йисум. О̄йка ва̄рсум, наме Михаил. Пыгуме̄н туп та̄лэ то̄влыс, о̄йкам а̄тимыг е̄мтыс. Ам амттем ва̄т нупыл акв та̄л о̄лэ̄гум, пыгум амттем янмалтаслум. Наме Фёдор, ма̄нь таквс э̄тпост ва̄т нупыл хӯрмит та̄лэ то̄влыс. Э̄ква тотыс, рущ нэ̄, Урай ӯс по̄ханыл о̄лы. Та̄н ань тот ты о̄лэ̄гыт. Кит апыг о̄ньще̄гум. Ам ань янгыщ Ха̄льӯст о̄лэ̄гум. Тот о̄йкам йӣгрище о̄лы, ат ня̄врам о̄ньщи, та̄н палтаныл ялантэ̄гум. Ре̄тыӈ ю̄свой э̄тпост Кимкъясӯй па̄вылн ялсум, тот Пе̄тр сасгум о̄лы. Тав тамле ка̄ркам хум, пум харты, на̄лмыл вит тоты. Ла̄ви: «Ӯнлуӈкве те патэ̄гум – матэ̄гум, тувка̄ртэ̄гум». Омамныл тав нилахуйплов та̄лэ ма̄ньнув. Ще̄мьянылт тав щар ма̄нь, такте̄т хультыс. Пыганэ тав ётэ юн о̄лэ̄гыт, рӯпитэ̄гыт, хӯл алыщлэ̄гыт. Раиса Ивановна тох та потыртас. Ма̄н, газетат рӯпитан ма̄хум, таве̄н са̄в ёмас, сымыӈ ла̄тыӈ ла̄ве̄в. Ще̄мьятэ ёт пуста̄гыл вос о̄лы, То̄рум ёт, О̄тыр ёт вос о̄лы!

1068 2014.01.24. Николай МЕРОВ

Сым ща̄ргын ла̄тыӈ. Та̄л котиль э̄тпос 10 хо̄талэ̄т Ха̄льӯст Светлана Николаевна Кугина, а̄ги опарищ наме Пузина, а̄тимыг е̄мтыс. На̄н таве ул ва̄слын. Тав Ха̄льӯс район Я̄сунт па̄вылт 1960 та̄лт самын патыс. Светлана иӈ ма̄ниг о̄лыс, ща̄нягеа̄щаге хотталь щалтсы̄г. Колта̄гылт та̄н нила а̄ги Светлана, Рая, Ольга, Марина ос акв пыг Семён та̄нкке̄ныл хультсыт. Светлана щар янгыг о̄лыс. Тав Саранпа̄выл школа а̄стламе юипа̄лт та̄ра рӯпитаӈкве патыс. Йӣгрищанэ ос а̄пщитэ такви янмалтасанэ. Тувыл 1987 та̄лт Светлана Ха̄льӯсн ва̄нтлыс. Ты ма̄ньщи нэ̄кве тот совхозт, гостиницат колкан ловтым ос пӯльницат а̄гмыӈ хо̄тпат уральтым са̄в та̄л рӯпитас. Юио̄выл хӯрум та̄л Ха̄льӯст пенсияолн вуим о̄лыс. Тот ты хотты лё̄хъя̄ст ё̄мыс, машинал тармыл минвес, порславес. Ма̄н, редакцият рӯпитан хо̄тпат, Светлана Николаевна ня̄враманэ̄н ос рӯт хо̄тпанэ̄н сым ща̄ргын ла̄тыӈ ке̄тэ̄в. Ты мӯтраӈ, ве̄щкат, нёмса, сымыӈ нэ̄кве ма̄гыс ма̄н сыманӯв о̄с сака ща̄рге̄гыт. Редакцият рӯпитан ма̄хум

1068 2014.01.24. Александр ВЬЮТКИН

Са̄в мӯтра ӯргалан кол. Ювле хультум та̄л ва̄т са̄грапнал э̄тпост Ханты-Мансийск ӯст о̄лнэ государственный архив колт «Гордость Югры» нампа выставка пусвес. Ты суссылтап округувт о̄лнэ мирн ва̄нэ соссаӈ ма̄хманув янытлан ма̄гсыл ва̄рвес. Выставка пуснэ порат яныгпа̄ла ма̄хум тув о̄с во̄виньта̄лве̄сыт. Та̄н халанылт яныгпа̄лаг о̄лнэ ма̄ньщи э̄ква Евдокия Ивановна Ромбандеева тот о̄лыс. Евдокия Ивановна ма̄ньщи мирувныл учёныит халт щар ма̄к мӯтраӈ хо̄тпаг о̄лы. Ань архивколт рӯпитан ма̄хум ты пӯмыщаныл ка̄сыӈ та̄л мо̄тмо̄т номтаныл щирыл э̄лаль ва̄руӈкв патэ̄гыт. Тув ёхталам ма̄хум халт Технологопедагогический колледжит ханищтахтын са̄в ма̄ньлат ма̄хум о̄лсыт. Выставкат о̄лум ка̄сыӈ хо̄тпа такви рӯпататэ ос рӯт ма̄хманэ наманыл тинсыс. Нэ̄пакыт коныпал са̄в пе̄с хури тот суссылтавес. То̄ва хурит Сортыӈъя па̄вылт ма̄ньщи ня̄врамыт ханищтахтын колт по̄слым о̄лсыт. Та хурит 1937 та̄лт ва̄рве̄сыт. Округ янытыл архивыт тармыл кӯщаиг о̄лнэ нэ̄ Людмила Сажаева атхатыглам ма̄хум нупыл о̄выл ла̄тыӈ ла̄вуӈкв во̄ввес. Людмила Дмитриевна ла̄выс: «А̄нум ты выставка рӯпитанэ̄тэ ма̄гсыл ёмас сыстам номтыл сымум ща̄рги. Ма̄н тох ва̄рнэ щирыл иӈ са̄в выставка номтыт о̄ньще̄в. Ань о̄лнэ суссылтап такви щире̄т та̄рвитыӈыг о̄лы. Нэ̄матыр хотёрувлаӈкв ос аквантэ̄лыгтаӈкве ат э̄ри. Тыт ань та порат о̄лум накыт ма̄к ва̄нэ ма̄хум о̄лэ̄гыт. Ань яныгпа̄лаг о̄лнэ хо̄тпат та̄нти ма̄ньлатыг о̄лманыл порат хансум нэ̄паканыл тыг мӯйлуптасаныл. Ты ма̄гсыл ам та̄нанылн яныг пӯмащипа ла̄тыӈ ла̄ве̄гум. Та̄н наманыл ма̄ янытыл са̄в ма̄т ва̄вет ос ёмас номтыл ка̄стыглавет. О̄лнэ̄ныл палыт та̄ратан нэ̄паканыл аквписыг ловиньтаӈкв патавет. Ань о̄лнэ ма̄ньлат ма̄хманув ма̄гсыл та̄н нэ̄паканыл тыныӈ нэ̄пакыг ловиньтахтэ̄гыт. Ма̄н ты выставка щё̄питамув порат тох номсахтасӯв: о̄лнэ ма̄в нотэ хоса, йис та̄гыл тамле ты ёмас тит соссаӈ мирыг тыт о̄лэ̄г. Ты урыл ма̄навн матыр ва̄ӈкв пуссын пӯмащ. Ка̄сыӈъе̄мт хунь ма̄н хотты пе̄с нэ̄пакыт хо̄нтэ̄в, ма̄н щар ма̄нь ня̄врамыт хольт ща̄гтэ̄в». Людмила Дмитриевна потре оигпам юипа̄лт, яныгпа̄лаг о̄лнэ ма̄хмыт пуссын са̄всыр оспа хорамыӈ лӯптал мӯйлуптаве̄сыт. Ос исум ща̄й аюӈкве пуссын пасан ва̄тан во̄вве̄сыт. Ты выставка я̄ӈк на̄тнэ э̄тпос мус рӯпитаӈкве паты. Хотьют ка̄сащи, пӯмащ ма̄гсыл тув ялэ̄н, сунсыглахтэ̄н, э̄рыӈ на̄нан э̄рнэ ля̄ххал тот хо̄нтэгы̄н.

1068 2014.01.24. Николай МЕРОВ

Ма̄ньщи нэ̄ янытлавес. Мо̄лалнув Ха̄льӯсн ялмум порат акв ма̄ньщи нэ̄ ёт ва̄щинтахтасум. Тав наме Валентина Гавриловна Себурова, а̄ги о̄парищ наме Гоголева. Ты нэ̄кве Ха̄льӯс район А̄нъя па̄вылт самын патыс. Ань Ха̄льӯст ва̄т та̄л арыгтем о̄лы. Ма̄нь ня̄врамыт колт ня̄врамаквет ӯргалым рӯпиты. Ты ма̄ньщи нэ̄ кит ня̄врам янмалтас. Тэ̄н ань сас янгыг е̄мтсы̄г. А̄гитэ ва̄т нупыл онтолов та̄лэ то̄влыс. Пыге ос ва̄т нупыл хо̄т та̄лэ то̄влыс. Тэ̄н ань Ха̄льӯст оматэ̄н палт о̄лэ̄г. Валентина Гавриловна а̄ще Гаврил Иванович Гоголев А̄нъя па̄вылныл о̄лыс. Тав о̄лме̄т акваг во̄раим яласас. О̄йка пе̄с порат са̄в во̄ркол о̄ньщис, нёхыс совыт план щирыл государстван майлысанэ. Пенсиян патме мус во̄рт акваг яласас. Во̄раян пора мины, на̄лув ва̄глы ос хӯл алыщлаӈкве о̄вылтахты. Нэ̄мхуньт тэ̄тал ат о̄лсыт, нё̄выль, хӯл, матыра̄ти пуссын о̄лыс. Оматэ Александра Ивановна Гоголева, а̄ги о̄парищ наме Гындыбина, тав ос Ялъюс па̄выл нэ̄ о̄лыс. О̄йкатэ̄н тувыл ты А̄нъян тотвес. Мо̄лты та̄л Коми республика Сыктывкар ӯсныл Финноугорский Центрыныл кина по̄слын ма̄хум ёхталасыт. Та̄н округувт о̄лнэ соссаӈ ма̄хманув урыл кина по̄слысыт. Ма̄ньщи ма̄хманув по̄слын ма̄гыс та̄н Ха̄льӯсн ялсыт. Акв хо̄тал тот ма̄ньщи нэ̄квет а̄канит ю̄нтуӈкве во̄виньта̄лве̄сыт. Валентина Гавриловна тув ю̄нсхатуӈкве о̄с ёхталас. Тав а̄кань ю̄нтнэ̄тэ халт мо̄йт мо̄йтыс, нэ̄т ёт э̄рыг э̄ргыс ос са̄всыр пӯмащ потрыт потыртас. Валентина Гавриловна са̄в та̄л ма̄нь ня̄врам колт рӯпитанэ̄тэ̄ ма̄гыс Ха̄льӯс район образование па̄лыл «Отличник народного образования» ма̄гылн тагатан по̄сыл майвес. Ма̄н, редакцият рӯпитан ма̄хум, ты ва̄рмаль ма̄гыс Валентина Гавриловна сымыӈыщ янытлылӯв. Ты мӯтраӈ нэ̄ рӯпататэ аквты щирыл э̄лаль ёмщакв вос ва̄ритэ. Ня̄враманэ, апганэ, ляпа рӯтанэ ос юрт ма̄хманэ ёт са̄в та̄л пуста̄гыл вос о̄лы. То̄румн вос ӯргалаве, э̄лаль о̄лнэ хо̄талэ акваг посыӈыг вос о̄лы. Пус ка̄т, пус ла̄гыл ма̄н таве̄н ла̄ве̄в.

1068 2014.01.24. Светлана РОМБАНДЕЕВА

Матъёмас тэ̄н ёхталасы̄г. Ювле хультум та̄л ва̄т са̄грапнал э̄тпосэ̄т Ханты-Мансийск ӯст ханты ма̄хум о̄выл учёныяныл Николай Иванович Терёшкин янытласаныл. Та порат тыг о̄йка пыге ос апге ёхталасы̄г. Пыге наме Сергей Николаевич, апге ос Николай Сергеевич. Тэ̄н Санкт-Петербург ӯст о̄лэ̄г. Ты яныг учёный о̄йка урыл Валентина Васильева (№ 24 2013 та̄л) газетат хансыглас. Терёшкин о̄йка о̄лнув те, ань яныгса̄т та̄лэ то̄влынув. Тав Ханты-Мансийск ӯст ханты ос мо̄т са̄в ма̄хумн самын патум хо̄талэ кастыл янытлавес. Ма̄хум тыт са̄в ма̄т акванатхатыгла̄лсыт, тав уре̄т са̄в потыр хӯнтлысыт. О̄йка ань о̄лме палыт маныр рӯпата ва̄рыс, хо̄т о̄лыс, хо̄т хо̄нтлыс, ще̄мьятэ урыл, та маныр ма̄хум са̄в потыртасыт. Таве ва̄м хо̄тпат, тав ётэ рӯпитам хо̄тпат о̄с аквкит ла̄тыӈ ла̄всыт. Пыге Сергей Николаевич ань Санкт-Петербург ӯст А. И. Герцен нампа институтт ма̄ньлат ма̄хум ханищтым рӯпиты, а̄тятэ хосат тот ты рӯпитас. Тав ань о̄с а̄тятэ хольт наука рӯпата ва̄ри, ханты мир э̄руптытэ ос янытлытэ. Акв хотты хо̄тал ма̄хум «Торум Маа» музейн во̄выглаве̄сыт, Сергей Николаевич пыге̄нтыл тув о̄с ёхталасы̄г. Ма̄хум пасан ва̄тат ӯнлахо̄лсыт, исум ща̄й айсыт, Николай Иванович Терёшкин урыл потыртасыт. Еремей Данилович Айпин ос Евдокия Андреевна Нёмысова о̄йка о̄лме порат ва̄стэ̄н, Санкт-Петербург ӯст тав колэ̄н ялсы̄г. Ты урыл тэ̄н хоса потыртасы̄г, хумус та̄н аквъёт рӯпитасыт, са̄всыр пӯмыщ ва̄рмалит номылмата̄лсы̄г, ма̄хум мощ мовиньтасыт. Сергей Николаевич пыге о̄патэ хурит пуссын акванатманэ, компьютер хосыт суссылтасанэ. Ань намыӈсуиӈ о̄патэ хо̄т о̄лыглас, хотьют ёт рӯпитас, аквъёт хо̄нтлум юртанэ хуритыт пуссын о̄лэ̄гыт, пуссын суссылтасанэ. Апге ла̄выс: «Ме̄н тыг матъёмас ёхтысаме̄н. Ам о̄пам самын патум ма̄тэн ялуӈкве сака тахсум, хо̄т тав яныгмас, ханищтахтас. Пумащипа на̄нанн! О̄пам урыл са̄в потыр хӯлсум, номтум сака ёмас». Пыг мольщаӈыл масхатым о̄лыс, тох и ӯнлахо̄лыс, потрамас. Татем ёмас, нёмса э̄лумхо̄лас. Сергей Николаевич о̄с ла̄тыӈ ла̄выс: «Ам номсысум, а̄тям урыл ам пуссын ва̄гум, насати, а̄ти. Тыт, Ханты-Мансийск ӯст о̄лнэме̄н сыс, тав уре̄т са̄в потыр хӯлсум. Та̄лыт молях ювле хультэ̄гыт, ляпа ма̄хманув матэ̄гыт, а̄тимыг е̄мтэ̄гыт. Ётыл ущ номсахтэ̄в, ты урыл ат китыглахтасум, та урыл тав а̄нумн ат потыртас, э̄рыс таве ёмащакв хӯнтлуӈкве. А̄тям такви о̄лупсатэ урыл са̄в кос потырта̄лыс, ос ам ань ва̄глум, тав а̄нумн пуссын потыртаӈкве ат а̄лымас. Тав о̄лупсатэ, насати, пӯмыщ о̄лум. Я̄тил тыныӈ ма̄хум, ханты ос мо̄т хо̄тпат, на̄нанн ам яныг пӯмащипа ла̄тыӈ ла̄ве̄гум! На̄н а̄щум о̄йка номилы̄н, тав ва̄рум рӯпататэ янытлылы̄н. Пӯмащипа, пуссын пуста̄гыл о̄лэ̄н! ». Тамле мутраӈ, сымыӈ хо̄тпан ма̄н о̄с са̄в ёмас, сымыӈ ла̄тыӈ ла̄ве̄в. Со̄ль, матъёмас тэ̄н ёхталасы̄г, тыт ханты мирн сака ӯрвесы̄г, пуссын сака ща̄гтсыт. Пуста̄гыл вос о̄лэ̄г, На̄янэ̄н, О̄тыранэ̄н вос ӯргалаве̄г! Светлана Ромбандеева Нуми хурит котильт С. Н. Терёшкин ӯнлахо̄лы, тав ёмаспа̄лэ̄т журналист э̄ква А. С. Глухих ос во̄ртыпа̄лэ̄т ханты учёный э̄ква Е. А. Нёмысова ӯнлэ̄г. Ёлы хурит ос Н. С. Терёшкин по̄слым о̄лы.

1068 2014.01.24. Людмила ТЕТКИНА

Во̄рт яныгмам а̄ги яныг ӯст ханищтахты. Ты э̄тпос 25 хо̄талэ̄т студентыт янытлан хо̄талыг о̄лы, рущ ла̄тӈыл «Татьянин день» намаявес. Ты кастыл ам акв ханты а̄ги урыл потыртэ̄гум, тав наме Лилия Тэвлина. А̄ги Сургут ӯст нефтяной техникумыт китыт курсыт ханищтахты. Ам таве Сургутский район Русскинская па̄вылт са̄лы ӯрнэ ма̄хум ялпыӈ хо̄таланыл о̄лум порат по̄слыслум. Ос китыгласлум, хотьютын тамле нё̄тнэ сахил ю̄нтвес, тав ювле ла̄выс: «Омам тав ма̄щтырыг ю̄нсхаты. Ам тамле хорамыт ю̄нтуӈкве ат ха̄сэ̄гум. Ам сакныл турло̄псыт, пальсакыт хартэ̄гум, ты рӯпатам ёмаснуве̄г тэ̄лы». Лилия ща̄нягеа̄щаге во̄рт о̄лэ̄г, во̄рае̄г, хӯл алыщлэ̄г ос са̄лы ӯре̄г. Тэ̄н о̄с акв ма̄нь а̄ги янмалтэ̄г. Алла ань интернатт о̄лы ос атыт классыт ханищтахты. Лилия ла̄выс, школа а̄стламе юипа̄лт тав Сургут ӯсн бухгалтерыг ханищтахтуӈкве минас. Техникум а̄стлы, тав э̄лаль университетт ханищтахтуӈкве ос Сургут ӯст о̄луӈкве паты. Э̄лаль ам таве китыгласлум, ханищтахтуӈкве хунь а̄сты, манрыг ща̄нягеа̄щаге палт во̄рн минуӈкве ат ка̄сащи. Ханты а̄ги ювле ла̄выс, тав хунь ма̄ниг о̄лыс, Сургут ӯсн тотыглавес. Та пора номтэ̄т ёмащакв хультыс, то̄нт тав таквирот номсыс, хунь янгыг е̄мты, яныг ӯсн о̄луӈкве мины. Хумус номсыс, тох та е̄мтыс. Омагеа̄тяге нэ̄матыр ат ла̄всы̄г, а̄гитэ̄н яныг ӯст ханищтахтуӈкве та̄ртыстэ̄н. А̄тятэ Александр Андреевич Тэвлин нефтяникыт палт обходчикыг рӯпиты, оматэ Неля Леонидовна ос юн о̄лы, са̄хит, супыт ос мо̄т маснут ю̄нты, сакныл харты. Турло̄псыт, тучаӈыт ос са̄всыр нё̄тнэ ханты пормасыт ялпыӈ хо̄талыт о̄лыгланэ̄ныл порат тыналы. Та̄н нефтяникыт ёт соглашениенэ̄пак хосыт олныл ос пормасыл нё̄тавет. Лилия стипендияолныл ат ойтаве. Таве̄н омагеа̄тяге олн ке̄тэ̄г. Ань такви рӯпата кинсы ос тэ̄натэ̄н нё̄туӈкве таӈхи.

1068 2014.01.24. Анна АЛГАДЬЕВА

Йильпи та̄л ты ёхтыс. Улпыл, ка̄сыӈ хо̄тпа ща̄гтым ӯрхаты, хунь йильпи та̄л ёхты. Ма̄хум са̄ртын та̄гыл щё̄питахтэ̄гыт, рӯтанылн ос руманылн мӯйлупса та̄стэ̄гыт, э̄лаль о̄лнэ ёмас посыӈ хо̄тал номсэ̄гыт. Ка̄сыӈ номсы, йильпи та̄л со̄тыӈыг ос щуниӈыг вос о̄лыс. Ма̄к ща̄гтэ̄гыт ос мо̄йт хольт мӯтра ӯре̄гыт – ня̄врамыт. Хулюмсунт па̄вылт ты та̄л ня̄врамыт ма̄гыс клуб колт «Ёлка» ва̄рыглавес. КСК колт рӯпитан ма̄хум ос тыг ялантан ханищтахтын ня̄врамыт «Морозко» рущ мо̄йт сценат суссылтасыт. Ты мойт телевизор хосыт ул пуссын ва̄щинта̄лыгласлы̄н. Со̄ль, матыр тахнэ номт ва̄рмалиг вос патыс, ма̄нкина̄вныл мины. Хо̄ӈха хумыс тахмаи, та щирыл та паты, туп матыр ва̄рнэ сымолн вос о̄лыс. Ка̄ркамыг о̄лнэ хо̄тпа таве̄н хо̄йхатнэ ва̄рмалянэ тэ̄лаг састлыянэ, э̄влаёра, пуӈке мус о̄лы. Мо̄йт а̄стум юипа̄лт ня̄врамыт ёнгысыт, э̄ргысыт. Ащирм о̄йка Тӯйт а̄гирищ апге ёт о̄лыс, о̄парище̄н нё̄тыс. Ла̄палахтыглан киснёлпэ̄ква о̄с ёхталас, о̄влэ̄т ня̄врамыт ёт мощ ощмарлас кос, тувыл номтэ патыс, ёмас а̄квыг пе̄румтахтас. Ты хо̄тал ащирм хо̄талыг кос о̄лыс, ня̄врамыт ащирманыл ат рохтысыт, ёнгын ма̄н ёхталасыт. Ёхталам ня̄врамыт пуссын ма̄нь мӯйлупсал ос канпетка хӯргыл майве̄сыт. Анна АНЯМОВА Сымолн – матыр сака та̄кыщ тахнэ номт. Э̄влаёра, пуӈке мус – ёмщакв, хумыс ка̄сащи, тащирыл о̄луӈкв, щёлыӈыг о̄луӈкв. Киснёлпэ̄ква – кисыӈ нёлпа э̄ква, акв тав кирпнёлпэ̄ква – кирпыӈ нёлпа э̄ква. Та̄нварпэ̄ква – та̄н ва̄рнэ э̄ква, ос аман хотьют? Аман о̄с акв тав?

1068 2014.01.24. Тамара МЕРОВА

Валентин о̄лупсатэ э̄ргыг хансыстэ. Мо̄лал Ханты-Мансийск ӯст «Хо̄тал» (рущ щирыл «Солнце») нампа театрыт рӯпитан хо̄тпат акв йильпи ёныг суссылтасыт. Та̄н таве «Валя 86» намтсаныл. Тот пыгыт «рэп» щирыл са̄всыр э̄ргыт э̄ргысыт ос э̄ргум ла̄тӈаныл ёнгил хольт щё̄питасаныл. Ам режиссёрнэ̄ Анна-Ксения Вишневская ос э̄ргыт хаснэ пыг Валентин Неттин ёт ва̄щинтахтасум ос ты тэ̄лат урыл китыгласагум. Анна-Ксения ла̄выс: «Ты суссылтапув «драматический концертыг» намтуӈкве ро̄ви. Ма̄хум Валентин Неттин хансум э̄рганэ хӯнтлысыт. Ты э̄рганэ̄т тав округт ма̄нь па̄влыт самын патум ос тот яныгмам а̄гитпыгыт урыл потыртас. Тот ма̄ньлат хо̄тпат хумус та̄рвит о̄лупсал о̄лсыт, маныр номсысыт, пыг пуссын ты ва̄рмалит урыл потыртыэ̄рги («рэп» о̄вылтыт та щирыл ла̄вуӈкве ро̄ви). Пыг сымт о̄щнэ та̄рвит наканэ ма̄навн хӯлтыс, таима̄гыс мо̄т щирыл ла̄вуӈкве ке, тыи тав «исповедь» э̄рганэ. То̄внакт э̄лумхо̄ласн лю̄ль о̄лупсатэ урыл та̄рвитыӈ потыртаӈкве, та̄ра ла̄тӈыт ат хо̄нтхатэ̄гыт. Валентин, улпыл мощ номсахтым, «рэп» э̄рыгсов хосыт ущ э̄рнэ ла̄тӈын ёхтувес. Тав а̄щ та̄л яныгмас, иӈ ма̄ниг о̄лме̄т а̄ще ще̄мьяныл сысы минас. Оматэ ва̄тихал вина аюӈкве тӯлтхатас ос ётыл а̄тимыг е̄мтыс. Онтолов та̄лэ̄т Валентин такке̄т та хультыс. Ща̄нягеа̄щаге урыл тав о̄с э̄рыг о̄ньщи. Оматэ ёт тав э̄рге̄т, э̄рттам, нас потырты. Ты э̄рге ма̄гыс Ульяна Шульгинан ханты ла̄тӈыл э̄рыг щё̄питас. Пыг такви потре рущ щирыл э̄ргитэ, оматэ таве̄н ханты ла̄тӈыл ювле ла̄ви. Ща̄нь э̄ргаге Юля Яркина э̄ргысаге. А̄ще̄н тай пищма хансум. Тувыл мо̄т э̄рганэ̄т аквъёт яныгмам юртанэ, а̄гиянэ номылматыглыянэ, то̄ванэ ос а̄тимыг е̄мтмыт. Та̄рвит о̄лупсал о̄лыманыл, та̄н та̄нкина̄ныл но̄хсаватыманыл манос вина айнэ паттыиг, са̄всыр лю̄ль тэ̄рпи ос наркотикыт ма̄гыс хотталь щалтсыт. Ань артистанув пуссын тот ва̄рыглахтым матыр ёнге̄гыт. Ты ма̄хманум ёт а̄нумн сака пӯмыщ рӯпитаӈкве, та̄н ётаныл аквтупмат а̄ти нас рӯпитэ̄гын, та̄н ётаныл ам аквторыг о̄лэ̄гум. Валентин иӈ ма̄ньлатыг о̄лы кос, ос такви номтанэ̄т тав сака мӯтраӈ пыг. Тав о̄с та̄рвит о̄лупсал о̄лыс ос тахольт таквина̄тэ витыг ат тотыстэ. Ань то̄ва а̄гитпыгыт лю̄льсаӈ ул вос о̄лсыт, мори ул вос капыртасыт, таима̄гыс ма̄н ты концертув тох ва̄рыслӯв. Та̄н ма̄нав вос хӯнтамлыяныл, торгамтыяныл ос э̄лаль о̄лнэ посыӈ ёмас хо̄тал вос кинсэ̄гыт. Ты концертув спектаклиг ва̄рнэ щирыл щё̄питаӈкве ма̄н КТЦ «Югра-Классик» рӯпитан хо̄тпатн сака нё̄твесӯв. Та̄нанылн яныг пӯмащипа ла̄тыӈ ла̄ве̄в. Та̄н ма̄навн э̄рнэ маснут ю̄нтсыт, мо̄т э̄рмыглан пормасыт хо̄нтсыт. Тувыл ёнгилӯв на̄йпосыл ёмщакв постувес, ёмас суйил ва̄рвесӯв». Валентин Неттин такви уре̄т о̄с аквкит ла̄тыӈ потыртас. Тав о̄влэ̄т Тэ̄к па̄вылт о̄лыс. Оматэ а̄тимыг е̄мтме юипа̄лт Ха̄льӯс интернатын ке̄твес. Атыт классыт ханищтахтаме порат ханищтан нэ̄ ня̄врамытын матах ла̄тыӈ ловиньтас ос тыгыл э̄лаль матыр хансуӈкве ла̄выс. Тав мо̄тыт хо̄талэ̄т такви хансум ёмас стих тотыс. Та юипа̄лт пыг акваг матыра̄ти хансуӈкве патыс. То̄ва стиханэ радио хосыт ловиньта̄лсанэ, районный газетан хансыглаве̄сыт. Тувыл Валентин ёмащакв по̄слуӈкве ха̄сы. Ты ва̄рмале хосыт тав са̄тыт классыт Ханты-Мансийскан Искусство центр школан ханищтахтуӈкве во̄ввес. Ос тувыл матрыг таве̄н э̄ргуӈкве ос йӣквуӈкве сака таххатас. Тот аквторыг «актёрское мастерство» тэ̄лан ханищтаве̄сыт. Акв урок ма̄гыс таве̄н рэпэ̄рыг щё̄питаӈкве э̄рыс. Валентин та порат Децл хум э̄рганэ э̄ргысанэ. То̄нт тав о̄с э̄ргуӈкве, йӣквуӈкве ханищтахтас. Тувыл ты ва̄рмаль школа ма̄хманэ̄н такем мӯстыс. Ань та па̄сыл Валентин э̄рыгсовыт э̄лаль хансуӈкве та патыс. Ам номсыке̄м, тав э̄рганэ ла̄щмарт о̄с са̄в ма̄хумн тах хӯнтамлавет. Ань театр концертаныл кит щёс суссылтасаныл, тот ӯнлын ма̄ а̄тим о̄лыс, таса̄вит мир та ёхтыс. Тувыл, сусте̄мт, ма̄хум тот сака пӯмщалахтым хӯнтлэ̄гыт ос э̄рыгсовыт э̄ргим порат то̄ват ка̄тпатта ра̄тым ӯнлантасыт.

1068 2014.01.24. Светлана РОМБАНДЕЕВА

Ня̄врамыӈ э̄щ. Ты мо̄йтэ̄рыг Николай Иванович Хозумов тав мо̄йтыстэ, нэ̄пакн С. Ромбандееван хасвес. Николай Иванович ла̄внэ̄тэ щирыл, ты мōйтэ̄рыг охсатэ э̄ргаве, охсатэ потыртаве. Ты, улпыл, пе̄с порат ōлум нак. Акв ōйка пастухыг ōлы, са̄лыӈ ōлыс. Э̄ква ōньщи, яга̄ги ōньщи, аквъёт са̄лыл яласасыт. Щёлыӈыт ōлсыт, са̄лыӈыт. Тав ōйка пастухыг ōлы, рӯпиты. Э̄ще ня̄врам ōньщис, а̄гирищ ōлыс. Таима̄гыс э̄ще ōньге̄н лавылнэ̄гылттавес, лю̄камтавес, халэ̄нт акваг ля̄втсы̄г. Тав каӈке̄н ла̄ви, каӈке ос э̄кватэ тармыл патытэ. Ётыл каӈке ла̄палытэ, ōньге̄н ат э̄руптанэ̄тэ ат ла̄ви. Тувыл ань э̄ще номылматас таквинатэ порслаӈкве. Щёлыӈыт ōлсыт, аквхурип хӯрум я̄ӈк ōщсыт. Каӈке̄н ла̄выс, са̄лыт юв вос тотыянэ: – Аквхурип хӯрум я̄ӈкум ёлпуве̄лын. Та на̄ӈкнэ ха̄льщахылн ялэ̄гум ща̄й маныгтаӈкве, пум маныгтаӈкве. Са̄лыянэ пувве̄сыт каӈке̄н, номсы, сōль, нас ялы. Каӈке сунсы, ань а̄гирище вōртыпал нупыл та̄лттыстэ, хаслыстэ, ёлнэ̄гсаластэ. Каӈке китыглахты: – Манрыг ня̄врам тох та̄лттылын, сохтыл та̄лттэ̄лын. Са̄лыянэ ос ке̄руӈкве патсанэ, вōртыпал нупыл ке̄риянэ. Каӈке ōс ка̄саластэ, ла̄ви: – Маныр, наӈ са̄лыянын ке̄руӈкве ёрувласын, вōртыпал нупыл ке̄риянын. Э̄кватэ юн ōлы, ань ōйкатэ э̄щ ат э̄руптытэ, хумус коннэ̄глы. Э̄ще э̄рги: Ягпыгкве, ягпыгкве, Акв хурипа хӯрум я̄ӈкте̄нын Ёлпувиньтэте̄на Та нэ̄ щахылна ща̄й маныгтаӈкве, Пум маныгтаӈкве ялэ̄гум Пе̄с май ща̄й нас маныгтэ̄гыт. Каӈке̄н аквхурип хӯрум я̄ӈке ёлпувве̄сыт, а̄гирище во̄ртыпал нупыл та̄лттыстэ, са̄лыянэ во̄ртыпал нупыл ке̄рсанэ, тувыл лю̄ньщимтыстым та минас. Каӈке ӯрхаты, э̄ще а̄ти, минаме хӯрмит хо̄тал. Кисмаитэ, та на̄ӈкнэ ха̄льщахылн минас. Тув ёхты, нэ̄матыр ща̄й ат маныгтас, пум ат маныгтас. Ёмащакв сунсы, ань са̄лыянэ касаил пуссын щамаве̄латаманэ, а̄гирище хотпорслам, такви порслахтам. Тувыл о̄йка кантмувес, юв ёхтыс, э̄кватэ о̄с щамаве̄латастэ, порсластэ. Потыр тувыл та.

1069 2014.02.07. Александр ВЬЮТКИН

Губернаторувн янытлым хум. Газетав о̄выл ло̄псэ̄т Александр Дмитриевич Сайнахов хурит по̄слым о̄лы. Александр такви Ха̄льӯс район Сӯкыръя па̄вылныл о̄лы. Ань рӯт ма̄хманэ пуссын тот о̄лэ̄гыт. Яныг ӯсыӈ ма̄н армият лӯсытам юипа̄лт 1995 та̄лт ва̄нтлыс. Тот тав Сургут ӯст о̄лнэ ГПТУ № 17 йӣвныл матыр ма̄щтырлан хумыг тит та̄л ханищтахтас. Училище а̄стлуме юипа̄лт тав та̄ра «Пе̄с Сургут» нампа музей колн ма̄щтырлан хумыг рӯпитаӈкв вуйвес. Та па̄сныл тав тот акв ма̄т ма̄щтырлым рӯпиты. Такви ка̄тыл ва̄рум пормасанэ щирыл тав са̄в ма̄т ва̄ве ос ханьщаве. Хотьютын матыр э̄рмыглан порат, тав нэ̄мхотты порат по̄хан ат мины. Маныр э̄ри нё̄ты, хумус э̄ри хӯлты. 2008 та̄лт тав «Народный мастер России» намыл майвес. Та юипа̄лт 2012 та̄лт ма̄щтырыг о̄лнэ ма̄хум халт касыл о̄лнэ порат «Лучшая экспозиция» нампа каснэ ма̄т щар о̄выл ма̄н пе̄риявес. Ты йильпи ёхтум та̄лт Александр Дмитриевич рӯпатанэ щар ма̄к ма̄щтырыг ва̄рнэ̄тэ ма̄гсыл «Премия губернатора» нампа олн мӯйлупсал майвес. Ма̄н ос ты ёмас олнмӯйлупсал маима ва̄рмалитыл таве янытлылӯв. Са̄в ёмас са̄всыр утанэ та̄кыг, хорамыӈыг вос а̄ртме̄гыт. Тамле ёмас ма̄ньщи хотпа э̄лаль о̄лнэ хо̄таланэ вос са̄вме̄гыт.

1069 2014.02.07. Валентина УЗЕЛЬ

Пенсияолн йильпи щирыл ловиньтаӈкв патаве. Ты э̄тпост округувт рӯпитан пенсионный фонд яныг кӯщае Татьяна Зайцева ля̄ххал тотнэ ма̄хум акванатыгласанэ. Мо̄лты та̄лт Россият йильпи федеральный са̄ккон пирмайтавес. Ань та са̄ккон щирыл 2015 та̄л па̄сныл пенсия щар йильпи щирыл ловиньтаӈкв патаве. Ос та та̄л мус пенсиян минам ма̄хум та̄н манах солко̄вил ловиньтаве̄сыт, э̄лаль аквтох ойтуӈкв патавет. Ос ань рӯпитан ма̄хум та̄нанылн ты са̄ккон щар ёмащакв ва̄ӈкв э̄ри. Ма̄н ка̄сыӈ хо̄тпа рӯпата олнанувныл «страховой взносыг» ла̄внэ олн ювпуваве. То̄ват ос ты коныпал мо̄т ма̄т (негосударственный пенсионный фондыт) олн о̄с атэ̄гыт. Та̄н манах олн пенсияныл мус ойтэ̄гыт, та са̄витныл та ловиньтавет. Ос ма̄к ты ва̄рмаль 2015 та̄лныл ва̄раве. То̄нт ты та̄рапаты: са̄в та̄л рӯпитам хо̄тпат, ат рӯпитам ма̄хум ос ма̄нь трудовой стаж о̄щнэ хо̄тпат та̄н пенсияныл манах са̄витыг е̄мты. Ты 2014 та̄л юипа̄лт ат рӯпитам ма̄хум та̄н сака мощща олныл ойтуӈкв патавет. Ань ты та̄л мус пенсиян минам ма̄хум та̄н пе̄с щирыл мощ са̄внув олныл тах ойтавет. Округувт ка̄сыӈ та̄л «минимальный прожиточный минимумыг» ла̄внэ ва̄рмаль манах солко̄вил хансаве, акв таса̄вит солко̄ви ат рӯпитам ма̄хум ань выгыт. Ос та та̄лныл щар мо̄т щирыл ва̄раве, нэ̄мхо̄т ат рӯпитан ма̄хум та̄н тыгыл тит щёс мощщанув олныл ойтуӈкв патавет. Ань ты та̄л округувт «прожиточный минимум» 8 со̄тыра 814 солко̄вил хасвес. Тувыл ты ловиньтаӈкв ро̄ви, стаж ат о̄щнэ ма̄хум пенсияныл манса̄витыг е̄мты. Ня̄врам о̄щнэ нэ̄квет та̄н ня̄враманыл ёт юн о̄лнэ та̄ланыл о̄с стажиг ловиньтавет. Тит ня̄врам о̄щнэ нэ̄ «минимальный стажиг» вос хансаве, таве̄н туп тит та̄л рӯпитаӈкв ро̄ви. Та̄ланэ акванловиньтавет, ат та̄лыг е̄мты. Хум хо̄тпатн акв тамле «минимальный стаж» ма̄гыс о̄с ат та̄л рӯпитаӈкв э̄ри. Тамле хо̄тпат пенсиян миннэ̄ныл порат «трудовой» пенсиял хансавет. Ос щар нэ̄мхо̄т ат рӯпитам ма̄хум та̄н «социальный» пенсиял тах мивет. Татьяна Зайцева э̄лаль тамле ва̄рмаль урыл потыртас. Та̄н палтаныл яныгпа̄ла ма̄хум ёхталэ̄гыт, пенсияныл урыл титыглахтэ̄гыт – нэ̄мхуньт ат рӯпитам хо̄тпа ос са̄в та̄л рӯпитам хо̄тпа пенсияге̄н а̄латы аквса̄витыг ловиньтаве̄г, манрыг тох? Кӯщай нэ̄ ты урыл тох ла̄выс, тыи ёмас ва̄рмаль хунь, со̄ль, тох ва̄руӈкв ат э̄ри кос. Ос кӯщаит ты ва̄рмаль та̄рапаттуманыл юипа̄лт ань йильпи са̄ккон э̄рнэ щирыл хассаныл. Ань тох ва̄раве, са̄в та̄л рӯпитам хо̄тпа са̄в олн тах выг, ат рӯпитам хо̄тпа ос пенсиятэ мощщаг ловиньтаве. Ань рӯпитан нэ̄квет пенсиян 50 та̄ланыл то̄влын порат минуӈкв ве̄рме̄гыт. Ос 55 та̄ланыл мус та̄н иӈ ат та̄л рӯпитаӈкв те патэ̄гыт ос пенсияныл ты ат та̄л сыс ат те выганыл, то̄нт та̄н са̄в пенсияолныл ловиньтавет.

1069 2014.02.07. Александр ВЬЮТКИН

Ща̄нь ла̄тӈув э̄лаль ялтуптаве. Ханты ос ма̄ньщи ла̄тӈыг ханищтан ня̄врамыт халт касыл о̄лум порат ам Валентина Ильинична Вахрушева ёт ва̄йхатасум. Валентина Ильинична Кондинский район Шугур па̄выл школат ня̄врамыт ма̄ньщи ла̄тӈыл потыртаӈкв ханищтыянэ. Тав потре э̄лаль ловиньтэлы̄н: «Ма̄н школавт яныгса̄т ва̄т нупыл нёлолов ня̄врам ханищтахты. Та̄н халанылт нёлса̄т нупыл хо̄т соссаӈ ня̄врам о̄лы. Са̄выӈпа̄лэ ня̄враманув ма̄ньщииг хансым о̄лэ̄гыт. Кондинский район соссаӈ ма̄хум о̄лнэ ма̄наныл рущит мус щар ляпа ма̄г о̄лыс. Таима̄гсыл ты, тот о̄лнэ ма̄ньщит ща̄нь ла̄тӈаныл хотёрувласаныл. Ань яныгман ня̄враманув пе̄с ма̄хум о̄лупсаныл ос ла̄тӈаныл ат ва̄ганыл. Та̄н оманыл, а̄тяныл ща̄нь ла̄тӈаныл ат ва̄ганыл, хотьют ва̄г, халанылт ат потыртэ̄гыт. Таима̄гсыл ты ла̄тӈаныл хот ёрувлахтас». Валентина Ильинична палт аквписыг ва̄т ня̄врам ма̄ньщи ла̄тыӈ ханищтаӈкве яланты. Та̄н халанылт юио̄выл тит классыгт ханищтахтын на̄врамыт «Элективные курсы» нампа ханищтапн са̄т сыс акв щё̄с ялантэ̄гыт. Та коныпал мощ мо̄лалнув пирмайтым са̄ккон щирыл, о̄выл ханищтахтын хӯрум класс ня̄врамыт ёт ма̄ньщи ла̄тыӈ ханищтап ва̄рвес. Рущ ла̄тӈыл «Курсы мансийского языка» ла̄ваве. Та курсын ос аквхуйполов ма̄нь ня̄врам ёхталэ̄гыт. Валентина Ильинична ла̄ви: «Ты са̄т хо̄тал сыс туп акв щё̄с ла̄тыӈ ханищтан ма̄гсыл миве, тыи сака мощща. Ты хо̄тал ма̄н ты ла̄тӈыт ханищтыянӯв. Са̄т хо̄тал оигпан сыс ня̄врамыт ханищтам ла̄тӈыт хотёрувлыяныл. Акв та ла̄тӈыт о̄ста йильпииг ханищтаӈкв э̄ре̄гыт». Валентина Ильинична ма̄ньщи ла̄тыӈ ханищтан ня̄врамытыл Ханты-Мансийск ӯсн тит а̄ги Татьяна Кутмарова ос Лидия Рогачёва ёт тотыгласаге. Тэ̄н сас Кондинский район янытыл ма̄ньщи ла̄тыӈ касыл о̄лме порат ня̄врамыт халт но̄хпатсы̄г. Таня омагеа̄тяге сас ма̄ньщииг. Тэ̄н ма̄ньщи ла̄тӈыл щар ат потыртэ̄г. Лида омагеа̄тяге ос сас рущиг. Лида ла̄ви: «Ам ма̄ньщи ла̄тыӈ ханищтаӈкв, о̄лупсаныл ва̄ӈкв сака ка̄саще̄гум. Хосат, хунь ма̄н о̄парищанув та̄нти о̄лупсанылт тыг о̄лмыгтасыт, ма̄ньщи ма̄хум пе̄с йис о̄лупсаныл хоттыпылтасаныл. Таима̄гсыл ам ань на̄н о̄лупсан урыл пуссын ва̄ӈкв таӈхе̄гум. А̄нумн тыи нас пӯмащ». Э̄лаль ханищтан нэ̄ ла̄выс: «Ты коныпал а̄гирищанув ка̄тыл ма̄щтырлан ма̄н ялантэ̄гыт. Тот та̄н а̄канит ю̄нтэ̄гыт, сакыл са̄всыр хорамыт хартэ̄гыт, тувыл ка̄тыл по̄слуӈкве ханищтахтэ̄гыт. Ня̄врамыт ка̄тыл ма̄щтырлаӈкве Ирина Семёновна Шифторован ханищтавет. Хум ня̄враманув ос ма̄вит ӯргалан ва̄рмаль ханищтэ̄гыт. Та̄н во̄раяӈкв ос хӯл алыщлаӈкв о̄с ханищтахтавет, во̄рын атах хо̄талын тотыглавет, тот мощ во̄рае̄гыт, няслэ̄гыт. Ма̄н па̄выл ня̄враманув юртыӈыщ о̄лэ̄гыт, ханищтахтэ̄гыт. Яныг хо̄тпат нупыл ёмас самыл сунсэ̄гыт, тыи ма̄гыс ма̄н сыманув ща̄гтым о̄лэ̄гыт».

1069 2014.02.07. Александр ВЬЮТКИН

Ла̄тӈув э̄лаль тотнэ ня̄врамыт. Та̄л котиль э̄тпост Ханты-Мансийск ӯст ма̄ньщи ос ханты ла̄тыӈ ва̄нэ ня̄врамыт халт ла̄тӈыг щирыл олимпиада нампа касыл ва̄рыглавес. Ты касыл Николай Иванович Терёшкин, ханты учёный хум, наме янытлан ма̄гсыл намая̄лвес. Николай Иванович о̄лме̄т, ханты ма̄хум халт мирн ва̄нэ щар о̄выл учёныиг о̄лыс. О̄лме щирыл тав ты та̄л яныгса̄т акв та̄лэ то̄влынув. Ты кастыл округув янытыл аквъёт пуссын хо̄тхуйполов ня̄врам Ханты-Мансийск ӯсн ёхталасыт. Титтыгуртхатым щирыл, халанылт онтолов ма̄ньщи ос онтолов ханты ня̄врам о̄лсыт. Ты та̄л олимпиада о̄лум хо̄тал малтып хо̄талыг то̄рмувн ва̄рыглавес. Таима̄гсыл ты са̄в каснэ ня̄врам ёхталас. Ня̄врамыт касыланыл о̄вылтаӈкве Надежда Геннадьевна Алексеевна ёхталас. Тав округ Дума соссаӈ ма̄хум Ассамблеят депутатыг о̄лы. Касыл о̄вылтан э̄лыпа̄лт ня̄врамытын янытлан ла̄тыӈ ла̄выс: «Ка̄сыӈ йильпи ёхтын та̄лт ма̄ньщи ос ханты ла̄тӈагув ва̄тихал мо̄тмо̄т ма̄т суйтыглэ̄г. Хотьют иӈ ма̄к потырты тыи яныгпа̄лаг о̄лнэ ма̄хманув. Ань тыгыл ты э̄лаль ща̄нь ла̄тыӈ тотнэ ма̄гыс потыртан мус таве ханищтаӈкв э̄ри. Мо̄т щирыл ла̄тыӈ та̄л хультын ма̄хум яныг мир халт тэ̄лыглы, таи ты сака лю̄ль. На̄нти ща̄нь ла̄тӈанын yльнаг ул хультуптэлы̄н, яныгпа̄лаг о̄лнэ ма̄хум ос ма̄н на̄н нупылын номт пинэ̄в. Ма̄н пуссын на̄нан агтэ̄в. Ка̄сыӈ та̄лт ла̄тыӈ ла̄тыӈ ва̄нэ на̄врамыт вос са̄вме̄гыт». Ма̄ньщи ос ханты ня̄врамыт титтыгуртхатым кассыт. Ма̄ньщи ня̄врамыт рӯпатаныл Маина Ефимовна Макарова, Диана Васильевна Герасимова ос Светлана Селивёрстовна Динисламова уральтым о̄лсыт. Ня̄врамыт са̄всыр нампа ат каснэ рӯпатал майлуве̄сыт. Ёмщакв ва̄рум рӯпатаныл ма̄гсыл хо̄тпан балл виӈкв ро̄выс. О̄выл рӯпатанылт ня̄врамыт ёт ща̄нь ла̄тӈыл потыртаӈкв э̄рыс. Ня̄врамытн торгамтаӈкв э̄рыс, маныр урыл таве титыглаве ос маныр таве̄н ювле ла̄вуӈкв э̄ри. Титыт рӯпатанылт ня̄врамн ос такви номтанэ щирыл манос хотты ма̄нь ма̄ньщи мо̄йт хансуӈкв э̄рыс. Хӯрмит заданиянылт ос мо̄йт ловиньтан щирыл касыл о̄лыс. Ня̄врамн таве хӯнтлан ма̄хмытн ла̄тӈанэ торгамтан щирыл мо̄йт ловиньтаӈкв э̄рыс. Та̄нанылн та̄рвитыӈ вос о̄лыс, мо̄йт ла̄тӈанэ мори тэ̄лыгта̄лве̄сыт. Ла̄тӈыт э̄рнэ щирыл акв юипа̄лт о̄лтуӈкв э̄рыс. Тувыл ёмщакв хаснэ ма̄гсыл акв задание майлувес. Тот ос са̄всыр щирыл тэ̄лыгтым лов предложения ёмщакв хансуӈкв э̄рыс. Ты задание та̄н ёмщаквег те ва̄рияныл, хӯс баллыл пинуӈкв ве̄рмуве̄сыт. Юио̄выл атыт рӯпатаныл ма̄ньщи ла̄тӈыл хансым потыр рущ ла̄тӈыл хансуӈкв э̄рыс. Ханты ня̄врамыт халт Белоярский район Касум па̄вылныл ёхталам ханты пыг Денис Ерныхов но̄хпатыс. Тав такви о̄лнэ районэ̄т ва̄рыглан касылт аквписыг касы. Тыт тав ханты ос ма̄ньщи ня̄врамыт халт щар са̄в, хо̄тпан нупыл са̄т балл вис. Пыгрищ юипа̄лт Рита Пяк но̄хпатыс. Тав хо̄тпан нупыл нила балл вис. Рита Сургутский районныл ёхталас. Хӯрмит хо̄тпаг Анжела Анадеева е̄мтыс. Тав атпан нупыл ат балл вис. Ма̄ньщи ня̄врамыт халт о̄выл места Ха̄льӯс район Саранпа̄выл ня̄врам Миша Ромбандеев вистэ. Тав хӯрмиттыг тыг касуӈкв ёхталас. Титыт места Екатерина Пашина вистэ. Тав Октябрьский районныл о̄лы. Хӯрмит ма̄ Кондинский районныл ёхталам а̄гин вуйвес. Тав наме Лидия Рогачёва. Каснэ̄тэ щирыл тав атпан нупыл нила балл вис. Но̄хпатум хӯрум ня̄врам дипломыл ос олн о̄щнэ сертификат нампа нэ̄пакыл мӯйлуптаве̄сыт. О̄выл места вим хо̄тпан ат со̄тыра̄, титыт места вим ня̄врам нила со̄тыра, юио̄выл хӯрмит места ма̄гсыл хӯрум со̄тырал мӯйлуптаве̄сыт. Тувыл мо̄т ня̄врамыт ос пӯмащипа ла̄тӈыӈ пищмал майве̄сыт. Касыланыл юипа̄лт жюриг о̄лнэ ма̄хум иӈ са̄в ёмас янытлаӈ ла̄тыӈ ня̄врамытын ла̄всыт. Та̄наныл хӯнтлум ня̄врамыт мо̄тантыг ёхталаӈкв о̄с ла̄вхатсыт. Хоты ма̄ныл, хоты витыл о̄лнэ ня̄врамыт, ма̄н та̄наныл пуссын cымыӈыщ янытлыянӯв. Та̄нти ща̄нь ла̄тӈаныл аквтох э̄лаль вос ханищтыяныл ос тотыяныл. Мо̄т ма̄хмыт та̄нти ла̄тӈыл потыртаӈкв о̄с ул вос э̄ссамтэ̄гыт.

1069 2014.02.07. Тамара МЕРОВА

Культураг намаим та̄л кастыл рӯпата та о̄вылтавес. Ва̄т саграп нал э̄тпос ва̄тыт хо̄талэ̄т «Год культуры» о̄вылтахтам та̄л кастыл ӯсыт ос районыт культура колыт щирыл рӯпитан ма̄хум Ханты-Мансийскат акванатхатыгласыт. Та̄н «Сохранение и развитие духовных традиций народов Югры» нампа форум ва̄рыгласыт. Тот 200 э̄лумхолас акванхо̄нтхатыгласыт, Тюменский дума па̄лыл депутат Геннадий Корепанов ёхталас. О̄вылт мӯй ма̄хум э̄лыпа̄лт ӯс ос район кӯщаиг, православный ос мусульман мир яныг кӯщаиг, округ культура па̄лыл рӯпитан хо̄тпат паща ла̄тыӈ ла̄всыт. Екатерина Ермакова, Ханты-Мансийск культура профсоюзыт пуӈктотнэ нэ̄, э̄сгын нэ̄пакыл мӯйлуптавес. Тувыл хо̄тал сыс мӯй ма̄хум я̄нас хо̄т колнакыт рӯпитасыт. Та̄н та̄нки культурный программаныл о̄вылтыт, рӯпатаныл ва̄рнэ ма̄гыс олн нё̄тмил урыл потыртасыт. Тувыл маныр проектыт ёт та̄н аквъёт э̄лаль рӯпитаӈкве ве̄рме̄гыт, таи та̄рапаттысыт. Юио̄вылт Василий Филипенко, Ханты-Мансийск ӯс кӯщай, ос районыт о̄лнэ кӯщаит культура тэ̄лат ёт аквъёт рӯпитан соглашениенэ̄пак хассыт. Пуссыт ты ва̄рмалит о̄вылтыт ам ётыл я̄нас потыр тах хансэ̄гум.

1069 2014.02.07. Светлана РОМБАНДЕЕВА

Ня̄врамыт самыл сунсым о̄ньщавет. Та̄л котиль э̄тпос 24 хо̄талэ̄т Ханты-Мансийск ӯст «Югра» нампа ля̄ххал тотнэ колт Татьяна Дмитриевна Моховикова потыртас. Ты нэ̄ округув янытыл о̄лнэ савалап ня̄врамыт тармыл патнэ ва̄рмаль палт кӯщаиг рӯпиты. Ля̄ххал тотнэ хо̄тпатн тав китыглавес, ань ня̄врамыт матыр та̄рвит о̄ньще̄гыт манос пуссын ёмащакв о̄лэ̄гыт, та̄рвит ва̄рмаль е̄мталан порат та̄наныл та̄н хумус нё̄тыяныл. На̄н ань э̄лаль Татьяна Дмитриевна потре ловиньтэлы̄н: Савалап ня̄врамыт манос ща̄ньа̄щныл по̄хан вуим ня̄врамыт ма̄н палтув пищма ва̄тихал ке̄тыглэ̄гыт, та̄рвитыӈ тэ̄ланыл урыл потыртэ̄гыт. Ювле хультум та̄лт 527 пищма ёхталас. Ма̄н ка̄сыӈ пищма ёмащакв ловиньтылӯв, пищма ке̄тум ка̄сыӈ ня̄врам ёт хо̄нтыглахтэ̄в, потраме̄в. Са̄выӈпа̄лэ та̄н кӯщаяныл урыл хансэ̄гыт, то̄ва ня̄врам ат нё̄таве, то̄ва ла̄пала̄лаве. Са̄в ня̄врам рӯт ма̄хманылн лю̄камтавет, роттыг о̄луӈкве ат ве̄рме̄гыт. То̄ва о̄лнэ кол ат о̄ньщи, то̄ва э̄рнэ нэ̄пак ка̄тынпаттуӈкве ат ве̄рми ос мо̄т са̄в тэ̄ланыл урыл пищманылт хансэ̄гыт. А̄гмыӈмосыӈ ня̄врам о̄щнэ хо̄тпат о̄с хансэ̄гыт. Ма̄н ка̄сыӈ ще̄мьян нё̄тэ̄в, ка̄сыӈ ня̄врам самыл сунсым о̄ньщилӯв. Ос сака та̄рвитыӈ тэ̄лат е̄мтапан порат, полициян пищма ке̄тэ̄в, тувыл сутытахтэ̄в. То̄ванакт ос пищма Павел Алексеевич Астаховын хансыглэ̄в, тав Россия янытыл ня̄врам вуянтан организацият кӯщаиг о̄лы. Депутатанувн о̄с хансыглэ̄в, нё̄таве̄в. Сака са̄в ще̄мьят нуса тотым та̄рвитыӈыщ о̄лэ̄гыт, ня̄врамыт савалэ̄гыт. Ма̄н са̄в рӯпитэ̄в, по̄х хо̄тпатыл нё̄тмил кинсэ̄в, э̄рнэ нэ̄пакыт хансэ̄в. То̄ва ще̄мьятын иӈ нё̄туӈкве ро̄ви, иӈ а̄лыме̄в, ос то̄ват ма̄н воссыг нэ̄матарыл нё̄туӈкве ат ве̄рмиянӯв. Ля̄ххал тотнэ нэ̄ С. В. Поливанова прививкат урыл китыглахтас. Тав ла̄внэ̄тэ щирыл, ань 14 та̄л яныт ма̄ньлат а̄гирищит пувласпи а̄гмыл (рак шейки матки) ул вос е̄мтэ̄гыт, прививкатыл ва̄руӈкве патавет. Ос таи лю̄ль, ты прививка ва̄рнэ юипа̄лт, са̄в а̄гирищ та̄рвитыӈ а̄гмыл е̄мтуӈкве ве̄рми. Япония ма̄т тамле ут ва̄рим юипа̄лт, нёлолов а̄гирищ савалаӈкве патсыт, ё̄мыгтаӈкве ат ве̄рме̄гыт. Тув мус та а̄гмыӈыг е̄мтсыт. Наӈ хумус номсэ̄гын, тамле прививкат ва̄руӈкве э̄ри? Татьяна Дмитриевна тох ла̄выс: Ам хӯрум а̄ги янмалтэ̄гум, а̄гиянум тамле прививкатыл ва̄руӈкве ам ат ка̄саще̄гум. Амти тамле утыл ат ва̄рыглаве̄сум, ам яныгмамум порат тамле ут матъёмас а̄тим о̄лыс. Ос ам хунь ла̄ве̄гум, тамле прививкат ат э̄ри ва̄руӈкве. Ка̄сыӈ ща̄ньа̄щ такви номсы, ня̄враме̄н прививка ва̄руӈкве ман а̄ти. Курский областьт май 135 ня̄врам ос 10 яныгхо̄тпа корь нампа а̄гмыл а̄гмыӈыг е̄мтсыт. Хунь ле̄ккарытын уральтаӈкве патве̄сыт, насати нэ̄мхотьютаныл прививкатыл аты ва̄рыглымат. Ты ёмас хунь, ма̄к э̄рнэ ка̄сыӈ прививка поратэ ёхты, ня̄врамытын атхунь та̄ра ва̄руӈкве э̄ри. Акв хумн тав Ренат пыгрищ урыл китыглавес. Ювле хультум та̄лт пыгрищ ань оматэ̄ныл хотвуйлыма, оматэ наркоманыг о̄лы, пыгрищ юн савалас. Тувыл оматэ сутытахтас, пыгрище ювле майвес, ос та мат лю̄ль пище ат хӯлистэ. Ля̄ххал тотнэ хум Ренат пыгрищ ма̄гсыл сыме ща̄рги, китыглахты, тав ань хумус о̄лы? Ща̄не ёт о̄лы? Татьяна Дмитриевна ла̄внэ̄тэ щирыл, ты ня̄врам та̄н ётыл о̄с хотвисаныл, тав ань ща̄не ёт ат о̄лы. Щаще̄кваге̄но̄паге̄н вуйвес, пыгрищ мӯсхал щирыл о̄ньщаве, янмалтаве. Тувыл о̄лнэ кол урыл китыглавес. Савалап ня̄врамыт о̄лнэ кол пуссын о̄ньще̄гыт ман а̄ти. Ты кӯщай нэ̄ ла̄внэ̄тэ щирыл, 2008 та̄л мус ты ва̄рмалюв та̄рвитыӈыг о̄лыс, то̄ва хо̄тпа о̄лнэ колыл миӈкве ат ве̄рмувес. Ань тай ма̄хманув ёмащакв рӯпитэ̄гыт, ня̄врамыт о̄лнэ колыл пуссын мивет, пуссын о̄ньще̄гыт. Ка̄сыӈ хо̄тпа нё̄таве, уральтаве, ань колэ мори ул вос тыналытэ, ул вос уркуптаве, кол та̄л ул вос хульты. Ма̄н ма̄хумн акваг ла̄выглэ̄в, матыр хӯнтамлэгы̄н те, эрыӈ савалап ня̄врам колэ тыналаӈкве таӈхи манос колэ̄н по̄х ма̄хум ёхталэ̄гыт, таве̄н торас ва̄ре̄гыт, ты урыл ма̄навн та̄ра ла̄ве̄н. Савалап ня̄врамн нё̄туӈкве э̄ри, тав ща̄ньа̄щ ат о̄ньщи, воссыг хотьютэ̄н нё̄таве.

1069 2014.02.07. Александр ВЬЮТКИН

Ӯсыт порс халн ты тэ̄лыглэ̄гыт. Та̄л котиль э̄тпост ва̄т нупыл титыт хо̄талт Ханты-Мансийск ӯс мирколт кӯщаиг о̄лнэ ма̄хум сапра̄ни ва̄рыгласыт. Сапра̄ниянылт щар яныг кӯщаиг окру Та̄н округув янытыл мори па̄хвтын порс анят ос лю̄льсаӈ ва̄рим порс атнэ во̄ӈхат урыл потыртасыт. Ка̄сыӈ район манос яныг ӯс кӯщай та̄нти ва̄рум рӯпатаныл урыл доклад нэ̄пак ловиньтасыт. О̄влэ̄т Наталья Комарова ла̄тыӈ ла̄выс: «Хо̄т та̄л сыс мори хуиглам хӯрумса̄т ляпатем порс анят хотвуйве̄сыт. 2013 та̄л сыс округув янытыл хо̄тпан нупыл хӯрум мо̄ри па̄хвтым порсыӈ ма̄ акванатвес ос ма̄тэ сыстамтавес. Ма̄н тыг о̄лмыгтамув юипа̄лт, округ янытыл ка̄сыӈ та̄л йильпи порс во̄ӈхат ва̄ре̄в. Пе̄с порат рущ ма̄хум нэ̄матыр урыл ат номсысыт. Та̄н нас ма̄во̄й ос газ но̄хвинэ плананыл то̄варттасаныл, тувыл та. Манырсыр о̄лнэ порсаныл мори мо̄тмо̄т ма̄т хультуптым, па̄хвтым оссувласаныл. Ань та порс во̄ӈхат сыстамтаӈкве ос ёмащакв щё̄питаӈкве э̄ре̄гыт. Ёмщакв ат те щё̄питыянӯв, хотьютын ва̄ве, маныр лю̄ль е̄мтуӈкв ве̄рми. Ань ня̄враманув пуста̄гыл э̄лаль о̄лнэ хо̄таланыл урыл номсуӈкв э̄ри. Хотьют ам ётум тох ат те ка̄сащи, вос ла̄ви, хумус тав номсы». Губернатор юипа̄лт Когалым ӯс кӯщаиг о̄лнэ хум Владимир Иванович Степура нэ̄паке ловиньтастэ. Тав ла̄выс: «Ӯсув янытыл порс по̄хан тотнэ щирыл тит компания рӯпиты. Мо̄лты 2013 та̄лт тэ̄н акванпотыртахтым ос халэ̄нт нё̄тхатым рӯпитаӈкв вуйхатсы̄г. Ань ӯст порс атнэ ос лаппантхатнэ те̄р хусапыт йильпи щирыл ва̄рсаныл. Тувыл та̄н по̄ханылт порс атнэ ма̄гсыл яныг ма̄ щё̄питасыт. Та коныпал та̄н хо̄талыӈ хо̄тал хольт на̄й по̄стын люминесцентная нампа лампочкат, са̄всыр батарейкат ос градусникыт пирмайтан кол пӯссыт. Та̄наныл ёмщакв ат те щё̄питаӈкв, та̄н са̄в лю̄ль мо̄сыӈ а̄гм ва̄ре̄гыт. Та а̄гмыл э̄лумхо̄лас а̄тимыг е̄мтуӈкв ве̄рми. 2013 та̄л сыс ӯс янытыл 160 со̄тыра тонна са̄всыр порс акв ма̄н тотвес. Ос та сыс порс атнэ йильпи ма̄ ва̄руӈкв о̄вылтавес. Тав Сургут ӯс нупыл минэ лё̄ӈх ляпат ос Когалым ӯсныл онтолов ве̄рыстан ва̄раве. Тот о̄лнэ ма̄тэ мил во̄ӈхаг хилвес ос порс атнэ во̄ӈхатэ мӯвлахи те̄рыл ва̄рим карс пӯсасыл лаппантвес. Порс атнэ ма̄тэ рӯпитаптын мус э̄рнэ щаӈкванэ пуссын ёвтве̄сыт. Тав тынэ 280 млн. солко̄ви са̄витыг е̄мтыс. 2014 та̄л оигпанэ̄тэ мус тав тах ва̄раве». Хум потыртан ма̄ныл а̄стуме юипа̄лт, Покачи ӯс кӯщай хум Раян Замелович Халиуллин потыртас. Тав ла̄выс: «Ма̄н Покачи ӯсувт ань о̄лнэ порс атнэ ма̄ 1989 та̄л па̄сныл рӯпитаӈкв о̄вылтахтас. Ань та во̄ӈха палытэ нила ве̄рыстаг ты е̄мты. Хосат та̄гыл тув тотым порс нумыл ма̄л лапра̄гпыслӯв. Порс сайлын ма̄ ле̄ккарытн ос ма̄вит ӯргалан ма̄хмытын ва̄тихал уральта̄лаве. Ма̄н ань ос йильпи во̄ӈха ва̄руӈкв номсэ̄в. Хумус ва̄рилӯв, ань та план нэ̄паканув щё̄питан ма̄ныл моще̄ртын ты а̄стэ̄гыт. Тувыл порс атнэ во̄ӈха ва̄руӈкв та̄ра та вуйхатэ̄в. Атахтем та̄л тах йильпи во̄ӈхан порс тотуӈкв патэ̄в. Пермь ӯст о̄лнэ компания ты проект щирыл ма̄навн нё̄ты». Сергей Владимирович Пикунов округ янытыл ма̄вит ос во̄руй ӯргалан кӯщаиг о̄лы. Тав сапра̄ният ла̄выс: «Ма̄н округув янытыл мори по̄варалын са̄в те̄р пӯщкат, хотсаквалым са̄всыр машинат ос А̄с я̄ ва̄татэ палыт пе̄с харӈайтым на̄иӈха̄пыт оссувлым хуе̄гыт. Ма̄н хумус номсэ̄в, та мори повара̄лнэ те̄рыт пуссын атуӈкв э̄ре̄гыт. Мо̄т щирыл та̄н харӈайтыманыл порат лю̄ль утаныл ма̄н ёлпосавет. Тувыл э̄лаль ма̄вит о̄с лю̄ль утытыл та тэ̄лыгтаве. Тыи пуссын щир мус щё̄питан кастыл са̄в олн э̄ри. Олн ка̄тынпаттэ̄в, та юипа̄лт я̄ ва̄та янытэ̄т ёмщакв тах щё̄питылӯв». Юио̄вылт Наталья Владимировна ла̄выс: «Хунь ма̄н акваннё̄тхатым рӯпитаӈкве патэ̄в, то̄нт ва̄рмалюв э̄лаль тах ущ нёвумты. Ты урыл э̄лаль номсахтэ̄н, ты ва̄рмаль акваннё̄тхатым кустырыг ва̄руӈкв э̄ри». Губернаторув Наталья Комарова о̄лыс.

1069 2014.02.07. Людмила ТЕТКИНА

Кондинский район 90 та̄лэ то̄влыс. Ты район 1923 та̄л яныг таквс э̄тпос 12 хо̄талэ̄т ва̄рвес. То̄нт тав Тобольский округ Уральский область нупыл ловиньтахтас. Районный центрыг Нахрачи па̄выл о̄лыс, ётыл 1961 та̄лт Кондинский па̄влыг намаявес. 1924 та̄л ре̄тыӈ ю̄свой э̄тпос 1-2 хо̄талыгт депутатыг пе̄риим хо̄тпат о̄выл съезданыл о̄лыс. Та па̄сныл 90 та̄л ювле та хультыс. 1930 та̄лт Кондинский район Остяко-Вогульский национальный округ нупыл хасвес. Ань Кондинский районт 27 яныг ос ма̄нь павылквет о̄лэ̄гыт. Районный центрыг 1994 та̄лныл Междуреческий па̄выл ва̄рвес. Та ма̄т 34 со̄тыра арыгкем э̄лумхо̄лас о̄лы, та̄н халанылт 5 со̄тыра арыгкем соссаӈ ма̄хум. Та районт Анна Митрофановна Конькова, Матрёна Панкратьевна Вахрушева, Андрей Семёнович Тарханов, мирн ва̄нэ ма̄ньщит, самын патсыт. Ань район 90 та̄лэ то̄влын кастыл та̄л сыс са̄всыр ялпыӈ хо̄талыт, суссылтапыт, каснэ ва̄рмалит ва̄рыглаӈкве патавет.

1069 2014.02.07. Тамара МЕРОВА

Ялъю̄с пе̄с ма̄ньщи па̄выл. Мо̄лты туи Ягримн ялмум порат ам Н. К. Захарова Ялъю̄с па̄вылт пе̄с о̄лупса урыл китыгласлум. Тав ты о̄вылтыт «Наследие» нампа пе̄с накыт кисхатнэ нэ̄н Л. Г. Галкинан ос ня̄врамытын са̄ртын потырта̄лыс. Ётыл та̄н пӯмащ нэ̄пак ва̄рсыт. Ань тувыл ам ловиньтам то̄ва ля̄ххалыт на̄нан хансыянум. «Березов острог» урыл хансым щар пе̄с потрыт палт тамле ва̄рмаль хӯлтэ̄гыт, Ялъю̄с па̄выл V-IV нотыт нижеобской культура о̄лыглам порат ӯнттыма. 1593 та̄лт Никифор Траханиотов Пе̄лум ма̄т ясак атнэ хум такви ма̄хманэ ёт Ха̄льӯс ӯнттуӈкве ке̄тве̄сыт. То̄нт ты ма̄хум Ялъю̄с па̄вылке урыл о̄выл щёс потырта̄лыгласыт. Ты па̄выл Лӯи Тагт я̄ хосыт сака нё̄тнэ карс ма̄т ӯнттувес. Са̄в нот ма̄ньщиянув тот о̄лсытхӯлсыт. Пе̄с порат ма̄хманув хумус о̄лсыт, маныр ва̄рсыт, ань ты о̄вылтыт Надежда Константиновна таи потыртас. «Ам Ялъю̄ст самын патсум, тот яныгмасум. Па̄влувт акв хоса ӯсхулы хосыт налыман арыгкем колыт ӯнттым о̄лсыт. Ма̄хманув пуссын та̄нки о̄лнэ коланыл по̄хат а̄мпарыт, мисколыт манос лувколыт о̄щсыт. Тувыл ка̄сыӈ ка̄рта кӣвырт ня̄нь ва̄рнэ кӯр кон ва̄рыгласыт. Па̄влув мувлахи такем ёмас сыстам во̄рыӈ ма̄т, са̄в ӯльпат, на̄ӈкыт, ховтыт, таргыт, ха̄ль ос хапка йӣвыт яныгме̄гыт. Ань то̄ва йӣвыт ниласа̄т та̄ланыл то̄влыс. Туи ма̄хманув па̄выл ляпат саӈквлыпил, морах, та̄хтпил, сӯйпил ва̄тсыт, сака э̄лы ма̄н минуӈкве ат э̄рыс. Та̄л палыт са̄всыр хӯл я̄т пувсӯв, ань ты е̄рувт туп ня̄лк толгыл алыщлэ̄в. Ма̄н пе̄с ма̄хманув хольт иӈ хоса о̄лсӯв, па̄влувт на̄йпос аты о̄щсӯв. Туи ёмас, э̄тыт посыӈыт, са̄в тэ̄лат ва̄руӈкве а̄лымасӯв. Во̄рт о̄лыгламувт, лё̄мвоитныл атыпыл пилсӯв. Ос сака илямтаве̄в ке, посымпут ва̄рыгласӯв. Тэ̄лы порат керащинаӈ ла̄мпал коланув постыгласанӯв. Номилум, кон сака ащирмаӈ, юн кӯрув ёмщакв па̄лтыглылӯв, ла̄мпав тэ̄г, ос ма̄н, ня̄врамыт, ане̄квав по̄хат акванатхатэ̄в ос тав мо̄йтанэ та хӯнтлэ̄в. Тав потырта̄лум ла̄тӈанэ юипа̄лт ма̄н акваг посыӈ номтыл э̄лаль о̄лсӯв, тав мо̄т ёмас о̄лупса е̄мтнэ урыл то̄внакт ма̄нав потырта̄лыс. Тувыл, со̄ль, на̄нки сусте̄нт, ань маныр йильпи о̄лупсал о̄луӈкве патсӯв. Ос то̄нт па̄влыӈ ма̄хманув пе̄с щирыл о̄лманыл халт са̄всыр ёмас манос та̄рвит накытн о̄с патыгла̄лсыт. 1913 та̄лт Ялъю̄с па̄выл та̄ра Ха̄льӯс нупыл «Морзе» телеграф ке̄р ква̄глыт хартуӈкве патве̄сыт. Телеграф потыртан то̄тап Молохов Паял колэ̄т ӯнттувес. Тав Ха̄льӯсныл ке̄тым ля̄ххалыт хӯнтлысанэ ос ма̄хумн потыртасанэ, па̄вылт о̄лум тэ̄лат ос тувле ке̄тыгласанэ. Советский Союзт хо̄т, маныр о̄лыглас ма̄н о̄с ва̄слӯв. О̄влэ̄т ма̄хум Октябрьский революция о̄вылтыт хӯнтамласыт. Ма̄н е̄рувт Красная Армия белогвардейцат ёт 1919 та̄л таквсы мус воритотсыт. 1941 та̄лт пилыщмаӈ ла̄тыӈ ёхтыс, война е̄мтыс. Хум хо̄тпанув о̄с тув тотыгпаве̄сыт. Па̄влувт нэ̄квет, ня̄врамыт ос яныгпа̄ла хо̄тпат хультсыт. Ма̄н пуссын акваннё̄тхатым хӯл алыщлым, во̄раим рӯпитасӯв. 1942 та̄лт Ялъю̄ст школа пусвес, тот Ираида Семёновна Кузьмина война оигпан мус ня̄врамыт ханищтасанэ. Тувыл мо̄т ма̄ныл ма̄хум тыг ке̄туӈкве патве̄сыт, рущ щирыл та̄н «спецпереселенцыг» ла̄вве̄сыт. Па̄влувт хӯрум ще̄мья Астрахань ӯсныл о̄лсыт, ос хӯрум колта̄гыл калмык ще̄мьят. Акв калмык хум Сергей Улемжиков ла̄пкат рӯпитас. Мо̄таныт Тагт я̄ тапа̄л ва̄тат о̄лсыт. Та̄н пуссын ма̄н ма̄ньщиянув ёт аквъёт «Леспромхозт» рӯпитасыт. Та̄н халанылт матахмат немец ще̄мья о̄лыс. Ма̄нки халувт пуссын юрщхатым о̄лсӯв. Ма̄хум а̄лпыл «гудок» суй хӯнтамлэ̄гыт, пуссын рӯпитаӈкве о̄вылтахтэ̄гыт. Ма̄н ма̄ньщи, рущ, немец, калмык ня̄врамыт пуссын школан ялантасӯв. Тот нила класс мус Желтова Таисья Васильевнан ос Таисья Васильевна Плоских ханищтавесӯв, школа кӯщаиг Галина Алексеевна Алексеева о̄лыс. Ётыл па̄влувт «Сталин» нампа колхоз ва̄рвес, нэ̄т мис поссыт, хум хо̄тпат вор яктым рӯпитасыт, туи картопка, капуста янмалта̄лсыт, хӯл алыщласыт, пум ва̄рсыт. А̄тям война оигпам юипа̄лт председателиг тув паттыглавес, ос 1948 та̄лт а̄тимыг е̄мтыс. Омам звероферма кӯщаиг о̄лыс, то̄нт тот ниласа̄т са̄вит сэ̄мыл охсар янмалтасыт. Па̄вылке̄вт ня̄нь ва̄рнэ кол о̄щсӯв. То̄нт ма̄н такем атыӈ ня̄нил тыттувесӯв. Киномеханик Сергей Гаврилюк ос нё̄тмил ва̄рнэ хумитэ Виктор Никитин ка̄сыӈ ӯщлахтын хо̄талт клубт кина суссылтасы̄г. Ты ва̄рмаль ма̄н аквписыг ӯрыслӯв, сака пӯмыщ пора о̄лыс. Медпункт о̄с о̄лыс, тот ле̄ккарыг Иван Давыдович Пакин рӯпитас. Тав э̄кватэ Агния Николаевна Пакина (Казаринова) клуб кӯщаиг о̄лыс. Ётыл ма̄нь колхозыт, совхозыт аквантотуӈкве патве̄сыт, ма̄хум ос яныг па̄вылн ва̄нтлуӈкве ла̄вве̄сыт. Ань па̄вылке̄в тох хотталь та со̄ймыс». Ма̄н ань Ялъю̄с па̄выл нас хультум наме коныпал матыр о̄лупсаӈ тэ̄лат та̄рапаттысанӯв. Ты пӯмыщ, э̄рнэ потыр ма̄гыс ам Надежда Константиновнан яныг пӯмащипа ла̄тыӈ ла̄ве̄гум.

1069 2014.02.07. Людмила ТЕТКИНА

Ма̄хум пусмалтам э̄ква. Нина Петровна Камаева ёт ам Ха̄льӯст хо̄нтхатыгласум. Ты э̄ква Тэ̄к па̄вылт налыман арыгкем та̄л ма̄хум пусмалтым рӯпитас. Пенсиян патхатаме юипа̄лт тав Ха̄льӯсн ва̄нтлас. А̄тятэ Пётр Филиппович Филиппов саран хум о̄лыс, рыбкоопыт председателиг рӯпитас. Акв порат Тобольск ӯсн рӯпата щирыл ке̄твес, тот тав э̄кватэ ёт акванхо̄нтхатсы̄г. Тувыл яныг ӯст о̄лум а̄ги Ха̄льӯсн о̄луӈкве тотыстэ. Пётр Филиппович ос Елена Павловна хӯрум ня̄врам янмалтасы̄г. Нина Петровна ла̄выс: «Ам акв каӈк ос э̄щ о̄щсум. Каӈкум война порат хо̄нтлаӈкве вуйвес. Яныг хо̄нт оигпаме юипа̄лт юв ёхтыс. Хо̄нтлым сакватавес, хоса ат о̄лыс, а̄тимыг е̄мтыс. Ма̄н война порат яныгмам ня̄врамыт са̄в хунь ва̄щинтасӯв ос савалым, тэта̄л яныгмасӯв. Омагува̄тягув са̄в рӯпитасы̄г, ме̄н Тамара э̄щум ёт акваг юн ме̄нккеме̄н о̄лсуме̄н. Омав пӯльницат санитаркаг рӯпитас. А̄тяв о̄влэ̄т са̄лы ӯрим яласас, тувыл рыбкоопын рӯпитаӈкве патхатас. Ма̄ниг о̄лмум порат акваг омам палт пӯльницан ялантаӈкве э̄руптасум, ма̄нь та̄гыл ма̄хум пусмалтаӈкве тахсум. Тыи ма̄гсыл школа а̄стламум юипа̄лт Ханты-Мансийск ӯсн медицинский училищан фельдшерыг ханищтахтуӈкве минасум. Училище а̄стласум, Октябрьский па̄вылн рӯпитаӈкве ке̄тве̄сум. Тот о̄йкам Василий Иванович Камаев ёт акванминасаме̄н, тав трактористыг рӯпитас. То̄нт колхозыт о̄лсыт, тав акваг акв па̄вылныл, мо̄т па̄вылн рӯпитаӈкве ке̄тыглавес. Тох ме̄н Тэ̄к па̄вылн о̄луӈкве ва̄нтласме̄н. Октябрьский па̄вылт рӯпитымам са̄всыр ма̄нь па̄вылкве̄тын ке̄тыглаве̄сум, тот А̄с ма̄ньщит о̄лсыт. Тох яласымам, ма̄хум пусмалтым, ма̄ньщи ла̄тӈыл потыртаӈкве патсум. Хунь Тэ̄к па̄вылн ёхтысум ос ханты ла̄тӈыл потыртаӈкве ханьщувласум. Па̄влыӈ ма̄хманув са̄в хӯл тэ̄сыт. Са̄в э̄лумхо̄лас ма̄йтаныл а̄гмыӈыг о̄лсыт, та порат са̄в хо̄тпа ос хо̄псы а̄гм о̄щсыт. Та̄наныл пуссын Ха̄льӯсн пусмалтахтуӈкве ке̄тыгласанӯв. Па̄вылт ӯлщпуӈк пусмалтан ле̄ккар а̄тим о̄лыс, пуӈканыл о̄с ам пусмалтасанум». Нина Петровна Камаева о̄йкатэ̄ныл кит ня̄врам янмалтасы̄г. Ань яныг э̄ква 16 а̄пыгрищ о̄ньщи, та̄н пуссын Ха̄льӯст о̄лэ̄гыт. Нина Петровна та̄л коттиль э̄тпост намхо̄талэ о̄лыс. Ам ты яныг э̄ква намхо̄талэ кастыл янытлылум ос са̄в сымыӈ ла̄тӈыл ке̄тылум. Пус ка̄т, пус ла̄гыл.

1069 2014.02.07. Людмила ТЕТКИНА

Ханты о̄йка хуриянэ суссылтавет. Ханты-Мансийск ӯст Геннадий Райшев, ка̄тыл хурит ханты о̄йка, о̄с акв суссылтапе рӯпиты. Тав 1960-1970 та̄лытт по̄слум хуриянэ тот суссылтавет. Та̄наныл сунсыглаӈкве са̄в мир ёхталас. Еремей Айпин, соссаӈ ма̄хум Ассамблея кӯщай хум, Геннадий Степанович ёт хосат та̄гыл ва̄йхаты. Еремей Данилович ла̄выс: «Та та̄лт ма̄н округув 83 та̄лэ то̄влыс. Округув ма̄гсыл са̄в рӯпата ва̄рнэ ма̄хум ма̄н янытласанӯв. Г. Райшев соссаӈ ма̄хум культура но̄хво̄рмалтан ма̄гсыл о̄с са̄в ё̄р пиныс. Тав хуриянэ нупыл сунсым, нё̄тнэ ма̄витув ма̄н ка̄салылӯв». Ты суссылтап Наталья Фёдорова, искусствоведнэ̄, щё̄питастэ. 1960-70 та̄лыт порат по̄слым хуриянэ хумус та̄н акванатсаныл ос суссылтапн ва̄рсаныл, та урыл потыртас. Тав ла̄выс, то̄ва хуриянэ Карпинск ӯсныл тыг тотве̄сыт, ӯсувт нэ̄мхуньт ат суссылтаве̄сыт. То̄ват са̄в та̄л акв ма̄т хуим, щар лю̄лиг е̄мтсыт. Та̄наныл мӯсхалыг щё̄питаӈкве са̄в хо̄тал э̄рмыглас. Ты э̄лыпа̄лт «Графика Райшева» нампа выставкатэ суссылтавес. Та та̄л о̄йка 80 та̄лэ то̄влыс, ты кастыл тав ётэ рӯпитан хо̄тпат са̄всыр суссылтапыт ань щё̄питэ̄гыт. Л. Спирякова хансум потре ма̄ньщи ла̄тӈыл Л. Теткина хансыстэ.

1069 2014.02.07. Валентина УЗЕЛЬ

Та̄н пе̄с э̄ргыт, йӣквыт акванатыяныл. Ты 2014 та̄л «Культура та̄лыг »ла̄ввес Ань ты кастыл округувт о̄лнэ мир ма̄гсыл са̄в пӯмыщ ва̄руӈкв тах патаве. Ос ты та̄л сыс культура ман клубколытт рӯпитан ма̄хум янытлаӈкв патавет. Ма̄н ма̄ньщи газетавт пе̄с йис ва̄рмалянув э̄лаль тотнэ ма̄хманув урыл ва̄тихал хансуӈкв патэ̄в. Ань о̄выл потрув А̄с ма̄хум ма̄гсыл рӯпитан культура центр урыл ловиньтэ̄н. Белоярский ӯст о̄лнэ культура центр кӯщаиг 1995 та̄л па̄сныл Надежда Борисовна Костылева рӯпиты. Тав ханты нэ̄, школа а̄стламе юипа̄лт Ханты-Мансийск ӯс педучилищан ёхтыс. Тот ня̄врамыт ханищтан нэ̄г ханищтахтас. Училище а̄стламе юипа̄лт Белоярск ӯсн о̄лмыгтас, ты центрын рӯпитаӈкв минас. Тот рӯпитаӈкв о̄вылтахтаме порат, Тюмень ӯс культура институтн юил ялым э̄лаль ханищтахтуӈкв патыс, а̄стластэ. Надежда такви рӯпататэ урыл мощ потыртас, тав ла̄выс: «Ам училищат ня̄врамыт ханищтан нэ̄г ханищтахтасум. Ос тыг рӯпитаӈкв ёхтумум порат, маныр рӯпата ва̄руӈкв патэ̄гум, аты ва̄слум. Таима̄гыс та̄ра э̄лаль ханищтахтуӈкв минасум. Институт а̄стламум юипа̄лт ма̄к культура специалистыг та е̄мтсум. Кӯщаиг тув та ӯнттуве̄сум. То̄нт Фаина Павловна Иштимирова кӯщаиг рӯпитас, тав о̄с ханты нэ̄. Тав ётэ акваг та урыл потыртасме̄н, ка̄сыӈ та̄л пе̄с э̄ргыт, мо̄йтыт ва̄нэ ма̄хум мощщаг е̄мтэ̄гыт. Та̄н потраныл, э̄рганыл молях хансуӈкв э̄ре̄гыт, ма̄хманув минэ̄гыт, ос ма̄н э̄лаль маныр ва̄руӈкве патэ̄в. Ань ма̄нь па̄влытт о̄лнэ яныгпа̄ла ма̄хум наманыл пуссын акванатуӈкв патсанӯв, та̄н палтаныл ялантасӯв. Ка̄сыӈ яныг хо̄тпа ёт тот ва̄щинтахтасӯв, ёмащакв титыгласлӯв, по̄слыслӯв. Та̄н халанылт хотьют э̄рыг ман матыр пе̄с о̄лупса урыл ва̄г, хотьют йӣквуӈкв ха̄сы, пуссын та̄рапаттуӈкв э̄рыс. Та̄н э̄рганыл нэ̄пакн хассанӯв, йӣкваныл тинан по̄слысланӯв. Ва̄им, о̄влэ̄т та̄рвитыӈ о̄лыс. Та па̄сныл хусахтем та̄л та минас. Та порат ва̄рим хурит ос тинан по̄слым йӣквыт ань сунсымав, пе̄с э̄ргыт хӯнтлымав, ань сыманув тармыл татем кӯпнитыг е̄мты. Со̄ль, яныг рӯпата ва̄руӈкв а̄лымасӯв. Ань то̄ванакт ма̄нь па̄влытытн о̄с ялантэ̄в, тув ёхтэ̄в, яныг ма̄хманув а̄тимыт. Та̄ра номтын ёхтаве̄в, матъёмас ма̄н та хо̄тпа ва̄щинтаслӯв, потранэ пуссын хассанӯв, йӣкванэ по̄слысанӯв. Ка̄сыӈ яныг хо̄тпа пе̄с ялпыӈ хо̄талыт ос пе̄с ва̄рмалит урыл титыглаӈкв э̄ри, хумус э̄рнэ щирыл та̄наныл янытлаӈкв, маныр ва̄руӈкв э̄ри. Ма̄н са̄в та̄л сыс ва̄рум рӯпатав нэ̄пакытн хансыслӯв, рущит ла̄внэ̄ныл хольт «методичка» нэ̄пакыт ва̄рсӯв. Ань ты нэ̄пакыт хосыт мо̄т ма̄хум йӣквуӈкв ханищтахтэ̄гыт, э̄рганув э̄ргияныл, ялпыӈ хо̄таланув янытлыяныл. Ма̄н «Увас хурамат» нампа йӣквнэ коллектив о̄ньще̄в, пусссын тот йӣкве̄в. Тув ялантан а̄гит, нэ̄квет пуссын сака ёмащакв йӣквуӈкв ха̄сэ̄гыт. Ты коллективув ань хус та̄лэ то̄влыс, Фаина Павловна Иштимирова тав ва̄рыстэ. Ань то̄ва ма̄нь па̄вланувт о̄лнэ ма̄щтыр ма̄хманув ма̄н пуссын ва̄ганӯв. Та̄н ма̄н ма̄гсылув супыт ю̄нтэ̄гыт, ма̄нав ю̄нсхатуӈкв о̄с ханищтыяныл. Та̄н ма̄к ёмащакв ма̄щтырлаӈкв ха̄сэ̄гыт. То̄ват ма̄навн нё̄тым ань ты мус рӯпитэ̄гыт. » Ты культура центр ань са̄всыр ма̄т ва̄ве. Тот рӯпитан ма̄хум акваг хо̄та̄ти йӣквим, э̄ргим ялантэ̄гыт. Сака ёмас о̄лнув, ка̄сыӈ ма̄ньщи ос ханты культура кол ман центр тох те рӯпитанув, то̄нт э̄рганув, йӣкванув са̄в та̄л маттем та суйтынувыт.

1069 2014.02.07. Людмила ТЕТКИНА

Леуши па̄вылт рӯпитан музей. Кондинский район Леуши па̄выл ты та̄л 430 та̄лэ то̄влы. Па̄влыӈ ма̄хум ты ялпыӈ хо̄тал тув порат янытлаӈкве щё̄питахтэ̄гыт. Хоты порат тот ма̄хум о̄лмыгтасыт, та урыл Елена Павловна Кульчицкая пе̄с нэ̄пакт ловиньтас. Ос тувыл «История села Леуши в документах и в воспоминаниях его жителей» нампа нэ̄пак та̄ратас. Тав Леуши па̄вылт школат ханищтан нэ̄г рӯпиты ос школьный музейт кӯщаиг о̄лы. Музей урыл таи потыртас: О̄влэ̄т Леуши па̄выл школат акв колнакт «История боевой славы» нампа суссылтап рӯпитас. Тот войнат хо̄нтлам ма̄хум хурияныл ос пормасаныл, нэ̄паканыл акванатым о̄лсыт. Яныг школа хунь ӯнттувес, суссылтап тыг тотвес. То̄нт ма̄н ня̄врамыт ёт э̄лаль са̄всыр пе̄с пормасыт акванатуӈкве патсӯв. Хунь ма̄хум ты ма̄н о̄лмыгтасыт, ам хо̄сат та̄гыл пӯмщалахтэ̄гум. Са̄всыр ма̄тт ла̄тыӈ кинсэ̄гум. Акв нэ̄пакт хансым о̄лыс, Ермак ма̄хманэ ёт са̄всыр мирыт ёт хо̄нтлас. Тав хунь порславес, ма̄хманэ киттыгӯртхатсыт, акват тыт хультсыт, мо̄таныт ювле минасыт. Ювле минаманыл порат ты Леуши па̄вылн хо̄игласыт. То̄нт ма̄ньщит та̄нки ще̄мьяныл ёт тыт о̄лсыт. Ты ва̄рмаль 1584 та̄л порат о̄лыс. Пе̄с нэ̄пакыт кисхатым, ам Тобольск ӯсн ялсум, тот архивколт ма̄нки па̄влув урыл ла̄тыӈ киссум. Тот ос акв пӯмащ ва̄рмаль хо̄нтсум. Леуши па̄вылт о̄лнэ ма̄хум ясак мощща о̄йтсыт. Ты ва̄рмаль 1614-1617 та̄лытт о̄лыс. Ам пуссын хо̄нтум нэ̄паканум районный Думан ке̄тсанум, депутатыт ловиньтасаныл ос постановление пирмайтасыт, ты та̄л па̄влув 430 та̄лэ то̄влы. Рущ ма̄хум ты ма̄т хосат та̄гыл о̄лэ̄гыт, кӯпса ма̄хум Леушит о̄с о̄лсыт. Та̄н халанылт Степан Сафронович Новосёлов щёлыӈ о̄йка о̄лыс. Советский власть ёхтум порат такви мисанэ, луванэ колхозн мисанэ, такви тот рӯпитаӈкве патыс. Тав о̄лум колэ̄т пӯльница ва̄рвес. Музеюв акв пе̄с хури о̄лы, тот ты пӯльница 1960 та̄л порат по̄слувес. Ос пупкол хунь тыт ӯнттувес, ты ва̄рмаль урыл ос нэ̄пакыт киссум. Музейт пе̄рна о̄лы, совеский власть ёхтум порат церковьколыт хо̄тло̄сталаӈкве, са̄кватаӈкве патве̄сыт, то̄нт ты пе̄рна Иван Кравченко ма̄нь пыгрищиг ёлпаттыстэ. Ань музеювт ты пе̄рна суссылтылӯв. «Югра» нампа энциклопедият ам таи ловиньтасум, Леуши па̄вылт пупкол 1888 та̄л порат ӯнттувес, ам ос Тобольск ӯст архивыт кисхатым мо̄т ла̄тыӈ хо̄нтсум. То̄нт йильпи пупкол ӯнттувес, ты э̄лыпа̄лт рӯпитам пупкол на̄йин ё̄свес. Мо̄т нэ̄пакыт ос ха̄нсым о̄лы, 1712 та̄лт пуп о̄йка Фёдор Лещинский Сатыги па̄вылн ма̄ньщит палт ялыс ос тыг ёхталас, то̄нт тыт Сатыгин ка̄нащ ще̄мьятэ ос рӯтанэ ёт о̄лыс. Тыт пуп о̄йка та̄наныл ос рущ То̄рум нупыл по̄йкщуӈкве ка̄щилтасанэ. Музеювт советский власть пора урыл ос са̄в нэ̄пакыт, хурит, пе̄с пормасыт акванатым олэ̄гыт. Тыт 1941-1942 та̄лыгт та̄ратым «Сталинская трибуна» нампа газета, са̄всыр докладнойнэ̄пакыт, по̄лщ тотнэ нэ̄пакыт ловиньтаӈкве ро̄ви. Ты нэ̄пакыт ма̄н акв пе̄с колыт хо̄нтсанӯв. Ма̄н палтув акв нэ̄ рӯпитаӈкве ёхтыс, тав пе̄с колт о̄лмыгтас. Акв порат куре хо̄тсаквалас, посым юв хартуӈкве патвес, хум хо̄тпат колалан тур сунсуӈкве но̄хха̄хсыт, тот таса̄вит нэ̄пак хо̄нтсыт. Пе̄с газетат, нэ̄пакыт пуссын музейн тотсаныл. Акв докладнойнэ̄пакт хансым о̄лыс, мис поснэ нэ̄ са̄в рӯпитаме ма̄гсыл щаквитыл ат майвес. Акв о̄йка мисэ а̄гмыл е̄мтыс, Ямки па̄вылныл ӯйхул пусмалтан ле̄ккар во̄выс. Тэ̄н аквъёт хӯрум хо̄тал вина айсы̄г, мисэ̄н ат пусмалтасы̄г. Тувыл мис алыстэ̄н ос нё̄выль э̄лаль тыналастэ̄н. Справка ва̄рсыг, э̄рттам мис а̄гм ат о̄ньщас. Тамле нэ̄пак ма̄н музейт ты о̄ньще̄в. Афганистан, Чечнят хо̄нтлам пыганув урыл о̄с суссылтап щё̄питасӯв. Па̄вылныл 24 пыгыт хо̄нтлуӈкве ялсыт. Та̄н халанылт акв пыг юв ат ёхтыс. Акв пыг «Орден мужества» нампа ма̄гылн тагатан по̄с о̄ньщи, тав Чечня ма̄т хо̄нтлым тамле ме̄талил майвес. Музеюв ма̄ньщи маснут ос мо̄т са̄всыр пормас мощща о̄ньще̄в. Са̄всыр мирыт пе̄с йис та̄гыл тыг ёхталаӈкве патсыт. Ма̄ньщиянув пуссын та̄н халанылт тэ̄лыгласыт. Та̄нки пе̄с йис ва̄рмаляныл ос ща̄нь ла̄тӈаныл хотёрувласаныл.

1069 2014.02.07. Людмила ТЕТКИНА

Тав стиханэ ань ты мус ловиньтавет. Ханты-Мансийск ӯст окружной библиотекаколт са̄в мир акванатхатыглас. Тот ма̄хум Владимир Волдин ка̄стысаныл. Тав ханты ос рущ ла̄тӈыл стихыт хансыс. Ма̄хум тав хансыглам стиханэ ловиньтасыт, э̄ргыг э̄ргысаныл ос тав уре̄тыл потыртасыт. Ювле хультум та̄лт А̄с-угорский ма̄ньлат ма̄хум организация ос В. Волдин намыл намаим ханты культура центр «И наших душ, и наших рук я славлю единение » нампа проект аквъёт хассы̄г. Ос ювле хультум та̄л ва̄т са̄грапнал э̄тпост проектаныл ма̄гыс грантолныл майве̄сыт. Ань та̄н ма̄хум акванатыглэ̄гыт, та̄нанылн Владимир Волдин хансум стиханэ ос ва̄рум рӯпататэ урыл потыртэ̄гыт. Ӯст о̄лнэ ма̄ньщит, хантыт ос мо̄т мирыт, соссаӈ ма̄хум Ассамблеят рӯпитан депутатыт, Общественный палатат рӯпитан ма̄хум, «Союз писателей Югры» организация па̄лыл хо̄тпат библиотекаколн ёхталасыт. Ма̄хум В. Волдин урыл са̄в ёмас ла̄тыӈ ла̄всыт. Любовь Чистова, Общественный палатат кӯщаиг рӯпитан э̄ква, таи ла̄выс: «Владимир Семёнович са̄в та̄л ювле хультум порат а̄тимыг е̄мтыс. О̄лме порат тав хансум стиханэ ма̄гсыл мирн янытлавес. Тав са̄в та̄л ат о̄лыс, ос такем ёмас стихыт хансуӈкве а̄лымас. Ам нэ̄паканэ ловиньтасанум. Тав э̄кватэ Мария Кузьминична Волдина урыл хансум стиханэ а̄нум сака мӯстысыт. Э̄кватэ такем э̄руптастэ, янытластэ. Тыи ма̄гсыл такем сымыӈ стихыт тэ̄лсыт». Альфия Абдрашитова «У озера» ос «Радио» нампа стихаге э̄ргыг э̄ргысаге. Еремей Айпин, округ Дума депутат, поэт ёт ва̄йхатас ос тав уре̄тыл потыртас. Тав ла̄выс: «Ам 1971 та̄лт педагогическое училище а̄стласум. Ос сӯкыр э̄тпост Москва ӯсн литературный институтн ханищтахтуӈкве минуӈкв щё̄питахтасум. Ханты-Мансийск ӯст ханищтахтамум порат Владимир Волдин палт хансум потранум радион ловиньтаӈкве ялантасум. Хунь юио̄выл щёс ва̄щинтахтасме̄н, тав такви стиханэ ловиньтасанэ. Манхурип номт о̄ньщи ос манхурип рӯпата ва̄руӈкве таӈхи, та урыл са̄в потыртас. Тувыл ам Москва ӯсн минасум, кит э̄тпос ювле хультыс, тав а̄тимыг е̄мтыс. Владимир Семёнович сака ёмас хо̄тпаг о̄лыс, нэ̄мхуньт лю̄ль ла̄тӈыл ат потыртас, нэ̄мхуньт ат ля̄втыглас. Ка̄сыӈ э̄лумхо̄лас торгамтаӈкве таӈхыстэ. Тав мир э̄руптастэ, ка̄сыӈ хо̄тал ща̄гтым ӯрыстэ. Тав тамле сымыӈ, ёмас хо̄тпаг о̄лыс». Ханты-Мансийский район Кышик па̄вылныл Альбина Дмитриевна Хорова, ня̄врам ханищтам э̄ква, Зина Долевская, школат ханищтахтын а̄ги, поэт ханты ла̄тӈыл хансум стиханэ ловиньтасы̄г. Мария Кузьминична Волдина о̄йкатэ урыл о̄с ла̄тыӈ ла̄выс: «Ме̄н о̄йкаме̄нтыл туп хӯрум та̄л аквъёт о̄лсуме̄н. Тав а̄нум хӯрум ня̄враманум ёт нэ̄г тотыстэ. Ам ня̄враманум сака э̄руптасанэ, такви ня̄враманэ хольт янмалтасанэ. Ос хунь Танечка а̄гиме̄н самын патыс, такем ща̄гтыс. Такви ня̄врам хольт пӯмщалахтас, а̄гитэ ла̄глаге, ка̄таге нупыл сунсыглым такем мувиньтас. Акв порат таве̄н ла̄всум, Таня ёт юн вос о̄лы. Тав юн ӯнлуӈкве ат ве̄ритас, а̄гитэ радио рӯпатан тотыстэ. Юв ёхтысум, юн а̄тимыг, кисмаясагум. Рӯпатан минасум, тув ща̄лтсум, ма̄нь а̄гитэ пасан тармыл пиныстэ, ос тав ётэ рӯпитан ма̄хумн суссылтытэ. Тув мус ща̄гтым о̄лыс, ты урыл ма̄хманэ̄н потыртас, тамле ёмас хо̄тпаг о̄лыс». Ты юипа̄лт Мария Кузьминична о̄йкатэ урыл такви хансум э̄рге э̄ргыстэ. Аквта хо̄талт мӯй ма̄хум пуссын искусства центрын во̄вве̄сыт. Та колт Мария Кузьминична апыгрищанэ ос ма̄ньлат ма̄хмыт ёт «Так Молупси» «Сказ о Земле Югорской» нампа спектакль суссылтасыт. Ты спектакль Владимир Волдин хансум поэматэ щирыл ва̄рсаныл.

1069 2014.02.07. Тамара МЕРОВА

Марий ма̄хум о̄лупсаныл о̄вылтыт. Валерьян Петров Марий Эл ма̄т Морко районный ӯст о̄лы. Тав ань пенсиян патхатым о̄лы, ос ты э̄лыпа̄лт «Морко мланде» районный газетат кӯщаиг рӯпитас. Мо̄лты туи о̄йка финноугорский газетатт рӯпитан хо̄тпат хурит по̄слуӈкв ханищтапн акванатыгласанэ. Ам о̄с тув ялсум, тот ханищтахтамув коныпал ма̄н марий ма̄хум о̄лупсаныл о̄вылтыт о̄с мощ пӯмщалахтасӯв. Акв хо̄талт Валерьян Васильевич ма̄нав такви рӯпитам колэ̄н ос район мирколн тотыгластэ. «Морко мланде» колэ̄т ма̄н тав ётэ рӯпитан ма̄хум ёт ва̄щинтахтасӯв. Рущ щирыл тав «Марийская земля» толмащлаве, редакцият рӯпитан хо̄тпат тамле газета рущ ла̄тӈыл о̄с таратэ̄гыт. Ань ты газетаг Моркинский районт хӯрум со̄тыра арыгкем хо̄тпатн ловиньтаве̄г. Тэ̄н акв са̄т сыс акв щёс та̄ратаве̄г. Ка̄сыӈ журналист газетан рущ манос марий ла̄тӈыл ля̄ххалыт ос потрыт хансы. Журналистыт ма̄нь па̄влыӈ ма̄н о̄с са̄в ялантэ̄гыт, марий мир о̄лупса о̄вылтыт потрыт кинсэ̄гыт. Тувыл район кӯщаяныл рӯпатаныл урыл са̄в ля̄ххал хансэ̄гыт. Марийцыт та̄нки ща̄нь ла̄тӈыл хансым газета ловиньтаӈкве сака таӈхе̄гыт, таи ма̄гыс газета сака ӯре̄гыт. Ма̄н мирколн о̄с ялсӯв, тот Моркинский район кӯщай Сергей Харитонович Григорьев ёт ва̄йхатасӯв. Тав ма̄навн та̄нки о̄лупсаныл урыл таи потыртас: «Ма̄н районувн Морки ӯс ос онтолов ма̄нь па̄влыт ловиньтахтэ̄гыт. Тыт 30 со̄тыра ниласа̄т са̄вит э̄лумхо̄лас о̄лы, та̄н халанылт 82% тыи марий ма̄хум, 8% рущ ос аквта са̄вит хатань ма̄хум о̄лэ̄гыт. Марийцыт та̄нки пе̄с йис агтаныл (рущ щирыл язычество) э̄лаль тотыяныл, то̄ват рущит хольт о̄с пе̄рна пинэ̄гыт, хатанит мусульман агтыл о̄лэ̄гыт. Морко ӯсувт матахмат хо̄тпат хосат о̄лмыгтасыт, та̄н буддизм агт тыг тотсыт. Ты хо̄тпат та̄нки ма̄гсыланыл ӯсувт ма̄нь кан щё̄питаӈкве во̄всыт, ма̄н ка̄сащасӯв. Ань ма̄н ма̄хманув о̄с тув ёхталэ̄гыт, нас пӯмщалахтэ̄гыт, сунсыглахтэ̄гыт. Та̄нанылн тот мӯсты, ла̄ве̄гыт, сыстам, посыӈ ма̄. Ма̄хманув янгыщ ӯйхул янмалтым, са̄всыр щӯртнит, ня̄нь пумыт янмалтым о̄лэ̄гыт. Мо̄лты та̄лт сака ре̄гыӈыг е̄мталас, са̄в та̄лыӈ йӣвыт хоттосуӈкве патсыт. Ма̄н ань 300 гектар ма̄ тармыл йӣвыт янмалтаӈкве сам пинсӯв, макев са̄в хорамыӈ йӣвыл э̄лаль вос яныгмаве. Па̄влыӈ ма̄хманув ӯйхул янмалтым, во̄р йӣвыт яктым ос па̄рт сылнэ ма̄т рӯпитэ̄гыт. То̄ват компрессорный станцият, кирпащ ва̄рнэ колт ос сыресыр пормасыт ва̄рнэ колт рӯпитэ̄гыт. Ляпа ӯсныл щёлыӈ хо̄тпат тыт пе̄с та̄гыл рӯпитан предприятият ёвтыяныл ос тувыл мо̄т рӯпатаӈ колыг щё̄питыяныл. Таи ёмас, ма̄н соссаӈ ма̄хманув тув рӯпитаӈкве вивет. Щищкурек янмалтан кол о̄с ӯнттысӯв, ты хосыт ма̄нки мӯӈи, нё̄выль о̄ньще̄в. Ма̄ньлат колта̄глытн ос са̄в ня̄врам о̄щнэ ще̄мьятын са̄всыр нё̄тмил ва̄ре̄в. Юио̄выл та̄лувт са̄внув ня̄врам самын патыс. Тыт ань 416 колта̄гыл яныг ще̄мьяг ловиньтахтэ̄гыт, та̄нанылн о̄лнэ кол ӯнттын ма̄гыс ма̄ло̄мтыл мисанӯв. Мо̄лал рӯпата ат хо̄нтнманыл ма̄гыс са̄в марийцат мо̄т ма̄н о̄луӈкве миныгласыт. Тувыл са̄в ма̄ньлат а̄гитпыгыт юристыг, бухгалтерыг ханищтахтэ̄гыт ос тыт рӯпата ат хо̄нтэ̄гыт, сысы о̄с та минэ̄гыт. Ам таи ла̄вуӈкве таӈхе̄гум, та̄н та̄нки самын патум ма̄наныл ат ёрувлыяныл, юв ёхталэ̄гыт. Та̄н аквтох пе̄с йӣс ялпыӈ хо̄талыт янытлэ̄гыт ма̄кев тыт сака ёмас». Ты э̄лыпа̄л хо̄талт ма̄н акв ялпыӈ ма̄н ялмув порат Уильем па̄вылт лё̄ӈхыт марийцат ёт хо̄нтхатыгласӯв. Тыи Татьяна Тихонова а̄гиягепыгаге ос о̄ныпе ёт ля̄льт ё̄мсыт. Ма̄н та̄н ётаныл мощ потыртасӯв. Татьяна хуньт Казаньт ня̄врам пусмалтан ле̄ккарыг ханищтахтас ос тувыл о̄йкатэ̄нтыл Лӯима̄н рӯпата киснэ ма̄гыс Дудинка ӯсн минасы̄г. Тав ань «скорый помощь» ле̄ккарыг рӯпиты. Пыге тэ̄н ётэ̄н нила та̄л тот о̄лыс, ос акв тыг э̄лаль ханищтахтуӈкве юв ёхтыс. Ань Пе̄тра пе̄с ялпыӈ хо̄тал янытлан кастыл (та̄н щираныл Сюрем хо̄тал) рӯт ма̄хманыл уральтан ма̄гыс та̄н отпускан ёхтысыт. Тащирыл ты марийцат о̄лэ̄гыт.

1069 2014.02.07. Светлана РОМБАНДЕЕВА

Пусмалтахтан ос ӯщлахтан кол. Ма̄н округувт Нефтеюганск ӯс ляпат «Юган» нампа санаторий о̄лы. Тот ма̄хум янгема̄не пусмалтахтэ̄гыт ос ӯщлахтэ̄гыт. То̄ва хо̄тпа пӯльницаныл ле̄ккаре̄н тув ке̄таве, то̄ва ос такви путёвка нэ̄пак ёвты (тынэ налыман нупыл ат со̄тыра са̄виттем солко̄ви). Ка̄сыӈ хо̄тпа тот нёлоловхуйплов хо̄тал о̄лы, о̄лнэ колнакыл миве, са̄всыр щирыл пусмалтаве, тыттаве. Ва̄т са̄грапнал э̄тпост ам тот о̄лсум, пӯльница па̄лыл ле̄ккарумн тув ке̄тыглаве̄сум. Ювле хультум та̄л ре̄тыӈ ю̄свой э̄тпосэ̄т ты санаторий ва̄т та̄лэ то̄влум. Кӯщаиг Виталий Иванович Чехута тав о̄лы. Хум тот онтоловхуйплов та̄л рӯпиты, «Отличник здравоохранения РФ» намыл майвес. Виталий Иванович тув патхатаме юипа̄лт санаторий сака ёмащакв рӯпитаӈкве патыс. Ва̄т та̄л сыс тот 98 со̄тыра 532 хо̄тпа пусмалтахтас (та̄н халанылт: 22 со̄тыра 982 хо̄тпа – ня̄врамыт ос ма̄ньлат ма̄хум, 4 со̄тыра 571 хо̄тпа – а̄гмыӈмосыӈ ма̄хум, 1 со̄тыра 530 хо̄тпа – яныг хо̄нт порат хо̄нтлум ма̄хум пусмалтахтасыт ос ӯщлахтасыт). Тот са̄т яныг ле̄ккарыт (терапевт) рӯпитэ̄гыт, акв ле̄ккар э̄кват пусмалты, акв ле̄ккар ос ӯлщпуӈк пусмалты, са̄т ма̄нь ле̄ккарыт массаж ва̄ре̄гыт, онтоловхуйплов ма̄нь леккарыт физиотерапият рӯпитэ̄гыт, атпан нупыл ат хо̄тпа тэ̄нут па̄йтнэ колт рӯпитэ̄гыт, са̄в хо̄тпа колкан ловтэ̄гыт манос кол ӯре̄гыт. О̄влэ̄т ты санаторий акв накпа йӣв корпус ос тэ̄нут па̄йтнэ ма̄гыс ма̄нь колнак о̄ньщас. Та̄л сыс 1 со̄тыра 500 хо̄тпа туп пусмалтахтуӈкве ве̄рмыс. Ань тав ат корпус о̄ньщи (ма̄хум тот о̄лэ̄гытхӯлэ̄гыт), кит тэ̄нэ колнак, поликлиника, водолечебница, административный корпус, спортивный комплекс. Ма̄нь ня̄врамыт ма̄гыс ёнгын колнак о̄лы. Санаторият ань аквторыг 260 хо̄тпа пусмалтахтуӈкве ос ӯщлахтуӈкве ве̄рми. Та̄л сыс 5 со̄тыра арыг хо̄тпа тув яланта̄лы. Ма̄хум са̄всыр ваннатыл ва̄равет (яныг хуран пусмалтан вит со̄саве, хо̄тпа тот та хуйгала̄лы), тувыл массажыл ва̄раве (алписове мощ таӈращлаве), ша̄нька ня̄нь хурип исум утыл а̄гмыӈ ма̄тэ пинаве, лаплэ̄паве (хо̄тпа тох щё̄с охса ӯщлахты). Тот акв тамле пӯмыщ пусмалтан ва̄рмаль о̄лы – иглоукалывание. Хо̄тпа пусмалтан ма̄гыс ю̄нтупытыл тӯщтаве, ю̄нтупанэ ёт хусахтем кӯм хуйгала̄лы. Ма̄хум ингаляциял ва̄равет (тэ̄рпил лылтэ̄гыт), пусмалтан ща̄ил айтавет, физкультура ва̄ре̄гыт ос мо̄т са̄всыр щирыл пусмалтавет. Нэ̄пак ловиньтан колнак рӯпиты. Тот са̄всыр ёмас нэ̄пакыт, журналыт ман газетат пуссын о̄лэ̄гыт. Пусмалтахтан юипа̄лт ма̄хум мощ кон ё̄мыгтаӈкве ве̄рме̄гыт, ёсал ман сунсовыл тахсуӈкве ро̄ви. Ты санаторий тарыг йӣвыӈ ма̄т ӯнттувес, во̄рыӈ ма̄т, ляпат воссыг нэ̄матыр кол а̄тим. Туп ӯщлахтан ма̄гсыл акв база о̄лы, ма̄хум тув Нефтеюганск ӯсныл ёхталэ̄гыт, ёсал тахсэ̄гыт. Школаныл ня̄врамыт тув тотавет, манос ще̄мьяӈ ма̄хум ёхтэ̄гыт, тот маттем та тахсэ̄гыт, ёмас, сыстам лылые̄пыл лылтэ̄гыт. Ня̄врамытын тай атхунь пӯмыщ. Суныл тахсынэ̄ныл порат, ос сунсоврищаныл по̄хантӯщтыгпияныл, сып ёлыпа̄лн па̄п паттанылт та тахамлэ̄гыт. Ща̄гтаклым, мовиньтым тот та повара̄лэ̄гыт, пальтасоврищаныл тӯйтыл лаппе̄рыгтыяныл. Я̄тил ма̄ньщи ма̄хум, хотьют ка̄сащи те, тув ялэ̄н, мощ ӯщлахтэ̄н, пусмалтахтэ̄н. Пусмалтахтан леккаранын китыглэ̄н, эрыӈ путёвкал миве̄н. На̄нти тув звонитаӈкве о̄с ве̄рмегы̄н, ты «Юган» санатория тав телефонэ: 8 (3463) 23-88-96. Матыр китыглахтан ла̄тыӈ о̄ньщегы̄н те, тув звонитэ̄н, китыглахтэ̄н. Санаторият ёмас, сымыӈ ма̄хум рӯпитэ̄гыт. Пуссын пуста̄гыл о̄лэ̄н, пус ка̄т, пус ла̄гыл!

1069 2014.02.07. Тамара МЕРОВА

«Монти Танья» ханты мо̄йт. Аньмунт Ханты-Мансийскат обскоугорский ма̄хум «Хо̄тал» нампа театр о̄с акв йильпи ёнгиланыл суссылтасаныл. Ты «Монти Танья» намаим спектакль, тав Тимур Салихов ма̄ньлат режиссёрын ва̄рвес. Танья тыи сургутский е̄рт о̄лнэ ханты ма̄хум та̄н Хо̄нт-О̄тыраныл. Ань ма̄хумн суссылтам хо̄нтлам ва̄рмаль XIV нотт порат о̄лыглам. Ты йис ва̄рмалит театрыт рӯпитан хо̄тпат таве ос мо̄йт щирыл щё̄питасаныл. Тувыл тамле пилыщмаӈ ва̄рмалит ма̄хумн хотмус суссылтаӈкве э̄рыс. Тимур Салихов ты спектакле то̄ва накыт пе̄с тӯлыглап хольт ва̄рсанэ. Тот артистат та̄нки ёнгын э̄ныл коныпал са̄с вильтхопил тӯлыглахтэ̄гыт. Акв хо̄нтлан ва̄рмаль а̄канит ёт щё̄питасаныл (рущ щирыл ке ла̄вуӈкве ты кукольный театр). Мо̄тынтыг исхорыт суссылтым потыртасыт. Са̄в э̄рнэ ла̄тӈыл Т. А. Молданован ос Е. А. Нёмысован хӯлтыглаве̄сыт . Тувыл спектаклит ёнгын хо̄тпат сургутский ханты ла̄тӈыл ёмщакве̄г потыртаӈкве Наталья Ачимован ханищтаве̄сыт. Ульяна Шульгина та̄нанылн э̄ргыт хансыс. Анна-Ксения Вишневская акв пилыщмаӈ нак урыл са̄с вильтыӈ ут нё̄тмилэ кастыл потыртаӈкве ла̄выс. Са̄с вильтыӈ ут хартыглахтым, ощща турсуил пилыщмаӈ нак урыл потыртас. Тох та̄рвит пищит сака пилнэ̄г ат сусхатэ̄гыт, соссаӈ ма̄хумн та̄н э̄рнэ̄г торгамтавет. Павел Мизёв художниканыл о̄с са̄в рӯпитас, тав сценан аквано̄лтым йиво̄влыт щё̄питаӈкве ла̄выс, та̄н нумыл ква̄лгыл нэ̄гсалаве̄сыт. Э̄рнэ торыг та̄н па̄лиӈ во̄р хосыт ё̄мыгтан ма̄г ва̄рапавет манос ё̄рнколыг тӯщтыгпавет. Евгений Литвинчук, "Хо̄тал" нампа театр кӯщай, ла̄выс: "Ты спектаклюв ма̄н 12 та̄л яныт ня̄врамытн суссылтаӈкве о̄с щё̄питаслӯв. Таима̄гыс то̄ва пилыщмаӈ утыт ощхуль ва̄рнэ щирыл ва̄рсанӯв. Та щирыл ханты ос ма̄ньщи ма̄хум та̄нки ёмщакве̄г тӯлыглахтуӈкве ха̄сэ̄гыт. Ня̄врамытын соссаӈ ма̄хум пе̄с наканыл ва̄ӈкве э̄ре̄гыт, пе̄с хо̄нт О̄тыраныл тэ̄ланыл о̄с вос ва̄гыт" Хуньт ты пе̄с мо̄йт Александр Иванович Силин, ханты ня̄врамыт ханищтан хо̄тпан, нэ̄пакн хасвес. Мо̄лал тав потырта̄лыс: «Ам ань «Монти Танья» потыр ловиньта̄лнэм сыс атпан та̄лн ювле хультум порам ка̄стылум. Тувыл мӯтраӈ о̄лупсан ханищтам ханты о̄йкат пуссын номылматыглыянум. Тыи ханты ла̄тӈыл пе̄с мо̄йт мо̄йтыглам Семён Фёдорович Покачев, а̄нумн потрыт рущ ла̄тӈын толмащлан хум Михаил Иванович Покачев. Ос Угут па̄вылт «выгыр ё̄рнколт» рӯпитам кӯщай Ефим Яковлевич Каюков а̄нумн ханты йис накыт о̄вылтыт са̄в потырта̄лыс, матыра̄ти хӯлтыглас. Ань пуссын ты юртанум хосат а̄тимыг е̄мтсы̄т. Туп ты «Монти Танья» йис потыр щирыл та̄н мо̄т мирн вос о̄с номавет, ма̄ньлат а̄гитнпыгытн ос апгытн вос ва̄вет». Ты мо̄йт тох потыртавес. Са̄ртын кит юртыӈыщ о̄лнэ колта̄глыг суссылтавесы̄г. Акв колта̄глыт «Са̄лы» намаим рӯт ма̄хум, мо̄т колта̄глыт «Ю̄свой» намаим рӯт ма̄хум о̄лсыт. «Юсвой» рӯт ма̄хум сака ё̄р, та̄ксар ма̄хмыг ловиньтахтасыт. Ты ма̄хум акв по̄хат о̄лсыт, хӯл а̄лыщлым ос во̄раим о̄лсы̄гхулсы̄г, то̄внакт тэ̄нки халэ̄нт мӯйлуӈкве хо̄игласыт. Акв щёс Норкаики «Са̄лы» рӯт ма̄хум яныгпа̄ла о̄йка Нэвикурек «Ю̄свой» рӯт ма̄хум яныгпа̄ла о̄йка палт мӯйлуӈкве хо̄яс. Тэ̄н ӯнлысы̄г, потыртасы̄г. Аквматэ̄рт мӯй о̄йка Нэвикурек нё̄тнэ а̄гитэ ка̄саластэ, таве нэ̄г виӈкве номылматас. Тувыл, ва̄им, ма̄ньлат нэ̄ матум хо̄тпан нэ̄г хунь виве. Таима̄гыс кит яныгпа̄ла о̄йкаг халэ̄нт халмалтахтасы̄г. Та сыс та̄н ма̄нанылт пилыщмаӈ пора ёхтыс. Мо̄т ма̄ныл хащта̄л ма̄хум та̄н ётаныл хо̄нтлуӈкве ёхтыгпасыт. Та̄н нэ̄мхотьют ат са̄литасыт, янгема̄не пуссын порслысаныл ос та̄нки кӯщайлахтуӈкве патсыт. То̄нт тӯлмах Норкаики таквина̄тэ ос рӯт ма̄хманэ лылыяныл нэ̄гылтан ма̄гыс хащта̄л утытн нё̄туӈкве ла̄вхатас. Ос тувыл во̄рт тӯйтыглахтам «Ю̄свой» рӯт ма̄хум порслаӈкве аквъёт та минасыт. Та̄н Нэвикурек та̄ксар ма̄хум э̄ткотильт хо̄нтсаныл ос лю̄ль ва̄рнэ ма̄гыс илттыг ёхтыгпасыт. Нэвикурек ма̄нь пыге̄н сысы оюӈкве кащилтастэ. Пыге̄н тав ла̄выс, такви ю̄свой рӯтэ э̄лаль вос тотытэ, ма̄хманэ ос ма̄тэ та̄кыщ вуянтым вос о̄ньщитэ, ю̄свой ма̄хум аквтох суиӈ намыл э̄лаль вос о̄лсыт. Ань ты пе̄с мо̄йт щирыл пуссын тох э̄лаль та е̄мтыс. Танья – тыи Нэви курек апыг. Нэви курек ма̄нь пыге во̄рт тӯйтыглахтам порат Васэк юртэ Айни йигрище ёт акванхо̄нтхатасы̄г. Тэ̄н рӯтанэ̄н пуссын порславе̄сыт, нэ̄мхотьют ат хультыс. Тувыл мо̄т сытам ма̄н о̄луӈкве та минасы̄г. Тох Танья пыг самын патыс. Ань тав ты ма̄тэ э̄лаль ӯргаластэ, таве̄ныл пуссын пилсыт. Такви рӯт наме, со̄ль, суиӈыг ва̄рыстэ. Тав уре̄т ань тыг мус ма̄хум потыртэ̄гыт, на̄н Танья турсуе хӯнтамлаӈкве тахмаегы̄н ке, туи порат «Орловский борка» ла̄внэ ма̄н минэ̄н. Тот яныг ӯрн но̄хха̄ӈхе̄н, тувыл палил ма̄ хӯнтлэ̄н, ёмщакв хӯнтлэ̄н. То̄нт на̄н хумус Танья, Ю̄свой рӯт ма̄хум Хо̄нтО̄тыр сыме путги, хӯнтамлылы̄н. Тав сыме щар мо̄йт щирыл акваг лылыӈ.

1070 2014.02.21. Тамара МЕРОВА

То̄ва тэ̄лат йильпи щирыл ва̄равет. Та хультум э̄тпост са̄всыр кӯщаит округ губернатор Наталья Комарован кит щёс акванатыгла̄лве̄сыт. Кӯщаит са̄всыр са̄кконытн манос мо̄т документытн са̄всыр э̄рнэ ла̄тӈыт хассыт. Ань та̄н хансум ла̄тӈаныл ёт депутатыт ка̄саще̄гыт ке, са̄кконыг манос э̄рнэ нэ̄пакыг тах пирмайтавет. Акванатхатыглам кӯщаит государственный имущество ёт рӯпитан хо̄тпат ва̄рнэ рӯпатаныл мӯсхалыг уральтаӈкве патыяныл. Ань организацият манос ма̄хум та̄нки нупыланыл хансум коланыл нэ̄пакыт хӯрум хо̄тал сыс атуӈкве вос а̄лыме̄гыт. Та̄н ты тэ̄лат хосан ул вос хультуптыяныл. То̄ванакт ма̄хум наска̄ссыг хоса ӯрхатэ̄гыт. Тувыл ветеринарный служба рӯпатат са̄всыр тэ̄ланэ ань мо̄т щирыл щё̄питаӈкв патавет. Округн тэ̄нутыт тотнэ порат ос ӯйхул нё̄выль хосыт э̄лумхо̄ласыт а̄гмыл ул вос ха̄хтавет, ты тэ̄лат аргеннув та̄кыщ уральтаӈкве тах патавет. Ма̄хум пуста̄гыл вос о̄лсыт ос спорт хосыт та̄ксарыг ос ё̄рыг вос е̄мтсыт, каснэ колыт ань ёмащакв вос рӯпитэ̄гыт, та̄н округ правительство па̄лыл олннё̄тмилыл та̄ставет. Ань округт 18 тамле колыт субсидияолныл тах мивет. Мо̄т документнэ̄пак кӯщаит «Многофункциональный центр Югры» нампа колыт урыл пирмайтасыт. Ма̄хум ань «единое окно» хосыт та̄нки ва̄рмаляныл та̄рапаттуӈкве ве̄рмияныл. Мо̄т сапра̄нит 2014 та̄л ос 2015-2016 та̄лыт кастыл хансым окружной бюджет са̄кконын кӯщаит о̄с мо̄т ла̄тӈыт хӯлтсыт. То̄ва тэ̄латныл хультум олныт кӯщаит школат, пӯльницат, каснэ колыт ӯнттын ма̄гыс мыганыл. Ща̄ньа̄щта̄л хультум а̄гитпыгыт молях колыл вос мивет, тув о̄с са̄в олн та̄ставе. Тувыл та̄н округт «прожиточный минимум» ва̄рмаль о̄вылтыт потыртасыт. Рӯпитан хо̄тпат э̄тпос сыс 11 со̄тыра 588 солко̄вил хасве̄сыт, пенсият о̄лнэ хо̄тпат – 8 со̄тыра 814 солко̄вил, ня̄врамыт – 10 со̄тыра 358 солко̄вил хасве̄сыт. Тыгыл мощщанув олн винэ ма̄хум нё̄туӈкв патавет.

1070 2014.02.21. Людмила ТЕТКИНА

Ре̄тыӈ ю̄свой э̄тпос 21 хо̄талэ ща̄нь ла̄тыӈ янытлан хо̄талыг о̄лы. Югра ма̄т о̄лнэ я̄тил мир! Ма̄н, округ Думат рӯпитан депутатыт, ща̄нь ла̄тыӈ янытлан Мирхал хо̄талыл на̄нан янытлыянӯв! То̄ва ялпыӈ хо̄талыт са̄всыр мирыт акваню̄рщхатым янытлэ̄гыт. Ща̄нь ла̄тыӈ янытлан Мирхал хо̄тал о̄с тамле хо̄талыг ловиньтахты. Ты хо̄тал ЮНЕСКО нампа мирхал организация ва̄руӈкве номылматастэ. Ос таима̄гсыл ва̄раве, ка̄сыӈ э̄лумхо̄лас ща̄нь ла̄тӈыл вос потырты, ул вос ёрувлытэ ос пе̄с йис ва̄рмалит э̄лаль вос тотыянэ. Щар о̄влэ̄т тамле ялпыӈ хо̄талыл ма̄ньщи ос хантыт мирыг янытлаӈкве э̄ри. Ань округувт соссаӈ ма̄хум ма̄гсыл пирмайтым са̄в са̄кконыт рӯпитэ̄гыт. Та̄н ла̄тӈаныл ул вос со̄йме̄гыт, яныг рӯпата ва̄раве. Ща̄нь ла̄тӈув э̄лаль тотым, ма̄н са̄всыр мирыт халт юртыӈыщ ос ёмащакв э̄лаль о̄луӈкве патэ̄в. Борис Хохряков, округ Дума кӯщай, ке̄тум ла̄тӈе ма̄ньщи ла̄тӈыл Л. Теткина хансыстэ.

1070 2014.02.21. Людмила ТЕТКИНА

Ня̄врамыт ща̄нь ла̄тӈыл ханищтан нэ̄. Ты хурит Евдокия Ивановна Кугина по̄слым о̄лы. Тав Ха̄льӯс район Кульпас па̄выл школат ня̄врам ханищтан нэ̄г рӯпиты. Евдокия Ивановна 9, 10 ос 11 класс а̄гитпыгыт ма̄ньщи ла̄тӈыл потыртаӈкве ханищтыянэ. Ты урокын ма̄ньщи, рущ ос мо̄т ня̄врамыт щар пуссын ялантэ̄гыт. Тувыл ос таи лю̄ль, тамле урок са̄т сыс акв щёс туп ва̄рыглаве. Ос ма̄ньщи а̄гитпыгыт халт туп китхӯрум ня̄врам ща̄нь ла̄тыӈ торгамты, потыртаӈкве нэ̄мхотьют ат ха̄сы. Ма̄н ты ма̄ньщи нэ̄ ща̄нь ла̄тыӈ ялпыӈ хо̄талыл янытлылӯв ос са̄в ёмас сымыӈ ла̄тыӈ таве̄н ке̄тэ̄в, пус ка̄т, пус ла̄гыл таве̄н ла̄ве̄в.

1070 2014.02.21. Валентина УЗЕЛЬ

Хо̄нтлам ос ань лусытан пыгыт нё̄тавет. Ты та̄л 25 та̄лыг ты е̄мтыс, Афганистан нампа э̄лы хо̄н ма̄т хо̄нтлын ва̄рмаль ёлпо̄илттавес. Ань ты ва̄рмаль кастыл ма̄н округув янытыл тот хо̄нтлам ма̄хум пуссын янытлавет. Ань та хультум са̄тыт журналист ма̄хум ёт потыртан ма̄гыс ат хо̄тпа ёхталасыт. Ты – округ военный комиссар Ю. М. Буров; – «Баграм» нампа общественный организацият кӯщай С. Г. Ниязов; – ма̄ньлат ма̄хум организациянылт кӯщай И. И. Есин; – комитет солдатских матерей кӯщай нэ̄ И. Ф. Браун; – ос Афганистан ма̄т по̄рслым хум увщитэ С. Ю. Балина. Юрий Михайлович Буров ла̄выс, ань са̄лтатыт хумус маставет, хумус тыттавет, ты ва̄рмалит пуссын уральтым о̄ньщавет. Ос ань армияв ма̄гыс сака са̄в олн холтаве, тув са̄в йильпи ищхӣпыӈ ут ёвтаве. Военный товлыӈха̄пыт, вертолётыт, ща̄рщит яласан катерыт ань пуссын пе̄нтавет, йильпи утыт щар номтыӈыг ва̄равет. Ань ма̄н ма̄в уральтан ма̄гыс ос матыр йильпи ут акваг та ва̄раве. Акв тамле ут рущ ла̄тӈыл тох ла̄ваве – скрытое управление войсками (СУВ). Ань ты ут лов са̄лтат пе̄нтсыл рӯпиты, такви маныр э̄ри – по̄слы, ма̄в янытэ̄т уральтаӈкв ве̄рмитэ. 2017 та̄л мус армияв «контрактныиг» ва̄раве. Ка̄сыӈ лӯсытан хо̄тпа олныл ойтуӈкв патаве. Тув мус армияв атса̄т со̄тыра са̄витыг тах е̄мты. Та ювле хультум 2013 та̄лт 81 со̄тыра хо̄тпа контрактнэ̄пакт хасхатасыт, ань ты та̄лныл армият контракт щирыл лусытан ма̄хум са̄вмуӈкв тах патэ̄гыт. Пыгыт армият лусытаӈкв вос ка̄саще̄гыт, ты военный комиссар такви ма̄хманэ ёт школатт ос колледжитт ханищтахтын ня̄врамыт ёт акваг хо̄нтхатыгла̄лы. Ты э̄тпост та̄н колледжитн ялсыт, пыгыт ёт армия урыл потыртасыт. Тувыл титыглаве̄сыт, армиян та̄н ялуӈкв ка̄саще̄гыт ман а̄ти. Пыгрищит пуссын ка̄сащасыт, щар акв хо̄тпа юн хультуӈкв ат таӈхи. Ты ёхталам ма̄хум халт тит нэ̄г о̄лсы̄г, акватэ Ирина Филипповна Браун, тав комитет солдатских матерей кӯщаиг о̄лы. Такви пыге ос хо̄нтлас, Чечнят порслувес. Ань ты нэ̄кве са̄всыр ма̄тт лӯсытан пыгыт уральтым яласы. Тав ётэ ща̄нит пыганыл палт воинский частин ялуӈкв о̄с ве̄рме̄гыт. Тав ла̄выс, таве̄н э̄тэхо̄талэ салтатыт ман та̄н ща̄няныла̄щаныл свонитаӈкв ве̄рме̄гыт, пуссын нё̄тыянэ. Ты хум хо̄тпат халт иӈ акв нэ̄кве о̄лыс, тав наме Светлана Юрьевна Балина. Тав а̄пщитэ о̄с Афганистаныт порслувес. Ань Ханты-Мансийск ӯст о̄лнэ школа №3 тав наме̄тыл пинуӈкв та̄н таӈхе̄гыт. Ос матрыг школа кӯщаит та̄н ётаныл ат ка̄саще̄гыт. Ань ты ва̄рмаль урыл та̄н мирн потыртэ̄гыт. Ӯст о̄лнэ ма̄хум вос ла̄ве̄гыт, ты школа Павел Моденцов намыл пинуӈкв э̄ри ман а̄ти.

1070 2014.02.21. Валентина УЗЕЛЬ

Округувт о̄лнэ я̄тил хум хо̄тпанув! Ре̄тыӈ ю̄свой э̄тпос 23 хо̄талэ̄т на̄нан янытлыянӯв. Ты хо̄тал кастыл ма̄н са̄в ёмас ла̄тыӈ на̄нанн ла̄вуӈкв таӈхе̄в. 23 февраль – на̄н ма̄гсылын яныг ялпыӈ хо̄талыг о̄лы. Ма̄в ӯргалан российский са̄лтатанув э̄тэхо̄тал лӯсытэ̄гыт. Та̄н щарщит яласэ̄гыт, то̄румт товлыӈха̄пыл Россияв ӯргалыяныл, ма̄те̄в янытэ̄т са̄всыр утыл сунсыяныл, мо̄т ма̄ныл по̄х хо̄тпа тыг ул вос ёхты. На̄н ё̄ранын хосыт ма̄н ёмащакв, пилта̄л о̄лэ̄в, ня̄враманув янмалтыянӯв. Кос хуньт лусытам ман хо̄нтлам хо̄тпат пуссын та̄ксарыг о̄лсыт, ё̄рыг о̄лсыт. Ма̄н о̄лнэ ма̄в ӯргалым на̄нтина̄нын ат са̄литасаны̄н. Ань яныгман пыганув о̄с акв тамле хо̄тпаг вос яныгме̄гыт. Ма̄н Россияв, ма̄н Родинав вос янытлыяныл ос ёмас са̄лтатыг вос е̄мтэ̄гыт. Ты ялпыӈ хо̄талувт ка̄сыӈ колт на̄н ма̄гсылын пасан вос ва̄раве, пуста̄гыл о̄лнэ ла̄тӈыл пуссын вос ла̄ваве̄н. Округ Дума кӯщай Б. Хохряков те̄тум ла̄тӈе ма̄ньщи ла̄тӈыл В. Хозумова хансыстэ.

1070 2014.02.21. Александр ВЬЮТКИН

О̄выл щёс ва̄рыглым пӯмащ. Ань ты э̄тпос котиль хо̄талэ̄т Ханты-Мансийск ӯст округ янытыл о̄лнэ са̄лыӈ ма̄хум халт яныг касыл ва̄рыглавес. Ты пӯмащ рущ ла̄тӈыл «Конкурс профессионального мастерства среди оленеводов Ханты-Мансийского автономного округа-Югры» намаим о̄лыс. Тамле касыл щар о̄выл щёс ты ва̄рыглавес. Округ янытыл о̄лнэ са̄лыӈ ма̄хум титыглахтасыт, касыланыл манрыг Ханты-Мансийск ӯст ва̄раве? Кӯщаит ла̄всыт: «Ханты-Мансийск ӯс округув котильт о̄лы, ты ма̄гсыл тыт ва̄рвес. Са̄всыр районытныл каснэ ма̄гыс ёхталам ма̄хум йинэ лё̄ӈханыл акв палытыг о̄лнэ щирыл тыт ва̄рвес». Са̄лыӈ ма̄хум каснэ хо̄таланыл э̄лыпал хо̄талт Ханты-Мансийск ӯсн са̄лыяныл тотве̄сыт. Ат районныл ма̄хум тыг касуӈкв ёхталасыт. Нижневартовский, Сургутский, Нефтеюганский, Белоярский ос Ха̄льӯс районныл ма̄хум о̄лсыт. Аквъёт пуссын хо̄тхуйполов каснэ са̄лыӈ сун тыг тотыглавес. Халанылт щар са̄в, са̄т са̄лыӈ сун, Сургутский районныл ёхталас. Тувыл ос са̄в саран ма̄хум о̄лсыт. Ма̄ньщи халт са̄лыӈ суныл каснэ хо̄тпа щар а̄тим о̄лыс. Са̄лыӈ колт рӯпитан ос матыр нё̄тмил ва̄рнэ щирыл хӯрум ма̄ньщи хо̄тпа ёхталас: Василий Ромбандеев Анна э̄кватэ̄нтыл ос Данил Вынгилев. Ӯсувн ёхтуманыл порат ат ё̄рнкол тӯщтысыт ос са̄лыяныл каснэ ла̄кв ханищтан щирыл а̄рталасаныл. Са̄лыӈ ма̄хум халанылт каснэ ва̄рмаляныл а̄лпыл онтолов щёс порат о̄вылтавес. О̄влэ̄т та̄н са̄лыяныл урыл са̄всыр щирыл титыглаве̄сыт. Тыи ва̄рмаль ос касылыг ловиньтахтас. «Кубок губернатора» нампа касыл о̄лнэ хо̄талт сака ащирмаӈ о̄лыс. Каснэ ва̄рмаль хунь о̄вылтавес, сунсуӈкв ёхталан ма̄хум мощща о̄лыс. Мӯй хо̄тпат са̄выӈпа̄лэ мольщаӈыл, сахил ос хорамыӈыщ ю̄нтым ва̄йил масхатам тот ё̄ӈхатахтыгласыт. Са̄лыт о̄щнэ ма̄хмыт номтаныл уральтан юипа̄лт ма̄к са̄лыӈ суныл яласан ва̄рмаль та о̄вылтавес. Ма̄хманув халанылт акваннё̄тхатым кассыт. Щар ма̄ньлатыӈ ка̄снэ хум Марк Рыков, щар янгыг Иосиф Кечимов о̄лсы̄г. Нэ̄ хо̄тпат халт акв ханты нэ Любовь Казанжи туп касыс. О̄влэ̄т ма̄хум са̄лыяныл урыл титыглахтан касыланыл щирыл мӯйлуптаве̄сыт. Но̄хпатум ма̄хум халт юио̄выл места Саранпа̄вылныл ёхталам саран хум Аркадий Хозяинов вис. Аркадий э̄лыпа̄лт Касум па̄вылныл о̄лнэ ханты хум Юрий Тарлин но̄хпатыс. О̄выл места Иван Попов вистэ. Тав о̄с Белоярский район Касум па̄вылныл ёхталас. Са̄лыл каснэ, тынщаӈ ре̄пнэ ос хӯрум щёс аквторыг поргын щирыл хӯрмит ма̄н Евгений Айпин е̄мтыс. Титыт места Альберт Покачев вистэ. Тэ̄н сас Сургутский районныл о̄лэ̄г. Са̄лыӈ суныл каснэ щирыл Юрий Тарлин но̄хпатыс. Соссаӈ ма̄хум халт «Кубок Губернатора» нампа щар ма̄к яныг мӯйлупса Юрий Кузьмич Тарлин вистэ. Ты ма̄гсыл тав те̄р ха̄пыл яласан яныг моторыл ос те̄р ква̄лгыт хосыт на̄йпос минэ генераторыл мӯйлуптавес. Мо̄т но̄хпатум ма̄хум ос «Буранын» ӯнттын йильпи двигателил мӯйлуптаве̄сыт.

1070 2014.02.21. Анна АЛГАДЬЕВА

Ам я̄тил тыныӈ ща̄нькем. Са̄пса е̄рт Ке̄расколыӈъя̄ па̄вылт ам ща̄нькемомакем Александра Васильевна Анямова о̄лы. Тав 1939 та̄лт Та̄пыст самын патыс. Ня̄хщамво̄ль па̄вылт яныгмас, хӯрум та̄л ишколат ханищтахтас. Хунь интернат пусвес, ща̄нен интернатн ат майвес, юн нё̄туӈкв э̄рыс. Юв ханищтаӈкв минэ урокыт юн ханищтаӈкв ща̄не̄н ат та̄ртвес. «Урок ханищтаӈкв ӯнтэ̄гум, ща̄нюмн ка̄салавем, ла̄ви: «Ущты ханищтахтуӈкв ялыс, о̄с ты хансуӈкв ӯнтыс ». Хотталь ульйӣв тӯлуӈкв ман вит тотуӈкв та ке̄тыгпавем, тикати кутюв пут ва̄руӈкв э̄ри». Ща̄нюм ла̄ви: «Хунь йильпи манит лӯисупныл тотве̄сыт, ма̄н а̄гирищит та̄н нупланыл та сунсэ̄в, супанылсахияныл такем та хорамыӈыт, ма̄щтырыт, такем са̄в хорамыл та ю̄нтнэ̄ныл. Ме̄н юрт а̄гиме̄нтыл тув ка̄салахтасме̄н о̄с па̄квпа̄лыӈ суп та ю̄нтыме̄н. Па̄квпа̄ланме̄н нёланыл са̄всыр щирыл во̄лиламыт, ме̄н тай номсыме̄н, маныр ха̄сыме̄н. Э̄кватн ка̄сала̄веме̄н, ла̄ве̄гыт: «А̄гирищиг, маныр хорамыӈ! » Ме̄н тай о̄лнэме̄н ат ва̄глуме̄н, матаёраг та лю̄ляхо̄лыме̄н, ме̄нкинаме̄н а̄ӈквата̄лылме̄н, та ха̄йтыме̄н». О̄с ща̄нюм потырта̄лы: «Аквнакт Тапыст о̄лмувт арыгтам совсаквытл ам ма̄нь а̄кань ва̄йрищиг ю̄нтсум, тучаӈумн тагатасагум, Лӯсум э̄кван ка̄салавесы̄г, маткем та о̄щатахтыглас, ла̄ви: « Ятаты, ты а̄гирищкве хуньт тах матыр ва̄руӈкв, матыр ю̄нтуӈкв тав та ханьщувлы». Со̄ль, ам ща̄нюм маныра̄ти ва̄руӈкв пуссын ха̄сы. Ма̄нь та̄гыл ю̄нсхатуӈкв ханьщувлас: сахи, ва̄й, мольщаӈ, по̄рха, вуйкан кувщ, ня̄ра, нуй сахи, пӯрка, хорамыӈ суп ю̄нтуӈкв; па̄юп, со̄вт, са̄н, ны̄п ва̄руӈкв ха̄сы. Ве̄рмуме порат во̄рт яласас, пушнина вуим порат – лэ̄ӈнаяс, со̄рп ка̄тынпаттыгла̄лыс, нёхс алыгла̄лыс, охсар, со̄выр лэ̄сыл пувыгла̄лыс, щёпыр пил ва̄тнэ порат акваг ӯтаве. Ань о̄с иӈ мо̄рсыӈыг во̄рн яланты, мо̄лты таквс акв нёхс кутьво̄йкатэ̄тыл ӯтталас». Ва̄ти хо̄тал э̄тпос 29 числат ам я̄тил тыныӈ ща̄нькем самын патум хо̄талэ о̄лыс, таве̄н 75 та̄л то̄влыс. Ам таве̄н ёмас ӯлум ла̄тыӈ ке̄тэ̄гум. На̄й-О̄тыранэ̄н вос ӯргалаве. Са̄в та̄л пуста̄гыл вос о̄лы. Пус ка̄т, пус ла̄гыл! Наӈ ма̄нь а̄гин Хурит Александра Васильевна Анямова а̄гиа̄гияге ёт по̄слым о̄лы. 2013 та̄л.

1070 2014.02.21. Светлана РОМБАНДЕЕВА

«Лӯима̄ сэ̄рипос» ма̄ньщи газетав 25 та̄лэ то̄влыс. Ты та̄л «Лӯима̄ сэ̄рипос» газетав 25 та̄лэ то̄влыс. 1989 та̄л порат ре̄тыӈ ю̄свой э̄тпос 11 хо̄талэ̄т Ханты-Мансийск ӯст ма̄ньщи ла̄тӈыл хансым о̄выл газета ва̄рвес. Тувыл э̄лаль ань ты хо̄тал ма̄ньщи газетав самын патум хо̄талыг та ла̄ваве. «Лӯима̄ сэ̄рипос» тох Клавдия Васильевна Афанасьеван намаявес, а̄ги о̄парищ наме Сайнахова. Ты ма̄ньщи нэ̄ Ха̄льӯс район Сӯкыръя па̄вылт самын патыс. О̄выл газетав ва̄рнэ э̄лыпа̄лт потрыт ман мо̄йтыт ма̄ньщи ла̄тӈыл «Остяковогульская правда» газетат хансыглаве̄сыт. Ты газета рущ ла̄тӈыл кос хасвес, ос то̄ва потрыт ма̄ньщи ос ханты ла̄тӈыл хансым о̄лсыт. Мощ ётылнуве, 1957 та̄л яныг таквс э̄тпос па̄сныл, ханты ла̄тыӈ газета ва̄руӈкве патвес, «Ленин пант хуват» намаявес (ма̄ньщи щирыл толмащлаве те «Ленин лё̄ӈх хосыт»). Та газетатт Юван Николаевич Шесталов стихотворениянэ, Пе̄тр Ефимович Шешкин потранэ, Матрёна Панкратьевна Баландина (Вахрушева) э̄рганэ хансыглаве̄сыт. 1978 та̄л яныг таквс э̄тпос газетат Наталья Васильевна Сайнахова «Ё̄р Юван» мо̄йтэ хансым о̄лы. Ты мо̄йт таве̄н Роман Алексеевич Сайнахов мо̄йтыглам, Ха̄льӯс район Сӯкыръя па̄вылт о̄лум хум. Тувыл тав Ю. Н. Шесталов, П. Е. Шешкин, Г. Н. Сайнахов ос мо̄т ма̄ньщи ма̄хманув урыл хансыс. 1986 та̄лт ма̄ньполь э̄тпос газетат Клавдия Васильевна Афанасьева «Олимпиада хо̄тал» статья хансыс, ань Саранпа̄вылт олимпиада о̄лум порат ма̄хум хумус кассыт, мӯйлысыт, та урыл хансыс. Ща̄нь ла̄тыӈ ханищтан ва̄рмаль урыл «Ленин пант хуват» газетат Клавдия Васильевна са̄в потыр хансыглас. Та̄л котиль э̄тпост 1989 та̄л порат та газетат тав юио̄выл потре хансыстэ, «Йис о̄лупсав э̄ри ялтуптаӈкве» намаястэ. Тувыл аквта та̄лт ре̄тыӈ ю̄свой э̄тпост «Лӯима̄ сэ̄рипос» о̄выл газета ва̄рвес. Та па̄сныл газетат потрыт, мо̄йтыт ос э̄ргыт туп ма̄ньщи ла̄тӈыл хансуӈкве патве̄сыт. «Лӯима̄ сэ̄рипос» газетат о̄влэ̄т ты ма̄ньщи ма̄хманув рӯпитасыт, статьят хассыт: Клавдия Васильевна Афанасьева, Наталья Васильевна Сайнахова, Николай Михайлович Садомин, Альбина Романовна Станиславец, Раиса Калистратовна Бардина, Татьяна Степановна Гоголева, Никита Калистратович Партанов. Мощ ётылнуве газетан рӯпитаӈкве ёхтысыт: Валентина Васильевна Узель, Светлана Матвеевна Ромбандеева, Тамара Сергеевна Мерова, Галина Рудольфовна Кондина, Людмила Ильинична Теткина, Николай Савельевич Меров, Анна Николаевна Алгадьева, Александр Васильевич Вьюткин. Ань ты нёлолов хо̄тпа «Лӯима̄ сэ̄рипос» газета та̄н ты ва̄рияныл. Ты 25 та̄л сыс са̄в потыр, мо̄йт, э̄рыг ос по̄слум хурит ма̄ньщи ма̄хманув газетан ке̄тыгласыт, хассыт. Ханты-Мансийск ӯс педучилищат ханищтахтан студентанув о̄с хансыгласыт. 1994 та̄лт ма̄ньщи а̄гииг Марина Александровна Алгадьева (а̄ги о̄парищ наме Монина, Кимкьясуйныл о̄лы) ос Татьяна Петровна Таратова (а̄ги о̄парищ наме Хатанзеева, Ло̄пмусныл о̄лы) са̄всыр статьят хансыгласы̄г. Та̄л арыгтем газетат Галина Николаевна Войтова рӯпитас. Ты ма̄хманув о̄с акваг хассыт и ань ты хо̄тал мус хансэ̄гыт: Евдокия Ивановна Ромбандеева, Анастасия Ильинична Сайнахова, Альбина Романовна Станиславец, Евдокия Ивановна Хозумова, Мария Тихоновна Двинянинова, Никита Калистратович Партанов, Валентина Селивёрстовна Иванова, Светлана Селивёрстовна Динисламова, Мария Владимировна Кумаева, Софья Алексеевна Ярцева, Наталья Борисовна Дудорева, Дарья Ивановна Белова, Ольга Ивановна Хатанева ос мо̄т ма̄хум. А̄тимыг е̄мтум хо̄тпанув о̄с са̄в хансыгласыт: Иван Афанасьевич Меров, Степан Гоголев, Анфиса Михайловна Хромова, Николай Михайлович Садомин, Нина Петровна Вынгилева. Газета ва̄рнэ хо̄тпатн Мария Кузьминична Волдина ос Таисия Степановна Себурова акваг нё̄тсыг, ты ханты нэ̄г са̄в та̄л «Ханты ясанг» газетат рӯпитасы̄г. Я̄тил ма̄хумате̄нув, ма̄н «Лӯима̄ сэ̄рипос» газетат рӯпитан хо̄тпат, на̄нан ты ялпыӈ хо̄талыл янытлыянӯв! Потрыт ма̄ньщи ла̄тӈыл хансэ̄н, редакциян ке̄тэ̄н. Газетав акваннё̄тхатым ва̄рилӯв, хансылӯв. Ща̄нь ла̄тӈувтыл потыртэ̄в те, газетав о̄лы те, ла̄тыӈте̄в мощ о̄с тах о̄лы, ма̄ янытыл мощ о̄с суйты. Пуссын пуста̄гыл о̄лэ̄н! На̄яны̄н-О̄тыраны̄н вос ӯргалаве̄н! Пус ка̄т, пус ла̄гыл!

1070 2014.02.21. Светлана РОМБАНДЕЕВА

Ма̄ньщи ня̄врамыт ханищтан нэ̄. Ты хурит ма̄ньщи нэ̄ Светлана Савельевна Мерова по̄слым о̄лы. Ха̄льус район Саранпа̄вылн ялмум порат школан щалтсасум, тав ётэ хо̄нтхатыгласум. Светлана Савельевна тот рӯпиты, па̄выл ня̄врамыт ма̄ньщи ла̄тӈыл ханищтыянэ. На̄н ань тав потре ловиньтэлы̄н: Школат ам са̄тхуйпловит та̄л ты рӯпитэ̄гум, ня̄врамыт ма̄ньщи ла̄тӈыл потыртаӈкве ханищтыянум. Китыт классныл аквхуйплов класс мус ханищтахтан ня̄врамыт ща̄нь ла̄тыӈ урокын ёхталэ̄гыт. Ма̄н са̄всыр ла̄тӈыт ханищтэ̄в, стихотвореният, э̄ргыт. То̄ва ня̄врам ханищты, то̄ва ос ханищтаӈкве ат таӈхи. Па̄влынт ань ма̄ньщи ла̄тӈыл потыртан ще̄мьят о̄лэ̄гыт? Ань тамле ще̄мья мощща, аквакитыг. Юн аквписыг рущ ла̄тӈыл потыртэ̄гыт, таима̄гыс ня̄врамыт аты ха̄сэ̄гыт ща̄нь ла̄тӈыл потыртаӈкве. Наӈ ще̄мьянт юн ма̄ньщи ла̄тӈыл потыртэгы̄н? Омав ма̄ньщи ла̄тӈыл потырты ма̄н ётув, ам то̄ванакт о̄с потыртэ̄гум. О̄йкам о̄с ма̄ньщи, тав ётэ потыртыме̄н. Светлана Савельевна Хо̄сло̄х па̄вылт яныгмас, школат ос Саранпа̄вылт ханищтахтас. Омагеа̄тяге, Лидия Анатольевна ос Савелий Прокопьевич, са̄т ня̄врам о̄ньщигласы̄г. А̄тяныл хосат а̄тимыг е̄мтыс, оманыл ань ня̄враманэ палт Саранпа̄вылт о̄лы. Светлана Савельевна школа а̄стламе юипа̄лт Санкт-Петербург ӯсн минас, тот А. И. Герцен нампа университетт учителиг ханищтахтас. Тувыл ань такви ханищтахтам школатэ̄т ты рӯпиты. Тав ла̄внэ̄тэ щирыл, школат ня̄врамыт ёт рӯпитаӈкве таве̄н мӯсты. Ос хумус ат мӯсты? Тав ща̄нь ла̄тӈе ос ма̄ньщи о̄лупсав ёмащакв ва̄гтэ, мире э̄руптытэ, ла̄тӈе янытлытэ. Светлана Савельевна хо̄тпа нупыл сымыӈ нэ̄, тамле нёмса, ка̄ркам э̄лумхо̄лас. «Лӯима̄ сэ̄рипос» газетав ялпыӈ хо̄талэ кастыл, ма̄н ты я̄тил ма̄ньщи нэ̄те̄в янытлылӯв! Пуста̄гыл вос о̄лы, На̄янэ̄н-О̄тыранэ̄н вос ӯргалаве!

1070 2014.02.21. Светлана РОМБАНДЕЕВА

Ло̄пмус па̄выл пыгрищ. Ты хурит ма̄ньщи пыгрищ по̄слым о̄лы Ваня Албин. Тав Ха̄льӯс район Ло̄пмус па̄вылт самын патыс, тот о̄лы. Ваня Рита а̄кве̄н янмалтаве, оматэ хосат а̄тимыг е̄мтыс. О̄выл нила классытт тав Ло̄пмуст ханищтахтас, э̄лаль ос Кульпас школан ханищтахтуӈкве ке̄твес. Тот ань нёлолов классыт ханищтахты, интернатт о̄лы. Ваня ань нилахуйплов та̄лэ то̄влыс, Саранпа̄вылн паспорт ва̄руӈкве ёхталас. Таве тот ва̄щинтаслум, потрамасме̄н, ня̄врамакве по̄слыслум. Ваня ла̄внэ̄тэ щирыл, школат ханищтахтуӈкве ёмас, тав классэ̄т атхуйплов ня̄врам ханищтахты. Ты я̄тил ма̄ньщи ня̄врамакве пуста̄гыл вос о̄лы, То̄рум ёт, О̄тыр ёт вос о̄лы, вос яныгми.

1070 2014.02.21. Анна АЛГАДЬЕВА

Ке̄расколыӈъя а̄гииг (Со̄лиӈыг о̄лум ва̄рмаль, атхуйпловкем э̄рыӈ ос тыгыл са̄внув та̄лыг е̄мтыс). Акв па̄вылт кит ма̄ньщи а̄гииг о̄лсы̄г. Наманэ̄н Аннэ ос Лена. Акв ва̄тихал тэ̄н акванялантасы̄г, пил ва̄тым, ла̄хс атым во̄рт ха̄йтыгтасы̄г. Аквнакт ӣтипа̄лаг акв а̄гирищкве тэ̄н палтэ̄н щалтапас, ла̄ви: «Паль хотоигпас, ква̄лгыӈ та̄гыл кӯтьвытн сып ёлыпа̄лн та ня̄влувес». Паль Аннэ тав ягпыге во̄раян а̄мпе о̄лыс. Ягпыге ты торыг юн а̄тим о̄лыс, ще̄мьяӈ та̄гыл о̄ныпе палт мӯйлым яласас. Колэ, кӯтьванэ Аннэн уральтаве̄сыт. А̄гииг кон ква̄лапасы̄г, хӯнтлэ̄г. Со̄ль, сып ёлыпа̄лт кӯтювыт та хортнэ суяныл. «Ятаты, ань кӯтюв ква̄лгыӈ та̄гыл минас, ул ёл та тагапас, ул вос пурнуве». А̄гииг молях а̄стапасы̄г, тув та ха̄йтэ̄г. Минаме̄н порат Аннэ ща̄не̄н ла̄всас кос, тав ёмщакв ат торгамтамтэ, хоталь а̄гияге тахасы̄г. Минаме̄н мус акв а̄гитэ колэ̄н масхатуӈкв ха̄йтталас, ма̄нь писале матрыг ёт а̄лмаямтэ. Па̄выл ёлыпа̄лт Ке̄расколыӈъя о̄втахты ос посыӈ витуп со̄с о̄лы, Ке̄расколыӈъя̄н паты. Со̄с ӯлтта я̄ по̄х ня̄лиӈ лё̄хъяс о̄лы, мо̄лты па̄выл ущ ва̄рим ляпат Ке̄расколыӈъя по̄х суитт Аннэ ща̄не щёпыр ня̄лит о̄ньщас. Ань та лё̄хъяс хосыт а̄гииг та ха̄йтэ̄г. Ха̄йтэ̄гха̄йтэ̄г, ляпан ат ёхтэ̄г. Акв э̄ла, акв э̄ла кӯтьванэ̄н та патантэ̄гыт. Ха̄йтсы̄гха̄йтсы̄г, торгамтастэ̄н, кӯтьванэ̄н матыр ня̄влэ̄гыт. Ла̄ве̄г: «Мощ тотнув ты кос суйтэ̄гыт, тув нэ̄гылттахтыглыме̄н, маныр хортаве». Я̄н ва̄глыгпасы̄г, хӯсы ха̄ль хосыт я̄ ӯлтта ха̄йтсы̄г, ма̄нь ня̄р во̄ӈха хосыт тахасы̄г. Мощ тотнув, йӣв щахылт ты суйтэ̄гыт. Тувле тэ̄латэ̄н а̄ти, акв кӯтьве̄н тэ̄натэ̄ныл э̄ла ат сэ̄ты. Халэ̄нт потыртэ̄г: Хотьютаме̄н па̄тамты? Наӈ писалиӈ, наӈ и па̄тлуптэн. Тыхал хӯнтала̄лэ̄г, матыр товсакв саквалан ат суйты. Хунь со̄рп хортаве, паль йӣвыӈ ма̄н ке е̄мты, товсаквыт сакваланэ̄ныл суйтэ̄гыт. Ты нэ̄матыр ат суйты. Кӯтювыт лэ̄ганыл во̄пыстэ̄гыт. Ос ляпаннув минасы̄г. Аннэ а̄ла ля̄втуӈкв патыс: «Нэ̄матыр а̄тим, аман ня̄р лэ̄гп лэ̄ӈын я̄сса ты янытва̄гыл лоӈхитахтэ̄гыт». Лена та порат ла̄ви: «Во̄рто̄лно̄йка? » Сома акватэ̄н китыглытэ̄н. Аннэ ос та порат самаге но̄ӈхаль патсы̄г, ла̄ви: «Ага». Ювле кос а̄ӈкваты, акватэ тай ла̄глаге щё̄приныл вуйлыяге. Акв юипа̄лт нас вущкасахтыгласы̄г, сома туп во̄тн тотвесы̄г. Ня̄р во̄ӈха хунь хультыгпас, ул ат мосталастэ̄н. Акв та хӯсы ха̄ле̄н ёхтыгпасы̄г, хотьют кит щёс суй та та̄ратас, ня̄лахтас. Ёлротмапасы̄г. Тай ос аман хотьют? Лэ̄гыӈ утыт ло̄йгын ма̄ныл по̄йтыгпасыт. Насати, ягпыге̄н о̄с кӯтюв хортнэ ма̄н ха̄йтум. Тэ̄н минаме̄нт ягпыге̄н кол сыст са̄гырхатас. Тав, насати, Полум ма̄хум са̄лы та̄ртан лё̄х хосыт ха̄йтум. Унсах хосыт я̄ ӯлтта унсыгтам, я̄ мо̄т па̄лыл а̄мпанэ юипа̄лт минам. Ань ка̄ркам китыг тай ат ва̄гтэ̄н, маныр ва̄руӈкв. Аман юв ха̄йтуӈкв, аман акв тув лаквхатуӈкв. «Нумын ӯнлум уткапае̄н омаке̄тэ ке нэ̄глы? Тай матыр та е̄мты » Халэ̄нт ла̄ве̄г: «Хатэ, сар, кисувла̄лыме̄н. Хотьют о̄лы, ювле тах кисувлы». Со̄ль, хотьют ювле та кисувлас. Акватэ паляге̄н ат агты, ла̄ви: Наӈ о̄с кисувла̄лэн. Э̄рыӈ, ӯйрищ ро̄ӈхи. О̄с та суяще̄г. Аквматэ̄рт хӯнтлэ̄г, хотьют ла̄ви: «Тыг яе̄н». Яныг сам хартым, тув та минэ̄г. Ляпан ёхтуӈкв патсы̄г, ягпыге̄н ля̄льт нэ̄глыс. Тэ̄н о̄выл ла̄тӈе̄н – манах? Ягпыге̄н ла̄ви: Китыг оясы̄г. Нэ̄н ос маныр тыт ва̄регы̄н? Ме̄н кӯтюв хортнэ ма̄н йисме̄н, Паль ква̄лгыӈ та̄гыл ёлтагапи, номсыме̄н. Оям китыг тай а̄гииг. То̄ва ма̄хум, хо̄т маныр во̄псата̄лы, тувле суй та та̄раты, та новитэ па̄тлуптаӈкв. Ань во̄рн ялум ма̄хум юв ёхтысыт. А̄гииг тай ща̄нена̄квен мощ та та̄ӈвесы̄г, такыщ ла̄ввесы̄г. Мо̄тынтыг хоталь ат э̄ри, тэ̄нкинатэ̄н ул вус тотытэ̄н. Маныр ат е̄мты. Ягпыге̄н яныг ягпыге во̄выс, о̄с аквта ма̄тэн минасы̄г, а̄пщике̄тэ̄н э̄рнэ щирыл щё̄питастэ̄н, юв тотастэ̄н. А̄лпыл ёмщакв пӯрласаныл, тэ̄пыӈ пасаныл ва̄рыгласаныл, ос ущ парласаныл. Ты ма̄хум то̄нт иӈ аюмкитум о̄лсыт. Во̄рто̄лно̄йка наска̄ссыг ва̄гылттаӈкв о̄с ат ро̄ви. Таве̄н пӯрлахтын ут, йир э̄ри. Ке̄расколыӈ па̄выл ань щар сытамыг е̄мтыс, кит о̄лнэ кол туп о̄лы, пилва̄тно̄йкатво̄рто̄лно̄йкат па̄вылн нэ̄глалаӈкв патсыт. Ла̄хс атуӈкв минэ̄гын, о̄с нэ̄глуӈкв ве̄рмаве̄н. Таве ат ке новилы̄н, тав о̄с ат новхаты. Тох та во̄р кӣвырт ма̄ньщиянув о̄лэ̄гыт. Паль – сэ̄мыл ман хопсат палиӈ я̄ӈк кӯтюв тох намтаве; Хӯсы ха̄ль – ёлхӯсылам, ёлпатум ха̄ль. Ты потырт ха̄ль я̄ ӯлтта патум; Ла̄глаге щё̄приныл вуйлыяге – пе̄лпыщ ха̄йты; Та̄ӈвесы̄г такыщ ла̄ввесы̄г; Полум ма̄хум са̄лы та̄ртан лё̄ӈх хусахкем та̄л ювле ка̄сыӈ таквсытӯя Полум ма̄хум иӈ Ке̄расколыӈъя̄ па̄выл та̄ра са̄лыяныл по̄сгалым яласасыт. Ань са̄лыт холасыт, са̄лы по̄сгалам ма̄хмытныл о̄с нэ̄мхотьют а̄тим. Туп са̄лы та̄ртан ма̄наныл ос яласам лё̄ӈханыл наманыл хультсыт.

1070 2014.02.21. Светлана РОМБАНДЕЕВА

Тав ма̄навн ань ты хо̄тал мус нё̄ты. Ханты-Мансийск ӯст о̄лнэ ханты нэ̄ Таисия Степановна Себурова ре̄тыӈ ю̄свой э̄тпос 23 хо̄талэ̄т самын патыс. Ты та̄л са̄тлов нупыл атыт та̄лэ то̄влы. Тав «Ханты ясанг» газетат ва̄т арыгтем та̄л рӯпитас, кӯщай ва̄ӈын нэ̄г о̄лыс. Таисия Степановна Ха̄льӯс район Тугияны па̄вылт 1949 та̄лт самын патыс, тот яныгмас. Оматэ Матрёна Григорьевна, атятэ Степан Леонтьевич. Э̄кваго̄йкаг хосат а̄тимыг е̄мтсы̄г. Акв э̄щ о̄ньщи, наме Елизавета, Нижневартовск ӯст ще̄мьятэ ёт о̄лы. Школа а̄стламе юипа̄лт, Таисия Степановна Ленинград ӯст о̄лнэ А. И. Герцен нампа институтт ханищтахтас. 1972 та̄лт институт а̄стламе юипа̄лт Ванзеват па̄вылн минас, школат ня̄врамыт ханищтас. Та юипал та̄л Ханты-Мансийск ӯсн ва̄нтлыс, ханты мир «Ханты ясанг» нампа газета редакциян рӯпитаӈкве патхатас. О̄влэ̄т ла̄тыӈ толмащлан хо̄тпаг о̄лыс, рущ ла̄тӈыл ханты ла̄тӈыг мо̄йтыт ос потрыт толмащлас. Ётылнуве корреспондентыг, тувыл ответственный секретариг рӯпитас. Са̄в та̄л газета кӯщай ва̄ӈын нэ̄г о̄лыс. Хо̄тпан та̄лэ то̄влуме юипа̄лт пенсиян минас. Таисия Степановна ща̄нь ла̄тӈе э̄руптытэ, янытлытэ. Ва̄рум рӯпататэ сака ёмащакв ва̄гтэ, мӯсхал щирыл ва̄рыстэ. Тав акваг са̄в рӯпитас. Ань газетанылт туп ёмас ос мӯтраӈ мо̄йтыт, потрыт вос хансавет, ханты ла̄тӈыл э̄рнэ щирыл вос хансавет, тув туп ёмас хурит вос по̄славет – ты урыл тав акваг номсыс, сыме ща̄ргыс. Ма̄н ма̄ньщи газетав, «Лӯима̄ сэ̄рипос» газетав, ма̄гыс о̄с сыме сака ща̄ргыс. Газета ва̄рнэ хо̄тпатн акваг нё̄тыс, акваг китыглахтас, потыр то̄вылхаты ман а̄ти, газета ва̄рнэ̄тэ ма̄гыс щё̄питавес ман а̄ти, э̄рыӈ матыр нё̄тмил э̄ри, акваг китыглахтас. Ханты ман ма̄ньщи газетат ущ рӯпитаӈкве о̄вылтахтам хо̄тпан о̄с акваг нё̄тыс, газета ва̄руӈкве ханищтастэ, э̄рнэ тэ̄лат хӯлтыглас. Газетат рӯпитаме коныпал тав педучилищат ос медучилищат ханищтахтан ма̄ньлат ма̄хум ханты ла̄тӈыл ханищта̄лсанэ. Радио хосыт о̄с потырта̄лыс, мо̄йтыт ос потрыт ханты ла̄тӈыл потырта̄лсанэ. Сака номтыӈ, мӯтраӈ хо̄тпаг о̄лнэ̄тэ ма̄гыс, 1982 та̄лт тав СССР журналистыт Союзаныл палт вуйвес. Рӯпитаме сыс са̄в почётный грамотатыл ос благодарственный пищматыл майлувес, са̄всыр мӯйлупсатыл мӯйлупта̄лвес. Таисия Степановна хо̄тпа нупыл сымыӈ э̄ква, нёмса, сэръёр э̄лумхо̄лас. Венгрия ос Финляндия учёный хо̄тпатн тав о̄с сака э̄руптаве. Са̄в та̄л тэ̄н Ева Адамовна Шмидт ёт юртыӈыщ о̄лсы̄г. Ты Венгр ма̄ныл намыӈсуиӈ учёный нэ̄ ма̄н ма̄вт соссаӈ мирагув халт са̄в та̄л о̄лыс, рӯпитас. Ты учёный хо̄тпав хосатнув а̄тимыг е̄мтыс. Нэ̄ Ханты-Мансийск ӯсн ёхталаме порат, акваг Таисия Степановна палт хо̄иглас. Аквъёт рӯпитасы̄г, э̄рнэ нэ̄пакыт хассы̄г, ханищтахтасы̄г. Ева Адамовна ханты ос ма̄ньщи ла̄тӈыл ёмащакв потыртас, пе̄с ла̄тӈыт ва̄с, пе̄с о̄лупса та маныр ханищтым о̄лыс. Мо̄т учёный ма̄хум Таисия Степановна палт ва̄тихал ёхталэ̄гыт, ханты о̄лупса урыл китыглахтэ̄гыт, тав ётэ пе̄с ла̄тӈыт толмащлэ̄гыт. Тав ань ат рӯпиты, пенсият о̄лы. Ос юн нас ат ӯнлы, ханты ла̄тӈыл нэ̄пакыт хансы, мо̄йтыт акванаты, нэ̄пакыг та̄ратыянэ. Ма̄н ос ань ты хо̄тал мус таве китыглылӯв, матыр китыглахтан ла̄тыӈ о̄ньще̄в те, та̄ра таве̄н звонитэ̄в. Таисия Степановнав сома ӯрхаты, хунь ма̄н матыр урыл китапахтэ̄в, тав ма̄навн пуссын ла̄ви, пуссын потырты. Мо̄лты та̄л тав дача кол ёвтыс, тӯя па̄сныл таквсы мус тот тэ̄пкант матыр ӯнтты, янмалты. Ӯсыӈ ма̄т акваг о̄луӈкве та̄рвитыӈ, тот ос матыр ва̄рнэ̄тэ те̄пыл, во̄рыӈ ма̄т мощ сакати ӯщлахты, сыстам лылые̄пыл лылты. Ма̄н, газетат рӯпитан ма̄хум, ты я̄тил хо̄тпав намхо̄талэ̄т сымыӈыщ янытлылӯв! Са̄в ёмас ла̄тыӈ таве̄н ла̄ве̄в, пуста̄гыл вос о̄лы, со̄тыӈыщ вос о̄лы! На̄янэ̄н-О̄тыранэ̄н вос ӯргалаве!

1070 2014.02.21. Тамара МЕРОВА

Ёмас тэ̄ланыл ма̄гыс наманыл ка̄стыянӯв. Ты потрумт ам ма̄ньщи ла̄тӈыл щар о̄выл ля̄ххалыт хансум хо̄тпат о̄вылтыт хансэ̄гум. Ам «Ленин пант хуват» 1959 та̄лт та̄ратым пе̄с газетат сунсыгламум порат ханты ла̄тӈыл хансум потрыт коныпал ма̄ньщи ля̄ххалыт о̄с хо̄нтсум. Та̄н Ханты-Мансийский педучилищат ханищтахтам а̄гитнпыгытн хансыглымат. То̄нт са̄в потыр Иван Меров ос Пе̄тр Шешкин хассы̄г. Иван Меров Хо̄сло̄х па̄вылныл о̄лыс, тав Афанасий а̄ще Мувыӈкес па̄влыӈ хум. А̄ще 1938 та̄лт репрессировайтавес ос Омск ӯст порславес. Ос Ульяна ща̄не а̄ги о̄парищ наме, ла̄ве̄гыт, Монина о̄лыс, сампыльтал нэ̄. Э̄кваго̄йкаг Па̄ял, Прасковья ос Иван ня̄враманэ̄н Хо̄сло̄хт янмалтасанэ̄н. Иван Ханты-Мансийский педучилищат ханищтахтаме юипалт Ленинград ӯсн э̄лаль ханищтахтуӈкве о̄с ялум. Ты о̄вылтыт а̄нумн ань Светлана Щербинина Череповец ӯсныл ла̄тыӈ хансыс. Иван тув 1962 та̄лт Евдокия Спиридонова нэ̄тэ ёт минамы̄г, нэ̄тэ филологический ос тав математический факультетыт ханищтахтасы̄г. Тувыл институт сас ат а̄стламыг, акваг ювле нупыл номсысы̄г. Тот лӯи ма̄ныл ёхтум студентыт, тыи 24 хо̄тпа, пуссын акв колнакт о̄лсыт. Ма̄ньнув колнакыт туп матыр а̄гм о̄щнэ хо̄тпат я̄нас о̄луӈкве та̄ртве̄сыт. Тот акв та̄л ханищтахтаме юипа̄лт Иван Ханты-Мансийскат хультыс, Евдокия кит та̄л туп ханищтахтас ос хумитэ палт та минас. Тав тот «Югория» нампа радиокомпаният передачат ва̄рыс, «Потырты Спиридонова» тох потре о̄вылта̄лыстэ. Иван Меров рущ ля̄ххалыт ос стихыт ма̄ньщи газетан толмащласанэ. То̄ва потрыт Ульяна ща̄не ос Евдокия Мерова нэ̄тэ намыл хансым хо̄нтсанум. Тав ща̄не самаге пусмалтан ма̄гыс ӯсн тотыгламе. Ётыл э̄кваго̄йкаг хотталь Касум па̄вылн ва̄нтлысы̄г, тэ̄н Вика а̄ги о̄щсы̄г. Во̄ссыг нэ̄матыр ма̄н ат ва̄глув, ань а̄гитэ̄н хо̄т хо̄нтнувув ке, такем ёмас о̄лнув. Иван акв ляпа рӯтэ, Галина Кокорина а̄ӈква̄гитэ Саранпа̄вылт о̄лы, тав о̄с мощща ва̄г. Ханты-Мансийскат аквнакт акв матумпа̄ла э̄ква ёт акванхо̄нтхатыгласме̄н, о̄парищ намум хӯнтамластэ ос ам ётум мощ потыртас. Тав педучилищат Иван ва̄ме, ла̄ви, ёмас, номтыӈ хо̄тпаг о̄лыс. Са̄в потыр Пе̄тр Шешкин ма̄ньщи газетан хансыглас. Пе̄тр Ефимович Ло̄пмус па̄вылт самын патыс. Ма̄ньщи ла̄тӈыл хансум потранэ сака пӯмщит, тав «Русскомансийский словарь» щё̄питас, 642 ма̄ньщи ма̄хум пословицат ос поговоркат, 85 а̄мщит атыс ос нэ̄пакын хассанэ. Хансат о̄с ёмщакв ханищтасанэ ос та̄н ётыл альбомын по̄слуве̄сыт. Шешкин о̄лме̄т, йӣвныл са̄всыр щаӈквыт ма̄щтырлас, ань то̄ва йӣв хуриянэ са̄всыр музеитт ӯргалым о̄ньщавет. 1989 та̄лт «Лӯима сэ̄рипос» ма̄ньщи газета я̄насыг ва̄рим порат тот Наталья Сайнахова Сӯкыръяныл рӯпитас. Тав ма̄ньщи ма̄нь па̄влытн ялантас, тувыл ля̄ххалыт, потрыт, мо̄йтыт тотыглас ос та̄наныл газетан хансыгласанэ. Ханищтахтан ня̄врамыт ма̄гыс са̄всыр учебникнэ̄пакыт щё̄питаӈкве э̄рыс. Таима̄гыс тав повышение кадров институтн научный хо̄тпаг э̄лаль рӯпитаӈкве во̄ввес ос тот нэ̄пакыт, словарикыт щё̄питас. Аквтох ма̄ньщи газетан потрыт Николай Михайлович Садомин ос Анфиса Михайловна Хромова хассы̄г. О̄йка Та̄гт па̄вылныл ос э̄ква Сортыӈъя па̄вылныл о̄лсы̄г. Николай Садомин «Пася, рума! » акв потре я̄нас нэ̄пакыг ва̄рвес. Тувыл о̄йка то̄ва потранэ радио хосыт потырта̄лсанэ, ня̄врамыт ханищтан нэ̄пакыт щё̄пита̄лыс. Финныт ма̄гыс Библияпотрыт ма̄ньщи ла̄тӈыл толмащлаӈкве нё̄тыглас. Юио̄выл та̄лэ о̄лме порат Николай Михайлович Ханты-Мансийскан ёхталас. Тав редакциян щалтсас, хоса потыртасме̄н. Ос ётылнув такви ка̄тыл хансум библияпотрыт тотсанэ ос ла̄выс, амки палтум вос хультуптыянум. Анфиса Михайловна газетавн войнан ялум, матум хо̄тпат о̄вылтыт потрыт хансыглас. Та̄гт па̄вылт «На̄й-О̄тыр ма̄» ва̄рум музее ань тыг мус рӯпиты. Школат а̄гитпыгыт пальсакыт, турло̄псыт хартуӈкве ханищтасанэ, тувыл ялпыӈ хо̄талыт порат та̄н ма̄ньщи йӣквыт йӣквсыт, э̄ргыт э̄ргысыт.

1070 2014.02.21. Александр ВЬЮТКИН

Ла̄тӈув э̄лаль тотнэ а̄гитпыгыт. Ты тув «Ма̄нь ӯскве» ня̄врамыт ӯщлахтын ма̄ хус та̄лэ то̄влы. Ты пӯмащ та̄ланэ янытлан кастыл щё̄питым о̄лыс. 2013 та̄лт Департамент общественных связей грант олннё̄тмил винэ щирыл ты пӯмащ номылматым о̄лыс. Ты ва̄рмаль ма̄н, «Ма̄нь ӯскве» ня̄врамыт ӯщлахтан ма̄т рӯпитан ма̄ньлат ма̄хмыт, ва̄рыгласлӯв. Номылматым пӯмщув «Во̄рщик питииг» намтыслӯв. Ты нам «Ма̄нь ӯскве» флагт во̄рщик ӯйрищ хорамыл ю̄нтым о̄лы. Таима̄гсыл ты э̄лаль ва̄рум ва̄рмалюв тамле намыл пиныслӯв. Яласан ма̄гсыл вуйлум грант олныл мощнув ат то̄влувесӯв. Олнанув ёмщакв вос то̄вылхатэ̄гыт, ма̄н ма̄нти халувт олныл пинхатым нё̄тхатсӯв. Янгема̄не пуссын аквъёт ва̄т нупыл акв хо̄тпа ӯсыт ос па̄влыт халт ва̄нтлысӯв. Халувт щар янгыг М. С. Мерова о̄лыс, щар ма̄ньлат ос Коля Семяшкин. Кӯщаитныл Н. Г. Алексеева ма̄навн нё̄тым яласас. Тувыл «Ма̄нь ӯскве» ня̄врамыт ӯщлахтын ма̄наныл тармыл кӯщаиг о̄лнэ нэ̄ Л. П. Стаканова яласас. Ма̄н, яласан ма̄хум, халанувт аквъёт пуссын ёмащакв ва̄йхатэ̄в, юртыӈыщ о̄лэ̄в. Ты, улпыл, таима̄гыс лё̄ӈхув та̄рвитэ атыпыл торгамтаслӯв. Ат хо̄тал сыс лё̄ӈхув палытэ акв со̄тыра нёлолов са̄ттем ве̄рыстаг хультыс. Ӯсыт ман па̄влыт халт ма̄н хӯрум машинал яласасӯв. О̄влэ̄т Саранпа̄выл ма̄хманув Павел Артеев ёт Приобье па̄выл мус йигмыгтасыт. Ма̄н ос мо̄тыт хо̄талт та̄н ётаныл хо̄нтхатнэ ма̄гыс Ханты-Мансийск ӯсныл тит машинал минмыгтасӯв. Хо̄талъя̄т порат акванхо̄нтхатасӯв. Приобье па̄вылт тэ̄пъяламув юипа̄лт та̄ра Белоярский район нупыл А̄с я̄ ӯлтта ханты ма̄ нупыл минмыгтасӯв. Касум па̄выл мус нила щё̄с минасӯв. Тув миннэ лё̄ӈхе састум, йильпииг ёмащакв щё̄питыма. Ам тув ялмумт хӯрум та̄лыг е̄мтыс. Та порат лё̄ӈханыл тэ̄лы яласан во̄р лё̄ӈх хурипаг о̄лыс. Ань та лё̄ӈхе атыпыл хащхаты. Э̄типа̄лаг тӯрманлан э̄лыпа̄лт Касум па̄вылн ущта ёхтысӯв. Тот та̄ра йильпииг ва̄рим музей коланылн во̄ввесӯв. Музеяныл па̄выл оигпан во̄р щахылт ӯнттым о̄лы. Пе̄с пора о̄лупса суссылтан кол пӯсасэ пе̄с хольт тольхыӈ о̄вланылт сома но̄хтӯщтым норыл ва̄рим о̄лы. Тув ляпан ро̄влахтамув порат, аквтупмат со̄ль, пе̄с пора па̄вылн ёхтысӯв. Музеяныл ёмас нё̄тнэ колыг ӯнттыма. Касум па̄вылт о̄лнэ «Нумсаӈ ёх» ня̄врамыт ёт ма̄н хосат юртыӈыщ о̄лэ̄в. Ка̄сыӈ тув акванёхталэ̄в. Таима̄гсыл ма̄н та̄н палтыланыл ёхтумув порат, па̄выл ня̄врамыт музей колт о̄лсыт. Ма̄н ётув ва̄щинтахтын кастыл та̄н ханищтан хо̄тпаныл ма̄н палтув во̄вхатасыт. Тот та̄н ма̄нав хо̄тал палыт ӯрсаныл. Ма̄н, тув ёхтум мӯй ма̄хум, та̄ра яныг пасан ва̄тан исум ща̄й аюӈкв ӯнттувесӯв. Ща̄й аимав юипа̄лт э̄лаль ва̄рнэ ва̄рмалянув урыл потыртахтасӯв. «Нумсаӈ ёх» ня̄врамыт ӯщлахтын ма̄ кӯщаиг Е. Т. Федотова о̄лы. Елена Терентьевна ты ӯщлахтын ма̄ рӯпитаӈкв о̄вылтахтаме па̄сныл рӯпиты. Та порат тав нас воспитателиг о̄лыс. Таима̄гсыл тав ня̄врамытн сымыӈыщ э̄руптаве. Э̄типа̄лаг ма̄н музей колт ма̄нтте̄в хультмув юипа̄лт мо̄йтув суссылтан щирыл щё̄питаӈкв о̄вылтаслӯв. Хуньт хосат ма̄н таве титахтем щё̄с ёнгыслӯв, тувыл та. Ань ос йильпииг ёнгын ма̄гсыл таве ёмщакв щё̄питаӈкв э̄рыс. Нилахтем щё̄с поргысӯв, йӣквсӯв ос мовиньтасӯв. Мо̄тыт хо̄тал а̄лпыл па̄выл ма̄хманув ёхталаӈкв патсыт. Хо̄талъятт тэ̄пъяламув юипа̄лт суссылтапув суссылтаслӯв. Концертув палытэ акв щё̄сыг а̄ртмыс. «Ма̄нь ӯскве» ня̄врамыт ӯщлахтын ма̄т ва̄рыглан наканув суссылтамув юипа̄лт, ханты ма̄хманув нас астал ӯнлысыт. Хунь ма̄н та̄наныл титыглаӈкв патсанӯв, та̄н ла̄всыт: «Ма̄н ты мо̄йт урыл э̄лаль номсахтэ̄в. Юио̄выл порат нэ̄глынэ Даучун нампа хум ё̄вт ня̄лэ супыгсакватаме юипа̄лт, тав ётэ э̄лаль маныр е̄мтыс, ты урыл номсахтэ̄в. Таима̄гсыл ты ма̄н суйта̄л, номсахтым ӯнлэ̄в». Ма̄н мо̄йтув хунь а̄стыс, о̄влэ̄т та̄наныл ат торгамтасанӯв, маныр е̄мтыс. Манрыг пуссын астал ӯнлэ̄гыт. Потыртамув юипа̄лт, ущта пуссын та̄рапатыс. Та юипа̄лт молямтахтым пормасанув машинан та̄лттысанӯв, ма̄нти ӯнтсӯв, ювле акв та лё̄ӈхыл Нягань ӯс нупыл та минмыгтасӯв. Тот ос Кадетский корпус нампа армият лусытан ня̄врамыт ханищтахтын колт мо̄йтув суссылтаслӯв. Та коланыл во̄рыӈ ма̄т о̄лы. Тот о̄с са̄в мир о̄лыс, та̄н халанылт ма̄ньщит ёхталасыт. Та̄н ла̄всыт: «Ма̄н ты суссылтап урыл мо̄лхо̄тал ущта ла̄ввесӯв. Са̄ртынув те ты ля̄ххал хӯлсӯв, са̄внув ма̄ньщи ёхтынув. Ты ма̄ньщит ма̄н о̄с ва̄ганӯв, акванпотыртахтасӯв, тыг вос ёхтэ̄гыт». Хо̄тыл торыг ма̄н та̄ра мо̄йтув суссылтаслӯв. Мо̄йтув суссылтамув порат яныгпа̄лаг о̄лнэ ма̄хум самвитаныл вотымта̄лым суссыт. Концертув оигпаме юипа̄лт ма̄хум ма̄н ётув ва̄йхатаӈкв, по̄слахтаӈкв ква̄лапасыт. Ма̄ньнув ня̄врамыт ёт ос туслы ёныг ёнгуӈкв «Ма̄нь ӯскве» ня̄врамытын ханищтаве̄сыт. Акв та хо̄талт э̄типа̄лаг ма̄н Урай ӯс нупыл минмыгтасӯв. Тув ёмщакв турманлан порат ёхтысӯв. Тот ма̄н Силава нампа пе̄с ма̄ньщи па̄вылт э̄т хӯлсӯв. Та па̄выл Урай ӯсныл мощ по̄хатнув о̄лы. Ӯсныл та па̄выл мус лё̄ӈх палытэ нилахуйплов ве̄рыста. Тот ос тув па̄лыт ня̄врамыт ӯщлахтынэ̄ныл ма̄гыс «Юрсил» нампа ма̄ о̄лы. Кӯщаиг О. А. Фомичёва рӯпиты. Ольга Александровна та̄л палыт та па̄выл тармыл о̄лы. Тот ат ёмас нор кол ос акв пувлын кол о̄лы. Ёмас урамыӈ, карс тарыг йӣвыӈ ма̄т па̄выл о̄лы. Таима̄гсыл тӯяг па̄влэ яныг вит порат витын ат а̄мараве. Тэ̄лы порат тув ос нас ӯщлахтан ма̄хум ёхталаӈкв ве̄рме̄гыт. Хотьют во̄рыӈ ма̄т ёлпо̄йтсалуӈкв таӈхи те, манса̄вит хо̄тал о̄луӈкв ка̄сащи те, таса̄вит тот вос о̄лы, туп олн вос ойты. Ольга Александровна тох таквина̄тэ̄н олн сэ̄лы. Силава па̄вылт э̄т хӯлымав юипа̄лт Урай ӯсн минасӯв. Тот ма̄н ӯс библиотекат суссылтапув ва̄рыгласлӯв. Нэ̄пак ловиньтан колн ёхтысӯв, ма̄н ётув та̄ра тот о̄лнэ ма̄ньщи ма̄хманув ва̄йхатаӈкв о̄вылтахтасыт. Та̄н тот ща̄нь ла̄тӈувтыл щар ат потыртэ̄гыт. То̄ва яныгпа̄лаг о̄лнэ ма̄хум аквтит ла̄тыӈ ва̄гыт, тувыл та. Мо̄йтув суссылтамув юипа̄лт, та̄н ка̄тпатта ра̄тым хоса лю̄льсыт. Суссылтапувт ма̄н аквписыг ма̄ньщи ла̄тӈыл потыртасӯв, таима̄гсыл та̄нанылн хӯнтлуӈкв пӯмащиг о̄лыс. Тувыл ма̄н ва̄т нупыл акв хо̄тпа та̄ра Ханты-Мансийск ӯс нупыл минмыгтасӯв. Ханты-Мансийск ӯсн ма̄н э̄ти хӯрум щё̄с порат ущ ёхтысӯв. А̄лпыл ос ка̄тыл хӯрит по̄слын хум Г. С. Райшев палт мо̄йт суссылтапув суссылтан ма̄гсыл атхатсӯв. Яласан ма̄ньнув ня̄враманув лё̄ӈхыт ва̄гта̄л патсыт, но̄х ворил ква̄лттысанӯв. Ка̄тыл по̄слын ма̄щтыр хум колт ма̄н ёлы кол наке̄т мо̄йтув суссылтаслӯв. Мо̄йтув суснэ ма̄гсыл налыман ляпатем хо̄тпа ёхталас. Та̄н халанылт соссаӈ мир Ассамблея кӯщай хум Е. Д. Айпин о̄лыс. Суссылтапув сунсум ма̄хум ла̄внэ̄ныл щирыл, мо̄йтув а̄ртмыс, сунсуӈкв пӯмщиг о̄лыс.

1070 2014.02.21. Светлана Динисламова

Ма̄хманув янытлыянӯв («Лӯима̄ сэ̄рипос» газетавт рӯпитан ма̄хмытн те̄тнэ ла̄тӈум). "Лӯима̄ сэ̄рипос" газетат рӯпитан хо̄тпат янытлэ̄в, Ёмас потранылномтаныл ма̄гыс на̄нан ӯлылэ̄в, Ма̄ньщи ла̄тыӈте̄в на̄н э̄лаль тотылы̄н, Хо̄тпа тӯпкам сым туп на̄н та ре̄гылттылы̄н. Нэ̄пак ка̄тыт пувим – ма̄н ё̄рыӈыг ё̄ме̄ва, Нэ̄пак ловиньтым – номтыӈыг е̄мтэ̄ва, Мо̄йтыт, потрыт ма̄навн аквписыг э̄ре̄гыт, Ма̄ньщи ла̄тыӈте̄ва щар палит та суйтэ̄гыт. Хоты ма̄т, хоты витт на̄н та яласэгы̄на, Са̄в лё̄хъясыт хосыт на̄н та ё̄масалэгы̄на, На̄н ма̄гсылын кол а̄вит ща̄гтым пусхатэ̄гыт, Ма̄ньщи хо̄тпате̄нув куньгим ӯрхатэ̄гыт. Пе̄с йис о̄лупсате̄в ул вос со̄ймалтахты, Ща̄ньа̄щ ла̄тыӈте̄в но̄х вос ялтуптахты, На̄н, я̄тил хо̄тпанува, торге̄н рӯпитэ̄на, Хӯнтамла̄лум потрытл акваг уртхатэ̄на. Ва̄т нупыл ат та̄л потрыт хансэгы̄на, Ва̄т нупыл ат та̄л нэ̄пакыт та̄ратэгы̄на, Мир о̄лнэ йис – тав нэ̄матыр ат тӯйты, Ла̄тыӈте̄в тыхо̄тал суиӈыщ иӈ суйты. Лӯима̄ сэ̄рипосныл хо̄тал о̄вылтахты, То̄нт Со̄рни хо̄талакве саге та̄рамлахты, На̄н э̄лаль о̄лнэ нотанын э̄л вос поступтавет, Мирув о̄щнэ мӯтрат ул вос ёрувлавет. Светлана Динисламова (Садомина), 2014 та̄л.

1070 2014.02.21. Людмила ТЕТКИНА

Та̄л сыс та̄н са̄в ща̄гт мирн тах тотэ̄гыт. Ты э̄тпос атыт хо̄талэ̄т Сургут ӯст округ янытыл о̄лнэ ма̄хум Культура та̄л янытлаӈкве акванатхатыгласыт. Та̄л сыс ма̄нь па̄вылкве̄т манос яныг ӯсытт яныгса̄т арыгкем са̄всыр суссылтапыт, фестивалит, ялпыӈ хо̄талыт ва̄рыглаӈкве патавет. Надежда Казначеева, культура департаментыт кӯщай нэ̄, ты ва̄рмалит урыл ля̄ххал тотнэ ма̄хумн потыртас. Ань округувт 15 со̄тыра арыгкем э̄лумхо̄лас 460 культура колтт рӯпитэ̄гыт. Тав ла̄вме щирыл, Культура та̄л янытлаӈкве та̄н пуссын мӯсхалыг щё̄питахтасыт. Та̄л сыс нас э̄ргуӈкве манос йӣквуӈкве та̄н ат патэ̄гыт, тыт о̄лнэ мирн та̄н са̄всыр ща̄гт тах тотэ̄гыт. Ос таи ёмас, ань культура ат ёрувлаве, тамле тэ̄ла нупыл са̄в олн та̄ставе. Округувт «Развитие культуры и туризма в ХМАО-Югре» нампа программа пирмайтавес. Ань онтолов йильпи культура кол тах ӯнттаве, 2014 та̄л сыс Октябрьский ос Сургутский районыгт хӯрум клуп кол ӯнттын ма̄ныл моще̄рт тах а̄ставет. Ре̄тыӈ ю̄свой э̄тпос 28 хо̄талныл Ханты-Мансийск ӯст «Дух огня» нампа кина суссылтан фестиваль рӯпитаӈкве о̄вылтахты. Ос мо̄т яныг тэ̄лат халт соссаӈ ма̄хум Мирхал фестиваляныл тах ва̄раве. Та 2013 та̄л Геннадий Райшев, ка̄тыл хурит по̄слан хум, 80 та̄лэ то̄влыс. Таве янытлан кастыл ӯсувт научнопрактический конференция ва̄раве. Тув Москва, Санкт-Петербург ос мо̄т ӯсытныл са̄в ма̄хум тах ёхталы. Ты та̄л Сургут ӯс 420 та̄лэ то̄влы, Кондинский район 90 та̄лэ, окружной библиотека ос 80 та̄лэ то̄влы. Ты кастыл са̄всыр ма̄тт рӯпитан ма̄хум сыресыр ялпыӈ хо̄талыт ань щё̄питэ̄гыт. Кӯщай нэ̄ ос таи ла̄выс, ка̄сыӈ район манос яныг ӯст та̄нки я̄нас программа о̄ньще̄гыт, ты нэ̄пак хосыт та̄л сыс рӯпата ва̄руӈкве патэ̄гыт.

1070 2014.02.21. Тамара МЕРОВА

Ща̄нь ла̄тӈув э̄лы хо̄н ма̄т о̄с ханищтаве. Ма̄н хосат та̄гыл Чилла Хорват ёт акванюрщхатым о̄лэ̄в. Ты венгр ма̄ньлат а̄ги. Тав Сегед ӯст университетыт ханищтахтаме̄т тыг Ханты-Мансийскан Югорский государственный университетн во̄выглавес. Ос ма̄н ма̄ньщи студента̄гиянув венгр ма̄хум палт ялсыт. ЮГУ колт Чилла ма̄ньщи ла̄тыӈ ос культура урыл пӯмщалахтас, ос ма̄нь па̄влыӈ ма̄н ма̄хманув палт мӯйлуӈкве мощщан ялыс. Тав ань Сегедский университет а̄стластэ ос тот э̄лаль рӯпитаӈкве патыс. Тот финноугорский ла̄тӈыт ханищтан кафедрат венгрыт ма̄ньщи ма̄хум тэ̄ланыл урыл о̄с ат ёрувлэ̄гыт. Чилла ва̄рмалянув о̄вылтыт ма̄навныл ва̄тихал пӯмщалахты. Тувыл та̄н палтаныл маныр пӯмыщ ялпыӈ хо̄талыт манос суссылтапыт ва̄рыглэ̄гыт, ма̄навн ля̄ххалыт хансы, ма̄навн тыи о̄с э̄ри. Аньмунт ам таве̄н тамле китыглахтын ла̄тыӈ ке̄тыгласум: «Венгрият о̄лнэ университетытт манах хо̄тпа ма̄ньщи ла̄тыӈ ханищтэ̄гыт? » . Чилла тувыл а̄нумн ювле хансыс, Сегедский университетыт ань ат хо̄тпа ма̄ньщи ла̄тыӈ ханищтэ̄гыт. Хӯрум студентыт мо̄т хо̄н ма̄ныл та̄н палтаныл ёхтысыт. Та̄н ма̄ньщи ла̄тӈув о̄с пӯмщалыяныл. Ты университет Каталин Шипёць ос Бернадетт Биро ма̄ньщи ла̄тыӈ ханищтан нэ̄г рӯпитэ̄г. Каталин ёт ме̄н о̄с ва̄йхатым о̄лыме̄н. Тав Санкт-Петербург ӯсн А. И. Герцен нампа университетн ёхталаме порат ла̄тӈув о̄вылтыт пӯмщалахтас, ме̄н Нина Вынгилева ёт та порат тав ётэ ва̄щинтахтасме̄н. Будапешт ӯст ханты ла̄тыӈ сургутский диалектыл потыртаӈкве студентыт ва̄тихал ханищтавет. Ка̄сыӈ китыт та̄лытыт а̄т хо̄тпа ма̄ньщи ла̄тыӈ о̄с ханищтэ̄гыт. Тот Марта Чепреги хосат та̄гыл ла̄тӈув ханищтан щирыл рӯпиты. Мо̄т институтанылт ман университетанылт ма̄ньщи ла̄тнув, культурав учёныитн о̄с пӯмщалавет ос тувыл та̄н наука нэ̄пакыт, потрыт хансэ̄гыт. Печ ӯст Габор Секей о̄лы, тав а̄ти сака хосат лӯсум ма̄ньщиянув палт мӯйлуӈкве ялыс. Ос Дебрецен ӯст акв аспирантка ла̄тӈув ханищты. Ма̄н ва̄глув, мо̄т финноугорский ма̄т ос Германият ма̄н мирув пӯмщалан хо̄тпат о̄с о̄лэ̄гыт. Таима̄гыс Чилла Хорват «Фейсбук» сайт нампа ищхӣпыӈ утыт акв ло̄пс ва̄рыс. Тав ты ло̄пс «In mansi way/ мансийским способом/ маньщи щирыл» намаим о̄лы, тав 2012 та̄л ма̄нь таквс э̄тпос хо̄тхуйплов хо̄талныл рӯпитаӈкве патыс. Тот ма̄ янытыл о̄лнэ ма̄хум ма̄н ща̄нь ла̄тӈув та̄нки ханищтаӈкве ве̄рме̄гыт. Потрыт пуссын ма̄ньщи, рущ ос английский ла̄тӈыл Чиллан хансавет. Ань китса̄т э̄лумхо̄лас ты ло̄пс сунсыглы ос потрыт ловиньты. Та ма̄хум халт яныгса̄т са̄вит хо̄тпа хо̄н ма̄ныл о̄лэ̄гыт, аквта са̄вит хо̄тпат Россияныл, са̄выӈпа̄лэ ма̄ньщит. Ма̄хум та̄нки халанылт щар ат ва̄йхатасыт, ань тот румалахтэ̄гыт. На̄н ань ты ва̄рмаль ва̄нэ̄г о̄с вос о̄ньщилы̄н, ищхӣпыӈ ут палт ты ло̄пс кинсэ̄лын. Тувыл на̄нки ос матыр ма̄нь потрыт, мо̄йтыт, хурит суссылтан ма̄гыс тув ке̄туӈкве ве̄рмегы̄н тах. Ты та̄л о̄с акв йильпи ло̄пс тот ка̄саласлум, таве Габор Секей ва̄рыстэ. Тав ань лӯсум ма̄ньщиянув палт ялум лё̄ӈхе урыл тот ля̄ххалыт хансы. Ма̄ньщи ла̄тӈыл хаснэ газетав о̄с пӯмщалаӈкве патвес. Анна Феньвеши акв мирхал проект щё̄питас, тав ма̄нав акваннё̄тхатым, аквъёт рӯпитаӈкве во̄выстэ. Ма̄н ва̄им, ка̄сащасӯв. Ма̄ньщи мирув, ла̄тӈув, пе̄с йис наканув иӈ са̄в нот э̄лаль вос о̄лнувыт.

1070 2014.02.21. Светлана Динисламова

Ня̄врамыт ма̄гыс та̄ратым нэ̄пакыт. Та минам 2013 та̄лт А̄с-угорский институтт рӯпитан хо̄тпат ня̄врамыт ма̄гыс са̄в йильпи нэ̄пакыт та̄ратасыт. То̄ва нэ̄пакыт школат ханищтахтын ня̄врамыт ма̄гыс хансым о̄лэ̄гыт, та̄н хосытаныл ханищтан хо̄тпат урокыт э̄рнэ щирыл ос ёмащакв ва̄руӈкве ве̄рме̄гыт. То̄ва нэ̄пакыт ма̄нь ня̄врамыт ма̄гыс хасве̄сыт. Людмила Николаевна Панченко (Хозумова) нё̄тнэ азбука щё̄питас, тот ка̄сыӈ буква ёт хури по̄слым о̄лы, ты щирыл ловиньтаӈкв ат ха̄снэ ня̄врамыт букват моляхнув та̄рапаттыяныл ос номтыт о̄ньщуӈкве тах патыяныл. Людмила Николаевна институтт ань хо̄тыт та̄л рӯпиты, тав рӯпататэ ялпыӈ хӯлтупыт ос ро̄вта̄лут хӯлтупыт урыл ва̄ритэ. Тамле хӯлтупыт са̄всыр ва̄рмалит урыл о̄лэ̄гыт: Тя̄к а̄квув солил пувтуӈкве ат ро̄ви, хунь ӯринэ̄ква йӣв тальхын ӯнтылматы, яныг вит е̄мты, лю̄лиӈ во̄р карсыг ке сусхаты – ащирмаг ēмты, хо̄тал ӯнты, юн мовиньтаӈкве ман ро̄хтахтаӈкве – ат тайи, – а̄ныса̄н ул ро̄хсалтэ̄н – сымын э̄тгалаӈкве патаве. Тав потранэ сака пӯмыщ ловиньтаӈкве, ка̄сыӈ щёс матыра̄ти та̄рапатхаты, номылматахты. Титыт нэ̄ Мария Владимировна Кумаева ня̄врамыт ма̄гыс о̄с нэ̄пакыт хансы. Институтт тав лов та̄л рӯпиты, ты сыс Югорский институт ос аспирантура а̄стлас, ань мощще̄ртын наука диссертациятэ хансытэ. Мария Владимировна сака ка̄ркам хо̄тпа, аквписыг нэ̄пакыт та ловиньты, матыр та хансы. Научный рӯпататэ ма̄ньщи ла̄тыӈ урыл хансытэ, хумус мо̄йт мо̄йтнэ торыг мо̄тмо̄т ла̄тыӈ ля̄галаве. Мария Владимировна та̄ратам нэ̄паканэ̄т хурит по̄слым о̄лэ̄гыт. Тав нила ос атыт классыт ма̄гыс ма̄ньщи ла̄тыӈ ханищтан нэ̄пакыг, ма̄ньщи мо̄йтытпотрыт хосыт рӯпитан нэ̄пак хансыс. Маныр урыл ты мо̄йт о̄лы, манрыг мо̄йтыт тох хансым о̄лы, хотьют ёмас, хотьют лю̄ль ва̄рмаль ва̄ри. . Воспитателит ос ня̄врамыт ханищтан хо̄тпат ма̄гыс ты сака пӯмыщ ос э̄рнэ нэ̄пак. Татьяна Дмитриевна Слинкина институтт ловит та̄л рӯпиты. Тав сака номтыӈ нэ̄пакыт хансы, ты нэ̄пакыт ка̄сыӈ ма̄ньщи хо̄тпан ловиньтаӈкве пӯмыщ. Акв нэ̄паке ма̄вит намыт урыл хансыстэ, тот нё̄рыт, я̄т, тӯрыт, па̄влыт намыт урыл хансым о̄лы, хоты ма̄ хумус ма̄ньщи щирыл намаим о̄лы. Рущ ла̄тӈыл тамле намыт «топонимыг» ла̄вавет. Татьяна Дмитриевна рӯпататэ̄т ос пе̄с йис тэ̄рныӈ э̄ргыт толмащлыянэ, тувыл а̄мщит ос э̄ргыт акванатыянэ, нэ̄пакыг та̄ратыянэ. Светлана Динисламова ма̄ньщи ня̄врамыт ма̄гыс нила нэ̄пак та̄ратас. Ань тамле нэ̄пакыт ка̄сыӈ э̄тпос э̄лаль тах та̄ратаӈкве патавет, нэ̄пак намаим о̄лы "Витсам". Ты нэ̄квет пуссын А̄с-угорский институтт рӯпитэ̄гыт, та̄н научный сотрудникыг о̄лэ̄гыт. Ма̄ньщи ня̄враманув ма̄гыс институтт ты ма̄хумн нэ̄пакыт э̄лаль вос хансавет, са̄в пӯмыщ хурит тот вос по̄славет.

1070 2014.02.21. Анна АЛГАДЬЕВА

Лӯски О̄тыр о̄йка (тэ̄рныӈ мо̄йт). Яныг тӯр паттат па̄ль ховтыӈ во̄р кӣвырт тэ̄нки па̄влыӈ Лӯски о̄йкагэ̄кваг о̄лсы̄гхӯлсы̄г. Аквнакт Сакв я̄ лӯи па̄лныл ё̄рныт ёхтысыт. Та̄н хӯрум по̄рал йисыт, лов ёлпа ха̄пыл товсыт. Та̄гт Сакв хал яласам ё̄рнын тыг сытамыл тотве̄сыт. Та хумияныл ма̄хманэ нупыл ла̄ви: Тытты кос тэ̄нки па̄влыӈ Лӯски э̄кваго̄йкаг о̄лэ̄г. Аман ань алапиягӯв манос ювле миннэ̄в мус? Та̄н Лӯски тӯр нирыӈ ва̄тат лё̄х о̄выл такос кинсыяныл, лё̄х о̄выл хо̄нтуӈкве ат ве̄рмияныл. Юио̄вылт Лӯски О̄тыр о̄йка такви на̄лув нэ̄глы ос ла̄ви: Хе, тямакыт ё̄рныт! На̄лми па̄лныл лё̄х сунт щар па̄тыскан хольт на̄ӈки. На̄н щёхрам атыӈ тӯлмах хольт лаквхатэгы̄н, лё̄х хо̄нтуӈкве ат ве̄рмилы̄н. Па̄г ща̄й аюӈкве ялэ̄н. Та̄н Лӯски э̄кван тахольт войкан хӯл ёхлыл, хорыл тыттуве̄сыт, ня̄рпум лӯптаӈ ма̄ньщи ща̄ил айтуве̄сыт. Ё̄рн Хо̄нт О̄тыр о̄йка такви тэ̄латэ ма̄гыс кол сысы мины, а̄ӈкваты: кол сыс сырт па̄лыгхалылам ё̄вт ос щакариӈ ня̄лыт ханэ̄гыт. Тав юв щалты, ла̄ви: Ты тӯр, во̄руй кӯщай о̄йкакве, мощ по̄сн ат па̄тлуптэ̄ва? Лӯски о̄йка сӯпне̄лмта̄л ос кӯньгащлым посыӈ па̄рт тӯщты. Акв ё̄рн о̄йка хищра ё̄втэ та хартытэ ос та па̄тамты ня̄лэ нуми па̄рт е̄рн сартумтахты, мо̄т хумитэ ня̄лэ па̄рт во̄ртыпал по̄хыл мины, хӯрмит хум ня̄лэ ёмаспал па̄рт е̄рныл сартумтахтым тахи. Тувыл Лӯски о̄йка па̄лыгхалылам ё̄втэ, щакариӈ ня̄лэ выг. Ос кол сыст лю̄льнэ акв питпа ва̄т тарыг нупыл хӯрум щёс пуӈк пины ос та па̄тамты – по̄с па̄рт щар ра̄выг саквалы. Ё̄рныт пуӈк ёлта̄ртым, ка̄ста̄л ос э̄ссамтым на̄лув ё̄мсыт. Сунсэ̄гыт, ха̄паныл, тӯпаныл матырмат сэ̄мыл ӯитн ха̄ӈхимат. Акв хо̄нт ё̄рн о̄йка Лӯски О̄тыр о̄йка палт ха̄йты: Пе̄та, пе̄та! Ты ма̄ӈ О̄тыр о̄йка, на̄лув ялэ̄н. Ма̄н ха̄панув манырсыр ӯитн ха̄хве̄сыт! Яныг о̄йка на̄лув ё̄манты, китхӯрум щёс саквалы сэ̄мыл ӯит хотталь та со̄ймысыт. Тав роттыг па̄г ё̄манты. Сэ̄мыл пуӈкуп ё̄рныт ха̄пн та̄лэ̄гыт, Сакв алгаль минмыгтэ̄гыт. Ос Лӯски О̄тыр о̄йка ювщалты, э̄кватэ нупыл ла̄ви: Э̄квакве, ам пуӈкум а̄ӈквата̄лэ̄лн. Хотмус такем та лощги. Юртэ ювле ла̄ви: Тамле ертыщма торыӈ нэ̄матыр ва̄рмаль ат о̄ньще̄гын? Хотыл йим та̄кманын? Тыкос ка̄сыӈ хо̄тал консыянме̄н. Лӯски э̄ква о̄йкатэ пуӈк са̄нс тармыл пинытэ ос пуӈке а̄ӈквата̄лытэ, ла̄ви: Тыт нэ̄матыр а̄тим. О̄йка пуӈке консащлым но̄хлю̄ли ос ты торыг номтын ёхтыгпаве: Ты щир ман ро̄ви? Илттыг тах ё̄рныт Сакв талях ма̄хум палт ёхтыгпе̄гыт, нэ̄мхотьют лылыӈ та̄гыл ат хульты. Тав аквта нерс тарге̄н но̄хха̄ӈхи ос я̄ нупыл а̄ӈкваты: ё̄рныт а̄лыматта̄л алгаль тове̄гыт, во̄ль паттан ты ёхтэ̄гыт. Тав акваг пуӈке та лощги, са̄всыр лю̄ль номтын патыглаве: «Лю̄ль ля̄ххал тах тэ̄лы. . Мир тах ла̄ве̄гыт: ягныга̄ӈквыл тэ̄лум Лӯски о̄йка ос хоталь сунсыс, тямакыт алгаль минаманыл порат. Аман самаге сыкварн лапминыглавесы̄г, аман во̄руй хӯлнэ пальасаге па̄ӈкыл лаптохрыглавесы̄г? Ятаты, юио̄вылт па̄лыгхалылам ё̄втэ ос напар хурипа ня̄лэ та выгтэ ос ё̄втэ та хартыстэ, та па̄тамты. Щакариӈмокариӈ ня̄лэ нумн ущ тэ̄лум э̄тпос хольт волята̄лы. Тав ё̄рн по̄рат халт ёл та томраты, ёл паты. Ё̄рн яныг Хо̄нт о̄йка, та̄н кӯщаяныл, китыглахты: На̄н ос манрыг э̄лаль ат товегы̄н? ! Тэ̄лата̄л вит тармыл хулыщтэгы̄н. Ос ты тав ёмащакв а̄ӈкваты, насати, юрт ма̄хманэ пуссын витн патыгламыт. Тэ̄н туп лё̄х суссылтан ё̄рн ёт ха̄пт хультмы̄г. Лӯски о̄йка нумыл на̄лваль ро̄ӈхи: Ищ! Ня̄врамаквет, ам лю̄ль наклат ва̄рсум. Мо̄т накт тах ос та ам палтум хо̄нтлуӈкве ювы̄н. Тэ̄н сӯпне̄лмта̄л ха̄пе̄н ло̄ӈхаль ё̄ӈхыгпастэ̄н ос нас туп Лӯи Ме̄сыг нупыл во̄псата̄лсы̄г. Ты юипа̄лт Сакв нупыл лё̄ӈханыл хотёрувласаныл. Ты мо̄йт П. Ф. Сайнахов мо̄йтыстэ, М. Сотам нэ̄пакн хансыстэ. («Лӯима̄ сэ̄рипос» № 16 газетат хансым о̄лыс, 25 август 1990 та̄л).

1071 2014.03.07. Валентина УЗЕЛЬ

Мирн пе̄риим ма̄хум рӯпатаныл. Ань округ Дума депутатанув тэ̄лы ӯщлахтаманыл юипа̄лт ты та̄л о̄выл сапра̄нияныл о̄лыс. Ре̄тыӈ ю̄свой э̄тпос 20 хо̄талэ̄т та̄н акванатхатыгласыт. Ты заседаниянылт ва̄тахтем са̄всыр са̄ккон урыл та̄н потыртасыт. Щар о̄влэ̄т та̄н ма̄ньщи поэтув Андрей Тарханов янытласаныл. Ты о̄йка «Почётный гражданин ХМАО-Югры» яныг намыл майвес. Мо̄т ма̄хум о̄с янытлаве̄сыт, та̄н ос Почётный грамотатыл майве̄сыт. Тувыл депутатма̄хум тамле ва̄рмаль урыл э̄лаль потыртаӈкв патсыт, 2016 та̄л ойттур э̄тпос па̄сныл ма̄н округувт о̄лнэ мир на̄йпос ма̄гыс йильпи щирыл ойтхатуӈкв патэ̄гыт. Акв хо̄тпа э̄тпос сыс туп 50 КВ электроэнергиял хансаве. Тав тыгыл са̄внув те холты, са̄внув олн ойтуӈкв тах паты. Ты ва̄рмаль ёт то̄ва депутатыт щар ат ка̄сащасыт, та̄н ла̄всыт, ма̄н округув щёлыӈыг ла̄ваве, тыт ма̄витыт са̄в щёл о̄лы. Ос мирув манрыг «нормаг» ла̄внэ ва̄рмалил хансавет? Мирн нё̄тнэ са̄кконыт Э̄лаль мирн нё̄тнэ са̄кконыт урыл та̄н потыртасыт. Ань федеральный са̄кконыт акваг йильпи щирыл хансавет, таима̄гыс ма̄н окружной са̄кконанув о̄с мо̄т щирыл хансуӈкв э̄ре̄гыт. Мария Краско социальный защита Департаментыт кӯщаиг о̄лы. Ань тав тамле ва̄рмаль урыл потыртас. Ма̄н округувт са̄в а̄гмыӈмосыӈ хо̄тпа о̄лы. То̄ват ще̄мья ат о̄ньще̄гыт, рӯт ат о̄ньще̄гыт. Та̄н ма̄гсыланыл я̄нас колыт ӯнттуӈкв патве̄сыт, рущ ла̄тӈыл «специальные домаинтернаты» тох ла̄вавет. Ань тув 50 та̄ланыл то̄влынэ̄ныл юипа̄лт э̄кват вивет, хум хо̄тпат 55 та̄ланыл юипа̄лт. Ос та са̄кконт хансым ат о̄лы, та хо̄тпа акваг округувт о̄лы ман а̄ти, э̄рыӈ тав мо̄т ма̄ныл тыг ёхтыс. Ань ка̄сыӈ хо̄тпа, хотьют о̄луӈкв тот ка̄сащи, тув тах виве. Депутатыт ты ва̄рмаль ёт ат ка̄сащасыт, ла̄всыт, ты са̄ккон ёмащакв вос хансаве, туп то̄нт тав пирмайтаве. Кол ма̄гыс ойтхатнэ олн ЖКХ тармыл кӯщаиг о̄лнэ хум Виктор Нанака тув о̄с во̄выглавес. Тав депутатытн титыглавес, та̄н та̄нти ва̄рнэ рӯпатаныл ос кол ма̄гыс ойтнэ олн урыл мирн манрыг ат потыртэ̄гыт. Ань ма̄хум та̄л котиль э̄тпосныл коланыл ма̄гыс са̄внув олн ойтуӈкв патсыт. Ты олныт таима̄гыс атавет, яныг колт о̄лнэ ма̄хум коланыл ёмащакв вос щё̄питаве, о̄льпыл вос сартаве, матыр мо̄т рӯпата тот вос ва̄раве, таима̄гыс ты олн мирныл атуӈкв патвес. Ты кӯщай ювле ла̄выс, ты ва̄рмаль та̄н та̄рапаттыяныл ос мирн тах ла̄ве̄гыт, манах солко̄ви ты ва̄рмаль ма̄гыс та̄н ма̄хумныл ювпувуӈкв патэ̄гыт. Ӯщлахтын ма̄ мус ялнэ лё̄ӈх Ты ва̄рмаль рущ ла̄тӈыл «льготный отпускаг» ла̄ваве. Ань ма̄хум лё̄ӈханыл олныл хумус ойтуӈкв патавет, ты урыл са̄ккон о̄с мо̄т щирыл хасвес. Округувт о̄лнэ мир са̄выӈпа̄лэ ща̄рыщ ва̄тан ӯщлахтуӈкв ялуӈкв патсыт. Ос тыглетувле ялнэ лё̄ӈханыл ма̄гыс та̄н справка щирыл олныл мивет. Ос то̄ванакт тох е̄мта̄лы, ма̄хум ӯщлахтын ма̄н ялнэ̄ныл ма̄гыс мощща олн ойтэ̄гыт, ос лё̄ӈх ма̄гыс тыгыл са̄внув олныл мивет. Та арыг олн та̄н та̄нтина̄нылн выганыл. Ань ты та̄лныл мо̄т щирыл ва̄раве. Лё̄ӈх олн ойтнэ ма̄гыс иӈ акв справканэ̄пак ма̄хумныл во̄вуӈкв патаве. Ты справкат билет тынэ хансым вос о̄лы. Манах тот хансаве, таса̄вит солко̄вил хо̄тпа тах миве. Мир ӯргалан ма̄хум рӯпатаныл Ка̄сыӈ та̄л о̄игпаме юипа̄лт полицият рӯпитан кӯщаит депутатыт э̄лыпа̄лт потыртэ̄гыт, та̄л сыс манаса̄вит лю̄ль ва̄рмаль ва̄рвес, манах хо̄тпа ӯнттувес. О̄влэ̄т Д. В. Шерман потыртас, тав округ следственное управление тармыл кӯщаиг о̄лы. Тав ла̄выс, 2013 та̄л сыс 1200 са̄вит «уголовный дело» хасвес, ты 2012 та̄лныл 200 са̄внуве̄г е̄мтыс. Са̄в хо̄тпа наркотик ёт пувве̄сыт. Ос сака са̄в хо̄тпа ня̄врамыт новманыл, маныгтасаныл. Та̄н пуссын хо̄нтве̄сыт. Ты хум депутатытн та̄ра ла̄выс, матыр э̄лаль ва̄руӈкв э̄ри, сака са̄в хо̄тпа ня̄врамыт нупыл лю̄ль номт о̄ньще̄гыт, та̄наныл новияныл. Ты ва̄рмаль ёлпо̄илттаӈкв э̄ри. Тав юипа̄лэ̄т В. И. Романица потыртас, тав УВД кӯщаиг о̄лы. Тав ос ла̄выс, лю̄ль ва̄рнэ ма̄хум акваг са̄вме̄гыт. Са̄в хо̄тпа о̄выл ва̄ре̄гыт. Ань ка̄сыӈ ӯст манос па̄вылт о̄лнэ мир камера щирыл уральтавет. Ос ты утыт ат то̄вылхатэ̄гыт, та̄наныл ёвтнэ ма̄гыс 400 млн. солко̄ви э̄ри. То̄нт лю̄ль ва̄рум хо̄тпа та̄ра хо̄нтуӈкв ро̄ви. Э̄лаль тав ла̄выс, ань полицият рӯпитан ма̄гыс ма̄ньлат ма̄хум ханищтаӈкв э̄ре̄гыт. Ос ляпат тамле ханищтан кол щар а̄тим, Екатеринбург, Нижний Новгород, Орел ос мо̄т ӯсытт та̄наныл ханищтаӈкв ро̄ви. Мирн пе̄риим ма̄хум хӯрум щё̄с арыгтем ань рӯпитасыт. Ва̄тахтем са̄ккон та̄н йильпи ла̄тӈыл хассаныл. Мо̄тыт э̄тпост та̄н о̄с тах акванатхатэ̄гыт.

1071 2014.03.07. Светлана РОМБАНДЕЕВА

Ялпыӈ ма̄т ос пе̄с колыт ӯргалавет. Ре̄тыӈ ю̄свой э̄тпос 20 хо̄талэ̄т Ханты-Мансийск ӯст о̄лнэ «Торум Ма» музейт «е̄ӈта пасан» хо̄нтхатыглап ва̄рыглавес. Тув Служба государственной охраны объектов культурного наследия Югры нампа организацият рӯпитан ма̄хум ёхталасыт, кӯщаяныл Андрей Николаевич Кондрашёв. Округувт ань са̄в ялпыӈ ма̄ о̄лы, пӯмыщ колыт манос йис та̄гыл о̄лнэ са̄всыр памятникыт. Та̄н ань ты организациян та̄рапаттым о̄ньщавет, пуссын нэ̄пакын хасве̄сыт. Тот рӯпитан ма̄хум ла̄внэ̄ныл щирыл, тамле колыт мори лоӈхитаӈкве ат ро̄ви, ялпыӈ ма̄т нас тох ё̄мыгтаӈкве ат ро̄ви, тот морикапыртаӈкве ат тайи. Ты организация ка̄сыӈ та̄л тамле ма̄т ос пе̄с колыт та̄рапатты. Ань ты «е̄ӈта пасан» ва̄тат кӯщай хумияныл Андрей Николаевич ла̄выс: «Ты та̄л ма̄н хӯрум ма̄ ялпыӈыг хансуӈкве таӈхиянӯв – ты Белоярский районт о̄лнэ Нумто нампа тӯр, Кондинский районт Половинка па̄выл ляпат о̄лнэ карс сып ос Ханты-Мансийский районт о̄лнэ Согом па̄выл. Светлана ХОЗУМОВА Ты хурит Ха̄льӯс район Сӯкыръя па̄вылт ӯнлын пупкол по̄слым о̄лы. Нэ̄пакт хансым о̄лы, ань11 нот порат ма̄хум тув хо̄нтлуӈкве ёхталамыт, ты кол та па̄сыл ты ла̄вылтаве. Са̄в щёс йильпииг ӯнтталавес, 1905 та̄лт о̄с йильпииг ты щё̄пита̄лыма.

1071 2014.03.07. Тамара МЕРОВА

Пуста̄гыл о̄лэ̄н. Ля̄ххал тотнэ хо̄тпат пӯльницат рӯпитан кит кӯщаиг ёт хо̄нтхатыгласыт. Тыи Ханты-Мансийск ӯст «Центр здоровья» нампа колт кӯщай Светлана Попова ос округ мир пусмалтан пӯльницат яныг ле̄ккар Всеволод Кольцов. Ань ма̄хум манырсыр а̄гм о̄ньще̄гыт, хо̄т, хумус пусмалтавет, ты о̄вылтыт тэ̄н потыртасы̄г. Светлана Александровна ла̄выс: «Ма̄н центрув туп хӯрум та̄л рӯпиты. Мо̄лты та̄л 3 со̄тыра 218 ма̄н палтув ёхталам хо̄тпаныл 2 со̄тыра 900 э̄лумхо̄лас ущ о̄вылтахтам а̄гммосаныл та̄рапаттысанӯв. Ты ма̄хум а̄гманыл уральтатта̄л воссыг ул вос о̄ньщияныл, ма̄н та̄наныл та̄ра пусмалтахтуӈкве ке̄тыянӯв. Пуста̄гыл о̄лнэ, ка̄тэла̄глэ пус 344 хо̄тпат о̄лсыт. 2013 та̄л сыс тамле хо̄тпа 5 процент са̄вит са̄внуве̄г е̄мтсыт. Ты ма̄хмыт та̄нки а̄гманыл хосан ат тотыяныл, та̄ра пусмалтахтэ̄гыт ос мо̄тынтыг ёхтынэ̄ныл порат то̄ват а̄гм та̄л о̄лэ̄гыт. Центрувн ёхталам хо̄тпат ма̄н ка̄сыӈ та̄л уральтахтуӈкве во̄виянӯв». Ма̄ньлат хо̄тпат пуста̄гыл о̄лнэ̄ныл ма̄гыс ты центрыт сака ӯравет. Ань тув 40 та̄ланыл то̄влын юипа̄лт ма̄хум ёхталэ̄гыт, са̄выӈпа̄лэ нэ̄ хо̄тпат. Тувыл янгыщ 50 та̄лныл 59 та̄л мус са̄в хо̄тпат тот уральтахтыглэ̄гыт. Ма̄хум са̄всыр ле̄ккарытын сунсавет. Та̄н давление ме̄ритэ̄гыт, тулё̄вылныл ке̄лп выгыт, самыт, ӯлщпуӈкыт ос сӯпасыт сунсэ̄гыт. Хо̄тпа ве̄скалаве, ос мо̄т ищхӣпыӈ утыл уральтаве. Та юипа̄лт пуссын та̄рапаттым ва̄рмалит ищхӣпыӈ утын хансавет. Ос хо̄тпа ла̄ваве, маныр а̄гм хо̄нтвес манос тав пуста̄гыл о̄лы. Са̄выӈпа̄лэ ма̄хум лю̄ль ос ат ро̄внэ тэ̄нут тэ̄гыт, тувыл тэ̄п хурганылт ос ма̄йтанылт а̄гм хо̄нтаве. То̄ват ке̄лпаныл лю̄ль, сӯпасанылт са̄всыр а̄гм о̄ньще̄гыт. Кантыӈ ос лю̄ль номтыл о̄лнэ хо̄тпат о̄с а̄гмыӈыг е̄мтэ̄гыт. Хохса хартнэ хо̄тпат ёт ле̄ккарыт о̄с я̄нас рӯпитаӈкве патсыт. А̄гмыӈ хо̄тпат пӯльницат ле̄ккарытн э̄лаль пусмалтавет. Ань Всеволод Станиславович ты о̄вылтыт потыртас. Акв хо̄тал сыс пӯльницат 125 хо̄тпат ёт са̄всыр ле̄ккарыт рӯпитэ̄гыт. Ос тот 75 койка щё̄питым о̄лэ̄гыт. 2013 та̄л сыс 1 со̄тыра 740 э̄лумхо̄лас пусмалтаве̄сыт. Пӯльницат лувнакт о̄лнэ а̄гмыт, сым а̄гм ос нервный система а̄гм о̄щнэ ма̄хум са̄в о̄лы. 15 со̄тыра хо̄тпа юн нас тэ̄рпил манос юил ёхталым са̄всыр процедурал ва̄рнэ утыл пусмалтэ̄гыт. Та̄н халанылт са̄в нэ̄т о̄с о̄лэ̄гыт, хум хо̄тпат пусмалтахтуӈкве сака ат ка̄саще̄гыт, а̄гманыл урыл щар ат номсэ̄гыт. А̄ти сака хосат ня̄врамыт ма̄гыс я̄нас центр ва̄рвес. Хо̄т э̄тпос сыс тот 480 ня̄врамыт пусмалтаве̄сыт. 47 самын патум ня̄врамаквет та̄рвитаныл мощщаг о̄лыс, та̄н са̄всыр ищхӣпыӈ утыл уральтымат, ёмщакв янмалтаве̄сыт. Ты яныг пӯльницат ма̄хум пуссын пусмалтаӈкве ат ве̄рмавет. Таима̄гыс Ханты-Мансийск ӯст мо̄т пӯльница ӯнттувес ос моще̄ртын ле̄ккарыт тот рӯпитаӈкве о̄вылтахтэ̄гыт. Округт йильпи пусмалтан накыг о̄с ва̄рвесы̄г. Акватэ рущ щирыл «грязелечение» намаим о̄лы, мо̄танэ «электрообезболивание». Тыт округувт ма̄хум пусмалтан ма̄гыс э̄рнэ па̄ӈк хо̄нтсыт ос са̄всыр ищхӣпыӈ утыл ма̄хум э̄лаль пусмалтавет.

1071 2014.03.07. Александр ВЬЮТКИН

Ма̄ньлат мир ёт рӯпитан хӯрум кӯщай. Мощ мо̄лалнув ма̄ньлат ма̄хум тэ̄ланыл щирыл рӯпитан кӯщаит ёт ля̄ххал тотнэ хо̄тпат Ханты-Мансийск ӯст акванхо̄нтхатыгласыт. Та̄н халанылт Алексей Варлаков о̄лыс. Тав округ янытыл ма̄ньлат ма̄хум ёт рӯпитан департамент колт кӯщаиг о̄лы. Титыт хум наме Сергеус Гловацкас, тав э̄лы хо̄н ма̄тт ма̄ньлат ма̄хум ёт рӯпитан щирыл яныг специалистыг о̄лы. Хӯрмит хумияныл СНГ э̄лы хо̄н ма̄т халт о̄с яныг кӯщаиг рӯпиты, тав наме Михаил Пушкин. О̄влэ̄т округувт рӯпитан кӯщай А. П. Варлаков потыртас: «Рӯпитаӈкв ка̄сащан ма̄ньлат хо̄тпа рӯпитан ма̄ та̄ра хо̄нтуӈкв ве̄рми. Ат те ве̄рми хо̄нтуӈкве, тав нё̄таве. То̄ванакт ос тащирыл о̄лыглы, рӯпата минэ ма̄хум ханищтахтын ма̄ныл ущты а̄стум хо̄тпа рӯпатан ат выганыл. Таи ты лю̄ль, та̄наныл матахтем та̄л хо̄та̄ти професияныл щирыл рӯпитаӈкве э̄ри. Таима̄гсыл то̄ва ма̄ньлат ма̄хум мо̄т хотты ма̄н рӯпитаӈкве вуйхатэ̄гыт. Россия янытыл рӯпата ат о̄щнэ ма̄хум щирыл, ма̄н округувт юио̄вылт о̄лы. Та пе̄нтсыл са̄в ма̄ныл рӯпитаӈкв тыг ювыт. Ма̄н нэ̄мхотьют по̄хан те̄туӈкв ат ве̄рме̄в. Хотмус э̄лаль о̄луӈкв, та̄нанылн о̄с э̄ри». Ты хум юипа̄лт СНГ э̄лы хо̄н ма̄т халт рӯпитан хум М. Пушкин потыртас. Тав ла̄выс: «Ма̄н ма̄ янытыл са̄в ма̄тт рӯпитэ̄в. Са̄всыр ма̄т сыресыр щирыл о̄лыглы. Ам тыг йигмыгтамум порат номсысум, ка̄сыӈъе̄мт амти рӯпатам ва̄рилум, э̄рнэ щирыл хӯлтыянум. Тыг ёхтумумт ам торгамтаслум, тыт ма̄ньлат ма̄хум нас тох ат о̄лэ̄гыт, рӯпитан ма̄ о̄ньще̄гыт. Са̄выӈпа̄лэ ёмас ма̄т рӯпитэ̄гыт. Мо̄т ма̄ныл тыг са̄в мир рӯпитаӈкве ёхтыс. Ам ань номсэ̄гум, хумус на̄нан пуссын тох ва̄руӈкв а̄ртмыс. На̄н округын э̄лаль янытлаӈкв патылум». Тувыл хо̄н ма̄т рӯпитан хум Сергеус Гловацкас потыртас, тав ла̄выс: «На̄н о̄лнэ ма̄н олн такви сэ̄лы. Ма̄во̄й но̄хвинэ хосыт мир рӯпитан ма̄ иӈ о̄ньще̄гыт. Хунь ма̄во̄й холы, округын акв ма̄н нопуӈкв ве̄рми. Матыр тэ̄нут янмалтан ма̄гыс тыт сака ащирмаӈ. Таима̄гсыл ань э̄лаль матыр ва̄руӈкв э̄ри. То̄нт ма̄ньлат хо̄тпа рӯпитан ма̄ныл мо̄т ма̄н ат мины». Алексей Варлаков ювле ла̄выс: «Ма̄н округувт ма̄ньлат ма̄хум ма̄гыс ханищтахтын кол пунсым са̄в о̄лы. Та̄н ма̄во̄й но̄хвинэ коныпал иӈ са̄всыр мо̄т рӯпатан ханищтахтэ̄гыт. Мо̄т хо̄н ма̄ныл ёхтын ма̄хум урыл са̄всыр йильпи сакко̄ныт пирмайтым о̄лэ̄гыт. Та̄наныл рӯпатал минэ ма̄хум ва̄тихал уральтавет. Тувыл та̄н ань мори ёхтын мир рӯпитаӈкв ат выганыл. Таима̄гсыл тыт о̄лнэ ма̄нти ма̄хманув рӯпатан патхатнэ щирыл лыпащнуве̄г е̄мтыс». Хо̄нтхатыглапув оигпан э̄лыпа̄лт мо̄т ма̄ныл ёхталам хумы̄г ла̄всы̄г: «Ма̄н о̄выл щёс тыг ёхталасӯв, ань э̄лаль аквписыг рӯпата щирыл тыг ёхталаӈкв патэ̄в. Матыр нё̄тмил на̄нан э̄рмыглы те, та̄ра нё̄тыянӯв. Акваннё̄тхатуӈкве патэ̄в те, о̄луӈкве тах кӯстырнуве̄г е̄мты».

1071 2014.03.07. Валентина УЗЕЛЬ

Тав пе̄с щирыл на̄й пе̄ламтас. Ты э̄тпос 7-16 хо̄талыт сыс Сочи ӯст «Паралимпиадаг» ла̄внэ яныг касыл ва̄раве. Ма̄ янытыл тув са̄в а̄гмыӈмосыӈ спортсменхо̄тпа тах мины. Ань ты кастыл Россия то̄ва ӯсытт на̄й пе̄ламтан ва̄рмаль о̄лыс. Ханты-Мансийск ӯсувт та хультум э̄тпос 28 хо̄талэ̄т са̄в мир акванатыглавес. Паралимпийский на̄й Андрей Хоров тав пе̄ламтастэ. Ты ханты хум Ханты-Мансийский район Кышик па̄вылт о̄лы. Кос акв ла̄гылпал, тав сака ка̄ркам хум, ӯс хосыт такви машинал яласы, община о̄ньщи. Ань ма̄н округувныл Сочи ӯсн нила хо̄тпа минасыт, та̄н «следжхоккеиг» ла̄внэ касылт касуӈкв патэ̄гыт. Та̄н наманыл ты – Константин Шихов, Василий Варлаков, Николай Терентьев ос Владимир Литвиненко. Та̄н пуссын ма̄нь сун тармыл ӯнлым хоккейт касуӈкв патэ̄гыт.

1071 2014.03.07. Александр ВЬЮТКИН

Саквалым ёсал э̄лаль ха̄йтум хум. Мощ мо̄лалнув Сочи ӯс каснэ ма̄т ёсал ха̄йтум хум Антон Гафаров ёт Ханты-Мансийск ӯст потыр о̄лыс. Та хум ёт ва̄щинтахтан ва̄рмаль ща̄й айнэ пасан ва̄тат ва̄рыглавес. Антон ка̄сыӈъе̄мт округув ма̄гсыл касы. Ханты-Мансийск ӯст тав СДЮШОР нампа колт ёсал ха̄йтуӈкв ханищтахтас. Тав ла̄выс: «О̄влэ̄т а̄нумн ёсал ха̄йтнэ ва̄рмаль ат а̄ртмыс. То̄нт ам номсысум, пуссын ве̄рме̄гыт, ам манрыг ат ве̄рме̄гум? Яныгнуве̄г е̄мтмум юипа̄лт, номтыл ущ ёхтуве̄сум, ам то̄нт иӈ нас ма̄ниг о̄лсум, таима̄гсыл ты нэ̄матыр ат а̄ртмыс». Сочи ӯст мир халт ва̄рыглам касылт Антон титынтыг касыс. Та э̄лыпа̄л 2010 та̄лт тав Ванкувер ӯст касыс. Ань ёсал ха̄йтнэ «спринт» нампа касыл порат ёлпатыс. Ёлрагатаме порат во̄ртыпал ёсатэ супыгсаквалас. Антон та саквалам ёсатэ̄т ка̄таге̄тыл туйхатым э̄лаль ха̄йтыс. Сып пуӈкныл ёлаль тахамтаме порат титынтыг ёлрагатас. Супыгсаквалам ёсатэ э̄лыо̄влэ ювле нупыл ёхтын мус сакватастэ. Но̄хворатаме порат Канада хо̄н ма̄ныл о̄лнэ тренер Антон пус ёсал мистэ. Титыт ма̄т ёлрагатаме ма̄гсыл Антон щар юио̄влыт ёхтыс. Ма̄н каснэ хумув ёсатэ саквалан ма̄т са̄в ма̄хум ёлрагата̄лсыт. То̄ват писаль ло̄саныл, мо̄таныт ос ха̄йтнэ̄ныл порат туйхатнэ йӣваныл сакватасыт. Прессконференция оигпам порат Антон ла̄выс: «Ты пора ёсал ха̄йтнэ лё̄ӈхув сака та̄рвитыӈ о̄лыс. Тамле та̄рвитыӈ ос мори щакара̄лнэ лё̄ӈх нэ̄мхоты ма̄т воссыг ат ва̄сум. Ань ты та̄рвитыӈ касылныл мощ ущлахтанэм юипа̄лт Сыктывкар ӯсн ёсал ха̄йтнэ Россия ма̄хум халт касуӈкв ялэ̄гум. Ёсал каснэ ва̄рмальныл ам по̄хан минуӈкв ат номсэ̄гум. Мо̄т щёс Корея э̄лы хо̄н ма̄т акв тамле касыл ва̄раве. Та ва̄рмаль мус иӈ нила та̄л хультыс, тот ёмщакв каснэ ма̄гсыл ань щё̄питахтуӈкв э̄ри». Ма̄н ты пыгн ёмщакв щё̄питахтын ла̄тӈыл те̄тылӯв. Ла̄глаге мо̄ляхыг, ка̄таге ё̄рнуве̄г вос е̄мтэ̄г.

1071 2014.03.07. Александр ВЬЮТКИН

Каснэ ма̄т хумус ос маныр о̄лыс. Ре̄тыӈ ю̄свой э̄тпост Сочи ӯст яныг касыл оигпан э̄лыпа̄л хо̄талт округувныл тув ялум ма̄хманув урыл потыртан ма̄гыс ӯсувт прессконференция о̄лыс. Ля̄ххал тотнэ ма̄хум ёт потыртан кастыл кӯщаиг о̄лнэ хӯрум хум ёхталас. Халанылт округ янытыл каснэ ма̄хум Департамент кӯщай хум Евгений Редькин о̄лыс. Мо̄танэ общественных ос внешних связей Департамент кол тармыл кӯщаиг рӯпитан хум Илья Верховский ёхталас. Хӯрмит хум наме Спартак Антоненков, тав ос «ЮграМегаСпорт» колт кӯщаиг рӯпиты. Ма̄н округувныл Сочи ӯст о̄лум касылн са̄т э̄лумхо̄лас каснэ ма̄гыс тув ялыс. Та̄н халанылт ёсал ха̄йтнэ нила хо̄тпа о̄лыс, та̄н наманыл Александр Легков, Сергей Устюгов, Антон Гафаров ос Евгений Шаповалов. Тувыл ёсал ха̄йтнэ ос малопулькаӈ писалил по̄сын па̄тлуптан тит хо̄тпа Алексей Волков ос Екатерина Шумилова тот кассы̄г. Юио̄выл са̄тыт хо̄тпа наме Екатерина Илюхина. Тав ос тит ла̄гыл акв по̄хан тӯщтын па̄хвыӈ ёсал карс сыпныл ёлтахамтым касыс. Каснэ ма̄хум коныпал тув иӈ мо̄т ма̄хум губернаторув Н. Комарова ёт ялсыт. Ма̄ янытыл о̄лнэ ма̄хум та̄нти о̄лупсаныл суссылтан колнак щё̄питым о̄щсыт. Ма̄н округув урыл тот суссылтап о̄с щё̄пита̄лвес. Кӯщаит ла̄внэ̄ныл щирыл, ма̄н колнакув мӯй ма̄хум пӯмщалахтым акваг щалтсасыт. Владимир Путин Россия Президентув ма̄н палтылув о̄с щалтсас. Та порат нэ̄мхотьют иӈ ат ва̄с, мирыт халт хотьютув щар ма̄к ё̄рыг о̄лы, хотьютув но̄хпаты. Аквтох но̄хпатнэ щирыл, ма̄н щар о̄выл щёс 1980 та̄лт но̄хпатыгласӯв. Ань о̄с мирын ё̄ранув та суссылтасанӯв.

1071 2014.03.07. Светлана РОМБАНДЕЕВА

Ма̄н ма̄вн ё̄рва̄гыл ке̄тыглым ма̄хум. Та̄л котиль э̄тпос 29 хо̄талэ̄т Ханты-Мансийск ӯст Природы и Человека музейт ма̄хум акванатхатыгласыт. Тот хӯрум э̄тпостем «Жизнь в ссылке» нампа выставка рӯпитас. Ань 1930-1950 та̄лытт ма̄н о̄лнэ ма̄вн ма̄хум ё̄рва̄гыл ке̄тыглаве̄сыт, ты урыл музейт потыр о̄лыс. О̄выл ла̄тыӈ музей кӯщай Светлана Викторовна Лазарева тав ла̄выс: «Ювле хультум пора мо̄т щирыл ва̄руӈкве ма̄н ат ве̄рмилӯв. Матыр о̄лыс, та о̄лыс. Ос та пилыщмаӈ нак ва̄ӈкве ос номуӈкве э̄ри. Ты урыл ма̄н потыртаӈкве ат те патэ̄в, ма̄ньлат ма̄хманувн ат те ла̄ве̄в, та̄н ва̄ӈкве аты патэ̄гыт. Та порат миллион са̄вит хо̄тпа щар наска̄ссыг порслувес. Та та̄рвитыӈ та̄лыт урыл са̄всыр документыт, потрыт, пищмат ос хурит то̄ва музеитыт акванатым о̄лэ̄гыт. Ма̄н, Природы и Человека музейт рӯпитан ма̄хум, та о̄лупса урыл о̄с са̄в потыр акванатсӯв, хурит ка̄тынпаттысӯв. Та порат хансыглам со̄тыра са̄виттем документыт, пищмат ос киноплёнкат хо̄нтсӯв. Ты урыл ма̄н нэ̄пак хассӯв, намаяслӯв «Жизнь в ссылке». Ты коныпал ты нак щирыл ма̄н ань научноисследовательский рӯпата ва̄ре̄в». Светлана Викторовна потыртаме юипа̄лт Дмитрий Васильевич Филипчук ла̄тыӈ ла̄выс. Ты хум музейт научный сотрудникыг рӯпиты, «Жизнь в ссылке» нэ̄пак хансуӈкве тав о̄с нё̄тыс. Хум тох ты потыртас: «Ка̄сыӈ мир матыр та̄рвит тэ̄ла о̄ньщи, та урыл ма̄хум потыртаӈкве ат таӈхе̄гыт манос потыртаӈкве ат тайи. Ма̄н ань о̄с о̄ньще̄в тамле тэ̄ла. 20й нот ущнув ты оигпас, ты нак та нотт о̄лыс. Ма̄н ань ты хо̄тал мус матыр хӯнтамла̄лэ̄в, ва̄ӈкв ат ва̄слув, насати тох та о̄лум. Ма̄хум полщил ва̄рве̄сыт, лӯи ма̄н са̄всыр ма̄ныл ке̄тыглаве̄сыт. Ты нак ва̄рум хо̄тпат ат суссыт, ты яныгхо̄тпа ман ня̄врам, щёлыӈ ман нуса э̄лумхо̄лас, пуссын тыг ӯйхул хольт ня̄влуве̄сыт. Са̄в хо̄тпа турман колн ӯнттуве̄сыт, то̄ват са̄в та̄л ӯнлысыт, ётыл конта̄ртыглаве̄сыт, то̄ват ос тот и порсысыт. Ма̄хум янгыщ аты ва̄саныл манрыг та̄н о̄лнэ коланыл коння̄влуве̄сыт, о̄лум ма̄наныл тыг ё̄рва̄гыл ке̄тве̄сыт. То̄ва порат ха̄п я̄ ва̄тан пӯхвты, ма̄хум ня̄враманыл ёт па̄гтуясавет, таит ла̄внэ̄ныл: «О̄лнэ ма̄н ты, хотмус та о̄лэгы̄н. Ма̄нт вуе̄н, на̄нтина̄нын о̄лнэ кол ӯнттэ̄н. Соссаӈ мир ёт ул потыртэ̄н, та̄н ма̄гсыланыл на̄н сылкат». Ма̄хум я̄ ва̄тат та оссувлавет, ляпат щар акв кол а̄тим, акв а̄мп а̄тим. Йильпи ма̄т, хащта̄л ма̄т савалым хотмус та о̄лмыгтасыт. Па̄влытт о̄лум ма̄хум манос нуса ма̄хум тох о̄луӈкве воссыг тыа̄ти та ханьщувласыт. Ос яныг ӯсытт о̄лум хо̄тпатн, ня̄враманылн тамле о̄лупсан ханьщувлаӈкве сака та̄рвитыӈ о̄лыс. Мощ ётылнуве ма̄хум тыг ос национальность щирыл ке̄туӈкве патве̄сыт – немцыт, финныт, калмыкыт Ты о̄с акв сака пилыщмаӈ нак. Тувыл о̄луӈкве хотмус э̄ри, ма̄хум рӯпитаӈкве патсыт. Хул пирмайтан комбинатт рӯпитасыт, колыт ӯнттысыт. Та порат Ханты-Мансийск ӯс Остяко-Вогульскыг ла̄ввес. Ты ӯсув ӯнттуӈкве ань то̄нт тыг ке̄тыглам ма̄хум та̄н ты о̄вылтасаныл. Ты рӯпата сака та̄рвитыӈ о̄лыс». Та нак порат тыг о̄лмыгтам ма̄хум то̄ва пормасаныл, маснутаныл музей акв колнаке̄т акванатымат, пе̄с хурит колнорн но̄хтагталымат, пуссын ма̄навн суссылтаве̄сыт. Дмитрий Васильевич то̄ва хурит урыл потыртас. Акв хурит Борис Степанов ще̄мьятэ ёт по̄слым о̄лы. Хум Ха̄льӯст райком партия секретариг рӯпитам. Тав тамле та̄ксар, пилта̄л хум о̄лум. Сталинын пищма хансыглам, манрыг ань ма̄хум наска̄ссыг полщил ва̄равет, саватавет. Мо̄т хум ос журналистыг о̄лыс, Виктор Гулидов, лӯи ма̄н Москва ӯсныл ке̄тыглавес. Ха̄льӯст 1935 та̄лныл 1937 та̄л мус о̄лыс. Та̄н пуссын э̄кванылн ос оманылн са̄в пищма хансыгласыт. Ань та пищмат хосыт мощ та̄рапатыс, хумус та̄н ты ма̄т о̄лсыт, хумус саваласыт, маныр урыл номсысыт. Ты хумыг ос мо̄т са̄в ма̄хум урыл «Жизнь в ссылке» нэ̄пакт хансым о̄лы, ка̄тынпаттум хурияныл о̄с тув по̄слуманыл. Виктор Гулидов яныг таквс э̄тпост 1937 та̄лт Тюмень ӯст порслувес. Борис Степанов ос ма̄нь таквс э̄тпост 1937 та̄лт турман колн ӯнтталавес, 1939 та̄лт та̄ртвес. Хум тот сака саватавес, алнэ па̄сыл о̄щвес. Хунь кон та̄ртвес, тав областной прокурорн ос Омский область партколлегия секретарин пищма хансыс. Маныр номсыс, пуссын хансыс, ань хумус ма̄хум наска̄ссыг саватавет, порславет. Сталин о̄йкан о̄с хансыс: «Ты пилыщмаӈ нак о̄лнэ̄тэ ма̄гыс, мирн ла̄тыӈ ла̄вуӈкве тах наӈ патэ̄гын, наӈ китыглаӈкве патавен. Ты порав йисыг е̄мты, наӈ намын тах ла̄вуӈкве патаве». Щар со̄ль та ла̄выс. Борис Степанов хоса пыл ат о̄лыс, хо̄нтлын ма̄н вуйлувес, тот порслувес. Д. В. Филипчук потре оигпам юипа̄лт ма̄хум мо̄т колнакн во̄вве̄сыт, тот ос сцена о̄лы. Музей кӯщай С. В. Лазарева сценан «Жизнь в ссылке» нэ̄пак хансум ма̄хум во̄всанэ – «Новости Югры» газетат корреспондентыг о̄лнэ нэ̄ В. В. Патранова, журналист ос лӯи ма̄ урыл хаснэ хум В. К. Белобородов, музей кӯщай ва̄ӈын нэ̄ О. И. Приступа ос Д. В. Филипчук. Та̄н коныпаланыл тув кит э̄кваг во̄ввесы̄г, ты Лидия Васильевна Бубова ос Анна Ильинична Жукова. Тэ̄н ще̄мьянэ̄н та нак порат тыг ке̄твесы̄г. С. В. Лазарева ла̄внэ̄тэ щирыл, ты нэ̄пак акв хо̄тал хунь хасвес. Нэ̄пак хансум ма̄хманув хус арыгтем та̄л рӯпитасыт. Тувыл ты нэ̄пак хансум ка̄сыӈ хо̄тпа ла̄тыӈ ла̄выс. Э̄кваг о̄с потыртасы̄г, хумус тэ̄н ма̄хманэ̄н тыг ва̄нтлысыт, о̄лмыгтасыт, та̄нанылн сака та̄рвитыӈ о̄лыс. Анна Ильинична Жукова ла̄выс: «Ты музейн ёхтум ма̄хумн ам пӯмащипа ла̄тыӈ ла̄ве̄гум. Ань та пилыщмаӈ пора о̄лме ма̄гыс на̄н о̄с сыманын ща̄рге̄гыт. Соссаӈ мирн, ма̄ньщи ос ханты ма̄хумн, ам яныг пӯмащипа ла̄тыӈ ла̄ве̄гум. Та̄н хосытанылт ма̄н лылыӈта̄гыл хультсӯв. Та̄н ма̄навн са̄в нё̄тмил ва̄рыгласыт, тэ̄нутыл ос о̄щнутыл майлувесӯв. Омам та̄н о̄лупсаныл ханищта̄лыстэ, ва̄стэ, маныр ро̄ви ва̄руӈкве, маныр ат тайи. Ма̄нав акваг ханищтастэ, акваг потырта̄лыс. Тав соссаӈ мир сака янытластэ. Ма̄н ань о̄с омав хольт о̄лэ̄в. Соссаӈ мир э̄лыпа̄лт ам ма̄ мус хӯтсэ̄гум, яныг пӯмащипа ла̄тыӈ ла̄ве̄гум». Ты хо̄нтхатыглапув оигпаме э̄лыпа̄лт ма̄ньлат хо̄тпат Анна Ахматова хансум стихотворениянэ ловиньтасыт. Ма̄хум щар сӯпне̄лмта̄л тыстым та ӯнлахо̄лсыт. Пуссын ты потрыт ос стихотвореният хӯнтлуӈкве сака та̄рвитыӈ, ос аквтох сака пӯмыщ о̄лыс. Воссыг хоталь щалтэ̄в, ты ма̄н ма̄вт о̄лум нак, ты ма̄н йис о̄лупсав.

1071 2014.03.07. unknown

Э̄кват ялпыӈ хо̄тал. Ты хурит Маина Ивановна Хозумова по̄слыма. Тав Ха̄льӯс район Та̄гт па̄вылт о̄лы. Оматэ Антонина Прокопьевна, а̄тятэ Иван Захарович Варсаковыг, саран э̄кваго̄йкаг о̄лсы̄г. Маина Ивановна о̄йкатэ ма̄ньщи хум, наме Алексей Родионович Хозумов. Тэ̄н аквъёт ат ня̄врам янмалтасы̄г, хӯрумхуйплов апыг о̄ньще̄г. Мо̄лты акваг Ло̄пмус па̄вылт о̄лсы̄г, рӯпитасы̄г, мислув о̄щсы̄г. Маина Ивановна 36 та̄л садикт тэ̄нут па̄йтым рӯпитас, «Ветеран труда» нам о̄ньщи. О̄йкатэ ня̄врамыт ханищтан хумыг школат рӯпитас, ла̄пкат тыналахтас, библиотекариг о̄лыс. Пенсиян патсы̄г, Та̄гт па̄вылн ва̄нтласы̄г. Ань онтоловит та̄л тот о̄лэ̄г, а̄гиа̄гиянэ̄н, а̄гипыганэ̄н, пыга̄гиянэ̄н, пыгпыганэ̄н янмалтэ̄г. Маина Ивановна э̄кват ялпыӈ хо̄талыл пуссын ня̄враманэ̄н янытлаве ос тамле ла̄тӈыт газета та̄ра ке̄таве: «Тӯя хо̄талыт, ма̄лтып хо̄талыт ёт со̄т ос йильпи ё̄р вос ёхты. Пуста̄гыл о̄лнэ хо̄талыт вос тоты. Кол со̄т, щунь ос хоса нот наӈынн. Ма̄н наӈын э̄руптылӯв». Наӈ ня̄враманын.

1071 2014.03.07. Анна АЛГАДЬЕВА

Рущ ма̄хум мӯйлысыт. Рущ ма̄хум халт ялпыӈ хо̄тал о̄лы, ла̄ваве – Масленица. Тамле хо̄тал ка̄сыӈ ӯст, па̄вылт ка̄сыӈ тӯя е̄мт ва̄рыглаве. Ма̄хум тэ̄лы пора парлэ̄гыт, тӯя хо̄талытн ща̄гтэ̄гыт. Ты хо̄талт ке̄ра̄ны паттан во̄вта ня̄нь понславе, кол халт мӯйлым ё̄маве, а̄мщит а̄мщавет. Ха̄льӯс район Хулюмсунт па̄вылт тамле ялпыӈ хо̄тал ма̄ньполь э̄тпос китыт хо̄талт ва̄рыглавес. Ка̄сыӈъе̄мт ты хо̄тал а̄лпыл столовый колт са̄всыр пиракыт, салатыт, щищкурек пе̄щит, шашлык тыналаве. Хо̄талъят порат ос ёнгын нак ва̄раве. Ты накт ма̄хум пуссын яныг нё̄тнэ ФОК кол по̄хын атхатыгласыт. ЛПУ организацият рӯпитан ма̄ньлат ма̄хум ос школат ханищтахтын ня̄врамыт концерт ва̄рыгласыт: э̄ргыт, частушкат э̄ргысыт, мо̄йт суссылтасыт. Тув атхатыглам ма̄хум, ня̄врамыт халанылт ё̄ранылтыл а̄рталахтасыт. Но̄хпатум хо̄тпат мӯйлупсал майве̄сыт. Щар юио̄вылт пум пилтапэ̄кваныл но̄хпе̄лаяптасаныл. Ла̄ве̄гыт, та пум пилтап хотщарнэ хольтыл та̄л палыт атхатам матыр лю̄ль накыт хотпатэ̄гыт, минэ̄гыт. Ма̄лтып тӯя хо̄талыт ёт ёмас посыӈ хо̄талыт ёхтэ̄гыт. Мир сыстамыг паты. Тахольтыл ма̄лтып, посыӈ, хо̄талыӈ хо̄тал о̄лыс, ма̄хум ёмщакв ощхультасыт, ёнгасасыт, ёмас номтыл ла̄ккваминыгласыт.

1071 2014.03.07. unknown

Та̄наныл янытлыянӯв. А̄с-угорский институтт ос «Лылыӈ со̄юм» студият я̄тил ма̄ньщи нэ̄ хо̄тпаквет рӯпитэ̄гыт. Са̄выӈпа̄лэ та̄н пуссын ма̄ньщи ла̄тӈыл потыртаӈкв ха̄сэ̄гыт. Институтт рӯпитан ма̄хум та̄н наука рӯпата ва̄ре̄гыт. Ос студият рӯпитан а̄гиянув та̄н ня̄врамыт ёт рӯпитэ̄гыт. Ань 8 март ялпыӈ хо̄тал кастыл ма̄н та̄наныл пуссын янытлыянӯв. То̄рум ёт, О̄тыр вос о̄лэ̄гыт! На̄й-О̄тыранылн вос ӯргалавет, пус ка̄т, пус ла̄гыл!

1071 2014.03.07. Людмила ТЕТКИНА

Кит а̄гирищакве̄г ома хо̄нтсы̄г. Людмила ос Евгений Угрюмовыг Кондинский район Леуши па̄вылт о̄лэ̄г. Людмила Ильинична такви ще̄мьятэ урыл ла̄выс: – Ме̄н о̄йкаме̄нтыл хӯрум пыг о̄ньщиме̄н. Ам акваг а̄ги урыл номсысум. Тох та та̄ланум ювле хультсыт. Яныг пыгагум школа а̄стласы̄г, э̄лаль ханищтахтуӈкве минасы̄г. О̄йкам ос ма̄нь пыгме̄н ёт юн хультсӯв. То̄нт номсахтуӈкве патсум, э̄рыӈ савалап колт ма̄нь а̄гирищ виӈкве. О̄йкам ты урыл ла̄всум, тав тай ёмащакв ва̄гтэ, ам сака а̄гирищ о̄ньщуӈкве тахсум. Тувыл Урай ӯс савалап ня̄врам колн ялсуме̄н, тот ме̄нки нэ̄паканме̄н хульсанме̄н. Ос ты юипа̄лт са̄всыр справкат ос мо̄т нэ̄пакыт акванатуӈкве о̄вылтахтасме̄н. Нэ̄пакыт ёт капыртым акв та̄л минас. Ма̄нь а̄гирищкве кинсым Ханты-Мансийск, Тюмень ӯсыгн савалап ня̄врам колн ялсуме̄н. Нэ̄паканме̄н Новосибирск ӯст о̄лнэ савалап ня̄врам колн ос ке̄тсанум. Ань ка̄сыӈ тамле кол интернетыт такви ло̄пс о̄ньщи, тот о̄лнэ ня̄врамыт хурияныл сунсыглаӈкве ро̄ви. Тот ты ам Василиса хуритэ ка̄саласлум. Тув свонитасум, а̄ги урыл китыглахтасум, ювле ла̄вве̄сум, Василиса йӣгрищ о̄ньщи, наме Маргарита. Ос туп кит а̄ги виӈкве э̄ри, аквъёт вос яныгме̄г. Ме̄н о̄йкаме̄нтыл а̄гирищиг палт минасме̄н. Тэ̄н ётэ̄н хунь ва̄щинтахтасме̄н, Василиса ам нуплум нас сунсыс, Рита хащта̄л хо̄тпа ка̄саламе торыг, лю̄ньщалтахтас. Амки а̄латы тот лю̄ньщалтахтасум. То̄нт о̄йкам ла̄выс, ты а̄гииг сас выгагме̄н. Междуреченский па̄вылн нэ̄пакыт щё̄питаӈкве минасме̄н, ла̄вве̄сме̄н, о̄влэ̄т ханищтахтуӈкве э̄ри. Ханищтахтуӈкве а̄стлысме̄н, экзаменыл ва̄рвесме̄н, са̄всыр нэ̄пакыт хассуме̄н. Психологыт ос мо̄т хо̄тпат ме̄н ётуме̄н рӯпитасыт. Ос ты юипа̄лт ущ а̄гирищиг ма̄гсыл Новосибирск ӯсн минасме̄н. То̄нт Рита туп акв та̄лэ то̄влыс, Василиса хӯрум та̄лэ о̄лыс. Хунь юв тотсагме̄н, о̄влэ̄т лю̄щсы̄г, о̄йкамныл ос пыгумныл пилсы̄г. Савалап ня̄врам колт туп нэ̄ хо̄тпат рӯпитэ̄гыт, тыи ма̄гсыл о̄йкам ка̄саламе̄н порат сас лю̄ньщуӈкве о̄вылтахтасы̄г. Ань тай ханьщувласы̄г, о̄йкам рӯпатаныл сака ӯритэ̄н, юв ёхты, сас тав палтэ ха̄йтэ̄г, такем та аниглытэ̄н. О̄йкам МЧСт рӯпиты, ам садикыт ле̄ккарыг о̄лэ̄гум, а̄гиягум о̄с тув ялантэ̄г. Хо̄тал палыт ам по̄хамт о̄лэ̄г, садикыт акваг тэ̄н группатэ̄н щалтапа̄лэ̄гум, уральтыягум. Яныг пыгме̄н Андрей строительный институтыт ханищтахты, котиль пыгме̄н Илья машиностроительный колледжит о̄выл курсыт ханищтахты. Ма̄нь пыгме̄н о̄вылт классын яланты. Хӯрум ня̄врам янмалтым, ма̄н яныг ще̄мьяг ловиньтахтасӯв, са̄в-сыр льгота о̄щсӯв. О̄йкам са̄в олн сэ̄лыс, тыи ма̄гсыл пособияолныл ат ойтвесӯв. Пыганум школат кит щёс тыттуве̄сыт, ты коныпал мо̄т нё̄тмил ма̄н ат ва̄щинтасӯв. Ань а̄гирищит ма̄гсыл олныл ойтаве̄в, тувыл матыр ёвтуӈкве э̄ри, чекыт пуссын акванатыянум ос опекан тотыянум. Ма̄нав ӯральтаӈкве та̄н ва̄тихал ёхталэ̄гыт. Сунсэ̄гыт, хо̄т а̄гирищиг хуе̄г, манхурип маснут о̄ньще̄г, манхурип тэ̄нут тэ̄гы̄г. О̄влэ̄т маныр э̄ри, пуссын суссылтасум, тувыл номсэ̄гум, акваг тох ӯральтаӈкве о̄с ат э̄ри. Па̄вылт таса̄вит вина айнэ хо̄тпа о̄лы, ня̄враманыл нупыл тэ̄ланыл щар а̄тим. Нэ̄мхотьют ат пӯмщалахты, манхурип та̄н маснут масэ̄гыт, хо̄т хуе̄гыт ос маныр тэ̄гыт. Ос ювле ла̄вавем, олныл ойтавем ос тыи ма̄гсыл ты уральтавем. Ань о̄йкаме̄нтыл о̄лнэ колув ремонтыл ва̄рысламе̄н, Василиса ос Маргарита ма̄гсыл акв колнак йильпииг щё̄питаслуме̄н, са̄всыр йильпи ёнгын утытыл ёвтсагме̄н. Тэ̄натэ̄н ме̄н э̄руптым ос ӯргалым янмалтыягме̄н. Ма̄нь пыгум а̄гирищиг ёт акваг ёнгасы. Тав такви иӈ ма̄нь, о̄влэ̄т китыглахтас, манрыг ты а̄гирищиг тотвесы̄г. Ань ос тав ханьщувлас, школаныл ёхты, та̄ра а̄гирищиг урыл китыглахты. Людмила Ильинична ос о̄йкатэ Евгений Владимирович сас ма̄ньщииг, Кондинский районт самын патсы̄г, тот яныгмасы̄г. Акван хунь минасы̄г, Леуши па̄вылн о̄луӈкве ва̄нтласы̄г. Тэ̄нки яныг кол ӯнттысы̄г. Ам Людмила Ильинична нэ̄ янытлан хо̄талыл янытлылум. Тав сымыӈ хо̄тпаг о̄лы, савалап ма̄нь ня̄врамыг о̄ньщи. А̄гирищиг тав палтэ молях ханьщувласы̄г, таве омаг ла̄витэ̄н. Ты ще̄мья со̄тыӈыщ, щуниӈыщ э̄лаль вос о̄лы. Пус ка̄т, пус ла̄гыл.

1071 2014.03.07. Светлана РОМБАНДЕЕВА

Сакв ма̄ньщиянув. Ха̄льӯс район Саранпа̄вылн ялмум порат ам акв ма̄ньщи нэ̄ ёт хо̄нтхатыгласум, наме Тамара Егоровна Гындыбина. Тав 1967 та̄лт яныгполь э̄тпост Саранпа̄вылт самын патыс, а̄ги о̄парищ наме Хозумова. На̄н ань тав потре ловиньтэлы̄н: Омам Александра Ивановна Я̄сунтыл о̄лыс, Ма̄нья нэ̄, 1934 та̄лт самын патыс. А̄ги о̄парищ наме Тихонова. А̄тям Егор Семёнович Хозумов Хо̄рыӈпа̄выл хум. А̄тягмомагм Я̄сунтыт акванхо̄нтхатсы̄г, а̄тям тот ла̄пкат рӯпитас. Ме̄н а̄пщиме̄нтыл самын патсуме̄н, хӯрум та̄л о̄с рӯпитас. Тувыл ла̄пка Я̄сунтыт лаппантвес, минасы̄г Хо̄рыӈпа̄вылн, о̄лмыгтасы̄г тув. А̄тям тот нёлолов та̄л рӯпитас, а̄тимыг е̄мтыс. Ма̄н тот и о̄лсув. Ханищтахтуӈкве патсуме̄н, Саранпа̄вылн ва̄нтлысӯв. Та па̄сыл ань тыт Саранпа̄вылт о̄лэ̄в. Омам 2008 та̄лт а̄тимыг е̄мтыс. О̄йкан хотыл о̄лы? Тав о̄с ма̄ньщи хум? О̄йкам Петр Иванович Кимкъясуйныл о̄лы, ма̄ньщи хум, нё̄рт яласас. Ме̄н са̄т та̄л нё̄рт яласасме̄н. Тувыл яныг пыгме̄н школан минас, на̄лув по̄йтсуме̄н. О̄йкам ань пенсиян патыс. Ам на̄лумт тыт тармыл совхозт рӯпитэ̄гум. Ме̄н нила ня̄врам о̄ньщиме̄н, ань пуссын янгыт хӯрум пыг, акв а̄ги. Пыганме̄н Серёжа, Ваня ос Алёша Ханты-Мансийск ӯст колледжит ханищтахтэ̄гыт. А̄гиме̄н Лена, школат нёлолов классыт ханищтахты. Кит пыгагме̄н армиян ялсы̄г, ма̄нь пыгуме̄н ань ты та̄л я̄ӈк на̄тнэ э̄тпост армиян виве. Ам ань совхозт сувенирный цехт рӯпитэ̄гум, пӯркит, тапочкат та матыра̄ти ва̄ре̄в, хансал яктыянӯв, ю̄нтыянӯв. Пӯркит ю̄нтуӈкве, улпыл, та̄рвитыӈ? Атхунь та̄рвитыӈ. Ханса яктуӈкве э̄ри, йинэ̄в, ю̄нтэ̄в. Ня̄враманын ма̄ньщи ла̄тӈыл потыртэ̄гыт? Та̄н ма̄ньщи ла̄тыӈ пуссын торгамтэ̄гыт, ане̄кваныл ёт яныгмасыт. Яныг пыгум потырты. А̄пщим яныг пыге Сашатэ ос ва̄г ма̄ньщи ла̄тыӈ. Ма̄ньнув ня̄враманув тай ат потыртэ̄гыт, ань матум хо̄тпа ат о̄ньще̄в, хотьют ёт ма̄навн потыртаӈкве. Ма̄н ань акв ла̄тӈув ма̄ньщи, китыт ла̄тӈув рущ, мори равтэ̄в. Торыӈ ла̄тыӈ ат хӯлэ̄гыт, хумус ва̄ӈкве патэ̄гыт. Школат тох тай ханищтэ̄гыт ща̄нь ла̄тыӈ, олимпиада та маныр, пуссын ва̄ре̄гыт. Ань ня̄врамыт ща̄нь ла̄тыӈ ханищтаӈкве сака ат таӈхе̄гыт, э̄ссамтэ̄гыт. «Лӯима̄ сэ̄рипос» ма̄ньщи газета на̄н палтылын ёхталы, ловиньтылын? Ёхталы, ам акваг ловиньтэ̄гум, то̄ванакт хотты ва̄нэ хо̄тпанув ка̄салэ̄гум. Матъёмас газетав о̄лы, ма̄нти ла̄тӈувтыл потрыт ловиньтэ̄в, сака ёмас. Тамара Егоровна тамле ка̄ркам, ма̄щтыр нэ̄. Пӯркит ва̄рнэ̄тэ коныпал тав ма̄ньщи суп ю̄нты. Ня̄враманэ кот тынтлаӈкве о̄с ха̄сэ̄гыт. Ты я̄тил ма̄ньщи хо̄тпав ще̄мьятэ ёт пуста̄гыл вос о̄лы, пус ка̄т, пус ла̄гыл! Ма̄н, редакцият рӯпитан ма̄хум, таве ос тав ще̄мьятэ нэ̄ хо̄тпат пуссын э̄ква ялпыӈ хо̄талыл янытлыянӯв! О̄выл хурит Тамара Егоровна ма̄хманэ ёт по̄слым о̄лы, во̄ртыпа̄лныл ёмаспа̄л нупыл лю̄ле̄гыт: Лена а̄гитэ, такви Тамара Егоровна, а̄пщитэ а̄гииг Люда ос Вика, а̄пщитэ пыг Саша ос Лена мане. Китыт хурит ос Тамара Егоровна пыганэ по̄слым о̄лэ̄гыт – Ваня, Алёша ос Серёжа. Ань тыт Ханты-Мансийск уст ханищтахтынэ̄ныл ма̄н та̄рапаттыслув, та̄наныл газета ва̄рнэ колн во̄выгласанув, тыт по̄слысанув. Ты я̄тил ма̄ньщи пыгыт со̄тыӈыщ вос о̄лэ̄гыт, На̄янылн-О̄тыранылн вос ӯргалавет!

1071 2014.03.07. Людмила ТЕТКИНА

Нё̄рахи па̄вылт яныгмам нэ̄. Надежда Владимировна Тасманова ня̄врамаге ёт ам Ха̄льӯст о̄лум ялпыӈ хо̄талт по̄слысанум. Ма̄ньщи нэ̄ ще̄мьяӈ та̄гыл тот о̄лы. Такви тав Ха̄льӯс район Нё̄рахи па̄вылт яныгмас. Пе̄с порат тот яныг па̄выл о̄лыс, ань туп хӯрум кол хультыс. Акв колт фермеро̄йка о̄лы, мисыт, лувыт янмалты. Китыт колт Калининыт колта̄гыл ос хурмит колт Надежда оматэ Татьяна Семёновна Тасманова такке̄т о̄лы. Тав Нё̄рахи па̄вылн оматэ палт ва̄тихал яланты, таве̄н кол сори рӯпата ва̄руӈкве нё̄ты. Оматэ ёт яныг тэ̄пкант карто̄пка ӯнттэ̄г, са̄всыр мо̄т тэ̄нут янмалтэ̄г, пил ва̄тэ̄г, хӯл алыщлэ̄г ос во̄рае̄г. Ам Надежда Владимировна нэ̄ хо̄тпат ялпыӈ хо̄талыл янытлылум. О̄лупсатэ кӯпнитыг вос е̄мты, То̄румн са̄в ё̄рыл вос пинаве. Пус ка̄т, пус ла̄гыл!

1071 2014.03.07. Александр ВЬЮТКИН

Хӯрум колта̄гыл. Ханты-Мансийск ӯст «Папа, мама, я – обскоугорская семья» нампа касыл хо̄тынтыг ва̄рыглавес. Ты хо̄т та̄л сыс пусcын аквъёт титхойплов соссаӈ колта̄гыл халанылт кассыт. Ты пӯмащ ва̄рмаль ка̄сыӈ та̄л «Лылыӈ со̄юм» колт ня̄врамыт ёт рӯпитан ма̄хум щё̄питыглыяныл. Ва̄рыглам ка̄сыланыл аквписыг пӯмащиг тэ̄лы. Ты порат о̄с сака пӯмащ о̄лыс. Соссаӈ ма̄хум халт тит ма̄ньщи ос акв ханты колта̄гыл кассыт. Щар яныг ще̄мьяг са̄в та̄л акъвёт о̄лнэ ханты колта̄гыл Раиса ос Валерий Головиныг, пыгаге̄н ос а̄гитэ̄н акваннё̄тхатым пуссын кассыт. Тувыл тит ма̄ньлат ма̄ньщи ще̄мьяг Анастасия Федий пыгаге ёт ос Максим, Татьяна Фоминых а̄гитэ̄н ёт о̄лсыт. Та̄н та̄нти самын патум ма̄наныл ос ань ты о̄лупсаныл урыл потыртасыт ос матыр такталасыт. Касыланыл щирыл та̄н йӣквсыт, э̄ргысыт ос са̄ӈквылтапыл са̄ӈквылтасыт. Пуссын аквтем пӯмщиг о̄лсыт. Жюри хо̄тпаг Мария Кузьминична Волдина, Наталья Фёдоровна Кривошапова ос Виктор Банк пе̄риялве̄сыт. О̄выл места ма̄ньлат ма̄ньщи Фоминых колта̄глын мисаныл. Тыи ма̄гсыл Татьяна ще̄мьятэ ёт тэ̄нут па̄йтнэ «мультиварка» нампа пӯтыл мӯйлуптавес. Та нампа пӯт тӣврыт са̄всыр тэ̄нут щё̄питаӈкв ро̄ви. Титыт местан Раиса ос Валерий Головиныг пе̄риявесы̄г. Тэ̄н ос «кухонный комбайн» нампа утыл мӯйлуптавесы̄г. Юио̄выл местан Анастасия Федий колта̄глэ е̄мтыс. Та̄н ос са̄всыр нампа фруктыт витыг сакватан утыл мӯйлуптаве̄сыт, ты ут рущ ла̄тӈыл «блендерыг» ла̄ваве. Ам ты хӯрум колта̄гыл щуниӈыщ э̄лаль о̄лнэ хо̄талыл ла̄виянум. Ня̄враманыл мовиньт коланылт ло̄ӈханьщап хольт акваг вос суйты. Нумыл ё̄хнэ, ёлыл ё̄хнэ ма̄витэ ня̄враманыл ма̄гсыл сыстам щирыл вос хульты. На̄й-О̄тыранылн вос ӯргалаве̄т, пуста̄гыл вос о̄лэ̄гыт.

1071 2014.03.07. Людмила ТЕТКИНА

Ты ёмас хо̄тал янытлым ма̄н ла̄тӈув э̄лаль тотылӯв. Ща̄нь ла̄тыӈ янытлан мирхал хо̄талт Югорский университетыт ялпыӈ хо̄тал ва̄рыглавес. Соссаӈ ма̄хум институтт рӯпитан хо̄тпат ма̄ньлат ма̄хум тот акванатыгласаныл. О̄влэ̄т Татьяна Карминская, ЮГУ кӯщай нэ̄, студентыт янытласанэ. Тав ла̄выс: « Ма̄ янытыл хо̄т со̄тыра са̄виткем мир о̄лы. Ань тох е̄мтыс, то̄ва мирыт та̄нки ща̄нь ла̄тӈаныл хотёрувлаӈкве патсаныл. Э̄лаль ке тох мины, туп хӯрум со̄тыра ла̄тыӈ тах хульты. Ань ла̄тыӈ ва̄нэ яныгпа̄ла хо̄тпат а̄тимыг е̄мтэ̄гыт, ты хосыт ща̄нь ла̄тӈыт о̄с со̄йме̄гыт. Ма̄ янытыл о̄лнэ мирыт ща̄нь ла̄тӈаныл ул вос ёрувлэ̄гыт, ЮНЕСКО нампа организация ща̄нь ла̄тыӈ янытлан хо̄тал ва̄руӈкве номылматас. Югорский университетт рӯпитан ма̄хум ма̄ньщи, ханты ла̄тӈыг ос пе̄с йис ва̄рмалит но̄хво̄рмалтан ма̄гсыл яныг рӯпата ва̄ре̄гыт. Ты та̄лныл соссаӈ ма̄хум институт тот рӯпитаӈкве о̄вылтахтас. Ань а̄гитпыгыт та̄нки культураныл ос ла̄тӈаныл тот ханищтэ̄гыт. Тамле ялпыӈ хо̄талыт ва̄рыглан хосыт, мо̄т студентыт соссаӈ ма̄хум урыл са̄внув ва̄ӈкве тах патэ̄гыт». Студентыт янытлаӈкве Александр Новьюхов, «Югра лылыеп» нампа организация кӯщай, ёхталас. Тав Россия янытыл о̄лнэ соссаӈ ма̄хум яныг организация рӯпататэ урыл ла̄тыӈ ла̄выс, рущ ла̄тӈыл тох намаим о̄лы: «Ассоциация коренных малочисленных народов Севера, Сибири и Дальнего Востока». Тув Россия янытыл мощщаг хультум налыман мирыт хансым о̄лэ̄гыт. Александр Новьюхов акв ва̄рмаль урыл тот о̄с потыртас. Россият о̄лнэ мирыт намнэ̄паканылт национальность ань ат хансаве. Тав ла̄вме щирыл, национальность ат о̄щнэ̄ныл паттыиг, ма̄хум та̄нки ла̄тӈаныл ат ва̄ганыл ос культураныл урыл щар ат пӯмщалахтэ̄гыт. Тувыл ань ос акв лю̄ль тэ̄ла о̄лы, са̄в по̄х хо̄тпат соссаӈ ма̄хум нупыл хасхатэ̄гыт ос са̄всыр льгота о̄ньще̄гыт. Кӯщай хум ла̄выс, тамле хо̄тпат экзаменыл ва̄руӈкве э̄ре̄гыт, ма̄ньщииг манос хантыиг о̄луӈкве ке воратэ̄гыт, та̄н хотты ла̄тыӈ вос ханищтэ̄гыт. Мария Кузьминична Волдина ма̄ньлат хо̄тпат э̄лыпа̄лт такви хансум стихотворениянэ ловиньтасанэ ос такви уре̄тыл потыртас. Тав яныгмаме порат, ка̄сыӈ ханты хо̄тпа хӯрум ла̄тӈыл потыртас. Ты э̄ква ханты, рущ ос саран ла̄тӈыт ва̄ганэ. Ань яныгман ня̄врамыт туп рущ ла̄тыӈ ва̄гыт. Тыи ма̄гсыл ань ща̄нь ла̄тыӈ янытлаӈкве ос э̄лаль тотуӈкве э̄ри. Светлана Динисламова ма̄ньщи ос рущ ла̄тӈыл хансум стихотворениянэ ма̄хумн о̄с ловиньтасанэ. Студентыт ты ялпыӈ хо̄тал янытлаӈкве о̄с щё̄питахтасыт. Акв колнакт та̄н ё̄рнкол тӯщтысыт ос мӯй ма̄хумн ма̄ньщи ос ханты пе̄с йис ва̄рмалит урыл потыртасыт, йӣквыт йӣвсыт ос э̄ргыт э̄ргысыт. Библиотекат «Язык – как воздух, можно им дышать» нампа пӯмыщ суссылтап рӯпитас.

1071 2014.03.07. Татьяна Бахтиярова

Ма̄нь а̄ги. Ха̄йты а̄гирищ, Мовиньты а̄гирищ Тахамты а̄гирищ, Тувыл ос но̄х сыпн ха̄йты. Сыме во̄йт хуи, Тав а̄пщи о̄ньщи, Тав яга̄ги о̄ньщи, Тав яныг ще̄мья о̄ньщи! Ща̄не юн ӯнлы, пӯрка ю̄нты, А̄ще щас кем туп холас, Во̄раяӈкве минас, Кӯтюве пе̄сталас, Тувыл ёса вотаяс А̄гирищ тыхо̄тал сыме во̄йт хуи, Тав а̄пщитэ̄н, тувыл яга̄гитэ̄н Тӯйткол ва̄руӈкв нё̄таве, Тӯйт кӣвырт повара̄лы, мовиньты. Мовиньт суе юв суйты. Ща̄ньке̄тэ юн ӯнлы, мовала̄лы Сыме ща̄рги, Суиӈ ма̄нь а̄ги о̄ньщи.

1071 2014.03.07. Людмила ТЕТКИНА

Андрей Тарханов яныг намыл майвес. Ма̄ньщи поэт Андрей Семенович Тарханов «Почётный гражданин Ханты-Мансийского автономного округа –Югры» намыл майвес. Андрей Семёнович ма̄ньполь э̄тпос 13 щислат 1936 та̄лт Аманья па̄вылт Кондинский районт самын патыс. Школа а̄стламе юипа̄лт Ханты-Мансийский педагогический училищат ханищтахтас. Тувыл Ленинград ӯст А. И. Герцен нампа институт а̄стластэ. Ос ты юипа̄лт Кондинский район Юмас па̄выл школан рӯпитаӈкве ке̄твес. Тот мощ рӯпитаме юипа̄лт Ханты-Мансийск ӯсн о̄луӈкве ва̄нтлас. Андрей Тарханов «Ленинская правда» нампа газетат корреспондентыг о̄лыс. Ты коныпал телевиденият ос Творчество колт рӯпитас. Андрей Семёнович «Союз писателей России» ос финноугорский писателит Ассоциация палт наме хансым о̄лы. 50 та̄л сыс тав «Первая завязь», «Зелёный дождь», «Морошковое лето» ос са̄в мо̄т нэ̄пакыт та̄ратас. Тав стихотворениянэ болгарский, венгерский, чешский, финский, киргизский ос са̄в мо̄т э̄лы хо̄н ла̄тӈытн толмащлаве̄сыт. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1071 2014.03.07. Тамара МЕРОВА

Сапра̄нит йильпи кӯщай пе̄риясыт. Округ общественный палатат рӯпитан ма̄хум акванатхатыгласыт. О̄влэ̄т та̄н «Социальный кодекс Югры» документыт тув хансым йильпи ва̄рмалит урыл потыртасыт. Ос тувыл округныл Российский Федерация общественный палатат рӯпитан ма̄гыс хо̄тпа пе̄риясыт. О̄выл ва̄рмаль урыл мирн нё̄тнэ Департаментыт рӯпитан кӯщай нэ̄ Мария Краско потыртас. Округувт 91 са̄всыр тэ̄латыт щирыл мирн нё̄тэ̄гыт. Ос ты хосыт 386 со̄тыра э̄лумхо̄лас олннё̄тмилыл мивет манос матыр мо̄т льгота о̄ньще̄гыт. Тувыл ка̄сыӈ та̄л тамле хо̄тпат са̄вме̄гыт. Ань 19 нё̄тмил ва̄рнэ тэ̄латыт мо̄т щирыл ке хансуӈкве, то̄нт 5 со̄тыра са̄вит хо̄тпаг мощщами. Тыг Югра ма̄вн ущтынув ёхтум ма̄хум ат та̄л тыт вос о̄лэ̄гыт, тувыл ущ та̄н нё̄туӈкве патавет. Ты тэ̄ла ёт то̄ват ат ка̄саще̄гыт. Мир пусмалтан Департаментыт ла̄всыт, то̄ва та̄рвитыӈ а̄гм о̄щнэ хо̄тпат та̄нки ёранылт пусмалтахтуӈкве ат ве̄рме̄гыт. Та̄нанылн сака тыныӈ тэ̄рпит акваг ёвтуӈкве э̄ри ос ты нё̄тмиланыл хотвиве ке, хумус та̄н э̄лаль о̄луӈкве патэ̄гыт. Мо̄т нё̄тмил урыл потыртан порат акванатхатам ма̄хум о̄с мощ воритотсыт. Любовь Чистова, округ общественный палата кӯщай, ла̄выс: «Ма̄хум вос торгамтэ̄гыт, округ бюджет олнанув а̄ти туп нё̄тмил ва̄рнэ ма̄гыс о̄лэ̄гыт. Ка̄сыӈ хо̄тпан ма̄н аквписыг нё̄туӈкве о̄с ат ве̄рме̄в. Тувыл то̄ва рӯпитан ос ёмас олн сэ̄лнэ хо̄тпат та̄нки ща̄нянылна̄щаныл нё̄туӈкве ат ка̄саще̄гыт. Тох о̄луӈкве о̄с ат ро̄ви». Ань ты «Социальный кодекс Югры» намаим са̄ккон ма̄ньполь э̄тпос оигпаме мус э̄лаль щё̄питаӈкве патаве. Тув мус матыр э̄рнэ хӯлтнэ ла̄тыӈ хансуӈкве э̄ри. Тувыл э̄лаль ты сапра̄нит округ па̄лыл РФ общественный палатат рӯпитаӈкве ка̄сащам хӯрум хо̄тпа наманыл ла̄вве̄сыт: тыи Галина Галимова Сургутныл, ос Ольга Сидорова, Виктор Заболоцкий Ханты-Мансийсканыл. Та̄н тувыл пуссын э̄лаль ва̄рнэ тэ̄ланыл о̄вылтыт потыртасыт. Са̄выӈпа̄лэ акванатхатам ма̄хум пуссын Виктор Заболоцкий пе̄риясыт. Юио̄выл тэ̄латыт та̄н «губернатор премиял» минэ ма̄гыс В. А. Каданцев ос «Ю. Н. Шесталов нампа премиял» минэ кастыл В. Е. Енов урыл потыртасыт. Валерий Каданцев литература ма̄гыс ос Владимир Енов ханты ща̄нь ла̄тӈе но̄хво̄рмалтан, пе̄с потрыт, накыт э̄лаль тотнэ ма̄гыс вос мӯйлуптаве̄г.

1071 2014.03.07. Валентина УЗЕЛЬ

Яныгпа̄ла хо̄тпат ёт потрамасӯв. Юио̄выл та̄лыт сыс ма̄ньщи ла̄тыӈ ва̄нэ ма̄хум акваг та мощщаме̄гыт. Ос ань газета ва̄рнэ колувт ма̄н нёлолов ма̄ньщи хо̄тпа рӯпитэ̄в. Пуссын ла̄тӈув ва̄глӯв, халувт туп ма̄ньщи ла̄тӈыл потыртэ̄в. Со̄ль, ща̄нь ла̄тӈыл потыртаӈкве татем ёмас. Ма̄н нэ̄мхотьютн ат торгамтаве̄в, маныр таӈхе̄в, та урыл та потыртэ̄в. Халувт хотьют пе̄с ла̄тыӈ номылматы, та̄ра ля̄галытэ. Тох ты халувт ханищтахтым, ла̄тыӈте̄в э̄лаль тотылӯв. Ань та хультум ре̄тыӈ ю̄свой э̄тпос 21 хо̄талэ̄т ма̄ янытыл Ща̄нь ла̄тӈыт янытлан яныг ялпыӈ хо̄тал о̄лыс. Ты кастыл ӯсувт о̄лнэ ма̄ньщи ос ханты ма̄хум А̄с-угорский институтт акванатыглаве̄сыт. Ты ва̄рмальт Светлана Динисламова кӯщаиг о̄лыс. Ма̄ньщи ма̄хманув са̄выӈпа̄лэ пуссын ма̄ньщи супыл масхатым о̄лсыт. А̄с ма̄хманув халт туп тит нэ̄г тэ̄нти супыл ёхталасы̄г. Ос ма̄к таи пӯмщиг о̄лыс, тув яныгпа̄ла ма̄ньщи хо̄тпат ёхталасыт – ты Мария Сергеевна Мерова, Николай Иванович Хозумов ос Егор Алексеевич Яркин. Николай Иванович Людмила а̄гитэ палт о̄лы. Егор Алексеевич о̄с а̄гитэ палт ёхтыс, тав а̄гитэ Раиса пӯльницат яныг ле̄ккарыг рӯпиты. Ща̄нь ла̄тӈув янытлан ма̄гсыл ма̄хум во̄вве̄сыт, та̄нти хансум потраныл, стихотворенияныл вос потыртыяныл. Ма̄ньщи ла̄тӈыл Светлана Селиверстовна ос ма̄ньлат ма̄ньщи а̄гиюв Татьяна Бахтиярова стиханэн о̄с ловиньтасы̄г. А̄с ма̄хманув ос маттем та потыртасыт. Ӯсувт ханты нэ̄кве о̄лы, наме Ульяна Шульгина. Ты сака ма̄щтыр нэ̄. На̄н «Северный дом» передача сунсылы̄н те, тот потыртан а̄гит ма̄ньщи ман ханты супыл масхатым о̄лэ̄гыт, ты Ульяна тав ю̄нтум супанэ. Ань ты о̄лум ялпыӈ хо̄талт Ульяна Николаевна ханты э̄ргыт э̄ргыс. Тав ма̄ньта̄гыл са̄лыӈколт яныгмас, ща̄не ёт о̄лыс. Сака са̄в э̄рыг ва̄г. Тав о̄с во̄выглавес э̄ргуӈкве. Ла̄тӈыт ат кос торгамтасанӯв, ос таве хӯнтлымав, э̄ргын турсуе щар сымын хо̄яс. Аквтуп ма̄ньщи хо̄тпа э̄рги. Тувыл ма̄хум пасан ва̄тан во̄вве̄сыт, та̄нти халанылт потыртаманыл сыс ща̄ил айтве̄сыт. Ань институтт рӯпитан ма̄хум пӯмащипа ла̄тӈыл ла̄виянӯв, матъёмас та̄н ма̄к ма̄ньщи, ханты ма̄хманув акванатыгласаныл, пуссын аквъёт ща̄нь ла̄тӈув янытласлӯв.

1071 2014.03.07. Людмила ТЕТКИНА

Са̄т хо̄тал кина суссылтавес. Ре̄тыӈ ю̄свой э̄тпос 28 хо̄талныл ма̄ньполь э̄тпос 6 хо̄талэ мус Ханты-Мансийск ӯст «Дух огня» нампа кина суссылтан мирхал фестиваль рӯпитас. Ты фестиваль тыт 12 щёс ва̄рыглавес. Ювле хультум та̄лт ма̄н округувт Ха̄льӯс районт хо̄нтым газ 60 та̄лэ то̄влыс, тыи ма̄гсыл фестивалит ма̄во̄й но̄хвинэ ма̄хум урыл кинат суссылтаве̄сыт. Са̄т хо̄тал сыс Ханты-Мансийск, Сургут, Нижневартовск, Излучинск, Советский, Югорск ос Нефтеюганск ӯсытт о̄лнэ мир кина сунсуӈкв ялантасыт. Фестивалин тотыглым кинат билетаныл 40 солко̄ви тынэ туп о̄лыс. Тув ма̄хум ще̄мьяӈ та̄гыл ялантасыт. Ты порат яныгса̄т арыгкем кина суссылтавес. Ка̄сыӈ та̄л тыг Россия янытыл мирн ва̄нэ артистыт ос режиссёрыт во̄виньта̄лавет. Ты та̄л тыг Елена Яковлева, Алёна Хмельницкая, Эммануил Виторган, Станислав Говорухин ос мирн ва̄нэ мо̄т са̄в хо̄тпат тыг ёхталасыт. Кина ва̄рнэ хо̄тпат та̄нки рӯпатаныл тыг суссылтаӈкве тотыгласаныл. Жюрихо̄тпат ма̄к ёмас, пӯмащ кина пе̄риясыт. Щар ёмас кина «Золотая тайга» нампа мӯйлупсал ос 300 со̄тыра солко̄вил майвес. Китыт места вим хо̄тпа ос «Серебренная тайга» нампа мӯйлупса ос 200 со̄тыра солко̄вил вис. Ос хӯрмит места ма̄гсыл «Бронзовая тайга» 100 со̄тыра солко̄ви майвес. Кинат ёмащакв ёнгын нэ̄гхумыг о̄с пе̄риявесы̄г. Но̄хпатум хо̄тпаг ос янытлавесы̄г, мӯйлупсал ос олныл майвесы̄г. Ань ты фестивальт манхурип кина но̄хпатыс, ма̄н мо̄тыт газетат тах хансэ̄в.

1071 2014.03.07. unknown

55та̄лэ̄тыл янытлылӯв! Ре̄тыӈ ю̄свой э̄тпос нёлоловхуйплов хо̄талэ̄т Раиса Германовна Решетникова самын патум хо̄талэ о̄лыс. Тав ань 55 та̄лэ то̄влыс. Ты кастыл ос нэ̄ хо̄тпат ялпыӈ хо̄талув кастыл ма̄н газета кӯщаюв янытлылӯв. Ще̄мьяӈ та̄гыл та̄н пуста̄гыл вос о̄лэ̄гыт, са̄в щунь ос са̄в со̄т вос о̄ньще̄гыт. Пус ка̄т, пус ла̄гыл! То̄рум ёт, О̄тыр ёт! Редакцият рӯпитан ма̄хум.

1071 2014.03.07. Тамара МЕРОВА

Финн учёный тэ̄ланэ э̄лаль тотавет. «Торум Маа» музейт рӯпитан А̄с ма̄ньщи нэ̄ Светлана Астапович та̄л котиль э̄тпост Финляндиян ялыс. Тот Хельсинки ӯст юио̄выл хо̄таланэ̄т «М. А. Кастрен и Сибирь» нампа ханищтап ва̄рыглавес. Матиас Кастрен ты финн ма̄хум та̄н учёныяныл, мо̄лты та̄лт тав 200 та̄лэ то̄влыс. Тав о̄лме̄т Россия лӯима̄ янытэ̄т яласастэ ос то̄нт о̄лум соссаӈ ма̄хум ла̄тӈаныл, культураныл урыл пӯмщалахтас. Юв ёхтуме̄т научный нэ̄пакыт хансыс. Тамле ва̄рмалит ань тыг мус мо̄т учёныитн э̄лаль ханищтавет ос ма̄хумн потыртавет. Ты ва̄рыглам семинарт Кастрен ханищтам ос та̄рапаттум пе̄с накыт ос ань ты пора лӯима̄т о̄лнэ о̄лупса аквана̄рталаве̄сыт. Тув ёхталам ма̄хум Хельсинский университетт рӯпитан хум Норман Лангерак потре хӯнтлысыт. Тав Матиас Кастрен ва̄рум тэ̄ланэ э̄сгиянэ, тав о̄вылтам рӯпататэ сака ёмащакв ва̄рманэ, ос ань учёныит таве̄ныл ханищтахтаманыл, аквтох э̄лаль рӯпитэ̄гыт. Энико Сий, Венгрияныл ёхталам э̄ква, Регули венгр учёный хо̄тпа о̄с ка̄стыстэ. Тэ̄н сас финноугорский ла̄тӈыт ос культурат ханищтым сака са̄в э̄рнэ тэ̄лат та̄рапаттысы̄г. Тувыл Олег Сергеев, марий хум, такви ща̄нь ла̄тӈе о̄вылтыт потыртас. Светлана Астапович «Музей моей жизни»: сохранение и трансляция традиционной культуры обских угров в Этнографическом музее под открытым небом «Торум Маа» о̄вылтыт потре ловиньтас. Та юипа̄лт мӯй ма̄хум пӯмыщ суссылтап сунсуӈкве во̄вве̄сыт. Ильдико Лехтинен, Финляндият яныг музейт рӯпитан кӯщай э̄ква, Матиас Кастрен яласам лё̄ӈхе ос лӯима̄ныл тотум пе̄с пормасыт, хурит суссылтас. Тувыл хуньт Матиас хансыглам пе̄с э̄рыг тот э̄ргувес. Йормо Етто ос Еса Тиккула, пианинал ёнгын нэ̄, э̄рыг йильпииг щё̄питастэ̄н. Йоуко Прами нё̄тнэ турсуил ты э̄рыг э̄ргыстэ. Мо̄т пӯмыщ ханищтап Улла Костиайнен ва̄рыглас. Тав мӯй ма̄хум а̄канит ва̄руӈкве ханищтас. Светлана Астапович тамле семинар ва̄рум ма̄хумн яныг пӯмащипа ла̄тыӈ ла̄ви. Тав тот о̄лме сыс Ильдико Лехтинен, Тармо Хаккарайнен ос Марья Лаппалайнен хо̄тпатын сака ёмащакв нё̄тве̄с. Та̄н потрыт рущ ла̄тӈын толмащласыт. Финляндият то̄ва музеит сунсыглым Светлана А̄с-угорский ма̄хмыт урыл матыра̄ти са̄внув ва̄ӈкве патыс. Тув ялме па̄сыл тав наука ма̄гыс са̄всыр тэ̄лат э̄лаль ханищтаӈкве ос нэ̄пакн хансуӈкве тахмаяс. Ма̄н таве̄н о̄с са̄в номтыӈ научный тэ̄лат э̄лаль ва̄руӈкве ла̄вилӯв.

1072 2014.03.21. Валентина УЗЕЛЬ

Яныг кӯщаюв хо̄нтаӈ ма̄ньщит палт ялыс. Та хультум са̄тыт округ кӯщаюв Наталья Комарова Кондинский район нупыл ялыс. Акв хо̄тал сыс тав нила па̄влытт о̄лнэ ма̄хум ёт хо̄нтхатыглас. Ань тав ялум лё̄ӈхе урыл ты потыр ловиньтэлы̄н. Карым па̄выл Пе̄с порат Карым па̄выл Шугур па̄выл ляпат о̄лыс. Ты Вахрушевыт та̄н о̄лум па̄вланыл. Тувыл та па̄вылныл ма̄хум мо̄т ма̄н ва̄нтлуптаве̄сыт. Са̄в та̄л минас, ос тот о̄лум Вахрушев ягпыгыт ань та па̄выл йильпииг ӯнттысаныл ос община тот ва̄рсыт, «Карым» намыл пинсаныл. Ань хусахтем та̄л та̄н тот о̄лэ̄гыт, хӯл алыщлэ̄гыт, пил, ла̄хыс атэ̄гыт. Пуссын аквъёт лов хо̄тпа тот рӯпитэ̄гыт. Та община кӯщаиг Евгений Александрович Вахрушев о̄лы. Та̄н палтаныл ты о̄влэ̄т округ кӯщаюв ялыс. Наталья Комарова па̄выл янытэ̄т сунсыстэ, ма̄хум ёт потыртас. Тувыл тав Евгений Вахрушев колн щалтуӈкв во̄ввес, тот ща̄й аиманыл сыс тав потыртавес, хумус ты община рӯпиты, маныр ва̄рмаль та̄н о̄ньще̄гыт. Ты община ма̄хум хӯл алыщлан аквхуйплов рыбучасток о̄ньще̄гыт. Я̄ хосыт яласан ха̄пыт ман ма̄нь катерыт, хӯл са̄всыр тэ̄нутыг ва̄рнэ оборудование о̄с ёвтсыт. Мо̄лты та̄л сыс та̄н титахтем тонна са̄всыр щирыл щё̄питым тэ̄нут тыналасыт. Пил, ла̄хыс, хӯл, во̄руй нё̄выль та̄н са̄всыр тэ̄нутыг ва̄руӈкв ха̄сэ̄гыт. Округ кӯщаювн та̄н ла̄всыт, родовой общинат рӯпитан хо̄тпат кол ӯнттын олныл о̄с вос мивет. Ты ва̄рмаль са̄кконанувт я̄насыг хансуӈкв э̄ри, то̄нт та̄н пуссын ма̄нь па̄влытт о̄лмыгтанувыт. Н. Комарова ювле ла̄выс, тав ты урыл тах номсахты. Э̄лаль тав общинат рӯпитан ма̄хум э̄сгысанэ, та̄н ёмащакв рӯпитанэ̄ныл ма̄гсыл янытласанэ. Мортка па̄выл Кӯщаюв та па̄влын ёхтынэ̄тэ кастыл Кондинский район Мортка па̄вылт каснэ ма̄гыс яныг кол ӯнттын ма̄ныл а̄стлавес. Тув ёхтуме порат тав та колн минас, тот ня̄врамыт то̄ват бассейныт пувлысыт, мо̄таныт мечикыл ёнгим ха̄йтыгтасыт. Губернаторув ёхтуме порат ня̄врамыт пувлуӈкве Оксана Веревкан ханищтаве̄сыт, тав олимпийский чемпионкаг о̄лы. Кӯщай нэ̄ тот о̄лум ня̄врамыт ос ма̄хум ёт потыртас. Та район янытыл лё̄ӈхыт пиным о̄лэ̄гыт, машинал ман автобусыл па̄влыт халт яласаӈкв ро̄ви. Ань губернаторув кӯщаитн ла̄выс, мо̄т па̄выл ня̄врамыт ты йильпи каснэ колн вос ёхталэ̄гыт, касуӈкв о̄с вос ханищтахтэ̄гыт, автобусыт акваг тыглетувле вос яласанувыт. Тувыл Н. Комарова тот ня̄врамыт ханищтан ма̄хум, ща̄нита̄щит комитетанылт рӯпитан хо̄тпат акванатыгласанэ, та̄н ётаныл потыртас, ва̄рмаляныл урыл титыгласанэ. Тав ла̄выс, тамле яныг колкапай ӯнттувес, са̄внув ня̄врам тув вос яланты, пуссын касуӈкв вос ханищтавет. Сотник па̄выл Та па̄вылт округ кӯщаюв Малышевы са̄в ня̄врамыӈ колта̄гыл палт ялыс. Тот тав ла̄ввес, ты па̄выл мус ёмас лё̄ӈх а̄тим. Та̄лэтуве сыс лё̄ӈх хотсакватаве, палытэ̄т та яныг во̄ӈхакапаит. Кӯщаюв ты ва̄рмаль урыл ва̄ме, тав та па̄вылн машинал тотвес. Э̄лаль тав ла̄выс, ты лё̄ӈх йильпииг вос ва̄раве, 600 миллион солко̄ви э̄ри. Ань 13 млн. солко̄вил та̄стуве̄сыт. Лё̄ӈх пиннэ рӯпата моще̄рт тах ты о̄вылтаве. Ты па̄выл ма̄хум иӈ акв яныг ва̄рмаль о̄ньще̄гыт – ка̄сыӈ туи порат па̄вланыл на̄йн а̄латы ё̄саве. Па̄выл во̄рыӈ ма̄т о̄лы. Во̄р но̄хпе̄ламлы те, та̄н э̄тэхо̄тал коланыл уральтыяныл. Вит о̄щнэ яныг во̄ӈхат хилункв э̄ри. Ты урыл потыртаманыл порат Кондинский район кӯщай хум Михаил Шишкин о̄лыс, тав ла̄выс, ты рӯпата та̄н ва̄рияныл, олн о̄лы. Ма̄хум ул вос пилэ̄гыт. Междуреченский па̄выл Ты та̄н районный па̄вланыл. Тот ты яныг сапра̄ни ва̄рыглавес. Ляпат о̄лнэ па̄влытныл ма̄хум тув ёхталасыт. О̄влэ̄т Наталья Комарова спортсмен ма̄хум янытласанэ, са̄в ёмас ла̄тӈыл ла̄всанэ. Кондинский районныл са̄в намыӈсуиӈ спортсменхо̄тпа о̄лы. Ты кастыл кӯщаюв та̄н тренераныл пуссын янытласанэ. Янытлам ма̄хум халт Сочи ӯст о̄лум олимпиадат но̄хпатум ёсал ха̄йтнэ пыг Сергей Устюгов ос тав тренере Иван Брагин о̄лсы̄г, тэ̄н сас яныг намыл майвесы̄г. 2013 та̄л сыс та̄н спортсменаныл каснэ ма̄т 192 щёс но̄хпатыгласыт. Тувыл та̄н мо̄т са̄всыр ва̄рмаль урыл потыртасыт. Губернатор прессслужбаныл те̄тым ля̄ххал ма̄ньщи ла̄тӈыл Валентина Хозумова хансыстэ.

1072 2014.03.21. Людмила ТЕТКИНА

Тав ё̄рва̄гыл йильпи колыл майвес. Савалап ня̄врамыт 18 та̄л то̄влынэ̄ныл юипа̄лт са̄ккон щирыл о̄лнэ колыл мивет. Ха̄льӯст о̄лнэ Ксения Гындышева савалапыг яныгмас, 18 та̄лэ то̄влуме порат номсыс, о̄лнэ колыл о̄с миве. То̄нт Ха̄льӯс мирколт ла̄ввес, таве янмалтам рӯтанэ о̄лнэ колыл майве̄сыт, тыи ма̄гсыл тав колыл воссыг ат миве. Ты юипа̄лт а̄ги Ханты-Мансийск ӯсн ханищтахтуӈкве минас. Ты ӯст мир ӯргалан Департаментын ялыс, такви та̄рвитыӈ ва̄рмалянэ урыл потыртас. Тот ла̄ввес, Ха̄льӯс районный миркол ёт вос сутытахты, туп тох колыл миӈкве ве̄рмаве. Сут щирыл колыл майвес. 2012 та̄л яӈк на̄тнэ э̄тпост Ха̄льӯст йильпи колн тав ва̄нтлас. Ксения кит пыг янмалты. О̄влэ̄т ма̄ньлат нэ̄ такем ща̄гтыс, номсыс, такви колт ёмащакв о̄лмыгты. Та̄н туп хӯрум э̄тпос ёмащакв о̄лсыт, тувыл таквсы пора ёхтыс, кон ра̄квуӈкве патыс, ащирмаӈыг е̄мтыс. То̄нт ты тав торгамтастэ, о̄лнэ колэ мӯсхалыг ат ва̄рима. Ра̄квыӈ хо̄талыт юипа̄лт кол са̄манэ хо̄тсайсыт ос ха̄ссытаве̄сыт. Тамле колт о̄лыманыл ня̄врамаге акваг а̄гмыл хартсы̄г. Ксения о̄влэ̄т мирколн ялантас, ты урыл акваг потыртас, тувыл тав кол ӯнттын ма̄хум палт ке̄твес. Кол ӯнттын ма̄хум тав колэ̄н ёхталасыт, хо̄тсаюм кол норанэ о̄льпыл са̄ртсаныл ос сысы та минасыт. Аквкит э̄тпос ювле хультыс, кол норанэ ос та ха̄ссытаве̄сыт. Ксения ты урыл ла̄выс: «О̄лнэ колумт о̄влэ̄т слесарный мастерская о̄лыс, тувыл та кол лаппантвес. Са̄в та̄л кола̄л ат о̄ньщас, тувыл акв о̄йка ты пе̄с кол ёвтыстэ ос нила квартира тот ва̄рыс. Районный администрациян тыналастэ. Ты колт ма̄н нила ще̄мья квартирал майвесӯв. О̄влэ̄т жилищный инспекцият рӯпитан ма̄хум палт та̄рвитыӈ ва̄рмалянув урыл потыртаӈкв ялсум, та̄н ам палтум ёхталасыт, колум ёмащакв суссаныл. Ос а̄нум пищма ке̄тсыт, тот хансым о̄лыс, колув вентиляциял ат ва̄рвес, таи ма̄гсыл тох хо̄тха̄ссытаве. Ам ты пищма ёт ос та кол ӯнттум ма̄хум палт минасум. Та̄н ам палтум ёхтысыт, ваннат яныг ас ва̄рсыт ос тув яныг тӯрпа нарыгтасыт, ла̄ве̄гыт, тамле вентиляция колумт рӯпитаӈкве паты. Ты юипа̄лт са̄всыр кӯщаит палт амки ва̄рмалюм урыл са̄в пищма хансыгласум». Ма̄н, редакцият рӯпитан ма̄хум, таве̄н нё̄туӈкве тахсӯв. Акв порат губернатор Наталья Комарова ёт прессконференция о̄лум порат Ксения о̄лнэ колэ урыл потыртасӯв. То̄нт яныг кӯщай нэ̄ таве̄н нё̄туӈкве ла̄выс. Ты ва̄рмаль юипа̄лт са̄в э̄тпос ювле хультыс, ам Ксения ёт ва̄щинтахтасум, о̄лупсатэ урыл китыгласлум. Тав ла̄выс: «Ам о̄влэ̄т номсысум, губернаторув тох ке ла̄выс, ань тах молях нё̄тавем. Ты юипа̄лт Любовь Коротун, районный миркол кӯщай нэ̄, такви палтэ а̄нум во̄выстэ. Ла̄выс, манрыг ам тох лю̄льсаӈ ва̄ре̄гум, хо̄та̄ти пищма хансэ̄гум. О̄лнэ колыл майве̄сум, нас амки э̄лаль ёмащакв о̄луӈкве ат ве̄рме̄гум. Ам о̄с таве̄н амки нэ̄паканум пуссын суссылтасанум, то̄нт тав ва̄ныӈ хо̄тпанэ̄н ла̄выс, о̄лнэ колум мӯсхалыг вос щё̄питаве. Ха̄льӯс миркол рӯпитан хо̄тпат ла̄внэ̄ныл щирыл, колувт колкан ёлыпа̄лт матхурип тӯрпат пинуӈкве э̄ри, то̄нт саюӈкве ос лю̄ль а̄тыл пасуӈкве ат паты. Ос тамле рӯпата ва̄руӈкве, колканэ хотло̄сталаӈкве э̄ри. То̄нт ма̄н нила ще̄мья пуссын ла̄ввесӯв, ма̄нки пормасанув, маснутанув та̄гыл мо̄т ма̄н ва̄нтлуӈкве вос щё̄питахтэ̄в. Ам ня̄врамагум амккем янмалтыягум, пасананум, уласанум ос мо̄т порамасанум тыглетувле хотьютын харттата̄луӈкве патавет. Кӯщаит палт ты урыл китыглахтасум, ювле ла̄вве̄сум, ёмас колт о̄луӈкве ке ка̄саще̄гум, пормасанув ёт амки вос а̄лмтахтэ̄гум». Та кол о̄лнэ ще̄мьят ремонтыл ань ты хо̄тал мус аты ва̄рве̄сыт, э̄лаль тох та о̄лэ̄гыт. Ксения ремонт ӯрим, районный миркол ёт сутытахтуӈкве патыс. Та̄л котиль э̄тпост сут о̄лыс, тав мо̄т колыл миӈкве ла̄ввес. Ре̄тыӈ ю̄свой э̄тпос тав йильпи колн ва̄нтлас. Тав ла̄выс: «Та пе̄с колт о̄с савалапыг яныгмам акв ма̄ньщи пыг о̄лнэ колыл майвес. Тав ос кӯщаит палт акваг пищма хансыглас ос районный миркол ёт сутытахтас. Тав сут о̄лум порат ла̄ввес, колэ ёмас, э̄лаль вос тот о̄лы. Ань тав окружной сутн такви нэ̄паканэ ке̄тсанэ, ӯрхаты, маныр тот ла̄ваве».

1072 2014.03.21. Тамара МЕРОВА

Кӯщаит та̄л сыс ва̄рум рӯпатаныл уральтавет. Округ губернатор Наталья Комарова ма̄ньполь э̄тпос о̄выл щислатэ мус Департаментыт пуссын та̄нки рӯпатаныл о̄вылтыт мир э̄лыпа̄лт потыртаӈкве ла̄всанэ. Ань ма̄хум матыр пӯмщалан ва̄рмаль о̄ньще̄гыт ке, та̄нанылн ла̄тыӈ вос хансэ̄гыт. Та̄н ювле потыртан ла̄тӈыл тах ке̄тавет. Тувыл ты э̄тпос ва̄т нупыл нёлолов щислат пуссын матыр хӯлтыглан манос йильпииг та̄рапаттым тэ̄лат урыл Наталья Владимировна э̄лаль потырты тах. Ля̄ххал тотнэ хо̄тпатн ань ты то̄ва тэ̄лат урыл Илья Верховский, внутренних ос внешних связей Департаментыт кӯщай хум, ла̄тыӈ хӯлтыс. Ка̄сыӈ департамент такви ка̄сащан щире̄тыл ла̄тыӈ тоты. То̄ват са̄в ма̄хум акванатхатам колт рӯпатаныл урыл потыртасыт, ос тот ва̄рнэ тэ̄ланыл ма̄гыс китыглаве̄сыт. Та щирыл Госзаказ, ЖКХ ос энергетика, Илья Аркадьевич кӯщай хум департамент рӯпататэ ос онтолов мо̄т кӯщаит та̄нки отчётаныл ловиньтасаныл. Мо̄т онтолов колыт ётылнув аквтох ма̄хум атэ̄гыт, акваннё̄тхатым э̄лаль рӯпитаӈкве потыртахтэ̄гыт. Мо̄таныт ищхӣпыӈ ут хосыт потраныл хассаныл. Ма̄хумн тот ловиньтавет ос тувыл та̄нки китыглан манос матыр хӯлтыглан ла̄тыӈ хансуӈкве ве̄рме̄гыт. Тамле тэ̄лат мирн нё̄тмил ва̄рнэ департамент, ханищтап ос ма̄ньлат ма̄хум ёт рӯпитан ос мо̄т ат кӯщаит ва̄рсыт. Ма̄вит ӯргалан департамент видеоконференция хосыт ма̄хум ёт рӯпитасыт. Тамле потыртан рӯпата рущ щирыл «очнозаочный» ва̄рмалиг ла̄ввес. На̄н ты ва̄рмалитыл матыр пӯмщалаӈкве патэгы̄н ке манос хотты департаментыт рӯпатаныл уральтаӈкве тахмаегы̄н ке, то̄нт ищхӣпыӈ ут хосыт департамент наме тув хансэлы̄н ос тувыл тот э̄лаль кисхатэ̄н. Округ янытыл са̄в ва̄рмалит та̄рапаттын ма̄гыс мо̄лал ищхӣпыӈ ут палт «Югражданин» нампа ос «Югра многоликая» ло̄псыг ва̄рвесы̄г. На̄н ты утыг о̄с тот сунсуӈкве, ловиньтаӈкве ве̄рмегы̄н.

1072 2014.03.21. Тамара МЕРОВА

Хӯлтыглан ла̄тӈыт. Мощ мо̄ланув губернатор ва̄ӈын кӯщае Геннадий Бухтин соссаӈ яныгпа̄ла хо̄тпат ёт акванхо̄нтхатыглас. Тав йильпи хӯлтыглан ла̄тӈыт о̄вылтыт потыртас. Наталья Комарова, округ губернатор, «О гарантиях прав коренных малочисленных народов Российской Федерации» Федеральный са̄ккон щирыл акв йильпи хӯлтыглан ла̄тыӈ ва̄рыс: округ Правительство ёт рӯпитан ма̄гыс соссаӈ ма̄хмыт Советн атуӈкв э̄ре̄гыт. Тувыл ка̄сыӈ район манос ӯс та̄нки Уставаныл акв яныг Положение нэ̄пакын э̄рнэ щирыл хансуӈкве э̄ре̄гыт. Геннадий Фёдорович ань кӯщаитн щё̄питам Положение нэ̄пак соссаӈ яныгпа̄ла хо̄тпатын мӯсхалыг сунсуӈкве ла̄всанэ. Тот «задачи, функции, права Совета» ва̄рмалит ёмащакв хансым о̄лэ̄гыт. Тувыл ты Советн ма̄хум хо̄т ос хумус пе̄риявет, хоты ма̄ныл манах хо̄тпа пе̄рияве, пуссын хансым о̄лы. Ма̄н «Совет старейшин» комиссияв ань матыр ла̄тыӈ тув хансумтаӈкве о̄с ве̄рме̄гыт. Ты соссаӈ ма̄хум йильпи Советн округ янытыл 21 хо̄тпа пе̄рияве тах. Та̄н округ Правительство кӯщаитн сапра̄нин акванатыглаӈкве патавет ос матыр та̄рвит тэ̄лат ёт акваннё̄тхатым э̄лаль рӯпитэ̄гыт тах. Ха̄льӯс район па̄лыл Саранпа̄выл, Кульпас, Ло̄пмус, Сӯкыръя, Кимкъясуй ос Сортыӈъя̄ па̄вылныл Совет ма̄гыс кит хо̄тпа пе̄рияӈкве э̄ри. Тувыл акв э̄лмхо̄лас Ня̄хщамво̄ль, Усть-Манья ос Нёрохи па̄влытныл ос кит хо̄тпа Ха̄льӯс, Тэ̄к, Устрём, Пугоры, Ванзеват, А̄нъя ос Шайтанка па̄влытныл вос пе̄риявет. Я̄грим ты нэ̄пакт ат хасвес, аман ёрувлавес, тав о̄с ул тув тах ловиньтаве? Белоярский районныл кит хо̄тпа ос Советский, Октябрьский районыгныл акв хо̄тпа та Советн хасве̄сыт. Тувыл Хо̄нтаӈ районныл хӯрум хо̄тпа пе̄рияве: Кондинский, Болчары, Алтай, Кама ос Шугур па̄влытныл акв э̄лмхо̄лас ос Междуреченский, Половинка, Мулымъя, Мортка, Юмас, Ямки ос Леуши па̄влытныл кит хо̄тпаг. Ос мо̄т ӯсытныл манос па̄влытныл акв хо̄тпал пе̄рияӈкве патаве. Соссаӈ ма̄хум та̄нки о̄лнэ ма̄нанылт сапра̄нин акван вос атыглавет ос та̄нки э̄рнэ э̄лмхо̄лас вос хо̄нтэ̄гыт. Ӯринэ̄ква ялпыӈ хо̄тал урыл Геннадий Бухтин о̄с потыртас. Ханты-Мансийскат тав яныгполь э̄тпос 12 щислат янытлаӈкве патаве. Ма̄хум «Югорская Долина» ма̄н мӯйлуӈкве во̄вавет. Тув ялнэ ма̄гыс ӯс ма̄хум я̄нас автобусыл тотавет тах. Юио̄вылт кӯщай э̄кват ос хум хо̄тпат ялпыӈ хо̄таланыл кастыл мӯйлупсал мисанэ.

1072 2014.03.21. Тамара МЕРОВА

Ка̄ркам соссаӈ а̄гитпыгыт. Ты э̄тпост МООУН (тыи ханты ос ма̄ньщи ма̄ньлат хо̄тпат организацияныл) Ханты-Мансийскат о̄лнэ соссаӈ а̄гитпыгыт акванатыгла̄лсанэ. Та̄н та̄нанылн ва̄рум рӯпатаныл о̄вылтыт потыртасыт. Надежда Молданова, та тэ̄латыт кӯщай нэ̄, о̄выл ла̄тыӈ ла̄выс. Та̄н Югорский университетт, Ханты-Мансийский колледжит, Центр искусстват ханищтахтын а̄гитпыгыт, тувыл Обскоугорский нампа институтт, телевиденият, газетат ос мо̄т са̄всыр ма̄тт рӯпитан хо̄тпат ёт акваннё̄тхатым матыр ёмас тэ̄лат ва̄ре̄гыт. Ты организациян 60% са̄вит ты ма̄ньлат а̄гит, ос 40% ма̄ньлат пыгыт, тув хасхатым о̄лэ̄гыт. Ань сапра̄нин са̄выӈпа̄лэ пыгыт акванатхатыгласыт. Ос ӯст о̄лнэ ма̄хум коныпал тыг Нижневартовск ос Югорск ӯсныл мӯй хо̄тпат ёхталасыт. Ма̄ньлат ма̄хум ёт рӯпитан организация соссаӈ а̄гит ос пыгыт та̄нки халанылт юртыӈыщ ос ка̄ркамыг о̄луӈкве пуссын ла̄виянэ. Матыр та̄рвит о̄ньще̄гыт ке, акваннё̄тхатым, акванпотыртахтым по̄хан вос ла̄квтыяныл. Та̄н ма̄нь па̄влытыт о̄лнэ ма̄хум палт ос акв тамле ла̄тыӈ ке̄тэ̄гыт. 2009 та̄лт ты организация матахмат па̄влытытн ня̄врамыт ёт ва̄йхатуӈкве ялсыт. Ка̄сыӈ ма̄т та̄н са̄всыр касылыт ва̄рыгла̄лсыт. Матыр тэ̄лат ва̄рнэ ма̄гыс МООУН са̄в проектыт щё̄питэ̄гыт, та̄наныл олныл та̄стын ма̄гыс воритотэ̄гыт. Олныл мивет ке, та̄н тэ̄ланыл щирыл холтыяныл. Тох Ханты-Мансийскат "Радуга" нампа савалап колт о̄лнэ ня̄врамыт Ка̄сум па̄вылн тотыгласаныл. Ӯст о̄лнэ соссаӈ ма̄хум ханты ос ма̄ньщи ла̄тӈыг ханищтасыт. Ма̄хум ща̄нь ла̄тӈыл потыртан щё̄ст мо̄йтыт, потрыт ловиньтасыт, та̄наныл толмащласаныл, э̄ргыт э̄ргысыт. Та таквсы па̄сыл нэ̄ хо̄тпа супыт ю̄нтнэ ханищтапыл ва̄рве̄сыт. Ханты суп ю̄нтуӈкве Галина Сергеевна Молданован ханищтавет. Ма̄ньщи суп ю̄нтуӈкве Мария Сергеевна Мерован ханищтавет. Хумус суп йинаве ос хорамыл ю̄нтаве, пуссын ты тэ̄лат кинан по̄славет. Ма̄хум сак хартнэ ва̄рмаль о̄с пӯмщалаӈкве патсыт, та̄н тамле ханищтап э̄лаль щё̄питэ̄гыт тах. Туи "Нумсаӈ ёх" ос "Ма̄нь ӯскве" этнолагериг рӯпитан порат тот о̄с матыр нё̄тэ̄гыт. Ка̄сыӈ туи Пойковский ӯсн ма̄ньха̄пыл касуӈкве ялантэ̄гыт. Ӯринэ̄ква ялпыӈ хо̄тал янытлан порат сыресыр ёнгилыт, кас ва̄ре̄гыт. Ва̄ӈын кӯщаит рӯпатаныл Э̄лмхо̄лас та̄ксарыг е̄мтнэ тэ̄лат палт Руслан Богордаев пуӈктоты. Тав такви рӯпататэ урыл я̄нас потыртас, ос та̄л сыс каснэ порат но̄хпатум пыгыт э̄сгын нэ̄пакыл мӯйлуптасанэ. Соссаӈ ма̄хманув палт акв пе̄с касыл «нюлтахли» пыгыт акваг э̄лаль ва̄руӈкве таӈхияныл. Мо̄т пыгрищит пе̄рщуӈкве ханищтан ма̄гыс та̄н ёмас колнак кинсэ̄гыт. Культура щирыл тэ̄лат ма̄гыс Виктор Банк пуӈктоты. Округ янытыл соссаӈ ма̄хум йӣкваныл ос э̄рганыл э̄лаль тотым 36 коллективыт рӯпитэ̄гыт. Тыгыл 12 коллективыт мирн ёмас ва̄вет, суиӈ намыл майве̄сыт. Та̄н са̄всыр фестивалин акваг во̄виньта̄лавет. Юио̄выл та̄лытыт Ханты-Мансийскат "Этнодискотека" ва̄рыглаве. Ма̄хумн тыи сака мӯсты. Алла Иштимирова-Посохова финноугор рӯт мирыт ёт аквъёт ва̄рум тэ̄лат урыл потыртас. Мо̄лты та̄лт та̄н "Культурная столица финноугорского мира" проект щирыл о̄с ла̄тыӈ хансыгласыт. Та̄н Ка̄сум, Кышик ос Русскинские па̄влыт тув пе̄риясыт. Тувыл пуссын ма̄нь па̄влыт халт удмурт ма̄хум та̄н Быгы па̄вланыл но̄хпатыс. Ань тот ты та̄л ма̄нь таквс э̄тпос нёлоловхуйплов щислат ялпыӈ хо̄тал ва̄ре̄гыт тах ос рӯт ма̄хум мӯйлуӈкве во̄вавет. 2015 та̄л сыс ос хотты финнугорский па̄выл но̄хпаты, тот ла̄ваве. Таима̄гыс Алла ань йильпи проектыт Саранпа̄выл ос Полноват па̄выл хӯлтыяге. Акваннё̄тхатым о̄лэ̄гыт Округ янытыл ма̄ньлат ма̄хум Парламентыт кӯщай хум Константин Репин о̄с сапра̄ниян ёхталас. Та̄н ань акв пӯмыщ "В единстве сила" нампа экспедиция щё̄питасыт. Ты э̄тпост ма̄ньлат хо̄тпат Нягань ӯст акванатхатэ̄гыт ос Саранпа̄выл нупыл тэ̄лы лё̄ӈх хосыт минэ̄гыт. Неро̄йка ос Народа нё̄р мус ялуӈкве кусэ̄гыт. Миннэ̄ныл мус та̄н па̄вланувн соссаӈ ма̄хум ёт ва̄йхатуӈкве хо̄иглэ̄гыт. Таима̄гыс ща̄нь ла̄тыӈ ва̄нэ хо̄тпат ма̄ньлат а̄гитпыгыт халт о̄лэ̄гыт ке, ос та̄н ётаныл экспедициян ялуӈкве во̄вавет. Константин акваннё̄тхатым рӯпитаӈкве ма̄хманув ла̄всанэ. Ос "Югра бесконечный драйв" видеоролик суссылтас. Тувыл Надежда Молданова ос Константин Репин аквъёт рӯпитан ос мо̄т тэ̄лат акваннё̄тхатым ва̄руӈкве договорнэ̄пакыгт хасхатсы̄г. Та юипа̄лт сапра̄нин атхатам ма̄хум пасан ва̄тан ща̄й аюӈкве во̄вве̄сыт.

1072 2014.03.21. Николай МЕРОВ

Ва̄т нупыл ат та̄л лусытам хум. Мо̄лал Дмитрий Васильевич Лельхов, ма̄ньщи хум ёт хо̄нтхатыгласум. Тав Ханты-Мансийск ӯст о̄лы. Округт сутытым ма̄хумн нё̄тнэ комиссият кӯщаиг рӯпиты. Ам таве о̄лупсатэ ос рӯпататэ урыл китыгласлум. На̄н тав уре̄тыл э̄лаль ловиньтэ̄н. Дмитрий Васильевич Ха̄льӯс район Новинские па̄вылт 1950 та̄лт самын патыс. Та па̄выл ма̄нь А̄с я̄ ва̄тат ӯнлыс. Ма̄ниг о̄лме̄т, тав номитэ, па̄влыӈ ма̄хум мо̄т карс сыппуӈкыӈ ма̄н ва̄нтлысыт. Са̄ртын тот са̄в во̄р яныгмас. Хум хо̄тпат тот кол ӯнттын ма̄гыс йӣв са̄грысыт, нор яктысыт. Пе̄с па̄выл торыг ка̄сыӈ та̄лныл сыппуӈк яныг вит порат ёлнильвес. Ётыл я̄ сака э̄лын патыс, таквсы порат тув мус миннэ лё̄ӈхе сака вущлахыӈыг е̄мтыс. Таима̄гыс па̄выл мо̄т ма̄н тотвес. Дмитрий Васильевич а̄ще Василий Андреевич Ярлин акваг во̄раим ос хӯл алыщлым яласас. Тав Новинские па̄вылт ма̄ньщи ще̄мьят яныгмас. Василий ща̄не сака та̄ксар нэ̄ о̄лыс, колхозт кӯщаиг рӯпитас. Оматэ Елена Алексеевна Лельхова, ханты нэ̄, Пашторы па̄вылныл о̄лыс. Тав о̄ньге̄н янмалтавес, иӈ ма̄ниг о̄лыс, ща̄не хотталь щалтыс. А̄ще китыт э̄кватэ̄ныл нёлолов ня̄врам о̄ньщис. Пуссын аквъёт онтолов ня̄врам яныгмасыт. Ты па̄влыг халэ̄нт атхуйпловкем ве̄рыстаг о̄лыс. Василий Андреевич ос Елена Алексеевна ма̄нь та̄гыл ва̄йхатсы̄г. Яныг хо̄нтлын нак о̄вылтахтын порат Новинские ос Пашторы па̄вылныл хум хо̄тпат пуссын хо̄нтлын ма̄н тотве̄сыт. Дмитрий Васильевич а̄ще эпилепсия а̄гм о̄ньщис, тыима̄гыс хо̄нтлын ма̄н ат вӯйвес. Тав сыме̄т хотум е̄мталас, ротпаттыиг ёлпатыглас. Ащо̄йкатэ ос тав хӯрум каӈканэ пуссын хо̄нтлуӈкве тотве̄сыт. Та̄н пуссын юв ат ёхтысыт, хотты ма̄т порславе̄сыт. Дмитрий Васильевич ща̄нягеа̄щаге хо̄нтлын нак э̄лыпа̄лт акванминасы̄г. Э̄кваго̄йкаг Новинские па̄вылн о̄лмыгтасы̄г. Оматэ ётыл тох потыртас: «Ам хунь хум ва̄рсум, о̄йкам колта̄гыл рӯтанэ пуссын ма̄ньщи ла̄тӈыл потыртасыт. Ам щар нэ̄матыр ат торгамтасум. Та̄л палыт тох о̄лсум. Тувыл ущ ла̄щалла̄щал ма̄ньщи ла̄тыӈ ханищтаслум». Ётылнув Юван Шесталов тав оматэ урыл тох ла̄выглас: «Наӈ хотыл йим ханты, наӈ ма̄к ма̄ньщи нэ̄». Тув мус та ёмщакв ма̄ньщи ла̄тӈыл потыртас. Юван Николаевич о̄влэ̄т номсыс, тав ма̄ньщи э̄ква. Ётылнув нэ̄гхумыг кит а̄ги Люба ос Лиза о̄щсы̄г. Та порат о̄лупса сака та̄рвитыӈ о̄лыс. Дмитрий Васильевич самын патме э̄лыпа̄лт та увщияге сас а̄тимыг е̄мтсыг. Тувыл тав ёлыпал кит йӣгрищаге Лида, Таня ос акв а̄пщитэ самын патсыт. А̄ще Василий Андреевич акв та̄л о̄лыс, 1957 та̄лт тӯя̄г хӯл алыщлан ма̄т сыме хотум е̄мтыс, витын патыс, хулпын тагапас, щаквыт та порсыс. Нила мань ня̄врам оманыл ёт та̄нкке̄ныл хультсыт. Дмитрий са̄т та̄лэ, Лида ат та̄лэ, Таня хӯрум та̄лэ, ма̄нь а̄пщияныл ос туп та̄лэ то̄влыс. Та̄н акв мисэ̄ква о̄щсыт. Оманыл ос такви во̄раим ос хӯл алыщлым яласас, ты тэ̄нутыл ты о̄лсыт. Э̄ква ня̄враманэ такви ё̄ре̄тыл, ёмас номтыл пуссын янмалтасанэ. Дмитрий Васильевич нёлолов класс мус Во̄сыӈтур па̄выл школат ханищтахтас. Тувыл э̄лаль школа а̄стлан мус Ха̄льӯс школат ханищтахтас. Лов класс юипа̄лт Тюмень ӯс кол ӯнттын ва̄рмалин ханищтахтуӈкве минас. Та̄л тот ханищтахтас ос военный хо̄тпаг училищан ханищтахтуӈкве минас. 1974 та̄лт та училище лейтенантыг а̄стластэ. Тувыл Дмитрий Васильевич Ленинградский военный округн понтонный взвод командирыг лусытаӈкве ке̄твес. Та̄н вит ёлыпа̄лт ӯнсахыт уральтым ос ӯнттым яласасыт. Та порат «Блокада» нампа кина по̄слувес. Та̄н взводаныл о̄с ты кинат по̄слувес. Ты ва̄рмаль тав сыме̄н сака хо̄яс, ань ты мус ёмщакв номитэ. Тюмень ӯс училище а̄стлам пыгыт Германият, Чехословакият, Польшат, Венгрият ос мо̄т хо̄н ма̄т лусытасыт. Дмитрий Васильевич Ленинград ӯс юипа̄лт ос Монголия ма̄н разведывательноводолазный взвод командирыг ке̄твес. Ётылнув ма̄хум мовиньтасыт, аман манрыг вит ёлыпа̄лт рӯпата ва̄рнэ хо̄тпаг тув ке̄тве̄сыт. Тот вит щар а̄тим, та то̄сам ма̄ рущ щирыл «Юг пустыни Гоби» ла̄ваве. Та сыс тот са̄всыр э̄рнэ ва̄рмаль ва̄рсыт. Та ма̄т тав кит та̄л лусытас. Тувыл ос Бурятия ос Монголия граница ӯргалаӈкве Кяхта ӯсн ке̄твес. Тот тав а̄ги ёт ва̄йхатуӈкве патыс. Ётыл тэ̄н акванминасы̄г. Э̄кватэ наме Фамия Фаттаховна, тэ̄н аквъёт ва̄т арыгкем та̄л о̄лэ̄г. Фамия колта̄гланылт са̄т ня̄врам яныгмасыт. Тав оматэ Дмитрий Васильевич нёлоловит ня̄врамы̄г ла̄выгластэ, ва̄псэ сака э̄руптастэ. Кяхта юипа̄лт Дмитрий Васильевич Молдавия ма̄т, Германият, Оренбургский областьт лусытас. Тувыл ос ювле Тюмень ӯсн лусытаӈкве ёхтыс. Пуссын аквъёт армият ва̄т нупыл ат та̄л лусытас, тувыл по̄хын минас. 1977 та̄лт тав ще̄мьяӈ та̄гыл Ханты-Мансийск ӯсн ва̄нтлыс. Матах та̄л соссаӈ ма̄хум округ Луима Комитетт рӯпитас. Та юипа̄лт тав «Комиссия по помилованию» округ общественный организациян рӯпитаӈкве паттувес. Ань китхуйпловит та̄л ты ва̄рмаль щирыл рӯпиты. Тэ̄н э̄кватэ̄нтыл кит ня̄врам янмалтасы̄г: акв пыг, акв а̄ги. Тэ̄н ань сас я̄нас ще̄мьял о̄лэ̄г. Ам ты мӯтраӈ, ве̄щкат ма̄ньщи хо̄тпан ос тав рӯтанэ̄н пуста̄гыл о̄лнэ ла̄тыӈ ке̄тэ̄гум. На̄й-О̄тыранылн вос ӯргалавет. Пус ка̄т, пус ла̄гыл э̄лаль вос о̄лэ̄гыт.

1072 2014.03.21. Светлана РОМБАНДЕЕВА

Саранпа̄выл школа. Яныгполь э̄тпос о̄выл хо̄талэ̄т Ха̄льӯс район Саранпа̄выл школа 112 та̄лэ то̄влы. Саранпа̄вылн ялмум порат ам тув щалтсасум, тот рӯпитан ма̄хум ос ня̄врамыт ёт потрамасум. Кӯщаиг Андрей Дмитриевич Попов тав о̄лы. Школа урыл кӯщай ва̄ӈын нэ̄ Раиса Михайловна Капшук потыртас, на̄н ань тав потре ловиньтэ̄лын: – О̄выл школа Сӯкыръят о̄лыс, тот ня̄врамыт о̄выл классытт ханищтахтасыт. Саранпа̄вылныл тув мус ялантаӈкве сака хоса о̄лыс, ня̄врамыт са̄вмуӈкве патсыт, ханищтахтан колнакытыл ат то̄влуве̄сыт. Ма̄хум кӯщаитн пищмат хансуӈкве патсыт, ань Саранпа̄вылт йильпи школа вос ӯнттаве. Та порат хо̄н о̄йка о̄лыс, тав ка̄сащас, школа ӯнттувес. О̄влэ̄т туп нила класс о̄ньщас, тувыл нёлолов класс мус ва̄рвес, мощ ётылнуве ос лов класс мус ва̄рвес. 1956 та̄лт Саранпа̄выл школат ханищтахтан ня̄врамыт о̄выл щёс лов класс а̄стласыт. Мощ ётылнуве аквхуйплов класс ва̄рвес. Ань ты хо̄тал мус ня̄врамыт тыт аквхуйплов класс мус та ханищтахтэ̄гыт. Школа са̄в ма̄т о̄лыс – акв кол ащирмаӈ о̄лыс, мо̄тыт кол ма̄нь, аквмат порат ос нила колытыт ня̄врамыт ханищтахтасыт. Ётыл 1987 та̄лт кит накпа кол ӯнттувес, та кол хӯрум щёс на̄йн но̄хё̄сыглавес. Тувыл 2006 та̄лт ань ты школан ущта ва̄нтлысув, хӯрум накпа кирпащ кол. Спортивный зал о̄лы, нэ̄пак ловиньтан колнак, концерт ва̄рыглан ма̄гыс колнак. Ёлы наке̄т акв охсатэ ань интернат нупыл майвес. О̄влэ̄т интернат я̄нас колт о̄лыс, ань ос школа нупыл паттувес. Тот са̄т ня̄врам туп о̄лы. Э̄лнаӈ са̄в ня̄врам о̄лыс, Хо̄сло̄хныл, Хо̄рыӈпа̄вылныл, Я̄сунтныл, Сӯкыръяныл тув тотыглаве̄сыт. Нё̄рт яласан ма̄хум ня̄враманыл о̄с интернатт о̄лсыт. Ты коныпал тыт па̄вылт о̄лнэ вина айнэ ще̄мьят ня̄враманыл тув вуйлуве̄сыт, ань йильпи са̄ккон щирыл та̄наныл виӈкве ат ро̄ви. Ань туп мо̄т па̄вылт о̄лнэ ма̄хум ос нё̄рт яласан ма̄хум ня̄враманыл интернатт о̄луӈкве ве̄рме̄гыт. Ам хунь ты школат рӯпитаӈкве патсум, 870 ня̄врам ханищтахтас. Ань тыт 375 ня̄врам ханищтахты, та̄н халанылт 196 ма̄ньщи ня̄врам. – Сӯкыръят о̄с школа о̄лы? – Тот о̄лы школа, ма̄нь ня̄врамыт садик о̄с аквта колт о̄лы. Хунь та школа ӯнттувес, тот о̄с кӯщай о̄лыс. Ань хӯрум школат тармыл – Саранпа̄выл, Сӯкыръя ос Кимкъясӯй, акв кӯщай А. Д. Попов. Та школагт ос кӯщай ва̄ӈын хо̄тпаг рӯпитэ̄г. Школант ня̄врамыт ма̄ньщи ла̄тыӈ пуссын ханищтэ̄гыт? А̄ти, пуссын ат ханищтэ̄гыт. Ань хотьют ка̄сащи ма̄ньщи ла̄тыӈ ханищтаӈкве, ня̄врам ща̄нягеа̄щаге заявление нэ̄пак хансэ̄г, ты юипа̄лт тав ущ ла̄тыӈ ханищтаӈкве ве̄рми. Ты са̄ккон нэ̄глынэ̄тэ э̄лыпа̄лт ма̄н та̄наныл китыгласанӯв, хоты ла̄тыӈ ханищтаӈкве таӈхе̄гыт, ма̄ньщи манос саран ла̄тыӈ. Ня̄врам такви номсы, хоты ла̄тыӈ ханищтаӈкве ка̄сащи, тув та хансаве. О̄выл классытт са̄ттем акв урок о̄лыглы, ос яныгнув классытт кит урок. Ань 11 классыт ма̄ньщи ла̄тыӈ туп кит хо̄тпа ханищтэ̄г. Акв пыгув Миша Ромбандеев ща̄нь ла̄тыӈ олимпиада о̄лыгланэ̄тэ порат кит щёс но̄хпатыглас. Школавт финноугорский мир йис о̄лупса, соссаӈ мир культура ос ка̄тыл матыр щаквщин урокыт о̄лсыт, ань хотвуйве̄сыт. Ты урокыт пуссын «Поиск» нампа ДЮЦ (детскоюношеский центр) нупыл хасве̄сыт. Кӯщаиг тот Альбина Васильевна Попова тав рӯпиты. Ань 8 ос 9 классыг ма̄гыс Искусство урок ва̄рвес. Э̄лнаӈ урокн ма̄н ма̄щтыр ма̄хум, во̄раян ос хӯл алыщлан ма̄хум во̄виньта̄лсув. Во̄раян хо̄тпан пыгрищит ня̄ль во̄ртуӈкве, лэ̄с ос ке̄рняль ӯнттуӈкве, ё̄рнкол тӯщтуӈкве ханищта̄лве̄сыт. А̄гирищит ос щаквщуӈкве ханищтахтасыт, матыр йинсыт, ю̄нтсыт. Ань а̄гирищитпыгрищит янас ханищтаӈкве ат ро̄ви, таима̄гыс ма̄н ань нэ̄мхотьют во̄вуӈкве ат ве̄рме̄в. Хунь ма̄н палтув яныгхо̄тпат ёхталасыт, татем ёмас о̄лыс. Ма̄ныр ва̄сыт, ма̄ныр ва̄руӈкве ха̄ссыт, пуссын ня̄врамытын потырта̄лсыт. Ам ань рӯпитан колнакумт яныгхо̄тпат ка̄тыл ва̄рум пормасаныл о̄лэ̄гыт – Сакв ма̄ньщиянув а̄канит, Сургут ӯс па̄лыл ёхталам хантыт, Венгрияныл ёхталам хо̄тпат ос рущ ма̄хум а̄канит. Александра Егоровна Рокина, Александра Фёдоровна Лесманова ос Антонина Егоровна Хозяинова са̄в а̄канит ва̄рыгласыт, тыт ты лю̄ле̄гыт. Ня̄враманув о̄с ха̄сэ̄гыт ва̄руӈкве. – «Лӯима̄ сэ̄рипос» газета на̄н палтылын ёхталы? – Ёхталы. О̄йкам газета сака э̄руптытэ. Ам юв тотылум ма̄ньщи газета, тав словарь нэ̄пак выг, тот та ловиньты. Тав тыт самын патыс, ты школат ханищтахтас. Саран ла̄тыӈ ва̄гтэ, ма̄ньщи мир о̄лупса ва̄г. – Раиса Михайловна, таяныт ёмас ва̄рен, наӈти урынт аквкит ла̄тыӈ ла̄вен. Хо̄т самын патсын, хо̄т яныгмасын? – Ам Новосокольники па̄вылт Псковский областьт самын патсум, 1947 та̄лт сӯкыр э̄тпост. А̄тям кол ӯнттын ма̄т рӯпитас, строителиг о̄лыс, таима̄гыс ма̄н са̄в ма̄т о̄лсӯв, а̄тям ёт яласасӯв. Белоруссият Витебск ӯст яныгмасум, тот май мирн ва̄нэ «Славянский базар» о̄лыглы. Тот и школа а̄стласум. Та юипа̄лт Смоленск ӯст педагогический институтт ханищтахтасум, история ос английский латыӈ ханищтан учителиг патсум. 1972 та̄лт тыг, Саранпа̄вылн, рӯпитаӈкве ке̄тве̄сум. Тыт налыман арыгтем та̄л ты о̄лэ̄гум, школат рӯпитэ̄гум. О̄йкам наме Алексей, ты па̄вылт акванхо̄нтхатасме̄н, кит пыг янмалтасме̄н. Яныг пыгме̄н Коля тыт о̄лы, ма̄нь пыгме̄н Юра, тав ос Санкт-Петербург ӯст щемьятэ ёт о̄лы. – Ты па̄вылт о̄луӈкве наӈын мӯсты? – Тыт атхунь ёмас о̄луӈкве, ёмас па̄вылкве, лылые̄пе сыстам. Па̄выл мир о̄с ёмас, сымыӈ э̄лумхо̄ласаквет. Ос туп таи лю̄ль, хо̄тпа илттыг матаре хотум е̄мтапи те, яныг ле̄ккар ат о̄ньще̄в, таве э̄ри яныгнув па̄вылн ман ӯсын тотуӈкве. Э̄лнаӈ тыт операцият ва̄рыглаве̄сыт, ня̄врамыт самын патсыт. Та порат товлыӈха̄пыт ёмащакв яласасыт, са̄в о̄лыс. Аквта хо̄тал тыгыл Ха̄льӯс та̄ра Москван ман Свердловскын тыламлаӈкве ро̄выс. Ань а̄ти тох, хотталь минмыгтанэ̄в порат, минуӈкве ат ве̄рме̄в, лё̄ӈхув сака та̄рвитыӈ. Потруме̄н та оигпас. Школа янытэ̄т суссылтастэ, тот мощ ё̄мыгтасме̄н, ня̄врамыт ханищтахтан колнакытын щалтсасме̄н, ханищтан хо̄тпат ёт потрамасум. Раиса Михайловна английский ла̄тыӈ ос история урок ня̄врамытн ханищты. Тав тамле мӯсхал, сэ̄ръёр э̄лумхолас, хо̄тпа нупыл сымыӈ нэ̄кве. Ня̄врамыт э̄руптыянэ, рӯпататэ янытлытэ. Ётыл ам нэ̄пакыт ловиньтасум, тав насати «Отличник народного просвещения» ос «Ветеран труда» нам о̄ньщи. Раиса Михайловнан ам са̄в ёмас, сымыӈ ла̄тыӈ ла̄ве̄гум. Ще̄мьятэ ёт пуста̄гыл вос о̄лы, со̄тыӈыщ вос о̄лы! Ня̄врамаквет ёмащакв вос ханищтахтэ̄гыт, ла̄тыӈ вос хӯнтлэ̄гыт. Пус ка̄т, пус ла̄гыл вос о̄лэ̄гыт!

1072 2014.03.21. Людмила ТЕТКИНА

Леуши па̄вылт ма̄хум йильпи клуб о̄с уре̄гыт. Кондинский район Леуши па̄вылт культура та̄л янытлан кастыл ма̄хум манхурип рӯпата ва̄руӈкве патэ̄гыт, ты урыл ма̄ньщи газета ма̄гыс Елена Бурдаева потыртас. Тав та па̄вылт рӯпитан клубт кӯщаиг о̄лы. Тув ялмум порат ам таве варнэ рӯпатаныл урыл китыгласлум. – Елена Васильевна, ты клубкол хунь ӯнттувес? – Ты кол леспромхоз о̄лме порат 1968 та̄лт ӯнттувес. Ювле хультум та̄лт клубув 45 та̄лэ то̄влыс. Таяныт колкапайт акваг ащирмаӈ, тыи ма̄гсыл молях пе̄сыг е̄мтыс, а̄латы ёллоньхаты. Са̄т та̄л ювле хультум порат ма̄н сметанэ̄пак ос проектнэ̄пак ва̄рсув, йильпи яныг клубкол ӯнттуӈкве кӯсыгласӯв. Тувыл та̄рвитыӈ пора (кризис) е̄мтыс, олнанув ювле вуйве̄сыт. Мощ ӯрхатуӈкве ла̄ввесӯв, ань ты мус ӯрхатэ̄в. Кондинский район янытыл тамле хо̄т пе̄с клубкол о̄лы. Миркол кӯщаит ла̄ве̄гыт, ат та̄л сыс ка̄сыӈ па̄вылт йильпи клубкол тах ӯнттаве. Клубколув МЧС рӯпитан хо̄тпат уральтаӈкве ёхталэ̄гыт, акваг штрафолныл хансаве̄в. Тамле пе̄с колт са̄всыр на̄йпос ква̄лгыт лю̄льсаӈ ва̄рим о̄лсыт, ань мӯсхалыг щё̄питасанӯв. Тувыл та̄н ла̄всыт, пе̄с а̄вит о̄с хотвыганӯв, ке̄р а̄вит вос ва̄ре̄в. Ты рӯпата ва̄руӈкв пилэ̄в, колув ёл ул вос ра̄гаты. Ты та̄л культура янытлан та̄лыг намаявес, ма̄н номсэ̄в, кӯщаит ма̄н та̄рвитыӈ ва̄рмалянув та̄ра тах паттыяныл. – Ты та̄л Культура та̄л хумус янытлаӈкве патэгы̄н? – Та̄л сыс ма̄н са̄всыр ялпыӈ хо̄талыт, концертыт ос мо̄т рӯпата ва̄руӈкве патэ̄в. Ты та̄л Леуши па̄выл 430 та̄лэ то̄влы. Тамле ялпыӈ хо̄тал ма̄н о̄йттур э̄тпост янытлаӈкве патэ̄в, та хо̄тал кастыл ань щё̄питахтэ̄в. Ма̄н учрежденияв тох намаим о̄лы «Культурноспортивный комплекс». Леуши, Дальний, Листвиничный ос Ягодный па̄влытт о̄лнэ клубыт акванловиньтахтэ̄гыт. Ты ялпыӈ хо̄тал ма̄н пуссын аквъёт ва̄руӈкве патэ̄в. Леушит клубт хо̄т коллектив о̄лы. Хус та̄л тыт «Ветеран» нампа коллектив рӯпиты, тот э̄кват са̄всыр э̄ргыт э̄рге̄гыт. Школат рӯпитан нэ̄т та̄нки ансамбль ва̄рсыт, ат та̄л э̄рге̄гыт. Па̄влыӈ ня̄врамыт «Огонёк» нампа коллективыт йӣкве̄гыт. Ювле хультум та̄л та̄н «Кондинские роднички» нампа конкурсын ялсыт, тот но̄хпатсыт, юв дипломнэ̄пак тотсыт. Па̄вылт ос концерт хунь ва̄рыглэ̄в, ща̄няныла̄щаныл ос мо̄т рӯтаныл пуссын ёхталэ̄гыт. Листвиничный, Дальний ос Ягодный па̄влытт рӯпитан клубт о̄с та̄нки я̄нас коллективыт о̄ньще̄гыт. – На̄н каснэ ва̄рмаль щирыл рӯпата о̄с ва̄регы̄н? – Ма̄н волейбольный площадка о̄ньще̄в. Туи порат ма̄ньлат ма̄хум тув ёнгуӈкве ёхталэ̄гыт. Тэ̄лы ёсал ха̄йтыгтаӈкве ро̄ви. Ань па̄влувт лыжный база ӯнттуӈкве о̄вылтаве, то̄нт са̄внув ма̄хум ёсал ха̄йтыгтаӈкве тах паты. – Леуши па̄вылт са̄в ма̄ньщи ма̄хум о̄лы, «Ӯринэ̄ква хо̄тал» ос мо̄т ялпыӈ хо̄талыт тыт ва̄рыглэгы̄н? – Ма̄ньщи ма̄хум тыт са̄в кос о̄лы, тувыл та̄нки пе̄с ва̄рмаляныл ат ва̄ганыл, ща̄нь ла̄тӈыл о̄с ат потыртэ̄гыт. Ань «Ӯринэ̄ква хо̄тал» ва̄рыглаӈкве пуссын ла̄ваве̄в. О̄выл щёс ялпыӈ хо̄тал ва̄рыгламув порат, тыт о̄лнэ ма̄ньщит китыгласанӯв, ма̄ньщит ты товлыӈ ӯй манрыг янытлэ̄гыт, манхурип мо̄йтыт, потрыт тав уре̄тыл о̄ньще̄гыт, та̄н ты урыл щар нэ̄матыр ат ва̄гыт. Интернет хосыт кисхатуӈкве патсӯв, тот нэ̄матыр ат хо̄нтсӯв. Соссаӈ ма̄хум пе̄с йис ва̄рмаляныл урыл хансым нэ̄пакыт о̄с ат о̄ньще̄в. Тувыл Половинка па̄выл музейт рӯпитан ма̄хум китыгласанӯв, та̄н ма̄навн нё̄тсыт. Полина Андреевна Токова, Ягодный па̄вылт о̄лнэ ма̄ньщи нэ̄, ма̄навн о̄с ёмащакв нё̄тыс. Тав ётэ ма̄н хосат та̄гыл рӯпитэ̄в, тав ань пенсият о̄лы, тыг ёхталы, ня̄врамытн соссаӈ ма̄хум культураныл урыл потырты. А̄гирищит са̄всыр пормасыт сакныл хартуӈкве ханищты. Тамле кружок клубт рӯпиты. Ка̄сыӈ та̄л во̄ртур э̄тпос 9 щислат соссаӈ ма̄хум мирхал ялпыӈ хо̄тал янытлэ̄в. Па̄влыт о̄лнэ соссаӈ ма̄хум акванатыглыянӯв, мӯйлэ̄в. – Елена Васильевна, ня̄врамыт клубн сакныл хартуӈкве ёхталэ̄гыт, ос ма̄ньлат ма̄хум манос яныг хо̄тпат тыг во̄виньта̄лыяны̄н? –Ня̄врамыт тыт ка̄тыл хурит по̄слэ̄гыт, са̄всыр э̄ргыт хӯнтлэ̄гыт, йӣкве̄гыт, кина сунсэ̄гыт. Ӯщлахтын хо̄талыт акваг тыг ёхталэ̄гыт. Ма̄ньлат ма̄хманув ёт ма̄н рӯпитаӈкве о̄с ка̄саще̄в. Та̄н та̄нки клубн ат ёхталэ̄гыт, Междуреченский па̄вылн ӯщлахтуӈкв ялантэ̄гыт. Па̄влувныл тув мус туп лов ве̄рыста. Междуреченский мус акваг автобус яласы, тув та̄лматэ̄гыт, яныг па̄вылн та минэ̄гыт. Ма̄ньлат ма̄хум ма̄гсыл ӯщлахтын хо̄талыт ва̄рыгласӯв, та̄н щар ат ёхталэ̄гыт. Китыглыянӯв, манрыг тыт ӯщлахтуӈкве ат ка̄саще̄гыт, та̄н ювле ла̄ве̄гыт, пе̄с клубн щалтуӈкве нас пилыщма. Ам номсэ̄гум, йильпи колыл ӯнттаве̄в ке, ма̄ньлат ма̄хманув клубн ёхталаӈкве патэ̄гыт. Яныг хо̄тпат пуссын пенсият о̄лэ̄гыт, та̄наныл во̄вуӈкве ат э̄ри, та̄нки ёхталэ̄гыт. Э̄ргуӈкве, йӣквуӈкве пуссын ха̄сэ̄гыт, та̄н ётаныл рӯпитаӈкве сака пӯмащ. –Па̄влыӈ ма̄хум ма̄гсыл ялпыӈ хо̄талыт ва̄рыглым, олн на̄нки сэ̄лэгы̄н? – Акв порат акв нэ̄ ам палтум ёхтыс, китыглахтас, клубколт ня̄враме намхо̄талэ ва̄руӈкве ро̄ви ман а̄ти. Такви тав ма̄нь колт о̄лы, таи ма̄гыс са̄в ня̄врам акванво̄вуӈкве ат ве̄рми. Та̄н пуссын тыг ёхтысыт, ма̄н та̄н ма̄гсыланыл са̄всыр касылыт ва̄рыгласӯв, а̄мщит а̄мщисӯв ос са̄в мо̄т ощхуль ва̄рыгласӯв. Ня̄врамыт маткем та поргысыт, юв минуӈкве ат тахсыт, ялпыӈ хо̄тал та̄нанылн такем мӯстыс. Ань па̄влыӈ ма̄хум тыг ёхталэ̄гыт, та̄н ня̄враманыл ялпыӈ хо̄талыл ва̄рыглыянӯв. Па̄влыӈ ма̄хум ма̄гсыл ӯщлахтын хо̄талыт о̄с ва̄рыглэ̄в, тыт та̄н ма̄гсыланыл пасан ва̄рыгла̄лэ̄в. Та̄н пасан ва̄тат ӯнлахо̄луӈкве сака э̄руптэ̄гыт, йӣкве̄гыт. Акв та̄л сыс ма̄н яныгполь э̄тпос о̄выл хо̄талыт яныг концерт щё̄питалэ̄в, тув билет тыналэ̄в. Ма̄хманув тув ялантаӈкве сака ка̄саще̄гыт. О̄влэ̄т билет тынэ 15 солко̄ви о̄лыс. Ань тынэ 100 солко̄ви ва̄рыслӯв, ма̄хум билетыт ёвтэ̄гыт, концерт сунсуӈкве ёхталэ̄гыт. Тамле рӯпата ва̄рим, мощ олн сэ̄лэ̄в, тувыл депутатытныл олн во̄выглэ̄в. Са̄всыр грантолн ма̄гсыл ма̄нки нэ̄паканув ке̄тыглэ̄в. Ма̄навн Геннадий Степанович Корепанов, депутатхум, сака ёмащакв нё̄тыс. Тав ма̄йлум олнытыл ма̄шина ёвтсӯв. Ань мо̄т па̄вылт концерт ва̄руӈкве ма̄нки ма̄шинал яласэ̄в. «Все работы хороши, выбирай на вкус» нампа проектнэ̄пак хассӯв ос Ханты-Мансийск ӯсн грантолн ма̄гсыл ке̄тыгласлӯв, тот кас щирыл но̄хпатсӯв. Ты проект хосыт рӯпитым, ня̄врамыт ёт са̄всыр рӯпата ва̄рнэ хо̄тпат ёт хо̄нтхатыгласӯв. О̄влэ̄т на̄й харыгтан ма̄хум палт ялсӯв, та̄н ня̄врамытын та̄нки рӯпатаныл урыл потыртасыт. Пӯльницат ле̄ккарыт хумус рӯпитэ̄гыт, а̄гирищитпыгрищит сунсуӈкве о̄с тотыгласанӯв. Ма̄н клубколн тэ̄нут па̄йтнэ хо̄тпа во̄виньта̄лыслӯв, тав о̄с рӯпататэ урыл потыртас, ня̄врамыт ма̄гсыл тэ̄нут пайтыс. Парикмахернэ̄ тыг о̄с ёхталас, а̄т хӯратаӈкве хумус ха̄сы, о̄с суссылтас. Ня̄врамытын ты ма̄хум ёт хо̄нтхатыглаӈкве сака пӯмащ о̄лыс. Ты коныпал ня̄врамыт ёт «Спасти и сохранить» нампа акция о̄лыгланэ̄тэ порат са̄в рӯпата ва̄рыглэ̄в. Па̄выл хосыт ос Туман нампа тӯр по̄хыт порс а̄тэ̄в. Ты рӯпата ва̄рнэ̄в ма̄гсыл янытлан нэ̄пакыл майвесӯв.

1072 2014.03.21. Анна АЛГАДЬЕВА

«Ма Мувем» – «Ам Ма̄м». Хулюмсунтыӈ школа искусств колн ялантан ня̄врамыт акваг са̄всыр ханищтахтын конференциятн ялантэ̄гыт. Тот та̄н матыр э̄рнэ докладыт ловиньтэ̄гыт, ка̄тыл матыр ва̄руӈкв ханищтахтэ̄гыт, та̄нки маныр ва̄гыт суссылтэ̄гыт. Мощ мо̄лалнув Ха̄льӯст КМЦ «Звёздный» па̄лыл ханты щирыл «Ма Мувем», ма̄ньщи щирыл ке ла̄вуӈкв «Ам Ма̄м» культурный проект минас. Тув Ягрим, Хулюмсунт па̄влыгныл школа искусств колытн ялантан ня̄врамыт ма̄щтыраныл суссылтаӈкв ялсыт. Культура колн ялантан Ня̄хщамво̄лиӈ ня̄врамыт о̄с о̄лсыт. Тэ̄к па̄вылныл, Шайтанка па̄вылныл ня̄врамыт ёхтала̄сыт. Ма̄н па̄влувныл Надежда Константиновна Маслова тув ялыс, хӯрум а̄гирищ ёт тотыглас. Ам таве яласам лё̄ӈхе урыл мощ китыгласлум: Хумыс яласасы̄н? Ёмщакв яласасӯв. О̄выл тув ёхтумув хо̄тал ня̄врамыт танки ва̄рнэ рӯпатаныл урыл потыртасыт, презентация ва̄рсыт. КМЦ «Звёздный» колт ёт тотам пормасаныл суссылтан выставка о̄лыс. Тув ёхтум ма̄хум ос соссаӈ хо̄тпат ва̄рум рӯпатаныл ёмщакв сунсыгласаныл. Хумыс ос манарыл ва̄рим, сагим ман ю̄нтым о̄лэ̄гыт, та̄рапаттысаныл. Тувыл ӯс сунсыглым пе̄с ма̄тытн тотыглавесӯв, ялпыӈ на̄ӈк щахылн, Меншиков памятникн ялсӯв. Китыт хо̄тал «Сорни сэй» нампа туи порат ня̄врамыт ӯщлахтын ма̄н тотвесӯв. Такем нё̄тнэ, ёмас, йильпи нор колкве тот о̄лы. Тот ю̄нсхатсӯв, сак хартсӯв, рущ ла̄внэ щирыл – мастеркласс суссылтасӯв. Хоты ня̄врамыт ёт тотыгласын? Маныр рӯпата суссылтасын? Ма̄н нилал ялсӯв: Вика Боженко, Диана Хайменова, Таня Сивцова ос ам. Ма̄н хӯрум са̄всыр а̄кань суссылтасӯв: акв рущ а̄кань, нас то̄рло̄мтытыл пе̄рыгтаве, акв ханты а̄кань – пилсам о̄с акв нас лӯи ма̄хум а̄кань. Пуссын ма̄нь а̄канит то̄рныл ва̄рим о̄лэ̄гыт, ӯргалапыг ла̄вавет. Маныр йильпи ут ва̄сын, хащсын? Тэ̄к па̄вылныл о̄лум э̄кван щакариӈ нак ю̄нтуӈкв ханищтаве̄сум, наме матыр о̄лыс, аты ва̄глум, ат китыгласлум, ётыл ущ кос номсахтэ̄гум. «Сорни сэй» кӯщай нэ̄ Ольга Константиновна Филиппова са̄сныл ва̄рнэ ма̄нь ло̄ӈханьщапыт хумыс ва̄равет, суссылтас ос такви ла̄внэ̄тэ щире̄тыл «со̄рни сэйкат» ва̄рыс ӯщлахтын ма̄ныл по̄с. Ёмщакв яласасӯв, ща̄гтым о̄лэ̄в. А̄гирищит номтаныл ёмас. Лӯи ма̄хум ёнгытыл ёнгысӯв, са̄лы то̄выль тармыл сыпныл тахсасӯв. Ты ма̄щтыр хо̄тпат нас ат о̄лэ̄гыт, акваг ма̄щтыр ка̄тке̄нылтыл матыр ва̄ре̄гыт, хо̄та̄ти яласэ̄гыт, та̄нки ханищтахтэ̄гыт, маныр ха̄сэ̄гыт, маныр ва̄гыт, э̄лаль суссылтыяныл. Маныр ат ва̄щинтэ̄гыт, пуӈкын выганыл, номуӈкв патыяныл. Э̄лаль о̄с тыгыл са̄внув йильпи номтын вос ёхтавет. Посыӈ, со̄тыӈ, щуниӈ хо̄талыт на̄нанн.

1072 2014.03.21. Тамара МЕРОВА

Э̄тпос яныгман порат соссаӈ ма̄хум пӯрлахтэ̄гыт. Ма̄ньполь э̄тпос атыт щислат Ханты-Мансийск ӯст о̄лнэ ханты ос ма̄ньщи ма̄хум «Тылыщ пори» пӯрлахтын кан ва̄рыгласыт. Рущ щирыл ке толмащлаӈкве, ты ялпыӈ хо̄тал «Праздник угощения Луны» ла̄ваве. Ма̄ньщи ла̄тӈыл ма̄н таве ос «Э̄тпос пӯрииг» ла̄вилӯв. Ань ӯст о̄лнэ ос мо̄т ма̄ныл ёхтум мӯй ма̄хум нилыттыг «Торум Маа» музейт акванатхатыгласыт ос тот йильпииг яныгман э̄тпос нупыл по̄йкщасыт. Ма̄ӯнтталам, ма̄вит о̄лыглам па̄сныл йис ма̄хум Э̄тпос ос Хо̄тал урыл тамле пе̄с мо̄йт мо̄йтыгласыт. «Э̄тпоспыг Хо̄тал нэ̄тэ̄нтыл о̄лсы̄г. Тувыл Хо̄тал хумитэ юипа̄лт ня̄влалахтам нэ̄ ёт Э̄тпоспыгн консыгтахтасы̄г ос кит нупыл харттуӈкве та патыстэ̄н. Тув мус капыртасы̄г, Э̄тпоспыг киттыгманумтастэ̄н. Хо̄тал нэ̄н сымта̄л о̄лнэ па̄лэ ликмыс. Нэ̄ то̄нт та ло̄мтэ ма̄нь ня̄врам хольт ма̄нигтастэ, а̄пан пиныстэ ос тот нёвитым, э̄рпащиӈыг та янмалтытэ. Ты ня̄враме хота мус яныгми, хӯрум хо̄тал туп яныг хо̄тпаг е̄мтала̄лы ос тувыл о̄ста ма̄ниг е̄мтапи. Тувыл ма̄нь ня̄врамыг е̄мтум утэ а̄пан хуюптытэ, нёвитытэ, ос э̄лаль янмалтахтым тох та о̄лэ̄г. Таитэ аквтох хӯрум хо̄талн янгыг е̄мталы, та юипа̄лт оста ма̄ниг ва̄рхаты. Юио̄вылт нэ̄ туре̄н ёхтыс, ка̄таге̄тла̄глаге̄т щар ва̄гта̄л патыс. Тав нёвитам ло̄мтэ пӯврыг ва̄рыстэ ос хотталь но̄ӈхаль та вущкасастэ, ла̄выс: «Ам ат ве̄рмысум Наӈ То̄румн ань вос янмалтавен ос э̄руптым вос о̄ньщаве̄н». Пӯвыр утэ То̄румт Э̄тпосыг е̄мтыс. Тувыл э̄лаль тав аквтох яныгма̄лы ос аквта щирыл ма̄ниг ва̄рхаты». Соссаӈ ма̄хманув «Тылащ пори» манос «Э̄тпос пӯри» ялпыӈ хо̄таланыл тӯя̄г Э̄тпос яныгман порат ва̄рияныл. Ты порат хо̄таланув ка̄сыӈъе̄мт хосаннув по̄стыглэ̄гыт, кон ма̄лтыпыг е̄мты, ма̄витув о̄с но̄хса̄йкалы. Ань ма̄хум по̄йкще̄гыт, хӯл вос са̄вми, ӯйхул вос са̄вми, та̄нки о̄с пуста̄гыл, щуниӈыг вос о̄лэ̄гыт. Ты пе̄с ялпыӈ хо̄тал янытлаӈкве ос ёмас ва̄рмалит ма̄гыс пӯрлахтуӈкве «Торум Маа» музейн ань З. Н. Лозямова, Е. А. Нёмысова, М. А. Лапина, Л. К. Зубакина, Т. А. Молданова, Р. Г. Решетникова, Ф. А. Иштимирова, А. М. Константинов, Д. В. Лельхов, Ю. Г. Кондин, Т. А. Молданов Ханты-Мансийскат о̄лум ханты хо̄тпат ос Белоярск ӯсныл Т. С. Пятникова ос М. Ф. Яркина во̄виньталве̄сыт. Ты А̄с ма̄хум пуссын ётыл культура Департамент па̄лыл мӯйлупсал майве̄сыт. Педагогический колледжит ханищтахтын а̄гитпыгыт, «Хо̄тал» нампа А̄с-угорский ма̄хум театрыт рӯпитан хо̄тпат матыр ва̄руӈкве тот о̄с нё̄тсыт. Тувыл музейт рӯпитан нэ̄т нё̄влиӈ исмит па̄йтсыт, мӯй ма̄хум атыӈ исмитыл тыттысаныл. Пуссын ёмащакв мӯйлысыт, та̄нанылн тот мӯстыс. «На̄й лылы» нампа кинофестивальн ёхталам мӯй хо̄тпат о̄с тув ёхталасыт. Сергей Иванов, режиссёро̄йка, соссаӈ ма̄хманув пе̄с ва̄рум накыт нупыл сунсым сака пӯмщалахтуӈкве патыс, тав ань йильпи кина ва̄руӈкве номылматас.

1072 2014.03.21. Тамара МЕРОВА

Хоты рӯтныл о̄лы, тав ат ва̄ме. Ханты-Мансийскан соссаӈ ма̄хум ёт ва̄йхатуӈкве Анхель Миляков ёхталас. Тав нё̄тнэ хурит ка̄тыл по̄слы, ос по̄слум хуриянэ̄н ты наме тув хансытэ. Такви намнэ̄пакет тав Андрей Васильевич Миляховыг хансым о̄лы, 1974 та̄лт Пермь ӯст самын патыс. Ос щар ма̄ньта̄гыл савалап ня̄врам колт Самара ӯст янмалтавес. Мо̄лты тав хотты рӯтанэ кинсуӈкве патсанэ ос ма̄н округувт увщитэ хо̄нтыстэ. Лариса Пойковский ӯст ще̄мьятэ ёт о̄лы. А̄пщитэ̄нтыл о̄выл щёс акванхо̄нтхатсы̄г. Тэ̄н соссаӈ ма̄хманув халт оматэ̄н манос хотты рӯтанэ̄н о̄вылтыт китыглахтэ̄г. Оматэ̄н наме Мария Кузьминична Миляхова о̄лыс, тав 1933 та̄лт самын патыс. А̄щаныл белорусо̄йкаг ла̄ваве. Лариса ос Андрей э̄лыпалэ̄нт э̄кваго̄йкаг Алексей, Василий ос Света ня̄врамыт о̄щсы̄г. Ха̄льӯс район па̄влытыт хо̄т тот о̄лсыт. Лариса Хо̄рыӈпа̄вылт самын патум. Тувыл кит та̄лэ то̄влумет ща̄няныл турманколн ӯнттыма. Тэ̄н Светатэ̄нтыл Тюменьн савалап ня̄врам колн ке̄тымаг. Каӈкаге̄н мо̄т ма̄н хотталь тотвесы̄г. Унтари а̄пщияныл Пермь ӯст турманколт самын патыс. Света увщитэ (мо̄лалнув а̄тимыг е̄мтыс) потырта̄лыс, оманыл Тюменин ёхталам, тэ̄н Ларисатэ̄нтыл таве ва̄щинтаме̄н. Ос ётыл о̄ста тыпылтастэ̄н, ла̄ве̄гыт, о̄с ӯнттувес. Тувыл Алексей каӈке̄н армият лусытам юипа̄лт а̄гирищиг Тюменьт хо̄нтсаге. Тэ̄н каӈке̄н ат номыстэ̄н, таве̄ныл хоттӯйтхатмыг, то̄нт тохиӈ ат потыртасыт. Василий урыл туп ва̄гыг, тав Алексей каӈке̄ныл хо̄т та̄лын ма̄ньнув о̄лыс. Андрей Самара ӯст яныгмас, армият лусытаме юипа̄лт о̄с тув о̄луӈкве, рӯпитаӈкве минас. Тав по̄слум хуриянэ савалап , а̄гмыӈмосыӈ ня̄врамытын суссылтыянэ. Та̄нанылн матыр нё̄тмил ва̄ри. Такви уре̄т тав ла̄выс: "Ам акваг номсысум, ам ул хатаниг о̄лэ̄гум. Мӯсхалыг кисхатуӈкве патсум, насати, ханты. Ханты-Мансийскан ме̄н Ларисаме̄нтыл Алла Иштимирова-Посохован, соссаӈ ма̄ньлат ма̄хум колыт рӯпитан нэ̄н, во̄ввесме̄н. Таве̄н яныг пӯмащипа ла̄виме̄н. Ос ты ёмас хо̄тпат ма̄гыс ам мо̄лхо̄тал э̄типалаг хури по̄слыслум, таве та̄нанылн мӯйлуптылум". Я̄тил ма̄ньщи ма̄хум, на̄н тэ̄н оматэ̄н наме хо̄т хӯлыгласлын ке, таяныт ёмас ва̄ре̄н, ма̄н газетавн ла̄тыӈ ке̄тэ̄н.

1072 2014.03.21. Светлана РОМБАНДЕЕВА

Са̄в ня̄врамыӈ нэ̄. Хурит Ха̄льӯс район Саранпа̄вылт о̄лнэ нэ̄ Мария Ильинична Семьяшкина по̄слым о̄лы. Школан щалтсамум порат, ам таве тот ва̄слум, потрамасме̄н. На̄н ань Мария Ильинична потре ловиньтэлы̄н: Ам Саранпа̄вылт, самын патсум, тыт яныгмасум. О̄йкам наме Владимир. Ме̄н нё̄лолов ня̄врам о̄ньщиме̄н, пуссын школа а̄стласыт, рӯпитэ̄гыт. Яныг пыгме̄н Восыӈтӯрт о̄лы, тав коныпа̄лэ̄т пуссын тыт, Саранпа̄вылт, о̄лэ̄гыт. А̄гиянме̄н пуссын тэ̄нут па̄йтнэ нэ̄г рӯпитэ̄гыт. Са̄т апыгрищ о̄ньщиме̄н. Школат онтоловхуйплов та̄л рӯпитэ̄гум, колкан ловтэ̄гум. Ня̄врамыт палт рӯпитаӈкве а̄нум мӯсты. Тыт ань кит апыгрищагум ханищтахтэ̄г. О̄лупсавт пуссын ёмас, ос ма̄к таи, ня̄врамыт пуста̄гыл вос о̄лэ̄гыт, ща̄гтаклым вос яныгме̄гыт. Мария Ильинична со̄тыӈ нэ̄, тав са̄в ня̄врам янмалтас, ань ос апыгрищанэ яныгме̄гыт. Ты я̄тил нэ̄ пуста̄гыл вос о̄лы, пус ка̄т, пус ла̄гыл!

1073 2014.04.04. Валентина УЗЕЛЬ

Округувт хус та̄л са̄кконыт хансавет. Ты э̄тпос 3 хо̄талэ̄т округ Дума рӯпитаӈкв о̄вылтахтаме па̄сныл 20 та̄лэ то̄влы. Ты та̄лыт сыс ат щёс тув депутат ма̄хум округувт о̄лнэ мир пе̄рия̄лыс. Ань рӯпитан депутатыт рущ ла̄тӈыл тох ла̄вавет – пятый созыв. Та̄н 2015 та̄л ма̄ньполь э̄тпос мус рӯпитэ̄гыт. Тувыл ос йильпи пе̄риян ва̄рмаль тах ва̄раве. Хус та̄л сыс ва̄рум рӯпатаныл урыл потыртан ма̄гыс ля̄ххал тотнэ хо̄тпат палт тит кӯщаиг ёхталасы̄г: Александр Сальников ос Сергей Дегтярев, тэ̄н сас округ Дума кӯщай ва̄ӈыг хумыг рӯпитэ̄г. Тэ̄н ла̄всы̄г, ань та̄нанылн рӯпитаӈкв кӯпнитнув. Дума хунь рӯпитаӈкв ущ о̄вылтахтас, то̄нт ты ма̄к та̄рвитыӈ о̄лыс. Юио̄выл та̄лыт сыс та̄н хосат хансым са̄кконыт ёмащакв хансыяныл, федеральный са̄кконытн а̄рталыяныл. Тыи э̄рнэ рӯпата та̄н таима̄гыс ва̄рияныл. Округувт матыр са̄ккон хансаве, ос то̄ва ла̄тӈанэ лю̄льсаӈ те хансымат, ты са̄ккон Москваныл ювле те̄таве, э̄рнэ щирыл вос хансаве. Александр Сальников тамле пӯмыщ ва̄рмаль урыл потыртас. То̄ва хансым са̄кконыт мирн сака ловиньтавет, ты урыл са̄всыр ма̄т потыртэ̄гыт. Хӯрум са̄кон: э̄типа̄лаг вина ул вос тыналаве, «губернаторский надбавкат» урыл ос ня̄врамыт э̄типа̄лаг кон ул вос ха̄йтыгтэ̄гыт та̄н ты хӯрум йильпи са̄ккон пирмайтаманыл юипа̄лт мирув сака пӯмщалахтуӈкв патыс, ты урыл потыртаӈкв патсыт. Ань 37 хо̄тпа депутатыг тот рӯпитэ̄гыт, халанылт пуссын кӯщаиг ат кос о̄лэ̄гыт. Ловиньтан нэ̄пак хаснэ ма̄хум, спортсменхо̄тпат, наука рӯпата ва̄рнэ хо̄тпат та̄н ётаныл о̄с рӯпитэ̄гыт. Ос та̄н халанылт са̄выӈпа̄лэ, ва̄им, ма̄во̄й но̄хвинэ ма̄тт рӯпитан нефтяникхо̄тпат. Ялпыӈ хо̄таланыл кастыл та̄н хосат та̄гыл щё̄питахтэ̄гыт, ва̄рнэ рӯпатаныл урыл тина по̄слувес, са̄всыр нэ̄пакыт тах та̄ратавет. Ты хус та̄л сыс округ Думат рӯпитам ос ань депутатыг о̄лнэ ма̄хум пуссын Ханты-Мансийск ӯсн мӯйлуӈкв тах во̄вавет.

1073 2014.04.04. Николай МЕРОВ

Кол ма̄гыс ойтхатнэ тэ̄ла. Ма̄ньполь э̄тпос Ханты-Мансийск ӯст Общественный палатат рӯпитан ма̄хум сапра̄ни ва̄рыгласыт, та̄н тот жилищнокоммунальный ва̄рмалит урыл потыртасыт. Округ янытыл са̄всыр ма̄ныл пуссын аквъёт налыманкем кӯщай хо̄тпа тыг ёхталас. Общественный палата кӯщай Любовь Чистова ла̄внэ̄тэ щирыл, кол ма̄гыс олн ойтнэ ос колыт ёмащакв щё̄питан тэ̄латытт са̄в ва̄рмаль о̄лы. Са̄выӈпа̄лэ ма̄хум ты урыл нэ̄матыр ат ва̄гыт. Таима̄гыс ты сапра̄нит кӯщай нэ̄ ёхтум ма̄хум ма̄к та̄рвитыӈ ва̄рмалит урыл потыртаӈкве ла̄всанэ. Ань ты накт ма̄хум ва̄тихал кол ма̄гыс ойтхатнэ ва̄рмаль урыл китыглахтэ̄гыт. Манаса̄вит олн ос маныр ма̄гыс ойтаве, ты урыл ЖКХ департамент кӯщай Марат Юсупов потыртас. Тав ла̄выс: «Округувт са̄внакпа колт газ, сыстам вит, кол па̄лтыглан ва̄рмаль урыл ЖКХ департамент ло̄псыт пуссын хансым о̄лы. На̄н интернет хосыт сунсуӈкве ве̄рмегы̄н. Ань ЖКХ департаментыт региональный фонд рӯпиты. Тув са̄внакпа колыт хотщё̄питан ма̄гыс олн та̄ставе. Тувыл ань кол ма̄гыс ойтхатнэ ва̄рмаль акваг уральтым о̄ньщаве. Тынэ а̄рген но̄х ул вос а̄лмаве. Ма̄хум норматив щирыл ойтхатэ̄гыт. Тох ат ке ка̄саще̄гыт, колытт счётчик ӯнттуӈкве ве̄рмегы̄н. Ты хосыт туп э̄рнэ са̄вит олн ойтуӈкве патэ̄гыт». Тувыл ань ос тамле йильпи программа щё̄питавес: 2016 та̄л мус рӯпата лю̄льсаӈ ва̄рнэ ЖКХ компаният арыгтаптавет тах. Ты рӯпата мо̄т ёмас компаниян миве. Ань ты тэ̄лат э̄лаль акваг мӯсхалыг щё̄питаӈкве патавет.

1073 2014.04.04. Тамара МЕРОВА

Та̄л сыс са̄в ёмас тэ̄ла ва̄рвес. Мо̄лты та̄л губернатор Наталья Комарова «Год информационной поддержки добрых дел» намаястэ. Ань ма̄хум ва̄рум ёмас тэ̄ланыл журналистытн та̄рапаттуве̄сыт. Тувыл о̄лыглатта̄л ос номтыӈыг ва̄рим тэ̄лат урыл ёмщаквег хаснэ журналистыт мӯйлупсал майве̄сыт. Ты 2014 та̄л губернаторув «Год доброй воли в Югре» намтуӈкве ла̄выстэ. Ты тэ̄ла хумле щирыл э̄лаль ва̄раве, хоты хо̄тпат ты ва̄рмалитыт рӯпитэ̄гыт, пуссын ты о̄вылтыт журналистыт э̄лыпа̄лт Ирина Максимова потыртас, тав общественный палатат рӯпиты, ня̄врамыт ос ма̄ньлат ма̄хум акваннё̄тхатнэ ассоциацият кӯщаиг о̄лы. Ирина Ивановна ла̄выс: "Ань "Добрая воля" ва̄рмальт ма̄хум та̄нки тэ̄ланыл ка̄сащан щирыл вос ва̄рияныл. Тот хо̄тпа нэ̄мхотьютн ё̄рва̄гыл матыр ва̄руӈкве ул вос кащилтаве. Ка̄сыӈ хо̄тпа такви вос пе̄рии, хо̄т, манхурип тэ̄лат тав ма̄хумн нё̄туӈкве паты. Тувыл са̄всыр нё̄тмил ва̄рнэ тэ̄лат ма̄н мӯсхалыг ханищтасанӯв ос «Зажги свою звезду» нампа проект щё̄питасӯв. Тот ат направление хосыт рӯпитаӈкве ро̄ви. О̄выл ва̄рмаль "Равный равному" намаим о̄лы. Тот ма̄ньлат ма̄хум яныгпа̄ла хо̄тпат ёт акваннё̄тхатым рӯпитаӈкве ве̄рме̄гыт. Китыт тэ̄ла "Волонтёрский всеобуч", тот ма̄хум матхурип йильпи тэ̄лан ханищтавет. Хӯрмит ханищтап «Infoдобро" намтыслӯв. Ма̄н ты сэ̄ръёр тэ̄лат урыл ма̄хумн ма̄к щирыл вос потыртасӯв. Нилыт ва̄рмалюв «Ядоброволец» намтыслӯв. Тот ка̄сыӈ хо̄тпа такви ханьщувлам наканэ̄тыл мо̄т хо̄тпат вос ханищтанув. Ос атыт направление "Меценатство" намаим о̄лы. Тот коммерческий колыт са̄всыр тэ̄лат ва̄рнэ ма̄гыс олн вос та̄стэ̄гыт, та̄н нё̄тмилыл минэ ма̄хманыл ёт аквъёт э̄лаль вос рӯпитэ̄гыт. Ань пуссын ты ат тэ̄лат акванёхтэ̄гыт. Ос ма̄н аквъёт юрщхатым матыр ва̄руӈкве ке патэ̄в, то̄нт рущит ла̄внэ̄ныл хольт совув пе̄ламлы ос ка̄сыӈ ва̄рум тэ̄ланув э̄лаль миргантаӈкв патэ̄гыт. Тамле рӯпатат округ янытыл ла̄щал ва̄руӈкве патве̄сыт. Ты тэ̄латыл матыр пӯмщалаӈкве таӈхегы̄н ке, на̄н общественных ос внутренних связей департамент ос образование, ма̄ньлат ма̄хум ёт рӯпитан департамент ищхӣпыӈ ло̄псыт ля̄ххалыт тах кинсэ̄н.

1073 2014.04.04. Николай МЕРОВ

Ма̄во̄й но̄хвинэ ма̄хум нё̄тэ̄гыт. Мо̄лал «Лукойл – Западная Сибирь» ма̄во̄й но̄хвинэ компания ма̄н редакциявн тамле ла̄тыӈ ке̄тыс. Та̄н «Югра лылыеп» общественный организациян нё̄тмил ва̄рсыт, 5 миллион солко̄ви мисыт. ОАО «Лукойл» компаният ос округ Правительстват рӯпитан ма̄хум халанылт соглашениенэ̄пак хансым о̄ньще̄гыт. Ань ты олнытыл соссаӈ ма̄хманув ма̄гыс съездыт, конференцият, координационный советыт ос ялпыӈ хо̄талыт щё̄питаӈкве патавет. «Лукойл» компания ос «Югра лылыеп» организация хосат та̄гыл аквъёт рӯпитэ̄г. 2010 та̄лныл соглашениенэ̄пак хосыт та̄н пуссын аквъёт 25 миллион солко̄ви са̄всыр тэ̄ла ма̄гыс та̄нанылн майласыт. «Лукойл» компания ке̄тум ля̄ххал ма̄ньщи ла̄тӈыг Н. МЕРОВ хансыстэ.

1073 2014.04.04. Людмила ТЕТКИНА

Мир пусмалтан ма̄гсыл са̄в олн та̄ставе. Ка̄сыӈ са̄тыт Наталья Комарова, губернаторув, такви ва̄ӈын кӯщай хо̄тпанэ акванатыглыянэ. Тот та̄н са̄всыр постановленият, распоряженият пирмайтэ̄гыт. Ос акв тамле сапра̄ни о̄лме порат кӯщаит мир пусмалтан ва̄рмаль урыл потыртасыт. Пирмайтым нэ̄пак щирыл ма̄хум пусмалтан ма̄гсыл федеральный бюджетныл 163 миллион солко̄ви округувн миве. Ма̄н округувт ты тэ̄лан акв миллиард 269 миллион солко̄ви тах та̄сты. Наталья Комарова губернаторув ла̄вме щирыл, ты олнытыл пӯльницат са̄всыр ищхӣпыӈ утыл ёвтавет. Тамле утыл сым а̄гмыт, пувласпи а̄гмыт ос мо̄т та̄рвитыӈ а̄гмыт пусмалтаӈкве ро̄ви. Владислав Нигматулин, округувт мир пусмалтан департаментыт рӯпитан хум, ла̄выс, ювле хультум та̄л сыс тамле ищхӣпыӈ утыл 7 со̄тыра арыгкем хо̄тпа та̄рвитыӈ а̄гманыл пусмалтаве̄сыт. Ос ты та̄л кастыл та̄стым олныл 8 со̄тыра арыгкем э̄лумхо̄лас пусмалтаӈкве то̄вылхаты. Ос аквта порат кӯщаит «Об основах общественного контроля в РФ» нампа са̄ккон урыл потыртасыт. Наталья Комарова ла̄вме щирыл, ты са̄ккон Государственный Думат хунь пирмайтаве, то̄нт ма̄хманув кӯщаит уральтаӈкве тах ве̄рмияныл. Общественный объединеният тамле рӯпата ва̄руӈкве патэ̄гыт. Ты са̄ккон таима̄гсыл пирмайтаве, кӯщаит та̄нки рӯпатаныл мӯсхалыг вос ва̄рияныл.

1073 2014.04.04. Александр ВЬЮТКИН

Акв сунпаттаӈ касыл. Сочи ӯст а̄гмыӈмосаӈ ос сакватахтам ма̄хум халт касыл минам юипа̄лт Ханты-Мансийск ӯст следжхоккеил каснэ хум ёт прессконференция ва̄рыглавес. Та хум наме Константин Шихов. Тав округувт ма̄ следжхоккейт каснэ ма̄хум халт капитаныг пе̄риим о̄лы. Тав ётэ иӈ Эдуард Исаков ос Александр Зыков о̄лсы̄г. Тэ̄н сас са̄кватахтам ма̄хум каснэ щирыл щё̄питан кӯщаиг рӯпитэ̄г. Ты касылт ла̄глыл ат ё̄мыгтан ма̄хум ёнгэ̄гыт. Та̄н акв э̄лмиӈ те̄р сунпаттаӈ сунын ӯнттым ос ёмщаквег ёлнэ̄гсалахтым я̄ӈк тармыл яласэ̄гыт. Ка̄танылт ос тит ма̄нь клюшка пувим о̄ньще̄гыт, таияныл ёт ты касэ̄гыт. Эдуард Исаков ла̄выс: «Ма̄н палтылув ты нампа касыл ва̄рим па̄сныл моще̄ртын ат та̄лыг ты е̄мты. Мо̄т хо̄н ма̄ ма̄хум палт тав хосат та̄гыл ва̄ве. США хо̄н ма̄т тамле сыр хоккеил хо̄тпан нупыл ат ма̄т касэ̄гыт. Таима̄гсыл ща̄рыщ тапалт о̄лнэ ма̄т Россият каснэ ма̄гыс кӯпнитнув ма̄хум пе̄рияӈкв о̄лыс. Ма̄н ос Россия ма̄в янытыл хо̄т ма̄т туп тамле касылн ма̄хум ханищтавет. Сочи ӯст касум ма̄хманув хосат акванатсанӯв. Ма̄н та̄наныл ёмщакве̄г ва̄ганӯв. Ма̄н каснэ ма̄хманув нила та̄л сыс са̄в а̄лымасыт, ёмщакве̄г щё̄питахасыт». Тувыл ма̄к следжхоккейт каснэ хум Константин Шихов потыртас: «Ты касыл ма̄гсыл ма̄н кӯщаянув са̄в ёмас тэ̄ла ва̄рсыт. Ам та̄нанылн яныг пӯмащипа ла̄тыӈ ла̄ве̄гум. Хунь ам щар о̄выл щёс ты касылн во̄вве̄сум, ам номсахтасум, манрыг а̄нум тыи э̄ри, ам сун тармыл ӯнлуӈкв ат ве̄рме̄гум, ты коныпал иӈ ёнгуӈкв э̄ри. Мощ ёнгимам юипа̄лт, ам торгамтаслум, ты касыл та̄л о̄лупсам тамле пӯмщиг ат о̄лнӯв. Ань ты Сочи ӯст о̄лум касылн ма̄н э̄тэхо̄талэ сыс щё̄питахтасӯв. Ты касылт Россия ма̄в ма̄гсыл ма̄н ма̄нтина̄нув щар ат са̄литасанӯв, ща̄лыго̄лн те̄р по̄с висӯв». Каснэ хум юипа̄лт таве щё̄питан хум Александр Зыков потыртас: «Со̄ль, хунь ма̄н тув щё̄питахтумув порат, ма̄нтирот номсахтасӯв. Ма̄навн э̄лыо̄вылн хотты ма̄н те е̄мтуӈкв, ёмасыг о̄лнув. Ма̄ янытыл са̄в ёмас ё̄р следжхоккеил ёнгын команда о̄лы. Аквъёт нё̄тхатым каснэ ма̄хманув титыт ма̄ висыт». Прессконференция оигпан э̄лыпа̄лт Эдуард Исаков ла̄выс: «Ма̄н ань следжхоккейт ёнгасан ма̄гсыл иӈ тит команда атуӈкв номсэ̄в. Хотьют таквина̄тэ уральтаӈкв ка̄сащи те, звонитэ̄н, ёхталэ̄н».

1073 2014.04.04. Людмила ТЕТКИНА

Тав яласам лё̄ӈхе хосыт ма̄хум ёсал ха̄йтсыт. Ха̄льӯс районт «Лыжнёй Андрея» нампа касыл о̄лыс. Ня̄врамыт ос ма̄ньлат хо̄тпат Саранпа̄вылныл Кульпас мус ёсал хӯрум хо̄тал ё̄мсыт. Акв э̄т та̄н Хо̄рыӈпа̄вылт хӯлсыт, мо̄т э̄т Ло̄пмус па̄вылт. Ты та̄л 26 э̄лумхо̄лас ёсал ты лё̄ӈхыл минасыт. Тамле пӯмащ касыл Андрей Яковлевич Хатанев тав ва̄руӈкве номылматас. Ма̄ньщи хум Саранпа̄выл школат ня̄врам ханищтан хумыг рӯпитас. Та па̄сныл са̄в та̄л ювле хультыс, Татьяна Степановна Гоголева ёсал ха̄йтнэ тэ̄ла но̄хво̄рмалтаӈкве номылматастэ. О̄выл щёс Саранпа̄вылт о̄лнэ ма̄хум 2009 та̄л Кульпас мус минасыт. Татьяна Степановнан Олег Хатанев нё̄ты, ты Андрей Яковлевич Хатанев тав пыге. Тав о̄с а̄тятэ хольт каснэ ва̄рмаль щирыл рӯпиты. Олег ты рӯпата урыл тох ла̄выс: «1960-1980 та̄лытыт Саранпа̄вылт о̄лнэ ма̄хум ка̄сыӈ та̄л Кульпас мус ос ювле ёсал ялсыт, ты лё̄ӈх палытэ 120 ве̄рыста. Аквнакт Кульпаст ос Ло̄пмуст о̄лнэ ма̄хум Саранпа̄вылн ёсал ё̄мсыт. «Югра-Мегаспорт» нампа организациян ос Татьяна Степановна Гоголеван ам яныг пӯмащипа ла̄тыӈ ла̄ве̄гум, ка̄сыӈ та̄л ты касыл ва̄руӈкве нё̄тэ̄гыт». Елена Савчук, Кульпаст о̄лнэ нэ̄, ты та̄л о̄выл щёс ёсал ё̄мыс. Тав ла̄выс: «О̄выл хо̄тал ма̄н Саранпа̄вылныл Хо̄рыӈпа̄выл мус минасӯв. Ты па̄выл мус 40 ве̄рыста. Китыт хо̄тал Ло̄пмусн ёхтысӯв. Таса̄вит ве̄рыста ёсал ха̄йтуӈкве, ам мощ ва̄гта̄л патсум». Ма̄хум халт щар яныг хо̄тпаг Иван Вокуев о̄лы. Тав о̄с мо̄т ма̄хум ёт ёсал ха̄йтнэ ты касыл щё̄питы. Тав ла̄выс: «Ме̄н Андрей Яковлевич ёт школат аквъёт рӯпитасме̄н. То̄нт тав ты рӯпата ва̄руӈкве о̄вылтастэ. Матъёмас ань тав пыге ос мо̄т ма̄хум тав о̄вылтам тэ̄латэ э̄лаль тотыяныл ос ня̄врамыт акванатыглыяныл. Ам амки о̄с са̄в та̄л ня̄врамыт ёт рӯпитасум, 70 та̄лум то̄влыс, ханищтан пыганум акваг ам палтум ёхталэ̄гыт, тох ам каснэ ва̄рмалюм урыл ат ёрувлэ̄гум». Алексей Хатанзеев Саранпа̄вылт «Поиск» нампа центрыт ня̄врамыт ёт рӯпиты. Тав ла̄выс: «Ня̄врамыт ёт ма̄н ёсал акваг ха̄йтыгтэ̄в, халувт касэ̄в. Тыи ма̄гсыл акв па̄вылныл мо̄т па̄выл мус минуӈкве ма̄н пуссын ве̄рме̄в. Ам Иван Николаевич Вокуевын яныг пӯмащипа ла̄тыӈ ла̄ве̄гум. Тав ма̄нав ма̄ньта̄гыл ёсал ха̄йтуӈкве ханищтастэ. Тав палтэ ялантан ня̄врамыт пуссын ёмас хо̄тпаг яныгмасыт, то̄ват МЧСыт, то̄ват на̄й харыгтан хо̄тпаг, ле̄ккарыг, ня̄врам ханищтан колт рӯпитэ̄гыт». Кульпаст ёсал ёхтум хо̄тпат пуссын па̄влыӈ ма̄хумн ӯрве̄сыт. Мӯй ма̄хум ма̄гсыл та̄н ялпыӈ хо̄тал ва̄рсыт. Ос аквта порат Саранпа̄выл музейт рӯпитан хо̄тпат «На горных ветрах времени» нампа конференция ва̄рыгласыт. Н. Анадеева ке̄тум потре ма̄ньщи ла̄тӈыл Л. Теткина хансыстэ.

1073 2014.04.04. Светлана РОМБАНДЕЕВА

Сӯкыръя па̄выл школа. Ха̄льӯс район Сӯкыръя па̄вылт о̄выл классытт ханищтахтан школа о̄лы. Та школат ма̄нь ня̄врам садик рӯпиты. Сӯкыръян ялмум порат ам тув щалтсасум, тот рӯпитан ма̄хум ёт хо̄нтхатыгласум, потрамасум. Кӯщай ва̄ӈын нэ̄ потре Тамара Савельевна Ванюта кӯщай ва̄ӈын нэ̄г о̄лы, тав ла̄внэ̄тэ щирыл, школаныл ань Саранпа̄выл школа нупыл паттувес, кӯщаяныл Андрей Дмитриевич Попов. –Школавт хӯрум ня̄врам ханищтахты о̄выл классыт акв ня̄врам, китыт акв, нилыт о̄с акв ня̄врам. Та̄наныл ханищтан нэ̄г Евгения Андреевна Гриценко ос Ольга Андреевна Ванюта. Мо̄лты та̄л кит ня̄врам ханищтахтас, мо̄тынтыг тах о̄с туп кит ня̄врам ханищтахтуӈкве паты. Садикын ос лов ня̄врам яланты. Школав аквхуйплов та̄л ты рӯпиты. Кит хо̄тпа ня̄врам ханищтэ̄г, кит воспитатель садикт рӯпитэ̄г. Пуссын аквъёт ма̄н тыт са̄тхуйплов хо̄тпа рӯпитэ̄в. Са̄выӈпа̄лэ Саранпа̄вылт о̄лэ̄в, ка̄сыӈ хо̄тал тыг рӯпитаӈкве та ёхталэ̄в, па̄влыг халэ̄н ат ве̄рыста. Ань автобус яласы, тув та̄лматэ̄в. Хотьют машина о̄ньщи, тай кӯстырнуве, та̄нти яласэ̄гыт. Э̄рнэ нэ̄пакыт, са̄всыр ищхӣпыӈ утыт, та маныр пуссын о̄ньще̄в. Кӯщаювн акваг нё̄таве̄в, матыр э̄рмыглы, та̄в та̄ра ке̄тхаты. Ты та̄л садик ма̄гыс са̄всыр ёнгын утыт ёвтавет. Школавт ре̄гыӈ, кӯре па̄лтыглым нила хо̄тпа рӯпиты, та̄н пуссын Сӯкыръят о̄лэ̄гыт, ня̄враманыл ты школан ос садикын ялантэ̄гыт. Тамара Савельевна а̄ги о̄парищ наме Вьюткина, 1974 та̄лт самын патыс. А̄тятэ Ме̄сыг па̄вылныл о̄лыс, оматэ ос Тутлейм па̄выл нэ̄. Э̄кваго̄йкаг ань сас а̄тимыг. Увщитэ Татьяна Савельевна ще̄мьятэ ёт Ханты-Мансийск ӯст о̄лы. Тамара Савельевна кит ня̄врам о̄ньщи. Артём пыге онтолов классыт, Зина а̄гитэ ос китыт классыт Саранпа̄выл школат ханищтахтэ̄г. О̄йкатэ Юрий Алексеевич ма̄ньщи хум, Со̄рахта нупыл хӯл алыщлаӈкве ос во̄раяӈкве яланты. Туи порат та̄н ще̄мьяӈ та̄гыл Ме̄сыг па̄вылн ялантэ̄гыт, щаще̄кватэ кол уральтыяныл. Тот пил ва̄тэ̄гыт, хӯл алыщлэ̄гыт. Ня̄врамыт ханищтан нэ̄ Евгения Андреевна Гриценко ня̄врамыт ханищтым лов та̄л рӯпиты. На̄н ань тав потре ловиньтэлы̄н: –Ты школат рӯпитаӈкве а̄нум сака мӯсты, аквъёт рӯпитан ма̄хманум пуссын ёмас хо̄тпаквет, акваннё̄тхатым рӯпитэ̄в. Тыт ань хӯрум ня̄врам ханищтахты, ка̄сыӈ классыт акв ня̄врам. Э̄рнэ нэ̄пакыт о̄ньще̄в, матыра̄ти пуссын о̄лы. Хотты нэ̄пак ман матыр ищхӣпыӈ ут э̄рмыглы те, хасылтэ̄в, ке̄тхатэ̄в, каникулыт сыс тотаве̄в. Ня̄врамыт ма̄гсыл са̄всыр конкурсыт ва̄рыглэ̄в, халанылт касэ̄гыт, тувыл хотьютаныл хоты места вы̄г, дипломытыл ос мӯйлупсатыл мыганӯв. Кол тӣвырт ханищтахтынэ̄ныл коныпал, ма̄лтып хо̄талытт та̄н кон ёнгасэ̄гыт, физкультура урок порат ёсал ос сунсовыл тахсэ̄гыт. Ам Саранпа̄вылт самын патсум. А̄тям ань пенсият о̄лы, омам пӯльницат рӯпиты. Пыг о̄ньще̄гум, хо̄тыт классыт ханищтахты. Ане̄квам Анастасия Ивановна Сангилева, Няхлаӈ па̄выл ма̄ньщи хо̄тпа. Тав ань ма̄н ётув о̄лы, паляге̄тыл сака ат хӯлы, самаге о̄с лю̄льсаӈ постэ̄г. Саранпа̄вылт щар яныг хо̄тпа тав ты, яныгполь э̄тпост 96 та̄лэ то̄влы. Нила ня̄врам о̄ньщиглас хӯрум пыг, акв а̄ги, тыи ам омам. Пыганэ пуссын а̄тимыт, омам такте̄т хультыс. Ань потруме̄н та оигпас. Садикт рӯпитан нэ̄кве̄г Хурит ос садикт рӯпитан нэ̄г по̄слым о̄лэ̄г – воспитатель Елена Григорьевна Кропотова ос ма̄нь ле̄ккар Ирина Германовна Кустышева. Елена Григорьевна Ханты-Мансийск ӯст педагогический колледж а̄стлас, тувыл та̄ра Сӯкыръя садикн рӯпитаӈкве патхатас. Тав ла̄внэ̄тэ щирыл, ань тув лов ня̄врам яланты, пуссын иӈ ма̄нит, китхӯрум та̄л яныт ня̄врамаквет. Рӯпитаӈкве таве̄н мӯсты, э̄рнэ матыр пуссын о̄ньще̄гыт. Ёнгын утыт, нэ̄пакыт, телевизор, са̄всыр ищхӣпыӈ утыт, та маныр, пуссын о̄лы. Ня̄врамыт тэ̄нутыл па̄йтавет, тыттавет. Елена Саранпа̄вылт олы, Сӯкыръян та̄н ань автобусыл ёхталэ̄гыт, туи порат ос ха̄пыл яласаӈкве патэ̄гыт. Елена Григорьевна Саранпа̄вылт самын патыс, тот яныгмас. Оматэ ё̄рн нэ̄, а̄тятэ ма̄ньщи хум. Тэ̄н ань сас а̄тимыг. Елена кит каӈк ос увщи о̄ньщи, та̄н щаще̄кваныл палт яныгмасыт. Щаще̄кваныл Евдокия Илларионовна Тальмич, а̄ги о̄парищ наме Рахтымова, Сӯкыръя нэ̄, ань Саранпа̄вылт о̄лы. Елена кит ня̄врам о̄ньщи, пыге о̄выл классыт ханищтахты, а̄гитэ ты та̄л школан мины. Ирина Германовна о̄с Саранпа̄вылт о̄лы. Сӯкыръят рӯпитанэ̄тэ лов та̄лыг ты то̄влыс. Тыг патхатаме э̄лыпа̄лт Саранпа̄выл пӯльницат ма̄нь ле̄ккарыг рӯпитас. Ань тыт ня̄врамыт ёт рӯпитаӈкве таве̄н мӯсты, э̄рнэ тэ̄рпи пуссын о̄лы. Прививкатыл ня̄врамыт Саранпа̄вылт ва̄равет. Сӯкыръя па̄выл – нё̄тнэ ма̄ньщи па̄вылкве, тыт о̄луӈкве та̄нанылн сака ёмас, лылые̄пе сыстам. Ирина Германовна Ха̄льӯст самын патыс, хо̄т та̄лэ то̄влуме порат ще̄мьятэ Саранпа̄вылн ва̄нтлыс. О̄йкатэ соссаӈ хум, совхозт трактористыг рӯпиты. Тэ̄н хӯрум ня̄врам о̄ньще̄г. Яныг а̄гитэ̄н ще̄мьяӈ та̄гыл Саранпа̄вылт о̄лы, пыге̄н Ханты-Мансийск ӯст медицинский академият ханищтахты. Ма̄нь а̄гитэ̄н нила та̄лэ, садикн яланты, ма̄ньщи ла̄тыӈ ханищты. Тот ань ща̄нь ла̄тыӈ ханищтан группа о̄лы, а̄гирище̄н тув яланты, ма̄ньщи ла̄тӈыл са̄всыр стихотвореният ханищты. Ирина Германовна мовиньты, ла̄ви, та̄н ань юн таве̄н пуссын нё̄тэ̄гыт, ма̄ньщи ла̄тыӈ аквъёт ханищтэ̄гыт. Садикын щалтсамум порат, ня̄врамыт ань хо̄талъя̄тт тэ̄пъяламаныл юипа̄лт ёлхуюптымат, ат та по̄слысанум. Школат рӯпитан ма̄хум ос ня̄врамыт тай мощ по̄слысанум. Ты я̄тил ма̄ньщи ма̄хуматенув, ня̄врамаквет пуссын пуста̄гыл вос о̄лэ̄гыт, На̄янылн-О̄тыранылн вос ӯргалавет!

1073 2014.04.04. Светлана РОМБАНДЕЕВА

Ха̄ӈла ос Ло̄пмус па̄выл ма̄хум. Ха̄льӯс район Саранпа̄вылн ялмум порат ам акв ма̄ньщи ще̄мья ёт хо̄нтхатыгласум. Дмитрий Николаевич ос Татьяна Васильевна Ивановыг нила ня̄врам янмалтэ̄г. На̄н ань Дмитрий Николаевич потре ловиньтэлы̄н: – Ам Саранпа̄вылт самын патсум, 1977 та̄лт ва̄т са̄грапнал э̄тпост. Ма̄н ще̄мьявт ат ня̄врам о̄лыс, ам щар яныг. Виктория э̄щум о̄с тыт Саранпа̄вылт о̄лы. Ма̄ньнув э̄щагум, Людмила ос Рая, Югорск ӯст о̄лэ̄г. Виталий а̄пщив а̄тимыг е̄мтыс. Омав Прасковья Дмитриевна, а̄ги о̄парищ наме Сайнахова, о̄с хосат хотталь щалтыс. Ма̄н яглаӈумн янмалтавесӯв, Виктор Семёнович Егоров. Тав ты ма̄н Волгоград ӯсныл ёхталас, нё̄рт рӯпитас. Омам ёт тыт акванхо̄нтхатсы̄г, акванминасы̄г, ам то̄нт ма̄ниг о̄лсум. Яглаӈум о̄с а̄тимыг е̄мтыс. Ане̄квам Лукерья Дмитриевна Сайнахова Ха̄ӈла па̄вылныл о̄лыс. Тэ̄н ащо̄йкам ёт нила ня̄врам о̄ньщигласы̄г, хӯрум пыг ос акв а̄ги, ты ма̄н омав. Та̄н Ха̄ӈла па̄вылт яныгмасыт. Ане̄квагумащо̄йкагум тэ̄нти ня̄враманэ̄н коныпал, кит савалап ня̄врам янмалтасы̄г, Артеев а̄гирищигпыгрищиг, Миша ос Лида. Тэ̄н ща̄няге̄на̄щаге̄н саран нэ̄гхумыг о̄лсы̄г. Ня̄врамыт пуссын аквъёт яныгмасыт. Михаил Тюмень ӯст о̄лы. Лида ос Ха̄льӯст, о̄йкатэ щирыл ань мо̄т о̄парищ намыл о̄лы. Омам яныг ягпыге Николай Ванзеват па̄вылт о̄лы, Василий Ха̄льӯст о̄лы. Семён каӈке Ямал ма̄т о̄лыс, кит пыг янмалтас. Хотталь щалтме атах та̄лыг ты е̄мты. 1979 та̄лт ане̄квам колэ на̄йн но̄хё̄свес, кипятильникыл вит исылтас, тувыл хотмус но̄ххораяс. То̄нт ам та̄л арыгтем туп о̄лсум. Тав а̄нум кон тотыгпастэ, ань документанэ ма̄гыс аквтув ювле щалтапи, то̄нт та алпитэ янытэ̄т на̄йн котаравес. О̄влэ̄т Ха̄льӯс пӯльницан тотыглавес, тувыл Вася пыге̄н Тюмень ӯсн тотвес. Тот о̄с мощ пусмалтавес, тох иӈ но̄х ат ве̄рмхатас, кит са̄ттем туп о̄лыс, а̄тимыг та е̄мтыс. Ане̄квам, лаве̄гыт, сака та̄ксар нэ̄ о̄лыс. Тамле нак ат те е̄мтыс, улпыл хоса о̄лнув. Коланыл я̄ ва̄та нупыл ӯнлыс, ань та ма̄т мо̄т кол ӯнлы, тот рӯт ма̄хманув о̄лэ̄гыт. – Дмитрий Николаевич, э̄кван хотыл о̄лы? – Э̄квам Татьяна Васильевна, а̄ги о̄парищ наме Чалданова, Ло̄пмус па̄вылныл о̄лы. Ме̄н нила ня̄врам о̄ньщиме̄н, яныг пыгме̄н ты та̄л о̄выл классын минас. Китгагме̄н садикын ялантэ̄г, щар ма̄нь а̄гиме̄н са̄тыт э̄тпосэ туп то̄влыс. Ам кол ӯнттын ма̄т рӯпитэ̄гум. То̄ванакт хӯл алыщлаӈкве ман во̄раяӈкве Ло̄пмус нупыл ялантэ̄гум, Тораст во̄ркол о̄ньще̄гум. Ты таквсы хӯл мощ пувсув, ӯйсов ань тай щар тынта̄лыг е̄мтыс, сака ат китыглаве. Ань потруме̄н та оигпас. Дмитрий Иванович ще̄мьятэ ёт та̄нти колт о̄лэ̄гыт. Э̄кватэ тамле ёмас нэ̄, юн акваг матыр колсори рӯпата ва̄ри, посхаты, тэ̄нут па̄йты. Ам ТатьянаВасильевна китыгласлум, хо̄т самын патыс, э̄лаль ань тав потре ловиньтэлы̄н: – Ам Лопмус па̄вылт самын патсум, яныгмасум. Тот ань омам о̄лы, наме Маргарита Геннадьевна. Ма̄н ще̄мьявт ат ня̄врам о̄лсув. Надя увщим ще̄мьятэ ёт Кульпаст о̄лы, Василиса э̄щум о̄с ще̄мьяӈыг е̄мтыс, о̄йкатэ̄нтыл хӯрум ня̄врам о̄ньще̄г, Ло̄пмуст о̄лэ̄гыт. А̄тяв Василий Степанович клуб колт рӯпитас. Та порат, 1985 та̄лытт, Ло̄пмуст пе̄с клуб кол ӯнлыс. А̄тяв тув са̄всыр инструментыт манос ёнгын утыт хасылта̄лыс. Мощ ётылнуве клубын тотыглаве̄сыт. Ма̄хум ань ты хо̄тал мус номияныл, ла̄ве̄гыт, та̄н клубт татем ӯщлахтасыт, э̄ргысыт, ёнгасасыт. А̄тяв ос каӈкагува̄пщиягув а̄тимыг е̄мтсыт. Омав ань юн такте̄т о̄лы, апыгрищанэ тав палтэ акваг ха̄йтэ̄гыт, ане̄кваныл э̄руптыяныл. Кит мис о̄ньщи акв поснэ мис, мо̄танэ иӈ ма̄нь. Туи порат пум ва̄ри, а̄гияге̄нва̄псаге̄н нё̄таве. Ты я̄тил ма̄ньщи ще̄мья пуста̄гыл вос о̄лы, ня̄врамыт со̄тыӈыщ вос яныгме̄гыт. На̄янылн-О̄тыранылн вос ӯргалавет! Пус ка̄т, пус ла̄гыл!

1073 2014.04.04. Людмила ТЕТКИНА

Ма̄ньщит – ма̄ сым ма̄хум. «Торум Маа» музейт Светлана Динисламова (Садомина) щё̄питам суссылтапе рӯпитаӈкве о̄вылтахтас. Ма̄ньщи нэ̄ такви рӯтанэ наманыл Алгадьевыт, Садоминыт, Новьюховыт (Носкиныт) ос Кугиныт акв яныг нэ̄пакн хассанэ. О̄влэ̄т выставкан ёхтум ма̄хум э̄лыпа̄лт Светлана Астапович, «Торум Маа» музейт рӯпитан нэ̄, ла̄тыӈ ла̄выс: «2008 та̄лт ма̄н о̄выл щёс «История семьи в истории страны след прожитой жизни» нампа суссылтап ва̄рыгласӯв. Мӯй ма̄хманув ты урыл сака пӯмщалахтасыт. Тыхо̄тал Алгадьевыт, Садоминыт, Кугиныт ос Новьюховыт (Носкиныт) хумус та̄нки халанылт рӯтыг о̄лэ̄гыт, тыт ловиньтаӈкве ро̄ви. Светлана Селивёрстовна такви рӯтанэ урыл ва̄рум суссылтапе «Люди сердца Земли» намаястэ. Тамле нам тав Савелий э̄ргум э̄рге̄тыл вистэ. Савелий Сотам ла̄выглас: «Пе̄с порат сараныт ма̄ньщит вогулыг ос во̄рт о̄лнэ ма̄хмыг ла̄выгласаныл. Ма̄ньщит – Ма̄ сым ма̄хум, та̄н Ма̄лтып ма̄ныл тыг ёхтысыт, хо̄т ма̄ киттыгӯртвес». Ты ла̄тыӈ «Паща рума» Николай Михайлович Садомин нэ̄паке̄т хансым о̄лы. Светлана ты рӯпататэ 1995 та̄лт ва̄руӈкве о̄вылтастэ, то̄нт оматэ Татьяна Романовна Садомина (Кугина) такви рӯтанэ урыл потыртас. Та̄н урыл ла̄тыӈ кинсым, ма̄ньщи нэ̄ Ха̄льӯст о̄лнэ архивын ялыс, тот рӯпитас. Интернетыт «Мемориал» нампа архивыт хо̄нтлум рӯтанэ урыл ла̄тыӈ хо̄нтыс. Тот хансым о̄лы, хо̄т та̄н хо̄нтласыт, хунь порславе̄сыт ос хоты ма̄т ёлщё̄питаве̄сыт. Светлана ты рӯтанэ кинсым Хулюмсунт, Саранпа̄вылн, Кульпасн ялыс, тот о̄лнэ ма̄хум ёт хо̄нтхатыглас. Ты юипа̄лт тав яныг таблицакапай ва̄рыс, тув акв со̄тыра арыгкем рӯт ма̄хманэ наманыл хассанэ. Тав нэ̄паке щирыл нила ще̄мья – Алгадьевыт, Садоминыт, Новьюховыт (Носкиныт) ос Кугиныт пуссын акв рӯтыг о̄лэ̄гыт. Светлана Селивёрстовна ла̄выс: «Ты рӯпата ва̄руӈкве а̄нумн сака мӯстыс, яныг пӯмащипа ла̄тыӈ а̄нумн нё̄тум хо̄тпатн ла̄ве̄гум. Пе̄с порат о̄лум ма̄хманум ос ань о̄лнэ рӯтанум пуссын акв нэ̄пакн хассанум. Таяныт таблица ва̄рнэм сыс, торгамтаслум–таса̄вит рӯт о̄ньще̄гум». Светлана а̄тятэ Селивёрст Семёнович Садомин. Тувыл нэ̄ таи хо̄нтыс, а̄тятэ Алгадьев о̄лум. Селивёрст Семёнович ма̄нь ня̄врамыг а̄щ та̄л хультыс. Оматэ мо̄т о̄йка ва̄рыс, ма̄нь пыгрищ ӯвщитэ̄н янмалтавес. Ма̄нь Селивёрст Ме̄ӈквъя па̄вылныл Кульпас па̄вылн о̄луӈкве тотвес. Садоминыт таве та̄нки о̄парищ намыл хассаныл, тох Селивёрст Садоминыг патыс. Тав ка̄ркамыг ос ёмас хо̄тпаг о̄лыс. Война порат хо̄нтлас, Берлин ӯс мус ялыс. Яныг хо̄нт оигпаме юипа̄лт нэ̄ тотыс, э̄кватэ̄нтыл са̄в ня̄врам янмалтасы̄г. Музейт тав э̄сгын нэ̄паканэ, ма̄глын тагатан по̄санэ о̄с ка̄салаӈкве ро̄ви.

1073 2014.04.04. Александр ВЬЮТКИН

Йильпи та̄лн йильпи номтыл. Белоярский ӯст «Год культуры 2014» нампа хо̄тал ва̄рыглавес. Та ва̄рмаль «Центр культур» нампа колт о̄лыс. Районаныл янытыл ма̄щтыр ханты ма̄хум пуссын выставкан во̄виньта̄лве̄сыт. Та̄н тот та̄нти ю̄нтум пормасаныл суссылтасаныл. Тув ёхталам ма̄хум халт хотьютаныл ка̄сащас, о̄с матыр ма̄щтырлаӈкв ве̄рмыс. Тот совныл ю̄нтым тучаӈыт, ня̄врамыт о̄щнэ совъя ва̄ит со̄сныл па̄йтым э̄льмыл хорамтасаныл. Та коныпал то̄рныл са̄всыр а̄канит ос пе̄с порат пуӈкын пиннэ э̄ква то̄рыт ю̄нтсыт. Ня̄врамыт халанылт ос туслы нампа пе̄с ёнгилыл ёнгысыт. То̄ват ос нарсъюхыл са̄ӈквылтаӈкв ханищтахтасыт. Та̄н Олег Потпот ханищтаве̄сыт. Тав хуньт хосат ос Дмитрий Георгиевич Агеев палт ханищтахтас. Тувыл А̄с-угорский театрыт рӯпитас. Ань ня̄врамыт са̄ӈквылтаӈкв ханищтым ос нарсьюхыт ва̄рим аквта «Центр культуры» колт рӯпиты. Выставка тит щё̄с ляпатем рӯпитас, та юипа̄лт концерт ва̄рыглавес. Концерт о̄вылтахтын э̄лыпа̄лт Белоярский район кӯщаӣ хум Сергей Петрович Маненков ва̄рум рӯпатаныл урыл потыртас. Тав потре э̄лаль ловиньтэлы̄н: «2013 та̄л сыс ма̄н районув янытыл са̄в йильпи ёмас лё̄ӈх, о̄лнэ ос ханищтахтын кол ӯнттысӯв. Ва̄рум рӯпатав ма̄гсыл 4 млн. 196 со̄тыра солко̄ви ойтым о̄лыс. А̄нумн на̄н халынт о̄луӈкв пӯмащ. Ам кӯщаиг рӯпитаӈкв о̄вылтахтамум па̄сныл моще̄рт атхойплов та̄лыг ты то̄влы. Мо̄лты та̄л Белоярский ӯсув округувт щар ёмас, сыстам ӯсыг пе̄риим о̄лыс. Ка̄сыӈ ёхтын та̄л ма̄н ӯсув самын патнэ ня̄врамытыл са̄вми. Минам та̄л сыс пӯльницат 434 ня̄врам самын патыс. Ам ва̄глум, ӯсувт та̄н ханищтахтын ма̄л пуссын то̄влавет. Хӯрум та̄лыг ты е̄мтыс, хунь ма̄н о̄выл щёс ты урыл номсахтаӈкв патсӯв. Тувыл яныг пӯмащипа ам а̄лы ма̄ныл тыг ёхтын ма̄хмытын ла̄ве̄гум. Та̄н тыг о̄лмыгтэ̄гыт, нэ̄матыр лю̄ль ат ва̄ре̄гыт. Та сыс та̄н акваннё̄тхатым юртыӈыщ о̄лэ̄гыт. Ка̄сыӈ колн са̄в со̄т, са̄в щунь, са̄в та̄л пуста̄гыл на̄нан о̄луӈкв ла̄ве̄гум». Сергей Петрович потыртан ма̄ныл а̄стуме юипа̄лт концерт та о̄вылтавес. Э̄ргыт, йӣквыт суссылтан ма̄гыс са̄в мир округ янытыл ёхталас. Сака пӯмыщ о̄лыс.

1073 2014.04.04. Александр ВЬЮТКИН

Ха̄пыт суссылтаве̄сыт. Мощ мо̄лалнув Ханты-Мансийск ӯст о̄лнэ «Центр ремёсел» колт йӣвныл са̄грим ханты ма̄ньха̄пыт выставкат суссылтаве̄сыт. Ты пӯмащ Нягань ӯст о̄лнэ ма̄щтыр хум щё̄пита̄лыгла̄стэ. Тав наме Сергей Константинович Лукьянченко. Сергей Константинович такви ка̄тыл хурит по̄слын хумыг ханищтахтас. Ань ат та̄лыг ты е̄мтыс, хунь тав о̄выл щёс йӣвныл ма̄щтырлаӈкв о̄вылтахтас. Ма̄ньха̄пыл каснэ ва̄рмаль е̄мталан порат тав ханты ма̄хум яласан ма̄ньха̄п са̄груӈкв номылматас. Нижневартовский районт о̄лнэ са̄лыӈ кол хум Семён Айпин палт ха̄п ва̄рнэ щирыл ханищтахтуӈкв минас. Щар о̄выл ха̄пе тит хо̄тпаг са̄т хо̄тал са̄грыстэ̄н. Сергей Константинович ха̄нты хумн маныр ос хумус пасатаӈкв ос хо̄т э̄ри са̄груӈкв, хӯлтвес. Та па̄сныл тит та̄лыг ты то̄влыс. Ма̄щтыр о̄выл ва̄рнэ ха̄панэ торыӈ щирыл ат а̄ртмысыт. Хоты ха̄пе сови хартаве, мо̄тананэ па̄лыгпоклысыт, тувыл такви са̄в ха̄п сака во̄втаг саграпа̄лсанэ. Ты коныпал тав иӈ са̄в са̄всыр туп са̄грыс. Тувыл такви номтанэ щирыл хорамтасанэ. 2013 та̄лт Сергей Константинович ха̄пыл щё̄питым выставкатэ Москва ӯсн тотыглавес. Тот ат хо̄тал суссылтапе рӯпитан сыс ат со̄тыра ляпатем ма̄хум тав палтылэ щалтсас. Мӯй ма̄хум Сергей ёт акваг потыртасыт ос тав ётэ по̄слахтасыт. Та юипа̄лт тав та̄ра «Народный мастер России» намыл пинвес. Ань ос йильпи ва̄рум выставкатэ Ханты-Мансийск ӯст суссылтаве. Хотьют ка̄сащи, ялэ̄н, сунсэ̄н.

1073 2014.04.04. Тамара МЕРОВА

Соссаӈ нэ̄тхумит кассыт. Ювле хультум э̄тпост Сургутский район Русскинская па̄вылт са̄лы ӯрнэ, во̄раян ос хӯл алыщлан ханты ос ё̄рн ма̄хум ялпыӈ хо̄талыл ва̄рыглаве̄сыт. Тамле ва̄рмаль район ос па̄влыӈ кӯщаит акваг щё̄пита̄лэ̄гыт. Па̄вылн ань са̄всыр ма̄ныл мӯй ма̄хум ёхталасыт. Соссаӈ ма̄хум ялпыӈ хо̄таланыл са̄лыт ха̄йтнэ касылыл о̄вылтавес. Ты та̄л сака са̄в са̄лыӈ ма̄хум тув ёхталас. Русскинская, Нижний Сортым па̄влыгт ос ты ляпат во̄рыӈ ма̄т о̄лнэ хантыт ос ё̄рныт коныпал тув Белоярский район Нумто ма̄ныл Пяк колта̄гыл касуӈкве ёхталас. Ань са̄лыт о̄щнэ атпан хум хо̄тпат та̄нки халанылт кассыт. Ос я̄нас касылыт ва̄т са̄виткем нэ̄ хо̄тпат касуӈкве ка̄сащасыт. Са̄лыӈ ма̄хум кит хо̄тпал аквторыг касуӈкве во̄виньта̄лве̄сыт, ты э̄лыпа̄лт та̄н нэ̄пакн хансым о̄лсыт ос вим номераныл щирыл ла̄кквауртве̄сыт. Касылт то̄ва хо̄тпат са̄лыяныл та̄ра ёмащакв нёвумтэ̄гыт, то̄ват ул хотрохтэ̄гыт, илттыг ювле та ё̄ӈхыгпе̄гыт. Мӯй ма̄хум пӯсас ос старт ляпат лю̄люӈкве ат кос та̄ртве̄сыт. Та̄н тай хури по̄слуӈкве тув сака воратасыт. Та щирыл матахмат каснэ хум ос нэ̄квет са̄лыяныл ювле ё̄хсыт, та̄н воссыг касуӈкве ат ве̄рмысыт. Тох ва̄им лю̄ль, то̄ват тапалыт ма̄ныл Русскинская па̄вылн ёхтысыт, ёмащакв каснэ ма̄гыс щё̄питахтасыт, тувыл вунщалыг та хультсыт. Ты та̄л хум хо̄тпат халт Александр Станиславович Лемпин, Нижний Сортым па̄вылныл о̄лнэ о̄йка, но̄хпатыс. Тав юипа̄лэ̄т Владимир Иванович Сопочин о̄лыс, ос хӯрмит места Геннадий Александрович Покачев вистэ. Нэ̄ хо̄тпат халт Русскинская па̄вылныл Зоя Павловна Русскина но̄хпатыс, китыт места Лидия Алексеевна Покачева вистэ, ос хӯрмит местат Капитолина Ивановна Покачева о̄лыс. О̄выл места вим хо̄тпаг "Газпром нефть" компания па̄лыл "Бураныл" мӯйлуптавесы̄г. Мо̄таныт ос мо̄т са̄всыр э̄рнэ пормасыл майве̄сыт. Китыт касыл "Бег в национальной одежде" намаим о̄лыс. Тот нэ̄квет халт Виолетта Ивановна Сопочина но̄хпатыс ос тав маснут поснэ утыл мӯйлуптавес. Китыт местат Анастасия Анатольевна Компина о̄лыс, хӯрмит местат Кристина Евгеньевна Вылла. Хумит халт Леонид Борисович Комтин но̄хпатыс, тав на̄йив сартнэ утыл мӯйлуптавес. Олег Вячеславович Мултанов китыт места вис, ос юио̄вылт Валерий Кузьмич Кечимов о̄лыс. Хум хо̄тпат суныт ӯлтта о̄с поргысыт. Тот Валерий Кечимов сака са̄в щёс порыгмас, тав юипа̄лэ̄т Леонид Комтин о̄лыс, ос хӯрмит места Виталий Русскин вистэ. Нэ̄ хо̄тпат халт маснут нё̄тнэ̄г ю̄нтнэ касыл ва̄рыглавес. Тот нэ̄квет та̄нки ю̄нтум тэ̄лы маснутаныл мӯй ма̄хум э̄лыпа̄лт суссылтасаныл ос та̄нки ма̄щтыр рӯпатаныл урыл потыртасыт. Та сыс хум хо̄тпат «Нюл тахли» касылт пе̄рщисыт. Па̄выл кант ярмарка ва̄рыглавес. Ань соссаӈ ма̄хум та̄нки ю̄нтум пормасаныл, са̄всыр пилыт, са̄лы нё̄выль ос хӯл тыналасыт. Ёрнколыт тӯщтыглаве̄сыт, ма̄хум тув ща̄й аюӈкве, нё̄влиӈ исмит тэ̄ӈкве ос нас исылтахтуӈкве щалтсасыт. Хо̄тал палыт са̄в ма̄ныл ёхталам мир мӯйлыс, тот кит финныг ос американецхум о̄лсыт. Ос та̄н уранылт ётылнуве тах хансэ̄гум.

1073 2014.04.04. Валентина УЗЕЛЬ

«Ӯринэ̄ква хо̄тал» янытлавес. Ювле хультум са̄тыт Югорск ӯст «Ӯринэ̄ква хо̄тал» янытлавес. Та ӯст са̄в та̄л «Суеват па̄выл» нампа музей рӯпиты. Тот рӯпитан ма̄хум та̄н ты ялпыӈ хо̄тал ва̄рыглэ̄гыт. Са̄тхуйплов ве̄рыстат во̄рт са̄в пе̄с кол ӯнттым о̄лы, ляпат Эсс нампа я̄ овты. Тот ты ма̄хум мӯйлысыт. Та е̄рт тӯрыт, я̄т пуссын ма̄ньщи нам о̄ньще̄гыт. Ам ялпыӈ хо̄тал о̄лум порат яныгпа̄ла хо̄тпат титыгласанум, ты я̄ манрыг тох ла̄ваве. Та̄н ла̄всыт, ма̄ньщи ма̄хум ты я̄ тох ла̄всаныл – Пе̄с я̄. Ос рущит та̄н ты «Эссыг» ла̄вуӈкв патсаныл. Та хо̄тал сака ма̄лтыпыг о̄лыс, хо̄талыӈ. Са̄в мир музей о̄лнэ ма̄н ёхталасыт. Пе̄с колыт сунсыглым тыглетувле ё̄мыгтасыт, по̄слахтасыт. Тувыл ялпыӈ хо̄тал та о̄вылтавес. Югорск ӯс кӯщай хум Раис Закиевич Салахов атхатам мир нупыл потыртас, тав ла̄выс: «Ӯсувт о̄лнэ мир ос ань тыг ёхтум мӯй ма̄хум! Тыхо̄тал ма̄н «Ӯринэ̄ква хо̄тал» янытлылӯв. Ты ялпыӈ хо̄тал хантыт ос ма̄ньщит та̄н янытлыяныл. Ос ма̄навн, тыг мо̄т ма̄ныл ёхтум мир, та̄н пе̄с ва̄рмаляныл, пе̄с ялпыӈ хо̄таланыл ва̄ӈкв о̄с э̄ри. Ма̄н та̄н ма̄наныл тармыл о̄лэ̄в, таима̄гыс ты ма̄н пуссын та̄н ётаныл тыхо̄тал мӯйлэ̄в. Ань ма̄лтыпыг ты е̄мты, тӯя юипа̄лт туи ёхты. Тыхо̄тал на̄н ёмащакв мӯйлэ̄н, ӯщлахтэ̄н. Ня̄враманын каснэ ма̄т вос касэ̄гыт, ат те ха̄сэ̄гыт, вос ханищтахтэ̄гыт. Ма̄н тыт о̄лэ̄в, ма̄навн соссаӈ мирыт культураныл ва̄ӈкв э̄ри». Тамле ты ёмас сымыӈ ла̄тӈыл ялпыӈ хо̄тал о̄вылтавес. Э̄лаль Нина Георгиевна Рукова потыртас, такви хансум стиханэ ловиньтасанэ. Ма̄хум йӣквсыт, э̄ргысыт. Тувыл пуссын каснэ ма̄н во̄вве̄сыт. Хум хо̄тпат, нэ̄квет йӣвсуп па̄хвтысыт, халанылт хотьют э̄лнув вущкасытэ. Ляпат ос ня̄врамыт кассыт, та̄н сун ӯлтта поргысыт. Ма̄ньнув ня̄врамыт ос нэ̄пакныл ӯринэ̄ква ва̄руӈкв ханищтаве̄сыт, тав ма̄гсылэ пити ва̄рсыт, хурит по̄слысыт. Ка̄сыӈ ма̄т но̄хпатум хо̄тпат ос ня̄врамыт пуссын янытлаве̄сыт, мӯйлупсал майве̄сыт. Тувыл ущ пуссын пасан ва̄тан во̄вве̄сыт, соламатыл тыттуве̄сыт. Ам та е̄рн о̄выл щёс ялсум, мир хумус тот мӯйлы, ма̄ньщи ма̄хманув тот хумус о̄лэ̄гыт, ты урыл я̄нас потрыт тах хансэ̄гум.

1073 2014.04.04. Александр ВЬЮТКИН

Касум па̄вылт са̄лыл кассыт. Ма̄ньполь э̄тпос овыл хо̄талэ̄т Белоярский район Касум па̄вылт са̄лыл каснэ хо̄тал ва̄рыглавес. Та пӯмащ касыланыл ты та̄л «юбилейныиг» намтым о̄лыс, нёлса̄т нупыл атыт щёс ва̄рыглавес. Касум па̄выл ма̄хум тох ла̄ве̄гыт: «Са̄лыл каснэ йильпи, ёмас ма̄ щё̄питавес. Ты э̄лыпа̄лт тамле хо̄тал Амня я̄ титтыго̄втнэ ма̄т о̄лыглас. Ань ос па̄вылныл мощ алгальнув йильпи музей кол торыг са̄лыт ха̄йтнэ лё̄ӈх тӯйтэ няӈраг ёлялыглым щё̄питалвес». Са̄т щёс порат са̄лыӈ суныл каснэ ма̄хум са̄лыяныл щё̄питаӈкв о̄вылтасаныл. Каснэ ла̄кв хосыт лё̄ӈх та̄рапаттын ма̄гсыл са̄лыяныл ня̄влыгласаныл. Онтолов щё̄с порат ма̄хум ще̄мьяӈ та̄гыл тув атхатаӈкв о̄вылтахтасыт. Лов щё̄с юипа̄лт са̄лыл каснэ ва̄рмаль та о̄вылтахтас. Яныг кӯщаит са̄лыӈ колыӈ ма̄хмытн янытлан ла̄тыӈ ла̄всыт. Москва ӯсныл Леонид Яковлевич Симановский ёхталас. Тав Российский Федерация Государственный Думат депутатыг о̄лы. Тав са̄лыӈ ма̄хум янытлым ла̄выс: «Хунь ам тыг йинэ щирыл щё̄питахтасум, ам ётум рӯпитан ма̄хманумн титыглаве̄сум: «Наӈ хоталь минэ̄гын? » «Ам ма̄н са̄лыӈ ма̄хум каснэ лӯи ма̄н минэ̄гум». «Таи манырсыр тамле касыл? ». «Та касыл пе̄с та̄гыл ва̄рыглаве. Ань хоталь минэ̄гум, тот нёлса̄т нупыл атыт щёс ва̄раве. Ам тув ялмумт, тот ёмас номтыл, сыстам сымыл о̄лнэ ма̄хум ва̄сум. Хунь ма̄н та̄н кӯстырыщнуве̄г о̄лнэ̄ныл ма̄гсыл йильпи са̄кконыт пирмайтэ̄в те, ма̄н пуссын тув тах ялуӈкв ве̄рме̄в. Сунсуӈкв, манырсыр ты каснэ хо̄тал ос ма̄хум хумус тот о̄лэ̄гыт». Хум юипа̄лт Касум па̄выл миркол тармыл кӯщаиг о̄лнэ нэ̄ Алсу Касымовна Назырова такви па̄выл ма̄хманэ янытласанэ. Тав ла̄выс: «Касум па̄вылт о̄лнэ са̄лыӈ колытт яласан ма̄хумаквет, ам на̄нан ты ёмас каснэ хо̄талыл янытлыянум. Округув янытыл са̄лыӈ ма̄хманув халт на̄н щар ё̄рыг о̄лэгы̄н. Ма̄н па̄влувн са̄в ма̄ныл мир ёхталы, та̄нанылн ма̄н о̄лупсав пӯмащ. О̄панын ащо̄йканын о̄лупсаныл э̄лаль тотнэ̄н ма̄гсыл на̄нан яныг пӯмащипа ла̄тыӈ ла̄ве̄гум». Ханты-Мансийск ӯсныл ёхталам нэ̄ Татьяна Петровна Колегова сценан о̄с во̄виньта̄лвес. Тав округ янытыл ма̄вит ӯргалан Департамент колт специалистыг рӯпиты. Ма̄хум янытлан ла̄тӈанэ ты: «На̄н палтылын ам мо̄т ва̄рмалянум щирыл кос ёхтысум. А̄нумн Белоярск ӯст ань рӯпитаӈкв кос э̄рыс. Хунь ам титыглаве̄сум: са̄лыӈ суныл касыл суснэ ма̄гсыл Касум па̄вылн ялэ̄гум ман а̄ти, ам хоса ат номсахтасум, та̄ра ка̄сащасум. А̄нумн ты касыл сака мӯсты. Таима̄гсыл ам ве̄рмынэ̄м щирыл порат тыг акваг ёхталаӈкв патэ̄гум». Тав юипа̄лэ̄т Степан Антонович Кечимов са̄лы о̄щнэ ма̄хманэ янытласанэ. Тав округ янытыл о̄лнэ са̄лыӈ ма̄хум халт президентыг о̄лы. О̄влэ̄т тав такви ханты ла̄тӈыл ма̄хум янытласанэ. Тувыл ла̄вум ла̄тӈанэ рущ ла̄тӈыл потыртасанэ. Ма̄хум ат са̄всыр касылытт кассыт. Са̄лыяныл «рысь» ос «мах» нампа ха̄йтыл та̄ртым, тувыл сун та̄рмыл лю̄лим, ёса масым са̄лыяныл юипа̄лт пувумтахтым ос сун то̄выль тармыл ӯнлым кассыт. Музей кант хӯрум ё̄рнкол тӯщтым о̄лыс. Коланылт мӯй ма̄хум па̄йтым атыӈ нё̄влиӈ исмит ос исум ща̄й айсыт. Кон ос тынщаӈ сув нумпа̄лн ре̄пуӈкве, сун ӯлтта поргуӈкв ос акв торыг тит ла̄глыл хӯрум щёс э̄лаль порыгмаӈкв ро̄выс, тамле касылыт ва̄рыглавесыт. Ма̄хум та̄нти ё̄раныл тот а̄рталасыт. Но̄хпатум ма̄хум са̄всыр мӯйлупсал мӯйлуптаве̄сыт. Са̄лыӈ ма̄хум халт «на рысь» каснэ ма̄т Николай Тасьманов но̄хпатыс. Са̄лыяныл султыл миннэ Михаил Молданов о̄влэ̄т ёхтыгпас. Сун тармыл но̄хлю̄лим Иван Попов са̄ртын ёхтыс. Сун то̄выль тармыл ӯнлым о̄с Михаил Молданов са̄ртын ёхтыс. Ё̄са масым касылт Александр Тасьманов но̄хпатыс. Округ са̄лыӈ ма̄хум халт щар ё̄рыг Юрий Кузьмич Тарлин пе̄риявес. Ханты-Мансийск ӯст «Кубок Губернатора» нампа мӯйлупсал тав майвес.

1073 2014.04.04. Николай МЕРОВ

Са̄лыӈ колт рӯпитан хум. Ха̄льӯс район Саранпа̄вылт акв ма̄ньлат ма̄ньщи хум Яков Васильевич Ромбандеев ёт хо̄нтхатыгласум. Тав такви о̄лупсатэ ос са̄лыӈ колт ва̄рнэ рӯпататэ урыл а̄нумн потыртас. На̄н тав потре э̄лаль ловиньтэлы̄н: – Ам Ха̄льӯст 1989 та̄лт самын патсум. То̄нт а̄щум са̄лыт урим яласас. Ам самын патмум юипа̄лт китах э̄тпос Саранпа̄вылт о̄щве̄сум, тувыл са̄лыӈ колн тотве̄сум. А̄щум Саранпа̄вылт самын патыс. Тав са̄тхуйплов та̄л яныт порат са̄лыт ӯруӈкве нё̄рн минас. Тот рӯпитыматэ, такви суныт, ё̄сат, матыра̄ти ма̄щтырыг ва̄руӈкве ханищтахтас. Тувыл 1995 та̄лт са̄лыӈ колт рӯпитаӈкве по̄йтсас. Саранпа̄вылт йильпи кол ӯнттыс, па̄вылн о̄лмыгтас, плотникыг рӯпитас. Та сыс акваг са̄лыӈ колн минуӈкве таӈхыс. Ка̄сыӈ таквс па̄влувт са̄лыт нё̄влиг ва̄рнэ порат, тав ос са̄лыт нуим тот рӯпитас. Ётылнув колэ а̄стластэ, ос ювле са̄лыӈ колн рӯпитаӈкве патхатас. О̄влэ̄т атыт бригадат рӯпитас. То̄нт тот са̄лы мощща о̄лыс. Таима̄гыс та̄н нилыт бригадан аквантӯлве̄сыт. А̄щум тот кӯщаиг паттувес. Ань ты мус тот рӯпиты. Ам Саранпа̄выл школа а̄стламум порат, э̄лаль ханищтахтуӈкве номтум щар ат патыс, са̄лыӈ колн рӯпитаӈкве воратасум. Ханищтахтамум порат туп ӯщлахтын хо̄талыт е̄мтэ̄гыт, та̄ра са̄лыӈ колн тотве̄сум. Онтолов класс мус ханищтахтасум, воссыг ат ве̄ритасум, са̄лыӈ колн та минасум. Ань а̄щум ёт аквхуйплов та̄л рӯпитэ̄гум. Ма̄н бригадавт нёлолов пастуххо̄тпа о̄лы. Пуссын аквъёт кит со̄тыра атса̄т са̄лы пуӈк аня о̄ньще̄в. Ань амки атхуйпловкем са̄лы о̄ньще̄гум. Ма̄н колта̄глувт ат ня̄врам яныгмасӯв. Яныг ӯвщим ань Ханты-Мансийск ӯст о̄лы. Котиль увщим ос а̄пщим Ханты-Мансийск ӯст ханищтахтэ̄г, ма̄нь йӣгрищум иӈ Саранпа̄выл школат ханищтахты. Та̄н са̄лыӈ колт о̄луӈкве ат ка̄саще̄гыт, ам туп ща̄нягума̄щагум ва̄рнэ рӯпататэ̄н э̄лаль тотылум. Са̄лыл каснэ ва̄рмалин ма̄н тӯя̄г щё̄питахтуӈкве о̄вылтахтэ̄в. Хоты са̄лыт та̄ксарнувет, пе̄лпыӈыщ ха̄йтэ̄гыт, таит выганӯв. Ам сунумн ат са̄лы ке̄ре̄гум: нила са̄лы сун хартым ха̄йтэ̄гыт, акв са̄лы по̄хыт лыпащиг ха̄йты. Тав таима̄гыс лыпащиг ке̄раве, сӯлтыл ул вос мины. Ты са̄лы вожакыг ла̄ваве. Таве атахкем та̄л ханищтаӈкве э̄ри. По̄хыт по̄сумта̄лылын, ёмаспал нупыл ха̄йты. Ква̄лге ювле мощ по̄сумтылын, тав во̄ртыпал нупыл мины. Састумы̄г ювле хартылын, ёл та лю̄ли. Сун хартнэ са̄лыт таве ты хӯнтлэ̄гыт. Ма̄щтыр хо̄тпат касыл ма̄гыс са̄лы суныт во̄втаг ва̄рияныл. Тэ̄лы порат ха̄ль йӣвныл ва̄рим сун ёмас. Тамле сун кӯпнит ос ёмщакв лакви. Каснэ порат са̄лыт молях ха̄йтэ̄гыт. Сакваланэ̄тэ порат со̄пас сун ёт акваг о̄ньще̄гыт. Тӯя̄г ос хо̄втыл ва̄рим йӣв суныл яласэ̄в. Яков Васильевич са̄лыӈ колт яныгмас. Са̄лыӈ суныл ма̄щтырыг яласы. Саранпа̄вылт каснэ ва̄рмаль о̄лыглан порат са̄в щёс призыл майлувес. Ты рӯпитан ма̄тэ̄ныл воссыг нэ̄мхотталь минуӈкве ат таӈхи. Рӯпататэ ма̄гыс ка̄сыӈ э̄тпос ёмас са̄вит олныл ойтаве. Ӯщлахтан хо̄таланэ порат па̄вылн ёхталы. Ам ты ма̄ньлат ма̄ньщи пыгын ос тав рӯтанэ̄н пуста̄гыл о̄лнэ ла̄тыӈ ке̄тэ̄гум. О̄лупсаныл кӯпнитыг вос о̄лы, колта̄гланыл со̄тыл вос пинаве. Са̄в та̄л щуниӈыщ э̄лаль о̄лэ̄н, На̄й-О̄тыранын вос ӯргалаве̄н!

1073 2014.04.04. Тамара МЕРОВА

Ӯсыӈ мир э̄ргыт хӯнтлысыт. Ма̄ньполь э̄тпос сыс Ханты-Мансийскат о̄лнэ ма̄хманув ма̄гыс сыресыр пӯмыщ накыт ва̄рыглаве̄сыт. Мӯй ма̄хум культура колн во̄выглаве̄сыт, ос та̄н тот матыр кас манос ёнгил суссыт. Хо̄тхуйпловит хо̄талт нэ̄пак ловиньтан окружной колт «Литературные встречи» сапра̄ни ва̄рыглавес. Тот ма̄хум Юрий Вэлла, потрыт хансум ё̄рн хум, ка̄сталавес. Китхуйпловит щислат тав са̄тпан нупыл хо̄тыт та̄лэ то̄влынув, ос мо̄лты таквсы пувласпи лю̄ль а̄гме ма̄гыс а̄тимыг е̄мтыс. Нэ̄пак ловиньтан колт Владимир Пшеничников ос Людмила Кипарис ё̄рн хум хансум стиханэ щирыл э̄рыг ва̄рсы̄г ос э̄ргысанэ̄н. «Хо̄тал» нампа А̄с-угорский ма̄хум театрыт рӯпитан хо̄тпаг Альфия Абдрашитова ос Татьяна Огнева «Земля любви» Юрий Кылевич хансум потре хосыт ма̄нь спектакль суссылтасы̄г. Тувыл са̄тхуйпловит щислат обскоугорский институт нэ̄пак ловиньтан колн соссаӈ ма̄хум во̄выглаве̄сыт. Тот «Музыка весны» нампа ӯщлахтан щё̄с ва̄рыглавес. Та хо̄талт Светлана Динисламова, потрыт ос стихыт хаснэ нэ̄, намхо̄талэ о̄лум. Тав ма̄гсылэ о̄с ма̄нь концерт щё̄пита̄лвес. Тот Татьяна Огнева Константин Меладзе «Оттепель» кина ма̄гыс хансум э̄рге, ос Белла Ахмадуллина стихе щирыл «Снегурочка» э̄рыг э̄ргысаге. Э̄рыгсов та̄ныт Вероника Кузнецован ёнгуве̄сыт. Ты коныпал Татьяна нё̄тнэ турсуил Юрий Вэлла ос Андрей Тарханов, ма̄ньщи хум, хансум стиханэ̄н ловиньтасаге. Альфия Абдрашитова Светлана Селивёрстовна «Мама» хансум потре ловиньтастэ. Тав ма̄н ма̄ньщи нэ̄в сака э̄сгыстэ. Ла̄выс, то̄ва потрыт ловиньтаме порат самвитанэ нэ̄глэ̄гыт, о̄лупсавт о̄лнэ пищит такем ёмщакве̄г ос э̄рнэ ла̄тӈыл хансавет, такем сымын хо̄е̄гыт. Ма̄ньщи нэ̄в ва̄рнэ тэ̄ланэ янытлан ма̄гыс Мария Волдина ос Владимир Енов ханты хо̄тпаг ёхталасы̄г. Мария Кузьминична потрыт хаснэ соссаӈ хо̄тпат урыл мощ потыртас ос акв э̄рыг э̄ргыс. Тав уре̄т ам таи хансуӈкве таӈхе̄гум, а̄ти сака хосат тав Екатеринбург ӯст «Поэзия» номинацият «Сердце поёт» та̄ратам нэ̄паке ма̄гыс мӯйлупсал майвес. Тот «Литературная премия Уральского федерального округа» нампа касыл ва̄рыглавес. Потрыт, стихыт хаснэ хо̄тпат та̄нки халанылт са̄всыр номинацият кассыт. Тот атхуйплов э̄лумхо̄лас но̄хпатыс, та̄н ты янытлаве̄сыт. Тувыл «За вклад в отечественную словесность» я̄нас премия Юрий Вэллан щё̄питавес. Владимир Енов Светлана Селивёртовнан са̄в ёмас ла̄тыӈ ла̄выс ос такви хансум поэматэ ловиньтастэ. Хулюмсунтныл ёхталам мӯй э̄ква Мария Тихоновна Двинянинова нё̄тнэ ма̄ньщи э̄рге э̄ргыстэ ос такви ка̄тыл сагум то̄ре Светланан мӯйлуптастэ. Светлана Динисламова мӯй ма̄хумн ювле ла̄тыӈ о̄с ла̄выс. Мо̄тынтыг тав атпан та̄лэ тах то̄влы, ос тав хансум стиханэ, потранэ щирыл обскоугорский театрыт рӯпитан хо̄тпат матыр йильпи ёнгил щё̄питаӈкве кусэ̄гыт. Культура тармыл рӯпитан хо̄тпат янытлан хо̄таланыл о̄с о̄лыс. Та кастыл ма̄хум В. И. Игошев музейколн во̄выглаве̄сыт. Тот ос «Любовь и жизнь актрисы» пӯмыщ концерт суссылтавес. Татьяна Огнева, Софья Шесталова сыресыр пе̄с э̄ргыт э̄ргысы̄г, э̄рыгсов та̄ныт Ирина Плотникован ёнгуве̄сыт. Ӯст о̄лнэ ма̄хум ёмащакв ӯщлахтасыт.

1073 2014.04.04. Людмила ТЕТКИНА

Та̄н пе̄с ва̄рмалитыл пӯмщалахтэ̄гыт. Ма̄ньполь э̄тпос 27-29 хо̄таланэ̄т Ханты-Мансийск ӯст «Ремёсла и промыслы: прошлое и настоящее» нампа конференция рӯпитас. Тамле конференция Ремёсла центрыт рӯпитан ма̄хум ка̄сыӈ та̄л ва̄рыглэ̄гыт ос округ янытыл о̄лнэ ня̄врамыт тыг во̄виньта̄лэ̄гыт. Ты та̄л ня̄врамыт ос ханищтан хо̄тпат Ха̄льӯс район Хулюмсунт па̄вылныл, Октябрьский район Талинка па̄вылныл, Нефтеюганский район Салым па̄вылныл, Сургут, Лянтор, Радужный, Нефтеюганск, Урай ӯсытныл тыг ёхталасыт. Ханты-Мансийск ӯст «Лучик» ня̄врам ӯргалан кол ос «Лылыӈ союм» нампа студиян ялантан ня̄врамыт та̄нки докладаныл ловиньтасаныл ос мастерклассыт суссылтасыт. Конференция о̄вылтахам порат ня̄врамыт э̄лыпа̄лт Тамара Николаевна Глушкова, Сургутский университетытт рӯпитан нэ̄, ла̄тыӈ ла̄выс: «Кит хо̄тал сыс тыт рӯпитым, на̄н халынт ва̄йхатэгы̄н ос ханищтахтэгы̄н. Матьёмас на̄н пе̄с йис ва̄рмалитыл пӯмщалахтэгы̄н ос э̄лаль тотыяны̄н. Тыи ма̄гсыл ка̄сыӈ ня̄врамын ам яныг пӯмащипа ла̄тыӈ ла̄ве̄гум». Людмила Сенгепова Лянтор ӯсныл тыг ёхталас. Ханты а̄гирищ атыт классыт ханищтахты. Лянтор ӯс ляпат о̄лнэ хантыт хумус та̄н ва̄ре̄гыт, та урыл тав конференцият потыртас. Ос ханищтапыт ма̄хум та̄н ва̄руӈкве ханищтасанэ. Людмила ла̄выс, оматэ ма̄щтырлаӈкве сака ха̄сы, са̄лы та̄ныл сахи ос мо̄т маснут ю̄нты. Тыи ма̄гсыл а̄гирищ тамле рӯпата ва̄руӈкве о̄с ёмащакв ха̄сы. Татьяна Юмина Сургут ӯсныл ёхталас, тав о̄с са̄лы та̄н ма̄хум ёт ва̄рыс. Татьяна о̄с атыт классыт ханищтахты. Тав «Старый Сургут» нампа центрын яланты. Тот ма̄ньщи хо̄тпат ня̄врамыт ёт са̄всыр щирыл ма̄щтырлэ̄гыт. Александр Дмитриевич Сайнахов ос Мария Владимировна Ситникова «Старый Сургут» центрыт рӯпитан хо̄тпаг, а̄гирищ ма̄щтырлаӈкве ханищтастэ̄н. Ты коныпал Татьяна «Лӯима̄ ханса» нампа коллективыт э̄рги. Тав ма̄ньщи ос ханты культурал сака пӯмщалахты, тыи ма̄гсыл тамле конференциян ёхталас. Ты рӯпата ма̄ньщит пе̄с порат ос ань хумус ва̄ре̄гыт, тав та урыл доклад ловиньтас. Татьяна Петрова, Октябрьский район Талинка па̄вылт о̄лнэ а̄ги, ма̄хум са̄всыр сас хусапыт ва̄руӈкве ханищтасанэ. Тав Галина Георгиевна Сунгатова, таве ханищтан хо̄тпа, ёт тыг ёхталас. Галина Георгиевна ла̄выс: «Талинка па̄вылт культура центр рӯпиты, тот ма̄н ня̄врамыт ёт ма̄щтырлэ̄в. А̄гирищитпыгрищит ёт са̄сныл са̄всыр хусапыт ва̄ре̄в. Тамле утыт ва̄рнэ ма̄гсыл са̄с ма̄н я̄ӈк на̄тнэ э̄тпос ос лӯпта э̄тпос порат нуюӈкве ялантэ̄в. Ам ты ма̄т хосат та̄гыл о̄лэ̄гум, ма̄ньщи, ханты культурал сака пӯмщалахтэ̄гум. Та̄н са̄сныл ва̄рим со̄втыт, па̄йпыт хумус ю̄нтэ̄гыт, о̄с ёмащакв ва̄глум. Пе̄с порат рущ ма̄хум а̄ныяныл о̄с са̄сныл ва̄рсаныл. Рущит ос соссаӈ ма̄хум са̄сныл ва̄рӯм то̄ва хусапаныл аквхурипаг о̄лэ̄гыт. Амки рущиг о̄лэ̄гум, тыи ма̄гсыл на̄н пе̄с йис ва̄рмалянын ханищтыянум ос э̄лаль тотыянум». Мо̄т ня̄врамыт конференцият йӣвныл са̄всыр а̄ньщарыт яктуӈкве, а̄канит ю̄нтуӈкве, ра̄ктыл а̄ныса̄ныт ва̄руӈкве ос мо̄т щирыл ма̄щтырлаӈкве ханищтахтасыт.

1074 2014.04.18. Тамара МЕРОВА

Олннё̄тмил урыл. Округ губернаторув Н. Комарова то̄ва кӯщаит акванатыгласанэ. Та̄н са̄кконытытн йильпи хӯлтыглан ла̄тӈыт хассыт. Ань сапра̄нит ва̄т нупыл кит ля̄ххалыт урыл потыртасыт. Округувт са̄всыр организациятт рӯпитан ма̄хум ӯщлахтын ма̄н ялнэ лё̄ӈх олнаныл ювле ойтуӈкве патавет. Лӯи ма̄т рӯпитан ма̄хум пуссын тув ловиньтахтэ̄гыт. Ты э̄лыпа̄лт туп округ бюджетный ма̄т рӯпитан хо̄тпат лё̄ӈх олнаныл ювле ойтыглаве̄сыт. Победа хо̄тал 69 та̄лэ янытлан кастыл округ бюджетныл 15 миллион солко̄ви та̄стувес. Ань ты олнытыл хо̄нтлуӈкв ялум хо̄тпат 3 со̄тыра солко̄вил ойтавет. Война порат ос хо̄нтлам о̄йканыл та̄л ань хультум э̄кват, Ленинград ӯс блокада щирыл тыг ке̄тым хо̄тпат, концлагерьт о̄ньщим хо̄тпат ос хо̄нт порат рӯпитам ма̄хум 2 со̄тыра солко̄вил мивет. Ос хо̄нтыт порслым са̄лтатыт та̄н ня̄враманыл акв со̄тыра солко̄вил та̄ставет. Я̄ӈк на̄тнэ э̄тпос 23 хо̄талныл ос лӯпта э̄тпос 20 хо̄талэ мус округ янытыл «Спасти и сохранить» акция рӯпататэ о̄вылтаве. Кӯщаит тув щё̄питан тэ̄лат та̄рапаттысаныл ос са̄всыр нё̄тмил ва̄рнэ ма̄гыс ка̄сащасыт. Ня̄врамыт этнолагерит ӯщлахтын ма̄гыс 21 миллион солко̄ви та̄стым о̄лы. Мо̄лты та̄л тамле ма̄т 503 соссаӈ ня̄врам ӯщлахтасыт. Юио̄выл та̄лытыт са̄внув ня̄врам тот ӯщлахтуӈкве таӈхи. Та̄нанылн тот о̄луӈкве мӯсты. «Развитие культуры и туризма» программан о̄с са̄всыр хӯлтыглан ла̄тыӈ хасвес. Субсидия олннё̄тмилыл искусства колыт тах мивет. Та̄н э̄рнэ йильпи пормасыт ёвтуӈкве ве̄рме̄гыт.

1074 2014.04.18. Людмила ТЕТКИНА

Но̄хпатум хо̄тпат янытлаве̄сыт. 2012 та̄л па̄сыл округ Думат «Думать поюгорски» нампа касыл ва̄рыглаве. Газетатт, журналытт, телевиденият рӯпитан хо̄тпат та̄нки рӯпатаныл тув ке̄тыглыяныл. Ты та̄л ля̄ххал тотнэ ма̄хум Дума урыл хансум 120 потраныл тув ке̄тыгласаныл. Депутатыт ос «Союз журналистов» нампа организацият рӯпитан хо̄тпат щар ма̄к ёмащакв хансым потрыт пе̄риясыт. Ма̄ньполь э̄тпос 28 хо̄талэ̄т но̄хпатум хо̄тпат янытлаве̄сыт. О̄выл места «Новости Югры» нампа газетат рӯпитан ма̄хум висыт. Китыт местал ос «Югра-Информ» нампа агентстват рӯпитан хум Сергей Банных майвес. Ос хӯрмит места «Местное время» нампа газетат рӯпитан хо̄тпат майве̄сыт. Ты та̄л ос кит я̄нас премия ва̄рвес. Акв премия Ольга Пламадилова вис, «Югра» нампа журналт рӯпитан нэ̄, ос китыт премиял Галина КОНДИНА, «Лӯима̄ сэ̄рипос» газетавт рӯпитан нэ̄, майвес.

1074 2014.04.18. Николай МЕРОВ

О̄лнэ кол урыл потыр. Мо̄лты та̄л округувт жилищный программа пирмайтавес. Тув са̄всыр э̄рнэ тэ̄лат хасве̄сыт. Ты программа ма̄ньлат ще̄мьят, са̄в ня̄врамыӈ ще̄мьят, атхуйплов та̄л арыгкем тыт о̄лнэ хо̄тпат ос мо̄т ма̄хум ма̄гыс щё̄питавес. Ма̄ньполь э̄тпост округув янытыл яныг ӯсытт сапра̄нит ва̄рыглаве̄сыт. Ма̄ньлат хо̄тпат китыглаве̄сыт, ты урыл та̄н маныр номсэ̄гыт. Ань Общественный палата кӯщай нэ̄ Любовь Чистова ты ма̄гыс ма̄хум акванатыгласанэ. Кина суснэ то̄тап хосыт Сургут, Нефтеюганск ос Нижневартовск ӯсытт кол минэ ва̄рмаль щирыл рӯпитан хо̄тпат са̄всыр та̄рвитыӈ тэ̄лат урыл потыртасыт. Ка̄сыӈ ӯст ма̄хум номтаныл акванёхтэ̄гыт. Щар о̄влэ̄т ма̄ньлат ще̄мьят, са̄в ня̄врамыӈ ще̄мьят ос нусаг о̄лнэ ще̄мьят нё̄тмилыл ва̄руӈкве э̄ре̄гыт. Ань тох е̄мтыс, 2010 та̄лт очередин хансым хо̄тпат субсидия винэ ма̄гыс очередяныл ущты ёхтыс. Ты программа ёмщакв рӯпитаӈкве ат ве̄рми, олн а̄тим, тыи ма̄гыс акваг ювле хульты. Тувыл ань ты очередь э̄лаль акваг са̄вмуӈкве паты. Тув иӈ са̄внув олн э̄рмыглы. Юио̄выл та̄лытт округувт са̄в ня̄врам самын паты, мир акваг са̄вми. Ма̄ньлат ма̄хум о̄с акв ва̄рмаль урыл потыртасыт, ипотека процентыт мощщануве̄г ва̄рнувет ке, сака ёмас о̄лнув. Тувыл ань йильпи кол акв квадратный метратэ тынэ сака яныг, мощща олн сэ̄лнэ хо̄тпат кол ёвтуӈкве ат ве̄рме̄гыт. Таима̄гыс округувныл то̄ва ма̄хум мо̄т ма̄н о̄луӈкве минэ̄гыт. Тыт о̄лнэ мир мо̄т ма̄н ул вос о̄лмыгтэ̄гыт, кол ёвтнэ ва̄рмаль мӯсхал щирыл щё̄питаӈкве э̄ри. Ань о̄лнэ сапра̄нин ма̄ньлат ма̄хум ёмщакв щё̄питахтыгласыт. Пуссын ва̄рмаляныл нэ̄пакн хассаныл. Ты тэ̄ла щирыл та̄н э̄лаль ёмащакв тах номсахтэ̄гыт.

1074 2014.04.18. Людмила ТЕТКИНА

Э̄рнэ нэ̄пакыт ань акв ма̄т виӈкве ро̄ви. Александр Сучков многофункциональный центрыт кӯщай хо̄тпаг рӯпиты. Ля̄ххал тотнэ ма̄хум ёт хо̄нтхатыгламе порат ва̄рнэ рӯпатаныл урыл потыртас. Ань округ янытыл 19 многофункциональный центр ва̄рвес. Тамле кол Ханты-Мансийск ӯст 2012 та̄л сӯкыр э̄тпосэ̄т рӯпитаӈкве о̄вылтахтас. Ты центр урыл ма̄хум ань ёмащакв ва̄гыт, акв хо̄тал сыс 250-350 э̄лумхо̄лас тув ёхталы. Нижневартовск, Сургут яныг ӯсыгт тыил са̄внув хо̄тпа нё̄тавет. Ань та колт ма̄хум намнэ̄пакыл, медицинский полисыл ва̄равет. Ня̄враманыл пособияолныл ойтнэ ма̄гсыл нэ̄паканыл о̄с тот щё̄питавет. Ты коныпал пенсиян миннэ хо̄тпат тот нё̄тавет. Росреестр рӯпататэ ань о̄с ты центрыт ва̄раве. Кӯщай хум ля̄ххал тотнэ хо̄тпатн китыглавес, ань тамле колыт яныг ӯсытт ос районный па̄влытт ва̄рве̄сыт, ма̄нь па̄влытт о̄лнэ мир справканэ̄паканыл ма̄гсыл ос акв тащирыл яныг ӯсн ялантэ̄гыт. Александр Сергеевич ла̄выс: «2013 та̄л оигпаме э̄лыпа̄лт ма̄н конкурс ва̄рыгласӯв, тот «Почта России» нампа организация но̄хпатыс. Ань почтат рӯпитан хо̄тпат ты рӯпата ва̄руӈкве тах патэ̄гыт. Ты та̄лт ма̄н Советский район янытыл хо̄т почтатыт тамле отделеният ва̄рсӯв. Коммунистический, Агириш, Таёжный, Алябьево, Зеленогорск ос Юбилейный па̄влытт о̄лнэ мир тув ялантаӈкве ве̄рме̄гыт, справканыл ма̄гсыл яныг ӯсн минуӈкве та̄нанылн воссыг ат э̄ри. Ты рӯпата ма̄н э̄лаль ва̄руӈкве патылӯв, мо̄т ма̄нь па̄влытт тамле центрыт о̄с тах ва̄ре̄в».

1074 2014.04.18. Николай МЕРОВ

Ма̄хум Нё̄рт ӯщлахтасыт. Ма̄ньполь э̄тпост ма̄ньлат ма̄хум Нё̄рн ялсыт. Хумус та̄н тот ӯщлахтасыт ос манхурип та̄рвит тот о̄лыс, ты урыл Сергей Черепин, ты тэ̄ла тармыл кӯщаиг о̄лум хум, ос Константин Репин, округ Думат ма̄ньлат ма̄хум ёт рӯпитан кӯщай, потыртасы̄г. Ты экспедиция ань китынтыг щё̄пита̄лвес. Ань ты накт пуссын аквъёт ва̄т хо̄тпа тув ялсыт. Лё̄ӈхыт то̄ва порат ма̄шинаныл манос «Бурананыл» саквала̄лсыт ос мо̄т са̄всыр та̄рвит ва̄рмаль е̄мталас. О̄влэ̄т Нораты нё̄рн ха̄ӈхуӈкве номтаныл о̄лыс. Нё̄рыт халт ты нё̄р щар карсыг о̄лы. Та̄н ма̄шинал Саранпа̄выл мус минуӈкве кӯссыт. Тувыл э̄лаль ос вертолётыл Нораты мус тыламлаӈкв е̄мталасыт ос турапыг е̄мтыс. Тыима̄гыс та̄н Нё̄ро̄йка нупыл минмыгтасыт, тув мус лё̄ӈх о̄лы. Нё̄ро̄йка сака карсыг ат кос о̄лы, ос тув ха̄ӈхуӈкве сака та̄рвитыӈ. Са̄в тӯйт о̄лнэ ма̄гыс та̄н Саранпа̄вылныл Нё̄ро̄йка мус ловманкем щё̄с яныг колёсаӈ ма̄шинал ос вездеходыл минасыт. Тувыл тот но̄хха̄хсыт, такос ӯрхатасыт, ёмас хо̄тал тох аты ва̄рыс. Ос ювле Саранпа̄вылн та минасыт. Тувыл э̄лаль ос тэ̄лы лё̄ӈх хосыт Нягань ӯс мус ва̄т нупыл нила щё̄с минасыт. О̄выл щёс Нё̄рн туп Нягань ӯст ос Ха̄льӯс районт о̄лнэ ма̄хум я̄лсыт. То̄нт налыманкем хо̄тпа тув тотыглавес. Ты хо̄тпатныл онтолов хо̄тпа Нё̄ро̄йка нумпа̄лн ха̄хса̄лсыт. Ты та̄л са̄всыр ма̄ныл ма̄хум ялсыт. Нё̄рн миннэ лё̄ӈханыл Ханты-Мансийск ӯсныл о̄вылтахтас. Ка̄сыӈ ма̄нь па̄вылн хо̄игласыт. Соссаӈ мирн сака сымыӈыщ ӯрве̄сыт. Па̄влытт ща̄ил айтве̄сыт, то̄ват тэ̄нут ёт майлысыт. Та̄н пуссын аквъёт кит со̄тыра ве̄рыста палыт лё̄ӈх минасыт. Тыгыл акв со̄тыра хӯрумса̄т ве̄рыста ты тэ̄лы лё̄ӈх. Ха̄льӯс районныл акв нэ̄ хо̄тпа та̄н ётаныл ялыс. Константин Репин ла̄выс: «Та нэ̄ Нё̄ро̄йкан но̄х ат ха̄ӈхыглас. Пе̄с та̄гыл нэ̄ хо̄тпатн тув щар ат ро̄ви». Ань ты ӯщлахтын ва̄рмаль э̄лаль тотуӈкве патаве. Ты тэ̄ла ма̄гыс олн та̄ставе ке, Нё̄р ляпат э̄т хӯлнэ ма̄ ос пувлын колыт ӯнттавет тах. Ань ты накт Екатеринбург, Москва ос мо̄т яныг ӯсытныл олныӈ ма̄хум ӯщлахтуӈкве тув акваг ялантэ̄гыт. Тыт о̄лнэ ма̄хум тот ӯщлахтуӈкве о̄с вос ве̄рмынувыт.

1074 2014.04.18. Александр ВЬЮТКИН

Ма̄ньщи хо̄тпанув янытлаве̄сыт. Мощ мо̄лалнув Ханты-Мансийск ӯст «Год культуры – 2014» нампа хо̄тал янытлавес. Та ва̄рмаль ӯст о̄лнэ Центр искусств нампа колт о̄лыс. Округув янытыл са̄в мир ёхталас. Та̄н пуссын ва̄рум рӯпатаныл ма̄гсыл пӯмащипа ла̄тӈыӈ пищмал, дипломнэ̄пакыл ос ма̄гылн тагатан са̄всыр нампа по̄сыл янытлаве̄сыт. Ма̄ньщи мирув халт ат хо̄тпа губернаторув Наталья Владимировнан са̄всыр мӯйлупсал мӯйлуптаве̄сыт. Та̄н наманыл – Андрей Семёнович Тарханов, Александр Дмитриевич Сайнахов, Светлана Селивёрстовна Динисламова, Галина Рудольфовна Кондина ос Галина Николаевна Ларионовна. Ты ма̄хум пуссын са̄в та̄л культура ма̄т рӯпитэ̄гыт.

1074 2014.04.18. Александр ВЬЮТКИН

Са̄лыӈ суныл каснэ ма̄хум урыл. Ханты-Мансийск ӯст са̄лыӈ ма̄хум урыл потыртан ма̄гсыл Геннадий Бухтин, Евгений Платонов, Александр Новьюхов ос Степан Кечимов ёхталасыт. Та̄н пуссын акванпотыртахтым са̄в э̄рнэ тэ̄ла щё̄питэ̄гыт. О̄влэ̄т Степан Кечимов потыртас. Тав округ янытыл са̄лыӈ ма̄хум халт президентыг пе̄риим о̄лы. Тав ла̄выс: «Ам са̄лыӈ ма̄хум ёт акваг потыртэ̄гум. Та̄нанылн округув янытыл ёхталам са̄лыӈколыӈ ма̄хум халт ва̄рыглам касыл сака мустыс. Хумус та̄н ла̄всыт: «Мо̄тынтыг ты каснэ хо̄тал ва̄рыгланэ̄н порат, ма̄н каснэ лё̄ӈхув хара ма̄т вос ва̄раве. Белоярский ос Ха̄льӯс районт о̄щнэ са̄лыянув тамле карыс кол ат ва̄щинтасыт, таима̄гсыл ӯст сака пилэ̄гыт». Э̄ти ма̄хум са̄лыт ӯрнэ щирыл хультсыт, та̄нти халанылт ва̄йхатасыт, потыртахтыгласыт хотьютаныл э̄ти са̄лыяныл ӯруӈкв паты. Ты порат са̄лыл каснэ ма̄хум халт акв ма̄ньщи а̄тим о̄лыс. Саранпа̄вылныл ёхталам хо̄тпат халт ма̄ньщит кос о̄лсыт, та̄н пуссын ё̄рнкол тӣвырт рӯпитасыт. Мо̄тынтыг сакати титахтем ма̄ньщи са̄лыӈ сун касуӈкве вос ёхталы». Степан Антонович потыртаме юипа̄лт округ янытыл ма̄вит ӯргалан Департамент тармыл кӯщаиг о̄лнэ хум Евгений Платонов ла̄тыӈ ла̄выс: «Ма̄н щар о̄влэ̄т ты хо̄тал урыл 2012 та̄лт номылматсӯв. Белоярский ӯст совещание о̄лум порат Степан Антонович такви номтэ ма̄навн потыртастэ. Ма̄н тав номтэ нё̄тхатым э̄лаль та тотыслӯв. О̄влэ̄т ты пӯмащ хӯрум та̄л сыс акв щёс ва̄рыглаӈкв потыртахтасӯв. Ань са̄лыл каснэ ма̄н ёхталам ӯс ма̄хум ма̄навн ла̄всыт, ты хо̄тал ва̄тихал вос ва̄рыглылӯв. Ань тах номсахтэ̄в, хо̄т, хумус ос хоты порат ты касыл ва̄рилӯв». Александр Новьюхов «Югра лылые̄п» соссаӈ мир организация тармыл президентыг о̄лы, тав ла̄выс: «Ты порат маныр ат а̄ртмыс ва̄руӈкв, ам номсэ̄гум, мо̄тынтыг тах ва̄ре̄в. Ёрнколытт рӯпитан ос кон тэ̄нут тыналан хо̄тпанув щар нэ̄матарыл ат мӯйлуптасанӯв. Та̄наныл мо̄тынтыг тах о̄с мӯйлупсал щё̄питыянӯв». Юио̄вылт губернатор ва̄ӈын хум Геннадий Бухтин потыртас: «Мощ мо̄лалнув ма̄н округувт са̄лыянув мощщамласыт. Ань са̄лыт ротмалтан ма̄гсыл са̄всыр са̄кконыт пирмайтэ̄в. Округ ма̄тэ яныг, ма̄навн тыт атпан ляпатем со̄тыра са̄лы о̄ньщуӈкв ро̄ви. Ты ма̄гсыл яныг рӯпата ва̄ре̄в. Зоотехникыг рӯпитан ма̄хум Екатеринбург ӯсн са̄лы те̄лп уральтаӈкв ва̄тихал те̄тыглэ̄гыт. Ань ка̄сыӈ са̄лы пале̄т такви по̄с о̄ньщи. А̄гмыӈмо̄сыӈ ӯйхул та по̄с щирыл та̄ра хо̄нтаве. Са̄лыӈ колт рӯпитан ма̄ньлат ма̄хум лусытан ма̄н ве̄рмавет ат виӈкв. Та̄н ань титыглавет, ка̄саще̄гыт та̄н лусытаӈкв манос а̄ти. Ма̄ньлат хум маныр ла̄ви, тох та е̄мты». Ма̄ньщи са̄лыӈколыӈ ма̄хумаквет, на̄н касылт но̄хпатнэны̄н ма̄гсыл ма̄нав са̄в щё̄питахтуӈкв э̄ри. На̄нан ла̄вуӈкв таӈхе̄гум, пуста̄гыл о̄лэ̄н, мо̄тынтыг е̄мтнэ касылн щё̄питахтэ̄н, ёхталэ̄н.

1074 2014.04.18. Тамара МЕРОВА

Та̄ксар хо̄тпаг э̄лаль о̄лы. Феодосья Давыдовна Пакина ёт ам таквсы Ханты-Мансийск ӯст ва̄йхатасум. Тав пӯльницан ёхталас ос юв миннэ̄тэ э̄лыпа̄лт ме̄н тав ётэ хо̄нтхатыгласме̄н, ос щё̄с арыгкем потыртасме̄н. Ам тав о̄лупсатэ урыл пӯмщалахтасум. Феодосья Пакина 1930 та̄лт сӯкыр э̄тпос нилахуйплов хо̄талт Резимово па̄вылт самын патыс. Ты ма̄нь па̄выл Восыӈтӯр ос Ягрим па̄влыг халт о̄лыс. Э̄ква ань 83 та̄лэ то̄влыс. О̄лупсатэ ты кос та̄рвитыӈ о̄лыс, ма̄нь порат а̄гмыӈмосыӈыг е̄мтыс, ань сусте̄мт, тав иӈ ка̄ркамыг о̄лы ос аквтох ощхуль ва̄рнэ хо̄тпаг хультыс. Ханты-Мансийскан э̄ква самаге пусмалтаӈкве ёхталас. Тав нила та̄лэ порат аквпа̄л саме акве̄н то̄сам пумыл хо̄илттыма. Омагеа̄тяге во̄раян ма̄ныл ёхтысы̄г, а̄гирище̄н ка̄саластэ̄н, вильтэ̄т ос пальтытт ке̄лп со̄схаты. Хотрохтысы̄г, маныр ва̄руӈкве, ле̄ккар ляпат а̄тим. Восыӈтӯр па̄выл нупыл минуӈкве са̄тлов ве̄рыста, Ягрим мус аквтаса̄витыг о̄лы. Тувыл Восыӈтӯрн та минмыгтасыт, я̄ хосыт ло̄ӈхаль моляхнув тув ёхтэ̄гыт. Тот еврей ле̄ккар ма̄хум сэ̄ръёрыг пусмалтас. Тав ре̄ге̄тыл саме ёмасыг е̄мтыс, туп пале̄тыл мощ лю̄льсаӈ хӯлуӈкве патыс. Школат ханищтахтуӈкве таве̄н сака мӯстыс. О̄выл ханищтан нэ̄тэ, Елизавета Васильевна, ань тыг мус номитэ. Ты рущ нэ̄ Тамбов ӯсныл о̄лыс. Ханищтан коланыл сака ащирмаӈ о̄лыс, ке̄р кӯр па̄лтыгласыт кос, кол аквты щёс по̄ляве. Пасаныл, уласыл ня̄врамыт пуссын ат то̄влавет, по̄лям колкан тармыл та ӯнтэ̄гыт, хансэ̄гыт ос ловиньтэ̄гыт. Рущ нэ̄ ре̄гыӈ маснут торыӈыщ о̄с ат о̄ньщис, соссаӈ хо̄тпатн ва̄ил, сахил майлаве, тав ат масыянэ. Тох та пе̄с пальтуве̄т, со̄пакаге̄т по̄льтахтас. Ха̄льӯсн лувыл миннэ̄тэ порат туп са̄хи ос ва̄й масыглас. Ӯсныл китхӯрум сыстам нэ̄пак тоты, ня̄врамыт тот туп контрольный рӯпатаныл хансуӈкве та̄ртавет. Ты э̄лыпа̄лт ня̄врамыт са̄с тармыл хассыт. Ма̄ньщи хо̄тпатныл туи порат са̄с нуюӈкве ханьщувласыт. Ёмас хаснэ йӣв о̄с ат о̄щсыт, чернилал ос ма̄нь йӣво̄влыл са̄с тармыл тот та щуртсыт. «Ань тай, со̄рни поскве, манрыг ат ханищтахтуӈкве? – Феодосья Давыдовна ла̄выс, – маныра̄ти э̄рнэ ут пуссын о̄лы, туп номтыӈ хо̄тпаг о̄лэ̄н. А̄ти, ня̄врамыт, ма̄ньлат хо̄тпат савыӈыг о̄лэ̄гыт ос мори капыртэ̄гыт, яныг хо̄тпа ла̄тыӈ ат хӯнтлэ̄гыт, ты маныр ман о̄лнэ пищ! Ма̄н матумпа̄ла хо̄тпат, оманува̄щанув, ханищтан нэ̄в ла̄вум ла̄тӈаныл сака хӯнтлысӯв. Елизавета Васильевнан ма̄н нила класс мус ханищтавесӯв. Тувыл туи Тамбов ӯсн ювле минас, воссыг ат та ёхталас. Ётыл хӯлыгласӯв, тав а̄тимыг е̄мтум». Война е̄мтум порат Феодосья Давыдовна лов та̄лэ о̄лыс. А̄ще Давыд Семёнович Пакин хо̄нтлуӈкве тотвес. Хо̄нтлын ма̄т са̄в рӯтанэ порславе̄сыт, э̄ква ты урыл потре ам на̄нан я̄нас хансылум тах. Ня̄врамыт янгема̄не пуссын юн хультум хо̄тпатн нё̄тсыт. Оматэ Татьяна Давыдовна Монина хӯл алыщлас, во̄раяс. Ане̄кватэ Марфа Павловна Самбиндалова лувыт уральтым рӯпитас. Тав о̄с акваг таве̄н нё̄тыс, таи ма̄гыс трудовой нэ̄паке̄т хансым о̄лы: колхозт нила та̄л хӯрум э̄тпос хо̄тхуйлов хо̄тал конюхыг рӯпитас. Та та̄рвит та̄лыт урыл э̄ква потыртас: «Ма̄н а̄лпыл кит щё̄скем школат ханищтавесӯв ос юв та ке̄таве̄в. Юн мощ ӯщлахтэ̄в, тэ̄гӯв ос рӯпитаӈкве о̄вылтахтэ̄в. Во̄рт тыпйӣв са̄грысӯв ос хӯл алыщлаӈкве ялсӯв. То̄нт матыра̄ти ва̄руӈкве о̄памн ханищтаве̄сум. Таве ёмщакв номилум, 99 та̄лэ мус о̄лыс. Щаще̄квам война юипа̄лт ат та̄л туп о̄лыс ос а̄тимыг е̄мтыс. О̄лме̄т таквина̄тэ о̄с ат са̄литастэ, во̄раяӈкве такви ялыс, акваг матыр ка̄тнпатталас. Ма̄н, ня̄врамыт, тэ̄лы ул вос по̄льтахтэ̄в, то̄сам пум тармыл ӯнттаве̄в, лапма̄нигтаве̄в ос лувыӈ суныл во̄рн та тотаве̄в. Хӯл алыщлэ̄в ке, аквтох то̄сам пумыл пантаве̄в, та̄ра ат по̄ляве̄в. Тох та о̄лсӯв, яныгмасӯв. Ётыл ма̄хум мо̄т ма̄н рӯпитаӈкве манос ханищтахтуӈкве мингаласыт. Ань Резимово па̄выл туп наме хультыс». Ха̄льӯсн увщитэ̄н о̄луӈкве во̄ввес. Тав тот хо̄псы а̄гм пусмалтан пӯльницат налыман та̄л рӯпитас. Самагепаляге а̄гм ма̄гыс э̄лаль ханищтахтуӈкве ат минас, туп Ханты-Мансийскан ле̄ккарыг ханищтан курсын та̄лохсан ке̄тыглавес. Тувыл Ха̄льӯс пӯльницат хо̄псы а̄гм о̄щнэ хо̄тпат палт лов та̄л санитаркаг рӯпитас. Тот акв ма̄т хоса рӯпитаӈкве ат та̄ртве̄сыт. Тав маснутыт ловтнэ колнакн рӯпитаӈкве ке̄твес. Ос тувыл пенсиян та патхатас. Ань Ха̄льӯст Татьяна а̄гитэ палт о̄лы. Александр пыге хосат а̄тимыг е̄мтыс. Ӯст тав ёмащакв пусмалтавес, таквсы порат ле̄ккаре̄н о̄с ёхталаӈкве ла̄ввес. Тав ётэ потыртамум порат маттем та мовиньтасме̄н. Тамле ощхуль ва̄рнэ ёмас э̄ква ёт ам та ва̄йхатасум.

1074 2014.04.18. Людмила ТЕТКИНА

Мирн ва̄нэ ма̄ньщи о̄йка тот о̄с ханищтахтас. Кондинский район Леуши па̄выл школан 270 ня̄врам яланты, та̄н халанылт 95 а̄гирищпыгрищ ма̄ньщииг манос хантыиг о̄лэ̄гыт. Школа Леуши ос Листвиничный па̄выл халт ӯнлы. Ты кит па̄влыгт о̄лнэ ня̄врамыт тот ханищтахтэ̄гыт. 2005 та̄лт ты школа Кирилл Петрович Механошин намыл пинвес. Ты о̄йка яныг хо̄нтлан нак о̄лум порат хо̄нтлас. Тав «Герой Советского Союза» яныг нам о̄ньщас. Андрей Семёнович Тарханов, ма̄ньщи поэт, о̄с та школат ханищтахтас. Ты та̄л тав «Почётный житель ХМАО-Югры» яныг намыл майвес. Леуши школат рӯпитан ма̄хум ос ня̄врамыт ты хо̄тпаг сака янытлыяныл. Ань тот Татьяна Степановна Билоухая кӯщаиг рӯпиты. Леуши па̄вылн ялмум порат ам тав ётэ хо̄нтхатыгласум ос школаныл урыл китыгласлум. Тав ла̄внэ̄тэ щирыл, Леуши па̄вылт йильпи школа 2001 та̄лт ӯнттувес. Школат аквторыг 400 а̄гирищитпыгрищит ханищтахтуӈкве кос ве̄рме̄гыт. Тувыл ань ты йис ня̄врамыт колнакыл ат то̄влавет. Ка̄сыӈ та̄лныл са̄внув ня̄врам школан ёхты, ань о̄выл классын 28 а̄гирищпыгрищ яланты. Па̄вылт мир акваг са̄вми ос са̄в ще̄мья савалап ня̄врам янмалтаӈкве выгыт. Ань Леуши па̄вылт 23 савалап а̄гирищпыгрищ ще̄мьят о̄лэ̄гыт. Ань «региональный компонентыг» ла̄внэ программа школат ва̄рвес. Ты хосыт о̄выл классыт «Мы дети природы» нампа предмет ня̄врамыт ханищтэ̄гыт. 5-7 классыт соссаӈ ма̄хум литература урыл та̄н потыртавет. 8-9 классыт «Экология и география ХМАО», 10-11 классын ялантан ня̄врамыт «История ХМАО» нампа урокыл ва̄рве̄сыт. Йильпи программат щирыл ма̄ньщи манос ханты ла̄тыӈ ханищтаӈкв таӈхе̄гыт ке, туп то̄нт ла̄тыӈ ханищтан урокыл ва̄равет. Леуши па̄вылт ня̄врамыт ма̄ньщи ла̄тыӈ ва̄ӈкве ат ка̄саще̄гыт. Татьяна Степановна ла̄выс: «Па̄влувт ма̄ньщи ла̄тыӈ ва̄нэ хо̄тпа а̄тим, ты ма̄т о̄лнэ ма̄ньщит хосат та̄гыл ща̄нь ла̄тӈаныл хо̄тёрувласаныл. Улпыл тыи ма̄гсыл ня̄враманыл ты ла̄тыӈ ханищтаӈкве ат таӈхе̄гыт. Ма̄н ня̄врамыт ма̄гсыл кружок ва̄рыгласӯв, ня̄врамыт сак хартуӈкве ханищтасанӯв. Тув аквкит ня̄врам туп ялантас, тыщирыл ма̄щтырлаӈкве о̄с ат ка̄саще̄гыт. Школат музей рӯпиты, кӯщаиг тот Елена Павловна Кульчицкая о̄лы. Тав ня̄врамыт ёт пе̄с пормасыт, нэ̄пакыт, хурит тув акванаты. То̄ва а̄гитпыгыт ёт са̄всыр докладпотрыт хансэ̄гыт, са̄всыр конференциян ва̄тихал ялантэ̄гыт. Ты рӯпатал та̄н пӯмщалахтэ̄гыт». Школат ма̄ньлат хо̄тпат рӯпитэ̄гыт ман а̄ти, ты урыл ам Татьяна Степановна китыгласлум. Кӯщай нэ̄ ювле ла̄выс: «Ань ма̄н школавт 9 ма̄ньлат хо̄тпа рӯпиты. Та̄н халанылт акв нэ̄ туп Леуши па̄вылныл о̄лы. Тав школа а̄стлан юипа̄лт э̄лаль ня̄врам ханищтан нэ̄г ханищтаӈкве минас, тувыл ювле рӯпитаӈкве ёхтыс. Нёлолов хо̄тпа мо̄т ма̄ныл о̄лэ̄гыт. Ань йильпи са̄ккон щирыл мо̄т ма̄ныл хо̄тпат рӯпитаӈкве тыг ке во̄вавет, та̄наныл о̄лнэ колыл миӈкве э̄ри. То̄ват служебныиг ла̄внэ колыл майве̄сыт. То̄ва ма̄ньлат хо̄тпат та̄нки о̄лнэ кол хо̄нтсыт, арендаолн ойтым о̄лэ̄гыт. Тамле колт о̄лнэ ханищтан хо̄тпанув на̄йпос, вит, коланыл па̄лтыглан ма̄гсыл олныл нё̄тавет. Ос мо̄т са̄ккон щирыл университет очный отделения а̄стлан а̄гитпыгыт та̄ра школан рӯпитаӈкве ке ёхтэ̄гыт, кит та̄л сыс ка̄сыӈ э̄тпос арыг кит со̄тыра солко̄вил мивет. Ань ня̄врамыт ханищтан хо̄тпат са̄в олныл ойтавет. Бюджетыт рӯпитан хо̄тпат хольт акв та̄л сыс рӯпата олнаныл но̄хнё̄тавет. Тыи ма̄гсыл ма̄ньлат хо̄тпат ань школат рӯпитаӈкв ка̄саще̄гыт». Ня̄врамыт ЕГЭ хумус хансэ̄гыт, ты урыл Татьяна Степановна тох ла̄выс: «Акв та̄лт 9 классыт 33 ня̄врам о̄лыс, школат э̄лаль ханищтахтуӈкве туп аквхуйплов ня̄врам хультыс. Мо̄т ня̄враманув Междуреченский па̄вылт о̄лнэ колледжит ханищтахтэ̄гыт, а̄лпыл тув минэ̄гыт, ӣтипа̄лаг ювле ёхтэ̄гыт. Мо̄лты та̄л акв а̄ги ЕГЭ хансуӈкве ат ве̄рмыс, аттестат пе̄нтсыл справканэ̄пакыл майвес. Тамле ва̄рмаль акв щёс туп о̄лыс, тох тай ня̄враманув пуссын экзаменыт ёмащакв хансэ̄гыт».

1074 2014.04.18. Светлана РОМБАНДЕЕВА

Та̄ныт са̄ӈквылтан ма̄ньщи хум. Яныгполь э̄тпос 28 хо̄талэ̄т Владимир Иванович Шесталов атпан та̄лэ то̄влы. Намыӈсуиӈ ма̄ньщи хо̄тпав Юван Николаевич Шесталов ты тав пыге. Владимир Иванович Ханты-Мансийск ӯст о̄лы, искусства школат рӯпиты, ня̄врамыт са̄ӈквылтапыл та̄ныт са̄ӈквылтаӈкве ханищтыянэ. Э̄лаль ань тав потре ловиньтэлы̄н: – Ам 1964 та̄лт Тюмень ӯст самын патсум. Омам Елизавета Владимировна, а̄ги о̄парищ наме Иванова. А̄тямн Лылыиг ла̄ввес, Лылы – рущ ла̄тыӈ щирыл – душа. Тэ̄н 1959 та̄л порат Санкт-Петербург ӯст акванминасы̄г. 1960 та̄лт Аринэ увщим самын патыс. 1971 та̄л мус ма̄н Тюменьт о̄лсӯв, тувыл Ленинград ӯсн ва̄нтлысӯв, увщиме̄нтыл тот яныгмасме̄н. Э̄ргуӈкве манос музыкальный инструментытл ёнгуӈкве ма̄нь та̄гыл тахсум, э̄рыгсов та̄н сака са̄в хӯнтлысум. Увщим Жданов нампа пионерыт колн ялантас, э̄ргыт э̄ргыс. А̄нум о̄с тув во̄выгластэ, тот э̄ргысум. Увщим акваг э̄ргыс, са̄всыр инструментытыл ёнгыс. Ам ос хӯнтлысум, ханищтахтасум, тувыл э̄рыгсовыт, та̄ныт ла̄щалла̄щал ва̄ӈкве патсанум. Ка̄тыл са̄всыр хурит по̄слысум, а̄тям номсыс, ам хурит по̄слын хо̄тпаг е̄мтэ̄гум. Ос ам акваг э̄ргын ва̄рмаль нупыл хартсум. Хо̄тхуйплов та̄лум порат гитарал ёнгуӈкве ханьщувласум. Эстрадный э̄рыг сака са̄в хӯнтлысум, та порат май тамле группат о̄лсыт: «АББА», «Бони М», «Битлз», «Роллинг Стоун». Та̄н э̄рганыл ам сака э̄руптасанум, хӯнтлысанум. Ма̄н, та порат яныгмам ма̄ньлат ма̄хум, та̄н хольтаныл э̄ргуӈкве сака тахсӯв. То̄нт ты э̄рыгсовыт хансуӈкве патсум. О̄выл э̄ргум Джон Леннон а̄тимыг е̄мтум хо̄талт хансыслум, тувыл та̄нсовыл ва̄рыслум – ва̄т са̄грапнал э̄тпос 9 хо̄талэ̄т 1980 та̄лт. 1985 та̄л па̄сныл а̄тямн тыг, Ханты-Мансийск ӯсн, во̄вуӈкве патве̄сум. Ам номсыте̄мт, яныг ӯст яныгмасум, тамле ма̄нь па̄вылн хумус минэ̄гум, тот ань ӯсхулыт хосыт мисыт ё̄мыгтэ̄гыт. Та порат ам ва̄т нупыл хӯрмит та̄лум то̄влыс. Тувыл маныр ва̄руӈкве, а̄тям ла̄вум ла̄тӈе хӯнтлуӈкве э̄ри, тув хотталь та ка̄сащасум. Ленинградыт ам заводыт рӯпитасум, тыт ос кол ӯнттын ма̄т плотникыг патхатасум. Ётылнуве, 1987 та̄лт, ам педучилищат ханищтахтуӈкве патсум. Э̄рыг та̄ныт ханищтан мир, э̄рыг э̄ргын хо̄тпат ам та па̄сныл ты ва̄ганум. 1989 – 1990 та̄лытт ам ма̄ньщи мирув та̄ныт ос э̄ргыт ханищтаӈкве патсум. 1991 та̄лт педучилище а̄стламум юипа̄лт, Новосибирск ӯст о̄лнэ консерваториян поступайтан ре̄тыл минасум. Тот ань май э̄рыг тэ̄ла ханищтаве. Ос ам тот ханищтахтуӈкве ат ка̄сащасум, аман хотэ̄ссамаве̄сум манос хотрохтысум, ювле пе̄румтахтасум. Тувыл та порат тот ты э̄квам ёт акванхо̄нтхатасме̄н. Тав ам сымумн та̄ра хо̄яс, таве э̄руптаӈкве патыслум, наме Софья. Ам таве̄н о̄с сака мӯстысум. Ханты-Мансийскын аквъёт ёхтысаме̄н, тыт акванминасаме̄н, пӯри тэ̄сув. 1993 та̄лт ме̄н э̄кваме̄нтыл Санкт-Петербург ӯст о̄лнэ А. И. Герцен нампа институтт ханищтахтуӈкве о̄вылтахтасме̄н. Та тув тыт финноугорский мир нилыт мирхал фестиваляныл о̄лыс. Ма̄хум мӯйлысыт, э̄рыг э̄ргысыт, йӣквсыт. То̄нт ты ам са̄ӈквылтапыл ёнгуӈкве ханьщувласум, «Кӯринька» йӣкв йӣквсум. Тувыл Восыӈтӯрныл ёхталам ма̄ньщи хо̄тпа Василий Николаевич Яркин ёт ва̄йхатаӈкве патсум. Тав а̄нум такви са̄ӈквылтапе мӯйлуптастэ. Мощ ётылнуве о̄йка а̄тимыг е̄мтыс. Институтт ханищтахтамуме̄н коныпал, ме̄н 1996 та̄лт Петрозаводский консерваторият ханищтахтуӈкве патсуме̄н. Тот ам э̄рыг ва̄рмаль ва̄нэ яныг хо̄тпат ёт ва̄йхатсум. – Владимир Иванович, кит ма̄т ханищтахтуӈкве хумус а̄лымасын? – Сака та̄рвитыӈ о̄лыс. Та порат ам тӯлыглахтан ва̄рмаль ханищтаӈкв патыслум. Ты э̄лыпа̄лт Кышик па̄вылт Ӯй йӣквес, ам тув ялсум, тот мощ суссум. Ханищтахтан ма̄ныл а̄стысум, 2001 та̄лт ювле йисум, тыт искусства центрыт рӯпитаӈкве патхатасум. 1995 та̄лт э̄рыг ханищтан урыл кит нэ̄пак хассум, 2001 та̄лт хӯрмит нэ̄пакум хансыслум. Ань потруме̄н та оигпас. Владимир Иванович 2011 та̄лт искусствоведение кандидат намыл майвес. А̄тятэ, Юван Николаевич, сака ща̄гтыс, ань пыге намыӈсуиӈыг е̄мтыс. Владимир Иванович тӯлыглахтан ва̄рмаль ва̄т нупыл ат та̄л арыгтем ханищты, э̄ргыт, йӣквыт ханищты, пуссын нэ̄пакын хансыянэ. Ма̄н, редакцият рӯпитан ма̄хум, ты я̄тил ма̄ньщи хо̄тпав нам хо̄талэ̄т янытлылӯв! Ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве!

1074 2014.04.18. Светлана РОМБАНДЕЕВА

Ма̄хум кассыт. Ма̄ньполь э̄тпос 24-28 хо̄таланэ̄т Ханты-Мансийск ӯст «Педагог года Югры – 2014» нампа конкурс о̄лыс, ня̄врамыт ханищтан ма̄хум халанылт кассыт. 2014 та̄л культура та̄лыг намаявес, ты конкурс ань таи ма̄гыс ты ва̄рыглавес. Ма̄ньщи ос ханты ма̄хманув тот о̄с кассыт, то̄ва хо̄тпанув тыг мо̄т па̄влытныл ёхталасыт. Акв ма̄ньщи нэ̄ Ха̄льӯс район Кульпас па̄вылныл ёхталас, Евдокия Ивановна Кугина. Школат тав ма̄ньщи ла̄тыӈ ос литература ханищтан учителиг рӯпиты. Та̄н рӯпатаныл о̄вылтыт потыртасыт, уроканылт ань ня̄врамыт ёт хумус рӯпитэ̄гыт, ма̄хумн пуссын суссылтасыт. Владимир Савельевич Меров тав но̄хпатыс. Ты ма̄ньщи хум Ханты-Мансийск ӯст о̄лы, «Лылынг союм» центрыт рӯпиты, ня̄врамыт ма̄ньщи ла̄тӈыл потыртаӈкв ханищтыянэ. Ма̄н, редакцият рӯпитан ма̄хум, ты я̄тил ма̄ньщи хо̄тпав но̄хпатме ма̄гсыл янытлылӯв! Пуста̄гыл вос о̄лы, э̄лаль о̄с аквтох ка̄ркамыг вос рӯпиты, На̄янэ̄н-О̄тыранэ̄н вос ӯргалаве! О̄выл хурит В. С. Меров ня̄врамыт ёт по̄слым о̄лы. Китыт хурит по̄слым о̄лэ̄гыт: И. М. Молданова (Ханты-Мансийск ӯст те̄хнологопедагогический колледжит рӯпиты, ма̄ньлат ма̄хум ханты ла̄тӈыл потыртаӈкв ханищтыянэ), Е. И. Кугина, В. С. Меров ос М. Е. Макарова (Ханты-Мансийск ӯст о̄лы, соссаӈ ня̄врамыт ма̄гыс ханищтан нэ̄пакыт ва̄рнэ ма̄т рӯпиты).

1074 2014.04.18. Светлана РОМБАНДЕЕВА

О̄выл класс ханищтан нэ̄. Хурит Ха̄льӯс район Саранпа̄выл школат о̄выл класс ня̄врамыт ханищтан нэ̄ по̄слым о̄лы, наме Зайтуна Биктимировна Магафурова. Ня̄врамыт ань иӈ ма̄нит, наме ла̄вуӈкве ат ве̄рмияныл, Зинаида Петровнаг ла̄вияныл. На̄н ань тав потре ловиньтэлы̄н: – Ам ханищтан классумт 13 ня̄врам ханищтахты – 9 соссаӈ ня̄врамаквет, 2 рущ ос 2 саран. Тыт ам ань о̄выл та̄л рӯпитэ̄гум. Ня̄врамаквет халанылт юртыӈыщ о̄лэ̄гыт, акваннё̄тхатэ̄гыт. Хотьютаныл хоса ат те ёхталы, ка̄саныл холы, ӯрияныл, халанылт э̄руптахтэ̄гыт. Акв ще̄мья хольт о̄лэ̄гыт, ат алхата̄лэ̄гыт. Ща̄няныла̄щаныл о̄с пуссын мӯсхал ма̄хум, сапра̄ни ва̄рыгланэм порат пуссын ёхталэ̄гыт, матыр тэ̄ланув ёмащакв ёлхансыяныл. Ань май йильпи ханищтап ква̄лтапаптувес, та̄наныл мо̄т щирыл ханищтаӈкве э̄ри. Ня̄враманылн акваг нё̄тэ̄гыт, юв минэ урокыт акваннё̄тхатым ва̄рияныл. Ты ма̄гыс ам номтум сака ёмас, ня̄врамаквет матъёмас тамле мӯтраӈ ща̄ньа̄щ о̄ньще̄гыт. Акв ма̄т ӯнлуӈкве та̄нанылн та̄рвитыӈ, таима̄гсыл са̄всыр кружокыт о̄лэ̄гыт, тув о̄с ялантэ̄гыт, йӣкващлэ̄гыт, э̄рге̄гыт. Зайтуна Биктимировна хо̄тпа нупыл сымыӈ нэ̄, ёмас э̄лумхо̄лас, щар ма̄ньщи хурипа. Пуста̄гыл вос о̄лы, со̄тыӈыщ вос о̄лы!

1074 2014.04.18. Николай МЕРОВ

Ма̄щтыр нэ̄ ня̄врамыт ханищты. Галина Петровна Самбиндалова 1998 та̄лт Ня̄хщамво̄ль па̄вылн ва̄нтлыс. Ты э̄лыпа̄лт Ягрим па̄вылт о̄лыс, тот рӯпитас. Тувыл хум ва̄рыс, о̄йкатэ наме Тимофей Константинович Самбиндалов, тэ̄н са̄в та̄л аквъёт о̄лэ̄г. Ам ты ма̄ньщи па̄вылн ялмум порат Галина Петровна ёт хо̄нтхатыгласум, тав а̄нумн такви о̄лупсатэ урыл мощ потыртас. На̄н тав потре ловиньтэлы̄н: – Ме̄н о̄йкаме̄нтыл о̄влэ̄т Яныгпа̄вылт о̄лсуме̄н. О̄йкам ща̄не хотталь щалтме юипа̄лт, а̄ще а̄гмыӈыг е̄мтыс. Таима̄гыс тот акв та̄л о̄лсуме̄н. Тувыл а̄гим ханищтахтан поратэ ёхтыс, ма̄н ще̄мьяӈ та̄гыл Ня̄хщамво̄льн ва̄нтлысӯв. Тыт клубыт ам художественный руководителиг рӯпитаӈкве патсум. То̄нт ма̄н музейкол пунсуӈкве тахмаясӯв. Са̄ртын э̄лыл ёхталам хо̄тпат па̄вылт о̄лнэ пе̄с пормасыт пуссын ӯс музейн тотыгласаныл. Яныгпа̄вылт о̄лмум порат Югорск ӯсн сака са̄в пе̄с пормас вуйвес. Ам ла̄всум, манрыг наска̄ссыг э̄л миӈкве, ма̄нки пормас атнэ кол ва̄ре̄в. Тыт хультэ̄гыт ке, сакати ня̄враманув сунсэ̄гыт. Ам клубколт рӯпитасум. Хотьют музейн ёхты, та̄ра во̄вавем. Ма̄хум сака пӯмщалахтасыт. Ма̄н ка̄сыӈ та̄л суссылтап щё̄пита̄лсув. Ялпыӈ хо̄талыт о̄лыгланэ̄ныл порат ю̄нтум ос сагум пормасанув пуссын тот суссылтасанӯв. Тувыл Хулюмсунт па̄вылн йильпи кӯщай паттувес. Тав румэ̄кватэ таве̄ныл па̄влувт тыналахтын ма̄гыс колнак во̄выс. Таима̄гыс клуб кӯщай пе̄с пормасыт та колнакыл хотвиӈкве ла̄всанэ. Та румэ̄ква тот пормасыт тыналаӈкве патыс. Музеюв рӯпитан ма̄ныл по̄илттаслӯв, то̄ва пормасанув па̄влыӈ ма̄хумн ювле мисанӯв, то̄ват ма̄н палтув хультсыт. О̄йкам ва̄рыглам сол ква̄лганэ хоткулатасыт. Омамныл хультум са̄хи ань но̄хвиӈкве пилэ̄гум, о̄с сака пе̄сыг е̄мтыс. Та колнак клуб нупыл хансым о̄лы. О̄влэ̄т тот кина суссылтавес. Ма̄н та нэ̄ ты колнак ма̄гыс ойтхатуӈкве ла̄выслӯв. Олн ат ойтнэ̄тэ ма̄гыс, ма̄н ань та колнак туманыл лаппантыслӯв. Ань миркол кӯщаюв та колнак о̄с музейколыг ва̄руӈкве ла̄выстэ. Ос ма̄н пе̄с пормасыт пуссын ла̄кквамисанӯв. Тувыл ос то̄ва пормасыт сака пе̄сыг е̄мтсыт. А̄гим ханищтахтын ма̄ныл а̄сты, ты рӯпатаныл по̄хын минуӈкве таӈхе̄гум, пенсиян патхатэ̄гум. Тав па̄вылт о̄луӈкве щар ат таӈхи, тыт рӯпата а̄тим. Ань ма̄хум мирколт, ма̄нь ня̄врамыт колт, школат, пӯльницат ос клубыт рӯпитэ̄гыт. Тувыл та, воссыг нэ̄мхо̄т рӯпитан ма̄ а̄тим. Клуб колт 2002 та̄л па̄сныл «Ма̄нь са̄лыкве» нампа кружок о̄ньще̄в. Са̄ртын ловманкем ня̄врам ма̄щтырлаӈкве тув ёхталас. Ка̄тыл ва̄рим пормасаныл ӯсн ке̄тыгласанӯв. Юио̄выл та̄лыт сыс мощща ня̄врам тув ялантаӈкве патыс, ань а̄гирищанув сакыл матыр сагуӈкве ос ю̄нсхатуӈкве ат таӈхе̄гыт. Тувыл та̄наныл Саранпа̄вылн «Ма̄нь ӯскве» нампа ня̄врамыт ӯщлахтын ма̄н тотыглаӈкве патсанум. Ам ла̄ве̄гум, кружокн ялантаӈкве ат патэгы̄н ке, тув ат тотыглыянум. Ты хосыт ань атах а̄гирищ яласаӈкве патыс. Ма̄ньщи то̄р ос мо̄т са̄всыр пормас ю̄нтэ̄в. Ты та̄л ре̄тыӈ ю̄свой э̄тпост рӯпатанув ос Ха̄льӯсн тотыгласанӯв. Мо̄лты ма̄н ма̄ньщи э̄ква саг сагсӯв, ма̄ньщи суп йинсӯв. А̄гит ёмщакв ю̄нсхатуӈкве ат ха̄сэ̄гыт, ты кос ханищтыянӯв (мовиньты), ю̄нтмиланыл ка̄салэгы̄н ке, такем янгыт. Саранпа̄выл а̄гит татем ёмщакв ю̄нсхатэ̄гыт, ма̄н ня̄враманув тох ат ха̄сэ̄гыт. Ань а̄канит ма̄гыс ма̄нь то̄рыт ю̄нтэ̄в. Ханищтахтэ̄в, тувыл пуӈкын пиннэ яныг то̄рыт ущ ю̄нтуӈкве патэ̄в. Ам Галина Петровнан са̄в ёмас ла̄тыӈ ке̄тэ̄гум. Тав ня̄врамыт са̄всыр пормасыт ю̄нтуӈкве ос сакныл пормасыт сагуӈкве ханищты. Ты ма̄щтыр нэ̄ хо̄тпа ма̄н янытлылӯв. Са̄в та̄л пуста̄гыл э̄лаль вос о̄лы!

1074 2014.04.18. Анна АЛГАДЬЕВА

Ма̄н Ӯринэ̄ква хо̄талув ӯлыглэ̄в. Ӯринэ̄ква ро̄ӈхувлы ке, тӯя по̄ра та ёхтыс, ма̄лтыпыг ты е̄мты. Ма̄лтып посыӈ тӯя хо̄талакве̄тн ма̄хум ща̄гтэ̄гыт. Лӯи ма̄ е̄р па̄влытт, ӯсытт «Ӯринэ̄ква хо̄тал» акваг ӯлыглаве. Ка̄сыӈ па̄выл, ка̄сыӈ ӯс такви щирыл мӯйлы. Хулюмсунт па̄вылт «Ӯринэ̄ква хо̄тал» яныгполь э̄тпос китыт ӯщлахтын хо̄тал о̄лум порат минас. Са̄в ня̄врам, яныг хо̄тпа ма̄ньщи па̄вылн атхатыгласыт. Школат ханищтахтын ня̄врамыт ос то̄ва яныг ма̄хум концерт суссылтасыт: э̄ргысыт, йӣквсыт, стихыт ловиньтасыт. Ня̄врамыт ма̄гыс са̄всыр ёнгыт, касылыт о̄лсыт, хо̄т та̄н са̄всыр мӯйлупса та̄нкина̄нылн сэ̄лсыт. «Ӯринэ̄ква хо̄тал» омат ос ня̄врамыт хо̄талыг ла̄ва̄ве. Тыи ма̄гыс о̄с акв ёмас пищ ма̄н па̄влувт о̄лы – ка̄сыӈ тӯя е̄мт та̄л сыс самын патум ня̄врамыт ты хо̄тал ма̄нь мӯйлупсал мивет. Мо̄т па̄влыӈӯсыӈ ма̄т ты хо̄тал ма̄гыс олн та̄ставе, йис о̄лупса койнэ ос музеит рӯпитан ма̄хум са̄ртын та̄гыл ты кастыл щё̄питахтэ̄гыт, рӯпитэ̄гыт. Хулюмсунт па̄вылт ты ёнгын хо̄тал ва̄руӈкв ё̄рыл нэ̄мхотьют ат кащилтаве. Ма̄хум пуссын та̄нки номтыл, хумыс ка̄саще̄гыт, тох ва̄ре̄гыт. Нэ̄мхотьют ты ма̄гыс олныл ат ойтаве. Ня̄врамыт ӯрхатэ̄гыт, китыглахтэ̄гыт, хунь «Ӯринэ̄ква хо̄тал» е̄мты. Та̄н ханьщувласыт, тыт ёмщакв ёнгасаӈкв ос поргащлаӈкв ро̄ви. Яныг ма̄хум ос, сакати, нас потраме̄гыт. Ты хо̄тал са̄в хо̄тпа акванатхаты, па̄влыӈ рущанув о̄с ёхтэ̄гыт, то̄ват пасанн тэ̄нут тотэ̄гыт. Ты ва̄рмаль о̄с ва̄ганыл. Марина Александровна Алгадьева ос Оксана Алексеевна Алгадьева са̄в нё̄тнэ э̄рыг э̄рге̄г, ня̄враманэ̄н ёт йӣквта̄ныт йӣкве̄г. Ма̄хмытн сака мӯсты, маныр тэ̄н щё̄питэ̄г, концерт ва̄рнэ а̄гитн нё̄тэ̄г. Ты ма̄гыс я̄нас пӯмащипа тэ̄натэ̄н. Яныг хо̄тпатыл Константин Георгиевич Адин ос Галина Константиновна Алгадьева аквъе̄мт нё̄тнэ ёмас э̄ргыт э̄рге̄г. Константин Георгиевич потыртас, пе̄с ма̄хманэ̄ныл, ла̄ви, хӯлыглас: «Пе̄с о̄с аквтох са̄в хо̄тпа акванатхатнэ ма̄т, волк (та̄нкке̄ныл о̄лнэ) ма̄ньлат ма̄хум юртхо̄тпа та̄нкина̄нылн сунсыгласыт. Аквтох э̄ргысыт, йӣквсыт, ёнгысыт, ощхульласыт, акванрумалахтасыт. Тувыл акванминнэ ма̄хум акванминасыт. Тох о̄лнэ ва̄рмаль э̄лаль минас». Тӯя хо̄талыт ёт Ка̄сыӈ колн со̄т вос щалты, Ка̄сыӈ колта̄гыл ща̄гтым вос о̄лы. Ка̄сыӈ хо̄тпа пуста̄гыл вос о̄лы, Ка̄сыӈ ня̄врам со̄тыӈыг вос яныгми. Пӯмащипа ла̄тыӈ па̄влыӈ мирколувн ла̄ве̄в. Миркол кӯщай нэ̄в О. В. Баранова ня̄врамыт ма̄гыс мӯйлупса ёвтнэ олнломт майлалы. ЛПУ кӯщаигн С. Г. Подкатиловн ос А. Н. Ермоловн пӯмащипа ла̄ве̄в, ка̄сыӈ е̄мт тӯйт няртнэ ё̄рыл майла̄лаве̄в. Ты хосытыл ня̄врамыт ёнгын канувт лощтыг поргащлэ̄гыт, э̄п тӯйтыт ат сусыгтэ̄гыт.

1074 2014.04.18. Николай МЕРОВ

Ня̄хщамво̄льт о̄лнэ во̄раян нэ̄. Мария Ильинична Рочева, а̄ги о̄парищ наме Монина, Ха̄льӯс район Ня̄хщамво̄ль па̄вылт о̄лы. Тав Усть-Манья па̄вылт самын патыс. То̄нт тот фельдшерский пункт рӯпитас. Та па̄вылныл ва̄т нупыл ат ве̄рыстат кит во̄рколыг ӯнлысыг. Мария тот ты яныгмас. Пе̄с порат та ма̄нь па̄вылт Мониныт кит ще̄мья во̄раясыт ос хӯл алыщласыт. Та во̄рпа̄выл Мониныт нам о̄ньщис. А̄ще наме Илья Николаевич Монин о̄лыс, акваг во̄раим ос хӯл алыщлым яласас. Тав 2007 та̄лт во̄рт хоттыпыс. Оматэ ос Анна Ивановна Монина. Э̄кваго̄йкаг ат ня̄врам янмалтасы̄г. Ань Мария Ильинична кит э̄щаге Лиза ос Соня Ня̄хщамво̄льт о̄лэ̄г. Акв каӈке а̄тимыг е̄мтыс, мо̄танэ ос Усть-Манья ляпат хотты ма̄т во̄р яктым рӯпиты. Та̄н колта̄гланыл 1986 та̄лт Ня̄хщамво̄льн ва̄нтлыс. Мария Ильинична тот хум ва̄рыс. О̄йкатэ Владимир Яковлевич Рочев саран хум, во̄раим рӯпитас. Ос ма̄щтыр хум матыра̄ти пуссын ва̄руӈкве ха̄сы. Ань пенсиян патыс кос ос во̄раян ма̄тэ̄н иӈ яланты. Та йис ма̄тэ такви нупылэ тох аты хансыстэ. Ос па̄влыӈ ма̄хум ва̄ганыл, по̄х хо̄тпат тув ат воратэ̄гыт. Са̄ртын а̄ще тот са̄лы о̄ньщис, са̄в та̄л пастухыг рӯпитас. Ётылнув са̄лыянэ ла̄щалла̄щал холасыт. Совхоз лаппантым юипа̄лт о̄йкатэ тот такви во̄раяӈкве патыс. Та ма̄ ёмщакв ва̄гтэ. Э̄кваго̄йкаг тэ̄нккетэ̄н о̄лэ̄г. Па̄вылн ёхтуме̄н порат Мария Ильинична о̄влэ̄т ня̄нь ва̄рнэ колт кӯщаиг рӯпитас. Тувыл та порат сокращение е̄мтыс, тав по̄хын ке̄твес. Та юипа̄лт школат мощ рӯпитас. Ос тот рӯпитаӈкве такви ат ка̄сащас, матахмат та̄л рӯпата ат о̄щнэ̄тэ ма̄гыс олныл ойтыглавес. Тувыл пенсиян патыс. Пуссын аквъёт нёловхуйпловкем та̄л рӯпитас. Ань о̄йкатэ̄нтыл аквъёт во̄руй алыщлым яласэ̄г. Таквсы порат хумитэ такке̄т во̄раи. Йильпи та̄л юипа̄лт ущ аквъёт минэ̄г. Владимир Яковлевич э̄кватэ ма̄гыс во̄вта ёса ва̄рыс. Ёса паттаге котыл хартсаге, аквъёт во̄рт ё̄мыгтэ̄г. То̄ванакт па̄вылн ёхтуӈкве ат а̄лыме̄г, я̄ та̄кыщ я̄ӈкыл лаппо̄ляве, ха̄пе̄н па̄г харттытэ̄н ос ла̄глыл па̄вылн та минэ̄г. Лё̄ӈхыт во̄рколт ӯщлахтэ̄г ос ща̄й ае̄г. То̄ванакт са̄в тӯйт паты ке, ёсал ё̄ме̄г. О̄лнэ ма̄тэ̄ныл о̄выл во̄ркол мус ва̄т нупыл ат ве̄рыста палыт лё̄ӈхе. Мо̄лты йильпи та̄л тэ̄н во̄рколт мӯйлысы̄г. Тот нёхыс ке̄рняль ӯнттым о̄ньще̄г. Ты коныпал во̄руй пувнэ ма̄гыс ня̄лит во̄ртэ̄г. Ань ты накт нёхыс со̄в тынэ ёмас са̄витыг но̄хнё̄твес. Таима̄гыс во̄раян ма̄хум ань таве алыщлаӈкве патсыт. Са̄выӈпа̄лэ лэ̄ӈын ос нёхыс ка̄тынпаттэ̄г. Ты сованэ о̄йкатэ договор щирыл Ха̄льӯс промхозн тыналыянэ. Мария Ильиничнан Ня̄хщамво̄ль па̄вылт о̄луӈкве сака мӯсты. Ос тамле та̄рвит ва̄рмаль о̄лы: колэ̄н 1969 та̄лт ӯнттувес, щар пе̄сыг е̄мтыс. Кол ёвтнэ субсидияолн винэ ма̄гыс нэ̄пакыт атсанэ кос, ос ань ты мус ӯрхаты. Ань та колэ̄нт ва̄т нупыл са̄тыт та̄л о̄лэ̄г. Кол ма̄гыс уртнэ олныт ат то̄вылхатэ̄гыт. Таима̄гыс очередь ворил ты э̄лаль лакви. Мо̄лты та̄л китыглахтас, кӯщаит ла̄всыт, олн иӈ а̄тим. Тувыл колэ̄н сака ма̄нь, акв колнакт о̄лэ̄г ос мо̄т колнакт тэ̄нут па̄йтэ̄г, тувыл та. Тамле колт мӯсхал щирыл о̄луӈкве ат ве̄рме̄г. Тэ̄лы порат тув мус та а̄щирмаӈ, колалатэ сака карс, кӯр па̄лтнэ порат ре̄ге пуссын но̄ӈхаль мины. Таима̄гыс колканэ сака ащирмаӈ. Тамле колт тох та о̄лантэ̄г. Кӯщаитн тувле тэ̄ла а̄тим. Ты ма̄щтыр нэ̄ па̄вылт ка̄сыӈ хо̄тпан ёмщакв ва̄ве. Ма̄хум таве̄н пӯркат, юн ё̄мыгтан ла̄гыл маснут, ня̄рат ос мо̄т са̄всыр маснутыт ю̄нтылтэ̄гыт. О̄йкатэ янытэ̄т такви ю̄нтум пормасыл мастыстэ. Сахи ос мольщаӈ нэ̄мхуньт ат ю̄нтыглас, ос а̄рталахтуӈкве тахнув кос ос нэ̄мхотьютн ат э̄ри. Ам ты мӯтраӈ, нёмса ос ма̄щтыр нэ̄ хо̄тпакве̄н пуста̄гыл о̄лнэ ла̄тыӈ ке̄тэ̄гум. Колта̄глэ ос рӯт ма̄хманэ са̄в та̄л пуста̄гыл э̄лаль вос о̄лэ̄гыт, о̄лупсаныл кӯпнитыг вос е̄мты. Та̄рвит ва̄рмаляны̄н мӯсхалыг щё̄питэ̄н. На̄й-О̄тыраны̄н вос ӯргалаве̄н. Пус ка̄т, пус ла̄гыл э̄лаль о̄лэ̄н!

1074 2014.04.18. Тамара МЕРОВА

О̄лупсав наука нэ̄пакн хансаве. Мо̄лалнув ам Инна Шрёдер, Германия ма̄ныл ёхталам нэ̄, ёт хо̄нтхатыгласум. Тав округувн са̄в щёс ёхталам. Ань маныр тыт ва̄рыс, манхурип тэ̄лат пӯмщалы, ты о̄вылтыт ам таве китыгласлум. Инна ювле ла̄выс: – Ам Галле ӯс Макс Планка нампа институтт 2010 та̄лныл рӯпитэ̄гум. Институтт ма̄н ма̄ янытыл о̄лнэ са̄всыр мирыт о̄лупсаныл, пе̄с наканыл ханищтыянӯв ос тувыл диссертация щё̄питэ̄в. Рущ щирыл ла̄вуӈкве ке, ма̄н «этнологический исследование» ва̄ре̄в. Германият тамле акв кол туп рӯпиты, воссыг нэ̄мхот а̄тим. Тот Евразия янытэ̄т, Африкат о̄лнэ ма̄хум та̄н государстваныл тэ̄лат пуссын ханищтавет. Ма̄н, аквъёт рӯпитан хо̄тпат, Россия лӯима̄т о̄лнэ тэ̄лат ханищтэ̄в. Лӯима̄ нампа центрув лов арыгкем та̄л институтт рӯпиты. Культура колыт са̄всыр па̄влытт манос ӯсытт э̄ре̄гыт ман а̄ти, та̄н рӯпатаныл урыл, ма̄н ты тэ̄лат пуссын та̄рапаттысанӯв. Ма̄хум советский та̄лыт порат хумус ӯщлахтасыт, маныр ва̄рсыт ос ань хумле о̄лэ̄гыт, таитыл пӯмщалахтэ̄в. Ам туи порат на̄н округынт Ха̄льӯс ос Белоярский районыгт о̄лнэ соссаӈ ма̄ньлат хо̄тпат ӯщлахтын ва̄рмаляныл ханищтыянум. -Наӈ наӈки номтытыл ты рӯпата ва̄руӈкв патыслын манос хотьютын ла̄вве̄сын? – Ам са̄ртын лӯима̄т ма̄лтыпнуве̄г е̄мты ман а̄ти, таитыл пӯмщалахтуӈкве тахсум. На̄н округын ам о̄выл щёс 2006 та̄лт ёхталасум. То̄нт Белоярский районт «Парламент мировых народов» нампа форум Хуллор ханты ма̄нь па̄вылт ва̄рыглавес. Ам тув Германияныл о̄лнэ ма̄хум ёт рущ ла̄тӈыл немец ла̄тӈын толмащлан хо̄тпаг ялсум. Тувыл тот о̄лыглам тэ̄лат, лӯима̄ мирыт а̄нумн сака мӯстысыт. Тот ам ка̄саласум ос хӯнтамласум, са̄выӈпа̄лэ ма̄хум маныр ма̄гыс сыманыл ща̄рге̄гыт. Ханты ос ма̄ньщи ла̄тӈыг ос пе̄с накыт хот ты ёрувлавет, ма̄ньлат хо̄тпатын ань э̄лаль ат ке тотавет, хотталь та со̄йме̄гыт. Та па̄сыл ты номаясум, ам ты е̄рт о̄лнэ ма̄хум та̄н культураныл э̄лаль пӯмщалаӈкв тах патыянум. Тот сака пӯмыщ ос э̄рнэ ва̄рмалит урыл хантыт ос ма̄ньщит потыртасыт. Пе̄с наканыл хумле щирыл о̄лэ̄гыт, та̄наныл са̄в мирн суссылтаӈкве ро̄ви ман а̄ти, манос э̄лаль сытамыг о̄ньщуӈкве ос нас ва̄ӈкве э̄ре̄гыт. То̄нт туризм тэ̄лат о̄вылтыт о̄выл щёс потыртасыт. Ольга Александровна Кравченко ос Любовь Павловна Стаканова ёт тот ва̄йхатасум. Тэ̄н ётыл Германиян о̄с ялсы̄г, туризм палт са̄всыр тэ̄лат та̄рапаттысы̄г ос немец хо̄тпат лӯи ма̄н мӯйлуӈкве во̄всанэ̄н. Тэ̄н ётэ̄н ам ёмщакв юрщхатасум ос 2010 та̄лт Галле институтт аспиранткаг патнэм па̄сныл ка̄сыӈ та̄л «Ма̄нь ӯскве» этностойбищан ялантаӈкве патсум. – Манах та̄л тот о̄лэ̄гын? Ос маныр акваг пӯмщалэ̄гын? – Ма̄н мо̄т ма̄т матыр тэ̄ла ханищтэ̄в ке, ма̄навн тот кит та̄л рӯпитаӈкве э̄ри. Ма̄ янытыл о̄лнэ ма̄хум акваг ханищтыянӯв, тувыл ущ наука нэ̄пак хансуӈкве та̄ртаве̄в. Тувыл аспирант акв та̄л мо̄т хо̄н ма̄т ке о̄лы, тав та ла̄тыӈ сэ̄ръёрыг ханищтытэ, тот о̄лнэ о̄лупса ёмщакв торгамтытэ. Ам 2010 та̄лт акв э̄тпос арыгкем "Ма̄нь ӯсквет" рӯпитасум. 2011 та̄лт Саранпа̄вылт ат э̄тпос о̄лсум, та юипа̄лт хӯрум э̄тпосн о̄с ёхталасум. Ань кит э̄тпос сыс о̄с са̄всыр тэ̄лат урыл пӯмщалахтасум. А̄нумн тыг ёхталаӈкве пӯмащ, са̄в юрт хо̄нтсум. Ня̄врамыт ос ма̄ньлат хо̄тпат хумус туи порат ӯщлахтэ̄гыт, маныр ва̄ре̄гыт, маныр пӯмщалэ̄гыт, ты о̄вылтыт наука нэ̄пак тах щё̄питэ̄гум. – Наӈ ётын рӯпитан ма̄хманын хоталь ялантэ̄гыт ос маныр урыл нэ̄пак хансэ̄гыт? – Та̄н Сибирь ма̄т яласэ̄гыт, тот рӯпитэ̄гыт. Акв нэ̄ якут ма̄хум Ясах ялпыӈ хо̄таланыл о̄вылтыт хансыс. Мо̄т нэ̄ помор ма̄хум хӯл алыщлан наканыл ханищтас. То̄ват алтай ма̄хум палт ялантэ̄гыт, тот ялпыӈ ма̄наныл ханищтэ̄гыт. – Лӯима̄ ма̄хум пуссын шаманыг ла̄вавет ос язычество щирыл о̄лэ̄гыт. То̄ват тыитыл хурахлэ̄гыт манос со̄ви сунсэ̄гыт. Наӈ ты о̄вылтыт маныр номсэ̄гын? – Ма̄н "этнология" ханищтан щё̄сыт лӯима̄ ма̄хум хурит ка̄сала̄лсанӯв, о̄лупсаныл урыл кинат суссӯв, таи ма̄гыс ам тамле ва̄рмалит ва̄ганум. Этнология мӯсхалыг ханищтанэ̄м сыс торгамтасум, ма̄ янытыл са̄всыр мирыт та̄нки щиранылт пуссын о̄лэ̄гыт. То̄ват пе̄с щирыл э̄лаль о̄луӈкве номсэ̄гыт. Ам ты ва̄рмаль ханищтаӈкве таӈхилум, а̄нумн сака пӯмыщ. Германият ань са̄в хо̄тпа язычество ос неошаманизм ва̄рмалит о̄вылтыт потрыт ловиньтэ̄гыт. Тувыл та̄нки пе̄с культуранылт о̄щнэ са̄всыр пе̄с потрытыл, мо̄йтытыл пӯмщалахтуӈкве патсыт. Ань та̄наныл ёмщакв торгамтан ма̄гыс мо̄т мирыт пе̄с наканыл ханищтэ̄гыт. Тох немцыт Байкал тӯрн ос тот о̄лнэ соссаӈ ма̄хум палт яланта̄лэ̄гыт. Ка̄сыӈ хо̄тпа таквинатэ̄н э̄рнэ тэ̄ла ос номт хо̄нты. Инна потре ма̄гыс пӯмащипа ла̄тыӈ ла̄ве̄гум ос наука рӯпататэ молях вос а̄стлытэ.

1074 2014.04.18. Светлана РОМБАНДЕЕВА

Ӯринэ̄ква янытлавес. Ты э̄тпос 12 хо̄талэ̄т Ханты-Мансийск ӯст «Ӯринэ̄ква хо̄тал» ва̄рыглавес. Йис та̄гыл ма̄ньщи ос ханты ма̄хум ӯринэ̄ква янытласыт. Тӯя̄г тав ёхтынэ̄тэ порат матыр а̄ныса̄н щё̄питасыт, ялпыӈ хо̄тал ва̄рыгласыт. «Ӯринэ̄ква хо̄тал» ма̄н округувт 2011 та̄л па̄сыл ва̄руӈкве патвес. Ты ялпыӈ хо̄тал кӯщаитн са̄ккон щирыл ва̄рвес, нэ̄пакын хасвес. Ань ка̄сыӈ та̄л яныгполь э̄тпос китыт субботатэт округт о̄лнэ мир вос мӯйлэ̄гыт. Ханты-Мансийск ӯст ма̄хум «Югорская долина» нампа гостиница по̄хат мӯйлысыт. Тот татем ёмас, сыстам во̄рыӈ ма̄кве. А̄ти сака яныг сцена ва̄рыглавес, ма̄хум тувыл ты выступайтасыт. О̄выл ла̄тыӈ губернатор ва̄ӈын хум Геннадий Бухтин тав ла̄выс: «Ӯринэ̄ква хо̄тал – ты ка̄сыӈ колта̄гыл ма̄гыс ялпыӈ хо̄тал. Йис та̄гыл ты хо̄талт ма̄ньщи ос ханты ма̄хум ща̄ньа̄щаныл ос ня̄враманыл янытласаныл. Ань ты ювле хультум та̄л сыс ма̄н ӯсувт соссаӈ ма̄хум халт са̄в ня̄врам самын патыс, та̄наныл ма̄н пуссын янытлыянӯв». Ты хум потыртаме юипа̄лт сценан ня̄врам самын паттум нэ̄тхумит ня̄враманыл ёт во̄вве̄сыт, пуссын янытлаве̄сыт, диплом нэ̄пакыл ос мӯйлупсатыл майве̄сыт. Ты та̄л сыс Ханты-Мансийск ӯст, насати, хо̄тхуйплов ма̄ньщи ос ханты ня̄врам самын патум. Округ кӯщай Наталья Комарова тув о̄с ёхталас, ла̄тыӈ ла̄выс, ма̄хум янытласанэ. Нэ̄пак хаснэ ханты э̄ква Мария Кузьминична Волдина э̄рыг э̄ргыс, апыгрище ханты йӣкв йӣквыс. Ты юипа̄лт мир мӯйлуӈкве та патыс. Концерт ва̄рыглавес, ма̄хум янгема̄не э̄ргысыт, йӣквсыт. Ня̄врамыт ос ма̄ньлат ма̄хум ма̄гыс са̄всыр ёнгилыт ва̄рыглаве̄сыт – халанылт пе̄рщисыт, са̄грап па̄хвтысыт, ё̄втыл ня̄л та̄ратасыт. Кит ё̄рнколыг тӯщталавесы̄г, ма̄хум тув щалтсасыт, ӯнлахо̄лсыт, хӯл исмитыл ос исум ща̄ил айтве̄сыт. Ма̄хум ёсал кассыт Аквта хо̄тал Иртыш я̄ тармыл ма̄хум ёсал кассыт. 1200 спортсменыт ё̄раныл а̄рталаӈкве тув ёхталасыт. Та̄н халанылт намыӈсуиӈ спортсменыт о̄лсыт – Евгений Дементьев, Александр Легков ос округув янытыл спорт ва̄рмаль Департаментыт кӯщаиг о̄лнэ хум Евгений Редькин. Ты коныпал тув соссаӈ ма̄хманув во̄виньта̄лымат. Сургутский район Русскинская па̄вылныл ханты ма̄хум ёхталасыт – э̄квато̄йкат, нэ̄тхумит ос ма̄ньлат пыгыт, пуссын та̄нти ма̄снутанылт масхатым о̄лсыт. Ё̄рнкол тӯщталасыт. Та̄нти халанылт ща̄нь ла̄тӈыл потыртэ̄гыт. Хум хо̄тпаныл ёсал кассыт. О̄выл места Леонид Конкин тав вис, китыт – Сергей Русскин, хӯрмиттыг ос Виталий Русскин тав ёхтыгпас. Но̄хпатум ма̄хум пуссын мӯйлупсатыл мӯйлуптаве̄сыт, янытлаве̄сыт.

1074 2014.04.18. Людмила ТЕТКИНА

Пыть-Ях ӯст ялпыӈ хо̄тал о̄лыс. Ты э̄тпос 12 хо̄талэ̄т Пыть-Ях ӯст о̄лнэ мир «Ӯринэ̄ква хо̄тал» о̄с янытласыт. Ялпыӈ хо̄тал та ӯст о̄лнэ музей ва̄рыглы. Кӯщаиг Зоя Лазаревна Жавко тот рӯпиты. Такви тав хантыиг о̄лы, о̄парищ наме Каюкова. Тав а̄нумн ла̄выс: «Ӯринэ̄ква хо̄тал хӯрум та̄л ювле хультум порат окружной ялпыӈ хо̄талыг ва̄рвес. Та па̄сныл ма̄н ма̄хум тыг акванатыглыянӯв. Ӯсувт туп 67 ма̄ньщи ос ханты хо̄тпа о̄лы, та̄наныл о̄с пуссын тыг во̄виньта̄лыянӯв». Пыть-Ях ӯст рӯпитан музей ос Ханты-Мансийск ӯст о̄лнэ «Торум Маа» нампа музей хольт ва̄рвес. Ӯс по̄хат во̄рт соссаӈ ма̄хум о̄лнэ кол, со̄мьях, ня̄нь ва̄рнэ кӯр ос мо̄т во̄р коланыл ӯнттуве̄сыт. Тув ёхталан ма̄хум ма̄ньщит ос хантыт о̄лупсаныл, культураныл урыл потыртавет. Пыть-Ях ӯст «Ӯринэ̄ква хо̄тал» ма̄хум та̄нки щирыл янытлэ̄гыт. Ты э̄лыпа̄лт музейт рӯпитан хо̄тпат ка̄сыӈ организациян нэ̄пак ке̄тыгласыт, ма̄хум са̄всыр конкурсыт касуӈкве во̄выгласаныл. Ты та̄л нёлолов организация та̄нки ма̄хманыл тув касуӈкве ке̄тыгласаныл. Пӯльницат, садикыт, ӯс мирколт, ма̄во̄й но̄хвинэ ос мо̄т ма̄тт рӯпитан ма̄хум са̄лы сун ӯлтта поргысыт, тынщаӈ па̄хвтысыт ос хотьют моляхнув ха̄йтыгты, тох о̄с кассыт. Жюрихо̄тпат та̄н халаныл щар ма̄к ё̄р хо̄тпа пе̄риясыт. Ялпыӈ хо̄тал о̄вылтахтаме порат Инна Петровна Тарасова, Пыть-Ях ӯс кӯщай нэ̄, ос Радика Ивановна Стадлер, ӯс миркол кӯщай нэ̄, ма̄хум янытласанэ̄н. Ос ты юипа̄лт Владимир Шесталов са̄ӈквылтапыл са̄ӈквылтас, тувыл а̄ще Юван Шесталов хансум стихотворениятэ э̄ргыг ва̄рме, о̄с э̄ргыстэ. Ты коныпал воссыг нэ̄мхотьют аты э̄ргыс, аты йӣквыс. Ты урыл Зоя Лазаревна ла̄выс: «Пыть-Ях ӯс миркол кӯщаянувн ла̄ввесӯв, соссаӈ ма̄хум э̄рганын, йӣкванын ӯсыӈ мир хӯнтлаӈкве ат патэ̄гыт, ма̄н туп аквкит э̄рыг манос йӣкв вос щё̄питэ̄в, тыил са̄внув ат э̄ри. Ос ялпыӈ хо̄талын са̄в ма̄хум вос ёхталы, пӯмащ касыл вос ва̄ре̄в. Тыи ма̄гсыл то̄ва ма̄хманув «Ӯринэ̄ква хо̄тал» рущ ла̄тӈыл «День здоровья» тох ла̄вияныл. Ам ка̄сыӈ та̄л Ханты-Мансийск ӯсн манос мо̄т ма̄н ялуӈкве такос кусэ̄гум, кӯщаитн ат та̄ртавем. Ӯринэ̄ква хо̄тал мо̄т ма̄т хумус янытлаве, сунсуӈкве таӈхе̄гум. Тувыл ма̄нки ты ялпыӈ хо̄тал мӯсхалыг ва̄рнувлӯв». Ты та̄л та ӯст ма̄ньщи ос ханты нила ня̄врам самын патыс. Та̄н ялпыӈ хо̄тал о̄лум порат туп наманыл ла̄вве̄сыт ос оманыла̄тяныл сценан аты во̄виньта̄лве̄сыт, аты янытлаве̄сыт. Ам ты ва̄рмаль урыл Зоя Лазаревна китыгласлум, тав ювле ла̄выс: «Ты э̄лыпа̄лт ма̄ньщи, ханты ня̄врам янытлалсанӯв ос мӯйлупсал майла̄лсанӯв. Ань та̄л сыс самын патум ня̄врамыт ща̄няныла̄щаныл олныл ойтавет, тыи ма̄гсыл сценан ат во̄выгласанув».

1074 2014.04.18. Валентина УЗЕЛЬ

Йӣквуӈкв о̄с ха̄суӈкв э̄ри. Ма̄н, округувт о̄лнэ соссаӈ ма̄хум, пуссын пе̄с ма̄хманув хольт о̄луӈкв воратэ̄в. Ос нэ̄квет, а̄гирищит халт са̄выӈпа̄лэ ма̄н пуссын йӣквуӈкв ат ха̄сэ̄в. «Кӯринька», «Пил ва̄тнэ а̄гит» ос мо̄т йӣквыт ат ва̄ганӯв. Ханты-Мансийск ӯст «Культура» нампа творческий объединение кол рӯпиты, тот рӯпитан ма̄хум ос ма̄ньлат хо̄тпат организация та̄н тамле йильпи ва̄рмаль ва̄рыгласыт – округувт о̄лнэ ос са̄всыр ма̄тт рӯпитан нэ̄квет ос ма̄ньнув а̄гит акванатыгласаныл ос та̄наныл йӣквуӈкв ханищтасаныл. Ты э̄тпост о̄выл щёс тамле ханищтап ва̄рыглавес. Ха̄льӯс, Белоярский, Сургутский, Ханты-Мансийский районытныл ос Сургут ӯсныл ма̄хум ёхталасыт. Ха̄льӯс районувныл туп Тэ̄к па̄вылныл ханты нэ̄квет тыт о̄лсыт. Ма̄ньщи ма̄хумныл аман матрыг туп Сургут ӯсныл акв ма̄ньщи а̄ги Людмила Мелентьева тыг во̄выглавес, тувыл та. Воссыг нэ̄мхотьют тыг ат ёхталас. Та̄нанылн лӯима̄ мирыт йӣкваныл урыл акв учёный о̄йка Вячеслав Николаевич Нилов потыртас. Тав Москва ӯсныл ёхталас, наукат ань яныг нам о̄ньщи. О̄йка Россият о̄лнэ мощщаг хультум мирыт йӣкваныл хусахтем та̄л ханищты. Тав та урыл потыртас, ань йӣквнэ ос э̄ргын коллективыт маснутаныл са̄всыр щирыл ю̄нтыяныл, соссаӈ мир йӣкваныл о̄с сака мори йӣквияныл. Тох щар ат кос ро̄ви. О̄влэ̄т ма̄к ма̄ньщи ман ханты йӣквыт ханищтаӈкв э̄ре̄гыт. Яныг хо̄тпат та̄н хумус йӣкве̄гыт, ёмащакв сунсуӈкв э̄ри, тувыл ущ мо̄т ма̄хум ханищтаӈкв. Ма̄ньщи ман ханты йӣквыт йӣквуӈкв та̄рвитыӈ кос а̄ти, ос ма̄к э̄ргыт, йӣквыт, пе̄с потрыт ос мо̄йтыт хосыт пе̄с йис о̄лупса э̄лаль ты тотаве. Таима̄гыс хотты по̄х хо̄тпа ня̄врамыт ма̄н йӣкванувн ханищтаӈкв те о̄вылтахты, ты ёмас хунь. Ня̄врамыт сыресат щирыл ханищтавет, лю̄льсаӈ ю̄нтым маснутыл маставет ос концертыт та суссылтавет. Мо̄т мирыт та номсэ̄гыт, ма̄ньщит ос хантыт тох та йӣкве̄гыт. Соссаӈ нэ̄ хо̄тпат «Кӯринька» ман мо̄т йӣкв йӣквнэ̄ныл порат ка̄таныл, ла̄гланыл татем ёмащакв хӯтсэ̄гыт, э̄рнэ щирыл ос нё̄тнэ̄г тотыглыяныл. Татем ма̄щтырыг ё̄ӈхатахтыглэ̄гыт, щар сома лув ат о̄ньще̄гыт, нё̄выль ат о̄ньще̄гыт. Ань ты семинарт ма̄хум хӯрум хо̄тал ханищтаве̄сыт, йӣквнэ ма̄гыс манхурип маснут ю̄нтуӈкв э̄ри, йӣкванув мирн хумус суссылтаӈкв. Та̄н Фаина Павловна Иштимирован йӣквуӈкв ханищтаве̄сыт, Татьяна Александровна Молданова ос маснут урыл та̄нанылн потыртас, ос манхурип маснут ю̄нтуӈкв ат ро̄ви, са̄всыр хури суссылтас. Пыгыт хум йӣквыт йӣквуӈкв Игорь Магарамовын ханищтаве̄сыт. Тав йӣквыт ёмащакв йӣквиянэ, «Са̄лы лё̄ӈх» театрыт са̄в та̄л ёнгыс. Юио̄выл хӯрмит хо̄талт тыг ёхталам ма̄хум йӣквуӈкв хумус ха̄сэ̄гыт, та суссылтасыт. Са̄ӈквылтан та̄н туп сумыллас, яты, ма̄хманув та йӣквалтахтасыт. Со̄ль, то̄ват татем ёмащакв ханищтахтамыт. Ма̄ньщи а̄гиюв Людмила Мелентьева та̄н ётаныл о̄с йӣквыс. Тамле ты ёмас ханищтап ӯсувт ва̄рыглавес. Ма̄ньщи йӣкванув ма̄н ма̄нти пуссын йӣквуӈкв те патыянӯв, сака ёмас о̄лнув.

1074 2014.04.18. Тамара МЕРОВА

Хорамыӈ маснутаныл э̄лыл ка̄салавет. Русскинская па̄вылт акв со̄тыра 870 э̄лумхо̄лас о̄лы, та̄н халанылт 986 э̄лумхо̄лас – хантыт ос ё̄рныт. То̄ваныл во̄рыӈ ма̄т акваг о̄лэ̄гыт ос па̄вылн ва̄тихал ёхталэ̄гыт. Ты соссаӈ ма̄хум хорамыӈ маснутыл масхатэ̄гыт, таи ма̄гыс та̄н э̄лныл на̄ӈке̄гыт. Ань са̄лыл яласан, во̄раян ос хӯл алыщлан хо̄тпат ялпыӈ хо̄таланыл порат нэ̄ хо̄тпат ма̄гыс «Йыс сохит варэм варэт» касыл ва̄рыглавес. Ма̄ньщи ла̄тӈыг ке толмащлаӈкве, «Йис та̄гыл ва̄рнэ пормасыт» нампа касыл. Тот нё̄лоловхуйплов нэ̄ хо̄тпа та̄нки ю̄нтум маснутаныл ос пормасаныл мо̄т ма̄хум э̄лыпа̄лт суссылтасаныл. Ос са̄лы совныл манос нуйныл манхурип хансал, манаса̄вит хо̄тал сыс ю̄нтсаныл, таи потыртасыт. Ка̄сыӈ нэ̄ такви щире̄тыл маснутанэ хорамтыянэ. То̄ва нэ̄ хо̄тпат сахил масхатасыт, мо̄таныт нуй сахи о̄щсыт. Нуй сахияныл пуссын са̄всыр оспа нуитныл ю̄нтыяныл ос сакыл сыресыр хансал хорамтыяныл. Ня̄враманыл мольщаӈыл, а̄гирищаквет ос сахил мастысаныл. Хум хо̄тпат ня̄раныл са̄всыр хорамыт о̄ньще̄гыт. То̄ват ня̄раныл янытэ̄т хансал ю̄нтым о̄лэ̄гыт. Ня̄врам маснутыт пе̄рна, хо̄тал хурип ман мо̄тсыр хури хансал ва̄римат. Жюрит о̄лум ма̄хум: Р. Ф Марценковский, Л. М. Косько, Е. П. Пинчук, В. Т. Шадрина, С. Н. Калинченко, В. Кочева хӯрум номинация щирыл но̄хпатнэ ма̄хум пе̄риясыт. Тох «Традиционное искусство» номинацият та̄н пе̄с ма̄хум маснутаныл ю̄нтнэ нак ос ма̄щтыр тэ̄ланыл суссыт. Ма̄к ма̄щтыр нэ̄г тот Раиса Ивановна Тэвлина ла̄ввес, тувыл Людмила Дмитриевна Покачева ос Алина Олеговна Тэвлина. «Авторское искусство» номинацият йильпи хурил ю̄нтым маснутыт ос ма̄щтырлан накыт та̄рапаттуве̄сыт. Тот Светлана Викторовна Мултанова, Антонина Дмитриевна Тэвлина янытлавесы̄г. Ос «Декоративноприкладной искусство» номинацият Тамара Мултанова, Раиса Тэвлина, Фёкла Бондаренко, Людмила Сопочина, Наталья Покачева хорамыӈ пормасаныл ма̄гыс э̄сгуве̄сыт. Нэ̄т пуссын мӯйлупсал майве̄сыт. Ялпыӈ хо̄талт соссаӈ ма̄хум пуссын та̄нки маснутанылт масхатым о̄лсыт. Мо̄т хо̄тпат та̄наныл пӯмщаласаныл, по̄слахтын ма̄гыс акваг ляпан во̄выгласаныл.

1075 2014.05.09. Тамара МЕРОВА

Рӯтанув урыл номуӈкв э̄ри. Мо̄лалнув Октябрьский район Талинка па̄вылныл ма̄н газетавн Татьяна Никифоровна Непкина пищма ке̄тыс. Ань мо̄рсыӈ хо̄тпа ща̄нь ла̄тӈыл матыр ла̄ви, янгыщ рущ ла̄тӈыл потыртэ̄в. Э̄ква потре ма̄ньщи ла̄тӈыл хансыстэ, на̄н ань таве ловиньтэлы̄н: «Миннэ са̄лы хуриӈ нёл Ха̄йтнэ са̄лы хуриӈ нёл Октябрьский район Лӯи о̄влэ̄т кит па̄выл о̄лы: Лӯи Нярихумит ос Алы Нярихумит. Алы Нярихумит карыс сумат ӯнлы. Па̄выл ляпат карыс, осыӈ ӯльпат ос хо̄втыт яныгме̄гыт. Та̄н, э̄рыӈ, ма̄ ӯнтум па̄сыл яныгме̄гыт, па̄влыӈ ма̄хмытн ат са̄гравет. Э̄лыл ёхтум о̄йка Ремер тот кол ӯнттыс, тувыл ӯльпат савыӈкант ӯльювыг са̄груӈкве пирмайтахта̄лыс. Па̄влыӈ ма̄хманэ̄н та̄рапаттувес, кӯщаитын са̄груӈкве ёлпо̄илттавес. Ань кол иӈтаг пӯсасэ па̄ртыл щар лапра̄тыстэ. Маныр йӣвыл колэ па̄лтыглытэ, ат келы. Во̄рт са̄в ӯльпа яныгми, ма̄хум па̄кв атэ̄гыт, са̄всыр пил тэ̄лы. Па̄выл э̄лыпа̄лт посалыт ове̄гыт, са̄в тӯр, со̄юмыт, ма̄нь посалыт о̄лэ̄гыт. Ма̄хум хӯл алыщлэ̄гыт. Тамле щуниӈ, нё̄тнэ ма̄т Егор Алексеевич Яркин самын патыс, тот яныгмас ос о̄лыс. А̄ще Алексей Данилович Яркин 1941 та̄лт армиян тотвес. Та̄н хӯрум пыгрищ Егор, Володя ос Петя а̄ӈканыл ёт хультсыт. Екур кӯщаиг хультыс, тав то̄нт хо̄т та̄лэ о̄лыс. Ме̄н тав ётэ ма̄ньта̄гыл аквъёт яныгмасме̄н. Коланме̄н акв по̄хат ӯнлысы̄г. А̄щагме̄н ягпыгыӈыщ о̄лсы̄г. Ам а̄щум о̄с фронтын тотвес. Ме̄н Екур ёт туи а̄ращ па̄лтуӈкве йӣв тагыт ос а̄щагме̄н тотум осыӈ норыт, йӣвыт тэ̄лы кастыл юв а̄лумтыме̄н. Тэ̄лы кастыл мис тыттуӈкве ос куращ ва̄рнэ ма̄гыс нёрщи таг ос ха̄ль таг сакватасме̄н. Тӯя̄г по̄льщаӈщи лэ̄сыл алыщласме̄н. Мощ яныгнуве̄г е̄мтсуме̄н, а̄щагме̄н хӯлпанэ̄н ӯнттысме̄н, ма̄нкинавн тэ̄нэ хӯл алыме̄н. Ур хосыт ха̄йтыгтыме̄н, ва̄с муӈи атыме̄н. А̄лпыл тэ̄нутыӈ та̄гыл юв ёхтыме̄н, рӯтанме̄н хотща̄гтэ̄гыт. Тащирыл та о̄лсӯв. Война оигпаме юипа̄лт Екур а̄ще Алексей Данилович юв ёхтыс. Аквкит хо̄тал юн о̄лыс ос Аренинан на̄тылтаӈкве ке̄твес. Екур пыге сыступыл товнэ ма̄гсыл ёт вистэ. Ос таквсы па̄лаг Алексей аким ня̄врамыт толгуӈкве атсанэ. Нилахкем тув тав ётэ толгысӯв, тыи Егор Яркин, Миша Собянин, Женя Яркина (Нестерова), Лена Яркина, Варвара Лыскова (Плесовских) ос ам, Татьяна Яркина (Непкина). Акв щёс тамле ва̄рмаль о̄лыс. Алексей акимн ялпыӈ канн толыг ре̄пыгтаӈкве тотвесӯв. Ме̄н Варяме̄нтыл ат тахсуме̄н кос, ме̄наме̄н тав хӯнтлуӈкве хунь патыс. Толыг ре̄пыгтасӯв, Алексей аким ос Авдотья аквум по̄сумт. Ме̄н товсуме̄н, Екур толыг па̄хвтыс. Па̄г пӯхтысӯв, ме̄н Варя ёт па̄г ат ква̄лсуме̄н, ха̄пнёлын хуясме̄н. Та̄н тыкос хартсытхартсыт, толганыл нэ̄мхотталь ат ла̄кви. Ме̄н нупыламе̄н ро̄ӈхе̄гыт: «Ха̄пныл сакати, хартэ̄на! » Ме̄н ха̄пныл хартуӈкве патсуме̄н, толгув щар нэ̄мхотталь ат ла̄квсы. Тувыл ювле со̄хтыслӯв, щар рав маныгтаслӯв ос но̄х та тагатаслӯв. Тувыл ма̄н ханищтахтуӈкве минасӯв. Екур то̄нт Миша Собянин ёт Тобольск ӯсн рыбтехникумын минасы̄г. Женя ос Варя Ханты-Мансийскт медучилищан, ме̄н Лена ёт педучилищан ханищтахтуӈкве минасӯв. Ос ка̄сыӈ тув ма̄н Екатерина Ивановна Шадрина, ам, Екур а̄ще ёт А̄ст хӯлпыл на̄тылтасӯв. Мо̄т ня̄врамыт пумкант рӯпитасыт. Колхозт яныг хо̄тпа мощща о̄лыс, таима̄гыс ка̄сыӈ тув ня̄врамыт нё̄тсыт. Екур Тобольский рыбтехникум а̄стламе юипа̄лт са̄в та̄л рыбакыг рӯпитас. Ты коныпал совхозт са̄всыр рӯпата ва̄рыс. Пенсиян миннэ̄тэ э̄лыпа̄лт лесникыг рӯпитас, рӯпатта̄л щар ат о̄лыс. Алы Нярихумит матнэ̄тэ мус тохиӈ тот о̄лыс. Та па̄вылт электричество а̄тим, газ а̄тим. Ань улюв тотуӈкве ат ве̄рми. Ӯст а̄гитэ па̄лт о̄луӈкве ат таӈхи, аквписыг юв вораты. Тав ла̄выс: «Ам ма̄нь та̄гыл рӯпитасум, а̄нумн ёмас о̄лнэ кол э̄ри. Ма̄ньнув ма̄хум, э̄лыл ёхтум ма̄хум колыл мивет, ам ма̄нь та̄гыл война порат, война оигпаме юипа̄лт матнэм мус рӯпитасум. Таима̄гыс Луи Нярихумит па̄вылт акв колнакыӈ колыл вос минувем. Ма̄н совхозув ётыл та па̄вылн тотвес». Егор Алексеевич Кевавнёл па̄вылт пе̄с колыл майлувес, тав тот щар ат о̄лыс. Ла̄внэ̄тэ, мо̄т хо̄тпан та кол вос миве, таве̄н Луи па̄вылт кол э̄ри, тот о̄лнув. Ань а̄гитэ палт Ханты-Мансийскан ва̄нтлыс. Ма̄н е̄рувт акв матумпа̄ла соссаӈ хо̄тпа туп тав хультыс, ань сысы минас. Ам таве̄н паща ла̄тыӈ ке̄тэ̄гум, пус ка̄т, пус ла̄гыл, На̄й-О̄тыранэ̄н вос ӯргалаве! » Ма̄н, редакцият рӯпитан хо̄тпат, Татьяна Никифоровнан потре ма̄гыс яныг пӯмащипа ла̄тыӈ ке̄тэ̄в, пуста̄гыл са̄в та̄л вос о̄лы!

1075 2014.05.09. Слинкина Т. Д.

Хо̄нтлын накт порсум ма̄ньщи ма̄хманув. Янгыщ 1941 та̄лт таквсы, хунь Ленинград немцытын мовылтаӈкв патвес. 1942-1943 та̄лытт ущпылнэ̄г са̄в хум ма̄хум та хо̄нтлын ма̄т порсысыт. То̄ва хум похоронкатэ рӯтанэ палт ёхталас, та̄н сакати ва̄гыт, хо̄т патыс, хо̄т ёлщё̄питавес. Ам интернетыт тисхатымам акв нэ̄пакыт «Книга памяти. Тюменская обл. Т. 3» 53 ло̄псыт хӯрум хум наманыл хо̄нтсанум, насати рӯтаныл ань тыг мус та̄н уранылт нэ̄матыр ат ва̄мыт. Войнан тотыманыл юипа̄лт пищма ат пыл ёхталас, похоронка о̄с а̄тим о̄лыс. Ня̄хщамво̄ль па̄вылт о̄лнэ хум Самбиндалов Сергей Петрович тит ляпа рӯтаге, о̄патэ Самбиндалов Кирилл Николаевич ос тав пыгтēтэ Самбиндалов Иван Кириллович (Сергей Петрович сасге) хомос тотвесы̄г военкоматын, воссыг суēн а̄тим о̄лыс. Насати Самбиндалов Кирилл Николаевич сакватым нюлмиянэ та̄рвитыӈыт о̄лмыт, таиянэ̄т 11.08.1944 та̄лт хотталь щалтум, Ленинградский областьт тот ёлщё̄питыма. Ос пыгтēтэ Самбиндалов Иван Кириллович Германият 17. 01.1945 та̄лт порсум. Хунь Сергей Петровичин тэ̄н урēнтыл телефон хосыт ла̄всум, тав маттем та тыстым ща̄ргыс порсум титгаге ма̄гыс. Тамле савыӈ ла̄тыӈ хӯлуӈкв сым тарум ёмас хунь. Ань тай сакати та̄н рӯт ма̄хманыл ва̄ганыл, хо̄т я̄тил о̄патēныл ос сасганыл ёлщё̄питавесы̄г. О̄с войнат порсум хӯрмит ма̄ньщи хумкве о̄с акв та нэ̄пакыт хо̄нтыслум, 34 ло̄псыт наме хансым о̄лы. Ты Качанов Никифор Николаевич, Ха̄ӈла па̄выл хум. О̄парищ наме со̄ви хансыма – Кочанов. Таима̄гыс тисхатнэ порат такви о̄парищ намēт ма̄хманэ̄н ат хо̄нтаве. Тав о̄с ань тыг мус рӯтанэ̄н ат ва̄йвес, хо̄т порсыс. Та̄н Ха̄ӈланыл хӯрум Качанов ягпыг добровольцыг войнан минасыт: Качанов Ефим Николаевич (1905), Качанов Никифор Николаевич (1913), Качанов Илья Николаевич (1921). Юв туп Ефим Николаевич лылыӈ та̄гыл ёхталас. А̄ги апыгтēтэ, Хозяинова Анастасия Анатольевна, хансы, яныг ащо̄йкатэ 1941 та̄лт о̄йттур э̄тпост войнан тотвес, «602 сд» дивизият лусытам. Победа ёхтум порат тав Прага ӯст о̄лум. 1943 та̄лт тит щёс саквата̄лыма: тӯяг ла̄глэ хо̄им, туи ос пуӈкēт осколокын хо̄иглым, таин акв самтēтэ хот сакватым, ос акв осколок ло̄мт тохиӈ пуӈкēт пыл хультум. Пусмуме юипа̄лт э̄лаль хо̄нтлын ма̄н минас. «За оборону Ленинграда» ме̄талил майлувес. Мо̄т ме̄тале «За отвагу» ётыл 1948 та̄лт ущ тавēн майвес. Войнаныл 27 числат лӯпта э̄тпост 1945 та̄лт юв та̄ртвес. Никифор ос Илья ягпыгаге 1942 та̄лт, хунь тэ̄н ущты войнан тотвесы̄г, Ленинград ӯс ляпат хо̄нтыгламаге. Юил йим ма̄ньщи маснутанылт, тэ̄нут та̄л савалым мо̄т са̄всыр ма̄хманувт аквъёт тотымат. Ётыл Илья Николаевич лусытам «ОСБр» нампа дивизият Калининский область, Ржевский район, Анеево па̄вылт 11.12.1942 та̄лт порсум. Никифор Николаевич «85 стрелковый дивизият» лусытам, 2. 09.1942 та̄лт порслыма. Хо̄т ёлщё̄питавес, та нэ̄пакын ат хансыма. Никифор Николаевич э̄кватēтэ Качанова (Шешкина) Мария Семёновна тактēтэ нила а̄гитēнэ (Пелагея, Римма, Клава, Дина) та янмалтасанэ. Ты Качанов ягпыгаквет урыл Ефим Николаевич а̄гитēтэ Качанова Елена Ефимовна а̄нумн потырта̄лыс, тав Саранпа̄вылт о̄лы. Та̄н ляпа рӯтаныл Качанов Дмитрий Петрович (1900) Никифор Николаевич ёт о̄с акв та «85 стрелковый дивизият» лусытас. Тав о̄с порсыс, Ленингадский область Колпино ӯст ёлщё̄питыма. Тав яныг пыгтēтэ Качанов Дмитрий Дмитриевич о̄с порсыс. Нэ̄пак юв ёхталам, тот «пропал без вести» хансым о̄лыс. Ётыл 1970 та̄лт ёлщё̄питым ма̄тэ братский могилат пионерытн хо̄нтыма, о̄с Ленинградский областьт порсум. Адресэ письмат о̄лум кос, ётыл хоттыпум. Э̄ще палт Качанова (Солянова) Матрёна Дмитриевнан ос а̄пщитэ палт, Качанов Митрофан Дмитриевичин, мēталянэ юв тēтсымат. Туп та пионерыт хосыт порсум ма̄тэ та̄нанылн та̄рапатыглас. Тав урēт а̄нум Качанова (Солянова) Матрёна Дмитриевна а̄гиягепыгаге потырта̄лсы̄г: Лидия Алексеевна Терентьева (Восыӈтӯр па̄вылт о̄лы), ос Солянов Николай Алексеевич (Ло̄пмус па̄вылт о̄лы). Качанова Матрёна Дмитриевна ос Митрофан Дмитриевич а̄тятэ̄н Дмитрий Петрович хо̄нтлын ма̄т порсыс, оматēтэ̄н Качанова (Хозумова) Татьяна Ивановна, Ха̄ӈла па̄вылт 1942 та̄лт порсыс. Ня̄врамыг савалапыг хультсы̄г. Рӯтанэ̄н ё̄рыл хотмос савалым тэ̄та̄л та̄рвит порат та яныгмасы̄г. Качанов Ефим Николаевич акитэ̄н войнаныл юв ёхтуме юипа̄лт ня̄врамыг тав колэ̄т о̄лсы̄г. Ётыл тэ̄нти щēмъянэ̄нт сас са̄в ня̄врам янмалта̄лсы̄г. Аквта хо̄нтлым порат Хо̄сло̄х па̄вылт хӯрум ня̄врам о̄с савалапыг хультсыт. Ты Ромбандеев Иван Петрович (1917) ос Ромбандеева (Хозумова) Акулина Викторовна тэ̄н ня̄враманэ̄н: Хозумова Зоя Ивановна, Хозумов Василий Иванович, Хозумова Елена Ивановна. А̄тяныл Иван Петрович 9. 12.1942 та̄лт порсыс Ленинградский областьт, тот ёлщё̄питыма. Ос оманыл 18. 08.1943 та̄лт щаквыт порсыс. Та̄н хӯл алнэ бригаданыл са̄витэт хӯрум нэ̄, ос нилыттыг ма̄нь нилахуйплов та̄л яныт а̄гикве о̄лыс, Ромбандеева Матрёна Ивановна (тав школат ханищтахтас). Сака няӈра щахыл во̄т капай та хо̄талт во̄тыс. Та̄н толгуӈкв ат кос миннувыт тамле пилыщмаӈ турапыт. Председателиг саран Ла̄ска о̄йка о̄лыс, тав та̄наныл по̄йкуманэ толгуӈкв ялуӈкв. Война порат ка̄сыӈ хо̄тал э̄рыс план ва̄руӈкв, а̄тиӈк сутытавет. Тувыл по̄рал нэ̄гим ма̄нь ха̄пыгтыл толыг рēпыгтаманылт ха̄паныл а̄хвтас нёлт яныг хумпын та̄лыма. Акулина Викторовна ха̄пныл кональ патыс, ма̄нь а̄гикве Ромбандеева Матрёна Ивановна уюӈкв ха̄сыс, улпыл тавēн нё̄туӈкв витн порыгмам. Сас та порсысыг, ё̄ртенэ̄н ат ёхтысы̄г тамле пилыщмаӈ во̄т хумпыт ёт. Ха̄пыт ӯнлум тит самва̄гта̄л э̄кваг туп хультсы̄г, тай лылыянэ̄н нэ̄глысы̄г. Акулина Викторовна савалапыг хультум хӯрум ня̄враме яга̄гиянэ̄н та янмалтавēсыт. Матрёна Ивановна оматэ пити патта ма̄нь а̄ги о̄лыс. Тав оматэ, Ромбандеева Мария Дмитриевна, ам ане̄квам. О̄йкатэ, ам ащо̄йкам, Ромбандеев Иван Петрович (Мувыӈкēс Ва̄нька о̄йка) репрессия порат наска̄ссыг порславес. Мощ мо̄лалнув ам войнат ēмтум акв нак о̄с хассум. Мувыӈкēс хум, (наме тыг ат хансыслум ма̄хманэ сым ща̄рыг ма̄гыс) на̄иӈтӯйтыл хо̄нтлын ма̄н миныманыл хотты ма̄т станцият хохса хартнэ са̄р ёвтуӈкв ха̄йтум. Та кӯмт на̄иӈтӯйтэ нёвумтам ос минам, тав станцият та хультум. Таи ма̄гыс тав военный трибуналн сутытыма, эрттам тав дезертир, нас ояс. Тав ётэ юв хультум ат хо̄тпа о̄с сутытаве̄сыт. Таяныт щёхлаӈ та о̄лыс. Тав то̄нт ма̄ньщиянув хотыл рущ ла̄тыӈ ва̄сыт? ! Маныр команда ла̄ваве, та̄н хомос торгамтыяныл? Война о̄вылтахтам порат торыӈ писаль, торыӈ э̄рнэ са̄вит патрон а̄тим о̄лыс, щар нас алнэ ма̄гыс ма̄хумтēнув та тотвēсыт аквпис хо̄тал кастыл. Ётыл ущ автоматытыл, та̄нкытыл, пулемётытыл са̄лтатанув майвēсыт. На̄н Ханты-Мансийск ӯст «Парк Победы» ва̄рим а̄хвтас парт тармыл порсум ма̄хум намыт хансым халт хотты ма̄ньщи о̄парищ нам хо̄нтыгласына? Тит нам хансым кос о̄лэ̄г, ос татем мори хансымаг – хо̄ӈхаг аты торгамтахтэ̄г. Ам та намыг интернет хосыт «Мемориал» архивыт ат пыл хо̄нтсагум. Тувыл ма̄ньщи газетат рӯпитан нэ̄ Светлана Ромбандеева а̄нумн хӯлтсаге, наманэ̄н ущта торгамтасагум. Акватэ Ромнадеев И. П. , ты насати Ромбандеев Иван Петрович (нумыннув тав урēт ты хассум). Мо̄танэ ос Ромбанцев Л. А. , ты Хорыӈпа̄выл хум Ромбандеев Леонид Александрович (1906) наме тох со̄ви хансыма, тав 7. 03.1943 та̄лт аквта Ленинградский областьт порсыс. Ты Хозумов Николай Иванович оматэ ягпыг о̄лыс. Хо̄сло̄х па̄вылныл о̄с хӯрум ягпыг хо̄нтлуӈкв войлаве̄сыт. Ты Лончаков Георгий Дмитриевич (1919), Лончаков Василий Дмитриевич, Лончаков Пётр Дмитриевич. А̄тяныл Лончаков Дмитрий Иванович (1897) репрессия порат 21. 01.1938 та̄лт порславес. Георгий Дмитриевич юн Ёхорыг намтым о̄лыс. Войнан 1942 та̄лт войвес. Оматэ палт нэ̄пак ёхталас, тот хансым «Пропал без вести 29 марта 1943 г. в Смоленской обл». Хосанув о̄лманыл юипа̄лт Георгий Дмитриевич ма̄хманэ̄н пищма тēтсыс. Насати, тав плент о̄лум, та юипа̄лт Белоруссият лагерьт о̄ньщима. Оматэ̄ныл тэ̄нут во̄вум посылкал, хансум, рӯпитэ̄гыт кос, ос щар тэ̄та̄л о̄ньщавет, ка̄сыӈ хо̄тал са̄в ма̄хум тэ̄та̄л сорум патэ̄гыт. Та пищматэ юипа̄лт такос оматэ̄н ӯрвес, нэ̄матыр суе воссыг а̄тим о̄лыс. Мо̄т пыге Лончаков Василий Дмитриевич (1928) Кавказыт трудармият лусытам. Хо̄нтлын ма̄ныл юв йийиматэ Самарово (Ханты-Мансийск) мус ёхталам, Ендырев Василий тав ётэ ва̄йхатам. Тӯя я̄ӈк Иртышт то̄нт кӯлатам тēмыг ēмтум, Василий Дмитриевич ла̄глыл юв минмыгтам. Та юипа̄лт аты хо̄нтыглавес, юв ат пыл ёхталас. Хӯрмит ягпыганыл Лончаков Петр Дмитриевич тай хо̄нтлын ма̄ныл юв ёхталас. А̄тимыг ēмтме мус саквата̄лым нюлмиянэ̄т та савалас. Э̄кватэ̄нтыл Анна Прокопьевна ёт яныг щēмья янмалта̄лсы̄г. Та̄н Хо̄сло̄х па̄выл хӯрум хум янмалтам оматēныл Лончакова Мария Викторовна яныгса̄т та̄лтем о̄лыс. Па̄выл ма̄хманувн ла̄ввес Мēсыг па̄выл Виктор о̄йка а̄ги. Тав самын патмēт оматēтэ а̄тимыг ēмтум. Ане̄кватэ̄н ос Мувыӈкēс Ванька о̄йка сасгēн янмалта̄лвес. Ань ты йист са̄всыр хо̄н ма̄т о̄лнэ мир акваг халанылт хо̄нтлуӈкв наламтахтэ̄гыт. На̄нти сунсэ̄н, ВОВ порат, ётыл Афганистаныт, Чечнят, сыресыр терактыт порат манах пыганув, ня̄враманув ос нас о̄лнэ мирув порславēсыт. Ань ос Украинат о̄лнэ оссам утыт мо̄т хо̄нпал политика хуйтпин ёхтувēсыт. Тыгыл э̄лаль То̄рум А̄щувн тамле оссам сола хольт капыртан утыт хотмос ёл вос торамтанувет, пуӈканыл номтыӈ са̄йтыл вос пиннувет. Т. Д. Слинкина, Урай Ханты Мансийск, ОУИПИиР, научный сотрудник.

1075 2014.05.09. Анна АЛГАДЬЕВА

Тӯяг Хулюмсунтын цирк ёхталас. Ка̄сыӈ та̄л Хулюмсунт па̄вылн цирк ёхтала̄лы. Ты тӯя ка̄с ос ощхуль тотнэ ма̄хум Санкт-Петербург ӯсныл о̄лсыт. Тӯлыглахтам хо̄таланыл э̄кват ялпыӈ хо̄талн е̄мтыс. Матке̄пыл юв щалтнэ ма̄т олн тыныӈ кос о̄лыс, па̄влыӈ ма̄нь клуб колув ня̄врамытыл та та̄гиньтас. (Ощхоль ӯре̄гыт. ) Ам номсэ̄гум, клоун о̄йка ня̄врамытн сака мӯстыс, хунь тав сценан нэ̄глы, ня̄врамыт маткем та мувиньтэ̄гыт. Клоун коныпал ос мо̄т артистат о̄лсыт, ӯйхулыт тотыглаве̄сыт. Акв а̄ги я̄ӈк колала ӯитголубит суссылтас. Тяклиӈ пунпа ма̄нь я̄ӈк кӯтюврищ о̄лыс, на̄е ёт йӣквыс, ла̄глыг халт щалтсас, ла̄кв ӯлтта поргыс. О̄с акв ялпыӈ ӯйнакталӯй суссылтавес, ня̄врамыт э̄лыпа̄лн ляпан тотыглавес. Акв ва̄ӈныӈконсыӈ ма̄ньлат ё̄р хум о̄лыс, ва̄т нупыл нила кила та̄рвитпа гирят щар кӯстырыг па̄хтащласанэ, аквторыг кит нэ̄ пунканэ̄тыл но̄ха̄лми. Рущ ла̄внэ щирылфокусник о̄лыс, сэ̄мыл то̄тап кӣвырт уля пе̄ламты. Клоун о̄йка тай ня̄врамыт ёт ёнгыс, ощхультаӈкв сценан но̄хво̄выгласанэ. Хунь тӯлыглахтын ма̄ныл а̄стысыт, ӯйхулыт ёт олн мус по̄слахтуӈкв ро̄выс. Ос коны а̄висунт колнакт аквта клоун о̄йка ощщахоса пувласхӯргытыл шарикытыл са̄всыр хорамыӈ лӯптат, кӯтюврищит, сыраит ва̄рыс, ос олн мус. Ла̄вуӈкв ро̄ви, тулыглахтын ма̄хум ёмщакв ща̄гтыл тотсыт, ёмщакв рӯпитасыт, сэ̄лхатасыт. Ня̄врамыт о̄с ёмщакв ӯщлахтасыт, мувиньтасыт. Накталӯй – змея Тяклиӈ щаклиӈ.

1075 2014.05.09. Светлана РОМБАНДЕЕВА

Са̄лыӈколыӈ колта̄гыл. Ханты-Мансийск ӯст «Ӯринэ̄ква хо̄тал» о̄лме порат ма̄хум ёсал кассыт. Сургутский район Русскинская па̄вылныл ханты ма̄хум ёхталасыт нэ̄тхумит, ма̄ньлат пыгыт. Пуссын та̄нти маснутанылт о̄лсыт, халанылт ща̄нь ла̄тӈыл потыртасыт. Ёсал касманыл порат Сережа ос Виталий Русскиныг китыт ос хӯрмит места висы̄г. Ам ты пыгыг а̄тятэ̄н ёт хо̄нтхатыгласум, потрамасум, наме Алексей Антонович. О̄влэ̄т потыртаӈкве ат таӈхыс, ла̄ви, рущ ла̄тӈыл потыртаӈкве ат ха̄сы. Ам ювле ла̄вегум, ам ма̄ньщи нэ̄, рущ ла̄тӈыл потыртаӈкве торыӈыщ о̄с ат ха̄сэ̄гум. Тувыл хум ань тув хотталь та ка̄сащас. На̄н ань Алексей Антонович потре ловиньтэлы̄н: Тыг пыганум ёт ёхтысум, хӯрум пыганум. Э̄квам наме Зоя Павловна, ме̄н акв а̄ги ос нила пыг о̄ньщиме̄н – Виталий, Валера, Вова ос Сережа. Ня̄враманме̄н ханты ла̄тӈыл пуссын ёмащакв потыртэ̄гыт, «Ханты ясанг» нампа ханты газета ловиньтэ̄гыт, ань пуссын грамотныит. Я̄ӈк на̄тнэ э̄тпост ам атпан нупыл онтолов та̄лум то̄влы. Акв э̄щ о̄ньще̄гум. Омаме̄н ма̄н ётув во̄рт о̄лы, а̄тяме̄н ос ам ат та̄л янытыг о̄лмум порат а̄тимыг е̄мтыс. Ам ще̄мьям ёт во̄рт о̄лэ̄гум, кол ӯнттысӯв. Ма̄лтып порат то̄ванакт ё̄рнкол тӯщталэ̄в, са̄лыянув ӯрим тот о̄лэ̄в. Ханты-Мансийск ӯсн ам о̄выл щёс ёхтысум, тыт а̄нумн пуссын сака мӯстыс, татем ёмас ма̄хум тыт о̄лэ̄гыт. Потрыӈ пыг Алексей Антонович но̄хпатум пыге Виталий тамле потрыӈ, тав потре ам о̄с хансыслум, э̄лаль ань ловиньтэлы̄н: – Ма̄н тыг во̄ввесӯв, ялнэминнэ ма̄шинал майвесӯв. Номсэ̄в, манрыг ат ро̄ви ялуӈкве, ялэ̄в. Ам Сургутский университетт ханищтахтэ̄гум, учителиг рӯпитаӈкве патэ̄гум. Ань ты касылт ам хӯрмиттыг ёхтысум. Сережа каӈкум ам э̄лыпа̄лумт ёхтыгпас, китыт места вис. Ма̄нти ва̄рум ёсанувт ха̄йтсӯв. Тамле ёсал ма̄н ма̄ньта̄гыл яласэ̄в. Ам номсыте̄мт, ты сака пӯмыщ ва̄рмаль, матъёмас тыг ёхтысӯв. Мо̄тынтыг о̄с те во̄ваве̄в, атхунь ёхтэ̄в. Виталий Русскинская па̄выл школат ханищтахтас, интернатт о̄лыс. Моще̄ртын хус та̄лэ ты то̄влы. Лӯи ма̄ мир касыл палт тав «кандидат в мастера спорта» намыл маим о̄лы. Ань май школат ханищтахтан ня̄врамыт халт са̄всыр олимпиадат ва̄рыглавет, Виталий ща̄нь ла̄тыӈ щирыл касыл о̄лыглам порат Ханты-Мансийск ӯсн во̄виньта̄лыма, тыт кит щёс о̄выл места вуйлам. Тав, насати, тамле ка̄ркам ос номтыӈ пыг. Ты ханты ще̄мья пуста̄гыл вос о̄лы, ня̄врамыт со̄тыӈыщ вос яныгме̄гыт. Пус ка̄т, пус ла̄гыл!

1075 2014.05.09. Александр ВЬЮТКИН

Ты урыл мир мощща ва̄гыт. Ювле хультум э̄тпост ма̄ янытыл «День всемирного наследия» хо̄тал янытлавес. Ты та̄л тав ва̄тыт щёс янытлавес. Ханты-Мансийск ӯст о̄лнэ «Ма̄вит ос э̄лумхо̄лас» нампа музей колт та хо̄тал янытлан щирыл суссылтап щё̄пита̄лвес. Тот ма̄н ялпыӈ ма̄нанувт о̄щнэ пормасанув мо̄т мирын суссылтан ма̄гсыл акванатве̄сыт. Выставкат о̄лнэ пормасанув халт ялпыӈ койпыт, са̄ӈквылтапыт, а̄рсыныт ос пе̄с ща̄лголныт пасан тармыл пинтлым о̄лсыт. То̄ва пормасыт хо̄тхойплов нот па̄сныл о̄лэ̄гыт. Ты суссылтап рӯпататэ о̄вылтан кастыл са̄выӈпа̄лэ ма̄ньщи ос учёный ма̄хум тув атыглаве̄сыт. Ёхталам нэ̄ хо̄тпанув пуӈканыл пуӈк то̄рыл пинсаныл. Э̄лаль ялпыӈ пормасыт о̄лнэ колнакын та̄н ат щалтсасыт. Ат ва̄нэ рущ нэ̄ хо̄тпат та ляпат пуӈк то̄р та̄л, ва̄ти ка̄тсорыӈ ос ва̄ти супыл тот ё̄ӈхатахтыгласыт. То̄ват ат тулё̄влыӈ я̄ӈк па̄ссаӈ ка̄тыл ялпыӈ по̄рмасанув сунсыглым ка̄тын вуйлысаныл. Ка̄сыӈ хо̄тпа ты урыл такви щире̄т номсы, ам ос тох номсэ̄гум: «Ялпыӈ пормасанув ялпыӈ ма̄т о̄ньщуӈкв э̄ре̄гыт. Ма̄н та̄н ялпыӈ пормасанувн хунь новхатэ̄в. Та̄нанылн ма̄н пормасанув ул вос суссылтавет. О̄тыранув ка̄сталан та̄л ма̄н ма̄ньщи мирув хотталь ул вос со̄йми».

1075 2014.05.09. Николай МЕРОВ

Ма̄ньлат хо̄тпат олныл майве̄сыт. Округт о̄лнэ ма̄ньлат ма̄хумн нё̄тнэ ма̄гыс губернаторув постановлениенэ̄паке щирыл 2007 та̄л па̄сныл ма̄ньлат хо̄тпат, хотьют мир ма̄гыс э̄рнэ рӯпата ёмщакв ва̄ри, та̄н ка̄сыӈ та̄л губернатор премияолныл мивет. Ань ты хо̄тал мус пуссын аквъёт 191 ма̄ньлат хо̄тпа округ губернатор премиял майве̄сыт. Ты наука ос ханищтап ва̄рмальт, культурат, общественный организацият, ля̄ххал хаснэ хо̄тпат ос мо̄т са̄всыр ма̄тт рӯпитан а̄гипыгыт янытлаве̄сыт. Ты ва̄рмаль ханищтап ос ма̄ньлат ма̄хум департаментыт рӯпитан хо̄тпат та̄н ва̄руӈкве номылматсыт. Ань тот экспертноконсультативный совет рӯпиты. Та̄н ка̄сыӈ та̄л акванатхатыглэ̄гыт, ма̄ньлат хо̄тпат ва̄рнэ рӯпатаныл уральтыяныл ос щар ёмас рӯпатат ма̄гыс премияолн та̄стэ̄гыт. Ты тэ̄ла щирыл 14-30 та̄л яныт хо̄тпат олныл мивет. Акв хо̄тпа рӯпататэ ма̄гыс 15 со̄тыра солко̄вил миве. Ань ты пора 33 ма̄ньлат хо̄тпа губернатор премиял майве̄сыт. Та̄н халанылт Ханты-Мансийск ӯст соссаӈ ма̄хум ва̄рмалит щирыл рӯпитан хӯрум хо̄тпа янытлаве̄сыт. Ты А̄с-угорский мир театрыт рӯпитан пыг Дмитрий Решетников, культура отделт рӯпитан нэ̄ Надежда Молданова ос соссаӈ ма̄ньлат мир организацият ля̄ххал хаснэ а̄ги Дарья Сумакова. Та̄н хосат та̄гыл соссаӈ мир о̄лупса э̄лаль тотым рӯпитэ̄гыт. Тувыл ос Русскинская па̄выл школаинтернатт 8 классыт ханищтахтын ханты а̄ги Виолетта Сопочина янытлавес. Губернатор нэ̄ та̄нанылн са̄в янытлан ла̄тыӈ ла̄выс.

1075 2014.05.09. Анна АЛГАДЬЕВА

Хотёрувлаӈкв ат ро̄ви. Яныг хо̄нт о̄лум порат мирув но̄хпатум хо̄тал янытлаве ос ва̄ве. Ка̄сыӈ ма̄нь па̄вылт ос яныг ӯст ты хо̄тал мирыл атхатэ̄гыт ос хо̄нтлам ма̄хум п9 май хо̄тал ляпаман э̄лыпа̄лт яныгполь э̄тпос15 числат Хулюмсунт па̄выл ишколат рӯпитан ма̄хум ос ханищтахтын ня̄врамыт акванюрщхатым акв яныг ва̄рмаль ва̄рыгласыт. Ты ва̄рмаляныл «Хотёрувлаӈкв ат ро̄ви» намаим о̄лыс, тот ня̄врамыт яныг хо̄нт о̄лум пора ханищтасыт. Ты кастыл то̄ва классыт, халанылт хащхатнэ, аквхурип ке̄нтыт ва̄рсытмассыт, то̄ват сыпто̄рыт нэ̄гсыт, то̄ват георгиевский ленточкат ма̄гылт о̄щсыт. То̄ва ня̄врамыт кина по̄слан ос ля̄ххал тотнэ хо̄тпаг ма̄ оспа ӯламыл масхатым о̄лсыт. Яныг хо̄нт ёмщакв торгамтан ма̄гыс «Тыт ос ань» о̄луӈкв ла̄вве̄сыт. О̄влэ̄т ня̄врамыт пуссын рота щирыл ла̄кквауртхатасыт, ка̄сыӈ колнакт мус война порат о̄лум щирыл ёлпо̄йтса̄лнэ ма̄т станцият ва̄рсыт. Ма̄колыт ма̄кол хольтыл турманыг ва̄рсаныл, иснасанэ сэ̄мыл то̄рыл лаптагатасаныл. Ка̄сыӈ рота такви командир о̄ньщас. Ка̄сыӈ командир нэ̄пак ло̄мтыл майвес, ос та юипа̄лт хӯлтым наканыл щирыл минасыт. «Ма̄кол» класс котильт а̄ращ по̄слым, а̄ращт пӯтсов ханы, ла̄мпа тэ̄г. Ня̄врамыт тыт хо̄нтлым пора э̄ргыт ханищтасыт. «Блокадный Ленинград» иснасыт лаптагатымат, нэ̄пакыл лапханлымат. Ювщалтнэ ма̄т ня̄врамыт карточкал майве̄сыт, та хосытыл ма̄нь сэ̄мыл ня̄нь ло̄мтыл уртве̄сыт ос вит ло̄мтыл айтве̄сыт. Тыт та̄н Ленинград урыл потрыт хӯнтласыт, «Таня Савичева дневник» щирыл та порат о̄лум ва̄рмалит суссыт. Ты о̄лум нак такем пуӈканылн висаныл, вильтаныл щирыл та̄раӈ о̄лыс, та̄н торгамтасаныл, манса̄вит та̄рвитаӈ нак та пора ма̄хманув ва̄щинтасыт. Пилыщмаӈ о̄лыс ос тэ̄ӈкв таххатас. «Сталинград. Салтатн пищма» тыт хо̄нтлым порат ва̄рим хурит сунсыгласыт, маныр тот по̄слым, ты урыл потыртаве̄сыт. «Лё̄ӈх лапо̄лнэ ма̄» тыт витыӈ ня̄р ӯлтта минуӈкв, хара ма̄ хосыт ва̄ӈкуӈкв ос лӯпи ӯлтта воратаӈкв э̄рыс. «По̄с па̄тлуптан ма̄» тыт па̄тлуптан ма̄гыс по̄сыт ва̄рыглаве̄сыт ос писалит о̄лсыт. Пыгрищитн тыт сака мӯстыс. «Санчасть» хумыс а̄гмыӈут пусумлаве, супыгсаквалан ма̄ хумыс пе̄рыгтаве, тыт ханищтаве̄сыт. «Салтатн посылка» тыт картон нэ̄пакыл то̄тапсов ва̄рсыт. То̄тапаныл нэ̄пак маснутыл, тэ̄нутыл та̄глэ̄кв пинсаныл. «Воинский званият» тыт ка̄сыӈ ня̄врам та̄нкина̄нылн погоныт яктысыт, пуссын майорыг, генералыг патсасыт. Ты коныпал о̄с мот станцият о̄лсыт. Акв ма̄т война урыл хансым нэ̄пакыт сунсыгласыт, военный стихыт, э̄ргыт хӯнтласыт. Мо̄т ма̄т йӣквуӈкв ханищтаве̄сыт. Москва ӯс урыл о̄с потыртавес. Манах э̄рнэ ма̄ пуссын минаманыл юипа̄лт ос пуссын актовый залн атхатыгласыт. Тыт ты ма̄ӈ ветерананув урыл ня̄врамыт та̄нки потыртасыт. Ханищтам э̄рганыл э̄ргы̄сыт, пе̄с йӣквыл йӣквсыт. А̄стуманыл юипа̄лт классный руководителит ханищтан ня̄враманыл классаныл мус атыгласаныл. Тох ты ня̄врамыт потыртасыт: – Ювле хультум накыт хотёрувлаӈкв ат ро̄ве̄гыт. Ты урыл ва̄ӈкв э̄ри. – «Блокадный Ленинград» ёмщакв торгамтаслум. Армиян ялуӈкв э̄ри. – Ты пылыщмаӈ нак ёмщакв торгамтаслӯв. Родинав ма̄гыс хо̄нтлам ма̄хум номуӈкв ос янытлаӈкв э̄ре̄гыт. Тамле пилыщмаӈ нак нэ̄мхуньт воссыг ул вос е̄мты. – Ма̄н посыӈ хо̄талыл о̄луӈкв таӈхе̄в. Яныг пӯмащипа ла̄тыӈ ветерананувн, юн рӯпитам хо̄тпанувн ла̄ве̄в. Тох ты ма̄нь па̄влыӈ ма̄т тамле яныг ва̄рмаль ня̄врамытн суссылтаве. Ты хосытыл ущ яныгман ня̄врамыт пилыщмаӈ ос та̄рвитаӈ нак ёмщаквнув ва̄ӈкв патыяныл. Сака ёмас э̄рнэ рӯпата номтыӈ мӯтраӈ ханищтан хо̄тпанув ханищтахтын ня̄враманыл ма̄гыс ва̄ре̄гыт. Ты ма̄гыс та̄нанылн я̄нас пӯмащипа. Но̄хпатум хо̄талыл пуссын янытлыянӯв! Я̄тил тыныӈ ветеранхо̄тпанув, са̄в та̄л пуста̄гыл о̄лэ̄н! Ляпа ма̄хманын вос ӯргалаве̄н, уральтаве̄н. Хоса щуниӈ нот на̄нанн!

1075 2014.05.09. Николай МЕРОВ

Я̄тил ветеран хо̄тпаквет! Округ Дума депутатыт ос ам на̄нан Победа хо̄талыл сымыӈыщ янытлыянӯв! Яныг хо̄нт оигпам па̄сныл са̄в та̄л минас. Та сыс ма̄н ты ва̄рмаль ань тыг мус ёмщакв номилӯв. Та пилыщмаӈ накт хо̄нтлам хо̄тпат ма̄в ӯргалым та̄ксарыг лю̄льсыт. Юн о̄лнэ ма̄хманув о̄с са̄в рӯпитасыт. Хумус ве̄рмысыт, нё̄тсыт, тэ̄нутмаснут хо̄нтлын ма̄н ке̄тыгласыт. То̄нт ты щар са̄в мир порславес. Ка̄сыӈ хо̄тпа Родинав та̄кыщ вуянтас. Аквъёт фашистыт ювле ня̄влуӈкве ве̄рмысанӯв. Ань о̄лнэ мир ты пилыщмаӈ нак о̄с ат ёрувлыяныл. Янгема̄не пуссын аквтем ва̄ганыл, ветераныт хосыт ань ма̄н посыӈ хо̄талт э̄лаль ты о̄лэ̄в. Ветераныт ос хотьют хо̄нтлын накт та̄рвитыӈ рӯпата ва̄рыс, ма̄н та̄н э̄лыпа̄ланылт ма̄ мус хӯтахлэ̄в. Та хо̄тпат о̄с ат ёрувлыянӯв, хотьют хо̄нтлын нак юипа̄лт са̄в рӯпитас. Ань ка̄сыӈ та̄лныл хо̄нтлам хо̄тпа мощща хульты. Ма̄н та̄наныл сака э̄руптыянӯв. Посыӈ хо̄талыл са̄в та̄л э̄лаль вос о̄лэ̄гыт. Тыныӈ ма̄хумаквет, Победа хо̄талыл на̄нан пуссын янытлыянӯв! Округ Дума кӯщай Б. С. Хохряков ке̄тум ля̄ххал ма̄ньщи ла̄тӈыг Николай МЕРОВ хансыстэ.

1075 2014.05.09. Николай МЕРОВ

Яныг хо̄нт порат рӯпитам э̄ква. Ты ва̄рмальн ветеран э̄ква Нина Георгиевна Попова во̄виньта̄лвес. Тав такви уре̄т мощ потыртас. На̄н тав потре э̄лаль ловиньтэлы̄н: «Ам Ханты-Мансийск ӯст хо̄тпан нупыл акв та̄л о̄лэ̄гум. Амки Москва ӯсныл Минск ӯс нупыл миннэ лё̄ӈх хосыт ӯнлын па̄вылт самын патсум. Хо̄нтлын нак э̄лыпалт ма̄н, ня̄врамыт, са̄всыр та̄рвит рӯпата ва̄рсӯв. Тувыл лӯпта э̄тпос 22 щислат илттыг пилыщмаӈ капай е̄мтыс. Фашистыт ма̄н ма̄вн хо̄нтлым ёхтасысыт. Ма̄н па̄влув Москва ӯсныл яныгса̄т са̄тлов ве̄рыстат ӯнлыс. Та̄н тув ма̄нь таквс э̄тпос ловит хо̄талт ёхтысыт. Фашистыт сака молях э̄лаль минасыт. То̄нт са̄в мир порславес. Ельня, Вязьня па̄влыг торыг ты кос ма̄хманув хо̄нтлысыт, ла̄щал ювле та я̄ртве̄сыт. Немцыт Москва ӯсн сака молямтахтасыт, тыи ма̄гыс сака са̄в ё̄р пинсыт, та̄кыщ алхатасыт. Москва нупыл миннэ̄ныл порат, нас о̄лнэ мир ат новсаныл. Ётылнув, хунь ювле ня̄влуӈкве патве̄сыт, та̄н па̄влытытт о̄лнэ мир нупыл сака кантыӈыт о̄лсыт. Та порат са̄в хо̄тпа наска̄ссыг порславес. То̄ва колыт э̄лумхо̄ласыӈ та̄гыл но̄хпе̄ламтасаныл. Мир хоталь ве̄рмысыт, тув ха̄йтсыт. Ам ва̄т нупыл атахтем ве̄рыста ла̄глылл ё̄мсум. Тувыл пормас тотыглан на̄иӈтӯйтын та̄лсум, Украина ма̄н тотве̄сум. Тот немцыт кит арыгтем та̄л о̄лсыт. Та̄н ётаныл о̄лмувт, ка̄сыӈ хо̄тпа по̄йкщис, ма̄нки хо̄тпанув хо̄нтлым моляхнув вос ёхтынувыт. Маттем та саваласӯв. Ётыл, хо̄нт юипа̄лт, ам Украинат хультсум, са̄т та̄л тот о̄лсум. Ка̄сыӈ хо̄тал ма̄нки ё̄ранув ат са̄литасанӯв та̄рвит рӯпата ва̄рсӯв. Война порат ма̄в щар пулиго̄хтыртавес. Коланув щё̄питасанӯв, тэ̄пкант тэ̄нут янмалтасӯв. Родинав ёмасыг е̄мтнэ ма̄гыс ма̄нки сака рӯпитаӈкве тахсӯв. Тыщир ты о̄лсӯв. О̄йкам Тобольск ӯсныл о̄лыс. Тав армият са̄т та̄л лусытас. Ме̄н 1949 та̄лт акванминасме̄н ос Украина ма̄ныл тав о̄лнэ ма̄тэ̄н о̄лмыгтасме̄н. Тот нор яктым рӯпитасме̄н. Тувыл 1963 та̄лт Ханты-Мансийск ӯсн ва̄нтлысаме̄н. Са̄всыр ма̄т аквъёт пуссын атпан нупыл нёлолов та̄л рӯпитасум. Ты та̄лытныл налыман нупыл ат та̄л Ханты-Мансийск ӯст рӯпитасум». Нина Георгиевна хо̄нтлын нак порат Украина ма̄т партизанытн нё̄тыс. Сытамыг та̄нанылн тэ̄нут, маснут тотыглас. Тувыл ща̄гтын хо̄тал ёхтыс. Та̄л котиль э̄тпост 1944 та̄лт Украинан ма̄нки хо̄тпанув хо̄нтлым ёхтысыт. Тувыл ты фашистыт акваг ювле ня̄влуӈкве патве̄сыт. Ты пилыщмаӈ накт са̄в хо̄тпа порславес. Хотьют рӯт та̄л, хотьют ща̄ньа̄щ та̄л, хотьют ня̄врам та̄л хультыс. Ты сака та̄рвитыӈ ва̄рмаль о̄лыс. Ма̄н, редакцият рӯпитан хо̄тпат, Нина Георгиевна пус ка̄т, пус ла̄гыл э̄лаль о̄луӈкве ла̄вилӯв.

1075 2014.05.09. Светлана РОМБАНДЕЕВА

Хо̄нтлам ма̄хум о̄лнэ колыл мивет. 2008 та̄лт Россия Президентув Указ хансыс, ань яныг хо̄нт порат хо̄нтлум ка̄сыӈ хо̄тпа, «Жителю блокадного Ленинграда» ма̄глын тагатан по̄с о̄щнэ ма̄хум, та̄н э̄кваныл пуссын о̄лнэ колыл вос мивет. О̄лнэ кол ёвтнэ ма̄гыс государствавн та̄н 1 миллион 917 со̄тыра 741 солко̄вил мивет. Ты коныпал ань йильпи са̄ккон щирыл, та̄н ты олнаныл мощ но̄хнув нё̄тавет, ты ма̄гыс 36 миллион 264 со̄тыра солко̄ви та̄стувес. Олныт ветераныт о̄лнэ ма̄нанылн ке̄тавет: Ханты-Мансийск, Нефтеюганск, Нижневартовск, Когалым, Нягань, Пыть-Ях ос Югорск ӯсытн, Сургутский ос Советский районыгн. 2005 та̄л мус округув янытыл очередин 530 хо̄тпа хансым о̄лсыт. Ты та̄лыт сыс 456 хо̄тпа о̄лнэ колыл майве̄сыт, 36 а̄тимыг е̄мтсыт, 15 – хотщуртумтаве̄сыт (та̄н кол о̄щнэ̄ныл). Ань ты хо̄тал мус 23 хо̄тпа кол ӯре̄гыт. Диана Юрьевна ла̄вме щирыл, ань тай олн то̄вылхаты, ка̄сыӈ хо̄тпа о̄лнэ колыл миве. Тувыл нэ̄ Чечнян ялум ма̄хум урыл потыртас. Округ янытыл ань 3 со̄тыра 725 хо̄тпа очередин хансым о̄лэ̄гыт. Та̄н о̄с пуссын нё̄тавет. 2013 та̄лт 635 хо̄тпа о̄лнэ колыл майве̄сыт, тыгыл э̄лаль ла̄щалла̄щал о̄с тах миӈкве патавет, кол та̄л нэ̄мхотьют ат хульты.

1075 2014.05.09. Тамара МЕРОВА

Нэ̄мхотьют ул вос ёрувлаве. Ты тэ̄ла щирыл музейт рӯпитан хо̄тпат ос ӯст о̄лнэ ма̄ньлат а̄гитпыгыт ань таи ва̄руӈкве таӈхе̄гыт: 1941-1945 та̄лытыт хо̄нтлуӈкве ялум хо̄тпат манос войнат порслам хо̄тпат наманыл пуссын "Бессмертный полк" нампа нэ̄пакн хансым вос о̄лсыт. Таима̄гыс ӯст о̄лнэ ма̄хмытн хо̄нтлам рӯт хо̄тпаныл урыл музейн ла̄тыӈ ке̄туӈкве э̄ри. Тот наме вос хӯлтыяныл, хоты ма̄т тав хо̄нтлыс ос хумус таве̄н рӯтыг о̄лы. Тувыл та са̄лтат хуритэ ва̄раве, рӯтанэ̄н миве ос Победа хо̄талт ты хури ёт тав ӯс кан хосыт ё̄муӈкве паты. Юио̄выл хультум та̄лытыт войнан ялум хо̄тпат ка̄сыӈъе̄мт мощщамлэ̄гыт. Ма̄ньлат хо̄тпат та̄нки о̄паныл, ащо̄йканыл манхурип пилыщмаӈ нак порат о̄лсыт, ты о̄выл тыт хотёрувлаӈкве патсыт. Та̄н а̄гиянылпыганыл о̄с нэ̄матыр потыр ат хӯлыглэ̄гыт. Ань "Бессмертный полк" акция ва̄рнэ кастыл ня̄врамыт хо̄нтлуӈкве ялум хо̄тпат хурияныл вос ка̄салыяныл. Тувыл Победа хо̄тал манрыг таве э̄лаль янытлаӈкве э̄ри, ня̄врамаквет са̄внув ва̄ӈкве патэ̄гыт. Ты коныпал та̄нки яныг ащо̄йканыл, яныг о̄паныл наманыл о̄с та̄рапаттыяныл, мо̄тынтыг та̄нки ӯс канын хуриӈ та̄гыл о̄с тах ёхтэ̄гыт. На̄нан ты ва̄рмаль мӯстыс ке, тамле акция на̄нки ӯсытн манос па̄влытн э̄лаль щё̄питаӈкве ве̄рмегы̄н. Таима̄гыс таи ва̄ре̄н: – ищхӣпыӈ ут хосыт www. podvignaroda. ru; www. soldat. ru; www. pomnite-nas. ru ло̄пс хо̄нтэ̄н ос тот о̄пан, ащо̄йкан манос мо̄т рӯтанын наманыл кинсэ̄н. Наманыл а̄тимыт ке, на̄нки тув ла̄тыӈ ос хури ке̄тэ̄н. Лангепас ӯст о̄лнэ ма̄хум хо̄нтлуӈкве ялум рӯтаныл та̄рапаттын ма̄гыс музейт рӯпитан хо̄тпат та̄нки коланылн во̄вияныл ос тот нё̄туӈкве ла̄вавет. Тувыл ма̄хум хо̄нтлам рӯтаныл хурит вос ва̄рияныл, (та̄нки ат ке ве̄рме̄гыт, акция ва̄рум хо̄тпатн нё̄тавет тах). Ма̄хум ты хуриӈ та̄гыл я̄ӈк на̄тнэ э̄тпос Победа хо̄талт та̄нки о̄лнэ ӯсыӈ манос па̄влыӈ канын вос минэ̄гыт ос тот «Бессмертный полк» ва̄рнэ колоннат вос ё̄ме̄гыт. Ты сака ёмас ос э̄рнэ ва̄рмаль. Та щирыл хо̄нтлуӈкве ялум ма̄хманув ка̄стыянӯв ос ка̄сыӈ йильпи та̄лт но̄хпатум хо̄талт та̄н аквтупмат та̄нки ма̄н халувт ё̄ме̄гыт.

1075 2014.05.09. Александр ВЬЮТКИН

Рӯпата минэ ма̄хум уральтан хум. Рӯпитан ма̄хум урыл о̄лум прессконференцият журналистыт ёт Евгений Кривобоков потыртас. Ма̄хум кӯщаитн ул вос ӯрккуптавет, ты ва̄рмаль щирыл тав Государственный инспекция кӯщаиг рӯпиты. Евгений Владимирович о̄влэ̄т рӯпата минэ ма̄хум уральтан тэ̄ла урыл потыртас: «Ма̄н ва̄глув, то̄ва ма̄хум рӯпата ва̄рнэ̄ныл ма̄гсыл олныл щар ат ойтавет. То̄ват ойтавет кос, ос сака мощщал. Та̄н договорнэ̄паканылт хансым о̄лы, рӯпатаныл ма̄гсыл олнаныл пуссын ат ойтавет. Са̄выӈпа̄лэ̄ тох кайнэ ма̄хум ЧОП нампа ма̄т рӯпитэ̄гыт. Ань ма̄н та̄н ётаныл рӯпитэ̄в, хумус та̄нанылн мир ёт рӯпитаӈкв э̄ри ос маныр э̄ри ва̄руӈкв. Тувыл та̄нанылн ма̄н ётув рӯпитаӈкв кӯстырнуве паты. Манавн налоговый ос социальный страхование фонд ёмщакв нё̄тэ̄г. Та̄н ЧОП ма̄хум ва̄тихал уральтыяныл. Хунь матыр хо̄нтэ̄гыт, ты урыл та̄ра ма̄навн пищма те̄тэ̄гыт. Ма̄н та пищма щирыл о̄с та э̄лаль уральтыянӯв. Матыр те лю̄ль хо̄нтэ̄в, олныӈ штрафыл пиныянӯв». Рӯпитан ма̄н ущты вим хо̄тпат то̄ванакт нэ̄мхотты нэ̄пакт ат хасхатэ̄гыт. Рӯпатат хунь матыр лю̄ль е̄мты, тот рӯпитам хо̄тпа нэ̄матырыл ат нё̄таве ос олныл ат о̄йтаве.

1075 2014.05.09. Тамара МЕРОВА

Тыт ӯщлахтуӈкве о̄с ро̄ви. Округ губернатор Наталья Комарова Белоярский ӯсн ялыс, тот Семейный совет Югры сапра̄ни ва̄рыглас. Тав тувыл ӯсыт ос районыт ёт ищхӣпыӈ ут хосыт ня̄врам ӯщлахтан тэ̄лат о̄вылтыт потыртас. 2014 та̄лт ня̄врамыт ёмащакв ӯщлахтын ос пусмалтахтын ма̄гыс 1 миллиард 735 миллион солко̄ви та̄стувес. Ты олннё̄тмилытыл 95% округт о̄лнэ ня̄врамаквет са̄всыр ма̄т ӯщлахтуӈкве ос пусмалтахтуӈкве ве̄рме̄гыт тах. Таима̄гыс 380 миллион солко̄ви пусмалтахтын колыт щё̄питан ма̄гыс холтавет. Та щирыл хо̄т яныг центрыт ёмащакв щё̄питавет. Ос округув янытыл ты та̄лт ня̄врамыт ма̄гыс 510 са̄всыр ӯщлахтын колыт пунсавет. Округувт йильпи этноцентрыт, этнолагерит ос акванатхатан мо̄т са̄всыр колыт ва̄руӈкве патве̄сыт. Ня̄врамыт тот во̄рт ӯщлахтэ̄гыт, сыресыр э̄рнэ ос мӯтраӈ тэ̄лан ханищтавет. Та̄нанылн тот ӯщлахтуӈкве сака мӯсты. Ханты-Мансийский район Елизарово па̄вылныл Валентин Александрович Еремеев ищхӣпыӈ ут хосыт потыртас, во̄рт о̄лнэ лагерит о̄лнэ̄ныл сыс ня̄врамыт та̄ксарнуве̄г е̄мтэ̄гыт, та̄нки халанылт акванюрщхатэ̄гыт. Тувыл то̄ва ня̄врамыт ща̄ньа̄щаныл ёт тув ялантэ̄гыт, тыи о̄с ёмас тэ̄лаг о̄лы. Тох та̄н та̄нки халанылт акваннё̄тхатым э̄лаль о̄лэ̄гыт. Акв а̄гирищ Дарина Кайгородова, «Поколение +» ня̄врамыт ёт рӯпитан колэ урыл сака ёмас ла̄тыӈ ла̄выс. Тав мо̄т а̄гитпыгытн тамле ла̄тыӈ ке̄тыс: «Юграт ӯщлахтуӈкве модныиг о̄лы». Валерия Шведова, Радужный ӯсныл ёхталам а̄ги, тамле ӯщлахтын колыт о̄вылтыт ос таи ля̄галас: «Тот интернет та̄л о̄лэгы̄н ке, мӯсхал щирыл ӯщлахтэгы̄н! ». «Югра» телерадиокомпаният мирн нё̄тмил ва̄рнэ программат щё̄питан нэ̄ Оксана Вожатова о̄с потыртас. Та̄н ня̄врамыт ма̄гыс са̄всыр ёмас кинат, ёнгилыт, касыт о̄ньще̄гыт. Соссаӈ ма̄хум ла̄тӈаныл ханищтан ма̄гыс «Югорика» нампа программа, «Кошкиосторожки» проектаныл, «Жемчужина Югры – Приполярный Урал» документальный кинат ос мо̄таныт. Ань пуссын ты передачаныл та̄н школат ос лагерьт рӯпитан хо̄тпатн миӈкв ве̄рмияныл. Та̄н туп телекомпаниян ла̄тыӈ вос ке̄тэ̄гыт. Ня̄врамытын округт о̄лнэ ма̄хум ёмщакв ва̄ӈкве э̄ри, тувыл манхурип нё̄тнэ ма̄т та̄н о̄лэ̄гыт, кинат ка̄салыяныл ос ве̄к хотты накт тув ялуӈкве тахмае̄гыт. Тувыл яныг ӯсытыт ос районытт о̄лнэ ма̄хум та̄нки ӯщлахтын коланыл урыл потыртасыт. Ольга Дмитриевна Пилецкая, Сургут ӯсныл о̄лнэ нэ̄, номтыӈ ня̄врамыт (одаренные дети) ӯщлахтуӈкве ос та сыс э̄лаль ханищтаӈкве хо̄т ӯравет, таи хӯлтыс. Мо̄лты ня̄врамыт Суздаль ӯсн тотыглаве̄сыт, та̄нанылн тот сака мӯстыс. Ты коныпал 21 со̄тыра ня̄врам ща̄рщ ва̄тан тотыглаве̄сыт. Тох та̄н Россият манос мо̄т хо̄н ма̄т ӯщлахтэ̄гыт. Болгариян 550 а̄гитпыгыт ялэ̄гыт тах, мо̄таныт Владивосток ӯсн «Океан» нампа лагерьн ос Туапсе ӯсн «Орлёнок» нампа лагерьн тотыглавет. Ты та̄л Крымт о̄лнэ «Артек» нампа лагерь о̄с рӯпитаӈкве паты, тув 134 ня̄врамыт ке̄тавет. Крымт войнат порслам ма̄хум памятниканыл ань тыг мус ӯргалым о̄ньщавет. Ща̄ньа̄щитн о̄с ла̄тыӈ ке̄тсыт, та̄нки Крымн ялуӈкве таӈхе̄гыт ке, ня̄враманыл ёт вос ялэ̄гыт. Ань тув ялнэ̄ныл ма̄гыс лё̄ӈханыл ма̄гыс мощща олн тах ойтэ̄гыт.

1075 2014.05.09. Людмила ТЕТКИНА

Та̄н та̄рвитыӈ ва̄рмаляныл ат ёрувлавет. Общественный палатат рӯпитан ма̄хум сапра̄нит а̄гмыӈмосыӈ хо̄тпат та̄рвитыӈ ва̄рмаляныл урыл потыртасыт. Кӯщаит тув о̄с во̄виньта̄лве̄сыт. Станислав Кононенко, Общественный палатат рӯпитан хум, тох ла̄выс: «Ань а̄гмыӈмосыӈ ма̄хум квота щирыл рӯпитаӈкве вивет. Ты э̄лыпа̄лт пирмайтым са̄ккон хосыт яныгса̄т а̄гмыӈмосыӈ э̄лумхо̄лас туп тох рӯпата хо̄нтуӈкве ве̄рмысыт. Йильпи са̄кконыт та̄н 35 квотал хасве̄сыт. Ань организацият инвалидхо̄тпат рӯпитаӈкве ке выганыл, округ бюджетныл олныл нё̄тавет. Тувыл то̄ват лю̄ль ва̄ре̄гыт, ма̄хум рӯпитаӈкве мощщан вуйлыяныл, ты олныл та̄ставет, ты юипа̄лт та̄наныл по̄хын ке̄тыяныл. Ос то̄ват рӯпитаӈкве кос вивет, тувыл ос ӯрккуптым мощща олныл ойтавет. Ты ва̄рмалит урыл ма̄н Наталья Комарова, губернаторув ёт, хо̄нтхатыгламув порат потыртасӯв. Тав ты тэ̄лат та̄рапаттым о̄ньщиянэ». Елизавета Лаптева, мир ӯргалан Департаментыт рӯпитан нэ̄, ос та̄нки рӯпатаныл урыл ла̄тыӈ ла̄выс. 2013 та̄лт акв со̄тыра 986 а̄гмыӈмосыӈ хо̄тпа рӯпата кинсыс. Та̄н халанылт 960 э̄лумхо̄лас рӯпатал хо̄нтве̄сыт. Кӯщай нэ̄ ла̄вме щирыл, ты ма̄хум юн о̄лым, са̄всыр пособиял ос пенсияолныл ойтавет, тыи ма̄гсыл та̄нки рӯпитаӈкве сака ат ка̄саще̄гыт. Округ янытыл сапра̄нин ёхталам а̄гмыӈмосыӈ ма̄хум та̄нки та̄рвитыӈ ва̄рмаляныл урыл потыртасыт. Кӯщаит та̄нанылн нё̄туӈкве ла̄вхатсыт.

1075 2014.05.09. Александр ВЬЮТКИН

Ловиньтан нэ̄пак хаснэ хо̄тпат янытлаве̄сыт. Нэ̄пак ловиньтан окружной колт «Литературная премия Югры 2013» ма̄хум мӯйлупсал янытлан ва̄рмаль о̄лыс. Ты премия 2007 та̄лт ва̄рвес. Та юипа̄лт 2009 та̄л па̄сныл тав ма̄ янытыл янытлаве. Ань тыг мус пуссын аквъёт налыман хо̄тпа ты мӯйлупсал майве̄сыт. Та коныпал ты та̄л Ханты-Мансийск ӯст о̄лнэ нэ̄пакыт ловиньтан кол нёлса̄т та̄лэ то̄влы. Ты та̄л та премиял са̄т хо̄тпа майве̄сыт. Округувныл Андрей Тарханов, Еремей Айпин ос Мария Волдина соссаӈ мир культура янытлан ма̄гсыл о̄с мӯйлуптаве̄сыт. Тувыл Воронеж ӯст о̄лнэ хум Иван Щелоков Россия ма̄в урыл ёмас, нё̄тнэ стихыт хаснэ̄тэ ма̄гсыл янытлавес. Та юипа̄лт Германияныл о̄лнэ нэ̄ Алексас Парнис ты премиял майвес. Азербайджан ма̄ныл о̄лнэ хум Мамед Орудж о̄с янытлавес. Тав ханты ос ма̄ньщи мо̄йтанув такви ла̄тӈе̄нт толмащланэ̄тэ ма̄гсыл премиял майвес. Юио̄выл Македония хо̄н ма̄ныл Венко Андоновский ёхталас. Тав ос такви ма̄тэ̄т о̄лнэ рущ ма̄хмыт урыл нэ̄пак хасме ма̄гсыл литературный премиял майвес. Ты янытлым ма̄хум пуссын мир янытыл ёмщакв ва̄вет ос ёмас ла̄тӈыл ӯлыглавет. Ка̄сыӈ хо̄тпа такви мире̄н са̄в ё̄мас тэ̄ла ва̄рыс. Хоты ма̄ныл, хоты витныл о̄лнэ ма̄хум То̄румн, О̄тырн вос ӯргалавет.

1075 2014.05.09. Александр ВЬЮТКИН

Лё̄ӈхыт мӯсхал щирыл яласэ̄н. Ювле хультум э̄тпост Ханты-Мансийск ӯст ГИБДД рӯпитан ма̄хум ня̄врамыт ма̄гыс «Твой вклад в безопасность дорог Югры» нампа акция о̄вылтасаныл. Ты ханищтап щё̄питан щирыл округ губернатор ва̄ӈын кӯщаиг о̄лнэ хум Алексей Путин та̄нанылн нё̄тыс. Ты акция щирыл яныгнув классытыт ханищтахтан ня̄врамыт ос студентыг о̄лнэ ма̄ньлат ма̄хум лё̄ӈх тармыл рӯпитан полицият ёт ӯс хосыт яласасыт. О̄влэ̄т ма̄ньлат ма̄хум ГИБДД колт акванатыглаве̄сыт. Тот та̄нанылн лё̄ӈхыт маныр ос хумле э̄ри ва̄руӈкв, хӯлтве̄сыт. Ма̄ньлат ма̄хум пуссын аквъёт атхойплов хо̄тпа о̄лыс. Та̄н хо̄т ма̄шинан ла̄ккваурттым о̄лсыт. Ань ты о̄выл акция щирыл ня̄врамыт тит щёс ГИББД ма̄хум ёт лё̄ӈхыт рӯпитасыт. Ма̄шинан ӯнтын э̄лыпа̄лт ма̄ньлат ма̄хум ёт Департамент колт рӯпитан хум Геннадий Забадин потыртас, тав ла̄выс: «Ань ма̄н нас сунсэ̄в, хумус ты ва̄рмаль мины. Тыил ма̄н ла̄ве̄в, ма̄хум лё̄ӈхыт рӯпитан ГИБДД ма̄хмыт вос янытлыяныл. Лё̄ӈхыт та̄н нас тох ат лю̄ле̄гыт, та̄н ва̄рнэ та̄рвитыӈ рӯпатанылт нё̄туӈкв э̄ри. Таима̄гсыл ты ма̄н тамле ёмас тэ̄ла э̄лаль тотылӯв. Лё̄ӈхыт миннэ̄н порат нэ̄мхотталь ул молямлэ̄н, ӯргалахтым яласэ̄н».

1075 2014.05.09. Александр ВЬЮТКИН

Крым урыл ля̄ххал. Мо̄лалнув э̄тпост Ханты-Мансийск ӯст Государственный Дума депутат Вячеслав Николаевич Тетёкин ёт потыртасӯв. Потрув Украина хо̄н ма̄ ва̄рмалянэ урыл о̄лыс. Вячеслав Николаевич тув ялыс. Тав ла̄выс: «Со̄ль, ань Россияв ма̄ янытыл щар ё̄рыг ловиньтаве. Э̄лы хо̄н ма̄т о̄лнэ ма̄хум са̄выӈпа̄лэ ма̄н ётув юртыӈыщ о̄луӈкв таӈхе̄гыт. То̄ват та̄нтина̄ныл такталым нас ва̄рыглахтэ̄гыт. Ань ты Украина ма̄т о̄лнэ ва̄рмаль 2007 та̄лт Германия хо̄н ма̄т Мюнхен ӯст мирхал конференция о̄лме порат о̄вылтавес. То̄нт ма̄н Президентув Владимир Путин Америка хо̄н ма̄ нупыл та̄н ва̄рнэ тэ̄ланыл урыл щар ля̄льт потыртас. Та порат Владимир Владимирович ла̄вум ла̄тӈанэ та̄нанылн ат мӯстысыт. Ань ты порат о̄лнэ ва̄рыглам наканыл ла̄щлакв та о̄вылтаве̄сыт. Хунь тыи пуссын о̄вылтахтас, маныр э̄лаль ва̄руӈкв э̄ри нэ̄мхотьют ат ва̄стэ. То̄нт ма̄н Российский са̄лтатанув Крымт о̄лнэ рущ ма̄хманув ӯргалан ма̄гсыл тув те̄тсанӯв. Парашютыл нумыл поргын са̄лтатанув мо̄т маснутыл мастым, писалиӈ та̄гыл, вильтаныл лаппантым тув те̄тыглаве̄сыт. Ань НАТО нампа армия ма̄нав пилуптан ма̄гыс са̄в лю̄ль ва̄ри. Мощ мо̄лалнув Крым ща̄рще̄т вит ёлыпа̄лт яласан США хо̄н ма̄ тит на̄иӈха̄паге ка̄салавесы̄г. Ма̄н ань ты на̄иӈха̄пыг аквписыг тармыл ӯрим о̄ньщиягӯв. Та̄н ты урыл ва̄гыт, таима̄гсыл хурахлэ̄гыт. Украина армиятэ армияг ла̄вуӈкв ат ро̄ви. Яныгпа̄лэ хо̄нтлын утаныл, танкыт, товлыӈха̄пыт ос на̄иӈха̄пыт щар ат рӯпитэ̄гыт. Та̄н армияныл хосат ла̄ккватӯлмантавес. Таима̄гсыл та̄н э̄рттам мо̄т хо̄н ма̄ныл нё̄тавет. Украинат Президент пе̄риян юипа̄лт тав, улпыл, кӯстырнуве̄г о̄луӈкв тот паты. Ань о̄лупса тот сака та̄рвитыӈ. Ма̄хум хунь ёмщакв о̄лмыгтэ̄гыт, та урыл иӈ нэ̄мхотьют ат ва̄гтэ. Тыи пуссын я̄ӈк на̄тнэ э̄тпос ва̄т нупыл атыт хо̄талэ юипа̄лт тах та̄рапаты». Прессконференция оигпаме э̄лыпа̄лт Вячеслав Тетёкин ла̄выс: «Ты тув мус пуссын ёмасыг сойиг е̄мты. Хотьют ка̄сащи, Крым ма̄н ӯщлахтаӈкв ялэ̄н, ул хурахлэ̄н. Тот ре̄гыӈ, ща̄рщ витэ сыстам. Та̄л палыт пуста̄гыл о̄лнэ̄н ма̄гсыл тот ӯщлахтэ̄н! »

1075 2014.05.09. Николай МЕРОВ

Ханты ма̄хманув са̄лыл кассыт. Ты та̄л Сургутский район Когалым ӯст соссаӈ ма̄хманув са̄лыл каснэ ва̄рмаль ва̄рыгласыт. Хо̄тал нэ̄глын е̄рт о̄лнэ ханты ма̄хум пуссын та̄нки са̄лы о̄ньще̄гыт. Та̄н Ямало-Ненецкий округ ляпат о̄лэ̄гыт. Та ма̄ныл ё̄рн ос ханты хо̄тпат ты ялпыӈ хо̄талн ка̄сыӈ та̄л ёхталэ̄гыт. Са̄лыӈ ма̄хум нё̄выль, пил ос мо̄т са̄всыр тэ̄нут ос ка̄тыл ва̄рим пормасаныл тот тыналэ̄гыт. Соссаӈ ма̄хманув пуссын хорамыл ю̄нтым маснутыл масхатым о̄лсыт. Та ӯс ляпат о̄лнэ па̄влытныл, ӯсытныл ты ва̄рмаль сунсуӈкве са̄в мӯй ма̄хум ёхталас. Ялпыӈ хо̄тал сака пӯмщиг минас. Когалым ӯс культура колт рӯпитан ма̄хум концерт щё̄пита̄лсыт. Хара ма̄т яныг сцена ва̄рыглавес. Тот ёнгын колыт са̄ӈквылтасыт, э̄ргысыт ос йӣквсыт. Ты ялпыӈ хо̄тал «Лукойл Западная-Сибирь» нампа ма̄во̄й ма̄ныл но̄хвинэ компания 2004 та̄л па̄сныл ва̄рыглытэ. Та порат Когалым ӯст соссаӈ ма̄хум съезданыл о̄выл щёс минас. Та съездыт кӯщаит са̄лыл каснэ ва̄рмаль ка̄сыӈ та̄л ва̄рыглаӈкве потыртахтасыт. Ань са̄лыӈ колытныл китса̄ткем ще̄мья ӯсн мӯйлуӈкве тотыглаве. Та̄наныл тотнэ ма̄гыс нефтяникыт машина майлэ̄гыт. Ямало-Ненецкий округныл са̄лыӈ хо̄тпат о̄с ёхталасыт. Та̄н мӯй ма̄хум пӯмащ ма̄гыс са̄лыӈ суныл тотыгласаныл. Акв щёс ялнэ ма̄гыс ма̄хум атпан солко̄ви ойтсыт. Мир ща̄гтым мӯйлысыт. Ащирман по̄льнэ хо̄тпат ё̄рнколт толтыглахтасыт. Тув щалтнэ ма̄гыс яныгса̄т солко̄ви ойтуӈкве э̄рыс. Тэ̄нут ма̄гыс ма̄хум о̄с я̄нас ойтхатасыт. О̄выл щёс каснэ ва̄рмаль о̄лум порат мощща са̄лыӈ ма̄хум касуӈкве ёхталасыт. Ты та̄л пуссын аквъёт са̄тпан нупыл ат са̄лыӈ хо̄тпа кассыт. Каснэ лё̄ӈханыл акв со̄тыра китса̄т метра палытыг о̄лыс. Хум хо̄тпат халт о̄выл места Владимир Иванович Сопочин, Русскинская па̄вылныл о̄лнэ хум, китыт места Василий Яковлевич Сопочин, Тром-Аган па̄выл хум, хӯрмит места Геннадий Александрович Покачев, Русскинская па̄вылт о̄лнэ хум, та̄н висыт. Э̄кват халт о̄выл места ос Зоя Фёдоровна Русскина, Русскинская па̄вылт о̄лнэ нэ̄, китыт места Анастасия Анатольевна Комтина вис, тав ос Русскинская па̄вылт о̄лы, хӯрмиттыг Зинаида Ивановна Кечимова, Когалым ӯст о̄лнэ нэ̄, ёхтыс. О̄выл места вим ма̄хум «Буран» нампа тӯйт тармыл яласан утыл мӯйлуптаве̄сыт. Китыт ос хӯрмит местаг ма̄гыс на̄йпос ва̄рнэ станция ос бензопила майвесы̄г. Ты коныпал са̄лыӈ хо̄тпат пе̄рщисыт, тынщаӈ па̄хвтысыт ос са̄лыӈ сун ӯлтта поргим кассыт. Тувыл ты ялпыӈ хо̄талт са̄лыӈ ма̄хум халт ё̄рнколт рӯпитан щар нё̄тнэ ос ка̄ркам э̄кваго̄йкаг пе̄риявесы̄г. Но̄хпатум хо̄тпат пуссын ёмас мӯйлупсал майве̄сыт.

1075 2014.05.09. Людмила ТЕТКИНА

Э̄ква та̄рвитыӈ пора номитэ. Александра Кузьмовна Питухина, такви о̄парищ наме Юткина, Кондинский район Леуши па̄вылт о̄лы. Ты та̄л яныгполь э̄тпос 20 хо̄талэ̄т 88 та̄лэ то̄влыс. Яныг хо̄нт оигпаме юипа̄лт 1946 та̄лт ма̄глын тагатан по̄сыл майвес, рущ ла̄тӈыл «За доблестный труд в Великой Отечественной войне 1941-1945 годов» намаим о̄лы. Ты коныпал тав са̄в грамотанэ̄пакыт ос мо̄т янытлан нэ̄пакыт о̄ньщи. Леуши па̄вылт ма̄ньщи э̄ква сака янытлаве. Александра Кузьмовна та пора урыл ла̄выс: «Война о̄вылтахтаме порат ам 15 та̄лум то̄влыс, то̄нт школат ханищтахтасум. Ма̄н ще̄мьявт ат ня̄врам яныгмасӯв. Омам рущ нэ̄, Свердловский областьт о̄лыс. Тав Леуши па̄вылн пил ва̄туӈкве ке̄твес, тыт а̄тям ёт акванминасы̄г. А̄тям ма̄ньщи хум о̄лыс. Тав кӯпсао̄йка яныг колэ ёвтыстэ, та порат кол 475 солко̄ви тынэ о̄лыс. Ойтхатнэ ма̄гсыл акваг са̄в рӯпитас, во̄раяс, хӯл алыщлас. Таквина̄тэ щар ат са̄литастэ, тох рӯпитым, а̄гмыл е̄мтыс, 1932 та̄лт а̄тимыг е̄мтыс. Омав такке̄т ат ня̄врам ёт хультыс. Та порат колхозыт ва̄руӈкве о̄вылтаве̄сыт, ма̄хум ӯйхуланыл тув пуссын мисаныл. Омам о̄с ла̄ввес, мисанэ, луванэ тув ат ке мыганэ, яныг налоголн ойтуӈкве паты. Пуссын ӯйхуланув колхозн та мисанэ, такви о̄с тув рӯпитаӈкве минас. Воссыг хоталь щалты, ма̄нав тыттуӈкве, мастуӈкве э̄рыс. 1934 та̄лт ам о̄выл классын минасум, 1943 та̄л порат школа а̄стласум. Ты э̄лыпа̄лт 1942 та̄лт Паша каӈкум хо̄нтлаӈкве вуйвес. Юв воссыг ат ёхтыс, хоты ма̄т порславес ос ёлщё̄питавес, аты ва̄глӯв. Война порат ма̄н ня̄врамыт о̄с пуссын рӯпитасӯв, туи пум ва̄рсӯв, хӯл алыщласӯв. Номилум, на̄иӈха̄п ёхты, юипа̄лэ̄т яныг баржа хартты, ма̄н па̄влыӈ ма̄хум пуссын тув рӯпитаӈкве ке̄таве̄в. Тэ̄нут, пормас тув та̄лттэ̄в. Ам амки талква, таяныт хӯргыт хо̄тал палыт та а̄лумтасум. Ӣтипа̄лаг юв ёхтэ̄гум, ла̄глагум щар нас то̄рге̄г. Акв хурыг 50 кила та̄рвитэ, ам амки тыил кӯпнитнуве̄г о̄лсум. Таяныт та̄рвит хумус но̄ха̄лмыгласум, ат ва̄глум. То̄нт та̄рвит рӯпата ва̄рим, ма̄н туп Победа урыл номсысӯв. Ам са̄т класс а̄стласум, Ханты-Мансийск ӯсн бухгалтерыг ханищтахтуӈкве минасум. А̄лпыл ханищтахтэ̄в ос ӣтипа̄лаг рӯпитэ̄в. Училища а̄стламум юипа̄лт Ларьякский районын ке̄тве̄сум. Кӯщаит палт минасум, лю̄ньщим юв во̄вхатсум, омамн нё̄туӈкве э̄рыс. Юв юрт а̄гиянум ёт минмыгтасӯв, то̄нт тай на̄иӈха̄пыт торыӈ ат яласасыт. Ханты-Мансийск ӯст на̄лми ва̄тат на̄иӈха̄п акв э̄тпос ӯрыслӯв. На̄иӈха̄пыт па̄г пӯхталэ̄гыт, са̄всыр пормасыл, тэ̄нутыл та̄глэ̄кв та̄лттавет, э̄лаль фронт нупыл та минэ̄гыт. На̄лми ва̄тат ӯнлымав, карточка щирыл майлым тэ̄нутанув холасыт, ма̄н грузчикыг тот рӯпитасӯв. Лӯпта э̄тпос оигпаме э̄лыпа̄лт Нахрачи па̄вылн ущта ёхтысӯв. Юн рыбкоопн рӯпитаӈкве патхатсум. А̄лпыл олн ловиньтасум, ӣтипа̄лаг ос колхозт рӯпитасум. Па̄влувт о̄лнэ ла̄пка, маснут ю̄нтнэ цех, пӯльница, школа пуссын ӯльювыл па̄лтыглаве̄сыт. Ма̄н, па̄влыӈ ма̄хум, пуссын аквъёт а̄лпыл нила щёс порат во̄рн ӯльюв сартуӈкве минэ̄в. Тэ̄лы кастыл ӯльюв щё̄питасӯв. Нёлолов щё̄с порат ювле ёхтэ̄в ос колхоз рӯпата ва̄ре̄в». Яныг хо̄нт оигпаме юипа̄лт Александра Кузьмовна хум ва̄рыс. О̄йкатэ̄ныл, Константин Константинович Питухин ёт, нила ня̄врам янмалтасы̄г. Ма̄ньщи э̄ква 1976 та̄лт пенсиян минас. Ты урыл тав ла̄ви: «Война юипа̄лт ам леспромхозт рӯпитасум, 1973 та̄л ты организация мо̄т ма̄н ва̄нтлуптавес. Ам по̄хан ке̄тве̄сум, пенсия мус пӯльницат рӯпитасум. Пенсиян патхатасум, пӯрщ, мис, лув о̄щсум. Ань тай ё̄р та̄л, ӯйхул ат о̄ньще̄гум, Андрей пыгум палт о̄лэ̄гум». Александра Кузьмовна Победа ма̄гсыл са̄в ё̄р пиныс, са̄в рӯпитас. Ма̄н, редакцият рӯпитан ма̄хум, ма̄ньщи э̄ква Победа хо̄талыл янытлылӯв, са̄в ёмас сымыӈ ла̄тӈыл ке̄тылӯв.

1075 2014.05.09. Александр ВЬЮТКИН

Са̄в та̄л пӯльницат рӯпитам э̄ква. Тэ̄лы «Ма̄нь ӯскве» ня̄врамыт ёт округув янытыл яласамум порат Нягань ӯст яныгпа̄лаг о̄лнэ потрыӈ ма̄ньщи э̄ква ёт ва̄йхатасум. Тав наме Матрёна Никитична Рещикова. Тав А̄с я̄ ва̄тат о̄лнэ Хал па̄вылт 1938 та̄лт самын патыс. Ане̄кватэ, ащо̄йкатэ о̄лнэтэ̄н палытыл Хал па̄вылт о̄лсы̄г. Ащо̄йкатэ Герасим Григорьевич Рещиков яныгса̄т ат та̄л о̄лум. О̄лме̄н порат тэ̄н э̄кватэ̄нтыл хӯл алыщлым ос во̄раим рӯпитасы̄г. Матрёна Никитична а̄тятэ наме Никита Константинович Савинов. Тав о̄с хӯл а̄лыщлан ос во̄раян хумыг о̄лыс. Война о̄лум порат са̄в хӯл ос нё̄выль хо̄нтлын ма̄н те̄туӈкв э̄рыс. 1943 та̄лт таквсы порат хӯл алыщлан ха̄паныл та̄глэ̄кв хӯлыл та̄лттысаныл, юв миннэ̄ныл порат турманыт ха̄паныл на̄тнэ щухын хоми ё̄хтувес. Матрёна Никитична а̄тятэ по̄лям витыт по̄льтахтыматэ юипа̄лт а̄гмыл та е̄мтыс. Та порат торыӈ тэ̄рпи а̄тим о̄лыс, Никита Константинович а̄гме̄н хотталь та тотвес. А̄тяныл хотталь щалтме порат та̄н ат ня̄врам хультсыт. Щар янгыг Сергей каӈке о̄лыс, тувыл Настя увщитэ. Ос котиль ня̄врамыг Матрёна тав ты о̄лыс. Тувыл иӈ тит а̄пщирищиг Альберт ос Петр яныгмасы̄г. Альберт а̄тимыг е̄мтме ань хӯрум та̄лыг ты е̄мтыс. Пити патта а̄пщирище Петя ос Перегрёбный па̄вылт ще̄мьяӈ та̄гыл о̄лы. О̄матэ Хал па̄выл колхозт лув о̄щнэ нэ̄г рӯпитас. Та порат почта, тэ̄нут тотыглан ма̄шина ос товлыӈха̄п иӈ а̄тим о̄лыс, лувыл пуссын хартсыт. Таима̄гсыл ты та̄н колхозанылт са̄в лув о̄щвес. Тэ̄нут тотыглан ма̄хум хотты па̄вылт луваныл пе̄нтнэ̄ныл юипа̄лт, э̄лаль та минэ̄гыт. Луваныл мощ ӯщлахтэ̄гыт, ювле миннэ лё̄ӈханылт та̄нти луваныл о̄с та те̄рияныл. Матрёна Никитична Посалтыт па̄вылт о̄лум интернат колт ханищтахтас. Юио̄выл тит класс Шеркалы па̄вылт а̄стлас. Та юипа̄лт 1955 та̄лт Ханты-Мансийск ӯсн ле̄ккарыг ханищтахтуӈкв минас. Хӯрум та̄л сыс фельдшерыг ханищтахтас. Ханищтахтаме юипа̄лт та̄ра Октябрьский па̄вылт о̄лнэ пӯльницан ле̄ккарыг рӯпитаӈкв те̄твес. Октябрьский пӯльницат хоса ат рӯпитас, тувыл тав э̄лаль Чемаши па̄вылн рӯпитаӈкв те̄твес. Чемаши па̄выл пӯльницат хӯрум та̄л рӯпитаме юипа̄лт Перегрёбный пӯльницан паттувес. Та па̄вылт ос хӯрумхой плов та̄л рӯпитас, тот о̄йкаӈыг е̄мтыс. Тэ̄н о̄йкатэ̄нтыл тит пыг ос акв а̄ги янмалтасы̄г. Пыгаге Владимир ос Петр ань сас а̄тимыг. А̄гитэ наме Лариса. Ань тав о̄парищ наме Головина. Ще̄мьяӈ та̄гыл Нягань ӯст о̄лы. Тав нэ̄ хо̄тпат ма̄гсыл маснут тыналан ла̄пкат о̄ньщи. Тэ̄н о̄йкатэ̄нтыл нила ня̄врам янмалтасы̄г. Яныг а̄гитэ наме Алёна. Алёна ос тэ̄нут тыналан ла̄пкат тыналахтын нэ̄г рӯпиты. Тав юипа̄л пыге наме Павел, ӯс янытыл интернет ва̄рнэ хӯмыг рӯпиты. Тит ма̄ньнув пыгаге Богдан ос Даниил школат ханищтахтэ̄г. Матрёна Никитична о̄матэ ёт ма̄ньщи ла̄тӈыл аквписыг потыртас. Ань хосаг ты е̄мтыс, хунь юио̄выл щёс тав ща̄нь ла̄тӈе̄тыл хотьют ёт потырта̄лыс. Хумус тав ла̄ви: «Нягань ӯст о̄лнэ ма̄ньщиянув ёт ма̄н торыӈ щирыл ат ва̄щинтахтыглэ̄в. Таима̄гсыл ла̄тӈув ла̄щал хотталь та со̄йми. Ань халувт ма̄ньщи ла̄тӈыл потыртан ма̄хум мощща хультыс. Хультум ма̄хманув щирыл хотмус ща̄нь ла̄тӈув э̄лаль ялтуптаӈкв э̄ри».

1075 2014.05.09. Валентина УЗЕЛЬ

Айнэ ут тыналан ма̄хум ма̄гыс са̄ккон. Ювле хультум э̄тпост са̄ккон хаснэ ма̄хум акванатхатыгласыт, та̄н заседанияныл о̄лыс. Ань та̄н сака мощща рӯпитасыт, акв щё̄стем сыс титхуйплов са̄ккон туп ловиньтасыт. О̄влэ̄т Думат рӯпитан ма̄хум янытлаве̄сыт. Округ янытыл МВД кӯщай В. Романица Дума кӯщаит пуссын янытласанэ, тувыл окружной суд кӯщай о̄с аквта хо̄тпат янытлас. Туп таи ёмас о̄лыс, Ассамблея кӯщаюв Е. Айпин та̄н халанылт о̄с янытлан нэ̄пакыл майвес. Ань йильпи са̄кконыт ат пирмайтаве̄сыт, хосат хансым са̄кконыт то̄ва ла̄тӈаныл мо̄т щирыл хассаныл, тувыл та. Ма̄нь ня̄врамыт ӯргалан са̄ккон урыл потыртаманыл порат Еремей Айпин ла̄выс, тот соссаӈ ня̄врамыт урыл Bad Credit Auto Loans Alberta Canada я̄нас вос хансаве. Во̄рт о̄лнэ ма̄хум та̄н ня̄враманыл ты ёмащакв ӯргалаӈкв э̄ре̄гыт. Та̄н а̄щанылща̄няныл во̄рт о̄лэ̄гыт, рущ ла̄тӈыл потыртаӈкв торыӈыщ ат ха̄сэ̄гыт, ва̄им са̄кконыт о̄с ат ва̄ганыл. Татьяна Моховикова «уполномоченный по правам ребенка» тамле яныг нам о̄ньщи, ня̄врамыт ӯргалым рӯпиты, тав ювле ла̄выс, соссаӈ ня̄врамыт ма̄гыс та̄н са̄ккон мощ мо̄т щирыл тах хансыяныл. Мо̄т ва̄рмаль урыл депутат ма̄хум халанылт мощ воритотсыт. Ты са̄ккон вина тыналан урыл хансым о̄лы. Ань э̄типа̄лаг нёлолов щё̄с юипа̄лт вина ла̄пкат ат тыналаве. Ос яныг ӯсытт са̄в ма̄нь ла̄пка о̄лы, тот кос хунь айнэ ут ёвтуӈкв ро̄ви. Та̄н нэ̄мхотьютн ат уральтавет. Ня̄врамыт хохса, сур пуссын ёвтуӈкв тот ве̄рме̄гыт. Ань мирн пе̄риим ма̄хум ты ва̄рмаль оснпаттысаныл ос тамле ла̄тыӈ са̄кконын хассыт – ма̄нь ла̄пкат вина тыналаӈкв ат ро̄ви, кос а̄лпыл, кос э̄типа̄лаг. Ты урыл прессконференцият потыртаманыл порат, Еремей Айпин тамле пе̄с ва̄рмаль номылматас, советский власть порат я̄ӈк вина сака лю̄льсаӈ лаппантым о̄лыс, пулпе тамле ма̄ньрищ. Сулья пӯнсаве те, лаппантуӈкв воссыг ат ве̄рмаве. Таима̄гыс хум хо̄тпат тох ла̄выгласыт, та̄н э̄лаль аюӈкв ат кос тахсыт, ос хоталь ва̄рхатэ̄гыт, сулья пӯссаныл, янытэ̄т аюӈкв э̄ри. Па̄лыг те о̄лы, ё̄рета мины, таима̄гыс ты пуссын айсаныл. То̄ва ма̄нь па̄влытт о̄лнэ ханты мир кӯщаитн ла̄выглэ̄гыт, та̄н палтаныл айнэ ут щар ул вос тыналаве. Тох о̄с ва̄руӈкв ат ро̄ви. То̄ват сака ае̄гыт, мо̄таныт мощ юв ӯрхатэ̄гыт, та̄нанылн манрыг лю̄ль ва̄руӈкв. Тамле ты йильпи ла̄тыӈ са̄кконанувн хасвес. Мо̄тыт э̄тпос та̄н о̄с тах атхатэ̄гыт, ос матыр э̄рнэ тэ̄лат тах пирмайтэ̄гыт.

1075 2014.05.09. Тамара МЕРОВА

По̄слум хуриянэ мирн суссылты. Мо̄лалнув Сургутский район Русскинская па̄вылн ялмум порат хо̄н ма̄т о̄лнэ хум ёт ва̄йхатасум. Тав наме Тодд Принц, хум Америка ма̄ныл о̄лы. Ань такви уре̄т Тодд таи ла̄выс: – Ам Нью-Йорк ӯст самын патсум. Ювле хультум лов арыгкем та̄л порат ам Москван минасум ос та ӯст та хультсум. Россия ма̄ ам акваг пӯмщалым о̄ньщислум, тувыл Нью-Йоркат са̄в рущ хо̄тпат о̄лэ̄гыт. Та̄н мощ мо̄таныт ос са̄в мирыт халт хащхатэ̄гыт. Акваг номсахтасум, манрыг тох. Таи ма̄гыс ам Европан сака ат тахсум, Россиян минуӈкве куссум. Амки ӯсумт о̄лмумт рущ хо̄тпат ёт о̄с румалахтасум. Та̄н та̄нки о̄лупсаныл о̄вылтыт са̄в потыртасыт. А̄нумн пуссын пӯмыщ о̄лыс, ос таи ма̄гыс амки матыра̄ти ка̄салаӈкве тахсум. Ты коныпал российский ма̄т о̄лыглам пе̄с накыт ос ловиньтан рущ нэ̄пакыт ва̄нэм ма̄гыс ханищтапын ялантасум. Ты потрыт а̄нумн сака мӯстысыт ос сымын хо̄ясыт. Москван ёхтумумт о̄влэ̄т журналистыг рӯпитасум ос на̄н экономикан урыл са̄всыр ля̄ххалыт хассум. Са̄всыр ӯсытытн манос па̄влытытн ялсум, а̄нумн ва̄та̄л са̄всыр пӯмыщ ва̄рмалит ка̄сала̄лсанум ос хурин по̄слысанум. Мо̄лалнув финансовый институтт рӯпитаӈкве патсум, пе̄с рӯпатам о̄с ат ёрувлылум. Лӯи ма̄н са̄лыӈ ма̄хум ялпыӈ хо̄таланыл сунсуӈкве хӯрмиттыг ёхтысум. Ёрн ма̄хум ос хантыт палт мӯйлысум. Та̄н о̄лнэ во̄р коланылн тотыглаве̄сум, йис о̄лупсаныл та̄рапаттыслум. Тамле накыт тувыл ам хоса номиянум. Амки о̄лнэ ма̄мт ма̄хум Россия урыл мощща ва̄гыт. Ань таима̄гыс «фейсбук» нампа ищхӣпыӈ утыт ам я̄нас ло̄пс ва̄рсум ос тот то̄ва по̄слум хуриянум суссылтыянум. Юртанум, рӯтанум та̄нки матыр тот ка̄салэ̄гыт. То̄внакт по̄слум хуриянум урыл китыглавем, ам ла̄тыӈ ювле хансэ̄гум. Моще̄ртын о̄с акв ло̄пс щё̄питаӈкве номсэ̄гум. Са̄всыр ӯсытт манос па̄влытт о̄лнэ э̄лумхо̄ласыт по̄слыянум ос маныр та̄н ва̄ре̄гыт, хо̄т рӯпитэ̄гыт, китыглыянум ос хури ёлыпа̄лт хансыянум. Ты э̄лыпа̄лт ам китхӯрум хури тох ва̄рыгласум, юртанумн сака мӯстыс ос та̄н э̄лаль пӯмщалахтуӈкве патсыт. Тох ва̄рнэм сыс, сакати, амки ма̄мт о̄лнэ ма̄хум Россия мир ёт мощ ва̄йхатэ̄гыт, та̄н о̄лупсаныл та̄рапаттыяныл. Тамле ля̄ххал а̄нумн Тодд потыртас, ме̄н ань ищхӣпыӈ ут хосыт рӯмаӈыг о̄лыме̄н. Ань тав Русскинская па̄вылт по̄слум хуриянэ суссылтаӈкве тув щё̄питыянэ.

1076 2014.05.23. Людмила ТЕТКИНА

Кол ёвтнэ урыл ля̄ххал. Ты та̄лныл округувт «Накопительная ипотека» нампа йильпи ва̄рмаль рӯпитаӈкве о̄вылтахтас. Евгений Чепель, Ипотечный агентства колт кӯщай, ос Владимир Вешняков, Ханты-Мансийский банкыт рӯпитан хум, ты тэ̄ла урыл потыртасы̄г. Программа хумус рӯпитаӈкве паты ос ма̄хумн хумус тах нё̄ты ты урыл Евгений Чепель ла̄тыӈ ла̄выс. Кол ат о̄щнэ хо̄тпат о̄влэ̄т Ипотечный агентстват очередин хасхатнэ̄ныл ма̄гыс э̄рнэ нэ̄паканыл тотыяныл. Ос ты юипа̄лт ты ма̄хум Ханты-Мансийский банкыт ос агентства ёт соглашениенэ̄пак хансэ̄гыт. Тувыл ка̄сыӈ э̄тпос хо̄т со̄тыра 250 солко̄ви тув пинуӈкве о̄вылтахтэ̄гыт. Са̄в олн ке сэ̄лэ̄гыт, тыгыл са̄внув олн тув ке̄тэ̄гыт. Кол ёвтнэ хо̄тпат тох 1-6 та̄лыт сыс олн акванатуӈкве ве̄рме̄гыт. Ипотечный агентстван нэ̄паканэ тотыяныл, ос ты банкыт олн акванатуӈкве ке патэ̄гыт, ка̄сыӈ э̄тпос округ бюджетныл акв ще̄мья банкын 12 со̄тыра 500 солко̄вил ке̄таве. Акв ще̄мья округ бюджетныл 450 со̄тыра солко̄вил миӈкве ве̄рмаве. Владимир Вешняков ла̄выс: «Э̄лумхо̄лас акванатнэ олнанэ̄тыл ос округ бюджетныл ке̄тнэ нё̄тмилыл (ты 900 со̄тыра солко̄ви) кол ёвтуӈкве ат ве̄рми. Тыи ма̄гсыл та̄н ма̄н палтув ипотекаолн виӈкве ве̄рме̄гыт ос 15-30 та̄лыт сыс ювле ойтхатуӈкве». Ты та̄л хӯрум э̄тпос сыс Ипотечный агентстван 150 э̄лумхо̄лас та̄нки нэ̄паканыл тотсаныл, та̄н халанылт 91 ще̄мья тув хасвес. Та̄н олн тох акванатуӈкве ань о̄вылтахтасыт. Евгений Чепель ла̄выс, ма̄ньлат ще̄мьят, соссаӈ ма̄хум, балокыт о̄лнэ хо̄тпат ос кол ат о̄щнэ ще̄мьят пуссын тув хасхатуӈкве ве̄рме̄гыт. Ты программа 2020 та̄л мус рӯпитаӈкве паты. Кит со̄тыра арыгкем ще̄мья кол ёвтнэ̄ныл ма̄гсыл олныл ты щирыл тах нё̄тавет. Ма̄хум ос китыглахтасыт, ты олныт акванатуӈкве мо̄т банкыт ро̄ви ман а̄ти. Евгений Чепель ос ювле ла̄выс: «Ма̄н ань мо̄т банкыт ёт потыртахтэ̄в тах, ань ты программа хосыт Ханты-Мансийский банк рӯпитаӈкве ка̄сащас. Тыи ма̄гсыл ань туп ты банкыт олн атуӈкве ро̄ви». О̄с акв ва̄рмаль урыл кӯщай хум ла̄выс, ань йильпи са̄ккон щирыл атхойплов та̄л арыгкем округувт о̄лнэ ще̄мьят туп та̄н бюджет олныл нё̄тавет. Мо̄т ма̄ныл ёхтум ос округувт мощща та̄л о̄лнэ ма̄хум ты программан ат хансавет.

1076 2014.05.23. Людмила ТЕТКИНА

Ӯс по̄хат ма̄нь ӯльпат ӯнттуве̄сыт. Во̄р ӯргалан ма̄хум ка̄сыӈ та̄л я̄ӈк на̄тнэ э̄тпос 17 хо̄талэ̄т йӣвыт ӯнттэ̄гыт ос ты э̄рнэ тэ̄ла ва̄руӈкве ма̄хум во̄выглэ̄гыт. Тамле рӯпата таи ма̄гсыл ва̄рыглаве, ма̄хум во̄р вос ӯргалэ̄гыт, ма̄вит урыл ул вос ёрувлэ̄гыт. Рущ ла̄тӈыл ты хо̄тал «Всемирный день древонасаждения» намаим о̄лы. Тамле тэ̄ла округ янытыл ка̄сыӈ та̄л ва̄рыглаве. Ты та̄л та хо̄талт кит со̄тыра 500 арыгкем э̄лумхо̄лас 33 со̄тыра арыгкем са̄всыр йӣвыт ӯнттысыт. Ханты-Мансийск ӯст ты акция нилыт та̄л о̄лыс. Ӯс ма̄хум пуссын Байбалак я̄ ляпат о̄лнэ ӯщлахтан ма̄н во̄виньта̄лве̄сыт. Ты та̄л тув 300 э̄лумхо̄лас ульпа йӣвыт ӯнттуӈкве ёхталасыт. А̄тхатам ма̄хум нупыл о̄влэ̄т Мария Кузьминична Волдина, ханты э̄ква, потыртас. Тав ла̄выс, соссаӈ ма̄хум пе̄с та̄гыл во̄р ӯргалэ̄гыт. Во̄р урыл та̄н са̄всыр мо̄йтыт, потрыт ос а̄мщит о̄ньще̄гыт. Потыртаме юипа̄лт тав «Ёшак най» нампа ансамбле ёт э̄ргыс ос йӣквыс. «Лылыӈ со̄юм» нампа студиян ялантан ня̄врамыт ма̄хум э̄лыпа̄лт ма̄ньщи, ханты йӣквыт йӣквсыт. Йӣвыт ӯнттуӈкве кӯщаит о̄с ёхталасыт. Ма̄хум нупыл Пётр Захаров, Ханты-Мансийский район миркол кӯщай хум, потыртас. Тав ла̄выс: «Ма̄н во̄р ӯнттым яныг тэ̄ла ва̄ре̄в, ма̄вит ӯргалэ̄в. Тамле хо̄талыт на̄н тыг матъёмас ёхтысын, ма̄н пуссын аквъёт са̄в йӣвыт тах ӯнттэ̄в». Ӯльпа ӯнттын хо̄талт на̄й ха̄рыгтан машинат тот суссылтаве̄сыт, ня̄врамыт ты утыл сака пӯмщалахтасыт. Тамле суссылтап ос таи ма̄гсыл ва̄рыглаве, ма̄хум во̄рн ялантым а̄ращ ёмащакв лап вос ха̄рыгтэ̄гыт ос во̄рт порс мо̄ри ул вос па̄хвтэ̄гыт. Я̄ӈк на̄тнэ э̄тпост Сургутский ос Советский районыгт во̄р но̄хпе̄ламла̄лыс, ань лапхарыгтавес. Во̄р ӯргалан хо̄тпат йӣвыт ӯнттуӈкве хосат тагыл щё̄питахтасыт. Байбалак я̄ ляпат ма̄ хилсыт ос кит хӯрум та̄л яныт хӯрумса̄т ӯльпат ос мо̄т йӣвыт тув тотсыт. МЧСыт, ЮТЭКыт, студентыт, во̄р ӯргалан ма̄хум, ля̄ххал тотнэ хо̄тпат пуссын аквъёт тот йӣвыт ӯнттысыт. То̄ва ма̄хум ще̄мьяӈ та̄гыл тув ёхталасыт. Ма̄н ма̄ньщи ос ханты редакциявт рӯпитан ма̄хум о̄с тув ялсӯв, ӯльпат ӯнттысӯв. Округ 22 районытт ос ӯсытт ма̄хум йӣвыт ӯнттысыт. Тамле рӯпата природный ресурс департамент ва̄рыглы ос ма̄хум тув во̄выглы. Тот рӯпитан ма̄хум ла̄внэ̄ныл щирыл ты ӯнттум йӣвыт нас тох ат о̄сувлавет акваг ӯральтавет. 10-15 та̄л сыс ты ӯльпат яныг йӣвыл е̄мтэ̄гыт.

1076 2014.05.23. Николай МЕРОВ

Яныгпа̄ла хо̄тпанув нё̄тавет. Я̄ӈк натнэ э̄тпост Победа хо̄тал кастыл мирн нё̄тмил ва̄рнэ департамент кӯщай Мария Краско ля̄ххал тотнэ ма̄хум акванатыгласанэ. Ань ветеран хо̄тпат ос хотьют хо̄нтлын накт рӯпитас, та̄н манхурип нё̄тмилыл ва̄равет, тав потыртас. Округувт ань хо̄т со̄тыра ветеран хо̄тпа о̄лы. Та̄н халанылт 441 э̄лумхо̄лас а̄гмыӈмосыӈ хо̄тпа ос хо̄нтлум ма̄хум; 5 со̄тыра 288 яныг хо̄нт порат са̄всыр та̄рвитыӈ рӯпата ва̄рум хо̄тпат; 80 – Ленинград ӯс блокадат о̄лум ма̄хум; 191 – тӯрманколт фашистытн са̄ватым хо̄тпат. Ты коныпал тот порсум хо̄тпат та̄н э̄кваныл ос яныг хо̄нт порат яныгмам ня̄врамыт ань ос пуссын нё̄тавет. Ты ма̄хум 9 май хо̄тал кастыл о̄с олныл ойтве̄сыт. Кӯщай нэ̄ ла̄выс: «Ма̄н мир пусмалтан департамент ёт акванпотыртахтым рӯпитэ̄в. Ты хосыт ветеран хо̄тпат пусмалтахтуӈкве ва̄тихал ке̄тыглыянӯв. Яныгпа̄ла хо̄тпанув са̄внув та̄л вос о̄лсыт, ма̄н яныг рӯпата ва̄ре̄в». Хо̄нтлум ма̄хум янытлан ма̄гыс округ бюджетныл 26 миллион солко̄ви та̄стыглавес. Ка̄сыӈ хо̄тпа премияолныл майвес. О̄с акв ва̄рмаль урыл потыр о̄лыс. Ань ты хо̄тал мус 30 ветеран хо̄тпа йильпи кол иӈ ат о̄ньще̄гыт. Ты ветеранытныл китхуйплов э̄лумхо̄лас ма̄гыс ань федеральный бюджетныл олн майвес. Ты та̄л оигпан мус та̄н колыл ёвтавет тах. Та сыс, иӈ нёлоловхуйплов хо̄тпа кол та̄л о̄лы. Та̄л холнэ мус пуссын колыл вос минувет. Тувыл ос ань округувт 79 ветераныт рӯт та̄л хультсыт. Ты хо̄тпат ма̄гсыл округувт я̄нас колыт ӯнттуве̄сыт. Та̄н тот о̄лэ̄гыт, ле̄ккарытн акваг уральтавет.

1076 2014.05.23. Николай МЕРОВ

Но̄хпатум хо̄тал янытлавес. Я̄ӈк на̄тнэ э̄тпос онтоловит хо̄талт Ханты-Мансийск ӯс кант Победа хо̄тал кастыл яныг парад щё̄пита̄лвес. Яныг хо̄нт оигпам па̄сныл ань 69 та̄лыг то̄влыс. Ялпыӈ хо̄тал о̄лум порат сака во̄тыс ос ащирмаӈ о̄лыс. Ос ты а̄ти, ӯс канын са̄в мир ёхталас. Ветеран хо̄тпат рӯтаныл ёт ёхталасыт. Ма̄хманув хумус мӯйлысыт, на̄н ты урыл э̄лаль ловиньтэ̄н. Ялпыӈ хо̄тал лов щё̄ст о̄вылтахтас. Мир э̄лыпалт о̄влэ̄т округ губернатор Наталья Комарова потыртас. Тав ла̄выс: «Ты хо̄тал мир ма̄гыс ща̄гтнэ хо̄тал. Ка̄сыӈ ще̄мьят ма̄хум ёмщакв мӯйлэ̄гыт. Ма̄н э̄лаль ёмщакв о̄лнэ̄в ма̄гыс ма̄хманув ты хо̄нтлысыт. Ты ялпыӈ хо̄талн атхатыгланэ̄в порат ма̄н о̄панув, ащо̄йканув ос рӯт ма̄хманув хоты ма̄т хо̄нтлысыт, акваг номылматыгла̄лэ̄в. Ам хо̄нтлын ма̄ныл ке̄тыглам пищма са̄в ловиньтасум. Владимир Манин Самарово па̄вылныл о̄лыс. Тав тох хансыс: «Ам ва̄тихал по̄слым хури сунсылум, тот э̄квам, а̄гим ос ам, ма̄н пуссын аквъёт лю̄ле̄в. Ты хурим акваг ёт о̄ньщилум, аквтупмат ма̄н аквъёт фашистыт ёт хо̄нтлэ̄в. Ты хури а̄нум сака ӯргалытэ, таима̄гыс иӈ пуста̄гыл о̄лэ̄гум». Мир пуссын ва̄ганыл, ма̄н са̄лтатанув ма̄ янытэ̄т фашистытныл хотсыстамтасаныл. Россият о̄лнэ ветераныт но̄хпатнэ ма̄гыс ма̄к та̄н са̄в ё̄р пинсыт. Таима̄гыс ты ялпыӈ хо̄талт ам хо̄нтлам хо̄тпат пуссын сымыӈыщ янытлыянум. Победа хо̄талыл на̄нан, тыныӈ ма̄хумаквет! » Тав юипалэ̄т ос Ханты-Мансийск ӯс кӯщай Василий Филипенко потыртас. Тав ла̄выс: «Ты ялпыӈ хо̄талт ветерананув янытлан кастыл ща̄гтым мӯйлэ̄в. Ма̄н хо̄нтлум хо̄тпанув сака э̄руптыянӯв. Ты посыӈ хо̄тал кастыл та̄н та̄нкина̄ныл са̄литта̄л хо̄нтлысыт. Ма̄в вуянтан ма̄гыс са̄в хо̄тпа порславес. Ты хо̄тпат пуссын номиянӯв. Ань мир ёмщакв о̄лнэ ма̄гыс та̄н са̄в ё̄р пинсыт, ма̄в вуянтасаныл. Ам ос Ханты-Мансийск ӯст о̄лнэ мир, пуссын ветераныт Победа хо̄талыл янытлыянӯв. Яныг пӯмащипа на̄нан ла̄ве̄в. Рӯтанын ёмщакв вос ӯргалаве̄н, пуста̄гыл э̄лаль о̄лэ̄н». Тувыл ос Виктор Яковлевич Башмаков, Ханты-Мансийск ӯст о̄лнэ ветеран хо̄тпа, мир нупыл потыртас. Тав 1924 та̄лт Ханты-Мансийский район Реполово па̄вылт самын патыс. Хо̄нтлын нак е̄мтыс, тав то̄нт нёлохуйплов та̄лэ иӈ ат то̄влыс. Таима̄гыс рӯпитаӈкве ке̄твес. Колхозт тракторыл рупитым яласас. То̄нт ка̄сыӈ пыг моляхнуве̄г фронтын минуӈкве таӈхыс. Ётылнув та̄ланэ то̄влысыт, та̄ра хо̄нтлын ма̄н тотвес. Та порат ма̄н са̄лтатанув фашистыт ёт та̄кыщ хонтлуӈкве патсыт, акваг ювле ня̄влуӈкве патсаныл. Война э̄лыпа̄лт Виктор Яковлевич па̄выл школат нёлолов класс а̄стлас. Таима̄гыс хо̄нт оигпам э̄лыпа̄лт тав ханищтахтын ма̄н ке̄туӈкве е̄мталавес, ос тав ат ка̄сащас, э̄лаль хо̄нтлуӈкве хультыс. Берлин ӯс мус мощща ве̄рыста хультсас кос, ос о̄йка тув мус тох аты ёхталас. Акв хотты хо̄нтлын ма̄т сакватыма хо̄нтвес ос пӯльницан тотвес. Во̄ртыпал ка̄тэ снарядын та̄кыщ сакватавес, ле̄ккарытн хотвуйвес. Ань тав та па̄сныл туп акв ка̄тыл о̄лы. Хо̄нтлын нак оигпас, Виктор Яковлевич юв ёхтыс. Ё̄рыг о̄лнэ ма̄гыс тав ка̄сыӈ хо̄тал та̄кмалтахтуӈкве патыс. Товтыл касыс ос нас ха̄йтыс. Каснэ ва̄рмалитн акваг во̄виньта̄лаве, са̄в щёс но̄хпатыглас. Тав Ханты-Мансийск ӯс «Почётный гражданин» намыл майвес. Тыт о̄лнэ мирн тав ёмащакв ва̄ве ос янытлаве. Война юипа̄лт тав са̄в та̄л судколт лю̄ль нак ва̄рнэ хо̄тпат сутытым рӯпитас. Ты та̄л ма̄нь таквс э̄тпос 17 хо̄талт тав 90 та̄лэ то̄влы. Яныгпа̄ла хо̄тпакве пуста̄гыл э̄лаль вос о̄лы. Ма̄н таве̄ныл сака янытлахтэ̄в. Потрыт а̄стысыт, ма̄хум акв кум астал лю̄льсыт, порсум мир номылматыгласаныл. Тувыл ос полицият, МЧСт, ма̄ньлат курсантыт ос военный хо̄тпат акв юипа̄лт ряд щирыл нё̄тнэ̄г ё̄мсыт. Ӯс кан хосыт кит хо̄нтлын машинаг минасы̄г. Та юипа̄лт пуссын ма̄хум а̄хвтасыӈ па̄рт тармыл хорамыӈ лӯптат пинсыт. Ты ялпыӈ хо̄талт ӯс кант мир хо̄нтлын писалит сунсыглаӈкве ве̄рмысыт. Тувыл ма̄хум хо̄нтлын нак порат э̄ргыглам э̄ргыт э̄ргысыт, ка̄сащан ма̄хум каша пут а̄рталасыт ос исум ща̄й айсыт. Тот ре̄г ма̄гыс я̄ӈк вина ломт мощ пинумта̄лвес. Я̄тил, ветеранхо̄тпат, На̄й–О̄тыранын вос ӯргалаве̄н. Са̄в та̄л пуста̄гыл э̄лаль о̄лэ̄н.

1076 2014.05.23. Людмила ТЕТКИНА

Туи порат сака ре̄гыӈ паты. Александр Тиртока округувт МЧС яныг кӯщай хумыг олы. Яныг вит ёхты ман а̄ти ос туи во̄рыӈ ма̄ на̄йн тэ̄ве ман а̄ти, тав ёмащакв ва̄гтэ. Александр Александрович ла̄вме щирыл, округувт Нижневартовский, Нефтеюганский, Кондинский, Октябрьский, Белоярский, Ханты-Мансийский ос Ха̄льӯс районытт 26 па̄влытт яныг вит ва̄руӈкве ве̄рми. Тот акв со̄тыра 894 кол витын а̄мараӈкве ве̄рмавет. Та колытт 9 со̄тыра 194 э̄лумхо̄лас о̄лы. Яныг вит ке ва̄ри, ты ма̄хум пуссын мо̄т ма̄н ва̄нтлуӈкве нё̄тавет. Ты кастыл округ янытыл о̄лнэ колыт щё̄питаве̄сыт, рущ ла̄тӈыл ла̄вавет – «пункты временного размещения». Александр Александрович ла̄вме щирыл, ты та̄л яӈк на̄тнэ э̄тпос оигпанэ̄тэ ос лӯпта э̄тпос о̄вылтахтанэ̄тэ порат яныг вит ёхтуӈкве ве̄рми. Ань МЧСт рӯпитан ма̄хум ты кастыл мӯсхалыг щё̄питахтасыт, округувт о̄лнэ ма̄хум ул вос пилэ̄гыт. Кӯщай хум во̄р ӯргалан ва̄рмаль урыл таи потыртас. Ты та̄л туи порат сака ре̄гыӈ паты, тыи ма̄гсыл округувт сака са̄в во̄р на̄ин тах тэ̄ве. Во̄р Белоярский ос Ха̄льӯс районыгт янгыщ тот ты на̄ин ё̄саве. Кондинский, Ханты-Мансийский ос Сургутский районытт тарыг яныгман во̄р но̄хпе̄ламлаӈкве ве̄рмаве. Ань МЧСыт 12 со̄тыра 500 на̄й ха̄рыгтан хо̄тпа рӯпиты. Та̄н акв со̄тыра 300 са̄всыр техника о̄ньще̄гыт, на̄й лапхарыгтаӈкве ве̄рме̄гыт. На̄й са̄в лю̄ль ул вос ва̄ри, МЧСт рӯпитан хо̄тпат округувт о̄лнэ мир ёт рӯпитаӈкве ань о̄вылтахтасыт. Ма̄хум потыртавет, во̄рн яласанэ̄ныл а̄ращаныл ёмащакв лап вос харыгтыяныл ос хохса тот мори ул вос па̄хвтэ̄гыт.

1076 2014.05.23. Тамара МЕРОВА

Ня̄врамыт пе̄с о̄лупса вос ва̄гыт. Соссаӈ ня̄врамыт ёт рӯпитан хо̄тпат ма̄гыс Ханты-Мансийскат ханищтап ва̄рыглавес. Тамле ва̄рмаль региональный образование институтт рӯпитан ма̄хум щё̄пита̄лсыт. Ос рущ щирыл тав «Новые подходы к реализации проекта «Погружение в этническую среду» намаим о̄лыс. Губернатор ва̄ӈын хумн нё̄тмил ва̄рнэ нэ̄ Людмила Алфёрова о̄влэ̄т акванатхатыглам ма̄хум ёт пащалахтас ос та̄н ва̄рнэ рӯпатаныл янытласанэ. Тав юипа̄лэ̄т Ирина Лисютина, округ янытыл соссаӈ ма̄хум образованияныл ос ма̄ньлат хо̄тпат тэ̄ланыл ёт рӯпитан нэ̄, ты проект щё̄питан ос ва̄рнэ рӯпатаныл урыл потыртас. Тувыл Сургутский район Угут ос Русскинская па̄влыг школагт соссаӈ ма̄хум ня̄врамыт ёт хумус рӯпитэ̄гыт, манхурип пӯмащ тэ̄лат та̄н ва̄рыгласыт, ты о̄вылтыт потыртасыт. Кит хо̄тал сыс ёхталам ма̄хум ӯст о̄лнэ музеитын тотыглаве̄сыт. Тот «Торум маа» музейт ос Г. С. Райшев тав мастерскойколэ̄т, соссаӈ ма̄хум о̄лупсаныл ос пе̄с наканыл суссылтаве̄сыт. Тувыл «Лылыӈ союм» этноцентрын ялсыт, тот ма̄ньщи ос ханты культура, ла̄тыӈ ханищтан ня̄врамыт ёт потыртасыт. Ты ма̄хум та̄нки халанылт акваннё̄тхатым э̄лаль рӯпитаӈкве ла̄вхатсыт. На̄н матыр тэ̄лат пӯмщалаӈкве ос та̄рапаттуӈкве таӈхегы̄н ке, ищхӣпыӈ ут хосыт ugutschool. ru манос russhooli. ru ло̄псыт са̄всыр потрыт, ля̄ххалыт ос хурит хо̄нтуӈкве ве̄рмегы̄н.

1076 2014.05.23. Тамара МЕРОВА

Кӯщаит мир ёт са̄внув вос рӯпитэ̄гыт. Округ Общественный палатат рӯпитан кӯщаит акванатхатыгласыт ос та̄нки ва̄рнэ тэ̄ланыл о̄вылтыт потыртасыт. Любовь Чистова, Общественный палатат кӯщаиг о̄лнэ нэ̄, ла̄выс, ань та̄н щиранылт са̄всыр департаментыт манос службат акв тамле 30 общественный советыт ва̄рве̄сыт ос тув 265 э̄лумхо̄лас рӯпитаӈкве пе̄рияве̄сыт. Ань ты щё̄питан ва̄рмалит па̄сыл кит та̄лыг ты е̄мтыс, туп то̄ват торыӈыщ аты рӯпитасыт. То̄ва ма̄т сапра̄ни ва̄рнэ ма̄гыс ма̄хум о̄выл щёс акванатыглаве̄сыт, тот совет тармыл кӯщай хо̄тпа пе̄риясыт ос тувыл рӯпатаныл та оигпас. Тот рӯпитан ма̄хум та̄рвитыӈ тэ̄лат ёмщакв ва̄рнэ ос та̄нанылн нё̄тнэ ма̄гыс ва̄рве̄сыт кос. Советыт та̄рвит ва̄рмалит ёмащакв та̄рапаттуӈкве вос нё̄тэ̄гыт ос ётыл са̄кконыт мӯсхалыг хаснэ̄ныл ма̄гыс ма̄к ла̄тыӈ хӯлтуӈкве вос ве̄рмысыт. Тамле тэ̄лат совет тармыл рӯпитан хо̄тпат акваг уральтым вос о̄ньщияныл. Тувыл та̄н Правительство кӯщаитн э̄лаль ла̄тыӈ вос тотэ̄гыт. Ты кӯщаит са̄всыр ва̄рмалит та̄рапаттым порат са̄кконыт о̄с торгамтым щё̄питаӈкве патыяныл. Губернатор ва̄ӈыг хум Андрей Филатов ты о̄вылтыт ла̄выс, советын пе̄риян хо̄тпат округ ма̄хумн нё̄тнэ ма̄гыс ве̄щкатыг вос рӯпитэ̄гыт. Ма̄хум хӯлтыглан ла̄тӈанылн о̄с вос хӯнтамлэ̄гыт. Та щирыл акваннё̄тхатым та̄н пуссын рӯпатаныл ёмащакв ос ма̄кыг ва̄рияныл. Общественный ос внешний связь департаментыт кӯщаиг о̄лнэ хум Илья Верховский потыртас: «Советыт пуӈктотнэ хо̄тпат ос та̄нанылн нё̄тмил ва̄рнэ хо̄тпат та̄нки са̄кконыт, экономика ля̄ххалыт пуссын ёмщаквег о̄с вос ва̄ганыл. Тэ̄лат урыл хо̄та̄ти номтыӈыг потыртаӈкве вос ха̄ссыт. Тувыл вос ва̄гыт, ты рӯпатаныл урыл та̄н мо̄т кӯщаитн уральтаӈкве ос китыглаӈкве ве̄рмавет. Тамле уральтан накыт кастыл общественный советыт рӯпитаӈкве ка̄саще̄гыт ке, вос э̄лаль рӯпитым хультэ̄гыт. Тувыл ма̄хум та̄нанылн агтуӈкв патэ̄гыт, та̄нки тэ̄ланыл ма̄гыс та̄н палтаныл ля̄льт сымыӈыщ ювыт. Ос ёмас тэ̄лат ва̄рнэ̄ныл ма̄гыс янытлаӈкве патавет». Ирина Астапенко, гражданский служба ос кадровый политика тэ̄лат ва̄ӈын кӯщай нэ̄, са̄всыр ханищтапыт о̄вылтыт потыртас. Кӯщаиг воратан хо̄тпат ма̄хум ёт номтыӈыщ ос сымыӈыщ рӯпитан ма̄гыс ханищтаӈкве э̄ре̄гыт. Таима̄гыс та̄н сыресыр касылыл ос ханищтапыл щё̄питавет, таит юипа̄лт экзаменыл ва̄равет. ЖКХат ос энергетика рӯпитан колыт общественный совет мо̄лты та̄лт ва̄рсыт. Тот хо̄т хо̄тпат акванатхатыглэ̄гыт ос маныр та̄рвит тэ̄лат ёмщаквег ва̄рнэ щирыл аквъёт номсахтэ̄гыт. Ты о̄вылтыт ла̄тыӈ Виктор Нанака ла̄выс, ты колт кӯщаиг о̄лы. Та̄н Общественный советаныл та̄л сыс 9 сапра̄ни ва̄рыглас ос са̄кконыт щё̄питан порат э̄рнэ торыг та̄н ла̄тыӈ ва̄рсыт.

1076 2014.05.23. Александр ВЬЮТКИН

Ма̄ньлат ма̄хум ханищтан тэ̄ла. Округ мирколт соссаӈ мир ёт рӯпитан Ассамблея колт ма̄нти ща̄нь ла̄тӈанув э̄лаль тотнэ щирыл сапра̄ни о̄лыс. Тот о̄лум кӯщаянув ос ма̄хманув халт щар янгыг Наталья Западнова ос Татьяна Гоголева о̄лсы̄г. Пуссын аквъёт налыман нупыл атахтем хо̄тпа тув атхатыглас. Тот ща̄нь ла̄тӈагув э̄лаль тотнэ урыл, тэ̄н ул вос ёрувлахтэ̄г ос ма̄ньлат ма̄хум ханищтан ва̄рмаль урыл потрув о̄лыс. О̄влэ̄т Татьяна Степановна ма̄ньщи ос ханты ня̄врамыт урыл такви щё̄питам докладпотре ловиньтастэ. Тав юипа̄лэ̄т округ янытыл ханищтап щирыл рӯпитан Департамент ва̄ӈын кӯщаиг о̄лнэ нэ̄ Валерия Кугаевская потыртас. Валерия Александровна округ янытыл э̄лаль ханищтахтын соссаӈ ма̄ньлат ма̄хум урыл докладэ о̄лыс: «Округувт онтоловхойплов ханты ос ма̄ньщи ня̄врам рӯпатаныл пе̄риян щирыл ханищтахтэ̄гыт. Пуссын аквъёт 919 соссаӈ ма̄хум халт 226 ня̄врам высший образование щирыл рӯпитаӈкв таӈхе̄гыт. Мо̄таныт ос мо̄т са̄всыр рӯпата щирыл ханищтавет. Са̄выӈпа̄лэ соссаӈ ма̄ньлат хо̄тпат Ханты-Мансийск ӯст ханищтахтэ̄гыт. Мо̄лты йильпи са̄ккон хасвес. Ань онтолов класс а̄стлын ня̄врам аттестатт хансым оценканэ щирыл колледжит ханищтахтуӈкв ве̄рми. Таве̄н ЕГЭ экзамен тот ат э̄рмыглы. Ты та̄л таи ма̄гсыл са̄в ня̄врам онтолов класс юипа̄лт пе̄риян рӯпата щирыл э̄лаль ханищтахтуӈкв номсэ̄гыт. Тыи ма̄гыс а̄гитытнпыгытн колледжин э̄рнэ нэ̄паканыл та̄нтина̄нылн атуӈкв э̄ре̄гыт».

1076 2014.05.23. Тамара МЕРОВА

ЕГЭ урыл потыртасыт. Лилия Максимова ханищтап ос ма̄ньлат ма̄хум тэ̄лат округ департаментыт кӯщай ва̄ӈыг нэ̄г рӯпиты. Мо̄лалнув тав ЕГЭ ва̄рмалит школат хумус минэ̄гыт, та о̄вылтыт мирн потыртас. Ты та̄л округ янытыл 11 со̄тыра арыгкем а̄гитпыгыт школа а̄стланэ̄ныл щирыл ловиньтахтэ̄гыт. Та̄наныл уральтан ос экзаменыт минэ ма̄гыс округт 124 ханищтан колыт сыресыр ищхӣпыӈ утыл ва̄рве̄сыт. Тувыл 974 экзамен пирмайтан колнаканыл пуссын кит видеокамера о̄ньще̄гыт. Ня̄врамыт тот по̄х ма̄ныл нэ̄матыр ул вос ловиньтэ̄гыт, та̄н э̄лыпа̄лныл ос сыспа̄лныл уральтаӈкве патавет. Ты коныпал то̄ва ща̄ньа̄щит ня̄врамыт нас уральта̄лыглаӈкве во̄вавет. Экзамен минэ порат а̄гитпыгыт колнакн паспортаныл щирыл та̄ртавет, ос ёт туп гелевый хаснэйӣв, линейка, транспортир вос выгыт. То̄ва экзаменыт калькуляторыт э̄рмыглэ̄гыт ке, ня̄врамыт тах ла̄вавет. Тувыл а̄гмыӈ ня̄врамыт тэ̄рпияныл ёт тотуӈкве ве̄рмияныл. Лилия Владимировна ща̄нитна̄щитн ла̄выс: «На̄нан ос ня̄враманын тамле экзамен порат пилуӈкве щар ат э̄ри. Тот ня̄врамыт школат аквхуйплов та̄л сыс ханищтан номтаныл уральтавет. Та̄н щар нэ̄матыр ловиньтатта̄л, ханищтатта̄л хунь о̄лэ̄гыт. Урокыт порат та̄н са̄всыр контрольный рӯпатат хансэ̄гыт ос оценкал пинавет. Та̄н туп сытмыл нэ̄пакныл манос мо̄т ищхӣпыӈ утныл ул вос хассыт. Комиссиян хо̄нтавет ке, экзаменыл сысы ня̄влавет ос ты та̄л воссыг тув ат та̄ртавет, мо̄тыт та̄лн хультуптавет. Та щирыл ты та̄лт нэ̄мхотталь э̄лаль ханищтахтуӈкве ат вивет». Школа а̄стлам ка̄сыӈ ня̄врамн ЕГЭ щирыл рущ ла̄тыӈ ос математика хансуӈкве э̄ри. Рособрнадзор ма̄т рӯпитан ма̄хум таи хӯлтэ̄гыт, рущ ла̄тыӈ экзамен ёмщакв минэ ма̄гыс 36 балл ловиньтахты, математика ма̄гыс 24 балл. Хо̄тпа тыгыл мощща балл о̄ньщи ке, тав экзаменэ лю̄лиг ловиньтаве ос мо̄тыт щёс сдавайтаӈкве ла̄ваве. Ты экзаменыг коныпал ЕГЭ щирыл ня̄врамыт мо̄т урокыт та̄нки пе̄рие̄гыт. Ты та̄л са̄выӈпа̄лэ а̄гирищитпыгрищит обществознание экзаменын минэ̄гыт, мо̄таныт физикан. Ня̄врамыт э̄лаль хоталь ханищтахтуӈкве минэ̄гыт, тув э̄рмыглан урок та пе̄рие̄гыт. Тувыл та оценканыл щирыл хотты университетн манос институтн вивет ке, экзаменыл тот ат ва̄равет. Ты кастыл тай ЕГЭ хансуӈкве ёмасыг о̄лы. Са̄ртын май университетт манос институтт э̄лаль ханищтахтын ма̄гыс экзамен о̄с я̄нас хассыт. Ань туп нэ̄пакыт акванатуӈкве э̄ри ос аквкит ма̄н ке̄туӈкве ро̄ви, тувыл ювлела̄внэ ла̄тыӈ ӯруӈкве э̄ри.

1076 2014.05.23. Тамара МЕРОВА

Кит районыгныл ке̄тым ля̄ххалыг. Хо̄нтаӈ район кӯщай хум Алексей Поздеев Супра ма̄нь па̄выл уральтаӈкве ялыс ос тот о̄лнэ ма̄хум тэ̄ланыл та̄рапаттыс. Ань ты па̄вылквет туп лов арыгкем хо̄тпа о̄лы ос та̄н Мулымъя мирколн ловиньтавет. Алексей Николаевич Пехтышев э̄кваго̄йкаг ёт тот хо̄нтхатыглас. Тэ̄н потыртасы̄г, па̄вылт ма̄хум вит амартан во̄ӈханыл ёмщакв щё̄питаӈкве э̄ри. Ос ӯсхуланыл хосыт на̄йпос тотнэ а̄ӈквалыт ва̄рнувет ке, щар ёмас о̄лнув. Тувыл Супра ос Шаим па̄влыгт то̄ва колыт, ма̄ ло̄мтыт э̄рнэ нэ̄пакын ат хасве̄сыт. Таима̄гыс пе̄с колыт ёмащакв щё̄питаӈкве ат ве̄рмавет, ма̄хум олныл ат нё̄тавет. Ле̄ккарыт та̄н палтаныл щар ат ёхталэ̄гыт. Ань ма̄хум нэ̄пакыт та̄нки ва̄рмаляныл урыл хассыт, нё̄тмил во̄всыт ос хотты накт ле̄ккарыл вос ке̄тыглавет. Пуссын ты ва̄рмалит Алексей Поздеев акваг уральтаӈкве патыянэ. Ха̄льӯс районт о̄лнэ ма̄хум «Спасти и сохранить» нампа экологический акцият са̄всыр тэ̄лат ва̄руӈкве ла̄вхатсыт. Та̄н та̄нки па̄вланылт ос ӯсыт порс акванатнэ хо̄талыт ва̄ре̄гыт тах. Во̄р ляпа ма̄наныл ос я̄ ва̄таныл о̄с сыстамтыяныл. Тамле тэ̄лат рӯпитан предприятият пуссын ва̄руӈкве патэ̄гыт. Тувыл ка̄сащан ка̄сыӈ хо̄тпа йӣвыт ӯнттуӈкве ве̄рми. Район янытыл па̄влыт «Чистый посёлок» касылт тах касэ̄гыт. Но̄хпатум па̄влыт олннё̄тмилыл мӯйлуптавет. Ня̄врамыт ма̄гыс сыресыр касылыт ос суссылтапыт ва̄равет. А̄гирищитпыгрищит «Красная книга» глазами детей» нампа касылн катыл по̄слум хурияныл вос ке̄тыяныл. Мо̄таныт «Югра таёжная» касылн фотоаппаратыл по̄слым хурит вос мыгыт. Ты ля̄ххалыг ма̄ньщи ла̄тӈыг Тамара МЕРОВАн толмащлавесы̄г.

1076 2014.05.23. Александр ВЬЮТКИН

Ма̄хум мо̄т мирыт ва̄ӈкв ханищтавет. Югорский университет колт ханищтахтын ма̄ньлат ма̄хум ма̄гыс научнопрактический конференция о̄лыс. Ка̄сыӈ порат ты ханищтап ханты ос ма̄ньщи студентыт ёт рӯпитан ма̄ньщи э̄ква Диана Васильевна Герасимова ва̄рыглы. «Этножурналистика» нампа кафедрат ханищтахтын ма̄ньлат ма̄хум ма̄гсыл ты конференция ва̄рим о̄лыс. Диана Васильевна та̄нанылн ань ла̄выс: «Ма̄н округувт са̄всыр нэ̄пакыт та̄ра ос телевизор хосыт программат ва̄равет. Ам то̄ва порат телевизор хосыт хоты ма̄хум урыл суссылтаве, щар ат торгамтэ̄гум. То̄ванакт тох о̄лыглы, ханты урыл кос хансэ̄гыт ма̄ньщи хурит тув ва̄равет. Хумус э̄ри, та̄ра ат паттыяныл, ля̄ххалт аквантэ̄лыгтым номтаныл мирн тох та тотыяныл. Са̄в студент Россия янытыл са̄всыр ма̄ныл тыт ханищтахты. Таи ма̄гсыл ты ма̄н журналистыг ханищтахтын студентанув ёт соссаӈ мирув о̄лупса ханищтаӈкв о̄вылтасӯв. Ты та̄л «этножурналистика» нампа курс титыт та̄лэ ты то̄влы. Акв та̄л сыс тит щёс тамле семинар ва̄рыглэ̄в. Ня̄врамытын са̄всыр мир о̄лупсаныл ханищтаӈкв пӯмщиг о̄лы. Ханищтахтынэ̄ныл сыс матыр ат торгамтэ̄гыт те, та̄н та̄нти ам палтум ёхталэ̄гыт, титыглахтэ̄гыт. Маныр та̄нанылн э̄ри, ёмщакв хӯлтэ̄гум».

1076 2014.05.23. Маргарита Ковалюк Валентина Васильева

Во̄сыӈтӯрныл те̄тым потыр. Ха̄льӯс район Во̄сыӈтур па̄вылт о̄лнэ нэ̄ Маргарита Витальевна Ковалюк (Шесталова) ма̄н редакциявн пищма те̄тыс. Тав мирколт рӯпиты, ань тав па̄влыӈ ма̄хманэ урыл хансыс, ялпыӈ хо̄талыт порат хумус та̄н мӯйлысыт. «Ӯринэ̄ква хо̄тал» та̄н хумус янытласаныл, ты урыл тав хансум пищматэ ловиньтэлы̄н. Ка̄сыӈ тӯя соссаӈ ма̄хманув ӯринэ̄ква ёхтын кастыл щё̄питахтэ̄гыт, ялпыӈ хо̄тал ва̄ре̄гыт. Ты та̄л ювле хультум э̄тпос нилыт хо̄талэ̄т ма̄н культура колувт рӯпитан хо̄тпат па̄влыӈ ма̄хманув акванатыгласаныл. Та хо̄тал кон мощ ащирмаӈ о̄лыс. Ос ня̄врамыт, яныгхо̄тпат пуссын тув ёхталасыт. Ня̄врамыт ос хум хо̄тпат ма̄гыс са̄всыр касылыт щё̄пита̄лве̄сыт, та̄н са̄грап па̄хвтысыт, сун ӯлтта поргысыт, йӣв ла̄кквахартсыт. Людмила Савельевна Хозумова а̄гирищит ёт ма̄ньщи йӣквыт йӣквыс. Тав Ло̄пмус па̄вылныл о̄лы, ма̄ньщи ла̄тӈыл потырты. Ань ня̄врамыт ёт рӯпиты, та̄наныл сак хартуӈкв, йӣквуӈкв ханищтыянэ. Клуб колт рӯпитанэ̄тэ ма̄гсыл ань олныл ат ойтаве, моще̄рт э̄рыӈ тав ойтуӈкв патаве. Ирина Никифоровна Муравьёва (а̄ги о̄парищ наме Гришкина) «Ӯринэ̄ква хо̄тал» урыл мирн потыртас, соссаӈ ма̄хум хумус пӯрлахтэ̄гыт. Тав оматэ Мария Тимофеевна Октябрьский районныл о̄лыс, а̄ще Никифор Петрович Сюмин хотыл А̄с я̄ е̄рныл о̄лыс. Такви Ирина Тобольск ӯст ханищтахтас, ань ня̄врамыт рущ йӣквытн ханищтыянэ. Анна Дементьевна Канева (такви о̄парищ наме Шесталова) о̄с ма̄ньщи яныгпа̄ла хо̄тпа. Ялпыӈ хо̄тал о̄лум порат тав нэ̄ хо̄тпат ос ня̄врамыт ёт арсын йӣвн нэ̄гсалас. Пӯрлахтаманыл юипа̄лт мӯйлын ма̄хум пуссын хӯл исмитыл айтве̄сыт, соламатыл тыттуве̄сыт. Хӯлыӈ ня̄нь ёт исум ща̄й айсыт. Тох ты ма̄н ёмащакв мӯйлысӯв. Маргарита Ковалюк хансум потре ма̄ньщи ла̄тӈыл Валентина Васильева хансыстэ Хурит па̄влыӈ ма̄хум ос ня̄врамыт по̄слым о̄лэ̄гыт.

1076 2014.05.23. Николай МЕРОВ

Тэ̄нут ма̄нки о̄лнэ ма̄вт ва̄ре̄в. Ань округувт АПК (агропромышленный комплекс) э̄лаль тотнэ ма̄гыс са̄в рӯпата ва̄раве, кӯщаиг тот Евгений Платонов рӯпиты. 2013 та̄лт та̄н хумус рӯпитасыт, тав ты урыл потыртас. Юио̄выл та̄лытт ты ва̄рмаль акваг са̄вмалтаӈкве патвес. Тыи ма̄гыс са̄в олн та̄ставе. Та̄нки рӯпата ва̄рнэ хо̄тпат са̄внув ӯйхул о̄ньщуӈкве патсыт. Ма̄хум мисыт, пӯрщит ос щищкуре̄кыт янмалтэ̄гыт. Ань округувт о̄лнэ ла̄пкатт са̄выӈпа̄лэ ма̄нки ва̄рум тэ̄нутанув тыналавет. Мо̄лты та̄л налыман нупыл нёлолов са̄вит пе̄рма пӯсвес. Тот рӯпитан хо̄тпат нёлолов со̄тыра арыгтем тонна нё̄выль, хӯрумхуйплов арыг тонна щаквит тыналан ма̄гыс та̄стысыт. Щар са̄внув ща̄квит ос нё̄выль Ханты-Мансийский, Нефтеюганский, Сургутский ос Нижневартовский районытт рӯпитан пе̄рмат мыгыт. Округувт ань са̄в нэ̄щищкуре̄к янмалтаве, та̄н са̄в муӈи тотэ̄гыт. Сэ̄мыл о̄хсар янмалтаӈкве патвес. Ты ӯит ка̄сыӈ та̄лныл акваг са̄вме̄гыт. Са̄лыт о̄с са̄вмалтавет. Ань ты накт округувт ва̄т нупыл хӯрум со̄тыра арыгтем са̄лы е̄мтыс. Ань та̄л котиль э̄тпос мус Саранпа̄выл совхозт аквхуйплов со̄тыра атса̄т арыгкем са̄лы ань ӯраве. Белоярский районт ОАО «Касум павыл оленеводческий компаният» са̄т со̄тыра са̄лы о̄лы. Ханты-Мансийский район Кышик па̄выл «Вар» нампа общинат хӯрумса̄ткем са̄лы янмалтаве. Касым па̄выл «Осетные» нампа соссаӈ ма̄хум общинат китса̄т арыг са̄лы о̄ньщаве. Кышик па̄выл «Ай-Тупос» нампа общинат ос хо̄тхуйплов са̄лы о̄лы. Ты общинат соссаӈ хо̄тпат во̄раим, хӯл алыщлым ос во̄рт са̄всыр пил, ла̄хыс атым рӯпитэ̄гыт. Мо̄лты та̄л сыс са̄лыӈ ма̄хум пуссын аквъёт кит со̄тыра атпан са̄вит тонна нё̄выль тыналан ма̄гыс ва̄рсыт. Тыгыл э̄лаль округувт совхоз са̄лыт акваг са̄вмалтаӈкве тах патавет. Та̄нки са̄лыяныл янмалтан хо̄тпа о̄с са̄в о̄лы. Округувт пуссын са̄лыт акванловиньтаӈкве ке, налыман нупыл нёлолов со̄тыра са̄вит са̄лы пуӈк аня е̄мты. Ты коныпал ос мо̄т са̄всыр э̄рнэ рӯпата ва̄раве. Ты сака ёмас ва̄рмаль, тэ̄нут ма̄нки о̄лнэ ма̄вт ва̄ре̄в.

1076 2014.05.23. Валентина УЗЕЛЬ

Ле̄ккарыг рӯпитам о̄йка. Андрей Алексеевич Головин 1936 та̄лт Саранпа̄вылт самын патыс. Тав саран хум, ань Ха̄льӯст о̄лы. Оматэ Фёкла Фёдоровна «Сталин» нампа колхозт рӯпитас, а̄ще Алексей Степанович во̄руй совыт пирмайтас. Алексей Степанович 1941 та̄лт хо̄нтлын ма̄н вуйвес, 1943 та̄лт июль э̄тпост Орловский областьт порслувес. Ща̄няныл хӯл алыщлым сака по̄льтахтас, аквта та̄л октябрь э̄тпост а̄тимыг е̄мтыс. Андрей Устинья увщитэ̄нтыл тэ̄нттетэ̄н хультсы̄г. То̄нт тав хо̄т та̄лэ то̄влыс, Устинья мощ яныгнуве̄г о̄лыс. Пыг 1944 та̄лт са̄т та̄лэ то̄влыс, школан та минас. О̄влэ̄т Саранпа̄выл школат ханищтахтас, тувыл Кульпаст, Ло̄пмуст. Школа Кульпаст а̄стластэ. Та та̄рвитыӈ пора урыл Андрей Алексеевич тох потыртас: «Ме̄н увщиме̄нтыл ме̄нттеме̄н хультсуме̄н, нэ̄мхотьют ме̄наме̄н ат нё̄тыс. Тав рӯпитаӈкв патыс, Нё̄рн са̄лыт ловиньтаӈкв те̄твес. Ам юн амттем хультсум. Мисув рӯтанувн та̄ра алвес, нё̄вле ла̄кквамайвес. На̄йванум холасыт, кӯрум па̄лтыглаӈкв э̄ри. Ам конторан на̄ив виӈкв минасум, тот та̄ра та пувве̄сум, ань манрыг ат титыглахтасум, виӈкв ро̄ви ман а̄ти. Мо̄тыт хо̄тал на̄йвыл тотве̄сум. То̄нт Кульпас школат Алексей Васильевич Голошубин рӯпитас, тав ам увщим тув рӯпитаӈкв во̄выстэ. 1945 та̄лт тув та минасме̄н. Ам школат ханищтахтасум, увщим рӯпитас. Школа а̄стламум юипа̄лт ам Ханты-Мансийск ӯсн фельдшерскоакушерский школан (ФАШ) ханищтахтуӈкв минасум. Акв та̄л ат ханищтахтасум, ос олн та̄л о̄луӈкве та̄рвитыӈ, рӯпитаӈкв та патсум. То̄нт Мария Ивановна Воскресенская кӯщаиг тот о̄лыс, тав а̄нумн э̄лаль ханищтахтуӈкв ювле во̄выстэ. Та та̄лытт амнистия щирыл сака са̄в хо̄тпа турманколныл юв та̄ртве̄сыт. Ӯст то̄нт ты са̄в о̄выл ва̄рвес, ма̄хум пилым о̄лсыт. Колыт но̄х ул вос пе̄ламтавет, ма̄н э̄ти титхӯрум хо̄тпал ханищтан колув уральтаӈкв патыслӯв. Акв э̄ти лув о̄щнэ кол но̄хпе̄ламтавес, тот леспромхоз лувыт о̄щве̄сыт. Са̄в лув тот порсыс. Ам ФАШт ёмащакв ханищтахтасум, лю̄ль оценкал те тӯщтаве̄в, стипендияолныл ат майлувесӯв. 1955 та̄лт та школа а̄стлыслум. Устрем па̄выл пӯльницан рӯпитаӈкв те̄тве̄сум, тот туп хӯрум э̄тпос рӯпитасум, ос армиян та вуйве̄сум. Юв ёхтысум, Ха̄льӯс район пӯльница кӯщай а̄нумн ла̄выс, Тугияны па̄вылт акв та̄л сыс хӯрум хо̄тпа по̄хан те̄тве̄сыт, пуссын вина аюӈкв тӯлтхатасыт. Ам тув вос минэ̄гум. Ам акв та̄лтем тот рӯпитасум, номсахтуӈкв патсум, ты па̄вылт э̄лаль те хультэ̄гум, о̄с аквтох вина айнэ хо̄тпаг е̄мтэ̄гум. Мо̄т ма̄н во̄вхатуӈкв патсум. Во̄сыӈтур па̄вылн те̄тве̄сум, тот хӯрум та̄л рӯпитасум. 1959 та̄лт нэ̄ тотсум, э̄квам Нина Фёдоровна. Тав ща̄не щирыл Ользинаг о̄лы, та̄н А̄с ма̄хум. Таве Тугияны па̄вылныл ёт во̄выслум. То̄нт тав школа ущ а̄стлыс. Ме̄н аквъёт са̄в та̄л о̄лыме̄н. Хӯрум ня̄врам о̄ньщиме̄н, Валентина яныг а̄гиме̄н Ха̄льӯс пӯльницат рӯпиты, котиль а̄гиме̄н Татьяна Хулюмсунт па̄вылт о̄лы, школат рӯпиты, пыгме̄н Алексей Тюмень ӯст полицият майор нам о̄ньщи. Ам пӯльницат ня̄врам самын патнэ ма̄т рӯпитасум. Титыт а̄гим самын патнэ порат сака та̄рвитыӈ о̄лыс, ма̄нь ле̄ккар нэ̄в хотрохтыс, юв ояс. Э̄квам ёт амти хультсум, а̄гиме̄н самын патыс, ат лылты. Ам ты рӯпата ва̄глум, а̄гим па̄пе̄т титхӯрум щёс ю̄ныгтаслум, тав та лю̄ньщалтахтас. Э̄квам ос ам нупылум ро̄ӈхи, ня̄врам манрыг ра̄тылум. Ам ювле ла̄ве̄гум, ам таве̄н ат те нё̄тнувум, а̄гиме̄н ань ат о̄лнув. Районув янытыл ам са̄в ня̄врамн самын патуӈкв нё̄тсум, та̄наныл пуссын номиянум, ва̄ганум. Хо̄т ос хунь самын патсыт, номе̄гум. Акв хотты та̄лт ам Тюмень ӯсн ялсум, тот Алексей Васильевич Голошубин ёт хо̄нтхатыгласум. Тав а̄нумн потыртас, репрессия та̄лыт порат таве винэ ма̄гсыл Саранпа̄вылн Ха̄льӯсныл НКВД ма̄хум ёхталасыт. Ам а̄тям таве виӈкв ат та̄ртыстэ, Качанов о̄йка тав пе̄нтсылэ пуввес, хотталь тотвес. Тамле ты пилыщмаӈ порат та̄н о̄лсыт. Пенсият о̄лнэ̄м сыс ловиньтан нэ̄пакыт хансуӈкв патсум. О̄выл нэ̄пакум «История здравоохранения Березовского района» хосат та̄ртвес, то̄нт районный пӯльницав 165 та̄лэ то̄влыс. Титыт нэ̄пакум «Березовской больнице 200 лет» намаим о̄лы. Пӯльницат рӯпитам ка̄сыӈ хо̄тпа наме тот хансым о̄лы, пе̄с хурит тув по̄слуве̄сыт. Ты нэ̄пакыг пӯмыщ ловиньтаӈкве». Ма̄н Ха̄льӯс районувт Андрей Алексеевич са̄в хо̄тпан ва̄ве, тав ань ва̄тахтем та̄л пенсият о̄лы. Пуста̄гыл э̄лаль вос о̄лы, ляпа рӯтанэн акваг вос уральтаве, То̄румн вос ӯргалаве.

1076 2014.05.23. Светлана РОМБАНДЕЕВА

Са̄в ня̄врамыӈ нэ̄. Хурит ма̄ньщи нэ̄ Надежда Калистратовна Филиппова по̄слым о̄лы. Ха̄льӯс район Сӯкыръя па̄вылн ялмум порат ам школан щалтсасум, тав ётэ хо̄нтхатыгласум. Надежда Калистратовна тэ̄нут па̄йтым тот са̄в та̄л рӯпиты. Ме̄н потрамасме̄н, на̄н ань тав потре ловиньтэлы̄н. – Тыт ам школа ӯнттын па̄сыл рӯпитэ̄гум, садикын ос школан ялантан ня̄врамыт ма̄гыс тэ̄нут па̄йтэ̄гум. Ат ня̄врам о̄ньще̄гум. Яныг пыгум ва̄т нупыл китыт та̄лэ то̄влыс, наме Андрей. Ханты-Мансийск ӯст училища а̄стлас, ань Ха̄льӯст рӯпиты. Хӯрманум школат ханищтахтэ̄гыт Яна а̄гим онтолов классыт, Федя пыгум хо̄тыт классыт ос Максимум нилыт классыт. Щар ма̄нь пыгум Антошам нила та̄лэ, садикын яланты. О̄йкам о̄с ты школат кӯр па̄лтыглым рӯпиты. Ам ще̄мьям ёт Сӯкыръя па̄вылт о̄лэ̄гум, о̄йкаме̄нтыл кол ӯнттысаме̄н. – Наӈ хо̄т яныгмасын? – Саранпа̄вылт яныгмасум. А̄тям Калистрат Петрович Хозумов, Хо̄рыӈпа̄выл хум. О̄лме палыт совхозт рӯпитас. Омам Нина Афанасьевна, а̄ги о̄парищ наме Качанова, Ха̄ӈла па̄вылт самын патыс. Ма̄н хо̄т ня̄врам о̄лсӯв. Яныг ка̄ӈкум Петр а̄тимыг емтыс. Альбина увщим Украина хо̄н ма̄т о̄лы, Лена увщим Я̄сунт па̄вылт о̄лы. Надежда тамле ка̄ркам, потрыӈ ма̄ньщи нэ̄кве. Ты я̄тил хо̄тпав ще̄мьятэ ёт пуста̄гыл вос о̄лы, На̄янылн-О̄тыранылн вос ӯргалавет!

1076 2014.05.23. Светлана РОМБАНДЕЕВА

Са̄лы ӯрнэ хум. Ханты-Мансийск ӯст ӯринэ̄ква янытлан хо̄талт Иртыш я̄ тармыл ёсал каснэ ва̄рмаль ва̄рыглавес. Сургутский район Русскинская па̄вылныл ханты ма̄хум ёхталасыт э̄кват, о̄йкат, ма̄ньлат а̄гипыгыт. Пуссын та̄нти маснутанылт масхатым о̄лсыт. Ё̄рнкол тӯщталасыт, та по̄хат лю̄ляхо̄лсыт, ё̄ӈхатахтыгласыт. Рущитн ос мо̄т хо̄н мирн маттем та пӯмщалаве̄сыт, та̄н ётаныл по̄слахтасыт. Ам акв хум ёт потрамасум, наме Дмитрий Васильевич Тэ̄влин. Ань ме̄н потруме̄н э̄лаль ловиньтэлы̄н. – Дмитрий Васильевич, Ханты-Мансийск ӯст мӯйлуӈкве наӈын мӯсты? – Тыт атхунь ёмас, нё̄тнэ ма̄кве, ма̄хум ма̄н нуплув сымыӈыщ сунсэ̄гыт, маснутанув тай акваг та пӯмщалавет. Тыг ма̄н «Лукойл» нефтяная компания па̄лыл автобусыл тотвесӯв, ва̄т нупыл ат хо̄тпа ёхтысӯв. Ёсал ма̄н онтолов хо̄тпа кассӯв. – Наӈ хо̄т самын патсын? – Ам Ямал ма̄т самын патсум. Ща̄нягума̄щагум хосат а̄тимыг е̄мтсы̄г, китхуйплов та̄лум порат савалапыг хультсум. Кит каӈк ос увщи о̄ньще̄гум, та̄н ётаныл яныгмасум. Рӯт тай са̄в о̄ньще̄в. Ма̄н ань ще̄мьянув ёт пуссын во̄рт о̄лэ̄в. Э̄квам наме Наталя, тав о̄с ханты нэ̄, ме̄н хӯрум ня̄врам о̄ньщиме̄н. Ка̄сыӈ хӯрум э̄тпос нефтяникытын олнло̄мтыл ойтыглаве̄в, сака са̄в а̄ти, ня̄нь винэ те̄мыл майлаве̄в. Ка̄сыӈ нила та̄л сыс акв щёс «Буран» нампа тӯйт тармыл яласан машинал майлаве̄в. – «Ханты ясаӈ» нампа газета ловиньтэгы̄н? – Ловиньта̄лэ̄в, то̄ва ла̄тӈыт ат торгамтыянӯв, тот мощ мо̄т диалектыл хансым о̄лы. Ма̄н ма̄нти халувт тай ма̄нти ла̄тӈувтыл потыртэ̄в, ня̄враманув о̄с сака ёмащакв потыртэ̄гыт. Яныг ня̄врамагме̄н Русскинская па̄вылт интернатт о̄лэ̄г, школат ханищтахтэ̄г. Тот тай пуссын акваг рущ ла̄тӈыл потыртэ̄гыт. Ос хунь юв ёхтэ̄г, туп ханты ла̄тӈыл потыртэ̄г. Ты я̄тил ханты ма̄хум пуста̄гыл вос о̄лэ̄гыт, На̄янылн-О̄тыранылн вос ӯргалавет!

1076 2014.05.23. Людмила ТЕТКИНА

Ха̄льӯс музей ты та̄л 35 та̄лэ то̄влы. Я̄ӈк на̄тнэ э̄тпос 18 хо̄талэ̄т музей янытлан хо̄талыг о̄лыс. Ты кастыл ма̄н Ха̄льӯс районт о̄лнэ музей урыл потыр хансэ̄в. Кӯщаиг тот Людмила Васильевна Андрианова рӯпиты ловиньтан. Тав ла̄выс: «Ты та̄л музейколув 35 та̄лэ то̄влы. Са̄всыр музеитт рӯпитан ма̄хум, учёныйхо̄тпат конференциян таквсы порат тыг во̄виньта̄лыянӯв. Ос музей рӯпататэ урыл нэ̄пак тах щё̄питэ̄в. Ты пора сыс музейт 20 со̄тыра са̄всыр пормасыт, хурит, нэ̄пакыт акванатсӯв. Ты э̄лыпа̄лт музеюв 19 но̄т порат ӯнттум колт о̄лыс. Ты яныг йильпи колн ма̄н 2003 та̄лт ва̄нтлысӯв. Колув кос яныг, тувыл са̄всыр йильпи суссылтапыт ва̄рыглаӈкве колнакыт ат о̄ньще̄в. Ха̄льӯст о̄лнэ ка̄тыл по̄слын хо̄тпат ёт акваг рӯпитэ̄в, та̄н по̄слум хурияныл мирн суссылтаӈкве о̄с таӈхе̄в. Колув по̄хат Добровольский кӯпса о̄йка ӯнттум колэ ёмащакв ань щё̄питаве. Ты кол музейн майвес, тот ма̄н ка̄тыл по̄слум хурит суссылтаӈкве тах патэ̄в. Музейт щар яныг колнакт газ хо̄нтум ма̄хум урыл выставка суссылтэ̄в. Мо̄т колнакыт ос соссаӈ ма̄хум пормасаныл ка̄салаӈкве ро̄ви. Ма̄н хунь ты суссылтап ва̄рыслӯв, Ха̄льӯст о̄лнэ ма̄ньщит, хантыт ёт потыртасӯв, китыгласанӯв. Та̄н ла̄всыт, соссаӈ ма̄хум ялпыӈ пормасыт нупыл нэ̄ хо̄тпан сунсуӈкве щар ат ро̄ви. Тыи ма̄гсыл ты пормасыт акв ма̄нь колнакн атсанӯв ос яныг торыл лаптагатасанӯв. Ма̄хум суссылтап сунсуӈкве ке ка̄саще̄гыт, тув щалтсэ̄гыт. Ты ялпыӈ пормасыт Новосибирск ӯс институт этнография щирыл рӯпитан ма̄хум ма̄навн ке̄тыс. Ты э̄лыпа̄лт Новосибирск ӯсныл Ха̄льӯс районын ма̄ньщи мир о̄лупса ханищтаӈкве са̄в учёный хо̄тпат ёхталасыт. Та̄н ты ма̄ныл са̄в ма̄ньщи ялпыӈ пормасыт Новосибирск ӯсн тотсыт. 18-19 но̄т порат ю̄нтым ма̄ньщи ялпыӈ пормасыт, ань ма̄н музеювт ка̄салаӈкве ро̄ви. Музейт Митрофан Тебетев по̄слум хуриянэ о̄лэ̄гыт. Ха̄льӯс районт о̄лме порат ты хуриянэ по̄слыгласанэ. Ань мо̄т музеит тав хуриянэ мирн суссылтаӈкве во̄вияныл. Пе̄тр Шешкин ва̄рум рӯпатанэ о̄с тыт суссылтыянӯв. Пормасанэ Ханты-Мансийскын ос мо̄т ӯсытн о̄с акваг тотыглавет. Пе̄тр Шешкин ма̄ньщи ла̄тӈыл хансум потранэ о̄с тыт о̄лэ̄гыт. Ань Кульпаст о̄лнэ ма̄ньщи нэ̄т тав потранэ рущ ла̄тӈын толмащлыяныл, ты юипа̄лт ма̄н та̄наныл акв нэ̄пакыг ва̄риянӯв. Кит та̄л сыс «Меншиковские чтения» нампа конференциян Россия янытыл учёный ма̄хум тыг во̄виньта̄лыянӯв. Ха̄льӯс районт о̄лнэ ня̄врамыт ма̄гсыл научный конференция ва̄рыглэ̄в. Щар о̄влэ̄т а̄гитпыгыт ма̄ньщи ос ханты пе̄с йис ва̄рмалит урыл хансым нэ̄пакныл докладыт хассыт. Ань ня̄врамыт па̄вланылт о̄лнэ хо̄тпаныл мо̄йтыт, потрыт нэ̄пакн хансыяныл. То̄ват та̄нки пе̄с порат о̄лум рӯтаныл урыл нэ̄пак хансэ̄гыт. Тамле докладыт хӯнтлаӈкве сака пӯмащ. Ка̄сыӈ та̄л «Ночь музеев» нампа ялпыӈ хо̄тал ва̄рыглэ̄в. Я̄ӈк на̄тнэ э̄тпост кон ат турманлы, тыи ма̄гсыл ма̄н ре̄тыӈ юсвой э̄тпос ӣтипа̄лаг ма̄хум ма̄нки палтылув во̄выглыянӯв. Ты кастыл ма̄н са̄всыр йильпи выставка щё̄питэ̄в. Акв та̄л сыс 20 со̄тыра арыгкем э̄лумхо̄лас музейн ёхталы». Ха̄льӯст о̄лнэ музей тамле э̄рнэ рӯпата ты ва̄ри. Ма̄ньщи ос ханты пе̄с пормасыт акванатым, суссылтапыт ва̄рыглым пе̄с йис ва̄рмалит э̄лаль тотыяныл.

1076 2014.05.23. Тамара МЕРОВА

Ка̄сыӈ ӯст манос па̄вылт музеит рӯпитэ̄гыт. Музеит янытлан кастыл 1977 та̄лт Россия па̄лыл мо̄т хо̄н ма̄н ла̄тыӈ ке̄твес. Ос 1978 та̄л па̄сыл тот рӯпитан ма̄хум ялпыӈ хо̄талыл ва̄рве̄сыт, ань 150 арыгкем са̄всыр ма̄тт ты хотал янытлаве. Ам о̄выл щёс Лангепасн минамумт, ты ӯс ос тот о̄лнэ ма̄хум урыл мощща ва̄сум. Ӯс хотмус ха̄щта̄лыг о̄лыс. Тувыл аквъёт рӯпитан нэ̄ме̄нтыл Музейновыставочный центрын ялсуме̄н. Кол кӯщаиг о̄лнэ хум ёт Андрей Николаевич Дробышев ос са̄всыр суссылтапыт щё̄питан хум Александр Николаевич Седов ёт тот ты ва̄йхатсуме̄н. Тэ̄н пуссын суссылтапыт ме̄наме̄н суссылтасанэ̄н ос ка̄сыӈ тэ̄ла урыл я̄нас потыртасы̄г. Та юипа̄лт ме̄н ӯс ва̄рмалит ос ӯст о̄лнэ то̄ва хо̄тпат ва̄рум ёмас тэ̄ланыл ма̄гыс ва̄ӈкве патсанме̄н. Ань ма̄ янытыл о̄лнэ ма̄хум аквтох музеин щалтнэ̄ныл порат хурит, пормасыт суснэ̄ныл сыс матыр ханищтэ̄гыт. Са̄всыр мирыт о̄лупсаныл, маснутаныл ос пе̄с та̄гыл о̄щнэ наканыл та̄рапаттыяныл. Ня̄врамыт музеин ялантым о̄с номтыӈнуве̄г е̄мтэ̄гыт, мо̄т хо̄тпа нупыл сымыӈыщ сунсым о̄лэ̄гыт. Музеит рӯпитан хо̄тпат тамле ёмас тэ̄лат акваг ты ва̄ре̄гыт. Тувыл ма̄хум та̄нки о̄с пӯмщалахтэ̄гыт, таима̄гыс мо̄лал та̄н лощит музейколыл ӯнттуве̄сыт. Андрей Дробышев ла̄выс, ювле хультум хӯрум та̄л порат та̄н ӯсанылт са̄всыр ма̄нь музеит, искусство центрыт аквантотве̄сыт ос акв йильпи яныг колыл майве̄сыт. Та̄н ань пуссын акв колт рӯпитэ̄гыт. Ме̄н музейт са̄в пӯмыщ ка̄саласме̄н. То̄ва суссылтапыт акваг рӯпитэ̄гыт, мо̄таныт мо̄рсыӈ порат щё̄пита̄лыглавет, то̄внакт пормасыт суссылтаӈкве мо̄т ма̄ныл тув тотыглавет. Тувыл тот акваг суссылтан пормасыт, хурит о̄с пе̄нтуӈкве ве̄рмавет. «История города» нампа колнакт Лангепас ӯс о̄вылтыт потыртэ̄гыт. Ты ӯс 25 та̄лэ ущтынув то̄влыс. Ты э̄лыпа̄лт тот во̄р о̄лыс, ма̄во̄й хо̄нтвес ос тув аквты щёс ма̄хум са̄в ма̄ныл рӯпитаӈкве ёхтысыт, о̄влэ̄т та̄н балокытт о̄лсыт, тувыл йӣв колыт ӯнттуве̄сыт. Ань тав ӯсыг е̄мтыс, кирпащиӈ са̄в яныг кол ӯнттувес. Тот атпан нупыл хӯрум со̄тыра са̄вит э̄лумхо̄лас о̄лы. Хосат та̄гыл ӯст о̄лмыгтам хо̄тпат то̄внакт ня̄врамыт э̄лыпа̄лт мовиньтэ̄гыт, ла̄ве̄гыт, та̄н о̄лнэ коланыл по̄хат ма̄хум пил ва̄тсыт ос во̄раясыт. Ма̄во̄й но̄хвинэ ва̄рмаль о̄вылтыт о̄с я̄нас колнак щё̄питавес. Тот нефтяникыт пормасаныл ос са̄всыр техникат суссылтавет. Соссаӈ ма̄хум ос «Природа Югры» нампа колнак акв ляпан ва̄рвесы̄г. Та е̄рт о̄лнэ хантыт о̄лупсаныл мӯсхалыг ханищтымат ос потраныл музеит акванатымат. Ма̄навн тот таи мӯстыс, са̄всыр о̄лыглам накыт ма̄кыг щё̄питаве̄сыт, пормасыт э̄рнэ ма̄н пинве̄сыт, ос соссаӈ ма̄хум о̄лупсаныл урыл потыртым нэ̄матыр ат тэ̄лыгтэ̄гыт. Та̄н та е̄рт о̄лнэ хантыт коныпал мо̄т ма̄т о̄лнэ хантыт ос ма̄ньщит пе̄с йис наканыл, коланыл мощ мо̄т щирыл ке о̄лэ̄гыт, о̄с ва̄ганыл ос ма̄хумн хӯлтыяныл. Мо̄т колнакт ма̄ ёлыпа̄лт хо̄нтым сака пе̄с пормасыт суссылтавет. Андрей Николаевич ма̄хманэ ёт ты утыт Сургут ӯс ляпат хо̄нтсаныл ос тувыл но̄ххилсаныл. Та̄н пуссын ищхӣпыӈ ут хосыт суссылтавет. Пуссын ты выставкат музеит акваг рӯпитэ̄гыт, та̄н хот ат вивет. Ос маныр ма̄гыс, маныр иӈ пӯмщалаӈкве ӯст о̄лнэ ма̄хум тув щалтсэ̄гыт, манхурип касылыт, э̄ргынйӣквнэ накыт тот ва̄рыглавет, хумус ма̄хум ӯщлахтэ̄гыт, ты урыл ам мо̄т потыр тах хансэ̄гум. Ань музеит рӯпитан хо̄тпат ма̄н ялпыӈ хо̄талыл янытлыянӯв, ос са̄всыр мӯтраӈ ва̄рмалитын мӯй ма̄хманыл вос ханищтыяныл, пӯмщалыяныл.

1076 2014.05.23. Светлана РОМБАНДЕЕВА

Сакв ма̄хманув пормасаныл о̄щнэ кол. Ха̄льӯс район Саранпа̄выл школат музей о̄лы. Тув щалтсамум порат Виктория Валерьевна Хозяинова ёт хо̄нтхатыгласум, тав ань та музейт рӯпиты, ты коныпал ня̄врамыт ханищты. Виктория Валерьевна ма̄ньщи нэ̄, а̄ги о̄парищ наме Качанова. Ме̄н тав ётэ потрамасме̄н, на̄н ань э̄лаль потруме̄н ловиньтэлы̄н: – Школант о̄лнэ музеин манах та̄л рӯпиты? – О̄влэ̄т тав пе̄с школат о̄лыс, та школа на̄йн но̄хё̄свес. Тувыл 2002 та̄лт музей йильпииг ва̄рыслӯв, школат колнакыл майвесӯв. Матъёмас тамле музей колнак о̄ньще̄в, сакати ты хосыт ханищтахтан ня̄врамыт та̄нти культураныл урыл мощ ва̄ӈкве патэ̄гыт. Ма̄ньщи мир пормасыт акванатуӈкве са̄в хо̄тпа нё̄тыс – ня̄врам ханищтан ма̄хум, ня̄врамыт, яныгхо̄тпат. Пуссын акваннё̄тхатым ма̄н яныг тэ̄ла ва̄рсӯв. Ам омам Елена Ефимовна Качанова ты музейт са̄в та̄л рӯпитас, кӯщаиг о̄лыс. Ма̄нь па̄влытт са̄всыр пормасыт атыс – Сӯкырьят, Я̄сунтыт, Саранпа̄вылт, Хо̄рыӈпа̄вылт. Музеювт ань 218 пормас о̄ньще̄в – маснут, ла̄гыл маснут, а̄ныса̄ныт, са̄всыр хусапсовыт, хӯл алыщлан ос во̄раян пормасыт, та маныр пуссын о̄лы. Ты та̄л ма̄нь таквс э̄тпост районув янытыл о̄лнэ школат халт конкурс ва̄раве. Хоты школат щар ма̄к ёмас музей о̄лы, тав та но̄хпаты. Ма̄н о̄с таӈхе̄в тот касуӈкве, э̄рыӈ хотты места выгӯв. – Ня̄врамыт музейн ёхталэ̄гыт? – Атхунь ёхталэ̄гыт, пӯмщалахтэ̄гыт, тыт экскурсиял ва̄рыглыянӯв. То̄ва пормасыт урокын тотыглыянӯв, ня̄врамытн сунсыглавет, ка̄сыӈ пормас урыл потраме̄в. Ма̄ньщи ла̄тыӈ урок ханищтан нэ̄ Светлана Савельевна Мерова музейт матыра̄ти ва̄тихал вуйлы. Ня̄врамытн ла̄тыӈ ханищтанэ̄тэ порат матыр суссылты, тыхал ла̄тыӈ ханищтэ̄гыт. Ты та̄л па̄сыл школавт «Совет бабушек» хо̄нтхатыглап ва̄рсӯв. То̄ванакт яныгхо̄тпанув ёхталэ̄гыт, ня̄врамыт ёт матыр ма̄щтырлэ̄гыт, потраме̄гыт. – Наӈ хо̄т самын патсын? –Ам тыт, Саранпа̄вылт, самын патсум, школа а̄стласум. Э̄лаль Санкт-Петербург ӯст А. И. Герцен нампа университетт история ос культурология учителиг ханищтахтасум. Ань ты школат ам соссаӈ мир ос ма̄ янытыл о̄лнэ мирыт культураныл урок ханищтэ̄гум. Ме̄н о̄йкаме̄нтыл хӯрум ня̄врам о̄ньщиме̄н. Яныг пыгме̄н Женя Санкт-Петербург ӯст университет а̄стлас, ань Тюмень ӯст рӯпиты. Паша пыгме̄н о̄с Санкт-Петербург ӯст ханищтахты, Настяме̄н школат атыт классыт ханищтахты. Ме̄н Виктория Валерьевна ёт музей колнакн щалтсасме̄н. Ам ма̄ньщи ма̄хманув ва̄рыглам пормасыт сунсыгласум, пӯмщаласанум, по̄слысанум. Тав то̄ва пормасыт урыл мощ потыртас. Акв хӯрыг ка̄саласум, китыглахтэ̄гум, маныр совыл ю̄нтым о̄лы, насати, сыг совыл ю̄нтыма. Та ляпат мо̄т хӯрыг хуи, тав ос сорт совыл ю̄нтвес. Тув колас манос сыртэп пинуӈкве ро̄ви. Хӯргыг Елена Ефимовна Качанова ю̄нтыгламаге. Ра̄ктыл ва̄рим пӯтсов лю̄ли, ты ос Я̄сунтыт о̄лум э̄ква Анна Дмитриевна Немдазина тав ва̄рыгламе. Сӯкыръят о̄лум о̄йка Иван Данилович Сайнахов ӯльпа та̄рыл са̄всыр хусапсовыт ва̄рыглам, то̄ванэ о̄с музейн тотве̄сыт, тот ты о̄ньщавет. Виктория Валерьевна тамле ёмас э̄рнэ тэ̄ла ва̄ри – ма̄ньщи ма̄хманув ва̄рыглам пормасыт мирн суссылты, потырты. Ты я̄тил ма̄ньщи нэ̄те̄в ще̄мьятэ ёт пуста̄гыл вос о̄лы, На̄янэ̄н-О̄тыранэ̄н вос ӯргалаве!

1076 2014.05.23. Александр ВЬЮТКИН

Тув кастыл щё̄питахтын ва̄рмаль. Тув палыт ня̄врамыт ӯщлахтын ва̄рмаляныл палт кӯщаиг о̄лнэ ма̄хум ма̄гыс округ мирколт сапра̄ни ва̄рыглавес. Тот щар яныг кӯщаиг Алексей Андреевич Путин о̄лыс, тав округ губернатор ва̄ӈын хо̄тпаг рӯпиты. О̄влэ̄т Елена Владимировна Немчинова потыртас. Тав мирн нё̄тнэ департаментыт ня̄врамыт ёт рӯпитан тэ̄ла тармыл кӯщай нэ̄г о̄лы. Тав ла̄выс: «Ты тув ня̄врамыт ӯщлахтынэ̄ныл ма̄гсыл округ бюджетныл 1 млрд. 720 млн. 600 со̄тыра солко̄ви та̄стувес. Ты тув ня̄врамыт ӯщлахтынэ̄ныл ма̄гыс 524 ма̄т рӯпитаӈкв патэ̄гыт. Ос 4 со̄тыра 500 ня̄врам ӯщлахтуӈкв тот ве̄рми. Ты та̄л то̄ва ӯщлахтын ма̄т са̄внув ня̄врам та̄нти палтыланыл виӈкв матрыг ат ка̄саще̄гыт. Тот рӯпитан ма̄хум ты урыл тох ла̄ве̄гыт: «Ма̄н са̄в ня̄врам таи ма̄гсыл виӈкв ат ка̄саще̄в, сака са̄в нэ̄пак щё̄питаӈкв э̄ри. Тувыл та̄л палыт та нэ̄паканув пирмайтаӈкв ат ве̄рмавет. Мощщанув ня̄врам те ёхты, тэ̄лав моляхнув мины. Ты та̄л соссаӈ ма̄хум пе̄с йис о̄лупсаныл суссылтан щирыл 7 млн. солко̄ви майвес. Тамле ма̄т ӯсыӈ ос яныг па̄влыӈ ма̄т о̄лнэ ня̄врамытын ӯщлахтуӈкв сака пӯмащ. Са̄выӈпа̄лэ тув ялнэ̄ныл юипа̄лт аквта ма̄н ялуӈкв мо̄т щёс о̄с во̄вхатэ̄гыт. Ты кастыл ма̄н ня̄врамыт ма̄гсыл са̄внув ӯщлахтын ма̄ щё̄питаӈкв таӈхе̄в». Та юипа̄лт мир пусмалтан Департамент колт ва̄ӈын кӯщаиг рӯпитан нэ̄ Тамара Давыдовна Овечкина ва̄рнэ рӯпатаныл урыл ма̄хумн потыртас: «Ань ма̄н йильпи яныг нэ̄пак щё̄питэ̄в, моще̄ртын ты а̄стлылӯв. Ты нэ̄пакт та урыл хӯлтэ̄в, хо̄т, хумус ос маныр мӯсхалыг щё̄питаӈкв э̄ри. Ты та̄л округув янытыл акв со̄тыра хӯрумса̄т ляпатем са̄всыр ле̄ккар рӯпитаӈкв паты. Онтоловхойплов со̄тыра а̄гмыӈмосыӈ ос сакватахтам ня̄врам пусмалтахтын ос ӯщлахтын ма̄н тотнэ щирыл о̄лэ̄гыт. Тувыл «клещевой энцефалит» а̄гм о̄щнэ те̄рыӈхомлахытн ня̄врамыт ул вос то̄вмавет, ӯщлахтын ма̄т во̄рыӈ ма̄наныл тӯяг тэ̄рпил рассалтавет». Тэ̄н потыртаме̄н юипа̄лт лё̄ӈхыт тармыл о̄лнэ полиция ос на̄й харыгтан щирыл рӯпитан тит хумыг тув кастыл щё̄питахтын урыл потыртасы̄г. Ня̄врамыт ӯщлахтын ма̄н минмыгтанэ̄ныл э̄лыпа̄лт кӯщаит о̄с тах акванатуӈкв ла̄вве̄сыт. Хотьют матыр ва̄руӈкв ат те а̄лыми, штрафыл пинаве.

1077 2014.06.06. Светлана РОМБАНДЕЕВА

Ю̄нтупытыл пусмалтан ле̄ккар. Нефтеюганск ӯс ляпат «Юган» нампа санаторий о̄лы. Ма̄хум тот янгема̄не пусмалтахтэ̄гыт. Ма̄ньщи ос ханты ма̄хум па̄выл ле̄ккаранылн тув ва̄тихал ке̄тыглавет. Ам тув ялмум порат ю̄нтупытыл пусмалтан ле̄ккар ёт потыртасум, наме Наталья Владимировна Гарбуз. Э̄лаль на̄н ань тав потре ловиньтэлы̄н. – Ам Самарский область Отрадный ӯст самын патсум. Нефтеюганск ӯсн 1968 та̄лт омагума̄тягум ёт ёхтысум, школа тыт а̄стласум. Тувыл Тюмень ӯсн медицинский институтн ханищтахтуӈкве минасум, 1982 та̄лт а̄стласлум. О̄влэ̄т «Юганскнефтегаз» нампа медсанчастит ма̄нь ня̄врам пусмалтан ле̄ккарыг рӯпитасум. Ня̄врам ӯримам та̄рвитыӈыщ о̄лмум сыс, ам ханищтахтан курсытн ялантасум, ю̄нтупытыл пусмалтаӈкве ханищтахтасум. Э̄лаль Пятигорск ос Москва ӯсыгт ханищтахтасум, рефлексотерапевт ле̄ккарыг патсум. Ты санаторият 1991 та̄л па̄сыл рӯпитэ̄гум, ма̄хум ю̄нтупытыл тӯщтым пусмалтыянум. Тыт рӯпитанэм сыс ва̄тихал ханищтахта̄лэ̄гум. 1991 та̄л порат тыг Китай ма̄ныл ле̄ккарыт ёхталасыт. Рущ ла̄тӈыл потыртаӈкве ат ха̄ссыт, английский ла̄тыӈ мощ ва̄сыт. Ам ань ты мо̄т хо̄н ла̄тыӈ о̄с ва̄глум, ла̄тӈаныл толмащлаӈкве нё̄тсанум. Та̄н ос а̄нум ю̄нтупытыл пусмалтаӈкве ханищтасаныл. Тувыл Новокузнецк, Новосибирск, Челябинск ӯсытт ханищтахтасум, ты коныпал са̄в нэ̄пак ловиньтасум. Ты рӯпата сака пӯмыщ, ка̄сыӈ хо̄тпан тав яныг парыс тотуӈкве ве̄рми. Ты щирыл пусмалтан ле̄ккарын акваг э̄ри ханищтахтуӈкве ос са̄в нэ̄пак ловиньтаӈкве. Э̄лумхо̄лас алпитэ са̄в точкат о̄ньщи, ка̄сыӈе я̄нас а̄гм пусмалты. Таима̄гыс та̄наныл пуссын ёмащакв ва̄ӈкве э̄ре̄гыт. Нэ̄пакытт ты урыл сака са̄в хансым о̄лы. Ю̄нтупытыл пусмалтан ва̄рмаль рущ щирыл рефлексотерапияг ла̄ваве, ты пе̄с йис пусмалтан тэ̄ла. Тав Китай ма̄т та̄рапаттувес. Ма̄хум ю̄нтупытыл пусмалтаӈкве тот ты о̄вылтаве̄сыт. Тувыл Корея ма̄т ле̄ккарыт тох пусмалтаӈкве патсыт, намаясаныл Суджоктерапия. Ты сака ё̄мас пусмалтан ва̄рмаль, тав ка̄сыӈ хо̄тпан нё̄ты. Ань тэ̄рпит ае̄в, тувыл мо̄т матаранӯв а̄гмыӈыг е̄мтэ̄гыт, са̄всыр аллергия а̄гмыт но̄ххулиглэ̄гыт, хо̄тпа алпитэ лощгуӈкве паты та маныр. Ос ты пусмалтан ва̄рмалюв а̄ти тох э̄лумхо̄лас ю̄нтупытыл пусмалтахтаме юипа̄лт, нэ̄матаре ат а̄гмыӈ, номтэ ёмас. – Манах та̄л яныт хо̄тпа ю̄нтупытыл пусмалтаӈкве ро̄ви, ня̄врамыт тох о̄с пусмалтавет? – Хӯрум та̄лныл са̄т та̄л яныт ня̄врамыт ма̄ньнув ю̄нтупытыл ва̄равет, нэ̄матыр а̄гм ат суйты. Э̄лаль ос яныгхо̄тпа хольт ва̄равет, ве̄ританте̄м о̄лы. Са̄всыр ня̄врам о̄лы, то̄ва пилы, ёл ат ротми, тыглетувле нёвсы, то̄ва ос туп хӯрум та̄лэ, щар ат пилы, са̄лтат хольт сохтыл хуи. Яныгхо̄тпат нёлса̄т нупыл ат та̄л мус ю̄нтупытыл пусмалтаӈкве ро̄ви. А̄гм о̄влэ̄т сумылла̄лы, тувыл хотталь та со̄йми. То̄ванакт хо̄тпа ёлойилматаве, то̄ва нас хуйгала̄лы, ӯщлахты. – Наталья Владимировна, наӈ ань ле̄ккарыг ты рӯпитэ̄гын, таяныт ёмас ва̄рен, ла̄вен, пуста̄гыл о̄лнэ ма̄гыс хо̄тпан маныр э̄ри ва̄руӈкве, хумус о̄луӈкве? – Ам китайцыт ёт са̄в рӯпитасум, та̄н тох ла̄ве̄гыт: «На̄н, Россият о̄лнэ мир, хунь сака а̄гмыӈыг е̄мтэгы̄н, ущ та номсуӈкве патэгы̄н: хумус пусмалтахтуӈкве, манхурип тэ̄рпи аюӈкве э̄ри. Ущ та хо̄нтылы̄н. Ос ма̄н, китайцыт, ты урыл ма̄нь та̄гыл номсэ̄в. Пуста̄гыл о̄лнэ ва̄рмаль ма̄н о̄лнэ̄в палыт ханищтылӯв». Мӯтраӈ китайцыт со̄ль ла̄ве̄гыт, ань ма̄хманув номсэ̄гыт: ма̄н пӯльницат ле̄ккаранувн пусмалтаве̄в, тэ̄рпил миве̄в, пусме̄в тах. А̄ти, тох о̄луӈкве щар ат ро̄ви. О̄лнэ хо̄таланув урыл, алписованув урыл ма̄нтина̄нувн номсуӈкве э̄ри, ле̄ккарытн ма̄н сака хунь э̄ре̄в. Хо̄тал палыт са̄в вит ае̄н, физкультура ва̄ре̄н, мощ хӯтсэ̄н. Ва̄тихал кон ё̄мыгтэ̄н, сыстам лылые̄пыл лылтэ̄н, са̄в мовиньтэ̄н. Ка̄сыӈ хо̄тал ща̄гтым о̄лэлы̄н. Ань телевизор хосыт ю̄нтупытыл пусмалтан ва̄рмаль урыл то̄ванакт лю̄ль потыр хӯлэ̄в, тав эрттам хо̄тпа ат пусмалты. Тамле полщ ань намыл тотаве, ма̄хум аптекан вос ялантэ̄гыт, тэ̄рпи вос ёвтэ̄гыт. Тэ̄рпи ва̄рнэ ос тыналан ма̄хум олн сэ̄лэгыт, тэ̄рпияныл ат те ёвтавет, та̄нанылн лю̄ль, олнаныл но̄х ат лапи. Хо̄тпа хунь матаре а̄гмыӈ, тэ̄рпи аи, мо̄т матаре а̄гмыӈыг е̄мтапи. Тувыл тав мо̄т а̄гмыӈ ма̄тэ ма̄гыс тэ̄рпи о̄с та ёвты, юваялытэ, ты юипа̄лт ос хӯрмит ма̄тэ а̄гмыӈыг е̄мты. Тох акваг та пусмалтахты, тэ̄рпиянэ̄н пусмалтан пе̄нтсыл витыг та тотаве. Ка̄сыӈ хо̄тпа такви вос пусмалтахты, ляпа ма̄хманэ̄н вос нё̄ты. Пуста̄гыл ос со̄тыӈыщ о̄луӈкве э̄ри, ка̄сыӈ э̄лумхо̄лас э̄руптаӈкве э̄ри. Ос щар ма̄к таи То̄рум А̄щув э̄руптэлы̄н. Пуссын пуста̄гыл о̄лэ̄н! Ань потруме̄н та оигпас.

1077 2014.06.06. Людмила ТЕТКИНА

Та̄н рущ ла̄тыӈ ханищтаӈкв ла̄вавет. Мо̄т хо̄н ма̄ныл ань акваг са̄в ма̄хум рӯпитаӈкве ос о̄луӈкве тыг ёхтэ̄гыт. Та̄н халанылт то̄ваныл рущ ла̄тӈыл лю̄льсаӈ потыртэ̄гыт, то̄ват ла̄тыӈ щар ат торгамтэ̄гыт. Ще̄мьяӈ та̄гыл ёхтэ̄гыт, ня̄враманыл школан тыт минэ̄гыт. Рущ ла̄тыӈ ва̄нэ та̄л та̄нанылн тыт ханищтахтуӈкве сака та̄рвитыӈ. Ты ня̄врамыт урыл кӯщаит сапра̄нит потыртасыт. Округ кӯщай нэ̄ Наталья Комарова общественный организациятт рӯпитан хо̄тпат ос ханищтап щирыл рӯпитан ма̄хум тув во̄виньта̄лсанэ. Кӯщай нэ̄ та̄н нупыланыл ла̄выс: «Са̄всыр мирыт юртыӈыщ то̄нт о̄луӈкве патэ̄гыт, хунь та̄н рущ ла̄тыӈ ёмащакв ва̄ӈкве ос янытлаӈкве патыяныл. Ань мо̄т хо̄н ма̄ныл ёхтум ма̄хум та̄нки рущ ла̄тӈыл потыртаӈкве ат хасэ̄гыт ос ня̄враманыл ат ханищтыяныл. Тамле ня̄врамыт школан миннэ̄ныл порат, рущ ла̄тыӈ ат торгамтанэ̄ныл ма̄гсыл, мӯсхал щирыл ханищтахтуӈкве ат ве̄рме̄гыт. Ань та̄н ща̄няныла̄щаныл ёт рӯпитаӈкве э̄ри, тыт э̄лаль о̄луӈкве ке ка̄саще̄гыт, рущ ла̄тыӈ вос ханищтэ̄гыт». Округ янытыл ты ня̄врамыт хумус ханищтавет, та урыл Лилия Максимова, ханищтап департаментыт рӯпитан нэ̄, потыртас. Тав ла̄выс, ань мо̄т хо̄н ма̄ныл тыг ёхтум 51% ще̄мьят та̄нки халанылт ос ня̄враманыл ёт туп ща̄нь ла̄тӈыл потыртэ̄гыт, тыи ма̄гсыл та̄н рущ ла̄тыӈ ат ва̄гыт. Ань тамле ня̄врам сака са̄в о̄лы, яныг ӯсытт та̄н ма̄гсыланыл школат пунсавет, тот пуссын ханищтавет. Акв тамле школа Нефтеюганск ӯст рӯпиты ос хӯрум школа Нижневартовск ӯст о̄лы. Наталья Комарова ханищтап щирыл рӯпитан департаментын ос миграционный службат рӯпитан ма̄хум аквъёт рӯпитаӈкве ла̄всанэ. Ты ня̄врамыт ща̄няныла̄щаныл нэ̄паканыл мӯсхалыг вос уральтыяныл. Э̄рнэ нэ̄пакыт ат ке о̄ньще̄гыт, та̄нки о̄лнэ ма̄нанылн ювле вос ке̄тавет. Кӯщай нэ̄ э̄лаль ла̄выс: «Ма̄н тыт ма̄нки ня̄враманув ма̄гсыл школа ат то̄вылхаты, та̄н кит смена щирыл ханищтахтэ̄гыт. Ма̄н мо̄т хо̄н ма̄ныл ёхтум ня̄врамыт ма̄гсыл яныг школа пӯнсэ̄в, тув са̄в олн та̄стэ̄в. Ты школат ос ёмащакв уральтэ̄н». Сапра̄нин ёхталам ма̄хум ос та̄нки проектаныл урыл потыртасыт. Рустам хазрат Аминов Религиозный Духовный управление мусульман нампа организацият рӯпиты, тав ня̄враманыл рущ ла̄тӈын ос тыт о̄лнэ мирыт янытлаӈкве хумус ханищтыяныл, та урыл потыртас. Ань та̄н «Я знаю, я уважаю, и я изучаю русский язык» нампа проект щирыл рӯпитэ̄гыт. Ня̄враманыл ты урыл са̄всыр хурит по̄слэ̄гыт, потрыт, стихыт рущ ла̄тӈыл хансэ̄гыт, ла̄тыӈ ты щирыл ты ханищтэ̄гыт. Ос акв та порат ма̄хум «Дни славянской письменности и культур» нампа ва̄рмаль урыл потыртасыт. Тамле ялпыӈ хо̄тал Ханты-Мансийск ӯст я̄ӈк на̄тнэ э̄тпос 23-24 хо̄талэ̄т о̄лыс. Ты рӯпата таи ма̄гсыл ва̄рыглаве, рущ ма̄хум та̄нки ща̄нь ла̄тӈаныл вос янытлэ̄гыт ос пе̄с йис ва̄рмаляныл ул вос ёрувлыяныл.

1077 2014.06.06. Людмила ТЕТКИНА

Ма̄вит ӯргалан тэ̄ла э̄лаль тотаве. Я̄ӈк на̄тнэ э̄тпос 23 хо̄талныл Югра янытыл «Спасти и сохранить» нампа акция рӯпитаӈкве о̄вылтахтас. Ань тыт са̄всыр ханищтапыт, касылыт, фестивалит, конференцият ва̄рве̄сыт. Ма̄хум йӣвыт ӯнттэ̄гыт, порс акванатэ̄гыт ос са̄в мо̄т э̄рнэ тэ̄лат ва̄ре̄гыт. Сергей Пикунов, ма̄вит ӯргалан службат кӯщай хум, ла̄выс, тамле рӯпатаныл хосыт та̄н ма̄хум ма̄вит янытлаӈкве, ӯргалаӈкве ханищтыяныл. Округувт ма̄во̄й но̄хвинэ ма̄хум рӯпитэ̄гыт, та̄н са̄в та̄л сыс ма̄витув па̄ӈктысаныл. Тамле акция хосыт та̄н нефтяникыт ма̄вит янытлаӈкве, сыстамтаӈкве о̄с ханищтыяныл. Та̄н ань ма̄во̄й мори ат со̄сантэ̄гыт, во̄р нас тох ат са̄гре̄гыт, тот са̄всыр пе̄с пӯщкат ос пе̄с ке̄рломтыт хо̄та̄ти ат па̄хвтэ̄гыт. Акция рӯпитаӈкве о̄вылтахтам порат Ханты-Мансийск ӯст акв конференция рӯпитас. Тув округ янытыл ня̄врамыт ханищтан хо̄тпат во̄виньта̄лве̄сыт. Та̄н «Экология безопасности жизнедеятельности» нампа предмет урыл тот потыртасыт. Ань ӯсувт то̄ва школат ня̄врамыт ты предметын ханищтаӈкве тах патавет. Тувыл мо̄т школатыт о̄с акв тамле урок тах ва̄раве. Ханищтап департаментыт рӯпитан нэ̄ Антонина Урсу-Архипова ла̄внэ̄тэ щирыл, тох та̄н ня̄врамыт ма̄ньта̄гыл ма̄вит ӯргалаӈкве ханищтыяныл. Акция о̄вылтан кастыл Ханты-Мансийск ӯст ялпыӈ хо̄тал о̄лыс. Ӯскант аквторыг 22 са̄всыр суссылтап рӯпитас. Ка̄сыӈ хо̄тпа таве̄н пӯмащ тэ̄ла хо̄нтуӈкве тот ве̄рмыс. Акв ма̄т ня̄врамыт ка̄тыл хурит по̄слысыт, мо̄т ма̄т ӯйхулыт суссылтаве̄сыт, хӯрмит ма̄т ос тэ̄пкан ӯнттын хорамыӈ лӯптат тыналаве̄сыт. «Лылыӈ со̄юм» студият рӯпитан хо̄тпат а̄кань ва̄руӈкве а̄гирищитпыгрищит ханищтасаныл. Ма̄ньлат ма̄хум «Макулатура, сдавайся» нампа акция ва̄рыгласыт. Ка̄сыӈ э̄лумхо̄лас тув ат э̄рнэ ловиньтан пе̄с нэ̄пакыт миӈкве ве̄рмыс. Ты акция нилахуйплов хо̄тал рӯпитас, ты пора сыс ӯст о̄лнэ ма̄хум 9 арыгкем тонна пе̄с нэ̄пак тув тотсыт. Ма̄хум янытлаӈкве Геннадий Бухтин, губернатор ва̄ӈын хум, ёхталас. Тав ла̄выс, ма̄хум ма̄вит ӯргалан ва̄рмаль урыл потыртаӈкве са̄всыр ма̄ныл тыг ёхталэ̄гыт, ты ма̄гсыл ты акция ма̄ янытыл ань ва̄ве. Ка̄сыӈ та̄л «Обь-Иртышский бассейн: молодёжь изучает и сохраняет природное и культурное наследие в регионах великих рек» нампа конференция ва̄рыглаве. Ты та̄л ма̄ньлат ма̄хум я̄ӈк на̄тнэ э̄тпос 25-29 хо̄талытт акванатхатыгласыт ос ва̄рнэ рӯпатаныл урыл тот потыртасыт. Лӯпта э̄тпост ля̄ххал тотнэ хо̄тпат ма̄гсыл ос «Спасти и сохранить» нампа касыл рӯпитас. Ты касыл «Югория» нампа телекомпания щё̄пита̄лыглы. Ма̄хум ма̄вит ӯргалан ва̄рмаль урыл по̄слум кинаныл тув ке̄тыгласыт. Ты та̄л онтоловхуйпловит фестиваляныл о̄лыс. Акция лӯпта э̄тпос 20 хо̄талэ мус рӯпитаӈкве тах паты, ты пора сыс округувт ма̄вит ӯргалан ма̄гсыл 400 са̄всыр рӯпата тах ва̄раве.

1077 2014.06.06. Александр ВЬЮТКИН

Ла̄тӈув ул вос ёрувлылӯв. Я̄ӈк на̄тнэ э̄тпос хусыт хо̄талэ̄т Ханты-Мансийск ӯст соссаӈ мир о̄лупсав ос ща̄нь ла̄тӈагув урыл заседания о̄лыс. Ма̄хум акванатхатыглан ма̄т щар яныг кӯщаиг губернатор ва̄ӈын хум Геннадий Бухтин ос Ассамблея кӯщай Еремей Айпин о̄лсы̄г. Заседаният округув са̄всыр ма̄ныл ёхталам кӯщаиг о̄лнэ ма̄хум та̄нти ва̄рум рӯпатаныл урыл докладыт ловиньтасыт. Щар о̄влэ̄т Ирина Лисютина докладэ ловиньтастэ. Тав соссаӈ ма̄ньлат ма̄хум ёт рӯпитан Департамент колт кӯщаиг о̄лы. Тав ханты ос ма̄ньщи ма̄хум хо̄т ханищтахтэ̄гыт, та потре урыл о̄лыс: «Ты та̄л округув янытыл са̄т со̄тыра 896 соссаӈ а̄гипыг са̄всыр ма̄тт ханищтахты. Ма̄к са̄в ма̄хум Ха̄льӯс районныл о̄лы. Тувыл акв со̄тыра 506 ня̄врам 39 са̄всыр ма̄тт ханищтахтэ̄гыт. Та юипа̄лт Ханты-Мансийск ӯс, тот акв со̄тыра 139 хо̄тпа 29 ма̄тт ханищтахтэ̄гыт. Кондинский районт 895 ханты, ма̄ньщи ня̄врам 33 школатыт ханищтахтэ̄гыт. Тувыл э̄лаль Нижневартовский, Белоярский ос Сургутский районыт халт са̄в соссаӈ ня̄врам ханищтахты. Ка̄сыӈ йильпи та̄лт соссаӈ мир ла̄тӈыл потыртан ма̄хум мощщами. Лов та̄л ювле хультум порат яныг ӯсыӈ ма̄н ёхтум ханты манос ма̄ньщи ня̄врам та̄нти ла̄тӈанылт потыртасыт, ат те потыртасыт, сакати торгамтасыт. Ань ща̄нь ла̄тыӈ ва̄нэ ня̄врам сака мощща. Ма̄н ня̄врамыт ханищтан Департамент колт ты урыл са̄в номсахтэ̄в. Округувт акв со̄тыра 694 школатт ня̄врамыт та̄нти ла̄тӈаныл ханищтэ̄гыт. Ханты ня̄врамыт халт акв со̄тыра 138 ня̄врам хӯс ханищтахтын колытт ла̄тӈаныл ханищтэ̄гыт. 436 ня̄врам нёлолов колт ма̄ньщи ла̄тыӈ ханищтыяныл. Мо̄лты соссаӈ ня̄врамыт оманыл, а̄тяныл ханищтан урыл титыгласанӯв. Та̄н халанылт ёмас са̄виттем мир та̄нти ня̄враманыл ща̄нь ла̄тӈаныл ханищтаӈкв ат ка̄саще̄гыт. Та урыл та̄н ла̄ве̄гыт: «Манрыг наска̄ссыг ня̄враманув саватаӈкв, ва̄ти манос хоса хультыс, ла̄тӈув тох та мины». Округувт ханты ос ма̄ньщи ла̄тыӈ ханищтан ма̄хум са̄выӈпа̄лэ средний специальнй образование о̄ньще̄гыт. Таима̄гсыл ма̄н са̄всыр ханищтап, та̄н халанылт каснэ курсыт ва̄рыглэ̄в. Округ касылыт но̄хпатнэ ма̄хум ос Россия ма̄ янытыл ла̄тӈыт ханищтан ма̄хум халт касуӈкве те̄тыглыянӯв». Ха̄льӯс районт ня̄врамыт ханищтан щирыл кӯщаиг рӯпитан нэ̄ Наталья Прожога та̄нти ва̄рум рӯпатаныл урыл потыртас: «Ма̄н Ха̄льӯс районувт соссаӈ мир ла̄тыӈ ханищтан са̄т кол о̄лы. Тот нила со̄тыра 989 ня̄врам ханищтахты. Та̄н халанылт акв со̄тыра 506 соссаӈ ня̄врам ла̄тӈаныл ханищтэ̄гыт. Са̄выӈпа̄лэ тот ма̄ньщи ла̄тӈыл потыртан мир о̄лы. Саранпа̄выл школат на̄врамыт са̄ран ла̄тыӈ, Тэ̄к па̄вылт ос ханты ла̄тыӈ ханищтэ̄гыт. 2012 та̄лныл округувт «Языковое гнездо» нампа проект ва̄рим о̄лы. Ма̄н районувт ма̄ньщи ла̄тыӈ ханищтан хӯрум садик о̄лы. Та̄н Саранпа̄вылт, Кульпаст ос Ня̄хщамво̄ль па̄влытт рӯпитэ̄гыт. Тув 65 ня̄врам ла̄тыӈ ханищтаӈкве яланты. Ка̄сыӈ тув ня̄врамыт ӯщлахтын «Мань ускве» ос «Сорни сэй» тит ёмас ма̄г рӯпитэ̄г. Тот та̄н ма̄ньщи мир о̄лупсаныл ос ла̄тӈаныл ханищтэ̄гыт. Ты ма̄г ма̄навн яныг нё̄тмил ва̄ре̄г. Ма̄ньщи ла̄тыӈ ханищтан хо̄тпа ат то̄вылхаты. Ма̄ньлат ма̄хум ӯсыӈ ма̄т о̄лнэ̄ныл юипа̄лт па̄влыӈ ма̄н ва̄нтлуӈкв ат ка̄саще̄гыт». Ты кӯщаиг юипа̄лт А̄с ма̄хманув та̄нти ва̄рыглан наканыл урыл потыртасыт.

1077 2014.06.06. Наталья Анадеева (RUS) Николай МЕРОВ (MNS)

Са̄лыӈ ма̄хманув хо̄нтлын накт нё̄тсыт. Яныг хо̄нтлын накт соссаӈ ма̄хманув хумус хо̄нтлысыт, ты урыл мощща потыр о̄лы. То̄нт са̄выӈпа̄лэ лӯима̄т о̄лум хо̄тпат писалил по̄сын ёмщакв хо̄йнэ̄ныл ма̄гыс снайперыг вуйлуве̄сыт. «Новости Югры» нампа газетат ля̄ххал тотнэ нэ̄ Наталья Анадеева ты ва̄рмаль щирыл потыр кинсыс. Насати, хо̄нтлум накт соссаӈ ма̄хманув са̄лыӈ суныл яныг нё̄тмил ва̄рсыт. Та̄н Ленинград ӯс блокада о̄лум порат тэ̄нут, пормас тув тотыгласыт. 1941 та̄лт яныг таквс э̄тпос Государственный Комитет Обороны СССР приказ щирыл са̄лыӈ суныл яласан хо̄тпат акванатуӈкве патве̄сыт. Соссаӈ хо̄тпат Ямало-Ненецкий округныл ос Коми республиканыл атве̄сыт. То̄нт ты саран, ё̄рн ос саам ма̄хманув са̄лыӈ та̄гыл хо̄нтлуӈкве вуйве̄сыт. Та̄н халанылн акв ма̄ньщи хо̄тпа Семён Сайнахов тув ликмыс. Ты ма̄ньщи о̄йка Ха̄льӯс район А̄нъя па̄вылт самын патыс, тот яныгмас. Ты Тамара Семёновна Мезенцева тав а̄тятэ о̄лыс. Тамара Семёновна ань Ягрим па̄вылт о̄лы. Тав ты урыл ля̄ххал тотнэ нэ̄н Наталья Анадееван тох потыртас: «Ам а̄щум Семён Кириллович, омам ос Анастасия Степановна Сайнаховыг о̄лсы̄г. А̄щум омам Люлюкары па̄вылныл тӯлмантастэ. Э̄кваго̄йкаг акваг А̄нъя па̄вылт о̄лсы̄г. Тэ̄н война о̄вылтахтан мус ат ня̄врам о̄щсы̄г, война холам юипа̄лт о̄с ат ня̄врам самын паттысы̄г. Пуссын аквъёт лов ня̄врам янмалтасы̄г. Хо̄нтлын нак о̄вылтахтам порат а̄щум та̄ра войнан вуйвес. Омам ня̄враманэ янмалтасанэ ос колхозт са̄всыр та̄рвитыӈ рӯпата ва̄рыс. То̄нт ня̄врамыт, нэ̄т ос яныгпа̄ла хо̄тпат та̄нкина̄ныл са̄литта̄л рӯпитасыт. Па̄влыӈ ма̄хум пуссын аквъёт тӯя па̄сныл я̄ӈк по̄льнэ мус ня̄р ла̄глыл по̄лям витыт сусым хӯл алыщласыт. Тэ̄лы порат пувум хӯланыл лувыӈ суныл Ханты-Мансийск ӯсн тотыгласаныл. Ты хӯланыл ма̄гыс та̄н сыртэпыл, коласыл ос са̄ккарыл майлуве̄сыт. А̄тям а̄ще (ам о̄пам) Кирилл Васильевич наме о̄лыс. Тав са̄в пыг о̄ньщис. Ма̄нь пыганэ пуссын Ха̄льӯс пупкол школан ханищтахтуӈкве майлысанэ. Ня̄врамыт халт а̄щум щар янгыг о̄лыс, таима̄гыс тав ща̄няге̄на̄щаге̄н ханищтахтуӈкве ат майвес, юн са̄всыр рӯпата ва̄рим о̄лыс. Школан ат ялантаме ма̄гыс рущ ла̄тыӈ щар ат ва̄с. Хо̄нтлам ма̄т ущта рущ ла̄тыӈ ва̄ӈкве патыс». Ще̄ман о̄йка Ленинград ӯс вуянтас ос Курский дугат хо̄нтлыс. Ма̄хманув тот сака та̄кыщ алыщлахтасыт. Аквматнакт тав китыглавес: са̄лыӈ суныл яласаӈкве ха̄сы манос а̄ти. Тав ва̄им, ха̄сыс, а̄ще са̄лыӈ хумыг о̄лыс. Ты потыр юипа̄лт тав са̄лыӈ сӯныл майвес ос Ладожское нампа тӯр ӯлтта Карелия ма̄ныл блокадный Ленинград ӯсн тэ̄нутпормас тотыглаӈкве ке̄твес. Та порат Ленинград ӯст о̄лум ма̄хум тэ̄тал са̄валасыт. Фашистыт ӯс мӯвылтасаныл, то̄нт тот са̄в мир тэ̄тал порсыс. Ще̄ман о̄йка тув тэ̄нут хартыс, ювле ос ня̄врамыт сунын та̄лттым тотсанэ. «Новости Югры» рущ газетат рӯпитан ма̄ньщи а̄ги Наталья Анадеева ты ва̄рмаль щирыл э̄лаль кисхатуӈкве патыс. Интернетыт Щеман Сайнахов урыл хоты потрыт о̄лсыт, пуссын ловиньтасанэ. Аквматэ̄рт тамле потыр хо̄нтыс: «Приказ 253 стрелковому полку 45 стрелковой дивизии Карельского фронта 1 июля 1944 года». Ты потыр щирыл 1942 та̄лт яныгпо̄ль э̄тпост 28 хо̄талт Сайнахов Семён Кириллович «За отвагу» нампа ма̄гыл по̄сыл майвес. Ленинградский фронтыт тамле ва̄рмаль о̄лыс, Пушкин ӯс винэ порат, немцыт са̄в патроныӈ писалил са̄лтатанув па̄тлуптасаныл, э̄лаль ат та̄ртсаныл, та̄кыщ юв я̄ртхатыгласыт. Ще̄ман о̄йка командирын та писаль лаппо̄илттаӈкве ке̄твес. Тув лаквме̄тэ ня̄лын хо̄йвес ос ка̄ркам ма̄ньщи хо̄тпакве тув граната вущкасаӈкве а̄лымас, ты хосыт пулемёт хотпоилттаӈкве ве̄рмыстэ. Та юипа̄лт тав ма̄хманэ̄н та̄ра пӯльницан тотвес. Китынтыг ос Сталинград ӯс вуянтым ня̄лын та̄кыщ саквата̄лвес. Пӯльницат пусмалтавес, ос э̄лаль лусытаӈкве минас. Ля̄ххал тотнэ нэ̄ ты нэ̄пак э̄лаль ловиньтыматэ, хото̄щатахтас. Насати, тав осетиныг хансым о̄лы. Осетиныт малтып ма̄т о̄лнэ ма̄хум тох ла̄вавет. Ты тэ̄ла щирыл тав округ военкоматын звонитас, та̄н ла̄всыт: «Тамле нам акв хо̄тпа о̄ньщис. Тав Ха̄льӯс район А̄нъя па̄вылныл о̄лыс». Та̄н ла̄внэ̄ныл, ань таима̄гыс тох е̄мтыс, Ще̄ман о̄йка рущ ла̄тӈыл потыртаӈкве ат ха̄сыс, остякыг улпыл ла̄вхатас кос, ос мо̄т щирыл торгамтавес. Осетин ма̄хум мирн ёмщакв ва̄вет, ул таима̄гыс тав та ма̄хум нупыл ты хасвес. Тамара Семёновна 1952 та̄лт самын патыс. А̄ще хо̄нтлум нак урыл сака са̄в ат потырта̄лыс, то̄ва потрыт пуссын ёмщакв номиянэ. Ще̄ман ойка потре щирыл, аквматнакт та̄н Карелия ма̄т ӯнлысыт. Кон татем ащирмаӈ ос сэ̄ӈкв о̄лыс. Сусте̄нт, а̄гирищ торыл пантхатым лю̄ли. Тав палтэ ё̄мыс, китыглахты, ат по̄ляве. Вильтэ̄н а̄ӈкватас, насати э̄ква лю̄ли, тав тох ла̄выс: «Пыгкве, наӈ хо̄нтлэ̄н, хо̄нтлэ̄н, ам ат по̄лявем». Курский дугат хо̄нтлум ва̄рмаль о̄с номыл матыгла̄лыстэ. Акв хотты накт та̄рвитыӈ хо̄нт юипа̄лт щар суйта̄лыг е̄мтыс. Ще̄ман о̄йка писалиӈ та̄гыл траншеял но̄хворатас, а̄ӈкватас, тав э̄лыпалэ̄т мощ э̄лыннӯв немец о̄йка писалиӈ та̄гыл лю̄ли. Сас тув ка̄ртсы̄г, акв ляльт нас та сунсэ̄г. Тувыл немец илттыг ма̄н ёлӯнтылматас. Ще̄ман о̄йка о̄с ювле порыгмас, писале уральтастэ, насати ня̄л та̄л о̄лыс. Тамле ты нак о̄лыглас. Ётылнув хо̄нтлын нак по̄йтыс. Ще̄ман о̄йка А̄нъя па̄вылн юв ёхтыс. Тот тав колхозт во̄раим ос хӯл алыщлым рӯпитаӈкве патыс. Тав хо̄нтлум нак урыл э̄ргыглам э̄ргыт сака э̄руптасанэ, ва̄тихал э̄ргысанэ. О̄йка пе̄с йис о̄лупсат ёмщакв ва̄санэ. 1959 та̄лт тав па̄вылт Ӯй йӣквнэ ва̄рмаль ва̄рыглас. Та ялпыӈ хо̄тал юипа̄лт тав мирколн са̄пранин во̄ввес, партбилетэ пасанын пинуӈкве ла̄ввес. Тав хот ат ро̄хтыс, тох ла̄выс: «Ам ты партбилетум ке̄лп хосыт сэ̄лыслум. На̄н ос хо̄нтлын ма̄т о̄лсы̄на? » Ос тав ня̄враманэ ма̄гыс сака пилыс, та̄нтте̄ныл ул вос хультсыт, таима̄гыс партбилетэ па̄санын пиныстэ ос сысы та минас. Семён Кириллович 78 та̄л о̄лыс. Ня̄лын саквата̄лум ма̄нанэ акваг лоӈхитаве̄сыт. Тамара Семёновна таве акваг пусмалтастэ. Ётыл а̄ще тав нупылэ тох ла̄выс: «А̄гикве, ле̄ккарыг ханищтахтэн, наӈ ка̄тагын татем кӯпнитыг». Тамара Семёновна ле̄ккарыг ат е̄мтыс, о̄лнэ па̄лытыл клуб колт акваг рӯпитас. Тав хунь война урыл кина сунсы, акваг а̄ще номылматыгла̄лытэ, аквтупмат таве тот ка̄салытэ, тав потырта̄лум потранэ ос кинат щар аквхурипат. Ты потыр Наталья Анадеева хансыстэ, ма̄ньщи ла̄тӈыг Николай МЕРОВ толмащластэ.

1077 2014.06.06. Николай МЕРОВ

Во̄рт ӯргалахтым о̄лэ̄н. Ань ма̄лтыпыг е̄мтыс. Сыресыр хащта̄л а̄гмыт нэ̄глэ̄гыт. Ты кастыл мир пусмалтан департамент кӯщай Александр Филимонов ля̄ххал тотнэ хо̄тпат акванатыгласанэ. Тав прививкаукол тӯщтын ва̄рмаль урыл потыртас. На̄н тав потре э̄лаль ловиньтэлы̄н. – Ма̄н ка̄сыӈ та̄л округувт о̄лнэ мир прививкауколыл тӯщтыянӯв. Ты а̄гмыт урыл акваг потыртэ̄в. Ма̄н во̄рыӈ ма̄т о̄лэ̄в. Ань тӯииг е̄мтыс о̄с ке̄рыӈхомлахыт та ква̄лапасыт. Рущ щирыл та̄н «клещиг» ла̄вавет. Та̄н сака та̄рвитыӈ а̄гм (энцефалит, боррелиоз) тотэ̄гыт. Тувыл ос мо̄т ӯитныл а̄гм ха̄хтуӈкве ве̄рме̄гыт. Хо̄тпа ты ӯйн пурасаве ке, тав а̄лпитэ сака исыглы, са̄йтта̄л патуӈкве ве̄рми ос то̄рыгтаӈкве патаве. Пурасам хо̄тпат то̄ват пусмалтаӈкве ат ве̄рмавет, ты а̄гм хосыт хотталь щалтэ̄гыт. Прививкаукол тӯщтуӈкве таима̄гыс ты э̄ри. Ты коныпал мо̄лты та̄л ма̄хум тамле а̄гмыл е̄мталасыт: ты туляремия – ма̄порсӯит ос лё̄мвоит тотнэ а̄гм ос описторхоз – хӯлытныл со̄рыгуй а̄гм. Туляремия а̄гмыл са̄выӈпа̄лэ во̄раян ос ӯйхул янмалтан хо̄тпат ма̄к та̄н ты ха̄хтавет. Ты а̄гм та̄ра ат суйты, кит са̄ткем мины, ущ та сумыллы. Ты а̄гм порат хо̄тпа а̄лпитэ илттыг исыглаве, аквтупмат грипп а̄гм нупыл харты, нё̄влянэ а̄гмыӈыг е̄мтэ̄гыт. Ща̄пак, хулюмхӯл, сорт ос мо̄т хӯлыт хосыт э̄лумхолас «описторхоз» а̄гмыл е̄мты. Со̄рыгуй ул вос о̄ньщегы̄н, хӯланы̄н ёмщакв па̄йтэ̄н ос ша̄ритэ̄н. Тамле та̄рвит а̄гм хосыт хо̄тпа о̄с по̄рсуӈкве ве̄рми. Ты а̄гмыл е̄мтнэ̄н порат сымкакр щар ва̄гта̄лыг паты, алпи ос витыг пе̄рыглы. Ётылнув а̄гм тув ӯнты, хроническииг е̄мты. А̄гмыл е̄мтнэ̄н порат та̄ра пӯльницан минэ̄н. На̄нки ул пусмалтахтэ̄н. Ӯргалахтым о̄лэ̄н, во̄рныл юв ёхтынэ̄н порат маснутаны̄н ёмащакв сунсыглэ̄н.

1077 2014.06.06. Людмила ТЕТКИНА

Ня̄врамыт янытлан хо̄тал. Ханты-Мансийск ӯст о̄лнэ «Торум Маа» музейт ня̄врамыт ма̄гсыл «Ворщик хо̄тал» нампа ялпыӈ хо̄тал ва̄рыглавес. Ты ялпыӈ хо̄тал пе̄с порат хо̄нтаӈ ма̄ньщи ма̄хум та̄н янытласыт. Музейт рӯпитан ма̄хум ты ва̄рмаль урыл пе̄с нэ̄пакыт ос Анна Митрофановна Конькова «День трясогузки» хансум мо̄йтэ̄т ловиньтасыт ос ты ялпыӈ хо̄тал янытлаӈкве о̄вылтахтасыт. Хо̄нтаӈ ма̄ньщит ла̄выгласыт, ворщик ке ёхтыс, я̄ӈк та нёвумты. Пе̄с порат тамле потыр о̄лыс, ты товлыӈ ӯй тыг ёхты, я̄н исы, лэ̄ге̄тыл я̄ӈк сакватытэ, такви товлаге̄т ре̄гыӈ ос малтым хо̄тал ёт тоты. Ворщик луйгим турман ӣтит хотня̄влыянэ ос туи пора лӯи ма̄н во̄витэ. «Торум Маа» музей «Ворщик хо̄тал» лӯпта э̄тпос о̄выл хо̄талэ̄т нилыт та̄л ты янытлавес. Тамле ялпыӈ хо̄тал та̄н ня̄врамыт ӯргалан хо̄тал кастыл ва̄рыглэ̄гыт. Ань Ханты-Мансийск ӯст о̄лнэ ма̄хум ты ялпыӈ хо̄тал ёмащакв ва̄ганыл, ос ка̄сыӈ та̄лныл тув са̄в мир ёхталы. Музейт рӯпитан ма̄хум а̄гирищитпыгрищит ма̄гсыл са̄в пӯмащ ва̄рыгласыт. Та̄н ворщик урыл мо̄йтыт мо̄йтсыт ос ма̄вит урыл са̄всыр а̄мщит а̄мщисыт. Ня̄врамыт са̄лы сун ӯлтта поргысыт, тынщаӈ па̄хвтысыт ос мо̄т щирыл кассыт.

1077 2014.06.06. Тамара МЕРОВА

Сапра̄нит са̄в тэ̄лат урыл потыртасыт. Ювле хультум э̄тпост округ правительство кӯщаит сапра̄нин акванатхатыгласыт ос са̄всыр са̄кконыт э̄рнэ ла̄тӈыл хассаныл. Акв сапра̄нит округ губернатор Наталья Комарова тав пуӈктотыс ос мо̄танэ̄т Геннадий Бухтин. Кӯщаит са̄всыр тэ̄лат урыл потыртасыт. Округув янытыл во̄р но̄хпе̄ламлаӈкве патыс. Ты э̄лыпа̄лт ӯсытыт ос па̄влытыт на̄й харыгтан колыт пуссын ёмщаквег щё̄питахтуӈкве ла̄вве̄сыт. На̄й харыгтан утыт э̄рнэ торыг мӯсхалыг вос рӯпитасыт ос акваг уральтым вос о̄щве̄сыт. Ты о̄вылтыт та̄н природный ресурс департамент па̄лыл ла̄тӈыл хӯлтыглымат. Тот кӯщаиг о̄лнэ хум Евгений Платонов ла̄выс: «Округувт я̄ӈк на̄тнэ э̄тпос кит са̄т сыс китхуйплов ма̄т на̄й о̄выл е̄мтме та̄рапаттысанӯв, та сыс во̄рт 88, 8 гектар са̄вит ма̄тэ на̄йн ё̄свес. Ма̄хум ялпыӈ хо̄талыт порат во̄рт ӯщлахтасыт, во̄раяӈкве ялсыт. Ма̄витув ань авиация ос во̄р уральтан служба па̄лыл ӯргала̄лым о̄ньщаве ос тот на̄й пистам е̄мтнэ порат та̄н та̄ра на̄й лапхарыгтыяныл. Тыи ма̄гыс 13 организацият рӯпитэ̄гыт». Вера Дюдина, округ бюджет олныт ловиньтан нэ̄, потыртас, ты та̄л хӯрум э̄тпос сыс та̄н 39 миллиард 917 миллион арыг солко̄ви сэ̄лсыт. Мо̄лты та̄л тыгыл мощщануве̄г о̄лыс. Ань са̄внув олн налог щирыл атсыт. Ос та олнытыл 34 миллиард 180 миллион солко̄ви са̄всыр программат ма̄гыс холтве̄сыт. Са̄выӈпа̄лэ олныт ма̄хум ханищтан ос пусмалтан ва̄рмалит ма̄гыс та̄стымат. Мо̄т па̄лэ мирн нё̄тмил ва̄рнэ, колыт ӯнттын ос лё̄ӈхыт пиннэ ма̄гыс, ЖКХ, па̄влыӈ ос во̄рыӈ хозяйстват но̄хво̄рмалтаӈкве уртве̄сыт. Туи порат ханищтахтын ня̄врамыт хотты ма̄т рӯпитаӈкве кусылэ̄гыт кос. Тамле тэ̄лат тармыл пуӈк тотнэ хо̄тпат ка̄сыӈ ня̄врам ёт ёмащакв вос потыртахтэ̄гыт ос матыр нё̄тмил та̄нанылн вос ва̄ре̄гыт. Ты программан о̄с я̄нас олн та̄стым о̄лы. Тувыл Алексей Варлаков, рӯпитан ма̄хум ос та̄н тэ̄ланыл ӯргалан департаментыт кӯщай хум, акв йильпи проект урыл потыртас. Ань хотты предпринимателит ка̄сащим матумпа̄ла хо̄тпат та̄нки палтаныл рӯпитаӈкве выганыл ке, та̄н грантолныл нё̄тавет тах. Ётылнув кӯщаит Геннадий Бухтинын китыт сапра̄нин акванатыглаве̄сыт. Та̄н о̄влэ̄т ЕГЭ ва̄рмалит урыл потыртасыт. Премьерминистр РФ Дмитрий Медведев ты урыл о̄с ла̄тыӈ ва̄рыс. Ты та̄л российский итоговый аттестация щирыл Крымт ос Севастополь ӯст школа а̄стлан ня̄врамыт о̄выл щёс номтаныл а̄рталавет тах. Округувт экзамен пирмайтан ма̄гыс колыт ёмащакв щё̄питаве̄сыт. Пуссын о̄лыглан ва̄рмалит кӯщаит та̄нки кос хотыл ищхӣпыӈ утыт хосыт уральтаӈкве ве̄рмияныл. Тувыл «Партнер» нампа компания правительствав ёт аквъёт рӯпитан соглашениенэ̄пакыт ловиньтасыт. Та̄н ма̄хумн о̄лнэ колыт ӯнттын тэ̄лат урыл ла̄вхатэ̄гыт. Кол ӯнттын э̄рнэ пормас та̄нки ва̄ре̄гыт ос колыт молях ӯнттыяныл. Ты коныпал рӯпатата̄л о̄лнэ хо̄тпат та̄нки палтаныл рӯпитаӈкве выганыл. Сургут ӯст кол ӯнттын пормасыт ва̄рнэ завод ӯнттуӈкве ве̄рме̄гыт. Кӯщаитн тамле тэ̄лат мӯстысыт ос та̄н ты ва̄рмалит э̄лаль тотуӈкве ла̄всыт. Мо̄т договорнэ̄пакт «Дорожный карта» о̄вылтыт хансым о̄лыс. Тав кастылэ, та̄н образование, наука, культура ос здравоохранение ва̄рмалит та̄рапаттысаныл ос манах солко̄ви тув холтэ̄гыт, таи а̄рталасыт.

1077 2014.06.06. Николай МЕРОВ

Мо̄йтыт ос потрыт хансэ̄н. Ма̄ньщи мо̄йтыт ос потрыт хансум ма̄ньщи э̄ква Анна Конькова номылматыглан кастыл ань округувт ка̄сыӈ та̄л ня̄врамыт ма̄гыс конкурс ва̄рыглаве. Ты конкурсын нёлоловхуйплов та̄ланыл иӈ ат то̄влын а̄гитпыгыт та̄н тув хансуӈкве ве̄рме̄гыт. Тув акв, кит, хӯрум потыр соссаӈ мир о̄лупса урыл хансуӈкве ро̄ви. Тот тамле номинацият щирыл потрыт вивет: «Стихотворение», «Потыр» (эссе, новелла), «Мо̄йт» (пе̄с йис потыр), «Миф». Ты конкурсын рӯпата ке̄тнэ ма̄гыс ня̄врамытн о̄влэ̄т заявканэ̄пак хансуӈкве э̄ри. Тувыл ос ты тэ̄ла культура Департамент ло̄псыт http: //www. depcultura. admhmao. ru та̄рапаттуӈкве ро̄ви. На̄нки потрын ос заявкан ты адрес щирыл ке̄тэ̄н: электронный адрес Cultura-ugra@admhmao. ru, пищман ос ты адресын: Ханты-Мансийск ӯс, ӯсхулы Мира, кол 14а, 207 колнак. Рӯпатанын лӯпта э̄тпос 30 хо̄талэ мус ке̄туӈкве ве̄рмияны̄н. Культура Департамент ке̄тум потре ма̄ньщи ла̄тӈыг Николай МЕРОВ хансыстэ.

1077 2014.06.06. Светлана РОМБАНДЕЕВА

Ня̄врамыт ӯргалавет. Ня̄врамыт ӯргалан щирыл округ янытыл рӯпитан нэ̄ Татьяна Дмитриевна Моховикова ос ма̄н ма̄вт о̄лнэ савалап ня̄врамыт тэ̄ланыл палт кӯщаиг о̄лнэ нэ̄ Елена Владимировна Немчинова ля̄ххал тотнэ ма̄хум э̄лыпа̄лт ня̄врамыт о̄лупсаныл урыл потыртасы̄г. Тэ̄н ла̄внэтэ̄н щирыл, ювле хультум та̄л сыс 700 арыгтем ня̄врам ос яныгхо̄тпат нё̄тмил киссыт, янгыщ ань о̄лнэ кол урыл китыглахтасыт. Т. Д. Моховикова тох ты потыртас: «То̄ва ӯсытт манос районытт рӯпитан кӯщаит тэ̄ланыл ёмащакв ат ва̄рияныл. Савалап ня̄врамыт нё̄тмил ре̄тыл та̄н палтаныл такос ялантэ̄гыт, ат иӈ хӯнтлавет, пуӈканыл ёлта̄ртым кон та минэ̄гыт. А̄гмыӈмосыӈ ня̄врам о̄щнэ колта̄гыл о̄с сака са̄в, та̄н о̄с нё̄тмил такос во̄ве̄гыт, нэ̄мхотьютн атпыл хӯлавет. Ма̄н ка̄сыӈ тэ̄ла уральтылӯв, пуссын нё̄тыянӯв. Ос хунь ла̄тӈанув акван ат ёхтэ̄гыт, сутытахтэ̄в. Ань ты ва̄рнэ рӯпатав хосыт мо̄лты порат Сургутский ос Нефтеюганский районыгт нила колта̄гыл о̄лнэ колыл майве̄сыт. Ка̄сыӈе а̄гмыӈмосыӈ ня̄врам о̄ньщи, кӯщаит та̄нанылн нё̄туӈкве щар ат тахсыт. Округув янытыл кӯщаит хӯрум ӯст щар ма̄к ёмащакв рӯпитэ̄гыт – Ханты-Мансийск, Нягань ос Мегион. Мо̄т ма̄т о̄лнэ хо̄тпат тай э̄лаль нас пувтыянӯв, молямтыянӯв, ань ка̄сыӈ ня̄врамн вос нё̄тэ̄гыт, пуссын о̄лнэ колыл вос мивет. Округувт о̄лупса ань сака ёмас, ня̄врамыт са̄всыр нё̄тмилыл ва̄равет, садикыт ос школат ӯнттавет. Таима̄гыс тыт ань са̄в ня̄врам самын паты. Ювле хультум та̄лт 27 со̄тыра 876 ня̄врам самын патыс. Савалап ня̄врамыт халт 95, 7% са̄вит колта̄глытн о̄луӈкве вуйве̄сыт, ня̄врам о̄щнэ колт мощща ня̄врам хультыс. Ма̄н рӯпатавт ма̄к таи, ань ня̄врам такви ща̄нягеа̄щаге ёт вос о̄лы. Мо̄лты та̄л 200 са̄вит хо̄тпа та̄нти ня̄враманыл ювле майве̄сыт. Тувыл ка̄сыӈ тамле колта̄гыл ма̄н акваг уральтылӯв, нё̄тылӯв». Я̄ӈк на̄тнэ э̄тпос 15 хо̄талэ – колта̄гыл ялпыӈ хо̄талыг о̄лыс. Ты хо̄талт ма̄ янытыл о̄лнэ мир пуссын мӯйлэ̄гыт, ка̄сыӈ колта̄гыл янытлаве. Татьяна Дмитриевна ос Елена Владимировна округт о̄лнэ ма̄хум пуссын ты хо̄талыл янытласанэ̄н, са̄в ёмас сымыӈ ла̄тыӈ ла̄всы̄г.

1077 2014.06.06. Людмила ТЕТКИНА

А̄гмыӈ а̄гитпыгыт ёнгын утыл мӯйлуптаве̄сыт. Ма̄ньполь э̄тпос 22 хо̄талныл я̄ӈк на̄тнэ э̄тпос 22 хо̄талэ мус округувт «Коробка храбрости» нампа акция рӯпитас. Э̄тпос сыс акв со̄тыра арыгкем э̄лумхо̄лас а̄гмыӈ ня̄врамыт ма̄гсыл ёнгын утыт ке̄тсыт. Тамле тэ̄ла Татьяна Моховикова, ня̄врамыт ӯргалан нэ̄, тав ва̄руӈкве ла̄выс. Акванатым мӯйлупсат тав Ханты-Мансийск ӯст пӯльницат пусмалтахтан ня̄врамытн мӯйлуптасанэ. Татьяна Дмитриевна ла̄выс, хунь та̄н тамле рӯпата ва̄руӈкве номылматсыт, о̄влэ̄т туп рака̄гм о̄щнэ а̄гирищитпыгрищит ма̄гсыл мӯйлупсат акванатсыт. Тувыл мощ номсахтым, та̄н торгамтасыт, мо̄т а̄гмыӈ ня̄врамаквет о̄с са̄всыр уколыл тӯщтавет о̄с мо̄т са̄в а̄гмыӈ процедурал ва̄равет, та̄н о̄с лю̄ньще̄гыт ос савалэ̄гыт. Тыи ма̄гсыл «Коробка храбрости» нампа тэ̄ла та̄н пуссын а̄гмыӈ ня̄врамыт ма̄гсыл ва̄рсыт. Пӯльницан ялме порат тав педиатрический отделеният пусмалтахтын ня̄врамыт ёт хо̄нтхатыглас ос мӯйлупсал мисанэ. Татьяна Моховикова округувт о̄лнэ ма̄хум ос Нефтеюганск ӯст «Светозар» савалап ня̄врамыт колн мӯйлупсат ма̄гсыл яныг пӯмащипа ла̄тыӈ ке̄тыс. Тамле ёнгын ут акванатнэ ма̄хум ня̄врамытн са̄в ща̄гт тотэ̄гыт, ос ня̄врамыт хунь ща̄гтэ̄гыт, мувиньтэ̄гыт, то̄нт моляхнув пусмалтахтэ̄гыт. Лӯпта э̄тпос хӯрмит хо̄талэ̄т ня̄врамыт уральтаӈкве Татьяна Моховикова Нижневартовск ӯсн ялыс. Тот тав пувласпиа̄гм пусмалтан ня̄врамыт ёт хо̄нтхатыглас ос пуссын ёнгын утыл мӯйлуптасанэ. Кӯщай нэ̄ ла̄выс, тамле акция та̄н ва̄тихал ва̄рыглаӈкве патэ̄гыт.

1077 2014.06.06. Александр ВЬЮТКИН

«Вы̄гыр» нампа нэ̄пак йильпииг нэ̄глыс. Ханты-Мансийск ӯст ма̄вит ӯргалан Департамент колт йильпи нэ̄пак суссылтавес. Тав рущ ла̄тӈыл ла̄ваве «Красная книга». Та нэ̄пакт округ янытыл мощщаг хультум ӯйхулыт, во̄рт яныгман са̄всыр лӯптаӈ пумыт ос ла̄хсыт урыл тот хансыма ос хурияныл суссылтавет. «Вы̄гыр нэ̄пак» лов та̄л сыс акв щёс ва̄рыглаве. Ты кастыл кӯщаиг о̄лнэ тит хумыг тув ёхталасы̄г. Акватэ наме Евгений Петрович Платонов, тав округ янытыл ма̄вит ӯргалан Департамент тармыл кӯщаиг о̄лы. Мо̄танэ ос Сергей Владимирович Пикунов, тав ма̄вит ос ӯйхул ӯргалым округ янытыл кӯщаиг рӯпиты. Ва̄рмаляныл о̄вылтан порат кӯщаиг ма̄хум янытлан ма̄гсыл потыртаӈкв во̄выглавесы̄г. Евгений Платонов ла̄выс: «Тыхо̄тал ам яныг пӯмащипа ла̄тыӈ ма̄вит ос ӯйхул ӯргалан ма̄хмытын ла̄ве̄гум. Та̄н та̄рвитыӈ рӯпатаныл ма̄гсыл ма̄н иӈ са̄всыр мо̄рсыӈ ӯйхул ка̄салаӈкв ве̄рме̄в. Та ма̄хмытын ма̄н ня̄враманув яныг пӯмащипа ла̄вуӈкв иӈ патэ̄гыт». Тувыл э̄лаль Сергей Пикунов ла̄выс: «Ам ос ты йильпи «Вы̄гыр нэ̄пак» щё̄питан ма̄хмытын ла̄ве̄гум. Та̄н ты ма̄гсыл са̄в рӯпата ва̄ре̄гыт. Ва̄рум рӯпатаныл щирыл ань ос ма̄вит ос ӯйхул ӯргалан ма̄хмытын кӯстырнуве̄г рӯпитаӈкв паты. Ма̄нтина̄нувн ма̄в сыстамыг ос ӯйхуланув са̄литым щирыл о̄ньщуӈкв э̄ри. Акваннё̄тхатым ань о̄лнэ осыӈ «Вы̄гыр нэ̄пакув» ущ тах во̄втами». Округувт щар о̄выл тамле нэ̄пак 1999 та̄лт та̄ратавес. Нэ̄пак щё̄питан ма̄гсыл тит хо̄тпаг рӯпитасы̄г. Тыи Виктор Андреевич Галинки, тав ань ма̄вит ӯргалан государственный инспекторыг рӯпиты. Тувыл Антонина Федоровна Тарханова, тав округ янытыл о̄лнэ экологический фонд тармыл председателиг о̄лы. Тэ̄н ты тит ёмас, ань ты нэ̄пак щё̄питан кастыл са̄выӈпа̄лэ потрыт атсы̄г. Антонина Федоровна «Заслуженный эколог Российской Федерации» нам о̄ньщи. Ӯйхул ӯргалан урыл хӯрум доклад о̄лыс. Ловиньтам нэ̄паканыл пуссын ма̄вит ӯргалан ма̄т рӯпитан ма̄хмытын щё̄пита̄лве̄сыт. Потраныл халт та̄н ла̄всыт: «Ӯйхуланув, са̄всыр хорамыӈ лӯптанув ос ла̄хсанув хультуптан ма̄гсыл ма̄навн та̄н о̄лнэ ос яныгман ма̄наныл сыстамыг о̄ньщуӈкв э̄ре̄гыт. Ма̄н округувт тамле ма̄ мощща. Таима̄гсыл ма̄н ань ты э̄лаль номсахтэ̄в, хоты ма̄т ӯргалаӈкв э̄ре̄гыт. Округув янытыл тамле хурип нила ма̄ ва̄ре̄в. Акватэ Нё̄ранув ляпат, тувыл хо̄талув нэ̄глын е̄рт тит ма̄ ва̄руӈкв э̄ри. Та коныпал ос тит ма̄ Лордовский ос Базуковский нампа ма̄вит ӯргалан ма̄нь ма̄г янгыг щё̄питаӈкв номсэ̄в. Э̄рнэ нэ̄паканыл щё̄питаӈкв э̄ре̄гыт. Ты ма̄гсыл матахтем та̄л э̄ри. Щар ма̄к са̄в ёмас сыстам ма̄т Нё̄р нупыл о̄лэ̄гыт. Тот ма̄витэ щар ма̄к сыстамыг хультуптаӈкв ты э̄ри. Яныгман мирув ма̄нь та̄гыл ма̄витув сыстамыг о̄ньщуӈкв ос ӯргалаӈкв вос ханьщувлэ̄гыт. То̄нт ты о̄лнэ ма̄в хосан сыстамыг хульты». Тув ёхталам мир пуссын ты йильпи «Вы̄гыр нэ̄пакыл» мӯйлуптавесӯв. Тав, со̄ль, матыр та̄рапаттын ма̄гсыл ёмас нэ̄пакыг тэ̄лыс.

1077 2014.06.06. Александр ВЬЮТКИН

Са̄в та̄л ня̄врамыт ёт рӯпитан нэ̄. Урай ӯст ам ка̄ркам, потрыӈ ма̄ньщи нэ̄ ёт ва̄йхатыгласум. Тав наме Тамара Ивановна Голованова, такви а̄ги о̄парище наме щирыл Тайлакова. Тамара Ивановна щаще̄кватэ, о̄патэ пе̄с та̄гыл Тап нампа ма̄нь па̄вылт о̄лсы̄г. Та па̄вланыл Конда ос Тап я̄г акванпатнэ ма̄т о̄лыс. Конда я̄ ва̄та хосыт о̄лнэ пе̄с па̄влыт пуссын акв я̄ ва̄та хосыт ӯнлэ̄гыт, туп Тап па̄вланыл тапал ва̄тат о̄лыс. Тамара Ивановна 1952 та̄лт та̄л котиль э̄тпост Тап па̄вылт самын патыс. А̄тятэ наме Иван Александрович о̄лыс. Колхозаныл яныг о̄лме порат тув палыт ӯйхул тэ̄нэ кастыл пум ва̄рнэ, хӯл алыщлан хумыг рӯпитас. Тэ̄лы на̄йив са̄грыс ос во̄раяс. Оматэ наме Дарья Васильевна, тав ос мис поснэ нэ̄г рӯпитас. О̄патэ наме Александр, яныг хо̄нт порат тав Ленинград, ань Санкт-Петербург ӯс, по̄хат порслувес. Щаще̄кватэ̄н похоронка нампа нэ̄пакыл атпыл тотыглавес. Война юипа̄лт рӯтананыл юио̄выл пищмат ёхталан ма̄н са̄в пищма те̄тыгла̄лсыт. Тувыл ювле пищмал ёхталаве̄сыт, тот хансым о̄лыс: «Александр Георгиевич хо̄т порслувес, ат ва̄ве, тав наме нэ̄мхо̄т а̄тим. Э̄рыӈ ма̄н ётув хо̄нтлан ма̄хум палт минас». Тамара Ивановна мощ ётылнуве та̄рапаттыстэ. Хо̄нт а̄стын юипа̄лт са̄в мир тамле хурип пищмал ёхтыглаве̄сыт. Опатэ Александр Георгиевич войнан минам порат щаще̄кватэ Наталья Семёновна ат ма̄нь ня̄враманэ ёт хультыс. Халанылт тит а̄ги, хӯрум пыг яныгмасыт. Ня̄враманэ тыттын ма̄гсыл Наталья Семёновна са̄в рӯпитас. Пыганэ мощ яныгнуве̄г е̄мтманыл юипа̄лт ущ кӯстырнуве̄г о̄луӈкв патыс. Тамара а̄тятэ̄н потырта̄лвес, хумус тав оматэ хӯл пувим, на̄йив са̄грим ос пум ва̄рим э̄тэхо̄талэ рӯпитас. Юв мощщаквен ёхталы, ня̄враманэ тыттыянэ, тувыл рӯпитаӈкв о̄с та мины. Щаще̄кватэ тав о̄с ёмщакв номитэ, тох ла̄выс: «Са̄в рӯпитаме ма̄гсыл тав такви та̄ланэ̄н ат сусхатас. Тав матумнуве̄г о̄лыс». Тамара Ивановна самын патум Тап па̄влэ̄т нила класс мус ханищтахтас. Тувыл Леуши па̄вылн интернатын э̄лаль ханищтахтуӈкв те̄твес. Каникулытт ӯщлахтын хо̄талыт порат а̄тятэ̄н аквписыг юв тотыглавес. Леуши па̄вылт иӈ нила та̄л ханищтахтас. Нёлолов класс а̄стламе юипа̄лт Ханты-Мансийск ӯсн ня̄врамыт ханищтан нэ̄г ханищтахтуӈкв минас. Та юипа̄лт Тобольский институтн «Физикоматематический» факультетн ханищтахтуӈкв минас. Тот хӯрмит курс а̄стламе юипа̄лт о̄йкаӈыг е̄мтыс. Тувыл та̄ра Урай ӯсн ювле та ва̄нтлыс. Ань о̄лнэ ӯсн ёхтуме порат о̄влэ̄т тав ат та̄л ня̄врамыт ханищтас. Тувыл садик колн воспитателиг патхатас. Тот тав пенсиян миннэ̄тэ мус рӯпитас. Ань тав ла̄выс: «Урай ӯс о̄лнэ то̄ва ма̄хум ёт ма̄ньта̄гыл ва̄йхатэ̄гум. Хунь хо̄т ка̄салавем, ханьщавем, аквписыг пащалахтэ̄гыт. Та̄н ла̄вум акв «Паща» ла̄тӈыл, ам сымум аквтупмат та ка̄мнями». Тэ̄н о̄йкатэ̄нтыл тит пыг янмалтасы̄г. Пыгаге сас ще̄мьяӈыг, Урай ӯст о̄лэ̄г, омаге̄на̄тяге̄н акваг нё̄тэ̄г. Тамара Ивановна щаще̄кватэ о̄лме порат ма̄ньщи ла̄тӈув потыртантем торгамтастэ кос. Та па̄сныл хосаг е̄мтыс, ла̄тӈув хотёрувластэ. Пенсиян ква̄лме юипа̄лт нас тох ат о̄лы. Яныгпа̄лаг о̄лнэ ма̄ньщи хо̄тпат ёт ка̄сыӈ са̄тыт хо̄талт акванатхатыглэ̄гыт. Та̄н акванатхатыглан ва̄рмаляныл «Возрождениег» намаясаныл. Та̄н тот а̄канит ю̄нтэ̄гыт, сакныл ма̄ньщи хорам хартуӈкв ханищтахтэ̄гыт, ма̄ньщи ла̄тыӈ ханищтэ̄гыт ос ма̄ньщи э̄ргыт э̄рге̄гыт. Урай ӯст о̄лнэ ёмас колта̄глыт са̄в со̄т вос о̄ньще̄гыт, ня̄враманыл пуста̄гыл вос о̄лэ̄гыт! Та̄нти На̄й-О̄транылн вос ӯргалавет!

1077 2014.06.06. Валентина УЗЕЛЬ

Мирув янытлан нэ̄кве. Ма̄н акв ма̄ньщи нэ̄кве̄в стихыт хаснэ̄тэ ма̄гыс мирн ва̄ӈкв патвес, тав наме Светлана Селивёрстовна Динисламова, а̄ги о̄парищ наме Садомина. Тав ань такви Тагт па̄влэ нупыл ялыс, тот па̄влыӈ мир ёт хо̄нтхатыглас. Ме̄н тав ётэ ты урыл потыртасме̄н, тав потре ловиньтэлы̄н. – Наӈ на̄ӈти па̄влын тӯяг ялсын. Газетав ма̄гыс потыртэн, маныр тот ва̄рсын? Хотьют ёт тот хо̄нтхатыгласын? – Тот ам Тагт па̄вылт о̄лнэ мир ёт хо̄нтхатыгласум. Ма̄н клубт, ёнгын колт акванатхатыгласӯв. Любовь Зорина тав ты ва̄рмаль ва̄руӈкве номылматас, а̄нумн тыг Ханты-Мансийск ӯсн свонитас, ме̄н потыртахтасме̄н, тув таима̄гыс ты ялсум. – Наӈ ётын хо̄нтхатыглан ма̄гыс са̄в хо̄тпа ёхталас? – Клубт сака са̄в мир ат о̄лыс, ва̄тахтем хо̄тпа. А̄нумн та̄н ётаныл потрамаӈкве сака пӯмыщ о̄лыс, та̄нанылн стиханум ловиньтасанум. – Па̄влыӈ ма̄хманын наӈ стиханын хумус хӯнтлысаныл? Маныр та̄нанылн потыртасын? – Тагт па̄вылт о̄лнэ хо̄тпатн, ам номсэ̄гум, пӯмыщ хӯнтлаӈкве о̄лыс. Ам та̄нанылн са̄ртын ма̄ньщи мир урыл ос ма̄ньщи ла̄тыӈ урыл потыртасум. Тамле потрыт ка̄сыӈ хо̄тпан сымын щалтэ̄гыт. Пе̄с порат, хунь рущ ма̄хманув тыг иӈыт ёхтысыт, то̄нт ма̄н мирув сака ёмащакв о̄лыс. Атса̄т та̄л минам порат ма̄ньщи мир сака ё̄р мирыг о̄лыс, са̄в ва̄рмаль то̄нт ва̄руӈкве ха̄сыс. Ань ла̄ве̄гыт – ма̄н туп вораяӈкве ос хӯл алыщлаӈкве ха̄сэ̄в. Ва̄им, ты сака э̄рнэ ва̄рмаль, тыи та̄л мирув о̄луӈкве ат ве̄рми, хосат та̄гыл тох мирув о̄лыс. Ос ты коныпал тав иӈ са̄в ва̄рмаль ва̄с. То̄нт, пе̄с порат, ма̄ньщи хо̄тпат ня̄нь янмалтаӈкве ха̄ссыт, ке̄р толтуӈкве ос та ке̄рныл са̄всыр пормасыт ва̄руӈкве, тыналахтын ва̄рмаль о̄лыс, са̄всыр э̄лысам ма̄н яланта̄лсыт – яныг ярмаркытн, тот вы̄гыр сов ӯит, сэ̄мыл сов ӯит мо̄т пормасытн пе̄нтса̄лсыт. То̄нт ма̄ньщит хо̄нтлан ва̄рмаль о̄с сака ёмащакв ва̄сыт. Нё̄р тыпал е̄рн ма̄ньщи мир о̄лнэ ма̄н нэ̄мхо̄тпа хоса та̄лыт миннэ̄ныл сыс ёхтуӈкве ат ве̄рмыс, сака няӈраг хо̄нтлам ка̄нащит ос та̄н аяӈхумпыганыл о̄лсыт. Ты урыл ам Тагт па̄выл мирн потыртасум, тувыл стиханум ловиньтасанум. – Па̄влыӈ мирн, рӯтанын матыр ла̄тыӈ газетав та̄ра те̄тэ̄гын? – Тагт па̄вылт о̄лнэ хо̄тпатн са̄в ёмас ла̄тыӈ ла̄вуӈкве таӈхе̄гум. Та̄н э̄лаль ос тамле сымыӈ хо̄тпаг вос о̄лэ̄гыт, ёмас рӯпата вос о̄ньще̄гыт, ще̄мьянылт пуссын пуста̄гыл вос о̄лэ̄гыт, ня̄враманыл э̄лаль вос ханищтахтэ̄гыт. Ань о̄лнэ ка̄сыӈ хо̄тпан са̄в мӯтра ва̄ӈкве э̄ри, са̄в мӯтра ханищтаӈкве, то̄нт тах о̄лупсаныл кӯпнитнуве̄г паты. Ань о̄лнэ йис ханищтап та̄л рӯпата хо̄нтуӈкве та̄рвитыӈыг патыс. Ня̄врамыт, ханищтахтэ̄н, пӯмщалахтэ̄н, алам пе̄с йис порат о̄лум на̄н яныг щаще̄кваныно̄панын, ане̄кванынащо̄йканын сака са̄в ва̄сыт. Та̄н сака са̄в номтыӈмӯтраӈ потрыт, мо̄йтыт хультуптасыт, матъёмас ты потрыт венгр ос финн учёныитн яныгса̄т атпан та̄л арыгтем па̄сныл ёлхансыгла̄лве̄сыт. Тыхо̄тал ты потрыт ловиньтым, самвитанув нэ̄глэ̄гыт – яныг номт, яныг мӯтра та̄н та ва̄мыт. Акв стихум ловиньтэлы̄н. "Витсам" Амти мāм нэ̄ – лāтыӈ тāл ат ōлэ̄гум, Нотум палытэ̄т щāнь лāтӈум ӯлылэ̄гум, Номтум вōйт овим потранум лāвиянум, Сымум вōйт хуим потранум тотыянум. Тагт я̄ сыстам витквет витсамыг ове̄гум, Сульгин я̄ӈкыт халт я̄ӈксамыг вольге̄гум, Сōсхатнэ раквыт ёт раквсамыг патэ̄гум, Ё̄ӈхамлан тӯйт ёт тӯйтсамыг ё̄ӈхе̄гум. Йисыт миннэ̄ныл сыс сāв щёс ōлыглāлмум, Щāньтем сāнсаге̄т сāв щёс ӯнлыглāлмум, Овыӈ я̄ витсамыг аквнакт хунь овсум, Мāньщи мирум халт аквнакт хунь ōлсум. Кāсыӈ вōр лё̄хъясыт лāглум ё̄масāлум, Э̄лаль миннэ лё̄ӈх номттем хōнтсāлум. Тōрум мāвит э̄рге ам та хӯнтамлāлмум, Щāньтем э̄ргум э̄рге ам та э̄ргалтамлум. Суиӈыщ ман суйтāл э̄ргум ōвылтаслум, Самвит сэ̄гумтāлым кāсум оссувласлум, Ōлнэ хосытумтыл вос витсамыг хультэ̄гум, Миртем э̄ргытпотрыт ул вос ёрувлэ̄гум. С. Динисламова ёт В. Хозумова потыртас.

1077 2014.06.06. Людмила ТЕТКИНА

Хо̄нтаӈ ма̄ньщит нэ̄пакыт ловиньтаӈкве э̄руптэ̄гыт. Та э̄тпос оигпам э̄лыпа̄лт 27 щислат библиотекат янытлан хо̄талыг о̄лыс. Ма̄н округувт яныг ӯсыт манос ма̄нь па̄вылквет 237 нэ̄пак ловиньтан кол о̄лы. Акв тамле библиотека Кондинский район Леуши па̄вылт рӯпиты. Татьяна Александровна Нохова, ты библиотекат рӯпитан нэ̄, ла̄выс: «Леуши па̄вылт нэ̄пак ловиньтан кол 60 арыгкем та̄л о̄лы. Ам яныгпа̄ла хо̄тпат ёт хо̄нтхатыгласум, ты ва̄рмаль урыл китыгласанум. Александра Кузьмовна Питухина, ма̄ньщи э̄ква, таи а̄нум ла̄выс, Леуши па̄вылт о̄лнэ пупколт нэ̄пак ловиньтан кол рӯпитас, рущ ла̄тӈыл «изба читальня» намаим о̄лыс. Тав ла̄вме щирыл, ма̄н па̄влувт библиотека 90 арыгкем та̄л рӯпиты. Ань 530 э̄лумхо̄лас библиотекан хасхатым о̄лэ̄гыт, та̄н халанылт 210 – ня̄врамыт. Ма̄хманув тыг вос ёхталасыт ос нэ̄пакыт вос ловиньтасыт, ам акваг са̄всыр суссылтапыт, ялпыӈ хо̄талыт ва̄рыглэ̄гум. Па̄влувт коррекционный школа рӯпиты. Ня̄врамыт тыг район янытыл ханищтахтуӈкве ке̄тавет. Та̄н ма̄гсыланыл ам суссылтап о̄с щё̄пита̄лэ̄гум. Акв порат са̄всыр пе̄с а̄нысаныт, ма̄ньщи па̄йпыт, со̄втыт ос мо̄т утыт тыт суссылтасанум. Ня̄врамаквет ты выставкал сака пӯмщалахтасыт. Ань та̄н ва̄тихал тыг ёхтала̄лэ̄гыт. Па̄влыӈ ня̄врамыт нэ̄пакыт вос ловиньтасыт, та̄н ма̄гсыланыл о̄с са̄всыр пӯмащ ва̄рыглэ̄гум, са̄всыр касылыт щё̄питалэ̄гум. Ловиньтан нэ̄пак хосыт са̄всыр ла̄тыӈ китыглэ̄гум, та ня̄врамыт хотьют са̄внув ва̄г, мӯйлупсал мӯйлуптыянум. Ка̄сыӈ та̄л ма̄ньполь э̄тпос «Неделя детской книги» нампа ялпыӈ хо̄талыт ва̄рыглэ̄гум. Туи порат нэ̄пакыт библиотекат виӈкве ул вос ёрувласыт ос яныг программа щё̄пита̄лэ̄гум. Яныг хо̄тпанув тыг во̄выглаӈкве ат э̄ри, та̄н тай нэ̄пакыт ловиньтаӈкве ка̄саще̄гыт. Хӯрум та̄л «Центр общественного доступа» тыт рӯпиты. Ма̄хум интернет щирыл рӯпитаӈкве библиотекат ве̄рме̄гыт. Па̄влувт ты ут сака лю̄льсаӈ рӯпиты, тыи ма̄гсыл ма̄ньлат ма̄хманув акваг тыг ёхталэ̄гыт. Яныгпа̄ла хо̄тпанув компьютерыл рӯпитаӈкве о̄с ханищтахтыянӯв. Тамле ханищтап ма̄н хӯрум щёс ва̄рыгласӯв. То̄ва яныгпа̄ла хо̄тпат ты утыл рӯпитаӈкве молях ханищтахтасыт, то̄ват щар ат ве̄рмысыт, акв хо̄тал ёхталасыт, тувыл сысы та минасыт. Ма̄н библиотекат туп 18 со̄тыра арыгкем нэ̄пак о̄ньще̄в. Тыи ма̄гсыл ты компьютер сака э̄ри, интернет хосыт са̄всыр нэ̄пак хо̄нтуӈкве ос ловиньтаӈкве ро̄ви. Соссаӈ ма̄хум пе̄с йис ва̄рмаляныл ос ща̄нь ла̄тӈаныл урыл хансым нэ̄пак тыт сака мощща. Ма̄ньщи ос ханты писателит хансум нэ̄паканыл тай о̄ньще̄в. Мо̄лты та̄л Юрий Вэлла, стихыт хансум ё̄рн хум, а̄тимыг е̄мтыс. Тав нэ̄паканэ ам акванатыгласанум ос суссылтап ва̄рыгласум. Ма̄хманув ты суссылтап ка̄салым, нэ̄паканэ ловиньтаӈкве вуйла̄лсаныл. Еремей Айпин потранэ о̄с тыт о̄лэ̄гыт, тав нэ̄паканэ ма̄хум ловиньтаӈкве сака э̄руптэ̄гыт. Андрей Тарханов хансум нэ̄паканэ ос пуссын тыт акванатсанум. Ма̄ньщи о̄йка тыт самын патыс, тыт яныгмас, школат тыт астластэ. Ёмас о̄лнув, Андрей Семёнович яныгмам па̄вылн ке ёхталанув, ма̄хманэ ёт ва̄щиньтахтанув, та̄нанылн такви нэ̄паканэ урыл потыртас ос стиханэ ловиньтас. Татьяна Александровна библиотекат 18 та̄л рӯпиты. Нэ̄пакыт ловиньтаӈкве такви э̄рупты, тыи ма̄гсыл рӯпататэ ёмащакв ва̄ритэ, ма̄хманэ нэ̄пак ловиньтаӈкве ханищтыянэ.

1077 2014.06.06. Тамара МЕРОВА

Тӯлыглапыт хурин по̄слысанэ. Музеит янытлан хо̄талт ма̄хум ӯщлахтын ма̄гыс са̄всыр колытытн во̄виньта̄лве̄сыт. Та̄н пуссын олн ойтнэ та̄л тув щалтсасыт, ос маныр ва̄рмалит тот о̄лэ̄гыт, мӯсхалыг пӯмщалаӈкве ве̄рмысыт. Г. С. Райшев, ка̄тыл хурит по̄слын о̄йка, галереямастерской колэ̄т са̄в ня̄врамыт ща̄ньа̄щаныл ёт атхатыгласыт. Тот «Музейная ночь с маэстро2014 » нампа программа щё̄пита̄лвес. Кон кол а̄висӯнт по̄хат мӯй ма̄хум Олег Боровков ӯрсанэ, тав саксофоныл нё̄тнэ э̄рыгсов таныт ёнгыс. Тувыл Геннадий Райшев мӯй ма̄хум ёт пащалахтас ос та̄наныл о̄влэ̄т кон матыр по̄слуӈкве ла̄всанэ, ётыл юв суссылтапыт сунсыглаӈкве во̄всанэ. Музей кант яныг осыӈ то̄рыт нортве̄сыт ос са̄всыр а̄хвтасыт ла̄кквапиным о̄лсыт. Ня̄врамыт ща̄ньа̄щаныл ёт тув ё̄мантасыт ос кисточка ка̄тн вуим а̄хвтасыт са̄всыр о̄льпыл сартсаныл ос мувлахи то̄р тармыл хурит по̄слысыт. Та̄наныл «Югорская легенда» яныг хури ва̄руӈкве э̄рыс. Мо̄т хо̄тпат мольберт нампа па̄рт тармыл хурит по̄слуӈкве патсыт. Ты хотьют са̄всыр хаснэ йӣвытыл, мелыл манос о̄льпыл по̄слуӈкве ка̄сащас, таи та вис. Акв нэ̄ ӯсувт о̄лнэ Храм кол нупыл сунсым та кол по̄слуӈкве патыс. Лена увщим школат ханищтахтаме порат о̄с сака ёмащакв по̄слуӈкве ха̄сыс, ань тав ма̄н Саранпа̄выл ляпат ӯнлын Нё̄ранув суссылтаӈкве тахмаяс ос таиянэ по̄слыс. Геннадий Степанович ка̄сыӈ хо̄тпа ляпан ёхталас, та̄н ётаныл потыртас манос матыр урыл хӯлтыглас. Тувыл мӯй ма̄хум музей колн щалтсыт. Тот «Хо̄тал» нампа обскоугорский театрыт рӯпитан хо̄тпат ос «Э̄ргыт, йӣквыт пувлын ма̄хум» нампа коллектив пӯмыщ ёнгилыт ва̄рсыт ос мощ тӯлыглахтасыт. Тот мӯй ма̄хум э̄лыпа̄лт культурат рӯпитан кӯщаит ос кит искусствоведнэ̄г Надежда Владиленовна Сухорукова, Наталья Николаевна Фёдорова потыртасыт. Тувыл «Диалоги с Райшевым: Надежда Талигина «Медвежьи игрища» суссылтапе сунсуӈкве во̄вве̄сыт. Надежда Михайловна ханты нэ̄, тав Сыня я̄ ва̄тат Ямалт самын патыс. Ма̄нь та̄гыл са̄всыр мӯтрат ва̄ӈкве яныгхо̄тпатныл ханищтахтас, матыр пе̄с накыт о̄вылтыт акваг пӯмщалахтас. Ты нэ̄ совыл, хӯлсовыл, нуил, то̄рыл пормасыт ю̄нты, сакныл хорамыӈ утыт харты. Ань ханьщувлам тэ̄ланэ пуссын э̄лаль тотыянэ ос мирн суссылтыянэ. Тав 1980 та̄лт Салехард ӯст культурнопросветительский училище а̄стлас. Ётыл Москва ӯст С. Г. Строганов нампа художественный училищат ханищтахтас. Ос Салехардыт Л. В. Лапцуй нампа культура ос искусство училищат ня̄врамыт ханищтас. Ань история ос археология институтт наука рӯпата ва̄ри. Надежда Талигина ка̄тыл нё̄тнэ̄г ва̄рум пормасанэ ма̄гыс «Ма̄щтыр намыл» маима о̄лы, ты коныпал история наукат учёный нам вуянтас. Сыньский ханты ма̄хум культураныл урыл са̄в потрыт ос нэ̄пакыт хансыс, тувыл ка̄тыл нё̄тнэ хурит по̄слы. Ка̄сыӈ по̄слум хуритэ̄т Надежда Михайловна лӯима о̄лупсат э̄лумхо̄лас та̄кыг о̄лнэ ё̄ре ос ё̄р номтэ суссылтытэ. Тав по̄слум хуриянэ Москва, Салехард, Санкт-Петербург, Сургут, Тюмень, Ханты-Мансийск ӯсытыт мирн суссылтаве̄сыт. Сомбатхей ӯс Венгриян ос Женева ӯс Щвейцария хо̄н ма̄н тотыглаве̄сыт. Ань тыт о̄с сака ёмас суссылтап ва̄рвес. Тувыл мӯй ма̄хум мо̄т колнакт акванатве̄сыт, тот «Музыкальное приношение» концерт о̄лыс. Гнесиных нампа академия филиалыт ханищтахтын нэ̄г Ирина Пасхальная ос Ирина Поспелова тот э̄ргысы̄г. Та юипа̄лт Геннадий Райшев рӯпитан колэ ма̄хумн янытэ̄т суссылтаве̄сыт ос «Моя Сибирь» мозаика яныг хури о̄вылтыт потыртасыт. Акв та сыс «Природы ос Человека» нампа мо̄т музейт о̄с акв пӯмыщ ва̄рмаль о̄лыс. Тот рӯпитан хо̄тпат «Парк советского периода» суссылтап ва̄рыгласыт. Та̄н та та̄лыт порат о̄лыглам накыт щё̄пита̄лыгласыт ос мӯй ма̄хум тув мӯйлуӈкве во̄выгласаныл. Ня̄врамыт ма̄гыс я̄нас колнак о̄лыс, та̄нанылн советский порат по̄слым мультикыт суссылтаве̄сыт. Вожатыиг масхатам а̄гитпыгыт ня̄врамыт ёт пе̄с ёнгын утыл ёнгысыт. Тувыл та̄н ща̄ньа̄щаныл октябрёнкаг ос пионерыг о̄лум пораныл урыл потыртасыт. Яныгнув а̄гирищит, пыгрищит «Юный техник», «Продлёнка», «Живой уголок» нампа кружокытын ӯрве̄сыт. Мо̄т колнак «коммунальный квартира» щирыл ва̄рвес. Са̄ртын китхӯрум колта̄гыл аквъёт о̄лсытхӯлсыт. Ань кол пормасыт аквта хольт ӯнтталаве̄сыт. Ще̄мьяӈ ма̄хум пе̄с щирыл масхатыгласыт ос о̄лупсаныл суссылтасаныл. Ня̄врамыт стихыт ловиньтасыт, ма̄ньлат хо̄тпат гитарал, гармошкал ёнгысыт ос э̄ргысыт. Тувыл ма̄хум са̄всыр пе̄с йӣквыт йӣквуӈкве ханищтаве̄сыт. Ты коныпал лото ёнгысыт, пе̄с газетат, журналыт ловиньтасыт ос сыресыр советский маркат суссыт. Акв колнакт мӯй ма̄хум ща̄й аюӈкве ос тэ̄пъялаӈкве ве̄рмысыт. Музейт хо̄тал палыт сака пӯмащ о̄лыс.

1078 2014.06.20. Александр ВЬЮТКИН

Рӯтыг о̄лнэ мирыт ма̄н ма̄вн ёхталасыт. Лӯпта э̄тпост онтоловит хо̄талэ̄т Ханты-Мансийск ӯст «Консультативный Комитет финноугорских народов» нампа заседание о̄лыс. Ты кастыл са̄всыр ма̄ныл, са̄всыр ла̄тӈыл потыртан рӯт мирыт тыг ёхталасыт. То̄ват ос та̄нти тэ̄ланыл щирыл тыг ёхталаӈкв ат ве̄рмысыт. Ань сараныт, ё̄рныт, мордва ос Финляндия ма̄ныл ма̄хум тыт о̄лсыт. Ты Консультативный Комитет заседаниятэ акв хо̄тал минас. Тот халувт потыртан кастыл пуссын аквъёт титхуйплов хо̄тпа о̄лыс. Мӯй ма̄хум ёт пащалахтын ма̄гыс округ губернатор ва̄ӈын кӯщай хум Геннадий Бухтин ёхталас. Финноугорский мирыт янытлан ос юртыӈыщ о̄лнэ ва̄рмаляныл урыл ма̄н потрув о̄лыс. Ос э̄лаль ва̄рнэ рӯпатав акваннё̄тхатым тах ва̄рилӯв. Таквсы Петрозаводск ӯст яныг конференция ва̄раве. Тот сӯкыр э̄тпос хӯрмит щислат заседание тах е̄мты. Ты кастыл тот ань пуссын щё̄питаве. Ка̄сыӈ мирныл тув хӯрум хо̄тпа ёхталаӈкв во̄вавет. Хоты ма̄ныл ма̄хум ёхтэ̄гыт, та̄нанылн та̄нти ва̄рум рӯпатаныл ос о̄лупсаныл урыл акв доклад ловиньтаӈкв э̄ри. Докладаныл са̄т кум палытыг вос о̄лы. Ты урыл Алексей Цыкарев потыртас. Тав финноугорский ма̄ньлат ма̄хум ёт рӯпиты. Та юипа̄лт ма̄ янытыл о̄лнэ соссаӈ ма̄хум ма̄гыс 2014 та̄лт сӯкыр э̄тпос 22-24 хо̄талытт Америка Нью-Йорк ӯст конференция ва̄раве, ты урыл о̄с потыртавесӯв. Тот маныр рӯпата ма̄нь мирыт ма̄гыс ва̄раве, та урыл потраныл е̄мты. Тув ка̄сыӈ мирныл аквтит хо̄тпа ялуӈкв ве̄рми. Мощ мо̄лалнув Нью-Йорк ӯсн ялнэ ма̄гсыл ма̄ньщи мирныл Оксана Рыжкова пе̄риявес. Оксана ат те мины, то̄нт Елена Фризоргер тув ялы. Петрозаводск ӯст доклад ловиньтан щирыл ос Николай Меров пе̄риявес. «Консультативный Комитет финноугорских народов» оигпан э̄лыпа̄лт Алексей Цыкарев Карелия ма̄т о̄лнэ ма̄ньлат ма̄хум ва̄рнэ тэ̄ланыл урыл потыртас, тав ла̄выс: «Ма̄н республикавт киновидео нампа ва̄рмальн ма̄ньлат ма̄хум ханищтан нампа кол пунсуӈкв номсэ̄в. Тот ханищтахтын ос ща̄нь ла̄тӈыл потыртан студентыт хӯрум со̄тыран стипендияныл но̄хнё̄тавет. Ты щирыл ханищтапаныл ты таквс о̄вылтаве. Хӯрум та̄лын а̄рталаӈкв номсаве. Пуссын ёмасыг те а̄ртми, э̄лаль ва̄раве».

1078 2014.06.20. Александр ВЬЮТКИН

Пе̄с порат хансым нэ̄пакыт. Мощ мо̄лалнув Ханты-Мансийск ӯст о̄лнэ А̄с-угорский институт колт нэ̄пакыт ловиньтан колнаке̄т музей пусвес. Тав рущ ла̄тӈыл «Национальный музей образования и наук» тох ла̄ваве. Музеяныл пуснэ порат институт кӯщай нэ̄ Виктория Ивановна Сподина о̄выл ла̄тыӈ ла̄вуӈкв во̄ввес. Тав ла̄выс: «Тамле хурип музей мощща. Мирн суссылтан ма̄гсыл са̄в ёмас, пе̄с йис порат та̄ратым о̄выл нэ̄пакыт суссылтым о̄лэ̄гыт. Ханты ос ма̄ньщи ла̄тӈанув ёт рӯпитан учёныит хансум нэ̄паканыл о̄с суссылтавет. Хотьютын пӯмащ, ёхталаӈкв ве̄рмегы̄н, матыр на̄нан э̄ри те, тыт тисхатэ̄н, ловиньтэ̄н». Тав юипа̄лт пе̄с йис о̄лупса ханищтан кол кӯщай хум Михаил Фёдорович Пыршов ла̄тыӈ ла̄вуӈкв во̄виньта̄лвес. Тав ла̄выс: «На̄н ётын, на̄н ма̄гсылын ма̄навн рӯпитаӈкв пӯмащ. Ань ты щё̄питан музеюв такви щире̄т сака пӯмащ. Тыт ро̄ви хо̄нтуӈкв, хоты порат, хо̄т на̄н о̄парищанын ёт ла̄тыӈ ханищтым мо̄т ма̄ныл ёхталам ма̄хум рӯпитасыт. А̄нумн на̄нан ань ты урыл потыртаӈкве те, са̄в э̄т, са̄в хо̄тал э̄рмыгланув. Хуньт хосат тыт рӯпитам учёный ма̄хум урыл писатель хум Анатолий Минчук ла̄выс: «Рыцари Севера! ». Та̄н ва̄рум рӯпатаныл щирыл ма̄н та̄наныл ка̄сыӈе̄мт ка̄сталаӈкв патыянӯв. Таима̄гсыл ма̄н на̄нан аквписыг тыт ӯриянӯв, тыг ёхталэ̄н». Та юипа̄лт Елена Степанова, А̄с-угорский институтыт нэ̄пак ловиньтан колт рӯпитан ханты нэ̄, музей щё̄питан урыл мощ потыртас. Тав ань йильпи музей тармыл кӯщаиг ӯнттаве.

1078 2014.06.20. Валентина УЗЕЛЬ

Та̄н ма̄н ма̄гсылув са̄кконыт хансэ̄гыт. Та э̄тпос юио̄выл хо̄талэ̄т мирн пе̄риим округ депутатанув акванатхатыгласыт. Та̄н хусахтем са̄всыр са̄ккон йильпи ла̄тӈыл хассаныл. То̄ва порат туп ЛДПР партия депутатыт мощ воритотсыт. Рӯпитаӈкв о̄вылтахтаманыл порат акв депутат та̄ра потыртаӈкв во̄вхатас. Тав ла̄выс: «Ма̄н ты созывн пе̄риим ма̄хум пуссын депутатыг о̄лэ̄в. Ос ма̄н халувт то̄ват матрыг Дума заседаниян щар ат ёхталэ̄гыт, ма̄н ётув ат рӯпитэ̄гыт. Акваг доверенностьнэ̄пак хансэ̄гыт, мо̄т ма̄хум та̄н пе̄нтсыланыл са̄кконыт пирмайтэ̄гыт. Ка̄сыӈ депутатхо̄тпа са̄в мирн пе̄риявес. Ам ма̄гсылум 130 со̄тыра хо̄тпа нэ̄пак та̄ратасыт. Ам лю̄льсаӈ рӯпитаӈкв ат ве̄рме̄гум, та̄н а̄нумн номт пинсыт, та̄н а̄нум ва̄ганыл. Ань ты щирыл рӯпитан депутатыт ёт матыр ва̄руӈкв э̄ри. » Ты хо̄тпа ёт са̄в депутат ка̄сащас, ос Дума кӯщай Борис Хохряков ювле ла̄выс, ты щирыл рӯпитаӈкв ро̄ви, федеральный са̄кконыт пуссын депутатын ӯргалан ма̄гсыл хансым о̄лэ̄гыт. Тувыл та̄н округ бюджет олнанэ урыл потыртаманыл порат са̄в воритотсыт. О̄влэ̄т олн ловиньтан департаментыт кӯщай нэ̄ Вера Дюдина 2013 та̄л урыл потыртас, та ювле хультум та̄лт ос ты 2014 та̄л нила э̄тпосанэ сыс манах солко̄ви холтвес. В. Маркин ЛДПР партия па̄лыл депутатыг рӯпиты, тав ла̄выс, налоголн са̄в кос атаве, ос манрыг мирн нё̄тнэ программат мощща олныл та̄ставет. Ты социальный программат ма̄гыс туп 19, 2% са̄вит олн майвес. Ос мо̄т программа ма̄гыс, тав «Национальный оборонаг» хансым о̄лы, тав ос 100% са̄вит олныл та̄стувес. Тувыл э̄лаль ты ва̄рмаль ёт депутатыт ка̄саще̄гыт ман а̄ти, та̄рапатыс. Та̄н са̄выӈпа̄лэ пуссын ка̄сащасыт, туп ЛДПР депутатыт ты отчёт ат пирмайтасаныл. Ань яныг ос тыныӈ ма̄шина о̄щнэ ма̄хум туп та̄н налоголн ойтэ̄гыт, мо̄т ма̄хум налогыл ат пинавет. Ос ты о̄лум заседаният депутатыт тамле са̄ккон пирмайтасыт, ань ты налог мо̄тыт та̄л ма̄нь таквс э̄тпос мус ойтуӈкв ро̄ви. СА̄в йильпи пӯльница ӯнттаве Дума юипа̄лт депутатма̄хум округ правительство кӯщаит ёт хо̄нтхатыгласыт, та̄н пӯльницат ӯнттын ва̄рмаль урыл потыртасыт. Э̄лы матах та̄л сыс 18 йильпи пӯльница округувт ӯнттаве. Мо̄тыт та̄л Нижневартовск ӯст яныг пӯльница ӯнттын ма̄ныл а̄стлаве, акв сыс тот 1 со̄тыра 100 хо̄тпа пусмалтахтуӈкв ве̄рми. Сургут ос Ханты-Мансийск ӯсыгт ма̄нь ня̄врамыт пусмалтан «перинатальный центрыг» ла̄внэ пӯльницаг ӯнттавег. Нефтеюганский район Пойковский па̄вылт, Нижневартовский район Корлики па̄вылт ос Советский район Коммунистический па̄вылт пӯльницат ӯнттавет. Ханты-Мансийск ӯст «Анти-СПИД» нампа центр, хо̄псы а̄гм пусмалтан диспансер ос «восстановительный» нампа пӯльница йильпи колыл ӯнттаве. ВО̄ранув урыл Ма̄н ма̄вт 130 са̄всыр организацият ос предпринимательхо̄тпа во̄р са̄грим ос па̄ртыт сылым рӯпитэ̄гыт. Та̄н округ па̄лыл о̄с нё̄тавет, субсидияолныл мивет. Тот рӯпитан ма̄хум ма̄гыс касылыт ва̄рыглавет: «Славим человека труда», «Лучший вальщик леса с моторными пилами». Кредит вим организацият туп олнаныл ювле ойтыяныл, процентолн ат мыгыт, тох та̄н округныл нё̄тавет. Тувыл кӯщаит ос депутатыт лё̄ӈхыт урыл потыртасыт, товлыӈха̄пыл миннэ ма̄гыс билет олн сака тыныӈыг ул вос о̄лы, округ правительстваныл ты предприятият о̄с са̄всыр субсидияолныл мивет. Ты хосыт билетыт тынаныл 64% са̄вит мощщануве̄г е̄мтэ̄гыт.

1078 2014.06.20. Николай МЕРОВ

Турва̄т па̄вылт са̄лыт янмалтавет. Ха̄льӯс район Турва̄т па̄вылт Савелий ос Татьяна Самбиндаловыг ще̄мьяӈ та̄гыл о̄лэ̄г. Тот о̄лнэ ма̄ньщиянув нот па̄лытыл йис о̄лупса э̄лаль тотыяныл. Пе̄с порат Савелий а̄ще са̄в са̄лы о̄ньщис. Таима̄гыс та̄н Ялпыӈ Нё̄р сыспалъе̄рт Сысъя ляпат са̄лы янмалтан ва̄рмаль ань но̄хво̄рмалтаӈкве патсыт. 2011 та̄лт Савелий соссаӈ ма̄хум Ассамблея кӯщаитн нэ̄пак хансыс, са̄лы ёвтнэ ма̄гыс нё̄тмил во̄выс. Ань ты ва̄рмаль щирыл са̄в э̄рнэ программа пирмайтым о̄лы. Ты хосыт я̄нас рӯпата ва̄рнэ хо̄тпатн олн миве. Аквта та̄л туи порат кӯщаянув э̄рнэ нэ̄пакыт акванатсаныл ос «Йильпи са̄лыӈ кол» нампа проект щё̄питасыт. Та юипа̄лт ты ще̄мья ма̄гсыл Ямал ма̄ныл нё̄лса̄т са̄лы ёвтвес. Ты са̄лыӈ кол рӯпататэ хумлег э̄лаль мины, округ Дума депутат нэ̄ Татьяна Гоголева акваг уральтым о̄ньщитэ. Тав ка̄сыӈ та̄л тув яланта̄лы. Ты коныпал телефон хосыт ва̄тихал та̄н ётаныл потырты, маныр э̄ри, китыглахты. Ань лӯпта э̄тпост ам о̄с та̄н ётаныл тув ялсум. Ма̄н ты хо̄тпат ялсӯв: Ханты-Мансийск ӯсныл кит депутатыг Татьяна Гоголева ос Надежда Алексеева, Югорск ӯсныл Татьяна Сысоева апа̄гитэ Лена ёт, Саранпа̄вылныл са̄лыӈ колт яныгмам пыг Александр Попов ос Екатерина Гоголева. Советский ӯсныл вертолётыл хӯрум щё̄с Турва̄т па̄выл мус тыламласӯв. Йильпи па̄рт ос кит кӯрала тув тотсӯв. Мо̄лты та̄л та̄н ма̄гсыланыл плотникыт Сысъя урам ляпат йильпи кол ос пувлынкол ӯнттысыт. Тэ̄лы порат са̄лыяныл та тэ̄пыӈ ма̄т о̄ньщияныл. Ань са̄лы ӯрнэ хо̄тпат акваг тот о̄луӈкве ве̄рме̄гыт. Тувыл мо̄тынтыг Турва̄т па̄вылт ос акв яныг кол ӯнттаве. Савелий пыганэ Олег, Илья, Унтари о̄с Улякси тув ва̄нтлэ̄гыт. О̄выл хо̄тал ялпыӈ колт пӯрлахтасӯв, пуӈк пинсӯв, На̄й-О̄тыранувн по̄йкщисӯв. Ща̄й айсӯв, о̄лупса ва̄рмалит урыл потыртасӯв. Турва̄т ма̄хманув кина суссылтан то̄тап о̄ньще̄гыт. Ма̄н Руслан Проводников, ма̄ньщи боксёр, уре̄тыл кина ёт тотыгласӯв. Ты ма̄ньщи пыг Америка хо̄н ма̄т ка̄миньт пассал алхатаме̄т но̄хпатыглас. Ань ма̄ янытыл такви весовой категориятэ̄т о̄с та̄ксар хо̄тпаг о̄лы. Мощ мо̄лалнув хо̄н ма̄т кина по̄слын хо̄тпат тав уре̄тыл кина ва̄рсыт. Э̄типа̄лаг на̄йпос станция ква̄лтапан порат та кина ма̄хманувн суссылтаслӯв. Мо̄тыт хо̄тал ос Александр Попов, саран пыг, са̄лы мӯӈияге яктысаге. Тав ма̄нь та̄гыл са̄лыӈ колт яныгмас. Са̄лыт урыл матыра̄ти пуссын ва̄г. Тав Савелий пыганэ сун хартнэ са̄лыт пе̄щхал мӯӈит яктуӈкве ханищтас. Акв са̄лы муӈияге яктын порат Турва̄т пыгыт сайтта̄л патнэ мус маттем та мовиньтасыт. Са̄лы ёлпаттысаныл, нила хо̄тпа таве та̄кыщ пӯвсаныл. Александр са̄лы мӯӈияге тыньщаӈыл аквантаӈыртасаге, йӣвсупыл ты кос ра̄тсаге, тох аты сакваласы̄г. Ята, ос касаил колхӯрге па̄лыгяктыстэ, мӯӈииг конхартсаге ос ка̄тыл акванпувим хотпатнэ̄г мус маныр ё̄р о̄ньщис, та ё̄хтысаге. Са̄лыюв тай супасэ па̄лыгхартыстэ, самаге лаппантым ос туп лылтым та хуяс. Ты ва̄рмаль а̄стын юипа̄лт са̄лы хоттарматсаныл, аквав ква̄лапас, хотталь та ха̄йтыс. Матъёмас китыт хо̄тал колхӯрге пусмалтахтын нупыл е̄мтыс. Ань таве тэ̄лы порат сунын ке̄руӈкве ро̄ви. Тав ёмщакв сун хартуӈкве паты. Тувыл хо̄тал котильт ма̄н Ма̄нь Та̄гт ос Лӯи Та̄гт я̄г акванпатнэ ма̄н йӣв ха̄пыл ялсӯв. Тот я̄тэ сака овыӈ, ва̄танэ ос ке̄расыӈыт. Ло̄ӈхаль йӣвыл туйхатым на̄тылтасӯв. Я̄г акванпатнэ ма̄т Илья ня̄с па̄хвтыс, ма̄нь а̄лнхӯл пӯвыс. Та ма̄т исмит па̄йтсӯв, ня̄рхул тэ̄сӯв. Мощ ӯщлахтасӯв ос ювле ла̄глыл са̄т ве̄рыста ё̄мсӯв. Туп ня̄врамыт ха̄пыл тотве̄сыт. Ювле миннэ лё̄ӈхе сака о̄выӈ о̄лыс. Ты коныпал я̄т яныг а̄хвтасыт хуе̄гыт, витэ ма̄ниг о̄лыс. Са̄в хо̄тпа та̄лнэ порат ха̄п ёлӯнты. Э̄типа̄лаг юв ёхтысӯв. Ӯлякщи хӯрум ёса ва̄рнэ ма̄ныл а̄стласанэ. Таитыл пӯмщалахтасӯв. Тав сака ма̄щтырыг са̄грапыл са̄гырхаты ос касаил ёрыгхаты. Тав ла̄внэ̄т, ты ёсат хӯрмахкем э̄тпос ва̄рсаге. Ёса паттаге ӯй котыл ю̄нтсаге. Ты ёсат Саранпа̄вылт о̄лнэ хо̄тпатн заказ щирыл ва̄рсанэ. Мо̄лалнув Савелий Саранпа̄вылн ялыс, хо̄тыт са̄лыӈколныл китхуйплов ма̄нь са̄лы ёвтыс. Ты са̄лыт ӯнттын ма̄гыс висанэ. Та̄н хащта̄л ма̄т молях ханьщувласыт. Э̄л ат минэ̄гыт, кол ляпан хо̄тал сыс хӯрум щёс ёхталэ̄гыт. Татьяна э̄кватэ та̄наныл комбикормыл, ня̄нил тыттыянэ. Ос акв ва̄рмаль о̄лы. Са̄лы ӯрнэ а̄мп ат о̄ньще̄гыт. Ань о̄лнэ а̄мпанэ, пуссын во̄раян а̄мпыт. Та̄наныл ёлнэ̄гим о̄ньщияныл. Лыпащ та̄ратым тай са̄лыт юил сака ня̄влалыяныл. Ётылнув э̄рыӈ ханьщувлэ̄гыт. Ань ты накт Турва̄т па̄вылт пуссын аквъёт налыманкем са̄лы о̄лы. Савелий тох ла̄ви: «Са̄лы о̄ньщуӈкве патсӯв, сымумт сака ёмас патыс. Пыганум во̄рт хультэ̄гыт, па̄влын о̄луӈкве сакати ат минэ̄гыт. Ла̄щал, ла̄щал са̄лы ӯрнэ ва̄рмалин ханьщувлэ̄гыт, ты ва̄рмаль э̄лаль тотыяныл. Ань са̄лыӈ суныл яласаӈкве та̄наныл ханищтаӈкве э̄ри. Ӯсытт, па̄влытт о̄лнэ ма̄хум рӯпата ат о̄ньще̄гыт, нэ̄матыр ат ва̄рнэ хосыт вина ае̄гыт. Манаса̄вит хо̄тпа ты хосыт порсыс. Тыт о̄лнэ̄в ма̄гсыл нэ̄матыр ва̄рмаль а̄тим». Тот о̄лмув сыс хо̄талыт татем хо̄талыӈыг о̄лсыт. Ма̄н са̄всыр ва̄рмаль ва̄рсӯв, ос аквтупмат нас ӯщлахтуӈкве ялсӯв. Ка̄сыӈ мӯй хо̄тпан тот о̄луӈкве сака мӯстыс. Ам ты ще̄мьян щуньпаща ла̄тыӈ ке̄тэ̄гум. О̄лупсаныл аквтыхольт ёмщакв э̄лаль вос мины. Са̄лыяныл акваг э̄лаль вос са̄вме̄гыт. Колта̄гыл пуста̄гыл вос о̄лэ̄гыт. То̄рум ёт, О̄тыр ёт, пус ка̄т, пус ла̄гыл та̄нанылн ла̄ве̄гум.

1078 2014.06.20. Светлана РОМБАНДЕЕВА

Тав самын патум ма̄тэ э̄руптастэ. Лӯпта э̄тпос 22 хо̄талэ̄т ма̄ньщи поэтув Юван Николаевич Шесталов самын патум хо̄талэ о̄лыс. О̄йка о̄лыс те, 77 та̄лэ то̄влынув. Ханты-Мансийск ӯст ань пыге о̄лы, Владимир Иванович Шесталов. Тав ётэ хо̄нтхатыгласум, а̄ще урыл потрамасме̄н. На̄н ань э̄лаль потруме̄н ловиньтэлы̄н. – Владимир Иванович, ма̄ньта̄гыл а̄тян хумус номилын, манхурипаг тав олыс? – Увщиме̄нтыл ме̄наме̄н тав э̄руптасаге. Юн ос торыӈыщ таве ат ва̄щинтаслуме̄н, акваг хо̄т рӯпитым яласас. Ты номилум, тав акваг рӯпитас, са̄в хансыс. А̄тям хо̄тыт та̄лэ мус рущ ла̄тыӈ ат ва̄с, потыртаӈкве ат ха̄сыс. 1954 та̄лт Ленинград ӯст тав А. И. Герцен нампа институтт ханищтахтуӈкве патыс. Тав хансум «Гроза» нампа о̄выл стихотворениятэ «Ленин пант хуват» газетат хансыглавес. О̄выл нэ̄паке намаястэ – «Ма̄кем ат». 1962 та̄лт трудовой книжкатэ Союз писателей ма̄н мистэ. Та па̄сыл атпан та̄л минас, ос 2012 та̄лт ам Союз композиторов России ма̄н хасве̄сум. Ты ма̄гыс ам номтум сака ёмас – атпан та̄л овумтам юипа̄лт ам о̄с а̄тям хольт намум мирн ва̄ӈкве та патвес. 1964 та̄лт Тюмень ӯст тав педагогический институт а̄стлас. А̄тям намыӈсуиӈ писателит ёт ва̄йхатас – Константин Симонов, Михаил Светлов, Александр Твардовский, Евгений Евтушенко, Сергей Баруздин, Лев Ошанин, лӯи ма̄ ос соссаӈ ма̄хманув халт Микуль Шульгин, Юрий Рытхэу, Владимир Санги. Та̄нти халанылт та̄н пуссын юртыӈыщ о̄лсыт. 1979 та̄лт тав М. Горький нампа премиял майвес. – А̄тян самын патум па̄влэ̄н наӈ ялсын, рӯтанэ ва̄санын? – Тав самын патум ма̄тэ̄н ма̄н яланта̄лсӯв, Во̄сыӈтурт о̄лсӯв. О̄пам ва̄слум, ёмащакв таве номилум. Тав китыт э̄ква тотыглас, таве о̄с ва̄слум, ты улпыл 1960й та̄лыт порат о̄лыс. А̄тям о̄ньген сака мат ат э̄руптавес, юв ёхталаме порат юн ат о̄лыс, интернатт о̄лыс. Щаще̄квам Уринэ Васильевна хосат а̄тимыг е̄мтыс, 1946 та̄лт. То̄нт а̄тям иӈ ма̄ниг о̄лыс. Оматэ сака э̄руптастэ, тав уре̄т са̄в стихотвореният хансыглас. Хунь увщим самын патыс, таве оматэ нам ляпан намтыстэ Аринэ. А̄тям такви самын патум ма̄тэ, ма̄ньщи мире сака э̄руптастэ. Ма̄тэ урыл ма̄навн акваг потырта̄лыс. Ётыл тыг о̄луӈкве та йис, ма̄н о̄с тав ётэ тыг ва̄нтлысӯв. Омам ат таӈхыс кос ты ӯсн йиӈкве, ос воссыг хоталь щалты, тох та йисӯв. Увщим ос Санкт-Петербург ӯст хультыс, пыгаге ёт тот о̄лы. Омагума̄тягум аквъёт атпан нупыл кит та̄л о̄лсы̄г, омам а̄тям э̄лыпа̄лт а̄тимыг е̄мтыс. Тыт, Ханты-Мансийск ӯст, а̄тям «Торум ма» музей ва̄руӈкве нё̄тыс. Ань ты ма̄т о̄луӈкве а̄нумн ёмас. Тыт ма̄ньщи ма̄хманӯв о̄лэ̄гыт, рӯтанӯв о̄лэ̄гыт. Тыт а̄тям ща̄нь ла̄тӈе суйты. Ты ма̄т ам са̄ӈквылтап та̄н са̄ӈквылтаӈкве ханьщувласум, ма̄ньщи ос ханты мир о̄лупса ва̄ӈкве патсум. Ты ма̄ ам э̄руптылум, ты ма̄ ма̄гыс а̄тямн яныг пӯмащипа ла̄тыӈ ла̄ве̄гум.

1078 2014.06.20. Валентина УЗЕЛЬ

Тина по̄слын хо̄тпаг. Ань ма̄вит ӯргалан ма̄гыс са̄всыр рӯпата ва̄раве. Округувт ка̄сыӈ та̄л акв э̄тпостем «Спасти и сохранить» нампа акция о̄лыглы. Са̄всыр ма̄ныл тыг ёхталан ма̄хум йӣвыт ӯнттэ̄гыт, мир ёт хо̄нтхатыглэ̄гыт, та̄н ётаныл потыртэ̄гыт – ма̄вит пуссын вос ӯргалым о̄ньщияныл. Ты акция о̄лнэ̄тэ сыс округувт са̄всыр па̄влытт ос яныг ӯсытт ма̄вит ӯргалан ва̄рмаль урыл тинат суссылтавет, рущ ла̄тӈыл ты рӯпата «телевизионный фестивалиг» ла̄ваве. Тот суссылтан тинат халт щар ма̄к ёмас ос пӯмыщ тина пе̄рияве. Тувыл ты фестиваль юио̄выл хо̄талэ̄т тина ва̄рнэ ма̄хум янытлавет, хотьютаныл но̄хпатыс. Ты та̄л ты касылн 480 тина тотыглавес. Россия, Финляндия, Армения, Иран, Франция ос Эстония ма̄тт о̄лнэ ма̄хум ня̄врамыт, ма̄витув ӯргалан ва̄рмаль урыл тинат суссылтасыт. Ань та̄н халанылт ё̄рн э̄ква Анастасия Тимофеевна Лапсуй «11 изображений человека» нампа тинатэ но̄хпатыс. «Со̄рни та̄хт» щар ма̄к яныг мӯйлупсал (рущ щирыл – «Золотая гагара») тав ты янытлавес. Ты яныг мӯйлупса таве̄н губернатор ва̄ӈын хум Геннадий Бухтин мистэ. Акв хо̄тал Анастасия Лапсуй Павел Славин юртэ ёт ма̄н рӯпитан колувн щалтсасы̄г, тэ̄нти уре̄нтыл ма̄навн мощ потыртасы̄г. То̄нт хоты тина но̄хпатыс, нэ̄мхотьют ат ва̄с. Ма̄н ща̄й аим пасан ва̄тат аквъёт ӯнлахо̄лсӯв, потыртасӯв. Ты ё̄рн э̄ква Ямал ма̄т 1944 та̄лт самын патыс, са̄лыӈколт яныгмас. Школа а̄стламе юипа̄лт педагогический училищат ханищтахтас, та юипа̄лт Уральский госуниверситетыт. Ва̄тахтем та̄л радиот рӯпитас, ё̄рн ла̄тӈыл са̄всыр ля̄ххалыт мирн ловиньтас. Тувыл ня̄врамыт ма̄гыс нэ̄пакыт хансыс, рущ потрыт ё̄рн ла̄тӈыг толмащласанэ. 1991 та̄лт тав хум ва̄рыс, о̄йкатэ финныг о̄лы, наме Марку Лехмускаллио. Тэ̄н Финляндият о̄лэ̄г. Аквъёт тина по̄слэ̄г. То̄ванакт тина по̄слын порат Анастасия Тимофеевна такви артисткаг о̄лы, тинат по̄слахты. Лӯима̄т о̄лнэ ё̄рн ма̄хманэ урыл са̄всыр пӯмыщ тина ва̄ри. Тав ла̄выс: «Ам ё̄рн нэ̄ хо̄тпа. Са̄лыӈколт самын патсум, тот яныгмасум. Ва̄глум, ё̄рн нэ̄кветн тот кӯпнит хунь. Кон сака ащирмаӈ, э̄ква а̄лпыл ква̄лы, кӯре па̄лтытэ, тэ̄нут па̄йты. Ма̄хманэ тыттыянэ, щё̄питыянэ. Ам амти тох о̄лсум, таима̄гыс тинат ты урыл акваг та по̄слэ̄гум. » Ань ты йильпи тинанэ тав о̄йкатэ ёт сака ёмащакв ва̄рыстэ̄н. Анастасия Лапсуй тот ё̄рн э̄кваг по̄слыма, ма̄хманэ ёт хумус са̄лыӈколт о̄лэ̄гыт. Акв щёс тамле пӯмыщ ва̄рмаль о̄лыс. Тина ва̄рнэ э̄лыпа̄лт о̄влэ̄т сценарийнэ̄пак хансаве, ты нэ̄паке ёт тав Ямалн минас. Тот щар яныгхо̄тпа палт ёхтыс. Та ё̄рн о̄йка онтырса̄т та̄лыг ул е̄мтыс. Анастасия таве̄н тина урыл потыртас, ла̄выс, нэ̄матыр пори тав ул вос по̄слы, ты о̄йкан вос ла̄ваве, ё̄рн ма̄хум о̄лупсаныл ёмащакв хумус по̄слуӈкв э̄ри. О̄йка таве хӯнтлыстэ, тувыл рӯтанэ, нэ̄ хо̄тпат ня̄врамыӈ та̄гыл, пуссын акв ё̄рнколн во̄всанэ ос та̄нанылн ла̄выс: «Ты нэ̄ ёнгуӈкв таӈхи, тав ётэ ёнгасэ̄н». Тамле ва̄рмаль номылматыгла̄лым, Анастасия Тимофеевна ла̄выс: «Матъёмас ма̄н соссаӈ э̄лмхо̄ласанув аквтоп ма̄нь ня̄врамыт хольт хультсыт. Са̄в та̄л ма̄во̄й ос газ ма̄ныл но̄хвиве, ма̄ та̄л ты хультэ̄в. Ос ма̄н халувт тамле ёмас сыстам номтыл о̄лнэ мӯтраӈ хо̄тпат ты о̄лэ̄гыт. » Яныгӯит урыл тина ва̄рум хум Павел Сергеевич Славин ты фестивальн такви по̄слум «Неведомый остров» нампа тинатэ о̄с тотыгластэ. Тот тав та урыл по̄слам, Москва ӯс ляпат «Лосиноостровский» нампа заповедник о̄лы, та ма̄т яныгӯит пе̄с та̄гыл о̄лэ̄гыт, та̄н э̄лмхо̄ласн сака ат ханьщувласыт. Ос та ма̄ мувлахи коттеджиг ла̄внэ колыт ӯнттуӈкв патве̄сыт. Са̄в олн о̄щнэ ма̄хум тот ма̄ ёвтэ̄гыт, ос колыт ӯнттэ̄гыт. Канализация тӯрпат пуссын заповедник нупыл пинве̄сыт, ты па̄ӈкыӈ вит тув о̄вты. Ляпат о̄лнэ ма̄хумн тув нупыл тэ̄ла щар а̄тим. Яныгӯит а̄гмыӈыг е̄мтэ̄гыт. Заповедникт рӯпитан ма̄хум Россия Президентын пищма хансыгласыт, нэ̄мхотьют та̄нанылн ат нё̄тыс. Ань та ма̄ кӯщай хум по̄хан минас, воссыг тот рӯпитаӈкв ат ка̄сащи. Э̄лаль маныр е̄мты, нэ̄мхотьют ат ва̄г.

1078 2014.06.20. Тамара МЕРОВА

Та̄н ма̄хманувн ща̄гт тотэ̄гыт. "Хо̄тал" нампа А̄с-угорский театрыт рӯпитан ма̄хум "Дети неба" ёнгиланыл ёт тӯяг Москва ӯсн ялсыт. Та̄н тув "Золотая маска" нампа яныг фестивальн во̄выглаве̄сыт ос тот мо̄т театрыт ёт хӯрум касылытт кассыт. Тув та̄н российский театрыт экспертный совет па̄лыл пе̄риялве̄сыт. Ты э̄лыпа̄лт ты совет 767 са̄всыр спектаклит суссыт ос щар ёмас, пӯмащ ёнгилыт э̄лаль касуӈкве висаныл. «Дети неба» ёнгил та̄н «Лучший спектакль в театре кукол» (Вячеслав Зайчиков), «Лучшая работа режиссёра» (Мария Литвинова, Вячеслав Игнатов) ос «Лучшая работа художника» (Павел Мизёв) номинациян ке̄тсаныл. «Хо̄тал» нампа колув мо̄т каснэ театрыт халт мощща та̄л рӯпиты, артистанув мирн иӈ сака ат ва̄вет. Та̄н тамле намыӈсуиӈ театрыт ёт, Мариинский театр, театр им. Е. Вахтангова ос са̄в ма̄хумн ва̄нэ артистат ёт рӯпитасыт. Ма̄н ма̄ньщи, ханты артистанув рӯпатаныл о̄с ма̄щтырыг тот ва̄рсаныл. Ань пе̄риян номинацият та̄н но̄х ат патсыт кос, ос мо̄т театрытын ань ва̄вет, тувыл са̄всыр э̄рнэ пищитн э̄лаль ханищтахтасыт. Тэ̄лы А̄с-угорский ма̄хум театрув «Монти Танья» ёнгил щё̄питан порат Евгений Литвинчук, кӯщаиг о̄лнэ хум, потыртас: «Ма̄н театрув ювле хультум хӯрум та̄л сыс ёмас спектаклит щё̄питаӈкве а̄лымас ос та тэ̄ланув ма̄гыс сака э̄сгувесӯв. Тувыл Йошкар-Ола ӯсн, Москван, Санкт-Петербургын спектаклянув суссылтаӈкве ялсӯв. Ам номсэ̄гум ты таима̄гыс, тыт номтыӈ, ка̄ркам ос акванюрщхатнэ ма̄ньлат хо̄тпат рӯпитэ̄гыт. Анна-Ксения Вишневская мӯтраӈ ос сымыӈ режиссёр нэ̄, такви рӯпататэ сака ёмащакв ва̄ритэ. Та̄н пуссын акваннё̄тхатым рӯпатаныл пӯмщиг ва̄рияныл. Са̄в та̄л рӯпитан хо̄тпат Александр Тургачёв, Вадим Важенин, Дмитрий Решетников, Марина Кашпирева мо̄т артистат халт ос та̄н сака ма̄щтырыг ёнге̄гыт, потыртэ̄гыт. Ма̄н ка̄сыӈ артистув такви щире̄тыл ва̄рнэ ёмас пищ о̄ньщи, ос таитэ̄тыл тав мо̄т ма̄хумн ханьщаве ос э̄руптаве. Тувыл художникув, композиторув рӯпатаныл ёмащаквег ва̄рнэ̄ныл ма̄гыс спектаклит о̄с пӯмщиг о̄лэ̄гыт. Ма̄хумн та̄наныл сунсуӈкве сака мӯсты. Ма̄н ёнгиланув искусство тармыл са̄в та̄л рӯпитан хо̄тпатын о̄с ва̄вет, таима̄гыс ма̄н сыресыр театральный фестивальн во̄виньта̄лаве̄в. Тот ма̄н спектаклянув хосыт ханты ос ма̄ньщи ма̄хум культураныл, о̄с мирн ва̄ӈкве патавет. Соссаӈ ма̄хум ла̄тӈыг о̄с э̄лаль тотылӯв, пе̄с э̄ргыт, йӣквыт хотты ёнгилытн ва̄риянӯв. Фестивалитн яланталнэ̄в порат хус са̄вит театрыт халт касыглэ̄в. Тох «Чёрная песня», «Всё, наконец», «Любить. » ёнгиланыл суссылтаӈкве тотыгласанув. Финноугорский рӯт ма̄ныл тув акваг ма̄хум ёхталэ̄гыт. Та̄н о̄с та̄нки мираныл урыл матыр пе̄с потрыт манос мо̄йтыт суссылтэ̄гыт. Ма̄нки халувт тот акваг ханищтахтэ̄в, театральный искусстватыт йильпи накытн а̄рталахтэ̄в. Ань аквъёт касыглан то̄ва театрыт э̄лыпа̄лт ма̄н о̄выл ма̄н е̄мтсӯв, тох "Золотая маска" яныг фестивальн хӯрум номинацият янытлавесӯв. Тот мо̄т ма̄хум халт но̄хпатэ̄в манос а̄ти, а̄т ва̄глӯв. Ос ам таи ла̄вуӈкве таӈхе̄гум, округт ты э̄лыпа̄лт нэ̄мхотты театр тамле яныг мӯйлупсан ат пе̄рия̄лвес. Ма̄н о̄выл щёс са̄в суиӈнамыӈ театрыт ос са̄в мирн ва̄нэ артистат ёт аквъёт касуӈкве патэ̄в тах. Ма̄н ма̄гсылув тыи ань о̄с но̄хпатнэ ва̄рмалиг о̄лы". Ва̄им, ма̄н о̄с аквтох номсэ̄в. Тувыл ты театрув мо̄т ӯсытн ялантанэ̄тэ сыс са̄в ма̄хумн э̄лаль ва̄ӈкве патве̄сыт. Ханты-Мансийскат та̄н рупатаныл о̄с акваг пӯмщалавет. Ань «И дольше века длится день» намаим спектакляныл мо̄т ӯсыт, па̄влыӈ ма̄т китыглаве ос тот ӯраве. Театрыт рӯпитан хо̄тпат ань туи пора сыс мощ ӯщлахтэ̄гыт, ос таквсы порат ма̄н мо̄т ёнгиланыл тах ӯриянӯв.

1078 2014.06.20. Александр ВЬЮТКИН

Са̄всыр ма̄ныл ёхталам ма̄щтыр ма̄хум. Лӯпта э̄тпост Сургут ӯст о̄лнэ «Старый Сургут» нампа музей кант ма̄щтырлан ва̄рмаль о̄лыс. Ты кастыл ка̄тыл са̄всыр пормасыт ва̄рнэ ма̄щтыр ма̄хум ма̄ янытыл акв ӯcн атыглаве̄сыт. Та пӯмащ хӯрум хо̄тал минас, рущ ла̄тӈыл «Международный фестиваль ремёсел коренных народов мира «Югра – 2014» ла̄ввес. Тав ань нёлоловит щёс ва̄рыглавес. Ма̄щтырлан ма̄хум ма̄ янытыл са̄в ма̄ныл тув ёхталасыт. Акв хум щар э̄лыл Конго нампа Африка ре̄гыӈ хо̄н ма̄ныл о̄лыс. Тав такви ю̄нтум ос са̄гум маснутанэ суссылтасанэ ос то̄ва пормасанэ тот тыналасанэ. Пуссын аквъёт хӯрумса̄т арыгтем хо̄тпа тот о̄лыс. Фестиваль рӯпататэ о̄вылтан кастыл Сургут ӯс тармыл кӯщаиг о̄лнэ хум Дмитрий Валерьевич Попов сценан но̄хво̄виньта̄лвес. Тав ла̄вум янытлан ла̄тӈанэ э̄лаль ловиньтэ̄н: «Ты ёмас, ре̄гыӈ хо̄талыӈ хо̄тал То̄рмув тав, улпыл, на̄н ма̄гсылын ва̄рыстэ. Тамле ре̄гыӈ хо̄тал ты та̄л ма̄н иӈ ат ва̄щинтасӯв. Ӯс янытыл са̄всыр пӯмащ ва̄раве. «Пе̄с Сургут» музей кант ань щар са̄в мир тыт акванатхатас. Ам номтум тамле, ты нампа пӯмащ ма̄н ӯсувт акваг вос ва̄рыглаве». Дмитрий Попов юипа̄лт округ Департамент культура кӯщаиг о̄лнэ нэ̄ Надежда Михайловна Казначеева потыртас, тав ла̄выс: «Ма̄н округувт са̄всыр ла̄тӈыл потыртан са̄в мир о̄лы. Таи ма̄гсыл тамле фестиваль ма̄н на̄н ма̄гсылын ва̄руӈкве номылматсӯв. Тыт йис та̄гыл о̄лнэ соссаӈ мирыт о̄лупсаныл ос пе̄с ва̄рмаляныл тыг ёхталан мирн ва̄ӈкв э̄ри. Ханты ос ма̄ньщи ма̄хманув ат ва̄нэ хо̄тпатн та̄н щар ат ханьщавет. Хотьют ва̄г, туп тав та̄ра ла̄ви, хотьют ма̄ньщи манос ханты. Са̄выӈпа̄лэ ты мирыг ат ва̄вег. Ты хо̄тал ам на̄нан э̄лаль пуста̄гыл о̄лнэ хо̄талыл ла̄виянум ос ты ялпыӈ хо̄талыл янытлыянум». Ханты-Мансийск ӯст о̄лнэ центр ремёсел нампа кол кӯщай нэ̄ Ольга Дмитриевна Бубновене хӯрмит хо̄тпаг ма̄хум янытласанэ. О̄влэ̄т тав та̄л сыс ва̄рум рӯпатаныл урыл потыртас: «Минам та̄л на̄н ма̄щтырлам пормасанын са̄в ӯсыӈ ма̄т тыналаве̄сыт ос мирн суссылтым хо̄та̄ти тотыглаве̄сыт. Ма̄н округ ма̄щтыр хо̄тпанув урыл са̄в хо̄н ма̄тт ос Россия янытыл ва̄вет. Ты хӯрум хо̄талыт сыс на̄н номтыт о̄щнэ тэ̄ланын урыл халувт мощ потыртэ̄н, тувыл пуссын акваннё̄тхатым э̄лаль рӯпитаӈкв вуйхатэ̄н. Халувт ма̄навн юртыӈыщ о̄луӈкве ос рӯпитаӈкв э̄ри. Матъёмас ма̄н округув янытыл о̄лнэ ханты ос ма̄ньщи ма̄щтыр ма̄хманув ёмщакв ва̄вет ос э̄руптавет». Ты ма̄щтырлан ва̄рмаль ты та̄л сыс титынтыг ва̄рыглавес. О̄выл пӯмщаныл рущ ла̄тӈыл: «Этнос – Традиция – Ремесло» тох ла̄ввес. Тав ре̄тыӈ ю̄свой э̄тпос о̄выл хо̄талт о̄вылтавес, яныг таквс юио̄выл хо̄таланэ мус минас. Та сыс тот рӯпитам ма̄щтыр ма̄хум суссылтапаныл округ ос Россия ӯсыт янытыл выставкат щирыл тотыглаве̄сыт. Ань Сургут ӯст о̄лум ты йильпи суссылтапаныл «Река – Ремесло – Жизнь» тох намтым о̄лыс. Пуссын аквъёт хӯрумса̄т арыгтем хо̄тпа атхатыглас. Тув ёхталам ма̄щтырыт о̄выл хо̄талт та̄нти пормасаныл суссылтан ма̄гсыл щё̄питыгласаныл. Та юипа̄лт соссаӈ ма̄хум пе̄с пораныл о̄щнэ пормасаныл выставкан майлысаныл, мо̄т ма̄ныл ёхталам ма̄хум пуссын ты суссылтап сунсуӈкв во̄виньта̄лве̄сыт. Ма̄ньщи хо̄тпаныл тот округувт ёмщаквег ва̄нэ тит ма̄ньщи ма̄щтырыг о̄лсы̄г. Нэ̄ хо̄тпа наме – Мария Владимировна Ситникова, тав «Народный мастер России» нам о̄ньщи. Мария Владимировна такви ма̄ньщи маснутыт ю̄нты, хумус номылматы, та щирыл хорамыл пиныянэ. Тав ю̄нтум пормасанэ са̄всыр ма̄н тотве̄сыт. Титыт ма̄щтырлан хо̄тпав наме – Александр Данилович Сайнахов. Тав о̄с «Народный мастер России» нам о̄ньщи, са̄лы ос яныгӯй а̄ньтыл, йӣвныл са̄всыр пӯмащит яктын ма̄щтырыг о̄лы. Мария Владимировна ос Са̄нтырав сас Сургут ӯст о̄лэ̄г, «Пе̄с Сургут» нампа музей колт рӯпитэ̄г. «Пе̄с Сургут» выставкат о̄лнэ пормасыт пуссын пе̄с щирыл ва̄рим о̄лэ̄гыт. Та̄н аквтоп пе̄с па̄выл ё̄рт ма̄ ёлыпа̄лныл но̄ххилым пормасыт хольт сусхатэ̄гыт, нас аквта хурияныл щирыл суссылтан ма̄гсыл йильпииг ва̄рве̄сыт. Тот са̄в пормас рактыл, а̄нох те̄рныл, йӣвныл, яныгyй а̄ньтыл ва̄римат. Товат тыналан ма̄гсыл тув пиныглаве̄сыт. Пе̄с щирыл ва̄рим пормасыт сунсыгламаныл порат, ма̄щтыр хотпанув та̄нти халанылт та пормасыт урыл потыртасыт. Маныр, хумус ва̄рвес ос хумус ань э̄ри ва̄руӈкв. Мо̄тыт хо̄тал а̄лпыл ма̄щтыр ма̄хум та̄нти ка̄тыл ва̄рум ёттотыглан пормасаныл выставкан пинтлысаныл. Ка̄сыӈ хо̄тпа такви ва̄рум утанэ урыл муй ма̄хумн потыртас. Та коныпал ӯст о̄лнэ ос тув ёхталам ма̄хум ка̄сащан щирыл ма̄щтыр ма̄хум ёт матыр ма̄щтырлаӈкв ве̄рмысыт. Хӯрум хо̄тал сцена тармыл ма̄хум аквписыг йӣквсыт ос э̄ргысыт. Са̄тловтем са̄всыр ма̄ныл ёхталам коллективыт та̄нти э̄рганыл, йӣкваныл суссылтасаныл. Мастерклассыт минам юипа̄лт ма̄хум «Ремёсла центр» кол кӯщай нэ̄ Ольга Бубновене ос округ Департамент культура кӯщаиг рӯпитан нэ̄ Надежда Казначеева дипломнэ̄пакыл ос савсыр пӯмащипа ла̄тӈыӈ пищмал майве̄сыт. Тамле фестивальн ёхталам ма̄щтыр ма̄хмытын ань ты ва̄рыглым ялпыӈ хо̄талыт сака мустысыт. Та̄н ла̄всыт: «Ань тыт о̄лум фестиваль щар ёмасыг ты а̄ртмыс».

1078 2014.06.20. Александр ВЬЮТКИН

Мир йӣквтын ва̄рмаль. Мощ мо̄лалнув Ханты-Мансийск ӯст «Год культуры 2014» нампа янытлан кастыл э̄ргын ос йӣквнэ фестиваль ва̄рыглавес. Ты пӯмащ ва̄рмаль рущ щирыл «Живущие по солнцу» намыл пиным о̄лыс. Ты фестиваль мо̄лты та̄лныл о̄вылтавес, ань титынтыг ва̄рыглавес. Та кастыл округув янытыл э̄ргын, йӣквнэ ос са̄ӈквылтан са̄всыр коллективыт ёхталасыт. Акванатхатыглахтам ма̄хум пуссын та̄нти суссылтан пӯмщаныл щирыл халанылт кассыт. Пуссын аквъёт яныгса̄т ляпатем мир о̄лыс. Ханты-Мансийск ӯсн Ненецкий, Ямало-Ненецкий ос Ханты-Мансийский хӯрум округныл ма̄хум ёхталасыт. Пуссын йӣквим, э̄ргим ос са̄ӈквылтым тит хо̄тал кассӯв. Фестиваль оигпам хо̄талт коллективыт пуссын акванатыглаве̄сыт. Ма̄н тот пе̄с йис пораныл э̄лаль тотнэ са̄ӈквылтан та̄ныт, йӣкванув ос э̄рганув урыл потыртасӯв. То̄ва ма̄ньщи хо̄тпат тох ла̄всыт: «Ма̄н ханты ма̄хманув ёт акв ляпат о̄лнэ̄в ма̄гсыл пе̄с э̄рыгсов та̄нанӯв пуссын акванатэ̄лыгтасанӯв. Хоты ма̄ныл манырсыр та̄н о̄лы, таве та са̄ӈквылтыянӯв». Тувыл жюрихо̄тпат ла̄всыт: «Саранпа̄вылныл ёхталам «Са̄лыӈ лё̄ӈх» ня̄врамыт ос «Э̄ргыт, йӣквыт пувлын ма̄хум» тит коллективыг са̄ӈквылтан та̄наныл ос йӣквыт пе̄с йис хурияныл хольт хультсыт. Ёмщакв те сунсуӈкв, туп ты тит коллективыг щар ма̄щтырыг ты сусхатэ̄г». Хурит йӣквнэ ос э̄ргын ма̄хум по̄слым о̄лэ̄гыт.

1078 2014.06.20. Ирина Самсонова (RUS) Людмила ТЕТКИНА (MNS)

Ма̄ньлат хо̄тпат ханищтахтуӈкве ялсыт. Туи о̄вылтахтам порат Мордовия ма̄т Рузаевский район Сузгарье па̄вылт ма̄ньлат финноугрыт ханищтапын акванатхатыгласыт. «Роль общественных организаций в сохранении финноугорских языков и культур» нампа ханищтап Финляндско-Российский нампа проект щирыл ва̄рыглаве. Ты хосыт финноугрыт та̄нки халанылт ва̄йхатым, акванюрщхатым та̄нки пе̄с йис ва̄рмаляныл ос ща̄нь ла̄тӈаныл ханищтыяныл ос э̄лаль тотыяныл. Мордовия ма̄н ханищтахтуӈкве Финляндияныл, Удмуртияныл, Карелияныл, Мордовияныл, Коми ос Марий Эл республиканыл, Пензенский областиныл, Санкт-Петербург ос Москва ӯсыгныл 34 ма̄ньлат хо̄тпа во̄виньта̄лве̄сыт. Ма̄н округувныл А̄с-угорский ма̄ньлат ма̄хум организацияныл ат хотпа: Диана Букаринова, Алла Ишимирова-Посохова, Лариса Миляхова, Антон Нахрачёв ос Ирина Самсонова, «Ханты ясанг» газетат рӯпитан нэ̄, тув ялсыт. Ханищтап о̄вылтахтан порат Рику Савонен, финноугорский проект щирыл рӯпитан хум, ос Юрий Мишанин, Поволжский финноугорский культурный центр кӯщай хум, паща ла̄тыӈ ла̄всы̄г. Тэ̄н юипа̄лт Владимир Абрамов, «Финноугорский мир» нампа мирхал журналыт кӯщай хум, финноугорский организацият манхурип э̄рнэ тэ̄лат ва̄ре̄гыт, та урыл потыртас. Ты юипа̄лт ка̄сыӈ ма̄ньлат хо̄тпа такви хансум проектэ урыл ла̄тыӈ ла̄выс. Ӣтипа̄лаг мӯй ма̄хум э̄лыпа̄лт «Торама» нампа ансамбль э̄ргыс ос йӣквыс. Ты ансамбльт э̄рганыл туп мордовский ла̄тӈыл э̄ргияныл. Мо̄т хо̄талт ма̄ньлат ма̄хум «Язык», «СМИ» ос «Менеджмент» хӯрум группан уртхатым рӯпитасыт. Ма̄хум тот са̄всыр проектыт хансуӈкве ос ты ва̄рмаль хосыт э̄лаль хумус рӯпитаӈкве, ханищтаве̄сыт. Аквта хо̄талт ма̄хум Подлесная Тавла па̄вылн тотыглаве̄сыт. Та па̄вылт рӯпитан школат ня̄врамыт йӣвныл са̄всыр пормас яктуӈкве ханищтавет. Ма̄ньлат хо̄тпат ты школа сунсуӈкве щалтсасыт. Тувыл Владимир Ромашкин музейколэ суссыт. Ты о̄йка Мордовия ма̄т сака ёмащакв ва̄ве. Тав о̄лнэ̄тэ сыс мордва мир пе̄с йис потрыт, э̄ргыт акванатыянэ. Тыи ма̄гсыл тав тот сака янытлаве. Хӯрмит хо̄талэ̄т ма̄хум са̄всыр проектыт хансуӈкве ханищтаве̄сыт. Ӣтипа̄лаг мӯй ма̄хум Саранск ӯсн ялсыт. Тот та̄н И. Д. Воронин нампа республиканский краеведческий музей суссыт. Тувыл «Мерема» нампа ансамбль мӯй ма̄хум ма̄гсыл концерт ва̄рыглас. Ты ансамбль о̄с туп та̄нки ща̄нь ла̄тӈыл э̄ргыт э̄ргияныл. Нилыт хо̄талэ̄т та̄н хӯрум хо̄тал сыс хансум проектаныл урыл потыртасыт. Ма̄ньлат хо̄тпат «Финский за 6 минут», «Финноугриада», «МИНФИН», «ЭТНОкалендарь» ос са̄в мо̄т проектыт тот хӯрум хо̄тал сыс хассыт. Китыт тамле ханищтап таквсы порат сӯкыр э̄тпост Удмуртия ма̄т рӯпитаӈкве паты. Са̄всыр ма̄т о̄лнэ а̄гитпыгыт та̄нки проектаныл тув ке̄туӈкве ве̄рме̄гыт. Щар ма̄к ёмас проектыт хансум ма̄ньлат хо̄тпат Удмуртия ма̄н ханищтапн о̄с тах во̄вавет. Ирина Самсонова хансум потре ма̄ньщи ла̄тӈыл Людмила ТЕТКИНА хансыстэ.

1078 2014.06.20. Александр ВЬЮТКИН

Ма̄щтырлан ма̄хум акванатыглаве̄сыт. Мощ мо̄лалнув ма̄хум нэ̄рнэйӣвыт Ханты-Мансийск ӯст ма̄щтырласыт. Ма̄щтырлан коныпал тув ёхталам ма̄хум са̄ӈквылтаӈкв ханищтахтасыт. Ты ва̄рмаль хӯрум хо̄тал минас. Та кастыл округувныл Саранпа̄вылныл, Нижневартовск, Сургут, Пыть-Ях ос Урай ӯсытныл соссаӈ ма̄хум ёхталасыт. Пуссын аквъёт хусахтем хо̄тпа о̄лыс. Нэ̄рнэйӣв ма̄щтырлан кастыл мирн ёмщакв ва̄нэ тит ма̄щтыр хӯмыг ханищтан ма̄гыс во̄выглавесы̄г. Тэ̄н наманэ̄н – Анатолий Вадичупов ос Герман Хатанзеев. Тэ̄н сас са̄ӈквылтапыт, на̄рсъюхыт, ко̄йпыт, тумраныт ос нэ̄рнэйӣвыт ёмас ва̄ре̄г, ма̄щтырыг о̄лэ̄г. Са̄выӈпа̄лэ са̄ӈквылтан ма̄хум са̄ӈквылтапыт тэ̄натэ̄н ты ва̄рылтэ̄гыт. Ханищтахтан ма̄хум ёт та̄н хӯрум хо̄тал сыс са̄т нэ̄рнэйӣв ва̄руӈкв а̄лымасыт. Нэ̄рнэйӣвыл са̄ӈкылтаӈкв ханищтахтам ма̄хум титаххӯрмах та̄н ханищтасыт. Ма̄щтырлан ва̄рмаль оигпан э̄лыпа̄лт та̄н ма̄нь суссылтап щё̄пита̄лыгласыт.

1078 2014.06.20. Людмила ТЕТКИНА

Та̄н яныгпа̄ла хо̄тпат ма̄гыс рӯпитэ̄гыт. Кондинский район Леуши па̄вылт «Совет ветеранов» нампа организация яныгпа̄ла ма̄хумн хумус нё̄ты ос манхурип э̄рнэ тэ̄ла ва̄ри, ты урыл ма̄ньщи газетав ма̄гсыл Надежда Витальевна Набатова потыртас. Тав ань секретарьхо̄тпаг тот рӯпиты. – 2013 та̄лт та̄л котиль э̄тпос 31 хо̄талэ̄т пе̄риян ва̄рмаль о̄лыс. То̄нт ма̄н «Совет ветеранов» организациян Лидия Петровна Мармышева кӯщаиг пе̄рияслӯв. Ань ты Советыт ма̄н са̄т хо̄тпа рӯпитэ̄в. Архивнэ̄пакыт кисхатым ам «Совет ветеранов» нампа организацияв урыл ла̄тыӈ хо̄нтсум. Ангелина Ивановна Ковалдина тот тох хансыс: «1993 та̄лт ма̄ньполь э̄тпос 3 хо̄талэ̄т «Совет ветеранов» организациян кӯщаиг Александр Никитич Филиппов пе̄риявес». Ты о̄йка юипа̄лт Вера Иванова Шишкина рӯпитас, тувыл Лидия Петровна Мармышева пе̄риявес. Ма̄н рӯпитаӈкве хунь патсӯв, о̄влэ̄т па̄вылт пенсият о̄лнэ ма̄хманув пуссын акв нэ̄пакн хассанӯв. Ос ка̄сыӈ хо̄тпа намхо̄талэ янытлаӈкве патыслӯв. Хум хо̄тпат 60 та̄лэ ос нэ̄ 55 та̄лэ то̄влын кастыл мӯйлупсал мӯйлуптыянӯв. Ма̄н «Совет ветеранов» па̄лыл та̄наныл янытлаӈкве юв ялэ̄в. Та̄н пуссын такем ща̄гтэ̄гыт. Ка̄сыӈ хо̄тпа номтэ ёмас, хунь тав номаве ос ат ёрувлаве. Тамле рӯпата ва̄руӈкве хунь номылматсӯв, о̄влэ̄т спонсорыт кинсым, хотальа̄ти пимща хассӯв. Ма̄навн Геннадий Семёнович Корепанов, областной Думат рӯпитан депутат, ат со̄тыра солко̄ви ке̄тыглас. Владимир Яковлевич Иванов, ма̄н районный Думавт депутатыг о̄лнэ хум, хӯрум со̄тыра солко̄ви мис. Ты коныпал мо̄т депутыт о̄с олн майлысыт. Па̄влувт рӯпитан предпринимателит о̄с ёмащакв ма̄навн нё̄тэ̄гыт. Тыи ма̄гсыл ма̄н та̄нанылн яныг пӯмащипа ла̄тыӈ ла̄ве̄в. Тувыл ма̄н «Забота» нампа проектнэ̄пак хассӯв ос Ханты-Мансийск ӯсн общественный связь Департаментын ке̄тыслӯв. Тот касыл щирыл но̄хпатсӯв, ань 200 со̄тыра солко̄вил майвесӯв. Па̄влув янытлан кастыл «Исторический ансамбль: 430 лет селу Леуши» нампа проектнэ̄пак щё̄питаслӯв. Гранолн винэ ма̄гсыл ты проект ке̄тыслӯв, тот о̄с но̄хпатсӯв, 200 со̄тыра солко̄вил майвесӯв. Ты олныл ма̄н па̄влыт о̄лнэ памятникыт мӯсхалыг щё̄питыянӯв. Па̄вылт акв памятник хосат тӯщтувес. Са̄в та̄л ювле хультум порат та ма̄т коммунистыт алве̄сыт ос ёлщё̄питаве̄сыт. Акв порат ты памятник мӯсхалыг щё̄пита̄лвес, тувыл тот ёлщё̄питам хо̄тпат наманыл аты хасве̄сыт. Та па̄сныл 40 та̄л минас, памятник намыт та̄л тох та лю̄ли. Ма̄н ты рӯпата ва̄рилӯв, наманыл тув хансыянӯв. Ань коммунистыт ат янытлавет, ат э̄руптавет. Тувыл историяв ос ты ма̄хум хотёрувлаӈкве ат э̄ри, тыи ма̄гсыл ма̄н ты рӯпата ва̄руӈкве вӯйхатсӯв. Ты коныпал ты олныл ма̄н па̄влувт акв йильпи памятник о̄с тах тӯщтэ̄в. Хо̄нтлам хӯрум яныгпа̄ла хо̄тпа ос «Труженики тыла» нам о̄щнэ 11 хо̄тпат Леушит ань о̄лэ̄гыт. Та̄н о̄лнэ коланылн ма̄н па̄рт тагатасӯв, ма̄хум вос ва̄гыт, хоты колт та̄н о̄лэ̄гыт. Грантолныл ма̄н акв нэ̄пак о̄с та̄ратаслӯв. Тот войнат хо̄нтлум ма̄хманув наманыл пуссын хассанӯв. Ка̄сыӈ э̄лумхо̄лас урыл потыр хассӯв, хоты ма̄т хо̄нтлас, хоты ма̄т ёлщё̄питавес, манхурип ма̄глын тагатан по̄с о̄ньщас. Победа хо̄талыл ветерананув янытламув порат ты нэ̄пакыл мӯйлуптасанӯв. 2013 та̄лт па̄влувт о̄лнэ «Ветеран» э̄ргын коллективув 20 та̄лэ то̄влыс, ты кастыл ма̄н «И льётся песня из души » нампа нэ̄пак та̄ратаслӯв. Мо̄т китыт нэ̄пак ма̄н Леуши па̄вылт о̄лнэ кит э̄кваг янытлан кастыл ва̄рыслӯв. Акв э̄ква наме Александра Георгиевна Зольникова. Тав 30 арыгкем та̄л школат ня̄врам ханищтан нэ̄г рӯпитас. Э̄ква «Отличник просвещения», «Заслуженный учитель РФ» нам ос «Знак почёта» ма̄глын тагатан по̄с о̄ньщи. Тав наме «Югория» нампа энциклопедиянэ̄пакт хансым олы. Китыт э̄ква Мария Трифоновна Тропина. Тав о̄с «Отличник просвещения» нам о̄ньщи. Э̄ква наме «Золотая книга Кондинского района» тув хасвес. Тамле мӯтраӈ, сымыӈ ос ка̄ркам э̄кваг ма̄н па̄влувт ты о̄лэ̄г. Са̄в та̄л ка̄ркамыг рӯпитам яныгпа̄ла хо̄тпанув благодарственный пищмал манос мо̄т янытлан нэ̄пакыл вос мивет, нэ̄паканыл акванатыянӯв ос районный межведомственный комиссиян ке̄тыянӯв. Тув ходатайствонэ̄пакыт ке̄тыглым па̄влувт 18 э̄лумхо̄лас янытлаве̄сыт ос ты нэ̄пакыл майве̄сыт. Ка̄сыӈ та̄л ма̄ньполь э̄тпос «Ярмарка некоммерческих организаций» Ханты-Мансийск ӯст ва̄рыглаве. Округ янытыл ма̄хум та̄нки рӯпатаныл урыл потыртаӈкве ос выставканыл суссылтаӈкве тув ялантэ̄гыт. «Совет ветеранов» нампа районный организацияв о̄с тув во̄виньта̄лвес. Анна Ивановна Клачкова, ты организацият кӯщаиг о̄лнэ э̄ква, ты выставка суссылтаӈкве ялыс. Ма̄н проектанув хосыт та̄ратым нэ̄паканув тот о̄с суссылтасанэ. Леуши па̄вылт о̄лнэ яныгпа̄ла хо̄тпат са̄всыр ялпыӈ хо̄талытн, концертытн ва̄тихал акванатыглыянӯв. Победа хо̄тал кастыл ма̄н яныгпа̄ла хо̄тпанув клубн во̄виньта̄лсанӯв. Акв хо̄талт ма̄н «Вечер народной частушки и песни» нампа концерт ва̄рыгласӯв. Са̄всыр э̄ргыт ос частушкат ва̄нэ хо̄тпат пуссын тув во̄виньта̄лсанӯв. О̄влэ̄т номсысӯв, ма̄хманув тах ат ёхтэ̄гыт. Тувыл таса̄вит мир ёхтыс, маткем та э̄ргысӯв, маткем та мовиньтасӯв. Яныгпа̄ла хо̄тпат ма̄гсыл «Спросите у доктора» нампа тэ̄ла ва̄рыглэ̄в. Ма̄н Вера Ивановна Швейкина, Леуши па̄выл ле̄ккарыг о̄лнэ нэ̄, ёт рӯпитэ̄в. Яныгхо̄тпа ле̄ккар нэ̄ па̄лт са̄всыр а̄гм урыл китыглахтуӈкве ке таӈхи, тув ёхталаӈкве ве̄рми. Акв хо̄тал леккар давлениеа̄гм урыл, мо̄т щёс тав сым а̄гм урыл потыртас, хӯрмит хо̄талэ̄т са̄всыр йильпи тэ̄рпи урыл ла̄тыӈ ла̄выс. Ма̄н нила щёс библиотекат акванатхатыгласӯв, ма̄хумн тамле тэ̄ла сака мӯстыс. Яныгпа̄ла ма̄хманув юн о̄лыманыл, та̄нки а̄гманыл урыл акваг ул вос номсахтэ̄гыт, ты ле̄ккар нэ̄ ёт ва̄тихал хо̄нтхатыглаӈкве тах патэ̄гыт. Надежда Витальевна Набатова ань пенсият о̄лы. Тав ма̄ньлатыг о̄лме порат Леуши па̄вылн школан рӯпитаӈкве ёхтыс. То̄нт а̄ги номсыс, мощ рӯпиты, ювле яныгмам ма̄н о̄луӈкве мины. Тувыл номтанэ мо̄т щирыл минасыт, Леушит па̄вылт тав хум ва̄рыс, о̄луӈкве тот та хультыс. Надежда Витальевна 36 та̄л сыс школат ня̄врам ханищтан нэ̄г рӯпитас. О̄йкатэ̄нтыл кит ня̄врам янмалтасы̄г. Пыге Москва ӯст юристыг ханищтахтас, ань Междуреченский па̄вылт рӯпиты. А̄гитэ ос Москва ӯст ханищтахтас, тот хум ва̄рыс, ань а̄гитэ янмалтым о̄лы. Надежда Витальевна пенсиян минаме юипа̄лт рӯпата та̄л нас ӯнлахо̄луӈкве ат таӈхыс. «Совет Ветеранов» нампа организацият рӯпата ва̄руӈкве вуйхатас. Тувыл такви ня̄враманэ о̄с ат ёрувлыянэ. Пыге хӯрум ня̄врам о̄ньщи, Надежда Витальевна тот акваг нё̄ты. Москва ӯсн а̄гитэ̄н нё̄туӈкве о̄с ва̄тихал яланта̄лы. Надежда Витальевна ла̄ви: «Ам нас тох тэ̄ла та̄л о̄луӈкве ат ве̄рме̄гум, акваг матхурип рӯпата а̄нумн ва̄руӈкве э̄ри».

1078 2014.06.20. Татьяна Хозяинова

Юрты̄г. Кит юрты̄г Сантыра ос Коша о̄лсы̄гхӯлсы̄г. Нё̄тнэ во̄р ос Нё̄р ляпат о̄лсы̄г. Тэ̄н кон мечикыл ёнгуӈкве, ёсал ос велосипедыл яласаӈкве сака э̄руптасы̄г, халэ̄нт юртыӈыщ о̄лсы̄г. Ка̄сыӈ таквс во̄р хӯнтлуӈкве ялантасы̄г. Лӯптат хумус тот суртге̄гыт, товлыӈ ӯит турсуяныл хӯнтлысы̄г, сӯйпил лӯпта, саӈквлыпил, ӯльпа па̄кв атыгласы̄г. Аквматнакт тэ̄н о̄с во̄рн минасы̄г. Во̄р хосыт ё̄ме̄г, илтты̄г лэ̄ӈынкве ка̄саласы̄г. Тав хорамыӈ ос пуныӈ о̄лыс. Тэ̄н ща̄гтым, поргим ос ёнгим лэ̄ӈын юипалт ха̄йтылтахтасы̄г. Лэ̄ӈын акв йӣвныл ос мо̄т йӣвн поргим тэ̄натэ̄н па̄ль во̄рн тӯлыстэ. Пыгрищиг номылматсы̄г, хот та тыпсы̄г. Сатапаӈкве патыс, Сантра ос Коша пилуӈкве патсы̄г. Во̄р хосыт хоса ё̄мсы̄г, ва̄гтал патсы̄г, во̄рт э̄т хӯлсы̄г. Э̄т сыс тэ̄н акваг акв по̄хат о̄лсы̄г, Таквсы э̄тыт ащирмаӈыг о̄лсыт, тэ̄н парщин курткал лэ̄пхатасы̄г. А̄лпыл ювле миннэ лё̄ӈх кинсуӈкве минасы̄г. Ня̄врамыг ё̄ме̄г, ощхуль ва̄ре̄г, атым пиланэ̄н киттыгуртыянэ̄н. Во̄рт сака пилсы̄г, тэ̄нки халэ̄нт акваннё̄тхатэ̄г. Юртыӈыщ о̄луӈкве о̄парище̄н ханищта̄лвесы̄г. Тэ̄н о̄парище̄н потырта̄лум ла̄тӈыт ёмщакв номитэ̄н: каӈк – ты ма̄к ю̄рт, тэ̄н аквписыг аквъёт. Хунь аквъёт – тэ̄н ё̄ры̄г. Хоса ё̄мыгтасы̄г, а̄ӈкватасы̄г, хо̄тал та̄кыщ но̄хпатыс. Мо̄лхо̄тал хольт ос пыгрищиг йӣв ка̄саласы̄г. Ты пе̄с яныг ӯльпа, тованэ осыӈыт. Та йӣв тармыл лэ̄ӈынкве ӯнлыс, ты лэ̄ӈнын тэ̄н во̄рн хуйтвесы̄г. Юрты̄г лё̄ӈхе̄н ханьщистэ̄н. Та лё̄ӈх хосыт ща̄гтым ха̄йталтахтасы̄г ос во̄рныл па̄вылн нэ̄глысы̄г. Лэ̄ӈынкве лэ̄ге хосги ос ла̄ви: «Ка̄сыӈ ю̄рт ё̄р». Пыгрищиг ёмащакв юв минасы̄г. Хунь юв ёхтысы̄г, тэ̄н ат потыртасы̄г, аквансыныгтахтым лю̄щсы̄г, тэ̄нкинатэ̄н пӯмащипа ла̄тыӈ ла̄всы̄г. Ань тэ̄н яныгмасы̄г, ла̄кква ма̄т о̄лэ̄г, хунь тэ̄нки па̄влэ̄н ёхтэ̄г, тэ̄н ты урыл аквписыг номылматыгла̄лэ̄г. Ань тэ̄нки ня̄враманэ̄н ханищтэ̄г, хумус юртыӈыщ о̄луӈкве э̄ри ос хумус о̄парище̄н ханищтавесы̄г. Ты потыр Саранпа̄выл школат ханищтахтын а̄ги Татьяна Хозяинова хансыстэ.

1078 2014.06.20. Михаил Ромбандеев

Амки ма̄кем. Сака нё̄тнэ хо̄тал ӯнтнэ ма̄, На̄й хольт хорая̄лы. Сака ёмас хо̄тал нэ̄глын ма̄, Я̄т тав о̄лыгла̄лы. Тыт сыстам лылые̄п, Тыт вуйкан нё̄рыӈ вит. Тыт па̄хвыӈ, лощит ма̄: Ос сака са̄всыр во̄р тыт. Ам ща̄гтым ла̄ве̄гум: «Ам тыт о̄лэгӯм, Ам тыт самын патсум Тыи ам ма̄м! » Ты стихотворение Михаил Ромбандеев, Саранпа̄вылт о̄лнэ ма̄ньщи пыг, хансыстэ.

1078 2014.06.20. Диана Панаева

Пупа̄пщикве. Пе̄с порат ма̄ньщи ма̄квет акв колта̄гылт ма̄ньщи а̄гирищ самын патыс. А̄гирищ каӈк о̄ньщис. Тав наме Посыӈсам о̄лыс. Ма̄нь па̄вылт тав сака ё̄рыг о̄лыс, ща̄нягена̄щаген э̄руптавес. Аквнакт тав са̄лы во̄раяӈкве минас. Во̄р хосыт хоса ё̄мыгтас, акваг нэ̄матыр ат хо̄нтыглас. Та та̄лыт нуса ос тэ̄талыӈ о̄лсыт. Юв ёхтыс, На̄й-О̄тыранэ̄н по̄йкщуӈкве патыс, ща̄нягеа̄щаге ма̄гыс матыр во̄р вос мыг. О̄ста во̄рн минас. Во̄р хосыт ёсал ё̄ми, ты ёсаге яныг ащо̄йканыл таве̄н хультсы̄г, ӣлттыг э̄лын сэ̄мыл ут ка̄салас. Такви ла̄ви: « Пӯпапщикве, ялпыӈ ӯйкве, наӈ ты ам ё̄рум. » Ёмщакв сунсы, яныг пӯпапщиквекапай лю̄ли. Ща̄гтыс, ань тах ща̄нягума̄щагум ма̄гыс мӯйлупса паты. Такви ё̄втэ но̄хлэ̄ватастэ, та̄кыщ хартыстэ, маныр ё̄р о̄ньщис, ня̄лэ на̄й хольт та̄ратастэ, пупа̄пщикве щар сыме̄н хо̄яс. Пупа̄пщикве по̄лям ма̄н ёл та рагатас, каӈке о̄с На̄й-О̄тырын та вуйвес. Тыщир тав пупа̄пщиквег та е̄мтыс. Ща̄нягеа̄щаге палт та ха̄йтыс. Тот та̄н пуссын хотрохтысыт, тав пупа̄пщикве хурипа, йӣгрище̄н хащвес. Ань та йисныл ма̄ньщи э̄лмхо̄ласн пупа̄пщикве каӈкыг ловиньтаве. Ты потыр Диана Панаева, Саранпа̄выл школат ханищтахтын а̄ги, хансыстэ.

1079 2014.07.11. Людмила ТЕТКИНА

Мир ма̄гсыл пирмайтым са̄кконыт. Лӯпта э̄тпос оигпан э̄лыпа̄лт Ханты-Мансийск ӯст округ Думат сапра̄ни о̄лыс. Депутатхо̄тпат тот 18 са̄ккон ос са̄всыр программа урыл потыртасыт, тувыл пирмайтасаныл. Ты халт та̄н мирн нё̄тнэ са̄кконын йильпи ла̄тыӈ хассыт. Бюджетный организацият рӯпитан ма̄хум кит та̄л сыс акв щёс ӯщлахтын ма̄н ялнэ ма̄гсыл олныл мивет, рущ ла̄тӈыл «льготный проездыг» ла̄ваве. Ты э̄лыпа̄лт тамле ва̄рмаль о̄лыс, хо̄тпа понедельникыл ӯщлахтын хо̄таланэ о̄вылтахтэ̄гыт ке, тав ос ты хо̄тал ат ӯрыстэ ос субботат манос воскресениет ӯщлахтуӈкве минас. То̄нт билет ёвтнэ ма̄гсыл олныл тав ат ойтвес. Ма̄хум кит хо̄тал юн ул вос ӯрхатсыт ос та̄ра ӯщлахтуӈкве минуӈкве вос ве̄рмысыт, депутатыт тамле йильпи ла̄тыӈ са̄кконын хассыт. Сапра̄нит депутатыт «Лесной кодекс РФ» нампа яныг са̄ккон урыл потыртасыт. Ань ты нэ̄пакт тох хансым о̄лы, организацият манос нас хо̄тпат, аренда щирыл та̄нкина̄нылн ма̄ ке хансэ̄гыт, та̄н ка̄сыӈ та̄л декларациянэ̄пак ва̄ре̄гыт. Ма̄во̄й но̄хвинэ компаният ты нэ̄пак акваг ул вос щё̄питасыт, ма̄н депутатанув йильпи ла̄тыӈ «Лесной кодексн» хансуӈкве таӈхе̄гыт. Хансум номтаныл та̄н Государственный Думан ос Совет Федерациян ке̄тсаныл. Любовь Чистова, Общественный палата кӯщай э̄ква, депутатыт нупыл рӯпататэ урыл потыртас. Тав ла̄выс, та̄н палтыланыл акваг са̄в хо̄тпа та̄рвитыӈ ва̄рмаляныл ёт ёхталэ̄гыт. Та̄н халанылт са̄в ма̄ньлат ще̄мьят о̄лы. Йильпи са̄ккон щирыл атхуйплов та̄л округувт о̄лнэ ще̄мья кол ёвтнэ ма̄гсыл очередин хансавет ос олныл нё̄тавет. Ань тамле ва̄рмаль о̄лы, нэ̄гхумы̄г акванминасы̄г ке, хум тыт самын патыс, тыт яныгмас, ос нэ̄тэ тыг о̄луӈкве мо̄т ма̄ныл ёхтыс ке, тэ̄н ань йильпи са̄ккон щирыл кол ёвтнэ ма̄гсыл нё̄тмилыл ат миве̄г. Кӯщай э̄ква, ла̄вме щирыл, ты пирмайтым са̄кконыт тамле ще̄мьят урыл я̄нас ла̄тыӈ хансуӈкве э̄ри. Надежда Алексеева, соссаӈ ма̄хум Ассамблеят рӯпитан депутат, пе̄с йис ма̄т о̄лнэ ма̄хум ма̄гсыл пирмайтым са̄ккон 2013 та̄л сыс хумус рӯпитас, та урыл потыртас. Надежда Геннадьевна ла̄выс, ювле хультум та̄л сыс соссаӈ ма̄хум халт нэ̄мхотьют пе̄с йис ма̄наныл та̄нки нупыланыл ат хассыт. «Социальноэкономическое развитие КМНС ХМАО-Югры» нампа программа мощща олныл та̄ставе, таи ма̄гсыл ты са̄ккон лю̄льсаӈ рӯпиты. Ты программа са̄внув олныл хансуӈкве э̄ри, туп то̄нт соссаӈ ма̄хум мӯсхалыг нё̄туӈкве патавет ос та̄н ма̄гсыланыл пирмайтым са̄кконыт ёмащакв рӯпитаӈкве патэ̄гыт. Лӯпта э̄тпос депутатыт юио̄выл сапра̄нияныл о̄лыс, мо̄т щёс та̄н сӯкыр э̄тпост тах акванатхатэ̄гыт.

1079 2014.07.11. Николай МЕРОВ

Са̄лыт уральтан хум. Ха̄льӯс район Саранпа̄выл совхозт Данил Васильевич Вынгилев рӯпиты. Ам тув ялнэ̄м порат, тав ётэ хо̄нтхатыгласум. Тав такви уре̄тыл мощ потыртас. На̄н тав потре э̄лаль ловиньтэлы̄н. «Ам ща̄нягума̄щагум Кимкъясуй па̄вылт о̄лсы̄г. Тот Кульпас па̄выл рыбоучастокт хӯл алыщлым рӯпитасы̄г. Тувыл Саранпа̄вылн ва̄нтлысы̄г. Тот са̄лыӈколн рӯпитаӈкве патхатсы̄г. О̄влэ̄т са̄тыт бригадат рӯпитасы̄г. Ётылнув ос о̄выл бригадат ловманкем та̄л са̄лы ӯрим яласасы̄г. Тувыл 1983 та̄лт пенсиян патсы̄г. Саранпа̄вылн на̄лув ва̄глысы̄г. Та юипалт ам 1985 та̄лт ща̄нягума̄щагум ва̄рмалянэ̄н э̄лаль тотнэ ма̄гыс са̄лыӈколн рӯпитаӈкве минасум. Нёловхуйплов та̄лум то̄влыс, армиян вуйве̄сум. Юв ёхтысум, о̄с са̄лы ӯруӈкве минасум. Та па̄сныл акваг са̄лыт ёт рӯпитэ̄гум. Са̄в та̄л пастухыг яласасум. Ма̄н ще̄мьявт ня̄врамыт пуссын са̄лыӈколт ма̄нь та̄гыл яныгмасӯв. Таима̄гыс о̄лупса ва̄рмалит пуссын ёмщакв ва̄ганум, нэ̄матыр та̄рвит а̄тим о̄лыс». Данил Васильевич ань Саранпа̄выл совхозт зоотехникыг рӯпиты. Са̄лыт уральтым ва̄тихал яласы. А̄гмыл ул вос е̄мтсыт, прививкауколыл тӯщтыянэ ос нас уральтыянэ. Ты рӯпата таве̄н сака мӯсты.

1079 2014.07.11. Людмила ТЕТКИНА

Нэ̄ кол ёвтнэ ма̄гсыл такви олн аты. Ты та̄лныл округувт «Накопительная ипотека» нампа йильпи программа рӯпитаӈкве о̄вылтахтас. Кол та̄л о̄лнэ ще̄мьят ты хосыт олннё̄тмилыл мивет. Ма̄хум о̄влэ̄т та̄нки нэ̄паканыл Ипотечный агентстван тотыяныл, тот та̄н очередьн хансавет. 2014 та̄л ат э̄тпос сыс округ янытыл 190 ще̄мья тув заявлениенэ̄пак тотсыт, ань 110 ще̄мья тув хасвес. Ты юипа̄лт очередьн хансым ма̄хум Ипотечный агентстваныл уведомлениенэ̄пакыл ке̄тавет. Тамле пищма яныгполь э̄тпосныл ма̄хумн ке̄туӈкве о̄вылтаве̄сыт. Ты пищмал тотым ще̄мьят Ханты-Мансийский банкын вос ялэ̄гыт ос «Накопительная ипотека» нампа вклад вос пунсэ̄гыт. Тот 3-6 та̄л сыс кол ёвтнэ ма̄гсыл олн акванатуӈкве э̄ри. Ще̄мья акв э̄тпос сыс 6-25 со̄тыра са̄вит солко̄ви тув пинуӈкве ве̄рми. Ос акв та порат ще̄мьят Ипотечный агентстват ёт соглашениенэ̄пак хансэ̄гыт. Тох кол ёвтнэ ма̄гсыл олн атым, хо̄тпа округ бюджетныл ка̄сыӈ э̄тпос 12 со̄тыра 500 солко̄вил ке̄таве. Пуссын та̄лыт сыс 450 со̄тыра солко̄ви са̄вит нё̄тмилыл тах миве. Щар о̄влэ̄т тох кол ёвтнэ ма̄гсыл олн атуӈкве Нягань ӯст о̄лнэ нэ̄ о̄вылтахтас. Тав хӯрум та̄л Ханты-Мансийский банкын олн пинуӈкве паты. Ты сыс тав округ бюджетныл ос арыг 450 со̄тыра солко̄вил тах миве. Ань йильпи са̄ккон щирыл, округувт 15 та̄л ат о̄лум ще̄мьят ты программан ат хансавет ос кол ёвтуӈкве ат нё̄тавет. Са̄в та̄л тыт о̄лнэ ще̄мьят пуссын тув хасхатуӈкве ве̄рме̄гыт. Ипотечный агентстваныл ке̄тым ля̄ххал ма̄ньщи ла̄тӈыл Людмила ТЕТКИНА хансыстэ.

1079 2014.07.11. Людмила ТЕТКИНА

Белоярский ӯст лылые̄п сака па̄ӈктаве. Ма̄н округувт ма̄вит ӯргалан тэ̄ла ань акваг та̄рапаттым о̄ньщаве. Ты хосыт рӯпитан ма̄хум ва̄тихал акванатхатыглэ̄гыт ос ты урыл потыртэ̄гыт. Акв тамле сапра̄ни губернатор ва̄ӈын хум Геннадий Бухтин ва̄рыглас. Ма̄вит ӯргалан службат рӯпитан хо̄тпат округ янытыл яласэ̄гыт, ка̄сыӈ районт ма̄, я̄т ос лылые̄п мӯсхалыг ханищтэ̄гыт. Ос ты ва̄рмалит пуссын акв нэ̄пакн хансыяныл. Ма̄вит ӯргалан ма̄хум ты нэ̄паканыл щирыл, Белоярский ӯст лылые̄п щар па̄ӈкыӈыг о̄лы. Та ӯст са̄в та̄л газокомпрессорный станция рӯпиты. Тав са̄в лю̄ль ут кон ты та̄рты. Щар сыстамыг Кондинский ос Советский районыг ловиньтахтэ̄г, тот мощща предприятие рӯпиты, та̄н ма̄, я̄т сака ат па̄ӈктыяныл. Яныг ӯст халт щар па̄ӈкыӈ Нижневартовск ӯс ловиньтахты. Ты юипа̄лт Сургут, Нефтеюганск ос Ханты-Мансийск ӯсыт хансым о̄лэ̄гыт. Кӯщаит ос таи ла̄всыт, ты нила ӯсытт сака са̄в ма̄шина яласэ̄гыт, та̄н сака лылые̄п па̄ӈктэ̄гыт. Ты коныпал ты ӯсыт ляпат ма̄во̄й но̄хвинэ са̄в компаният рӯпитэ̄гыт, та̄н о̄с са̄в лю̄ль ва̄ре̄гыт. Округувт ма̄вит хумус ӯргалаве, хо̄т ма̄вит сака па̄ӈктаве ос хумус сыстамтаве, ты урыл кӯщаит ка̄сыӈ та̄л яныг докладнэ̄пак щё̄питэ̄гыт. Ма̄хум та̄н хансум нэ̄паканыл ловиньтаӈкве вос ве̄рме̄гыт, таве интернетын ва̄рияныл.

1079 2014.07.11. Николай МЕРОВ

Округувт о̄лнэ пыганув Президентув палт лусытэ̄гыт. Мо̄лал Югра ма̄ныл Президентув полкын нёлоловхуйплов та̄ланыл то̄влын пыгыт лусытаӈкве тотве̄сыт. Та̄н Московский область Ногинский район «Купавна» нампа военный лагерьт ма̄в ӯргалан ма̄гыс присяга мисыт. Ты ва̄рмаль кастыл округ губернатор Наталья Комарова о̄с тув ялыс. На̄н ты урыл э̄лаль ловиньтэ̄н. Ма̄н округувныл пуссын аквъёт атхуйплов пыг тув тотве̄сыт. Та̄н ща̄няныла̄щаныл Президентский полкын присяга сунсуӈкве о̄с ёхталасыт. Наталья Комарова лусытан пыгыт ос та̄н рӯтаныл сымыӈыщ янытласанэ. Ты пыгыт Ханты-Мансийск, Нижневартовск, Нягань, Нефтеюганск, Сургут, Лангепас ӯсытныл ос Кондинский, Советский районыгныл о̄лэ̄гыт. Та̄н рӯтанылн писаль лосталан ос ряд щирыл нё̄тнэ̄г ё̄мнэ ва̄рмаль суссылтасыт. Тот лусытан пыгыт Россия яныг кӯщаит ос «Красный площадь» ӯргалыяныл. Президентув полкын винэ ня̄врамыт о̄лупсаныл уральтавет, хо̄тпа нас тох тув ат ликми. Ня̄врамыт хумус школат ханищтахтасыт, маныр номт о̄ньще̄гыт, манхурип ще̄мьят та̄н яныгмасыт, ёмщакв уральтавет. Югра ма̄т о̄лнэ ня̄врамыт 2007 та̄лныл тув вивет. Та па̄сныл ань тыг мус тот 120 пыг лусытас.

1079 2014.07.11. Людмила ТЕТКИНА

Округ кӯщай нэ̄ Нё̄рн ялуӈкве номсы. Мо̄лты та̄л Югра ма̄н 450 со̄тыра мӯй ма̄хум ёхталас. Ирина Арканова, туризм щирыл рӯпитан кӯщай нэ̄, ла̄выс, са̄в ма̄хум тыг ӯщлахтаӈкве вос ёхталэ̄гыт, округ янытыл са̄всыр турбазат, этностойбищат ос мо̄т мӯйлын колыт рӯпитэ̄гыт. Ма̄хум тыт ма̄ньщит, ханты о̄лупсаныл сунсуӈкве, хӯл алыщлаӈкве, Нё̄рн ялуӈкве ос мо̄т щирыл ӯщлахтуӈкве ве̄рме̄гыт. Округ кӯщаит туризм нупыл ань акваг са̄в олн кос та̄стэ̄гыт, тувыл тот иӈ са̄в та̄рвитыӈ ва̄рмаль о̄лы. Тыт ёмас яласан лё̄ӈх а̄тим, тыи ма̄гсыл туристыт тыг ёхталаӈкве сака ат ка̄саще̄гыт. Мо̄т та̄рвит округ янытыл гостиницаколыт э̄т хулнэ ма̄гсыл са̄в олн выгыт. Ирина Арканова ла̄внэ̄тэ щирыл, туризм хосыт иӈ са̄в рӯпата ва̄руӈкве э̄ри, туп ты юипа̄лт са̄в мӯй ма̄хум тыг ёхталаӈкве патэ̄гыт. Ма̄н ма̄в урыл мо̄т ма̄т о̄лнэ мирыт са̄внув вос ва̄гыт ос тыг вос ёхталэ̄гыт, ань са̄всыр рӯпата ва̄раве. Ма̄ньполь э̄тпост ма̄ньлат хо̄тпат Ха̄льӯс район Нё̄рн ялсыт. Ты ва̄рмаль урыл телевизор, газетат ос интернетыт ля̄ххал хансыглавес. Са̄внув мир Нё̄ранув урыл вос пӯмщалахтэ̄гыт, ты та̄л во̄ртур э̄тпос яныгса̄т э̄лумхо̄лас тув ялуӈкве щё̄питахтэ̄гыт. Антон Тимкин, ма̄ньлат ма̄хум ос ханищтап Департаментыт рӯпитан хум, ты урыл ла̄выс: «Ка̄сыӈ хо̄тпа ма̄н ётув Нё̄рн ялуӈкве ве̄рми. Ань ня̄врамыт, ма̄ньлат а̄гитпыгыт, МЧСыт ос са̄в мо̄т ма̄тт рӯпитан хо̄тпат тув минуӈкве ка̄саще̄гыт. Наталья Комарова, губернаторув, Нё̄рн ялуӈкве о̄с щё̄питахты. Ма̄н группа щирыл ла̄кквауртхатэ̄в, акват ла̄глыл тув ё̄ме̄гыт, мо̄таныт яныг ма̄шинал ос акв группа велосипедыл тув ялэ̄гыт». Тамле рӯпата ос таи ма̄гсыл ва̄раве, са̄внув мир ма̄н округувн ӯщлахтуӈкве вос ёхталы.

1079 2014.07.11. Людмила ТЕТКИНА

Та̄н ма̄вит ӯргалаӈкве ханищтавет. Лӯпта э̄тпос «Спасти сохранить» нампа ва̄рмаль Югра янытыл рӯпитас. Манхурип э̄рнэ тэ̄ла ты акция мирн тоты, манхурип рӯпата ты пора сыс ва̄рвес, ты урыл Геннадий Бухтин, губернатор ва̄ӈын хум, ос Сергей Пикунов, ма̄вит ӯргалан служба кӯщай, потыртасы̄г. Геннадий Бухтин ла̄выс, ма̄вит ӯргалан акция о̄лум порат аквторыг са̄в рӯпата ва̄рвес. А̄гирищитпыгрищит «Красная книга глазами детей» нампа касылн ка̄тыл по̄слум хурияныл ке̄тыгласыт. Ты порат «Сохраним цветущий мир Югры» нампа форум о̄лыс. Тув са̄всыр ма̄ныл 200 э̄лумхо̄лас ёхталасыт. «Спасти и сохранить» нампа телефестивальн 450 хо̄тпат та̄нки по̄слум кинаныл тотыгласаныл. Ты коныпал мо̄т са̄в мирхал конференцият, ханищтапыт та э̄тпос сыс рӯпитасыт. Сергей Пикунов ла̄вме щирыл, ма̄вит ӯргалан акция ма̄н округувт акваг ва̄рыглаве. Тамле касылыт, ханищтапыт хосыт ня̄врамыт ма̄нь та̄гыл ма̄вит ургалаӈкве ханищтавет. Ты коныпал ты акцият рӯпитан ма̄хум ос мо̄т яныг рӯпата ва̄ре̄гыт, ма̄во̄й но̄хвинэ ма̄хум ма̄вит ӯргалаӈкве ос сыстамтаӈкве ханищтыяныл. Ань нефтяникыт ты тэ̄ла урыл о̄с сака ат номсахтэ̄гыт. Та̄н ма̄во̄й ма̄ныл но̄хвуим газ нас тох но̄хпе̄ламтыяныл, хо̄тал палыт та тэ̄г, ты хосыт ты ма̄вит сака па̄ӈктаве. Ань округувт тамле факелыт лапхарыгтан ма̄гсыл ты йильпи программа рӯпитаӈкве о̄вылтахтас. Ты нэ̄пак щирыл нефтяникыт мӯсхалыг уральтавет ос ты утыт лапхарыгтаӈкве ла̄вавет. Ты ва̄рмаль хосыт рӯпитан ма̄хум 2015 та̄л сӯкыр э̄тпост яныг конференциян акванатхатэ̄гыт. Ма̄ янытыл рӯпитан ма̄во̄й но̄хвинэ компаният пуссын ты урыл потыртаӈкве ос матыр нэ̄пак хансуӈкве Ханты-Мансийск ӯсн тах во̄виньта̄лавет.

1079 2014.07.11. Валентина УЗЕЛЬ

Ӯст о̄лнэ соссаӈ ма̄хум. Ты хурит Татьяна Александровна Молданова Надежда Васильевна Лукина ёт по̄слым о̄лэ̄г. Тэ̄н сас наука рӯпата ва̄рнэ хо̄тпаг. Надежда Васильевна «доктор исторических наук» яныг нам о̄ньщи, тав ань Санкт-Петербург ӯст о̄лы. Татьяна Александровна ос «исторический наукат кандидат» нам о̄ньщи.

1079 2014.07.11. Валентина УЗЕЛЬ

Юван о̄йка памятникыл ва̄рвес. Юван Николаевич Шесталов о̄лме̄т сака намыӈсуиӈ хо̄тпаг о̄лыс. Тав потыртаӈкв о̄вылтахты те, таве хӯнтлаӈкв сака пӯмыщ о̄лыс. Ма̄ньщи мирув, ща̄нь ла̄тӈув ос ма̄н пе̄с ва̄рмалянув урыл акваг потыртас. Потранэ щирыл мо̄т мирыт, рущ ма̄хум то̄ва ла̄тӈаныл пуссын ма̄ньщи ла̄тӈыл тэ̄лмыт. Ань Юван Николаевич та̄л, со̄ль, ма̄ньщи мирув урыл воссыг нэ̄мхотьют тох потыртаӈкв ат паты. Та ювле хультум э̄тпост тав 77 та̄лэ то̄влынӯв. Ос ты кастыл ляпа рӯтанэ, юрт ма̄хманэ тав ма̄гсылэ а̄хвтасныл яныг памятник ва̄рмыт. «То̄рум ма̄» музейт тав намхо̄талэ порат са̄в мир акванатхатыглас. О̄влэ̄т кӯщаиг о̄лнэ ма̄хум потыртасыт. Округ губернатор ва̄ӈын хум Геннадий Бухтин ла̄выс, Юван Шесталов ма̄ньщи мирув урыл ма̄ янытыл потыртаме ма̄гсыл ань ма̄н ты хосыт ты ва̄ве̄в. Тав юипа̄лэ̄т са̄в мо̄т ма̄хум о̄с потыртасыт – Т. С. Гоголева, А. С. Тарханов, М. К. Волдина. Ка̄сыӈ хо̄тпа тав уре̄тыл са̄в ёмас ла̄тыӈ ла̄выс. Владимир пыге э̄кватэ ёт э̄ргысы̄г, хуньт а̄тятэ хансум стихотворениятэ Владимир э̄ргыг ва̄рыстэ. Ань акваг та э̄ргитэ. Аквъёт рӯпитам ма̄хманэ Юван о̄йка о̄с ка̄стысаныл, ЮГУт рӯпитан ма̄хум о̄с э̄ргысыт. Ты ма̄н ма̄ньщи поэтув ща̄нь ла̄тӈув сака янытластэ. О̄выл потранэ, стиханэ пуссын нё̄тнэ ма̄ньщи ла̄тӈыл хансым о̄лэ̄гыт. Тав ма̄тэ улылан, хо̄тпа улылан са̄в потыр хансыглас. Ос пе̄с порат та̄ратым нэ̄пакыт ань нэ̄мхо̄т хо̄нтуӈкв ат ро̄ви, туп ловиньтан колнакытт о̄лэ̄гыт. Та̄н ань йильпииг те та̄ратанувет, ма̄к ёмас ва̄рмаль о̄лнув. Тамле нё̄тнэ, ма̄к ма̄ньщи ла̄тӈыл хансым нэ̄пак сака мощща. Мир потыртаманыл юипа̄лт памятник нумыл пантым то̄ре хотхасумтавес. Ма̄хманув ка̄саласыт, ма̄ньщи о̄йкав татем ёмас памятникыл та ва̄рима. Тав э̄ще Альбина Николаевна Мехнина ла̄выс, ты памятник ва̄рнэ ма̄гыс ма̄во̄й но̄хвинэ ма̄хум са̄т миллион солко̄ви маймыт. Хуритэ а̄хвтасныл Володя Саргсян, архитекторо̄йка, тав ва̄рыстэ. Музей юипа̄лт то̄ва ма̄ньщи ма̄хманув тав ёлщё̄питам ма̄тэ нупыл ялсыт. Юван о̄йка о̄лме̄т ла̄выглас, тав ӯс савынканын ёл ул вос щё̄питаве, такви я̄нас ма̄ хо̄нтыс. Тув та тотвес. Ань тот кӯщаит «городищаг» ла̄внэ ма̄ ва̄руӈкв таӈхе̄гыт. Ма̄ньщи мир пе̄с колыт, ма̄колыт пуссын тот ӯнттавет.

1079 2014.07.11. Николай МЕРОВ

Во̄раян хум э̄ква кинсы. Мо̄лал Ха̄льӯс район Тӯрва̄т па̄вылн рӯпата щирыл ялнэ̄м порат акв ма̄ньщи о̄йка ёт хо̄нтхатыгласум. Ты хум наме Василий Владимирович Тасманов, тав рӯтанэ уральтаӈкве тув ёхталас. Ам таве о̄лупсатэ урыл китыгласлум. На̄н тав потре э̄лаль ловиньтэлы̄н. «Ам 1964 та̄лт Свердловский область Ивдельский район Полумъя па̄вылт самын патсум. Та па̄выл ань а̄тим. Яныгпа̄ла хо̄тпат пуссын холасыт. Ма̄хум ӯсытн манос па̄влытн ла̄кквамингаласыт. Акв хум туп хультыс, ань тот о̄лы. Ам тот ты яныгмасум. Са̄ртын тот Самбиндаловыт ще̄мья о̄лыс. Та̄н о̄с пуссын а̄тимыт. Ма̄н тот хоса ат о̄лсӯв. 1970 та̄лытт Советский район Лэ̄пла па̄вылн ва̄нтлысӯв. Лэ̄плат ань туп кит кол ӯнлы. Тот ме̄н Коляме̄нтыл ос акв хум во̄рае̄в. Хумыт коныпал тот кит нэ̄, акв ма̄нь пыгрищ о̄лы, воссыг нэ̄мхотьют а̄тим. Ам о̄лнэ со̄самум тот та, тыг нас ёхталэ̄гум. Лэ̄пла па̄вылныл Тӯрва̄т па̄выл мус налыман нупыл атахкем ве̄рыста ла̄глыл ё̄ме̄в. Сака хоса а̄ти, ва̄тихал мӯйлуӈкве ёхтыгпа̄лэ̄в. Ма̄шинал яласан тэ̄лы лё̄ӈх о̄лы, тувыл ё̄ме̄в. Во̄р па̄влумт ка̄сыӈ та̄л во̄рае̄гум. Нёхыс манос со̄руп ка̄тынпаттыглэ̄гум. Таил ты о̄лэ̄гум. Ань воссыг торыӈ ӯй а̄тим. Алыщлам утанум хоталь вивет, тув тыналыянум. То̄ванакт хотты ямсыкт ёхтэ̄гыт, то̄ва порат ос амки па̄вылн ва̄гылсэ̄гум. Нёхыс ёвтнэ хо̄тпат та̄нки а̄нум хо̄нтыяныл. Хащта̄л хо̄тпат тыт ва̄тихал матыр кинсым яласэ̄гыт. То̄ва хо̄тпат ёт потыртахтэ̄гум, таквсы сыс алыщлэ̄гум ос та̄нанылн та тыналэ̄гум. Туи порат, хунь витэ яныг, мотор ха̄пыл яласэ̄гум. «Буран» пе̄сыг е̄мтыс, хотсаквалас, щаӈкв тав ма̄гсылэ хо̄нтуӈкве ат ве̄рме̄гум, тох та лю̄ли. Са̄ртын «Тула» нампа мотоциклыт о̄лсыт. Та ут хотло̄сталаслум, мощ мо̄т щирыл атыслум. Туп мотор щаӈкве ос раматэ вислум, хӯрум яныг колёса тув натапасанум. Ань лё̄хта̄л ма̄т пилта̄л яласэ̄гум. Витыӈ ос я̄ӈкылмаӈ ма̄т ёл ат ра̄гпи, хоталь ат ве̄рме̄гум, тув та ёхтэ̄гум. Пе̄с порат ща̄нягума̄щагум са̄в са̄лы о̄щсы̄г. Са̄ртын ма̄хум пуссын са̄лы янмалтасыт, таил ты о̄лсӯв. Ётыл, перестройка е̄мтум порат, са̄лыт пуссын хотталь тотве̄сыт. То̄ва ма̄хум вертолётыл тыламлым са̄лыт па̄тлуптэ̄гыт. Нумыл сунсэ̄гыт, атахкемхо̄тахкем ве̄рыстат са̄лыт ка̄салэ̄гыт, тув вертолётыл ёхтыгпе̄гыт, манах э̄ри, па̄тлуптэ̄гыт, та̄лттапияныл, та тахе̄гыт. Наӈ хунь тув мус ёхтуӈкве а̄лыме̄гын, тыщир та холасыт». Лэ̄пла па̄вылт пе̄с порат ма̄хум Ӯй акваг йӣквыгласыт. Са̄всыр па̄влытныл мир тув мӯйлуӈкве ёхталасыт. Яныгпа̄ла хо̄тпат ма̄нь ня̄врамыт аквтем тӯлыглахтасыт, сака пӯмащ о̄лыс. Ань ты ва̄рмаль ос э̄лаль тотуӈкве о̄вылтавес. Мощ мо̄лал Лэ̄плат о̄с Ӯй йӣквыгла̄лвес. То̄нт Ханты-Мансийск ӯсныл, Ха̄льӯс районныл са̄в мир мӯйлуӈкве ёхталасыт. Василий Владимирович ты та̄л матыр ка̄тынпатты ке, о̄с тах мӯй ма̄хум йӣквуӈкве во̄виянэ. Ос акв ва̄рмаль урыл потыртас. Тав ань э̄ква та̄л о̄лы. Хотты нэ̄ ты нё̄тнэ ос ка̄ркам ма̄ньщи хум ёт во̄рт о̄луӈкве ка̄сащи те, ма̄н редакциявн хансэ̄н, ха̄йтталаӈкве нё̄тылӯв.

1079 2014.07.11. Валентина УЗЕЛЬ

Дунаев колта̄гыл ня̄врамыт. Хурит Дунаев Унтя Галина ос Дарья э̄щаге ёт по̄слым о̄лэ̄гыт. Та̄н Са̄пса е̄рт Висумтыт па̄вылт о̄лэ̄гыт. Унтя 12 та̄лэ то̄влыс, сака сэ̄ръёр, роткам пыгрищ, хӯл пувуӈкв сака ка̄сащи. Туи юн о̄лнэ̄тэ сыс акваг я̄ ля̄льт каскан па̄хтым лю̄лянты. Рӯтанэ палт Лэ̄пла па̄вылн а̄лнхул, о̄щщахӯл пувуӈкв ла̄глыл яланты. Анна Анямова ва̄рум хури.

1079 2014.07.11. Анна АЛГАДЬЕВА

Ма̄ньлат хо̄тпаг потре̄н. Та̄л палытыл са̄всыр янытлан, мощнув янытлан ос нас хо̄талыт о̄лэ̄гыт. Ка̄сыӈ ялпыӈ ма̄н ялпыӈ та̄л хо̄тал мӯйлуӈкв ва̄г ат ёхты. Са̄р э̄тпос колта̄гыл ма̄хум янытлым хо̄тал порат, газетат, о̄выл ло̄псыт Петровыт колта̄гыл по̄слым о̄лсыт. Ам ты ма̄ньлат хо̄тпаг ёт хо̄нтхатыгламум порат, потрув ёлхансыслум: – Оля, наӈки урынтыл мощ потыртэн. Омагна̄тягн хотьютыг? Маныр наманэ̄н? – Омам наме Татьяна Селивёрстовна Номина. А̄тям Иван Тихонович Номин о̄лыс, а̄тимыг е̄мтме 21 та̄лыг е̄мтыс. Ма̄н иӈ ма̄нит о̄лсӯв, омав мо̄т хум ва̄рыс. Яглаӈум наме Анатолий Никитович Адин. Ня̄врам э̄рупты, акваг нё̄ты, ня̄нькалахты. – Манах ягпыг, а̄пщи, яга̄ги о̄ньще̄гын? – Ма̄н кит а̄ги, кит пыг, пуссын Хулюмсунт па̄вылт о̄лэ̄в. Тыт яныгмасӯв, школан тыт ялантасӯв. Яныг ягпыгум наме Никита, ЛПУ организацият плотникыг рӯпиты. Ваня а̄пщим ла̄пкат грузчикыг о̄лы. Наташа э̄щум заправкат рӯпиты. – Наӈки манах ня̄врам о̄ньще̄гын? – Нила ня̄врам: хӯрум пыг, акв а̄ги, а̄гим щар ма̄нь. Яныг пыгум ты та̄л о̄выл класс а̄стлыс. Акв пыгум садикн яланты, туп ма̄нь пыгум ос а̄гирищум юн о̄лэ̄г. – О̄йкан маныр наме? Хо̄т акванхо̄нтхатсы̄н? – Ойкам рущ хум, наме Евгений Александрович Петров. Ханты-Мансийск ӯст акванхо̄нтхатсуме̄н. Ам тот тэ̄нут ва̄руӈкв ханищтахтын ма̄т ханищтахтасум. Тав ос официантыг тот рӯпитас. Тот акванрӯмалахтасме̄н. Такви уре̄тыл вос такви потырты. – Евгений, наӈ хотыл о̄лэ̄гын? – Ам 1997 та̄л порат Кыргызстаныл ты ма̄н ёхтысум. Октябрьский район Сергино па̄вылт ане̄квам ёт о̄лсум. Ханты-Мансийск ӯст официантбарменыг ханищтахтасум, тувыл акв тот рӯпитасум. – Тыт хо̄т рӯпитэ̄гын? –Ла̄пкат грузчикыг рӯпитэ̄гум. – Тыт о̄луӈкв марщум а̄ти? – А̄ти, ханьщувласум. Ам тыт э̄квам ягпыгыга̄пщииг ёт хӯл алыщлым яласэ̄гум, во̄рае̄гум. Шар о̄выл ка̄тынпаттум уюм – ва̄с. Тыт маныр ат о̄луӈкв! Тыт сытам, ёмас, ма̄шина мощща. Яныг ӯсыӈ ма̄т пуссын хотталь ха̄йтэ̄гыт, молямлэ̄гыт, таса̄вит са̄всыр ма̄шина, потыльм, нас ва̄гта̄л патэ̄гын. А̄нумн ёмас тыт о̄луӈкв. Ты ма̄ньлат китыг то̄ва ма̄хмыт хольтыл, тэ̄нки о̄лнэ кол ат о̄ньще̄г, мо̄т хо̄тпа колт о̄лэ̄г, о̄лнэтэ̄н ма̄гыс ме̄т ойтэ̄г. Хунь тэ̄нки о̄лнэ колыӈыг е̄мтэ̄г, ат ва̄йхаты. Юио̄выл хӯрум та̄л сыс Хулюмсунт па̄вылт кит яныг о̄лнэ колыг на̄йн хотё̄свесы̄г, таса̄вит ма̄хум кол та̄л хультсыт. Хотьют рӯт о̄ньщи, рӯтаныл палт о̄лэ̄гыт. Хо̄ӈха ёмас рӯма о̄ньщи, руманылн во̄вве̄сыт, ювта̄ртве̄сыт. То̄ва ма̄хум ня̄врамыӈ та̄гыл иӈ пӯльницат о̄лэ̄гыт. Мирколт ла̄ве̄гыт, о̄лнэ колыт ӯнттуӈкв ат патавет. Ос йильпи ма̄ньлат ще̄мьят аман хо̄т о̄луӈкв патэ̄гыт? Кӯщаит аман маныр ва̄ре̄гыт? Ма̄хум о̄лэ̄гыт, йильпи ще̄мьят е̄мтэ̄гыт. Та̄нанылн хо̄тт о̄луӈкв э̄ри.

1079 2014.07.11. Николай МЕРОВ

Соссаӈ ма̄хманув ма̄щтырлаӈкве ёхталасыт. Лӯпта э̄тпос 16-19 хо̄талытт Ханты-Мансийск ӯст ма̄щтыр хо̄тпат акванатхатыгласыт. Ты семинар «Внутреннее убранство обских угров: музееведческие и технологические аспекты» тох намаим о̄лыс. Ты ва̄рмаль «То̄рум маа» музейт рӯпитан хо̄тпат та̄н щё̄пита̄лсыт. Хотьютыт тыг ёхталасыт ос манырсыр рӯпата та̄н ва̄рсыт, на̄н ты урыл э̄лаль ловиньтэ̄н. Ты семинар пуснэ хо̄талт учёный хо̄тпанув о̄влэ̄т докладнэ̄пакыт ловиньтасыт. Мӯй хо̄тпатн та̄наныл хӯнтлуӈкве сака пӯмащ о̄лыс. Ма̄хум пе̄с о̄лум ва̄рмалит номылматыгла̄лсаныл. Ма̄к ма̄щтыр хо̄тпат ты потрыт хӯнтлысыт, та̄нанылн сака мӯстыс. Округ янытыл ты ма̄щтыр хо̄тпат о̄лсыт. Ха̄льӯс район Хо̄рыӈпа̄вылныл Рудольф Васильевич Меров ёхталас. Тав пе̄с щирыл ва̄рыглам пасаныт, уласыт ос мо̄т са̄всыр утыт ва̄рыс. Тав такви ва̄рум рӯпатанэ урыл мощ потыртас: «Пе̄с порат ма̄хум пасаныт ос уласыт тарыг йӣвыл ке̄рсоль та̄л ва̄рыгласыт. Тарыг йӣв ка̄миньта, па̄лыг ат по̄клы. О̄влэ̄т партыт та̄ставет, састумыг ёргавет. Тувыл та̄наныл акваннатапан ма̄гыс ӯсхулныл ханлын ут ва̄раве. Ӯсхул саханэ̄т хӯрыгсов о̄лы, тав ёмщакв хоттославе, тувыл витыт тытылтаве, э̄люм та е̄мты». Рудольф Васильевич ань пенсият о̄лы. Па̄влэ̄т хӯл алыщлы ос во̄раи. Пе̄с йис о̄лум ва̄рмалит ёмщакве̄г ва̄ганэ. Тав ва̄тихал «То̄рум маа» музейн матыр пормасыт ва̄руӈкве во̄виньта̄лаве. Ань ты накт мощща яныгпа̄ла хо̄тпа хультыс, хотьют пе̄с йис пормасыт ва̄руӈкве ха̄сы. Матъёмас ань тамле семинарыт ва̄рыглаӈкве патве̄сыт. Ма̄ньлат ма̄хманув ты ва̄рмалил пӯмщалахтэ̄гыт, ты тэ̄ла сакати э̄лаль тотылӯв. Яков Тарлин Белоярский район Касум па̄вылныл ёхталас. Ты ханты хум тумраныт, ко̄йпыт ма̄щтырыг ва̄ри, тынщаӈыт саги, матыра̄ти пуссын ва̄руӈкве ха̄сы. Ты коныпал тав школат ханищтахтын ня̄врамыт соссаӈ ма̄хум каснэ ва̄рмальн ханищтыянэ. Та̄наныл округ янытыл касылн акваг тотыглыянэ. Ня̄врамыт са̄лы сун ӯлтта порге̄гыт, тынщаӈ па̄хвтэ̄гыт, пе̄рще̄гыт ос са̄грап э̄л вущкасэ̄гыт. Ань о̄лум семинарт тав хӯнах ос а̄нысан ва̄рыс. Тав ма̄ньта̄гыл са̄гырхатуӈкве ос ёрыгхатуӈкве а̄ще̄н ханищтавес. Тувыл Анатолий Вадичупов, Ханты-Мансийск ӯст о̄лнэ хум, тув о̄с во̄виньта̄лвес. Ты ма̄ньщи хум Кимкъясуй па̄вылныл о̄лы. Хосат та̄гыл ӯсн ва̄нтлыс. Тав пӯт хӯнах ва̄рыс ос ма̄ньлат хо̄тпатн ёрыгхатуӈкве нё̄тыс, та̄наныл ханищтасанэ. Анатолий Васильевич са̄ӈквылтапыт ма̄щтырыг ва̄руӈкве ха̄сы. Тав ва̄рум са̄ӈквылтапанэ ёнгын порат сака нё̄тнэ суил суйтэ̄гыт. Матыр ёргын манос са̄грын порат, тав акваг тув во̄виньта̄лаве. Тав ла̄выс: «Ма̄щтырлаӈкве амки ханищтахтасум. Па̄вылт яныгпа̄ла хо̄тпат матыр ва̄рнэ̄ныл порат ам акваг суссум. Тувыл ань ты накт нэ̄пакт пе̄с пормасыт урыл са̄в потыр хансым о̄лы. Са̄выӈпа̄лэ нэ̄пакыт хосыт ма̄щтырлэ̄гум. Мо̄лты порат са̄ӈквылтапыт ос мо̄т са̄всыр пормасыт ва̄тихал ва̄рыгласум. Ань ты накт мо̄рсыӈ порат ма̄щтырлэ̄гум. Юн са̄в рӯпата о̄лы». Ты ва̄рмальн нэ̄ хо̄тпат о̄с ёхталасыт. Надежда Васильевна Лукина ла̄выс: «Ам тамле семинарн о̄выл щёс ёхтысум. Ты пормасыт са̄ртын нас музейт ва̄санум, а̄мки нэ̄мхуньт ат ва̄рыгласум. Ань ты порат атхуйпловит семинар минас. Ам сусте̄мт, ка̄сыӈ та̄лныл са̄внув ма̄ньлат хо̄тпат тамле ва̄рмальн ханищтахтуӈкве ка̄саще̄гыт. Соссаӈ ма̄хманув о̄лупса акваг э̄лаль тотаве. Матъёмас ты музей нё̄тнэ, во̄рыӈ ма̄т ӯнттувес. Ка̄сыӈ хо̄тпа яныг ща̄гтыл тыт ма̄щтырлас». Тувыл ос Ханты-Мансийск ӯсныл ханты э̄ква Людмила Калистратовна Зубакина ёхталас. Тав са̄ртын «Ханты ясаӈ» газетат рӯпитас. Ань пенсият о̄лы. Тэ̄н кит хо̄тпаг татем нё̄тнэ хасап ю̄нтсы̄г. Ма̄хум маттем та пӯмщалахтасыт. Людмила Калистратовна ханты супыт ос мо̄т са̄всыр пормасыт такви ю̄нты. Ю̄нсхатнэ ва̄рмальн ма̄ньта̄гыл ханищтахтас. Соссаӈ ма̄хманувн тав ёмщакв ва̄ве. Альбина Лазаревна Ярсомова лӯи ханты хо̄тпа, Сургутский район Угут па̄вылныл ёхталас. Ты нэ̄ ня̄врамыт ёт рӯпиты. Тав палтэ ат ханты ня̄врам яланты. Та̄н са̄кныл хорамыт хартэ̄гыт, са̄сныл са̄всыр пормасыт ю̄нтэ̄гыт ос мо̄т рӯпата ва̄ре̄гыт. Тав ос ты урыл ла̄выс: «Ма̄н ню̄лы йӣв сулыл са̄всыр хусапыт ю̄нтэ̄в. Тыт о̄лнэ̄в сыс ню̄лы сулыт ос ля̄мйӣв ма̄гыс во̄рн ялсӯв. Сулыт мощ то̄слыянӯв, ущта хусапы̄г ва̄риянӯв. Хусап ля̄мйӣв ла̄квыл аквано̄лтылӯв. Тивре са̄сныл ю̄нтылӯв. Тыщир ва̄рим хусапытсака нё̄тнэ̄т ос та̄кыт, мори ат саквалэ̄гыт. Ню̄лы сулыл ма̄хум хосат та̄гыл хусапыт ат ва̄ре̄гыт. Ма̄н о̄вылтахтасӯв, ань ты ва̄рмаль э̄лаль тотуӈкве патвес. Ма̄ниг о̄лмум порат суссум, хумус щаще̄квам тамле хусапыт ва̄рыс. Ётылнув ос омам ва̄рыс, ла̄щалла̄щал ханищтахтасум. Пе̄с порат ты хусапыт хум хо̄тпат о̄щсыт. Тув патроныт, сэ̄лят ос сакнёлыт пинтла̄лсыт. Хусап паттатэ ос алатэ ха̄ль са̄сныл ва̄раве, хот ат ёсаве». Тамле ты пӯмащ потрыт ма̄хум потыртасыт. Юио̄выл хо̄талт ма̄щтыр хо̄тпат та̄нки рӯпатаныл пуссын янытэ̄т а̄стласаныл. Тувыл музей кӯщай нэ̄ Валентина Николаевна Кочетыгова мӯй ма̄хум пуссын янытласанэ. Та̄н нупыланыл са̄в сымыӈ ла̄тыӈ ла̄выс ос янытлан нэ̄пакыл мисанэ. Ань соссаӈ ма̄хманув хуньт о̄с акванатхатыглахтуӈкве потыртахтасыт.

1079 2014.07.11. Александр ВЬЮТКИН

Хо̄н ма̄ныл ёхталам тит а̄гииг. Лӯпта э̄тпост хусыт хо̄талэ̄т Венгрия хо̄н ма̄ныл тит пӯмащ ма̄ньлат а̄гииг ёхталасы̄г, тэ̄н наманэ̄н Нори ос Юдит Ковач. Халэ̄нт увщииг о̄лэ̄г. Тыг ёхталан щирыл та̄н хӯрум хо̄тпа о̄лсыт. Тэ̄н ётэ̄н Москва ӯст Венгрия Посольство колт советникыг рӯпитан хум Андраш Барани о̄лыс. Тав тэ̄н потранэ̄н рущ ла̄тӈын толмащлан хо̄тпаг о̄лыс. Андраш Россият о̄лнэ̄тэ титхойполов та̄лыг ты то̄влыс. Тав ла̄выс: «Моще̄ртын ам амтина̄нум россияниныг ловиньтаӈкв патылум. Манаре лю̄ль, тит ма̄ халт тох о̄луӈкв о̄с ёмас». Андраш тыг тотыглам а̄гияге Мадьяр ма̄ янытыл ёмщакве̄г ва̄ве̄г. Тэ̄н э̄ргын э̄ргананэ̄н пе̄с йис та̄гыл о̄лнэ э̄ргыт. Юдит «Цитере» нампа утыл са̄ӈквылты, Нори увщитэ ос э̄рги. Тэ̄н суссылтапанэ̄н тох ты минэ̄гыт, Юдит са̄ӈквылтан ут коныпал иӈ «Барача» нампа тискын утыл ёнги. «Цитере» утаныл пе̄с потрыт щирыл ӯйхул тыттын а̄ныл о̄лыс. Тэ̄н суссылтапанэ̄н такталаӈкв о̄вылтахтаме̄н па̄сныл, ты та̄л лов та̄лыг ты е̄мтыс. Ты сыс хус са̄всыр э̄ргыт э̄ргын альбом мирн хӯнтлын ма̄гсыл та̄ратасы̄г. Ань ос ты пӯмщаныл йис пораныл рӯтыӈыщ о̄лнэ ма̄хманылн суссылтан ма̄гсыл тыг ёхталасыт. Венгрия ма̄хум ма̄н ма̄гсылув щар ляпа рӯт ма̄хмыг ловиньтахтэ̄гыт. Ханты-Мансийск ӯст та̄н хӯрум хотал о̄лсыт. Тыт о̄лнэ̄ныл сыс та̄н ма̄н ӯсувт са̄всыр пӯмащ о̄щнэ ма̄н тотыглаве̄сыт. «Лылыӈ со̄юм» ня̄врамыт ханищтахтын колт ня̄врамыт ёт хо̄нтхатыгласыт. Та̄н тув ёхтуманылт ня̄врамыт пуссын юв та̄ртве̄сыт, нэ̄мхотьютаныл тот а̄тим о̄лыс. То̄нт та̄н «Э̄ргыт, йӣквыт пувлын ма̄хум» ма̄н коллективув урыл мощ пӯмщалахтасыт. О̄влэ̄т а̄гииг са̄ӈквылтан утыт урыл титыглахтасы̄г. Хоты са̄ӈквылтан утыл, хоты порат ос хоты ма̄т са̄ӈквылтаӈкв ро̄ви. Тувыл хунь ос манырсыр йӣвныл та̄н ёргавет. Ма̄н Владимир Меров ос Елена Фризоргер ёт та̄нанылн ты урыл пуссын потыртасӯв ос са̄ӈквылтан та̄нанув суссылтасанӯв. Та юипа̄лт тэ̄н о̄йкат ос э̄кват ма̄ньщи йӣквыт урыл мощ пӯмщалахтасыт. Хоты ма̄ныл, манырсыр йӣкв, та урыл пуссын тэ̄натэ̄н пӯмащ о̄лыс. Ма̄н та̄нанув ос мо̄т пӯмщанув суссылтамув юипа̄лт тэ̄н ос ма̄н ма̄гсылув ма̄нь суссылтап суссылтасы̄г. О̄влэ̄т та̄нти са̄ӈквылтан утаныл урыл мощ потыртасы̄г. Потраныл хащматаныл юипа̄лт са̄ӈквылтасы̄г, йӣквсы̄г ос э̄ргысы̄г. Та̄н э̄рыгсов та̄наныл, э̄рганыл ос йӣкваныл а̄ти ма̄н утанув хурипат. Э̄рганув, йӣкванув холыгпан юипа̄лт акв ля̄льт иӈ хоса потыртым ӯнлантасӯв. Тэ̄натэ̄н ма̄н о̄лупсав урыл пуссын пӯмащ хӯнтлуӈкв о̄лыс. Мо̄т щёс хуньт ёхталэ̄гыт те, ма̄нь па̄влыӈ ма̄н ялнэ номт о̄ньще̄г.

1079 2014.07.11. Людмила ТЕТКИНА

Ля̄ххал хаснэ хо̄тпат акванатхатыгласыт. Лӯпта э̄тпос 19-21 хо̄талытт Марий Эл республика Йошкар-Ола ӯст ля̄ххал тотнэ хо̄тпат хо̄тыт Форуманыл рӯпитас. Тамле ва̄рмаль ты республика культура Министерстваныл ос финноугорский журналистыт Ассоциация аквъёт ва̄рыгласы̄г. Са̄всыр ма̄ныл тув 60 арыгкем хо̄тпат ёхталасыт. Тот «Финноугорские СМИ Российской Федерации в условиях развития новых информационных технологий. Опыт, проблемы, решения» нампа конференция рӯпитас. О̄влэ̄т тув ёхтум ма̄хум суссылтап сунсуӈкве во̄вве̄сыт. Александр Саликович Абдулов, РАФУЖ ос «Марий Эл» нампа газетат кӯщаиг о̄лнэ хум, ла̄выс: «Ма̄н хурит по̄слан хотпат ма̄гсыл ханищтапыт ва̄рыгласӯв. Акв ханищтап Коми республикат Ижма па̄вылт о̄лыс. Мо̄т щёс ма̄хманув Мордовия Саранск ӯст акванатхатыгласыт. Акв тамле ханищтап Ханты-Мансийск ӯст рӯпитас. Тот по̄слым ёмас хурит суссылтапн щё̄питаве̄сыт ос Россия янытыл са̄всыр ӯсыт суссылтым тотыглаве̄сыт. Тамле выставка сунсыглым мо̄т мирыт ва̄гыт, хумус ань финноугрыт о̄лэ̄гыт. Тыхо̄тал ма̄н о̄с акв тамле суссылтап ва̄рыслӯв ос «Финноугорский мир сегодня» намаяслӯв». Ма̄н, редакциявт рӯпитан ма̄хум, тув ма̄ньщит, хантыт по̄слым хӯрияныл о̄с ке̄тыгласанӯв. Форум рӯпитаӈкве хунь о̄вылтахтас, ма̄хум нупыл Михаил Васютин, Марий Эл республикат культура министрыг рӯпитан хум, потыртас. Тав ла̄выс, ля̄ххал тотнэ финноугор хо̄тпат Ассоциацияныл ань Россия янытыл ва̄ве. Та̄н пуссын аквъёт яныг ос э̄рнэ рӯпата ва̄ре̄гыт. Ля̄ххалыт, потрыт ща̄нь ла̄тӈыл хансым, та̄н пе̄с йис ва̄рмаляныл э̄лаль тотыяныл. Матъёмас, та̄н халанылт тох ва̄йхатэ̄гыт ос юртыӈыщ о̄лэ̄гыт. Конференцият ма̄хум та̄нки рӯпатаныл урыл потыртасыт. Ань финноугрыт ща̄нь ла̄тӈыл ля̄ххал хансым пуссын аквхурип та̄рвитыӈ ва̄рмалит о̄ньще̄гыт. Та̄н хансум ля̄хханыл, потраныл интернетыт ань о̄с ловиньтаӈкве ро̄ви. Тувыл ка̄сыӈ мир такви букват о̄ньщи, то̄ва порат интернет ты ут ат ханьщи, ты ма̄гсыл то̄ва ла̄тӈыт ма̄хум ловиньтаӈкве ат ве̄рме̄гыт. Ты потрыт интернетыт мӯсхалыг вос тэ̄лсыт, ты ищхӣпыӈ ут ма̄гсыл э̄рнэ программа ва̄руӈкве э̄ри. Мо̄т та̄рвит газетат, журналыт юв тотнэ ма̄гсыл ка̄сыӈ та̄лныл «Почта Россия» са̄внув олн выг. Тувыл газетат, журналыт яныг каталогнэ̄пакн хаснэ ма̄гсыл о̄с са̄в олн э̄ри. Александр Абдулов, «Марий Эл» нампа газетат кӯщай ла̄выс, ань та̄н газетаныл хасылтан ма̄гсыл 900 арыгкем солко̄ви ойтуӈкве э̄ри. Ма̄хум таса̄вит олн ойтуӈкве ат ка̄саще̄гыт, тыи ма̄гсыл ка̄сыӈ та̄лныл мощщанув э̄лумхо̄лас та̄н газетаныл хасылты. Ос таи лю̄ль, ка̄сыӈ та̄лныл мощщанув ща̄нь ла̄тыӈ ва̄нэ хо̄тпа хульты. Ма̄ньлат хо̄тпат та̄нки ла̄тӈыл потыртаӈкве сака ат ка̄саще̄гыт. Резолюциянэ̄пакн ма̄хум таи хассыт, ань Россият ща̄нь ла̄тӈыл газетат, журналыт та̄ратан ма̄гсыл яныг программа вос пирмайтаве. Туп то̄нт финноугорский ла̄тӈыл хансым нэ̄пакыт э̄лаль мӯсхалыг та̄ратаӈкве патавет. Ты ла̄тыӈ та̄н Россия Правительстван тах ке̄тыяныл. Ты юипа̄лт ма̄хум Ассоциациян йильпи кӯщай пе̄риясыт. 11 та̄л Александр Саликович Абдулов ты рӯпата ва̄рыстэ. Ань йильпи кӯщаиг Николай Иванович Ишуткин пе̄риявес. Ты хум Мордовия ма̄т о̄лы, «Чилисема» нампа ня̄врамыт ма̄гсыл та̄ратан журналт кӯщаиг рӯпиты. Николай Иванович ла̄выс, тав Ассоциация рӯпататэ о̄с ка̄ркамыг ва̄руӈкв патытэ. Ля̄ххал тотнэ хо̄тпат халанылт вос ва̄йхатэ̄гыт, ханищтахтэ̄гыт ос акваннё̄тхатым э̄лаль вос рӯпитэ̄гыт, ва̄тихал акванатыглаӈкве патыянэ. Ос та юипалт ля̄ххал хаснэ мир халт ва̄рыглым касылт но̄хпатум хо̄тпат янытлаве̄сыт. Ма̄н редакцияв «Региональное издание» нампа номинацият янытлавес. «Ханты ясаӈ» нампа газета китыт местал майвес. Та̄н по̄слум хурияныл ма̄гсыл тот янытлаве̄сыт. Ма̄ньщи газета ос хӯрмит местал майвес, мирн ва̄нэ финноугрыт урыл хансум потранув ма̄н тув ке̄тыгласанӯв. Ты касылт Россия янытыл 40 арыгкем э̄лумхо̄лас та̄нки халанылт кассыт.

1079 2014.07.11. Людмила ТЕТКИНА

Ты хо̄тал та̄н пе̄с та̄гыл янытлыяныл. Ка̄сыӈ та̄л лӯпта э̄тпост мариец ма̄хум акванатхатыгла̄лэ̄гыт. Та̄н «Пеледыш пайрем» (Праздник цветов) та̄нки ялпыӈ хо̄таланыл тот янытлэ̄гыт. Ма̄хум тэ̄пкант картопка ос мо̄т тэ̄нут ӯнттуӈкве а̄стланэ̄ныл кастыл тамле яныг ялпыӈ хо̄тал ва̄рыглэ̄гыт. Марий Эл республика янытыл о̄лнэ ма̄хум пуссын тув мӯйлуӈкве ёхталэ̄гыт. Ты та̄л ялпыӈ хо̄тал лӯпта э̄тпос 21 хо̄талэ̄т о̄лыс. Ма̄хум лов щёс порат яныг ӯскант акванатхатуӈкве патсыт. Та̄н пуссын мариец мир маснутыл масхатым о̄лсыт. Са̄всыр районытт о̄лнэ марийцыт супаныл мощ мо̄т щирыл ю̄нтыяныл. Аквъёт та̄н пуссын такем нё̄тнэ̄г сусхатасыт. Ос тув атхатыглам ма̄хум та̄нки халанылт туп марийский ща̄нь ла̄тӈыл потыртасыт. Тувыл китхуйплов щёс порат та̄н ӯсхулы хосыт акв яныг колонна щирыл мо̄т ӯскан мус ё̄мсыт. Тув ёхтуманыл порат Марий Эл республика президент Леонид Игоревич Маркелов ма̄хум ялпыӈ хо̄талыл янытласанэ. Тав ла̄выс: «Тамле ялпыӈ хо̄тал ва̄рыглым, на̄н на̄нки пе̄с йис ва̄рмалянын э̄лаль тотыяны̄н. Ты ма̄т марийцыт, рущит, хатанит ос мо̄т мирыт о̄лэ̄гыт, ты ялпыӈ хо̄тал ма̄навн пуссын юртыӈыщ э̄лаль о̄луӈкве нё̄ты. Тыхо̄тал ка̄сыӈ колн са̄в со̄т ос щунь вос тоты». Ты юипа̄лт са̄в мо̄т кӯщаит ла̄тыӈ ла̄всыт ос акванатхатам мир ялпыӈ хо̄талыл янытласаныл. Таи ёмас, кӯщаит пуссын марийский ща̄нь ла̄тӈыл ёмащакв потыртэ̄гыт. Ты юипа̄лт ка̄ркамыг рӯпитан трактористыт, ма̄ сакватан хо̄тпат, мис по̄снэ нэ̄т ос мо̄т рӯпата ва̄рнэ ма̄хум са̄всыр янытлан нэ̄пакыл майве̄сыт ос янытлаве̄сыт. 16 районныл ёхталам ма̄хум пуссын та̄нки я̄нас па̄сан ва̄рыгласыт, са̄всыр тэ̄нут тув ӯнттыгласыт. Ка̄сыӈ хо̄тпа та̄н па̄санылт матыр тэ̄нут виӈкве ос тэ̄пъялаӈкве ве̄рмыс. Россия янытыл о̄лнэ марийцыт ты ялпыӈ хо̄талн тув о̄с ёхталэ̄гыт. Ты та̄л Башкирия, Татарстан, Свердловский областьт о̄лнэ марийцыт тув мӯйлуӈкве ялсыт. Та̄н о̄с пасан щё̄пита̄лыгласыт, концерт о̄лум порат о̄с э̄ргысыт, йӣквсыт. Йошкар-Ола ӯст о̄лнэ ма̄хум тамле хо̄талт мӯйлуӈкве о̄с сака ка̄саще̄гыт, тыи ма̄гсыл та̄н ще̄мьяӈ та̄гыл тув ёхталэ̄гыт. Ӣтипа̄лаг мӯйлын ма̄хум пуссын аквторыг йӣквсыт, йӣкваныл рущ ла̄тӈыл «марийская круговая» намаим о̄лы. Ты юипа̄лт ма̄ньлат а̄гитпыгыт ма̄гсыл этнодискотека о̄лыс. Тох марийцыт «Пеледыш пайрем» ялпыӈ хо̄талт мӯйлысыт.

1079 2014.07.11. Александр ВЬЮТКИН

Соссаӈ мир ёт хо̄нтлам нак урыл суссылтап. Сургут ӯс янытлан хо̄талт «Пе̄с Сургут» нампа музей кант пе̄с порат о̄лыглам накыт урыл суссылтап ва̄рыглавес, рущ ла̄тӈыл та пӯмащ «Мангазейский ход» намтым о̄лыс. Та ва̄рмаль Сургут ӯс 420 та̄лэ то̄влын кастыл ва̄рыглавес. Хуньт хосат 1594 та̄лт ань Сургут ӯс ӯнлын ма̄ тармыл Бордек нампа ханты ка̄нащ кӯщайлахтас. Акв то̄нт ты Русь янытыл Федор Иванович, Иван Грозный пыге, хо̄ныг ӯнлыс. Тав ты А̄с я̄ хосыт ӯс ӯнттын ма̄ тиснэ ма̄гсыл казак ма̄хум те̄тсанэ. Тыг йигмыгтам казакыт халт воевода нампа кӯщаиг Иван Оньчкин паттым о̄лыс. Та пе̄с порат о̄лум накыт урыл ань ты ма̄нь суссылтап суссылтавес. Пӯмщаныл такталан ма̄хум та порат о̄ньщум маснутыл масхатым о̄лсыт. Тит телекал тотыглым яныг ня̄лыл па̄тлуптам писаляныл турсӯнтэ хосыт селятэ писальн пинаве. Та коныпал пе̄щ по̄хат ханнэ сыраит, сыспалъе̄рт о̄щнэ ва̄ти ё̄втыт ос хоса налпа са̄грапыт о̄щсыт. Та̄н нупыланыл сунсымав порат номтанувт аквтупмат, со̄ль, та поран ты е̄мтыгпасӯв. Суссылтапанылт аквпа̄л ма̄хманыл сома но̄хтӯщтым норыл ва̄рим пӯсас тапалъе̄рт лаппантхатасыт. Мо̄тананыл ос та̄н нупыланыл халанылт писалянылт толтылахтым ля̄льт лаквхатасыт. Тув нупыл суснэ ма̄хум писалит то̄лматын порат хотрохтуптахтым суссыт. Акв ля̄льт ляпан ёхтуманыл юипа̄лт сыраяныл ос ё̄втаныл ка̄тын висаныл. Акванха̄йтнэ ма̄т те̄рнлахтым ма̄хум пӯсас тӣврын та щалтсыт. Та̄н но̄х та патсыт. Та па̄сныл та ма̄ Сургут ӯсыг намтым ты о̄лы. Щар о̄влэ̄т 280 хо̄тпа тув о̄лмыгтас. Ань ты мус ма̄н округув янытыл тав щар яныг ос са̄в мирыӈ ӯсыг ловиньтахты.

1079 2014.07.11. Анна АЛГАДЬЕВА

Йӣквта̄ныт ханищтан нэ̄. Са̄в та̄л Хулюмсунт па̄выл клуб колт йӣквуӈкв ханищтан нэ̄г Ася Анатольевна Горенятенко о̄лыс. Са̄в ня̄врам тав па̄лтылэ ялантас, та̄н са̄в яныг ӯсыӈ ма̄т йӣквим акваг яласасыт, но̄хпатум нэ̄пак ос мӯйлупса сэ̄лыгла̄лсыт. Мо̄лты тӯя нэ̄ рӯпитан та̄ланэ то̄влысыт, по̄хын минас. Таквсы мо̄т ма̄ньлат ханищтан нэ̄ рӯпитаӈкв ёхтыс. А̄тэ нэ̄, ущ ханищтахтам ма̄нь а̄ги Анна Витальевна Самохвалова. Такви Казахстаныл о̄лы. Ща̄нягеа̄щаге тот хультсы̄г. Пензинский училище а̄стламе юипа̄лт Челябинский академият культура ос искусства ханищтан ма̄т ханищтахтас. О̄лум ма̄тэ̄т манарыг ханищтахтас, та рӯпататэ щирыл ня̄врамыт ёт рӯпитас. Ты ма̄т о̄луӈкв ос тыт рӯпитаӈкв па̄влыӈ спорткомплекс па̄лыл во̄ввес, общежитиет та̄ра о̄лнэ колхусапыл майвес. Хумыс таве̄н тыт о̄лхаты, ты урыл ме̄н мощ потрамасме̄н, э̄лаль ловиньтэлы̄н: – Тыг ёхтумум ма̄гыс, щар номтум ат савалы. А̄нумн тыт ёмас, ня̄врамыт ёмасыт, па̄вылкве ёмас, сыстам. Ам амки о̄с ма̄нь па̄вылныл о̄лэ̄гум. – Са̄в ня̄врам наӈ палтылн яланты? – Ня̄врамыт йӣквуӈкв сака ка̄саще̄гыт, пуссын а̄гирищит нила группаг уртым о̄лэ̄гыт: яныгнув, котильарт, ма̄ньнув ос щар ма̄нит. Щар ма̄нь ханищтан ня̄враманум иӈ садикн ялантэ̄гыт. Ос акв нэ̄т группа о̄лы, тыг туп э̄кват рӯпата щё̄саныл юипа̄лт ёхталэ̄гыт. –Манхурип йӣквта̄ныт ханищтэгы̄н? –Са̄всыр йӣквта̄н ханищтэ̄в: пе̄с йӣквта̄ныт, ань йӣквнэ йильпи та̄ныт. Ханищтахтын та̄л оигпам ляпат щар ма̄нь а̄гирищит юио̄выл щёс йӣквуӈкв ялманыл порат ам о̄с сунсуӈкв ялсум. Хумыс та̄н тот ню̄нсала̄лавет, порыгтавет, суссум. Ты а̄гирищит ты ханищтахтам та̄л сыс нэ̄мхо̄т ат йӣквсыт, хумыс ос манкем ханьщувласыт, туп оманыла̄тяныл э̄лыпа̄лт та̄нкина̄наныл суссылтасыт. Та̄н иӈ ма̄нит. Ханищтан нэ̄ныл ла̄ви: «Ма̄н иӈ ма̄ньрищит о̄лсӯв, мощнув яныгме̄в, ма̄к намыӈсуиӈыг е̄мтэ̄в. » Тох ты со̄ль ва̄рмаль о̄лы. Тамле ка̄ркам, нёмса, ёмас ханищтан нэ̄ маныр пуссын а̄лыми. Ня̄враманэ̄н сака э̄руптаве, тав ла̄тӈе̄н хӯнтлэ̄гыт. Такви о̄с хо̄тпа нупыл ёмас нэ̄, ёмщакв рӯпиты. Э̄лаль о̄с аквтох ханищтан ня̄враманэ ёт юртыӈыщ вос о̄лэ̄гыт. Посыӈ номтыл, йильпи ё̄рыл таквсы э̄лаль вос рӯпитэ̄гыт. Майвес – мивес Намыӈсуиӈ са̄в мирн ва̄нэ Номтум ат савалы – а̄нумн тыт мусты.

1079 2014.07.11. Анна АЛГАДЬЕВА

Ты хурит Алгадьева Диана по̄слым о̄лы. Ты хурит Алгадьева Диана по̄слым о̄лы. Тав садикн ялантаме па̄сыл А. А. Горенятенко палт йӣквуӈкв ялантас. Ёмщакв йӣквнэ̄тэ ма̄гыс йӣквнэ порат Ася Анатольевнан акваг э̄лт тӯщтувес. Ань э̄лаль А. В. Самохвалова палт яланты. Йӣквуӈкв ханищтан нэ̄тэ̄н э̄сгаве, матыр концерт порат акваг йӣкви. Диана сака ёмас а̄гирищкве, ёмщакв ханищтахты, таквсы 4 классыт ханищтахтуӈкв паты, йӣквнэ кружок коныпал э̄ргын ос ка̄тыл по̄слаӈкв ханищтахтын кружокн яланты. Ханищтан щё̄сэн юв ат хульты, хоталь таве̄н э̄ри, пуссын а̄лыми.

1079 2014.07.11. Валентина УЗЕЛЬ

Ма̄таприщ урыл йильпи нэ̄пак. А̄с-угорский институтт рӯпитан хо̄тпат ня̄врамыт ма̄гыс йильпи нэ̄пак та̄ратасыт. Ты нэ̄пакмо̄йт щар ма̄нь ня̄врамыт ма̄гыс хансым о̄лы. «Таквина̄тэ э̄руптан ма̄таприщ» тох намаим о̄лы. Ханты-Мансийский банк ё̄рыл тав та̄ратавес. А̄с-угорский институт ма̄гыс ты банк, рущ ла̄тыӈ щирыл ке ла̄вуӈкв – «спонсорыг» о̄лыс. Ты нэ̄пак хӯрум ла̄тӈыл хансым о̄лы: ё̄рн ма̄хум ла̄тӈыл, рущ ла̄тӈыл ос английский ла̄тӈыл. Ма̄н нэ̄пакув ма̄нь ня̄врамыт ёт рӯпитан ма̄хумн ос ня̄врамыт ма̄гыс сака пӯмащ ос э̄рнэ нэ̄пак. Нэ̄пакув та̄ратан ма̄гыс та э̄тпост нёлоловхуйплов хо̄талэ̄т А̄с-угорский институтт рӯпитан хо̄тпат суссылтап ва̄рыгласыт. Та̄н ня̄врамыт ёт «Лылыӈ со̄юм» центрыт хо̄нтхатыгласыт. Нэ̄пак пӯмщалан ма̄гсыл са̄в э̄лмхо̄лас ёхталас. Та̄н халанылт Ханты-Мансийский банкыл ос ханищтап Департаментныл тит нэ̄г о̄лсы̄г. Ты нэ̄пак по̄слын хо̄тпа И. В. Соколова ня̄врамыт ма̄гыс мастеркласс ва̄рыглас. Манырсыр по̄слын нак о̄лы, хумус ро̄ви по̄слуӈкве, пуссын тав ханищтас. Ня̄врамаквет тав ётэ мощ по̄слысыт. Ты хурит С. С. Динисламова «Витсам» нампа такви ва̄рнэ нэ̄пакн тув по̄слыянэ. Светлана Селивёрстовна ня̄врамыт ма̄гыс о̄с пӯмащ, э̄рнэ ла̄тыӈ ла̄выс: институтт ос манхурип нэ̄пакыт хансым о̄лэ̄гыт, хотьют ты нэ̄пак ва̄руӈкве нё̄ты, манса̄вит э̄лмхо̄лас ты нэ̄пакыт хансэ̄гыт, нэ̄пак ва̄рнэ порат манырсыр та̄рвитыӈ ва̄рмаль о̄лы, пуссын тав потыртас. Манхурип мо̄йтыт, пе̄с потрыт о̄лэ̄гыт, ос таи ня̄врамытн пуссын ла̄выс. Суссылтап а̄стын юипа̄лт ня̄врамаквет атыӈ мӯйлупсал ос нэ̄пакыл мӯйлуптаве̄сыт. Нэ̄пак суснэ ма̄гсыл ты ма̄хманув коныпал ос «Югория» телерадиокомпания ёхталас, та̄н кина ва̄рсыт. Та̄нанылн О. Д. Ерныхова ос С. С. Динисламова потыртасы̄г. Хотьют ма̄навн ты нэ̄пак ва̄руӈкве нё̄тыс, пуссын сымын э̄рнэ ла̄тӈыл ла̄виянӯв. Пуста̄гыл вос о̄лэ̄гыт!

1080 2014.07.25. Людмила ТЕТКИНА

Рӯпатаныл по̄хын ке ке̄таве̄н тув хансэ̄н. Хо̄тпа рӯпатаныл по̄хын минуӈкве акваг ке ла̄ваве манос сэ̄лум олныл та̄ра ат ойтаве, тав Евгений Кривобоков палт ты урыл пищма хансуӈкве манос тав палтэ ялуӈкв ве̄рми. О̄йка ты ма̄хумн нё̄туӈкве ла̄выс. Тав рӯпата ӯргалан инспекцият кӯщаиг о̄лы. Евгений Владимирович акваг ла̄ви, э̄лумхо̄лас рӯпататэ̄ныл нас тох по̄хын ке ке̄твес, та̄н палтанылын ёхталаӈкве ул вос пилы. Хо̄тпа инспекцият заявлениенэ̄пак ке хансы, то̄нт та̄н та̄ра ты организация уральтаӈкве о̄вылтахтэ̄гыт. Ты та̄л хо̄т э̄тпос сыс та̄н акв со̄тыра 756 организация уральтасыт. Тот 5 со̄тыра 506 лю̄ль тэ̄ла хо̄нтсыт. Ты организацият яныг штрафолныл пинсаныл. Та̄н пуссын аквъёт 24 миллион арыгкем штрафолн ойтсыт. Югра ма̄т рӯпитан организацият халт кол ӯнттын ма̄хум лю̄льсаӈ о̄ньщавет, са̄всыр щирыл урккуптавет, мощща олныл ойтавет. Инспекция тот 949 лю̄ль тэ̄ла хо̄нтыс. Хо̄т э̄тпос сыс ты та̄л 12 э̄лумхо̄лас рӯпитым а̄тимыг е̄мтыс, 39 хо̄тпа са̄кватахтас. Та организацият, хо̄т тамле лю̄ль тэ̄ла о̄лыс, ань пуссын уральтавет. Евгений Кривобоков о̄с акв ва̄рмаль урыл потыртас. Ты э̄лыпалт тав палтэ са̄в ма̄хум акв та̄рвитыӈ ва̄рмаль ёт ёхталасыт, та̄н ӯщлахтын ма̄н ялнэ билетнэ̄паканыл ма̄гсыл олныл ат ойтве̄сыт. Кӯщай ла̄вме щирыл, ты урыл 2006 та̄л пирмайтым са̄ккон то̄ва ла̄тӈанэ йильпииг хасве̄сыт. Ка̄сыӈ организация такви положениенэ̄пак хансыс, ты хосыт ма̄хумн билет ёвтнэ ма̄гсыл олн мис. Са̄в кӯщаит ты нэ̄пак ат ва̄рсыт, ма̄хум мо̄т ма̄н ӯщлахтуӈкве ялнэ̄ныл ма̄гсыл олныл ат ойтве̄сыт. О̄йка ла̄выс: «Ма̄н ты кӯщаит ёт са̄в рӯпитасӯв, са̄всыр нэ̄пакыл хансыгласанӯв, та̄нки ма̄хманыл ул вос урккуптасаныл, олныл вос ойтыяныл. Таи лю̄ль, ма̄хманув са̄кконыт та̄нки ат ловиньтыяныл, тыи ма̄гсыл та̄нки тэ̄ланыл вуянтаӈкве ат ве̄рмияныл».

1080 2014.07.25. Людмила ТЕТКИНА

Та ма̄ныл ёхтум ще̄мьят тыт о̄с нё̄тавет. Ань Украина ма̄ныл Россиян са̄в ма̄хум о̄луӈкве ва̄нтлэ̄гыт. Ты ще̄мьят округувн о̄с ёхталаӈкве патсыт. Манаса̄вит ще̄мья тыг ёхтыс ос хумус та̄н нё̄тавет, ты урыл кӯщай нэ̄т потыртасыт. Ольга Полякова миграционный службат кӯщаиг рӯпитан нэ̄, ла̄выс, ма̄н округувт 12 со̄тыра 500 арыгкем украинцыт «вид на жительство» нампа нэ̄пак щирыл о̄лэ̄гыт ос рӯпитэ̄гыт. Украинат хо̄нтлан нак о̄вылтахтаме па̄сыл Луганский ос Донецкий областигныл тыг 12 э̄лумхо̄лас ёхтыс, тыт нэ̄паканыл ва̄рсаныл ос тыг о̄лмыгтасыт. Ты коныпал 51 хо̄тпа заявлениенэ̄пак хассыт, тыт о̄луӈкве о̄с ка̄саще̄гыт. Ты ма̄хум «О беженцах» нампа са̄ккон щирыл нё̄тавет ос э̄рнэ нэ̄пакытыл ва̄равет. Ты юипа̄лт та̄н ня̄враманыл тыт садик ма̄гсыл очередин хансавет, школан ханищтахтуӈкве вивет, са̄всыр пособияолныл ойтавет. Тувыл ёхтум мирыт Россия гражданствал ань моляхнувег ва̄равет. Мо̄т кӯщай нэ̄ Светлана Лотова акв са̄ккон урыл потыртас. Тав ла̄выс, Россиян ёхтум ще̄мьят «Переселение соотечественников» нампа программа хосыт о̄с нё̄туӈкве ве̄рмавет. Ты программа ма̄гсыл округ бюджетыт 25 миллион солко̄ви хансым о̄лы. Светлана Тимофеевна ла̄выс: «Украинал ёхтум ма̄хум миграционный службат нэ̄паканыл хунь ва̄рияныл, ма̄н палтув ёхтуӈкве ве̄рме̄гыт. Ма̄н та̄нанылн рӯпата хо̄нтуӈкве нё̄тэ̄в. Ты программа хосыт о̄лнэ кол ойтхатнэ ма̄гсыл о̄с олныл мыганӯв. Акв ще̄мья акв э̄тпос сыс 25 со̄тыра солко̄вил ойтыянӯв. Ще̄мьят ты олныл акв та̄л сыс нё̄тыянӯв. Ты юипа̄лт о̄лнэ коланыл ма̄гсыл та̄нки ойтхатуӈкве патэ̄гыт. Мария Краско, мирн нё̄тнэ департаментыт кӯщай нэ̄, ла̄выс, та̄н Украинал ёхтум ще̄мьят ма̄гсыл са̄всыр тэ̄нут, пормасыт пирмайтэ̄гыт. Тамле колыт ань округувт янытыл рӯпитэ̄гыт, ка̄сыӈ хо̄тпа тув пормас, тэ̄нут тотуӈкве ве̄рми.

1080 2014.07.25. Александр ВЬЮТКИН

Пальта̄л ма̄хум касыланыл ты ляпами. Мощ мо̄лалнув Ханты-Мансийск ӯст пальта̄л ма̄хум 2015 та̄лт е̄мталан ёсал каснэ касыланыл урыл прессконференция о̄лыс. Та касыл рущ ла̄тӈыл ла̄ваве: «Сурдоолимпийские игры». Журналистыг рӯпитан ма̄хум ёт тит хум Евгений Редькин ос Спартак Антоненко потыртаӈкв ёхталасыг. Тэ̄н сас каснэ щирыл кӯщаиг рӯпитэ̄г. О̄влэ̄т Евгений Леонидович ла̄выс: «2014 та̄л о̄вылтахтан порат округ губернаторув Наталья Комарова Москва ӯст пальта̄л манос лю̄льсаӈ хӯлнэ ёсал ха̄йтнэ ма̄хум округувт каснэ ва̄рмаляныл ва̄рыглан ма̄гсыл э̄рнэ нэ̄пакыт мир янытыл а̄гмыӈмосыӈ ма̄хум ёт рӯпитан комитет колын ма̄йлыс. Нэ̄паканув уральтан юипа̄лт касыл та̄н тыт ва̄рыглаӈкве ка̄сащасыт. Ты касыл нёлоловхойпловитыг тах е̄мты. Тамле касыл ма̄н Россия ма̄вт щар о̄выл щёс ты ва̄раве. Та мус нёлолов э̄тпос хультыс, ма̄навн пуссын алымаӈкв э̄ри». Евгений Леонидович юипа̄лэ̄т Спартак Геннадьевич о̄с мощ потыртас: «Та кастыл ва̄рнэ рӯпатав уральтаӈкве ты та̄л э̄лы хо̄н ма̄ныл ма̄хум уральтан щирыл титынтыг ёхталасыт. Ань то̄ва тэ̄лат та̄н хӯлтнэ щираныл э̄лаль э̄рнэ̄г щё̄питыянув. Ты коныпал ма̄навн иӈ хӯрумса̄т арыгтем нё̄тмил ва̄рнэ хо̄тпа ханищтаӈкв э̄ри. Са̄выӈпа̄лэ пальта̄л ма̄хум ёт рӯпитан щирыл студентыг о̄лнэ ма̄ньла̄т ма̄хум хасхатаӈкв ёхталэ̄гыт. Э̄рнэ са̄вит нё̄тмил ва̄рнэ хо̄тпат атнэ̄в юипа̄лт ма̄н тах та̄н ма̄гсыланыл пальта̄л ма̄хум ёт ка̄тыл хӯлтхатым потыртан ханищтап ва̄ре̄в».

1080 2014.07.25. Александр ВЬЮТКИН

Хохса хартыман на̄нтина̄нын лю̄ль ва̄регы̄н. О̄йттур э̄тпос о̄выл хо̄талэ̄т Ханты-Мансийск ӯст ОТРК «Югра» РИЦ нампа колыт хохса хартнэ ма̄хум ма̄гсыл хансым йильпи са̄ккон урыл прессконференция о̄лыс. Потрув лӯпта э̄тпос о̄вылтахтын хо̄талыт хохса хартнэ щирыл йильпи пирмайтан са̄ккон урыл о̄лыс. Та урыл ма̄н ётув потыртан кастыл хӯрум хум ёхталас. Халанылт та̄н мо̄тмо̄т ма̄т рӯпитэ̄гыт. Йильпи са̄ккон нэ̄глын щирыл та̄н акваннё̄тхатым рӯпитэ̄гыт. Ёмаспал нупыл ӯнлын хум наме Василий Иванович Костин, тав «Центр медицинской профилактики» нампа пӯльница тармыл ле̄ккар кӯщаиг рӯпиты. Котильт о̄лнэ хум наме Роман Игоревич Надыба, тав ос полицият рӯпиты. Хӯрмит хумияныл наме Константин Сергеевич Репин, тав округ Дума колт ма̄ньла̄т ма̄хум ёт рӯпитан парламент тармыл председателиг о̄лы. О̄влэ̄т пӯльницат рӯпитан хум хохса хартнэ ма̄хум урыл мощ потыртас. Тав ла̄выс: «Россия янытыл ка̄сыӈ та̄лт сака са̄в мир хохса хартнэ пе̄нтсыл о̄лнэ а̄гмыл хотталь щалты. Хохса хартнэ ма̄хум халт са̄выӈпа̄лэ сым ос хо̄псы а̄гмыл хотталь щалтэ̄гыт. Хум хо̄тпат халт налыман та̄л мус ат о̄лнэ хо̄тпат са̄выӈпа̄лэ о̄лнэ̄ныл палыт акваг хохса хартым о̄лсыт. Ма̄н округув янытыл хохса хартнэ хо̄тпа пусмалтан ма̄гсыл ва̄т нупыл ат колнак рӯпиты». Ле̄ккар юипа̄лт ос полицият рӯпитан хум ла̄выс: «Хохса хартнэ ма̄хум ёт рӯпитанэ̄в моще̄ртын лов та̄лыг ты е̄мты. О̄влэ̄т хохса мори тыналан ва̄рмаль хотпо̄илттаслӯв. Тувыл ня̄врамыт ханищтахтын колыт ляпат хохса хартуӈкв по̄илттасӯв. Ань ос тэ̄нэайнэ колытыт хохса хартнэ нак хотпо̄илттаӈкв номсэ̄в. Тувыл ань са̄всыр вокзалыт, ла̄пкат ос ма̄хум ӯщлахтын ма̄т ляпат хо̄хса хартуӈкв о̄с ат та̄ртаве. Йильпи пирмайтым са̄ккон щирыл посым потылтан ма̄хум хохса хартуӈкв ат ро̄внэ ма̄ныл атхойплов метран по̄хан э̄ри минуӈкв. Ты коныпал ла̄пкат хохса о̄щнэ норманыл хотвиӈкв ла̄вве̄сыт. Тувыл ос са̄всыр ма̄нь ла̄пкат хохса тыналан лицензиянэ̄паканыл хот–вуйве̄сыт. Хохса тыналан щирыл та̄рапаттын ма̄т яныг штрафолныл пинуӈкв ве̄рмавет». Тав потыртан ма̄тэ̄ныл а̄стынэ̄тэ юипа̄лт Константин Сергеевич ла̄выс: «Ма̄н ма̄ньлат ма̄хманув ёт са̄всыр пӯмащ номт о̄ньще̄в. Ань «Добровольная дружина» ма̄гсыл хохса ат хартнэ ос вина ат айнэ ма̄ньлат ма̄хум атэ̄в. Ма̄н ты ма̄ньлат ма̄хум о̄влэ̄т Нягань ӯст номсэ̄в атуӈкв. Ма̄навн полицият рӯпитан ма̄хум нё̄туӈкв патэ̄гыт. Ань ты са̄кконыт пирмайтан па̄сныл округув янытыл лӯпта э̄тпос сыс акв со̄тыра 391 хо̄тпа штрафыл хансыглаве̄сыт. Штрафыт са̄всыр тын о̄ньще̄гыт. Автобус ӯрнэ ма̄т хосха хартнэ ма̄гсыл хо̄тпат атса̄т солко̄вил хасылтавет. Тувыл ня̄врамыт ёнгасан ма̄т хохса хартнэ ма̄гсыл титхӯрум со̄тырал пинуӈкв ве̄рмавет. Щар яныг штраф хо̄тса̄т со̄тыран ёхты. Ань хо̄хса хартнэ урыл са̄всыр кина охсат ва̄рнэ ма̄гсыл ма̄хум та яныт штрафыл пинавет. Хохса хартнэ ма̄ныл по̄йтэ̄н, са̄в та̄л пуста̄гыл о̄лэ̄н.

1080 2014.07.25. Людмила ТЕТКИНА

Та̄н Юван Шесталов намыл пиным премиял майве̄сыт. Округувт пирмайтым нэ̄пак хосыт соссаӈ ма̄хум пе̄с йис ва̄рмаляныл, ща̄нь ла̄тӈаныл но̄хво̄рмалтан ос э̄лаль тотнэ ма̄гсыл Юван Шесталов намыл пиным премияолныл мивет. Ма̄ньщи манос ханты культура ма̄гсыл са̄в рӯпата ос э̄рнэ тэ̄ла ва̄рнэ хо̄тпат ос коллективыт та̄нки нэ̄паканыл тув ке̄туӈкве ве̄рме̄гыт. Коллектив 200 со̄тыра солко̄вил ос хо̄тпа 75 со̄тыра солко̄вил ойтавет. Ты та̄л округ янытыл са̄в ма̄хум ты премия ма̄гсыл нэ̄паканыл ке̄тыгласаныл. Жюрихо̄тпат акванатхатыгламаныл порат но̄хпатум коллектив ос кит хо̄тпа пе̄риясыт. Ты та̄л олныл «Ма̄нь Ӯскве» нампа стойбище, Лариса Николаевна Карпенко (Хозумова) ос Маргарита Фёдоровна Рябова (Яркина) майве̄сыт. Лариса Николаевна Карпенко Октябрьский район Ня̄рихумит па̄выл школат ма̄ньщи ла̄тыӈ ханищтан нэ̄г рӯпиты. Ты коныпал ня̄врамыт са̄кныл хартуӈкве, ю̄нсхатуӈкве ос са̄всыр щирыл ма̄щтырлаӈкве ханищтыянэ. Такви тав Саранпа̄вылныл о̄лы, та ма̄т самын патыс, тот яныгмас. Ханищтахтуӈкве а̄стламе юипа̄лт ма̄ньщи нэ̄ Ня̄рихумит па̄вылн рӯпитаӈкве ке̄твес, та па̄сныл тот о̄лы. Са̄в та̄л школат ня̄врам ханищтым тав ма̄ньщи ла̄тыӈ ханищтан нэ̄пакыт такви хансыс. Ка̄ркамыг рӯпитанэ̄тэ ма̄гсыл Лариса Николаевна са̄всыр янытлан нэ̄пакытыл майлувес. Ма̄ньщи нэ̄ «Учитель года» ос «Учитель родного языка и литературы ХМАО-Югры» нампа касылт мо̄т ханищтан хо̄тпат ёт касыс. Тав са̄в та̄л ма̄ньщи газета ёт рӯпиты, такви ос ня̄враманэ хансум потраныл, мо̄йтаныл тыг ке̄тыс. «Сохраним язык в семье» нампа касылт ос мо̄т са̄всыр касылт ня̄враманэ касыгласыт. Тав ханищтан а̄гирищанэпыгрищанэ о̄выл, китыт манос хӯрмит места са̄в щёс вӯйласыт. Маргарита Фёдоровна Рябова 1996 та̄лт Белоярский район Ванзеват па̄вылт «Тутые» нампа ансамбль ва̄рыс. А̄гит ханты э̄ргыт э̄ргуӈкве ос йӣквыт йӣквуӈкве ханищтасанэ. Маргарита Фёдоровна ханищтам а̄гиянэ ань тав тэ̄латэ э̄лаль тотыяныл, та̄н ня̄врамыт ханты э̄ргыт э̄ргуӈкве ос йӣквуӈкве ань та̄нки ханищтыяныл. То̄ва а̄гит А̄с-угорский театрыт рӯпитэ̄гыт. 1994 та̄лт Ха̄льӯс район Я̄сунт па̄вылт «Ма̄нь Ӯскве» нампа стойбище рӯпитаӈкве о̄вылтахтас. 20 та̄л сыс Я̄сунт па̄вылт кит со̄тыра арыгкем ня̄врам ӯщлахтас. А̄гирищитпыгрищит Кондинский, Нижневартовский, Белоярский, Сургутский, Ханты-Мансийский ос Ха̄льӯс районытныл тот ӯщлахтасыт. Тюмень, Тобольск, Новосибирск, Пермь, Томск ӯсытныл Ямал, Эвенкия ма̄ныл, Удмуртия ос Коми республикал мӯй ма̄хум ос ня̄врамыт тув ялсыт. Ты коныпал ма̄хум Германия, Чехия, Венгрия, Канада, Эстония, Финляндия, Голландия, Франция ос США хо̄н ма̄ныл тув ёхталасыт. Ӯщлахтын ма̄т Любовь Павловна Стаканова кӯщаиг са̄в та̄л о̄лы. Тав «Ма̄нь Ӯскве» рӯпитан ма̄гсыл са̄в ё̄р тув пиныс, сака са̄в рӯпитас. Ма̄н, редакцият рӯпитан ма̄хум, «Ма̄нь Ӯскве» нампа стойбищат рӯпитан хо̄тпат, Лариса Николаевна Карпенко, Маргарита Федоровна Рябова сымыӈыщ янытлыянӯв. Та̄н э̄лаль ос аквта щирыл ка̄ркамыг вос рӯпитэ̄гыт, ма̄ньщи ос ханты пе̄с йис ва̄рмалянув э̄лаль вос тотыяныл.

1080 2014.07.25. Анна АЛГАДЬЕВА

Са̄в та̄л ка̄ркамыг рӯпитан хо̄тпа. Рущ па̄влыӈ, рущ ӯсыӈ ма̄т рӯпата тал о̄луӈкв та̄рвитаӈ, ка̄сыӈ хо̄тпа та̄квина̄тэн матыр рӯпата кинсы. Во̄рт о̄лнэ ма̄хум о̄с нас ат о̄лэ̄гыт. Нювсаӈкв ат ке патэ̄гын – манарын тэ̄гын? Хулюмсунт па̄вылт са̄вке̄пыл а̄ти рӯпат ма̄, рущема̄ньщитэ̄тыл пуссын аквъёт рӯпитэ̄гыт. Сосьвинский ЛПУ Хулюмсунт рӯпитанэ̄тэ па̄сныл налыман нупыл са̄т та̄лыг е̄мтыс. Татьяна Даниловна Самбиндалова ты организацият «Служба связи» ма̄т ва̄т арыг та̄л рӯпиты. Ёмщакв ка̄ркамыг рӯпиты, рӯпататэ э̄руптытэ, са̄всыр службат халт спортивный соревнованиятн яланты: ёсал ха̄йты, волейбол, теннисыл ёнги. Ам тав колэ̄н ялсум, рӯпататэ ос о̄лупсатэ урыл ме̄н мощ потрамасме̄н: – Хо̄т самынпатсын, яныгмасын, ханищтахтасын? – Ня̄хщамво̄ль па̄вылт самынпатсум. Николай Михайлович Сагандуков та порат леккарыг о̄лыс, ма̄ньщитн леккар-Коляг ла̄ввес. Нёлолов та̄л мус Ня̄хщамво̄льт о̄лсум, тот садикн ялантасум, хӯрум та̄л яныт порат садикн майве̄сум. Та порат ясли группа а̄тим о̄лыс. Са̄т та̄л школан минасум. Тувыл омам хум ва̄рыс, Няхлаӈ па̄вылн минас. Тама̄гыс акв та̄л Та̄гт па̄выл школаинтернатт ханищтахтасум. Лов та̄лум нупыл патум порат 69 та̄лт тыг Галя о̄ньгум ос Илья яглаӈум па̄лт ёхтысум, тэ̄н па̄лттэ̄н о̄лмаясум. Тэ̄н та порат иӈ ма̄нь китыг, Катяг-Ленаг ма̄ниг о̄лсыг, Миша та таквсы самынпатыс. Та порат Хулюмсунтыӈ ня̄врамыт Ня̄хщамволь па̄вылт ханищтахтасыт. Ам о̄с нёлолов класс мус Ня̄хщамво̄льт ханищтахтасум. Нёлоловхуйплов та̄л яныт порат «Тюменьтрансгаз» организациян колкан ловтуӈкв патхатасум, акв та̄л рӯпитасум, Салехард ӯсн торговый училищан ханищтахтуӈкв ялсум, тувыл тот а̄гмыл е̄мтсум. Ётыл Ха̄льӯст пирикаскаг ханищтахтасум, хулнё̄выль рущ щирыл рыбамясо тыналан ла̄пкат кит та̄л пирикаскаг рӯпитасум, амки общежитиет о̄лсум. Тувыл 1981 та̄лт ювле Хулюмсунтн ёхтысум, о̄с «Туменьтрансгаз» рӯпат ма̄н патхатасум, хурум та̄л ОРС-4 буфетт рӯпитасум. Отпускат о̄лмум сыс Ягримн ханищтахтуӈкв ялсум, Учебный комбинатт телефонисткаг акв э̄тпос ханищтахтасум. Ёхтысум ос 1984 та̄л па̄сныл связьн телефонисткаг вуйве̄сум. Ань матах та̄л электромонтерыг ты хо̄тал мус о̄лэ̄гум. Связьт ва̄т та̄л рӯпитэ̄гум, та э̄лыпа̄лт хӯрум та̄л ос буфетчицаг о̄лсум. – Телефонисткаг о̄лмынт маныр рӯпата ва̄рсын? Хумыс рӯпитасын? – Та порат коммутатор о̄лыс. Колхал ӯлтта ман мо̄т ляпа па̄вылхал потыртан ма̄гыс хотьют звониты, китыглылум ос хо̄ӈха таве̄н э̄ри та ёт ке̄рква̄лганэ̄н аквано̄лтыягум, ма̄хум тащир ущта потыртасыт. Потыр аквано̄лтсум. Ань хо̄льтыл хунь, хоталь э̄ри тув ро̄хлыгты. 1995 тал порат ущ компьютерный связь патыс. Рация хо̄сыт потыртаӈкв во̄ваве̄в. – Электромонтер ос маныр ва̄ри? – Кабель –телефон ква̄лгыт пинэ̄в. Хот ма̄ хо̄сыт миннэ ма̄т, ма̄ хилуӈкв ке э̄ри ма̄ хилэ̄в, нумыл тотуӈкв ке э̄ри –нумыл тотылув. Хо̄т э̄ри но̄хнэ̄гсалыянув, тувыл хото̄люптыянув. Рӯпитан ма̄вт са̄всыр аппаратура о̄лы, таит хотсэ̄гсалыянув, колкан ловтэ̄в. – Наӈки матыр рӯт о̄ньще̄гын? –Рӯт о̄ньще̄гум, тыт па̄вылт Галя о̄ньгум о̄лы. –Оман маныр наме о̄лыс? –Омам Самбиндалова Дарья Степановна о̄лыс. Няхщамвольт о̄лыс, тувыл Няхлаӈ па̄вылн хум ва̄рыс. О̄йкатэ наме Пе̄тр Егорович Вынгылев о̄лыс. Ётыл омам по̄хын минас, ювле ёхталас, тыт Хулюмсунтт о̄лыс. Марина э̄щум а̄нумныл са̄т та̄лэ ма̄нь, о̄с тыт Хулюмсунтт о̄лы, рӯпиты. Та ёлыпа̄л Люда, тав Югорск ӯст о̄лы. Тувыл Нина ос Вася, щар ма̄ниг. Нина Ханты-Мансийскат о̄лыс, та̄лыг е̄мтыс а̄тимыг е̄мтме. Вася Ягримт о̄лы. Амки пыгум наме Илья, Новосибирск ӯст о̄лы, тот ханищтахтас, э̄лаль тув хультыс. Колыл ёвтыслум, ань тот о̄лы. Амки ва̄тихал тув ялантэ̄гум. Потруме̄н та оигпас. Пуста̄гыл о̄лнэ са̄в та̄л таве̄н, э̄лаль ёмщакв рӯпитаӈкв. Хоса нот, со̄т ос щунь!

1080 2014.07.25. Александр ВЬЮТКИН

Сытамыг но̄хпатум чемпион. Лӯпта э̄тпост ва̄т нупыл са̄тыт хо̄талт Ханты-Мансийск ӯсн щахныл алхатым каснэ ма̄ньщи хумиюв Руслан Проводников юв миннэ̄тэ порат хоиглас. Руслан ань тит э̄тпос палыт Америкат о̄лыс. Ты оигпам лӯпта э̄тпост нилахойплов хо̄талт ма̄н каснэ хумиюв американец Крис Алигьери ёт касыс. Тэ̄н Крис самын патум ос ань о̄лнэ Нью-Йорк ӯст кассы̄г. Потыртахтынэ̄ныл порат ща̄рщ тапа̄лыл о̄лнэ ма̄хум тох тахмаясыт, мо̄т щирыл Крис касуӈкв ат ка̄сащас. Руслан таквсы Майк Альворадо ёт каснэ̄тэ порат хотвим WBO Чемпионский э̄нтапе ань ос Крис Алигьери хумин хотвуйвес. Хотьют та касыл сунсыс, тав ва̄гтэ, халэ̄нт хотьютэ̄н ё̄рнуве̄г о̄лыс. Каснэ хумиюв Ханты-Мансийск ӯсн хо̄игламе порат депутатыг о̄лнэ тит ма̄ньщи нэ̄г Татьяна Гоголева ос Надежда Алексеева Руслан ёт ва̄щинтахтын пӯмащ ва̄рыгласы̄г. Мир янытыл ва̄нэ ма̄ньщи хумиюв ёт потыртан кастыл янгема̄не ва̄т арыгтем хо̄тпа ёхталас. Та порат ты ам Руслан Крис ёт каснэ урыл потыртасум. – Руслан, хумус наӈ номсэ̄гын, манрыг тох е̄мтыс, манрыг на̄ӈ э̄нтапын мо̄т хумин майвес? Тав ювле ла̄выс: Хотьютын ва̄ве, ань та урыл са̄в ро̄ви потыртаӈкв. Халме̄нт касыл о̄вылтахтын порат тав та̄ра со̄выррищ хольт ринг янытыл поргуӈкв о̄вылтахтас. Ам тох каснэ хо̄тпат щар ат э̄руптыянум. Касуӈкв те ла̄вхатсын, манрыг ха̄йтыгтэ̄гын. Каснэме̄н порат тит щирыл ам таве са̄ӈалалым колканын ёлпаттыгласлум. Тувыл то̄ва порат ам таве мощ са̄литаслум. Юио̄выл хӯрмит раундыт Фреди Роуч ам тренерум ла̄выс: «Руслан, наӈын таве ёлпаттуӈкв э̄ри. Ма̄н тав ма̄тэ̄т, тав ӯсэ̄т касэ̄в, мо̄т щирыл но̄хпатуӈкв ма̄н нэ̄мхотьютн ат та̄ртаве̄в». Хумус Фреди ла̄всас, тох та е̄мтыс. Ам таве̄н сам ёлыпа̄лн ёмщакв хо̄игламум порат тав сам ёлыпал лӯве акв ма̄т хотпокматас. Таима̄гсыл Крис сам нё̄вле мо̄лях лапторхатас. Бокс щирыл, хунь каснэ хум саме ат ка̄салы ос сам нё̄влянэ̄н лапхартаве, касыл по̄илттаве. Крис ёт а̄лхатамум порат тох ат е̄мтыс. Тав пе̄нтсылэ ам самум мощнув те лаппантхатнув, касыл та̄ра та по̄илттануве. Алхатамуме̄н юипа̄лт о̄лум прессконференцият ам ты урыл о̄щнэ номтанум пуссын потыртасанум. Каснэме̄н юипа̄лт Крис саме ма̄гсыл та̄ра пӯльницан тотвес. Ань ам ётум рӯпитан юрт хумим Вадим Корнилов Крис ёт каснэ ва̄рмаль титынтыг ва̄руӈкв номсы. Та па̄л ма̄хманув титынтыг ам ётум касуӈкв воссыг ат ка̄саще̄гыт». – Руслан, на̄ӈ та̄рвит рӯпатан ва̄рнэн юипа̄лт хумус ӯщлахтаӈкв ос маныр ва̄руӈкв номсэ̄гын? – Юн мощ о̄лэ̄гум, тувыл ще̄мьяӈ тагыл Байкал тӯр ляпан ӯщлахтаӈкв ялэ̄гум. Яныг ӯст суяныл та̄л сытамнув ма̄т ӯщлахтуӈкв таххаты. Руслан та̄л сыс акв щёс касыс, тамле ма̄т каснэ хо̄тпан таи а̄ти ёмас. Мо̄тыт ка̄сылэ хо̄т ос хунь е̄мты, иӈ ат ва̄гтэ. Таима̄гсыл ты урыл тав нэ̄матыр ат ла̄выс.

1080 2014.07.25. Светлана РОМБАНДЕЕВА

Ло̄пмус па̄выл ня̄врамыт. Ты ма̄ньщи ня̄врамыт Ха̄льӯс район Ло̄пмус па̄вылт о̄лэ̄гыт. Ло̄пмусн ялмум порат та̄наныл по̄слысанум. Ӯщлахтан лагеряныл туп лӯпта э̄тпост рӯпитас, тувыл та. Ня̄врамаквет ла̄внэ̄ныл щирыл, о̄с аквман э̄тпос рӯпитанув те, ёмас о̄лнув. Тот та̄н ёнгасасыт, матыр ханищтасыт, щаквщисыт, па̄йтым тэ̄нутыл тыттуве̄сыт. Ань ос та̄нти кон та ёнгасэ̄гыт, ха̄йтыгтэ̄гыт, Ло̄пыӈ я̄т пувлэ̄гыт. Ты порат кон сака лё̄мвоиӈ ос ма̄ньӯйиӈ, та̄н атпыл пилэ̄гыт. Пуравет те̄пыл, Ло̄пыӈанылт та пувлэ̄гыт, туп мовиньтаныл суйты. Ты я̄тил ня̄врамаквет пуста̄гыл вос о̄лэ̄гыт, со̄тыӈыщ вос яныгме̄гыт!

1080 2014.07.25. Людмила ТЕТКИНА

Ха̄льӯст о̄лнэ ма̄ньщи нэ̄. Валентина Гавриловна Себурова, о̄парищ наме Гоголева, ва̄т арыгкем та̄л Ха̄льӯст ня̄врам ӯргалан колт воспитателиг рӯпиты. Ма̄ньщи нэ̄ такви рӯпататэ сака э̄руптытэ. Са̄в та̄л ка̄ркамыг рӯпитан ма̄гсыл Валентина Гавриловна «Отличник народного образования» намыл майвес. Ма̄ньщи нэ̄ такви уре̄т таи ла̄выс: «Ам А̄нъя па̄вылныл о̄лэ̄гум, тот нила класс мус ханищтахтасум. Атыт классын Ягрим па̄вылн интернатын ке̄тве̄сум. Тот лов класс а̄стласум. Тувыл Ханты-Мансийск ӯст педагогический училищат воспитателиг ханищтахтасум. То̄нт увщим ще̄мьяӈ та̄гыл Ха̄льӯст о̄лыс, тав а̄нум тыг о̄луӈкве во̄выстэ. Ха̄льӯсн хунь ёхтысум, садикт рӯпитаӈкве патусм. Щар о̄влэ̄т ам палтум ялантан ня̄врамыт ань та̄нки ня̄врамыӈыт. Ха̄льӯст а̄нум ка̄салыяныл, та̄ра пащалахтэ̄гыт. Сымум такем ёмас, таса̄вит та̄л ювле хультыс, а̄нум номияныл, ат ёрувлыяныл. Ме̄н увщим ёт тыт о̄лмыгтасме̄н, омаме̄н А̄нъя па̄вылт такке̄т хультыс. Таве Ха̄льӯсн о̄луӈкве во̄выслуме̄н, тав ла̄выс, туп колэ, мисанэ, луванэ, а̄мпанэ ёт тыг ва̄нтлы. А̄нъя па̄вылт о̄лнэ кол хо̄тлостласлӯв ос Ха̄льӯсн тотыслӯв. Тыт тав такви колэ̄т э̄лаль о̄лыс. Ань то̄ва порат А̄нъя па̄вылн ялуӈкве кос таӈхе̄в, тувыл о̄лнэ кол тот ат о̄ньще̄в, тыи ма̄гсыл тув ат ялантэ̄в. А̄гим ос пыгум хунь ма̄ниг о̄лсы̄г, омам тэ̄н ётэ̄н юн ӯнлыс. Ань нэ̄ хо̄тпа ня̄враме ёт хӯрум та̄л мус юн о̄луӈкве ве̄рми, са̄всыр пособияолныл ойтавет, тыщирыл нё̄тавет. Ма̄н ня̄враманув янмалтамув порат тамле ёмас ва̄рмаль а̄тим о̄лыс, тыи ма̄гсыл юн ат ӯнлахо̄лсув, та̄ра рӯпитаӈкве минасӯв. Училище а̄стламум юипа̄лт о̄влэ̄т Ягрим па̄вылн о̄луӈкве номсысум. Ягримныл А̄нъя па̄выл мус лё̄ӈхе а̄ти сака хоса, акваг юв ялантаӈкве ве̄рмынувум. Ань таса̄вит та̄л Ха̄льӯст о̄лэ̄гум, тыг ханьщувласум. О̄йкаме̄нтыл тыт яныг кол ӯнттысаме̄н, ань ня̄врамагме̄н янгыг, сас ме̄н ётуме̄н о̄лэ̄г. О̄йкам ханты хум, Тугияны па̄вылныл о̄лы. Тав яныгмам па̄влэ̄н тай яланталы. Настя а̄гиме̄н школа а̄стламе юипа̄лт Ханты-Мансийск ӯст Югорский университетыт экономистыг ханищтахатас. О̄влэ̄т Ханты-Мансийск ӯсн о̄лмыгтас, тот рӯпитас, пыге такке̄т янмалтытэ. Тувыл тот о̄лнэ кол ат о̄ньщас ос ня̄враме садикн ат ялантас, тыи ма̄гсыл ювле Ха̄льӯсн ёхтыс, ань ме̄н ётуме̄н о̄лэ̄г. Ань тав тыт многофункциональный центрыт рӯпиты, ма̄хумн са̄всыр нэ̄пакыт ва̄руӈкве нё̄ты. Тот рӯпитаӈкве таве̄н мӯсты. Миша пыгуме̄н о̄с Югорский университетыт ханищтахтас, ань ос Ха̄льӯст о̄лы, тыт рӯпиты. Валентина Гавриловна ма̄щтырлаӈкве ха̄сы, са̄всыр пормасыт сагуӈкве сака э̄рупты. Тувыл садикыт рӯпитым ма̄щтырлаӈкве ат а̄лыми. Ха̄льӯст ма̄ньщит, хантыт ва̄йхатэ̄гыт, нэ̄ хо̄тпат акванатхатэ̄гыт, ю̄нсхатэ̄гыт, сакныл хартэ̄гыт. Ӯринэ̄ква хо̄тал ос мо̄т ялпыӈ хо̄талыт о̄лыглам порат акванатхатыглэ̄гыт. Ма̄ньщи нэ̄ о̄с тув яланты, Ха̄льӯст о̄лнэ соссаӈ ма̄хум ёт ва̄щинтахты ос ва̄йхаты. Тамле сымыӈ ос ка̄ркам нэ̄ Ха̄льӯст о̄лы. Ам Валентина Гавриловнан паща ла̄тыӈ ке̄тэ̄гум ос са̄в сымыӈ ла̄тыӈ ла̄ве̄гум. Пус ка̄т, пус ла̄гыл таве̄н.

1080 2014.07.25. Александр ВЬЮТКИН

Ванзеват па̄выл ханты хум. Тӯяг Белоярский район Касум па̄вылт са̄лыӈ ма̄хум каснэ хо̄талын ялмум порат пӯмащ ханты хум ёт ва̄йхатасум. Тав наме Герасим Николаевич Дыбин. Ань тав Ванзеват па̄влыт о̄лы. А̄тятэ наме Николай Тимофеевич Дыбин, о̄лнэ̄тэ палытыл колхозт хӯл алыщлым, во̄раим о̄лыс. Оматэ наме Евгения Петровна, тав колхозт мис поснэ нэ̄г рӯпитас. Ӯйхуланыл ма̄гсыл пум са̄грынэ̄ныл порат тэ̄н ще̄мьяӈ та̄гыл пум ва̄рнэ ма̄н те̄тыглавесы̄г. Тэ̄н колта̄глэ̄н яныг о̄лыс, нила ня̄врам янмалтасыг хӯрум а̄ги ос акв пыг. Щар яныг а̄гитэ̄н наме Ольга Ефимовна, о̄йкатэ щирыл Скакунова. Тав ань Нефтеюганск ӯст о̄лы. Ольга Ефимовна ханищтахтын ма̄ныл а̄стуме юипа̄лт пенсиян ква̄лнэ̄тэ мус ма̄нь ня̄врамыт ханищтан нэ̄г рӯпитас. Ань тав пенсият олы, ӯщлахты. Тав юипа̄лэ̄т Евдокия Николаевна, о̄йкатэ щирыл Калинина. Тав ань ня̄враманэ̄н нё̄тым, а̄пганэ янмалтым, о̄с Нефтеюганск ӯст о̄лы. Хӯрмит э̄ще̄н наме Галина Николаевна, тав ань а̄тим. Щар питипатта ня̄врамыг тав ты Герасим Николаевич самын патыс. Тав ханищтахтын колн миннэ̄тэ мус са̄мын патум Ванзеват па̄влэ̄т са̄т та̄л мус яныгмас. Ханищтахтуӈкв Полноват па̄влын интернатын те̄твес. Ня̄врамыт ханищтахтын коланыл а̄стлан мус Ванзеват ос Полноват тит па̄влыг халт яласым о̄лыс. Герасим Николаевич ханищтахтаме порат нас тох о̄луӈкв ат ве̄рмыс. Та̄вен аквписыг матыр ва̄руӈкв э̄рыс. Таима̄гсыл ка̄сыӈъе̄мт ялпыӈ хо̄талыт е̄мталан порат тав тот э̄ргыс, йӣквыс, пӯмащ ма̄гсыл матыр э̄рыс, тав пуссын ва̄рыс. Концерт суссылтан щирыл та̄н аквписыг Ха̄льӯс район янытыл о̄лнэ па̄влытт тотыглаве̄сыт. Та порат Ха̄льӯс район ань о̄лнэ тит районыг яныт о̄лыс. Ханищтахтын ма̄ныл а̄стуме юипа̄лт тит та̄л во̄рян хумыг о̄лыс. Тувыл газ ма̄гсыл о̄лнэ те̄р турыт пиннэ ма̄т СМУ-2 нампа колт тит та̄л рӯпитас. Тот рӯпитаме порат армиян лусытаӈкв вуйвес. Ла̄гл а̄гме щирыл тав хо̄са ат лусытас, юв те̄твес. Па̄влэ̄т нэ̄мат хоса а̄т о̄лыс, аквта та̄л таквсы Салехард ӯсн Культпросвет училищан ханищтахтуӈкв минас. Хӯрум та̄л баяныл ёнгасан хумыг ханищтахтас. Ханищтахтын ма̄ныл а̄стуме юипа̄лт та̄ра нэ̄ тотыс, э̄кватэ наме Ирина. Тав ос та порат Салехард ӯст тэ̄нут па̄йтнэ нэ̄г ханищтахтын ма̄ а̄стлас. Акванминаме̄н юипа̄лт тэ̄н сас Катравож А̄с я̄ ва̄тат о̄лнэ па̄влын рӯпитаӈкв те̄твесы̄г. Тот тэ̄н тит та̄л арыгтем о̄лсыг. Торыӈ о̄лнэ кол ат о̄щсы̄г, ня̄врамыӈыг е̄мтме̄н юипа̄лт Ха̄льӯс районын о̄луӈкв ва̄нтлысыг. Ванзеват па̄вылт рӯпитан ма̄ а̄тим о̄лыс, тэ̄н район мирколныл Ня̄хщамво̄ль па̄вылн рӯпитаӈкв те̄твесы̄г. Герасим Николаевич тот клубт хӯрум та̄л рӯпитас. Ха̄льӯс мус яласан лё̄ӈхе хо̄саг о̄лыс, таима̄гыс 1981та̄лт такви самын патум Ванзеват па̄влэ̄н ще̄мьяӈ та̄гыл о̄луӈкв та ва̄нтлысы̄г. Ань мус тот та о̄лэ̄г. Герасим Николаевич о̄влэ̄т колхозын рӯпитаӈкв патхатыглас. Нэ̄матыр хо̄са тот ат рӯпитас клубын рӯпитаӈкв во̄ввес. Та коныпал тав ня̄врамыт ханищтахтын колт ня̄врамыт э̄ргуӈкв ханищтан хумыг о̄лыс. Ханищтан ня̄враманэ ёт ханты ла̄тӈыл э̄ргын коллектив ва̄рыглас. Та ня̄враманэ ёт округ янытыл концерт суссылтым ва̄тихал яласасыт. 1994 та̄лт Ханты-Мансийск ӯст Дмитрий Агеев ёт ва̄йхатас. Таве̄н са̄ӈквылтап ос нарсьюх са̄ӈквылтан суянэ сымын хо̄ясыт. Та юипа̄лт тав такви пӯмащ ма̄гсылэ нарсьюхыл са̄ӈквылтаӈкв са̄т та̄н ханищтас. Э̄кватэ о̄с ня̄врамыт ханищтахтын колт тэ̄нут па̄йтнэ нэ̄г пенсиян ква̄лме мус рӯпитас. Ты та̄л рӯпитаӈкве хотпо̄йтнэтэ̄н па̄сныл ат та̄лыг ты то̄влыс. Тэ̄н хӯрум ня̄врам янмалтасыг. Яныг пыге̄н наме Коля, ё̄рн ма̄хум о̄лнэ ма̄т на̄й харыгтан ма̄т рӯпиты. Тав юи¬па̄лэ̄т тит а̄ги янмалтасыг. Яныгнув а̄гитэ̄н наме Оля, о̄йкатэ о̄парищ нам щирыл ань Хуланхова. Тав ань Ванзеват па̄вылт ня̄врамыт ханты ла̄тӈыл ханищтан нэ̄г рӯпиты. Питипатта а̄гитэ̄н наме Катя, тав колта̄глыӈыщ Ханты-Мансийск ӯст о̄лы. Садикт ня̄врамыт пусмалтан ле̄ккарыг рӯпиты. Тамле ёмас хум ёт потыртаӈкв нас пӯмащ. Са̄в та̄л пуста̄гыл вос о̄лы, таве̄н щунь паща ла̄тыӈ те̄тэ̄гум.

1080 2014.07.25. Людмила ТЕТКИНА

Тэ̄к па̄выл я̄ ва̄татэ витын ёлниляве. Ха̄льӯс район Тэ̄к па̄вылныл ма̄н редакциявн пищма ёхтыс. Анна Константиновна Самбиндалова, ма̄ньщи э̄ква, такви о̄лнэ па̄влэ урыл потыр ке̄тыс. Э̄лаль тав потре хансым о̄лы. – Тэ̄к па̄выл ма̄н о̄лнэ ма̄в. Ма̄н, Тэ̄к па̄вылт о̄лнэ ма̄хум, ма̄нки па̄влув сака э̄руптылӯв. Ханты ма̄хум па̄выл «Тэ̄к курт» тох ла̄вияныл. 2006 та̄лныл Тэ̄к па̄выл Ха̄льӯс нупыл хасвес, мирколув ос кӯщаянув пуссын тот о̄лэ̄гыт. Э̄лумхо̄лас ке китыглаве, хоты ма̄ныл тав Родинатэ о̄вылтахты, тав илтторыг ты урыл ювле ат ла̄ви. Тав самын патум ма̄тэ, о̄лнэ ма̄тэ, улпыл, тамле ма̄г ловиньтахты. Ма̄н ма̄гсылув Тэ̄к па̄выл тамле ма̄г о̄лы, тыт рӯпитэ̄в, ня̄враманув янмалтэ̄в. Ань Югра янытыл акв миллион 500 со̄тыра арыгкем э̄лумхо̄лас о̄лы. Та̄н халанылт 30 со̄тыра туп ма̄ньщит, хантыт ос ё̄рн хо̄тпат. Ха̄льӯс районт 6 со̄тыра соссаӈ ма̄хум о̄лэ̄гыт. Ты мирыт ӯргалан ма̄гсыл ань Россият са̄всыр са̄кконыт рӯпитэ̄гыт. Округувт ма̄ньщит, хантыт ма̄гсыл са̄кконыт, программат о̄с пирмайтаве̄сыт. Тамле ма̄нь па̄вылкве нэ̄мхотьютын ань ат э̄ри, ма̄н ва̄рмалянув урыл кӯщаит хотёрувласыт. Па̄влувт ёмас яласан лё̄ӈх а̄тим, тыт са̄в ма̄хум рӯпата та̄л о̄лэ̄гыт, ма̄ньлат ма̄хум рӯпата кинсым мо̄т ма̄н о̄луӈкве мингалэ̄гыт. Тэ̄к па̄выл урыл пе̄с мо̄йт о̄лы. На̄й-О̄тыр Тохлен Курэк Ики такви о̄лнэ ма̄ ат о̄ньщас. Тав лӯи ма̄ныл ма̄ло̄мт таквина̄тэ̄н тотуӈкве тахмаяс. Тувле нупыл минас. Тув ёхтыс, ма̄ ёлыпа̄лн хисматас, тувыл но̄хтыламлас ос ма̄ло̄мт ёт алмаяс. Ма̄ло̄мтэ ёт алы ма̄ нупыл минмыгтас. Алы ма̄ нупыл миныматэ ма̄ло̄мтэ ёлрагатас. Хоталь ма̄ло̄мт патыс, яныг ма̄ е̄мтыс. Пе̄с мо̄йт щирыл Тэ̄к па̄выл акв тамле ма̄ло̄мтыт ӯнлы. Па̄выл ӯнлын ма̄ пе̄с порат ялпыӈ ма̄г ловиньтахтас, ма̄хум тыт коланыл ат ӯнттысаныл. Пе̄с ма̄хум Тэ̄к-Ики нупыл по̄йкщуӈкве тыг ялантасыт. Ань па̄влувт акв яныг та̄рвитыӈ ва̄рмаль о̄лы, я̄ ва̄тав витын ёлниляве. Тэ̄к па̄вылт са̄в та̄л сыс «19 Партсъезд» нампа колхоз рӯпитас, тот пилорама, пувлын кол, ня̄нь ва̄рнэ кол, рыбкооп ос мо̄т колыт о̄лсыт. Я̄ ва̄тав ёлнильвес, ты колыт пуссын ёллоньхатасыт ос витн патсыт. Ка̄сыӈ та̄л я̄ ва̄та моляхнув ёлниляве, са̄в ще̄мья тах колта̄л хульты. 2005 та̄лт Обская ӯсхулы аквпалъе̄рт о̄лнэ ще̄мьят Ха̄льӯст колыл майве̄сыт, та̄н тув ва̄нтласыт. Хотъют тув минуӈкве ат ка̄сащас, Тэ̄к па̄вылт о̄луӈкве хультсыт. Ӯсхулы мо̄тпалъе̄рт о̄лнэ ще̄мьят мо̄т колыл ат мивет, мо̄т ма̄н о̄луӈкве ат ва̄нтлуптавет. Та̄н акваг пилым о̄лэ̄гыт, я̄ ва̄та та̄н коланыл мус ты ёхты. Ань Ха̄льӯс район мирколт акваг мо̄тмо̄т кӯщаит рӯпитэ̄гыт. Та̄н я̄ ва̄тат о̄лнэ ще̄мьят пуссын мо̄т колыл миӈкве ла̄всыт. Потраныл тэ̄лаг аты е̄мтэ̄гыт. Ань ты хо̄тал мус ма̄хманув я̄ ва̄тат о̄лэ̄гыт. Александра Владимировна Разбоева, Людмила Владимировна Тарлина, Юрий Михайлович Новьюхов коланыл а̄латы витын рагатэ̄гыт. Софья Васильевна Новьюхова, Валентина Григорьевна Новьюхова, Евдокия Ивановна Миляхова мо̄т колн ва̄нлуӈкве аты а̄лымасыт, а̄тимыг е̄мтсыт. Хӯрум манос нила щёс луванув, мисанув я̄ ва̄тат пум маныгтым витн ра̄гата̄лсыт. Ты юипа̄лт ма̄хманув та̄нки ӯйхуланыл кон та̄ртуӈкве пилэ̄гыт, ня̄враманыл о̄с я̄ ва̄тат ёнгуӈкве щар ат та̄ртыяныл. Кӯщаит акваг ла̄выглэ̄гыт, па̄влувт яныг кол ӯнттаве, тув я̄ ва̄тат о̄лнэ 12 ще̄мьят о̄луӈкве ва̄нтлуптавет. Тамле ла̄тыӈ ма̄н хо̄т та̄л сыс хӯнтлэ̄в, ань ты мус кол ӯнттуӈкве аты о̄вылтавес. «Сельская школа» нампа программа хосыт па̄влыт йильпи кирпащ школа са̄в та̄л сыс ӯнттаве, а̄стлаӈкве ат ве̄рмаве. Ка̄сыӈ та̄л районный миркол кӯщаит школа а̄стлан ма̄гсыл олн та̄стуӈкве ла̄вхатэ̄гыт, ты мус нэ̄матыр тот ат ва̄раве. Округувт «Чистая вода» нампа программа рӯпиты. Ты хосыт яныг ӯст манос яныг па̄влыт вит сыстамтан утыт ва̄равет. Ма̄н, Тэ̄к, Пугоры ос Устрём па̄вылт о̄лнэ мир, ты тэ̄ла урыл туп хӯлыгласӯв. Ма̄н тай улпыл, э̄лаль акв та щирыл паӈкыӈ вит я̄ныл аюӈкве патэ̄в. 2002 та̄л во̄ртур э̄тпос «Жизнь Югры» газетат акв потыр хансым о̄лыс. Тот хансым щирыл ма̄н па̄влувт водопровод ва̄раве. Ты ла̄тыӈ туп газетат хультыс, ма̄н акв та щирыл вит я̄ныл тотэ̄в. Ты халт акв ёмас тэ̄ла о̄лыс, 2003 та̄лт па̄влувт йильпи садик ос интернат рӯпитаӈкве о̄вылтахтас. Яныг кол «Сельская школа» программа хосыт ӯнттувес. Ма̄н пуссын такем хотща̄гтсӯв, тамле ёмас, яныг кол па̄влувт рӯпиты. Та па̄сныл лов та̄л арыгкем ювле хультыс, па̄влувт йильпи кол воссыг аты ӯнтталавес. Любовь Константиновна Коротун, районный миркол кӯщаиг рӯпитан нэ̄, ёхталас. Па̄влувт йильпи ФАП ӯнттуӈкве ла̄выс. Йильпи пӯльница яныгполь э̄тпост а̄стлаӈкве э̄рыс, ойттур э̄тпос ювле ты хульты, пӯльница ӯнттуӈкве аты о̄вылта̄лвес. Юван Николаевич Шесталов а̄тятэ Тэ̄к па̄выл колхозт кӯщаиг рӯпитас. Ма̄нь та̄гыл Юван А̄с я̄ ва̄тат яныгмас, такви ма̄тэ сака э̄руптастэ ос янытластэ. Тав такви яныгмам ма̄тэ, я̄ урыл таса̄вит нё̄тнэ стихотвореният хансыглас. Тав хансум ла̄тӈе щирыл, А̄с я̄ ва̄тат лю̄лим ос нё̄тнэ я̄тэ нупыл сунсым сыме э̄ргыс. Ма̄н ань А̄с ва̄тат лю̄люӈкве пилэ̄в. Турап, во̄тыӈ хо̄талытт туп та урыл номсэ̄в, хумпыт я̄ ва̄тав ул вос сакватыяныл. Тыщирыл э̄лаль ке мины, я̄ ва̄тав тох молях ёлнилюӈкве патаве, Тэ̄к курт ма̄нь па̄выл номтанувт туп хульты. Анна Константиновна Самбиндалова, Тэ̄к па̄вылт о̄лнэ Совет Ветеранов кӯщай э̄ква, хансум потре ма̄ньщи ла̄тӈыл Л. Теткина хансыстэ.

1080 2014.07.25. Александр ВЬЮТКИН

Мохсаӈ хӯл янытлан хо̄тал. Ань о̄лнэ э̄тпост хусыт хо̄талт Ханты-Мансийск ӯс ляпат Шапша па̄вылт мохсаӈ хӯл янытлан хо̄тал ва̄рыглавес. Та хо̄тал рӯщ ла̄тӈыл «День муксуна» ла̄ввес. Ты атыӈ хӯл янытлан хо̄тал округувт щар о̄выл щёс ва̄рыглаве̄с, тав хӯл а̄лыщлан ма̄хум янытлан хо̄таланыл кастыл щё̄пита̄лвес.

1080 2014.07.25. Александр ВЬЮТКИН

Ма̄хманув ма̄ньха̄пыл кассыт. Ка̄сыӈ та̄л о̄йттур э̄тпост э̄лы о̄выл ӯщлахтан хо̄талыт порат ханты ма̄хум ма̄ньха̄панылт каснэ ва̄рмаль ва̄рыглэ̄гыт. Ты та̄л тав хӯрумхойпловитыг о̄лыс. Рущ ла̄тӈыл «Кубок губернатора ХМАО-Югры по гонкам на обласах» ла̄ваве. Тав Нефтеюганский районт «Сказка» нампа ӯщлахтын ма̄т ва̄рыглаве. Ань о̄лум касыл ты та̄л о̄выл щёс мирхал касылыг намтвес. Ты кастыл ма̄хум тыг хӯрум са̄всыр нампа хо̄н ма̄ныл касуӈкв ёхталасыт. Эстония, Финляндия ос Латвия ма̄ныл о̄лсыт. Та̄н халанылт щар яныг делегация Финлядияныл о̄лыс, ат хо̄тпа. Округув янытыл ёхталам ма̄хум Нижневартовский, Белоярский, Березовский, Советский, Ханты-Мансийский, Нефтеюганский районытныл ос Когалым, Урай, Ханты-Мансийск ӯсытныл касуӈкв ёхталасыт. Ты коныпал Тюменский областьныл акв команда о̄лыс. Аквъёт пуссын са̄тхойплов команда, титса̄т ляпатем хо̄тпа атхатыглас. Ма̄нь ха̄пыл каснэ ва̄рмаль о̄вылтахтаме порат округ губернаторув Наталья Комарова о̄лыс. Тав ла̄выс: «Тыт о̄лнэ соссаӈ ма̄хум са̄в мутраӈ потрыт о̄ньще̄гыт. Ам та̄н мутраӈ потраныл номылматнэм порат мо̄тмо̄т ма̄т ва̄тихал ӯлылыянум. «Ка̄тыт пувим витын та̄рматан хӯл, ювле виӈкв ат ве̄рмилын». Тох ты ань ма̄нь ха̄пыл каснэ ва̄рмаль ёт е̄мтыс. Хуньт хосат тав номылматавес, щё̄питавес, ань ты хо̄тал мус тав уре̄т са̄в ма̄т ва̄ве. Ты та̄л ма̄н палтыланув касуӈкв, ёраныл суссылтаӈкв тыг хӯрум хо̄н ма̄ныл ма̄хум ёхтысыт. Ма̄н округув янытыл са̄в я̄ овты, пе̄с йис та̄гыл тит о̄лнэ соссаӈ ма̄хманув тамле ха̄пыл яласасыт. Таи ты ёмас та̄н пе̄с йис о̄лупсаныл щирыл ань ты хотал мус о̄лэ̄гыт. Ма̄н та̄наныл ты ма̄гсыл э̄руптыянӯв». Каснэ ва̄рмаль о̄вылтахтаме порат пуссын ёл «Горная» нампа я̄ ва̄тан «Витхон» янытлаӈкв минасув. «Витхон» Русскинский па̄вылныл о̄лнэ ханты ма̄хум пасан щё̄пита̄лсыт. Наталья Комарова ма̄н ётув о̄с вит ляпат лю̄ляхо̄лыс. Пурлахтамув юипа̄лт касыл ущ та о̄вылтавес. Касыл ма̄ньлат ма̄хумн о̄вылтавес, тан юипа̄ланныл ос яныгнув ма̄хум кассыт. Ма̄нь ха̄пыт ат то̄вылтахтсыт, халаныл ӯрсаныл, тох та касыт. Нижневартовкий, Сургутский ос Нефтеюганский районытт о̄лнэ ханты ма̄хмыт каснэ ха̄паныл ёт тотыгласаныл. Ма̄ньха̄п ва̄рнэ ма̄хум ка̄сыӈ хо̄тпа такви щире̄т ха̄п са̄гри. Каснэ ма̄т манах ха̄п о̄лыс, халанылт акв хурип ва̄рим ха̄п щар а̄тим о̄лыс. Сургутский район Русскинский па̄выл ма̄хум каснэ ха̄паныл ощща хосаг са̄грим о̄лсыт. Та̄н ма̄хманыл ва̄тихал хо̄ми ёӈхыгпа̄лсыт. Ха̄п ат о̄щнэ ма̄хум «Сказка» ӯщлахтын ма̄т о̄лнэ ха̄пыл касуӈкв майлуве̄сыт. Тот о̄лнэ ха̄пыт ханты ма̄щтыр хумин Василий Михайлович Хоровын ва̄рве̄сыт. Василий тох ла̄ви: «Ам ма̄ньлат хумыг о̄лнэм порат о̄выл ха̄п ва̄рсум. О̄влэ̄т ва̄рнэ ха̄панум ловиньтым о̄щсанум, ань ат пыл номилум ма̄нах ха̄п ам са̄грыгласум. Ва̄рнэ ха̄панум тынаныл яныг, хо̄тпатын ёмас ха̄п э̄ри те, тынэ урыл щар ат номсахтэ̄гыт, та̄ра та ва̄рылтэ̄гыт». Ха̄льӯс районныл касуӈкв ёхталам ма̄хум ма̄гсыл Василий Хоров тот о̄лнэ ха̄пытныл ха̄п такви пе̄рияс. Ёхталам ма̄хум ла̄всыт: «Ты пора ха̄панув витыт ёмащакв ла̄кве̄гыт! Ты э̄лыпал та̄ланувт ёхталамув порат ха̄панув ха̄п хӯрип ат о̄лсыт, ха̄пыг ла̄вуӈкв ат хо̄йхатасыт. То̄ва ха̄пыт со̄вииг ва̄римат, та̄рвитыӈыт ос сака хӯмплыӈ ха̄пыл ликмыгла̄лвесӯв. Ты порат тай касуӈкв ро̄ви». О̄выл хо̄тал ма̄хум вит тармыл каснэ ма̄ныл а̄стуманыл юипа̄лт ос ма̄ тармыл кассыт. Ё̄раныл а̄рталан щирыл, акванпӯхвтым касыл о̄вылтавес. Пе̄рщин ва̄рмаляныл «Нюлтахли» намаим о̄лы. Тох пе̄с йис порат ма̄хманув пе̄рщисыт, таве тащирыл ты ва̄рсаныл. Тамле касыл мо̄лты о̄выл щёс Русскинский па̄вылт ва̄рыглым о̄лыс. Таима̄гсыл ань тыт Русскинский па̄вылт касманыл щирыл ма̄хум кассыт. Ла̄гыл нёлыл мо̄т хумитэ ла̄гыл ва̄ӈкыртым ёлпаттуӈкв щар ат ро̄ви. Ка̄таныл мо̄т хум сыспа̄лн акванпувим ё̄рва̄гыл пе̄рщуӈкв э̄рыс. Халэ̄нт хотьютэ̄н са̄ртыннув ёлпаттаве, пе̄рщин ма̄ныл тав та арыгтаптаве. Халанылт каснэ щирыл хо̄н ма̄ныл ёхталан ма̄хум касуӈкв о̄с ла̄вхатсыт. Та̄н халанылт акв ма̄ньлат пыг туп о̄лыс, таима̄гсыл тав о̄лнэ ма̄хманэ ёт купнитнуве̄г касыс. Мо̄тананэ пуссын та̄рвитыӈнув ма̄хум ёт кассыт. Та̄н тыг пе̄рщуӈкв ёхталасыт, халанылт пуссын матыр пе̄рщин касыл ханищтасыт. Та̄наныл ты пе̄рщил хащталыг о̄лнэ ма̄т, таима̄гсыл пе̄рщин порат хо̄н ма̄хум нэ̄мхотьютаныл но̄х ат патыглас. Титыт хо̄тал о̄влэ̄т акв хо̄тпал кассыт. Тувыл титгыл щар юио̄вылт акв ха̄пыл хӯрмаххо̄тпа ӯнтым товсыт. Ха̄льӯс районыл ёхталам ма̄хум титгыл каснэ порат акв щёс пувлыст. Хӯрмыл товым ха̄пыл нила щёс хоми ё̄ӈхыгласыт, финишин онтоловит ха̄пыт ёхтысыт. Но̄хпатнэ районанув щирыл о̄влэ̄т Нефтеюганский район ла̄ввес. Тав юипа̄лэ̄т Нижневартовский район, хӯрмит места Сургутский район вистэ. Касыл оигпаме юипа̄лт каснэ ма̄хум Диплом ос пӯмащипа ла̄тӈыӈ пищмал янытлаве̄сыт. Ма̄н ма̄хманув халт Валентина Спиридоновна Вьюткина па̄нт телевизорыл ос «За волю к победе» нампа Дипломыл майвес. Ты порат щир ма̄ньлатыӈ хо̄тпат халт тит ня̄врам янытлавесы̄г, ты Ксения Коргополова, тав Урай ӯс командат касыс, тувыл ос Федор Аганджи, тав Нижневартовский районыл ёхталас. Щар яныгпа̄лаг каснэ хо̄тпа Марина Яковлевна Сенгепова, тав Сургутский районт са̄лы о̄ньщим во̄рыт о̄лы. Мо̄тынтыг акв та порат, акв та ма̄т тамле пумащ тах о̄с ва̄раве, ка̄сащан ма̄хум пӯмащ ма̄гсыл тув тах ялэ̄н, сунсэ̄н.

1080 2014.07.25. Валентина УЗЕЛЬ

Стихыт хаснэ э̄ква. Нина Георгиевна Рукова Югорск ӯст о̄лы. Тав ань та ӯст о̄лнэ мирн ва̄ве, хосат та̄гыл стихыт хансы. Ялпыӈ хо̄талыт о̄лыгланэ̄ныл порат тав акваг тув во̄выглаве, такви хансум стиханэ мирн ловиньтыянэ. Тӯяг ме̄н тав ётэ хо̄нтхатыгласме̄н, тав такви уре̄тыл мощ потыртас. Тав а̄ще Георгий Александрович Ануфриев Ма̄нья па̄вылныл о̄лыс, 1930 та̄лт самын патыс. Ще̄мьяныл сака яныг о̄лыс. Нина Георгиевна о̄патэ Александр Матвеевич тит щёс нэ̄ тотыглас. О̄выл э̄кватэ а̄тимыг е̄мтме юипа̄лт лов ня̄враманэ ёт такте̄т хультыс. Титынтыг нэ̄ тотыс, иӈ лов ня̄врам самын патыс. Пуссын аквъёт та̄н хус ня̄врам яныгмасыт. А̄тятэ щар ма̄нь ня̄врамыг о̄лыс. О̄лме̄т са̄в та̄л во̄р ӯргалан хо̄тпаг рӯпитас. Оматэ Прасковья Гавриловна 1926 та̄лт самын патыс, тав такви а̄ги о̄парищ наме Фирсова о̄лыс. Та̄н Омский областьныл о̄лсыт, тэ̄та̄л о̄лум порат хӯрум лувыӈ суныл Конда ма̄ нупыл ва̄нтлысыт. Оматэ рущ нэ̄г о̄лыс, яныг хо̄нт порат педучилищат ханищтахтас. 1946 та̄лт Ня̄хщамво̄ль па̄вылн рӯпитаӈкв те̄твес. Тот хум ва̄рыс, ойкатэ̄нтыл нила а̄ги янмалтасы̄г. Прасковья Гавриловна налыман нупыл акв та̄л школат рӯпитас, ня̄врамыт ханищтас. Э̄лаль Нина Георгиевна а̄нумн такви уре̄тыл мощ потыртас, тав ла̄выс: «Ам «ветеран труда» нам о̄ньще̄гум. Ты ӯст 1978 та̄лныл о̄лэ̄гум, ты э̄лыпа̄лт Казахстан ма̄т о̄лсум. Ань юио̄выл та̄лыт сыс ам то̄рыл са̄всыр пормас ю̄нтэ̄гум, хӯл совныл матыр ма̄щтырлаӈкв ханищтахтэ̄гум. Сов ёмащакв ат тынтлылум, сов тармыл хораманэ то̄нт ат на̄ӈке̄гыт. Ма̄щтырлаӈкв о̄вылтахтамум порат ам торыӈыщ нэ̄матыр ва̄руӈкв ат ха̄ссум. Сортхул сове па̄рт тармыл ат то̄слыслум, номсысум, тув ханувьи. Кумыска тармыл пиныслум, хӯл сове тувто̄суӈкв патыс, кумыска ма̄ниг щар пулиг хотсакватавес, та̄ра хотвущкасаслум. Ань матыр ва̄рнэм э̄лыпа̄лт о̄влэ̄т ханищтахтэ̄гум, тувыл ущ ма̄щтырлэ̄гум. Стихыт ам школат ханищтахтамум па̄сныл хансэ̄гум. Пенсиян минамум юипа̄лт то̄нт ты са̄в хансуӈкв патсум. То̄ванакт школатт ман садикытт рӯпитан ма̄хум а̄нум во̄вияныл, та̄н ма̄гсыланыл матыр вос хансэ̄гум. Ань титыт ловиньтан нэ̄пакум ты та̄ратавес. Ам хӯрум ня̄врам о̄ньще̄гум, акв а̄ги ос тит пыг. Та̄н пуссын я̄нас колта̄глыл о̄лэ̄гыт. Та̄нанылн ня̄враманыл янмалтаӈкв нё̄тэ̄гум. Са̄в та̄л ма̄н, ӯсувт о̄лнэ соссаӈ ма̄хум, акванатхатыглэ̄в, ка̄ркам хо̄тпав Альбина Петровна тав ма̄навн атыглыянэ. Югорск ӯсув сака яныг кос а̄ти, ос тыт о̄лнэ ма̄хум ма̄ньщи ос ханты мир урыл са̄выӈпа̄лэ нэ̄матыр ат ва̄гыт. Матъёмас ялпыӈ хо̄талыт ва̄рыглавет, тув са̄в мир ёхталы, сака пӯмщалахтэ̄гыт». Нина Георгиевна сака ёмас сымыӈ хо̄тпа, тав ань са̄всыр ма̄н во̄выглаве, округувт о̄лнэ ма̄щтыр ма̄хумн ва̄ве. Пус ка̄т, пус ла̄гыл э̄лаль вос о̄лы.

1080 2014.07.25. unknown

Кульпас ня̄врамыт ка̄тыл по̄слэ̄гыт. Ты хурит Ха̄льӯс район Кульпас па̄выл школат ханищтахтан ня̄врамыт та̄н ка̄тыл по̄слысыт. Школанылт ма̄ньщи ла̄тыӈ ханищтан нэ̄ Евдокия Ивановна Кугина тыг, Ханты-Мансийск ӯсн, ёхталас, «Лӯима̄ сэ̄рипос» газета ва̄рнэ колн щалтсас, ня̄врамыт хурит ма̄навн мис. Ма̄ньщи ня̄враманув ка̄тыл по̄слуӈкве татем хасэ̄гыт, хурияныл матъёмас ма̄ньщи газетавн тотве̄сыт. Ма̄н, редакцият рӯпитан ма̄хум, Евдокия Ивановнан пӯмащипа ла̄тыӈ ла̄ве̄в. Ня̄врамаквет пуста̄гыл вос о̄лэ̄гыт, о̄с са̄в хурит вос по̄слэ̄гыт, газета ва̄рнэ колувн вос ке̄тыяныл. Пуссын пуста̄гыл вос о̄лэ̄гыт, На̄й-О̄тыранылн вос ӯргалавет!

1081 2014.08.08. Редакцият рӯпитан ма̄хум

Сым ща̄ргын ла̄тыӈ. Ты э̄тпос хӯрмит хо̄талэ̄т Ханты-Мансийск ӯст ханты нэ̄ Евдокия Николаевна Вожакова а̄тимыг е̄мтыс. Тав 1949 та̄лт Ха̄льӯс район Нумто па̄выл ля̄пат (налымантем ве̄рыста) во̄рколт самын патыс. А̄тятэ хул алыщлан ос во̄раян хумыг о̄лыс. Евдокия Николаевна Ка̄сум па̄выл школат ханищтахтас, 1966 та̄лт тот нёлолов класс а̄стлас. Э̄лаль Ханты-Мансийск ӯст о̄лнэ педучилищат ханищтахтас (1966-1970 та̄лытт), тувыл Ленинград ӯст А. И. Герцен нампа педагогический институтт ханищтахтас (1970-1976 та̄лытт). Институт а̄стламе юипа̄лт тав школат рущ ос ханты ла̄тыӈ ханищтан учителиг о̄лыс (1976-1979 та̄лытт), ня̄врамыт ханты ла̄тӈыл ханищтан ма̄гыс нэ̄пакыт ос словарит хансыс (1979-1991 та̄лытт), Обскоугорский институтт научный сотрудникыг рӯпитас (1991-1999 та̄лытт), «Югория» нампа округ радиот ханты ла̄тӈыл передачат ва̄рыс (2001-2005 та̄лытт). Евдокия Николаевна кит а̄ги ос акв пыг о̄ньщиглас. Тав хо̄тпа нупыл сымыӈ нэ̄ о̄лыс. Ань иӈ о̄лнув, а̄гме̄н ёлпаттувес. Ма̄н, редакцият рӯпитан ма̄хум, тав ня̄враманэ̄н ос рӯт хо̄тпанэ̄н сым ща̄ргын ла̄тыӈ ке̄тэ̄в. Ты мӯтраӈ, нё̄мса нэ̄кве ма̄гыс ма̄н сыманув о̄с ща̄рге̄гыт.

1081 2014.08.08. Александр ВЬЮТКИН

Пе̄риян кастыл щё̄питахтан ва̄рмаль. О̄йттур э̄тпос оигпан хо̄талэ̄т Ханты-Мансийск ӯст о̄лнэ ОТРК-Югра РИЦ нампа колт Тюменский область губернатор пе̄рияпын щё̄питахтан ма̄гыс прессконференция ва̄рыглавес. Журналистыт нупыл аквтит ла̄тыӈ ла̄вуӈкве Борис Хохряков ёхталас. Борис Сергеевич округ янытыл «Единая Россия» тармыл кӯщаиг о̄лы. Щар о̄влэ̄т тав ла̄выс: «Область губернатор юио̄выл щёс 2001 та̄лт пе̄риясув. То̄нт Тюменский область губернаторыг Сергей Собянин но̄хпатыс. Та юипа̄лт пе̄риян ва̄рмаль хо̄тпо̄илтта̄лвес. Ты та̄лныл таве ос э̄лаль ялтуптаӈкв номылматвес». Ля̄ххал тотнэ хо̄тпат титыглахтасыт: «Манрыг ма̄навн, округт о̄лнэ ма̄хмытын, э̄лынт о̄лнэ кӯщай пе̄рияӈкв? » Ты урыл Борис Сергеевич Хохряков ювле тох ла̄выс: «О̄лнэ колынт колпо̄х хо̄тпа пе̄рияӈкв ро̄выс те, на̄н ос сыстамыг о̄лнэ, потыльма ат ва̄рнэ хо̄тпа пе̄риянувын. Акв та щирыл ма̄н тох ты пе̄рие̄в. Область губернаторув мир торгамтан кӯщаиг вос о̄лы. Тувыл ос но̄х–патнэ хо̄тпа ма̄н округувн вос нё̄ты. «Единый Россия» партияныл ма̄н Владимир Владимирович Якушев тув ла̄выслув. Ам та хум хо̄сатта̄гыл ва̄глум, ма̄н округувн тав ётэ рӯпитаӈкв кӯстыр». Тюменский область губернатор пе̄рияӈкв ё̄рн ма̄хум ма̄наныл (Ямало-Ненецкий автономный округ) о̄с паты. Ты пе̄рияп сӯкыр э̄тпост нёловит хо̄талыт тах ва̄раве. Пе̄рияӈкве ялэ̄н, хотьют на̄нан мусты, таве пе̄рие̄н.

1081 2014.08.08. Александр ВЬЮТКИН

Са̄в мир акв то̄рыг акв ма̄т. Во̄ртур э̄тпост Ха̄льӯс районт Саранпа̄вылт йильпи пӯмащ ва̄раве. Рущ ла̄тӈыл III Окружной туристический слёт форум «Просторы Югры» ла̄ваве. Аквъёт пуссын яныгса̄т арыгтем хо̄тпа Нораты нё̄р палт мины. Халанылт та̄н са̄т группа щирыл уртхатэ̄гыт. Касыӈ группаныл та̄нти лё̄ӈханылт Нораты ос Корпиншор я̄г акванхо̄йнэ ма̄ мус нёлолов щислат ёхтуӈкв э̄ри. Тот ты палатканылт о̄луӈкв патэ̄гыт. Акванёхтынэ̄ныл хо̄тал юипа̄л хо̄талт ос Нораты нё̄р нумпа̄лэ̄н ха̄хсан номт о̄ньще̄гыт. Но̄хво̄раталнэ̄ныл юипа̄лт ос тит нупыл Нораты я̄ ло̄ӈхаль ос Кедрасью я̄ нупыл ё̄ме̄гыт. Э̄лаль та тит я̄г щирыл катомаран ха̄пыл Саранпа̄выл мус на̄тылтым минэ̄гыт.

1081 2014.08.08. Александр ВЬЮТКИН

Са̄всыр те̄рныл хорамыт щё̄питан хум. Сургут ӯст са̄всыр пормасыт ма̄щтырлан ма̄хум акванатыглаве̄сыт. Ам Дмитрий Алексеевич Прибыльнов ёт ва̄йхатасум. Тав пе̄с пора щирыл те̄рныл ва̄рнэ хорамыт ма̄щтырлан хумыг о̄лы. Дмитрий рӯпитан ма̄тэ «Сибирская БРОНЗА» ла̄ваве. Таве̄н ты ва̄рмаль студентыг о̄лме порат пӯмащиг е̄мтыс. Такви о̄лум Тобольск ӯс ма̄тэ̄т ка̄тыл по̄слын колт ханищтахтас. Ка̄сыӈ тув ӯщлахтанэ̄ныл порат, юрт ма̄хманэ ёт пе̄с па̄вылканыт хилуӈкв ялантасыт. Колъёрыт но̄ххилум ма̄ныл ос хо̄нтыглам пормасаныл учёныиг о̄лнэ ма̄хмытын ханищтаве̄сыт. Хо̄нтыглам хораманыл Дмитрий такви пӯмщаласанэ, сунсыгласанэ ос по̄слысанэ. Тувыл ханищтахтын ма̄ныл а̄стуме юипа̄лт акв та пе̄с хольт а̄нох ос ща̄лыголн те̄рныл хорамыт ва̄руӈкв номылматас. О̄влэ̄т нас уральтан щирыл ва̄рыс, та̄н виӈкв патавет ман а̄ти. О̄выл ва̄рыглам хораманэ та̄ра пуссын вуйве̄сыт. Тувыл та̄наныл э̄лаль ва̄руӈкв та патыс. Ань ты коныпал тав иӈ янгуй, са̄лыӈ а̄ньтыл ос ма̄хар лувыл хорамыт якты. Ва̄рнутанэ халт пальщимщакыт, тулят, сыплувын тагатан хорамыт ос са̄всыр хурил э̄нтап те̄рыт ва̄ри. Хораманэ ам ва̄санум, пуссын ма̄щтырыг а̄ртме̄гыт. Потыртамуме̄н сыс са̄в хораманэ ма̄хумн ёвтве̄сыт. То̄ват та̄нти о̄щнэ ма̄гсыланыл, то̄ват ос нас хотьютын мӯйлуптаӈкв. Мӯйлуптан щирыл Дмитрий ва̄рум утанэ щар ма̄к ёмасыт. Ёхталам ма̄хумн Дмитрий Алексеевич сымын ро̄внэ номтыӈ ла̄тӈыл, э̄лаль о̄лнэ хо̄талыл янытлавес. Ам таве̄н э̄лаль пуста̄гыл о̄лнэ ла̄тыӈ о̄с те̄тэ̄гум.

1081 2014.08.08. Александр ВЬЮТКИН

А̄ньт лувыл хорамыт яктын нэ̄. Сургут ӯст ма̄щтыр ма̄хум ва̄йхатнэ мирхал фестиваль о̄лме порат ам ка̄тыл по̄слан ос янгӯй, са̄лыӈ а̄ньтыл са̄всыр хорамыт яктын нэ̄ ёт ва̄йхатыглахтасум. Тав наме Ирина Викторовна Могутова. Тав пӯмащ ва̄рмале атхойплов та̄л ты ва̄ритэ. Ань тав Тюмень ӯст о̄лы, такви тэ̄ла о̄ньщи, такви ма̄гсылэ рӯпиты. Тав ётэ юрт нэ̄тэ Зинаида Леставская рӯпиты. Тэ̄н ма̄щтырлан ва̄рмале̄н щирыл ма̄ янытыл са̄в ма̄т яласасыг. Хо̄н ма̄н ва̄тихал во̄виньта̄лыглаве̄г. А̄ньт лувыл яктын са̄всыр ханищтап ва̄руӈкв во̄ваве̄г. Та коныпал тэ̄н Тюмень ӯст о̄лнэ «Центр прикладных исследований и разработок» нампа колт ханищапыт ва̄рыгла̄лэ̄г. Ирина Викторовна ла̄ви: «А̄нумн тох рӯпитаӈкв пӯмащ. Мансавит солко̄ви сэ̄лыме̄н, пуссын ме̄нти ще̄пме̄н пиныянаме̄н. Манахыл ойтавен пуссын, наӈти утанын». Ирина Викторовна Сургут ӯсн ёхталаме порат са̄в та̄л ма̄щтырламе ма̄гсыл янытлан нэ̄пакыл майвес.

1081 2014.08.08. Тамара МЕРОВА

Пе̄с о̄лупса ӯргалан э̄кваго̄йкаг. Хантыт ос ма̄ньщит халт пе̄с накыт ӯргалан хо̄тпа ка̄сыӈъе̄мт мощщамлы. Тувыл тамле хо̄тпат ёт ва̄йхатахтынэ̄в порат ма̄н хотща̄гтым о̄лэ̄в. То̄внакт та̄н ты кос та̄рвит о̄лупсал о̄лэ̄гыт, ос пе̄с наканыл ат хультуптыяныл, э̄лаль тотыяныл. Мо̄лал Русскинская па̄вылн ялмумт акв ханты нэ̄ ёт ва̄щинтахтасум. Нэ̄ наме Клавдия Григорьевна Покачева, тав ще̄мъяӈ та̄гыл са̄лыл каснэ ва̄рмальн ёхталас. На̄н потре э̄лаль ловиньтэлы̄н. – Ме̄н о̄йкаме̄нтыл акв юипа̄лт хӯрмит та̄л тыг са̄лыл касуӈкве ёхтала̄лыме̄н. Ты та̄л омам ме̄н ётме̄н о̄с ёхтыс, тав 77 та̄лэ то̄влыс. А̄тям ювле хультум нила та̄л порат та̄рвит а̄гме ма̄гыс хотталь щалтыс. Са̄ртын ма̄н колта̄глыл Пим я̄ по̄хат Винка ма̄т о̄лсӯв, ма̄нки атпан са̄вит са̄лы о̄щсӯв. Ще̄мъяв яныг, омагума̄тягум онтолов ня̄врам янмалтасы̄г, ань са̄т ня̄врам хультсыт. Ам 1973 та̄лт во̄рт самын патсум. Тувыл ма̄н яныгнуве̄г е̄мтмув порат Русскинский па̄выл ляпан ва̄нтлысӯв. Тув ханищтахтуӈкве тотыглавесӯв. Ос ты е̄рт о̄лмувт нусаг о̄луӈкве патсӯв, са̄лыянув мощщамласыт. Омам ань ва̄т нупыл ат са̄вит са̄лы туп о̄ньщи. Ётыл ам хум ва̄рсум, хумум наме Альберт Николаевич Покачев. О̄йкам ща̄нягеа̄щаге хосат а̄тимыг е̄мтсы̄г, тэ̄н о̄с са̄лы янмалтым о̄лсы̄г. Ам ще̄мьям ёт ань Тромаганыт о̄лэ̄гум. Ма̄н о̄с ва̄т са̄вит са̄лы о̄ньще̄в. Тыи пуссын ма̄нки янмалтым са̄лыянув, по̄х ма̄ныл ат ёвтыгласӯв. Ме̄н о̄йкаме̄нтыл хо̄т нэ̄ви са̄лы о̄щсуме̄н, мо̄лты акв нэ̄ви са̄лыюв хоттыпыс, нэ̄мхот ат та хо̄нтыгласлуме̄н. Ӯйхул пусмалтан ле̄ккарыт ма̄н палтув та̄нки ат ю̄выт. Та̄н палтаныл ла̄тыӈ ке̄тэ̄в ос тувыл ма̄нки ДНС ляпа ма̄н са̄лыянув по̄сыянӯв. Та ма̄т та̄н прививкатыл ва̄равет ос тувыл ювле та минэ̄в. Тамле ва̄рмаль ма̄навн сака та̄рвитыӈыг о̄лы. Ма̄нки Русскинская па̄вылн ёхталанэв порат ле̄ккарыт палт ялантэ̄в. Во̄рн та̄л сыс аптечкато̄тапсов щирыл тэ̄рпил ке̄тыглаве̄в. Ань тыг ёхтумувт пӯльницан щалтсуӈкве ат а̄лымасӯв. Ялпыӈ хо̄тал ма̄гыс ё̄рнколыт тӯщтымав, кӯрыт па̄лтымав сыс порав аквта щёс минам. Каснэ ма̄гыс тыг ёхталаӈкве ма̄н 120 ве̄рыста са̄лыл ёхталэ̄в. Лё̄ӈхув та̄рвит кос, ос ма̄навн тыт пӯмащ. Са̄в ма̄хманув ёт тыт акванхо̄нтхатыглэ̄в, тувыл ня̄врамагме̄н тыт ханищтахтэ̄г. Милана а̄гиме̄н хо̄т классыт ханищтахты, Радик пыгме̄н атыт классыт. Света а̄гиме̄н онтолов класс а̄стлас, ос ётыл хум ва̄рыс. Кит ня̄врамагме̄н а̄тимыг е̄мтсы̄г. Касылыт са̄лыянув ёт но̄х ат патыгласӯв, ма̄хумныл сака пилэ̄гыт. Юн о̄лте̄вт хотты мӯй хо̄тпа о̄лэ̄гыт ке, та̄н коральн ат щалтэ̄гыт, во̄рт хо̄т ха̄йтыгтэ̄гыт. Ма̄нки хультэ̄в, тувыл ущ щалтэ̄гыт. Нефтянникытн мощ нё̄таве̄в. Хӯрум э̄тпос сыс акв хо̄тпа кит со̄тыра солко̄вил ойтаве, тыгыл ма̄н налоголныл ювле пуваве̄в. Снегоход «Бураныл» нила та̄л сыс акв щёс майла̄лаве̄в ос китхойплов пе̄нщинпӯщкал майла̄лаве̄в. Тыгыл ат товлаве̄в, ма̄нки я̄нас о̄с ёвтэ̄в. Тувыл «Буран» хотсаквалы ке, ма̄нки о̄с ва̄риянув. Тув сыресыр щаӈквыт ёвтуӈкве э̄ре̄гыт. Тэ̄нут ёвтнэ ма̄гыс олн мощ ма̄нки сэ̄лэ̄в. Пил ва̄тэ̄в, тувыл Нижний Сортым па̄вылн, Сургут ӯсн манос машина яласан лё̄х хосыт тыналаӈкве тотыянӯв. Тамле о̄лупсал та о̄лэ̄в. Ня̄враманме̄н пе̄с нак щирыл о̄луӈкве патэ̄гыт манос а̄ти, ат ва̄глуме̄н. Ханты ла̄тыӈ ва̄гыт, юн потыртэ̄в. Тувыл ма̄нки хурип ю̄нтым супыл, сахил, ла̄гыл маснутыл ос масхатэ̄гыт, ат э̄ссамтэ̄гыт. Касыл ва̄рнэ хо̄талыт Клавдия Васильевна са̄лыянэ̄н ювлеё̄ӈхыгпаве̄сыт. Акв э̄лумхо̄лас та̄н э̄лыпа̄лытыт хури по̄слуӈкве нэ̄глапас, нэ̄ са̄лыянэ рохтуптасанэ. О̄йкатэ мо̄т каснэ хумит халт мощнув ювлехультыс. Я, тав кос, ве̄к мо̄тынтыг тэ̄н со̄тэ̄н е̄мты. Ма̄н ос ты колта̄гыл мирхал соссаӈ ма̄хум ялпыӈ хо̄талыл янытлыянӯв. Тувыл ты э̄тпост э̄кваго̄йкаг акванминамен пасыл хус та̄лыг е̄мтыс. Пус ка̄т, пус ла̄гыл, ос То̄рум ёт, О̄тыр ёт та̄н э̄лаль вос о̄лэ̄гыт!

1081 2014.08.08. Людмила ТЕТКИНА

Хо̄нтаӈ ма̄ньщи э̄ква. Нина Алексеевна Маркевич 1945 та̄лт сӯкыр э̄тпос 16 хо̄талэ̄т Кондинский район Карым па̄вылт самын патыс. То̄нт Карым яныг па̄влыг ловиньтахтас, са̄в мир тот о̄лыс. Нина Алексеевна школат тот ханищтахтас. Тувыл Ханты-Мансийск ӯсн минас, 1961 та̄лт педагогический училище а̄стлас. Та пора урыл ма̄ньщи э̄ква таи ла̄выс: «Ма̄н группавт са̄в ма̄ньщи а̄гит ханищтахтасыт, та̄нки халанылт та̄н акваг туп ща̄нь ла̄тӈыл потыртасыт. Ма̄н Кондинский районыл ёхтум ма̄ньщи а̄гит та̄н ла̄тӈаныл ат торгамтасанӯв. Омам ма̄ньщи ла̄тӈыл ёмащакв потыртаӈкве ха̄сыс, ам ма̄нь та̄гыл юн ща̄нь ла̄тыӈ хулсум, тувыл мӯсхал щирыл потыртаӈкве ат тэ̄лыс. Училищат ма̄н Та̄гт ма̄ньщи ма̄хум ла̄тӈаныл ханищтасув. Ань тай хо̄нтаӈ ма̄ньщи ла̄тыӈ ва̄нэ хо̄тпа щар а̄тим, тыи ма̄гсыл ам ща̄нь ла̄тӈум о̄с хо̄тёрувлаӈкве патыслум. Советский власть о̄лум порат, пуссын рущиг ва̄рвесӯв, ща̄нь ла̄тӈыл потыртаӈкве ат та̄ртвесӯв. Тыи ма̄гсыл ам ня̄враманум ма̄ньщи ла̄тӈыл потыртаӈкве о̄с ат ханищтасанум». Нина Алексеевна яныг ще̄мьят яныгмас, ща̄нягеа̄щаге онтолов ня̄врам янмалтасы̄г. Ще̄мьянылт тав щар ма̄ниг о̄лыс. Оматэ Ефросинья Дмитриевна Карым па̄вылныл о̄лыс, тот интернатыт ня̄врам ӯргалан нэ̄г са̄в та̄л рӯпитас. А̄тятэ Алексей Семёнович Чадов, Свердловский областил ёхтум рущ хум. Тав Карым па̄вылн школа ӯнттуӈкве ёхтыс, тот Ефросинья Дмитриевнал акванхо̄нтхатсы̄г, акванминасы̄г. Нина Алексеевна о̄йкатэ̄нтыл нила ня̄врам янмалтасы̄г. Кит та̄л ювле хультум порат о̄йкатэ а̄тимыг е̄мтыс. Акв а̄гитэ̄н Шугур па̄вылт колта̄глэ ёт о̄лы, кит а̄гияге Ханты-Мансийск ӯсн ва̄нтласы̄г. Пыге туп э̄лы ма̄н о̄луӈкве минас, ань ще̄мьяӈ та̄гыл Ивановский областьт о̄лы. Э̄ква ла̄ви: «Та палыт ма̄т о̄лым, пыгум а̄нум ат ёрувлытэ, мӯйлуӈкве тыг ёхталы. Ханты-Мансийск ӯсн амки ва̄тихал ялантэ̄гум, а̄гиягум ёт тот ва̄щинтахтэ̄гум. Ань ма̄ньлат ма̄хум тай пуссын яныг ӯст о̄луӈкве воратэ̄гыт. Тувыл ӯст ос ёмас рӯпата хо̄нтуӈкве ат ве̄рме̄гыт. Ань тай о̄лнэ колыл ат мивет, о̄лнэ кол та̄нки кинсэ̄гыт, тув яныг олн ойтэ̄гыт. Ма̄н ма̄ньлат хо̄тпаг хунь о̄лсӯв, тармле та̄рвитыӈ ва̄рмаль а̄тим о̄лыс. Ханищтахтан ма̄ныл а̄стлысӯв, та̄ра рӯпитаӈкве ке̄твесӯв. Рӯпитан па̄вылн ёхтысӯв, о̄лнэ колыл майвесӯв. Ань тай ма̄ньлат ма̄хум рӯпата ос кол та̄л тох та са̄валэ̄гыт». Нина Алексеевна Шугур па̄вылт школат ня̄врам ханищтан хо̄тпаг са̄в та̄л рӯпитас. 60 та̄лэ то̄влуме порат пенсиян минас. Нина Алексеевна колэ̄т акваг ня̄врам мовиньт суйты, тав палтэ а̄пыгрищанэ акваг ёхталэ̄гыт. Ань тав палтэ а̄гитэ а̄ги Маша ӯщлахты. Маша такви уре̄т ла̄выс: «Ам намум Маша Нохова, сӯкыр э̄тпост ам о̄выл классын ханищтахтуӈкве минэ̄гум. Ам ловиньтаӈкве ёмащакв хасэ̄гум, ка̄тыл хурит по̄слуӈкве э̄руптэ̄гум. Ам са̄в рӯт о̄ньще̄гум, та̄н наманыл: Ксюша, Соня, Рита, Захарка, Данька. Ма̄н аквъёт акваг ёнгасэ̄в. Ам кӯтюврищ о̄ньще̄гум тав наме Туман, ты коныпал ос кати о̄ньще̄гум тав таме Бусинка, яныг ка̄тим наме Фигаро. Ос акв каӈкум урыл ла̄вуӈкве хотёрувласум, тав наме Михейка, тав ётэ о̄с ёнге̄гум». Тамле потрыӈ ма̄нь а̄гирищ Нина Алексеевна палт ӯщлахты, ане̄кватэ̄н са̄в ща̄гт тоты. Наталья Ткачук ке̄тум потыр ма̄ньщи ла̄тӈыл Л. Теткина хансытэ.

1081 2014.08.08. Светлана РОМБАНДЕЕВА

Ло̄пмуст о̄лнэ колыт ӯнттавет. Ха̄льӯс район Ло̄пмус па̄вылт о̄лнэ колыт ӯнттавет. Колыт ӯнттын ва̄рмаль урыл ам Сергей Владимирович Хозумов ёт потыртасум. Тав ма̄ньщи хум, Ло̄пмуст самын патыс, тот яныгмас. Ань колыт ӯнттын ма̄т тав бригадирыг рӯпиты. Сергей Владимирович ла̄вме щирыл, ты колыт Ягримт о̄лнэ «Сосьва» нампа национальный община па̄лыл ӯнттавет, кӯщаяныл Николай Геннадьевич Полуянов. О̄лнэ колыт та̄н 1991 та̄л па̄сыл ӯнттэ̄гыт, ты коныпал тэ̄лы лё̄ӈх ва̄ре̄гыт, сыстамтэ̄гыт – Саранпа̄выл, Приполярный, Кульпас ос Кимкьясуй па̄влыт халт рӯпитэ̄гыт. Ты общинат рӯпитан ма̄хум аквтох Ягримт ос Саранпа̄вылт колыт ӯнттэ̄гыт. Са̄в кол Кульпаст ӯнттысыт – ат кол кит квартира о̄ньще̄гыт, тувыл ат янас кол. То̄ва пе̄с колыт йильпииг щё̄питасаныл. Ло̄пмуст ань хӯрум кол ӯнттэ̄гыт – кит кол кит квартира о̄ньще̄г, акв кол ос хӯрум квартира о̄ньщи. Сергей Владимирович ла̄ви, колыт та̄н йильпи та̄л кастыл а̄стлыяныл, ма̄хум тах коланылн ва̄нтлэ̄гыт. Хотальа̄ти э̄рнэ ма̄шинат, тракторыт, катерыт манос колыт ӯнттын магыс э̄рнэ матыр пуссын о̄лы. Колыт ӯнттын ахвтас утыт (блокыг ла̄вавет) та̄н Екатеринбург ӯсныл тотэ̄гыт. Насати, та палыт ма̄ныл тыг та харттынэ̄ныл. Тот ань атхуйплов хо̄тпа рӯпиты, олныл ка̄сыӈ э̄тпос ойтавет. Ма̄ньщи пыгыт Хурит хӯрум ма̄ньщи пыганӯв по̄слым о̄лэ̄гыт. Та̄н ань пуссын кол ӯнттын ма̄т рӯпитэ̄гыт. Александр Сергеевич Лыткин Кимкьясуй па̄вылт олы, 1983 та̄лт самын патыс. Оматэ Евдокия Владимировна Ло̄пмус па̄выл нэ̄, а̄ги о̄парищ наме Албина. Атятэ Сергей Валентинович Лыткин. Увщи о̄ньщи, наме Люба, тав Ня̄хщамво̄ль па̄вылт о̄лы, хӯрум ня̄врам о̄ньщи. Саша э̄кватэ Анна, а̄ги о̄парищ наме Анямова. Тэ̄н кит пыг янмалтэ̄г – Данил ос Дима, Кимкьясуй па̄вылт о̄лэ̄гыт. Яныгнув пыге Данил о̄с а̄тятэ ёт Ло̄пмус па̄вылн ёхтыс, па̄выл ня̄врамыт ёт тот ты ёнгасы, ха̄йтыгты. Ам пыгрищ нупыл ла̄ве̄гум, ты щаще̄кван тав яныгмам па̄влэ, ань ос наӈ тыт та ё̄мыгтэ̄гын, поргащлэ̄гын. Саша китыглылум, та̄н ань «Лӯима̄ сэ̄рипос» ма̄ньщи газета ловиньтэ̄гыт ман а̄ти. Ла̄ви, ловиньтэ̄гыт, ща̄нягеа̄щаге ма̄ньщи ла̄тӈыл потыртэ̄г. Котильт лю̄льнэ пыгув тай Александр Владимирович Таратов. Саша Ло̄пмуст самын патыс, яныгмас. Ты та̄л яныгполь э̄тпост тав оматэ Клавдия Ивановна а̄тимыг е̄мтыс. Таима̄гыс ам тав палтэ ат ялсум, ат китыглахтасум. Саша ще̄мьятэ ёт Ло̄пмус па̄вылт о̄лы, ня̄враманэ янмалты. Хӯрмит пыгув Юрий Николаевич Черепков 1988 та̄лт самын патыс. Оматэ Ольга Леонидовна Остерова Потрасуй па̄выл нэ̄, а̄тятэ Николай Николаевич Черепков Ха̄льӯс па̄выл хум. Юрий о̄выл классытт Ха̄льӯст ханищтахтас, тувыл э̄лаль Кульпаст ханищтахтас, тот аквхуйплов класс а̄стлас. Школа а̄стламе юипа̄лт Ягрим па̄вылн минас, тот колледжит бульдозерит ва̄рмальн ханищтахтас. Тав ань ще̄мьятэ ёт Кульпаст о̄лы, э̄кватэ наме Алена, пыге Илья. Ло̄пмус па̄вылт тамле ка̄ркам пыгыт та рӯпитэ̄гыт. Та̄н ла̄внэ̄ныл щирыл, тот та̄нанылн пуссын мӯсты, туп лё̄мвой сака са̄в, рӯпитан уракыл ат мивет. Рӯпитан ма̄хум Светлана Герасимовна Хатанзееван тэ̄нутыл па̄йтавет, тэ̄пъялэ̄гыт, мощ ӯщлахтэ̄гыт, тувыл о̄с э̄лаль та рӯпитэ̄гыт. Ты я̄тил ма̄ньщи хо̄тпанув пуста̄гыл вос о̄лэ̄гыт, На̄й-О̄тыранылн вос ӯргалавет!

1081 2014.08.08. Тамара МЕРОВА

О̄лупсав пе̄с хуриянув щирыл ханищтаве. Ты накт о̄с акв йильпи нэ̄пак та̄ратавес, «Портреты обских угров» намаим о̄лы, таве Раиса Бардина щё̄питастэ. Тот ювле хультум нотт 1930-1970 та̄лыт сыс пӯмыщ хурит акванатым о̄лэ̄гыт. Мо̄лты та̄л ва̄ти хо̄тал э̄тпост ме̄н Раиса Калистратовна ёт ты нэ̄пак урыл потыртасме̄н. То̄нт тав ла̄выс: «Ам йильпи нэ̄пак та̄ратан щирыл ань рӯпитэ̄гум. Ма̄ньщи ос ханты рӯтанум палт ялнэм порат са̄всыр пе̄с хурит ка̄сала̄лсум. Та̄н тот та̄нки ю̄нтум маснутанылт о̄лсыт. Ётыл таил э̄лаль пӯмщалахтуӈкве патсум. Тувыл матахмат хурит акванатсум, ты э̄лыпа̄лт хансум нэ̄паканумн то̄ват тув по̄слыгласанум. Соссаӈ ма̄хманув та̄нки рӯтаныл тот ка̄салыяныл ос а̄нумн матыр ла̄тыӈ ке̄тэ̄гыт. Та̄нки палтаныл о̄лум пе̄с хурит о̄с а̄нумн суссылтыяныл ос матыр потыртэ̄гыт. Та юипа̄лт хуриӈ нэ̄пак ва̄руӈкве а̄нумн Надежда Васильевна Лукина номт пиныс. Ты э̄ква ам диссертациям хаснэм ос таве вуянтамум порат научный кӯщаиг о̄лыс. Туп ань ты нэ̄пакум щё̄питамум порат нэ̄мхумус нё̄туӈке ат ве̄рмыс, такви са̄в рӯпата о̄ньщис. Ам хурит ос тув хансум потранум Новосибирский институтт археология ос этнография тармыл о̄лнэ издательствоколн ке̄тсанум. Та̄н ётаныл аквъёт рӯпитан договорнэ̄пак хассум. Хуриӈ нэ̄пакум ва̄рнэ ма̄гыс амки олн тув ойтсум. Ос ты нэ̄пакум хорамыӈыг ва̄рнэ̄ныл щирыл иӈ олн кинсуӈкве э̄ри кос. Нэ̄пакум моляхнув ва̄руӈкве, ва̄им, таӈхе̄гум. Тот ма̄нки соссаӈ ма̄хманув хумус пе̄с порат о̄лсыт, манхурип маснутыл масхатым о̄лсыт, манхурип рӯт хо̄тпа о̄щсыт, пуссын хури нупыл сунсым та̄рапаттавет. Ам номсэ̄гум, ты ва̄рум рӯпатам са̄в хо̄тпатн тах пӯмщиг е̄мты». Раиса хури по̄слум нэ̄паке та̄ратанэ̄тэ ма̄гыс ань кит ма̄ньщи хо̄тпагн олныл нё̄твес. Тыи российский боксёрпрофессионал Руслан Проводников ос такви ма̄гсылэ рӯпитан предприниматель нэ̄ Наталья Чайникова. Тэ̄н коныпалэ̄н Раиса Бардина о̄с са̄в хо̄тпатн пӯмащипа ла̄тыӈ ла̄ви, тыи пе̄с хурит майлам ще̄мьятытн ос хурит о̄вылтыт ла̄тыӈ хӯлтнэ ма̄хумн. Ты коныпал сака ёмас нётмил ва̄рсыт, рӯтаныл о̄вылтыт я̄нас потыртасыт. Нё̄тмил ва̄рнэ ма̄хум наманыл пуссын нэ̄пакыт хансым о̄лэ̄гыт. «Портреты обских угров» нэ̄пакет 355 са̄всыр хурит по̄слуве̄сыт. Тыи янгыщ А̄с я̄ ос Лӯи е̄р Та̄гт я̄ ва̄тат о̄лнэ соссаӈ ма̄хум. Ма̄хум па̄вланыл щирыл хури по̄хат хасве̄сыт. Тувыл нэ̄пакт карта по̄слым о̄лы, тот ка̄сыӈ па̄выл хӯлтвес. Хурит пуссын та̄ланыл щирыл ла̄ккваӯртве̄сыт ос я̄насыг суссылтавет. О̄влэ̄т 1930 та̄лт ос тыгыл э̄лаль миннэ та̄лыт порат по̄слум хурит нэ̄пакн щё̄питаве̄сыт, тувыл 1940йт, 1950ит, 1960ит ос 1970ый та̄лыт порат. Сака пе̄с хурит са̄всыр учёныит хантыт ос ма̄ньщит палт ялманыл порат по̄слыгласаныл. Тувыл ма̄нь па̄влытын хури по̄слум хо̄тпат ке̄тыгла̄лве̄сыт. Ма̄хум то̄нт ще̄мъяӈ та̄гыл по̄слуве̄сыт. Ма̄ньлат а̄гитпыгыт хо̄т ханищтахтынэ̄ныл порат манос пыгыт армият лусытан сыс о̄с по̄слахтасыт. Ханты ос ма̄ньщи ма̄хум маснутаныл ханищтым А. А. Богордаева учёный нэ̄ ты о̄вылтыт са̄в потыр хансыс. Ань акв ма̄нь потре о̄с ты нэ̄пакыт хасвес. Хурит нупыл сунсым ханты ос ма̄ньщи ма̄хманув о̄лупсаныл ёмащакв иӈ э̄лаль ханищтаӈкве ро̄ви. Тыи э̄рнэ ёмас нэ̄пак мо̄т учёныитн о̄с пӯмщалаве тах.

1081 2014.08.08. Александр ВЬЮТКИН

Каснэ ма̄т рӯпитан пыг. Касум па̄вылт Белоярский районт ма̄ньлат потрыӈ ханты хум о̄лы. Тав наме Наиль Артурович Салахов. Ты хум ма̄ньта̄гыл лӯи ма̄ ма̄хум касылыт касы. 2000 та̄лт тав «Мастер спорта России» намыл ма̄йвес. Щар о̄влэ̄т тэ̄лы ащирмат юрт пыгрищанэ̄т кон ха̄йтыгтаманылт толтыглахтын ма̄гсыл каснэ колн щалтапасыт, Наиль то̄нт ты о̄выл щёс лӯи ма̄ ма̄хум касыл ка̄саластэ. Та порат тав лов та̄л яныт пыгрищиг о̄лыс. Мо̄т щёс ёхталаме̄т нас тох по̄хт сунсым ат люлис, такви но̄тпа хум ня̄врамыт ёт касыс. Каснэ̄тэ порат а̄ти тох та̄ра пуссын а̄ртмуӈкв патыс. О̄выл тит та̄л каснэ̄тэ сыс аквписыг котиль ма̄т вис. Тувыл касыл э̄лаль артмуӈкв та патыс, ва̄тихал но̄хпатыглас. Школа а̄стлуме юипа̄лт та̄ра Ханты-Мансийск ӯсн каснэ щирыл ня̄врамыт ханищтан хумыг ханищтахтуӈкв минас. Колледж нампа колт Наиль ат та̄л ханищтахтас. Тот ханищтахтын ма̄ныл а̄стуме юипа̄лт ювле такви Касум па̄влэ̄н о̄луӈкв минас. Тот тав интернат колт ня̄врамыт каснэ щирыл ханищтан хумыг рӯпитаӈкв патхатас. Тувыл э̄лаль ханищтахтуӈкв номылматас. А̄с угорский университетын ос акв та каснэ̄тэ щирыл ханищтахтуӈкв минас. Тот тав акв та̄л сыс тит щёс юил ёхталан щирыл хо̄т та̄л ханищтахтас. Ханищтахтан ма̄ныл а̄стуме юипа̄лт та̄ра Касум па̄вылт о̄лнэ яныг каснэ колн методистыг рӯпитаӈкв патхатас. Ань тав па̄лтылэ налыман ня̄врам яласы, ёхталан ня̄врамыт каснэ по̄рат аквписыг ёмщакв касэ̄гыт. То̄ва ня̄враманэ касыл е̄мтнэ э̄лыпа̄лт щёпитахтуӈкв ёхталэ̄гыт. Таи ма̄гсыл та̄н нэ̄матыр места виӈкве ат ве̄рме̄гыт, нас та касэ̄гыт. Наиль ханищтан ня̄враманэ каснэ порат касуӈкв пуссын ла̄виянэ. Ат ёхталан ня̄врамыт ма̄гсыл тав такви яланты, ка̄т палыл ва̄нттыянэ. Акв, тит щёс тох тотыгланэ̄тэ юипа̄лт, мо̄т щёс ня̄враме ат те ёхталы, тав та ня̄врам юипа̄лт тисхатым во̄ссыг атпыл ха̄йтыгты. Ня̄враманэ каснэ̄ныл порат Наиль сыме ща̄рги. Та каснэ щирыл щё̄питахтын ня̄врам э̄тэхо̄талэ каснэ колт поргуӈкв ве̄рми. Наиль такви касыгла̄лме по̄рат округ ма̄гсыл касыс. Щар са̄в щёс тав сӯн ӯлтта 330 щёс порыгмас. Тит ла̄глыл аквторыг хӯрум щёс э̄лаль порыгман щирыл лов метра, хус сантиметра ёхталас. Тыньщаӈ сувын ре̄пыгтан щирыл акв торыг щар са̄в щёс онтырса̄т нупыл хо̄т щёс тыньщаӈе сувын хо̄иглас. Ще̄мятэ̄т та̄н хӯрум ня̄врам яныгмасыт, халанылт пуссын пыгрищит. Наиль щар янгыг о̄лы. Та̄н пуссын ма̄нь та̄гыл халанылт нё̄тхатым лӯи ма̄ ма̄хум касылын ханищтахтасыт. Котиль а̄пщитэ Виталий о̄с каснэ щирыл Россия ма̄щтыр нам о̄ньщи. Тамле ёмас ханты ма̄ньлат хумин ам са̄в щуньпаща ла̄тыӈ те̄тэ̄гум. Ще̄мьятэ На̄й-О̄тыранылн вос ӯргалаве, са̄в та̄л пуста̄гыл вос о̄лы.

1081 2014.08.08. Тамара МЕРОВА

Ма̄ янытыл о̄лнэ соссаӈ мирыт янытлавет. Во̄ртур э̄тпос 9 хо̄талэ Ма̄ янытыл соссаӈ мирыт янытла̄н хо̄талыг о̄лы. Ань ты кастыл хо̄та̄ти са̄всыр суссылтапыт манос ханищтапыт ва̄равет. Тох Екатеринбург ӯст о̄лнэ ма̄хумн лӯсум ма̄ньщит о̄лупсаныл урыл хурит суссылтаӈкве патавет. Тамле потыр Екатерина Турдакина ищхӣпыӈ ут хосыт хансыс. Тав Юстмедиа нампа ля̄ххал тотнэ колт рӯпиты, ань ты нэ̄ хансум потре ам на̄нан рущ ла̄тӈыл э̄лаль толмащласлум. – Ты суссылтапыт лӯсум ма̄ньщиянув хумус ань тыг мус пе̄с щирыл о̄лэ̄гыт, маныр ва̄ре̄гыт, пуссын хурин по̄слуве̄сыт. Хурит Виктор Тинигин Карпинск ӯст о̄лнэ хум по̄слыгла̄лыс. Тав то̄ва по̄слум хуриянэ Карпинский музейн о̄с во̄виньта̄лавет ос тот пӯмщалавет. Ань тав ва̄т нупыл ат хуриянэ «Гринвич» нампа яныг ла̄пка капай ос ӯщлахтан колыт суссылтаӈкве патавет. Я̄нас хотты ма̄хум о̄вылтыт потыртан суссылтап тот о̄выл щёс щё̄питавес. Ты э̄лыпа̄лт ӯст о̄лнэ хо̄тпатн са̄всыр пормасыт манос ма̄хум ӯщлахтан ва̄рмалит матыр урыл туп потырта̄лсыт. «Гринвич» нампа колт рӯпитан кӯщай хум Илья Клюжин ла̄выс: «Ма̄н тамле тэ̄ла таима̄гыс ва̄руӈкве номылматсӯв, ӯсыӈ манос тыг ёхталан мӯй хо̄тпат вос ва̄гыт, хоты соссаӈ ма̄хум халт та̄н о̄лэ̄гыт. Ты ма̄т лӯсум ма̄ньщит о̄лэ̄гытхӯлэ̄гыт, та̄н та̄нки пе̄с наканыл, ла̄тӈаныл э̄лаль тотыяныл». Ань Екатеринбург ӯст ты суссылтап во̄ртур э̄тпос нёлоловит хо̄талныл ва̄т нупыл ат хо̄тал мус рӯпитаӈкве паты тах. Ос лӯсум ма̄ньщиянув о̄вылтыт Свердловский областьт э̄лумхо̄лас праванэ ӯргалан кӯщай нэ̄ Татьяна Мерзлякова тамле ва̄рмалит хӯлтыс, ты мӯтраӈ ос нёмса мир ма̄н областюв лӯима̄ е̄р нупыл Ушма, Те̄расколыӈъя̄ ос Бурмантово па̄влытыт о̄лэ̄гыт. Та̄н пуссын Са̄пса ӯс миркол нупыл хансым о̄лэ̄гыт. Тувыл тот кӯщаит «Общество по выживанию и социальноэкономическому развитию манси» ва̄рмалит щирыл рӯпитэ̄гыт. Тот кӯщай ва̄ӈын нэ̄ Зубайда Щербак потыртас: «Са̄пса е̄рт ань лӯсум ма̄ньщииг 150 хо̄тпа ловиньтахтэ̄гыт, янгыщ тыи хус та̄лныл налыман та̄л мус яныт хо̄тпат ос тувыл ня̄врамыт. Та̄н халанылт щар яныгпа̄лаг Александра Васильевна Анямова о̄лы. Ты тэ̄лы порат тав 80 та̄лэ то̄влыс. Хум хо̄тпат во̄рае̄гыт, хӯл алыщлэ̄гыт, нэ̄ хо̄тпат пил ва̄тэ̄гыт, тэ̄рпи лӯптат атэ̄гыт. А̄ти сака хосат лӯсум ма̄ньщит са̄лы о̄щсыт ос са̄лыл яласа̄сыт. Ань тамле та̄рвитыӈ рӯпатан нэ̄мхотъют вуйхатуӈкве ат таӈхи ос атыпыл ха̄сы. То̄ват щар ма̄нь па̄вылт о̄лэ̄гыт, коланыл на̄й поста̄л, тохиӈ хотмус та о̄лэ̄гыт». Татьяна Мерзлякова э̄лаль таи потыртас: «Ӯсытт манос яныг па̄влытыт о̄лнэ хо̄тпат соссаӈ ма̄хум палт яланталэ̄гыт. Ӯйсовыт манос пил ёвтнэ коныпал винал тотыяныл, ма̄хум айтыяныл. Тамле лю̄ль пищ воссыг ул вос ва̄рнувыт. Ма̄ньщит та̄нки пе̄с наканыл ӯргалым э̄лаль са̄в та̄л ёмащакв вос о̄лнувыт». Ма̄н о̄с аквтох номсэ̄в кос. Ань на̄н во̄ртур э̄тпост Екатеринбург ӯст мӯйлуӈкве патэ̄гын ке, суссылтап сунсуӈкве щалтапа̄лэ̄н. Ищхӣпиӈ ма̄т хансум ля̄ххал ма̄ньщи ла̄тӈын Тамара МЕРОВАн толмащлавес.

1081 2014.08.08. Тамара МЕРОВА

Ня̄врамыт ёт рӯпитаӈкве таве̄н мӯсты. Санкт-Петербург ӯст А. И. Герцен нампа университетт ханищтахтамум порат ам ётум Ямал ма̄ныл акв ма̄ньлат а̄ги ханищтахтас. 1995 та̄лт университет а̄стласме̄н ос ла̄ккваминасме̄н. А̄ти сака хосат ме̄н ищхӣпыӈ ут хосыт хо̄нтхатахтасме̄н. Тав наме Галина Возелова о̄лыс, ань о̄йкатэ щирыл Змитрович. Юрта̄гим Лангепас ӯст о̄лнэ̄тэ. Яныгполь э̄тпост ме̄н ва̄щинтахтасме̄н ос тав такви о̄лупсатэ урыл мощ потыртас. – Ам Шурышкары па̄вылт самын патсум. Кит та̄лыг то̄влумум порат, ма̄н тувыл сысы минасӯв. А̄тяв, Иван Иванович Возелов, партийный рӯпататэ щирыл Мужи па̄вылн ке̄твес. Тот о̄выл классыт та̄л охса ханищтахтасум ос тав Лопхари па̄вылн миркол кӯщаиг паттуве̄с, ма̄н тув та ва̄нтлысӯв. Та па̄вылт хӯрум классыт ханищтахтамум мус о̄лсӯв, тувыл а̄тям Шурышкары па̄вылн ювлеминуӈкве тахмаяс. Омам са̄ртын тув ат ка̄сащас кос, Лопхарит о̄луӈкве таве̄н мӯстыс. Ос а̄тямн райкомыт э̄лаль рӯпитаӈкве э̄рыс, ма̄н тав ётэ Шурышкары па̄вылн ювле та минасӯв. Ам самын патум ос мощ яныгмам колн ювле та ёхтысӯв. А̄тям омаме̄нтыл Ленинград ӯст акванхо̄нтхатсы̄г, сас лӯима̄ ня̄врамыт институтт ханищтахтуӈкве патыгласы̄г. Та ӯст а̄тям акваг а̄гмыӈыг е̄мталас, тот о̄луӈкве хоса ат ве̄рмыс, таима̄гыс нэ̄гн та̄гыл ювле та минас. Омам селькупка нэ̄, наме Раиса Алексеевна Безруких, тав Красноселькупский районт Сидорово ма̄нь па̄вылт самын патыс. Ханты ла̄тӈыл потыртаӈкве такви ханищтахтас. О̄йкатэ̄н ё̄рнколн тотвес, тувыл тав матахмат хо̄талыт во̄раяӈкве ялнэ̄тэ сыс тав о̄ныпе ос акитэ ёт хультсы. Тэ̄н рущ щирыл потыртаӈкве щар ат ха̄ссы̄г, ань тэ̄н ётэ̄н ва̄тихал тох хульса̄лыглыматэ молях ла̄тыӈ ханищтас. Туп ам свидетельство о рождении нэ̄пакумт омам селькупкаг хансым о̄лыс. Ётыл ханты ла̄тыӈ ёмас ва̄нэ̄тэ ма̄гыс а̄тыпыл китыглаве, тав селькуп манос мо̄т хотты хо̄тпа. Йигрищанум, а̄пщиянум палт омам хантыиг хансыглыма. Юн ща̄нягума̄щагум ханты ла̄тӈыл потыртасы̄г кос, ос ма̄н, ня̄врамыт, ёт нэ̄мхотьют сака ат потырта̄лыс. Школа а̄стлам юипа̄лт ам тэ̄н ла̄внэ̄тэн щирыл Герцен нампа институтын минасум. Амки тув ат миннувум кос, ос тэ̄н хосат та̄гыл номсысы̄г, хотты а̄гитэ̄н Санкт-Петербургын ханищтахтуӈкве вос ялнув. Ты э̄лыпа̄лт увщим Тюмень ӯсн инженерностроительный институтн ханищтахтуӈкве минас, таима̄гыс ам тув та ке̄тве̄сум. Тувыл университет а̄стламум юипа̄лт ам са̄т та̄л Шурышкары школат «рущ ла̄тыӈ ос литература» ханищтан нэ̄г рӯпитасум. Ня̄врамыт ёт а̄нумн рӯпитаӈкве сака мӯстыс. Ос амки номтумтыл ам акваг хотты ма̄ньнув ӯст о̄луӈкве тахсум. Ма̄н школат ханищтахтамув порат са̄всыр нэ̄пакыт акванатуӈкве ла̄ввесӯв ос та̄н йильпи ӯнттум ӯсытн нэ̄пак ловинтан колн ке̄тве̄сыт. Ам та па̄сныл номсыгласум, ам о̄с тамле ӯсн о̄луӈкве минэ̄гум тах, хоттынакт акв тамле посылкал вос ке̄тнуве̄м. Ань ты тэ̄ла номылматыглылум, э̄лаль мовалалэ̄гум. 2002 та̄лт ме̄н Антонина Ануфриева ёт Лангепас ӯсн минасме̄н ос тот о̄лмыгтасме̄н. Тав соссаӈ ня̄врамыт э̄ргуӈкве ос йӣквуӈкве ханищтасанэ. Ам ос «Радуга» нампа дополнительный образование центрыт рӯпитаӈкве патсум. Ня̄врамыт ханты ла̄тӈыл потыртаӈкве ос сак хартуӈкве ханищтасанум. Ты коныпал соссаӈ мир о̄лупсатэ, пе̄с наканэ урыл пӯмщаласанум. Школат иӈ рӯпитанэ̄м порат ма̄н «Региональный компонент» программа щирыл рӯпитаӈкве ла̄ввесӯв. То̄нт ам ханты, ма̄ньщи ос ё̄рн ма̄хум о̄вылтыт э̄рнэ нэ̄пакыт ловиньтасум, са̄всыр наканыл та̄рапаттысанум. Ань ӯст о̄лнэ ня̄врамаквет хумус пӯмщалаӈкве э̄рыс, ам ва̄слум. Тувыл ма̄нки яныгмамув сыс матумпа̄ла хо̄тпаныл са̄всыр ва̄рмалитыл о̄с пӯмщалахтасӯв. То̄внакт ялпыӈ канн тотыглавесӯв, тот матыра̄ти суссӯв манос хӯлыгласӯв. А̄тям ёт са̄в щёс хӯл алыщлаӈкве ялсӯв, номилум яныг хӯл капайт алыщласӯв. Тувыл А̄с я̄ сака хумпыӈ я̄, ха̄пув тыглетувле нас хосгащлаве. Ань ты ва̄рмалит ӯст яныгман ня̄врамытн о̄с потырталыянум. Са̄ртын центрын са̄в соссаӈ ня̄врамыт ялантасыт. Ам амки ща̄ньа̄щаныл палт юв ёхталасум, ня̄враманыл кружокыт ялантаӈкве во̄выгласанум. То̄ват ща̄ньа̄щит та̄нки о̄с са̄в пӯмщалахтым о̄лсыт. Та̄н ня̄враманыл ань яныгмасыт, э̄лаль ханищтахтуӈкве минасыт. Ань юио̄вылт щар мощща ханты хо̄тпа центрын ёхталаӈкве патыс. Тувыл та̄н ща̄ньа̄щаныл та̄нки нэ̄матарыл сака пӯмщалахтуӈкве ат патсыт. Ты е̄рт о̄лнэ хантыт та̄нки маснутаныл хосат та̄гыл ат масыглыяныл, ла̄тӈаныл ёрувласаныл, мо̄т агт о̄ньще̄гыт. Ам палтум рущ ман мо̄т мирыл о̄лнэ ня̄врамыт ялантаӈкве патсыт. Ня̄врамыт пуссын ам э̄руптыянум, та̄н ётаныл а̄нумн рӯпитаӈкве ёмас.

1081 2014.08.08. Александр ВЬЮТКИН

Ка̄таге̄т тав ма̄щтыр. Ханты ма̄хум халт ка̄таге̄т ёмщакв ма̄щтырлан хум о̄лы, тав наме Николай Анатольевич Тасьманов. Тав рӯтанэ пуссын Касум па̄вылт Белоярский районт о̄лэ̄гыт. Коля ма̄нь та̄гыл са̄лыӈколт яныгмас. Хум хо̄тпанэ матыр ма̄щтырланэ̄ныл порат, пыгрищ аквписыг та̄н ляпанылт ё̄ӈхатахтыглас, сунсыс, ма̄ныр хумус ва̄раве. Мощ яныгнуве̄г е̄мтыс, такви ёргуӈкв ос са̄грхатуӈкв патыс. Та па̄сныл тав ань ты хо̄тал мус аквписыг маныр э̄ри, пуссын ма̄щтырлы. Ва̄рум рӯпатанэ ма̄гсыл 2006 та̄л «Народный мастер России» намыл майвес. Николай ань Касум па̄вылт о̄лы. Йильпи музейт кӯр па̄лтыглы ос нас мо̄т рӯпата ва̄ри. Та коныпал тав иӈ тув па̄лыт ос ня̄врамыт ӯщлахтан «Нумсаӈ ёх» ма̄т рӯпиты. Тот тав ня̄врамыт ма̄щтырлаӈкв ханищты. Тав ла̄ви: «Ня̄врамыт ёт рӯпитанэм порат, та̄н юипа̄ланылт аквписыг сунсуӈкв э̄ри. То̄ва ня̄врамыт касай пувуӈкв ат ха̄сэ̄гыт. Матараныл хотум те е̄мтапи, ты урыл тах ам титыглавем. Ёмас хунь титаххӯрмах ня̄врам ханищтахты. Та̄н аквписыг самыл сунсым ёрыгхатэ̄гыт. Касае лю̄льсаӈнув те выгтэ, та̄ра наӈки. Тувыл та̄н ма̄к ма̄щтырыг та е̄мтэ̄гыт. Ам ханищтам то̄ва ня̄враманум а̄нумыныл ма̄щтырнуве̄г матыр ва̄руӈкв ханьщувласыт. Мо̄т ущты касай ка̄тын винэ ня̄врамыт ёт рӯпитаӈкв а̄нумн нё̄тэгыт. Ты магсыл ам та̄наныл во̄рын щёпыр па̄тлуптаӈкв ос хӯл а̄лыщлаӈкв тотыглыянум». Ты ёмас потрыӈ хумин ам ла̄ве̄гум: Ма̄щтырлан пормасанэ та̄кыг, хорамыӈыг вос а̄ртме̄гыт. Тамле ёмас хо̄тпа э̄лаль о̄лнэ хо̄таланэ вос са̄вме̄гыт, На̄й-О̄тыранэ̄н вос ӯргалаве!

1081 2014.08.08. unknown

Кульпас ня̄врамыт ка̄тыл по̄слэ̄гыт. Ты хурит Ха̄льӯс район Кульпас па̄выл школат ханищтахтан ня̄врамыт та̄н ка̄тыл по̄слысыт. Са̄т хурияныл ма̄н ты э̄лыпа̄л газетат (14 номерт) ва̄рыгласанӯв, ань ос э̄лаль мо̄т хурияныл на̄нанн суссылтыянув. Я̄тил ня̄врамаквет, пуссын пуста̄гыл о̄лэ̄н, о̄с са̄в хури по̄слэ̄н, газета ва̄рнэ колн ке̄тэ̄н. Со̄тыӈыщ о̄лэ̄н, На̄й-О̄тыранын вос ӯргалаве̄н!

1081 2014.08.08. Александр ВЬЮТКИН

Ма̄ньщи нупыл суснэ ма̄хум. Пермь ӯст та̄нтина̄наныл ма̄ньщииг ло̄виньтан ма̄хум о̄лэ̄гыт. Та̄н Кама я̄ хосыт Волгоград ӯс мус «Урал» нампа яныг на̄иӈха̄пыл яласан пӯмщаныл ты та̄л нилыттыг ва̄рияныл. Миннэ лё̄ӈханылт ат яныг ӯс та̄лтын пӯхталэ̄гыт. Та пӯмщаныл «Яныг хулыл» намтым о̄лы. Палытэ̄т тав хус хо̄тал мины. Тыи пуссын «Нанук» нампа Фонд тармыл кӯщаиг о̄лнэ нэ̄ Надежда Георгиевна Окорокова янытлытэ. Тав ӯсыӈ ма̄т студентыг о̄лнэ ма̄ньлат ма̄хум ёт рӯпиты. Та коныпал тав Пермский край янытыл ма̄щтыр мир ёт рӯпиты. Ма̄щтырлан пормасанэ ка̄сыӈъе̄мт ма̄щтыр ма̄хум акванатхатыглахтан са̄всыр ма̄н тотыгла̄лыянэ. Ань ты на̄йиӈха̄пыл миннэ лё̄ӈханылт о̄с тах са̄всыр мастеркласс е̄мты. Мо̄т о̄с акв тамле ва̄рыглам пӯмщаныл Ма̄хар Пермский край янытыл тотыглыяныл. Надежда Георгиевна ла̄ви: «Тэ̄лы порат Пермь ма̄ янытыл яласаӈкве кӯстыр. Миннэ лё̄ӈхувт хоты ма̄нь па̄влыт о̄лэ̄гыт, пуссын хо̄иглыянув. Тот о̄лнэ ма̄хманувн пӯмащ ма̄гсыл ма̄нь концерт такталэ̄в. Суссылтапанув суссылтанэ̄в юипа̄лт ща̄й айнэ пасан щё̄пита̄лэ̄в. Хо̄талъя̄т порат ма̄нти щирувт во̄рыӈ ма̄т о̄с пӯрлахтэ̄в. Ма̄н ва̄глув кос, матыр ат ва̄нэ щирыл ул вос ва̄ре̄в, хумус ве̄рме̄в ос ха̄сэ̄в, тох та ва̄ре̄в. Ам ма̄ньщит пӯрлахтанэ̄ныл урыл са̄в нэ̄пак ловиньтасум, тувыл са̄всыр пе̄с йис кинат суссум. А̄нум та урыл пуссын пӯмащ. Таима̄гсыл на̄н пе̄с йис о̄лупсан ам ханищтэ̄гум». Надежда Окорокова ёт ам лӯпта э̄тпост Сургут ӯст ва̄щинтахтасум. Ме̄н тав ётэ тот о̄лнэ «Старый Сургут» нампа музей каныт «Международный фестиваль ремёсел коренных народов мира (Югра -2014)» на̄мпа ма̄щтырлан ва̄рмаль порат потыртасуме̄н. Та порат тав ма̄щтырыг о̄лнэ хум Иван Конюков ёт ёхталас. Иван Иванович ра̄ктыл а̄ныт ва̄ри, тувыл ха̄ль са̄сныл са̄всыр хусапсовыт ма̄щтырлы. Ты коныпал тав йӣвныл колпо̄хн тагтан хорамыӈ хӯрит якты. Ка̄таге̄тыл ма̄щтырлаӈкв Иван Иванович ма̄ньта̄гыл о̄вылтахтас. Таве̄н матыр яктуӈкв, сагуӈкв ос по̄щгуӈкв пӯмащ. Тав тох ла̄ви: «Матыр ва̄рнэ̄м порат ам ӯщлахтэ̄гум»! Матъёмас тамле ма̄хум о̄лэ̄гыт. Тамле номт тотнэ ма̄хум ма̄гсыл ма̄н, ма̄ньщи ма̄хум, мир янытыл са̄в ма̄т ва̄ве̄в, ёмас номтыл ӯлыла̄лаве̄в.

1081 2014.08.08. Светлана Динисламова

Акв хо̄тал «Мāнь ӯсквет». О̄йттур э̄тпос атыт числат мāн Я̄сунт пāвылн ялсув. Ма̄н – тыи ам, Каталин Шипёц, Бернадетт Биро, Сильвия Немет ос Анастасия Сайпашева. Ты нила āгитнэ̄т Венгрияныл ёхтала̄лсыт, тит āгииг Сегед ӯсныл, тит āгииг Будапештныл. Каталин – тав учёный нэ̄, тав филология докторыг о̄лы, университетт āгитпыгыт мāньщи лāтӈыл ханищтыянэ. Тав мāньщи лāтӈыл сака ёмащакв потырты, ос тав ётэ ёхталам āгит мāньщи лāтӈыл о̄с потыртэ̄гыт. Тыи ам таимāгыс хассум – нāн, мāньщи хо̄тпаквет, торген нāнти лāтӈын ӯлылэ̄н, ханищтэ̄н, щāнь лāтӈыл потыртэ̄н. Сунсэ̄н, мāн лāтӈув мо̄т хо̄н мāт татем вāве, янытлаве, ханищтаве. Ята, мāн Я̄сунт пāвылн ялсув, тот о̄лнэ «Мāнь ӯсквег» лāвнэ э̄тностойбищат о̄лсув. О̄йтттур э̄тпос о̄выл сāтэ̄т тот о̄выл смена рӯпитас, сāв ня̄врам тот о̄лыс. Янгемāне пуссын аквторыг та порат тот ӯщлахтасыт. Яныгнув ня̄врамыт, мāньлат хо̄тпат пуссын мāньнув ня̄врамыт сāвсыр э̄рнэ вāрмалитн ханищтасаныл: йӣквуӈкве, ю̄нсхатаӈкве, мāщтырлаӈкве, по̄слуӈкве, ра̄ктыл ёнгын утыт по̄щгуӈкве, ты коныпал иӈ сāв пӯмыщ вāрмаль тот ня̄врамыт вāре̄гыт. Мāн акв хо̄тал туп «Мāнь ӯсквет» о̄лсув, ты хо̄талув сыс татем сāв пӯмащ ка̄саласув, аквтоп са̄ттем тот о̄лсув. Яныг пӯмащипа лāтыӈ Любовь Павловна Стаканован лāве̄в. Ты нэ̄ хо̄тал сыс вāгта̄л улпыл щар ат патыглы, мāтырāти пуссын вāруӈкве āлыми, ущты ня̄врамыт ёт по̄слыс, хансыс, тыт та̄ра мāн ё̄рнколын во̄ввесӯв, тāв яныгнув ня̄врамыт ёт презентация мāнавн суссылтас. Мощ хал минас ос рӯпитан хо̄тпат аканитыл кукольный театр тāнти вāрум мо̄йтаныл хосыт суссылтасыт. А̄лпыл па̄сыл э̄ти мус Любовь Павловна ня̄врамыт ёт аквписыг та о̄лы, кāсыӈ хо̄тпа мāгыс ёмас лāтыӈ хо̄нты, кāсыӈ ня̄врам мāгыс тав щар аквтоп омаг о̄лы. Ты ма̄гыс тāве янытлылув. «Мāнь ӯсквет» ня̄врамыт мāгыс хо̄тал онтолов щё̄с порат о̄вылтахты. А̄лпыл, тэ̄пъяланэ̄ныл юипāлт щё̄скем ня̄врамыт по̄слэ̄гыт, щаквще̄гыт, э̄рыгйӣкв ханищтэ̄гыт. Тувыл пыгрищит ё̄рнколын мо̄т матыр ва̄руӈкве минэ̄гыт, āгит янас колыт Мария Сергеевна Мерован ю̄нсхатуӈкве ханищтавет. Кāсыӈ āгирищин āкань ос пуӈкто̄р ю̄нтуӈкве э̄ри. Венгрияныл ёхталам āгитнэ̄т тāнти мāгсыланыл о̄с āканит ю̄нтуӈкве алымасыт. Вāим, сāв нё̄тмил тāнаныл Мария Сергеевна тāв вāрыс, э̄типа̄ла мус āканяныл āканиг тэ̄лсыт. Хо̄талъя̄т порат ня̄врамыт ёмащакв тэ̄пъялэ̄гыт, тувыл щё̄скем о̄с щаквще̄гыт, хӯрум щё̄с по̄рат спорт о̄вылтахты. Яныг ӯс каныт тāн маттем та ха̄йтыгтасыт. Аквтоп нэ̄матыр лё̄мвой а̄тим, нэ̄матыр посым пӯт ат э̄ри, ща̄гтым, мовиньтым торген та ёнгысыткассыт. Ты вāрмаль юипāлт концерт о̄лыс, насати ня̄врамыт венгр лāтӈыл тит э̄рыг ханищтамыт, э̄ргысыт. Тувыл тāн мāгсыланыл венгр мāхманув о̄с э̄рыг э̄ргысыт. Э̄типа̄лаг ос тӯлыглап о̄лыс, маттем та мовиньтасув. Хо̄тал хосаг о̄лыс. Лов щё̄с порат ня̄врамыт ёлхуюптаве̄сыт, пāвыл суйтāлыг е̄мтыс. Мāн ты э̄т Я̄сунт пāвылт хӯлсув. Хунь хӯлнэ колувн ё̄мсув, Каталин а̄нумн лāвыс: «Ам тамле сэ̄ръёр, юртыныщ о̄лнэ ня̄врамыт нэ̄мхо̄т ат ка̄сала̄лсум. Тыт налыман ня̄врам акв колта̄гыл хольт о̄лэ̄гыт, нэ̄мхо̄т кантыӈ лāтыӈ ат хӯнтамлэ̄гын, нэ̄мхотьют ат ня̄ӈхи, ат тысты, пуссын ща̄гтым аквонтасыг ӯнлахо̄лэ̄гыт, ёнгасэ̄гыт, ха̄йтыгтэ̄гыт. Ам номсэ̄гум, венгрия ня̄врамыт мощ мо̄тхурипат. . » Ам таве̄н лāвсум: «Венгрия ня̄врамыт тыг ёхтынувыт, ты этностойбищат о̄лнувыт, ты о̄лупса ка̄саланувыт, о̄с акв яныг ще̄мьят яныгман ня̄врамыт хольт о̄лнувыт». Пāвылныл мāн «Мāнь ӯскве» нупыл суссув, посыӈ лӯи э̄тыт пуссын на̄ӈки: тит норколыг ос палаткат ӯнлэ̄гыт, ё̄рнколыт лю̄ле̄гыт, а̄ращ посымлы, Любовь Павловна ня̄враманэ уральтым, холыт мāгыс вāрмалянэ вāрим, ё̄мыгты. . Мāн сыманув ща̄гтым путге̄гыт – матъёмас Я̄сунт пāвылн ялсув, ты хо̄тпа ёт хонтхатсув, тав э̄рнэ рӯпататэ та̄рапаттыслув. Потрум ты лāтӈытыл а̄стлылум: титыт хо̄тал, хунь мāн ювле минуӈкв щё̄питахтасув, акв мāнь āгирищкве тыи касалым, хотлю̄ньщалтахтас, мāн юв ул вос минэ̄в. Таимāгыс лāве̄гум: «Мāнь ӯсквен» сāв мир, сāв ня̄врам ман яныг хо̄тпат ялуӈкве вос вēрме̄гыт, тув ялум хо̄тпат сыманылн аквписыг тув вос хартавет».

1082 2014.08.22. Тамара МЕРОВА

Ка̄ркам ма̄ньщи хум. Мо̄лал Лангепас ӯсн ялмумт ме̄н аквъёт рӯпитан нэ̄ме̄нтыл «Фортуна» нампа колн ялуӈкве ла̄вхатсуме̄н. Тот, ла̄ве̄гыт, пӯмыщ хо̄тпат ёт ва̄йхатыме̄н ос акв ма̄ньщи хум ёт хо̄нтхатахтыме̄н. Хум наме Евгений Игоревич Захаров, тав «Фортуна» нампа центрыт кӯщаиг рӯпиты. Тот ня̄врамыт ос ма̄ньлат ма̄хум са̄всыр тэ̄ланыл ёт рӯпитэ̄гыт. Ме̄н Евгений Захаров ка̄саланэме̄н порат таве та̄ра ханьщисламе̄н. 2006 та̄лт тэ̄лы тав Антонина Ануфриева ёт Ханты-Мансийскан ёхталас ос «Дед Мороз и Снегурочка» Россия янытыл ва̄рыглан касылыт кассы̄г. Тэ̄н маснутанэ̄н соссаӈ ма̄хманув хансал хорамтасанэ̄н. То̄нт тэ̄н но̄хпатсы̄г ос хо̄н ма̄н Париж ӯсн ялнэ путё̄вкал мӯйлупта̄лвесы̄г. Ань Евгений Игоревич такви рӯпататэ ос о̄лупсатэ урыл таи ла̄выс: Рӯпитан кол урыл – Ма̄н ты колув 2006 та̄лт яныг таквс э̄тпост рӯпитаӈкве патыс. О̄влэ̄т ма̄н культура тэ̄лат щирыл туп рӯпитасӯв. 2009 та̄л па̄сыл ня̄врамыт ос ма̄ньлат ма̄хум ма̄гыс ва̄рнэ тэ̄лат о̄с тыг тотве̄сыт. Тувыл центрыг ла̄вуӈкве патвесӯв. Рӯпатав культура па̄лыл э̄лаль ӯргалаве кос, ос са̄в тэ̄лат образование нупыл о̄лэ̄гыт. Ань ма̄н ат са̄всыр программа щирыл рӯпитэ̄в: тыи ӯсувт са̄всыр мирыт культураныл суссылтан ва̄рмаль, ще̄мьят ёт рӯпитан ва̄рмаль, ня̄врамыт ӯщлахтан ос туи рӯпата нё̄тнэ тэ̄ла, коррупция ва̄рмалит та̄рапаттын накыт ос ма̄ньлат ма̄хум тэ̄ланыл ёт рӯпитан палата. Ты тэ̄ланув ва̄рнэ ма̄гыс ма̄н культура ос образование па̄лыл олныл та̄ставе̄в. То̄ванакт ма̄нки матыр проектыт щё̄питэ̄в ос грант щирыл олн сэ̄лэ̄в. Ще̄мьят ёт рӯпитан колнакыт психологыт, юристыт рӯпитэ̄гыт. Та̄н ще̄мьяӈ хо̄тпатын та̄рвит тэ̄ланыл порат нё̄тэ̄гыт. Мо̄т колнакыт ня̄врамыт хотталь ӯщлахтан миннэ̄ныл порат манос туи сыс рӯпата кинсуӈкве нё̄тавет. Пуссын маныр тэ̄лат ёт ма̄н рӯпитэ̄в, таит «Молодежное информационное агентство» нампа колнакт рӯпитан а̄гитнпыгытн ля̄ххалыг, потрыг хансаве̄т ос ищхӣпыӈ утын ва̄равет. Ты коныпал та̄н сыресыр хурит по̄слэ̄гыт ос нэ̄пакло̄псыт ва̄ре̄гыт. Матыр пӯмщалахтан утыт урыл интернет ло̄псувт на̄нки тах ловиньтаӈкве ве̄рмегы̄н. СА̄всыр мирыт суссылтан колнак – Ты колнакувт 2007 та̄л яныг таквс нила щислат, са̄в мирыӈ ма̄хум акванюрщхатан ялпыӈ хо̄талт рӯпитаӈкве о̄вылтахтасӯв. То̄нт нила мирколыт халт аквъёт рӯпитан, акваннё̄тхатнэ нэ̄пак хасве̄с, тыи ӯс миркол, ӯс Дума, «Лангепас нефтегаз» кол ос са̄всыр мирыт ёт рӯпитан организация. Лангепас ӯсувт са̄тхойплов са̄всыр ма̄хум акванатхатнэ я̄нас организация о̄ньще̄гыт. Та̄н ань пуссын тыт акванатхатахтыглэ̄гыт. Тыт ка̄сыӈ мир урыл суссылтап щё̄питым о̄лы. Ӯсыӈ ма̄хумн пе̄с о̄лупсаныл, маснутаныл суссылтавет. Тувыл акв хотты хо̄талт акв хотты мир тыт э̄рганэ, йӣкванэ суссылтаӈкве акванатхатэ̄гыт. Тыт янгема̄не ма̄хум пуссын аквъёт ӯщлахтэ̄гыт, ка̄с ва̄ре̄гыт. Таи ма̄гыс концерт ва̄рнэ кан о̄ньще̄в. Центрув мо̄т са̄всыр ёмас колнакыт о̄с о̄ньщи. То̄ванакт хотты ва̄рмалянув урыл потыртаӈкве э̄рмыглы ке, ма̄н яныг кӯщаит тыг во̄виньта̄лыянӯв. Са̄всыр политикыт, спортсменыт, артистат тыг мӯйлуӈкве щалтсэ̄гыт. Ты коныпал ма̄хум ёт ва̄йхатуӈкве пуп о̄йка ос имам о̄йка ёхталэ̄г. Ня̄врамыт ос ма̄ньлат ма̄хум ма̄гыс «толерантность» ханищтан нак ва̄рыглэ̄в. Ка̄сыӈ хо̄тпа такви ма̄хманэ коныпал мо̄т мирыт э̄руптым ос ва̄нэ̄г вос о̄ньщиянэ. Акв колнак ёмас ищхӣпыӈ утыл ва̄рим о̄лы. Тот ма̄хманув мо̄т ӯсыт о̄лнэ ма̄хум ёт телемост щирыл потыртаӈкве ве̄рме̄гыт. Мо̄лтынув ма̄н белоруссанув Москва ӯст о̄лнэ белоруссыт ёт потыртасыт. Лангепаст соссаӈ ма̄хманув тэ̄ланыл ёт Маргарита Филипповна Заяц рӯпиты. «Форсмажор» театр урыл – Ты театрувтыл школат ханищтахтын яныг ня̄врамыт ёт «Бесстрашная Татья» нампа спектакль щё̄питасӯв. Тав А. М. Конькова хансум мо̄йтанэ щирыл о̄лы. Таве суссылтамув юипа̄лт «Образцовый театр» намыл майвесӯв ос грантолн висӯв. Акв пал са̄вит олнэ нё̄тнэ маснутыт ма̄гыс холтсанӯв, мо̄т олнытыл йильпи проект щё̄питэ̄в. Сусте̄мт, ты ня̄врамытын соссаӈ ма̄хум пе̄с наканыл ва̄ӈкве сака пӯмщиг о̄лы. Та̄н са̄всыр мирыл о̄лэ̄гыт, мо̄тмо̄т школат, са̄всыр классыт ханищтахтэ̄гыт. Ос тыт акванюрщхатасыт. Таи лю̄ль, ты та̄л то̄ват ханищтахтуӈкве а̄стэ̄гыт, ос мо̄т ӯсн минэ̄гыт. Такви рӯтэ урыл – Ам рӯтанум щирыл хо̄нтаӈ ма̄ньщииг о̄лэ̄гум. Яныг пыгум школат ханищтахтаме порат «Рӯт ма̄хум» о̄лнэ накытыл кисхатас. Кисхатам тэ̄латэ XVII нотэ мус тотыстэ. Тувыл таи та̄рапатыс, ма̄н Сатыга канащо̄йка рӯтыг о̄лэ̄в. Яныг ане̄квам а̄ще о̄парищ наме Сатыгина, та̄нки о̄с Сатыга па̄вылт о̄лсыт. Антон пыгум ты урыл пе̄с э̄рнэ нэ̄пакыт ос хурит хо̄нтыс. Э̄квам рӯт ма̄хманэ о̄с кинсуӈкве о̄вылтахтас. Та̄н Питухина о̄парищ намыл о̄лэ̄гыт. Ты ма̄хум Петр I ляпат акваг о̄лмыт. Антон ань Санкт-Петербург ӯст «Экономика и управление связи и строительства» тэ̄латын ханищтахты. Григорий, ма̄ньнув пыгум, моще̄ртын школа а̄стлы. Амки рӯпатамт ам то̄ва депутатытн, предпренимательхо̄тпатын яныг пӯмащипа ла̄тыӈ ла̄вуӈкве таӈхе̄гум. Тэ̄ланув ёмасыг ва̄рнэ̄в ма̄гыс та̄н ма̄нав олныл нё̄тыяныл.

1082 2014.08.22. Тамара МЕРОВА

Акваннё̄тхатым э̄лаль рӯпитэ̄гыт. Округ губернаторув Наталья Комарова ос Тюменский областьт ва̄ӈын кӯщай пе̄нтсыл рӯпитан губернатор Владимир Якушев Нягань ӯст акванхо̄нтхатыгласы̄г. Тэ̄н ос мо̄т кӯщаит аквъёт ва̄рнэ тэ̄ланыл урыл потыртасыт, тувыл ӯсыӈ ма̄хум о̄лупсаныл о̄вылтыт пӯмщалахтасыт. Та юипа̄лт Югорск ӯсн ялсыт. О̄влэ̄т кӯщаит Нягань ӯст о̄лнэ пӯльницан тотыглаве̄сыт. Ты яныг э̄рнэ колыт округт о̄лнэ ма̄хум а̄гманыл сыресыр ищхӣпыӈ утыл пусмалтавет. Ле̄ккарыт 48 са̄всыр пусмалтан а̄гм щирыл рӯпитэ̄гыт. Ос ма̄хум янгыщ тот сым а̄гманыл пусмалтавет. Таима̄гыс матыр э̄рнэ ут ёвтым пуссын о̄лы. Тот акв матумпа̄ла э̄ква сым а̄гме та̄рапаттын ма̄гыс операциял ва̄рвес. Ле̄ккарыт ты ва̄рнэ рӯпатаныл сунсуӈкве тув кӯщаит та̄ртсаныл. Ань э̄ква матыр сым а̄гм о̄ньщи ке, таи пуссын са̄всыр ищхӣпыӈ утыт хосыт та̄рапатэ̄гыт. Ты коныпал яныг ма̄хум мо̄т рӯпитан колнакытн щалтсасыт ос тот са̄всыр а̄гмыт пусмалтан утыл та̄н суссылтаве̄сыт. Сергей Доганин, пӯльницат кӯщаиг о̄лнэ хум, ла̄выс: «Ма̄н матыр э̄рнэ пусмалтан утыт ёвтуӈкве «Сотрудничество» программа щирыл олныл нё̄твесӯв. Тувыл ма̄н палтув сака номтыӈ ле̄ккарыт рӯпитэ̄гыт, та̄нки тэ̄ланыл янытэ̄т ва̄ганыл ос ищхӣпыӈ утыл рӯпитаӈкве мӯсхалыг ханищтахтасыт. Пуссын ты кастыл ма̄хум а̄гманыл ёмащакв пусмалтавет». Наталья Комарова ос Владимир Якушев пӯльницат рӯпитан ма̄хумн ёмас сымыӈ ла̄тыӈ ла̄всы̄г. Ла̄тӈанэ̄н мӯй хо̄тпат ёхталам нэ̄пакт хассанэ̄н ос мӯйлупса мисы̄г. Ма̄н губернаторув ня̄врам пусмалтан колын матыр ёвтнэ ма̄гыс олн нё̄тмил нэ̄пак мӯйлуптас. Тыгыл кӯщаит Няганский ГРЭС ма̄н тотве̄сыт. Тот та̄н ты йильпи рӯпитан кол суссыт ос ма̄хум ёт потыртасыт. Та̄н «Фортум» нампа корпорцияг ла̄вавет. Александр Чуваев, ва̄ӈыг кӯщай хум ла̄выс: «Ты гидроэлектростанция мо̄лты та̄л яныгпо̄ль э̄тпост рӯпитаӈкве о̄вылтахтас. О̄влэ̄т 420, 9 мегаватт ва̄ге̄т рӯпитас, ётылнув китыт энергоблокыл ва̄рыслӯв ос тав 454 мегаватт о̄ньщис. Моще̄ртын хӯрмит энергоблок ва̄рилӯв ос тав тыгыл са̄внув ва̄г о̄ньщуӈкве паты тах. Пуссын янытэ̄т ГРЭС акв со̄тыра 254 мегаватт ва̄ге̄тыл рӯпитаӈкве паты тах». Наталья Комарова ла̄вме щирыл, ань ты о̄щнэ кол кастыл Лӯима̄т о̄лнэ ма̄хум на̄йпоста̄л ат хультэ̄гыт, ос нэ̄мхотты мо̄т та̄рвитын ат я̄рме̄гыт. Владимир Якушев э̄лаль потре тотыстэ, тувыл Няганский электростанция попутный газ ёт рӯпитанэ̄тэ кастыл Юграт, Ямалт ос Тюменский областьт о̄лнэ ма̄хум тынта̄лнув на̄йпос о̄ньщуӈкве патэ̄гыт. Ты о̄с сака ёмас ва̄рмалиг о̄лы. Тувыл яныг кӯщаит Нягань ӯст ос Октябрьский районыт о̄лнэ ма̄хум ёт ва̄щинтахтасыт, са̄в э̄рнэ тэ̄ланыл о̄вылтыт аквъёт потыртасыт. Та юипа̄лт кӯщаит Югорск ӯсн ми насыт, тот аквтох Советский, Югорск, Урай ӯсыӈ ма̄хум ос районт о̄лнэ ма̄хум ёт акванхо̄нтхатыгла̄лсыт. Губернаторыг ма̄хумн са̄всыр тэ̄лат урыл китыглавесы̄г, то̄ват матыр нё̄тмил ва̄рнэ тэ̄ла киссыт. Ань «Содружество» программа щирыл Югра, Ямал ос Тюменский область акваннё̄тхатым э̄лаль рӯпитаӈкве патэ̄гыт. Ты э̄тпос нилахойплов щислат Тюменский область 70 та̄лэ то̄влыс. Наталья Комарова ма̄хум ты ялпыӈ хо̄талыл янытласанэ, ос Владимир Якушевын ёмщакв рӯпитанэ̄тэ ма̄гыс пӯмащипа ла̄тыӈ ла̄выс.

1082 2014.08.22. Александр ВЬЮТКИН

Кӯщаит ёт ва̄рыглан ёнгил. Во̄ртур э̄тпост нёлолов хо̄талт Ха̄льӯс районт Я̄сунт па̄вылт о̄лнэ ня̄врамыт ӯщлахтын «Мань Ускве» ма̄н округ губернаторув Наталья Комарова вертолётыл ёлиссас. Тав ётэ тот ва̄щинтахтын кастыл депутатыг о̄лнэ тит ма̄ньщи нэ̄г Татьяна Степановна Гоголева ос Надежда Геннадьевна Алексеева ёхталасы̄г. Тувыл ня̄врамыт ёт са̄в та̄л рӯпитан «Мань Ускве» ма̄ тармыл кӯщаиг о̄лнэ нэ̄ Любовь Павловна Стаканова, яныгнув ня̄врамыт ёт тот о̄лыс. «Мань Ускве» ня̄врамыт губернаторув ёт ёхталан кӯщаит та̄ра пе̄с порат о̄щнэ лахрыл мастуве̄сыт ос пуӈкыт о̄щнэ сагыл нэ̄гсалаве̄сыт. Наталья Комарова ма̄ньщи супыл мастувес, пуӈкто̄рыл пинвес ос ма̄ньщи хорамыӈ а̄гииг пе̄риявес. Ва̄ӈын ма̄хманэ ос таве ӯргалаӈкве ла̄ввесыт. Та юипа̄лт во̄рт о̄лнэ сома лю̄льнэ пӯсасыӈ па̄влын ва̄нттуве̄сыт. «Мань Ускве» ма̄ньлат хум ма̄хум ос та̄н ётаныл пе̄рщуӈкв ёхтын щирыл ла̄вхатсыт. Тох ты ёнганыл та о̄вылтасаныл. Губернаторув ня̄врамыт ос Мария Сергеевна Мерова ёт ка̄тын нэ̄гумтан ква̄лыг ло̄мт сагуӈкв ханищтахтас. Нэ̄матыр хо̄са та̄н пӯсасаныл тӣврыт нас то̄х ат о̄лсыт, «Мань Ускве» ма̄ньлат хум ма̄хмыт ха̄йтыл ёхтыгпасыт, мӯй ма̄хум пуӈкын пиннэ саганыл хо̄т та няртумтасаныл. Ёнганыл а̄стынэ юипа̄лт яныг кӯщаиг о̄лнэ ма̄хум ма̄нь ня̄врамыт хольт, халанылт иӈ хо̄са номтанылт пе̄нтхатым потыртасыт. Губернаторувн «Мань Ускве» ня̄врамыт ӯщлахтын ма̄ сака мӯстыс. Тав ла̄выс: «Тамле пӯмащ ёнгил нэ̄мхотты порат ат ёнгыгласум. Ам ань ва̄ӈын хо̄тпанум нупыл сунсэ̄гум, амтиротум номсэ̄гум, та̄наныл ам то̄х а̄прамтахтым нэ̄мхотты порат ат ва̄санум. На̄н сака ёмас ва̄рмаль э̄лаль тотэгы̄н. Таима̄гсыл ам на̄нанн яныг пӯмащипа ла̄вегум». Тувыл Наталья Владимировна «Мань Ускве» ня̄врамыт ӯщлахтын колн те̄рха̄пыл яласан мотор ос ханты ма̄хум яласан ма̄ньха̄п мӯйлупм. Тав ос хоса та̄йтыӈ лё̄мвой то̄рыӈ ня̄врамытын ю̄нтым супохсал мӯйлуптаве̄с. Акв та порат, аквтамле супохсал «Мань Ускве» ня̄врамытын аквписыг нё̄тмил ва̄рнэ ма̄гсыл Татьяна Степановна о̄с мӯйлуптавес. Тох ты ма̄н округувт о̄лнэ яныг кӯщаюв «Мань Ускве» ма̄н ёхталас. Любовь СТАКАНОВА те̄тыглам потре ма̄ньщи ла̄тӈыл Александр ВЬЮТКИН хансыстэ.

1082 2014.08.22. Александр ВЬЮТКИН

О̄лнэ колыт ӯнттын урыл ля̄ххал. Мощ мо̄лалнуве Ханты-Мансийск ӯст ОТРК РИЦ – Югра нампа колт ля̄ххал тотнэ ма̄хум губернатор ва̄ӈын хум Дмитрий Викторович Шаповал ёт хо̄нтхатыглахтасыт. Тав округ янытыл са̄всыр колыт ӯнттын ва̄рмаль палт кӯщаиг о̄лы. О̄влэ̄т Дмитрий Викторович кол ӯнттын ма̄хум ялпыӈ хо̄таланылт янытласанэ. Тав ла̄выс: «Та̄н ва̄рнэ рӯпатаныл ма̄гсыл ам та̄наныл аквписыг ёмас ла̄тӈыл ӯлылыянум. Ты та̄л сыс округув янытыл акв миллион са̄вит метра о̄лнэ кол ӯнттувес. Ты ма̄гсыл ам та̄нанылн яныг пӯмащипа ла̄вегум». Щар о̄выл щёс кол ӯнттын ма̄хум ялпыӈ хо̄таланыл 1956 та̄лт янытлавес. Тувыл э̄лаль ка̄сыӈ та̄л во̄ртур э̄тпост титыт ӯщлахтан хо̄талыт та̄н ӯлылавет. Дмитрий Викторович ма̄хманэ янытлан ма̄ныл а̄стуме юипа̄лт ля̄ххал тотнэ хо̄тпатн титыглавес: – Со̄ль, ань округувт са̄в яныг, карс ос хорамыӈ колыт ӯнттавет! Ты ӯнттын колыт, аман со̄ль, тамле та̄ксарыг о̄лэ̄гыт, хумус ты урыл кол ӯнттын ма̄хум ла̄ве̄гыт? – Ма̄н та̄н рӯпатаныл ва̄тихал уральтыянӯв. Кол ӯнттуӈкве о̄вылтахтынэ̄ныл э̄лыпа̄лт ма̄навн те̄тум договор нэ̄паканыл щирыл та̄н палтыланыл минэ̄в. Нэ̄паканылт хансум ос по̄слым щирыл уральтыянӯв, ат а̄лыманэ̄ныл порат хо̄талыл ма̄йлыянӯв. Рӯпатаныл э̄лаль ат нё̄вумтан порат олныӈ штрафыл пиныянӯв. Хӯрмиттыг ёхтынэ̄в, рӯпатаныл акв ма̄т лю̄ли те, кол ӯнттын щирыл о̄щнэ нэ̄паканыл хот та выганӯв. Нэ̄паканыл магсыл та̄н сака пилэ̄гыт, таи ма̄гсыл та̄н ёмащакв ос э̄рнэ щирыл мо̄лях ва̄регыт. Кӯщай хум о̄с акв ва̄рмаль урыл титыглавес: – Округув янытыл са̄в йильпи ма̄ньлат щё̄мья о̄лы. Та̄н ма̄гсыланыл матыр ӯнттаве манос а̄ти? – Са̄выӈпа̄лэ ма̄н та̄н ма̄гсыланыл колыт ты ӯнттэ̄в. Та о̄лнэ колыт «Экономкласс» колыг ла̄вавет. Щар яныг тамле кол 59 квадратный метран туп ёхты. Яныгнуве̄г таве ва̄руӈкв ат ро̄ви. Тамле колыт ма̄ньлат ма̄хум ма̄гсыл ты номылматве̄сыт. Ань йӣльпи колыт ёвтнэ ма̄гсыл са̄всыр нё̄тмил ва̄рнэ саккон са̄в пирмайтым о̄лы. Округ ма̄тэ янгыг о̄лнэ щирыл ты пирмайтан тэ̄ланув пуссын э̄рнэ щирыл ат рӯпитэ̄гыт. Та̄наныл уральтаӈкв та̄рвитыӈ. О̄лнэ кол ёвтнэ щирыл ань Нижневартовский районт щар лыпащ, кол тынэ тот сака яныг а̄ти. – Ты та̄л сыс ня̄врамыт ханищтахтан ос са̄всыр мо̄т кол ма̄нах ӯнттувес ос ӯнттаве? – Округув янытыл ня̄врамыт ханищтан ма̄гсыл са̄тхойплов кол ӯнттаве. Тувыл титхойплов кол ма̄нь ня̄врам ӯрнэ колыг ва̄равет. Тувыл ос Нижневартовск ӯст ма̄хум пусмалтан кол э̄лаль ва̄руӈкв о̄вылтавес. Тав са̄в та̄л ӯнттуӈкве ат ве̄рмувес, ань тав юио̄выл атыт наке а̄стлаве. Та коныпалт ос Сургут ӯст ма̄хум пусмалтан яныг кол ӯнттаве. Тувыл Нефтеюганск ӯст каснэ ма̄гыс округув янытыл ма̄к яныг кол ӯнттаве. Моще̄ртын ты а̄сты, ань тӣвыр рӯпатанэ ва̄равет. Тав рӯпитан щирыл сӯкыр э̄тпост тах та пӯнсаве.

1082 2014.08.22. Тамара МЕРОВА

Юртанэ̄н ка̄стувес. Ты э̄тпос нёлоловит хо̄талэ̄т Митрофан Алексеевич Тебетев 90 та̄лэ то̄влынув. Тыи ханты о̄йка, тав ка̄тыл са̄всыр хурит по̄слыс. Ювлехультум хӯрум та̄л порат а̄тимыг е̄мтыс. Ханты-Мансийскат Природы ос Человека нампа музейт рӯпитан ма̄хум нам хо̄талэ кастыл суссылтап щё̄питасыт. Тот тав то̄ва по̄слум хуриянэ суссылтаве̄сыт. Са̄выӈпа̄лэ хурит Шеркальский ос Ха̄льӯс музеит акванатым о̄лэ̄гыт. Митрофан Алексеевич Октябрьский район Лохтоткурт па̄вылт самын патыс. Ань ты ма̄нь па̄влэ по̄хат Шеркалы па̄выл о̄лы, тэ̄н тот Тамара Васильевна Диодорова ёт музей ва̄руӈкве номылматсы̄г. Мо̄т ма̄хумн тэ̄н о̄с нё̄твесы̄г. Ётыл Тебетев ще̄мьятэ ёт Ха̄льӯсн ва̄нтлыс, тот рӯпитас. Ань таима̄гыс Шеркалы ос Ха̄льӯс музеигт о̄йка са̄в по̄слум хуриянэ акванатве̄сыт, э̄лаль ӯргалым тот о̄ньщавет о̄с ма̄хумн суссылтавет. Ханты-Мансийскат тэ̄н э̄кватэ̄нтыл ювле хультум хус арыгкем та̄л о̄лсы̄г. О̄йка тыт э̄лаль о̄с рӯпитас. Ма̄ньлатыг о̄лме порат тав Ханты-Мансийск ӯст ханищтахтас ос то̄нт ӯсхулыт, колыт по̄слыглам. Та па̄сыл са̄в та̄лыт ювлехультсыт, ӯст мо̄т йильпи яныг колыт ӯнттуве̄сыт, мо̄т ӯсхулыл ва̄рве̄с. Ань ӯс пе̄с о̄лупсатэ Тебетев хуриянэ щирыл туп ка̄салаӈкве ве̄рмавет. Та̄н Природы ос Человека нампа музейт суссылтавет. Тот кӯщаиг рӯпитан нэ̄ Светлана Лазарева суссылтапын атхатам ма̄хум ёт пащалахтас ос Тебетев о̄йка ва̄нэ мӯй хо̄тпатын матыр потыртаӈкве ла̄выс. О̄влэ̄т Людмила Алфёрова, губернатор ва̄ӈын хо̄тпа палт советникыг о̄лнэ нэ̄, потыртас: «Ма̄н ты хо̄тал а̄лпыл Митрофан Алексеевич ёлщё̄питам ма̄тэ̄н ялсӯв. О̄йка памятникыл ва̄рвес, ос таве тув тотыслӯв. Ты э̄лумхо̄лас ам ёмащакв номилум. Ань о̄выл щёс е̄мтыс, по̄слум хуриянэ ма̄н тав та̄лэ̄т суссылтыянӯв. Митрофан Алексеевич ка̄сыӈ хуритэ урыл ма̄хумн такви потырта̄лыс. О̄лмет тав сака са̄в юрт ат о̄ньщис. О̄йка акваг ма̄к киснэ ла̄тыӈ ос пилта̄л хо̄тпаг о̄лыс. Кӯщаит матыр лю̄ль тэ̄ла ва̄ре̄гыт ке, ты о̄вылтыт та̄нанылн ля̄льт ла̄выглас. Ам тав ётэ Ханты-Мансийскат «Югра лылые̄п» ассоциацият рӯпитамум па̄сныл рӯмалахтасум. Тав такви ла̄внэ̄тэ щирыл: «Ам ат рӯпитан тулё̄влыт о̄ньще̄гум, та̄наныл хурит по̄слэ̄гум. Ос са̄всыр тэ̄ланум мо̄т хӯрум тулё̄вланумн ва̄руӈкве нё̄таве̄м, тыи Людмила Алфёрова, Леонид Струсь ос Юрий Кондин». Ты хо̄тал пуссын тыг атхатам ма̄хумн пӯмащипа ла̄тыӈ ла̄ве̄гум. Мирн ёмас тэ̄лат ва̄рнэ хо̄тпат пуссын номуӈкве э̄ре̄гыт, та̄наныл ёрувлаӈкве ат э̄ри». Леонид Филиппович Струсь ла̄выс: "Митрофан Тебетев ёт ме̄н 1994 па̄сныл ва̄йхатуӈкве патсуме̄н. Тав, со̄ль, то̄внакт нас хо̄тпат коныпал яныг кӯщаит о̄с ля̄выльттасанэ. О̄лме порат тав такви колэ̄т музейкол щё̄питаӈкве таӈхыс. Ты тэ̄латэ э̄лаль тотнэ щирыл ма̄н таве̄н о̄с нё̄тсӯв. Ты ва̄рмалюв са̄всыр та̄рвитын ёл пувыглавес, тохиӈ э̄лаль нэ̄матыр ва̄руӈкве ат та та̄ртвесӯв. Ам Митрофан Алексеевич о̄вылтыт видео суссылтан утыт о̄ньще̄гум, тав о̄лупсатэ кинан по̄слыслум. Ты суссылтапыт а̄нумн мӯйлуптан хурииг о̄лэ̄гыт. Акв хурит фруктыт по̄слысанэ. Акв щёс ам тав палтэ мӯйлуӈкве щалтсасум ос ты атыӈ утыт тотсум. Тав хотмовалас ос ла̄ви: «Сар ла̄щ, ам та̄наныл о̄влэ̄т по̄слыянум, тувыл ущ тэ̄ганум». А̄нумн мӯйлуптам мо̄т хуритэ̄т соссаӈ ма̄хум са̄с а̄ныса̄н ос пилыт по̄слысанэ. Ты лӯима ма̄ о̄с са̄всыр атыӈ тэ̄нутыт о̄ньщи ос соссаӈ ма̄хумытн ёмащакв ӯргалаве». Тувыл Леонид Филиппович музейн акванатхатам мӯй ма̄хум ма̄гыс «Колесо судьбы» э̄рыгсов ла̄тӈанэ ловиньтас, Тебетев о̄йкан ты э̄рыгсов сака мӯстыс. Музейт мӯйлын ма̄хум ма̄гыс Фаина Павловна Иштимирова пе̄с йӣкв йӣквыс, Юлия Яркина са̄ӈквылтапыл са̄ӈквылтас. Тэ̄н «Ялпус ма̄хум» нампа э̄ргынйӣквнэ тэ̄ла ва̄рсы̄г. Суссылтап сӯкыр э̄тпос ва̄т щисла мус рӯпитаӈкве паты тах.

1082 2014.08.22. Светлана РОМБАНДЕЕВА

Ма̄вит мо̄т намыл пинвес. Ты туи о̄йттур э̄тпос 25 хо̄талэ̄т «Природный парк «Кондинские озера» йильпииг намаявес – «Природный парк «Кондинские озера» имени Л. Ф. Сташкевича». Ты ма̄вит ӯргалан ва̄рмаль Леонид Федорович Сташкевич тав о̄вылтаме, тот тав са̄в та̄л рӯпитас. Ты ма̄вит ӯргалан парк тав наме̄тыл намтуӈкве са̄в хо̄тпа тахсыт, та̄н пуссын са̄в ма̄т рӯпитэ̄гыт: Советский район мирколт рӯпитэ̄гыт, экологыт, Советское лесничество, «Малая Сосьва» ос «Юганский» нампа заповедникыгт, «Нумто», «Сибирские Увалы» ос «Самаровский чугас» паркытт рӯпитан ма̄хум ос са̄в мо̄т хо̄тпат. Тувыл округ мирколт рӯпитан ма̄хум та̄н ётаныл ка̄сащасыт, ты ма̄вит ӯргалан парк о̄йка наме̄тыл та пинвес. Леонид Федорович о̄йттур э̄тпос 19 хо̄талэ̄т 1935 та̄лт Ростов на Дону ӯст самын патыс. Тав ще̄мьятэ̄т пуссын учителиг рӯпитасыт. 1965 та̄лт Омск ӯст физкультура ос спорт институт а̄стлас. Ма̄н ма̄вн о̄йка 1970 та̄лт ёхтыс, Советский ӯст о̄лмыгтас. Тот са̄в ма̄т рӯпитас – физкультура учителиг о̄лыс, Советский райисполкомыт инженерыг, кол ӯнттын ма̄т бригадирыг ос мо̄т ма̄т рӯпитас. 1976 та̄лт тав «Малая Сосьва» нампа ма̄вит ӯргалан ма̄н кӯщаиг паттувес. 1981-1994 та̄лытт Леонид Федорович «Остров Врангеля» ос «Курильский» заповедникыгт пуӈк тотнэ хо̄тпаг паттувес. Тот рӯпитаме сыс тав акваг ма̄вит по̄слыс, хурит ва̄рыс, матыр ка̄салы, пуссын кинан по̄слыянэ. Ма̄вит ӯргалан урыл атпан арыг потыр хансыглас, хӯрум нэ̄пак та̄раталыс, намаясанэ – «Заповедник Малая Сосьва», «Арктическая заповедь. Записки директора заповедника», «Мои перевалы». Округув янытыл выставкат о̄лыгланэ̄ныл порат та̄в тот такви ва̄рум хуриянэ мирн ва̄тихал суссылта̄лсанэ: «40 лет геологического поиска», «35 лет Шаимской нефти». 1995 та̄лт о̄йка «Кондинские озера» нампа ма̄вит ӯргалан парк ва̄руӈкве номылматас, тот такви кӯщаиг патыс. Ань та ма̄вит нэ̄мхотьютн ул вос новаве, ул вос хилаве, тув нас мори яласан ма̄хум ул вос ялантэ̄гыт, ма̄ ул вос па̄ӈктыяныл. Ты ма̄гсыл тот са̄в хо̄тпа рӯпитаӈкве патыс – наука щирыл ос ма̄ янытэ̄т ӯргалан щирыл, са̄всыр хо̄нтхатыглапыт ва̄руӈкве патве̄сыт. Ань ма̄хум акван вос хо̄нтыглахта̄лэ̄гыт, ма̄вит ӯргалан урыл вос потраме̄гыт. Та ма̄т ма̄во̄й но̄х ул вос хилаве, о̄лнэ ма̄в курщипыг ул вос ва̄раве. Мо̄лты таквсы Леонид Федорович а̄тимыг е̄мтыс. О̄йка о̄лме палытыл ма̄вит ӯргалым о̄лыс, са̄в ёмас тэ̄ла ва̄рыс. Таима̄гыс тав акваг янытлавес, ма̄глын тагатан по̄сытыл майлувес. 2006 та̄лт «Заслуженный эколог Российской Федерации» намыл ма̄йвес.

1082 2014.08.22. Светлана РОМБАНДЕЕВА

Округт о̄лнэ я̄тил ма̄хум! Ма̄н, округ Думат рӯпитан ма̄хум, на̄нан ма̄ янытыл о̄лнэ соссаӈ мирыт Мирхал хо̄таланылт янытлыянӯв! Ты ялпыӈ хо̄тал Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) щирыл хус арыгтем та̄л ты ва̄рыгла̄лаве. Ма̄ янытыл о̄лнэ соссаӈ мирыт – ты ань ма̄в янытыл та̄нти пе̄с йис о̄лупсанылт о̄лнэ пӯмыщ ма̄хум. Округувт кит тамле мирыг о̄лэ̄г ма̄ньщи ос ханты ма̄хманув. Пе̄с йис та̄гыл та̄н та̄нти о̄лупсанылт о̄лэ̄гыт, мӯтраӈ ма̄хманыл хольт ма̄витаныл ӯргалым, культураныл, ща̄нь ла̄тӈаныл янытлым о̄лэ̄гыт. Округувт ань ма̄во̄й но̄х виве ос ма̄витт о̄лнэ тыныӈ матарт кинсавет, ка̄тнпаттавет. Соссаӈ мирн тамле ма̄т о̄луӈкве атхунь та̄рвитыӈ. То̄ванакт та̄н тораставет, та̄нти о̄лупсанылт мӯсхал щирыл о̄луӈкве ат ве̄рмегыт. Та̄н ма̄гсыланыл ма̄навн са̄в ёмас тэ̄ла ва̄руӈкве э̄ри, та̄н ань мӯсхал щирыл о̄луӈкве вос ве̄рмегыт, та̄нти культураныл но̄х вос во̄рмалтыяныл, ща̄нь ла̄тӈанылт вос потыртэ̄гыт. Ам номсыте̄мт, ань соссаӈ ма̄хманув ма̄гыс хансыглам сакконанув манос э̄рнэ нэ̄паканув та̄нанылн нё̄тэ̄гыт. Округт о̄лнэ я̄тил ма̄хум, соссаӈ мир, на̄нан ам ялпыӈ хо̄талыл янытлыянум! Пуссын пуста̄гыл олэ̄н, со̄тыӈыщ, щуниӈыщ о̄лэ̄н! Округ Дума кӯщай хум Б. С. Хохряков потре ма̄ньщи ла̄тӈыг С. Ромбандееван толмащлавес.

1082 2014.08.22. Светлана РОМБАНДЕЕВА

Ня̄врамыт пувлым ат а̄стысыт. Ты хуритыт Ха̄льӯс район Ло̄пмус па̄вылт о̄лнэ ма̄ньщи ма̄хум по̄слым о̄лэ̄гыт. О̄йттур э̄тпос о̄выл хо̄таланэ мощ хо̄талыӈыг о̄лсыт, та порат Ло̄пмус па̄выл ня̄врамыт пувлуӈкве а̄лымасыт. Ам ань кит а̄гирищ ос кит пыгрищ урыл аквкит ла̄тыӈ ла̄вуӈкве таӈхе̄гум – ты Диана Ромбандеева, Наташа Хозумова, Даниил Узаков ос Павлик Ромбандеев. Ло̄пмуст кит са̄ттем о̄лнэ̄м сыс ты нила ня̄врам ка̄сыӈ хо̄тал, хо̄талпалыт та пувлысыт. Хо̄талъя̄тыг иӈыт е̄мты, то̄ва ня̄врамыт иӈ хуе̄гыт, ты нила а̄гирищитпыгрищит я̄нанылт та сумыллэ̄гыт. На̄лваль ё̄ме̄гум, Ло̄пыӈ я̄н нэ̄гылттахтэ̄гум, яа, та̄н мовиньтым, ро̄хтахтым ты пувлэ̄гыт. То̄ванакт мощ во̄тыӈыг е̄мтапалы ман раквалтахтыглы, та̄н тох иӈ та пувлэ̄гыт. Э̄типа̄лаг ос лё̄мвоиӈыг ман ма̄ньӯиӈыг е̄мты, пуравет ман а̄ти, та̄нти та ва̄ганыл, тот та ёнге̄гыт, витн мӯрмыглэ̄гыт. Тувыл тыхал касэ̄гыт, ань хотьютаныл я̄ тапа̄лн моляхнуве̄г уйи. Юв такос во̄виянув, ма̄навн хунь хӯнтлэ̄гыт. Ань моще̄ртн таквсыиг ты е̄мты, школан минэ̄гыт, Ло̄пыӈ я̄нанылт пувлуманыл урыл матыр потыр тах улпыл хансэ̄гыт. Со̄ль, та̄нанылн нэ̄мхотты ща̄рщ ат э̄ри, та̄н сома ща̄рщ ва̄тат ӯщлахтасыт. Ты я̄тил ня̄врамаквет пуста̄гыл вос о̄лэ̄гыт, со̄тыӈыщ вос яныгме̄гыт!

1082 2014.08.22. Александр ВЬЮТКИН

Хусыт та̄лэ та то̄влыс. Ха̄льӯс районт Я̄сунт па̄вылт о̄лнэ ня̄врамыт ӯщлахтын «Мань Ускве» ма̄ ка̄сыӈ тув рӯпиты. Ты та̄л тав хусыт та̄лэ то̄влыс. Щар о̄влэ̄т тав рӯпитаӈкве о̄вылтахтаме порат тот нэ̄матыр а̄тим о̄лыс. То̄нт ты ма̄ньщи мирув пуссын аквщир номт о̄ньщим, акваннё̄тхатым ань о̄лнэ «Мань Ускве» ва̄рсаныл. Щар яныг нё̄тмил Татьяна Степановна Гоголева ва̄рыс. Ты ма̄гсыл ма̄н та̄нанылн яныг пӯмащипа ла̄тыӈ ла̄ве̄в. Ань ты порат о̄лнэ ёныг урыл а̄нумн тув ялум ма̄ньлат хум Сергей Ремизов потыртас. На̄н ань тав потре э̄лаль ловиньтэлы̄н. – Ты та̄л ва̄рыглам пӯмащаныл ойттур э̄тпост ва̄т нупыл атыт хо̄талэ̄т о̄вылтасаныл, ат хо̄тал сыс о̄лыс. Округ янытыл са̄в ня̄врам тув ёхталас. Ханты-Мансийск ӯсныл, Ягримныл, Ха̄льӯсныл, Кульпасныл ос Хулюмсунтныл ма̄хум ёхталасыт. Аквъёт пуссын нёлса̄т ляпатем хо̄тпа о̄лыс. Тув ялантан ня̄врамыт са̄выӈпа̄лэ халанылт ва̄йхатэ̄гыт, юртыӈыщ о̄лэ̄гыт. Смена о̄вылтахтын хо̄тал, хунь ня̄врамыт Я̄сунт па̄вылн тотве̄сыт э̄типа̄лаг выгыр нампа ё̄рнкол котильт а̄ращ па̄лтыглан порат халанылт пуссын э̄рнэ щирыл ва̄йхатасыт. Ка̄сыӈ ня̄врам такви уре̄т, ва̄рыглам тэ̄ланэ урыл мощ потыртас. Мо̄тыт хо̄талыт, а̄лпыл ня̄врамыт ма̄гсыл Москва ӯсныл ёхталам нэ̄ Елена Геннадьевна Федорова тыт о̄лнэ пе̄с пора о̄лупсав урыл потыртас. Елена Федорова яныг ӯсыӈ ма̄т студентыг о̄лнэ ма̄ньлат ма̄хум ханищтан нэ̄г рӯпиты. Ма̄н пе̄с йис ма̄хманув о̄лупсаныл урыл тав са̄в ханищтас. Хо̄талья̄т юипа̄лт а̄гит, пыгыт щё̄питахтын щирыл ла̄ккваминасыт. А̄гирищит та̄нти ма̄гсыланыл пуӈкын пиннэ то̄р ос тучаӈ ю̄нтсыт. А̄с-угорский ма̄ньлат ма̄хум ёт рӯпитан хум Руслан Богордаев пыгрищит «Нюл тахли» нампа пе̄рщил ханищтасанэ. Хум ня̄врамытын ты пе̄рщил сака мӯстыс, халанылт та̄н иӈ хо̄са пе̄рщисыт. Титит хо̄талт пыгрищит халанылт титтыг уртхатасыт. Та э̄лыпа̄лнувет ос ма̄к щар яныг кӯщаиг ос судьяг щирыл Владимир Меров ос Константин Георгиевич Адин о̄луӈкв ла̄ввесы̄г. Та юипа̄лт ущ уртхатаӈкв о̄вылтахтасыт. Титтыг мингалан порат акв са̄вит ё̄р о̄щнэ щирыл уртхатасыт. Та юипа̄лт халанылт янгыг о̄лнэ ка̄нащиг пе̄риясыт. Ка̄нащиг Валера Сайнахов ос Вадим Чекмазов о̄луӈкв ла̄ввесы̄г. Тувыл та̄нти халанылт хумус ла̄вхатнэ нам пе̄риясыт. Владимир Меров ос Вадим Чекмазов ма̄хманэ «Нила во̄т хо̄н ма̄хум» намыл намтхатсыт. Константин Георгиевич ос Валера Сайнахов «Лӯи я̄ ма̄хум» ла̄вхатасыт. А̄гирищит ос пуӈкын пиннэ то̄р ос тучаӈ ю̄нтнэ̄ныл юипа̄лт Мария Сергеевна Мерова ма̄щтыр ю̄нтмилыл ю̄нтым а̄гит пе̄рияс. Щар хорамыӈ ю̄нтмиланыл Люба Артеева, Влада Штакм ос Даша Татаринова о̄лсыт. Та̄н халанылт Люба Артеева нё̄тнэ ма̄ньщи а̄гииг пе̄риявес. Хӯрмит хо̄тал а̄лпыл хумус э̄ри масхатасыт, ёт винэ пормасаныл щё̄питасаныл ла̄кква та минасыт. Константин Георгиевич такви «Лӯи я̄» ма̄хманэ ёт во̄рт о̄лнэ пӯсас тӣврын минасыт. Владимир Меров «Нила во̄т хо̄н» ма̄хманэ ёт ос во̄рын минасыт. Ёнгын порат пӯсас тӣвыр ма̄хум ма̄ньщи нё̄тнэ а̄гияныл ӯргалым о̄лэ̄гыт. Таве пӯсас тӣврыт о̄лнэ ма̄ кол тӣврыт о̄ньщияныл. Во̄рт о̄лнэ ма̄хум ва̄тихал во̄р па̄влын хо̄нтлуӈкв ёхталэ̄гыт. Хум ня̄врамыт пуӈканылн са̄гыл нэ̄гсаласаныл. Хотьют са̄ге пуӈке̄ныл хотхасумтаве, та хо̄тпа ёнгын ма̄ныл по̄хан ква̄лы. «Мань Ускве» ёрнколыт о̄лнэ ма̄н та̄ра тув та мины. О̄выл ёнгасан хо̄талт Константин Георгиевич ёт о̄лнэ ня̄враманэ во̄р па̄влыӈ ёнгасан ма̄т но̄хпатсыт. Та юипа̄лт ос ё̄рнкол по̄хат о̄лнэ сыстам ма̄т пе̄рщиманыл порат та̄н ёлпаттуве̄сыт. Мо̄тыт хо̄талт ос Владимир Меров ня̄враманэ ёт о̄с акв та щирыл е̄мтыс. Ӯсыӈ ма̄т тох та каймыт, акв ляльт ёхтынэ сыстам ма̄т та̄н пуӈк саганын пуссын хотхасумтымат. Ты та̄л нэ̄мхотьютаныл но̄х ат патыс. Халанылт та̄н титгылтитгыл но̄хпатыгласыт. Юио̄выл хо̄таланылт Хулюмсунт ма̄хманув ма̄гсыл вертолёт ёхталаме юипа̄лт «Мань Ускве» ня̄врамыт о̄лнэ ма̄наныл хо̄т щё̄питасаныл. Ё̄рнкол парщинаныл то̄слысаныл, о̄лнэ ма̄наныл округ губернатор Наталья Комарова ёхталан кастыл щё̄питасаныл.

1082 2014.08.22. Александр ВЬЮТКИН

Во̄рыӈ ма̄т ӯщлахтасыт. Ты хурит Ха̄льӯс район Я̄сунт па̄вылт «Мань Ускве» ӯщлахтын ма̄т ня̄врамыт по̄слым о̄лэ̄гыт. Та̄н пуссын ва̄тихал тув ӯщлахтаӈкв ялантэ̄гыт, халанылт ёмащакв ва̄йхатэ̄гыт, акваннё̄тхатым юртыӈыщ о̄лэ̄гыт. Моще̄ртн ӯщлахтан хо̄таланыл ты оигпе̄гыт. Хо̄ты ма̄ныл, хо̄ты витныл о̄лнэ я̄тил ня̄врамаквет ёмащакв вос ханищтахтэ̄гыт, пуста̄гыл во̄с о̄лэ̄гыт, На̄й-О̄тыранылн вос ӯргалавет!

1082 2014.08.22. Тамара МЕРОВА

Са̄в нот о̄лнэ соссаӈ мирыт. Во̄ртур э̄тпос онтоловит хо̄талэ Ма̄ янытыл о̄лнэ соссаӈ мирыт янытлан хо̄таланыл. Тамле ва̄рмаль ООН Генеральный Ассамблеят рӯпитан хо̄тпатын 1994 та̄лт ва̄рвес. Ты пора таима̄гыс пе̄риявес, ты э̄лыпа̄лт 1992 та̄лт во̄ртур э̄тпос онтоловит щислат соссаӈ мирыт тэ̄ланыл ӯргалан группа о̄выл щёс рӯпитаӈкве патыс. Ма̄ янытыл 370 миллион са̄вит э̄лумхо̄лас соссаӈ мирыг ловиньтавет. Та̄н ма̄ янытыл 70 са̄всыр хо̄н ма̄т о̄лэ̄гыт. Ты мирыт пуссын та̄нки ма̄кеныл ӯргалым о̄ньщияныл ос пе̄с йис наканыл э̄лаль тотыяныл. Россияв янытыл 47 са̄всыр нацият соссаӈ мирыг ловиньтахтэ̄гыт. Та̄н пуссын акванловиньтавет ке, тыи 280 со̄тыра э̄лумхо̄лас. Тувыл то̄ва ма̄хум та̄нки щиранылт намаим республикатт, областитт манос округытт http: //www. abbeylandsnursinghome. com//best-payday-loan-company о̄лэ̄гыт. Ханты-Мансийский автономный округт соссаӈ мирыт ялпыӈ хо̄таланыл 2005 та̄л па̄сыл янытлаӈкве патвес. Тыт мощщаг хультум хӯрум соссаӈ мир о̄лы – тыи хантыт, ма̄ньщит ос ё̄рныт. 2010 та̄лт Россия ма̄хум пуссын нэ̄пакын хансым порат тамле ва̄рмаль та̄рапатыс: округувт 19 со̄тыра 68 са̄вит э̄лумхо̄лас хантыиг хасве̄сыт, ма̄ньщииг – 10 со̄тыра 977 хо̄тпа ос 1 со̄тыра 438 ё̄рныт. Ё̄рныт са̄выӈпа̄лэ Ямал ма̄т о̄лэ̄гыт. Ань соссаӈ ма̄хум янытлан хо̄таланыл кастыл округув янытыл ӯсыӈ манос па̄влыӈ ма̄т сыресыр пӯмыщ ва̄рмалит щё̄пита̄лавет. Ханты-Мансийск ӯст ка̄сыӈ та̄л соссаӈ ма̄хум «То̄рум Маа» нампа музеин мӯйлуӈкве во̄виньта̄лавет. Ялпыӈ хо̄тал ва̄руӈкве культура департамент ос «Югра лылые̄п» ассоциация па̄лыл матыр щё̄питаӈкве нё̄тэг. Ты та̄л ялпыӈ хо̄тал нёлоловит хо̄талт ва̄рвес, тыи Митрофан Алексеевич Тебетев тав самын патум хо̄талэ. О̄йка о̄лнув ке, 90 та̄лэ то̄влынув. Тыт тав по̄слум хуриянэ о̄с суссылтаве̄сыт, тав уре̄тыл потыртасыт. Тувыл Ульяна Николаевна Шульгина ханты ма̄хум пе̄с накыт ӯргалан ос э̄лаль тотнэ̄тэ ма̄гыс, са̄в рӯпата ва̄рме ма̄гыс мӯйлупсал майвес. Кышик па̄вылныл Лидия Алексеевна Алясова «Мощ хот» (ма̄ньщи ла̄тыӈ щирыл «Мо̄йт кол») нампа э̄ргынйӣквын колэ ёт тот мӯйлыс. Ма̄ньщи пе̄с э̄рыгсов та̄н са̄ӈквылтан порат, э̄ква со̄с косамта̄лыс ос мӯй ма̄хум э̄лыпа̄лт такталастэ. Тав ётэ ёхталам кит пыгыг «Во̄раян хум йӣкв» йӣквсы̄г. Ма̄ньлат нэ̄т Галина Яптина, Марина Кашпирева ос Юлия Яркина нё̄тнэ та̄ныт са̄ӈквылтасыт ос ётыл ма̄щтырыг йӣквсыт. Мария Кузьминична Волдина апганэ ёт о̄с э̄ргыс, йӣквыс, тувыл пуссын мӯй ма̄хум То̄рум нупыл по̄йкщан ла̄тыӈ ла̄вуӈкве ла̄выс. Соссаӈ мирыт халт э̄лы ма̄ныл са̄в рущ манос мо̄т хо̄тпат ёхталасыт. Таи ма̄гыс пуссын рущ ла̄тӈыл «Света и добра! » са̄т щёс ро̄ӈхувласыт ос тувыл акв ма̄т лю̄лим хӯрум щёс мувлахи ё̄хсыт. Ханты-Мансийск атпан нупыл кит хо̄тпат нилахойплов са̄всыр ӯсыӈ ма̄ныл ёхталасыт. Та̄нкина̄ныл та̄н «этноэкспедицияг» ла̄вияныл. Та̄н халанылт ва̄т нупыл хо̄т ханищтахтын ня̄врам о̄лы. Ты а̄гирищитпыгрищит ханты ос ма̄ньщи ма̄хум о̄лупсаныл пӯмщалыяныл. Ялпыӈ хо̄тал ва̄рнэ ма̄гыс «То̄рум Маа» музейт рӯпитан хо̄тпатн я̄нас пӯмащипа ла̄вуӈкве э̄ри. Та̄н акваг ня̄врамыт ма̄гыс сыресыр касылыт ва̄рыглэ̄гыт. Тувыл мӯй ма̄хум ма̄гыс атыӈ тэ̄нут па̄йтэ̄гыт. Мо̄т ма̄ныл ёхтум хо̄тпатын ня̄няныл сака мӯстыс. Тав хӯл коласыл ва̄рим о̄лыс, ня̄врамыт такем тэ̄пъяласыт. Ты коныпал сыресыр касылыт кассыт, по̄слысыт, ёнгысыт. Ты о̄вылтыт ам тах я̄нас потыр хансэ̄гум. Хо̄тал палыт ёмас, посыӈ хо̄талыг о̄лыс, мӯй ма̄хум пӯмщиг ӯщлахтасыт.

1082 2014.08.22. Редакцият рӯпитан ма̄хум

Сунсэ̄н ос пусмалтахтэ̄н. Ань ищхӣпыӈ ут хосыт сыресыр пӯмыщ ля̄ххалыт, кинат манос мультикыт хо̄нтуӈкве ро̄ви. Мо̄лал тот сунсыглахтым ма̄н «Зарядка ва̄рнэ тэ̄ла» ос «Закаливание» нампа мультикыг хо̄нтсӯв. Тэ̄н тамле пӯмащ о̄ньще̄г, ань са̄всыр мирыт ла̄тӈаныл щирыл толмащлымаг. Ма̄н округт о̄лнэ соссаӈ ла̄тӈгыгн о̄с толмащлымаг. Тамле тэ̄ла округувт «Центр медицинской профилактики» па̄лыл ва̄рвес. Ань ма̄ньщи ла̄тӈыл э̄рыгсов хольт тэ̄н Петр Анямовын э̄ргаве̄г, ханты ла̄тӈыл ос Ульяна Данило. Ань ты ма̄ньщи э̄рыгсовыг ёлхассагӯв, на̄н ловиньтэ̄н. Гимнастика-Э̄рыгсов Е̄мтапи те тамле ва̄рмаль Урок та̄л ос рӯпат та̄л, Та̄ра спортыг ла̄внэ ма̄гыс Хо̄нтыгпе̄в ма̄н потрыӈ хал. Ма̄н ты хо̄тал на̄нан ла̄ве̄в, О̄луӈкве пуста̄гыл хумус, Поргын ва̄рмаль суссылталэ̄в, Ва̄гта̄л ул патэ̄н ты мус. Молях аквъёт поргащлэ̄ва, Ла̄гланува та̄кталэ̄ва, Ё̄рнув та̄н вос е̄мтапе̄гыт. Акв ман а̄гманув по̄хан вос минэ̄гыт, Ювле ул вос ёхтэ̄гыт. Ань ос ка̄тыл рӯпитэ̄ва, Ё̄р вос ка̄тыт о̄ньщиглэ̄ва, Сунсэ̄н, хумус нё̄тнэ упражнение, Ва̄руӈкве тах на̄нан! Ва̄ре̄н ты щир, ва̄ре̄н та щир, То̄нт ё̄рыг е̄мтэгы̄н, Ва̄ре̄н ты щир, ва̄ре̄н та щир, То̄нт апрыг е̄мтэгы̄н, Ва̄ре̄н ты щир, ва̄ре̄н та щир, То̄нт нё̄тнэ̄г е̄мтэгы̄н, Ва̄рен ты щир, ва̄ре̄н та щир, То̄нт пусыг о̄лэ̄гы̄н! Закаливание-Э̄рыгсов Упражнение юипа̄лыт Э̄ри молях ё̄р кинсуӈкве. Тыима̄гыс э̄ри ка̄сыӈ хо̄тал А̄лпыл по̄лям витыл со̄схатаӈкве. Та̄кмалтахтэ̄н ла̄щмарылыл, Та̄кмалтахтэ̄н аквписыг, Акв ман а̄гм урыл ёрувлэ̄гы̄н, Тэ̄рпит урыл ёрувлэ̄гы̄н, Нэ̄мхо̄т аквтоп а̄гм, нэ̄мхо̄т асыӈ. Туи порат та̄кмалтахтэ̄н, Сэ̄ит повара̄лэ̄н, Ёнге̄н, пувлэ̄н, апмрамтахтэ̄н, Алпин котралэлы̄н. Хунь та тэ̄лы пора о̄вылтахты, То̄внакт ёса масэ̄н, Торге̄н ащирма сэ̄ӈкв лылтэ̄н, А̄гмын пусмалтаӈкве ха̄сэ̄н. Ва̄ре̄н ты щир, ва̄ре̄н та щир, То̄нт ё̄рыг е̄мтэгы̄н, Ва̄ре̄н ты щир, ва̄ре̄н та щир, То̄нт а̄прыӈ е̄мтэгы̄н, Ва̄ре̄н ты щир, ва̄ре̄н та щир, То̄нт нё̄тнэ̄г е̄мтэгы̄н, Ва̄рен ты щир, ва̄ре̄н та щир, То̄нт пуста̄гыл о̄лэ̄гы̄н! Ань хотты хо̄тпа ты ва̄рмалитыл пӯмщалахтуӈкве паты ке, тав ищхӣпыӈ ут хосыт э̄лаль вос кисхаты. Таима̄гыс о̄влэ̄т «Гимнастика» манос «Закаливание» ла̄тыӈ хансэ̄н, тэ̄н по̄хатэ̄н ма̄ньщи ла̄тыӈ хӯлтэ̄н, тувыл «видео» палт ва̄релы̄н. Та юипа̄лт э̄рнэ утыт тот нэ̄глэ̄гыт тах. Я̄тил ня̄врамаквет, ма̄ньта̄гыл пусмалтахтэ̄н, пуста̄гыл о̄лэ̄н!

1083 2014.09.05. Светлана РОМБАНДЕЕВА

Округт о̄лнэ я̄тил ма̄хум! Ма̄н, округ Думат рӯпитан ма̄хум, на̄нан номт тотнэ хо̄талыл янытлыянув! Сӯкыр э̄тпос о̄выл хо̄талэ – ты ань ханищтахтан хо̄тпат ма̄гыс сака ёмас ялпыӈ хо̄тал. Ханищтахтан ва̄рмаль ты хо̄талыл ты о̄вылтахты, ма̄ньлат ма̄хум номтыӈыг е̄мтэ̄гыт, тувыл э̄лаль мӯсхал щирыл рӯпитаӈкве патэ̄гыт. Ня̄врамыт ханищтахтан тэ̄ланыл акв щирыл хунь мины, то̄ванакт матыр та̄рвит о̄лыглы, ос ка̄сыӈе̄мт ты сака пӯмыщ ва̄рмаль. Та̄н са̄в хащтал матыр ва̄ӈкве патэ̄гыт, йильпи ва̄рмалит та̄рапаттэ̄гыт, матыра̄ти ва̄руӈкве ханищтахтэ̄гыт. Ка̄сыӈ ня̄врам маныр ва̄г, маныр ха̄сы, ханищтахтынэ̄тэ порат пуссын но̄ххулиглы, тав ва̄рнэ тэ̄ланэ мирн ка̄салавет, ва̄ӈкве патавет. Я̄тил ня̄врамаквет, ма̄ньлат ма̄хум, ханищтахтан тэ̄лан на̄нан акваг вос нё̄ты, э̄лаль о̄луӈкве на̄нти ханищтахтэ̄н, матыр э̄рнэ тэ̄ла ва̄руӈкве на̄нти вос ха̄сэгы̄н. На̄н хуньт тах округув янытыл рӯпитаӈкве патэгы̄н, о̄лнэ ма̄вн са̄в ёмас тэ̄ла ва̄регы̄н. Ты йильпи ханищтахтан та̄л сыс номтыӈыг е̄мтэ̄н. Ханищтан хо̄тпат ёмас номтыл вос рӯпитэ̄гыт, ща̄ньа̄щит та̄нти ня̄враманылн вос нё̄тэ̄гыт, мӯтраӈыг вос о̄лэ̄гыт, ня̄врамыт ос ё̄мащакв вос ханищтахтэ̄гыт! Округ Дума кӯщай Б. С. Хохряков ке̄тум ля̄ххалэ ма̄ньщи ла̄тӈыг С. Хозумован толмащлавес.

1083 2014.09.05. Светлана РОМБАНДЕЕВА

Ня̄врамыт автобусыл мӯйлуптаве̄сыт. Сургутский ра̄йон Русскинская па̄выл интернатт о̄лнэ соссаӈ ня̄врамыт о̄выл ханищтахтан хо̄тал кастыл «ЛУКОЙЛ-Западная Сибирь» рӯпитан ма̄ныл автобусыл мӯйлуптаве̄сыт. ОАО «ЛУКОЙЛ» рӯпитан ма̄ ос округ правительство халэ̄нт юртыӈыщ о̄лэ̄г. Ты компания округувт о̄лнэ мирн матыр нё̄тмил тэ̄ла ва̄тихал ва̄рапа̄лы. Ань ос «ЛУКОЙЛ-Западная Сибирь» рӯпитан ма̄ ня̄врамытн тамле нё̄тнэ, тыныӈ автобус мӯйлуптас. Тув ва̄т нупыл кит улас ва̄рим о̄лы. Ка̄сыӈ ӯнлын ма̄ мӯсхал щирыл щё̄питавес, ла̄гыл тӯщтын ма̄гыс ха̄ӈхылтапыт ёмащакв ва̄рим о̄лэ̄гыт, ня̄врамыт на̄йпос но̄хпе̄ламтаӈкве ве̄рме̄гыт ос мо̄т са̄в э̄рнэ матарт тув ва̄рим о̄лэ̄гыт. Ня̄врамытн ань па̄влыт халт яласаӈкве кӯпнит, ёмас номтыл ӯнлахо̄лэ̄гыт, минэ̄гыт.

1083 2014.09.05. Светлана РОМБАНДЕЕВА

Ханищтахтан кол ӯнттувес. Ма̄н округувт Нефтеюганск ӯст ма̄ньлат ма̄хум ма̄гыс йильпи ханищтахтан кол ӯнттувес, политехнический колледжиг ла̄ваве. Тот ма̄ньлат ма̄хум округ янытыл са̄всыр ма̄т рӯпитан ма̄гыс ханищтавет – сварщикыт, слесарит, плотникыт, колыт ӯнттын ма̄хум, электромонтёрыт, тэ̄нут па̄йтнэ ма̄хум ос кондитерыт. Тот ань 630 хо̄тпа ханищтахты. Ты коныпал тот туи порат школат ханищтахтан ня̄врамыт ма̄гыс са̄всыр ханищтапыт ва̄рыглавет. Кӯщаиг Сергей Николаев тав о̄лы. Ань ты хум ла̄внэ̄тэ щирыл, колледжанылт ханищтахтан ма̄гыс хотальа̄ти э̄рнэ матыр та̄н пуссын о̄ньще̄гыт. Ты э̄рнэ рӯпатат коныпал та̄н иӈ хӯрум специальность щирыл ханищтап щё̄питэ̄гыт – ты автомеханик, токарь ос пуӈк хуратан тэ̄ла. Тув округ кӯщаюв Наталья Комарова ос Тюменский область губернатор пе̄нтсыл рӯпитан хум Владимир Якушев ялсыг. Тэ̄натэ̄н ты ханищтахтан кол сака мӯстыс.

1083 2014.09.05. Редакцият рӯпитан ма̄хум

Пе̄рияп ва̄рмаль. Ты э̄тпос нилахойпловит хо̄талэ̄т Тюменский область ма̄гыс губернатор пе̄рияве. Тюмень ӯс по̄хат о̄лнэ районыт коныпал яныг кӯщай пе̄рияӈкве Ханты-Мансийский автономный округт ос Ямало-Ненецкий автономный округт о̄лнэ ма̄хум о̄с патэ̄гыт. Пе̄рияп ва̄рмаль во̄рт о̄лнэ соссаӈ ма̄хум палт ань ва̄ре̄гыт. Тюменский область губернаторыг е̄мтнэ ма̄гыс нила хо̄тпа воритотэ̄гыт, ты Дорохин Павел КПРФ партия па̄лыл, Пискайкин Владимир «Справедливая Россия» партия па̄лыл, Селюков Михаил ЛДПР партия па̄лыл ос Якушев Владимир «Единая Россия» партияныл. Владимир Якушев ань губернатор ва̄ӈын хо̄тпаг о̄лы. Юграт ос Ямалт о̄лнэ ма̄хум, на̄н ос пе̄рияӈкве во̄ваве̄н. Пе̄рияӈкве ялэ̄н тах, хот ул ёрувлэ̄н.

1083 2014.09.05. Тамара МЕРОВА

Ня̄врамыт ханищтахтуӈкве о̄вылтахтасыт. 2014-2015 та̄лыг кастыл округ янытыл 187 со̄тыра ня̄врамыт школан ханищтахтуӈкве минасыт. Та̄н халанылт 21 со̄тыра 600 са̄вит ма̄нь ня̄врамаквет о̄выл классыт ханищтахтуӈкве патсыт. Ань ка̄сыӈ а̄гирищакве ос пыгрищакве «Подарок первокласснику Югры» нампа нэ̄пакыл мӯйлуптавес. Ты нэ̄пак щирыл ня̄врамыт Россия ма̄т о̄лнэ са̄всыр мирыт урыл ва̄ӈкве патэ̄гыт. Тувыл округт яныгман во̄р ӯйит, хӯлыт, ма̄витув о̄вылтыт потрыт ловиньтэ̄гыт. Та̄наныл пуссын пӯмыщ ма̄гыс нё̄тнэ хуритыт ка̄салыяныл. Ты коныпал ня̄врамаквет ГИБДД па̄лыл о̄с мӯйлупсал щё̄питаве̄сыт. Та̄н я̄ӈк хуриӈ по̄сыл майве̄сыт. Таве коны о̄щнэ маснутын хотталь ва̄руӈкве э̄ри. Кон турманыӈыг е̄мтнэ порат тамле по̄с ёмщакв постуӈкве паты ос машинат яласан лё̄ӈхыт посэ э̄лныл на̄ӈки. Ты таквсыиг Ханты-Мансийскат ос Сургут ӯст йильпи школаг рӯпитаӈкве патсы̄г. Ка̄сыӈ школат 825 а̄гитпыгыт ханищтахтуӈкве ве̄рме̄гыт. Советский район Зеленоборск па̄вылт о̄с йильпи школа ӯнттувес. Тув ня̄врамыт о̄выл щёс ханищтахтуӈкве щалтсыт.

1083 2014.09.05. Николай МЕРОВ

Товтыл каснэ лё̄ӈх щё̄питавес. Мощ мо̄лал товтыл каснэ мирхал ва̄рмаль щё̄пита̄лнэ кӯщаит Ханты-Мансийск ӯст акванатхатыгласыт. Ма̄н округувныл Алексей Путин – губернатор ва̄ӈын хум, тувыл Борут Нунар – рейсмирхал Кубок кӯщай хум, Владимир Мелехов – Россият биатлон ва̄рмаль э̄лаль тотнэ кӯщай ва̄ӈын хум ос Спартак Антоненков – «ЮграМегаСпорт» нампа организация кӯщай та̄н о̄лсыт. Югра ма̄т о̄лнэ биатлонный центр каснэ ма̄гыс мӯсхал щирыл щё̄питым о̄лы ма̄н а̄ти, ёхталам кӯщаит уральтасаныл. Та юипа̄лт та̄н ля̄ххал тотнэ ма̄хум ёт хо̄нтхатыгласыт ос ты урыл потыртасыт. Ля̄ххал тотнэ хо̄тпатн Алексей Путин тох ла̄выс: «Округувт каснэ ва̄рмаль ёмасыг мины, ма̄н каснэ хо̄тпанув ма̄ янытыл о̄лыгла̄лум кассылыт ва̄тихал но̄хпатыглэ̄гыт. Ты ма̄т касылын щё̄питахтан хо̄тпанув а̄ти сака хосат, мирхал олимпиада о̄лум порат, Россия ма̄гыс ма̄гылн тагатан са̄в по̄с тотсыт. Та̄н халанылт товтыл каснэ порат Алексей Волков со̄рни по̄с вис. Ма̄н округувт ты каснэ ва̄рмаль акваг э̄лаль тотуӈкве патылӯв. Ань Биатлонный центр ты коныпал ёмаснуве̄г ва̄рилув тах. Тахсын лё̄ӈхыт йильпииг щё̄питыянӯв, кина по̄слын ма̄ о̄с ёмащакв ва̄риянӯв тах». Э̄лыл ёхталам кӯщаиг Борут Нунар ос Владимир Мелихов каснэ лё̄ӈхыт ос ма̄хум ӯнлын ма̄т ёмщакв уральтасанэ̄н. Тэ̄н ла̄внэтэ̄н щирыл, округт о̄лнэ биатлонный центр каснэ ма̄гыс ёмщакв ва̄рим о̄лы. Тыт о̄лнэ мир мӯй ма̄хум яныг ща̄гтыл ӯрияныл. Ка̄сыӈ хо̄тпан тыт ӯщлахтуӈкве сака мӯсты. Каснэ ма̄хум ма̄гыс маныр э̄ри, пуссын щё̄питым о̄лы. Хотьют ты ма̄гыс яныг рӯпата ва̄рыс, тэ̄н та хо̄тпат сака янытласанэ̄н. Сӯкыр э̄тпос о̄выл хо̄талытт товтыл каснэ ва̄рмаль ва̄рнэ хо̄тпат мирхал Конгресс щё̄питэ̄гыт тах. Ты Конгрессн ма̄хум нила та̄л сыс акв щёс акванатхатыглэ̄гыт. Маныр та̄рвит ва̄рмаль о̄ньще̄гыт, ты урыл потыртаӈкве патэ̄гыт ос акваннё̄тхатым та̄рвитаныл мӯсхал щирыл щё̄питыяныл тах. Кӯщай хо̄тпат о̄с акв ва̄рмаль урыл потыртасыт. Каснэ тэ̄ла сунсуӈкве са̄в мир ёхталы. Та̄н ма̄гсыланыл ӯщлахтын кол сака мощща о̄лы. Ань тах ос йильпи колнакт ӯнттуӈкве патавет. Тувыл каснэ лё̄ӈх, суснэ ма̄ ос кина по̄слын ма̄ я̄нас щалтнэ ма̄л щё̄питаве. Пуссын ты ва̄рмолит ма̄хум ща̄гт ма̄гыс щёпитавет.

1083 2014.09.05. Николай МЕРОВ

По̄х хо̄тпан мори ул агтэ̄н. Ань ты накт тӯлмантан хо̄тпат са̄всыр щирыл ма̄хум урткуптыяныл. Ты ва̄рмаль урыл полицият рӯпитан хо̄тпат мощ мо̄лалнув потыртасыт. Ма̄хум ты накын ул вос патсыт, мир ӯргалан хо̄тпат ла̄тыӈ ке̄тсыт. Ма̄н округувт рӯпитан полиция хо̄тпат ла̄внэ̄ныл щирыл, ань ты ва̄рмаль та̄кыщ уральтым о̄ньщаве, тыи ма̄гыс ты ощмар мощщаг е̄мтыс. Мо̄т та̄лыт ловиньтаӈкве ке, тох е̄мты: 2012 та̄лт – 1 со̄тыра 94 ла̄палахтын нак, 2013 та̄лт – 871 ла̄палахтын нак, 2014 та̄л са̄т э̄тпосэ сыс – 658 ла̄палахтын ва̄рмаль о̄лыс. Ты хо̄тал мус 378 о̄выл е̄мтнэ нак осн иӈ ат паттувес. Тамле ощмар ва̄рнэ хо̄тпат пувуӈкве сака та̄рвитыӈ. Ты коныпал то̄ват суд щирыл ӯнттуӈкве ат ве̄рмавет. О̄выл ва̄рапам наке ёмщакв та̄ра ат ке паттаве, тав та та̄ртаве. Тамле ощмар ва̄рнэ хо̄тпат тӯлмантан ва̄рмаль акванюрщхатым щё̄питэ̄гыт. Хо̄тпа ла̄пала̄лаве, пормасанэ хотвивет. Ётыо̄вылт е̄мты тох, э̄лумхо̄лас пормасанэ э̄рттам такви э̄л мисанэ. Ла̄палахтын ма̄хум хо̄тпа номтэ ёмщакв то̄ргамтыяныл. Аквтупмат хо̄тпа нупыл юртыг о̄лэ̄гыт. Тувыл ос акв тамле ва̄рмаль о̄лы. То̄ва ла̄палам хо̄тпат полициян ат ювыт, заявлениенэ̄пак хансуӈкве ат таӈхе̄гыт. Ты хосыт о̄выл ва̄рнэ хо̄тпат пувуӈкве ат ве̄рмавет. Ощмар ва̄рнэ ма̄хум янгыщ яныгпа̄ла хо̄тпат тох урткуптыяныл, э̄рттам та̄нанылн нё̄тнэ щирыл рӯпитэ̄гыт. Та̄н палтаныл ёхтэ̄гыт, сырсыр хащта̄л нэ̄пакт суссылтэ̄гыт, тувыл олн та няртэ̄гыт. Са̄выӈпа̄лэ ос тамле ощмар о̄лы: телефон хосыт звонитэ̄гыт, уркпотыр тотэ̄гыт. Э̄лумхо̄лас ла̄палыяныл, олныл та ойтапавет. Ётыл та олнаныл акваг хотталь та минэ̄гыт. Са̄выӈпа̄лэ турманколт ӯнлын хо̄тпат тамле ощмар ва̄ре̄гыт. Та̄н хотты хо̄тпан звонитэ̄гыт, ла̄ве̄гыт, э̄рттам юртэ манос рӯтэ матыр лю̄ль нак ва̄рапанэ̄тэ ма̄гыс полициян пуввес. Ос таве тувыл та̄ртнэ ма̄гыс олн во̄ве̄гыт. Тамле нак са̄в щёс о̄лыглас, то̄ва хо̄тпат олн ойтэ̄гыт. Ты хо̄тпатн щар ул агтэ̄н. Ты потыр о̄влэ̄т ёмщакв та̄рапаттуӈкве э̄ри. То̄ва ла̄палахтын хо̄тпат сыресыр тэ̄рпи манос матыр пормасыт тыналэ̄гыт. Та̄наныл юв мори ул та̄ртэ̄н, та̄н тыналан пормасаныл о̄с ул ёвтэ̄н. На̄н ул вос ла̄палавесы̄н, полицият рӯпитан хо̄тпат тамле потыр щё̄питасыт. Маныр ва̄руӈкве э̄ри, ты урыл э̄лаль ловиньтэ̄н. Хотьют на̄н палтын звониты ке, ул рохтэ̄н. О̄влэ̄т ляпат о̄лнэ рӯтанын ёт потраме̄н. Тувыл ос та юртын манос рӯтын палт звонитэ̄н, хотьют урыл потыр о̄лыс, таве китыглэ̄лын. Тав телефонэ ат выгтэ ке, юртанэ̄н манос аквъёт рӯпитан ма̄хманэ палт звонитэ̄н, тав уре̄тыл тот китыглахтэ̄н. Маим телефонын манос банковский номерн щар ул звонитэ̄н, на̄нки банковский карта номерын по̄х хо̄тпан о̄с ул ла̄велын. Банковский карта палт на̄нки паролин ул пинэлы̄н, ощмар ва̄рнэ хо̄тпан ка̄тынпаттаве ке, олнанын пуссын хота̄лмаявет. Олнанын Банкколт ӯнттум банкоматытт манос та ляпат ӯнлын колытт вуе̄н, та̄н пуссын видеокамера хосыт сунсавет. Интернет хосыт банковский картал матыр ма̄гыс ойтхатнэ̄н порат антивирус программан ёмащакв вос рӯпиты. Хащта̄л Интернетсайтыт о̄с нэ̄матыр ул ёвтэ̄н. Тамле ощмарлан ва̄рмаль ул вос е̄мтыс, полицият рӯпитан ма̄хум са̄в рӯпата ва̄регыт кос, ос на̄н на̄нки о̄с ӯргалахтым о̄лэ̄н. Мори ма̄хум на̄нки колын ул та̄ртэ̄н, хащтал хо̄тпат потрын та̄ра ул агтэ̄н. Ос тамле накн ликмысын ке, та̄ра «02» телефон хосыт звонитэ̄н, тот на̄н ва̄рмалин щирыл полиция ма̄хумн нё̄таве̄н. УУР УМВД России округув янытыл ке̄тум ля̄ххал ма̄ньщи ла̄тӈыг Николай МЕРОВ хансыстэ.

1083 2014.09.05. Тамара МЕРОВА

Э̄рнэ нэ̄паканув молях щё̄питавет. Ювле хультум э̄тпост РИЦ «Югра» колт ля̄ххал тотнэ ма̄хум кит кӯщаиг ёт хо̄нтхатахтыгласыт – тыи ищхӣпыӈ утыт ёт рӯпитан департаментыт кӯщай Андрей Бородин ос «Многофункциональный центр» нампа колт кӯщаиг о̄лнэ хум Александр Сучков. Андрей Бородин Департаментэ рущ щирыл «информационных технологий» намаим о̄лы. Ань ты кӯщаиг тэ̄нки рӯпататэ̄н о̄вылтыт ма̄хум ма̄гыс ля̄ххал тотсы̄г. О̄влэ̄т Александр Сучков потыртас: «Ань ма̄хум Пенсионный фондныл ос социальный развитие департаментныл акванатнэ э̄рнэ нэ̄пакыт ма̄н палтув щё̄питаӈкве ве̄рме̄гыт. Материнский капиталыг намаим тэ̄лат палт ма̄н нэ̄ хо̄тпатн нё̄тэ̄в. Во̄раян пора о̄вылтахтынэ̄тэ э̄лыпа̄лт хум хо̄тпат «во̄раяӈкве ма̄гыс та̄ратан нэ̄пакыл» ва̄руӈкве нё̄тыянӯв. Тувыл пенсионерыт манос мо̄т хо̄тпат Ханты-Мансийский банкныл винэ «Социальная карта» ань о̄с МФЦ па̄лыл щё̄питаӈкве патве̄сыт. Налог ойтнэ ма̄хум та̄нки тэ̄ланыл та̄рапаттуӈкве манос сыресыр э̄рнэ нэ̄пакыт кинсуӈкве о̄с ма̄н палтув вос ёхталэ̄гыт». Тувыл мо̄лты та̄лныл Юграт «Универсальная электронная карта» нампа проект рӯпататэ о̄вылтавес. Тамле УЭК пластиковый картал ка̄сыӈ хо̄тпа ва̄руӈкве ве̄рмаве, туп вос ка̄сащанув. Тот медицинский полис, страховой счет ос банк ма̄гыс хансым номерыт хӯлтавет. Ты карта о̄щнэ̄н порат на̄н я̄нас документанын мо̄тмо̄т ма̄т кинсуӈкве ат э̄ре̄гыт тах. Та щирыл ма̄хум пӯльницат ос Пенсионный фондыт тэ̄ланыл нэ̄мат хосан ат тагапе̄гыт. Округ янытыл 25 многофункциональный центрытыт УЭК пластиковый картат щё̄питавет. Ань ты хо̄тал мус 7 со̄тыра хо̄тпа карта ва̄рнэ щирыл ӯрхатэ̄гыт. Кит со̄тыра арыгкем хо̄тпа тамле ут ка̄тын майве̄сыт. Ма̄хум ань МФЦ о̄вылтыт матыр ля̄ххал ва̄нэ ма̄гыс http: //mfchmao. ru. ло̄псыт вос кисхатэ̄гыт. Андрей Бородин э̄лаль ла̄выс: «Ка̄сыӈ хо̄тпа ищхӣпыӈ ут хосыт МФЦ ло̄пс палт такви наме, о̄парищ наме ос сотовый номере хӯлтуӈкве ве̄рми. Ты коныпал СНИЛС манос паспортын хансым утыт о̄с хӯлтыянэ ке, то̄нт МФЦ па̄лыл сыресыр справкат манос документыт кисхатнэ торыг та̄ра хо̄нтавет ос э̄рнэ нэ̄паканэ молях ва̄равет. Ань мус 267 со̄тыра э̄лумхо̄лас тув хасхатым о̄лы. Туп ювле хультум са̄т э̄тпос сыс 192 со̄тыра э̄лумхо̄лас хасхатасыт. Ма̄нь па̄влыӈ ма̄т ма̄н о̄с многофунциональный центрыт рӯпитан щирыл щё̄питыянӯв. Та̄наныл ищхӣпыӈ утыл ке̄тыянӯв ос ва̄риянӯв. Тувыл ма̄хум ищхӣпыӈ утыл рӯпитаӈкве о̄с ханищтыянӯв. Таи ма̄гыс «Электронный гражданин» ханищтап са̄в ма̄т ва̄ре̄в. Округ янытыл ань 60 со̄тыра хо̄тпат тамле ханищтапын ёхталасыт. Та юипа̄лт МФЦ ло̄псын хасхатнэ хо̄тпа та̄ра мощ са̄вми». Тувыл ты кӯщаиг о̄с акв е̄мтапам ва̄рмаль урыл потыртасы̄г. Та̄н ань Украина ма̄ныл ёхтум хо̄тпат ёт са̄в рӯпитаӈкве патсыт. Ты ма̄хум тэ̄ланыл ёмщакв щё̄питан ма̄гыс миграционный служба ёт рӯпитэ̄гыт. Украина ма̄ныл оим 3 со̄тыра 538 хо̄тпат та̄н палтаныл нё̄тмил кинсуӈкве хасхатасыт. Пуссын Россият акваг о̄лмыгтан ва̄рмаль во̄ве̄гыт ос таима̄гыс э̄рнэ нэ̄паканыл кинсуӈкве ос ма̄кыг щё̄питаӈкве э̄ре̄гыт. Ты коныпал хотты колыт нё̄тмилыл ва̄равет, хо̄т маныр о̄лы, ма̄хум пуссын хӯлтавет. Ма̄н номсыте̄вт, ты та̄рвит хо̄нтлан ва̄рмаль та̄н палтаныл моляхыл ёл вос по̄илттавет. Хота мус нас ма̄хум саватаӈкве ро̄ве̄гыт. Та̄н ётаныл рӯпитаӈкве са̄в хунь кос, тувыл ос ойгалам ма̄хум са̄лиг о̄лы. Ты ма̄хум тыт о̄лнэ колыл хо̄нтавет, рӯпатал кинсавет. Аньмунтув ущты акв ля̄ххал о̄с та̄рапатыс, округ янытыл са̄всыр школанувт 500 арыгкем тувыл ёхтум ня̄врамыт ханищтахтуӈкве патэ̄гыт.

1083 2014.09.05. Тамара МЕРОВА

А̄с я̄ ва̄тат ӯнлын па̄вылкве. Шеркалы па̄выл Октябрьский районт о̄лы. Тав А̄с я̄ ва̄тат ӯнттувес. Тув та̄л палыт мӯй ма̄хум ёхталэ̄гыт ос ты нё̄тнэ ма̄кве пӯмщалыяныл. Тот 1 со̄тыра 361 э̄лумхо̄лас о̄лы. Та̄н халанылт 341 соссаӈ хо̄тпа о̄лы, тыи 309 хантыт, 28 ма̄ньщит ос 9 ё̄рн хо̄тпат. Мо̄лты та̄лт па̄выл кӯщаиг тот Людмила Валерьевна Мироненко пе̄риявес. Ты э̄лыпа̄лт нэ̄ 1994-1997 та̄лытыт миркол кӯщаиг о̄лыс. Шеркалыт школаинтернат, ня̄врам ӯрнэ кол, клуб, музей ос ла̄пкат о̄лэ̄гыт. Ма̄хум тот нёлоловхойплов са̄всыр предприятиятт рӯпитэ̄гыт. Тувыл мощща хо̄тпат мо̄т ма̄н о̄луӈкве минэ̄гыт. Ма̄хум тот о̄лнэ колыт ӯнттэ̄гыт. Та̄нки ма̄ке̄ныл э̄руптыяныл, па̄вланыл урыл нё̄тнэ э̄ргыт о̄ньще̄гыт, ос ялпыӈ хо̄талыт порат акваг э̄ргияныл.

1083 2014.09.05. Николай МЕРОВ

Ка̄тыл са̄всыр пормасыт ва̄рнэ нэ̄. Нина Георгиевна Рукова, Советский район Югорск ӯст о̄лы. Ты нэ̄ Ня̄хщамво̄ль па̄вылт яныгмас. Тав а̄ще тувыл ты о̄лыс. Ща̄не Парасковья Гавриловна, о̄йкатэ щирыл Ануфриева, ма̄ньщи нэ̄, Ха̄льӯст олыс, школат рӯпитас. Тувыл 1946 та̄лт са̄лыӈ суныл Ня̄хщамво̄льн тотвес, тот школат ня̄врамытн ма̄ньщи ла̄тыӈ урок ханищтас. Ща̄нягеа̄щаге тот акванминасы̄г, тувыл Нина самын патыс. Та па̄сныл са̄в та̄л минас. Нина Георгиевна ма̄нь ня̄врам колт налыман нупыл акв та̄л рӯпитас. Пенсиян патме юипа̄лт тав соссаӈ мир пормасыт ка̄тыл ва̄руӈкве о̄вылтахтас. Ам аквматнакт тав палтэ ёхталасум, тав а̄нумн ма̄щтырлан пормасанэ суссылтас ос акв пӯмащ мо̄йт потыртас. На̄н тав потре э̄лаль ловиньтэлы̄н: – Ам о̄влэ̄т соссаӈ мир о̄лупса урыл стихотвореният хансуӈкве патсум. Э̄лумхо̄лас, ма̄вит ос мо̄т мирыт урыл са̄в стихотворение хассум. Кит ма̄нь нэ̄пак та̄ратасум. Ётылнув ос пормасыт ка̄тыл ва̄руӈкве номылматсум. Ты ва̄рум пормасанум хосыт ам соссаӈ ма̄хум йис о̄лупса мирн суссылтэ̄гум. Пе̄с ма̄хум хумус о̄лсыт, манырсыр номт тотсыт, ты пормасыт хосыт та̄рапаттуӈкве ро̄ви. А̄тям саран хум о̄лыс, тав лесникыг рӯпитас, ма̄ньщи мир урыл са̄в потырта̄лыс. Акваг та̄н халанылт о̄лыс. Акв мойт ань потыртылум: «Ёрнколт Ищтапан о̄йка о̄лыс. Пе̄с порат, ялпыӈ хо̄талыт о̄лыглам порат, ма̄ньщи ос рущ ма̄хум халанылт пормасыл тыналахтасыт. Ма̄ньщи хо̄тпат тэ̄нутпормасаныл рущ па̄вылн тотыгласаныл. Тот матыр мо̄т пормас ма̄гыс пе̄нтыгласаныл. Аквматнакт Ищтапан са̄лыӈ суныл минас. Ло̄ӈханьщапыт суяныл э̄лыл суйтсыт, во̄р во̄тын хосгувес. Тав э̄ргантым ла̄щалла̄щал минас. Аквматэ̄рт во̄рт тав лю̄ньщ суй хӯнтамлас. О̄йка са̄лыӈ сунэ ёлпо̄йтыгпаптастэ. Номсы, э̄рыӈ са̄лыӈ сун паттатэ щихырты. Мощ хӯнтлыс, нэ̄матыр ат суйты, о̄с э̄лаль минмыгтас. Хӯнтлы, о̄с э̄рттам ня̄врам лю̄ньщи. Тав лё̄ӈх коныпалн ёмыс, сунсы, во̄р щахылт а̄па ӯнлы, та а̄пат ня̄врам хуи. Тыглетувле сунсыглахтас, ляпат нэ̄мхотьют а̄тим. Номсы, аман хотьют а̄па тыт хультуптас, ня̄врам по̄ляве. Воссыг маныр ва̄руӈкве, ня̄врам вистэ, ёмщакв лапма̄нигтастэ ос э̄лаль такви па̄влэ̄н та минмыгтас. Лё̄ӈхыт миныматэ номсахты: Ос хумус ам таве янмалтаӈкве патылум. Ам э̄ква ат о̄ньще̄гум, амккем о̄лэ̄гум. Мирн маныр ла̄ве̄гум, хотыл ам ня̄врам вислум. Ам нупылум номсахтуӈкве патэ̄гыт, э̄рыӈ ам тӯлмантаслум. Ты ма̄гыс тах хотум ва̄равем. Ты номтэ̄т тав ювле ёӈхыс, рущ па̄вылн минмыгтас. Тув ёхтыс, ӯщлахтын колт хӯрум хо̄тал о̄лыс, ӯрхатас. Номсы, хотьют ня̄врам кисмаитэ, тав палтэ ёхты. Тох нэ̄мхотьют аты ёхтыс. Тот о̄лыматэ ня̄врам щар ат лю̄ньщис. Ты кос ӯрхатас, тувыл маныр ва̄руӈкве воссыг, ювле такви па̄влэ̄н та минас. Юв ёхтыс, ня̄врам па̄лыгутыстэ, насати а̄гирищ. Ята вос, Ищтапан о̄йка та а̄ги такви но̄хянмалтастэ. А̄гикве во̄раяӈкве ханищтахтас. Во̄рт ёсал ё̄мыгтас, сака ёмащакв па̄тлуптас, лэ̄ӈын саме̄н хо̄яс. Юн колсори рӯпата ва̄рыс. Ос аквматнакт тэ̄лы порат Ищтапан о̄йка ё̄рнколныл конква̄лыс. Со̄ви ла̄гыл ё̄мнэ лё̄ӈх касалас. А̄гитэ̄н ла̄выс: – Ме̄н ё̄рнколме̄н по̄хыт хотты хащта̄л хо̄тпа ё̄мыгты, наӈ ӯргалахтым о̄лэ̄н, наӈте̄н э̄л ул минэн. Хотталь тӯлмантаӈкве ве̄рмавен. А̄гитэ ты урыл нас мовалас ос ла̄выс: – Хотьютын ам тӯлмантавем. О̄с аквматнакт а̄ще а̄лпыл ква̄лыс, а̄гитэ а̄тим. Насати тав во̄р исхорытн тотвес. Та̄н тох ла̄всыт: – Тав во̄р а̄ги, а̄ще̄н во̄рт хо̄нтвес. Ты а̄ги янгыг е̄мтнэ̄тэ мус ма̄н хоса ӯрхатсӯв. Ань таве а̄пгув палт ха̄йталылӯв. А̄гирищ самаге па̄лыгпуссаге, хотьютын ты тотаве. Нё̄тнэ хара ма̄н ёхтысыт, мувылтахи яныг йӣв капайт лю̄ле̄гыт. А̄ги хунь торгамтастэ, маныр накн патыс, хотрохтыс. Я̄та, сунсы, акв ва̄ӈкариӈ йӣв тав ляльтэ ё̄ми. Тав юипа̄лэ̄т пе̄с йӣвыт ё̄ме̄гыт. Ляпан ёхтысыт, а̄ги нупыл ла̄ве̄гыт: – Наӈ во̄р а̄ги, ма̄н наӈын хосат та̄гыл ӯрилӯв. Наӈ ань ма̄н палтув, во̄рт о̄луӈкве патэ̄гын. А̄ги ущпылнэ̄г хотрохтыс ос во̄р исхорыт нупыл ла̄ви: – Та яныт ёмас ва̄ре̄н, а̄нум юио̄выл щёс а̄щум ёт ва̄щинтахтуӈкве та̄ртэлы̄н. Вор исхорыт хоса ма̄н ва̄ти номсахтасыт, та та̄ртсаныл. Пуссын аквъёт а̄ще палт та минасыт. Ёрнколн ёхтысыт, а̄гирищ кол кивырн щалтыс, а̄ще ка̄салас, тав палтэ ха̄йталтас, ма̄гылн сынумтахтас ос лю̄ньщуӈкве та о̄вылтахтас. Та лю̄ньщи, та лю̄ньщи, ты торыг акваг ма̄ниг е̄мты. Юио̄вылт ӯйрищиг е̄мтыс, ё̄рнколныл кон та тыламлас. Во̄р исхорыт ос ё̄рнкол по̄хыт та ӯрхатэ̄гыт, хунь а̄гирищ конква̄лы. Ань тыг мус ё̄рнкол э̄лыпалт та лю̄ле̄гыт». Нина Георгиевна ка̄тыл ва̄рум пормасанэ ма̄хумн пӯмащ ма̄гыс сака ёвтавет. Тав са̄всыр семинарытн яланта̄лы, пе̄с йис пормасыт ва̄руӈкве ханищтахты. Тав ла̄внэ̄тэ щирыл, то̄ва хо̄тпат са̄в пормас выгыт, юрт хо̄тпанылн мӯйлуптыяныл. Ты мо̄йт Маргарита Анисимкова нэ̄пакн хансыстэ. Нина Георгиевна аквматнакт ловиньтастэ, сака сымын хояс. Таима̄гыс ты хосыт ка̄тыл хӯрит по̄слыс. Ты ка̄ркам, хо̄тпа нупыл сымыӈ нэ̄ мо̄йтыт коныпал са̄в э̄ргыт ва̄г. Ам ётум потыртаме порат тав ты хал э̄ргыт э̄ргыс ос стихотвореният ловиньтас. Ам Нина Георгиевнан щунь паща ла̄тыӈ ке̄тэ̄гум. Тав сака пӯмащ ва̄рмаль э̄лаль тоты. Нё̄тнэ пормас о̄с са̄внув вос ва̄ри. Ты мӯтраӈ нэ̄ са̄в та̄л пуста̄гыл вос о̄лы, То̄румн вос нё̄таве, На̄й-О̄тыранэ̄н вос ӯргалаве! Юио̄выл хурит Нина Георгиевна а̄пге Лена Соколова по̄слым о̄лы. Лӯпта э̄тпост тав Тӯрват па̄вылн мӯйлуӈкве ялыс. Йив ха̄пыл Тагт я̄ хосыт миннэ̄тэ порат ам таве по̄слыслум.

1083 2014.09.05. Т. Д. Слинкина

Ам ётум Кульпас школат ханищтахтам ня̄врамыт. Атпан нупыл са̄т та̄лыг ēмтыс ам школа а̄стламум юипа̄лт. Ам ётум Кульпас па̄вылт ханищтахтам ня̄врамыт ань пуссын матсыт, пенсионерыг ēмтсыт. То̄ванув та па̄сыл а̄тимыг ēмсыт. Лов арыгтем ма̄ньщи па̄влытыл атым ня̄врамыт аквъёт интернатыт о̄лсӯв: ты Я̄сунт па̄выл, Сӯкыръя па̄выл, Саранпа̄выл, Ха̄ӈла па̄выл, Хо̄сло̄х па̄выл, Хо̄рыӈпа̄выл, Ло̄пмус па̄выл, Потрасуй па̄выл, Кимкьясуй па̄выл, Няхлаӈ па̄выл, Сортыӈъя па̄выл. Ты па̄влытт то̄ва школат 1953-1954 та̄лытт лаппантвēсыт, туп Ло̄пмус па̄вылт ос Кимкьясуй па̄вылт нила класс мӯс ня̄врамыт ханищтавēсыт. Атыт классныл нёлолов класс мӯс Кульпас па̄выл школаинтернатыт та ханищтахтасӯв. Хоты хо̄тпа э̄рыӈ таквина̄тэ хурит ка̄салытэ – хот ща̄гты. Нумыннув хурит ма̄н нёлоловит класс та̄гыл ня̄врамыт 1966-1967 та̄лытт ханищтахтасӯв. То̄ва ня̄врамыт са̄тыт класс юипа̄лт Саранпа̄вылн минасыт ханищтахтуӈкве, таи ма̄гыс та та̄л ма̄н тит классыг акванюрщувēсӯв. Ма̄н классувт 25 ня̄врам ханищтахтас. Нумын лю̄лēгыт во̄ртыпа̄лныл ёмаспа̄л нупыл: Кимлобазова Клавдия Васильевна (Кимкьясуй па̄выл), Филиппова Любовь Николаевна (Кульпас па̄выл), Вынгилева Клавдия Петровна (Няхлаӈ па̄выл), Ендырева (Слинкина) Татьяна Дмитриевна (Хо̄сло̄х па̄выл), Афанасьев Валерий Афанасьевич (Кульпас па̄выл), Нагибин Александр Петрович (Кульпас па̄выл), Вадичупов Пётр Семёнович (Кимкьясуй па̄выл), Сайнахов Владимир Васильевич (Я̄сунт па̄выл), Качанов Ефим Абрамович (Кульпас па̄выл), Неумоев Сергей Григорьевич (Кульпас па̄выл, щаквыт порсыс). Та̄н э̄лыпа̄ланылт ӯнлэ̄гыт: Таратова Светлана Николаевна (Потрасуй па̄выл), Липина Зинаида Николаевна (Кульпас па̄выл), Кушнин Александр Фёдорович (Кульпас па̄выл), Спивакова Нэля Павловна (классный руководителюв, тав о̄выл та̄л география учителиг рӯпитас), Гындыбин Сергей Николаевич (Кимкьясуй па̄выл), Хатанзеев Василий Терентьевич (Саранпа̄выл), Хатанзеев Иван Селивёрстович (Кульпас па̄выл). Ёлын ӯнлын нила ня̄врам: Бешкильцева Лидия Васильевна (Кульпас па̄выл), Ванюта Иван Георгиевич (Саранпа̄выл), Вадичупов Владимир Дорофеевич (Хо̄рыӈпа̄выл), Хилиманюк Николай Андреевич (Кульпас па̄выл). Ты коныпал нила ня̄врам ат по̄слахтасыт. Ты Гындыбина Валентина Егоровна (Кимкьясуй па̄выл), Анямова Елизавета Владимировна (Хо̄рыӈпа̄выл), Попов Александр Александрович (Сортыӈъя па̄выл), Хатанзеев Анатолий Алексеевич (Кульпас па̄выл). Ам ань ты матмыг ēмтум ма̄хмытн яныг паща ла̄тыӈ тēтэ̄гум. Пӯс ка̄т, пус ла̄гыл вос о̄лэ̄гыт, На̄й-О̄тыранылн вос ӯргалавет. Āтимыг ēмтум ма̄хманув ёмас номтыл номиянӯв. Мо̄тыт хурит тай са̄тыт класс ня̄врамыт 1965 та̄лт сентябрьт Лю̄лиӈ-Во̄рт по̄слахтасӯв. Ка̄сыӈ таквс са̄тыт класс ня̄врамыт матах хо̄талын Лю̄лиӈ-Во̄рн ва̄нтта̄лвесӯв. Тот а̄хвтас саквыӈ тēрас о̄лы, ма̄н «Горой семиклассников» намтым о̄ньщислӯв. Та тēрас по̄ӈкыт ма̄н ты ха̄хталахтэ̄в по̄слахтым. Во̄ртыпа̄лныл ёмаспал нупыл: Т. Д. Ендырева, М. А. Филиппова, И. Гындыбин, Л. И. Хозумов, Н. Мелентьева, З. В. Хозумова, В. Е. Гындыбина. Ёлыннув хӯрум пыгрищ: А. Оманов, В. В. Сайнахов, И. Таратов. Хӯрмит хурит ма̄н учителюв Пётр Парамонович Кимлобазов (ма̄ньщи хум) Ленинградыт ханищтахтаме порат по̄слахтам. Кульпас па̄выл школат тав са̄в та̄л география ос физкультура учителиг рӯпитас. Татьяна Дмитриевна Слинкина (а̄ги о̄парищ наме Ендырева), Обскоугорский институт, Ханты-Мансийск ӯс.

1083 2014.09.05. Анна АЛГАДЬЕВА

Лӯсум ма̄ньщит. Свердловский областьт Са̄пса е̄р ма̄т сака мощща ма̄ньщи хультыс, яныгса̄тныл мощ са̄внув, ма̄кыг ке ла̄вуӈкв 112 э̄лумхо̄лас. Ма̄к ма̄ньщи хо̄тпа тыгыл китхӯрумпис мощща. Ма̄к ма̄ньщит туп во̄р па̄влытт хультсыт. Во̄р па̄влытт о̄лнэ хо̄тпат иӈ ма̄ньщи щирыл о̄лэ̄гыт, янгема̄не̄тыл пуссын ма̄ньщи ла̄тӈыл потыртэ̄гыт, ӯрхатэ̄гыт, во̄рае̄гыт, хул пуве̄гыт, пил ва̄тэ̄гыт, па̄квсам ва̄ре̄гыт. Маныр во̄рныл сэ̄лэ̄гыт, таянылтыл та о̄лэ̄гыт. Тыналан ма̄гыс со̄рп котныл пӯрка ю̄нтэ̄гыт. Са̄лыт хосат холасыт, туп во̄рса̄лыт алыглэ̄гыт. Ма̄ньщи ӯламыл о̄лнэ хо̄тпа ань тай мори ат ка̄салэ̄гын, пуссын ла̄пкаӈ маснутыл масхатэ̄гыт. Акваг ма̄ньщи супыл, ма̄ньщи ня̄рава̄ил нила э̄ква туп о̄лэ̄гыт: Александра Васильевна Анямова, тав Ке̄расколыӈъя̄ па̄вылт о̄лы, Мария Васильевна Тасманова, тав Мирон-Ващка па̄вылт о̄лы о̄с кит ма̄ньщи супыӈ э̄кваг Лэ̄пла па̄вылт о̄лэ̄г – Екатерина Васильевна Тасманова ос тав мане Татьяна Владимировна Анямова. Альбина Александровна Анямова Висумтыт па̄вылт о̄лнэ э̄ква мо̄рсыӈыг ма̄ньщи супыл масхатыглаӈкв патыс, мо̄лты ма̄ниг о̄лме порат акваг ма̄ньщи супыл, сахил, ня̄рал о̄лыс. Во̄р па̄вылт та̄рвитаӈ о̄луӈкв. Ӯльйиввит тотуӈкв э̄ри. Пос а̄тим, ма̄хум иӈ ла̄мпал о̄лэ̄гыт. Пекарня а̄тим, ма̄хум пуссын та̄нки ня̄нь ва̄ре̄гыт. Ла̄пка а̄тим, матыра̄ти ёвтуӈкв тэ̄нут ман мо̄т матыр пормас ма̄гыс рущ па̄вылн ялантаӈкв э̄ри. Са̄пса ӯсын сака мат хо̄са а̄ти кос, 150 ве̄рыста туп лё̄ӈхе лю̄ль. Висумтытныл Вижай мус хӯрум я̄ Висма, Томпусум, Ялпыӈя̄ ӯлтта минуӈкв э̄ри. Таквсытӯя яныг вит порат я̄т ӯлтта ат патаве. Хуньт сутытым утыт ва̄рыглам унсахыт хосат хотсайсыт, яныгнув я̄т мӯстаныл нас хотщаритаве̄сыт. Кос манке̄м та̄рвитаӈ кос яласаӈкв – рущ ма̄хмыт, са̄всыр туристат, яласан ма̄нанылныл тай ат та по̄йтса̄лэ̄гыт. Нё̄рн миннэ лё̄ӈх Висумтыт та̄ра о̄лы. Та̄н щёлыӈ ма̄хум, ӯщлахтым яласэ̄гыт, ё̄р машинал тахата̄лэ̄гыт, тыкати Са̄пса па̄сныл яныг машина ме̄талэ̄гыт, тох та тыглетувле яласэ̄гыт, я̄т ӯлтта сӯлттэ̄гыт, нэ̄мхотталь ат тагапе̄гыт. То̄ват хӯл а̄лыщлым яласэ̄гыт, я̄ хо̄сытыл на̄тылтэ̄гыт. Туп тэ̄лы ащирм порат мощ кӯм е̄мталы, сака ат нэ̄глэ̄гыт. Тэ̄лы яласан лёӈх тӯйтэ хот атняртыглаве, атщё̄пита̄лаве. Ма̄хум матыр тэ̄лал Вижай па̄выл мус, тыкати Хо̄сво̄ль па̄выл мус бураныл яласэ̄гыт. Хосволь па̄вылн акв са̄т сыс кит щёс Са̄псаныл автобус яланты. Вижай па̄выл мощ мо̄лтынув улян ё̄свес, колыт щар пӯссын витыг тотве̄сыт, тот нэ̄мхотьют ат о̄лы, туп хӯл рӯтмалтан утыт йӣльпи па̄выл я̄ ва̄тан ва̄рсыт. Та̄лэтуве̄тыл тот о̄лэ̄гыт, рӯпитэ̄гыт. О̄с акв румао̄йка яласан лё̄х ва̄тат о̄лы, са̄всыр туристат машинат ӯри. То̄ва ямсыкыт тыг мус танки машинанылтыл ёхтэ̄гыт, э̄лаль ла̄глыл миннутыт ла̄глыл минэ̄гыт, Нё̄рытн ялантэ̄гыт, сыстам лылые̄пыл лылтэ̄гыт. Хӯл алыщлан утыт алгаль та минэ̄гыт, ло̄ӈхаль та на̄тылтэ̄гыт, рещинка хапыл я̄т хосыт яласэ̄гыт. Автобус Вижайн ат яланты, туп нас мори яласан рущит а̄рапаптахтэ̄гыт, тыкати са̄ртын таксофон та̄ра матыр миннэ ёр кинсэ̄гыт, ӯс мус тотавет. Ювле о̄с акв тох. Евгений Михайлович Алексеев «ОВСЭРМ» кӯщай хумыг о̄лнэ хум ма̄ньщитн нё̄ты кос, такос са̄всыр нэ̄пак хотальа̄ти хансы. Нас потыр коныпал э̄лаль тэ̄лаг ат мины. Пума ос Та̄лтъя̄ па̄влыг ляпат яныг каръер ва̄рвес, тот рӯпитан ма̄хум аргин ос цинк хилэ̄гыт. Евгений Михайлович та̄н кӯщаянылн пищма хансыс, ань ты па̄влыгт о̄лнэ ма̄ньщит та̄л акв щёс олныл ойтыглавет. Та олнытыл та̄л палытыл тэ̄нут ёвтэ̄гыт: колас, саккар, сыртэп, во̄й, ща̄й. Мощ мо̄лалнув ос а̄гитпыгыт ма̄ньщи пормасыт ва̄рсыт: тучаӈыт, а̄канит, ю̄нтуп тӯщтын утыт, телефон пиннэ хурыгсовыт. Ва̄рум утаныл э̄лаль Екатеринбург ӯсн суссылтаӈкв тотавет, Са̄псаӈ ма̄ньщит вос ва̄вет, вос ка̄салавет, ма̄ньщит иӈ о̄лэ̄гыт. Хо̄ӈхан ты пормасыт мӯстэ̄гыт, э̄рыӈ ёвтуӈкв номылматэ̄гыт, мо̄тынтыг тыналан ма̄гыс ва̄руӈкв патэ̄гыт, ты хосытыл олн сэ̄лэ̄гыт. Тох та ма̄хум о̄лэ̄гыт. Ямсык – ма̄ньщииг ат о̄лнэ са̄всыр мори яласан ма̄хум, Лӯсум ма̄ньщитн тох ла̄вавет.

1083 2014.09.05. Анна АЛГАДЬЕВА

Пил ва̄тнэ а̄гит. Ты тув То̄рмув сэ̄кв тув ва̄рыс. Пилыт молях ат понсэ̄гыт. Ре̄гыӈ тувытт Илья хо̄тал порат ля̄м ва̄таве, ля̄мыӈ со̄ломт ман ля̄мыӈ пирак ва̄ра̄ве. Ты тув тай акваг та ащирмаӈ, морахт ёмщакв понсуӈкв ат ве̄рме̄гыт. Ля̄мыт о̄с ущпыл ётыл понсэ̄гыт. Ам пил ва̄тнэ а̄гит ёт кит хо̄тал сыс кит щёс морах ва̄туӈкв ялсум. Хо̄сан хунь ялсув, па̄выл по̄х ня̄рувт ё̄мыгтасув. Пиланув ёмщаквнув ат кос понсамыт: то̄ва морахт щар ёмщакв толувъямыт, то̄ват мощ иӈ по̄лямнуват кос о̄лсыт, ма̄н тай тох та ва̄тасаске̄нув. Э̄кват ла̄ве̄гыт, пуссын ёмщакв понснэ ӯруӈкв патэ̄в, нэ̄матыр ат а̄рыгты. Тыхурип атыӈ пилквет, са̄в хо̄тпа халт аквты щёс ва̄тасавет. Морах пилкве ка̄сыӈ тув ат тэ̄лы. Хо̄ӈха ва̄туӈкв а̄лыми, тэ̄лы кастыл со̄паслы. Тэ̄лы ащирм хо̄талытт морах самкве исум ща̄йкве ёт маныр атыӈ!

1083 2014.09.05. Тамара МЕРОВА

Ма̄щтыр ма̄хум акванатыглаве̄сыт. Во̄ртур э̄тпос ва̄т нупыл нилыт щислат ва̄т нупыл хо̄тыт щисла мус Октябрьский район Шеркалы па̄вылт «Союз мастеров» нампа съезд о̄лыс. Тув округ янытыл ма̄щтыр нам о̄щнэ соссаӈ ма̄хум акванатыглаве̄сыт. Тамле тэ̄ла округт ань нилыттыг ва̄рыглавес. Щар о̄выл съезд 1995 та̄лт лӯпта э̄тпост о̄лыс. Тав «Югра лылые̄п» ассоциация тармыл «Сорни ёш» намаим акванатхатам хо̄тпатн щё̄пита̄лвес. Ма̄ньщи ла̄тӈыл ла̄вуӈкве ке, тыи «Со̄рни ка̄т». Ты хо̄тпат хантыт ос ма̄ньщит пе̄с щирыл ю̄нтнэ маснутаныл, ка̄тыл ва̄рнэ пормасаныл аквта хольт хультуптаӈкве, мо̄т ма̄хум ханищтаӈкве ла̄вхатсыт. Тувыл Ха̄льӯсн ёхталасыт ос соссаӈ ма̄хум йис та̄гыл ма̄щтырлан наканыл, тамле ва̄рмалит ӯргалан ос та̄наныл э̄лаль тотнэ хо̄тпат ёт ва̄йхатуӈкве, та̄н ётаныл хумус рӯпитаӈкве, манах щёс акванатхатахтыглаӈкве, пуссын ты урыл потыртахтасыт. Ма̄хум нила та̄л сыс акв щёс акванхо̄нтхатахтуӈкве тахсыт. Та юипа̄лт ма̄хум са̄в та̄л акванхо̄нтхатуӈкве ат ве̄рмысыт. Соссаӈ ма̄хум пе̄с йис наканыл ӯргалан ма̄гыс Художественный фондын вуйлуве̄сыт. Ла̄щалт ты ва̄рмалит мо̄тмот ма̄н ла̄кквахарттуве̄сыт, ос ётыл а̄латы ёрувлаве̄сыт. Таи ёмас, 1994 та̄лт Россия янытыл о̄лнэ ма̄хум пе̄с йис наканыл э̄лаль тотнэ щирыл хӯлтнэ ла̄тыӈ хансым о̄лыс. Ты кастыл тувыл са̄ккон щё̄питавес ос пирмайтавес. Аквта торыг Ханты-Мансийск ӯст «Центр народных художественных промыслов и ремесел» рӯпитан кол па̄лыгпусвес. Хантыт ос ма̄ньщит пе̄с йис наканыл ӯргалаӈкве ос э̄лаль тотуӈкве тув паттуве̄сыт. Тувыл «Сорни ёш» нампа ма̄щтыр союз ос ты центр 2002 та̄лт Ханты-Мансийскат китыт съезд ва̄рыгласыт. Ос хӯрмит съезданыл 2006 та̄лт Белоярский ӯст о̄лыс. Ма̄щтырлан хо̄тпат ёт акваг Светлана Кирилловна Гындышева рӯпитас ос та̄н тэ̄ланыл ма̄гыс пуӈктотыс. Соссаӈ ма̄хум са̄всыр ханищтапын во̄выглаве̄сыт. Ма̄ньлат а̄гитпыгыт тот маснут ю̄нтуӈкве, йӣвылт сыресыр пормасыт ёргуӈкве, сак хартуӈкве, са̄с ёт рӯпитаӈкве ханищтаве̄сыт. Та порат сака ёмащакв ма̄щтырлан яныгпа̄ла хо̄тпат та̄рапаттуве̄сыт ос та̄н «Народный мастер РФ» намыл майве̄сыт. Та па̄сыл мо̄т нэ̄ ман хум хо̄тпат пе̄с наканув э̄лаль пӯмщалаӈкве патсаныл ос ла̄щмарт матыр ва̄руӈкве ханьщувласыт. То̄ват о̄с ма̄щтыр хо̄тпаг пе̄рияве̄сыт. Ань тыг нилыт съездын са̄в ма̄ныл о̄лнэ 60 ма̄щтыр хо̄тпатныл 55 хо̄тпа туп Шеркалы па̄вылн ат ёхталасыт. Нижневартовский районныл щар нэ̄мхотьют ёхтуӈкве ат ве̄рмыс. Съезд 1996 та̄лт по̄слум кина суссылтым о̄вылтавес. Тот та пора па̄сныл са̄всыр ханищтапыт ва̄рнэ тэ̄лат акванатым о̄лсыт. То̄ват та̄нкинаныл ма̄ньла̄тыг о̄лнэ̄ныл пораныл манос мо̄таныт ща̄няныл, ане̄кваныл ка̄саласаныл. Тувыл мӯй ма̄хум ёт Октябрьский район кӯщай ва̄ӈын нэ̄ Татьяна Галеева ос Александр Ковешников, ма̄вит ӯргалан ос соссаӈ ма̄хум тэ̄ланыл ёт рӯпитан Департаментныл кӯщай хум пащалахтасы̄г ос э̄рнэ тэ̄лат мӯсхалыг э̄лаль тотнэ щирыл ла̄всы̄г. Людмила Алфёрова, губернатор ва̄ӈын хо̄тпа палт советникыг о̄лнэ нэ̄ ос са̄в ёмас ла̄тыӈ ос ёмащакв рӯпитаӈкве ла̄выс. Светлана Гындышева, ма̄щтыр хо̄тпат кӯщай нэ̄, такви рӯпататэ о̄вылтыт ла̄тыӈ тотыс. Ос э̄лаль рӯпитан ма̄гыс са̄всыр комиссиян хо̄тпат пе̄рияве̄сыт. Таюипа̄лт Татьяна Молданова, исторический наукат кандитатыг о̄лнэ нэ̄, соссаӈ ма̄хум пе̄с маснутыт ю̄нтым о̄вылтыт сака э̄рнэ потыр ва̄рыс. Тав са̄всыр хурит суссылтаме порат мӯй ма̄хумн потыртас, ма̄щтырыг ва̄рнэ манхурип пормасыт «традиционный» щирыл ловиньтавет, ос та̄наныл ва̄рнэ хо̄тпат, со̄ль, мирн ва̄нэ ма̄щтырыг намтуӈкве ро̄ве̄гыт. Ос манхурип пормасыт аквта щирыл ва̄рыглавет кос, ос та̄н туп «сувенирный продукцияг» о̄лэ̄гыт. Наталья Фёдорова, мирн ва̄нэ искусствоведнэ̄ о̄с ла̄тыӈ ке̄тсас. Потре С. К. Гындышеван ловиньтавес. Тав туп ма̄ньщит ос хантыт ханьщувлым пе̄с наканэ о̄вылтыт хансыс. Ка̄сыӈ мир такви щире̄тыл ханьщувлым матыра̄ти ва̄ри, та̄наныл тэ̄лыгтаӈкве ат кос э̄ре̄гыт. Тувыл ма̄щтыр хо̄тпат та̄нки ю̄нтум маснутаныл, ка̄тыл ва̄рим пормасаныл выставкан щё̄пита̄лсаныл. Татьяна Александровна ётылнув ка̄сыӈ пормас ка̄тн вуйластэ ос та̄н о̄вылтаныт я̄нас потыртас, матыра̄ти э̄рнэ ва̄рмалит хӯлтыс. То̄нт то̄ва хо̄тпат ущты торгамтасыт, соссаӈ ма̄хум палт манхурип пормасыт ма̄кыг о̄лсыт, маснут хансанэ ма̄ниг ю̄нтыглаве̄сыт, то̄р ло̄мтанэ са̄кпакыг аквансо̄лтыглаве̄сыт. Пе̄с супыт аквкит хансаӈ то̄рныл ю̄нтыглаве̄сыт. Пормасыт о̄с нё̄тнэ̄г ва̄рыглаве̄сыт. Ань тай ка̄сыӈ хо̄тпа хумус тахмаи, та щирыл маснут ю̄нты, пормас ва̄ри. То̄ва пормасыт мо̄т лӯи ма̄хум о̄щнэ хурипаг ва̄равет. Та̄н ханты ос ма̄ньщи ма̄хманув нупыл ловиньтаӈкве ат э̄регыт. Ань таи ма̄гыс ма̄ньлатыг о̄лнэ ма̄щтыр хо̄тпат выставканыл щё̄питан юипа̄лт Татьяна ос Тимофей Молдановыг, Светлана Гындышева, Людмила Алфёрова пормасыт, маснутыт ёмщакве̄г суссаныл ос та̄наныл мощ ла̄кквауртсаныл. Пе̄с щирыл щё̄питан пормасыт я̄нас пинсаныл, йильпи щирыл ва̄рум пормасыт мо̄т ма̄н атве̄сыт. Та̄н рущ щирыл «сувенирный продукцияг» ла̄вавет. Са̄прани э̄лаль ва̄рнэ порат ма̄щтыр хо̄тпат та̄нки ва̄рмаляныл урыл потыртасыт. Хӯрум хо̄тпа «Народный мастер ХМАО-Югры» нампа нам кисхатнэ ла̄тыӈ ва̄рсыт, тыи Ирина Семёновна Молданова, Тамара Семёновна Мезенцева (Сайнахова) ос Надежда Алексеевна Гришкина. Тувыл сыресыр комиссиян хо̄тпат пе̄риясыт. Грантыт вуянтан порат та̄н о̄с тув рӯпитаӈкве во̄выглавет. Ма̄щтыр ма̄хум палт ань йильпи кӯщай хо̄тпа пе̄риявес. Са̄в хо̄тпат Надежда Молданова ма̄гыс ла̄тыӈ тотсыт. Ань тав ма̄щтыр ма̄хум тэ̄ланыл э̄лаль тотыянэ тах. Светлана Гындышева аквтох таве̄н нё̄туӈкве паты. Мо̄т са̄всыр о̄лыглам ва̄рмалит ос мӯй ма̄хум ла̄вум ла̄тӈаныл ам мо̄т потрыт хансыянум тах.

1083 2014.09.05. Александр ВЬЮТКИН

Интат ма̄щтырыг ва̄рнэ хум. Ты хурит по̄слым хум ка̄таге̄т матыр ва̄руӈкв сака ма̄щтыр. Тав наме Владислав Борисович Белявский. Ам таве Сургут ӯст ма̄щтыр ма̄хум акванатыглахтанэ̄ныл порат ва̄щинтаслум. Ань тав Белоярский районт о̄лы. Владислав та э̄лыпалт Ха̄льӯс район Саранпа̄вылт о̄лыс. Школат ханищтахтын ма̄ныл а̄стуме юипа̄лт Иркутск ӯст пушномеховой техникум «Охотоведзверовод» ма̄т ханищтахтас. Та юипа̄лт Саранпа̄вылт са̄в та̄л ня̄врамыт ханищтахтын колт во̄раян щирыл хум ня̄врамыт ханищтым рӯпитас. Ня̄врамыт ёт во̄раяӈкв ос хӯлпъяӈкв ва̄тихал ялантас. Та коныпал тав ханищтан пыгрищанэ ка̄тыл матыр ва̄руӈкв ханищтасанэ. Са̄всыӈпа̄л ханищтан ма̄хманэ тав са̄всыр ӯйхул интат ва̄руӈкв ханищтасанэ. Интат ва̄руӈкв тав Иркутск ӯст ханищтахтаме порат ханьщувлас. Владислав ще̄мьяӈ тагыл ань Верхнеказымский па̄вылн ва̄нтлыс. Тот тав «Верхнеказымский ЛПУ» ма̄т на̄й харыгтан хумыг рӯпиты. Тав ла̄ви: «Тот рӯпитаӈкв ёмас. Рӯпитан ма̄тэ̄т акв э̄т ӯрнэ юипа̄лт титаххӯрмах хо̄тал юн ӯщлахтым о̄лэ̄гум. Юн о̄лнэ ва̄рмалянум ёмщакв ва̄руӈкв а̄лыме̄гум. Таи ты иӈ ёмас, во̄рын ялапалуӈкв аквписыг ве̄рме̄гум». Владислав ты коныпал пе̄с порат о̄ньщиглам мо̄т са̄всыр пормасыт ма̄щтырлы. Выставкат о̄лыгланэ̄ныл порат тав аквписыг матыр суссылтаӈкв во̄выглаве. Мо̄т ма̄ныл ёхталан ма̄хумн матыр хорамыӈ ут ос хотты интат ва̄руӈкв во̄виньталаве. Владислав Борисович тыныӈ совныл матыр лю̄льсаӈ ва̄руӈкв манос хотсайлан совныл матыр ва̄руӈкв ат пилы. Тав ла̄тӈанэ: «Ва̄нэ щирыл сов ёт рӯпитан порат, нэ̄матыр лю̄ль ат е̄мты. То̄ва ма̄хумн хотлэ̄гпын совыл инта ва̄руӈкв во̄выглавем. Сованыл сунсым, манаре хумус ёмаснуве̄г хотлэ̄гпын ма̄тэ ат на̄ӈкнэ щирыл ва̄руӈкв ро̄ви. Рӯпатам а̄стынэм юипа̄лт амтиротум номсэ̄гум, хумус тох ня̄р ма̄тэ ат на̄ӈкнэ щирыл а̄ртмыс? ! » Ма̄к соссаӈ ма̄хум о̄лупсав щирыл рӯпитан ос ма̄щтырлан ма̄хум ма̄н округув янытыл сака мощща. Таима̄гсыл ты хум ам ёмас янытлан ла̄тӈыл те̄тылум. На̄й-О̄тыранэ̄н вос ӯргалаве. Тав колтаглэ щуниӈыщ, со̄тыӈыщ вос о̄лы.

1083 2014.09.05. Тамара МЕРОВА

Са̄в ня̄врамытн ва̄ӈкве патвесӯв. Во̄ртур э̄тпос о̄выл лов хо̄таланэ̄т Ханты-Мансийскыт са̄всыр ӯсытныл ёхталам хо̄тпат мӯйлысыт. Та̄нкинаныл та̄н «Этноэкспедицияг» ла̄выгласаныл. Ты мӯй хо̄тпат ма̄витув ханищтым сунсыгласаныл, соссаӈ ма̄хум о̄лупсаныл урыл пӯмщалахтасыт ос матыра̄ти та̄рапаттысыт. Тамле ва̄рмаль Москват о̄лнэ «Федеральный детский экологобиологический центр» нампа колныл щё̄пита̄лвес. Ань тот рӯпитан ва̄ӈын кӯщай нэ̄ Клавдия Васильевна Сенчилова таи потыртас: – Ма̄н, атпан нупыл кит хо̄тпа, тыг Россия янытыл нилахойплов са̄всыр ма̄ныл ёхтысӯв. Тыи ва̄т нупыл хо̄т ня̄врам ос хо̄тхойплов ханищтан манос учёный хо̄тпат. Ня̄врамыт Башкирия ос Калмыкия республиканыл, Воронежский, Калужский, Кировский, Московский, Нижегородский, Новосибирский, Оренбургский, Псковский ос Свердловский областитныл, Москва ос Санкт-Петербург ӯсыгныл тыг тотве̄сыт. Тувыл хӯрум этнограф учёныит ос э̄рыгсовыт ханищтан акв хум ма̄н ётув рӯпитэ̄гыт. Ты э̄лыпа̄лт тамле экспедициян ма̄н Алтай ос Коми республикан, Архангельский областин ос Ямал ма̄н ялсӯв. Тот ня̄врамыт ма̄вит, ӯйхулыт, во̄руйит, я̄т манос тӯрыт ханищтым акваг пӯмщалахтасыт. Ань Югра ма̄н щё̄питахтынэ̄в порат, ня̄врамыт ма̄гыс ханищтапув мощ мо̄тщир ва̄рыслӯв, таве «Природа, культура, этнос» намтыслӯв. Тыт ма̄витэ та̄рапаттын коныпал а̄гитпыгыт ханты ос ма̄ньщи ма̄хум пе̄с о̄лупсаныл вос ханищтыяныл, ос ты урыл потыр хансуӈкве патэ̄гыт тах. Ма̄н ань ма̄нки тох тэ̄лав ва̄рнэ̄в ма̄гыс хотща̄гтым о̄лэ̄в. Ханты ос ма̄ньщи ма̄хум урыл ма̄н са̄в ва̄ӈкве патсӯв. Та̄н ка̄сыӈ э̄лумхо̄ласн вос ва̄нувет. Ты ма̄хум пе̄с йис та̄гыл ма̄вит ӯргалым акваг о̄лсыт. Тувыл манырсырман во̄рӯйит, хӯлыт о̄лэ̄гыт, манхурип йӣвыт, лӯптат яныгме̄гыт, ты урыл та̄н сыресыр потрыт ос мо̄йтыт о̄ньще̄гыт. Ӯст о̄лнэ соссаӈ хо̄тпат ёт о̄с ва̄йхатсӯв, та̄н пе̄с пора о̄лупсаныл о̄вылтыт потыртасыт. Са̄всыр тэ̄латыл ма̄нки о̄с пӯмщалахтасӯв – тыи ня̄врам самын патнэ̄тэ порат хоты хо̄тпан ля̄хтхаты, манах ща̄нин о̄ньщаве; ма̄ньлат а̄гитпыгыт нэ̄гхумыг о̄луӈкве манах та̄л порат акванминэ̄гыт. Со̄ль ман а̄ти, а̄гияныл ман пыганыл иӈ ма̄ниг о̄лнэ̄ныл порат акванминнэ̄ныл ма̄гыс та̄н ща̄ньа̄щаныл та̄нки халанылт потыртахтэ̄гыт. Ня̄враманув пе̄с накыт урыл нэ̄пакытт ловиньтасыт, то̄ва ва̄рмалит ёмщакв ат торгамтасаныл, таима̄гыс ань матыра̄ти э̄лаль китыглахтэ̄гыт. Ма̄навн Ханты-Мансийскат сака мӯстыс, тыт соссаӈ хо̄тпат ань тыг мус пе̄с ма̄хманыл о̄лманыл щирыл о̄лэ̄гыт. Та̄н нё̄мса э̄лумхо̄ласыт, ма̄витаныл ёмащакв ӯргалыяныл, та̄нки То̄рманылн агтэ̄гыт ос та̄нки На̄й-О̄тыраныл нупыл пуӈк пинэ̄гыт, та̄наныл ат ёрувлыяныл. Ма̄н номсысӯв, ты ва̄рмалит хосат та̄гыл туп нэ̄пакыт хансым хультсыт. Ань ма̄н ётув рӯпитан ханты ос ма̄ньщи хо̄тпатын ма̄н яныг пӯмащипа ла̄тыӈ ла̄ве̄в. Тыт «Торум Маа», «Природы и Человека», «Нефти и газа» музеитн тотыглавесӯв. Ка̄сыӈ хо̄тал нэ̄пак ловиньтан колын яланта̄лсӯв. Ос тыт рӯпитан хо̄тпат ма̄навн сака ёмщакв нё̄тсыт, са̄всыр э̄рнэ нэ̄пакыт ма̄навн майласыт. Тувыл я̄нас колнакыл щё̄пита̄лвесӯв, ма̄н тыт са̄в пӯмыщ хо̄тпат ёт акванхо̄нтхатыгласӯв. «Лӯима̄ сэ̄рипос» ос «Ханты ясанг» газетаг ва̄рнэ колн щалтсасӯв, тот рӯпитан ма̄хум ёт ва̄йхатсӯв. Ань экспедиция кӯщаит ювле миннэ̄ныл э̄лыпа̄лт конференция ва̄рыгласыт. Ня̄врамыт соссаӈ ма̄хманув палт маныр пе̄с накыт та̄рапаттысыт, таияныл потрыг хассаныл ос ловиньтасаныл. Псков ӯсныл ёхталам а̄гирищиг ты ма̄вт о̄лнэ ӯйрищит о̄вылтыт матыра̄ти тэ̄латыл пӯмщалахтасы̄г ос та̄н уранылт потыр хассы̄г. Лиза Родионова «Торум Маа» музейт Ма̄ янытыл мирыт янытлан ялпыӈ хо̄тал ва̄рнэ̄в порат пуӈк паттатэ̄н акв ӯйрищ исыглас ос хоса тот та ӯнлантас. А̄гирищ ты кос тыглетувле ё̄ӈхыгпа̄лы, ӯйрищ о̄влэ̄т ва̄ӈнэ̄н исыглас ос тувыл ювле пуӈк паттатэ̄н исыс. Мо̄т хо̄тпат нупыл тай уре а̄тим. Ма̄н ла̄всӯв, тыи ёмас ва̄рмаль. Ма̄ниг о̄лмув порат, ма̄н пуӈк а̄танув ловтым порат, улпыл ул вос ня̄хсӯв, ла̄ваве̄в «сыстам номтыӈ пуӈкын ӯйрищ исы тах». Ма̄н тув агтсӯв. Ань Лиза ёт ул аквтох е̄мтыс. Оренбург ӯсныл о̄лнэ пыгрищиг во̄раян тэ̄лат урыл потыр щё̄питасы̄г. Тэ̄натэ̄н тыт Вячеслав Кондин, Прокопий Молданов, Р. Г. Решетникова ос М. К. Волдина нё̄тсыт. Новосибирский областьныл ёхталам а̄гирищиг хӯл алыщлан пормасыт та̄рапаттысанэ̄н. Башкирия ма̄ныл о̄лум хӯрум а̄гит, тувыл Калужский областьныл ёхталам а̄ги ма̄н палтув яныгман йӣвыт урыл потыртасыт. А̄канит манос сыресыр ёнгын утанув урыл башкир а̄гирищ ос тувыл Киров ма̄ныл ёхталам а̄гирищигпыгрыщиг ла̄тыӈ ва̄рсыт. Калмыкия ма̄ныл ёхталам пыг лӯптал ман пилыл пусмалтан ва̄рмаль о̄вылтыт пӯмщалахтас. А̄гирищ ня̄нь ва̄рнэ тэ̄нутыт ханищтам. Московский областьныл о̄лнэ хо̄тпат ка̄тпосанув та̄рапаттысыт. Калуга ӯсныл ёхталам а̄гииг ня̄врам самын патнэ юипа̄лт ва̄рыглам тэ̄ла пӯмщаластэ̄н. Екатеринбург ма̄ныл о̄лнэ хо̄тпат во̄руянув урыл ос соссаӈ ма̄хум пе̄с йис потрыт ос мо̄йтыт о̄вылтыт потыртасыт. Санкт-Петербург ӯсныл ёхталам пыгыг рӯпитан хо̄таланыл хурин по̄слысаныл ос ань хурит суссылтасыт. Пуссын хансум потрыт ма̄навн о̄с пӯмыщ хӯнтлуӈкве о̄лыс. Та сыс а̄гитпыгыт ат торгамтам тэ̄ланыл ва̄нэ хо̄тпатын ёмащакв хӯлтыглаве̄сыт. Ма̄ньщи па̄лыл С. С. Динисламован хӯлтыглаве̄сыт, ханты па̄лыл ос М. К. Волдинан. Ань ня̄врамыт о̄вылтам тэ̄ланыл мӯсхалыг э̄лаль ханищтыяныл тах, тувыл тэ̄лы Москват о̄с акванатыглавет, тот тах ты потраныл мо̄т ма̄ньлат ма̄хум э̄лыпа̄лт ловиньтыяныл. Пуста̄гыл вос о̄лэ̄гыт, номтыӈыщ э̄лаль вос ханищтахтэ̄гыт.

1084 2014.09.19. Тамара МЕРОВА

Пе̄рияп ва̄рмаль та минас. Россия янытыл нэ̄пак та̄ратан ва̄рмаль та оигпас. Ма̄н, Югравт о̄лнэ ма̄хум, Тюменский область губернатор хо̄тпа о̄с пе̄риясӯв. Тувыл то̄ва ма̄т ӯсыӈ манос районный депутатхо̄тпа ос па̄влыӈ кӯщай пе̄риясыт. Округ янытыл 386 со̄тыра 600 э̄лумхо̄лас пе̄рияӈкве ялсыт, тыи туп 35, 22 % пе̄риян ма̄хум. Щар са̄в хо̄тпа Белоярский, Ха̄льӯс, Советский районытт нэ̄пак та̄ратасыт. Мощща ма̄хум Нижневартовск ос Сургут ӯсыгт пе̄рияӈкве ёхталасыт. Юграт о̄лнэ са̄выӈпа̄лэ хо̄тпат Тюменский область губернаторыг Владимир Якушев пе̄риясаныл. Тав ма̄гсылэ 83, 39 % ма̄хум ка̄тпос пинсыт, Михаил Селюков ма̄гыс – 9, 14% ос Владимир Пискайкин – 4, 29%. Ты коныпал Сургутский район Нижнесортымский па̄вылт о̄лнэ ма̄хум па̄выл кӯщаиг Елена Никифорова пе̄риясыт, Белый Яр па̄выл кӯщаиг Пётр Рымарев э̄лаль хультуптавес. Кондинский район Болчары па̄выл кӯщаиг Сергей Мокроусов паты, ос Нижневартовский район Ларьяк па̄выл кӯщаиг Евгений Звезда пе̄риявес. Пе̄рияп ва̄рмалит пуссын ёмщакв минасыт, нэ̄мхо̄т лю̄ль накыт ат ва̄рыглаве̄сыт.

1084 2014.09.19. Людмила ТЕТКИНА

Соссаӈ ма̄хум олннё̄тмилыл та̄ставет. Округ Правительство кӯщаит сапра̄нин акванатхатыгланэ̄ныл порат, акв нэ̄пак пирмайтасыт. Кӯщаит «Социальноэкономическое развитие коренных малочисленных народов Севера ХМАО-Югры» нампа программан йильпи тэ̄ла хассыт. Та̄н ты нэ̄пакн арыг 15 миллион солко̄ви хассыт. Ты олныт федеральный бюджетныл ма̄ньщит, хантыт нё̄тнэ ма̄гсыл ке̄тве̄сыт. Наталья Комарова, губернатор нэ̄, ты урыл ла̄выс: «Ты э̄лыпа̄лт ка̄сыӈ миркол ма̄навн нэ̄пак ке̄тыглас, соссаӈ ма̄хум нё̄тнэ ма̄гсыл манаса̄вит олн та̄нанылн э̄ри, тув хансыгласыт. Ань та̄стым олнытыл ма̄н пе̄с йис ма̄тт о̄лнэ ще̄мьят са̄лыл ос э̄рнэ пормасыл ёвтуӈкве нё̄тыянӯв. Ты ма̄т о̄лнэ соссаӈ ма̄хум ва̄рмаляныл ма̄н акваг та̄рапаттым о̄ньщиянӯв». Ты коныпал ты олныл университетыт, колледжит манос училищат ма̄ньщи ос ханты а̄гитпыгыт ханищтахтан ма̄гсыл ойтхатуӈкве нё̄тавет. Олныл та ма̄ньщит ос хантыт мивет, хотьют та̄нки ойтхатуӈкве ат ве̄рме̄гыт. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1084 2014.09.19. Тамара МЕРОВА

Мир пусмалтан ёмас пӯльница. Мо̄лал ля̄ххал тотнэ хо̄тпат ёт Нягань ӯсн ялмумт ма̄н яныг пӯльницан тотыглавесӯв. Тот Сергей Михайлович Догадин яныг ле̄ккарыг рӯпиты, ма̄нав кон ӯрыстэ. Тувыл мощ потыртамув юипа̄лт, тав ма̄нав пӯльница сунсыглаӈкве во̄выстэ. Ты та̄л ва̄ти хо̄тал э̄тпост Нягань ӯс о̄выл пӯльница рӯпитаӈкве о̄вылтахтам па̄сныл налыман та̄лэ то̄влы. Ос ювле хультум во̄ртур э̄тпос са̄тыт щислат йильпи яныг пӯльница лов та̄лэ о̄лыс. Ты э̄лыпа̄лыт ӯс янытыл о̄лнэ 29 са̄всыр пусмалтан ма̄нь колыт пуссын ла̄кква рӯпитасыт, тувыл та̄н аквантотве̄сыт. То̄нт ле̄ккарыт са̄всыр а̄гмыт пусмалтан ма̄гыс ищхӣпыӈ э̄рнэ утыл ёвтве̄сыт. Ты коныпал сака та̄рвит а̄гм о̄щнэ хо̄тпат ос сакватахтам, а̄гмыӈмосыӈ хо̄тпат тот ёмас ха̄ӈхылтапыл, я̄нас лифтыл ва̄рве̄сыт. Пӯльница такви я̄нас на̄йпос ва̄рнэ станция о̄ньщи, на̄йпос лапхарыгмаптынэ̄тэ сыс, тав такви на̄й тах пе̄ламты. Операция ва̄рнэ колнакыт, лабораторият сыстам лылые̄пыл лылтнэ ма̄гыс э̄рнэ утыл тотве̄сыт. Вит сыстамтан утыл о̄с ӯнттуве̄сыт. Сергей Догадин ла̄выс: «Ма̄н ле̄ккаранув 48 са̄всыр а̄гмыт пусмалтым рӯпитэ̄гыт. Нягань ӯст, Ха̄льӯс, Октябрьский районыгт о̄лнэ ма̄хум о̄с тыт пусмалтыянӯв. Тувыл «сосудистая хирургия» а̄гмыт ма̄н палтув сака ёмщакве̄г пусмалтавет. Тот э̄лумхо̄лас ке̄лп та̄ранэ уральтавет, сыресыр лю̄ль утыт та̄рапаттавет. Тамле а̄гмыт ле̄ккаранувн ва̄нэ̄г о̄ньщавет, таима̄гыс тыг округ янытыл ма̄хум о̄с ёхталэ̄гыт. Ань тыг мус онкозаболевание ос ке̄лп а̄гмыт щирыл ле̄ккарыт ат со̄тыра арыгкем операция ва̄рсыт. Са̄в операцият сым а̄гм пусмалтан щирыл о̄лсыт. Пусмалтахтын ма̄гыс ма̄хумн олн ойтуӈкве ат э̄ри. Ты яныг пӯльницат 468 э̄лумхо̄лас ма̄гыс койкат щё̄питым о̄лэ̄гыт. Мо̄т ма̄хум тыт о̄с уральтавет ос тувыл юн тэ̄рпил пусмалтахтуӈкве ла̄вавет. Пӯльницавт нэ̄ хо̄тпат ос хум хо̄тпат о̄щнэ а̄гманыл пусмалтан ва̄рмаль ка̄сыӈе̄мт са̄вмалтаве. Ле̄ккарыт ищхӣпыӈ утыл рӯпитаӈкве э̄лаль ханищтахтэ̄гыт. Паль, нёл ос тур (рущ щирыл лор) пусмалтан ле̄ккарыт, сам пусмалтан ле̄ккарыт пуссын о̄с номтыӈыщ рӯпитэ̄гыт. То̄ва ле̄ккаранув «нейрохирургия» намаим йильпи ва̄рмальн ханищтаӈкв патве̄сыт. Моще̄рт ма̄н пӯльницавт тамле а̄гмыт пусмалтаӈкве о̄с патавет, ань матыра̄ти э̄рнэ ищхӣпыӈ утыт ёвтавет ос ёмащакв щё̄питавет». Мо̄т тэ̄лат урыл Сергей Михайлович тох потыртас, та̄н пӯльницанылт 1 со̄тыра 376 э̄лумхо̄лас рӯпиты. Тыгыл 176 ле̄ккарыт, та̄н халанылт аквхойплов хо̄тпа медицина наукат учёный нам о̄ньще̄гыт. 544 хо̄тпа ма̄нь ле̄ккарыг о̄лэ̄гыт. 389 медикхо̄тпа тот рӯпиты. Та̄н пуссын хо̄та̄ти медицина ва̄рмалитын ханищтаве̄сыт. Ле̄ккарыт са̄всыр конференциян о̄с яланта̄лэ̄гыт, матыр а̄гмыт пусмалтан щирыл йильпи накыт та̄рапаттэ̄гыт. Мо̄т хо̄н ма̄н о̄с во̄виньта̄лавет, тот ханищтавет. Мо̄лалнув Россия Президентув № 597 хӯлтнэ ла̄тыӈ ке̄тыс, ле̄ккарыт рӯпатаныл ма̄гыс ёмас олныл вос ойтавет. Ань пӯльницат рӯпитан ма̄хум са̄внув олн сэ̄луӈкве патсыт. Яныг ле̄ккар ла̄внэ̄тэ щирыл, ань Нягань ӯс пӯльницат ле̄ккарыт 90 со̄тыра са̄вит солко̄вил ойтавет, яныг медсестраг рӯпитан хо̄тпат 46 со̄тыра са̄вит солко̄ви ос ма̄нь медсестраг о̄лнэ хо̄тпат 32 со̄тыра са̄вит солко̄ви сэ̄лэ̄гыт. Пӯльницанылт са̄всыр рӯпитан хо̄тпа товылхаты. Хо̄т ле̄ккар ат ке то̄вылхаты, та̄нки кинсэ̄гыт манос та̄нки хо̄тпаныл э̄лаль ханищтахтуӈкве ке̄тыглыяныл. Ма̄н округт о̄лнэ ма̄хум пуста̄гыл о̄луӈкве ла̄виянӯв. Ос матыр а̄гм о̄ньще̄гыт ке, хосан ул вос хартыяныл, та̄ра вос пусмалтахтэ̄гыт. Пус ка̄т, пус ла̄гыл!

1084 2014.09.19. Светлана РОМБАНДЕЕВА

Ма̄ янытыл о̄лнэ мир ма̄гыс хансым ма̄к потыр. Ка̄сыӈ ма̄т са̄всыр э̄рнэ сакконыт хансым о̄лэ̄гыт. Та̄н халанылт кит тамле сакконыг хансым о̄лэ̄г: Ма̄ янытыл о̄лнэ мир ма̄гыс хансым ма̄к потыр (Всеобщая декларация прав человека) ос Ма̄ янытыл о̄лнэ мирыт Акванпотыртахтам Мирколаныл соссаӈ мирыт урыл хансум ма̄к потре (Декларация Организации Объединенных наций о правах коренных народов). Я̄тил ма̄ньщи ма̄хум, на̄н ань ты сакконыг ма̄ньщи ла̄тӈыл ловиньтэ̄н. Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) Генеральный Ассамблея резолюция нэ̄паке 217 А (III) ва̄т са̄грапнал э̄тпос 10 хо̄талэ̄т 1948 та̄лт пирмайтавес. Ва̄нэ̄в щирыл, ань э̄лумхо̄лас янытлаӈкве э̄ри, ка̄сыӈ мир та̄нти о̄лнэ ма̄нанылт пуссын аквте̄м вос о̄лэ̄гыт, сэ̄ръёрыг вос о̄лэ̄гыт, халанылт вос э̄руптахтэ̄гыт, ма̄ янытыл хо̄нтлан нак нэ̄мхуньт ул вос е̄мты; ос ва̄нэ̄в щирыл, хунь э̄лумхо̄лас ат янытлаве, ӯльнаг яныгми, тувыл тав са̄в мир порслуӈкве ве̄рми, тох о̄луӈкве ат ро̄ви, хо̄тпа ань ёмас ма̄т, ёмас ма̄хум ляпат вос о̄лы, такви номтэ щирыл потыртаӈкве вос ве̄рми, пилыщма ул вос ва̄г, нуса ул вос тоты, э̄лы хо̄тал нупыл вос сунсы, матыр та̄рвит порат но̄х хотталь вос вораты; ос ва̄нэ̄в щирыл, ань ка̄сыӈ хо̄тпа саккон тотнэ ма̄хумн вос ӯргалаве, вос вуянтаве, саккон щирыл тармыл ат те патаве, тав атиӈк матыр о̄выл ва̄руӈкве ве̄рми, таве̄н лю̄ль ва̄рум хо̄тпа такви сутыл сутытаӈкве ве̄рмитэ; ос ва̄нэ̄в щирыл, ма̄ янытыл о̄лнэ мирытн нё̄туӈкве э̄ри, халанылт та̄н юртыӈыщ вос о̄лэ̄гыт; ос ва̄нэ̄в щирыл, Ма̄ янытыл о̄лнэ Акванпотыртахтам мирыт Устав нэ̄пак ёт ка̄сащасыт, та̄н агтэ̄гыт, ань э̄лумхо̄лас сакконанэ̄н ӯргалаве, янытлаве, кос нэ̄, кос хум хо̄тпа пуссын аквте̄мыт, ма̄хум пилта̄л о̄лэ̄гыт, ты ма̄гсыл та̄н о̄лнэ ма̄наныл ма̄гыс ущпылнэ̄г са̄в ёмас тэ̄ла ва̄руӈкве патэ̄гыт, ка̄сыӈ хо̄таланыл ёмасыг вос о̄лы; ос ва̄нэ̄в щирыл, ань ка̄сыӈ государство Ма̄ янытыл о̄лнэ мирыт Акванпотыртахтам Миркол Генеральный Ассамблеятэн нё̄туӈкве ла̄выс, сакконыт ос мо̄т э̄рнэ тэ̄лат ва̄ӈкве ос янытлаӈкве ла̄выс; ос ва̄нэ̄в щирыл, ты саккон ма̄ янытыл о̄лнэ ма̄хумн пирмайтавес, ка̄сыӈ ма̄т тав ва̄ве, тувыл ань тав щире̄т о̄луӈкве кӯстыр, Генеральный Ассамблея, ань ты Ма̄ янытыл о̄лнэ мир ма̄гыс хансум ма̄к потре, ма̄к сакконэ, мирн ты мыгтэ, мирн ты потыртытэ, ань ты щирыл пуссын вос о̄лэ̄гыт, ка̄сыӈ хо̄тпа, ка̄сыӈ мир ос рӯпитан колыт ты ма̄к потыр вос ва̄ганыл, акваг ляпат вос о̄ньщияныл, таве акваг номим вос о̄ньщияныл, сакконанэ вос янытлыяныл, са̄всыр мирыт акванхо̄нтыглахтынэ̄ныл порат халанылт юртыӈыщ вос о̄лэ̄гыт, аквъёт мӯсхал щирыл вос рӯпитэ̄гыт, Ма̄ янытыл о̄лнэ мирыт Акванпотыртахтам Мирколаныл палт хансым о̄лы ман а̄ти, манос нас хотты ма̄ нупыл хансым о̄лы, пуссын юртыӈыщ ос ща̄гтым вос о̄лэ̄гыт. 1ыл статья Ма̄ янытыл о̄лнэ мир пуссын аквхольт самын патэ̄гыт, аквте̄м вос о̄лэ̄гыт, аквте̄м нё̄тмил вос кинсэ̄гыт. Та̄н пуӈк о̄ньще̄гыт, номсуӈкве ве̄рме̄гыт, э̄сырма о̄ньще̄гыт, халанылт ягпыгыӈыщяга̄гиӈыщ вос о̄лэ̄гыт. 2ыт статья Ты саккон щирыл, ань ма̄ янытыл о̄лнэ ка̄сыӈ хо̄тпа хумус таӈхи о̄луӈкве, тох вос о̄лы, нэ̄матарыл ул вос пилы, тав ань хоты ма̄ныл о̄лы, алпи осэ манхурипа, нэ̄ хо̄тпа тав манос хум хо̄тпа, хоты ла̄тӈыл потырты, То̄рум нупыл сунсы ман а̄ти, политика тэ̄ла палт хотты ма̄т рӯпиты ман а̄ти, нуса ман щёлыӈ, пуссын ты нупыл нэ̄мхотьют ул вос сунсы. Ма̄хум нэ̄мхотьютн ул вос лю̄камтавет, кос хоты ма̄т вос рӯпитэ̄гыт, кос хоты ма̄т вос о̄лэ̄гыт, о̄лнэ ма̄нанылт кӯщаиг та̄нти о̄лэ̄гыт манос мо̄т хо̄н ма̄ныл о̄лнэ ма̄хум та̄н палтаныл кӯщайлахтэ̄гыт, нэ̄мхотьютн ул вос тораставет. 3ит статья О̄луӈкве ла̄вим ка̄сыӈ хо̄тпа вос о̄лы, роттыг вос о̄лы, нэ̄мхотьютн лю̄ль ла̄тӈыл ул вос ла̄ваве. 4ыт статья Нэ̄мхотты хо̄тпа нэ̄мхо̄т ё̄рва̄гыл ёл ул вос пуваве, пилата̄лым ул вос о̄ньщаве; э̄лумхо̄лас тыналан ва̄рмаль ма̄ янытыл нэ̄мхо̄т а̄тим, нэ̄мхотьют нэ̄мхотталь ул вос тыналаве. 5ыт статья Нэ̄мхотты хо̄тпа ул вос ра̄таве, алнэ па̄сыл ул вос о̄ньщаве, э̄лумхо̄лас хуритэ витыг ул вос тотаве. 6ыт статья Кос хоты ма̄т о̄лнэ хо̄тпа такви ма̄тэ̄т кӯщаиг вос о̄лы, э̄рнэ нэ̄пакыт вос о̄ньщи. 7ыт статья Саккон э̄лыпа̄лт пуссын аквхурипат, кос хоты ма̄ныл, кос хоты мирныл о̄лнэ ма̄хум пуссын аквте̄м вос вуянтавет. Нэ̄мхотьют ул вос лю̄камтаве манос намталаве, ос тувыл тамле пилыщмаӈ тэ̄ла ва̄руӈкве хо̄тпа нэ̄мхотьютн ё̄рва̄гыл ул вос кащилтаве, хо̄тпа лю̄ль матыр ва̄ри те, тав ты саккон щирыл ат о̄лы, тыт хансым ла̄тыӈ ат хӯнтлы. 8ит статья Ка̄сыӈ хо̄тпа сутытахтаме юипа̄лт, тав сустетэ̄т, ань тэ̄латэ ёмащакв ат хӯнтлувес, Конституция ос мо̄т сакконыт щирыл ат нё̄твес, тав э̄лаль нё̄тмил вос кинсы, такви о̄лнэ ма̄тэ̄т ма̄к саккон щирыл вос нё̄таве. 9ит статья Нэ̄мхотты хо̄тпа нас тох, нас хо̄тпатн ёлпувуӈкве ат ве̄рмаве манос такви о̄лнэ ма̄тэ̄ныл по̄хання̄влуӈкве ат ве̄рмаве. 10ит статья Хо̄тпа насска̄сыг ёлпуввес те, э̄рнэ нэ̄паканэ уральтавет манос мо̄т хотты хо̄тпа ва̄рум о̄выл тав нупылэ ла̄ваве, тав нё̄тмил молях вос кинсы, сутытахтан порат тэ̄латэ саккон ва̄нэ ма̄хумн вос ловиньтаве. 11ит статья 1. Э̄лумхо̄лас иӈ ат те сутытавес, тав нуплэ ат ро̄ви ла̄вуӈкве, ань о̄выл тав та ва̄рыс. Тав туп саккон щирыл вос сутытаве, таве вуянтан хо̄тпа тот о̄с вос о̄лы, тэ̄латэ мӯсхал щирыл вос сунсыглаве. 2. Хо̄тпа матыр о̄выл ва̄рапас те, ос та порат та ма̄т о̄лнэ саккон манос мирхал саккон щирыл ты ва̄рмале лю̄ль ва̄рнэ тэ̄лаг ат ловиньтавес. Тувыл ань та ва̄рапам ва̄рмале ма̄гыс ты э̄лыпа̄лт ма̄хум сака ат те нюсве̄сыт, тав ань о̄с аквтох сака та̄кыщ ул вос сутытаве. 12ит статья Хо̄тпа о̄лупсатэ урыл, ще̄мьятэ урыл нэ̄мхотьют мори ул вос потырты, ул вос пӯмщалахты, тав о̄лнэ колэ̄н во̄вта̄л манос тав та̄лэ нэ̄мхотьют ул вос щалты, тав пищманэ ос э̄рнэ нэ̄паканэ ловиньтаӈкве ат ро̄ви. Тамле нак е̄мтапан порат ка̄сыӈ хо̄тпа таквина̄тэ вос вуянтытэ, саккон тотнэ ма̄хум палт нё̄тмил вос во̄ви. 13ит статья 1. Хо̄тпа такви о̄лнэ ма̄тэ янытыл кос хо̄т яласаӈкве ве̄рми, хо̄т о̄луӈкве ка̄сащи, тот вос о̄лы. 2. Хо̄тпа мо̄т хо̄н ма̄т яласаӈкве ве̄рми, тувыл такви ма̄тэ̄н ювле вос ёхты. 14ит статья 1. Ка̄сыӈ э̄лумхо̄лас такви ма̄тэ̄т лю̄камтаве те, тав о̄лнэ ма̄гсыл мо̄т ма̄н во̄вхатуӈкве ве̄рми, ань тув вос та̄ртаве ос такви ма̄хманэ̄ныл тот хот вос тӯйтаве. 2. Хо̄тпа мо̄т ма̄н та порат та̄ртаве, хунь тав политика щирыл о̄выл ва̄рыс, ос мо̄т матыр пилыщмаӈ о̄выл ва̄рапас те, тав мо̄т государстван ат та̄ртаве, Ма̄ янытыл о̄лнэ мирыт Акванпотыртахтам Миркол рӯпататэ щирыл э̄лумхо̄лас торыг ва̄рапан лю̄ль ва̄рмаль нэ̄мхотьютн тармыл ат патаве. 15ит статья 1. Ка̄сыӈ хо̄тпа гражданство вос о̄ньщи. 2. Нэ̄мхотты хо̄тпа гражданстватэ ё̄рва̄гыл хотвиӈкве ат ве̄рмаве, манос гражданстватэ мо̄т ма̄н пе̄нтуӈкве номылматы те, тав нэ̄мхотьютн ёлпувуӈкве ат ве̄рмаве, пе̄нтхатаӈкве таӈхи те, тав тэ̄латэ. 16ит статья 1. Ты саккон щирыл, ма̄ньлат хо̄тпа нёлоловхуйплов та̄лэ то̄влынэ̄тэ порат яныг хо̄тпаг та е̄мты, о̄лупсатэ̄т ма̄к тэ̄ланэ тав ань такви ва̄руӈкве ве̄рмиянэ. Хо̄тпа кос хоты мирныл о̄лы, То̄рум нупыл сунсы ман а̄ти, ка̄сыӈ такви ще̄мья о̄ньщуӈкве ве̄рми. Нэ̄гхумыг акванминнэтэ̄н порат, аквъёт о̄лнэтэ̄н сыс манос киттыгминнэтэ̄н порат э̄рнэ нэ̄паканыл пуссын акв саккон щирыл щё̄питавет. 2. Нэ̄гхумыг акванминнэ нэ̄паке̄н та порат хансаве, хунь тэ̄н акванминуӈкве аквъёт ка̄саще̄г. 3. Ка̄сыӈ государстват ще̄мья ты ма̄к тэ̄ла, ще̄мьят матыр та̄рвит е̄мтапан порат тав саккон щирыл тармылпатаве, вуянтаве. 17ит статья 1. Ка̄сыӈ хо̄тпа матыр о̄лтул о̄ньщуӈкве ве̄рми, такте̄т манос ляпа ма̄хманэ ёт. 2. Матыр о̄лтуланэ тав ва̄та̄лэ нэ̄мхотьютн хотвиӈкве ат ве̄рмавет. 18ит статья Ка̄сыӈ хо̄тпа такви номтэ̄т вос о̄лы, матыр ва̄руӈкве тахмаи, вос ва̄ри, тав кӯщай. То̄рум нупыл сунсы ман а̄ти, хумус сунсы, манарын агты, такте̄т манос хотты ма̄хум ёт, То̄рум нупыл юн по̄йкщи манос пуп колн яланты, тав тэ̄латэ. 19ит статья Хо̄тпа матыр номт о̄ньщи те, тав ты урыл мирн потыртаӈкве ве̄рми, ты номтэ ма̄гыс тав нэ̄мхотьютн нэ̄матарыл ул вос ла̄ваве, э̄лы хо̄н ма̄хумн матыр пищма ке̄туӈкве ве̄рми, пищмал ювле вос ке̄таве. 20ыт статья 1. Ка̄сыӈ хо̄тпа хотты ма̄хум ёт акванатхатыгла̄луӈкве ве̄рми, са̄всыр ассоциацият ос мо̄т акванатхатахтыглан тэ̄ла палт ялантаӈкве ве̄рми. 2. Нэ̄мхотьют тув ё̄рва̄гыл ул вос харттаве. 21ыл статья 1. Ка̄сыӈ э̄лумхо̄лас такви государстватэт кӯщайлахтуӈкве ве̄рми, ма̄к яныг тэ̄лат ва̄руӈкве ве̄рми, такви кӯщаиг ат те о̄лы, тув мирн пе̄риим ма̄хум хосыт хотты ма̄к тэ̄латэ вос ва̄раве. 2. Ка̄сыӈ такви о̄лнэ ма̄тэ̄т яныг кӯщаиг о̄луӈкве ве̄рми, государстватэ ма̄к яныг тэ̄лат палт рӯпитаӈкве ве̄рми. 3. Ма̄хум о̄лнэ ма̄нанылт та̄нти номт вос о̄ньще̄гыт, хумус номсэ̄гыт, ла̄вуӈкве вос ве̄рме̄гыт, кӯщай та̄нти вос пе̄рие̄гыт, тамле пе̄рияпыт вос ва̄рыгла̄лавет, ань хо̄тпа хотьютэ пе̄риянэ̄тэ порат ма̄хум вос сунсэ̄гыт манос сытамыӈыщ вос пе̄рии. 22ыт статья Э̄лумхо̄лас такви о̄лнэ ма̄тэ̄т кӯщаянэ̄н вос нё̄таве, ёмащакв вос о̄лы, вос ханищтахты, рӯпата олныл вос ойтаве, хо̄та̄ти вос ё̄мыгты, вос ӯщлахты, матыр та̄рвит порат мирхал саккон щирыл вос нё̄таве. 23ит статья 1. Ка̄сыӈ хо̄тпа рӯпата вос о̄ньщи, хо̄т тахмаи, тот вос рӯпиты, рӯпитан ма̄тэ рӯпитанте̄м вос о̄лы, сыстамыг вос о̄лы, хо̄тпа ул вос по̄ляве, по̄хан ул вос ня̄влаве. 2. Хо̄тпа рӯпитанэ̄тэ ма̄гыс олныл вос ойтаве, нэ̄мхотьют ул вос лю̄камтаве, ул вос ла̄пала̄лаве. 3. Рӯпитан ка̄сыӈ хо̄тпа рӯпататэ ёмащакв вос ойтаве, тав мӯсхал щирыл о̄луӈкве вос ве̄рми, ще̄мьятэ̄н нё̄туӈкве вос ве̄рми, олнанэ ат те то̄вылхатэ̄гыт, матыр нё̄тмилыл вос миве. 4. Ка̄сыӈ хо̄тпа рӯпататэ вуянтан ма̄гыс профессиональный союз ва̄руӈкве ве̄рми манос нас тув вос хасхаты. 24ыт статья Ка̄сыӈ хо̄тпа ӯщлахтуӈкве ве̄рми, рӯпитанэ̄тэ порат ӯщлахтан ма̄гыс ос матыр хал вос о̄лы, отпускын миннэ̄тэ порат олныл вос ойтаве. 25ыт статья 1. Ка̄сыӈ хо̄тпа о̄лупсатэ̄т хотальа̄ти э̄рнэ матыр пуссын вос о̄ньщи, тэ̄нут, маснут, о̄лнэ кол, пусмалтахтуӈкве вос ве̄рми, та̄рвитыӈ порат нё̄тмилыл вос нё̄тумта̄лаве, таквина̄тэ̄н ос ще̄мьятэ̄н тав нё̄туӈкве вос ве̄рми, рӯпататэ̄ныл по̄хан ке̄таве те, олнло̄мтыл вос ойтаве, а̄гмыӈыг е̄мты те, вос пусмалтаве, яныгпа̄лаг е̄мтме порат ос пенсия олныл вос ойтаве, мо̄т матыр та̄рвитыӈ ва̄рмаль е̄мтапан порат, о̄с вос нё̄таве. 2. Ня̄врам самынпаттын ва̄рмаль ка̄сыӈ ма̄т сака ёмащакв нё̄таве ос вуянтаве, ома ос ня̄врам янытлаве̄г. Ня̄врамыт ща̄няныла̄щаныл акванхасхатасыт ман а̄ти, пуссын аквте̄м нё̄тавет. 26ыт статья 1. Ка̄сыӈ хо̄тпа школат олн ойтта̄л вос ханищтахты. Ка̄сыӈ хо̄тпан о̄выл классыт а̄стлуӈкве э̄ри. Рӯпитан ма̄гыс ханищтахтуӈкве ка̄сыӈ вос ве̄рми. Высший образование ма̄гыс хотьют ве̄рми ханищтахтуӈкве, вос ханищтахты. 2. Э̄лумхо̄лас ханищтахтан ва̄рмале таве̄н ёмас па̄рыс вос тоты, тав номтыӈыг вос е̄мты, сакконыт вос ва̄ганэ. Ань То̄рум нупыл ка̄сыӈ такви щире̄т сунсы, пуссын аквхурипат хунь, тав ка̄сыӈ мир янытлаӈкве вос ханищтахты, хо̄тпа ёт потыртаӈкве вос ха̄сы, Ма̄ янытыл о̄лнэ мирыт Акванпотыртахтам Мирколн вос нё̄ты, ань ма̄ янытыл о̄лнэ мир хо̄нтта̄л вос о̄лы. 3. Ща̄ньа̄щит ня̄враманыл ма̄гыс ханищтахтан кол та̄нти вос пе̄рие̄гыт. 27ыт статья 1. Культура тэ̄ланэ ва̄рыглан ма̄н ка̄сыӈ хо̄тпа ялантаӈкве ве̄рми, тот вос ӯщлахты, вос сунсы, матыр вос ханищты, йильпи тэ̄ла о̄лыглан порат тав о̄с матыр ка̄тын вос патты, йильпи нэ̄пакыл ман мо̄т матарыл вос миве. 2. Хо̄тпа нэ̄пак хансыс те, ка̄тыл хури по̄слыс ман мо̄т яныг научный рӯпата ва̄рыс те, тав ва̄рум рӯпататэ мо̄т хо̄тпан хот ул вос виве, саккон щирыл тав ӯргалаве. 28ит статья Тыт хансым саккон щирыл ка̄сыӈ хо̄тпа вос ӯргалаве, о̄лте̄т ань матыр та̄рвит ва̄рмаль е̄мтапи манос мирхал тэ̄ланэ палт матыр китыглахтан ла̄тыӈ о̄ньщи те, саккон тотнэ хо̄тпатн вос нё̄таве. 29ит статья 1. Э̄лумхо̄лас мир халт о̄лы, тот яныгми, ханищтахты, нэ̄гхумыг е̄мты, ма̄хум халт тав роттыг, саккон щирыл вос о̄лы. 2. Тох о̄лыглы, ань э̄лумхо̄лас матыр ва̄руӈкве тахмаи, ос саккон щирыл тох ат ро̄ви. Тав хунь кос таве̄н лю̄ль ва̄рнэ ма̄гыс ат та̄ртаве, тав ань мо̄т хо̄тпан лю̄ль матыр ул вос ва̄рапи, таи ма̄гыс мощ ёлпо̄илттаве, тэ̄латэ ва̄руӈкв ат та̄ртаве. Ты саккон таи ма̄гыс хасвес, ань ма̄ янытыл о̄лнэ мирыт халанылт юртыӈыщ вос о̄лэ̄гыт, ляпа ма̄хманыл вос э̄руптыяныл, сакконыт вос янытлыяныл. Пуссын пуста̄гыл вос о̄лэ̄гыт. 3. Ма̄ янытыл о̄лнэ ма̄хум о̄лупсаныл ань Ма̄ янытыл о̄лнэ мирыт Акванпотыртахтам Мирколанылт хансум сакконыл со̄ви ул вос мины. 30ыт статья Тыт хансым сакконыт нэ̄мхотьютн мо̄т щирыл ул вос ва̄рапавет, нэ̄мхотьют ул вос ла̄ви, ань та̄н пуссын тав ма̄гсылэ манос хотты я̄нас ма̄ ма̄гыс хасве̄сыт. Ты сакконыт ма̄ янытыл о̄лнэ ка̄сыӈ хо̄тпа ма̄гыс хасве̄сыт. Хо̄тпа та̄н щиранылт ат те о̄лы, ты сакконыт таве̄н тах нё̄туӈкве ат патэ̄гыт.

1084 2014.09.19. Светлана РОМБАНДЕЕВА

Ма̄ янытыл о̄лнэ мирыт Акванпотыртахтам Миркол соссаӈ мирыт урыл хансум ма̄к потре. ООН Генеральный Ассамблея ты резолюция нэ̄паке 61/295 сӯкыр э̄тпос 13 хо̄талэ̄т 2007 та̄лт пирмайтавес. Генеральный Ассамблея, ань Ма̄ янытыл о̄лнэ мирыт Акванпотыртахтам Мирколаныл (Организация Объединенных Наций) Устав нэ̄паке щирыл ос ка̄сыӈ государство тох о̄луӈкве ла̄тыӈ ла̄внэ̄ныл ма̄гыс, ка̄сащи, ань ма̄ янытыл о̄лнэ соссаӈ мирыт мо̄т мирыт ёт пуссын аквте̄м вос о̄лэ̄гыт, ос ка̄сыӈ мир мощ такви хурипатэ, тав ань ты урыл ла̄вуӈкве ве̄рми, манхурипаг о̄лы, тох вос ва̄ве, вос янытлаве, аквтох та урыл ка̄сащи, ань ка̄сыӈ мир такви матыр пӯмыщ о̄ньщи, о̄лупсатэ мирн суссылты, мо̄т мирыт ёт культураныл та маныр аквантэ̄лыглэ̄гыт, пуссын акв мир хольт та о̄лэ̄гыт, э̄лаль та ёт о̄с ка̄сащи, ань то̄ванакт хӯлыгла̄лэ̄в, э̄рттам акв хотты мир ёмаснуве, манос акв хотты хо̄тпа такви мире щирыл, То̄рум нупыл суснэ тэ̄латэ манос культуратэ щирыл ёмаснуве, тамле номт мирн ос ма̄вн лю̄ль тоты, ма̄хум халанылт халмалтахтэ̄гыт, наука щирыл тамле номт пе̄сыг е̄мтыс, сакконт ты урыл хансым ат о̄лы, тамле ва̄рмаль ма̄гсыл ма̄хум савалэ̄гыт, тох о̄луӈкве ат ро̄ви, ка̄сащи, ань соссаӈ ма̄хум роттыг вос о̄лэ̄гыт, нэ̄мхотьютн ул вос лю̄камтавет, ул вос тораставет, ты ма̄гыс сыме ща̄рги, ань пе̄с йис порат соссаӈ мирыт тораставе̄сыт, таима̄гыс я̄нас ма̄н ня̄влуве̄сыт, ра̄тыглаве̄сыт, о̄лнэ ма̄наныл хотвуйла̄лве̄сыт, ма̄нанылт ман ма̄наныл тӣвырт маныр о̄лы, пуссын мо̄т ма̄хум нупыл та патэ̄гыт, тох та̄н хумус э̄лаль о̄лэ̄гыт, мӯсхал сакконт о̄лсыт те, та̄н ёмащакв о̄лнувыт, ва̄им, ма̄ янытыл о̄лнэ соссаӈ мирыт янытлаӈкве э̄регыт, политика ос олн сэ̄лнэ тэ̄ланыл ва̄рнэ̄ныл порат ёмас ла̄тӈыл ла̄вуӈкве э̄ре̄гыт, та̄нти культураныл ос пе̄с йис о̄лупсаныл щирыл вос о̄лэ̄гыт, та̄нти ма̄хманыл о̄лум ма̄нанылт вос о̄лэ̄гыт, ва̄им, соссаӈ ма̄хум ос та̄н о̄лупсаныл янытлаӈкве э̄ри, ты урыл ань ма̄ янытыл о̄лнэ государстват са̄всыр э̄рнэ нэ̄паканылт хансым о̄лы, соссаӈ мирыт тэ̄ланыл та̄н акваннё̄тхатым ва̄рияныл, ос ва̄им, ань соссаӈ мирыт нэ̄мхотьютн ул вос тораставет, ул вос саватавет, таима̄гыс та̄н акваннё̄тхатэ̄гыт, политика, культура ос олн сэ̄лнэ тэ̄ланыл пуссын аквъёт ва̄рияныл, тав ва̄гтэ, ань ка̄сыӈ соссаӈ мир мо̄т соссаӈ ма̄хум о̄лупсаныл урыл ва̄ӈкв патэ̄гыт те, та̄рвитыӈ тэ̄ланыл та̄рапаттыяныл те, то̄нт ка̄сыӈ мир такви культуратэ, пе̄с йис ва̄рмалянэ но̄хво̄ртуптаӈкве патыянэ, ка̄сыӈ такви ве̄рмынте̄м ханищтахтуӈкве паты, ва̄им, мо̄т мирыт соссаӈ ма̄хум культураныл ос пе̄с йис о̄лупсаныл янытлаӈкве патыяныл те, та̄н тах ща̄гтым э̄лаль ханищтахтуӈкве патэ̄гыт, о̄лнэ ма̄в тах ущпылнэг та̄кыщ ӯргалаӈкве патыяныл, таи ва̄гтэ, ань ма̄ янытыл о̄лнэ мирыт ёмащакв о̄лэ̄гыт, олн сэ̄лнэ тэ̄ланыл, э̄лаль ханищтахтан тэ̄ланыл мӯсхал щирыл мины, ма̄хум ос мирыт та̄нти халанылт э̄руптахтым ос юртыӈыщ о̄лэ̄гыт, соссаӈ мирыт о̄с тох о̄лнэ̄ныл ма̄гыс ань сака яныг рӯпата ва̄раве, та̄н о̄лнэ ма̄наныл таима̄гыс ты вуянтаве, тыи ос ва̄нэ щирыл о̄ньщитэ, ань ма̄к сакконыт щирыл, соссаӈ мирыт ще̄мьянылт ос общинанылт пуссын акваннё̄тхатым вос о̄лэ̄гыт, ня̄враманыл та̄нти вос янмалтыяныл, ханищтыяныл, таи тыг те ловиньтаӈкве, ань соссаӈ мирыт то̄ва сакконаныл манос мо̄т э̄рнэ нэ̄паканыл мирхал сакконыт палт хансым о̄лэ̄гыт, таима̄гыс та̄н мо̄т хо̄н ма̄т о̄лнэ саккон тотнэ хо̄тпатн янытлавет, вуянтавет, та̄н тэ̄ланыл мирхал тэ̄лаг ла̄вавет, тыи о̄с тыг те ловиньтаӈкве, ка̄сыӈ соссаӈ ма̄хум хансум са̄всыр э̄рнэ нэ̄паканыл ма̄ янытыл о̄лнэ соссаӈ мирытн сака яныг па̄рыс тотэ̄гыт, государстваныл халанылт ты коныпал юртыӈыщ о̄луӈкве патэ̄гыт, ва̄им, ань Ма̄ янытыл о̄лнэ мирыт Акванпотыртахтам Миркол Уставе, олн сэ̄лнэ ос культура Мирхал саккон, гражданский ос политический тэ̄лат Мирхал саккон, Венский декларация ос Программа действий пуссын аквъёт та̄н ла̄ве̄гыт, ань ка̄сыӈ соссаӈ мир такви я̄нас мирыг о̄лы, политика, олн сэ̄лнэ манос культура тэ̄ланыл та̄н та̄нти ва̄руӈкве ве̄рмияныл, э̄лаль хумус о̄луӈкве, та̄н та̄нти вос номсэ̄гыт, номитэ, тыт хансым нэ̄мхотты потыр соссаӈ мирытн лю̄ль ул вос ва̄ри, мирхал сакконыт щирыл та̄н о̄с тармылпатавет, тав щире̄т, ань ма̄ янытыл о̄лнэ соссаӈ мирыт ос тыт хансым сакконыт ва̄ӈкве ос янытлаӈкве патавет те, то̄нт тах государстват халанылт юртыӈыщ о̄луӈкве патэ̄гыт, ка̄сыӈ ма̄т о̄лнэ соссаӈ ма̄хум кӯщаянылн нё̄туӈкве патавет, нэ̄мхотьют ла̄палахтуӈкве ат паты, ма̄хум лю̄камтаӈкве ат патавет, нё̄тнэ щирыл о̄лы, ань ка̄сыӈ государство такви соссаӈ ма̄хманэ̄н вос нё̄ты, саккон щирыл манхурип нё̄тмил та̄нанылн э̄ри ва̄руӈкве, вос нё̄тумтыянэ, мирхал тэ̄ланыл ва̄руӈкве о̄с вос нё̄тэ̄гыт, соссаӈ ма̄хум матыр сакконыт ат те ва̄ганыл, вос хӯлтыяныл, ва̄нэ̄тэ щирыл, ань Ма̄ янытыл о̄лнэ мирыт Акванпотыртахтам Миркол соссаӈ мирытн нё̄туӈкве ла̄выс, та̄наныл тармылпатуӈкве вуйхатас, номсыте̄т, ань тыт хансым сакконыт соссаӈ мирн сака ёмащакв нё̄тэ̄гыт, та̄н хосытанылт ка̄сыӈ мир ва̄ве, саккон тотнэ хо̄тпатн та̄н тармылпатавет, Ма̄ янытыл о̄лнэ мирыт Акванпотыртахтам Мирколн ты саккон нэ̄пак сака яныг парыс тоты, ва̄нэ̄тэ щирыл ла̄вегыт, соссаӈ ма̄хум ань ма̄ янытыл о̄лнэ мо̄т мирыт хольт вос о̄лэ̄гыт, ма̄к яныг сакконыт манос мирхал сакконыт о̄с аквтох та̄н ма̄гсыланыл рӯпитэ̄гыт, та̄н нэ̄мхотьютн ул вос лю̄камтавет, мо̄т ма̄хум хольт о̄с вос ханищтахтэ̄гыт, со̄тыӈыщ, щуниӈыщ вос о̄лэ̄гыт, ва̄нэ̄тэ щирыл, ка̄сыӈ ма̄т ос ка̄сыӈ государстват соссаӈ ма̄хум о̄лупсаныл аквхурип а̄ти, ка̄сыӈ мир ань о̄лупсатэ мощ мо̄тхурипа, тав о̄лнэ ма̄тэ ос мо̄т ма̄ а̄ти аквхурипа, пе̄с йис о̄лупсатэ ос культуратэ о̄с мо̄тхурипа, Генеральный Ассамблея сохтыл лю̄лим ла̄ви, ань тыгыл э̄лаль Ма̄ янытыл о̄лнэ мирыт Акванпотыртахтам Мирколаныл соссаӈ мирыт ма̄гыс хансум саккон нэ̄паке ма̄ янытыл о̄лнэ мирытн вос ва̄ве, вос янытлаве, тав щире̄тыл ма̄хум вос о̄лэ̄гыт, аквъёт вос рӯпитэ̄гыт, халанылт вос э̄руптахтэ̄гыт: 1ыл статья Соссаӈ мирыт, акв хо̄тпа манос са̄в хо̄тпа пуссын аквъёт, сакконыт щирыл тэ̄ланыл та̄нти ва̄руӈкве ве̄рмияныл, та̄наныл вуянтан сакконыт Ма̄ янытыл о̄лнэ мирыт Акванпотыртахтам Мирколаныл Устав нэ̄пакт, Ма̄ янытыл о̄лнэ мир ма̄гыс хансым ма̄к потрыт ос мирхал сакконыт палт хансым о̄лэ̄гыт. 2ыт статья Соссаӈ хо̄тпа, соссаӈ мирыт ос ма̄ янытыл о̄лнэ мо̄т мирыт пуссын аквхурипат, хотьют хо̄т о̄луӈкве таӈхи, вос о̄лы, матыр ва̄руӈкве тахмаи те, вос ва̄ри, нэ̄мхотьютн ул вос лю̄камтаве, ул вос ла̄ваве, наӈ ань та манос ты мирныл о̄лэ̄гын. 3ит статья Соссаӈ мирыт таӈхе̄гыт те, та̄нти о̄лупсанылт вос о̄лэ̄гыт. Саккон щирыл, та̄н политика, олн сэ̄лнэ тэ̄ла, о̄лупсаныл ос культураныл та̄нанылн э̄рнэ щирыл хансуӈкве ве̄рме̄гыт, саккон нэ̄пакыт пирмайтаӈкве ос та̄нти о̄лупсал о̄луӈкве ве̄рме̄гыт. 4ыт статья Соссаӈ мирыт та̄нти тэ̄ланыл саккон щирыл ва̄рияныл те, та̄н о̄лнэ ма̄наныл я̄нас ма̄г ловиньтаӈкве ро̄ви (рущ щирыл ла̄ваве – автономия), то̄нт са̄всыр тэ̄ланыл та̄н та̄нти ва̄рияныл, ма̄нанылт сэ̄лнэ олныт хоталь ойтуӈкве э̄ри, та̄н та̄нти ойтэ̄гыт, ос мо̄т са̄всыр тэ̄лат хумус ва̄руӈкве э̄ри, та̄н та̄нти номсахтэ̄гыт. 5ыт статья Соссаӈ мирыт ка̄саще̄гыт те, та̄н о̄лупсаныл, культураныл, политика ос олн сэ̄лнэ тэ̄ланыл саккон нэ̄пакыг хансуӈкве ве̄рмияныл, ты коныпал та̄н та̄нти государстваныл тэ̄ланэ – политика, олн сэ̄лнэ ос культура тэ̄ланэ палт пуӈк тотнэ хо̄тпанылн нё̄туӈкве ве̄рме̄гыт. 6ыт статья Ка̄сыӈ соссаӈ хо̄тпа гражданство вос о̄ньщи. 7ыт статья 1. Соссаӈ хо̄тпа о̄луӈкве ла̄ввес те, вос о̄лы, алпитэ, пуӈке, ка̄танэла̄гланэ пуста̄гыл вос о̄лэ̄гыт, тав палтэ нэ̄мхотьют ул вос пе̄рхаты, нэ̄мхотьютн ул вос пащралаве, ул вос тораставе. 2. Хо̄нтта̄л о̄лупсат, хунь хо̄тпа нэ̄мхотьютн ат новаве, роттыг о̄лы, соссаӈ ма̄хум о̄с та̄нтирот о̄луӈкве ве̄рме̄гыт, та̄н я̄нас мирыг вос ловиньтавет, нэ̄мхотты мирн ул вос тораставет, ул вос саватавет, ня̄враманыл хот ул вос вивет, мо̄т ма̄н ул вос тотавет. 8ит статья 1. Соссаӈ мирыт ос та̄н нупланыл хансым ма̄хум та̄нти о̄лнэ ма̄наныл мо̄т ма̄н ё̄рва̄гыл ул вос тотавет, пе̄с йис о̄лупсаныл ос культураныл ул вос лю̄камтаве. 2. Ты накыт е̄мталан порат, ка̄сыӈ государства такви соссаӈ ма̄хманэ та̄ра тармылпатыянэ ос вуянтыянэ: а) хунь та̄н тораставет, ла̄ккваня̄влавет манос э̄рнэ пормасаныл хотвиӈкве таӈхавет; b) о̄лнэ ма̄наныл хотвиӈкве таӈхаве, ма̄наныл по̄хан ня̄влавет; c) хунь та̄н ё̄рва̄гыл мо̄т ма̄н ке̄тавет, са̄всыр щирыл саватавет, сакконаныл ва̄ӈкве ат таӈхавет; d) та̄н намыл мо̄т ма̄н ё̄рва̄гыл тотавет, ань мо̄т мир халн вос тэ̄лыглэ̄гыт, тувыл хотталь вос со̄йме̄гыт; e) хунь ма̄хум та̄н уранылт лю̄льсаӈ потыртэ̄гыт, полщил ва̄равет, са̄в хо̄тпа акванатэ̄гыт, таитн ань та̄н о̄с вос лю̄камтавет. 9ит статья Соссаӈ хо̄тпа хо̄т о̄луӈкве таӈхи, тот вос о̄лы, такви ма̄хманэ ёт манос мо̄т мирыӈ ма̄т о̄лы, тав тэ̄латэ. Ты ма̄гыс тав нэ̄мхотьютн лю̄ль ла̄тӈыл ул вос ла̄ваве, ул вос лю̄камтаве. 10ит статья Соссаӈ ма̄хум о̄лнэ ма̄наныл мо̄т ма̄н ё̄рва̄гыл ул вос ке̄тавет. Та̄н ка̄саще̄гыт те хотталь минуӈкве, ты урыл нэ̄пак вос хансэ̄гыт, тот пуссын вос хасхатэ̄гыт. Мо̄т ма̄н ва̄нтлынэ̄ныл ма̄гыс олныл вос ойтавет, ос ювле минуӈкве ро̄ви те, ювле вос минэ̄гыт. 11ит статья 1. Ка̄сыӈ соссаӈ мир таӈхи те, такви о̄лупсал вос о̄лы, такви культуратэ но̄х вос во̄рмалтытэ, пе̄с йис ва̄рмалянэ мирн вос суссылтыянэ. Пе̄с коланыл, пе̄с о̄лтуланыл, ка̄тыл ва̄рнэ са̄всыр пормасаныл, ка̄тыл по̄слын хурияныл, та маныр пуссын вос янытлыяныл. 2. Ка̄сыӈ ма̄т саккон тотнэ ма̄хум са̄всыр тэ̄лат хосыт соссаӈ миранылн нё̄тэ̄гыт, та̄н культураныл, ханищтахтан тэ̄ланыл ос То̄рум нупыл суснэ ва̄рмаляныл но̄хво̄рмалтан ма̄гыс та̄н пуссын аквъёт э̄рнэ нэ̄пакыт хансэ̄гыт, ос о̄лнэ ма̄наныл хосат хот те вуйве̄сыт, ты урыл о̄с са̄в рӯпитэ̄гыт, э̄рнэ нэ̄пакыт акванатэ̄гыт, ань пе̄с йис ма̄наныл ювле вос мивет. 12ит статья 1. Саккон щирыл, соссаӈ мирыт та̄нти пе̄с о̄лупсаныл ос То̄рум нупыл суснэ ва̄рмаляныл мирн суссылтаӈкве ве̄рмияныл, но̄хялтуптаӈкве, ма̄ньлат ма̄хум ханищтаӈкве ос э̄лаль тотуӈкве ве̄рмияныл; ялпыӈ ма̄наныл по̄х хо̄тпатн суссылтаӈкве ат те таи, ул вос суссылтыяныл, ӯргалым вос о̄ньщияныл; а̄тимыг е̄мтум ма̄хманыл та̄нти щиранылт ёл вос щё̄питыяныл, о̄лум ма̄нанылн вос тотыяныл. 2. Та̄нанылн э̄рнэ пормасаныл манос На̄й-О̄тыраныл хо̄т э̄лынт о̄лэ̄гыт те, кӯщаянылн ка̄тынпаттуӈкве вос нё̄тавет, ос хотты хо̄тпа хо̄т э̄лы хо̄н ма̄т ёл те щё̄питавес, таве юв тотуӈкве вос нё̄тавет. Пуссын ты урыл э̄рнэ нэ̄пакыт та̄н аквъёт хассыт. 13ит статья 1. Соссаӈ мирыт та̄нти пе̄с о̄лупсаныл, ла̄тӈаныл, хансум нэ̄паканыл ос э̄рганыл, мо̄йтаныл но̄х вос ялтуптыяныл, яныгман ня̄врамытн вос хӯлтыяныл, общинаныл, о̄лнэ ма̄наныл ос самын патум ня̄враманыл та̄нти намыл вос намтыяныл, ӯргалым вос о̄ньщияныл. 2. Ка̄сыӈ ма̄т саккон тотнэ хо̄тпат соссаӈ ма̄хманыл вуянтан сакконыт акваг уральтым о̄ньщияныл, соссаӈ мирыт та̄нти сакконаныл вос ва̄ганыл, хотты ма̄хум ёт халмалтахтынэ̄ныл ос воритотнэ̄ныл порат потыртаӈкве вос ха̄сэ̄гыт, вуянтахтуӈкве вос ве̄рме̄гыт, кӯщаянылн вос хӯлавет, вос торгамтавет. 14ит статья 1. Соссаӈ мирыт ня̄враманыл та̄нти ла̄тӈыл ханищтан школат ман институтт ӯнттуӈкве ве̄рме̄гыт, тот та̄нти вос кӯщайлахтэ̄гыт, ня̄враманыл та̄нти ва̄нэ щирыл вос ханищтыяныл. 2. Соссаӈ ня̄врамыт хо̄та̄ти вос ханищтахтэ̄гыт, ань соссаӈыг о̄лнэ̄ныл ма̄гыс ханищтахтан ма̄нанылт ул вос лю̄камтавет. 3. О̄лнэ ма̄нанылт школа а̄тим те, ня̄врамыт ханищтахтан ма̄н вос тотавет, тот мӯсхал щирыл вос о̄ньщавет, ща̄нь ла̄тӈаныл ханищтаӈкве, та̄нти халанылт ща̄нь ла̄тӈыл потыртаӈкве вос ве̄рме̄гыт, ос матыр та̄рвитыӈ порат, китыглахтан ла̄тыӈ са̄в о̄лы те, соссаӈ ма̄хум ос кӯщаит пуссын аквъёт вос номсэ̄гыт, маныр хумус ва̄руӈкве, ня̄врамыт мӯсхал щирыл ханищтахтуӈкве вос ве̄рме̄гыт. 15ит статья 1. Соссаӈ ма̄хум та̄нти о̄лнэ ма̄нанылт мӯсхал щирыл вос о̄лэ̄гыт, пе̄с йис о̄лупсанылт вос о̄лэ̄гыт, о̄лупсаныл ань ханищтахтан ос ля̄ххал тотнэ ва̄рмаль хосыт вос на̄ӈки. 2. Ка̄сыӈ ма̄т рӯпитан кӯщаит соссаӈ ма̄хманыл мо̄т мирытныл тармыл вос патыяныл, та̄н ань соссаӈыг о̄лнэ̄ныл ма̄гыс ул вос тораставет, ул вос намталавет, ос соссаӈ ма̄хманыл ёт вос номсэ̄гыт, маныр э̄ри ва̄руӈкве, ань ма̄хум пуссын аквъёт юртыӈыщ вос о̄лэ̄гыт. 16ит статья 1. Соссаӈ мирыт ля̄ххал тотнэ я̄нас колыт ва̄руӈкве ве̄рме̄гыт, та̄нти ла̄тӈанылт вос потыртэ̄гыт, вос хансэ̄гыт, э̄лы хо̄н ма̄хум ля̄ххалыт вос хӯнтлэ̄гыт, вос ловиньтэ̄гыт, нэ̄мхотьютн нэ̄матарыл ул вос ла̄вавет.

1084 2014.09.19. Светлана РОМБАНДЕЕВА

Ня̄врамыт яныг кӯщайн уральтаве̄сыт. Ня̄врамыт ханищтахтан ва̄рмаляныл о̄вылтахтан кастыл округ Дума кӯщай Борис Сергеевич Хохряков Ханты-Мансийск ӯст ос Шапша па̄вылт о̄лнэ са̄в ня̄врамыӈ колта̄глыт палт ялыс. Уральтасанэ, ань ня̄врамыт хумус о̄лэ̄гыт, ханищтахтан ма̄гыс э̄рнэ матыр пуссын о̄ньще̄гыт ман а̄ти. Шапша па̄вылт Шумиловыт колта̄гыл палт ялыс. Тот хӯрум ня̄врам яныгми – 8, 10 ос 12 та̄л яныт ня̄врамыт. Нэ̄гхумыг яныг пыге̄н 21 та̄лэ, тав ань а̄ще̄н нё̄ты. Ня̄врамытн Борис Сергеевич ханищтахтан ма̄гыс э̄рнэ пормасыт ос школан ялантан кощтюм парат мӯйлуптас. Ханты-Мансийск ӯст ос Трифонов колта̄гыл палт ялыс. Тот о̄с хӯрум ня̄врам о̄лы – 4, 6 ос 8 та̄л. Та̄нанылн тав о̄с са̄всыр ёнгилыт, ханищтахтан ма̄гыс э̄рнэ пормасыт мис. Ка̄сыӈ ще̄мья ёт потрамас, китыглахтас, матыр та̄рвит о̄ньще̄гыт ман а̄ти. Борис Сергеевич ла̄выс: «Ма̄н о̄лнэ ма̄вт кӯщаянув ня̄врамыт урыл акваг номсысыт. «Единая Россия» партия та̄рвитыӈыщ о̄лнэ ще̄мьятн о̄с акваг нё̄ты. Ка̄сыӈ та̄л тав «Помоги детям собраться в школу» нампа акция ва̄рыглы. Тот рӯпитан ма̄хум са̄в ня̄врамыӈ ос нусаг о̄лнэ ще̄мьятын, савалап ня̄врамытын ос мо̄т са̄в хо̄тпатын нё̄тэ̄гыт. Ня̄врамыт ань школат ханищтахтуӈкве та о̄вылтахтасыт. Та̄нанылн ам са̄в ёмас, сымыӈ ла̄тыӈ ла̄ве̄гум, пуссын пуста̄гыл вос о̄лэ̄гыт, со̄тыӈыщ вос яныгме̄гыт». Округ Думаныл ке̄тым ля̄ххал ма̄ньщи ла̄тӈыг Светлана ХОЗУМОВАН толмащлавес.

1084 2014.09.19. Валентина УЗЕЛЬ

Кӯщаюв э̄лы хо̄н ма̄т соссаӈ мир урыл потыртаӈкв паты. Округ кӯщай о̄выл ва̄ӈын хо̄тпаг Геннадий Бухтин рӯпиты. Соссаӈ ма̄хумн нё̄тнэ са̄всыр программат щирыл кӯщаиӈ хо̄тпат хумус рӯпитэ̄гыт, тав пуссын ты ва̄рмалит уральтым о̄ньщиянэ. Ты э̄тпос тав э̄лы хо̄н ма̄н мины, ООН (Организация Объединённых наций) яныг мирколт ма̄н округув, тыт о̄лнэ соссаӈ мирыт урыл тав потыртаӈкв паты. Маныр урыл тот потырты, тав ма̄н газетав ма̄гыс такви хансум потре мистэ. Ма̄ янытыл о̄лнэ соссаӈ мирыт 2009 та̄л па̄сныл иӈ лов та̄л э̄лаль янытлаӈкв патавет. Ань округувт о̄лнэ мощщаг хультум ос ма̄нь мирыг ловиньтахтын ханты, ма̄ньщи ос ё̄рн ма̄хумн нё̄тнэ ма̄гыс организационный комитет рӯпиты, кӯщаиг тот округ губернатор Наталья Комарова олы. Та̄н са̄всыр рӯпата ва̄ре̄гыт. Хус та̄л сыс соссаӈ ма̄хум ма̄гыс 56 са̄всыр хӯлтнэ нэ̄пакыт пирмайтаве̄сыт, 13 са̄ккон округт о̄лнэ ма̄ньщи, ханты ос ё̄рн ма̄хум ма̄гыс хансым о̄лэ̄гыт. Концепция устойчивого развития коренных малочисленных народов нампа щар ма̄к яныг нэ̄пак щирыл та̄н 2011 та̄л па̄сныл рӯпитэ̄гыт. Округув янытыл са̄в соссаӈ хо̄тпа, ты са̄выӈпа̄лэ хантыт, та̄нти пе̄с йис та̄гыл о̄лнэ ма̄наныл та̄нти нупыланыл хассаныл, ань 475 тамле ма̄ о̄лы. Та ма̄ тармыл о̄лнэ ханты хо̄тпат ма̄во̄й но̄хвинэ ма̄хум рӯпитаӈкв тув та̄ртыяныл те, олныл ойтавет. Таит ос ханты мир рӯпатал мыганыл, ня̄враманыл э̄лаль ханищтахтын ма̄гыс олныл нё̄тыяныл. Са̄в хо̄тпа община ва̄ре̄гыт. Аквъёт рӯпитан ма̄хум хӯл алыщлэ̄гыт, пил ва̄тэ̄гыт, во̄рае̄гыт, олн та̄нти ма̄гсыланыл сэ̄лэ̄гыт. Са̄внув хо̄тпа са̄лы о̄ньщуӈкв ка̄сащасыт, ань округувт 40 со̄тыра арыгтем са̄лы ӯравет. Мир пусмалтан рӯпата тыт о̄с ёмащакв ва̄раве. Соссаӈ ма̄хманув ле̄ккарытн акваг уральтавет. Ма̄нь па̄влытт, во̄рт о̄лнэ мир хотьютаныл а̄гмын сака илямтаве те, тав товлыӈха̄пыл ман вертолётыл пӯльницан тотаве. 2013 та̄л сыс 1 со̄тыра 858 щёс тамле санзадание о̄лыс. Ка̄сыӈ тув ос плавполиниклиника ят хосыт яласы, ма̄нь па̄влытн хоиглым ле̄ккарыт па̄влыӈ мир пусмалтэ̄гыт. Са̄в ФАП ӯнттувес. Ань округувт кол ӯнттын ма̄гыс са̄всыр программмат хансым о̄лэ̄гыт. Хотьют такви кол ӯнттуӈкв те таӈхи, тав нё̄таве. Мо̄т ма̄хум ос субсидияолныл мивет. 2009-2013 та̄лыт сыс тув 4 млрд солко̄ви холтвес. Соссаӈ ма̄хум та̄нти ща̄нь ла̄тӈаныл э̄лаль вос тотыяныл, ня̄врамыт ща̄нь ла̄тӈаныл вос ханищтыяныл, ты рӯпата ма̄гыс о̄с са̄в олн холтаве. Округувт 9 садикытт ма̄нь ня̄врамыт ос 22 школатт яныгнув ня̄врамыт та̄нти ханты ман ма̄ньщи ла̄тӈаныл ханищтыяныл. Школа юипа̄лт э̄лаль ханищтахтуӈкв ка̄сащан ня̄врамыт о̄с нё̄тавет, ханищтан нэ̄пакыт, маснут ёвтнэ ма̄гыс олныл мивет. Ущты ханищтахтуӈкв о̄вылтахтам ня̄врамыт 40 со̄тыра солко̄вил маснут ёвтнэ ма̄гыс мивет, а̄стланэ̄ныл э̄лыпа̄лт 50 со̄тыра солко̄вил мивет. Тыглетувле ялнэ лё̄ӈханыл олныл о̄с ойтавет. Юио̄выл хӯрум та̄л сыс 2 со̄тыра 166 ханищтахтан ня̄врам тох нё̄твес. Ты 2014 та̄лныл йильпи рӯпата о̄вылтавес, ань соссаӈ мир ма̄гыс хансым са̄кконыт пуссын ханты ос ма̄ньщи ла̄тӈын тах толмащлавет. Ма̄ янытыл о̄лнэ мирыт ма̄гыс хансым тит ма̄к яныг са̄кконыг на̄н ань ты газета о̄выл ло̄псанэ̄т ловиньтаӈкв ве̄рмегы̄н. Тувыл иӈ акв яныг ва̄рмаль о̄лы – округувт о̄лнэ са̄в соссаӈ хо̄тпа рӯпата ат о̄ньще̄гыт. Ос ты ва̄рмаль ань акваг та̄рапаттым о̄ньщаве, ты хосыт ань туп 204 хо̄тпа рӯпата та̄л хультыс. Ос ты э̄лыпа̄л 2009 та̄лт 2 со̄тыра 944 хо̄тпа рӯпата та̄л о̄лыс. Ты потыр ма̄ньщи ла̄тӈыл Валентина Хозумова хансыстэ.

1084 2014.09.19. Людмила ТЕТКИНА

Ле̄ккарыт палт ялуӈкве ул ёрувлэ̄н. Ма̄н округувт мир пусмалтан департаментыт кӯщаиг Александр Филимонов рӯпиты. Тав ля̄ххал тотнэ ма̄хум ёт хо̄нтхатыглас, мир пусмалтан ва̄рмаль урыл потыртас. Ань ка̄сыӈ хо̄тпа интернет щирыл ле̄ккар палт хасхатуӈкве ве̄рми. Тувыл таи лю̄ль, ты хосыт мо̄т ма̄хум ле̄ккар палт талон виӈкве щар ат ве̄рме̄гыт. Кӯщай хум ла̄выс, ты щирыл та̄н ёмас ва̄руӈкве кос тахсыт, э̄лумхо̄лас а̄лпыл но̄х ул вос ква̄лыс, хо̄тал палыт очередит ул вос лю̄лис. Ань мо̄т щирыл е̄мтыс, то̄ва ма̄хум, хотьют интернет щирыл ле̄ккар палт хасхатуӈкве а̄лымасыт, пӯльницан ат ёхталэ̄гыт. Ле̄ккар компьютер щирыл хасхатам э̄лумхо̄лас такос ӯриты, мо̄т а̄гмыӈ хо̄тпат ат пирмайтыянэ, ат пусмалтыянэ. Тыи ма̄гсыл ань мир пусмалтан департаментыт ма̄хум номсахтэ̄гыт, хумус ва̄руӈкве э̄ри, са̄внув а̄гмыӈ хо̄тпат ле̄ккар палт очередь та̄л вос ёхталасыт. Округув янытыл рӯпитан пӯльницатт ле̄ккар то̄вылхаты ман а̄ти, ты урыл ля̄ххал тотнэ ма̄хум о̄с пӯмщалахтасыт. Александр Филимонов ос таи ла̄выс, ань ле̄ккар хо̄тпат рӯпата олнаныл ва̄тихал но̄хнё̄тавет, ма̄нь па̄вылквен миннэ ле̄ккарыт о̄лнэ колыл мивет ос са̄всыр нё̄тмилолныл ойтавет. Тыи ма̄гсыл ма̄ньлат хо̄тпат ле̄ккарыг рупитаӈкве минэ̄гыт. Ма̄нь ня̄врам пусмалтан ле̄ккар ат то̄вылхаты. Ань то̄ва яныг ӯсытт о̄лнэ ща̄нита̄щит ня̄враманыл ёт ле̄ккар палт са̄в щё̄с ӯнлэ̄гыт. Ма̄нь па̄вылквен ань тэ̄рпи хумус тотаве ос пуссын тэ̄рпи тот о̄лы ман а̄ти, та урыл тав ла̄выс, ань ма̄нь па̄вылкветт о̄лнэ мир тэ̄рпил тотавет, тэ̄рпи та̄л нэ̄мхотьют ат хӯльты. Ка̄сыӈ пӯльницат ле̄ккархо̄тпа такви хансы, манхурип тэ̄рпи тав пусмалтан ма̄хманэ̄н э̄ре̄гыт, тувыл ты нэ̄паке щирыл пӯльница э̄рнэ тэ̄рпил ке̄таве. Ос акв ва̄рмаль осннэ̄глыс, ты туи порат Нижневартовский районт са̄в хо̄тпа корь нампа а̄гмыл е̄мталасыт. Ха̄льӯс район Ягрим па̄вылт ос туляремияа̄гм о̄лыс. Ань тамле а̄гмыл ма̄хум ул вос ха̄хтавет, ты кастыл ня̄врамыт ма̄ньтагыл прививкал пуссын вос тӯщтавет. Ос ка̄сыӈ хо̄тпа такви пуста̄гыл о̄лнэ̄тэ урыл ул вос ёрувлытэ ос ле̄ккар палт ва̄тихалнув вос яланты. Округувт о̄с акв тэ̄ла рӯпиты, ка̄сыӈ э̄лумхо̄лас пӯльницан уральтахтуӈкве ёхталаӈкве ве̄рми, рущ ла̄тӈыл «всеобщий диспансеризацияг» ла̄ваве. Э̄лумхо̄лас та̄рвитыӈ а̄гме са̄ртыннув ке хо̄нтаве, ёмащакв пусмалтаӈкве ве̄рмаве. Тыи ма̄гсыл туп пӯльницан ва̄тихал ялуӈкве э̄ри.

1084 2014.09.19. Людмила ТЕТКИНА

Кол ӯнттын ва̄рмаль урыл потыр. Кондинский район Леуши па̄вылт миркол кӯщаиг Владимир Зольколин о̄лы. Ты кӯщай хум ёт хо̄нтхатыгламум порат кол ӯнттын ва̄рмаль урыл китыгласлум. Тав таи потыртас: – Леуши па̄вылт районный программа щирыл колыт ӯнттавет. Ма̄н мирколув нупыл иӈ хӯрум па̄выл: Листвинечный, Ягодный ос Дальний ловиньтахтэ̄гыт. Леуши ос Лиственичный па̄влыг щар акв по̄хат ӯнлэ̄г, тот о̄лнэ ще̄мьят акв очединин хасве̄сыт, пуссын аквъёт 59 ще̄мья. Ягодный ос Дальний па̄влыгт 30 ще̄мья о̄лнэ кол ӯре̄гыт. 2014 та̄лт олныл щар ат та̄стыглавесӯв, тыи ма̄гсыл йильпи колыт ат ӯнттуве̄сыт. 2013 та̄л олныл майлувесӯв, та та̄л сыс Леушит онтолов ще̄мья йильпи колн ва̄нтласыт. Ань са̄кконыт щирыл ма̄н ты очеридин хансым ще̄мьят колыл ёвтыянӯв. О̄влэ̄т па̄влыт кол ӯнттын ма̄гсыл ма̄ хо̄нтэ̄в, межевание ос са̄в мо̄т нэ̄пакыт щё̄питэ̄в. Тувыл кол ӯнттын компаният ёт аукцион щирыл рӯпитэ̄в. Тот но̄хпатум компаният па̄вылт кол ӯнттуӈкве о̄вылтахтэ̄гыт. Та̄н о̄влэ̄т та̄нки ӯнттэ̄гыт, хунь а̄стлыяныл, ма̄навн тыналэ̄гыт. 2013 та̄лт Леуши па̄вылт са̄т кол акв компания ос кит кол мо̄т компания ӯнттысы̄г. Районувт акв квадратный метра 44-46 со̄тыра солко̄ви тынэ о̄лыс. Ты тынэ щирыл ма̄н колыт ты ёвтсанӯв. Акв компания са̄т кол молях ӯнттыгпасанэ, мо̄танэ колаге ӯнттуӈкве о̄вылтасаге кос, тувыл олнанэ холасыт. Матахкем э̄тпос нэ̄матыр ат ва̄рыс, олн кинсыс, олн хо̄нтыс, э̄лаль рӯпитаӈкве патыс. Колаге хунь а̄стлысаге, ма̄навн тыналасаге. Ты колыт ма̄н социальный найм щирыл очередин хансым ще̄мьятытн мисанӯв. Ань ма̄хум йильпи кол ёвтэ̄гыт, кол кивыр рӯпататэ пуссын та̄нки ва̄ре̄гыт, тув ос са̄в олн холтэ̄гыт. Ма̄н па̄влувт ӯнттын колыт кӣвыр рӯпатаныл ос пуссын ва̄рим о̄лэ̄гыт, тув ва̄нтлам ще̄мьят ремонт урыл щар ат номсахтэ̄гыт. Ма̄хум о̄лнэ колн хунь ва̄нтласыт, о̄влэ̄т ёмащакв сунсыглахтасыт, матыр лю̄льсаӈ ва̄рим ке о̄лыс, ос заявлениенэ̄пак хассыт. Тувыл ма̄н ос ты кол ӯнттум ма̄хум тыг во̄всанӯв, ла̄всанӯв, ты рӯпатаныл мӯсхалыг вос ва̄рсаныл. Тамле колт о̄лнэ хӯрум ще̄мья заявлениенэ̄пак хансыглас. Акв ще̄мья ла̄выс, кола̄латэ лю̄льсаӈ ва̄рвес, мо̄т колт колкананыл сака полям о̄лыс, хӯрмит колт иснананыл лю̄льсаӈ ва̄рве̄сыт, тувыл ащирмал хартыс. Кол ӯнттын хо̄тпат ёхталасыт, лю̄льсаӈ ва̄рум рӯпатаныл ёмащакв ва̄рсаныл. Тыщирыл кос ёмас, тувыл ма̄хманув нас о̄луӈкве ос нэ̄матыр ат ва̄руӈкве сака ханьщувласыт, та̄нки кол ӯнттуӈкве ат ка̄саще̄гыт. Та ӯрхатэ̄гыт, хунь йильпи колыл мивет. Ань тыт туп кирпащ колыт ӯнттавет. Кирпащит ос мо̄т э̄рнэ утыт э̄лы ма̄ныл тыг тотавет, тыи ма̄гсыл ӯнттум колыт тынаныл янгыг е̄мты. Кондинский район Мортка па̄вылт нор, па̄ртыт сылнэ предприятие о̄лы. Кол ӯнттын ма̄гсыл маныр э̄ри, тот пуссын ва̄раве. Тувыл тамле колытт ще̄мьят о̄луӈкве ат ка̄саще̄гыт, улпыл тыи ма̄гсыл предприятие мӯсхалыг рӯпитаӈкве ат ве̄рми. Па̄влытыт полицейский участок ӯнттын ма̄гсыл я̄нас программа рӯпиты. Ма̄н па̄влувт ты хосыт тамле кол о̄с ӯнттувес. Ты та̄л яныгполь э̄тпос ты кол а̄стлавес. Аквпалъе̄ре̄т полицейский участок ва̄рвес, мо̄тпалъе̄ре̄т ос о̄лнэ колыл ва̄рим о̄лы. Ма̄н номсысӯв, хунь ты кол ӯнттаве, участковый тыг рӯпитаӈкве тах ёхты. Нижневартовск ӯсныл участковый рӯпитаӈкве тыг ёхталас. Тав ты йильпи колн о̄луӈкве ва̄нтлас. Тав ты нила па̄влыт тармыл участковыиг рӯпитас. Таве̄н акваг Лиственичный, Ягодный, Дальний па̄влытытн ялантаӈкве э̄рыс. Тох рӯпитаӈкве таве̄н улпыл та̄рвитыӈ о̄лыс, тыи ма̄гсыл хоса ат ве̄ритас, ювле та минас. Павлув о̄ста участковый та̄л хультыс. Ань йильпи кол нас тох та ӯнлы. Миркол кӯщай ам ня̄врамыт ханищтан колыт урыл о̄с китыгласлум. Тав ла̄выс, Леуши па̄влыт йильпи садик ӯнттаве, ма̄нь таквс э̄тпос тах а̄стлаве. Леуши ос Лиственичный па̄вылт о̄лнэ ня̄врамыт тув ялантаӈкве патэ̄гыт. Кӯщай хум ла̄выс, та̄н па̄вланыл ат ёрувлавет, са̄всыр программат щирыл олныл та̄ставет, ты хосыт па̄влыт о̄лнэ колыт ты ӯнттавет. Па̄вланылт пе̄с пӯльница ос са̄в пе̄с кол о̄лы, та̄н ань ты ва̄рмаль урыл кӯщаитн акваг хансэ̄гыт, па̄вылт пӯльница вос ӯнттаве.

1084 2014.09.19. Валентина УЗЕЛЬ

Тав ма̄щтырлаӈкв такви ханищтахты. Ты тӯяг ва̄рим хурит Югорск ӯст о̄лнэ ще̄мья по̄слым о̄лы. Нэ̄ наме Анна, о̄йкатэ о̄парищ наме щирыл Зайцева. Тав ханты нэ̄, Октябрьский районныл о̄лы. Такви ще̄мьятэ урыл ма̄ньщи газетав ма̄гыс тав тох потыртас. – Ам А̄с я̄ ва̄тат Октябрьский па̄вылт самын патсум, тот яныгмасум. А̄тям Владимир Георгиевич, тав ханты о̄йка о̄лыс, Пальяново па̄вылныл тув ёхтыс. Тав а̄тимыг е̄мтыс, ань туп омам хультыс. Омам па̄лыл о̄лум пе̄с рӯтанув тыг ссылкан те̄тве̄сыт. Ам ане̄квам Фёкла Васильевна Осинцева ма̄навн потырта̄лыс, яныг хо̄нт э̄лыпа̄лт са̄в ще̄мья ня̄врамыӈ та̄гыл, яныгпа̄ла хо̄тпат пуссын аквъёт тыг ня̄влуве̄сыт. Тыг йиманыл порат лё̄ӈхыт хум хо̄тпат пуссын вуйве̄сыт, хотталь мо̄т нупыл тотве̄сыт. Октябрьский район Каменное па̄выл ӯнлын ма̄ мус туп э̄кват, ня̄врамыт ос яныгхо̄тпат ёхтысыт. Та̄н ё̄раныл хосыт ты па̄выл ӯнттувес. Ане̄квамащо̄йкам тот ты акванминасы̄г, лов ня̄врам о̄щсы̄г. Ане̄квам ам сака э̄руптаслум. Тав э̄ргуӈкв сака ха̄сыс, турсуе татем суиӈыг о̄лыс. А̄нум тав ты ма̄щтырлаӈкв ханищтастэ. Школа а̄стламум юипа̄лт ам э̄лы ма̄н ханищтахтуӈкв минасум. Новокуйбышевский техникумт маснут ман мо̄т са̄всыр пормас ю̄нтуӈкв ханищтахтасум. Юв ёхтысум, рӯпата ат хо̄нтсум. Югорск ӯс училищан рӯпитаӈкв во̄вве̄сум, тот ня̄врамыт ханищтасанум. О̄йкам ёт хо̄нтхатсум, тав ты ӯсн рӯпитаӈкв те̄твес. Пӯльницат мир пусмалтан са̄всыр техника уральты, саквалэ̄гыт те, ёмащакв ва̄риянэ. Акванминасаме̄н, пыгме̄н самын патыс. Тав туптуп хӯлы, паляге лапминым о̄лэ̄г. Ня̄врам ёмащакв ат те хӯлы, ва̄им, тав пуста̄гыл яныгмаӈкв ат ве̄рми. Таима̄гыс ам та̄ра рӯпатаныл по̄хан минасум, ань пыгум ёт юн о̄лэ̄гум. Амти ханты мирум урыл пӯмщалахтуӈкв патсум. Э̄ква маснут хумус ю̄нтаве, щулкит хумус сагавет, нэ̄пакытт тисхатуӈкв патсум. Тох амти хумус ве̄рме̄гум, ю̄нсхатуӈкв та о̄вылтахтасум. Са̄ӈквылтаӈкв ханищтахтэ̄гум. Ань ханты ос ма̄ньщи ма̄хум ма̄гыс са̄всыр ханищтапыт ва̄рыглавет, са̄ӈквылтаӈкв ханищтавет, ю̄нсхатуӈкв. Хотты ханищтахтын ма̄н нэ̄мхотталь ялуӈкв ат ве̄рме̄гум, о̄йкам акваг рӯпиты, пыгме̄н такте̄т хультуптаӈкв ат ве̄рмиламе̄н, акваг тав ляпатэ̄т о̄луӈкв э̄ри. Тох амтирот нэ̄пакыт щирыл, интернет щирыл ла̄щал ма̄щтырлаӈкв та ханищтахтэ̄гум. О̄йкам Василий гитарал са̄ӈквылтаӈкв сака ёмащакв ха̄сы, такви стихыт хансы, э̄ргыг ва̄риянэ. Ялпыӈ хо̄талыт порат то̄ванакт мир э̄лыпа̄лт э̄рге̄гум, йӣкве̄гум. Ме̄н аквъёт атхуйплов та̄л о̄лыме̄н, тав сака ёмас хо̄тпа. Тамле потыр ты нэ̄кве та потыртас. Ӯст о̄лнэ соссаӈ мирн тав ва̄ве, янытлаве, э̄руптаве. Та̄н акванхо̄нтхатыгланэ̄ныл порат Анна акваг тув ёхталы, аквъёт ма̄щтырлэ̄гыт, халанылт ханищтахтэ̄гыт.

1084 2014.09.19. Тамара МЕРОВА

Ляма я̄ ва̄тат о̄лнэ ще̄мьят урыл. «Торум маа» музеит рӯпитан хо̄тпат «История семьи в истории страны – след прожитой жизни» намаим проектаныл щирыл э̄лаль рӯпитэ̄гыт. Ты э̄тпос о̄выл щислат тот «Ляма, ставшая судьбой» йильпи суссылтап пӯсвес. Хосат та̄гыл Кантеровыт, Песиковыт ос Сопочиныт ханты ще̄мьят Большой Юган я̄ныл Сургутский район Ляма я̄ ва̄тан о̄лмыгтасыт. Ань хумус ма̄хум тот о̄лсыт, маныр ва̄рсыт, ты о̄вылтыт Аграфена Семёновна Сопочина мирн потыртас. Аграфена Сопочина – ханты э̄ква, округ мирн ва̄нэ хо̄тпаг о̄лы. Тав соссаӈ ма̄хум о̄лупса ёмщакв ва̄гтэ ос сургутский хантыт ла̄тӈаныл щирыл са̄всыр ханищтан нэ̄пакыт хансыс. Тувыл рӯт ма̄хманэ пуссын ёлхассанэ ос «родословный» нампа яныг ло̄пс ва̄рыс. Тув Кантеровыт, Каюковыт, Лозямовыт, Песиковыт ос Сопочиныт хансым о̄лэ̄гыт. Аграфена Семёновна пе̄с ма̄хманэ о̄лупса янытлан ма̄гыс ты суссылтап щё̄питастэ ос ка̄сыӈ рӯтэ о̄вылтыт я̄нас потрамас. Песиков ханты о̄парищ нам «па̄сыг» ла̄тӈыныл э̄лаль хансуӈкве патвес. Та̄н са̄лы о̄щнэ ма̄хмыг о̄лсыт. 19 нотт котиль та̄ланэ порат та̄рвит а̄гм е̄мтум сыс са̄в хо̄тпа а̄тимыг е̄мтсыт. Акв па̄вылквет кит пыгрищиг тэ̄нккетэ̄н пусыг хультсы̄г ос Ханты-Мансийский район Селиярово па̄выл по̄хан о̄луӈкве минасы̄г. Ётыл акватэ, Павел Николаевич Песиков, мо̄т ма̄н о̄лмыгтас. Тав Фёдор Кантеров о̄лнэ ма̄н ликмыс ос та па̄сыл Песиковыт ос Кантеровыт акв рӯтыг ловиньтаӈкве патве̄сыт. Павел Николаевич Песиков тыи Аграфена тав о̄патэ. О̄йка 114 та̄лэ мус о̄лыс, о̄лме сыс са̄всыр ва̄рмалит ва̄щинтас. Акв ма̄т ат ӯнлыс, Балык, Белогорье, Назым, Салым я̄т хосыт акваг хотальа̄ти ялантас. Тав ханты ма̄хум йис мо̄йтыт ва̄м о̄йкаг о̄лыс, са̄в пе̄с э̄ргыт э̄ргыглас. Татьяна Павловна Песикова (Кантерова) э̄кватэ, ты ос Аграфена щаще̄кватэ, колсори рӯпатат пуссын такви ва̄рсанэ. Ос о̄йкатэ яласанэ̄тэ сыс такви хӯл алыщлас ос во̄раяс. Ла̄ве̄гыт, нэ̄ сака со̄тыӈыщ о̄лыс. Тав увщитэ, Дарья Павловна Комтина, номтыӈ ос та̄к хо̄тпаг ла̄выглавес. Ханты мир халт тав Найратнэ̄г намыл ла̄ввес. Та̄н е̄ранылт Кушников кӯпса хум хӯл алыщлан тӯр такви нупылэ хансуӈкве таӈхыстэ. Найратнэ̄ са̄в мирколытн ла̄тыӈ ке̄тсалыс, Тобольск ӯс нупыл такви ялыс. Юио̄вылт кӯпса тувыл губернатор па̄лыл пищмал тотвес, тав сысы минуӈкве ла̄ввес. Ань Сопочиныт кит ве̄рыста тувыл мощ по̄хат таргыт яныгман во̄рыӈ ма̄т о̄лэ̄гыт. Аграфена а̄ще Семён Павлович Песиков яныгмам та̄ланэ хо̄нтлан та̄лытын е̄мтсыт. 1945 та̄лт школа а̄стламе юипа̄лт тав Пим нампа колхозт о̄влэ̄т секретариг рӯпитас, ётыл ревизорхо̄тпаг паттувес. Тувыл «Калинин» нампа колхоз о̄лнэ̄тэ мус тот бухгалтерыг рӯпитас. Марфа Константиновна, Аграфена оматэ, ма̄ньлатыг о̄лме̄т фронт ма̄гыс са̄в рӯпитас. Таима̄гыс «За доблестный труд в ВОв» ма̄гылт о̄щнэ по̄сыл майвес. Ты э̄кваго̄йкаг ханты пе̄с йис накыт нэ̄мхуньт ат ёрувла̄лсанэ̄н, ня̄враманэ̄н ща̄нь ла̄тӈыл потыртаӈкве ос пе̄с накыт ва̄ӈкве ханищтасанэ̄н. Ань ты суссылтапыт мӯй ма̄хум са̄всыр пормасыт, маснутыт, хурит суссыт. Сургут ӯс е̄р тапа̄лт о̄лнэ соссаӈ ма̄хум ань тыг мус та̄нки ю̄нтум маснутыл масхатэ̄гыт. Акв супе урыл Аграфена Семёновна тох ла̄выс, тав Анна-Лайма Екабовна Галеииеце латышка о̄ныпе̄н супыл мӯйлупта̄лвес. Ты супе хоса о̄ньщистэ ос тувыл мощ мо̄т щирыл йинумтастэ ос хансал ю̄нтыстэ. Супе ханты ма̄хум супыг е̄мтапас. О̄ныпе колта̄глэ ёт репрессия та̄лытыт лӯима ма̄н о̄луӈкве ке̄тве̄сыт. Та̄н ще̄мьяныл тот са̄в та̄л о̄лсыт . 1990 та̄лыт минам юипа̄лт та̄нки о̄лум Латвия ма̄н минуӈкве номылматсыт. То̄нт Аграфена Сопочина о̄йкатэ̄нтыл киттыгминасы̄г, ня̄врамаге̄н ос а̄щен ёт минасы̄г. Та̄нки халанылт акваг ва̄йхатым, ёмас номтыл о̄лсыт. Такви Аграфена Семёновна ханты ма̄хум ла̄тӈе ос пе̄с о̄лупсатэ ханищтаӈкве патыстэ. Са̄всыр ма̄н ялантым тав Иосиф Антонович Сопочин ёт хо̄нтхатас ос тувыл тэ̄н акванминасы̄г. Аквъёт са̄лы янмалтым о̄лсы̄г. Ос хум а̄тимыг е̄мтме порат, нэ̄ «Ханто» нампа община ва̄рыс ос тот э̄лаль рӯпитаӈкв патыс. Ань хумус рӯт ма̄хманэ пе̄с щирыл иӈ о̄лэ̄гыт, тувыл тотым пормасыт суссылтым тав ты урыл мирн потыртас. Ты коныпал Аграфена Сопочина (Песикова) ня̄врамыт ма̄гыс сургутский ханты ла̄тыӈ ханищтан сыресыр 22 нэ̄пак ос букварит хансыс. То̄ват о̄с тот ка̄салаӈкве ро̄ве̄гыт. Евдокия Андреевна Нёмысова акв йильпи ва̄рум нэ̄паке суссылтастэ, ты нэ̄пак моще̄ртын ущ са̄витыг та̄ратаве. Ань туп акв нэ̄пак ка̄тн майлувес, Евдокия Андреевна таве Аграфена Семёновнан мӯйлуптастэ. Тувыл Валерий Ледков, э̄ргыт хаснэ хум, таве̄н акв э̄рыг э̄ргыс. Мӯй ма̄хумн такем мӯстыс, та̄н иӈ э̄рыг э̄ргуӈкве таве во̄всаныл. О̄йка «Ханты – значит человек» хансым стихыт щирыл э̄рыгсов щё̄питам. Ты э̄рге э̄ргум порат то̄ва хо̄тпат о̄с тав ётэ э̄ргуӈкве патсыт. Та юипа̄лт мӯй ма̄хум пуссын тэ̄нэ пасан ва̄тан во̄вве̄сыт, пе̄с ма̄хманыл ка̄стысаныл, йис о̄лупсаныл урыл потыртасыт. Ты суссылтап яныг таквс э̄тпос юио̄выл щислатэ мус рӯпитаӈкве паты тах.

1084 2014.09.19. Николай МЕРОВ

Финноугор мирыт Конгрессын щё̄питахтэ̄гыт. 2012 та̄лт Венгрия ма̄т Шиофок ӯст финноугор мирыт VI мирхал Конгрессаныл о̄лыс. Та̄н ты ва̄рмалин нила та̄л сыс акв щёс акванатхатыглэ̄гыт. Тот соссаӈ мирыт та̄рвит ва̄рмаляныл урыл потыртэ̄гыт ос акваннё̄тхатым ты тэ̄лат мӯсхалыг щё̄питыяныл. VII Конгресс 2016 та̄лт Финляндия ма̄т Лахти ӯст е̄мты тах. Ань ма̄н округувныл ма̄хум о̄с тув щё̄питахтэ̄гыт. Ты Конгрессыт о̄лыглам халт, ка̄сыӈ порат финноугор мирыт конференция ва̄рыглэ̄гыт. Рӯпатаныл хумус э̄лаль мины, маныр ва̄рсыт, маныр та̄рвит иӈ о̄ньще̄гыт, ты урыл тот потыртэ̄гыт ос мо̄тыт Конгрессын щё̄питахтэ̄гыт. Щар ма̄к яныг ва̄рмаль ща̄нь ла̄тӈув э̄лаль тотнэ тэ̄ла. Ань ты та̄л сӯкыр э̄тпос 3-4 хо̄талыгт Карелия ма̄т Петрозаводск ӯст финноугор ма̄хум тамле конференциян акван ты атхатыгласыт. Ма̄н округувныл хо̄т хо̄тпа тув ялсыт. Ма̄ньщи хо̄тпат Нина Николаевна Гадебская, Ха̄льӯс район Хулюмсунт па̄вылт ле̄ккарыг рӯпитан нэ̄, Светлана Селивёрстовна Динисламова, Ханты-Мансийск ӯс Югорский университетт рӯпитан нэ̄, ос ам, Николай Меров. Ханты хо̄тпатныл Алла Иштимирова-Посохова, Ханты-Мансийск ӯс А̄с-угорский театрыт рӯпитан нэ̄, Фёкла Семёновна Бондаренко, Нижневартовский район Аган па̄выл музейт рӯпитан э̄ква, ос Людмила Александровна Алфёрова, округ губернатор ва̄ӈын хо̄тпа палт советникыг о̄лнэ нэ̄, тув ялсӯв. Ты конференция кит хо̄тал минас. Россия ма̄ныл Марий Эл, Удмуртия, Мордовия, Коми республикатныл, Ямало-Ненецкий ос ма̄н округувныл ма̄хум о̄лсыт. Хо̄н ма̄ныл Финляндия, Эстония ос Венгрия ма̄ныл ма̄хум ёхталасыт. Са̄всыр ма̄ныл пуссын аквъёт яныгса̄т арыгтем хо̄тпат тот атхатыгласыт. Мирхал конгресс рӯпататэ э̄лаль тотнэ ма̄гыс кӯщаиг Валерий Марков пе̄риим о̄лы. Тав ты рӯпата урыл докладнэ̄пак ловиньтас. На̄н тав потре э̄лаль ловиньтэлы̄н: «Хо̄тыт конгресс о̄лум порат маныр тэ̄ла ма̄н пирмайтасӯв, хумус ты ва̄рмаль щирыл рӯпатав э̄лаль мины, ань ты урыл потыртэ̄в. Ма̄н ань тамле конференциян хӯрмиттыг акванатхатыглэ̄в. Кит щёс Мордовия ма̄т Саранск ӯст о̄лыс. Са̄всыр ма̄ныл ёхталан финноугор ма̄хум маныр та̄рвит о̄ньще̄гыт, ты ва̄рмалит мӯсхалыг щё̄питан ма̄гыс ма̄н акваннё̄тхатым рӯпитэ̄в. Ма̄нки халанувт ханищтахтэ̄в. Ты конференцият са̄выӈпа̄лэ ты урыл хӯнтлуӈкве тахнувӯв: финноугор мирыт рӯпатаныл хумус ва̄рияныл, маныр та̄рвит ва̄рмаль о̄ньще̄гыт ос йильпи проектыт урыл потрыт». Валерий Харламов, финноугор мирыт консультативный комитет кӯщай хум, ла̄внэ̄тэ щирыл, финноугор мирыт ма̄гыс щар яныг ва̄рмаль ты ща̄нь ла̄тыӈ э̄лаль тотнэ тэ̄ла. Ань ты накт ма̄нь па̄влытт рӯпитан школат лаппантуӈкве патве̄сыт. Та сыс туп тамле школат ня̄врамыт ща̄нь ла̄тыӈ ханищтаӈкве ве̄рме̄гыт. Ты школат лаппантнэ̄ныл юипа̄лт ня̄врамыт яныг школан ханищтаӈкве ке̄тавет, тот ща̄нь ла̄тыӈ ханищтан урок а̄тим. Ётыл ня̄врамыт та̄нки ща̄нь ла̄тӈаныл ла̄щал та ёрувлыяныл. Тыи ма̄гыс ань са̄в ня̄врам ща̄нь ла̄тӈыл потыртаӈкве ат ха̄сы. Тувыл ос ты хосыт ла̄тӈанув со̄йме̄гыт. Ще̄мьят ща̄ньа̄щит ня̄враманыл ёт о̄с ат потыртэ̄гыт. Ня̄врам ёт ма̄нь та̄гыл ща̄нь ла̄тӈыл потыртэгы̄н ке, ты потыр тав номтэ̄н ёмащакв хо̄и ос молях ханищтытэ. Пе̄с о̄лум ва̄рмалянув ул вос ёрувлахтасыт, Валерий Харламов общественный организацият ща̄нь ла̄тыӈ э̄лаль тотнэ ма̄гыс рӯпитаӈкве во̄всанэ. Ма̄ньлат ма̄хманув ёт са̄в потыртаӈкве э̄ри, ща̄нь ла̄тӈув э̄лаль вос тотыяныл, атиӈк хотталь со̄йми. Та̄нанылн тох ла̄вуӈкве э̄ри, ла̄тыӈ ханищтан номтыл вос ёхтавет. Тав ла̄выс: «Ща̄нь ла̄тӈув вос суйты, ня̄враманын ханищтэ̄н, та̄н ётаныл акваг потыртэ̄н, ул э̄ссамтэ̄н. Ня̄врамыт ма̄гыс ща̄нь ла̄тӈыл са̄внув нэ̄пак, газета та̄ратэ̄н. Школат, нэ̄пак ловиньтан колт ос ма̄нь ня̄врам колт ты нэ̄пакт та̄стым вос о̄лэ̄гыт. Интернет хосыт на̄нки халанынт о̄с ща̄нь ла̄тӈыл потраме̄н. Тувыл ня̄врамыт китыглаӈкве э̄ре̄гыт, манрыг та̄н ща̄нь ла̄тыӈ ханищтаӈкве ат таӈхе̄гыт. Ты ва̄рмаль о̄с та̄рапаттуӈкве э̄ри, то̄нт э̄рыӈ мо̄т матыр йильпи ва̄рмаль щё̄питэ̄в. Ла̄тыӈ ханищтаӈкве ня̄враманув акваг хуйтуӈкве э̄ре̄гыт». Тувыл ос «Карельский Конгресс» нампа общественный объединеният рӯпитан кӯщай хум Анатолий Григорьев ты ва̄рмаль урыл потыртас. Карелия ма̄т карелыт, вепсыт ос финн ма̄хум о̄лэ̄гыт. Мо̄т финноугор мирыт халт та̄н щар та̄рвитыӈыщ о̄лэ̄гыт, ща̄нь ла̄тӈаныл, пе̄с йис о̄лупсаныл моще̄ртын акваг со̄йми. Ты урыл та̄н сыманыл сака ща̄рге̄гыт. Анатолий Григорьев ла̄выс, ты таима̄гыс тох е̄мтыс, яныг кӯщаит культура э̄лаль тотнэ ма̄гыс олн мощща та̄стэ̄гыт. Са̄ртын Петрозаводск ӯст «Karelia» нампа журнал финн ла̄тӈыл та̄ратавес. Ты нэ̄пак са̄в ма̄хум ловиньтэ̄гыт. Ань юио̄выл та̄лт ты журнал щар мощщаг нэ̄глуӈкве патыс. Ты коныпал республикат сака са̄в во̄р яктаве ос мо̄т ма̄щунь сэ̄лаве, ос ты олныт пуссын э̄лы ма̄н минэ̄гыт. Ты конференцият са̄в мир та̄нки ва̄рмаляныл урыл потыртасыт. Ма̄н ма̄хманув урыл потыр а̄тим о̄лыс. Та сыс, финноугор ма̄хум о̄лпусаныл акваг э̄лаль мины. Ща̄нь ла̄тӈаныл э̄лаль тотнэ ма̄гыс са̄в рӯпата ва̄раве. Мо̄т мирыт потраныл хӯнтлуӈкве сака пӯмащ о̄лыс. Тув ёхталам мӯй ма̄хум Петрозаводск ӯс суссылтаӈкве тотыглаве̄сыт. Ма̄ньлат ма̄хум ханищтахтын консерваторият йӣквнэ, э̄ргын ос ёнгын хо̄тпат концерт ва̄рыгласыт. Хотьют ка̄сащас, музейн ялуӈкве ве̄рмыс. Ка̄сыӈ хо̄тпан тот рӯпитаӈкве сака мӯстыс. Ань финноугор ма̄хум мо̄тыт мирхал Конгрессын щё̄питахтэ̄гыт.

1085 2014.10.10. Анна АЛГАДЬЕВА

Ля̄ххалыт. Лариса Юрьевна Хозумова налыман нупыл акв та̄л Ха̄льӯс район Хулюмсунт школат рӯпиты, о̄выл классыт ханищтан нэ̄г о̄лы. Лариса Юрьевна сака ка̄ркам, нёмса хо̄тпа. Ня̄врамытн э̄руптаве, рӯпитан юртанэ̄н янытлаве. Ханищтан хо̄тпат янытлан хо̄талыл пуссын янытлыянӯв! Са̄в та̄л пуста̄гыл о̄лэ̄н. Посыӈ хо̄тал, щуниӈ хо̄тал на̄нанн. Йильпи номт, хоса нот. Ханищтан ня̄враманын ла̄тыӈ вос хӯнтлэ̄гыт, ёмащакв вос ханищтахтэ̄гыт.

1085 2014.10.10. Валентина УЗЕЛЬ

Мирколытт рӯпитан мир урыл ля̄ххал. Ювле хультум э̄тпост округ миркол кӯщаит сапра̄нияныл о̄лыс, тувыл округ Дума депутатыт акванатхатыгласыт. Та̄н та̄нти ураныл хансым са̄ккон ань ловиньтасаныл ос мо̄т щирыл хассаныл. Та са̄кконт тамле ва̄рмаль урыл хансыглавес. Округув янытыл мирколытт рӯпитан ма̄хум (рущ ла̄тӈыл та̄н «госслужащииг» ла̄вавет) о̄лнэ кол ёвтнэ̄ныл ма̄гыс я̄нас субсидияолныл маиглымат. 2006 та̄л па̄сныл 2012 та̄л мус 356 хо̄тпа кол ёвтмыт, та̄н пуссын аквъёт 267 млн. солко̄ви вимыт. Ань ты олн ӯрим 345 хо̄тпа очередин хансым о̄лы. Округ губернаторув Наталья Комарова ла̄выс, 2017 та̄л о̄выл э̄тпосэ мус та̄н кӯщаиг о̄лнэ ма̄хум кол ёвтнэ ма̄гыс олныл миӈкв ат патыяныл. Округувт субсидияолн са̄в ма̄ньлат хо̄тпа, соссаӈ мир ӯре̄гыт, о̄влэ̄т та̄нанылн нё̄туӈкв э̄ри. Губернатор прессслужбаныл те̄тым ля̄ххал ма̄ньщи ла̄тӈыл В. Хозумова хансыстэ.

1085 2014.10.10. Людмила ТЕТКИНА

Пенсият о̄лнэ ма̄хум олныл мивет. Округ правительстват рӯпитан кӯщаит сапра̄ни ва̄рыгласыт, та̄н пенсият о̄лнэ ма̄хум урыл нэ̄пак пирмайтасыт. Ты нэ̄пак щирыл Югра ма̄т ос Тюменский областьт о̄лнэ 220 со̄тыра пенсионерхо̄тпа олныл мивет. Тюменский областьт туп та ма̄хум мивет, хотьют 15 арыгкем та̄л округувт рӯпитас. Мирн нё̄тнэ округ департаментыт кӯщаиг рӯпитан нэ̄ Мария Краско ля̄ххал тотнэ ма̄хум ёт потыртаме порат ла̄выс: «Округувт пенсият о̄лнэ ма̄хманув яныг таквс э̄тпост акв со̄тыра солко̄вил тах ойтавет. Та̄нанылн заявлениенэ̄пак хансуӈкве ат э̄ри, ты олннё̄тмил пенсияныл ёт тах ёхты». Пенсият о̄лнэ ма̄хум тамле олннё̄тмилыл ка̄сыӈ та̄л округув янытлан хо̄тал кастыл мивет. Губернатор прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ.

1085 2014.10.10. Тамара МЕРОВА

Ты э̄тпос о̄выл хо̄талэ яныгпа̄ла хо̄тпат янытлан хо̄талыг о̄лыс. Югра ма̄т рӯпитан депутатыт ос ам яныгпа̄ла хо̄тпанув ялпыӈ хо̄талыл янытлыянӯв! Тыи на̄н ва̄рум рӯпатан хосыт ма̄н округув но̄хпатыс. На̄н яныг хо̄нт о̄лум та̄лыт порат пилта̄лыг ма̄в вуянтаслы̄н, хӯл алыщлым ос во̄раим фронтын нё̄тсы̄н. Тувыл ма̄н па̄вланув, ӯсанув ӯнттысаны̄н, са̄всыр ма̄т ос ма̄во̄й но̄хвинэ ма̄т ёмщакв рӯпитасы̄н. На̄н пенсиян патхатым ӯщлахтуӈкве о̄с ат а̄лымегы̄н, на̄н ань культура тэ̄лат, пусмалтахтан накыт э̄лаль тотыяны̄н. Таима̄гыс ма̄н на̄нан яныг пӯмащипа ла̄тыӈ ла̄ве̄в, со̄тыӈыщ ос пуста̄гыл са̄в та̄л о̄лэ̄н. Округ Дума кӯщай Б. Хохряков ке̄тум ла̄тӈе ма̄ньщи ла̄тӈыг Т. Мерован хасвес.

1085 2014.10.10. Валентина УЗЕЛЬ

Ханты-Мансийск яныг ӯсыг е̄мты. Ханты-Мансийск ӯст мирколт рӯпитан ма̄хум тамле ля̄ххал те̄тсыт. Ты та̄л хо̄т э̄тпос сыс ӯсувт 906 ня̄врам самын патыс, 3 со̄тыра арыгтем хо̄тпа мо̄т ма̄ныл ма̄н ӯсувн о̄луӈкве ёхтысыт. Ӯсыӈ мир пуссын ловиньтаве̄сыт, нэ̄пак щирыл ӯст ань 95 со̄тыра 310 хо̄тпа о̄лы. Хусахтем та̄л ювле хультум порат ӯсувт туп 30 со̄тыра арыгтем мир о̄лыс. Са̄выӈпа̄лэ са̄в нэ̄, а̄ги о̄лы 49 со̄тыра 371 хо̄тпа; хумыт, хум ня̄врам мощщанув – 45 со̄тыра 939 хо̄тпа. Ӯс кӯщай Максим Ряшин ла̄выс, ӯст о̄лнэ мир яныгса̄т са̄витыг хунь е̄мты, миркол нэ̄пакыт пуссын мо̄т щирыл хансуӈкв э̄ре̄гыт, ты Уставнэ̄паке, са̄внув депутат ӯс Думан пе̄рияӈкв э̄ри, мо̄т са̄всыр рӯпата тах ва̄ре̄гыт. Ӯс мирколныл те̄тым ля̄ххал ма̄ньщи ла̄тӈыл В. Хозумова хансыстэ.

1085 2014.10.10. Тамара МЕРОВА

Ханищтан хо̄тпат губернаторн янытлаве̄сыт. Ты э̄тпос нилыт хо̄талэ̄т округ губернаторув Наталья Комарова Нефтеюганск ӯсн ялыс. Тав тот са̄всыр школатт рӯпитан ма̄хум ёт ва̄щинтахтас ос ётыл мо̄т тэ̄лат уральтас. Округ янытыл ёхталам ханищтан хо̄тпат «Обь» нампа культура центрыт акванатхатыгласыт. Та̄н ётаныл Наталья Комарова пащалахтас ос ялпыӈ хо̄таланыл кастыл пуссын янытласанэ. Тувыл са̄в та̄л школат ёмщакв рӯпитан ма̄хум ос тэ̄ланыл ка̄ркамыг, мӯсхалыг ва̄рнэ хо̄тпат мӯйлупсал мисанэ. Ханищтан хо̄тпат халт хӯрум э̄лумхо̄лас Россия Президент па̄лыл янытлаве̄сыт. Нижневартовск ӯс лицей кӯщай нэ̄ Нина Егоровна Арий «За заслуги перед Отечеством» II степени по̄сыл майвес. Мо̄т хӯрум хо̄тпа ханищтан тэ̄ланыл ёмщакв ва̄рнэ̄ныл ма̄гыс премияолныл о̄с та̄стуве̄сыт. Тувыл нилахуйплов хо̄тпа Министерство образование па̄лыл яныг намыл майве̄сыт ос э̄сгын нэ̄пакыл мӯйлуптаве̄сыт, ос кит хо̄тпа округ па̄лыл э̄сгувесы̄г. Ты коныпал округ янытыл о̄лыглам касылыт но̄хпатум ма̄хум о̄с янытлаве̄сыт. Ётыл ты мӯйлуптым ма̄хум ёт Наталья Владимировна я̄нас хо̄нтхатыглас ос та̄н ётаныл ща̄й айнэ порат са̄всыр тэ̄лат урыл потыртас. Аквта хо̄талт хӯрумхуйплов ханищтан хо̄тпат йильпи о̄лнэ колн щалтсыт. Ты кол о̄выл «арендный» колыг ла̄ваве. Ань йильпи ӯнттым колн округ кӯщаюв о̄с ялыс. Тот колыл маим ма̄хум туманне̄лмыл мӯйлуптаве̄сыт. Пуссын хотща̄гтсыт, та̄н ма̄гсыланыл тыи хосат та̄гыл ӯрхатнэ ос ма̄к э̄рнэ мӯйлупсаг о̄лыс.

1085 2014.10.10. Валентина УЗЕЛЬ

Са̄ккон хаснэ ма̄хум рӯпитасыт. Туи ӯщлахтаманыл юипа̄лт мирн пе̄риим депутатыт акванатхатыгласыт, та̄н ань округ Дума о̄выл заседанияныл о̄лыс. Ловиньтам са̄кконаныл та̄н ань са̄выӈпа̄лэ пуссын йильпи ла̄тӈыл хассаныл. О̄лнэ мА̄гыс олныт нО̄хнё̄твЕ̄сыт «Прожиточный минимумыг» ла̄внэ олныт са̄ккон хаснэ ма̄хум ань но̄хнё̄тсаныл. Ня̄врамыт ма̄гыс ань тыса̄вит олн хасвес – 11 со̄тыра 354 солко̄ви, ты э̄лыпа̄л э̄тпосытт ня̄врамыт ма̄гыс 11 со̄тыра 118 солко̄ви хансым о̄лыс. Пенсия винэ ма̄хумн акв э̄тпосн 9 со̄тыра 566 солко̄ви хасвес. Ты пирмайтым са̄ккон щирыл 2015 та̄л о̄выл э̄тпосныл пенсионерыт ос ня̄врамыт арыг 230 солко̄вил миӈкв патавет. Аквма̄н патум хо̄тпатытн нё̄тмил те ва̄раве, та̄н хотты казённый колт о̄ньщавет те манос та̄нанылн нё̄туӈкв ма̄хум юв ёхталэ̄гыт те, та̄н пенсияныл 75% са̄вит олн ювӯраве. Ты ва̄рмаль ма̄гыс са̄ккон о̄с акваг йильпииг хансаве. Соссаӈ мир мА̄гыс хансым сА̄кконыг Ань депутатыт ты заседаниянылт соссаӈ мир ма̄гыс хансым тит са̄кконыг урыл потыртасыт. Акв са̄ккон рущ ла̄тӈыл тох ла̄ваве – «О факториях», мо̄танэ – «О территориях традиционного природопользования». 2013 та̄лт общинат «факторияг» ла̄вуӈкв патве̄сыт. Округув янытыл 11 тамле организация рӯпиты. Ты йильпи тэ̄ла о̄вылтам порат та̄н сака ёмащакв нё̄тве̄сыт. 2013 та̄лт та̄н ма̄гсыланыл 58 млн. солко̄ви майвес, ты 2014 та̄лт 1 млн. 200 со̄тыра солко̄ви миве. Мо̄тыт 2015 та̄лт туп 453 со̄тыра солко̄ви та̄ставе. Еремей Данилович Айпин депутатытн ла̄выс, та̄н округ кӯщаюв Наталья Комарова палт ялсыт, ла̄всыт, соссаӈ мир факторияныл ма̄гсыл сака мощща олн та̄ставе. Округувт ка̄сыӈ районт аквтит тамле рӯпитан ма̄ о̄лы. Ха̄льӯс районувт 2 фактория рӯпиты – ты «Рахтынья» ос межрайпотребсоюз. Сургутский районт «Яунях» нампа община ва̄рвес, тот 248 хо̄тпа рӯпиты. Та̄н 1 млн. солко̄вил майве̄сыт. Общинат рӯпитан хо̄тпатн рӯпата олн ойтнэ ма̄гыс олн щар ат то̄вылхаты. Ты урыл Айпин кӯщаюв ла̄выс, ань Россияв ма̄гыс са̄всыр «экономический санкция» хо̄н ма̄т ты ва̄ре̄гыт. Ты хосыт тэ̄нутыт, пормасыт тынаныл сака но̄хлапе̄гыт. Ос ань ма̄н соссаӈ ма̄хманув пил ва̄тэ̄гыт, хӯл алыщлэ̄гыт, са̄лы о̄ньще̄гыт. Ты хосыт округувт о̄лнэ мир тыттуӈкв о̄с кос ро̄ви. Таима̄гыс община о̄щнэ ма̄хум нё̄туӈкв э̄ре̄гыт, та̄нанылн ань олн миӈкв э̄ри, матыр э̄рнэ ут та̄н ёвтуӈкв вос ве̄рме̄гыт. Мо̄т са̄ккон ос таима̄гыс мо̄т щирыл хасвес. Са̄в та̄л ювле хультум порат ка̄ркамнувег о̄лнэ соссаӈ ма̄хум та̄нти о̄лнэ ма̄наныл «родовой угодияг» хассаныл. Ань ты йильпи са̄кконыт щирыл та̄н о̄лнэ ма̄наныл тох ла̄вавет – «территории традиционного природопользования». Округув янытыл 475 тамле ма̄ о̄лы. Ты ма̄т тармыл о̄лнэ ос нэ̄паканыл атуӈкв а̄лымам ма̄хум ань са̄всыр олныл ойтавет, нё̄тавет. Ос ты коныпал са̄в соссаӈ хо̄тпа нэ̄пак ва̄руӈкв ат а̄лымасыт. Та̄н о̄с во̄рт о̄лэ̄гыт, са̄лы ӯре̄гыт, пил ва̄тэ̄гыт, во̄рае̄гыт. Пе̄с о̄лупсав э̄лаль тотыяныл. Та̄нанылн о̄с нё̄туӈкв э̄ри. Ань ты хо̄тпат наманыл пуссын акв нэ̄пакн хансавет, ос округ миркол па̄лыл нё̄туӈкв патавет. Тамле хо̄тпа округув янытыл сака са̄в о̄лы.

1085 2014.10.10. Светлана РОМБАНДЕЕВА

На̄й харыгтан ма̄хум ань ханищтахтэ̄гыт. Округув янытыл ма̄вит ӯргалан колт кӯщаиг о̄лнэ хум Евгений Платонов ля̄ххал тотнэ хо̄тпатн аквкит ла̄тыӈ ла̄выс. Ань ты та̄л манса̄вит ма̄т во̄рув на̄йн но̄хё̄свес, ты урыл тав мощ потыртас. Ты хум ла̄внэ̄тэ щирыл, ты та̄л о̄лнэ ма̄вт во̄рув туп мо̄рсыӈ ма̄т но̄хпе̄ламла̄лвес. Лӯпта э̄тпос па̄сныл сӯкыр э̄тпос мус округувт 219 во̄рыӈ ма̄ пе̄ламла̄лвес. Мо̄лты та̄л ос 640 тамле ма̄ ло̄мт о̄лыс. 2012 та̄лт май туи порат сака ре̄гыӈ о̄лыс, та порат 1600 во̄рыӈ ма̄ но̄хё̄свес. На̄й не̄лме щар па̄влыт мус ёхталас, ма̄хум торыӈыщ лылтуӈкве ат ве̄рмысыт. Та порат во̄рт на̄й харыгтан хо̄тпа ат то̄вылхатас, ма̄хум тыг э̄лы хо̄н ма̄ныл во̄выглаве̄сыт, во̄рт рӯпитан са̄в десантникыт тыг ёхталасыт, нё̄тсыт. Товлыӈха̄пыт ос вертолётыт но̄х акваг тыламла̄лсыт, во̄рыӈ ма̄нанув уральтасаныл. 11 са̄вит Ан-2 товлыӈха̄пыт округув янытыл акваг яласасыт, Ми-26 ос Ми-8 вертолётыг ос вит ёт но̄хлапыгласы̄г, ма̄в нумыл со̄сантастэ̄н. Та̄рвитыӈ порат рӯпитан ма̄хум ос десантникыт ань ханищтахтэ̄гыт, та̄н ма̄гсыланыл Радужный ӯст ос Уват па̄вылт ханищтахтан колкапаиг ӯнттувесы̄г. Евгений Платонов ла̄внэ̄тэ щирыл, на̄й харыгтан ма̄хманув 2015 та̄л кастыл ань ёмащакв ханищтахтэ̄гыт, о̄лнэ ма̄в тах мӯсхал щирыл ӯргалыяныл.

1085 2014.10.10. Светлана РОМБАНДЕЕВА

Колыт ма̄гыс са̄внув олн виӈкв патаве. Сӯкыр э̄тпос онтоловит хо̄талэ̄т Ханты-Мансийск ӯст ля̄ххал тотнэ ма̄хум кит яныг кӯщаиг ёт хо̄нтхатыгласыт. Акв хум наме Виктор Николаевич Шаповал, тав округ янытыл кол ӯнттын ма̄т ос на̄йпос ва̄рмаль палт кӯщаиг о̄лы, китыт хум ос Сергей Викторович Макаров, тав ос Югорский фонд нампа колыт йильпииг щё̄питан ма̄т кӯщаиг о̄лы. Тэ̄н кит тэ̄ла урыл потыртасы̄г: «Колыт ань та̄л кастыл хумус щё̄питаве̄сыт» ос «Ка̄сыӈ э̄тпос о̄лнэ колыт ма̄гыс ойтхатнэ порат ма̄хум о̄с акв йильпи тэ̄ла ма̄гыс олн ойтуӈкве патэ̄гыт – кол йильпииг щё̄питан ма̄гыс». Виктор Николаевич ла̄внэ̄тэ щирыл, округув янытыл 60-70 % са̄вит о̄лнэ колыт йильпииг щё̄питаӈкве э̄ре̄гыт. Колыт акваг кос щё̄пита̄лве̄сыт, ос ма̄хум ты рӯпата ат янытласаныл. Ань та̄нти олн ойтуӈкве патэ̄гыт, тах ущ пӯмщалахтэ̄гыт, коланыл коны ма̄тэ сыстам ман а̄ти, йильпииг ва̄рнэ поратэ ёхтыс ман тох иӈ мощ ве̄риты. Тыи ма̄гыс ты кӯщаит тох ва̄руӈкве номылматсыт. Ка̄сыӈ кол 15 та̄л сыс акв щёс йильпииг щё̄питаве. Сака пе̄с колыт ма̄гыс ма̄хум ойтхатуӈкве ат патэ̄гыт. Ма̄хум та̄нти олн ойтнэ̄ныл коныпал государствав о̄с нё̄ты, мо̄т охсатэ ос тав ойтытэ. Москва ӯст тох 2 миллиард солко̄ви атвес. Та̄н хунь ты йильпи нэ̄пак хассыт, китыглахтан ла̄тыӈ сака са̄в о̄лыс. Колыт пуссын аквторыг йильпииг ва̄рапаӈкве хунь ве̄рмавет. Кӯщаит о̄влэ̄т пе̄рие̄гыт, ань ка̄сыӈ та̄л хоты колыт щё̄питаӈкве, тувыл рӯпитаӈкве ущ о̄вылтахтэ̄гыт. Ханты-Мансийск ӯст о̄влэ̄т Чехов ос Мира ӯсхулыг хосыт ӯнлын колыт щё̄питавет, мо̄т колыт ос ётылнув тах ущ щё̄питавет. Ты ма̄н ма̄к яныг ӯсув, таве ёмащакв ва̄руӈкве э̄ри. Сергей Викторович ла̄внэ̄тэ щирыл, 2014-2016 та̄лыт сыс о̄лнэ колыт ма̄гыс 6 миллиард са̄вит солко̄ви та̄стувес. Округув янытыл ань яныг колытт о̄лнэ хо̄тпа ёлаль ос но̄х тотыглан те̄р колхусап (рущ щирыл лифтыг ла̄ваве) – 44 са̄вит тамле колхусап пе̄нтуӈкве э̄ри. Та̄н матыр щаӈканыл хотсакваласыт манос хосат та̄гыл ат рӯпитэ̄гыт. Туп Нягань ӯст 22 тамле те̄р колхусап пе̄нтуӈкве э̄ри, акв тамле ут тынэ 2 миллион са̄вит солко̄ви. Мо̄таныт ос округув янытыл пуссын пе̄нтавет тах. Ка̄сыӈ ӯст, ка̄сыӈ районт кӯщаит та̄нти номсэ̄гыт, та̄нанылн хумус рӯпитаӈкве, хоты колыт о̄влэ̄т щё̄питаӈкве э̄ри. Ка̄сыӈ колт о̄лнэ ма̄хум ты рӯпата та̄нти о̄с тах уральтыяныл, коланыл мӯсхал щирыл ва̄раве ман а̄ти. Та̄л кастыл колыт мӯсхал щирыл щё̄питаве̄сыт ман а̄ти, Виктор Николаевич тох ла̄выс: «Округув янытыл колыт та̄л кастыл ёмащакв щё̄питаве̄сыт. Колыт ма̄гыс 3 миллиард 357 миллион са̄вит солко̄ви та̄стлувес. 505 котельныит йильпииг щё̄питаве̄сыт, вит тотнэ турпат 4226 ве̄рыста йильпииг пе̄нтвес. Исум вит со̄снэ турпат 85% йильпииг ва̄рве̄сыт. Ань ты хо̄талытт ре̄г тотнэ турпат хосыт исум вит ты та̄ратаве, ка̄сыӈ колт ре̄гыӈыг е̄мты. Ма̄н акв та̄рвитыӈ ва̄рмаль о̄ньще̄в – сака са̄в хо̄тпа о̄лнэ коланыл ма̄гыс ат ойтхатэ̄гыт, са̄выӈпа̄лэ на̄йпос ма̄гыс ат ойтэ̄гыт. Ань ты хо̄тал мус 200 миллион арыг солко̄ви ойтуӈкве э̄ри, та̄н ань а̄рнта олныг та о̄лэ̄гыт. Округт о̄лнэ ма̄хум, о̄лнэ коланын ма̄гыс та̄ра ойтхатэ̄н. А̄рнта ат те о̄ньщегы̄н, то̄нт роттыг о̄лэгы̄н».

1085 2014.10.10. Людмила ТЕТКИНА

Э̄ква рӯпата та̄л ат ӯнлы. Октябрьский район Карымкары па̄вылт «Совет ветеранов» нампа организацият кӯщаиг Раиса Ивановна Агеева рӯпиты. Тав та па̄вылт самын патыс, тот яныгмас. Карымкары школат нила класс туп ханищтахтас, атыт классын Подгорный па̄вылн тотвес. То̄нт та па̄вылт са̄в мир о̄лыс, тот школаинтернат рӯпитас, са̄т класс тот а̄стлас. Раиса Ивановна ты урыл таи номылматас: «Ма̄н ще̄мьяв тыг ссылкан ке̄твес. Та та̄рвитыӈ порат ам омам акваг рӯпитас, таве аты ва̄щинтаслӯв. То̄нт тыг рущит, калмыкыт ос немцыт ссылкан ке̄тве̄сыт. Омам 17-18 та̄л яныт рущ ос калмык а̄гит халт пиркатирыг о̄лыс. Па̄вылт хум хо̄тпа а̄тим, э̄кват ос а̄гит та̄нки та̄рвитыӈ рӯпата ва̄рсыт. Война порат рӯпитан хо̄тпа ат то̄вылхатас. Школат туп кит нэ̄ ня̄врамыт ханищтасы̄г. Акватэ о̄выл ос нилыт классыт ня̄врам ханищтасанэ, мо̄танэ китыт ос хӯрмит классын ялантан ня̄врамыт ёт рӯпитас. Ам тай ма̄ньта̄гыл ханищтахтуӈкве сака ка̄сащасум, са̄т класс Подгорный па̄вылт а̄стласум, Октябрьский па̄вылт нёлолов классыт ханищтахтасум. Туи порат юв ёхтэ̄гум, омам колхозт рӯпитаӈкве нё̄тыслум. То̄нт тыт рыбучасток о̄лыс, на̄иӈха̄пыт тыг акваг пӯхталасыт. Хӯланув Тобольск ӯс нупыл тотве̄сыт. Та хо̄тал ма̄н я̄ ва̄тат рӯпитасӯв, на̄иӈха̄п пӯхтыс, тот Октябрьский па̄вылт ам ётум ханищтахтам а̄гиянум ка̄саласанум. Та̄н а̄нум э̄лаль Тобольск ӯсн ханищтахтуӈкве во̄всаныл. Ам юв ха̄йтталасум, чемоданум а̄лмаяслум, а̄гиянум ёт э̄лаль ханищтахтуӈкве та минасум. Тобольск ӯст ам культпросвет училищат библиотекариг ханищтахтасум. Тюменский область Казанский район Огнёва па̄вылт нэ̄пак ловиньтан колт хӯрум та̄л рӯпитасум. Ӯщлахтан порат омам палт мӯйлуӈкве юв ёхтысум. То̄нт па̄вылт клуб ӯнттувес, ам тот рӯпитаӈкве хультсум. Та па̄сныл пенсия мус 44 та̄л Карымкары па̄вылт та рӯпитасум». Раиса Ивановна клубт, тувыл библиотекат рӯпитас. Ты юипа̄лт тав са̄в та̄л па̄выл мирколт депутатыг о̄лыс. Э̄ква ла̄выс: «Ма̄н таса̄вит та̄л коммунизм ма̄гсыл рӯпитасӯв, тувыл 1991 та̄лт ла̄ввесӯв, ань мо̄т щирыл о̄луӈкве ос рӯпитаӈкве патэ̄в. Ань хумус е̄мтыс, ма̄хманув рӯпитаӈкве ат ка̄саще̄гыт, ня̄врамыт ханищтахтуӈкве о̄с ат таӈхе̄гыт. Ма̄н яныгмамув порат пуссын рӯпитасӯв, нэ̄мхотьют рӯпата та̄л ат ӯнлыс. Ам 1993 та̄лт пенсиян патхатасум. 1995 та̄лт Михаил Трифонович Букаринов па̄вылт «Совет Ветеранов» нампа организация ва̄рыс. Ам нас тох юн ӯнлуӈкве ат ханьщувласум, тав ётэ рӯпитаӈкве патсум. О̄йка кӯщаиг пе̄риявес, ам ос тав ва̄ӈын хо̄тпаг о̄лсум. 1999 та̄лт тав а̄тимыг е̄мтыс, тав ва̄рум тэ̄латэ ам э̄лаль тотуӈкве патыслум. Ты рӯпата 15 та̄л сыс ва̄рилум. Ам ётум хо̄т хо̄тпа рӯпиты. Карымкары па̄вылт о̄лнэ яныгпа̄ла хо̄тпат ма̄н акваг уральтыянӯв. Та̄нкке̄ныл о̄лнэ яныг хо̄тпат палт ялантэ̄в, ӯльюв ат ке о̄ньще̄гыт, миркол кӯщаин ла̄ве̄в, ӯльювыл вос ёвтыяныл. Хум хо̄тпат ос нэ̄ хо̄тпат янытлан хо̄талыт кастыл ос ялпыӈ хо̄талыт ва̄рыглэ̄в, клубт акванатхатэ̄в, ща̄й ае̄в, потраме̄в. Пенсият о̄лнэ ма̄хум самын патум хо̄талыл янытлаӈкве юв ялантэ̄в. Победа хо̄тал кастыл ос аквъёт мӯйлэ̄в. Школат ня̄врамыт ёт хо̄нтхатыглэ̄в. Кит та̄л сыс па̄влыӈ мир ма̄гсыл «Зажженная свеча» нампа тэ̄ла ва̄рыгласӯв. Па̄вылт тӯщтым памятник палт ня̄врамыт ёт ялантэ̄в, тот хо̄нт порат по̄рслым хо̄тпат ка̄стыянӯв. Хӯл алыщлан хо̄тпат янытлан хо̄талыл, па̄выл янытлан хо̄тал, мо̄т ялпыӈ хо̄талыт кастыл о̄с са̄в рӯпата ва̄ре̄в». «Совет ветеранов» нампа организация такви ансамбль о̄ньщи. Ювле хультум та̄лт «Родные напевы» нампа ансамбляныл 15 та̄лэ то̄влыс. Та̄н са̄всыр ялпыӈ хо̄талын э̄ргуӈкве акваг во̄виньта̄лавет. Мо̄тыт та̄л ма̄ньполь э̄тпос Октябрьский районт «Совет Ветеранов» рӯпитанэ̄тэ 40 та̄лэ, я̄ӈк на̄тнэ э̄тпос Победа хо̄талув 70 та̄лэ тах то̄влэ̄г. Ты ялпыӈ хо̄талыг янытлаӈкве та̄н ань щё̄питахтэ̄гыт. Яныг э̄ква ла̄внэ̄тэ щирыл, тав ты рӯпата таи ма̄гсыл ва̄ритэ, яныгпа̄ла хо̄тпат ул вос ёрувлавет ос янытлавет. Ань Карымкары па̄вылт 323 пенсионер хо̄тпа о̄лы. Та̄н халанылт 4 э̄лумхо̄лас «Труженик тыла» нам о̄ньще̄гыт. Ты ма̄хумн нё̄тым э̄ква ты рӯпиты.

1085 2014.10.10. Анна АЛГАДЬЕВА

Яныгхо̄тпат янытлан хо̄тал. Яныгхо̄тпанув та̄л э̄лаль о̄лнэ хо̄тал а̄тим о̄лнув. О̄лнэ ва̄рмаль ва̄щинтам, номтыӈ, мӯтраӈ хо̄тпанув тармыл ка̄сыӈ кол ӯрхаты. Яныгхо̄тпат янытлан хо̄таланылт ка̄сыӈ хо̄тпан пуста̄гыл о̄лнэ хо̄тал ла̄вуӈкв таххаты. Щуниӈ пасаныл вос ӯнлахо̄лэ̄гыт, хоса нот вос о̄лэ̄гыт. Ня̄враманылн, апганылн, рӯт ма̄хманылн ос рӯманылн ва̄тихал вос уральтанувет. Мощ мо̄лалнув, яныгхо̄тпат янытлан хо̄тал ва̄тимам ля̄пат, ам Хулюмсунт па̄вылт о̄лнэ э̄кваго̄йкаг палт щалтсасум, ты Константин Георгиевич ос Зоя Емельяновна Адиныг палт. Тэ̄н сас пе̄нсият о̄лэ̄г, па̄влыӈ ма̄хумн акваг ва̄ве̄г. Константин Георгиевич Сосьвинское ЛПУМГ организацият са̄в та̄л рӯпитас, компрессорный ӯнттыс, яныг техникал рӯпитас. Ёмщакв рӯпитаме ма̄гыс ме̄таль о̄ньщи – «За освоение недр и развитие нефтегазового комплекса Западной Сибири», 1985 та̄лт Москваныл ке̄тыглавес. Ма̄ньщи о̄лупса ва̄нэ̄тэ ма̄гыс ка̄сыӈ тув ня̄врамыт ёт рӯпитаӈкв «Ма̄нь ӯсквен» яланты, «Почётный гражданин Берёзовского района» нам о̄ньщи, «За развитие культуры малочисленных народов Севера» нампа ме̄талил 2010 та̄лт округ па̄лыл мӯйлуптавес. Константин Георгиевич ос Зоя Емельяновна атпан нупыл нёлолов та̄л аквъёт о̄лэ̄г, кит ня̄врам янмалтасы̄г, ат апыг, акв апыгпыг о̄ньще̄г. Во̄ртур э̄тпост соссаӈ мир янытлан хо̄талт о̄с акв ме̄талил мӯйлуптавесы̄г – «День семьи, любви и верности в Российской Федерации». Потрув э̄лаль мины: – Константин Георгиевич, наӈки урынтыл мощ потыртэн, хо̄т самын патсын, яныгмасын? – 1946 та̄л июль э̄тпос 25 числат тыт Хулюмсунт па̄вылт самын патсум. Омам Федосья Степановна Адина о̄лыс. Са̄всыр та̄рвит ва̄щинта̄лас. Репрессия ва̄с, война. Война та̄лыт сыс а̄гитэ̄кват пиркатирыг о̄лыс. Тыгыл Сортыӈъя̄ тапа̄лн О̄лттумпын толгуӈкв ялантасыт. Плананыл то̄влынэ̄г тот та ло̄ӈхитахтасыт. Ювле пе̄що̄выл ква̄лгыл хартсыт. Хунь Я̄гримн тыламлэ̄гын, аквано̄лтхатым хӯрум тумп то̄ва порат на̄ӈке̄гыт. Тот та хӯл алыщласыт. – Хо̄т ханищтахтасын? – Ня̄хщамво̄льт ханищтахтасум, тыт нила класс мус ханищтаве̄сыт. Ам акв та̄л туп тыт ханищтахтасум. Школа юипа̄лт Ханты-Мансийскат механизация училищат кит та̄л ханищтахтасум. Направление щирыл Карымкары па̄вылн леспромхозн ке̄тыглаве̄сум. Тот хоса ат о̄лсум, ювле ёхтысум. -Манарыг рӯпитасын? – Я̄грим сумыллас. Колыт ӯнттуӈкв са̄в во̄р йӣв э̄рыс. Тыт хулюм кӣвырт нор яктысӯв. Акванятым кол лаквап хольт ва̄рим, пор ква̄рекыг о̄лтым щирыл, Ягримн ка̄терыл хартве̄сыт. Ла̄кква ул вос ло̄сылэ̄гыт, са̄маныл ке̄рта̄ныл акванпе̄рыгтаве̄сыт. Тыщир ты во̄р йӣв лоӈхитасӯв. Сальки хо̄втыт, ӯльпат – осыӈыт, хосат. Ма̄н норанув э̄сгуве̄сыт. Иснас со̄плаг, а̄ви со̄плаг ва̄рве̄сыт. Тувыл Ха̄льӯсн ва̄нтласӯв, тыт ханищтахтамум щирыл рӯпата а̄тим о̄лыс. Ха̄льӯст тракторыл рӯпитасум. Хунь тыт компрессорный ӯнттуӈкв патвес, ювле йисум. Тыт рӯпитанэ̄м сыс яныг та̄рвитаӈ бульдозерыл рӯпитаӈкв Омск ӯсн ханищтахтуӈкв ке̄тыглаве̄сум. Трубоукладчикыг ханищтахтуӈкв Магнитогорск ӯсн ялсум. Чебоксарский Белый Ярн ялсум. Бульдозеристыг, сваибойщикыг, трубоукладчикыг о̄лсум, яныг техникал рӯпитасум. Константин Георгиевич ань пенсият кос о̄лы, нас о̄луӈкв ат ка̄сащи. Акваг матыра̄ти ва̄ри, ха̄п ва̄ри, во̄раи, хӯл алыщлы, са̄всыр рӯпата кон то̄вылхаты. Потрув иӈыт оигпи, Зоя Емельяновна э̄лаль потырты: – Зоя Емельяновна, хо̄т самын патсын, яныгмасын? – 20 сентябрь 1941 та̄лт самын патсум, а̄тям наме Емельян Игнатович Новьюхов войнан вуйлавес, ранитавес, юв ёхтыс. Омам Наталья Петровна Новьюхова, нёлоловхуйплов та̄л яныт порат хум ва̄рыс, а̄тям ловманкем та̄лэ таве̄ныл яныг о̄лыс. Ва̄тахкем та̄л яныт порат войнан минас. Хоты та̄л порат самын патыс, нэ̄пак ат о̄ньщас. Во̄раян хумыг о̄лыс. Ягпыгум хӯрум та̄л а̄нумныл яныг о̄лыс, тав 1938 та̄лт самын патыс, наме Ефрем Емельянович Новьюхов. Э̄щум Мария Емельяновна Новьюхова, 1944 та̄лт самын патыс. 1953 та̄лт а̄щув а̄тимыг е̄мтыс, Сталин о̄йка холам та̄лт. Ма̄н ма̄нкке̄в хультсӯв, та̄рвитаӈ о̄лыс. Ягпыгум иӈ ма̄нь та̄гыл во̄раяӈкв, хӯл алыщлаӈкв патыс. А̄щум о̄лум порат Васлёры па̄вылт о̄лсӯв, ётыл ущ Тэ̄к па̄вылн ва̄нтласӯв. Ань ма̄н колув о̄лум ма̄ ёлнильвес, нэ̄матыр ат хультыс. А̄щум колта̄гылт лов хум о̄лсыт, акв э̄щ туп о̄ньщасыт. Халанылт ёмщакв о̄лсыт, таяныт мисколыт о̄щсыт. Репрессия порат о̄пав аман хотыл мостыстэ, во̄рт па̄выл ва̄рум, мисколыт ӯнттум, пум ва̄рум. Матахмат мис, ма̄нь мисыт, сурты мисыт тув оймалтаманэ, такви о̄с тув ва̄нтлам, хоттӯйтхатам. Ӯйхулыт няртгалым порат тав тох ты ощмар ва̄рум. Юн о̄лум ӯйхуланэ тай та вӯймет. Та порат май арыг ӯйхулыт акваг хотняртгалаве̄сыт. Ётыл мощ сытамыгнув е̄мтыс, акв ювпо̄сасаманэ. Васлёры па̄вланылт ёмщакв о̄лсыт, щёлыӈыг о̄лсыт. Са̄в во̄раясыт, хӯл алыщласыт. Тыналахтымва̄талахтым Са̄пса ӯс па̄сныл сӯлттасыт. Хотаӈ пун тыналасыт, пун маныгтан порат – хоса пуныт я̄нас маныгтавет, някв пуныт я̄нас атавет. Матах хум атхатэ̄гыт, пушнинал, хӯлыл, пун хӯргытыл та̄лтхатэ̄гыт, та минэ̄гыт. Ты Сортыӈъя̄ лё̄ӈх хосыт Хулюмсунт та̄ра ты яласасыт, рущитн ты лё̄ӈх царский лё̄ӈхыг ла̄ввес. – Манарыл яласасыт? – Лувыл яласасыт, лувыӈ суныл. Сунаныл щар та̄глэ̄кв та̄лттыяныл. Тот матыр тэ̄нутыг, пормасыг пе̄нтыяныл. Ювле о̄с та̄глыӈ суныл та ёхтэ̄гыт. Война э̄лыпа̄лт тох яласасыт. Ёмщакв о̄лсӯв. Ма̄н колувт тамле яныг то̄тап (сунтук) о̄лыс, ам номилум, кӣвре ло̄мтыӈ са̄ккар о̄ньщас. Ягпыгум тамле са̄ккар тэ̄ӈкв сака ка̄сащас. Яныг нё̄тнэ то̄рыт а̄щув тотыглалас. Та порат матыр ёмаснув э̄лава̄рсаныл. Ам а̄щумн яныг нё̄тнэ то̄рыл майлаве̄сум, Ханты-Мансийскан ханищтахтуӈкв минасум, то̄рум ёттотыгласлум. А̄гит ка̄саласаныл, ла̄ве̄гыт, ла̄ккваяктылав. Та порат мотно о̄лыс, то̄рыл о̄луӈкв. Ща̄нюмн со̄рниӈ туля – яныг а̄хвтас пуӈкпаттаӈ туля тотыглас. Омам ла̄ви, яныгме̄гын, наӈын тах ты туля мыглум. Пе̄с, май, ма̄хум та̄нки туля ва̄рсыт. Са̄в туля акваннэ̄гим са̄с то̄тап кӣвырт о̄лсыт, та туля о̄с та ёто̄лыс. Тэ̄кн ва̄нтламувт, аман хоталь тахасыт, аман хоттӯлмантаве̄сыт. Ам ма̄нь порамт акваг а̄тям ёт хӯл алыщлым яласасум. Тӯяг сорх хӯл ёмщакв пӯхтас. Толгысыт, толыг ква̄лыг лувыл хартсыт. – Хо̄т ханищтахтасын? – Ам Ханты-Мансийскат фельдшеракушерыг нила та̄л ханищтахтасум. 1959 та̄лт минасум. Та порат ёмас о̄лыс, ма̄нь ма̄хум ханищтахтын ма̄ныл а̄стэ̄гыт, направление щирыл рӯпитаӈкв ке̄тавет. Ам Ха̄льӯсн ке̄тве̄сум, тот поликлиникат мощ рӯпитасум. Аквнакт яныг ле̄ккарув ла̄ви, Хулюмсунтыт ле̄ккар э̄ри. Са̄в ма̄нь ма̄хум, ла̄ви, тыт о̄лы, ратио лӯт о̄лы. Ёхтысум, нэ̄мат а̄ти. – Хо̄т о̄лсын? – О̄влэ̄т медпунктыт о̄лсум. Матахмат э̄т хӯлсум, амки сака пилащи осум, тупъер акваг хотьют та ё̄ми. Ӣти осма хӯргыӈ та̄гыл тётя Катя палт минасум, тув о̄лмаясум. Ме̄н аквъёт рӯпитасме̄н, тав санитаркаг о̄лыс. – О̄йкантыл хумыс румалахтасын, акванхо̄нтхатасын? – Тав о̄с Ханты-Мансийскат трактористыг ханищтахтас. О̄влэ̄т, ла̄ви, нас э̄лыл сунсыс, пищма хансуӈкв кӯсыс. Тувыл каникулыт е̄мтсыт, тав ёхтыс, танцыт румалахтасме̄н. Тох ла̄щалла̄щал аквъёт о̄луӈкв патсуме̄н. Та̄рвитаӈ рӯпитаӈкв о̄лыс, рация а̄тим. О̄щхатнэ э̄кватн ня̄враманыл самынпаттуӈкв нё̄тсум, тётя Катя посхатас, тэ̄нут па̄йтыс, пос ӣти ат тэ̄г, шприцанмен кӯралат па̄йтсанме̄н. То̄ва порат лувыӈ суныл тотыглаве̄сум, Ме̄ӈквъя па̄вылн, Ха̄ӈылсам па̄вылн. Тыт мощ о̄лсуме̄н, 1969 та̄лт тӯяг Ха̄льӯсн минасме̄н. 1971 та̄л па̄сныл 1982 мус садик ле̄ккарыгвоспитателиг о̄лсум. Ёмщакв рӯпитанэм ма̄гыс ӯскант Доска почёта па̄ртыт хурим ханас. О̄йкам тракторыл яласас, Восыӈтӯр совхоз тэ̄пканыт рӯпитас, пум са̄грысыт. Тувыл тыт компрессорный ӯнттуӈкв патвес, тав ла̄ви, амки ма̄мн рӯпитаӈкв минэ̄гум, та̄л рӯпитас, ювле Ха̄льӯсн ёхтыс. Аквта ма̄тэ̄т мощ рӯпитас о̄с Хулюмсунтын минас. Пыгме̄н школа а̄стлас, армин вуйвес. Ам ос тыг Хулюмсунтын ва̄нтласум. А̄гиме̄н Маша э̄щум палт хӯлислум, иӈ школан ялантас. Ты ма̄гыс ань мус ме̄н нуплуме̄н кантлы, такке̄тэ хӯлислуме̄н. Тыт газовый котельныйн операторыг вуйве̄сум, пенсиян патнэм мус тот рӯпитасум, ань пенсия выгум. Тамле ты хоса потыр ма̄н потыртасӯв. Ты со̄тыӈ хо̄тпаг матыра̄ти пуссын о̄ньще̄г. Тэ̄нки ӯнттум яныг нё̄тнэ колэ̄нт о̄лэ̄г. Ня̄враманэ̄н акваг нё̄таве̄г. Са̄в та̄л пуста̄гыл о̄лэ̄н. Пус ка̄т, пус ла̄гыл!

1085 2014.10.10. Валентина УЗЕЛЬ

Пе̄с ва̄рмалит э̄лаль тотнэ а̄ги. Ты хурит Анна Павловна Дунаева по̄слым о̄лы. Тав а̄ще Павел Дунаев, о̄йка «Малая Сосьва» нампа заповедникт во̄р са̄грим рӯпиты. Тот рӯпитаӈкв о̄вылтахтаме па̄сныл ань ва̄т та̄лыг ты е̄мты. Анна оматэ удмуртка нэ̄. А̄ги Ханты-Мансийск ӯст Югорский университет а̄стлас, тувыл юв минас. Ань Югорск ӯс музей колт рӯпиты. Ты сака ёмас ще̄мья. Акв хотты та̄лт округув янытыл ва̄рыглым касылт «Семья года» та̄н кассыт, округ кӯщаювн тот янытлаве̄сыт.

1085 2014.10.10. Николай МЕРОВ

Ма̄ньщиянув акванатхатыгласыт. Мо̄лал Карелия ма̄т Петрозаводск ӯст финноугор ма̄хум мирхал конференцияныл о̄лыс. 2016 та̄лт Финляндия ма̄т Лахти ӯст финноугор ма̄хум VII мирхал конгрессаныл е̄мты. Ма̄н округувныл ма̄ньщи, ханты ос ё̄рн хо̄тпанув тув ялуӈкв о̄с щё̄питахтэ̄гыт. Ты э̄лыпа̄лт нэ̄глум газетат ам ты урыл хансыгласум. Тувыл аквта торыг тот консультативный комитетт рӯпитан ма̄хум акванатхатыгласыт. Ма̄н округувныл Татьяна Гоголева, округ Дума депутат нэ̄, тув ялыс. Ань ты накт тав ӯст о̄лнэ соссаӈ ма̄хманув мирколн во̄виньта̄лсанэ. Та сапра̄нит маныр ва̄рмалит урыл та̄н потыртасыт, ты урыл э̄лаль ловиньтэ̄н. Т. С. Гоголева ла̄выс: «Финноугор ма̄хманув са̄в та̄рвит ва̄рмаль о̄ньще̄гыт. Ма̄н таима̄гыс акванатхатыглэ̄в, тыщир та̄рвитыӈ ва̄рмалянув мӯсхалыг щё̄питаӈкве кӯпнитнув о̄лы. Финноугор мирыт халт щар та̄рвит ва̄рмаль – ты ща̄нь ла̄тӈыт э̄лаль тотнэ тэ̄ла. Мо̄тыт Конгрессыт финноугор ма̄хманув ща̄нь ла̄тӈыт э̄лаль тотнэ ва̄рмаль урыл потыртаӈкве патэ̄гыт. Па̄влыӈ школатыт ня̄врамыт ща̄нь ла̄тӈын ханищтан тэ̄ла, ма̄нь па̄влытт пӯльницат лап ул вос пантавет ос мо̄т ва̄рмалит ёмщакв щё̄питаӈкве э̄ре̄гыт. Са̄тыт мирхал конгрессыт ма̄хум янгыщ ты урыл потыртаӈкве тах патэ̄гыт. Ань таима̄гыс Консультативный комитетт рӯпитан ма̄хумн 2015 та̄лт округув янытыл са̄в тэ̄ла щё̄питаве. Ща̄нь ла̄тыӈ э̄лаль тотнэ ма̄гыс финноугор мирыт халт яныг конференцият ва̄равет. Акв тамле ва̄рмаль ща̄нь ла̄тӈыл нэ̄пак хаснэ хо̄тпат ма̄гыс щё̄питаве. Тувыл финноугор мирыт янытлан хо̄тал кастыл Ханты-Мансийск ӯст яныг научный конференция ва̄раве. Ты тэ̄ла рущ щирыл тох намаим о̄лы: «Инновационные технологии в сфере образования». Ты ва̄рмальн ня̄врамыт ща̄нь ла̄тӈыл ханищтан хо̄тпат са̄всыр па̄влытныл во̄вавет. Ты коныпал Удмуртия ма̄ныл ос Коми республиканыл финноугор ма̄хманув тыг ёхталэ̄гыт. Тыи ос мо̄т э̄рнэ тэ̄лат пуссын мо̄тыт та̄лт щё̄питавет тах.

1085 2014.10.10. Тамара МЕРОВА

Нё̄тнэ ма̄ке̄в. Таквсы порат ма̄витув сака нё̄тнэ̄г о̄лы. Лӯима̄т акв таксв э̄тпос сыс ма̄тэ са̄всырыг е̄мтапа̄лы. Во̄р, я̄т, то̄рум нупыл сунсуӈкве сака пӯмыщ. Мо̄лал ам Лида Прописнова (Хозяинова) руманэ̄м по̄слум хуриянэ ка̄саласанум. Лидия Саранпа̄вылт о̄лы, ос са̄лы ӯрнэ рӯтанэ палт Нё̄рн ва̄тихал яланта̄лы. Тав са̄лы ӯрнэ ма̄хум о̄лупсаныл ос та̄н яласан ма̄ке̄ныл хурин акваг по̄слыянэ. Ань тав по̄слум хуриянэ на̄н сунсыглэ̄н.

1085 2014.10.10. Николай МЕРОВ

Ма̄хум янытлаве̄сыт. Са̄всыр мирыт та̄нки халанылт ёмщакв вос о̄лэ̄гыт, тыи ма̄гыс округувт ка̄сыӈ та̄л «Губернатор премия» нампа олннё̄тмил миве. Ты ва̄рмаль рущ щирыл «За вклад в развитие межэтнических отношений в Ханты-Мансийском автономном округе – Югре» ла̄ваве. Мо̄лал Ханты-Мансийск ӯст Экспертный советт рӯпитан хо̄тпат акванатхатыгласыт. Хотьют Губернатор премияолныл ань майвес, на̄н ты урыл э̄лаль ловиньтэ̄н. Округ губернатор постановлениятэ щирыл, ты премияолн 2011 та̄л па̄сныл майлаве. 2014 та̄лт ты совет хӯрмиттыг акванатхатыглас. Округ янытыл са̄всыр ма̄ныл пуссын аквъёт налыман нупыл нёлолов хо̄тпа урыл заявлениенэ̄пак ёхтыс. Ос ты премиял щар ма̄к хо̄йхатнэ хо̄тпат мивет. Таима̄гыс экспертный советт рӯпитан хо̄тпат ты ма̄хум та̄рапаттысаныл. Ты совет кӯщаиг Юрий Александрович Изосимов о̄лыс. Тав ань культура департамент кӯщай пе̄нтсыл рӯпиты. Таве̄н Евгения Михайловна Касаткина нё̄тыс, ты нэ̄ творчество кол отдел кӯщаиг о̄лы. Секретариг Елена Евгеньевна Исламуратова, культурат рӯпитан нэ̄, о̄с о̄лыс. Та̄н ётаныл Людмила Александровна Алфёрова, губернатор ва̄ӈын хум палт советникыг рӯпитан нэ̄, Елена Борисовна Плеханова, са̄всыр мирыт ёт рӯпитан нэ̄ ос мо̄таныт, пуссын аквъёт лов хо̄тпа ты ва̄рмаль щирыл рӯпитасыт. Советыт рӯпитан хо̄тпат ма̄хум ке̄тыглам заявлениянэ̄пакыт пуссын ёмащакв ловиньтасаныл ос ты хо̄тпат губернатор премия олныл мисаныл. Ты ма̄хум янытлаве̄сыт: – М. Ф. Рябова, Белоярский ӯс «Увас хурамат» нампа ёнгын колт рӯпитан нэ̄; – Л. Р. Хомляк, Белоярский ӯс «Увас хурамат» ёнгын колт рӯпитан нэ̄; – М. В. Кабакова, Белоярский район Ка̄сум па̄выл соссаӈ ня̄врамыт «Нумсаӈ ёх» нампа ӯщлахтын ма̄ кӯщай нэ̄; – Н. С. Цыбина, Нижневартовск ӯст ма̄нь ня̄врамыт ханищтан нэ̄; – А. К. Франгу, Сургутский район Солнечный па̄выл нэ̄пак ловиньтан кол кӯщай; – Л. Ш. Кашапова, Ханты-Мансийск ӯс творчество колт ма̄нь ня̄врамыт ханищтан нэ̄; – З. С. Куканбаева, Ханты-Мансийск ӯс «Дуслар» нампа татаробашкирский клуб колт рӯпитан э̄ква; – О. М. Норова (Анямова), Ханты-Мансийск ӯс «Лылыӈ со̄юм» нампа ня̄врамыт ханищтан колт соссаӈ ня̄врамыт ёт рӯпитан ма̄ньщи нэ̄; – С. Э. Киберов, Ханты-Мансийск ӯс «Дагестан» нампа мир юртыӈыщ о̄лнэ культура колт рӯпитан хум; – Е. Н. Молданова, Ханты-Мансийск ӯст о̄лнэ ма̄ньлат ма̄хум организацият рӯпитан ханты нэ̄. Ты коныпал ос ты организацият ёмащакв рӯпитанэ̄ныл ма̄гыс премияолныл майве̄сыт. Ха̄льӯс район Я̄сунт па̄вылт о̄лнэ «Ма̄нь ӯскве» нампа ня̄врамыт ӯщлахтын кол, тот ма̄ньщи нэ̄ Л. П. Стаканова кӯщаиг о̄лы. Нижневартовск ӯс «Ватан» нампа общественный организация янытлавес, тот кӯщаиг З. Ю. Валеева о̄лы. Нягань ӯст о̄лнэ «Алания» нампа осетин ма̄хум культура коланыл, тот кӯщаиг В. Х. Абаев рӯпиты. Сургут ӯст «Рущ ма̄хум культура» нампа общественный организация, кӯщаиг тот Е. В. Лоншакова рӯпиты. Сургутский район Фёдоровский па̄вылт о̄лнэ «Кумыки» нампа кумык ма̄хум культура кол, тот кӯщаиг А. К. Керимов о̄лы. Ханты-Мансийск ӯст о̄лнэ «Немецкая национальнокультурная автономия» нампа общественный организация, тот кӯщаиг Е. И. Кизнер рӯпиты. Ханты-Мансийск ӯст о̄лнэ хо̄нтлам ма̄хум общественный организацияныл, кӯщаиг тот В. А. Корнеева о̄лы. Ханты-Мансийск ӯст о̄лнэ «Ялпус ма̄хум» нампа ще̄мьяӈ ёнгын кол, кӯщаиг тот А. Р. Иштимирова-Посохова, ханты нэ̄ о̄лы. Ханты-Мансийск ӯст о̄лнэ «Вахдат» нампа таджик ма̄хум культура коланыл, тот Ш. Б. Норов кӯщаиг рӯпиты. Ханты-Мансийск ӯст о̄лнэ «Гармония» нампа культура кол, тот Г. А. Выдрина кӯщаиг о̄лы. Ты хо̄тпат рӯпатаныл ма̄гыс пуссын премияолныл майве̄сыт. «Культура» творческое объединение ке̄тум потре ма̄ньщи ла̄тӈыг Николай МЕРОВ толмащластэ.

1085 2014.10.10. Людмила ТЕТКИНА

Пыть-Ях ӯст о̄лнэ музей йильпи колыл ӯнттувес. Ты э̄тпос 9 хо̄талэ̄ныл Пыть-Ях ӯскант йильпи кол рӯпитаӈкве о̄вылтахтас. Яныг кирпащ колт аквпалъе̄ре̄т нэ̄пак ловиньтан кол ос мо̄тпалъе̄рт музей рӯпитаӈкве патэ̄г. Ты кастыл ялпыӈ хо̄тал о̄лыс, са̄в мир тув акванатхатыглас. Зоя Лазаревна Жавко, такви а̄ги о̄парищ наме Каюкова, музейт кӯщаиг рӯпитан нэ̄, ла̄выс: «Ма̄н музей колув 2001 та̄лныл рӯпиты, Пыть-Ях ӯс ляпат во̄р халт ханты па̄выл ӯнттувес. Тыг ёхталан мирн ма̄н суссылтэ̄в ос потыртэ̄в, хумус ма̄ньщит, хантыт пе̄с порат о̄лсыт. Ты пора мус акв та̄рвитыӈ ва̄рмаль о̄лыс, са̄всыр йильпи выставкат суссылтаӈкве колнакыт ат о̄щсӯв. Ма̄н 16 э̄лумхо̄лас пуссын акв колт рӯпитасӯв. Ань йильпи колт колнакыл миве̄в, тот ма̄н са̄всыр выставкат щё̄питаӈкве патэ̄в. Ос таи ёмас, ты кол ӯскан по̄хат ӯнттувес, ам номсэ̄гум, тув тах са̄внув мир ёхталаӈкве паты. Галина Петровна Марченко, «Югра лылые̄п» общественный организацият рӯпитан нэ̄, тав ты музей ва̄руӈкве номылматас. Та порат ӯс мирколт кӯщаиг Валерий Михайлович Веснин рӯпитас. Галина Петровна тав палтэ ялыс, такви номтэ урыл потыртас. Тот ювле ла̄ввес, номтанэ пуссын нэ̄пакн вос хансыянэ, миркол кӯщаит олн хо̄нтэ̄гыт ос соссаӈ ма̄хум культураныл э̄лаль тотнэ ма̄гсыл музей тах ӯнттэ̄гыт. Ты юипа̄лт «Балыклес» нампа организация норыт, па̄ртыт ос са̄в мо̄т э̄рнэ утыт тотсыт. О̄влэ̄т та̄н пе̄с йис ва̄рмалит ва̄нэ соссаӈ ма̄хум киссыт, та̄н музей ма̄гсыл со̄мъяхыт, ханты колыт пе̄с щирыл вос ӯнттыяныл. Пыть-Ях ӯст ты ва̄рмаль ва̄нэ ма̄ньщи ос ханты хо̄тпат ат хо̄нтсыт. Ты рӯпата нас по̄х хо̄тпатн ва̄рвес. Музеюв ёмащакв рӯпитанэ̄тэ ма̄гсыл Ольга Николаевна Кузнецова о̄с са̄в ё̄р пиныс. Та порат тав соссаӈ ма̄хум культураныл но̄хво̄рмалтан центрыт кӯщаиг о̄лыс. Ты рущ нэ̄ Угут па̄вылт самын патыс, тот яныгмас. Ща̄нягеа̄щаге тув ссылкан ке̄твесы̄г. Ханты ма̄хум халт о̄лыматэ сыс, Ольга Николаевна ма̄н ла̄тӈув ос та̄рвитыӈ ва̄рмалянув ёмащакв ханищтасанэ. Ты центрыт рӯпитым, ма̄ньщитн, хантытн сака нё̄тыс. Ты ма̄гсыл соссаӈ ма̄хманувн тав сака янытлаве. 2007 та̄л мус музейт туп 300 са̄всыр пе̄с пормас акванатым о̄лыс. То̄нт ма̄н яныг рӯпата ва̄рсӯв, во̄рт манос ма̄нь па̄влытт о̄лнэ ханты ще̄мьят палт ва̄тихал ялантасӯв. Та̄н ты пе̄с пормасыт музей ма̄гсыл мисыт. Ам амки Угут па̄вылныл о̄лэ̄гум, ӯщлахтын порат во̄рт о̄лнэ рӯтанум палт ялантэ̄гум. Са̄всыр пе̄с пормасыт атэ̄гум. Ты пормасыт ёвтуӈкве кос э̄ре̄гыт, тувыл ты рӯпата ма̄гсыл олныл щар ат та̄стыглаве̄в. Наталья Кононовна Поянкина, музейт рӯпитан нэ̄, Лемпино нампа такви яныгмам па̄влэ̄н о̄с яланты, тот рӯпиты. Наталья Кононовна рӯтанэ о̄с пуссын пе̄с ма̄хманув щирыл о̄лэ̄гыт. Са̄т та̄л сыс ма̄н 3 со̄тыра арыгкем са̄всыр пе̄с пормасыт, маснутыт, хурит акванатсанӯв. Тыт рӯпитан а̄ги музейт о̄щнэ пормасыт пуссын нэ̄пакын хассанэ. Ма̄н щё̄питам суссылтапанув ӯст рӯпитан организациятытн тотыглыянӯв. О̄влэ̄т ты организацият ёт потыртахтэ̄в, та̄н ма̄навн колнак вос мыгыт, тувыл щё̄питам выставкав тув тотылӯв. Ма̄хум ёхталэ̄гыт ос суссылтапув сунсыглэ̄гыт. Ма̄н ань о̄с олн сэ̄луӈкве ла̄ваве̄в, музейн ёхталан ма̄хумн билет тыналэ̄в, тынэ ня̄врам ма̄гсыл 20 солко̄ви, мо̄т ма̄хум ма̄гсыл 40 солко̄ви. Акв та̄л сыс 6-7 со̄тыра э̄лумхо̄лас тыг ёхталы. Ты коныпал мо̄т ӯсытт, па̄влытт о̄лнэ организацият ёт рӯпитэ̄в. 2013 та̄лт Нефтеюганск ӯст туризм щирыл рӯпитан фирма ёт соглашениенэ̄пак хассӯв. Та̄н Нефтеюганск ӯсныл ня̄врамыт музеювн тотыгласаныл. Салым ос Пойковский па̄влыгныл а̄гирищитпыгрищит музей сунсуӈкве ёхталасыт. Тох ня̄врамыт туи порат тыг тотыглавет. Наталья Кононовна ма̄щтырлаӈкве сака ёмащакв ха̄сы, са̄всыр сувенирыт, ма̄ньщи ос ханты ма̄хум пормасыт ю̄нты. Ӯст о̄лнэ ялпыӈ хо̄талыт кастыл са̄всыр суссылтапыт ва̄рыглэ̄в, ма̄нки ю̄нтум пормасанув тот тыналыянӯв. Ханты-Мансийск ӯсн во̄виньта̄лаве̄в. Ка̄сыӈ та̄л тот «Югра-Тур» нампа выставкан яланта̄лэ̄в. Тот о̄лнэ музеит ёт рӯпитэ̄в. «Торум Маа» музей са̄всыр конференцият, ханищтапыт, суссылтапыт щё̄пита̄лыглы, ма̄н акваг во̄выглаве̄в. Тувыл тув ялантаӈкве олн ат о̄ньще̄в». Ты коныпал Зоя Лазаревна «Экологоэтнографическая тропа» нампа проект урыл потыртас. Та̄н «Культура» программа хосыт олныл та̄стуве̄сыт. Ты олныл та̄н музейт ос акв суссылтап щё̄питэ̄гыт, пе̄с порат соссаӈ ма̄хум хумус во̄раясыт, ёхталан мирн та̄н суссылтаӈкве ос та урыл потыртаӈкве патэ̄гыт. Зоя Лазаревна са̄т арыгкем та̄л тот кӯщаиг о̄лы. Тав сака ка̄ркам нэ̄, ты та̄лыт сыс музей ма̄гсыл са̄в рӯпата ва̄рыс. Ань ӯст о̄лнэ ка̄сыӈ э̄лумхо̄лас музей урыл ва̄г. Ма̄хум тув вос ёхталэ̄гыт ос тот ва̄рыглам суссылтапыл вос пӯмщалахтэ̄гыт, ты нэ̄кве ма̄хманэ ёт ка̄сыӈ та̄л Ӯринэ̄ква хо̄тал ос мо̄т ялпыӈ хо̄талыт ва̄рыглы. Ӯст о̄лнэ мир пуссын мӯйлуӈкве во̄виньта̄лыяныл. Кӯщай нэ̄ ла̄выс: «Пыть-Ях ӯст са̄всыр мир о̄лы, са̄в хо̄тпа мо̄т ма̄ныл тыг о̄луӈкве ёхты. Мо̄т ма̄ныл ёхтум ма̄хум китыглавет, округув манрыг тамле нам о̄ньщи, та̄н аты ва̄ганыл. Тыи ма̄гсыл соссаӈ ма̄хум ялпыӈ хо̄талыт тыт ва̄рыглэ̄в, потыртэ̄в. Мо̄т мирыт ма̄ньщит ос ханты о̄лупсаныл урыл са̄внув вос ва̄гыт ос та̄наныл вос янытлыяныл».

1085 2014.10.10. Тамара МЕРОВА

Пӯмыщ суссылтап ва̄рвес. Хури по̄слан о̄йка Г. С. Райшев мастерскойколэ̄т йильпи суссылтап ва̄рвес ос ювле хультум э̄тпост тав рӯпитаӈкве о̄вылтахтас. Тот Геннадий Степанович атпан та̄л сыс, ты 1960 та̄лныл 2010 та̄лыт мус, по̄слум хуриянэ акванатве̄сыт. О̄йка ты по̄слум хуриянэ са̄всыр щирыл ва̄рманэ. Рущ щирыл та̄н я̄нас нам о̄ньще̄гыт, тыи линогравюра, офорт, монотипия. Ты хурит та̄нки щирыл по̄слым о̄лэ̄гыт. Тох Геннадий Райшев «Сибирские мотивы» намаим хуриянэ линогравюра щирыл щё̄питасанэ. Ты выставкатэ 1998 та̄лт ма̄хумн суссылта̄лвес, ань тувыл вим то̄ва хурит мӯй хо̄тпат о̄с тот ка̄салаӈкв ве̄рмияныл. Райшев о̄йка юио̄выл та̄лытыт по̄слум рӯпатанэ «живопись искусстваг» ла̄вавет. Ань ты суссылтапн «Калевала» ос «Героический эпос манси. Песни святых покровителей» хансым пе̄с йис потрыт щирыл по̄слым хурит щё̄питаве̄сыт. Финныт ос карелыт пе̄с йис потраныл щирыл хурит ос ольпыл сартсанэ. Ос пе̄с ма̄ньщи потрыт щирыл тав хурит сэ̄мыл хаснэ йӣвыл по̄слысанэ. О̄йка Карпинск ӯст о̄лме̄т сыресыр хурит о̄с по̄слум. Ань тувыл тотым са̄тхуйплов хури тыт суссылтаве. Ты коныпал мо̄лты та̄л о̄вылтам «Космос ос человек» хуриянэ ты выставкат о̄лэ̄гыт. Такви Геннадий Степанович ла̄выс: «Ам ань яныгпа̄лаг е̄мтсум, са̄в мирыт нупыл, о̄лупсав нупыл На̄й-О̄тыранув хольт нумыл сунсэ̄гум. Ма̄ке̄в матыра̄ти пуссын хӯлы, хо̄та̄ти сунсы, номтанув ва̄вет. Ань таима̄гыс тамле хурит по̄слуӈкве номылматсум». Ты суссылтап сунсуӈкве са̄в мир вос ёхталы, тав сака пӯмщиг ва̄рим о̄лы.

1085 2014.10.10. Тамара МЕРОВА

Та̄н ма̄щтырлаӈкв ханищтаве̄сыт. Октябрьский район Шеркалы па̄вылн ёхталам мӯй ма̄хум ма̄щтыр хо̄тпа съезданыл номуӈкве тах иӈ хоса патыяныл. Ва̄им, та̄н са̄в та̄л акван ат атыглаве̄сыт, ма̄ньлат соссаӈ хо̄тпат са̄в ва̄рмалит урыл нэ̄матыр ат хӯлыгласыт. То̄ват маснут ю̄нтсыт, сакныл матыр хартсыт ос йӣвныл, совныл са̄всыр пормасыт ва̄рсыт. Та̄н атыпыл номсысыт, то̄ва маснутаныл, пормасаныл, насати, лю̄льсаӈ ва̄рманыл. Ханты ос ма̄ньщи ма̄хум са̄ртын та̄н щиранылт хорамтым маснут, хо̄та̄ти ат э̄рнэ хансал супаныл мори ат ю̄нтыгласаныл ос мо̄т мирныл вуим хащта̄л нак ат о̄щсыт. Ма̄хманув пе̄с щирыл о̄лсыт ос йис наканыл э̄лаль тотсаныл. Ты ва̄рмалит урыл Татьяна Александровна Молданова потыртас: «Ма̄н ма̄щтыр ма̄хманув ёт хосат та̄гыл акван ат атхатыгласӯв. Ос Л. А. Алферова ма̄навн тахольт нё̄тыс, кӯщаит па̄лыл олн хо̄нтыс ос ма̄н тыт акванхо̄нтхатасӯв. Тыг са̄всыр ма̄щтыр хо̄тпат ёхтысыт ос та̄нки ва̄рум пормасаныл ёт тотсаныл. Пормасаныл пуссын пӯмщит, хорамыӈыт. Ма̄н пе̄с щирыл ва̄рим пормасыт та̄ра я̄нас атсанӯв, йильпи щирыл ва̄рим утыт по̄ханнув пинсанӯв. Ос ты о̄вылтыт ма̄щтыр хо̄тпанув ёт ёмщакв потыртасӯв. Ты ма̄хумн та̄рала̄всӯв, ма̄н туп пе̄с йис ханищтан ма̄гсыл ос та̄наныл э̄лаль тотнэ щирыл рӯпитаӈкве таӈхе̄в. Мо̄т мирыт о̄щнэ ва̄рмалит та̄н акван ул вос тэ̄лыгтыяныл. Ма̄н суссылтап суссӯв, ос рущ щирыл ке ла̄вуӈкве «сценический» супыт, «сувенирный продукцият» по̄ханатсанӯв. То̄ва хо̄тпанув кантлуӈкве о̄вылтахтыгласыт, манрыг та̄н хансал ю̄нтым хорамыӈ супаныл манос ёмщакв сагим маснутаныл по̄хан пинве̄сыт. Тав ты кос нё̄тнэ, туп ма̄н пе̄с ма̄хманув тамле сака хансаӈ маснутыл ат о̄лсыт. Касум па̄вылт яныгпа̄ла ма̄хманув ма̄ньлат хо̄тпат ма̄к тэ̄лан ханищтыяныл. Ты рӯпата ва̄рнэ ма̄гыс са̄всыр потрыт, кинат щё̄питавет ос тувыл ханищтапыт порат суссылтавет. Ма̄ньщи ма̄хум халт М. С. Мерова ма̄щтырыг супыт ю̄нтнэ ос пе̄с накыт ва̄нэ хо̄тпаг о̄лы. Ма̄н пуссын таве̄ныл ханищтахтэ̄в, матыра̄ти ва̄рмалит пӯмщалэ̄в. Ань йильпи щирыл пормасыт вос ю̄нтыяныл, туп та̄н ма̄к ма̄ньщи ман ханты пормасыг ул вос ла̄вияныл, наска̄ссыг мо̄т ма̄хум ул вос ла̄палыяныл». Светлана Кирилловна Гындышева ла̄выс: «Ты съездыт ханищтапанув о̄с ёмщакв минасыт. З. Н. Лозямова ханты супыт ю̄нтнэ тэ̄лат урыл потыртас, Яков Тарлин хум хо̄тпа э̄нтапыт ва̄рнэ тэ̄лат ос йӣвыл щё̄питан пормасыт урыл потыртас. Татьяна Уколова ос Галина Волдина ма̄хум са̄сыл рӯпитаӈкве ханищтасанэ̄н. То̄нт ма̄ньлат ма̄хум та̄рапаттысаныл, хумус пе̄с ма̄хманув пормасаныл ва̄рыгласаныл, ю̄нтыгласаныл, манрыг ханса тув мори по̄слуӈкв ат ро̄ви. Тувыл хоты хорамлан то̄рыт мо̄т то̄рн ю̄нтуӈкве ат э̄ре̄гыт, таил хӯлтве̄сыт. Юио̄выл хультум та̄лытыт, ва̄им, этнотуризм тэ̄лат кастыл то̄ва ма̄хманув, ва̄им, са̄всыр пормасыт ва̄руӈкве ква̄лапасыт. Матыр ва̄ре̄гыт ос номсэ̄гыт, тытты ма̄ньщи манос ханты ма̄хум ма̄к пормасаныл. Та щирыл ва̄руӈкве воссыг ат э̄ри. Ма̄н ань ма̄ньлат хо̄тпат пе̄с йис ва̄рмалит торгамтаӈкве ханищтыянӯв, тыгыл э̄лаль маныр ва̄руӈкве патэ̄гыт, та̄н та̄нки вос номсахтэ̄гыт. Ма̄н ос та̄нанылн нё̄туӈкве патэ̄в». Шеркалы па̄влыӈ ма̄хум тув о̄с во̄виньта̄лве̄сыт. Рущ о̄йка Юрий Николаевич Кушнин потыртас: «Ам ты па̄вылт о̄лнэ кол ёвтсум ос хӯрум та̄л тыт о̄лэ̄гум. Амки тыт кос самын патсум, ос ётыл мортым ма̄н о̄луӈкве минасум. Тот о̄лымам марщумлаве̄сум, насати, хӯл алыщлаӈкве, во̄раяӈкве тахнэм. Ювле та ва̄нтлысум. Мо̄т юртанум о̄с ла̄кквамингаласыт. Ос то̄внакт мощщан мӯйлуӈкве тыг ёхтыгпа̄лэ̄гыт, та̄нанылн тыт мӯсты. Ам ань ты суссылтап сунсыслум ос таке̄м ща̄гтсум. Ма̄ньта̄гыл йӣвныл ёргуӈкве о̄с сака тахсум, туп э̄лаль ат ханищтахтасум. Тыт ань пӯмыщ потрыт хӯнтлысум. Тамле накыт ва̄тихал вос ва̄рыглавет. Юртанум ань минасыт, та̄наныл о̄с тыг тотнуванум. Тамле нё̄тнэ пормасыт, супыт о̄с вос ка̄саланувыт. Соссаӈ ма̄хум культураныл о̄вылтыт са̄внув о̄с вос ва̄гыт. А̄нумн тыт сака пӯмыщ о̄лыс». Потыртам ма̄хманумн яныг пӯмащипа ла̄тыӈ ла̄ве̄гум.

1085 2014.10.10. Анна АЛГАДЬЕВА

Яныг ӯс колыл акваг та ӯнттаве. Манах щёс Ханты-Мансийскан ёхталэ̄гум, ӯсув акваг нё̄тнэ̄г та е̄мты. Ам ханищтахтамум порат студентыт о̄лнэ ӯс о̄вылт щар во̄р о̄лыс. Ханищтахтын ма̄хум ма̄гыс ат накпа ат о̄лнэ коланыл э̄лыл та на̄ӈксыт. Ань тай таса̄вит та яныт колкапаит та ӯнттымат, хоттыпуӈкв ро̄ви. Нэ̄пак та̄ратан хо̄тал ӯс кант ё̄мыгтасум, йильпи ӯнттым колытыл о̄щатахтыгласум. Тох ялгала̄лым, ӯс кан котиль ха̄ль щахылн ёхтысум. Хуньт о̄лум нас ха̄ль ща̄хыл тох та ва̄рапиме. Ня̄врамытын ёнгасан та са̄вит са̄всыр ёнгын ма̄: та сып, та тя̄тьтялахтын ма̄, са̄всыр ха̄хталахтын ха̄ӈхылтапыт, нас ӯнлахо̄лнэ ӯнлын ма̄т. Ма̄н ханищтахтамувт ха̄ль ща̄хыл та̄ра нас лё̄хъяс о̄лыс. Ань тай та па̄ӈхвит а̄хвтас лё̄ӈх. Ха̄ль щахыл котильт ма̄нь турво̄х ва̄рим, турво̄х кӣвырн ке̄рас ло̄мт, та ке̄рас мувал ты ма̄т о̄лнэ са̄всыр ӯйхулыт ва̄римат: во̄рто̄лно̄йка, со̄рп, кит са̄лы, хӯрум ха̄йтнут, во̄р пӯрщ, ращ. Тувыл са̄всыр нё̄тнэ вит со̄схатнэ ма̄т, рущ щирыл – фонтаныт, ня̄врамыт тахсан паровозикыт, са̄всыр нё̄тнэ каруселит о̄лэ̄гыт. Ма̄хум такем са̄в. Тот сунсыглахтым колала ӯиӈ «Дерево дружбы» по̄хын ёхтысум. Хорамыӈыг масхатым клоуныт такем поргащлэ̄гыт, йӣкве̄гыт. Ӯсыт о̄лнэ са̄всыр дополнительное образование ханищтан ма̄хум ва̄рнэ рӯпатаныл суссылтасыт, организацият, ма̄хум ма̄гыс ёнгын предпринимателит, са̄всыр учрежденият. Ты халт «Лылыӈ со̄юмт» рӯпитан хо̄тпат о̄с о̄лсыт, лӯпта а̄канит, тарыг па̄кв а̄канит, ма̄нь то̄р а̄каняквет хумыс ва̄равет, суссылтасыт. «Юный натуралист» нампа станция ӯйхуланыл суссылтасыт. Ты халт са̄всыр атыӈ утыт тыналаве̄сыт. Ма̄хум ӯщлахтын хо̄тал рӯпитам наканыл порсыг ат минас, са̄в хо̄тпа ня̄врамыӈ та̄гыл тот ё̄мыгтасыт, ӯщлахтасыт. Хотьютын матарыг ханищтахтын ва̄рмаль мӯстыс, э̄лаль ты ма̄хмыт палт ханищтахтуӈкв ялантаӈкв патэ̄гыт. Тох ты ӯст о̄лнэ са̄всыр ва̄рмаль суссылтаве.

1085 2014.10.10. Николай МЕРОВ

Ха̄льӯс на̄ӈк щахыл урыл потыр. Раиса Петровна Загородняя – ханты нэ̄, тав Ха̄льӯст соссаӈ мир культура центр колт лов та̄л рӯпиты. Та̄н тот ка̄тыл са̄всыр пормасыт ва̄ре̄гыт. Тав ла̄выс, хунь о̄выл щёс ӯсн ёхтыс, Ха̄льӯс налми ва̄тан на̄ӈкыт яныгман щахылн пӯрлахтуӈкве ялыс. Та ма̄ сыме̄н татем хо̄яс, та па̄сныл акваг тув яланты. Ӯст о̄лнэ соссаӈ ма̄хманув пӯрлахтуӈкве тув ва̄тихал ялантэ̄гыт. Мо̄лты ам Ха̄льӯсн ялмум порат Раиса Петровна а̄нумн та ма̄ урыл пе̄с потыр потырта̄лыс. Ань на̄н тав потре э̄лаль ловиньтэлы̄н. – Хосат пе̄с ма̄хум та на̄ӈк щахылн са̄т та̄л сыс акв щёс пӯрлахтуӈкве яланта̄лсыт. Та̄н тот йир тӯщтыгласыт. Халанылт потрамасыт, хоты ма̄т ос хумус хӯл алыщлаӈкве ос во̄раяӈкве ро̄ви. Ма̄хум тот та̄нки о̄лупса ва̄рмаляныл урыл потыртасыт ос йильпи ля̄ххалыт тотсыт. Та ма̄т та̄н ня̄враманыл ха̄йтыгтасыт ос нас ва̄щинтахтыгласыт. Ханты ма̄хум та ялпыӈ ма̄ «Аяс на̄ӈк пай» ла̄вияныл. Ты потыр ма̄ньщи щирыл «Ма̄нь А̄с я̄ То̄рум» толмащлаве. Ха̄льӯс ля̄пат Лӯи Тагт я̄ по̄хыт ма̄нь А̄с я̄ овты. Таима̄гыс ты на̄ӈк щахыл тох намаявес. Пе̄с ма̄хум тох потырта̄лсыт: «Пе̄с йист таквсы порат я̄ хосыт ма̄ньщи ос ханты похатыр хо̄тпат минасыт. Та̄н татем нё̄тнэ, урамыӈ ма̄ ка̄саласыт, па̄гпӯхтысыт, а̄ращ ва̄рсыт, э̄т хӯлсыт. А̄лпыл но̄хква̄лсыт ос э̄лаль минмыгтаӈкве атхатасыт. Ос миннэ̄ныл э̄лыпа̄лт, ты нё̄тнэ ма̄ ма̄гыс, То̄рум янытлан кастыл, та̄нки йӣв суваныл тот тӯщтым хультуптасаныл. Ты йӣв сувыт тӯяг но̄хтэ̄лумтасыт ос на̄ӈк йӣвыг е̄мтсыт. Та па̄сныл та̄н ань ты хо̄тал мус тот лю̄ле̄гыт. Ань ты йӣвкапаит карсыг, та̄кыг е̄мтсыт. Ты ма̄ урыл о̄с акв пе̄с потыр о̄лы. Тав ос тох потырта̄лвес. Хосат, ма̄ тэ̄лум порат, То̄рум а̄щанув ма̄ уртсыт. Ка̄сыӈ То̄рум такви ма̄тэ вуянтас. Карс аки товлыл яласас, тав Ма̄нь А̄с я̄ аки ёт ты на̄ӈкыт яныгман ма̄ ма̄гыс хо̄нтлыс. Тув мус та алыщлахтасы̄г, на̄ӈк йӣв тольхыт пуссын ёлаль хӯтсыт. Аквтупмат намыл хӯтувъяптуве̄сыт. Со̄ль, та на̄ӈк щахылн ляпаман порат хӯтум йӣв тольхыт ёмщакв ка̄салаӈкве ро̄ви. На̄н Ха̄льӯсн ёхтэгы̄н ке, ты нё̄тнэ ма̄н пӯмащ ма̄гыс о̄с ялэ̄н.

1085 2014.10.10. Людмила ТЕТКИНА

Юван Шесталов рӯпитам колэ музеиг ва̄рвес. Ма̄нь таквс э̄тпос китыт хо̄талэ̄т Ханты-Мансийск ӯст о̄лнэ соссаӈ ма̄хум Югорский университетн во̄виньта̄лве̄сыт. Та ханищтан колт Юван Шесталов намыл пиным музей рӯпитаӈкве о̄вылтахтас. Нэ̄пак хансум ма̄ньщи о̄йка 2011 та̄лт а̄тимыг е̄мтыс. О̄лме порат тав Югорский университетыт рӯпитас. Тот соссаӈ ма̄хум пе̄с йис ва̄рмалит, ла̄тӈаныл ханищтан ос но̄хво̄рмалтан центрыт кӯщаиг о̄лыс. Ты музейт ань тав нэ̄паканэ, хуриянэ ос пормасанэ акванатве̄сыт. Юван Шесталов намыл намаим кол «Торум Маа» нампа музей нупыл ловиньтахты. Тот рӯпитан хо̄тпат ты кол ӯргалаӈкве тах патэ̄гыт. Музей ва̄руӈкве Юван о̄йка яга̄гитэ Альбина Николаевна Мехнина номылматас. Ты кол рӯпитанэ̄тэ ма̄гсыл тав, Светлана Динисламова, мо̄т ма̄ньщит ос хантыт са̄в ё̄р пинсыт. Югорский университетыт кӯщаит ты музей ва̄руӈкве щар ат ка̄сащасыт. Ӯст о̄лнэ соссаӈ ма̄хум, «Торум Маа» нампа музейт рӯпитан ма̄хум са̄всыр кӯщаитн ты музей урыл пищма хансыгласыт. Тох кит та̄л ювле хультыс, Юван Шесталов музее рӯпитаӈкве ань та о̄вылтахтас. Акванатхатыглам ма̄хум музей сунсыгласаныл ос Юван Шесталов номылматыгла̄лсаныл.

1085 2014.10.10. Николай МЕРОВ

Финноугор ня̄врамыт мӯйлуӈкве о̄вылтахтэ̄гыт. Ты э̄тпос 16 хо̄талт Россият о̄лнэ финноугор ня̄врамыт ма̄гыс нилыт мирхал фестиваль ва̄раве. Ань йӣквнэ ос э̄ргын ня̄врамыт Марий Эл ма̄ныл мӯйлуӈкве о̄вылтахтэ̄гыт. Та юипа̄лт Коми республикан минэ̄гыт. Тувыл ос Удмуртия ма̄н, ос юио̄выл концертаныл Коми-Пермяцкий округт ва̄раве. Ты ва̄рмалин ня̄врамыт са̄всыр ма̄ныл акванатхатэ̄гыт. Ты коныпал 2015 та̄лт Карелия ма̄т финноугор мирыт о̄с акв тамле яныг концерт тах ва̄ре̄гыт. Щар о̄выл концерт 2008 та̄лт о̄лыс. Та па̄сныл ты тэ̄ла акваг э̄лаль тотаве. Ма̄хум ты ва̄рмаль сака э̄руптыяныл, йӣквнэ ос э̄ргын ня̄врамыт яныг ща̄гтыл ӯрияныл. Ты мӯйлын ва̄рмаль ка̄сыӈ та̄лныл мо̄тмо̄т щирыл пӯмщиг ва̄рыглаве. Финноугор мирыт культура Центр колныл ке̄тым ля̄ххал ма̄ньщи ла̄тӈыг Николай МЕРОВ хансыстэ.

1085 2014.10.10. Людмила ТЕТКИНА

Са̄всыр мирыт юртыӈыщ вос о̄лэ̄гыт. Ты та̄л Ханты-Мансийск ӯст йильпи организация рӯпитаӈкве о̄вылтахтас, рущ ла̄тӈыл « Совет по делам национальнокультурных объединений и религиозных организаций» намаим о̄лы. Тагир Аюпов, Ханты-Мансийск мирколт депутатыг рӯпитан хум, кӯщаиг тув пе̄риявес. Ань ты Советын са̄всыр мирыт общественный организацияныл хансым о̄лэ̄гыт. Ма̄ньщи ос ханты яныгпа̄ла хо̄тпат хосат та̄гыл о̄с Совет ва̄рсыт, рущ ла̄тӈыл: «Окружной Совет старейшин коренных малочисленных народов Севера» ла̄ваве. Ань тот М. К. Волдина, Д. В. Герасимова, Д. В. Лельхов, А. М. Константинов ос мирн ва̄нэ мо̄т хо̄тпат рӯпитэ̄гыт. Яныгпа̄ла хо̄тпат янытлан хо̄тал э̄лыпа̄лт ты Советыт рӯпитан ма̄хум яныг сапра̄нин акванатхатыгласыт ос соссаӈ ма̄хум тув во̄виньта̄лсаныл. Тагир Аюпов та̄н нупыланыл ла̄выс: «Ма̄ньщи, ханты ма̄хум пе̄с пора та̄гыл тыт о̄лэ̄гыт ос та̄нки ла̄тӈаныл ос ва̄рмаляныл э̄лаль тотыяныл. Ань тыт са̄всыр мирыт о̄лэ̄гыт, та̄нки халанылт юртыӈыщ вос о̄лэ̄гыт, тыи ма̄гсыл ма̄навн аквъёт рӯпитаӈкве э̄ри. Ма̄ньщи, ханты хо̄тпат ты Советыт о̄с вос рӯпитэ̄гыт». Д. В. Герасимова, Югорский университетт рӯпитан э̄ква, ла̄выс: «Ань мо̄т ма̄ныл ёхтум мирыт то̄ва порат тыт о̄лнэ соссаӈ ма̄хум ат янытлыяныл. Тамле ва̄рмаль таи ма̄гсыл о̄лы, та̄н ма̄н пе̄с йис ва̄рмалянув ат ва̄ганыл. Ань ма̄навн са̄всыр ялпыӈ хо̄талыт аквъёт ва̄рыглаӈкве ос тыт о̄лнэ са̄всыр мирыт тув во̄выглаӈкве э̄ри». Сапра̄нит тыт кит Советыгт рӯпитан ма̄хум э̄лаль аквъёт рӯпитаӈкве потыртахтасыт. Ханты-Мансийск ӯс мирколыл ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1085 2014.10.10. Тамара МЕРОВА

Ня̄врамыт туи ёмщакв ӯщлахтасыт. Наталья Ткачук, Ханты-Мансийск ӯст А̄с-угорский институтт рӯпитан нэ̄, тав соссаӈ ма̄хманув ань о̄лнэ о̄лупсав ханищтытэ ос нэ̄пакн хансытэ. Ма̄н газетав ва̄рнэ колувн то̄внакт щалтапа̄лы ос ма̄ньщи па̄вылт о̄лнэ хо̄тпанув о̄вылтыт потрыт ос та̄н хурияныл тоты. Ты туи Наталья Ня̄хщамво̄льн ялыс ос ня̄врамыт ӯщлахтан тэ̄ланыл урыл матыра̄ти та̄рапаттыс. Ань ты о̄вылтыт ма̄н ты потрыт щё̄питасанӯв. Инесса кА̄ркам А̄гирищкве урыл – Паща о̄лэ̄н, ам намум Инесса Номина, ты та̄л ам о̄выл щёс школан минасум. А̄нумн ма̄ньщи ла̄тыӈ ханищтаӈкве сака мӯсты. Ма̄н Наталья Константиновна Самбиндалован ханищтаве̄в. Ань тамле ма̄ньщи ла̄тӈыт ва̄ганум: ома, пил, мис, лув, кӯтюв ос мо̄т са̄всыр ла̄тӈыт ханищтыянум тах. Ам кит ма̄нь йӣгрищ о̄ньще̄гум, тыи Эвелина, тав нила та̄лэ то̄влыс ос Мирослава ущтынув самын патыс. Ам щар яныг, таима̄гыс омамн акваг нё̄тэ̄гум. Ма̄нь йӣгрищагум ёмщакв ӯриягум. Ам са̄всыр стихыт ва̄гум. А̄нумн Агния Барто хансум «Я выросла» стихе сака мӯсты, ам таве акваг ловиньтылум. Школат ам ёмщакв, номтыӈыг ханищтахтуӈкве тах патэ̄гум. Туи ӯщлахтын пора Ня̄хщамво̄ль па̄выл сака нё̄тнэ ма̄т ӯнлы. Ма̄хум я̄т хӯл алыщлэ̄гыт, ӯщлахтэ̄гыт, во̄рт са̄всыр пил ос ла̄хыс атэ̄гыт, тот лылые̄пе сыстам. Света ос Виталий Побокиныг Ня̄хщамво̄льт самын патсы̄г, тот о̄лэ̄г. Света ань атыт классыт ханищтахты, Виталик китыт классыт. Тэ̄н туи ӯщлахтын поратэ̄н о̄вылтыт тох потыртасы̄г: – Ме̄н туи ща̄нягме̄на̄щагме̄н ёт Усть-Манья̄н акваг ялантыме̄н. Тот са̄в ӯсморах яныгми, пил ва̄тэ̄в. Тув порат мотор ха̄пыл хо̄т щё̄с тув минуӈкве э̄ри, тэ̄лы туп акв щё̄с тув минэ̄в. А̄тяме̄н ла̄выс, Ме̄сыг я̄в тыглетувле щакара̄лы, таима̄гыс ма̄н хоса минэ̄в. Ос тэ̄лы я̄тэ тувпо̄ляве, таима̄гыс лё̄ӈхе сохтыл ва̄раве. Усть-Маньян миннэ̄в мус ма̄н кит ма̄нь ма̄ньщи па̄влыг ос во̄р колыт та̄ра минэ̄в. Ма̄н то̄внакт хотты ма̄т ща̄й аюӈкве па̄гпӯхтыглэ̄в. Ма̄ньщи па̄влыг тыи: Холпа̄выл ос Яныгпа̄выл. Тувыл ляпат овнэ я̄т наманыл о̄с ва̄ганме̄н: Няйс, Лэ̄пла, Тапсуй, Та̄гт я̄. Школат сочинение хансуӈкве ла̄ваве̄в ке, ам Усть-Манья урыл хансэ̄гум. Тав нё̄тнэ карс уранэ нупыл сунсуӈкве а̄нумн сака мӯсты. Акв уре ма̄хумн во̄рто̄лн э̄кваг намтвес. Па̄вылт о̄лнэ хум Толя Ивукин мисыт, лувыт о̄ньщи. Ма̄н тот о̄лмувт ӯйхулыт нупыл суссӯв, а̄лпыл та̄н та̄нки я̄ ва̄тан вит аюӈкве минэ̄гыт ос хо̄тал палыт пум яныгман ма̄т ё̄мыгтэ̄гыт. Нё̄тнэ сэ̄мыл лувыт мощ вотгащлаӈкве таххаты кос, туп та̄н ляпан нэ̄мхотьют ат та̄ртэ̄гыт. Та сыс Виталик мовалас ос э̄лаль потыртас: – Ма̄н колувн ёхтынэ̄в порат па̄вылт такем суиӈыг е̄мты. Кол по̄хан а̄мпыт, лувыт, мисыт пуссын атхатэ̄гыт. Пӯсас та̄ра а̄ӈквата̄лэ̄гыт, аквтупмат китыглахтэ̄гыт: «Хотьют ёхтыс? Сунсуӈкве э̄ри». Ты а̄гирищигпыгрищиг туи ӯщлахтан поратэ̄н пӯмщиг, ка̄сыӈыг минас. Ань тэ̄н ла̄ве̄г, мӯй ма̄хум та̄н палтаныл ёхталэ̄гыт ке, та̄н пуссын ща̄гтым о̄лэ̄гыт. Туи Ханты-Мансийсканыл Олеся Ткачук увщитэ̄н мӯйлуӈкве ёхталас. Таве̄н Усть-Маньят о̄с сака мӯстыс, мо̄тыт та̄л о̄с ёхталаӈкве таӈхи. Ты потрыг ма̄ньщи ла̄тӈыг Тамара МЕРОВА толмащласаге.

1086 2014.10.20. Людмила СПИРЯКОВА

Са̄ккон хаснэ хо̄тпат сапра̄нияныл о̄лыс. Ты э̄тпос 14 хо̄талэ̄т округ Думат рӯпитан депутатыт са̄всыр са̄кконыт пирмайтасыт. Округувт рӯпитан са̄ккон щирыл, ань вина э̄типа̄ла 8 щё̄с мус ла̄пкат тыналаве. То̄ва депутатыт ла̄ве̄гыт, ты са̄ккон мо̄т щирыл хансуӈкве э̄ри ос вина э̄типа̄ла 10 щё̄с пора мус вос тыналаве. Ма̄хум мощщанув вина аюӈкве ат патсыт. Ань ма̄хум хумус ва̄ре̄гыт, ла̄пка лаппантнэ э̄лыпалт са̄внув вина ёвтэ̄гыт ос тувыл пулигайхатэ̄гыт, мори та капыртэ̄гыт. Ла̄пкат ӣти мус вина тыналаӈкве ке патаве, та̄н тох ва̄руӈкве ат патэ̄гыт. Борис Хохряков ос ла̄выс, ма̄хум ань сака са̄в вина ат ае̄гыт ос лю̄ль сака ат ва̄ре̄гыт. Ты са̄ккон ёмащакв рӯпиты, тэ̄ла та̄л мо̄тмо̄т щирыл таве хансуӈкве ат э̄ри. Сапра̄нит ма̄хум о̄с акв йильпи ва̄рмаль урыл потыртасыт. Ка̄сыӈ э̄лумхо̄лас о̄лнэ колэ ма̄гсыл налоголн о̄йты. Ань «налоговый кодекс» яныг нэ̄пакт мо̄т ва̄рмаль урыл хасвес, тыи ма̄гсыл округувт ос тамле са̄ккон пирмайтавес. Ма̄н о̄лнэ коланув ма̄гсыл «кадастровый оценка» нампа нэ̄пак щирыл налоголн ойтуӈкве тах патэ̄в. Ты нэ̄пакыт кол тынэ янгыг хансаве, тыи ма̄гсыл са̄в олн тув ойтуӈкве тах патэ̄в. Йильпи налоголн ма̄н 2016 та̄л па̄сныл ойтуӈкве о̄вылтахтэ̄в. Кӯщаит ла̄ве̄гыт, тыщирыл округ бюджетн са̄в олн ювле ёхтуӈкве паты тах. Акв та порат ма̄хум 2015 ос 2016-2017 та̄лыт кастыл хансым бюджет урыл о̄выл щёс потыртасыт. Мо̄т сапра̄нит та̄н ты са̄ккон урыл потыртаӈкве о̄с тах патэ̄гыт.

1086 2014.10.20. Людмила ТЕТКИНА

Соссаӈ мир ма̄гсыл хансым нэ̄пакыт. Геннадий Бухтин, губернатор ва̄ӈын хум, соссаӈ ма̄хум ос са̄всыр департаментыт рӯпитан хо̄тпат сапра̄нин во̄выгласанэ. Та̄н тот ма̄ньщит, хантыт ос ё̄рн мирыт культураныл ос ща̄нь ла̄тӈаныл ханищтан нэ̄пакыт урыл потыртасыт. О̄влэ̄т Дмитрий Осминкин, общественный связь департаментыт рӯпитан хум, ла̄тыӈ ла̄выс. Тав ла̄внэ̄тэ щирыл, ты та̄л сыс та̄н 4 со̄тыра 800 са̄вит нэ̄пак та̄ратасыт. Ты халт та̄н Еремей Айпин, округ Думат соссаӈ ма̄хум Ассамблея кӯщай хум, «Божья матерь в кровавых снегах» нэ̄паке ос Владимир Енов, «Ханты ясаӈ» газетат рӯпитан хум, мо̄йтанэ ос са̄в мо̄т ма̄хум хансум нэ̄паканыл та̄ратасыт. Ань са̄в э̄лумхо̄лас та̄нки нэ̄паканыл та̄н палтаныл тотыяныл. Ты нэ̄пакыт та̄ратан ма̄гсыл 14 миллион солко̄ви тах э̄рмыглы, ты та̄л та̄н туп хӯрум миллион солко̄вил майве̄сыт. Дмитрий Осминкин ла̄выс, соссаӈ ма̄хум пе̄с йис ва̄рмаляныл ос ла̄тӈаныл урыл хансым нэ̄пакыт ма̄гсыл са̄внув олн та̄стуӈкве э̄ри. Надежда Казначеева, культура Департамент кӯщай нэ̄, ты урыл о̄с потыртас. Та̄л сыс соссаӈ ма̄хум пе̄с йис ва̄рмаляныл э̄лаль тотнэ ма̄гсыл яныгса̄т арыгкем са̄всыр ханищтапыт, ялпыӈ хо̄талыт ос мо̄т тэ̄лат ва̄рыгласыт. Округ янытыл рӯпитан библиотекат ань соссаӈ ма̄хум урыл хансым 7 со̄тыра 200 нэ̄пак о̄лы. Ань таи ёмас, то̄ва нэ̄пакыт интернет хосыт ловиньтаӈкве ро̄ви. Ханищтап щирыл рӯпитан департамент манхурип рӯпата ва̄ри, ты урыл Ирина Лисютина ла̄тыӈ ла̄выс. Ань А̄с-угорский институтт рӯпитан хо̄тпат ня̄врамыт ма̄гсыл ма̄ньщи ос ханты ла̄тӈыл ханищтан нэ̄пакыт хансэ̄гыт, та̄ратэ̄гыт. Югорский университетт соссаӈ ма̄хум ма̄гсыл ань институт ва̄рвес. Тот ма̄ньщи, ханты ос ё̄рн ня̄врамыт ханищтавет. Сапра̄нит ма̄хум ханты мир алфавит урыл потыртасыт. Евдокия Андреевна Нёмысова, ханты мир учёный э̄ква, мо̄т учёныйхо̄тпат ёт йильпи алфавит ва̄руӈкве таӈхе̄гыт, ты ва̄рмаль урыл хо̄та̄ти акваг потыртэ̄гыт. Геннадий Бухтин та̄н нупланыл ла̄выс, о̄влэ̄т ханты ла̄тӈыл ня̄врамыт ханищтан хо̄тпат ос газета ловиньтан ма̄хум вос китыглыяныл, хоты алфавит та̄нанылн а̄ртми, ос та юипа̄лт ущ алфавитаныл мо̄т щирыл вос хансыяныл.

1086 2014.10.20. Тамара МЕРОВА

А̄гитпыгыт та̄ксарыг яныгме̄гыт. Нягань ӯст ня̄врамыт ма̄гыс «Патриот» нампа ханищтан ос ӯщлахтын кол о̄лы. Округ губернатор Наталья Комарова та ӯсн ялме порат тув щалтсас ос тот рӯпитан хо̄тпат, а̄гирищитпыгрищит ёт ва̄йхатас. Ня̄врамыт нила тэ̄латытн тот э̄лаль ханищтавет. Пыгыт армият лусытан ма̄гыс та̄ксар хо̄тпаг о̄луӈкве щё̄питавет ос самын патум ма̄наныл вос э̄руптасаныл. Пуста̄лыг ос ё̄рыг о̄лнэ ма̄гыс са̄всыр спортивный колнакыт тот рӯпитэ̄гыт. Лув тармыл яласаӈкве ханищтавет. Тувыл во̄рт хумус о̄луӈкве ро̄ви, ня̄врамыт ма̄ньта̄гыл тамле ва̄рмалит ва̄ӈкве о̄с ханищтавет. Наталья Комарова, округ Дума кӯщай хум Борис Хохряков ос мо̄т кӯщаит о̄влэ̄т каснэ колнакыт суссыт. Акв колнакт а̄гирищитпыгрищит ме̄чикыл ёнгасасыт, мо̄т колнакыт писалил патлумтасыт. Губернатор нэ̄ писаль ка̄тн вуйлас, тав о̄с мощ па̄тлуптаӈкве таӈхыс. Тувыл мӯй хо̄тпат «Афганец» нампа клубн ялантан ня̄врамыт ёт хо̄нтхатыгласыт. Андрей Еськов, тот пуӈктотнэ хум, са̄всыр ханищтапыт урыл потыртас. Ня̄врамыт маныр тот ва̄ре̄гыт, ты о̄вылтыт кина суссылтас. То̄ва пыгрищит парашютыл поргуӈкве ха̄сэ̄гыт, мо̄таныт аквалангыл витт мӯрсалэ̄гыт. Туи нё̄р ляпан тотыглавет, та̄н альпинистыт хольт ха̄хталахтын яласэ̄гыт. Пуссын ты ва̄рнэ ёнгилыт кастыл та̄н ё̄рыг, та̄ксарыг е̄мтэ̄гыт. Моще̄ртын школат ГТО нормат ва̄руӈкве патавет. Ты ня̄врамыт тай ёмщаквег ханьщувлым о̄лэ̄гыт. Та̄н ань сыресыр касылын тотыглавет ос тот но̄хпатэ̄гыт. Юио̄выл та̄лытыт ты клубн а̄гирищит ялантаӈкве о̄с ка̄саще̄гыт. Та̄нанылн тот пӯмыщ, та̄н аквтох пе̄рщуӈкве, пилта̄лыг парашютыл поргуӈкве таӈхе̄гыт. Армияныл ёхтум хӯрум пыгыт яныг кӯщаит ёт о̄с потыртасыт. Та̄н «Патриот» центрын ма̄ньта̄гыл ялантасыт. Тот ханищтам ва̄рмалит лусытыманыл сыс пуссын сака э̄рмыгласыт. Нягань ӯст о̄лнэ хо̄тпат ты ханищтан ос ӯщлахтын центраныл сака янытлыяныл. Тувыл ня̄врамыт губернатор нэ̄н ла̄вве̄сыт: «Ань Украина ма̄ныл тыг са̄в ма̄хум ёхтэ̄гыт. Тувыл ёхтум ня̄врамыт на̄н ётын школат ханищтахтуӈкве патэ̄гыт ке, манос ты центрын ялантаӈкве патэ̄гыт – на̄н та̄нанылн нё̄тэ̄н, та̄н ётаныл аквтох юртыӈыщ о̄лэ̄н».

1086 2014.10.20. Николай МЕРОВ

Яныгпа̄ла хо̄тпат нё̄тавет. Ты э̄тпост Мария Геннадьевна Краско, мирн нё̄тмил ва̄рнэ Департаментыт рӯпитан кӯщай нэ̄, ля̄ххал тотнэ ма̄хум акванатыгласанэ. Ань яныгпа̄ла хо̄тпат ос нусаг о̄лнэ ма̄хум маныр нё̄тмилыл ва̄равет, тав ты урыл потыртас. На̄н тав потре э̄лаль ловиньтэлы̄н: На̄н пуссын ва̄глы̄н, округувт о̄лнэ яныгпа̄ла хо̄тпат, э̄кват 55 та̄л, о̄йкат 60 та̄л порат пенсиян минэ̄гыт. Ма̄н лӯи ма̄т о̄лэ̄в, таима̄гыс са̄ртыннув пенсиян минэ̄в. Яныгпа̄ла хо̄тпат ма̄гыс нё̄тмилыт пуссын ла̄кквауртым о̄лэ̄гыт. Яныг хо̄нт порат хо̄нтлум хо̄тпат, хо̄нт порат юн са̄всыр рӯпата ва̄рум хо̄тпат ос мо̄т са̄всыр ма̄т хо̄нтлум ма̄хум я̄нас щирыл нё̄тавет. Округувт атхуйплов арыгкем та̄л рӯпитам яныгпа̄ла хо̄тпат, пенсияныл коныпал губернатор па̄лыл арыг олныл ойтавет. Та̄н ань пуссын пенсияолн винэ ма̄хманув округ янытлан хо̄тал кастыл акв щёс премияолныл майлавет. Тувыл хотьют «Сотрудничество» нампа программа щирыл Тюмень ӯсн о̄луӈкве минас, та хо̄тпат о̄с ат ёрувлавет, та̄н тот о̄с премияолныл ойтавет. Яныгпа̄ла хо̄тпат ты ва̄рмаль щирыл акваг нё̄тавет: олныл мивет, путёвка щирыл ӯщлахтын ма̄н ке̄тыглавет, ӯлщпуӈкыл ӯнттавет ос тэ̄рпил мивет. Россия янытыл яныгпа̄ла хо̄тпат лов со̄тыра арыгтем пенсияолн выгыт. Югра ма̄т ма̄хманув ос хо̄тхуйплов со̄тыра арыгтем солко̄вил ойтавет. Хо̄нтлум ма̄хманув ос хотьют ущтынув пенсиян патсыт, та̄н тыгыл иӈ са̄внув пенсияолныл ойтавет. Ос тамле хо̄тпат о̄лэ̄гыт, хотьют матыр ва̄рмаль щирыл щар мощща пенсияолныл ойтаве. Ты тэ̄ла щирыл ань о̄с яныг рӯпата ва̄раве. Мощща олн винэ хо̄тпат пенсияныл ла̄щалла̄щал но̄хнё̄туӈкве тах патаве. Округувт пуссын аквъёт 387 со̄тыра пенсияолн винэ хо̄тпа о̄лы. А̄гмыӈмосыӈ хо̄тпат ос ща̄ньа̄щ та̄л хультум ня̄врамыт о̄с тув пуссын акванловиньтавет. Мария Геннадьевна о̄с акв ва̄рмаль урыл потыртас. Мо̄тынтыг яныг хо̄нт оигпаме па̄сныл 70 та̄л то̄влы. Ты кастыл ветераныт о̄лнэ коланыл хотщё̄питаӈкве патавет. Югра ма̄т пуссын аквъёт 1 со̄тыра 800 хо̄нтлам хо̄тпа ты ва̄рмаль щирыл нё̄туӈкве э̄ри. Та̄н коланыл 2015 та̄л я̄ӈк на̄тнэ э̄тпос мус тах щё̄питавет.

1086 2014.10.20. Людмила ТЕТКИНА

Мощщаг хультум мирыт хо̄н ма̄т атхатыгласыт. Сӯкыр э̄тпост США ма̄т Нью-Йорк ӯст ООН штабквартират ма̄ янытыл о̄лнэ соссаӈ ма̄хум яныг сапра̄нин акванатхатыгласыт. Россия ма̄ныл ма̄хум тув о̄с ялсыт. Россия соссаӈ ма̄хум Ассоциацияныл, ос «Союз общин» нампа организацияныл ос финноугрыт халт делегатыт пе̄риялве̄сыт. Ма̄н округувныл Геннадий Бухтин, губернатор ва̄ӈын хум, ос Александр Новьюхов, «Югра лылые̄п» организация кӯщай хум, яныг сапра̄нин ялсы̄г. Александр Вячеславович ла̄выс, та̄н тот кит хо̄тал сыс рӯпитасыт, соссаӈ ма̄хум та̄рвитыӈ ва̄рмаляныл урыл потыртасыт. 2007 та̄лт ты мирыт ма̄гсыл ООН яныг нэ̄пак пирмайтасыт, рущ ла̄тӈыл «Декларация по правам коренных народов мира» намаим о̄лы. Тот хансым о̄лы, соссаӈ ма̄хум та̄нки пе̄с йис ма̄т вос о̄лэ̄гыт ос та̄нки пе̄с ва̄рмаляныл, ла̄тӈаныл э̄лаль вос тотыяныл. Ты ма̄ныл ма̄хум нэ̄мхотьютын хотня̄влуӈкве ат ве̄рмавет. Ань ма̄ янытыл то̄ва государстват ты нэ̄пак щирыл рӯпитэ̄гыт ос мо̄таныт таве пирмайтаӈкве щар ат ка̄саще̄гыт. Ма̄ янытыл о̄лнэ государстват мощщаг хультум мирыт та̄рвитыӈ ва̄рмаляныл ул вос ёрувлыяныл ос та̄н акваг вос нё̄тавет, 2004 та̄лт ООН нэ̄пак пирмайтавес, рущ ла̄тӈыл «Второе десятилетие коренных народов мира» намаим о̄лыс. Ты лов та̄л сыс манхурип рӯпата ва̄рвес, яныг сапра̄нит ма̄хум о̄с потыртасыт. ООН ма̄т Россияныл Виталий Чуркин акваг рӯпиты. Россияныл ёхталам ма̄хум ты кӯщай ёт хо̄нтхатыгласыт ос та̄нки тэ̄ланыл урыл таве̄н потыртасыт.

1086 2014.10.20. Тамара МЕРОВА

Ма̄витув ӯргалан ва̄рмалит. Сергей Пикунов, ма̄вит ӯргалан службат кӯщай хум, ля̄ххал тотнэ хо̄тпат ма̄гыс тамле ла̄тыӈ ла̄выс. Тав округ янытыл ма̄вит ос во̄руй уральтан тэ̄лат урыл потыртас. Ань ма̄витув ка̄сыӈ та̄л арген па̄ӈктуӈкве патвес. Сергей Владимирович ла̄выс: «2013 та̄л сыс ма̄н палтув ма̄хум 246 полыщ тотнэ нэ̄пак ке̄тыгласыт. Тыгыл 45% са̄виткем ма̄хум та̄нки хо̄та̄ти порс мори па̄хвтэ̄гыт. Ты та̄л онтолов э̄тпос сыс 244 полыщ тотнэ ла̄тӈыл ке̄твесӯв. Тамле тэ̄лат ма̄н пуссын уральтыянӯв. Лю̄ль нак ва̄рнэ рӯпитан колыт манос хо̄тпат шрафыл пиныянӯв. Мо̄лты та̄лт 3 со̄тыра 578 рӯпитан колыт порс ва̄рнэ щирыл та̄рапаттуве̄сыт. Тувыл 3 со̄тыра 16 тэ̄лат палт ма̄н олн ойтнэ нэ̄пак хасылтасӯв. Та щирыл са̄всыр организацияныл 50 млн. солко̄ви атуӈкве э̄рыс. Ань тыг мус 2 со̄тыра 947 тэ̄лат ма̄гыс ма̄н 44 млн. 127 со̄тыра солко̄ви атсӯв. Мо̄таныт иӈ ат ойтхатасыт. То̄ванакт олныт сут та̄ра выганӯв. Ма̄во̄й но̄хвинэ компаният халт «Роснефть» ос тав ётэ рӯпитан «РН-Юганскнефтегаз» нампа колыг тэ̄н ма̄витув сака па̄ӈктытэ̄н». Яныг ӯсыӈ ос па̄влыӈ ма̄т ма̄хум порсанят мори ва̄ре̄гыт. Тамле лю̄ль накыт то̄ванакт ЖКХ рӯпитан колыт о̄с та̄рапаттавет. 2013 та̄лт са̄всыр ма̄тт 338 тамле порсанят хо̄нтве̄сыт, тыгыл 309 хотщё̄питаве̄сыт. Ты та̄л 135 ма̄ хотщё̄питаӈкве а̄лымаве̄сыт. Айнэ вит о̄с уральтавес. Тот 98% уральтым ма̄т витэ̄т са̄в витхурип ке̄р ща̄лыг хо̄нтвес. Порсыт мори хуигланэ̄ныл ма̄гыс, тувыл ма̄во̄й ос газ хо̄та̄ти со̄ссантан щирыл я̄т ос тӯрыт сака па̄ӈктаве. Тувыл то̄ва ЖКХ ма̄т, янгыщ Нефтеюганск ос Нягань ӯсыгт, вит сыстамтан утыт щар пе̄сыг е̄мтсы̄т. Ма̄во̄й тотнэ турпат о̄с пе̄сыт. Та̄н о̄с ма̄ сака па̄ӈктыяныл. Тамле лю̄ль ва̄рмалит пуссын витн тэ̄лыгтахтэ̄гыт ос витув аюӈкве ат хо̄йхаты, таве са̄в щёс сыстамтаӈкве э̄ри. Ань ты ва̄рмалит акваг уральтым о̄ньщавет.

1086 2014.10.20. Валентина УЗЕЛЬ

Ня̄врамыт округувт вос ханищтахтэ̄гыт. Югорский университет яныг кӯщаиг Татьяна Дмитриевна Карминская рӯпиты. Ты э̄тпос тав ля̄ххал хаснэ ма̄хумн ва̄рнэ рӯпатаныл ос ЮГУ урыл потыртас. Ты этпост ЮГУ рӯпитанэ̄тэ па̄сыл 13 та̄лэ то̄влыс. Ты ханищтан кол рӯпитаӈкв о̄вылтахтаме порат Ханты-Мансийск ӯст рӯпитан са̄всыр институтыт пуссын тув тотве̄сыт. Ань тот ня̄врамыт ханищтым са̄в хо̄тпа рӯпитэ̄гыт, та̄н халанылт са̄выӈпа̄лэ пуссын учёный нам о̄ньще̄гыт, са̄в хо̄тпа наукат «доктор» нам о̄ньще̄гыт, са̄в хо̄тпа «кандидатыг» е̄мтсыт. Кос хо̄т ня̄врамыт ханищтан ва̄рмаль ань йильпи щирыл ва̄раве. ЮГУт ка̄сыӈ ханищтан хо̄тпа такви я̄нас программа хансы. Ос ты э̄лыпа̄лт та̄н планнэ̄пакыл майлуве̄сыт, тот хансым о̄лыс ня̄врамыт хумус ханищтаӈкв э̄ре̄гыт, манхурип лекция та̄н ма̄гсыланыл ловиньтаӈкв э̄ри. Татьяна Карминская ла̄выс, ты тал та̄н университетаныл нупыл тит колыг хасвесы̄г ты Нижневартовский нефтяной техникум ос Нефтеюганский индустриальный колледж. Ань та̄н ма̄во̄й но̄хвинэ ма̄т рӯпитан кӯщаитн ла̄вавет, манхурип специальность щирыл ня̄врамыт ханищтаӈкв э̄ре̄гыт, манхурип специалист ат то̄вылхаты. Та̄рапатыс, бурильщикыг рӯпитан ма̄хум сака мощща, са̄внув хо̄тпа ты рӯпатан ханищтаӈкв тах патавет. Тувыл э̄лаль кӯщай нэ̄ потыртас, ты 2014 та̄лт манах хо̄тпа университетн ханищтахтуӈкв ёхтыс. Туи порат 3 со̄тыра 709 хо̄тпа заявление хассыт, ос та ма̄хумныл 1 со̄тыра 417 хо̄тпа тот хультуптаве̄сыт: 908 хо̄тпа очный щирыл ханищтахтэ̄гыт, 509 хо̄тпа – заочно. Ты а̄гитпыгыт халт то̄ват ханищтахтынэ̄ныл ма̄гыс олн ойтуӈкв патэ̄гыт. Ка̄сыӈ та̄л са̄внув ня̄врам тув ханищтахтуӈкв ёхты. Та̄н нила та̄л тот ханищтавет. То̄ват ка̄саще̄гыт те, иӈ тит та̄л э̄лаль тах ханищтахтэ̄гыт, ты рӯпата рущ ла̄тӈыл тох ла̄ваве – магистратура. Тот хо̄тпа ма̄к мӯсхал рӯпатан ханищтаве. ЮГУ а̄стлам хо̄тпат рӯпата хо̄нтуӈкв о̄с нё̄тавет. Югорский университет а̄стлам 250 хо̄тпа «Ханты-Мансийский банкыт» ань рӯпитэ̄гыт. Ты та̄л округувныл са̄всыр ӯсытныл, па̄влытныл 455 хо̄тпа тув ханищтахтуӈкв ёхтыс, Ханты-Мансийск ӯсныл 225 хо̄тпа. Мо̄т мир пуссын са̄всыр мо̄т э̄лы ма̄ныл ёхтысыт.

1086 2014.10.20. Тамара МЕРОВА

Йильпи ханищтан нэ̄пакыт вос хансавет. Школат соссаӈ ня̄врамыт ханищтан хо̄тпат Ханты-Мансийск ӯсн акванатыглаве̄сыт. Та̄н наука ос образование департамент ос А̄с-угорский институт па̄лыл тув во̄виньта̄лве̄сыт. Ма̄хум ня̄врамыт ханищтан нэ̄пакыт урыл потыртасыт. Ты ва̄рмаль урыл Майя Ефимовна Макарова, региональный образование институтт рӯпитан нэ̄, тох ла̄выс: – Ма̄навн школат рӯпитан соссаӈ хо̄тпат ла̄тыӈ ке̄тсыт. Та̄н школат ханты, ма̄ньщи ос ё̄рн ла̄тыӈ ханищтан щё̄сыт ма̄гыс олныл ойтуӈкве моще̄рт ёл ты по̄илттавет. Ты ва̄рмалит ань хосат хансым нэ̄паканув ма̄гыс е̄мтсыт. Ань образование палт са̄кконыт мо̄т щирыл щё̄питаве̄сыт. Федеральный государственный образовательный стандартыт, рущ щирыл ФГОС, хансым о̄лы, ня̄врамыт ат та̄л ювлехультум порат хансым нэ̄пакыт щирыл ханищтаӈкве ве̄рмавет. Ты э̄лыпа̄л та̄ратым нэ̄пакыт пуссын пе̄сыг ловиньтавет. Ханищтан нэ̄пакыт пуссын уральтаве̄сыт ос ётыл та̄н акв реестрын хасве̄сыт. Туп тув хансым нэ̄пакытыл ня̄врамыт школат ханищтаӈкве ро̄ви. Соссаӈ ла̄тӈанув ханищтан нэ̄пакыт, ва̄им, тув ат хасве̄сыт. Ма̄н нэ̄паканув пуссын хус манос ва̄т арыгкем та̄л ювле хультум порат щё̄пита̄лве̄сыт. Йильпи нэ̄пакыт ма̄н ат о̄ньще̄в. Ань округувт образование тармыл о̄лнэ кӯщаит ат ва̄ганыл, хумус соссаӈ ла̄тӈыт ханищтан хо̄тпатн э̄лаль рӯпитаӈкве э̄ри. Манрыг ма̄н тамле нэ̄пак ат о̄ньще̄в, хотты хо̄тпаныл ань китыглаӈкве, ма̄н о̄с ат ва̄глӯв. Рущ ла̄тыӈ ос мо̄т предметыт ханищтан нэ̄пакыт хаснэ ма̄гыс са̄всыр институтыт рӯпитэ̄гыт. Тот са̄в учёный хо̄тпат э̄рнэ щирыл нэ̄пакыт хансыяныл. Ща̄нь ла̄тӈыт ханищтан нэ̄пакыт ка̄сыӈ республика ос округ та̄нки щё̄питаӈкве ла̄вве̄сыт. Округувт ты рӯпата ва̄руӈкве нэ̄мхотьют ат вуйхатас. Ма̄н институтувт о̄влэ̄т лаборатория о̄лыс, ня̄врамыт хумус ханищтаӈкве э̄ре̄гыт, тот ма̄н ханищтан хо̄тпат хӯлтыглаӈкве туп ве̄рмысанӯв. Нэ̄пакыт ма̄нки ат хассӯв. Ща̄нь ла̄тыӈ ханищтан нэ̄пакыт щирыл хӯлтыглан потрыт ва̄рыгласӯв. Ётыл нэ̄пакыт хансуӈкве А̄с-угорский институт ма̄хум ла̄вве̄сыт. Та̄н ловиньтан нэ̄пакыт та̄ратасыт кос, ос ань ня̄врамыт ма̄гыс э̄рнэ букварит а̄тимыт. Ты нэ̄пакыт пуссын «типовой» нампа программа щирыл ва̄равет, ос ща̄нь ла̄тыӈ ханищтан программа нэ̄мхотьют щё̄питаӈкве ат вуйхаты. Ма̄н ань ты ва̄рмалит та̄рапаттын ма̄гыс ханищтан хо̄тпат ёт акванхо̄нтхатыгласӯв. Акваннё̄тхатым йильпи нэ̄пакыт хаснэ урыл потыртахтасӯв.

1086 2014.10.20. Тамара МЕРОВА

Лю̄ль нак та̄рапаттувес. Ты э̄тпост госнаркоконтроль тэ̄лат тармыл рӯпитан кӯщай Алексей Якименко ля̄ххал тотнэ хо̄тпат ёт хо̄нтхатыглас. Тав Сургут ӯс ос районытыт осннэ̄глум лю̄ль ва̄рмаль о̄вылтыт потыртас. Тот акв са̄т сыс 200 са̄вит хо̄тпат пӯльницан тотыглаве̄сыт. Ты э̄лыпалт та̄н ва̄та̄л та̄ври ёвтыгламыт ос тувыл хохсаг хартнэ̄ныл юипа̄лт савалаӈкве патсыт. Нёлолов хо̄тпат а̄тимыг е̄мтыс. Ты ма̄хум пуссын наркотик хосыт о̄лэ̄гыт. 68 э̄лумхо̄лас пӯльницат хультсыт, мо̄таныт э̄лаль пусмалтахтуӈкве ат ка̄сащасыт, юв минамыт. Округувт наркоконтроль тэ̄лат палт рӯпитан хо̄тпат губернатор ос мо̄т кӯщаит ёт акванхо̄нтхатыгласыт ос та̄н ётаныл акваннё̄тхатым ты тэ̄лат уральтаӈкве потыртахтасыт. Полицият рӯпитан хо̄тпат ты лю̄ль нак ва̄рнэ хо̄тпат са̄всыр ма̄т э̄тэхо̄талэ уральтым о̄щсаныл, ос лю̄ль тэ̄рпи тыналан ма̄т та̄рапаттысаныл. Мо̄тмо̄т ма̄т та̄н наркотикыт тыналан ат хо̄тпа пувсыт. Ты хо̄тпат ищхӣпыӈ ут хосыт манос ще̄пт о̄щнэ телефон щирыл потыртахтым ма̄хумн ты лю̄ль тэ̄рпит тыналэ̄гыт. Наркотик хартнэ хо̄тпа ла̄ваве, хоты ма̄н таве̄н олн пинуӈкве э̄ри, ос тувыл мо̄т ма̄т лю̄ль тэ̄рпил пинаве, тав ань ханьщувлым о̄лы, тувыл акваг та выганэ. Сургутыт матахмат тамле ма̄ хо̄нтвес, та̄н ӯс картан по̄слым о̄лнэ̄ныл ос туп э̄рнэ хо̄тпатн та̄н ва̄вет. Ты ат хо̄тпа ма̄гыс «уголовное дело» нэ̄пакыт хасве̄сыт ос пуссын та̄н ва̄рнэ тэ̄ланыл ань уральтаӈкв патавет. Та юипа̄лт Сургут ӯст о̄с нила хо̄тпа пуввес. Ты хум хо̄тпат я̄нас гараж о̄щмыт ос тот тӯлмахыл лю̄ль тэ̄рпит ва̄рмыт. Тувыл та̄нки ос са̄всыр ма̄н пинсаныл. Та̄н мо̄т ӯсыӈ ма̄ныл олн сэ̄луӈкве тув ёхтумыт. Хоты хо̄тпат ёт та̄н рӯпитэ̄гыт, ань э̄лаль та̄рапаттаве. Лю̄ль тэ̄рпи ва̄рнэ ма̄гыс сыресыр лӯптат ос пуӈк манос мо̄т а̄гмыт пусмалтан тэ̄рпит аптекат ёвтнэ̄ныл. Тувыл тыит та̄врииг ва̄рияныл, ос ацетон ман мо̄т сыресыр ут тув пинэ̄гыт, лю̄ль вит ёт мощ тэ̄лыгтыяныл, то̄слыяныл ос наркоманхо̄тпатын та тыналыяныл. Манырсырман та̄ври ва̄раве, манос о̄лы. Аквантэ̄лыгтан утыт пуссын я̄нас наркотикыг кос ат ловиньтахтэ̄гыт. Тувыл сунсэ̄н, хумус ма̄хум пуӈканыл тэ̄лыгтавет ос сыманылма̄йтаныл ётыл а̄гмыӈыг, са̄йтта̄л патэ̄гыт. Ань тамле пилыщмаӈ ва̄рмалит ла̄щмарт ёлпо̄илттаӈкве патавет тах. Сыресыр тэ̄рпит ёмщакв уральтавет ос то̄ват туп ле̄ккарытн хасылтаӈкв патавет. Та̄н ань «психоактивный вещество» ат та̄ратан нэ̄пакн хансым ат о̄лэ̄гыт, таи ма̄гыс гаражт хо̄нтым са̄в утыт наркотикыг ат ловиньтавет. Тот та̄врииг ва̄рим туп матахмат хӯрыгсовыт щё̄питым о̄лсыт. Тувыл э̄лаль хотыл ва̄глӯв, манах хо̄тпа палт та̄н ка̄тн патэ̄гыт ос ты хосыт иӈ манах хо̄тпа порсы.

1086 2014.10.20. Александр ВЬЮТКИН

Пальта̄л ма̄хум касыланыл. Мощ мо̄лалнув Ханты-Мансийск ӯст ат хӯлнэ ма̄хум 2015 та̄лт ёсал каснэ касыланыл щирыл прессконференция о̄лыс. Та касыл рущ ла̄тӈыл «XXVIII Сурдлимпийские игры» ла̄ваве. Ля̄ххал тотнэ ма̄хум ёт Эдуард Владимирович Исаков потыртаӈкв ёхталас. Тав «Центр адаптации спорта Югры» каснэ кол тармыл кӯщаиг рӯпиты. О̄влэ̄т Эдуард Владимирович ла̄выс: Тамле касыл ма̄н Россия ма̄вт щар о̄выл щёс ты ва̄раве. Ат хӯлнэ ма̄хум тыт ёмащакв о̄лнэ̄ныл ма̄гсыс са̄в тэ̄ла йильпииг э̄рыс щё̄питаӈкв. Ты Сурдлимпийские щирыл нила касыл ва̄раве. Ёсал хайтуӈкв ос «сноубордыл» касуӈкв патэ̄гыт. Ты касылт ма̄хум акв па̄хвыӈ ёсан тит ла̄гыл акв юипа̄лт тӯщтым щирыл сып пуӈкныл ёл тахамтым касэ̄гыт. Та коныпал иӈ хоккей ос «кёрлинг» нампа ёнгил пальта̄л ма̄хум халанылт касуӈкв патэ̄гыт. Сыпныл тахамтан касыл Магнитогорск ӯс по̄хат «ММК–Курорт» нампа ӯщлахтын ма̄т каснэ ма̄наныл е̄мты. Ма̄н округувт о̄лнэ сыпанув а̄ти тамле карсыт ос па̄хвыӈыт, мансавиттем та̄нанылн э̄ри. Ля̄ххал тотнэ хо̄тпат титыглахтасыт: Манса̄вит хо̄н ма̄ныл ос манах каснэ ма̄хум тыг ёхты? Тувыл каснэ мир халт округув ма̄гсыл манса̄вит хо̄тпа касуӈкв паты? Ма̄ янытыл ва̄т нупыл хо̄т э̄лы хо̄н ма̄ныл мир тыг ёхтуӈкв ла̄вхатсыт. Аквъёт пуссын 450 каснэ хо̄тпа ёхты. Ма̄н округув ма̄гсыл хо̄т хо̄тпа касуӈкве паты. Та̄н халанылт ат хотпа ёсал ха̄йты, акв а̄ги ос сып пуӈкныл тахамтым касы. Ань та̄н пуссын Германия хо̄н ма̄т, Оберхот ӯс по̄хат ты яныг касылт касуӈкве щё̄питахтэ̄гыт. Хо̄н ма̄ныл ёхталан ат хулнэ ма̄хум ос ма̄н ма̄вит о̄лнэ ат хӯлнэ хо̄тпат халанылт потраныл хумус торгамтыяныл? Ты кастыл на̄н маныр ва̄регы̄н ос хотьют ханищтэгы̄н? Со̄ль, пальта̄л ма̄хум халанылт ат хащхатэ̄гыт. Ты кастыл ма̄н ань хӯрумса̄т арыгтем нё̄тмил ва̄рнэ хо̄тпа ханищтэ̄в. Са̄выӈпа̄лэ пальта̄л ма̄хум ёт рӯпитан щирыл студентыг о̄лнэ ма̄ньла̄т ма̄хум супта̄л потрын ханищтахтэ̄гыт. Та̄н халанылт ёмщакв тит ла̄тӈыл супне̄лмта̄л потыртан атхойполов хо̄тпа о̄лы. Ты коныпал иӈ та̄нти хо̄н ма̄ныл ёхталан супне̄лмта̄л потыртан ма̄хманыл нё̄туӈкв патэ̄гыт. Ам номсэ̄гум, пальта̄л хо̄тпат ёт потрув акв ма̄н ат нопи.

1086 2014.10.20. Николай МЕРОВ

Ма̄ньщи хо̄тпаг потре̄н. Клавдия Ефимовна Сайнахова Ха̄льӯс район Ло̄пмус па̄вылт самын патыс. Кульпас па̄выл школа а̄стламе юипа̄лт тав Ханты-Мансийск ӯсн фельдшер нэ̄г ханищтахтуӈкве минас. Та ханищтап а̄стластэ, тувыл 1981 та̄лт Ня̄хщамво̄ль па̄вылн рӯпитаӈкве ке̄твес. Аквматнакт ам та па̄вылн ялсум, тав колэ̄н щалтсасум. Э̄ква такви о̄лупсатэ урыл а̄нумн мощ потыртас. То̄нт о̄йкатэ лылыӈта̄гыл о̄лыс, наме Вячеслав Юрьевич. Ты тал тав а̄тимыг е̄мтыс. На̄н ань Клавдия Ефимовна потре ловиньтэлы̄н. Па̄влувт ма̄н ла̄щлакв о̄лантэ̄в. Мис а̄гирищ о̄ньще̄гум. Ам пӯльницат рӯпитэ̄гум. Ань ос тамле ва̄рмаль е̄мтыс, рӯпатавт то̄ва хо̄тпат по̄хын ке̄тве̄сыт. Са̄ртын а̄гмыӈ хо̄тпат пӯльницат хуясыт, тот пусмалтаве̄сыт. Ань ты ва̄рмаль ёлпо̄илттавес. То̄ва ма̄нь ле̄ккарыт рӯпата та̄л хультсыт. Ма̄н пӯльницав кит накпа йӣв колт о̄лыс. Ётылнув йильпи кирпащиӈ кол ӯнттувес, пӯльницав тув ва̄нтлуптавес. Таи ёмас, лощит кол, колнаканэ посыӈыт, а̄гмыӈ хо̄тпат тот пусмалтаӈкве сака ёмас. Тувыл ань ты накт ос мо̄т яныг ле̄ккар пӯльницан рӯпитаӈкве ёхтыс. Ты о̄йка Астрахань ӯсныл о̄лы. Ам номсэ̄гум, манрыг тапалыт ма̄ныл хащтал ма̄хум рӯпитаӈкве тыг во̄вавет, ма̄нки хо̄тпанув, тыт рӯпитанувыт ке, ёмаснуве̄г о̄лнув. Тувыл ань па̄вылт тамле ва̄рмаль о̄лы, ма̄хум са̄выӈпа̄лэ рӯпата ат о̄ньще̄гыт. Хӯл алышлым, во̄раим, ла̄хыс атым ос пил ва̄тым о̄лэ̄гыт. Мо̄т щирыл олн сэ̄луӈкве нэ̄мхотмус, ты хосыт та о̄лэ̄в. Ам пӯльницат ставка охса щирыл акушерыг рӯпитэ̄гум. Ты урыл ла̄вуӈкве ве̄рме̄гум, ань юио̄выл та̄лытт мощща ня̄врам самын паты. Па̄влув яныг, атса̄т арыгкем хо̄тпа о̄лы. Мо̄лты та̄л сыс туп хо̄т ня̄врам самын патыс. Па̄влув ма̄гыс ты сака мощща. Ма̄ньлат ма̄хманув таима̄гыс са̄в ня̄врам о̄ньщуӈкве ат таӈхе̄гыт, рӯпата щар а̄тим. Тувыл ань я̄т хӯл о̄с сака мощща пӯхты, ма̄хум туп тэ̄нэ са̄вит алыщлэ̄гыт». Клавдия Ефимовна о̄йкатэ Вячеслав Юрьевич Сайнахов, а̄ще о̄парищ наме Хозумов о̄лыс, тав Хорыӈпа̄вылт яныгмас. Рӯтанэ Саранпа̄вылт ос Сӯкырьят о̄лэ̄гыт. Та̄н колта̄гланылт ат ня̄врам яныгмасыт. Ма̄нь порат Хо̄рыӈпа̄вылт о̄лсыт. Ётыл, колхоз е̄мтнэ порат, та̄н пуссын Ло̄пмусн ва̄нтлысыт. Ло̄пмуст тав кина суссылтан хо̄тпаг рӯпитас. Тэ̄н Клаватэ̄нтыл хунь Ня̄хщамво̄льн ёхтысыг, тот рӯпата а̄тим о̄лыс. Таима̄гыс тав тот ат рӯпитас. Тувыл Саранпа̄выл экспедициян рӯпитаӈкве патхатыглас. Вячеслав Юрьевич яныг э̄ще, Лариса Юрьевна, Хулюмсунт па̄вылт о̄лы. Ма̄ньнув э̄ще, Фаинатэ, Надым ӯст о̄лы. Тэ̄н сас ще̄мьяӈыг. Хулюмсунт па̄вылт о̄лнэ э̄ще палт Яков а̄пщитэ о̄лы. Там ма̄ньта̄гыл а̄гм нупыл харты, ань увщитэ̄н о̄ньщаве. Лариса а̄гитэ Света сака номтыӈыг яныгмас. Школат ёмащакв ханищтахтас, а̄стламе юипа̄лт Норвегия ма̄т хо̄н ла̄тыӈ толмащлан хо̄тпаг э̄лаль ханищтахтас. Ань Санкт-Петербург ӯст о̄лы, хотты ма̄т ты ва̄рмаль щирыл рӯпиты. Тав са̄в хо̄н ла̄тыӈ ва̄г. Э̄кваго̄йкаг акв пыг о̄ньще̄г, наме Миша, тав о̄с ще̄мьяӈ та̄гыл Ня̄хщамво̄ль па̄вылт о̄лы. Тав Ханты-Мансийск ӯс ле̄ккар училищат лаборантыг ханищтахтас. Ты коныпал автомеханикыг ханищтахтас. Э̄кватэ Ло̄пмус па̄вылныл о̄лы, наме Юля, а̄ги о̄парищ наме Хозумова. Тэ̄н кит ня̄врам о̄ньще̄г. Клавдия Ефимовна о̄йкатэ̄нтыл хус арыгкем та̄л Ня̄хщамво̄льт аквъёт о̄лсы̄г. Вячеслав Юрьевич а̄тимыг е̄мтме ма̄гыс ма̄н таве̄н сым щаргын ла̄тыӈ ке̄тэ̄в. Ты я̄тил ма̄ньщи колта̄гыл пуста̄гыл вос о̄лы, На̄янылн-О̄тыранылн вос ӯргалавет.

1086 2014.10.20. Николай МЕРОВ

Ма̄н Ягрим ос А̄нъя па̄влыгн ялсӯв. Ты э̄тпост округ Дума депутат нэ̄ Татьяна Гоголева, тав ётэ рӯпитан а̄ги Оксана Рыжкова ос Светлана Динисламова, А̄с-угорский институтт рӯпитан нэ̄, Ягрим па̄вылн ос А̄нъя па̄вылн рӯпата щирыл ялсыт. Та̄н тот соссаӈ ма̄хум ёт хо̄нтхатыгласыт. Ам та̄н ётаныл тув о̄с ялсум. На̄н ты урыл э̄лаль ловиньтэ̄н.

1086 2014.10.20. Людмила ТЕТКИНА

Ма̄ньщи нэ̄ ще̄мьятэ ёт яныгмам ма̄тэ̄н о̄луӈкве ёхтыс. Людмила Ивановна Калиниченко, такви о̄парищ наме Кугина, ще̄мьятэ ёт Украинат Донецкий область Краснолиманский район Коровий Яр па̄вылт 34 та̄л о̄лыс. Во̄ртур э̄тпост ма̄ньщи нэ̄ такви колта̄глэ ёт яныгмам ма̄тэ̄н о̄луӈкве ёхтыс. Тав ла̄выс: «Ам Ха̄льӯс район Кульпас па̄вылт самын патсум, тот яныгмасум. Школа а̄стламум юипа̄лт Тюмень ӯсн э̄лаль ханищтахтуӈкве минасум. Тот Сергей о̄йкам ёт акванхо̄нтхатасме̄н, акванминасме̄н. То̄нт ам 18 та̄лум то̄влыс, ханищтахтуӈкве по̄йтсум, о̄йкам ёт Украина ма̄н о̄луӈкве та минасум. Ме̄н кит пыг ос а̄ги янмалтасме̄н. О̄лнэ ма̄вт хо̄нтлан нак ат ке о̄вылтахтас, э̄лаль тот о̄лнувӯв. Ам таса̄вит та̄л хащта̄л ма̄т о̄лымам, тув ханьщувласум. Тот о̄лнэ колув, ӯйхуланув пуссын хультуптасанӯв. Ма̄н хунь ва̄слӯв, тох е̄мты, ам ня̄враманум яныгмам ма̄нанылн тамле пилыщмаӈ нак ёхты. О̄влэ̄т номсысӯв, война ат о̄вылтахты, ма̄н коланув нумипа̄лт са̄всыр истребитель нампа товлыӈха̄пыт яласаӈкве ат патэ̄гыт ос коланув нупыл бомбат па̄хвтуӈкве ат патавет. Тот о̄лымам акваг ня̄враманум ма̄гсыл пилсӯм. Украинат хунь тамле хо̄нтлан ва̄рмалит о̄вылтахтасыт, о̄йкам, пыгагум ос а̄гим Россиян о̄луӈкве минуӈкве акваг во̄всанум. Тот пилым, тӯйтхатым о̄лсӯв. Ӣти щар ат хуясум, акваг лю̄ньщим номсысум, хумус э̄лаль о̄луӈкве патэ̄в. Та̄н тыг минуӈкве щар ат ка̄сащасыт, па̄влувт хунь истребитель товлыӈха̄пыт акваг яласаӈкве патсыт, туп то̄нт тыг минуӈкве щё̄питахтасыт. Ня̄враманум ос апыгрищанум ёт во̄ртур э̄тпос 12 щислат па̄вылныл Россия нупыл минмыгтасӯв. Олныл Россия границатэ мус ёхтуӈкве туп то̄влувесӯв. Матъёмас Россият рӯтанум о̄лэ̄гыт, Светлана Динисламова (Садомина) ма̄навн лё̄ӈх олн ке̄тыс. Во̄ртур э̄тпос 20 щислат Сургут ӯсн ущта ёхтысӯв. О̄йкам Украинат пенсиятэ ӯрим хультыс, туп сӯкыр э̄тпос 20 щислат тыг ёхтыс. Сургут ӯсн хунь ёхтысӯв, та̄ра УФМСн минасӯв, тот пуссын э̄рнэ нэ̄пакыл ва̄рвесӯв. Страховой полисыл пуссын молях майвесӯв, пӯльницан ле̄ккарыт палт уральтахтуӈкве ке̄твесӯв. Виталя пыгум хо̄псытэ по̄слувес, тувыл пӯльницан пинвес. Тав 2011 та̄лт хо̄псытэ а̄гмыӈыг е̄мтыс, то̄нт пӯльницат сака хоса пусмалтавес. Ле̄ккарытн то̄нт ла̄ввес, пӯльницан уральтахтуӈкве ва̄тихал вос ёхталы. Сургут ӯст хо̄псытэ по̄слувес, ле̄ккарыт тот матыр о̄ста ка̄саласыт. Пыгум ма̄гсыл ань такем сымум а̄гмыӈ. Ань Виталям Сургут ӯс пӯльницат пусмалтахты, ня̄враманум Ханты-Мансийск ӯст Света Динисламова палт о̄лэ̄гыт. Тыт Украина ма̄ныл ёхтум мирыт ань ёмащакв нё̄тавет. Ма̄н мирн нё̄тнэ центрын ялсӯв, тот ня̄враманув ма̄снутыл майве̄сыт. Кит щёс ос тэ̄нутыл майлувесӯв. Тыи ма̄гсыл ам яныг пӯмащипа ла̄тыӈ ла̄ве̄гум. Ме̄н о̄йкаме̄нтыл Кульпасн о̄луӈкве ань миныме̄н, Рая э̄щум колэ̄т о̄луӈкве патыме̄н. Тав ань Ха̄льӯсн ва̄нтлас, пыге ос Урай ӯсн рӯпитаӈкве минас, о̄влэ̄т тэ̄н колэ̄нт о̄луӈкве патыме̄н. А̄гиме̄н хӯрум ня̄враманэ ёт выганум, ам ётум тув минэ̄гыт. Пыгагме̄н тыт Ханты-Мансийск ӯст хультэ̄г. Александр яныг пыгум водителиг ханищтахтас, Виталям ос трактористыг рӯпитас. Юля а̄гим ос маснут ю̄нтым рӯпитас. Ва̄псум Александр о̄с трактористыг ханищтахтас. Ма̄н тыт «центр занятости» колн ялсӯв, нэ̄паканув тув мисанув. Алёна манюм о̄с маснут ю̄нтым рӯпитас. Виталий э̄кватэ ос а̄гитэ Украинат Краснолиманск ӯст о̄лэ̄г, тэ̄н тав ётэ киттыгминасы̄г. Хумус тэ̄н тот о̄лэ̄г, ты урыл акваг номсэ̄гум. Ты э̄лыпалт тав ётэ телефон хосыт потыртасум, ла̄выс, пилым, тӯйтыглахтым о̄лэ̄гыт. Ма̄н ётув тыг минуӈкве ат тахмаяс, тот оматэ палт хультыс. Внучкам тыг ёт виӈкве ат мистэ. Украинан ювле ма̄н воссыг ат минэ̄в, тыг о̄лмыгтэ̄в. Хунь ма̄хум Украинат хо̄нтлаӈкве по̄йтэ̄гыт, колув уральтаӈкве туп ялэ̄в. Ня̄враманум о̄с ла̄ве̄гыт, тув туп рӯтаныл палт мӯйлуӈкве ялантаӈкве патэ̄гыт. 1997 та̄лт ма̄н украинский намнэ̄пакыл майвесӯв. Та порат ам о̄йкам Россиян о̄луӈкве во̄выгласлум. Ам ма̄ньщииг о̄лэ̄гум, тыт самын патсум, тыт яныгмасум, ань ӯрхатэ̄гум, тыт о̄лнэм ма̄гсыл э̄рнэ нэ̄пакытыл вос ва̄равем. Ты урыл хунь номсэ̄гум, а̄латы лю̄ньще̄гум. Туп ань торгамтаслум, ты гражданство урыл то̄нт номсахтуӈкве э̄рыс. Ань ма̄н «статус временного убежища» нэ̄пакыл майвесӯв, Россия гражданствал мо̄тыт та̄лт тах ущ ва̄раве̄в. Ам Татьяна Гоголева ос Надежда Алексеева, округ Дума депутат нэ̄гн, Еремей Айпин, соссаӈ ма̄хум Ассамблеят кӯщай хумн яныг пӯмащипа ла̄тыӈ ла̄ве̄гум. Та̄н ма̄навн ёмащакв нё̄тсыт. Людмила Алфёрован о̄с яныг пӯмащипа ла̄тыӈ ке̄тэ̄гум. Ты нэ̄ Геннадий Бухтин, губернатор ва̄ӈын хум, палт нё̄тмил ва̄рнэ нэ̄г рӯпиты. Тав ма̄навн о̄с ёмащакв нё̄тыс».

1086 2014.10.20. Валентина УЗЕЛЬ

Тит ща̄нь ла̄тыӈ ва̄нэ хо̄тпа. Клавдия Васильевна Койнова Ха̄льӯст о̄лы, тав а̄ги о̄парищ наме щирыл Рочева. Ня̄хщамво̄ль па̄вылт о̄лыс, тот ханищтахтас, яныгмас. Тувыл тав Украина ма̄н ва̄нтлыс, тот хус арыгтем та̄л о̄лыс. Ха̄льӯст хо̄нтхатыгламуме̄н порат мощ потыртасме̄н, Клавдия Васильевна рӯтанэ ос такви уре̄тыл тох ла̄выс. Ам Ня̄хщамво̄льт самын патсум. Омав Федосья Даниловна Анемгурова о̄лыс, а̄щув Василий Иовлевич Рочев, саран хум. Ма̄н ма̄ньта̄гыл тит ла̄тӈыл потыртасӯв, ма̄ньщи ос саран ла̄тӈыл. Ханищтахтуӈкв о̄вылтахтамув порат рущ ла̄тӈыл потыртаӈкв щар ат ха̄ссӯв. Ащо̄йкам Данил Васильевич Анемгуров Ха̄ӈылсам па̄вылныл о̄лыс, ты па̄выл ӯнлум ма̄т ань туп аквтит кол хультыс. Ане̄квам Анастасия Ивановна Няхлаӈ па̄вылныл о̄лыс. Тэ̄н ат ня̄врам о̄щсы̄г, нила а̄ги Федосья, Анна, Ольга ос Дарья, ос акв пыг – Петр. Яныг а̄гитэ̄н Федосья – ты ма̄н омав. Тэ̄н са̄лы о̄щсы̄г, са̄лы ӯрим яласасы̄г. Хо̄нт э̄лыпа̄лт 1937 та̄лт ащо̄йкав о̄с хотталь тотвес, лов та̄л минас, 1947 та̄лт юв ёхтыс. Ты лов та̄л сыс ане̄квав ня̄враманэ ёт такте̄т о̄лыс, та̄нти хотмус са̄лы ӯрим яласасыт. Омав а̄тяв ёт 1941 та̄лт акванминасы̄г, омав то̄нт 18 та̄лэ ущ то̄влыс. А̄тяв войнан ат вуйвес, са̄лы ӯруӈкв хультуптавес, а̄пщитэ тув тотвес. Ма̄н нёлолов ня̄врам самын патсӯв, йӣгрищув та̄лэ ат то̄влыс, а̄тимыг е̄мтыс. Са̄т ня̄врам хультсӯв. Школан миннэ̄в мус ма̄н омагувна̄тягувн са̄лыӈ колт тотыглавесӯв. Ма̄н иӈ ма̄ниг о̄лмув порат ома та̄л хультсӯв, ма̄нтирот о̄лсӯв, ма̄нти яныгмасӯв. А̄тяв са̄лы ӯрим нё̄рт яласас. Туи порат па̄вылт о̄лсӯв, пил ва̄тсӯв, ла̄хыс атсӯв. Ане̄квавнащо̄йкавн, Дарья а̄квувн нё̄твесӯв. Школа а̄стламум юипа̄лт ам педучилищат ханищтахтасум. Мощ рӯпитасум, ще̄мьяӈ та̄гыл Украина ма̄н минасӯв, тув о̄лмыгтасӯв. Хус арыгтем та̄л тот о̄лсӯв, ювле йигмыгтамув порат Щерки ма̄нь пыгум 20 та̄лэ то̄влыс. Ам Ня̄хщамво̄ль интернатт воспитателиг мощ рӯпитасум, тувыл Ӯсн (пе̄с ма̄хманув Ха̄льӯс тох ла̄выгласаныл) ва̄нтлысум. Тыт пе̄с э̄ргыт, мо̄йтыт атнэ колт рӯпитасум, тувыл культура центрыт рӯпитаӈкв патсум. Ань ма̄н ты рӯпитан колув мо̄т щирыл ла̄вуӈкв патвес, отделыг ва̄рвес. Нила хо̄тпа тыт рӯпитэ̄в, Р. П. Загородняя, Т. В. Тунгусова, ам ос колкан ловтнэ нэ̄. Тит пыгагум сас тыт о̄лэ̄г, рӯпитэ̄г. Щерки пыгум ань Коми республикат о̄лы, тот нэ̄ тотыс. Э̄кватэ саран а̄ги, яныг а̄гитэ̄н саран ла̄тӈыл потыртаӈкв сака ёмащакв ха̄сы. Тамле ты потыр Клавдия Васильевна потыртас. То̄ванакт тав ма̄н газетавн потрыт те̄тса̄лы, тав хансум потранэ пӯмыщ ловиньтаӈкв. Ма̄н таве̄н са̄в ёмас ла̄тыӈ те̄тэ̄в, На̄й-О̄тыранэ̄н вос ӯргалаве, пуста̄гыл вос о̄лы. Э̄лаль потрыт ма̄навн вос хансы.

1086 2014.10.20. Николай МЕРОВ

Соссаӈ ма̄хманув мӯйлысыт. Ты э̄тпос о̄выл хо̄талытт Ханты-Мансийск ӯсн Лӯима̄, Сибирь ос Дальний Восток ма̄ныл мощщаг хультум соссаӈ ма̄хум мӯйлуӈкве ёхталасыт. Ты ва̄рмаль рущ щирыл «Северное сияние» намаим о̄лыс. Ма̄хум Алтай, Таймыр, Камчатка, Ямало-Ненецкий округытныл о̄лсыт. Та̄наныл Мария Кузьминична Волдина, яныгпа̄ла ханты э̄ква, сымыӈ ла̄тӈыл янытласанэ. Тав ёнгын колэ «Ешак най» нам о̄ньщи. Ты ще̄мьяӈ ёнгын кол округувт о̄лнэ мирн ёмщаквег ва̄ве. Ка̄сыӈ ма̄ныл ёхтум ма̄хум йӣквсыт, са̄ӈквылтапыл са̄ӈквылтасыт ос э̄рыг э̄ргысыт. Та̄н нупыланыл сунсуӈкве сака мӯстыс. Ты ва̄рмаль таима̄гыс щё̄питавес, ка̄сыӈ мир халанылт юртыӈыщ вос о̄лсыт. О̄влэ̄т та̄н «Ма̄вит ос э̄лумхо̄лас» нампа пе̄с пормас атнэ музей колт йӣквсыт. Тувыл Октябрьский ос Нефтеюганский районыгн э̄лаль мӯйлуӈкве ялсыт. Мо̄тыт хо̄тал Ханты-Мансийск ӯсн ювле ёхтысыт. Тыт юио̄выл хо̄тал яныг концерт щё̄пита̄лсыт. Ты пӯмащ ва̄рмаль сунсуӈкве са̄в мир атхатыглас.

1086 2014.10.20. «Лӯима̄ сэ̄рипос» ос «Ханты ясаӈ» газетаг редакцият рӯпитан ма̄хум

Сым ща̄ргын ла̄тыӈ. Ты э̄тпос хо̄тхуйпловит хо̄талэ̄т Ханты-Мансийск ӯст ма̄ньщи хо̄тпав Владимир Иванович Шесталов а̄тимыг е̄мтыс. Тав яныгполь э̄тпос 28 хо̄талэ̄т 1964 та̄лт Тюмень ӯст самын патыс. Та порат а̄тятэ Юван Николаевич Шесталов тот педагогический институтт ханищтахтас. 1971 та̄л ще̄мьяныл Санкт-Петербург ӯсн ва̄нтлыс, Владимир Иванович тот яныгмас. Ва̄т нупыл хӯрмит та̄лэ то̄влуме порат тав Ханты-Мансийск ӯсн ва̄нтлыс. 1987 та̄лт тыт педучилищат ханищтахтуӈкве о̄вылтахтас. 1989-1990 та̄лытт ма̄ньщи мирув э̄рыгсов та̄ныт ос э̄ргыт ханищтаӈкве патыс. Ты юипа̄лт Владимир Иванович Санкт-Петербург ӯст о̄лнэ А. И. Герцен нампа институтт ханищтахтас. Тувыл 1996 та̄лт Петрозаводский консерваторият ханищтахтуӈкве о̄вылтахтас, тот э̄рыг ва̄рмаль ва̄нэ яныг хо̄тпат ёт ва̄йхатуӈкве патыс. 2011 та̄лт искусствоведение кандидат намыл майвес. Са̄в та̄л искусства школат рӯпитас, ня̄врамыт са̄ӈквылтапыл та̄ныт са̄ӈквылтаӈкве ханищтасанэ. Владимир Иванович тӯлыглахтан ва̄рмаль ва̄т нупыл ат та̄л ханищтас, ма̄ньщи э̄ргыт, йӣквыт ханищтас, пуссын нэ̄пакын хассанэ. Ты На̄й-О̄тырыӈ ма̄т тав ща̄гтым ё̄мыгтас, рӯпататэ э̄руптастэ, ханищтам ня̄враманэ янытласанэ. А̄ще ма̄, а̄ще ща̄нь ла̄тыӈ сака э̄руптастэ, сака янытластэ, хо̄тпа нупыл сымыӈ э̄лумхо̄ласыг о̄лыс. Рӯт хо̄тпанэ̄н ма̄н сым ща̄ргын ла̄тыӈ ке̄тэ̄в, тав ма̄гсылэ ма̄н сыманув о̄с ща̄рге̄гыт. «Лӯима̄ сэ̄рипос» ос «Ханты ясаӈ» газетаг редакцият рӯпитан ма̄хум.

1086 2014.10.20. Анна АЛГАДЬЕВА

Иныг йӣвыӈ, лям йӣвыӈ па̄выл. Таквсы кит ӯщлахтын хо̄талыг сыс школат ханищтахтын ма̄ньщи ня̄врамыт, школат рӯпитан кит ханищтан нэ̄г о̄с то̄ва па̄влыӈ ма̄хум Ме̄ӈквъя па̄вылн ялсыт. Ме̄ӈквъя па̄выл ва̄т нупыл ат ве̄рыстат Хулюмсунт па̄вылныл ло̄ӈхаль о̄лы. Ты па̄выл па̄влыӈ ма̄хманэ̄н наме̄тыл ат ла̄ваве. Пе̄с о̄лум ма̄хманэн Иныг йӣвыӈ, ля̄м йӣвыӈ па̄влыг ла̄ввес. Ань о̄лнэ па̄влыӈ ма̄хманэ̄н, нас, та па̄влыг ла̄ваве. По̄х хо̄тпан тай Ме̄ӈквъя па̄влыг ла̄вуӈкв ро̄ви. Тыг ялнэ номт хосат та̄гыл о̄лыс. Биология ос химия урокыт ханищтан нэ̄ Т. А. Головина таквс палытыл щё̄питахтас, ханищтан ня̄враманэ ёт са̄ртын та̄гыл ты урыл потыртас. Сака таӈхыс ялуӈкв. Наска̄ссыг хунь ла̄ве̄гыт, хунь номтынтыл сака ке та̄кыщ матыр таӈхе̄гын, ва̄рмаль та щирыл та паты. Ам ма̄ньщи ла̄тыӈ ханищтан нэ̄г школат о̄лэ̄гум, ам о̄с ты ма̄хум ёт ялсум. Хоса щё̄питахтасӯв, аквматэ̄рт ты а̄стысӯв. Миннэ па̄лаг патсӯв, ат ха̄п е̄мтыс. Миркол кӯщай нэ̄в О. В. Баранова ат ве̄ритас, хо̄тыт ха̄пыл такви ё̄рыл о̄с ма̄н ётув ялыс. Янгема̄не̄тыл пуссын аквъёт ва̄т нупыл нила э̄лумхо̄лас. Яласамув сыс ёмащакв рӯпитасӯв, аквтымус ӯщлахтасӯв. Па̄выл коныпа̄лт ё̄мыгтасӯв, во̄ре манхурип та̄ра паттыслӯв. Хумыс нир тыт поталы, сэ̄ныг, со̄с, ха̄ль пӯӈат яныгми, суссӯв. Хара па̄вылкан хосыт нас ё̄мыгтасӯв. Галина Константиновна Алгадьева щар яныг хо̄тпаг ма̄н халувт о̄лыс. Тав ущ хум ва̄рме порат о̄йкатэ Илья Никитич Алгадьев ёт ос о̄ныпе Мария Васильевна Алгадьева ёт ты па̄вылт о̄лыс. На̄лми ва̄тат пе̄с кол ӯнлы. Галина Константиновна ла̄ви: «Та пе̄с кол сыспа̄лн минуӈкв нэ̄ хо̄тпан ат ро̄ви. Та кол са̄мт хуньт пе̄с порат Миснэ колъёр о̄лум. Па̄выл о̄лыме̄тэ порат мислув о̄щсыт, ӯйхул тув ке мины, тот ке ё̄мыгты, тоӈханэ э̄лнэ̄лттавет. » Тох ты, та кол сыспа̄лэ вуянтахты. Ва̄та̄л ма̄т мори ё̄муӈкв ат ро̄ви. Ма̄н ялмувт вит яныг о̄лыс, улпыл таима̄гыс пыгрищит такос хӯл нясласыт, нэ̄матыр ат пувсыт. А̄гирищит о̄с та̄н па̄лтыланыл юрщигтахтыглэ̄гыт кос. Ма̄тар хилсыт, такос ня̄сласыт. Исмитув ат тэ̄лыглас. Хум хо̄тпат хӯлп ӯнтталасыт, акв хулюмхул муӈкпыг туп пе̄рыглалас. Галина Константиновна та хӯлыл хумыс ёхыл ва̄раве, суссылтас. А̄гит иныг, пащар, ля̄м ва̄тсыт. Пыгрищит ӯльйив халытасыт. Тэ̄нут а̄ращт па̄йтсӯв, акв яныг па̄саныл кон тэ̄пъяласӯв. Акв э̄т туп хӯлсӯв. Кит кол мус о̄лсӯв. Галина Константиновна колэ ма̄нь, колыӈ ма̄хум та̄нки тот хӯлсыт. Семён Ильич Алгадьев колэ яныг, са̄в па̄л о̄ньщи. Ёхталам ма̄хум са̄выӈпа̄лэ пуссын тот хӯлсыт, па̄лн ат то̄влуве̄сыт, колканн нортгалахтыгласыт. Ӣтипа̄лаг са̄всыр мо̄йтыт мо̄йтсӯв. Такем ёмщакв яласасӯв, ня̄врамытн сака мустыс. Китыглахтэ̄гыт, хунь о̄с аквтох аквъёт хотталь минэ̄в? Са̄ртын ла̄вхатуӈкв ат патсӯв, ма̄лтыпыг е̄мты, ущ ос номсахтэ̄в. Ягануво̄парищанув хуньт во̄рт яныгма̄ласыт, во̄рыл ханищтахтыгласыт. Манхурип та̄л, таквс, хо̄тал е̄мты, са̄ртын ва̄саныл. Ма̄н о̄с акв ты ва̄рмаль койгалым, во̄р ханищтым кос яласэ̄в.

1086 2014.10.20. Тамара МЕРОВА

Тав ща̄нь ла̄тӈе̄тыл пӯмщалахты. Мо̄лалнув ищхӣпыӈ ут хосыт ам Валентин Дёмин ёт ва̄йхатасум. Тав уре̄тыл а̄нумн Софья Власенкова (Рукова) потырта̄лыс. Тэ̄н сас ма̄ньщи хо̄тпаг. Софья Ильинична ань Калужский область Жиздра ӯст о̄лы. Ме̄н тав ётэ рӯтыӈыщ о̄лыме̄н. Ос Валентин тав ва̄нэ хо̄тпатэ. Ты ма̄ньлат пыг Ивдель ӯст о̄лмет а̄нумн свонита̄лыс, ме̄н то̄нт мощ потыртасме̄н ос тувыл ищхӣпыӈ ут хосыт ам таве о̄лупсатэ урыл ёмщакв китыгласлум. Мо̄лты ювле хультум та̄л па̄сныл ма̄ньщи ла̄тыӈ такви ханищтаӈкве о̄вылтаме. Тав э̄рнэ ханищтан нэ̄пакыт хо̄нтыс, матыра̄ти тэ̄лал акваг пӯмщалахтас, ос тоха та э̄лаль ма̄н ла̄тӈув ва̄ӈкве патыстэ. Валентин ань ищхӣпыӈ ут хосыт ма̄ньщи газетав ловиньтаӈкве ве̄рми. Тувыл ща̄нь ла̄тыӈ э̄лаль тотнэ ма̄гыс тав такви номылматан ма̄ньщи потырохсат, мо̄йтыт хансуӈкве патыс. Сыресыр рущ потрыт, стихыт тав онтолов та̄лныл хансы. Такви уре̄т пыг таи потыртас: «Ам хус та̄лум то̄влыс, Дятлово па̄вылт самын патсум. Ты па̄выл Московский область Зарайский районт о̄лы, ты а̄тям тав самын патум па̄влэ, тав рущ о̄йка. Омам Свердловский область Ивдельский районт Бахтияровыт о̄лум ма̄ныл о̄лыс. Тав ма̄ньщи нэ̄. Ты ва̄рмаль ам туп мо̄лты та̄л та̄рапаттыслум. А̄нумн сака пӯмащ о̄лыс, та па̄сныл ам акваг ма̄ньщи ма̄хум о̄вылтыт номсахтуӈкве патсум, мирув о̄лупса, ща̄нь ла̄тӈув ханищтаӈкве патыслум. Ма̄н ще̄мьявт нила хо̄тпа, тыи а̄тям, омам, ам ос а̄пщим. Щаще̄ква, о̄па о̄с о̄ньще̄гум. Ам школат онтолов класс а̄стласум, тувыл нила та̄л техникумыт ханищтахтасум. Ты та̄л таве а̄стласлум, ань рӯпата кинсэ̄гум. Амки ле̄ккарыг о̄луӈкве таӈхе̄гум, ма̄хум пусмалтаӈкве ос та̄нанылн нё̄туӈкве патэ̄гум». Ос аньмӯнтнув Валентин Дёмин ма̄ньщи ла̄тӈыл такви хансум мо̄йтэ ке̄тыстэ. На̄н ань ты мо̄йт ловиньтэлы̄н. Са̄лыт ӯрнэ ос во̄раян хумы̄г Са̄лыт ӯрнэ хум ос во̄раян хум о̄лсы̄г. Акв ляпат о̄лсы̄г. Аквнакт са̄лы ӯрнэ хум йильпи кол ӯнттуӈкве тахмаяс, колэ пе̄сыг е̄мтыс. Э̄рнэ ут, матыр вис ос рӯпитаӈкве патыс. Акв хо̄тал ва̄ри, китыт хо̄тал ва̄ри. Нэ̄матырыг ат е̄мты. Акв хо̄тпан рӯпитаӈкве та̄рвитыӈ. Тав нор тармыл ӯнтыс ос та тысты. Та̄ра во̄раян хум ё̄мыс. Тав са̄лы ӯрнэ хум ка̄саластэ ос китыглытэ: Паща о̄лэ̄н, рума. Наӈ манрыг тыстэ̄гын? Ос хумус ат тыстуӈкве? Йильпи кол ӯнттуӈкве таӈхе̄гум, колум пе̄с, щар лю̄лиг е̄мтыс. Туп нэ̄матыр ва̄руӈкв ат ве̄рме̄гум. А̄нум акваг та̄рвит. Моще̄ртын тэ̄лыиг ты е̄мты. Ул тыстэн! Ам наӈын нё̄тэ̄гум. Во̄раян хум хӯрум пыганэ во̄всанэ. Аквъёт кол ӯнттуӈкве о̄вылтахтасыт. Рӯпатаныл кӯпнитыг минас. Та̄н молях кол ӯнттысаныл. Нё̄тнэ, ре̄гыӈ кол ӯнттысыт. Са̄лы ӯрнэ хум хотща̄гтыс, ла̄выс: Пӯмащипа, юрт. Наӈ а̄нумн ат ке нё̄тсын, колта̄глум тэ̄лы по̄льнуве. Пӯмащипа ла̄тыӈ ул ла̄ве̄н. Ам юртумн акваг ща̄гтым нё̄тэ̄гум. Та̄лэтуве минас. Аквнакт са̄лы ӯрнэ хум во̄раян хум колэ ляпат минас ос во̄раян хум тыстым ка̄саластэ. -Наӈ манрыг тыстэ̄гын? Маныр е̄мтыс? – са̄лы ӯрнэ хум китыглахты. Ос хумус ат тыстуӈкве? Ты та̄л во̄раян ва̄рмаль лю̄ль. Во̄руй ат ликмыгла̄лы. Ам во̄рт ты кос ё̄мыгтэ̄гум ос нэ̄матыр ка̄тн ат паттыглэ̄гум. Ам колта̄глум тэ̄та̄л ты хульты. Ул тыстэ̄н. Ам ётум минэн. Тэ̄н са̄лы ӯрнэ хум палт ёхтысы̄г. Са̄лы ӯрнэ хум са̄в са̄лы о̄ньщи, тав ла̄выс: Манах са̄лы э̄ри, вӯен. Наӈ колта̄глын тэ̄та̄л воссыг ул вос о̄лы. Во̄раян хум са̄лыт висанэ. Юрткве, пӯмащипа. Ма̄н ань тэ̄та̄л ат щуӈкырлэ̄в. Пӯмащипа ла̄тыӈ ул ла̄ве̄н. Ам юртумн акваг ща̄гтым нё̄тэ̄гум. Та па̄сныл са̄в та̄л минас. Са̄лы ӯрнэ хум ос во̄раян хум колта̄глаге̄ныл ёт ань тыг мус о̄лэ̄гыт. Халэ̄нт юртыӈыщ о̄лэ̄г, нуса ат ва̄гыг. Тамле пӯмащ мо̄йт Валентин ма̄ньщи ла̄тӈыл ты хансыс. Таве̄н ма̄н о̄с яныг пӯмащипа ла̄тыӈ ке̄тэ̄в. Тав такви щирыл тахнэ номтанэ тэ̄лаг вос е̄мтэ̄гыт. Пус ка̄т, пус ла̄гыл, То̄рум ёт, О̄тыр ёт!

1086 2014.10.20. Алёна Рокина

О̄лнэ ма̄вт хӯлюм посыӈ лё̄ӈхе. Ханты-Мансийск ӯст Лопарева ӯсхулыт «Доммузей народного художника СССР В. А. Игошева» нампа кол о̄лы. Та колт ольпыл по̄слым са̄всыр яныг манос ма̄нь хорамыӈ ло̄псын нэ̄пакыт, хурит суссылтавет. В. А. Игошев хурин са̄в ма̄ньщиянув по̄слысанэ. Щар о̄выл щёс ма̄ньщит па̄лт тав 1954 та̄лт ёхталас. Ня̄хщамво̄ль па̄вылт тав Степан Куриков, Максим Рокин, Тасмановыт ще̄мьяныл ос мо̄т ма̄хум по̄слысанэ. Ня̄хщамво̄ль школат тав ма̄нь а̄гирищ по̄слыстэ, хуритэ «Озорница» намаястэ. Ань ма̄ньщит ты музейн та̄нки йис о̄паныл сунсуӈкве ялантэ̄гыт. Ты ма̄гсыл яныг пӯмащипа та ма̄хумн ла̄вуӈкве э̄ри, хотьют ты музей ӯнттын ма̄гсыл са̄в ё̄р пиныс. Максим Рокин Нё̄рныл Ня̄хщамво̄ль па̄вылн са̄лыянэ ёт на̄лув ва̄глыс. 1931 та̄лт тав нэ̄ тотыс, э̄кватэ̄нтыл лов ня̄врам янмалтасы̄г. Па̄вылн хунь ёхтыс, китнакпа кол ёвтыс, та порат купсат та̄н тамле колт о̄лсыт. Такви ос э̄лаль са̄лы ӯрим Нё̄рт яласас. Ты кол Владимир Игошев о̄с хурин по̄слыстэ, «Дом охотника М. Я. Рокина» намыл пиныстэ. О̄йка такви ос по̄слыма, та хури музейт о̄с ханы. Са̄лы ӯрнэ хум ос 1974 та̄лт хурин по̄слыстэ, «Максим Яковлевич Рокин» намаястэ. Ань ма̄хум ты хурит нупыл сунсым ос китыглахтэ̄гыт, ма̄ньщит во̄рт ёмыгтым хумус ат тыпе̄гыт, хумус ва̄ганыл, хоты ма̄т о̄лэ̄гыт. Во̄раян хум ка̄сай ос ще̄ранка ке о̄ньщи, тав лылытэ та нэ̄глы. Во̄рт акв пумта̄рс ке о̄лы, хо̄т о̄лэ̄гын, торгамтаӈкве ро̄ви ос ювле миннэ лё̄ӈхын хо̄нтхатуӈкве. Во̄раян ма̄хум ще̄пт ка̄сай ос ще̄ранка акваг о̄ньще̄гыт. Тамле «лё̄ӈх» ма̄хум та̄нки юипа̄ланыл та хультуптасаныл. Ам ма̄ньщи ла̄тыӈ о̄выл та̄л ханищтылум, са̄ртыӈ саран ла̄тыӈ ханищтаслум. Потыр ма̄ньщи ла̄тӈын толмащлаӈкве щаще̄квамн нё̄тве̄сум, школат ос ханищтан нэ̄н словарьнэ̄пакыл рӯпитаӈкве ханищтаве̄сум. Потрум тыщирыл та тэ̄лыс. Пӯмащипа. Алёна Рокина, Ня̄хщамво̄ль па̄выл школат ловит классыт ханищтахтан а̄ги.

1086 2014.10.20. Людмила ТЕТКИНА

А̄с я̄ ва̄тат ӯнлын па̄выл. Октябрьский район Карымкары па̄вылт ань акв со̄тыра арыгкем э̄лумхо̄лас о̄лы. Ты па̄вылкве урыл 16-17 нот порат та̄ратым нэ̄пакыт хансым о̄лыс, то̄нт ханты ма̄хум ты па̄выл Карингвош намаясаныл. Па̄выл ляпат ма̄нь я̄ о̄вты, тот ка̄рай хӯл сака са̄в о̄лыс. Пе̄с порат па̄выл по̄хат ялпыӈ ма̄ о̄лыс, са̄всыр ма̄ныл хантыт та̄нки На̄й-О̄тыраныл нупыл по̄йкщуӈкве тув ёхталасыт. Ань тот о̄лнэ хантыт мо̄т мирыт халн тэ̄лыгласыт, та̄нки пе̄с йис ва̄рмаляныл нупыл сака ат сунсэ̄гыт, ща̄нь ла̄тӈыл ат потыртэ̄гыт. Тыи ма̄гсыл Карымкары ань рущ па̄влыг ловиньтахты, ханты ма̄хмытыл туп наме хультыс.

1086 2014.10.20. Людмила ТЕТКИНА

Архив кол 80 та̄лэ то̄влыс. Ты э̄тпос о̄выл хо̄талэ̄т окружной Архив кол 80 та̄лэ то̄влыс. Ты кастыл Югра янытыл архивытт рӯпитан ма̄хум Ханты-Мансийск ӯсн во̄виньта̄лве̄сыт ос янытлаве̄сыт. 1934 та̄л ма̄нь таквс э̄тпосэ̄т Остяко-Вогульск ӯст «Окружное Архивное бюро» ва̄рвес. Ты юипа̄лт Кондинский, Лярьякский, Октябрьский, Сургутский ос Ха̄льӯс районт тамле колыт рӯпитаӈкве о̄вылтахтасыт. 1960-1970 та̄лыт Нефтеюганск ос Урай ӯсыгт са̄всыр пе̄с нэ̄пакыт архивн атуӈкве патве̄сыт. Ань ка̄сыӈ районт манос яныг ӯст 22 тамле кол о̄лы. Округ янытыл о̄лнэ архивколт 140 э̄лумхо̄лас рӯпиты, тот 809 со̄тыра 906 са̄всыр э̄рнэнэ̄пакыт акванатым о̄лэ̄гыт. 857 организация ань та̄нки нэ̄паканыл тув ке̄тыяныл. Ты коныпал тот 30 со̄тыра 654 пе̄с хурит о̄лэ̄гыт. Ты ма̄хум яныг рӯпата ва̄ре̄гыт, пе̄с э̄рнэ нэ̄пакыт, хурит акванатсаныл ос акв ма̄т ӯргалым о̄ньщияныл. Тыщирыл ма̄н пе̄с о̄лупсав ат ёрувлылӯв. Хо̄нтлан нак э̄лыпа̄лт тыт сака са̄в ма̄хум наска̄ссыг порславе̄сыт. Ты пилыщмаӈ ва̄рмалит урыл архивыт о̄лнэ нэ̄пакытт хо̄нтуӈкве ро̄ви. Ань са̄в ма̄хум тув ялантэ̄гыт, рӯтаныл урыл хансум ла̄тыӈ кинсэ̄гыт. Пенсиян миннэ ма̄хум та̄нки рӯпитам организацияныл нэ̄пакыт о̄с тот хо̄нтуӈкве ве̄рме̄гыт. Акв та̄л сыс 75 со̄тыра арыгкем э̄лумхо̄лас са̄всыр нэ̄пакыт кинсым тув ёхталы. Тот рӯпитан хо̄тпат са̄в пе̄с нэ̄пакын «Электронный архив Югры» нампа тэ̄ла палт хассаныл. Ты нэ̄пакыт интернет хосыт ань ловиньтаӈкве ро̄ви. Архив тамле э̄рнэ рӯпата мир ма̄гсыл та ва̄ри. Соссаӈ ма̄хум о̄лупсаныл урыл са̄всыр пе̄с нэ̄пакыт ос хурияныл архивыт ос акванатым о̄лэ̄гыт. 80 та̄л ювле хультум порат округувт янытыл колхозыт ос совхозыт рӯпитаӈкве о̄вылтахтасыт. Ань та колт са̄в пе̄с нэ̄пакыт о̄лэ̄гыт, хот хансым о̄лы, хумус план ма̄гсыл ма̄ньщит, хантыт рӯпитасыт, манаса̄вит ӯйхул пувсыт, манаса̄вит пил ва̄тсыт. Тамле нэ̄пакыт ань туп архивыт ка̄салаӈкве ро̄ви. Ялпыӈ хо̄тал о̄лме порат «Архивная служба. 80 лет вместе с Югрой» нампа суссылтап ва̄рыглавес. Ань ма̄хум хумус рӯпитэ̄гыт ос пе̄с нэ̄пакыт хумус ӯргалым о̄ньще̄гыт, та урыл кина суссылтавес. «Югра-Классик» нампа колт ос «История Югры в архивных документах» мо̄т суссылтап рӯпитас. Ты выставка сунсуӈкве са̄в ма̄хум ёхталасыт. Та̄н нупланыл Людмила Сажаева, окружной Архивыт кӯщаиг о̄лнэ нэ̄, ла̄выс: «Тыт ма̄н округ янытыл о̄лнэ архивыт са̄всыр нэ̄пакыт ос хурит акванатсанӯв. Тыт Югра ма̄в йис поратэ ос ма̄хум пе̄с о̄лупсаныл урыл ловиньтаӈкве ро̄ви. То̄ва нэ̄пакыт щар о̄выл щёс суссылтыянӯв». Ты юипа̄лт архивыт са̄в та̄л рӯпитан ка̄ркам хо̄тпат кӯщаитн янытлаве̄сыт. Алексей Путин, губернатор ва̄ӈын хум, ма̄хум нупыл ла̄выс: «На̄н нэ̄пакыт акванатым, са̄в э̄рнэ тэ̄ла варегы̄н. Ань на̄н палтын пенсионный фондыл, мирн нё̄тнэ департаментыл ос округувт о̄лнэ ма̄хум нэ̄паканыл кинсым архивн ёхталэ̄гыт. Ты рӯпата ма̄гсыл на̄нанн яныг пӯмащипа ла̄тыӈ ла̄ве̄в». Борис Хохряков, округ Дума кӯщай хум, ос Василий Филипенко, Ханты-Мансийск ӯст миркол кӯщай хум, са̄в ёмас, сымыӈ ла̄тыӈ ла̄всы̄г ос са̄в та̄л ка̄ркамыг рӯпитан ма̄хум янытлан нэ̄пакыл мисаныл.

1086 2014.10.20. Анна АЛГАДЬЕВА

Ӯльпа щахыл. Ӯльпа – щуниӈ йӣв. Ӯльпа та̄лныл, ӯльпа о̄ӈхныл тэ̄рпи ва̄раве, па̄квсамытныл во̄й пащиртаве. Йӣве̄ныл ха̄п, ёса ва̄раве. Па̄кв ке тэ̄лы, щуниӈ таквсыиг ла̄ваве. Ха̄льӯс район Хулюмсунт па̄выл школа а̄висунт э̄лыпа̄лт ӯльпа щахыл яныгми. Хӯрмит классыт ханищтахтын ня̄врамыт о̄выл та̄л ханищтахтаманыл порат школа э̄лыпа̄лн ма̄нь ӯльпа пыгрищит ӯнттыгласыт. Мощ мо̄лалнув, акв хотты хо̄тал, пыгрищит 11 классыт ханищтахтын а̄гирищит ёт ӯнттум ӯльпаныл сунсуӈкв ялсыт. Ӯльпаныл уральтасаныл, ловиньтасаныл, йӣваныл по̄хыт ма̄тэ мощ хотхилащласаныл. Ёты хо̄тал классанылт а̄гирищаныл ля̄льт потыртасыт. Та̄н ань ва̄ганыл, ӯльпа йӣв сака ла̄щал яныгми, па̄квын о̄с молях ат тэ̄лаве. Янмалтан ма̄гыс ӯнттым йӣв ва̄тихал уральтаӈкв э̄ри. О̄выл классыт ханищтахтын ня̄врамыт о̄с кит хо̄тал мус ма̄вит урыл потыртаве̄сыт. Хумыс ӯльпа яныгми, та̄ланэ манхурипат, маныр о̄нтас ӯльпа йӣвныл е̄мты, пуссын ты урыл 11 классыт ханищтахтын а̄ги Виктория Лаверина ня̄врамытн потыртас. Тувыл та̄наныл ма̄нь ӯльпа пыгрищитыл мисанэ. Урокыт холам юипа̄лт биология урокыт ханищтан нэ̄ Т. А. Головина ёт, ханищтан нэ̄ныл Н. В. Ожгибесова ёт ос 11 классыт ханищтахтын а̄гит ёт ня̄врамыт йӣваныл ма̄н ӯнттысаныл. Ӯнттум йӣваныл иӈ сака ма̄нит. Тыт рӯпитам ма̄хум пуссын таӈхе̄гыт, хуньт ты ма̄нь ӯльпарищаныл яныг ӯльпаг вос яныгмасыт. Тамле ханищтапыт пуӈкын хосан пухтэ̄гыт. Ка̄сыӈ ня̄врам «Кедровая школа» нампа удостоверениел мӯйлуптавес ос ӯльпа па̄квыл майвес. Ань школа э̄лыпа̄лт ва̄т нупыл онтолов ӯльпа яныгми.

1087 2014.11.07. Анна АЛГАДЬЕВА

Кит а̄ги урыл мо̄йт. Во̄р па̄вылт о̄лсыг э̄кваго̄йкаг. Э̄ква такви торыг а̄ги о̄ньщас. О̄йка такви торыг а̄ги о̄ньщас. А̄гияге̄н янгыг е̄мтсыг. Аквматэ̄рт э̄ква ла̄ви: Маныр а̄гин, во̄рт э̄лнув ма̄нь колхусапыл ва̄рапе̄лын, вос такви тот о̄лы. Яныг а̄ги. О̄йка хоталь щалты, та минас. Ма̄нь ёмас яныт колхусап ва̄рыс, а̄гитэ тув та ва̄нтлуптастэ. Наӈ тыт о̄лэн, ла̄ви, такви лю̄ньщи. Воссыг хумле ва̄рилум, о̄ньгын ляпан ат вивен, акваг тораставен. Тот та о̄лы. О̄йка о̄лыо̄лы, уральтытэ. Нуса порат пе̄с тэ̄нутыл тотытэ. Аквматэ̄рт ёхтыстэ, а̄гитэ ӯнлы, щёвалт такем ты пӯтэ па̄йтахты. Айкве, наӈ хотыл нё̄выль висын? Осын такем ты нё̄влиӈ. Юв щалтыс, сунсыглахты, колэ̄т тай щар акваг сэ̄млуйвыгруй ханта̄л акв ле̄ӈк а̄тим. Акваг осэва̄тал нёхсыт па̄рт осыл ханащлэ̄гыт. Наӈ хотьют о̄ньще̄гын? А̄ти, ат суйтыглы а̄гитэ. А̄щ, ӯнтэ̄н. Пӯтэ а̄стыс, пӯтыл хӯныстэ, манарастэ. Тыттыстэ, манарастэ. Юв минуӈкв патыс. Тытты, пӯт ва̄рнэ нё̄выль вуе̄лн, юв тотэ̄лн. Сунсовн та̄лтхатас, о̄йка юв та харты. Юв ёхтыс, э̄кватэ ляльт ла̄ви: А̄гиме̄н такем та ёмщакв о̄лы, колэ̄т тай таса̄вит сэ̄млуйвы̄груй нас хананты. Кон со̄млях сове та̄глэ нё̄выль. Вос тах туииг е̄мты, ам а̄гим о̄с я̄нас колыл ва̄рапе̄лын. О̄с о̄йка о̄лыо̄лы, о̄ста яланты уральтаӈкв. А̄гитэ тай акваг сэ̄млуйвы̄груй нас хананты. Наӈ хумыс тох о̄лэ̄гын? Ам Мисхумн ва̄глуве̄сум. Тав э̄лумхо̄ласн ат суссылтахты. Во̄рт акваг та яласы, акваг матыра̄ти алыщлы, осэва̄тал во̄руй юв тоты. Ёмас. О̄йка сыме ёмас, а̄гирище ёмщакв о̄лмыгтас, манарас. Тӯяпа̄лаг патыс, нэ̄тэ тай акваг та вораты. Моляхмолях кол ва̄рен. А̄гирищум колыл ва̄рапе̄лн, ӯнттыгпе̄лн. Вос такви я̄нас о̄лы, э̄рыӈ о̄с тах щёлыӈ хум ва̄ри. Тӯяпа̄лаг патыс, о̄йкарищ колхусап та ва̄ри, манари, щё̄питас а̄гитэ ма̄гыс. Туп а̄стапас, та̄ра а̄гитэ а̄лмаястэ, пормасыӈ та̄гыл тув та ха̄йттастэ. А̄гитэ о̄лы, аквматэ̄рт о̄лыме̄тэ, хотьют та ло̄хи. Щалтапен, кей, щалтапен, а̄ви па̄лыго̄лы. Юв та щалты. Ме̄ӈквын ёхтувес. Матыр тэ̄нут о̄ньще̄гын? Ии, тав тай та ха̄йты, манари. Тэ̄нут такос аты, пасанн такос ӯнтты. Манарн пуки сове то̄влаве. Та тэ̄с, та тэ̄с. О̄с тэ̄ӈкв таӈхи, такви та лохасавес. Саманэпалянэ аялаве̄сыт, пуӈк хопаритэ а̄виха̄пн ӯнттыгпавес. Такви ань та мины. Э̄кваго̄йкаг тай та о̄лэ̄г. Аквматэ̄рт матпалыт хоса о̄лсы̄г, ва̄ти о̄лсы̄г. Сар, ам ялэ̄гум, а̄гим уральтылум, хумыс о̄лы, э̄ква ла̄ви. Тув та мины. Тув мины, сунсы. Яя, а̄ги тай кол а̄витэ па̄лыг, ул нё̄выль пут па̄йты. Такем та ре̄гтыглыма, кол а̄витэ па̄лыгпиныма. Ляпан та ёхтыс, ёмщакв сунсуӈкв патыстэ, яа, манаре, а̄гитэ туп пуӈк хопаритэ ӯнттыгпиме, ӯнлы. Саханэ пӯт йӣвн пе̄румтымат. Лю̄ньщим, поварим юв та мины, ля̄втым. Хумитэ палт ёхтыс. -Наӈ а̄гин нэ̄матрыг ат таи, тав тай ёмас щёлыӈ хум ва̄рыс. Ам а̄гирищум витыг та минас. Мо̄йтум та оигпас. Ты мо̄йт а̄нумн Елена Константиновна Самбиндалова мо̄йтыстэ. Тав Ня̄хщамво̄ль па̄вылт о̄лы. Аква̄тихал Хулюмсунтын ёхтала̄лы. Тыт тав а̄гияге ос а̄ги ня̄враманэ о̄лэ̄гыт. Мо̄йт таве̄н тав ща̄не Мария Григорьевна Самбиндалова, а̄ги о̄парищ наме Тасманова, потырта̄лас.

1087 2014.11.07. Александр ВЬЮТКИН

Ща̄нь ла̄тӈув э̄лаль тотнэ хум. Тӯяг соссаӈ ла̄тӈыл потыртан щирыл ня̄врамыт ханищтан ма̄хум халт окружной касыл ва̄рыглавес. То̄нт ма̄ньщи ос ханты ма̄хум халт ма̄н ма̄ньщи хумиюв но̄хпатыс, тав наме Владимир Савельевич Меров. Володя ань Ханты-Мансийск ӯст о̄лы. Тав ня̄врамыт ханищтым «Лылыӈ союм» колт рӯпиты. Ня̄врамыт са̄ӈквылтапыл, нарсъюхыл са̄ӈквылтаӈкв, хум ня̄врамыт йӣквуӈкв ос тӯлыглахтуӈкв ханищтыянэ. Моще̄рт Всероссийский нампа касыл ты е̄мты. Ты та̄л тав яныг таквс э̄тпос са̄тхойполов хо̄талт Москва ӯст ва̄раве. Тув Россия ма̄ янытыл са̄всыр ща̄нь ла̄тӈыл ня̄врамыт ханищтан ма̄хум ёхтэ̄гыт. Ка̄сыӈ ёхтын хо̄тпа такви ма̄тэ̄т о̄с акв тамле щир касылт но̄хпатыс. Ты касыл титхӯрум хо̄тал тах мины. О̄влэ̄т та̄нти ва̄рнэ рӯпатаныл мастеркласс щирыл такталаӈкв э̄ри. Та касыл рущ ла̄тӈыл «Мой регион, моя школа, моя профессиональная деятельность» тох ла̄ваве. Тувыл лов кум палыт телевизор хосыт ня̄врамыт ёт рӯпитан ханищтап суссылталаӈкв э̄ри. Та хо̄таланыл сыс ка̄сыӈ хо̄тпа такви маснутыл масхатым вос о̄лы. Ты коныпал та̄нти маснутаныл ос хораманыл урыл иӈ мощ потыртаӈкв во̄вавет. Владимир Меровн касылн щё̄питахтын ма̄гсыл Майя Ефимовна Макарова ос Ирина Борисовна Белявская нё̄тэ̄г. Москва ӯст ма̄ньщи хумиювн ёмащакве̄г каснэ̄тэ щирыл ма̄н са̄в щунь ос но̄хпатнэ ла̄тыӈ те̄тэ̄в. На̄й-О̄тыранэ̄н вос ӯргалаве ос нё̄таве.

1087 2014.11.07. Александр ВЬЮТКИН

Ня̄врамыт ханищтан ма̄хум касыланыл. Ма̄нь таквс э̄тпос котиль хо̄талытт Ханты-Мансийск ӯст ня̄врамыт ханищтан ма̄хум халт ва̄рнэ касыл урыл прессконференция о̄лыс. Та ва̄рмаляныл рущ ла̄тӈыл «Всероссийский конкурс «Любимый учитель в Югре» намаим о̄лыс. Ля̄ххал тотнэ ма̄хум ёт потыртан ма̄гыс нила хум ёхталасыт. Округ губернатор ва̄ӈын хум Алексей Андреевич Путин о̄лыс, тувыл «Единая Россия» партият центральный совет кӯщай ва̄ӈын хум Олег Павлович Пташкин ёхталас. Ос Иван Михайлович Пачин, тав мо̄лты та̄лт Россия янытыл ва̄рыглым касылт финал мус ёхтыс. Юио̄выл хум Александр Евгеньевич Муромский о̄лыс, тав «Рекорд Гиннеса» нампа нэ̄пакт наме са̄т щёс хансыглавес. О̄влэ̄т Алексей Путин ня̄врамыт ханищтан ма̄хум халт ва̄рнэ касыл урыл потыртас: – Ма̄н округувт тамле касыл щар о̄влэ̄т 2011 та̄лт ва̄рыглавес. То̄нт тав иӈ окружной нам о̄ньщис. Ты порат таве Всероссийскийиг ва̄рилӯв. Россия ма̄ янытыл аквъёт пуссын ва̄т нупыл са̄т ма̄ныл ма̄хум ма̄н округувн касуӈкв ёхтэ̄гыт. Ты хӯрум щёс ва̄рыглам касыланувт но̄хпатум ма̄хум ма̄шинал мӯйлупта̄лсанӯв. Ты порат о̄с олныӈ мӯйлупсал мӯйлуптыянӯв. Та юипа̄лт Олег Пташкин ля̄ххал тотнэ хо̄тпатын титыглавес: – Россия янытыл ты касыл ва̄рнэ щирыл ос манрыг Югра пе̄риявес? – Ты урыл ма̄н хоса атыпыл номсахтасӯв, хо̄т таве ва̄руӈкв. О̄выл номтанув та̄ра на̄н округынт ва̄рнэ щирыл е̄мтыс. Тыт пуссын хумус ва̄раве, воссыг нэ̄мхотты ма̄т тох ва̄руӈкве ат ве̄рме̄гыт ос ат ха̄сэ̄гыт. Ань ты касылув юипа̄лт, ам номсэ̄гум, мо̄тынтыг Россия янытыл пуссын на̄н палтылын касуӈкв тах ёхтэ̄гыт. Тувыл Александр Муромский титыглавес: – Хумле номсэ̄гын, ма̄н округув ёмщакв ты касылын щё̄питахтуӈкв ве̄рми ман а̄ти? – Ам на̄н палтылын нилыттыг ты ёхтысум. Ва̄глум, хумус на̄н ты рӯпата ёмщакв ва̄рилын. Ка̄сыӈ щёс тыг ёхталанэм порат матыр ёмас, йильпи пӯмащ на̄н суссылтэгы̄н. Ань ос амтирот ты номсэ̄гум, нэ̄мхотьютн ат ва̄нэ пӯмащ щё̄питым о̄ньщегы̄н. Тав потре оигпам юипа̄лт Иван Пачин титыглавес: – Тамле касыл ня̄врамыт ханищтан ма̄хмытын э̄ри манос а̄ти? – Тыхурип касыл ма̄навн сака э̄ри. Ам о̄влэ̄т касуӈкв щар ат номсысум. Нас тох амти пӯмащум ма̄гсыл хасхатасум. Щар о̄влэ̄т ня̄врамыт ханищтан хо̄тпат каснэ̄ныл ма̄гсыл ня̄врамытын пе̄риявет. Тувыл ущ э̄лаль ма̄н касуӈкв ве̄рме̄в. Ня̄враманӯв ма̄н хумус ханищтыянӯв, тох э̄лаль о̄луӈкв патэ̄в. Ам та̄наныл ёмащакв ханищтаӈкве ос та̄н ётаныл пилта̄л о̄луӈкв таӈхе̄гум. Ты ма̄н рӯпатав хосыт ма̄н ма̄к яныг ёмас тэ̄ла ва̄ре̄в.

1087 2014.11.07. Людмила ТЕТКИНА

Ма̄нь па̄вылт рӯпитан школа. Октябрьский районт Карымкары па̄выл А̄с я̄ ва̄тат ӯнлы. Па̄выл котильт яныг ӯрай о̄лы. Ты ӯрай па̄выл киттыг уртытэ. Акв ва̄тат пе̄с па̄выл, мо̄тыт ва̄тат йильпи па̄выл. Па̄влыӈ ма̄хумн тэ̄н тох ты ла̄ваве̄г. Пе̄с па̄выл котильт яныг кирпащ школа ӯнттувес. Нина Олеговна Мудрецова школа кӯщай нэ̄г о̄лы. Тав ла̄выс: «Ма̄н школав «малокомплектныиг» ловиньтахты. Ты та̄л тыт 140 ня̄врам ханищтахты. Та̄н халанылт 19 а̄гирищпыгрищ ма̄ньщиг манос хантыиг о̄лэ̄гыт. Соссаӈ ня̄врам тыт мощща, тыи ма̄гсыл ща̄нь ла̄тыӈ школат та̄н ат ханищтэ̄гыт. Ты э̄лыпа̄лт са̄всыр кружокыт ва̄рыгласӯв, та̄наныл сак хартуӈкве ос ю̄нсхатуӈкве ханищтасанӯв. Тувыл а̄гирищит тув ёхталаӈкве сака ат ка̄сащасыт. Ты кружок рӯпитаӈкве воссыг ат патыс. Округув янытлан хо̄тал кастыл ка̄сыӈ та̄л концертыт, суссылтапыт, каснэ ва̄рмалит ва̄рыглэ̄в. Ты коныпал классный щёс урок порат ма̄ньщит, хантыт культураныл урыл потыртэ̄в. Ня̄враманув ёмащакв ва̄ганыл, хоты мирыт пе̄с йис та̄гыл тыт о̄лэ̄гыт». Карымкары па̄выл школат ня̄врам ханищтым 19 хо̄тпа рӯпиты. Кӯщай нэ̄ ла̄внэ̄тэ щирыл, та̄н халанылт ма̄ньлат хо̄тпа щар а̄тим. Нина Олеговна ма̄ньлат хо̄тпат тув рӯпитаӈкве кос во̄виянэ, тувыл ма̄нь па̄вылн нэ̄мхотьют минуӈкве ат ка̄сащи. Ань ты школа а̄стлан а̄гит ня̄врам ханищтан хо̄тпаг э̄лаль ханищтахтуӈкве ке̄тыяныл. Мо̄тыт та̄л тах кит а̄ги университет а̄стлэ̄г ос о̄лнэ па̄влэ̄н ёхтуӈкве номсэ̄г. Тувыл кӯщай нэ̄ ла̄выс, ханищтахтам а̄гияге ӯст рӯпата ке хо̄нтэ̄г, то̄нт та̄н тах ханищтан хо̄тпа та̄л о̄с та хультэ̄гыт. Ты э̄лыпалт кӯщай нэ̄ интернет хосыт ня̄врам ханищтан хо̄тпа кинсыс, са̄в ма̄н пищма ке̄тыглас. Хо̄тпа тув рӯпитаӈкве ке ёхты, та̄ра о̄лнэ колыл миӈкве э̄ри, та̄н арыг о̄лнэ кол ат о̄ньще̄гыт. Тыи ма̄гсыл нэ̄мхотьют Карымкары па̄вылн ёхтуӈкве ат ка̄сащи. Нина Олеговна ла̄выс: «Ма̄н ма̄нь па̄вылквет кос о̄лэ̄в, тувыл школат маныр э̄ри пуссын о̄ньще̄в. Са̄всыр ищхӣпыӈ партыл, компьютерыл ёвтвесӯв. О̄выл классын ялантан а̄гирищитпыгрищит ты ищхӣпыӈ утыл рӯпитаӈкве акв колнакт ханищтахтэ̄гыт. Мо̄т колнакт яныгнув ня̄врамыт рӯпитэ̄гыт. Школат интернет ва̄рвес. Ань акв та̄рвит о̄лы, ты утув лю̄льсаӈ рӯпиты. Ты урыл кӯщаит палт акваг хансыглэ̄в, ла̄ве̄гыт, моще̄ртн тах па̄вылт яныг вышка тӯщтаве, то̄нт интернет ёмащакв рӯпитаӈкве ущ паты. Мо̄лты та̄л ма̄н грантолн ма̄гсыл нэ̄паканув ке̄тыгласанӯв, то̄нт 600 со̄тыра солко̄вил майлувесӯв. Ты олныл ма̄н компьютерный ос спортивный классыг ёвтсагӯв. Ня̄врам ханищтан нэ̄пакыт пуссын о̄ньще̄в. Ка̄сыӈ та̄л нэ̄пакыт хасылтэ̄в ос тувыл э̄рнэ нэ̄пакытыл ке̄таве̄в. Ща̄ньа̄щит ты нэ̄пакыт щар ат ёвтыглэ̄гыт, э̄рнэ ханищтан нэ̄пакыл ня̄врамыт школат мыганӯв». Ты та̄л Карымкары па̄вылт о̄выл классын 20 а̄гирищпыгрищ ёхтыс. Ос 11 классыт лов ня̄врам ханищтахты. Лов классыт туп хӯрум ня̄врам ханищтахты, са̄в ня̄врам ты та̄л училищан манос колледжин э̄лаль ханищтахтуӈкве минасыт. Карымкары па̄выл по̄хат ма̄во̄й но̄хвинэ компания рӯпиты, са̄в ня̄врам нефтегазовый колледжин ханищтахтуӈкве минэ̄гыт. Таи ёмас, ханищтахтуӈкве а̄стлэ̄гыт, пуссын ювле рӯпитаӈкве ёхтэ̄гыт.

1087 2014.11.07. Александр ВЬЮТКИН

Ма̄ мувлахи яласан хум. Минам э̄тпос ва̄т нупыл титыт хо̄талэ̄т Ханты-Мансийск ӯст ка̄тыл по̄слын хурит суссылтан колт пӯмащ суссылтап о̄лыс. Ты хурит ма̄ янытыл яласан хум Фёдор Филиппович Конюхов по̄слысанэ. Фёдор Конюховын ва̄т са̄грапна̄л э̄тпос титхуйплов хо̄талт са̄тлов нупыл хӯрмит та̄лэ ты то̄влы. Тав Украинат Запорожский оласть ма̄т Чкалово па̄вылт самын патыс. Ма̄н округувн тав ань о̄выл щёс ёхталас. Тыт ва̄рыглам выставкатэ̄т атпан са̄виттем хури суссылтас. Хӯриянэ яласам ма̄нанэ̄т по̄слыгласанэ. Фёдор Конюхов налыман ляпатем са̄всыр ма̄н экспедициян ялыс. Хо̄т щёс такте̄т пары̄сыӈ ха̄пыл ма̄ мувылтастэ. Яласам лё̄ӈхе палытэ То̄рум э̄тпос акиюв мус ёхты. Та палытэ 384 со̄тыра арыгтем ве̄рыста о̄лы. О̄йка хунь яласан ма̄тэ̄ныл юв ёхты, тав номтэ щирыл хуриянэ та̄ра ёмащакв щирмус по̄слыянэ. Пуссын аквъёт тав хӯрум со̄тыра хури по̄слыс. Фёдор Филиппович суссылтапе пӯснэ кастыл са̄в мир ёхталас. Мир халт округ Дума кӯщаиг о̄лнэ хум Борис Хохряков о̄лыс. Тав ла̄выс: – Ма̄н округув ма̄тэ такви щире̄т сака нё̄тнэ ос пӯмащ. Таима̄гсыл хотьют ма̄н палтылув ёхталас те, тав титынтыг тыг ёхтуӈкв ла̄ви. Ма̄н округувн мирн ва̄нэ са̄в учёный ма̄хум ёхталасыт. Та̄н наманыл касталан щирыл Самарово нампа ӯс палъе̄рыт а̄нох памятник ва̄рим о̄лы. Ань ос ма̄ янытыл яласан мирн ва̄нэ хум ма̄н ӯсувн ёхтыс. Ты ма̄гсыл ам таве̄н яныг пӯмащипа ла̄тыӈ ла̄ве̄гум. Яласан лё̄ӈхе̄т То̄рмувн ёмщаквег вос ӯргалаве. Борис Хохряков юипа̄лт ка̄тыл хурит по̄слын хум Геннадий Степанович Райшев э̄лыл ёхтум хум янытлаӈкв во̄ввес, тав ла̄выс: – Ам тамле ёмас хум ёт хосат ва̄йхатаӈкв номсысум. Тав пӯмащ рӯпатанэ а̄нумн сака мӯстысыт. Фёдор Филиппович са̄в а̄лыми ва̄руӈкв, ты ма̄гсыл ам таве хурин тах по̄слылум. Ка̄тыл по̄слын ханты о̄йка потыртаме юипа̄лт выставка пуснэ хум Фёдор Филиппович потыртас: – Ам на̄н округын урыл хосат хӯлыгласум, аквписыг тыг ёхталаӈкв номсысум. Ань ам номтум тэ̄лаг ты е̄мтыс. На̄н округын сака ёмас, тыт лылтуӈкв кӯстыр. На̄н Ханты-Мансийск ӯсын мо̄т ӯсыт хурип а̄ти. Тав мо̄т хурипнув ӯсыг о̄лы, тыт о̄лнэ мире о̄с мо̄тсырнувег сусхатэ̄гыт. Ам са̄в ма̄т о̄лсум, ва̄глум. Ам ётум ва̄йхатнэ кастыл ёхтумын ма̄гсыл на̄нанн яныг пӯмащипа ла̄тыӈ ла̄ве̄гум.

1087 2014.11.07. Светлана РОМБАНДЕЕВА

Ма̄ньлат а̄гипыганув ханищтахтэ̄гыт. Ханты-Мансийск ӯст Технологопедагогический колледжит нила со̄тыра арыгтем ма̄ньлат хо̄тпа ханищтахты. Та̄н халанылт 330 – соссаӈ ня̄врамыт. Ты ханищтахтан колт са̄в та̄л рӯпиты ма̄ньщи нэ̄ Альбина Романовна Станиславец, а̄ги о̄парищ наме Хозумова. Ма̄ньлат а̄гипыгыт тав ма̄ньщи ла̄тӈыл ханищтыянэ. Ам Альбина Романовна ёт потрамасум, китыглахтасум, ма̄ньщи ня̄враманув хотыл ёхтысыт, хумус ханищтахтэ̄гыт, хумус о̄лэ̄гыт. На̄н ань э̄лаль Альбина Романовна потре ловиньтэлы̄н. – Ты колт хӯрумса̄т арыгтем соссаӈ а̄гипыг ханищтахты, та̄н халанылт яныгса̄т ляпатем – ма̄ньщит. Са̄выӈпа̄лэ Ха̄льӯс районныл о̄лэ̄гыт – Кульпасныл, Саранпа̄вылныл, Ло̄пмусныл, Кимкьясӯйныл, Ягримныл. Кондинский районныл хо̄нтаӈ ня̄врамыт о̄лэ̄гыт. Акв а̄гиюв Свердловский областьныл ёхтыс, Нина Анямова, лӯсум а̄ги. А̄гит янгыщ садикт рӯпитан воспитателиг ос о̄выл классыт учителиг ханищтахтэ̄гыт. Пыгыт ос судоводителиг, автомеханикыг, электромонтерыг, кол ӯнттын ва̄рмальн ос мо̄т рӯпатан ханищтахтэ̄гыт. Ань тамле группа а̄тим, хо̄т туп соссаӈ ня̄врамыт ханищтахтэ̄гыт. Ка̄сыӈ хо̄т ка̄сащи, тот ханищтахты. Ань май экзаменыт ат мыгыт, нас аттестатаныл щирыл вивет. Хотьют оценканэ ёмасыт, ёмаснув специальностин ликми. Ань нэ̄матыр льгота а̄тим, кос ма̄ньщи, кос рущ ня̄врам, пуссын аквхурипат. Хотьют ве̄рми ханищтахтуӈкве, тав та ханищтахты. Ма̄н ханищтахтан колув хӯрум корпус о̄ньщи. Уроканув са̄всыр ма̄т о̄лэ̄гыт, хӯрум колыт халт та яласэ̄в. Соссаӈ хо̄тпат отделениянылт ам кӯщаиг о̄лэ̄гум. Тамле отделение а̄тим кос, ос ня̄врамыт ёт рӯпитаӈкве э̄ри, таима̄гыс ам тув та паттуве̄сум. Хӯрум колыт халт яласэ̄гум, тох та рӯпитэ̄гум. Ма̄нь таквс э̄тпост, хунь ущты ёхтэ̄гыт ханищтахтуӈкве, ам та̄н ётаныл ва̄йхатэ̄гум, китыглыянум, хотыл о̄лэ̄гыт, пуссын наманыл ос телефонаныл нэ̄пакын хансыянум. Ла̄виянум, хунь матыр та̄рвит е̄мтапи, матыр нё̄тмил э̄ри те, та̄ра ам палтум тыг вос ёхтэ̄гыт, рӯпитан колнакум номере ла̄вилум. – Альбина Романовна, ма̄ньщи ла̄тыӈ пуссын ханищтэ̄гыт? – А̄ти, туп дошкольный ос о̄выл классыт ханищтан отделениягт ханищтэ̄гыт, хӯрмит ос нилыт курсыт. Мо̄т ня̄врамыт ат ханищтэ̄гыт. – Ла̄тӈув ва̄нэ а̄гипыг о̄лы? – Ща̄нь ла̄тӈув ва̄нэ хо̄тпа сака мощща. Туп акв а̄ги Нина Анямова ма̄ньщи ла̄тӈыл ёмащакв потырты, ла̄тӈе ва̄гтэ. Дошкольный отделеният ам палтум Настя Хозумова – Ло̄пмус па̄вылныл ос Вика Никитина – Ясунт па̄вылныл ханищтахтэ̄г, тэ̄н ма̄ньщи ла̄тыӈ ёмащакв торгамтэ̄г, потрыт рущ ла̄тӈыг толмащлаӈкве ве̄рмиянэ̄н. – Ма̄н ня̄враманув пуссын общежитият о̄лэ̄гыт? – Та̄н общежитият о̄лэ̄гыт. Пыгрищит Учхозыт о̄лэ̄гыт. Па̄влыӈ ма̄ныл са̄в пыгрищит ёхтысыт. О̄лнэ коланыл ёмас кос, ос ка̄сыӈ колнакт сака са̄в хо̄тпа о̄лы. Та̄н ма̄гсыланыл колнаканылт кит накпа пе̄ринат ӯнттуве̄сыт, тох хотмус та хуе̄гыт. Мо̄лхо̄тал ам Та̄гт па̄выл ос Касум па̄выл пыгрищит китыглыянум: «На̄н тыт ат ра̄таве̄н? » Ла̄ве̄гыт: «А̄ти, ат ра̄таве̄в, ма̄н тыт са̄в хо̄тпа о̄лэ̄в, яныгнув курсыт ханищтахтан пыгрищитн вуянтаве̄в». Ань общежитият видеокамерат о̄лэ̄гыт, хотьют мори капырты ман алхаты, тот пуссын на̄ӈки, таима̄гыс та̄н тот ань мощ роттыгнув о̄лэ̄гыт. Стипендия олныл туп та ня̄врамыт ойтавет, хотьют ёмащакв ханищтахты, нила ос ат оценкат о̄ньщи. Хунь хӯрум оценкат о̄ньщи, олныл ат миве. Нё̄тмил олныл туп нусаг о̄лнэ ня̄врамыт ойтавет. Та̄нанылн са̄в нэ̄пак акванатуӈкве э̄ри, то̄нт олныл ущ мивет. То̄ват о̄вылтахтэ̄гыт ханищтахтуӈкве, тувыл хотпо̄йтэ̄гыт, ща̄нянылна̄щанылн олныл нё̄туӈкве ат ве̄рмавет. Ёмас, хунь та̄н юил нё̄тавет. Нас тох по̄хан ма̄н ня̄врамыт ат утыянӯв, та̄н ётаныл акваг потыртэ̄в, рӯпитэ̄в, ла̄ве̄в, на̄нанн ханищтахтуӈкве э̄ри. Ос хунь та̄нти ат таӈхе̄гыт ханищтахтуӈкве, то̄нт по̄хан минэ̄гыт. Альбина Романовна потре та оигпас. Таве̄н ам яныг пӯмащипа ла̄тыӈ ла̄всум. Тав такви о̄с ма̄ньщи па̄вылт яныгмас, Ха̄льӯс район Сӯкыръя па̄вылт, са̄т а̄пщи о̄ньщас. Атхунь ва̄гтэ, хумус та̄нанылн та̄рвитыӈ мо̄т мир халт о̄луӈкве. Таима̄гыс та̄н ма̄гсыланыл тав сыме ща̄рги. Ты я̄тил ма̄ньщи ма̄хумате̄нув, Альбина Романовна ос ханищтахтан а̄гипыганув, пуссын пуста̄гыл вос о̄лэ̄гыт, На̄янылн-О̄тыранылн вос ӯргалавет!

1087 2014.11.07. unknown

Тит нё̄тнэ ма̄ньщи а̄гииг. Ты хурит Оксана Рыжкова (Станиславец) по̄слым о̄лы. Тав округ Дума депутат Т. С. Гоголеван нё̄тнэ хо̄тпаг рӯпиты. Ты хурит Татьяна Сивцова по̄слым о̄лы, тав Хулимсунт па̄выл школат 11 классыт ханищтахты.

1087 2014.11.07. Валентина УЗЕЛЬ

Округ кӯщаюв э̄лы хо̄н ма̄н ялыс. Ювле хультум э̄тпос 28 хо̄талэ̄т округ кӯщаюв Наталья Комарова Франция э̄лы хо̄н ма̄т Париж ӯст ЮНЕСКО нампа колт ма̄н округув урыл потыртас. ЮНЕСКО – ты кол ООН (Организация Объединённых Наций) па̄лыл рупиты. Ма̄н округ кӯщаюв Наталья Комарова ёт са̄в соссаӈ хо̄тпа тув ялыс, «Хо̄тал» нампа театр, «Торум маа» нампа музейт рӯпитан ма̄хум, «Ешак най» нампа ще̄мьяӈ ансамбль ос мирн ва̄нэ мо̄т хо̄тпат. Тот ма̄ньщи, ханты ос ё̄рн мирыт о̄лупсаныл урыл потыртасыт. Ма̄хманув йӣквсыт, э̄ргысыт. Та̄н нупыланыл сунсуӈкв ёхталам ма̄хумн ма̄н йӣкванув, э̄рганув сака мӯстысыт. Округувт ань ЮНЕСКО кол акв кафедратэ 2008 та̄л па̄сныл Югорский университетт рӯпиты. Тот рӯпитан ма̄хум ань ма̄витув ханищтыяныл. Та̄н та̄рапаттуӈкв таӈхе̄гыт, ка̄сыӈ та̄лэтуве манрыг ма̄лтыпыг е̄мты, то̄ванакт манрыг яныг вит ва̄ри. Моще̄рт ма̄ янытыл о̄лнэ мирыт ща̄нь ла̄тӈаныл пуссын акв яныг нэ̄паккапайн хансавет, рущ ла̄тӈыл тох ла̄ваве – Атлас языков мира. Ма̄н округувт о̄лнэ ма̄ньщи мир, ханты ос ё̄рн мирыг ла̄тӈанув тув о̄с хансавет. Ты рӯпата о̄с ЮНЕСКО колт ва̄раве.

1087 2014.11.07. Светлана РОМБАНДЕЕВА

О̄лнэ коланув урыл ля̄ххал. Ювле хультум э̄тпост РИЦ «Югра» колт ля̄ххал тотнэ ма̄хум акванатапа̄лве̄сыт. Тот ань округ янытыл налоговый служба палт кӯщаиг о̄лнэ нэ̄ Ольга Анатольевна Литова тав потыртас. Э̄лумхо̄лас о̄лнэ колэ, колэ ӯнлын ма̄ ос яласан ма̄шинатэ ма̄гыс налоголн ойты. Ка̄сыӈ та̄л яныг таквс э̄тпос мус ойтхатуӈкве э̄ри. Ольга Анатольевна ла̄вме щирыл, хотьют налоголн ойтуӈкве ат те таӈхи манос ат ве̄рми, тав ё̄рва̄гыл ойтхатуӈкве ла̄ваве. Хо̄тпа олнэ яныгса̄т арыгтем со̄тыра са̄вит те, ос тувыл ойтхатуӈкве ат те ка̄сащи, тав та̄л сыс э̄лы хо̄н ма̄н минуӈкве ат ве̄рми, ань налоговый службан нэ̄мхотталь ат та̄ртаве. Ювле хультум та̄л сыс округувныл 555 хо̄тпа э̄лы ма̄н минуӈкве ат ве̄рмысыт, ка̄сыӈанылн яныгса̄т арыгтем со̄тыра ойтуӈкве э̄рыс, пуссын аквъёт – 100 млн. арыгтем солко̄ви. Ты хотьютн яныгса̄т арыгтем солко̄ви ойтуӈкве э̄ри, ос мо̄т ма̄хум ёт – та̄нанылн 14, 5 млрд. солко̄ви ойтуӈкве э̄ри. 2008 та̄лт ма̄хум 28 млрд. солко̄ви ойтуӈкве ат ве̄рмысыт. Налоголн ойтуӈкве ё̄рва̄гыл кащилтан тэ̄ла – ты сака та̄рвитыӈ рӯпата. Таве ма̄н са̄всыр службат ёт акваннё̄тхатым ва̄рилӯв, ма̄хум ёт потыртэ̄в, ла̄ве̄в, ань Россияв ма̄к са̄кконэ щирыл, налог олн ка̄сыӈ хо̄тпан ойтуӈкве э̄ри. Хунь хо̄тпа щар нэ̄мхотмус ойтхатуӈкве ат те таӈхи, то̄нт ма̄н тав матыр э̄рнэ утанэ хотвыганӯв. Округт о̄лнэ ма̄хум ёт ма̄н ёмас щирыл потыртэ̄в, та̄н ётаныл нур тотуӈкве ат таӈхе̄в. Хо̄тпа налоголнэ хӯрум та̄л арыг ат те ойтытэ, тав олнанэ хӯрмахнилах щёс но̄хлапе̄гыт, тувыл таве щёровн ойтуӈкве э̄ри. Ма̄хум ты урыл ат номсэ̄гыт, та̄нтина̄нанылн лю̄ль ва̄ре̄гыт. Ты кӯщай нэ̄ о̄с акв тэ̄ла урыл ля̄ххал ла̄выс, ань тыгыл э̄лаль, 2015 та̄л па̄сныл, о̄лнэ коланув ма̄гыс са̄внув олн ойтуӈкве патэ̄в. Россия Президентув ма̄нь таквс э̄тпос хо̄тыт хо̄талэ̄т йильпи са̄ккон хансыс. Ты са̄ккон щирыл, ань э̄лумхо̄лас о̄лнэ колэ ма̄гыс а̄ти та пе̄с тынэ̄тыл (кадастровая стоимость ла̄ваве) налоголн ойтуӈкве паты, ос ань йильпи щирыл о̄лнэ колэ тынэ манса̄вит (рыночная стоимость ла̄ваве), тувыл ойтуӈкве паты. Кос выгӯв, хо̄тпа о̄лнэ колэ тынэ 180 со̄тыра о̄лыс, налог тав тыгыл ойтыс. Йильпи щирыл ос ты колэ тынэ 3 млн. 500 со̄тыра солко̄ви, ань тав тыгыл олн ойтуӈкве паты. Ты атхунь сака са̄в. Ты са̄ккон хансум ма̄хум ла̄внэ̄ныл щирыл, Россияв янытыл ань са̄в колыт ӯнттавет, тынаныл сака янгыт, ос ты э̄лыпалт ӯнттум колыт тынаныл а̄ти тамле янгыт о̄лсыт. Хосат ӯнттум колыт тынаныл пуссын йильпииг ловиньтавет. Ты са̄ккон та̄н ань таима̄гыс хассыт, ма̄хум о̄лнэ коланыл ма̄гыс аквса̄виттем вос ойтэ̄гыт. Округувт ань о̄лнэ кол о̄с са̄в ӯнттуӈкве патвес. Ма̄хум кол та̄нти ёвтэ̄гыт, ӯнттуӈкве о̄с та̄нти ве̄рме̄гыт. Мо̄тыт та̄лныл ма̄н, Россият о̄лнэ мир, о̄лнэ коланув ма̄гыс тах маттем ойтхатуӈкве та патэ̄в. Яласан ма̄шинат урыл я̄нас потыр о̄лыс. Ма̄хум ань яласан ма̄шинаныл ма̄гыс налоголн о̄с ойтуӈкве патэ̄гыт. 100 лув ё̄р мус яныт ма̄шинат – акв щирыл ойтхатэ̄гыт, 100-250 лув ё̄р яныт ма̄шинат – ойтхатан олнаныл мощ мо̄тнув щирыл ловиньтавет, 250 ос тыгыл са̄внув лув ё̄р о̄щнэ ма̄шинат ос щар ма̄к са̄в олн та̄н тах та ойтэ̄гыт. Пенсият о̄лнэ ма̄хум ос а̄гмыӈмосыӈ хо̄тпат сака са̄в олн ойтуӈкве ат патэ̄гыт, та̄н ма̄гсыланыл са̄всыр льготат хансым о̄лэ̄гыт.

1087 2014.11.07. Тамара МЕРОВА

Та̄н йильпи колыл молях майве̄сыт. Мо̄лалнув Нефтеюганск ӯсн ялмум порат ма̄н акв йильпи ӯнттым колн тотыглавесӯв. Ты кол «о̄выл арендный колыг» ла̄ваве. Тот хӯрумхуйплов ханищтан хо̄тпат туманне̄лмыл майве̄сыт. Та̄нанылн туманне̄лмыт округ губернатор Наталья Комарова ос Ипотечный агентстват рӯпитан кӯщай хум Евгений Чепель мисыт. Округт ты кол акв йильпи программа щирыл ӯнттувес. Тав «Проект по развитию рынка доступного арендного жилья» намаим о̄лы, ос 2012 та̄лт рӯпитаӈкве о̄вылтавес. Ты программа щирыл ле̄ккарыт, ня̄врамыт ханищтан ма̄хум ос полицият рӯпитан хо̄тпат о̄лнэ кол молях миӈкве патавет. Колыт са̄всыр компаниятн ӯнттавет ос тувыл Ипотечный агентство па̄лыл ёвтавет. Таи ма̄гыс округ бюджетныл олн та̄ставе. Ипотечный агентство ты колыт аквтох э̄рнэ пормасыл ёвтыянэ. Тув щалтнэ ма̄хумн пасаныт, уласыт, шкап манос диван ёвтуӈкве ат э̄ри. Та̄н туп тот о̄лнэ̄ныл сыс ка̄сыӈ э̄тпос округн олн ойтуӈкве патэ̄гыт. Акв па̄лэ ще̄мьят та̄нки ойтэ̄гыт, мо̄т па̄лэ рӯпитан ма̄ныл аренда олн ойты. Евгений Чепель э̄лаль таи потыртас: « Ань ты арендный колт 94 са̄всыр колнакыӈ колыт ма̄хумн майве̄сыт. Та̄н пуссын са̄всыр ойтнэ тын о̄ньще̄гыт, тув ловиньтаве: кол манах колнак о̄ньщи, хоты лю̄лит этажит тав о̄лы, пе̄с манос йильпи пормасыл ёвтвес. Тувыл ма̄хумн таи ёмас, та̄н тот пропискал ва̄равет. То̄нт та̄н та̄нки ма̄гсыланыл э̄рнэ справкат щё̄питаӈкве ве̄рме̄гыт, ӯс па̄лыл нё̄тмилыл о̄с ва̄равет, пусмалтахтуӈкве манос ӯщлахтуӈкве путёвкал мивет. Ты колт акв колнак о̄щнэ квартира ма̄гыс хо̄тпат ка̄сыӈ э̄тпос 15 со̄тыра солко̄ви ойтуӈкве патэ̄гыт. Тамле колыт янытаныл 30 са̄виткем квадратный ме̄тра. Хӯрум колнакыӈ кол ма̄гыс, та̄н 80 са̄вит ме̄тра о̄ньще̄гыт, ма̄хум 30 со̄тыра солко̄ви ойтуӈкве патэ̄гыт тах. Ты коныпал колт на̄йпос ос турпат энергосберегающий ёмас утыл ва̄рве̄сыт. Та щирыл «коммунальный оплата», тыи со̄сантым вит, холтым на̄йпос, ре̄г ос мо̄т утыт ма̄гыс ойтнэ олн са̄в ат атхаты. Тот ще̄мьят та̄нки я̄нас ойтхатэ̄гыт. Ты йильпи о̄лнэ колыт по̄хат садикыт, школа, са̄всыр ла̄пкат, аптека, пусмалтан колыт ӯнттым о̄лэ̄гыт. Автобусыт ва̄тихал вос ялантэ̄гыт, ты тэ̄лат о̄вылтыт ань ӯсыӈ кӯщаит мӯсхалыг номсахтэ̄гыт ». Ма̄н туманне̄лмыл маим хо̄тпат ёт потыртасӯв. Та̄н пуссын мо̄т ма̄ныл тыг ёхтумыт. Са̄выӈпа̄лэ Башкирияныл, Марий Эл ма̄ныл о̄лэ̄гыт. О̄выл туманне̄лмыл Чулпан Гиззатуллина майвес. Тав колэ̄т ма̄хум акванатыглаве̄сыт. Нэ̄ мо̄лалнув Башкирияныл ёхтыс, тыт нила номер школат логопедыг рӯпиты. Фарида Шурихина о̄йкатэ̄нтыл Челябинский областьныл тыг ёхтысы̄г. Тав нёлолов школат биология ос химия урокыг мыг. Тыг мо̄лалнув а̄гитэ ёхтыс, тав Уфа ӯст ма̄во̄й но̄хвинэ институт а̄стлас ос тыг рӯпитаӈкве ёхтыс. Ань пуссын Нефтеюганскын о̄лмыгтасыт. Ты э̄лыпа̄лт та̄нки о̄лнэ кол киссыт, колыӈ кӯщаитн та̄нки ойтхатасыт. Тувыл тахольт молях о̄лнэ колыл майве̄сыт, ань пуссын хотща̄гтым о̄лэ̄гыт. Наталья Комарова ла̄выс: «На̄н школатт ня̄врамыт номтыӈыг ханищтыяны̄н, ма̄н на̄нан яныг пӯмащипа ла̄тыӈ ла̄ве̄в. На̄н ань тыт э̄лаль ёмащакв рӯпитасын, округ па̄лыл тынта̄лнув колыт ӯнттэ̄в». Тамле колыт э̄лаль ӯнттуӈкве патавет. Моще̄ртыт Сургутт ос акв тамле 170 квартираӈ кол, Ханты-Мансийскат 90 квартираӈ кол ты а̄стлаве̄г. Ань Сургут ӯст 260 квартираӈ кол ӯнттуӈкве о̄вылтавес. 2015 та̄лт ма̄хум тув о̄лмыгтэ̄гыт. Колыл маим хо̄тпат ла̄ве̄гыт, ты программа школатт, пӯльницатт рӯпитан хо̄тпатытн сака э̄ри. Ня̄врамыт ханищтаӈкве, ма̄хум пусмалтаӈкве мощща хо̄тпа ка̄сащи. Ёмас о̄лнэ колыл та̄ра ке мивет, то̄нт са̄внув хо̄тпа ты рӯпатан ханищтахтуӈкв патнувыт. Тав кос мо̄т ма̄ныл ма̄хум тыг сака ул вос ёхтынувыт.

1087 2014.11.07. Николай МЕРОВ

А̄нъя па̄выл кӯщай нэ̄ потре. Ха̄льӯс район А̄нъя па̄выл кӯщаиг са̄в та̄л Татьяна Михайловна Рукова рӯпиты, такви о̄парищ наме Гындыбина. Ам таквсы порат тув ялсум, тав ётэ хо̄нтхатыгла̄сум. Ты нэ̄кве такви уре̄т ос ща̄нягеа̄щаге урыл мощ потрамас. На̄н тав потре э̄лаль ловиньтэлы̄н. «Ам 1958 та̄лт Кимкъясуй па̄вылт самын патсум. Ма̄н 1964 та̄лт колта̄глыл А̄нъя па̄вылн ва̄нтлысӯв, тыт яныгмасум. Ягрим па̄выл школаинтернатт ханищтахтасум. А̄щум Михаил Егорович Гындыбин, омам ос Елизавета Павловна Гындыбина, такви о̄парищ наме Гоголева о̄лыс. Ма̄н колта̄глувт хо̄т ня̄врам яныгмасӯв: хӯрум пыг, хӯрум а̄ги. Омав ма̄н нупылув «хӯрум ӯринэ̄кват» мовиньтым ла̄выглас. Тав ма̄нав пил ва̄туӈкве ханищтастэ. Пе̄с порат тох о̄лыс, ня̄врам са̄ткем та̄лэ то̄влы, тав во̄рн пил ва̄туӈкве тотыглаӈкве та о̄вылтаве. Таима̄гыс ма̄н ты рӯпатал щар ат пилэ̄в, ма̄нь та̄гыл ханьщувлым о̄лэ̄в. Ка̄сыӈ таквс пил ва̄туӈкве яласэ̄в. Ань о̄лнэ ня̄враманув тай во̄рн минуӈкве ё̄рыл кащилтыянӯв. Пил мощ ва̄тэ̄гыт, тувыл та, ка̄саныл та холы. Кимкъясуй па̄вылт о̄лмувт, юн пуссын ма̄ньщи ла̄тӈыл потыртасӯв. Ань ты накт ос рущиг е̄мтсӯв. Морсыӈ порат ма̄ньщи ла̄тӈыл потраме̄в. Ам хунь А̄нъя па̄вылн тотве̄сум, хо̄т та̄лум о̄лыс, рущ ла̄тыӈ щар ат ва̄сум. Ань па̄влувт Алексей каӈкум, Щерки а̄пщим ос Нина Михайловна Ендырева йигрищум о̄лэ̄гыт. Увщим нэ̄пак ловиньтан колт рӯпиты. Ма̄н ань нила хо̄тпа хультсӯв. Ща̄нягува̄щагув Нё̄рт са̄лы ӯрим нёлоловкем та̄л яласасы̄г. Са̄ртын колхозт са̄в са̄лы о̄лыс. То̄ва са̄лыӈ ма̄хум ва̄нтлым Карский ща̄рыщ мус яласасыт. Ща̄нягума̄щагум тай та ща̄рыщ мус ат ялсы̄г. Тэ̄н ма̄нки Нё̄ранув ляпат яласасы̄г. Та та̄лытт хӯрум ня̄врам самын паттыгласы̄г. Ос то̄нт сыре̄сыр а̄гм е̄мталас, тэ̄рпи ос а̄тим о̄лыс. Та ня̄врамыт пуссын а̄тимыг е̄мтсыт. Таима̄гыс омам нилыт щёс та̄рвитыӈыщ е̄мтыс, тав а̄щум ёт са̄лы ӯргалан ма̄ныл по̄йтсы̄г, на̄лув ва̄глысы̄г. Кимкъясуй па̄вылт о̄луӈкве патсы̄г. Тувыл ма̄н акв юипа̄лт хо̄т ня̄врам самын ты патсӯв. Пуссын пуста̄гыл э̄лаль яныгмасӯв. Ань па̄выл кӯщаиг рӯпитэ̄гум. Ме̄н о̄йкаме̄нтыл ат ня̄врам янмалтасме̄н. Хӯрум пыганме̄н Ягрим па̄вылт я̄нас ще̄мьяӈ та̄гыл о̄лэ̄гыт. Кит пыгагум субсидия хосыт тэ̄нки ма̄гсылэ̄н кол ёвтсы̄г. Акв пыгум ос субсидия ма̄гыс хансым о̄лы, ань ӯрхаты. Округувт кол ёвтнэ программа ёмщакв рӯпиты. Ты ва̄рмаль ма̄гыс кӯщаянувн пӯмащипа ла̄тыӈ ла̄ве̄гум. Яныг а̄гим А̄нъят о̄лы. Тав хӯрум ня̄врам о̄ньщи. Ма̄нь пыгме̄н Алёша хо̄тхуйплов та̄лэ то̄влыс, ме̄н ётме̄н о̄лы». Татьяна Михайловна китыт щёс хум ва̄рыс. О̄выл о̄йкатэ щаквыт порсыс, то̄нт хӯрум ня̄враманэ иӈ ма̄ниг о̄лсыт. Тувыл ётылнув тав китынтыг хум ва̄рыс. О̄йкатэ наме Виктор Романович Чалданов, тэ̄н аквъёт ва̄т нупыл са̄т та̄л о̄лэ̄г, аквъёт кит ня̄врам янмалтасы̄г. Яныг а̄гитэ̄н ват нупыл ат та̄лэ, питипатта пыге̄н хо̄тхуйплов та̄лэ то̄влыс. Ам ты колта̄глын пус ка̄т, пус ла̄гыл о̄лнэ ла̄тыӈ ке̄тэ̄гум. О̄лупсаныл кӯпнитыг вос о̄лы, коланылн ща̄гт вос ёхты. На̄й-О̄тыранылн вос ӯргалавет!

1087 2014.11.07. Николай МЕРОВ

Тӯрват ма̄хманув йильпи коланыл а̄стлысаныл. Ма̄нь таквс э̄тпост округ Дума депутат нэ̄ Татьяна Гоголева Ха̄льӯс район Тӯрват па̄вылн рӯпата щирыл ялыс. Тот Савелий ос Татьяна Самбиндаловыг колта̄глыл ня̄враманэ̄н ос апганэ̄н ёт та̄лэтуве о̄лэ̄гыт. Ма̄н та̄н о̄лупсаныл урыл ва̄тихал хансыглэ̄в. Ты ма̄ньщи ще̄мья са̄лыт о̄ньщиманыл па̄сныл ань нилахкем та̄лыг ты е̄мтыс. 2012 та̄лт йис ма̄нанылт колыт ӯнттын ма̄гыс та̄н 70 процент са̄вит субсидияолныл майлуве̄сыт. Ты 990 со̄тыра са̄вит солко̄ви. Кит та̄лыг сыс маныр та̄н ӯнттысыт, ты колыт пирмайтан ма̄гыс Ха̄льӯс район миркол па̄лыл комиссия тув ялыс. Йис ма̄т ӯнттын колыт уральтан ма̄гыс Ханты-Мансийск ӯсныл округ Дума депутат нэ̄ Татьяна Гоголева, Ха̄льӯсныл миркол кӯщай ва̄ӈын хум Вадим Максимов, тав ётэ рӯпитан кит хо̄тпаг ос ам вертолётыл тув ялсӯв. О̄влэ̄т ма̄н вертолётув Турват па̄вылн исыс. Тот кит йильпи а̄мпар ос акв пувлынкол ӯнттым о̄лэ̄гыт. Та колыт по̄слысанӯв. Ам Савелий Дмитриевич ёт мощ потрамасум. Тав ла̄выс: «Ань ты накт туп нёлолов са̄лы хультыс. Са̄лы тэ̄нэ ма̄ мувлахил, са̄ткем ве̄рыста па̄лыт ма̄, ты кос яныг пӯсасыл ва̄рыслӯв, ос са̄лыт ха̄йтнутытн тох та алыщлавет. Хомлахыт э̄лыл ёхтыгпа̄лэ̄гыт, во̄ртур э̄тпост са̄т са̄лы алапасыт. Янытэ̄т ювтэ̄саныл, туп пуӈк хопалыяныл хультсыт. Мо̄т щёс ёхталасыт о̄с са̄т са̄лы алапасыт. Сака о̄щмарыӈыт, мори самын ат нэ̄глэ̄гыт. Са̄лыт э̄лаль янмалтан ва̄рмаль ат мыгыт. Ты кос ня̄влалыянӯв, нэ̄матыр ё̄р ат ёхты». Таима̄гыс ань ты хультум са̄лыяныл кол э̄лыпа̄лт ма̄нь пӯсас кӣвырт о̄ньщияныл. Я̄ па̄лыго̄лум порат са̄лы тэ̄п ха̄пыл тотыгласыт. Юн тыттым о̄ньщияныл. Ань ты та̄л о̄с тах Саранпа̄вылныл ма̄нь са̄лыт ёвтуӈкве номсэ̄гыт. Мо̄лты та̄гыл ӯнттум коланыл ань пуссын а̄стысыт. Ты ма̄гыс олныл ойтавет ке, о̄с тах са̄лы выгыт. Са̄лы ӯрнэ ма̄гыс акв яныг пӯсас Тӯрват па̄вылт ва̄рим о̄лы. Туи порат са̄лыт па̄выл ляпат о̄ньщияныл. Тэ̄лы кастыл са̄лыяныл ос Сысъя Нё̄р ляпан ва̄нтлуптыяныл. Тот та̄наныл ӯрнэ ма̄гыс о̄с пӯсас щё̄питым о̄лы. Сысъят о̄лнэ ма̄гыс яныг кол, тэ̄нутпормас о̄щнэ а̄мпарыт, сӯмъях, пувлынкол ӯнттысыт. Ма̄н та колыт пирмайтан ма̄гыс вертолётыл тув ты ялсӯв. Тот кӯщаянув ка̄сыӈ кол карсытэ ос палытэ нэ̄пакн хассаныл ос по̄слысаныл. Тувыл ётылнув ты тэ̄ла щирыл Ха̄льӯс мирколт сапра̄ни ва̄рыглавес. Комиссия ёт ялум хум Вадим Максимов ла̄выс: «Ма̄н комиссия ёт тув ялсӯв, ӯнттум коланыл пуссын ёмщакв суссанӯв. Тувыл МЧС организацият рӯпитан хо̄тпа о̄с тув ялыс. Тав колыт палытаныл, хосытаныл пуссын ловиньтасанэ ос ла̄выс, ёмщакв ӯнттым о̄лэ̄гыт. На̄й тэ̄нэ порат но̄х ат ё̄савет. Комиссия секретариг Наталья Курикова, Ха̄льӯс мирколт рӯпитан нэ̄, о̄лыс. Ты ва̄рмалит тав пуссын нэ̄пакн хассанэ ос колыт хурин по̄слысанэ. Ма̄н нэ̄пак щирыл суссӯв. Округ ма̄вит ӯргалан Департамент ёт хансыглам договорнэ̄пак щирыл манырсыр кол ӯнттуӈкве э̄рыс, пуссын о̄лы. Ты Департамент колыт ӯнттын ма̄гыс олн ойтыглас. То̄ва колыт проект щирыл ат кос ӯнттуве̄сыт. Ос ты пе̄нтсыл мо̄т ӯнттым колыт тув хансуӈкве ро̄ви. Ам тох ла̄вуӈкве таӈхе̄гум, проект щирыл маныр кол э̄рыс, Самбиндаловыт о̄лнэ йис ма̄т пуссын ёмщакв ӯнттуве̄сыт. Ты коныпал арыгнув а̄мпар ӯнттым о̄лы. Та̄ра на̄ӈки, ты ще̄мья та̄нки ма̄гсыланыл колыт ӯнттысыт. Манаса̄вит олн майлувес, пуссын тэ̄лаг минасыт. Ань ма̄н ты ва̄рмаль щирыл э̄рнэ нэ̄пакыт щё̄питэ̄в. Ам номсэ̄гум, ма̄хманув 30 процент са̄вит хультум олнаныл ойтавет тах. Ты 424 со̄тыра 500 солко̄ви ойтнэ щирыл хультыс». Со̄ль, ма̄хманув такем ёмас колыт ӯнттысыт. Арыг ӯнттым колыт о̄с пуссын нэ̄пакн хасве̄сыт. Договор щирыл Савелий Дмитриевичн по̄ль кол ӯнттуӈкве э̄рыс. Ос тав ты кос хилуӈкве арталахтыглас, во̄ӈха та̄ра витыл а̄мараве, тот тэ̄нут о̄ньщуӈкве ат а̄ртми. Такви ё̄ре̄тыл по̄ль кол ва̄руӈкве ат ве̄рми. Тувыл ос та̄н Нё̄р ляпат о̄лэ̄гыт. То̄ва ма̄т туп ма̄нтыл акв щёс хилаяӈкве ро̄ви, тувыл та, ёлаль акваг а̄хвтас. Таима̄гыс по̄ль кол пе̄нтсыл тав тэ̄нутпормас о̄щнэ а̄мпар ӯнттыс. Туи порат та̄н са̄лы нё̄выль солвалтыяныл ос ке̄раст по̄лям витыт о̄ньщияныл. Тот тамле ке̄рас са̄в о̄лы. Тувыл о̄с акв ва̄рмаль урыл потыртасыт. Ха̄льӯс район комиссият рӯпитан ма̄хум ла̄внэ̄ныл щирыл, Самбиндаловытн туп Сысъя ма̄т колыт ӯнттуӈкве э̄рыс. Ос Са̄ва йис ма̄тэ яныг, ты хосыт та̄н ла̄тӈаныл акванёхтысыт, Тӯрват па̄вылт ӯнттум кит а̄мпарыг, акв пувлынкол о̄с тув ловиньтаве̄сыт. Ты ма̄ньщи ще̄мья ань ӯнттум коланыл ма̄гыс хультум олнытыл моляхнув вос ойтве̄сыт, комиссият рӯпитам хо̄тпат нё̄туӈкве ла̄всыт. Ва̄им, Ха̄льӯс район янытыл туп акв тамле ма̄ньщи ще̄мья о̄лы. Та̄н пе̄с йис ва̄рмалит но̄хво̄рмалтэ̄гыт, таима̄гыс та̄нанылн нё̄туӈкве э̄ри. Ам ты колта̄глын яныг паща ла̄тыӈ ке̄тэ̄гум. О̄лупсаныл кӯпнитыг вос о̄лы. Номтыт о̄щнэ ва̄рмаляныл тэ̄лаг вос е̄мтэ̄гыт, са̄лыяныл э̄лаль вос са̄вмалтыяныл. Пус ка̄т, пус ла̄гыл э̄лаль вос о̄лэ̄гыт, щуне̄гыт. На̄й-О̄тыранылн вос ӯргалавет, вос нё̄тавет!

1087 2014.11.07. Николай МЕРОВ

Нё̄тнэ пормасыт суссылтавет. Ха̄льӯс район Ягрим па̄вылт концертновыставочный колт суссылтап пӯсвес. Тот са̄выӈпа̄лэ ты ма̄ньщи хо̄тпанув Валентина Дорофеевна Саратина, Елизавета Селивёрстовна Мерзлякова ос Тамара Семёновна Мезенцева ка̄тыл ва̄рум пормасаныл ка̄салаӈкве ро̄ви. Ты яныгпа̄ла хо̄тпат ма̄ньщи супаныл, сахияныл, ла̄гыл маснутаныл, сыресыр хӯрыгсовыт сака нё̄тнэ̄г ю̄нтыяныл. Сакныл хорамыӈ пальсакыт, турло̄псыт ос мо̄т са̄всыр пормасыт саге̄гыт. Ты коныпал тот мо̄т ма̄хманув пормасаныл, ка̄тыл по̄слын хурияныл о̄с ка̄салаӈкве ро̄ви. Ягримн ёхтэ̄гын ке, на̄н пӯмащ ма̄гыс ты пормасыт сунсуӈкве о̄с тув ялэ̄н.

1087 2014.11.07. Валентина УЗЕЛЬ

Рӯтанэ пуссын паща ла̄тӈыл те̄тыянэ. Федосья Алексееевна Пуксикова ань Югорск ӯст о̄лы. Тав 1957 та̄лт Хулимсунт па̄вылт самын патыс. О̄йкатэ украинец хум, наме Дмитрий Валентинович Токиа. Тэ̄н о̄йкатэ̄нтыл 1986 та̄лт Югорск ӯсн о̄лмыгтасы̄г. Ань тэ̄нттетэ̄н о̄лэ̄г. Федосья ань матах та̄л пенсият о̄лы. Ты э̄лыпа̄лт тав «Суеват павыл» нампа музейт ат та̄л рӯпитас, тувыл пенсиян минас. Тот рӯпитаме порат та̄н ма̄ньщи хо̄тпат то̄ва порат акванатхатыгласыт, пӯрлахтасыт. Ань юио̄выл та̄лытт туп ялпыӈ хо̄тал порат тот хо̄нтхатыглэ̄гыт. Федосья Алексеевна ла̄выс, ань музейт ма̄ньщи хо̄тпат щар ат рӯпитэ̄гыт, пуссын по̄хан минасыт. Са̄всыр по̄х хо̄тпа тув рӯпитаӈкв ёхтысыт. Ялпыӈ хо̄талыт пуссын ты музейт ва̄рыглавет. Нэ̄кве тох ла̄выс: «Рущ щирыл ва̄равет». Тав рӯтанэ пуссын Хулимсунт па̄вылт о̄лэ̄гыт. Федосья та̄нанылн газетав та̄ра паща ла̄тыӈ те̄ты: каӈке̄н Павел Алексеевич Пуксиковн, тав э̄кватэ̄н Прасковья Ивановнан, Пуксиковытн, Сюминытн, Сивцовытн ос мо̄т рӯтанэ̄н. Увщитэ Галина Алексеевна Вынгилева Ха̄льӯст о̄лы, тав 73 та̄лэ то̄влыс. То̄рум ёт, О̄тыр ёт пуссын вос о̄лэ̄гыт, пус ка̄т, пус ла̄гыл. На̄й-О̄тыранылн вос ӯргалавет.

1087 2014.11.07. Александр ВЬЮТКИН

Ка̄сыӈ та̄л аквты порат музей янытлаве. Ма̄нь таквс э̄тпос ва̄тыт щислатэ Ханты-Мансийск ӯст о̄лнэ «Торум маа» музей янытлан хо̄талыг о̄лы. Ты та̄л тав ва̄т нупыл са̄тыт та̄лэ то̄влыс. «Торум маа» музей кант та̄л сыс ниласа̄т са̄вит экскурсия ва̄рыглаве. Та сыс тув хус со̄тыра ляпатем мӯй ма̄хум ёхталы. Музейт нила со̄тыра арыгтем са̄всыр пе̄с йис пормас ӯргалым о̄ньщаве. Музей янытлан порат щар о̄выл ла̄тыӈ «Торум маа» музей тармыл кӯщаиг о̄лнэ нэ̄ Валентина Николаевна Кочетыгова ла̄выс: Ма̄н музей намхо̄талув, со̄ль, ёмас хо̄талыг о̄лы. Тыт рӯпитан ма̄хманум ёт кӯстыр рӯпитаӈкве. Та̄н та̄нти рӯпатаныл ёмащакв ва̄ганыл ос э̄руптыяныл. Ты минам та̄лыт сыс ма̄н са̄в тэ̄ла ва̄руӈкве а̄лымасӯв. Са̄в пе̄с йис ялпыӈ хо̄тал но̄хялтуптасӯв. Мо̄тынтыг музей ма̄тэ яныгнувег ва̄руӈкв таӈхилӯв. Та тэ̄ла щирыл э̄рнэ нэ̄паканув пуссын щирмус щё̄питым о̄лэ̄гыт. Ты та̄л оигпан кастыл ма̄тэ урыл пуссын та̄рае̄мты. Ма̄н тот ханты, ма̄ньщи пе̄с йис о̄лупсаныл такталан коныпал сараныт, ё̄рныт ос рущит о̄лупсаныл суссылтаӈкв патэ̄в. Ам номсэ̄гум, ты рӯпата ва̄руӈкв о̄с э̄ри. Кӯщай нэ̄ потыртан ма̄ныл а̄стуме юипа̄лт, ты та̄л сыс «Торум маа» музеин рӯпитаӈкв ёхтум ма̄ньлат ма̄хум ва̄йхатнэ ма̄гсыл но̄хква̄лсыт. Та̄н пуссын аквъёт лов хо̄тпа. Та юипа̄лт «Торум маа» музейн нё̄тнэ яныгпа̄лаг о̄лнэ соссаӈ ма̄хум янытлаве̄сыт, ты Евдокия Александровна Белявская, Зоя Никифоровна Лозямова ос Мария Сергеевна Мерова. Та̄н пуссын ма̄нь мӯйлупсал мӯйлуптаве̄сыт.

1087 2014.11.07. Тамара МЕРОВА

Лӯима̄ янытыл о̄лнэ мирыт. Ювле хультум э̄тпос юио̄выл хо̄талытт Финляндияныл театрыт рӯпитан финныт ёхталасыт. Та̄н «Народы ледяного края» нампа проект щирыл рӯпитаӈкве во̄виньта̄лве̄сыт, ты финноэстонский театральный проект. Тот Кирсика Моринг, «Хельсинки саномат» нампа газетат рӯпитан нэ̄, пуӈктоты. Тав ётэ аквтох сценарист Арии-Пекка Лахти, режиссер Паулийна Хулкко ос хореограф Хана Бротерус рӯпитэ̄гыт. Та̄н та̄нки артистаныл, э̄ргыт ос йӣквыт ва̄нэ хо̄тпаныл ёт акваннё̄тхатым лӯима̄т о̄лнэ мирыт палт ялантэ̄гыт. Ма̄хманув сыресыр ёнгын ва̄рмалитн ханищтыяныл ос та сыс сунсыглахтэ̄гыт. Проектаныл щирыл финныт мирхал театральный фестиваль ма̄гыс акв спектакль щё̄питаӈкве таӈхе̄гыт. Ты спектаклит ёнгуӈкве та̄н са̄всыр ма̄тт о̄лнэ хо̄тпат тув кинсэ̄гыт. Ос та ёнгил 2016 та̄лт Финляндият фестиваль порат тах суссылтаве. Мо̄лтынув финныт саамыт палт ялмыт, ань ос ма̄н соссаӈ хо̄тпанув ёт ва̄йхатуӈкве ёхталасыт. Тыи Самули Нордберг, тав сыресыр йӣквнэ тэ̄лат ва̄г, Туомас Роунакари э̄рыгсов та̄ныт спектаклин щё̄питы, такви э̄рги, са̄ӈквылты. Тувыл Яркко Лахти ос Ип Лахти, кит ягпыгыг, акватэ артистаг о̄лы, мо̄танэ режиссёрсценарист. Яркко ма̄хманув тӯлыглахтын ва̄рмалитн ханищтыянэ, Ип матыра̄ти пуссын хӯнтлы, сунсы ос ётыл потрыт, ла̄тӈыт хансы ос спектаклин ва̄риянэ. Мо̄т мӯй хо̄тпаг Ип Пасси, тав тыт ва̄рнэ тэ̄лат пуссын кинан по̄слыянэ, ос Мерья Йокела финныт потраныл рущ ла̄тӈыл толмащлыянэ. Кинан по̄слым утыт проектыт рӯпитан хо̄тпатын ётыл ёмщакв сунсавет ос тувыл хотты э̄лумхолас пе̄рие̄гыт. А̄с-угорский театр рӯпитан колт та̄н кит хо̄тал сыс ма̄н ма̄хманув ёт рӯпитасыт. Тув атпан са̄виткем э̄лумхо̄лас атхатыглас. Тыи ЮГУт, Ханты-Мансийский технологопедагогический колледжит ханищтахтын а̄гитпыгыт, ӯст о̄лнэ соссаӈ хо̄тпат. Тот са̄в хантыт, ма̄ньщит халт акв рущ, акв ё̄рн ос Калмыкия, Украина, Узбекистан ма̄ныл ёхтум студентыт о̄лсыт. Та̄н халанылт хо̄тпат нэ̄мхо̄т ос нэ̄мхуньт та̄нки ат ёнгыгласыт, тув нас пӯмщалахтуӈкве ёхталасыт. Ань ос та̄н ма̄к ёнгуӈкве кащилтаве̄сыт. То̄ват э̄ссамтасыт, мо̄таныт хурахлым лю̄ляхолсыт – ты пищаныл пуссын по̄хан яртуӈкве ла̄вве̄сыт. Ос хумус хотяртуӈкве э̄ре̄гыт, ты урыл потыртаве̄сыт ос тувыл э̄рнэ накыт аквъёт ханищтаӈкве патсыт. Акванатхатам мир тувыл хо̄т группан ла̄кквауртве̄сыт ос тувыл о̄лупсат о̄лыглам нак пӯмыщ ёнгыг щё̄питаӈкве ла̄вве̄сыт. Ты ёныг ла̄тыӈ та̄л ва̄руӈкве э̄рыс, туп то̄внакт матхурип турсуил э̄ргуӈкве ро̄выс, ос тэ̄лат пуссын хотмус щакаралым манос вильтсованыл хартыгла̄лым суссылтаӈкве ла̄вве̄сыт. Ёнгыт пӯмщиг о̄лсыт, ма̄хманув э̄ссамаӈкве по̄йтсыт. Финнытн тыи сака мӯстыс. Та̄н ла̄всыт: «На̄н пуссын ёмщакв тӯлыглахтасын, тэ̄лан сымыӈыщ ва̄рсаны̄н. Тыт таи ёмас, на̄н акванюрщхатым са̄в ма̄хум э̄лыпа̄лт пилта̄лыг рӯпитаӈкве патсы̄н. Э̄лумхо̄лас лю̄ль манос ёмас пищанэ ма̄кыг суссылтыяны̄н». Мерья Йокела юио̄вылт ла̄выс: «Ма̄н на̄нан яныг пӯмащипа ла̄тыӈ ла̄вуӈкве таӈхе̄в. Кит хо̄тал сыс акваннё̄тхатым такем ка̄ркамыг рӯпитасӯв. Ма̄нки о̄с са̄всыр хащта̄л тэ̄лат тыт ка̄саласанӯв, спектаклянувт тах э̄лаль тотыянӯв». Тамле ханищтапыт ва̄тихал вос ва̄рыгланувет.

1087 2014.11.07. Людмила ТЕТКИНА

Ю̄нсхатуӈкве ане̄кватэ̄н ос щаще̄кватэ̄н ханищтавес. Ма̄нь таквс э̄тпост Пыть-Ях ӯст о̄лнэ музей йильпи колн ва̄нтлыс. Ань ӯст о̄лнэ мир выставкат сунсуӈкве тув ёхталэ̄гыт. Пе̄с порат хумус ханты ма̄хум та ма̄т о̄лсыт, манхурип маснут о̄щсыт, хумус во̄раясыт, хӯл алыщласыт, тот ка̄салаӈкве ро̄ви. Музейт рӯпитан хо̄тпат та ма̄т о̄лнэ ханты ще̄мьят палт ялантасыт ос пе̄с пормасыт музей ма̄гсыл тот акванатсаныл. Наталья Кононовна Поянкина Пыть-Ях ӯс музейт 2003 та̄л па̄сныл рӯпиты. Тав Нефтеюганский район янытыл о̄лнэ ханты ма̄хум палт са̄в щёс яланта̄лыс. Тав ла̄выс: «Ам рӯтанум во̄рт пе̄с йис щирыл о̄лэ̄гыт. Та̄н о̄лнэ ма̄наныл та̄нки нупыланыл хассаныл, ань тот во̄раим ос хӯл алыщлым о̄лэ̄гыт. Та̄н а̄нумн музей ма̄гсыл са̄в пе̄с пормасыт мисыт. Ам Нефтеюганский район Лемпино па̄вылныл о̄лэ̄гум. Музейт ам ня̄врамыт сакныл сагуӈкве, а̄канит ю̄нтуӈкве ханищтыянум. Ма̄н ань школат, садикыт ёт акваг рӯпитэ̄в. Тув ялантэ̄гум, соссаӈ ма̄хум культураныл урыл ня̄врамытын потыртэ̄гум, а̄канит ю̄нтуӈкве ос мо̄т щирыл ма̄щтырлаӈкве ханищтыянум. Нефтеюганский район Пойковский па̄выл по̄хат «Сказка» нампа ӯщлахтын ма̄ о̄лы. Касыӈ та̄л соссаӈ ма̄хум ма̄ньха̄пыл касуӈкве тув ёхталэ̄гыт. Округ янытыл о̄лнэ ня̄врамыт ӯщлахтуӈкве о̄с тув тотыглавет. 2013 та̄л ам акв э̄тпос сыс тот рӯпитасум, ня̄врамыт ма̄щтырлаӈкве ханищтасанум, ма̄ньщи ос ханты культура урыл потыртасум. Ма̄н музеювн ня̄врамыт Нефтеюганск ӯсныл ос мо̄т па̄влытныл тотыглавет. А̄гирищит, пыгрищит музейн хунь ёхталэ̄гыт, акваг китыглахтэ̄гыт, пӯмщалахтэ̄гыт, та̄н ётаныл рӯпитаӈкве сака пӯмащ». Наталья Кононовна Лепмино па̄вылт нёлолов класс а̄стлас, э̄лаль Нефтеюганск ӯс школан ханищтахтуӈкве ке̄твес, тот тав интернатт о̄лыс. Тувыл э̄лаль Тобольск ӯст крановщикыг ханищтахтас. Училище а̄стламе юипа̄лт кол ӯнттын ма̄т рӯпитас. Хум ва̄рыс, кит а̄ги ос акв пыг янмалтас. Ань ня̄враманэ пуссын та̄нки ще̄мьяныл ёт я̄нас о̄лэ̄гыт. Наталья Кононовна нила апыгрищ о̄ньщи. Ханты нэ̄ такви яныгмам поратэ урыл ла̄выс: «Пе̄с порат рӯтанум Салым я̄ ва̄тат о̄лсыт. Война о̄вылтахтаме порат ам ащо̄йкам хо̄нтлуӈкве вуйвес, ане̄квав ня̄враманэ ёт хультыс. Во̄рт таккет о̄луӈкве ат ве̄рмыс, Лемпино па̄вылн о̄луӈкве ва̄нтлас. Ащо̄йкам хо̄нтлан ма̄ныл ювле ат ёхтыс, хоты ма̄т ёлщё̄питавес, аты ва̄глӯв. Ам ане̄квам ёмащакв номилум, тав ма̄щтыр э̄ква о̄лыс. Ханты маснут ю̄нтуӈкве, щулки сагуӈкве сака ха̄сыс. Улпыл, тыи ма̄гсыл ам сакныл хартуӈкве, маснут сагуӈкве ос ю̄нсхатуӈкве э̄руптэ̄гум. Щаще̄квам о̄с ма̄щтыр э̄ква о̄лыс. Тав яныг тучаӈт ю̄нтупыт, тулят ос са̄всыр то̄рло̄мтыт о̄ньщасанэ. Ты тучаӈ сунсыглаӈкве тав палтэ акваг ялантасум. Сак ква̄лганэ ке̄р хусапыт о̄щсанэ, ты хусап ка̄тыт пувуӈкве о̄с э̄руптасум. Ам иӈ ма̄ниг о̄лсум, хунь омам а̄тимыг е̄мтыс, ане̄квамн ос щаще̄квамн ю̄нтуп ка̄тыт пувуӈкве ханищтаве̄сум. То̄нт ма̄н ща̄нь ла̄тӈыл потыртаӈкве ат та̄ртвесӯв, интернатт о̄лымав порат, акваг ля̄выльттавесӯв. Тыи ма̄гсыл ам амки ня̄враманум ёт ща̄нь ла̄тӈыл о̄с ат потыртасум. Апыгрищанум ханты ла̄тӈыл ханищтыянум, ань аквкит ла̄тыӈ ва̄гыт. Та̄наныл ханты маснутыл ю̄нтсанум. Музейт ялпыӈ хо̄талыт о̄лыглам порат акваг э̄рге̄гыт, йӣкве̄гыт. Лемпино па̄вылн ос во̄рт о̄лнэ рӯтанум палт тотыглыянум. Тув ялантанэ̄ныл порат сунсэ̄гыт, хумус ханты рӯт ма̄хманыл о̄лэ̄гыт».

1087 2014.11.07. Тамара МЕРОВА

Йильпи э̄рыгсов та̄ныт хӯнтлысыт. Ка̄сыӈ та̄л ань ма̄нь таквс э̄тпост финноугор мирыт та̄нки о̄лнэ ма̄нанылт ялпыӈ хо̄тал ва̄рыглэ̄гыт. То̄нт рӯтыг о̄лнэ мӯй хо̄тпат мӯйлуӈкве во̄выглыяныл ос аквъёт пӯмыщ ка̄с ва̄ре̄гыт. Ань Ханты-Мансийск ӯст о̄лнэ соссаӈ ма̄хум «Октябрь» нампа ёнгын колт о̄с акванатхатыгла̄лсыт. Та̄н ма̄гсыланыл тот рущ щирыл ла̄вуӈкве ке, «Фолквечеринка» о̄лыс. Ты «Культура» нампа творческий объединение ос соссаӈ ма̄ньлат ма̄хум ёт рӯпитан кол тамле ялпыӈ хо̄тал ва̄рыгласы̄г. Мӯй ма̄хум тув йӣквуӈкве во̄выглаве̄сыт. Ос йӣквнэ̄ныл халт сыресыр йильпи э̄рыгсов та̄ныт хӯнтлысыт. Тувыл та сыс соссаӈ мир о̄щнэ пе̄с наканыл о̄с номылматыгла̄лсаныл. О̄влэ̄т тув ёхталам ма̄хум ёт Людмила Крицкая, культура тармыл рӯпитан кӯщай ва̄ӈын нэ̄, пащалахтас ос та̄наныл финноугор рӯтыг о̄лнэ мирыт ялпыӈ хо̄тал кастыл янытласанэ. Тав юипа̄лэ̄т Надежда Молданова, соссаӈ ма̄ньлат ма̄хум ёт рӯпитан нэ̄, потыртас. Надежда а̄гитнпыгытн акваннё̄тхатым ва̄рнэ тэ̄ланыл ма̄гыс пӯмащипа ла̄тыӈ ла̄выс. Ос то̄ват э̄сгын нэ̄пакыл мӯйлуптасанэ. Мо̄т ӯсытныл ос па̄влытныл ма̄хум о̄с ёхталасыт. Фёдор Ларюшкин, Кышик па̄выл клубт рӯпитан хум, мӯй хо̄тпат э̄лаль ка̄с ва̄руӈкве во̄всанэ. Касум па̄вылт о̄лнэ «Нумсаӈ ёх» этностойбищан ялантан а̄гирищитпыгрищит пе̄с ма̄хум йӣкваныл мощ йильпи щирыл йӣквсаныл. Валентина Тарлина ос акв пыг ханты ла̄тӈыл «Пе̄тущ, Пе̄тущ кумие» э̄рыг э̄ргысы̄г. Ханты-Мансийский педагогический колледжит ханищтахтын а̄гирищит маткем та поргысыт, йӣкващласыт. Та̄н рущ э̄рыг пӯмыщ йӣквыг ва̄рсаныл. Ты та̄л ты йӣквнэ ва̄рмаль «этнорокфолк» щирыл щё̄питым о̄лыс. Ма̄хум тот Алёна Дубасова, «Ямра» группат э̄ргын нэ̄, э̄рганэ хӯнтлысыт. Ты группа матахмат та̄л ювле хультум порат Ханты-Мансийскат ЮГУт ханищтахтам пыгытн ва̄рвес. Та̄н ёнгум э̄рыгсов та̄наныл этнорокыг ла̄вияныл. Тувыл щё̄скем Лянтор ӯсныл ёхтум аквта хурип «Тень мигранта» ансамбль концерт ва̄рсыт. Ты ансамблит Вера Кондратьева рущ щирыл хансум стиханэ тав ща̄нен ханты ла̄тӈыл толмащлавет. Та юипа̄лт Вера ёт рӯпитан пыгыт ты стихытныл э̄рыгсов та̄н ва̄ре̄гыт ос рокэ̄ргыг та э̄ргияныл. Вера э̄рганэ халт то̄внакт койп ра̄ты, то̄внакт тумраӈыл манос ло̄ӈханьщапыл ёнги. «Хо̄тал» нампа А̄с-угорский ма̄хум театрыт рӯпитан пыг Валентин Неттин ос такви хансум рокэ̄рганэ э̄ргысанэ. Ты порат тув ёхталам мӯй ма̄хум са̄в ат йӣквсыт, та̄н янгыщ э̄ргыт хӯнтлым нас лю̄лянтасыт. Этнорок ва̄рмаль ма̄хум мощ хащта̄лнувег о̄ньщияныл. Тамле йильпи тэ̄лан улпыл ла̄щмарт ханьщувлаӈкве э̄ри.

1088 2014.11.21. Мария Тихоновна Двинянинова

«Лӯима̄ сэ̄рипос» газета щё̄питан ма̄хумн. Яныг таквсы э̄тпос «Лӯима̄ сэ̄рипос» газета ва̄т нупыл атыт та̄лэ ущты янытлавес. Таима̄гыс тыт рӯпитан ма̄хум та̄ратан газетаныл ёт пуссын янытлыянум. Пуста̄гыл вус о̄лэ̄гыт, хаснэ ля̄ххал вус хо̄нтэ̄гыт. Ёмас а̄гит, ёмас пыгыт «Лӯима̄ сэ̄рипос» газетат рӯпитэ̄гыт, Номтыӈ потыр, ля̄ххал хансэ̄гыт, Ка̄сыӈ па̄вылн, колн ля̄ххал тотэ̄гыт. Мир халт е̄мтнэ номтыӈ потыр Та̄н та ха̄сэ̄гыт толмащлаӈкв, Пуӈк тотнэ мирыт тотнэ ва̄рмаль Та̄н та ве̄рме̄гыт мирн хӯлтыглаӈкв. Та̄рвитыӈ рӯпата ва̄ре̄гыт, Сосса мирн торгамтан щирыл, Рущ мӯтра са̄всыр та̄рвитыӈ ла̄тӈыт Кӯстырыг ля̄галанэг толмащлыяныл. Са̄в номтыӈ ла̄тӈыл вус ёхтавет, Номтыл акваг вус пинавет, Рӯпатаныл ха̄сым ва̄ре̄гыт, Посыӈ номтыл вус о̄лэ̄гыт. Газетав ловиньтан ма̄хумн «Потрытля̄ххалыт тотнэ ва̄рмалит ка̄сыӈ мир ща̄нь ла̄тӈыл та̄ратан нэ̄пакт маныр щирыл ос хумле минэ̄гыт», тох ты семинараныл намаим о̄лыс. Ва̄т нупыл ат та̄лэ «Лӯима̄ сэ̄рипос» газета то̄влыс! Ты сыс мощща вит хунь овтыс, Ты сыс мощща ля̄ххал хунь о̄лыс. Ла̄щалла̄щал яныгмантас, Потре та ёт са̄вмантас, Лӯима̄ сэ̄рипос постын хольт Э̄лаль тав та постыгланты. Вус пыл посты сэ̄рипос хольт, Ка̄сыӈ колн ща̄гт вус тоты. Ёмас ля̄ххал, ёмас потыр Ма̄ньщи мирн тав вус тоты. Ма̄ янытыл суйтнэ ва̄рмаль Ка̄сыӈ мире̄н вус хӯлаве. Мир халт е̄мтнэ номтыӈ потыр, Сосса мирн вус ловиньтаве.

1088 2014.11.21. людмила алгадьева

Ма̄ньщи газетав янытлаӈкве са̄в хо̄тпа ёхталас. Ты та̄л «Лӯима̄ сэ̄рипос» газетав ре̄тыӈ ю̄свой э̄тпост 25 та̄лэ то̄влыс. О̄выл ма̄ньщи газетав 1989 та̄л порат та̄ратавес. Ты яныг ва̄рмаль кастыл ма̄н хоса щё̄питахтасӯв, са̄в рӯпата ва̄рсӯв, туп ты э̄тпос 6 хо̄талэ̄т семинар ущта ва̄рыслӯв, са̄в мир тув во̄виньта̄лсӯв. Семинарув «О роли и значении СМИ, издаваемых на родных языках» намаяслӯв. Газетат рӯпитан хо̄тпат янытлаӈкве ма̄ньщи ма̄хум ос финноугрыт ёхталасыт. О̄влэ̄т Вера Царёва, губернатор прессслужбат кӯщаиг рӯпитан нэ̄, ма̄навн сымыӈ ла̄тыӈ ла̄выс. Тав ла̄внэ̄тэ щирыл, ма̄ньщи ла̄тӈыл потрыт хансым, ма̄н ща̄нь ла̄тӈув ос пе̄с йис ва̄рмалянув э̄лаль тотыянӯв. Илья Верховский, общественный связь департаментыт кӯщай хум, о̄с са̄в ёмас ла̄тыӈ ла̄выс. Тав Ханты-Мансийск ӯст самын патыс, тыт школат ханищтахтас. Ня̄врамыг о̄лме порат Юван Николаевич Шесталов хансум стиханэ ос Ме̄ӈквыт урыл мо̄йтыт ловиньтаӈкве э̄руптас. Ма̄н культурав урыл пӯмщалахтым торгамтас, ма̄ньщи ла̄тыӈ ва̄нэ ма̄хум мо̄т щирыл номсахтэ̄гыт, мир нупыл мо̄т щирыл сунсэ̄гыт. Ла̄выс, ля̄ххалыт, потрыт ща̄нь ла̄тӈыл хансым, ма̄н щар ма̄к яныг ос э̄рнэ рӯпата ва̄ре̄в. Людмила Алфёрова губернатор ва̄ӈын хум Геннадий Бухтин палт нё̄тнэ нэ̄г рӯпиты, газетав о̄с янытластэ. Тав ла̄выс, ма̄н тэ̄ла та̄л щар ат ӯнлэ̄в, акваг рӯпитэ̄в. Редакцияв интернетт ло̄пс ва̄рыс, тот ма̄ньщи потрыт ловиньтаӈкве ань о̄с ро̄ви. Газетав са̄в ма̄хум вос ловиньтасыт, хансум потранув рущ ла̄тӈын толмащлыянӯв. Татьяна Гоголева, округ Думат рӯпитан депутат, ёмас ла̄тыӈ ла̄выс. Ма̄нь па̄влытн яласанэ̄тэ порат, тав ма̄нав акваг ёт во̄виньта̄лыянэ. Татьяна Степановна хоты па̄вылн ялыс, хоты ма̄хум ёт хо̄нтхатыглас, хумус ма̄ньщи мирн нё̄ты, та урыл ма̄н ва̄тихал хансыглэ̄в. Тав ла̄выс: «Тыхо̄тал таса̄вит нё̄тнэ мир тыт акванатхатас. На̄н, газетат рӯпитан ма̄хум, ка̄сыӈ хо̄тал туп ща̄гтым рӯпатан ёхталэ̄н. Э̄лаль акв та щирыл ма̄нь па̄вылквет о̄лнэ мирыт урыл хансэ̄н, ханищтахтэ̄н ос ма̄ньщи яныг учёныиг е̄мтэ̄н». Ты юипа̄лт ма̄хум та̄нки хансум потраныл ловиньтасаныл. О̄влэ̄т Раиса Решетникова, редакциявт кӯщай нэ̄, ат та̄л сыс маныр рӯпата ма̄н ва̄рсӯв, та урыл потыртас. Николай Ишуткин Саранск ӯсныл ёхталас. Тав ня̄врамыт ма̄гсыл «Чилисема» нампа журналыт та̄раты, тот кӯщаиг о̄лы. Ты коныпал ты та̄лныл тав ля̄ххал тотнэ финноугорский ма̄хум ассоциациянылт кӯщаиг рӯпиты. Са̄всыр газетат, журналыт та̄рвитыӈ ва̄рмаляныл урыл потыртас. Ань ща̄нь ла̄тыӈ ва̄нэ ма̄хум мощщанув е̄мты, ма̄ньлат ма̄хум та̄нки ла̄тӈанылт ат потыртэ̄гыт. Ос ка̄сыӈ та̄лныл ты газетат, журналыт ма̄хумн тотнэ ма̄гсыл «Почта России» са̄в олн виӈкве патыс. Тыи ма̄гсыл газетат, журналыт мощща хо̄тпа хасылтэ̄гыт. Юлия Накова такви рӯпататэ урыл потыртаӈкве Салехард ӯсныл ёхталас. Тав 1996 та̄л па̄сныл ля̄ххал тотнэ нэ̄г телевиденият рӯпиты. Ямал ма̄ янытыл яласы, тот о̄лнэ соссаӈ ма̄хум о̄лупсаныл урыл кина по̄слы. Са̄в ма̄хум ёт хо̄нтхатыгла̄лы, ма̄ньщи ще̄мьят ёт ва̄йхатуӈкве патыс. Та ма̄т ань Сайнаховыт, Китаевыт колта̄глыт о̄лэ̄гыт. Та̄н ма̄ньщииг ловиньтахтэ̄гыт ос ща̄нь ла̄тӈыл ат потыртэ̄гыт. Пе̄с порат та̄н рӯтаныл хӯл алыщлаӈкве А̄с я̄н ёхталасыт ос о̄луӈкве тот хультсыт. Юлия Николаевна Сайнаховыт ёт хо̄нтхатыглас, потыртас ос ты ще̄мьят урыл архив колт о̄лнэ пе̄с нэ̄пакытт потыр кинсыс. Ос таи хо̄нтыс, наса̄ти Сайнаховыт Ямал ма̄н са̄ӈквылтап тотмыт, тот о̄лнэ ханты ма̄хум са̄ӈквылтаӈкве та̄н ты ханищтасаныл. Клавдия Васильевна Койнова Ха̄льӯсныл ёхталас. Тав ла̄выс «Лӯима̄ сэ̄рипос» газетат ма̄нь па̄вылквет о̄лнэ са̄в ма̄хум урыл ловиньтаӈкве ро̄ви. Манхурип та̄рвитыӈ ва̄рмаль тот о̄лы, газетат хансыглаве. Клавдия Васильевна ла̄выс, матъёмас ма̄ньщи газета ка̄сыӈ ще̄мьян тотаве, ань ловиньтаӈкве са̄внув мир ве̄рми. Татьяна Слинкина о̄с такви доклад щё̄питас. Тав Урай ӯст ня̄врамыт ма̄ньщи ла̄тыӈ ханищтаӈкве вуйхата̄лыс. Э̄рнэ ханищтан нэ̄пак ат хо̄нтыс, а̄гирищитпыгрищит газетавт хансым потрыт щирыл ла̄тӈын ханищтасанэ. Ос ма̄навн ла̄выс, манрыг ма̄н «щ» буква хансуӈкве патсӯв. Правила щирыл «с» хансуӈкве э̄ри «ся̄нь», ос «ща̄нь» хансуӈкве ат ро̄ви. Ты юипа̄лт ма̄н мо̄т потыр рӯпатав урыл хӯлсӯв. То̄ват ла̄ве̄гыт, ля̄ххаланув щар аквхурипаг о̄лэ̄гыт ос ма̄ньщи газетан са̄в рущ ла̄тыӈ хансэ̄в. Ма̄навн пе̄с мо̄йтыт, потрыт ловиньтаӈкве э̄ри, туп то̄нт потранув ёмащакв тэ̄луӈкве тах патэ̄гыт. Ты урыл хӯлым ос таи ювле ла̄ве̄в, тыщирыл ке ма̄хум ла̄ве̄гыт, хансум потранув та̄н мӯсхал ловиньтыяныл. Семинар оигпаме э̄лыпа̄лт резолюциянэ̄пак ловиньтаслӯв. Манхурип э̄рнэ тэ̄ла ва̄руӈкве э̄ри, тув хассӯв. Ань ля̄ххал тотнэ финноугорский ма̄хум «Российские финноугорские журналисты» нампа нэ̄пак щё̄питаӈкве ос та̄ратаӈкве таӈхе̄гыт. Тувыл Николай Михайлович Садомин хансум потранэ «Живой источник» нампа нэ̄пакн о̄с вос хансавет. Ты коныпал Григорий Лазарев намыл пиным премия ва̄руӈкве э̄ри. Ты премия ма̄ньщи ос ханты ла̄тӈыл ля̄ххал хаснэ ма̄хум касыл щирыл вос мивет. Ос акв тэ̄ла урыл ты нэ̄пакт хансым о̄лы, Белоярский ос Ха̄льӯс районыгт «Юный корреспондент» нампа ханищтап вос ва̄раве. Та ма̄т о̄лнэ ма̄ньщи манос ханты ла̄тыӈ ва̄нэ ня̄врамыт ща̄нь ла̄тӈыл ля̄ххалыт, потрыт хансуӈкве вос ханищтавет. Ты юипа̄лт Светлана Динисламова «Витсам» нампа журнал урыл потыртас. Нэ̄паке ты та̄лныл тав ня̄врамыт ма̄гсыл ва̄руӈкве о̄вылтастэ. Акв э̄тпос сыс акв журнал та̄раты. Ты нэ̄пакт а̄гирищитпыгрищит ма̄ньщи ла̄тыӈ ханищтаӈкве, ка̄тыл хурит по̄слуӈкве ос са̄в пӯмащ ва̄рмаль урыл ловиньтаӈкве ве̄рме̄гыт. Ханты ма̄хум тамле нэ̄пак ня̄врамыт ма̄гсыл о̄с ва̄ре̄гыт. Ты журнал «Ханты ясанг» нампа газетат рӯпитан хо̄тпат та̄ратэ̄гыт. Надежда Вах ты рӯпатаныл урыл ла̄тыӈ ла̄выс. Тувыл ма̄н йильпи нэ̄пакыг урыл ма̄хумн потыртасӯв. «Лӯима̄ сэ̄рипос» газета 25 та̄лэ то̄влын кастыл редакцияв «Ма̄ньщи ма̄хманув потрыт» нампа нэ̄пак та̄ратас. Тув са̄всыр та̄лыт порат газетат хансыглым потрыт акванатсанӯв. Тот Николай Садомин, Пе̄тр Шешкин, Мария Двинянинова, Анфиса Хромова ос ма̄н хансум потранув хассанӯв. Ты коныпал ма̄н ос «25 лет с газетой» нампа нэ̄пак та̄ратаслӯв. Са̄всыр порат ва̄рим хурит тув ва̄рсанӯв. Мӯй ма̄хманув ма̄гсыл «Лозьвинские манси» ос «Финноугорский мир сегодня» нампа кит суссылтапыг о̄лсы̄г. Акв суссылтап Денис Речкин, «Марий Эл» нампа газетат рӯпитан хум, Йошкар-Ола ӯсныл тыг тотыгластэ. Мо̄т суссылтап Тамара МЕРОВА щё̄пита̄лыгластэ. Тамле ялпыӈ хо̄тал «Лӯима̄ сэ̄рипос» газета янытлан кастыл та о̄лыс. Ма̄н палтув ёхталам мӯй ма̄хумн паща ла̄тыӈ ке̄тэ̄в. Матъёмас ёхталасыт, ма̄навн са̄в ща̄гт тотсыт.

1088 2014.11.21. Валентина УЗЕЛЬ

Ма̄н округ кӯщай пе̄рияӈкв ат патэ̄в. Ты э̄тпост са̄всыр ма̄тт рӯпитан журналистыт округ мирколт акванатыглаве̄сыт. Та̄н ётаныл округ Дума Борис Хохряков ос са̄всыр политический партия кӯщаит потыртасыт. Округувн ань тамле ла̄тыӈ ёхтыс. 2015 та̄л ма̄ньполь э̄тпост ма̄н, округувт о̄лнэ мир, губернатор пе̄рияӈкв ат патэ̄в. Россия Президент хӯрум хо̄тпа наманыл ла̄виянэ, тувыл округ дума депутатыт ты хо̄тпат халт акв хо̄тпа пе̄рие̄гыт, округ губернаторыг рӯпитаӈкв тав та паты. Ты йильпи щирыл кӯщай пе̄риян ва̄рмаль туп хӯрум ма̄тт ва̄равет – ма̄н округувт, Ямало-Ненецкий округт ос Архангельский областьт о̄лнэ Ненецкий округт. Ля̄ххал тотнэ ма̄хум кӯщаит ёт потыртаманыл порат акваг титыглахтасыт, ты манрыг тох ва̄раве – тыт о̄лнэ мир кӯщай пе̄рияӈкв та̄нти ат ве̄рме̄гыт? Ма̄нав манрыг ат титыглыяныл, ма̄н ка̄саще̄в ман а̄ти – по̄х хо̄тпа яныг кӯщаиг тыт вос рӯпиты? Кӯщай ма̄хум пуссын акв щирыл ювле потыртасыт. Ма̄н округув, Ямал ос Ненецкий округ – ты хӯрум Лӯи ма̄ та̄н ты са̄выӈпа̄лэ Россия бюджетэ олныл та̄гиньтаптыяныл. Таима̄гыс щар ат таи, хотты по̄х хо̄тпа округ губернаторыг ма̄н ул вос пе̄рие̄в, э̄рыӈ тав ма̄к яныг кӯщаянувн ат ро̄внэ рӯпата ва̄руӈкв паты. Ань ты кастыл ма̄н округув яныг Уставнэ̄паке мо̄т щирыл хансуӈкв э̄ри. Ос са̄всыр ма̄ кӯщаит пе̄риян ва̄рмаль урыл хансым федеральный са̄ккон ос йильпи щирыл тах хансаве. Тӯяг пе̄риян ва̄рмаль э̄лыпа̄лт Россия Президент ты хӯрум хо̄тпа наманыл ла̄виянэ. Ос округ дума депутатыт та̄н ты хо̄тпаныл акв хо̄тпа пе̄рие̄гыт ос округ кӯщаиг ӯнттыяныл.

1088 2014.11.21. Людмила ТЕТКИНА

Ня̄врамыт ӯргалан урыл потыр о̄лыс. Ханты-Мансийск ӯст яныг мирколт округ янытыл ёхталам ма̄хум сапра̄нин акванатхатыгласыт. Та̄н ня̄врамыт янмалтан ос ӯргалан ва̄рмаль урыл потыртасыт. Ханищтан колытт, полицият, мир ӯргалан департаментыт ос са̄в мо̄т ма̄тт рӯпитан хо̄тпат тув во̄виньта̄лве̄сыт. Татьяна Черкашина округ Правительстват ня̄врамыт ӯргалан ва̄рмаль торыг рӯпиты. Тав ла̄внэ̄тэ щирыл, ань округ янытыл атса̄т арыгкем ще̄мьятт ня̄врамыт лю̄льсаӈ о̄ньщавет. А̄гирищитпыгрищит ул вос саваласыт, тамле ще̄мьят акваг уральтавет. Ты ще̄мьят ёт акваг рӯпитым, ты та̄л сыс 148 ща̄ньа̄щ вина аюӈкве по̄йтсыт, ос ня̄враманыл мӯсхал щирыл янмалтаӈкве патсаныл. Ты ня̄врамыт ща̄няныла̄щаныл нупыл сунсым вина аюӈкве, хохса хартуӈкве ос мо̄т лю̄ль ва̄рмаль ва̄руӈкве ул вос о̄вылтахтасыт, та̄н ётаныл психологыт ос ханищтан хо̄тпат рӯпитэ̄гыт. Сапра̄нит кӯщаит потыртасыт, ты ще̄мьят яныгман ня̄врамытн хумус мӯсхалыг нё̄туӈкве. Москва ӯсныл ты сапра̄нин Николай Ковалёв ёхталас. Ма̄ньлат хум «Поиск пропавших детей» нампа отрядыт кӯщаиг рӯпиты. Россия янытыл ӯстым ня̄врамыт та̄н хумус кинсыяныл, та урыл потыртас. Тав ла̄выс, ань Москва ӯст туп акв хо̄тал сыс атса̄т арыгкем ня̄врам тыпи. Таи лю̄ль, кит о̄выл хо̄тал сыс тыпум ня̄врамыт ат ке хо̄нтхатэ̄гыт, та̄н халанылт са̄в а̄гирищитпыгрищит воссыг юв ат ёхтэ̄гыт. То̄ва ня̄врамыт са̄в та̄л кинсавет. Ань та̄н интернетт ло̄пс ва̄рсыт, ӯстым ня̄врамыт пуссын наманыл тув хансыяныл. Ща̄ньа̄щит тув хансуӈкве ве̄рме̄гыт, та̄н ня̄враманыл кинсуӈкве тот нё̄тавет. Сапра̄нин ёхталам ма̄хум ла̄всыт, та̄н ты ма̄ньлат хо̄тпа ёт рӯпитаӈкве э̄лаль патэ̄гыт, округувт ня̄врамыт киснэ ма̄гсыл тамле отряд о̄с тах ва̄раве.

1088 2014.11.21. В. Аксёнова

Па̄выл ос район кӯщаит рӯпатаныл урыл. Округ кӯщаюв Наталья Комарова са̄всыр ма̄тт кӯщаиг рӯпитан ма̄хум акванатыгламанэ порат тамле ла̄тыӈ та̄нанылн ла̄выс. Ань Россия янытыл кӯщаит ма̄гыс яныг нэ̄паккапай пирмайтавес, рущ ла̄тӈыл тох ла̄ваве – Стратегия национальной политики. Ты хосыт округув янытыл 50 са̄всыр тэ̄ла щирыл ма̄хум рӯпата ва̄руӈкв тах патэ̄гыт. Ань ты йильпи ва̄рмаль таима̄гыс о̄вылтавес, округувт о̄лнэ мирыт халанылт юртыӈыщ вос о̄лэ̄гыт, мо̄т национальностил о̄лнэ ма̄хум лю̄ль самыл ул вос сунсавет. Ка̄сыӈ хо̄тпа такви о̄лнэ ма̄тэ вос янытлытэ, тав ляпатэ̄т о̄лнэ мирыт ул вос лю̄камтыянэ. Ань ма̄хум ты рӯпатан ханищтаӈкв патавет, ня̄врамыт ос школат ты урыл тах потыртавет. Ты рӯпата ёмащакв вос ва̄раве, ка̄сыӈ районт, ка̄сыӈ ӯст ос па̄влытыт ты рӯпата уральтан хо̄тпат ӯнттавет. Мирыт халанылт ёмащакв ос юртыӈыщ э̄лаль вос о̄лэ̄гыт, ты ва̄рмаль 2025 та̄л мус та̄н уральтаӈкв тах патыяныл. Губернатор прессслужбаныл те̄тым ля̄ххал ма̄ньщи ла̄тӈыл В. аксёнова хансыстэ.

1088 2014.11.21. Светлана РОМБАНДЕЕВА

Йильпи щирыл нё̄туӈкве патаве̄в. Ты э̄тпос 17 хо̄талэ̄т РИЦ «Югра» колт нё̄тмил урыл потыр о̄лыс. Ля̄ххал тотнэ ма̄хум ёт Тереза Анатольевна Пономарева потыртас, тав мирн нё̄тмил ва̄рнэ колт кӯщаиг о̄лы. На̄н ань э̄лаль тав потре ловиньтэлы̄н. – Мирн нё̄тмил ва̄рмаль 2015 та̄л па̄сныл йильпииг мины. Ань ты йильпи са̄ккон щирыл, округувт о̄лнэ ка̄сыӈ хо̄тпа я̄нас нё̄туӈкве патаве. Ка̄сыӈ хо̄тпа о̄лупсатэ урыл китыглаве, маныр та̄рвит о̄ньщи, тэ̄ланэ пуссын мӯсхал щирыл нэ̄пакын хансавет. Тувыл нё̄тмил ва̄рнэ колт комиссия атхаты, ма̄хум номсахтэ̄гыт, ань таве̄н хумус нё̄туӈкве. Тав государственный ман нас мирн нё̄тмил ва̄рнэ мо̄т колытн нё̄туӈкве ве̄рмаве. Хоталь ка̄сащи, тув та хансаве, та кол па̄лыл нё̄туӈкве патаве. Э̄лумхо̄лас та порат нё̄таве, хунь такви нё̄тмил во̄ви, ёхты, та̄рвитыӈ тэ̄ланэ урыл потырты. Ма̄н о̄лнэ ма̄вт ма̄хум тох нё̄тавет: то̄ват щар ат ойтхатэ̄гыт, то̄ват мощща олн ойтэ̄гыт, то̄ват ос ка̄сыӈ нё̄тмил ма̄гыс ойтэ̄гыт. А̄гмыӈмосыӈ ма̄хум ос хо̄нтлам ма̄хум тай атхунь о̄с аквта щирыл ойтхатуӈкве ат патэ̄гыт, нас тох нё̄тавет.

1088 2014.11.21. Тамара МЕРОВА

Мирн ва̄нэ о̄йка янытлавес. Ты э̄тпос 16 хо̄талэ̄т Геннадий Степанович Райшев 80 та̄лэ то̄влуме кастыл ос 50 та̄лэ хурит по̄слынэ̄тэ ма̄гсыл са̄всыр суссылтапыт ос ханищтапыт Ханты-Мансийск ӯст ва̄рыглаве̄сыт. Яныг суссылтап «Пространство и время» намаим о̄лы, ма̄хум таве Г. С. Райшев галереямастерской колэ̄т сунсуӈкве ве̄рмегыт. Ты коныпал «Творчество Г. С. Райшева в контексте современной культуры. 1960-2010 годы» нампа ханищтап о̄лыс. Ханты-Мансийскан искусство учёныит Барнаул, Екатеринбург, Москва, Омск, Санкт-Петербург ос Тюмень ӯсытныл ёхталасыт. Та̄н ка̄тыл хурит по̄слум хо̄тпат рӯпатаныл о̄вылтыт са̄в потыртасыт, са̄всыр пӯмыщ тэ̄лат аквъёт та̄рапаттысыт. Пуссын ты ва̄рмалит урыл ма̄н мо̄тыт газетат тах хансэ̄в.

1088 2014.11.21. Валентина УЗЕЛЬ

Рӯпата минэ ма̄хум акваг уральтавет. Ма̄н округувт хусахтем та̄л акв организация рӯпиты, рущ ла̄тӈыл ла̄ваве – государственная инспекция труда. Тот рӯпитан кӯщай хум Евгений Кривобоков ва̄рнэ рӯпатаныл урыл мирн акваг потырта̄лы. Тав ань онтолов э̄тпос сыс ва̄рум рӯпатаныл урыл тамле ла̄тыӈ ла̄выс. Ты э̄тпосыт сыс та̄н хӯрум со̄тыратем рӯпитан ма̄ уральтасыт. Ты инспекцият рӯпитан хо̄тпат та̄нти хотты предприятие уральтаӈкв ат ве̄рмияныл. Та̄н ма̄хумн пищмал хансавет те, то̄нт ты та̄н та предприятие уральтыяныл. Са̄выӈпа̄лэ нэ̄ хо̄тпат та̄н полщ тотнэ нэ̄пак хансэ̄гыт. Та̄н са̄в рӯпитаӈкв ла̄вавет, ос ты рӯпата ма̄гсыл олныл сака ат ойтавет. Вахта щирыл рӯпитан ма̄хум о̄с са̄всыр щирыл ла̄пала̄лавет. Та̄н Лӯи ма̄т рӯпитэ̄гыт, олныл та̄ра ат мивет, юв та минэ̄гыт. Юв ёхтэ̄гыт, олнаныл такос ӯрияныл, нэ̄матыр олн а̄тим. Та̄н халанылт то̄ват са̄кконыт ёмащакв ат ва̄ганыл, са̄кконыт ловиньтанэ̄ныл порат торгамтаӈкв ат ве̄рмияныл. Ӯщлахтын пораныл хунь ёхты, номсэ̄гыт – са̄в отпусколн тах выгыт. Ос рӯпитан э̄тпосаныл ловиньтавет, туп хо̄т э̄тпос та̄н рӯпитамыт. Ты э̄тпосыт ма̄гыс олныл та мивет. Таима̄гыс ты са̄в хо̄тпа ты инспекциян пищма хансэ̄гыт. Е. Кривобоков ла̄выс, са̄в хо̄тпа рӯпитан ма̄наныл ёт сутытахтэ̄гыт. Ос та̄н по̄хан те̄туӈкв хунь патавет, то̄нт ущ сутн минэ̄гыт. Ты э̄лыпа̄лт матыр та̄рвитыӈ ва̄рмаль те о̄лыс, та̄н кӯщаяныл нупыл нэ̄матыр ля̄льт ат ла̄выгласыт, нас роттыг о̄лсыт. Турн ёхтын мус та̄н ве̄ритэ̄гыт. Сут о̄лнэ порат ты инспекцияныл акв специалистхо̄тпа тот о̄с о̄лы, тав ты хо̄тпа тармылпаттытэ. Колыт ӯнттын ма̄т сака са̄в ма̄хум сакватахтэ̄гыт. Мо̄лты та̄л 17 хо̄тпа рӯпитаманыл порат а̄тимыг е̄мтсыт. Ань ос ты та̄л онтолов э̄тпосанэ сыс 12 хо̄тпа порсыс. Тамле ты та̄рвитыӈ ва̄рмалит е̄мталэ̄гыт.

1088 2014.11.21. Людмила ТЕТКИНА

Ӯст о̄лнэ ня̄врамыт ханищтан ва̄рмаль. Ханты-Мансийск ӯст «Лылыӈ союм» нампа ханищтан колт ня̄врамыт ма̄ньщи, ханты ла̄тӈыл потыртаӈкве, ка̄тыл хурит по̄слуӈкве, ю̄нсхатуӈкве, сакныл хорамыт хартуӈкве ханищтавет. Ты э̄тпост тот рӯпитан хо̄тпат «Этнокультурное образование: поиски и перспективы» нампа конференция ва̄рыгласыт. Кондинский район Шугур па̄вылныл, Урай ӯсныл ос Ханты-Мансийск ӯст ханищтан колытт рӯпитан хо̄тпат конференциян ёхталасыт. Ма̄хум рӯпатаныл урыл потыртым та̄нки халанылт ханищтахтасыт. Ань «Лылыӈ союм» нампа студиян 200 арыгкем ня̄врам ёхталы. Ты коныпал тот рӯпитан ма̄хум ӯст о̄лнэ школатытн ня̄врамыт ханищтаӈкве ялантэ̄гыт. Татьяна Вадичупова, кӯщай нэ̄, ла̄внэ̄тэ щирыл, ня̄врамыт ханищтан нэ̄пакыт ос са̄всыр методический пособият та̄н ат о̄ньще̄гыт. А̄гирищит, пыгрищит ма̄ньщи ла̄тӈыл, сакныл хорамыт хартуӈкве ос са̄ӈквылтапыл са̄ӈквылтаӈкве ханищтан нэ̄пакыт ань нэ̄мхотьют ат хансы. Та̄н са̄в та̄л тох рӯпитым, ты нэ̄пакыт та̄нки хансуӈкве о̄вылтахтасыт. Татьяна Савельевна ла̄выс, та̄н хансум нэ̄паканыл щирыл мо̄т ма̄хум рӯпитаӈкве о̄с ве̄рме̄гыт. Конференцият та̄н ты нэ̄пакыт ос ня̄врамыт ханищтан ва̄рмаль урыл потыртасыт. Любовь Федоркив «Лылыӈ союм» ханищтан колт ня̄врамыт ханты ла̄тӈыл ханищтыянэ. Ня̄врамыт ща̄нь ла̄тӈыл потыртаӈкве вос ка̄сащасыт, тав акваг са̄всыр пӯмащ урок щё̄питы. Ня̄врамыт мо̄йтыт хосыт ща̄нь ла̄тӈыл потыртаӈкве ханищтыянэ. Раиса Гаврильчик ма̄ньщи тучаӈ ос э̄нтап урыл потыртас. Пе̄с порат ты кит пормасы̄г хумус хорамтавесы̄г, ос хумус а̄гирищитпыгрищит ань ма̄щтырлаӈкв ханищтаӈкве ро̄ви, та урыл ла̄тыӈ ла̄выс. Мо̄т ханищтан хо̄тпат та̄нки рӯпатаныл, уроканыл урыл конференцият о̄с потыртасыт. Ты ханищтан кол тамле конференция ка̄сыӈ та̄л ва̄рыглы. Тот ловиньтым докладыт та̄н акв нэ̄пакын щё̄питыяныл. Ханищтан хо̄тпат ты нэ̄пак хосыт о̄с э̄лаль тах рӯпитаӈкве патэ̄гыт.

1088 2014.11.21. Тамара МЕРОВА

То̄ва тэ̄лат мо̄т щирыл хасве̄сыт. Губернаторув Наталья Комарова ва̄ӈын кӯщаянэ акванатыгласанэ ос та̄н аквъёт то̄ва округ программат палт йильпи ла̄тыӈ хассыт. Тох та̄н яныг квартираӈ колыт ёмщакв щё̄питан урыл хансым программан я̄нас ла̄тыӈ хӯлтсыт. Ты тэ̄лат ань ва̄руӈкве са̄всыр ӯсытныл манос па̄влытныл о̄лнэ ма̄хум та̄нки во̄вхатсыт. Ань то̄ва колыт ӯнттыманыл па̄сыл 70% пе̄сыг ке о̄лэ̄гыт, э̄лаль щё̄питаӈкве ат патавет. Тамле колытт о̄лнэ ма̄хум мо̄т «пе̄с колныл ёмас колыл минэ программан» хансуӈкве патавет. Михаил Козлов, кол ӯнттын департаментыт кӯщай ва̄ӈын хум, ла̄выс: «Ты э̄лыпа̄лт российский са̄кконытыт сыресыр хӯлтыглан ла̄тӈыт хансыглаве̄сыт. Ань ос ка̄сыӈ регион такви э̄рнэ ла̄тыӈ тув хӯлтуӈкве ве̄рми». Ты коныпал мо̄т ма̄хум кол щё̄питан тэ̄ланыл ма̄гсыл са̄всыр арыг рӯпатал мивет ос ма̄хумныл са̄внув олн виӈкв ла̄вавет. Тувыл губернаторув Ипотечный агентство Югры ёт акв соглашениенэ̄пак хассы̄г. Ань Украина ма̄ныл рӯпитаӈкве ёхтум ще̄мьят «арендное жильё» нампа программа щирыл йильпи колыл миӈкве тах патавет. Таи ма̄гыс ты хо̄тпат труда ос занятости департамент колн заявление хансуӈкве вос ёхталэ̄гыт. Тамле квартират о̄лнэ ма̄гыс та̄н мощщанув олн ойтуӈкве ла̄вавет. О̄выл арендный кол ань Нефтеюганскыт ӯнттувес, таквсы ма̄хум тув ва̄нтлысыт. Та ще̄мьят арендаолнаныл рӯпитан ма̄ныл ойтавет, акв э̄тпос сыс туп ва̄т нупыл ат со̄тыра солко̄ви тыгыл са̄внув ойтуӈкве та̄н ат ве̄рме̄гыт. Моще̄ртын Сургут ӯст ос Ханты-Мансийскат акв тамле колыт ӯнттуӈкве а̄стлаве̄т. Ля̄ххал ма̄ньщи ла̄тӈыг Тамара МЕРОВАн хасвес.

1088 2014.11.21. Людмила ТЕТКИНА

О̄лнэ ма̄вт ёмащакв ӯщлахтуӈкве о̄с ро̄ви. Юграт хоты ма̄т ӯщлахтуӈкве ро̄ви, «ЮграТур-2014» нампа выставкат суссылтавес. Суссылтап ма̄нь таквс э̄тпос 13-15 хо̄талытт Ханты-Мансийск ӯст рӯпитас. Ка̄сыӈ район такви суссылтапе тыг тотыгластэ. Ты коныпал Болгария, Чехия ос Крым ма̄ныл ма̄хум та̄нки ӯщлахтын ма̄наныл урыл потыртаӈкве тыг ёхталасыт. Хӯрум хо̄тал сыс тыт са̄всыр конференцият, ханищтапыт рӯпитасыт. Соссаӈ ма̄хум общинат мӯй ма̄хум та̄нки о̄лнэ ма̄нанылн мӯйлуӈкве ӯщлахтуӈкве о̄с во̄виньта̄лыяныл. Та̄н о̄с мо̄т организацият ёт ты э̄лыпа̄лт та̄нки нэ̄паканыл грантолн ма̄гсыл ке̄тыгласаныл. Суссылтап рӯпитам порат та̄н пуссын тыг ёхталасыт ос проектнэ̄паканыл урыл жюрихо̄тпат э̄лыпа̄лт потыртасыт. Та̄н хо̄т номинацият щирыл олныт майве̄сыт, ты рӯпата ма̄гсыл 12 миллион солко̄ви та̄стувес. Ты та̄л Надежда Алексеева, округ Дума депутат, Людмила Алфёрова, «Югра лылые̄п» кӯщай ва̄ӈын нэ̄, Елена Молданова, Общественный палатат рӯпитан нэ̄, мо̄т жюрихо̄тпат ёт рӯпитасыт. Евгений Платонов, Правительстват рӯпитан кӯщай хум, ла̄выс, Югра янытыл са̄всыр йильпи ӯщлахтын ма̄т щё̄питаве̄сыт. Ань округувт 26 арыгкем э̄лумхо̄лас ты рӯпата ва̄ри. Мӯй хо̄тпат Сургутский, Нижневартовский ос Нефтеюганский районыт пе̄с йис ма̄т о̄лнэ соссаӈ ма̄хум палт мӯйлуӈкве во̄вавет. Тот та̄н хӯл пувуӈкве, са̄лы суныл яласаӈкве, ос ханты ще̄мьят хумус о̄лэ̄гыт, сунсуӈкве ве̄рме̄гыт. Ха̄льӯс районт мӯй ма̄хум Нё̄рн ялуӈкве ве̄рме̄гыт. Белоярский районт ос ханты ма̄хум палт хӯл алыщлаӈкве ма̄хум во̄выглавет. Ань округувт са̄в ма̄хум туризм щирыл рӯпитаӈкве ка̄сащи. Ка̄сыӈ та̄лныл са̄внув ма̄хум та̄нки нэ̄паканыл грантолн ма̄гсыл ке̄тыглэ̄гыт. Наталья Комарова, округ кӯщай нэ̄, выставка сунсуӈкве о̄с ёхталас. Но̄хпатум ма̄хум янытласанэ. Губернатор нэ̄ ла̄выс, мӯй ма̄хум тыг ӯщлахтуӈкве во̄вим, та̄н соссаӈ ма̄хум культураныл э̄лаль тотыяныл. Ты мирыт урыл Россия янытыл ос мо̄т хо̄н ма̄т ма̄хум тах ва̄ӈкве патэ̄гыт. Эдуард Куриков Белоярский район Полноват па̄вылныл ёхталас. Тав такви нэ̄паканэ ты олн ма̄гсыл ке̄тыгласанэ ос жюрихо̄тпатн такви рӯпататэ урыл потыртас. Мо̄т ма̄хум халт но̄хпатыс, щар ма̄к ёмас проект хансыс, тав 3 миллион 500 со̄тыра солко̄вил майвес. Ты олныл такви о̄лнэ ма̄тэ̄т мӯй ма̄хум ма̄гсыл яныг кол тах ӯнтты. О̄лнэ ма̄т кол о̄ньщи, тот ат хо̄тпа туп о̄луӈкве ве̄рме̄гыт. Яныг колэ хунь а̄стлытэ, аквторыг 20 хо̄тпа тав палтэ ёхталаӈкве тах патэ̄гыт. «Чуэльско-Ветляховская» нампа общинатэ 1994 та̄л па̄сныл рӯпиты, ты та̄лыт сыс та̄н хӯл алыщлым олн сэ̄лсыт. Туризм щирыл рӯпитан ма̄хум олныл ань мивет, тав о̄с ты рӯпата ва̄руӈкве вуйхатас. Хӯрум та̄л сыс тав палтэ Екатеринбург, Пермь, Челябинск ӯсытныл мӯй ма̄хум хӯл алыщлаӈкве ёхталэ̄гыт. Тав интернетыт о̄с такви ло̄пс ва̄рыс, такви общинатэ ос ӯщлахтын ма̄тэ урыл тув потыр хансыс. То̄ва хо̄тпат таве интертет щирыл хо̄нтсаныл. Акв хо̄тпа хӯл алыщлан ма̄гсыл ёхталым, акв хо̄тал сыс кит со̄тыра солко̄ви ойты. Ханты хум хӯл алыщлаӈкве мӯй ма̄хум во̄ртур ос сӯкыр э̄тпосыгт туп во̄выглыянэ, мо̄т порат хӯл тот а̄тим. Тыи ма̄гсыл туп кит э̄тпос сыс мӯй ма̄хум ёт рӯпитэ̄гыт, мо̄т порат та̄н во̄рае̄гыт. Общинат ань хо̄т хо̄тпа рӯпиты. «Колмадай» нампа община хӯрум миллион солко̄вил майвес. Тот рӯпитан ма̄хум Ханты-Мансийск ӯст по̄хат па̄вылкве ӯнттуӈкве таӈхе̄гыт. Тот та̄н ё̄рнкол тӯщтэ̄гыт, са̄лы тув тотэ̄гыт, ӯст о̄лнэ ма̄хум тув ӯщлахтуӈкве тах во̄ве̄гыт. Ма̄хум тот са̄лы суныл яласаӈкве, са̄лы ёт по̄слахтуӈкве тах патэ̄гыт. Хӯл исмитыл ос нё̄влил тах тыттавет, ща̄ил айтавет. Мо̄т номинацият рущ хо̄тпат но̄хпатсыт, та̄н о̄с танки палтыланыл мӯй ма̄хум ӯщлахтуӈкве во̄вуӈкве патыяныл.

1088 2014.11.21. Александр ВЬЮТКИН

Тит ма̄ньлат колта̄глыг. Сургутский район Нижнесортымский ӯсн ялмум порат, тит ма̄ньлат ма̄ньщи нэ̄квег ёт тот хо̄нтхатыгласум. Тэ̄н наманэ̄н Татьяна ос Юлия, халэ̄нт тэ̄н яга̄гиӈыщ о̄лэ̄г. Тэ̄нти о̄парищ наме̄н Анямовыг. Самын патум ма̄тэ̄н Саранпа̄выл. Ляпа рӯтанэ̄н пуссын Ха̄льӯс районт о̄лэ̄гыт. Саранпа̄вылт ань оматэ̄н Нина Митрофановна Анямова ос Маша котиль яга̄гитэ̄н ще̄мьяӈ та̄гыл о̄лэ̄г. Таня тот ханищтахтын кол а̄стлуме юипа̄лт та̄ра Ханты-Мансийск ӯсн ханищтахтуӈкв минас. Тав А̄с-угорский университетт ма̄ньщи ла̄тӈыл ня̄врамыт ханищтан нэ̄г ат та̄л ханищтахтас. Ханищтахтам ма̄ныл а̄стуме юипа̄лт та̄ра хумиӈыг е̄мтыс. Хумитэ наме Виталий Айваседа. Тэ̄н халэ̄нт ханищтахтаме̄н порат ва̄йхатасы̄г. Виталий такви ё̄рн хум. Омагеа̄тяге Белоярский ос Сургутский районыг титтыг халмыгтан во̄рыӈ ма̄т о̄лэ̄г. Тэ̄н пыге̄н ос апыгрищанэ̄н уральтаӈкве ос та̄н палтаныл мӯйлуӈкв ва̄тихал ёхталэ̄г. Таня о̄йкатэ̄нтыл ань хӯрум ня̄врам янмалтэ̄г. Щар яныг а̄гитэ̄н наме Ксюша, мо̄тынтыг тав ханищтахтуӈкв мины. Тувыл Катя, тав моще̄ртын хӯрум та̄лэ ты то̄влы. А̄гирищиг юипа̄лт питипатта пыгрищ о̄ньще̄г, тав наме Антон. Пыгрищиӈыг мощ мо̄лалнув е̄мтсы̄г, титыт э̄тпосэ ущ ты е̄мты. Та̄н хӯрум яга̄ги пуссын Дмитрий Георгиевич Агеев палт са̄ӈквылтапыл са̄ӈквылтаӈкв, э̄ргуӈкв ос ма̄ньщи нэ̄ йӣквыт йӣквуӈкв ханищтым яласасыт. «Са̄лыӈ лё̄ӈх» ня̄врамыт ёт ма̄ньщи пӯмщанув суссылтым Дмитрий Георгиевичин ма̄ янытыл ва̄тихал тотыглаве̄сыт. Юля Саранпа̄вылт ханищтахтын ма̄ныл а̄стуме юипа̄лт Ханты-Мансийск ӯсн ма̄нь ня̄врамыт ёт рӯпитан нэ̄г ханищтахтуӈкв минас. Тот тав хӯрум та̄л ханищтахтас. Ханищтахтаме порат ю̄рт пыгрищиӈыг е̄мтыс, наме Павел Молданов, тав ханты хо̄тпа. Та па̄сныл тэ̄н аквъёт о̄лэ̄г. Павел А̄с-угорский «Солнце» нампа театрыт са̄в та̄л актёрыг рӯпитас. Юля ханищтахтам ма̄ныл а̄стуме юипа̄лт Таня увщитэ̄н о̄лнэ Нижнесортымск ӯсн о̄луӈкв во̄ввес. Паша рӯпитан ма̄тэ̄ныл по̄хан минаме юипа̄лт тэ̄н Юлятэ̄нтыл та ӯсн о̄луӈкв ва̄нтлысы̄г. Тот Паша «Газпром» ма̄н операторыг рӯпитаӈкв та̄ра вуйвес. Нэ̄матыр хоса ат о̄лсы̄г, пӯри ва̄рсы̄г. Ань тэ̄н тит ня̄врам о̄ньще̄г. Яныгнув пыгрище̄н наме Кирилл, тав мо̄тантыг ханищтахтуӈкв мины. Тав юипа̄л а̄гирище̄н наме Алина, тав ос моще̄ртын хӯрум та̄лэ ты то̄влы. Паша такви Белоярский район Юильск нампа ханты ма̄нь па̄вылныл о̄лы. Омагеа̄тяге са̄лы о̄ньщим во̄рт о̄лэ̄г. Тэ̄н па̄влыӈ ма̄т о̄луӈкв щар ат ве̄рме̄г, таима̄гсыл пыге̄н палт яныг ӯсытн мощщан ёхталэ̄г. О̄влэ̄т ма̄во̄й ос газ но̄хвинэ ма̄ мус «бураныл» минэ̄г, тувыл пыге̄н о̄лнэ ӯс мус э̄лаль вертолётыл тотаве̄г. Тэ̄лы сыс нилахтем щёс ёхталэ̄г. Нижнесортымский ӯст тит ёмас та̄ксар колта̄глыг ты о̄лэ̄г. Э̄лаль аквтох юртыӈыщ вос о̄лэ̄гыт, ам та̄нанылн щунь ла̄тыӈ те̄тэ̄гум. Хоты ма̄ныл, хоты витныл о̄лнэ ня̄врамыт На̄й-О̄тыранылн вос ӯргалавет.

1088 2014.11.21. Николай МЕРОВ

Са̄в ма̄т ле̄ккарыг рӯпитам хум. Николай Павлович Сянклин Ха̄льӯс район А̄нъя па̄вылт о̄лы. Тав О̄лттумп па̄вылт самын патыс. Ты яныгпа̄ла о̄йка ань пенсияолн вуим о̄лы, хӯл алыщлы. Ам тав колэ̄н щалтапа̄лсум. Ты ве̄щкатыӈ хум такви о̄лупсатэ ос ща̄нягеа̄щаге урыл а̄нумн мощ потрамас. На̄н ты урыл э̄лаль ловиньтэ̄н. Николай Павлович оматэ Матрёна Николаевна 1924 та̄лт самын патыс. Ане̄квагео̄паге Николай Ефимович ос Анна Ивановна Гоголевыг о̄лсы̄г. Нэ̄гхумыг ат ня̄врам янмалтасы̄г: кит пыг, хӯрум а̄ги. Яныг пыге̄н кулакыг ла̄ввес, 1937 та̄лт хотталь тотвес. Юв воссыг ат ёхтыс, Ханты-Мансийскат порславес. Китыт пыге̄н а̄гмыл е̄мтыс, пӯльницан пинвес. То̄нт торыӈ тэ̄рпи а̄тим о̄лыс. Таима̄гыс пусмалтаӈкве ат ве̄рмувес, юв ке̄твес. Юн мощ о̄лыс, а̄тимыг е̄мтыс. Матрёна ма̄ньлатыг о̄лме̄т матахмат та̄л Саранпа̄вылт о̄лыс. Ётылнув война о̄вылтахтаме э̄лыпа̄лт та̄н ще̄мьяӈ та̄гыл О̄лттумпын ва̄нтлысыт. Тот хӯл алыщласыт ос во̄раясыт. Пилыщмаӈ хо̄нт нак о̄вылтахтаме порат Матрёна са̄тхуйплов та̄лэ ущты то̄влыс. 1941 та̄лт тав О̄лттумпыт хӯл алыщлан ма̄т кассирыг рӯпитас. Тувыл ос хӯл пувнэ хо̄тпат палт бригадирыг паттувес. Па̄вылт о̄лум китхуйплов ос атхуйплов та̄л яныт а̄гитпыгыт ёт хӯл алыщлас. Та̄нки картопка ва̄ӈныл хартыгласыт. Са̄всыр та̄рвитыӈ рӯпата аквъёт ва̄рсыт. Та порат хӯл алыщлан бригада кӯщаиг Пётр Семёнович Вынгилев рӯпитас. Тоболдино па̄выл мус ла̄глыл яласасыт. Ювле ос яныг толгыӈ та̄гыл тӯпыл товим минасыт. Бригадат туп хӯрум яныгпа̄ла хум хо̄тпа о̄лыс. Ты Пётр Вынгилев, Михаил Гоголев (тав ётылнув Тоболдино па̄вылн а̄рпи ва̄руӈкве минас, я̄ӈк ёлыпа̄лн ра̄гпыс, а̄тимыг е̄мтыс) ос Ефим Чалданов. Та̄н война порат тот ня̄врамыт ос нэ̄ хо̄тпат ёт хӯл алыщлым яласасыт. Тувыл О̄лттумпын акв о̄йка рӯпата щирыл ёхтыс, ля̄ххал тотыс. Тав хо̄нтлын нак оигпам урыл та̄нанылн ла̄выс. Матрёна Николаевна ты ля̄ххал ос э̄лы ма̄т хӯл алыщлан хо̄тпатн э̄лаль тотыстэ. Тох ты та порат ма̄хум война холам урыл хӯнтамласыт. Хо̄нтлын нак юипа̄лт 1946 та̄лт Матрёна Николаевна хум ва̄рыс. О̄йкатэ Павел Кириллович Сянклин, О̄лттумп хум о̄лыс. Ань та па̄выл а̄тим. Яныг хо̄тпат потраныл щирыл, пе̄с порат О̄лттумпыт колхоз о̄лыс. Павел Кириллович тот ӯйхул янмалтан ма̄т бригадирыг рӯпитас. Та порат са̄в мис ос лув тот о̄щвес. Павел Кириллович э̄кватэ хольт о̄с 1924 та̄лт самын патыс. Тав яныг хо̄нт порат хо̄нтлын ма̄н о̄с тотыглавес. Аквматнакт Курский Дуга ма̄т хо̄нтлуме порат ла̄глэ писаль ня̄лн сакватавес. Ты ва̄рмаль ма̄гыс верховный главнокомандующий таве̄н янытлан нэ̄пак мис. Тувыл ос китынтыг ня̄лн сакватым юипа̄лт 1945 та̄лт ма̄ньполь э̄тпост сувыӈ та̄гыл юв ёхтыс. Хо̄нтлын нак оигпам юипа̄лт тав нэ̄ тотыс. Э̄кватэ̄нтыл туп нила та̄л о̄лсы̄г. 1950 та̄лт сӯкыр э̄тпост О̄лттумпыт ма̄колыӈо̄йка мисыт таӈыртаӈкве ватаяхтас. Па̄влыӈ хум хо̄тпат писалиӈ та̄гыл таве юил койлыгтасаныл. Пупа̄пщикве палт нэ̄глысыт, о̄влэ̄т Павел о̄йка ё̄мыс, тав юипа̄лэ̄т ё̄мум хум писале илттыг э̄лто̄лматас. Ня̄лэ Павел сысэ̄н хо̄яс, ты та̄рвит ва̄рмаль щирыл тав а̄тимыг та е̄мтыс. Та̄ксар о̄йка хо̄нтлын ма̄ныл ты кос лылыӈ та̄гыл юв ёхтыс, ос юн тамле накн та патыс. Со̄ль ла̄ваве, э̄лы лё̄ӈх ат на̄ӈки, хоты ма̄т хомле е̄мтэ̄гын, хунь ва̄глын. Тав порсуме юипа̄лт хус хо̄тал минас, китыт пыге самын патыс. Ты э̄лыпа̄лт тэ̄н э̄кватэ̄нтыл акв а̄ги ос акв пыг о̄щсы̄г, наме Николай. Ань ты урыл тав ты потыртас. А̄пщитэ 1996 та̄лт а̄тимыг е̄мтыс. Яныг увщитэ Зина Павловна Ефимова ань тыг мус А̄нъя па̄вылт о̄лы. Николай атахкем та̄лэ яныт о̄лыс, О̄лттумпыт о̄лум колхоз лаппантуӈкве патвес. Ма̄хум мо̄т па̄влытын ла̄кквамингаласыт. То̄нт ты та̄н ще̄мьяӈ та̄гыл А̄нъя па̄вылн ва̄нтлысыт. А̄нъя колхозт ва̄т манос налыманкем мис о̄щвес. Пӯиннув яныг мискол ӯнлыс, ань тот туп харама̄ о̄лы. Хӯл алыщлан бригада о̄с са̄в о̄лыс, туп савыӈ хо̄тпа рӯпата та̄л ӯнлыс. Па̄вылт ла̄пка, ня̄нь ва̄рнэ кол, школа матыра̄ти пуссын о̄лыс. Николай А̄нъят са̄т класс а̄стлас. Тувыл нёлолов класс Ха̄льӯст а̄стластэ. Та юипа̄лт ос техникумыт э̄лаль ханищтахтуӈкве е̄мталас. Ос номтэ щирыл школан онтоловит классыт ханищтахтуӈкве хультыс. Акв э̄тпос ханищтахтас, ка̄сэ та холас. Пормасанэ атсанэ ос ювле такви па̄влэ̄н та минас. Па̄выл совхозт акв та̄л рӯпитас. Тувыл ос Ханты-Мансийск ӯс училищан ма̄нь ле̄ккарыг ханищтахтуӈкве минас. Фельдшер хо̄тпаг тот ханищтахтас. А̄стламе юипа̄лт ос армиян вуйвес. Кит та̄л тот ле̄ккарыг лусытас. Юв ёхтыс, ты рӯпататэ щирыл ос Саранпа̄выл совхозн са̄лыт ӯрнэ ма̄н мо̄т ле̄ккарыт ёт рӯпитаӈкве ке̄твес. Та̄н ё̄рнколаныл «Красный чум» намаим о̄лыс. Нилахкем та̄л са̄лыӈ ма̄хум пусмалтым нё̄рт яласас. То̄нт са̄лыӈ колытт са̄выӈпа̄лэ саран ос ё̄рн ма̄хум яласасыт. Бригадат туп аквкит ма̄ньщи хо̄тпа о̄лыс. Ётыл тот рӯпитаӈкве по̄йтыс. Николай Павлович рӯпататэ щирыл Ха̄льӯс район янытыл Ягрим, Кульпас, Кимкъясуй па̄влыт пӯльницатн, Саранпа̄выл са̄лыӈ колытн, Белоярский район «Нумто» нампа са̄лыӈ колытн ос Касум па̄выл са̄лыӈ ма̄хум пусмалтаӈкве ялантас. Та порат о̄лум соссаӈ ма̄хумн тав ёмащакв ва̄йвес. Аквматнакт аквъёт ханищтахтам юртэ са̄лыӈ колт ва̄щинтастэ. Та хум о̄с са̄лыӈ колт ма̄хум пусмалтым яласас. Николай Павлович о̄лупсатэ сака пӯмащ, тав са̄в ма̄т яласас. А̄нумн таве хӯнтлуӈкве сака мӯстыс.

1088 2014.11.21. Анна АЛГАДЬЕВА

Мартын а̄ги Вера. Ка̄сыӈ хо̄тпа такви о̄лнэ ма̄тэ̄н хартаве. Ка̄сыӈ хо̄тпа такви самын патум ма̄тэ ӯлылытэ, э̄руптытэ, янытлытэ, э̄сгитэ. Тав ма̄гсылэ яныгмам ма̄тэ во̄ре посыӈ, ма̄тэ сыстам, витэ атыӈ. Ка̄сыӈ лё̄хъяс ман ӯсхулы, ка̄сыӈ а̄хвтас, со̄съял ман вит во̄ӈха, ка̄сыӈ яныгман йӣв ман пумтар, ка̄сыӈ са̄м ло̄мт таве̄н тыныӈ. Ань ат а̄лыман то̄рмувт, рущ рӯпатан нэ̄гхатым о̄лым, э̄лын о̄лнэ ма̄хум яныгмам ма̄нанылн ялуӈкв ӯщлахтын пора та ӯре̄гыт. Кос хоты хо̄тпа са̄выӈпа̄лэ туи порат ӯщлахтуӈкв ка̄саще̄гыт. Туи яласаӈкв ма̄лтып, ня̄врамыт ӯщлахтэ̄гыт, пувлуӈкв ро̄ви, пил ва̄туӈкв, ла̄хс атуӈкв, па̄кв паттуӈкв ха̄йтталаӈкв ро̄ви. Туи порат сытам ща̄ньа̄щ колыт суиӈыг та е̄мтэ̄гыт. Ты тув Мартын а̄гит Хулюмсунт па̄вылн атхатыгла̄лсыт. Ма̄н халувт рӯтыг кос о̄лэ̄в. Туп яныгмамув порат ат ва̄щинтахтыгла̄лсӯв. Ща̄нянува̄щанув тай халанылт ва̄йхатасыт кос, мӯйлым акваняланта̄лыгласыт. Мартын Ильич Анямов такви Ё̄рыӈколыӈ хум о̄лыс, 1930 та̄лт Сапса е̄р ма̄т Хосво̄ль па̄вылт самын патыс. Илья Васильевич Анямов нотаныл палытыл са̄лы о̄щсыт, Нё̄рт яласасыт, юио̄выл та̄лытт Ня̄хщамво̄льт о̄лсыт. Мартын ма̄нь та̄гыл а̄ще ёт яласас. Хунь яныгмас, Ня̄хщамво̄лиӈ промхозт са̄лы ӯрим о̄лыс, тувыл па̄рт сылнэ ма̄т рӯпитас. Э̄кватэ наме Анна Андреевна, интернатт рӯпитас. Э̄кваго̄йкаг хоса ат о̄лсы̄г, ня̄враманэ̄н иӈ ма̄нит о̄лсыт, хотталь ща̄лтсы̄г. Мартын а̄ги Вера ам о̄лнэм па̄лытыл китынтыг ущ ты ва̄слум. Хо̄нтхатыгламме̄н порат, мощ ты потыртасме̄н. Газета ма̄гыс о̄с потыр хассуме̄н. – Наӈки урынтыл мощ потыртэн: хо̄т самын патсын? Хоты ма̄т яныгмасын? – Ам намум Вера Мартыновна Анямова, Ня̄хщамво̄льт самын патсум. Омам Анна Андреевна Анямова, а̄щум Мартын Ильич Анямов о̄лсы̄г. – Манах а̄гипыг колынт о̄лсы̄н? – Нёлолов: хурум пыг, ат а̄ги. – Хо̄т ханищтахтасын? Манарыг ханищтахтасын? – Ня̄хщамво̄лиӈ школат лов класс мус ханищтахтасум, тувыл Тюменьн минасум. Са̄ртын секретарьмашинистыг ханищтахтасум. Тувыл э̄лаль ханищтахтуӈкв минасум, Свердловский университетт историкархивистыг ханищтахтасум. Ань Тюменский областной архивт рӯпитэ̄гум. Отчёт ва̄рнэ ма̄т кӯщаиг о̄лэ̄гум. Са̄всыр нэ̄пакыт акв ма̄т о̄ньщиянӯв. Са̄всыр рӯпата ма̄ пе̄с нэ̄пакыт ма̄навн мыгыт. То̄ва нэ̄пакыт са̄тхуйпловит нот па̄сныл о̄лэ̄гыт. Ма̄хум акваг ёхталэ̄гыт, китыглахтэ̄гыт. То̄ват йис о̄парищаныл, ща̄ньа̄щ рӯтаныл кинсэ̄гыт. – А̄гипы̄г о̄ньще̄гын? – Агим наме Юля, культура институтт ханищтахты, «менеджер по туризму и ресторанному бизнесу» паты. О̄йкам кол ӯнттын ма̄т рӯпиты, кол кӣвыр рӯпата ва̄ри. Ам тыт ла̄хс ма̄гыс ха̄йттала̄лэ̄гум, э̄щанум ёт пил ва̄тэ̄гум. – Э̄лын о̄лэ̄гын, ювле хартавен? – Ня̄хщамво̄льт нэ̄мхотьют ат хультыс. Ам нила классыт ханищтахтамумт, омам хотталь щалтыс, а̄тям та э̄лыпа̄лт. Ма̄н интернатт о̄лсӯв. Тыт Хулюмсунт па̄вылт яга̄гим ос э̄щум о̄лэ̄г. Тэ̄н па̄лтэн ёхтала̄лэ̄гум. Кит э̄щагум Ханты-Мансийск ӯст о̄лэ̄г, ма̄н ань пуссын тыт о̄лэ̄в. Хосаг е̄мтыс, тыг ёхталамум онтолов та̄л. Люба Номина ам ётум ханищтахтас, школат аквъёт ханищтахтасме̄н, аквъёт архивт рӯпитасме̄н. – Матыр ялпыӈ хо̄тал Тюмень ӯст ва̄рыглаве? – Ам нэ̄мхотталь ат ялантэ̄гум. «Ӯринэ̄ква хо̄тал» о̄с ва̄ра̄ве. Ханты, ма̄ньщи а̄гит тув ялантэ̄гыт, йӣкве̄гыт. О̄лнэ̄кем хантыт, ма̄ньщит тув ялантэ̄гыт. ДК «Строитель» колт национальных культура центр о̄лы, са̄всыр ма̄хмыт тув атхатэ̄гыт: хатанит, украинцыт , белоруссыт, казахыт, хантыт, ма̄ньщит, ё̄рныт. Э̄рге̄гыт, йикве̄гыт, йӣс о̄лупсаныл но̄хво̄ртмалтэ̄гыт. А̄гирищум о̄с тув ялантас. Студентыт тув ялантэ̄гыт. Ос матырмат «Кедр» о̄лы, тув о̄с студентыт ялантэ̄гыт. Кӯщаяныл ма̄ньщи хум, наме хотёрувласлум. Вера Мартыновнан, тав ще̄мьятэ̄н ос э̄щанэ̄н яныг паща ла̄тыӈ ке̄тэ̄гум. Ос ма̄хмытн ла̄вуӈкв таххаты: яныгмам ма̄н ул ёрувлэ̄лын, ва̄тихал юв ёхтала̄лэ̄н. Та порат ня̄врамыт рӯтаныл ва̄ӈкв патыяныл.

1088 2014.11.21. Светлана РОМБАНДЕЕВА

Ла̄тыӈ щирыл ма̄н рӯтыг о̄лэ̄в. Ка̄сыӈ та̄л ма̄нь таквс э̄тпос юио̄выл хо̄таланэ̄т ла̄тыӈ щирыл рӯтыг о̄лнэ ма̄хум (финноугорский мир) мӯйлэ̄гыт. Та хо̄талытт та̄н акванатхатыглэ̄гыт, ща̄нь ла̄тӈанылт потыртэ̄гыт, э̄рге̄гыт, пе̄с йис йӣкваныл суссылтэ̄гыт. 1989 та̄лт Марий Эл ма̄т Йошкар-Ола ӯст нэ̄пак хаснэ финноугор ма̄хум мирхал конференцияныл о̄лыс. То̄нт та̄н та урыл потыртасыт, ань ла̄тыӈ щирыл рӯтыг о̄лнэ ма̄хманув ва̄тихал акван вос хо̄нтхатыглэ̄гыт, мӯйлэ̄гыт, ялпыӈ хо̄талыт вос ва̄рыглэ̄гыт. Хосат ос, 1900 та̄лт, финн ма̄хум учёныит яныг конференцияныл о̄лме порат М. А. Кастрен нампа Общество ва̄руӈкве номылматсыт. То̄нт пуссын ка̄сащасыт, тав ань Финляндият вос о̄лы. Тувыл мощ ётылнуве ты Общество финноугор мирыт ма̄гыс ма̄к яныг центрыг ва̄рвес, тот ла̄тӈанув ос культуранув ханищтаӈкве патве̄сыт. Ты та̄л ма̄н, Ха̄льӯст о̄лнэ финноугор ма̄хум, о̄с акванатхатыгласӯв – ма̄ньщит, хантыт ос сараныт. Са̄всыр конкурсыт ва̄рыгласӯв, то̄ванув э̄ргысыт, ма̄щтыр ма̄хум ка̄тыл ва̄рум пормасаныл суссылтасыт. Пе̄с йис та̄гыл тэ̄щинтан тэ̄нут тотыгласӯв, мощ тэ̄пъяласӯв, ӯнлахо̄лсӯв, потрамасӯв. Кит ма̄ньщи учёный нэ̄г, Любовь Васильевна Кашлатова ос Светлана Алексеевна Попова, соссаӈ ма̄хманув йис о̄лупса урыл потыртасыг. Ты юипа̄лт конкурс ва̄рыглавес, но̄хпатум хо̄тпат янытлан нэ̄пакыл майве̄сыт. Соссаӈ ма̄хум тэ̄нут ва̄рнэ ма̄т щар ма̄к атыӈ пӯт Дина Тимофеевна Лисова тав па̄йтыс. Ты ма̄ньщи э̄ква пе̄с йис о̄лупса ос ща̄нь ла̄тӈе ёмащакв ва̄гтэ. Ща̄нь ла̄тыӈ ва̄нэ тэ̄ла палт ос Раиса Владимировна Новьюхова но̄хпатыс. Э̄рыг э̄ргын ма̄т – Нина Михайловна Панкратова, йис о̄лупса ӯргалан тэ̄ла палт – Варвара Васильевна Ямру, ма̄щтырлахтан тэ̄ла палт – Варвара Михайловна Новьюхова. «Изьватас» нампа саран ма̄хум э̄ргын коллективаныл саран ла̄тӈыл э̄ргысыт, Иван Андреевич Архипов гармошкал ёнгыс. Тамле ёмас ялпыӈ хо̄тал Р. П. Загородняя, Т. В. Тунгусова, К. В. Койнова ос В. В. Ямру щё̄пита̄лсыт. Та̄нанылн яныг пӯмащипа ла̄тыӈ ла̄ве̄в, пуста̄гыл вос о̄лэ̄гыт. Р. П. Загородняя ке̄тум потре ма̄ньщи ла̄тӈыг Светлана Ромбандееван толмащлавес.

1088 2014.11.21. Александр ВЬЮТКИН

Ма̄ньлат хо̄тпат ты урыл вос ва̄гыт. Ханты-Мансийск ӯст нэ̄пак ловиньтан колт Россия янытыл пе̄с йис порат ня̄врамыт янмалтан ва̄рмаль урыл потыр о̄лыс. Та кастыл щар ма̄нь ня̄врамыт ёт рӯпитан ма̄гсыл ханищтахтын ма̄ньлат ма̄хум тув акванатыглаве̄сыт. О̄влэт тот рӯпитан нэ̄ Светлана Петровна Берендеева пе̄с порат та̄ратым тит нэ̄пакыг урыл мощ потыртас. Ты нэ̄пакыг пе̄с порат ня̄врамыт ханищтам колыт урыл хансымаг. О̄выл тамле нэ̄пак 1770 та̄лт хасвес. Ня̄врамыт ханищтахтынэ̄ныл порат астал, роттыг ӯнлым хӯнтлуӈкв э̄рыс. Ханищтан хо̄тпа юипа̄лт ёхтум ня̄врамн колн щалтуӈкв ат ро̄выс. Ат те хӯнтлы ос ётылнув те ёхты, та ня̄врам тыпйӣв нирыл сысэ̄т ос ла̄гыл паттаге̄т хосгувес. Та коныпал ётылнув ёхтум ня̄врам колканын равтасам яныгнув сыртэп ос горох тармыл хоса лю̄люӈкв ла̄выглавес. Та порат ня̄врамыт са̄йтта̄л патнэ̄ныл мус саватаве̄сыт. Светлана Петровна потыртан ма̄ныл а̄стуме юипа̄лт рущит, хатанит ос башкир ма̄хум та̄нти ня̄враманыл хумус янмалтыяныл, та урыл потыртасыт. Та̄н юипа̄ланылт ос ма̄н, соссаӈ ма̄хум, ма̄нти ня̄враманув янмалтан урыл мощ потыртасӯв. Ханты ма̄хум «Сорт пуӈке тэ̄лнэ» мо̄йт Татьяна Огнёван суссылтым мо̄йтвес. Ма̄ньщи ня̄врамыт янмалтан урыл ос Светлана Динисламова потыртас. Тувыл такви номтэ̄тл акв юипа̄лт хорамыӈыщ о̄лтым хансум ла̄тӈанэ потыртасанэ. Тув ёхталам ма̄ньлат ма̄хмытын ты урыл хӯнтлуӈкв нас пӯмащиг о̄лыс. Та ва̄рмаль оигпаме юипа̄лт пуссын ка̄миньт, атыӈ ня̄нил тыттуве̄сыт ос исум ща̄ил айтве̄сыт. Та̄нанылн пуссын пӯмащ о̄лыс, ща̄й аиманыл та̄нти пӯмащаныл ма̄гсыл са̄всыр тэ̄лат урыл титыглахтасыт.

1088 2014.11.21. Светлана Динисламова

Я̄тил ма̄м хосыт ща̄гтым ё̄ме̄гум. Вāгтāл товлагумтыл но̄х вос лапнувум, Мā янытэ̄тыл вос кāсаланувум, Пēс йисыӈ мāхманув тох яласа̄лмыт, Кислаквыӈ мāке̄в тāн, соль, мувылта̄лмыт. Ты хāйтнэ тулыт тāн нумыл ялманыл, Ты миннэ тулыт ёлхультупта̄лманыл, ё̄ранылмӯтраныл То̄румн туп вāвēт, Нāй-О̄тырыт наманыл ат ёрувлавēт. Тāн о̄ньщум мутраныл хоталь минасыт? Хо̄т, хотты йисыт сыс та̄н тыпыгласыт? Манрыг тыхо̄тал мāн но̄х ат лапēва? Манарын, хотьютытн ёлпувавēва? Āти, тāн э̄рганыл о̄с сумылласыт, Тāн пинум лāтӈаныл но̄хлапаясыт, Мāньщи мирув аквтоп товлыӈыг ēмтыс, Хунь пēс мāхум потрыт хӯнтамлаӈкв вēрмыс. Э̄квапыг пыгрищ о̄с но̄хялтуптавес, Тав мӯтраӈ номте̄тэ ат тыпылтавес, Паль о̄щнэ хо̄тпан тав хӯлуӈкв патаве, Сам о̄щнэ хо̄тпан тав ка̄сала̄лаве. Товлагум вāгталыг, но̄х ат лапēгум. . Я̄тил мāм хосыт ам щāгтым ё̄мēгум! Нāй-О̄тырыӈ мāвитт матъёмас о̄лэ̄гум, Мир о̄лнэ хо̄тал То̄румныл по̄йкще̄гум.

1088 2014.11.21. Наталья Константиновна Тасманова

Владимир Высоцкий стиханэ мо̄т хо̄н ла̄тӈыл хансавет. Ма̄нь таквс э̄тпост ищхӣпыӈ ут щирыл ма̄н Ня̄хщамво̄ль школавн пищма ёхтыс. Школа яныг кӯщаюв Татьяна Андрияновна Сагандукова пищма ам палтум тотыстэ. Тот хансыма: «Паща о̄лэн, Наталья Константиновна, ня̄врамыт ма̄ньщи ла̄тӈыл ханищтан нэ̄. Музей яныг кӯщай нэ̄ Марлена Зимна наӈын хансы». Э̄лаль пищматэ̄т тав ты урыл хансыс, Польшат мо̄т хо̄н ма̄т Кошалин ӯст «Музей Владимира Семёновича Высоцкого» о̄лы. Та̄н палтаныл ялуӈкве во̄вхатэ̄гыт. Мирхал проект хосат та̄гыл щё̄питым о̄лы -«Владимир Высоцкий на языках мира. Новые переводы». Ос Владимир Семёнович Высоцкий кос акв стихотворениятэ ма̄ньщи ла̄тӈыг толмащлаӈкв нё̄туӈкве э̄ри. Ты китыт проект та̄н музеянылт паты. Ос ань ты порат Владимир Высоцкий поэзиятэ яныгса̄т нупыл кит са̄всыр мирыт ла̄тӈанылн толмащлым о̄лы. Яныгса̄т са̄тхуйплов йильпи толмащлым стихотвореният та̄н мо̄т хо̄н ла̄тӈын ань тыг мус хассаныл. Ань ты проектаныл кастыл рӯпатат акванатавет, йильпи толмащлым стиханэ, э̄рганэ акванщё̄питавет. Са̄в мир ла̄тыӈна стиханэ ань мус толмащлым ат о̄лэ̄гыт (ты хинди, дари, селькупский, шорский, нанайский, кельтский ос мо̄т са̄в мир ла̄тӈын). Та ялпыӈ хо̄тал мус йильпи экспозиция щё̄питэ̄гыт, ань ущты толмащлым потрыт тот суссылтэ̄гыт. Ма̄хумна о̄выл щёс ущты нэ̄пакн хансавет, мир вос ка̄салыяныл ос вос ловиньтыяныл. То̄ва ма̄ныл о̄лнэ мирн ва̄нэ литераторыт ос лингвистыт Владимир Высоцкий потрыт мо̄т хо̄н мир ла̄тыӈна толмащлым щё̄питэ̄гыт, хоты ма̄т иӈ ат толмащла̄лве̄сыт. Ме̄н ты проектын нё̄туӈкв ос музейный рӯпатат нё̄тмил тотуӈкв ка̄сащасме̄н, ты рӯпата намаим о̄лы «Творчеству выдающегося поэта, певца Владимира Высоцкого». Ты о̄выл экспонат ма̄ньщи ла̄тӈыл хансым паты, та̄н музеянылт суссылтаве ос потыртаве. Катерина, Катя, Катерина Катерина, Катя, Катерина! Наӈ палтын, нан торгылын Ам номтум паты! Наӈ хо̄вт хурип, Торас лю̄лит лю̄ле̄гын, Наӈ тыныӈ супыл о̄лэ̄гын. Ам ярмакыл наӈын мастылум, Ос каминьт нуил пе̄рыгтылум Вос То̄рум наӈын нё̄ты Тамарканыл нё̄тнэ̄г сусхатэ̄гын, Пе̄с порат тамле номтна ёхтуве̄сум. Ул пилэн, Катя. Катерина, ме̄нки ва̄рмаляме̄н, О̄лнэ ва̄рмаляме̄н – ӯс морых! Ам э̄кват ка̄сыӈ та̄л ат пе̄нтэ̄гум. Катерина, то̄влы, ул пилэн! Суп ма̄глум па̄лыгманумтылум, Пуссын ва̄слын! Тахсуӈкв миныме̄н! Паты ялпыӈ хо̄тал 1965 та̄л. Ам, Наталья Константиновна Тасманова, ос рущ ла̄тыӈ ханищтан нэ̄ Надежда Степановна Артеева толмащлам потруме̄н на̄нанн ты хансысламе̄н.

1088 2014.11.21. Николай МЕРОВ

Ме̄ӈквыт урыл йильпи нэ̄пак нэ̄глыс. Мо̄лалнув нэ̄пак хаснэ ханты хум Владимир Енов китыт нэ̄паке нэ̄глыс. Ты нэ̄пак «Подарок Меӈква» намаим о̄лы. Тав о̄выл хансум нэ̄паке «Сказы рода правдивых людей» 2013 та̄лт та̄ратавес. Ань ты хо̄тал мус пуссын аквъёт налыман мо̄йт тав хансыс. Владимир Егорович Ямало-Ненецкий округт Шурышкарский районт Карвожи па̄вылт хӯл алыщлан ос во̄раян ще̄мьят самын патыс. Школа а̄стламе юипа̄лт Томск ӯс педагогический университет ханищтахтас. Тувыл юв ёхтыс ос та̄ра школан рӯпитаӈкве патхатас. Ня̄врамыт рущ ла̄тыӈ урокн ханищтасанэ. 2001 та̄лт ма̄н округувн рӯпитаӈкве ёхтыс. О̄влэ̄т тав «Югория» нампа телерадиокомпаният рӯпитас. Ань «Ханты ясаӈ» газетат ля̄ххал тотым рӯпиты. «Подарок Меӈква» нэ̄паке ханты ос рущ ла̄тӈыл хансыстэ. Тав мо̄йтанэ ма̄нь ня̄врамыт ос школат ханищтахтын ня̄врамытн ловиньтавет. Яныг хо̄тпат тав мо̄йтанэ̄тыл о̄с сака пӯмщалахтэ̄гыт. Ка̄сыӈ мо̄йтпотырт тав ма̄вит ӯргалан ва̄рмаль, о̄лнэхӯлнэ нак ос пе̄с йис о̄лупса номтыт э̄лаль тотыянэ.

1089 2014.12.05. Николай МЕРОВ

Ля̄ххал тотнэ ма̄хум акванатхатыгласыт. Ты э̄тпост 20-21 хо̄талыгт округ янытыл ля̄ххал тотнэ ма̄хум ловит щёс Ханты-Мансийск ӯст акванатхатыгласыт. Ты ва̄рмаль общественный ос внешний связь округ Департаментыт рӯпитан ма̄хум та̄н щё̄пита̄лыглэ̄гыт, рущ щирыл «Информационный мир Югры» ла̄ваве. Ань ля̄ххал тотнэ ма̄хум та̄нки рӯпатаныл урыл выставка тот ва̄рыгласыт. Ты тэ̄лан э̄лы ма̄ныл яныг кӯщаит ёхталасыт. Форум пуснэ порат округ губернатор о̄с тув ёхталас, ля̄ххал тотнэ хо̄тпат ёт потыртас. Тав ла̄выс: «Округув са̄выӈпа̄лэ ля̄ххал тотнэ хо̄тпат та̄нки рӯпатаныл ёмщакв ва̄рияныл. Ос таи ла̄вуӈкве таӈхе̄гум, та̄нанылн ты урыл номсахтуӈкве э̄ри та̄нки ва̄рнэ рӯпатаныл хосыт мирн нё̄тмил вос ва̄ре̄гыт. Мо̄лалнув Россия Правительстват рӯпитан ма̄хум хус регион ла̄всаныл, тот ля̄ххал тотнэ ма̄хум номтыӈыщ ос э̄рнэ щирыл ля̄ххалыт суссылтэ̄гыт ос хансэ̄гыт. Ты ва̄рмаль щирыл ма̄н округув хӯрмит ма̄т о̄лы. Ты урыл тох ла̄вуӈкве ро̄ви, Югра ма̄вт ма̄хум о̄лупсаныл ёмаснувег е̄мтыс, сака яныг та̄рвит а̄тим. Ты статистика щирыл тох о̄лы. Амки ты урыл ос тох номсэ̄гум, ля̄ххал тотнэ ма̄хум мирн са̄в номт тотэ̄гыт. Таима̄гыс ам акваг та̄н ётаныл рӯпитэ̄гум. Ма̄н ва̄рнэ рӯпатав урыл ос ма̄хум та̄рвитыт урыл та̄н ты хансэ̄гыт. Ам тахнувум, ля̄ххал хаснэ хо̄тпат та̄нки рӯпатаныл ёмас номтыл вос ва̄рияныл. Аквматнакт газетат акв ля̄ххал ка̄саласум, тот тамле потыр хансым о̄лыс. Вах я̄ унсах ӯлтта яласан ма̄гыс мирныл арге̄н са̄в олн виве. Ам ты ва̄рмаль урыл таи номсэ̄гум, хо̄ӈха намыл арге̄н са̄в олн виӈкве паты, ля̄ххал тотнэ хо̄тпа ул такви номтэ щирыл тох хансыс. Ты потыр хансыматэ аман маныр урыл номсыс. Ма̄хум тав потре ловиньтыяныл, тох номсуӈкве патэ̄гыт. Ма̄н олнанув хосыт ты ӯнсах ӯнттувес, та̄н ань яласан ма̄гыс арге̄н са̄в олн выгыт. Ма̄хум ты потыр ёмщакв ат торгамтыяныл, кантлуӈкве патэ̄гыт. Ам тамле потрыт нупыл сака ат сунсэ̄гум. Ка̄сыӈ хо̄тпа юипа̄лт ха̄йтыгтаӈкве ат патэ̄гум. Ос ам таи ла̄ве̄гум, ля̄ххал тотнэ ма̄хум мир ма̄гыс са̄в э̄рнэ потыр хансэ̄гыт. Ка̄сыӈ хо̄тпа матыр ва̄рмаль урыл потре номтыӈыг вос хансытэ, то̄нт ущ тав рӯпататэ ма̄хумн янытлаӈкве патаве. На̄н рӯпатан сака э̄ри, мир ма̄гыс са̄в нё̄тэгы̄н». Ты та̄л газетат ля̄ххалыт хаснэ хо̄тпат ос кина по̄слын то̄тап хосыт ля̄ххалыт ва̄рнэ хо̄тпат ма̄гыс ханищтап щё̄пита̄лвес. Тот ма̄хум газета щё̄питан ва̄рмальн ханищтаве̄сыт, ма̄н редакциявт рӯпитан хо̄тпат о̄с тув ханищтахтуӈкве ялсыт. Тувыл ань мо̄лал ля̄ххал тотнэ хо̄тпат халт конкурс щё̄пита̄лвес. Хотьют щар ёмщакв потыр хансыс, та̄н тот янытлаве̄сыт ос мӯйлупсал майве̄сыт. Тувыл мӯй ма̄хум ма̄гыс экскурсият щё̄пита̄лве̄сыт. Ты та̄л ля̄ххал тотнэ хо̄тпат тох ты рӯпитасыт.

1089 2014.12.05. Мария Двинянинова

Тыныӈ нэ̄ хо̄тпат, Югра ма̄т о̄лнэ нэ̄т! Ханты-Мансийский округ Дума депутатыт ос ам янытлан ла̄тӈыт на̄нан ла̄ве̄в тамле ёмас ялпыӈ хо̄талт – Ома хо̄тал! Ты хо̄тал са̄всыр ялпыӈ хо̄талыт халт янгыг ловиньтахты. Ма̄н ва̄глӯв, о̄лнэ хо̄тал оманыл о̄вылтахты. Ома – щар яныг ос тыныӈ хо̄тпа, кос маныр янытыг вос о̄лнув, ма̄н пуссын та̄рвитыӈ хал порат ома палт ха̄йтэ̄в. Хунь матыр ща̄гтальпи манос матыр посыӈ ва̄рмаль ма̄н о̄лнэ хо̄талувт е̄мтапи, молямтахтэ̄в таве̄н палямтахтуӈкв. «Ома» ла̄внэ сымыӈ ла̄тыӈ ма̄навн о̄лнэ ё̄рва̄г мыг ос са̄всыр та̄рвит та̄ра минуӈкв нё̄ты. То̄нт наӈкина̄н агтэ̄гын, номтын та̄кыг о̄лы. Таима̄гыс Ома хо̄тал, тав рущ щирыл яныг таквс э̄тпос оигпан ляпат янытлаве, ёмас ва̄рмалиг ловиньтахты. Ос аквман щёс юв ялнэ нак атапахтуӈкв, ще̄мья пуссын аквъёт ос ома ёт ӯнлахо̄луӈкв, потрамаӈкв, таве сымыӈыщ янытлаӈкв. Тыныӈ омат, Юграт о̄лнэ омат! Ам на̄нан ла̄вуӈкв ка̄саще̄гум – пуста̄гыл о̄лэ̄н, со̄тыӈыщщуниӈыщ ос нотыӈ о̄лупсал о̄лэ̄н. На̄н ня̄враманын о̄с ёмащакв вус о̄лэ̄гыт, на̄нан ща̄гтальпиӈ кас вус ва̄ре̄гыт ос сымыӈыщ ре̄гыӈ э̄рупса щирыл на̄нан вус уральтыяныл. Б. С. Хохряков ке̄тум янытлан ла̄тӈе ма̄ньщи ла̄тӈыг М. Т. Двинянинован толмащлавес.

1089 2014.12.05. Анна АЛГАДЬЕВА

Са̄в ще̄мья о̄лнэ кол ёвтсыт. 2007 та̄лныл Россият китыт ня̄врам самын паттум ще̄мьят олныл ойтавет, рущ ла̄тӈыл «материнский (семейный) капиталыг» ла̄ваве. Та па̄сныл округувт о̄лнэ 77 со̄тыра 512 ще̄мьят тамле сертификатнэ̄пакыл майве̄сыт. Та̄н халанылт 30 со̄тыра 981 ще̄мья кол ёвтнэ ма̄гсыл олныл висаныл. Ты ще̄мьятын нё̄тнэ ма̄гсыл Пенсионный фонд 10 млрд. солко̄ви та̄стыс. Ос кит со̄тыра 568 ще̄мья олн ос ня̄враманыл ханищтан ма̄гсыл холтсаныл. Ты ма̄хумн Пенсионный фонд 100 млн. солко̄ви мис. Ты халт туп 87 ще̄мьят олнаныл пенсияныл са̄вмалтан ма̄гсыл тув ке̄тсаныл. Ты та̄л округ янытыл 9 со̄тыра 638 ще̄мьят китыт ня̄враманыл самын патыс, та̄н пуссын тамле сертификатнэ̄пакыл майве̄сыт. Пенсионный фонд ке̄тум ля̄ххал ма̄ньщи ла̄тӈыл Л. Алгадьева хансыстэ.

1089 2014.12.05. Людмила тасманова

Округ ма̄к яныг са̄кконэ йильпи ла̄тӈыл хасвес. Ювле хультум э̄тпос 19 хо̄талэ̄т округ Думат рӯпитан депутатыт акванатхатыгласыт ос са̄всыр са̄кконыт пирмайтасыт. То̄нт акв хо̄тал сыс та̄н кит сапра̄ни ва̄рыгласыт. А̄лпыл та̄н 28 са̄ккон манос программанэ̄пакыт пирмайтасыт, ӣтипа̄лаг ос 2015-2017 та̄лыт ма̄гсыл хансым округ бюджет олныт урыл потыртасыт. Ты э̄лыпа̄лт Борис Хохряков, округ Дума кӯщай хум, ос мо̄т депутатыт ля̄ххал тотнэ хо̄тпат ёт хо̄нтхатыгласыт ос тамле ля̄ххал тотсыт. Та̄н ла̄всыт, округув Уставн, ты щар ма̄к яныг са̄кконын, йильпи ла̄тыӈ хансуӈкве э̄ри. Депутатыт пуссын ты йильпи тэ̄ла ма̄гсыл номт ке пинэ̄гыт, округувт о̄лнэ ма̄хум губернатор пе̄рияӈкве ат патэ̄гыт. Россия Президентув хӯрум хо̄тпат наманыл округ Думан ке̄тыянэ ос депутатыт та хо̄тпатныл акв хо̄тпа губернаторыг тах пе̄рие̄гыт. Сапра̄нит депутатыт йильпи щирыл хансым Устав та пирмайтасаныл. Депутатыт ты урыл маныр номт о̄щсыт, пуссын китыглаве̄сыт. Щар ма̄к яныг са̄ккон мо̄т щирыл хансуӈкве ос пирмайтаӈкве та̄н пуссын ка̄сащасыт. Ань пирмайтым нэ̄пак та̄н Государственный Думан ке̄тыяныл. Тот рӯпитан ма̄хум ты тэ̄ла о̄с ке пирмайтыяныл, 2015 та̄лт ма̄ньполь э̄тпост ма̄н округувт пе̄риян ва̄рмаль ат ва̄раве. Аквта хо̄талт депутатыт хӯрум та̄л кастыл хансым округ бюджет пирмайтасыт. Ты нэ̄пак урыл сака хоса потыртасыт. ЛДПР партият рӯпитан депутатыт ты бюджетнэ̄пак пирмайтаӈкве щар ат ка̄сащасыт. Та̄н ла̄внэ̄ныл щирыл, хӯрум та̄л ма̄гсыл хансым олныт мо̄т щирыл уртуӈкве э̄рыс. Та̄н ла̄тӈаныл аты хӯнтлуве̄сыт, хӯрум та̄лн хансым бюджетолныт та пирмайтаве̄сыт. Мо̄т щёс округ Думат рӯпитан депутатыт ва̄т са̄грапнал э̄тпос 10 хо̄талэ̄т сапра̄нин о̄с тах та во̄вавет.

1089 2014.12.05. Людмила ТЕТКИНА

Йильпи та̄лныл ма̄хум олнаныл но̄хнё̄тавет. Округувт о̄лнэ ма̄хум ань са̄всыр программат щирыл олннё̄тмилыл ойтавет. Мо̄тыт та̄л са̄в ня̄врам янмалтан ще̄мьят, яныгпа̄ла хо̄тпат, «Труженик тыла», «Ветеран труда» нам о̄щнэ хо̄тпат ос мо̄т ма̄хум пособиеолнаныл но̄хнё̄тавет. Ты ва̄рмаль урыл округ Правительстват рӯпитан ма̄хум сапра̄нит потыртасыт ос постановлениенэ̄пак пирмайтасыт. Ирина Уварова, округ мирн нё̄тнэ департаментыт рӯпитан нэ̄, ты урыл ла̄выс: «Ма̄н ты ма̄хумн олн ойтнэ ма̄гсыл 2015 та̄лт 500 миллион солко̄ви тах холтэ̄в. 2016-2017 та̄лыг кастыл о̄с аквты са̄вит олн хассӯв». 2015 та̄л та̄л котиль э̄тпос о̄выл хо̄талэ̄ныл 170 со̄тыра хо̄тпат олнаныл но̄хнё̄тавет. Округ губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1089 2014.12.05. Николай МЕРОВ

Э̄лы ма̄т ӯнлын па̄влытн э̄рнэ пормас тотаве. Округувт э̄лы ма̄т ӯнлын па̄влытн налыман нупыл кит тонна э̄рнэ пормас тотаве. 2015 та̄л кастыл нилахуйплов тонна бензин ос солярка, тувыл нёлоловхуйплов тонна кӯр па̄лтыглан а̄хвтас тах ёвтаве. Ты та̄л яныг таквс э̄тпост округ Правительстват рӯпитан кӯщаит заседание ва̄рыгласыт, тот та̄н ты ва̄рмаль урыл потыртасыт. Ты тэ̄ла ма̄гыс олныт округ бюджетныл а̄рнтаг миӈкве патавет. Пормас тотнэ хо̄тпат аукцион щирыл пе̄риявет. Кӯщаянув ла̄внэ̄ныл щирыл, ты хосыт э̄лы ма̄т ӯнлын па̄влытт о̄лнэ ма̄хум о̄лупсаныл кӯпнитнуве̄г е̄мты, мощ нё̄тавет. Губернатор ва̄ӈын хум Геннадий Бухтин ла̄выс, ты ва̄рмаль мӯсхал щирыл э̄лаль тотнэ ма̄гыс акваг уральтаӈкве патаве. Губернатор прессслужбатэ ке̄тум ля̄ххал ма̄ньщи ла̄тӈыг Николай МЕРОВ хансыстэ.

1089 2014.12.05. Тамара МЕРОВА

Пӯмыщ ханищтапыт ос суссылтапыт о̄лсыт. Та са̄тыт Ханты-Мансийскат «Ма̄вит ос Э̄лумхолас» нампа музейт са̄в ма̄хум акванатхатыгласыт. Тот «VI Югорская полевая музейная биеннале» нампа ханищтап о̄лыс. Са̄всыр ӯсыӈ ос мо̄т ма̄ныл ёхталам ма̄хум та̄нки музеяныл урыл тот потыртасыт ос са̄всыр пӯмащ суссылтап ва̄рыгласыт. Ма̄н ань о̄лнэ поравт пе̄с пормасыт хумус ёмщакве̄г ӯргалаӈкве э̄ре̄гыт, хоты ма̄т пе̄с пормасыт кинсуӈкве ро̄ви ос са̄всыр мирыт аквантэ̄лыглахтам э̄лыпа̄лт манхурипаг о̄лсыт, та тэ̄лат та̄рапаттуве̄сыт. Музеит рӯпитан хо̄тпат са̄всыр проектыт о̄щсыт, та̄н таияныл ищхӣпыӈ утыт хосыт суссылтасыт. Кит пӯмыщ мастеркласс ва̄рыглавес. Тувыл мӯй ма̄хум Ханты-Мансийский район Селиярово па̄вылн тотыглаве̄сыт. Ос ётыл акванатхатыгламаныл порат туриндустрия урыл потыртасыт.

1089 2014.12.05. Александр ВЬЮТКИН

Ма̄ньщи хумиюв касыс. Та хультум э̄тпост ня̄врамыт ханищтан ма̄хум халт Москва ӯст Всероссийский нампа касыл о̄лыс. Тув Россия ма̄ янытыл са̄всыр ща̄нь ла̄тӈыл ня̄врамыт ханищтан ма̄хум акванатхатыгласыт. Тув ёхталам ка̄сыӈ хо̄тпа такви ма̄тэ̄т акв тамле касылт но̄хпатыс. Пуссын аквъёт ва̄т нупыл акв хо̄тпа о̄лыс. Хатанит, ё̄рныт, калмыкыт, алтайцыт, тувинцыт о̄лсыт, Мордовияныл, Удмуртияныл, Чечняныл ос Дагестан республиканыл ма̄хум ёхталасыт. Касыланыл тит хо̄тал о̄лыс, хӯрмит хо̄талт та̄н ос Государственный Дума нампа колн ялсыт. Ма̄н округувныл Москва ӯсн ты яныг касылн ма̄н хӯрум ма̄ньщи хо̄тпа ялсӯв: Владимир Савельевич Меров, тувыл таве̄н нё̄тнэ нэ̄, Майя Ефимовна Макарова, ос ам. О̄выл хо̄талт каснэ ма̄хум хотьютаныл ос хунь касуӈкв паты, халанылт ты тэ̄ла та̄рапаттысаныл. Ка̄сыӈ хо̄тпа такви но̄ххартум нэ̄пакломтэ̄т хансым по̄сэ щирыл касыс. Владимир Савельевич каснэ ма̄т хо̄тхуйпловитыг о̄лыс. Та юипа̄лт та̄нти ва̄рнэ рӯпатаныл щирыл мастеркласс суссылтасыт, рущ ла̄тӈыл «Мой регион, моя школа, моя профессиональная деятельность» ла̄ввес. Ка̄сыӈ хо̄тпа такви мире маснутыт ос хорамыт урыл мощ потыртас. Ты касыланыл та̄н э̄типа̄ла мус суссылтасаныл. Ма̄н хӯрум хо̄тпа пуссын аквъёт Володян нё̄тсӯв. Касылэ са̄ӈквылтапыл са̄ӈквылтан «Нэ̄ йӣкв» пе̄с та̄ныл о̄вылтастэ. Тувыл потре э̄лаль та хащматас. Потре̄т такви ще̄мьятэ, ханищтан колэ, о̄лнэ ос рӯпитан ма̄тэ урыл потыртас. Та юипа̄лт ма̄ньщи хумиюв йӣкв йӣквыс ос «Са̄лыӈ хум э̄рыг» э̄ргыстэ. Ма̄н ляпавт ӯнлын ма̄хмытын Владимир суссылтапе сака мӯстыс. Та̄н Володян ла̄всыт: «Холытан наӈ суссылтапын акв тамле ёмас суссылтапыг те е̄мты, наӈ но̄х та патэ̄гын». Каснэ ма̄гсыл ёхталам ма̄хум суссылтапаныл са̄выӈпа̄лэ пуссын яныг экраныӈ телевизор хосыт суссылтасаныл. Таима̄гсыл ма̄н юипа̄лувт о̄лнэ ма̄хум та̄нти суссылтапаныл мощ мо̄т ширыл ва̄рсаныл. Ты э̄лыпа̄лт то̄ва каснэ хо̄тпат акв ма̄т лю̄лим потыртасыт, мо̄тананыл тыглетувле ё̄мыгтым потыртасыт. Нэ̄матыр хоса ат ӯрхатсӯв, аквматэ̄рт ня̄врамыт ханищтан ма̄хум йӣквуӈкв ос э̄ргуӈкв та тӯлтхатасыт. Татарстан ма̄ныл ёхталам хум ёт йӣквнэ ос э̄ргын ма̄хум тув ёхталасыт. Ты касыланыл э̄типа̄ла онтолов щё̄с мус о̄лыс. Титыт каснэ хо̄тал о̄с а̄лпыл о̄вылтахтас. Тот ос лов манос атхуйплов кум палыт ня̄врамыт ёт рӯпитан ма̄хум ханищтап суссылтасыт. Ка̄сыӈ хо̄тпа такви ща̄нь ла̄тӈыл потыртан кина такталас. Ма̄н Ханты-Мансийск ӯсувт о̄лнэ «Лылыӈ со̄юм» колт ханищтахтын ня̄врамыт ма̄ньщи ла̄тыӈ ат ва̄гыт. Таима̄гсыл Владимир Савельевич та̄наныл рущ ла̄тӈыл ханищтыянэ, ты урыл кина суссылтас. Ты, улпыл, таи ма̄гсыл ма̄н каснэ хумиюв ювле хультыс. То̄ва хо̄тпат та̄нти уранылт таглым, хоса номсахтым потыртасыт. Э̄типа̄лаг хо̄т щё̄с порат жюриг о̄лнэ ма̄хум ня̄врам ханищтан ма̄хум халт ма̄к ёмас хо̄тпа пе̄риян ма̄гсыл мо̄т колнакн минасыт. Тот та̄н щё̄с арыгтем потыртасыт. Номтаныл акванёхтуманыл юипа̄лт ма̄хум янытлаӈкв ущта о̄вылтахтасыт. Алтай ма̄ныл ёхталам нэ̄ но̄хпатыс. Владимир Савельевич о̄выл степень о̄щнэ «За индивидуальность» нампа дипломнэ̄пакыл майвес. Хӯрмит хо̄талт ос ня̄врамыт ханищтан ма̄хум Государственный Дума колн тотыглаве̄сыт. Тот са̄всыр мӯйлупсал ос пӯмащипа ла̄тӈыӈ пищмал майве̄сыт.

1089 2014.12.05. Александр ВЬЮТКИН

Па̄ссаӈ щахныл каснэ хумиюв. Яныг таквс э̄тпос ва̄т нупыл нёловит хо̄талт Москва ӯст бокс нампа яныг касыл о̄лыс. Па̄ссаӈ щахныӈ ка̄тыл каснэ ма̄хум халт ма̄н ма̄ньщи хумиюв Руслан Проводников касыс. Тав ма̄ янытыл янытлаве ос ёмащакв ва̄ве. Руслан ты э̄лыпа̄л касылэ̄т WBO чемпионский нампа э̄нтап о̄ньщас. Лӯпта э̄тпос нилахуйплов хо̄талт яныг ща̄рыщ тапалъе̄рт США ма̄т Нью-Йорк ӯст касме порат Крис Альджиери каснэ хумитэ̄н э̄нтапе хотвуйвес. Та па̄сыл Руслан ёт касуӈкв ка̄сащан хо̄тпа хоса хо̄нтуӈкв ат ве̄рмувес. Тав ётэ нэ̄мхотьют касуӈкв ат ка̄сащас. Ань Москва ӯст о̄лум касылн Мексика ма̄ныл о̄лнэ хум Хосе Луис Кастильо касуӈкв ёхталас. Луис Кастильо ань налыман талэ. Каснэ палытыл нёлса̄т щёс алхатас. Са̄тлов нупыл хо̄т щёс тав но̄хпатыглас. Тав ётэ касум хо̄тпан нупыл са̄т э̄лумхо̄лас тав са̄ӈала̄лнэ мус ра̄тсанэ. Руслан ёт каснэ мус хӯрумхуйплов щё̄с ра̄тыглавес. Акв щёс халэ̄нт каснэ хумитэ ёт нэ̄мхотьютэ̄н но̄х ат патыс. Луис Кастильо мощ ма̄ньлатнувег о̄лме порат са̄в та̄л «чемпионский» нампа э̄нтап такви палтылэт о̄ньщистэ. Ань ос ма̄н ма̄ньщи хумиюв ёт Москва ӯст касуӈкв ка̄сащас. Касыл о̄лум хо̄талн хӯс хо̄талын са̄ртынув ёхтыс. Мо̄т ма̄т каснэтэ щирыл са̄в щё̄питахтуӈкв э̄ри. Та̄н тот о̄лнэ щё̄саныл лов щё̄сын юв хульты. Таима̄гсыл та̄н щё̄питахтын щирыл са̄ртынув тув манос тыг ялантэ̄гыт. Тувыл касыл э̄лыпа̄лт те̄лпаныл са̄всыр тэ̄рпил ул вос тэ̄лыгтаве, ва̄тихал уральтым о̄ньщавет. Руслан каснэ хо̄талт тав э̄лыпа̄лэ̄т па̄ссаӈ ка̄тыл каснэ иӈ онтолов хум касыс. Ма̄н Россия ма̄в ма̄гсыл каснэ ма̄хум пуссын но̄хпатсыт. Щар ва̄ти касыл са̄тхуйплов кум минас. Ты Волгодонск ӯсныл о̄лнэ Дмитрий Кудрешов Куба ма̄ныл ёхталам хум Хуан Карлос Гомес ёлпаттыстэ. Дмитрий Кудрешов каснэ ма̄т «кувалда» нам о̄ньщи. Тав ётэ каснэ ма̄хум пуссын пӯӈк ва̄лманыл то̄рнуве̄сыт, са̄ӈала̄лым ёлпатыгласыт. Аквъёт пуссын ань хо̄тхуйплов хо̄тпа тох ра̄тыгласанэ. Руслан Проводников Луис Кастильо халэ̄нт атыт раунд мус алхатсы̄г. Касылэ̄н о̄вылтахтаме порат Руслан хумитэ та̄ра ра̄туӈкв та о̄вылтастэ. Луис Кастильо аквписыг лаппантхатым ювле ла̄квхатас. Юио̄выл атыт раундыт ма̄н каснэ хумиюв ща̄рыщ тапа̄лныл ёхталам хум мощщакве̄н ёлпаттыгластэ. Луис Кастильо но̄хква̄лме юипа̄лт Руслан таве̄н вильтэ̄т титынтыг ёмщакв ю̄ныгтастэ. Кастильо воссыг нэ̄матыр ва̄руӈкв ат ве̄рмыс, тувыл рефери нупыл пуӈке хосгим ёл та ӯнтыс. Та юипа̄лт касылэ̄н та по̄илттавес. Касыл о̄лум колн са̄в мир ёхталас. Ро̄ӈхимав кол алатэ но̄х а̄лты а̄лмыслӯв, пуссын хот ща̄гтсӯв. Хотьют хумус ве̄рмыс, тох та ро̄ӈхыс. Ты алхатнэ касылт Руслан ты та̄л юио̄выл касылэ ты о̄лыс. Мо̄тыт касылэ ре̄тыӈ ю̄свой манос ма̄ньполь э̄тпост тах е̄мты. Та урыл нэ̄мхотьют иӈ ат ва̄гтэ. Руслан мир янытыл ва̄нэ ма̄хманэ̄н э̄лаль о̄лнэ ёмас ла̄тӈыл янытлаве. Ма̄н таве о̄с са̄в ёмас ла̄тӈыл те̄тылув. На̄й-О̄тыранэ̄н вос ӯргалаве.

1089 2014.12.05. Людмила ТЕТКИНА

Лё̄ӈхыт ос вина тыналан ва̄рмаль урыл. Округ кӯщай Наталья Комарова па̄влыӈ ос ӯсыӈ мирколытт рӯпитан кӯщаит Ханты-Мансийск ӯсн сапра̄нин во̄выгласанэ. Тот кӯщаит ма̄шинал яласан лё̄ӈхыт ос вина тыналан ва̄рмалиг урыл потыртасыт. Кӯщай нэ̄ та̄нанылн ла̄выс: «Ты та̄л округ миркол ёмащакв рӯпитанэ̄тэ ма̄гсыл Россия Правительстваныл олныл майвес. Ты олныт ӯсытт, па̄влытт лё̄ӈхыт ёмащакв ва̄рнэ ос то̄ва ма̄тт йильпи лё̄ӈхыт пиннэ ма̄гсыл майве̄сыт. Ма̄хманув акваг ла̄ве̄гыт, лё̄ӈхыт щар лю̄лиг е̄мтсыт, яласан кемыг аты ва̄равет. Ты рӯпата ма̄н акваг уральтым о̄ньщилӯв. На̄н ос ӯсыт, па̄влыт миркол кӯщаит ты ва̄рмаль урыл о̄с ул ёрувлэ̄н». Ювле хультум та̄лт ты рӯпата ва̄рнэ ма̄гсыл 823 миллион солко̄ви майвес, ты та̄л акв миллиард 350 со̄тыра солко̄ви та̄стувес. Округув янытыл 80% са̄вит лё̄ӈхыт йильпииг щё̄питаве̄сыт. Ань туп Ха̄льӯс ос Ханты-Мансийский районыгт ма̄шинал яласан лё̄ӈхыт лю̄льсаӈ ва̄рим о̄лэ̄гыт. Та районыгт ос округ янытыл 450 ве̄рыста палыт лё̄ӈхыт ёмащакв ань щё̄питаӈкве э̄ре̄гыт. Яныг кӯщаюв Наталья Комарова мирколытт рӯпитан хо̄тпат ла̄всанэ, та̄стым олныт хумус холтавет, хумус лё̄ӈхыт щё̄питавет, вос уральтыяныл, олнаныл ёмащакв вос ловиньтыяныл. Ка̄сыӈ районт лё̄ӈх щё̄питан ма̄гсыл я̄нас фонд о̄лы, туп Белоярский ос Ха̄льӯс районыгт тамле рӯпата иӈ ат ва̄рвес. Э̄лаль тав кӯщаит ты рӯпата моляхнув ва̄руӈкв ла̄всанэ. Кондинский район миркол кӯщай Михаил Шишкин сапра̄нит ты рӯпата урыл о̄с потыртас. Та районт туп аквкит па̄выл мус ма̄шина яласан лё̄ӈх а̄тим, мо̄т па̄влытт о̄лнэ мир та̄л сыс машинал тыглетувле яласэ̄гыт. Тав ла̄выс, ань тот мо̄т та̄рвит о̄лы. Та̄н ма̄шинат яласан лё̄ӈхыт акваг уральтыяныл, тэ̄лы порат тӯйт хотщё̄питэ̄гыт, сэ̄ил, солвалыл манос мо̄т утыл лё̄ӈханыл паргалтыяныл. Ты рӯпата ма̄гсыл олн акваг ат то̄вылхаты. Ос акв ва̄рмаль урыл кӯщай хум ла̄выс, ань лё̄ӈх ва̄рнэ ма̄хум аукцион щирыл пе̄риявет, хотьют ты рӯпата ма̄гсыл мощщанув олн во̄ви, тав но̄х та паты. Ты та̄л та̄н ты рӯпата о̄с ва̄рсыт, тамле организация хо̄нтсыт. Ань акв та̄л та ӯрхатэ̄гыт, лё̄ӈханыл ат ва̄равет. Тамле организация олн ат о̄ньщи, рӯпата ёмащакв ва̄руӈкве ат ве̄рми. Тувыл олн ке хо̄нты, рӯпататэ молях ва̄рапитэ, аквкит та̄л ювле хульты, лё̄ӈханыл о̄ста лю̄лиг е̄мтэ̄гыт, миркол кӯщаит олн во̄вуӈкве о̄ста о̄вылтахтэ̄гыт. Тав ла̄внэ̄тэ щирыл, лӯима̄т лё̄ӈх ва̄рнэ ма̄гсыл олн са̄литаӈкве щар ат э̄ри. Ты ва̄рмаль урыл Борис Сочинский о̄с потыртас. Тав Нефтеюганский район Усть-Юган па̄выл миркол кӯщаиг о̄лы. Та̄н о̄с па̄вылт ёмас лё̄ӈх ва̄руӈкве кос о̄вылтахтасыт. О̄с аукцион ва̄рыгласыт, маткем та ӯрхатасыт, та̄н ма̄нь па̄вланылт рӯпитаӈкве нэ̄мхотьют ат ка̄сащас. Тав лё̄ӈх ва̄рнэ организацият палт такви ялыс, ос рӯпитан хо̄тпа во̄выглас. Ювле туп акв ла̄тӈыл ла̄ввес, 5 ве̄рыста палыт лё̄ӈх ва̄руӈкве та̄н тув ат минэ̄гыт. Тув са̄всыр техника хартнэ ма̄гсыл са̄в олн холтэ̄гыт ос тыкем лё̄ӈх ва̄рим са̄в олн ат сэ̄лэ̄гыт. Тыи ма̄гсыл ты та̄л та ма̄нь па̄вылквет о̄лнэ ма̄хум ёмас лё̄ӈхыл ат ва̄равет. Э̄лаль кӯщаит вина тыналан ва̄рмаль урыл потыртасыт. Наталья Комарова ла̄выс, мо̄тыт та̄лныл акв йильпи са̄ккон рӯпитаӈкве о̄вылтахты. Ла̄пкат вина тыналан хо̄тпат лицензиянэ̄пакыл мо̄т щирыл миӈкве патавет. Тав ла̄выс: «Ань предпринимателиг рӯпитан хо̄тпатн ты йильпи са̄ккон урыл потыртэ̄н. Вина тыналан хо̄тпат э̄лаль аквта щирыл уральтым о̄ньщэ̄н. Та̄н лю̄ль вина ул вос тыналэ̄гыт. Ня̄враманув, ма̄ньлат хо̄тпанув вина аюӈкве ул вос кащилтыяныл. Ос ла̄пкат ӣти мус вина тыналым ул вос рӯпитэ̄гыт». Ханты-Мансийск ӯс миркол кӯщай Максим Ряшин ос Родика Стадлер, Пыть-Ях ӯс миркол кӯщай нэ̄, вина тыналан ва̄рмаль урыл о̄с потыртасы̄г. Людмила ТЕТКИНА, Фото прессслужбы губернатора.

1089 2014.12.05. Светлана РОМБАНДЕЕВА

Потыр ща̄нь ла̄тыӈ урыл о̄лыс. Яныг таквс э̄тпос 25 хо̄талэ̄т Ханты-Мансийск ӯст технологопедагогический колледжит научнопрактический конференция ва̄рыглавес. Потыр тот ща̄нь ла̄тыӈ урыл о̄лыс. Ты акванхо̄нтхатыглап округ янытыл рӯпитан соссаӈ мир Ассамблея па̄лыл ва̄рыглавес. Ма̄хум са̄всыр ма̄ныл ёхталасыт. Округ янытыл то̄ва па̄влытныл ня̄врамыт ща̄нь ла̄тӈыл ханищтан ма̄хум о̄лсыт Ха̄льӯс район, Белоярский, Советский, Сургутский ос мо̄т ма̄ныл ма̄хум ёхталасыт. Студентыг о̄лнэ ма̄ньлат хо̄тпат ос са̄всыр кӯщаит о̄лсыт. Акв профессор ойка Уигет Эндрю Москва ӯсныл ёхталас, тот тав государственный университетт исторический факультетт ма̄ньлат ма̄хум ханищты. О̄выл ла̄тыӈ депутатыг о̄лнэ ма̄ньщи нэ̄ Татьяна Степановна Гоголева ла̄выс. Тув ёхтум ма̄хум тав янытласанэ, э̄лы ма̄ныл ёхтум хо̄тпатн са̄в ёмас сымыӈ ла̄тыӈ ла̄выс. Тувыл о̄с депутатыг о̄лнэ ханты хум, Еремей Данилович Айпин, потыртас. Тав ла̄выс: «Ма̄н пе̄с йис о̄лупсав, пе̄с порат о̄лум ва̄рмалянув, ща̄нь ла̄тӈанув та маныр, пуссын но̄хво̄рмалтаӈкве э̄ри. Ла̄тӈув о̄луӈкв паты те, ма̄н са̄в э̄рнэ тэ̄ла ва̄руӈкве ве̄рме̄в тах. Ка̄сыӈ хо̄тпа такви о̄лнэ ма̄тэ янытлытэ, ӯлылытэ, ам о̄с ма̄н пе̄с йис ма̄в сака э̄руптылум. Ма̄н, округ Думат рӯпитан ма̄хум, са̄в э̄рнэ тэ̄ла ва̄рсӯв, са̄в э̄рнэ са̄ккон хассув. То̄ва тэ̄лат э̄лаль молях ат лакве̄гыт, ма̄н ул кос тахнувув, ань та̄н тэ̄лаг молях вос е̄мтэ̄гыт. Тамле тэ̄лат палт сака са̄в ё̄р пинуӈкве э̄ри, мо̄т ма̄хум ёт са̄в рӯпитаӈкве э̄ри. Я̄тил ма̄хум, матъёмас тыг ёхтысы̄н, тыхо̄тал пуссын аквъёт рӯпитэ̄в, ла̄тӈанув тэ̄лаг вос е̄мтэ̄гыт». Образование Департамент кӯщай ва̄ӈын нэ̄ Лилия Владимировна Максимова, Ханты-Мансийск ӯст о̄лнэ технологопедагогический колледж кӯщай нэ̄ Ольга Афанасьевна Бывалина, Ханты-Мансийск ӯст о̄лнэ соссаӈ мир институт кӯщай нэ̄ Диана Васильевна Герасимова о̄с мо̄т са̄в ма̄хум потыртасыт, докладыт ловиньтасыт. Лилия Максимова ла̄выс: «Округув янытыл 6 со̄тыра арыгтем соссаӈ ня̄врам ханищтахты, 29 школатыт ща̄нь ла̄тыӈ ос соссаӈ мир культура 1 со̄тыра16 са̄вит ня̄врам ханищты. Ня̄врамыт таима̄гыс ла̄тыӈ ханищтаӈкве ат таӈхе̄гыт, та̄н ань ща̄няныла̄щаныл ат ка̄саще̄гыт. Та̄н ла̄ве̄гыт, манрыг таве ханищтаӈкве, щёровн моще̄рт хотталь со̄йми». Ольга Бывалина ла̄выс: «Колледжит ань 320 соссаӈ хо̄тпа ханищтахты. Та̄н са̄всыр рӯпатан ханищтахтэ̄гыт. А̄гит янгыщ о̄выл классытт ня̄врам ханищтан хо̄тпаг ос садикт рӯпитан воспитателиг ханищтахтэ̄гыт. Ма̄н са̄лы ӯрнэ ос хӯл алыщлан рӯпатан ханищтан урокыт ва̄руӈкве номылмата̄лсӯв, ос тот ханищтахтуӈкве нэ̄мхотьют ат ка̄сащас. Тувыл ты номтув та хӯлислӯв. Соссаӈ ня̄врамытныл 7 хо̄тпа сака ёмащакв ханищтахтэ̄гыт, 125 хо̄тпа о̄с мӯсхал щирыл ханищтахтэ̄гыт, ёмас оценкат о̄ньще̄гыт. Ка̄сыӈ студент та̄л палыт нё̄тмил олныл ойтаве. Ма̄н туп э̄рнэ нэ̄пакыт ос словарит ат о̄ньще̄в». Сургутский районныл са̄лы ӯрнэ ханты хум ёхталас, Иосиф Иванович Сопочин. Тамле яныг конференциятын тав ва̄тихал во̄виньта̄лаве. Ка̄сыӈъе̄мт тав во̄р тэ̄ланыл, о̄лупсаныл урыл потырты. Ань хум ла̄тыӈ о̄с ла̄выс: «Ам хус та̄л ювле хультум па̄сыл депутатыт ёт рӯпитаӈкве патсум. Ма̄н, во̄рт о̄лнэ ма̄хум, кӯщаитн сака ат нё̄таве̄в. Та̄н та̄нти ма̄гсыланыл рӯпитэ̄гыт, ще̄паныл олныл тохрим ат а̄стэ̄гыт. Ня̄враманыл янмалтэ̄гыт, ма̄н йис та̄гыл о̄лнэ ма̄нанувт о̄лнэ колыт ос дачат ӯнттэ̄гыт. Са̄лыт ня̄влалэ̄гыт, во̄руй пилуптэ̄гыт. Ма̄нав о̄с пилата̄лым о̄ньщияныл. Кит колта̄глыг о̄лнэ ма̄т ма̄во̄й хо̄нтвес. Нефтяникыт ань тот ма̄ хилуӈкве таӈхе̄гыт. Я̄тил ма̄хум, таяныт ёмас ва̄ре̄н, ма̄навн нё̄тэ̄н. Ма̄н моще̄ртн витыг ты тотаве̄в. Ма̄нти ма̄н нэ̄матыр ва̄руӈкве ат ве̄рме̄в, ма̄нтина̄нанув вуянтаӈкве ат ве̄рме̄в. Та̄нанылн э̄рнэ нэ̄пакытт хасхатэ̄в те, та юипа̄лт ма̄н хотталь та со̄йме̄в, ма̄в ос но̄хо̄хтыртаве. Ма̄навн нё̄тнэ хо̄тпан такос свонитэ̄гум, турпка ат выгтэ. Тох та савалэ̄в». Уигет Эндрю, Американыл о̄лнэ хум, тох ты потыртас: «Ка̄сыӈ ма̄т соссаӈ мирыт пуссын аквхурип та̄рвит о̄ньще̄гыт. Ам ань то̄ва мирыт урыл мощ потыртэ̄гум. Мексикат 10 миллион соссаӈ хо̄тпа о̄лы, тот о̄лнэ мирныл ты 10% са̄вит. О̄лнэ ма̄нанылт та̄н 70 арыгтем университет о̄ньще̄гыт. Ща̄нь ла̄тӈаныл ханищтан ма̄гыс са̄всыр программат хансэ̄гыт. Ла̄тыӈ ханищтан учителит ма̄гыс о̄с са̄всыр я̄нас программат о̄ньще̄гыт, сыресыр курсыт ва̄рыглэ̄гыт. Новая Зеландия ма̄т маури нампа соссаӈ мир о̄лы, тот о̄лнэ мирныл 15% са̄вит. Та̄н о̄с институтыт о̄ньще̄гыт, та̄нти ла̄тӈаныл ханищтан ма̄гыс та̄нанылн ро̄внэ программат о̄с та̄нти хансэ̄гыт. Австралият 700 со̄тыра соссаӈ хо̄тпа о̄лы. Ка̄сыӈ та̄л 4 со̄тыра ма̄ньлат хо̄тпа ханищтахтуӈкве о̄вылтахта̄лэ̄гыт. Ос туп 300 са̄виттем хо̄тпа ханищтахтан коланыл а̄стлыяныл. Яныг ӯст о̄луӈкве та̄нанылн та̄рвитыӈ, таима̄гыс то̄ват ханищтахтуӈкве та по̄йтэ̄гыт. Канадат эскимосыт ос индейцыт о̄лэ̄гыт. Ка̄сыӈ община такви колледж о̄ньщи, ня̄враманыл та̄н та̄нти ханищтыяныл, пе̄с йис о̄лупсаныл урыл та̄нанылн потыртэ̄гыт. Пуссын аквъёт тот 20 колледж рӯпиты, кӯщаиг ос учителиг та̄нти соссаӈ ма̄хманыл рӯпитэ̄гыт. 1976 та̄лт индейцыт университет ӯнттысыт, тот ань 800 хо̄тпа ханищтахты. Мощ ётылнуве ос институт Права ӯнттысыт. Аляскат ма̄т (США) 5 миллион хо̄тпа о̄лы, 25% са̄вит хо̄тпаныл юн та̄нти ла̄тӈанылт ат потыртэ̄гыт. О̄лнэ ма̄нанылт колледжит ӯнттысыт. То̄ва ня̄враманыл Гарвардский университетт ханищтахтэ̄гыт, тув са̄в олн ойтуӈкве э̄ри. Ня̄врамыт индейский общинат па̄лыл нё̄тавет. Тамле общинат а̄ти кос щёлыӈыт, ос ня̄враманыл ханищтан ма̄гыс олн та̄н та̄стлэ̄гыт. Тот о̄лнэ ня̄врамыт то̄ваныл ща̄нь ла̄тыӈ ат ва̄гыт, ёрувласаныл. Ос хунь ща̄няныла̄щаныл палт ёхталэ̄гыт, ща̄гтэ̄гыт, та̄нтина̄наныл индейцыг ловиньтыяныл». Э̄лы хо̄н ма̄ныл ёхталам хумиюв тох та потыртас. Потыртаме сыс тав ищхӣпыӈ ут хосыт та ма̄хманэ пуссын суссылтасанэ, потре сака пӯмщиг о̄лыс. Тувыл ма̄хманувн маттем та китыглавес. Юио̄выл ла̄тӈе тамле о̄лыс: «Ща̄нь ла̄тыӈ ханищтан урыл ма̄н са̄в потыртаӈкве ве̄рме̄в, ос юн ат те потыртэ̄в, ня̄врамыт ла̄тыӈ ат те хӯлэ̄гыт, нэ̄мхотьютаныл потыртаӈкве ат ханьщувлы». Ты конференциян ёхталам ма̄хум пуссын ка̄сащасыт, ань тамле хо̄нтхатыглап ва̄тихал ва̄рыглаӈкве э̄ри. Ла̄тыӈ о̄лы те, ма̄ янытыл суйты те, мире о̄лы, хӯлы.

1089 2014.12.05. Светлана РОМБАНДЕЕВА

Ханищтахтан ма̄ньлат а̄гииг. Ты хурит Ханты-Мансийск ӯст о̄лнэ технологопедагогический колледжит ханищтахтан ма̄ньлат а̄гииг по̄слым о̄лэ̄г во̄ртыпал нупыл Ирина Сергеевна Плешкова ос ёмаспал нупыл Мария Ивановна Головкина ӯнлэ̄г. Колледжит тэ̄н ма̄ньщи ла̄тыӈ ханищтэ̄г. Ам та ханищтахтан колн щалтсамум порат, Альбина Романовна Станиславец ёт потрамасум, тав ма̄ньлат ма̄хум ма̄ньщи ла̄тӈыл потыртаӈкве ханищтыянэ. То̄нт ам ты кит а̄гииг ёт потыртасум, сас хӯрмит курсыт ханищтахтэ̄г. Китыгласагум, хотыл о̄лэ̄г, хумус ханищтахтэ̄г. На̄н ань Ирина потре ловиньтэлы̄н: – Ам тыт, Ханты-Мансийск ӯст, самын патсум, яныгмасум. Омам наме Евгения, а̄ги о̄парищ наме Щербицкая. Тав ла̄ви, ма̄н ащо̄йкав ос ане̄квав ма̄ньщи ман ханты хо̄тпаг о̄лсыг. Э̄лнаӈ ань май паспортанылт национальность хасвес, ос хунь тот хансым о̄лыс ма̄ньщи ман ханты, ты щар нё̄тталыг о̄лыс. Таима̄гыс ма̄хманув пуссын рущиг хасве̄сыт, тувыл э̄лаль акваг рущиг та патсыт. А̄тям наме Сергей, тав Сибирский па̄вылныл о̄лы. Акв йигрищ о̄ньще̄гум. Тыт ханищтахтуӈкве а̄нумн сака мӯсты. Ань хӯрмит курсыт ханищтахтэ̄гум, о̄выл классыт ханищтан учителиг рӯпитаӈкве патэ̄гум. Ма̄ньщи ла̄тыӈ ты та̄л ущты ханищтаӈкве патсӯв. Ам сусте̄мт, ла̄тыӈ сака та̄рвитыӈ, щар нэ̄матыр ат торгамтэ̄гум, потыртаӈкве иӈ ат ве̄рме̄гум. Ам номсэ̄гум, ма̄ньщи ла̄тыӈ пӯмыщ ла̄тыӈ, ла̄щалла̄щал тах ва̄ӈкве патылум. Китыт а̄гиюв ос Мария, тав Ягрим па̄вылныл ёхтыс. А̄не̄кватэ ма̄ньщи э̄ква. Мария ще̄мьянылт щар яныг, кит йигрищ ос акв а̄пщи о̄ньщи. Тыт тав ща̄гтым ханищтахты, общежитият о̄лы. Тамле ма̄ньлат а̄гиквег ёт та потрамасум. Пуста̄гыл вос о̄лэ̄г, То̄рум ёт, О̄тыр ёт.

1089 2014.12.05. Валентина УЗЕЛЬ

Армиян винэ пыгыт урыл. Ювле хультум э̄тпос 8 хо̄талныл та̄л оигпанэ̄тэ мус округув янытыл 18 та̄ланыл то̄влум пыгыт армиян вивет. Кӯщаит ла̄ве̄гыт, ань тыхо̄тал мус са̄в хо̄тпа армият лусытаӈкв ат ка̄саще̄гыт, са̄в хо̄тпа хотты ма̄т хоттӯйтхатасыт, призывной ма̄н ат ёхталэ̄гыт. Ань ты ва̄рмаль та̄рапаттын ма̄гсыл ма̄н, Ханты-Мансийск ӯст о̄лнэ ля̄ххал тотнэ ма̄хум, Пыть-Ях ӯсн тотыглавесӯв. Тот ӯс ляпат рущ ла̄тыӈ щирыл «сборный пункт» о̄лы. Ӯсныл тув мус атхуйплов ве̄рыста минуӈкв э̄ри. Тув ёхтумув порат ма̄н ётув «Комитет солдатских матерей» кӯщай нэ̄ Ирина Филипповна Браун потыртас. Тав ла̄выс, тӯяг ос таквсы пыгыт армиян винэ порат тав акваг тув ёхталы, пыгыт ёт потырты. Та̄н ща̄няныла̄щаныл тув о̄с ёхталэ̄гыт, ка̄сыӈ хо̄тал э̄типа̄лаг акв щё̄с та̄н ня̄враманыл ёт тот о̄луӈкв ве̄рме̄гыт. Ань ты мус округув янытыл туп 440 ня̄врам армиян вуйве̄сыт. Ты э̄тпос оигпанэ̄тэ мус иӈ 1 со̄тыра 700 пыг виӈкв э̄ри. О̄выл пыгыт пуссын Восточный военный округ Хабаровск ӯс нупыл тотве̄сыт, та палыт ма̄т лусытаӈкв та патэ̄гыт. Ма̄н тот о̄лмув порат пыгыт Елань нампа военный частин тотве̄сыт. Та юипа̄лт Ульяновский частин те̄тве̄сыт. Ты армиян винэ ма̄т призывникыт хӯрумнила хо̄тал о̄лэ̄гыт. О̄выл хо̄талт та̄н та̄ра ле̄ккарытн ёмащакв сунсавет, хо̄псыяныл по̄славет. Та юипа̄лт та̄н психологле̄ккарн сунсавет, рущит ла̄внэ̄ныл щирыл «психологический портрет» ва̄раве. Пыг о̄лупсатэ̄т манхурипа, ищхипыӈ ут хосыт ты ва̄рмаль та̄рапаттаве. Та юипа̄лт комиссия ма̄хум ла̄ве̄гыт, хоты войскыт пыг лусытаӈкв ве̄рми. Пыть-Ях ӯст, пыгыт армиян винэ ма̄т, яныг кӯщаиг Сергей Борисович Коваленко яныг кӯщаиг о̄лы. Тав ты ма̄навн пуссын потыртас. Журналист ма̄хум ёт хо̄нтхатыглан ма̄гыс тав ётэ казак хум ёхталас – Артём Николаевич Еремеев. Ма̄н округувт «Обь-Иртышское казачье общество» о̄лы, та̄н округ янытыл рӯпитэ̄гыт. Артём Еремеев Сургут ӯст о̄лнэ казакыт халт кӯщаиг о̄лы. Та̄н ты та̄л ущты призывной ма̄т рӯпитаӈкв патсыт. Ты хум ла̄выс, мо̄лты та̄л са̄в офицер ос прапорщик хо̄тпа по̄хан те̄тве̄сыт. Ань пыгыт армиян винэ порат военный хо̄тпа ат то̄вылхаты. Таима̄гыс ты казакма̄хум тув нё̄туӈкв во̄вве̄сыт. Полковник хум Сергей Коваленко ла̄выс, казакыт та̄нанылн сака ёмащакв нё̄тэ̄гыт. Та̄н пыгыт ёт а̄лпыл зарядка ва̄ре̄гыт, рат щирыл ёмащакв ё̄муӈкв ханищтыяныл. Армият хумус лусытаӈкв э̄ри, та̄н ётаныл ты урыл потыртэ̄гыт Э̄лаль ты кӯщай ла̄выс, ань армиян винэ пыгыт пуссын ёмас частит лусытаӈкв таӈхе̄гыт. То̄ват «Президентский полкын» во̄вхатэ̄гыт. Ос 2008 та̄лныт ка̄сыӈ та̄л тӯяг туп атхуйплов хо̄тпа тув виве, «ВДВ» ма̄н налыман хо̄тпа, «специальный назначение» ма̄нва̄т нупыл ат хо̄тпа. Таквсы нэ̄мхотьют тув ат виве. С. Коваленко, полковник о̄йка, ань о̄лнэ та̄рвитыӈ пора урыл тох ла̄выс: «Ань ты йист ка̄сыӈ яныг ос ма̄нь военный частит акваг «боевой готовностит» о̄лэ̄гыт. Кос хоталь пыгыт ань лусытаӈкв вос тотавет, та̄н армиян сака э̄ре̄гыт».

1089 2014.12.05. Тамара МЕРОВА

Ёмас номтыл ка̄стылӯв. Яныг таквс э̄тпос ва̄т нупыл нилыт щислатэ̄т Анфиса Михайловна Хромова 80 та̄лэ то̄влыс. О̄лмет э̄ква ма̄ньщи мирув ма̄гыс са̄в ёмас тэ̄ла ва̄рыс. Тав Ханты-Мансийский педучилище ос ётыл Ленинград ӯст (ань Санкт-Петербург) А. И. Герцен нампа институт а̄стламе юипа̄лт са̄в та̄л школат рӯпитас. 1962 та̄лныл 1983 та̄л мус Саранпа̄вылт ос ётыл Кульпас школат рущ ла̄тыӈ ос литература ня̄врамытн ханищтас. О̄йкатэ Владимир Вячеславович Хромов о̄с тот ня̄врамыт ханищтас, тувыл Кульпас па̄выл школат кӯщаиг о̄лыс. Анфиса Михайловна 1984-1987 та̄лытыт РСФСР Министерство просвещения тармыл научноисследовательский институтн рӯпитаӈкве вуйлавес, тот «Ма̄ньщи ла̄тыӈ» ханищтан нэ̄пак хансуӈкве нё̄тыс. Тувыл 1984 та̄лныл 1997 та̄л мус ще̄мьятэ ёт Кульпас па̄вылт о̄лсыт. Тот Анфиса Михайловна соссаӈ а̄гирищит ма̄гыс «Сэ̄рипос» йӣквнэ ос э̄ргын ансамбль ва̄рыглас. Тав акв ма̄т нэ̄мхуньт ат ӯнлантас. Ня̄врамыт ёт рӯпитаме коныпал Тюменский область депутатыг пе̄рия̄лвес, ос Кульпас па̄влыӈ нэ̄ хо̄тпат Советанылт пуӈктотыс. Тав номтэ̄т тот 1990 та̄лт «Найотыр маа» музей ӯнттуӈкве патвес. Музей ань тыг мус рӯпиты, тот ма̄ньщи пе̄с коланув ӯнттуве̄сыт. Са̄в ма̄ныл тув ёхталан мӯй ма̄хум йис о̄лупсал пӯмщалахтэ̄гыт. Та̄гт ма̄хум ка̄сыӈ тув Ӯринэ̄ква ялпыӈ хо̄тал тот янытлэ̄гыт. Финноугорский рӯт мирыт акванатхатыгламаныл порат, Анфиса Михайловна ма̄ньщи пе̄с йис тэ̄лат урыл акваг потыртас. 1997 та̄лт о̄йкатэ̄нтыл Ханты-Мансийск ӯсн ва̄нтлысы̄г, тыт Вася ос Серки пыгаге̄н о̄лэ̄г. Тыт Анфиса Михайловна «Торум маа» музейт рӯпитас. Тув о̄с са̄всыр пормасыт атыс, ма̄ньщи потрыт нэ̄пакн хансыс, хурит по̄слыс. Тэ̄н о̄йкатэ̄нтыл аквъёт са̄всыр нэ̄пакыт та̄ратасы̄г, ма̄ньщи нэ̄пакыт щё̄пита̄лсы̄г. «Лӯима̄ сэ̄рипос» газетавн тав о̄с акваг нё̄тыс, ма̄ньщи хо̄тпанув о̄вылтыт потрыт ке̄тсалыс. Рӯпататэ мӯсхал щирыл ва̄рме ма̄гыс тав ма̄гылт о̄щнэ по̄сыл майлувес ос «Отличник просвещения» намыл янытлавес. Ма̄н таве ёмас посыӈ номтыл ка̄стылӯв.

1089 2014.12.05. Тамара МЕРОВА

Ялпыӈ хо̄талт мӯйлысӯв. «Югра лылые̄п» ассоциация ты та̄л 25 та̄лэ то̄влыс. Ты кастыл Ханты-Мансийскат ялпыӈ хо̄тал щё̄пита̄лвес. Ос тув округ янытыл ассоциацият рӯпитан хо̄тпат во̄виньта̄лве̄сыт. Та̄н акваннё̄тхатым, соссаӈ ма̄хум о̄лупсаныл ӯргалым ос э̄лаль тэ̄ланыл ёмащакв ва̄рнэ ма̄гыс пуссын аквъёт рӯпитэ̄гыт. 1989 та̄лт ассоциация рӯпитаӈкве о̄вылтахтаме та̄лт тот Татьяна Гоголева пуӈктотыс. Тувыл тав округ Дума депутатыг пе̄риявес, ань тот рӯпиты. Татьяна Степановна юипа̄лэт Валентин Михайлович Молотков рӯпитас. Тав пенсиян патхатаме порат Тюмень ӯсн ва̄нтлыс. Тот 1996 та̄лт хантыт, ма̄ньщит, ё̄рныт тэ̄ланыл палт акваннё̄тхатнэ «Кедр» нампа кол ва̄рыс. Ань та па̄сыл ӯст Ӯринэ̄ква ялпыӈ хо̄тал акваг янытлэ̄гыт. 2002 та̄лныл ты ва̄рмалит Владимир Климовн э̄лаль тотуӈкве патве̄сыт. Валентин Молотков ань ӯщлахты, тав ӯсн о̄с ёхталас. Тав юипа̄лэ̄т Александр Новьюхов пе̄риявес. Тав ос Людмила Алфёрова, таве̄н нё̄тнэ нэ̄, ань тыг мус соссаӈ ма̄хум тэ̄ланыл аквъёт э̄лаль тотыянэ̄н. Мо̄т ӯсыӈ ос па̄влыӈ ма̄т соссаӈ ма̄хум ёт рӯпитан я̄нас колыт ва̄рве̄сыт. Тувыл ассоциация па̄лыл са̄лы ӯрнэ ма̄хум Союз, ма̄щтыр хо̄тпат Союз, ма̄ньлат ма̄хум организация рӯпитаӈкве патсыт. Ты ма̄хум пуссын мӯйлуӈкве ёхталасыт ос ёмас рӯпатаныл ма̄гыс та̄н ма̄гылт о̄щнэ по̄сыл манос э̄сгын нэ̄пакыл майве̄сыт. Ульяна Данило «Притоки великой Оби» та̄ратам йильпи нэ̄паке урыл потыртас. Тот ханты хо̄тпат хансум потраныл ос стиханыл Ульянан акванатве̄сыт ос нэ̄пакыг ва̄рве̄сыт.

1089 2014.12.05. Николай МЕРОВ

Пе̄с йис о̄лупса ханищтан ма̄хум акванатхатыгласыт. Яныг таквс э̄тпост йис о̄лупса ос о̄лнэхӯлнэ накыт э̄лаль тотнэ ва̄рмаль щирыл Ханты-Мансийск ӯст китыт мирхал Конгресс ва̄рыглавес. Ты ва̄рмальн Россия янытыл ос мо̄т хо̄н ма̄ныл са̄в мир ёхталас. Ма̄хум хӯрум хо̄тал са̄всыр секциян ла̄кквауртхатым рӯпитасыт, та̄нки пе̄с йис ва̄рмаляныл урыл докладыт ловиньтасыт. На̄н ты урыл э̄лаль ловиньтэ̄н. О̄выл тамле Конгресс 2011 та̄лт Ханты-Мансийск ӯст о̄лыс. Ты ва̄рмаль «ЮНЕСКО» нампа мирхал организация па̄лыл Россият рӯпитан комиссия, округ культура Департамент ос ремёсла Центр колт рӯпитан ма̄хум та̄н щё̄пита̄лыгласыт. Тот потырта̄лым потрыт та̄н нэ̄пакыг ва̄рсаныл. Ты Конгресс мирн таима̄гыс э̄ри, ма̄хум та̄нки пе̄с йис о̄лупсаныл, о̄лнэхӯлнэ тэ̄ланыл ёмщакв вос ва̄ганыл. Пе̄с ма̄хум о̄ньщум ма̄снутаныл ань мощ мо̄т щирыл ю̄нтуӈкве патве̄сыт. Са̄всыр мирыт маснутаныл ос хансаныл аквантэ̄лыгтаве̄сыт. Ты ва̄рмаль йис пора но̄хво̄рмалтан ма̄гыс ты щё̄питавес. Белоруссия ма̄ныл Ольга Александровна Лобачевская ёхталас. Тав Минск ӯст Государственный университетт о̄лнэхӯлнэ ва̄рмалит щирыл ма̄ньлат хо̄тпат ханищты. Тав искусствоведение наукат кандидатыг о̄лы. Ты нэ̄ белорус ма̄хум о̄ньщиглам хорамыӈ супаныл ос хансаныл суссылтасанэ ос ты урыл потыртас. Акв э̄ква таве̄н ла̄выс, Молдавия ма̄т о̄лнэ ма̄хум пе̄с порат ю̄нтум маснутаныл о̄с аквты хурипат, ты ма̄к та̄н пормасаныл. Маткем ты урыл та потыртасыт. Ётылнув ла̄тӈаныл акванёхтысыт, насати хотты порат ма̄хум ю̄нтум хорамыӈ супаныл аквантэ̄лыгтымат. Тамле тэ̄ла ма̄ янытыл са̄в ма̄т о̄лы. Тувыл о̄с акв нэ̄ Ксения Андреевна Артеева Сургут ӯсныл ёхталас. Тав рӯтанэ Саранпа̄вылт о̄лэ̄гыт. Та̄наныл киснэ ма̄гыс хотты порат тув ялуӈкве таӈхи. Ты нэ̄ 2010 та̄лт Сургут ӯс университетыт журналистыг ханищтахтас. А̄стламе юипа̄лт ос ханты ма̄хум о̄лупса урыл потрыт хансуӈкве патыс. Ты ва̄рмаль щирыл Сургутский районт о̄лнэ йис ма̄н ялыс, ханты ма̄хум ёт са̄лыӈколт матахмат хо̄тал о̄лыс. Та е̄рт о̄лнэ са̄лыӈ хо̄тпат са̄выӈпа̄лэ рущ ла̄тӈыл потыртаӈкве ат ха̄сэ̄гыт. Нэ̄ ла̄выс, о̄выл щёс та̄н ётаныл потыртаӈкве сака та̄рвитыӈ о̄лыс. Тот о̄лыматэ, та̄н о̄лупсаныл мощ ханищтастэ, та юипа̄лт ущ ханты ма̄хум тав нупылэ ёмас самыл сунсуӈкве патсыт. Аквъёт во̄рн тэ̄рпи пум атнэ ма̄гыс ос ӯльпа та̄р яктуӈкве ялантасыт, хӯл алыщлан а̄рпи уральтасыт ос мо̄т са̄всыр рӯпата ва̄рсыт. Ханты хо̄тпат таве̄н йис о̄лупса урыл потыртаӈкве патсыт. Хумус пе̄с порат ма̄хум о̄лсыт, маныр ва̄рсыт. Ань мощ мо̄т щирыл соссаӈ ма̄хум о̄лэ̄гыт, ос ты а̄ти то̄ва о̄лупса тэ̄лат ань ты мус э̄лаль тотавет. Соссаӈ ма̄хум халт о̄луӈкве таве̄н сака мӯстыс. Хантыт во̄рт маныр ва̄ре̄гыт, Ксения Андреевна ты ва̄рмалит пуссын кина по̄слын то̄тапын хансуӈкве патсанэ ос интернетн ва̄рсанэ. Тав по̄слум кинатныл са̄в хащта̄л хо̄тпат пӯмщалахтуӈкве патсыт. Ань нэ̄ «Сургутская трибуна» нампа газетат соссаӈ ма̄хум о̄лупса урыл хансы. Тав потранэ мирн сака ловиньтавет. Таима̄гыс тав ты рӯпата э̄лаль ва̄руӈкве патыстэ. Ксения Андреевна ты Конгрессын ёхталам хо̄тпатн соссаӈ ма̄хум урыл такви по̄слум пӯмащ кинатэ суссылтастэ, ма̄хумн ты кина сака мӯстыс. Юио̄выл хо̄талт мӯй ма̄хум акванатхатыгласыт. Ка̄сыӈ секцият рӯпитам хо̄тпат та̄нки ва̄рмаляныл урыл потыртасыт. Сапра̄ни оигпаме юипа̄лт та̄н хуньт тах о̄с акванатхатуӈкве потыртахтасыт.

1089 2014.12.05. Тамара МЕРОВА

Нэ̄квег акв ма̄т ат ӯнлантэ̄г. Югорск ӯст о̄лнэ ма̄ньщи нэ̄ Дарья Белова мо̄лалнув Ханты-Мансийскан ёхталаме порат кит потрыг ма̄навн тотыс. Ам тэ̄натэ̄н ма̄ньщи ла̄тӈыг толмащласа̄гум, на̄н ань ты потрыг ловиньтэ̄н. Лӯпта э̄тпост Дарья Ивановна Белова ос Нина Георгиевна Рукова Ямал ма̄н ялсы̄г. Тот Шурышкарский районт Ханты-Мужи па̄вылт «Земля мастеровая-2014» нампа фестиваль ва̄рыглавес. Тэ̄н тув во̄виньта̄лвесы̄г. Тот мо̄т мӯй хо̄тпат ёт «Кедровый остров» ня̄врам ӯщлахтан колн тотыглаве̄сыт. Тав «Живун» нампа паркмузейт сыстам, нё̄тнэ ма̄т ӯнттым о̄лы. Анна Геннадьевна Брусницына ты музейт кӯщаиг рӯпиты. Тот о̄лнэ хантыт коланыл пе̄с щирыл ӯнттуве̄сыт ос са̄всыр пе̄с пормасыт тув акванатве̄сыт. Ня̄врамыт тот ӯщлахтынэ̄ныл сыс соссаӈ ма̄хум са̄всыр пе̄с йис ва̄рмалянылн ханищтавет. Ётыл та̄н ты накыт ул вос ёрувлыяныл, яныг хо̄тпатн касылыл ва̄равет. А̄гирищитпыгрищит та̄рапаттым са̄всыр тэ̄лат урыл та̄нки э̄лаль потыртэ̄гыт. Ос пе̄с ва̄рмалит ёмщакв ва̄нэ ня̄врамаквет мӯйлупсал мивет. Ща̄ньа̄щаныл тув мощщан мӯйлуӈкве о̄с во̄виньта̄лавет. Та̄н о̄с матыра̄ти пӯмщалаӈкве тот ве̄рме̄гыт. Ты та̄л ня̄врамыт ма̄ньщи ма̄хум пе̄с ва̄рмалит урыл матыр ва̄ӈкве патсыт. Дарья Ивановна ос Нина Георгиевна та̄нанылн ма̄ньщи хансат урыл потыртасы̄г, нуйил, хӯл совныл пормасыт ю̄нтуӈкве ос турло̄псыт, пальсакыт сакныл хартуӈкве ханищтаве̄сыт. Пе̄с йис мо̄йтыт хӯнтлысыт. Нэ̄квег тэ̄нки мо̄т хо̄тпат ёт ва̄йхатуӈкве патсы̄г. Тэ̄н Ольга Григорьевна Самсонова (Бадагова) ёт румалахтасы̄г. Тав, насати, ма̄ньщи нэ̄. Ты паркмузейт тав о̄выл кӯщаиг о̄лум. Ольга Григорьевна 1951 та̄л я̄ӈк на̄тнэ э̄тпос хо̄тыт хо̄талт Ня̄хщамво̄ль па̄вылт самын патыс. Ща̄не Софья Васильевна о̄лыс, а̄ще Григорий Григорьевич. Нэ̄ Ня̄хщамво̄льт школа а̄стламе юипа̄лт культпросвет училищан Салехард ӯсн минас. Ос таве а̄стламе юипа̄лт о̄влэ̄т Красноселькупский район Сидоровка па̄вылт о̄лнэ клубн рӯпитаӈкве ке̄твес, ётыл Шурышкарский район Восяхово па̄вылт рӯпитас. 1973 та̄лт Мужи па̄выл районный клубт рӯпитаӈкве патыс. Тот э̄ргынйӣквнэ кружокыт ва̄рыглас, сырсыр сценкат щё̄пита̄лыс. Ос тувыл са̄всыр па̄влыӈ ма̄н агитбригада ёт яласас. Ты ка̄ркам, номтыӈ нэ̄ Мужи па̄вылт 1999 та̄лт музей ва̄рыс ос тот кӯщаиг паттувес. Тав ма̄хум ёт рӯпитаӈкве сака ёмщакв ха̄сы, тав палтэ акваг са̄в ма̄хум ёхтала̄лэ̄гыт. Ольга Григорьевна Новосибирск ӯс учёныит ёт, Литва, Латвия ос Эстония ма̄ныл о̄лнэ этнографыт ёт ва̄йхаты. Та̄н ма̄гсыланыл этнографический экспедицият щё̄пита̄лыглы. Ты коныпал профсоюзный комитетыт рӯпитас. Тот культура тармыл рӯпитан хо̄тпат тэ̄ланыл ёмащакв ва̄руӈкве акваг нё̄тыс. «Ямалпотомкам» нампа ассоциацият соссаӈ ма̄хум акванатхатнэ̄ныл порат та̄н ма̄гсыланыл ханищтапыт ва̄рыглы. Ёмащакв рӯпитанэ̄тэ ма̄гыс Ольга Самсонова «Ветеран Ямала» нам о̄ньщи, Ямал губернатор па̄лыл ос «Знание» нампа Всероссийский общество па̄лыл янытлан нэ̄пакыл мӯйлуптавес. Нэ̄ ань пенсиян патхатас. Тав кит а̄ги ос пыг о̄ньщи, апганэ янмалтаӈкве нё̄ты. Ос тувыл Илья каӈке ня̄врамыг, Татьяна ос Петя, янмалтасаге. Пётр армият лусытас ос БАМт рӯпитас, тав таима̄гыс правительственный наградал майвес. Ольга Григорьевна ма̄нь пора та̄ланэ ва̄тихал номылматыгла̄лыянэ. Та̄н а̄щаныл ёт во̄раим, хӯл алыщлым пуссын яласасыт, пил ва̄тсыт. Ня̄врамыт ма̄вит ӯргалаӈкве ос яныгпа̄ла хо̄тпат янытлаӈкве ханищтаве̄сыт. Школат о̄выл ханищтан нэ̄тэ Прасковья Гавриловна Ануфриева ёмас номтыл номылматыглытэ, тувыл школат ос интернатт рӯпитан хо̄тпат, тыи Г. А. Артеева, М. М. Подосенина, Н. Е ос Т. Ф. Собяниныг ос Ня̄хщамво̄льт ань о̄лнэ матумпа̄лаг е̄мтум ма̄хум пуссын номиянэ. Та̄нанылн тав паща ла̄тыӈ ке̄ты. Ма̄н ос тамле ёмас сымыӈ хо̄тпа урыл хӯнтамласӯв, ма̄навн тыи о̄с ёмас. Мо̄т ва̄рмаль урыл Дарья Белова тох потыртас. Югорск ӯст о̄лнэ музей 15 та̄лэ то̄влыс. Тот история ос этнография суссылтапыг ма̄хумн щё̄питавесы̄г. А̄ти сака хосат ты колт II мирхал театральный фестиваль ва̄рыглавес. Тот ӯст о̄лнэ са̄всыр мирыт акванатхатыгласыт ос та̄нки маснутыл масхатым мӯй ма̄хум ӯрсаныл. Наталья Николаевна Нестерова, культура тармыл кӯщаиг о̄лнэ нэ̄, ма̄хум ёт пащалахтас. Ос ётыл башкирыт ос хатанит «Тупыр» нампа театр, рущ ос соссаӈ ма̄хум та̄нки э̄рганыл, йӣкваныл суссылтасаныл. Музейт рӯпитан хо̄тпат суссылтапыт о̄вылтыт потыртасыт. Ты театральный фестиваль сака пӯмщиг о̄лыс. Ма̄хум пуссын ща̄гтым, ёмас номтыл ла̄кквамингаласыт. Дарья Белова потраге ма̄ньщи ла̄тӈыг Тамара МЕРОВАн толмащлавесы̄г.

1089 2014.12.05. Тамара МЕРОВА

Яныг о̄йка ма̄н о̄с янытлылӯв. Геннадий Степанович Райшев яныг таквс э̄тпос о̄выл хо̄талэ̄т 80 та̄лэ то̄влыс ос тувыл тав хурит по̄слынэ̄тэ па̄сыл 50 та̄лыг ты е̄мтыс. Тав намхо̄талэ кастыл округувт са̄всыр суссылтапыт ва̄рыглавет. Акв яныг суссылтап тав рӯпитан колэ̄т щё̄питавес. Тот «Пространство и время» намаим са̄в та̄л сыс по̄слум хуриянэ акванатве̄сыт. Хурит ла̄кквауртве̄сыт ос ка̄сыӈ пора такви я̄нас намыл пинвес, тыи «Детство», «Зрелость», «Мудрость» ос «Музыка». Тувыл мо̄лты та̄л сыс по̄слум «Э̄лумхо̄лас. Ма̄. То̄рум» нампа хуриянэ я̄нас суссылтапыг ва̄рве̄сыт. Геннадий Степанович Ханты-Мансийск (пе̄с щирыл Самарово) ляпат Сивохрап ӯнлум па̄вылт самын патыс. Ты па̄вылкве А̄с я̄н патнэ Салым я̄ ва̄тат ӯнлыс. А̄ще Степан Миронович Райшев ханты хумыг о̄лыс, ос оматэ Евгения Фёдоровна Конева рущ нэ̄г о̄лыс. Ты лӯи ма̄вт кит мирыг хосат та̄гыл акв ляпат о̄лсы̄г. Ань таима̄гыс Геннадий Степанович ла̄выс: «На̄н то̄ва по̄слум хуриянум суснэ̄н порат, рущит манос хантыт палт о̄лум пе̄с пищит хо̄нтэгы̄н тах. Тот хӯрум лувыт акв сунын ке̄рим хурит манос са̄лыл яласан хо̄тпат ка̄салэгы̄н. Тыи ам ща̄нягума̄щагум пе̄с о̄лум ва̄рмале̄н, ос тыт о̄лнэ о̄лупсав хӯлтуӈкве таӈхилум». Тувыл «Югра» телерадиокомпаният рӯпитан хум Ринат Халиуллин «Ассиметричный Райшев» нампа кина по̄слыс. Ань конференциян ёхталам хо̄тпатн суссылтавес. Тот Геннадий Степанович самын патум ма̄тэ по̄слым о̄лы, тав тув акитэ палт мӯйлуӈкве ялыс. Ос хара ма̄т ё̄мыгтым, я̄ ва̄тат ӯнлантым сыс такви номтанэ ла̄выс. Тувыл хумус тамле номтыт нэ̄пак тармыл хурииг тэ̄лэ̄гыт, таи мощ потыртас. Акв э̄типа̄лаг ӯст о̄лнэ ос мӯй ма̄хум «Югра-Классик» колн во̄виньта̄лве̄сыт. Тот о̄йка намхо̄талэ̄т янытлавес ос «Небом посланная жизнь» ёнгилыл ва̄рвес. Ханты-Мансийск ӯст о̄лнэ хо̄тпат ос мӯй ма̄хум Геннадий Райшев галереямастерской колэ̄т йильпииг ос хосат по̄слум хуриянэ сунсуӈкве вос ёхтала̄лэ̄гыт. Тот сака пӯмыщ. Ма̄н ты яныгпа̄ла о̄йка о̄с янытлылӯв, са̄в та̄л пуста̄гыл о̄луӈкве ла̄вилӯв, То̄рум ёт, О̄тыр ёт вос о̄лы!

1089 2014.12.05. Анна АЛГАДЬЕВА

Ка̄пъя о̄йка мо̄йт. Ка̄пъя э̄кваго̄йкаг о̄ньщасыг хӯрум пыг. Яныг пыге̄н нэ̄ӈ, ня̄врамыӈ о̄лыс. Кит пыгаге нэ̄ ат о̄ньщасы̄г. Хоса ман ва̄ти о̄лсыт, Нё̄рт яласасыт. Э̄кватэ а̄тимыг е̄мтыс, ань вуньщалыг та минас. Арыгтас хӯрум пыге ёт ос мане. Та о̄лсыт, та о̄лсыт. Яа, маныр ва̄руӈкв. Тувыл ань Ка̄пъя о̄йк ань Я̄ӈкыӈ ща̄рыщ ва̄тан юрт тотуӈкв та минас. Таӈкыр хаслы хӯрум хо̄пт ке̄рыс, та минас. Хоса ман ва̄ти яласас, ёхтыс, хӯрум пыганэ о̄ньгыл тотсанэ. Минаме порат, ань нэ̄тэ Я̄ӈкыӈ ща̄рыщ ва̄та хӯрум апщитэ̄н ла̄выс: – Тах ты миннэм хӯрмит тув на̄н ёхтэ̄н тув, ань Ка̄пъя о̄йка па̄лт. Са̄лыт тыгле тотъянув. Хоса ман ва̄ти о̄лсыт. Та о̄лэ̄гыт. Та хурип ёмас кӯтюв о̄ньщасыт, са̄лы кӯтюв. Со̄тыр са̄лы палт ке̄тъяныл, акв щёс мӯвылматы, юв ёхты. Ёмас ке, лэ̄г хосги. Ос ат ке а̄ртми: хотты сурты, хотты па̄сыг кональ ке мины та щӣньги. Китыглаве, нас щӣньги. Ань о̄ньганыл ёхтуме хӯрмит тӯя, та хурип ёмас са̄лы кӯтьваныл ань са̄лыяныл палт ке̄тсаныл. Ань Ка̄пъя о̄йк тав ке̄тытэ. Са̄лы кӯтюв миннэ э̄лыпа̄лт, са̄лыт палт иӈыт мины. Пыганэ нупыл ла̄ви: – Ялэ̄н сар, ман тыкем сун, тыкем ва̄рмаль, тыкем то̄с йӣв, тыкем са̄йт йӣв тотэ̄н. Пыганэ минасыт. Кӯтюве ялыс, са̄лыянэ палт ёхтыс. Ята: – Пӯняквепӯня, Со̄тыр са̄лы пӯӈ ло̄мтме̄н, Ма̄сйӣв та̄лыӈ тыныӈ лэ̄гын Тыщир хосге̄лн. Ма̄сйӣв та̄лыӈ та̄глыӈ лэ̄гын Тыщир хосге̄лн. Кӯтюве ат хосгитэ, лэ̄ге ат хосги. Номсы, маныр е̄мтыс. –Сӯй пил лӯпта ма̄нь не̄лмыкен ню̄витэ̄лн. Кӯтюве о̄с не̄лме ат ню̄витытэ. – Ята, во̄рин куккук ӯлыӈ туркен вос суйтыглы, лай. Во̄р хулах ӯлыӈ туркен та̄рата̄лэ̄лн. Кӯтюв ат суйтыглы. Ты маныр е̄мтыс? Та о̄лсы̄г, та о̄лсы̄г. Яа, пыганэ сысы ке̄тсанэ. Хоса ман ва̄ти яласасыт. Ха̄ль ва̄тан но̄хёхтэ̄гыт. Яа, сунсэ̄гыт, маныр тот на̄ӈки? Ань Ка̄пъя о̄йка хӯрум пыг пуссын аквъёт но̄ӈхаль минэ̄гыт, сув йӣв та̄глыӈта̄глыӈ суныл. Вущрам хо̄птыл ке̄рхатым, но̄ӈхаль хартавет. Та кос сунсэ̄гыт, ат торгамтыяныл. Яа, маныр е̄мтыс. – А̄мп по̄х щахыл та̄глыӈ ут Ул та ёхтыглыме̄ва. А̄щке̄в аман хо̄т о̄лы? Хоталь миныгламке̄тэ? Ёрнкол ань а̄тим. Сунсэ̄гыт, хӯрум сун ёлаль ты сӯлттэ̄гыт. Та̄н хӯрум а̄пщи ёлаль ань та̄лматасыт. Ща̄нь о̄ньщам, а̄щ о̄ньщам хӯрум пыг та минэ̄гыт. Ха̄ль ва̄т ёлыпа̄лн ёхтысыт. Яныг ягпыганыл сӯлттыме̄тэ па̄лха̄льйӣве по̄ри утыгпас, тув хотрагатас. Тот та ёхтувес, о̄втаӈ па̄лха̄льйӣвыл тот та тотыгпавес. Китыг та сӯлттэ̄г, кит а̄пщи. Акватэ о̄с ань сунэ̄ныл хотрагатас. Пе̄с совъя ва̄ил о̄лэ̄гыт, совъя ва̄й ква̄лге хотнирасаӈкв ёлпо̄йтыгпа̄лас. Тув о̄с та хультыгпас. Хультыгпас, о̄с та ёхтувес. Тот та хультыс. Ма̄нь а̄пщитэ̄н арыгтас. Яа, хоса ман ва̄ти сӯлтты. Юил ты ёхтаве. Сунсы, ты ёхтаве. Ёхтуӈкв патвес, ань а̄хвтас осыл сунэ по̄ри хисатас. Хот рагатас. Та ха̄йты, та ха̄йты. Хоса ман ва̄ти ла̄глыл ха̄йтыс. Аквматэ̄рт сунсы, ты ню̄саве, па̄нт а̄хвтас ёлыпа̄лн та щалтапас, тув ань тӯйтыгпахтас. Тот та хуи. Хоса ман ва̄ти хуяс. Нэ̄матыр суй а̄ти, нэ̄матыр а̄ти. Но̄хква̄лыс, та сунсглахты. Нэ̄мхотьют а̄ти. Яа, маныр ва̄руӈкв. Лай: – А̄щин о̄лум тыныӈ ма̄кем, Хоталь хӯлянтыке̄лум. Со̄тыр са̄лы ма̄нь пӯӈло̄мтум Хоталь ню̄вумтаптувес? Та э̄ргыс, такви уре номсахтас. Та лю̄ляхо̄лас, номсахтас, э̄ргыс. Тувыл та ё̄мантас. Лай: – А̄щум о̄лум ты̄ныӈ колъёр Нас кос ё̄мыгта̄лылум. Тув минас. Яа, хо̄лы ат о̄ньще̄гыт, нэ̄матыр ат о̄ньще̄гыт. Сунсыглахты. Хӯрыгсов ёлпиныме, па̄нт а̄хвтас ёлыпа̄лна. Ня̄нь тот хуи, тыньщаӈ тот хуи. Яа, маныр ва̄руӈкв? Тэ̄нут хо̄нтас. Хоталь минуӈкв? Такви ат ва̄гтэ. Та номсахтас, та номсахтас: «Мо̄т са̄лыӈ колна тув минэ̄гум, сар тув ялэ̄гум. Аман хоса минэ̄гум, аман ва̄ти минэ̄гум, тув ялэ̄гум». Та минас. Тув иӈыт ёхты. Са̄лы а̄ти, нэ̄матыр а̄ти, колъёр о̄с а̄ти. – По̄ри тулсып по̄ри юв Хо̄таль лакванта̄ламын, Сэ̄мыл тулсып сысы мины, По̄ри тулсып по̄ри лакви. Са̄лыт ань по̄ри тотавет, по̄ри ва̄нтлэ̄гыт. Та ё̄мыс, та ё̄мыс. Э̄т ё̄мыс, хо̄тал ё̄мыс. Та ёхтыс, тув ёхтыс. – Яа, маныр ка̄с. Маныр потыр, маныр ва̄рмаль, маныр ла̄тыӈ? Та лю̄ляхо̄лас, лю̄ляхо̄лас. – Со̄тыр са̄лы пӯӈло̄мтув хота̄рмалтаве̄сыт. Ка̄пъя о̄йк хӯрум пыг о̄лсӯв. Арыгтамум аква ам. Маныр ва̄руӈкв? – Наӈ маныр ва̄ре̄гн? – А̄нумн таӈкыр хаслы хӯрум хо̄пт ке̄рен. Са̄кваляк сампа хӯрум хо̄пт юил нэ̄гъянум. Тувыл та майвес. Таӈкыр хаслы хӯрум хо̄птыл та сӯлтты. Лай: – Нё̄рин вальйӣв нумипа̄лныл, Нумылнува ӯсувла̄лэ̄на, Нё̄рин ахвтас нумипа̄лныл Нӯмылнувыл минанта̄лэ̄на. Вущрам хо̄птанэ̄тыл ань ёлыл мины, ма̄ мощщакв нумпа̄лнылнув. Минаме э̄лыпа̄лт ла̄выс: – Ты миннэм са̄тыт хо̄тал таӈкыр хаслы хӯрум хо̄птын юв ёхты. Са̄кваляк сампа хӯрум хо̄птын э̄лаль та минэ̄гыт. Та хо̄птанэ̄тыл та сӯлттас, та сӯлттас. Аман э̄т сӯлттас, хӯрум сӯлттас. Аквмартэ̄т, яа, нумыл миннэ хулах ро̄ӈхувла̄лы: «Хувых». Хулах о̄йк ро̄ӈхувла̄лы. – Ты хо̄тал хӯрмит хо̄тал ань, Ка̄пъя о̄йк са̄лыт во̄р ӯлтта ты уста̄вет тах. Во̄р ӯлтта ты тотавет. Таӈкыр хаслы хо̄птанэ хот та та̄ратасанэ. Солвал сампа хӯрум хо̄птэ, са̄кваляк сампа хӯрум хо̄птанэ̄тыл э̄лаль мины. – Са̄кваляк сампа хӯрум хо̄птум, Солвал сампа хӯрум хо̄птум Ты ке ке̄рантыке̄нум, Ты ке минмыгтэгина. Ха̄йтнэ(га) пув(ы)с нуми па̄лна Но̄халапанталэ̄н(а). Миннэ пувыс тулсып хольтыл На̄н ты лапантыке̄н(а). Тащир та минас. Хоса ман ва̄ти минас. Ос ань та са̄кваляк сампа хӯрум хо̄птэ̄тыл юил та ёхтысанэ. Во̄р ӯлтта унсуӈкв ат ве̄рмысыт. Иӈыт а̄лыме̄гыт. Я̄ӈкыӈ ща̄рыщ ва̄т хӯрум пыг са̄лы по̄сэ̄гыт. Ка̄пъя о̄йк са̄лыт по̄сэ̄гыт. Ща̄няныл тай э̄ргим ӯнлы, хартаве. О̄ньге, тай, лю̄ньщим ӯнлы. Ва̄гтэ, ань па̄нтэ арыгтас. Хоса ман ва̄ти тащир минасыт. Яа, а̄ӈкватас, па̄нтэ ӯнлы. Са̄ртын щё̄питам, ань хо̄лыянэ тахурип та̄к тыньщаӈ щё̄питас а̄лмаян щирыл. Па̄нтэ кисувлас, хо̄лыянэ та ёлпинумтасанэ. Я̄ӈкыӈ ща̄рыщ ва̄т о̄ныпе, лай: – Манрыг ёлпо̄йтыгпа̄ласын наӈ? – Ам тай ква̄лумпал хо̄птум ань ка̄тэ тув пиныс, хотутыгпаслум. Ань ва̄нт сун хо̄птэ. Номсы, аманрыг. – Наӈ тах ты ма̄нь о̄кка, ма̄нь са̄лын тах юв ёхты, лохащлахтуӈкв паты, наӈ ла̄вен: «Ты ань тав ёхтыс». Ва̄гтэ, па̄нтэ тах ёхты. (Мощ хотнув ёрувласлум, э̄лытнув итъямтахтасум. ) Па̄нтэ̄н ла̄ваве: – Наӈ Я̄ӈкыӈ ща̄рыщ ва̄таӈ хӯрум о̄втаӈ пыг , хӯрум ня̄лыӈ пыг осма ёлыпа̄лт пуссын ня̄ланылёвтаныл хотяктэ̄н. Кӯтюв ке хормыгты тах, кон ул ква̄лэн. Ань торгамтастэ. Тувыл аквматэ̄рт, со̄ль. Ва̄гтэ, ань па̄нтэ ты ёхты. – На̄н ос о̄ньганылн ла̄вавен, са̄лыянын палт Ка̄пъя о̄йка пӯӈло̄мт ла̄кква ул вос минэ̄гыт. Ты Нё̄рыӈ ма̄, ты со̄втыӈ ма̄, аняг о̄ньще̄н». Та минасыт. та̄лматасыт. Ня̄ланылё̄втаныл ёт висаныл. Ята, Ка̄пъя о̄йк ма̄нь пыг та ро̄ӈхувла̄лым сӯлтты. Ро̄ӈхувла̄лы, ань юв. Лай: – Са̄кваляк сампа хӯрум хо̄птум Хо̄птанум ве̄рманта̄лэ̄гыт. Миннэ(га) пувыс нумипа̄лныл Ёл та патанта̄мыкем. Ха̄йтнэ(га) пувыс нумипа̄лныл, Ёл та ёхтыгла̄лкема. (Мо̄йтанум ань ёрувлыянум. ) Тащир та ёхтыс. Таяныл ань Ка̄пъя о̄йк пӯӈло̄мтаныл мӯвылтым та сӯлттэ̄гыт ля̄льт. Ля̄льт сӯлттэ̄гыт. Мо̄тан ня̄лэ кос хасмыгты, ня̄лэ хотсаквалы. Китыт кос хасмыгты, та̄нэ хотто̄лматы. Хӯрмит кос хасмыгты, ё̄втэ хотсаквалас. Пуссын тот та порсласанэ. Аман хоса тот ман ва̄ти пуссын тув та ра̄гматасыт. Я̄ӈкыӈ ща̄рыщ ва̄т хӯрум а̄пщитэ. Ё̄рнколн тув ёхтыс. Яа, о̄ньге э̄кв ӯнлы, суйты: – Ка̄пъя о̄йка яныгса̄т, со̄тыр са̄т са̄лы А̄пщике̄нум по̄санта̄лэ̄гыт, Ма̄щтыр ва̄рнут ма̄нь ка̄тке̄гум А̄пщиянум ва̄ранта̄лэ̄гум. Аквматэ̄рт ё̄рнкол ань курсалтаӈкв патвес. Яа, маныр е̄мтыс, китыглахты. – А, тай окка са̄лы юв ёхтыс. Ё̄рнкол а̄ви па̄лыгпӯсвес. Яа, Ка̄пъя о̄йк ма̄нь пыгрищ тот лю̄ли. О̄ньге харни щё̄льщи хурил ва̄рапахтас, та ояс. Са̄кваляк сампа хӯрум хо̄птэ̄тыл та кос минас: но̄хлапсы, ёлпатсы. Юил ат ёхтытэ. Хоса ман ва̄ти ня̄влыстэ, о̄ньге э̄кв сахитэ та вущкасас, ва̄й та вущкасас. Юил ат ёхтыстэ. Хоса ман ва̄ти ня̄влыстэ, тыа̄ти, юв та ё̄ӈхас. Юв ё̄ӈхас, ань о̄ньге палт ёхтыс. Са̄кваляк сампа хӯрум хо̄птэ о̄с э̄лаль тӯщтысанэ. Ка̄пъя о̄йк а̄ще ма̄ло̄мтна, витло̄мтна, ань о̄ньге ювле та тотастэ. Хоса ман ва̄ти минасыг. Та о̄лум ма̄нылн ёхтысыт, о̄ньге ань пыгрищиӈ та̄гыл. Са̄т я̄ӈк тӯщтысы̄г, са̄т хансаӈ тӯщтысы̄г. Юв ёхтысы̄г, йирыг та тӯщтысанэ̄н. – Няӈра турпа тӯрыӈ вот, Во̄т вос ва̄рсанта̄лнувын. Няӈра турпа тӯрыӈ во̄т(а) Во̄т вос хо̄игла̄лнува. Я̄ӈк ща̄рыщ ва̄та ва̄танувл Ул вос ёхтала̄лнувкве. Та щирыл э̄ргыс. Тувыл та йирхатсы̄г. Я̄ӈк са̄т тӯщтысы̄г, са̄т хансаӈ тӯщтысы̄г. О̄ньге̄н э̄кв ат ёхтыс. А̄пщиянэ порславе̄сыт. Тэ̄нки э̄лаль ань та щуне̄г, ань та о̄лэ̄г. Ты мо̄йт а̄нумн Мария Васильевна Тасманова 2004 тал порат мо̄йтыстэ. Мария Васильевна а̄пщитэ̄нтыл о̄лэ̄г. А̄пщитэ наме Алексей Васильевич Тасманов. Тэ̄н Лэ̄пла я̄ талихт пе̄с Миран-Ващка па̄вылт о̄лэ̄г, йильпи кол мо̄лтыт тув ӯнттысы̄г. Но̄т ос щунь тэ̄натэ̄н. Пупганэ̄н-То̄рманэ̄н вос ӯргалаве̄г. Пуста̄гыл вос о̄лэ̄г.

1090 2014.12.19. Людмила Алгадьева

Сэ̄лнэ олнанув урыл. Округувт о̄лнэ мир акв ля̄ххал урыл акваг потыртэ̄гыт, йильпи 2015 та̄лныл лӯима̄т рӯпитан ма̄хум «районный коэффициентыг» ла̄внэ олнаныл хотвиӈкв ве̄рмавет. Тамле ва̄рмаль ке ва̄раве, ма̄н тыт рӯпитан хо̄тпат мощща олн сэ̄луӈкве патэ̄в. Ань ма̄н пуссын 1, 7 са̄вит районный коэффициентыл ойтаве̄в, йильпи са̄ккон щирыл 1, 5 са̄витыг ва̄раве. Кондинский районт 1, 3 са̄вит ма̄хум ойтуӈкве патавет. Вячеслав Тетёкин Москва ӯст Государственный Думат депутатыг рӯпиты. Тав тыт ля̄ххал тотнэ хо̄тпат ёт хо̄нтхатыгламе порат ты ва̄рмаль урыл о̄с потыртас. Тав ла̄выс, тамле са̄ккон пирмайтаӈкв щар ат ро̄ви. Москва ӯст рӯпитан кӯщаит та̄нки лӯима̄т ат о̄лсыт, хумус ма̄хум тыт рӯпитэ̄гыт, хумус тыт о̄лэ̄гыт, ат ва̄ганыл. Тыт о̄лнэ мирн тэ̄ӈкве ёмащакв э̄ри, са̄в маснут ёвтуӈкве э̄ри. Ащирмаӈ хо̄талыт порат ма̄хум на̄йпос, ре̄г ма̄гсыл са̄в олн ойтэ̄гыт. О̄йка ла̄выс, ма̄хум мощщанув олныл ойтуӈкве ке патавет, са̄в ще̄мьят мо̄т ма̄н о̄луӈкве минмыгтэ̄гыт. Ань Россия янытыл ма̄хум пуссын ёмащакв о̄лэ̄гыт, са̄в олн сэ̄лэ̄гыт, тыи ма̄гсыл ань лӯима̄т мощща э̄лумхо̄лас рӯпитаӈкве ка̄сащи. Ма̄хум тыт э̄лаль вос рӯпитасыт, та̄н сэ̄лум олнаныл ва̄тихал но̄хнё̄туӈкве э̄ре̄гыт. В. Тетёкин округув янытыл яласас, тыт о̄лнэ ма̄хум ёт хо̄нтхатыглас. Са̄в хо̄тпа таве̄н ла̄всыт, тамле са̄ккон ке пирмайтаве, та̄н мо̄т ма̄н о̄луӈкве минэ̄гыт, тамле та̄рвитыӈ рӯпата ва̄руӈкве тыт воссыг ат патэ̄гыт. Тав ла̄выс, ты са̄кконнэ̄пак пирмайтын э̄лыпа̄лт о̄влэ̄т лӯима̄т о̄лнэ ма̄хум китыглаӈкве э̄рыс. Тамле са̄ккон ул вос пирмайтаве, тав ма̄н округувн хумус ялыс, ма̄хум манхурип номт ты са̄ккон урыл о̄ньще̄гыт, Государственный Думат рӯпитан депутатытн тах потырты.

1090 2014.12.19. Александр ВЬЮТКИН

Йильпи та̄л ты ляпами. Ва̄т са̄грапнал э̄тпос ловит хо̄талэ̄т Россия ма̄ янытыл йильпи та̄л тотнэ, ащирма ва̄рнэ я̄ӈк тусыӈ о̄йкат онтоловиттыг Ханты-Мансийск ӯст атхатыгласыт. Касыланыл хӯрум хо̄тал сыс минас. Каснэ ма̄гсыл хо̄тхуйплов ма̄ныл тусыӈ о̄йкат апыг а̄гияныл ёт ёхталасыт. Великий Устюг ӯсныл щар яныг Дед Мороз ёхталас. Тав Россия ма̄ янытыл ма̄к яныг ащирма тотнэ о̄йкаг ла̄ваве. Тав тув пе̄рияме па̄сныл ты та̄л атхуйплов та̄л минас. Ащирма тотнэ о̄йкат янытлан кастыл ӯс котильн са̄в мир ёхталас. Кон ащирмаӈ кос о̄лыс, нэ̄мхотьют ат по̄львес. Акв ма̄т по̄льтахтым нэ̄мхотьют ат лю̄лис. Янгема̄не пуссын йӣквсыт, э̄ргысыт ос ёнгысыт.

1090 2014.12.19. Валентина УЗЕЛЬ

Округ кӯщаюв ма̄ньщи ос ханты ла̄тӈыг урыл потыртас. Округув намхо̄талэ̄т ва̄т са̄грапнал саквалан э̄тпос 10 хо̄талэ̄т округ Дума депутатыт акванатхатыгласыт. Та̄н о̄ста са̄в са̄ккон йильпи щирыл хассаныл. О̄влэ̄т та урыл потыртасыт. Та̄н ётаныл рӯпитам о̄йка В. С. Валеев по̄ханте̄тсаныл, тав пе̄нтсылэ ань мо̄т хо̄тпа рӯпитаӈкв паты. Та депутат лю̄ль ва̄рум, тэ̄нут тыналан нэ̄ са̄всыр лю̄ль ла̄тӈыл пиныстэ. Ляпат камера о̄лум, ты ва̄рмаль по̄слыма, ань ты тина ищхӣпыӈ утыт ка̄салаӈкв ро̄ви. Тувыл ма̄хум янытлаве̄сыт, Ханты-Мансийск ӯс кӯщай Василий Филипенко янытлавес, ты ма̄н округ о̄выл кӯщаюв Александр Филипенко тав пыге, тав ма̄гылн тагатан по̄сыл майвес. Тав ётэ 18 хо̄тпа округ Дума па̄лыл Почетный грамота нэ̄пакыл майве̄сыт. Сӯкыр э̄тпосныл ма̄н о̄лнэ коланув ма̄гсыл са̄внув олн ойтуӈкв ла̄ввесӯв, кол ёмащакв щё̄питан ма̄гсыл ты олн ювпуваве. Ань округувт о̄лнэ са̄выӈпа̄лэ ма̄хум ты олн ойтуӈкв ат ка̄саще̄гыт, са̄всыр яныг кӯщаянувн пищма хансэ̄гыт. Тыи ма̄гыс ты ва̄рмаль урыл хансым са̄ккон акваг йильпи щирыл та хансаве. Ань депутатма̄хум тамле ла̄тыӈ тув хассыт – йильпи колн ущты о̄лмыгтам ма̄хум 5 та̄л ты ва̄рмаль ма̄гыс олн ойтуӈкв ат патэ̄гыт. Кол ӯнттын порат олн ойтум ма̄хум, та̄н рущ ла̄тӈыл «дольщикыг» ла̄вавет, та̄н о̄с матахмат та̄л ойтхатуӈкв ат патэ̄гыт. Округувт ты олн атнэ ма̄гыс «Югорский» нампа фонд ва̄рвес. Та̄наныл уральтан ма̄гыс ань комиссия ва̄раве. Ос ка̄сыӈ кол ма̄гыс мирн ойтым олныт я̄нас атуӈкв патавет, акван ат пинавет. Ты хосыт кос хоты колт о̄лнэ хо̄тпа ва̄ӈкв паты, тав о̄лнэ колытныл манах солко̄ви атвес, хумус та̄н холтавет. Округув янытыл манах олн холтаве, ул ка̄сыӈ сапра̄нит депутатыт ты урыл потыртэ̄гыт. Ань та̄лув ты оигпи. Олн ловиньтан департаментыт кӯщай нэ̄ Вера Дюдина та̄нанылн потыртас, онтолов э̄тпос сыс округувт 119 млрд. солко̄ви холтвес, 8 млрд. солко̄ви со̄пасыг хультыс. Та̄л оигпан мус та̄н матыр э̄рнэ ва̄рмаль ма̄гыс тах холтавет. Депутатыт рӯпитаманыл халт округ кӯщай нэ̄ Наталья Комарова ты сапра̄нин ёхталас. Тав мощ хӯнтлыс, са̄ккон хаснэ ма̄хум маныр урыл потыртэ̄гыт. Тувыл та̄наныл округ намхо̄талэ кастыл янытласанэ ос ты урыл потыртас. Ты 2014 та̄л сыс депутат ма̄хум 114 са̄всыр са̄ккон пирмайтасыт. Та̄н округ миркол кӯщаит ёт халанылт нё̄тхатым ёмащакв рӯпитасыт. Э̄лаль аквтох рӯпитаӈкв э̄ри. Ма̄ньщи ос ханты ла̄тӈыг урыл тав тох ла̄выс. Ма̄н округувт ты ла̄тӈыг э̄лаль тотнэ ма̄гыс яныг рӯпата ва̄руӈкв э̄ри. Ты рӯпата соссаӈ мир Ассамблеят рӯпитан ма̄хум акваг та̄рапаттым вос о̄ньщияныл. Мощ ётылнув журналистыт Еремей Айпин титыгласаныл: «Ма̄ньщи ос ханты ла̄тӈыг ӯргалан ма̄гыс округувт ман мощща рӯпата ва̄раве? Манрыг яныг кӯщаюв Н. Комарова ты урыл ва̄тихал потырта̄лы? » Еремей Данилович ла̄выс, со̄ль, ань ма̄ньщи манос ханты ла̄тыӈ ва̄нэ хо̄тпат акваг мощщаме̄гыт. Школат ла̄тыӈ ханищтан урокыт хотвуйве̄сыт, туп ка̄сащан ня̄врамыт та̄н ща̄нь ла̄тыӈ ханищтэ̄гыт. Ёмас ханищтан нэ̄пакыт о̄с а̄тимыт, йильпи нэ̄пакыт хансуӈкв э̄ре̄гыт. Са̄в ва̄рмаль о̄лы, са̄в рӯпата ва̄руӈкв э̄ри. Матъёмас ань округ кӯщаюв ты урыл акваг потыртаӈкв патыс.

1090 2014.12.19. Александр ВЬЮТКИН

Сытам во̄рыӈ ма̄ тиснэ во̄руй. Ханты-Мансийск ӯс ос Шапша па̄выл ляпат о̄лнэ во̄р «Самаровский чугас» нампа колт рӯпитан ма̄хмытын аквписыг ӯргалым о̄ньщаве. Ка̄сыӈ та̄л тэ̄лы ащирмат ос йильпи тӯйт патум юипа̄лт во̄рт о̄лнэ ӯянув ха̄йтыгтан лё̄ӈханыл щирыл ловиньтавет. Ань тох туп ма̄колыӈо̄йкат хансаныл щирыл ловиньтаӈкве ат а̄ртми. Та̄н ань та̄нти ёмщакв щё̄питым, тӯйтыл нумыл лаплэ̄пхатым ма̄коланылт хуе̄гыт. Ты таквс Ханты-Мансийск ӯс ляпат ма̄хум са̄в щёс ма̄колыӈо̄йкат ка̄сала̄лсаныл. Кон хотты хо̄тпа титыглэлы̄н те: «Ӯс ляпат манах во̄рто̄лнут о̄лы? » Аквпа̄лэ ла̄ве̄гыт са̄в, мо̄тананыл атахтем, са̄тахтем. Ты урыл торыӈыщ нэ̄мхотьют ат ва̄гтэ. Ма̄ янытыл во̄рто̄лнутыт са̄всыр щирыл ловиньтавет. Ма̄н, «Самаровский чугас» во̄р ӯргалан ма̄хум, таквсы о̄выл тӯйт патыгланэ порат ма̄колыӈ о̄йкат хансаныл щирыл ловиньтыянув. Ты та̄л Ханты-Мансийск ӯс ос Шапша па̄выл ляпа во̄рт лов ма̄колыӈо̄йка ва̄щинтавес. Во̄рто̄лнутанув э̄лумхо̄лас ляпан о̄лмыгтан тэ̄ланыл нэ̄мхотьютн иӈ ат ва̄вет. Ты ва̄рмаль та̄рапаттын ма̄гсыл ма̄вит, во̄ре ос во̄рӯй ӯргалан департамент колт ма̄хум ты рӯпитэ̄гыт. Та̄н ань о̄щнэ номтаныл тамле: «Ань ты юио̄выл ат та̄л сыс округувт хо̄тал нэ̄глын е̄рт сака са̄в ма̄во̄й ос газ но̄хвинэ рӯпата ва̄раве. Тапалъе̄рт о̄лнэ во̄руит сытам ма̄наныл ма̄шинал э̄лаюв яласавес. Тав, улпыл, тувыл тот о̄лнэ во̄руянув хо̄тал ёлпа̄тыран сытамнув о̄лнэ ма̄ нупыл минэ̄гыт. Тувыл ос Ханты-Мансийск ӯс по̄хат порс атнэ яныг ма̄ о̄лы. Тав лю̄ль саюм атэ во̄тн э̄латотыглаве, таи ма̄гсыл ма̄колыӈо̄йкат та ляпа атхатэ̄гыт. Тот ляпат рӯпитан ма̄хумн та̄н ва̄тихал ва̄щинтавет. «Самаровский чугас» ма̄т рӯпитан ма̄хум ла̄ве̄гыт, Ханты-Мансийск ӯс ос Шапша па̄выл по̄хат хотты хо̄тпат во̄рто̄лнутыт те ва̄щинтасыт, ты урыл та̄нанылн ля̄ххал вос те̄тэ̄гыт. Во̄р ӯргалан ма̄хум потраныл Александр ВЬЮТКИН ма̄ньщи ла̄тӈыл хансыстэ.

1090 2014.12.19. Валентина УЗЕЛЬ

Тав ляпа рӯтанэ хо̄нтлын ма̄т о̄лэ̄гыт. Ты хурит по̄слым нэ̄ Евгения Алексеевна Полякова Югорск ӯст о̄лы. Тав такви уре̄т тох потыртас. Ща̄нягеа̄щаге ань Донбасс ма̄т о̄лэ̄г. Мо̄т ма̄н о̄лмыгтаӈкв щар ат ка̄саще̄г. Тэ̄н ань сас яныгпа̄ла хо̄тпаг. Тав а̄ще военный хо̄тпаг о̄лыс. Лусытаме̄т ще̄мьяӈ та̄гыл са̄всыр ма̄т о̄лсыт. Лусытан хо̄тпат акв ма̄т ат о̄лэ̄гыт, акваг тыглетувле те̄тыглавет. Ты а̄гитэ̄н лё̄ӈхыт миныманыл порат на̄иӈтуйтыт самын патыс. А̄ги ма̄ньлатыг о̄лме порат оматэ̄н акваг ла̄выглавес, лусытан хо̄тпа хумыг ул вос выгтэ. Ос тох та е̄мтыс, а̄гитэ о̄с лусытан хо̄тпа палт минас. Евгения Алексеевна о̄йкатэ 1986 та̄лт ма̄н округувн Комсомольский па̄вылн рӯпитаӈкв те̄твес. Ты па̄выл ётыл Югорск ӯсыг ва̄рвес. Та па̄сыл тот та о̄лэ̄гыт. Тит пыгаге я̄нас о̄лэ̄г, акватэ Югорск ӯст ща̄не ляпат о̄лы, мо̄т пыге Украина ма̄т йильпи рӯпитан ма̄ ва̄рыс, кӯщаиг тот о̄лы. О̄йкатэ̄нтыл титтыгминамме̄н юипа̄лт тав ня̄врамаге такви янмалтасаге. Тав школа юипа̄лт Киев ӯст консерваториякол а̄стлас. Акв хотты юио̄выл та̄лт нэ̄ та ӯсн ялыс, ханищтахтам колэ̄н щалтсас. Маныр тав тот ка̄салас, ань ты мус сыме ща̄рги. Ла̄выс, та кол ханищтан кол хурип а̄ти, тув мус лю̄лиг та ва̄рвес. Матъёмас ты ва̄рмаль таве ханищтам хо̄тпат ат ва̄саныл, та̄н ань пуссын а̄тимыг е̄мтмыт. Ты нэ̄ ань Югорск, Советский ӯсыгт ос Советский районт о̄лнэ ма̄ньлат ма̄хум ёт рӯпиты. Тав такви ёнгын кол пӯнсыс, тув э̄ргуӈкв ос йӣквуӈкв ха̄снэ ма̄ньлат хо̄тпат акванатсанэ. Та̄н ма̄гсыланыл стихыт хансы, а̄гитпыгыт ос тав стиханэ э̄ргыг ва̄рияныл манос спектакль щирыл ёнгияныл. Тит э̄тпос сыс акв щёс ӯст о̄лнэ мир акванатыглэ̄гыт, концерт та̄нанылн суссылтэ̄гыт. Ялпыӈ хо̄талыт о̄лнэ порат та̄н тув о̄с акваг во̄виньта̄лавет. Ам таве титыгласлум, мо̄т ма̄н о̄лмыгтан номт о̄ньщи ман а̄ти. Тав ювле ла̄выс, ты урыл щар ат номсахты, тыт тав са̄в та̄л о̄лы, э̄лаль ты ма̄т о̄луӈкв паты.

1090 2014.12.19. Валентина УЗЕЛЬ

Яныг кӯщай э̄ква янытлавес. Округув янытыл Любовь Чистова намыӈсуиӈ хо̄тпаг о̄лы. Ювле хультум э̄тпос 28 хо̄талэ̄т э̄ква 65 та̄лэ то̄влыс. Тав «Почетный гражданин ХМАО-Югры», «Заслуженный юрист РФ», юридический наукат кандидат, тамле яныг намыт ты о̄ньщи. Ань Общественная палата нампа ма̄т яныг кӯщаиг рӯпиты. Любовь Александровна Ханты-Мансийск ӯст самын патыс, школа тыт а̄стлас. Э̄лаль тав Свердловский юридический институтн ханищтахтункв минас, тувыл юв рӯпитаӈкв те̄твес. Тыт хус арыгтем та̄л прокуратурат рӯпитас. 1990 та̄л па̄сыл 2006 та̄л мус мирн округ Дума депутатыг пе̄рия̄лвес. Матахмат та̄л Дума кӯщай ва̄ӈыг хо̄тпаг о̄лыс. Са̄в та̄л ювле хультум порат нэ̄ хо̄тпат ма̄гыс общественный организация ва̄рыс, рущ ла̄тӈыл «Женская инициатива» ла̄ваве. Та̄н ань ты мус аквъёт рӯпитэ̄гыт, та̄рвитыӈ ва̄рмаль о̄щнэ нэ̄кветн нё̄тэ̄гыт. Ань ты э̄ква са̄в хо̄тпатн янытлавес. Округ Дума кӯщай хум Борис Хохряков тамле ла̄тыӈ таве̄н те̄тыс: «Наӈ са̄в та̄л ма̄н округувт о̄лэ̄гын, са̄в та̄л тыт рӯпитэ̄гын. Наӈ намын ань са̄в хо̄тпан ва̄ве. Тыт рӯпитанэн сыс ма̄н та̄рапаттыслӯв, наӈ номтыӈ политикхо̄тпа, рӯпатан сака ёмащакв ва̄рилын, са̄в хо̄тпан нё̄тэ̄гын. Наӈ ё̄рын хосыт ма̄н округувт са̄в э̄рнэ са̄ккон хасвес, са̄в хо̄тпат нё̄тве̄сыт. Ань ты ялпыӈ хо̄талын кастыл ма̄н наӈын са̄в ёмас сымыӈ ла̄тыӈ ла̄ве̄в – пуста̄гыл о̄лэн, рӯпатант са̄в ёмас тэ̄ла ва̄рен. Ка̄сыӈ йильпи хо̄тал наӈ ма̄гсылын посыӈыг вос о̄лы, номтыт о̄щнэ ва̄рмалянын пуссын ёмас тэ̄лаг вос е̄мтэ̄гыт. » Э̄ква янытламе юипа̄лт яныг кӯщай о̄йка Любовь Александровнан мӯйлупса мис. Э̄ква таве̄н ос такви ущты хансум йильпи нэ̄паке мӯйлуптастэ. Округ Думаныл те̄тым ля̄ххал ма̄ньщи ла̄тӈыл Валентина Хозумова хансыстэ.

1090 2014.12.19. Анна АЛГАДЬЕВА

Ам яныг ащо̄йкагумане̄квагум урыл. Ам яныг ащо̄йкам наме Николай Михайлович Сагандуков. Колта̄гланылт тав хӯрмит ня̄врамыг о̄лыс, 1926 та̄л порат Курганский район Наунак па̄вылт самын патыс. Ма̄нь поратэ̄т А̄с я̄ ва̄тат яныгмас. 1942 та̄лт Полноват па̄выл школат 7 класс а̄стлас. 1942 та̄лныл 1945 та̄л мус Ханты-Мансийск ӯст медучилищат ханищтахтас. Медучилище а̄стламе юипа̄лт Хальӯс районын ювле ёхтыс, 37 та̄л Ня̄хщамво̄ль пӯльницат рӯпитас. Ты сыс ос 5 та̄л леккарыг ханищтахтас, фельдшерыг рӯпитас. Ат та̄л «Красный чумт» па̄влыт мус яласан ле̄ккарыг о̄лыс. Са̄в та̄л яныг ле̄ккарыг пульницат о̄лыс. Ня̄врам самын паттын порат кос хунь ма̄хум таве ӯрсаныл. Илттыг э̄рнэ операция порат ле̄ккарытн нё̄тыс. 1981 та̄лт пенсиян ялыс, тувыл акв та̄л о̄с рӯпитас ос ущ акваг ӯщлахтуӈкв минас. 1947 та̄л порат Ня̄хщамволиӈ миркол щекретарь а̄ги нэ̄гыг тотастэ. Нила пыг янмалтасыг: Владимир, Александр, Виктор ос Борис. Верховный Совет СССР па̄лныл кит металь о̄ньщи: «За трудовое отличие» 1971 та̄лт мӯйлупта̄лвес ос «Ветеран труда» 1982 та̄л порат майлувес. 2008 та̄лт хотталь щалтыс. Ам яныг ане̄квам наме Татьяна Ивановна Сагандукова. Тав Ня̄хщамво̄льт 1927 та̄лт та̄л котиль э̄тпос 25 хо̄талэ̄т самын патыс. Та̄н коланылт ат а̄ги о̄лсыт, яныгмасыт. Хо̄т та̄л яныт порат тав школан минас, 4 класс мус Ня̄хщамво̄лиӈ школат ханищтахтас, 5 класс Саранпа̄вылт ханищтахтас. 6-7 классыг Сосьват. 1942 та̄л порат Нахрачинский заводн рӯпитаӈкв минас, пил вӣнэ ма̄т о̄лыс. Тувыл Тапссунт хӯл алыщлан ма̄т рыбучастокт рӯпитас: таквсытӯя хӯл вис, пирмайтас, тэ̄лы конторат рӯпитас. 1946 та̄лт Ня̄хщамво̄ль мирколт щекретариг о̄лыс. Акв та та̄л лӯпта э̄тпос 5 числат хум ва̄рыс, Николай Михайлович Сагандуков палт минас. Рыпкоопт, порумхозт, испедицият рӯпитас, тувыл о̄с мирколн патсас. Ань пенсият о̄лы. Ам яныг ане̄квам сака э̄руптылум, тав палтылэ мӯйлуӈкв ва̄тихал ялантэ̄гум. Иван Кешфетдинов, Ня̄хщамво̄ль па̄выл школат 6 классыт ханищтахтын пыг, хансум потыр ма̄ньщи ла̄тӈыг Анна АЛГАДЬЕВАн толмащлавес.

1090 2014.12.19. Николай МЕРОВ

Тыналахтын хо̄тпат ёхталасыт. Ты та̄л ва̄т са̄грапнал э̄тпос ловит хо̄талт ма̄н округув 84 та̄лэ то̄влыс. Ты кастыл округт о̄лнэ та̄нки рӯпата ва̄рнэ хо̄тпат Ханты-Мансийск ӯсн ёхталасыт. Та̄н та̄нки ва̄рум тэ̄нутпормасаныл тыт суссылтасыт ос тыналасыт. Рущ щирыл ты ва̄рмаль «Товары земли Югорской» ла̄ваве. Ты тэ̄ла округ мирколт рӯпитан хо̄тпат ос тыналахтын ма̄хумн нё̄тмил ва̄рнэ колт рӯпитан хо̄тпат та̄н э̄лаль тотуӈкве нё̄тэ̄гыт. Тыналахтын ва̄рмаль пӯснэ хо̄талт о̄выл ла̄тыӈ округ губернатор ва̄ӈын хум Сергей Михайлович Заукеев ла̄выс: «А̄нумн тыналахтын хо̄тпат тыт ка̄салаӈкве сака мӯсты. Матъёмас ма̄н тамле э̄рнэ тэ̄ла э̄лаль тотылӯв. Тыи ма̄гыс маныр э̄ри, пуссын о̄лы, туп хо̄тпа рӯпитаӈкве вос тахнув. Ань тэ̄нутпормас ма̄нки ва̄руӈкве ве̄рме̄в. Тыт суссылтан тэ̄нутыт ка̄сыӈ хо̄тпа а̄рталаӈкве ве̄рми. Пормасыт о̄с ка̄тыт пувуӈкве ро̄ви. Ётыл хо̄тпа номтэ паты ке, ты пормас тав ёвтытэ. Ань ты та̄л тэ̄нутпормас тыналан ва̄рмаль округ намхо̄талэ̄т ва̄рвес. Ам Югра ма̄т о̄лнэ ма̄хум пуссын сымыӈыщ янытлыянум. Ма̄н ма̄вт ма̄во̄й ос газ ма̄ныл но̄хвиве. Россия ма̄гыс са̄в олн сэ̄лэ̄в. Тыил сака янытлахтэ̄в кос, ос ты коныпал ань ма̄н ма̄нки тэ̄нутпормас тыт ва̄ре̄в. Ты хосыт округ экономикав ма̄нки са̄вмалтылӯв. Ос ты урыл ла̄вуӈкве таӈхе̄гум. Са̄р хо̄тал ам ты тэ̄нутпормасыт сунсым ё̄мыгтасум. Ты урыл тох номсэ̄гум, ма̄нки ты рӯпата ат ке ва̄ре̄в, нэ̄мхотьютытн ат нё̄таве̄в. Тыщир акваннё̄тхатым э̄лаль рӯпитаӈкве патэ̄в ке, округув ёмщакв но̄хво̄рмалтылӯв. Ань май мо̄т хо̄н ма̄т о̄лнэ мир ма̄н нупылув кантлым о̄лэ̄гыт. Ты хосыт хо̄н ма̄ныл тотыгла̄лым то̄ва тэ̄нутпормасыт тыналаӈкве тыг воссыг ат тотавет. Ань ам ва̄глум, ма̄н ма̄нки тэ̄нутпормас ва̄руӈкве ве̄рме̄в. Россияв яныг, рӯпата ка̄сыӈ хо̄тпа хо̄нты. Ня̄враманув, а̄пганув э̄лаль ёмщакв о̄лнэ̄ныл ма̄гыс аквъёт са̄в рӯпитаӈкве патэ̄в». Та юипа̄лт Ольга Андреевна Сидорова, тыналахтын ма̄хумн нё̄тмил ва̄рнэ колт рӯпитан нэ̄, потыртас. Тав ла̄выс, ма̄к са̄в со̄т ос щунь ма̄н округув ма̄гыс ты тыт о̄лнэ ма̄хум. Ка̄сыӈ хо̄тпа предпринимателиг рӯпитаӈкве ат ве̄рми. Ань округувт тыналахтын хо̄тпатн нё̄тмил акваг ва̄раве. Ты хосыт та̄н рӯпатаныл мӯсхал щирыл мины. Та̄н э̄лаль о̄лнэ хо̄тал урыл акваг номсэ̄гыт. Маныр тэ̄нут э̄ри, тыт пуссын о̄лы. Йильпи та̄л кастыл ка̄сыӈ хо̄тпа па̄санын атыӈ тэ̄нут ёвтуӈкве ве̄рми. Юио̄вылт кӯщай нэ̄ ла̄выс, ты рӯпата ва̄рнэ хо̄тпат акваг ӯргалаӈкве ос нё̄туӈкве тах патавет. Тувыл ос торговопромышленный палата кӯщай Альфия Павкина потыртас. Тав пуссын мӯй ма̄хум та̄нки ва̄рнэ рӯпатаныл ма̄гыс о̄с янытласанэ. Ань тыналахтын ма̄хум онтоловхуйпловит щёс акванатхатыгласыт. Ты та̄лыт сыс са̄в хо̄тпа тыналахтын ма̄н ёхталас. Выставкан тотыглам тэ̄нутпормасыт ка̄сыӈ та̄лныл акваг са̄вме̄гыт. Ма̄хум йильпи проектыт щё̄питэ̄гыт. Са̄всыр та̄рвит о̄лыглы, ос ма̄хум э̄лаль рӯпитан ё̄р акваг хо̄нтэ̄гыт. Ты тэ̄лат палт ма̄к та̄ксар хо̄тпат рӯпитэ̄гыт.

1090 2014.12.19. Людмила ТЕТКИНА

Па̄влыӈ мир о̄лупсаныл. Октябрьский район Карымкары па̄вылт хус арыгкем та̄л миркол кӯщаиг Михаил Климов о̄лы. Тав па̄влыӈ ма̄хманэ о̄лупсаныл ос та̄рвитыӈ ва̄рмаляныл ёмащакв ва̄ганэ. Кӯщай хум ла̄выс: «Карымкары ос Горнореченск па̄влыг акв миркол нупыл хансым о̄лэ̄г. Тот акв со̄тыра 360 э̄лумхо̄лас о̄лы, та̄н халанылт 140 хо̄тпа ты соссаӈ ма̄хум. Па̄влыӈ ма̄хманув ёмащакв о̄луӈкве ке ка̄саще̄гыт, та̄н рӯпитэ̄гыт, олн сэ̄лэ̄гыт. Карымкары по̄хат 2004 та̄лныл «Сургутнефтегаз» нампа компания ма̄ныл ма̄во̄й но̄хвыг. Хум хо̄тпанув пуссын тув рӯпитаӈкве патхатасыт. Рӯпитан ма̄наныл мус 25 ве̄рыста минуӈкв э̄ри. А̄лпыл хо̄т щё̄с порат тув ма̄шинал тотавет. Ӣтипа̄лаг о̄с аквта щирыл ювле ёхтэ̄гыт. Ка̄сыӈ хо̄тал тыглетувле та яласэ̄гыт. Ма̄во̄й но̄хвинэ компания па̄влув ляпат ма̄шинат яласан лё̄ӈх ва̄рыс. Ань та̄л сыс Сургут мус ялантаӈкве ве̄рме̄в. Таи лю̄ль, ты лё̄ӈхныл па̄влув мус 7 ве̄рыста яласан лё̄ӈх а̄тим. Ты компания Сургут мус яласан лё̄ӈх такви рӯпататэ ма̄гсыл ва̄рыстэ, рущ ла̄тӈыл «ведомственныиг» ла̄ваве. Мо̄т хо̄тпан ты лё̄ӈх хосыт яласаӈкве ат ро̄ви. Па̄влыӈ ма̄хманув ань пуссын тот рӯпитэ̄гыт, тыи ма̄гсыл ма̄н ты лё̄ӈх хосыт Сургут мус яласэ̄в. Яныг ӯсн хунь минэ̄в, намнэ̄паканув ётвиӈкве ла̄ваве̄в. Нэ̄пакыт щирыл ты лё̄ӈх а̄тим, тыи ма̄гсыл ты са̄т ве̄рыста ёмащакв ва̄рнэ ма̄гсыл олныл ат миве̄в. Нэ̄ хо̄тпанув ня̄врам ханищтан колт, садикт, пӯльницат рӯпитэ̄гыт. Ань совхозт, почтат, ЖКХат рӯпитан хо̄тпа ат то̄вылхаты. Пищмат, газетат ма̄хумн тотуӈкве, мис посуӈкве, па̄выл лё̄ӈхыт тӯйт хо̄тхилуӈкве нэ̄мхотьют ат ка̄сащи. Ма̄хманув пуссын нефтяникыт палт рӯпитаӈкве воратэ̄гыт, па̄вылт о̄лнэ рӯпата ва̄руӈкве ат таӈхе̄гыт. Тувыл таи ёмас, ма̄во̄й но̄хвинэ компания тыт рӯпитаӈкве о̄вылтахтас, мирув са̄вмуӈкве патыс. Ма̄ньлат хо̄тпанув мо̄т ма̄н воссыг ат ва̄нтлэ̄гыт, о̄луӈкве тыт хультэ̄гыт. Ань ка̄сыӈ та̄лныл са̄внув ня̄врам самын паты. Ам яныгмамум порат тыт школат 270 ня̄врам ханищтахтас. Тувыл колхозув рӯпитаӈкве хотпо̄йтыс, ма̄хманув мо̄т ма̄н мингаласыт. То̄нт яныгса̄т ня̄врам туп ханищтахтас. Ань 140 а̄гирищпыгрищ школан яланты. Ты та̄л ос йильпи садик ӯнттуӈкве о̄вылтавес, тув 75 ня̄врам ялантаӈкве патэ̄гыт. Ань Карымкары па̄вылт кит садикыг рӯпитэ̄г. Акв кол 1968 та̄л порат ӯнттувес, норанэ щар хотсайсыт, ка̄сыӈ та̄л мӯсхал щирыл такос щё̄питылӯв, а̄латы ёллоньхаты. Ань йильпи садик ӯнттуӈкве касыл щирыл э̄ри. О̄влэ̄т хунь ты рӯпата ва̄руӈкве о̄вылтаслӯв, нэ̄мхотьют садик ӯнттуӈкве ат касащас. Па̄влувн са̄всыр пормасыт, кирпащ, иснасыт, цемент тотуӈкве туп яныг вит порат ро̄ви. Мо̄т ма̄ныл ты утыт хартым, са̄в олн та̄н ат сэ̄лэ̄гыт, тыи ма̄гсыл тамле ма̄нь па̄вылквет колыт ӯнттуӈкве ат ка̄саще̄гыт. Ты э̄лыпа̄лт районувт кол ӯнттын организацият ёт потыртахтыгласум. Ань акв организация тыт рӯпитаӈкве ка̄сащас, садик ӯнттуӈкве моще̄рт ты о̄вылтахты. Колхоз рӯпитаме порат па̄влувт яныг клуб ӯнттувес, ёмас кол о̄лыс, тувыл на̄йн ё̄свес. Клуб ань ма̄нь пе̄с колт рӯпиты. Тот колнакыт ма̄нит, ялпыӈ хо̄талыт ос са̄всыр концертыт ва̄рыглаӈкве ма̄хум ат ве̄рме̄гыт. Йильпи клуб ӯнттын ма̄гсыл олн такос во̄ве̄в, кӯщаит ювле акваг ла̄ве̄гыт олн а̄тим. Ань мо̄т та̄рвит о̄лы, Сургут ӯсныл са̄всыр по̄х хо̄тпат па̄влувн ёхталэ̄гыт, ма̄ньлат хо̄тпанув са̄всыр лю̄ль хохса хартуӈкве, тэ̄рпи аюӈкве, лю̄ль тэ̄рпиӈ ю̄нтуп тӯщтуӈкве кащилтавет. Лё̄ӈх та̄л о̄лмув порат, ты лю̄ль урыл а̄гиянувпыганув нэ̄матыр ат ва̄сыт. Лё̄ӈх ёт тамле та̄рвит ма̄навн та тотвес. Тыи ма̄гсыл па̄влувн клубкол сака э̄ри, ма̄ньлат хо̄тпанув ёт рӯпитаӈкве ань акваг э̄ри, мо̄ри ул вос капыртэ̄гыт».

1090 2014.12.19. Николай МЕРОВ

Са̄в рӯпитам ма̄хум янытлаве̄сыт. Ты та̄л округув 84 та̄лэ то̄влум кастыл Ханты-Мансийск ӯст «Югра-Классик» нампа колт округ губернатор нэ̄ Наталья Комарова са̄в та̄л тыт рӯпитан ма̄хум янытласанэ. Пуссын аквъёт атпан арыгкем хо̄тпа о̄лыс. Кӯщай нэ̄ нила хо̄тпа урыл я̄нас потыртас. Ты Марина Александровна Плотникова, тав хус та̄л округ гимназият рущ ла̄тыӈ ос литература ня̄врамытн ханищты. Тав «Заслуженный учитель России» нам о̄ньщи. Марина Александровна ханищтан ня̄враманэ са̄всыр олимпиадат са̄в щёс но̄хпатыгласыт. Ань округувт ма̄во̄й ма̄ныл но̄хвинэ па̄сныл атпан та̄лэ то̄влыс. Ты кастыл Сергей Павлович Тосников, «Сургутнефтегаз» нампа ма̄во̄й винэ компаният ва̄т арыгкем та̄л рӯпитан хум, янытлавес. Ты хум рӯпататэ ма̄гыс «Орден за заслуги перед Отечеством» ма̄гылн тагатан по̄сыл майвес. Округув щёлыӈыг е̄мтнэ ма̄гыс ма̄к Сергей Павлович хурип ма̄хум са̄в рӯпата ты ва̄рсыт. Хунь округув экономикатэ са̄вми, мир о̄лупсатэ о̄с ёмасыг е̄мты. Махум пуста̄гыл о̄лнэ̄ныл ма̄гыс Юрий Алексеевич Чемакин о̄с са̄в рӯпата ва̄ри. Тав Сургут ӯс ке̄лп а̄гм пусмалтан пӯльницат яныг ле̄ккарыг о̄лы. Ва̄т арыгкем та̄л тот рӯпиты. Та пӯльницат ле̄ккарыт ва̄рнэ рӯпатаныл хосыт са̄в хо̄тпа ань пуста̄гыл о̄лы. Тувыл кӯщай нэ̄ о̄с акв э̄ква урыл потыртас. Ты Людмила Ивановна Голик, тав «Заслуженный строитель Югры» нам о̄ньщи. Ма̄ньлат поратэ̄т Нягань ӯсн колыт ӯнттын ва̄рмаль щирыл рӯпитаӈкве ёхтыс. О̄влэ̄т ма̄щтыр хо̄тпаг о̄лыс. Ань тав технический отдел кӯщаиг рӯпиты. Та̄н компанияныл о̄лнэ колыт, школат, ӯнсахыт, заводыт ос мо̄т са̄всыр колыт ӯнттэ̄гыт. Ты потыр юипа̄лт Наталья Владимировна ма̄хум янытлаӈкве о̄вылтасанэ. Та̄н халанылт акв ма̄ньщи хум наме ла̄ввес. Ты Никита Калистратович Партанов, «Торум Маа» музейт са̄в та̄л рӯпитам хум. Тав наукат ос соссаӈ ма̄хум йис ва̄рмалит э̄лаль тотнэ ма̄гыс Почётный намыл майвес. О̄йка наме хунь ла̄ввес, тав сэ̄ръёрыг кӯщай нэ̄ палт ё̄мыс, ка̄тэ анигластэ ос мӯйлупсал та майвес. Тамле ва̄рмаль мирн сака пӯмщиг о̄лыс. Ма̄хум маткем ка̄тпатта таве̄н та ра̄тсыт. Тувыл Нижневартовский районт о̄лнэ акв ханты хум пе̄с йис о̄лупса э̄лаль тотнэ ма̄гыс о̄с Почётный намыл майвес. Ты хум наме Виталий Егорович Казамкин, тав такви ва̄рнэ рӯпататэ̄т ӯщлахтын тэ̄ла э̄лаль тотытэ. Соссаӈ мир ва̄рмалит щирыл акв яныгпа̄ла рущ э̄ква Альбина Сергеевна Глухих мӯйлупсал ос Почётный дипломнэ̄пакыл майвес. Тав «Новости Югры» нампа газетат атпан та̄лкем рӯпиты. Округувт ты щар пе̄с газета, та̄ратан па̄сныл ань нёлса̄ткем та̄лыг е̄мтыс. Альбина Сергеевна та газетат ма̄ньщи, ханты ос ё̄рн ма̄хум о̄лупса ос о̄лнэхӯлнэ накыт урыл са̄в потыр хансыс. Тыт о̄лнэ ӯсыт, па̄влыт ос соссаӈ ма̄хманув йис та̄гыл о̄лнэ ма̄наныл пуссын яласасанэ. Тав ла̄выс, ты маим мӯйлупса пе̄с порат рӯпитам хо̄тпат номылматыглан ма̄гыс о̄ньщуӈкве патытэ.

1090 2014.12.19. Светлана РОМБАНДЕЕВА

Ма̄хум пусмалтан ле̄ккарув. Ва̄т са̄грапнал э̄тпос 19 хо̄талэ̄ ма̄н ма̄вт о̄лнэ христиан ма̄хум ма̄гыс сака яныг ялпыӈ хо̄талыг о̄лы – Николай Чудотворец манос Николай Угодник янытлан хо̄тал. 1959 та̄лт о̄с аквты хо̄талт Ха̄льӯс район Ло̄пмус па̄вылт ма̄ньщи а̄гирищ самын патыс, Валяг намаявес. Валентина Борисовна Албина са̄в та̄л Сургут ӯст о̄лы, яныг ле̄ккарыг рӯпиты. Ам тав ётэ хо̄нтхатыгласум, о̄лупсатэ урыл китыгласлум. На̄н ань э̄лаль тав потре ловиньтэлы̄н: – Ам Ло̄пмус па̄вылт самын патсум, тот яныгмасум. 1967 та̄лт таквсы школан минасум. О̄выл учителюм Галина Алексеевна Таратова. Нилыт классын ма̄н, па̄выл ня̄врамыт, Кульпасн тотвесӯв, э̄лаль тот ханищтахтасӯв, интернатт о̄лсӯв. Мо̄т па̄влытныл о̄с са̄в ня̄врамыт о̄лсыт – Кимкъясуй, Потрасуй, Сортыӈъя. 1975-1977 та̄лытт ам Ха̄льӯст ханищтахтасум. Тот о̄с интернатт о̄лсум. Са̄в ня̄врам Тэ̄к, Устрём, Ка̄сум, Восыӈтӯр, Кульпас ос мо̄т па̄влытныл ханищтахтасыт. Колнакт ма̄н нёлолов хо̄тпа о̄лсӯв – кит Тоняг, акватэ Неттина, Тэ̄к па̄вылныл о̄лсы̄г, Раиса Молданова, Галина Рябчикова, Шайтанканыл Аля Морозова о̄лыс. Ма̄н, ханты, ма̄ньщи, саран ос рущ ня̄врамыт, пуссын аквъёт ёмащакв о̄лсӯв, нэ̄мхуньт ат ля̄втыгласӯв, тэ̄ланув пуссын аквъёт ва̄рсанӯв, ёмащакв ханищтахтасӯв. Акв воспитателюв ма̄ньщи нэ̄ о̄лыс, Дина Тимофеевна Лисова, тав Потрасуй па̄вылт са̄мын патыс. Акв ос Канева, саран нэ̄. Тэ̄н сака ёмас, ласкат нэ̄г, ма̄нав пуссын э̄руптасанэ̄н. Школа а̄стламум юипа̄лт э̄лаль ам Ханты-Мансийск ӯс медучилищат ма̄нь ле̄ккарыг ханищтахтасум. Училище а̄стламум юипа̄лт Ха̄льӯс пӯльницат интенсивный терапия отделеният ма̄нь ле̄ккарыг рӯпитаӈкве патсум. Та порат тот яныг ле̄ккарыг Владимир Иванович Берсенёв о̄лыс. Тав сака мӯтраӈ ле̄ккар о̄лыс, ты о̄йка палт ам са̄в ёмас э̄рнэ тэ̄ла ханищтасум. 1983 та̄л мус тот рӯпитасум, та та̄лт ам Тюмень ӯс мединститутн ханищтахтуӈкве минасум. Институт 1990 та̄лт а̄стласлум, тувыл тыг, Сургут ӯсн, ва̄нтлысум. Ань тыхо̄тал мус тыт о̄лэ̄гум, поликлиникат терапевт ле̄ккарыг рӯпитэ̄гум. Атыт курсыт ханищтахтамум порат Дима пыгум самын патыс. Тыт Сургут ӯст яныгмас, школа а̄стлас. Ань Тюменьт ӯлщпуӈк пусмалтан ле̄ккарыг ханищтахты. – Валентина Борисовна, ле̄ккарыг рӯпитаӈкве та̄рвитыӈ? – Ам рӯпатам сака пӯмыщ, ханищтахтуӈкве акваг э̄ри, са̄в нэ̄пак ловиньтаӈкве э̄ри. Ка̄сыӈ хо̄тпа алписове туп таквихурипаг о̄лы, аквхурип хо̄тпа а̄тим. Таима̄гыс то̄ванакт э̄лумхо̄ласын тэ̄рпи хансуӈкве та̄рвитыӈ. Акв хо̄тпан тэ̄рпи нё̄ты, мо̄т хо̄тпан ос аквты тэ̄рпи нё̄туӈкве ат ве̄рми. Яныг ӯст о̄лнэ ма̄хум ос ма̄нь па̄вылт о̄лнэ ма̄хум о̄лнэ хурияныл аквхурип а̄ти, таима̄гыс та̄наныл я̄нас щирыл пусмалтаӈкве э̄ри. Э̄лнаӈ о̄лупсав щар мо̄тхурипаг о̄лыс. Ма̄хум са̄в рӯпитасыт, коны ма̄т са̄в яласасыт, ня̄врамыт кон хоса ёнгасасыт. Ань яныг ӯст о̄лнэ ма̄хум коны ма̄т сака ат о̄лыглэ̄гыт, ня̄врамыт янгыщ юн ӯнлантэ̄гыт, са̄всыр ищхӣпыӈ утыт хосыт ёнге̄гыт. Таима̄гыс уроканылт хоса ӯнлуӈкве ат ве̄рме̄гыт, сысаныл а̄гмыӈыт. Ань сым а̄гм ос са̄всыр пувласпи пилыщмаӈ а̄гмытыл ма̄ньлат ма̄хум а̄гмыӈыг е̄мтуӈкве патсыт. Э̄лнаӈ тамле а̄гмын туп яныгхо̄тпа ёлпаттаве, ань янгема̄не савалы. Ма̄н ань ща̄ньа̄щитн акваг ла̄ве̄в, ня̄враманыл пуста̄гыл о̄луӈкве ма̄ньта̄гыл вос ханищтыяныл, кон торген вос ха̄йтыгтэ̄гыт, вос пувлэ̄гыт. Акваг ул вос ханищтахтэ̄гыт, ёмас оценкат – ты атхунь ёмас, ос алпияныл те ва̄гталыт, ты ёмас хунь. – Наӈ ма̄нь па̄вылт яныгмасын, яныгмам поран ос наӈти ма̄хманын урыл аквкит ла̄тыӈ ла̄вен. – Омам наме Татьяна Павловна, а̄ги о̄парищ наме Ромбандеева, Хо̄сло̄х па̄вылныл о̄лыс. А̄тям Борис Николаевич Албин, Ло̄пмус па̄выл хум. О̄лме палытыл хӯл алыщлас, рыбакыг рӯпитас. Ӯсхул, сӯкыр ос сорх та̄им яныгмасӯв. Э̄лнаӈ а̄тяв рыбакыт ёт А̄сн ке̄тыглаве̄сыт, ма̄н, ня̄врамыт ос оманув, о̄с ёттотаве̄в. Тот супыгхул, мохсаӈ ос ка̄рай хӯл тэ̄сув, супыгхул по̄р тэ̄сув. Та пора ам акваг номылмата̄лылум, сымумт татем ёмас. Ам ань тыхо̄тал мус ла̄пкат хӯл ат та ёвтыгласум. Я̄тил хӯлкве ам туп юв ялантанэм порат тэ̄щинта̄лэ̄гум. Саша каӈкум ос Зоя увщим а̄тимыг е̄мтсыг. Кульпаст Юра а̄пщим ос Наталя э̄щум ще̄мьяӈта̄гыл о̄лэ̄г. Саранпа̄вылт Лена э̄щум о̄лы, ат ня̄врам о̄ньщи. Ма̄н яныгмамув порат акваг ща̄нь ла̄тӈувтыл потыртасӯв. Интернатт то̄ванакт ат та̄ртаве̄в ма̄ньщи ла̄тӈыл потыртаӈкве, ма̄н, Ло̄пмус ня̄врамыт, нэ̄мхотьют ат хӯнтлысӯв, тох и потыртасӯв. Па̄влувт Ӯй йӣквыгла̄лвес, ма̄н ня̄врамыт о̄с пуссын тув ялантасув. Ам номилум, Ефим Семёнович Ромбандеев аким колт Ӯй йӣквес. Тувыл Владимир Семёнович Албин, Егор Петрович Таратов ос Алексей Михайлович Хозумов колт. Анна Ильинична Албина то̄нт ма̄ниг о̄лыс, тот сака нё̄тнэ̄г йӣквыс. Ма̄ньщи супыл масхаты, то̄р пины, тав ляльтэ сунсуӈкве сака пӯмыщ о̄лыс. О̄йкатэ о̄парищ нам щирыл тав ань Хозумова. Та порат сака мӯтраӈ, нёмса, ощхуль ма̄хум о̄лсыт. 1972 та̄лт а̄тяв рӯпататэ щирыл Василий Карпович Бешкильцевын Кульпасн во̄ввес, тувыл ще̄мьяв о̄с тув та ва̄нтлыс. Рыбакыт Ра̄ктъя па̄вылт хӯл алыщласыт. Омав о̄с акваг а̄тяв ёт яласас. Аквматнакт а̄тяв Ха̄льӯс пӯльницан товлыӈха̄пыл тотвес. Ам юрт а̄гим Раиса Алексеевна Качанова, ань о̄йкатэ о̄парищ нам щирыл Проводникова, ётыл потырты: «А̄вин хотьют ра̄ты, ань па̄лыгпӯнсылум, яа, оман ты лю̄ли, ма̄ньщи супыл масхатым о̄лы, кӯньгантым лю̄ляхо̄лы. Тав ла̄ви, ань а̄тян тыг пӯльницан тотвес, китыт хо̄тал тав о̄с товлыӈха̄пын ӯнтылматас, тыт ты мины». Омагума̄тягум акваг аквъёт о̄лсыг, ань омав улпыл номсы, о̄йкатэ аман хоталь тотвес, тав юипа̄лэ̄т Ӯсын та тыламлас. – Ма̄ньщи нэ̄ Раиса Алексеевна ань Руслан пыге щахныл ю̄нгата̄лхатнэ ма̄т касы, намыӈсуиӈ хо̄тпаг е̄мтыс. Раиса хоты па̄вылныл о̄лы? – Тав Сӯкыръя па̄вылныл о̄лы. 1978-1980 та̄лытт тэ̄н Зоя увщим ёт Ха̄льӯс рыбокомбинатыт рӯпитасы̄г, общежитият о̄лсы̄г. То̄нт ам медучилищат ханищтахтасум, каникулын юв миннэм порат тэ̄н палтэ̄н хо̄игласум, тот э̄т хӯлэ̄гум. Ётылнуве Зоям рӯпататэ̄л по̄ханминас, ань юв минуӈкве щё̄питахты. Юрт а̄гитэ Раиса то̄нт о̄йкатэ армиян вуйвес, такви ос мо̄т щирыл о̄лы, увщим нупыл ла̄ви: «Ам ос хоталь минэ̄гум? » Зоям ювле ла̄ви: «Ам палтум миныме̄н, ам омагума̄тягум ёмас хо̄тпаг» Кульпасн ёхтысы̄г, омам ла̄ви: «Ма̄н ма̄ньщи а̄гирищув, вус о̄лы» Тот ос аквъёт зверофермат рӯпитасы̄г. Ма̄н колувт Рая кит та̄л ляпатем о̄лыс. Омам таве такви а̄гитэ хольт э̄руптастэ. Тувыл тот, Кульпаст, 1980 та̄лт таквсы Раиса ня̄врам самын паттыс, а̄гирищ. Мощ ётылнуве Миша о̄йкатэ ёхтыс, та̄н Ха̄льӯсн та минасыт. Та па̄сыл ма̄н юртыӈыщ о̄лэ̄в. Раиса омав акваг номылмата̄лытэ, ла̄ви: «О̄лупсамт хунь сака та̄рвитыӈ о̄лыс, на̄н колта̄глын а̄нум нё̄тыс, матъёмас на̄нанн ва̄ганум». Ётылнуве Руслан пыге ос Наташа а̄гитэ самын патсыг. Тэ̄н ня̄враманэ̄н ма̄ниг о̄лманыл порат, Наталя ос Лена э̄щагум Ха̄льӯсн ёхтэ̄г, Раян матыр колсори ва̄руӈкве нё̄тэ̄г, сома увщитэ̄н палт ёхтэ̄г. Ань Руслан пыге ма̄гыс ма̄н сыманув ща̄рге̄гыт. То̄ванакт оматэ тав ётэ каснэ ма̄н яланта̄лы. Ваим, ка̄сыӈ оман тамле касыл нупыл сунсуӈкве та̄рвитыӈ. – Валентина Борисовна, пуста̄гыл о̄лнэ ма̄гсыл ма̄ньщи ма̄хманувн хумус о̄луӈкве э̄ри? – Ма̄н ма̄хманув сака ё̄рыт, пе̄с та̄гыл са̄в рӯпитасыт, ма̄вит ляпат акваг о̄лсыт, во̄раясыт, хӯл алыщласыт. Атхунь таӈхе̄гум, та̄н ань яласан ма̄гыс матыр э̄рнэ ма̄шинат ман моторха̄пыт вос о̄ньще̄гыт, о̄лупсаныл мощ кӯпнитнуве̄г вос е̄мты. Ань матъёмас телевизорыт о̄ньще̄гыт, э̄тэхо̄талэ на̄йпос тэ̄г. Ма̄к туп таи – тыглетувле яласан ёмас лё̄ӈхыл вос ва̄равет, яласаӈкве вос ве̄рме̄гыт. Ам са̄в рӯт о̄ньще̄гум, Ха̄льӯс районт ос мо̄т ма̄т о̄лэ̄гыт. Я̄тил рӯт ма̄хманум, я̄тил ма̄ньщи мир, пуссын пуста̄гыл о̄лэ̄н, ня̄враманын янмалтэ̄н, халанынт нё̄тхатэ̄н. Пус ка̄т, пус ла̄гыл о̄лэ̄н, На̄янын-О̄тыранын вос ӯргалаве̄н! Ань потруме̄н та оигпас. Валентина Борисовна тамле мӯтраӈ э̄лумхо̄лас, хо̄тпа нупыл сымыӈ нэ̄. Тав о̄лнэ̄тэ палыт ма̄хум пусмалты, ка̄сыӈ хо̄тал э̄рнэ тэ̄ла ва̄ри. Па̄выл ма̄хманэ̄н ос рӯтанэ̄н тав э̄руптаве ос янытлаве. Ма̄н, газетат рӯпитан ма̄хум, таве намхо̄талэ кастыл о̄с янытлылӯв, са̄в ёмас сымыӈ ла̄тӈыл ла̄вилӯв. Пуста̄гыл вос о̄лы, со̄тыӈыщ вос о̄лы!

1090 2014.12.19. Т. Д. Слинкина

То̄рум ла̄вум ща̄нь ла̄тӈув та̄кыщ ӯргалэлы̄н ос ханищтэлы̄н. Ты э̄лыпа̄лт нэ̄глум «Лӯима̄ сэ̄рипос» газетат (№22) Людмила Алгадьева хансум статьятэ̄т («Ма̄ньщи газетав янытлаӈкве са̄в хо̄тпа ёхталас») тав ам потрум атнув торгамтамтэ. Ам то̄ва ма̄ньлат учёныит урыл нас о̄щатахтым ла̄всасум. Ма̄ньщи ла̄тыӈ ханищтан ня̄врамыт ма̄гыс та̄н учебный пособият хансэ̄гыт. Тынув халт йильпи «номт» хо̄нтмыт: ща̄нь ла̄тӈанылт «ча», «ща» паттыиг ро̄вта̄л «чя», «щя» хансэ̄гыт, «чу», «щу» паттыиг «чю», «щю» хансэ̄гыт. Йис та̄гыл о̄лнэ ма̄ньщи ща̄нь ла̄тӈув йитыпари хансуӈкв патсаныл: «щахыл, чахыл» паттыйыг«шяхыл, чяхыл» хансэ̄гыт, «щунь» паттыиг «щюнь» хансэ̄гыт. (Тамле щирыл хансым титыт классыт ханищтахтын ня̄врамыт ма̄гыс атпан нэ̄пак та̄ртвес). Евдокия Ивановна Ромбандеева, мир янытыл ва̄нэ яныг учёныюв, хунь ты ощмараныл та̄рапаттыстэ, маттем та ща̄ргатахтыглым та нэ̄паканылт со̄ви хансум ла̄тӈаныл щургаласанэ. Таи ма̄к ва̄ӈкве э̄ри: хунь хоты ма̄ньщи ла̄тыӈ ка̄миньт «с» буква ёт хансаве, то̄нт тав юипалэ̄т «я» буква хансуӈкве э̄ри: буква «с» ка̄миньтаг о̄лы «щ» буква юртэ̄ныл. Аквта ла̄тыӈт «с» ~ «щ» юртыӈыщ о̄лэ̄г, кос хотытэ хансэ̄н, та ла̄тыӈ толмащпитэ ат тыпи: сяхыл~щахыл туча; сяхны~щахны – кулак; сюнь~щунь – счастье, благоденствие; ся̄нь~ща̄нь – мама, мать, матушка. Ты ка̄миньт «с» ос «щ» букваг хоты юртыӈ тит ла̄тӈыгт хансым те о̄лэ̄г, та ла̄тӈыг аквщир торгамтахтэ̄г ос толмащлахтэ̄г: пася о̄лэн ~ паща о̄лэн – здравствуй; Сила па̄выл ~ Щила па̄выл – деревня Силантия; сяпрах ва̄та ~щапрах ва̄та – твёрдый плёс; сёпыр ~ щёпыр глухарь; Сёртаӈ-Я̄ ~Щёртаӈ-Я̄ – река Сёртынъя (на картах). Ма̄ньщи газетавт ща̄нь ла̄тӈув ӯргалым о̄ньщаве, хунь ка̄миньт «с» буква пе̄нтсыл корреспондентанув «щ» буква хансуӈкве патсыт, та̄н учёный ма̄хумн сака ломгуве̄сыт, финноугорский научный мир халт нэ̄паканылт са̄р та̄гыл ка̄миньт «с» хансуӈкве ос ла̄вуӈкве потыртахтасыт. Тыт рӯпитан корреспондентыт хо̄та̄ти ма̄нь па̄влытт ман яныг ӯсытт яласэ̄гыт, соссаӈ ма̄ньщитн аквписыг ломгуве̄сыт, ка̄миньт «с» буква «щ» пе̄нтсыл хаснэ̄ныл ма̄гыс. Йис та̄гыл о̄лнэ то̄ва ла̄тыӈ та̄нанылн ат мӯстынэ̄тэ, манос илттыг та̄ра ат торгамтахты, маныр урыл газетат хансаве. Тахольт та̄н соссаӈ ма̄ньщи мирувн хӯнтлысыт. Та̄нти халанылт потыртахтасыт ка̄миньт «с» паттыиг «щ» буква хансуӈкве патсыт. На̄н сунсэ̄н, ханты ла̄тыӈ хомос та̄рвит тоты, та̄н алфавитаныл торыӈ щирыл иӈыт щё̄питыяныл, пе̄с ма̄к учёныяныл ты ва̄рмаль сохытлаӈкв ат а̄лымасаныл, йильпи учёныит халанылт такос потыртэ̄гыт, воритотэ̄гыт. Та̄н ща̄нь ла̄тӈаныл са̄в диалектыт о̄ньщи, таи ма̄гыс ла̄тӈаныл аквхурипат а̄ти, аквхурип алфавит ва̄руӈкв ос аквщир ла̄тӈыт хансуӈкв, ва̄им, ат а̄ртми. Ма̄нь па̄влытт ман яныг ӯсытт о̄лнэ соссаӈ ханты мираныл ёт те ёмщакв потыртахтэ̄гыт, тах ущ матыр ёмас хал хо̄нтэ̄гыт. Ма̄н ма̄ньщи ла̄тӈув Евдокия Ивановна Ромбандееван яныг учёныит ёт мӯсхал щирыл щё̄питавес. Янгыщ алфавитув ва̄руӈкве а̄лымасаныл, ос «Просвещение министерство» э̄лыпа̄лт 1989 та̄л ва̄т са̄грапнал саквалан э̄тпос 12 хо̄талэ̄т воянтасаныл, ань нэ̄матыр пе̄нтсуӈкве ат э̄ри. Ханищтахтын ма̄гыс э̄рнэ нэ̄пакыт Евдокия Ивановнан пуссын ва̄рве̄сыт: ня̄врамыт ма̄гыс букварьт, учебникыт, мо̄т са̄всыр нэ̄пакыт хосат а̄лымас хансуӈкве. Учёныит ма̄гыс ос ВУЗ, СУЗ студентыт ма̄гыс ма̄ньщи ла̄тыӈ ханищтаӈкве са̄в яныг рӯпатат ва̄рыс: ма̄ньщи словарь, синтаксис, морфология, графика, орфография, фонетика, пунктуация– ты пуссын тав мӯсхал щирыл ва̄рсанэ. Мир янытыл ты нэ̄пакыт хосыт ма̄ньщи ла̄тыӈ ханищтаве, потыртаве. Мо̄т хо̄н ма̄т о̄лнэ учёныит (венгрыт, финныт, немцыт, французыт) ма̄ньщи ла̄тыӈ сака ӯргалым номтыӈыщ ханищтыяныл, со̄ви ат хартыяныл, мори ат хансыяныл. Ма̄нти соссаӈ учёныянув аман манрыг ща̄нь ла̄тӈаныл торыӈ ат ва̄та̄л хоттэ̄лгата̄лыяныл? ! Хосат та̄гыл о̄лнэ сым ща̄ргын мо̄т ва̄рмаль урыл ла̄вуӈкве о̄с э̄ри: ма̄ньщи алфавитувт о̄лнэ лов гласный букванув нум па̄лт ма̄н май по̄ри щуртмил по̄с «-» (долгота знаке) хансэ̄в: А̄а̄, Е̄е̄, Ё̄ё̄, Ӣӣ, О̄о̄, Ӯӯ, Ы̄ы̄, Э̄э̄, Ю̄ю̄, Я̄я̄. На̄н о̄с тыи ва̄глын, то̄нт ла̄тыӈ мӯсхал щир ла̄вхаты ос толмащлахты, ты по̄с та̄л ма̄к ла̄тыӈ толмаще нас хоттыпи. Ты букват нумпа̄л по̄ри по̄с йильпи учёныит ман школат рӯпитан учителит о̄с йитыпари хансыяныл: хо̄т э̄ри – ат хансыяныл, хо̄т ат э̄ри – хансыяныл. На̄нти номсэ̄н: сам – глаз, кол са̄м – угол дома, хӯл са̄м – чешуя рыбы, сай – гной; са̄й – прикрытие; суй – звук; сӯй бор. Ты по̄ри щуртмил «-» э̄рнэ ма̄т ат те хансаве, та ла̄тыӈ ма̄к толмаще та тыпи: «сӯйн» миннэ паттыйыг нас «суй» та тэ̄лы. Ань та нумыннув ла̄вылтам титыт класс ма̄гыс хансым нэ̄пакыт ты по̄ри по̄с са̄в ма̄т хотӯстыма. Ева Адамовна Шмидт Венгрияныл ма̄н ма̄вн рӯпитаӈкве ёхтуме̄т ханты мир ла̄тыӈ ёмщакв ва̄стэ, ты коныпал ма̄ньщи ла̄тыӈ тыт о̄лыматэ таквирот молях ханищтапастэ. Щар ма̄к ма̄ньщи хольт ма̄щтырыг потрамас. Венгрияныл, Финляндияныл ёхталан янгема̄не учёный ма̄хум ма̄ньщи ла̄тӈыл ма̄навныл ёмаснуве̄г потыртэ̄гыт. А̄нумн нас пыл э̄сырма хӯнтлуӈкве ос ловиньтаӈкве, хомос то̄ва соссаӈ ма̄ньщи учёныянув, учителянув ща̄нь ла̄тӈаныл мори то̄стыяныл Кос йильпи нэ̄пакыт, кос словарикыт –о̄щатахтым, тыстым та̄н мори хаснутаныл нас пыл та щуртгалыянӯв. Ты йист о̄лнэ ма̄ньщит тай рущ ла̄тыӈ, английский, французский, немецкий ла̄тӈыт мӯсхал ва̄ганыл, ёмщакве̄г потыртэ̄гыт, хансэ̄гыт. Ос ща̄нь ла̄тӈаныл аманарыг тох э̄сырма та̄л савалап ня̄врам хольт саватыяныл? . Ма̄ньщи ла̄тӈув саватан ма̄хманув э̄рыӈ матнэ̄ныл о̄румт ущ номтыгтэ̄гыт, э̄рыӈ то̄нт ущ То̄рум ла̄вум ща̄нь ла̄тӈаныл номсахтта̄л саватаӈкв ат патыяныл. Ӯрай ӯст о̄лнэ учитель о̄йка ня̄врамытн акв щёс ла̄вум потре аквписыг номтумн ёхталы: «Кос рущ ла̄тыӈ, кос хоты мо̄т мир ла̄тыӈ ма̄к «таблица умножения» хольт ханищтаӈкв э̄ри. Акв щёс ловиньтан ре̄гыл хащта̄л ла̄тыӈ такви пуӈк тӣвырн хунь щалтапи, сӯпын, не̄лумн такви хунь ханувьи. Кос хоты мир ла̄тыӈ мӯсхал щирыл, ма̄щтырыг хансуӈкве, потыртаӈкве ханищтахтэ̄н». Ты Лев Иосифович Либов ла̄вум потре. Тав нотэ па̄сыл Урай ӯст школат рӯпитас, ань ос пенсиян патыс, ӯсувт о̄лнэ са̄всыр ма̄хум урыл матахтем нэ̄пак хансыс, «Оттиск» нампа литературный журнал ва̄рыс. Мӯтраӈ яныг хо̄тпа са̄в мо̄т мир ла̄тыӈ ва̄г, пӯмщалы. Тав хум ты ма̄н ӯсувт о̄лнэ ма̄ньщит ща̄нь ла̄тӈаныл ялтуптаӈкве акванатыгласанэ. Хӯрум та̄л сыс ня̄врамыт, оманыл, а̄щаныл ёт ма̄ньщи ла̄тыӈ мощ ханищтаӈкве а̄лымасыт. Тувыл ӯсувт о̄лнэ «Управление образования» сокращение ва̄рапасыт: Либов, ма̄ньщи ла̄тыӈ та̄нанылн ат э̄рнэ̄тэ. Округувт ма̄ньнув па̄влытт ман ӯсытт о̄лнэ школат о̄с аквтох ва̄тихал ща̄нь ла̄тыӈ ханищтан учителит урок щё̄саныл хотвивет, манос та̄нти хотарыгтаптавет. Тыгыл э̄лаль ла̄тӈув ул вос хоттыпи, ул вос ще̄лумты, таи ма̄гыс ма̄ньщи газетав на̄н, ма̄хумкве, ловиньтэлы̄н, та хосытыл ма̄к сохтыл хансуӈкве ос потыртаӈкве ханьщувлэгы̄н. Щар ма̄к ёмас ва̄рмаль газетавт ва̄руӈкв ро̄ви: ма̄ньщи ла̄тыӈ ханищтан ма̄гыс аквман нэ̄пак ло̄пс манос я̄нас приложение урокыт хольт ва̄руӈкве э̄ри. Ма̄ньлат ма̄хум на̄нти халынт ва̄тихал хо̄нтхатыглэ̄н, потыртахтэ̄н, титыглахтэ̄н, хомос хоты ла̄тыӈ мӯсхал хансуӈкве э̄ри. Ма̄н А̄с-угорский институтувн ёхталэ̄н, на̄нан нё̄тнэ ма̄хум тот о̄с рӯпитэ̄гыт. Йильпи хаснэ нэ̄пакан ла̄тыӈ ва̄нэ хо̄тпан суссылта̄лэ̄н, халанувт ма̄нти ат те ханищтахтэ̄в, ат те нё̄тхатэ̄в – воссыг хо̄ӈхан ханищтаве̄в, нё̄таве̄в? Тах То̄рмув такви ма̄навн ла̄вум ща̄нь ла̄тӈе ӯргалаӈкве ма̄к нё̄тытэ, э̄лаль юртыӈыщ о̄луӈкве о̄с тах нё̄тытэ. Ма̄ньщи ла̄тӈув ат те тыпылтылӯв, ма̄нти са̄в мир халт о̄с ат тыпе̄в, хот ат со̄йме̄в. Тыныӈ ма̄хумакве, янгема̄не̄т То̄рум нупыл, На̄й-О̄тыр нупыл ща̄нь ла̄тӈыл по̄йкщим э̄лаль пуста̄гыл, щунь тотым о̄лэ̄н. Т. Д. Слинкина, Ханты-Мансийск, ОУИПИиР, научный сотрудник.

1090 2014.12.19. Александр ВЬЮТКИН

Пе̄с ва̄рыглам наканыл. Ханты-Мансийск ӯст нэ̄пакыт ловиньтан яныг колт «Югорский культурный форум» ва̄рмаль пӯнсым о̄лыс. Та пӯмащ титынтыг ты ва̄рыглавес. Ты 2014 та̄л Россия янытыл «Культура» та̄лыг намаим о̄лыс. Та̄лув оигпан мус матахтем хо̄тал ты хультыс, таве янытлан ма̄гсыл са̄всыр пӯмащ та ва̄раве. Ань ты выставканыл округув пе̄с йис о̄лупсатэ урыл о̄лы. Тот пе̄с порат о̄лум соссаӈ ма̄хманув ва̄рыглам рӯпатаныл урыл са̄всыр нэ̄пакыт ос хурит суссылтавет. Акв тамле пе̄с хури Кульпас па̄вылт «Культбаза» о̄лум порат 1937 та̄лт нэ̄ хо̄тпат янытлан хо̄талт по̄слыглавес. Та коныпал иӈ са̄в мо̄т пе̄с ва̄рмаляныл суссылтавет. Соссаӈ ма̄хум щар о̄выл йӣквнэ ос э̄ргын концертаныл 1958 та̄лт о̄вылтавес. 1970 та̄лт соссаӈ мир халт ма̄к яныг фестиваль ва̄рыглавес. То̄нт Ха̄льӯс районныл о̄лум са̄ӈквылтан, э̄ргын ос йӣквнэ ма̄хум но̄хпатсыт. «Та па̄сныл Ха̄льӯс районныл ёхталан ма̄хум аквписыг но̄хпатэ̄гыт, » тох округ культура тармыл кӯщаиг о̄лнэ нэ̄ Н. М. Казначеева ла̄выс. Со̄ль, тот сунсыглахтым ё̄мыгтаӈкве сака пӯмащ. Ханты-Мансийск ӯст о̄лнэ ос мӯйлын щирыл ёхталан ма̄хум пӯмащ ма̄гсыл тув вос ялэ̄гыт.

1090 2014.12.19. Александр ВЬЮТКИН

Ща̄нь ла̄тӈе э̄лаль тотнэ нэ̄. Россия ма̄ янытыл ня̄врамыт ща̄нь ла̄тӈыл ханищтан ма̄хум халт касыланыл о̄лнэ порат, ам Архангельский район Ненецкий автономный округ ма̄ныл ёхталам нэ̄ ёт ва̄йхатыгласум. Тав наме Прасковья Ивановна Выучейская. Прасковья Ивановна са̄лыӈколт яныгмас. Яныгмаме порат хӯрум са̄всыр ла̄тӈыл потыртас. Такви ё̄рн ща̄нь ла̄тӈе коныпал рущ ос саран ла̄тӈыл потыртас. Та̄н са̄лыӈколаныл яласан ма̄нанылт саран ма̄хум са̄лы о̄ньщим о̄с яласасыт. Акванёхталаманыл порат халанылт аквписыг тит ла̄тӈыл потыртасыт. Нэ̄ рущ ла̄тыӈ ма̄нь та̄гыл о̄с ёмщаквег ва̄гтэ. Ханищтахтаме порат Красный нампа па̄вылт школаинтернатыт яныгмас. Омагеа̄тяге а̄гитэ̄н уральтаӈкве ва̄тихал ёхталасы̄г. Хоса ӯщлахтан хо̄талыт е̄мталан порат таве аквписыг са̄лыӈколн ёттотыгластэ̄н. Прасковья Ивановна такви ма̄нь та̄ланэ номылматыгламе порат ла̄выс: – Ам юв са̄лыӈколн ёхталамум порат, амти са̄лыянум уральтаӈкв та̄ра кон та ха̄йтэ̄гум. Наманыл щирыл во̄виянум, та̄н ам палтылум э̄ӈамтахтым ня̄нь тинсым та ёхтыгпе̄гыт. Са̄лыянум ня̄нил тыттынэм порат ёлпатталавем, то̄ванакт ос лю̄ньщтавем. Са̄лырищанум халт яныгмаӈкв сака пӯмащ о̄лыс. Прасковья Ивановна ханищтахтам ма̄тэ̄ныл а̄стуме юипа̄лт Санкт-Петербург ӯсн А. И. Герцен нампа РГПУ колн ня̄врамыт ханищтан нэ̄г ханищтахтуӈкв минас. Та кол а̄стуме юипа̄лт та̄ра такви Красный па̄влэ̄н рӯпитаӈкв ёхтыс. 1997 та̄лт таквсы ня̄врамыт ханищтан ва̄рмале та о̄вылтастэ. Рӯпитаӈкв вуйхатаме па̄сныл ты та̄л са̄тхуйплов та̄лыг та е̄мтыс. Ща̄нь ла̄тыӈ ханищтан нэ̄ ань ла̄выс: – Хунь ам рӯпитаӈкв о̄вылтахтасум, са̄выӈпа̄лэ ня̄врамыт та̄нти ла̄тӈыл иӈ ёмащакв потыртасыт. Ань юио̄выл атахтемса̄тахтем та̄л сыс ё̄рн ла̄тӈыл потыртан ня̄врам мощщаг е̄мтыс. Ла̄тӈув щар ул вос оймыгтас, та̄н ётаныл аквписыг ща̄нь ла̄тӈыл потыртаӈкв э̄ри. Ма̄н та̄н ётаныл хумус ве̄рме̄в, ла̄тӈув та щирыл та ханищтылӯв. Са̄выӈпа̄л ня̄врамыт оманыл, а̄тяныл ёт юн халанылт рущ ла̄тӈыл потыртэ̄гыт. Тыи ма̄гсыл ханищтан ня̄враманув ювле о̄с аквта рущ ла̄тӈыл потыртаӈкв та ханьщувлэ̄гыт. Кос хоталь ва̄рхатэ̄в, ща̄нь ла̄тӈув ла̄щлакв та холы! Прасковья Ивановна о̄лнэ ма̄тэ̄т ёмащакв ва̄ве. 2010 та̄лт нэ̄ хо̄тпат халт «Женщина года» касыл о̄лнэ порат «Душа тундры» нампа номинацият но̄хпатыс. Тамле ёмас ё̄рн нэ̄квен ам са̄в щуньпаща ла̄тыӈ те̄тэ̄гум. На̄й-О̄тыранэ̄н ще̄мьятэ вос ӯргалаве. Прасковья Ивановна са̄в та̄л пуста̄гыл вос о̄лы, ща̄нь ла̄тӈыл ня̄враманэ э̄лаль вос ханищтыянэ.

1090 2014.12.19. Тамара МЕРОВА

Округувт о̄лнэ музеит янытлаве̄сыт. Ханты-Мансийск ӯст Ма̄вит ос Э̄лумхо̄лас нампа музейт ва̄рим суссылтапыт о̄вылтыт ам э̄лаль хансэ̄гум. Тот «биеннале» – хащта̄л ла̄тӈыл ла̄внэ сыресыр ханищтапыт ос суссылтапыт ва̄рыглаве̄сыт. Тув са̄всыр яныг ӯсытныл, Тарту (Эстония) ӯсныл музейт рӯпитан хо̄тпат ёхталасыт. Ос 2013 та̄л сыс хоталь та̄н ялсыт ос тот маныр рӯпата ва̄рсыт, та урыл потыртасыт. Акв колнакт ма̄н округувт о̄лнэ музеит са̄всыр рӯпатаныл суссылтасыт ос тувыл та̄нки халанылт кассыт. Ты та̄л мӯй ма̄хум хус йильпи суссылтап сунсуӈкве ве̄рмысыт. Музеит халт Югорск ӯст о̄лнэ «Музей истории и этнографии» но̄хпатыс. Та̄н «Печатный пряник на Руси» нампа пӯмыщ ва̄рмаль щё̄пита̄лыгласыт. Ань пе̄с порат ня̄нь сумил хумус тэ̄лыгтавес ос пряникыг хумус ва̄рвес, та̄н пуссын суссылтасыт. Тэ̄нут ва̄рнэ пе̄с рецептыт ос ёнгилыт ма̄хум ёт ханищтасыт. Ва̄рум пряниканыл такем атыӈыт о̄лсыт, ювта̄япаве̄сыт. Китыт места Касум па̄вылт о̄лнэ музейн майвес. Та̄н «История переселения комизырян в Приказымье» суссылтап ёттотыгласыт. Хӯрмит места Нягань ӯст о̄лнэ музейнокультурный кол вистэ. Та̄н «Страницы прошлого листая » рӯпатаныл э̄сгувес. Мо̄т колнакт Екатеринбург ос Москва ӯсныл ёхталам хо̄тпат та̄ратам йильпи нэ̄паканыл, альбоманыл урыл потыртасыт. Та̄н наука щирыл хансым са̄всыр пӯмыщ нэ̄пакыт, ма̄нь ня̄врамыт ма̄гыс нё̄тнэ журналыт, а̄гирищитпыгрищит ма̄гыс ханищтан нэ̄пакыт ёттотыгласыт. То̄ва нэ̄пакыт сака тыныӈыг о̄лсыт, тувыл ты суссылтапн атхатыглам ма̄хум ма̄гыс ёмас тэ̄ла ва̄рвес. Нэ̄пакыт пуссын са̄т солко̄ви тыныл пинве̄сыт. Ма̄вит ос Э̄лумхолас нампа музеюв ос Санкт-Петербургыт «Инфостудия«экон» рӯпитан хо̄тпат ёт аквъёт щё̄питам «История ссылки и спецпереселений в Ханты-Мансийском автономном округе–Югре» проектаныл ищхӣпыӈ ут хосыт суссылтасаныл. Ос аквта щирыл щё̄питым «Виртуальная реальность Тобольского Кремля» тэ̄ла урыл Тобольск ӯст историкоархитектурный музейзаповедникыт рӯпитан хо̄тпаг потыртасы̄г. Тувыл Владислав Карташов Сургутныл ёхталам хум музейт о̄щнэ пормасыт хумус ищхӣпыӈ ут хосыт суссылтаӈкве ро̄ве̄гыт, тамле ёмас ва̄рмаль щё̄питам. Томский университетт рӯпитан музей ос Горноправдинскыт о̄лнэ школа акваннё̄тхатым тыт «Палеогеновое море» нампа суссылтап ва̄рсы̄г. Тот 25 миллион та̄лыт ювле хультум порат Лӯима̄в манхурипаг о̄лыс, та ма̄витэ урыл потыртасыт. Пе̄с йис порат яныгмам йӣвыт, лӯптат ос манхурип хӯлыт та порат о̄лсыт, таит пуссын та̄рапаттысаныл. Ос акв пӯмыщ «Мыс священной собаки» суссылтап о̄лыс. Ямал ма̄т Шурышкарский район Питляр па̄вылн ялум хо̄тпат тот та̄рапаттум ва̄рмаляныл урыл потыртасыт. Яныгпа̄ла ма̄хманув ла̄внэ̄ныл щирыл, та па̄влыӈ ма̄ «Ялпыӈ а̄мп я̄ нёлыг» ла̄ввес. Ань тот пе̄с ма̄хманув хӯл алыщлам ос во̄раям пормасаныл, маснутаныл ос са̄всыр хурит суссылтавет. Ань пуссын ты выставкат ӯсувт о̄лнэ музейт 2014 та̄л оигпан мус тах рӯпитэ̄гыт. Матыр пӯмщалаӈкве тув ёхталэ̄н.

1090 2014.12.19. Николай МЕРОВ

Сымын хо̄йнэ потрыт хаснэ нэ̄. А̄с-угорский институтт рӯпитан ма̄ньщи нэ̄ Светлана Селивёрстовна Динисламова мо̄лал Ягрим ос А̄нъя па̄влыгн мӯйлуӈкве ялыс. Ты нэ̄ ма̄ньщи ос рущ ла̄тӈыл стихотвореният ос потрыт хансы. Ос ня̄врамыт ма̄гыс ма̄ньщи ла̄тӈыл «Витсам» нампа журнал 2014 та̄л о̄вылтахтам па̄сныл та̄ратытэ. Па̄влыӈ ма̄хум ёт хо̄нтхатыгламе порат, тав та̄нанылн такви ва̄рум рӯпататэ урыл потыртас. Тав ла̄выс: – Ам са̄в ма̄т яласасум, са̄в ма̄хум ёт хо̄нтхатыгласум, Ягрим ос А̄нъя па̄влыгт иӈ ат о̄лсум. Таима̄гыс ща̄гтым тыг ёхтысум. Ма̄хум ёт хо̄нтхатыгланэм порат ты урыл потыртэ̄гум, хунь хо̄тпа такви пе̄с йис о̄лупсатэ та̄рапаттытэ, хунь ёмщакв ва̄гтэ, тав номтэ татем та ёмасыг е̄мты. Тав ля̄галан ла̄тыӈ акваг о̄ньщи, ма̄к тамле хо̄тпа ща̄нь ла̄тӈе э̄лаль ты тотытэ. Акв проектум щирыл ма̄ньлат хо̄тпат ма̄ньщи ла̄тӈыл ханищтыянум. Рӯпатам щирыл па̄влытн ва̄тихал ялантэ̄гум. Ань нэ̄пакыт та̄ратэ̄гум. Тот ка̄сыӈ па̄выл урыл мощломт хансэ̄гум ос по̄слум хуриянум тув ва̄риянум. Китыт рӯпатам щирыл ос ня̄врамыт ма̄гыс ма̄ньщи ла̄тӈыл журнал та̄ратэ̄гум. Кит та̄л ювле хультум порат о̄с акв тамле тэ̄ла щирыл рӯпитасум. То̄нт туп хӯрум нэ̄пак та̄ратасум. На̄нан тамле хӯлтнэ ла̄тыӈ ла̄ве̄гум, ань тамле субсидияолн миве, ты хосыт на̄н матыр проект ва̄руӈкве тахмае̄гын ке, ты субсидия хосыт тах нё̄таве̄н. Хо̄т матыр касыл ва̄руӈкв хунь патаве, на̄н на̄нки проектын суссылтаӈкве тот о̄с ве̄рмилын. Ёмащакв хансыслын ке, ты ва̄рмаль э̄лаль тотнэ ма̄гыс нё̄таве̄н. Тувыл китахкем та̄л ювле хультум юипа̄лт ам ос тамле ва̄рмаль щё̄питыгласлум. Омам о̄лме̄т ла̄выглас: «А̄гикве, ам о̄лнэм сыс, ва̄нэ рӯт хо̄тпанум наманыл нэ̄пакн хансэ̄н». Тувыл ам ты ва̄рмаль щирыл рӯпатам ва̄руӈкве о̄вылтаслум. Нэ̄пакн туп нила ло̄пс хассум. Омам атхуйплов та̄лэ нупыл минас, тав а̄тимыг е̄мтыс. Ос та хо̄тпат, хотьют нэ̄пакын хассанум, та̄н ма̄ньлат хо̄тпат номтанылт вос хультсыт, ураныл ам нэ̄пак та̄ратасум. Ты нэ̄пак рущ щирыл «Допиши свою историю» намаяслум. Тот ам са̄в ма̄ньщи хо̄тпа урыл хассум. Хоты та̄лт, хоты ма̄т тав самын патыс, хо̄т а̄тимыг е̄мтыс, хо̄т омагеа̄тяге о̄лсы̄г, о̄йкатэ, э̄кватэ ос ня̄враманэ урыл хассум. Насати, са̄выӈпа̄лэ ма̄ньщи хо̄тпат халанылт рӯтыг о̄лэ̄гыт. Та нэ̄пакт пуссын аквъёт акв со̄тыра атпан са̄т э̄лумхо̄лас урыл хассум ос атпан хури тув ва̄рсум. Ты нэ̄пак ань э̄лаль хансуӈкве таӈхилум. Ловиньтан ма̄хманумн о̄с сака нё̄тавем. Хотьют урыл хумус хансуӈкве э̄ри, та̄н хӯлтыглэ̄гыт. Са̄ртын ам радиот рӯпитасум. То̄нт са̄в ма̄ньщи хо̄тпа ёт хо̄нтхатыгласум. Татем пӯмащ потрыт хансыгласум. Ам номсэ̄гум, ты потрыт наска̄ссыг архивыт манрыг о̄ньщуӈкве патавет, о̄с пуссын нэ̄пакн хассанум. Тот Ивдельский районт Лопсъя, Овыӈъя, Улям тэ̄н па̄влыӈ хо̄тпат потраныл о̄лэ̄гыт. Ань ты та̄л, хунь нэ̄пакум ва̄руӈкве патыслум, мощща олныл майве̄сум, та̄рвитыӈ о̄лыс. Нэ̄пакум та̄ратан ма̄гыс маткем олн та киссум, юио̄вылт та̄ратаӈкве ве̄рмыслум». Светлана Селивёрстовна щё̄скем соссаӈ ма̄хум э̄лыпа̄лт такви нэ̄паканэ урыл потыртас ос стихотворениянэ ловиньтас. Ма̄хумн таве хӯнтлуӈкве сака мӯстыс. Потре оигпам юипа̄лт тав ка̄сыӈ хо̄тпан такви хансум нэ̄паке мӯйлуптастэ. Ты ма̄ньщи нэ̄ стихотворениянэ рущ ос ма̄ньщи ла̄тӈыл хансыянэ. Ма̄хумаквет, на̄н хуньт тав хансум нэ̄паканэ ка̄тынпаттыяны̄н ке, о̄с ловиньтэ̄н. Тав хансум потранэ ос стихотворениянэ ловиньтаӈкве сака кӯпнит, аквтупмат э̄рыг хольт овтэ̄гыт, сымын сака хо̄егыт.

1090 2014.12.19. Людмила Алгадьева

Мӯтраӈ ма̄ньщи о̄йка. Ты э̄тпос 10 хо̄талэ̄т округув 84 та̄лэ то̄влыс. Ты кастыл Анатолий Николаевич Хомяков ка̄ркам хо̄тпа урыл хансэ̄в. Ты та̄л тав о̄с 84 та̄лэ то̄влыс. Хо̄нтаӈ ма̄ньщи о̄йка Кондинский район Половинка па̄вылт музей ӯнттыс. Ос тот о̄лнэ ма̄ньщит пе̄с пормасаныл тув акванатсанэ. 24 та̄л ювле хультум порат ва̄т са̄грапнал э̄тпос 10 щислат, округув янытлан хо̄тал кастыл, музей кол мир ма̄гсыл пунсыстэ. Ань тав пенсият о̄лы, а̄гитэ Галина Анатольевна Мостовых музей кӯщаиг рӯпиты. Анатолий Николаевич рӯпата та̄л ат ӯнлы, ка̄сыӈ хо̄тал музейн ёхталы. Тав ла̄выс: «Ам ма̄нь та̄гыл рӯпитаӈкве ханьщувласум, рӯпата та̄л о̄луӈкве ат ве̄рме̄гум. Ты талыт сыс хо̄т со̄тыра арыгкем пе̄с пормас акванатсӯв, то̄ват ам амки ва̄рсанум. Пормасыт о̄щнэ колнак ат о̄ньще̄в, тыи ма̄гсыл тох молях лю̄лиг е̄мтэ̄гыт. Ань ва̄тихал ёхталэ̄гум ос пормасыт мӯсхалыг щё̄питыянум». Ма̄ньщи о̄йка та ма̄т самын патыс, тот яныгмас, пенсиятэ мус колхозт рӯпитас. Пенсиян минаме порат Половинкат музей ва̄руӈкве вӯйхатас. Тав ётэ хо̄нтхатыгламум порат ва̄рум рӯпататэ урыл таи ла̄выс: «Па̄вылт музей ӯнттуӈкве хосат та̄гыл номт о̄щсум. Тувыл колхозт са̄в рӯпата о̄лыс ос ня̄враманум янмалтаӈкве э̄рыс. Тыи ма̄гсыл хунь пенсиян патхатасум, туп то̄нт музей ӯнттыслум. Ань тох номсэ̄гум, музей ва̄руӈкве са̄ртыннув э̄рыс. То̄нт ам омам ос мо̄т яныг хо̄тпат па̄вылт о̄лсыт, хо̄нтаӈ ма̄ньщит пе̄с о̄лупсаныл урыл са̄в ва̄сыт. Та порат ты рӯпата ва̄руӈкве ке о̄вылтахтасум, тыт са̄внув пе̄с пормас акванатсум. Ам омам хо̄нтаӈ ма̄ньщи ла̄тӈыл ёмащакв потыртаӈкве ха̄сыс, ма̄ниг о̄лмум порат ам о̄с ща̄нь ла̄тыӈ торгамтаслум. Тувыл рущ халт о̄лым ла̄тӈум хотёрувласлум. Омам 92 та̄лэ мус о̄лыс. Акв порат словарьнэ̄пак ва̄руӈкв о̄вылтахтыгласум. Ань номсэ̄гум, омам палт ка̄сыӈ хо̄тал ялантаӈкв э̄рыс, то̄нт са̄внув ла̄тыӈ нэ̄пакумн хансуӈкве ве̄рмынувум. Тамле рӯпата ва̄руӈкве ат а̄лымасум, ты ма̄гсыл ань сымум ща̄рги. Ань музейт хо̄нтаӈ ма̄ньщит то̄ва пе̄с пормасыт наманыл Та̄гт я̄ хосыт о̄лнэ ма̄ньщи ла̄тӈаныл щирыл хассанӯв. Музей котильт ам «Ялпыӈ ма̄» ва̄рсум. Тувыл ва̄глум, хо̄нтаӈ ма̄ньщитн ты ма̄ мо̄т щирыл ла̄выглавес. Ты ма̄ хумус ла̄выгласаныл, аты номилум». Анатолий Николаевич музей такви ӯнттыстэ. О̄влэ̄т миркол кӯщаит таве̄н щар ат нё̄тсыт, музей хунь ва̄рыстэ ос ма̄хум тав палтэ ёхталаӈкве патсыт, туп то̄нт мощ нё̄туӈкве патвес. Э̄лаль тав тох потыртас: «Акв порат мирколт ла̄вве̄сум, ты рӯпата э̄лаль вос ва̄рилум, тыт о̄лнэ ма̄ньщит пе̄с йис ва̄рмаляныл э̄лаль вос тотыянум. Ты юипа̄лт па̄выл клубн баянистыг хасве̄сум, олныл ойтуӈкве патве̄сум. Тох кит манос хӯрум та̄л баянистыг ловиньтахтасум, туп ты юипа̄лт музей нэ̄паканэ пуссын ва̄рсанум. О̄влэ̄т амккем тыт рӯпитасум, амки кӯщаиг, научный сотрудникыг, охранникыг, хранителиг о̄лсум. Тувыл а̄гим тыг рӯпитаӈкве во̄выслум. Ань тыт лов э̄лумхо̄лас рӯпиты, ка̄сыӈ хо̄тпа такви рӯпата о̄ньщи». Мӯтраӈ, ка̄ркам ма̄ньщи о̄йка ёт потыртаӈкве сака пӯмащ о̄лыс, о̄лупсатэ урыл ос музей урыл сака са̄в потыр о̄ньщи. Тав потранэ мо̄т газетат тах хансыянум.

1091 2015.01.16. Валентина УЗЕЛЬ

Округувт о̄лнэ я̄тил мир!Округ Дума депутатыт ос ам на̄нан Йильпи та̄л ос Рождество хо̄тал кастыл янытлыянӯв ос тамле ла̄тӈыл те̄тыянӯв. Ювле хультум та̄л оигпан э̄лыпа̄лт ма̄н ва̄рум рӯпатав та̄рапаттылӯв ос мирн ла̄ве̄в – маныр рӯпата ма̄н ва̄руӈкв номсысӯв ос та̄л сыс маныр ва̄руӈкв а̄лымасӯв. 2014 та̄л сыс ма̄н ма̄вт о̄лнэ мир ма̄гыс са̄в рӯпата ва̄рвес. Ка̄сыӈ хо̄тпа ёмащакв вос о̄лы, ня̄враманэ, ще̄мьятэ пуссын ёмас номтыл вос о̄лэ̄гыт, рӯпата вос о̄ньще̄гыт, та̄рвитыӈ ва̄рмалит ул вос ва̄щинтэ̄гыт, тыи ма̄гыс кӯщаянув ты рӯпитэ̄гыт. Россия янытыл са̄в республика, область ос округ о̄лы. Та̄н халанылт щар ма̄к ёмащакв рӯпитан ма̄ тисвес. Ма̄н округув тот хӯрмит местал майвес. Тыт мирув ёмащакв о̄лы. Ань йильпи 2015 та̄л ты ёхтыс. Ты та̄лт округув 85 та̄лэ то̄влы. Хумус ма̄н э̄лаль о̄луӈкв патэ̄в, ты урыл ка̄сыӈ хо̄тпа вос номсахты. Йильпи та̄л ос Рождество хо̄тал ты ёмас ялпыӈ хо̄талы̄г. Ка̄сыӈ ще̄мья ты ялпыӈ хо̄талы̄г ӯри. Йильпи та̄лт на̄н номтыт о̄щнэ ва̄рмалянын пуссын тэ̄лаг вос е̄мтэ̄гыт. Пуста̄гыл о̄лэ̄н. Округ Дума кӯщай хум Б. С. Хохряков те̄тум потре ма̄ньщи ла̄тӈыл В. Хозумова хансыстэ.

1091 2015.01.16. Светлана РОМБАНДЕЕВА

Пенсия урыл потыр о̄лыс. Ювле хультум э̄тпост ма̄н округувт о̄лнэ Пенсионный фонд ма̄к яныг колэ̄т ля̄ххал тотнэ ма̄хум акванатыглаве̄сыт. Кӯщаиг тот Татьяна Зайцева рӯпиты. Ты нэ̄ ла̄внэ̄тэ щирыл, ма̄н округувт 391 со̄тыра пенсионер хо̄тпа о̄лы. Ма̄н ма̄в янытыл щар ма̄нь пенсия – 10 со̄тыра арыгтем. Россияв янытыл ма̄хум тыгыл мощщал ойтавет. Ань яныгнув пенсия олн ня̄влалым тыг сака са̄в хо̄тпа ювыт. Таима̄гыс ка̄сыӈ та̄л округувт о̄лнэ мир 4% са̄витаг та са̄вми. Ты та̄л пенсия олн тах о̄с мощ но̄хнув лапи. Ювле хультум та̄л сыс округ янытыл пенсият о̄лнэ хо̄тпатн 70 млрд. са̄вит солко̄ви ойтвес. Материнский капитал урыл нэ̄ о̄с аквкит ла̄тыӈ ла̄выс. Нёлолов та̄л сыс ма̄хум ты олнаныл са̄выӈпа̄лэ кол ӯнттын ма̄гыс ойтсаныл. Ты ва̄рмаль 2016 та̄л мус рӯпитаӈкве паты. Ты материнский капитал тыхал воссыг миӈкве ат таӈхаве, э̄лытэ ат на̄ӈки, э̄рыӈ со̄ль хотпо̄йтыгпавет. Ты нэ̄ мо̄т са̄в тэ̄лат урыл потыртас. Тав ла̄выс, хунь 2014 та̄л оигпи, то̄нт пуссын ущ та̄рапаты. Пенсия тэ̄ла урыл та̄н тах та̄л котиль э̄тпост мирн потыртэ̄гыт.

1091 2015.01.16. Александр ВЬЮТКИН

Ма̄витув хумус ӯргалавес. Округув янытыл ма̄вит ос ӯйхул ӯргалан ма̄хум та̄л сыс ва̄рум рӯпатаныл урыл сапра̄нит потыртасыт. Та̄н рӯпатаныл урыл хӯнтлын ма̄гсыл округ губернатор ва̄ӈын кӯщаиг о̄лнэ хум Геннадий Федорович Бухтин тув о̄с ёхталас. О̄влэ̄т Геннадий Федорович ма̄вит сыстамыг о̄щнэ ос ӯйхул ӯргалан ма̄хумн са̄в пӯмащипа ла̄тыӈ ла̄выс ос ма̄нь мӯйлупсал мӯйлуптасанэ. Тав юипа̄лэ̄т Сергей Владимирович Пикунов потыртас, тав та кол кӯщаиг о̄лы. Тав ла̄выс: – Ма̄вит ос ӯйхул ӯргалым пуссын аквъёт округувт 126 хо̄тпа рӯпиты. Тыса̄вит хо̄тпал ма̄витув янытэ̄т уральтаӈкв ат а̄ртми. Яныг нё̄тмил ма̄навн полицият ос прокуратурат рӯпитан ма̄хум ва̄ре̄гыт. Та̄н ётаныл ма̄навн кустырнуве̄г рӯпитаӈкв патыс. Округув янытыл ма̄во̄й ос газ но̄хвинэ са̄всыр нампа компаният рӯпитэ̄гыт. Та̄наныл ва̄тихал о̄с уральтыянӯв. Та̄н сыстам ма̄ ма̄во̄ил ул вос со̄сантыяныл. Во̄ил со̄сантым ма̄т са̄в та̄л нэ̄матыр ат яныгми. Ты ма̄гсыл во̄руит тувыл по̄хан та минэ̄гыт. Ма̄н нефтяник ма̄хум лю̄ль ва̄рмаляныл урыл пуссын ва̄ӈкв ат ве̄рме̄в. Ма̄во̄й мо̄т ма̄н те̄тнэ те̄р тӯраныл хащлын ма̄т матыр лю̄ль те е̄мты, та ма̄тэ ма̄н сыстамтаӈкв ла̄виянӯв. Ат те щё̄питыяныл, нумыл иӈ яныг штрафолныл пиныянӯв. Ма̄во̄й но̄хвинэ компаният халт «Роснефть» щар ма̄к са̄в порс ва̄рнэ компанияг о̄лы. Тав юипа̄лэ̄т ОАО «Самотлорнефтегаз» ос ОАО «Юганскнефтегаз» минэ̄г. Тэ̄н рӯпитан ма̄тэ̄н мощ сыстамнуве̄г о̄ньщияге̄н.

1091 2015.01.16. Александр ВЬЮТКИН

Лӯима̄т о̄лнэ ма̄хум халт касыл. Ювле хультум ва̄т са̄грапнал э̄тпост Ханты-Мансийск ӯст лӯима̄ ма̄хум касыланыл о̄лыс. Рущ ла̄тӈыл «Чемпионат и первенство России по северному многоборью» ла̄ввес. Хус та̄л сыс ма̄н округувт ты касыл титынтыг ты ва̄рыглавес. Лӯима̄ ма̄хум касыланылн титхуйплов команда тыг ёхталас: Магаданский ос Тюменский областигныл, Красноярский крайныл, Саха (Якутия) ос Коми (Саран) ма̄хум республикагныл, Эвенкияныл, Ненецкий ос Ямало-Ненецкий, тувыл Чукотский округытныл. Пуссын аквъёт яныгса̄т нёлса̄т хо̄тпа о̄лыс. Та̄н халанылт яныгса̄т атпан нупыл тит каснэ хо̄тпа касыс. Щар са̄в каснэ ма̄хум Красноярский крайныл ёхталас. Касыланыл палытэ̄т нила хо̄тал минас. Хум хо̄тпат халанылт ат нампа касылыт кассыт. О̄выл хо̄талт та̄ра тит касыл о̄лыс. Каснэ хо̄тпан ла̄глаге̄тыл аквторыг хӯрум щёс э̄лаль порыгмаӈкв ос писаль пе̄нтсыл ка̄тыт о̄щнэ ощща йӣв ёт ха̄йтуӈкв э̄рыс. Титыт хо̄талт са̄грап па̄хвтысыт. Хӯрмит хо̄талт ос тыньщаӈ сома лю̄льнэ сувын ре̄пыгтасыт. Юио̄выл хо̄таланылт ос сун ӯлтта поргысыт. Ка̄сыӈ касыланылт хо̄тал палыт кассыт. А̄лпыл лов щёс порат о̄вылтахтэ̄гыт, э̄типа̄лаг хо̄т манос са̄т щёс порат а̄стыглэ̄гыт. Округ ма̄гсыл са̄тхуйплов ма̄ньлат хо̄тпа касыс. Ха̄льӯс район Саранпа̄вылныл лӯима̄ мир халт каснэ щирыл акв а̄ги ёхталас. Тав наме Евгения Андреевна Филиппова. Тав а̄тятэ Андрей Дорофеевич ты щирыл каснэ ма̄хумн тав наме ёмщакв ва̄ве. Андрей Дорофеевич Саранпа̄выл ня̄врамыт лӯима̄ ма̄хум касыланылт касуӈкв щё̄питыянэ. Тав ёмщакв каснэ са̄в хо̄тпа янмалтас. Та̄н халанылт чемпионыт ос рекордсменыт о̄лэ̄гыт. Юио̄выл хо̄талт касыланыл а̄стум юипа̄лт «Октябрь» нампа культура колт но̄хпатум ма̄хум янытлаве̄сыт. Команда щирыл ма̄н округув но̄хпатыс. Титыт места ос Красноярский крайныл о̄лнэ ма̄хмытын вуйвес. Хӯрмит места Ямало-Ненецкий автономный округн е̄мтыс. А̄гит халт щар ё̄рыг ос моляхыг Магаданский областьныл ёхталам а̄ги Яна Сауленко о̄лыс. Тав юипа̄лэ̄т ос ма̄н округув ма̄гсыл каснэ а̄ги Анна Адамова но̄хпатыс. Хӯрмит места Красноярский крайныл ёхталам а̄ги Ирина Журавлеван вуйвес. Ма̄ньлат хумит халт Максим Нигматуллин но̄хпатыс. Тав ма̄н округув ма̄гсыл касыс. Титыт ма̄тэ Красноярский крайныл о̄лум хумн Антон Скороходовн вуйвес. Хӯрмит места ос ма̄н каснэ хумиюв вистэ, тав наме Валерий Камзолов. Каснэ юипа̄лт но̄хпатум а̄гит, пыгыт пуссын касыл щирыл «мастер спорта» намыл мивет. Мо̄тыт «Чемпионат и первенство России по северному многоборью» нампа онтоловит касыл ё̄рн ма̄хум о̄лнэ ма̄нанылт Ноябрьск ӯст тах ва̄раве.

1091 2015.01.16. Людмила ТЕТКИНА

Та̄л сыс ва̄рум рӯпатаныл урыл потыртасыт. 2014 та̄л оигпан э̄лыпа̄лт соссаӈ ма̄хум Ассамблеят рӯпитан депутатыт Ханты-Мансийск ӯст о̄лнэ ма̄ньщит, хантыт сапра̄нин во̄выгласаныл. Та̄л сыс Думат рӯпитан хо̄тпат манхурип са̄кконыт соссаӈ ма̄хум ма̄гсыл пирмайтасыт, та урыл тот потыртасыт. Ты э̄лыпа̄лт соссаӈ ма̄хум ма̄гсыл «О территориях традиционного природопользования» нампа са̄ккон пирмайтавес. Пе̄с йис ма̄т о̄лнэ ще̄мьят ма̄наныл та̄нки нупыланыл хассаныл. Ты та̄л Ассамблея ты са̄ккон хосыт э̄лаль рӯпитас. Депутатыт тув акв йильпи ла̄тыӈ хансуӈкве тахсыт. Ты ма̄т «Особо охраняемые природные территории» тох вос ловиньтавет. Думат рӯпитан мо̄т депутатыт тамле тэ̄ла са̄кконын хансуӈкве ат ка̄сащасыт ос ат пирмайтасыт. Ассамблеят рӯпитан депутатыт округ янытыл акваг яласэ̄гыт ос ма̄хум ёт хо̄нтхатыглэ̄гыт. 2014 та̄л сыс 556 э̄лумхо̄лас та̄нки та̄рвитыӈ ва̄рмаляныл урыл та̄нанылн пищма хассыт. Ассамблеят рӯпитан хо̄тпат ка̄сыӈ пищма ловиньтыяныл, ос са̄всыр кӯщаит ёт э̄лаль рӯпитэ̄гыт. Ӯст о̄лнэ ма̄хум манхурип номт о̄ньще̄гыт, та урыл сапра̄нит о̄с китыглаве̄сыт. Та̄н ювле ла̄всыт, ты э̄лыпа̄лт Ханты-Мансийск ӯст потрыт, стихыт хаснэ хо̄тпат ма̄гсыл «Дом писателей» нампа кол рӯпитас. 2015 та̄л Россият «Литература та̄лыг» намаявес. Нэ̄пак хаснэ ма̄хумн ты кол ювле вос миве. Тувыл соссаӈ ма̄хум ма̄гсыл рӯпитам департамент урыл потыртасыт. Ань ма̄ньщит, хантыт хоты кӯщаитн пищма хасуӈкве ро̄ви, хотыл нё̄тмил во̄вуӈкве, щар ат ва̄ганыл. Ты Лӯима̄ департамент ювле вос ва̄раве. Э̄лаль та̄н ос соссаӈ мир а̄гманыл урыл потыртасыт. Округувт манса̄вит ма̄ньщи, ханты ос ё̄рн тыт о̄лы, манхурип а̄гм о̄ньще̄гыт, нэ̄мхотьют ат ва̄гтэ. Ты тэ̄ла урыл потыртан ма̄гсыл я̄нас конференция щё̄питаӈкве э̄ри. Ос ёмас о̄лнув, ты та̄л Ӯй йӣквнэ ва̄рмаль ма̄ньщи манос ханты хоты ма̄нь па̄вылт ке ва̄раве. Ты коныпал ма̄хум тот са̄в э̄рнэ тэ̄лат урыл потыртасыт. Депутатыт ты тэ̄лат пуссын нэ̄пакын хассаныл ос та̄л сыс та̄н ётаныл рӯпитаӈкве ла̄вхатасыт.

1091 2015.01.16. Людмила ТЕТКИНА

Ма̄ньлат ще̄мьят кол ёвтуӈкве нё̄тве̄сыт. Округувт ма̄ньлат ще̄мьят «Доступное жильё молодым» нампа программа щирыл кол ёвтуӈкве нё̄тавет. 2014 та̄л оигпан э̄лыпа̄лт ты программа арыг 176 миллион солко̄вил та̄стувес. 200 ма̄ньлат ще̄мьят нё̄тве̄сыт. 2010 та̄лт манос ты э̄лыпа̄л та̄лытт очередин хасхатам ма̄ньлат ще̄мьят субсидияолн та̄л та̄нки кол ёвтсыт. Ань олныл нё̄тым ма̄ньлат ще̄мьят ва̄т са̄грапнал э̄тпос о̄выл хо̄тал пищмал ке̄тве̄сыт. Тувыл 15 хо̄тал сыс э̄рнэ нэ̄паканыл ипотечный агентстван тотсаныл. Ты хо̄талыт сыс ат ке а̄лымасыт, туп йильпи та̄лт тах субсидияолныл мивет. Ты программа хосыт акв та̄л сыс са̄в ще̄мьят колыл ёвтуӈкве нё̄тве̄сыт. Ань ка̄сыӈ та̄лныл мошщанув олн та̄н ма̄гсыланыл та̄стыглаве. То̄ва ще̄мьят тамле нё̄тмил ат ӯре̄гыт, та̄нки о̄лнэ кол ёвтэ̄гыт. Ос та̄л оигпан э̄лыпа̄лт ипотечный агентстват олн ке хульты, очередь хосыт ты ще̄мьят нё̄тавет. Ты олныл та̄н ипотека ма̄гсыл ойтхатэ̄гыт. Ипотечный агентстваныл ке̄тым ля̄ххал ма̄ньщи ла̄тӈыл Л. Теткина хансыстэ.

1091 2015.01.16. Людмила ТЕТКИНА

Та та̄л акв со̄тыра атса̄т хо̄тпа йильпи колн ва̄нтласыт. Наталья Комарова, губернаторув, Москва ӯсн сапра̄нин во̄выглавес. Та̄л сыс Юграт манаса̄вит йильпи кол ӯнттувес ос пе̄с колыт хумус ёмащакв щё̄питавет, та урыл тот потыртас. 2017 та̄л сӯкыр э̄тпос о̄выл хо̄талэ мус округувт пе̄с колытт о̄лнэ 5 со̄тыра э̄лумхо̄лас йильпи колын тах ва̄нтлэ̄гыт. Ты программа щирыл 184 пе̄с колыт о̄лнэ ма̄хум йильпи колыл тах мивет. 2013 та̄лт ты программа хосыт колыт ӯнттын ма̄гсыл акв миллиард солко̄ви та̄стыглавес. 2014 та̄лт ты рӯпата ма̄гсыл акв миллиард атса̄т со̄тыра солко̄ви холтвес. Та та̄л сыс акв со̄тыра яныгса̄т э̄лумхо̄лас йильпи кол ва̄нтласыт. Ты программа хосыт пе̄с колыт о̄лнэ ще̄мьят коланыл ёмащакве о̄с щё̄питавет. Югорский фондыл ты тэ̄ла ма̄гсыл ты та̄л 65 миллион солко̄ви та̄стувес, округ бюджет ос 115 миллион солко̄ви мис ос районный мирколыт 8 миллион солко̄ви холтсыт. Ань округув янытыл 6 со̄тыра 728 пе̄с кол щё̄питаӈкве э̄ре̄гыт. Та та̄л сыс 353 кол ольпыл сартве̄сыт, йильпи иснасыл, йильпи кола̄лал, йильпи колканыл ва̄рве̄сыт. Ань тамле рӯпата ва̄рнэ ма̄гсыл округувт о̄лнэ ще̄мьят та̄нки о̄с олн ойтэ̄гыт. Округ губернатор прессслужбатэ ке̄тум ля̄ххал ма̄ньщи ла̄тӈыл Л. Алгадьева хансыстэ.

1091 2015.01.16. Анна АЛГАДЬЕВА

Ма̄н ялпыӈ хо̄талт мӯйлысӯв. Округув янытлан хо̄тал кастыл Хулюмсунт па̄выл школат ва̄т са̄грапнал саквалан э̄тпос китхуйпловит хо̄талэ̄т мӯйлын хо̄тал ва̄рыгласӯв. Ма̄к мӯйлын хо̄талт школа «Актовый зал» колнакн ма̄хум акванатхатыгласыт, халанылт потрамасыт. Ты накт нэ̄матыр йӣквтан ат щё̄пита̄лыгласӯв, э̄рыг ат ханищта̄лыгласӯв. Са̄в ман мощща тыг ёхталам ма̄хум о̄влэ̄т та̄нкина̄нылн ма̄нь мӯйлупса ма̄нь а̄кань ва̄рсыт. Тувыл школат ханищтахтын ня̄врамыт потыртасыт, та̄л палытыл соссаӈ ма̄хум о̄лупса урыл минам мероприятият о̄вылтыт потыр щё̄пита̄лсыт: мо̄лты та̄л «Округ хо̄тал» хумыс минас, «Ӯринэ̄ква хо̄тал» хумыс ёнгыслӯв, Ха̄льӯсн, Ня̄хщамво̄ль па̄вылн, Ме̄ӈквъя па̄вылн хумыс ялсыт, манхурип научный конференцият школа па̄лыл ва̄рыгласыт. 11 классыт ханищтахтын а̄ги Татьяна Сивцова, са̄т ос нёлолов классыгт ханищтахтын а̄гит Екатерина Алгадьева, Виктория Боженко, Мария Лаверина, Юлия Давыдова, Виктория Адина, Юлия Боженко пуссын ма̄нь потырло̄мт потыртасыт, са̄в ёмас нё̄тнэ пӯмащ хури ты урыл суссылтасыт. Акв щар ма̄нь, о̄выл классыт ханищтахтын а̄ги Надежда Алгадьева о̄с ма̄нь потыр потыртас. Таквсынув школат рӯпитан ханищтан нэ̄т Москва ӯсн конференциян ялсыт, ты кастыл ёттотнэ ма̄гыс атпан ма̄нь а̄каньрищит ня̄врамыт ва̄рыгласыт. Надя ос тав ётэ ханищтахтын а̄гирищкве Маргарита Адина о̄с акань ва̄руӈкв нё̄тсы̄г, тэ̄н а̄кань то̄р ва̄рсы̄г. Хуньт тах яныг а̄гит школаныл а̄стын юипа̄лт, ты а̄гирищквег тэ̄н та о̄с ма̄кыг нё̄туӈкв патэ̄г. Хунь а̄кань ва̄рмувт, то̄рло̄мтыт са̄ртын яктым о̄лсыт, ка̄сыӈ пасан а̄кань то̄раныл намыл аквсыр оспаг пинсанӯв. Акв пасантакв хурипат, мо̄т пасантмо̄т хурипат. Потранув а̄стум юипа̄лт о̄лум кем ма̄хум пуссын а̄каньто̄ранув щирыл ла̄кквауртхатсӯв: акв хурип а̄каньто̄рыӈ ма̄хумакв нупыл, мо̄т хурипатмо̄т нӯпыл. Пуссын аквъёт нила группа е̄мталас. Тувыл колнакыт щирыл пуссын ла̄ккваялыгласӯв. Тот ма̄хум потыртасыт: хо̄ӈха хотыл ма̄ньщи о̄лнэ ва̄рмаль ва̄г манос ат ва̄г; мансыр э̄ргыт хо̄т, хотыл хӯлыгла̄лсыт; манхурип йӣквта̄ныт ва̄щинта̄лсыт. Хунь пуссын о̄с акванёхтысӯв, ка̄сыӈ группа матыр номер суссылтас. Татьяна Андреевна Головина группа «Хоса палиӈ со̄выр» урыл мо̄йт суссылтасыт. Надежда Константиновна Маслова нупыл о̄лум ма̄хмытыл Галина Константиновна Алгадьева э̄рыг э̄ргыс. Альбина Ксенофонтовна Таратова группатэ а̄мщит а̄мщисыт. Ам нупылум о̄лум а̄гит – йӣквсыт. Ма̄к мӯйлын хо̄тал хольтыл, номсам ва̄рмалянув а̄стум юипа̄лт пилыӈ яныг ня̄нь ёт ща̄й айсӯв, ущ ла̄ккваминыгласӯв. Ёмас, хунь тамле мероприятиян яныг хо̄тпат ёхталэ̄гыт, ня̄врамытн ма̄к э̄рнэ ёмас потрыт потыртэ̄гыт. Ты ма̄гыс яныг пӯмащипа ла̄тыӈ та̄нанылн ла̄ве̄в. Хо̄т акванатхатнэ кол ке о̄щнувӯв, ва̄тихал акванялантанувӯв, матыр щаквщинувӯв, потраманувӯв. Ма̄к ма̄ньщи а̄кань ю̄нтуӈкв хоса, молях ма̄гыс ма̄н кӯстыр а̄каньрищит ва̄рсӯв. Пуӈканыл а̄кань пуӈк хольт пе̄рыгтыянӯв, супанылто̄раныл нас тув ӯрмыгтыянӯв ос сэ̄тапыл тув нэ̄гумтыянӯв.

1091 2015.01.16. Евдокия Кугина

Кульпасн мӯйлуӈкве ёхталэ̄н. Ма̄нь таквс э̄тпост 2014 та̄лт хо̄тхуйпловит щислат Кульпас па̄выл искола нёлсат та̄лыг е̄мтыс. Кӯщаиг ань Наталья Александровна Слепцова рӯпиты. Ма̄н исколавт сака ёмас учителит рӯпитэ̄гыт, пуссын высший образование о̄ньще̄гыт. Рӯпатав ёмащакв, ка̄ркамыг мины. Са̄всыр конкурсыт, ощхулит ва̄рыглэ̄в. Исколавт тамле касыл о̄лы, тав наме «Таёжный БУМ». Ка̄сыӈ та̄л тот учителит, интернат воспитателит ос классный руководителит касэ̄гыт. Ня̄врамыт район ос округ янытыл ищхӣпыӈ ут (интернет) хосыт конкурсыт ос ощхулит ва̄рыглэ̄гыт. 2012 та̄лт исколав Ха̄льӯс район кӯщай хо̄тпан «Лучший проект программы развития общеобразовательного учреждения» нампа номинацият премиял майвес. Ань исколавт 11 класс а̄стлуӈкве ро̄ви. Пе̄с порат туп о̄выл классыт а̄стлуӈкве ро̄выс. 1934 та̄лт о̄выл классытт ня̄врамыт ханищтан искола рӯпитаӈкве о̄вылтахтас, тот туп ва̄т нупыл хӯрум ня̄врам ханищтахтас. Ма̄нь па̄влытт о̄лнэ ня̄врамыт ат ханищтахтасыт, ща̄нянылна̄щанылн тыг тотуӈкве ат та̄ртве̄сыт. Тувыл учителит та̄н ётаныл са̄в потыртасыт, ань ня̄врамытн ханищтахтуӈкве э̄ри. Ты юипа̄лт ущта ня̄враманыл интернатн тотуӈкве патсаныл. Тувыл исколат 283 ня̄врам ханищтахтас. 1935 та̄лт ма̄нь таквс э̄тпост исколаинтернат рӯпитаӈкве патыс. Кӯщаиг тот Алексей Васильевич Голошубин о̄лыс. 1960 та̄л мус ня̄врамыт са̄тыт класс мус ханищтахтасыт, мощ ётылнуве нёлолов класс мус, тувыл 1970 та̄лытт ловит класс мус ханищтахтуӈкве патсыт. Ма̄н исколавт ханищтахтам ма̄хум ань Россия янытыл са̄в ма̄т рӯпитэ̄гыт – учителит, ле̄ккарыт, геологыт, экономистыт, юристыт, водителит, хӯл алыщлан ос во̄раян хо̄тпат, культурат ос мо̄т са̄в ма̄т рӯпата ва̄ре̄гыт. Та̄нти исколаныл ос па̄вланыл ат ёрувлыяныл, янытлыяныл. Ты ма̄гыс ма̄н номтанув ёмасыт. Юио̄выл ва̄т та̄л сыс исколавт ёмащакв ханищтахтам са̄т хо̄тпа ме̄талитыл майве̄сыт. Исколавт ань э̄рнэ матыр пуссын о̄лы – сырсыр ищхӣпыӈ утыт (компьютерыт, интернет, интерактивный па̄ртыт), ма̄нти ло̄пс (сайт) тот о̄ньще̄в. Ка̄сыӈ учитель тамле ищхӣпыӈ ут хосыт ня̄врамытн ля̄ххалыт ман потрыт ловиньты. Учителит, воспитателит, тыт ханищтахтам ос ань ханищтахтан ма̄хум пуссын ты ялпыӈ хо̄талыл янытлыянӯв! 2015 та̄лт та̄л котиль э̄тпост Кульпас па̄выл исколат ялпыӈ хо̄тал ва̄ре̄в, пуссын ёхталэ̄н, ма̄н на̄нан ӯриянӯв! Евдокия Кугина, Кульпас исколат ма̄ньщи ла̄тыӈ ханищтан нэ̄.

1091 2015.01.16. Николай МЕРОВ

Пе̄с йис о̄лупса э̄лаль тотаве. Мо̄лты та̄л ва̄т са̄грапнал э̄тпост Ханты-Мансийск ӯст «Туризм» нампа ӯщлахтын ва̄рмаль урыл прессконференция ва̄рыглавес. Округувт ты тэ̄лат щирыл Инна Григорьевна Арканова кӯщаиг рӯпиты. Тав ля̄ххал тотнэ ма̄хумн ӯщлахтын ва̄рмаль урыл потыртас. Ты хосыт ань Ханты-Мансийск ӯс ляпат о̄лнэ Добрино па̄вылт «Югра» нампа ӯщлахтын ма̄ рӯпитаӈкве патыс. Ты проект э̄лаль тотнэ ма̄гыс округ правительстват рӯпитан ма̄хум та̄н нё̄тсыт. Та ма̄ соссаӈ ма̄хум пе̄с йис о̄лупса щирыл ва̄рим о̄лы. Ты ва̄рмаль тыи ма̄гыс щё̄питавес, э̄лыл тыг ёхталан мир соссаӈ ма̄хум о̄лупса ка̄салаӈкве вос ве̄рмысыт. Хумус ма̄ньщи, ханты ос ё̄рн ма̄хманув пе̄с порат о̄лсыт. Манхурип пормас о̄щсыт, манырсыр тэ̄нут ва̄рсыт, тот пуссын суссылтаве. Та ӯщлахтын ма̄т э̄кваго̄йкаг о̄лэ̄г. Тэ̄н ётэ̄н хо̄тпа потрамаӈкве ве̄рми, тэ̄н матыра̄ти хӯлтыглэ̄г. Хотьют ка̄сащи, такви ма̄гсылэ ка̄тыл пормас ва̄руӈкве ве̄рми. Тувыл ос соссаӈ ма̄хманув тэ̄нут тот а̄рталаӈкве ро̄ви. Тамле ты пӯмащ ва̄рмаль щё̄питавес.

1091 2015.01.16. Николай МЕРОВ

А̄нъя па̄выл яныгпа̄ла хо̄тпа потре. 2014 та̄лт ма̄нь таквс э̄тпост ам Ха̄льӯс район А̄нъя па̄вылн ялсум. Тот акв ма̄ньщи э̄ква ёт потрамасум. Тав наме Тамара Семёновна Мезенцева, ты ма̄ньщи нэ̄ на̄н ва̄глын, ма̄н тав уре̄тыл хансыгласӯв. Тамара Семёновна такви рӯтанэ урыл потыртас. На̄н ань тав потре э̄лаль ловиньтэлы̄н: «Ам а̄тям самын патме порат, нэ̄пакт Семён Кириллович Кислобаев хасвес. О̄пам ос о̄парищ наме Сайнахов о̄лыс. Тох манрыг е̄мтыс, ань потыртылум. Насати, а̄щум самын патме юипа̄лт щаще̄квам о̄парищ наметыл хасвес. Щаще̄квам а̄ги о̄парищ наме Кислобаева о̄лыс. Тав па̄л рӯтанум Кимкъясуй па̄вылт пуссын о̄лэ̄гыт. Тот О̄выръя о̄вты. Тыима̄гыс щаще̄квам акваг О̄выръя а̄гииг ла̄выглавес. Та рӯтныл ма̄н ты сусумтасӯв. Омам Анастасия Степановна ос Я̄лъюс па̄выл а̄ги о̄лыс. А̄щум таве хӯрум щёс та па̄вылныл тӯлманта̄лыстэ, маткем тыглетувле та тотыглавес. Ётылнув омам потырта̄лыс, тав аквматнакт ма̄ньлатыг о̄лме̄т ӯлум ӯлмаяс. Э̄рттам хотты хӯл алыщлан ма̄хум татем ёмщакв толыг ре̄пыгтасыт, толыг хӯрыг кӣвырт омам таквина̄тэ ка̄саластэ. Хӯл алыщлан хо̄тпат таве толыг хӯргыл конхасумтасаныл, яныг пе̄с йис колн тотыгпасаныл. Та колныл тусыӈ о̄йка конква̄лыс. Ты ам о̄парищум о̄лыс. Ётыл, хунь ща̄нягума̄щагум акванминасыг, со̄ль, омам та колн ты щалтыс. Тох ты такви о̄лупсатэ ӯлум хосыт ка̄саластэ. Ты ва̄рмаль хосат о̄лыс, омам яныгпа̄лаг е̄мты̄с, ущта ты номтэ а̄нумн хультуптастэ. Тав тох ла̄выс: «Ам на̄нан янмалтан ма̄гыс яныг о̄парищин колн ёхтысум. А̄щин а̄нум вистэ». Ам о̄парищум ат ёхтыслум, ащо̄йкам о̄с ат ёхтыслум. Тэ̄н хосат а̄тимыг е̄мтсы̄г. Та порат вуйкан хо̄нтыт ма̄н ма̄вн хо̄нтлым ёхталасыт. О̄пам ос ащо̄йкам щёлыӈыг о̄лсы̄г. Щёлыӈ ма̄хум хо̄нтытн пащиртаӈкве патве̄сыт. Ащо̄йкам Степан Алексеевич Сангилев ке̄р ва̄рнэ хумыг о̄лыс. О̄пам ос Кирилл Васильевич Сайнахов са̄в са̄лы о̄ньщис. Тав кит ме̄тра карсытэ о̄лыс. Ща̄нь ла̄тыӈ коныпал рущ, саран, ё̄рн ос мо̄т хоттымат акв ла̄тыӈ ва̄с. Щаще̄квам тай ос щар талква, туп ме̄тра арыгтем карсытэ о̄лыс. Ань А̄нъя па̄вылт ам яныгмам пе̄с колум иӈ ӯнлы. Па̄вылн ёхталанэ̄м порат тот ты хӯлэ̄гум. Колув ляпат са̄лы ӯрнэ о̄щув иӈ лю̄ли. Ам таима̄гыс ты ма̄ нэ̄мхотьютын миӈкве ат таӈхилум». Тамара Семёновна школа а̄стламе юипа̄лт Салехард ӯсн культура тэ̄ла щирыл э̄лаль ханищтахтуӈкве минас. Ханищтахтын ма̄ныл а̄стуме юипа̄лт Ягрим па̄выл культура колт рӯпитаӈкве сака таӈхыс. Тув ёхтыс, кӯщай нэ̄ тав нупылэ ла̄выс: «Наӈ нила ня̄врам о̄ньще̄гын, садик а̄тим, ма̄н наӈын виӈкве ат ве̄рмилӯв». Тувыл нэ̄ сысы та минас. Ос такви яныгмам па̄влэ̄н ёхтыс, рӯпитан ма̄л тот майвес. Тамара Семёновна са̄в та̄л клуб колт рӯпитас. Ань тав пенсия олн вуим Ягрим па̄вылт о̄лы. Ялпыӈ хо̄талыт о̄лыгланэ̄ныл порат тав тув акваг во̄виньта̄лаве. А̄нья па̄вылн колэ уральтан ос нас ӯщлахтын ма̄гыс ва̄тихал яланта̄лы.

1091 2015.01.16. Людмила ТЕТКИНА

Колхоз кӯщаиг са̄в та̄л рӯпитам о̄йка. Октябрьский район Карымкары па̄вылн ялмум порат Александр Семёнович Климов ёт ва̄йхатасум. Ты яныг о̄йка па̄влыӈ мирн сака янытлаве. Тав са̄в та̄л колхоз кӯщаиг рӯпитас. Рущ о̄йка та районт Малый-Атлым па̄вылт самын патыс, тот яныгмас. Школа а̄стламе юипа̄лт Салехард ӯст на̄иӈха̄пыл яласан хо̄тпаг ханищтахтас. Александр Семёнович та поратэ урыл тох ла̄выс: «На̄иӈха̄пыл А̄с я̄ хосыт тыглетувле яласаӈкве сака э̄руптасум. Ос тувыл хотыл номтыл ёхтуве̄сум, Краснодарский край ща̄нягума̄щагум яныгмам ма̄тэ̄н о̄луӈкве минасум. Та ма̄т слесариг рӯпитаӈкве патхатасум. Тот хоса о̄луӈкве ат ве̄рмысум, акваг ты ма̄н воратасум, ювле та йисум. Карымкары па̄вылт 1974 та̄лныл пенсиян миннэ̄м мус колхозт рӯпитасум. Ня̄враманум о̄с тыт самын патсыт, ань тыт о̄лэ̄гыт. Ам рӯпитаӈкве хунь о̄вылтахтасум, колхозт 750 мис ос 200 арыгкем лув о̄лыс. 1982 та̄лт акв со̄тыра 200 мис о̄щсӯв, 1990 та̄л – акв со̄тыра 500 арыгкем мис тыт о̄лыс. Та̄рвитыӈ пора хунь о̄вылтахтас, ма̄хманув пуссын йильпи щирыл о̄луӈкве тахмаясыт, воссыг нэ̄мхотьют рӯпитаӈкве ат ка̄сащас. То̄нт мисанув юв та та̄япасанӯв. 1993 та̄лт кӯщаит тыг ёхталасыт, колхоз лаппантуӈкве кӯсыгласыт. Тох номтум щар ат патыс, са̄в та̄л сыс ты рӯпата амки ва̄рыслум. То̄ва порат номсахтасум, э̄рыӈ со̄ль, мисанум пуссын нё̄влиг тыналаӈкве. Ос ӯйхул та̄л хумус о̄луӈкве патэ̄в. Акв порат Ханты-Мансийск ӯсн яныг кӯщаит палт ялсум, колхозувт о̄лнэ та̄рвитыӈ ва̄рмалит урыл тот потыртасум. Ювле ла̄вве̄сум, тыт ма̄во̄й но̄хвиӈкве э̄ри, туп тох са̄в олн сэ̄луӈкве ро̄ви. Мисанум, луванум амки вос о̄ньщиянум, ты ва̄рмаль мирн щар ат э̄ри. Ювле ёхтысум, мощ номсахтасум, э̄лаль амкем рӯпитаӈкве та патсум. Октябрьский район янытыл туп ма̄н па̄влувт тамле ӯйхул янмалтан предприятие о̄лы. Ань ма̄нь пыгум ты рӯпата ва̄ри, 150 мис о̄ньщи. Рӯпататэ пуссын о̄с такви ва̄ритэ. Ма̄хум тав палтэ рӯпитаӈкве щар ат ка̄саще̄гыт. Пыгум такви мисыт посыянэ. Нэ̄ хо̄тпат пуссын ань кол уральтэ̄гыт манос колкан ловтэ̄гыт. Ты рӯпата ва̄рим, са̄внув олн выгыт. Э̄лнаӈ колхозт мис поснэ 18 нэ̄ рӯпитас, то̄нт щаквит са̄в о̄лыс. Па̄выл по̄хат таса̄вит ёмас пумкан о̄лыс, пум тракторыл са̄грысӯв. Ты пумканыт пуссын ань нирын лапяныгмаве̄сыт. Па̄влыӈ ма̄хманув щаквит ос мисво̄й ёмащакв ёвтэ̄гыт. Рӯпитан хо̄тпа а̄тим, мисанув туи кон та̄ртыянӯв, пум тэ̄ӈкве во̄рн минэ̄гыт. Пыгум та̄наныл такос па̄вылн ня̄влыянэ, ювле во̄рн ха̄йтэ̄гыт. То̄ва мисанув тот пум тэ̄нэ̄ныл порат алавет. Ты туи сыс нила мис хо̄нтсӯв. Ла̄гланыл хотяктавет, ётвивет, нё̄вле янгыщ тох та хультуптаве. Хотьют лю̄ль ва̄ри, аты хо̄нтсанӯв. Полиция ма̄хум тыг во̄выгласӯв, та̄н па̄выл хосыт такос ё̄мыгтасыт, ма̄хум китыгласаныл, нэ̄пакын матыр хассыт, ювле Октябрьский па̄вылн та минасыт. Ос ты э̄лыпа̄лт ма̄навн ла̄всыт, мисанув ма̄нки вос ӯргалыянӯв, во̄рн ат ке та̄ртсанӯв, тох ат е̄мтнув. Ты э̄лыпа̄лт манаса̄вит мис тыт о̄лыс, во̄рт ос тапал ва̄тат пум таим хо̄тал па̄лыт ё̄мыгтасыт, нэ̄мхотьютн ат новве̄сыт. Ань манрыг тох ва̄ре̄гыт, ам щар ат торгамтэ̄гум. Па̄выл по̄хат ма̄во̄й но̄хвинэ хо̄тпат рӯпитэ̄гыт, ма̄шинат акваг тыглетувле яласэ̄гыт. Пыганум ла̄ве̄гыт, улпыл, ты по̄х хо̄тпат лю̄ль ва̄ре̄гыт. Ань таи ёмас, кӯщаянув ущта торгамтасыт, туп ма̄во̄й но̄хвиӈкве ат э̄ри, тыт мо̄т рӯпата ва̄руӈкве о̄с ро̄ви. Ань пыгум мисыт янмалтан ос щаквит тыналан ма̄гсыл субсидияолныл ойтаве. Са̄всыр нэ̄пакыт ёт ань тав рӯпиты, ам таве̄н мис посуӈкве, са̄всыр техника ва̄руӈкве нё̄тэ̄гум». О̄йка са̄в та̄л ка̄ркамыг рӯпитаме ма̄гсыл са̄всыр янытлан нэ̄пакыл ос ма̄глын тагатан по̄сыл майвес. Рӯпатаныл по̄хын минаме порат «Орден почёта» по̄сыл майвес. Ты коныпал тав «Заслуженный работник сельского хозяйства России» ос «Почётный гражданин Октябрьского района» яныг намыг о̄ньщи.

1091 2015.01.16. Светлана РОМБАНДЕЕВА

Ма̄щтыр пормасыт суссылтавет. Ты хуритыт по̄слым пормасыт Сургут ӯст ИКЦ «Старый Сургут» нампа колт о̄лэ̄гыт. Ва̄т са̄грапнал э̄тпост тув ялмум порат та̄наныл ка̄саласанум, по̄слысанум. Та колт рӯпитан ма̄ньщи нэ̄ Людмила Мелентьева ла̄внэ̄тэ щирыл, ты пормасыт атхуйплов та̄лыт сыс тот рӯпитам ос ань рӯпитан ма̄щтыр ма̄хум та̄н ва̄рсыт. Йӣв пормасыт ос Александр Дмитриевич Сайнаховын ма̄щтырлаве̄сыт. Ӯс ма̄хум ос мӯй хо̄тпат тув акваг щалтсэ̄гыт, пӯмщалахтэ̄гыт.

1091 2015.01.16. Николай МЕРОВ

Ты пе̄с йис ма̄ ӯщлахтын ма̄гыс рӯпиты. Ювле хультум 2014 та̄л ва̄т са̄грапнал э̄тпост тыналахтан ма̄хум са̄всыр тэ̄нутпормас Ханты-Мансийск ӯсн тотыгласыт. Ӯст о̄лнэ «Экспоцентр» колн са̄в мир ёхталас. Александр Сергеевич Охранов, «Остяко-Вогульск» нампа община кӯщай хум, такви ва̄рум рӯпататэ урыл а̄нумн мощ потыртас. Тав ла̄выс: «Ма̄н по̄лям хӯлыт сорт, тӯрхул ос ӯсхул тыг тотсӯв. Тувыл сӯйпил, саӈквлыпил, са̄вни пил, ӣныг ос то̄слым ла̄хыс тыналэ̄в. А̄ӈхат, ятрит, мансыныт ёттотсӯв. Общинав рӯпитанэ̄тэ па̄сыл са̄т та̄лыг е̄мтыс. Ка̄сыӈ та̄л тыналахтуӈкве тыг ёхталэ̄в. Ма̄н онтолов хо̄тпа аквъёт рӯпитэ̄в, пил ос ла̄хыс ма̄нки атэ̄в. Ханты-Мансийский районт Талинка па̄выл по̄хыт ӯщлахтын ма̄ о̄ньще̄в. Тот соссаӈ ма̄хманув пе̄с порат о̄лманыл щирыл акв яныг кол, кит ё̄рнкол, кит сӯмъях ӯнттысӯв. Пӯсас кӣвырт са̄лыт о̄ньще̄в. Ма̄ньщи ос ханты ма̄хум пе̄с о̄лупсаныл урыл мӯй ма̄хумн потыртэ̄в. Йис та̄гыл тыт о̄лнэ мирыт урыл э̄лыл ёхталан ма̄хум сака пӯмщалахтэ̄гыт. Та̄л сыс ма̄н палтув са̄в хо̄тпа мӯйлуӈкве ёхталы. Са̄выӈпа̄лэ ма̄хум таквсы порат ёхталэ̄гыт. То̄нт пил, ла̄хыс са̄в о̄лы. Ма̄н та̄наныл хӯлтыянӯв, манхурип пил ос ла̄хыс хо̄т атуӈкве ро̄ви. Хо̄тпат во̄рт хот ул вос тыпсыт, хумус а̄ращ па̄лтуӈкве э̄ри, во̄р но̄х ул вос пе̄ламлы, во̄рн миннэ̄ныл э̄лыпа̄лт ты ва̄рмалин ма̄н та̄наныл ханищтыянӯв. Яныг ӯсныл ёхталан хо̄тпат то̄ват ты урыл нэ̄матыр ат ва̄гыт. Йис ма̄вт хӯл алыщлан нёлса̄ткем хо̄тпа рӯпиты. Та̄н ётаныл договорнэ̄пак хассӯв. Ты хо̄тпат пувнэ хӯланыл общинан мыганыл. Ма̄н хӯлыт тыналыянӯв ос ма̄хум ёт та̄ра ойтхатэ̄в. Тувыл во̄раян ма̄ о̄ньще̄в. Тот ос ва̄т нупыл ат хо̄тпа рӯпиты. Алыщлан во̄руй сованыл о̄с ма̄навн мыганыл. Тох ты рӯпитэ̄в. Са̄в хо̄тпа хӯл алыщлаӈкве ос во̄раяӈкве ма̄н палтув ёхталы. Хотьют хумус таӈхи, тох та ӯщлахты. Ма̄н ма̄хум яныг ща̄гтыл ӯриянӯв. Тыщир ӯщлахтуӈкве ка̄сащегы̄н ке, ма̄н палтув ёхталэ̄н». Ань о̄лум выставкат са̄всыр тэ̄нутпормас о̄лыс. Тот солвалыӈ, по̄лям, посымтым са̄всыр хӯлыт ёвтуӈкве ро̄выс. Тувыл лэ̄пак, во̄нтыр, о̄хсар, нёхыс, лэ̄ӈын ос мо̄т ӯй совыт тыналаве̄сыт. Са̄всыр пил, ла̄хыс о̄лыс. Ма̄хум тот мольщаӈыт, ня̄рат, пӯркат ос мо̄т маснут ёвтсыт. Атыӈ ня̄нь, са̄всыр нё̄выль ос мо̄т тэ̄нут а̄рталасыт. Кон кит ё̄рнкол тӯщтым о̄лсы̄г, мӯй ма̄хум тот тэ̄пъяласыт. Та хо̄талытт ӯст о̄лнэ мир пуссын ёвтхатуӈкве тув яланта̄лсыт.

1091 2015.01.16. Светлана РОМБАНДЕЕВА

Финноугор мир хо̄нтхатыглап. Ювле хультум та̄л ва̄т са̄грапнал э̄тпос 5-6 хо̄талаге̄т Сургут ӯст финноугор ма̄хум акванхо̄нтхатыгласыт, «Дни культуры финноугорских народов» нампа хо̄талытт мӯйлысыт. О̄выл хо̄тал ма̄хум «Старый Сургут» нампа историкокультурный центрыт атхатыгласыт. Соссаӈ мир ма̄гыс я̄нас отдел о̄лы, кӯщаиг тот ма̄ньщи нэ̄ Марина Самсонова рӯпиты. Тув са̄в хо̄тпа ёхталас, мо̄т па̄влытныл манос ӯсытныл ма̄щтыр ма̄хум о̄лсыт, э̄ргын, йӣквын ансамблит ёнгысыт. Финноугор республиканыл ла̄тыӈ щирыл рӯтыг о̄лнэ ма̄хманув о̄с о̄лсыт. О̄выл ла̄тыӈ центр кӯщай Антон Александрович Акулов тав ла̄выс. Тув атхатам ма̄хум янытласанэ, са̄в ёмас сымыӈ ла̄тыӈ ла̄выс. Ты юипа̄лт ма̄щтыр хо̄тпат та̄нти ка̄тыл ва̄рнэ пормасаныл урыл мощ потыртасыт, мӯй ма̄хумн рӯпатаныл суссылтасаныл. Виктория Викторовна Карчина, ханты нэ̄, Лянтор ӯсныл ёхталас, тав прикладной творчество центрыт по̄слын ос матыр щаквщин хо̄тпаг рӯпиты. Лям я̄ хосыт о̄лнэ хантыт хотаӈ пуныл а̄канит хумус ва̄ре̄гыт, ты урыл потыртас. Кит ханты нэ̄г Нижневартовский район Аган па̄вылныл о̄лсы̄г – Фёкла Семёновна Бондаренко ос Татьяна Семёновна Уколова. Па̄влэ̄нт тэ̄н ханты мир культура центрыт рӯпитэ̄г, сас ма̄щтыр намыл маим о̄лэ̄г. Соссаӈ хо̄тпанув халт акв хум Удмуртияныл о̄лыс, Дмитрий Дмитриевич Рябчиков. Тав тамле акв сыр лӯпта йӣв (липа) ня̄рыг са̄лмыл ла̄гылн маснэ хопи сагнэ урыл потыртас (рущ ла̄тӈыл ла̄ваве плетение лаптей из лыка). Тюмень ӯсныл ос Марина Владимировна Клицук ёхталас, саран ма̄хум а̄каняныл урыл потыртас. Э̄ргын ос йӣквнэ ансамблит выступайтасыт, янгема̄не маттем та э̄ргысыт, йӣквсыт, сака пӯмыщ о̄лыс. Хо̄талъя̄т юипа̄лт ос ма̄хум нэ̄пак хаснэ финноугор ма̄хум ёт хо̄нтхатыгласыт – В. С. Иванова, С. С. Динисламова ос Р. В. Кириллова ёт, та̄н та̄нти хансум нэ̄паканыл урыл потыртасыт. Тувыл ма̄хум историкокультурный центр янытэ̄т мощ ё̄мыгтасыт, колытн щалтсасыт, ка̄сыӈ кол урыл я̄нас потыр хӯнтлысыт. Китыт хо̄тал ма̄хум А. С. Пушкин нампа яныг библиотекат хо̄нтхатыгласыт, тот «Современное состояние культуры финноугорских народов» нампа научнопрактический семинар ва̄рыглавес. Учёный ма̄хум докладыт ловиньтасыт. Ма̄щтыр ма̄хум ос ка̄тыл ва̄рнэ пормасаныллӯтаныл тув тотыгласаныл, тув ёхталам мӯй хо̄тпатн рӯпатаныл суссылтасаныл. Хо̄тпа ханищтахтуӈкве таӈхыс те, ханищтавес. Ма̄щтыр ма̄хум халт кит ма̄ньщи хо̄тпаг о̄лсы̄г. Ты Александр Дмитриевич Сайнахов – тав ты музейт рӯпиты, хӯл алыщлан ман во̄раян ма̄гыс э̄рнэ алыщлапыт ва̄ри, «Народный мастер России» яныг намыл маим о̄лы. Александр тот ань йӣвныл ёнгын ут ва̄рыс, ты рӯпататэ мӯй хо̄тпатн суссылтастэ. Китыт хо̄тпав – ты Мария Владимировна Ситникова, тав о̄с та музейт рӯпиты, «Мастер народных художественных промыслов Югры» намыл маим о̄лы. Тав ос тот хӯл совыл са̄всыр сувенирыт ва̄рыс, ты рӯпататэ суссылтас. Мӯй ма̄хум тот хо̄тал палыт рӯпитасыт, ма̄щтыр ма̄хум палт ро̄влахта̄лсыт, та̄н ва̄рум рӯпатаныл нупыл суссыт, пормасаныл пӯмщаласаныл.

1091 2015.01.16. Тамара МЕРОВА

Тав пе̄с щирыл о̄лы. Во̄ртур э̄тпост Шеркалы па̄вылн ялмум порат соссаӈ ма̄щтыр хо̄тпат халт акв ма̄ньлат нэ̄ о̄лыс. Тав такви ю̄нтум пормасанэ тув суссылтаӈкве о̄с тотыгласанэ. Тувыл сусте̄мт, нэ̄ пе̄с щирыл ю̄нтым совъя ва̄й, тучаӈ, хансал ю̄нтым пӯтыска ос лэ̄пта то̄рыт но̄хлэ̄ватас, пасан тармыл пинсанэ. Ётылнув тав ётэ ва̄йхатасум ос такви уре̄тыл мощ потрамаӈкве во̄выслум. – Паща о̄лэ̄н, ам намум Ольга Ярсомова. Ам Самсоновские нам о̄щнэ стойбищаныл тыг ёхтысум. Тав Нефтеюганский район Салым па̄выл по̄хат о̄лы. Ты о̄йкам тав самын патум ма̄тэ. Мо̄лал тав а̄тимыг е̄мтыс. Ам ань кит пыгагум ёт хультсум, ма̄нкирот во̄рт та о̄лэ̄в. Акв пыгум са̄тыт та̄лэ моще̄ртын то̄влы, ма̄нь пыгкем ат та̄лэ. Ам амки Сургутский район Таурово ма̄нь па̄вылт самын патсум. Школат ханищтахтамум сыс Угут па̄вылт интернатт о̄лсум. Мо̄т ма̄н э̄лаль ханищтахтуӈкве нэ̄мхотталь ат ялсум. 2006 та̄лт мӯй хо̄тпат а̄нум ха̄йталаӈкве ма̄н колувн ёхтысыт ос нэ̄г та тотве̄сум. Та па̄сыл ще̄мьямтыл стойбищат та о̄лэ̄гум. Во̄рт о̄луӈкве а̄нумн сака мӯсты. – Ос ань на̄нкирот во̄рт о̄луӈкве ат пилэгы̄н? Ул сака та̄рвитыӈ, па̄вылн минуӈкве ат номсэгы̄н? – А̄ти, ма̄н тув ханьщувласӯв. Тот сытам ма̄, лылые̄пе сыстам. А̄лпыл но̄хква̄лэ̄в, тэ̄пъялэ̄в, матыр колсори рӯпата ва̄ре̄в, вит тотэ̄в, тэ̄нут па̄йтэ̄в. Кӯр па̄лтын ма̄гыс тӯяг са̄внув на̄йив атэ̄в. Ня̄врамагум ёнгасанэтэ̄н сыс ю̄нсхатуӈкве ӯнтылмата̄лэ̄гум. Ма̄н тыт амки ю̄нтум маснутыл масхатым о̄лэ̄в. Туи порат котыт, ӯйхул совыт тынтлыянум, хариӈ са̄с оспаӈ ут па̄йтэ̄гум. Пил ва̄тнэ пора ёхты, пил ва̄туӈкве ялантэ̄в. Хӯл о̄с ма̄нки алыщлэ̄в, ня̄врамагум няслэ̄г. Тэ̄н а̄нумн сака ёмщакв нё̄тэ̄г, матыр рӯпата пуссын аквъёт ва̄рилӯв. – Кот, сов хотыл выгын? – О̄йкам о̄лме̄т са̄в во̄раяс, во̄руит ка̄тнпаттыглас. Таве̄ныл хультум котыт, совыт о̄ньще̄гум. Тав щаще̄квагео̄паге са̄лыт о̄щсы̄г. А̄нумн о̄с са̄лы мӯйлупта̄лсы̄г. Ань нэ̄матыр а̄тим, ма̄нки са̄лы янмалтаӈкве ат патсӯв. Омам Альбина Лазаревна Ярсомова Угут па̄вылт о̄лы. Тот ма̄хум пе̄с накын ханищтыянэ, акваг матыр ю̄нты, ва̄ри. Тав во̄рт кол, пувлын кол, сӯмъях о̄ньщи. Угутыт омам о̄лнэ кол о̄с о̄ньщи. Ам 17 та̄лумт хум ва̄рсум, ос сысы та тотве̄сум. – Ня̄врамагын яныгме̄г, па̄вылт о̄луӈкве ат воратэ̄г? – Ты таквсы тай Салым па̄вылн ва̄нтлысӯв. Ма̄н тот квартира о̄ньще̄в. Пыгум ань школан минас. ты э̄лыпалт па̄вылн яланта̄лмув порат пыгагум акваг ла̄всыг, «тот марщум». Амки па̄вылт о̄луӈкве нэ̄мхуньт ат ка̄сащасум. Во̄рт соссаӈ ма̄хум маснутыл масхатэ̄гум, а̄нумн ёмас, нэ̄мат лю̄ль а̄тим. Тох масхатым а̄нумн колсори рӯпата аквтупмат кӯстырнув ва̄руӈкве, мо̄т матыра̄ти тэ̄лат ва̄руӈкве о̄с сака мӯсты. Ма̄ньта̄гыл тамле маснутн ханьщувласум. Ань Салымн ёхтэ̄гум, тот па̄влыӈ ма̄хум ам нупылум хащта̄лыг та сунсэ̄гыт. Пыгагум ань тамле маснут о̄ньще̄г, сас ю̄нтсагум. Тувыл яныгмаӈкве патсы̄г, тох масхатуӈкве сака ат таӈхе̄г. Ла̄гыл маснут туп масыглэ̄г, мо̄т маснут масуӈкве тэ̄н ань ат ка̄саще̄г. Яныгнув пыгум ханты ла̄тӈув торгамты, мощ потырты. Ма̄нь пыгум то̄ва ла̄тӈыт торгамты ос потыртаӈкве ат ха̄сы. Ам ща̄нь ла̄тӈум ёмщакв ва̄глум, школан миннэм мус рущ ла̄тӈыл ат потыртасум. – Наӈ ты мащтыр ма̄хум съездын ёхталасын, ты ва̄рмалитыл маныр э̄лаль ӯре̄гын? – Ань тамле тэ̄лан ам о̄выл щёс во̄вве̄сум, тыг амки ю̄нтум пормасанум тотсанум. Мо̄т ма̄хум маснутаныл, пормасаныл суссанум, ёмас ханищтапыт о̄лсыт, потрыт хӯнтлысум. Тувыл хотты пормасанум ёвтуӈкве ка̄саще̄гыт ке, тыналыянум. Тамле ёмас ма̄ньлат нэ̄ ёт та ва̄йхатасум. Таве̄н ос пыгаге̄н паща ла̄тыӈ ке̄тэ̄гум, пуста̄гыл вос о̄лэ̄гыт, На̄й-О̄тыранылн вос ӯргалавет.

1091 2015.01.16. Людмила ТЕТКИНА

Та̄н ща̄нь ла̄тӈаныл э̄лаль тотыяныл. Марий Эл республикат о̄лнэ мариец ма̄хум ма̄гсыл 2005 та̄лныл ратива рӯпиты. Туи порат ты ратива рӯпитаӈкв о̄вылтахтаме па̄сныл лов та̄лэ тах то̄влы. Наталья Пушкина тот кӯщай нэ̄г о̄лы. Рӯпатаныл урыл тав таи ла̄выс: «Марий Эл ма̄ янытыл о̄лнэ ма̄хум марийский ла̄тӈыл потыртэ̄гыт. Яныг ӯсыт о̄лнэ ма̄хманув ла̄тыӈ ва̄гыт кос, тувыл потыртаӈкве э̄ссамтэ̄гыт. Ма̄ньлат хо̄тпанув ул вос э̄ссамтасыт ос ла̄тӈув э̄лаль вос тотсаныл, та̄наныл Йошкар-Ола ӯст акванатыглаӈкве патсанӯв. Йӣквуӈкве во̄выглыянӯв, ты йӣквнэ ва̄рмаль рущ ла̄тӈыл «этнодискотекаг» намаяслӯв. А̄гиянув, пыганув тув марийский маснутыл ёхталэ̄гыт ос мариец ма̄хум йӣквыт йӣкве̄гыт. Ма̄ньлат хо̄тпан тамле ва̄рмаль сака мӯстыс, йӣквуӈкве ань ва̄тихал акванатхатыглэ̄в. Тувыл ма̄н мо̄т ёмас номтыл ёхтувесӯв, ма̄хманув ка̄сыӈ хо̄тал марийский э̄ргыт вос хӯнтлэ̄гыт, ратива ва̄рсӯв. Ань ма̄н лов хо̄тпа рӯпитэ̄в. Йошкар-Ола ӯст о̄лнэ ма̄хум 13 щё̄с ос ма̄нь па̄вылквет о̄лнэ мир 18 щё̄с сыс э̄ргыт ос передачат хӯнтлэ̄гыт. А̄лпыл хо̄т щёс порат рӯпитаӈкве о̄вылтахтэ̄в. Мария Глушкова «Здоровье» нампа передача ва̄ри. Такви палтэ ле̄ккарыт во̄выглыянэ ос та̄н ётаныл тот са̄всыр а̄гмыт пусмалтан ва̄рмаль урыл потырты. Ма̄хум тув свонитэ̄гыт ос китыглахтэ̄гыт. Игорь Матвеев «Деревня поэта» нампа передача щё̄питы. Тав тот потрыт, стихыт хаснэ хо̄тпат ёт хо̄нтхатыгла̄лы, та̄н ётаныл потырты. Та̄н марийский ла̄тӈыл хансым стихыт, потрыт ловиньтэ̄гыт. Акв передачан ма̄н са̄всыр кӯщаит во̄выглыянӯв, та̄наныл ос са̄всыр ва̄рмалит урыл китыглыянӯв. Ка̄сыӈ э̄лумхо̄лас тот китыглахтуӈкве о̄с ве̄рми. Ма̄н ративав рӯпитанэ̄тэ ма̄гсыл Марий Эл Правительство 70 % са̄вит олн та̄стыглы, 30% са̄вит олн ма̄навн сэ̄луӈкве э̄ри. Ща̄нь ла̄тӈыл потыртым олн сэ̄луӈкве ат ве̄рмысӯв, тыи ма̄гсыл акв порат рӯпитаӈкве по̄йтыгласӯв. То̄нт па̄влыӈ ма̄хманув кӯщаит па̄лт пищмат хансуӈкве о̄вылтахтасыт, китыглахтасыт, манрыг ма̄н ат рӯпитэ̄в. Та̄н пуссын потыртасыт, мариец ма̄хум э̄ргыт ос потрыт хӯнтлуӈкве сака э̄руптэ̄гыт. Ты юипа̄лт Республика янытыл рӯпитаӈкве патсӯв. Олн ат то̄вылхатас, тыи ма̄гсыл Йошкар-Ола ӯст ат рӯпитасӯв. Номсысӯв, ма̄хманув тыт рущ ос мо̄т мирыт халт о̄лыманыл, ща̄нь ла̄тӈыл э̄ргыт сака ат хӯнтлэ̄гыт. Тувыл ӯст о̄лнэ ма̄хманув о̄с китыглахтасыт ос кӯщаит палт пищмат хассыт, ты юипа̄лт ӯст марийский э̄ргыт э̄лаль суйтуӈкве та патсыт. Ма̄н ань са̄всыр ялпыӈ хо̄талыт ос этнодискотекат ва̄рыглэ̄в, тох олн сэ̄лэ̄в. Яныг концертыт щё̄пита̄лэ̄в, тув Марий Эл ма̄ янытыл о̄лнэ турсуиӈ хо̄тпат марийский э̄ргыт э̄ргуӈкве во̄виянӯв. Йошкар-Ола ӯст «Дружба» нампа яныг колкапай о̄лы, тот 7-8 со̄тыра э̄лумхо̄лас э̄ргыт хӯнтлуӈкве акванатхатыглэ̄гыт. Тыщир олн сэ̄лэ̄в, ос ма̄нки культурав ос ща̄нь ла̄тӈув э̄лаль тотылӯв. Наталья ла̄выс, ань ӯст о̄лнэ ма̄ньлат ма̄хум тох ва̄тихал акванатхатыгла̄лым марийский ла̄тӈыл потыртаӈкве воссыг ат э̄ссамтэ̄гыт. Ань Йошкар-Ола ӯст о̄лнэ ма̄хум пуссын ща̄нь ла̄тӈыл потыртэ̄гыт.

1091 2015.01.16. Тамара МЕРОВА

Увщиигэ̄щиг. Литература та̄л та о̄вылтахтас Югра янытыл о̄лнэ ма̄хум ма̄гыс 2015 та̄л Литература та̄лыг ла̄ввес. Ань газетатт, журналытт сыресыр потрыт, мо̄йтыт са̄в вос хансаве. То̄нт ма̄хум пуссын матыра̄ти са̄внув ловиньтаӈкве патнувыт. Ма̄н о̄с ювле ул вос хультэ̄в, на̄н ма̄гсылын са̄всыр пӯмыщ потрыт, мо̄йтыт хансуӈкве патэ̄в. На̄нки матыр потыр о̄ньщегы̄н ке, ма̄навн ке̄туӈкве ве̄рмегы̄н, ма̄хумн вос ловиньтавет. Валентин Дёмин урыл ма̄н мо̄лты №20 газетавт хансыгласӯв. Тав ань на̄н ма̄гсылын такви хансум мо̄йтэ ма̄навн ке̄тыстэ. Ты таквс ма̄ньлат пыг армиян лусытаӈкве во̄ввес, хотталь Архангельский область нупыл та тотвес. Та̄л сыс тав ма̄ньщи ла̄тыӈ хотёрувлаӈкве хурахлы. Таве̄н ла̄ве̄в, ка̄сыӈ хо̄тал аквкит ла̄тыӈ номтэ̄т вос номылматыгла̄лы, та щирыл ла̄тӈыт ат ёрувлахтэ̄гыт. Пыг ёмас ма̄т вос лусыты, пус ка̄т, пус ла̄гыл таве̄н, На̄й-О̄тыранэ̄н вос ӯргалаве! Акв па̄вылт пе̄с порат увщиигэ̄щиг о̄лсы̄г. Ща̄ньа̄щ тэ̄н ат о̄щсы̄г. Омаге̄натяге̄н сорумн патсы̄г. Па̄влыӈ ма̄хманэ̄н тэ̄н нё̄твесы̄г. Таи ма̄гсыл тэ̄н лю̄льсаӈ ат о̄лсы̄г. Увщитэ сака ёмас, номтыӈ, ка̄ркам нэ̄ о̄лыс. Э̄ще савыӈыг, оссампа̄лаг о̄лыс. Увщитэ колсори рӯпата пуссын ва̄рыс: тэ̄нут па̄йтыс, маснут ю̄нтыс, колэ сыстамыг о̄ньщистэ ос па̄влыӈ ма̄хманэ̄н нё̄тыс. Та̄н таве э̄руптасаныл. Э̄ще нэ̄матыр ат ва̄рыс. Тав хо̄тал палыт нас ӯнлыс, туп потыртас ос увщитэ нупыл сунсыс, хумус таитэ рӯпиты. Увщитэ тав нупылэ ат кантлыс. Аквнакт тэ̄лы порат та̄н па̄вланылн са̄лыӈ суныл акв пыг ёхтыс. Тав хоса лё̄ӈх йис, сака ва̄гта̄л патыс. Са̄лыянэ ӯщлахтуӈкве о̄с тахсыт. Тав акв колкве ка̄салас, тув ёхтыс, ос э̄т хӯлуӈкве во̄вхатас. Та колт увщиигэ̄щиг о̄лсы̄г. Увщитэ а̄ви па̄лыгпунсыстэ, пыг ювта̄ртыстэ. Пыг китыглахты: – Нэ̄н колынт а̄нум мощ ӯщлахтуӈкве ро̄ви? Ам сака ва̄гта̄л патсум, са̄в хо̄тал йисум, са̄лыянум о̄с ва̄гта̄л патсыт. Увщитэ ювле ла̄выс: – Атхунь, щалтэн. Кон ащирмаӈ, ул сака по̄льве̄сын. Са̄лыянын кол по̄хат вос ӯщлахтэ̄гыт. Пыг колн юв та щалтыс. Тот ёмас, ре̄гыӈ о̄лыс. Тав маснутанэ витыӈыг ос хащлумыг о̄лсыт. Увщи тав маснутанэ то̄слуӈкве но̄хтагатасанэ. Тувыл таве̄н тэ̄нут ос ща̄й а̄ны пасан тармыл ӯнттыс. Пыг тэ̄пъялас, пӯмащипа ла̄тыӈ ла̄выс: – Сака портыӈ тэ̄нут ос исум са̄ккарыӈ ща̄й айсум. Наӈ ёмас колыӈ кӯщай нэ̄. Тав ла̄щлакв исылтахтас. Увщи таве китыглытэ: – Лё̄ӈхыт хумле яласасын? Ань э̄лаль хоталь минэ̄гын? – Ам ӯс нупыл минэ̄гум. Тот ам рӯт ма̄хманум о̄лэ̄гыт, пыг ювле ла̄выс. – Манрыг ме̄н колме̄н наӈ ювщалтсын? Мо̄т хо̄тпат палт ат ве̄рмысын минуӈкве? э̄ще китыглахты, Ме̄н ме̄нки марум ма̄т о̄лыме̄н. Наӈ наӈки нупылын сунсэн, маснутанын пе̄сыт, хащлумыт. Наӈ а̄нумн ат мӯстэ̄гын. Пыг э̄щ нупыл ювле нэ̄матыр ат ла̄выс. Увщи э̄ще нупыл кантыӈыщ а̄ӈкватас. Кон турманыг е̄мтыс. Увщи пыг ма̄гсыл пе̄рина нортыс. Тувыл пуссын ёл та хуясыт. Хунь а̄лпыл постыглас, пыг но̄хса̄йкалас, пе̄ринал но̄хлю̄люмтас. Увщи пасан щё̄питас, ща̄йпут па̄ялтас. Э̄ще тай иӈ хуйгала̄лы. – Пасан ва̄тан тыг йиен. Ань тэ̄ӈкве патэ̄гын, увщи пыг нупыл ла̄выс. Пыг пасан ва̄тан ӯнтыс. Увщи э̄ще но̄хса̄йкатаӈкве патыстэ. – А̄нум ул нове̄лн, ам хуюӈкве таӈхе̄гум, э̄ще ла̄выс о̄с та лэ̄птхатас. Увщи ос пыг тэ̄нккетэ̄н та тэ̄сы̄г, ща̄й айсы̄г. Пыгн минуӈкве пора ёхтыс. Увщи таве̄н тосам маснутанэ ювлемисанэ. Э̄ти тав пыг хащлум маснутанэ ю̄нтсанэ. Кон кол по̄хат сытам ма̄т ос ӯщлахтам са̄лыянэ лю̄льсыт. А̄ги пыгын лё̄ӈхын тэ̄нут ёт щё̄питас. – Пӯмащипа наӈын, наӈ сака ёмас колыӈ кӯщай нэ̄. Ам ма̄гсылум са̄в ва̄рмаль ва̄рсын. Ам наӈын ат ёрувлылум, пыг увщи нупыл ла̄выс. Тувыл са̄лыӈ сунын ӯнтылматас, э̄лаль та тахас. Са̄т хо̄тал ювле хультыс. Кон тӯйис. Увщи акваг та рӯпиты. Илттыг тав колэ по̄хат хӯрум войкан ос нё̄тнэ са̄лыт нэ̄глапасыт, та̄н са̄лыӈ сунын ке̄рим о̄лсыт. Пыг сун тармыл ӯнлыс. Тав хорамыӈ ос пуныӈ мольщаӈыл масхатым о̄лыс. Тав по̄хатэ̄т яныг то̄тап лю̄лис. Увщи колныл конква̄лапас. Пыг таве̄н тох та ла̄выс: – Са̄всыр ма̄т ам яласасум, ос тамле ёмас а̄ги ат хо̄нтыгласум. Ам Ӯс-О̄тыр пыг, наӈын ам ётум о̄луӈкве во̄вилум. Ам наӈын нэ̄г ке тотылум, наӈ ка̄саще̄гын? Увщи хоса ат номсахтас. – Ам наӈ ётын о̄луӈкве патэ̄гум, ам наӈын сака э̄руптылум! Ӯс-О̄тыр пыг яныг то̄тапныл хорамыӈ сахи конлэ̄ватастэ ос увщин мӯйлуптастэ. Э̄щ иснасныл тыи нупыл нас сунсыс. Тав сыме сака ща̄ргыс. Ӯс-О̄тыр пыг увщитэ сун тармыл ӯнттыстэ, са̄лыянэ нупыл ро̄ӈхувлас, са̄лыт молях э̄лаль та ха̄йталтахтасыт. Ос ӯсн аквъёт та минасы̄г, тот о̄луӈкве патсы̄г. Хоса ос щуниӈ о̄лупсал о̄лсы̄г. Са̄в ня̄врам о̄щсы̄г, са̄в ня̄врам янмалтасы̄г. Ос маныр э̄ще ёт е̄мтыс, нэ̄мхотьют ат ва̄г. Валентин ма̄ньщи ла̄тӈыл хансум потре Софья Власенкован (Рукован) ёмащакв хансуӈкве нё̄твес. Ты хо̄тпаг сас Москва ляпат хотты ӯсыӈ ма̄т о̄лэ̄г. Ос таи ёмас, тэ̄нки ща̄нь ла̄тӈе̄н э̄лаль ва̄ӈкве сака таӈхе̄г. Тэ̄н пуссын ма̄ньщи ма̄хманув йильпи 2015 та̄лыл янытлыянэ̄н. Ты ло̄пс Тамара МЕРОВА щё̄питастэ.

1091 2015.01.16. Света Побокина

Ня̄хщамво̄льт о̄лнэ а̄ги пищма хансыс. Ам намум Света Побокина, ам онтолов тāлум то̄влыс, нилыт классыт ханищтахтэ̄гум. Ам омам мāньщи нэ̄, наме Татья, тав школат ня̄врамыт ханищтым рӯпиты. А̄тям сāран хум, тав наме Щерки, тав во̄раян ос хӯл алыщлан хо̄тпа. Мāн щēмьяв ос ляпа рӯтанув пуссын Ня̄хщамво̄ль пāвылт о̄лэ̄гыт. Омам рӯтанув урыл, щащēквагуво̄пагув, анēквагуващо̄йкагув урыл акваг потырта̄лы. Омам щирыл мāн тамле рӯт о̄ньще̄в: Номиныт, Пеликовыт, Анямовыт, ос āтям щирыл – Ануфриевыт, Поповыт, Побокиныт. Школат ам йӣквнэ кружокн ялантэ̄гум, хунь пāвылт матырсыр ялпыӈ хо̄тал мӯйлаве, мāн аквписыг клубн йӣквуӈкве ос э̄ргуӈкве во̄выглаве̄в. Ам омам школат волонтер вāрмаль вāрыс, тыи хунь мāн, ханищтахтын ня̄врамыт, матумпāла хо̄тпат мāгыс сāвсыр нё̄тмил вāрēв: нāйиво̄рас аня вāрēв, тэ̄нут ёвтуӈкве ла̄пкан ялантэ̄в, таквсы картопка хилуӈкве нё̄тэ̄в. Ам вāглум, яныг хо̄тпатн акваг нё̄туӈкве э̄ри, тāн ё̄рыг о̄лманыл порат сāв вāрмаль мāн ма̄гсылув вāрыгласыт. Мāн акв рӯтув – тыи Нина Васильевна Анемгурова. Таве̄н мāн о̄с нё̄тмил вāрыглэ̄в. Нина Васильевна ам омам ёт туп мāньщи лāтӈыл потырты, мāн тэ̄натэ̄н туп хӯнтлэ̄в: сака нё̄тнэг тэ̄н потре̄н о̄лы. Ам нё̄тнэ̄г по̄слуӈкве ха̄сэ̄гум. По̄слум хуриянум картинат хольт вāриянум, но̄хтагталыянум. Юртанум ман рӯтанум ёхталанэ̄ныл порат ты хурит сунсыглыяныл. Акв картинамт хо̄хра по̄слыслум. Ам āтям ла̄выс: «Пēс мāхум лāвыгласыт: «Во̄рт хо̄хра суиныщ ро̄ӈхуӈкве о̄вылтахты те, раквуӈкве паты». Ам увщиянум ос āпщим ёт аквписыг ёнгасэ̄гум, туи порат мāн лāхыс атуӈкве во̄рн яланта̄лэ̄в, тэ̄лы маттем кон ёнгасэ̄в. Мāн юртыӈыщ о̄лэ̄в, омав ос āтяв сака э̄руптыягӯв. О̄лнэ мāв янытлылӯв! Ты потыр ма̄навн Наталья Ткачук мистэ. Ма̄н таве̄н пӯмащипа ла̄тыӈ ла̄ве̄в.

1092 2015.01.30. Тамара МЕРОВА

Ма̄хум йильпи та̄л пӯмщиг о̄вылтасаныл. Округув янытыл туризм тэ̄лат акваг э̄лаль тотавет. Ащирмаӈ тэ̄лы порат мӯй ма̄хум тыг о̄с вос ёхталэ̄гыт ос ёмщакве̄г вос ӯщлахтэ̄гыт, та̄н ма̄гсыланыл сыресыр пӯмыщ касыт щё̄пита̄лве̄сыт. Касыт «Ханты-Мансийск – Йильпи та̄л о̄вылтан яныг ӯс! » нампа проект щирыл щё̄питаве̄сыт. Ӯст о̄лнэ музеит, культура колыт ос ӯс каныт ань ты мус рӯпитэ̄гыт. Ты о̄вылтыт Константин Пенчуков, Ханты-Мансийск ӯс кӯщай ва̄ӈын хум, ос Оксана Лунгите, туризм ва̄рмалит тотнэ нэ̄, потыртасы̄г. 2015 та̄л о̄выл хо̄талытныл Ханты-Мансийскат са̄т канытыт са̄всыр ёнгилыт ва̄рыглаве̄сыт. Ма̄хум ка̄сыӈ хо̄тал тот ёнгылтаве̄сыт, та̄н рӯтаныл ос юртаныл ёт акванхо̄нтхатнэ ма̄гыс тув акваг ёхталасыт. Щар пӯмщиг мӯй ма̄хумн ё̄рнколт ӯщлахтан ос са̄лы суныл яласан тэ̄ла о̄лыс. Тувыл мо̄т ӯсытныл ёхталам мӯй хо̄тпат о̄выл щёс по̄лям ня̄рхул тэ̄пъяласыт, та̄наныл ты тэ̄нут мӯстыс. Са̄всыр ма̄ныл ёхталам ма̄хум кон ащирмаг о̄лнэ̄тэ ос са̄в патум тӯйт ма̄гыс сака пӯмщалахтасыт. Тамле порат соссаӈ ма̄хманув хумус о̄лэ̄гыт ос мана хосыт ве̄ритаӈкве ве̄рме̄гыт, таи уральтасыт ос а̄рталасыт.

1092 2015.01.30. Александр ВЬЮТКИН

Соссаӈ мир халт яныг кӯщаиг о̄лнэ хум. Та̄л котиль э̄тпос ва̄т нупыл титыт хо̄талт соссаӈ мир ёт рӯпитан Ассамблея кол кӯщай хум Еремей Данилович Айпин Ханты-Мансийск ӯст о̄лнэ ма̄хумн нё̄тмил ва̄рнэ рӯпататэ та о̄вылтастэ. Та хо̄талт тав палтэ са̄т хо̄тпа та̄рвитыӈ тэ̄ланыл урыл потыртан ма̄гсыл ёхталасыт. Ты э̄лыпа̄лт Еремей Данилович ос Нижневартовский районт о̄лнэ ханты ма̄хум ёт ва̄щинтахтас. Та е̄рт о̄лнэ ханты ма̄хум ма̄во̄й ос газ но̄хвинэ хо̄тпат ёт потыртахтуӈкв ат ве̄рме̄гыт. Са̄лыӈ ма̄хум са̄лыяныл по̄снэ тэ̄пыӈ ма̄ныл нэ̄мхотьютн ат титыглан щирыл ма̄шинал пулигялыглавет. Са̄лыт по̄снэ ма̄ныл хотсакнэ юипа̄лт са̄лыӈ ма̄хмытын нэ̄мхоталь воссыг ва̄рхатаӈкв, мо̄т тэ̄пыӈ ма̄ та тинсэ̄гыт. Ма̄тэ мощща, ма̄ вӯянтым акв по̄хат о̄лнэ са̄лыӈ ма̄хум халанылт ля̄втуӈкв та тӯлтхатэ̄гыт. Нё̄тмил во̄внэ ма̄гсыл ёхталан мир титыт та̄рвитыӈ ва̄рмаляныл тамле о̄лнэ кол щирыл нё̄тмил тинсым ёхталэ̄гыт. Ханищтахтын студентыт нё̄тмил о̄с во̄ве̄гыт. Мир пусмалтахтын матыраныл ат а̄ртмын порат о̄с кӯщаит палт ёхталэ̄гыт. Е. Айпин ла̄выс: «Нё̄тмил во̄внэ ма̄гсыл ёхталан мир по̄хан ат те̄тыянӯв. Ве̄рмынэ̄в щирыл ма̄н пуссын нё̄тыянӯв. Таи ты лю̄ль, то̄ва ма̄хманув нё̄тмил во̄внэ ма̄гсыл ётыл ёхтэ̄гыт. То̄нт ма̄навн та̄нанылн нё̄туӈкв та̄рвитнуве̄г о̄лы». Минам 2014 та̄л сыс Еремей Данилович палт 341 хо̄тпа са̄всыр тэ̄ла щирыл пищма хансыгласыт. Та коныпал иӈ 213 хо̄тпа та̄нти щирыл тав палтэ нё̄тмил во̄вуӈкве ёхталасыт.

1092 2015.01.30. Николай МЕРОВ

Олннё̄тмил миве. 2012 та̄л ва̄т са̄грапнал э̄тпост округ Правительстват рӯпитан ма̄хум постановлениенэ̄пак щё̄питасыт. Ты хосыт ща̄нь ла̄тӈыт э̄лаль тотнэ ос ёмщакв рӯпитан соссаӈ хо̄тпат Ю. Н. Шесталов намыл пиным премияолныл мивет. Ань общественный ос внешний связь департамент ма̄хум тамле ла̄тыӈ ке̄тэ̄гыт. 2015 та̄лт ре̄тыӈ ю̄свой э̄тпос 16 хо̄талэ мус та̄н палтаныл ёмщакв рӯпитан хо̄тпат наманыл ке̄туӈкве э̄ри. Хо̄тпа урыл э̄рнэ нэ̄пакыт ищхӣпыӈ ут хосыт ты электронный адрес щирыл ZvonarevaJA@admhmao. ru ке̄тэ̄н. Ты адрес щирыл пищма хансэ̄н: Ханты-Мансийск ус, Комсомольский ӯсхулы, 31 кол, 212 колнак. Манос на̄нки э̄рнэ нэ̄пакыт ты рӯпитан колн 09: 00 – 17: 00 щё̄с порат тув тотуӈкве ве̄рмияны̄н. Ты премияолн ща̄нь ла̄тыӈ, литература, са̄ӈквылтан ос йӣквнэ ва̄рмалит, соссаӈ мир йис о̄лупса э̄лаль тотнэ ма̄гыс майлаве. Ка̄сыӈ та̄л щар хо̄йхатнэ хо̄тпат ты олнытыл минэ ма̄гыс пе̄риявет. Па̄выл ос ӯс мирколытт, организациятт комиссия рӯпиты. Та̄н ты хо̄тпа пе̄рияныл. Ты тэ̄ла щирыл матыр та̄рапаттуӈкве таӈхегы̄н ке, 8(3467)31-81-72 телефон хосыт китыглахтэ̄н. Ты ля̄ххал ма̄ньщи ла̄тӈыг Н. МЕРОВ хансыстэ.

1092 2015.01.30. Людмила ТЕТКИНА

Хус соссаӈ ще̄мья кол ёвтуӈкве нё̄тве̄сыт. Округувт соссаӈ ма̄хум кол ёвтуӈкве манос ӯнттуӈкве «Обеспечение жильём граждан из числа коренных малочисленных народов ХМАО-Югры» нампа программа хосыт нё̄тавет. Ты э̄лыпа̄лт ма̄ньщи, ханты ос ё̄рн ще̄мьят та̄нки о̄лнэ районанылт манос ӯсанылт очередин хасве̄сыт. Тувыл та̄н пуссын Ипотечный агентстват акв очередиг ва̄рве̄сыт. Ань тувыл соссаӈ ма̄хум субсидияолныл мивет. 2014 та̄л сыс хоты районыт манос ӯсыт соссаӈ ма̄хум кол ёвтнэ ма̄гсыл субсидияолныл майве̄сыт, э̄лаль хансым о̄лы. Ты ва̄рмаль Ипотечный агентства интернетло̄псэ̄т ловиньтаӈкве ро̄ви. То̄ва районытт ос ӯсытт о̄лнэ ма̄хум ты та̄л субсидияолныл ат майве̄сыт. Ань Ипотечный Агентстват округ янытыл 4 со̄тыра соссаӈ ще̄мьят ты нё̄тмил ма̄гсыл хансым о̄лэ̄гыт. Ма̄хум та̄нки наманыл интернетыт хо̄нтуӈкве ве̄рме̄гыт. Ты программа 2020 та̄л мус тах рӯпитаӈкве паты, ка̄сыӈ та̄л ма̄ньщи, ханты ос ё̄рн ще̄мьят ма̄гсыл туп 70 миллион солко̄ви та̄стыглаӈкве патаве. Кол ёвтнэ ще̄мьятытн олныт та̄ра ке̄тавет. Ос кол ӯнттын хо̄тпат субсидияолнаныл киттыгуртавет, акв олнло̄мтэ миве, хунь кол ӯттуӈкве о̄вылтаве ос китыт ло̄мтэ хунь кол а̄стлаве. Ты та̄л Кондинский районт о̄лнэ акв ще̄мья кол а̄стлан ма̄гсыл субсидияолныл майвес.

1092 2015.01.30. Николай МЕРОВ

Тӯяг ялпыӈ хо̄тал ва̄раве. Та̄л котиль э̄тпос 26 хо̄талэ̄т Ханты-Мансийск ӯст Общественный палатат рӯпитан ма̄хум акванатхатыгласыт. Тӯяг «Славянская письменность» ялпыӈ хо̄талыт е̄мтэ̄гыт. Ань атхатыглам ма̄хум потыртасыт, та̄н ты ва̄рмаль щирыл маныр рӯпата ва̄руӈкв патэ̄гыт. Ты та̄л литература та̄лыг ла̄ввес. Ты ва̄рмалин ма̄хум о̄с щё̄питахтэ̄гыт. Округувт о̄лнэ нэ̄пак хаснэ хо̄тпат, ка̄тыл хӯрит по̄слын хо̄тпат, нэ̄пак ловиньтан колт рӯпитан ма̄хум ос мо̄т организацият яныг рӯпата ань ва̄ре̄гыт. Ты ялпыӈ хо̄талытт Михаил Шолохов, СССР порат о̄лум нэ̄пак хансум хо̄тпа, номылматыглан кастыл выставка рӯпитаӈкве паты. Тувыл ос «Рущ кол» пӯнсаве. Тот рущ ма̄хум о̄лнэхӯлнэ накыт тах суссылтавет.

1092 2015.01.30. Валентина УЗЕЛЬ

Пенсияолн ма̄нтина̄вн атуӈкв э̄ри. Ма̄н округувт Ханты-Мансийский негосударственный пенсионный фонд рӯпитаӈкв о̄вылтахтаме па̄сныл, мо̄лты та̄л лов та̄лыг е̄мтыс. Ань тот рӯпитан ма̄хум маныр рӯпата лов та̄л сыс ва̄рсыт, ты урыл НПФ кӯщай хум Алексей Охлопков ля̄ххал тотнэ ма̄хумн потыртас. Тав ла̄выс, ма̄ янытыл са̄всыр хо̄н ма̄т о̄лнэ ма̄хум рӯпитаӈкв хунь о̄вылтахтэ̄гыт, та̄н та̄нки пенсияныл ма̄гыс та̄ра олн атуӈкв патэ̄гыт. Рӯпитам та̄ланыл сыс са̄в олн атхаты. Таима̄гыс э̄лы ма̄т о̄лнэ пенсионерхо̄тпат са̄в пенсииолн ты выгыт. Россияв янытыл ты рӯпата лов та̄л ювле хультум порат о̄вылтавес. Ос са̄выӈпа̄лэ ты та̄лыт сыс пенсионный фондыт рӯпитан ма̄хум олн хумус атуӈкв, нэ̄матыр торыӈыщ ат ва̄саныл. Ань тыг мус «пенсионный реформаг» ла̄внэ рӯпата Россият ёмащакв та̄ра ат паттувес. Рӯпитан ма̄хум та̄нти пенсияныл ма̄гсыл олн атуӈкв ат ка̄саще̄гыт. Номсэ̄гыт, минэ олнаныл хотталь тотавет. Ма̄н округувт рӯпитан ма̄хумныл атнэ олныт ты пенсионный фонд акв ма̄т нас ат о̄ньщиянэ. Ты олныт кол ӯнттын ма̄н мивет, тувыл ӯнттым о̄лнэ колыт тыналавет. Ювле фондын са̄внув олн ёхты. Ты арыг сэ̄лым олныт фондын хасхатам ма̄хум халт уртавет, процентыг ловиньтавет. Акв хо̄тпа та̄л сыс такви ма̄гсылэ 12 со̄тыра солко̄ви те пины, аквтыса̄вит солко̄ви округ бюджетныл миве. Нумыл процентыт ловиньтавет. Тох ты ка̄сыӈ хо̄тпа такви ма̄гсылэ пенсияолн аты. Ты кӯщай ла̄выс, то̄ва хо̄тпат пенсияныл сака яныг, та̄н ка̄сыӈ э̄тпос нумыл 20 со̄тыра солко̄вил ойтавет.

1092 2015.01.30. Людмила ТЕТКИНА

Ханищтахтан ма̄ньлат а̄гитпыгыт янытлан хо̄тал. Та̄л котиль э̄тпос 25 хо̄талэ̄т Россия янытыл студентыт янытлан хо̄талыг о̄лы. Югра ма̄вт ханищтахтан ма̄ньлат хо̄тпат тамле хо̄тал о̄с пуссын янытлэ̄гыт. Югорский университетыт ханищтахтан ня̄врамыт ты кастыл ос са̄всыр каснэ ва̄рмалит, суссылтапыт щё̄пита̄лсыт. Ма̄ньлат хо̄тпат, хумус ханищтахтэ̄гыт ос ты ялпыӈ хо̄тал хумус янытлэ̄гыт, та урыл Татьяна Карминская, ЮГУ ректорыг рӯпитан нэ̄, ля̄ххал тотнэ ма̄хум э̄лыпа̄лт потыртас. Югорский университыт а̄гитпыгыт тот са̄всыр профессиян ханищтавет. Ань тот ханищтахтан хо̄тпат халт 20% са̄вит а̄гитпыгыт Ханты-Мансийск ӯсныл о̄лэ̄гыт, мо̄таныт пуссын округ янытыл манос мо̄т ма̄ныл ханищтахтуӈкве тыг ёхтысыт. Ты э̄лыпа̄лт тамле ва̄рмаль о̄лыс, ма̄нь па̄вылныл ёхтум ма̄ньлат хо̄тпат пуссын ӯст о̄луӈкве хультсыт, ювле яныгман ма̄н минуӈкве ос тот рӯпитаӈкве ат ка̄сащасыт. Ань мо̄т щирыл е̄мтыс, са̄в агитпыгыт ювле о̄лнэ ма̄н миныглэ̄гыт, мощща хо̄тпа тыт о̄луӈкве хульты. Ты э̄лыпа̄лт ос та̄рвитыӈ ва̄рмаль о̄лыс, университет а̄стлам хо̄тпат рӯпата хо̄нтуӈкве ат ве̄рмысыт. 2014 та̄лт ЮГУ а̄стлам 97% са̄вит а̄гитпыгыт пуссын рӯпитэ̄гыт. Ля̄ххал тотнэ ма̄хум ос соссаӈ ня̄врамыт хумус ханищтахтэ̄гыт ос пе̄с йис ва̄рмаляныл э̄лаль хумус тотэ̄гыт, та урыл пӯмщалахтасыт. Татьяна Карминская ла̄выс, Югорский университетыт ань ма̄ньщи, ханты ос ё̄рн ня̄врамыт ма̄гсыл я̄нас институт рӯпиты. Ма̄ньлат а̄гитпыгыт тот та̄нки ща̄нь ла̄тӈаныл ханищтэ̄гыт, ты коныпал мо̄т предмет хосыт та̄н соссаӈ ма̄хум пе̄с йис ва̄рмаляныл урыл потыртавет ос ханищтавет. Та институтыт ань акв йильпи тэ̄ла ва̄рвес, рущ ла̄тӈыл «Лаборатория народных промыслов» намаим о̄лы. Тув ялантан а̄гит а̄канит, турло̄псыт ос мо̄т пормасыт ю̄нтуӈкве, сагуӈкве ханищтавет. Ты пормасыт ос сувенирыт та̄н са̄всыр выставкат тах суссылтэ̄гыт. Тыщирыл Югорский университет соссаӈ ма̄хум пе̄с йис ва̄рмаляныл э̄лаль тотыяныл.

1092 2015.01.30. Светлана РОМБАНДЕЕВА

Соссаӈ хо̄тпа янытлан нэ̄. Елена Николаевна Сидорова Сургут ӯст «Старый Сургут» нампа Историкокультурный центрыт рӯпиты, рущ мир культура пе̄с йис о̄лупсатэ ханищты, хотёрувлам ва̄рмалит та̄рапатты. На̄н ань э̄лаль тав потре ловиньтэлы̄н. – Ам школат ханищтахтамум порат соссаӈ мир о̄лупсаныл акваг пӯмщалахтасум. Аквматнакт Ӯй йӣквнэ ва̄рмаль урыл потыр хансыгласум, ты урыл мощ ва̄гум. Ты центрыт ам хӯрмит та̄л рӯпитэ̄гум. Ма̄н тыт ма̄ньщи ос ханты ма̄хум аквъёт рӯпитэ̄в, то̄ва ялпыӈ хо̄талыт аквъёт щё̄питыянӯв, та̄нанылн нё̄тэ̄в. Ты та̄л яныгполь э̄тпост Ӯринэ̄ква хо̄тал ва̄рыгласӯв, ам ӯринэ̄кваг о̄лсум, маттем та ёнгысӯв. Елена Николаевна хо̄тпа нупыл сымыӈ нэ̄. Пуста̄гыл вос о̄лы, То̄рум ёт, О̄тыр ёт вос о̄лы.

1092 2015.01.30. Светлана Динисламова

Ма̄нь котиль а̄ги янытлылӯв (Надежда Селиверстовна Яковлева 50 та̄лэ то̄влыс). Надежда – ве̄ритан нам, Надежда – ӯрхатнэ нам, Надежда – нё̄тнэ рущ нам. Ам, увщин, ос каӈкын наӈын йийквег ла̄виламе̄н, Йигрищн наӈын увщиквег ла̄витэ, А̄гин ос пыгын наӈын омаквег ла̄витэ̄н, Ос сым тарс пыг а̄гитен наӈ щаще̄кваг ла̄вавен. Тыхо̄тал наӈын ма̄н улылылӯв, Нам хоталынт наӈын ма̄н янытлылӯв, Ща̄ньа̄щин хӯлтым лё̄ӈхын вос па̄хвыӈ, Ща̄ньа̄щин ла̄вим лё̄ӈхын вос састум, Вос хо̄талыӈ лё̄ӈхын акваг поступтаве, Вос ща̄гтыл, вос со̄тыл акваг мӯйлуптавен. Наӈын, Надежда, ма̄н янытлылӯв, Э̄руптым, ла̄тӈытыл ла̄вителӯв: «Э̄ргытыл э̄ргим наӈ нёвитаве̄сын, Ӯлылым ща̄гтыӈыщ янмалтаве̄сын, Ма̄нь котиль а̄гииг омавн ла̄вве̄сын, Сэ̄ръёрыг о̄луӈкве ханищтаве̄сын. Я̄тил Надежда – Ма̄нь котиль а̄ги, Пыгын яныгмас, яныгмас а̄гин, Колта̄глын ёт пуста̄гыл на̄н о̄лэ̄н, Ма̄ньщи мир ла̄внэ щирыл: пус ка̄т, пус ла̄гыл! То̄румн вос ӯргалавен, О̄тырн вос ӯргалавен!

1092 2015.01.30. Людмила ТЕТКИНА

Та̄н о̄лнэ колыт та̄нки ӯнттэ̄гыт. Мо̄лты та̄л №24 газетат Октябрьский район Карымкары па̄вылт о̄лнэ ма̄хум о̄лупсаныл урыл хансыгласум. Па̄влыӈ мир халт ань са̄в хо̄тпа «Сургутнефтегаз» нампа ма̄во̄й но̄хвинэ компаният рӯпитэ̄гыт. Ань са̄в ма̄ньлат ма̄хум рӯпата кинсым мо̄т ма̄н ат минэ̄гыт, па̄вылт о̄луӈкве хультэ̄гыт. Ма̄хмыт тот рӯпитым ос са̄в олн сэ̄лым ёмащакв о̄луӈкве патсыт. Михаил Александрович Климов, миркол кӯщай хум, ла̄внэ̄тэ щирыл, ка̄сыӈ та̄лныл па̄влыӈ мир са̄вми. Кӯщай хум ёт потыртамум порат ос кол ӯнттын ва̄рмаль урыл китыгласлум, тав ювле таи ла̄выс: – Карымкары па̄вылт са̄в ще̄мьят йильпи кол ӯнттэ̄гыт. Соссаӈ ма̄хум ос ма̄ньлат ще̄мьят субсидияолныл нё̄тавет. Пе̄с колт о̄лнэ ще̄мьят ос мо̄т программа хосыт йильпи колыл мивет. Ты мус ма̄н олныл ёмащакв та̄стыглавесӯв, пе̄с колт о̄лнэ ще̄мьят ма̄гсыл па̄влувт 9 кол ӯнттысӯв. Ка̄сыӈ та̄л тох олныл ке майлувесӯв, ма̄хманув пуссын йильпи колн о̄лмыгтанувыт. Тувыл таи лю̄ль, то̄ва ма̄хманув тох о̄луӈкв ос нас ӯрхатуӈкве ханьщувласыт. Та̄нки кол ӯнттуӈкве ат ка̄саще̄гыт. Йильпи колыл мыганӯв, матахкем та̄л ювле хульты, коланыл мискол хурипаг ва̄рияныл, та̄н палтаныл юв щалтуӈкве нас пилыщмаӈ. Коланыл ёмащакв ат о̄ньщияныл, нораныл, кола̄ланыл, колканыл молях хотсае̄гыт, та̄н о̄ста мо̄т кол во̄вуӈкве о̄вылтахтэ̄гыт. Нё̄тмил во̄вим мирколн акваг ёхталэ̄гыт. Мо̄т ще̄мьят субсидияолн ат во̄ве̄гыт, са̄всыр очередин ат хасхатэ̄гыт, кол та̄нки ӯнттэ̄гыт. Ань Сургут ӯс нупыл ма̄шинал яласан лё̄ӈх о̄лы, са̄всыр норыт, партыт ма̄хум тот ёвтэ̄гыт. Ань акв ще̄мья такви кол ке ӯнтты, акв квадратный метратэ 27 со̄тыра солко̄ви са̄витыг тынэ е̄мты. Ос мо̄т ма̄ныл ёхтум ма̄хум тыт кол ке ӯнттэ̄гыт, акв квадратный метра ма̄гсыл 47 со̄тыра солко̄ви паты. Тыи ма̄гсыл ма̄хманув та̄нки рӯпата пуссын ва̄ре̄гыт, по̄х хо̄тпат рӯпитаӈкве тыг ат во̄вияныл. Ювле хультум та̄л па̄влувт кит соссаӈ ще̄мья субсидия олныл майвесы̄г, 2013 та̄л сыс ос кит ще̄мьяг субсидияолныл тыт кол ӯнттысы̄г. Ань ма̄ньщи, ханты ма̄хум округ янытыл кол ёвтуӈкве ве̄рме̄гыт. Ма̄хманув Сургут ӯст манос мо̄т ӯсыт кол ул вос ёвтсыт ос та̄нки кол тыт вос ӯнттысыт, ма̄н акваг нё̄тыянӯв. Кол ӯнттын ма̄наныл нэ̄паканыл пусын ма̄нки ва̄риянӯв, са̄всыр нэ̄пакыт акванатэ̄в. Ты нэ̄пакыт та̄л кол ӯнттын ма̄гсыл субсидияолныл ат та̄ставет. Ма̄хманув мо̄т ма̄н ул вос миныгласыт, тох нё̄тыянӯв. 2010 та̄лт акв ма̄ньлат ще̄мья ипотекаолн вис. Па̄вылт о̄лнэ кол ӯнттыс, нэ̄гхумыг номсысы̄г, субсидияолныл хунь миве̄г, ипотека ма̄гсыл ювле ойтхатэ̄г. Нила та̄л ювле хультыс, ань ты мус ӯрхатэ̄г, ипотека ма̄гсыл са̄в олн ойтэ̄г. Ос манаса̄вит та̄л ты нё̄тмил ӯруӈкве э̄ри, нэ̄мхотьют ат ва̄г. Тыи ма̄гсыл па̄вылт мо̄т ма̄ньлат ще̄мьят ипотекаолн ат выгыт, та̄нки ё̄ранылт кол ӯнттэ̄гыт. Ань мо̄т ма̄ныл тыг ле̄ккарыт, ня̄врамыт ханищтан хо̄тпат ке во̄виянӯв, та̄ра о̄лнэ колыл миӈкве э̄ре̄гыт, па̄вылт ты ма̄хум ма̄гсыл кол о̄ньще̄в. Тувыл ӯсыт та̄н квартираколт о̄луӈкве ханьщувласыт. Тыт вит а̄лумтаӈкве, кӯр па̄лтыглаӈкве та̄нкина̄нылн э̄ри. Тыи ма̄гсыл ма̄хум тыт рӯпитаӈкве ат ка̄саще̄гыт. Ань ма̄хманув йильпи колт кӯр ат о̄ньще̄гыт. Са̄всыр оборудование ёвтэ̄гыт, на̄йпос хосыт коланыл исылтыяныл. Акв порат ащирмаӈ хо̄талт на̄йпос ква̄лганув ат ве̄ритасыт, па̄выл янытыл на̄йпос хотхарыглас, турман колт та ӯнлысӯв. Ты юипа̄лт па̄выл мус йильпи на̄йпос тотнэ ке̄рква̄лгыт хартве̄сыт, на̄йпос та̄л воссыг ат о̄лэ̄в.

1092 2015.01.30. Николай МЕРОВ

Па̄влыӈ ма̄хум хӯл алыщлан тэ̄ланыл. Ха̄льӯс район А̄нъя па̄вылт Федот Павлович Монин о̄лы. Тав 2004 та̄лт па̄вылт хӯл алыщлан община ва̄рыс. Тав палтэ акваг хо̄т ще̄мья хӯл алыщлым рӯпитэ̄гыт. Мо̄таныт ос договорнэ̄пак щирыл рӯпитэ̄гыт. Ам мо̄лты та̄л таквсы порат тав ётэ Анъя па̄вылт акванхо̄нтхатыгласум. Тав а̄нумн такви ва̄рмалянэ урыл потыртас. На̄н тав потре э̄лаль ловиньтэлы̄н. – Ам хунь община ва̄руӈкве о̄вылтахтасум, нэ̄мхотьютн ат нё̄тве̄сум, амки ё̄румт матыра̄ти ёвтсум. Ос па̄влувт хӯл алыщлан я̄ янытэ̄т Кульпаст рӯпитан община та̄н висаныл. Ма̄н ань та̄н ётаныл рӯпитэ̄в, потыртахтын нэ̄пак хассӯв. Пувум хӯланув та̄нанылн мыгӯв. Ма̄н тыщир рӯпитаӈкве ат таӈхе̄в, мощща олн сэ̄лэ̄в. Таима̄гыс общинав вуньщалы̄г о̄лы. Ты э̄лыпа̄лт ма̄н ос та̄н ётаныл рӯпитасӯв, нялк, сорых ос мо̄т са̄всыр хӯл пувсӯв. Кульпас комбинат ма̄н па̄влув по̄хыт плашкоут ӯнттыгласыт. Пувум хӯланув тув пинтла̄лсанӯв. Ос то̄ванакт ты хӯлыт тот хоса хуйнэ̄ныл ма̄гыс хотпохсата̄лсыт. Тыщир са̄в хӯл наска̄ссыг сайлысӯв. Ётыо̄вылт ты тэ̄ла щирыл рӯпитаӈкве хотпо̄йтсӯв. Мо̄лты та̄л па̄сныл ма̄н туп нялк алыщлэ̄в ос та̄нанылн майлэ̄в. Са̄в хӯл пувуӈкве ат та̄ртаве̄в. Са̄ртын ма̄н тэ̄лы порат камкал хӯл алыщласӯв. Туи порат ос толыг ре̄пыгтасӯв. Ань хӯл туп туи порат пуве̄в. Лӯпта э̄тпос ловит хо̄талныл во̄ртур э̄тпос ловит хо̄талэ мус алыщлаӈкве ро̄ви. Тувыл та, хӯл алыщлан ма̄ныл та по̄йтэ̄в. Ос ань па̄влувт мо̄т рӯпата а̄тим. Туп хӯл пувнэ хосыт ма̄хум о̄лэ̄гыт. Акв э̄тпос сыс хӯл алыщлэ̄в, ты хосыт та̄л палыт та о̄лэ̄в. Тувыл хӯл о̄с норма щирыл пуве̄в. Нялк туп яныгса̄т кила тыналан ма̄гыс пувуӈкве ро̄ви. Нялк акв кила пирмайтан тынэ ниласа̄т солко̄ви, ты сака мощща. Хӯл алыщлан ва̄рмаль ёлпо̄илттан порат хо̄тпа хӯл алыщлым пуваве ке, тав та̄ра яныг штрафолныл пинаве. Ма̄нки община о̄щнувув ке, то̄нт тай хӯл пувуӈкве та̄ртнуве̄в. Мо̄т щирыл хӯл алыщлаӈкве нэ̄мхотмус. Ам таима̄гыс ты община мӯсхал щирыл щё̄питаӈкве таӈхилум. Та сыс, хӯл алыщлан коныпал ме̄н э̄кваме̄нтыл пил ва̄тыме̄н. Пиланме̄н ос Ягрим па̄вылн «Игрим торг» нампа предприятиян тыналыянме̄н. Мо̄лты та̄л туп яныгса̄ткем литра саӈквлыпил ва̄тсуме̄н, пил мощща яныгма̄лыс. Э̄лы ма̄н минуӈкве, ос бензин сака тыныӈ. Са̄р та̄лытт тай тоннаохса са̄виткем ва̄тыгласме̄н. Ты хосыт ос мощ олн сакати сэ̄лыме̄н. Э̄кваго̄йкаг ла̄внэ̄тэ̄н, община э̄лаль тотнэ ма̄гыс Ха̄льӯс район кӯщаитн ты кос нэ̄пак хансыгласы̄г, тох нэ̄матарыл аты нё̄твесы̄г. Мо̄лты та̄л таквсы порат А̄нъя па̄вылн округ Дума депутат нэ̄ Татьяна Гоголева ма̄хум ёт хо̄нтхатыглаӈкве ёхталас. Федот Павлович община э̄лаль тотнэ ма̄гыс таве̄ныл нё̄тмил во̄выс. Нэ̄пак хансыс, я̄ хосыт яласан моторха̄п, «Буран» ос туи порат хӯл по̄льтын то̄тап ёвтнэ ма̄гыс олн во̄выс. Ань кӯщаит ты ва̄рмаль ёмщакв ханищтыяныл, са̄ккон щирыл манаса̄вит нё̄тмил таве̄н миӈкве ро̄ви, ты хосыт э̄рнэ нэ̄пакыт акванатыяныл, то̄нт ущ нё̄тмилыл тах миве.

1092 2015.01.30. Анна АЛГАДЬЕВА

Ня̄врамыт ханищтан нэ̄ потре. Мо̄лалнув, аквнакт Ня̄хщамво̄лиӈ школат рӯпитан ма̄ньщи ла̄тыӈ ханищтан нэ̄ Наталья Константиновна Тасманова ва̄слум. Тав Хулюмсунт та̄ра Ханты-Мансийск ӯсн ялыс. Ам тав ётэ хо̄нтхатыгламум порат, школат рӯпитанэ̄тэ урыл китыгласлум: – Ня̄хщамво̄лиӈ школат ма̄ньщи ла̄тыӈ ань ханищтаве? – Ма̄н школавт хус арыгкем та̄л ма̄ньщи ла̄тыӈ ханищтаве. Са̄ртыннув ханищтахтам а̄гитпыгыт тай ма̄ньщи ла̄тыӈ ва̄сыт. Нас, хумыс нэ̄пак щирыл хансуӈкв, ханищтахтасыт. Ма̄н ла̄ве̄в «ща̄нь», нэ̄пакт тай хансаве «ся̄нь». «Щаквит», ос тот хансаве – «сяквит». Тамле утыт вос ва̄ганыл, таи туп ханищтасӯв. Словарик ёт хумыс рӯпитаӈкв. Ань ос ня̄врамыт ёхтэ̄гыт, ла̄тыӈ ат ва̄гыт. Та̄наныл потыртаӈкв ханищтыянӯв. Та хо̄нтэ̄гыт – «сяквит», а̄ти, ла̄вуӈкв э̄ри – «ща̄квит». О̄с ювле ханищтаӈкв э̄ре̄гыт. Ань са̄в хансуӈкв патвес, ня̄врамыт атэ хансуӈкв ха̄ссыт, э̄рыгло̄мт вос ва̄гыт, йӣкв вос ва̄гыт. Ос таил мощнув ханищтыянӯв. – Са̄в ма̄ньщи ня̄врам школант ханищтахты? – Юио̄выл кит та̄л пуссын ма̄ньщи ла̄тыӈ урокн ялантасыт. Саран ла̄тыӈ хотвуйла̄лвес. Ань ос саран ла̄тӈув ювле тотвес. Ма̄ньщит ва̄тахкем ня̄врам о̄лы. Кит та̄л пуссын ма̄ньщи ла̄тыӈн ялсыт. Ань тай ёмас, сарананув саран ла̄тыӈн ялантэ̄гыт. Ам о̄с ма̄ньщи ла̄тӈыл ханищтыянум. Хунь пуссын акванялантаманылт, та̄н ма̄ньщит ке, хотмус э̄ссамтасыт. Кӯпнитнув тох. Тувыл аквта «Кӯринькав» ёлхансылӯв, потыр щирыл ханищтылӯв, таве э̄ргилӯв, тувыл таве йӣквуӈкв ханищтылӯв. Акв «Кӯринька» са̄всыр щирыл ва̄рыглылав – вос тэ̄лы, вос ва̄ганыл, хумыс йӣкваве. Тыкати аквта «Со̄выркве». Ла̄тӈанэ ханищтэ̄в, мощ йӣкващлэ̄в. Тыгыл ва̄гыт, манхурип во̄руит о̄лэ̄гыт. Со̄выр тав во̄руй. Со̄выр я̄ӈк, со̄выр хо̄псат та сыс о̄льпыт ханищтыянӯв. Тащир хотмус та ма̄ньщи ла̄тыӈ ханищтэ̄в. Саранпа̄вылт ань «Ма̄нь ӯскве» стойбище о̄лы, то̄ва ня̄врамыт тув ялантаӈкв ка̄сащаӈкв патсыт. Та воратэ̄гыт: «А̄нум вуелы̄н, а̄нум вуелы̄н». Ам ла̄ве̄гум: «Потрамаӈкв патэ̄в, э̄рыг ханищтаӈкв, йӣкв. Тув хунь ёхтэ̄в, концерт суссылтаӈкв тот э̄ри». Хулюмсунтын ань о̄с во̄ввесӯв, конференция ва̄руӈкв кусэ̄гыт. Тот Хулюмсунтыт о̄с са̄в ханищтэ̄гыт, потыр маныр хансэ̄гыт, йӣкв ханищтэ̄гыт, сакныл хартэ̄гыт, нуйил ю̄нтэ̄гыт. Ам ла̄ве̄гум: «Тув ёхтэ̄в, матыр йильпи ут суссылтаӈкв э̄ри». Мо̄лал ня̄врамыт матыр щё̄питаӈкв ты патсыт. Ань тах, ам яласанэм сыс, э̄рыг ла̄тӈыт ханищтэ̄гыт. – Ма̄ньщи ла̄тыӈ ханищтаӈкв ка̄саще̄гыт? – Ань тай ка̄сащаӈкв патсыт. Мо̄лты тай ля̄втсыт. Ань тай ка̄саще̄гыт. Ам ла̄ве̄гум: «На̄н ты йӣквсы̄н, интернетн пинылӯв, э̄рыӈ хотьютн ка̄салаве̄н тах, пӯмщалахтуӈкв патэ̄гыт». Ты воратэ̄гыт: «А̄нум хансэ̄лн, ам минэ̄гум». Ос ла̄ве̄гыт: «А̄нум стойбищен хансэ̄лн». Таӈхе̄гыт яласаӈкв. Патэгы̄н йӣкв ва̄ӈкв, ла̄тыӈ ва̄ӈкв – ке̄тъянум. Пе̄с потыр кинсэ̄в. Ла̄ве̄гум: – Ня̄хщамво̄ль урыл хансэ̄н: ма̄хум хумус о̄лсыт, хотыл ма̄хум ёхтысыт. Тэ̄нутыт урыл. Тэ̄нут о̄с пӯмащ. Та̄н ла̄ве̄гыт: – А, ма̄ньщит тай туп ня̄рнё̄выль ос хӯл тэ̄сыт. А̄ти, ам ла̄ве̄гум. Хунь кинсуӈкв патсӯв, ла̄виянум: Яныг хо̄тпатныл китыглахтэ̄н: маныр а̄ныл та̄н тэ̄пъяласыт. На̄н во̄рн минэгы̄н пӯт та̄л, ща̄й па̄йтуӈкв э̄рмаи, маныр ва̄регы̄н? Ма̄ньщи хо̄тпа ща̄й па̄йтуӈкв ве̄рмыс. Тай хумыс? Ам ла̄ве̄гум: На̄н ялэ̄нялэ̄н, китгалахтэ̄н. Аква ёхтыс, ла̄ви: Насати, са̄с нуюмтылын, щумпалыг ва̄рапилын – ща̄йпут. Па̄йтэ̄гын, вит ае̄гын. Сунсэ̄н, манхурип пе̄с ма̄ньщит мутраӈыт о̄лсыт. Ма̄навн о̄с аквта щир мутраӈыг о̄луӈкв э̄ри. Кинсэ̄гыткинсэ̄гыт пе̄с потыр. Аквта хӯланыл. Ла̄ве̄гыт: Ты маныр? Хулюмхул, тав лувыӈ. Ам ла̄ве̄гум: Таве ва̄нэ щирыл яктуӈкв ке, луванэ я̄нас патэ̄гыт, хӯлэ хорыг паты. Товтащлылын – щар атыӈ. Тувыл та̄наныл хорыл тотыгласанум, тыттысанум. Атыӈ. Сунсыглыяныл хумыс яктым о̄лы, ла̄ве̄гыт: Ма̄нав ханищтэ̄н. На̄н классын хӯл тотэ̄н, ам тах на̄нанн хӯл яктуӈкв ханищтыянум. Акв пыгрищакве, пӯмащ, ла̄ви: Ам, лай, тах хунь а̄щум хӯл алы, ам наӈын тах мӯйлуӈкв во̄вилум. Ам ла̄ве̄гум: Э̄рыӈ а̄щин ат ка̄сащи. Ам а̄щум ла̄вилум, наӈ яктуӈкв ха̄сэ̄гын, тав тах о̄с ханьщувлы яктуӈкв. Во̄венво̄вен, ам тах ёхтэ̄гум, суссылтылум хумыс. Са̄всыр тамле пӯмыщ о̄лыгла̄лы. Ань тай та̄нанылн потыртаӈкв мощнув пӯмащиг е̄мтыс. Са̄ртын тай э̄ссамтасыт. «О̄ста ты маньщи ла̄тыӈ. Манрыг тав э̄ри? Ат э̄ри. » «А̄ти, э̄ри» ам ла̄ве̄гум. Оссы о̄с. Рущ щирыл са̄всыр салфеткат Няхщамво̄льн хунь тотве̄сыт? Ва̄тахкем та̄л ювле. Ос ма̄ньщи нот па̄лыт тамле салфетка о̄ньщасыт. Та̄н: «Хумыс? Хотыл вӯйласыт? » Ам тувыл та̄нанылн оссы урыл потыртэ̄гум. «Аа, пӯмащ». Акваг хунь ловиньтэ̄в, то̄ва щёс тох та са̄всыр щирыл потыр потыртэ̄в. Тамле ты потыр ме̄н потыртасме̄н. Наталья Константиновна потрыӈ хо̄тпа, ме̄н о̄с са̄в потыр о̄ньщиме̄н. Мо̄тынтыг тах о̄с хансэ̄гум. Ма̄ньщи ня̄врамытн ла̄вуӈкв таӈхе̄гум ма̄ньщи ла̄тыӈ ханищтэ̄н. Ма̄ньщи ла̄тыӈ ва̄нэ хо̄тпа сака мощща хультыс. Ща̄нянына̄щанын китыглэ̄н. Хо̄ӈха ане̄кващаще̄ква, о̄паащо̄йка о̄ньщи – тай со̄тыӈ ня̄врам. Яныг ане̄кванувщаще̄кванув, о̄пануващо̄йканув та̄н ты ма̄к пе̄с о̄лум ва̄рмалит ва̄ганыл. Рӯтанын, нас яныг хо̄тпат китыглэ̄н, ла̄тӈанылпотраныл ёлхансэ̄н. Ётыл на̄нанн э̄рмаи, на̄нкинан пӯмащ паты.

1092 2015.01.30. Татьяна Бахтиярова

Ма̄ньщи колта̄гыл. Ты хурит по̄слым о̄лэ̄гыт Галина Владимировна Анямова, Анастасия Владимировна Анямова, Николай Алексеевич Анямов, Андрей Миронович Бахтияров, тувыл ёлын ӯнлы Павел Саввельевич Бахтияров. Та̄н Висумтыт па̄вылт ōлнэ ма̄хум. Галина ща̄не ёт юн ōлы, нё̄ты, ос тав ягрище Анастасия ханищтахты, тав молты та̄л Ханты-Мансийский технологопедагогический колледж холтыс, диплом вис, ань ос Серов ӯсн э̄лаль ханищтахтуӈкв минас, тот о̄луӈкв хультыс. Николай тай юн па̄вылт ōлы, тав яныг щēмья ōньщи, кит ня̄врам ōньщи. Тувыл ос яга̄гитэ кит пыг янмалты. Андрей ос юн ōлы, ня̄врамаге янмалты, школан мисанэ, ёмщакв ханищтахтэ̄г, а̄ги пыгыг ōньщи. Паша иӈ ма̄ньнуваг ōлы, такви щēмья ат ōньщи, нэ̄ иӈыт тоты. Ма̄хум туи пуссын акванхо̄нтхатыглэ̄гыт, та̄л палытыл ка̄саныл холы, таквсы ос ла̄кквамингалэ̄гыт ханищтахтуӈкв, ла̄щал тох та о̄лэ̄гыт.

1092 2015.01.30. Тамара МЕРОВА

Ягрим ӯст «Югра лылые̄п» хумле рӯпиты. Галина Николаевна Вынгилева Ягрим па̄вылт о̄лы. Тав ня̄врамыт ханищтан центрыт рӯпиты. Мо̄лты 2013 та̄л оигпан э̄лыпа̄лт тав соссаӈ ма̄хум халт «Югра лылые̄п» ассоциацият пуӈктотнэ нэ̄г пе̄риявес. Ань ты тэ̄лат хумус э̄лаль тотыянэ, ты о̄вылтыт ам таве мощ китыгласлум. Тав ла̄выс: – Ам э̄лыпа̄лумт тыт Надежда Максимовна Булусова кӯщаиг о̄лыс. Са̄в та̄лыт сыс ва̄рнэ тэ̄ланэ ам о̄с э̄лаль тотыянум. Соссаӈ ма̄хум тэ̄ланыл но̄хво̄рмалтаӈкве а̄нумн ат хо̄тпа нё̄ты. Ма̄н Координационный Советыг ла̄вхатэ̄в. Ань мо̄тыт та̄л сыс маныр тэ̄лат ва̄руӈкве э̄ре̄гыт, нэ̄пакн аквъёт хассанӯв. Мо̄лал округ губернаторув ла̄выс, 2015 та̄л соссаӈ ма̄хум пе̄с наканыл, о̄лупсаныл ӯргалан ос э̄лаль тотнэ та̄лыг намаяӈкве э̄ри. Ма̄навн ты ля̄ххал сака мӯстыс. Ос таима̄гыс ёмасн агтым са̄всыр номылматам тэ̄ланув э̄лаль кӯстырыг ос та̄рвит та̄л вос ва̄рнуванӯв. Йильпи та̄л ёхтын кастыл «Газпром» нампа кол па̄лыл ня̄враманув атыӈ тэ̄нутыӈ мӯйлупсал щё̄питавет. Рущ щирыл та̄н «спонсорыг» ла̄вавет. Нё̄тмил ва̄рнэ̄ныл ма̄гыс ма̄н та̄нанылн пищма хансэ̄в. Та̄н ма̄навн акваг нё̄тэ̄гыт, таима̄гыс тот рӯпитан нэ̄тхумитн пӯмащипа ла̄тыӈ ла̄ве̄в. Мӯйлупсат о̄влэ̄т савалап ня̄врамыт, са̄в ня̄врам о̄щнэ ще̄мьят ос мощща олн сэ̄лнэ ща̄ньа̄щаныл халт уртыянӯв. Тамле ще̄мьят та̄рапаттын ма̄гыс ма̄н о̄влэ̄т сыресыр э̄рнэ справкат акванатыянӯв ос тувыл ущ нё̄тыянӯв. Тувыл мо̄лты та̄л ёмащакв ханищтахтан ос са̄всыр касылыт каснэ ос но̄хпатум а̄гирищитпыгрищит мӯйлупсал о̄с щё̄питасанӯв. Та̄н ща̄ньа̄щаныл ёт сака ща̄гтсыт. Ща̄ньа̄щаныл пӯмащипа ла̄тыӈ ла̄всыт, та̄н ня̄враманыл хот ат ёрувлаве̄сыт. Ма̄н центрув о̄с са̄всыр нё̄тмил ва̄ри. А̄гирищитпыгрищит э̄ргынйӣквнэ ёнгилыт щё̄питэ̄гыт ос па̄влыӈ ня̄врамыт та̄нки палтыланыл мӯйлуӈкве во̄выглыяныл. Ӯринэ̄ква ялпыӈ хо̄тал ва̄рнэ порат ос мо̄т касылыт, э̄ргыт, йӣквыт ханищтэ̄гыт. – Наӈ ань хультум та̄л сыс ва̄рум рӯпатан урыл маныр ла̄вуӈкве ве̄рме̄гын? Маныр тэ̄лат та̄рвитыӈыг о̄лсыт? Соссаӈ ма̄хум та̄нки маныр тэ̄ланыл щирыл наӈ палтын ёхталэ̄гыт? – Ам та о̄выл та̄лумт акваг матыр кисхатым рӯпитасум. Матыр ва̄рмалит палт Надежда Максимовна палт китыглахтуӈкве ялапа̄лсум. Ты рӯпатат тав са̄внув ва̄г, а̄нум матыр хӯлты ос нё̄ты. Тувыл соссаӈ ма̄хум акванатыглан ма̄гыс Ягрим миркол кӯщаювн колыл майвесӯв. Тот хӯрум колнаканэ пуссын хотщё̄питаӈкве э̄рсыт. То̄нт ма̄ньщи ос ханты ма̄хманув акваннё̄тхатым такем ёмщакве̄г нё̄тсыт. Ӯщлахтан хо̄таланылт манос э̄типа̄лаг кол щё̄питаӈкве яныгпа̄ла ос ма̄ньлат хо̄тпат пуссын ёхталасыт. Па̄влувт кол ӯнттын компаният палт нё̄тмил во̄внэ ма̄гыс пищма ке̄тыгласум. Та̄н ма̄навн о̄люп ос обои майласыт. Ань пуссын нё̄тнэ ма̄хманумн яныг пӯмащипа ла̄тыӈ ла̄ве̄гум. Ты колув ма̄нки нупылув хаснэ ма̄гыс э̄рнэ нэ̄пакыт ань тыг мус щё̄питавет, таима̄гыс тот иӈ ат рӯпитэ̄в. Тот акв колнак музейиг ва̄рилӯв тах, акв колнак ща̄нит ма̄нь ня̄врамыӈ та̄гыл ёхталан ма̄гыс ва̄руӈкве номсылӯв кос. Ня̄врамыт ма̄ньпорат матыр сак хартуӈкве манос мо̄т матыр тэ̄лат ва̄руӈкве ханищтахтынувыт ке, сака ёмас о̄лнӯв. Ань ма̄ньлат а̄гитпыгыт матыр ва̄руӈкве во̄виянув ке, та̄н ёхталэ̄гыт, матыр ка̄ркамыг ва̄ре̄гыт. То̄ва хо̄тпанув тай лю̄льсаӈ ханьщувлым о̄лэ̄гыт, та̄нки матыр акваг та во̄ве̄гыт, матарыл ля̄льт вос тотавет. Тамле хо̄тпат ёт та̄рвит рӯпитаӈкве, тыи ты лю̄ль. Та̄н тамле пищаныл по̄хан вос хультуптыяныл ос ул вос кантлэ̄гыт. А̄нумн нё̄тнэ хо̄тпанум ёт 2015 та̄лытыл Ӯринэ̄ква ялпыӈ хо̄тал э̄лаль ва̄руӈкве патылӯв, тувыл ма̄ янытыл о̄лнэ соссаӈ мирыт янытлан хо̄тал кастыл матыр о̄с щё̄питэ̄в. Са̄всыр суссылтапыт ва̄ре̄в тах, ма̄щтыр нэ̄т та̄нки ю̄нтум супаныл, пальсаканыл, турло̄псаныл манос сэ̄тапыл сагум пормасаныл суссылтаӈкве акваг тыг тотыглыяныл. Тувыл 2015 та̄л литература та̄лыг ты ла̄ввес. Ма̄н, ма̄ньщи ос ханты ма̄хум, халувт потрыт ос стихыт хаснэ хо̄тпат о̄с о̄лэ̄гыт. Аква тыи Валентина Алексеевна Карымова, на̄н таве ул ва̄глын. А̄нъя ос Восыӈтӯр па̄влыг о̄с ма̄н палтув ловиньтахтэ̄г. Тот о̄лнэ ма̄хум мощ ка̄ркамыг вос о̄лнувыт, матыр о̄с вос щё̄питэ̄гыт манос ма̄н палтув мӯйлуӈкве вос ёхталэ̄гыт. Восыӈтур па̄вылт о̄лнэ кӯщай рӯпата тэ̄ланэ ка̄ркамыг ва̄риянэ, матыр о̄вылтыт ва̄тихал китыглахты. Ты ма̄нь па̄влыгт ос Ягримт о̄лнэ ма̄хманум Йильпи та̄лыл янытлыянум! Пуссын пуста̄гыл вос о̄лэ̄гыт, са̄всыр тэ̄ланув кӯстырыг вос минэ̄гыт, ос акваннё̄тхатым юртыӈыщ э̄лаль вос о̄лэ̄гыт!

1092 2015.01.30. Николай МЕРОВ

Хӯл совныл пормасыт ма̄щтырлан нэ̄. Коми республикат культура Центр колт рӯпитан ма̄хум финноугор мирыт урыл кина ва̄ре̄гыт. Ты хо̄тпат мо̄лал ма̄ньщи ма̄хум о̄лупса кинан по̄слуӈкве Ха̄льӯсн ёхталасыт. Тот ма̄щтыр нэ̄ Галина Матвеевна Руденко ёт хо̄нтхатыгласыт. Тав хӯл совытныл са̄всыр пормас ю̄нты. Мӯй ма̄хум таве ты рӯпата урыл китыгласаныл. Хӯл совныл хумус ос манырсыр пормас ма̄щтырлаве, на̄н ты урыл Галина Матвеевна потре э̄лаль ловиньтэлы̄н: – Пе̄с порат ма̄хум хӯл совныл са̄выӈпа̄лэ ла̄гыл маснут ю̄нтыгласыт. Туи тамле маснутыл ё̄мыгтан порат ла̄гыл ат ёсаве. На̄н ул номсэгы̄н, э̄рттам хӯл сов сака во̄вта. Ты кос во̄вта ос тав та̄кыг о̄лы, мори ат маныгтахты. Хӯл совытныл ма̄хум са̄всыр маснут, тэ̄нутпормас пиннэ хӯргыт ос са̄всыр хорамыт ю̄нтыгласыт. Тувыл ос тох е̄мтыс, са̄в та̄л сыс хӯл совныл нэ̄матыр пормас ат ю̄нтыглавес. Ты ва̄рмаль а̄латы хотёрувлавес. Ос ма̄н ты тэ̄ла э̄лаль тотуӈкве вуйхатсӯв. Хӯл сов хумус щё̄питаӈкве, яныгпа̄ла хо̄тпатныл китыглахтасӯв. Тыщир ты са̄всыр пормасыт ю̄нтуӈкве о̄вылтахтасӯв. Ань ты ва̄рмаль ёмщакв ханищтаслӯв. Ам мо̄лалнув хӯл совныл та̄йтта̄л маснут ю̄нтсум. Сов тынтлын юипа̄лт хорамыӈыг е̄мты, татем нё̄тнэ̄г сусхаты, ма̄хум сака пӯмщалахтэ̄гыт. Тувыл са̄всыр хӯргыт ос тучаӈыт ю̄нтсум. Ма̄щтыр хо̄тпа маныр номылматы, таи та ва̄ри, ка̄сыӈ хо̄тпа такви щире̄тыл матыр ю̄нтуӈкве ве̄рми. Соссаӈ ма̄хум са̄выӈпа̄лэ сорт ос сыг совныл са̄всыр пормас ю̄нтыгласыт. Сыг совныл ла̄гыл маснут ты ю̄нтыглавес, ты сов щар та̄кыг ты ловиньтаве. Хумус хӯл сов щё̄питаве, ань на̄нан потыртэ̄гум. Э̄рыӈ хуньт на̄н ос тамле совытныл матыр пормас ю̄нтуӈкве номылматэгы̄н. Сорт манос сыг пувегы̄н ке, сове хотнуелы̄н. Тувыл мойтакыл ёмщакв хотпосуӈкве э̄ри. Сэ̄мыл мойтак о̄ньщегы̄н ке, таил посэлы̄н. Ня̄льще янытэ̄т хот вос паты. Тувыл сов састум парт тармыл ла̄кквахартэлы̄н, ёмщакв то̄слэлы̄н. То̄сме юипа̄лт ка̄тыл ёмащакв тынтлэлы̄н. Хӯл сов та̄к, ул пилэ̄н, ат маныгтахты, нолам тынтлэлы̄н. Ка̄миньтаг е̄мтме порат нё̄тнэ хансанэ та нэ̄глапе̄гыт. Тувыл ты совныл маныр ка̄сащегы̄н, таи ю̄нтуӈкве ве̄рмегы̄н. Сорт хӯл па̄йтнэ юипа̄лт янытэ̄т тэ̄лаг мины. Совныл матыр ю̄нтаве, сыс лувыт сакныл аквантэ̄лыгтавет, сакква̄лгыт ва̄руӈкве ро̄ви. Сорт пуӈк па̄йтанэ торыг «на̄йив тотнэ э̄ква» лувсак о̄лы, та лувсак пе̄рна хурипа. Ам ты лувсак пе̄рна пе̄нтсыл сакква̄лгын тагатылум. Пе̄с порат ма̄хум лувсакыт о̄льпыл ат сартсаныл, манхурипаг о̄лсыт, тох ва̄рыгласыт. Ам пормас ва̄рнэ лувсаканум пуссын о̄льпыл сартыянум, сака нё̄тнэ̄г сусхатэ̄гыт ос тыщир хосануве̄г ве̄ритэ̄гыт, мори ат саквалэ̄гыт. Ты пормасыт ма̄щтырлаӈкве ма̄навн Раиса Петровна Загородняя оматэ нё̄ты. Ты яныгпа̄ла ханты э̄ква ма̄нав ханищтыянэ, маныр ат торгамтэ̄в, тав хӯлтыглы. Тыима̄гыс таве̄н яныг пӯмащипа ла̄тыӈ ла̄ве̄гум. Са̄ртын соссаӈ ма̄хум хорамыт ос пормасыт са̄всыр утытыл та̄нки ва̄рсыт, нэ̄матыр э̄л ат вӯщкасыгласыт. Ань ты ва̄рмаль ла̄щалла̄щал о̄с но̄хво̄рмалтаӈкве патвес. Ма̄н округувн ёхталан мӯй ма̄хум тамле пормасыт пӯмащ ма̄гыс сака ёвтэ̄гыт. Галина Петровна ва̄рнэ рӯпататэ акваг э̄лаль вос мины. Ты тэ̄лан ня̄врамыт о̄с вос ханищтыянэ. Та̄н ты йис о̄лупса са̄в нотн э̄лаль тах тотыяныл.

1092 2015.01.30. Валентина УЗЕЛЬ

Ялпыӈ я̄ ва̄тат ӯнттым «Суеват пауль» Советский район Ивдельский район ляпат о̄лы. Та е̄р нупыл са̄в ялпыӈ ма̄ о̄лы, са̄в ма̄ньщи ще̄мьят тот о̄лэ̄гыт. Та̄н сытам ма̄т о̄лнэ̄ныл ма̄гыс пе̄с о̄лупсав, пе̄с ва̄рмалянув э̄лаль тотыяныл, сака ӯргалым о̄ньщияныл. Югорск Советский ӯс ляпат ӯнттым о̄лы, халэ̄нт туп титхуйпловтем ве̄рыста. Ма̄н Югорск ӯсн ялмув порат ӯст о̄лнэ «Суеватпауль» нампа музейколн тотыглавесӯв. Колкапай сака яныг. Са̄в пе̄с ма̄ньщи пормас, маснут тот акванатым о̄ньщавет. Титыглахтуӈкв патсӯв, ма̄ньщи хо̄тпат тот рӯпитэ̄гыт ман а̄ти. Ла̄ввесӯв, нэ̄мхотьют ат рӯпиты, пуссын рущит. Туп акв рущ нэ̄ ты музей ӯнттым па̄сыл тот рӯпиты, таве хо̄нтыслӯв, ты музей урыл ёмащакв титыгласлӯв. Тав наме Марина Юрьевна Зяблинцева, музейколт пормасыт ӯргалым рӯпиты. Ты кол хумус ӯнттувес, тав ты урыл тох ла̄выс: – Ӯст ӯнттым музейколув 1999 та̄лт пӯсвес. Тувыл 2002 та̄лт во̄рыӈ ма̄т Югорск ӯс ляпат иӈ акв я̄нас музей ӯнттуӈкв номылматсыт. Тот туп ма̄ньщи колыт вос о̄лэ̄гыт. Ос ты колыт ма̄кыг туп ма̄ньщи хо̄тпа ӯнттуӈкв ве̄рми. То̄нт музей кӯщаиг Ольга Александровна Соляр рӯпитас. Тав такви ма̄ хо̄нтыс, тот ты э̄лыпа̄лт геологыт о̄лсыт. Ма̄тэ ёмас, карыс ма̄ ос ляпат Эсс нампа я̄ овты. Кол ӯнттын хо̄тпа тинсуӈкв патыс. Свердловский область Ивдельский район Полум я̄ ляпат о̄лнэ Куриковыт колыт ӯнттуӈкв во̄всанэ. Куриковыт хум хо̄тпат та̄н ты ма̄ньщи пе̄с колыт ӯнттысаныл, нила хо̄тпа рӯпитасыт. Тув сыс ты колыт пуссын а̄стлысаныл. Э̄лаль ам рущ нэ̄ Марина Зяблинцева Куриковыт наманыл ла̄вуӈкв во̄выслум. Тав ла̄выс, ат ва̄ганэ. Такос хо̄та̄ти тисхатсум, нэ̄мхо̄т ат хо̄нтсанум. Ётылнув ӯсувт о̄лнэ ма̄ньщи нэ̄ Светлана Селиверстовна Динисламова ты урыл титыгласлум, тав ла̄выс, ты Куриковыт тав ва̄ганэ. Ос музей хумус ӯнттувес, тав ты урыл тох потыртас: – Ольга Соляр музейт рӯпитаме порат Лӯсум ос Полум я̄ хосыт о̄лнэ ма̄ньщиянув палт акваг ялантас. Тав «Суеват пауль» ӯнттын ма̄гыс тот о̄лнэ хум хо̄тпат во̄всанэ. Щар яныг хо̄тпаг Василий Петрович Куриков о̄лыс, тав ётэ о̄лум ма̄хум мощ ма̄ньнуве̄г о̄лсыт. Та̄н Югорск ӯсн ёхтысыт, акв э̄т тот хӯлсыт. Мо̄тыт хо̄тал та̄н Эсс я̄ ва̄тан музей ӯнттын ма̄н тотве̄сыт. Василий Петрович номтэ та̄ра хотсакыс, тав ла̄выс: «Ты я̄ ма̄навн ялпыӈыг о̄лы. Ам яныг хо̄тпаныл хӯлыгласум, Эсс я̄ ялпыӈе сака яныг. Ма̄навн тыт витн новхатуӈкв щар ат ро̄ви. » Та̄н пӯрлахтасыт, со̄с ос ла̄лва косамтасыт, пуӈк пинсыт. Э̄тпостем тот о̄лманыл сыс та̄н Эсс я̄ ва̄тан щар ат ялсыт, туп э̄лыл тув нас а̄ӈквата̄лсыт. Айнэ вит э̄лы ма̄ныл тотыгласыт. Василий Петрович ёт Николай Гаврилович о̄лыс, Саша Куриков ос Коля Самбиндалов. Саша то̄нт ва̄т нупыл нила та̄лыг е̄мтыс, Коля хус та̄лэ то̄влыс, тэ̄н яныг хо̄тпагн кол ӯнттын ва̄рмальн ханищтавесы̄г. Ты 2015 та̄л туи порат во̄рыӈ ма̄т ӯнттым музей хӯрумхуйплов та̄лэ то̄влы. Ты урыл потыртамуме̄н порат ам Марина Зяблинцева рущ нэ̄ титыгласлум, та̄н матыр кол тот иӈ ӯнттэ̄гыт ман а̄ти. Тав ювле ла̄выс, моще̄рт аквта ма̄т та̄н рущ кол, украинец ма̄хум кол, хатань ма̄хум кол тах ӯнттэ̄гыт. Ва̄им, тамле ва̄рмаль урыл хунь хӯнтамлэ̄гын, номтын ёмасыг ат е̄мты. Ма̄ньщи ма̄хманув ялпыӈ ма̄наныл ла̄щал витыг та тотавет. Мо̄т ма̄ныл ёхтум мирн тэ̄ла а̄тим, ты манырсыр ма̄. Ос ка̄сыӈ ма̄к ма̄ньщи хо̄тпа ва̄гтэ, ка̄сыӈ па̄выл, ка̄сыӈ ялпыӈ ма̄ такви сака ӯргалахты, ат та̄ртхаты. Таима̄гыс ты ма̄н мо̄т ма̄н ат новхатэ̄в, тув ат воратэ̄в. Ма̄навн ат та̄и.

1092 2015.01.30. Светлана РОМБАНДЕЕВА

Ю̄нсхатан туля урыл. Ювле хультум э̄тпос 10 хо̄талэ̄т Ханты-Мансийск ӯст о̄лнэ Ма̄ ос Э̄лумхо̄лас музейт ю̄нсхатан тулят суссылтаве̄сыт, рущ щирыл напёрсткаг ла̄вавет. Матахтем яныгса̄т са̄вит тулят акванатымат, нормат тармыл тӯщталымат. Ю̄нсхатан туля – ты ань тулё̄вылн мастапан ут. Хо̄тпа хунь ю̄нсхаты ман матыр ма̄щтырлы, ань тулё̄влэ ю̄нтупын ул вос пе̄лаве, таима̄гыс тулял ю̄нты. О̄выл тулят патта та̄л ва̄рве̄сыт, патта ат о̄щсыт. Мощ ётылнуве паттал ущ ва̄руӈкв патве̄сыт. Ня̄врамыт ма̄гыс, насати, о̄с я̄нас тулят ва̄рыглаве̄сыт. Россиявт о̄выл тулят XIV нотт ва̄руӈкве патымат, акв тамле туля Новгород ӯс ляпат хо̄нтвес. Туля урыл о̄выл потыр Иверский пупколт хо̄нтвес, 1669 та̄л пе̄с нэ̄пакт хансым о̄лы, ань та пупкол 40 туля ос 300 ю̄нтуп ёвтыс. 1704 та̄л па̄сыл тулят са̄в ма̄т ва̄руӈкве патве̄сыт, са̄всыр хуритыл хорамтаве̄сыт, сыресыр о̄льпытыл сартве̄сыт. Европа ма̄т ю̄нсхатан тулят ва̄руӈкве ма̄хум Нюрнберг ӯст ханищтаве̄сыт. Тот ю̄нсхатан туля ва̄рнэ тэ̄ла тӯйтым о̄щвес. Туля ва̄руӈкв ха̄снэ хо̄тпа мо̄т ӯсын манос э̄лы хо̄н ма̄н ва̄нтлуӈкве ат та̄ртвес, тав ань ты тэ̄ла нэ̄мхотьютн ул вос суссылтытэ, ты урыл нэ̄мхотьютн ул вос потырты. Китыт тамле яныг центр Голландия ма̄т о̄лыс, тот са̄в фабрикат рӯпитасыт, са̄в тулят ва̄рве̄сыт. Та порат ма̄щтыр ма̄хум сака са̄в о̄лыс, нэ̄ хо̄тпат акваг матыр ю̄нтсыт, щаквщисыт. Пе̄с ань хунь нэ̄хумыг акванминэ̄г, хум хо̄тпа нэ̄тэ̄н ю̄нсхатан туля мӯйлуптас. XVII-XVIII нотытт тулят щар сака модныиг е̄мтсыт, ма̄хум халанылт тулятыл мӯйлуптахтасыт. Нэ̄т хотталь мӯйлуӈкве минмыгтэ̄гыт, ёт нёлолов са̄виттем ю̄нсхатан туля выгыт, нэ̄ ань катаге̄т ка̄сыӈ тулё̄выл туля вос о̄ньщи. Та порат та̄н сака тыныӈ те̄рыл ос а̄хвтасыл ва̄рве̄сыт. Ос хунь ю̄нсхатан машинкат нэ̄глысыт, тулят сака ёвтуӈкве ат патве̄сыт. Ты юипа̄лт сака мат са̄в ва̄руӈкве ат патвес. Э̄лыхо̄н ма̄т о̄лнэ ма̄хум ю̄нсхатан туля акванатнэ ва̄рмаль сака э̄руптэ̄гыт, рущ ла̄тӈыл ла̄ваве – коллекционирование. Янгыщ английский фарфоровый тулят янытлавет, тувыл ща̄лголн ос мо̄т са̄всыр тулят, пуссын акванатавет, тот та пӯмщалавет, сунсыглавет. Ма̄н о̄лнэ ма̄вт туля тыналан я̄нас ла̄пка а̄тим. Хо̄тпа таве̄н э̄рнэ туля кинсуӈкв паты те, молях ат хо̄нты, туля киснэ ва̄рмаль рӯпатаӈ. Ты пӯмыщ суссылтап таи ма̄гыс ва̄рвес, ань ма̄хум вос ва̄ганыл, манхурип тулят о̄лэ̄гыт, хунь ос хоты ма̄т ва̄руӈкве патве̄сыт. То̄ва хо̄тпа мовалым улпыл ля̄галы: «Маныр ю̄нсхатан туля урыл потыртаӈкве. . . » А̄ти сар, ул мовиньтэ̄н, туля – ты ма̄н пе̄с о̄лупсав, ма̄щтырлахтынэ̄в порат ты щар ма̄к э̄рнэ пормасате̄в. Ма̄щтыр нэ̄, ма̄щтыр хо̄тпа туля та̄л нэ̄матыр ю̄нтуӈкве ат ве̄рми, мӯсхал щирыл щаквщуӈкве ат ве̄рми. Ты выставка туп ва̄т са̄грапнал э̄тпост рӯпитас. Ӯс ма̄хум ю̄нсхатан тулятыл маттем та пӯмщалахтасыт, та колнакт рӯпитан нэ̄ маттем та китыглавес. Со̄ль, сака пӯмыщ о̄лыс. Пӯмыщ тулят хуньт, э̄рыӈ, тах о̄с суссылтавет, та торыг тув те ликмегы̄н, щалтапа̄лэ̄н.

1092 2015.01.30. Александр ВЬЮТКИН

Такви ща̄нь ла̄тӈе ёт рӯпитан нэ̄. Ты хӯрит по̄слым нэ̄ ёт ам Москва ӯст ня̄врамыт ханищтан ма̄хум халт касыл о̄лум порат ва̄йхатыгласум. Тав наме Кира Евграфовна Сагалакова. Тав Хакасия республиканыл о̄лы. Хакасия ма̄тэ аквпалъе̄ре Енисей я̄н овтаве. Мире о̄лнэ ма̄тэ Саян ос Алтай нё̄рыт халт о̄лы. Та̄н ос ма̄н хольтув акв тамле На̄й-О̄тырын по̄йкще̄гыт. О̄лнэ ма̄ныл палытэ̄т ниласа̄т хо̄тпан ве̄рыста, па̄ӈвхитэ ос титса̄т ве̄рыстаг о̄лы. Хакас мире аквъёт пуссын 546 со̄тыра са̄витыг о̄лы. Ма̄к яныг ӯсыг Абакан ӯс ловиньтахты. Абакан ма̄ньщи ла̄тӈыг толмащлаӈкве те «Во̄рто̄лнут те̄лпе» тох ла̄ваве. Кира Евграфовна колта̄глэ Астийск па̄вылт о̄лы. Тав такви интернатыт о̄лнэ ня̄врамыт ёт рӯпиты. Та кол «Советский Союз героиг» о̄лум хум М. И. Чебодаев намыл пиным о̄лы. 2014 та̄лт та интернаткол 140 та̄лэ то̄влыс. Минам та̄л сыс Россия янытыл па̄влыӈ ма̄т щар ёмащакв рӯпитан ханищтан ма̄хум ма̄гыс ва̄рнэ касыл атхуйпловитыг е̄мтыс. Кира Евграфовна ня̄врамыт хакасский ла̄тӈыл потыртаӈкв ханищтанэ̄тэ коныпал, иӈ школа тармыл кӯщай ва̄ӈын нэ̄г о̄лы. Тав ханищтан ня̄враманэ ща̄нь ла̄тӈаныл щирыл касыл о̄лыглан порат ва̄тихал но̄хпатыглэ̄гыт. Кира Евграфовна такви хӯрум ня̄врам о̄ньщи. Ня̄враманэ пуссын та̄нти ща̄нь ла̄тӈыл потыртэ̄гыт. Тав ла̄выс: «Ня̄враманув ла̄тӈув ва̄ӈкв ат те патэ̄гыт, мирув хот та тыпылтахты. Хоталь ва̄рхатаӈкв, са̄в ма̄ньлат ма̄хманув та̄нти ща̄нь ла̄тӈыл потыртаӈкв ат таӈхе̄гыт, э̄ссамтэ̄гыт, то̄ват рӯщиг воратэ̄гыт. Мо̄т пал мирув ос па̄влыӈ ма̄т о̄луӈкв щар ат ве̄рме̄гыт. Та̄н яныг мисыт по̄сым лувыл нё̄рыӈ ма̄н ва̄нтлэ̄гыт. Ам та̄наныл щар ма̄к хакас хо̄тпаг ловиньтыянум. Тох ва̄нтлым ма̄н пе̄с пора ма̄хманув о̄лсыт. Па̄влыӈ ма̄т о̄лнэ ма̄хум ла̄тӈув мощ хотёрувласыт, са̄в ма̄ньлат ма̄хум ос винан патхатым о̄лэ̄гыт. Тох э̄лаль те мины, ма̄н о̄с мощщаг хультум мирыг ловиньтахтуӈкв патэ̄в». Кира Евграфовна Москва ӯст ня̄врамыт ща̄нь ла̄тӈыл ханищтан ма̄хум халт но̄хпатыс. Тав а̄нох те̄рныл товлыӈ ӯй пуныл ва̄рим хаснэ йӣвыл мӯйлуптавес. Такви ла̄тӈе ма̄гсыл сыме ща̄рги. Ам таве̄н са̄в со̄т, са̄в щунь ла̄тӈыл те̄тылум. Ханищтан ня̄враманэ та̄нти ща̄нь ла̄тӈанылт вос потыртэ̄гыт.

1092 2015.01.30. Тамара МЕРОВА

Эстонияныл ёхталам мӯй нэ̄ потре. Светлана Карм Тарту ӯсныл Эстония ма̄ныл тыг ёхталас. Тав Ханты-Мансийск ӯс музеит рӯпитан ва̄рмалит урыл пӯмщалахтас ос та̄нки ма̄нанылт о̄лнэ тэ̄лат урыл потыртас. Ты нэ̄ о̄влэ̄т ка̄саламум порат амкирот номсасум: тав саран нэ̄ хурипа. Тувыл потыртамуме̄н юипа̄лт та̄рапатыс, тав насати удмуртка. На̄н ань ме̄н потруме̄н э̄лаль ловиньтэлы̄н. – Ам Малопургинский район Старая Монья па̄вылт самын патсум. Ты па̄вылкве Удмуртия ма̄т о̄лы. Ань ос юио̄выл хус арыгкем та̄л Эстоният о̄лэ̄гум. Тот Тарту ӯст Эстонский национальный музейт рӯпитэ̄гум. Финноугорский рӯт мирыт пе̄с о̄лупсаныл ханищтыянум ос нэ̄пакн хансыянум. Музеювт сыресыр суссылтапыт о̄с щё̄пита̄лэ̄в. Ань пуссын акв проект щирыл рӯпитэ̄в. Моще̄ртын йильпи лощит музейколыл ӯнттаве̄в. Тот акв яныг колнакт финноугорский рӯт ма̄хманув урыл потыртаӈкве патэ̄в. Ань таима̄гыс са̄всыр пе̄с накыт та̄рапаттыянӯв ос музейн са̄в пе̄с пормасыт, маснутыт атэ̄в. Тамле яныг кол ӯнттын ма̄гыс 2006 та̄лт нэ̄пакыт щё̄питаӈкве патве̄сыт ос 2008 та̄л па̄сыл ма̄н рӯпитаӈкве тот о̄вылтахтасӯв. – Эстониян наӈ хумус минасын? – О̄йкамн тув тотве̄сум, тав эстонец хум. Ма̄ньлатыг о̄лме порат Удмуртиян рӯпататэ щирыл ёхталас. Ме̄н то̄нт акванхо̄нтхатасме̄н. Тав о̄с музейт рӯпиты, ма̄ янытыл о̄лнэ ма̄хум, та̄н о̄лупсаныл хурин по̄слыянэ. – Ам сусте̄мт наӈ тот хосат та̄гыл о̄лэ̄гын, омагна̄тягн мо̄т ма̄н минуӈкве хумус та̄ртве̄сын? – Омам са̄ртын ат ка̄сащас кос, хумус э̄лы ма̄н тотавем. А̄тям тувыл ла̄выс: «Э̄лы ма̄ ман а̄ти, акв яныг ма̄капайт о̄лэ̄в. Хотмус рӯтыг ты ла̄вхатэ̄в. Ма̄нки халувт мӯйлуӈкв ялантаӈкве ул та̄ратаве̄в». То̄нт ма̄н иӈ СССР ма̄т о̄лсӯв. То̄нт хунь номсысӯв, ётыл мо̄т щирыл о̄лмыгтэ̄в. Ты э̄лыпа̄лт ма̄н па̄влувт мо̄т а̄гит хум ва̄рсыт ос Германиян о̄луӈкве тотве̄сыт. Тув ялантан ма̄гыс рӯтанылн сака са̄в э̄рнэ нэ̄пакыт атуӈкве э̄рыс. Ма̄хум таитыл хурахласыт. Ань юв мо̄рсыӈ порат яланта̄лэ̄гум. То̄внакт Удмуртият матыр конференцият о̄с ва̄рыглавет, тув во̄виньта̄лавем. Са̄ртын ня̄врамагум ёт тотыгласагум. Ань ще̄мьяӈ та̄гыл ялантаӈкве са̄в олн э̄ри. – Манах ня̄врам о̄ньще̄гын, та̄н ща̄нь ла̄тӈыл потыртаӈкве ха̄сэ̄гыт? – Ме̄н о̄йкаме̄нтыл кит ня̄врам янмалтасме̄н. А̄гиме̄н художественный академият ханищтахты. Пыгме̄н ты та̄л гимназия тах а̄стлы. Удмурт ла̄тыӈ тэ̄н ат ва̄гтэ̄н, ам тэ̄натэ̄н ат ханищтасагум. Ам эстонский ла̄тӈыл тэ̄натэ̄нтыл амки потыртаӈкве ханищтахтасум. Эстониян ёхтумум порат та̄н ла̄тӈаныл щар ат торгамтаслум. Ань то̄внакт, ва̄им, ка̄смоста̄л номсэ̄гум, манрыг а̄гиягумпыгагум амки ща̄нь ла̄тӈумтыл потыртаӈкве ат ханищтасагум. Тувыл ва̄глум, ка̄сыӈ э̄лумхо̄лас матыр ва̄ӈкве сака тахмаи ке, тав ё̄р пиным ханьщувлы тах. – Ханты-Мансийскат наӈ о̄выл щёс о̄лсын? Манырсыр тэ̄лат наӈ тыт та̄рапаттысанын? – Ам о̄выл щёс тыг ат та̄л ювле хультум порат ёхталасум. То̄нт тыт Россия янытыл финноугор учёныит Форумн акванатхатыгласыт. Тот рӯт ма̄хманув о̄вылтыт доклад ловиньтасум. Ты та̄л тыг во̄вве̄сум. Такем номтыӈ хо̄тпат ёт тыт ва̄йхатасум. Са̄в ма̄ныл ёхталам музеит рӯпитан хо̄тпат та̄нки тэ̄ланыл сака сымыӈыщ ва̄рияныл. Матыр ва̄рнэ ма̄гыс проект щё̄питэ̄гыт, воритотэ̄гыт. Ос олныл мивет ке, та̄н проектаныл ёмас тэ̄лаг ва̄рияныл. Ма̄н ань ос музейт проектув щирыл са̄в рӯпитэ̄в. Ты урыл ам тыт потыртасум. Йильпи музеюв 2016 та̄л ма̄нь таквс э̄тпост рӯпитаӈкве о̄вылтахты. Та кастыл ма̄н ань финноугорский ма̄хум о̄лнэ ма̄н яланта̄лэ̄в, та̄н о̄лупсаныл ханищтэ̄в. Ань тыг мус та̄н пе̄с щирыл о̄лэ̄гыт ман а̄ти, матыр ялпыӈ хо̄талыт ва̄рыглэ̄гыт ман а̄ти. Ма̄навн пуссын пӯмыщ. Тувыл музейн ёвтнэ ма̄гыс пе̄с пормасыт кинсэ̄в. Ма̄нки матахмат пе̄с пормасыт о̄ньще̄в кос. Ань аквта хурип супыт, маснутыт хотьют ю̄нтнув ке, такем ёмас о̄лнув. Пе̄с хансым потрыт о̄с о̄ньще̄в. Ань Эстоният ка̄сыӈ рӯт ма̄хум урыл мультфильм по̄слуӈкве таӈхе̄гыт. Акв ма̄ньщи мо̄йт ам ёттотсум, таве ма̄ньщи ла̄тӈыл толмащлаӈкве ос диктофонын хансуӈкве э̄ри. Ётыл ты мо̄йт мульфильмыг по̄славе тах. Ты тэ̄лат палт нё̄тнэ хо̄тпатн ам пӯмащипа ла̄тыӈ ла̄ве̄гум ос на̄н ма̄ньщи ма̄хманын пуста̄гыл вос о̄лэ̄гыт.

1092 2015.01.30. Мария Тихоновна Двинянинова

Хумус апа̄пщикве маньнэ пе̄рияӈкве нё̄тыс «Апа̄пщитем нурыг ул вос выгтэ, хо̄т матыр ат а̄ртмын щирыл те ля̄галылум».. Акв ма̄ньщи пыгкве о̄лысхулыс. Маныртем та̄лыт минантэ̄гыт, татем пыгкве та̄ксарыг, янгыг е̄мты. Аквматэ̄рт ань пыг нэ̄ тотуӈкв номылматас. Ты ёмас, посыӈ ва̄рмаль. Туп нэ̄ тотнэ порат, маньнэ ма̄гыс хумпал утэн ме̄т ойтуӈкве э̄ри. Ос акв ва̄рмаль таи ты, таве̄н ва̄ӈкв э̄ри: манырсыр хурип а̄ги ма̄гыс ме̄т ойты, о̄лупсатэ маныр хурипа, ве̄щкатыг о̄лы манос а̄ти, ва̄ти нотпа манос хоса то̄рум о̄лы. Ты са̄в мощ ва̄рмаль та̄рапаттын ма̄гыс ань пыгкве а̄ги апа̄пщикве палт тотыглаӈкв номылматас. Тав ва̄нэ̄тэ щирыл, на̄н нэ̄ хо̄тпат – сака ощмар ма̄хум. Тувыл та̄нанылн хумус агтуӈкве ро̄ви? » Апа̄пщикве нэ̄ хо̄тпат халт о̄лыглас, таима̄гыс та̄н о̄лупсаныл урыл тав ёмщакв ва̄г. Ос ме̄т ойтнэ ма̄гсыл аквкит ла̄тыӈ миӈкв ве̄рми. Хосава̄ти яныгпа̄ла ма̄хум номсахтэ̄гыт, аквматэ̄рт ты номылматсыт, хумапа̄пщикве пе̄риясыт. Яа ань апа̄пщикве хо̄т хо̄нтуӈкве э̄ри. Хоса манос ва̄ти во̄рыт ё̄мсыт. Аквматэ̄рт апащикве хаснэ ма̄н ты хо̄нтхатасыт. Тав хо̄т хансыссуссыгтас, хӯл няслыс. А̄ги тув ва̄нттувес. А̄лпыл постыглан порат а̄ги апа̄пщиквел акванхо̄нтхатуӈкве э̄рыс, та порат тув ща̄не̄н ва̄нттувес. Ща̄нь – ты яныг хо̄тпа, нэ̄ ма̄хум тармыл матыра̄ти хӯлтыгланэ щирыл о̄лнэ нэ̄, тав са̄в ва̄нэ номтыӈсайтыӈ хо̄тпаг о̄лы Ань а̄ги ка̄саламе порат апа̄пщикве туп не̄рыг хусгын луньщ витанэ э̄ла раге̄гыт Та̄рапатыс, насати, а̄ги тай торыӈ ма̄т а̄ги а̄ти, то̄палыг таквина̄тэ мори о̄щнэ а̄ги о̄лнэ̄тэ. Яты, тувыл ань ты нэ̄ ха̄йталаӈкв пыкве ка̄сэ та холас. Ос тувыл китыт а̄ги номылматас ха̄йталаӈкв. Ты а̄гикве апа̄пщикве палт о̄ста ва̄нттувес. Апа̄пщикве ка̄саламе̄т, а̄ги татем та рохтыс, алпитэ нас то̄рги, осэ щар вуйканыг щё̄ӈхатас. Тувыл та̄рапатыс, насати, ты а̄ги нотэ ва̄ти о̄лнэ̄тэ. Таима̄гыс пыг ойтнэ ме̄тэ ёла кос паттувес, акв па̄лэ туп ойтнэ щирыл. Нэ̄ тав ётэ хоса то̄рум ат о̄лы. Ос тувыл пыг та по̄йтыс. Хосава̄ти о̄лыс ос хӯрмит нэ̄ ха̄йталаӈкве номылматас. Нэ̄ апа̄пщикве палт о̄ста ва̄нттувес. Ты а̄гикве апа̄пщикве э̄лыпа̄лт осэ щар хотвы̄гратас, э̄сырмаӈыг е̄мтыс. Ты тай ёмас, ве̄щкатыг о̄лнэ а̄гикве ты, со̄т о̄ньщи ос о̄лнэ нотэ хоса, ёмас посыӈ то̄рум э̄лаль о̄лнэ а̄ги. А̄ги э̄лыпа̄лт апа̄пщикве такви самаге ёлаль та̄ратасаге, аквтуп, ма̄н ёлаль рагатасы̄г, щар о̄лнэ̄тэ а̄тим. Ла̄щлакв сысы та минантас, тав та̄рвитэ̄тл щар акв тово̄выл ат лятатас. Тыщирыл ты. Ты А̄с ма̄ньщи хо̄тпатн мо̄йтым мо̄йт Эстонияныл ёхталам нэ̄ Светлана Карм тав тотыстэ. Мо̄йт нэ̄пакын эстонский ла̄тӈыл хансым о̄лыс, ос тот мо̄йт рущ ла̄тӈыл толмащлавес. Ам ос ма̄ньщи ла̄тӈыг толмащласлум ос мӯй нэ̄ диктофонэ̄н ловиньтаслум. Ме̄н «Лӯима̄ сэ̄рипос» нампа ма̄ньщи газетат рӯпитан нэ̄ Тамара МЕРОВА ёт ты мӯй нэ̄ ёт хоса потыртасме̄н. Светлана Карм ма̄ньщи мир пе̄с наканув о̄вылтыт китыглахтас. Ща̄нь ла̄тӈыл иӈ са̄в хо̄тпа потырты манос а̄ти, ма̄ньлат ма̄хманув потыртаӈкве ха̄сэ̄гыт манос ла̄тыӈ нас ханищтэ̄гыт. Пе̄с наканув э̄лаль тотнэ щирыл та̄н пӯмщалахтэ̄гыт манос та̄н нэ̄матыр ва̄ӈкве ат таӈхе̄гыт. Ма̄ньщи мирув сака молях мощщаг е̄мты. Тыи, ва̄им, ёмас тэ̄лаг хунь о̄лы, сака са̄ль. Ань То̄рум ла̄вум со̄рни ща̄нь ла̄тыӈке̄в потыр ёлхаснэ суиӈ утын э̄лаль вос хансаве, ос мо̄т ма̄хумн вос хӯнтлаве.

1092 2015.01.30. Тамара МЕРОВА

Са̄всыр хурит по̄слын хум. Ханты-Мансийскат ва̄ти хо̄тал э̄тпост «Ма̄вит ос э̄лумхо̄лас» нампа музейт акв пӯмыщ суссылтап ва̄рыглавес. Тот са̄в мирн ва̄нэ хурит по̄слан хум Никас Сафронов по̄слум утанэ ма̄хумн суссылтаве̄сыт. Акв тамле ва̄рмаль Нефтеюганск ӯст о̄с ва̄рвес. Никас Сафронов 1956 та̄лт Ульяновск ӯст самын патыс. А̄ще рущ о̄йка, военный хо̄тпаг о̄лыс. Ща̄не литовцат ос финн ще̄мьянытыл о̄лыс. Пыге таима̄гыс та рӯтанэ щирыл тамле рущ ха̄щтал нам о̄ньщи. Тав ма̄ньта̄гыл о̄лме̄т по̄слуӈкве о̄вылтахтас, са̄всыр нэ̄пакыт сунсым хурит по̄слыс ос то̄ванакт такви матыр хурит тув по̄слыс. Ётыл Никас Сафронов Москват В. И. Суриков нампа художественный институт а̄стлас. Тав ань Россия янытыл яныг нам о̄ньщи, са̄в мирн ва̄нэ хо̄тпаг е̄мтыс. Ань хум такви Ханты-Мансийскан ёхталаӈкве ат ве̄рмыс. Тав ётэ рӯпитан ма̄ньлат нэ̄ Елена Химич тыт суссылтап щё̄пита̄лыс. Ты нэ̄ ма̄хумн ла̄выс: «Мӯйлын ма̄хум яныгса̄т са̄вит по̄слум хуриянэ тыт ка̄салаӈкве ве̄рме̄гыт. Тыт мирн ва̄нэ са̄всыр хо̄тпат хурияныл, пейзажит о̄лэ̄гыт. То̄ва хурит о̄лупсат о̄лыглатта̄л по̄слуве̄сыт. Мо̄т щирыл ла̄вуӈкве ке, та̄н «дримвижн» техника хольт по̄слым о̄лэ̄гыт. Тыи хунь э̄лумхо̄лас матыр ӯлмаи ос но̄хса̄йкаламе порат ты ва̄рмалит иӈ номиянэ ос тувыл та̄наныл ка̄саламе щирыл э̄лаль по̄слыянэ». Ма̄хум хотты картинат та̄нки ма̄гсыланыл ёвтуӈкве ве̄рме̄гыт. Ты коныпал ёвтнэ ма̄гыс хурит фотоальбомнэ̄пакын по̄слуве̄сыт, сыресыр магнитикыг щё̄питаве̄сыт. Нефтеюганскат ос Ханты-Мансийскат суссылтан хурит ань Сургут ӯсн художественный музейн тотве̄сыт. Тот о̄с са̄в ма̄хумн вос сунсавет.

1093 2015.02.13. Валентина УЗЕЛЬ

Округ кӯщаюв яныг ӯсытн ялыс. Ювле хультум са̄тт округ кӯщай Наталья Комарова Сургут ос Мегион ӯсыг нупыл ялыс, матах хо̄тал тот рӯпитас. Са̄всыр кӯщаит акванатыгласанэ, ва̄рнэ рӯпатаныл урыл та̄наныл титыгласанэ. Сургут ӯст о̄лнэ колыт урыл потыртасыт Тув ялме порат тав кол ма̄гыс олн атнэ компаният, ЖКХ ма̄хум, ре̄г колытн тотнэ ва̄рмаль щирыл рӯпитан хо̄тпат пуссын акванатыгласанэ. Хо̄т арыгтем щё̄с та̄н аквъёт рӯпитасыт. Та сапра̄нин ӯст о̄лнэ ма̄хум о̄с ёхталасыт. Ань ма̄хум тамле та̄рвитыӈ ва̄рмалит о̄ньще̄гыт – коланыл ма̄гыс сака са̄в олн виве, пе̄с колныл ма̄хум мо̄т йильпи колн ат ва̄нтлуптавет, са̄в ня̄врамыӈ ще̄мьят кол ӯнттын ма̄гыс ма̄ло̄мтыл ат мивет, лё̄ӈхыт урыл о̄с потыртасыт. Ӯст о̄лнэ нэ̄ И. Адамова губернаторн ла̄выс, Сургут ӯст то̄ванакт тӯрпат хосыт овтнэ вит татем па̄ӈкыӈыг о̄лы ос лю̄ль атыл пасы, айнэ витыг щар ат хо̄йхаты. Ӯс кӯщаит ювле ла̄всыт, аквтит щёс тох о̄лыглы те, ос нэ̄матыр лю̄ль а̄тим. Н. Комарова та̄нанылн ла̄выс, та̄н ӯст о̄лнэ мирныл са̄в олн выгыт, рӯпатаныл ёмащакв вос ва̄рияныл. Лё̄ӈхыт урыл ма̄хум ла̄всыт, ӯст пиным лё̄ӈхыт акв та̄л сыс щар витыг тотавет, яласаӈкв пилыщма. Та яныт капай во̄ӈхат тэ̄лы юипа̄лт осн та нэ̄глэ̄гыт. Округ кӯщаюв мирн ла̄выс, мо̄лты та̄л лё̄ӈхыт ёмащакв ва̄рнэ ма̄гыс 500 млн. солко̄ви майлувес, ты та̄л о̄с аквтыса̄вит олн тах та̄ставе. Мегион ӯст са̄в мир балокытт о̄лэ̄гыт Округувт ты мирн нё̄тнэ ма̄гыс я̄нас программанэ̄пак хансым о̄лы. Ты нэ̄пак щирыл балокытт о̄лнэ ма̄хум субсидияолныл мивет, та̄н та̄нтина̄нылн о̄лнэ кол вос ёвтэ̄гыт. Мегион ӯст ань 807 тамле те̄р хусапыӈ колытт, рущ щирыл та̄н балокыг ла̄вавет, ма̄хум о̄лэ̄гыт. Ка̄сыӈ та̄л округ бюджетныл са̄в олн миве, ты ма̄хум мо̄т колн вос ва̄нтлэ̄гыт. Ос матрыг ты ӯст о̄лнэ мир э̄лаль тот та о̄лантэ̄гыт. Н. Комарова тув ялме порат ты ва̄рмаль урыл потыртан ма̄гыс ӯс кӯщаит сапра̄нин атыгласанэ ос титыгласанэ, ань ты мус манрыг балокытт 1 со̄тыра арыгтем ще̄мьят о̄лэ̄гыт. Ка̄сыӈ та̄л Мегион кӯщаит ты ва̄рмальн маим олныт ёмащакв ат холтыяныл, округ бюджетн ювле те̄тыяныл. Ань кӯщаюв та̄нанылн ла̄выс, та̄н лю̄льсаӈ ва̄рнэ рӯпатаныл хосыт ма̄хум кол ёвтуӈкв ат ве̄рме̄гыт ос савалым балокытт та о̄лантэ̄гыт. Округ губернатор прессслужбаныл те̄тым ля̄ххалыг ма̄ньщи ла̄тӈыл Валентина Хозумова хассаге.

1093 2015.02.13. Людмила ТЕТКИНА

Ня̄врамыӈ ще̄мьят 20 со̄тыра солко̄вил мивет. Кит манос хӯрум ня̄врам о̄щнэ ще̄мьят «материнский капиталыг» ла̄внэ олныл мивет. Ты та̄л ты сертификатнэ̄пак о̄щнэ ма̄хум акв олнло̄мтэ тувыл виӈкве ве̄рме̄гыт 20 со̄тыра солко̄ви. Ты э̄лыпа̄лт тамле ва̄рмаль 2009 та̄лт о̄лыс, то̄нт ще̄мьят 12 со̄тыра солко̄ви виӈкве та̄ртыглаве̄сыт. Та̄л котиль э̄тпосныл ты олныт но̄хнё̄тве̄сыт, ань акв ще̄мья 453 со̄тыра 26 солко̄вил миве. Мо̄лты та̄л ты олныт 23 со̄тыра солко̄вил мощщанув о̄лсыт. Ще̄мьят ты олныл кол ёвтуӈкве, ня̄врамыт ханищтан ма̄гсыл ойтхатуӈкв манос пенсияныл ма̄гсыл пинуӈкве ве̄рме̄гыт. 2007 та̄л па̄сныл ань ты та̄л мус ма̄н округувт 80 со̄тыра ще̄мья тамле сертификатнэ̄пакыл майве̄сыт. Ань та̄н халанылт 11 со̄тыра ще̄мья «материнский капиталыг» ла̄внэ олнаныл висаныл. Са̄в ма̄хум ты олныл кол ёвтнэ порат ойтхатасыт. Тамле программа 2016 та̄л ва̄т са̄грапнал э̄тпос 31 хо̄талэ мус рӯпитаӈкве тах паты. Та пора мус самын патум ня̄врамыт пуссын сертификатнэ̄пакыл тах мивет. Ос ка̄сыӈ та̄л ты олныт но̄хнё̄туӈкве патавет. Пенсионный фонд ке̄тум ля̄ххалэ ма̄ньщи ла̄тӈыл Людмила Тасманова хансыстэ.

1093 2015.02.13. Людмила ТЕТКИНА

Пенсияолныт но̄хнё̄тве̄сыт. Ре̄тыӈ юсвой э̄тпос о̄выл хо̄талныл ма̄хум са̄внув пенсияолныл ойтуӈкве патве̄сыт. Татьяна Зайцева, округувт Пенсионный фондыт кӯщаиг о̄лнэ нэ̄, ла̄выс, ань Югра ма̄т 373 со̄тыра э̄лумхо̄лас пенсия выгыт. 2025 та̄лт тыт 500 со̄тыра э̄лумхо̄лас ты олныл ойтуӈкве тах патавет. Ты ма̄хмыт пуссын са̄всыр пенсияолн выгыт, то̄ват са̄внув, то̄ват мощщанув олныл ойтавет. Хо̄тпа манаса̄вит та̄л рӯпитас, манаса̄вит олн сэ̄лыс, тувыл пенсия ань ловиньтаве. Кӯщай нэ̄ ла̄выс, ма̄хум пуссын кит со̄тыра солко̄вил са̄внув ойтуӈкве патве̄сыт. Акв хо̄тпа ты э̄лыпа̄лт 17 со̄тыра солко̄ви ке вис, ань 19 со̄тыра солко̄вил ойтаве. Ты та̄л сыс ма̄хум олнаныл ос кит щёс тах но̄хнё̄тавет. Яныгполь э̄тпосныл социальный ла̄внэ пенсият са̄внуве̄г ловиньтавет. Во̄ртур э̄тпосныл рӯпитан пенсионерхо̄тпат о̄с тах са̄внув олныл ойтуӈкве патавет. Татьяна Зайцева акв э̄рнэ ва̄рмаль урыл о̄с потыртас. Пенсионный фонд интернетыт я̄нас ло̄пс о̄ньщи. Хо̄тпа манаса̄вит олн ты фондын ань ке̄ты, ос рӯпатал по̄хын хунь мины, манаса̄вит олныл ойтаве тот ловиньтаӈкве ро̄ви. Тамле тэ̄ла таи ма̄гсыл ва̄рвес, ка̄сыӈ э̄лумхо̄лас такви пенсиятэ урыл ань вос номсахты.

1093 2015.02.13. Светлана РОМБАНДЕЕВА

О̄лнэ колыт йильпииг щё̄питаӈкве о̄вылтаве̄сыт. Та э̄тпос 26 хо̄талэ̄т РИЦ «Югра» нампа колт ля̄ххал тотнэ ма̄хум акванатхыглаве̄сыт. Потыр о̄лнэ колыт урыл о̄лыс. Хӯрум хо̄тпа потыртасыт, ты – округ кӯщай ва̄ӈын хум Дмитрий Викторович Шаповал, кол ӯнттын ма̄т кӯщаиг о̄лнэ хо̄тпа Кирилл Равильевич Минулин, ос Югорский фонд кӯщай Сергей Викторович Макаров (ты фонд са̄в квартираӈ колыт йильпииг щё̄питан щирыл рӯпиты). Д. Шаповал хум ла̄выс: «Округув янытыл о̄лнэ колыт йильпииг щё̄питаӈкве ущты о̄вылтаве̄сыт. Ты рӯпата ва̄рнэ фонд 550 миллион солко̄ви атыс. Ты пуссын округ янытыл о̄лнэ ма̄хумныл атым олныт. Ань рӯпата та о̄вылтахтас. Округув янытыл 52% са̄вит олн атсӯв. Воссыг ты а̄ти, ма̄хманув сакати тыса̄вит солко̄ви ойтсыт. Россия янытыл мо̄т ма̄т акванатым олныт ты са̄витаг ат ёхтэ̄гыт. Ма̄н номсыте̄вт, ань ты йильпи о̄вылтахтам та̄л китыт кварталэ̄т 80-90% са̄виттем солко̄вил ма̄хманув ойтхатэ̄гыт». Э̄лаль хум ос та урыл ла̄выс, ань хо̄тпа матахмат та̄л ойтхатас те, тувыл колэ тыналаӈкве номылматастэ. Тув ойтыглам олнанэ таве̄н ювле ат мивет. Тав колэ йильпииг щё̄питан ма̄гыс ойтхатас, такви ма̄гсылэ ты олн хунь атыс. Ля̄ххал тотнэ ма̄хум китыглахтан ла̄тыӈ са̄в о̄щсыт. Ань о̄кругув янытыл хоты ӯст ман районт ма̄хум ёмащакв ойтхатэ̄гыт? Д. Шаповал хум ла̄внэ̄тэ щирыл, ма̄хум Ханты-Мансийск (100%) ос Когалым (90%) ӯсыгт ёмащакв ойтхатэ̄гыт. Тувыл Белоярск, Югорск, Лангепас, Нягань, Нефтеюганск, Радужный ос Урайт о̄лнэ ма̄хум (80%). Нижневартовский район, Сургут, Покачи ос Мегион ӯсытт сака мощща олн атыма (40% туп ты ёхты). Тот о̄лнэ то̄ва хо̄тпат ойтхатуӈкве ат таӈхе̄гыт. Та̄н ётаныл потыртаӈкве э̄ри. Ань тув округ кӯщаюв ялыс, ты урыл тав ма̄хум ёт мощ потыртас. С. Макаров хум ос та урыл китыглавес, ань йильпииг щё̄питан кастыл манах кол нэ̄пакн хансым о̄лы? Тав ла̄внэ̄тэ щирыл, 2014 та̄л сыс 350 арыгтем кол планнэ̄пакн хасвес. Ос ань тыхо̄тал мус туп 200 са̄вит кол ма̄гсыл э̄рнэ нэ̄пакыт ва̄рве̄сыт. К. Минулин хум ла̄выс: «Колыт йильпииг щё̄питан ма̄гсыл компаният конкурс щирыл кинсуӈкве патавет. Ты компаният ёт договорнэ̄пак хансуӈкве э̄ри. Тувыл рӯпитаӈкве ущ о̄вылтахтэ̄гыт. 2015 та̄лт округув янытыл 320 кол щё̄питан щирыл о̄лы. О̄выл лов кол ва̄т са̄грапнал э̄тпост Белоярский, Советский ос Октябрьский районт йильпииг ва̄рве̄сыт. Округув янытыл ос мо̄т ма̄т моще̄рт 15 кол ты а̄стлаве». Ка̄сыӈ кол ма̄гыс э̄рнэ компания я̄ӈк на̄тнэ э̄тпос мус кинсуӈкве патаве, са̄всыр э̄рнэ нэ̄пакыт та маныр щё̄питаӈкве патавет. Тувыл ущ та̄рапаты, ма̄хум коланыл хотьютн йильпииг щё̄питавет.

1093 2015.02.13. Александр ВЬЮТКИН

Ма̄н ма̄вт о̄лнэ мирн нё̄тнэ хум. Та̄л котиль э̄тпос ва̄т нупыл атыт хо̄талэ̄т Ханты-Мансийск ӯст мир ёт рӯпитан ос нё̄тмил ва̄рнэ хум Александр Леонидович Сидоров ёт прессконференция о̄лыс. Тав минам та̄л сыс ва̄рум рӯпататэ урыл ля̄ххал тотнэ ма̄хумн потыртас. Рӯпитан ма̄тэ рущ ла̄тӈыл «Уполномоченный по правам человека в ХМАО-Югре» ла̄ваве. Александр Сидоров потре э̄лаль ловиньтэлы̄н: «Минам та̄л сыс ма̄н палтув 541 хо̄тпа са̄всыр тэ̄ланыл щирыл пищма хансыгласыт ос нё̄тмил во̄вуӈкве ёхталасыт. Щар са̄в 209 пищма о̄лнэ кол ат о̄щнэ манос пе̄с колт о̄лнэ ма̄хум ёхталасыт. Тувыл ЖКХ ёт ва̄рмаляныл акван ат ро̄внэ щирыл нё̄тмил во̄ве̄гыт. Са̄в ма̄хум рӯпитан ма̄ хо̄нтуӈкв ат ве̄рме̄гыт, ос нё̄тмил во̄внэ ма̄гсыл ма̄н палтылув свонитэ̄гыт. То̄ва хо̄тпа тэ̄латэ такви кос ва̄руӈкв номсытэ. Са̄всыр кӯщаит палт яласыматэ, ва̄гта̄лыг патнэ юипа̄лт, нё̄тмил тиснэ щирыл о̄с ма̄н палтув та ёхты. Ам ва̄глум, то̄ва кӯщаиг рӯпитан ма̄хум ё̄раныл ат то̄влын щирыл ювле нас пищмат хансым рӯпитэ̄гыт. Та̄н палтыланыл ёхталан хо̄тпат тэ̄ланыл нэ̄мхотьютн ат сунсавет. Та̄нанылн пӯмащ а̄ти. 2014 та̄лт Украина хо̄нтлын ма̄ныл ха̄йтнэ мир ва̄тихал ма̄н палтылув ёхталэ̄гыт. Та̄рапаттын щирыл щар са̄в беженец Сургут ӯст о̄лы. Ханты-Мансийск ӯсн ос яныгса̄т ляпатем хо̄тпа ёхтыс. Та̄н тыт нэ̄матыр ат о̄ньще̄гыт, о̄влэ̄т та̄нанылн нё̄туӈкв э̄ри. Округувт хо̄тса̄т ляпатем беженец о̄лы. Та̄н халанылт ос тамле ма̄хум о̄лэ̄гыт. Та̄н то̄ват хосат тыг рӯпитаӈкв ёхтысыт. Рӯпитанэ̄ныл сыс тыт хультнэ ма̄гыс намыл э̄рнэ намнэ̄пак та̄л о̄лсыт. Ос та̄нти ма̄нылн ювле минуӈкв ань ат таӈхе̄гыт. Ма̄н та̄нанылн э̄рнэ нэ̄паканыл атуӈкв нё̄тыянӯв. Мо̄т щирыл ма̄н воссыг хоталь ва̄рхатэ̄в. Та̄нанылн нё̄туӈкв о̄с э̄ри».

1093 2015.02.13. Тамара МЕРОВА

Рӯт мирув ла̄тӈе ханищтаве. Венгр учёныит ханты ос ма̄ньщи ла̄тӈыг акваг пӯмщалым о̄ньщияныл. Ань то̄ва университетаныл манос институтаныл ЮГУ ёт аквъёт рӯпитан ма̄гыс соглашениенэ̄пак хассыт. Та щирыл учёный хо̄тпат ос студентыт тыглетувле яласаӈкве ве̄рме̄гыт. Ма̄н ма̄хманув Венгриян ялантэ̄гыт, венгрыт ос ма̄н палтув ёхталэ̄гыт. Ань Ханты-Мансийск ӯсн Венгрияныл Йожеф Балажи ёхтыс, тав Будапешт ӯс университетт рӯпиты. ЮГУт хӯрум э̄тпос сыс тав такви ща̄нь ла̄тӈе о̄вылтыт лекцият тах ловиньты. Ка̄сыӈ ка̄сащан хо̄тпа тув ялантаӈкве ве̄рми. Ма̄хум са̄т сыс кит хо̄тал ла̄тыӈ ханищтаӈкв патэ̄гыт.

1093 2015.02.13. Александр ВЬЮТКИН

Хӯл алыщлан урыл ля̄ххал. Мощ мо̄лалнув округ мирколт сапра̄ни о̄лум порат соссаӈ ма̄хум хӯл алыщлан ва̄рмаляныл урыл кӯщаянув потыртасыт. Хӯл пувнэ ма̄гсыл хансым нэ̄пак рущ ла̄тӈыл «квотаг» ла̄ваве. Ты нэ̄пак соссаӈ ма̄хум ма̄гыс щё̄питым о̄лы. Округ кӯщаюв Наталья Комарова та сапра̄нит тох ла̄выс: «Квота щирыл пувнэ хӯл тыныӈ хӯлыг ловиньтахты, тув хо̄т са̄всыр хӯл наманыл хансым о̄лэ̄гыт. Ханты ос ма̄ньщи ма̄хманув пуссын аквъёт 52 тонна тыныӈ хӯл та̄нти ма̄гсыланыл пувуӈкв ве̄рме̄гыт. Ка̄сыӈ та̄л я̄тт хӯл мощща е̄мты, таи ма̄гсыл мир са̄в хӯл пувуӈкв ма̄н ат та̄ртыянӯв. Хӯланув са̄вмалтан ма̄гсыл ты рӯпата ва̄раве. Ма̄хманув са̄в пувуӈкв те патэ̄гыт, ань о̄лнэ са̄витыг хӯлыт воссыг ат е̄мтэ̄гыт». Округ кӯщаюв потыртан ма̄ныл а̄стуме юипа̄лт ос ма̄вит сыстамыг ӯргалан департамент кол кӯщаиг о̄лнэ хум Евгений Платонов потыртас, тав тох ла̄выс: «Квотанэ̄пак ка̄сыӈ та̄л мощ мо̄тсырнуве̄г хансаве. Ма̄хум хӯланыл уральтым хӯл сэ̄рнэ во̄ӈхат тармыл о̄лыяныл. Ёмащакв ханищтанэ̄ныл юипа̄лт, хӯл пувнэ ва̄рмаль урыл ущта мирн ла̄ве̄гыт. Тувыл ма̄н квота щирыл хӯл пувуӈкв ма̄хум та та̄ртыянӯв. Ты та̄л акв со̄тыра атса̄т соссаӈ хо̄тпа квота винэ ма̄гсыл э̄рнэ нэ̄паканыл ма̄навн те̄тсаныл. Хотьют хӯл алыщлым ос во̄раим о̄лы, та соссаӈ ма̄хум щар о̄влэ̄т я̄ӈк хӯл пувуӈкв та̄ртавет». Губернатор прессслужбаныл те̄тым пищма ма̄ньщи ла̄тӈыл А. ВЬЮТКИН хансыстэ.

1093 2015.02.13. Валентина УЗЕЛЬ

Ханты-Мансийск ӯсыг е̄мтме па̄сыл 65 та̄лэ то̄влыс. Ювле хультум э̄тпос 27 хо̄талэ̄т Ханты-Мансийск ӯсув 65 та̄лэ то̄влыс. Ос нэ̄пакытт хансым о̄лы, щар о̄выл ма̄хум йис порат тыг о̄лмыгтаманыл па̄сныл ты та̄л 433 та̄лыг е̄мты. 1950 та̄л порат РСФСР Верховный Совет Президиуме тамле ла̄тыӈ хансыс – Ханты-Мансийск па̄выл ӯсыг вос ва̄раве, Самарово па̄выл о̄с тув вос хансаве. Та та̄лт Ханты-Мансийск ӯст 10 со̄тыратем хо̄тпа о̄лыс. Миркол рӯпитас, са̄т титнакпа о̄лнэ кол ӯнттуве̄сыт, милициякол, пувлынкол, пӯльница, ӯйхул пусмалтан кол, педагогический техникум, рыбокомбинат ос лесозавод пуссын рӯпитасыт. 1993 та̄лт ӯсув округ столицаг ва̄рвес. Та па̄сыл ӯст са̄в кол ӯнттувес, пӯльница са̄в. Мир о̄с акваг са̄вми. Ань яныгса̄т со̄тыра арыгтем хо̄тпа тыт о̄лы. Ювле хультум э̄тпос 30 хо̄талэ̄т ӯст ялпыӈ хо̄тал ва̄рыглавес. «Октябрь» нампа культура колт са̄всыр суссылтапыт щё̄пита̄лве̄сыт. Ка̄сыӈ организация я̄нас выставка ва̄рыглас. Пе̄с хурит суссылтаве̄сыт. Тувыл са̄в та̄л ос ёмащакв рӯпитан ма̄хум янытлаве̄сыт. Та̄н пуссын мӯйлупсал ос грамотанэ̄пакыл майве̄сыт. Э̄типа̄лаг мӯйлын мир ма̄гыс спектакль о̄лыс, артистма̄хум ёнгим са̄всыр та̄лытт о̄лум мир о̄лупсаныл суссылтасаныл. Тув олн ойтта̄л ялуӈкв ро̄выс. Таса̄вит мир тув та атхатыглас, ӯнлын ма̄ щар а̄тим о̄лыс. Тох ты ӯсув ялпыӈ хо̄талэ минас.

1093 2015.02.13. Валентина УЗЕЛЬ

Са̄в та̄л школат рӯпитам рущ э̄ква. Ханты-Мансийск ӯс ялпыӈ хо̄талэ о̄лум порат са̄в мир янытлавес. Та ма̄хум халт акв яныгпа̄ла рущ э̄ква о̄лыс, ме̄н тав ётэ мощ потыртасме̄н. Тав та хо̄талт о̄с янытлавес. Тав такви уре̄тыл тох потыртас: – Ам намум Людмила Михайловна Вторушина, 1938 та̄лт Ханты-Мансийск ӯст самын патсум. Ань 76 та̄лум то̄влыс. Ма̄н ще̄мьявт хо̄т ня̄врам яныгмасӯв, ам ос ат каӈканум. Омам Прасковья Исааковна, а̄тяв Михаил Петрович Вторушин о̄лсы̄г, тэ̄н Тобольский губернияныл тыг те̄твесы̄г. Ма̄н Самарово па̄вылт о̄лсӯв, тот яныгмасӯв. То̄нт сака пӯмыщ о̄лыс, ня̄врамыт пуссын тув атхатыгласыт. Самарово ма̄т ма̄нь пупкол тит урыг халт ӯнлыс. Та ма̄ «бараба» ма̄г ла̄ввес, ань ос Барабинский ӯсхулыг намаявес. Ма̄н ма̄ниг хунь о̄лсӯв, тот ты са̄в ня̄врам аквъёт атхатэ̄в, та ха̄йтыгтэ̄в, та ёнгасэ̄в. Ня̄врамыт мо̄т ма̄т те о̄лэ̄гыт, пуссын тув ёхтэ̄гыт. Я̄ ва̄тан минэ̄в, на̄иӈха̄пыт та ӯриянӯв. Ань тот са̄в йильпи кол ӯнттувес, пе̄с ма̄тэ ат хащхаты. Ам 2 школат ханищтахтасум. Школа юипа̄лт Рыбников нампа клубколн ялсӯв. А̄гит тот акванатхатэ̄в, э̄рге̄в, йӣкве̄в. Тэ̄лы кос, тупельканув масыянӯв, та ха̄йтэ̄в, нэ̄матыр ат по̄львесӯв. Са̄в мир тув атхаты, а̄гит ос пыгыт халанылт румалахтэ̄гыт. Сака ёмас о̄лсӯв, пӯмыщ пора о̄лыс. Ханты-Мансийский районт о̄лнэ па̄влытн тотыглавесӯв, па̄влыӈ ма̄хум э̄лыпа̄лт э̄ргысӯв. Школа а̄стламум юипа̄лт педтехникумн ханищтахтуӈкв минасум. Тит диплом–нэ̄пак о̄ньще̄гум. Ня̄врамыт 8 школат о̄выл классытт ханищтасанум ос ётыл са̄в та̄л библиотекат рӯпитасум. То̄нт библиотека колэ сака ма̄нь о̄лыс, нэ̄пакыт пуссын акв шкапт о̄щве̄сыт. Ётыл са̄в нэ̄пакыл те̄туӈкв патвесӯв. Школав о̄с яныгнуве̄г ӯнттувес. Ма̄н, школат рӯпитам ма̄хум, са̄всыр хо̄нтхатыглап ва̄рыгласӯв. 1963 та̄лт кукольный театр ва̄рсӯв, ня̄врамыт ёт садикытт ос мо̄т школатт пӯмыщ ёнгилыт суссылтасӯв. Та порат ма̄хум нэ̄пак сака ловиньтасыт. Ущты та̄ратым йильпи ловиньтан нэ̄пакыт урыл потыртасӯв, читательский конференцият ва̄рыгласӯв. Ка̄сыӈ хо̄тпа матыр я̄нас нэ̄пак урыл потыртас. Ӯст о̄лнэ ма̄хум, мо̄т школаныл учителит, ня̄врамыт, са̄в мир ма̄н палтув ёхталас. 1995 та̄л мус 8 школат рӯпитасум. Тувыл ам ма̄нь ня̄врамыт ма̄гыс рӯпитан библиотека кӯщаиг 12 та̄л о̄лсум. 2009 та̄лт пенсиян минасум. «Ветеран труда» намыл майве̄сум, Почётный грамота ос мо̄т са̄всыр янытлан нэ̄пак о̄ньще̄гум. Ань тыхо̄тал о̄ста янытлаве̄сум. Ма̄н, Ханты-Мансийск ӯст, яныгмам ма̄хум, ань ты мус акванатхатыглэ̄в. То̄ванакт, аквъёт ща̄й аим хоса ӯнлахо̄лэ̄в, потраме̄в. 50-60 та̄лытт хумус яныгмасӯв, хумус рӯпитасӯв, номылматыгла̄лэ̄в. Ма̄н ма̄гсылув то̄нт ты щар ёмас о̄лупса о̄лыс. Тамле потыр ты рущ э̄ква та потыртас. Ань ӯсувн са̄всыр ма̄ныл мир ёхты, та̄н туп олн ма̄гыс тыг ювыт. Ос ӯсувт о̄лнэ ма̄хум халт са̄в рущ соссаӈ хо̄тпа, са̄в хатань соссаӈ хо̄тпа о̄лы. Матъёмас та̄н ат ёрувлавет, акванатыглавет, янытлавет. Та̄н ты пе̄с о̄лупса ёмащакв номияныл ос ва̄ганыл.

1093 2015.02.13. Тамара МЕРОВА

«Альянс» нампа колн ма̄хум ща̄гтым ялантэ̄гыт. Ха̄льус район янытыл матумпа̄ла ос а̄гмыӈмосыӈ, сакватахтам хо̄тпатн нё̄тнэ ма̄гыс «Альянс» нампа хӯрум кол рӯпитэ̄гыт. Щар яныг кол Ха̄льӯст о̄лы, тав 1997 та̄л па̄сыл рӯпитаӈкве патыс. Ос мо̄тыт та̄лт акв тамле кол Ягримт пусвес. Саранпа̄вылт «Альянс» нампа кол 2010 та̄лт ва̄рвес. 2012 та̄лт Ягрим ос Саранпа̄выл колыг акваннё̄тхатым рӯпитаӈкве патсы̄г. Ягримн ялмум порат ме̄н ханты газетат рӯпитан нэ̄ме̄нтыл «Альянс» колн щалтсасме̄н. Маныр ма̄хум тот ва̄ре̄гыт, та тэ̄лат та̄рапаттысанаме̄н. Юв щалтмуме̄н порат ма̄хум тот э̄ргим ӯнлахо̄лсыт. Яныг колнакт лов са̄виткем хо̄тпа акванатхатамыт, тот та̄н ка̄с ва̄рсыт. Ма̄нки халувт пащалахтасӯв, мо̄т ӯсныл ёхтум мӯй хо̄тпагн та̄н о̄с ща̄гтсыт. Людмила Васильевна Иляхина, тот рӯпитан нэ̄, мощ потыртас: – Ма̄хум акванхо̄нтхатыгланэ̄ныл, халанылт потыртан ос кас ва̄рнэ ма̄гыс ма̄н тыт акванатыглыянӯв. Ва̄т са̄грапнал э̄тпост округув янытлан кастыл та̄наныл тыг во̄выгласанӯв. Ягримт о̄лнэ хо̄тпат коныпал тыг А̄нъяныл ос Восыӈтӯрныл ма̄хум ёхталэ̄гыт. Ма̄н туп нилахуйлов хо̄тпа тыг атыглэ̄в, тыгыл са̄внув атыглаӈкв ат ве̄рме̄в, колув ма̄нь. Ма̄хум тыг ёхталэ̄гыт, нас ӯщлахтэ̄гыт ос пусмалтахтэ̄гыт. Ты колнакувт ма̄н э̄ргуӈкве ос йӣквуӈкве ханищтахтэ̄в. Мо̄т колнакт мощ пусмалтахтэ̄в, ле̄ккар нэ̄н давленияв сунсавет, массаж ва̄рнэ уласн манос велотренажёрн ӯнталаве̄в. Хӯрмит колнакт ма̄н ка̄тыл матыр ма̄щтырлэ̄в, ань тот суссылтап о̄лы. Тув соссаӈ ма̄хум маснутаныл, пормасыт щё̄питасанӯв, ань ёхталан матумпа̄ла хо̄тпат та̄н тыг тотум пормасаныл. Ма̄щтырыг ю̄нтым супыт, сакныл хартым пальсакыт, турло̄псыт са̄в па̄влыӈ ма̄н суссылтаӈкве о̄с тотыглавет. Ань тыг акванатхатыглан ма̄хманув пораныл оигпи, ма̄н ётылнув мо̄т хо̄тпат во̄виянӯв. Ка̄сыӈ порав такви хурип нам о̄ньщи ос таима̄гыс са̄всыр пӯмыщ тэ̄лат ва̄рыглэ̄в. Туи мӯй ма̄хманув ёт во̄рн яланта̄лэ̄в, тот хӯл исмит па̄йтэ̄в, сыресыр лӯптаӈ ща̄й ае̄в. Таквсы порат са̄всыр лӯптат, пилыт, тэ̄пкант яныгман тэ̄нутыт атэ̄в ос тувыл «Со̄рни таквсы» ялпыӈ хо̄тал ва̄ре̄в. Ка̄сыӈ э̄лумхо̄лас нам хо̄талэ о̄с янытлылӯв, матыр муйлупсал мӯйлуптылӯв. Та сыс Людмила Васильевна акванатхатам ма̄хманэ ёт э̄лаль рӯпитаӈкве патыс. Та̄н ань вит о̄вылтыт китыглаве̄сыт, сыресыр касылыл щё̄питымат. О̄влэ̄т пасан тармыл пиным нэ̄пакныл ва̄рим хӯлкве акв хо̄тпа ка̄тн вистэ ос мо̄т па̄лэ̄т хансым китыглахтан ла̄тыӈ ловиньтастэ. Таве̄н ювле ла̄тыӈ ла̄вуӈкве э̄рыс. Тувыл вит урыл э̄ргыт э̄ргысыт. Насати, са̄в э̄рыг о̄лы. Э̄рыгсованыл пуссын гитарал са̄ӈквылтаве̄сыт. «Альянс» колт рӯпитан хо̄тпат Ягримт о̄лнэ матумпа̄ла э̄квато̄йкат ёт ва̄тихал акванхо̄нтхатыглэ̄гыт. Та̄нанылн, матыр нё̄тмил ва̄рнэ ма̄гыс э̄рнэ справкат кинсэ̄гыт, э̄рнэ торыг мо̄т ма̄н пусмалтахтуӈкве ке̄тыглыяныл. Нас ущлахтуӈкве манос ялпыӈ хо̄талт мӯйлуӈкве во̄выглыяныл. Та̄н ма̄гсыланыл тот «Неугомонные бабки» намаим клуб ос «Волшебные ручки» кружок о̄лы. Тот та̄нки э̄ргыт, йӣквыт ханищтэ̄гыт ос тувыл концерт ва̄ре̄гыт. А̄нъя, Восыӈтӯр ос Светлый па̄вылн йӣквуӈкве, э̄ргуӈкве тотыглавет. Па̄вылт о̄лнэ ня̄врамыт, ма̄ньлат хо̄тпат ёт о̄с ва̄щинтахтэ̄гыт, акванюрщхатым, та̄наныл ханищтым матыра̄ти аквъёт щё̄питэ̄гыт. Ты матумпа̄лаг о̄лнэ хо̄тпат нупыл сунсым номсахтэ̄гын, та̄н о̄лупсаныл ты кос та̄рвитыӈыг о̄лыс, тувыл та̄н иӈ ка̄ркамыг о̄лнэ̄ныл, ощхуль ос ка̄с ва̄ре̄гыт. Пуста̄гыл вос о̄лэ̄гыт, нэ̄мат лю̄ль ва̄рмаль воссыг ул вос ва̄гыт.

1093 2015.02.13. Николай МЕРОВ

Са̄лыӈ ма̄хум нё̄тавет. Мо̄лты та̄л яныгпо̄ль э̄тпост Сургутский районт о̄лнэ ханты ма̄хум Когалым ӯст са̄лыл каснэ ва̄рмальн акванатхатыгласыт. То̄нт са̄тпан нупыл хо̄т са̄лыӈ ма̄хум ма̄н округувныл ос Ямало-Ненецкий округныл ёхталасыт. Та̄н са̄лыл кассыт, тыньщаӈ па̄хвтысыт ос пе̄рщисыт. Та ялпыӈ хо̄талт нё̄выль, пил ос мо̄т тэ̄нутпормас тыналавес. Са̄в мир нас ӯщлахтуӈкве тув ёхталас. Ты ялпыӈ хо̄талт ам Дмитрий Никитович Русскин ёт потыртасум. Тав Когалым ӯс «Югра лылыеп» нампа соссаӈ ма̄хум организацият кӯщаиг рӯпиты. Ам таве такви рӯпататэ урыл китыгласлум, соссаӈ ма̄хумн ты тэ̄ла э̄ри манос а̄ти, тав ты урыл тох ла̄выс: «Ам номсэ̄гум, «Югра лылыеп» нампа ассоциация соссаӈ мирн э̄ри. Та̄н са̄в та̄рвитыӈ ва̄рмаль о̄ньще̄гыт. Ты тэ̄ланыл мӯсхалыг щё̄питан ма̄гыс ма̄н палтув ёхталэ̄гыт. Ма̄н хумус ве̄рме̄в, таил нё̄тыянӯв. Соссаӈ ма̄хманув тэ̄ланыл ма̄н ты кӯщаитн потыртыянӯв. Мо̄т щирыл та̄н ла̄тӈаныл хумус тув ёхты. Ань матъёмас ма̄ньщит, хантыт ат ёрувлавет, ва̄тихал са̄всыр конференцият, семинарыт щё̄пита̄лавет. Ва̄рмалянув ма̄н тот акваг потыртыянӯв. Ты хосыт, сакати, ма̄хум мощ нё̄тавет. Тыт о̄лнэ са̄лыӈ ос во̄раян хо̄тпатн ам ёмщакв ва̄вем. Матыр тэ̄ла ке о̄ньще̄гыт, та̄н ам палтум та̄ра ёхтэ̄гыт. Та̄рвитыӈ ва̄рмаль о̄лнэ ма̄гыс э̄рнэ нэ̄пак аквъёт хансэ̄в». Са̄лыӈ ма̄хум ма̄во̄й ма̄ныл но̄хвинэ хо̄тпат ёт акваг во̄ритотэ̄гыт. Округ янытыл тамле ва̄рмаль хосат та̄гыл о̄лы. То̄ва ханты хо̄тпат рущ ла̄тыӈ ат ва̄гыт, то̄ват ос са̄кконыт ат ва̄ганыл. Ты хосыт «Югра лылые̄п» ассоциация та̄нанылн сака нё̄ты.

1093 2015.02.13. Валентина УЗЕЛЬ

Югорск ӯст о̄лнэ ма̄ньщи ма̄хманув. Ты хурит тит ма̄ньщи нэ̄кве̄г по̄слым о̄лэ̄г: во̄ртыпал нупыл – Светлана Николаевна Бардинская, ёмаспал нупыл Людмила Петровна Волкова. Тэ̄натэ̄н ам Югорск ӯст о̄лнэ «Суеват пауль» нампа музейт по̄слысагум. Светлана Николаевна такви о̄парищ наме Шадрина. Тав Восыӈтӯр па̄вылт самын патыс, тот яныгмас. Са̄в та̄л Югорск ӯст о̄лы, ань а̄гитэ̄нтыл те̄нттетэ̄н о̄лэ̄г, а̄гитэ колледжит ханищтахты. Ляпа рӯтанэ округувт са̄всыр па̄влытт ос ӯсытт о̄лэ̄гыт. Савины ос Шумиловы ще̄мьят Восыӈтӯрт о̄лэ̄гыт, Сургут ӯст Виктор Васильевич Савин ще̄мьяӈ та̄гыл о̄лы, Нягань ӯст Клавдия Ксенофонтовна Шадрина, та̄н пуссын ляпа рӯтыг о̄лэ̄гыт. Людмила Петровна Волкова такви опарищ наме Вынгилева. Пыге о̄с Югорск ӯст о̄лы. Рӯтанэ ос са̄всыр па̄влытт ос ӯсытт о̄лэ̄гыт. Ань Людмила йильпи рӯпата хо̄нтыс, ма̄ньлат а̄гит ос нэ̄квет костераныл са̄всыр щирыл хорамтыянэ, са̄всыр хорамыӈ о̄льпыл сартыянэ. Ты тит ма̄ньщи нэ̄квег газетав та̄ра рӯтананэ̄н пуссын паща ла̄тӈыл те̄тыянэ̄н.

1093 2015.02.13. Валентина УЗЕЛЬ

Лӯи ма̄ныл ёхтум ханты э̄ква. Ты хурит Зоя Ивановна Агафурова по̄слым о̄лы, тав ханты э̄ква. Мо̄лты та̄л хо̄тпан та̄лэ то̄влыс. Тав Ямало-Ненецкий округ Приуральский район Харсаим нампа па̄вылныл Югорск ӯсн о̄луӈкв ёхтыс. Тав такви уре̄тыл тох потыртас: – Ам амти о̄парищ намум Айхо, ханты ла̄тӈыл те толмащлаӈкв, тох ла̄ваве – ма̄нь хум. Ул номсэ̄н, ма̄н ще̄мьявт пуссын талкват, а̄ти. Хум хо̄тпанув, о̄пам, а̄щум пуссын сака карсыг о̄лсыт, таима̄гыс ты ма̄н тох ла̄ввесӯв. Намталахтын намув нэ̄пакн хасвес, о̄парищ намыг ва̄рвес. Ма̄н ань ще̄мьяӈ та̄гыл Ямал ма̄н акваг яланта̄лэ̄в. Пыгагум тот мольщаӈ масэ̄г, ва̄й масэ̄г. Тэ̄натэ̄н сака пӯмыщ тув ялуӈкв. Ань ты ӯст а̄пщим колта̄глэ ёт о̄лы, халувт акваг ва̄йхатыглэ̄в. Ам ты ма̄т о̄луӈкве ханьщувласум. О̄йкам ёт са̄в та̄л аквъёт о̄лыме̄н, рӯпатаныл пенсиян минасме̄н. Ты потрыг Валентина хозумова хассаге.

1093 2015.02.13. Людмила ТЕТКИНА

Яныгпа̄ла о̄йка намхо̄талэ̄тыл янытлавес. Та̄л котиль э̄тпос 27 хо̄талэ̄т Эмиль Иванович Косполов намхо̄талэ о̄лыс. Ма̄ньщи о̄йка 75 та̄лэ то̄влыс. Тав соссаӈ ма̄хум пе̄с йис ва̄рмаляныл но̄хво̄рмалтан ма̄гсыл са̄в ё̄р пиныс. Эмиль Иванович са̄в та̄л музыкальный школат ос та юипа̄лт творчество округ колт рӯпитас. Са̄ӈквылтапыл ос мо̄т инструментыл ёнгуӈкве ёмащакве ха̄сы. Творчество колт рӯпитам хо̄тпат ёт тав округ янытыл концертыт суссылтым яласас. Юван Шесталов, Еремей Айпин ос мо̄т соссаӈ ма̄хум ёт «Торум маа» нампа музей ӯнттыс. Ты коныпал Нижневартовский район Варъёган па̄вылт о̄с музей ва̄руӈкве нё̄тыс. Пенсиян минаме порат нас юн ӯнлуӈкве ат ве̄рмыс ос соссаӈ ма̄хум Ассамблеят Еремей Айпин депутатн нё̄тнэ хумыг рӯпитас. Ань Ханты-Мансийск ӯст о̄лнэ ма̄ньщит, хантыт ос Думат рӯпитан ма̄хум акванатхатыгласыт ос таве янытласыт. О̄влэ̄т Сергей Дегтярёв, округ Дума кӯщай ва̄ӈын хум, ма̄ньщи о̄йка са̄в сымыӈ ла̄тӈыл ла̄выстэ ос пӯмащипа ла̄тӈыӈ пищмал мистэ. Еремей Айпин ос таве̄н ла̄выс: «Эмиль Иванович ёмас э̄тпост самын патыс. Ма̄ньщит ос хантыт ты э̄тпос та̄л котиль э̄тпосыг ла̄вияныл. Ювле хультум та̄л манхурип рӯпата ва̄рсӯв ос йильпи та̄лт манхурип ва̄рмаль ва̄руӈкве иӈ э̄ри, ты э̄тпост ма̄н мирн потыртэ̄в. 2015 та̄лт округувт соссаӈ ма̄хум пе̄с йис ва̄рмаляныл э̄лаль тотнэ та̄лыг намаявес. Россия янытыл ос литература та̄лыг ла̄ввес. Я̄ӈк на̄тнэ э̄тпост Победа хо̄тал 70 та̄лэ ос ва̄т са̄грапнал э̄тпост округув 85 та̄лэ тах то̄влэ̄г. Таса̄вит яныг ялпыӈ хо̄талыт ма̄н та̄л сыс янытлаӈкве та патэ̄в. Ам Эмиль Иванович намхо̄талэ̄тыл ос ты ялпыӈ хо̄талыг кастыл янытлылум. Яныг хо̄нтлам нак э̄лыпа̄лт омагеа̄тяге сас ня̄врам ханищтан хо̄тпаг рӯпитасы̄г. А̄тятэ Иван Прохорович Косполов яныг хо̄нтлам нак порат 1942 та̄лт Новгородский областьт порславес. Тох Эмиль ос Эльвира увщитэ а̄щ та̄л хультсы̄г. Оматэ Анна Митрофановна Конькова ня̄врамаге такке̄т янмалтасаге. Эмиль Иванович оматэ ма̄ньщи мо̄йтыт ня̄врамыт ма̄гсыл хансыс. Округувт Анна Митрофановна Конькова ёмащакв ва̄ве». Еремей Айпин ты ма̄ньщи о̄йка ёт хосат та̄гыл ва̄йхаты. Тав Верховный Советыт депутатыг хунь о̄лыс, Эмиль Иванович тав палтэ помощникыг рӯпитас. Ты юипа̄лт са̄в та̄л аквъёт рӯпитасы̄г. Зоя Никифоровна Лозямова, «Торум маа» музейт рӯпитан э̄ква, Эмиль Иванович о̄с янытластэ. Тав потыртас, хумус тэ̄н округ янытыл э̄ргим ос йӣквим яласасы̄г. То̄нт по̄слым хуритэ таве̄н ань мӯйлуптастэ. Та хурит Эмиль Иванович са̄ӈквылтапыл са̄ӈквылты. Ма̄ньщи о̄йка янытлаӈкве Мария ос Наталья а̄гияге ёхталасы̄г. Тэ̄н Тюмень ӯст колта̄глаге̄н ёт о̄лэ̄г. Акв а̄гитэ стихыт хансы, а̄тятэ янытлым яныг стихотворение ловиньтас. Мо̄т а̄гитэ ос э̄рыг э̄ргыс. Культура департаментыт рӯпитан хо̄тпат, Ханты-Мансийск ӯс мирколт рӯпитан нэ̄т ос са̄в ма̄ньщит, хантыт яныгпа̄ла о̄йкан са̄в ёмас, сымыӈ ла̄тыӈ ла̄всыт. Ма̄н, редакцият рӯпитан ма̄хум, Эмиль Иванович самын патум хо̄талыл о̄с янытлылӯв. Пус ка̄т, пус ла̄гыл э̄лаль вос о̄лы. То̄румн ос О̄тырн вос ӯргалаве.

1093 2015.02.13. Татьяна Бахтиярова

Кимыӈщупа па̄вылт ва̄рим хурииг. Ты хурит Тимофей Бахтияров по̄слыма.

1093 2015.02.13. Тамара МЕРОВА

Ня̄врамыт ма̄нь та̄гыл са̄в нэ̄пак вос ловиньтэ̄гыт. Ты та̄л Юграт литература та̄лыг ла̄ввес. Та э̄тпост ӯсувт о̄лнэ садикытт «Неделя Югры» намаим тэ̄лат ва̄рыглаве̄сыт. Тот ма̄хум ня̄врамытн нэ̄пак ловиньтан ва̄рмаль урыл потыртасыт. Аксинья Петровна Анямова, «Хо̄талакве» нампа садикт рӯпитан нэ̄, ня̄врамытн нэ̄пак хаснэ соссаӈ ма̄хум овылтыт потыртас. Тувыл ня̄врамыт А̄сугорский нампа институтн тотыгласанэ. Тот рӯпитан нэ̄т а̄гирищитпыгрищит ща̄гтым ля̄льт ӯрсаныл ос та̄н ма̄гсыланыл пӯмыщ касылыт щё̄питыгласыт. Елена Павловна Степанова, нэ̄пак ловиньтан колнакт кӯщаиг о̄лнэ нэ̄, о̄влэ̄т ма̄ньщи ос ханты ма̄хум урыл потыртас. Та колнакт о̄щнэ пе̄с пормасыт суссылтасанэ тыи ма̄ньхап, са̄лы сун, сыресыр а̄канит. Ос ня̄врамаквет ма̄гыс хансым нэ̄пакыт ка̄тн майлысанэ, са̄всыр потрыт ос мо̄йтыт та̄нанылн ловиньтас. То̄ва а̄гирищит ос пыгрищит, насати, соссаӈ ма̄хманув ёмщакв ва̄нэ̄ныл. Та̄н М. К. Волдина, А. С. Тарханов ос А. М. Конькова хурияныл ка̄саланэ̄ныл порат та̄н наманыл ла̄всаныл. Ос та̄н хансум потраныл ос стиханыл ловиньтасаныл. Институтт рӯпитан ма̄хум та̄н ма̄гсыланыл «Кит и олень» мо̄йт мо̄йтсыт, ос ты ва̄рмалит о̄вылтыт э̄лаль китыглахтасыт. Ня̄врамыт пуссын э̄рнэ щирыл ювле потыртасыт. Мо̄т рӯпитан нэ̄т ня̄врамыт ма̄гыс ма̄ньщи а̄мщит а̄мщисыт, «Лусы» («Щёл») ёнгил ёнгуӈкве ханищтаве̄сыт. Тувыл а̄гирищитпыгрищит «Витсам» нампа ма̄ньщи журналыл ос «Коротенькие сказки с верховий Белого озера» нэ̄пакыл мӯйлуптаве̄сыт. Ня̄врамаквет пуссын ща̄гтым садикн ювле минасыт. Хотты ня̄врам акв потыр манос мо̄йт ма̄ньщи ла̄тӈыл ловиньтытэ ке ос торгамтытэ, ма̄навн о̄с сака ёмас о̄лнув. Наталья Ткачук ке̄тум потре Тамара МЕРОВА ма̄ньщи ла̄тӈыл хансыстэ.

1093 2015.02.13. Светлана РОМБАНДЕЕВА

Ло̄пмус па̄выл нэ̄ хо̄тпа. Ты хурит ма̄ньщи нэ̄ Галина Прокопьевна Сайнахова по̄слым о̄лы. Сургут ӯст «Старый Сургут» нампа Историкокультурный центрын ялмум порат таве тот ка̄саласлум, потрамасме̄н. Сургут ӯст колта̄глэ ёт тав са̄в та̄л о̄лы. О̄йкатэ наме Алик, а̄гипыг о̄ньще̄г. Пыге̄н наме Игорь. А̄гитэ̄н Наташа, тав ще̄мьяӈыг е̄мтыс, Никита пыг о̄ньщи. Галина Прокопьевна Ха̄льӯс район Ло̄пмус па̄вылт самын патыс, тот яныгмас. Яныгмам па̄влэ тав сака э̄руптытэ, пе̄с ма̄хманэ акваг номылмата̄лыянэ, ӯлылыянэ. Тав ла̄внэ̄тэ щирыл, Сургутыт о̄лнэ ма̄ньщи ма̄хум ты центрын ва̄тихал ёхталэ̄гыт. Тот мощ ё̄мыгтэ̄гыт, пӯмщалахтэ̄гыт, матыр пӯмыщ потыр хӯнтлэ̄гыт. Галина Прокопьевна ма̄ньта̄гыл ща̄нягеа̄щаге ёт пум ва̄руӈкве ялантас. Во̄рт пум ва̄рнэ ма̄т са̄сныл ня̄лы ва̄рсыт, хӯл хӯнуӈкве тайи ва̄рсыт. Юн со̄втыт ос па̄йпыт ю̄нтсыт, ма̄щтырласыт. Ло̄пмуст Зоя э̄ще о̄лы. Тав ат пыг о̄ньщиглас. Хӯрум пыганэ а̄тимыг е̄мтсыт. Яныг пыге Олег ще̄мьятэ ёт Саранпа̄вылт о̄лы. Тав юипал пыге Толя Ло̄пмуст о̄лы, о̄с ще̄мьяӈыг е̄мтыс, хӯрум ня̄врам о̄ньщи. Галя Зоятэ̄нтыл ягпыг о̄щсы̄г, наме Па̄ял. Ты э̄тпост тав а̄тимыг е̄мтыс, Белоярск ӯст Коля пыге палт о̄лыс. Коля э̄кватэ̄нтыл хӯрум пыг о̄ньще̄г, та̄н ань о̄с пуссын ще̄мьяӈыг е̄мтсыт. Ты я̄тил ма̄ньщи нэ̄ колта̄глэ ёт пуста̄гыл вос о̄лы, На̄й-О̄тыранэ̄н вос ӯргалаве. Пус ка̄т, пус ла̄гыл!

1093 2015.02.13. Валентина УЗЕЛЬ

Тав Ня̄хщамво̄льныл о̄лы. Ты хурит Дарья Ивановна Белова Иван пыге̄нтыл по̄слым о̄лэ̄г. Тэ̄н «Суеват пауль» музейт ма̄кол сунсыглым ё̄мыгтасы̄г, то̄нт ты тэ̄натэ̄н по̄слысагум. Дарья ма̄щтырлаӈкв сака ка̄сащи, ю̄нстхаты. Иван пыге а̄нумн такви урыл тох потыртас: – Ам налыман нупыл о̄выл та̄лум то̄влыс. Э̄кваме̄нтыл хӯрум ня̄врам о̄ньщиме̄н, яныг пыгме̄н са̄т та̄лэ то̄влыс. Ам ӯст о̄лнэ ма̄ньлат ханты ос ма̄ньщи соссаӈ ма̄хум акванатуӈкв таӈхиянум. Ма̄н округувт тамле организация рӯпиты, тыт я̄нас отделение ва̄руӈкв номсэ̄гум. «Югра лылыеп» организация рӯпитаӈкв о̄вылтахтаме порат ма̄н оманува̄тянув сака ка̄ркамыг тот рӯпитасыт, са̄в ёмас тэ̄ла ва̄рсыт. Та̄н ань пуссын яныгпа̄ла хо̄тпаг е̄мтсыт, та организация ос вуньщалыг минас. Ос ма̄ньлат ма̄хманув яныг ӯст о̄лыманыл та̄нти мираныл урыл торыӈыщ нэ̄матыр ат ва̄гыт, пе̄с ва̄рмалитыл, пе̄с накытыл ат пӯмщалахтэ̄гыт. Ам та̄н ма̄гсыланыл матыр те ва̄ре̄гум, сака ёмас о̄лнув.

1093 2015.02.13. Александр ВЬЮТКИН

Тав о̄лнэ ма̄тэ̄ныл мо̄т ма̄н ня̄влаве. Округ Дума колт Ассамблея кӯщаиг о̄лнэ хум Еремей Данилович Айпин Ханты-Мансийск ӯс мир ёт рӯпитас. Та хо̄тал тав палтылэ тит ханты хумыг ма̄к та̄рвитыӈ тэ̄ла урыл потыртан ма̄гсыл ёхталасы̄г, тэ̄н Сургутский район Нижнесортымский па̄выл по̄хат о̄лэ̄г. Тэ̄н сас са̄лы о̄ньще̄г. Акв хум наме Семён Павлович Нимперов. Семён Павлович са̄лыянэ щарк ма̄тэ̄т иӈ а̄тятэ̄н тот о̄щве̄сыт. А̄тятэ а̄тимыг е̄мтме юипа̄лт ма̄тэ Семён такви нупылэ хансыстэ. Та е̄рт о̄лнэ ханты ма̄хум ма̄наныл пуссын та̄нтина̄нылн хасылтасаныл. Семён Павлович ма̄тэ «5 Н» намтым о̄лы. Тав колта̄глэ яныг а̄ти. Тэ̄н э̄кватэ̄нтыл акв пыг о̄ньще̄г. Пыге̄н хӯрмит классыт ханищтахты, Нижнесортымский па̄вылт рӯтаныл палт о̄лы. Хум са̄лы ӯрнэ ма̄тэ налыман ве̄рыста па̄ӈвхитэ ос налыман ве̄рыста палытыг о̄лы. Семён нёлса̄т нупыл ат ляпатем са̄лы о̄ньщи. Ань тав тэ̄лы о̄лнэ во̄рколэ̄т о̄лы, са̄лыянэ ӯри, во̄раи ос хӯл пуви. Минам 2014 та̄лт Семён Павлович о̄лнэ ма̄тэ ляпат ма̄ ла̄кквауртнэ «Сибнефтьгеофизик» нампа сейсмопартия хо̄тпат рӯпататыл о̄вылтасаныл. Семён Павлович потре ань э̄лаль ловиньтэлы̄н: «О̄влэ̄т та̄н нас ма̄ сунсыглым ёхталасыт. Нэ̄мхотты нэ̄пак ёт ат о̄щсыт. Та юипа̄лт ёхтуманылт та̄н та̄нти нэ̄паканыл ма̄навн ка̄тпос тӯщтын щирыл тотсаныл. Та̄н а̄нум ва̄т ве̄рыстан лӯинув ва̄нтлуӈкв ла̄всыт. Тув ва̄нтлын ма̄гыс нё̄тмилыл ва̄т со̄тыра солко̄ви, ниласа̄т литра бензин ос атпан литра бензинын тэ̄лыгтан во̄йил майве̄сум. Ам тув ва̄нтлуӈкв ат кос ка̄саще̄гум, тот са̄лы ӯрнэ ма̄ щар а̄тим. Та ма̄ хосат мо̄т хо̄тпан о̄лаве. А̄нумн мустыс, та ляпат ам рӯт ма̄хманум са̄лы о̄ньщим о̄лэ̄гыт. Матъёмас та̄н а̄нумн та̄нти ма̄нылн та̄ртсаныл. Ам тув иӈыт ва̄тлэ̄гум, во̄р са̄грын ма̄хум ань ам ма̄мт рӯпитэ̄гыт. Во̄р са̄грим ма̄ па̄хвыӈ лё̄ӈх хольт мины, тав «профилиг» ла̄ваве. Хумус та̄н ла̄ве̄гыт, та̄нанылн во̄р ӯсма щирыл са̄груӈкв э̄ри. Э̄лаль ос по̄ри миннэ лё̄ӈхыт котильт ниласа̄мпа во̄рло̄мт хульты. Са̄лыянум ӯрнэ ма̄ ос ляпа во̄рум пулигялыгласаныл. Во̄руй колум ляпат ань щар а̄тим. Са̄лыянум та̄н са̄грим лё̄ӈханыл щирыл хосан минэ̄гыт. Таима̄гсыл та̄наныл ка̄сыӈ хо̄тал уральтаӈкв э̄ри, э̄ла миннэ порат ювлеё̄хтуӈкв э̄ре̄гыт. Во̄р о̄лум порат аквтыт колум ляпат щарканыл о̄лыс. Ань яласан тапалыт ма̄н нэ̄мхотты порат ат яланта̄лсыт. По̄х ма̄хум рӯпатаныл о̄вылтаманыл юипа̄лт ам ат са̄лыянум тыпылтасанум. Тох э̄лаль те мины, са̄лыянум моще̄ртын ты холэ̄гыт». Семён Павлович потыртаме юипа̄лт Еремей Данилович таве̄н ла̄выс: «Наӈ манрыг тох хоса номсахтасын? Ма̄навн телефон хосыт ты урыл та̄ра потыртаӈкв э̄рыс. Ань тай ма̄н маныр ва̄ре̄в? Та̄н та̄нти рӯпатаныл та ва̄рсаныл. Та̄нанылныл ма̄н наӈын мо̄т ма̄н ва̄тлын ма̄гсыл нас компенсация нампа олн во̄вуӈкв ве̄рме̄в, тувыл та. Манарыл ве̄рме̄в, таил та нё̄тылӯв».

1093 2015.02.13. Людмила ТЕТКИНА

Та̄н ма̄ньщи пе̄с маснут ю̄нтуӈкв ха̄сэ̄гыт. Урай ӯст ремёсла центрыт рӯпитан ма̄щтыр ма̄хум пормасыт ю̄нтэ̄гыт ос са̄всыр щирыл ма̄щтырлэ̄гыт. Та кол кӯщаиг Вера Васильева о̄лы. Та ӯсн ялмум порат ам ты нэ̄ ёт хо̄нтхатыгласум ос рӯпатаныл урыл пӯмщалахтасум. Вера Владимировна ла̄выс: «Урай ӯст ремёсла центр 1997 та̄л па̄сныл рӯпиты. Ты центр ӯст о̄лнэ соссаӈ ма̄хманув ва̄руӈкве номылматасыт. Ань центрув Ханты-Мансийск ӯст о̄лнэ округ ремёсла центр нупыл ловиньтахты. Кондинский районт о̄лнэ ма̄ньщит хосат мо̄т мирыт халт тэ̄лыгласыт, та̄нки пе̄с йис ва̄рмаляныл урыл щар нэ̄матыр ат ва̄гыт. Тыи ма̄гсыл ма̄н са̄всыр пе̄с нэ̄пакыт ловиньтэ̄в. Виктория Шашкова пе̄с порат хо̄нтаӈ ма̄ньщит манхурип маснут о̄щсыт, та урыл пӯмщалахтас. Тав Тобольск ӯст о̄лнэ музейн ялыс. Тот хо̄нтаӈ ма̄ньщит пе̄с пормасаныл ос маснутаныл акванатым о̄лэ̄гыт. Тав ты маснутыт ханищтасанэ ос по̄слысанэ. Пе̄с порат тыт о̄лум ма̄ньщит такем нё̄тнэ маснут о̄щсыт. Виктория юв ёхтуме порат ты хурит нупыл сунсым, ма̄ньщи супыт ю̄нтуӈкв патыс. Ань ты маснутыт ма̄н са̄всыр выставкат суссылтыянӯв. Ты юипа̄лт маснут ю̄нтнэ машинка ёвтсӯв, ма̄ньщи супыт ты утыл ю̄нтыянӯв. Ка̄сыӈ хо̄тпа тамле суп ань ёвтуӈкве ве̄рми. Виктория о̄выл супе акв та̄л ка̄тыл ю̄нтыстэ, хораманэ сака хоса ва̄рсанэ. Ань машинкал тай тамле суп молях ю̄нтуӈкве ро̄ви. Пе̄с нэ̄пакт турло̄псыт ка̄саласанӯв. Пе̄с порат ма̄ньщит турло̄псыт о̄с сакныл хартсаныл, саганыл ма̄нь ке̄рло̄мтыл хорамтасаныл. Ты ке̄рло̄мтыт о̄с та̄нки ва̄рсаныл, то̄нт та̄н тамле рӯпата ва̄руӈкве ха̄ссыт. 2013 та̄л порат Ханты-Мансийск ӯст «Торум маа» музейт рӯпитан ма̄хум ханищтап ва̄рыгласыт. Элеонора Митрофанова, округ ремёсла центрыт рӯпитан нэ̄, тув о̄с во̄виньта̄лвес. Тав турло̄псыт хорамтан ма̄гыс са̄всыр ут ва̄руӈкве ха̄сы. Ты нэ̄ ёт ма̄н аквъёт рӯпитэ̄в. Ма̄щтыр нэ̄т турло̄псыт хартэ̄гыт, тав ос сагн та̄гатан ке̄рло̄мтыт ва̄ри. Ма̄н са̄всыр музеит ёт рӯпитэ̄в. Санкт-Петербург ӯст этнографический музей о̄лы. 18-19 нот порат учёный хо̄тпат ва̄тихал тыг ёхталасыт. То̄нт хо̄нтаӈ ма̄ньщит та̄нки пормасаныл та̄наныл мӯйлуптасаныл. Та музейт ма̄н пе̄с турло̄псыт ка̄саласанӯв. Та̄н нупыланыл сунсым турло̄псыт хартуӈкве ма̄нки ханищтахтасӯв, ань са̄всыр выставкат та̄наныл суссылтыянӯв. Ос мо̄т рӯпата ва̄руӈкве вӯйхатсӯв. Пе̄с порат о̄лум ма̄ньщит понал лӯптал то̄р сагсыт. Ма̄н тамле то̄р сагуӈкве ань ханищтахтэ̄в, ты э̄лыпа̄лт ю̄нтым супыт ма̄гсыл то̄р ла̄пкат ёвтыгласӯв. Ты ва̄рмаль урыл пе̄с нэ̄пакыт о̄с хансым кос о̄лы. Ма̄н Анатолий Николаевич Хомяков, Половинка па̄вылт о̄лнэ яныгпа̄ла ма̄ньщи о̄йка, палт ялсӯв. Тав ты ва̄рмаль урыл ма̄навн потыртас. Тав о̄матэ потырта̄лыс, пе̄с ма̄хум понал лӯпта таквсы о̄выл хол ва̄рнэ порат маныгтасыт. Ма̄н о̄с таквсы порат понал лӯпта яктуӈкве во̄рн минасӯв. Маткем та капыртасӯв, ты лӯпта туи сыс янгыг яныгмас, ащирмаӈ хо̄талыт ёлпатыглас. Тох мощ понал лӯпта юв тотсӯв, о̄влэ̄т хотто̄слысанӯв, тувыл акв щёс витыт тытылтасанӯв, та юипа̄лт о̄с китынтыг то̄слысанӯв. То̄слым понал халталаслӯв ос ква̄лыг ва̄рсӯв. Анатолий Николаевич потыртаме щирыл, ты лӯптал сэ̄тап ва̄рсӯв. Тор сагуӈкв ат ве̄рмысӯв, сэ̄тапув акваг маныгтахтас. Ма̄н туп акв щёс понал лӯпта ёт рӯпитасӯв, ань э̄лаль пе̄с нэ̄пакыт кисхатуӈкве э̄ри. Ты ва̄рмаль урыл потыр хунь хо̄нтэ̄в, ос лӯпта маныгтаӈкве во̄рн тах ялэ̄в. Урай ӯст рӯпитан ма̄щтыр нэ̄т яныг ос э̄рнэ рӯпата ва̄ре̄гыт, пе̄с йис ва̄рмалит э̄лаль тотыяныл. Та̄н хо̄нтаӈ ма̄ньщит пе̄с маснут та̄нки ма̄гсыланыл ю̄нтсыт. Ты маснутыл масхатым са̄всыр ялпыӈ хо̄талн ос суссылтапн ялантэ̄гыт. Вера Васильева ла̄выс, ань округувт янытыл мир ва̄гыт, пе̄с порат хо̄нтаӈ ма̄ньщит манхурип маснут о̄щсыт. Ольга Александровна Фомичёва, Силава па̄вылт о̄лнэ ма̄ньщи нэ̄, таквина̄тэ̄н ос а̄гитэ̄н тамле суп тот ёвтыс. Ялпыӈ хо̄талыт о̄лыглан порат тэ̄н ты супаге̄н масыглыяге̄н.

1093 2015.02.13. Тамара МЕРОВА

Нэ̄пак хаснэ ханты о̄йка урыл. Ювле хультум э̄тпост литература та̄лыг намаим 2015 та̄л Ханты-Мансийскат нэ̄пак ловиньтан колт янытлавес. Тот Татьяна Владимировна Пуртова мӯй ма̄хумн ловиньтан нэ̄пак хаснэ ханты хум Еремей Айпин урыл потыртас. Тав депутатыг е̄мтме э̄лыпа̄лт хансум нэ̄паканэ щирыл намыӈсуиӈ хо̄тпаг е̄мтыс. Еремей Данилович мӯтраӈ потранэ хасманэ ма̄гыс «Мамин-Сибиряк» нампа премиял мӯйлуптавес. Ань тав уре̄т са̄всыр кӯщаит ос юртанэ са̄в янытлан ла̄тыӈ ла̄всыт. Еремей Айпин хосат хансум потранэ йильпи нила ловиньтан нэ̄пакыг щё̄питаве̄сыт ос Санкт-Петербург ӯст «Амфора» издательствоколт та̄ратаве̄сыт. Са̄ртын хансум потранэ̄т то̄ва ла̄тӈанэ ань мощ мо̄т щирыл хассанэ. Хурит по̄слын о̄йка Геннадий Степанович Райшев та потрыт ма̄гыс хурит по̄слыс. Кит со̄тыра са̄витыг нэ̄пакыт та̄ратаве̄сыт. Ань 250 нэ̄пакыт округ янытыл савсыр библиотекатытн ке̄тве̄сыт. Мо̄таныт ла̄пкат тыналаӈкве патавет. Ань ка̄сыӈ нэ̄пак урыл мир я̄нас потыртасыт ос та сыс матыр кина суссылтавес манос касыл щё̄пита̄лвес. «У гаснущего очага» нэ̄паке урыл потыртам порат мӯй ма̄хум «Югра. Первая вода» кина суссыт. Еремей Данилович ла̄выс, ты потре̄т тав о̄лупса нупыл аквтуп ня̄врам самаге̄тыл сунсыглахтас. Китыт потре «Ханты, или Звезда утренней зари» э̄лумхо̄лас яныгманэ̄тэ сыс о̄лупсат кисхатнэ номтыт хансыс. Мӯй хо̄тпат соссаӈ ма̄хум а̄мщит а̄мщисыт, то̄ват хо̄тпат пе̄с накыт урыл китыглаве̄сыт. «Река в январе» нампа нэ̄пакт ма̄ньлат а̄гит ос пыгыт хумус э̄руптахтым о̄лсыт, ты урыл потрыт хансым о̄лэ̄гыт. То̄ва хансум потранэ щирыл «Хо̄тал» нампа А̄с-угорский ма̄хум театр спектакль щё̄питасыт. Та̄н «Любить» намаим спектакляныл ма̄хумн сака мӯстыс. Ос «Божья матерь в кровавых снегах» нилыт потре щирыл кина ва̄рим о̄лы. Тав «Лёд. Сага о хантах» намаим о̄лы, ань тувыл кина ма̄нь ло̄мтэ суссылтавес. Еремей Айпин ос мо̄т хантыт тот о̄с по̄слахтасыт. Мӯй ма̄хумн тамле ва̄рмаль сака мӯстыс. Та̄н ань ловиньтан нэ̄пак хаснэ хумныл мо̄т йильпи потрыт ӯруӈкве патэ̄гыт.

1093 2015.02.13. Светлана РОМБАНДЕЕВА

Аган па̄вылт о̄лнэ нэ̄. Ва̄т са̄грапнал э̄тпост Сургут ӯст финноугор ма̄хманув акванатхатыгласыт. Та порат тот ам акв ханты нэ̄ ёт хо̄нтхатыгласум, наме Татьяна Семёновна Уколова. Сусте̄мт, тав татем ма̄щтыр нэ̄, матаре щаквщим та ӯнлахо̄лы. Тав палтэ ро̄влахтасум, китыглахтасум, хотыл о̄лы, манаре тыт ма̄щтырлы. На̄н ань э̄лаль Татьяна Семёновна потре ловиньтэлы̄н. – Ам Аган па̄вылт о̄лэ̄гум, а̄ги о̄парищ намум Казамкина. Тыт ам ань са̄сныл хусапсов ю̄нтэ̄гум, тув тах матыр пинуӈкве ро̄ви, ханты ла̄тӈыл кутшумыг ла̄ваве. Ня̄лы, а̄нысан ос мо̄т са̄всыр пормасыт ва̄руӈкве ха̄сэ̄гум. Ма̄н, ня̄врамыг о̄лмувт, ма̄ньта̄гыл акваг матыр ва̄рсӯв, ма̄щтырласӯв. Оманувна̄тянувн нё̄тым, ханищтахтасӯв. Па̄йпыт, совтыт ю̄нтсӯв. Ты рӯпата ам сака э̄руптылум, матыр ю̄нтуӈкве а̄нумн нэ̄мат та̄рвит а̄ти. Ам 1959 та̄лт самын патсум. Акв пыг о̄ньщигласум, а̄тимыг е̄мтыс. О̄йкам ня̄враманэ о̄лэ̄гыт. Омам наме Екатерина Алексеевна, а̄тям Семён Ильич. О̄парищ нам щирыл тэ̄н сас Казамкинаг о̄лсы̄г. Ам хӯрум яга̄ги о̄ньще̄гум – кит увщиягум Варъёган па̄вылт о̄лэ̄г, акв ос Радужный ӯст о̄лы. Татьяна Семёновна ма̄щтыр нэ̄, тав «Мастер народных художественных промыслов Югры» намыл маим о̄лы. Хо̄тпа нупыл сымыӈ э̄лумхо̄лас, ощхуль ва̄рнэ нэ̄. Матыр пӯмыщ ла̄тыӈ ля̄галы, тувыл та мовиньты. Ты я̄тил нэ̄кве пуста̄гыл вос о̄лы, ос са̄в ёмас пормас вос ва̄ри, вос ма̄щтырлы.

1093 2015.02.13. Людмила ТЕТКИНА

Наука щирыл рӯпитан ма̄ньщи нэ̄. Ханты-Мансийск ӯст А̄с-угорский институтт рӯпитан ма̄хум наука щирыл нэ̄пакыт хансэ̄гыт. Ма̄ньщит, хантыт ла̄тӈыг, пе̄с йис ва̄рмалит, мо̄йтыт, а̄мщит, э̄ргыт нэ̄пакын ёлхансыяныл. Тот ма̄ньщи отделт Мария Кумаева, такви о̄парищ наме Алгадьева, рӯпиты. Ты та̄л ма̄ньполь э̄тпост тав диссертациянэ̄паке вӯянтаӈкве Саранск ӯсн тах мины. Тав оматэ Варвара Васильевна Алгадьева сака са̄в мо̄йт, пе̄с потыр, э̄рыг вас. Мария ма̄ньта̄гыл ма̄ньщи мо̄йтыт хӯнтлыс. Яныгнув хунь е̄мтыс, мо̄йтыт нэ̄пакн хансуӈкве патсанэ. То̄нт хансым нэ̄пакыт ань ты мус иӈ о̄ньщиянэ. Ма̄ньщи нэ̄ такви урыл ос рӯпататэ урыл таи потыртас: – Ам ма̄ниг о̄лмум порат омам акваг мо̄йтыт мо̄йтыглас, пе̄с потрыт потырта̄лас. Ня̄врамыг о̄лмум, хансат нэ̄пакн ос по̄слысанум. А̄пат манос сахит манхурип хансат о̄ньщасыт, пуссын тетрадкан по̄слысанум. Тох осыӈ тетрадка е̄мтыс. Тувыл нэ̄пакум хотӯстыслум, мо̄йтыт хансыглам тетрадкам иӈ о̄ньщилум. А̄тям Владимир Васильевич Алгадьев са̄ӈквылтаӈкве ха̄сыс. Са̄ӈквылтан та̄нанэ о̄с хассанум. 1994 та̄лт ре̄тыӈ ю̄свой э̄тпос 13 хо̄талэ̄т ам каӈкум Алексей Ӯй йӣквнэ ва̄рмаль ва̄рыглас. То̄нт а̄тяв а̄тимыг е̄мтыс, Илья Васильевич Алгадьев яныг хо̄тпа о̄лыс. А̄тямн Илья Васильевич каӈкыг ōлыс. Щар яныг каӈкыг āтям щēмьят Александр Васильевич ōлыс. Тав яныг хōнтлам мāт āтимыг ēмтыс. Ос Ӯй йӣквнэ порат Илья аки Алексей ты хӯлтыгластэ, хумус ва̄руӈкве э̄ри. Светлана Алексеевна Попова Ӯй йӣквнэ ва̄рмаль по̄слуӈкве Хулюмсӯнт па̄вылн ёхталас. Та па̄сныл ты нэ̄ ёт ва̄йхатыме̄н. 1995 та̄лт Светлана Алексеевна Ха̄льӯсн научный фольклорный фондын рӯпитаӈкве а̄нум во̄выстэ. 2000 та̄л оигпан мус тот рӯпитасум. Ха̄льӯст а̄гим самын патыс. Тувыл ювле Хулюмсӯнт па̄вылн о̄луӈкве минасме̄н. Та порат ма̄ньщи нэ̄т па̄вылт музейт ва̄руӈкве вӯйхатсыт. Ам та̄нанылн о̄с нё̄тсум. 2003 та̄лт па̄вылн Евдокия Ивановна Ромбандеева рӯпататэ щирыл ёхталас. Ты э̄лыпа̄лт тав ётэ ам Ха̄льӯст ва̄йхатсум. Хулюмсӯнт па̄вылт а̄нум ты ка̄саластэ ос ла̄выс, Ханты-Мансийск ӯст э̄лаль вос ханищтахтэ̄гум. Та порат номсахтуӈкве патсум, э̄рыӈ со̄ль, яныг ӯсн минуӈкве э̄ри. Ос туи порат 2003 тāлт Ке̄расколыӈъя̄ пāвылн ялсум. Тот Т. С. Гоголева, мāньщи мирн нё̄тнэ хōтпа, яныг ёмас, пӯмащ рӯпата вāрыглас, мāньщи лāтыӈ урыл курсыт. Тамле вāрмаль āнум сака мӯстыс, та пāсныл э̄лаль ханищтахтын урыл номтум патыс, ӯсн та минасум. 2003 та̄лт таквсы Югорский университет заочный щирыл ханищтахтуӈкве ёхтысум. Ма̄ньщи газетат рӯпитаӈкве патхатыгласум. Тувыл ты институтн рӯпитаӈкве вуйве̄сум, ань аквхуйплов та̄лыг ты е̄мты. Югорский университет ёмащакве а̄стлыслум. Аспирантуран э̄лаль ханищтахтуӈкве рекомендациянэ̄пакыл майве̄сум. Тот о̄с заочный щирыл нила та̄л ханищтахтасум. Ты та̄л мо̄т ӯсыӈ ма̄т диссертациянэ̄пакум щирыл учёный совет тах е̄мты. Хансум наука нэ̄пакум «Система выразительных средств в мансийском детском фольклоре» намаяслум. Ам научный руководителюм Дина Васильевна Герасимова о̄лы. Ты э̄лыпа̄лт дипломнэ̄пакум хунь хансыслум, тав о̄с а̄нум ханищтастэ ос нё̄тыс. Ма̄ньполь э̄тпост Саранск ӯсн диссертациямнэ̄пакум тотылум. Тот научный совет э̄лыпа̄лт рӯпатам урыл потыртаӈкве тах патэ̄гум. Ты диссертация коныпал мо̄т рӯпата ва̄ре̄гум. Са̄всыр конференциян докладыт щё̄пита̄лэ̄гум. Ка̄сыӈ та̄л «Югорские чтения» нампа конференция ва̄рыглаве. 2014 та̄лт ты ва̄рмаль заочный щирыл ва̄т са̄грапнал э̄тпос о̄лыс. Ам тув о̄с ма̄ньщи мо̄йтыт урыл потыр хассум. Рӯпитанэ̄м сыс атпан арыгкем научный потыр ос са̄в статьят хассум. Институт хо̄тпанув пуссын та̄нки тема щирыл рӯпитэ̄гыт. Ам о̄с амки тема о̄ньще̄гум, ма̄ньщи мо̄йт урыл хансэ̄гум. Ты та̄л Хулюмсӯнт па̄вылн ялуӈкве кусыглэ̄гум, лӯпта э̄тпос минуӈкве номсэ̄гум. Тот мо̄йтыт ва̄нэ ма̄ньщит ёт хо̄нтхатыглэ̄гум. Ты э̄лыпа̄лт ам тув ялсум, Галина Константиновна Алгадьева, Нина Никоновна Анямова, Ираида Тихоновна Номина, Мария Тихоновна Двинянинова ёт рӯпитасум. Та̄н ва̄нэ хо̄тпаг о̄лэ̄гыт. Акв порат Ке̄расколыӈъя̄ па̄вылн ялсум. Тот о̄лнэ ма̄ньлат а̄гитпыгыт ла̄тӈув ёмащакве ва̄гыт. Та̄н палтыланыл ма̄ньщи мо̄йтыт хансыгласум. Ты рӯпатам коныпал ня̄врамыт ма̄гсыл ханищтан нэ̄пакыт хассум. Ювле хультум та̄лт Анастасия Шиянова, Галина Нахрачёва ёт 1-5 классытн ялантан ня̄врамыт ма̄гсыл ханищтан нэ̄пакыт та̄ратасӯв. Ма̄н, редакцият рӯпитан ма̄хум, институтт рӯпитан ма̄ньщи хо̄тпат наука хо̄тал кастыл янытлыянӯв. На̄й-О̄тыранылн вос ӯргалавет.

1093 2015.02.13. Тамара МЕРОВА

Ща̄нь ла̄тыӈ ханищтан ня̄врамыт кассыт. Та̄л котиль э̄тпос юио̄выл хо̄таланэ̄т Ханты-Мансийскан са̄в па̄влыӈ ма̄ныл школат ханищтахтын а̄гирищитпыгрищит ёхталасыт. Та̄н та̄нки халанылт олимпиадат кассыт. Ты та̄л ханты ос ма̄ньщи ма̄хум ла̄тӈыг ос литература щирыл касуӈкве хӯрумхуйплов ня̄врам ёхталас. Та̄н Касум, Кульпас, Саранпа̄выл, Шугур, Угут па̄влытныл ос Нярихумит Лӯи па̄вылныл о̄лсыт. Ты э̄лыпа̄лт ты а̄гитпыгыт школанылт кассыт, тот но̄хпатсыт ос тувыл тыг ке̄тве̄сыт. О̄выл щёс Ханты-Мансийск ӯсныл акв ма̄ньщи пыг касыс, тыи онтоловит классыт ханищтахтан Иван Гаврильчик. Тав «Лылыӈ союм» нампа этноцентрын ма̄ньщи ла̄тыӈ ханищтаӈкве ялантас. Ань тот рӯпитан ос тув ялантан ня̄врамаквет олимпиадан ёхталам ма̄хум янытласаныл. Надежда Константиновна Бушуева ос Мария Федоркив ма̄хум ёт пащалахтасы̄г, Игорь Хромов стих ловиньтас ос Александр Замиралов са̄ӈквылтас. Тувыл жюри хо̄тпат потыртаӈкве во̄вве̄сыт. Ма̄ньщи группат Дина Васильевна Герасимова кӯщаиг о̄лыс, таве̄н Светлана Селивёрстовна Динисламова ос Елена Устиновна Акбаш нё̄тсы̄г. Ханты группат Валентина Николаевна Соловар кӯщаиг о̄лыс, таве̄н Евдокия Андреевна Нёмысова ос Ирина Максимовна Молданова нё̄тсы̄г. Ань ня̄врамыт 2015 та̄лт литература та̄л янытлан кастыл ты тэ̄лат урыл китыглаве̄сыт. Та̄наныл ма̄к э̄рнэ ла̄тыӈ хансуӈкве э̄рыс. Пасан тармыл ня̄врамыт словарикыт о̄с о̄щсыт, то̄ванакт тув а̄ӈквата̄луӈкве та̄н та̄ртве̄сыт. А̄гитпыгыт хаснэ̄ныл сыс ханищтан хо̄тпат мо̄т колнакт акванатыглаве̄сыт. Та̄н школат ня̄врамыт ханищтан нэ̄пакыт о̄вылтыт потыртасыт. (Ты урыл ам тах я̄нас потыр хансэ̄гум. ) Хо̄талъятт ня̄врамаквет пуссын ӯс сунсуӈкве тотыглаве̄сыт, та̄н мощ ӯщлахтасыт. Жюри хо̄тпат та̄н хансум рӯпатаныл ловиньтасаныл. Э̄типа̄лаг Еремей Данилович Айпин а̄гитпыгыт янытлаӈкве ёхталас. Тав та̄наныл сертификатнэ̄пакыл ос такви хансум нила нэ̄пакыл мӯйлуптасанэ. Тувыл 2014 та̄лт мо̄т касылыт ка̄сум ня̄врамыт ос та̄н ханищтан хо̄тпаныл В. А. Филипенко, Ханты-Мансийск ӯс кӯщаюв па̄лыл, о̄с мӯйлупсал майве̄сыт. Юио̄вылт ты олимпиадат но̄хпатум хо̄тпат наманыл ла̄вве̄сыт. Лов ма̄ньщи ня̄врамаквет халт Саранпа̄вылт ловит классыт ханищтахтан а̄ги Евгения Ромбандеева но̄хпатыс. Китыт места Нярихумит Лӯи па̄вылт аквхуйпловит классыт ханищтахтын а̄ги Екатерина Пашина вис. Татьяна Кутмарова Шугур па̄вылныл хӯрмиттыг е̄мтыс, тав аквхуйпловит классыт ханищтахты. Та̄н ётаныл школанылт ханищтан хо̄тпаныл о̄с ща̄гтым о̄лсыт, тыи Светлана Савельевна Мерова, Лариса Николаевна Карпенко ос Валентина Ильинична Вахрушева. Хӯрум ханты ня̄врамаквет туп та̄нки халанылт кассыт. Тот Альберт Молданов Касум па̄вылныл пыг но̄хпатыс. Тав юипалэ̄т Алексей Лельхов Полноватныл о̄лыс, ос хӯрмит местан Анжела Арантеева Угутский школаныл е̄мтыс. Ты ня̄врамыт пуссын ловит классыт ханищтахтэ̄гыт. Альберт Софья Максимовна Каксинан ханищтаве, Алексей Анастасия Евгеньевна Себурован, ос Анжела Полина Ивановна Нюгломкинан. Но̄хпатум ня̄врамыт олныл тах мивет: о̄выл места ма̄гыс ат со̄тыра солко̄ви, китыт места ма̄гыс нила со̄тыра солко̄ви ос хӯрмит места ма̄гыс хӯрум со̄тыра солко̄ви. Ма̄н та̄наныл о̄с янытлыянӯв, номтыӈыщ э̄лаль вос ханищтахтэ̄гыт, ща̄нь ла̄тӈаныл э̄лаль вос тотыяныл ос хот ул вос ёрувлыяныл.

1093 2015.02.13. Александр ВЬЮТКИН

Марий нэ̄ ща̄нь ла̄тӈе э̄лаль тотытэ. Москва ӯст са̄всыр ща̄нь ла̄тӈыл потыртан щирыл ня̄врамыт ханищтан ма̄хум касыл хунь о̄лыс, а̄м Марий-Эл ма̄ныл ёхталам нэ̄ ёт тот ва̄йхатасум. Тав наме Татьяна Павловна Горшкова, такви а̄ги о̄парище наме Егорова. Татьяна Павловна омаге, а̄тяге о̄с ня̄врамыт ханищтым рӯпитасы̄г. Оматэ наме Таисия Антоновна о̄лыс, тав о̄лме палытыл ня̄врамыт ща̄нь ла̄тӈыл ханищтан нэ̄г рӯпитас, «Ветеран педагогического труда» нам о̄ньщас. А̄тятэ наме Павел Павлович Егоров о̄лыс. Тав щар ма̄нь ня̄врамыт ханищтас. Рӯпататэ ма̄гсыл тав о̄с «Ветеран труда» намыл майлувес. Тэ̄н сас Козьмодемьянск ӯст ня̄врамыт ханищтан колт рӯпитасы̄г. Таи ма̄гсыл Татьяна Павловна ма̄нь та̄гыл ня̄врамыт ханищтан номт о̄ньщас. Школа а̄стламе юипа̄лт та̄ра номтэ щирыл ня̄врамыт ханищтан нэ̄г ханищтахтуӈкв минас. Ма̄нь та̄гыл а̄тятэ̄н потырта̄лум ла̄тӈанэ номиянэ: «Манарыл ханищтэ̄гын, таи э̄руптаӈкв э̄ри. Тувыл хотьют ханищтылын, таве о̄с э̄руптаӈкв э̄ри! » Н. К. Крупская намыл пиным государственный педагогический институтт ханищтахтас. 1990 та̄лт ханищтахтын ма̄ныл а̄стламе юипа̄лт та̄ра такви па̄влэ̄н рӯпитаӈкв минас. Тит та̄л тот рӯпитаме юипа̄лт Козьмодемьянск ӯст о̄лнэ школаинтернатн рӯпитаӈкв во̄ввес. 1997 та̄лт Татьяна Павловна ня̄врамыт марий ла̄тӈыл ханищтан ма̄гсыл колнак пӯнсыс. Тот тав ща̄нь ла̄тӈыл потыртаӈкве ня̄врамыт ханищтас. Та коныпал ла̄тӈаныл ханищтан колнаканылт иӈ пе̄с йис порат о̄ньщим пормасыт суссылтан музей щё̄питасыт. Музейт о̄щнэ пормасыт сунсыглаӈкве ня̄врамыт та̄нти ёхталэ̄гыт. Тувыл ос са̄всыр ма̄ныл ёхталан мӯй ма̄хумн пе̄с йис о̄лупсаныл урыл потыртэ̄гыт. Минам та̄лт Татьяна Павловна рӯпитан колэ яныгса̄т та̄лэ то̄влыс. Ханищтан ня̄враманэ ёт нэ̄ марий э̄ргыт о̄с ханищты. Ялпыӈ хо̄талыт о̄лыглан порат э̄рганыл концертыт э̄ргияныл. Татьяна Павловна такви ва̄рнэ рӯпататэ ёмщакве̄г ва̄ритэ. Тамле ёмас ма̄хум янытлаӈкв ос ӯргалаӈкв э̄ри. Таима̄гсыл ам таве̄н са̄в щуньпаща ла̄тыӈ те̄тэ̄гум. Марий ма̄хум о̄щнэ На̄йО̄тыранылн ще̄мьятэ вос ӯргалаве. Са̄в та̄л пуста̄гыл таве̄н э̄лаль о̄луӈкв.

1094 2015.02.27. Александр ВЬЮТКИН

Ань лусытан ма̄хум урыл ля̄ххал. Хум хо̄тпат янытлан хо̄тал э̄лыпа̄л хо̄талт округ военный комиссарыг о̄лнэ хум Юрий Михайлович Буров ёт прессконференция о̄лыс. Тав ань о̄лнэ армияв урыл потыртас. – 2014 та̄лныл ма̄н округув янытыл са̄тлов хо̄тпа контракт щирыл армият лусытэ̄гыт. Ань ма̄н армиявт ма̄шинат, танкыт, товлыӈха̄пыт, на̄иӈха̄пыт пуссын йильпит. Ма̄н ма̄в нупыл матыр ва̄рмаль те е̄мты, ма̄н армияв ва̄т кум сыс хо̄нтлан ма̄гсыл атхаты. Ты ма̄гсыл ма̄ янытыл ма̄н армияв ма̄к ё̄р армияг ла̄ваве. Контракт щирыл лусытан ма̄хманув хосыт ма̄н ё̄рыг ты е̄мтсӯв. Салта̄танув урыл ла̄вуӈкв таӈхе̄гум, ань акв та̄л лусытэ̄гыт, та̄н ма̄гсыланыл пуссын ва̄раве. Нэ̄мхотьютн ат саватавет. Ка̄сыӈ а̄лпыл ос э̄типа̄лаг алпияныл, ла̄гланыл, ка̄таныл сунсавет, нэ̄матыр ю̄ныгтым ма̄ алпиянылт ул вос о̄лы. Ущты лусытан ма̄н миннэ пыгыт телефон хосыт потыртанэ̄ныл ма̄гсыл тит симкартал олнта̄л мивет. Акватэ таквина̄тэ̄н выгтэ, мо̄танэ ос юв рӯтанэ палт те̄тытэ. Та щирыл халанылт потыртан ма̄гсыл тынэ тынта̄лнувег о̄лы. Тувыл ань салта̄тыт о̄щнэ маснутаныл ре̄гыӈыг о̄лэ̄гыт. Ты юио̄выл тит та̄л сыс ма̄н армиявт нэ̄мхотьют ат по̄льтыслӯв. Ма̄н ма̄ньлат хум хо̄тпанув та̄ра лӯсытан ма̄н миннэ̄ныл ма̄гсыл ма̄н такос пуссын ва̄ре̄в. Та̄н лусытаӈкв ат таӈхе̄гыт. 2014 та̄лт ва̄т ма̄ньлат хум лусытан миннэ ма̄ныл оясыт. То̄ват ань ты мус полициян иӈ та тинсавет. Тӯйталахтынэ̄ныл щирыл та̄нтина̄нылн лю̄ль ва̄ре̄гыт. Йильпи са̄ккон щирыл лӯсытан ма̄н ат ялнэ хум хо̄та̄ти ёмас рӯпатан ат виве.

1094 2015.02.27. Александр ВЬЮТКИН

Мирн ва̄нэ хо̄тпат ӯсувт атыглаве̄сыт. «На̄й лылы» нампа тина суссылтан фестиваль Ханты-Мансийск ӯст хӯрумхуйпловит щёс ва̄рыглавес. Ты та̄л яныг хо̄нт минам па̄сныл са̄тлов та̄лыг е̄мты. Та яныг хо̄нт урыл тина щирыл са̄в суссылтаве. Фестиваль о̄выл хо̄талэ̄т хо̄нтлам ма̄хум вы̄гыр лё̄ӈх хосыт ё̄мсыт. Та̄н юипа̄ланылт тинат по̄слахтан, мирн ва̄нэ артистма̄хум «Югра-Классик» нампа колн ущ щалтсыт. Ты фестиваль хо̄т хо̄тал минас. Ты урыл мо̄тыт газетат ловиньтэ̄н.

1094 2015.02.27. Николай МЕРОВ

Мегион ӯс урыл потыр о̄лыс. Ты э̄тпос о̄выл хо̄талытт Ханты-Мансийск ӯсн Михаил Сергеевич Игитов, Мегион ӯс кӯщай хум, ёхталас. Тав тыт ля̄ххал тотнэ хо̄тпат ёт хо̄нтхатыглас. Та ӯст ЖКХ ва̄рмалит хумус о̄лэ̄гыт, тав китыглавес. Ань тав та урыл потыртас, та 2014 та̄л сыс колытн ре̄г тотнэ щирыл тот хӯрум авария о̄лыс. Кӯщай хум ла̄выс, тот рӯпитан хо̄тпат ре̄г тотнэ турпат са̄в та̄л ат уральтасаныл. Кол кӣвырн вит овтнэ турпат хосат та̄гыл ат пе̄нтыглаве̄сыт, пе̄сыг е̄мтсыт, хотхарӈайтаве̄сыт. Акваг ма̄лтыпащирма е̄мталан хосыт то̄ва ке̄ртурыт ат ве̄ритасыт, па̄лыгпокматасыт. Тамле ва̄рмаль воссыг ул вос е̄мталы, ты та̄лн лю̄лиг е̄мтум ке̄ртурыт пе̄нтнэ ма̄гыс са̄внув олн та̄ставе. Та ӯст о̄лнэ мир ла̄всыт, та̄н ӯсанылт ӯсхулытныл тӯйт сака лю̄льсаӈ хотвиве. Кӯщай ла̄выс, ювле хультум ат та̄л сыс ӯсныл нёлоловкем со̄тыра кубометра тӯйт хотвуйвес. Ты тэ̄лы о̄с са̄в тӯйт патыс. Туп кит э̄тпосыг сыс яныгса̄т кубометра тӯйт ӯс коныпа̄лн тотвес. Ань мо̄тантыг тыи ма̄гыс са̄внув олн тах та̄ставе. Михаил Сергеевич Мегион ӯс кӯщаиг ат та̄л рӯпиты. Ты та̄л сыс ӯсэ но̄хво̄рмалтан ма̄гыс тав са̄в рӯпата ва̄рыс. Ань тот хӯрумса̄т та̄л яныт ня̄врамыт пуссын садикыл то̄влавет. Са̄в та̄л э̄лаль ат ӯнттым пӯльница ань а̄стлавес, ма̄хум тот пусмалтавет. Ня̄врамыт ма̄гыс йильпи каснэ кол ӯнттувес. Ӯс котильт хорамыӈ кан щё̄питавес ос мо̄т э̄рнэ рӯпата ва̄раве.

1094 2015.02.27. Александр ВЬЮТКИН

О̄выл яныг хо̄нт урыл нэ̄пак нэ̄глыс. Ре̄тыӈ ю̄свой э̄тпос хо̄тыт хо̄талэ̄т Ханты-Мансийск ӯст о̄лнэ государственный архив колт «Первая мировая война в жизни югорчан» нампа йильпи нэ̄пак мирн о̄выл щёс суссылтавес. Ты нэ̄пак округ архив колт рӯпитан ма̄хум ос Ханты-Мансийск ӯс краеведыг о̄лнэ хум Владимир Филиппович Струсь акваннё̄тхатым щё̄питасаныл. Округ архив колт кӯщаиг рӯпитан нэ̄ Людмила Сажаева ты урыл тох потыртас: «Ма̄навн Сергей Сергеевич Козлов нэ̄пак та̄ратаӈкв олныл нё̄тыс. Тав Тюменский область Дума депутатыг о̄лы. Хум ат те нё̄тыс, нэ̄пак аты нэ̄глыс. Нэ̄пак хаснэ ма̄гыс ма̄хум нёлолов та̄л рӯпитасыт. Та та̄лыт сыс Владимир Филиппович са̄в рӯпата ва̄рыс. Россия янытыл пе̄с порат хансым нэ̄пакыт щирыл ма̄хум наманыл тинсым рӯпитас. Округ янытыл та о̄выл яныг хо̄нтыт пуссын аквъёт акв со̄тыра 870 хо̄тпа хо̄нтлыс». Ты нэ̄пак суссылтан кастыл Ханты-Мансийск ӯст о̄лнэ яныгпа̄ла ма̄хум тув во̄выглаве̄сыт. Та хо̄нтыт та̄н а̄тяныл, о̄паныл хо̄нтлысыт. Та ма̄хум халт са̄в Пуртов, Сивков, Карандашов ос Корепанов хо̄тпат о̄лсыт. Та̄н пуссын 1893–1916 та̄лытыт хо̄нтласыт. Хум хо̄тпат та̄л сыс акв щёс таквсы порат вуйлуве̄сыт. Та порат атпан нупыл титыт та̄ланыл то̄влын мус лусытасыт. Та̄н наманыл Тобольск ӯст архив колт пе̄с нэ̄пакытт хансым о̄лэ̄гыт. То̄ват атпан арыгтем та̄ланыл мус лусытасыт. Кӯщай нэ̄ юипа̄лт Ольга Поликарповна Ермолина такви а̄ще Поликарп Матвеевич Спиридонов урыл мощ потыртаӈкв во̄ввес. Ольга Поликарповна а̄ще «унтерофицер» намыл маима мус лусытас. Юв ёхтуме̄т, тав нэ̄мхуньт та урыл ат потырта̄лыс. Лусытаме ма̄гсыл Поликарп Матвеевич наган нампа ма̄нь писалил мӯйлупта̄лвес. Наган аквпалъе̄ре̄т «За безупречную службу царю и Отечеству! » ла̄тӈыт хансым о̄лсыт. О̄йка юв ёхтуме̄т мӯйлупта̄лым наганэ хоттӯйтме. Та урыл ам а̄тям нэ̄мхотьютн атыпыл потырта̄лыс. Ще̄мьятэ ма̄гсыл тав сака пилыс. Та порат са̄в мир нэ̄мхотьютн ат ва̄нэ щирыл хотталь тотве̄сыт. Ты нэ̄пак ма̄гсыл ам на̄нан яныг пӯмащипа ла̄тыӈ ла̄ве̄гум. Ты урыл ань яныгман ня̄врамытн потыртаӈкв э̄ри. Та̄н яныг о̄паныл о̄лупса вос ва̄ганыл ос э̄лаль вос потыртыяныл». Э̄лаль Нина Никитична Отто а̄тятэ Никита Федорович Пермяков урыл мощ матыр потыртаӈкв во̄ввес. Э̄ква ла̄выс: «Ам а̄тям ат номилум, та порат ам самын иӈ ат патсум, о̄лум накыт урыл а̄нумн омам потырта̄лыс. А̄тям хо̄нтлуме порат пленын вӯйлувес. Тӯрманколт тэ̄тал, аквписыг ра̄тым о̄щве̄сыт. Тав ётэ лусытам ма̄хманэ урыл титыглавес. Юио̄вылт а̄тям тып йӣв нирыл ва̄т нупыл ат щёс сысэ̄т са̄йтта̄л патнэ мус хосгувес. Ра̄тым ма̄хмытын тох тав та оссувлавес. Та̄нти тувыл э̄лаль минасыт. Па̄влыӈ ма̄хум а̄тям та̄нти палтыланыл висаныл. Мощ пусмалтахтаме юипа̄лт тав такви о̄щнэ маснутанэ хоттӯйтсанэ. Мо̄т маснутыл масхатым тох тав юв та ёхтыс». Та порат о̄лум накыт, пе̄с ма̄хмытын потырта̄лым потрыт пуссын нэ̄пакн хансым о̄лэ̄гыт. Ты йильпи нэ̄пак пуссын аквъёт хӯрумса̄т са̄витыг та̄ратавес. Та̄н пуссын округ янытыл библиотекат, ханищтахтын колыт щирыл те̄тавет.

1094 2015.02.27. Людмила ТЕТКИНА

Яныг ӯст о̄лнэ ва̄рмалит. Нижневартовск ӯст Алла Бадина миркол кӯщай нэ̄г о̄лы. Тав са̄в та̄л мирколт рӯпиты, ӯст о̄лнэ мир та̄рвитыӈ ва̄рмаляныл ёмащакв ва̄ганэ. Нижневартовск ӯст ань 300 со̄тыра арыгкем э̄лумхо̄лас о̄лы. Са̄всыр та̄рвитыӈ ва̄рмаляныл урыл та̄н мирколн пищма акваг хансэ̄гыт. Са̄в ма̄хум ла̄ве̄гыт, ӯст тӯйт лю̄льсаӈ хотщё̄питаве. Алла Бадина ты ва̄рмаль урыл ла̄выс, то̄ва порат хо̄тал сыс са̄в тӯйт паты, та̄н ӯсхулыт хотсыстамтаӈкве ат ве̄рме̄гыт. Тувыл ма̄хум та̄нки лю̄ль ва̄ре̄гыт, о̄лнэ коланыл по̄хыт хультуптым ма̄шинат торас ва̄ре̄гыт. Тӯйт ёмащакв хотвиӈкве та̄нки ат мыгыт. Кӯщай нэ̄ садикыт ӯнттын ва̄рмаль урыл о̄с потыртас. Ань Нижневартовск ӯст са̄в ня̄врамыт садикн ат ялантэ̄гыт. Ты та̄л тот нила садик тах ӯнттаве. Ма̄ньполь э̄тпос 6 щисла Нижневартовск ӯс янытлан хо̄талыг о̄лы. Та хо̄талэ̄т акв йильпи садик рӯпитаӈкве тах о̄вылтахты. Кӯщай нэ̄ ла̄внэ̄тэ щирыл, та̄н ка̄сыӈ та̄л ӯс янытлан хо̄тал кастыл акв йильпи садик ӯнттуӈкве а̄стлэ̄гыт. Тамле яныг мӯйлупса та̄н ӯст о̄лнэ ма̄хум ма̄гсыл ва̄ре̄гыт. Тувыл ань ӯст са̄в ня̄врам самын паты, та̄н ма̄гсыланыл кӯщаит йильпи садикыт ӯнттуӈкве о̄с ат а̄лыме̄гыт. Нижневартовск ӯст о̄лнэ мир ма̄шинат яласан лё̄ӈхыт урыл пищма акваг хансыглэ̄гыт. Ка̄сыӈ та̄л хунь тӯйт толы, лё̄ӈхыт пуссын лю̄лиг ва̄равет. Ань ты рӯпата ва̄рнэ ма̄гсыл ӯс миркол са̄в олн та̄сты. Туи ма̄лтым хо̄талыт ӯс лё̄ӈхыт ёмащакв щё̄питаӈкве тах патавет.

1094 2015.02.27. Людмила ТЕТКИНА

Та̄н э̄рнэ тэ̄лат урыл потыртасыт. Округ Думат ос правительстват рӯпитан хо̄тпат сапра̄нин акванатхатыгласыт. Тыт о̄лнэ ма̄хум нуса ул вос тотэ̄гыт, ёмащакв э̄лаль вос о̄лэ̄гыт, рӯпата та̄л ул вос хультэ̄гыт, кӯщаит пуссын аквъёт ань ты урыл номсахтэ̄гыт. Округ правительстват рӯпитан хо̄тпат мирн нё̄тнэ программа хассыт. Ка̄сыӈ э̄лумхо̄лас таве интернетыт ловиньтаӈкве ос матыр ла̄тыӈ тув ке̄туӈкв ве̄рми. Ань комиссия ва̄рвес, тот 20 хо̄тпат рӯпиты. Та̄н округ янытыл мирн ке̄тым ла̄тӈыт ловиньтаӈкве патыяныл. Ма̄хум ла̄тӈаныл ты программан ке а̄ртме̄гыт, о̄с тув хансавет. Сапра̄нит депутатыт та̄нки номтаныл урыл о̄с потыртасыт. Борис Хохряков ла̄выс, рӯпата та̄л о̄лнэ ма̄хум ань са̄всыр ханищтапыл вос щё̄питавет. Мо̄т профессиян тот вос ханищтавет. «Югорский капитал» нампа олныӈ нэ̄пак о̄щнэ ще̄мьят ты та̄л олнаныл акв ло̄мтэ тувыл виӈкве вос та̄ртавет. Ты олныл туп рӯпата та̄л о̄лнэ ща̄нита̄щит мивет. Акв ще̄мья хӯрмит ня̄враме ма̄гсыл 117 со̄тыра солко̄вил ань ойтавет. Тамле олныл та̄н кол ёвтнэ, ня̄врам ханищтан ма̄гсыл ойтхатуӈкве манос ща̄не пенсиятэ ма̄гсыл пинуӈкве ве̄рме̄гыт. Мо̄т депутатыт та̄нки номтаныл урыл о̄с потыртасыт. Ань ты программан ос та̄н таи хансуӈкве таӈхе̄гыт. Правительстват рӯпитан ма̄хум рӯпата олнаныл ты та̄л но̄х ул вос нё̄тавет. Ос яныг кӯщаит та̄нки рӯпатаныл ма̄гсыл сака тыныӈ пасаныт, уласыт, компьютерыт ос мо̄т пормасыт ул вос ёвтэ̄гыт. Ос бюджетный организациятт рӯпитан ма̄хум та̄л сыс акв щёс 5% са̄витыг олнаныл вос но̄хнё̄тавет. Ты коныпал кӯщаит са̄всыр мо̄т тэ̄лат урыл потыртасыт, э̄рнэ ва̄рмалит пуссын ты яныг программан тах хансавет.

1094 2015.02.27. Валентина УЗЕЛЬ

Са̄в ня̄врамыӈ ще̄мьят ма̄ло̄мтыл мивет. Район ос яныг ӯсыт кӯщаит ань мо̄т щирыл пе̄рияӈкв патавет. Та̄н районный манос городской дума депутатытныл пе̄риявет. Манос конкурс щирыл хо̄тпа кӯщаиг тув ӯнттаве. Ты са̄ккон 2015 та̄л ма̄ньполь э̄тпос 7 хо̄талныл рӯпитаӈкв паты. Ань ня̄врам о̄щнэ ще̄мьят урыл са̄ккон тамле йильпи ла̄тӈыл хасвес – аквты ще̄мьят та̄н яныг ня̄враманыл 18 та̄лэ ат те то̄влыс манос тав хо̄т э̄лаль те ханищтахты, тав ос 23 та̄лэ иӈ ат то̄влыс те, то̄нт садикын ялантан титыт манос хӯрмит ма̄нь ня̄врам ма̄гыс ойтым олн «компенсацияг» ювле миве. Ща̄нита̄щит садик ма̄гыс ойтхатнэ олн ат те о̄ньще̄гыт, та̄н «материнский капитал» нампа олныӈ нэ̄пакныл мощ олн виӈкв ве̄рме̄гыт. Та̄нти я̄насыг рӯпитан хо̄тпат, рущ ла̄тӈыл та̄н «индивидуальный предпринимателиг» ла̄вавет, ань ёмащакв рӯпитаӈкв вос ве̄рмысыт, та̄н ма̄гсыланыл тамле са̄ккон хасвес – та̄н рӯпитаӈкв ущты о̄вылтахтасыт те, налоголн та̄нанылн ойтуӈкв щар ат э̄ри. Ос та̄н акв та̄л сыс 50 арыгтем хо̄тпа та̄нти палтыланыл рӯпитаӈкв висаныл те, то̄нт та̄н налоголныл пинавет. Ань хӯрум манос тыгыл са̄внув ня̄врам о̄щнэ ще̄мьят кол ӯнттын ма̄гыс ма̄ло̄мтыл мивет. Ты са̄ккон 2015 та̄л яныгполь э̄тпос 1 хо̄талэ мус рӯпитас, ань тав э̄лаль пирмайтавес. Ущты са̄в ня̄врамыӈыг е̄мтум ще̄мьят та̄н пуссын очередин хансавет. Ос та са̄кконт тох хансым о̄лы о̄лнэ колыл иӈ ат ӯнттым ма̄ тыналаӈкве щар ат ро̄ви. Ты та̄л Победа хо̄талув 70 та̄лэ то̄влы. Ты кастыл округ Думат рӯпитан ма̄ньлат ма̄хум акв йильпи са̄ккон хассыт, ань ты Дума о̄лум порат тав пирмайтавес. Ты са̄ккон «Знамя Победы» урыл хансым о̄лы. Ань Победа хо̄талув мус «Знамя Победы» са̄всыр ма̄т тагатаве. Мирколыт пуссын колаланылт Россия флаг, округ флаг ос ты «Знамя Победы» нампа флаг вос тагатаве. Ма̄хум та̄нти о̄лнэ коланылт ты флаг тагатаӈкв о̄с ве̄рме̄гыт. Ань ма̄ньлат ма̄хманув вина ос пивосур пе̄нтсыл акв лю̄ль вит аюӈкв патсыт, рущ ла̄тӈыл тав «энергетикыг» ла̄ваве. Ты айнэ вит те̄р ма̄нь па̄нкат тыналаве. Хо̄тпа аквтит тамле ма̄нь па̄нкарищ юв те аи, тав са̄в ё̄рыл ёхтаве, ӯлме по̄хан мины. Ты «энергетикыт» лю̄ль утыл пинавет. Хо̄тпа матах па̄нка аи, тав давлениятэ сака но̄хмины. Тох хӯрмахнилах па̄нка аим ма̄ньлат пыгыт та̄ра а̄тимыг е̄мтэ̄гыт, та̄н пуӈканыл тӣврыт о̄лнэ те̄лп та̄рсаныл маныгтахтэ̄гыт. Ты лю̄ль энергетиквит са̄в мо̄т ма̄т хосат ат тыналаве. Округув янытыл ты тув порат лӯпта э̄тпос о̄выл хо̄талныл тыналаӈкв ат патаве. Ты са̄ккон молодёжный парламентыт рӯпитан ма̄ньлат ма̄хум та̄н хассаныл, округ Дума депутатытн тав пирмайтавес.

1094 2015.02.27. Людмила ТЕТКИНА

Та̄н пирмайтым са̄кконыт урыл ля̄ххал хансэ̄гыт. Ля̄ххал тотнэ ма̄хум ма̄гсыл округ Дума «Думать поюгорски» нампа касыл ва̄рыглы. Та̄л сыс депутатыт манхурип рӯпата ва̄ре̄гыт ос сапра̄нит манхурип са̄кконыт пирмайтэ̄гыт, журналистыт ты урыл акваг хансэ̄гыт. Хансум потраныл ты конкурсын ке̄тыглыяныл. Тамле касыл таи ма̄гсыл ва̄рыглаве, тыт о̄лнэ ма̄хум депутатыт рӯпатаныл ос йильпи са̄кконыт урыл са̄внув вос ва̄гыт. Ты э̄тпос 18 хо̄талэ̄т ля̄ххал тотнэ ма̄хум акванатыглаве̄сыт ос та̄н халанылт но̄хпатум хо̄тпат янытлаве̄сыт. Борис Хохряков, округ Дума кӯщай, ма̄хумн ла̄выс: «Ка̄сыӈ та̄л са̄в хо̄тпат ты касылн та̄нки потраныл ке̄тыглэ̄гыт. Ты та̄л округ янытыл ке̄тым яныгса̄т арыгкем са̄всыр потыр жюрихо̄тпат ловиньтасаныл ос но̄хпатум хо̄тпат пе̄риясыт. На̄н сака са̄в ёмас потыр ке̄тсы̄н, тыи ма̄гсыл ма̄н ка̄сыӈ номинацият но̄хпатум кит хо̄тпа пе̄риясӯв». Ты та̄л о̄выл места «Местное время» ос «Московский Комсомолец-Югра» нампа газетаг вистэ̄н. Китыт места «Югра» нампа журналт рӯпитан э̄ква Ольга Пламадилова ос «Тюменские известия» газетат рӯпитан хум Андрей Фатеев висы̄г. Хӯрмит местал Алексей Нейман, «Новости Югры» газетат рӯпитан хум, ос Ольга Капанина, «Самотлор» нампа телекомпаният рӯпитан нэ̄, майвесы̄г.

1094 2015.02.27. Анна АЛГАДЬЕВА

Ха̄льӯс миркол кӯщаиг Хулюмсӯнт па̄вылн ёхталасы̄г. Ха̄льӯс район тармыл о̄лнэ кӯщай хумыг Владимир Иванович Фомин ос Сергей Владиславович Кравченко Хулюмсӯнтын ёхталасы̄г. Тэ̄н па̄влыӈ рӯпата ма̄т мус ялсы̄г, ма̄хум ёт сапра̄ни ва̄рыгласы̄г. Хулюмсунтын йигме̄н сыс Светлый рущ па̄вылн хо̄игласы̄г, Ня̄хщамво̄ль па̄вылн ялсы̄г. Владимир Иванович тав потыр о̄вылтас, ла̄выс, Светлыйт храм пӯсвес. Тот рӯпитан батюшка Украинаныл оям о̄йка, храм коныпал такви «тэквандо» касылн ня̄врамыт ханищтыянэ, па̄влыӈ ма̄хмытн янытлаве. Ре̄тыӈ ю̄свой э̄тпост Ягрим па̄вылт 6 та̄л арыг ӯнттын «Айсберг» кол а̄стлаве, ущты рӯпитаӈкв паты. Ха̄льӯс районт ань тыг мус маныр ӯнттын щирыл о̄лыс, та рӯпатат пуссын а̄стлавет. Округ губернаторув Наталья Комарова Ха̄льӯс е̄р ма̄ ӯргалым ос уральтым о̄ньщитэ. О̄с акв яныг проект о̄лы – ке̄рлё̄ӈх нупыл яласан лё̄ӈх ва̄руӈкв патаве. Ягрим ос Приобье хал туи яласан лё̄ӈхыл ва̄раве. Ягримыг – Саранпа̄влыг хал о̄с лё̄ӈхыл пинаве, Нё̄рыт нупыл лё̄ӈх паты. Кит та̄л сыс лё̄ӈхыг а̄стлаве̄г. Владимир Иванович ла̄выс: «Ты яласан лё̄ӈхыг ва̄руӈкв патаве̄г, Ха̄льӯс район ёмщаквнуве̄г, кӯпнитнуве̄г о̄луӈкв паты. Ма̄ лё̄ӈх ма̄кыг э̄ри. » Манах та̄лыг е̄мтыс, нас та ла̄ве̄гыт – Хулюмсӯнт па̄вылт йильпи школа ӯнттаве. Ань ты хо̄тал мус школа ӯнттын ма̄т ня̄р во̄ӈхат, туп ня̄р тарыгпыгыт ос хаслы осэ хотняртасым о̄лы. Сергей Владиславович ты урыл тох ла̄выс: «Нэ̄пакыт щирыл ты та̄л холнэ порат, школа а̄стлын щирыл о̄лыс. Мо̄лты та̄л школа ӯнттуӈкв вуйхатыглам кӯщай рӯпататэ ат ва̄рыстэ, ань мо̄т пуӈкто̄тап кинсэ̄в. Ты ма̄гыс йильпи школа 2016 та̄л холнэ порат ущта а̄сты. » Ань о̄лнэ школав сака ащирмаӈ, кӣвреконытэ йильпииг э̄рттам ва̄рвес, ущпыл а̄щирмаг патыс. Ты урыл кӯщаит я̄нас кисхатуӈкв ла̄всыт. Садик о̄с щар пе̄сыг е̄мтыс. Ма̄хум китыглахтасыт: йильпи садик ӯнттуӈкв патаве ман а̄ти? Сергей Владиславович тох ювле ла̄выс: «Йильпи садик ӯнттын ма̄гыс сака са̄в олн э̄ри, ты урыл потыр иӈ а̄тим о̄лыс. Ань о̄лнэ садик иӈ о̄лнэ ке̄м, хоты кол щё̄питаӈкв э̄ри – йильпииг щё̄питыянӯв. » О̄лнэ колыт ӯнттуӈкв патавет ман а̄ти, ты урыл па̄влыӈ ма̄хум о̄с китыглахтасыт. Ольга Васильевна Баранова, Хулюмсунтыӈ миркол кӯщай нэ̄, ла̄выс: «Нэ̄пакыт щирыл акв о̄лнэ кол ӯнттын щирыл о̄лы. » Э̄лаль Владимир Иванович Фомин потыртас, тав ла̄выс: «Светлый па̄вылт тахурип школа ӯнттувес, ма̄н мо̄лхо̄тал тув щалтсасӯв, ща̄гтым тувыл конква̄лсӯв. Ня̄хщамво̄льт са̄в ще̄мья о̄лнэ щирыл кит кол ӯнттаве̄г. Акв колэ о̄лнэ па̄лаг тыгыл ты паты, мо̄танэ иӈ са̄в рӯпата о̄ньщи. Тох рӯпитан ма̄хум аквтох тыг во̄вуӈкв ро̄ви. Ня̄хщамво̄льн щар та̄рвитыӈ матыр кол ӯнттын пормас тотуӈкв. Матыр ва̄рнэ сымолн ке о̄ньще̄гын, тот кол ӯнттуӈкв ос рӯпитаӈкв ро̄ви. » Мо̄лты та̄л па̄сныл Хулюмсӯнт па̄вылт бассейн ва̄руӈкв ла̄ве̄гыт: Газпром организация ос Ха̄льӯс миркол акваннё̄тхатым, акв ё̄рыл ты та̄л яныг пувлын кол ӯнттуӈкв о̄вылтыяныл. Сапра̄ни о̄лум порат Сосьвинское ЛПУ МГ кӯщай хум Алексей Петрович Коняев о̄с о̄лыс. Ты йильпи ёхтум хум ущ кӯщаиг патыс, тав ла̄выс: «ЛПУ па̄лыл о̄лнэ кол ӯнттуӈкв ат патаве. Са̄в хо̄тпа о̄лы, хоты пенсиян патэ̄гыт, о̄лнэ са̄манылн миныглэ̄гыт, о̄лум коланыл ювле ат мыганыл. Таима̄гыс о̄лнэ кол ат то̄вылхаты. Ты урыл по̄х э̄лумхо̄лас рӯпатан сака ат выгӯв. Па̄влыӈ хо̄тпат хотьют рӯпата кинсы, нэ̄паканыл акванатым о̄ньщиянӯв, пе̄ръяхтэ̄в, хо̄ӈха а̄ртми – рӯпатан выглӯв. То̄ват номсэ̄гыт – ам тыт о̄лэ̄гум, а̄нум рӯпатан вуелы̄н. Ханищтахтэн, наӈкина̄н суссылтэн. Ма̄ньлат ма̄хум э̄рнэ образование ке о̄ньще̄гыт – маныр рӯпатан ат виӈкв. » Сапра̄ни холам порат Владимир Иванович Фомин тох ла̄выс: «2014 та̄л сыс Ха̄льӯс районт 102 ня̄врам самын патыс. Са̄в ман мощща, ма̄н о̄лэ̄в, яныгме̄в. Посыӈ номтыл ос пуста̄гыл пуссын о̄лэ̄н, са̄всыр конкурсыт а̄рталахтэ̄н. » Тох ты потыр о̄лыс.

1094 2015.02.27. Тамара МЕРОВА

Рӯпата колыт акваг уральтавет. Ты э̄тпост ля̄ххал тотнэ хо̄тпат ма̄хум рӯпитан ма̄нанылт та̄рвитыӈ ва̄рмалит та̄рапаттын кӯщай Евгений Кривобоков ёт акванхо̄нтхатыгласыт. Тав са̄всыр тэ̄лат урыл китыглавес. О̄йка ювле ла̄выс, ва̄ти хо̄тал э̄тпос онтоловхуйплов щислат та̄н рӯпитан коланыл хус та̄лэ то̄влыс. Та сыс та̄н 57 со̄тыра са̄всыр тэ̄лат уральтасыт, ос ты хосыт миллион са̄виткем э̄лумхо̄ласыт 6, 3 миллиард са̄вит хоттӯйтум олнаныл ювлеойтсаныл. Хус та̄л сыс ты инспекция колт рӯпитан хо̄тпат штраф пувнэ щирыл 132 миллион солко̄ви сэ̄лсыт. 2014 та̄лт та̄н 3 со̄тыра 802 рӯпитан ма̄ уральтасыт. Тот лов арыгкем со̄тыра сыресыр лю̄ль ва̄рмалит хо̄нтсыт. Са̄выӈпа̄лэтыи колыт ӯнттын ма̄т, транспорт ос связь рӯпитан ма̄тт ос ма̄во̄й но̄хвинэ ма̄т о̄лэ̄гыт. То̄ва ма̄хмыт щар мощща олн сэ̄лэ̄гыт манос арыгнув са̄в щё̄с рӯпитаӈкве ла̄вавет, о̄с олныл ат ойтавет. Мо̄т ма̄т ма̄хум матахмат э̄тпос рӯпата олныл ат мивет. Ань тамле лю̄ль накыт тот воссыг ул вос е̄мталасыт, та предприятие кӯщаит акваг уральтавет. Тот рӯпитан ма̄хум олныл ойтнэ ма̄гыс кӯщаит са̄ртын атхуйплов хо̄талыл мивет. Та̄н тэ̄ланыл сака лю̄льсаӈ ке минэ̄гыт, хӯрум э̄тпосыл э̄лаль ловиньтавет. Та юипа̄лт нэ̄матыр ат ке ва̄ре̄гыт, та кӯщаит рӯпатаныл округ Правительство, Дума ос прокуратура па̄лыл уральтавет ос лю̄ль ва̄рнэ̄ныл ма̄гыс яныг штрафолныл пинавет. Тувыл то̄ва рӯпитан организацият э̄лумхо̄лас ӯргалан ос пуста̄гыл о̄лнэ наканыл щар ат сунсавет. Та хосыт матахмат хо̄тпат наска̄ссыг порсысыт. Тох хус та̄л сыс кит со̄тыра арыгкем хо̄тпа рӯпатанылт а̄тимыг е̄мтсыт. Ты о̄вылн патум накыт уральтым юипа̄лт та̄рапатыс 40 хо̄тпа та̄нки лю̄льсаӈ рӯпитаманыл ма̄гыс хотталь щалтмыт. Та 2014 та̄л сыс 34 тамле та̄рвитыӈ ва̄рмаль о̄лыглас. Ты хо̄тпат пуссын пилыщмаӈ ма̄т рӯпитасыт, са̄тхуйплов хо̄тпа порсыс. Та̄н ще̄мьяныл олныл нё̄тве̄сыт. Мо̄т хо̄тпат хоса пусмалтаве̄сыт. Та̄н олныл нё̄туӈкве о̄с ла̄вве̄сыт . Округ янытыл о̄лыглам тэ̄лат пуссын Москва ӯс па̄лыл о̄с акваг уральтавет. Инспекция труда ка̄сыӈ са̄т сыс тув ла̄тыӈ ке̄ты. Та щирыл лю̄ль ва̄рнэ кӯщаит мощ хурахлым о̄лэ̄гыт, нэ̄мхотталь мо̄т ма̄н ат ое̄гыт. Рӯпата коланыл лап ул вос пантве̄сыт, та̄н ма̄хумн та̄ра олн ойтэ̄гыт.

1094 2015.02.27. Тамара МЕРОВА

Йис накыт ос пе̄с колыт нэ̄пакн хансавет. Культура тармыл рӯпитан ма̄хум «Торум Маа» нампа музейт акванатыглаве̄сыт. Тот Андрей Кондрашёв, округ культура тэ̄лат ӯргалан кӯщай хум, 2014 та̄л сыс та̄нки ва̄рум рӯпатаныл о̄вылтыт ла̄тыӈ ла̄выс. Ань округув янытыл культура па̄лыл нэ̄пакн хансым 5 со̄тыра 360 йис ва̄рмалит, колыт манос йис ма̄т ӯргалавет: 983 пе̄с ма̄ ман колыт Россияв янытыл ӯргалавет, 110 пе̄с накыт округ историян хасве̄сыт, та̄н районыт манос ӯсыт щирыл намыл пинве̄сыт. Кос выглӯв, Сургутский районт «Барсова гора» о̄лы, ос Ханты-Мансийск ӯст «Самаровский чугас». 2014 та̄л сыс 59 са̄всыр пе̄с накыт ос йис порат о̄лым ма̄т та̄рапаттуве̄сыт ос нэ̄пакн хасве̄сыт. Ты э̄лыпа̄лт хансым 11 пе̄с ва̄рмалит хотщуртумтаве̄сыт. Ул нэ̄матыр пе̄с нак манос йис ва̄рмаль тот ат хо̄нтвес. Тувыл соссаӈ мир ат ялпыӈ ма̄наныл та̄рапаттуве̄сыт, та̄н та ма̄т йис тагыл ӯргалыяныл. Белоярский районт Нумто тӯр ялпыӈыг ла̄ваве. Ань по̄х хо̄тпатн тав щар ул вос новвес, ма̄во̄й хилнэ хо̄тпатн ма̄тэ пулиг ул вос сакватавес, тав государствав па̄лыл «культурный наследие» нампа нэ̄пакн о̄с вос хансаве. Ты ва̄рмаль тэ̄лаг ва̄рнэ ма̄гыс та тӯр ляпат о̄лнэ матумпа̄ла хантыт ос ё̄рныт ёт та̄н хоса потыртасыт. Октябрьский район Шеркалы па̄вылт пе̄с порат ӯнттым кол «Усадьба купцов Новицких» (ты кол хурит по̄слым о̄лы. ) ос Ха̄льӯст «Старое кладбище Берёзово» реестрнэ̄пакн хансуӈкве о̄с хосат номсаве̄г. Таима̄гыс ань ты урыл хансым са̄всыр потрыт ос пе̄с йист о̄лыглам накыт кинсавет. Андрей Кондрашёв ла̄вме щирыл, та̄н са̄в рӯпата о̄ньще̄гыт. Тот хӯрумхуйплов э̄лумхо̄лас рӯпиты. Та̄н халанылт историкыт, археологыт, этнологыт о̄лэ̄гыт. Тувыл округ музеитт рӯпитан хо̄тпатн о̄с нё̄тавет, научный потрыт ос нэ̄пакыт аквъёт хансэ̄гыт. Та̄стым олныт та̄н пуссын ёмас тэ̄лан холтыяныл. Мо̄лты та̄лт та̄н 616 со̄тыра солко̄вил майлуве̄сыт. Та̄н пе̄с йис ма̄т та̄рапаттын ма̄гыс ос тот рӯпитаманыл сыс 528 со̄тыра солко̄ви холтсыт. Туп акв ялпыӈ ма̄н та̄н акв ма̄ньщи о̄йкан ат та̄ртавет, тав йис та̄гыл На̄й-О̄тыр ма̄тэ такви ӯргалытэ, тармыл патытэ.

1094 2015.02.27. Тамара МЕРОВА

А̄гикветпыгквет пуста̄гыл вос яныгме̄гыт. Ягрим па̄вылт «Росток» нампа центр о̄лы. Тот та̄рвит о̄лупсан патум ма̄хум ня̄враманыл нё̄тавет. Кол 2001 та̄лт пусвес. То̄нт Николай Кисляченко Ха̄льӯс район кӯщаиг о̄лыс, центр ва̄рнэ ма̄гыс кол мис. Ты центрыт ань хӯрум отделеният ва̄рве̄сыт: тыи ханищтахтын а̄гитпыгыт ёт рӯпитан стационар, а̄гмыӈмосыӈ, сакватахтам ня̄врамыт ёт рӯпитан кол ос нуса тотнэ ще̄мьятн нё̄тнэ служба. Ка̄сыӈ тамле колт я̄нас хо̄тпа кӯщайлахты. Ань ханищтахтын а̄гитпыгыт палт кӯщай ва̄ӈын нэ̄ Светлана Вечкитова ос ты стационарт пуӈктотнэ нэ̄ Олеся Доля ёт ва̄йхатыгласум. Тэ̄н потраге̄н ань ловиньтэ̄н. Хумус ты тэ̄лат о̄вылтаве̄сыт: Ягрим па̄вылт мирн нё̄тнэ социальный тэ̄лат мирколыӈ хо̄тпатн 1995 та̄лныл о̄вылтаве̄сыт. То̄нт та̄н хӯрум колнакыӈ кол мисыт, ма̄хум тот рӯпитаӈкв та патсыт. О̄выл кӯщаиг тот Ольга Ивановна Чумакова о̄лыс, э̄ква ань тыг мус ня̄врамыт ёт рӯпиты. Та порат район кӯщаитн та̄н сака ат нё̄тве̄сыт, тахольт па̄влыӈ ма̄хум та̄наныл э̄рнэ пормасыт тотсыт, сыресыр э̄рнэ нё̄тмил ва̄рсыт. О̄влэ̄т приютыт туп Ягримт о̄лнэ а̄гирищитпыгрищит о̄лсыт, ётыл ты кол районныиг ва̄рвес. Тув ма̄нь па̄влыӈ ня̄врамыт тотыглаӈкве патве̄сыт. Саранпа̄выл э̄лы ма̄т о̄лы, тувыл ма̄хум тотнэ ма̄гыс мощ та̄рвитыӈыг о̄лы: тэ̄лы лё̄ӈхыл хоса минуӈкве ос то̄внакт сака ащирмаӈ. А̄гмыӈмосыӈ хо̄тпат молях ва̄гта̄л патэ̄гыт, товлыӈха̄пыл яласаӈкве билет сака тыныӈ, та̄н хотты хо̄тпатн тув та тотавет. Ня̄врамыт урыл: Ты колыт аквторыг атхуйплов са̄виткем ня̄врам пусмалтахтуӈкве ос ӯщлахтуӈкве ве̄рми. Ань китхуйплов а̄гирищпыгрищ тот о̄лыс. Нила ня̄врам тув юил ёхталасыт ос та̄н хо̄тал палыт тот ӯщлахтасыт, мо̄т нёлолов ня̄врам э̄тэхо̄талэ тот о̄лэ̄гыт. То̄ва ня̄врамаквет та̄лохса сыс тот о̄лэ̄гыт. Та̄н тот пусмалтавет, ханищтавет ос нас ӯщлахтэ̄гыт. Юил ёхталам а̄гитпыгыт хӯрум э̄тпос тув ялантэ̄гыт. Та̄н ще̄мьянылт о̄лупсаныл аквтох лю̄лиг е̄мталы ке, та̄н «Росток» центрын ювле во̄вавет. Центрын са̄выӈпа̄лэ ня̄врамыт опека кол па̄лыл ке̄тавет, то̄внакт ща̄ньа̄щит нё̄тмил во̄внэ ма̄гыс ня̄враманыл тув тотыяныл. Мо̄лал акв нэ̄ пӯльницат хоса пусмалтавес, тав ат а̄гиянэпыганэ центрыт хультупта̄лсанэ. Са̄ртын са̄в хантыт ос ма̄ньщит тув атыглаве̄сыт, ань юио̄выл та̄лытыт мо̄т мир ня̄врамыт тув о̄с тотыглаӈкве патве̄сыт. Ня̄врамыт та̄нки халанылт юртыӈыщ о̄лэ̄гыт, матыра̄ти ва̄руӈкве аквъёт ханищтахтэ̄гыт. Сыресыр ханищтапыт урыл: Ня̄врамаквет ёт тот ханищтан хо̄тпат рӯпитэ̄гыт, тыи психологыт, педагогыт, са̄всыр а̄гмыт пусмалтан ле̄ккарыт. Та̄н тот матыр ка̄тыл ма̄щтырлаӈкве, хурит по̄слуӈкве, йӣквуӈкве, э̄ргуӈкве ханищтавет. Тот о̄лмум порат то̄ва а̄гирищитпыгрищит ялпыӈ хо̄тал кастыл сыресыр хорамыӈ утыт ва̄рсыт, мо̄таныт э̄ргыт ос йӣквыт ханищтасыт. Акв колнакт пусмалтан э̄рнэ ут пуссын о̄лы. Ня̄врамыт пусмалтахтуӈкве ос ӯщлахтуӈкве тув щалтапа̄лэ̄гыт. Тувыл та̄н та̄нки о̄лупсаныл ос о̄лнэ ма̄наныл ӯргалан ма̄гыс са̄всыр ханищтапыл ва̄равет. Та̄н Россия ма̄ вос янытлыяныл, пуста̄гыл вос яныгме̄гыт ос ищхпыӈ утыл рӯпитаӈкве вос ха̄сэ̄гыт. Тамле тэ̄лат ня̄врамытн о̄с сака пӯмщалавет. Та̄нки яныгман ма̄наныл ос тыт о̄лнэ соссаӈ ма̄хум пе̄с ва̄рмалит, пе̄с накыт ва̄нэ ма̄гыс я̄нас программа щё̄питым о̄лы. Тот «Сорни ёш» нампа студия ва̄рвес, та̄н сакныл матыр ма̄нь хорамыт хартэ̄гыт, лӯима ма̄хум са̄всыр пормасыт урыл потыртэ̄гыт ос хумус та̄наныл ва̄руӈкве э̄ри ханищтавет. Центрыт са̄в та̄л Луиза Степановна Тихонова рӯпиты, тав ты ня̄врамыт ханищтыянэ. Та̄наныл «Ӯринэ̄ква хо̄талн» тотыглыянэ, тот э̄рге̄гыт, йӣкве̄гыт, ёнгилыт касэ̄гыт. Ты центрыт о̄лнэ а̄гитпыгыт «Альянс» нампа колн ялантан матумпа̄ла ма̄хум ёт хо̄нтхатыглэ̄гыт. Та̄н аквъёт сыресыр ка̄с ва̄ре̄гыт, спектаклит щё̄питэ̄гыт, акваннё̄тхатым юртыӈыщ о̄лэ̄гыт. Мо̄т организацият та центрын о̄с ёхталэ̄гыт, манос ня̄врамыт та̄нки палтаныл мӯйлуӈкве во̄выглыяныл. Тувыл ня̄врамыт са̄всыр касылыт касэ̄гыт ос ёмас тэ̄ланыл ма̄гыс мӯйлупсал мивет. «Росток» колт о̄лмумт, ам са̄всыр грамотат, благодарностьнэ̄пакыт ка̄саласанум. Таима̄гыс номтум сака ёмас, тот ёмас сымыӈ хо̄тпат рӯпитэ̄гыт.

1094 2015.02.27. Людмила ТЕТКИНА

Половинка па̄вылт рӯпитан школа. Кондинский район Половинка па̄выл котильт яныг кирпащ школа ӯнттым о̄лы. Ты ханищтан кол 2005 та̄лт рӯпитаӈкве о̄вылтахтас. Аквпалъе̄ре̄т садик, мо̄тпалъе̄ре̄т школа о̄лы. Кӯщаиг тот Елена Андреевна Рябова рӯпиты. Половинка па̄вылн ялмум порат ам таве ня̄врамыт ханищтан ва̄рмаль урыл китыгласлум. Тав ювле таи ла̄выс: – Школавт 170 а̄гирищпыгрищ ханищтахты, садикын 46 ня̄врам яланты. 2010 та̄лт па̄влувт школав ос садик аквантотвесы̄г. Ханищтан кол кӯщаиг ам паттуве̄сум. Ань о̄выл классын 19 ня̄врам яланты. Щар са̄в ня̄врам 6 классыт о̄лы, тот 35 а̄гирищпыгрищ ханищтахты. Ты яныг класс киттыгуртыслӯв, ань кит 6 класс о̄ньще̄в. 11 классыт туп хӯрум ня̄врам ханищтахты. Мо̄т классын туп 8-11 ня̄врам яланты. А̄гитпыгыт 9 класс а̄стлэ̄гыт ос Урай ӯсн колледжин э̄лаль ханищтахтуӈкве минэ̄гыт. Па̄влув Урай ӯст по̄хат о̄лы, а̄лпыл автобусыл тув минэ̄гыт, ӣтипа̄лаг ювле ёхтэ̄гыт. Па̄влыӈ ма̄хум о̄с тот рӯпитэ̄гыт, о̄с аквтащирыл тыглетувле яласэ̄гыт. Ты та̄л английский ла̄тыӈ ханищтан нэ̄ школан рӯпитаӈкве во̄выслӯв. О̄влэ̄т ос Урай ӯст о̄лыс, ка̄сыӈ хо̄тал ӯсныл тыг ёхталас. Ань Половинка па̄влувт о̄лнэ колыл майвес, тыг ва̄нтлас. Ма̄н школавт ханищтахтам а̄ги мо̄лты та̄л Югорский университет а̄стлас. Ань о̄с тыт рӯпиты, ня̄врамыт рущ ла̄тӈын ханищтыянэ. Са̄в хо̄тпа Курган ӯсныл рӯпитаӈкве тыг ёхтысыт. Тыт о̄лнэ колыл майве̄сыт, школат са̄в олныл ойтавет. Ювле та̄нки ӯсанылн минуӈкве нэ̄мхотьют ат ка̄сащи. Школан ялантан ня̄врамыт халт 60 а̄гирищпыгрищ ма̄ньщииг о̄лэ̄гыт. Ты э̄лыпа̄лт ща̄няныла̄щаныл китыгласанӯв, ня̄враманыл ма̄ньщи ла̄тыӈ ва̄ӈкве ка̄саще̄гыт ман а̄ти. Ща̄нь ла̄тыӈ ханищтаӈкве нэ̄мхотьют ат тахмаяс. Ня̄враманув «История Югры» ос «География Югры» нампа предметыг ханищтэ̄гыт. Ты урокыгт та̄н соссаӈ ма̄хум пе̄с о̄лупсаныл, культураныл урыл потыртавет. Округув янытлан кастыл ня̄враманув ма̄гсыл касыл ва̄рыглэ̄в. Та̄н са̄лы сӯн ӯлтта порге̄гыт, ха̄йтыгтэ̄гыт, тыньщаӈ па̄хвтэ̄гыт ос мо̄т щирыл касэ̄гыт. Па̄влувт о̄лнэ музей ёт о̄с акваг рӯпитэ̄в. Ань Галина Анатольевна Мостовых музей кӯщаиг о̄лы. Тот рӯпитан хо̄тпат ня̄врамыт ма̄гсыл са̄всыр конкурсыт акваг ва̄рыглэ̄гыт. Сакныл сагуӈкве, са̄сныл хусапыт ва̄руӈкве ос мо̄т щирыл ма̄щтырлаӈкве ханищтыяныл. Ня̄враманув тув ялантаӈкве ка̄саще̄гыт. Та̄н «Ӯринэ̄ква хо̄тал», хӯл алыщлан хо̄тпат янытлан хо̄тал ос мо̄т ялпыӈ хо̄талыт щё̄пита̄лыглэ̄гыт. А̄гирищитпыгрищит э̄ргуӈкве, йӣквуӈкве тув во̄выглыяныл. Ка̄сыӈ та̄л округ янытыл соссаӈ ма̄хум ма̄ньха̄пыл касуӈкве Нефтеюганский районт акванатхатыглэ̄гыт. Хӯрум та̄л ня̄врамыт ханищтан хо̄тпанув ёт касуӈкве тув о̄с ялантэ̄гыт. Ма̄хманув о̄выл щёс хунь тув ялсыт, ма̄ньха̄пыл яласаӈкве ат ве̄рмысыт. Туп тув ёхталанэ̄ныл ма̄гсыл янытлан нэ̄пакыл майве̄сыт. Тувыл ма̄ньха̄пыл товуӈкве ханищтахтасыт, ань а̄ти нас мӯйлуӈкве, мо̄т ма̄хум ёт касуӈкве тув ялантэ̄гыт. Ма̄нки ма̄ньха̄п ат о̄ньще̄в, улпыл тыи ма̄гсыл о̄выл места виӈкв ат ве̄рме̄в. Мо̄лты та̄л тув ялсыт, ла̄вве̄сыт, ма̄хум пуссын аквхурип ма̄ньха̄пыл ва̄равет, э̄рыӈ то̄нт та̄н тот но̄хпатэ̄гыт ос о̄выл места тах выгыт.

1094 2015.02.27. Светлана РОМБАНДЕЕВА

Э̄ргынйӣквнэ ханты ма̄хум. Кӯщаиг тот ханты нэ̄ Светлана Михайловна Сенгепова рӯпиты. Ювле хультум та̄л ма̄нь таквс э̄тпосэ̄т та̄н э̄ргынэ̄нылйӣквнэ̄ныл лов та̄л ты то̄влыс. Ам Светлана Михайловна ёт хо̄нтхатыгласум, ансамбляныл урыл таве китыгласлум. На̄н ань э̄лаль тав потре ловиньтэлы̄н. – 2004 та̄лт Лянтор ӯст ня̄врамыт ма̄гыс «Са̄лыкве» нампа китыт окружной фестиваль о̄лыс. Ты юипа̄лт ам кӯщаитн во̄вве̄сум, ла̄ве̄гыт: «Ӯсувт ма̄н ань ма̄нти ансамбль ат о̄ньще̄в. Ма̄нти о̄щнувув те, тай ёмас о̄лнув. Наӈ ат вуйхатэ̄гын? Э̄ргынйӣквнэ ма̄хум вос хо̄нтнувын, ма̄н наӈын нё̄тэ̄в». Тувыл аквта та̄л таквсы порат ма̄н йӣквуӈкв, э̄ргуӈкв та патсув. Ам кӯщаиг паттуве̄сум. Ханты ла̄тӈыл э̄ргыт э̄рге̄в, пе̄с йӣкванув йӣкве̄в. Лов та̄л сыс ма̄н са̄в ма̄т о̄лсӯв, са̄в ма̄т яласасӯв. Ма̄нь таквс э̄тпост Коми республикан Сыктывкар ӯсн ялсӯв, тот ня̄врамыт ма̄гыс фестиваль о̄лыс, тув во̄виньта̄лвесӯв. Ам ётум ань ма̄нь а̄гим э̄ргийӣкви. О̄йкам ма̄навн акваг нё̄ты, то̄ва тэ̄лат тав ва̄рапиянэ. Йӣквнэ̄в порат хотьютув ёхтуӈкве ат те ве̄рми, тав ма̄н ётув о̄с лю̄люмта̄лы йӣквуӈкве, койп ра̄туӈкв э̄ри те, койп ра̄ты. – Светлана Михайловна, наӈ хо̄т самын патсын? – Ам Пим я̄ ва̄тат самын патсум, тот яныгмасум. А̄ги о̄парищ намум Лемпина. Ане̄квагумащо̄йкагум палт Лям я̄ ва̄тат о̄с акваг о̄лыгласум. Ащо̄йкам Семён Павлович Песиков. Са̄лыӈколыӈ ма̄хум тот йис та̄гыл о̄лэ̄гыт, та̄н халанылт яныгмасум. О̄йкам ос Касум па̄лыл о̄лы, Сергей Степанович Сенгепов. Ам Пим я̄ хантыянув о̄лупса ва̄глум, та халт яныгмасум, тувыл о̄йкам о̄лупсатэ ос ла̄тӈаныл о̄с ёмащакв ва̄глум. Ме̄н о̄йкаме̄нтыл нила а̄ги, акв пыг о̄ньщиме̄н. Ща̄нягума̄щагум са̄лыӈколыӈ хо̄тпаг о̄лсы̄г, хӯл алыщласы̄г, во̄раясы̄г. Нила увщи ос хӯрум ягпыг о̄ньще̄гум. Ма̄н во̄рт яныгмасӯв. Са̄лы са̄в о̄щсӯв, ма̄ньта̄гыл пуссын са̄лыл яласасӯв, посым пӯт ва̄рсӯв. Тох та яныгмасӯв. Светлана Михайловнан потре ма̄гыс пӯмащипа ла̄тыӈ ла̄ве̄гум. Тав хо̄тпа нупыл сымыӈ нэ̄, мӯтраӈ э̄лумхо̄лас. Ще̄мьятэ ёт пуста̄гыл вос о̄лы, со̄тыӈыщ, щуниӈыщ вос о̄лы.

1094 2015.02.27. Александр ВЬЮТКИН

Ма̄ньщи пе̄с пормасыт суссылтавет. Ре̄тыӈ ю̄свой э̄тпос титхуйплов хо̄талэ̄т Ханты-Мансийск ӯст о̄лнэ «Торум Маа» колт «От экспедиции к экспозиции» нампа йильпи выставка пӯсвес. 1999 2003 та̄лыт сыс ма̄ньщи ос хо̄тал нэ̄глын е̄рт о̄лнэ ханты ма̄хум палт атым пе̄с йис пормасыт ань ты суссылтапт о̄лсыт. Ты пормасыт ма̄ньщи нэ̄в Нина Петровна Чернякова, такви а̄ги о̄парище наме щирыл Вынгилева, тот рӯпитаме порат атыгласанэ. Тав 2013 та̄лт а̄тимыг е̄мтыс. Ань ос тав наме ка̄сталан щирыл ты выставка щё̄питавес.

1094 2015.02.27. Светлана РОМБАНДЕЕВА

А̄кань ва̄рнэ нэ̄. Хурит ханты нэ̄ Виктория Викторовна Карчина по̄слым о̄лы. Тав Лянтор ӯст «Лянторский центр прикладного творчества и ремесел» колт художникконструкторыг рӯпиты. Округ янытыл манос э̄лы хо̄н ма̄т выставкат ос мо̄т са̄всыр хо̄нтхатыглапыт о̄лыгланэ̄ныл порат Виктория Викторовна тув акваг во̄виньта̄лаве, мирн такви рӯпататэ суссылтытэ (рущ щирыл мастерклассыг ла̄ваве). Сургут ӯст «Старый Сургут» нампа колт тав хотаӈ совыл а̄кань ва̄рыс, ты рӯпататэ суссылтастэ. Тав ла̄внэ̄тэ щирыл, тамле а̄канит Лям я̄ ва̄тат о̄лнэ ханты ма̄хум та̄н тох ю̄нтэ̄гыт, ма̄щтырлэ̄гыт. Тав ва̄рум а̄канянэ̄тыл ма̄хум маттем та пӯмщалахтасыт.

1094 2015.02.27. Светлана РОМБАНДЕЕВА

Тав ӯльпа та̄рыл пормас ва̄ри. Ты хурит ханты нэ̄ Фёкла Семёновна Бондаренко по̄слым о̄лы. Ювле хультум та̄л ва̄т са̄грапнал э̄тпосэ̄т Сургут ӯсн ялмум порат таве «Старый Сургут» нампа культура колт ка̄саласлум, по̄слыслум, мощ потрамасме̄н. На̄н ань Фёкла Семёновна потре ловиньтэлы̄н. – Ам Нижневартовский район Аган па̄вылт о̄лэ̄гум, тот самын патсум, яныгмасум. Тыт, Сургут ӯст, а̄гим о̄лы, хӯрум ня̄врам о̄ньщи. А̄тям Аган па̄выл хум, омам ос Касум е̄рныл о̄лыс. Казымский восстание о̄лме порат омам колта̄гланыл Аган нупыл ояс. А̄тям ёт тэ̄н тот ты акванхо̄нтхатсы̄г. Тыг ань ос рӯпатам суссылтан ма̄гыс во̄вве̄сум. Ань мӯй ма̄хум вос сунсэ̄гыт, соссаӈ мир пе̄с порат ӯльпа та̄рыл маныр ва̄рсыт, ма̄щтырласыт. Ам ань суссылтэ̄гум, хусапсов хумус сагаве. О̄влэ̄т ма̄н ӯльпа та̄р атэ̄в, ёмащакв щё̄питыянӯв, тувыл ущ матыр ва̄ре̄в, ма̄щтырлэ̄в. Э̄лнаӈ ма̄хманув ӯльпа та̄рыл са̄всыр хусапсовыт коныпал норыт акваннэ̄гсалан ма̄гыс ква̄лыг ва̄рсыт, сагсыт. Тамле та̄р кол ӯнттын порат ман мо̄т та̄рвитыӈ рӯпата ва̄рнэ порат сака яныг па̄рыс тотыс. Ам Фёкла Семёновна китыгласлум, ӯльпа та̄р щё̄питаӈкве та̄рвитыӈ? Тав ла̄внэ̄тэ щирыл, атхунь та̄рвитыӈ, щё̄питан порат сака рӯпатаӈ. Тув са̄в ё̄р пинуӈкве э̄ри. Ос ты рӯпата сака пӯмыщ. Хунь ва̄рнэ тэ̄лан матарыг е̄мты, татем ща̄гтэ̄гын, о̄с матыр ва̄руӈкве тахмае̄гын. Аган па̄вылт соссаӈ ма̄хум хӯл алыщлан ос во̄раян пормасаныл ва̄рнэ ос о̄щнэ кол о̄лы. Фёкла Семёновна тот кӯщаиг рӯпиты. Такви па̄влэ̄т тав намыӈсуиӈ хо̄тпаг о̄лы. Тамле намытыл майвес: Народный мастер России, заслуженный деятель культуры ХМАО-Югры, Почётный гражданин Нижневартовского района, п. Аган Нижневартовского района. Ты сака ёмас, мӯтраӈ э̄ква, хо̄тпа нупыл сымыӈ э̄лумхо̄лас. Ты я̄тил хо̄тпа пуста̄гыл вос о̄лы, На̄й-О̄тыранэ̄н вос ӯргалаве! Пус ка̄т, пус ла̄гыл!

1094 2015.02.27. Николай МЕРОВ

Ӯй ӯлыглан э̄ргыт э̄лаль тотавет. Ха̄льӯс культура Центр колт Раиса Петровна Загородняя рӯпиты. Ты ханты нэ̄ пе̄с йис о̄лупса ва̄рмалит ёмщакв ва̄ганэ. Ам тув ялнэ̄м порат тав ётэ хо̄нтхатыгласум. Раиса Петровна «Ӯй йӣквнэ» ма̄т са̄в щёс о̄лыглас, са̄в пе̄с потыр ты урыл ва̄г. Пе̄с ма̄хум Ӯй йӣквнэ порат ялпыӈ э̄ргыт э̄ргыгласыт. Ты э̄ргыт маныр номт тотэ̄гыт, тав ты урыл а̄нумн мощ потыртас. Ма̄ниг о̄лме̄т яныгмам па̄влэ̄т Ӯй ка̄тынпаттум юипа̄лт ма̄хум тӯлыглахтасыт. То̄ва потрыт тав ща̄нягеа̄щаге̄ныл хӯнтыгла̄лыс. Ань хумус ты ва̄рмалит номиянэ, тох потыртас. На̄н тав потре э̄лаль ловиньтэлы̄н: «Ма̄ньщи ос ханты ма̄хманув ма̄гыс щар яныг ялпыӈ хо̄тал ты «Ӯй йӣквнэ нак» о̄лы. Ты ялпыӈ хо̄тал ва̄рнэ ма̄гыс, о̄влэ̄т пупа̄пщикве юил кояве, таквсы порат хо̄т тав ёлхуи, во̄раян хо̄тпат та ма̄ та̄рапаттыяныл. Ётыл, тэ̄лы порат тав ма̄колэ̄н хум хо̄тпат ёхтэ̄гыт, ка̄тынпаттуманыл юипа̄лт, таве па̄вылн тотыяныл. Ӯй йӣквнэ ма̄н са̄всыр па̄влытныл рӯтыӈыщ о̄лнэ ма̄хум мӯйлуӈкве акванатхатыглэ̄гыт. Хӯрмах, атах манос са̄тах хо̄тал Ӯй йӣкваве. Ты ялпыӈ хо̄талытн ма̄ньлат ма̄хум о̄с ёхталэ̄гыт. Тот та̄н халанылт ва̄йхатэ̄гыт, ётыл ща̄нитна̄щитн ха̄йтталавет. Тувыл ты ва̄рмальн Ӯй ӯлыглан э̄рыг ва̄нэ яныгпа̄ла хо̄тпат э̄ргуӈкве во̄выглаве̄сыт. Ты э̄ргыт пе̄с йис пораныл э̄лаль тотавет, то̄ват ань ты хо̄тал мус хультсыт. То̄ва ялпыӈ э̄ргыт сака хоса э̄ргавет ос туп хум хо̄тпат та̄наныл ёмщакв ва̄ганыл. Ялпыӈ э̄рыг э̄ргын хо̄тпа маныр ка̄салы, та урыл о̄с э̄рги. Ӯй колт тамле э̄ргыт э̄ргавет: хотыл ты Ӯй ма̄н ёхтыс, хо̄т тав ка̄тынпаттувес, хунь юв тотвес, хумус щё̄питавес, юв тӯлвес ос хумус ялпыӈ хо̄тал о̄вылтахтас. Хум хо̄тпат хорамыл ю̄нтым ке̄нтыл, нуй са̄хил, па̄ссал, ня̄рал масхатэ̄гыт, вильтаныл нуй то̄рло̄мтыл лаппантыяныл. Ке̄нтыт тармыл па̄выл ӯргалан На̄й-О̄тырыт хансаныл ю̄нтым о̄лэ̄гыт. Пассат ос мо̄т хансал ю̄нтым о̄лэ̄гыт. Ты маснутыт туп Ӯй йӣквнэ порат масыглавет, нас тох щар ат о̄ньщавет. Хум хо̄тпа Ӯй ӯлыглан э̄рыг о̄вылтанэ порат, тав по̄хат лю̄льнэ хо̄тпат тулё̄влыл акванпӯвумтахтым пуӈк пинэ̄гыт ос ка̄таныл но̄ӈхаль тотыгпа̄лыяныл. Э̄рыг аква, хӯрум манос тыгыл иӈ са̄внув щё̄с э̄ргаве. Учёный хо̄тпат пе̄с порат ялпыӈ э̄ргыт хансым яласасыт. Ты урыл ань нэ̄пакыт хансым о̄лэ̄гыт. Ялпыӈ э̄рыг щирыл, пупа̄пщикве То̄рум пыгыг о̄лыс. Акв ма̄т о̄выл пыгыг, мо̄т ма̄т хӯрмит пыгыг, хотты ма̄т ос са̄тыт пыгыг ла̄ваве. Ка̄сыӈ па̄вылт соссаӈ ма̄хум та̄нки щираныл ты урыл потыртасыт. Пупа̄пщикве о̄влэ̄т Нуми То̄румт о̄лыс, ма̄ нупыл ёлаль нас сунсыс. Нё̄тнэ во̄рыӈ, тӯрыӈ, я̄ӈ ма̄т тав сыме̄н татем хо̄ясыт. Хоса ман ва̄ти сунсыс, То̄рум а̄ще во̄вуӈкве патыстэ, таве ёл вос та̄ртытэ. А̄ще ты кос таве ёлта̄ртуӈкве ат таӈхыстэ, ётыо̄вылт та̄ртыстэ. Пыге ёлта̄ртнэ ма̄гыс а̄па ю̄нтвес, тув ӯнттувес ос ёлта̄ртуӈкве та патвес. Ла̄щалла̄щал ма̄ мус та ёхтыс. Нумын тав номсыс, ма̄ састумыг о̄лы. Ма̄ та̄рмыл ва̄глыс, насати тав урамыӈыг, во̄ӈхаӈыг о̄лнэ̄тэ, ка̄рыс йӣвыт халт тав щар ма̄ниг е̄мтыс. Воссыг маныр ва̄руӈкве, во̄р янытыл ощатахтым ё̄мыгтаӈкве та патыс. Мощ ё̄мыгтас ос тэ̄пъялаӈкве тахмаяс. Сыресыр товлыӈ ӯит, во̄руит ка̄салас. Та̄н юипа̄ланылт ня̄влалахтым ос хоттымат кит ла̄глыл ё̄мыгтан хащта̄л ут палт нэ̄глыс, а̄мпарыт ос сӯмъяхыт ка̄салас. Акв а̄мпар кӣвырн ла̄щлакв воратас, тувыл тэ̄нут тӯлмантас, во̄рн тотыстэ, ёмщакв тэ̄пъялас. Таве̄н ты ва̄рмаль сака мӯстыс, ос тувыл тэ̄нут тӯлмантаӈкве та патыс. Ма̄хум номсэ̄гыт, аман хотьют тэ̄нут тӯлманты, ла̄гылпаттаге э̄лумхо̄лас хурипаг, самын ос ат ликмалы. Ма̄хум та тӯлмах кинсуӈкве патсаныл. Та сыс, пупа̄пщикве сытамыг па̄ль во̄р янытыл ё̄мыгтас. Акв ма̄т тамле э̄рыгсов о̄лы, тав е̄ри патум йӣв ӯлтта ва̄ӈкме̄тэ порат, ня̄р сове пуныӈыг е̄мтыс. О̄влэ̄т тав ла̄гылпаттаге ос ка̄тпаттаге э̄лумхо̄лас хурипаг о̄лсыт, ётылнув пунытаве̄сыт ос консыл яныгмаве̄сыт. Ва̄тихал тэ̄нут тӯлмантанэ̄тэ ма̄гсыл, тав э̄лумхо̄ласн ка̄тынпаттуӈкве ты патвес. Пупа̄пщикве ка̄тынпаттаве, сахитэ а̄ӈхаве, а̄ваӈ та̄гыл юв тотаве. Ма̄хум ва̄ганыл, тав То̄рум пыг, йӣквнэ порат таима̄гыс таве ӯлыглан э̄ргыт э̄ргавет, тав исэ но̄ӈхаль вос мины. Ты ялпыӈ хо̄талытн са̄всыр ма̄ныл ма̄хум ёхталэ̄гыт. Э̄ргыт юипа̄лт та̄н па̄влыӈ На̄й-О̄тырыт суссылтыяныл. Та̄н То̄рум пыг ёт тот акванхо̄нтхатэ̄гыт, аквъёт са̄всыр тэ̄ла урыл потыртэ̄гыт. Ты юипа̄лт ялпыӈ хо̄тал ёмщакв минуӈкве паты. Та хо̄тпа, хотьют пупа̄пщикве ка̄тынпаттыс, а̄ва ляпат ӯнлы, акваг ла̄ви: «Ты а̄ти ам наӈын аласлум». Тувыл хум хо̄тпат ощхулиӈ тӯлыглапыт ва̄руӈкве та о̄вылтахтэ̄гыт. Та̄н ты ва̄рмаль товлыӈ ӯит манос во̄руит нупыл пе̄рыгтыяныл, э̄рттам та̄н ты пупа̄пщикве ка̄тынпаттысаныл. Ӯй йӣвкнэ ва̄рмаль э̄тэхо̄талэ мины, ма̄хум ёл ат хуе̄гыт. А̄лпылыг е̄мты, ос э̄лаль тӯлыглахтуӈкве та о̄вылтахтэ̄гыт. Ты тӯлыглапыт э̄лумхо̄лас ощмар ва̄рнэ накыт мовиньтавет. Манхурип ощмар, урк, э̄сыгхатан ос мори о̄лнэ нэ̄хум хо̄тпат о̄лэ̄гыт, ты тӯлыглапыт хосыт суссылтаве ос пӯмащ, ощхулиӈ йӣквыт йӣквавет. Тӯлыглапыт ёлпо̄йтыглан сыс нэ̄ хо̄тпат э̄ргыт э̄рге̄гыт. Пе̄с пораныл ань ты хо̄тал мус пупа̄пщикве ялпыӈ уиг ловиньтаве. Яныг ӯра Октябрьский районт Вежакоры па̄выл по̄хат о̄лы. Пе̄с ма̄хум ка̄сыӈ та̄л Ха̄льӯс, Белоярский ос Октябрьский районытныл Ӯй йӣквуӈкве тув акванатхатыгла̄лсыт. Ты коныпал ма̄хум пуӈк пинуӈкве ос йир тӯщтуӈкве тув яланта̄лсыт. Хумус пе̄с порат Ӯй йӣквыглавес, ам ва̄нэ̄м щирыл та потыртасум. » Ты сака яныг ялпыӈ ва̄рмаль, ты урыл хоса потыртаӈкве ро̄ви. Раиса Петровна ла̄внэ̄тэ щирыл, ва̄т нупыл ат та̄лкем минам юипа̄лт Ӯй йӣкв ва̄нэ хо̄тпа са̄в о̄лыс. Ты накт ты ва̄рмаль ва̄нэ хо̄тпа сака мощща хультыс. Та сыс, ялпыӈ э̄ргыт ва̄нэ хо̄тпат иӈ о̄лэ̄гыт. Та̄н ань Ӯй йӣквнэ накт ты э̄рге̄гыт. Ос ма̄ньлат ма̄хум ты тэ̄ла нупыл ат сунсэ̄гыт, э̄ргыт ат ханищтыяныл. Советский Союз о̄лум порат Ӯй йӣквуӈкве ат та̄ртыглавес, ма̄хум сытамыг йӣквыгласыт. Таима̄гыс ань о̄лнэ ма̄хум ты урыл мощща ва̄гыт. Моще̄ртын тох е̄мты, Ӯй ӯлыглан э̄ргыт ла̄щал та ёрувлавет. Ос таи ёмас, учёный ос этнограф хо̄тпанув Ӯй йӣквнэ нак нэ̄пакытн хансуӈкве а̄лымасаныл. Пе̄с порат хумус ялпыӈ э̄ргыт э̄ргыглаве̄сыт, хумус ма̄хум тӯлыглахтасыт, ты тэ̄лат пуссын ёлхансым о̄лэ̄гыт. Ты хосыт хуньт э̄ргыт о̄с тах ква̄лттапавет. Ань ос ты накт соссаӈ ма̄хманув ва̄тихал Ӯй йӣкв ва̄рыглэ̄гыт. Сакати ма̄н ты тэ̄ла мощ э̄лаль тотылӯв.

1094 2015.02.27. Тамара МЕРОВА

Ма̄ янытыл ща̄нь ла̄тӈыт янытлан хо̄тал о̄лыс. Рущ ла̄тӈыл ла̄внэ "тотальный диктант" Россия янытыл о̄выл щёс 2004 та̄лт ва̄рыглавес. Тав такви девиз о̄ньщи: «Ма̄к номтыӈыг ла̄тӈыт хансуӈкве – ёмас тэ̄лаг о̄лы». Тувыл со̄ль, ка̄сыӈ та̄л диктантпотыр хансуӈкве, са̄внув ма̄хум ёхталаӈкве патсыт. Та̄н пуссын та̄нки номтаныл а̄рталыяныл ос таима̄гыс ханищтахтэ̄гыт. Юио̄выл та̄лытыт диктант ре̄тыӈ ю̄свой э̄тпос 21 щислат, ща̄нь ла̄тӈыт янытлан хо̄талт, ва̄рыглаве. Ты та̄лт ма̄н округувт ма̄ньщи, ханты ос ё̄рн ла̄тӈыл хаснэ акв тамле тэ̄ла ва̄руӈкве номылматвес. Тав А̄с-угорский ма̄хум институтт рӯпитан хо̄тпатн щё̄питавес. Ос округ образования тармыл рӯпитан институтыт школат диктант хансуӈкве о̄с ла̄всаныл. Та щирыл округ янытыл ва̄т нупыл нила ма̄т соссаӈ ла̄тӈыл ма̄хум диктант хассыт. Ха̄льӯс районт тыи Кульпаст, Саранпа̄вылт ос Ха̄льӯст кит я̄нас ма̄т ма̄хум атыглаве̄сыт. Белоярский районт тыи Ванзеватыт, Касумт, Полноватыт ос Белоярскийт. Сургутский районт ма̄хум Лянтор ӯст, Русскинская ос Угут па̄влыгт диктант хансуӈкве во̄выглаве̄сыт. Нижневартовский районыт туп па̄влыӈ ма̄т о̄лнэ ма̄хум акванатыглаве̄сыт: Варъёган, Корлики, Ларъяк ос Чехломей. Октябрьский районт Нярихумит Лӯи па̄вылт; ос Кондинский районт Шугурт, Ханты-Мансийский районт Кышикт диктант ва̄рыглавес. Яныг ӯсыӈ ма̄т Сургутыт, Ханты-Мансийскат, Няганьт ос Урайт о̄лнэ соссаӈ ма̄хум во̄выглаве̄сыт. Институтт рӯпитан хо̄тпат Еремей Данилович Айпин хансум потырохсатэ «Ма̄ суе хӯнтлэ̄гум» ма̄ньщи, ханты ос ё̄рн ла̄тӈытн толмащласаныл. Ёрн ла̄тӈын потыр А. В. Филатован толмащлавес. Ханты ма̄хум ты потыр та̄нки о̄лнэ е̄ранылт потыртан ла̄тӈаныл щирыл толмащласаныл. Ваховский диалектыл М. А. Прасинан хасвес, среднеобской Л. В. Кашлатован ос сургутский А. Н. Волкован. Тувыл казымский диалектын потыр В. Н. Соловар толмащластэ ос йильпи графика щирыл хансыстэ. Ос аквты потыр Ф. М. Лельхова пе̄с о̄щнэ графикал хансыстэ. Ань ханты ма̄хум хоты хурип графикал хансуӈкве патэ̄гыт, та̄нки вос пе̄рие̄гыт. Ма̄ньщи ла̄тӈын потыр С. С. Динисламова толмащластэ. Ань Ханты-Мансийскат ва̄т нупыл акв ма̄ньщи э̄лумхо̄лас диктант хансуӈкве ёхталасыт. Са̄выӈпа̄лэ педагогический колледжит ханищтахтан а̄гит о̄лсыт, тувыл кит институтыгт рӯпитан нэ̄т, ос акв нэ̄ "Лылыӈ со̄юм" студияныл ос ам о̄лсӯв. О̄влэ̄т ма̄хум э̄лыпа̄лт Светлана Герасимова, А̄с-угорский институтт научный сотрудникыг рӯпитан нэ̄, ты ханищтап урыл пуссын э̄рнэ тэ̄лат хӯлтыс. Тувыл хаснэ потрув э̄лаль Людмила Николаевна Хозумован (Панченко) ловиньтавес ос ма̄н тав юипалэ̄т пуссын хассӯв. Ханты ма̄хум кит я̄нас колнакыгт акванатыглаве̄сыт. Касум ма̄хум диалектыл потыр Ирина Максимовна Молданова ловиньтастэ. Тот хо̄тхуйлов ханты ма̄хум о̄лсыт. Ос сургутский диалектыл потыр Наталья Андреевна Ачина ловиньтастэ, тот нила хо̄тпа хансыс. Ань ка̄сыӈ хо̄тпа хумус потре хансыстэ, ётылнув такви та̄рапаттуӈкве ве̄рми. Таима̄гыс институтт ищхӣпыӈ ло̄псэ̄т кисхатуӈкве э̄ри, тув такви майлам «шрифткод» вос хӯлтытэ. Комиссият о̄лнэ ма̄хум ань рӯпатат пуссын уральтыяныл. Округ янытыл мирн хансым диктантыт пуссын ты институтн тах ке̄тавет.

1094 2015.02.27. Николай МЕРОВ

Тэ̄рпи лӯпта ос тэ̄нутпормас та̄стын хо̄тпат. Мо̄лты та̄л ва̄т са̄грапнал саквалан э̄тпост округув янытыл та̄нки рӯпата ва̄рнэ хо̄тпат Ханты-Мансийск ӯсн тыналахтуӈкве ёхталасыт. Ты тэ̄ла ка̄сыӈ та̄л щё̄пита̄лаве. Тот ка̄тыл ва̄рим пормасыт, са̄всыр хӯлыт, пилыт, лахсыт ос во̄руй совыт тыналавет. Тув ёхталан мир округувт ва̄рнэ тэ̄нутыт а̄рталаӈкве ве̄рме̄гыт. Хотьют ка̄сащи, такви ма̄гсылэ матыр ёвтуӈкве ве̄рми. Округувт манхурип тэ̄нутпормас ва̄раве, мир вос ва̄ганыл, таима̄гыс тамле ва̄рмаль ты щё̄пита̄лаве. То̄нт ты тыналахтан ва̄рмальн акв ма̄ньщи хум ёхталас. Ты Пётр Павлович Монин, тав «Правдинск» нампа соссаӈ ма̄хум общинат кӯщаиг о̄лы. Ты община 2005 та̄лт рӯпитаӈкве о̄вылтахтас. Та̄н Ханты-Мансийский район Горноправдинск па̄вылт рӯпитэ̄гыт. Ам Пётр Павлович такви ва̄рнэ рӯпататэ урыл китыгласлум. На̄н тав потре э̄лаль ловиньтэлы̄н: «Ма̄н общинавт хӯрум хо̄тпа рӯпитэ̄в. Ме̄н пыгме̄нтыл ос акв ханты хум. Община пӯнсым па̄сныл акваг тыг тыналахтуӈкве ёхталэ̄в. Маныр тэ̄нутпормас щё̄питэ̄в, мощщалмощщал тыг тотыглыянӯв. Ма̄хум ат ке ёвтэ̄гыт, са̄кати сунсыяныл, э̄рыӈ, ётылнув хотьютн матыр э̄рмыглы. Пилыт, ла̄хсыт, ӯльпа па̄квсамыт, маныр во̄рт яныгми, пуссын та̄стэ̄в. Атум утанув тэ̄нутыг ат ва̄риянӯв, нас по̄льтыянӯв ос тыналыянӯв. Ма̄хум ёмас ёвтэ̄гыт. Тувыл ос пыгме̄н ёт во̄раиме̄н. Община нупыл хансым йис ма̄ о̄ньщиме̄н. Тот ке̄рнялил нё̄хыс, охсар, лэ̄пак пувиме̄н. Янгуй ма̄гыс лицензиянэ̄пак выгме̄н ке, нё̄выль ка̄тынпаттыме̄н. Таквсы порат тот сӯйпил лӯпта атыме̄н. Сӯйпил ос суйпил лӯптат са̄в а̄гм пусмалтэ̄гыт. Ты лӯптат тӯяг атавет, ле̄ккарыт ос ма̄хум ла̄внэ̄ныл щирыл, та̄н са̄в э̄рнэ витамина о̄ньще̄гыт. Лӯима̄т о̄лнэ ма̄хум ты пил ос лӯптат пусмалтахтын ма̄гыс акваг атыгласыт. Тыил э̄лумхо̄лас са̄ӈква̄хвтас, со̄рыг а̄гм, сым а̄гм, по̄льтахтын а̄гм ос мо̄т сыресыр а̄гм пусмалтас. Ты пил ня̄рыг тэ̄нэ порат о̄с са̄в по̄рт тоты. Сӯйпил хоса о̄ньщуӈкве ро̄ви, лю̄лиг ат е̄мты. Тувыл ха̄льйив са̄в атэ̄в. Соссаӈ ма̄хум тыил ка̄тла̄гыл лувнакыт, ма̄йт, со̄рыг ос инфекция а̄гм пусмалтасыт. Ха̄льйив са̄вныл ва̄рнэ вит ке̄лп сыстамты ос хум хо̄тпатн яныг ё̄р мыг. О̄йка тамле тэ̄рпи айнэ̄тэ юипа̄лт э̄кватэ сака э̄руптаӈкве патытэ. Ты сака ёмас тэ̄рпи, туп пусмалтан ва̄рмальтоты. Таве о̄с тӯяг атаве». Ты коныпал ты общинат рӯпитан хо̄тпат са̄всыр хӯл алыщлэ̄гыт. Пӯвум хӯланыл солвалтыяныл, посымыл посымтыяныл ос по̄лямыг тыналыяныл. Са̄выӈпа̄лэ ты хосыт олн сэ̄лэ̄гыт. Та̄н ураныл тох ла̄вуӈкве ро̄ви: та̄н мир ма̄гыс э̄рнэ тэ̄рпи ос тэ̄нутпормас щё̄питэ̄гыт. Ты ва̄рмаль щирыл рӯпатаныл э̄лаль акваг ёмщакв вос мины.

1094 2015.02.27. Александр ВЬЮТКИН

Ка̄сыӈ хумн э̄рнэ э̄нтап. Ре̄тыӈ ю̄свой э̄тпос котиль хо̄таланэ̄т Ханты-Мансийск ӯст о̄лнэ «Лылыӈ со̄юм» колт соссаӈ хум хо̄тпатн о̄щнэ э̄нтап урыл потыр о̄лыс. Та ханищтап ханты мир пе̄с йис о̄лупса ханищтан нэ̄ Татьяна Александровна Молданова ва̄рыглас. Татьяна Александровна ханты, ма̄ньщи ос ё̄рн хум хо̄тпатытн о̄щнэ э̄нтапква̄лыг урыл потыртас. Учёныиг о̄лнэ нэ̄ о̄йкатэ̄нтыл хум хо̄тпа э̄нтапыт ханищтым са̄в та̄л рӯпитасы̄г. Тав о̄йкатэ о̄с учёныиг о̄лы, тав наме Тимофей Алексеевич Молданов. Тэ̄н сас Белоярский район Касум па̄вылныл о̄лэ̄г. Татьяна Александровна потре щирыл, ма̄н ма̄вн ань о̄щнэ э̄нтапыт XV-XVI нотыт йис порат тотве̄сыт. Ань пе̄с па̄выл каныт хилнэ ма̄хум хӯлтэ̄гыт, та̄н хо̄нтыглам э̄нтапыт хораманыл ща̄лыголн ос а̄нох те̄рныл ва̄рим о̄лсыт. Ты те̄рыг ма̄ тӣврыт са̄в та̄л хӯюӈкв ве̄рме̄г. Пе̄с порат о̄ньщим э̄нтапыт хораманыл мощ мо̄тсырнуве̄г о̄лсыт. Та̄н та порат са̄всыр во̄руй хуритыл хорамтаве̄сыт. Та коныпал сыраяныл ос ӯнтуп ханнэ ма̄ ва̄рим о̄лыс. Э̄нтапква̄лгыт титпис со̄выл ю̄нтыглаве̄сыт. Та порат ва̄рим хорамыт са̄всырыг о̄лсыт. То̄ват хотыл э̄лы ма̄ныл тыг тотыглаве̄сыт. Лӯи ма̄т соссаӈ ма̄хум те̄р толтым та̄нти хорамыт о̄с со̄ссыт. Ты е̄рт те̄р мощщаг о̄лнэ ма̄гсыл, те̄р пе̄нтсыл са̄лы ос янгуй а̄ньтыл хорамыт яктуве̄сыт. Таима̄гсыл ты та̄н са̄всырыг сусхатасыт. Йис пораныл са̄лыӈ ос то̄ва во̄раян ма̄хум о̄щнэ э̄нтапаныл ань ты мус ты ёхтысыт. Ка̄сыӈ э̄нтапыӈ хум такви щире̄т э̄нтапе хорамтытэ. Акв хурип тит э̄нтап ат хо̄нтэгы̄н. Ань о̄лнэ соссаӈ хум хо̄тпа халт то̄ват э̄нтапква̄лыг самын пыл ат ва̄щинтасыт. Са̄лыӈ ос во̄раян хум э̄нтапе та̄л рӯпататэ э̄лаль ат лакви. Э̄нтаптахтын хум ка̄тыт о̄щнэ пормасанэ пуссын ляпат о̄лэ̄гыт. Татьяна Александровна потре а̄нумн сака мӯстыс. Ты ёмас ханты нэ̄н са̄в та̄л пуста̄гыл о̄луӈкв ла̄ве̄гум. На̄й-О̄транэ̄н ёмщакв вос ӯргалаве.

1095 2015.03.13. Валентина УЗЕЛЬ

Соссаӈ мир ма̄гыс йильпи кӯщаиӈ ма̄ ат ва̄раве. Та э̄тпост округ Дума колт рӯпитан Ассамблея депутатанув сапра̄ни ва̄рыгласыт. Кӯщаиг о̄лнэ хум Еремей Данилович Айпин са̄в мир акванатыглас. Та̄н ань акв та̄рвитыӈ ва̄рмаль урыл потыртасыт. Ма̄н округувт хосат та̄гыл мир ӯргалан ос ня̄врамыт ӯргалан тит хо̄тпаг я̄нас ма̄т рӯпитэ̄г, рущ ла̄тӈыл тэ̄н тох ла̄ваве̄г – Уполномоченный по правам человека ос Уполномоченный по правам ребёнка. Ань ма̄н соссаӈ мир па̄лыл пе̄риим депутатанув акв тамле хо̄тпа кӯщаиг ӯнттуӈкв номсысыт, тав соссаӈ мир ӯргалым ос ма̄ньщи, ханты мирыг та̄рвитыӈ ва̄рмаляныл оснпаттым вос рӯпиты. Рущ ла̄тӈыл ты хо̄тпа тох вос ла̄ваве – Уполномоченный по правам коренных малочисленных народов округа. Ань ты сапра̄нит са̄всыр кӯщаит о̄лсыт. Акв кӯщай о̄йка округ правительство па̄лыл о̄лыс. Тав та̄ра ла̄выс, йильпи кӯщай соссаӈ мир ӯргалан ма̄гыс ат э̄ри. Ань ма̄н та̄рвитыӈ порат о̄лэ̄в, олн а̄тим. Таима̄гыс иӈ акв кӯщаиӈ ма̄ ва̄руӈкв ат э̄ри. Такос Надежда Геннадьевна Алексеева ос Еремей Данилович Айпин тав ётэ воритотсы̄г, тох нэ̄матыр акванпотыртахтын ла̄тыӈ ат хо̄нтсыт. Ты сапра̄нит о̄лум ма̄хум ла̄вве̄сыт, ань олн те а̄тим ос округ яныг кӯщаюв ты йильпи тэ̄ла ёт ат те ка̄сащи, мо̄тыт та̄л та̄н соссаӈ мир ӯргалан ты йильпи кӯщай урыл э̄лаль потыртаӈкв тах патэ̄гыт.

1095 2015.03.13. Тамара МЕРОВА

Пенсияолныт хумус атавет. Округувт о̄лнэ мир пенсияныл ловиньтан колт ля̄ххал тотнэ хо̄тпат акванатыглаве̄сыт. Тот кӯщаиг о̄лнэ нэ̄ Татьяна Зайцева 2015 та̄л па̄сныл пенсияолныт йильпииг ловиньтан ва̄рмаль урыл потыртас. Ань ка̄сыӈ хо̄тпан ва̄ӈкве э̄ри: тав пуссын сэ̄лнэ олнанэ рӯпитан ма̄тэ̄т нэ̄пакн хансым вос о̄лэ̄гыт. Тыгыл «страховой» олныт са̄внув виӈкве ве̄рмаве, та̄н пенсия ма̄гыс ловиньтавет. Ма̄хум хоттӯйтум олнаныл паттыиг ётыл пенсияныл мощщаг ловиньтавет. Манса̄вит та̄л на̄н страховой олныт ойтэгы̄н – та та̄ланыл ма̄гыс пенсиян но̄хяныгми. Ань нэ̄ хо̄тпат 55 та̄ланыл то̄влум порат, хум хо̄тпат 60 та̄ланылт то̄влум порат пенсиян минуӈкве ат ке ка̄саще̄гыт ос э̄лаль рӯпитаӈкве патэ̄гыт ке – та̄н пенсияныл «премиальный коэффициент» щирыл э̄лаль тах са̄вми. 1967 та̄лт самын патум хо̄тпат ос тыгыл ма̄ньнуве̄г о̄лнэ ка̄сыӈ хо̄тпа такви вос пе̄рии – тав туп «страховой» олныт акванатыянэ манос «накопительный» олныт атуӈкве паты. Ань ма̄хум йильпи щирыл атнэ пенсияныл «баллыг» ловиньтавет. Ка̄сыӈ э̄лумхо̄лас та̄л сыс лов балл мус олн миӈкве ве̄рми. Ты ма̄гыс таве̄н та̄л сыс 624 со̄тыра солко̄ви сэ̄луӈкве э̄ри. Хунь пуссын акванловиньтым 30 балл акванаты, то̄нт тав матумпа̄лаг е̄мтнэ порат пенсиял (пенсия по старости – рущ щирыл) ойтуӈкве патаве. Матыр урыл на̄н китыглахтуӈкве таӈхегы̄н ке – на̄нки Пенсионный фонд ищхӣпыӈ ло̄псэ̄т матыра̄ти хо̄нтуӈкве ве̄рмегы̄н. Тот пенсиян атнэ олныт «баллыг» ловиньтан ханищтап о̄лы.

1095 2015.03.13. Людмила ТЕТКИНА

Пе̄с йис ва̄рмалит урыл потыр о̄лыс. Ты э̄тпос 6 хо̄талэ̄т Ханты-Мансийск ӯст Семейный совет нампа сапра̄ни о̄лыс. Са̄в ня̄врам о̄щнэ ща̄нита̄щит, ня̄врам ханищтан хо̄тпат, ле̄ккарыт ос ка̄ркамыг рӯпитан ма̄хум округ янытыл тув во̄виньта̄лве̄сыт. О̄влэ̄т та̄н школат, пӯльницат, а̄гмыӈмосыӈ хо̄тпатн нё̄тнэ колыт ос спорт щирыл рӯпитан колыт хумус рӯпитэ̄гыт, та урыл потыртасыт. Ань общественный организацият та̄н уральтасаныл ос щар ма̄к ёмащакв рӯпитан кол пе̄риясыт. Наталья Комарова ос ты урыл ла̄выс: «Ма̄хум пӯльницат, школат, мирн нё̄тнэ колыт уральтым ёмащакв рӯпитан хо̄тпат пе̄риясыт. Ма̄н ань ва̄глув, хоты па̄влытт манос ӯсытт ка̄ркам ма̄хум о̄лэ̄гыт. Та̄наныл янытлаӈкве патыянӯв». Ты та̄л округувт соссаӈ мир пе̄с накыт янытлан та̄лыг намаявес. Манхурип рӯпата ты кастыл округувт ва̄раве, та урыл потыр о̄с о̄лыс. Вячеслав Кондин, «Торум Маа» нампа музейт рӯпитан хум, ялпыӈ хо̄талыт урыл ла̄тыӈ ла̄выс. Ма̄ньполь э̄тпос оигпан э̄лыпа̄лт та̄н «Тылащ пори» ялпыӈ хо̄тал ва̄ре̄гыт. Туи порат Нефтеюганский районын ма̄ньщит, хантыт ма̄ньха̄пыл касуӈкве акванатыглыяныл. Ты та̄л та̄н о̄выл щёс «Витхон» ялпыӈ хо̄тал тах щё̄питэ̄гыт. Ты коныпал та̄н та̄л сыс са̄в мо̄т ялпыӈ хо̄талытн мӯй ма̄хум тах во̄выглыяныл. Ты юипа̄лт Фёкла Бондаренко, Нижневартовский район Аган па̄выл о̄лнэ ремёсла центрыт кӯщай э̄ква, ос округ общинатыт рӯпитан хо̄тпат соссаӈ мир культураныл э̄лаль тотнэ ва̄рмалит ос та̄нки тэ̄ланыл урыл потыртасыт.

1095 2015.03.13. Людмила ТЕТКИНА

Налоголн урыл ля̄ххал. Ольга Литова налоголн акванатнэ ма̄т кӯщаиг о̄лы. Тав декларациянэ̄пак урыл потыртас. 2014 та̄л сыс округувт са̄в олн сэ̄лнэ ма̄хум та̄нки нэ̄паканыл яныгполь э̄тпос 30 хо̄талэ мус та̄н палтаныл вос ке̄тыяныл ос о̄йттур э̄тпос 15 хо̄талэ мус налоголн вос ойтэ̄гыт. Ты рӯпата ат ке ва̄ре̄гыт, та̄н штрафыл пинавет. Кӯщай нэ̄ ла̄вме щирыл, та та̄л сыс тыт о̄лнэ мир пуссын аквъёт 70 млрд. солко̄ви налоголн ойтсыт. Округувт ань 8 щё̄лыӈ хо̄тпа о̄лы, та̄н халанылт акв э̄лумхо̄лас та̄л сыс 10 млрд. солко̄ви сэ̄лыс. 7 хо̄тпат миллионерыг о̄лэ̄гыт. Ще̄мья кол ке ёвтыс, нэ̄гхумыг сас налоголныл ювле ань ойтаве̄г. Акв э̄лумхо̄лас кит миллион солко̄вилныл 13% савит налоголныл ювле миве. Ще̄мья кол ёвтнэ нэ̄паканыл та̄н палтын ке ке̄тыныяныл, нэ̄гхумыг сас 260 со̄тыра солко̄ви ойтавет. Тох акв ще̄мья 520 со̄тыра соко̄вил виӈкве ве̄рми.

1095 2015.03.13. Николай МЕРОВ

Номтыӈ ня̄врамыт нё̄тавет. Та э̄тпос 18 хо̄талэ̄т округ кӯщай ва̄ӈын хум А. Путин заседание ва̄рыглас. Округувт ще̄мьятн ос ня̄врамытн нё̄тмил ва̄рнэ программа хумус рӯпиты, ты урыл тот потыртасыт. Ань са̄в ханищтахтын колыт о̄лэ̄гыт, ма̄к номтыӈ ня̄врамыт хумус тот нё̄тавет, ты урыл С. М. Буторина потыртас. Тав культура департамент кӯщай ва̄ӈын хо̄тпаг рӯпиты. Нэ̄ ла̄выс, ня̄врамыт ма̄гыс са̄в рӯпата тыт ва̄раве, щар номтыӈ ня̄врамыт са̄всыр ва̄рмальн ханищтавет. Та̄н ма̄гсыланыл хӯрум яныг ханищтап кол о̄лы: Сургут ӯст рущ ма̄хум о̄лнэхӯлнэ накыт э̄лаль тотнэ колледж ос акв яныг ёнгын кол тот о̄лы. Ханты-Мансийск ӯс искусства Центр кол рӯпиты. Са̄всыр ма̄т пуссын аквъёт налыман нупыл ат со̄тыра номтыӈ а̄гитпыгыт ханищтахтэ̄гыт. Ты ня̄врам маныр тэ̄ла щирыл ханищтахтуӈкве таӈхе̄гыт, та̄н нё̄тавет. Та̄н номтаныл э̄лаль тотнэ ма̄гыс 2014 та̄лт ня̄врамыт ма̄гыс культура программа щирыл китхуйплов мероприятие ва̄рыглавес, конкурсыт, суссылтапыт ос фестивалит о̄лсыт. Ос щар номтыӈ ня̄врамыт всероссийский касылн э̄лаль касуӈкве тах ке̄тавет.

1095 2015.03.13. Людмила ТЕТКИНА

Хо̄нтаӈ ма̄ньщит о̄лупсаныл. Кондинский район Половинка па̄вылт миркол кӯщаиг Александр Анатольевич Немзоров о̄лы. Ты э̄лыпа̄лт тав са̄в та̄л школат ня̄врам ханищтым рӯпитас. Па̄вылт пе̄риян ва̄рмаль о̄лум порат Александр Анатольевич мо̄т ма̄хум халт но̄хпатыс. Ань са̄т та̄л мирколт кӯщаиг рӯпиты. Па̄вылт ань акв со̄тыра 536 э̄лумхо̄лас о̄лы, та̄н халанылт 348 – соссаӈ ма̄хум. Ты кӯщай хум та̄н о̄лупсаныл урыл китыгласлум. Александр Анатольевич тамле потыр о̄ньщас: «Кондинский районт пе̄с йис та̄гыл ма̄ньщит о̄лэ̄гыт. Тыи ма̄гсыл па̄влувт о̄лнэ соссаӈ мир халт са̄в хо̄тпат ма̄ньщиг ловиньтахтэ̄гыт. Та̄н ща̄нь ла̄тыӈ ат ва̄гыт, потыртаӈкве ат ха̄сэ̄гыт, та̄нки пе̄с йис ва̄рмаляныл урыл сака аты пӯмщалахтэ̄гыт. То̄ва хо̄тпанув то̄нт ма̄ньщиг ла̄вхатэ̄гыт, хунь нё̄тмил во̄вуӈкве ёхтэ̄гыт. Ам тыт са̄в та̄л о̄лэ̄гум, ма̄ньщи манос ханты ла̄тӈыг ат хӯлыгласлум. Мо̄лты та̄л ма̄н палтув Еремей Айпин, нэ̄пак хаснэ хум, ёхталас. Па̄влыӈ мир ёт тав библиотекат хо̄нтхатыглас. То̄нт тав такви ща̄нь ла̄тӈыл потыртас. Ам ханты ла̄тыӈ тот о̄выл щёс хӯлыслум. Па̄влувт музей о̄лы, ты кол Анатолий Николаевич Хомяков ва̄рыстэ. Хо̄нтаӈ ма̄ньщит пе̄с пормасаныл тув акванатсанэ. Ты о̄йка округ янытыл ёмащакве ва̄ве, янытлаве. Ань тав а̄гитэ Галина Анатольевна Мостовых музейт кӯщаиг о̄лы, тав ва̄рум рӯпататэ э̄лаль тотытэ. Ань туп музейт рӯпитан ма̄хум ма̄ньщи пе̄с йис ва̄рмаляныл ханищтэ̄гыт ос пӯмщалэ̄гыт. Ка̄сыӈ та̄л туи порат ма̄н хӯл алыщлан хо̄тпат янытлан хо̄тал ва̄рыглэ̄в. Лӯима̄ департамент о̄лме порат ты ялпыӈ хо̄тал ма̄гсыл олныл та̄стыглавесӯв. Ань па̄влувт рӯпитан предпринимательхо̄тпат палт олн во̄ве̄в. Я̄ ватат хӯл ӣсмит па̄йтэ̄в, мӯй ма̄хум пусссын тытыянӯв. Урай ӯсныл са̄в мир мӯйлуӈкве тыг ёхталэ̄гыт. Тот пил, ла̄хыс, хӯл ос мо̄т тэ̄нут тыналаве. Мӯй хо̄тпат ты тэ̄нут сака ёмащакве ёвтэ̄гыт. Ма̄щтыр ма̄хум са̄всыр сувенирпормасыт тот тыналэ̄гыт. Ка̄сыӈ э̄лумхо̄лас тот са̄лы сун ӯлтта поргуӈкве, тыньщаӈ па̄хтуӈкве ос мо̄т щирыл касуӈкве ве̄рми. Ты ялпыӈ хо̄тал ма̄н, мирколт, музейт ос клубт рӯпитан ма̄хум, аквъёт щё̄питэ̄в. Музей Ӯринэ̄ква хо̄тал ос мо̄т ялпыӈ хо̄талыт ва̄рыглы, ма̄н мӯйлуӈкве пуссын тув ялантэ̄в». Ань округувт соссаӈ ма̄хум кол ёвтнэ ма̄гсыл программа о̄лы. Манаса̄вит ще̄мья па̄вылт ты программа хосыт о̄лнэ кол ёвтсыт, ам миркол кӯщай хум китыгласлум. Тав ювле ла̄выс: «Ты программа хунь пирмайтавес, соссаӈ ма̄хманув пуссын ла̄всанув, нэ̄паканыл вос акванатыяныл ос очередин вос хасхатэ̄гыт. 2012 та̄лт кит ще̄мья субсидияолныл майвесы̄г, о̄лнэ кол тыт ӯнттысы̄г. 2013 та̄лт акв ще̄мья о̄лнэ кол Урай ӯст ёвтыс. Ос ювле хультум та̄лт тыт о̄лнэ ма̄ньщит, ханты ще̄мьят олныл ат майлуве̄сыт. Та̄н пуссын Ханты-Мансийск ӯст акв очередин хасве̄сыт. Ма̄хум нэ̄паканыл ань та̄ра тув ке̄тыяныл, тыи ма̄гсыл ма̄н ат ва̄глӯв, манаса̄вит па̄вылт о̄лнэ соссаӈ ще̄мьят тув хансым о̄лэ̄гыт». Па̄вылт общинат рӯпитэ̄гыт ман а̄ти, та урыл о̄с пумщалахтасум. Тав ос ювле тох потыртас: «Ам па̄влыӈ ма̄хум ла̄выгласанум, общинат тыт вос ва̄ре̄гыт, са̄всыр нэ̄пакыт акванатуӈкв ма̄н нё̄тыянӯв. Тамле рӯпата ва̄руӈкве нэ̄мхотьют ат ка̄сащас. Ань Г. А. Мостовых, музей кӯщай нэ̄, тамле община ва̄руӈкве таӈхи. Ма̄н о̄лнэ ма̄вт са̄в ла̄хыс, пилыт, яныгме̄гыт, я̄т са̄в хӯл о̄лы. Ам номсэ̄гум, общинав ёмащакве рӯпитаӈкве тах паты».

1095 2015.03.13. Тамара МЕРОВА

Соссаӈ ще̄мьят ёмщакв ос пӯмыщ кассыт. Ханты-Мансийск ӯст о̄лнэ соссаӈ ма̄хум халт «Мама, папа, я – обскоугорская семья» касыл ва̄рыглавес. Тамле ва̄рмаль ка̄сыӈ та̄л «Лылыӈ со̄юм» центрыт рӯпитан ма̄хум щё̄пита̄лыглэ̄гыт. Ты та̄лт хӯрум соссаӈ ще̄мьят касуӈкве тув ёхталасыт. Тувыл ка̄сыӈе̄мт касыл матхурип мо̄тмо̄т нам о̄ньщи, ты порат тав нэ̄ хо̄тпа ос литература та̄л кастыл намыл пинвес. Ань нэ̄ хо̄тпат хумус ня̄враманыл янмалтыяныл, маныр аквъёт ва̄ре̄гыт, манхурип мӯтраӈ накн та̄наныл ханищтыяныл – ты урыл пуссын потыртасыт ос суссылтасыт. Ма̄ньщи ма̄хум халт касуӈкве кит нэ̄г Тамара Алгадьева ос Оксана Динисламова ёхталасы̄г. Ты нэ̄г сас Хулюмсӯнт па̄вылт самын патсы̄г ос хосат та̄гыл Ханты-Мансийск ӯсн о̄лмыгтасы̄г. Тамара Михайловна аквхуйплов та̄л яныт Лиза а̄гитэ̄нтыл ос кит аӈква̄гияге Ксения ос Дарья ёт о̄лыс. Оксана Юрисовна кит ма̄нь а̄гияге ос аӈквпыге ёт о̄лыс. Тав яныг а̄гитэ Ксениян онтолов та̄л, мо̄танэ Са̄нтыра ма̄нь а̄гирищкве та̄лэ ущ то̄влыс. Каӈке пыг Максимн – са̄т та̄л. Ты ма̄ньлат нэ̄г ще̄мьяге̄н о̄вылтыт ищхӣпыӈ ут хосыт пӯмыщ хурит суссылтасы̄г. Тувыл А̄с э̄ква Галина Токчевна Шиянова кит апгаге ёт ёхталас. Тав Ямал ма̄т самын патыс, тав ще̄мьяӈ та̄гыл хосат ӯсувн о̄луӈкве ва̄нтлыс. О̄йкатэ ё̄рн хумыг о̄лыс, тэ̄н са̄в ня̄врам янмалтасы̄г. Та̄н ань пуссын та̄нки ня̄врамыӈыг е̄мтсыт. Ань касуӈкве тотыглам апгаге а̄ще̄н хатань хум. Галина Токчевна ла̄выс: «Ма̄н са̄всыр мирыл о̄лэ̄в, ос амки лӯима̄ ма̄тем э̄руптым, пе̄с наканум э̄лаль тотым ня̄враманум, апганум о̄луӈкве ханищтыянум». Тав такви ще̄мьятэ урыл потыртаме порат хурит по̄слым кит нэ̄пакыг суссылтасаге. О̄выл касылт ще̄мьят хо̄талакве по̄слуӈкве ла̄вве̄сыт; ня̄врамыт оманыл манхурип хо̄талакве̄г сусхатэ̄гыт, вос по̄слэ̄гыт ос оманыл Хо̄тал ханса хольт вос по̄слыяныл. Тувыл каснэ ма̄хманув йӣквсыт, та̄нки ща̄нь ла̄тӈыл стихыт ловиньтасыт. Ётыл пуссын то̄тапыл майлуве̄сыт, ос манхурип о̄лупсал рӯт ма̄хманыл о̄лэ̄гыт, маныр ва̄ре̄гыт – тамле пормасыт тув вос атэ̄гыт. Галина Токчевна са̄лы о̄щнэ ма̄хум пормасыт тув пиныс, Тамара ос Оксана хӯл алыщлан манос во̄раян ма̄хум о̄щнэ пормасыт то̄тапн атсы̄г. Юио̄выл касыл ма̄гыс атыӈ тэ̄нут юил тотсыт. Шиянов колта̄гыл морах пил тотсыт, Алгадьевыт ос Динисламовыт хӯл са̄ритамыт ос хӯлыӈ ня̄нь ва̄рмыт, па̄квсам тотсыт. Ты ще̄мьят касылын щё̄питахтынэ̄ныл сыс «Лылыӈ со̄юм» центрыт ханищтахтан а̄гирищитпыгрищит са̄ӈквылтапыл са̄ӈквылтасыт. «Ялпӯс ма̄хум» нампа ансамблин ялнэ а̄гирищквет йӣквсыт ос э̄ргысыт. Жюри хо̄тпаг Н. К. Бушуева, «Лылыӈ со̄юм» центрыт рӯпитан нэ̄, Е. И. Адина, Хулюмсӯнт па̄вылныл ёхталам мӯй нэ̄, о̄лыс. Ос кӯщай нэ̄г А. Н. Мехнина пе̄рия̄лвес, тав Юван Шесталов музейколнакт рӯпиты. Ань хӯрмит места Г. Т. Шиянован майвес, китыт местат Т. М. Алгадьева о̄лыс. Оксана Динисламова ще̄мьятэ но̄хпатыс. Ты ще̄мьят дипломыл ос мӯйлупсал мӯйлуптаве̄сыт. Тувыл мӯй ма̄хмыт пуссын ща̄й аюӈкве пасан ва̄тан во̄вве̄сыт. Ёмас, пӯмыщ касыл та оигпас.

1095 2015.03.13. Людмила ТЕТКИНА

Ма̄ньщи нэ̄ урыл потыртасыт. Светлана Селивёрстовна Динисламова, такви о̄парищ наме Садомина, стихотворениянэ ма̄ньщи ос рущ ла̄тӈыл хансыянэ. Ханты-Мансийск ӯст нэ̄пак ловиньтан колт тав хансум стиханэ ос та̄ратам нэ̄паканэ урыл ань потыртас. О̄влэ̄т Светлана Селивёрстовна ос тав ще̄мьятэ урыл кина суссылтавес. Тав ща̄нягеа̄щаге урыл, Кульпас па̄влэ ос такви хансум нэ̄паканэ, по̄слум хуриянэ урыл тот потыртавес. Светлана Селивёрстовна ла̄выс, стихыт хансуӈкве тав хосат та̄гыл о̄вылтахтас. О̄влэ̄т туп рущ ла̄тӈыл хансыс. Тувыл Юван Шесталов ёт хунь ва̄йхатас, ма̄ньщи о̄йка таве̄н ла̄выс: «Ща̄нь ла̄тӈув ос ма̄ньщи мирув ке э̄руптэ̄гын, ма̄ньщи ла̄тӈыл хансэ̄н». Ты юипа̄лт тав стиханэ ща̄нь ла̄тӈыл хансуӈкве та патсанэ. Ма̄ньщи ла̄тӈыл та̄н та̄ра э̄рнэ щирыл тэ̄лэ̄лыт. Стиханэ оматэ, ще̄мьятэ ос ма̄вит урыл хансым о̄лэ̄гыт. Светлана Селивёрстовна потре ань хӯнтлуӈкве са̄в ма̄хум атхатыглас. Та̄н халанылт Вадим Борисович Орлов, Югорский университетт рӯпитан хум, о̄лыс. Тав ма̄ньщи нэ̄ рӯпататэ урыл тох ла̄выс: «Светлана Селивёрстовна ёмас стихыт хансы, хурит по̄слы, ты коныпал ос наука щирыл рӯпата ва̄ри. Ань ос ня̄врамыт ма̄гсыл «Витсам» нампа журнал та̄раты. Ня̄врамыт ма̄ньщи ла̄тӈыл потыртаӈкве ханищтыянэ. Тав акваг молямлы, аквторыг са̄всыр рӯпата ва̄рим, са̄в тэ̄ла ва̄руӈкве а̄лыми». Ты юипа̄лт мо̄т ма̄хум Светлана Селивёртовна хансум стиханэ, нэ̄паканэ урыл потыртасыт ос пуссын таве янытласыт.

1095 2015.03.13. Николай МЕРОВ

Самын патум ма̄нын э̄руптэлы̄н. Ре̄тыӈ ю̄свой э̄тпос 25 хо̄талт Ханты-Мансийск ӯст Общественный палатат рӯпитан ма̄хум заседание ва̄рыгласыт. Сапра̄ни о̄вылтахтам порат тот кӯщаиг рӯпитан э̄ква Любовь Чистова тох ла̄выс: «Ань юио̄выл та̄лытт «патриот» ла̄тыӈ щар хотёрувлавес. Ва̄тихал ма̄н лю̄ль нак ва̄рнэ хо̄тпат урыл хӯнтамла̄лэ̄в. Ма̄нки о̄лнэхӯлнэ наканув ос йис порат о̄лум ва̄рмалит ул вос ёрувлахтасыт, тыима̄гыс мощ мо̄лалнув округувт э̄рнэ тэ̄ла урыл хансум нэ̄пак пирмайтавес. Тыт о̄лнэ мирув та̄нки ма̄наныл вос ӯргаласаныл, ка̄сыӈ хо̄тпа юртыӈыщ вос о̄лыс, тыи ос мо̄т тэ̄лат урыл тот хансым о̄лы. Ты ва̄рмалитн ня̄врамыт ма̄нь та̄гыл ханищтаӈкве э̄ре̄гыт». Ты тэ̄ла э̄лаль тотнэ урыл потыртан ма̄гыс са̄всыр ма̄тт рӯпитан кӯщаит ёхталасыт. Ма̄ньлат ма̄хум нё̄тнэ кӯщай хум Антон Тимкин, ты ва̄рмаль урыл тох ла̄выс: «Ка̄сыӈ хо̄тпа такви самын патум ма̄тэ вос ӯргалытэ, ма̄н ты урыл акваг потыртэ̄в. Ма̄н то̄нт военнопатриотическое воспитание урыл номсэ̄в. Округувт са̄выӈпа̄лэ ня̄врамыт пуссын ты ва̄рмальн ханищтавет. Ма̄н таима̄гыс ань атхатсӯв, ня̄враманув мо̄т э̄рнэ тэ̄ла щирыл о̄с вос ханищтавет. Ты ва̄рмаль са̄в я̄нас миннэ тов о̄ньщи: о̄лнэхӯлнэ накыт, йӣс о̄лупса, ма̄вит ӯргалан тэ̄ла, ёмас щирыл о̄лнэ нак, каснэ ва̄рмалит ос мо̄т са̄в тэ̄лат щирыл рӯпата ва̄руӈкве ань э̄ри. Тувыл ань ма̄нь ня̄врамыт коныпал а̄гитпыгыт, ма̄ньлат хо̄тпат ос яныг хо̄тпат, пуссын аквтем ты ва̄рмалин ханищтаӈкве патавет. Ка̄сыӈ хо̄тпа такви самын патум ма̄тэ вос э̄руптытэ. То̄нт ма̄н мирув щуниӈнуве̄г ос щёлыӈнуве̄г е̄мты.

1095 2015.03.13. Александр ВЬЮТКИН

Нэ̄квет ос а̄гит янытлан хо̄тал кастыл. --

1095 2015.03.13. Светлана РОМБАНДЕЕВА

Ло̄пмус па̄выл урыл потыр. Ре̄тыӈ ю̄свой э̄тпост ам Ха̄льӯс район Ло̄пмус па̄вылн ялсум. Ты ма̄ньщи па̄выл йис та̄гыл То̄рум лё̄ӈх сӯнт па̄влыг ла̄ваве. Тот школа ос пӯльница о̄лы, ла̄пка рӯпиты. На̄йпос минэ станция рӯпиты, на̄яныл э̄тэхо̄талэ тэ̄г. Па̄выл тэ̄ланэ уральтаӈкве Николай Алексеевич Солянов тав паттувес, тав Кульпас па̄выл кӯщай ва̄ӈын хумыг о̄лы. Тав ла̄внэ̄тэ щирыл, па̄выл ма̄хум ань мощ ёмащаквнув о̄луӈкве патсыт. Ювле хультум та̄лт китхӯрум квартираӈ ат кол ӯнттувес. Ты колыт ӯнттын ма̄т кӯщаиг Ягрим па̄выл Полуянов о̄йка ос Кульпас па̄выл Голошубин хум тэ̄н о̄лсы̄г. О̄лнэ кол ат о̄ньщам ма̄хум ман пе̄с колт о̄лум хо̄тпат та̄н тув ва̄нтлысыт. Полуянов о̄йка ты та̄л колыт ӯнттуӈкве о̄с номсы. Манах кол ӯнттэ̄гыт тах, мощ ётылнуве та̄ра ущ паты. Ла̄пка ка̄сыӈ хо̄тал рӯпиты, йильпи тэ̄нут ва̄тихал тотыглаве. Са̄всыр пормас, маснут, ня̄врамыт ма̄гыс сыресыр ёнгил та маныр тот пуссын о̄лы. Йильпи пӯльница ӯнттувес, са̄всыр э̄рнэ пормасыт тув тотве̄сыт. Ле̄ккар э̄кваныл моще̄ртн тот рӯпитаӈкве паты, ань пусмалтан пормасыт тув тотавет, рӯпитан ма̄гыс пӯльница щё̄питыяныл. Тыглетувле яласан лё̄ӈханыл ёмащакв ва̄рим о̄лы. Па̄вланыл та̄ра Саранпа̄выл манос Ха̄льӯс мус автобус яласы. Николай Алексеевич ла̄выс, туп таи лю̄ль – потыртан связь утаныл сака лю̄льсаӈ рӯпиты. Вышка тӯщтувес кос, ос ёмащакв ва̄руӈкве ань ты хо̄тал мус иӈ ат та ве̄рмияныл. Ты тэ̄ла ва̄рнэ хо̄тпат ма̄ньполь э̄тпост ёхтуӈкв ла̄всыт, эрттам то̄нт ёмащакв ущ ва̄рияныл. Па̄выл ма̄хум мӯсхал щирыл звонитаӈкве ат ве̄рме̄гыт. Акв хотты ур хо̄нтэ̄гыт, тув минэ̄гыт, тот та потыртэ̄гыт. Потыртаӈкве ущ о̄вылтахтэ̄гыт, связяныл хот та утыгпи, тувыл телефонрищаныл такос волкалтыяныл, нэ̄матыр суй а̄тим. Ащирма порат тох кон лю̄лим та по̄льтахтэ̄гыт. Э̄лнаӈ тамле связь а̄тим о̄лыс, сака ат иӈ э̄рыс. Ань ты йист са̄всыр ищхӣпыӈ утыт ква̄лтапаптуве̄сыт, ще̄п телефон ань са̄в хо̄тпа о̄ньще̄гыт. Тувыл ос клуб кол па̄вылт а̄тим. Клубыл ӯнттуӈкве ла̄вве̄сыт кос, ос хунь о̄вылтаве, хунь ва̄ве. Тот нэ̄пак о̄щнэ яныг колнак – библиотека ва̄раве тах. Ань тав школат о̄лы, па̄выл ма̄хум ловиньтан нэ̄пак ма̄гыс тув ялантэ̄гыт. Ло̄пмус па̄выл я̄тил ма̄ньщи ма̄хумате̄нув пуссын пуста̄гыл вос о̄лэ̄гыт, На̄й-О̄тыранылн вос ӯргалавет! Пус ка̄т, пус ла̄гыл!

1095 2015.03.13. Александр ВЬЮТКИН

Тав номтэ рӯтанэ̄н э̄лаль тотаве. Ре̄тыӈ ю̄свой э̄тпос оигпанэ порат округ янытыл ма̄ньщи мир Ха̄льӯс районын атхатаӈкв та патсыт. Са̄в мир Саранпа̄вылн, Ло̄пмусн ос Кульпасн ёхтысыт. Та̄н ёсал каснэ ва̄рмальн ёхталасыт, ма̄ньщи хумиюв Андрей Яковлевич Хатанев ка̄сталан щирыл тав ты ва̄рыглаве. Ты та̄л «Лыжнёй Андрея» са̄тытыг ты минас. Андрей Яковлевич о̄лме порат ёмас, ка̄ркам ос акваг ощхуль ва̄рнэ хумыг о̄лыс. Тащирыл тав нотпаӈ ма̄хум потыртэ̄гыт. Ня̄врамыт ань тав уре̄т о̄с ёмщакве̄г ва̄гыт. Хӯрум па̄выл халт ёсал ё̄мнэ ма̄хум ка̄сыӈ та̄л ты са̄вме̄гыт. То̄ват ка̄сыӈ та̄л яласэ̄гыт. Ань Саранпа̄выл ос Кульпас ма̄хманув нэ̄мхоталь юв ат хультэ̄гыт, ня̄враманыл о̄с ка̄ркамыг ха̄йтэ̄гыт. (Ёсал ха̄йтнэ пӯмащ урыл мо̄тыт газетат ловиньтэ̄н).

1095 2015.03.13. Тамара МЕРОВА

Ма̄нь ня̄врамаквет ханищтан нэ̄. Ольга Норова, такви о̄парищ наме Анямова, Ханты-Мансийск ӯст о̄лнэ « Лылыӈ со̄юм» нампа центрыт ма̄нь ня̄врамаквет ханищтан нэ̄г рӯпиты. Тав 1997 та̄лт Санкт-Петербург ӯст А. И. Герцен нампа университет а̄стлам юипа̄лт Ханты-Мансийскан ёхтыс. О̄влэ̄т садикыт ма̄нь ня̄врамыт ёт рӯпитас, ос ётыл «Лылыӈ со̄юм» соссаӈ ня̄враманув ханищтан колн рӯпитаӈкве во̄ввес. Тот тав 5 та̄л яныт а̄гирищитпыгрищит «Витсам» нампа программа щирыл ханищтыянэ. Ос 7-9 та̄л яныт ня̄врамыт ма̄гыс «Э̄твит сам» нампа программа о̄ньщи. Ты ханищтапыг Ольга Мартыновна такви хассаге. Ты хосыт са̄всыр а̄гирищитпыгрищит ма̄ньщи ла̄тыӈ ва̄ӈкве ханищтавет. Ка̄сыӈ ханищтап кит щё̄сохсаг ӯртым ва̄раве. Акв щё̄сохсат ня̄врамыт матыр тэ̄лат о̄вылтыт потыртавет, суссылтавет ос ётыл та̄н та̄нки ювле потыртэ̄гыт. Та̄н хорамыӈ нэ̄пакло̄мтыл са̄всыр пормас, хурит ва̄ре̄гыт, ты мус а̄мщит а̄мще̄гыт манос мо̄йтыл мо̄йтавет. Ос ётыл о̄выл щёс хӯнтамлам ла̄тӈыт ёмщаквег ханищтыяныл, та̄наныл торгамтым вос ва̄ганыл. Тувыл ювле хультум ат та̄л порат Ольга Норова «Витсам» хансум программатэ щирыл ӯст о̄лнэ садикыт ёт рӯпитаӈкве патыс. Тав «Голубок», «Золотая рыбка», «Радуга» ос «Солнышко» садикытн ялантан ня̄врамыт мощ ханищтасанэ. Ос ты программатэ щирыл №5 ос №11 школагт ханищтахтан ня̄врамыт ёт рӯпитас. Школат «краеведение» урокыт о̄лнэ̄ныл порат Ольга Мартыновна тув во̄виньта̄лаве. Тав ня̄врамытн Юграт о̄лнэ соссаӈ ма̄хум пе̄с наканыл, нэ̄пак хаснэ хо̄тпат, хурит по̄слан хо̄тпат урыл потырты ос то̄ва ва̄рмалит ма̄ньщи ла̄тӈыл ла̄виянэ. Ня̄врамыт са̄всыр тэ̄лат ёмщакве̄г ос молях вос торгамтасаныл, Ольга Норова са̄всыр ханищтан нэ̄пакыт щё̄питас. Тыи «Ла̄тӈыт хансуӈкве ханищтахтэ̄в», «Ла̄тӈыт ловиньтаӈкве ханищтахтэ̄в», «Са̄витэ ловиньтаӈкве ос ла̄вуӈкве ханищтахтэ̄в» намаим нэ̄пакыт. Тув э̄рнэ хурит манос сыресыр ла̄тӈыт Ольга Мартыновна о̄с такви щё̄питасанэ. Тав ма̄ньта̄гыл по̄слы, хуриянэ пӯмщиг о̄лэ̄гыт. «По̄слын нэ̄пак», «Ма̄вит о̄льпат» нампа кит я̄нас нэ̄пакыг ва̄рыс, тот са̄всыр пормасыт хурияныл по̄слым о̄лэ̄гыт. Ня̄врамыт ла̄тӈыт ханищтан коныпал хурит о̄люптаӈкве ве̄рме̄гыт. Ты нэ̄паканэ та̄ратан ма̄гыс Ольга Норова округ Правительство ос культура департамент па̄лыл грантолн вуйлас. Финляндият о̄лнэ М. А. Кастрен нампа общество ос Музейное Ведомство па̄лыл тав «Культурное наследие финноугорских народов» хансум проектэ ма̄гыс о̄с олныл майлувес. Ос округ губернаторн «Лучший педагог дополнительного образования» намаим грантолныл мӯйлуптавес. Ма̄ньщи ма̄хум пе̄с йис наканыл манос ла̄тӈаныл э̄лаль тотнэ хо̄тпат ӯст ке о̄лэ̄гыт, сака ёмас. Ольга аквтох «Югра» телерадиокомпаният ма̄ньщи ла̄тыӈ ханищтан нэ̄г рӯпиты. Тот «Югорика» передача ты о̄лы, на̄н то̄внакт таве ул сунсылы̄н. Тувыл соссаӈ ма̄хум ялпыӈ хо̄таланыл ва̄нэ ма̄гыс ня̄врамыт сыресыр ёнгылыл, суссылтапыл пӯмщалавет. «Лылыӈ со̄юм» центрыт рӯпитан хо̄тпат «Тылащ пори», «Ӯринэ̄ква хо̄тал», «Ома хо̄тал» ос мо̄т ялпыӈ хо̄талыт ва̄рнэ порат та̄нки ка̄с ва̄ре̄гыт. Йильпи та̄л янытлан ялпыӈ хо̄тал кастыл а̄гирищитпыгрищит ма̄гыс та̄н пӯмыщ спектаклит акваг щё̄пита̄лэ̄гыт. Та̄н пуссын ёнгиланыл соссаӈ ма̄хум мо̄йтаныл щирыл ва̄рияныл. Та та̄лт Ольга Мартыновна Миснэ а̄гииг ёнгыс. Ань нэ̄ хо̄тпа ялпыӈ хо̄тал кастыл ма̄н таве янытлылӯв, таве̄н ос ще̄мьятэ̄н ёмас сымыӈ ла̄тыӈ ла̄ве̄в. Ольга о̄йкатэ̄нтыл кит пыг ос кит а̄ги янмалтэ̄г. Пус ка̄т, пус ла̄гыл, То̄рум ёт, На̄й-О̄тыранылн вос ӯргалавет.

1095 2015.03.13. Тамара МЕРОВА

Ща̄нь ла̄тӈыг э̄лаль тотнэ нак. Ма̄ янытыл ща̄нь ла̄тӈыт янытлан кастыл ре̄тыӈ ю̄свой э̄тпос ва̄т нупыл са̄тыт хо̄талэ̄т ма̄н редакцияв технологопедагогический колледжин во̄виньта̄лвес. Тот ме̄н аквъёт рӯпитан нэ̄ ёт хӯрмит курсыт ханищтахтан а̄гитпыгыт э̄лыпа̄лт ханты ос ма̄ньщи ла̄тӈагув урыл потыртасме̄н. Ирина Самсонова «Ханты ясанг» газетатэ урыл ёмас потыр щё̄питас ос пӯмыщ хурит суссылтас. Ам ос ты газетагув хоты мо̄т ӯсыӈ ма̄т ловиньтавет, хоты хо̄н ма̄т ма̄н ла̄тӈагув пӯмщалаве̄г ос ханищтаве̄г, ты урыл мощ потыртасум. Наука ма̄гыс ханты ос ма̄ньщи ла̄тӈыг ханищтан хо̄тпат газетагув о̄с ва̄ве̄г. Та̄н тот са̄всыр ла̄тӈыт, потрыт, мо̄йтыт хо̄нтэ̄гыт, тувыл матыра̄ти э̄рнэ утыт ханищтэ̄гыт ос диссертацият хансэ̄гыт. Ща̄нь ла̄тӈыт э̄лаль тотнэ урыл Ольга Енова о̄с потыртас. Тав развитие образование нампа институтт нэ̄пак ловиньтан колт рӯпиты. Ольга Владимировна соссаӈ ма̄хум халт учёный хо̄тпанувн хансым нэ̄пакыт, словарикыт суссылтаӈкве ёттотыглас. Пуссын ты ва̄рмалит студентытн ёмщакве̄г пӯмщалаве̄сыт. Та̄н ювле пӯмащипа ла̄тыӈ ла̄всыт ос ща̄нь ла̄тӈув аквтох э̄лаль ёмащакв ханищтаӈкве ос матыра̄ти пе̄с ва̄рмалит ва̄ӈкве ла̄вхатсыт.

1095 2015.03.13. Валентина УЗЕЛЬ

Та̄н округ кӯщай па̄лыл мӯйлупсал майве̄сыт. Ты 2015 та̄л Россия Президентын литература та̄лыг ла̄ввес. Ань ты кастыл Ханты-Мансийск ӯст ялпыӈ хо̄тал ва̄рыглавес. Ма̄ньполь э̄тпос 3 хо̄талэ ма̄ янытыл о̄лнэ писателит янытлан хо̄талыг о̄лы. Ма̄н округувт ловиньтан нэ̄пакыт о̄с са̄в ма̄хум хансэ̄гыт. Та̄н халанылт то̄ват потрыт хансэ̄гыт, то̄ват – стихыт, то̄ват – мо̄йтыт. Ӯсувт ханты хум Владимир Енов о̄лы, тав «Ханты ясанг» газетат рӯпиты. А̄с ма̄хум ла̄тӈыл са̄всыр ля̄ххалыт хансы. Матах та̄л ювле хультум порат тав мо̄йтыт хансуӈкв патыс. Ань тыг мус тит ловиньтан нэ̄пак та̄ратас. Акватэ рущ ла̄тӈыл тох намаим о̄лы – «Ве̄щкатыг о̄лнэ ма̄хум потраныл», мо̄танэ – «Ме̄ӈкв о̄йка мӯйлупсатэ». Ань ты хум ос тит рущ о̄йкаг Владимир Волковец ос Дмитрий Сергеев округ кӯщаюв па̄лыл янытлаве̄сыт, та̄н хӯрум ёмас пуссын «премия губернатора» нампа яныг мӯйлупсал майве̄сыт. Ты э̄тпос хӯрмит хо̄талт та̄н ты янытлаве̄сыт. Округ кӯщай ва̄ӈын хум Алексей Путин та̄нанылн мӯйлупса ос дипломнэ̄пак мис. Ань та̄н «писателиг» ла̄виманыл ма̄гыс 2015 та̄л сыс округув янытыл са̄всыр ӯсытн ос па̄влытн ялантаӈкв патэ̄гыт, мир ёт тот хо̄нтхатыглэ̄гыт ос та̄нти ураныл та̄нанылн тах потыртэ̄гыт.

1095 2015.03.13. Светлана РОМБАНДЕЕВА

Тром-Аган па̄выл ма̄хум. Сургут ӯст финноугорский ма̄хум ялпыӈ хо̄талт ам акв ханты нэ̄ ёт потрамасум, наме Фёкла Николаевна Суровцева. Тав «То̄рум ягун мугут» (рущ ла̄тӈыл «Тром-Аганские ребята») нампа ансамблит ханты э̄ргыт э̄рги. На̄н ань тав потре ловиньтэлы̄н. – Ма̄н ансамблюв атхуйплов арыгтем та̄л ты о̄лы, кӯщаюв Майя Александровна Швейд. Ханты ня̄враманув халт рущ ня̄врамыт о̄с э̄рге̄гыт, йӣкве̄гыт. Пуссын аквъёт лов арыгтем хо̄тпа. Россия ма̄в янытыл ма̄н са̄в ма̄т о̄лсӯв – Москва, Чита ӯст, Бурятият. Са̄всыр фестивалит о̄лыгланэ̄ныл порат тув акваг во̄виньта̄лаве̄в. Ам колта̄глум ёт Тром-Аган па̄вылт о̄лэ̄гум. Во̄рт кол о̄ньще̄в, тув акваг яланта̄лэ̄в, тот са̄лыянув о̄лэ̄гыт. Кит колыг халт та яласэ̄в. Кит пыг ос акв апыгрищ о̄ньще̄гум. Ма̄нь пыгум школат ханищтахтаме порат о̄с ты ансамблин ялантас. Армиян ялыс, ань колта̄глэ ёт Сургут ӯст о̄лы, рӯпиты. Яныг пыгум ос са̄лыӈколыӈыг е̄мтыс, са̄лыянэ ӯрим во̄рт яласы. Омагума̄тягум нёлса̄т арыгтем та̄л о̄лсы̄г. Са̄т ня̄врам янмалтасы̄г – хӯрум пыг, нила а̄ги. Ма̄н пуссын тарыг ёлыпа̄лт самын патсӯв. Колта̄глув ань сака яныг, яга̄гиянумягпыганум пуссын са̄в ня̄врам о̄ньще̄гыт. Яныг рӯтыг е̄мтсӯв. А̄тяв щирыл ма̄н Мултановыт, омав ос Кечимова рӯтыл о̄лыс. Фёкла Николаевна тамле сымыӈ нэ̄кве. Такви мире, такви ла̄тӈе тав сака э̄руптытэ, янытлытэ. Ханты мир пе̄с йис э̄ргыт, йӣквыт мирн суссылтаӈкве тав ня̄врамытын нё̄ты. Та̄наныл тав ханищтыянэ, та̄н ётаныл э̄рги, яласы, нё̄тыянэ. Таве̄н ам са̄в ёмас, сымыӈ ла̄тыӈ ла̄ве̄гум. Колта̄глэ ёт пуста̄гыл вос о̄лы, То̄рум ёт, О̄тыр ёт вос о̄лы.

1095 2015.03.13. Светлана РОМБАНДЕЕВА

Музеитыт рӯпитан хо̄тпат. Ре̄тыӈ ю̄свой э̄тпос 25-26 хо̄талаге̄т Ханты-Мансийск ӯст «Центр народных художественных промыслов и ремесел» колт округ янытыл са̄всыр музеитыт рӯпитан ма̄хум акванатхатыгласыт. Ты акванхо̄нтхатыглап тох намаим о̄лыс: XV Координационный совет субъектов сферы народных художественных промыслов и ремесел. Та̄н халанылт соссаӈ хо̄тпат о̄с о̄лсыт: Сургут ӯсныл «Старый Сургут» историкокультурный центрныл ма̄ньщи нэ̄ М. В. Самсонова ёхталас, тав соссаӈ мир отделт кӯщаиг рӯпиты; ханты нэ̄ Ф. С. Бондаренко Нижневартовский район Аган па̄вылныл о̄лыс, такви па̄влэ̄т музейт кӯщаиг о̄лы; Белоярский ӯсныл ханты нэ̄ М. В. Кабакова ёхталас, тав ос пе̄с йис пормас суссылтан ма̄т рӯпиты. Мо̄т ма̄хум Нефтеюганск, Мегион, Лянтор, Советский ос Урай ӯсытныл о̄лсыт. О̄выл ла̄тыӈ округ янытыл культура тэ̄ла палт кӯщаиг о̄лнэ нэ̄ Н. М. Казначеева тав ла̄выс. Тув ёхталам ма̄хум тав янытласанэ, тамле та̄рвитыӈ ос аквты э̄рнэ рӯпата ва̄рнэ̄ныл ма̄гыс са̄в ёмас сымыӈ ла̄тыӈ ла̄выс. Тувыл ты кол кӯщай нэ̄ Ольга Дмитриевна Бубновене потыртас: «Округув янытыл 32 ма̄щтыр хо̄тпа о̄лы. Ма̄н ма̄хманув 2014 та̄л сыс округув коныпал Россияв янытыл ос э̄лы хо̄н ма̄т 29 са̄всыр конкурсытыт но̄хпатыгласыт. Пуссын янытлан нэ̄пакытыл ос са̄всыр мӯйлупсатыл майве̄сыт. Ты янгыщ Сургут, Лянтор ос Урай ӯсытт о̄лнэ хо̄тпанув. Ма̄н пуссын аквъёт э̄рнэ тэ̄ла ва̄ре̄в. Ма̄н катыл ва̄рум пормасанув са̄в ма̄т ва̄вет, сунсыглавет, пӯмщалавет». Кит хо̄тал сыс ка̄сыӈ хо̄тпа такви рӯпататэ урыл потыртас, ань ювле хультум та̄л сыс тэ̄ланыл хумус ва̄рсаныл, матыр та̄рвит о̄ньще̄гыт ман пуссын ёмас, ты урыл потыртасыт. Ищхӣпыӈ ут хосыт кина охсат ос са̄всыр хурит суссылтасыт.

1095 2015.03.13. Людмила ТЕТКИНА

Ма̄ньлат ма̄хум йильпи нэ̄паканыл. Литература та̄л янытлан кастыл Ханты-Мансийск ӯст нэ̄пак ловиньтан колт ва̄тихал йильпи нэ̄пакыт суссылтавет. Ре̄тыӈ ю̄свой э̄тпос оигпан э̄лыпа̄лт тот Ульяна Данило, «Ханты ясанг» нампа газетат рӯпитан нэ̄, такви та̄ратам нэ̄паке урыл ма̄хумн потыртас. Андрей Дубасов, Елена Ермакова, Андрей Молданов, Анна Молданова, Виктория Молданова, Владислав Молданов, Арсений Немельгин, Олеся Сопочина, Валентина Тарлина ма̄ньлат ма̄хум хансум стиханыл ос Ульяна Данило такви хансум мо̄йтанэ тув ва̄рсанэ. Нэ̄паке «Притоки Великой Оби» намаястэ. Тамле рӯпата ва̄руӈкве таве̄н «Югра лылые̄п» нампа организация нё̄тыс, олн ос общественный связь Департамент па̄лыл майвес. Ульяна Данило нэ̄паке хумус щё̄питастэ ос ты ма̄ньщит, ханты ма̄ньлат хо̄тпат ёт хумус ва̄йхатас, та урыл потыртас. Ты юипа̄лт а̄гитпыгыт та̄нки стиханыл ловиньтасаныл. Павел Черкашин, нэ̄пак хаснэ хум, ла̄выс: «Потрыт ос стихыт хаснэ ма̄ньлат хо̄тпатн нё̄туӈкве э̄ри. Та̄н яныг поэтыг манос писателиг вос е̄мтэ̄гыт, хансум рӯпатаныл ма̄хумн са̄в ща̄гт вос тотэ̄гыт». Мария Кузьминична Волдина ты нэ̄пак урыл о̄с потыртас. Ханты э̄ква ла̄вме щирыл, то̄ва потрыт ос стихыт рущ ла̄тӈыл лю̄льсаӈ хансым о̄лэ̄гыт. Тамле нэ̄пакыт та̄ратан э̄лыпа̄лт о̄влэ̄т ты рӯпата ва̄нэ хо̄тпат ёт рӯпитаӈкве э̄рыс. Ты нэ̄пак та̄ратам ма̄хум ос ма̄ньлат хо̄тпат рущ ла̄тыӈ ёмащакв ханищтаӈкве ла̄всанэ. Ты хосыт э̄лаль рӯпитаӈкве ке патэ̄гыт, туп ты юипа̄лт ёмас ва̄рмаль тах тэ̄лы.

1095 2015.03.13. Светлана РОМБАНДЕЕВА

Э̄рыгпотыр ма̄гыс хо̄нтхатыглап. Ты э̄тпос 3 хо̄талэ̄т Ханты-Мансийск ӯст о̄лнэ «Ма̄вит ос Э̄лумхо̄лас» нампа музейт стихотвореният ос э̄ргыт хаснэ ма̄хум акванхо̄нтхатыгласыт. Тот Литературная гостиная нампа колнак о̄лы, э̄рыгпотыр тотнэ ма̄хум тот ва̄тихал акванатхатыглэ̄гыт. Ань ос ты э̄типа̄ланыл намаясаныл – «Певец заснеженного края». Лов арыгтем хо̄тпа та̄нти хансум стихотворенияныл ловиньтасаныл, то̄ва ос намыӈсуиӈ хо̄тпа хансыглам потрыт ловиньтас. Акв а̄ги, наме Лиза, татем ёмас стихотворение ловиньтас «Хулиганы», насати Валентин Гафт тав хасме. Тав мирн ва̄нэ ма̄хум – Маяковский, Есенин, Шукшин ос Высоцкий хум хо̄тпат пуссын хулиганыг ла̄виянэ. Ань та̄н пуссын а̄тимыт. О̄лманылт та̄н са̄в ёмас тэ̄ла ва̄рсыт – потрыт, э̄ргыт хассыт, та̄нти ма̄наныл э̄руптасаныл, янытласаныл. Валентин Гафт та̄наныл атхунь э̄руптыянэ, ӯлылыянэ, ос тав ла̄выс, мощ хулиганыг ат те о̄лсыт, таса̄вит ёмас тэ̄ла ат ва̄рнувыт. Таима̄гыс тав та̄наныл нас э̄рпыӈыщ тох намталыянэ. «Солнце» нампа театрыт рӯпитан ханты нэ̄ Алла Иштимирова-Посохова стихотворениянэ соссаӈ ма̄хманув урыл о̄лсыт. «Лылыӈ со̄юм» ня̄врам ханищтан центрыт рӯпитан ма̄ньщи хум Сергей Ремизов «Деньги есть, а счастья нет» пӯмыщ потыр потрамас. Акв хум гитарал ёнгыс, тувыл та̄н пуссын аквъёт «Ты да я, да мы с тобой» рущ э̄рыг э̄ргысыт. Та̄н халанылт, сусте̄мт, ма̄ньщи ман ханты пыг лю̄ляхо̄лы, тав о̄с потыртас. Хунь концертаныл оигпас, ам пыг китыгласлум, хотыл тав о̄лы. Насати, ма̄ньщи пыг, Антон Нахрачёв, Ха̄льӯс район Тэ̄к па̄вылныл о̄лы. Тыт технологопедагогический колледжит информационные системы рӯпатан ханищтахты. Антон ла̄выс, тав ма̄ньта̄гыл э̄рыгсовыт ос потырохсат хансуӈкве патыс. Оматэ Майя Витальевна, а̄ги о̄парищ наме Миляхова. Антон йӣгрищ о̄ньщи, наме Аня. Тув ма̄хум акванатум нэ̄ Инна Романова о̄с аквкит ла̄тыӈ ла̄выс. Тав ты музейт научный сотрудникыг рӯпиты. Инна ла̄выс, ты та̄л литература та̄лыг ла̄ввес. Таима̄гыс ань то̄ва литературный проектыт тав нупылэ хасве̄сыт, кӯщаиг тав паттувес. Ты хо̄нтхатыглапаныл та̄н о̄с ты тэ̄ла щирыл ва̄рияныл. Тох акванхо̄нтхатыгла̄луӈкве та̄н ань ва̄тихал патэ̄гыт, потрыт ман стихотвореният хаснэ ма̄хум пуссын тув во̄вияныл. Ма̄н, газетат рӯпитан ма̄хум, тув во̄вуӈкве о̄с ла̄ввесӯв. Ты урыл ма̄н тах э̄лаль хансэ̄в. Иннан ам яныг пӯмащипа ла̄тыӈ ла̄всум. Матъёмас тамле хо̄тпат о̄лэ̄гыт, мирн пӯмыщ потыр, сымын ро̄внэ ла̄тыӈ тотэ̄гыт.

1095 2015.03.13. Валентина УЗЕЛЬ

Нэ̄квет ма̄гыс ва̄рим суссылтап. Нэ̄ хо̄тпат янытлан хо̄тал о̄лум кастыл ма̄н ӯсувт са̄в пӯмыщ суссылтап ва̄рыглавес. Акв суссылтап «Ма̄вит ос э̄лмхолас» нампа музейт о̄лыс, рущ ла̄тӈыл тамле намыл пинвес – «Цветы. Камни. Горы». Ты музейт рӯпитан ма̄хум Нё̄ранув нупыл тув порат ялсыт. Са̄в а̄хвтас тот атмыт. Я̄трия, Лопсия, Ма̄нья, Сӯкыръя, Пуйва, Улитимья ос Тагт я̄ хосыт яласамыт. То̄ва ма̄т та̄н сака нё̄тнэ ос тыныӈ а̄хвтасыт хо̄нтсыт. Та ма̄хум халт са̄всыр учёный хо̄тпат о̄лсыт, акв э̄ква биологыг о̄лы, тав хорамыӈ лӯпта ханищтым та̄н ётаныл ялыс. Тав са̄в пӯмыщ хури ва̄рыс. Ань ты выставкат тав такви по̄слум хуриянэ суссылтасанэ ос ла̄выс, «красный книган» хансым са̄в лӯпта тав Нё̄ранувт хо̄нтыс.

1095 2015.03.13. Тамара МЕРОВА

Яныгпа̄ла о̄йка по̄слум хуриянэ. Геннадий Степанович Райшев 80 та̄лэ намхо̄талэ кастыл по̄слум хуриянэ йильпи нэ̄пакыт та̄ратаве̄сыт. Ты альбом «Геннадий Райшев. Живопись 1960-2010» намаим о̄лы. Тав та та̄лыт сыс то̄ва по̄слум хуриянэ тув ва̄рве̄сыт. Йильпи нэ̄пакет хӯрумсат арыгкем акванатым по̄слум хурит о̄лэ̄гыт. Геннадий Райшев Ханты-Мансийск ӯст рӯпитан колэ̄т о̄щнэ хуриянэ, тувыл Екатеринбургыт ос Тюменьт о̄лнэ музеитныл тотым хурит пуссын тув ва̄рве̄сыт. Ань ты йильпи нэ̄паке мӯй ма̄хумн суссылтавес. Хорамыӈ яныг нэ̄паке̄т ниласа̄т са̄вит ло̄псыт са̄всыр хурит коныпал о̄йка о̄лупсатэ урыл потыр, тав ётэ рӯпитан ма̄хманэ потрыт о̄с хасве̄сыт. Нэ̄пак округ культура департамент па̄лыл олныл ойтувес. Екатеринбург ӯст «Баско» нампа издательствоколт та̄ратавес. Тав тираже кит со̄тыра хо̄тса̄т са̄витыг о̄лы. Ань Геннадий Степанович палт ёхталам мӯй ма̄хум пуссын тамле нэ̄пакыл мӯйлуптаве̄сыт. О̄йка ты о̄вылтыт ла̄выс: «Атпан та̄л сыс по̄слум хуриянум ань акванатве̄сыт, матъёмас ты рӯпата ва̄рвес. Таима̄гыс хотща̄гтым о̄лэ̄гум ос а̄нумн нё̄тнэ хо̄тпатн пӯмащипа ла̄тыӈ ла̄ве̄гум».

1095 2015.03.13. Николай МЕРОВ

Касум ма̄т са̄лыл кассыт. Ты та̄л ре̄тыӈ ю̄свой э̄тпос 28 хо̄талэ̄т Белоярский район Касум па̄вылт са̄лыӈ ма̄хум ма̄гыс каснэ ва̄рмаль щё̄пита̄лвес. Ты па̄вылт пуссын аквъёт 1 со̄тыра 700 са̄виткем хо̄тпа о̄лы, са̄выӈпа̄лэ ханты ос саран хо̄тпат. Та̄н тот йис та̄гыл о̄лэ̄гыт, хӯл алыщлэ̄гыт ос са̄лы янмалтэ̄гыт. Округув янытыл щар са̄в са̄лы тот ты о̄ньщаве. Юильск, Касум ос Нумто па̄влыт халт яныгса̄т са̄т ще̄мья са̄лы ӯрим яласы. Та̄н пуссын хо̄т со̄тыра арыгтем са̄лы о̄ньще̄гыт. Таи ёмас, ма̄ньлат хо̄тпат са̄лы ӯрим та̄н ётаныл о̄с рӯпитэ̄гыт. Тот о̄лнэ са̄лыӈ ма̄хум ка̄сыӈ та̄л тамле каснэ ва̄рмалил щё̄пита̄лавет. Ты та̄л касыл нё̄лсат нупыл хотыт щёс ва̄рыглавес. Ань тот ва̄тахкем са̄лыӈ нэ̄хум хо̄тпа касыс. Ты пӯмащ ва̄рмальн э̄лы ӯсытныл, па̄влытныл са̄в мир акванатхатыглас. Ты коныпал хо̄н ма̄ныл о̄лнэ ма̄хум о̄с мӯйлуӈкве тув ёхталасыт. Са̄лыл каснэ ва̄рмаль пуснэ хо̄талт кӯщаит о̄с о̄лсыт. Та̄н каснэ хо̄тпат ос мӯй ма̄хум нупыл са̄в сымыӈ ла̄тыӈ ла̄всыт. Сергей Петрович Маненков, Белоярский район кӯщай хум, са̄лыӈ ма̄хум та̄рвитыӈ рӯпата ва̄рнэ̄ныл ма̄гыс пуссын янытласанэ ос ла̄выс: «Ам тыт о̄лнэ са̄лыӈ хо̄тпат, са̄выӈпа̄лэ пуссын ёмщакв ва̄ганум. Та̄н ётаныл ка̄сыӈ та̄л ва̄щинтахтэ̄гум. Ты касылн а̄ти туп мӯйлупса сэ̄лнэ ма̄гыс ёхталэ̄гыт. Хотьютаныл ка̄ркамнув, моляхнув яласы, та̄ксарнув о̄лы, та̄н тыт та̄нки халанылт ё̄раныл а̄рталыяныл». Тувыл ос тамле ёмас ва̄рмаль о̄лыс. Сергей Петрович «Казымский» нампа са̄лыӈ ма̄хум предприятиян, крестьянскофермерский хозяйстватн нё̄тнэ ма̄гыс 500 со̄тыра солко̄ви о̄щнэ сертификатнэ̄пак мис. Акв предприятие кӯщаиг Сергей Иосифович Попов рӯпиты. Тав са̄лыт э̄лаль са̄вмалтан ма̄гыс олныл ты майвес. Са̄в та̄л рӯпитан са̄лыӈ хо̄тпат пуссын почётный грамотал мӯйлуптаве̄сыт. Кӯщай хум ка̄сыӈ хо̄тпан ёмщакв мӯйлуӈкве ла̄выс. Тувыл мо̄т кӯщаит потраныл юипа̄лт са̄лыӈ ма̄хум касуӈкве та о̄вылтахтасыт. Касум па̄выл ляпат Амня я̄ о̄вты. Та я̄т каснэ ва̄рмаль ты щё̄пита̄лвес. Са̄лыӈ суныл миннэ лё̄ӈх 1 со̄тыра 500 метра палытэ о̄лыс. То̄ва са̄лыӈ хо̄тпат Сургутский районныл ёхталасыт. Та̄н ань нила ва̄рмаль щирыл кассыт. Са̄лыт ро̄ттыг ха̄йтнэ касылт хумит халт ты хо̄тпат но̄хпатсыт: – о̄выл места Николай Павлович Тасьманов вис, китыт места Сергей Петрович Канев, хӯрмит места Михаил Кузьмич Молданов. Са̄лыт сӯлтыл миннэ порат ты хо̄тпат но̄хпатсыт: – о̄выл места Сергей Петрович Канев вис, китыт места – Иван Алексеевич Попов, хӯрмит места – Алексей Павлович Тасьманов вис. Салыӈ сун тармыл лю̄лим каснэ порат ос ты хо̄тпат но̄хпатсыт: – о̄выл места Иван Алексеевич Попов, яныгпа̄ла хум хо̄тпа вис, китыт места Сергей Петрович Канев, хӯрмитыг ос Юрий Кузьмич Тарлин ёхтыс. То̄выль тармыл касым ты хо̄тпат но̄хпатсыт: – о̄выл места Иван Алексеевич Попов вис, китыт места – Сергей Петрович Канев, хӯрмит места – Пётр Алексеевич Попов. Са̄лыт юипа̄лт ёсал миным ты хо̄тпат но̄хпатсыт: – о̄выл места Иван Алексеевич Попов вис, китыт места – Юрий Кузьмич Тарлин, хӯрмитыг ос Алексей Павлович Тасьманов ёхтыс. Э̄кват халт са̄лыӈ суныл сӯлттым ты хо̄тпат но̄хпатсыт: – о̄выл места Лариса Алексеевна Попова вис, китыт места – Надежда Петровна Попова, хӯрмитыг ос Светлана Владимировна Канева ёхтыс. Ма̄ньлат нэ̄ хо̄тпат халт са̄лы юипа̄лт ёсал миным ос ты хо̄тпат но̄хпатсыт: – о̄выл места Екатерина Рандымова вис, китыт места – Ирина Тарлина, хӯрмит места Любовь Рандымова. Амня я̄ на̄лми ва̄тат яныг музейӯскве ӯнттым о̄лы. Тот ё̄рнколыт тӯщтыглаве̄сыт. Мӯй ма̄хум ма̄гыс атыӈ тэ̄нут па̄йтвес. Тот пе̄с йис пормасыт атнэ колыт рӯпитасыт. Кон ос са̄всыр хӯл, нё̄выль, пил, ла̄хыс, матыра̄ти пуссын тыналавес. Мӯй ма̄хум та̄нки ма̄гсыланыл матыр тэ̄нутпормас ёвтуӈкве ве̄рмысыт. Са̄лыл каснэ ва̄рмаль миннэ торыг ма̄ньлат хо̄тпат ма̄гыс ос я̄нас касылыт щё̄пита̄лве̄сыт. Та̄н са̄лы сун ӯлтта поргысыт, тыньщаӈ па̄хвтысыт ос пе̄рщисыт. Ка̄ркам, та̄ксар хо̄тпат о̄с пуссын мӯйлупсал майве̄сыт. Ӯскве котильт яныг палатка тӯщтыглавес. Ёнгын колыт тот нё̄тнэ йӣквыт йӣквсыт, э̄ргыт э̄ргысыт ос нё̄тнэ та̄ныт са̄ӈквылтасыт. Татем пӯмащ ялпыӈ хо̄тал о̄лыс. Та ӯсквен щалтнэ ма̄гыс яныг хо̄тпан яныгса̄т солко̄ви, ня̄врамын ос атпан солко̄ви ойтуӈкве э̄рыс. Па̄йтым тэ̄нут о̄с олн ма̄гыс ё̄рнколт тыналавес. Ты а̄ти, ты ялпыӈ хо̄талн са̄в мир ёхталас. Ка̄сыӈ хо̄тпа ща̄гтым ӯщлахтас. Ты ялпыӈ хо̄тал мӯсхал щирыл щё̄питан ма̄гыс Любовь Филиппова ос Анна Коптелова «Ханты-Мансийский банк» па̄лыл мӯйлупсал майвесы̄г. Тувыл «Единая Россия» нампа партият рӯпитан ма̄хум ма̄щтыр хо̄тпатн Ксения Григорьевна Ерныхован, Мария Степановна Молданован ос Ирина Семёновна Молданован мӯйлупса мисыт. Хотьют касыл щё̄питас, та̄н пуссын мӯйлупсал майве̄сыт. Нэ̄мхотьют по̄хыт ат хультыс. Тамле ты ёмас ялпыӈ хо̄тал Касум па̄вылт о̄лыс.

1095 2015.03.13. Людмила ТЕТКИНА

Тав ю̄нсхатым олн сэ̄лы. Округувт 2015 та̄л соссаӈ мир пе̄с накыт янытлан та̄лыг намаявес. Ты кастыл ам акв ма̄щтыр нэ̄ урыл потыр хансэ̄гум. Ольга Витальевна Мингалёва Октябрьский район Карымкары па̄вылт о̄лы. Тав тот самын патыс, тот яныгмас. Школан а̄стлан юипа̄лт Тобольск ӯст ханищтахтас. Та пора урыл Ольга Витальевна ла̄выс: «Ам па̄вылн ювле хунь ёхтысум, школат рӯпитаӈкве патсум. Биология предмет щирыл ня̄врамыт ханищтасанум. Тувыл хум ва̄рсум, ня̄враме̄н самын патыс. Пыгум янмалтым юн о̄лсум, ат рӯпитасум. Акв порат ӯвщим ам палтум ёхтыс, а̄нум сакныл хартуӈкве ханищтастэ. Сакныл са̄всыр пальсакыт, турло̄псыт хартуӈкве а̄нумн сака мӯстыс. То̄нт тав Ханты-Мансийск ӯст ремёсла центрыт рӯпитас. Карымкары па̄вылн ёхталым, а̄нум тох ма̄щтырлаӈкве ханищтастэ. Ты юипа̄лт ам са̄сныл ма̄нь хусапыт, а̄канит ос мо̄т пормасыт ва̄руӈкве патсум. Ань са̄всыр нэ̄пакыт та̄ратавет, тот ты ва̄рмаль урыл са̄в хансым о̄лы. Тыщир ма̄щтырлаӈкве амки та ханищтахтасум. Пе̄с порат ма̄ньщит, хантыт са̄с я̄ӈк на̄тнэ э̄тпос оигпан манос лӯпта э̄тпос о̄вылтахтан порат щё̄питасыт. Ам ос ты порат са̄с нуюӈкве во̄рн ялантэ̄гум. Ма̄щтырлаӈкве а̄нум сака мӯсты, тыи ма̄гсыл школаныл по̄хын минасум. Ань са̄всыр сувенирыт ва̄рим олн сэ̄лэ̄гум. Ты пормасыт са̄всыр выставкатт суссылтыянум ос тыналыянум. То̄ва порат ма̄хум ам палтум та̄нки ёхталэ̄гыт ос са̄всыр пормас ёвтэ̄гыт. Акв порат Октябрьский районт ялпыӈ хо̄тал о̄лыс, то̄нт миркол кӯщаит а̄нумн атпан а̄кань ю̄нтуӈкве ла̄всыт. А̄канит ялпыӈ хо̄талн ёхталам мӯй хо̄тпатн мӯйлуптасыт. То̄нт ам э̄тэхо̄талэ ю̄нсхатасум. О̄йкам ос пыгагум а̄нумн нё̄тсыт, то̄рло̄мтыт яктысыт, а̄канит ю̄нтсыт. Рӯт ма̄хманумн ань акваг ла̄ваве̄м, ю̄нтум пормасанум Ханты-Мансийск ӯсн суссылтаӈкве ос тыналаӈкве вос ке̄тыянум. Ань округ янытыл о̄лнэ ма̄щтыр ма̄хум та̄нки пормасаныл тот тыналыяныл. Тот са̄всыр яныг ялпыӈ хо̄талыт ва̄рыглавет, тув ёхталан мӯй ма̄хум тамле пормас ёмащакв ёвтэ̄гыт. Ам ма̄ньщи ос ханты ма̄щтыр ма̄хум хольт ю̄нсхатуӈкве ат ха̄сэ̄гум, а̄нум иӈ ханищтахтуӈкве э̄ри. Ты ма̄гсыл рӯпатанум тув ат ке̄тыянум. Ма̄щтыр ма̄хум са̄всыр ханищтапыл, мастерклассыл ва̄рыглавет. Ам ос тамле ханищтапн ялуӈкве сака ка̄саще̄гум. Тувыл хоты порат ос хоты ӯст манос па̄вылт тамле семинарыт ва̄рыглавет, щар ат ва̄глум. Тыт районт о̄лнэ ма̄щтыр хо̄тпат ёт ва̄йхатэ̄гум, та̄н палтаныл о̄с ханищтахтэ̄гум. Ань ос ра̄ктыл са̄всыр сувенирыт ва̄ре̄гум, тамле утыт ва̄рнэ ма̄гсыл ра̄кт ёвтэ̄гум. О̄влэ̄т па̄выл по̄хат ра̄кт хилсум, акв а̄ньщар ва̄рыгласум, кӯрн хунь пиныслум, тот па̄лыгпокматас. Тыт о̄лнэ рактыл тамле сувенирыт ат тэ̄лэ̄гыт». Ольга Витальевна ань предпринимательхо̄тпаг ловиньтахты, такви ма̄гсылэ рӯпиты. Тав садикн ос школан яланты, ня̄врамыт хурин по̄слыянэ ос са̄всыр альбомыт ва̄ри. Ма̄щтыр нэ̄ ла̄выс, тамле рӯпата ва̄рим о̄с олн сэ̄лы. Туп а̄канит ю̄нтым ос са̄всыр сувенирыт ва̄рим са̄в олн сэ̄луӈкве ат ве̄рми. Ос тувыл ты рӯпата таве̄н са̄в ща̄гт тоты, тыи ма̄гсыл мо̄т рӯпата ат кинсы.

1095 2015.03.13. Людмила ТЕТКИНА

Удмурт хум янытлавес. Ювле хультум э̄тпост Ханты-Мансийск ӯст нэ̄пак ловиньтан колт потрыт, стихыт хаснэ хо̄тпат янытлаве̄сыт ос «Югра» нампа премиял майве̄сыт. Тамле ва̄рмаль Дмитрий Мизгулин, «Ханты-Мансийский банкыт» кӯщай хум, ва̄рыс. Такви тав о̄с стихыт хансы. 2007 та̄л па̄сныл нэ̄пак хаснэ 50 хо̄тпат ты премиял янытлаве̄сыт: та̄н Россият, Белоруссият, Украинат, Сербият, Болгарият, Македоният, Грецият ос Чехият о̄лэ̄гыт. 2012 та̄лт Юрий Вэлла «краеведение» нампа номинация щирыл но̄хпатыс. То̄нт ё̄рн хум «Река Аган со притоками» нэ̄пакэ ма̄гсыл янытлавес. 2013 та̄лт ма̄ньщи о̄йка Андрей Тарханов, ханты хо̄тпаг Еремей Айпин ос Мария Волдина хансум нэ̄паканыл ма̄гсыл о̄с тамле премиял майлуве̄сыт. Ты та̄л нэ̄пак хаснэ онтолов хум янытлаӈкве ос та̄н хансум нэ̄паканыл урыл потыртаӈкве библиотекан во̄виньта̄лве̄сыт. Ты хо̄тпат халт финноугорский мирн ва̄нэ удмурт хум о̄лыс, тав наме Вячеслав Ар-Серги. Тав финноугор мирыт ща̄нь ла̄тӈаныл но̄хво̄рмалтан ос э̄лаль тотнэ ма̄гсыл янытлавес. Тав такви ща̄нь ла̄тӈыл хансум потранэ рущ ла̄тӈын толмащласанэ. Удмурт хум ва̄рнэ рӯпататэ ма̄гсыл о̄с «Югра» нампа премиял майвес.

1096 2015.03.27. Николай МЕРОВ

Пе̄с колытт о̄лнэ ма̄хум йильпи колыл мивет. Ты та̄л Югра ма̄т пе̄с колытт о̄лнэ ма̄хум йильпи колыл миӈкве патавет. Ты урыл Геннадий Бухтин, округ губернатор ва̄ӈын хум, мирколт сапра̄ни о̄лум порат ла̄выс. Ос ты ма̄хум то̄нт йильпи колыл мивет, хотьют коланыл 2012 та̄л мус щар пе̄сыг хасве̄сыт. Ты ва̄рмаль ань округ кӯщай Наталья Комарова та̄кыщ уральтым о̄ньщитэ. Ма̄хум ма̄гыс тыи щар та̄рвитыӈ ва̄рмаль, тыт о̄лнэ мир кӯщай нэ̄ ёт хо̄нтхатыгланэ̄ныл порат, таве ты урыл о̄сэва̄тал акваг китыглыяныл. Округувт пуссын аквъёт 5 со̄тыра са̄виткем хо̄тпа тамле лю̄ль колытт о̄лэ̄гыт. Ты программа хосыт 65 со̄тыра са̄вит квадратный метра о̄лнэ кол ӯнттуӈкве э̄ри. Ты тэ̄ла ма̄гыс 2015 та̄лт 1 миллиард 710 миллион солко̄ви тах холтаве. Кӯщай хум ла̄выс, са̄выӈпа̄лэ ма̄хум ты та̄л йильпи колн тах ва̄нтлэ̄гыт. Ты ва̄рмаль 2017 та̄л мус рӯпитаӈкве паты. Ань хӯрум та̄лн 4 миллиард 465 миллион солко̄ви та̄стувес, ты та̄лытт сыс пе̄с колытт о̄лнэ ма̄хум пуссын йильпи колыл тах мивет. Са̄выӈпа̄лэ олныт округ бюджетныл холтавет, мо̄т охсатэ ос Федеральный ЖКХ фондыл миве. Округ губернатор прессслужбатэ ке̄тум ля̄ххал ма̄ньщи ла̄тӈыг Николай МЕРОВ хансыстэ.

1096 2015.03.27. Тамара МЕРОВА

Мирн пе̄риим хо̄тпат сапра̄нин атхатыгла̄лсыт. Ты э̄тпост округ депутатыт атпан нупыл китыт сапра̄нин акванатхатыгласыт ос нилахуйлов са̄всыр тэ̄лат урыл ос то̄ва са̄кконытн пирмайтан ла̄тыӈ о̄вылтыт потыртасыт. Акв ва̄рмальт депутатыт пуссын акванка̄сащим о̄лсыт, та̄н Евгений Борисович Ботвинкин округ прокурор кӯщаиг пе̄риясаныл. О̄йка ты э̄лыпа̄лт прокурор ва̄ӈын хумыг рӯпитас. Тувыл Леонид Юрьевич Дольников, Нижневартовск ӯсныл о̄лнэ депутат, ёмас рӯпататэ ма̄гыс ма̄гылт о̄щнэ э̄сгын посыл майвес. Мо̄т тэ̄лат палт мирн пе̄риим хо̄тпат то̄внакт та̄нки халанылт мощ воритотсыт. Мо̄т хо̄н ма̄ныл тыг ёхтын хо̄тпат урыл са̄в потыр о̄лыс. Акв щё̄питан са̄ккон щирыл некоммерческий организацият ма̄гыс бюджетныл са̄внув олн та̄стуӈкве во̄ве̄гыт. Ты олныт мо̄т ма̄ныл ёхтум хо̄тпат матыр тэ̄ланылт нё̄тнэ ма̄гыс вос мивет. Ань ЛДПР партият рӯпитан депутатыт ты ва̄рмалит э̄лаль лаквтуӈкве ат таӈхияныл. Та̄н ла̄ве̄гыт, ты э̄лыпа̄лт мо̄т са̄ккон пирмайтан щирыл та̄н ка̄сащасыт, хотты э̄лы ма̄ныл ёхтум хо̄тпа ат та̄л лӯима̄т ке о̄лы ос рӯпиты, то̄нт ущ таве̄н сыресыр нё̄тмил ва̄руӈкве патэ̄гыт. Ос йильпи ла̄тыӈ ты са̄ккон палт ма̄н депутатанув пирмайтэ̄гыт ке, хо̄н ма̄ныл сака са̄в мори хо̄тпа тыг ёхтуӈкве ква̄лапи ос пуссын нё̄тмил во̄вуӈкве тах патэ̄гыт. Ты са̄ккон э̄лаль тотнэ депутатыт ла̄всыт, та̄н федеральный са̄ккон пирмайтым щирыл таве э̄лаль хансуӈкве патыяныл. Евгений Марков то̄нт ювлеля̄галас, Россия янытыл мо̄т о̄лнэ республикат ос округыт та̄нки палтаныл тамле ва̄рмаль ва̄ре̄гыт ке, тыи та̄н тэ̄ланыл. Ос ма̄н газ, ма̄во̄й но̄хвинэ ма̄вн мори хо̄тпа во̄вуӈкве щар ат э̄ри кос. Мо̄т са̄кконыт палт хӯлтнэ ла̄тӈыт ёмщакв а̄рталаве̄сыт ос та̄наныл та̄ра пирмайтасаныл. Тох а̄гмыӈмосыӈ, сакватахтам хо̄тпат рӯпатал минэ порат, тот савалатта̄л рӯпитаӈкве вос ве̄рмынувыт. Рӯпитан коланылт та̄нанылн э̄рнэ утыл щё̄питым вос о̄лэ̄гыт. Тувыл Победа 70 та̄л янытлан хо̄талэ ма̄гыс олныт та̄стын нак о̄вылтыт потыртасыт. Таима̄гыс округ янытыл о̄лнэ ӯсанувт, па̄вланувт са̄всыр кас ва̄рнэ накыт щё̄питавет. Акв яныг проект «Фронтовой привал» намаим о̄лы. Ань депутатский фонд па̄лыл 2 млн. 400 со̄тыра солко̄ви тув та̄стуӈкве ла̄вхатсыт. Хо̄нтлуӈкве ялум хо̄тпат пуссын олннё̄тмилыл мивет манос колт о̄щнэ матыр пормасыл ёвтавет. Округув янытыл войнан ялум ань 254 хо̄тпат хультсыт, мо̄лты та̄лт 328 хо̄тпа о̄лыс. Тувыл 4 со̄тыра 515 э̄лумхо̄лас война порат рӯпитам хо̄тпат, война паттыиг хум та̄л хультум э̄кват, лагерит савалам хо̄тпат ос блокадный Ленинград ӯсныл тыг ке̄тым хо̄тпат тув ловиньтавет. Та̄н пуссын о̄с олныл нё̄тавет. Мо̄тыт сапра̄ни депутатыт яныгпо̄ль э̄тпос хо̄тхуйплов хо̄талт ва̄руӈкве ла̄вхатсыт. Та сыс то̄ва са̄кконыт палт э̄лаль ла̄тыӈ тах хӯлтэ̄гыт.

1096 2015.03.27. Александр ВЬЮТКИН

Ӯсанув тӯя кастыл щё̄питаӈкв та о̄вылтаве̄сыт. Мощ мо̄лалнув Сургут ӯс кӯщаиг о̄лнэ хум Дмитрий Владимирович Попов ёт прессконференция о̄лыс. Тав ля̄ххал тотнэ acceptance loan ма̄хум нупыл такви ӯсэ̄т ва̄рнэ рӯпататэ урыл потыртас. Щар о̄влэ̄т Дмитрий Владимирович тӯя кастыл ӯсканыт тӯйтныл хотвинэ урыл титыглавес. Ювле тав ла̄выс: «Со̄ль, ты та̄л са̄в тӯйт патыс. Ма̄н Сургутский районув щирыл та̄л сыс патнэ тӯйт нёлса̄т нупыл тит сантиметра осытэ нормаг ловиньтахты. Ты тэ̄лы метра арыгтем осыт тӯйт патыс. Ты ма̄гсыл тӯйт моляхнув ӯс коныпа̄лн тотуӈкв э̄ри. Мо̄т щирыл ӯсхулыянув витн лапа̄маравет. Сургут ӯс мувлахи титхуйплов ма̄т тӯйт атвес. Нол витэ ӯсн ул вос ёхты, та ма̄т э̄лн о̄лэ̄гыт. Ка̄сыӈ хо̄тал ӯс янытыл титса̄т атпантем тӯйт тотнэ машина рӯпиты. Сургут янытыл лё̄ӈхе палытэ̄т титса̄т са̄тпан нупыл хо̄т ве̄рыстаг о̄лы. Та̄наныл ёмщаквег, сыстамыг о̄ньщуӈкв э̄ре̄гыт. Мо̄т щирыл ӯс янытыл ма̄нь машинал ма̄хум яласаӈкв ат ве̄рме̄гыт». Та юипа̄лт ӯс янытыл пиным лё̄ӈхыт урыл Дмитрий Владимирович титыглавес, ты та̄л Сургут ӯс хотты ӯсхуланэ щё̄питаӈкв патавет манос нас лё̄ӈх котильт о̄лнэ асанэ пантуӈкв патавет? «Лё̄ӈх а̄хвтасэ тэ̄лы ос тӯяг сака хащлы. Тэ̄лы ма̄ по̄льнэ порат лё̄ӈханув ащирман но̄хво̄ртавет. Ты ма̄гсыл лё̄ӈх а̄хвтасэ па̄лыг та поклы. Тӯяг ос хо̄талув исылтанэ порат лё̄ӈх а̄хвтасэ ма̄нь поклылыт щирыл нол витын щалтаве. Э̄ти витэ я̄ӈкыг по̄льнэ порат лё̄ӈх а̄хвтасэ па̄лыг та во̄ртаве. Та юипа̄лт лё̄ӈхув асыӈыг та е̄мты. Ӯс янытыл лё̄ӈханув щё̄питан ма̄гсыл са̄в олн э̄ри. Таима̄гсыл ма̄н аквторыг пуссын щир мус лё̄ӈхув щё̄питаӈкв ат ве̄рмилӯв. Ка̄сыӈ та̄л щар лю̄лиг о̄лнэ лё̄ӈхыт палытанылт щё̄питыянӯв. Тув сыс атхо̄т лё̄ӈх щё̄питаӈкв туп а̄лыме̄в. Ат а̄лыманэ̄в ос олн ат то̄вылхатнэ порат асаныл нас лаппантавет». Ты ма̄к э̄рнэ тит ва̄рмалиг урыл ма̄нти халувт потрув ты о̄лыс. Юио̄влэ̄т Дмитрий Владимирович ла̄выс: «Таквсы порат ӯс янытыл о̄лнэ лё̄ӈханув сунсуӈкв ёхталэ̄н, ам на̄нан пуссын ӯриянум».

1096 2015.03.27. Валентина УЗЕЛЬ

На̄нти хансум потранын ты касылн те̄тэ̄н. Ма̄н округув янытыл культура департамент па̄лыл йильпи касыл ва̄рвес, рущ ла̄тӈыл тамле намыл пинвес – «Родной Югре признание». Ты касыл ювле хультум ре̄тыӈ ю̄свой э̄тпос 1 хо̄талныл ос яныг таквс э̄тпос мус мины. Ань ты нёлолов э̄тпос сыс матыр потыр тув те̄туӈкв ро̄ви. Тит та̄л сыс акв щёс ты конкурс ва̄рыглаве. Ань комиссия о̄лы, та̄н ты рӯпата уральтаӈкв патыяныл. Тув 14 та̄л яныт ос тыгыл яныгнув ма̄хум та̄нти потраныл те̄туӈкв ве̄рме̄гыт. Акв хо̄тпа туп акв потыр вос хансы. Тув нас ловиньтан потрыт манос мо̄т матыр хурип потыр те̄туӈкв ро̄ви. Потрыт титтыг тах урттавет: акв номинациятэ «литературное творчество» нампаг ла̄ваве, мо̄танэ «проектная и исследовательская работа». Ловиньтан потрыт хаснэ ма̄хум та̄нти потраныл са̄всыр щирыл вос хансыяныл, та̄н рущ ла̄тӈыл тох намаявет – рассказ, очерк, эссе. Мо̄т потрыт ма̄н о̄лнэ ма̄в урыл, пе̄с йис накыт урыл хансым вос о̄лэ̄гыт. Акв хотьют такви ще̄мьятэ урыл те хансы, тот пе̄с рӯтанэ о̄лупсаныл урыл ос наманыл пуссын вос хансыянэ. Па̄вылт о̄лум манос ань о̄лнэ мирн ва̄нэ хо̄тпа о̄вылтыт потыр хансуӈкв ро̄ви. Ты потрыт пуссын округ библиотекат акванатуӈкв патавет. Тувыл э̄лаль пуссын тот та хультуптавет. Ка̄сыӈ номинациятэ̄т щар ма̄к ёмас потыр хансум 6 хо̄тпа тах пе̄рияве, титтит хо̄тпан ка̄сыӈ места миве. Но̄хпатум хо̄тпат ос ня̄врамыт пуссын округ библиотекаколт янытлаӈкв патавет. Та̄н потраныл са̄всыр нэ̄пакыт тах хансавет. Ос хо̄тпа ат те ка̄сащи, тав потре нэ̄мхо̄т ат хансаве.

1096 2015.03.27. unknown

Ня̄врам винэ ще̄мьят ма̄гыс. Ань ня̄врам винэ ще̄мьятытн са̄в са̄ккон ва̄ӈкв э̄ри. Та̄н ма̄гсыланыл ищхӣпыӈ утыт я̄нас ло̄пс о̄лы, рущ ла̄тӈыл тамле намыл пиным о̄лы – «Перспективное детство Югры». На̄н ты урыл матыр ва̄ӈкв таӈхегы̄н те, тот ёмащакв тисхатэ̄н.

1096 2015.03.27. Людмила ТЕТКИНА

Олн ӯрнэ соссаӈ ще̄мьят ма̄гсыл ля̄ххал. Са̄в та̄л округувт «Обеспечение жилыми помещениями граждан из числа КМНС» нампа программа рӯпиты. Ты хосыт ма̄ньщи, ханты ос ё̄рн ще̄мьят кол ёвтнэ манос ӯнттын ма̄гсыл субсидияолныл мивет. Программа э̄рнэ щирыл ат рӯпиты, мощща ще̄мья олныл нё̄тавет. Тыи ма̄гсыл кӯщаит тув йильпи ла̄тыӈ ань хансэ̄гыт. Ты ва̄рмаль урыл потыртаӈкве та̄н Ханты-Мансийск ӯст о̄лнэ соссаӈ ма̄хум сапра̄нин во̄виньта̄лсаныл. Диана Саваровская, кол ӯнттын округ департаментыт кӯщай ва̄ӈын нэ̄, ты урыл ла̄выс: «Соссаӈ ма̄хумн нё̄тнэ программа 2006 та̄л па̄сныл рӯпиты. Ты пора сыс округувт 2 со̄тыра 186 ще̄мья субсидияолныл нё̄тве̄сыт. Та̄н о̄лнэ кол ёвтнэ манос ӯнттын ма̄гсыл 3 миллиард 800 арыгкем со̄тыра солко̄ви та̄стуве̄сыт. Ань очередин иӈ 3 со̄тыра 992 ще̄мья хансым о̄лы. Ты программа 2020 та̄л мус олныл миӈкве патаве, ка̄сыӈ э̄лы та̄л 70 миллион солко̄вил хасвес. Ты э̄лыпа̄лт районыт ос яныг ӯсыт та̄нки я̄нас очередь о̄щсыт. Тувыл та̄н пуссын Ипотечный агентстван аквантотве̄сыт. Ань тамле ва̄рмаль о̄лы, тув хасхатам о̄выл ма̄хум субсидияолн ат выгыт. Тувыл са̄ккон щирыл, та̄н касыӈ та̄л уведомлениенэ̄пакыл ке̄тыглавет ос ты нё̄тмил виӈкве ла̄вавет. Ще̄мьят хӯрум э̄тпос номсахтуӈкве ве̄рме̄гыт. Хӯрум э̄тпос хунь ювле хульты, туп то̄нт мо̄т ще̄мьят тамле нэ̄пакыл ке̄тавет. То̄ва хо̄тпат са̄т щёс тамле пищмал ёхталаве̄сыт. Та̄н ювле ла̄тыӈ ат ке̄тэ̄гыт, тох насска̄сыг са̄в э̄тпос ювле та хульты. Ка̄сыӈ та̄л ты ма̄хмытныл ювле ла̄тыӈ урим, ма̄н мо̄т ще̄мьян нё̄туӈкве ат ве̄рме̄в. 2013 та̄лт 23 миллион 800 со̄тыра арыгкем солко̄ви ат холтвес, ты олныт округ бюджетын ювле вуйве̄сыт. 2014 та̄л сыс ты ма̄хмытныл ла̄тыӈ урим о̄с са̄в олн хультыс. Та та̄л оигпан э̄лыпа̄лт мо̄т ще̄мьят молях о̄лнэ кол хо̄нтсыт ос нэ̄паканыл акванатсаныл ос субсидияолныл ва̄т са̄грапнал э̄тпос 31 хо̄талэ̄т майве̄сыт. Ты программа ёмащакв вос рӯпитас, ма̄н ань акв йильпи ла̄тыӈ тув хансэ̄в. 2006-2010 та̄лытт ты очередин хасхатам ще̄мьят ос акв заявлениенэ̄пак хансуӈкве патэ̄гыт. Йильпи очередь хунь ва̄раве, кӯщаит сунсуӈкве патэ̄гыт, хоты та̄лт ос щислат ты ма̄хум пе̄с очередьн хансым о̄лсыт. Тамле очередь акв та̄л рӯпитаӈкве тах паты. Ос заявлениенэпак ма̄хум та̄л сыс хансуӈкве ве̄рме̄гыт. Ты та̄л хо̄тпа субсидияолныл ат ке миве, йильпи та̄лт заявлениенэ̄пак о̄с хансуӈкве ве̄рми. Ты рӯпата таи ма̄гсыл ва̄раве, та̄стым олныт пуссын соссаӈ ма̄хум халт очередь щирыл вос уртавет ос ювле округ бюджетын ул вос ке̄тавет». Сапра̄нит ма̄хум китыглахтасыт, манрыг 2010 та̄л юипа̄лт очередьн хансым ще̄мьят тамле заявлениенэ̄пак хансуӈкве ат ве̄рме̄гыт. Кӯщай нэ̄ ла̄вме щирыл, ань 2006-2010 та̄лытт ты программан хасхатам ма̄хум ма̄гсыл олн та̄стувес. Тыи ма̄гсыл мо̄т ще̄мьят ань нё̄туӈкве ат патавет. Ань 400 соссаӈ ще̄мья субсидияолн та̄л о̄лнэ кол ёвтсыт. Ма̄хум ос пӯмщалахтасыт, та̄стым олныт ты ще̄мьят халт ӯртуӈкве ро̄ви ман ати. Кӯщай нэ̄ ла̄выс, тох ва̄руӈкве ат ро̄ви, ще̄мьят туп очередь щирыл олныл мивет. Ма̄ньлат хо̄тпат ос мо̄т ма̄хум ма̄гсыл о̄лнэ программат ань пуссын ты йильпи тэ̄ла хосыт рӯпитэ̄гыт. Ос тувыл ты заявлениенэ̄пак са̄в хо̄тпа хансуӈкве ёхталы. Ты та̄л оигпан э̄лыпа̄лт бюджетыт арыг олн ке хульты, та̄н субсидияолныл мивет. Соссаӈ ще̄мьятн нё̄тнэ программа мӯсхалыг рӯпитаӈкве ке о̄вылтахты, кӯщаит са̄внув олн тув та̄стуӈкве тах патэ̄гыт. Ань та̄стым олныл та̄л сыс туп 25-30 соссаӈ ще̄мья кол ёвтуӈкве ве̄рме̄гыт. Кӯщаит ты йильпи тэ̄ла хунь пирмайтэ̄гыт, ма̄ньщит, хантыт ос ё̄рн ма̄хум Ипотечное агентстван заявлениенэ̄пак та̄ра ке̄туӈкве тах ве̄рме̄гыт. Ань соссаӈ ще̄мьят очередяныл интернетыт о̄лнэ ло̄псыт ловиньтаӈкв ро̄ви, та̄н наманыл пуссын тот о̄лэ̄гыт. Ка̄сыӈ хо̄тпа такви наме тот хо̄нтытэ. Ань Ипотечный агентстват 2006-2010 та̄лыт сыс ты очередин акв со̄тыра 380 ще̄мья хансым о̄лэ̄гыт. Та̄н тамле заявлениенэ̄пак тув ке̄туӈкве ве̄рме̄гыт.

1096 2015.03.27. Людмила ТЕТКИНА

Москва ӯст яныг суссылтап щё̄питаве. Москва ӯст яныг суссылтап щё̄питаве Ка̄сыӈ та̄л яныгполь э̄тпос 22-26 хо̄талытт Москва ӯст «Сокровища Севера» нампа суссылтап ва̄рыглаве. Ань ос акв та порат Россия янытыл о̄лнэ соссаӈ ма̄хум Ассоциация 25 та̄лэ то̄влын кастыл «Четверть века – результаты, итоги перспективы» нампа конференция рӯпитаӈкве тах паты. Ты пора сыс манхурип рӯпата ва̄рвес ос маныр та̄рвитыӈ ва̄рмалит соссаӈ ма̄хум иӈ о̄ньще̄гыт, та урыл потыртаӈкве патэ̄гыт. Литература та̄л янытлан кастыл тот «Душа Севера» нампа тэ̄ла ва̄раве. Нэ̄пак хаснэ соссаӈ ма̄хум та̄нки стиханыл ос потраныл ловиньтаӈкве тот акванатхатыглэ̄гыт. Ма̄н округувныл общинат рӯпитан ма̄хум тув ялуӈкве ань щё̄питахтэ̄гыт. Суссылтапыт хӯл, нё̄выль, ла̄хыс, пилыт ос мо̄т тэ̄нут тыналаӈкве патэ̄гыт. Округ правительство ке̄тум ля̄ххалэ ма̄ньщи ла̄тӈыл Людмила ТЕТКИНА хансыстэ.

1096 2015.03.27. Николай МЕРОВ

Сутыт рӯпитан кӯщаиг потре̄н. Ты э̄тпос 20 хо̄талт ля̄ххал тотнэ колн Арбитражный суд кӯщай Геннадий Стоякин ос во̄ритотнэ ма̄хум ва̄рмаляныл ёт рӯпитан кӯщай ва̄ӈын хум Юрий Южаков во̄виньта̄лвесы̄г. Мо̄лты та̄л ва̄рум рӯпатаныл урыл тэ̄н потыртасы̄г. Г. Стоякин ла̄выс: «Ма̄н рӯпатав ка̄сыӈ хо̄тпа интернет хосыт уральтаӈкве ве̄рмитэ. Матыр во̄ритотнэ ва̄рмаль миннэ порат, хотьют ка̄сащи, тав ты тэ̄ла суснэ ма̄гыс сутколн ёхтуӈкве ве̄рми, ма̄н ат тӯйтыглахтэ̄в. Юио̄выл та̄лытт предпринимателит ос государственный организацият са̄в во̄ритотнэ нак щирыл заявлениенэ̄пакыт хансэ̄гыт. Та̄н ва̄рмаляныл ёт ма̄н ань са̄в рӯпата ты ва̄ре̄в. 2008 та̄лт Россият та̄рвитыӈ о̄лупса е̄мталам порат ос са̄в заявлениенэ̄пак сутн ёхталас. Са̄выӈпа̄лэ договор нэ̄пак щирыл рӯпата минэ хо̄тпат олн э̄рнэ са̄вит ат ойтэ̄гыт, ты ва̄рмалит хосыт ма̄хум нё̄тмил во̄всыт. Мо̄т тамле ва̄рмаль о̄лы олнэ кол ма̄гыс на̄йпос, вит, ре̄г ма̄гыс ат о̄йтхатнэ хо̄тпат сут хосыт олнаныл вивет. Мо̄лты та̄л сыс акв со̄тыра са̄тса̄т хо̄тпа сутытаве̄сыт. Пуссын аквъёт са̄всыр тэ̄лат щирыл 7 млрд солко̄ви суд хосыт пуввес. Ос то̄ванакт во̄ритотнэ хо̄тпат та̄нки ва̄рмаляныл сут та̄л мӯсхал щирыл щё̄питыяныл, та̄нки халанылт потыртахтэ̄гыт. Са̄в ва̄рмалит миркол па̄лыл ма̄н палтув те̄тавет». Ю. Южаков ос «Ютейр» нампа авиакомпания урыл тох ла̄выс, ты компаният рӯпитан хо̄тпат та̄ра иӈ ат паттысыт, арбитражный сутт манос нас сутт та̄н ва̄рмаляныл уральтаӈкве патаве. Ты компания банкротыг иӈ ат е̄мтыс. Мощ ётылнув ты тэ̄ла щирыл сут е̄мты, ма̄н на̄нан ты урыл о̄с тах ла̄ве̄в.

1096 2015.03.27. Тамара МЕРОВА

Ма̄н ла̄тӈанув хо̄н ма̄т нот палытыл ханищтавет. А̄ти сака хосат Венгрия э̄лы хо̄н ма̄ныл Чилла Хорват пищма ке̄тыс ос ма̄навн Дебрецен университет урыл потыртас. Ты та̄лт та университетыт о̄лнэ финноугорский ма̄хум ла̄тӈыт ханищтан кафедра яныгса̄т та̄лэ то̄влум. Ма̄ньполь э̄тпос хо̄тыт ос са̄тыт хо̄талаге̄т тав янытлавес. Рӯтыг о̄лнэ ща̄нь ла̄тӈанув пӯмщалан хо̄н учёныит пуссын тув акванатхатыгламыт. Ань маныр тот о̄лыс, маныр урыл та̄н потыртасыт, Чилла мощ хансыс. Ты кафедрат Шандор Матичак кӯщаиг о̄лы, тав ань пуссын ма̄хмыт янытласанэ. Яныг мӯй хо̄тпат халт Паси Туоминэн Финляндия ма̄ныл Венгрият посоло̄йка о̄лыс, тав о̄с ма̄хманув ёт пащалахтас. Та ма̄ныл ос Ювяскюля университетт рӯпитан учёныит ёхталасыт. Тот финский ла̄тыӈ ханищтан ва̄рмаль янытлавес. Венгрия мо̄т университетанылт манос институтанылт рӯт мирыт ла̄тӈыт, культура манос история ханищтан хо̄тпат та̄нки хансум потраныл тот ловиньтасаныл. Ты кафедра историятэ урыл потыртаманыл порат рӯтыг о̄лнэ мирыт пуссын ла̄выглаве̄сыт. Учёныит са̄всыр тэ̄лат урыл потыртасыт, тувыл аквана̄рталахтым ос са̄всыр тэ̄лат та̄рапаттысыт. Венгрыт ла̄тӈаныл ос пе̄с наканыл щирыл рӯт ма̄хманыл о̄вылтыт потыртаӈкве акванатхатыгласыт. Та̄н халанылт Ласло Хонти, намыӈсуиӈ финноугроведакадемик ВАН, Шандор Чуч, Шандор Северени, Иштван Козмач, Марианн Бакро-Надь рӯт ла̄тыӈ ханищтан яныг языковедыт, Иштван Вашархейи ос Клара Адягаши тюрский ма̄хум ла̄тӈаныл ханищтан языковедыг о̄лсыт. Тувыл Йожеф Папаи, о̄с мирн ва̄нэ хо̄тпа, ка̄стысаныл. Тав о̄лме̄т А̄с ма̄хум ла̄тӈаныл пӯмщаластэ. Ос Бела Кальман, тав ма̄ньщи ла̄тыӈ ханищтан нэ̄пакыт хансыс. Тав щё̄питам нэ̄паканэ щирыл Чилла Сегед университетыт ханищтахтаме порат ма̄н ща̄нь ла̄тӈув ханищтаӈкве патыстэ. Бернат Мункачи о̄вылтам ма̄ньщи словарьнэ̄пак Бела Кальман э̄лаль щё̄питастэ. Тэ̄н Евдокия Ивановна Ромбандеева ёт ёмщакве̄г ва̄йхатсы̄г, ла̄тӈув ханищтан ма̄гыс са̄в рӯпитасы̄г. Ань ты порат Бригита Эндрес, доктор учёный нам о̄щнэ нэ̄, ма̄ньщи ла̄тӈыл сака пӯмщалахты. Ты ва̄рмалит урыл ва̄ӈкве ма̄навн о̄с мӯсты. То̄румн маим ща̄нь ла̄тӈув иӈ матах нот палыт э̄лаль вос суйты. Мо̄т хо̄н ма̄т таве ханищтан хо̄тпатн, таве пӯмщалан хо̄тпатн пӯмащипа ла̄тыӈ ке̄тэ̄в. Пус ка̄т, пус ла̄гыл, та̄нки То̄румн, На̄й-О̄тыранын вос ӯргалавет.

1096 2015.03.27. Светлана РОМБАНДЕЕВА

Ане̄кватэ Сӯкыръяныл о̄лыс. Ха̄льӯс район Ло̄пмус па̄вылн ялмум порат акв ма̄ньщи хо̄тпа палт щалтсасум, наме Михаил Васильевич Лелятов. Ме̄н мощ ӯнлахо̄лсуме̄н, потрамасме̄н. Тав яныг таквс э̄тпос 12 хо̄талэ̄т 1941 та̄лт Ло̄пмуст самын патыс. На̄н ань э̄лаль Михаил Васильевич потре ловиньтэлы̄н. Хо̄нтлын нак порат ма̄н Куга (Хохаль) па̄вылт о̄лсӯв, Сортыӈъя тыпа̄лтнув. Омам ла̄ви, ма̄н нёлолов ня̄врам о̄лсӯв – ат а̄ги, хӯрум пыг. Ань пуссын холасыт, амттем хультсум. Мо̄лты та̄л щар ма̄нь а̄пщим Колям а̄тимыг е̄мтыс. Тав 1956 та̄лт самын патыс, Сортыӈъят ханищтахтас. Армиян ялыс, морфлотыт служитас. Э̄кватэ̄нтыл Кульпаст акванхо̄нтхатсы̄г, тувыл Ягримн минасы̄г, тув о̄лмыгтасы̄г. Колям речфлотыт рӯпитас. Хӯрум ня̄врам о̄ньщигласы̄г, китыг ань о̄лэ̄г, акватэ̄н о̄с а̄тим. Омам Анна Трофимовна Ма̄нья па̄вылныл о̄лыс, 1895 та̄лт самын патыс. Ане̄квав Евдокия Сӯкыръяныл о̄лыс. А̄тям ос Куга па̄выл хум, Василий Макарович. Акиянум тыт Ло̄пмуст о̄лсыт. Ос хотыл ёхталасыт, таи тай ат торгамта̄лыслум, аман тыт и о̄лсыт. А̄тям войнан тотыглавес, юв ёхталас. Юв ёхтыс, мо̄т э̄ква тотыглас, ма̄нав оссувласанэ. Тувыл ма̄н Куги па̄вылныл тыг Ло̄пмусн йисӯв, тыт о̄лмыгтасӯв. Омам рӯтанэ тыт о̄лсыт. Ань ам о̄лнэ колум ты Юван Николаевич Шесталов тав а̄тятэ тыт председателиг рӯпитаме порат ӯнтталастэ, омав колхозт рӯпитас. О̄влэ̄т ма̄н ты колт, та колт о̄лсӯв, тувыл ты колыл ӯнттувесӯв, тыг щалтсӯв. Шесталов о̄йка о̄влэ̄т тав ты колхоз но̄хво̄рмалтастэ. Ётыл ос пе̄нтхата̄лсыт, са̄в хо̄тпа рӯпитас. Ам Кульпас па̄выл интернатыт ханищтахтасум. Армияныл юв ёхтысум, Саранпа̄вылн рӯпитаӈкве минасум. Тот рыбкоопт китаххӯрмах та̄л рӯпитасум, ла̄пкат тыналахтасум. Хо̄рыӈпа̄вылт о̄с матахмат та̄л ла̄пкат рӯпитасум. Тувыл юв таӈхе̄гум, юн ань омам о̄лыс. Ат кос та̄ртве̄сум, ла̄ве̄гыт, рӯпитэ̄н. Омам палт щёровн юв таӈхе̄гум, па̄влувн тохиӈ та йисум. Э̄квам Анна Дмитриевна, а̄ги о̄парищ наме Кугина. Тыт, Ло̄пмуст акванхо̄нтхатсуме̄н. То̄нт ам армияныл юв ёхтысум, акван та минасаме̄н. Акв а̄ги янмалтасме̄н, Ленаме̄н. Тав ань Кульпаст о̄лы, а̄гипыг о̄ньщи, Света ос Сережа. Тэ̄н ань сас ще̄мьяӈыгня̄врамыӈыг е̄мтсы̄г. Сережа апгум армият служитас. Э̄квам хотталь щалтме нёлолов та̄лыг ты е̄мтыс. Э̄лнаӈ э̄рыгмо̄йт ва̄нэ ма̄хум са̄в о̄лыс. Па̄влувт Пе̄тр Ефимович Шешкин тав оматэ сака мо̄йтыс, тувыл Василий Албин э̄кватэ̄нтыл, наме Татьяна. Ма̄н яныгмамув порат Ӯй йӣквнэ ва̄рмаль ва̄рыглавес, тамле колт акваг о̄лыгласӯв. Ма̄хум са̄всыр ощхуль суссылтасыт, тӯлыглахтасыт, поргысыт, йӣквсыт, са̄снёлыт та маныр, сака пӯмыщ о̄лыс. То̄нт мощща айсӯв. Ма̄хум акваг рӯпитасыт, мис, лув о̄щсыт. Па̄гле нупыл яныг тэ̄пканкапай ва̄рыглавес, ма̄хум картопка, турнепс, капуста ӯнтталасыт. Ке̄рма̄нтыл хилэ̄гыт, ӯнттэ̄гыт. Во̄й ва̄рнэ аппарат о̄лыс, во̄й ва̄ре̄гыт. Па̄влувныл акв ве̄рыста палыт, Ло̄пыӈ тапа̄лт, звероферма о̄лыс, тот охсарыт янмалта̄лве̄сыт. Арыгтам щаквит тувле ве̄трал харттыяныл, вит тотнэ йӣвн ве̄траныл тагатыяныл, тох та тотыяныл. Потруме̄н ань та оигпас. Михаил Васильевич юн такте̄т о̄лы. А̄гитэ ос апыгрищаге тав палтэ ва̄тихал ёхталэ̄гыт, уральта̄лаве, мощ мӯйлэ̄гыт. Ты я̄тил ма̄ньщи хо̄тпав са̄в та̄л пуста̄гыл вос о̄лы, На̄янэ̄н-О̄тыранэ̄н вос ӯргалаве! Пус ка̄т, пус ла̄гыл!

1096 2015.03.27. Александр ВЬЮТКИН

Хӯрум па̄вылныл ня̄врамыт акванёхталасыт. Ма̄ньполь э̄тпост хӯрум ма̄ньщи па̄выл халт ёсал ха̄йтнэ ва̄рмаль о̄ста ва̄рыглавес. Ты ёсал ха̄йтнэ пӯмащ «Лыжнёй Андрея» ла̄ваве. Ты та̄л ёсал ха̄йтнэ ва̄рмаль са̄тытыг о̄лыс. Ка̄сыӈ та̄л аквта яласан лё̄ӈханыл щирыл ня̄врамыт акв юипа̄лт ёсал ха̄йтэ̄гыт. Ты порат Саранпа̄вылныл пуссын аквъёт хус хо̄тпа минас. Тувыл тэ̄нутаныл ос пормасаныл тотым хӯрум «Буран» минас. Саранпа̄вылн ёсал ха̄йтнэ ма̄хум акванёхтуманыл юипа̄лт Андрей Яковлевич Хатанев ёт рӯпитам ос таве ва̄м ма̄хум ёт ща̄й айнэ ма̄гсыл акванатхатыгласыт. Тот тав о̄лум хо̄таланэ, ва̄рыглам тэ̄ланэ ка̄стуве̄сыт. Ты ёмас хумиюв урыл потыртан ма̄гсыл са̄в мир тув ёхталы. Саранпа̄вылныл пуссын аквъёт атхуйплов хо̄тпа ёсал ё̄мыс. Ка̄сыӈ та̄л та̄н халанылт кӯщаиг Иван Николаевич Вокуев яласы. Ты ёмас, аквписыг мовиньтан саран о̄йка моще̄ртын са̄тлов нупыл са̄т та̄лыг то̄влаве. Иван Николаевич э̄лаюв ня̄врамыт ёт акваг ёсал ха̄йты. Таве ат ва̄нэ хо̄тпа таса̄вит та̄л янытыг аты пыл ла̄витэ . Ма̄ньполь э̄тпост хӯрмит хо̄талэ хо̄талыӈ хо̄талыг о̄лыс. Ня̄врамыт ханищтан пе̄с колт ань ДЮЦ «Поиск» о̄лы, ты кол по̄ханыл ёсаӈ ма̄хманув Ло̄пмус па̄выл нупыл та нёвумтасыт. Па̄выл хyлыт щирыл ё̄миманыл порат па̄выл ма̄хманув хотьют нас сунсым, мо̄таныл ка̄тпатта ра̄тым кон ква̄лыгласыт. Па̄выл кан оигпан ма̄ мус ёхтыманылт хо̄тал но̄хнув миннэ ма̄гыс ущпылнэ̄г исылтаӈкв о̄вылтахтас. Во̄т ре̄ге ма̄лтып во̄тыг во̄тыс. Хо̄сло̄х па̄вылн тэ̄пъялан ма̄гыс хо̄талъятт тит щё̄с ляпат ёхтысыт. Иван Николаевич та̄ксарнуве̄г о̄лнэ пыгрищанэ а̄ращ па̄лтнэ ос вит путыг па̄йтуптан ма̄гсыл э̄лаль те̄тсанэ. Ка̄сыӈ е̄мт ма̄хум тув ёхтуманыл порат пӯтаныл а̄ращ нумпа̄лт па̄ялтан щирыл ты ханэ̄гыт. Щё̄с арыгтем ӯщлахтаманыл, тэ̄пъяламаныл юипа̄лт тувыл э̄лаль я̄ хосыт Хо̄рыӈпа̄выл мус та минмыгтасыт. Ты порат Хо̄сло̄х ос Хо̄рыӈпа̄выл халт миннэ лё̄ӈхе ёмас лё̄ӈхыг о̄лыс. Мощ та э̄лыпа̄лнув Иван Николаевич Хо̄рыӈпа̄выл мус па̄выл ма̄хманэ ёт потыртахтын ос лё̄ӈхе уральтан щирыл ялыс. Та лё̄ӈх охсатэ «Бураныл» авкписыг яласа̄лымаг о̄лы. Ма̄хум тот аквписыг яласэ̄гыт. Э̄типа̄лаг турманлан э̄лыпа̄лт ёсаӈ ма̄хманув Хо̄рыӈпа̄выл тумп мус та ёхтысыт. Э̄т хӯлыманыл юипа̄лт Хо̄рыӈпа̄вылныл ло̄ӈхаль та минмыгтасыт. Нэ̄тлё̄ӈх мус лё̄ӈханыл лапво̄тастым о̄лыс. Хӯл алыщлан ма̄хум пе̄с колрищаныл по̄хат ёсаӈ ма̄хманув ща̄й аиманыл юипа̄лт э̄лаль та нёвумтасыт. Э̄типа̄лаг Ло̄пмус па̄вылн та ёхтысыт. Э̄типа̄лаг ёсал ё̄мнэ ня̄врамыт ос Ло̄пмус па̄вылт о̄лнэ ма̄хум ма̄гсыл концерт о̄лыс. Хӯрмит хо̄тал щар пӯмащ хо̄талыг о̄лыс. Но̄хква̄лманыл юипа̄лт пуссын ёсал каснэ ма̄гсыл щё̄питахтуӈкв та о̄вылтахтасыт. Хотьют духовка нампа писалил па̄тлуптаӈкв ат ха̄сы, таве̄н та писаль такталавес, па̄тлуптаӈкв ханищтавес. Тувыл потыртавес, маныр тав ётэ ва̄руӈкв ат ро̄ви. Ты нампа писаль са̄квня̄л яныт те̄рня̄лыл па̄тлупты. Ты порат каснэ ва̄рмаль щё̄с щирыл са̄ртыннуве̄г о̄вылтавес. Ка̄сыӈ та̄л ёсал каснэ мир са̄вми. Касыл о̄вылтахтам порат о̄влэ̄т щар ма̄нь ня̄врамыт ха̄йтсыт. Тувыл ханищтахтын ня̄врамыт ос ма̄ньлат ма̄хум тит ла̄кв щирыл ха̄йтсыт, тит ма̄т па̄тлуптасыт. Нила по̄сн па̄тамтаӈкв э̄рыс, ка̄сыӈ по̄сн акв ня̄л. Титыт па̄тлуптан ма̄т ёсал лю̄лим па̄тлуптасыт. Тувыл ущ финишин ха̄йтсыт. Ка̄сыӈ ат хойнэ по̄с пе̄нтсыл хо̄тпа иӈ лов кумыл нумыл нё̄твес. Э̄типа̄лаг ос во̄раян ма̄хум касыланыл та о̄вылтавес. Янгӯй котыӈ ёсал ма̄хум ха̄йтсыт. Ха̄йтыманылт акв ма̄т ё̄втыӈ ня̄л по̄сын та̄ртыгласыт. Ё̄втаныл пе̄с хольт титпис ё̄втыг ва̄рим о̄лсыт. Каснэ мир судьяг о̄лнэ ма̄хум И. Н. Вокуев, О. А. Хатанев ос В. П. Рокин но̄хпатум ня̄врамыт пе̄риясыт. Ка̄сыӈ та̄л каснэ ма̄хум ёмас мӯйлупсал мӯйлуптавет. Янге, ма̄не нэ̄мхотьют мӯйлупса та̄л по̄хан ат хультуптаве. Но̄хпатум хо̄тпат иӈ олныл майлуве̄сыт. Мӯйлуптан ма̄ныл а̄стыманыл юипа̄лт пуссын ювле минмыгтан лё̄ӈханылн щё̄питахтуӈкв патсыт. Иван Николаевич Саранпа̄выл ня̄враманэ ёт та̄нти йинэ лё̄ӈханылт аквта ювле Хо̄рыӈпа̄выл мус ха̄йталтахтасыт. Тот э̄т хӯлыманыл юипа̄лт, мо̄тыт хо̄талт та̄нти па̄вланылн та ёхтысыт. Ёсал ха̄йтнэ ма̄хманув нэ̄мхотьютаныл ла̄гланыл вит хӯргыл ат нильталасаныл ос а̄гмыл ат е̄мталасыт. Мо̄тантыг ос аквты порат, аквта хӯрум па̄выл хал котиль па̄вылт акванатыглахтын мус на̄н пуссын ёмщаквег, пуста̄гыл о̄лэ̄н. Са̄в со̄т, са̄в щунь!

1096 2015.03.27. unknown

Па̄вылт школа рӯпиты. Ха̄льӯс район Ло̄пмус па̄вылт о̄выл классытыт ханищтахтан школа рӯпиты. Тав Кульпас школа нупыл хансым о̄лы, яныг кӯщаяныл Наталья Александровна Слепцова. Ло̄пмус школат пуӈк тотым ос тав ва̄ӈын нэ̄тэ рӯпиты, Татьяна Валерьевна Анямова. Ам тав ётэ хо̄нтхатыгласум, школа урыл китыглахтасум. На̄н ань Татьяна Валерьевна потре ловиньтэлы̄н. – Ма̄н школавт онтолов ня̄врам ханищтахты, о̄выл классныл – хурмит класс мус ханищтахтэ̄гыт. О̄выл классыт – ат ня̄врам, китыт – кит, хурмит – о̄с кит ня̄врам. Школа палт ма̄нь ня̄врамыт садиканыл о̄лтвес. Тув атхуйплов ня̄врам яланты. Школав са̄ттем ат хо̄тал рӯпиты, кит хо̄тал ӯщлахтэ̄в. Школавт ре̄гыӈ, кӯре сэ̄мыл а̄хвтасылпа̄лтыглаве. Тэ̄нут па̄йтнэ колнак о̄ньще̄в. Ня̄врамыт па̄йтым тэ̄нутыл хӯрум щёс тыттыянув. Китах та̄л ювле хультум порат школавн ёсат ос мо̄т э̄рнэ пормасыт, ёнгилыт тотве̄сыт. Ня̄враманув ань тахсэ̄гыт, ёнгасэ̄гыт. Школав ляпат каснэ ма̄ ва̄рвес, ёмас хо̄талыт порат ос тот ёнгасэ̄гыт, ха̄йтыгтэ̄гыт. Са̄всыр ищхӣпыӈ утыт о̄ньще̄в – компьютерыт, интернет та маныр. То̄ва урокыт компьютер хосыт ханищтэ̄гыт. Ань тамле ут о̄лы, ма̄навн сака кӯстыр. Матыр ва̄руӈкв э̄рмыглы те, ос хумус ва̄руӈкве ма̄нти ат те ва̄глув, аквта та̄ра интернет хосыт сунсэ̄в, ловиньтэ̄в. Тот пуссын хансым о̄лы. Тох рӯпитаӈкве тай сака кӯпнит. Тӯяг, ма̄ньполь э̄тпост, «Лыжнёй Андрея» ва̄рыгла̄лаве. Ёсал яласан ма̄хум Саранпа̄вылныл ос Кульпасныл ма̄н па̄влувн ёхталэ̄гыт, тыт э̄т хӯлэ̄гыт, ӯщлахтэ̄гыт. Тувыл ма̄хум касылыл ва̄равет, ёсал касэ̄гыт. Хотьют но̄хпаты, матарыл мӯйлуптаве, янытлан нэ̄пакыл миве. Мӯй хо̄пат концерт суссылтэ̄гыт, па̄выл яныт мирн тай ат хунь пӯмыщ. Ялпыӈ хо̄талыт кастыл концертыт ма̄нти о̄с ва̄рыглэ̄в. Ня̄враманув ос школат рӯпитан ма̄хманув выступайтэ̄гыт, э̄рге̄гыт. Татьяна Валерьевна тох та потыртас. Школанылт татем ёмас, ня̄врамквет ща̄гтым тот ё̄мыгтэ̄гыт, ёнгасэ̄гыт. Каснэ колнаканыл яныг, лощит. Коридораныл са̄всыр хуритыл по̄слым о̄лы. Ам пӯмщалахтасум, ты аман хотьют тох нё̄тнэ̄г по̄слыс. Ты насати Нина Николаевна Анямова ос Валентина Ивановна Юрьева тэ̄н тох ма̄щтырласы̄г, по̄слысы̄г. Школат рӯпитан ма̄хум ос ня̄врамыт хум хо̄тпат ялпыӈ хо̄тал кастыл концерт ва̄рыгласыт. Ня̄врамыт стихотвореният ловиньтасыт. Хӯрум нэ̄т А. А. Шесталова, С. А. Хозумова ос И. В. Анямова хум хо̄тпа военный кощтюм па̄ра массыт, э̄рыг э̄ргысыт, ощхульлым ё̄ӈхатахтыгласыт. Та̄н нупланыл сунсым ма̄хум маттем та мовиньтасыт. Татем ёмащакв ёнгысыт, сака пӯмыщ о̄лыс. Татьяна Валерьевнан ам яныг пӯмащипа ла̄тыӈ ла̄всум. Ло̄пмуст о̄лнэ я̄тил мир, я̄тил ня̄врамаквет пуссын пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт!

1096 2015.03.27. Николай МЕРОВ

Касум ма̄т Ӯй йӣквес. Ма̄ньполь э̄тпос 1-3 хо̄талытт Белоярский район Касум па̄вылт ханты ма̄хум Ӯй йӣкв нак щё̄пита̄лсыт. Тот о̄лнэ яныгпа̄ла хо̄тпат хосат та̄гыл ты ва̄рмаль ва̄руӈкве номсысыт. Ты ялпыӈ хо̄тал Касум па̄вылт о̄лнэ паркмузей колт рӯпитан хо̄тпат ос «То̄рум Маа» музейт рӯпитан ма̄хум та̄н щё̄пита̄лсыт. Ӯй йӣкв хӯрум хо̄тал минас. Ты ва̄рмаль кастыл э̄лы ӯсытныл, па̄влытныл са̄в ханты ма̄хум тув акванатхатыгласыт. Музей колт суссылтап ва̄рыглавес. Тот 1988 та̄лт Ӯй йӣквум порат по̄слым хӯрит мирн ань суссылтаве̄сыт. Ӯй ӯлыглан э̄ргыт хӯрум яныгпа̄ла хо̄тпат э̄ргысыт. Ты Касум па̄вылт о̄лнэ хо̄тпа Андрей Ерныхов, Сургутский район Имилор нампа йис ма̄т са̄лы ӯрнэ хум Сергей Кечимов ос Ханты-Мансийск ӯст о̄лнэ хум Тимофей Молданов. Тот о̄лнэ то̄ва ма̄ньлат хо̄тпат та̄н ётаныл о̄с ялпыӈ э̄рыг э̄ргысыт. Тимофей Алексеевич Молданов такви Юильск па̄вылныл о̄лы, пе̄с йис ва̄рмалит ёмщакв ва̄ганэ. О̄йка хосат Ханты-Мансийск ӯсн ва̄нтлыс. Тав ще̄мьяӈ та̄гыл ань тув ёхталас. Э̄кватэ Татьяна Александровна Молданова Югорский университетт ня̄врамыт йис ва̄рмальн ханищтым рӯпиты. Тав тӯлыглапыт халт йӣквыс, Петя пыге̄н о̄с тӯлыглахтас. Касум па̄вылт о̄лнэ ма̄ньлат ма̄хум ла̄щал ты ва̄рмаль ханищтыяныл. Та̄н ань Ӯй ӯлыглан э̄ргыт, йӣквыт ос пӯмащ тӯлыглапыт э̄лаль ты тотыяныл. Ты Ӯй йӣкв суснэ ма̄гыс йис ва̄рмалит ханищтан хо̄н ма̄хум Швеция ма̄ныл тыг ёхталасыт. Та̄н «Нация и медведь» нампа проект щирыл рӯпитэ̄гыт. Ты хо̄тпат Ӯй йӣквнэ нак кина по̄слын тотапн хассаныл. Ётыл ты урыл кина тах ва̄ре̄гыт. Тувыл Америка ма̄ныл ма̄хум ты ва̄рмаль сунсуӈкве о̄с ёхталасыт. Ань ты Ӯй йӣквнэ нак Касум па̄вылт о̄лнэ ма̄ньлат ма̄хум ханищтан ма̄гыс щё̄пита̄лвес. Ня̄врамыт та̄нки пе̄с йис наканыл ул вос ёрувлыяныл. Ос ань тох ла̄вуӈкве ро̄ви, Ка̄сум ма̄т ты ва̄рмаль ат ёрувлаве, тот са̄в ма̄ньлат хо̄тпа ань ты нак ва̄ганыл. Р. Решетникова хансум потыр ма̄ньщи ла̄тӈыл Николай меров хансыстэ.

1097 2015.04.10. Людмила ТЕТКИНА

Кол ёвтум ма̄ньлат ще̄мьят ма̄гыс ля̄ххал. Мо̄лты та̄л оигпан э̄лыпа̄лт долларолн сака тыныӈыг е̄мтыс ос Россия янытыл тэ̄нут, маснутыт, пормасыт тынаныл о̄с но̄хминасыт. Ты юипа̄лт ипотекаолн о̄с яныг процентыл пинвес. Ань ма̄хум банкыт олн виӈкве ос о̄лнэ колыт ёвтуӈкве сака ат ве̄рме̄гыт. Са̄внув ще̄мья олн вос выгыт ос о̄лнэ кол вос ёвтэ̄гыт, Россия Правительстват акв йильпи тэ̄ла пирмайтавес, ма̄ньполь э̄тпосныл ипотекаолн 12% са̄витыг ва̄рвес. Ты ва̄рмаль урыл губернатор ва̄ӈын хум Дмитрий Шаповал ля̄ххал тотнэ ма̄хум э̄лыпа̄лт потыртас. Тав ла̄выс, тамле хӯлтнэ нэ̄пак 2016 та̄л ма̄ньполь э̄тпос о̄выл хо̄талэ мус рӯпитаӈкве тах паты. Ань «Сбербанк», «ВТБ-24» банк ты щирыл рӯпитаӈкве ка̄сащасы̄г, ипотека ма̄гсыл 12% са̄вит процентолн виӈкв тах патэ̄г. Та̄н ань «Ханты-Мансийский банк» ос «Газпромбанк» ёт потыртахтэ̄гыт, тэ̄н ос ты щирыл вос рӯпитэ̄г. Кӯщай ла̄выс, йильпи колыт ань тынта̄лнуве̄г е̄мтсыт, тыи ма̄гсыл кол ёвтуӈкве ань э̄ри. Ипотечный агентство кӯщай хум Евгений Чепель ос акв ля̄ххал урыл потыртас. Моще̄рт округувт акв йильпи тэ̄ла тах ва̄раве, ипотекаолн вим ос кол ёвтум ще̄мьят э̄лаль нё̄туӈкве патавет. Ты э̄лыпа̄лт сака са̄в ма̄ньлат ще̄мьят ипотека щирыл о̄лнэ кол ёвтсыт. Са̄в нэ̄тхумыт китыт манос хӯрмит ня̄врам о̄щнэ̄ныл ма̄гыс, та̄н мо̄т яныгнув кол ёвтуӈкве кос ка̄саще̄гыт. Ос ань о̄лнэ коланыл ма̄гсыл та̄н иӈ ат ойтхатасыт, ос тыналаӈкве ат ве̄рмияныл. Ань Ипотечный агентстваныл ты ще̄мьят нё̄туӈкве патавет. Ма̄хум мо̄т яныгнув кол ёвтуӈкве ке ка̄саще̄гыт, тув вос ялэ̄гыт. Та̄н тот о̄лнэ коланыл тыналаӈкве ос яныгнув кол ёвтуӈкве нё̄тавет ос мо̄т йильпи ипотекаолныл мивет. Ма̄хум мо̄т кол ё̄втэ̄гыт ке, са̄внув олн ювле ойтуӈкве тах патэ̄гыт. Ань ты та̄рвитыӈ порат тэ̄нут, пормасыт тынаныл акваг но̄х та минэ̄гыт, туп са̄в о̄лн сэ̄лнэ хо̄тпат ипотека ма̄гсыл ойтхатуӈкве ве̄рме̄гыт. Тыи ма̄гсыл Евгений Чепель ты ще̄мьят пуссын ёмащакве̄г номсахтуӈкве ла̄всанэ.

1097 2015.04.10. Тамара МЕРОВА

Яныг нё̄тмил ва̄раве. Победа хо̄тал 70 та̄лэ то̄влынэ̄тэ кастыл хо̄нтлан ма̄н ялум хо̄тпат ос война порат хум та̄л хультум э̄кват, са̄в рӯпитам ма̄хум ань о̄лнэ коланыл ёмащакв щё̄питаӈкв нё̄тавет. Тыи ма̄гыс округ миркол па̄лыл 306 миллион солко̄ви та̄стувес. 2013 та̄л ва̄ти хо̄тал э̄тпос па̄сныл мирн нё̄тмил ва̄рнэ службат ветераныт о̄лупсаныл акваг уральтым о̄ньщияныл. Тувыл ка̄сыӈ ӯст манос па̄вылт та̄н ма̄гсыланыл ветеран советыт рӯпитэ̄гыт. Ань ты службат ос советыт акваннё̄тхатым яныгпа̄ла ма̄хумн нё̄тэ̄гыт, тэ̄ланыл ёмащакв ва̄рияныл. 2014 та̄лт ветераныт коланыл щё̄питан ма̄гыс 220 миллион солко̄ви та̄стыглавес. То̄нт 1 со̄тыра 600 хо̄тпат нё̄тве̄сыт. Ты та̄л колыт щё̄питан ма̄гсыл 1 со̄тыра 900 ветеранхо̄тпа хансым о̄лэ̄гыт. Ты та̄стым олнытыл яныгпа̄ла хо̄тпат коланылт о̄щнэ ос э̄рнэ пормас ёвтуӈкв ро̄ви. «Победа хо̄тал 70 та̄лэ то̄влын кастыл, ма̄н ветеранытн яныг пӯмащипа ла̄тыӈ ла̄ве̄в. Ань та̄н о̄лупсаныл мощ ёмаснуве̄г вос о̄лы, ма̄н сыресыр нё̄тмил ва̄руӈкве патэ̄в, » тамле ла̄тӈыт округ кӯщай нэ̄ Наталья Комарова мирколт о̄лум сапра̄нит ла̄выс. Округ губернатор прессслужбатэ ке̄тум ля̄ххал ма̄ньщи ла̄тӈыг Тамара МЕРОВА хансыстэ.

1097 2015.04.10. Людмила ТЕТКИНА

Мирн пе̄риим нэ̄г Якутск ӯсн ялсы̄г. Округ Думат депутатыг рӯпитан нэ̄г Татьяна Гоголева ос Надежда Алексеева Якутск ӯсн конференциян во̄виньта̄лвесы̄г. Тамле тэ̄ла Лӯима̄ янытыл о̄лнэ соссаӈ ма̄хум общинат Содружестванылт рӯпитан хо̄тпат ва̄рыгласыт. Ханты-Мансийский округ, Иркутский область, Красноярский край, Якутия, Хакасия, Алтай ос Тыва ма̄ныл яныгса̄т арыгкем э̄лумхо̄лас тот акванатхатыгласыт. Ма̄хум общинат рӯпатаныл, са̄кконыт хаснэ ва̄рмаль ос соссаӈ мирыт мо̄т та̄рвитыӈ ва̄рмаляныл урыл тот потыртасыт. Та̄н са̄в секцият щирыл ла̄кквауртхатым рӯпитасыт. Татьяна Гоголева ос Надежда Алексеева акв тамле секцият пуӈктотсы̄г. Пе̄с йис ма̄т о̄лнэ соссаӈ ма̄хум та̄рвитыӈ ва̄рмаляныл урыл та̄н тот потыртасыт. Аквта порат мӯй ма̄хум Якутият о̄лнэ са̄всыр комитетыт ос департаментыт рӯпитан хо̄тпат ёт акванхо̄нтхатыгласыт ос та̄н рӯпатаныл урыл пӯмщалахтасыт. Тувыл та̄н «Богатство Якутской Арктики» нампа выставка сунсуӈкве тотыглаве̄сыт. Округ Думаныл ке̄тым ля̄ххал ма̄ньщи ла̄тӈыл Людмила ТЕТКИНА хансыстэ.

1097 2015.04.10. Николай МЕРОВ

Ма̄витув акваг уральтым вос о̄ньщаве. Ма̄ньполь э̄тпос 23 хо̄талэ̄т округ мирколт сапра̄ни ва̄рыглавес. Кӯщай хо̄тпат «Спасти и сохранить» нампа ма̄вит ӯргалан мирхал ва̄рмаль щё̄питан урыл потыртасыт. Ты сапра̄нин Сергей Пикунов ёхталас. Тав ты тэ̄ла щирыл хосат та̄гыл рӯпиты. Ма̄витув ань хомле̄г о̄лы, на̄н ты урыл тав потре э̄лаль ловиньтэлы̄н. «Ты тэ̄ла округувт хӯрумхуйпловит щёс ань щё̄питаве. Ты хосыт ма̄н Югра ма̄вт о̄лнэ мирн ма̄ сыстамыг о̄щнэ урыл потыртэ̄в. Ка̄сыӈ хо̄тпа такви о̄лнэ ма̄тэ вос ӯргалытэ, то̄нт ма̄нкина̄вн тыт о̄луӈкве ёмас паты. Ма̄н ма̄в акваг уральтылӯв, хо̄т па̄ӈктын нак хо̄нтэ̄в ке, хоты хо̄тпат манос предприятият ты лю̄ль ва̄рмаль ва̄рсыт, та̄наныл са̄ккон щирыл яныг штрафыл пиныянӯв. Мо̄лты та̄л ма̄н сапра̄ни ва̄рыгласӯв. Ты ва̄рнэ рӯпатав китхуйплов та̄л сыс манхурип по̄рт тотыс, уральтаслӯв. Со̄ль, ань ма̄витув сыстамнуве̄г патыс. Са̄ртын ма̄во̄й ма̄ныл но̄хвинэ ма̄хум ма̄витн са̄в нефть со̄сантасыт ос торыӈыщ ма̄ ат сыстамта̄лсаныл. Ва̄им, Россия янытыл туп ма̄н ма̄вт атпан са̄вит процент ма̄во̄й но̄хвиве. Округувт Сургутский, Нижневартовский ос Нефтеюганский районытт щар са̄в ма̄во̄й виве. Ос ты а̄ти, ань ты накт та̄н хосытаныл ма̄ па̄ӈктын нак мо̄рсыӈ порат е̄мталы. Хо̄т ке̄ртӯрыт маныгтахтэ̄гыт ке, та̄н та ма̄ та̄ра хотсыстамтыяныл. Ма̄вит ӯргалан са̄ккон округувт 1991 та̄лт пирмайтавес. Ка̄сыӈ та̄лныл ты са̄ккон э̄лаль тотнэ ма̄гыс йильпи тэ̄лат тув хансавет. Та па̄сныл ма̄н са̄в рӯпата ва̄рсӯв. Атхуйпловкем та̄л юипа̄лт са̄выӈпа̄лэ ма̄во̄й винэ ма̄т лю̄лиг о̄лсыт. Ань тамле ва̄рмаль а̄тим, ма̄ ёмщакв ӯргалаве. 2003 та̄лныл ты тэ̄ла ма̄гыс са̄в олн холтвес». Ты хосыт ань ма̄вит ӯргалан ва̄рмаль урыл тох ла̄вуӈкве ро̄ви, округувт ты са̄ккон ёмщакв рӯпиты, государство па̄лыл ты тэ̄ла та̄кыщ уральтаве ос нефтяникыт рӯпитан ма̄наныл та̄нки о̄с ёмщакв ӯргалыяныл.

1097 2015.04.10. Николай МЕРОВ

Мария Кумаева учёный намыл майвес. Ювле хультум э̄тпос 20 хо̄талэ̄т Мария Владимировна Кумаева филологический наукат кандидат намыл майвес. Ты ма̄ньщи нэ̄ мо̄лты Югорский университет а̄стлас ос ты ва̄рмаль щирыл э̄лаль ханищтахтуӈкве номылматас. Тав ща̄нь ла̄тӈув ос о̄лнэхӯлнэ наканув э̄лаль тотнэ ма̄гыс ханищтахтас. Наука нэ̄паке хаснэ̄тэ ма̄гыс тав ты учёный хо̄тпат нэ̄паканыл хосыт ханищтахтас: В. Н. Чернецов, А. Н. Баландин, Е. И. Ромбандеева, А. Канисто, А. Алквист ос мо̄таныт. Тувыл тав Ха̄льӯс район Хулюмсӯнт ос Ме̄ӈквъя па̄влыгныл о̄лнэ ма̄хумныл са̄в пе̄с йис потрыт атыс. Свердловский область Ивдельский район Ке̄расколыӈъя па̄вылн ялыс. Тот о̄с ма̄ньщи хо̄тпанув о̄лэ̄гыт. Тувыл о̄с са̄в потыр тотыс. Ма̄н, аспирантура отделт рӯпитан хо̄тпат, Мария Владимировна ты рӯпататэ ма̄гыс янытлылӯв. Тав научный руководителе Диана Васильевна Герасимова о̄лыс. Ма̄ньщи мирув халт учёный хо̄тпат щё̄питан ма̄гыс ма̄н таве̄н яныг пӯмащипа ла̄тыӈ ла̄ве̄в. Ханищтап ва̄рмале э̄лаль акваг ёмщакв вос мины! Гуманитарный институт отделт рӯпитан хо̄тпат ке̄тум ля̄ххал ма̄ньщи ла̄тӈыг Николай МЕРОВ хансыстэ.

1097 2015.04.10. Людмила ТЕТКИНА

Ма̄ньщи ос ханты хо̄тпат олныл мивет. Соссаӈ ма̄хум пе̄с йис ва̄рмаляныл ос ща̄нь ла̄тӈаныл но̄хво̄рмалтан ма̄гсыл ань нё̄тмилолн миве. Ма̄ньполь э̄тпост культура департамент ты олныт уртнэ ма̄гсыл касыл ва̄рыглас. Ка̄сыӈ ка̄сащан хо̄тпа такви проектнэ̄паке тув ке̄туӈкве ве̄рмыс. Тот хо̄т номинацият но̄хпатум хо̄тпат пе̄рияве̄сыт. Светлана Динисламова «Именитые богатыри Обского края. Книга третья» нампа нэ̄пак та̄ратан ма̄гсыл олныл майвес. Ты нэ̄пак та̄н Анастасия Ильинична Сайнахова, Альбина Николаевна Мехнина ос венгерка нэ̄ Юдит Дмитриева ёт хассаныл. «Югра лылые̄п» общественный организация о̄с акв тэ̄ла ма̄гсыл грантолныл та̄стувес. Тот рӯпитан ма̄хум «Встреча родов сургутских ханты «От Югана до Тром-Агана» акванхо̄нтхатыглан ва̄рмаль тах щё̄питэ̄гыт. «Лэ̄пак» нампа община ма̄ньщи во̄раян хо̄тпат маснутаныл ю̄нтнэ ма̄гсыл олныл майвес. Владимир Волдин намыл пиным центрыт рӯпитан ма̄хум Назым я̄ нупыл ялуӈкве таӈхе̄гыт, ос «Поездки к каменному человеку» нампа нэ̄пак та̄ратан ма̄гсыл олн ань во̄всыт. «Сосьва ЭтноТур» организация ос ма̄ньха̄пыт ва̄руӈкве таӈхе̄гыт. Ханты-Мансийский район Кышик па̄вылт о̄лнэ ма̄щтыр хо̄тпат хо̄т ма̄ньха̄п тах ва̄ре̄гыт. «Чуэльско-Ветляховская» нампа общинат рӯпитан хо̄тпат ты олныл ханищтап ва̄ре̄гыт, ма̄хум ханты мир маснутаныл ос са̄всыр пормас сагуӈкве ос ю̄нтуӈкве тах ханищтыяныл. Культура департамент ке̄тум ля̄ххалэ ма̄ньщи ла̄тӈыл Людмила Тасманова хансыстэ.

1097 2015.04.10. Александр ВЬЮТКИН

Тув кастыл ӯщлахтын ма̄т щё̄питавет. Тув палыт ня̄врамыт ӯщлахтын тэ̄ланыл щирыл кӯщаиг о̄лнэ ма̄хум округ мирколт сапра̄ни ва̄рыгласыт. Та̄н халанылт щар яныг кӯщаиг Алексей Андреевич Путин о̄лыс, тав округ губернатор ва̄ӈын хо̄тпаг рӯпиты. Сапра̄нияныл округ янытыл телевизор хосыт аквторыг потыртан щирыл ва̄рыглавес. Тамле ва̄рмаль рущ ла̄тӈыл «видеоконференцияг» ла̄ваве. Ка̄сыӈ кӯщай хо̄тпа такви рӯпитан ма̄тэ̄т ня̄врамыт ӯщлахтын ма̄гыс маныр рӯпата ва̄рыс, та урыл потыртас. О̄влэ̄т Снежана Александровна Возняк потыртас. Тав ма̄ньлат мир департамент колт кӯщай ва̄ӈын нэ̄г рӯпиты. Тав ла̄выс: «Ты ёхтын тув сыс Россия ма̄ныл мо̄т хо̄н ма̄н 538 ня̄врам ӯщлахтын ма̄гсыл тах тотыглавет. Са̄выӈпа̄лэ Болгария хо̄н ма̄т ня̄врамыт ӯщлахтаӈкв патэ̄гыт. Пуссын аквъёт 450 ня̄врам тах ӯщлахты. Ня̄врамыт тув тотыглан ма̄гсыл э̄рнэ договорнэ̄пакыт хансым о̄лэ̄гыт. Ос Россия янытыл ня̄врамыт иӈ хӯрум ӯщлахтын са̄всыр ма̄н тотыглавет. Владивосток ӯсн «Океан» нампа ма̄н нёлса̄т нупыл тит ня̄врам тув тотаве. Тувыл «Орлёнок» Туапсе ӯсн са̄тлов ня̄врам тах тотаве. Ня̄врамыт ӯщлахтын хӯрмит ма̄ «Центр смен» намыл пиным о̄лы. Тав Краснодар по̄хат о̄лы. Тот ос са̄тлов ня̄врам ӯщлахтаӈкв паты». Та юипа̄лт Алексей Петрович Варлаков потыртас. Тав ма̄ньлат ма̄хум ёт рӯпитан департамент тармыл кӯщаиг о̄лы. Тав ла̄выс: «Округув янытыл ӯщлахтынэ̄ныл сыс рӯпитаӈкв тахнэ ня̄врам са̄в. Пуссын аквъёт 14-18 та̄л яныт 10 со̄тыра 32 ма̄ньлат хо̄тпа рӯпитан щирыл ка̄сащан нэ̄пакыт хасылтасыт. Тув сыс та̄н йӣвыт ӯнттуӈкв ос са̄всыр оспаӈ лӯптал ӯс хорамтаӈкв патэ̄гыт. Яныгнув ня̄врамыт ӯсыт ос па̄влыт янытыл мори хуйгалан порс атуӈкв патэ̄гыт. Ты тит рӯпатаг щар са̄в ня̄врам ва̄руӈкв патэ̄гыт. Мо̄тананыл ос мо̄т са̄всыр ма̄нь рӯпата тах ва̄ре̄гыт». Тувыл мир пусмалтан департамент колт ва̄ӈын кӯщаиг рӯпитан нэ̄ Тамара Давыдовна Овечкина ва̄рнэ рӯпатаныл урыл ма̄хумн потыртас. Тав ла̄выс: «Ты та̄л округув янытыл акв со̄тыра ва̄т нупыл ат са̄всыр а̄гм пусмалтан ле̄ккар рӯпитаӈкв паты. Та̄н палтыланыл ва̄т нупыл акв со̄тыра арыгтем ня̄врам суссылтахтын щирыл хасылтым о̄лы. Тувыл 257 савалап ня̄врам алы ма̄н яныг ща̄рщ ва̄тан пусмалтахтын ма̄гсыл тотавет. Клещевой энцефалит нампа а̄гм о̄щнэ те̄рыӈхомлахытн ня̄врамыт ул вос то̄вмасавет, ӯщлахтын ма̄т ляпа во̄рыӈ ма̄наныл тӯяг тэ̄рпил расгалтаӈкв патавет. Тэ̄рпи расгалтан рӯпата лӯпта э̄тпос о̄вылтахтын порат ва̄раве. Радужный ӯс, Белоярский ос Ха̄льӯс район ма̄наныл тэ̄рпил расгалтаӈкв ат патавет. Ня̄врамыт клещевой энцефалит а̄гм о̄щнэ те̄рыӈхомлахытн то̄вмасын юипа̄лт а̄гмыл ул вос е̄мтэ̄гыт, тэ̄рпи ёвтнэ ма̄гыс 16 млн. 554 со̄тыра солко̄ви холтвес. Ань ты ёвтнэ тэ̄рпиянув округ янытыл те̄тавет». Та юипа̄лт полицият ос на̄й харыгтан ма̄т рӯпитан хо̄тпаг потыртасы̄г, тэ̄н ла̄всы̄г: «Ты ёхтын тув кастыл ма̄н иӈ щё̄питахтэ̄в. На̄й харыгтан ма̄хум ань ня̄врамыт ӯщлахтын ма̄т о̄лнэ коланыл уральтыяныл. На̄й те̄р ква̄лганыл ёмащакв щё̄питым вос о̄лэ̄гыт, конква̄лнэ ма̄тэ ос со̄пасыг о̄лнэ а̄вит са̄всыр пормасыл лап ул вос ӯнтталавет. Тыи пуссын уральтаве». Ня̄врамыт ӯщлахтын ма̄н минмыгтанэ̄ныл э̄лыпа̄лт кӯщаиг о̄лнэ ма̄хум о̄с тах акванатхатыглэ̄гыт.

1097 2015.04.10. Светлана РОМБАНДЕЕВА

Кульпас хумиягув хӯл тыналасы̄г. Ка̄сыӈ та̄л ма̄ньполь э̄тпост Ханты-Мансийск ӯст биатлон касыл о̄лыгланэ̄тэ порат выставочный центрыт ос хӯл тыналан тэ̄ла ва̄рыгла̄лаве, тох намаявес: «Югорский рыбный фестиваль». Тынакт тот хӯл коныпал мо̄т са̄в тэ̄нут тыналавес. Ма̄хум Россия ма̄в янытыл са̄в ма̄ныл тыг тыналахтуӈкв ёхталасыт. Сака са̄в ма̄г хотыла̄ти тотыглавес, кит ман хӯрум компаният Алтайныл о̄лсыт. Камчатканыл ма̄хум хащта̄л хӯлыт тотыгласыт, кальмарыг ман осьминогыг ла̄вавет, са̄всыр по̄р та маныр о̄щсыт. Ха̄льӯст о̄лнэ хӯл участканыл ма̄хум о̄с о̄лсыт. Хӯл тыналан са̄в компаният Ханты-Мансийск ӯс ляпат о̄лэ̄гыт, то̄ваныл о̄с ёхталасыт. Кульпас па̄вылт о̄лнэ «Рахтынья» нампа соссаӈ мир общинаныл кит ма̄ньщи хумы̄г ёхталасы̄г, хӯл тотыгласы̄г – Александр Юрьевич Захаров ос Алексей Петрович Полищук. Тэ̄н рӯпата па̄лыл машинал ёхталасы̄г, акв тонна ляпатем са̄вит хӯл тотыгласы̄г – ня̄рхул, нялк, солвалыӈ ман восытым хӯл, тувыл те̄р банка тӣвырн пиным хӯл. Ты коныпал сакватым хӯл ос нё̄выль тотыгласы̄г, пельменит, котлетат та маныр. Кульпаст тэ̄нут ва̄рнэ кол (цех) о̄лы, та̄н пуссын тот ты ва̄равет, щё̄питавет. Ты община кӯщай Александр Игоревич Голошубин. Ам Алексей Петрович ос Александр Юрьевич китыгласагум, ма̄хум тэ̄н тотум хӯланэ̄н ёвтэ̄гыт? Тэ̄н ань ювле ла̄всы̄г: «Аа, ӯс ма̄хум сака ёвтхатэ̄гыт. О̄выл хо̄тал солвалыӈ хӯланаме̄н пуссын ёвтве̄сыт, ня̄лк сака са̄в ёвтсыт, банкаӈ хӯл о̄с ёмас са̄вит висыт. Ма̄н тынанув а̄ти сака янгыт, то̄ва компаният тынаныл сака но̄хутсаныл, тэ̄нутаныл аман тай ёвтавет, тавагт». Александр Юрьевич Кимкъясуй па̄вылт самын патыс, тот яныгмас. Тав ань ще̄мьятэ ёт Ягрим па̄вылт о̄лы. Э̄кватэ ханты нэ̄, наме Елена. Пыг о̄ньще̄г, Женя, таве̄н нила та̄л. Нягань ӯст Галя э̄ще о̄лы, колледжит тэ̄нут па̄йтнэ нэ̄г ханищтахты. Оматэ̄н Надежда Владимировна Ло̄пмус па̄выл ма̄ньщи нэ̄ о̄лыс, а̄ги о̄парищ наме Албина. А̄тятэ̄н ос Кимкъясуй па̄выл хум. Нэ̄гхумыг ань сас а̄тимыг. Александр Юрьевич ты общинат рӯпитанэ̄тэ нилыт та̄лыг ты е̄мтыс, склад кӯщаиг о̄лы. Алексей Петрович ще̄мьятэ ёт Кульпаст о̄лы. Э̄кватэ Светлана, хӯрум пыг ос акв а̄ги о̄ньще̄г – Рудольф, Леон, Максим ос Лена. «Рахтынья» община складыт тав приёмщикыг рӯпиты. Алексей Петрович Сургут ӯст самын патыс. Ма̄ньта̄гыл ща̄нягеа̄щаге ёт Ло̄пмус па̄вылн ялантас. Оматэ Зоя Васильевна ма̄ньщи нэ̄, а̄ги о̄парищ наме Албина. Сургут ӯст ань оматэ ос Люда э̄ще ще̄мьятэ ёт о̄лэ̄гыт. Тав ос оматэ яныгмам ма̄н минас, тув о̄лмыгтас. Ань ты «Югорский рыбный фестиваль» оигпаме э̄лыпа̄лт, но̄хпатум общинат ман компаният янытлаве̄сыт, дипломнэ̄пакыл майве̄сыт. «Рахтынья» община о̄с янытлавес, Александр Юрьевич ос Алексей Петрович нила дипломнэ̄пакыл майвесы̄г. Тэ̄н тотыглам тэ̄нутанэ̄н, хӯланэ̄н, со̄ль, сака атыӈыт о̄лсыт, таима̄гыс та янытлаве̄сыт. Матъёмас Кульпас па̄вылт тамле номтыӈ, ка̄ркам ма̄хум о̄лэ̄гыт, рӯпитэ̄гыт. Ты я̄тил ма̄ньщи хумиягув ос «Рахтынья» общинат рӯпитан ма̄хум пуссын пуста̄гыл вос о̄лэ̄гыт, На̄й-О̄тыранылн вос ӯргалавет!

1097 2015.04.10. Светлана РОМБАНДЕЕВА

Ма̄ньщи колта̄гыл урыл потыр. Ха̄льӯс район Ло̄пмус па̄вылт ам Василий Петрович ос Светлана Герасимовна Хатанзеевыг колн щалтсасум. Ты ма̄ньщи нэ̄хумыг кит пыг, кит а̄ги янмалтэ̄г. Тэ̄н ётэ̄н мощ потрамасум, на̄н ань э̄лаль Светлана Герасимовна потре ловиньтэ̄лын. – Ам ма̄нь таквс э̄тпост 1969 та̄лт Нё̄рт ё̄рнколт самын патсум, та ма̄ ла̄ваве Торговая база. А̄ги о̄парищ намум Солянова. Омам наме Александра Дмитриевна, а̄ги о̄парищ наме Сайнахова, 1931 та̄лт самын патыс. Тав Сӯкыръяныл о̄лыс, кит увщи ос акв а̄пщи о̄ньщяс. А̄тям Герасим Яковлевич, 1933 та̄лт Хо̄сло̄х па̄вылт самын патыс. Алексей каӈк ос Домна э̄щ о̄ньщас. Та̄н ань пуссын а̄тимыт. А̄тям 14 та̄лэ то̄влуме порат Нё̄рт яласаӈкве патыс. Хӯрум каӈк о̄щсум, щар яныг Семён, тувыл Яков ос Коля. Та̄н ос Ира увщим пуссын ма̄ньта̄гыл Нё̄рт яласасыт, рӯпитасыт. Ня̄враманыл ё̄рнколт самын патсыт, тот яныгмасыт. Ам самын патмум порат о̄с аквта торыг Андрей Николаевич Канев самын патыс, а̄нумныл тав атах кӯм ма̄ньнуве. Ма̄хманув ань мо̄т ма̄н минуӈкве щё̄питахтасыт, ме̄н та торыг самын патсуме̄н. Та̄ра а̄пан пинвесаме̄н, са̄лыӈ суныл э̄лаль та тотвесаме̄н. Ань хунь тав ётэ акванхо̄нтхатыме̄н, потрамиме̄н, тав сома ам а̄пщим. Ма̄навн, ня̄врамытын, Нё̄рт яныгмаӈкве сака пӯмыщ о̄лыс. Хо̄тал палыт ёнгасасув, пил ва̄тэ̄в, юв тасавит пил тотэ̄в – морах, та̄хтпил. Нё̄рн но̄х та ха̄ӈхе̄в, ос тот ёнгасэ̄в. Пуссын мольщаӈыл, ва̄ил о̄лэ̄в, тот та ха̄йтэ̄в. Школан миннэ порав ёхты, Саранпа̄вылн вертолётыл тотаве̄в, каникулыт порат ос ювле тотаве̄в. Тот интернатт о̄лсув. Ам хунь школан о̄выл классын минасум, сумкал ёвтве̄сум. Та сумкарищум тотуӈкве ат таӈхилум, омамн то̄р сумкал ю̄нтвесум. О̄выл классытыт учительницам Александра Яковлевна Гоголева тав о̄лыс. Тэ̄лы порат мольщаӈагумня̄рагум омам юв тотуӈкве тахсаге, ам ат мисагум. Школан мольщаӈыл ос ня̄рал тох иӈ ялантасум. Александра Яковлевна интернатын ёхты, а̄нум мастытэ, школан та тотытэ. Та порам ань номылмата̄лылум, маттем та мовиньтэ̄гум. То̄нт са̄в ма̄ньщиянув Нё̄рт яласасыт. Омагума̄тягум хо̄тыт бригадат рӯпитасыг, туп акв ё̄рнколныл 21 ня̄врам ханищтахтуӈкве ке̄тавет. Ма̄н нила колта̄гыл – Соляновыт кит колта̄гыл (ма̄н ос Улякщи аким), кит саран колта̄гыл, Кустышевыт ос Филипповыт, пуссын аквъёт о̄лсув. Ма̄н, ня̄врамыт, туи кон ма̄нь палаткал тӯщтаве̄в, тот хуянтасӯв. Са̄лыӈ колув по̄хат тятьтялахтан ма̄гыс китхӯрум ква̄лгыл ва̄раве̄в, хо̄тал палыт ос тот та поргащлэ̄в, тятьтялахтэ̄в. А̄кань ва̄ре̄в, а̄ньтыт тӯщтэ̄в, хурат хоми ё̄хтыянув, тув ӯнтэ̄в, эрттам са̄лыӈ суныл та минэ̄в, ва̄нтлэ̄в. А̄тямн хӯлп охсал миве̄в, я̄н ёхтэ̄в, ань тэ̄ӈкве тахмае̄в, хӯлп ӯнттэ̄в, хӯл пуве̄в. Ма̄н ма̄ньщи ос саран ня̄врамыт пуссын аквъёт ёнгасасув, яныгмасув. Ма̄н та̄н ла̄тӈаныл ёмащакв торгамтаслӯв, та̄н ос ма̄н ла̄тӈув, потыртаӈкве ха̄ссув. Халанувт тыхал рущ ла̄тӈыл потыртэ̄в. Данил Филиппов ма̄ньщи ла̄тӈыл сака ёмащакв потыртас. Ам саран частушкат ва̄гум, э̄ргуӈкве ха̄сэ̄гум. Нё̄рн хоса ат те ялэ̄гум, татем лю̄ль. Тав улпыл тот яныгмамум ма̄гыс, ё̄рнкол та̄л о̄луӈкве ат ве̄рме̄гум. Тот ань нилыт бригада рӯпиты, о̄йкаме̄нтыл тув ка̄сыӈ та̄л яланта̄лыме̄н. Мо̄лты та̄л о̄йкам нупыл ла̄ве̄гум: «Миныме̄н ё̄рнколын рӯпитаӈкве». Тав ювле ла̄ви: «Ам ат ха̄сэ̄гум». Ам ос ла̄ве̄гум: «Ам наӈн ханищтылум». Ам тай ха̄сэ̄гум, ма̄ньта̄гыл тот о̄лсув. Са̄тнёлолов класс па̄сыл ма̄нти ха̄ссув са̄лыл яласаӈкве, ма̄нти ке̄риянув. Клава увщим ёт ӯнтыме̄н, э̄ргим та миныме̄н. А̄тяме̄н юил юв, та ро̄ӈхи: «Ул э̄рге̄н, са̄лыянын хотрохтэ̄гыт». Яныгмам порам сака пӯмыщ о̄лыс. – О̄йкан ёт хо̄т акванхо̄нтхатасын? – Ме̄н Саранпа̄вылт акванхо̄нтхатасме̄н. О̄влэ̄т ам таве Са̄ранпа̄вылн во̄выслум о̄луӈкве, тав ат таӈхи, ла̄ви Ло̄пмуст о̄лыме̄н. Тувыл тыг та о̄лмыгтасме̄н. Кит пыг, кит а̄ги о̄ньщиме̄н. Игорь армият служиты Дальний востокыт Чита ӯст. Ма̄нь пыгме̄н Никита садикын яланты, атыт та̄лэ то̄влыс. А̄гиягме̄н Кульпаст ханищтахтэ̄г, Оксана ловит классыт, Соня ос нилыт классыт, интернатт о̄лэ̄г. Ло̄пмус па̄вылт о̄луӈкве ханьщувласум. А̄тям тыт яныгмас, о̄лыс, ань ос ам тыг о̄лмыгтасум. Тыт ань клубыт рӯпитэ̄гум. Ма̄н йильпи пӯльницал ӯнттувесув, татем ёмас лощит кол. Ле̄ккарувн Римма Яковлевнан пусмалтаве̄в. Хо̄тпа матаре хотум е̄мтапи, хо̄тыл порат ман э̄ти, тав тэ̄рпиянэ ёт та̄ра ёхтыгпи, нё̄ты. Ла̄пкав рӯпиты, на̄йпосув э̄тэхо̄талэ тэ̄г. Туи са̄всыр пил ва̄тэ̄в, ла̄хс атэ̄в, хӯл пуве̄в. Яныг парникыт о̄ньще̄в, помидорыт, огурецыт янмалтэ̄в, картопка ӯнттэ̄в. Саранпа̄вылн ва̄тихал ялантэ̄в. Тот Ира увщим ос Коля каӈкум о̄лэ̄г. Сӯкыръят Лена э̄щум о̄лы. Пуссын ще̄мьяныл ёт о̄лэ̄гыт, ня̄враманыл янмалтэ̄гыт. Потруме̄н та оигпас. Э̄лаль ань ос Василий Петрович потырты. – Ам 1975 та̄лт ма̄ньполь э̄тпос 30 хо̄талэ̄т Ха̄льӯст самын патсум, Ло̄пмуст яныгмасум. Школат Кульпаст ханищтахтасум, интернатт о̄лсум. Омам Софья Семёновна, а̄ги о̄парищ наме Албина. Ане̄квам Матрёна Николаевна Сайнахова Я̄сунт па̄вылныл о̄лыс. Омам медицинский училище а̄стламе юипа̄лт Я̄сунт па̄вылн ке̄твес, тот матахмат та̄л рӯпитас. А̄тям ёт тот ты акванхо̄нтхатасыг. Тувыл Ло̄пмусн та йисыг, тыт пӯльницат са̄в та̄л ма̄нь ле̄ккарыг рӯпитас. А̄тям Петр Иванович лесникыг рӯпитас. Армиян миннэ̄тэ мус тав Нё̄рт яласас. Тэ̄н ань сас а̄тимыг. Кит увщи о̄ньще̄гум, Рая ос Граня, сас ще̄мьяӈыг, Ха̄льӯст о̄лэ̄г. Валера каӈкум ще̄мьятэ ёт Ло̄пмуст о̄лы. Мо̄лты та̄л ам нумпал увщим Таням а̄тимыг е̄мтыс. Кит пыгрищаге хультсы̄г, ань а̄тятэ̄н ёт о̄лэ̄г. Ам электростанцият рӯпитэ̄гум, тот рӯпитанэ̄м аквхуйплов та̄лыг ты е̄мтыс. Василий Петрович ос Светлана Герасимовна кол ӯнттысыг, атыт та̄л тот ты о̄лэ̄гыт. Мис а̄гирищ виӈкве таӈхег, пум ва̄руӈкве тах патэ̄гыт. Тэ̄н сака потрыӈ нэ̄гхумыг. Светлана ань Нё̄рт яныгмас, са̄лыӈколыӈ ма̄хум о̄лупса ва̄гтэ, атхунь са̄в потыр о̄ньщи. Тэ̄натэ̄н ам яныг пӯмащипа ла̄тыӈ ла̄всум. Ты я̄тил ма̄ньщи колта̄гыл пуста̄гыл вос о̄лы, со̄тыӈыщ вос о̄лы, На̄й-О̄тыранылн вос ӯргалавет. Пус ка̄т, пус ла̄гыл!

1097 2015.04.10. Николай МЕРОВ

А̄нъя па̄выл ма̄хум о̄лупсаныл. Ха̄льӯс район А̄нъя па̄вылн рӯпата щирыл ялмум порат тот Татьяна Михайловна Рукова, па̄выл кӯщай нэ̄, ёт потрамасум. Тав акв ловиньтан нэ̄пак урыл потыртас. Та нэ̄пакт па̄выл тэ̄лум урыл ос ветеран хо̄тпат урыл са̄в потыр хансым о̄лыс. На̄н ань А̄нъя па̄выл тэ̄лум урыл потыр ловиньтэ̄н. Соссаӈ ма̄хум хӯлыӈ, во̄руиӈ ос тэ̄пыӈ ма̄ тармыл пе̄с йис та̄гыл о̄лэ̄гыт. Я̄т хосыт са̄в ма̄ньщи па̄выл ӯнлы. Акв тамле щёлыӈ ма̄ А̄нъя па̄выл. Са̄ртын ма̄ньщи ма̄хум кит па̄выл ӯнтталасыт. Тӯяг та̄н я̄ ва̄тат хӯл алыщлым о̄лсыт. Тэ̄лы кастыл ма̄хум ос па̄гленув о̄луӈкве ва̄нтлыгласыт. А̄щирмаӈ лӯи вот порат са̄й ма̄т во̄рт о̄лсыт. Тэ̄лы сыс тот са̄всыр во̄руй, товлыӈ ӯй ка̄тынпаттыгласыт, ты коныпал са̄лы тэ̄п ляпат о̄лыс. Ос манрыг ты па̄выл тох намаявес, ты урыл ма̄нь потыр о̄лы. Аквматнакт Та̄гт я̄ хосыт купса о̄йка ха̄пыл товыс. Тот тав такви ща̄й а̄нытэ я̄н паттыстэ. Ты ва̄рмаль хосыт па̄выл А̄нъяг ты намаявес. Мо̄т потыр щирыл ос яныгпа̄ла хо̄тпат тох ла̄выгласыт, па̄выл торыг я̄тэ а̄ны хурипаг о̄лы, таима̄гыс па̄выл тох намаявес. 1926 та̄лт А̄нъя па̄вылт о̄лнэ ма̄хум нэ̄пакн хасве̄сыт. Нэ̄т, хумыт ос ня̄врамыт, пуссын аквъёт яныгса̄т нупыл са̄т хо̄тпа тот о̄лыс. 1930 та̄лт колхоз кӯщаиг Трофим Васильевич Ендырев рӯпитас. То̄нт па̄вланыл Сортыӈъя миркол нупыл хансым о̄лыс. 1932 та̄лт ущ я̄нас миркол пусвес. Тувыл э̄лаль яныгнув па̄влыт пуссын я̄нас мирколыл ва̄рве̄сыт. А̄нъя па̄выл миркол нупыл Ялъю̄с, Ягрим, Нярга, Хонгокурт, Шухтунгорт ос мо̄т па̄влыт хасве̄сыт. Ты па̄влытыт ӯйхул янмалтан ат яныг колхоз о̄лыс, хӯл алыщлан рыбучасток ос са̄в во̄раян хо̄тпа тот рӯпитас. Школатт кит учителиг ня̄врамыт ханищтасы̄г. А̄нъят о̄влэ̄т ма̄нь школаинтернат о̄лыс. Тувыл яныг школа ӯнттувес. Ня̄врамыт тот нёлолов класс мус ханищтаве̄сыт. Ётылнув па̄вылт на̄йпос ва̄рнэ станция ва̄рвес, радио тув тотвес, йильпи клубкол ӯнттувес. То̄нт ма̄ньщи хо̄тпат рущ ла̄тӈыл потыртаӈкве щар ат ха̄ссыт. О̄влэ̄т ня̄врамыт ханищтан ос ле̄ккар хо̄тпатн соссаӈ ма̄хум ёт рӯпитаӈкве сака та̄рвитыӈ о̄лыс. Ма̄ньщит рущ ла̄тӈыл ханищтан ма̄гыс, та̄н са̄в номт тотсыт. Соссаӈ ма̄хманув по̄х хо̄тпа та̄нки ляпанылн мори сака ат та̄ртсаныл. Архив нэ̄пакыт щирыл 1938 та̄л мус А̄нъя па̄выл нупыл са̄тхуйплов ма̄нь па̄выл хасвес. Тот пуссын аквъёт акв со̄тыра китса̄т налыманкем ма̄ньщи, саран ос ханты хо̄тпа о̄лыс. Тувыл 1941 та̄лт лӯпта э̄тпос 22 хо̄талэ̄т фашистыт ма̄н ма̄вн хо̄нтлым йиймыгтасыт. Па̄влытт о̄лнэ хум хо̄тпат пуссын хо̄нтлын ма̄н тотве̄сыт. Юн туп яныгпа̄ла хо̄тпат, э̄кват ос ня̄врамыт хультсыт. Та̄н э̄тэхо̄талэ та̄нкина̄ныл са̄литатта̄л рӯпитасыт. Хӯл алыщласыт, во̄раясыт, ты тэ̄нутпормасаныл хо̄нтлын ма̄н ке̄тыгласаныл. Хо̄нтлан ма̄хманув ос ты хосыт но̄х ты патсыт, юн са̄всыр та̄рвитыӈ рӯпата ва̄рнэ хо̄тпат са̄в нё̄тсыт. Со̄пак а̄тим о̄лыс, э̄кват, ня̄врамыт ня̄р ла̄глыл полям витыт суссантым толгысыт. Тох ты ма̄хманув та порат саватаве̄сыт. Хо̄нтлын нак оигпам юипа̄лт А̄нъя па̄выл миркол Я̄гримн тотвес. Ляпат ӯнлын па̄влыт о̄с пуссын тув хасве̄сыт. Хо̄нтлын накт о̄лум ма̄хманув номиянӯв 1941-1948 та̄лытт А̄нъя кӯщаиг Клавдия Петровна Печеркина о̄лыс. Тав та̄рвитыӈ накт тот ты рӯпитас. Хотьют ты па̄вылныл хо̄нтлын ма̄н ке̄твес, ос та та̄рвитыӈ порат хотьют рӯпитас, клубколт о̄щнэ нэ̄пакыт ань ка̄сыӈ ма̄ньщи хо̄тпа урыл я̄нас потыр хансым о̄лы. Ты та̄л хо̄нтлын нак оигпам па̄сныл 70 та̄лэ тах то̄влы. То̄ва хо̄тпат юв ёхтысыт, то̄ват хотты э̄лыма̄т порславе̄сыт. Та̄наныл номылматыглан кастыл, на̄н ты хо̄тпат урыл ань э̄лаль ловиньтэ̄н. Елизавета Павловна Гындыбина, такви о̄парищ наме Гоголева, Тоболдино па̄вылт 1924 та̄лт самын патыс. А̄ще Павел Савельевич Гоголев, во̄раян ос хӯл алыщлан хумыг о̄лыс. 1937 та̄лт репрессия о̄лум порат, тав Ханты-Мансийск ӯсн тотвес, тот по̄рславес. Оматэ наме Анна о̄лыс. Э̄кваго̄йкаг хӯрум манос нила ня̄врам о̄щсы̄г. 1940 та̄лт колхозыт аквантотуӈкве патве̄сыт. Акв ляпат ӯнлын ма̄нь па̄влытт Алтатумпын тотве̄сыт, тот яныг колхоз ва̄рвес. То̄нт Елизавета са̄тхуйплов та̄лэ ущты то̄влыс, тав мо̄т ня̄врамыт ёт та колхозт хӯл алыщлым рӯпитас. Георгий Павлович Ендырев 1922 та̄лт А̄нъя па̄вылт самын патыс. 1941 та̄лт Омск ӯсн хо̄нтлын тэ̄лан ханищтахтуӈкве тотвес. Тувыл та̄ра Белорусский фронтын ке̄твес. Са̄выӈпа̄лэ лӯима̄ ос Сибирь ма̄ныл ёхтум хум хо̄тпат тув ке̄тве̄сыт. Та̄н та̄ксарыг о̄лсыт. Тав яныг ня̄лыл па̄тлуптан писалил хо̄нтлыс. 1944 та̄лт Будапешт ӯсныл фашистыт ня̄влысаныл. То̄нт Венгрия ма̄ вуянтым хӯрумса̄т хус со̄тыра э̄лумхо̄лас порславес. Германияныл щар сымта̄л, ма̄йтта̄л фашистыт хо̄нтлуӈкве тув ёхталасыт. Ты пилыщмаӈ хо̄тпат «СС» тох ла̄вве̄сыт. Георгий Павлович та хо̄тпат ляльт хо̄нтлыматэ ня̄лын ты сакватавес. 1946 та̄лт тав юв ёхтыс. Пилта̄лыг хо̄нтламе ма̄гыс «За отвагу» ма̄гылн тагатан кит по̄с, «За победу над Германией», Гвардейский знак, «25летию Победы» ос мо̄т по̄сытыл майвес. Георгий Павлович хо̄нтлын нак юипа̄лт колхозт рӯпитас. 1974 та̄лт тав а̄тимыг е̄мтыс. А̄нъя па̄вылт ёлщё̄питавес. Тав каӈке Михаил Павлович Ендырев 1916 та̄лт самын патыс. Хум 1939 та̄лт армиян вуйвес. Хо̄нтлын нак о̄вылтахтам порат тав лӯсытас, таима̄гыс та̄ра войнан тотвес. Тав ма̄ вуянтым Берлин ӯс мус ялыс. Ты ма̄гыс хӯрум «Орден Славы» ос ма̄гылн тагатан са̄в по̄сыл майвес. 1947 та̄лт тав юв ёхтыс. А̄нъя па̄выл «Игримский» нампа совхозт рӯпитас. О̄выл э̄кватэ̄ныл акв пыг, китыт э̄кватэ̄ныл акв а̄ги о̄ньщис. Михаил Павлович о̄с хосат хотталь щалтыс, тав Ишим ӯст ёлщё̄питавес. Ань моще̄ртын ос 9 май Победа ялпыӈ хо̄тал ты е̄мты. Ма̄хумаквет, на̄н рӯтанын хо̄т хо̄нтлысыт ке, ос на̄н ты урыл матыр ва̄гы̄н ке, ма̄н редакциявн потыр ке̄тэ̄н. Ма̄н та̄н ураныл тах о̄с хансэ̄в. Ам ос А̄нъя па̄выл ветераныт урыл мо̄тыт газетат э̄лаль тах хансэ̄гум.

1097 2015.04.10. Александр ВЬЮТКИН

Юртыӈыщ о̄лнэ ще̄мья. Мо̄лты Белоярский район Касум па̄вылн ялмум порат ам ёмас ханты нэ̄ ёт ва̄йхатасум. Тав наме Марина Матвеевна Першина, такви а̄ги о̄парище наме щирыл Новьюхова. А̄тятэ Матвей Иванович 1938 та̄лт самын патыс. Оматэ наме Ольга Васильевна, такви а̄ги о̄парищ наме Харанзеева о̄лыс. Тав 1944 та̄лт Большой Вар нампа ма̄нь па̄вылт самын патыс. Та па̄выл Ханты-Мансийский район Кышик па̄выл ляпат о̄лыс. Марина Матвеевна оматэ ос а̄тятэ Тэ̄к па̄вылт акванхо̄нтхатсы̄г. Ольга Васильевна ӯйхул пусмалтан нэ̄г ханищтахтын ма̄ а̄стлуме юипа̄лт Тэ̄к па̄вылн рӯпитаӈкв те̄твес. Та порат тот мис ос лув янмалтан яныг колхоз о̄лыс. А̄тятэ Матвей Иванович та колхозт бригадирыг о̄лыс. Тот мощ рӯпитаме юипа̄лт тав Анапа ӯсн председателиг ханищтахтуӈкв те̄твес. Матвей Иванович э̄лы ма̄ныл юв ёхтуме юипа̄лт та̄ра пури ва̄рыс. Колта̄гланылт Марина щар яныг а̄гииг о̄лыс. Тав 1969 та̄лт Тэ̄к па̄вылт самын патыс. Та юипа̄лт 1970 та̄лт Вера йигрище, 1972 та̄лт ос Сергей а̄пщирище самын патсы̄г. Та̄н халыӈыщ акв яныт ня̄врамыг о̄лнэ̄ныл ма̄гсыл аквписыг аквъёт ёнгим ха̄йтыгтасыт. Тэ̄к па̄вылт ня̄врамыт туп нёлолов класс мус ханищтахтуӈкв ве̄рмысыт. Тувыл э̄лаль Светлый па̄вылн юио̄выл тит класс а̄стлан щирыл те̄тыглаве̄сыт. Марина йигрище, а̄пщирище ёт юртыӈыщ, акваннё̄тхатым яныгмасыт. Ка̄сыӈ тув а̄тяныл, оманыл ёт на̄йив щё̄питым, пум са̄грим яласасыт. Таквсыиг е̄мтнэ порат пил, ла̄хыс атым ос ӯльпа па̄кв паттым а̄тянылн во̄рн тотыглаве̄сыт. Оманыл Ольга Васильевна са̄в та̄л интернатколт э̄т ӯрнэ нэ̄г рӯпитас. Ня̄врамытн тав сака э̄руптавес. А̄тянылн а̄гмыӈыг е̄мтме юипа̄лт ва̄тихал пӯльницан ялантаӈкв э̄рыс, таи ма̄гсыл Ха̄льӯсн о̄луӈкв ва̄нтлысыт. Марина школа а̄стлуме юипа̄лт э̄лаль Нижневартовск ӯсн минас. Газыл яныг кӯрыт па̄лтыглан хо̄тпаг ханищтахтуӈкв номсыс. Тув тав ат а̄лымас. Тувыл Ялуторовск ӯст тав лаборантхимикыг ханищтахтуӈкв вӯйхатыглас. Тот ханищтахтуӈкв таве̄н ат мӯстыс. Самын патнэ ма̄тэ мус миннэ лё̄ӈхе сака хоса. Тувыл такте̄тэн о̄луӈкв тот марщумыг о̄лыс. Та̄л охсатэ тот аты пыл о̄лыс, ювле Ха̄льӯсн о̄луӈкв та ёхтыс. Юн о̄с хоса ат о̄лыс. Вера юрта̄гитэ ёт Тюмень ӯсн почтат рӯпитан нэ̄г ханищтахтуӈкв минасы̄г. Юрта̄гитэ тот ханищтахтуӈкв ат тахмаяс, юв минас. Марина та ханищтахтын кол а̄стлуме юипа̄лт Касум па̄вылн рӯпитаӈкв те̄твес. 1989 та̄л па̄сныл Марина Касум па̄вылт о̄лы. Ань тав почта кол кӯщай нэ̄г рӯпиты. Тот тав хум ва̄рыс. О̄йкатэ наме Андрей. 1990 та̄лт тэ̄н а̄гиӈыг е̄мтсы̄г. А̄гитэ̄н наме Таня. Титыт а̄гитэ̄н наме Оля, тав ос 2002 та̄лт самын патыс. Таня а̄гитэ̄н ань пыгрищ о̄ньщи. О̄йкатэ о̄влэ̄т кол ӯнттын ма̄т рӯпитас. Тувыл ЖКХ ма̄т яныг машинал яласан хумыг рӯпитас. Касум па̄вылт «Центроспас-Югория» на̄й харыгтан кол пунсыманыл порат Андрей тув рӯпитаӈкв вуйвес. Мощ мо̄лалнув тав ма̄гылн тагатан «За отвагу при пожаре» нампа по̄сыл мӯйлуптавес. Тамле ёмас ханты колта̄гылн ам са̄в ёмас сымыӈ ос паща ла̄тыӈ те̄тэ̄гум. Пус ка̄т, пус ла̄гыл та̄нанылн ла̄ве̄гум.

1097 2015.04.10. Тамара МЕРОВА

Хо̄нтаӈ ма̄ньщи нэ̄ потре. Октябрьский район Шеркалы па̄вылт ма̄щтыр ма̄хум съезданыл о̄лум порат соссаӈ ма̄хум халт ам кит ма̄ньлат нэ̄г ка̄саласагум, тэ̄н сас ма̄ньщи супыл масхатым о̄лсы̄г. Акватэ Светлана Кузнецова тав о̄лыс, мо̄танэ Оксана Серебрякова. Оксана Советский ӯст о̄лы, тав такви уре̄т мощ потрамас: – Ам Кондинский па̄вылт самын патсум, тот яныгмасум. Омам хо̄нтаӈ ма̄ньщи нэ̄, тав Карым па̄вылныл о̄лы, а̄ги о̄парищ наме Кутмарова. Тав рӯтанэ хӯл алыщлым, во̄раим о̄лэ̄гыт. А̄тям Левдино па̄вылныл о̄лы. Ма̄н ще̄мьяв яныг, омагума̄тягум онтолов ня̄врам о̄щсы̄г. Омав тэ̄нут па̄йтнэ нэ̄г, а̄тяв ос ла̄пкат товароведхо̄тпаг рӯпитас. Ам о̄влэ̄т ӯй совыт йинэ ос яктын хо̄тпаг ханищтахтасум, амки пальтувыт, шубат ю̄нтсум. Хум ва̄рсум, ня̄врамагум ёт юн ӯнлысум. Ётыл о̄йкаме̄нтыл киттыгминасме̄н. А̄тям хольт рӯпитаӈкве ам ма̄ньта̄гыл сака тахсум. Тувыл ла̄пкат тыналан нэ̄г ханищтахтасум. Киттынтыг хум ва̄рсум, ань ще̄мьям ёт Советский ӯст о̄лэ̄гум. Кит а̄гиягум янгыг, акватэ ва̄т нупыл хӯрум та̄лэ. Тав такви хӯрум а̄ги о̄ньщи, ам ань ане̄кваг о̄лэ̄гум. Мо̄т а̄гим хус та̄лэ то̄влыс, тав Ханты-Мансийскат ЮГУ юио̄выл курсыт ханищтахты. Хӯрмит а̄гиквем ёт тыг ёхтысаме̄н, Ленам хӯрмит классыт ханищтахты. Тав соссаӈ ма̄хум ю̄нсхатнэ, сак хартнэ ва̄рмалил сака пӯмщалахты. Ме̄н ань тыт мощ сунсыглахтыме̄н, матыр нё̄тнэ пормасыт ка̄салыме̄н ке, о̄с матыр ю̄нтуӈкве патыме̄н. Ам ань щар ма̄нь а̄гим ёт юн о̄лэ̄гум, тав садикн миннэ поратэ ты ёхты. Тав садикн хунь мины, ам амки рӯпитаӈкв ос олн сэ̄луӈкве номсэ̄гум. – Ты манырсыр рӯпата? Маныр э̄лаль ва̄руӈкве патэ̄гыт? – Мо̄лалнув ма̄н кроликыт янмалтаӈкве патсӯв, совыт ма̄гыс о̄ньщиянӯв. Ю̄нсхатын машина, мо̄т э̄рнэ са̄всыр утыт ам о̄ньще̄гум. Совныл матыр ю̄нтуӈкве тах патэ̄гум. Мо̄т нэ̄ хо̄тпат аквъёт рӯпитан ма̄гыс о̄с кинсэ̄гум, та̄н туп сакныл пальсакыт, турло̄псыт хартуӈкве ос маснут ю̄нтуӈкве ос сагуӈкве вос ха̄снувыт. Пионерский па̄вылт о̄лнэ ма̄ньлат а̄ги о̄с кроликыт янмалты, тав а̄нумн нё̄туӈкве ла̄вхатас. Ма̄хум ёт аквъёт рӯпитанэм ма̄гыс ам ань сыресыр э̄рнэ нэ̄пакыт акванатэ̄гум, рущ ла̄тӈыл ла̄внэ щирыл "бизнесплан" хансэ̄гум. Ам матыр тэ̄ла ма̄гыс вуйхатэ̄гум ке, тэ̄ланум пуссын ва̄риянум. – На̄н ӯсынт соссаӈ хо̄тпа са̄в о̄лы? На̄нки халынт ва̄йхатэгы̄н? – Советский ӯст соссаӈ ма̄хманув ма̄гыс "Югра лылые̄п" общественный совет ма̄н о̄ньще̄в, тот ань са̄т хо̄тпа акваннё̄тхатым рӯпитэ̄гыт. Ам тот секретарьнэ̄г о̄лэ̄гум. Ма̄н ӯсувт о̄лнэ ма̄ньщи, ханты, ё̄рн хо̄тпа нупыл ла̄тыӈ ке̄тыгласӯв ос нэ̄пакыт хасхатуӈкве во̄виньта̄лсанӯв. Ань ты советувн 46 хо̄тпат хасхатасыт, та̄н ма̄навн нё̄тэ̄гыт. Ӯсувт 202 ханты, ма̄ньщи ос ё̄рн соссаӈ ще̄мьят о̄лэ̄гыт. Тувыл Алябьевский, Малиновский, Пионерский ос Таёжный па̄влытт о̄лнэ соссаӈ ма̄хум ёт пуссын аквъёт 400 ще̄мьяг е̄мты. Ам та̄н ётаныл пуссын ва̄йхатасум, ма̄нки халувт ще̄пт о̄щнэ телефон хосыт потыртэ̄в. Та̄н та̄нки та̄рвитыӈ тэ̄ланыл порат а̄нум кинсыяныл. Са̄выӈпа̄лэ хо̄тпат о̄лнэ кол ма̄гыс китыглахтэ̄гыт ос олннё̄тмил ӯре̄гыт. Та̄нанылн нё̄тнэ ма̄гыс амки о̄с са̄в ханищтахтэ̄гум, пӯмщалахтэ̄гум, сыресыр нэ̄пакыт ловиньтэ̄гум. Ма̄н ань пуссын акв ёмас рӯпата ва̄ре̄в. Соссаӈ ма̄хум пе̄с наканыл э̄лаль тотнэ щирыл сытам ма̄т музей ӯнттуӈкве о̄вылтасӯв. Тот са̄лы янмалтаӈкве таӈхе̄в. Тамле тэ̄лат ва̄риянӯв ке, щар ёмас о̄лнӯв. Ты ва̄рмалит ма̄гыс са̄в олн ат о̄ньще̄в кос, грантолн о̄с ат вуйласӯв. Ам ты тэ̄лат амки ё̄рыл э̄лаль тотыянум. Югорск ӯст соссаӈ ма̄хум та̄нки я̄нас акванатхатыглэ̄гыт. Ӯст та̄н колнак о̄ньще̄гыт, тот ю̄нсхатэ̄гыт, сак хартэ̄гыт, матыр саге̄гыт, сыресыр ялпыӈ хо̄талыт ва̄рыглэ̄гыт. – Оксана Дмитриевна, наӈ соссаӈ ма̄щтыр хо̄тпат съезданылт о̄лсын. Хумус тав минас, маныр тыт пӯмщаласын, матыр мӯстыс ман а̄ти? – А̄нумн тыт сака пӯмыщ о̄лыс. Са̄в ма̄ныл ёхталам мӯй хо̄тпат ёт ва̄йхатасум. Надежда Молданова ёт потыртасум, ма̄ньщи суп хумус ю̄нтаве, тав видеодиск щё̄питы. Ма̄н тамле диск о̄с вос о̄щнувӯв, ам ань ты о̄щнэ супум ёмас ман лю̄ль, амки ю̄нтыслум. Ма̄ньщи суп нё̄тнэ̄г ю̄нтуӈкве ос ща̄нь ла̄тыӈ ханищтаӈкве ам сака таӈхе̄гум кос. Мо̄т ма̄хум ю̄нтум нё̄тнэ пормасыт о̄с сунсыгласанум. Акв э̄ква хӯл совныл ю̄нтым супыт ёттотыглас, тыил сака пӯмщалахтасум, тав ётэ мощ потыртасме̄н. Тот са̄в пӯмыщ хури по̄слысум. Ань юв ёхтынэ̄м порат нё̄тнэ хуриӈ нэ̄пак ва̄руӈкве номсэ̄гум. Тамле съездыт ва̄тихал вос ва̄рыглавет.

1097 2015.04.10. Светлана РОМБАНДЕЕВА

Ма̄щтырлым та̄н э̄рнэ тэ̄ла ва̄ре̄гыт. Ма̄ньполь э̄тпос 25-27 хо̄таланэ̄т Ханты-Мансийск ӯст о̄лнэ Центр ремесел колт ня̄врамыт ос ма̄ньлат ма̄хум ма̄гыс «Ремесла и промыслы: прошлое и настоящее» нампа X Межрегиональный научнопрактический конференция ва̄рыглавес. Округ янытыл о̄лнэ ня̄врамыт тыг ханищтан хо̄тпаныл ёт ёхталасыт, хӯрум хо̄тал сыс рӯпитасыт. О̄выл хо̄тал пуссын Центр ремесел колт акванатхатасыт. Та кол кӯщай нэ̄ Ольга Дмитриевна Бубновене тох ла̄выс: «Я̄тил ня̄врамыт, ма̄ньлат хо̄тпат, матъёмас на̄н ань тыг ёхтысын, хӯрум хо̄тал сыс ма̄н са̄в э̄рнэ тэ̄ла ва̄руӈкве а̄лыме̄в. Ма̄н ма̄вт са̄в номтыӈ, ка̄ркам ня̄врам о̄лы, та̄н ётаныл рӯпитэ̄в, пӯмыщ потрыт хансэ̄в. Ва̄рнэ тэ̄ланув мирн суссылтаӈкве патыянув те, ма̄хум та̄нти о̄лнэ ма̄наныл урыл са̄в ва̄ӈкве патэ̄гыт, ма̄н хольтув о̄с тах ущпылнэ̄г пӯмщалахтэ̄гыт. Округув янытыл о̄лнэ музеитыт ман ремесла центрытыт са̄в пормас акванатым о̄лы, ка̄сыӈ пормас урыл са̄в потыр хансуӈкве, щё̄питаӈкве ро̄ви. Ты та̄л округувт промыслы ос ремёсла та̄лыг ла̄ввес, таима̄гыс ма̄н ань о̄с акван ты хо̄нтхатасӯв». Округ культура Департамент кӯщай Надежда Михайловна Казначеева о̄с потыртас, ня̄врамыт янытласанэ, са̄в ёмас сымыӈ ла̄тыӈ та̄нанылн ла̄выс. Ты нэ̄г потыртанэтэ̄н юипа̄лт ня̄врамыт тамле выставкат сунсыглаӈкве во̄вве̄сыт: «История одежды – история этноса», «Мой Север – от Онеги до Оби», «Подарок Деду Морозу» ос мо̄т выставкат, ня̄врамыт маттем та пӯмщалахтасыт. Кина охсатыл суссылтаве̄сыт. Тувыл ма̄ньлат ма̄хум та̄нти хансум потраныл ловиньтасаныл. Сургутский район Лянтор ӯсныл школат ханищтахтан а̄ги Зарина Азратова ёхталас, тав Салым ма̄т о̄лнэ ханты ма̄хум маснутаныл урыл потыртас. Потре сака пӯмыщ о̄лыс. Ищхӣпыӈ ут хосыт хурит суссылтас, тот пуссын ёмащакв на̄ӈкыс, ань маснутыт хораманыл манхурипат, то̄ват татем нё̄тнэ ма̄нь па̄квпалыл ю̄нтым о̄лэ̄гыт. Ханты-Мансийск ӯст о̄лнэ ханты а̄гирищ Мария Гришкина пальсак ос турло̄пс ва̄рнэ тэ̄ла урыл потыртас. Сургутныл ёхталам а̄гирищ Александра Осадчая «Желанница» намыл пиным а̄кань урыл потыртас, хумус ос манрыг тав ва̄раве, хо̄т о̄ньщаве. Ты коныпал ос мо̄т са̄в потыр ма̄хум хӯнтлысыт. Мо̄тыт хо̄тал пуссын «Центр развития творчества детей и юношества» колн минасыт, тот ос мастерклассыт о̄лсыт ня̄врамыт та̄нти рӯпатаныл суссылтасаныл. Ка̄сыӈаныл ань маныр рӯпата ва̄руӈкве ха̄сы, таи суссылтас, тэ̄латэ урыл потыртас. Ам Мария Гришкина рӯпататэ̄ныл пӯмщалахтасум, тав юн о̄щнэ ла̄гыл маснут ва̄рыс. Ма̄н нэ̄ хо̄тпат тав ётэ ю̄н туӈкве о̄с ӯнтсасӯв, мощ щаквщисӯв. Мо̄т рӯпатат суссанӯв: изготовление колье с орнаментом, глиняная свистулька «Веснянка», пошив хантыйской игольницы, роспись филимоновской игрушки, вязание орнамента на 5ти спицах «Звезда коми» ос мо̄т рӯпатат. Хӯрмит хо̄тал а̄лпыл пуссын Центр ремесел колт атхатасыт, тот о̄с мастерклассыт о̄лсыт. Сургутныл ёхталам пыгрищ Арсений Суконник ё̄паньщи ва̄иг ва̄рнэ тэ̄ла суссылтас. Ловмантем хо̄тпа тав ётэ рӯпитасыт, ма̄нь ё̄паньщи ва̄ит ва̄рсыт. Лянтор ӯсныл ёхталам а̄гирищ Мадина Исенова таи суссылтас, ань казах ма̄хум войлокыл ковёр хумус ва̄ре̄гыт. Янгема̄не тав ётэ рӯпитасыт, таве̄н нё̄тсыт. Тувыл ва̄рум утаныл ма̄хумн суссылтасаныл, татем нё̄тнэ̄г тэ̄лсыт. Сургут ӯсныл о̄лум пыгрищ Саша Толмаков пӯсас ва̄рнэ тэ̄ла суссылтас, ма̄хум лоза нирйивныл пӯсас сагсыт. Ханты-Мансийск ӯст о̄лнэ нэ̄ Лариса Петровна Пастернак ос ра̄ктыл а̄ныса̄н ва̄рыс. Хо̄талъя̄т юипа̄лт ня̄врамыт янытлаве̄сыт, грамота нэ̄пакыл майве̄сыт, мӯйлупсатыл мӯйлуптаве̄сыт. Юио̄выл ла̄тыӈ Ольга Дмитриевна тав ла̄выс: «Ты хо̄талыт сыс ма̄н са̄всыр ва̄рмалит ка̄саласӯв, аквъёт ханищтахтасӯв, ма̄щтырласӯв. Ань ты хӯрум хо̄тал на̄н пуссын сака ёмащакв рӯпитасы̄н, ка̄сыӈ хо̄тпа но̄хпатыс. На̄нанн ма̄н янытлыянӯв, са̄в ёмас ла̄тӈыл, пӯмащипа ла̄тӈыл ла̄виянӯв. Тамле хо̄нтхатыглапыт е̄мталанэ̄ныл порат ма̄н тах на̄нан о̄с ӯруӈкве патыянӯв. Тыг ань ёхтуӈкве то̄ванув ат ве̄рмысыт, ос ма̄н рӯпатав урыл ма̄хум тах газетатыт ловиньтэ̄гыт, телевизор ос интернет хосыт сунсэ̄гыт. Пуссын пуста̄гыл о̄лэ̄н, ёмащакв ханищтахтэ̄н». Ты юипа̄лт ня̄врамыт хо̄нтхатыглапаныл та оигпас. А̄гирищитпыгрищит потраныл хӯнтлуӈкве, та̄н ётаныл рӯпитаӈкве сака пӯмыщ о̄лыс. Ма̄нит те̄пыл, ос рӯпитаӈкве ман хо̄тпа ханищтаӈкве татем та ха̄снэ̄ныл. Ка̄сыӈ ня̄врам урыл, ва̄рум тэ̄ланыл урыл я̄нас потыр хансуӈкве ро̄ви. Ла̄тӈаныл ат холы, потраныл ат холы – тув мус са̄в номт та о̄ньще̄гыт, э̄рнэ тэ̄лат ва̄руӈкве та ха̄сэ̄гыт. Ты я̄тил ня̄врамаквет, ма̄ньлат хо̄тпаквет пуссын пуста̄гыл вос о̄лэ̄гыт, о̄лнэ ма̄нанылн яныг па̄рыс вос тотэ̄гыт.

1097 2015.04.10. Валентина УЗЕЛЬ

Ӯринэ̄ква хо̄тал ма̄нь па̄вылт янытлавес. Ханты-Мансийск ӯс ляпат ма̄нь па̄выл ӯнлы, Кышик па̄влыг ла̄ваве. Тот са̄выӈпа̄лэ А̄с ма̄хум о̄лэ̄гыт. Та па̄выл мус туп тэ̄лы лё̄х хосыт ос тув порат я̄ хосыт ялантаӈкв ро̄ви. Ка̄сыӈ та̄л тэ̄лы лё̄х иӈ ёмасыг о̄лнэ̄тэ порат, ма̄ньполь э̄тпост Ӯринэ̄ква хо̄тал тот янытлаве. Ань ты та̄л о̄с ювле хультум э̄тпос 28 хо̄талэ̄т ты ялпыӈ хо̄тал па̄вланылт ва̄рыглавес. Ма̄хум янытлан ма̄гыс округ Дума па̄лыл Надежда Алексеева, Ханты-Мансийский район кӯщай хум Пётр Захаров ос округ мирколныл Александр Комиссаров тув ялсыт. А̄лпыл та̄н тот сапра̄ни ва̄рыгламыт, ка̄ркамыг о̄лнэ ма̄хум пуссын акванатыгласаныл. Мир та̄рвитыӈ ва̄рмаляныл урыл потыртамыт. Та̄н па̄вылканын ёхтуманылт ма̄хум мӯйлуӈкв ущта о̄вылтахтасыт. О̄влэ̄т район кӯщай о̄йка Пётр Захаров па̄влыӈ ма̄хум янытласанэ, тав мир нупыл са̄в ёмас ла̄тыӈ ла̄выс ос ты урыл потыртас. Ты па̄выл ӯс ляпат кос о̄лы, ос тув ялнэ лё̄ӈхе сака та̄рвитыӈыг о̄лы. Ма̄лтыпыг е̄мты, лё̄ӈхе та̄ра хотсаки. Таима̄гыс ты ма̄нь па̄вылт Ӯринэ̄ква хо̄тал мощ са̄ртыннув ва̄раве. Кышикт ань акв со̄тыратем хо̄тпа ат о̄лы. Кӯщай о̄йка ла̄выс, та па̄вылт о̄лнэ ма̄хум пуссын ка̄ркамыт, э̄лмхо̄лас нупыл ёмас сымыӈ хо̄тпат, рӯпитаӈкв ёмащакв ха̄сэ̄гыт. Тав потыртаме юипа̄лт сценан Вера Лозямова во̄ввес. Тав ханты ла̄тӈыл пе̄с э̄рыг э̄ргыс, ос тав юипа̄лт ма̄хум э̄ргуӈкв ос йӣквуӈкв та тӯлтхатасыт. Артистма̄хум янгыщ пуссын Ханты-Мансийск ӯсныл ёхталасыт. Та̄н юипа̄ланылт ущ па̄влыӈ ня̄врамыт э̄ргысыт ос йӣквсыт. Та ляпат тит ё̄рнколы̄г тӯщталавесы̄г, акватэ̄т са̄всыр пӯмыщ выставкат о̄лсыт, мо̄танэ̄т пасаныт ва̄рыглаве̄сыт. Тот мӯй ма̄хум тэ̄пъяласыт, та̄н исум ща̄ил ос хӯл исмитыл пинтлаве̄сыт. Та хо̄тал мощ ащирмагнуве̄г о̄лыс, хотьют по̄львес, тав ё̄рнкол тӣврын исылтахтуӈкв щалтапа̄лыс. Ма̄хум э̄ргиманыл ос йӣквманыл халт па̄вылт о̄лнэ ка̄ркамыг рӯпитан хо̄тпат янытлаве̄сыт. Та̄н Ханты-Мансийский район па̄лыл ос мо̄т кӯщаиӈ ма̄ныл са̄всыр янытлан нэ̄пакыл майве̄сыт.

1097 2015.04.10. Людмила ТЕТКИНА

Ӯст о̄лнэ мир яныгман э̄тпос нупыл пӯрлахтасыт. Ма̄ньполь э̄тпос 25 хо̄талэ̄т Ханты-Мансийск ӯст о̄лнэ соссаӈ ма̄хум «Торум Маа» музейт акванатхатыгласыт. Та хо̄талэ̄т «Э̄тпос пӯри» пӯрлахтан ва̄рмаль тот ва̄рыглавес. Ханты ма̄хум ты пӯрлахтан нак «Тылащ пори» ла̄вияныл. Э̄тпос нупыл по̄йкщуӈкве ва̄нэ хо̄тпат музейн во̄виньта̄лве̄сыт. Та̄н халанылт ма̄ньщи хо̄тпат Светлана Селивёрстовна Динисламова, Светлана Алексеевна Попова ос Рудольф Васильевич Меров о̄лсыт. Ӯст о̄лнэ ма̄хум итипа̄лаг са̄т щё̄с порат тув акванатхатуӈкве патсыт. Ка̄сыӈ мӯй хо̄тпа такви тэ̄нут ёттотыс. Нэ̄ хо̄тпат тӯйтыл ва̄рим пасанын тэ̄нутыт ӯнтталасыт. Ня̄врамыт са̄всыр ёнгилыл ёнгысыт, са̄лы сун ӯлтта поргысыт, тыньщаӈ па̄хвтысыт. А̄с-угорский театрыт рӯпитан хо̄тпат ты ялпыӈ хо̄тал урыл мӯй ма̄хумн потыртасыт. Пе̄с йис пора та̄гыл соссаӈ ма̄хум э̄тпос нупыл таима̄гыс пӯрлахтасыт, та̄н ма̄лтып тӯя хо̄талыт во̄всыт, во̄рт са̄в во̄руй вос о̄лыс, туи порат са̄в пил вос тэ̄лыс ос са̄в ла̄хыс вос яныгмас. Ос ка̄сыӈ ще̄мья со̄тыӈыщ ос щуниӈыщ э̄лаль вос о̄лыс. Пасан хунь щё̄питавес, ма̄хум ляпаннув во̄вве̄сыт ос Тимофей Алексеевич Молданов э̄тпос нупыл по̄йкщуӈкве та о̄вылтахтас. Зоя Никифоровна Лозямова са̄т ня̄нь ло̄мт тӯйтыл паргалтасанэ ос тувыл сумъях нупыл па̄хвтысанэ. Пасанын ӯнттым тэ̄нутыт Людмила Каллистратовна Зубакина ос Рудольф Васильевич Меров со̄сыл косамтасанэ̄н. Ос аквта порат, во̄туӈкве патыс ос тулыт халныл яныгман э̄тпос та нэ̄глыс. Ма̄хум пӯрлахтуӈкве а̄стысыт, мӯй хо̄тпат пасан ва̄тан тэ̄пъялаӈкве во̄всаныл. Светлана Алексеевна Попова ёт ам тот потыртасум, таве ты ялпыӈ хо̄тал урыл китыгласлум. Тав са̄в та̄л ма̄ньщи ма̄хум пе̄с йис ва̄рмалит ханищтыянэ ос пӯмыщ нэ̄пакыт хансы. Тав ты урыл тох ла̄выс: «Пе̄с порат Та̄гт я̄ хосыт о̄лнэ ма̄ньщиянув тамле пӯрлахтан нак ат ва̄рыгласыт. А̄с я̄ ляпат о̄лнэ ма̄ньщит ос хантыт та̄н э̄тпос нупыл тай по̄йкщисыт. Ань ты мус Белоярский районт о̄лнэ ханты ма̄хум ты ялпыӈ хо̄тал сака янытлэ̄гыт». Матъёмас, «Торум Маа» музейт рӯпитан хо̄тпат соссаӈ ма̄хум акванатыглыяныл, ма̄ньщит ос хантыт пе̄с йис ва̄рмаляныл но̄хво̄рмалтыяныл ос э̄лаль тотыяныл.

1097 2015.04.10. Людмила ТЕТКИНА

Усть-Манья па̄вылн ялум ня̄врамыт. Хулюмсӯнт па̄выл школат рӯпитан нэ̄ Татьяна Андреевна Головина ня̄врамыт Усть-Маньян тотыгласанэ. Та̄н ётаныл Ольга Васильевна Баранова, миркол кӯщай нэ̄, ос та па̄вылт о̄лнэ ма̄хум: Галина Константиновна Алгадьева, Елена ос Александр Адиныг, Надежда Маслова тув ялсыт. Хулюмсӯнт па̄вылныл ма̄хум ма̄ньполь э̄тпос 26 хо̄талэ̄т Ня̄хщамво̄льн минмыгтасыт. Па̄вылн ёхтуманыл порат та̄н Наталья Константиновна Тасманова колэ̄т э̄т хӯлсыт. Мо̄т хо̄талэ̄т а̄лпыл ня̄врамыт метеостанциян ялсыт. Тот рӯпитан хо̄тпаг са̄всыр ищхӣпыӈ утыт ня̄врамытн суссылтасаныл. Ма̄лтып манос турап хо̄тал хунь е̄мты, ты утыт хосыт ка̄салаӈкве ро̄ви. Ня̄врамытн тот са̄всыр гелиографыт, гидрометрыт сунсыглаӈкве сака пӯмащ о̄лыс. Ты юипа̄лт э̄лаль Усть-Манья нупыл минмыгтасыт. Тув миным та̄н Яныгпа̄вылн хо̄игласыт. Пе̄с порат тот са̄в мир о̄лыс, ань туп кит ще̄мья хультыс. Ма̄хум пуссын Ня̄хщамво̄ль па̄вылн ва̄нтласыт манос мо̄т ма̄н о̄луӈкве миныгласыт. Тот о̄лнэ ще̄мьяг во̄раим, хӯл алыщлым ос мис, лув янмалтым о̄лэ̄г. Та па̄вылт Галина Константиновна Алгадьева ща̄нягеа̄щаге о̄лсы̄г. Ня̄врамыт тэ̄н колэ̄нт тэ̄пъяласыт. Тувыл па̄выл сунсыглам ё̄мыгтасыт ос Та̄гт я̄ ва̄тат ёсал тахсыт. Та хо̄талт па̄вылт сака суиӈыг о̄лыс, Ня̄хщамво̄ль ня̄врамыт ёт акванатхатыгласыт ос «Зарница» ёнгилыл тот ёнгысыт. Мощ ӯщлахтаманыл юипа̄лт ос э̄лаль Усть-Манья па̄выл нупыл минасыт. Тув ёхтынэ̄ныл порат тот о̄лнэ хо̄тпат пуссын кон ква̄лсыт, мӯй ма̄хумн та̄н сака ща̄гтсыт. Ань Усть-Маньят туп ат э̄лумхо̄лас о̄лы. 1960-1970 та̄лытт тав о̄с яныг па̄влыг о̄лыс. Та порат па̄вылт школа, пӯльница, ла̄пка, ня̄врам ӯргалан кол рӯпитасыт. Са̄всыр тыныӈ а̄хвтас киснэ хо̄тпат рӯпитаӈкве хунь по̄йтсыт, па̄влыӈ ма̄хум о̄с мо̄т ма̄н ва̄нтлуӈкве та патсыт. Ань тот о̄лнэ хо̄тпат во̄раим, хӯл алыщлым ос ӯйхул о̄ньщим о̄лэ̄гыт. Усть-Манья Нё̄р ляпат ӯнлы. Нё̄ранув тувыл ёмащакв на̄ӈке̄гыт. Ня̄врамыт па̄выл хосыт ё̄мыгтасыт, сунсыглахтасыт ос по̄слахтасыт. Тувыл ос ёсал мощ ха̄йтыгтасыт. Ос та юипа̄лт ювле Ня̄хщамво̄ль нупыл та минмыгтасыт. Мо̄тыт хо̄талэ̄т Ня̄хщамво̄ль школат Литература та̄л янытлан кастыл конференция рӯпитас. Ня̄врамыт нэ̄пак хаснэ соссаӈ ма̄хум урыл тот потрыт ловиньтасыт. Юлия Боженко ос Виктория Адина, Хулюмсӯнт па̄выл школат 8 классыт ханищтан а̄гииг, Андрей Семёнович Тарханов ма̄ньщи поэт урыл хансум потраге̄н ловиньтасы̄г. Наталья Константиновна Тасманова 8 классыт ханищтахтын ня̄врамыт ёт ос В. А. Игошев, ка̄тыл хурит по̄слам хум, урыл потыр хассыт. Ты о̄йка ма̄ньщи ос саран ма̄хум по̄слуӈкве Ня̄хщамво̄ль па̄вылн ва̄тихал ёхталас. Тав по̄слум хуриянэ ань са̄всыр яныг музеитт суссылтавет. Аквта хо̄талт па̄влыӈ ма̄хум «Проводы русской зимы» нампа ялпыӈ хо̄талн мӯйлуӈкве акванатхатыгласыт. Хулюмсӯнт ма̄хум о̄с тув во̄виньта̄лве̄сыт. Та юипа̄лт ювле о̄лнэ па̄вланыл нупыл та̄н та минмыгтасыт. Юлия Боженко ке̄тум потре ма̄ньщи ла̄тӈыл Л. Теткина хансыстэ.

1097 2015.04.10. Тамара МЕРОВА

Савалап ня̄врамыт э̄ргысыт ос йӣквсыт. Ма̄ньполь э̄тпост Нижневартовск ӯст «Созвездие» нампа э̄ргынйӣквнэ фестиваль о̄лыс. Тот савалап ня̄врамыт ос ща̄нитна̄щитн ат о̄щнэ ня̄врамыт та̄нки халанылт кассыт. Округувт тамле нак ань хӯрумхуйпловит щёс ва̄рыглавес. Ты та̄лт савалап ня̄врамыт о̄щнэ нила кол касуӈкве ёхталас, тыи Нижневартовсканыл «Аистёнок» нампа кол, «Лучик» Октябрьский район Сергино па̄вылныл, «Радуга» кол Ханты-Мансийсканыл ос «Северяночка» Нягань ӯсныл. Ва̄т нупыл онтолов а̄гирищпыгрищ о̄лыс. Та̄н та̄нки халанылт ат са̄всыр номинацият щирыл кассыт. Та̄н та̄ланыл щирыл ла̄ккваурттве̄сыт ос халанылт я̄нас кассыт. Жюри ма̄хум са̄выӈпа̄лэ пуссын культура, образование ос мирн нё̄тнэ Нижневартовск ӯст о̄лнэ рӯпитан колныл во̄виньта̄лве̄сыт. Яныг кӯщаиг тот округ янытыл опека ос попечительство кӯщай ва̄ӈын нэ̄ Е. А. Шулдикова о̄лыс. Э̄ргын ос йӣквнэ накыт о̄вылтан э̄лыпа̄лт «Аистёнок» нампа колт яныгман ня̄врамыт «Созвездие» намаим флаг но̄ххарттысаныл. Тувыл Т. В. Воронова, та ӯст са̄всыр тэ̄лат тармыл кӯщайлахтын нэ̄, мӯй ма̄хум янытласанэ. О̄влэ̄т «Вокал» нампа касыл о̄лыс. А̄гирищит ос пыгрищит аквалаквал э̄ргысыт. Ка̄сыӈ ня̄врам са̄ртын мощ пилым э̄ргыс. Тувыл тахольт та̄н та э̄ргалтахтасыт ос э̄лаль ла̄тӈаныл ёмщакв э̄ргысаныл. То̄ва э̄рыг ла̄тӈаныл сака сымын хо̄ясыт. Ща̄ньта̄ла̄щта̄л яныгман ня̄врамаквет оманыл э̄руптан урыл э̄рсыгыт. Ос Победа хо̄тал 70 та̄лэ то̄влын кастыл сыресыр э̄рыгсовыт ханищтамыт, сценкат щё̄питамыт. Ань ты ла̄выглам номинацият о̄выл места хӯрум ня̄врамн майвес, тыи Иван Абабков, Кирилл Михеев (сас Ханты-Мансийсканыл) ос Семён Тагунов (Нижневартовсканыл). Китыт местан Екатерина Метельская («Лучик» колныл) ос Валерия Рахимзянова («Аистёнок» колныл) паттувесы̄г ос хӯрмит места Нягань ӯсныл ёхталам «Вояж» нампа ансамбль вис. Тувыл ня̄врамыт «Хореография» номинацият кассыт. Ты йӣквнэ ва̄рмальт Ханты-Мансийсканыл о̄лнэ а̄гирищитпыгрищит но̄хпатсыт. Та̄н «Родина-Мать» ва̄рум ёнгиланыл сака ёмщакв суссылтасаныл. Китыт ос хӯрмит местаг Нижневартовск ос Нягань ӯсныл о̄лнэ ня̄врамытн майвес. «Театральная» номинацият «Аистёнок» кол суссылтам ёнгиланыл ма̄хумн сака мӯстыс. Тот ты ня̄врамыт но̄хпатсыт. Китыт ос хӯрмит местаг Нягань ӯсныл ос Сергино па̄вылныл ёхталам а̄гитпыгыт халт уртвес. «Литературная» номинация миннэ порат ня̄врамыт война урыл потыртасыт ос я̄ӈк то̄р тармыл сысесыр хурит такталасыт. Жюри хо̄тпат ётыл тох ла̄всыт: «Ма̄н ты ва̄рмалит сунсымав юипа̄лт сыманув ань тыг мус ща̄рге̄гыт ос та сыс ма̄навн сака ёмас. На̄н, ань ты порат о̄лнэ ня̄врамаквет – хо̄нтлан ва̄рмаль нэ̄мхуньт ат ва̄щинтан хо̄тпаквет – такем сымыӈыщ ос э̄рнэ щирыл потыртасы̄н, суссылтасы̄н. Таима̄гыс ма̄н на̄нан яныг пӯмащипа ла̄тыӈ ла̄ве̄в». Юио̄выл касыл «Мода» нам о̄ньщис. Тот а̄гит ос пыгыт сыресыр нё̄тнэ маснутыл масхатым тыглетувле нас ё̄мыгтасыт манос мощ йӣкващласыт, поргащласыт. Ань Нижневартовск ӯст о̄лнэ савалап ня̄врамыт о̄щнэ кол но̄хпатыс, та̄н «тэ̄лы, тӯя, туи ос таквсы» пора нампа маснутыл масхатым о̄лсыт. Китыт ос хӯрмит местаг Ханты-Мансийск ӯсныл ёхталам ня̄врамытын майвесы̄г. Ма̄ньнув ня̄врамыт нэ̄пакныл щё̄питам маснутыл ё̄мыгтасыт, мо̄т щёс тыгыт о̄лнэ соссаӈ ма̄хум о̄щнэ маснутыл масхатыгласыт. «Приз зрительских симпатий» нампа мӯйлупса щё̄питым о̄лыс. Ма̄хум тув «Стиляги» намаим суссылтан утыт пе̄риясыт. Тамле маснут Сергино па̄вылныл ёхталам ня̄врамыт суссылтасыт. Э̄ргынйӣквнэ ня̄врамаквет пуссын мӯйлупсал майве̄сыт. Тамле акванатхатнэ накт та̄н та̄нки халанылт ёмщакв юрщхатэ̄гыт, а̄йхатэ̄гыт ос акваннё̄тхатым э̄лаль о̄лэ̄гыт. Тувыл жюри хо̄тпатн та̄н ёмас йӣквнэ манос э̄ргын ва̄рмаляныл та̄рапаттавет ос ты тэ̄лат э̄лаль тотуӈкве ханищтавет. «Созвездие» нампа мо̄тыт фестиваль 2016 та̄лт Ханты-Мансийск ӯст тах ва̄раве. Ань ты ма̄гыс ӯсувт о̄лнэ пыгытн флаг майвес. Ня̄врамаквет пуста̄гыл пуссын вос о̄лэ̄гыт ос та̄рвитыӈ ва̄рмаль ул вос ва̄щинтэ̄гыт.

1098 2015.04.24. Николай МЕРОВ

Хо̄тпат янытлаве̄сыт. Яныгпо̄ль э̄тпост Ханты-Мансийск ӯс «Югра-Классик» йӣквнэ колт округ культура департаментыт рӯпитан хо̄тпат о̄лнэхӯлнэ нак э̄лаль тотнэ ма̄хманув янытласаныл. Ты кастыл округ губернатор ва̄ӈын хум Алексей Путин тув ёхталас. Тот атхатам ма̄хумн тав ла̄выс: «Ма̄н округувт культура ос искусство ва̄рмалиг щирыл рӯпитан ма̄хманувныл сака янытлахтэ̄в. Та̄н хосытаныл ӯсувт ань «Ма̄вит ос э̄лумхо̄лас» пе̄с йис пормасыт атнэ кол, Владимир Игушев – ка̄тыл хурит по̄слам хум музейколэ, Геннадий Райшев ка̄тыл хурит по̄слын хум галереятэ ос мо̄т пе̄с йис пормасыт атнэ колыт о̄ньще̄в. О̄лнэхӯлнэ накыт э̄лаль тотнэ хо̄тпат, хотты ялпыӈ хо̄талн э̄лы ма̄н ялнэ̄ныл порат, юв акваг матыр мӯйлупса тотыглэ̄гыт. Ты рӯпатаныл ма̄гыс ма̄н та̄нанылн яныг пӯмащипа ла̄тыӈ ла̄ве̄в». Округ янытыл са̄в хо̄тпа янытлаӈкве тыг во̄виньта̄лве̄сыт. Йӣквнэ, ёнгын, э̄ргын ос ма̄щтырлан хо̄тпат са̄всыр янытлан нэ̄пакыл ос ма̄гылн та̄гатан по̄сыл майве̄сыт. Та̄н халанылт са̄в ма̄ньщи ос ханты хо̄тпа янытлавес ты Светлана Динисламова, Юрий Кондин, Вячеслав Кондин, Андрей Хоров ос мо̄т хо̄тпат.

1098 2015.04.24. Валентина УЗЕЛЬ

Округ кӯщаюв рӯпататэ урыл потыртас. Округ Дума о̄лме порат яныг кӯщаюв Наталья Комарова тув ёхталас. Мирн пе̄риим ма̄хум нупыл 2014 та̄л сыс ва̄рум рӯпататэ урыл потыртас. Тав тох ла̄выс, юио̄выл та̄лыт сыс ма̄н округув акваг ёмащаквнув о̄луӈкв патыс. Ка̄сыӈ та̄л 1 млн. квадратный метра са̄вит о̄лнэ кол тыт ӯнттаве. Мо̄лты та̄л – 1 млн. 115 метра са̄вит кол ӯнттыма. Ты метрат пуссын акван те ловиньтаӈкв, акв йильпи ӯсыг е̄мты. 2014 та̄л сыс ма̄нь ня̄врамыт ма̄гыс 22 садиккол ӯнттувес. Ань очередь а̄тим, ня̄врамыт хӯрум та̄ланыл то̄влын юипа̄лт та̄ра садикн минэ̄гыт. Ос матах та̄л мины, та колыт то̄ват ат э̄рмыглэ̄гыт. Ань номсахтуӈкв э̄ри, матыр мо̄т рӯпитан кол тот ва̄руӈкв вос ро̄выс. Округ олн мощ ювӯрнэ ма̄гыс ань са̄всыр ма̄т рӯпитан кӯщаит мощ по̄хан те̄тве̄сыт, 22% са̄вит чиновникхо̄тпат ань кӯщаиӈ ма̄ та̄л хультсыт. То̄ва кӯщаиӈ колыт лаппантве̄сыт. Ты рӯпата таима̄гыс ва̄раве, сака са̄в олн наска̄ссыг ул вос холтаве. Са̄в ня̄врамыӈ ще̄мьят кол ӯнттын ма̄гыс ань ма̄ло̄мтыл мивет. Ос округув янытыл ты очередин ань 5 со̄тыра арыгтем колта̄гыл хансым о̄лы. Ювле хультум та̄л сыс туп 102 ще̄мья кол ӯнттын ма̄гыс ма̄ло̄мтыл майве̄сыт. Ань кос ӯсытт, кос па̄влытт арыг ма̄ щар а̄тим. Ты ва̄рмаль щирыл кӯщаит э̄лаль рӯпитаӈкв тах патэ̄гыт. Яныг кӯщаюв потыртаме юипа̄лт са̄всыр политический партиян хасхатам хо̄тпат таве мощ титыгласаныл. Ка̄сыӈ я̄нас партия туп тит щёс титыглахтуӈкв ве̄рмыс. Акв депутат–о̄йка кӯщаювн та̄ра ла̄выс, ань округувт са̄в кол ӯнттаве, акваг та ла̄ваве – 1 млн. квадратный метра ӯнттыма. Ос тамле лю̄ль колыт ӯнттуӈкв ты патве̄сыт. Акв подъездыт титса̄ттем квартира ва̄раве, акв этажт нилахуйплов квартира. Тох колыт ӯнттуӈкв щар ат кос ро̄ви. Тамле йильпи колыт ма̄хманувн ат э̄ре̄гыт. Ювле кӯщай нэ̄ тох ла̄выс, манхурип кол ӯнттуӈкв ро̄ви, специалистхо̄тпат ёмащакв титыглавет. Та̄н ты ла̄ве̄гыт, хумус ӯнттуӈкв ро̄ви, хумус а̄ти.

1098 2015.04.24. Тамара МЕРОВА

Ля̄ххалыт ма̄к щирыл вос хансавет. Округув янытыл ля̄ххал тотнэ ма̄хум акв ханищтапн во̄виньта̄лве̄сыт. Тав Ханты-Мансийск ӯст ва̄рыглавес. Тыг Москва, Санкт-Петербург, Екатеринбург ӯсныл мӯй хо̄тпат ёхталасыт. Евгений Кузьмин, ЮНЕСКО совет па̄лыл кӯщайлахтын хум, потыртас: «Ищхӣпыӈ ут хосыт са̄в сумп потрыт хансавет. Ты хансым ля̄ххалыт правительство па̄лыл та̄ра уральтаӈкве ат ве̄рмавет, та̄н ищхӣпыӈ утыт хосыт мо̄т хо̄н ма̄т ловиньтавет. То̄ват тув агтэ̄гыт, тувыл мо̄т ма̄хум ёт кантыӈыщ о̄лэ̄гыт ос мори капыртэ̄гыт. Тыи сака лю̄ль ва̄рмаль». Санкт-Петербургыт журналистика тэ̄лат тармыл са̄в та̄л рӯпитан хум Сергей Корконосенко пӯмыщ ла̄тыӈ тотыс, нэ̄мхо̄т ат кӯщайлахтын манос мирн ат ва̄нэ хо̄тпат о̄вылтыт ля̄ххалыт са̄в щёс хансавет ман а̄ти. Округув па̄лыл ня̄врамыт ма̄гыс ля̄ххалыт ва̄рнэ хо̄тпат та̄нки рӯпатаныл урыл потыртасыт. Ля̄ххал хансуӈкве школат ханищтахтын а̄гитпыгыт ань ханищтаӈкве э̄ре̄гыт кос.

1098 2015.04.24. Валентина УЗЕЛЬ

Мирн пе̄риим ма̄хум рӯпитасыт. Ты э̄тпос округ Дума депутат ма̄хум акванатхатыгласыт. О̄влэ̄т та̄н ёмащакв рӯпитан хо̄тпат янытласаныл. Та ма̄хум халт ма̄н ма̄ньщи хо̄тпав янытлан нэ̄пакыл майвес, ты Валентина Селиверстовна Иванова (Садомина). Тувыл та̄н яныг кӯщаяныл Борис Хохряков депутатыт ва̄рум рӯпатаныл урыл потыртас. Та̄н 2014 та̄л сыс 120 са̄всыр са̄ккон пирмайтасыт. 21 – ты щар йильпи са̄кконыт, 99 са̄кконытн та̄н матыр йильпи ла̄тыӈ хассыт. Думат нила комитет рӯпиты, та̄н пуссын я̄нас рӯпата ва̄ре̄гыт. Ос соссаӈ мир ма̄гыс Ассамблея са̄кконыт хансы. Таквсы та̄н йильпи округ кӯщай пе̄рияӈкв тах патэ̄гыт. Ос ань рӯпитан кӯщай нэ̄ урыл Борис Сергеевич Хохряков ла̄выс, Наталья Комарова рӯпитанэ̄тэ сыс рӯпататэ ёмащакв ва̄ритэ. Ань округувт мир ёмащаквнув о̄луӈкв патыс, ма̄хум са̄всыр щирыл нё̄тавет. Мо̄лты та̄лт 27 со̄тыра 700 ня̄врам самын патыс, Ос ты урыл потыртаме порат тав ханты мир ма̄нь потырохсатэ потыртастэ, пе̄с порат ханты ма̄хум ла̄выгламыт: «Ювле акваг а̄ӈквата̄лым, э̄лаль сака ат лакве̄гын». Ты сапра̄ниянылт депутатхо̄тпат округ бюджетолнанэ мощ но̄хнё̄тсаныл, арыг 6 млрд. солко̄ви тув та̄стысыт. Ань та̄рапатыс, акв та̄л сыс округув 193 млрд. солко̄ви о̄ньщи, ос тыгыл са̄внув олн холты – 201 млрд. солко̄ви, 7 млрд. – тыса̄вит олн ат то̄вылхаты. Ос а̄гмыӈмосыӈ хо̄тпат ӯргалан са̄ккон тамле йильпи ла̄тӈыл хасвес – ё̄мыгтаӈкв ат ве̄рмын хо̄тпат, коляскал яласан хо̄тпат та̄н ань мо̄т о̄лнэ колыл миӈкв патавет. Хотьют са̄внакпа колт те о̄лы, ос таве̄н кон ква̄луӈкв те та̄рвитыӈ, тав о̄выл этажт о̄лнэ колыл тах миве.

1098 2015.04.24. Валентина УЗЕЛЬ

Соссаӈ ня̄врамыт ӯргалан ма̄ хотвуима. Ты э̄тпос Ассамблея ма̄хманув сапра̄ни ва̄рыгласыт. Та̄н округ Дума ка̄сыӈ заседание э̄лыпа̄лт мир акванатыглыяныл ос матыр йильпи са̄ккон урыл потыртэ̄гыт. Ань ты сапра̄нин та̄н яныг кӯщаиӈ ма̄хум во̄выгласаныл – округ кӯщай ва̄ӈын хум Геннадий Бухтин, Татьяна Дмитриевна Моховикова, тав ня̄врамыт ӯргалан нэ̄г о̄лы, рущ ла̄тӈыл ла̄ваве – Уполномоченный по правам ребенка, ос ханищтап департамент кӯщай нэ̄ Любовь Николаевна Ковешникова. Щар ма̄к тамле ва̄рмаль урыл та̄н потыртасыт. Ханты-Мансийский технологопедагогический колледжит йильпи кӯщай ӯнттыма – Алексей Борисович Сарабаров. Тав рӯпитанкв ущты о̄вылтахтам, ос та̄ра тамле хӯлтнэ ла̄тыӈ хансум – са̄в та̄л рӯпитам «национальный отделение» хотвиӈкве. Ос тав манрыг тох ва̄рум, тав ос Любовь Ковешникова нэ̄ ёмащакв ань титыглавесы̄г. Еремей Айпин ла̄выс, педагогический училище рӯпитаӈкв о̄вылтахтам па̄сыл ты национальный отделение та̄ра пӯсвес. Са̄в та̄л сыс сака са̄в ханты, ма̄ньщи ман ё̄рн хо̄тпа тот ханищтахтас, а̄стламаныл юипа̄лт та̄н пуссын ма̄нь па̄влыӈ ма̄т школат ос ма̄нь ня̄врамыӈ колт рӯпитасыт. Ань ос тот са̄в соссаӈ хо̄тпа ханищтахты. Ос ты отделение кӯщаиг ма̄н ма̄ньщи нэ̄в Альбина Романовна Станиславец рӯпиты. Тав ты ня̄врамыт та̄кыщ о̄ньщиянэ, та̄наныл уральтым общежитиян акваг яланты. Тав ань пищмал те̄тыма, отделение лаппантыма ма̄гсыл тав по̄хан те̄твес, туп нас ма̄ньщи ла̄тӈын ня̄врамыт ханищтаӈкв ве̄рми. Ты сапра̄нит о̄лум яныг кӯщай о̄йка Геннадий Бухтин о̄с са̄в ёмас ла̄тыӈ ла̄выс. Ань округувт са̄в рӯпата ва̄раве, ма̄ньщи ос ханты хо̄тпат вос нё̄тавет, ма̄н пе̄с ва̄рмалянув, пе̄с наканув э̄лаль вос тотыянӯв. Ань колледжит ты национальное отделение ювле вос пӯнсаве. Таквсы па̄влыӈ ос во̄рыӈ ма̄ныл соссаӈ ня̄врамыт ханищтахтуӈкв ёхтынэ̄ныл порат, та̄н вос ва̄ганыл – ханищтахтын колт та̄нанылн матыр нё̄тмил ва̄рнэ ма̄ о̄лы. Л. Н. Ковешникова нэ̄ ос колледж кӯщай хум А. Б. Сарабаров ювле ла̄всы̄г, со̄ль, ма̄ньщи, ханты ос ё̄рн ня̄врамыт ма̄гыс ва̄рим отделение лаппантуӈкв ат э̄рыс кос. Ос ань та̄рвитыӈ порат о̄лэ̄в, арыг олн а̄тим, хо̄та̄ти олн ювӯруӈкв мощ э̄ри. Тэ̄н ты отделение ювле ва̄рнэ ма̄гсыл рӯпата тах ва̄ритэ̄н. Т. Д. Моховикова такви рӯпататэ урыл ань о̄с мощ потыртас. Тав ня̄врамыт тармылпаттын ма̄т рӯпиты. Тав рӯпитан ма̄тэ̄т соссаӈ ня̄врам ӯргалан ма̄гыс нэ̄матыр я̄нас рӯпата ат ва̄рвес. Ань ты рӯпата ва̄руӈкв патаве. Ос соссаӈ ще̄мьятыт яныгман ня̄врамыт ёмащакв ӯргалаӈкв ос уральтаӈкв патавет.

1098 2015.04.24. Николай МЕРОВ

Хо̄нтлам ма̄хум олныл мивет. Ты та̄л яныг хо̄нтлын нак оигпам па̄сныл 70 та̄лэ то̄влы. Тыи ма̄гыс Россия Президентув В. В. Путин указнэ̄пак хансыс. Победа хо̄тал кастыл Россия Пенсионный фонд па̄лыл ветераныт ос то̄ва яныгпа̄ла хо̄тпат ань олныл мивет. Са̄т со̄тыра са̄вит солко̄вил яныг хо̄нт порат хо̄нтлам ма̄хум, а̄гмыӈмосыӈ хо̄тпат, фашистытн турманколт ня̄врамыг о̄лум порат са̄ватым ма̄хум, Финляндия, Япония ёт хо̄нтлын накт о̄лум хо̄тпат ос яныг хо̄нт порат хум та̄л хультум э̄кват олныл нё̄тавет. 1941 та̄л па̄сныл 1945 та̄л мус хо̄нтлын нак о̄лум порат юн са̄всыр та̄рвитыӈ рӯпата ва̄рум хо̄тпат хӯрум со̄тыра са̄вит солко̄вил ойтавет. Хотьют туп хо̄т э̄тпос рӯпитас, та̄н о̄с тув ловиньтавет. Тувыл пилыщмаӈ та̄лытыт юн та̄рвитыӈ рӯпата ва̄рум хо̄тпат, фашистыт турманколанылт ӯнлум ма̄ньлат хо̄тпат, та̄н о̄с пуссын ты олнытыл тах мивет. Ты олныт хо̄нтлын ва̄рмаль оигпам па̄сныл 70 та̄лэ то̄влын кастыл акв щёс мивет. Округ янытыл пуссын аквъёт нила со̄тыра атса̄ткем са̄вит э̄лумхо̄лас тах нё̄тавет. Пенсионный фонд бюджетныл ты ма̄гыс нёлоловхуйплов миллион солко̄ви ань та̄стувес. Ты олныт ка̄сыӈ хо̄тпан яныгпо̄ль э̄тпост пенсия олн ёт тах мивет. Пенсионный фонд ля̄ххалэ ма̄ньщи ла̄тӈыг Н. МЕРОВ толмащластэ.

1098 2015.04.24. Тамара МЕРОВА

Соссаӈ мир о̄лупсаныл тыт ёмщакв ӯргалаве. А̄ти сака хосат Ханты-Мансийск ӯсн Москваныл ЮНЕСКО тармыл рӯпитан кӯщай хум Евгений Кузьмин ёхталас. Тав ля̄ххал тотнэ ма̄хум ма̄гыс «Информация для всех» нампа мирхал программа урыл потыртас. Ты совет акв программатэ мощщаг хультум мирыт та̄н ща̄нь ла̄тӈаныл урыл хансым о̄лы. То̄ва соссаӈ ма̄хум ща̄нь ла̄тӈаныл сака молях хотсо̄йме̄гыт, таима̄гыс ты тэ̄лат акваг уральтаӈкве э̄ре̄гыт. Соссаӈ ма̄хум са̄в мирыӈ ма̄хум халт ла̄кквамингалэ̄гыт ос та щирыл ла̄тӈаныл та ёрувлыяныл. Евгений Кузьмин ӯсувт о̄лме сыс А̄с-угорский ма̄хум рӯпитан институтн щалтсас. Тот ханты, ма̄ньщи ос ё̄рн хо̄тпанув ёт ва̄йхатас, та̄н рӯпатаныл ос о̄лупсаныл о̄вылтыт пӯмщалахтас. Ань сунсум ос хӯнтамлам тэ̄ланытыл хум хотщагтым хультыс. Ты та̄л о̄йттур э̄тпос хо̄тыт ос са̄тыт хо̄талаге̄т ӯсувт Саммит БРИКС нампа мирхал конференция ва̄раве. Тыг мо̄т хо̄н ма̄ныл са̄всыр кӯщаит ёхтэ̄гыт тах. Та̄н мощща хультум мирыт ща̄нь ла̄тӈаныл э̄лаль тотнэ урыл потыртаӈкв патэ̄гыт. Учёныит ла̄всыт, ищхӣпыӈ ут хосыт ща̄нь ла̄тӈанув суяныл э̄лаль хансуӈкве вос а̄лыме̄в. Ань туи акван о̄с тах хо̄нтхатыглэ̄гыт. Округ губернатор прессслужба ля̄ххалэ ма̄ньщи ла̄тӈыл Т. Мерова хансыстэ.

1098 2015.04.24. Николай МЕРОВ

Нефтеюганск ӯс кӯщай потре. Ты э̄тпос са̄тыт хо̄талэ̄т ля̄ххал тотнэ колн Вячеслав Акиндинович Арчиков, Нефтеюганск ӯс миркол кӯщай, во̄виньта̄лвес. Ӯсанылт маныр ва̄рмаль о̄лы, ос хумус тот рӯпатаныл мины, тав ты урыл потыртас. «Ма̄н ӯсувт са̄в рӯпата ва̄раве. 2015 ос 2016 та̄лыгн бюджет пирмайтаслӯв кос, ос ты та̄стум о̄лнанув то̄ва тэ̄лат ма̄гыс ат то̄вылхатэ̄гыт. Та сыс са̄внакпа колыт ӯнттын ма̄гыс ма̄н ма̄ ла̄щал щё̄питэ̄в. Тув 130 млн. солко̄ви холтуӈкве номсэ̄в. Акв тамле тэ̄ла о̄ньще̄в, Нефтеюганск ӯст са̄в ще̄мьят пе̄с колытт о̄лэ̄гыт. Ты колыт 1960 та̄лытт ӯнттуве̄сыт, щар пе̄сыг е̄мтсыт. То̄ва ма̄хум ос балокытт иӈ ты о̄лэ̄гыт. Округув янытыл ты ва̄рмаль щар ма̄к та̄рвитыӈыг ты о̄лы. Ӯсувт китса̄т нёлса̄т са̄виткем кол щар пе̄сыг хасве̄сыт. Ты колыт хосат хотвиӈкве кос э̄ре̄гыт. Ӯс тумп хурип ма̄т ӯнттувес. Аквпалъе̄ре̄т Юганский А̄с я̄ овты, мо̄тпалъе̄ре̄т ос А̄с я̄ о̄вты. Ты коныпал ӯс ма̄во̄иӈ ма̄ тармыл ӯнлы. Тот о̄лнэ щуниӈ ма̄ло̄мтыт лаппантым о̄ньщавет. Тамле ма̄т кол ӯнттуӈкве ат та̄ртаве. Ма̄н ань пе̄с колыт хотвыганӯв, тот йильпи колыт ӯнттуӈкв патэ̄в. О̄влэ̄т пе̄с колытт о̄лнэ ма̄хум мо̄т колыл миӈкв э̄ре̄гыт. Са̄ртын кол ӯнттын кит предприятие о̄лыс. Ань 12 предприятие рӯпиты. Та̄н хосытаныл ма̄н ань ка̄сыӈ та̄л са̄ткем пе̄с кол хотло̄сталэ̄в. Мо̄т ва̄рмалит о̄с о̄лэ̄гыт. Ма̄н йильпи рӯпитан ма̄т та̄стэ̄в. Рӯпитан ма̄хум олнаныл та̄ра вос ойтве̄сыт, ты ва̄рмаль о̄с акваг уральтым о̄ньщилӯв. Ты та̄л округувт тэ̄лы сыс са̄в тӯйт патыглас. Ӯсхулыт хотсыстамтаӈкве ворил ты а̄лымасӯв. Ты патыглам тӯйт ма̄н хотвислӯв кос, ос ты рӯпатав сака та̄рвитыӈ о̄лыс. Нефтеюганск ӯст са̄в э̄лумхо̄лас о̄лы. Тот са̄тлов со̄тыра са̄виткем са̄всыр машина яласы. Машинат ӯнлын ма̄т тӯйт хотсыстамтаӈкве нэ̄мхотмус. Матъёмас ЖКХ ма̄т рӯпитан хо̄тпат ос лё̄ӈхыт уральтан полиция та̄н сака нё̄тсыт. Тэ̄лы сыс пуссын аквъёт хо̄тса̄т арыгтем са̄вит кубометр тӯйт ӯсныл э̄л тотвес. Мо̄лты та̄л сунсуӈкве ке, то̄нт мощщанув тӯйт ӯс коныпалн тотсӯв». Кӯщай хум ла̄выс, 2020 та̄л мус колыт ӯнттуӈкв патавет. Пе̄с колытт о̄лнэ ма̄хум пуссын йильпи колыл миӈкв номсыяныл. Тыи ос мо̄т ва̄рмалит урыл кӯщай хум щё̄скем потыртас. Ты о̄лупса тэ̄лат мӯсхалыг щё̄питан ма̄гыс иӈ са̄в рӯпата ва̄руӈкве э̄ри.

1098 2015.04.24. Тамара МЕРОВА

Ма̄вит ӯргалан хо̄тпат акванатхатыгла̄лсыт. Ты э̄тпос лов щислат Александр Дунин-Горкавич нампа конференция Ханты-Мансийск ӯст о̄лыс. Ты тэ̄ла округув ань аквхуйплов щёс ва̄рыглавес. Ань ма̄вит ӯргалан хо̄тпат та̄нки рӯпатаныл урыл потыртасыт. Тыг са̄в ма̄ныл ма̄хум ёхталасыт. Ӯсувт Дунин-Горкавич ма̄гыс памятник ва̄рвес ос акв ӯсхулы тав намыл пинвес. Ты о̄йка я̄т, во̄рыӈ ма̄в, ӯйхӯланув пуссын ӯргалым ос ханищтым са̄в та̄л тыт рӯпитас. Ань памятнике палт ма̄вит ӯргалан департамент кӯщай хум Евгений Платонов ос мӯй ма̄хум хорамыӈ лӯптат пинуӈкве ялсыт. Тувыл ЮГУ колт акванатхатыгласыт ос са̄всыр ёмас ос лю̄лиг о̄лнэ тэ̄ланыл о̄вылтыт ла̄тыӈ тотсыт. Щар пилыщмаӈыг ос лю̄ль тэ̄лаг о̄лы, хунь Россияв янытыл во̄р на̄йн тэ̄нэ накыт о̄лыглэ̄гыт. Во̄р та̄л хультэ̄в. Та кастыл во̄руит о̄с мощщаме̄гыт. Тувыл тамле на̄йтэ̄м ма̄т йӣвыт са̄в та̄л ат яныгме̄гыт. Во̄рув сака ёмщакв ӯргалаӈкве э̄ри. Таима̄гыс округ миркол па̄лыл э̄рнэ программат щё̄питавет, ма̄ньлат хо̄тпат ма̄вит ӯргалан рӯпатан ханищтавет. Ка̄сыӈ та̄л ма̄вит ӯргалан ма̄хум халт касыл ва̄рыглаве. Та̄н та̄нки тэ̄ланыл э̄лаль тотнэ ма̄гыс потыр хансэ̄гыт ос халанылт касэ̄гыт. Ты та̄л ЮГУт ханищтахтын а̄ги Анастасия Тимощук премияолныл майвес. Тувыл ма̄хум ат колнак щирыл ла̄кквауртхатым са̄всыр я̄нас тэ̄лат о̄вылтыт потыртасыт. Акв ма̄т ма̄ньщи, ханты мир урыл потрыт хӯнтлуве̄сыт.

1098 2015.04.24. Светлана РОМБАНДЕЕВА

Кирилл о̄йка ма̄нь пыг. Ты хурит Кирилл о̄йка ма̄нь пыг по̄слым о̄лы – Николай Кириллович Юрьев. Тав Ха̄льӯс район Ло̄пмус па̄вылт о̄лы. Ре̄тыӈ ю̄свой э̄тпост тав колэ̄н щалтсасум, мощ ӯнлахо̄лсуме̄н, потрамасме̄н. На̄н ань э̄лаль Николай Кириллович потре ловиньтэлы̄н. Ам яныгпо̄ль э̄тпост самын патсум, 1978 та̄лт. Та порат ма̄н колта̄глув Кульпаст о̄лыс. Омам наме Таисия Васильевна, а̄ги о̄парищ наме Шешкина, Няхлаӈ па̄вылныл о̄лыс. А̄тям Кирилл Константинович Ме̄сыг па̄вылт самын патыс. Кульпаст а̄тям колхозт рӯпитас, хӯл алыщлас, рыбакыт ёт А̄сн ке̄тыгла̄лве̄сыт. Э̄лнаӈ тав са̄лыл Ха̄льӯс мус яланта̄лыс, Ӯс лё̄ӈх хосыт, проводникыг о̄лыс. Сака са̄в лё̄ӈх яласас, са̄в ва̄щинта̄лыс, ты урыл акваг потырта̄лыс. Ам самын патмум юипа̄лт ма̄н Ло̄пмусн ва̄нтлысӯв. Омам пе̄карнят рӯпитас, ня̄нь ва̄рыс. Тэ̄н ань сас а̄тимыг, акв ляпат хотталь щалтсы̄г. Ще̄мьявт ма̄н хо̄т ня̄врам о̄лсӯв. Яныг увщим Клава, тувыл Алексей, Илья, Костя, Надя, ам щар ма̄нь. Ань туп акв каӈкум о̄лы, Алексей. Тэ̄н Ира э̄кватэ̄нтыл о̄с тыт Ло̄пмуст о̄лэ̄г, са̄т ня̄врам о̄ньще̄г. Яныг а̄гияге̄н ос пыге̄н ще̄мьяныл ёт Ханты-Мансийск ӯст о̄лэ̄гыт. Клава увщим а̄гитэ Ольга Кульпаст о̄лы, о̄с ще̄мьяӈыг е̄мтыс. То̄ванакт тыг ёхталы, а̄нум нё̄тумта̄лытэ, ня̄нил тотавем. Каӈкумн о̄с нё̄тыглавем, такви ще̄мьятэ яныгте̄пыл. Во̄раяӈкве ос хӯл алыщлаӈкве ялантэ̄гум. Николай Кириллович омагеа̄тяге сымыӈ хо̄тпаг о̄лсы̄г. Таисия Васильевна са̄в мо̄йт ва̄с, пе̄с йис о̄лупса урыл са̄в потыр ва̄с, потырта̄лыс. Колта̄гланыл сака яныг о̄лыс, ня̄враманэ̄н ос апыгрищанэ̄н ёт пуссын аквъёт о̄лсыт. Ань питипатта пыге̄н, Колятэ̄н, колэ̄т такте̄т хультыс, такте̄т о̄лы. Ам тав нуплэ ла̄ве̄гум, хотты хо̄тпа вос тотнувын, юртта̄л о̄луӈкве улпыл марщум. Ла̄ви, ам нэ̄мхотталь ат ялантэ̄гум, амттем та о̄лэ̄гум. Ты я̄тил ма̄ньщи хо̄тпав пуста̄гыл вос о̄лы, На̄янэ̄н-О̄тыранэ̄н вос ӯргалаве! Пус ка̄т, пус ла̄гыл!

1098 2015.04.24. Валентина УЗЕЛЬ

Кӯщаит ма̄нь па̄влыӈ ма̄н ялсыт. Ӯринэ̄ква хо̄тал янытлам порат Кышик па̄вылт сапра̄ни о̄лыс. Тот яныг кӯщаит па̄влыӈ ма̄хум ёт потыртасыт. Ты урыл а̄нумн Альбина Дмитриевна Хорова потыртас. Ты э̄тпос 1 хо̄талэ̄т тав 60 та̄лэ то̄влыс Тав са̄в та̄л школат ханищтан нэ̄г рӯпитас, ань пенсият о̄лы. Та хо̄тал туп ка̄ркамыг о̄лнэ ма̄хум кӯщаит ёт хо̄нтхатыгласыт ты Альбина Дмитриевна такви, М. С. Харанзеева, В. И. Тарлина, Г. М. Ершова, Т. А. Молданова. Ты нэ̄ хотпат пуссын ю̄нсхатуӈкв, ма̄щтырлаӈкв сака ха̄сэ̄гыт. Та̄нти ща̄нь ла̄тӈаныл ва̄ганыл, пуссын потыртаӈкв ха̄сэ̄гыт. Та̄н тамле та̄рвитыӈ ва̄рмаль о̄ньще̄гыт. Аквъёт рӯпитанэ̄ныл ма̄гыс кол ат о̄ньще̄гыт. Мо̄т ма̄хум ма̄щтырлаӈкв ханищтан ма̄гыс та̄н то̄р, нӯй ман мо̄т э̄рнэ ут ёвтнэ олныл вос нё̄тавет. Ща̄нь ла̄тӈаныл ма̄гыс сыманыл о̄с сака ща̄рге̄гыт. Ань школат ня̄врамыт ханты ла̄тӈыл потыртаӈкв щар ат ханищтавет, урокыл ос щё̄сыл ат мивет. Школат кружокыт ат ва̄равет, ты хосыт ня̄врамыт сак хартуӈкве, матыр ю̄нтуӈкве ман ма̄щтырлаӈкв ханищтаӈкв о̄с нэ̄мхотмус. Музеяныл о̄с лаппантвес, школат о̄лыс кос, ос хо̄тпа олн та̄л хумус тот рӯпитаӈкв паты. Тох ты ёмас тэ̄лат ва̄рнэ ма̄гыс ты ма̄хум щар ат нё̄тавет.

1098 2015.04.24. Николай МЕРОВ

Койп ра̄тнэ пыгрищакве. Ты хурит Артём Полищук «Пе̄с Сургут» ӯсквет по̄слым о̄лы. Ты пыг 12 та̄лэ то̄влыс. Ялпыӈ хо̄талыт о̄лнэ порат тав акваг тот йӣкви. Щаще̄кватэ ма̄ньщи э̄ква, хосат та̄гыл Сургут ӯст о̄лы. Тав ты Артём тув тотыстэ. Ань ты ва̄рмаль пыгн мӯсты. Ня̄врамакве яныг ща̄гтыл йӣквуӈкве тув яланта̄лы, койп ра̄туӈкв ха̄сы.

1098 2015.04.24. Александр ВЬЮТКИН

Ма̄нь ня̄врамыт ёт рӯпитан нэ̄. Ха̄льӯс район Саранпа̄вылт ма̄нь ня̄врамыт ӯрнэ «Оленёнок» нампа колт «Ма̄нь са̄лыкве» нампа коллектив атым о̄лы. Тув яласан ня̄врамыт ма̄ньщи ла̄тӈыл э̄рге̄гыт ос пе̄с щирыл йӣкве̄гыт. Ня̄врамыт атнэ номт Ольга Владимировна Лелятова тав э̄лаль тэ̄лаг ва̄рыстэ. Мо̄лты яныгпо̄ль э̄тпост «Ма̄нь са̄лыкве» акванатым па̄сныл лов та̄лэ ты то̄влыс. Намхо̄талэ Саранпа̄выл клубыт янытлавес. Та хо̄таланыл нэ̄пак ло̄виньтан кол тармыл кӯщаиг о̄лнэ нэ̄ Галина Ларионова щё̄пита̄лыстэ. Суссылтапаныл ва̄рыгламаныл порат «Ма̄нь са̄лыкве» ня̄врамыт э̄ргысыт, йӣквсыт ос стихыт ма̄ньщи ла̄тӈыл ловиньтасыт. Ольга Владимировна са̄в та̄л ма̄ньщи ла̄тӈыл ня̄врамыт ханищтым рӯпиты. Тав ма̄ньщи о̄лупсав ёмщакв ва̄нэ хо̄тпаг о̄лы. Стихыт ос э̄ргыт такви хансы. Хансум пӯмщанэ э̄лаль ня̄врамытн ханищтыянэ. Ня̄врамыт ос э̄лаль тотыяныл. Галина ЛАРИОНОВА те̄тум потре ма̄ньщи ла̄тӈыл Александр ВЬЮТКИН хансыстэ.

1098 2015.04.24. Александр ВЬЮТКИН

Яныг пӯмащипа ла̄тыӈ ла̄ве̄гум. Манкем та̄ланув са̄выг е̄мтэ̄гыт, такем ва̄гта̄л патантэ̄в. Ам о̄с яныгпа̄лаг патуӈкв патсум, лувумса̄мум а̄гмыӈыт. Ве̄рмумум порат ӯйхӯл о̄щсум, торыӈ ат яласасум. Ань ня̄враманум яныгмасыт, ня̄враманум ня̄врамыт мис щаквит ат ае̄гыт. Таима̄гыс мисанум холтсанум. Ӯщлахтым, пусмалтахтым, ма̄ сунсыглым яласэ̄гум. Ань ня̄враманумн нё̄тавем, пусмалтахтын олныл мивем. Югорск, Краснотурьинск ӯсыгт о̄лсум. Мощ мо̄лалнув Тюмень ӯсн «Тараскуль» здравницан ялсум. Тот ёмщакв пусмалтахтасум, тэ̄рпиӈ вит хӯрат ӯнлысум, ла̄глагум пусмалтавесы̄г. Ка̄сыӈ хо̄тал ӣтипа̄лаг са̄всыр ощхулил суссылтавесӯв. Хотьют э̄ргуӈкв ка̄сащас, э̄ргыс. Кутаклан хум (баянист) кутакыл ёнгыс. Ёмщакв по̄йтнэ̄г тыттувесӯв. Ам ётум Ленаа̄гим, Натальэ̄щум ос а̄гипыгум Максим о̄лсыт. Тот тӯр о̄лы, тӯр ва̄тан ялантасӯв. Сыстам во̄рт ё̄мыгтасӯв. Пусумлахтын халт суп ю̄нтсум. Натальэ̄щум та̄йтта̄л супохса сагыс. Кит са̄т тот о̄лсӯв, ёмщакв ӯщлахтасӯв. Ня̄враманумн яныг пӯмащипа ла̄ве̄гум. Акваг а̄нумн нё̄тэ̄гыт, акваг уральтавем. Таима̄гыс э̄лумхо̄лас ня̄врам ты янмалты, а̄щеща̄не уральтаӈкв ос тэ̄натэ̄н нё̄туӈкв. Г. К. Алгадьева хансум пищма А. Анямован газетан ке̄твес.

1098 2015.04.24. Тамара МЕРОВА

Тав ӯщлахтынэ̄тэ сыс сакныл нё̄тнэ пормасыт ва̄ри. Татьяна Дмитриевна Русанова ёт ме̄н акв щёс Ялъю̄с нампа пе̄с па̄влыӈ ма̄т акванхо̄нтхатыгласме̄н. То̄нт туи пора о̄лыс. Войнан ялум хум хо̄тпат тот ка̄сталаве̄сыт ос та̄н ма̄гсыланыл памятник тӯщтувес. Та юипа̄лт кит та̄л минас, ты тэ̄лы Ягримт ам ты э̄ква колэ̄н щалтапа̄лсум ос о̄лупсатэ урыл китыгласлум. – Ам а̄ги о̄парищ намыл Сангилеваг о̄лсум. А̄тям наме Дмитрий Егорович Сангилев, тав Ялъю̄с па̄влыӈ хум о̄лыс. Тав 1943 та̄лт хо̄нтлан ма̄н тотвес ос 1947 та̄лт юв ущ ёхтыс. Война юипа̄лт сапёр рӯпата ва̄рыс, са̄в ма̄т ос колыт сыстамтасыт. Юв ёхтыс, омам нэ̄г тотыстэ, ам 1948 та̄лт самын патсум. Ам ма̄ньта̄гыл щаще̄квамно̄памн янмалтаве̄сум, омагума̄тягум акваг рӯпитым яласасы̄г. Омам Фаина Ефимовна рущ ма̄ныл ёхтыс, тав школат ня̄врамыт ханищтас, а̄тям колхозт рӯпитас. О̄пам Егор Петрович Сангилев хӯрум пыганэ хо̄нтлуӈкве тотве̄сыт. Такви хӯл алыщлым акваг яласас. Тав па̄влыӈ ня̄врамыт ёт янгема̄не пуссын акваннё̄тхатым хо̄нтлан ма̄н ке̄тнэ ма̄гыс са̄в хӯл алыщласыт. Тамле та̄рвитыӈ пора ань тыг мус Н. К. Захарова ос А. Н. Гындыбина номитэ̄н ос то̄внакт ма̄навн ты урыл потырта̄лэ̄г. Войнат о̄пам Иван ос Николай пыгаге порславесы̄г. Туп а̄тям юв ёхтыс, сака хоса ат о̄лыс ос а̄тимыг е̄мтыс. Омаме̄нтыл ётыл А̄нъя па̄вылн ва̄нтлысаме̄н, тав тот школа кӯщай ва̄ӈын нэ̄г паттувес. А̄нъят тот китынтыг хум ва̄рыс, о̄йкатэ наме Георгий Павлович Ендырев о̄лыс. Тав о̄с хо̄нтлыс, 1947 та̄лт юв та̄ртвес, хо̄т оккупационный ма̄т о̄лыс. Аквъёт о̄лыматэ̄н сыс нила ня̄врам о̄щсы̄г. Ма̄н ань хӯрум хо̄тпа хультсӯв, Ольга йигрищум Нефтеюганск ӯст о̄лы, Сергей а̄пщим Ягримт. Тав са̄в та̄л ма̄во̄й но̄хвинэ ма̄т рӯпитас, мо̄лалнув пенсиян патхатас. Ма̄ньлат порав та̄рвитыг о̄лыс кос, ос ма̄н яныгпа̄ла рӯтанувн сака э̄руптым, ӯргала̄лым янмалтавесӯв. Ма̄н, Ялъю̄ст о̄лум ня̄врамыт, ма̄нки халувт пуссын юртыӈыщ о̄лсӯв. – Ань ос наӈки о̄лупсан урыл мощ потыртэ̄н, хо̄т мо̄т ма̄т о̄лсын ман а̄ти, хо̄т ханищтахтасын, хо̄т рӯпитасын? –Ам Ха̄льӯст са̄т класс а̄стласум ос Ханты-Мансийск педучилищан э̄лаль ханищтахтуӈкве минасум. Тот 1965-1969 та̄лытыт ханищтахтасум, та юипа̄лт о̄влэ̄т Во̄сыӈтур па̄вылт ня̄врамыт ханищтасанум, тувыл Сортыӈъя школат акв та̄л рӯпитасум. Ос хум ва̄рсум, о̄йкаме̄нтыл Ханты-Мансийск ӯсн о̄луӈкве минасме̄н. Тав речникыг о̄лыс, на̄иӈха̄пыл са̄всыр па̄влыӈ ма̄н яласас, ам ос тав ётэ билетыт уральтан нэ̄г нёлолов та̄л рӯпитасум. Тувыл Ноябрьск ӯсн ва̄нтлысаме̄н. То̄нт ам юил ялым Нижневартовский торговый училищат бухгалтерыг ханищтахтасум. Ос таве а̄стламум юипа̄лт пенсия мус бухгалтерыг рӯпитасум. О̄йкаме̄нтыл ня̄врам ат о̄щсуме̄н, акв рӯт а̄гирищкве янмалтаӈкве вислуме̄н. Кит та̄л ювле хультум порат тав а̄тимыг е̄мтыс. Такви акв а̄ги о̄ньщас, Юля ань Урай ӯст о̄лы, о̄с ня̄врамыӈыг е̄мтыс. Ам тэ̄натэ̄н нё̄тэ̄гум. О̄йкам хосат хотталь щалтыс, ам тувыл тыг Ягримн ва̄нтлысум, тыт 2005 та̄л па̄сыл о̄лэ̄гум. Пенсият о̄лнэ̄м сыс сыресыр хурит сакныл ю̄нтуӈкве патсум, са̄всыр турло̄псыт, па̄льсакыт хартэ̄гум. Акв щёс нас пӯмащ ма̄гыс хурит сакныл ю̄нтуӈкве ӯнтылматыгласум ос такем а̄нумн тамле тэ̄ла мӯстыс. Ань ва̄т са̄виткем хурит рӯтанумн, юртанумн мӯйлуптасанум. Юлям о̄с ханищтаслум, тав нё̄тнэ пормасыт ва̄руӈкве ха̄сы. Туи тэ̄пкант матыр ӯнттэ̄гум, янмалтэ̄гум, та щирыл порав аквта щё̄с та мины. Татьяна Дмитриевнан потре ма̄гыс яныг пӯмащипа ла̄тыӈ ос пуста̄гыл э̄лаль о̄луӈкве ла̄ве̄гум. Пе̄с Ялъю̄ст яныгмам хо̄тпатн паща ла̄тыӈ ке̄тэ̄гум. Та̄н та̄нки па̄вланыл ат ёрувлыяныл, войнан ялум о̄паныл, а̄щаныл, каӈканыл ка̄стыяныл.

1098 2015.04.24. Александр ВЬЮТКИН

Ка̄сыӈ та̄л Ӯринэ̄ква хо̄тал янытлан ма̄хум акваг та са̄вме̄гыт.. Мощ мо̄лалнув Ханты-Мансийск ӯст «Югорский лыжный марафон» нампа касыл о̄лыс. Тав ань хӯрмиттыг ты ва̄рыглавес. Ёсал ха̄йтнэ хо̄тал э̄лыпал хо̄талт касыл щё̄питан хо̄тпат ос ля̄ххал тотнэ ма̄хум халт прессконференция о̄лыс. Ма̄н ётув потыртан кастыл нила яныг кӯщай хо̄тпа ёхталас. Та̄н пуссын ёсал каснэ ма̄хумн ёмщакве̄г ва̄вет. Щар о̄влэ̄т ёсал ха̄йтнэ лё̄ӈханыл щё̄питан урыл ос манса̄вит ёсал ха̄йтуӈкве хо̄тпа ка̄сащас, ты урыл титыглаве̄сыт. Россия янытыл ёсал каснэ ма̄хум халт вицепрезидентыг о̄лнэ хум Сергей Крянин тох ла̄выс: «Ты та̄л касыл хӯрмиттыг ты ва̄рилӯв. Ка̄сыӈ е̄мт ёсал ха̄йтнэ мирув са̄вми. Ты та̄л тит со̄тыра ляпатем хо̄тпа ёсал ха̄йтуӈкв хасхатас. Та̄н халанылт щар ма̄нь ня̄врам та̄лэ ущты то̄влыс. Щар янгыг акв о̄йка о̄лы, тав 1929 та̄лт самын патыс. Ты тэ̄лы осыӈ тӯйт патыглас, лё̄ӈханув ёмщаквег ва̄рве̄сыт. Ты хосыт каснэ лё̄ӈхув ёмщакве̄г щир мус щё̄питым о̄лыс». Та юипа̄лт хо̄н ма̄ныл о̄лнэ хум Анжело Коррадини титыглавес. Тав ла̄выс: «Мо̄лхо̄тал то̄влыӈха̄пыл тыг йинэм порат са̄в мо̄т хо̄н ма̄т мирн ёмщакве̄г ва̄нэ ма̄хум ёт ва̄щинтахтасум. Ханты-Мансийск ӯс урыл та̄н пуссын ёмас ла̄тыӈ ла̄всыт. Лӯима̄т о̄лнэ ӯсын та̄нанылн сака мӯстыс. Ам тыг э̄ти турмант ёхтысум. То̄влыӈха̄пув ёлиснэ порат на̄йиӈ ӯсын нумыл ва̄слум. То̄нт на̄янэ халт торыӈ щирыл сунсыглаӈкв ат ве̄рмыслум. Ань на̄н ётын хо̄нтхатнэ ма̄гсыл тыг йинэм порат ам номсахтасум, тамле ёмас сыстам ӯс хотьютн ат мӯсты. Ам ань на̄н о̄лнэ ма̄н ёмас номтыл аквписыг номылматыглалуӈкв патылум». Хо̄н ма̄ныл ёхталам мӯй хум юипа̄лт ос «Ханты-Мансийск банк» тармыл кӯщай хум Дмитрий Мизгулин титыглавес. Тав потыртас: «Ма̄н ёмщакве̄г щё̄питыхтасӯв. Маныр, хумус э̄ри, пуссын э̄рнэ щирыл ва̄рим о̄лы. Щар яныг ёсал хайтнэ ла̄кв палытэ атпан ве̄рыста, на̄н о̄с ха̄йтуӈкв номт те о̄ньщегы̄н, ул пилэ̄н, ёса масэ̄н, ха̄йтэ̄н». Мо̄т хо̄тал а̄лпыл онтолов щё̄с порат «Югорская долина» нампа ма̄т састумыг щё̄питым, тӯйтэ ёлялыглам ма̄н ма̄хум атхатаӈкв патсыт. Ма̄к касыланыл аквхуйполов щё̄с порат о̄вылтасаныл. Касыланыл соссаӈ ма̄хум та̄н о̄вылтасаныл. Хум хо̄тпат во̄раян ёсал акв ве̄рыста ха̄йтсыт. Сургутский районт о̄лнэ ма̄ньлат хум Виталий Русскин финиш пусас мус щар са̄ртын ёхтыгпас. Ханты ма̄хум ёсал ха̄йтнэ пӯмщаныл юипа̄лт са̄всыр ма̄ныл ёхтум ма̄хум ущта ха̄йтылтахтасыт. О̄выл ха̄йтнэ лё̄ӈханыл ат ве̄рыста палытыг о̄лыс. Тот янге, ма̄не, хотьют ка̄сащи, пуссын ха̄йтуӈкв ве̄рмысыт. Тувыл ма̄хум атпан ве̄рыста та̄ра ха̄йтсыт. Та хо̄тал ма̄лтып, хо̄талыӈ хо̄талыг о̄лыс, ёсал ха̄йтнэ лё̄ӈх тӯйтэ ка̄миньтаг е̄мтыс. Тамле лё̄ӈх ха̄йтуӈкв та̄рвитыӈыг о̄лыс. Таи ма̄гсыл лё̄ӈханыл хус ве̄рыстан ва̄тинуве̄г ва̄рвес. Ва̄т ве̄рыста ха̄йтыманыл щирыл о̄йкат халт Тони Ливерс са̄ртын финишн ёхтыс. Тав Швейцария хо̄н ма̄ныл касуӈкв тыг ёхталас. Тав юипа̄лэ̄т Белоруссия хо̄н ма̄ныл ёхталам хум Алексей Иванов о̄лыс. Хӯрмит ма̄ ма̄н хумиюв Евгений Белов вистэ. Нэ̄ хо̄тпат халт Белоруссияныл о̄лнэ нэ̄ Екатерина Рудакова вистэ. Мо̄лты тав о̄с тот но̄хпатыглас. Тав юипа̄лэ̄т Аурэли Дабюдик Франция хо̄н ма̄ныл о̄лнэ нэ̄, финишн ёхтыс. Тувыл Атонелла Конфортолло, Италия хо̄н ма̄ныл о̄лнэ нэ̄, вистэ. Касыл о̄лнэ порат иӈ са̄в мо̄т са̄всыр пӯмащ тот суссылтавес. Пӯмщаныл халт тит ёсаӈ «Бураныл» каснэ ва̄рмаль ква̄лттапавес. «Бурананыл» акв юипалт но̄хпорыгма̄лым нуйхатсыт. Со̄ль, та хо̄тал тот сака пӯмащ хо̄талыг о̄лыс. Мо̄тантыг ты касыл аквты порат, акв тот ты тах ва̄раве. Ка̄сащан ма̄хум ёхталэ̄н, сунсэ̄н, касэ̄н.

1098 2015.04.24. unknown

Сым ща̄ргын ла̄тыӈ. Ма̄ньпо̄ль э̄тпос 20 хо̄талэ̄т Ханты-Мансийск ӯст ма̄ньщи хо̄тпав Николай Иванович Хозумов а̄тимыг е̄мтыс. Тав ма̄ньпо̄ль э̄тпос 24 хо̄талэ̄т 1932 та̄лт Ха̄льӯс район Хо̄рыӈпа̄вылт самын патыс, тот яныгмас. Та̄рак па̄вылт щаще̄квагео̄паге о̄лсы̄г, тав ма̄ньта̄гыл тув акваг яланта̄лыс. Ане̄квагеащо̄йкаге ос Мувыӈтес хо̄тпаг о̄лсы̄г. Оматэ Марья Александровна тот самын патыс, а̄тятэ Иван Михайлович Хо̄рыӈпа̄выл хум о̄лыс. Николай Иванович щар яныг о̄лыс, Саранпа̄вылт хӯрум а̄пщиянэ ос э̄ще о̄лэ̄гыт. О̄выл классытт тав Ло̄пмуст ханищтахтас, тувыл Хо̄рыӈпа̄вылт школа е̄мтыс, э̄лаль ос тот ханищтахтас. Ма̄ньщи мир пе̄с йис мо̄йтыт ос э̄ргыт тав сака са̄в ва̄с. Э̄кватэ хосат а̄тимыг е̄мтыс, ня̄враманэ пуссын янгыт. Юио̄выл ат та̄л Ханты-Мансийск ӯст ма̄нь а̄гитэ Людатэ палт о̄лыс. Ма̄н, редакцият рӯпитан ма̄хум, тав ня̄враманэ̄н ос рӯт хо̄тпанэ̄н сым ща̄ргын ла̄тыӈ ке̄тэ̄в. Ты ма̄ньщи хо̄тпав ма̄гыс ма̄н сыманув о̄с ща̄рге̄гыт.

1098 2015.04.24. Людмила ТЕТКИНА

Са̄в та̄л во̄рт рӯпитан хум. Тэ̄лы порат ма̄н ще̄мьяӈ та̄гыл Свердловский область Полум па̄вылн Фёдор Григорьевич Векшин палт мӯйлуӈкве ялсӯв. Ма̄ньщи хум та па̄вылт колта̄глэ ёт о̄лы. Фёдор ма̄навн Вершина нампа яныгмам па̄влэ̄н тотыгласанэ. Ань та ма̄т нэ̄мхотьют ат о̄лы. Ма̄ньщи па̄выл По̄лум па̄вылныл я̄ хосыт лов ве̄рыста алгальнув ӯнлыс. Тав ма̄ньта̄гыл ща̄нягеа̄щаге ёт тот о̄лыс, тот яныгмас. Фёдор ня̄врамыг о̄лме порат ханищтахтуӈкве Полуночный па̄вылн тотыглавес, тот интернатыт о̄лыс. Школа а̄стламе юипа̄лт та̄ра рӯпитаӈкве патыс, тувыл нэ̄ тотыс. Тамара нэ̄тэ ёт са̄в та̄л аквъёт о̄лэ̄г. Тэ̄н нила ня̄врам о̄ньще̄г. Яныг пыге̄н 25 та̄лэ то̄влыс, яныг а̄гитэ̄н 20 та̄лэ, китыт а̄гитэ̄н 19 та̄лэ то̄влыс ос ма̄нь пыге̄н туп 8 та̄л янытыг е̄мтыс. Ма̄ньщи хум такви па̄влэ̄н акваг яланты. Вершина па̄вылт йильпи кол ӯнттыс, ще̄мьяӈ та̄гыл тув яланта̄лы. Фёдор во̄раим ос хӯл алыщлым яласы, пыгаге о̄с ёт тотыглыяге. Ма̄ньщи хум во̄р па̄вылт яныгмас, во̄р та̄л хоса о̄луӈкве ат ве̄рми. Тыи ма̄гсыл тав во̄р ӯргалан хо̄тпаг рӯпитаӈкве патхатас. Рӯпататэ са̄в та̄л мӯсхалыг ос ка̄ркамыг ва̄ритэ. Фёдор Григорьевич «Ветеран труда» нам ань о̄ньщи, во̄рт на̄й ёлхарыгтаме ма̄гсыл ма̄гылн та̄гатан посыл майвес. Ам ты ма̄ньщи колта̄гылн паща ла̄тыӈ ос са̄в сымыӈ ла̄тыӈ ке̄тэ̄гум. То̄румн ос О̄тырн вос ӯргалавет. Пус ка̄т, пус ла̄гыл та̄нанылн ла̄ве̄гум. Дарья Белова ке̄тум потре ма̄ньщи ла̄тӈыл Л. Тасманова хансыстэ.

1098 2015.04.24. Редакцият рӯпитан ма̄хум

Ма̄ньщи хо̄тпаг самын патум хо̄талэ̄ныл янытлыягӯв!Яныгполь э̄тпос 22 хо̄талэ̄т ма̄ньщи хо̄тпав Евдокия Ивановна Ромбандеева самын патум хо̄талэ о̄лыс. Тав 1928 та̄лт Ха̄льӯс район Хо̄сло̄х па̄вылт самын патыс, тот яныгмас. Школа а̄стламе юипа̄лт Ханты-Мансийск ӯст педагогический училищат , тувыл э̄лаль Санкт-Петербург ӯст Жданов нампа педагогический институтт ханищтахтас. Евдокия Ивановна Санкт-Петербург ос Москва ӯсыгт са̄в та̄л о̄лыс, рӯпитас, школат ос педучилищат ханищтахтан ня̄врамыт ма̄гыс са̄в нэ̄пак хансыс. 1990 та̄лт тав Ханты-Мансийск ӯсн ва̄нтлыс. Наука щирыл тав яныг рӯпата ва̄ри, нэ̄пакыт хансы. 1998 та̄лт Евдокия Ивановна доктор наук намыл майвес. Наука тэ̄ла палт тав намыӈсуиӈ хо̄тпаг о̄лы. Тав наме «Ведущие языковеды мира» нэ̄пакт хасвес. Матъёмас ма̄ньщи мирув халт тамле хо̄тпа о̄лы, ма̄ньщи ма̄хманэ̄н тав э̄руптаве ос янытлаве. Ма̄н, редакцият рӯпитан ма̄хум, Евдокия Ивановна намхоталэ̄т янытлылӯв, таве̄н са̄в ёмас, сымыӈ ла̄тыӈ ла̄ве̄в! На̄янэ̄н-О̄тыранэ̄н вос ӯргалаве! Ос аквта хо̄талт Валентина Селивёрстовна Иванова (Садомина) 65 та̄лэ то̄влыс. Тав о̄с ма̄ньщи мирув о̄лупса, пе̄с йис ва̄рмалит, пе̄с йис накыт ханищты, наукат кандидат нам о̄ньщи, са̄в учёный нэ̄пак хансыс. Ма̄н таве о̄с янытлылӯв! Пус ка̄т, пус ла̄гыл.

1098 2015.04.24. Людмила ТЕТКИНА

Ма̄тэ урыл стихыт хансы. Литература та̄л янытлын кастыл ам акв э̄ква урыл потыр хансэ̄гум, тав наме Светлана Владимировна Карнаухова. Ты ма̄ньщи э̄ква стихыт хосат та̄гыл хансы. Тав ётэ ам Урай ӯст хо̄нтхатыгласум, потыртасум. Ам школат ханищтахтамум порат стихотвореният хансуӈкве патсум. То̄нт стиханум ма̄хумн щар ат ловиньтасанум. Школа а̄стламум юипа̄лт Ханты-Мансийск ӯс педучилищан э̄лаль ханищтахтуӈкве минасум. Акв порат стиханум юрт а̄гимн ловиньтасанум. Тав а̄нумн ювле ла̄выс, хансуӈкве ам щар ат ха̄сэ̄гум. Ты юипа̄лт стихыт воссыг ат хассум. Ханищтахтын ма̄ныл а̄стласум, Урай ӯсн ювле ёхтысум, рӯпитаӈкве патсум, хум ва̄рсум. О̄йкаме̄нтыл ня̄враманме̄н янмалтанэме̄н сыс стихыт хаснэ ва̄рмаль урыл воссыг ат номсысум. Акв порат Урай ӯст касыл ва̄рыглавес, ка̄сыӈ хо̄тпа такви стиханэ ос потранэ тув ке̄туӈкве ве̄рмыс. Ам мощ номсахтасум, тувыл стиханум о̄с тув та ке̄тсанум. Тот ам о̄выл местал майве̄сум. Та пораныл нэ̄пак хаснэ хо̄тпат ёт ва̄йхатуӈкве патсум. Школан, нэ̄пак ловиньтан колытн ос са̄всыр ялпыӈ хо̄талытн стихыт ловиньтаӈкве ва̄тихал во̄виньта̄лве̄сум. Урай ӯст «Клуб поэзии» рӯпитас, тув о̄с акваг ялантасум. Акв порат та ма̄хум ёт нэ̄пак та̄ратасӯв, стиханув ос потранув тув хассанӯв. Нэ̄пак та̄ратан ма̄гсыл ма̄нки олн ойтсӯв. Ты нэ̄пак рӯт ма̄хманувн, ю̄рт хо̄тпанувн мӯйлуптасанӯв. Ӯсувт о̄лнэ ма̄ньщит «Возрождение» нампа клуб ва̄руӈкве хунь о̄вылтахтасыт, ам та̄нанылн нё̄туӈкве патсум. Ань ма̄ньщи, ханты ос ё̄рн ма̄хум ёт ва̄тихал акванатхатыглэ̄в, аквъёт са̄всыр ялпыӈ хо̄талыт ва̄рыглэ̄в. Тот ам ма̄хум э̄лыпа̄лт стиханум о̄с ловиньтыянум». Светлана Владимировна яныгмам поратэ ос такви о̄лнэ ма̄тэ урыл стихыт хансы. Та поратэ ёмащакв номитэ. Тав ане̄кватэ Евра па̄вылныл о̄лыс. Колэ на̄йн хунь ё̄свес, тав Сатыга па̄вылн о̄луӈкве ва̄нтлас. Светлана тав палтэ ӯщлахтуӈкве туи порат акваг ялантас. Та урыл тав ла̄выс: «Сатыга па̄вылт мо̄т ня̄врамыт ёт хо̄тал палыт кон ёнгасасум. Тэ̄ӈкве тахмае̄гум, юв щалтапа̄лэ̄гум, ня̄ньло̄мт а̄лмае̄гум, э̄лаль та ха̄йтэ̄гум. Ос ре̄гыӈ хо̄талыт я̄т акваг пувлысӯв. Итипа̄лаг, хунь хо̄тал ёлӯнтуӈкве паты, няслуӈкве ялантасӯв. Та порат са̄в хӯл пувуӈкве ро̄выс. Во̄рн са̄всыр пил тэ̄ӈкве ха̄йттала̄лэ̄в, хоты порат пил понсы, ёмащакве ва̄слӯв. Ос па̄кв паттуӈкве ялантасӯв, о̄влэ̄т па̄кв тай о̄ӈхыӈ, ве̄тран атыянӯв ос нумыл пумыл пиныянӯв, тох а̄ращ ва̄тан па̄йтуӈкве тагатыянӯв. О̄ӈх пумын хунь ханы, то̄нт па̄квыт та а̄стэ̄гыт. Во̄ртур э̄тпос во̄тыӈ манос ра̄квыӈ хо̄тал юипа̄лт па̄квыт нас ёлпатыглэ̄гыт, то̄нт па̄кв атым во̄рт о̄с ха̄йтыгтасӯв. Та порат ма̄ньщит пуссын хӯлыл урак ва̄рсыт. Тамле хӯл о̄с акваг тэ̄сӯв. (Хо̄нтаӈ ма̄ньщит, улпыл, ёхыл «уракыг» ла̄всаныл). Хӯл яктаве, со̄лвалыӈ витн пинаве, тувыл ос а̄ращ по̄хат то̄слуӈкв тагатаве. Ань тамле урак нэ̄мхотьют ат ва̄ри, пе̄с порат па̄влувт ка̄сыӈ ще̄мья тамле хӯл ва̄рыс». Ма̄ньщи э̄ква Ханты-Мансийск ӯст ханищтахтам поратэ урыл о̄с мощ потыртас. Тав Еремей Данилович Айпин, нэ̄пак хаснэ ханты о̄йка, ёт ханищтахтас. Та урыл тав тох потыртас: «О̄выл курсувт туп кит пыгыг ма̄н ётув ханищтахтасы̄г, пуссын а̄гит. Акв пыг китыт курсын ханищтахтуӈкве ат ёхтыс, Еремей а̄гит халт такке̄т хультыс. Ма̄н пуссын таве Ерёмушкаг ла̄выслӯв, тав такем э̄ссамтас. То̄нт тав нё̄тнэ, карс пыгыг о̄лыс, а̄гитытн сака э̄руптавес. Ханищтахтуӈкве а̄стлысӯв, пуссын ла̄кквамингаласӯв, са̄в та̄л ат ва̄щинтахтасӯв. Мо̄лты та̄л тав Урай ӯсн ёхталас, тав ётэ хо̄нтхатыгласме̄н, потыртасме̄н. Ос ты э̄лыпа̄лт намхо̄талэ кастыл тав ма̄нав пуссын Ханты-Мансийск ӯсн во̄виньта̄лсанэ. Тот ма̄н маткем та потыртасӯв, ханищтахтам порав номылматыгласлӯв, юв ща̄гтым пуссын мингаласӯв». Светлана Владимировна тав ётэ ханищтахтам хо̄тпатытн ос Еремей Даниловичн паща ла̄тыӈ ке̄ты. Пус ка̄т, пус ла̄гыл та̄нанылн ла̄ви.

1098 2015.04.24. Александр ВЬЮТКИН

Товлыӈ ӯй янытлавес. Ка̄сыӈ та̄л Ӯринэ̄ква хо̄тал янытлан ма̄хум акваг та са̄вме̄гыт. Са̄в мир ще̄мьяӈ та̄гыл тув ёхталэ̄гыт. Пе̄с ма̄ньщит ла̄выгласыт, Ӯринэ̄ква таквсы мо̄ртым ма̄н миннэ̄тэ э̄лыпа̄лт мирн ла̄ви: «Тӯяг ам ёхтынэм кастыл хоты ма̄ныл, хоты витыл о̄лнэ а̄гитпыгыт са̄в а̄пат вос нёвитавет, хоса ма̄ныл ёхтынэм порат ва̄гта̄л патэ̄гум, по̄лявем, ла̄гылрищагум толтыглан ма̄ хо̄т тах э̄ри». Ты ёмас номтанэ ма̄гыс Ӯринэ̄ква ка̄сыӈ тӯя аквты порат соссаӈ ма̄хмытн ты ӯлыглаве. Ань ялпыӈ хо̄тал титхуйплов щё̄ст та о̄вылтавес. Мyй ма̄хум нупыл Вячеслав Юрьевич Кондин потыртас. Ам «Торум Маа» сып пуӈкын но̄хёхтумум порат, ня̄врамыт пумныл, ма̄нь ха̄ль ос тып нирныл акваннё̄тхатым питит пе̄рыгтасыт. Мӯӈи пе̄нтсыл ос тӯйт пӯвыр поталыиг ка̄тыл таӈрим пити паттан пинтласыт. Мӯй ма̄хум ма̄гсыл сценат «Хо̄тал» нампа А̄с-угорский театр ма̄хум ма̄нь пӯмащ суссылтасыт. Тувыл «Лылыӈ со̄юм» колт ханищтахтын ня̄врамыт са̄ӈквылтасыт. Концерт юипа̄лт ня̄врамыт ма̄гсыл са̄всыр касылыт ва̄рыглаве̄сыт. О̄влэ̄т халанылт титтыгуртхатым ква̄лыг тит нупыл хартсыт. Тувыл яныгнуве̄г о̄лнэ ня̄врамыт ма̄нь сунсов пе̄нтсыл ӯлас хольт ва̄рим нормат ӯлтта поргысыт. Ма̄ньнуве̄г о̄лнэ ня̄врамыт оc тыньщаӈ пе̄нтсыл тып нирныл ва̄рим ла̄кв сома но̄хлю̄льнэ сайт нумпа̄лн па̄хвтысыт. Та хо̄тал иӈ са̄в пӯмащ о̄лыс. Касманыл юипа̄лт ня̄врамыт пуссын ма̄нь мӯйлупсал майве̄сыт. Ты ма̄нь мӯйлупсат ма̄гсыл хотьют хумус ве̄рмыс, тох та капыртас. Сып пуӈкыныл ёлва̄глын ма̄т хоса пасаныт щё̄пита̄лве̄сыт. А̄ращ ва̄тат яныг хӯл исмит пӯтыг тагатым ханасы̄г. Мӯйлын ма̄хум тэ̄пъяласыт, ёмащакв мӯйлысыт. Э̄рнэ щирыл ялпыӈ хо̄тал хумус ва̄руӈкв э̄ри, ань пуссын о̄лыс. Э̄лаль о̄c тох вос о̄лы.

1098 2015.04.24. Светлана РОМБАНДЕЕВА

Пе̄с йис ва̄рмалит но̄хво̄рмалтан ма̄хум. Ма̄щтыр хо̄тпа нам о̄ньщэ ма̄хум та̄нти рӯпатаныл ва̄рнэ̄ныл коныпал мо̄т са̄в э̄рнэ тэ̄лат ва̄ре̄гыт пе̄с йис ва̄рмалит ханищтэ̄гыт, хотёрувлам тэ̄лат ёмащакв та̄рапаттыяныл, тувыл ос пормасыт ва̄руӈкве мо̄т ма̄хум ханищтэ̄гыт. Округув янытыл тамле хо̄тпа са̄в о̄лы, соссаӈ ма̄хум ос рущ мир пе̄с тэ̄ланыл но̄хво̄рмалтыяныл. Ка̄сыӈ ма̄щтыр хо̄тпа такви мире ос ще̄мьятэ ва̄рмалит та̄рапаттым о̄ньщиянэ. Ты коныпал тав археология, этнография, искусствоведение ос педагогика ва̄рмалит о̄с мощ ва̄ганэ, пуссын аквантотыянэ, аквъёт ханищтыянэ. Ханты-Мансийск ӯст о̄лнэ Центр народных промыслов и ремёсел колт рӯпитан ма̄хум округ янытыл са̄в хо̄тпа ёт рӯпитэ̄гыт, пе̄с порат ва̄рыглам тэ̄лат та̄н ань о̄с аквта щирыл ва̄руӈкве ханищтыяныл, са̄всыр мастерклассыт ва̄рыглэ̄гыт. М. А. Некрасова ла̄внэ̄тэ щирыл, э̄лумхо̄лас матыр ма̄щтырлы те, тав такви мире ос о̄лнэ ма̄тэ культура но̄хво̄рмалтытэ. Кос ма̄ньщи, кос рущ, пуссын аквхольт. Ма̄нти миранув пе̄с йис о̄лупсаныл номуӈкве ос ва̄ӈкве ат те патэ̄в, ань йис культурав тах таквирот нас та о̄ланты, ос манрыг тав тамле, ты урыл нэ̄мхотьют ва̄ӈкве ат паты. Центр ремёсел колт ма̄н научнометодический совет ва̄рыгла̄лэ̄в, тот ка̄сыӈ ма̄щтыр хо̄тпа рӯпататэ ёмащакв сунсыглылӯв, та̄рапаттылӯв. Тувыл таве̄н э̄рнэ тема кинсэ̄в, ты хосыт тав э̄лаль рӯпитаӈкв ве̄рми, ос научный рӯпата ва̄руӈкв тахмаи те, вос ва̄ри. Народный мастер России намыл маим нэ̄ В. Шашкова соссаӈ ма̄хум маснутаныл хорамыт са̄в та̄л ханищты. Э̄ква ман о̄йка суп, ка̄щ, па̄сса ос мо̄т маснут хумус йинавет, ю̄нтавет – тыи тав ханищты, пуссын нэ̄пакн ёлхансыянэ. Центр ремёсел колт акв тема ма̄гыс я̄нас ма̄ ва̄рсӯв, намаяслӯв: «Экспериментальная археологическая керамика». Ты колт ос округ янытыл са̄всыр музеитыт рӯпитан ма̄щтыр ма̄хум керамика тэ̄ла ханищтыяныл, пе̄с порат ва̄рыглам хусапсовыт кинсэ̄гыт, та̄рапаттыяныл, хунь ос хумус та̄н ва̄рыглаве̄сыт. Народный мастер нам о̄щнэ нэ̄ Л. П. Пастернак ты тэ̄ла лов арыгтем та̄л ханищтытэ. Тав э̄лыпа̄лэ̄т намыӈсуиӈ археологытын ханищтавес – И. Г. Глушков, А. П. Зыков, С. Ф. Кокшаров, В. И. Семёнова ос мо̄т хо̄тпатн. Ма̄щтыр ма̄хум ва̄рнэ рӯпатаныл са̄в ма̄хумн ханищтавет – археологытн, этнографытн, искусствоведытн. Ка̄сыӈаныл таве̄н э̄рнэ матыр кинсы, ханищты. Археолог таил пӯмщалахты, ань пормас хунь ва̄рвес, манарыл ва̄рвес. Этнографын тав ос тыглетувле пе̄ргата̄лаве, по̄славе, хумус ва̄рвес, манарыл ва̄рвес, пуссын ёлхансаве. Ка̄тыл по̄слын хо̄тпа ты пормас урыл са̄в номсы, хоты порат тав о̄щвес, хотьют палт о̄лыс, по̄слытэ. Тувыл по̄слум хуриянэ мирн суссылтыянэ. Центр ремёсел кол кӯщай О. Д. Бубновене потре ма̄ньщи ла̄тӈыг С. Ромбандееван толмащлавес.

1098 2015.04.24. Александр ВЬЮТКИН

Та̄к сымыӈ ма̄ньщи пыг. Хурит та̄ксарыг о̄лнэ ма̄ньщи хум Руслан Проводников по̄слым о̄лы. Щахныл алхатым каснэ ма̄т ма̄ янытыл тав ёмщаквег ва̄ве. Мощ мо̄лалнув яныгпо̄ль э̄тпост нёлоловхуйплов хо̄талт Руслан США хо̄н ма̄т Нью-Йорк ӯс по̄хат Верона ӯст ва̄т нупыл нё̄лоловит касылэ о̄лыс. Ма̄н каснэ хумиюв ёт Лукас Матиссе алхатас. Хурит та̄ксарыг о̄лнэ ма̄ньщи хум Руслан Проводников по̄слым о̄лы. Щахныл алхатым каснэ ма̄т ма̄ янытыл тав ёмщаквег ва̄ве. Мощ мо̄лалнув яныгпо̄ль э̄тпост нёлоловхуйплов хо̄талт Руслан США хо̄н ма̄т Нью-Йорк ӯс по̄хат Верона ӯст ва̄т нупыл нё̄лоловит касылэ о̄лыс. Ма̄н каснэ хумиюв ёт Лукас Матиссе алхатас. Матиссе Аргентина нампа хо̄н ма̄ныл о̄лы. Тав Русланыл акв та̄лэ мощ яныгнуве. Матиссе налыман щёс касыс, са̄в щёс но̄хпатыглас. Тав ётэ алхатам ма̄хманэ мощщаквен саӈаланэ̄ныл мус ра̄тсанэ. Тав такви туп хӯрум щёс ра̄тыглавес. Ма̄н ма̄ньщи хумиюв ё̄ре мощнув ат ёхтыс. Касыл а̄стум юипа̄лт Руслан ла̄выс: «На̄н а̄нум агтсы̄н, ам ат ва̄глум, маныр щирыл тох е̄мтыс. А̄нумн сака са̄ль. Матиссе ёт ам титынтыг ринг тӣвырт алхатуӈкв таӈхе̄гум. Тав те ка̄сащи, вос ла̄ви».

1098 2015.04.24. Александр ВЬЮТКИН

Ня̄врамыт ӯргалан товлыӈ ӯй ӯлыглан хо̄тал. Яныгпо̄ль э̄тпост са̄тыт хо̄талэ̄т Ха̄льӯс районт о̄лнэ Сӯкыръя пе̄с ма̄ньщи па̄вылт Ӯринэ̄ква хо̄тал янытлавес. Ӯринэ̄ква ӯлыглан хо̄тал ма̄нь концертыл о̄вылтавес. Мир нупыл сценаныл тит ма̄ньщи нэ̄г Галина Ларионова ос Вера Комкова потыртасы̄г. Тэ̄н о̄влэ̄т пе̄с порат ты ялпыӈ хо̄тал хумус янытлавес, та урыл потыртасы̄г. Тувыл ня̄врамыт ёт щё̄питам концертаныл суссылтасыт. Тот та̄н ма̄ньщи йӣквыт йӣквсыт, э̄ргысыт ос стихыт ловиньтасыт. Та халт ма̄ньщи са̄ӈквылтап та̄н суе аквписыг суйтыс. Пе̄с пора ма̄хманув Ӯринэ̄ква нэ̄ хо̄тпат ос ня̄врамыт ӯргалан товлыӈ уйиг ловиньтасаныл. «Тӯяг ёхтынэм порат са̄в а̄пат вос нёвитавет, та̄л сыс самын патум а̄гитпыгыт пуста̄гыл вос яныгме̄гыт», – ты ма̄гыс Ӯринэ̄ква ка̄сыӈ тӯяг соссаӈ ма̄хмытн ты ӯлыглаве. Та юипа̄лт та̄л сыс Саранпа̄вылт ос Сӯкыръят самын патум ма̄ньщи ня̄врамыт миркол кӯщайн Николай Никитич Артеевн ма̄нь мӯйлупсал майве̄сыт. Концерт суссылтан юипа̄лт мӯйлын мир ма̄гсыл са̄всыр касылыт ва̄рыглаве̄сыт. Ма̄хум нэ̄мхотьют по̄хат ат хультыс. Халанылт ё̄ранылт а̄рталан са̄в ка̄сащан ма̄хум о̄лыс. Ла̄гланыл, ка̄таныл по̄льнэ ма̄хум ма̄гсыл па̄выл клубт пасаныт щё̄пита̄лве̄сыт. Ма̄хум ань ла̄всыт, Ӯринэ̄ква хо̄тал а̄ртмыс. Таве Елена Савчук, Вера Комкова, Галина Ларионова ос Вячеслав Хатанзеев та̄н щё̄пита̄лсаныл. Ӯринэ̄ква хо̄тал кастыл олныӈ нё̄тмил ва̄рме ма̄гсыл ООО «Сосьва» кӯщаиг о̄лнэ хум Николай Геннадьевич Полуяновн соссаӈ ма̄хум пӯмащипа ла̄тыӈ ла̄ве̄гыт. Галина ЛАРИОНОВА те̄тум потре ма̄ньщи ла̄тӈыл Александр ВЬЮТКИН хансыстэ.

1098 2015.04.24. Светлана РОМБАНДЕЕВА

Кульпас па̄выл музей. Ха̄льӯс район Кульпас па̄вылныл пищма ёхтыс, Светлана Николаевна Немкова хансыстэ. Тот тав «Найотыр Маа» нампа этнографический паркмузейт кӯщаиг о̄лы. На̄н ань э̄лаль тав хансум потре ловиньтэлы̄н. – «Найотыр Маа» музей соссаӈ ма̄хманув ма̄гыс ва̄рвес. Тыт лӯима̄т о̄лнэ ма̄ньщиянув коланыл ос а̄мпараныл ӯнттым о̄лэ̄гыт, пормасаныл, маснутаныл, алыщлапаныл та маныр, пуссын мирн суссылтан ма̄гыс акванатве̄сыт. Музейт ма̄н ялпыӈ хо̄талыт ва̄рыгла̄лэ̄в, мӯй ма̄хум тыг са̄в ма̄ныл ёхталэ̄гыт, мощ ё̄мыгтэ̄гыт, пӯмщалахтэ̄гыт. Ка̄сыӈ та̄л яныгпо̄ль э̄тпост ма̄н Ӯринэ̄ква хо̄тал ва̄рыглэ̄в. Ты ялпыӈ хо̄талув ма̄н, музейт рӯпитан ма̄хум, тувыл библиотекат ос школат рӯпитан ма̄хум, яныгхо̄тпанув ос ня̄врамыт пуссын аквъёт щё̄питылӯв, «Найотыр Маа» музейт мӯйлэ̄в. Ты та̄л нёлса̄т арыгтем хо̄тпа ёхталас, Ӯринэ̄ква янытласлӯв. Са̄снёлыт ва̄рсӯв, йӣквсӯв, э̄ргысӯв. Ня̄врамыт ма̄гыс пе̄с йис ма̄ньщи ёнгилыт ва̄рыгласӯв, мощ ощхульласӯв. Э̄ргынйӣквнэ ма̄хум концерт суссылтасыт. «Рахтынья» община кӯщаин А. И. Голошубинын яныг пӯмащипа ла̄тыӈ ла̄вуӈкве таӈхе̄гум. Ты ялпыӈ хо̄тал о̄лме кастыл тав са̄в нё̄тмил ва̄рыс. Тамле хо̄талыт ва̄рыглаӈкве атхунь э̄ри, мирн сакати ща̄гтальпиӈ. Са̄в хо̄тпа акванёхталасӯв, маттем та потрамсӯв, мовиньтасӯв, ща̄й айсӯв, ӯнлахо̄лсӯв. Пе̄с порат Ӯринэ̄ква янытлан хо̄тал хумус ва̄рыглавес, яныгхо̄тпанув ты урыл потыртасыт. С. Н. Немкова потре ма̄ньщи ла̄тӈыг С. матвееван толмащлавес.

1098 2015.04.24. Николай МЕРОВ

Сургут ӯст Ӯринэ̄ква хо̄тал минас. Яныгпо̄ль э̄тпос 11 хо̄талэ̄т Сургут ӯст Ӯринэ̄ква хо̄тал о̄лыс. «Пе̄с Сургут» ӯсквет соссаӈ ма̄хум отделт рӯпитан хо̄тпат, та̄н ты ва̄рмаль щё̄пита̄лсаныл. Тот кӯщаиг Марина Самсонова рӯпиты. Ты ялпыӈ хо̄тал кастыл ам о̄с тув ялсум. Кӯщай нэ̄ а̄нумн Ӯринэ̄ква хо̄тал урыл мощ потыртас. Ос ам амки ты пӯмащ ва̄рмаль сунсыслум. Хумус тот ты ялпыӈ хо̄тал минас, маныр пӯмащ о̄лыс, на̄н ты урыл э̄лаль ловиньтэ̄н. Ты та̄л Сургут ӯст о̄лнэ соссаӈ ма̄хум Ӯринэ̄ква хо̄тал хо̄тхуйпловит щёс мӯйлыгласаныл. Щар о̄выл щёс ты ялпыӈ хо̄тал 2000 та̄лт ва̄рыглавес. Та па̄сныл ка̄сыӈ та̄л ты ва̄рмаль щё̄пита̄лаве. Тот «Лӯима̄ ханса» нампа э̄ргын ос йӣквнэ ня̄врамыт кол о̄лы. Школат ханищтахтын ма̄ньщит Мария Шамсутдинова, Татьяна Тихонова ос акв пыг Артём Полищук, хантыт – Татьяна Юмина, Саша Тюмкина ос Вика Молданова тув ялантэ̄гыт. Акв марий а̄ги Полина Фролова та̄н ётаныл йӣкви. Пуссын аквъёт са̄т ня̄врам. Тувыл ос «А̄с нэ̄» нампа ёнгын кол о̄лы. Тот соссаӈ ма̄хум тэ̄ла щирыл рӯпитан э̄кват та̄нки э̄рге̄гыт ос йӣкве̄гыт. «Пе̄с Сургут» ӯсквет соссаӈ отделт са̄т хо̄тпа рӯпиты. Та̄н та̄л сыс са̄всыр мӯйлын ва̄рмаль щё̄пита̄лэ̄гыт. Ты э̄тпос ӯлыглан хо̄тал, Ӯринэ̄ква хо̄тал, ма̄ньха̄пыл каснэ ва̄рмаль, финноугор мирыт хо̄таланыл ос мо̄т са̄всыр ялпыӈ хо̄талыт ва̄рыглэ̄гыт. Ань ты порат Ӯринэ̄ква хо̄тал мӯйлуӈкве са̄в мир ёхталас. Ос та̄л сыс самын патум ня̄врамыт ат янытлаве̄сыт. Мо̄лты та̄л ты рӯпата ва̄рнэ нэ̄ по̄хан вуйвес. Са̄ртын тав ЗАГС па̄лыл ты хо̄тпат хо̄нтыгласанэ. Тот ня̄врамыӈ нэ̄т урыл по̄х хо̄тпан ат потыртаве. Сургут ӯст ниласа̄ткем со̄тыра э̄лумхо̄лас о̄лы. Та̄н халанылт акв со̄тыра китса̄т соссаӈ хо̄тпа. Ӯс сака яныг, хотьют ня̄врам самын паттыс, ты урыл потыр виӈкве воссыг нэ̄мхо̄т. Ӯринэ̄ква хо̄тал манрыг йис пораныл соссаӈ ма̄хумн мӯйлаве, ты урыл пе̄с потыр о̄лы. Ты товлыӈ ӯй тӯяг щар са̄ртын лӯима̄н ёхты. Тав ла̄глаге, ка̄таге сака по̄ляве̄г. Исылтахтын ма̄гыс тав ре̄гыӈ ма̄ кинсы. Соссаӈ ма̄хманув пе̄с порат ма̄нь ня̄врам а̄па паттан йӣв са̄п пинтла̄лсыт. Са̄п ка̄миньта ос ре̄г тоты. Ӯринэ̄кват хо̄т тамле са̄п а̄ня хо̄нтэ̄гыт, та тармыл ӯнтэ̄гыт, хо̄тал ляльт исылтахтэ̄гыт. Таквсы порат а̄лы ма̄н миннэ̄ныл порат та̄н по̄йкще̄гыт, са̄внув ня̄врам самын вос патыс, ты хосыт са̄в са̄п кон хуюӈкве паты, таве̄н тӯяг ка̄тла̄гыл толтыглан ма̄гыс сака ёмас. Тамле ты пӯмащ потыр пе̄с «Сургут ӯсквет» рӯпитан кӯщай нэ̄ Марина Самсонова потыртас. Тав ла̄выс, са̄ртын Ӯринэ̄ква урыл э̄рыг Александр Сайнахов, тот ма̄щтырыг рӯпитан ма̄ньщи хум, ка̄сыӈ та̄л э̄ргыгла̄лыс. Ань ты порат а̄гмыӈыг е̄мталас, ат щё̄питастэ. Ты э̄рыг Татьяна Романовна Садомина тав о̄лме̄т э̄ргыгластэ. Таве Валентина Селивёрстовна Садомина, улпыл, хотты порат ёлхансыгластэ. Та э̄рыг ма̄к ты ялпыӈ хо̄тал урыл о̄лы. Ань о̄лум Ӯринэ̄ква хо̄талн са̄в хо̄тпат ос ня̄врамыт ёхталасыт. Соссаӈ ма̄хманув йӣквсыт, э̄ргысыт, ёнгысыт ос о̄щхулиӈ тӯлыглапыт суссылтасыт. Ня̄врамыт та̄нки халанылт кассыт, сун ӯлтта поргысыт, а̄мщит амщисыт. Ла̄глыл акв ляльт во̄ртхатым йӣв хартсыт, но̄хпатум хо̄тпат пуссын мӯйлупсал майве̄сыт. Ня̄врамытн тот мӯйлуӈкве сака мӯстыс.

1098 2015.04.24. Николай МЕРОВ

Рӯт ма̄хманув ёт хо̄нтхатыгласӯв. Яныгпо̄ль э̄тпос о̄выл хо̄талытт Ханты-Мансийск ӯст пальта̄л хо̄тпат каснэ ва̄рмаляныл минас. То̄нт мо̄т хо̄н ма̄ныл са̄в мир тыг касуӈкве ёхталас. Та̄н халанылт венгр ма̄хум о̄лсыт, ты ма̄к ма̄н финноугор рӯтанув. То̄ва ла̄тӈанув щар аквхурипат. Тыт о̄лманыл сыс та̄н ма̄ньщит ос хантыт ёт ва̄йхатаӈкве тахмаясыт. Тыи ма̄гыс Александр Новьюхов, «Югра лылые̄п» ассоциация кӯщай, соссаӈ ма̄хум акванатыгласанэ. Венгр ма̄хманув Будапешт ӯсныл тыг ёхталасыт. Та̄н ётаныл каснэ мир халт кӯщай хум Петар ла̄выс: «Ма̄н кит команда о̄ньще̄в. Ань ты пора нэ̄ хо̄тпат ёмаснуве̄г кассыт. О̄выл места виӈкве ат ве̄рмысӯв кос, ос ты а̄ти, ма̄навн тыт касуӈкве сака мӯстыс. Ӯсын татем нё̄тнэ, сыманувн сака хо̄яс. Тыт сака сымыӈ хо̄тпат о̄лэ̄гыт. Ма̄н ань ва̄глӯв, ма̄ньщит ос хантыт ма̄н рӯтанӯв. Таима̄гыс та̄н ётаныл ва̄щинтахтуӈкве сака тахсӯв. Хунь ла̄ввесӯв, акванхо̄нтхатэ̄в, хотща̄гтсӯв. Сакати рӯтанув ка̄салаӈкве ёхталасӯв». Александр Новьюхов соссаӈ ма̄хманув о̄лупса урыл та̄нанылн мощ потыртас. Ща̄й аквъёт айсӯв, аквъёт по̄слахтасӯв. Ань мо̄тыт щёс тыг ёхтэ̄гыт ке, о̄с ва̄щинтахтуӈкве потыртахтасӯв.

1098 2015.04.24. Людмила ТЕТКИНА

Ханты э̄ква суссылтап щё̄питас. «Торум Маа» нампа музейт йильпи суссылтап ва̄рвес. Ты выставка Зоя Никифоровна Лозямова тав щё̄питастэ. Тав такви рӯт ма̄хманэ наманыл пуссын акв нэ̄пакн хассанэ. Хансум нэ̄паке ос такви ю̄нтум пормасанэ ань тот суссылтасанэ. Суссылтап «История семьи в истории страны. След прожитой жизни» намаим о̄лы. Ты э̄лыпа̄лт о̄с акв тамле суссылтапыт Светлана Селивёрстовна Динисламова, Евдокия Андреевна Нёмысова ос мо̄т ма̄ньщи, ханты ще̄мьят та̄нки рӯтаныл урыл ва̄рыгласыт. Зоя Никифоровна 1992 та̄л порат рӯт ма̄хманэ урыл нэ̄пак хансуӈкве о̄вылтахтас. Тав ла̄выс: «Ты рӯпатам ва̄руӈкве хунь патыслум, ане̄квам, щаще̄квам, о̄пам иӈ о̄лсыт. Та̄н а̄нумн са̄в потыр потырта̄лсыт. Ма̄нки халувт са̄в потыртасӯв, мӯсхалыг китыглахтасум. Ты нэ̄пакн яныгса̄т арыгкем рӯтанум наманыл хассанум». Ханты э̄ква Белоярский районт самын патыс. Ще̄мьянылт тав акв ня̄врамыг о̄лыс, ща̄няна̄щин, ане̄кван, щаще̄кван ос мо̄т рӯт ма̄хманылн сака э̄руптавес. Тав ка̄ркам ня̄врамыг яныгмас, а̄тятэ ёт хӯл алыщлаӈкве ос во̄раяӈкве ялантас. Оматэ̄н ма̄ньта̄гыл колсори рӯпата ва̄руӈкве нё̄тыс ос ма̄щтырыг ю̄нсхатуӈкве ханищтахтас. Тав ат та̄л янытыг о̄лме̄т ю̄нтуп тӯщтын ут ю̄нтыс. Зоя Никифоровна ань ла̄выс, ща̄няге̄на̄щаге̄н тав са̄грапыл са̄груӈкве ос ю̄нтуп пувуӈкве ёмащакв ханищтавес. Ань то̄ва рӯтанэ Белоярский районт о̄лэ̄гыт, то̄ват Сургутский районын ва̄нтласыт. Такви тав хосат та̄гыл Ханты-Мансийск ӯст о̄лы, са̄в та̄л «Торум Маа» нампа музейт рӯпиты. Са̄всыр ялпыӈ хо̄талыт о̄лыгланэ̄ныл порат мӯй ма̄хум ма̄гсыл атыӈ ня̄нь ва̄ри ос хӯл исмит ман мо̄т тэ̄нут па̄йты. Ты рӯпата ос ка̄ркамыг ва̄ритэ, мӯй ма̄хум тав ва̄рум ня̄не ос па̄йтым хӯл исмитэ тэ̄ӈкве сака э̄руптэ̄гыт. Та суссылтап пӯснэ хо̄талт Зоя Никифоровна намхо̄талэ о̄лыс, тав 70 та̄лэ то̄влыс. Ханты э̄ква янытлаӈкве ос тав щё̄питам суссылтапе сунсыглаӈкве са̄в рӯтанэ ос мӯй ма̄хум тув ёхталасыт. Округувт пе̄риян ва̄рмаль щирыл рӯпитан яныг кӯщай хум Андрей Павкин Зоя Никифоровна о̄с янытластэ. Тав ла̄выс, ты ханты э̄ква ёт тав са̄в та̄л сыс ва̄йхаты. Пе̄риян ва̄рмаль о̄лнэ порат Зоя Никифоровна та̄нанылн акваг нё̄ты. Тыи ма̄гсыл таве̄н та̄н яныг пӯмащипа ла̄тыӈ ла̄ве̄гыт. Ты юипа̄лт э̄ква са̄в мӯй ма̄хумн янытлавес ос са̄в ёмас ла̄тӈыл ла̄ввес.

1099 2015.05.08. Александр ВЬЮТКИН

Хо̄нтлам ма̄хум ме̄талил мивет. Яныг хо̄нт оигпам па̄сныл са̄тлов та̄лэ то̄влын кастыл та порат хо̄нтлам ма̄хум округ кӯщаювн Наталья Комарова ма̄гылн тагатан по̄сыл мивет. Акв тамле ме̄талил Борис Проводников майвес. Ты ма̄гсыл губернаторув яныгпа̄ла о̄йка палт юв ялыс. Мощ мо̄лалнув Борис Андреевич 91 та̄лэ то̄влыс. Нёлоловхуйплов та̄лэ то̄влум юипа̄лт 1942 та̄лт лусытаӈкв вуйвес. Хо̄нтлам ва̄рмальн хо̄т э̄тпос ханищтавес, та юипа̄лт э̄лаль хо̄нтлуӈкв те̄твес. Борис Проводников хо̄нтламе сыс са̄в яныг хо̄нт о̄лум ма̄т хо̄нтлуӈкв а̄лымас. Ты ма̄гсыл тав ма̄гылн тагатан «Отечественной войны I степени», тувыл «За отвагу», «За победу на Германией» ос «За трудовую доблесть» нампа по̄сыл мӯйлуптавес. О̄йка Сургут ӯст самын патыс. Тот тав яныгмас, тувыл армиян вуйвес. Хо̄нтлын ма̄ныл юв ёхтуме юипа̄лт «К победе коммунизма» нампа газета нэ̄пакт (ань «Сургутская трибуна» газетаг ла̄ваве) олн ловиньтан хумыг рӯпитас. 1988 та̄лт пенсиян патме юипа̄лт ӯс янытыл мо̄тмо̄т ма̄т хо̄нтлын ва̄рмаль урыл потыртаӈкв акваг во̄виньта̄лвес. Борис Андреевич Проводников Сургут ӯсныл хо̄нтлам ма̄н ялум ос акв тув ювле ёхтум ма̄хум халт щар юио̄выл хо̄тпаг хультыс. Губернатор прессслужбат рӯпитан ма̄хум те̄тум ля̄ххаланыл ма̄ньщи ла̄тӈыл Александр ВЬЮТКИН хансыстэ.

1099 2015.05.08. Александр ВЬЮТКИН

Товлыӈ ӯй янытлан хо̄тал та минас. Ханты-Мансийск ӯст яныгпо̄ль э̄тпос титыт ӯщлахтам хо̄талт «Югорская Долина» нампа ма̄т «То̄рум Маа» музейт рӯпитан ма̄хум Ӯринэ̄ква хо̄тал нампа окружной ялпыӈ хо̄тал ва̄рыгласыт. Янытлан хо̄талувт то̄рмувн ёмас, ма̄лтып, сыстам хо̄талыл ва̄рвесӯв. Ӯринэ̄ква хо̄тал титхуйплов щё̄ст янытлаӈкв о̄вылтавес. Мӯй ма̄хум ма̄гсыл сценат «Хо̄тал» нампа А̄с-угорский театр ма̄хум щё̄питам пӯмщаныл суссылтасаныл. Тувыл «Лылыӈ со̄юм» колт ханищтахтын пыгрищит ма̄ньщи йӣкв йӣквсыт. Та коныпал иӈ са̄в мо̄т коллектив йӣквсыт ос э̄ргысыт. Та юипа̄лт Ханты-Мансийск ӯст та̄л сыс самын патум ма̄ньщи ос ханты ня̄врамыт губернатор ва̄ӈын кӯщай хум Геннадий Фёдорович Бухтин ма̄нь мӯйлупсал мӯйлуптасанэ. Ка̄сыӈ йильпи ёхтын та̄лт Ӯринэ̄ква хо̄тал янытлан мир акваг та са̄вми. Са̄в хо̄тпат ще̄мьяӈ та̄гыл нас пӯмщалахтуӈкв тув ёхталасыт. Ёхталан мӯй ма̄хум ма̄гыс нила ё̄рнкол тӯщтым о̄лыс. Ма̄нь ня̄врамыт ма̄гыс ос са̄всыр ёнгил ва̄рыглавес, рущ ла̄тӈыл «Играем сами и с гостями» намтым о̄лыс. Пе̄с ма̄хум ла̄выгласыт: «Ӯринэ̄ква ёхтыс, ма̄ та са̄йкалас». Тав ма̄нь ня̄врамыт ӯргалан ӯиг ловиньтаве. Ты ма̄гыс Ӯринэ̄ква ка̄сыӈ тӯя аквты порат соссаӈ ма̄хмытн ты ӯлыглаве. Та хо̄тал иӈ са̄в пӯмащ о̄лыс. Йис та̄гыл янытлан Ӯринэ̄ква хо̄тал 2012 та̄лт са̄ккон щирыл окружной нампа ялпыӈ хо̄талыг ты ва̄рвес. Ты хо̄тал яныгпо̄ль э̄тпос аквхуйплов хо̄талт янытлаве.

1099 2015.05.08. Николай МЕРОВ

Кӯщай нэ̄ хо̄нтлам ма̄хум янытласанэ. Округ кӯщай Наталья Комарова ветераныт ос хо̄нтлам нак о̄лум порат рӯпитам хо̄тпат ёт хо̄нтхатыглас. Тав Ханты-Мансийский район Шапша па̄вылт яныгпа̄ла хо̄тпат ос а̄гмыӈмосыӈ хо̄тпат о̄лнэ интернатколн ялыс. Тот пуссын аквъёт 51 яныгпа̄ла хо̄тпа о̄лы. Та̄н халанылт хӯрумхуйплов хо̄тпа – ты ветераныт. Ань хо̄нтлын нак оигпам па̄сныл 70 та̄лэ то̄влыс. Ты кастыл Наталья Владимировна та̄наныл янытласанэ ос мӯйлупсал мисанэ. Югра ма̄т о̄лнэ яныг хо̄нт порат хо̄нтлум ма̄хум но̄хпатнэ̄ныл ма̄гыс, пуссын ма̄гылн тагатан юбилейный по̄сыл майве̄сыт. Тувыл пуссын ветераныт олныл нё̄тве̄сыт. То̄ва хо̄тпат о̄лнэ коланыл ёмщакв хотщё̄питан ма̄гыс сертификатнэ̄пакыл ос мо̄т са̄всыр мӯйлупсал ма̄хум мисанэ. Яныгпа̄ла хо̄тпат ма̄гыс интернаткол 2011 та̄лт ва̄т са̄грапнал э̄тпост ӯнттувес. Ма̄тэ тот нё̄тнэ, лылые̄п сыстам, ляпат во̄р яныгми. Ма̄тум хо̄тпат тот ща̄гтым о̄лантэ̄гыт, ёмащакв о̄ньщавет. Округ кӯщай прессслужбатэ ке̄тум ла̄тыӈ ма̄ньщи ла̄тӈыг Николай МЕРОВ хансыстэ.

1099 2015.05.08. Николай МЕРОВ

Округувт та̄рвитыӈ а̄гмыт пусмалтаӈкве патавет. Яныгпо̄ль э̄тпос 23 хо̄талэ̄т Ханты-Мансийск ӯст ля̄ххал тотнэ колн округ пӯльница кӯщай хум Алексей Альбертович Добровольский во̄виньта̄лвес. Манырсыр а̄гмыт тот пусмалтаӈкве патавет, та урыл на̄н тав потре э̄лаль ловиньтэлы̄н. Яныг ле̄ккар о̄йка ла̄выс, мир пусмалтан ва̄рмаль ма̄гыс ань лицензиянэ̄пак щё̄питаве. Мо̄лалнув округ пӯльницат рӯпитан лов арыгтем ле̄ккар хо̄тпа Москва ӯсн «Шумаков академик» намыл пиным научноисследовательский институтн ханищтахтуӈкве ялсыт. Ты хирургыт, анестезиологыт, сосудистый хирургыт, лабораторный рӯпата ва̄рнэ ле̄ккарыт ос мо̄таныт тот ханищтахтасыт. Ты хосыт ань са̄ӈква̄хвтас, ма̄йт ос сым та̄рвитыӈ а̄гмыт о̄щнэ ма̄хум округ пӯльницавт пусмалтаӈкве патавет. Ты а̄гм о̄щнэ ма̄хум пусыг о̄лнэ са̄ӈква̄хвтасыл, ма̄йтыл манос сымыл тыт ӯнттуӈкве о̄вылтавет. Югра ма̄т ниласа̄ткем хо̄тпа са̄ӈква̄хвтас а̄гм о̄ньще̄гыт. Тыгыл мощщанув хо̄тпа ма̄йт ос сым а̄гмыл а̄гмыӈыг о̄лэ̄гыт. Таима̄гыс кӯщай хум ла̄выс, о̄влэ̄т са̄ӈква̄хвтас ӯнттын операция ва̄руӈкве о̄вылтаве. Са̄ртын тамле операция туп Москва ӯст ва̄рвес. Ты а̄гм пусмалтан ма̄гыс акв ке̄лпыл о̄лнэ рӯт хо̄тпат кинсавет. Тув ща̄ньа̄щит, увщит, каӈкыт манос мо̄т ляпа рӯтыт ро̄ве̄гыт. Ань округувт лов та̄л сыс ты а̄гмыл о̄лум 60 процент са̄вит хо̄тпат Москва ӯст операциял ва̄рве̄сыт. Ань та̄н пуссын тыт уральтавет, э̄лы ма̄н минуӈкве ат э̄ри. Мощ мо̄лалнув пӯльницат конференция щё̄пита̄лвес. То̄нт ты операция ханищтан научноисследовательский институтныл тыг ле̄ккар хо̄тпат ёхталасыт. Та̄н о̄выл операция аквъёт ва̄руӈкве потыртахтасыт. Тувыл о̄с акв ва̄рмаль урыл потыр о̄лыс. Округ пӯльницавт ле̄ккарыт ат то̄вылхатэ̄гыт. Ань тыт перинатальный центр тах пӯнсаве. Са̄выӈпа̄лэ ма̄нь ня̄врам пусмалтан ле̄ккар сака мощща. Тыима̄гыс ма̄хум осэва̄та̄л очередин хансым ӯрхатэ̄гыт. Тамле ле̄ккарыт Ханты-Мансийск ӯс медицинский академият ат ханищтавет. Та̄н пуссын э̄лыл рӯпитаӈкве тыг ёхтысыт. Моще̄ртын, э̄рыӈ, ты ле̄ккарыт о̄с тыт ханищтаӈкве тах патавет. Та сыс, ань округ пӯльницат рӯпитан атса̄т ле̄ккар хо̄тпаныл, яныгса̄т хо̄тпа тыт о̄лнэ медицинский академия а̄стласыт. Ос а̄гмыӈ хо̄тпат ла̄внэ̄ныл, то̄ва ма̄ньлат ле̄ккарыт мир пусмалтанэ̄ныл порат ханищтахтын нэ̄пакын а̄ӈквата̄лэ̄гыт, со̄ль, ты а̄гм пусмалтэ̄гыт манос а̄ти, тот ловиньтэ̄гыт. Ма̄хум тамле ле̄ккарыт палт пусмалтахтуӈкве ат таӈхе̄гыт. Алексей Альбертович ювле тох ла̄выс: «Ле̄ккар хо̄тпа ханищтахтын нэ̄пакн сунсы ке, тыи ёмас. Тав такви номтэ акваг са̄вмалтытэ. Лю̄ль ва̄рмаль то̄нт е̄мты, хунь ле̄ккар нэ̄матыр ат ва̄г, сэ̄р ма̄т пусмалты».

1099 2015.05.08. Александр ВЬЮТКИН

Ӯргалахтым о̄лэ̄н. Мощ мо̄лалнув Ханты-Мансийск ӯст ма̄нтина̄нув, о̄лнэ коланув ос о̄щнэ пормасанув ӯргалан урыл потыр о̄лыс. Рущ ла̄тӈыл «Страхование ОСАГО» тох ла̄ваве. Ты кастыл ма̄н ётув ГСК «Югория» кол тармыл кӯщаиг о̄лнэ хум Алексей Анатольевич Охлопков потыртаӈкв ёхталас. Алексей Охлопков ла̄выс: «Ань ты та̄л яныгпо̄ль э̄тпос о̄вылтахтам хо̄талт сакватахтам хо̄тпат ма̄гсыл йильпи са̄кконыт пирмайтаве̄сыт. Ань «ОСАГО страховка» ма̄гсыл олн ойтнэ тынэ но̄хлаплувес. Сакватахтам хо̄тпа пусмалтахтынэ̄тэ кастыл пе̄с щирыл 160 со̄тыра солко̄ви ойтвес. Йильпи щирыл та̄н 500 со̄тырал ойтуӈкв патавет. Ка̄сыӈ сакватахтам хо̄тпа са̄всыр са̄вит олныл миве. Тувыл машинал яласан ма̄хум ма̄гсыл о̄с ёмас йильпи тэ̄ла о̄лы. Ань машинат страховканыл тынэ 5 со̄тыра 600 солко̄вииг о̄лы. Ос та̄л сыс ма̄хум мо̄т машинат ёт лё̄ӈхыт акван ат те ле̄ӈктхатэ̄гыт, машинал яласан страховка тынэ тынта̄лнувег ва̄раве».

1099 2015.05.08. Светлана РОМБАНДЕЕВА

Но̄хпатум хо̄тал урыл выставка ва̄рвес. Яныгпо̄ль э̄тпос 17 хо̄талэ̄т Ханты-Мансийск ӯст о̄лнэ Ма̄вит ос Э̄лумхо̄лас музейт акв пӯмыщ выставка рӯпитаӈкве о̄вылтахтас, тох намаим о̄лы: «Капитуляция Германии. Май 1945». Ты выставкат са̄всыр хурит ос э̄рнэ нэ̄пакыт суссылтавет. 1945 та̄лт я̄ӈк на̄тнэ э̄тпос 8 хо̄талэ̄т ма̄н ма̄в (то̄нт Советский Союзыг ла̄ввес) ос Германия ма̄ халэ̄нт хо̄нтлум наке̄н та оигпас. Ты урыл та порат ма̄к э̄рнэ нэ̄пак хасвес, ла̄ваве «Капитуляция Германии». Ты хащта̄л ла̄тыӈ тох толмащлаве: ань хо̄нтлын нак вос оигпи, ма̄хум хо̄нтлын ма̄ныл вос по̄йтэ̄гыт, но̄хпатум мир э̄лыпа̄лт пуӈканыл ёл вос та̄ртыяныл, вос ла̄ве̄гыт: «Ята, со̄ль, на̄н но̄х та патсы̄н! ». Хуритыт Германият кӯщаиг о̄лум немец хо̄тпат ос ма̄н ма̄вныл ёхталам маршал о̄йка Георгий Константинович Жуков по̄слым о̄лэ̄гыт. Тамле ма̄к э̄рнэ нэ̄пак палт та̄н ты хасхатасыт. Тувыл э̄лаль ма̄ янытыл о̄лнэ мирн тамле ёмас ля̄ххал та ла̄ввес, ань ты пилыщмаӈ нак та оигпас. Хунь ты нэ̄пак хасвес, ма̄н ма̄вт 9 хо̄талыг е̄мтыс, ос Германият иӈ 8 хо̄тал о̄лыс, ань ка̄сыӈ ма̄ такви щё̄сыл о̄лы. Таима̄гыс Германият ма̄хум ты хо̄тал 8 щислат янытлыяныл, ма̄н ма̄вт ма̄хманув ос 9 щислат мӯйлэ̄гыт. Ты нэ̄пак ань Германо-Российский музейт о̄лы. Хӯрум ла̄тӈытыл хансыма – рущ, немецкий ос английский. Хурит ты музей кол о̄с по̄слым о̄лы. Москва, Лондон ос Нью-Йорк ӯсытыт ос Франция ма̄т ма̄хум хунь ты ля̄ххал хӯлсаныл, хумус мӯйлысыт, ща̄гтсыт, тот пуссын по̄слыма. Ма̄н ма̄вныл хо̄нтлум ма̄н ялум ма̄хум урыл тот потрыт о̄с хансым о̄лэ̄гыт. Акв ма̄ньщи хум хуритэ тув ва̄рвес, наме Трофим Ефимович Исыпов. Округт о̄лнэ я̄тил ма̄хум, ты выставка сунсуӈкве ялэ̄н. Тав лӯпта э̄тпос 28 хо̄талэ мус рӯпитаӈкве паты.

1099 2015.05.08. Тамара МЕРОВА

Ня̄врамыт пӯмыщ суссылтап ва̄рсыт. Округ янытыл о̄лнэ савалап а̄гирищитпыгрищит ос ща̄нитна̄щитн ат янмалтан ня̄врамыт Победа хо̄тал кастыл ка̄тыл са̄всыр пормасыт ва̄рсыт. Ты ва̄рнутаныл та̄н Нижневартовск ӯст «Созвездие» нампа фестиваль о̄лум порат ма̄хумн суссылтасаныл. Ня̄врамыт э̄лумхо̄лас сыресыр хурит нэ̄пакныл яктысыт, то̄рныл ю̄нтсыт ос пластилиныл ва̄рсыт. Та̄н нупыланыл сунсым таи ла̄вуӈкве таххаты пормасыт пуссын ма̄щтырыг ос ёмас сымыӈ номтыл ва̄рим о̄лэ̄гыт. То̄ва рӯпатат аквкит щё̄с сыс ва̄руӈкве ат а̄лыме̄гын, таима̄гыс матахмат щё̄с акв ма̄т ӯнлуӈкве э̄ри. Тувыл вильтхурияныл ма̄кыг о̄с вос сусхатэ̄гыт, ты о̄вылтыт номсахтуӈкве о̄с э̄ри. Ань ты пормасыт ам по̄слысанум, на̄нки сунсыглэ̄н.

1099 2015.05.08. Тамара МЕРОВА

Та̄н ма̄в вуянтасаныл. Санкт-Петербург ӯс ань сака яныг нё̄тнэ ӯсыг олы. Ты ӯст па̄хвыӈ ӯсхулыянэ хосыт ань ё̄мыгтанэ̄в порат атпыл номсахтэв, война о̄лум порат тав ма̄гсылэ манах ма̄хум хо̄нтлысыт. То̄нт тав Ленинград намыл пиным о̄лыс. Фашистыт ӯс виӈкве сака воратасыт кос, ос ӯс кӣвырн нэ̄мхотьют ул вос щалтыс тав мувлахи ма̄н салтатанувн ӯргалавес, вуянтавес. Ӯст о̄лум ма̄хум 900 э̄тэхо̄талэ сыс тэ̄та̄л саваласыт. Ма̄н ма̄ньщи хум хо̄тпанув тув хо̄нтлуӈкве о̄с тотыглаве̄сыт. Тот са̄выӈпа̄лэ Ха̄льӯс ма̄ныл хум хо̄тпат порславе̄сыт ос тот хо̄т ёлщё̄питаве̄сыт. Мо̄лалнув «Книга памяти» нампа нэ̄пакыт нила хо̄тпа наманыл хо̄нтсанум, тан Ленинград ӯст ёлщё̄питымат, Ленинградский областьт налыман нупыл хо̄т хо̄тпа, ты коныпал Кингисепп ӯст кит ос Колпино ӯст нёлолов хо̄тпа. Туп мо̄рсыӈ хо̄тпат юв ёхтысыт. Ам о̄пам о̄с Ленинград ӯс по̄хат хо̄нтлас, тот сакватавес ос юв та те̄твес. Щаще̄квам хӯл исмитыл ос сыресыр лӯптаӈ ща̄ил таве айтым, тох пусмалтастэ. Ань та пилыщмаӈ пора номнэ ос ма̄хманув ка̄стын ма̄гыс Санкт-Петербург ӯст «Монумент героическим защитникам Ленинграда» яныг кан ӯнттым о̄лы. Тув ка̄сыӈ хо̄тал са̄в ма̄хум ёхталэ̄гыт. Тот нумипа̄лэ̄т са̄всыр памятникыт тӯщтым о̄лэ̄гыт ос кан ёлыпа̄лн щалтнэ ма̄ о̄лы. Тот 900 пилыщмаӈ хо̄талыт о̄вылтыт хурит, кинат ос сыресыр пормасыт суссылтавет. Войнат порслам ма̄ньщи ма̄хманув ка̄стын ма̄гыс ам ань тув о̄с ялсум.

1099 2015.05.08. Светлана РОМБАНДЕЕВА

Е̄ӈта пасан ва̄тат потыр о̄лыс. Ювле хультум э̄тпос 15 хо̄талэ̄т Ханты-Мансийск ӯст соссаӈ мир ла̄тӈаныл ос культура тэ̄ланыл ма̄гыс ва̄рим научнокоординационный совет заседаниятэ о̄лыс. Тот рӯпитан ма̄хум коныпал са̄в хо̄тпа культура ос образование па̄лыл ёхталас, е̄ӈта пасан ва̄тан ӯнтсасыт, ла̄тыӈ ос культура тэ̄лат урыл потыртасыт. Та̄н халанылт финноугорский мир Консультативный комитетт рӯпитан о̄йка В. С. Сондыков, «Ханты ясаӈ» ос «Лӯима̄ сэ̄рипос» газетаг редакцият кӯщаиг о̄лнэ нэ̄ Р. Г. Решетникова, культура Департамент кӯщай Н. М. Казначеева, Дума депутат о̄йка Е. Д. Айпин, «Лылыӈ со̄юм» нампа ня̄врамыт центр кӯщай Т. С. Вадичупова ос мо̄т са̄в ма̄ньщи ос ханты ма̄хум о̄лсыт. Округув янытыл то̄ва ӯсытыт ос районытыт о̄лнэ соссаӈ ма̄хманув та̄н ётаныл ищхӣпыӈ ут та̄ра потыртасыт, телевизор хосыт акв нупыл суссыт Ха̄льӯс па̄вылныл, Белоярский, Советский, Октябрьский ос мо̄т па̄влытт о̄лнэ хо̄тпат. О̄выл ла̄тыӈ округ кӯщай ва̄ӈын хум Г. Ф. Бухтин тав ла̄выс: «Ма̄н ань пуссын ва̄глув, ты йист соссаӈ ма̄хманув ла̄тӈаныл хотталь со̄ймуӈкве патсыт. Та̄н ань тох ат потыртэ̄гыт, хумус пе̄с порат ма̄хманыл потыртасыт. Ла̄тыӈ ва̄нэ яныгхо̄тпат ка̄сыӈ та̄л мощщамаӈкве патсыт, таима̄гыс ань ка̄сыӈ потыр, э̄рыг ман мо̄йт ёлхансуӈкве э̄ри. Молямлаӈкве э̄ри, нэ̄мхоты хо̄тпа ул вос хульты, пуссын хансуӈкве вос а̄лымавет». То̄ва хо̄тпат та̄нти рӯпатаныл урыл потыртасыт. А̄с-угорский институт кӯщай нэ̄ В. И. Сподина сака ёмас потыр щё̄питас. Тав ла̄вме щирыл, ань ма̄ньщи ос ханты ма̄хум мо̄йтаныл, пе̄с йис потраныл, э̄рганыл ёлхаснэ ма̄гыс, акванатнэ ос мӯсхал щирыл щё̄питан ма̄гыс, институтанылт ма̄хум сака яныг рӯпата ва̄ре̄гыт. Ма̄ньщи ос ханты мир халт мо̄йт ва̄нэ хо̄тпа кинсэ̄гыт, мо̄йтыт, потрыт ос э̄ргыт ёлхансыяныл. Тувыл са̄всыр ищхӣпыӈ утыт хосыт та̄наныл мӯсхал щирыл щё̄питыяныл, нэ̄пакыг ва̄рияныл. Ты кӯщай нэ̄ тох ла̄выс: «Ма̄н ань 500 арыгтем хо̄тпа мо̄йтаныл, потраныл ёлхассанув, 4 со̄тыра са̄виттем щё̄с ищхӣпыӈ утытн хансым о̄лы. Ты рӯпата ва̄рим институтувт 18 хо̄тпа рӯпиты. Ма̄хманув акваг ханищтахтэ̄гыт. Ювле хультум та̄лт Л. В. Кашлатова наука кандидат намыл майвес. Ты та̄л ос кит нэ̄г тамле намыл майвесы̄г – ма̄ньщи нэ̄ М. В. Кумаева ос ханты нэ̄ Г. Л. Нахрачева». Тувыл ос мо̄т хо̄тпат потыртасыт. Ты хо̄нтхатыглап оигпаме э̄лыпа̄лт ма̄хум пуссын нэ̄пакытыл майве̄сыт, тот та урыл хансым о̄лы, ань соссаӈ мир ла̄тӈаныл хотталь ул вос со̄йме̄гыт, э̄лаль хумус рӯпитаӈкве э̄ри.

1099 2015.05.08. Александр ВЬЮТКИН

Ва̄санув ты ёхтысыт. Округувт ӯйхул ӯргалан Департамент колт прессконференция о̄лыс. Алы ма̄ныл тыг ёхтын товлыӈ ӯит ка̄тынпаттын урыл ма̄н ётув потыртаӈкве тит кӯщаиг ёхталасы̄г. Акватэ наме Алексей Николаевич Залибеков, тав округ янытыл во̄руй ӯргалан кӯщаиг рӯпиты. Мо̄танэ наме Павел Викторович Сивков, тав ма̄вит ос во̄руй ӯргалан Депприродресурс нампа ма̄т ва̄ӈын кӯщаиг о̄лы. О̄влэ̄т тэ̄н а̄лы ма̄ныл тыг ёхтын товлыӈ ӯит па̄тлуптан хо̄талыт урыл мощ потыртасы̄г. Тит та̄лыг ты е̄мтыс, хунь тыт лов хо̄талын ва̄с па̄тлуптан ва̄рмаль ва̄рвес. Ты порат ос акв йильпи ва̄рмаль тэ̄лаг ва̄руӈкв номылматвес. Ань ва̄с ӯрнэ тэ̄ла районыт щирыл ат та̄ртаве. Ты та̄лныл ма̄в «северный широта» нампа щирыл ӯрттым, ва̄с ӯруӈкв тах та̄ртаве̄в. Лицензия нэ̄пак винэ̄в порат, та̄рапаттэ̄н, хо̄т ос хунь на̄нан во̄раяӈкв ро̄ви. Мо̄т щирыл олныӈ штрафыл хасылтаве̄н. Акв э̄т сыс хӯрум хум ва̄с, акв лунт па̄тамтаӈкв ро̄ви. Ты та̄л ва̄с ӯрнэ лицензия тынэ но̄хнув лаплувес. Ань то̄влыӈ ӯй па̄тамтан ма̄гсыл та̄ратан нэ̄пак тынэ 650 солко̄ви. Ка̄тынпаттум ка̄сыӈ ва̄с манос лунт лицензиянэ̄пакн та̄ра постуӈкв э̄ри. Ӯйхул ӯргалан ма̄хмытын хунь уральтаве̄н, нэ̄паканын та̄тыла те, штрафыл пинаве̄н. Ва̄с ма̄гсыл 900 солко̄ви, лунт ос 1500 солко̄вил. Ты порат мансын ос щёпыр ка̄тынпаттуӈкв ат ро̄ви. Павел Сивков тох ла̄выс: «Тыт лӯима̄т о̄лнэ ты тит товлыӈ ӯиг мощщаг ты е̄мтсы̄г. Тӯяг ты то̄влыӈ ӯиг па̄тамтан ма̄гсыл сака са̄в ощмар ва̄ӈкв ат э̄ри. Та̄н машинат яласан лё̄ӈх по̄хан а̄хвтас атнэ ма̄гсыл та̄нти исэ̄гыт. Тот ты та̄н сымта̄л о̄лнэ хо̄тпатн та па̄тлуптавет. Акв хо̄тпа таквинатэ̄н тэ̄нэ са̄вит товлыӈ ӯй вос па̄тамты. То̄ват ос маныр тот о̄лы, пуссын та па̄тамтыяныл. Тувыл ат ва̄ганыл, хоталь та̄наныл тотуӈкв. Тыи ты сака лю̄ль ва̄рмаль». Ма̄ньщи хо̄тпат, щир мус во̄рае̄н, я̄тил тыныӈ во̄рувн нэ̄матыр лю̄ль ул ва̄ре̄н.

1099 2015.05.08. Людмила ТЕТКИНА

Та̄н наманыл акв нэ̄пакн хансавет. А̄с-угорский институтыт Победа хо̄тал кастыл «Югорчане солдаты и труженики Великой Отечественной войны» суссылтап рӯпитаӈкве о̄вылтахтас. Та выставкат хо̄нтлам соссаӈ ма̄хум урыл потрыт, хурит, пищмат, нэ̄пакыт акванатым о̄лэ̄гыт. Институтыт рӯпитан ма̄хум ля̄па рӯтаныл хурияныл, ма̄глын тагатан по̄саныл, нэ̄паканыл тот о̄с суссылтыяныл. Тув ёхталам ма̄хум э̄лыпа̄лт А̄с-угорский институт кӯщай нэ̄ Виктория Сподина ла̄выс: «Ханты-Маснийск ӯскан по̄хат «Парк Победы» о̄лы. Тот тӯщтым а̄хвтас па̄ртыт тармыл ты ма̄ныл хо̄нтлаӈкве минам ос тот по̄рслым хо̄тпат наманыл хансым о̄лэ̄гыт. Соссаӈ ма̄хум халт то̄ва хо̄тпат наманыл о̄с хасве̄сыт, то̄ва хо̄тпат наманыл ат хасве̄сыт. Округувт «Электронная книга памяти» нампа ёмас тэ̄ла ва̄раве. Ань ка̄сыӈ э̄лумхо̄лас хо̄нтлам рӯтэ интернет щирыл тув хансуӈкве ве̄рмитэ. Хо̄нтлам ма̄хманув наманыл ва̄ӈкве ос номуӈкве э̄ре̄гыт. Тыи ма̄гыс ань тамле яныг тэ̄ла ва̄раве». Светлана Алексеевна Попова ос Светлана Селивёрстовна Динисламова тэ̄нки а̄тяге̄н хуриянэ̄н, удостоверениянэ̄паканэ̄н ос ма̄глын тагатан по̄санэ̄н ты выставкан тотсаге̄н. Светлана Алексеевна Попова такви а̄тятэ урыл тот потыртас. А̄тятэ Алексей Алексеевич Вокуев Ня̄хщамво̄ль па̄вылныл о̄лыс. Светлана Алексеевна тав уретыл ла̄выс: «А̄щум хо̄нтлам поратэ урыл сака ат потырта̄лас. Войнат сакватавес, тыи ма̄гсыл хоса ат о̄лыс. Тав 45 та̄лэ туп то̄влыс, хунь а̄тимыг е̄мтыс. То̄нт ам 16 та̄лум то̄влыс, ма̄нь а̄пщирищум туп кит та̄л яныт о̄лыс. Омав ма̄нав, са̄в ня̄врам, такке̄т янмалтасанэ. А̄щум 1944 та̄лт 18 та̄лэ то̄влыс, та̄ра хо̄нтлаӈкве та тотвес. Войнан хунь минмыгтас, оматэ со̄рни олнло̄мт ётмистэ. Ла̄выс, ты тыныӈ ке̄рло̄мт таве ӯргалаӈкве патытэ. Улпыл, ты ке̄ро̄лнэ ӯстуӈкве пилыс, Варшава ӯст акв ле̄ккар хумн со̄рнитэ ӯлщ пуӈкыг ва̄рвес. 1947 та̄лт юв со̄рни ӯлщ пуӈкыл ёхтыс. Потырта̄лыс, Будапешт ӯс таве̄н сака мӯстыс. Ань ам о̄с та ӯсн ялантаӈкве сака э̄руптэ̄гум. Тот хо̄нтлам ма̄хум ма̄гсыл памятник тӯщтым о̄лы. Тан ӯс хунь ёхталэ̄гум, хорамыӈ лӯпта тув яланта̄лэ̄гум ос а̄щум ка̄стылум». Та суссылтапт Светлана Селивёрстовна такви а̄тятэ о̄ньщум ма̄глын тагатан по̄санэ ос хуриянэ, нэ̄паканэ суссылтыянэ. Тав а̄тятэ хо̄нтлам поратэ урыл «Судьба» яныг поэма хансыс. Селивёрст Семёнович 1941 та̄лт хо̄нтлаӈкве минас, Берлин мус ялыс. Войнат пилта̄л хо̄нтлас, тыи ма̄гсыл ма̄гылн тагатан сака са̄в по̄с о̄ньщас.

1099 2015.05.08. Тамара МЕРОВА

Яныг пӯмащипа ла̄тыӈ ла̄ве̄гум. Яныгпо̄ль э̄тпост ма̄н редакциявн Калужский областьт о̄лнэ Жиздра ӯсныл пищма ёхтыс. Ма̄навн ёмас сымыӈ ла̄тыӈ Софья Ильинична Власенкова хансыс. Тав хансум потре ам на̄нан ма̄ньщи ла̄тӈыл толмащласлум. Паща о̄лэ̄н «Лӯима̄ сэ̄рипос» рӯпитан хо̄тпат. Ам о̄с ма̄ньщи э̄ква, Ха̄льӯс район Анъя па̄вылт 1953 та̄лт самын патсум. Ма̄ньта̄гыл омагума̄тягум ос па̄влыӈ ма̄хманум ёт акваг ща̄нь ла̄тӈыл потыртасум. Ма̄н хӯрмит классыт ущ рущ ла̄тӈыл ханищтаӈкве патвесӯв. Хо̄тыт классныл нёлоловит класс мус ам Сортыӈъя школат ханищтахтасум ос тот интернатт о̄лсум. Та юипа̄лт Ханты-Мансийскан минасум ос тот педучилище а̄стласум. Ма̄н тот Павел Александрович Вахрушевн ма̄ньщи ла̄тӈыл ханищтавесӯв, таве ёмщакв номилум. Тувыл ам А̄нъя па̄вылн ювле ёхтысум ос садикыт ма̄нь ня̄врамыт ёт рӯпитасум. Ётыл Тобольск ӯст кит та̄л о̄лсум. Тот о̄лмум сыс акв ма̄ньлат пыг ёт ва̄йхатасум ос 1976 та̄лт ме̄н аквъёт Калужский областин ва̄нтлысаме̄н. Ань тыг мус тот о̄лыме̄н. Тув ёхтумум па̄сыл ам ма̄ньщи ла̄тӈыл ат потыртасум, ща̄нь ла̄тыӈкем хотёрувлаӈкве ты патыслум. Ос налыман та̄л минам юипа̄лт ущта Ханты-Мансийск ӯсн ялсум. Ма̄н 2013 та̄лт сӯкыр э̄тпост педучилищат аквъёт ханищтахтам хо̄тпат ёт акван хо̄нтхатыгласӯв. Группав 93 номерыг пиным о̄лыс. Самын патум А̄нъя па̄вылн о̄с ялсум. Тот рӯтанум ёт ва̄щинтахтасум, ма̄ньлат ня̄враманыл, апганыл ёт ва̄йхатасум. Ма̄ньщи ла̄тӈыл потыртан э̄лумхо̄лас щар мощща хультум, о̄влэ̄т ам та̄наныл о̄с лю̄льсаӈ торгамтасанум. Тувыл матъёмас «Лӯима сэ̄рипос» газета ам ка̄ттагумн ликмыс. Тот потрыт ловиньтанэм сыс ща̄нь ла̄тӈыт номылматуӈкве патсанум. Газетат рӯпитан нэ̄ хо̄нтыслум ос та̄н редакция па̄лыл а̄нумн тыг Калужский областин газета ке̄туӈкве патсыт. Ам ань ля̄ххалыт, потрыт пуссын ловиньтыянум ос ёмщакв торгамтыянум. Ты о̄вылтахтам та̄лт газета ёхталаӈкве илттыг хотпо̄йтыс, ма̄ньпо̄ль э̄тпос мус нэ̄матыр ат ёхталас. Таима̄гыс ам хотрохтысум, номсэ̄гум, амки рӯтанум о̄вылтыт, округт о̄лнэ ма̄хманув урыл воссыг нэ̄матыр ва̄ӈкве ат патэ̄гум, ща̄нь ла̄тӈум о̄ста хотёрувлаӈкве патылум. Тувыл тахольт ма̄ньпо̄ль э̄тпос ва̄т нупыл хӯрмит хо̄талэ̄т ам яныг конвертыӈ пищмал тотве̄сум. Тув «Лӯима̄ сэ̄рипос» ат газетат пинымат, ам сымкем щар хотща̄гтыс. Тахольт а̄нум ат ёрувлыяныл, газета а̄нумн ке̄туӈке тах патэ̄гыт. Пӯмащипа! Пус ка̄т, пус ла̄гыл э̄лаль о̄лэ̄н! Э̄лаль рӯпитэ̄н, а̄нум ты газета ке̄тэ̄н! На̄нан янытлан ос яныг пӯмащипа ла̄тыӈ ке̄тнэ э̄ква Софья Ильинична Власенкова. Ты пищма ма̄ньщи ла̄тӈыг Тамара МЕРОВА толмащластэ.

1099 2015.05.08. Людмила ТЕТКИНА

Ня̄хщамво̄ль ма̄ньщи па̄выл. Пе̄с йис та̄гыл Ня̄хщамво̄льт ма̄ньщит о̄лэ̄гыт. Колхоз ва̄рим порат ляпат ӯнлым ма̄нь па̄вылквет о̄лнэ мир тув рӯпитаӈкве ва̄нтлуптаве̄сыт. Ма̄хум Ня̄хщамво̄льн миныглым па̄вланыл хультуптасаныл, о̄лум ма̄наныл йӣвыл лап та яныгмаве̄сыт. Ань Яныгпа̄вылт, Нёрахи па̄вылт ос Усть-Маньят туп китхӯрум хо̄тпа хультыс. Ня̄хщамво̄льт ань атса̄т арыгкем э̄лумхо̄лас о̄лы, та̄н халанылт са̄выӈпа̄лэ ма̄ньщи хо̄тпат. Ты па̄вылт Москва ӯс миркол яныг кӯщаиг рӯпитан хум Сергей Семёнович Собянин самын патыс. О̄выл классыт тот ханищтахтас. Тувыл ща̄нягеа̄щаге ёт Ха̄льӯсн о̄луӈкве минас. Ань тав мирн ва̄нэ хо̄тпаг ты е̄мтыс. Тав ётэ о̄выл классыт ханищтахтам то̄ва хо̄тпат Ня̄хщамво̄ль па̄вылт иӈ о̄лэ̄гыт. Ань Собяниныт тот о̄лэ̄гыт кос, тувыл ма̄хум ла̄ве̄гыт, халанылт та̄н рӯтыг ат ловиньтахтэ̄гыт. Ка̄тыл хурит по̄слам хум Владимир Игошев ты па̄выл ос намыӈсуиӈыг ва̄рыстэ. О̄лме порат ва̄тихал хурит по̄слуӈкве тув ялантас. Тот по̄слум хуриянэ Москва, Ханты-Мансийск ос мо̄т ӯсытт о̄лнэ музеитт мирн суссылтавет. Ня̄хщамво̄ль па̄влыӈ ма̄хум тамле мирн ва̄нэ хо̄тпал сака янытлахтэ̄гыт.

1099 2015.05.08. Николай МЕРОВ

А̄нъя па̄выл хо̄тпанув ка̄стыянӯв. Ань ты та̄л яныг хо̄нтлын нак оигпам па̄сныл 70 та̄лэ то̄влыс. Та войнат хо̄нтлум ма̄хум ка̄стыглан ма̄гыс, ма̄н та хо̄тпат урыл ка̄сыӈ газетат хансэ̄в. Мощ мо̄лалнув нэ̄глум газетат ам Ха̄льӯс район А̄нъя па̄выл ветераныт урыл хансыгласум. Ос хотьют та па̄вылныл хо̄нтлын ма̄н ялыс, хотьют юн рӯпитас, на̄н ань та̄н ураныл э̄лаль ловиньтэ̄н. Николай Петрович Ендырев Тав 1918 та̄лт Ха̄льӯс район А̄нъя па̄вылт самын патыс. Тав нёлоловхуйплов та̄лэ то̄влуме порат армиян вуйвес. Мощ лӯсытас ос хо̄нтлын нак е̄мтыс. 1942 та̄лт сӯкыр э̄тпос китыт хо̄талэ̄т тав хо̄нтлын ма̄н ке̄твес. Тав Ленинград ӯс по̄хыт стрелковый полкыт хо̄нтлыс. Тот пукитэ̄н писаль ня̄лн хо̄йвес. Пӯльницат пусмалтахтаме юипа̄лт э̄лаль хо̄нтлуӈкве ат ве̄рмыс. 1944 та̄лт ре̄тыӈ ю̄свой э̄тпос хӯрмит хо̄талт тав юв ке̄твес. Та̄н хӯрум каӈк Иван Петрович, Андрей Петрович ос Николай Петрович хо̄нтлын ма̄н ялсыт. Юв Николай Петрович такке̄т ёхтыс. Кит каӈкаге хотты э̄лы ма̄т порславесы̄г, ань ты мус ва̄нэ та̄л хультсы̄г. Николай Петрович хо̄нтлуме ма̄гыс ма̄гылн тагатан ты по̄сытыл майлувес: «Орден Красной Звезды», «За отвагу» I, II, III степени ос хо̄нтлын нак оигпам па̄сныл ва̄т та̄лэ то̄влын кастыл ма̄гылн тагатан по̄с. Э̄кватэ Екатерина Федоровна, о̄парищ наме Кирилова, лов ня̄врам янмалтым юн о̄лыс. О̄йка ос во̄раян, хӯл алыщлан ос во̄рт пил, лахыс атнэ хо̄тпат палт бригадирыг рӯпитас. Николай Петрович 1990 та̄лт а̄тимыг е̄мтыс. Ягрим па̄вылт ёлщё̄питавес. Тав пыге Иван Николаевич Ендырев А̄нъя па̄вылт о̄лы. Ань пыге акв а̄гитэ Белоярский ӯст о̄лы, мо̄тананэ ос Я̄грим па̄вылт о̄лэ̄гыт. Иван Савельевич Кислобаев Тав Ха̄льӯс район А̄нъя па̄вылт 1924 та̄л та̄л котиль э̄тпос 16 хо̄талт самын патыс. Тав 1942 та̄лт нёлоловхуйплов та̄лэ то̄влыс, туи порат хо̄нтлын ма̄н тотвес. Лӯима̄ ма̄хум та̄ксарыг о̄лнэ̄ныл ма̄гыс Ленинград ӯс вуянтаӈкве ке̄тыглаве̄сыт. Тав о̄с та̄ра тув тотвес. Та ма̄т сака пилыщмаӈ хо̄нтлын нак о̄лыс. Хум 54 гвардейский стрелковый полкыт хо̄нтлыс. О̄выл щёс хо̄нтлуме порат, сака та̄рвитыӈыщ ня̄лн сакватавес, хоттыпыс. Ётылнув тав ма̄нь ле̄ккарытн Ладожское тӯр ляпат туп лылыӈыг хо̄нтвес. Ос ня̄лн сакватым мо̄т хо̄тпат ёт, та тӯр хосыт, норыӈ порыл нарыгтахтым Ленинград ӯс коныпа̄лн тотвес. Иван Савельевич пӯльницат пусмалтахтас ос 1943 та̄лт юв ке̄твес. Война юипа̄лт тав совхозт рӯпитас. 1953 та̄лт нэ̄ тотыс. Э̄кватэ Прасковья Ивановна наме о̄лыс. Тав хо̄нтлын нак порат юн са̄всыр та̄рвитыӈ рӯпата ва̄рыс. Э̄кваго̄йкаг акв а̄ги янмалтасы̄г. А̄гитэ̄н ань Белоруссия ма̄т о̄лы, кит ня̄врам о̄ньщи. Иван Савельевич 1991 та̄лт а̄тимыг е̄мтыс. Тав Я̄грим па̄вылт ёлщё̄питавес. Мария Павловна Ендырева Нэ̄ 1918 та̄лт ре̄тыӈ ю̄свой э̄тпос 19 хо̄талт А̄нъя па̄вылт самын патыс. Тав ща̄нягеа̄щаге Павел Николаевич ос Домна Петровна о̄лсы̄г, тэ̄н нила пыг – Михаил, Георгий, Федот, Александр ос кит а̄ги Нина ос Мария янмалтасы̄г. Пыгыт пуссын хо̄нтлын ма̄н тотве̄сыт. Война о̄вылтахтам порат Мария ущты ва̄т нупыл хӯрум та̄лэ то̄влыс. Та та̄рвитыӈ хо̄нт порат, салта̄танув но̄хпатнэ ма̄гыс, мо̄т ня̄врамыт ёт, тав аквтем са̄всыр та̄рвитыӈ рӯпата ва̄рыс. Ма̄ньлат а̄ги во̄раим яласас. То̄нт сэ̄лясакнёл мощща о̄лыс, норма щирыл майлувес. Тав сака ёмщакв па̄тлуптас, посын та̄ра хо̄иглас. Тӯяг, туи ос таквсы та̄н э̄тэхо̄талэ хӯл алыщлым яласасыт. Хӯл пувнэ бригадат тав звеньевоиг о̄лыс. Хо̄нт нак о̄вылтахтам порат пӯвум немцытрищит о̄с та̄н ётаныл хӯл алыщлым яласасыт. Я̄валт рущ ла̄тӈыл щар ат торгамтасыт, ма̄ньщиянув ка̄тыл такталым та̄нанылн хӯлтсыт. Хунь фашистыт ма̄н ма̄в нупыл хо̄нтлым йисыт, та̄н татем о̄щхульласыт, э̄ргим рӯпитасыт. Ётылнув, хунь ма̄н хо̄тпанув фашистыт ювле ня̄влуӈкве патсаныл, та̄н пуӈканыл ёлта̄ртсаныл, хотротмысыт, та̄ра каста̄лыг е̄мтсыт. Ул номсысыт, но̄хпатэ̄гыт. Тот та̄н кит та̄л рӯпитасыт. Хӯл алыщлым Саквъя мус яласасыт. Ётылнув та̄н хотталь тотве̄сыт. Мария Павловна са̄всыр та̄рвитыӈ рӯпата ва̄рыс. Тав репрессиян ке̄тым калмыкыт ос переселенцыт ёт, колхоз ӯйхулыт ма̄гыс пум ва̄рыс. Тувыл ма̄хум ёт са̄всыр ке̄рло̄мтыт заводн ке̄тнэ ма̄гсыл акванатыглас. Тот ты ке̄рытныл писалит, яласан утыт ос сыресыр щаӈквыт ва̄рве̄сыт. Тэ̄лы порат тав Анастасия Кирилловна Сайнахова юрт а̄гитэ ёт лувыӈ суныл почта тотыглым рӯпитас. Война холам юипа̄лт тав хум ва̄рыс. О̄йкатэ Илья Григорьевич Гоголев о̄лыс. Тав 1927 та̄лт А̄нъят самын патыс. О̄йка а̄ще Григорий Михайлович Гоголев, оматэ ос Анна Николаевна, а̄ги о̄парищ наме Качанова, о̄лсы̄г. Илья Григорьевич 1944 та̄лт армиян рӯпитаӈкве тотвес. То̄нт ма̄ньлат пыгыт пуссын тув вӯйла̄лве̄сыт. А̄нъя па̄вылныл тав ётэ Степан Павлович Руков о̄с тув ялыс. Ётылнув тэ̄н Дальний Востокн Японият о̄лнэ мир ёт хо̄нтлуӈкве ке̄твесы̄г. Война юипа̄лт Илья Григорьевич 1949 та̄л мус хотлоӈхитым колыт ӯнттым рӯпитас. Э̄кваго̄йкаг аквъёт хо̄т ня̄врам янмалтасы̄г. Ты Зоя, Надя, Михаил, Прокопий, Анатолий ос Юрий. Илья Григорьевич 1976 та̄лт хотталь щалтыс. Мария Павловна ос 1992 та̄лт а̄тимыг е̄мтыс. Тэ̄н сас А̄нъя па̄вылт ёлщё̄питавесы̄г».

1099 2015.05.08. Тамара МЕРОВА

А̄тятэ урыл пищма хансыс. Ты хури ма̄навн Светлана Петровна Парфёнова (а̄ги о̄парищ наме Вынгилева) мистэ. Тот тав а̄ще Вынгилев Пётр Егорович такви ще̄мьятэ ёт по̄слым о̄лы. Ос а̄тятэ урыл Светлана тамле потыр хансыс. Вынгилев Пётр Егорович лӯпта э̄тпос 12 хо̄талт Ха̄льӯс районт о̄лнэ Няхлаӈ ма̄нь па̄вылт самын патыс. Кульпас па̄вылт са̄т класс а̄стламе юипа̄лт Ленинград ӯсн э̄лаль ханищтахтуӈкве минас. Тот 1936 та̄лныл 1939 та̄л мус ханищтахтас. Ханищтахтаме сыс сыресыр рущ потрыт ма̄ньщи ла̄тӈыл толмащласанэ, тыи Александр Пушкин хансум «Станционный смотритель» потырохса ос Ленин о̄йка хансум то̄ва нэ̄паканэ. 1939 та̄лт а̄тям финский войнан ке̄твес. Тувыл юв ат ёхталас, 1941 та̄лт та̄ра э̄лаль хо̄нтлуӈкве тотвес. Ёмас стрелокыг о̄лыс. Ма̄н во̄раям хо̄тпанув пуссын ёмщакв па̄тлуптаӈкве ха̄ссыт. 1943 та̄лт акв хо̄нтлам нак порат а̄тям сакватавес. То̄нт тав саме̄н хо̄йвес ос таима̄гыс по̄хан та паттувес. Тав ща̄нягеа̄щаге палт юв ялыс, мощ о̄лыс ос Ханты-Мансийск ӯсн партийный школан ханищтахтуӈкве ке̄твес. Таве а̄стламе юипа̄лт Хулюмсӯнт па̄выл нэ̄пак ловиньтан колн рӯпитаӈкве паттувес. Та па̄вылт о̄лме̄т нэ̄ тотыс. Пелагея Васильевна Адина нэ̄тэ̄нтыл онтолов ня̄врам янмалтасы̄г. Та̄рвит о̄лупса о̄лыс, а̄тям Кульпаст, А̄нъят, Сортыӈъят, Няхлаӈ па̄влытыт о̄лум ма̄хманув ёт хӯл алыщлым, во̄раим акваг рӯпитасыт. Государствав но̄хво̄рмалтан ма̄гыс са̄в хӯл, пушнина мисыт. Китынтыг а̄тям о̄с нэ̄ тотыглас, 1968 та̄лт тэ̄н Дарья Степановна Самбиндалова ёт акванминасы̄г ос хӯрум ня̄врам о̄щсы̄г. 2003 та̄л яныгпо̄ль э̄тпос китыт щислат а̄тяв а̄тимыг е̄мтыс. Ма̄н таве ёмас посыӈ номтыл пуссын номилӯв. 70 та̄л Победа ялпыӈ хо̄тал кастыл хо̄нтлуӈкве ялум хо̄тпат, тамле та̄рвитыӈ порат яныгмам ма̄хумн, та̄н ня̄враманылн, пуста̄гыл о̄луӈкве ла̄ве̄гум. Посыӈ хо̄талакве акваг вос посты, тамле пилыщмаӈ ва̄рмаль нэ̄мхуньт ул вос е̄мты. Ма̄хум со̄тыӈыщ, щуниӈыщ вос о̄лэ̄гыт». Светлана Петровнан ма̄н пӯмащипа ла̄тыӈ ла̄ве̄в, тав ань Ханты-Мансийск ӯст яныгпа̄ла хо̄тпат пусмалтым рӯпиты.

1099 2015.05.08. Тамара МЕРОВА

Рӯтанэ̄н, юртанэ̄н сымыӈыщ янытлавес. Яныгпо̄ль э̄тпос ва̄т нупыл нила хо̄талэ̄т Санкт-Петербург ӯст А. И. Герцен нампа Лӯима̄ мирыт ханищтахтын институтт мирхал конференция о̄лыс. Валентина Селивёрстовна Иванова (Садомина) 65 та̄лэ то̄влум кастыл тав ва̄рыглавес. Тувыл ты та̄л Лӯима̄ ма̄хум институтаныл рӯпитаӈкве о̄вылтахтаме па̄сыл 85 та̄лэ то̄влы. Ань тыгыл э̄лаль та̄л палыт са̄всыр мо̄т пӯмыщ тэ̄лат тот ва̄руӈкве тах патавет. Та институтт ханищтахтам хо̄тпат тув ёхталаӈкве пуссын во̄вавет. Ты о̄выл конференция «Традиционные и инновационные формы сохранения и развития коренных малочисленных народов Севера» намаим о̄лыс. Ань культура, история, этнография ос лӯима̄ ла̄тӈыт ханищтан наукат палт налыман нупыл акв хо̄тпа пӯмыщ тэ̄лат та̄рапаттысыт ос та̄нки хансум потраныл ловиньтасаныл. Ханты-Мансийский округ па̄лыл то̄ват тув ялуӈкве ат ве̄рмысыт. Мо̄таныт та порат Москва ӯс «Сокровище Севера» нампа фестивальн минамыт. Ма̄н ань туп са̄тхуйплов хо̄тпа хансум потраныл хӯнтлысанӯв. О̄влэ̄т лӯима̄ ма̄хум институт па̄лыл Валентина Селивёрстовна рӯпататэ ма̄гыс э̄сгувес ос грамотал мӯйлуптавес. Тувыл тот доцентыг о̄лнэ хум Аркадий Иванович Гашилов ма̄ньщи нэ̄ хо̄тпав урыл са̄в сымыӈ ла̄тыӈ ла̄выс. Тав такви хансум потре «Имеющая право на тайны духовного наследия своих предков» намаястэ. Валентина Иванова ма̄ньщи ма̄хум То̄рум А̄щн агтын ос На̄й-О̄тыр Акиянувн ӯргалан тэ̄лат пуссын диссертациянэ̄пакыг щё̄питасанэ. О̄йка ань сака номтыӈ ос мӯтраӈ ла̄тыӈ пе̄с йис о̄лупсав о̄вылтыт потыртас. Тав нэ̄мхотты мо̄т мирытныл тамле нотыӈ ос йис та̄гыл о̄лнэ пе̄с ва̄рмалит урыл ат хӯлыглас, ат ва̄с. Аркадий Иванович ла̄выс: «Ма̄ньщи ма̄хманув та̄нки То̄рум А̄щанылн агтым ань тыг мус ё̄р номтыл э̄лаль о̄лэ̄гыт ос мо̄т хо̄тпат аквтох тамле ё̄рыл пиныяныл. Та̄н То̄руманылн по̄йкщим ма̄вит ӯргалан тэ̄лан ос мо̄т мирыт сымыӈыг, мӯтраӈыг, юртыӈыщ о̄луӈкве ханищтыяныл. Валентина Селивёрстовна такви ве̄рмынэ̄тэ мус тахольт тув ро̄внэ, номтыӈ научный потыр хансыс». Ма̄ньлат студента̄гит тав о̄с э̄сгысанэ. Хо̄т а̄гит лӯима̄ ма̄хум ла̄тӈанылт о̄лнэ накыт манос сыресыр пе̄с йис ва̄рмалит та̄рапаттысаныл ос та урыл ла̄тыӈ тотсыт. Ань институтт ханищтан а̄гитпыгыт халт рущит о̄с о̄лэ̄гыт. Та̄н лӯима̄ ма̄хум ва̄рмалитыл сака пӯмщалахтэ̄гыт, матыра̄ти тэ̄лат ёмщакв ханищтыяныл ос ма̄к потыр хансэ̄гыт. Кира Семяшкина тӯлыглапыт о̄вылтыт потыртас, Олеся Кабанова селькум ма̄хум пе̄с потраныл щирыл ӯит ӯргалан ва̄рмалит ханищтас. Надежда Янгасова ко̄йпыт урыл потыртас. Марина Дежурова ма̄ньщи ос саран ма̄хум ла̄тӈыт мощ аквана̄рталасанэ. Ганна Шестопалова нанайма̄хум ла̄тӈанылт «хо̄нт» ла̄тыӈ о̄вылтыт манхурип ла̄тӈыт ла̄вавет, таит та̄рапаттысанэ. Учёный хо̄тпат Надежда Васильевна Лукина, Александр Александрович Петров, Игорь Вадимович Бродский, Сергей Алексеевич Мызников, Марина Дмитриевна Люблинская о̄с са̄всыр наука тэ̄лат урыл потыртасыт. Игорь Бродский ла̄вме щирыл, моще̄ртын лӯима̄ ма̄хум ла̄тӈаныл ул мо̄т хо̄н ма̄хум ла̄тӈаныл щирыл туп школатт ос университетытт ханищтаӈкве патавет. Таима̄гыс ма̄ньлат хо̄тпат акваг матарыл пӯмщалаӈкве э̄ре̄гыт. Тувыл Финляндия ма̄ныл библиянэ̄пак толмащлан институтныл хӯрум хо̄тпа тот мӯйлысыт. Та̄н Валентина Селивёрстовна ёт хосат та̄гыл ва̄йхатэ̄гыт. Анита Лааксо таве̄н ёмас сымыӈ ла̄тыӈ ла̄выс ос библият хансым потрыт ма̄ньщи ла̄тӈын толмащламе ма̄гыс э̄сгын нэ̄пакыл мистэ. «Просвещение» нампа нэ̄пак та̄ратан колт рӯпитан нэ̄ Марина Рачинская лӯима̄ ма̄хум ня̄враманыл ханищтан нэ̄пакыт урыл потыртас. Валентина Иванова ёт тэ̄н кит нэ̄пак та̄ратамаге̄н порат аквъёт ка̄ркамыг рӯпитасы̄г. Конференция а̄латы а̄стыс, мӯй ма̄хум потыртанэ̄ныл сыс а̄виныл кит ма̄ньщи нэ̄г нэ̄глапасы̄г. Ты Татьяна Степановна Гоголева ос Надежда Геннадьевна Алексеева, округ Дума депутатнэ̄г, тэ̄н юв щалтсы̄г. Валентина Селиверстовна намхо̄талэ̄т тэ̄н янытластэ̄н ос округ па̄лыл ма̄гылт о̄щнэ по̄сыл мӯйлуптастэ̄н. Ма̄н газетагув па̄лыл таве о̄с янытласлӯв. Тувыл Ханты-Мансийсканыл Динисламов колта̄глыт тув о̄с ёхталасыт. Валентина Селивёрстовна сака ща̄гтым о̄лыс. Са̄в со̄тыӈ, са̄в посыӈ хо̄тал тав э̄лаль вос о̄лы, пус ка̄т, пус ла̄гыл, То̄румн, На̄й-О̄тыранэ̄н вос ӯргалаве.

1099 2015.05.08. Людмила ТЕТКИНА

Э̄ква са̄в рӯпитым, яныг нам урыл ат номсыс. Анна Никитична Самбиндалова Сума па̄вылт 1928 та̄лт самын патыс. Колхоз ва̄рнэ порат ма̄нь па̄вылквет о̄лнэ ма̄хум пуссын Кульпасн рӯпитаӈкве ва̄нтлуптаве̄сыт. Анна Никитична ща̄нягеа̄щаге о̄с тув ва̄нтлысы̄г. А̄гирищ хӯрум та̄лэ туп то̄влыс, оматэ хотталь щалтыс. А̄ще Ло̄пмус па̄вылныл мо̄т нэ̄ тотыс. 1939 та̄лт Володя а̄пщитэ самын патыс. Война о̄вылтахтам порат Анна Никитична туп 13 та̄л янытыг о̄лыс. Та та̄рвитыӈ пора урыл ань ты мус ёмащакв номитэ. О̄влэ̄т ловиньтаӈкве ос хансуӈкве хаснэ хум хо̄тпат хо̄нтлаӈкве тотве̄сыт. То̄нт ам иӈ ня̄врам, школат ханищтахтасум. Хум хо̄тпанув войнан пуссын хунь минасыт, па̄влув рӯпитан ма̄хум та̄л хультыс. Нэ̄ хо̄тпат ос ма̄н, ма̄нь ня̄врамыт, са̄всыр рӯпата ва̄рсӯв. То̄нт а̄щум каӈке Михаил о̄с хо̄нтлаӈкве минас. Троица ӯсныл пищма ос хури ке̄тыглас. Тот пӯльницат пусмалтахтас. Хурит хансыс: «Ам ос рӯмам». Ты хури а̄гимн ань хо̄т иӈ о̄ньщитэ. Та юипа̄лт воссыг нэ̄матыр аты ке̄тыглас, Москва ӯс ляпат ёлщё̄питавес. 1944 та̄лт ам са̄т класс а̄стласум. Няхлаӈ, Кимкъясуй ос мо̄т па̄влыӈ а̄гит Ханты-Мансийск ӯсн ханищтахтуӈкве ке̄твесӯв. Кульпасныл юрт а̄гим Ульяна Оманова ёт ме̄нккеме̄н о̄лсуме̄н. Тувыл «Шлеев» на̄иӈха̄п ёхтыс, Ханты-Мансийск ӯсн та тотвесӯв. Училищат кӯщаиг Величко о̄йка о̄лыс. Хо̄нтлым сакватавес, тувыл ла̄глэ хотяктувес. Ла̄гыл та̄л юв та ке̄твес. Училище кӯщаиг ӯнттувес. Ханты-Мансийск ӯст о̄лмувт, ля̄ххал хӯлыслӯв, Победа е̄мтыс. Ма̄хум пуссын хотща̄гтсыт, ма̄н а̄гит та лю̄ньще̄в, мувиньтэ̄в, та манаре̄в. Ӯст яныг салют ва̄рыглавес, тамле тэ̄ла тай ам аты ва̄щинтаслум. Ханищтахтын та̄л оигпас, ювле о̄лнэ па̄вылн та минмыгтасӯв. Тувыл Ханты-Мансийск ӯсн воссыг ат минасӯв. Величко о̄йкав ма̄навн тай ӯриянэ, телеграмма та ке̄ты, хансы, а̄гит ханищтахтуӈкве ёхтэ̄н. Атяв мо̄т нэ̄тэ хотталь щалтыс, ам юн Володя а̄пщим ёт хультсум, рӯпитаӈкве патхатасум. Война холам порат хум хо̄тпа о̄с мощща, рӯпитан хо̄тпа а̄тим. Ам совхозт рӯпитасум, Люлюкары па̄выл нупыл нор са̄груӈкве ялантасум. Ма̄хум са̄всыр па̄влытныл рӯпитаӈкве тув ке̄тыглаве̄сыт. Та ма̄т ёмас тарыг йӣвыт яныгмасыт. Юрт а̄гим ёт та̄л тот рӯпитасме̄н. Туи порат ёхтыс, ювле па̄вылн минуӈкве щё̄питахтасме̄н. Тувыл о̄йка ёхтыс, ла̄выс: «Нэ̄н тыт хультэгы̄н, нор Ха̄льӯс нупыл на̄тылтаӈкве патэгы̄н». Кӯщай палт ха̄йтсуме̄н, ла̄виме̄н, таяныт норка̄паит на̄тылтаӈкве ё̄рыл ат товлавеме̄н. Ювле та та̄ртвесаме̄н. Со̄пак, мо̄т маснут о̄с а̄тим. То̄нт яныг планыл хансаве̄в, таквсы я̄ӈк на̄тнэ мус толге̄в, со̄пак ат о̄ньще̄в, со̄въява̄ил витын щалтэ̄в. Витэ тай такем по̄лям, о̄влэ̄т ла̄глагум э̄рттум нас котараве̄г. Тувыл хунь ла̄глагум по̄лявег, нас то̄рыгтаӈкве о̄вылтавем. Таяныт хӯлп ва̄тан хартым ка̄тагум о̄с нас тувка̄ртэ̄г. Акв порат Ня̄хщамво̄льныл таса̄вит пыгыт рӯпитаӈкве ёхтысыт. Та пыгыт халт Самсон о̄лыс. Аквъёт рӯпитым ва̄йхатсуме̄н. 1950 та̄лт во̄ртур э̄тпост хӯрум щислат итипа̄лаг ам палтум ёхтыс, ла̄выс: «Холытан «Шлеев» Ня̄хщамво̄ль па̄выл нупыл мины, щё̄питахтэ̄н, аквъёт миныме̄н. Ам а̄тямн нэ̄матыр ат ла̄всум, тох оясум. «Шлеев» ёхтыс, ма̄хум пуссын та̄лсыт, ам о̄с молях тув щалтапасум, Самсон а̄нум тӯйтыстэ. А̄тям ты ва̄рмаль урыл хӯлыстэ, на̄лми ва̄тан ёхтыгпас. На̄иӈха̄пн та̄лыс, а̄нум кинсым та ха̄йтыгты, та ро̄ӈхи: «Нюра, наӈ хо̄т о̄лэ̄гын, юв минэ̄н». А̄нум аты хо̄нтыстэ, па̄г та ва̄глыс. Тох Самсон а̄нум Ня̄хщамво̄ль па̄вылн та тотыстэ. «Шлеев» Няхлаӈ па̄вылн пӯхталас. А̄тям урыл акваг номсым, па̄г ва̄глуӈкве тахсум, ювле минмыгтаӈкве кусыгласум. Самсон а̄нум ювле минуӈкве ат та̄ртыстэ. Тувыл а̄тям такви ам палтум ёхталас. Ма̄нь ха̄пыл са̄т хо̄тал акв тӯпыл товыс. Ёхтыс, ам нупылум ат кантлыс, нас ла̄выс: «Минасын ке, о̄лэ̄н, пуста̄гыл туп вос о̄лсына». Воссыг нэ̄матыр ат ла̄выс. Анна Никитична ос Самсон Васильевич 60 та̄л аквъёт о̄лсы̄г. Са̄т ня̄врам янмалтасы̄г. О̄йкатэ а̄тимыг е̄мтыс, Анна Никитична Хулюмсӯнт па̄вылн Татьяна яныг а̄гитэ палт ва̄нтлас. Ма̄н, редакцият рӯпитан ма̄хум, Анна Никитична Победа хо̄тал кастыл янытлылӯв, са̄в ёмас, сымыӈ ла̄тыӈ таве̄н ке̄тэ̄в. Ня̄врамыг о̄лме̄т, ка̄ркамыг са̄в рӯпитас, мо̄т хо̄тпат ёт Победа ма̄гсыл са̄в ё̄р пиныс. Ма̄ньщи э̄ква ёт потыртамум, ам таве китыгласум: «Труженик тыла» нам о̄ньщи ман а̄ти. Тав а̄гитэ Татьяна ювле ла̄выс: «Ща̄нюм тамле нам ат о̄ньщи. Ма̄хум ла̄ве̄гыт, са̄всыр нэ̄пакыт акванатуӈкве э̄ри. Акваг рӯпитым, са̄всыр яныг нам урыл ат номсахтас. Мо̄т ма̄хум хольт ка̄ркамыг рӯпитас».

1099 2015.05.08. Александр ВЬЮТКИН

Яныг о̄пануващо̄йканув номиянӯв. Яныг хо̄нтыт но̄хпатум хо̄тал э̄лыпа̄лт ма̄нти хо̄нтлам ма̄хманув ка̄сталан ма̄гсыл А̄с-угорский институтыт рӯпитан ма̄хум ёмас тэ̄ла ва̄рсыт. Ма̄хманув ка̄сталан хо̄тал Татьяна Дмитриевна Слинкина щё̄пита̄лыс. Рущ ла̄тӈыл «Ляпинские манси на войне и в тылу» намтым о̄лыс. Татьяна Дмитриевна хо̄нтлам ма̄ньщи ма̄хум наманыл та̄рапаттын щирыл са̄в та̄л рӯпиты. Хо̄нтын Ха̄льӯс районныл нила со̄тыра ляпатем ма̄ньщи, саран ос ханты хум хо̄тпат хо̄нтлуӈкв тотве̄сыт. Ань Татьяна Дмитриевна нэ̄пакыт щирыл 140 хо̄тпа наманыл та̄рапаттысанэ. Хунь та̄н лусытаӈкв вуйве̄сыт, хоталь тотве̄сыт ос хо̄т порслуве̄сыт, таи пуссын та̄рапаттыс. Хо̄нт юипа̄лт туп ва̄тахтем ма̄ньщи хум юв ёхтыс. То̄ват урыл военный архивколт тох хансым о̄лыс: та̄н аман порслымат манос хоттыпсыт. Хо̄нт о̄вылтахтам порат щар о̄влэ̄т репрессиян тотым ма̄хум рӯтаныл лусытаӈкв вуйве̄сыт. Ма̄ньщи хо̄тпат са̄выӈпа̄лэ та порат Ленинград ӯс по̄хан хо̄нтлуӈкв тотве̄сыт. Ань о̄лнэ архив нэ̄пакыт щирыл, тув тотым ма̄хум туп ат хо̄тал хо̄нтлуӈкв а̄лымасыт. Торыӈ щирыл маснут, писаль ат о̄щманыл ма̄гсыл порславе̄сыт, то̄ват пленын вуйве̄сыт. Хотьют лылыӈ та̄гыл ос сакватым хультыс, пӯльницан тотве̄сыт. Тох ты са̄в ма̄хум ань ты мус тыпылтахтым ловиньтавет. Ты яныг тэ̄ла ва̄рнэ̄тэ ма̄гсыл ма̄н, ма̄ньнуве̄г о̄лнэ ма̄хум, Татьяна Дмитриевнан яныг пӯмащипа ла̄тыӈ ла̄ве̄в. Са̄в та̄л пуста̄гыл таве̄н о̄луӈкв. Номтанэ пуссын тэ̄лаг вос е̄мтэ̄гыт.

1099 2015.05.08. Тамара МЕРОВА

А̄гитэ ма̄гня̄нил тотуӈкве ла̄выстэ. Лиза Посохова Ханты-Мансийск ӯст о̄лы ос 11 школат хӯрмит классыт ханищтахты. Тав ма̄навн яныг ащо̄йкатэ урыл пищма хансыс. Лиза потре э̄лаль ловиньтэлы̄н. Яныг хо̄нт о̄лум порат ул ка̄сыӈ ще̄мьяныл хо̄тпа хо̄нтлуӈкв тотвес. Ма̄н рӯт ма̄хманув халт о̄с акв хо̄тпа хо̄нтлын ма̄н тотвес, ос тот порслувес. Тыи ам яныг ащо̄йкам – Илья Иванович Миляхов. Тав 1916 та̄лт Ха̄льӯс район Чуанели па̄вылт самын патыс. А̄тятэ наме Иван Иванович Миляхов о̄лыс, соссаӈ ма̄хумн тав Тасан Юван ики ла̄ввес. Хум нусаӈ ще̄мьяныл ма̄ньлат Лиза а̄ги нэ̄г тотыстэ. Тэ̄н хӯрум ня̄врам о̄щсы̄г, Илья котиль пыгтетэ̄н. Хо̄нтлан ва̄рмаль э̄лыпа̄лт Илья такви ще̄мьяӈ хо̄тпаг е̄мтыс. 1941 та̄лт хо̄нтлуӈкве миннэ̄тэ порат тав хӯрум та̄л яныт Оля а̄гитэ сынумтастэ ос ма̄гня̄нил мистэ. Тувыл а̄гитэ ка̄тн вистэ ос ла̄вум: "Хо̄нтлан ма̄ныл юв ёхтэ̄гум, наӈын ма̄гня̄нь хӯрыгсов тах тотэ̄гум! " Хум хо̄тпа юв тох аты ёхтыс. Ма̄нь Олятэ такос ӯрхатас. Ос ётыл та̄рапатыс, тав а̄ще 1943 та̄лт ре̄тыӈ ю̄свой э̄тпост хоттыпум. Са̄в та̄лыт ювле хультум порат Оля щаще̄квам такви а̄ще хуритэ хо̄нтум, та хуритэ̄т тав 1943 та̄лт по̄слыма. Яныг ащо̄йкам то̄нт ва̄т нупыл хо̄т та̄лэ о̄лыс. Тав ма̄гылн тагатан са̄в по̄с о̄ньщис. Ань ты мус щаще̄квам хуритэ нупыл сунсым ос самаге̄тыл самвитанэ нэ̄глым ханты ла̄тӈыл э̄рыгсов акваг та э̄ргитэ. Ма̄н пуссын ка̄смоста̄лыг тав нупылэ та сунсэ̄в. Ань Ханты-Мансийск ӯст хо̄нтлам ма̄т порслым хо̄тпат наманыл хансым ка̄нт на̄н "Миляхов И. И. " нам ка̄салылы̄н ке, ва̄е̄н, ты ма̄ньлат хум такви а̄гирищкве̄н ма̄гня̄нь тотуӈкве таӈхыс кос, тувыл тох ат та тотыс. Ма̄н ще̄мьяв ань ка̄сыӈ та̄л Победа хо̄талт ӯсканын ялэ̄в ос хорамыӈ лӯптат тотнэ̄в коныпал, ма̄н ма̄гня̄нь хӯрыгсов тув о̄с тотылӯв, тув пинылӯв. Ты пилыщмаӈ хо̄нтлан нак хосыт са̄в ня̄врамаквет а̄щ та̄л хультсыт, ма̄ньпораныл та̄рвит нуса ва̄рмаль ва̄щинтасыт. Ма̄н та̄н о̄вылтыт о̄с номе̄в, нэ̄мхуньт ат ёрувлыянӯв. Лиза Посохова хансум пищматэ ма̄ньщи ла̄тӈын Тамара МЕРОВАн хасвес.

1099 2015.05.08. Светлана РОМБАНДЕЕВА

Ло̄пмуст о̄лнэ колта̄гыл. Ха̄льӯс район Ло̄пмус па̄вылт ам ма̄ньщи хо̄тпаг колн щалтсасум, Василий Фомич ос Лилия Иосифовна Таратовыг. Ма̄н мощ ӯнлахо̄лсув, потрамасув. Василий Фомич 1952 та̄лт Ло̄пмуст самын патыс. Тав кит а̄пщи о̄ньщас, Саша ос Юра, тэ̄н ань сас а̄тимыг. Кит э̄щ о̄ньщи. Ленатэ Тюмень ӯст ще̄мьятэ ёт о̄лы, са̄т ня̄врам о̄ньщи, ань пуссын янгыт, ще̄мьяӈыг е̄мтсыт. Ира э̄ще Кульпас па̄вылт о̄лы, хӯрум пыг о̄ньщи. Василий Фомич тох потыртас: – Омам наме Елена Ивановна, Ло̄пмуст самын патыс. Колта̄гланыл яныг о̄лыс, рӯтанув ань пуссын Ха̄льӯс район янытыл о̄лэ̄гыт. А̄тям 1956 та̄лт а̄тимыг е̄мтыс, то̄нт ам нилыт та̄лум ущ то̄влыс, Саша а̄пщим ос кит та̄л яныт туп о̄лыс. Ма̄навн щаще̄кваме̄н нё̄тыс, Марья Шешкина. О̄влэ̄т тав ма̄н ётув о̄лыс, тувыл Албин Борис колн ва̄нтлыс, тот о̄лыс. Ам Ло̄пмуст яныгмасум, хо̄тхуйплов та̄лум то̄влыс, рӯпитаӈкве патсум. Са̄в та̄л рыбоучастокт рӯпитасум, хӯл алыщласум. Пенсия олнум ань сака ма̄нь, хо̄т арыг со̄тыран туп ёхты. Ты та̄л хӯл сака ат хо̄и, хӯлпыт такос ӯнтталэ̄в, хӯл а̄тим. Василий Фомич э̄кватэ Лилия Иосифовна, о̄с ма̄ньщи нэ̄, Кульпас е̄рныл о̄лы. Э̄лаль ань тав потре ловиньтэлы̄н: – А̄тям Иосиф Игнатьевич Кислобаев. Омам Нина Михайловна А̄нъя па̄вылныл о̄лыс, а̄ги о̄парищ наме Гоголева. Ма̄н ще̄мьяв о̄влэ̄т Кимкьясуй па̄вылт о̄лыс. Ам тот самын патсум, школат ханищтахтуӈкве о̄вылтахтасум. Ам щар яныг, ат а̄пщи ос э̄щ о̄щсум – Сергей, Игнат, Вова, Алексей ос Рита. Ма̄нь а̄пщирищув ущ самын патме порат а̄тимыг е̄мтыс. А̄пщирищанум ос э̄щум ам акваг уральтасанум. Омагува̄тягув во̄рн рӯпитаӈкве минэ̄г, на̄йив са̄гре̄г ман мо̄т матыр рӯпата ва̄ре̄г, ма̄нав коныпа̄лыл лапто̄варттыянэ̄н, хо̄талпалыт ма̄нтте̄в юн та порге̄в. Тох та яныгмасӯв. Та порат «Дружба» нампа на̄йив сартнэ ут хунь о̄лыс, ма̄хум ка̄тыл (на̄йив сартнэ ке̄рыл) сартсыт. Тувыл а̄тям рӯпитаӈкве Кульпасн ке̄твес, ма̄н о̄с тув та ва̄нтлысӯв. Ха̄льӯст Роман акиюв о̄лыс, а̄тяв тав каӈке. Москва ман Ленинград ӯсыг па̄лыл нэ̄ тотыглас, хӯрум ня̄врам о̄щсы̄г – Ирина, Света ос Валера. Та̄н ань пуссын Ха̄льӯст о̄лэ̄гыт. Кульпаст Алексей а̄пщим ще̄мьятэ ёт о̄лы, Ягримт Рита э̄щум о̄лы. Восыӈтурт ханты о̄йка ва̄рыгласум, яныг а̄гим Тоням тот самын патыс. А̄тятэ э̄ргуӈкве сака ха̄сыс, ханты ла̄тӈыл э̄ргыс, рӯтанэ пуссын э̄ргысыт. О̄влэ̄т ла̄тӈаныл ат торгамтаслум, тувыл мощ ва̄ӈкве патыслум. Та̄н ос ма̄н ма̄ньщи ла̄тӈув урыл ла̄ве̄гыт: «Ты манырсыр мат ла̄тыӈ? ! Татем нё̄тнэ, вит хольт ови». Васям ёт Кульпаст акванхо̄нтхатасме̄н, а̄нум тыг во̄выстэ, тувыл тыг та о̄лмыгтасум. О̄выл хо̄талытт ня̄нь ма̄гсыл ла̄пкан минэ̄гум, хоттыпе̄гум, юв миннэ лё̄ӈхум хо̄нтуӈкве ат ве̄рмилум. То̄нт пе̄карня станция тапа̄лт о̄лыс, ам номсыте̄мт э̄л та минасум. О̄влэ̄т марщум о̄лыс, нэ̄мхотьют ёт ат ва̄йхатасум. Тувыл Наташа а̄гиме̄н самын патыс. Тав ань ще̄мьяӈыг е̄мтыс, хӯрум ня̄врам о̄ньщи. Яныг а̄гим, Тоням, о̄с тыт о̄лы, о̄йка ва̄рыс, кит ня̄врам о̄ньще̄г. Тыт тай ам ань ханьщувласум, сака ёмас па̄вылкве, ёмас ма̄хум тыт о̄лэ̄гыт. Ты та̄л ме̄н о̄йкаме̄нтыл йильпи колыл майвесаме̄н, акв ко̄лнак о̄ньщи. Ма̄н колув хӯрум квартираӈ кол, тот о̄с кит ще̄мьяг о̄лэ̄г. Витыл ва̄пс о̄йкаме̄н бураныл тотыгпавеме̄н, то̄ванакт тӯйт тӯлэ̄гум. Кит лув о̄ньщиме̄н, туи пум ва̄ре̄в. Пенсия о̄лныл тотыглавеме̄н, хӯл пуве̄в, тох та о̄лэ̄в. Потрув ань та оигпас. Василий Фомич ос Лилия Иосифовна хо̄тпа нупыл сымыӈ нэ̄гхумыг. А̄гияге̄напганэ̄н ёт пуста̄гыл вос о̄лэ̄гыт, На̄й-О̄тыранылн вос ӯргалавет. Пус ка̄т, пус ла̄гыл!

1099 2015.05.08. Раиса РЕШЕТНИКОВА Николай МЕРОВ

Ща̄нь ла̄тӈыт э̄лаль тотавет. Матахмат та̄л минам юипа̄лт Белоярский район Касум па̄вылт о̄лнэ ханты ма̄хум ща̄нь ла̄тӈаныл э̄лаль тотнэ ма̄гыс «Языковое гнездо» нампа проект щё̄питасыт. Ань тот ня̄врамыт ханты ла̄тӈыл потыртаӈкве ханищтавет. Щар о̄выл порат ты ва̄рмаль хо̄н ма̄ныл тыг тотвес. Ты йильпи тэ̄ла щирыл, ня̄врамыт ла̄тыӈ ва̄нэ хо̄тпат ёт ща̄нь ла̄тӈыл потраме̄гыт. Таима̄гыс та̄нки ла̄тӈаныл молях ханищтыяныл. Ань Ка̄сум па̄вылт о̄лнэ ня̄врамыт о̄с аквтох ща̄нь ла̄тыӈ ва̄нэ хо̄тпатн ханищтавет. Тыщир та̄н та̄нки ла̄тӈаныл моляхнув торгамтаӈкв патыяныл. Щар о̄влэ̄т тамле школат Ха̄льӯс район Ло̄пмус, Сӯкыръя, Тэ̄к ос мо̄т ма̄нь па̄влытт пӯсве̄сыт. Тувыл ётылнув Ка̄сум школат рӯпитан хо̄тпат о̄с ты проект э̄лаль тотуӈкве номылматсаныл. Ань па̄вылт о̄лнэ «Оленёнок» нампа садикыт хӯрмит та̄л ща̄нь ла̄тӈыл ня̄врамыт ханищтавет. Тот «Огонёк» нампа группа рӯпиты. Тув онтоловхуйплов ня̄врам ханты ла̄тыӈ ханищтаӈкве ялантэ̄гыт. Ня̄врам ханищтан хо̄тпат ща̄нь ла̄тӈаныл ёмщакв ва̄ганыл, ня̄врамыт ёт акваг потыртэ̄гыт. Тот ты ханты нэ̄т рӯпитэ̄гыт З. Н. Тарлина, Р. И. Тасьманова, Л. И. Рандымова ос Н. М. Рандымова. Ня̄врамыт ща̄няныла̄щаныл о̄с яныг нё̄тмил ва̄ре̄гыт. Та̄н ня̄враманыл ма̄гыс хорамыӈ супыт ю̄нтсыт ос ёнгын утыт ма̄щтырласыт. Акв колнакт ка̄тыл по̄слым хурит ос са̄всыр ёнгын утыт акванатве̄сыт, выставка ва̄рвес. Тот па̄выл урыл хансым са̄в нэ̄пак о̄лы. Ты хосыт ня̄врамыт та̄нки йис о̄лупсаныл о̄с ханищтыяныл. Ща̄нь ла̄тыӈ ханищтан ма̄гыс ма̄нь ня̄врамыт ма̄гыс «Хо̄талакве» нампа журнал та̄ратэ̄гыт. Тот товлыӈ ӯит, во̄руит ос са̄всыр хӯлыт наманыл ханты ла̄тӈыл хансым о̄лэ̄гыт. Ты нэ̄пак хосыт ня̄врамытн пӯмащ ханищтуӈкв. Ӯщлахтын порат та̄н мо̄йтыт мо̄йтэ̄гыт ос а̄мщит ханьще̄гыт. А̄гирищит а̄канил, пыгрищит ос «Щёл» ёнгилыл ёнге̄гыт. Та̄нанылн тот ханищтахтуӈкве сака мӯсты. Тот рӯпитан хо̄тпат са̄всыр семинарытн э̄лаль ханищтахтуӈкве ва̄тихал ялантэ̄гыт. Па̄вылт тамле ва̄рмаль о̄лы, соссаӈ ще̄мьят юн ща̄нь ла̄тӈыл щар ат потыртэ̄гыт. Таима̄гыс ня̄врамыт та̄нки ла̄тӈаныл ат ва̄ганыл. Ань «Языковое гнездо» нампа проект хосыт, э̄рыӈ ты ва̄рмаль мӯсхал щирыл щё̄питаве. Ты потыр ханты нэ̄ Раиса Решетникова хансыстэ, ма̄ньщи ла̄тӈыг Николай МЕРОВ толмащластэ.

1100 2015.05.22. Светлана РОМБАНДЕЕВА

Соссаӈ нэ̄ хо̄тпат маснутаныл хорамыл ю̄нтыяныл. Сургутский районт о̄лнэ МУК «Лянторский центр прикладного творчества и ремёсел» колт рӯпитан нэ̄ Д. Бектошева соссаӈ ма̄хум хорамыт урыл потыр хансыс, на̄н ань э̄лаль тав потре ловиньтэлы̄н: – Ам сакныл са̄всыр пормасыт ва̄руӈкве ханищтахтэ̄гум. Тув ялантанэм сыс ханты ма̄хум культураныл урыл са̄всыр тэ̄лат ва̄ӈкве патсум. Акв щёс ма̄н «Хантыйские мотивы» выставкан ялсӯв, тот сака пӯмыщ пормасыт ка̄саласум – ӯйхул, товлыӈ ӯй ос хӯл совыл са̄всыр пормасыт ос маснутыт ю̄нтым о̄лэ̄гыт. Ка̄сыӈ пормас такви щире̄т ва̄рима, ма̄щтыр хо̄тпа наме тув хасвес. Ма̄ньщи ос ханты ма̄хум маснутаныл насати ӯйхул манос хӯл совныл ю̄нтыгламаныл. Са̄лы сов ёмащакв тынтлыяныл, йиныяныл, хорамыт яктэ̄гыт, тувыл ущта ю̄нсхатуӈкве ӯнтэ̄гыт. Маснут ман матыр пормас хорамыл ю̄нтыяныл, щаквще̄гыт. Тамле маснут татем нё̄тнэ̄г сусхаты. Ты рӯпата рущ щирыл тох ла̄ваве: мозаика из ровдуги. Ам ань исследовательский рӯпатам та урыл о̄лы – соссаӈ ма̄хум пе̄с порат хорамныл хумус якытла̄лсаныл, манарыл рӯпитасыт, касай ман маныр о̄щсыт. Хорам яктуӈкве амти о̄с ханищтахтэ̄гум. Хунь ты тэ̄ла ёмащакв та̄рапаттылум, мастеркласс ва̄руӈкве номсэ̄гум рӯпатам тах мирн суссылтылум. Соссаӈ мир маснутаныл ханищтан учёный ма̄хум хансум нэ̄паканылт тамле сов урыл аквкит ла̄тыӈ туп хансыгласыт. Ам Анжела Егоровна Обирина нэ̄ныл хӯлыгласум, тав а̄нум ханищтытэ. Тав ос Большой Юган я̄ ва̄тат, Колсомовы нампа во̄рыӈ ма̄т о̄лнэ ханты нэ̄ Екатерина Егоровна Усанова палт ханищтахтас. Ты рӯпата кӯпнит а̄ти. Сов ю̄нтнэ э̄лыпа̄лт э̄рнэ пормасыт пуссын акванатуӈкве, ляпан тотуӈкве э̄ре̄гыт. Рӯпата тох ты ва̄раве: 1. Сов о̄влэ̄т ёмащакв тынтлаве. 2. Сов сартнэ о̄льп на̄ӈк йӣв совыл ва̄раве, о̄льпыл сартаве. 3. Ю̄нсхатан ма̄гыс та̄н щё̄питаве. Сов та̄ныл ю̄нтаве. Сэ̄тапыл ю̄нтуӈкве патэ̄в те, сэ̄тап тув яктхаты, сов хотманыгтытэ. 4. Хорамыт ю̄нтнэ сов ка̄миньтаг вос о̄лы, ас ул вос о̄ньщи. 5. Ёмас яныт та̄к касай э̄лмитэ пе̄лпыӈыг вос о̄лы. 6. Сов яктын ма̄гыс па̄рт щё̄питаве. Ка̄сыӈ хо̄тпа таве̄н э̄рнэ па̄рт вос хо̄нты. То̄ва ма̄нь парт та̄рмыл якты, то̄ван ос яныг па̄рт тармыл рӯпитаӈкве кӯпнитнуве. Па̄ртэ састум вос о̄лы. Сов сака мори якытлаӈкве ат э̄ри, мощ ювӯруӈкве э̄ри. О̄льпыл сартым кит сыр совыг акв тармыл пинаве̄г, хорамыл щуртаве̄г, тувыл ты китпис совыг аквторыг яктаве̄г. Ма̄ньщи ос ханты ма̄хум янгыщ тамле хорамыт ва̄рыгласыт: «Ха̄льйив тов», «Ха̄льйив ма̄нь тов» ос «Са̄лы а̄ньт». Ты хорамыт сака ёмащакв на̄ӈке̄гыт, сусхатэ̄гыт. Ты рӯпата та̄н пе̄с йис та̄гыл ва̄рыгласаныл, хаснэ йӣв ат о̄щсыт, нэ̄матарыл ат щуртсыт. Ка̄сыӈ хорам та̄н номим о̄щсаныл, пе̄лпыӈ ка̄саил яктысаныл. Хорам мӯсхал щирыл яктаве те, то̄нт рӯпата э̄лаль ёмащакв мины. Ос хунь со̄ви яктаве, хорам тувломырлы ман со̄ви хартуӈкв паты. Са̄ртын хорамыт о̄вланыл аквано̄лтумта̄лавет, ты юипа̄лт ущ акваню̄нтуӈкве патавет. Совыл ю̄нтум хорам са̄в та̄л о̄ньщуӈкве ро̄ви. Ла̄гыл маснут хот те хащлы, хорам хотха̄лматаӈкве ро̄ви, йильпииг ю̄нтнэ ла̄гыл маснут палт ю̄нтуӈкве ро̄ви. Тав э̄лаль о̄с аквтох йильпииг сусхатуӈкве паты. Маснут то̄слуӈкве о̄с ха̄суӈкв э̄ри – хотёсвес те, мори па̄хвтуӈкве, тагматаӈкве ат э̄ри, хо̄талка̄тн ул вос ёхтаве, кӯр тармыл пинуӈкве ат э̄ри. Э̄лнаӈ соссаӈ ма̄хум маснутаныл сӯмьяхыт о̄щсаныл, тув нэ̄матыр ӯй ман ма̄порсӯйрищит ха̄ӈхуӈкве ат ве̄рмысыт, пормасаныл ӯйитн ат та̄йве̄сыт, хот ат сайсыт. Ань тамле рӯпата мо̄рсыӈ хо̄тпа ва̄ри. Та̄н ва̄рнэ хо̄тпа о̄с мощща. Ма̄хум янгыщ ла̄пкаӈ маснут ёвтэ̄гыт, таима̄гыс ты тэ̄ла хотёрувлаӈкве патвес. Ты ма̄гыс ам сымум сака ща̄рги, татем э̄рнэ тэ̄ла, татем нё̄тнэ рӯпата хот та ёрувлахты. Таве э̄ри торген мирн суссылтаӈкве, хотьют э̄рыӈ ва̄руӈкве паты, таве̄ныл ос мо̄т ма̄хум ханищтахтуӈкве патэ̄гыт. Ты потыр ма̄ньщи ла̄тӈыг С. Ромбандееван толмащлавес.

1100 2015.05.22. Тамара МЕРОВА

Пусмалтан ва̄рмалит урыл ля̄ххал. Мо̄лалнув ля̄ххал тотнэ хо̄тпат Александр Филимонов ёт хо̄нтхатыглаӈкве акванатыглаве̄сыт. Ты хум мир пусмалтан департаментыт кӯщаиг о̄лы ос тав ань ва̄рнэ рӯпататэ о̄вылтыт потыртас. Ма̄хум пусмалтан ма̄гыс сыресыр программат щё̄питаве̄сыт, ты рӯпатат ва̄рнэ ма̄гыс округ бюджет па̄лыл олныл та̄ставет. Мо̄лты та̄лныл ле̄ккарыт «Развитие здравоохранения ХМАО-Югры» программа щирыл рӯпитаӈкве патсыт. Тав щире̄тыл о̄с аквтох тув мо̄т йильпииг хӯлтнэ ва̄рмалит ёт 2020 та̄л мус э̄лаль рӯпитэ̄гыт тах. Ты та̄лыт сыс акв яныг перинатальный нампа центр ӯнттаве, тув пусмалтахтын э̄рнэ пормасыт ёвтавет. Юграт ань ка̄сыӈе̄мт са̄внув ня̄врам самын паты. Нэ̄ хо̄тпат та̄рвитыӈыщ о̄лнэ̄ныл сыс ос ня̄враманыл самын паттум порат матыр а̄гм ке о̄ньще̄гыт, та̄н тамле центрыт та̄ра пусмалтаӈкве патавет. Э̄лумхо̄лас матыр а̄гме са̄ртыннув та̄ра ке паттаве, тыи сака ёмас о̄лнув. Ань сыресыр ищхӣпыӈ утыт хосыт ма̄хум моляхнув пусмалтавет, нас туп та̄н ты о̄вылтыт вос ва̄ганыл. Диспансеризация щирыл Юграт о̄лнэ 200 со̄тыра хо̄тпат ле̄ккарытн сунсыглаӈкв ос пусмалтаӈкв ве̄рмавет. Ань тыг мус са̄в ма̄хум ке̄лпанылт о̄щнэ а̄гманыл ма̄гыс а̄тимыг е̄мтэ̄гыт, тувыл сыресыр лю̄ль мосыл яныгмавет (рущ щирыл ке ла̄вуӈкве онкозаболевания) манос та̄нки хо̄та̄ти сакватахтэ̄гыт. Манос лю̄ль пищ о̄ньще̄гыт ос та̄нкина̄нылн лю̄ль ва̄ре̄гыт, – хохса са̄в хартэ̄гыт, вина ае̄гыт, лю̄ль тэ̄рпит ке̄лп та̄нын тӯщтэ̄гыт. На̄н на̄нки ӯргалахтым о̄с о̄лэ̄н, э̄рнэ торыг пусмалтахтэ̄н.

1100 2015.05.22. Светлана РОМБАНДЕЕВА

Ӯс ма̄хум ӯльпат ос на̄ӈкыт ӯнттысыт. Я̄ӈк на̄тнэ э̄тпос 16 хо̄талэ̄т Ханты-Мансийск ӯст о̄лнэ ма̄хум йӣвыт ӯнттысыт. Ма̄н, редакцият рӯпитан ма̄хум, та ма̄н о̄с ялсӯв. Таса̄вит мир, янгема̄не, тот пуссын рӯпитасыт. Та мир халт округ кӯщай нэ̄ Наталья Владимировна Комарова о̄лыс. Хурит ань тав ты по̄слым о̄лы, на̄ӈк йӣв ӯнтты. Ты урыл мо̄тыт газетат ловиньтэ̄н тах.

1100 2015.05.22. Людмила ТЕТКИНА

Миркол кӯщаит рӯпатаныл урыл. Я̄ӈк на̄тнэ э̄тпос 15 хо̄талэ̄т Наталья Комарова ва̄ӈын хо̄тпанэ сапра̄нин во̄выгласанэ. О̄влэ̄т та̄н округувт пирмайтым 25 программат урыл потыртасыт. Та̄л сыс ты программат рӯпитанэ̄ныл ма̄гсыл 290 миллиард солко̄ви тах та̄ставе. Ань нила э̄тпос сыс 63 миллиард солко̄ви холтвес. Наталья Комарова ма̄хум э̄лыпа̄лт ла̄выс: «То̄ва кӯщаит лю̄льсаӈ рӯпитэ̄гыт, та̄л оигпан э̄лыпа̄лт хультум олнаныл хумус холтуӈкве, ущ номсахтуӈкве та о̄вылтахтэ̄гыт. Ма̄н округувт о̄лнэ мир ёмащакв о̄лнэ̄тэ ма̄гсыл ты программат пирмайтыянӯв. Ты ва̄рмаль урыл ул ёрувлэ̄н». Ты юипа̄лт кӯщаит ос кол ӯнттын ва̄рмаль урыл потыртасыт. Нила э̄тпос сыс округув янытыл туп 115 со̄тыра квадратный метра са̄вит кол ӯнттувес. Та та̄л оигпам э̄лыпа̄лт ипотекаолн процентанэ но̄хминасыт, ще̄мьят о̄лнэ кол ёвтуӈкве воссыг ат ве̄рме̄гыт. Кол ӯнттын ма̄хум йильпи кол о̄с ат ӯнттэ̄гыт. Та̄н ань пуссын ӯрхатэ̄гыт, хунь банкыт ипотекаолн ма̄гсыл мощщанув процент во̄вуӈкве патэ̄гыт. Машинат яласан лё̄ӈхыт урыл та̄н о̄с потыртасыт. Наталья Комарова ва̄ӈын хо̄тпанэ китыгласанэ, манрыг акв ма̄т машинат яласан лё̄ӈх тынта̄лнув о̄лы, мо̄т ма̄т тынэ сака яныг. Ва̄ӈын хо̄тпанэ тув та̄стым олныт ёмащакве уральтаӈкве ла̄всанэ.

1100 2015.05.22. Александр ВЬЮТКИН

Пе̄с порат ӯнттым а̄мпар. Округ историкыг ос краеведыг о̄лнэ хум Яков Яковлев мощ мо̄лалнув пищмал те̄твес. Тот пе̄с тит накпа а̄мпар урыл потыр хансым о̄лыс. Мо̄лты «Новости Югры» нампа нэ̄пакт Ханты-Мансийский районт о̄лум Сухорукова пе̄с па̄выл урыл тит потрыг о̄с хансым о̄лсы̄г. Та па̄выл урыл иӈ 1740 та̄лт яныг учёный хум Герард Миллер такви нэ̄паканэ̄т хансыглас. Ань ты мус тот тит накпа пе̄с а̄мпар туп хультыс. Тав яныгса̄т та̄л ювле хультум порат ӯнттувес. Хунь пе̄с йис о̄лупсав ханищтан ма̄хум Сухорукова па̄вылн ёхталасыт, та̄н ла̄всыт: «Со̄ль, ты кол ӯргалаӈкв ос «объект культурного наследия» намыл пинуӈкв э̄ри». Ты а̄мпар тамле яныг намыл пиныма юипа̄лт са̄ккон щирыл мо̄т ма̄н тотуӈкв ат ро̄ви. Аквта ма̄т таве хультуптаӈкв о̄с ат ро̄ви, во̄раян ос хӯл алыщлан ма̄хум а̄ращаныл па̄лтыглан ма̄гсыл на̄йивыг хотсартуӈкв ве̄рмияныл. Хуритэ̄т хультуптан щирыл таве ӯсыӈ ма̄н тотуӈкв кос э̄ри. Таи ты лю̄ль, а̄мпар мо̄т ма̄н тотнэ олныӈ смета лаппантвес. Ты урыл пе̄с о̄лупсав ӯргалан щирыл рӯпитан хо̄тпаг Андрей Кондрашов ос Яков Яковлев ла̄всы̄г. А̄мпар ӯсыӈ ма̄н тотнэ ма̄гсыл ань пуссын ва̄раве. Таве мо̄т ма̄н тотнэ кастыл Тобольск ӯст о̄лнэ пе̄с пормасыт ёт рӯпитан ма̄хум тыг во̄виньтаӈкв номсавет. Ханты-Мансийск ӯст таве «Торум Маа» музейн «Югорская долина» нампа ма̄н ӯнттаве. А̄мпар мо̄т ма̄н тотнэ щирыл са̄в олн э̄ри. Ты ма̄гсыл та̄н олн миӈкв ка̄сащан хо̄тпатныл о̄лныӈ нё̄тмил во̄ве̄гыт. На̄н олн миӈкв таӈхегы̄н те, ищхӣпыӈ утыт тисхатэ̄н. Тот тох хансым о̄лы: БУ «Этнографический музей под открытым небом «Торум Маа». «Пожертвование на сохранение исторической постройки – амбар из деревни Сухорукова». Ты потыр ма̄ньщи ла̄тӈыл Александр ВЬЮТКИН хансыстэ.

1100 2015.05.22. Тамара МЕРОВА

Музеит э̄ткотиль мус рӯпитасыт. Я̄ӈк на̄тнэ э̄тпос нёлоловхуйплов щислат ма̄ янытыл музеит янытлан хо̄талыг о̄лы. Ты кастыл музеит э̄т па̄лыт рӯпитасыт, та̄н ма̄хум мӯйлуӈкве во̄выгласаныл ос выставкат суснэ ма̄гыс олн ойтуӈкве щар ат э̄рыс. Ты коныпал музеит рӯпитан хо̄тпат сыресыр касыт ва̄рыгласыт. Ань Ханты-Мансийск ӯст о̄лнэ музеит ос пӯмыщ касыт щё̄пита̄лыгласыт. «То̄рум Маа» музеит рӯпитан хо̄тпат Югорский Долина нампа ма̄н ма̄хум во̄выгласаныл. Тот соссаӈ ма̄хум ня̄врамыт ёт са̄всыр ёнгилыл ёнгысыт, хӯл алыщлан ос вораян ва̄рмалит о̄вылтыт мо̄йтыт мо̄йтсыт. «Айсар хар сайтум» рӯтыг о̄лнэ ма̄хум урыл потрыт хӯнтлысыт. Ма̄ньщи ос ханты ма̄хум маснутыл масхатуӈкве ос по̄слахтуӈкве ро̄выс. Юван Шесталов музейколнакт Светлана Динисламова хансум стиханэ ловиньтасанэ. Ос мӯйлын ма̄хум ты кит хо̄тпаг урыл сымыӈыщ потыртасыт. Юван ма̄ньщи ла̄тӈув ма̄кыг ос ве̄щкатыг ӯргаластэ, Светлана ма̄ньщи ла̄тӈыл хансым стихыт о̄с о̄ньщи. Ща̄нь ла̄тӈув мо̄т мирыт халт э̄лаль суиӈыг вос о̄лы. Тувыл хумус соссаӈ ма̄хманув щё̄валт хӯл исмит па̄йтсыт, ня̄нь хумус ва̄рсыт – ты ва̄рмалит сунсуӈкве ро̄выс. Тимофей Молданов пе̄с щирыл саг сагум, ань ты о̄вылтыт ма̄хум о̄с пӯмщалахтасыт. Ӯст о̄лнэ мо̄т музеит ос пӯмащ тэ̄лат щё̄пита̄лсыт. Ма̄вит ос Э̄лумхо̄лас нампа музейн ёхтум ма̄хум э̄типа̄лаг са̄в хорамыӈ шарикыт то̄рум нупыл но̄хта̄ратасыт. Та̄н молях во̄тн хотталь та тотыгпаве̄сыт. Ма̄хум тыглетувле мӯйлым э̄ти сыс ёмщакв ӯщлахтасыт.

1100 2015.05.22. Николай МЕРОВ

Хо̄нтлам ма̄хум 9 май Победа хо̄талыл янытлаве̄сыт. Ты та̄л я̄ӈк на̄тнэ э̄тпос 9 хо̄талэ̄т Ханты-Мансийск ӯст яныг парад ва̄рыглавес. Яныг хо̄нт нак оигпам па̄сныл ань 70 та̄лэ то̄влыс. Тыи ма̄гыс ӯс котильн ловманкем со̄тыра са̄вит хо̄тпа мӯйлуӈкве акванатхатыгласыт. Манхурип парад о̄лыс, ос хумус ма̄хум мӯйлысыт, на̄н ты урыл э̄лаль ловиньтэ̄н. Ты та̄л ӯс котильн китса̄т хо̄тпанкем ветеран хо̄тпа ёхталас. Ялпыӈ хо̄тал йӣквнэ ос ёнгын колыт та̄н о̄вылтасаныл. Тувыл ма̄нь ня̄врамыт хо̄нтлам ма̄хумн ос та та̄рвитыӈ накт юн са̄всыр рӯпата ва̄рум хо̄тпатытн хорамыӈ лӯптат мӯйлуптасыт. Округ кӯщай нэ̄ Наталья Комарова та̄наныл сымыӈыщ янытласанэ, тав ла̄выс: – Тыныӈ ветераныт ос тыт о̄лнэ ма̄хумаквет, ма̄н аквъёт ань 70 щёс Победа хо̄тал мӯйлылӯв. Ма̄н мирув но̄хпатме ма̄гыс яныг та̄рвит тотыс. Ань ты ялпыӈ хо̄тал ма̄н таима̄гыс янытлылӯв, мир ты та̄рвит ва̄рмаль нэ̄мхуньт ул вос ёрувлыяныл. Ма̄н хо̄нтлам ма̄хманув наманыл номылматыглан ма̄гыс ка̄сыӈ па̄вылт, ӯсыт о̄лнэ мир ань акванатхатыглэ̄в. 1941-1945 та̄лыт порат о̄лум хо̄нтлам ва̄рмаль мо̄т щирыл ул вос хансаве, ма̄н тыи та̄кыщ ӯргалаӈкве патылӯв. Туп ма̄н ты ва̄рмаль ёмщакв ва̄глӯв, ма̄н са̄в ё̄р ты ма̄гыс мисӯв. Та пилыщмаӈ накт порслым ма̄хманув ос лылыӈыг хультум хо̄тпанув ма̄гыс ма̄н ма̄ мус пуӈк пиным хӯтахлэ̄в. Ветеран хо̄тпанувн яныг пӯмащипа ла̄тыӈ ла̄ве̄в. Та̄н ё̄раныл хосытыл ань ня̄враманув ёмщакв о̄лэ̄гыт. Ка̄сыӈ хо̄тпа сыме̄т Победа номт о̄лы. Победа хо̄талыл на̄нан, я̄тил ма̄хумаквет! Тувыл кӯщай нэ̄ юипа̄лт кина суснэ тотап хосыт Сургут ӯсныл Борис Андреевич Проводников, хо̄нтлам хум, потыртас. Яныгпа̄ла хо̄тпа ӯс котильт атхатам ма̄хумн щунь паща ла̄тыӈ ла̄выс: «Ка̄сыӈ хо̄тпа рӯпатаӈыг ос щёлыӈыг вос о̄лы. Посыӈ То̄рмын, На̄й-О̄тыранын вос ӯргалаве̄н. Пус ка̄т, пус ла̄гыл э̄лаль са̄в та̄л о̄лэ̄н. Ты ялпыӈ хо̄талт ёмщакв мӯйлэ̄н. Хо̄нтлам нак хот ул ёрувлэлы̄н». Тувыл ос Нижневартовск ӯсныл Никита Бачинский, хо̄нтлам ма̄т са̄всыр пормас киснэ «Самотлор» нампа отряд кӯщай хум, ветераныт янытласанэ. Тав ла̄выс: «Мир пе̄с йис пораныл тамле нак ат ва̄щиньтас, хунь ма̄хум пилта̄лыг, та̄нкина̄ныл са̄литатта̄л хо̄нтлысыт. Ма̄к та̄н геройхо̄тпаг ты о̄лсыт. Ма̄н та хо̄тпат нэ̄мхуньт ат ёрувлыянӯв, акваг номуӈкве патыянӯв. Я̄тил ветеран хо̄тпат, на̄н хосытын ма̄н ань посыӈ хо̄талыл э̄лаль ты о̄лэ̄в. Пӯмащипа на̄нан тыи ма̄гыс ла̄ве̄в». Янытлан потрыт оигпасыт ос парад та о̄вылтахтас. Ханты-Мансийск ӯс котильт о̄лнэ Мира ӯсхулы хосыт Афганистан ма̄т хо̄нтлум хо̄тпат, салта̄тыт, каснэ хо̄тпат, полицият, МЧС ма̄т рӯпитан ма̄хум, казакыт, сутытан ма̄т рӯпитан хо̄тпат, кадетский школат лусытан ня̄врамыт ос мо̄таныт ряд щирыл ё̄мсыт. Ос щар яныг тамле пӯмащ о̄лыс, ань ты та̄л ӯсхулы хосыт салта̄тыт юипа̄лт са̄всыр военный техника писалиӈ та̄гыл тотвес. Ты яныг хо̄нт порат яласам танк Т – 34, мотоциклыт, «Катюша» нампа са̄в ня̄лыл па̄тлуптан яныг машина ос пушкат харттуве̄сыт, акв ма̄нь товлыӈха̄п ла̄щлакв рӯпитым минас. Лё̄ӈх китпал е̄раге̄т таса̄вит миркапай ты ва̄рмаль сунсуӈкве атхатыгла̄лыс. Ханты-Мансийск ӯст рӯпитан хо̄тпат акв юипа̄лт колонна щирыл лю̄льсыт. Хо̄нтлам хо̄тпат номылматыглан кастыл «Бессмертный полк» нампа акция щё̄пита̄лвес. Та̄н хо̄нт порат порслым рӯтаныл хурияныл тотсыт, щар э̄лыпа̄лт ветераныт ё̄мсыт. Пуссын аквъёт хо̄тахкем со̄тыра э̄лумхо̄лас хуриӈ та̄гыл о̄лыс. Тувыл ма̄хум пуссын Победа паркын минасыт. Тот яныг хо̄нт порат порсум ма̄хум наманыл хансым о̄лэ̄гыт. Ма̄хум а̄хвтасыӈ па̄рт та̄рмыл хорамыӈ лӯптат пинсыт ос мир номылматыглан ма̄гыс мощщан ёллю̄льсасыт. Та хо̄тал Ханты-Мансийск ӯс ос Самарово ма̄т о̄лнэ мир ма̄гыс хо̄нтлын накт урыл э̄ргыт э̄ргуве̄сыт. Каша пӯт па̄йтыглавес, хотьют ка̄сащас, а̄рталаӈкве ве̄рмыс. Ма̄хум йӣквсыт, э̄ргысыт ос нас ща̄гтым ё̄мыгтасыт. Концерт э̄типа̄ла мус минас. Тувыл писалил салют па̄тлуптавес ос ма̄хум ла̄кква та миныгласыт. Югра ма̄т та хо̄талт нила яныг ӯсытт Нижневартовск, Сургут, Нефтеюганск ос Ханты-Мансийскат, пуссын аквъёт яныгса̄т хус со̄тыракем хо̄тпа мӯйлысыт. Та̄н халанылт атхуйпловкем со̄тыра хо̄тпа «Бессмертный полк» нампа акцият хо̄нтлам накт порслым рӯтаныл хурияныл тотым ё̄мсыт.

1100 2015.05.22. Николай МЕРОВ

Лё̄ӈхыт та̄рвитыӈ нак е̄мтыс. Ювле хультум э̄тпост Тюмень – Ханты-Мансийск ӯс лё̄ӈх хосыт минам автобус хо̄миё̄ӈхыс. Тот са̄в ма̄хум сакватахтасыт. Манрыг ты ва̄рмаль е̄мтыс, ГИБДД кӯщай ва̄ӈын хум Константин Александрович Крылов ля̄ххал тотнэ колн потыртаӈкве ёхталас. Константин Александрович ты урыл тох потыртас: «Яныгпо̄ль э̄тпос 27 хо̄талэ̄т, а̄лпыл, нила щё̄ст Тюмень ӯсныл Ханты-Мансийск ӯс мус автобус ма̄хум тотым йис. Ос лё̄ӈхыт яныг во̄ӈха ликмыс. Водитель хо̄тпа ты во̄ӈха по̄ханыл минуӈкве е̄мталастэ ос ат ве̄рмыстэ, лё̄ӈх коныпалн автобусэ вущкасавес, матах щё̄с хо̄миё̄ӈхыгпа̄лыс. Хӯрум хо̄тпа та̄ра порсысыт. Мо̄т ва̄т нупыл кит хо̄тпа пуссын сакватахтасыт. Тув та̄ра лё̄ӈх уральтан полиция минас. Та̄н ты ва̄рмаль по̄слысаныл ос нэ̄пакт хассаныл. Ос мир по̄рсум ма̄гыс уголовный тэ̄ла пӯсвес. Полицият ты ва̄рмаль ёмщакв та̄рапаттыяныл, тувыл ущ лю̄ль ва̄рум хо̄тпа ла̄ваве. Сакватахтам хо̄тпат о̄влэ̄т пуссын ляпат о̄лнэ Горноправдинск па̄выл пӯльницан тотве̄сыт. Тот та̄н мощ пусмалтаве̄сыт. Тувыл Ханты-Мансийск ӯс яныг пӯльницан тотве̄сыт. Автобус ты э̄лыпа̄лт уральтавес, тав ёмщакв рӯпитас. Кит водитель о̄лыс. Акватэ ва̄гта̄л патыс, тэ̄н пе̄нтхатсы̄г, мо̄танэ туп налыманкем кум минас, е̄ри та ё̄ӈхыс. Ань ты ва̄рмаль следователит ёмщакв уральтыяныл».

1100 2015.05.22. Николай МЕРОВ

Мо̄т ӯсыт ёт акваннё̄тхатнэ ва̄рмаль щё̄питаве. Нижневартовск ӯс кӯщай Максим Витальевич Клец мо̄лалнув округ кӯщай нэ̄ Наталья Комарова ёт Крым ма̄н ялыс. Тэ̄н тот о̄лнэ кӯщаит ёт акваннё̄тхатым рӯпитаӈкве потыртахтасы̄г. Кӯщай хум ты урыл ля̄ххал тотнэ ма̄хумн китыглавес. Тав ла̄выс: «Ма̄н Крым ма̄т Симферополь, Евпатория ос Саки ӯсытн ялсӯв. Э̄лаль аквъёт рӯпитаӈкве потыртахтасӯв. Са̄всыр э̄рнэ ва̄рмаль щё̄питаӈкве номсэ̄в. О̄влэ̄т мир ма̄гыс ӯщлахтын колыт ӯнттэ̄в, щаквит, нё̄выль ос мо̄т тэ̄нутпормас тыналаӈкве тот патэ̄в. Пусмалтахтын ва̄рмаль щирыл ос тамле рӯпата ва̄руӈкве патэ̄в. Евпатория ӯст са̄в пе̄с пусмалтахтын пӯльница о̄лы. Та колт мӯсхалыг щё̄питаӈкве э̄ре̄гыт. Школат ханищтахтын ня̄врамыт тув ты ӯщлахтуӈкве тотыглавет. Хӯрмит тэ̄ла ос тамле, Евпаторият ос Саки ӯсыгт са̄в пӯльница о̄лы, тот ма̄хум рактыл сартхатым хосат та̄гыл пусмалтавет. Ты ле̄ккар колт ос хо̄тщё̄питаӈкве э̄ре̄гыт. Ма̄н ань о̄влэ̄т ты ва̄рмалит ёмщакв ханищтыянӯв. Тувыл ущ матыр рӯпата ва̄руӈкве тот о̄вылтахтэ̄в». Ты хосыт Крым ма̄т о̄лнэ ма̄хум ӯщлахтан ма̄гыс о̄с тыг ёхталаӈкве ве̄рме̄гыт. Ма̄н ос та̄н палтаныл яласаӈкве патэ̄в. »

1100 2015.05.22. Людмила ТЕТКИНА

Ханты газетат рӯпитан хо̄тпат нэ̄пак та̄ратасыт. Победа хо̄тал 70 та̄лэ то̄влум кастыл «Ханты ясанг» газетат рӯпитан хо̄тпат «Солдаты Обского Севера» нампа нэ̄пак та̄ратасыт. Яныгпо̄ль э̄тпос 30 хо̄талэ̄т ӯст нэ̄пак ловиньтан колт ма̄хум ты урыл потыртаӈкве акванатхатыгласыт. «Ханты ясанг» ос «Лӯима сэ̄рипос» газетаг кӯщай нэ̄ Раиса Решетникова ла̄выс: «Лов та̄л ювле хультум порат Победа хо̄тал 60 та̄лэ кастыл ма̄н ня̄врамыт ма̄гсыл «Салют Победы» нампа касыл ва̄рыгласӯв. Ма̄н редакциявн са̄в ня̄врам хо̄нтлам рӯтаныл урыл та̄нки хансум потраныл ке̄тсаныл. То̄нт ты тамле нэ̄пак ма̄н ва̄руӈкве номылматсӯв. Ос 1960 та̄л па̄сныл ань ты мус ханты газетат хансым потрыт ты нэ̄пакн ва̄рсанӯв». Ханты газетат рӯпитан нэ̄ Людмила Спирякова потрыт акванатсанэ. Архивт о̄щнэ пе̄с газетатт потрыт хо̄нтсанэ ос тувыл рущ ла̄тӈын толмащласанэ. Ань ты нэ̄пак са̄в ма̄хум ловиньтаӈкве ве̄рме̄гыт. Тав такви ва̄рум рӯпататэ урыл ла̄выс: «Ты нэ̄пак ма̄н таи ма̄гсыл ва̄рыслӯв, войнат хо̄нтлам хо̄тпат ос та порат рӯпитам ма̄хманув ул вос ёрувлавет». Ты юипа̄лт соссаӈ ма̄хум Ассамблеят кӯщай хум Еремей Айпин потыртас: «Ты нэ̄пакт хансым потрыт ань туп яныг архивт ос нэ̄пак ловиньтан колт хо̄нтуӈкве ро̄ве̄гыт. Таяныт рӯпата ва̄рсын, тыи ма̄гсыл ам на̄нан яныг пӯмащипа ла̄тыӈ ла̄ве̄гум. Кондинский район Евра па̄вылт нэ̄мхотьют ань ат о̄лы. Пе̄с порат тот са̄в мир о̄лыс. Война порат та па̄вылныл 50 хум хо̄нтлаӈкве тотве̄сыт. Хультум нэ̄ хо̄тпат ос ня̄врамыт мо̄т па̄вылн ва̄нтлуптаве̄сыт. Тох ты ма̄нь па̄вланув мир та̄л хультсыт. Тамле нэ̄пак ловиньтым, хо̄нтлам ос та порат рӯпитам ма̄хманув номылматыгла̄лыянӯв». Тав юипа̄лт са̄в ма̄хум потыртасыт. Юв миннэ̄ныл э̄лыпа̄лт ка̄сыӈ хо̄тпа ты нэ̄пакыл майвес.

1100 2015.05.22. Александр ВЬЮТКИН

Тав ща̄нь ла̄тӈе̄тыл ня̄врамыт ханищты. Мо̄лты та̄л Москва ӯст ня̄врамыт ханищтан ма̄хум халт Всероссийский нампа касыл о̄лыс. Тув Россия ма̄ янытыл ня̄врамыт са̄всыр ща̄нь ла̄тӈыл ханищтан ма̄хум акванёхталасыт. Пуссын аквъёт ва̄т нупыл акв хо̄тпа касыс. Та̄н халанылт Ольга Александровна Попова о̄лыс. Ам тав ётэ тот ва̄йхатасум. Нэ̄ хо̄тал но̄хнэ̄глын е̄рныл Хабаровский крайныл Москван ёхталас. Тав о̄лнэ ма̄тэ̄т щар яныг я̄ – ты Амур. Такви касылэ о̄вылтанэ̄тэ э̄лыпа̄лт тувыл тотыглам атыӈ хӯлыл, сэ̄мыл ос выгыр хӯл по̄рыл жюри ма̄хманэ майлысанэ. Ольга Александровна о̄лнэ па̄влэ Нижние Халбы тох ла̄ваве. Та па̄выл канэ атхуйплов но̄т па̄сыл о̄лы. О̄выл ханищтахтын кол 1927 та̄лт пӯсвес, «выгыр ё̄рнколыг» ла̄ввес. Нанаец ма̄хум ханищтан ма̄гыс тув ёхтум нэ̄ Александра Петровна Путинцева таве пунсыстэ. Па̄выл янытыл матыр пӯмащ о̄лыгланэ̄тэ порат, пуссын тот ва̄рыглавес. Ань Нижние Халбы па̄вылт яныг тит накпа ханищтан кол ӯнттым о̄лы. Ольга Александровна тот рӯпитанэ̄тэ па̄сныл лов та̄лыг ты то̄влыс. Тав нанайский ла̄тӈыл потыртан ма̄гсыл ня̄врамыт ханищтан коныпал, иӈ са̄в мо̄т пӯмащ ханищтым рӯпиты. Касылыт о̄лыгланэ̄ныл порат тав ня̄враманэ ща̄нь ла̄тӈаныл щирыл ва̄тихал но̄хпатыглэ̄гыт. Потыртан ма̄ныл а̄стламе порат Ольга Александровна ла̄выс: «Па̄влыӈ ма̄т о̄лнэ ма̄хум ла̄тӈув мощ хотёрувласаныл, рӯпата ат хо̄нтнэ̄ныл ма̄гсыл са̄в ма̄ньлат хо̄тпа винан патхатэ̄гыт. Тох э̄лаль те е̄мты, ма̄н мирув хот та о̄ймыгты. Ты ма̄гсыл ам маныр ве̄рме̄гум, пуссын ва̄ре̄гум, ня̄врамыт ульнаг о̄луӈкв ат та̄ртыянум. Та̄н ляпанылт, та̄нанылн нё̄тым о̄лэ̄гум. Маныр ам ат ве̄рме̄гум ос ат ха̄сэ̄гум, то̄ват а̄тяныл, о̄парищаныл нё̄тэ̄гыт, та̄н ётаныл во̄раим ос хӯл а̄лыщлым яласэ̄гыт. Тох ня̄врамыт ма̄к пе̄с ма̄н о̄лупсав ос ла̄тӈув о̄лнэ хуритэ̄т выганыл. Ам номсэ̄гум, та щирыл ма̄н ла̄тӈув тах хульты». Нэ̄ ща̄нь ла̄тӈе ма̄гсыл сыме сака ща̄рги. Ам таве са̄в со̄т, са̄в щунь ла̄тӈыл те̄тылум. Ханищтан ня̄враманэ та̄нти ща̄нь ла̄тӈаныл хот ул вос ёрувлыяныл, э̄лаль вос тотыяныл ос ёмщакв ханищтыяныл.

1100 2015.05.22. Тамара МЕРОВА

Ащо̄йкатэ ос ане̄кватэ номияге. Оксана Пуховец ань Белоярский ӯст о̄лы. Нэ̄ Ягрим па̄вылт самын патыс, оматэ Клара Саратина (Пуховец) о̄с тот о̄лы. Оксана ма̄навн ащо̄йкагеане̄кваге о̄вылтыт таи потыртас: – Ам ащо̄йкам Константин Алексеевич Саратин 1910 та̄лт Ялъю̄с па̄вылт самын патыс. Ос 1942 та̄лт а̄пщияге, каӈке ёт хо̄нтлуӈкве ке̄тве̄сыт. Тав Ленинград ӯс по̄хат хо̄нтлыс. Хум хо̄тпат та е̄рт сака та̄рвитыӈыг воритотсыт. Тот хо̄т о̄выл щёс сакватавес, ос мощ пусмалтахтаме юипа̄лт э̄лаль хо̄нтлуӈкве минас. 1943 та̄лт ре̄тыӈ ю̄свой э̄тпост тав ёмщакв лусытаме ма̄гыс ща̄й айнэ а̄ныл мӯйлуптавес. 1944 та̄л ва̄ти хо̄тал э̄тпосныл ащо̄йкам Белорусский фронтыт хо̄нтлуӈкве патыс. То̄нт тав китынтыг сакватавес. Победа хо̄тал е̄мтнэ порат тав юн о̄лыс, а̄гмыӈмосыӈ, сакватахтам э̄лумхо̄ласыг юв ёхтыс. Ню̄лмиянэ ма̄гыс 1948 та̄лт а̄тимыг е̄мтыс. Та порат тав налыман нупыл нёлолов та̄лэ то̄влыс. Иӈ ма̄ньлат хо̄тпаг кос о̄лыс. Юн о̄лме сыс Константин Алексеевич колхоз кӯщаиг паттыглавес, хӯрум та̄л тот рӯпитас. Тав мо̄т ма̄хмыт ёт хӯл алыщлым, во̄раим ка̄ркамыг рӯпитас. Ма̄хум таве ёмас сымыӈ ос ощхуль ва̄рнэ хо̄тпаг номияныл. Ма̄н таве о̄с ёмас, посыӈ номтыл ка̄стылӯв, ань туп хуритэ сунсыгла̄лылӯв. Хо̄нтлын ма̄ныл пищмат тав юв ат ке̄тыглас, рущ ла̄тӈыл хансуӈкве щар ат ха̄сыс. Туп хо̄нтламе сыс тав рущ ла̄тыӈ торгамтаӈкве патыстэ ос мощ потыртаӈкве ханищтахтас. Юв акв хури тотыглас, ма̄н ань та хури сака ӯргалым о̄ньщилӯв. Ма̄гылт о̄щнэ «Орден Красной Звезды» посыл мӯйлупта̄лвес. Таи лю̄ль, Ялъю̄ст ӯнлум колув пормасанэ, э̄рнэ нэ̄паканэ, ма̄гылт о̄щнэ посанэ лутэ̄т на̄йн хотталь тотве̄сыт. Нэ̄матыр ат хультыс. Ане̄квам Мария Прокопьевна Саратина ёт тэ̄н нила ня̄врам янмалтасы̄г. Ащо̄йкам хо̄нтлуӈкве минам порат Анатолий, Надежда иӈ ма̄ниг о̄лсы̄г. То̄нт ане̄квам та̄рвитыӈыщ о̄лыс, ётылнув Клара, ам омам, самын патыс. Лёня пыге̄н война юипа̄лт самын патыс. Мария ане̄квам о̄с ка̄ркам нэ̄г о̄лыс, рӯпат та̄л нэ̄мхуньт ат ӯнлантас, аквтох хӯл алыщлым, то̄внакт во̄раим яласас. Хӯл солвалтасыт, туи пил са̄в ва̄тсыт ос картёпка, капуста колхозт янмалтасыт. Мис о̄щсыт, та̄нки щаквит во̄й ва̄рыгласыт ос фронтын ке̄тыгла̄лсаныл. Тав рӯпатаӈ нэ̄паке̄т туп акв ва̄рмаль хансым о̄ньщис: «1936 та̄лныл 1958 та̄л мус «Сталин» нампа звероферма кӯщаиг рӯпитас». Соссаӈ ма̄хманув тот сэ̄мыл совыӈ охсарыт янмалтасыт. Тав са̄тпан та̄лэ мус о̄лыс. Ане̄квам ос ащо̄йкам Ялъю̄с па̄выл пе̄с ма̄ньщи савыӈкант ёлщё̄питавесы̄г. Тэ̄натэ̄н ма̄н Троица хо̄талт акваг ка̄стыянӯв. Ане̄квам о̄лме̄т ма̄хумн самын патум хо̄талэ урыл китыглавес, тав ювле ла̄выглам: «Омам ла̄выс, ам Троица хо̄талт самын патсум». Ащо̄йкам ёт тэ̄н сас нёмса хо̄тпаг о̄лсы̄г, нэ̄мхуньт ма̄хум э̄лыпа̄лт ат ёралахтасы̄г, нэ̄мхотьют ат люкамтасы̄г. На̄н ань на̄нки яныгпа̄ла рӯтанын ӯргалым о̄ньще̄н, та̄н та̄рвит порат о̄лсыт, са̄в нуса ва̄сыт. Пуста̄гыл пуссын э̄лаль вос о̄лэ̄гыт.

1100 2015.05.22. Валентина УЗЕЛЬ

Потраныл а̄щаныл урыл о̄лсыт. Ӯсувт о̄лнэ «Торум Маа» нампа музейт рӯпитан ма̄хум я̄ӈк на̄тнэ э̄тпос 8 хо̄талэ̄т ӯсыӈ мир акванатыгласаныл, та̄н Победа хо̄тал кастыл ляпа рӯтаныл урыл мирн вос потыртасыт. Ты э̄типа̄ла та̄н тох намая̄лсаныл – «И помнить страшно, и забыть нельзя». О̄влэ̄т музей кӯщай ва̄ӈын нэ̄ Эрика Сургутскова потыртас. Тав ла̄выс, та̄н музеянылт рӯпитан нэ̄т хосат та̄гыл Победа хо̄тал кастыл щё̄питахтуӈкв о̄вылтахтасыт. 1941-1945 та̄лыт сыс ма̄н округувныл са̄в хо̄тпа хо̄нтлуӈкв тотве̄сыт. Ань та̄н урыл потыртан ма̄гсыл мир ты атыглавес. Ханты ос ма̄ньщи хум хо̄тпат хӯл алыщламаныл порат вуйве̄сыт, нас катерн ӯнттымат, тох э̄лаль та тотымат. Ханты хум Тимофей Молданов потыртас, тав пе̄с архивнэ̄пакытт ты урыл ловиньтас – война о̄вылтахтам порат репрессиян тотым ма̄хум ляпа рӯтаныл хо̄нтлуӈкве ат вуйлуве̄сыт, та̄н 1942 та̄лт ущ тотуӈкв патве̄сыт. Э̄лаль тав а̄кве урыл потыртас, нэ̄ наме о̄лыс – Анна Ефимовна Молданова. Анна во̄раям хо̄тпаг о̄лыс, тав рӯтанэ̄н потырта̄лыс – яныг планкапаил хансаве, акв хо̄тал сыс манса̄вит лэ̄ӈын ка̄тнпаттуӈкв таве̄н э̄ри. Ня̄враманэ пуссын хуе̄гыт, тав э̄ткотиль мус лэ̄ӈныт нуим та ӯнланты. Ӯй совыт то̄сэ̄гыт, пуссын тынтлавет. Па̄влыӈ а̄гит, нэ̄квет совныл па̄сса ю̄нтсыт. Ты па̄ссат пуссын фронтын те̄тыглаве̄сыт. Е. А. Нёмысова ос такви а̄ще урыл потыртас, тав а̄ще о̄с та̄ра войнан тотвес, акв та̄л хо̄нтлас, сака та̄кыщ сакватавес, юв те̄твес. Юн пусмалтаӈкв о̄вылтавес, матах хо̄тал о̄лыс, тувыл а̄тимыг та е̄мтыс. То̄нт Евдокия Андреевна ма̄нь а̄гирищиг о̄лыс, а̄ще хумус юв ёхтыс, тав ань ты мус номитэ. Ты э̄ква Полноват па̄вылныл о̄лы, тот яныгмас. Хо̄нт порат па̄вылт о̄лум нэ̄квет салта̄тыт ма̄гсыл акв тулё̄влыӈ пасса сагсыт, хо̄нтлан ма̄хум па̄тлуптаӈкв ёмащакв вос ве̄рмысыт. Та е̄рт о̄лум ханты ма̄хум са̄выӈпа̄лэ пуссын па̄ля о̄щсыт, нэ̄квет па̄ля пунныл сэ̄тап ва̄рсыт. Та сэ̄тапныл носкит ос па̄ссат сагсыт. Ань Евдокия Андреевна пе̄с хурит, са̄всыр документнэ̄пакыт пуссын акванатыянэ, ловиньтан нэ̄пакыг ва̄руӈкв таӈхи. Та хо̄талт тит ма̄ньщи хо̄тпаг потыртасы̄г – ты А. И. Сайнахова ос А. Н. Мехнина. Война о̄лум порат Анастасия Ильинична туп онтолов та̄лэ то̄влыс. Та̄н кос ня̄врамыт, па̄влыӈ ма̄хум ёт пуссын аквтем рӯпитасыт. Альбина Николаевна ос ты урыл потыртас. Та̄н а̄щаныл хо̄нтлам ма̄ныл юв ёхтыс, ня̄враманэ акваг титыгласанэ: «На̄н а̄тян хотьют? » Ня̄враманэ ювле ла̄ве̄гыт: «Наӈ». Тав ювле ла̄ви: «А̄ти, на̄н а̄тян – Сталин! » Тох ты пӯмыщ потыртым, ма̄хум хо̄нтлам рӯтаныл ты ка̄стысаныл. Матъёмас тамле ёмас тэ̄ла ва̄рнэ хо̄тпат ӯст о̄лэ̄гыт.

1100 2015.05.22. Тамара МЕРОВА

Та̄н а̄щта̄л яныгмасыт. А̄с-угорский институтт рӯпитан хо̄тпат Победа 70 та̄лэ то̄влын кастыл мӯйлын нак ва̄рыгласыт. Та̄н Ханты-Мансийскат о̄лнэ матумпа̄ла соссаӈ ма̄хум акванатыгла̄лсаныл. То̄ват а̄щаныл войнан тотыглаве̄сыт, то̄ват ма̄нь та̄гыл та̄наныл ва̄щинтым воссыг нэ̄мхуньт ат та ка̄саласаныл, та̄н та̄лэ̄тыл яныгмасыт. Тув мӯйлуӈкве Евдокия Александровна Белявская, Мария Кузьминична Волдина, Мария Сергеевна Мерова, Руфина Михайловна Новопашина, Евдокия Георгиевна Отшамова, Людмила Степановна Отшамова, Андрей Семёнович Тарханов ос Владимир Вячеславович Хромов ёхталасыт. Нэ̄пак ловиньтан колнакт рӯпитан нэ̄ Е. П. Степанова Победа кастыл суссылтап щё̄питыглас. Тувыл институт кӯщай ва̄ныӈ нэ̄ М. В. Воробьёва та̄н ётаныл пащалахтас, ёмас сымыӈ ла̄тӈыл ла̄всанэ, та юипа̄лт та̄н пуссын мӯйлупсал майве̄сыт. С. А. Герасимова ос Т. В. Волдина война порат э̄ргыглам э̄ргыт урыл потыртасы̄г. Та пилыщмаӈ порат ма̄хум сака ул вос хурахласыт, сака ва̄гта̄лыг ул вос е̄мтсыт – та̄н ма̄гсыланыл ка̄сыт ва̄рыглаве̄сыт. То̄ва хум хо̄тпат та̄нки баяныл ёнгуӈкве ха̄ссыт, ос акванатхатыгламаныл сыс э̄ргысыт, мощ ӯщлахтасыт. Ань Валерий Ледков мӯй хо̄тпат ма̄гыс о̄с гитарал ёнгыс ос Булат Окуджава, Владимир Высоцкий, Юрий Визбор хансум э̄рганыл э̄ргысанэ. Тувыл хо̄нтлуӈкве ялум хо̄тпат Павел Коган, Семён Гудзенко, Юрий Грунин, Давид Самойлов, Борис Слуцкий, Юрий Левитанский, Фёдор Сухов хансум стиханыл ловиньтасанэ. Ты э̄ргыт ос стихыт хосыт хо̄нтлам ма̄хманув пуссын номтаныл щирыл та̄ксарыг е̄мталасыт, пилта̄лыг э̄лаль хо̄нтлысыт. Ма̄н о̄с ты стихыт ловиньтым порат та̄н та̄рвит о̄лупсаныл оснпаттыянӯв, номтыт о̄ньщиглыянӯв. Та юипа̄лт мӯй ма̄хум пуссын пасан ва̄тат во̄вве̄сыт ос тот та̄н ща̄й айнэ̄ныл сыс та̄нки а̄щаныл, о̄паныл, ащо̄йканыл урыл потыртасыт. Андрей Семёнович Тарханов Ленинград ӯсн ханищтахтуӈкве минам порат а̄ще ёлщё̄питым ма̄тэ кинсуӈкве ялум. Тав а̄ще Семён Прокопьевич Тарханов та ӯс ляпат 286 стрелковый дивизият лусытас. Ос 1944 та̄л лӯпта э̄тпост аквъёт хо̄нтлам ма̄хманэ ёт Каннельярви нампа па̄вылт порславе̄сыт. Пуссын тот хо̄т ёлщё̄питымат. Ты па̄выл Финляндия хо̄н ма̄ ляпат о̄лы, мори хо̄тпа тув ялуӈкве ат та̄ртыглавес. Ос та ма̄н тав акв щёс ялум, тот хо̄нтлам хо̄тпат номеранэ щирыл кисхатас. Та па̄сыл са̄в та̄л ювле хультыс. Ётылнув тув ялме порат Андрей Семёнович ка̄салас та ма̄ ло̄мт хотсыстамтыма. Кӯщайлахтын хо̄тпат тот матыр ӯнттуӈкве ла̄ве̄гыт, тох та капыртэ̄гыт. Мария Сергеевна Мерова ань тыг мус а̄ще Сергей Егорович Хатанев порслым ма̄тэ ат ва̄гтэ. А̄ще̄ныл туп хӯрум пищма хультсыт, та̄н Грозный ӯсныл ке̄тым о̄лсыт, тав тот пусмалтым о̄щвес. Таи туп та̄рапаттым о̄лы, тав 168 стрелковый батальонт лусытас. Ос 1944 та̄лт ма̄нь таквс э̄тпос хо̄тхойлов щислат 5062 ЭГ (эвакогоспиталит) а̄тимыг е̄мтыс. Тувыл оматэ̄н нэ̄матыр похоронканэ̄пак ат ёхталам. Ётыл ущ та̄рапатыс – та хансум нэ̄паке̄т щар ат о̄лыглам па̄выл хӯлтвес, тот Саранпа̄выл миркол мо̄т щирыл хансым о̄лыс. Ань ка̄сыӈ мӯй хо̄тпа такви рӯтанэ о̄вылтыт ла̄тыӈ ва̄рыс, ос ты ка̄сыӈ хо̄тпаныл урыл я̄нас потыр хансуӈкве ро̄ви. Институтт рӯпитан ма̄хум та̄н потраныл о̄с диктофонын хассаныл , тувыл матыр нэ̄пак тах ул щё̄питэ̄гыт.

1100 2015.05.22. Людмила ТЕТКИНА

Соссаӈ ма̄хум яныг ӯсн суссылтап тотыгласыт. Та э̄тпос 22-26 хо̄таланэ сыс «Сокровища Севера» нампа суссылтап Москва ӯст рӯпитас. Аквта порат тот «Законодательное обеспечение жизнедеятельности коренных малочисленных народов Севера, Сибири и Дальнего Востока» нампа конференция ва̄рыглавес. Лӯима̄ янытыл о̄лнэ мощщаг хультум соссаӈ мирыт ма̄гсыл манхурип са̄кконыт ань рӯпитэ̄гыт ос манхурип са̄кконыт пирмайтаӈкве иӈ э̄ри, та урыл ма̄хум тот потыртасыт. Россият о̄лнэ ма̄нь мирыт Ассоциацияныл 25 та̄лэ то̄влын кастыл «Четверть века – итоги и перспективы» нампа конференция о̄с щё̄пита̄лвес. Нэ̄пак хаснэ ма̄хум та̄нки хансум потраныл ос стиханыл урыл «Душа Севера» нампа хо̄нтхатыглан ва̄рмаль о̄лум порат потыртасыт. Ямал ма̄ныл ёхталам ханты нэ̄ Зинаида Лонгортова такви хансум потре «Царская дорога» тот ловиньтастэ. Югра ма̄ныл суссылтапн «Лангки», «Обь», «Верхнее-Вахская» общинат ос «Регион-К» нампа компания ос такви ма̄гсылэ рӯпитан хум Владимир Водопьянов са̄всыр щирыл щё̄питым тэ̄нутыт тот тыналасыт. Мо̄т общинат ёт халанылт касым та̄н са̄всыр номинацият но̄хпатсыт. Андриетта Вагнер «Национальное жилище» нампа касылт о̄выл местал майвес. Хӯлыт, нё̄влит, пилыт, ла̄хсыт ос мо̄т тэ̄нутыт ма̄гсыл общинат рӯпитан ма̄хум тот о̄с янытлаве̄сыт. «Торум Маа» нампа музейт рӯпитан э̄ква З. Н. Лозямова ос Аган па̄выл музей кӯщай э̄ква Ф. С. Бондаренко а̄канит ос ханты маснут ю̄нтуӈкве ма̄хум ханищтасы̄г. А. Ю. Пельментиков хум йӣвыл са̄всыр аньщарыт тот яктыс. Та̄н о̄с янытлан нэ̄пакыл майве̄сыт. Ма̄н ӯсувныл Лидия Алясова, Виктория Костылева, Алла Русмиленко хӯл совныл ю̄нтым маснутыт, турло̄псыт ос мо̄т са̄всыр пормасыт тот суссылтасыт. Та̄н о̄с тот янытлаве̄сыт.

1100 2015.05.22. Светлана РОМБАНДЕЕВА

Ма̄ньщи поэтув номилӯв. Яныгпо̄ль э̄тпос 28 хо̄талэ̄т Ханты-Мансийск ӯст о̄лнэ «Торум Маа» музейт ма̄ньщи хо̄тпав Юван Шесталов урыл потыр о̄лыс. Тав ма̄гсылэ тот я̄нас колнак щё̄питавес, тох намаявес: Мемориальный кабинетмузей Ювана Шесталова. Ма̄хум тув ёхталанэ̄ныл порат тав уре̄т потыртаӈкве патэ̄гыт – тамле хо̄нтхатыглап ла̄ваве «Литературная гостиная». Ма̄н, ма̄ньщи ма̄хум, тув о̄с ялсӯв. То̄ва нэ̄ хо̄тпанув ма̄ньщи ос ханты суп масмыт, то̄рыл пинхатамыт. Та̄н ляльтаныл сунсуӈкве татем ёмас о̄лыс. О̄выл ла̄тыӈ музейт рӯпитан нэ̄ тав ла̄выс, ты колнак урыл потыртас, поэтув ӯлыластэ. Ма̄ньщи нэ̄ Динара Гындыбина ма̄ньщи э̄рыг э̄ргыс, школат ханищтахтан пыгрищ ос «Щёра, щёра о̄выл тӯйт. . . » Юван Николаевич хансум стихотворениятэ потыртастэ. Владимир Вячеславович Хромов ла̄тыӈ ла̄выс, тэ̄н Юван Николаевич ёт Ленинград ӯст ханищтахтасы̄г. Та̄н ма̄ньлат ма̄хум хумус тот о̄лсыт, ты урыл потыртас. То̄ваныл ань ма̄ янытыл ва̄вет, нэ̄пак хаснэ хо̄тпа нам о̄ньщуӈкве патсыт. Ма̄ньщи хо̄тпав Анастасия Ильинична Сайнахова потыртас. Тав ла̄вме щирыл, ань рущ ма̄хум намыӈсуиӈ поэт о̄ньще̄гыт – А. С. Пушкин, ма̄ньщи мирув халт тамле хо̄тпа о̄с о̄лыс, ты Юван Николаевич. Тав ты рущ поэт хольт ма̄ янытыл о̄с ва̄ве, тав хансум потранэ ос стихотворениянэ са̄в мо̄т ла̄тӈытын толмащлаве̄сыт. Юван Николаевич ма̄нь порат манхурип о̄лыс, хумус яныгмас, ты урыл тав э̄ще А. Н. Мехнина потыртас. Са̄всыр пӯмыщ тэ̄лат номылмата̄лсанэ, ма̄хум мощ мовиньтасыт. Тот рӯпитан хо̄тпат ла̄всыт, ань тамле хо̄нтхатыглапыт ва̄тихал ва̄руӈкве патавет. Лӯи ма̄т о̄лнэ, о̄лум поэтыт ос нэ̄пак хаснэ ма̄хум урыл потыртаӈкве патэ̄гыт. Хотьют, э̄рыӈ, ты музей колнакн ялуӈкве ка̄сащи, ялэ̄н.

1100 2015.05.22. Людмила ТЕТКИНА

Са̄в ня̄врамыӈ колта̄гыл. Я̄ӈк на̄тнэ э̄тпос 15 хо̄талэ̄т ще̄мьят янытлан хо̄талыг о̄лыс. Та хо̄талэ̄т округув янытыл са̄всыр суссылтапыт, концертыт ва̄рыглаве̄сыт ос са̄в ня̄врам янмалтан ще̄мьят янытлаве̄сыт. Ты ялпыӈ хо̄тал кастыл ам ма̄ньщи ще̄мья урыл хансэ̄гум. Семён ос Мария Алгадьевыг Хулюмсӯнт па̄вылт о̄лэ̄г. Нэ̄гхумыг нила ня̄врам о̄ньще̄г. Тэ̄н сас яныг ще̄мьягт яныгмасы̄г. Семён Ме̄ӈквъя па̄вылныл о̄лы, тав ща̄нягеа̄щаге нёлолов ня̄врам о̄щсы̄г. Мария ос Кимкъясуй па̄вылныл о̄лы. Тав омагеа̄тяге о̄с нёлолов ня̄врам янмалтасы̄г. Тэ̄н аквъёт 50 та̄л арыгкем о̄лэ̄г. Семён 25 та̄л «ГазпромтрансгазЮгорск» нампа организацият рӯпиты. Яныг пыге̄н Максим китыт классыт ханищтахты, Кристина ос Полина садикн ялантэ̄г. Мария ма̄нь пыге Данил ёт юн о̄лы. 2014 та̄лт ща̄нит янытлан хо̄тал кастыл ма̄ньщи нэ̄ са̄в ня̄врам о̄щнэ̄тэ ма̄гсыл янытлавес, Ха̄льӯс район миркол кӯщай па̄лыл пӯмащипа ла̄тӈыӈ пищмал майвес. Мария сака ка̄ркамыг ос ма̄щтыр нэ̄г о̄лы. Таквинатэ̄н ос ня̄враманэ ма̄гсыл хорамыӈ ма̄ньщи супыт ю̄нты. Ты коныпал ма̄ньщи ла̄тӈыл э̄ргуӈкве ос йӣквуӈкве ёмащакве ха̄сы. Хулюмсӯнт па̄вылт са̄всыр ялпыӈ хо̄талыт э̄ргуӈкве ос йӣквуӈкве акваг во̄виньта̄лаве. Ань ня̄враманэ мощ яныгмасыт, та̄наныл ма̄ньщи ла̄тӈыл потыртаӈкве ханищтыянэ. Мария ма̄нь та̄гыл пе̄с йис ва̄рмалитыл пӯмщалахты. Кульпас па̄выл школат «Сэ̄рипос» нампа ансамблин ялантас, тот э̄ргыс, йӣквыс. Школа а̄стламе юипа̄лт Ханты-Мансийск ӯсн воспитателиг ханищтахтуӈкве минас. Тот ёмащакв ханищтахтас, тыи ма̄гсыл 1994 та̄лт мо̄т ма̄ньлат хо̄тпат ёт тав Саранск ӯсн финноугорский Конгрессын ке̄тыглавес. Ты юипа̄лт Санкт-Петербург ӯст университет а̄стлас. Тувыл хо̄т та̄л Кульпас интернатыт рӯпитас. Воспитателиг рӯпитым са̄всыр ма̄ньщи мо̄йтыт, а̄мщит, потрыт, э̄ргыт акванатыс. 2005 та̄лт Мария хум ва̄рыс ос Хулюмсӯнт па̄вылн о̄луӈкве ва̄нтлас. Ань ма̄нь пыге ёт юн ӯнлым, тав ю̄нсхаты ос сакныл харты. Ма̄щтыр нэ̄ ла̄выс: «Ю̄нсхатуӈкве омамн ханищтаве̄сум. Ань са̄всыр машинкат о̄лэ̄гыт, ма̄ньщи суп ю̄нтылтаӈкве тамле утыл молях ро̄ви. Ам тай супанум пуссын ка̄тыл ю̄нтыянум. О̄влэ̄т нас па̄кпалыл ва̄рсанум, та юипа̄лт са̄всыр нё̄тнэ хансал ю̄нтуӈкве патсанум. Сакныл хартуӈкве интернатыт ханищтахтасум. Ань а̄гиягум сас тамле нё̄тнэ турло̄псыл ва̄рсагум». Мария ю̄нтум ма̄ньщи супанэ ос мо̄т пормасанэ Ханты-Мансийск ӯсн ремёсла центрын ке̄тыгласанэ. Тот рӯпитам выставкат пормасанэ суссылтаве̄сыт. То̄нт тав «Мастер года – 2008» намыл майвес. Са̄всыр ялпыӈ хо̄талын, конференциян, ханищтапын ялантым Мария янытлан нэ̄пакыл майлувес. Ань тамле янытлан нэ̄пак тав са̄в о̄ньщи.

1100 2015.05.22. Людмила ТЕТКИНА

Э̄ква такви о̄йкатэ урыл потыртас. Хо̄нтлам нак о̄вылтахтам порат Ня̄хщамво̄ль па̄вылт о̄лум хум хо̄тпат о̄с хо̄нтлаӈкве минасыт. Та̄н халанылт са̄в хо̄тпат юв ат ёхтыс. Та па̄вылт миркол по̄хат памятник ва̄рвес, войнат по̄рслым ма̄хум наманыл тув хансым о̄лэ̄гыт. Ка̄сыӈ та̄л я̄ӈк на̄тнэ э̄тпос 9 хо̄талэ̄т Ня̄хщамво̄льт о̄лнэ ма̄хум та̄наныл ка̄стуӈкве ос хорамыӈ лӯпта тув пинуӈкве ёхталэ̄гыт. Войнаныл юв ёхтум хо̄тпат пуссын а̄тимыг е̄мтсыт. Ня̄хщамво̄ль па̄вылт хӯрум хо̄тпа «Труженик тыла» намыл маим о̄лэ̄гыт, ос акв э̄ква Александра Васильевна Самбиндалова «Вдова участника ВОв» нам о̄ньщи. Та па̄вылн ялмум порат ам ты рущ э̄ква ёт хо̄нтхатыгласум ос потыртасум. Тав тамле потыр о̄ньщас: – Ам 1931 та̄лт Усть-Манья па̄вылт самын патсум. Миша а̄пщирищум ёт иӈ ня̄врамыг о̄лсуме̄н, хунь а̄щме̄н а̄тимыг е̄мтыс. Ща̄ньме̄н мо̄т хум ва̄рыс. Ты юипа̄лт ма̄н Ня̄хщамво̄ль па̄вылн о̄луӈкве ва̄нтласӯв. Ща̄нюм китыт о̄йкатэ Илья Павлович Батманов о̄лыс. Э̄кватэ хотталь щалтыс, тав нёлолов ня̄враманэ ёт такке̄т хультыс. Ща̄нюм тав ня̄враманэ янмалтасанэ ос ты коныпал са̄т ня̄врам самын паттыс. То̄нт ам лов та̄л янытыг о̄лсум. Хӯрум класс туп а̄стласум. Ща̄нюм о̄с акваг рӯпитас, ам ты ня̄врамыт нёвитым юн о̄лсум. Школан воссыг ат ялантасум. Та̄н мощ яныгмасыт, юн хультуптыянум, ща̄нюм палт ха̄йтэ̄гум, таве̄н нё̄тэ̄гум. Тав колхозт рӯпитас. Война о̄вылтахтам порат яглаӈум ос колхозт кӯщаиг паттувес. Ще̄мьяв яныг о̄лыс, ма̄н мис, лув, щищкурек о̄щсӯв. Колсо̄ри рӯпата ва̄рим ос ня̄врамыт нё̄витым та яныгмасум. 1950 та̄лт хум ва̄рсум. О̄йкам наме Кирилл Васильевич Самбиндалов о̄лыс. Тав 1942 та̄лт таквсы порат хо̄нтлаӈкве минас. Хо̄нтлым ка̄тэ, ла̄глэ сакватавесы̄г, сака хоса пусмалтахтас. Война оигпам юипа̄лт юв ущ ёхтыс. Хо̄нтлым «За оборону Ленинграда» ос мо̄т ме̄талитыл майвес. Юв ёхтыс, инвалидхо̄тпаг хасвес, пенсияолныл ойтвес. Тав хо̄нтламе ма̄гсыл па̄влыӈ ма̄хумн сака янытлавес. О̄йкам хо̄нтлын нак урыл щар ат потырта̄лас, то̄ва порат та урыл китыглаве, тав ювле акваг ла̄выглас: «Маныр ма̄гсыл та пора урыл потыртаӈкве, таса̄вит мир тот по̄рслувес». Тав каӈке Степан Васильевич Самбиндалов Ленинград ӯс по̄хат хо̄нтлас, та ма̄т ёлщё̄питавес. Ос акв каӈке Семён Васильевич Самбиндалов о̄с хо̄нтлаӈкве ялыс, юв ёхтыс. О̄йкам колта̄гланылт ща̄нягеа̄щаге палт щар ма̄нь пыгыг о̄лыс. О̄ныпум ам палтум хунь ёхталас, акваг ла̄выглас: «Ма̄нь пыгум тай рущ нэ̄ тотас». О̄влэ̄т тай ам ма̄ньщи ла̄тӈыл ат потыртасум. Тувыл о̄йкам ёт о̄лым, ма̄ньщи ла̄тӈе ёмащакве ханищтаслум. Войнат тав та̄кыщ саквата̄лвес, та̄рвитыӈ рӯпата ва̄руӈкве ат ве̄рмыс. Колхозт кӯпнит рӯпата ва̄руӈкве паттувес. Ты коныпал акваг во̄раим, хӯл алыщлым яласас. Ам ос ня̄враманув ёт юн о̄лсум. О̄йкам 1966 та̄лт а̄тимыг е̄мтыс. Та юипа̄лт мирколн колкан ловтуӈкве ос кур па̄лтуӈкве патхатасум. Тувыл та рӯпатаныл пенсиян минасум. Александра Васильевна Самбиндалова о̄йкатэ ёт туп 16 та̄л аквъёт о̄лсы̄г, са̄т ня̄врам о̄щсы̄г. Пити патта а̄гитэ иӈ ма̄ниг о̄лыс, хунь о̄йкатэ а̄тимыг е̄мтыс. Ня̄враманэ такви янмалтасанэ. Ань акв а̄гитэ ще̄мьяӈ та̄гыл Германият о̄лы, кит а̄гияге – Полум па̄вылт, акв а̄гитэ Ня̄хщамво̄ль па̄вылт о̄лы. Акв пыге а̄тимыг е̄мтыс, китыт пыге Саранпа̄вылт о̄лы о̄с акв пыг Ня̄хщамво̄ль па̄вылт о̄лы. Победа хо̄тал 70 та̄лэ то̄влын кастыл Александра Васильевна о̄с янытлавес, мӯйлупсал юв тотвес. Ань хо̄нтлам ма̄хум ёмащакве ӯргалавет, нё̄тавет. Ос хо̄нтлам хо̄тпат э̄кваныл о̄с ат ёрувлавет. Александра Васильевна о̄йкатэ хо̄нтламе ма̄гсыл 2011 та̄лт йильпи колыл ӯнттувес. Ты та̄л тав 84 та̄лэ то̄влыс. Э̄ква мис о̄ньщи, такви посытэ, а̄гияге̄н ос пыгаге̄н пум ва̄руӈкве нё̄таве.

1100 2015.05.22. Светлана РОМБАНДЕЕВА

Таратов ма̄хманув урыл. Ты хурит Ха̄льӯс район Ло̄пмус па̄вылт о̄лнэ ма̄ньщи хум по̄слым о̄лы – Альберт Владимирович Таратов. Тав 1982 та̄л яныгпо̄ль э̄тпосэ̄т Ло̄пмуст самын патыс. Кульпас па̄вылт ханищтахтас, интернатт о̄лыс. 1999 та̄лт школа а̄стластэ, армиян вуйвес. О̄влэ̄т Краснодарский крайт лусытас, тувыл Чечня ма̄н Гудермес ӯсн ке̄твес. Тот та̄л арыгтем лусытас. Армияныл юв ёхтыс, нэ̄ тотыс, кит а̄гирищ о̄ньще̄г. Яныг а̄гитэ̄н Ксения, ань о̄выл классыт ханищтахты, ма̄нь а̄гитэ̄н Аня. Альберт Владимирович кит каӈк ос увщи о̄ньщи. Яныг каӈке Сергей Ха̄льӯст ще̄мьятэ ёт о̄лы, ма̄нь каӈке Александр о̄с ще̄мьяӈыг е̄мтыс, Ло̄пмуст о̄лы. Люда увщитэ Саранпа̄вылт о̄лы, о̄йкатэ̄нтыл хӯрум пыг о̄ньще̄г. Тав э̄кватэ ма̄ньщи нэ̄, Саранпа̄вылныл о̄лы, наме Лена, а̄ги о̄парищ наме Тихонова. Тав каӈк ос э̄щ о̄ньщи, Сергей ос Надя. Э̄ще хум ва̄рыс, Саранпа̄вылт о̄лэ̄г. Та̄н тув ва̄тихал яланта̄лэ̄гыт. Альберт Владимирович ла̄ви: «Тот рӯпата о̄лы кос, ос о̄лнэ кол а̄тим. Ло̄пмуст ань рӯпата а̄тим, тох хотмус та о̄лэ̄в. Мо̄лты порат туи колыт ӯнттысӯв, олнло̄мтыл мощ ойтыглавесӯв». Оматэ Клавдия Ивановна 1942 та̄лт ма̄нь таквс э̄тпост самын патыс. Тав сака ка̄ркам э̄ква о̄лыс, са̄в рӯпитас, ӯйхул акваг о̄ньщас, пум ва̄рыс. Хо̄тпа нупыл сымыӈ э̄лумхо̄лас о̄лыс. Мо̄лты та̄л яныгпо̄ль э̄тпост Клавдия Ивановна а̄тимыг е̄мтыс. Ань коланылт ма̄нь пыге ще̄мьятэ ёт о̄лы. Ты я̄тил ма̄ньщи ма̄хманув пуссын пуста̄гыл вос о̄лэ̄гыт, На̄й-О̄тыранылн вос ӯргалавет! Пус ка̄т, пус ла̄гыл!

1100 2015.05.22. Светлана РОМБАНДЕЕВА

Яныг хо̄нт порат та̄н са̄в рӯпитасыт. 1941 та̄л лӯпта э̄тпосэ̄т ма̄н ма̄вн пилыщмаӈ ля̄ххал ёхтыс – яныг хо̄нткапай (Великая Отечественная война) о̄вылтахтас. Хум хо̄тпат пуссын хо̄нтлуӈкве тотве̄сыт, нэ̄ хо̄тпат ос ня̄врамыт рӯпитаӈкве патсыт. Ка̄сыӈ колхозт ма̄хум план щирыл рӯпитасыт, хо̄нтлум мирн нё̄тсыт. Тамле девизла̄тыӈ о̄щсыт: «Всё для фронта, всё для Победы». Рӯпитаӈкве а̄лпыл минэ̄гыт, хунь турманлы, юв ущ ёхтэ̄гыт. Ла̄гыл маснутаныл лолтал ю̄нтуӈкве ат а̄лымасыт, тув мус та рӯпитасыт. Янгема̄не сыманыл э̄тгалаве̄сыт, алпияныл по̄льве̄сыт, тох та саваласыт. Нэ̄ хо̄тпат ос ма̄ньлат ма̄хум хӯл алыщласыт, баржа тӣвырн та̄рвитыӈ хӯргыт тотсыт, харттысыт. Щар ма̄к та̄рвитыӈ рӯпата та̄н та ва̄рсыт. Та порат ма̄хум пуссын яныг сав тотсыт, о̄лупса то̄нт сака пилыщмаӈ о̄лыс. Ха̄льӯс район Кульпас па̄вылт ань хо̄нтлум хо̄тпа а̄тим, пуссын хотталь щалтсыт. Ос то̄нт о̄лум мир халт то̄ва э̄кват па̄влувт ань о̄лэ̄гыт, та пора та̄н ёмащакв номияныл. Хумус та̄н о̄лсыт, рӯпитасыт, ты урыл ма̄навн потырта̄лэ̄гыт. «Труженик тыла» нам пуссын ат о̄ньще̄гыт, та порат э̄рнэ нэ̄пакыт тыглетувле тотыглаве̄сыт, хоттыпылтаве̄сыт, та̄наныл о̄щнэ мӯсхал кол а̄тим о̄лыс. Ань тыгыл э̄лаль ты э̄кват урыл ловиньтэ̄н. Мария Ильинична Семичастных 1922 та̄лт лӯпта э̄тпост Андреевка па̄вылт Голышмановский район Тюменьский областьт самын патыс. Тав ма̄ньта̄гыл рӯпитаӈкве патыс, колта̄гланыл витыӈ мельница о̄ньщас, я̄ ва̄тат лю̄лис. Ва̄т арыгкем мис о̄щсыт, Мария Ильинична та̄наныл уральтасанэ. Колхоз рӯпата ва̄рсыт – картопка ос мо̄т тэ̄нут ӯнттысыт, хилсыт, пум ва̄рсыт, колас ва̄рсыт. Хо̄тал палыт рӯпитанэ̄ныл юипа̄лт ос мо̄т рӯпата ва̄руӈкве минэ̄гыт – на̄йиӈтуйт яласан лё̄ӈх ва̄рсыт. Э̄ти ос носкит, па̄ссат сагсыт, ты пормасаныл пуссын хо̄нтлын ма̄н ке̄тыгласаныл, пум о̄с тув ке̄тыгласыт. На̄йиӈтуйт ёхты, сакватым ма̄хум тотавет, та̄нанылн нё̄тэ̄гыт, щаквитыл тотыяныл, тэ̄нутыл мыганыл. Та порат тэ̄нутыл карточкат щирыл майлуве̄сыт. Мария Ильинична та пора акваг номим о̄ньщитэ, но̄хпатум хо̄талт та̄н пуссын ща̄гтсыт. 1950 та̄л порат тав Кульпас па̄вылн ва̄нтлыс, пӯльницат тэ̄нут па̄йтым рӯпитас, тувыл пенсиян минас. Хӯрум ня̄врам янмалтас. Мария Ильинична са̄в та̄л рӯпитаме ма̄гыс янытлан нэ̄пакытыл ос ма̄глын тагатан по̄сытыл майлувес. Фаина Михайловна Бешкильцева 1925 та̄лт ма̄нь таквс э̄тпост Кировский область Суворова па̄вылт самын патыс. 1937 та̄лт тав колта̄глэ Омский областин Лобва па̄вылн ва̄нтлыс. Яныг хо̄нт порат тав школат ханищтахтас ос колхозт рӯпитас. Фаина Михайловна тох ты потыртас: «1941 та̄л сака та̄рвитыӈыг о̄лыс – витэ яныг, пум ва̄рнэ ма̄т пуссын а̄мараве̄сыт. Пум са̄всыр ма̄т киссӯв, ва̄рсӯв, мисыт ос лувыт тэ̄та̄л ул вос патэ̄гыт. Тэ̄лы порат та̄н ма̄гсыланыл тыпйӣв са̄м нильсӯв. Хӯл алыщласӯв, баржат тэ̄нут тотэ̄гыт, тот рӯпитэ̄в, то̄тапыт а̄лумтэ̄в. Сэ̄лыглам олнанув пуссын хо̄нтлын ма̄н ке̄тыглаве̄сыт. 1942 та̄лт ам са̄т класс а̄стласум, э̄лаль Ханты-Мансийск ӯст о̄лум фельдшерскоакушерский школат ханищтахтуӈкве патсум. 1945 та̄лт а̄стласлум, Ха̄льӯсн рӯпитаӈкве ке̄тве̄сум, тувыл ос Кульпас па̄вылн ва̄нтласум. Хо̄нтлам нак оигпаме порат ам Кондинский па̄вылт о̄лсум, рӯпатам щирыл тув ке̄тсуве̄сум. Ты ёмас ля̄ххал ам тот хӯлыслум. Клуб колт ма̄хум ща̄гтым маттем та мӯйлысыт. Ты пилыщмаӈ хо̄нт оигпам юипа̄лт о̄лупса сака та̄рвитыӈ о̄лыс, тэ̄нут ос тэ̄рпи торыӈ а̄тим о̄лыс. Ам Няхлаӈ, Ягрим ос Саранпа̄вылт рӯпитасум, тувыл 1953 та̄лт Кульпаст акваг та о̄лмыгтасум. 1975 та̄лт пенсиян патхатасум, ос тувыл э̄лаль о̄с са̄в та̄л пӯльницат рӯпитасум, 2002 та̄л мус». Фаина Михайловна хӯрум ня̄врам о̄ньщи. Са̄в та̄л рӯпитаме ма̄гыс Ха̄льӯс район кӯщаин ос округ губернаторн янытлан нэ̄пакытыл ос ма̄глын тагатан по̄сытыл майлувес. Кульпас па̄выл депутатыг са̄в щёс пе̄рия̄лвес. Анна Никитична Монина ма̄ньщи хо̄тпа, 1927 та̄лт я̄ӈк на̄тнэ э̄тпост Ха̄льӯс район Куги па̄вылт самын патыс. Кульпаст атыт класс мус ханищтахтас, тувыл Куги па̄вылт колхозт рӯпитаӈкве о̄вылтахтас. 1943 та̄лт Кушеватский район Горки па̄вылн рӯпитаӈкве ке̄твес. Хӯл пиннэ ма̄гыс пӯщкат ва̄рсыт, хӯл алыщласыт, солвалтасыт. Носилкатыл солвал а̄лумтасыт. Мощ хуе̄гыт, а̄лпыл та ква̄лэ̄гыт, хо̄тал палыт рӯпитэ̄гыт. Сака та̄рвитыӈ о̄лыс, торыӈ маснут ат о̄щсыт, тох та рӯпитасыт. 1946 та̄лт Анна Никитична такви яныгмам па̄влэ̄н минас, колхозт кассирыг рӯпитас. Олн ма̄гсыл Сортыӈъя па̄выл мус ла̄глыл яланта̄лыс. 1951-1957 та̄лытт са̄лыӈколыӈ хо̄тпат ёт Нё̄рт яласас. Тувыл Кульпасн ва̄нтлыс, зверофермат охсарыт тыттым рӯпитас. Пенсиян минаме юипа̄лт о̄с са̄в рӯпитас. Анна Никитична са̄т ня̄врам о̄ньщи. Са̄в грамотатыл, янытлан пищматыл ос ма̄глын тагатан по̄сытыл майлувес. Нина Семёновна Мурайченко 1926 та̄лт яныг таквс э̄тпост Тобольск ӯст самын патыс. Яныг хо̄нт о̄вылтахтаме порат тав колта̄глэ Ханты-Мансийский район Зенково па̄вылт о̄лыс. Тот са̄т класс а̄стлас, тувыл Тобольск ӯсн минас, Тоблторг ма̄н рӯпитаӈкве патхатас. 1950 та̄лт Нина Семёновна Ха̄льӯсн ва̄нтлыс, хум ва̄рыс. Сортыӈъя ос Кимкъясуй па̄влыгт рӯпитас. 1967 та̄лт колта̄глэ ёт Кульпасн ва̄нтлыс, рыбкоопн патхатас. Пенсиян минаме юипа̄лт о̄с акваг рӯпитас ла̄пкаӈ э̄кваг о̄лыс, ня̄нь ва̄рыс. Нина Семёновна са̄т ня̄врам янмалтас. Са̄в рӯпитаме ма̄гыс янытлан нэ̄пакытыл майлувес, «Материнская слава», «Победитель соцсоревнований», юбилейный ме̄таль «Победы в Великой Отечественной войне» ма̄глын тагатан по̄сытыл майлувес. Ольга Дмитриевна Рочева 1931 та̄лт Ха̄льӯс район Восыӈтур па̄вылт самын патыс. Ягрим па̄вылт нилыт класс мус ханищтахтас, яныг хо̄нт порат колхозт рӯпитас. 1951-1953 та̄лытт Люлюкары па̄вылт лесоучасткан патхатыглас, тувыл Патрасуй па̄выл колхозт рӯпитас. 1960 та̄лт Кульпасн ва̄нтлыс, хӯл щё̄питан участкан рӯпитаӈкве патхатас. Ётылнуве ос зверофермат охсарыт ма̄гыс тэ̄нут па̄йтыс. 1989 та̄лт пенсиян минас. Ольга Дмитриевна лов ня̄врам янмалтас. Ма̄глын тагатан тамле по̄сытыл майлувес: «За доблестный труд в годы Великой Отечественной войны 1941-1945гг. », «Ветеран труда», юбилейный ме̄талитыл «50, 55, 60, 65 лет Победы в Великой Отечественной войне 1941-1945гг. », «За доблестный труд», «В ознаменование 100летия со дня рождения В. И. Ленина», «Мать – героиня» ос «Материнская слава». Роза Дмитриевна Слепцова 1924 та̄лт сӯкыр э̄тпост Шурышкарский район Кушеват па̄вылт самын патыс. А̄тятэ Дмитрий Петрович партийный хо̄тпаг о̄лыс, хо̄та̄ти акваг кӯщаиг рӯпитас. Оматэ Анфиса Ивановна ла̄гыл ма̄снут лолтал пиныс, ты рӯпата ва̄руӈкве сака ёмащакв ха̄сыс. Тав па̄йтым тэ̄нутанэ сака атыӈыт о̄лсыт, са̄всыр булочкат та маныр ва̄рыс. 1931 та̄лт Роза Дмитриевна Ха̄льӯст школан минас. 1933 та̄лт а̄тятэ культбаза ӯнттын ма̄гыс Кульпас па̄вылн ке̄твес, 1934 та̄лт ос Касум па̄вылн ке̄твес. Оматэ тав ётэ минуӈкве ат ка̄сащас, ня̄враманэ ёт Ха̄льӯст хультыс. Роза Дмитриевна потырты: «Яныг хо̄нт о̄вылтахтаме порат ам ловит классыт ханищтахтасум. Ма̄н экзамен сдавайтасӯв, классувт ханищтахтам 13 пыгрищ хо̄нтлын ма̄н та тотве̄сыт. Ам а̄тям ёт хӯл алыщлаӈкве ялантасум, йӣвха̄пыл минэ̄в, ка̄тыл тове̄в, толыг харттэ̄в. Хӯл ос я̄ӈк а̄лумтэ̄в, тувыл хӯланув хо̄нтлын ма̄н ке̄тыянӯв. Ма̄н, ма̄ньлат ма̄хум, аман по̄лиглавесӯв, ва̄гта̄л патыгласӯв ман а̄ти, тох та рӯпитасӯв. Колхоз ма̄гыс пум ва̄рсӯв, на̄йив ка̄тыл сартсӯв, халталасанӯв. Шайтанка па̄вылт колхоз тэ̄пкант рӯпитасӯв, картопка ӯнттысӯв, хилсӯв. Резимово па̄вылт нялк пувсӯв. Ма̄н нила а̄ги акв ще̄мья хольт о̄лсӯв, ханты ма̄хум маснут масэ̄в, тох ат по̄ляве̄в. Татем ёмас маснут о̄щнэ̄ныл, ре̄гыӈ. Па̄влыт халт культха̄пыл яласасӯв, концерт суссылтасӯв. Ма̄н ётув акваг партия райкомыл хо̄тпа яласас, политика урыл потрыт ловиньтас. Ам э̄лаль воссыг нэ̄мхо̄т ат ханищтахтасум, омамн нё̄тсум, хӯрум э̄щ о̄щсум, та̄наныл янмалтаӈкве э̄рыс. 1945 та̄лт а̄тяв хо̄нтлын ма̄ныл юв ёхтыс. 1954-1976 та̄лытт ам Устрём па̄вылт ня̄врамыт садикт воспитателиг ос кӯщаиг рӯпитасум. 1976 та̄лт пенсиян минасум, тувыл хӯл участокт 1980 та̄л мус рӯпитасум». Роза Дмитриевна нила ня̄врам о̄ньщи. Тав о̄с са̄в рӯпитаме ма̄гыс янытлан нэ̄пакытыл ос ма̄глын тагатан по̄сытыл майлувес. Ты я̄тил яныгхо̄тпанув ма̄н 70 та̄л Победа хо̄талыл янытлыянӯв! Пуста̄гыл вос о̄лэ̄гыт, со̄тыӈыщ, щуниӈыщ вос о̄лэ̄гыт! Пус ка̄т, пус ла̄гыл!

1101 2015.06.05. Людмила ТЕТКИНА

Ёмащакв рӯпитан хо̄тпат халанылт кассыт. Ка̄сыӈ та̄л Уральский федеральный округувт са̄всыр рӯпата ва̄рнэ ма̄хум «Славим человека труда» нампа касылыл ва̄рыглавет. Ты та̄л тамле э̄рнэ ва̄рмаль о̄с рӯпитас. Ка̄ркамыг рӯпитан ма̄хум халанылт ань 13 ма̄т са̄всыр щирыл кассыт. Игорь Холманских, Россия Президент ва̄ӈын хум, но̄хпатум хо̄тпат янытлаӈкве Сургут ӯсн ёхталас. Тав округ губернаторув Наталья Комарован ты касыл ма̄гсыл яныг пӯмащипа ла̄тыӈ ла̄выс. Тамле касыл таи ма̄гсыл ань щё̄пита̄лаве, ка̄сыӈ э̄лумхо̄лас ка̄ркамыг вос рӯпиты. Наталья Комарова тот акв йильпи тэ̄ла урыл потыртас. Тав ла̄выс: «Ты та̄л ма̄н округувт соссаӈ ма̄хум пе̄с йис наканыл э̄лаль тотнэ та̄лыг намаяслӯв. Ты кастыл та̄л сыс са̄всыр ялпыӈ хо̄талыт, ханищтапыт ос мо̄т э̄рнэ тэ̄лат ва̄рыглэ̄в. Уральский федеральный округувт соссаӈ ма̄хум о̄с о̄лэ̄гыт. «Славим человека труда» нампа касылт ты ёмащакв рӯпитан ма̄хум ма̄гсыл я̄нас номинация о̄с ва̄руӈкве э̄ри. Во̄ртур э̄тпос 9 хо̄талэ̄т но̄хпатум ма̄щтыр ма̄хум вос янытлавет». Мо̄тыт та̄лныл ка̄ркам хо̄тпат ты касылт йильпи номинациял ва̄равет. Щар о̄влэ̄т «Славим человека труда» нампа касыл Свердловский областьт 2011 та̄лт ва̄рвес. Тувыл Уральский федеральный округувт о̄лнэ ма̄хум тот касуӈкве патсыт. Президент Владимир Путин 2013 та̄лныл ты касыл Россия янытыл ва̄рыглаӈкве ла̄выс. Губернатор прессслужбатэ ке̄тум ля̄ххал ма̄ньщи ла̄тӈыл Людмила ТЕТКИНА хансыстэ.

1101 2015.06.05. Валентина УЗЕЛЬ

Ворщик хо̄тал. Мо̄т ма̄ньщи ма̄хманув хо̄нтаӈ (кондинские) ма̄ньщииг ла̄вавет. Та̄н хосат та̄гыл ща̄нь ла̄тӈаныл ат ва̄ганыл, пе̄с ва̄рмаляныл, пе̄с наканыл пуссын хотёрувласаныл. Ос матрыг ань тыг мус та̄н тамле ялпыӈ хотал янытлэ̄гыт, рущ ла̄тӈыл ла̄ваве – День трясогузки, Ворщик хо̄тал. Аман хоты па̄сныл та̄н ты ялпыӈ хо̄таланыл янытлыяныл. Ос ань юио̄выл та̄лыт сыс Ворщик хо̄тал округув янытыл янытлаӈкв патвес. Ханты-Мансийск ӯст «Торум Маа» музейт ка̄сыӈ та̄л лӯпта э̄тпос 1 хо̄талэ̄т ты ялпыӈ хо̄тал ва̄рыгла̄лаве. Са̄в ня̄врам тув атыглаве. Та̄н тот ёнге̄гыт, порге̄гыт, халанылт касэ̄гыт. Ань ты ялпыӈ хотал тот о̄с янытлавес. Ма̄хум ня̄враманыл ёт тот мӯйлысыт, ӯщлахтасыт, пасаныл ва̄рыглаве̄сыт. Хотьют ка̄сащас, тав ма̄нь то̄рло̄мтыл ӯйрищ ва̄рыс. Тох ты ӯсувт соссаӈ ня̄врамыт янытлаве̄сыт.

1101 2015.06.05. Александр ВЬЮТКИН

Ня̄врамыт ма̄гсыл ва̄рыглым пӯмащ. Ма̄ янытыл ня̄врамыт янытлан хо̄тал о̄лум порат та̄н ма̄гсыланыл Ханты-Мансийск ӯс янытыл са̄в пӯмащ ва̄рыглым о̄лыс. Акв тамле пӯмащ «Природы и Человека» нампа окружной музейт ва̄рыглавес. Та пӯмащ ханищтахтын ня̄врамыт ма̄гсыл номылматвес. О̄влэ̄т та̄н ма̄гсыланыл ма̄нь ханищтап о̄лыс. Тот та̄нанылн маныр, хо̄т, хунь ос хоты те̄расыт хурит по̄слымат, та урыл мощ потыртавес. Та юипа̄лт мо̄т колнакн ва̄нттуве̄сыт. Тот ос по̄слым хурит щё̄питым о̄лсыт. Ма̄н округувт те̄рас ат о̄лнэ щирыл пе̄с па̄выл колъё̄раныл но̄ххилнэ ма̄т хо̄нтым а̄нысупыт ос а̄ньт лӯвыл яктым са̄всыр пормасыт суссылтаве̄сыт. Та̄н халаныт Ха̄льӯс районт хо̄нтым а̄ньтыл ва̄рим консуп о̄лыс. Пормасыт сунсыгламаныл юипа̄лт ня̄врамыт ос пе̄с порат по̄слым хурит са̄всыр оспа о̄льпыл лаппо̄слысаныл. Тув ёхталам ня̄врамытн пуссын пӯмащ о̄лыс. Тот рӯпитан хо̄тпал аквписыг матыр урыл титыглахтасыт, тувыл пе̄с пормас хумус о̄щве̄сыт, та номтаныл та̄нти потыртасаныл. Ты суссылтап акв э̄тпос тах рӯпиты. Ка̄сащан ма̄хум, нас пӯмащ ма̄гсыл тув ёхталэ̄н, сунсыглахтэ̄н.

1101 2015.06.05. Тамара МЕРОВА

Вит ӯргалан ос сыстамтан урыл потыртасыт. Я̄ӈк на̄тнэ э̄тпос ва̄т нупыл хо̄т щислат Ханты-Мансийскат яныг кӯщаит ос мӯй ма̄хум акванатхатыгла̄лсыт ос та̄н я̄, тӯр витыт урыл потыртасыт. Ты ва̄рмаль "Современные проблемы охраны и использования водных объектов Югры: пути их решения" намаим о̄лыс. Тав "Спасти и сохранить" ма̄вит ӯргалан тэ̄ла кастыл о̄вылтавес. Тув атхатам ма̄хум ёт Наталья Комарова округ губернаторув пащалахтас ос таи ла̄выс: "Ма̄н ма̄вит ӯргалан акциява̄рмаль ты о̄вылтаслӯв. Ты та̄л тав "В капле воды весь мир! " номтыӈ ла̄тӈыл намтыслӯв. Ма̄нки палтув вит сыстамыг о̄щнэ нак сака ӯргалаӈкве э̄ри. Ма̄н округув Обь-Иртышский бассейн тармыл о̄лы, тыт са̄в я̄т, тӯрыт ове̄гыт. Югра ма̄в Финляндия ма̄ хурипаг о̄лы". Ань Финляндияныл мӯй хо̄тпат о̄с ёхталасыт. Яри Салонен, «Пяйят-Хяме» коммуна союз кӯщаиг о̄лнэ хум, та̄нки палтаныл о̄лум ва̄рмалит урыл потыртас: "Ма̄н ма̄хумн айнэ вит ӯсувт сыстамтылӯв. Айнэ вит ӯс ляпат о̄лнэ тӯрныл выгӯв. Вит сыстамтым ма̄н лов арыгкем та̄л рӯпитэ̄в ос таима̄гыс ёмас ищхӣпыӈ утыт о̄ньще̄в. Та щирыл ма̄н ма̄витув ат па̄ӈквтылӯв. Ты ва̄рмалит пӯмщалан ма̄гыс на̄н палтын ёхтысӯв, ос на̄н ка̄сащегы̄н ке, ма̄н аквъёт рӯпитаӈкв ве̄рме̄в. Ма̄н на̄нан нё̄тэв тах". Тувыл ма̄хум э̄лыпалт Югра ма̄вит ӯргалан кӯщай Сергей Пикунов потыртас. Борис Ткачёв, ЮГУт рӯпитан профессор хум, ма̄вит ос я̄т, тӯр вит ёмщаквег ханищтан ос та̄рапаттым са̄всыр ва̄рмалит урыл ла̄тыӈ тотыс. Акванатхатам ма̄хум резолюциянэ̄пак щё̄питасыт ос э̄лаль аквъёт рӯпитаӈкве потыртахтасыт.

1101 2015.06.05. Николай МЕРОВ

Пе̄рияпт рӯпитан хо̄тпат янытлаве̄сыт. Ювле хультум э̄тпос 28-29 хо̄талыгт Центральный избиркомт рӯпитан хо̄тпат Ханты-Мансийск ӯст ханищтап щё̄пита̄лсыт. То̄нт Россия янытыл пе̄рияп комиссият кӯщай ва̄ӈын хум Леонид Григорьевич Ивлев ля̄ххал тотнэ колн во̄виньта̄лвес. Тот тав нэ̄пак та̄ратан рӯпата урыл потыртас. На̄н тав потре э̄лаль ловиньтэлы̄н. Тав тох ла̄выс: «Югра ма̄т семинарув кит хо̄тал минас. Ты ханищтап ма̄н тыт о̄выл щёс ва̄рыгласлӯв. Ханты-Мансийск ӯсн кит федеральный округыгныл, Крым республиканыл ос Севастополь ӯсныл, Россия янытыл пуссын аквъёт 24 субъектытныл пе̄риян ва̄рмальт рӯпитан ма̄хум тыг ёхталасыт. Ма̄хум рӯпатаныл хумус ва̄рияныл, та̄нки халанылт ты урыл потыртасыт ос ты ханищтапт уртхатасыт. Э̄лн о̄лнэ ма̄хум ёт рӯпитаӈкве ханищтахтасыт. Тыи ма̄гыс та̄н ма̄во̄й но̄хвинэ ма̄н тотыглаве̄сыт. Пе̄рияп е̄мтнэ порат э̄лн ӯнлын па̄влытн, ё̄рнколытн, йис ма̄н, хо̄т э̄лумхо̄лас о̄лы, тув та ялэ̄гыт. Вертолётыл щё̄скем миннэ ма̄гыс та̄н яныгса̄т атпан со̄тыра солко̄ви ойтэ̄гыт, та яныт тыныл ты яласэ̄гыт. Та̄н хосытаныл ка̄сыӈ хо̄тпа ка̄тпос пинуӈкве ве̄рми. Ты та̄л сӯкыр э̄тпост яныг пе̄рияп щё̄питаве. Яныгса̄ткем са̄всыр кӯщай пе̄рияӈкве патаве. Та̄н халанылт 21 губернатор пе̄рияве, Ханты-Мансийский, Ямало-Ненецкий округыгт ос Тюменский областиныл о̄лнэ хӯрум губернатор мирн пе̄рияӈкве ат патавет, та̄н Россия Президентын тув ӯнттавет тах. Югра ма̄т пе̄рияп ёмщакве̄г ва̄рыглаве, ла̄палахтын нак щар ат е̄мталас, ма̄н палтув нэ̄матыр полщ тотнэ нэ̄пак ат ёхталас. На̄н палтын пе̄рияп кӯщаиг Андрей Евгеньевич Павкин о̄лы. Тав ётэ пуссын аквъёт ловманкем со̄тыра хо̄тпа рӯпиты. Округ янытыл 22 районный миркол о̄лы. Ка̄сыӈ па̄вылт, ӯст пуссын аквъёт 691 участковый пе̄рияп кол рӯпиты. Ма̄хум кӯпнитыг ка̄тпос пинэ̄гыт, нэ̄пак тот та̄ратэ̄гыт. Тувыл 2016 та̄лт ва̄т са̄грапнал э̄тпос о̄выл ӯщлахтын хо̄талэ̄т ос Государственный Думан депутатыт пе̄рияӈкве патавет, ос тах са̄в рӯпата е̄мты». Ты потре юипа̄лт Леонид Григорьевич округ кӯщайн Наталья Комарован ос ты семинар щё̄питан ма̄гыс нё̄тмил ва̄рнэ хо̄тпатн яныг пӯмащипа ла̄тыӈ ла̄выс.

1101 2015.06.05. Александр ВЬЮТКИН

Савалап ма̄ньлат ма̄хум о̄лнэ колыл мивет. Мощ мо̄лалнув образование ос наука Россия министерство па̄лыл субсидияолн та̄стувес. Ты олннё̄тмил савалап ня̄врамыт о̄лнэ колыл ёвтнэ ма̄гсыл миве. Ань ты ёмас тэ̄ла кастыл яныг кӯщаиг о̄лнэ ма̄хум ты нэ̄паканылт ка̄тпосаныл по̄стысаныл. Ты урыл округ кӯщай нэ̄ Наталья Комарова ла̄выс: «Савалап ня̄врамыт о̄лнэ колыл ёвтнэ кастыл федеральный нампа бюджетолныл 41 миллион солко̄ви маим о̄лыс. Ма̄н ань э̄рнэ са̄вит олн о̄ньще̄в, та̄н э̄рнэ щирыл холтуӈкв э̄ре̄гыт. » Мирн нё̄тмил ва̄рнэ департамент кӯщай нэ̄ Ирина Уварова ос тох ла̄выс: «Савалап ня̄врамыт о̄лнэ колыл ёвтнэ ма̄гсыл округ бюджетныл 877 миллион солко̄ви майвес. Ты олныл 480 ма̄ньлат хо̄тпа колыл ёвтавет. Округ янытыл пуссын аквъёт 7 со̄тыра са̄вит савалап ня̄врам о̄лы. Ты та̄л сыс 480 ма̄ньлат хо̄тпа колыл тах мивет. » Округ кӯщай прессслужбаныл те̄тым ля̄ххал ма̄ньщи ла̄тӈыл Александр ВЬЮТКИН хансыстэ.

1101 2015.06.05. Николай МЕРОВ

Ма̄нь па̄влыт олныл нё̄тавет. Мо̄лалнув Россия Правительстват заседание о̄лыс, 2015 та̄лт ма̄нь па̄влыт но̄хво̄рмалтан ма̄гыс ань олныл нё̄туӈкве патавет. Ты ва̄рмаль хосыт Югра ма̄н 2 миллион солко̄ви миве. Ты программа 2014-2017 ос 2020 та̄лыт мус рӯпитаӈкве паты. Тувыл 446 со̄тыра солко̄ви са̄вит олннё̄тмил ке̄таве. Ма̄вит ос несырьевой сектор экономика Департамент кӯщай ва̄ӈын хум Алексей Киселев ла̄внэ̄тэ щирыл, округ бюджетныл акв миллион солко̄ви са̄вит грантолныг миӈкве патаве. Ты олныт па̄влыӈ ма̄т каснэ ва̄рмаль, ӯщлахтын ва̄рмаль ос ня̄врамыт ма̄гыс ёнгилыт щё̄питан кастыл та̄стуве̄сыт. Россия бюджетныл 1 миллион 700 со̄тыра солко̄ви ма̄нь па̄влыт о̄лнэ ма̄хум коланыл хотщё̄питан ма̄гыс ке̄таве. Ма̄ньлат ще̄мьят ос па̄вылн рӯпитаӈкве ущты ёхтум хо̄тпат о̄с нё̄туӈкве патавет. 2015 та̄лт ты тэ̄ла ма̄гыс округ бюджетныл 6 миллион 459 со̄тыра солко̄ви та̄стувес. Ань Ха̄льӯс, Октябрьский, Нефтеюганский, Ханты-Мансийский ос Кондинский районт о̄лнэ ат ще̄мьят ты олнытыл нё̄тавет тах. Округ кӯщай прессслужбатэ ке̄тум ля̄ххал ма̄ньщи ла̄тӈыг Николай МЕРОВ хансыстэ.

1101 2015.06.05. Светлана РОМБАНДЕЕВА

Ня̄врамыт янытлаве̄сыт. Я̄ӈк на̄тнэ э̄тпос 24 хо̄талэ̄т Ханты-Мансийск ӯст о̄лнэ «Лылыӈ со̄юм» колт ня̄врамыт янытлаве̄сыт. Та̄л палыт ань хотьютаныл маныр ва̄руӈкве ханьщувлас, хумус ханищтахтас, ты урыл тот рӯпитан хо̄тпат потыртасыт. То̄ва ня̄врамыт са̄всыр конкурсытыт но̄хпатсыт, пуссын янытлан нэ̄пакытыл майве̄сыт, са̄в ёмас, сымыӈ ла̄тӈытыл ла̄вве̄сыт, э̄сгуве̄сыт. Тувыл ня̄врамыт ос тот рӯпитан ма̄хум концерт суссылтасыт ма̄ньщи ос ханты супыл масхатасыт, йӣквсыт, сценкат суссылтасыт, са̄ӈквылтап та̄ныт ёнгысыт. То̄ваныл ма̄ньщи ос ханты ла̄тӈыл стихотвореният ловиньтасыт. Ань ханищтахтан та̄ланыл та оигпас, тыгыл э̄лаль тот э̄тпостем лагеряныл рӯпитаӈкве паты, хотьют ка̄сащас, наме тув хасвес. Я̄тил ня̄врамаквет, пуссын пуста̄гыл о̄лэ̄н, На̄й-О̄тыранын вос ӯргалаве̄н!

1101 2015.06.05. Валентина УЗЕЛЬ

Мощщаг хультум мирыт урыл потыртасыт. Москва ӯст Государственный Думат яныг сапра̄ни ва̄рыглавес. Тот та урыл кӯщаит потыртасыт – мощщаг хультум мирыт ма̄гыс маныр са̄кконыт хансым о̄лэ̄гыт, хумус та̄н ӯргалавет ос э̄лаль маныр рӯпата ва̄руӈкв э̄ри. Яныг кӯщаит потыртаманыл юипа̄лт та̄нти номтаныл пуссын акв нэ̄пакн хассаныл. Ань ты нэ̄пак Федеральное Собрание колн, РФ Правительство колн, са̄всыр яныг компаниятытн, организациятытн ос ка̄сыӈ регионын тах те̄таве. Та̄н ты нэ̄пак щирыл рӯпатаныл вос ва̄рияныл. Лӯима̄, Сибирь ос Дальний Восток ма̄ янытыл о̄лнэ мирыт Ассоциацияныл ва̄рнэ рӯпататэ урыл ла̄всыт, та̄н мощщаг хультум ма̄нь мирыт ма̄гыс са̄в э̄рнэ рӯпата ва̄ре̄гыт. Ос э̄лаль аквтох ёмащакв вос рӯпитэ̄гыт. Мощ мо̄лтынув ос Россия Президент Владимир Путин са̄в мир акванатыглас. Та̄н тот потыртасыт, мощщаг хультум мирыт ла̄тӈаныл хумус э̄лаль тотуӈкв э̄ри, хумус ӯргалаӈкв э̄ре̄гыт. Ос ма̄хум пуссын ла̄всанэ, та̄н ла̄тӈыт э̄лаль тотнэ ма̄гыс ёмащакв вос рӯпитэ̄гыт. Ты ля̄ххал ма̄ньщи ла̄тӈыл Валентина Хозумова хансыстэ.

1101 2015.06.05. Николай МЕРОВ

А̄рнтаг са̄в налоголн атхатас. Округувт яныгса̄т ат хо̄тпа налоголн ат ойтнэ̄ныл ма̄гыс мо̄т хо̄н ма̄н та̄ртуӈкве ат патавет. Югра ма̄т тамле та̄рвит ва̄рмаль ань ты о̄лы. Сака са̄в хо̄тпа налоголн государстван ат ойтэ̄гыт. Округувт налоголн пувнэ колт рӯпитан хо̄тпат ла̄внэ̄ныл щирыл, ты хосыт ма̄хум бюджетн са̄в олн а̄рнтаг атсыт. Ты та̄л я̄ӈк на̄тнэ э̄тпос о̄выл хо̄тал мус округувт о̄лнэ ма̄хум налоговый службан 1 миллиард 3 миллион солко̄ви ат ойтсыт. Щар са̄в олн яласан машина ма̄гыс ма̄хум ат ойтэ̄гыт. Та̄н ты ма̄гыс пуссын аквъёт 960 миллион олн ойтнэ щирыл о̄лэ̄гыт. Тувыл кол ма̄гыс 280 миллион, ёвтым ма̄ ма̄гыс ос 80 миллион атхатас. Ань Югра ма̄т рӯпитан налог атнэ хо̄тпат та̄кыщ ты тэ̄лан вуйхатсыт. Олныт ат ойтнэ хо̄тпатныл олн ань пувуӈкве патаве. Хотьют хо̄нтаве, сутытаве. Тувыл сутыт рӯпитан приставыт ты олныт паттыиг о̄лнэ колныл матыр пормас тыналан ма̄гыс хот тах выгыт. Ань нила э̄тпос сыс 105 хо̄тпа пуссын аквъёт 21 миллион солко̄ви са̄всыр тэ̄ла щирыл ат ойтсыт. Ты хо̄тпатныл 63 э̄лумхо̄лас яласан машина ма̄гыс 2 миллион арыгкем солко̄ви ойтнэ щирыл о̄лэ̄гыт. То̄ва хо̄тпат ань 776 со̄тыра солко̄ви ойтсыт. Тыгыл э̄лаль ань налог атнэ хо̄тпат ат ойтхатнэ ма̄хум ӯщлахтын хо̄н ма̄н та̄ратаӈкве ат патыяныл. Ты коныпал та̄н акваг лю̄камтаӈкве патавет. Таима̄гыс ма̄хумаквет, на̄н налоголн та̄ра ойтэ̄н, юв ул пувелы̄н. Округ кӯщай прессслужбат рӯпитан ма̄хум ке̄тум ля̄ххал ма̄ньщи ла̄тӈыг Николай МЕРОВ хансыстэ.

1101 2015.06.05. Светлана РОМБАНДЕЕВА

Туп ӯщлахтан тэ̄ла урыл потыр о̄лыс. Я̄ӈк на̄тнэ э̄тпос 15 хо̄талэ̄т ля̄ххал тотнэ ма̄хум акванво̄выглаве̄сыт, ня̄врамыт туи порат ӯщлахтынэ̄ныл урыл потыр о̄лыс. Тув ань ща̄ньа̄щ та̄л яныгман ня̄врамыт ос са̄всыр нё̄тмил мирн ва̄рнэ Департаментыт рӯпитан нэ̄ Елена Владимировна Немчинова тав ёхталас. На̄н ань э̄лаль тав потре ловиньтэлы̄н. Ма̄н школат ханищтахтан ня̄врамытн туи порат ӯщлахтуӈкве нё̄тэ̄в. Округув янытыл ань 200 со̄тыра мощ арыгнув ня̄врам школат ханищтахты. Ты туи 95% са̄витаныл ӯщлахтуӈкв ве̄рми. То̄ваныл ща̄ньа̄щаныл ёт ща̄рщиӈ ма̄н ялантэ̄гыт, 120 со̄тыра ня̄врам са̄всыр лагеритн ялантаӈкве патэ̄гыт, 30 со̄тыра ляпа ня̄врам ща̄рщиӈ ма̄н тотыглавет. Ты туи ня̄врамыт ӯщлахтынэ̄ныл кастыл арыг олн майвес – 16 миллион солко̄ви, пуссын аквъёт ань 1 миллиард 16 миллион солко̄ви о̄ньще̄в. Ма̄н номсыте̄вт, ты туи мощ са̄внув ня̄врам ӯщлахтан ма̄н ялэ̄гыт тах. Та̄н янгыщ Сэ̄мыл ос Азовский нампа ща̄рщ ва̄тан тотыгла̄лавет. Россия ма̄в янытыл о̄с ӯщлахтэ̄гыт – Тюменский областьт, Башкирият, яныгнув ня̄врамыт Нё̄рыт хосыт ӯщлахтым яласэ̄гыт. Ань ос то̄ваныл Крым республикан ос Севастополь ӯсн тотавет – 2 со̄тыра 700 са̄вит ня̄врам. Мо̄лты та̄л тув 1 со̄тыра 300 ня̄врам ялыс. Санаторнокурортный путёвкат о̄с о̄ньще̄в, тув а̄гмыӈмосыӈ ня̄врамыт оманыл ёт пусмалтахтуӈкве яланта̄лэ̄гыт. Ты та̄л тамле путёвкатыл о̄с мощ са̄внуве майвесӯв – 1 со̄тыра 426. Та̄н Алтайский крайн, Кавказские Минеральные Воды ма̄н, Тюменский областьн, Анапа ӯсн ос Крым республикан ке̄тыгла̄лавет. Ёмащакв ханищтахтан ос са̄всыр конкурсытт но̄хпатум ня̄врамыт э̄лыхо̄н ма̄н тотыглавет тах – Болгариян, Венгриян. Ма̄во̄й но̄хвинэ ма̄т рӯпитан ма̄хум ня̄враманыл Англиян, Американ, Венгриян ос Грециян ӯщлахтуӈкве тотыгла̄лавет. Са̄в ня̄врам во̄рыӈ ма̄т я̄ ва̄тат ӯщлахтэ̄гыт, парщин хасапыт (палаткат) хартэ̄гыт, э̄тпостем тот о̄лэ̄гыт. Ювле хультум та̄лт 39 тамле лагерь рӯпитас, ты та̄л 50 рӯпитаӈкве паты. Тот янгыщ ла̄тыӈ ат хӯнтлын ма̄ньлат ма̄хум та̄н ӯщлахтэ̄гыт. Ле̄ккарыт ла̄внэ̄ныл щирыл, тамле ня̄врамыт во̄рыӈ ма̄т о̄лыманыл номтаныл мощ ка̄мняме̄гыт, ла̄тыӈ хӯнтлуӈкве патэ̄гыт. Ка̄сыӈ та̄л ма̄к са̄в тамле лагерь Кондинский район янытыл ва̄рыглавет. Тувыл Нижневартовский, Ханты-Мансийский, Советский ос мо̄т районыт янытыл о̄лыгла̄лэ̄гыт. Ты туи манах ня̄врам ӯщлахты, ма̄н тах ты урыл таквсы порат ущ потыртэ̄в. Я̄тил ня̄врамаквет, ма̄ньлат хо̄тпат, ёмащакв ӯщлахтэ̄н, пуста̄гыл о̄лэ̄н, со̄тыӈыщ яныгме̄н.

1101 2015.06.05. Светлана РОМБАНДЕЕВА

Пуссын ща̄гтым йӣвыт ӯнттысыт. Ювле хультум э̄тпос сака са̄в мӯйлын хо̄тал о̄ньщи – яныг хо̄нт оигпас, ня̄врамыт ханищтахтан ма̄наныл по̄йтэ̄гыт. Моще̄ртын туи пора ёхты, ма̄хум янгыщ ӯщлахтуӈкве патэ̄гыт, то̄ва хотталь э̄л мины, билетыт ёвтуӈкве э̄ри та маныр. Пуссын ка̄ркамыг е̄мтапе̄гыт, ха̄йтыл ялэ̄гыт. Со̄ль, сака рӯпатаӈ э̄тпос. Ты коныпал я̄ӈк на̄тнэ э̄тпост сымыӈ ма̄хум акв сака ёмас тэ̄ла ва̄руӈкве номылматсыт, намаясаныл «Лес Победы». Ка̄сыӈ та̄л ма̄н Россияв янытыл я̄ӈк на̄тнэ э̄тпост яныг хо̄нт кастыл ма̄хум, янгема̄не, йӣвыт ӯнттэ̄гыт. Хо̄тпа ё̄рва̄гыл ат кащилтаве, хотьют рӯпитаӈкве ка̄сащи, йӣвыт ӯнттын ма̄н ялы, То̄рум ма̄гыс тот мощ рӯпиты. 16 хо̄талт ма̄н, редакцият рӯпитан ма̄хум, тув о̄с ялсӯв – Байбалак нампа посал ва̄тан тотыглавесӯв. Ань ты ва̄рмаль ма̄гыс ӯльпа манос на̄ӈк йӣвыт питомник нампа колт янмалтавет, хус ман налыман сантиметр янытат. Тамле йӣвыт тув ты ӯнттысӯв. Ка̄сыӈ организация йӣвыт ӯнттын ма̄гыс я̄нас ма̄ныл хӯлтвес, ве̄трал, ма̄нтыл ос тулё̄влыӈ па̄ссал майвесӯв. Яты, рӯпитаӈкве та о̄вылтахтасӯв. Татем хо̄талыӈ хо̄тал о̄лыс. Сцена ва̄рыглавес. О̄влэ̄т Ханты-Мансийский район кӯщай Пётр Захаров тав потыртас. Тув ёхталам хо̄тпатн са̄в ёмас сымыӈ ла̄тыӈ, пӯмащипа ла̄тыӈ ла̄выс. Яныг хо̄нт порат рӯпитам э̄ква Анна Степановна Шушунова мощ потрамас. То̄нт тав нёлоловхуйплов та̄лэ ущ то̄влыс. Яныгхо̄тпат ёт рӯпитас, на̄йив хартыс, са̄грыс. Ханты э̄ква Мария Кузьминична Волдина ма̄хум янытласанэ, сымыӈ ла̄тӈыл ла̄всанэ. Округ кӯщай нэ̄ Наталья Владимировна Комарова тув о̄с ёхталас, на̄ӈк йӣвыт ӯнттыс, мир ёт потрамас, по̄слахтас. Ля̄ххал тотнэ ма̄хум таве маттем та по̄слысаныл, китыгласаныл. Кӯщай нэ̄ мощ потрамас, ла̄выс: «Йӣвыт ӯнттын тэ̄ла ма̄гыс ам номтум сака ёмас, ты атхунь э̄рнэ ва̄рмаль. Во̄рыӈ ма̄т ань йӣвыт са̄вме̄гыт, хунь тах яныг йӣвыг е̄мтэ̄гыт». 350 са̄виттем хо̄тпа тот рӯпитасӯв. Округув янытыл 3 со̄тыра 500 арыгкем хо̄тпа рӯпитасыт, ӯльпа ос на̄ӈк йӣвыт ӯнттысыт.

1101 2015.06.05. Александр ВЬЮТКИН

Ма̄ньлат ёмас нэ̄кве. Ха̄льӯс район Саранпа̄вылт акв ка̄ркам ма̄ньлат ма̄ньщи а̄ги о̄лы, тав наме Анастасия Албина. Наста ма̄нь та̄гыл Дмитрий Георгиевич Агеев палт ялантас. Тав тот ма̄ньщи йӣквыт йӣквуӈкве, э̄ргуӈкве, са̄ӈквылтаӈкв ханищтахтас. «Са̄лы лё̄ӈх» ня̄врамыт ёт са̄всыр ма̄н ос ӯсытн йӣквыт, э̄ргыт суссылтым ялыс. Ка̄сыӈ тув Я̄сунт па̄вылн «Ма̄нь ӯсквен» ня̄врамыт ӯщлахтын ма̄т ӯщлахтас. Юрт а̄гирищанэ ёт та̄н тот сака пӯмащ о̄лсыт. Э̄типа̄лаг ос рущ э̄ргыт гитарал са̄ӈквылтым а̄ращ ва̄тат э̄ргысыт. Школа а̄стламе юипа̄лт тав та̄ра Ханты-Мансийск ӯсн ма̄нь ня̄врамыт ёт рӯпитан нэ̄г ханищтахтуӈкв минас. Тув порат практикат рӯпитан ма̄гсыл такви па̄вылн ялантас. Ты ханищтахтын кол а̄стламе юипа̄лт та̄ра Саранпа̄вылн о̄луӈкв минас. Тот хум ва̄рыс. О̄йкатэ о̄с ма̄ньщи хо̄тпа. Тав ЖКХ ма̄т яныг машинал яласан хумыг рӯпиты. Ӯщлахтан порат во̄раим ос хӯл алащлым яласы. Тэ̄н ма̄нь а̄ги о̄ньще̄г, а̄гитэ̄н наме Яна. Тав ань ма̄нь ня̄врамыт колн яланты. Мо̄тантыг ханищтахтуӈкв мины. Наста ань «Поиск» нампа ДЮЦколт рӯпиты, тав палтылэ яласан ня̄врамыт йӣквуӈкв ос э̄ргуӈкв ханищтыянэ. Тамле ёмас ма̄ньлат ма̄ньщи хо̄тпагн ам щуньпаща ла̄тыӈ те̄тэ̄гум. На̄й-О̄тырн ще̄мьятэ̄н вос ӯргалаве, са̄в та̄л пуста̄гыл о̄луӈкв ос ма̄ньщи ва̄рмалянув э̄лаль тотуӈкв ла̄виянум.

1101 2015.06.05. Людмила ТЕТКИНА

Ка̄ркам а̄ги. Виолетта Маметчина Ха̄льӯс район Ня̄хщамво̄ль па̄вылт о̄лы. Ты та̄л тав нёлолов класс а̄стлас. А̄ги школат сака ёмащакв ханищтахты. Са̄всыр конференцият рӯпитанэ̄ныл порат доклад акваг щё̄питы, ялпыӈ хо̄талытт мо̄т а̄гит ёт о̄с э̄рги, йӣкви. Виолетта а̄тятэ хатань хум, оматэ ос ма̄ньщи нэ̄. Ане̄кватэ Татьяна Семёновна Тасманова Нёрахи па̄вылт о̄лы. Виолетта ма̄нь та̄гыл туи порат ӯщлахтуӈкве та па̄вылн яланты. Ане̄кватэ таве ма̄ньщи ла̄тӈыл потыртаӈкве ханищтытэ, ань а̄ги ща̄нь ла̄тыӈ ёмащакве хӯлы. Виолетта ма̄ньщи пе̄с йис ва̄рмалитыл сака пӯмщалахты. Ты туи тав Я̄сунт па̄вылн «Ма̄нь Ӯскве» ӯщлахтын ма̄н ялуӈкве щё̄питахты.

1101 2015.06.05. Тамара МЕРОВА

Тав акваг номтыӈ рӯпата ва̄ри. Мо̄лалнув Санкт-Петербург ӯст о̄лмум порат ам Татьяна Николаева палт мӯйлысум. Тав ань Русский географический общество колт ля̄ххалыт тотнэ тэ̄лат ёт рӯпиты. Ты э̄лыпа̄лт Татьяна Георгиевна матахмат та̄л Ханты-Мансийск ӯст о̄лыс, ань ам таве такви уре̄т мощ потыртаӈкве во̄выслум. Тав ла̄выс: Ам Нижневартовск ӯст самын патсум. Лов класс тот а̄стласум ос Ленинград ӯст о̄лнэ А. И. Герцен нампа институтт рущ ла̄тыӈ ос литература учителиг ханищтахтасум. 1992 та̄лт юио̄выл курсыт ханищтахтамум порат ма̄н лӯима̄ факультетувн акв мӯй хо̄тпа ёхталас. Ты француз о̄йка, наме Жан Малори. Тав мирн ва̄нэ полярникучёныиг о̄лы, са̄всыр потрыт хансы. То̄нт о̄йка институт а̄стлам лӯима̄ а̄гитпыгыт ма̄гыс Россият йильпи ханищтан кол ва̄руӈкве номылматас. Та̄н ма̄хум ёт рӯпитаӈкв ха̄снэ хо̄тпаг вос ханищтахтынувыт, са̄всыр са̄кконыт ёмщаквег вос ва̄нувыт, э̄рнэ торыг та̄нки ма̄хманылн нё̄туӈкве вос ве̄рмынувыт. Тувыл, со̄ль, 1992 та̄лт лӯима̄ ма̄хум ханищтан кол Ленинград ӯст ва̄рвес, о̄влэ̄т тав «Полярный круг» сообществаг о̄лыс, ётыл тав Полярная Академия намыл пинвес. Тот Мурманск ӯсныл хо̄тал нэ̄глын е̄р мус са̄всыр лӯима ма̄ныл студентыт ханищтахтасыт. Ам о̄с тот ханищтахтуӈкве хультсум. То̄нт группав янгыг о̄лыс, ос ма̄н, туп ва̄т нупыл хо̄т хо̄тпа, Академия а̄стлысӯв. Ма̄н тот сака ёмас, номтыӈ хо̄тпатн ханищтавесӯв, то̄ват ты ӯст о̄лсыт, мо̄таныт Францияныл ёхталасыт. Та̄н потраныл хӯнтлуӈкве сака пӯмщиг о̄лыс. 1994 та̄лт ма̄н Москва ӯсн образование ос са̄всыр мирыт тэ̄ланыл ӯргалан Министерство колн практикан ке̄тыглавесӯв. Ос Полярный Академия тармыл пуссын хотальа̄ти рӯпитаӈкве вуйла̄лвесӯв. Ам тот ректорн нё̄тнэ хо̄тпаг рӯпитасум. Тувыл Санкт-Петербурский университет аспитантурат ханищтахтасум. Тот экономика ос финансы факультетт история пе̄с ва̄рмалит пӯмщаласанум. Ос "Социальноэкономическое развитие городов в зоне добычи нефти и газа. Проблемы их развития" диссертация хансуӈкве патыгласум. Ам то̄нт Тюменский архивт са̄в пе̄с нэ̄пакыт ловиньтасанум, Нижневартовск ос Ханты-Мансийк ӯсыгт о̄лнэ архивколыгн ялсум. Аквтох соссаӈ ма̄хум та̄рвитыӈ тэ̄ланыл ма̄гыс государство па̄лыл нё̄тавет ман а̄ти, са̄ккон щирыл ӯргалавет манос а̄ти, ты тэ̄лат та̄рапаттысанум. Ётыл Россиявт та̄рвитыӈ кризис та̄лыт о̄вылтахтасыт, о̄лупсав ос мо̄т щирыл е̄мтапас. Ос 1999 та̄л ам Академия па̄лыл Ханты-Мансийск ӯсн приёмный комиссият рӯпитаӈкве ке̄тве̄сум. Тот ам ханищтап Департаментын рӯпитаӈкве во̄вве̄сум. Ам хоса ат номсахтасум, та̄ра хультсум. Ты э̄лыпа̄лт таса̄вит та̄л сыс са̄в номтыӈ ва̄рмалитн ханищтаве̄сум, ань ос амки мо̄т ма̄хум ханищтаӈкве, э̄рнэ торыг та̄нанылн матыр нё̄тмил ва̄руӈкве ве̄рме̄гум. Тувыл ня̄врамыт йильпи щирыл хумус ханищтаӈкв э̄ре̄гыт, ам та департаментыт кит та̄л рӯпитасум. Тувыл А̄с-угорский ма̄хум институтн рӯпитаӈкве минасум. Номсысум, диссертациям э̄лаль хансылум, ос тах вуянтылум. Ос округ Думат соссаӈ ма̄хум ма̄гыс Ассамблея ва̄руӈкве патсыт. Ам са̄всыр пе̄рияп ва̄рмаль щирыл округ янытыл яласасум, ханты ос ма̄ньщи депутатыт Ассамблеян пе̄риян ма̄гыс ла̄тыӈ ва̄рсум. Са̄в соссаӈ ма̄хмыт ёт то̄нт ва̄йхатасум. Та порат ты ёмас рӯпатам ка̄салавес ос Лӯима̄ комитетн соссаӈ ма̄хум тэ̄ланыл ёт э̄лаль рӯпитаӈкве во̄вве̄сум. Ам ань тох номсэ̄гум, ты комитет щар яныг миркол хольт лӯима̄ ма̄хманув ма̄гыс о̄лыс. Тувыл нё̄тым та̄н сыресыр тэ̄лат, ханищтап, культура ва̄рмалит но̄хво̄рмалтасыт. Хӯл алыщлан, во̄раян хо̄тпат та̄нки пе̄с о̄лупсаныл щирыл о̄луӈкве патсыт. Ос Ассамблеян пе̄риим депутатыт э̄рнэ са̄кконыт хансуӈкв о̄вылтахтасыт. Мо̄т акв ёмас тэ̄ла тыи ня̄врамыт ма̄гыс этностойбищат ва̄рве̄сыт. Тот ма̄нь ня̄врамыт пе̄с ма̄хманув мӯтраӈ о̄лупсаныл ханищтэ̄гыт. Ань тыг мус «Ма̄нь ӯскве» ос «Нумсанг ёх» этностойбищан ня̄врамыт ка̄сащим ялантэ̄гыт, матыра̄ти ва̄ӈкве, пӯмщалаӈкве тув ёхталэ̄гыт. Та сыс ёмщакве̄г ӯщлахтэ̄гыт, та̄нки халанылт юрщхатэ̄гыт. Яныг пӯмащипа ла̄тыӈ тот рӯпитан хо̄тпатын ос ты тэ̄лат э̄лаль тотнэ хо̄тпагн ла̄вуӈкве э̄ри, тыи Любовь Павловна Станканован ос Ольга Александровна Кравченкан. Аквтох ам А̄с-угорский ма̄хум «Солнце» нампа театр урыл номсэ̄гум. Тот рӯпитан артистат пуссын этностойбищан ялым пе̄с накыт ва̄нэ хо̄тпаг яныгмасыт. Мо̄лалнув ам «И дольше века длится день» спектакляныл сунсыслум, сака ёмщакве̄г, номтыӈыг ва̄рсаныл, а̄гитпыгыт сэ̄ръёрыг ёнгысыт. Пуссын тамле э̄рнэ тэ̄лат нот па̄лыт э̄лаль вос о̄лнувыт, ёл нэ̄мхотьютн ул вос пувавет. Татьяна Николаева ань ты рӯпататэ э̄лаль ва̄ритэ, пӯмащ ос э̄рнэ тэ̄лат щё̄питы. То̄нт та̄н Владимир Путин РФ Президентув та̄нки коланылн ӯрсаныл ос са̄всыр мирыт ва̄рмаляныл о̄вылтыт потыртаӈкве щё̄питахтасыт.

1101 2015.06.05. Николай МЕРОВ

Округув ма̄гыс ма̄нки тэ̄нут та̄стэ̄в. Я̄ӈк на̄тнэ э̄тпос атхуйпловит хо̄талэ̄т ам ля̄ххал тотнэ ма̄хум ёт Сургутский район Белый Яр па̄вылн тотыглаве̄сум. Та па̄выл по̄хыт щищкурекыт янмалтан ООО «Обьрегион» нампа пе̄рма ӯнттым о̄лы. Та пе̄рмат рӯпитан хо̄тпат ма̄навн щищкурекыт янмалтан ва̄рмаль суссылтасыт. Хумус ты я̄нас миннэ тов мины, на̄н ань агропромышленный комплекс кӯщай хум Евгений Петрович Платонов потре э̄лаль ловиньтэлы̄н: «Ты товлыӈ ӯит янмалтан кол 2010 та̄лт пӯсвес. Са̄ртын о̄с щищкурек янмалтан пе̄рма тот о̄лыс. Ос матыр ва̄рмаль щирыл вуньщалыг паттувес, таима̄гыс лаппантвес. Тувыл сэ̄ръёрыӈ хо̄тпат акванхо̄нтхатасыт, щищкурекыт янмалтан ва̄рмаль но̄хво̄рмалтасаныл. Та̄нки олн тув пинсыт, маныр э̄рыс, ёвтсыт ос рӯпитаӈкве та о̄вылтахтасыт. Ань ты пе̄рма округув ма̄гыс мӯӈи ос нё̄выль лов процент са̄виткем тоты. Ты накт мо̄т хо̄н мир ёт воритотнэ ма̄гыс Россиян нэ̄матыр тэ̄нут ат тотаве, таима̄гыс ань ла̄пкатт тэ̄нутыт тыныӈнуве̄г е̄мтсыт. Ос Сургутский районт та̄нки ва̄рнэ нё̄вляныл ос мӯӈияныл тынта̄лнуве̄г о̄лэ̄гыт. Та пе̄рма хосыт школат, пӯльницат ос мо̄т са̄всыр э̄рнэ колыт ёмас ос тынта̄лнув тэ̄нутыл ань та̄ставет. Я̄нас рӯпата о̄щнэ хо̄тпат ты ва̄рмаль та̄нки ё̄ранылт э̄лаль тотуӈкве ве̄рмияныл кос, ос ты тэ̄ла мӯсхал щирыл миннэ ма̄гыс та̄н государство палыл о̄с олныл нё̄тавет. Округувт ты ва̄рмаль э̄лаль тотнэ ма̄гыс программа рӯпиты. Пе̄рматн нё̄тнэ ма̄гыс ка̄сыӈ та̄л олн та̄ставе. Мӯӈи ос ща̄квит ма̄гыс тувыл олн ойтаве. Мо̄лты та̄л округ янытыл рӯпитан предприятиятн ты тэ̄лан са̄тпан миллион солко̄ви майвес. Ты олныт пуссын э̄рнэ щирыл холтве̄сыт. Ма̄н округувт пуссын аквъёт 650 са̄всыр пе̄рма рӯпиты. Ханты-Мансийск ӯс по̄хыт Ярки па̄вылт ма̄хум рӯпата э̄лаль тотнэ ма̄гыс ос та̄нки олн пинсыт. Тот ань витхӯрыг (огурец), помидор ос саюмпум янмалтаве. Ань иӈ тув олн пинуӈкве номсаве, ма̄тэ лов гектар мус яныгнуве̄г ва̄раве тах. Тот клубника пил ос мо̄т са̄всыр тэ̄лнэ ут янмалтаӈкве патаве. Тувыл ос ты накт Белоярский районт щаквит ва̄рнэ завод пӯсвес. Ты хосыт Белоярский ос Октябрьский районыгт о̄лнэ мир йильпи щаквитыл ань та̄ставет. Ты коныпал ань Советский районт о̄с щаквит та̄ратан завод ӯнттаве. Та завод та̄л сыс 425 со̄тыра тонна щаквит ва̄рнэ щирыл о̄лы. Округ янытыл ма̄нки ты са̄вит тэ̄нут ва̄ре̄в: щаквит ос нё̄выль 7-10 процент, картёпка 40 процент, хӯл – 50 процент. Пе̄рман пиным олныт та̄ра ювле ат ёхтэ̄гыт, атахкемса̄тахкем та̄л та̄кыщ рӯпитаӈкве э̄ри. Тувыл ущта холтым олныт ювле ёхтэ̄гыт ос э̄лаль са̄вмалтахтэ̄гыт. Ты тэ̄нутыт ма̄хум акваг ёвтуӈкве патыяныл, таима̄гыс пе̄рма вуньщалыг ат е̄мты. Мо̄лты та̄л сыс та̄нки рӯпата о̄щнэ ма̄хумн нё̄тнэ ма̄гыс округ бюджетныл 1 миллиард 400 миллион солко̄ви майлувес. Та̄н маныр тэ̄нут ва̄рыгласыт, таияныл ёмщакв тыналасаныл ос тыи ма̄гыс олныл ты нё̄тве̄сыт. Ты та̄л 900 миллион солко̄ви та̄стувес. Кӯщай ла̄выс, ат ке то̄влавет, округ правительстван нэ̄пак хансэ̄гыт ос нё̄тмил во̄ве̄гыт тах. Тувыл Надежда Петровна Мазалевич, птицефабрикат технологыг рӯпитан нэ̄, потыртас. Тав ла̄выс: «Ма̄н щищкурекыт янмалтан ма̄гыс мӯӈит Магнитогорск ӯсныл тыг тотыянӯв. Молях яныгман щищкурекыт, рущ щирыл «бройлерыг» ла̄вавет. Та̄наныл янмалтан ма̄гыс Германия ма̄ныл ищхӣпыӈ то̄тапыт ёвтсӯв, мӯӈит ӯйрищиг е̄мтнэ̄ныл мус та то̄тапт о̄ньщиянӯв, акваг тыглетувле ё̄ӈхата̄лыянӯв. Ка̄сыӈ хо̄тахкем хо̄тал та̄н уральтавет, та̄рвитаныл манса̄витыг е̄мтыс. Мӯӈит ёл ул вос ханасыт, то̄самыг о̄ньщиянӯв. Хус арыг хо̄тал та ищхӣпыӈ то̄тапт о̄ньщавет, тувыл ма̄нь ӯйрищит та нэ̄глапе̄гыт. Аквторыг ва̄т со̄тыракем ма̄нь ӯйрищ самын паты. Самын патнэ̄ныл юипа̄лт а̄гмыл ул вос е̄мтсыт, та̄н тэ̄рпил расгалтавет. Тувыл хунь ёмщакв то̄сэ̄гыт ос янмалтан колнакн тотавет. Ӯйрищит ул вос по̄льве̄сыт, колнакт температуратэ акваг 34 градус са̄витыг о̄ньщаве. Та̄н тот туп 38 хо̄тал о̄лэ̄гыт, янгыг та е̄мтапе̄гыт. Ты хо̄талыт сыс щищкурекыт кит кила ос ниласа̄т грамм мус та̄рвитаныл е̄мты. Та юипа̄лт ос нё̄влиг та ва̄рапавет. Тувыл та ма̄ хотсыстамтаве, ос мо̄таныт янмалтаӈкве тув тотавет. Щищкурекыт тыттын ма̄гыс ма̄н Тюмень ӯс ня̄нь ва̄рнэ заводныл комбикорм ёвтэ̄в. Та̄наныл лю̄ль тэ̄нутыл ат тыттыянӯв, туп ёмас тэ̄нут тэ̄гыт. Ты пе̄рмат акв э̄тпос сыс хӯрмахкем манос нилахкем яныг щищкурек а̄ня нё̄влиг ва̄раве, э̄тпос сыс ва̄тахкем тонна нё̄выль та̄ставе. Нё̄влянув Сургут, Лянтор, Нефтеюганск, Пытъ-Ях ӯсыт ос Сургутский район янытыл тыналыянӯв. Сургут ӯст о̄лнэ ма̄нь ня̄врамыт колыт ос школат пуссын ма̄н пе̄рмавт янмалтан нё̄влитыл та̄стыянӯв. Тувыл ос тэ̄нэ ма̄гыс мӯӈит тотнэ нэ̄ щищкурекыт о̄с о̄лэ̄гыт. Акв нэ̄щищкурек са̄тса̄т хо̄тал муӈи тотым о̄ньщаве, тувыл нё̄влиг ва̄раве. Тав та̄л сыс хӯрумса̄ткем мӯӈи мыг». Та пе̄рмат рӯпитан ма̄хум ка̄сыӈ та̄л «Дары Югры» нампа выставкан та̄нки ва̄рум тэ̄нутаныл тотыглыяныл. Рӯпатаныл ма̄гыс ма̄гылн тагатан по̄сыл акваг янытлавет. Тувыл Белый Яр па̄вылт рӯпитан «Белоярочка» нампа ла̄пкат та предприятият янмалтан щищкурек нё̄влит, са̄всыр атыӈ колбасатэ̄нутыт о̄с ань тыналавет. Ялпыӈ хо̄талыт о̄лыглам порат, мир та ла̄пка щар хотта̄тламтыяныл. Ма̄хум ла̄внэ̄ныл щирыл, та пе̄рмат ва̄рум щищкурек нё̄влит сака атыӈыт.

1101 2015.06.05. Тамара МЕРОВА

Нё̄тнэ маснутыт суссылтаве̄сыт. Ханты-Мансийскат «Сделано на Родине» нампа акв пӯмащ проект суссылтавес. Тав мода центр колт щё̄питавес, тот кӯщаиг Елена Скакун о̄лы. Ӯст о̄лнэ ма̄хум «геология, нефть ос газ музеин» акванатыглаве̄сыт ос тот карс нё̄тнэ а̄гит хорамыӈ супыл масхатым тыглетувле ё̄мыгтасыт. О̄влэ̄т «Млада» рущ э̄ргыт э̄ргыӈ коллектив ты ва̄рмаль о̄вылтасаныл. Та̄н о̄с супаныл пуӈкын пиннэ павловопосадский то̄рныл ю̄нтым о̄лсыт. Тувыл модельа̄гит халт тот а̄гмыӈмосыӈ, сакватахтам спортсмен нэ̄т о̄с супыл мастуве̄сыт. Тыи Ольга Сергиенко, Маликат Магомедова, Ольга Касьянова. Ханты ос ма̄ньщи хансал ю̄нтым супыт такем нё̄тнэ̄г о̄лсыт. Акв костюм Руслан Проводников ма̄гыс ю̄нтвес, тав о̄с а̄гит халт ё̄мыгтас. Мо̄лал ты маснутыт Москват «Этно-Эрато» Евразийский касылт суссылтаве̄сыт. Тот ты мода центрколув «Этнические мотивы в современном костюме» номинацият о̄выл места висыт.

1101 2015.06.05. Тамара МЕРОВА

Э̄кваго̄йкаг ща̄гт тотэ̄г. Хурит Светлана Андреевна ос Сергей Иванович Хунзи э̄кваго̄йкаг по̄слым о̄лэ̄г. Тэ̄н Нижневартовск ӯст о̄лэ̄г, мо̄лалнув пенсиян патхатсыт. Ос тэ̄ла та̄л тэ̄н ат ӯнлантэ̄г, акваг матыра̄ти пӯмыщ ва̄рмалит ва̄руӈкве номылматэ̄г. 2013 та̄лт тэ̄н «Хунзи» нампа ще̄мьяӈ община ва̄рсы̄г. Э̄кватэ хорамыӈ маснутыт ю̄нты, о̄йка хӯл алыщлы ос во̄раи. Соссаӈ ма̄хум о̄щнэ ялпыӈ хо̄таланыл мирн суссылтаӈкве щё̄питэ̄г. Ма̄ньполь э̄тпост «Славтэк» нампа корпорация ёт акваннё̄тхатым та̄н хӯл алыщлан ос во̄раян хо̄тпат ма̄гыс ялпыӈ хо̄тал ва̄рыгласыт. Тамле тэ̄ла «Сибирские увалы» ӯщлахтан колт о̄лыс. Тув Нижневартовск ӯсныл ос Излучинск па̄вылныл мӯй ма̄хум ёхталасыт. Хунзи э̄кваго̄йкаг маснутыт ос са̄всыр пормасыт ёмас суссылтапыг щё̄питасаныл ос ма̄хум ханты пе̄с накытыл пӯмщаласаныл. Светлана Андреевна хӯл исмит па̄йтыс, хӯлыӈ ос пилыӈ ня̄нь ва̄рыс. Сергей Иванович янгӯй ка̄тнпаттын ва̄рмаль урыл потыртас, сыресыр во̄раян утыт суссылтас ос та урыл потыртас. Тувыл нё̄тнэ турсуил ханты э̄рыг э̄ргыс. Мӯй ма̄хум са̄лы суныл мощ тотыглаве̄сыт, сыресыр касылыт ёнгысыт. Ты ялпыӈ хо̄тал та̄нанылн сака мӯстыс ос та̄н ла̄всыт, тамле ва̄рмалит э̄лаль вос тотнувыт. Ханты ос ма̄ньщи ма̄хум о̄вылтыт та̄н са̄внув ва̄ӈкве таӈхе̄гыт. Сергей ос Светлана Хунзи «Славтэк» корпорация А. А. Петерман кӯщайн ос «Сибирские увалы» нампа ӯщлахтан кол С. П. Иванцов кӯщайн пӯмащипа ла̄тыӈ ке̄тэ̄г. Ты хо̄тпаг тэ̄натэ̄н ялпыӈ хо̄тал ва̄руӈкве олныл нё̄тсы̄г ос ма̄хум тув мӯйлуӈкве во̄всы̄г. Ань ос ма̄нь ня̄врамыт ма̄гыс э̄кваго̄йкаг ва̄с янытлан ялпыӈ хо̄тал тот ва̄ре̄г. Тэ̄н ня̄врамыт ӯргалан хо̄тал кастыл аквтох сыресыр ёнгилыт, касылыт щё̄питэ̄г. Ва̄с пут па̄йтэ̄г, ӯйхулыт урыл потыртэ̄г, мо̄йтыт мо̄йтэ̄г. Светлана Андреевна ла̄выс, тэ̄н апге̄н нила класс а̄стлы, ань тав ётэ ханищтахтын ня̄врамыт ос та̄н оманыла̄тяныл ёт мӯйлуӈкве ёхтэ̄гыт тах. Тамле ва̄рмаль та̄наныл ке мӯсты, тэ̄н аквтох э̄лаль ва̄руӈкве номсэ̄г. Тэ̄н ётэ̄н ам хоса потыртасум, ёмас сымыӈ хотпаг о̄лупсатэ̄н пӯмащ. Хотынакт потранэ̄н хансыянум тах.

1101 2015.06.05. Тамара МЕРОВА

Намхо̄таланыл кастыл янытлыянӯв. Я̄ӈк на̄тнэ э̄тпост ос лӯпта э̄тпост ты хӯрум соссаӈ хо̄тпат намхо̄таланыл о̄лыс. Ма̄н та̄н то̄влум та̄ланыл ма̄гыс хотща̄гтым о̄лэ̄в ос та̄наныл янытлыянӯв. Егор Алексеевич Яркин ва̄т нупыл нёлоловит щислат 80 та̄лэ то̄влыс. Тав «ХМАО-Югры ветеран» хо̄тпаг о̄лы. О̄йка са̄в та̄л хӯл алыщлым Октябрьский районт о̄лнэ Кевавтнёл ос Алы Нярихумит па̄влыгт совхоз бригадирыг рӯпитас. Ёмащакв рӯпитаме ма̄гыс са̄всыр э̄сгын нэ̄пакыл ос по̄сыл майлувес. Ма̄н таве̄н яныг пӯмащипа ла̄тыӈ ла̄ве̄в ос пуста̄гыл о̄лнэ нак ке̄тэ̄в. Ирина Кузьминична Фирсова ва̄т нупыл са̄т щислат 50 та̄лэ то̄влыс. Ты нэ̄ Белоярский ӯст о̄лы ос са̄всыр мирыт культураныл э̄лаль тотнэ центрыт рӯпиты. Тав тот соссаӈ ма̄хманув о̄щнэ хорамыӈ пормасыт ва̄ри, нё̄тнэ маснутыт ю̄нты, щулкиныт саги. Нэ̄ ты тэ̄ланэ сака э̄рпыӈыщ о̄ньщиянэ, са̄всыр пормасыт ма̄щтырыг ва̄руӈкве яныгпа̄ла соссаӈ хо̄тпаныл ханьщувлас. Ань ос мо̄т ма̄ньлат а̄гитпыгыт ханищты. Пуссын ва̄рум утанэ ма̄гыс Ирина Кузьминична «Россия ма̄щтырхо̄тпа» намыл пинвес. Мария Владимировна Ситникова лӯпта э̄тпос китыт щислат 70 та̄лэ то̄влыс. Тав ва̄т нупыл кит та̄л мир пусмалтан тэ̄лат щирыл рӯпитас. Ос пенсиян патхатаме юипа̄лт ма̄ньщи маснутыт, са̄всыр пормасыт ю̄нтуӈкве патыс. Тав «Старый Сургут» нампа центрыт соссаӈ ма̄хум культураныл ӯргалан ос э̄лаль тотнэ хо̄тпаг рӯпиты. О̄выл ва̄рум рӯпататэ ма̄гыс Мария Владимировна сыресыр э̄сгын нэ̄пакыл, ма̄гылт о̄щнэ по̄сыл мӯйлуптавес. Ос юио̄выл рӯпататэ ма̄гыс тав округ па̄лыл «За развитите культуры малочисленных народов Севера» премиял майвес. Ты я̄тил, ёмас хо̄тпат ма̄н пуссын намхо̄таланыл кастыл янытлыянӯв. Са̄в посыӈ, со̄тыӈ хо̄тал э̄лаль вос о̄лэ̄гыт, та̄нки сыманылн э̄рнэ тэ̄ланыл э̄лаль вос ва̄рияныл ос ня̄враманылн, апганылн акваг вос э̄руптавет ос ӯргалавет. Пус ка̄т, пус ла̄гыл, То̄рум ёт, На̄й-О̄тыраныл ёт!

1101 2015.06.05. Тамара МЕРОВА

То̄рум А̄щ ла̄тӈыт э̄лаль тотнэ хо̄тпат. Финка нэ̄ Анита Лааксо ёт ме̄н хосат та̄гыл ва̄йхатыме̄н. Ам 1996 та̄лт Финляндият ханищтахтамум порат тот акванхо̄нтхатасме̄н. Тав Хельсинки ӯст о̄лы ос Библиянэ̄пак толмащлан институтколт кӯщай нэ̄г рӯпиты. Ты институтт Библиянэ̄пакт хансым потрыт са̄всыр мирыт та̄нки ща̄нь ла̄тӈаныл щирыл хансыяныл. Ты тэ̄лат ва̄рнэ̄ныл ма̄гыс тот сака ёмащакв рӯпитэ̄гыт. Россия янытыл о̄лнэ са̄всыр ма̄хум ёт та̄н юрщхатым о̄лэ̄гыт. Ка̄сыӈ мир халт юрт о̄ньще̄гыт ос та̄н ётаныл аквъёт потрыт ща̄нь ла̄тӈанылн толмащлыяныл. Та сыс та̄нки о̄с ма̄н ла̄тӈанув мощ ханищтыяныл. Финноугорский мирыт ос Санкт-Петербургыт лӯима̄ институтт ханищтахтын ма̄хум та̄нанылн ве̄щкат нё̄тэ̄гыт. Ань Санкт-Петербург ӯсн ялмум порат ме̄н Анита Лааксо ёт акванхо̄нтхатыгласме̄н. Тав аквъёт рӯпитан румаге ёт В. С. Иванова намхо̄талэ кастыл янытлаӈкве тув ёхталас. Валентина Селивёртовна та̄нанылн сака са̄в ос мӯсхалыг нё̄тыс. Тав Клавдия Васильевна Афанасьева ёт Библиянэ̄пакн хансым потрыт ма̄ньщи ла̄тӈыл толмащласанэ̄н. Тувыл потрыт ёмщаквег уральтавет, ла̄тӈыт ма̄кыг хӯлтавет ос та юипа̄лт хорамыӈ нэ̄пакыг ва̄равет. Толмащлан хо̄тпатн ос нэ̄пак та̄ратан ма̄гыс финныт та̄нки олн ойтэ̄гыт. Та щирыл та̄н То̄рум А̄щ ла̄вум ла̄тӈыт, пе̄с накыт ма̄ янытыл о̄лнэ са̄всыр мирыт халт нот палытын о̄с э̄лаль тотыяныл.

1101 2015.06.05. Людмила ТЕТКИНА

А̄гитпыгыт ма̄вит ӯргалаӈкве ханищтавет. «Спасти и сохранить» нампа акция рӯпитан порат ня̄врамыт мо̄т хо̄н ма̄ныл, Россияныл ос округ янытыл Ханты-Мансийск ӯсн ёхталасыт. Та̄н пуссын «Одна планета – одно будущее! » нампа форумт рӯпитасыт. А̄гитпыгыт Венгрия, Словения, Финляндия, Армения, Болгария ос мо̄т хо̄н ма̄ныл тыг во̄виньта̄лве̄сыт. Форум рӯпитаме порат ня̄врамыт са̄всыр ханищтапыл, мастерклассыл, ёнгилыл ва̄рыглаве̄сыт. Хулюмсӯнт па̄выл школаныл Юлия Боженко, Юлия Давыдова ос Татьяна Андреевна Головина, ня̄врам ханищтан хо̄тпа, тыг ёхталасыт. Юлия Боженко «Водная экспедиция – Моя земля» такви потре тот ловиньтастэ. Ма̄ньполь э̄тпост Татьяна Андреевна ня̄врамыт Усть-Манья па̄вылн тотыгласанэ. Та па̄вылн мус миным та̄н Ня̄хщамво̄ль, Яныгпа̄вылн хо̄игласыт. Ка̄сыӈ па̄вылт та̄н я̄т вит ёт виссыт. Усть-Манья па̄вылныл вит о̄с юв тотсыт. Ювле ёхтыманыл Татьяна Андреевна Юлия Боженко ты вит ёмащакве ханищтастэ̄н. Ань щар па̄ӈкын вит Хулюмсӯнт па̄вылт ови, я̄ витэ са̄всыр лю̄ль утыт о̄ньщи. Са̄всыр ма̄нь я̄ныл ос я̄ӈкылма̄ныл, ураил вит Тагт я̄н паты, таи ма̄гсыл таса̄вит са̄в лю̄ль ут о̄лы. Усть-Манья па̄вылт я̄ витэ щар сыстам. Юлия ты ва̄рмалит урыл форумт ты потыртас. А̄нумн ла̄выс, тамле форумн тав о̄выл щёс ёхталас, тот рӯпитаӈкве таве̄н сака мӯстыс. Ат хо̄тал сыс тав ма̄вит ӯргалан урыл са̄в йильпи тэ̄ла хӯлыс. Мо̄тыт та̄лт тамле форумн ёхталаӈкве о̄с таӈхи.

1101 2015.06.05. Валентина УЗЕЛЬ

Ма̄н ма̄вн о̄лмыгтам рущ ма̄хум урыл. Ханты-Мансийский районт о̄лнэ Кышик па̄выл ханты па̄влыг ла̄ваве, тот йис та̄гыл ханты ма̄хум о̄лэ̄гыт. Та̄н тув Касум ма̄ныл о̄луӈкв ва̄нтлысыт. Пе̄с порат Назым я̄ хосыт хантыт са̄лыӈ суныл Ханты-Мансийск ӯсн хӯл, нё̄выль, са̄всыр мо̄т тэ̄нут хартсыт. Тот ӯлтта лё̄ӈх пиным о̄лы. Та па̄сныл са̄в ханты ще̄мьят тот о̄луӈкв хультсыт, ань ты мус яныгпа̄ла хо̄тпат тот ханты ла̄тӈыл потыртэ̄гыт. Рущит тув нас ня̄влуве̄сыт. Та̄н мо̄т ма̄ныл тыг те̄тыманыл юипа̄лт са̄всыр ма̄нь па̄влытн о̄лмыгтаӈкв ла̄вве̄сыт. Кышикт ам акв рущ э̄ква ёт потыртасум. Тав наме Татьяна Васильевна Фатеева. Ме̄н тав ётэ тӯяг тот хо̄нтхатыгласме̄н, тав такви рӯпататэ урыл мощ потыртас. Тит та̄лыг ты е̄мтыс, тав «Северяночка» нампа клуб кӯщаиг ӯнттувес. Тув яныгпа̄ла хо̄тпат ёхталэ̄гыт, са̄выӈпа̄лэ рущ э̄кват. Пуссын аквъёт ань нёлолов хо̄тпа, акванатхатэ̄гыт, та э̄рге̄гыт, матыр та щаквще̄гыт – хотьют ю̄нсхаты, хотьют саги. Ос пуссын э̄ргуӈкв сака ха̄сэ̄гыт, турсуяныл татем суиӈыт. Ты э̄лыпа̄лт та̄н мощ щирыл намаим о̄лсыт. Ты рущ э̄ква такви урыл тох потыртас. Тав Кышик па̄вылт самын патыс. Щаще̄кватэ ос о̄патэ мо̄т ма̄ныл о̄лсы̄г. Яныг хо̄нт э̄лыпа̄лт о̄луӈкв тув те̄твесы̄г. Колта̄гланыл сака яныг о̄лыс, тэ̄н онтолов ня̄врам о̄щсы̄г. Пуссын яныгмасыт, ла̄кква мингаласыт. Ос Татьяна Васильевна оматэ тот хультыс, нила ня̄врамыӈ нэ̄г о̄лыс. Ань ты нэ̄ такви яныг ще̄мьяӈыг е̄мтыс. Хӯрум ня̄враманэ пуссын Кышик па̄вылт хультсыт, акв ма̄нь пыге ань армият лусыты, моще̄рт юв ёхты. Татьяна Васильевна атпан та̄лэ то̄влыс, такви сака ка̄ркам хо̄тпа. Яныгпа̄ла э̄кват пуссын акванатсанэ, ань э̄ргимйӣквим са̄всыр ма̄т та яласэ̄гыт. Хоты па̄вылн во̄вавет, тув та минэ̄гыт. Ма̄щтырлым пормасаныл тыналыяныл, тох мощ олн сэ̄лумтэ̄гыт. Хо̄т матыр ялпыӈ хо̄тал те ва̄раве, тот та тыналахтэ̄гыт. Па̄вланылт ялпыӈ хо̄талыт о̄лнэ̄ныл порат ос маттем та э̄рге̄гыт. Аквъёт э̄ргиманыл ань хо̄тхуйплов та̄лыг ты е̄мтыс. Тох ты мо̄т ма̄ныл ёхтум рущ ма̄хум ма̄нь па̄вылн ты о̄лмыгтэ̄гыт, ма̄нь мир халт тэ̄лыгтахтэ̄гыт ос та̄нти э̄рганылйӣкваныл мирн суссылтым та о̄лэ̄гыт.

1101 2015.06.05. Людмила ТЕТКИНА

Юн ма̄ньщи ла̄тӈыл потыртэ̄н. Ха̄льӯс район Ня̄хщамво̄ль па̄вылт ма̄нь ня̄врамыт садикт 2013 та̄л па̄сныл «Языковое гнездо» нампа проект рӯпиты. Ня̄врам ӯргалан колт кӯщаиг ма̄ньщи нэ̄ Галина Николаевна Войтова о̄лы, такви опарищ наме Курикова. Ты тэ̄ла урыл тав ла̄выс: «Ты проект хосыт ня̄враманув ма̄ньщи ла̄тӈыл потыртаӈкве ханищтыянӯв. Ня̄хщамво̄ль ма̄ньщи па̄влыг о̄лы, тувыл ань ма̄хманув ща̄нь ла̄тӈыл щар ат потыртэ̄гыт. Тыи ма̄гсыл ма̄н ты ва̄рмаль хосыт рӯпитаӈкве та̄ра ка̄сащасӯв, а̄гирищанувпыгрищанув ма̄нь та̄гыл ма̄ньщи ла̄тӈыл вос потыртэ̄гыт». Ань Россия янытыл о̄лнэ финноугорский мирыт ты проект щирыл пуссын рӯпитэ̄гыт. 2012 та̄л порат Галина Николаевна Саранск ӯсн ханищтапн ялыс, финноугор ма̄хум ты рӯпата хумус ва̄ре̄гыт, та урыл тот пӯмщалахтас. Ма̄н округувт ань Ха̄льӯс район Саранпа̄выл ос Ня̄хщамво̄ль па̄влыгт ня̄врамыт ма̄ньщи ла̄тӈыл ханищтавет. Тэ̄к ос Касум па̄влыгт а̄гирищитпыгрищит ос ханты ла̄тӈыл садикт потыртэ̄гыт. Ня̄хщамво̄льт садикыт «Со̄выркве» нампа группа ва̄рвес. Нина Николаевна Курикова ня̄врамыт ма̄ньщи ла̄тӈыл ханищтыянэ. Тав садикыт 28 та̄л рӯпиты. Ты э̄лыпа̄лт тав ат та̄л интернатт воспитателиг о̄лыс. То̄нт яныгса̄т арыгкем ня̄врам ма̄нь па̄влытныл ос Хулюмсӯнтыл тув тотыглаве̄сыт. Та порат о̄выл классын ёхтум а̄гирищитпыгрищит рущ ла̄тӈыл щар ат потыртасыт. Ань тай мо̄т щирыл е̄мтыс, ня̄врамыт ща̄нь ла̄тыӈ щар ат ва̄гыт. Ма̄ньщи нэ̄ такви рӯпататэ урыл таи ла̄выс: «Ты тэ̄ла садикт ва̄руӈкве хунь о̄вылтаслӯв, ща̄нита̄щит китыгласанӯв, ня̄враманыл ма̄ньщи ла̄тӈув ханищтаӈкве патэ̄гыт ман а̄ти. Ма̄хманув ка̄сащасыт, ань ты группан нёлолов ня̄врам яланты. Ма̄н са̄т хо̄тал сыс кит щёс акванатхатыглэ̄в. Ам акв колнакт суссылтап щё̄питаслум. Тот са̄всыр ма̄ньщи пормасыт акванатсанум. А̄гирищитпыгрищит тув ёхталаӈкве сака ка̄саще̄гыт. Са̄всыр ма̄нь ёсат, ха̄пыт, совтыт, а̄канит ос са̄в мо̄т пормас сунсыглаӈкве сака э̄руптэ̄гыт. Тамле ханищтапт ам ня̄врамыт ёт ма̄ньщи ла̄тӈыл потыртэ̄гум, та̄н тай иӈ ма̄нит, ла̄тыӈ ёмащакве хӯлэ̄гыт. Ёмаснувег о̄лнув, ща̄няныла̄щаныл юн ма̄ньщи ла̄тӈыл ке потыртасыт. Акв порат ня̄врамытн по̄слым хӯл суссылтым, китыгласанум: «А̄нум ма̄ньщи ла̄тӈыл ла̄ве̄н, тыи манхурип «хӯл»? Акв пыгрищ ювле ро̄ӈхи: «Ам ва̄глум, тыи ня̄лк, ане̄квам тох ла̄ви». Яныг хо̄тпа юн о̄лы, тыи ма̄гсыл пыгрищ са̄внув ма̄ньщи ла̄тыӈ ва̄г. Нина Николаевна ня̄врам ёт мо̄йтыт, амщит, стихыт ханищты. Юван Шесталов хансум стиханэ ос Анна Конькова мо̄йтанэ та̄нанылн ловиньтыянэ. Мо̄лты та̄л тав Саранпа̄вылн ялыс, ты проект хосыт ма̄хум хумус тот рӯпитэ̄гыт, та урыл пӯмщалахтас.

1101 2015.06.05. Светлана РОМБАНДЕЕВА

Музейт ма̄н маттем та мӯйлысӯв. Ханты-Мансийск ӯст я̄ӈк на̄тнэ э̄тпос 16 хо̄талэ̄т Ма̄вит ос Э̄лумхо̄лас музей э̄ткотиль мус рӯпитас. Та порат Россия ма̄в янытыл са̄в музеит тох рӯпитасыт. Мӯйлын э̄типа̄ла тох намая̄лвес: «Солдат войну не выбирает». Музеин щалтсан ма̄гыс ма̄хум олн ат ойтсыт. Яныг хо̄нт урыл выставкат ос экскурсият ва̄рыглаве̄сыт. Ня̄врамыт ма̄гыс са̄всыр мастерклассыт о̄лсыт. То̄ваныл пластилиныл та̄нкыт ос товлыӈха̄пыл ва̄рсыт, то̄ваныл ос ка̄тыл са̄всыр хурит по̄слысыт. Кина суснэ колнакт ма̄хум кинал суссылтаве̄сыт. Ӯйхулыт ос товлыӈӯйит хурияныл но̄хва̄римат – янгуй, охсар, щёпыр, а̄ӈха, щар сома лылыӈта̄гыл лю̄ляхо̄лэ̄гыт. Музейт сака са̄в мир о̄лыс, кон ворил ты ква̄лсӯв. Кон ма̄тэ̄т ос са̄всыр машинат лю̄льсыт, ань ма̄хманув хо̄нтлуманыл порат манарыл яласасыт, манарыл па̄тлуптасыт, тот пуссын сунсуӈкве ро̄выс, ма̄хум маттем та по̄слахтасыт. Пыгрищит хо̄нтлын ва̄рмалил ва̄рыглаве̄сыт – писалил майлуве̄сыт, патлуптым мощ ха̄йтыгтасыт. «Солдатский привал» рӯпитас, ма̄хум кашал тыттуве̄сыт, ща̄ил айтве̄сыт. Концерт о̄лыс, яныг хо̄нт урыл э̄ргыт э̄ргуве̄сыт. Сусте̄мт, кон турманлас, а мир тоха та мӯйлы. Аман хунь юв мингаласыт, тавагт.

1101 2015.06.05. Людмила ТЕТКИНА

Ма̄щтыр ма̄хум ёнгын утыт ва̄рсыт. Я̄ӈк на̄тнэ э̄тпос оигпан э̄лыпа̄лт Ханты-Мансийск ӯст «Торум Маа» нампа музейт «Игры и игрушки обских угров» нампа ханищтап рӯпитас. Тамле э̄рнэ тэ̄ла ка̄сыӈ та̄л ва̄рыглаве ос округ янытыл о̄лнэ ма̄щтыр ма̄хум Ханты-Мансийск ӯст акванатыглавет. Ты та̄л хо̄тхуйплов ханищтап рӯпитас. Акв та̄лт ма̄хум са̄всыр а̄нысаныт, совтыт, па̄йпыт сасныл ва̄рсыт. Мо̄т та̄лт ма̄щтыр хо̄тпат ос хӯл алыщлан ма̄гсыл са̄всыр хӯлпыт сагсыт, во̄раян хо̄тпат ма̄гсыл ёсат ос мо̄т пормасыт ва̄рсыт. Ты та̄л рӯпитам семинарт о̄выл хо̄талэ̄т ма̄хум ма̄ньщи ос ханты ня̄врамыт пе̄с порат манхурип ёнгын утыл ёнгасасыт ос хумус та̄н ва̄рсыт, та урыл потыртасыт. Учёный хо̄тпат ты ва̄рмаль урыл хансым докладаныл ловиньтасыт. Ты та̄л Томск ӯсныл Ольга Михайловна Рындина ос Наталья Владимировна Золотарёва ты семинарн во̄виньта̄лвесы̄г. Тэ̄н Томский университетыт рӯпитэ̄г, ма̄ньщи ос ханты пе̄с йис ва̄рмалит ханищтэ̄г. Ханты-Мансийск ӯст тэ̄н соссаӈ ма̄хум пе̄с накыт урыл потыртасы̄г. Акв та хо̄талэ̄т «Играми, игрушками играющие» нампа суссылтап рӯпитаӈкве о̄вылтахтас. Музейт о̄лнэ а̄канит ос са̄в мо̄т ёнгын утыт тот суссылтаве̄сыт. Тувыл нила хо̄тал сыс округ янытыл ёхталам ма̄щтыр хо̄тпат ма̄хум ю̄нтуӈкве манос ма̄щтырлаӈкве ханищтасаныл. Валентина Дорофеевна Саратина ос Тамара Семёновна Мезенцева Ягрим па̄вылныл тыг во̄виньта̄лвесы̄г. Мария Сергеевна Мерова Ханты-Мансийсканыл о̄лыс. Октябрьский па̄вылныл Галина Семёновна Волдина ос Нижневартовский районыл Аган па̄вылныл Альбина Лазаревна Ярсомова ёхталасы̄г. Округувт ка̄сыӈ ма̄т ма̄ньщит, хантыт а̄кань та̄нки щирыл ю̄нтыяныл. Тув ёхталам ма̄хум са̄всыр а̄канит ю̄нтуӈкве ханищтахтасыт. Галина Рудольфовна Кондина ня̄врамыт ма̄гсыл са̄сныл ма̄нь а̄пат ю̄нтуӈкве ханищтас. Рудольф Васильевич Меров ос Ха̄льӯс районныл Хӯрумпа̄вылныл тыг ёхталас. Тав ос Валерий Михайлович Шульгин, Ханты-Мансийск ӯст о̄лнэ ма̄щтыр хум, ёт ма̄нь ёса, са̄лы сун, тӯп ос мо̄т ёнгын ут ва̄рсыт. Яков Никифорович Тарлин Белоярский район Касум па̄вылныл тыг во̄виньта̄лвес. Тав о̄с са̄всыр пӯмащ ня̄врамыт ма̄гсыл ва̄рыс. Семинар оигпам юипа̄лт ма̄щтыр ма̄хум пуссын янытлаве̄сыт ос янытлан нэ̄пакыл майве̄сыт. Ня̄врамыт ма̄гсыл ва̄рим ёнгын утыт ма̄щтыр ма̄хум музейн мӯйлуптасаныл. Ты пормасыт са̄всыр выставкат суссылтаӈкве тах патавет.

1102 2015.06.26. Тамара МЕРОВА

Пилыщмаӈ хо̄нтРоссият лӯпта э̄тпос ва̄т нупыл китыт хо̄талэ акваг номим о̄ньщаве. Тав «День памяти и скорби» рущ щирыл ла̄выглаве. Ты хо̄талт 74 та̄л ювле хультум порат Германия мирхал яныг пилыщмаӈ хо̄нт СССР нупыл о̄вылтас. Ты та̄рвит ва̄рмалит сака са̄в ма̄хум порслувес. Та̄н рӯтанылн ань тыг мус ка̄ставет. Ханты-Мансийск ӯст войнат порслам ма̄хум о̄с ка̄стуве̄сыт. Хосат та̄гыл «Единая Россия» нампа мирн пе̄риим хо̄птат ос мо̄т партият о̄лнэ депутатыт а̄лпыл хо̄т щё̄ст ӯскан памятник по̄хат акванатхатыглэ̄гыт. Ты та̄л та̄н аквтох тув ёхталасыт ос «Молодая гвардия» ма̄ньлат хо̄тпат ёт тот исвеща пе̄ламтасыт, пуӈк пинсыт ос хорамыӈ лӯптат памятникыт хультуптасыт. Тувыл китхойплов щё̄ст матумпа̄ла хо̄тпат ос са̄всыр кӯщаит о̄с тув атхатыгласыт. Округ губернатор нэ̄ Наталья Комарова ос округ Дума кӯщай Борис Хохряков ма̄хум э̄лыпа̄лт ты хо̄талт пилыщмаӈ о̄вылтам ва̄рмаль урыл ла̄тыӈ ла̄всы̄г. Воссыг нэ̄мхуньт ос нэ̄мхот тамле лю̄ль та̄рвит нак ул вос е̄мты. СССР янытыл 1941-1945 та̄лыт сыс 20 миллион са̄вит э̄лумхо̄лас наска̄ссыг порслуве̄сыт. Югра ма̄ныл 18 со̄тыра хум хо̄тпат хо̄нтлуӈкве ке̄тве̄сыт, 6 со̄тыра арыг хо̄тпа ювле ат ёхтысыт.

1102 2015.06.26. Валентина УЗЕЛЬ

Те̄рыӈхомлахыт ты ква̄лапасытАнь ма̄лтыпыг е̄мтме юипа̄лт те̄рыӈхомлахыт о̄с та ква̄лапасыт. Ӯщлахтын хо̄талыт сыс те̄рыӈхомлахытн то̄вмасым са̄в мир пӯльницан та минэ̄гыт. Мощ ма̄лтыпнув ма̄т о̄лнэ ма̄хум та̄н ӯргалахтым о̄лэ̄гыт. Ос ман, тыт яныгмам ма̄хум, тамле лю̄ль ут хунь ва̄щинтасӯв. Ань ле̄ккарыт тамле ла̄тыӈ мирн те̄тэ̄гыт. Ёмащакв масхатуӈкв э̄ри На̄н во̄рн миннэ̄н э̄лыпа̄лт сэ̄мыл маснут ул масэ̄н. Ты ма̄нь утрищит тамле маснут тармыл щар ат на̄ӈке̄гыт. Ка̄щ о̄вланын носки тивырн нарыгтэ̄н. Пуӈк то̄р пинэ̄н, хум хо̄тпат ос матыр те̄нт вос масэ̄гыт. Тэ̄рпил сартхатэ̄н Ань ле̄ккар колт са̄всыр тэ̄рпи тыналаве, ро̄ви нас сартхатуӈкв, ро̄ви маснут тэ̄рпил расгалтаӈкве. Те̄рыӈхомлахыт тамле тэ̄рпи юипа̄лт аквтит кум туп о̄лэ̄гыт, та̄ра та патыглэ̄гыт. Юв ёхтынэ̄н юипа̄лт маснутанын ёмащакв уральтэ̄н, э̄рыӈ та̄н хоттӯйтхатасыт. Ты ма̄нь утрищит сака хоса о̄лэ̄гыт, юв те тотавет, та̄н матахмат хо̄тал иӈ лылыӈыт. Та̄н хотталь хуйнэ ма̄н те патэ̄гыт, ос хо̄тпа тув ӯнты те, тав палтэ ханувъе̄гыт, пурасаве, алпитэ̄н та то̄вмхатэ̄гыт. Ты утрищит самыл ка̄салан ма̄н ат то̄вмхатэ̄гыт, хо̄тпа пале юипа̄лт манос хаӈылпаттатэ̄т тот хот сов тӣврын та щалтэ̄гыт. Те̄рыӈхомлахн то̄вмасым хо̄тпа такви та̄ра таве кон вос хартытэ. Ос ле̄ккарыт ла̄ве̄гыт, таве конхартуӈкв щар ат э̄ри кос. Тав акв па̄лэ конхартаве, ос пуӈке хо̄тпа алписов тивре̄т хульты. Ты пилыщмаӈ а̄гм тотнэ лю̄ль утыт пуӈке̄т о̄лэ̄гыт. Ле̄ккарыт палт та̄ра минуӈкв э̄ри, та̄н э̄рнэ щирыл таве конхартыяныл, хо̄тпа алпитэ̄т нэ̄матыр ат хульты. Э̄лмхо̄лас ат те ва̄нэ̄тэ, тав те̄рыӈхомлахн то̄вмасыма, ос та юипа̄лт ты ут такви хо̄т ёлпатыс. Та то̄вмасым ма̄тэ хотпувлахты, ос хӯрумса̄т э̄лмхо̄лас нэ̄матыр а̄гмыл ат е̄мты. Хусахтем хо̄тал мины, то̄нт ущ а̄гм осн та нэ̄глы. Ос ты а̄гм щар яныг пилыщма тоты – хо̄тпа а̄тимыг е̄мты манос аквма̄н паты. Ты а̄гм э̄лмхо̄лас пуӈква̄лме̄н сака лю̄ль ва̄ри, хо̄тпа та юипа̄лт потыртаӈкв ат паты, ё̄мыгтаӈкв ат паты. То̄вмасым хо̄тпа пӯльницан те мины, тот тав ле̄ккарытн та̄ра тэ̄рпиӈ ю̄нтупыл тӯщтаве. Ос тамле тэ̄рпиӈ ю̄нтуп туп акв а̄гм пусмалты – энцефалит, ты коныпал те̄рыӈхомлахыт иӈ матах мо̄т та̄рвитыӈ а̄гм о̄ньще̄гыт. Ос та а̄гмыл хо̄тпа те ха̄хтаве, тав ты коныпал ёмащакв пусмалтаӈкв патаве. Ханты-Мансийск ӯс ляпа во̄ре̄т, йӣвыт яныгман ма̄т тамле ма̄нь утрищ сака са̄в. Ань я̄ӈк на̄тнэ э̄тпос оигпам мус ма̄хум ё̄мыгтан ма̄т пуссын тэ̄рпил расгалтавет. Ос нэ̄пак тагатаве, ма̄хум вос ва̄ганыл – та̄н хо̄т ёмащакв ӯщлахтуӈкв ве̄рме̄гыт. Ань юио̄выл та̄лытыт ты те̄рыӈхомлахыт лӯима̄ нупыл ты минмыгтасыт – Ха̄льӯс ос Октябрьский районыгт нэ̄глапасыт. Таима̄гыс на̄н пуссын ӯргалахтым о̄лэ̄н. Хо̄т во̄рт то̄вмасаве̄н те, та̄ра пӯльницан минэ̄н. Пӯльницаныл те̄тым потыр ма̄ньщи ла̄тӈыг Валентина Хозумова толмащластэ.

1102 2015.06.26. unknown

Хо̄н ма̄ныл ке̄тым ла̄тыӈАньмӯнтнув ма̄н редакциявн Швейцария хо̄н ма̄ныл пищма ёхтыс. Тув нё̄тнэ ма̄ хури, хум хо̄тпа хуритэ ос олн пиным о̄лыс. (Аман конвертыт, маркат ёвтнэ ма̄гыс тув олн пиныс? ). Потыр английский ла̄тӈыл хансым о̄лы, ма̄н пищма ма̄ньщи ла̄тӈыл толмащласлӯв, на̄н ловиньтэ̄лын: Паща о̄лэ̄н. Ам намум Витус , ам ханты ос ма̄ньщи хо̄тпат ёт румалахтуӈкве таӈхе̄гум. На̄н ам ке̄тум пищмам рущ манос ма̄ньщи ла̄тӈыл толмащлылы̄н ке, хурим ос «Лӯима̄ сэ̄рипос» газетант по̄слылы̄н ке, ам хотща̄гтэ̄гум. Ам ма̄ньлат пыг, на̄н соссаӈ ма̄хум о̄вылтыт сака пӯмщалахтэ̄гум. Ос хотьют ам ётум юрщхатуӈке тахмаи ке, а̄нумн английский манос немецкий ла̄тӈыл пищма вос хансы. Ам адресум тамле: Vitus Castelberg Aspermontstr, 19 CH-7000 Chur Switzerland Яныг пӯмащипа! На̄нан янытлыянум, Витус.

1102 2015.06.26. Николай МЕРОВ

Ханты-Мансийск ӯскант ма̄хманув мӯйлысытЛӯпта э̄тпост 12 щислат Ханты-Мансийск ӯст Россия хо̄тал ос ӯсув нам хо̄талэ о̄лыс. Ты кастыл Мира ӯсхулы хосыт ӯска̄н мус са̄в мир акв юипа̄лт ё̄мсыт. Ма̄хум флагыт, плакатыт ос хорамыӈ шарикыт ка̄тыт тотсыт. Ӯскант нилахкем со̄тыра э̄лумхо̄лас акванатхатыглас. Ты ялпыӈ хо̄талт Федеральный инспектор кӯщай Дмитрий Кузьменко, округ кӯщай ва̄ӈын хум Геннадий Бухтин, Ханты-Мансийск ӯс кӯщай Василий Филипенко мир янытлан ла̄тыӈ ла̄всыт. Ты коныпал ма̄хум э̄лыпа̄лт акв яныгпа̄ла хо̄тпа Семён Владимирович Семёнов потыртас. Тав 1943 та̄лт Самарово па̄вылт самын патыс. Ты хум са̄в та̄л ёмщакв рӯпитаме ма̄гыс Ханты-Мансийск ӯс Почётный гражданин намыл майвес. На̄н тав потре э̄лаль ловиньтэлы̄н: «Я̄тил ма̄хумаквет, ам на̄нан ты ялпыӈ хо̄талыл сымыӈыщ янытлыянум. Ханты-Мансийск ӯсув тох намаяме па̄сныл ань 65 та̄л то̄влыс. Ам таи номылматсум, ва̄т нупыл ат та̄л юипа̄лт ӯсув щар ма̄нь о̄лыс. То̄нт туп ловманкем со̄тыра э̄лумхо̄лас о̄лыс. Йӣв колыт ӯнлысыт, ёмас лё̄ӈх щар а̄тим о̄лыс. Ань юио̄выл атхуйпловкем та̄л сыс ӯсув татем нё̄тнэ колытыл ӯнттувес, ёмас лё̄ӈхыл пинвес, са̄в мир э̄лыл тыг ёхталаӈкве патсыт. Ань тыт ма̄хум пуссын аквъёт ловиньтаӈкве ке, яныгса̄т арыг со̄тыра хо̄тпа о̄лы. Ты ва̄рмаль ма̄навн яныг ща̄гт тоты, ӯсув акваг яныгми. Ос яныг пӯмащипа ла̄тыӈ о̄влэ̄т тыт рӯпитам хо̄тпатн ла̄вуӈкве таӈхе̄гум. Та̄н яныг ё̄р пинсыт, са̄в рӯпитасыт, ты хо̄тпат ёрувлаӈкве щар ат э̄ри. Та̄н хосытаныл ма̄н ань ёмащакв ты о̄лэ̄в. Ты хо̄тал о̄с акв ёмас хо̄тпа номылматаслум Александр Васильевич Филиппенко. Тав са̄в та̄л округ кӯщаиг рӯпитас, Югра ма̄в тав ты но̄хво̄рмалтастэ. Ань ты хо̄тпав ты та̄л о̄с 65 та̄лэ то̄влыс. Ма̄н таве о̄с ща̄гтым янытлылӯв, са̄в та̄л пуста̄гыл о̄лнэ ла̄тӈыл ке̄тылӯв. Ты коныпал ос мо̄т са̄в хо̄тпат урыл потыртаӈкве ро̄ви. Ос таи ла̄вуӈкве таӈхе̄гум, тыт рӯпитан хо̄тпат ӯсув нё̄тнэ̄г та̄н ты ва̄рсаныл. Россия хо̄талыл ос ӯсув ялпыӈ хо̄талыл на̄нан тыныӈ ма̄хумаквет! ». Янытлан ла̄тӈыт юипа̄лт ма̄хум иӈ хоса тот нас ё̄мыгтасыт, ӯщлахтасыт. Тот тыналахтын палаткат тӯщталаве̄сыт, исум тэ̄нут тыналавес. Хо̄тпа ка̄сащас те, матыр пӯмащ ут ёвтуӈкве ве̄рмыс. Хо̄талыӈ хо̄талт ка̄сыӈ хо̄тпа ща̄гтым ё̄мыгтас. Ӯскан котильт мир ма̄гыс концерт ва̄рыглавес. Ма̄хум э̄типа̄ла мус йӣквсыт ос э̄ргыт хӯнтлысыт, тувыл та ре̄гыл ла̄кква та мингаласыт.

1102 2015.06.26. Николай МЕРОВ

«Николай Пирогов» на̄иӈха̄п ма̄хум пусмалтаӈкве минасЯ̄ӈк на̄тнэ э̄тпос 26 хо̄талэ̄т «Николай Пирогов» нампа на̄иӈха̄п округ янытыл ма̄нь па̄влытн мир пусмалтаӈкве минас. Ты на̄иӈха̄пт яныг ле̄ккарыг Николай Владимирович Ташланов рӯпиты. Ля̄ххал тотнэ хо̄тпат таве ты са̄всыр ва̄рмалит урыл китыгласаныл. Тав ла̄внэ̄тэ щирыл, на̄иӈха̄п ма̄нь таквс э̄тпос мус яласаӈкве паты. Тав атах районытн ялы, атпан нупыл хо̄т па̄влытн па̄гпӯхталы. Тот лов ле̄ккар рӯпиты, та̄н халанылт ӯлыщ пуӈк пусмалтан ле̄ккар, ма̄нь ня̄врам пусмалтан ле̄ккар, сам а̄гм пусмалтан ле̄ккар, паль, тур, нёл уральтан ле̄ккар ос мо̄таныт. Та̄н ётаныл нилахуйплов ма̄нь ле̄ккар минасыт. Китхуйплов хо̄тпа ос ты на̄иӈхапыт рӯпитэ̄гыт. Ты на̄иӈха̄п ка̄сыӈ та̄л ма̄нь па̄влытыт палт лов со̄тыра арыгтем хо̄тпан нё̄тмил ва̄ри. Таима̄гыс тав па̄влыӈ мирн ёмщакв ва̄ве, акваг ӯраве. Россия янытыл туп акв тамле на̄иӈха̄п о̄лы. Тот са̄в пусмалтан колнак щё̄питавес. Ма̄хум йильпи ищхӣпыӈ утыт хосыт янытанылт уральтавет. Ты коныпал ле̄ккарыт тот операция ва̄руӈкве ве̄рме̄гыт. Яныг ле̄ккар ла̄выс: «Ма̄н ёмщакв ва̄глӯв, хоты ма̄н ос хотьют уральтаӈкве минэ̄в. Э̄лы ма̄т ӯнлын па̄влыт палт туп туи порат на̄иӈха̄пыл ялуӈкве ро̄ви. Округув янытыл са̄в тамле ма̄нь па̄выл о̄лы. Тот о̄лнэ то̄ва ма̄хум ва̄тихал пӯльницан ялантаӈкве ат ве̄рме̄гыт, то̄ват олн ат о̄ньще̄гыт. Тыи ма̄гыс мо̄рсыӈ порат уральтахта̄лэ̄гыт. Ты хосыт та̄н ань па̄выл мир янытэ̄т уральтахтуӈкве ве̄рме̄гыт». Ань юио̄выл та̄лытт тох е̄мталы, я̄ витэ молях то̄сы. Таима̄гыс хоталь минуӈкве э̄ри, ле̄ккарыт на̄иӈха̄пт капитаныг рӯпитан хо̄тпа ёт потыртахтэ̄гыт. Хоты я̄ витэ моляхнув то̄сы, о̄влэ̄т тув минэ̄гыт. На̄иӈха̄п кӯщай округувт са̄в та̄л рӯпиты. Тав Кондинский, Ха̄льӯс, Октябрьский ос Белоярский районытт овтын я̄т ёмщакв ва̄ганэ, хоталь моляхнувег ялапа̄луӈкве э̄ри, тав ты хӯлтыглы. На̄иӈха̄пт акв тамле ва̄рмаль о̄лы. То̄ва ищхӣпыӈ утыт ёлын щё̄питым о̄лэ̄гыт. Яныгпа̄ла хо̄тпатн тув ва̄гылсаӈкве сака та̄рвитыӈ, ха̄ӈхылтап сака сохтыл лю̄ли. Матъёмас матросыг рӯпитан хо̄тпат нё̄тмил ва̄ре̄гыт, та̄н яныгпа̄ла хо̄тпат ла̄щлакв тыглетувле ва̄нтата̄лыяныл. Ос а̄гмыӈмосыӈ хо̄тпат ле̄ккарытн юн уральта̄лавет. Са̄выӈпа̄лэ ле̄ккарыт хосат та̄гыл на̄иӈха̄п тармыл рӯпитэ̄гыт. Та̄н ка̄сыӈ па̄вылт о̄лнэ хо̄тпат ва̄ганыл. Пе̄с о̄лум ва̄рмаль Щар о̄выл щё̄с Югра ма̄т 1968 та̄лт «Здоровье» нампа на̄иӈха̄п яласаӈкве патыс. То̄нт ле̄ккарыт ма̄нь па̄влытт о̄лнэ мир нас уральтасаныл. Тувыл ётылнув, 1973 та̄лт, «Здоровье-2» нампа на̄иӈха̄п щё̄питавес. Та на̄иӈха̄п о̄влэ̄т ма̄нь па̄влытн мир тотыглым яласас. Кӣвыр колнаканэ мощ мо̄тщирнув щё̄питаве̄сыт. Э̄рнэ ле̄ккар атвес, а̄гмыӈ ма̄хум пусмалтан манос уральтан ма̄гыс сыресыр ищхӣпыӈ ут тув тӯлвес. Та на̄иӈха̄п округ янытыл рӯпитым са̄в та̄л яласас. Э̄лын ӯнлын па̄влытт о̄лнэ ма̄хумн ты ва̄рмаль сака мӯстыс. Та̄н ка̄сыӈ та̄л ты на̄иӈха̄п яныг ща̄гтыл ӯрсаныл. Ле̄ккарыт я̄ӈк миннэ юипа̄лт рӯпитаӈкве о̄вылтахтыгласыт, я̄ӈк лю̄льнэ мус ма̄нь па̄влыт пуссын яласаӈкве а̄лыма̄лсаныл. Ка̄сыӈ хо̄тпа уральтасаныл. Тувыл ты ва̄рмаль щирыл 1993 та̄лт вит тармыл яныг на̄иӈха̄п та̄ртвес, тот колнакыт пуссын пӯльница хурипаг щё̄питаве̄сыт. Ты на̄иӈха̄п капай «Николай Пирогов» намыл майвес. Николай Иванович Пирогов Москва ӯст 1810 та̄лт самын патыс. Тав нилахуйплов та̄лэ то̄влуме порат Москва ӯс ле̄ккар университетн ханищтахтуӈкве минас. Ты ханищтап ва̄рмаль а̄стламе юипа̄лт матахмат та̄л хо̄н ма̄т ле̄ккар тэ̄лан э̄лаль ханищтахтас. Ма̄ньлат пыг ва̄т нупыл хо̄тыт та̄лэ то̄влуме порат профессорыг е̄мтыс. Хо̄нтлум ма̄хум пусмалтан ма̄гыс пӯльница пӯнсыс. Тот хо̄нтлын ма̄т рӯпитан ле̄ккарыт пусмалтан ва̄рмалин ханищтасанэ. Ты коныпал такви ос сакватым хо̄тпат пусмалтаӈкве хо̄нтлын ма̄н ялантас. Николай Иванович сака ёмас хирургыг о̄лыс. Ты ле̄ккар о̄йка хосыт са̄в хо̄тпа лылыӈта̄гыл хультыс. Тав операцият ва̄руӈкве сака ёмщакв хасыс, нюлмит мӯсхал щирыл ю̄нтсанэ. Таима̄гыс э̄лумхо̄лас ка̄тэла̄глэ пусыг хультуӈкве ве̄рмыс. Ань ле̄ккарыт ты ва̄рмаль «Операция Пирогова» ла̄вияныл. Николай Иванович 1981 та̄лт та̄рвитыӈ а̄гме паттат а̄тимыг е̄мтыс. Ань ты на̄иӈха̄п тав наме̄тыл ты пиным о̄лы. Ты коныпал ань ле̄ккаранув тэ̄лы порат э̄лы па̄влытн ос машинал яласаӈкве патсыт. Ты ма̄гыс профессиональный патология Центрыт ат яныг машинат ищхӣпыӈ утытыл та̄стуве̄сыт. Та̄н па̄вылт о̄лнэ участковый пӯльницат ёт акваннё̄тхатым рӯпитэ̄гыт. Ты щирыл э̄лы ма̄т о̄лнэ ма̄хманув туи ос тэ̄лы порат уральтавет. Ань ты на̄иӈха̄п Ха̄льӯс районт ты хо̄талытт рупитаӈкве паты тах. Саранпа̄вылт: 09. 07 14. 07 хо̄талытт. Ло̄пмуст: 15. 07 – 16. 07 хо̄талытт. Кульпаст: 17. 07 – 21. 07 хо̄талытт. Сортыӈъят: 22. 07 хо̄талт. А̄нъят: 23. 07 хо̄талт. Восыӈтӯр: 24. 07 – 28. 07 хо̄талытт. Тыныӈ ма̄ньщи ма̄хумаквет, на̄нкина̄н ӯргалэ̄н, пӯльницан уральтахтуӈкве ва̄тихал ялантэ̄н. Пуста̄гыл о̄лэ̄н, ёмас номтыл ё̄мыгтэн!

1102 2015.06.26. Светлана РОМБАНДЕЕВА

Округт о̄лнэ я̄тил ма̄хум! Ма̄н, Думат рӯпитан хо̄тпат, на̄нан День России ялпыӈ хо̄талыл янытлыянӯв! Ва̄т нупыл ат та̄л ювле хультум порат, 1990 та̄л 12 хо̄талэ̄т, ма̄н о̄лнэ ма̄в ма̄гыс Декларация нампа йильпи нэ̄пак хасвес – Россия мир Конституция щирыл о̄луӈкве паты, ма̄к са̄кконыг тав паттувес. Ань ма̄н о̄лнэ ма̄в ё̄р ма̄г, щёлыӈ ма̄г о̄лы. Ма̄ янытыл о̄лнэ мирыт ма̄н ла̄тӈувн хӯнтлэ̄гыт, матыр та̄рвитыӈ ва̄рмалит порат ма̄нав китыглыяныл, ма̄н ётув потраме̄гыт. Россиявт са̄всыр мирхал хо̄нтхатыглапыт ва̄тихал ва̄рыгла̄лавет, ка̄сыӈ государстваныл яныг кӯщаит ёхтала̄лэ̄гыт, э̄рнэ тэ̄лат урыл потраме̄гыт. Матъёмас тамле ялпыӈ хо̄тал ва̄рвес, о̄лнэ ма̄в янытыл ма̄хманув пуссын ща̄гтым мӯйлэ̄гыт. Россиявт са̄всыр мирыт пуссын аквъёт юртыӈыщ о̄лэ̄гыт, та̄нти ма̄наныл э̄руптыяныл, янытлыяныл. Туп та урыл по̄йкще̄гыт, ма̄н ань пуссын со̄тыӈыщ, щуниӈыщ вос о̄лсӯв. Ма̄н, Россият о̄лнэ мир, аквхурипат атте̄пыл ка̄сыӈ такви национальностил о̄лы, То̄рум нупыл такви щире̄т сунсы, политика тэ̄ла палт о̄с аквтох, ань хо̄тпан хоты партия мӯсты, тав таи пе̄рии, ос ма̄н таи ва̄глӯв: ма̄н пуссын акв ма̄т о̄лэ̄в – Россият. Пуссын аквъёт ма̄н юртыӈыщ о̄лэ̄в, акваннё̄тхатым рӯпитэ̄в, ня̄враманув янмалтэ̄в! Лӯима̄т о̄лнэ я̄тил мир! Пуста̄гыл о̄лэ̄н, ёмас номтыл ё̄мыгтэ̄н, халанынт нё̄тхатэ̄н! Ты ялпыӈ хо̄тал ка̄сыӈ колн вос ёхталы, я̄тил Россияте̄в ка̄сыӈ хо̄тпан вос янытлаве! Округ Дума председатель потре ма̄ньщи ла̄тӈыг С. Хозумован толмащлавес.

1102 2015.06.26. Николай МЕРОВ

Кӯщаит рӯпатаныл уральтаӈкве патаветЛӯпта э̄тпос хӯрмит хо̄талэ̄т Ханты-Мансийск ӯст яныг мирколт Общественный палатат рӯпитан ма̄хум акванатхатыгласыт. Ань округувт о̄лнэ департаментыт уральтан ма̄гыс Общественный Совет рӯпиты. Та̄н таи сунсэ̄гыт, кӯщаянув олныт манырсыр тэ̄ла ма̄гыс холтыяныл ос маныр рӯпата ва̄регыт. Ты ва̄рмаль ань хумус э̄лаль мины, на̄н ты урыл мощ ловиньтэ̄н. Тамле совет ва̄рнэ урыл ма̄хум хосат та̄гыл потыртасыт. Ань ты ва̄рмаль мӯсхал щирыл щё̄питавес. Са̄прани о̄вылтахтаме порат округ Федеральный инспектор кӯщай Дмитрий Кузьменко ла̄выс: «Общественный совет рӯпататэ кӯщаянув ос мирув аквано̄лтнэ ма̄гыс ва̄рвес. Та̄н рӯпатаныл акваг уральтаӈкве патавет. Ты та̄ра ма̄хум ва̄ӈкве патэ̄гыт, кӯщаянув олныт маныр тэ̄лан холтыяныл». Ты ва̄рмаль урыл ос мо̄т са̄в кӯщай потыртас. Юио̄вылт тамле номт тотсыт: Совет ӯщты рӯпитаӈкве о̄вылтахтас, ты ва̄рмаль акв ма̄т ул вос лю̄лис, са̄в рӯпата ва̄руӈкве э̄ри. Акваннё̄тхатым о̄лупсав кӯпнитнуве̄г ва̄рилӯв. Сапра̄ни о̄вылтахтаме э̄лыпа̄лт о̄с акв ва̄рмаль о̄лыс. Ма̄хум ма̄гыс «Мы не были на той войне» нампа кина суссылтавес. Тот округувныл яныг хо̄нтлын накн ялум хо̄тпат хурияныл суссылтаве̄сыт. Ты ва̄рмаль мо̄лты та̄лт щё̄питавес. Ань ка̄сыӈ та̄лныл хо̄нтлум ма̄хманув акваг мощщаг хультуӈкве патсыт. Таима̄гыс ань ветерананув ос та та̄рвитыӈ нак юипа̄лт юн са̄всыр рӯпата ва̄рум хо̄тпанув номылматыглан ма̄гыс хурит манос матыр пе̄с потрыт акванатуӈкве о̄вылтаве̄сыт. Округ Общественный палата кӯщай нэ̄ Любовь Александровна Чистова ла̄выс: «Ты ва̄рмаль Россия янытыл Общественный палатат рӯпитан ма̄хум та̄н щё̄питасаныл. Ань ам ётум рӯпитан хо̄тпат та̄нки хо̄нтлын ма̄хманыл урыл 154 хури ос потыр атсыт. Ань ты хо̄тал мус округув янытыл о̄лнэ мир са̄в хури атсыт. Матъёмас тамле э̄рнэ тэ̄ла ва̄руӈкве номылматвес. Ты накт тамле ва̄рмаль е̄мтыс, хотты порат юртыӈыщ о̄лум мирыт ань ма̄н нуплув кантлуӈкве патсыт. Яныг хо̄нтлын накт о̄лум ва̄рмалит то̄ва ма̄т ань мо̄т щирыл хасве̄сыт. Та̄н ёрувласаныл, манъяныт ё̄рва̄гыл ос ворил ма̄н са̄лтатанув но̄хпатсыт, манаса̄вит хо̄тпа порславес. Ма̄н ань ты ва̄рмаль таима̄гыс щё̄питаслӯв, ма̄ньлат ма̄хманув, ня̄враманув ты пилыщмаӈ нак нэ̄мхуньт ул вос ёрувлыяныл».

1102 2015.06.26. Николай МЕРОВ

Во̄рт а̄ращ ул хультуптэ̄нЛӯпта э̄тпос ло̄вит хо̄талэ̄т Ханты-Мансийск ӯст округ Ма̄вит ӯргалан департаментыт рӯпитан кӯщай Евгений Платонов сапра̄ни ва̄рыглас. Югра ма̄в янытыл са̄в ма̄вит ӯргалым о̄ньщаве. Ты ма̄т ул вос па̄ӈктуве̄сыт, на̄й тув ул вос ёхтыс, та̄наныл акваг уральтавет. Ань ты накт округув янытыл онтолов ма̄т на̄й но̄хпе̄ламла̄лыс. На̄й харыгтан ма̄т са̄в хо̄тпа рӯпиты. Ма̄хум на̄й харыгтым вертолётыл ос техникал яласэ̄гыт. Ха̄льӯс районт мо̄лал кит ма̄т на̄й харыгтавес. Белоярский районт кит ма̄т харыгтавес кос, ос ат ма̄т во̄р иӈ тэ̄г. Нижневартовский, Октябрьский ос Советский районытт то̄ва ма̄т на̄й акваг тэ̄г. Тот на̄й харыгтан хо̄тпа о̄с то̄вылхаты. Та̄л о̄вылтахтаме па̄сныл округув янытыл пуссын аквъёт яныгса̄т арыгтем на̄йтэм ловиньтасыт. Ань ты хо̄тал мус яныгса̄ткем са̄вит ма̄т на̄й харыгтаӈкве ве̄рмувес. Во̄р ӯргалан хо̄тпат ты урыл ла̄ве̄гыт: «Ма̄хумаквет, на̄н во̄рт мори а̄ращ ул па̄лтэ̄н. Ӯщлахтан ма̄ныл а̄стынэ̄н юипа̄лт, а̄ращин ёмащакв лапхарыгтэлы̄н. Ты туи сака ре̄гыӈыг паты, туп ма̄нь сӯлтумыл во̄р но̄хпе̄ламлаӈкве ве̄рми. Во̄рт ӯргалахтым о̄лэ̄н, юв миннэ̄н э̄лыпа̄лт а̄ращин ёмщакв лапхарыгтэлы̄н. Матыр о̄выл е̄мты те, таве харыгтаӈкве сака та̄рвитыӈ паты».

1102 2015.06.26. Валентина УЗЕЛЬ

Йильпи са̄кконыт хасве̄сытЮвле хультум э̄тпост округ Дума заседаниятэ о̄лум порат штрафолн урыл йильпи са̄ккон пирмайтавес. Лю̄ль ва̄рнэ хо̄тпат яныг штрафолныл пинуӈкв патавет. Хотьют кол ляпат порс па̄хвты, хохса харты манос ра̄тива сака суиӈыщ хӯнтлы, та̄н пуссын олн ойтуӈкв тах патэ̄гыт. Машина о̄щнэ ма̄хум ос машинаныл пум яныгман ма̄т хультуптыяныл те, та̄н о̄с 1-3 со̄тыра са̄вит солко̄ви штрафыл тах пинавет. Округ бюджет олнанэ урыл ань депутатыт о̄с потыртасыт. Олн ловиньтан департаментт кӯщаиг рӯпитан нэ̄ Вера Дюдина 2014 та̄л сыс манса̄вит солко̄ви округувт холтвес, та урыл тох ла̄выс: «Мо̄лты та̄л сыс 187, 2 млрд. солко̄ви холтвес, ос э̄рыс кос – 178 млрд. солко̄ви. Арыг 8, 5 млрд. солко̄ви са̄вит мирн нё̄тнэ са̄всыр тэ̄лан минас». Тувыл та̄ра ты урыл потыртас, ты та̄л о̄выл хӯрум э̄тпос сыс округувт 36, 5 млрд. солко̄ви холтвес. Ты олныт янгыщ мирн нё̄тнэ ма̄гыс холтавет, рущ ла̄тӈыл ла̄вавет – социальные выплаты. Ла̄тыӈ ат хӯнтлын ня̄врамыт урыл хансым са̄ккон ань мощ мо̄т щирыл хасвес. Ань матыр о̄выл ва̄рум ня̄врамыт рӯпатал тах мивет, э̄лаль ханищтаӈкв патавет. Ты э̄лыпа̄лт тох о̄лыс, хотьют ма̄нь поратэ̄т турман колт ӯнлыс, тав ня̄врамыт ёт рӯпитаӈкв щар ат та̄ртвес. Ань комиссия ма̄хум та̄н ты ла̄ве̄гыт – хоты ня̄врам рӯпитаӈкв ве̄рми, хоты ня̄врам пусмалтахтын ма̄н те̄туӈкв ро̄ви. Ос та̄н ты ёмащакв та̄рапаттыяныл – ты ня̄врам э̄лаль хумус о̄луӈкв ве̄рми, ла̄тыӈ хӯнтлуӈкв паты ман а̄ти.

1102 2015.06.26. Светлана РОМБАНДЕЕВА

Ма̄ньха̄пыл яласан касыл урылТы э̄тпос 16 хо̄талэ̄т Ханты-Мансийск ӯст о̄лнэ РИЦ «Югра» колн ля̄ххал тотнэ ма̄хум акванатапа̄лве̄сыт, ма̄хум ма̄ньха̄пыл каснэ тэ̄ла урыл потыртасыт. Тув округ янытыл о̄лнэ физкультура ос спорт Департамент кӯщай хум Е. Л. Редькин, «Югра лылые̄п» организация кӯщай А. В. Новьюхов ос Ханты-Мансийский район янытыл кӯщаиг о̄лнэ хум П. Н. Захаров та̄н ёхталасыт. Ма̄ньха̄пыл яласан касыл округувт ка̄сыӈ та̄л ва̄рыглаве, ты та̄л 15 щёс е̄мты. Ань ос Ханты-Мансийск ӯс ляпат ва̄руӈкв номылматвес. Ма̄хум тыг са̄в ма̄ныл ёхталэ̄гыт – Россия янытыл ос э̄лы хо̄н ма̄ныл. Акв индеец хум ёхтуӈкв ла̄выс, наме Вождь – белое перо. Э̄лы хо̄н ма̄ныл ёхтын мир халт 12 хо̄тпа касуӈкв патэ̄гыт, заявка нэ̄пак хассыт. Пуссын аквъёт 200 са̄вит хо̄тпа касуӈкве патэ̄гыт. Ты касыл о̄йттур э̄тпос 3-5 хо̄таланэ̄т ва̄раве. Я̄тил ма̄ньщи ма̄хумате̄нув, хотьютн касуӈкв ка̄сащи те, заявка нэ̄пак хансэ̄н. Намын тув хасумтаве, каснэ пора ля̄пами, тув тах во̄ваве̄н. Ты касылт хотьютаныл но̄хпаты, ма̄н ты урыл тах акв хотты газетат хансэ̄в.

1102 2015.06.26. Тамара МЕРОВА

Сыстам вит ма̄ янытыл вос о̄лыХанты-Мансийскат XIII «Спасти и сохранить» нампа ма̄вит ӯргалан мирхал акция та оигпас. Ты та̄л ма̄хум вит урыл потыртасыт. Ань ма̄ янытыл я̄т, тӯрыт сыстамыг вос о̄лэ̄гыт, витэ ул вос па̄ӈктувес, са̄в ма̄ныл тыг ёхталам мӯй хо̄тпат вит ӯргалан ва̄рмаль урыл ла̄тыӈ тотсыт. Кит са̄т сыс ӯст о̄лнэ ос мӯй ма̄хум сыресыр пӯмыщ ва̄рмалитыл щё̄пита̄лве̄сыт. Ма̄ньлат хо̄тпат «Одна планета – одно будущее! » нампа форумн атыглаве̄сыт. Тыг а̄гирищитпыгрищит 11 са̄всыр хо̄н ма̄ныл ёхталасыт ос вит уральтан урыл та̄нки хансум проектаныл ловиньтасаныл ос сыресыр касылыт кассыт. Аквты порат Юграт, Ямалт, Тюменский ос Свердловский областигт о̄лнэ мотоциклал яласан хо̄тпат Ханты-Мансийск ӯс ляпат акванатхатыгла̄лсыт. Рокерыт ос байкерыт аквтох сыстамыг хультум я̄т о̄вылтыт ос ёмас лылые̄пыӈ во̄р халт э̄лаль о̄луӈкве номсэ̄гыт. Та̄н ань мо̄т ма̄хум ты тэ̄ла э̄лаль хӯнтамлан ма̄гыс ла̄тыӈ тотэ̄гыт. Музейт рӯпитан хо̄тпат та̄нки палтаныл о̄с сыресыр пӯмащ тэ̄лат щё̄пита̄лсыт. Тувыл «Спасти и сохранить» нампа XIX телефестиваль о̄лыс. Ань тамле касыл ка̄сыӈе̄мт са̄в мирытн пӯмщалаӈкве патвес. Ты та̄л 37 хо̄н ма̄ныл ма̄хум та̄нки по̄слум кинаныл тыг ке̄тыгласаныл. Жюри хо̄тпат 420 са̄всыр кинат 185 ке̄тум телекомпаниятныл суссыт ос щар ёмас кина пе̄риясыт. Ма̄н «Югория» ос «Югра» телекомпаниягув «Лӯлы» мӯйлупсал майвесы̄г. Мо̄т акв тамле лов лӯлыт Баку (Азербайджан), Псков, Самара, Санкт-Петербург, Таллин (Эстония), Ташкент (Узбекистан), Чита ӯсныл ке̄тыглым рӯпатат мӯйлуптаве̄сыт. Гран-При яныг мӯйлупса ты та̄л Москваныл ёхталам мӯй хо̄тпат висыт. Вадим Витовцев ос Наталья Кузнецова «Дальневосточный леопард. Борьба за таёжный престол» по̄слум кинатэ̄н янытлавес. Ня̄врамыт ёт рӯпитан студият о̄с мӯйлупса висыт. Ты та̄л Омск, Салехард ос Ярославль ӯст по̄слым кинат э̄сгуве̄сыт. Ма̄вит ӯргалан акция юио̄выл хо̄талэ̄т, тыи лӯпта э̄тпос аквхуйплов щислат, Югра Природнадзор колт рӯпитан кӯщай Сергей Пикунов, ЮНЕСКО ма̄т пуӈктотнэ хум Амир Билялетдинов ос Саха республиканыл (Якутия) во̄р ӯргалан кӯщай Сахамин Афанасьев ля̄ххал тотнэ хо̄тпат ёт акванхо̄нтхата̄лсыт. Та̄н ма̄вит па̄ӈктан тэ̄лат урыл китыглаве̄сыт. Ка̄сыӈ ма̄т, ка̄сыӈ э̄лумхо̄лас такви самын патум ма̄тэ сыстамыг о̄ньщуӈкве патытэ ке, то̄нт ма̄витув аквтох нё̄тнэ̄г э̄лаль хульты. Ань ты мӯй хо̄тпаг ты акцияв урыл пӯмащипа ла̄тыӈ ла̄всы̄г. Аквта э̄типа̄ла ӯст о̄лнэ ма̄хум «Арена Югра» яныг колн во̄виньта̄лве̄сыт. Тот ма̄во̄й ӯргалан колыт ёмас рӯпатаныл ма̄гыс, ля̄ххал хаснэ ма̄хум касыланыл палт но̄хпатум хо̄тпат мӯйлупсал майве̄сыт. Журналистыт халт Альбина Глухих, «Новости Югры» нампа газетат хосат та̄гыл рӯпитан э̄ква, мӯйлуптавес. Тувыл Николай Расторгуев «Любэ» нампа э̄ргын группатэ ёт э̄ргыт э̄ргысыт. Тав май Россия ма̄кев э̄руптан са̄всыр э̄ргыт о̄ньщи.

1102 2015.06.26. Тамара МЕРОВА

Ня̄врамыт ӯщлахтэ̄гыт ос ка̄с ва̄ре̄гытМо̄лал губернатор ва̄ӈын кӯщай Алексей Путин ня̄врамыт ӯщлахтын ва̄рмалит о̄вылтыт округ янытыл ӯсыт ос районыт пуӈктотнэ хо̄тпат китыгласанэ. Та̄н ищхӣпыӈ ут хосыт потыртасыт. Туи ӯщлахтанэ̄ныл сыс а̄гирищитпыгрищит ёт нэ̄матыр лю̄ль пищ ул вос е̄мтыс, ва̄рмалит пуссын ань ёмщакв уральтаве̄сыт. Ос матыр та̄рвит ва̄рмаль хо̄нтвес ке, таве та̄ра хотщё̄питаӈкве ла̄ввес. Ты та̄л округ янытыл 543 ӯщлахтан колыт щё̄питаве̄сыт. Тыгыл 472 колытыт ня̄врамыт ёт хо̄тал палыт рӯпитаӈкве патэ̄гыт, та̄н янгыщ пуссын школат ва̄рыглавет. Тувыл 9 лагерь ӯсыт ляпат па̄лыгпӯнсавет, ня̄врамыт тув смена щирыл тотыглавет тах. Ты коныпал во̄рыӈ ма̄т палаткат о̄луӈкве 51 лагерь ва̄раве. Акв санатория ня̄врамыт пусмалтан ос ӯщлахтан щирыл рӯпиты тах. Ос лов лагерьн а̄гирищитпыгрищит мощ олн сэ̄лнэ ма̄гыс рӯпитаӈкве ос та сыс ӯщлахтаӈкве во̄вавет. Тамле са̄всыр ма̄н туи сыс 49 со̄тыра 710 ня̄врам ӯщлахтуӈкве ӯраве. Культура ос спорт тармыл рӯпитан департаментыг ня̄врамыт ма̄гыс о̄с сыресыр ӯщлахтын ва̄рмалит щё̄питасыт. Ань э̄ргын, йӣквнэ манос хурит по̄слуӈкве ха̄снэ а̄гирищитпыгрищит Сэ̄мыл ща̄рыщ ва̄тан Болгария ма̄н ӯщлахтуӈкве ке̄тавет. Ӯсыт манос па̄влыт о̄лнэ клубыт, культура колыт ня̄врамыт ма̄гыс са̄всыр пӯмыщ касылыт, суссылтапыт, ёнгилыт ва̄ре̄гыт. Округ янытыл спортивный колыт о̄с ёмщакв щё̄питаве̄сыт. Тох 291 спортивный каныт па̄лыгпӯсве̄сыт, 18 спортивный клубыт рӯпитэ̄гыт. Ос 386 спортсмення̄врамыт Крымн ӯщлахтуӈкве тотыглавет.

1102 2015.06.26. Тамара МЕРОВА

Ма̄в ӯргалан ос вуянтан урыл потырМирн нё̄тнэ комитетыт пуӈктотнэ нэ̄ Наталья Западнова то̄ва депутатыт ос ма̄ньлат ма̄хум ёт рӯпитан кӯщаит акв са̄праниян атыгласанэ. Москва ӯсныл са̄всыр кӯщаит о̄с ёхталасыт ос та̄н пуссын мав ӯргалан, вуянтан тэ̄лат, рущ щирыл ке – гражданскопатриотическое воспитание урыл ла̄тыӈ тотсыт. Россия ма̄в ӯргалан, вуянтан о̄вылтыт са̄кконыт туп нёлолов российский ма̄т пирмайтым о̄ньще̄гыт ос та̄н щираныл ёмщакв рӯпитэ̄гыт: тыи Брянский, Вологодский, Калужский, Саратовский, Смоленский, Тюменский, Ульяновский областит ос Краснодарский крайт. Ма̄н Югравт тамле са̄кконыт паттыиг нас ля̄ххалла̄тыӈ туп щё̄питым о̄лы, ос тыгыл э̄лаль я̄нас са̄ккон хансуӈкве э̄ри кос. Тав щире̄тыл, ты ва̄рмалит ёт рӯпитан колыт государство па̄лыл ёмас нё̄тмил ос э̄рнэ хӯнтлаптын ва̄рмаль о̄щнувыт. Округув янытыл ма̄ньлат а̄гитпыгыт ёт ань 812 колытыт ма̄в ӯргалан, вуянтан тэ̄лат щирыл рӯпитэ̄гыт. Тыи сыресыр центрыт, клубыт, музейт, войнат о̄лум пе̄с накыт киснэ отрядыт пуссын тув ловиньтавет. Та̄н пуссын хо̄нтлуӈкве ялум хо̄тпат наманыл ос порслум ма̄наныл кинсыяныл. Студентыт ма̄гыс са̄всыр ханищтан программат щё̄питым о̄лэ̄гыт. Тамле колытыт ханищтахтам юипа̄лт то̄ва пыгыт ёмас лусытан ма̄н во̄виньта̄лавет. Тох 2008 та̄лныл 15 пыгыт Президенский полкын лусытаӈкве вивет. Акв пыг Ленинградский областьт я̄нас спецотрядыт 90 поисковый батальоныт лусытас. Ос мо̄т пыгыт армияныл по̄хат хультуӈкве мори ат воратэ̄гыт.

1102 2015.06.26. Светлана РОМБАНДЕЕВА

Ма̄нти На̄й-О̄тыранув нупыл вос сунсэ̄вЯ̄ӈк на̄тнэ э̄тпос 27 хо̄талэ̄т Ханты-Мансийск ӯс мирколт «Югра лылые̄п» ос Общественный палата Югры организациягт рӯпитан ма̄хум хо̄нтхатыглап ва̄рыгласыт. Та урыл потыртасыт, ань ма̄н о̄лнэ ма̄вн э̄лы хо̄н ма̄ныл са̄всыр хо̄тпат ю̄выт, ка̄сыӈ такви То̄рум о̄ньщи. Тувыл та хащтал утаныл урыл тыт о̄лнэ ма̄ньщиянув, ханты ос мо̄т мирыт нупыл потыртэ̄гыт. О̄выл ла̄тыӈ «Югра лылые̄п» ассоциация кӯщай хум Александр Вячеславович Новьюхов ла̄выс. На̄н ань э̄лаль тав потре ловиньтэлы̄н. – Ты урыл ам хосат та̄гыл хӯлыгла̄лэ̄гум. Сургутский районт о̄лнэ ханты ма̄хманув потырта̄лэ̄гыт, ань та̄н палтаныл са̄всыр хо̄тпат ёхталэ̄гыт, То̄рум нупыл суснэ тэ̄ланыл урыл та̄нанылн потыртэ̄гыт. Сака са̄в ханты хо̄тпа та̄н нупланыл сунсуӈкве патсыт, та хащтал То̄рмын агтуӈкве патсыт. Та̄нти На̄й-О̄тыраныл по̄ханӯрияныл, то̄ват ос а̄рсинаныл тя̄ква̄кваныл палт па̄хвтысаныл. Пе̄с йис та̄гыл тэ̄щинта̄лум тэ̄нутаныл воссыг ат тэ̄гыт – ня̄р нё̄выль, ня̄рхул. Рӯтаныл э̄лыл ёхтэ̄гыт, юв ат та̄ртыяныл. Хоса ма̄ йисыт, кон та лю̄ляхо̄лэ̄гыт, по̄льтахтэ̄гыт. Тувыл маныр ва̄руӈкве, ювле та минэ̄гыт. О̄с ма̄к таи лю̄ль, ань тув агтуӈкв патум ма̄хманув та̄нти ща̄нь ла̄тӈанылт потыртаӈкве ат таӈхе̄гыт, ня̄враманыл туп рущ ла̄тӈыл потыртаӈкв ханищтыяныл. Ля̄ххал тотнэ хо̄тпатн манос наука щирыл рӯпитан ма̄хумн нэ̄матыр мо̄йт ман э̄рыг потыртаӈкве ат таӈхе̄гыт. Рӯпата о̄лнло̄мтаныл тув та мыганыл. Та̄н утанылн агтуӈкве то̄ванакт ма̄хум ё̄рва̄гыл кащилтавет, то̄ват ат тахнэ̄ныл ма̄гыс ра̄тыглымат. Таит ань ва̄ганыл, Сургутский районт ма̄во̄й но̄хвиве, тот о̄лнэ соссаӈ ма̄хум щёлыӈ ма̄т о̄лэ̄гыт. Таима̄гыс тув та минэ̄гыт. Соссаӈ ма̄хманув тамле пилыщман та ёхтуве̄сыт. Матыр ва̄руӈкв э̄ри! Ань ты хо̄нтхатыглап таи ма̄гыс ты ва̄рсӯв. Я̄тил ма̄хум, та ма̄хманувн хотмус нё̄туӈкв э̄ри. Тув нё̄рыглан хо̄тпат пуссын по̄хання̄влуӈкве э̄ре̄гыт. Ты урыл номсуӈкв ма̄н ат те патэ̄в, ма̄хманув воссыг хотьютн нё̄тавет? ! Александр Вячеславович юипа̄лт са̄в хо̄тпа потыртас. Тав ётэ пуссын ка̄сащасыт – соссаӈ мирн нё̄туӈкве э̄ри, э̄лы хо̄н ма̄ныл йинэ ма̄хум та̄н палтаныл ул вос ро̄влахтэ̄гыт. Ты ва̄рмаль э̄лаль хумус мины, ма̄н тах ты урыл таквсы порат хансэ̄в.

1102 2015.06.26. Светлана РОМБАНДЕЕВА

Ло̄пмуст йильпи пӯльница ӯнттувесКа̄сыӈ та̄л лӯпта э̄тпос хӯрмит ӯщлахтан хо̄талэ̄ ле̄ккарыт ялпыӈ хо̄талыг о̄лы. Ты та̄л ма̄хум 21 хо̄талт мӯйлэ̄гыт, ле̄ккарыт янытлавет. Ма̄ньщи мирув халт са̄в ле̄ккар о̄лы, ань Ханты-Мансийск ӯст о̄лнэ медицинский академият ма̄ньщи а̄гипыганув о̄с ханищтахтэ̄гыт. Ам ань акв ма̄ньщи ле̄ккарув потре ёлхансыслум, наме Римма Яковлевна Ромбандеева. Тав Ха̄льӯс район Ло̄пмус па̄вылт о̄лы, ма̄хум пусмалтым пӯльницат ва̄т нупыл онтоловит та̄л рӯпиты. Ты та̄л ре̄тыӈ ю̄свой э̄тпост та̄н йильпи пӯльницал ӯнттуве̄сыт. На̄н ань э̄лаль Римма Яковлевна потре ловиньтэлы̄н. – Йильпи пӯльница ма̄н сака са̄в та̄л ӯрсӯв, са̄всыр ма̄т о̄лыс, сака саваласӯв. Ты та̄л ущ та ӯнттувесӯв, матъёмас, ма̄н сака ща̄гтсув. Пӯльницав сака посыӈ, нё̄тнэ, лощит. Са̄всыр колнакыт о̄ньщи хо̄тпа ёт потраман колнак, тэ̄рпиӈ ю̄нтуп ва̄рнэ колнак, са̄в хо̄тпа щалты те, ӯрхатан манос ӯнлахо̄лнэ колнак. Акв па̄лэ о̄лнэ щирыл ва̄рвес. По̄х хо̄тпа тыг ма̄хум пусмалтаӈкве ёхты те, тот о̄луӈкве ве̄рми. Э̄рнэ тэ̄рпи о̄ньще̄в, тэ̄рпиянув холэ̄гыт те, ам Ха̄льӯсн ялантэ̄гум, тувыл во̄ве̄гум. Э̄лнаӈ ма̄хманув тэ̄рпи ма̄гыс олн ат о̄йтсыт, ань ос ойтуӈкве ла̄вавет. Яныг ле̄ккарыт ла̄вегыт, ка̄сыӈ колта̄гыл юн аптечка вос о̄ньщи. Матаре а̄гмыӈыг е̄мты манос илттыг матаре хотум е̄мтапи те, юн э̄рнэ тэ̄рпит, мазит, бинт ос йо̄д вос о̄ньщи. Хунь э̄лумхо̄лас матаре сака а̄гмын, тэ̄рпи ат те о̄ньще̄в, манос хо̄тпа матаре илттыг хотум е̄мтапи, ам та̄ра Ха̄льӯсн звонитэ̄гум, МЧС ман пӯльница па̄лыл та̄ра вертолётыл ке̄таве̄в. Па̄влувт вертолёт ӯнтсан ма̄ а̄тим. Ты накт тыг район кӯщай В. А. Фомин ёхталас, тав ма̄навн нё̄туӈкве ла̄выс, тамле ма̄л ва̄раве̄в. Па̄выл ма̄хманув Ха̄льӯс ман Ягрим пӯльницан уральтахтуӈкв ялантэ̄гыт. Ягрим ле̄ккарыт ма̄н нуплув сака ат сунсэ̄гыт, ла̄ве̄гыт, ма̄н ань Ха̄льӯс нупыл хансым о̄лэ̄в, тув вос минэ̄в. Таима̄гыс ма̄хманув янгыщ Ха̄льӯс пӯльницан ялантэ̄гыт. Кульпас пӯльница акв охсатэ май лаппантвес. Хунь тав янытэ̄т рӯпитас, манавн ёмас о̄лыс, то̄ва хо̄тпанув тот пусмалтахтасыт. Нэ̄ хо̄тпа мо̄т щирыл о̄лы те, ам таве та̄ра Ха̄льӯсн ке̄тылум, тот яныг ле̄ккарытын вос сунсаве, анализытыл вос ва̄раве. Хунь ня̄врам самын патнэ поратэ ляпами, нэ̄ о̄с та илямтылум, Ха̄льӯс пӯльницан вос мины. Ӯлщпуӈк пусмалтаӈкве ма̄хманув ос Саранпа̄вылн ялантэ̄гыт. То̄ва хо̄тпанув сака мат уральтахтуӈкве ат таӈхе̄гыт. Матараныл а̄гмынте̄пыл, пӯльницан ат ю̄выт. Ос хунь сака а̄гмыӈыг е̄мтэ̄гыт, ле̄ккар палт ущ та минэ̄гыт. Пусмалтан автобус ос «Николай Пирогов» на̄иӈха̄п ёхталан порат о̄с аквтох, сака тув ат минэ̄гыт, объявление нэ̄пак хансэ̄в, то̄ва хо̄тпанув ёрва̄гыл тув ке̄тыянув. То̄ва ома ос ня̄враманэ тотыянэ, ле̄ккарытын суссылтыянэ, такви ос та̄н палтаныл ат иӈ щалтсы. Ма̄н ма̄хманув янгыщ ма̄йт а̄гмыл са̄валэ̄гыт, хо̄псы а̄гм о̄с са̄в, яныгхо̄тпат ка̄тла̄гланыл лоӈхитавет. А̄гмыл е̄мтэ̄гыт, та̄ра ат ла̄ве̄гыт, тувыл та̄наныл пусмалтаӈкве та̄рвитыӈ, тыи ты лю̄ль. – Римма Яковлевна, па̄выл ма̄хманын пуста̄гыл о̄лнэ̄ныл ма̄гыс, хумус о̄луӈкве э̄ри? –Я̄тил ма̄хумате̄нув, пӯльницан ва̄тихал щалтсэ̄н, матарын а̄гмын те, ла̄ве̄н, ул тӯйтхатэ̄н. Ма̄н, ле̄ккарыт, на̄нанн нё̄туӈкве вос ве̄рме̄в, вос а̄лыме̄в. Са̄всыр пил атэ̄н, па̄кв паттэ̄н, па̄квсам ва̄ре̄н, хӯл та̄ен, щаквит ае̄н. Сосыг лӯпта ос Иванчай та̄стлэ̄н, тамле ща̄й ае̄н. Тарыг почкат атэ̄н, заваривайтэ̄н, ля̄мйив лӯптатыл тур хулщалтаӈкв ро̄ви. Иныг атэ̄н, то̄слэ̄н, тувыл ща̄й хольт ае̄н – тав витамин хольт ёмас, ос хунь хо̄тпа со̄рге хотща̄лумтаве, тав сака нё̄ты. Ма̄н о̄лнэ ма̄вт иныг са̄в яныгми, ос тувле нупыл тэ̄лав а̄ти. Тыныӈ тэ̄рпит ул ёвтэ̄н, нас тынта̄л тэ̄рпи ёвтэ̄н (парацетамол, анальгин, корень солодки. . . ), та̄н о̄с ёмащакв пусмалтэ̄гыт. Па̄выл ма̄хманув, ма̄ньщи мир, пуссын пуста̄гыл о̄лэ̄н, ёмас номтыл ёмыгтэ̄н, халанынт э̄руптахтэ̄н! Газета ва̄рнэ хо̄тпатн ма̄н яныг пӯмащипа ла̄тыӈ ла̄ве̄в. Ма̄ньщи газетав ма̄н ловиньтылӯв, таве акваг ӯрилӯв. Пуссын пуста̄гыл о̄лэ̄н! Римма Яковлевна Ло̄пмуст самын патыс, тот яныгмас. А̄ги о̄парищ наме Талигина. Оматэ Елена Николаевна, Ло̄пмус па̄выл э̄ква о̄лыс, а̄ги о̄парищ наме Албина. А̄тятэ Яков Никитич, Сӯкырьяныл олыс, о̄лме палытыл хӯл алыщлым рӯпитас. Римма Яковлевна нила пыг, акв а̄ги янмалтас, апыгрищит о̄ньщи. Таве̄н ма̄н са̄в ёмас, сымыӈ ла̄тыӈ ла̄ве̄в, колта̄глэ пуста̄гыл вос о̄лы! То̄рум ёт, О̄тыр ёт, пус ка̄т, пус ла̄гыл!

1102 2015.06.26. Тамара МЕРОВА

Рӯтанэ̄н Со̄рни пӯрил янытлаве̄г!Лӯпта э̄тпос хо̄тхойплов щислат Клара Константиновна ос Василий Игнатьевич Пуховец 50 та̄лэ̄н то̄влыс, хумус тэ̄н аквано̄луӈкве минасы̄г. Э̄кваго̄йкаг Ягрим па̄вылт о̄лэ̄г. Тэ̄н ань рӯтанэ̄н, юртанэ̄н янытлаве̄г. Оксана Сидак (Пуховец) яныг а̄гитэ̄н а̄нумн таи потыртас: «Аквщёс Клара оматэ а̄лпыл но̄хса̄йкалас ос такви капрон щулкинаге пулигманыгтым хо̄нтсаге. Ос щулкинаге тармыл катияныл ре̄пыгтам. Ма̄ньлат а̄ги сыме хоса ща̄ргыс ос ане̄кватэ̄н то̄нт ла̄ввес: «Наӈ ул каен, мо̄т йильпи щулкин ёвтэ̄гын тах. Ос китхӯрум хо̄тал сыс хум ва̄ре̄гын. Тамле пе̄с ла̄тыӈ о̄лы». 1965 та̄лт туи Клара Саратина Салехард ӯст зооветеринарный техникум а̄стлас ос Кондинский район Леуши па̄вылн рӯпитаӈкве ке̄твес. Лё̄ӈхыт тув миннэ̄тэ сыс сака по̄льтахтас ос па̄вылн ёхтуме̄т та̄ра пӯльницан пинвес. Тав тот ты Василь ма̄ньлат пыг ёт ва̄йхатас. Пыг пӯльницат о̄с пусмалтахтас. Василь карс, нё̄тнэ ос ощхуль ва̄рнэ э̄лумхо̄ласыг о̄лы. Тав Украина ма̄ныл са̄в олн сэ̄лнэ ма̄гыс лӯима̄н ёхтыс. Моще̄ртын Клара пӯльницаныл юв та̄ртвес. Василь таве мо̄т маснутыл масхатым ка̄саластэ. А̄ги нё̄тнэ ня̄рппум оспа пальтувыл, я̄ӈк хотаӈ ке̄нтыл ос сэ̄мыл вольгын со̄пакыл масхатым о̄лыс. Тувыл Надежда увщитэ̄н хорамыӈ щулкиныл сагвес. То̄нт тыщирыл а̄ги ка̄салым, Василь такви па̄рт чемоданэт хуритэ ка̄тл тув по̄слыстэ. Ётылнув тэ̄н почтаколт акванхо̄нтхатсы̄г. Та э̄типа̄лаг Конда я̄ ва̄тат аквъёт ё̄мантым Василь таве̄н ла̄выс: «Наӈ ам ётум акваг патэ̄гын! » Тох ма̄ньлат хо̄тпаг акван та о̄лмыгтасы̄г. Тэ̄нки о̄лтул торыӈыщ ат о̄щсы̄г, туп чемодан са̄вит пормасыт ёт о̄щсы̄г. Тӯя минас ос о̄выл на̄иӈхап ёхтынэ̄т порат тэ̄н лӯпта э̄тпос 16 хо̄талт Леуши па̄вылт акванхасхатсы̄г. Пӯри тэ̄сыт, са̄в ка̄с, ощхуль ва̄рсыт, аквъёт рӯпитан ма̄хманэ̄н 15 солко̄вил мӯйлуптаве̄сы̄г». Нэ̄гхумыг 1966 та̄лт Оксана а̄гитэ̄н самын патыс. Па̄выл кант хосыт а̄ще мечикыл ёнгынэ̄т сыс Оксана роттыг нирщахыл ёлыпа̄лт хуяс. Тувыл нэ̄гхумыг Украина ма̄н Херсонский областьн минуӈкве номылматсы̄г. Тот 1970 та̄лт Василь армиян вуйвес, кит та̄л лусытас, юв ёхтыс. Ос 1973 та̄лт Каховка па̄вылт нэ̄гхумыг китыт а̄гитэ̄н самын патыс. Таве Светланаг намтыстэ̄н. Та ма̄т ще̄мья хоса о̄с ат о̄лыс, та̄н Ягрим па̄вылн ва̄нтлуӈкве номылматсыт ос тувыл э̄лаль ань тыг мус тот о̄лэ̄гыт. Клара Константиновна пенсиян патхатаме мус «Игримский» совхозт рӯпитас, ос Василий Игнатьевич котельныит слесариг рӯпитас. 1993 та̄лт ще̄мьятэ̄н йильпи колыл майве̄с. Та яныг ща̄гт, то̄нт та̄н а̄ви пӯсас по̄хат нюлы йӣв янмалтаӈкве ӯнттысыт. Тамле ва̄рмаль та̄нанылн сака мӯстыс. Ос тувыл э̄квагойкаг апганэ̄н самын патманыл порат о̄с сыресыр йӣвыт ӯнттуӈкве патсы̄г. Леночка ос Богдан апгаге̄н ма̄гыс ха̄льйӣвыг ӯнттысыт, Яночка ма̄гыс ля̄мйӣв, Златочка ма̄гыс пащар йӣв. Ос Стёпочка правнукен самын патме порат иснас ёлыпа̄лт сирень нирыт ӯнттысыт. Тох та Пуховец яныг колта̄гыл юртыӈыщ о̄лэ̄гыт, та̄нки халанылт акваннё̄тхатэ̄гыт. Ма̄н Клара Константиновна ос Василий Игнатьевич ёмас ялпыӈ хо̄талыл янытлыягӯв. Са̄в щюнь, са̄в со̄т акваг вос о̄ньще̄г, пуста̄гыл, То̄румн, На̄й-О̄тыранэ̄н ӯргалым са̄в та̄л э̄лаль вос о̄лэ̄г.

1102 2015.06.26. Светлана РОМБАНДЕЕВА

Ма̄ньщи э̄ргыт ва̄нэ яныгхо̄тпавХа̄льус район Восыӈтӯр па̄вылт ма̄ньщи э̄ква о̄лы – Ульяна Ивановна Неттина, а̄ги о̄парищ наме Анимова. Тав уре̄т «Лӯима̄ сэ̄рипос» газетат (7 сентябрь 2012 та̄л, №25) Александр Васильевич Вьюткин хансыглас. Ты э̄тпос о̄выл хо̄таланэ̄т ам Восыӈтӯрн ялсум, Ульяна Ивановна колн щалтсасум, э̄ква уральтаслум. Тав ань Света а̄гитэ ёт о̄лы, ма̄н мощ потрамасӯв, ӯнлахо̄лсӯв. Ульяна Ивановна ма̄ньщи ос рущ ла̄тӈыл са̄всыр э̄ргыт ва̄нэ̄тэ, мощ э̄ргыс. На̄н ань э̄лаль тав потре ловиньтэлы̄н. – Ам Шайтанка па̄вылт 1940 та̄лт яныг по̄ль э̄тпос о̄выл хо̄талэ̄т самын патсум. Омам Татьяна Ионовна, а̄ги о̄парищ наме Шесталова, Ялпыӈнёл па̄вылт самын патыс. А̄щум Иван Тимофеевич Анимов, тав яныг хо̄нт порат порслувес. Наме ань клубув по̄хат лю̄льнэ па̄рт тармыл хансым о̄лы. Ам хӯрум каӈк о̄щсум – Семён, Данил ос Савва. Яныг каӈкум хо̄нт порат порслувес. Мир тэ̄та̄л о̄лме порат Савва каӈкум хотталь щалтыс, матырмат а̄гмыл а̄гмыӈыг е̄мтыс. О̄йкам ханты хум, Тэ̄к па̄вылныл о̄лыс, хосат а̄тимыг е̄мтыс. Ме̄н ат ня̄врам о̄ньщигласме̄н, ань китгагме̄н о̄лэ̄г – Ваня ос Света. Ваня пыгум Ха̄льӯст о̄лы, хунь марщумлаве, ам палтум ёхталы. Светам ам ётум о̄лы, а̄гирищ о̄ньщи. Тыт, Восыӈтӯрт, ферма о̄лыс, са̄в ӯйхул тот о̄щвес. Фермат ам са̄в та̄л рӯпитасум, ветеринарный фельдшерыг о̄лсум. Ӯйхулыт пусмалтасум, прививкатыл манос тэ̄рпиӈ ю̄нтупытыл ва̄рыгласанум. Акваг уральтасанум, пуссын пуста̄гыл вос о̄лэ̄гыт. Ӯнттын пораныл ёхты, та̄нанылн нё̄тсум. Пенсиян миннэм юипа̄лт, 1990 та̄лыт порат, ферма лаппантвес. Ӯйхулыт пуссын хотталь ла̄кквахартата̄лве̄сыт, то̄ват порслуве̄сыт. Ам ань тыт па̄влумт та о̄лэ̄гум. Телевизор о̄ньще̄гум, сунсэ̄гум, ӯнлахо̄лэ̄гум. То̄ванакт конква̄лсэ̄гум, кон мощ ё̄мыгтэ̄гум. Э̄лнаӈ матыр щаквщисум, ма̄ньщи суп ю̄нтсум, ва̄рыгласум. Пасан ман улас тармыл пиннэ са̄всыр салфеткат сагыгласум, ань тай матсум. Тӯяг 75 та̄лум то̄влыс. Рӯтанум ёхталасыт, ма̄н тыт йӣквсӯв, э̄ргысӯв. Акваг ёмас щирыл о̄лсӯв, ань о̄с ёмащакв о̄лэ̄в, нэ̄мхотьют лю̄ль ла̄тыӈ ат ла̄вса̄лы. О̄лнэм палытыл хо̄тпа нупыл ёмас номтыл потрамасум, пуссын аквъёт мовиньтасӯв, ощхульласӯв, э̄ргысӯв. Ань хо̄тпа ка̄салэ̄гум, сыныгтавем, ам ётум потраме̄гыт. Кон те ква̄лсэ̄гум, ма̄хум ва̄ганыл, ам лылыӈта̄гыл о̄лэ̄гум, ё̄мыгтэ̄гум. Ка̄сыӈ хо̄тпа э̄руптылум, ам о̄с э̄руптавем. Тыныӈ коянум, со̄рниӈ коянум, пуссын пуста̄гыл вос о̄лэ̄гыт. А̄ги Э̄рыг Ӯйрищ во̄ӈхата сэ̄мыл колына А̄щум тыналаве̄сума. Ань ам колумтага акв па̄лэ̄тага Посыӈ уляга ханыла̄лы. Со̄рниӈ нэ̄пака, тыныӈ нэ̄пака Ам ты нэ̄гага о̄ньщиг ла̄лэ̄гум. Кай ты э̄ргыгга ла̄ви, ла̄ви Со̄ль ты ма̄нага о̄лыглалэ̄в. Тыныӈ коюма, со̄рниӈ коюма Ам ты нэ̄гага о̄лыглэ̄гум. Ка̄йты э̄ргыга со̄рниӈ ва̄рмальа Ам ты нэ̄гага о̄лыглэ̄гум Ам ты э̄ргыгала̄лыглэ̄гума Ам ты э̄ргыга о̄ньщиглэ̄гум. Со̄рниӈ коюма, тыныӈ коюма Ам ты нэ̄гага о̄лыгла̄лэ̄гум Тыныӈ коюма, со̄рниӈ коюма Ам ты нэ̄гага о̄лыгла̄лэ̄гум. . . Ленин О̄йка урыл Ленин о̄йкага, со̄рниӈ о̄йкага Ма̄н ты тав ля̄ге о̄лыгла̄лы Ма̄н ат та сунсыгла̄лылы Ма̄н та э̄ргыгала̄лыглэ̄в. . . Колхоз урыл Колхоз та̄л о̄луӈкве сака лю̄ль о̄лнэ̄тэ, О̄лэ̄гум, номсэ̄гум, сака лю̄ль о̄лнэ̄тэ. Колхоз нупыл сунсэ̄гум, мирыл та̄н ялэ̄гыт, О̄лэ̄гум, номсэ̄гум, мирыл та̄н ялэ̄гыт. Мирыл та̄н ялэ̄гыт, са̄в ва̄рапе̄гыт, О̄лэ̄гум, номсэ̄гум, са̄в ва̄рапе̄гыт. Са̄в ва̄рапе̄гыт, молях а̄стапе̄гыт, О̄лэ̄гум, номсэ̄гум, молях а̄стапе̄гыт. . . Ульяна Ивановна ла̄ви, ты э̄ргыт пуссын сака хосат. Э̄лнаӈ па̄вланыл клубыт концертыт о̄лыгламаныл порат, тав тот ва̄тихал э̄ргыглас, турсуе тамле нё̄тнэ, вит хольт ови. Ульяна Ивановна хо̄тпа нупыл сымыӈ э̄лумхо̄лас. Света а̄гитэ омате̄тэ э̄руптытэ, ӯргалытэ. Ты я̄тил ма̄ньщи хо̄тпавн са̄в ёмас, сымыӈ ла̄тыӈ ла̄ве̄в. Колта̄глэ пуста̄гыл вос о̄лы, На̄янэ̄н-О̄тыранэ̄н вос ӯргалаве!

1102 2015.06.26. Тамара МЕРОВА

«Соцветие» нампа ялпыӈ хо̄талТы э̄тпос са̄т щислат Сургут ӯст «Соцветие» нампа фестиваль о̄лыс. Тамле ялпыӈ хо̄тал тот 1998 та̄лныл ва̄рыглаве. Ты ӯст о̄лнэ са̄всыр мирыт пуссын акванатхатэ̄гыт ос та̄нки о̄лупсаныл суссылтыяныл. Ты порат та̄н Сургут ӯсаныл 50 та̄лэ аквъёт юртыӈыщ янытласаныл. Ӯс кӯщай Дмитрий Попов ма̄хум пуссын ёмас сымыӈ ла̄тӈыл ла̄всанэ ос мӯйлупсал мисанэ. Хуньт о̄лыглам ма̄нь па̄выл хосат та̄гыл са̄в ма̄ныл ёхтум са̄всыр мирытн ӯнттуӈкве о̄вылтавес, ань тав нё̄тнэ яныг ӯсыг е̄мтыс. Тыи ма̄во̄й хо̄нтум порат Советский Союз са̄всыр республиканыл ма̄хум тув рӯпитаӈкве ёхтысыт ос акваг тув та о̄лмыгтасыт. Ань мирыт та̄нки йӣкваныл йӣквуӈкве, э̄рганыл э̄ргуӈкве «Хоровод дружбы» нампа касылн во̄вве̄сыт. Акв ӯскант рущит, хатанит, башкирыт, дагестанцыт, чеченцыт, кыргызыт, молдаваныт пуссын аквъёт 18 са̄всыр мирыт ка̄таныл акванпувим э̄ргысыт, йӣквсыт. Та̄нки нё̄тнэ маснутыл масхатым о̄лсыт. Ка̄сыӈ мир та̄нки хурип тэ̄нэ пасан щё̄пита̄лсыт. Ты коныпал матыра̄ти пе̄с накыт ва̄руӈкве мӯй ма̄хмыт ханищтаве̄сыт. 2015 та̄л май Юграт о̄лнэ ма̄хум та̄нки пе̄с наканыл ӯргалан ос э̄лаль тотнэ та̄лыг намтым о̄лы. Соссаӈ ма̄хум пе̄с та̄гыл о̄лупсаныл суссылтан ос э̄лаль тотнэ ма̄гыс Валентина Шадрина, «Югра лылые̄п» ассоциацият рӯпитан нэ̄ ӯс кӯщайн э̄сгын нэ̄пакыл майвес. Ань хантыт, ма̄ньщит ос ё̄рн ма̄хум пе̄с накыт ханищтан ва̄рмалит «Старый Сургут» колыт рӯпитан хо̄тпатн суссылтаве̄сыт. Та̄н ё̄рнкол тӯщталасыт ос та̄н палтаныл са̄в хо̄тпа мӯйлысыт. Тувыл Сургутский район Русскинский па̄вылныл соссаӈ ня̄врамаквет йӣквнээ̄ргын коллективаныл ёт ёхталасыт. Лянтор ӯсныл «Тень мигранта» ансамбль во̄виньта̄лвес. Тот Вера Кондратьева фолкрок щирыл э̄ргыт э̄ргыс. Тувыл Дмитрий Попов ӯст о̄лнэ ма̄хум «Яныг Сымыл» мӯйлуптасанэ. Ань са̄всыр мирыт хорамыӈ я̄рмак то̄раныл тув пе̄румтасаныл. Тав ань памятник хольт тах хотталь тӯщтаве. Мӯй ма̄хум сака ёмщакв мӯйлысыт, та̄н матыра̄ти пе̄с накытн, мастеркласс щирыл ханищтаве̄сыт, нас ӯщлахтасыт ос са̄всыр пӯмащ ва̄рмалит хурин по̄слысаныл.

1102 2015.06.26. Александр ВЬЮТКИН

Э̄лы ма̄ныл тотыглым суссылтапЛӯпта э̄тпост титыт хо̄талт «Югорская Долина» нампа гостиницаг о̄лнэ колт «Торум Маа» музей щирыл ва̄рим колнакт Удмурт ма̄хум суссылтапаныл щё̄пита̄лсаныл. Тыг тотум выставканыл Ханты-Мансийск ӯст тит э̄тпос тах рӯпиты. Выставканыл «Лудорвай» нампа та̄н ма̄нылт о̄лнэ яныг музеил тыг то̄твес. Суссылтапаныл рӯщ ла̄тӈыл «Семейные знаки удмуртов» намаясаныл. Та̄нти пе̄с йис порат о̄щнэ пормасаныл урыл суссылтым потыртасыт. Удмуртия янытыл иӈ са̄в па̄выл о̄лы, хо̄т та̄н иӈ та̄нти маснутыл о̄лэ̄гыт. Ка̄сыӈ па̄вылт ос колта̄гыл та̄нти щир хорам о̄ньще̄гыт. Та хораманыл щирыл халанылт ты хащхатэ̄гыт. Та щирыл мо̄т па̄вылныл ёхталан хо̄тпа ханьщаве. Тувыл ка̄сыӈ ма̄щтыр хо̄тпа ва̄рим пормас такви ка̄т по̄сыл по̄стым урыл потыртасыт. Та̄н ма̄н хольтылув о̄парищ наманыл хансуӈкв ат ха̄ссыт, та пе̄нсыл ка̄т по̄сыл щуртумтым по̄стахтасыт. Потыртан ма̄ныл а̄стуманыл юипа̄лт маньнэ хум ва̄рнэ кастыл щё̄питан урыл ма̄нь суссылтап такталасыт. Тот та̄н маныр хумле маньнэ тэ̄латэ щирыл маставе пуссын такталасыт. Маньнэ̄г «Торум Маа» колыт рӯпитан А̄с я̄ ва̄таныл о̄лнэ ма̄ньщи нэ̄ Светлана Михайловна Астапович мастыглавес. Таве̄н Удмурт ма̄хум о̄щнэ супаныл, пуӈкын пиннэ те̄нтаныл татем ёмщакв а̄ртмысыт. Маньнэ мастын порат пе̄ста̄гыл э̄ргим мастыяныл. Та̄н нупланыл сунсуӈкв сака пӯмащ о̄лыс. Ёхталам ма̄хумн удмурт ма̄хум пуссын ёмас, сымыӈ, номтыӈ ла̄тӈыл ла̄ввесыт, э̄лаль пуста̄гыл о̄лнэ хо̄талыл янытлаве̄сыт. Хо̄ты ма̄ныл, хо̄ты витныл о̄лнэ финноугорский ма̄хум ма̄н пуссын ла̄тыӈ рӯтыг ловиньтахтэ̄в.

1102 2015.06.26. unknown

Восыӈтӯр ня̄врамыт янытлаве̄сытТы хуритыт Ха̄льӯс район Восыӈтӯр па̄выл ня̄врамыт по̄слым о̄лэ̄гыт. Лӯпта э̄тпос о̄выл хо̄талэ ня̄врам янытлан хо̄талыг о̄лы. Таима̄гыс ма̄н ма̄в янытыл пуссын мӯйлэ̄гыт, ня̄врамаквет янытлавет, мӯйлупсатыл мӯйлуптавет. Та хо̄тал Восыӈтӯрт клуб колт янгема̄не концерт ва̄рыгласыт, йӣквсыт, э̄ргысыт. Я̄тил ня̄врамаквет, пуссын пуста̄гыл о̄лэ̄н, со̄тыӈыщ яныгме̄н!

1103 2015. 07. 10. Тамара МЕРОВА

Ищхӣпыӈ утыт пӯмщалан ва̄рмаль Ты э̄тпос хо̄тыт щислатэ̄т Ханты-Мансийск ӯст са̄тыт мирхал IT-Форум о̄лыс. IT – Форум рущ щирыл ке ла̄вуӈкве, тыи ищхӣпыӈ утыл пӯмщалахтан ос та̄н ётаныл рӯпитаӈкве ханищтан нак. Тыг ань БРИКС (Бразилия, Россия, Индия, Китай ос Южно-Африканский Республикат) ос ШОС (Шанхайская организация сотрудничестват Казахстан, Киргизия, Таджикистан ос Узбекистан о̄лэ̄гыт) са̄всыр ма̄ныл ма̄хум акванатхатыгласыт. Россия па̄лыл хо̄н ма̄хум тэ̄ланыл палт пуӈктотнэ хум Сергей Лавров ке̄тум пищматэ Валерий Морозов дипломатхумын ловиньтавес. Игорь Холманских, Уральский федеральный округ тармыл кӯщайлахын хум, мӯй ма̄хум ма̄гыс видеопищматэ суссылтавес. Ос округ губернатор Наталья Комарова тув атхатам ма̄хум пӯмыщ ва̄рнэ тэ̄лат урыл э̄лаль акваннё̄тхатым ла̄всанэ. Тувыл хо̄н ма̄ныл ёхталам кӯщаит о̄с пащалахтасыт. Та̄н пуссын ос ITищхӣпыӈ утыт ёмщакв ханищтаӈкве таӈхияныл, хо̄та̄ти э̄рнэ нё̄тмил ва̄ре̄гыт тах. Ты форум "Умный регион Удобный регион" намтувес. Ань мир пусмалтан, ма̄хум ханищтан, та̄н культураныл ос ща̄нь ла̄тӈаныл э̄лаль тотнэ щирыл пуссын ищхӣпыӈ утыт хосыт ӯргалаӈкв ос но̄хво̄рмалтаӈкв ёмщакв вос ве̄рмынувыт. Тамле тэ̄лат э̄лаль тотнэ ма̄гыс сыресыр ма̄т рӯпитан специалистыт проектыт щё̄питасыт, ань та̄наныл суссылтасаныл. Тувыл "ПРОФ-IT" касыл ва̄рыглавес. Ты та̄лт 170 са̄всыр рӯпатат ке̄тыглаве̄сыт, тыгыл 36 рӯпатат э̄лаль вуянтаӈкве ла̄вве̄сыт. Ань тот но̄хпатум хо̄тпат наманыл ла̄вве̄сыт ос мӯйлупсал майве̄сыт. Аквта порат Ханты-Мансийскат ЮНЕСКО па̄лыл ща̄нь ла̄тӈанув э̄лаль тотнэ нак мирхал конференция ва̄рыглавес. Тав "Всемирная встреча экспертов по проблемам сохранения языков и их развития в киберпространстве" намаим о̄лыс. Ань мирхал ма̄хум ты акванхо̄нтхатнэ ва̄рмалигт та̄н рӯпатаныл ам мо̄тыт газетат я̄нас потыр хансэ̄гум тах.

1103 2015. 07. 10. Валентина УЗЕЛЬ

О̄лнэ колыт урыл потыр о̄лыс О̄лнэ колыт урыл потыр о̄лыс Ма̄ янытыл кос хо̄т о̄лнэ колыт нас ат мивет. Ма̄хум кол ёвтуӈкв ве̄рме̄гыт те, та ёвтэ̄гыт, ат те ве̄рме̄гыт, нас са̄внув арендаолн ойтым тот о̄лэ̄гыт. Ань ты йильпи ва̄рмаль ма̄н ма̄вн ос ты тотвес, рущ ла̄тӈыл тох ла̄ваве – арендный дом. Округувт мо̄лты та̄лныл тит тамле колыг ӯнттувесы̄г, акватэ Нефтеюганск ӯст, мо̄танэ Ханты-Мансийск ӯст. Ювле хультум э̄тпост та колн са̄в колта̄гыл ва̄нтлысыт. Тот 90 квартира о̄лы. Ос ка̄сыӈ ка̄сащан хо̄тпа тув о̄лмыгтаӈкв о̄с ат ве̄рми. Тув янгыщ бюджетный ма̄т рӯпитан хо̄тпат та̄н тамле колыл мивет – ты ле̄ккарыт, ня̄врамыт ханищтан ма̄хум, ня̄врамыӈсадыкт рӯпитан ма̄хум. Ка̄сыӈ кол ма̄гыс я̄нас арендаолн хансым о̄лы. Яныгнув те кол, о̄лнэ ма̄гыс са̄в олн ойтуӈкв э̄ри. Ань тув о̄лмыгтам ма̄хум 21-33 со̄тыра солко̄ви ойтуӈкв патэ̄гыт. Ипотечный агентстват кӯщай хум Евгений Чепель ля̄ххал тотнэ ма̄хумн ла̄выс, ань ты колыт тиврыт маныр э̄ри, пуссын о̄лы – пасаныт, уласыт, а̄ныт, тэ̄нут ва̄рнэ плитат, хуйнэ пе̄ринат. Нэ̄матыр тув ёвтуӈкв ат э̄ри. Хо̄тпа туп тот вос о̄лы, вос рӯпиты. Мо̄т ма̄н о̄лмыгтаӈкв те таӈхи, нэ̄матыр ва̄рмаль ат е̄мты, колэ ювле мыгтэ, тувыл та. Ань ты ёмас тэ̄ла Россия янытыл э̄лаль тотуӈкв патаве. Ты хосыт то̄ва ле̄ккарыт э̄рыӈ хо̄т ат о̄вылхатэ̄гыт, та̄н вос ва̄ганыл – мо̄т ма̄н те ва̄нтлэ̄гыт, та̄н тах тот о̄с акв тамле колыл мивет. Ос ты кол ёвтуӈкв щар ат ро̄ви, та̄н туп нас о̄лнэ ма̄гыс миӈкв патавет. Хо̄тпа пенсиян те мины, тав тах ты колныл по̄ханминуӈкв ла̄ваве. Округ мирколныл те̄тым ля̄ххал ма̄ньщи ла̄тӈыг Валентина Васильева толмащластэ.

1103 2015. 07. 10. Тамара МЕРОВА

Ма̄витув мори ул вос па̄ӈктаве Аньмӯнт губернатор ва̄ӈын хум Геннадий Бухтин ма̄витув ӯргалан ма̄гыс са̄прани ва̄рыглас. Тот ты тэ̄лат палт пуӈктотнэ хо̄тпат ла̄тыӈ тотсыт. То̄ва ӯсыӈ манос район па̄влыӈ ма̄т порсаныл акванатнэ̄ныл юипа̄лт хотталь во̄рн мори тотыяныл ос тот оссувлыяныл. Ты тэ̄лат хоттӯйтавет ос то̄ва кӯщаит ты ва̄рмалит нупыл саманыл, паляныл лаппантыяныл. Воссыг тох ул вос е̄мталас, ань лю̄ль тэ̄ланыл ма̄гыс мощ пащралаӈкве э̄ре̄гыт. Юграт Природнадзор кӯщай ва̄ӈын нэ̄ Светлана Король потыртас, округ ма̄хум та̄л сыс ка̄сыӈе̄мт са̄в порс атэ̄гыт. Та̄нанылныл пуссын матыр йильпииг ва̄руӈкве ат а̄ртми. Нэ̄пакыт, кумы̄скаӈ утыт тыкос я̄нас атыглаве̄сыт, тувыл матыр ва̄руӈкве ос хотталь мо̄т ма̄н тотуӈкве ос аквты олн э̄ри. Таима̄гыс порсанян та па̄хвтавет ос сайнэ ма̄наныл та. Россия янытыл порсанят ва̄рнэ ма̄ урыл са̄ккон хансым о̄лы кос, ос то̄ват тувле нупыл щар ат сунсэ̄гыт. Ань тув хансым тэ̄лат мӯсхалыг ханищтаӈкве иӈ э̄ре̄гыт ос мощ мо̄т ла̄тӈыл вос хансавет. Ань акванатхатам хо̄тпат ма̄вит ӯргалан департаментын тамле ла̄тыӈ ва̄рыс, та̄н ма̄ ӯргалан РФ Министерство колн №457-ФЗ са̄ккон палт ла̄тыӈ вос хӯлтэ̄гыт, ты са̄ккон 01. 01. 2017 та̄л мус ювле вос ӯрияныл. Та сыс са̄всыр департаментыт рӯпитан ма̄хум та са̄кконын хансум йильпи тэ̄лат э̄рнэ щирыл ва̄руӈкве вос ханьщувлэ̄гыт.

1103 2015. 07. 10. Тамара МЕРОВА

Ща̄нь ла̄тыӈ рӯтанув ёхталасыт Лӯпта э̄тпос юио̄выл хо̄талэ̄т «Ассоциация финноугорских народов РФ» нампа Совет са̄всыр тэ̄лат о̄вылтыт потыртаӈкве Ханты-Мансийскан ёхталасыт. Россият о̄лнэ финноугорский ма̄хум тэ̄ланыл палт Пётр Тултаев пуӈктоты. Ань о̄выл ёхтум хо̄таланылт мӯй хо̄тпатн ӯсув суссылтавес, тувыл А̄с ос Иртыш я̄г аквановтнэ ма̄н тотыглаве̄сыт. Китыт хо̄талт та̄н ма̄н соссаӈ ма̄хманув ёт са̄прани ва̄рыгласыт. Тот Геннадий Бухтин, губернатор ва̄ӈын хум ма̄ньщит ос хантыт ва̄рмаляныл урыл ла̄тыӈ тотыс. Са̄всыр департаментыт рӯпитан кӯщаит манхурип тэ̄лат манос нё̄тмилыт ва̄ре̄гыт, таит хӯлтсаныл. Тувыл аквъёт культура, ханищтап, ла̄тыӈ но̄хво̄рмалтан тэ̄лат о̄вылтыт потыртасыт. Югравт соссаӈ ма̄хум ща̄нь ла̄тӈаныл ва̄нэ ма̄гыс газетат, ня̄врамыт ма̄гыс журналыт, ловиньтан сыресыр нэ̄пакыт та̄ратавет. Са̄в нэ̄пак, журналыт Юван Шесталов нампа премияолн кастыл ва̄равет. Этнотуризм манос пе̄с йис накыт э̄лаль тотнэ щирыл о̄с грантолныл майлавет. Акв та̄л сыс соссаӈ ма̄хум культураныл щирыл 4 со̄тыра са̄вит са̄всыр ва̄рмалит щё̄пита̄лавет. Пё̄тр Тултаев ла̄выс: « Юграт ма̄нки рӯт ма̄хманув о̄лупсаныл о̄вылтыт матыра̄ти ма̄н пуссын ва̄ӈкве таӈхе̄в. На̄н тыт ма̄ньщит, хантыт ос ё̄рн ма̄хум та̄н ёмас о̄лупсаныл ма̄гыс са̄в номтыӈ тэ̄лат, насати, ва̄ре̄гын. Янгыщ ща̄нь ла̄тӈын э̄лаль тотнэ ма̄гыс сака са̄в вос нё̄тнуве̄н. Ка̄сыӈ мир такви ла̄тӈе кастыл э̄лаль вос о̄лы, э̄лаль вос та̄кмалтахты, са̄вми. Ма̄н ань ты пасан ва̄тат финноугрыт культураныл суссылтан ма̄гыс рӯт ма̄хманув фестивалин акванатхатуӈкве кӯсэ̄в. Тав «Культура России» нампа программан хаснуве ке, щар ёмас о̄лнув. То̄нт тав акв па̄лэ российский бюджетныл ойтнуве, мо̄т па̄лэ округныл. Тувыл пе̄с йис потрыт, э̄ргыт дискын хансуӈкве щё̄питавет ке, тох ла̄тӈанув са̄в мирн хӯнтамланувет, суяныл щирыл ёмщакв ханищтанувет. Соссаӈ ма̄хум янытлан Ӯринэ̄ква хо̄талыт, Ворщик хо̄талыт кинан вос по̄славет ос са̄в ма̄хумн вос суссылтавет. «Хо̄тал» нампа театрыт суссылтан тӯлыглапыт, ёнгыт кинан о̄с по̄слуӈкве э̄ре̄гыт. Округт рущ ла̄тӈыл хансым газетат то̄ва ля̄ххалыт ханты ос ма̄ньщи ла̄тӈыл толмащлым вкладышнэ̄пак вос о̄щнувыт. На̄н палтын са̄всыр тэ̄лат грантолныл минэ ва̄рмаль ма̄навн сака мӯстыс». Ётыл финноугор рӯт хо̄тпат нэ̄пак ловиньтан колн тотыглаве̄сыт. Тот ты колыт рӯпитан ма̄хум ёт ва̄йхатасыт, са̄всыр нэ̄пакыт та̄ратан о̄вылтыт аквъёт потыртасыт. Мӯй хо̄тпат та̄нки ма̄ныл тотым нэ̄пакыт мӯйлуптасыт. Тыгыл э̄лаль та̄н центр искусств номтыӈ ня̄врамыт ханищтан колн, «Лылынг союм» этноцентрын ос ЮГУ колн мӯйлуӈкве во̄виньта̄лве̄сыт. Ля̄ххал ма̄ньщи ла̄тӈыг Т. Мерован толмащлавес.

1103 2015. 07. 10. Тамара МЕРОВА

Пӯльницат уральтавет Ювле хультум э̄тпост округ депутат нэ̄ Наталья Западнова, е̄ӈта пасан ва̄тан районыт янытыл о̄лнэ са̄всыр кӯщаит акванатыгласанэ. Та̄н тот пӯльницат ӯнттын колыт о̄вылтыт потыртасыт. Ань округ янытыл манах пӯльницат ӯнттавет, хумус тот тэ̄ланыл о̄лэ̄гыт, пуссын уральтаве̄сыт. Ма̄хум пусмалтан колыт ӯнттын ма̄гыс са̄в олн кос та̄стыгла̄лаве, ос то̄ва пӯльницат э̄рнэ торыг ӯнттуӈкве янытанылт ат алымавет. Ань манырсыр та̄рвит тэ̄лат та̄н о̄ньще̄гыт, акванатхатнэ кӯщаит та̄рапаттысаныл. Дмитрий Шаповал, губернатор ва̄ӈын хум таи ла̄выс: «То̄ванакт пӯльницат ӯнттуӈкве ла̄палахтан хо̄тпат вуйхатэ̄гыт. Та̄н пӯльницат ӯнттын ма̄гыс э̄рнэ нэ̄пакыт молях щё̄питыяныл, сака са̄в олн тув холтуӈкве ат во̄ве̄гыт. Ос юио̄вылт рӯпатаныл лю̄льсаӈ ва̄рияныл, пӯльницат а̄стын пораныл ёхты, та̄н хотталь та тӯйтыгпахтэ̄гыт. Ма̄н кисхатам сыс са̄в пора мины, ос ма̄хум мо̄т хотты ма̄т та пусмалтахтэ̄гыт». Тох Нефтеюганск ӯст ня̄врам самын паттын кол сака хоса ӯраве. О̄влэ̄т тав нас мощ йильпииг щё̄питаӈкве тахвес. Тувыл янытэ̄т ёмщакв щё̄питаӈкве номылматвес. Ос таве мо̄т щирыл ӯнттын ма̄гыс сметанэ̄пакыт ва̄рве̄сыт. 140 миллион та̄стум солко̄ви тув ат товылхатасыт, таима̄гыс нэ̄паканэ йильпииг о̄ста щё̄питаве̄сыт. Ты ва̄рмалитыт ёт капыртым пора наска̄ссыг та минас. Аквтох Горноправдинск, Нижневартовск ӯсыгт пӯльницаг ӯнттым хоса ӯраве̄г. Мир пусмалтан департамент кӯщай хум Александр Филимонов потыртас: «Йильпи пӯльницат ӯнттуӈкве манос та̄наныл ёмас щирыл нас щё̄питаӈкве ман программа хансым о̄ньще̄в. Ты программа щирыл 2020 та̄л мус рӯпитэ̄в тах. Мо̄лты та̄л Радужный ӯст ня̄врам пусмалтан кол ӯнттувес, Пыть-Ях ос Когалым ӯст пӯльницаг па̄лыгпусвесы̄г. Нижневартовск ӯст психоневрологический диспансер ёмщакв щё̄питавес, ос Югорск ӯст пӯльница». Ма̄нь па̄влыӈ ма̄т ФАПыт ӯнттуве̄сыт ос рӯпитэ̄гыт. Тувыл ма̄хум пусмалтан колыт пуссын ищхӣпыӈ утыл, э̄рнэ пормасыл ёвтавет.

1103 2015. 07. 10. Светлана РОМБАНДЕЕВА

Ма̄ньлат а̄гипыгыт яныг ӯст ханищтахтуӈкве патэ̄гыт Санкт-Петербург ӯст экономика тэ̄ла урыл о̄лум мирхал хо̄нтхатыглапыт округ кӯщаюв Наталья Комарова ос Виктор Садовничий акванхо̄нтхатыгласыг. Ты хум М. В. Ломоносов нампа Московский государственный университет кӯщаиг о̄лы. Тэ̄н потыртахтасыг, ань тыгыл э̄лаль та ханищтахтан колн ма̄н округувныл ня̄врамыт о̄с виӈкве патавет. Школат ёмащакв ханищтахтам ос э̄кзаменыт ёмас щирыл хансум хо̄тпат та̄н тув во̄вавет. Округувныл ёхтын а̄гипыгыт янгыщ геологыг, физикыг ос ищхӣпыӈ утыӈ рӯпатан ханищтахтуӈкве патэ̄гыт. Ты та̄л тув 22 ма̄ньлат хо̄тпа вивет. Тувыл тэ̄н э̄рнэ нэ̄пакыт щё̄питасы̄г, хасхатасы̄г. Туп ма̄к таи – тот ханищтахтан хо̄тпа тах рӯпитаӈкве округын ювле вос юв, тыт тах вос рӯпиты. Таквсы порат ёмащакв ханищтахтам ма̄хум Москва ӯсн минэ̄гыт, ты яныг колт ханищтахтуӈкве тах та о̄вылтахтэ̄гыт. Округ кӯщай нэ̄ ля̄ххалэ ма̄ньщи ла̄тӈыг С. ромбандееван толмащлавес.

1103 2015. 07. 10. Светлана РОМБАНДЕЕВА

Ма̄ньщи хо̄тпав номилӯв Лӯпта э̄тпос 22 хо̄талэ̄т Ханты-Мансийск ӯст ма̄хум «Торум маа» музейт акванатхатыгласыт, ма̄ньщи поэтув Юван Николаевич Шесталов самын патум хо̄талэ о̄лыс. Тав рӯтанэ, юртанэ, ма̄ньщи ос ханты ма̄хум тув ёхталасыт. Юван Николаевич 1937 та̄лт Ха̄льӯс район Комратка па̄вылт самын патыс. Атимыг е̄мтме яныг таквс э̄тпост нилыт та̄лэ то̄влы. Ты музей ӯнттуӈкве тав номылматастэ, таима̄гыс ань тот памятникыл ва̄рвес, сценал ва̄рвес. Ла̄тыӈ ла̄внэ хо̄тпа тув но̄хялы, потрами. Са̄в хо̄тпа потыртасыт, та̄в хансум стихотворениянэ ловиньтаве̄сыт, ма̄ньлат ма̄хум са̄ӈквылтапыл та̄н са̄ӈквылтасыт, э̄ргын хо̄тпа э̄ргыс.

1103 2015. 07. 10. Светлана РОМБАНДЕЕВА

Та̄гт я̄ ва̄тат ӯнлын Восыӈтӯр па̄выл Лӯпта э̄тпос о̄выл хо̄таланэ̄т ам Восыӈтӯр па̄вылн ялсум. Ты па̄вылт ма̄ньщи ма̄хум, хантыт ос мо̄т са̄в мирыт о̄лэ̄гыт. О̄влэ̄т ам мирколн щалтсасум, па̄выл кӯщай нэ̄г тот Елена Владимировна Томчук рӯпиты, ӯщлахтуӈкве минам, а̄тим. Тав ва̄ӈын нэ̄тэ Ираида Ильинична Корикова па̄вланыл урыл мощ потыртас. На̄н ань э̄лаль тав потре ловиньтэлы̄н. – Восыӈтӯр па̄влув 1930 та̄лт ӯнттуӈкве о̄вылтавес. Та порат э̄лныл тыг са̄всыр мирыт ке̄тыглаве̄сыт – Свердловский областьныл немцыт, Крым па̄лыл евреит ос мо̄т са̄в ма̄хум. Па̄выл ӯнттуӈкве та̄н ты о̄вылтасаныл. То̄ва колта̄глыт са̄в ня̄врамыӈыг о̄лсыт, катер ань па̄гпӯхты, пуссын пӯинт хӯлявет, о̄лнэ кол а̄тим, ма̄хум тот та савалэ̄гыт. Тувыл нэ̄ хо̄тпат ос ня̄врамыт Чуанель па̄вылн тотве̄сыт, тув о̄лмыгтасыт, хум хо̄тпат ос па̄выл ӯнттуӈкве патсыт. Аквта та̄лт Восыӈтӯрт о̄выл классытыт ханищтахтан школа пӯсвес, ат квартираӈ барак тув майвес. 1931 та̄лт я̄ӈк на̄тнэ э̄тпост па̄вылт миркол рӯпитаӈкве патыс. 1932 та̄л порат клуб ӯнттувес. 1933 та̄лт сельхозартель ва̄руӈкве номылматвес, ӯйхулыт янмалтан ма̄гыс мискол ос лувкол ӯнттуӈкве патвес. 1935 та̄лт пӯльница ӯнттувес. Тэ̄пканыт ва̄рве̄сыт, нэ̄ хо̄тпат ос ня̄врамыт картопка, капуста, лук, витыӈ хӯрыг, морковка ос мо̄т тэ̄нут янмалтасыт. Хум хо̄тпат ос кол ӯнттын ма̄т рӯпитасыт, хӯл алыщласыт ос во̄раясыт. 1941 та̄лт таквсы порат яслисад пӯсвес. 1952 та̄лт Лапоры, Новое, Неремово ос Камратка па̄влытыт школат лаппантве̄сыт, ня̄врамыт пуссын Восыӈтӯрн ханищтахтуӈкве ке̄тве̄сыт. Тот хӯрум баракыт интернатыг ва̄рве̄сыт, ня̄врамыт тув ва̄нтлысыт. 1954 та̄лт хӯрум колхозыт аквантотве̄сыт – Восыӈтӯр, Лапоры ос Чуанель. Восыӈтӯрт ӯнттувес, Н. С. Хрущев намыл майвес. 1950-60 та̄лыт порат ос Новинские па̄вылныл колхоз тыгле тотвес, йильпи щирыл намаявес – «Путь Ленина». 1959 та̄лт ты па̄влыт пуссын Восыӈтӯр миркол нупыл хасве̄сыт: Лапоры, Новинские, Сыгары, Неремово, Комратка, Чуанель, Резимово, Восыӈтӯр. 1961 та̄лт нё̄выль ос щаквит ва̄рнэ «Ванзетурский» нампа совхоз ӯнттувес. Тав 1997 та̄л мус рӯпитас, районын сака яныг парыс тотыс. 1964 та̄лт Чуанель па̄вылт школа лаппантвес, па̄выл ма̄хум пуссын Восыӈтӯрн ва̄нтлысыт. 1970 та̄лт клуб ос нэ̄пак ловиньтан кол ӯнттувес. 1976 та̄лт ос телевышка ва̄рвес, ма̄хум телевизорыт ёвтуӈкве патсыт. 1985 та̄л порат интернат ӯнттувес, тот Новое ос Шайтанка па̄выл ня̄врамыт о̄лмыгтасыт. 2000 та̄лт ос кит накпа кирпащ школа ӯнттувес. 2006 та̄лт Восыӈтӯр ос Новинские па̄влыг акванхасвесы̄г, Ягрим мирколн тӯлвесы̄г. Па̄влувт ань 462 хо̄тпа о̄лы. Та̄н халанылт ма̄ньщит – 260 хо̄тпа, хантыт – 29 хотпа. Пӯльница о̄лы, школа, спортзал, ня̄врам янмалтан кол, клуб – тот 76 хо̄тпа рӯпиты. Тувыл «Ютэк» нампа отделение, «Березовогаз» участок, «Белоярсктелеком» участок ос РУФПС нампа связь отделение о̄лы, тот ос 34 хо̄тпа рӯпиты. Связь ёмащакв рӯпиты, ще̄пыт о̄щнэ телефонанув хосыт потыртэ̄в. Интернет о̄ньще̄в. «ОРТ», «РТР» ос «Югория» телевизор хосыт суснэ программат рӯпитэ̄гыт. Тэ̄лы порат ма̄н машинал яласэ̄в, туи – на̄иӈха̄пыл. Лё̄хта̄л порат ос ма̄н палтув вертолёт ӯнтса̄лы. Ираида Ильинична ёт потыртамум юипа̄лт школан ялсум, тот рӯпитан хо̄тпат ёт потыртасум. Па̄вылт о̄лнэ ма̄ньщи ма̄хманув ёт хо̄нтхатыгласум, потраныл ёлхассанум. Та̄н о̄вылтытаныл ам тах мо̄т хотты газетат хансэ̄гум.

1103 2015. 07. 10. Светлана РОМБАНДЕЕВА

Тав а̄тятэ ма̄ньщи хум Ты хурит Ираида Ильинична Корикова по̄слым о̄лы, а̄ги о̄парищ наме Ярлина. Ва̄рнэ рӯпататэ урыл потыртаме юипа̄лт ос такви о̄вылтытэ аквкит ла̄тыӈ ла̄выс. – Ам Новинские па̄вылт 1963 та̄лт самын патсум. А̄тям Илья Григорьевич Ярлин, 1927 та̄лт самын патыс, соссаӈ хо̄тпа о̄лыс, ма̄ньщи хум. Омам Софья Ильинична Кечимова, 1936 та̄лт самын патыс, ханты нэ̄, Сургут е̄рныл о̄лыс. Тэ̄н ань сас а̄тимыг. Ат ня̄врам о̄ньщигласы̄г, китгагув о̄с а̄тимыг, ма̄н хӯрум о̄лэ̄в. Акв каӈкум Ха̄льӯст о̄лы – Иван Ильич Ярлин, мо̄т каӈкум тыт о̄лы – Виктор Георгиевич Кечимов. О̄йкам Ха̄льӯсныл о̄лы, кит а̄ги янмалтасме̄н. Увщим кит ня̄врамаге о̄с ме̄н палтуме̄н яныгмасы̄г, тав хосат а̄тимыг е̄мтыс. Ня̄враманме̄н ань пуссын янгыт. А̄тям ма̄ньщи ла̄тӈыл потыртас, таи ма̄гыс ам ла̄тӈув мощ хӯлылум. О̄лме порат ма̄н тав ётэ ма̄ньщи ла̄тӈыл потыртасӯв, тав 1985 та̄лт а̄тимыг е̄мтыс. Та па̄сныл ам ма̄нти ла̄тӈувтыл воссыг ат та потырта̄лэ̄гум. Омав ла̄тӈе (сургутский хантыт ла̄тыӈ) ма̄н щар ат торгамтаслӯв. Таима̄гыс ам ань ня̄враманум ща̄нь ла̄тӈаныл ат ва̄ганыл. Тыт ам 1983 та̄л па̄сныл рӯпитэ̄гум. Школа а̄стламум юипа̄лт ам Ханты-Мансийск ӯст торговый училищат ханищтахтасум. Ётыл ос, хунь тыт рӯпитаӈкве патсум, юил ялантым Тюмень ӯс университетыт ханищтахтасум, экономический отделение а̄стласум. Тыт о̄луӈкве а̄нум сака ёмас. Хотталь э̄л мощщан ялэ̄гум, та̄ра ювле минуӈкве та номсэ̄гум. Ня̄враманум Нягань ӯст о̄лэ̄гыт, та̄н палтаныл ялэ̄гум, китхӯрум хо̄тал о̄лэ̄гум, ювле молямлаӈкве та патэ̄гум. Квартиранылт матыра̄ти э̄рнут пуссын о̄лы – вит со̄схаты, юн ловтхатэ̄гыт, колхусапаныл ре̄гыӈ. Ам тай тамле колт хоса о̄луӈкве ат ве̄рме̄гум. Та̄н ма̄ньлат ма̄хум, йильпи о̄лупсан молях ханьщувлэ̄гыт. Ань потруме̄н та оигпас. Ам Ираида Ильиничнан пӯмащипа ла̄тыӈ ла̄всум. Тав ще̄мьятэ ёт пуста̄гыл вос о̄лы, со̄тыӈыщ вос о̄лы. На̄янэ̄н-О̄тыранэ̄н вос ӯргалаве. Ты потрыг Светлана Ромбандеева тав хассаге.

1103 2015. 07. 10. Николай МЕРОВ

А̄нъя па̄вылт ханищтап о̄лыс Ты та̄л лӯпта э̄тпос 15-21 хо̄таланэ̄т Ха̄льӯс район А̄нъя па̄вылт ма̄ньщи ма̄хманув акванатхатыгласыт. Ло̄пмус па̄вылт ка̄тыл са̄всыр пормасыт ма̄щтырлан ма̄ньщи хум Пе̄тр Ефимович Шешкин о̄лыс. Тав йӣвныл, а̄ньтныл са̄всыр хурит ёргыс ос ма̄ньщи хансат по̄слыс, акванатыс. Ты та̄л тав 85 та̄лэ то̄влынув. 2000 та̄л па̄сныл ты хум ка̄стыглан ма̄гыс округувт ос Свердловский областьт о̄лнэ ма̄ньщи па̄влытт «Шешкинские чтения» нампа ма̄ньщи ла̄тыӈ ханищтан семинар туи порат ва̄рыгла̄лаве. Ты тэ̄ла округ Дума депутат нэ̄ Татьяна Степановна Гоголева тав э̄лаль тотуӈкве номылматастэ. Ты ва̄рмаль о̄вылтахтам хо̄талт мир пуссын клубколн акванатхатасыт. Мӯй ма̄хум э̄лыпа̄лт Татьяна Степановна янытлан ла̄тыӈ ла̄выс: «Тыщир акванатхатыглым ща̄нь ла̄тӈув ма̄нки ё̄рувт э̄лаль тотуӈкве ве̄рмилӯв. Ты пора А̄нъя па̄вылт хӯрмиттыг ща̄нь ла̄тыӈ ханищтан ва̄рмаль мины. То̄ва ма̄ньщи хо̄тпанув ня̄враманыл ос апганыл ёт тыг ёхтысыт. Та̄н ва̄тихал ма̄ньщи хо̄тпа ка̄салаӈкве патэ̄гыт ке, ла̄тӈув хӯлуӈкве патыяныл ке, номтаныл тах ёмас паты. Ня̄враманув ты ва̄рмаль ма̄нь тагыл вос ханищтыяныл». А̄нъя па̄вылт пуссын аквъёт ва̄т арыгкем мӯй хо̄тпа о̄лыс. Ма̄хум тув Нягань, Сургут, Ханты-Мансийск ӯсытныл, Я̄гримныл, Ха̄льӯсныл ос Саранпа̄вылныл ёхталасыт. Яныгпа̄ла ма̄щтыр э̄кват Мария Сергеевна Мерова, Тамара Семёновна Мезенцева, Валентина Дорофеевна Саратина, Марина Сергеевна Вынгилева ос мо̄т са̄в ма̄ньщи хо̄тпат о̄лсыт. Та̄н халанылт «Пе̄с Сургут» нампа музейт рӯпитан ма̄ньщи ма̄хманув Мария Владимировна Ситникова апа̄гитэ Татьяна ёт ос ка̄тыл са̄всыр пормасыт ма̄щтырлан хум Александр Дмитриевич Сайнахов ёхталасыт. Нягань ӯсныл акв А̄с ма̄ньщи нэ̄ Клавдия Ксенофонтовна Шадрина тот мӯйлыс. Тувыл Ханты-Мансийск ӯсныл Г. Райшев нампа ка̄тыл хурит по̄слын хум музейкол кӯщай нэ̄ Наталья Николаевна Фёдорова тув ёхталас. Ты нэ̄ Пе̄тр Ефимович о̄лупсатэ урыл потыртас, тав уре̄тыл кина суссылтас. Ма̄хумн таве хӯнтулӈкве сака мӯстыс. А̄с-угорский институтт рӯпитан кит нэ̄ хо̄тпаг а̄гиӈ та̄гыл ёхталасы̄г, ты Светлана Динисламова ос Наталья Ткачук. Тэ̄н тот сакныл хорамыӈ пормасыт хартсы̄г, са̄сныл са̄всыр хусапыт, совтыт ва̄рсы̄г. Светлана Селивёрстовна такви хансум стиханэ ма̄хумн ловиньтасанэ, тувыл ос нэ̄пак хаснэ ма̄ньщи хо̄тпанув о̄лупсаныл урыл потыртас. Таве хӯнтлуӈкве мирн о̄с сака пӯмащ о̄лыс. Тувыл Ханты-Мансийск ӯст о̄лнэ «Лылыӈ союм» нампа йӣквнэ ос са̄ӈквылтан колт рӯпитан ма̄ньщи нэ̄ Ольга Мартыновна Норова а̄гитэ ёт ёхталас. Ханищтап о̄вылтахтаме порат Алина Норова ос Олеся Ткачук са̄ӈквылтапыл нё̄тнэ та̄ныт са̄ӈквылтасы̄г. Семинар са̄т хо̄тал о̄лыс. Ня̄врамыт ка̄сыӈ хо̄тал ма̄ньщи ла̄тыӈ ханищтасыт, хаснэйӣвныл са̄всыр хӯрит по̄слысыт. Та̄н ма̄гсыланыл кон сыресыр ёнгилыт щё̄пита̄лве̄сыт. Матъёмас ка̄сыӈ хо̄тал хо̄талыӈыг о̄лыс. А̄гит ос нэ̄ хо̄тпат сакныл са̄всыр хорамыӈ пормасыт хартсыт, са̄нсква̄лгыт сагсыт, са̄сныл со̄втыт ос са̄всыр хусапыт ва̄рсыт. Та̄нанылн ты ва̄рмаль сака мӯстыс. Хум хо̄тпат ос кон пасаныт, уласыт ос ха̄пыл товнэ тӯпыт ва̄рсыт. Сургут ӯсныл ма̄щтыр хум Александр Дмитриевич Сайнахов ёхталас, тав ня̄врамыт ма̄ньщи туп ва̄руӈкве ханищтасанэ. Ты хум Ха̄льӯс район Сӯкырья па̄вылт самын патыс, тот яныгмас. Ма̄ньщи мирн ёмащакв ва̄ве. А̄нъя па̄вылт о̄лыматэ сыс, са̄в рӯт хо̄нтыс. Такви ва̄рум тупе Сёма апге̄н мӯйлуптастэ. Акв хо̄тал А̄нъя я̄т ос ма̄ньхапыл каснэ ва̄рмаль ва̄рыглавес. На̄лми ва̄тат ё̄рнкол тӯщталавес. Касылн атхатам мир ма̄гыс хӯл исмит ос ва̄с нё̄выль пӯт па̄йтыглавес. Яныгпа̄ла хо̄тпат я̄ ва̄тат Витхо̄нын по̄йкщасыт. Ма̄ тэ̄пыӈыг, я̄ хӯлыӈыг вос о̄лыс. Нэ̄матыр лю̄ль нак ул вос е̄мтыс, тыи по̄йкщисыт. Я̄н пуӈк пиннэ юипа̄лт ма̄хум касуӈкве та о̄вылтахтасыт. Хум хо̄тпат, э̄кват, ня̄врамыт пуссын я̄нас товсыт. Но̄хпатум хо̄тпат пуссын пӯмащ ма̄гыс хасапытыл ос хуйнэ хӯргытыл мӯйлуптаве̄сыт. Касыл юипа̄лт ма̄хум на̄лми ва̄тат иӈ хоса мӯйлысыт. Ханищтап ва̄рмаль оигпаме порат Татьяна Степановна ёхталам мӯй ма̄хум ос па̄вылт о̄лнэ нё̄тмил ва̄рнэ хо̄тпат янытлан нэ̄пакытыл мисанэ. Ка̄сыӈ хо̄тпа урыл тыныӈ ла̄тыӈ ла̄выс. Ань ты ханищтап мо̄т щёс э̄рыӈ о̄с тах та па̄вылт щё̄пита̄лаве. Ты ва̄рмаль па̄влыӈ мирн сака ёмас, сака мӯстыс. Ня̄врамытн ты ханищтап о̄с пӯмащ, ща̄нь ла̄тӈув э̄лаль тох ты тотылӯв.

1103 2015. 07. 10. Светлана РОМБАНДЕЕВА

Янгема̄не ма̄ньха̄пыл кассыт Ты э̄тпос 5 хо̄талэ̄т Ханты-Мансийский районт Витхон пӯрлан хо̄тал о̄лыс, таима̄гыс ма̄хум мӯйлысыт, ма̄ньха̄пыл кассыт. Ты та̄л тамле касыл 15 щёс ва̄рыглавес, тох намаявес: Кубок Губернатора мирхал касыл. Китса̄т арыг ма̄ньщи ос ханты хо̄тпа ка̄ссыт, та̄н халанылт ма̄хум Тюмень ӯсныл ос Ямало-Ненецкий округныл о̄лсыт. Э̄лы хо̄н ма̄ныл о̄с ёхталасыт – Финляндияныл, Эстонияныл, США ос Новая Зеландия ма̄ныл, китхуйплов хо̄тпа. Касыл о̄вылтахтаме э̄лыпа̄лт ханты ма̄хум пӯрлахтасыт, ань ты ялпыӈ хо̄тал ёмас щирыл вос мины. Округ губернаторув та торыг тув ёхтыс, сунсыс, ань ма̄хманув То̄рум А̄щув нупыл хумус по̄йкще̄гыт – ты та̄л ёмащакв вос о̄лнувӯв, во̄рн миннэ хо̄тпа – матыр ка̄тын вос патты, хӯл алыщлаӈкв мины – хӯл вос пуви, пуссын пуста̄гыл вос о̄лнувӯв. Тувыл Наталья Владимировна ла̄тыӈ ла̄выс: «Ты касылын ма̄хум э̄лы хо̄н ма̄ныл китынтыг ёхтысыт, таима̄гыс ма̄н таве мирхал касылыг намаяслӯв. Соссаӈ ма̄хманув сымыӈ э̄лумхо̄ласаквет, та̄н ляпанылт о̄луӈкве ёмас, ма̄хум э̄лы хо̄н ма̄ныл тыг ща̄гтым ю̄выт, ма̄ньщи ос ханты ма̄хманув ёт касэ̄гыт. Я̄нанувт хӯл вос о̄лнув, ты ань йис та̄гыл соссаӈ ма̄хманув та̄н ма̄к тэ̄нутаныл. Я̄тил мир, халанынт юртыӈыщ о̄лэ̄н, акваннё̄тхатым, э̄рпыӈыщ о̄лэ̄н. Хо̄тпа такви мире э̄руптытэ те, ща̄нь ла̄тӈе янытлытэ, ӯргалахты – ты сака ёмас. Тамле хо̄тпан нё̄тэ̄н. ЮНЕСКО нампа мирхал организацият рӯпитан ма̄хум Витхон пӯрлан хо̄тал ос ма̄ньха̄пыл яласан касыл нематериальный мировой наследие нэ̄пакын хансуӈкве номсыяныл». Россияв янытыл о̄лнэ соссаӈ мирыт Ассоциация Президент Григорий Ледков округ кӯщаюв «За верность Северу» нампа ма̄гылн тагатан по̄сыл мистэ. Хум тох ла̄выс: «Тамле по̄сыл соссаӈ мирн нё̄тмил ва̄рнэ хо̄тпат та̄н мивет. Ань са̄кконанув торыӈыщ хансым хунь о̄лэ̄гыт, таима̄гыс соссаӈ мирыт кӯщаянылн мӯсхал щирыл нё̄туӈкве ат ве̄рмавет. Ос то̄ваныл аквтыпыл матыр хал хо̄нтэ̄гыт, олн та̄стэ̄гыт, соссаӈ ма̄хманыл щёровн нё̄тыяныл, янытлыяныл. Тамле по̄с ма̄н нила кӯщаитн мисӯв – Хабаровский край кӯщаин, Саха (Якутия) Республика, Ямал, ань ос на̄н о̄лнэ ма̄н кӯщаин мыглӯв». Тувыл касыл та о̄вылтахтас. Яты, ань хо̄т ман нёлолов хо̄тпа ма̄ньха̄панылн аквторыг та порыгме̄гыт, ха̄паныл та нёвумтэ̄гыт. Хотьютаныл щар молях, та̄кыщ тови, тав та э̄л мины. То̄ва ос ма̄ньха̄пе е̄ри ё̄ӈхыгпи, витн паты, тот та пувлы. То̄ва о̄влэ̄т татем ёмащакв мины, тувыл ха̄пе ла̄щалла̄щал витын та а̄мараве, такос тови, ёл хотталь та па̄тыри. Са̄ль кос, ос ма̄навн сунсуӈкве пӯмыщ, сыманув ща̄ргим, мовиньтым тот та ро̄ӈхе̄в. Спасательный кит моторха̄пыг вит тармыл яласасы̄г, е̄риё̄ӈхыгпам хо̄тпат ха̄паныл ёт па̄г та тотавет. Ка̄сыӈаныл ёт со̄пас маснут о̄ньщас, та̄ра то̄сам маснут масапи. Ма̄хум янгема̄не хо̄талпалыт маттем та кассыт. Ам сусте̄мт, каснэ ма̄хум татем ёр, та̄к хо̄тпат, молях тове̄гыт, ха̄паныл товлыӈха̄пыт хольт минэ̄гыт. Та̄н ляльтаныл сунсуӈкве сака пӯмыщ о̄лыс. Э̄лнаӈ ма̄н ма̄ньщи ма̄хманув тамле ё̄рыт та о̄лсыт, ма̄ньха̄пыл манос йӣвха̄пыл са̄в ве̄рыста яласасыт. Э̄типа̄лаг но̄хпатум ма̄хум янытлаве̄сыт. Хум хо̄тпат халт о̄выл ме̄ста Аркадий Прасин тав вистэ. Ты ханты хум Нижневартовский районныл ёхталас, моторха̄пыл майвес. Нэ̄т халт ос Ирина Сухих но̄хпатыс. Тав о̄с Нижневартовский районныл о̄лыс, электростанциял майвес. Щар ма̄к яныг приз Кубок Губернатора Нижневартовский районныл ёхталам ма̄хумн майвес, та̄н сака ёмащакв яласасыт. Китыт места Когалым ӯсныл ёхталам ма̄хум та̄н висаныл, хӯрмит – Сургутский район ма̄хум, нилыт – Нефтеюганский район ма̄хум. Ма̄хум са̄в щирыл кассыт. Ань ты ла̄вылтам хо̄тпат коныпал о̄с са̄в нэ̄тхумит но̄хпатсыт, пуссын янытлаве̄сыт. 1). 18 та̄л мус ма̄ньлат а̄гит халт: 1 место – Ксения Айваседа (Нижневартовский район) 2 место – Анастасия Середкина (Нефтеюганский район) 3 место – Милана Покачева (Союз оленеводов) 2). 18 мус ма̄ньлат пыгыт халт: 1 место – Евгений Глызин (Когалым ӯс) 2 место – Радик Покачев (Союз оленеводов) 3 место – Иван Сологуб (Нижневартовский район) 3). 35 та̄л мус нэ̄ хо̄тпат халт: 1 место – Ирина Сухих (Нижневартовский район) 2 место – Елизавета Смирнова (Нефтеюганский район) 3 место – Лидия Покачева (Сургутский район) 4). 35 та̄л мус хум хо̄тпат халт: 1 место – Анатолий Русскин (Сургутский район) 2 место – Валентин Тэвлин (Когалым ӯс) 3 место – Антон Айваседа (Аборигены Севера) 5). 50 та̄л мус нэ̄ хо̄тпат халт: 1 место – Зоя Русскина (Сургутский район) 2 место – Ирина Мултанова (Когалым ӯс) 3 место – Клавдия Покачева (Сургутский район) 6). 55 та̄л мус хум хо̄тпат халт: 1 место – Аркадий Прасин (Нижневартовский район) 2 место – Ефрем Сардаков (Аборигены Севера) 3 место – Алексей Салтыков (Нижневартовский район) 7). 50 та̄лныл яныгнув нэ̄т халт: 1 место – Антонина Виноградова (Нижневартовский район) 2 место – Татьяна Айваседа (Когалым ӯс) 3 место – Федосья Каюкова (Нефтеюганский район) 8). 55 та̄лныл яныгнув хум хо̄тпат халт: 1 место – Даниил Покачев (Сургутский район) 2 место – Иосий Кечимов (Когалым ӯс) 3 место – Сергей Кечимов (Сургутский район) 9). Хум хо̄тпат пуссын аквторыг кассыт: 1 место – Виталий Русскин (Сургутский район) 2 место – Алексей Русскин (Нефтеюганский район) 3 место – Валентин Тэвлин (Когалым ӯс) 10). Нэ̄ хо̄тпат пуссын аквторыг кассыт: 1 место – Ирина Сухих (Нижневартовский район) 2 место – Лидия Покачева (Сургутский район) 3 место – Владлена Басс (Старый Сургут) 11). Кит хум хо̄тпаг акв ха̄пыт ӯнлым кассыг: 1 место – Юрий Казанкин, Аркадий Прасин (Нижневартовский район) 2 место – Виталий Русскин, Даниил Покачев (Сургутский район) 3 место – Дмитрий Тэвлин, Евгений Глызин (Когалым ӯс) 12). Кит нэ̄г акв ха̄пыт ӯнлым кассыг: 1 место – Карина Прасина, Любовь Прасина (Аборигены Севера) 2 место – Ирина Сухих, Ксения Айваседа (Нижневартовский район) 3 место – Раиса Русскина, Зоя Тарлина (Сургут ӯс) 13). Акв хум ос акв нэ̄ акв ха̄пыт ӯнлым кассыг: 1 место – Алексей Стулеев, Анастасия Середкина (Нефтеюганский район) 2 место – Михаил Белов, Анастасия Ачимова (Спасение Югры) 3 место – Виталий Русскин, Лидия Покачева (Сургутский район) Ты ма̄хум пуссын янытлаве̄сыт, диплом нэ̄пакытыл ос олныл майве̄сыт. Та каснэ ма̄т ма̄хум хо̄талпалыт мӯйлысыт, ё̄рнколыт тӯщталаве̄сыт, ма̄хум хӯл исмитыл ос исум ща̄ил айтве̄сыт. Ты ялпыӈ хо̄тал ма̄навн сака мӯстыс, касум хо̄тпанув пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт.

1103 2015. 07. 10. Тамара МЕРОВА

Са̄в мир акванатхатыглас Лӯпта э̄тпос онтоловхойплов щислат Ханты-Мансийскат В. А. Игошев музейколт «Цветок Сибири» нампа э̄типа̄ла о̄лыс. Тамле ва̄рмаль Любовь Миляева стихыт хаснэ нэ̄ янытлан ма̄гыс ва̄рыглавес. Тыг Мегион, Нижневартовск, Сургут ос мо̄т ма̄ныл ма̄хум ёхталасыт. Ты мӯй хо̄тпат хо̄та̄ти са̄всыр ма̄т рӯпитэ̄гыт ос та̄н акв ва̄рум тэ̄ла кастыл акванюрщхатасыт – та̄н стихыт ос потрыт хансэ̄гыт. О̄влэ̄т музейн ёхталам мӯй ма̄хум «Цветок Сибири» намаим э̄рыг хӯнтлысыт ос округув урыл кинаохса суссыт. Ты э̄рыг ла̄тӈанэ Любовь Миляеван хасве̄сыт ос э̄рыгта̄н Владимир Пшеничников, ма̄н ӯсувт о̄лнэ композиторын щё̄питавес. Ты ёмас э̄рыг ма̄хумн сака мӯстыс, хосат та̄гыл ка̄сыӈ ялпыӈ хо̄талыт порат сӯйтыглы, таве Лада Дэнс певица э̄ргитэ. Тувыл ма̄хум Любовь Геннадьева хансум стиханэ хӯнтлысыт ос тав уре̄т юртанэ са̄в ёмас ла̄тыӈ ла̄всыт. Тав такви ва̄рнэ тэ̄латэ̄т Юграт о̄лнэ са̄всыр мирыт акванатсанэ ос та̄н пуссын юрщмахтасыт. Сака ёмас тэ̄лаг таи о̄лы, та̄н акваннё̄тхатым «Югра многоликая» яныг нэ̄пак та̄ратасыт. Тот округувт са̄всыр мирныл о̄лнэ поэтыт, писателит хансум стиханыл, потраныл тув акванатым о̄лэ̄гыт. Любовь Миляева то̄ва стиханэ армянский, молдавский, румынский, талышский, татарский, хантыйский, чеченский ла̄тӈытн толмащлым о̄лэ̄гыт. Та̄н ань ты э̄типа̄ла мӯй хо̄тпатын та̄нки ща̄нь ла̄тӈытыл ловиньтаве̄сыт. Рущ ла̄тӈыл стихыт Альфия Чернышева ос Татьяна Огнёва, «Хо̄тал» нампа А̄с-угорский театрыт рӯпитан нэ̄г, ловиньтаве̄сыт манос э̄ргыг э̄ргуве̄сыт. Э̄ри таи ла̄вуӈкве, Любовь Миляева стиханэ щирыл композитор Елена Чернова са̄всыр э̄ргыт щё̄питас, ты нэ̄ ань Францият о̄лмыгтас. Тувыл Москват о̄лнэ композитор Елена Кожуховская ос матахмат стихыт э̄ргыг щё̄питасанэ. Хантыт ос ма̄ньщит ёт ёмас юрщхатнэ нак о̄вылтыт мирн ва̄нэ э̄ква Мария Волдина Любовь Геннадьевна о̄вылтыт са̄в потыртас. Ма̄к сымыӈ э̄лумхо̄ласыг таве Юван Шесталов акваг номыстэ, ты урыл ань Альбина Шесталова Юван Николаевич увщитэ ла̄выс. Тувыл азербайждан ма̄хум ёт юрщхатнэ нак урыл Габибулла Мирзоев потыртас, армян ма̄хум ёт Наира Симонян, украинцыт ёт Леонид Струсь. Леонид Филиппович «Из поколения детей войны» хансум нэ̄пакыт урыл мощ потыртас. Аквтох тув ёхталам мӯй мирыт азербайджанский, армянский, дагестанский, украинский э̄рыгсов та̄ныт та̄нки о̄щнэ са̄ӈквылтан утыл са̄ӈквылтасаныл манос дудка утыл ёнгысаныл. Ханты-Мансийскат о̄лнэ хумыг Владимир Енов ос Павел Черкашин тэ̄нки хансум стиханэ̄н таве̄н ловиньтасы̄г. Тувыл «Гармоника» нампа ансамбль нё̄тнэ турсуил таве̄н са̄всыр э̄ргыт э̄ргысыт. Акв мӯй хум Чечня ма̄ныл тыг ёхталас, тыи Балаутдин Мусаев. Тав такви ма̄хманэ̄ныл ке̄тум паща ла̄тыӈ тотыс, Любовь Миляева литературный премиял ос «Золотой Орёл» нампа по̄сыл мӯйлуптастэ. Ты коныпал нэ̄ Владимир Маяковский нампа ма̄гылт о̄щнэ посыл Россия потрыт толмащлан Союз па̄лыл о̄с майвес. Тав рӯпататэ номтыӈыг, мӯсхалыг ва̄рнэ̄тэ ма̄гыс са̄всыр грамотал, дипломыл са̄в щёс майлувес. Ма̄гылт о̄щнэ «150 лет окончания Крымской войны» акв ме̄таль о̄ньщи, тувыл РФ Министерство культура па̄лыл мӯйлуптан ут. Пус ка̄т, пус ла̄гыл, То̄рум ёт, О̄тыр ёт э̄лаль вос о̄лы.

1103 2015. 07. 10. Светлана РОМБАНДЕЕВА

Ма̄щтыр хо̄тпаг янытлаве̄г Ханты-Мансийск ӯст о̄лнэ Центр ремёсел колт кӯщаиг рӯпитан нэ̄ Ольга Дмитриевна Бубновене кит ма̄щтыр хо̄тпаг урыл потыр хансыс, тох намаястэ: Выставка «Два Александра». Ань тыгыл э̄лаль тав потре ловиньтэлы̄н. Округт о̄лнэ мирыт, кос соссаӈ ма̄хум, рущ ос мо̄т мирыт, пе̄с йис о̄лупсаныл ка̄сыӈ такви щире̄т пӯмыщ. Пе̄с порат хо̄тпа ма̄витэ ӯргалым, янытлым о̄лыс, кон матыр йӣво̄выл ман лувсак хо̄нты, таил э̄рнэ пормас ма̄щтырлы, щаквщи. Ма̄н о̄лнэ ма̄вт йис та̄гыл акв ляпат са̄в мир о̄лы, халанылт ханищтахтэ̄гыт, ка̄сыӈ такви пе̄с тэ̄ланэ та̄рапаттыянэ, янытлыянэ. Ань ма̄ньщи ос ханты ма̄хум та̄нти культураныл но̄хво̄рмалтаӈкве патсаныл. Матыр ат те ва̄гыт, яныгхо̄тпаныл китыглыяныл, ханищтахтэ̄гыт. Ос рущ ман саран ма̄хум пе̄с пора о̄лупсаныл хотталь ты со̄йми. Ка̄сыӈ мир культуратэ щирыл на̄ӈки – хумус тав о̄лы, маныр урыл номсащлахты, манхурип тэ̄нут ка̄тынпатты. Центрувт я̄ӈк на̄тнэ э̄тпост ма̄н «Два Александра» нампа выставка щё̄питасӯв, таве мо̄т ма̄н тотыглаӈкве ро̄ви. О̄влэ̄т Нефтеюганск ӯст о̄лнэ мирн суссылтылув, тувыл Лянтор, Сургут ос Ханты-Мансийск ӯсытн тотыглылӯв. Кит Александр хум хо̄тпагув ка̄тыл ва̄рум пормасанэ̄н мирн суссылтыянӯв. Александр Сайнахов ма̄ньщи хум, Сургут ӯст о̄лы, йӣвныл са̄всыр пормасыт ва̄ри, ма̄щтырлы. Александр Синицын ос рущ хум, Нягань ӯст о̄лы, тав хосат ты ма̄н ёхтум рущ ма̄хум ка̄тыл ва̄рыглам пормасаныл ань йильпииг ва̄риянэ, та̄н культураныл но̄хво̄рмалтытэ. Тэ̄н кит ма̄т самын патсы̄г, яныгмасыг, ос ань акв тэ̄ла ва̄ре̄г – йӣвныл са̄всыр пормасыт ёрге̄г, ма̄щтырлэ̄г, пе̄с йис тэ̄лат ханищтэ̄г. Александр Сайнахов – Народный мастер нам о̄ньщи, тав са̄в щёс ка̄тыл ва̄рум пормасанэ ёт сыресыр конкурсытыт но̄хпатыглас. Мирхал ма̄т манос округувт о̄лыглан выставкатын, фестивалитын тав акваг во̄виньта̄лаве, округ кӯщаин лауреат премии намыл майвес. Тав са̄ӈквылтапыт ва̄ри, йӣвныл ос лувсакыл са̄всыр пормасыт ос а̄ныса̄ныт ма̄щтырлы. Са̄всыр мастерклассыт ва̄тихал ва̄рыглы, ня̄врамыт ма̄щтырлаӈкве ханищтыянэ, рӯпататэ мирн суссылтытэ. Александр Синицын – Югра ма̄вт народный художественный промыслы ос ремёсла ма̄щтыр намыл маим о̄лы. Тав ка̄тыл ва̄рум пормасанэ о̄с са̄всыр конкурсытыт, выставкатыт суссылта̄лавет, мирхал фестивалитын акваг во̄виньта̄лаве. Йӣвныл са̄всыр а̄ныса̄ныт ва̄ри, хорамтыянэ. Сэ̄тап ва̄рнэ пе̄с йис прялкат ос сундук то̄тапыт ва̄руӈкве ха̄сы, ты тэ̄ла но̄хво̄рмалтытэ. Ты коныпал тав ка̄тыл хурит по̄слы, ты ва̄рмале сака э̄руптытэ. Александр Сайнахов «Старый Сургут» музейт йӣвныл ма̄нь колыт ӯнттыс, сӯмьях, ё̄рнкол, суныт, ёсат ос мо̄т са̄в пормасыт ва̄рыс, пуссын акв колнакын тӯщтуве̄сыт. Тав акв тэ̄латэ о̄с сака э̄руптытэ – лувсакыл са̄всыр хурит ма̄щтырлы. Музей коны ма̄тэ̄т ос ё̄рнкол тӯщтыс, сӯмьях ӯнттыс. Экскурсият о̄лыгланэ̄ныл порат, мӯй ма̄хум тув ёхталэ̄гыт, ё̄рнколн щалтсэ̄гыт, пӯмщалахтэ̄гыт. Выставка о̄вылтахтаме порат кит Александр ка̄тыл ва̄рум пормасанэ̄н урыл потыртасы̄г. Тувыл акватэ йӣвныл ня̄лы ёргыс, мо̄танэ ос лувсакыл ма̄щтырлас. А̄гирищитпыгрищит тэ̄н ляльтэ̄н маттем та суссыт, ӯрхатасыт, ань ва̄рнэ утаге̄н аман хунь тэ̄лэ̄г, ка̄салаӈкве ат ве̄ритасыт. Нефтеюганск ӯст тамле выставка нэ̄мхуньт ат ва̄рыглавес, ма̄хум сака пӯмщалахтасыт. О. Д. Бубновене хансум потре ма̄ньщи ла̄тӈыг С. хозумован толмащлавес.

1103 2015. 07. 10. Александр ВЬЮТКИН

Ӯйхул ос ма̄ ёт рӯпитан ма̄хум Удмуртия ма̄т Ижевск ӯст ма̄н, хурит по̄слын ма̄хум, акванатхатахыгламув порат экскурсия щирыл Дебёс нампа пе̄с йис па̄вылн тотыглавесӯв. Тот ма̄н Дебёсский район тармыл кӯщаиг о̄лнэ хум Андрей Серафимович Иванов ёт ва̄щинтахтасӯв. Ты район Удмуртский республика янытыл щар яныг районыг ловиньтахты. Тав янытэ̄т са̄тпан нупыл акв па̄выл о̄лы. Та̄н халанылт хо̄тхуйплов яныгнув па̄выл кӯраныл газыл па̄лтыглыяныл. Пуссын аквъёт ва̄тахтем са̄всыр ла̄тӈыл потыртан мир тот о̄лы. Щар о̄влэ̄т ма̄н нуплув Андрей Серафимович район янытыл о̄лнэ рӯпатаныл урыл мощ ла̄выс: «Ман Дебёсский районув ӯйхул ос ма̄т яныгман са̄всыр тэ̄нут янмалтан хосыт о̄лы. Аквъёт пуссын ва̄т нупыл нёлолов кол ӯйхул ос ма̄т матыр янмалтым рӯпитэ̄гыт. Та̄н халанылт хӯрумхуйплов са̄всыр нампа сыртэп, картё̄пка, капуста, морковка, вущрамыӈ витыӈ хӯрыг ос помидор янмалтан тэ̄пканыӈ о̄лы. Атхуйплов кол мис, лув, пӯрщ, па̄ля, щищкурек ос лунт янмалтан ферма рӯпиты. Мо̄лты та̄л сыс ат со̄тыра тонна хӯрумса̄т кила нё̄выль по̄хантыналасӯв. Мис щаквит щирыл Удмуртская республика янытыл ма̄н но̄хпатсӯв. Ты коныпал ма̄н ма̄хманув район янытыл титса̄т я̄нас тэ̄лат щирыл рӯпитэ̄гыт. Та̄н саквалым машинат ва̄ре̄гыт, о̄лнэ колыт ӯнттэ̄гыт, йӣв яктын ма̄т ос ӯйхул янмылтым рӯпитэ̄гыт. Моще̄ртын кирпащ щаритан кол ӯнттуӈкв о̄вылтаве. Ань таве ӯнттын ма̄гыс э̄рнэ нэ̄пакыт щё̄питавет. Кирпащ щаритан кӯрыт ёвтым о̄лэ̄гыт. Нэ̄паканыл щё̄питан ма̄ныл а̄стынэ юипа̄лт та̄ра ӯнттуӈкв та о̄вылтаве. Та коныпалт иӈ хо̄са порат мис ос пӯрщ о̄ньщам кол но̄хялтуптаӈкв номсаве. Ань са̄в ма̄хум па̄влыӈ ма̄н о̄луӈкв ва̄нтлэ̄гыт. Таима̄гсыл та̄н та̄нти щёланылт мис ос пӯрщ о̄щнэ пе̄с колыт йильпииг щё̄питыяныл. Ма̄хум рӯпата та̄л о̄луӈкв ат таӈхе̄гыт. Таима̄гсыл ма̄н хумус ве̄рме̄в, та щирыл та̄нанылн та нё̄тэ̄в». Тувыл Андрей Серафимович ня̄врамыт та̄нти ща̄нь ла̄тӈаныл ханищтан урыл титыглавес. Тав ты урыл тох ты ла̄выс: «Ма̄н районув янытыл ня̄врам ханищтахтын нилахуйплов кол о̄лы. Ханищтахтын колт пуссын ма̄нти удмуртский ла̄тӈув ханищтым ма̄хум рӯпитэ̄гыт. Та коныпал ма̄н халанувт аквписыг ма̄нти ща̄нь ла̄тӈувт потыртэ̄в. Ня̄враманув вос хӯнтлэ̄гыт, хӯнтамламаныл щирыл та̄нти халанылт о̄с потыртаӈкв о̄вылтахтэ̄гыт. Тох ма̄н яныгпа̄лаг о̄лнэ ма̄хманув ёт рӯпитэ̄в. Та̄наныл аквписыг мо̄тмо̄т ма̄т ня̄врамыт ёт халанылт ва̄йхатыглахтын ма̄гсыл тотыглыянӯв. Ня̄врамыт ханищтахтын колыт халт ма̄н ла̄тӈув щирыл касылыт ва̄тихал ва̄рыгла̄лэ̄в. Аквписыг са̄в ня̄врам касы. Но̄хпатнэ ня̄враманув республика янытыл о̄лыглан касылытт ос касыглэ̄гыт, то̄ванакт но̄хпатыглэ̄гыт. Ты ма̄гсыл та̄нанылн пӯмащ, ма̄навн ёмас». Халувт потыртан ма̄ныл а̄стымав юипа̄лт Андрей Серафимович республикатэ нот ма̄гсыл ма̄н ётув по̄слахтаӈкв во̄вхатас.

1103 2015. 07. 10. Александр ВЬЮТКИН

Дебёс па̄выл ма̄хум ялпыӈ нё̄раныл Удмуртия ма̄н Ижевск ӯсын ялмум порат удмурт ма̄хум йис та̄гыл о̄лнэ ма̄наныл хосыт экскурсия суссылтым тотыглавесӯв. Акв тамле Дебёсы па̄выл похан Байгурезь нампа сып пуӈкын ялсӯв. Дебёсы – пе̄с па̄выл. Тот са̄т со̄тыра ляпатем э̄лумхо̄лас о̄лы. Рӯщит, хатанит, сараныт ос удмурт ма̄хум халанылт юртыӈыщ, акваннё̄тхатым о̄лэ̄гыт. Тит са̄т арыгтем колта̄гыл ӯйхул янмалтэ̄гыт. Байгурезь сыпаныл Дебёс па̄выл хал палытэ̄н хӯрум ве̄рста. Яныг я̄лпыӈ хо̄талыт янытланэ̄ныл порат, па̄выл мире Байгурезь сыпаныл по̄хат Чепца я̄ ва̄тат Куиньсэрго нампа ма̄т атхатыглэ̄гыт. Тот ты пуссын ма̄к пӯмащаныл о̄лыглэ̄гыт. Байгурезь сыпаныл пе̄с тагыл я̄лпыӈыг ло̄виньтаве. Рӯщ ла̄тӈыл тав тит щирыл ӯлылаве. Та па̄вылт о̄лнэ ма̄хум таве «Супне̄лмта̄л нё̄рыг» ла̄вияныл. Мо̄т ма̄ныл ёхталан ма̄хум ма̄гсыл тав «Щёлыӈ нё̄рыг» хӯлтаве. Пе̄с порат та̄л сыс щар хоса хо̄тал о̄лнэ порат супне̄лмта̄л хо̄тпан сып пуӈкын сома лю̄льнэ а̄врахе щирыл но̄х во̄ратаӈкв э̄рыс. Та коныпалт тав ка̄тэ̄т та̄глыӈ ща̄рка но̄хтотвес. Но̄х ёхтын ма̄т ща̄ркатэ юв аяламе юипа̄лт супне̄лмта̄л хо̄тпа суй потре ёхталас. Хумус тот о̄лнэ яныгпа̄лаг ма̄хум ла̄ве̄гыт: «Хунь супне̄лмта̄л ма̄хум потыртаӈкв о̄вылталыгласыт. Со̄ль, тамле о̄лыглатта̄л нак о̄лыглас». Тот ань ос акв тамле пӯмащ мӯй ма̄хум ма̄гсыл ва̄рыглаве. Ма̄н ос сып е̄р щирыл но̄хво̄ратасӯв.

1103 2015. 07. 10. Николай МЕРОВ

Ты ня̄врамыт А̄нъят ханищтахтасыт Лӯпта э̄тпос 15-21 хо̄таланэ̄т Ха̄льӯс район А̄нъя па̄вылт ща̄нь ла̄тыӈ ханищтан ва̄рмаль о̄лыс. Ня̄врамыт тот хаснэйӣвныл хурит по̄слысыт, ка̄тыл са̄всыр пормасыт ва̄рсыт, щаквщисыт, ёнгасасыт.

1103 2015. 07. 10. Александр ВЬЮТКИН

Нюлы кис ёт о̄лум хо̄тал О̄йттур э̄тпос о̄выл хо̄талэ̄т Ханты-Мансийск ӯс котильт о̄лнэ «Бориса Лосева» нампа во̄р щахлыт ня̄врамыт янытлан хо̄тал ва̄рыглавес. Та хо̄тал ня̄врамыт ӯщлахтан тит сменаг хал хо̄талыг о̄лыс, рущ ла̄тӈыл «Бегом по радуге» ла̄всаныл. Ӯщлахтан смена о̄лме сыс ёмщакв рӯпитам ва̄т ня̄врамыт округ кӯщаюв Наталья Комарова ма̄нь мӯйлупсал ос трудовой нампа нам нэ̄пакыл мӯйлупсанэ. Наталья Комарова ёт тав ва̄ӈын хо̄тпатэ Алексей Путин ос Ханты-Мансийск ӯс тармыл кӯщаиг о̄лнэ хум Василий Филипенко о̄лсыг. Ня̄врамыт янытлан хо̄тал пӯснэ̄ныл юипа̄лт халанылт ла̄кквауртхатым акв юипа̄лт ва̄нтата̄лым са̄всыр ёнгыт ёнгысыт. А̄хвтасыӈ лё̄ӈх тармыл по̄слысыт, нэ̄пак ло̄псытыл товлыӈ ха̄пыт ва̄рсыт ос а̄канит ю̄нтсыт.

1104 2015. 07. 24. Светлана РОМБАНДЕЕВА

Округ кӯщай ма̄хум акванатыгласанэ Ань округ кӯщай пе̄нтсыл рӯпитан нэ̄ Наталья Комарова ка̄сыӈ са̄тыт тав ётэ рӯпитан ма̄хманэ акванво̄выглыянэ, са̄всыр тэ̄лат урыл потыртэ̄гыт. Ты накт тав та урыл ла̄тыӈ ла̄выс, ань моще̄ртн во̄ртур э̄тпос ты ляпами – 9 хо̄талэ̄т Ма̄ янытыл о̄лнэ соссаӈ мирыт ялпыӈ хо̄таланыл. Тав ла̄вме щирыл, ты ма̄т о̄лнэ соссаӈ ма̄хум ань сака ёмащакв мӯйлуӈкве патэ̄гыт, ты та̄л май округувт пе̄с йис о̄лупса но̄хво̄рмалтан та̄лыг ла̄ввес. Ты мӯйлын хо̄тал «Славим человека труда» нампа конкурс щирыл ва̄раве. УрФО янытыл кӯщаиг о̄лнэ хум Игорь Холманских ты ва̄рмальн о̄с нё̄туӈкве паты. Ма̄н ма̄вн ловмантем областитныл ма̄хум ёхтэ̄гыт, та̄н халанылт Государственный Дума депутат, Россияв янытыл о̄лнэ Лӯима̄, Сибирь ос Дальний Восток нампа Ассоциация кӯщай хум Григорий Ледков ёхталы. Ма̄хум ань ты хо̄тал кастыл щё̄питахтэ̄гыт, тэ̄ланыл ва̄рияныл, хотьют тыг ёхтуӈкв таӈхи, наманыл та̄рапаттавет, акванхансавет. Наталья Комарова о̄с акв тэ̄ла урыл тох ла̄выс: «Ты ялпыӈ хо̄тал порат ань соссаӈ ма̄хум халт пе̄с йис тэ̄лат но̄хво̄рмалтан ма̄щтыр хо̄тпат о̄с вос янытлавет. Та̄н ма̄гсыланыл матыр конкурсыт вос ва̄равет, рӯпатаныл мирн вос суссылтыяныл». Кӯщай нэ̄ ёт пуссын ка̄сащасыт.

1104 2015. 07. 24. Светлана РОМБАНДЕЕВА

О̄лнэ ма̄вт са̄в ня̄врам самын паты Россия Правительство кӯщай хум Дмитрий Медведев ня̄врам самын паттын урыл хо̄нтхатыглап ва̄рыглас. О̄лнэ ма̄в янытыл кӯщай хо̄тпат ёт тав ищхӣпыӈ ут хосыт потыртас. Тав ла̄вме щирыл, ань Россияв янытыл ня̄врам самын патнэ ма̄гыс кӯщаит яныг рӯпата ва̄регыт. Округувт ань сака са̄в ня̄врам самын паты. Ня̄врам о̄щнэ ка̄сыӈ колта̄гыл олныл нё̄тумта̄лаве. Ань мо̄рсыӈ ня̄врам хотталь щалты, пуссын пусмалтавет. Яныгхо̄тпат о̄с хосанув о̄луӈкве патсыт. Статистика щирыл, округув 1 миллион 612 со̄тыра 076 хо̄тпа о̄лы. Дмитрий Медведев ла̄выс: «Ань о̄лупса ёмаснуве̄г е̄мтыс, яныгхо̄тпат нё̄тмилыл ва̄тихал ва̄рапа̄лавет. Ка̄сыӈ округт манос областьт рӯпитан кӯщай хо̄тпат, та яныт ёмас ва̄ре̄н, леккарыт рӯпатаныл та̄рапаттым о̄ньщелы̄н. Самын патум ка̄сыӈ ня̄врам мӯсхал щирыл вос пусмалтаве, хо̄т манах ня̄врам самын паты, ты урыл та̄н та̄ра межведомственный комиссиян ла̄тыӈ вос ке̄тэ̄гыт».

1104 2015. 07. 24. Светлана РОМБАНДЕЕВА

Ла̄тӈанув ищхӣпыӈ ут хосыт ханищтаӈкве патавет Ханты-Мансийск ӯст о̄лнэ Обскоугорский институтт рӯпитан ма̄хум мо̄тыт та̄л кастыл акв йильпи тэ̄ла щё̄питасыт, тох намаясаныл: «Родной Язык – в один клик». Ты ань соссаӈ мир ща̄нь ла̄тӈаныл ханищтан научнообразовательный ва̄рмаль, ма̄хум ищхӣпыӈ ут (интернет) хосыт рӯпитаӈкве патэ̄гыт. Ты ва̄рмаль сыресыр утыт о̄ньщи: ща̄нь ла̄тӈыл хансым потрыт та маныр акванатнэ ма̄гыс электронный библиотека; лингвокультурологический информацият; Югра ма̄в лингвистический карта; ща̄нь ла̄тыӈ ханищтан ма̄гыс са̄всыр проектыт щё̄питавет – урокыт, хо̄тпа такви ротэ̄т рӯпитан ма̄гыс творческий заданият, словарь нэ̄пакыт, разговорникыт, самоучителит ос мо̄т са̄всыр утыт о̄ньщи. Югра ма̄т рӯпитан яныг кӯщаит соссаӈ мир ща̄нь ла̄тӈаныл янытлыяныл. Садикытыт ань 255 ня̄врам ща̄нь ла̄тыӈ ханищты, школатыт ос со̄тыра а̄рыг ня̄врам ханищты. Учителит соссаӈ мир о̄лупса о̄вылтыт то̄ва урокытыт потырта̄лэ̄гыт. Ханищтахтан программанылт ань лов арыг тамле урокыт о̄лэ̄гыт. 2015 та̄лт ща̄нь ла̄тыӈ ханищтан ма̄гыс тамле ва̄рмалит ква̄лтапаптуве̄сыт: «Читающая Югра» – ма̄нь ня̄врамыт ос ма̄ньлат ма̄хум ща̄нь ла̄тыӈ вос ханищтэ̄гыт; «Фронтальный диктант на мансийском, хантыйском и ненецком языках – 2015» нампа акция; «Говори на родном языке» нампа кинаохсатыл ва̄рим конкурс. Округ кӯщай нэ̄ прессслужбаныл те̄тым ля̄ххалыт ма̄ньщи ла̄тӈыг Светлана Ромбандееван толмащлаве̄сыт.

1104 2015. 07. 24. Тамара МЕРОВА

Ща̄нь ла̄тӈыт ӯргалавет Ханты-Мансийскат 32 са̄всыр хо̄н ма̄ныл ёхталам ма̄хум акванхо̄нтхатыгла̄лсыт. Та̄н пуссын та̄нки ма̄нанылт о̄лнэ мирыт ща̄нь ла̄тӈыт ӯргалан хо̄тпаг о̄лэ̄гыт. Тамле тэ̄лат ва̄рнэ̄ныл ма̄гсыл та̄н экспертыг ла̄вавет, тувыл ЮНЕСКО ос ООН мирн ва̄нэ организацияг хосыт та̄н ма̄ янытыл пуссын ла̄тӈыт ӯргалыяныл ос та̄наныл э̄лаль тотнэ ма̄гыс са̄в рӯпата ма̄кыг ва̄ре̄гыт. Тыг мӯй хо̄тпат РФ ЮНЕСКО тармыл «Информация для всех» программа щирыл рӯпитан хо̄тпат округ мирколн о̄с во̄выглаве̄сыт. То̄нт БРИКС ос ШОС са̄всыр ма̄ныл ма̄хум акванатхатыгласыт. Ань ищхӣпыӈ утыт хосыт ма̄ янытыл о̄лнэ ла̄тӈыт э̄лаль тотуӈкве ве̄рмавет манос а̄ти, ты о̄вылтыт потыртасыт. Ань ма̄ янытыл 7 со̄тыра са̄всыр мирыт та̄нки ща̄нь ла̄тӈаныл урыл номсахтэ̄гыт ос потыртэ̄гыт. То̄ва мирквет сака мощщаг хультсыт, та̄н ща̄нь ла̄тӈаныл молях хот тах со̄йме̄гыт. Са̄всыр ма̄тт кӯщайлахтын хо̄тпат ань нэ̄матыр ат ке ва̄ре̄гыт, ты нотув оигпан мус 7 со̄тыра са̄вит соссаӈ мирыт са̄выӈпа̄лэ ла̄тӈаныл хотталь та со̄йме̄гыт. Таи пилыщмаӈыг о̄лы, тамле мирыт пе̄с йис наканыл, мӯтраӈ потраныл, мо̄йтаныл хот тах та ёрувлавет. Мо̄т ма̄хумн ла̄тӈаныл воссыг ат хӯнтамлавет, нэ̄мхо̄т потраныл ат та ловиньтавет. Ань тыг мус манах ща̄нь ла̄тыӈ, пе̄с мирыт мӯтраӈ ва̄рмаляныл хотталь со̄ймысыт, нэ̄мхотьютн та̄рапаттуӈкве ат ве̄рмаве. Тамле тэ̄лат ул вос е̄мтсыт, ань ты акванатхатыглам экспертхо̄тпат «Атлас языков мира» нэ̄пак щё̄питасыт ос «Атлас исчезающих языков» нампа тэ̄ла ва̄ре̄гыт. Тох мощщаг хультум мирыт ла̄тӈаныл оснпаттым о̄ньщавет, пе̄с тэ̄ланыл ханищтавет ос э̄лаль ӯргалаӈкве патавет. Анна Феньвеши, Венгрия ма̄ныл ёхталам нэ̄, такви рӯпататэ о̄вылтыт ма̄навн потыртас. Тав Сегедский университетыт рӯпитан махманэ ёт «FinUgRevita» тох намтым проект щирыл рӯпиты. Та̄н тот удмурт ос ма̄ньщи ла̄тӈыг щирыл яныг словарь ва̄ре̄гыт. Таве ищхӣпыӈ утн хаснэ ма̄гыс щё̄питыяныл. Венгерский ла̄тыӈ коныпал словарь рущ ос английский ла̄тӈыг толмащлаве. Сыресыр ла̄тӈыт акванатнэ ма̄гыс «Лӯима̄ сэ̄рипос» газетат хансым потрыт о̄с ханищтыяныл. Ма̄н ва̄глув, ма̄н ма̄ньщи ла̄тӈув Венгрият, Австрият, Финляндият, Эстоният о̄лнэ универститетытыт ханищтаве. Ань хо̄н а̄гитнпыгытн тамле тэ̄ла сака э̄рмыглы тах, тувыл ма̄нки номтанув о̄с ёмасыг о̄лэ̄гыт, ща̄нь ла̄тыӈке̄в ос хотта мус э̄лаль тах о̄лы. Евдокия Ивановна Ромбандеева ты ва̄рнэ тэ̄ланыл ма̄гыс венгр ма̄хумн яныг пӯмащипа ла̄тыӈ ла̄выс. Тав пуссын венгр учёный хо̄тпат ка̄стысанэ. Та̄н ювле хультум нот палыт сака ёмас, сэ̄ръёр, номтыӈ тэ̄лат ва̄рсыт. Ань та̄н рӯпатаныл Евдокия Ивановна э̄лаль тотытэ. Анна Феньвеши проектэ ёмщакв ва̄рнэ̄тэ ма̄гыс тав о̄с нё̄туӈкве ла̄выс. Мо̄т хо̄н ма̄ныл ёхталам ма̄хум Евдокия Ивановна ёт ва̄йхатуӈкве сака тахсыт. Та̄н тав потре ща̄гтым хӯнтлысыт. Тувыл Индияныл ёхталам нэ̄ Анурадха Канниганти ла̄выс, ка̄сыӈ мир та̄нки ща̄нь ла̄тӈаныл э̄лаль тотнэ учёныит наманыл хаснэ ма̄гыс я̄нас колнакыт щё̄питаӈкве э̄ре̄гыт. Тамле хо̄тпат са̄в мирытн вос ва̄вет. Тыи со̄ль, ка̄сыӈ мир ща̄нь ла̄тӈе – тыи тав со̄тэ, тав щуне. Ма̄н ща̄нь ла̄тӈув ва̄нэ̄в ма̄гыс ма̄ньщииг о̄лэ̄в, таве э̄лаль ат ке тотылӯв, хотёрувлылӯв – мирке̄в хотталь тах та со̄йми.

1104 2015. 07. 24. Светлана РОМБАНДЕЕВА

Иртыш я̄ ва̄тат ма̄хум мӯйлысыт Ты э̄тпос 12 хо̄талэ̄т хӯл алыщлан ма̄хум ялпыӈ хо̄таланыл о̄лыс. Округув янытыл мир са̄в ма̄т мӯйлысыт, хӯл алыщлан ма̄хманыл янытласаныл. Ханты-Мансийск ӯст Иртыш я̄ ва̄тат «День Югорского муксуна» нампа ялпыӈ хо̄тал ва̄рыглавес. О̄выл ла̄тыӈ Департамент природных ресурсов и несырьевого сектора экономики Югры кӯщай хум Евгений Петрович Платонов ла̄выс: «Ты ялпыӈ хо̄тал ма̄н таима̄гыс ва̄рыглылӯв, ань ма̄хум вос ва̄ганыл – мохсаӈ хӯл сака атыӈ хӯлкве, ос таве мори алыщлаӈкве ат ро̄ви. Ты хӯл мощщами те, тав тах та̄ра «Выгыр» нэ̄пакын хасумтаве. Ты урыл янгема̄не вос ва̄ганыл. Ка̄сыӈ та̄л округувт 10 тонна са̄вит хӯл пуваве. Уральский Федеральный округ янытыл ма̄к са̄в хӯл тыт та па̄гё̄хтаве». Хум хо̄тпат халанылт кассыт – няслысыт, ань нила щё̄с сыс хотьютаныл са̄внув хӯл пуви, тав та но̄хпаты. Ты урыл ам Александр Николаевич Садовой китыгласлум, тав Федерация рыболовного спорта ХМАО-Югры тэ̄ла палт президентыг о̄лы, щар ма̄к яныг судья о̄с тав. Хум тох ла̄выс: «Ты та̄л 22 хо̄тпа касэ̄гыт – кит хо̄тпал 7 команда щирыл уртхатасыт, 8 хо̄тпа ос ка̄сыӈ такви ма̄гсылэ касы. То̄ват районытныл ёхтысыт, Шапша ос Горноправдинск па̄влыгныл, то̄ванув ос Ханты-Мансийск ӯст о̄лэ̄гыт. Ма̄н Федерацияв туп та̄лэ то̄влыс, ос ты та̄л сыс ма̄н нила касыл ва̄руӈкв а̄лымасӯв. 15 хо̄тпа ань хӯрмит разряд о̄ньще̄гыт, хо̄т хо̄тпа китыт разрядыл мисанӯв. Ты накт ос тыг во̄ввесӯв, касыл ма̄н вос ва̄рилӯв. Тыгыл э̄лаль тамле рӯпата ма̄н округ янытыл о̄с са̄в ма̄т ва̄руӈкв патэ̄в. Ань са̄всыр ма̄т касыл ва̄рнэ ма̄ кинсэ̄в, хӯл алыщлан хо̄тпанув мӯсхал щирыл няслуӈкве вос ве̄рмынувыт. Соссаӈ хо̄тпа ат касыгла̄лы, хотьютаныл ка̄сащи те, ла̄тыӈ вос ке̄тэ̄гыт, ма̄нти палтув хансыянув, вос касэ̄гыт. Нэ̄ хо̄тпан о̄с ро̄ви касуӈкве. Ма̄ньлат ма̄хум 16 та̄лэ то̄влыс те, о̄с вос юв ма̄н палтув. Сургутыт нэ̄т кассыт, разрядыл мисанув. Ты касыл ма̄н ань Россия янытэ̄т ва̄руӈкв номсылув, ма̄хум ма̄н о̄лнэ ма̄вн вос ю̄выт, тыт вос касэ̄гыт. Ам Краснодарский крайт самын патсум, тот яныгмасум. Ма̄ньта̄гыл хӯл алыщлэ̄гум. Сургут ӯст нилахуйплов та̄л о̄лэ̄гум. Э̄квам наме Елена, хӯрум а̄ги о̄ньщиме̄н. Ань э̄квам ос ма̄нь а̄гим Вероника о̄с тыг ёхтысыг. Кит ва̄пс о̄ньще̄гум, акватэ о̄с сака хӯл алыщлы, Кубань ма̄т о̄лы». Судьяг о̄лнэ китыт хум наме Илья Александрович Ногин, тав о̄с аквкит ла̄тыӈ ла̄выс: «Ам Тюмень ӯст судья хӯрмит категориял майве̄сум. Ань тыт хӯл алыщлан ма̄хманув нупыл сунсэ̄гум, хотьют хумус няслы. О̄влэ̄т ам хӯл алыщлан ма̄хум халт нас кассум, акваг о̄выл местат вуйласум, тувыл судьяг пе̄рияве̄сум. Ам Омск ӯсныл о̄лэ̄гум, Иртыш я̄ ва̄тат яныгмасум, ма̄ньта̄гыл няслысум. Тувыл Сургутыт о̄лмыгтасум, тот ос А̄с я̄, тав о̄с сака яныг. Ма̄н, ты федерация касыл щирыл яласан ма̄хум, пуссын мо̄т рӯпата о̄ньще̄в. Ос ты тэ̄лав ма̄н нас сака э̄руптылув, таима̄гыс тох рӯпитым та яласэ̄в. Ам служба безопасность ма̄т рӯпитэ̄гум. Вика э̄квам акваг ам ётум яласы, няслын ва̄рмаль о̄с сака э̄руптытэ, то̄ванакт касыгла̄лы. Тав ань та̄рвитыӈыщ о̄лы. Хӯл юн акваг па̄йтэ̄в, хӯл исмит сака э̄руптэ̄гум». Ты рущ хумыг татем ёмас сымыӈ хо̄тпаг, ма̄витув э̄руптытэ̄н, янытлытэ̄н. Няслум ма̄хум ёт о̄с потрамасум. Борис Борисович Шевченко Ханты-Мансийский район Шапша па̄вылт о̄лы, рущ хум, тох потыртас: «Тыт ам ань о̄выл щёс касэ̄гум. Ты касыл урыл хӯлмум порат, тыг йиӈкве та̄ра ка̄сащасум. Ам Омский область Усть-Ишимский районт самын патсум, тот яныгмасум. Ма̄ньта̄гыл хӯл алыщласум. Ты ма̄н 2006 та̄лт ёхтысум, номсэ̄гум, тыт мощ рӯпитэ̄гум, ос акваг тыг та о̄лмыгтасум. Э̄квам наме Люда, а̄гиме̄н Алина». Борис Борисович команда щирыл тав ётэ няслум хумитэ̄нтыл китыт места висыг. Иван Алексеевич Дмитриев о̄с Шапша па̄вылныл ёхталас, тав тох ла̄выс: «Ам Ханты-Мансийский район Пырьях па̄вылт яныгмасум. Хунь хо̄тыт та̄лум то̄влыс, няслуӈкве патсум, ань ты хо̄тал мус ка̄сыӈ ӯщлахтан хо̄таланум порат няслэ̄гум. Тох тай ам почтат рӯпитэ̄гум, ты хо̄тал – День почты России ялпыӈ хо̄тал. Почтат рӯпитан ма̄хманум па̄влувт мӯйлэ̄гыт, ам ос тыг йисум. Ам 2007 та̄л па̄сныл касыгла̄лэ̄гум, мо̄лты порат ма̄н командав о̄выл места вис. Ме̄н э̄кваме̄нтыл кит пыг о̄ньщиме̄н. Яныг пыгме̄н ловит та̄лэ то̄влыс, няслуӈкве о̄с сака таӈхи». Хум хо̄тпат нила щё̄с няслысыт, судьяг о̄лнэ хо̄тпатн уральтаве̄сыт, ань хотьют са̄внув хӯл пувыс. Ка̄сыӈ такви ма̄гсылэ алыщлан касылыт Александр Аркадьевич Гончаров, Горноправдинск па̄вылныл ёхталам хум, тав но̄хпатыс. Команда щирыл ос Кузьмин ягпыгыг но̄хпатсыг. Ня̄слум ма̄хум пуссын диплом нэ̄пакытыл майве̄сыт, янытлаве̄сыт. Мӯй мир ма̄гыс хӯл исмит пӯт капай па̄йтыглавес, ма̄хум тэ̄пъяласыт, ща̄й айсыт. Хӯл тыналавес, ка̄тыл ва̄рум са̄всыр пормасыт тыналан палаткат лю̄льсыт, кит ё̄рнколыг тӯщталавесы̄г. Ня̄врамыт ма̄гыс са̄всыр пӯмщит ва̄рыглавесыт – ка̄тыл хурит по̄слысыт, хӯлыт урыл китыглаве̄сыт, хотьют са̄в ва̄г, пӯмыщ ма̄гыс матарыл маяпавес. Тувыл янгема̄не кассыт – йӣвныл ёргим хӯл хуритэ э̄ллыӈкве э̄рыс, щар ма̄к хосан вущкасан хо̄тпа тав та но̄хпаты. Мо̄т касылт ос китыг ма̄ тармыл акв ляльт ӯнтэ̄г, йӣво̄вылн пӯхтэ̄г, та хартэ̄г. Ань хотьютэ̄н ё̄р, тав та но̄хпаты. Тамле са̄всыр пӯмыщ ща̄гт тот та ва̄рыглавес. Сургут ӯсныл «Тром ёван мокут» нампа ансамбль ёхталас, а̄гипыгыт ханты э̄ргыт э̄ргысыт, йӣквсыт. Ты ялпыӈ хо̄тал оигпаме э̄лыпа̄лт Иртыш я̄н атса̄т са̄виттем ма̄нь мохсаӈ хӯлыт та̄ртве̄сыт, та̄н Югорский рыбоводный заводыт кит та̄л янмалтаве̄сыт. Ты завод кӯщай хум Василий Сысуев ла̄вме щирыл, тыгыл э̄лаль тот сӯкыр, ка̄рай хӯлыт янмалтаӈкве патавет.

1104 2015. 07. 24. Николай МЕРОВ

Кӯщаит па̄влыт уральтым яласасыт О̄йттур э̄тпос о̄выл хо̄талаге̄т Ханты-Мансийский районт са̄тхуйпловит Координационный совет рӯпитас. Тот кӯщаиг Петр Николаевич Захаров о̄лы. Ты сапра̄нит округ Дума кӯщай, тот рӯпитан депутатыт, округ мирколт рӯпитан ма̄хум, район янытыл рӯпитан кӯщаит ос мо̄таныт акванатхатыгласыт. Пуссын аквъёт ва̄т нупыл ат хо̄тпа о̄лыс. Кӯщаит культура, ханищтап, каснэ ва̄рмаль, ӯщлахтын тэ̄ла э̄лаль тотнэ урыл потыртасыт. Округ Дума кӯщай Борис Сергеевич Хохряков ла̄выс, о̄выл хо̄тал кӯщаит Ханты-Мансийский район Луговской па̄вылн ялсыт. Тот пӯльница, культура кол ос предприятият хумус рӯпитэ̄гыт, уральтасаныл. Тувыл хо̄нтлын накт порсум ма̄хум ка̄стыглан ма̄гыс а̄хвтасыӈ па̄рт тармыл хорамыӈ лӯптат пинсыт. Ты район урыл о̄йка тох ла̄выс: «Ханты-Мансийский район ла̄щалла̄щал экономикатэ акваг са̄вми. Округ янытыл 250 миллион тонна ма̄во̄й но̄хвиве. Тыгыл 40 миллион арыг тонна ма̄во̄й ты районт но̄хвиве. Тот ань са̄в ня̄врам самын паты. Матахмат та̄л юипа̄лт са̄в хо̄тпа рӯпатта̄л о̄лсыт. Ань та̄н са̄выӈпа̄лэ рӯпатаӈыг е̄мтсыт, туп акв процент са̄вит ма̄хум рӯпата иӈ ат о̄ньще̄гыт. Па̄влытыт йильпи о̄лнэ колыт, пӯльницат, школат, ма̄нь ня̄врам ӯргалан колыт ӯнттавет, ёмас лё̄ӈхыт ва̄рве̄сыт. Ма̄хум ма̄ тармыл рӯпитэ̄гыт, та̄нки ӯйхул о̄ньще̄гыт ос мо̄т тэ̄нут янмалтэ̄гыт». Со̄ль, Ханты-Мансийский районт ань са̄в пе̄рма рӯпиты. Мирн ва̄нэ «Богдашка» нампа пе̄рмат мисво̄й ос мо̄т сыресыр ща̄квитыӈ тэ̄нут ва̄раве. Ма̄хум акваг ты тэ̄нутыт ёвтыяныл. Ярки па̄вылт витхӯрыг (огурец), помидор ос мо̄т са̄всыр лӯптаӈ тэ̄нут янмалтаве. Тот соссаӈ ма̄хум община ва̄рсыт. Хо̄т матыр тыналан ва̄рмаль е̄мталы ке, та̄н пуссын та̄нки тэ̄нутаныл акваг тув тотыглыяныл, тот тыналыяныл. Ты хосыт та̄н округ ос район бюджет ма̄гсыл са̄в олн сэ̄лэ̄гыт.

1104 2015. 07. 24. Валентина УЗЕЛЬ

Ӯйхул о̄щнэ ма̄хум олныл мивет Ань юио̄выл та̄лыт сыс па̄влыӈ ма̄т о̄лнэ ма̄хум ӯйхул о̄ньщуӈкв патсыт. Та̄нанылн нё̄тнэ ма̄гыс округ бюджетныл ань олннё̄тмил та̄ставе. Ювле хультум э̄тпост ма̄н округув Россия сельский хозяйство министерства па̄лыл 25 миллион солко̄вил майвес. Ты олныт ӯйхул о̄щнэ ма̄хум халт уртавет. Кондинский районт о̄лнэ Дальний нампа па̄вылт Фёдор Чурилович о̄лы, тав о̄с фермерыг рӯпиты. Ты та̄л тав олныл нё̄твес, ты олнытыл тав йильпи мискол ӯнттыс. Мисанэ поснэ ма̄гыс са̄всыр э̄рнэ ут ёвтыс. Тэ̄лы щаквит ва̄рнэ заводэ рӯпитаӈкв тах та о̄вылтахты. Акв хо̄тал сыс тав 10 со̄тыра тонна щаквит ва̄руӈкв номсы. Ань ты ёмас тэ̄ла акваг э̄лаль тотуӈкв патаве. Ты хосыт ма̄н округувн мо̄т э̄лы ма̄ныл нё̄выль тотуӈкв ат э̄ри, щаквит тотуӈкв ат э̄ри.

1104 2015. 07. 24. Светлана РОМБАНДЕЕВА

Ма̄щтыр хо̄тпа ня̄враманэ Ха̄льӯс район Восыӈтӯр па̄вылн ялмум порат ам Светлана Егоровна Истратова ёт хо̄нтхатыгласум. Тав ма̄ньщи нэ̄, а̄ги о̄парищ наме Тасманова, о̄йттур э̄тпос хӯрмит хо̄талэ̄т 1963 та̄лт самын патыс. Светлана Егоровна оматэ намыӈсуиӈ хо̄тпа о̄лыс – Ирина Ивановна Тасманова, тав ка̄тыл са̄всыр пормас, маснут ю̄нтыс, ма̄щтырлас. На̄н ань э̄лаль Светлана Егоровна потре ловиньтэлы̄н. – Омам Неремово па̄вылт 1923 та̄лт самын патыс, а̄ги о̄парищ наме Тыманова. А̄тям Егор Александрович Тасманов, 1933 та̄лт Резимово па̄вылт самын патыс. Тэ̄н о̄лме̄н палыт са̄всыр ма̄т выступайтым яласасы̄г. А̄тям са̄ӈквылтапыл та̄ныт са̄ӈквылтас. Ётыл ос Коля а̄пщив са̄ӈквылтас, э̄ргынйӣквнэ ансамблит ёт акваг яласас. Са̄ӈквылтапыт такви ва̄рыс, омав ма̄гыс ос тумраӈыт ва̄рыс. Омав Венгриян во̄виньта̄лвес, тув ялыс. Тав 2008 та̄лт ма̄ньполь э̄тпост а̄тимыг е̄мтыс. А̄тяв ос хосат 1976 та̄лт хотталь щалтыс. Ма̄н хо̄т ня̄врам о̄лсув, ань хӯрум хультсув. Яныг увщим Елизавета Егоровна Копатилова Ягрим па̄вылт о̄лы, 1954 та̄лт самын патыс. Тав педучилище а̄стламе юипа̄лт са̄в та̄л ня̄врам садикт кӯщаиг рӯпитас, ань пенсият о̄лы. Мо̄т увщим Вера Егоровна Полякова ань о̄с пенсият о̄лы. Ам 1981 та̄лт школа а̄стласум, та̄ра рӯпитаӈкве патсум. Совхозт мис поссум, тувыл садикт нянькаг о̄лсум, ня̄врамыт ма̄гыс тэ̄нут па̄йтсум. Мощ ётылнув ос совхозн ювле минасум, тот э̄лаль рӯпитаӈкве патсум. Зоотехникыг паттуве̄сум, тувыл совхоз кӯщаиг патсум, та порат тот 140 хо̄тпа рӯпитас. Совхозт ам лаппантме мус рӯпитасум. Ань юио̄выл нёлоловхуйплов та̄л ГСМт рӯпитэ̄гум, ла̄ваве «Березовогаз», Ванзетурский газовый участок, газ тэ̄ла палт мастерыг о̄лэ̄гум. – Светлана Егоровна, о̄йкан ёт хо̄т акванхо̄нтхатасын? – О̄йкам наме Алексей Михайлович Истратов. Тав ма̄н ма̄вн Украинаныл комсомольский путёвка щирыл ёхтыс, Белоярск ӯсн кос минас. Ме̄н Ха̄льӯст акванхо̄нтхатасме̄н, тув минуӈкве ат тахмаяс, ам ётум Восыӈтӯр па̄вылн йис, тыг та о̄лмыгтас. Акванминасаме̄н, кол ӯнттысаме̄н, колув яныг. Ӯйхул о̄ньще̄в, пум ва̄ре̄в, тэ̄пкан хилэ̄в, матыр ӯнттэ̄в. Э̄лнаӈ о̄йкам яныгмам ма̄тэ̄н ка̄сыӈ та̄л яланта̄лсув. Та̄н колта̄гланыл о̄с яныг о̄лыс, ат ня̄врам яныгмасыт. Рӯтанэ пуссын ёмас хо̄тпаквет. Ань омагеа̄тяге о̄с а̄тимыг. Ма̄н палтув яныгмам ня̄врамыт тув о̄с тотыгласанме̄н, Крым ма̄н ща̄рщ ва̄тан ӯщлахтуӈкве ялантасув. О̄йкаме̄нтыл кит а̄ги о̄ньщиме̄н. Яныг а̄гиме̄н Марина Санкт-Петербург ӯст А. И. Герцен нампа университетт филологический факультетт ханищтахтас, та ӯст о̄лмыгтас. Настя а̄гиме̄н Ханты-Мансийск ӯс педучилищат воспитателиг ханищтахтас, ань тыт садикт рӯпиты. А̄гиягме̄н коныпал ма̄н палтув хӯрум савалап а̄гирищит яныгмасыт. Та̄н ань пуссын янгыт, ханищтахтасыт, рӯпитэ̄гыт. Ань ос кит пыгрищ ма̄н ётув о̄лэ̄г, яныгме̄г, савалап ня̄врамыг. Ат апыг о̄ньщиме̄н – акв а̄гирищ, наме Дарина, ос нила пыгрищ. – Наӈ оматен намыӈсуиӈ хо̄тпа о̄лыс, улпыл акваг ма̄щтырлас? – Омав са̄в маснут, пормас, а̄ныса̄н ю̄нтыглас. Тав ва̄рыглам а̄патэ ань ам палтум о̄лы, э̄ӈкварп а̄па ам ӯргалым о̄ньщилум. Ма̄ньщи супыт, халатыт, ня̄врам ос о̄йка супыт ва̄рыглас, па̄квпалыл ю̄нтыгласанэ. Ань пуссын ам палтум о̄лэ̄гыт. Омав йис потыр са̄в о̄ньщас, э̄рыг ва̄с, э̄ргуӈкве ха̄сыс, тумраӈыл ёнгыс. Ма̄навн пе̄с пора о̄вылтыт акваг потырта̄лыс. Яныг хо̄нт порат са̄в рӯпитасыт, норыт яктысыт, хӯл алыщласыт. Ла̄гыл маснут ат о̄щсыт, тох хотмус та о̄лсыт. Ам яныгмам порам тай сака пӯмыщ о̄лыс. А̄тяв ёт хӯл алыщлаӈкве ялантасув, толгысув, нялк пувсув. Та порат нялк са̄в о̄лыс. Ща̄нягува̄щагув ёт во̄рн ялантасув, на̄йив сартсув, тэ̄натэ̄н акваг нё̄тсув. Акваг лувыл яласасув, ам лувыл яласаӈкве сака тахсум. Лувыӈ сунын ӯнтэ̄гын, та минэ̄гын, хо̄тал ка̄т посты, кон татем нё̄тнэ, лылтуӈкве ёмас. Хо̄тал ӯнтуӈкв паты, тувле нупыл сунсэ̄в, тай о̄с сака нё̄тнэ. Пум тотэ̄в ман на̄йив хартэ̄в. Сака ёмас порат яныгмасув. Ма̄хум пуссын лув о̄щсыт, ань мо̄рсыӈ хо̄тпа о̄ньщи. Ма̄н па̄влув сака ёмас па̄вылкве, янытэ̄т вущрам пум яныгми, лылые̄пе сыстам. Машинат сака ат яласэ̄гыт. Клубувт манос школавт са̄всыр концертыт ва̄тихал ва̄рыгла̄лавет, янгема̄не ма̄н тот пуссын выступайта̄лэ̄в, э̄рге̄в, йӣкващлэ̄в. – Юн на̄н ма̄ньщи ла̄тӈыл потырта̄лэгы̄н? – А̄ти, ат потыртэ̄в. Ня̄враманум ос апганум ща̄нь ла̄тыӈ ат ва̄гыт. Ам увщим Ягримт о̄лы, нэ̄мхотьют ёт потыртаӈкве. Ня̄врамыт школат ма̄ньщи ла̄тыӈ мощ ханищтэ̄гыт, матыр ул торгамтэ̄гыт. Ма̄нь порат, ам номилум, омам увщитэ, Вера Ивановна а̄квум, ма̄ньщи мо̄йтыт акваг мо̄йтыглас, тав мо̄йт ва̄нэ хо̄тпаг о̄лыс. Та порат тамле ищхӣпыӈ утыт хунь о̄лсыт, тав потранэмо̄йтанэ нэ̄мхотьютн ёл ат та хансыглаве̄сыт. Ягримт о̄лнэ увщим пе̄с йис потрыт ос мо̄йтыт ва̄г, са̄в пе̄с хурит о̄ньщи, тав акваг омав ёт о̄лыс. Ань потруме̄н та оигпас. Светлана Егоровна оматэ ю̄нтыглам ма̄ньщи супыт но̄хвис, такви масхатас, о̄йкатэ, ня̄враманэ ос апганэ масхатасыт. Рӯт нэ̄тэ Людмила Савельевна Хозумова супыл о̄с то̄влувес, о̄с масхатас. Кон минасӯв, пуссын по̄слысанум. Ма̄щтыр омате̄ныл, ане̄квате̄ныл ва̄рыглам, ю̄нтыглам супытыл кон маттем та ё̄мыгтасыт, ё̄ӈхатахтыгласыт. Ирина Ивановна ва̄рум тэ̄латэ матъё̄мас ня̄враманэ̄н э̄лаль тотаве, янытлаве. Светлана Егоровнан ам пӯмащипа ла̄тыӈ ла̄всум. Ты я̄тил ма̄ньщи ма̄хумате̄нув пуссын пуста̄гыл вос о̄лэ̄гыт, На̄янылн-О̄тыранылн вос ӯргалавет! Пус ка̄т, пус ла̄гыл!

1104 2015. 07. 24. Тамара МЕРОВА

Ёмас туи пора Ты накт ам Светлана Петровна Парфёнова (Вынгилева) ёт ва̄щинтахтасум. Тав Крым ма̄т ӯщлахтаме юипа̄лт , насати, Няхлаӈ ма̄ньщи па̄вылн о̄с ялапалум. Ам таве ты урыл мощ китыгласлум, ань потре ловиньтэлы̄н: – Няхлаӈ па̄выл – ты ам самын патум ма̄кем. Ма̄н колта̄глув тот пе̄с ос йильпи кол о̄ньщи. Тэ̄натэ̄н туи ва̄тихал уральтаӈкве яланта̄лэ̄в. Ты ма̄нь па̄вылкве̄т а̄тяв йӣгрище Дарья Александровна Вынгилева акваг о̄лы. Тав палтэ Люда а̄гитэ ос апганэ аквписыг ёхтала̄лэ̄гыт. Апганэ ка̄сыӈ туи тот ӯщлахтэ̄гыт, матыр нё̄тмил ва̄ре̄гыт. Тувыл акв хум хо̄тпа Владимир Остеров тот такви колэ̄т о̄с о̄лы. – Мо̄т хотты яныгнув па̄вылныл тув манах ве̄рыста минуӈкве э̄ри? Па̄выл ма̄хманув хумус тот о̄лэ̄гыт, маныр ва̄регыт? – Няхлаӈ па̄выл, рущ щирыл Нильдино, Тагт я̄ ва̄тат нё̄тнэ, сыстам ма̄т ӯнлы. Лылые̄пе ос сака сыстам. Ты Кульпас па̄вылныл я̄ хосыт алгаль 90 ве̄рыста минуӈкве э̄ри. Пил ва̄тнэ, пум ва̄рнэ тыглетувле яласан ма̄хум Няхлаӈ па̄вылн о̄с па̄гпӯхталэ̄гыт. Тот о̄лнэ ма̄хманув уральтыяныл, ща̄й айнэ̄ныл сыс матыра̄ти о̄вылтыт пӯмщалахтэ̄гыт. Та̄н та̄нки халанылт сака юртыӈыщ о̄лэ̄гыт. Володя Остеров хӯл алыщлым, во̄раим о̄лы. Тав такке̄т о̄лы, колсори рӯпата такви ва̄ритэ, колэ̄т сыстам. Тувыл ты ма̄хманув тот та̄нки тэ̄пкан, ӯйхул янмалтан кол, сӯмъях, пувлын кол о̄ньще̄гыт. Дарья аквум о̄с такке̄т о̄лы, тав ма̄ньлатыг о̄лме порат о̄с акваг такви во̄раяс, хӯл алыщлас. Ань Люда а̄гитэ то̄внакт во̄раи, тувыл хӯлп ӯнттуӈкве ялантэ̄г. Юн мисыт ос лув о̄ньще̄гыт. Та̄н ма̄гсыланыл са̄в пум ва̄руӈкве э̄ри. Тот ма̄кев сака ёмас, та̄н тот яныг тэ̄пкан ва̄ре̄гыт ос са̄в картёпка, огурец, помидорыт, морковкат янмалтэ̄гыт. Мо̄т тэ̄нутыт Кульпаст манос Ягримт ёвтэ̄гыт. Ня̄нь та̄нки ва̄ре̄гыт, туи кон щёвал па̄лтыглэ̄гыт, тэ̄лы юн кӯранылт ня̄нь ва̄ре̄гыт. Ка̄сыӈ коланылт движок рӯпиты, на̄йпос о̄ньще̄гыт. Тувыл мо̄лал таксофоныл ӯнттыглаве̄сыт, хотмус потыльмаӈыг рӯпитас, ос ва̄тихал хотсаквала̄лыс. Тав ань тыг мус тот лю̄ли. – Хоты ма̄ныл тув ёхталэ̄гыт, Люда ня̄враманэ хо̄т ханищтахтэ̄гыт? – Тав колта̄глэ ёт Ягрим па̄вылт о̄лы, ня̄враманэ тот о̄выл классытыт ханищтахтэ̄гыт. Туи пуссын Няхлаӈ па̄вылт ӯщлахтэ̄гыт, ос ане̄кванылн нё̄тэ̄гыт. Дарья ане̄кваныл Ягримн о̄луӈкве ты кос во̄вияныл, тав тув минуӈкве номтэ щар ат паты. Володя колта̄глэ тай Ха̄льӯст колыл майвес, тав тув минуӈкве о̄с ат ка̄сащи. Э̄кватэ ня̄враманэ ёт Ха̄льӯсн о̄лмыгтасыт. Ам ань тув ялмум порат такем ёмщакв о̄с ӯщлахтасум. Хосат та̄гыл тув ялуӈкве ат ве̄рмысум, ань рӯт ма̄хманум ёт ва̄щинтахтасум. Колагум сас уральтасагум, ёмщакв щё̄питасагум, ма̄хманумн мощ пум ва̄руӈкве нё̄тсум. Во̄рт пиланув иӈ ат понсысыт, пил ат ва̄тсӯв. Тувыл Володян на̄йив атуӈкве нё̄тве̄сум, пум са̄грын ке̄рум пе̄лпыг кӣвтыстэ. Тур ва̄тан хӯл алыщлаӈкве ялсӯв, во̄рт сыресыр ӯйхул лё̄ӈханыл Володян хӯлтыглавесӯв. Ма̄хманув ёт ма̄нь пора о̄лупсав номылматыгласлӯв, сака ёмас посыӈ пора о̄лыс. Ам мо̄т рущ ма̄т са̄в яласым, нэ̄мхо̄т воссыг тох ёмщакв, роттыг ат ӯщлахтыгласум. Туп таи лю̄ль, са̄в лё̄мвоит ос ма̄ньӯит ква̄лапасыт, ята вос, ма̄н та̄нанылн ханьщувлым о̄лэ̄в. Няхлаӈ па̄выл хо̄тпанумн яныг паща ла̄тыӈ ке̄тэ̄гум. Пус та̄гыл вос о̄лэ̄гыт, То̄румн, На̄й-О̄тыранылн вос ӯргалавет! Светлана Парфёнова ёт Тамара Мерова потыртас.

1104 2015. 07. 24. Николай МЕРОВ

Ма̄хманув ще̄мьяӈ та̄гыл мӯйлэ̄гыт Тӯяг Ӯринэ̄ква хо̄тал о̄лум порат ам Сургут ӯсн ялсум. Тот Олеся Пельментикова ханты нэ̄ ёт хо̄нтхатыгла̄сум. Тав Локосово па̄вылт самын патыс, тот яныгмас. Школа а̄стламе юипа̄лт, ня̄врам ханищтан хо̄тпаг институтт э̄лаль ханищтахтас. Тувыл хум ва̄рыс, ань та ӯст школат ня̄врамыт ханищтым рӯпиты. Ты нэ̄ кит ня̄врам о̄ньщи. А̄гитэ лов та̄лэ то̄влыс. Тав хӯрмит классыт ханищтахты ма̄нь та̄гыл соссаӈ мир урыл са̄всыр потрыт акванаты. Пыге ос ущты китыт та̄лэ то̄влыс. Олеся ла̄выс: «Ня̄враманув ма̄нь та̄гыл пе̄с йис о̄лупса ва̄рмалит янытлан тэ̄лан ханищтаӈкве э̄ре̄гыт. Ётыл та̄н янгыг е̄мтэ̄гыт, ты ва̄рмаль э̄лаль тотуӈкве та̄нки тахмае̄гыт тах». Соссаӈ ма̄хманув «Пе̄с Сургут» музейт ялпыӈ хо̄талыт щё̄пита̄лнэ порат, ты ще̄мья акваг тув мӯйлуӈкве яланта̄лы. Ам та̄нанылн щунь паща ла̄тыӈ ке̄тэ̄гум.

1104 2015. 07. 24. Валентина УЗЕЛЬ

Ты тӯр ялпыӈе сака яныг Белоярский районт Нумто нампа тӯркапай о̄лы. Ты тӯр ханты ос ё̄рн ма̄хум сака ялпыӈыг ла̄вияныл. Ляпат Нумто нампа ма̄нь па̄выл о̄лы. Тот о̄лнэ соссаӈ ма̄хум ты тӯраныл сака ӯргалым о̄ньщияныл. Мувлахи ма̄тэ рущ ла̄тӈыл «природный парк» тох хасвес. 2001 та̄л порат ма̄во̄й но̄хвинэ нефтяникма̄хум та е̄рн рӯпитаӈкв ёхтысыт. Яныг кӯщаитн та̄н тот рӯпитаӈкв та̄ртве̄сыт, лицензиянэ̄пакыл майве̄сыт. Тот та̄н сака са̄в ма̄во̄й хо̄нтсыт. Ос тот рӯпитаӈкв щар ат ро̄ви, та̄н аты ва̄маныл. Кӯщаит та̄нанылн маим нэ̄пакт ты «Нумто» нампа природный парк урыл нэ̄матыр ат хассыт. Ань матах та̄л ты нефтяникыт ос тот о̄лнэ ё̄рн, ханты ма̄хум халанылт сака воритотэ̄гыт. Тӯр ёлыпа̄лт щар са̄в ма̄во̄й хо̄нтвес, ос соссаӈ ма̄хум нефтяникыт рӯпитаӈкве тув щар ат та̄ртыяныл. Татьяна Меркушина ма̄вит ӯргалан департаментыт рӯпиты. Ты тӯр ма̄гыс тав сыме сака ща̄рги. Тав ань тох ла̄выс, нефтяникма̄хум тув рӯпитаӈкв ёхтысыт, тӯр ляпат рӯпитэ̄гыт, ань ма̄тэ лю̄лиг та ва̄рияныл. Та̄н на̄й ва̄рнэ те̄рква̄лгыт тув хартэ̄гыт, лё̄ӈхыт пинэ̄гыт, тӯр ва̄танэ то̄суӈкв та патсыт. Э̄лаль тох те мины, тӯркапай витыг та тотыяныл. Матъёмас ань са̄в ма̄хум акванатхатым, потыртахтым ты тӯр сака ӯргалыяныл. Ӯсувт о̄лнэ ма̄ньлат соссаӈ ма̄хум о̄с потыртахтасыт, та̄н ты тӯр ӯргалан ма̄гыс са̄всыр рӯпата ва̄руӈкв патэ̄гыт, кӯщаит ос мо̄т мир вос ва̄ганыл – ты тӯрн новхатуӈкв щар ат ро̄ви, тав сака ялпыӈыг о̄лы, ос ханты, ё̄рн ма̄хум та̄н ялпыӈ ма̄наныл пуссын тот ляпат о̄лэ̄гыт. Ты ля̄ххалыг ма̄ньщи ла̄тӈыг Валентина Хозумова хассаге.

1104 2015. 07. 24. Николай МЕРОВ

Ӯй йӣквнэ ва̄рмаль э̄лаль тотылӯв Лӯпта э̄тпос 24-26 хо̄таланэ̄т Ханты-Мансийск ӯст научнопрактический мирхал конференция о̄лыс. Рущ щирыл ты тэ̄ла «Новый взгляд на ритуализм медвежьего культа в Северном регионе» ла̄ввес. Ты ва̄рмаль соссаӈ мирн нё̄тмил ва̄рнэ Ассамблея депутатыт та̄н щё̄пита̄лсаныл. Тот округ Дума депутат нэ̄ Татьяна Гоголева, округ культура кӯщай Надежда Казначеева, ля̄ххал тотнэ департамент кӯщай хум Илья Верховский о̄лсыт. Са̄всыр ма̄ныл о̄лнэ ма̄ньщи ос ханты ма̄хум ты тэ̄лан акванатхатыгласыт. Ты са̄пранит о̄влэ̄т Ассамблея кӯщай Еремей Айпин потыртас. Хо̄н ма̄ныл акв профессор о̄йка Эндрю Вигет тав о̄лыс. Тав Ӯй йӣквнэ нак ӯргалан урыл доклад ловиньтас. Тувыл ма̄ньщи депутатув Надежда Алексеева мир ёт пащалахтаме юипа̄лт Ӯй йӣкв нак э̄лаль тотнэ урыл потыртас. Тав ла̄выс: «Тыт ань та ма̄хум атхатасыт, хотьют Ӯй йӣквнэ нак ма̄гыс сыманыл ща̄рге̄гыт. Ань юио̄выл та̄лытт Ӯй ӯлылан ва̄рмаль ёмщакв ва̄нэ яныгпа̄ла хо̄тпа мощща хультыс. Таима̄гыс ма̄н ань ты тэ̄ла туп акваню̄рщхатым са̄в та̄лытн э̄лаль тотуӈкве ве̄рмилӯв. Ма̄навн тох ва̄руӈкве э̄ри, ня̄враманув ты тэ̄ла урыл о̄с вос номсэ̄гыт. Пе̄с йис о̄лупса э̄лаль тотуӈкве та̄н ты патыяныл. Ты ва̄рмаль ул вос ёрувлахтас, ань ва̄тихал акванатхатыглахтуӈкве патэ̄в». Ты конференцият о̄лум кӯщаит, учёный хо̄тпат, пе̄с йис ма̄т о̄лнэ соссаӈ ма̄хум о̄лсыт. Ка̄сыӈ хо̄тпа доклад нэ̄пак ловиньтас. Ма̄хманув потраныл щирыл, ань щар мощща яныгпа̄ла хо̄тпа хультыс, хотьют Ӯй ӯлыглан э̄ргыт мощ ва̄ганыл. Тох э̄лаль ке мины, Ӯй йӣквнэ нак со̄ймуӈкве ве̄рми. Ты тэ̄ла но̄хво̄рмалтаӈкве хосат кос э̄рыс. Соссаӈ мирытн нё̄тмил ва̄рнэ Ассамблея депутатанув ма̄хум потраныл пуссын акванатсаныл ос ты хосыт э̄рнэ нэ̄пак щё̄питаӈкве патэ̄гыт. Ань тах Ӯй йӣквнэ нак э̄лаль тотаве, кӯщаянув тыи ма̄гыс нё̄тмил ва̄руӈкве патэ̄гыт.

1104 2015. 07. 24. Светлана РОМБАНДЕЕВА

Ма̄н о̄лупсанув аквхурипат О̄йттур э̄тпос о̄выл хо̄таланэ̄т Ханты-Мансийск ӯс ляпат ма̄ньха̄пыл каснэ ва̄рмаль о̄лме порат э̄лы хо̄н ма̄ныл нэ̄гхумыг ёхталасыг – Американыл чероки нампа индейский племя вождь Ларри Джеймс Машу Белое Перо ос Новая Зеландияныл маори нампа племя нэ̄ Дорин Беннет. Тэ̄н «Югра лылые̄п» ассоциациян во̄выглавесы̄г, ма̄ньщи ос ханты хо̄тпатн о̄лупсаныл урыл китыглавесы̄г. На̄н ань э̄лаль Ларри Джеймс Машу Белое Перо потре ловиньтэлы̄н. – Ме̄н Дорин ёт «Два» пера нампа мирхал организацият рӯпитыме̄н. Ма̄ янытыл о̄лнэ соссаӈ мирыт пе̄с йис о̄лупсаныл, культураныл, ла̄тӈаныл янытлыянме̄н. Тувыл «Голос коренных народов» нампа радио программа ва̄рсуме̄н. Ты радио хосыт ка̄сыӈ соссаӈ мир ла̄тӈе суйтуӈкве ве̄рми, ма̄хум та̄нти о̄лупсаныл урыл потыртэ̄гыт. Ам чероки индейский племят самын патсум. Ма̄н ща̄нь ла̄тӈув а̄ла ты хотталь со̄ймыс. Акв вождь хумиюв, наме Секвойя, ла̄тӈув нэ̄пакын хансыстэ. Ва̄т нупыл хо̄т та̄л рӯпитас, э̄рнэ нэ̄пакыт хансыс. Хунь Совет племени тав хансум алфавитэ пирмайтасаныл, ла̄тӈув нэ̄пак щирыл ханищтаӈкве патвес. То̄нт ань та̄рапатыс, насати ка̄сыӈ хо̄тпа ла̄тӈув молях ханищтаӈкве ве̄рмитэ, Секвойяв татем ёмас алфавит хансум. Тувыл ма̄н ма̄хманув кит ла̄тыӈ ва̄ӈкве патсыт, ща̄нь ла̄тыӈ ос мо̄т мир (английский) ла̄тыӈ. Кит ла̄тӈыг ёмащакв ва̄саныл, грамотныиг е̄мтсыт. То̄ва мо̄т хо̄тпат та̄нти ла̄тӈаныл ворил ты ва̄саныл. Таима̄гыс ма̄н племяв колонизаторытын ущпылнэ̄г ня̄влалаӈкве патвес, торастаӈкве патвес, ань манрыг ма̄нти ла̄тӈувтыл потыртэ̄в. Та̄н номсысыт, ма̄н моще̄ртн хотталь ты со̄йме̄в, ос ла̄тӈув аман хотыл но̄хква̄лтапаптыслӯв. О̄лнэ ма̄вн та̄нанылн сака э̄рыс, таима̄гыс ма̄н нуплув нур тотсыт. Та порат ма̄ханув са̄выӈпа̄лэ ща̄нь ла̄тӈыл потыртаӈкве пилсыт, номсысыт, мо̄т мирытын лю̄камтаӈкве патавет. Ань а̄ти тох, ань ка̄сыӈ хо̄тпав ла̄ви, хоты племяныл тав о̄лы – чероки, лакота манос апачи. Ма̄н сака са̄в э̄рнэ тэ̄лат ва̄ре̄в – ща̄нь ла̄тыӈ ханищтан школат ӯнттэ̄в, культурав но̄хво̄рмалтан колыт ӯнттэ̄в. Ла̄тыӈ вос о̄лыс, вос суйтыс, таве юн ще̄мьят ханищтаӈкве э̄ри. Ня̄врамыт, ма̄ньлат ма̄хум та̄нти ла̄тӈыл потыртаӈкве патэ̄гыт те, мир тах э̄лаль о̄с о̄лы. Югорский университетт рӯпитан ма̄ньщи э̄ква Диана Васильевна Герасимова мощ потыртас: «На̄н, индейцыт, сома ма̄н рӯтанув. Ма̄н о̄лупсанув а̄ла ты аквхурипат. На̄н хольтын ма̄н Витхон хо̄тал ва̄рыглэ̄в, витн хӯтахлэ̄в, ань тав хосытэ̄т ты о̄лэ̄в – тэ̄нут о̄ньще̄в, айнут о̄ньще̄в. Ма̄н ма̄ньщи ос ханты ма̄хманув хӯл тэ̄нэте̄м алыщлэ̄гыт, та̄н ва̄ганыл, ань ма̄витыл матыр те висын, ювле о̄с матыр маен. О̄лнэ ма̄в ӯргалаӈкве, янытлаӈкве э̄ри. Мо̄т яныг мирыт ма̄нь мирытын хӯнтлынувыт те, то̄нт о̄лнэ ма̄в янытыл са̄всыр пилыщмаӈ ва̄рмалит ат е̄мталанувыт». Индеец хум хотща̄гтыс, ювле тох ты ла̄выс: «Ма̄н, чероки ма̄хум, вит о̄с сака янытлылӯв. Вит янытлан ялпыӈ хо̄тал ва̄рыглэ̄в. Хо̄тал но̄хнэ̄глынэ̄тэ па̄сыл ёлпа̄тыранэ̄тэ мус ма̄н мӯйлэ̄в, витув нупыл пуӈк пинэ̄в, по̄йкще̄в, таве ӯлылылӯв. Диана Васильевна, наӈ потрын а̄нумн сака пӯмыщ о̄лыс. Тох о̄луӈкве ма̄н ма̄нь та̄гыл потырта̄лвесув, ма̄нь та̄гыл ханищта̄лвесув. Ам ань тыт на̄н халынт ӯнлэ̄гум, ос сома ма̄н племявт хо̄тпа потырты. Ма̄н щар аквхольт номсэ̄в, аквхольт о̄лэ̄в». Ма̄хманув китыглахтан ла̄тыӈ са̄в о̄щсыт. Кинат урыл потыртасыт, ла̄ве̄гыт, ма̄н ма̄ньта̄гыл американцыт ат э̄руптасанув, кина хосыт та̄наныл ва̄санув, ос индейцыт са̄литасанув, э̄руптасанув. Кук о̄йка урыл о̄с китапахтасыт, тав май Новая Зеландия ма̄н минас, тот соссаӈ хо̄тпатын хотум ва̄рапавес, юв ат иӈ ёхталас. Ма̄хманув китгагув ёт маттем та мовиньтасыт. Мо̄тыт хо̄тал Машу Белое Перо ос Дорин Беннет каснэ ма̄н ялсыг. Ма̄н ма̄вн тэ̄н о̄выл щёс ёхталасыг, тэ̄натэ̄н тыт сака мӯстыс, кӯщаянувн пӯмащипа ла̄тыӈ ла̄всыг.

1104 2015. 07. 24. Светлана РОМБАНДЕЕВА

Талинка па̄вылт ма̄хум ханищтахтасыт Лӯпта э̄тпос 16 хо̄талэ̄т Ханты-Мансийский район Талинка па̄вылт «Свет родной земли» III методикопрактический семинар о̄лыс. Ты та̄л май сохранение народных промыслов и ремёсел, исторического и культурного наследия народов, населяющих Югру намаявес. Ты хо̄нтхатыглап славянский письменность ос культура хо̄талыт кастыл ва̄рыглавес. О̄влэ̄т ань Талинка, Нягань ос Ханты-Мансийск ӯст о̄лнэ пуп колытыт рӯпитан ма̄хум ля̄ххал тотнэ хо̄тпат э̄лыпа̄лт потыртасыт. Тувыл Кирилл ос Мефодий о̄йкаг урыл докладыт ловиньтаве̄сыт – хумус тэ̄н рущ алфавит ва̄рсы̄г, пе̄с порат ма̄хум хумус мӯйлысыт, пе̄с йис ялпыӈ хо̄талыт урыл, ма̄хум манхурип пормасыт ма̄щтырласыт та ма̄ныр. О. Д. Бубновене «Керамическое производство в п. Кирпичный во второй половине XX в. » докладэт та урыл потыртас, ань ты ма̄н ссылкан ке̄тыглым хум В. А. Пеганов Ханты-Мансийский районт ра̄ктыл матыр пормас по̄щгын тэ̄ла хумус но̄хво̄рмалтастэ. «Прилетай к нам, птица Пава» выставка суссылтавес. 5 та̄лныл 99 та̄л мус яныт хо̄тпат тот рӯпитасыт. Ӯйрищ са̄всыр щирыл ва̄рвес то̄рыл ю̄нтвес, сакныл хартвес, то̄р тармыл ю̄нтупыӈ сэ̄тапыл ю̄нтсалавес, ра̄ктыл, нэ̄пакыл, то̄сам пумыл ва̄рвес. Ты суссылтап сака пӯмыщ о̄лыс. Мо̄т суссылтапыт о̄с ва̄рыглавесыт: «Береста – чудесница» –са̄сныл ва̄рим са̄всыр пормасыт пасан тармыл тӯщталаве̄сыт – ла̄гыл маснут, а̄ныса̄ныт, ма̄гылн тагатан сыресыр хорамыт ос мо̄т са̄в пормас; «Гимн половичку» – ты о̄с пӯмыщ суссылтап, улас тармыл манос колканын пиннэ утыт суссылтаве̄сыт. Тувыл мастерклассыт ва̄рыглаве̄сыт. Ханты-Мансийск ӯсныл ёхталам мащтыр хо̄тпа Л. П. Пастернак «Утица» нампа тэ̄ла урыл потыртас, ань пе̄с порат рущ ма̄хум ра̄ктыл а̄нысов ва̄рыгласыт, тав иснас тармыл ӯнтталавес. Нягань ӯсныл о̄лум ма̄щтыр хум А. Синицын пыгрищит ос хум хо̄тпат вятский ня̄лыт ва̄руӈкве ханищтасанэ. Междуреченск ӯсныл о̄лум С. М. Качанова ёт янгема̄не са̄сныл хусапыт ос ӯйрищит ва̄рсыт. Удмуртия республиканыл ёхталам И. Ш. Караваева станокт колканын пиннэ то̄р ут ва̄рыс. С. Н. Савчук ос «Женские украшения из бересты» нампа выставка ва̄рыглас, тав ётэ а̄гирищит ос нэ̄ хо̄тпат та̄нтина̄нанылн са̄сныл сыресыр хорамыт ма̄щтырласыт. Петрова Танян ос са̄сныл хусапсовыт ва̄руӈкве ханищтаве̄сыт. Са̄всыр то̄рло̄мтытл ма̄хум сыресыр коврикыт ю̄нтсыт, ты рӯпата ос тох намаим о̄лыс: «Архангельские кругляши». Та̄наныл хумус ва̄руӈкве, Г. Г. Сунгатова тав суссылтастэ. Ка̄сыӈ колт ань са̄в пе̄с то̄рло̄мтыт нас хуе̄гыт, акванатуӈкве те, акваню̄нтуӈкве, татем хорамыӈ пормасыт ва̄руӈкве ро̄ви. Ты хо̄нтхатыглап ка̄сыӈ хо̄тпан сака мӯстыс. Талинка школат ханищтахтан ня̄врамыт ос яныгхо̄тпат таи та̄рапаттысыт, ань рущ культура насати таса̄вит пӯмыщ пе̄с ва̄рмалит та о̄щнэ̄тэ. О. Д. Бубновене потре ма̄ньщи ла̄тӈыг С. МАТВЕЕВАН толмащлавес.

1104 2015. 07. 24. Александр ВЬЮТКИН

Хурит по̄слын ханищтап Лӯпта э̄тпост аквхуйпловит хо̄талт финноугорский рӯт ма̄хманув халт Удмуртия ма̄т фотоаппаратыл по̄слын ос ля̄ххал тотнэ ма̄хум са̄тытыг акванатхатгласӯв. Ханищтапув рущ ла̄тӈыл «VII Всероссийский фестиваль финноугорских журналистов» намаим о̄лыс. Ты кастыл са̄в ма̄ныл ма̄хум тув ёхталасыт. Аквъёт пуссын хус арыгтем хо̄тпа о̄лыс. Коми, Удмуртия, Мордовия, Ямало-Ненецкий ос ма̄н округувныл хӯрум хо̄тпа тув атыглавесӯв. Тот потыр янгыщ ла̄тӈанув урыл о̄лыс. Россия янытыл пуссын аквъёт хо̄тпан ляпатем нэ̄пак финноугорский ла̄тӈыл нэ̄глалы. Ты ма̄гсыл ма̄н ла̄тӈанув, э̄рганув, йӣкванув ос пе̄с йис о̄лупсанув ат ёрувлахтэ̄гыт. Ща̄нь ла̄тӈыл рӯпитан ма̄хум ты кос ла̄тӈаныл э̄лаль тотнэ рӯпата ва̄ре̄гыт. Финноугорский рӯт ма̄хманув ма̄н хольтув хоталь воссыг ва̄рхатэ̄гыт. Ань мир янытыл са̄в йильпи ищхӣпыӈ ут ва̄равет, таи ма̄гсыл яныгман ня̄врамыт пе̄с йис о̄лупсав ва̄ӈкв ос ханищтаӈкв ат номсэ̄гыт. Ма̄хум та̄нти ща̄нь ла̄тӈыл нэ̄глын нэ̄пак хасылтаӈкв ат таӈхе̄гыт. Таи ма̄гсыл нэ̄паканув илттыг ул вос холыгпе̄гыт, бюджетныл олн нё̄тмил во̄вуӈкв э̄ри. Ты ма̄гсыл ка̄сыӈ республикан ос округын тамле олн во̄внэ пищма хансуӈкв э̄ри. Тот ты урыл хансым вос о̄лы: – Финноугорский нампа рӯт ма̄хум акваннё̄тхатым са̄всыр ла̄тӈытыл нэ̄пак нэ̄гылттан ва̄рмаль номылматвес. – Тувыл журналистыг рӯпитан ма̄хум ханищтахтын ма̄гыс халанылт пе̄нтхатым яласаӈкв номсэ̄гыт. – Юио̄выл классыт ханищтахтын ня̄врамыт ёт рӯпитаӈкв э̄ри. Та̄наныл пӯмщалан ма̄гсыл нэ̄пакыт хаснэ ос щё̄питан колт ханищтапыт ва̄тихал ва̄рыглаӈкв э̄ри. Мо̄тыт акв тамле VIII Всероссийский фестиваль 2017 та̄лт мо̄т хотты ма̄т ат те ве̄рмаве ва̄руӈкве, таве ма̄н палтув Ханты-Мансийск ӯст, «Ханты ясаӈ» газета хо̄тпан та̄лэ янытлан порат ва̄раве. Ты урыл юио̄выл хо̄талт Резолюция нэ̄пак хаснэ порат та̄рапатыс.

1104 2015. 07. 24. Николай МЕРОВ

Нёхыс э̄нтапыӈ хумит (Ма̄ньщи мо̄йт) Э̄кваго̄йкаг о̄лэ̄г. Хӯрум а̄ги о̄ньще̄г. Яныг а̄гитэ̄н ань витын ке̄тытэ̄н. Витын минас, на̄лваль ё̄ми, ӯйрищакве тав э̄лыпалэ̄н исапи. Юил кос ня̄влытэ, кос пувумтытэ, тав о̄с э̄лаль тыламлы. Ос та ня̄влытэ, кос пувумтытэ, о̄с э̄лтыламлы. Вит ва̄тан ёхтыс, вит ве̄траге а̄мартасаге, но̄ха̄лмысаге, ӯйрищакве ве̄траге кит па̄лаге̄т тыглетувле исапа̄нтым та исгащлы. Вит ве̄траге оссувласаге, ӯйрищ юипа̄лыл та ня̄вылхатас. Вит тотын йӣвыл ты кос ю̄ныгтытэ, о̄с э̄лтыламлы. Тащир ня̄влыматэ, во̄рн акваг та минас. Во̄рн минас, во̄рт ё̄ми, ня̄влытэ. Аквматэ̄ртн сунсы, ха̄ссытым, та̄ӈквитым кол ӯнлы. Та колн ёхтыс. Воссыг хоталь мины, юв щалтыс. Ань ӯйрище хотталь тыламлам, а̄тим. Тувыл юв щалтыс, юн хӯрум хум ӯнлэ̄гыт. Яныгнув каӈканыл ла̄ви: – Щалтэн, щалтэн, йиен, йиен, па̄гйиен. Ма̄н алыщлым о̄лэ̄в. Ня̄ранув хотхоласыт, мольщаӈанув хотхоласыт. Ма̄навн ня̄ра ю̄нтэн, мольщаӈ ю̄нтэн. Хӯрум ня̄ра тагыл кот о̄ньще̄в, хӯрум мольщаӈ та̄гыл со̄выт о̄ньще̄в. Ма̄н во̄рн минэ̄в. Во̄рт ялнэ̄в сыс наӈ ня̄рат ос мольщаӈыт ю̄нтэ̄н, вос а̄стэ̄гыт. Тувыл ма̄хманэ масхатасыт, во̄рн та минасыт. Во̄рн минасыт, а̄ги таквирот ла̄ви: – Со̄рни яныг То̄рум, тыса̄вит ня̄ра, мольщаӈ акв хо̄тал сыс хумус ю̄нтумтыянум? Тувыл ань конква̄лыс. Кон ё̄ӈхатахтыглыматэ, сунсы, мощ э̄лыннув о̄с ха̄ссытым, та̄ӈквитым кол ӯнлы. Таквирот ла̄ви: – Сар та колн ялэ̄гум, ва̄йпатта пум юв тӯлэ̄гум. Тув щалтыс, ва̄йпатта пум атыматэ, ята, пӯипа̄лыл яныг э̄ква тыгле нэ̄глыс, ла̄ви: – Апа̄гикве, апа̄гикве, щалтэ̄тен, щалтэ̄тен. Юв щалтэн, ляпан йиен, а̄нумныл ул пилэн. Ам хӯрум пыг о̄ньще̄гум, ань ня̄враманум алыщлэ̄гыт. Йиен ам пуӈкум кинсэ̄лын. Ань а̄ги ювле ла̄ви: – Ам тыса̄вит ня̄рал, мольщаӈыл ю̄нтуӈкве майве̄сум, хумус кинсэ̄гум, а̄нумн ю̄нсхатуӈкве э̄ри. Яныг э̄ква ла̄ви: – Наӈ мощщан ӯнтылматыглэн, пуӈкум мощ кинсэ̄лын. А̄ги я̄ртхатас, яныг э̄ква пуӈке сунсуӈкве ат тахмаястэ. Ята вос, э̄ква конква̄лыс, сысы та минас. А̄ги такке̄т хультыс. Ань щёвал кӯр сыспа̄лт сунсыглахты, э̄льм пӯт хо̄нтыс. Э̄льм пӯт хо̄нтыс, таквирот ла̄ви: – Ня̄рат ос мольщаӈыт ю̄нтмилыт тыгыл ханлыянум ке, молях а̄стэ̄гыт. Ята, молямтахтым ю̄нтмилыт ханлысанэ. Ня̄ранэ, мольщаӈанэ та а̄стысыт. Тувыл ань э̄типа̄лаг е̄мтыс, хум ма̄хманэ юв та ёхтысыт. А̄ӈкватасыт, акваг ня̄рат, мольщаӈыт а̄стым о̄лэ̄гыт. Тувыл та, э̄т хуясыт. Ань а̄лпылыг е̄мты, ня̄раныл, мольщаӈаныл но̄хмаснэ̄ныл мус ла̄кквакӯлатэ̄гыт, ю̄нтмилыт э̄льмын ат пувавет. Ань а̄ги кон та ня̄влувес. Хотталь минас, тавагт. Ань э̄кваго̄йкаг кит а̄гияге̄н хультсы̄г, ос котля а̄гитэ̄н витын ке̄тытэ̄н, ла̄ве̄г: – Котля а̄ги, наӈ витын ялэ̄н. Увщин хотталь минас, иӈ ты а̄тим. Наӈ вит тотэ̄н. Ань котля а̄ги витын та минас. О̄с аквтыхольт ӯйрищакве ля̄льт хо̄нтыс. Юил та ня̄влытэ, кос пувумтытэ, о̄с э̄л тыламлы. Вит ва̄тан ёхтыс, вит ве̄траге а̄мартасаге но̄халмысаге, ӯйрищакве ве̄траге кит па̄лаге̄т тыглетувле исапа̄нтым та исгащлы. Вит ве̄траге оссувласаге, ӯйрищ юипа̄лыл та ня̄вылхатас. Вит тотын йӣвыл ты кос ю̄ныгтытэ, о̄с э̄л тыламлы. Тащир ня̄влыматэ, во̄рн акваг та минас. Во̄рт ё̄ми, ня̄влытэ. Аквматэ̄ртн, сунсы, ха̄ссытым, та̄ӈквитым кол ӯнлы. Та колн ёхтыс. Ань ӯйрище хотталь тыламлам, а̄тим. Воссыг хоталь мины, юв щалтыс. Юн хӯрум хум ӯнлэ̄гыт. Яныгнув каӈканыл ла̄ви: – Щалтэн, щалтэн, йиен, йиен, па̄гйиен. Ма̄н алыщлым о̄лэ̄в. Ня̄ранув хотхоласыт, мольщаӈанув хотхоласыт. Ма̄навн ня̄ра ю̄нтэн, мольщаӈ ю̄нтэн. Хӯрум ня̄ра та̄гыл кот о̄ньще̄в, хӯрум мольщаӈ та̄гыл совыт о̄ньще̄в. Ма̄н во̄рн минэ̄в. Во̄рт ялнэ̄в сыс наӈ ня̄рат ос мольщаӈыт ю̄нтэ̄н, вос а̄стэ̄гыт. Тувыл ма̄хманэ масхатасыт, во̄рн та минасыт. Во̄рн минасыт. А̄ги таквирот ла̄ви: – Со̄рни яныг То̄рум, тыса̄вит ня̄ра, мольщаӈ, акв хо̄тал сыс хумус ю̄нтумтыянум? Тувыл ань конква̄лыс. Кон ё̄ӈхатахтыглыматэ, сунсы, мощ э̄лыннув о̄с ха̄ссытым, та̄ӈквитым кол ӯнлы. Таквирот ла̄ви: – Сар та колн ялэ̄гум, ва̄йпатта пум юв тӯлэ̄гум. Тув щалтыс, ва̄йпатта пум атыматэ, ята, пуипа̄лыл яныг э̄ква тыгле нэ̄глыс ос ла̄ви: – Апа̄гикве, апа̄гикве, щалтэ̄тен, щалтэ̄тен. Юв щалтэн, ляпан йиен, а̄нумныл ул пилэн. Ам хӯрум пыг о̄ньще̄гум, ань ня̄враманум алыщлэ̄гыт. Йиен, ам пуӈкум кинсэ̄лын. Ань а̄ги ювле ла̄ви: – Ам тыса̄вит ня̄рал, мольщаӈыл ю̄нтуӈкве майве̄сум, хумус кинсэ̄гум, а̄нумн ю̄нсхатуӈкве э̄ри. Яныг э̄ква ла̄ви: – На̄ӈ мощщан ӯнтылматыглэ̄н, пуӈкум мощ кинсэ̄лын. А̄ги я̄ртхатас, яныг э̄ква пуӈке сунсуӈкве ат тахмаястэ. Ята вос, э̄ква конква̄лыс, сысы та минас. А̄ги такке̄т хультыс. Ань щё̄вал кӯр сыспа̄лт сунсыглахтыматэ э̄льм пӯт хо̄нтыс, таквирот ла̄ви: – Ня̄рат ос мольщаӈыт ю̄нтмилыт тыгыл ханлыянум ке, молях а̄стэ̄гыт. Ята, молямтахтым ю̄нтмилыт ханлысанэ, ня̄ранэ, мольщаӈанэ та а̄стысыт. Тувыл ань э̄типа̄лаг е̄мтыс, хум ма̄хманэ юв та ёхтысыт. А̄ӈкватасыт, акваг ня̄рат а̄стым о̄лэ̄гыт, мольщаӈыт а̄стым о̄лэ̄гыт. Тувыл та, э̄т хуясыт. Ань а̄лпылыг е̄мты, ня̄раныл, мольщаӈаныл но̄хмаснэ̄ныл мус, ла̄кквакӯлатэ̄гыт, ю̄нтмилыт э̄льмын ат пувавет. А̄ги кон та ня̄влувес, хотталь минас, тавагт. Ань э̄кваго̄йкаг ма̄нь а̄гитэ̄н хультыс. Ос ма̄нь а̄гитэ̄н витын ке̄тытэ̄н, ла̄ве̄г: – Ма̄нь а̄ги, наӈ витын ялэ̄н. Увщин хотталь минас, иӈ ты а̄тим. Наӈ сакати вит тотэ̄н. Ань ма̄нь а̄ги витын та минас. О̄с аквты хольт ӯйрищакве ля̄льт хо̄нтыс, юил та ня̄влытэ, кос пувумтытэ, о̄с э̄лтыламлы. Вит ва̄тан ёхтыс, вит ве̄траге а̄мартасаге, но̄ха̄лмысаге, ӯйрищакве ве̄траге кит па̄лаге̄т тыглетувле исапа̄нтым та исгащлы. Вит ве̄траге оссувласаге, ӯйрищ юипа̄лыл та ня̄вылхатас. Вит тотын йӣвыл ты кос ю̄ныгтытэ, о̄с э̄лтыламлы. Тащир ня̄влыматэ, во̄рн акваг та минас. Во̄рт ё̄ми, ня̄влытэ. Аквматэ̄ртн сунсы, ха̄ссытым, та̄ӈквитым кол ӯнлы. Та колн ёхтыс. Ань ӯйрище хотталь тыламлам, а̄тим. Воссыг хоталь мины, юв щалтыс. Юн хӯрум хум ӯнлэ̄гыт. Яныгнув каӈканыл ла̄ви: – Щалтэн, щалтэн, йиен, йиен, пагйиен. Ма̄н алыщлым о̄лэ̄в. Ня̄ранув хотхоласыт, мольщаӈанув хотхоласыт. Манавн ня̄ра ю̄нтэн, мольщаӈ ю̄нтэн. Хӯрум ня̄ра та̄гыл кот о̄ньще̄в, хӯрум мольщаӈ та̄гыл совыт о̄ньще̄в. Ма̄н во̄рн минэ̄в. Во̄рт ялнэ̄в сыс наӈ ня̄рат ос мольщаӈыт ю̄нтэ̄н, вос а̄стэ̄гыт. Тувыл ма̄хманэ масхатасыт, во̄рн та минасыт. Во̄рн минасыт. А̄ги таквирот ла̄ви: – Со̄рни яныг То̄рум, ты са̄вит ня̄ра, мольщаӈ акв хо̄тал сыс хумус ю̄нтумтыянум? Тувыл ань конква̄лыс. Кон ё̄ӈхатахтыглыматэ, сунсы, мощ э̄лыннув о̄с ха̄ссытым, та̄ӈквитым кол ӯнлы. Таквирот ла̄ви: – Сар та колн ялэ̄гум, ва̄йпатта пум юв тӯлэ̄гум. Тув щалтыс, ва̄йпатта пум атыматэ, ята, пӯипа̄лыл яныг э̄ква тыгле нэ̄глыс ос ла̄ви: – Апа̄гикве, апа̄гикве, щалтэ̄тен, щалтэ̄тен, ляпан йиен, а̄нумныл ул пилэн. Ам хӯрум пыг о̄ньще̄гум, ань та̄н алыщлэ̄гыт. Йиен ам пуӈкум кинсэ̄лын. Ань а̄ги ювле ла̄ви: – Ам тыса̄вит ня̄рал, мольщаӈыл ю̄нтуӈкве майве̄сум, хумус кинсэ̄гум, а̄нумн ю̄нсхатуӈкве э̄ри. Яныг э̄ква ла̄ви: – Наӈ кинсэ̄лын, ам наӈын ос нё̄тылум. Тувыл ма̄нь а̄ги а̄кве пуӈке кинсуӈкве та ӯнтыс. Та̄кум хо̄нты, щанасы, мольщаӈ хота̄сты. О̄с та̄кум хо̄нты, щанасы, о̄с мольщаӈ хота̄сты. Тувыл пуӈке ос та кинсытэ. Са̄ныг хо̄нты, щанасы, ня̄ра а̄сты. О̄с са̄ныг хо̄нты, щанасы, о̄с ня̄ра а̄сты. Тыщир ня̄ранэ, мольщаӈанэ пуссын та а̄стыпасыт, яныг э̄ква ла̄ви: – Яты, а̄гикве, пуӈкум та кинсыслын, ань а̄нумн татем кӯпнит е̄мтыс. Наӈ ос ня̄ранын, мольщаӈанын а̄стысыт. Моще̄ртын ма̄хманын ёхтэ̄гыт, ам минэ̄гум. Тувыл а̄кве та минас. Ань э̄типа̄лаг е̄мтыс, хум ма̄хманэ юв та ёхтысыт. А̄ӈкватасыт, ня̄рат, мольщаӈыт а̄стым о̄лэ̄гыт. Э̄т хуясыт. А̄лпыл ня̄раныл, мольщаӈаныл но̄хмасэ̄гыт, ёмас, ла̄кква ат кӯлатэ̄гыт. Масхатасыт, во̄рн та минасыт. Мощ о̄лсыт, ювле лэ̄ӈныл, нё̄хсыл та̄глыӈ э̄нтапыл ёхтысыт. Яныг каӈканыл а̄ги нупыл ла̄ви: – Ань ща̄нин, а̄щин палт пӯри ва̄руӈкве минэ̄в. Хотьют наӈ сымын хо̄и, таве о̄йкаг вуе̄лын. Ята минасыт, ха̄йталахтасыт. Та нёхыс э̄нтапыӈ хумит ань ты мус о̄лэ̄гыт, ань ты мус щуне̄гыт. Ты мо̄йт М. С. Мерова мо̄йтыстэ, нэ̄пакн Николай НИКИТИН хансыстэ.

1104 2015. 07. 24. Светлана РОМБАНДЕЕВА

Ня̄врамыт э̄тпостем ӯщлахтасыт Ханты-Мансийск ӯст о̄лнэ «Лылыӈ со̄юм» ня̄врам ханищтан колт лӯпта э̄тпост лагерь рӯпитас. Ня̄врамыт э̄тпостем ӯщлахтасыт, ханищтахтасыт, ёнгасасыт, ка̄тыл са̄всыр пормасыт ма̄щтырласыт, ӯст о̄лнэ музеитн тотыглаве̄сыт. Тувыл хунь хо̄таланыл оигпаӈкве патсыт, татем пӯмыщ концерт суссылтасыт – пыгрищит са̄ӈквылтапыл ёнгысыт, а̄гирищит ма̄ньщи ос ханты йӣкв йӣквсыт, сценкат суссылтасыт. Та̄н ётаныл рӯпитам хо̄тпат а̄гирищитн ос пыгрищитн са̄в ёмас, сымыӈ ла̄тыӈ ла̄всыт, ка̄сыӈ ня̄врам мӯйлупсал майвес.

1105 2015. 08. 14. Людмила ТЕТКИНА

Кӯщай нэ̄ Ягримт сапра̄ни ва̄рыглас Округ губернатор Наталья Комарова Ха̄льӯс районын ялме порат Ягримт о̄лнэ ма̄хум ёт хо̄нтхатыглас. Сапра̄нит 60 арыгкем э̄лумхо̄лас о̄лыс. Яныг кӯщай нэ̄н та̄рвитыӈ ва̄рмаляныл урыл потыртаӈкве Приполярный, Светлый, А̄нъя ос Восыӈтӯр па̄вылныл ма̄хум ёхталасыт. Ягрим па̄вылт о̄лнэ хум Дмитрий Чесноков ты сапра̄нин о̄с ялыс. Ма̄ньлат хум акв э̄рнэ тэ̄ла урыл Наталья Комарован потыртас. Тав ла̄выс, па̄вылт акв яныг склад о̄лы. Хосат та̄гыл та яныг кол тэ̄ла та̄л ӯнлы, Дмитрий Чесноков ня̄врамыт ос ма̄ньлат хо̄тпат ма̄гсыл тот каснэ кол ва̄руӈкве таӈхи. Тамле кол рӯпитаӈкве ке паты, а̄гирищитпыгрищит спортыл пӯмщалахтуӈкве тах патэ̄гыт. Наталья Комарован ты тэ̄ла сака мӯстыс. Тав ювле ла̄выс, ты э̄лыпа̄лт ты кол ёмащакв сунсыглаӈкве ос уральтаӈкве э̄ри, ня̄врамыт ма̄гсыл тамле кол ва̄руӈкве тот ро̄ви ман а̄ти. Ты рӯпата ма̄гсыл олн миӈкве ла̄вхатас. Дмитрий Чесноков ла̄выс: «Олныл ке миве̄в, ам ты ва̄рмаль хосыт э̄лаль рӯпитаӈкве тах патэ̄гум. Ягримт о̄лнэ ма̄ньлат хо̄тпанув ос ня̄враманув вина нупыл ос мо̄т лю̄ль пищ нупыл ул вос сунсэ̄гыт ос касуӈкве ты колн вос ёхталэ̄гыт». Сапра̄нит о̄лум ма̄хум та̄нки та̄рвитыӈ ва̄рмаляныл урыл Наталья Комарован потыртасыт. Та̄н яласан лё̄ӈх урыл, ре̄г, вит ма̄гсыл ойтхатнэ ва̄рмалит ос са̄в мо̄т тэ̄лат урыл китыглахтасыт. Кӯщай нэ̄ ты та̄рвитыӈ ва̄рмалит та̄ра тах паттыянэ. Округ кӯщай прессслужбатэ ке̄тум ля̄ххал ма̄ньщи ла̄тӈыл Людмила Алгадьева хансыстэ.

1105 2015. 08. 14. Людмила ТЕТКИНА

Ма̄щтыр хо̄тпат халанылт кассыт Ты та̄л губернаторув Наталья Комарова ма̄н округувт о̄лнэ соссаӈ ма̄хум пе̄с йис ва̄рмаляныл э̄лаль тотнэ та̄лыг намаястэ. Ос та̄н ма̄гсыланыл са̄всыр ялпыӈ хо̄талыт, касылыт, ханищтапыт, фестивалит ва̄рыглаӈкве ла̄выс. Я̄ӈк на̄тнэ э̄тпост Президент па̄лт рӯпитан кӯщай хум Игорь Холманских ёт тав акванхо̄нтхатыглас ос ты тэ̄ла урыл потыртас. То̄нт Наталья Комарова кӯщай хумн ла̄выс, соссаӈ ма̄хум пе̄с йис наканыл э̄лаль тотнэ ма̄гсыл «Славим человека труда» нампа конкурс о̄с акв номинациял ва̄руӈкве э̄ри. Игорь Холманских хумн ты ва̄рмаль сака мӯстыс ос ма̄щтыр ма̄хум халт касыл ва̄рыглаӈкве ла̄выс. Тамле касыл 2011 та̄лт Свердловский областит ва̄руӈкве о̄вылтавес. Ань Уральский округувт са̄всыр рӯпата ва̄рнэ ма̄хум та̄нки халанылт 13 номинация щирыл касэ̄гыт. То̄нт са̄лы манос хӯл совныл са̄всыр пормас ю̄нтнэ хо̄тпат, сасныл са̄всыр хусапыт ва̄рнэ ма̄хум ос йӣвныл са̄всыр а̄ньщарыт ёргын хо̄тпат хӯрум касылыл ва̄рве̄сыт. Ты юипа̄лт Уральский округув янытыл о̄лнэ ма̄щтыр хо̄тпат та̄нки о̄лнэ ма̄нанылт халанылт касуӈкве патсыт. Ма̄н округувт ма̄щтыр ма̄хум та̄нки халанылт о̄с кассыт. Округ янытыл 20 э̄лумхо̄лас та̄нки рӯпатаныл Ханты-Мансийск ӯсн ке̄тыгласаныл. Жюрихо̄тпат та̄н халанылт хӯрум ма̄щтыр хо̄тпат пе̄риясыт. Нижневартовский район Аган па̄вылныл о̄лнэ ханты нэ̄ Татьяна Семёновна Уколова но̄хпатыс. Тав са̄сныл совтыт, па̄йпыт са̄всыр а̄ныт ос хусапыт ва̄руӈкве сака ма̄щтырыг ха̄сы. Нягань ӯст о̄лнэ о̄йка Александр Иванович Синицын йӣвныл са̄всыр аныт ос мо̄т пормасыт якты, тав о̄с овыл местал майвес. Сургут ӯст о̄лнэ нэ̄ Надежда Фёдоровна Павлова са̄лы ос хӯл совныл са̄всыр пормасыт ю̄нты, тав ос о̄выл места вис. Ты хӯрум хо̄тпат во̄ртур э̄тпос 9 щислат мо̄т мащтыр махум ёт касуӈкве Ханты-Мансийск ӯсн во̄виньта̄лве̄сыт. Ма̄ньщиянув та̄нки рӯпатаныл ты касылн о̄с ке̄тыгласаныл. Сургут ӯст о̄лнэ хум Александр Дмитриевич Сайнахов йӣвныл ёргим пормасанэ тув майлысанэ. Тав туп хӯрмит местал майвес, тыи ма̄гсыл э̄лаль касуӈкве ат во̄ввес. О̄влэ̄т ла̄ввес, ты конкурсыт туп соссаӈ ма̄хум касуӈкве патэ̄гыт. Ма̄н округувт о̄лнэ ма̄ньщит, хантыт ма̄щтырлаӈкве пуссын ха̄сэ̄гыт. Тувыл са̄всыр мо̄т ма̄хум тот касуӈкве тув во̄ратасыт ос кит номинацият рущ хо̄тпаг нохпатсы̄г. Тыщирыл соссаӈ ма̄хманув по̄хыт та хультсыт.

1105 2015. 08. 14. Валентина УЗЕЛЬ

Ха̄льӯс районт ма̄хум са̄кконыт о̄с хансэ̄гыт Округ кӯщаюв Наталья Комарова Ха̄льӯсн ялме порат район дума депутатыт ёт хо̄нтхатыглас. Ты та̄л районный дума рӯпитанэ̄тэ па̄сныл 20 та̄лэ то̄влыс. Округ кӯщай нэ̄ депутатма̄хумн тох ла̄выс, Ха̄льӯс район бюджетэ 3 млрд. солко̄ви са̄витыг о̄лы. Са̄выӈпа̄лэ ты олныт округ бюджетныл та̄ставет. 570 млн. солко̄ви са̄вит та̄н налоголныл туп атэ̄гыт. Ос э̄лаль хотмус округ бюджетныл олн ӯруӈкв ат э̄ри, та̄нти сэ̄лым олнытыл вос о̄лэ̄гыт. Тувыл депутатыт ла̄всыт, Ха̄льӯст товлыӈха̄пыт ёлиснэ ма̄ округ нупыл вос хансаве, таве акваг ёмащакв щё̄питаӈкве э̄ри. Ос олн а̄тим. Та районт ма̄нь па̄влыт мус туп вертолётыл ман товлыӈха̄пыл минуӈкв ро̄ви, воссыг нэ̄мхотмус. Хӯл алыщлан рӯпата урыл о̄с мощ потыртасыт, ань хӯл пувнэ ма̄гыс квотанэ̄пакыт сака лю̄льсаӈ мивет. Тот о̄лнэ ма̄хум са̄внув хӯл пувуӈкв вос та̄ртавет. Округ кӯщай прессслужбаныл те̄тым ля̄ххал ма̄ньщи ла̄тӈыл В. Хозумова хансыстэ.

1105 2015. 08. 14. Николай МЕРОВ

Са̄внув хӯл пувуӈкв та̄ртаве Ха̄льӯс район Ягрим па̄вылт тав округ кӯщай нэ̄ Наталья Комарова ёт потыртаӈкве 250 са̄виткем хо̄тпа ёхталас. Та̄н ётаныл тав хо̄тахкем щё̄с потрамас. Ма̄хум са̄выӈпа̄лэ ялнэминнэ лё̄ӈхыт урыл китыглахтасыт. Ягримт о̄лнэ нэ̄ Елена Запорожец ла̄выс, Приобье причалыл вокзал мус минуӈкве та̄рвитыӈыг е̄мтыс. Са̄ртын ма̄хум сохтыл ке̄рлё̄ӈх ӯлтта ё̄мсыт. Ань лю̄ль нак ул вос е̄мтыс, та лё̄ӈх лаппантвес, ӯлтта ё̄муӈкве ма̄хум ат та̄ртавет. Хунтхӯргыӈ та̄гыл мувлахи ё̄муӈкве ос сака хоса. Лё̄ӈхыт ва̄рнэ департамент кӯщай ва̄ӈын хум Константин Масраков ла̄выс, ке̄рлё̄ӈх ӯлтта ӯнсах 2017 та̄л мус ва̄раве тах. Ань ос ты накт причал ма̄ныл вокзал мус автобус ма̄хум тыглетувле тотыглаӈкве паты. Са̄внув рейс э̄рмыглы ке, та̄н ты ва̄рмаль щё̄питэ̄гыт. Ты коныпал кӯщай нэ̄ ла̄выс, Нярихуми Лӯи па̄вылныл Ягрим мус ос са̄внув автобус яласаӈкве паты. Нярихуми Лӯи па̄выл на̄лми ва̄тат дебаркадер ӯнттувес. Ма̄хум ань колнакт ӯнлахо̄лым «Метеор» ӯруӈкве ве̄рме̄гыт. Ха̄льӯс районт ма̄хум пе̄с йис та̄гыл хӯл алыщлым ос во̄раим о̄лэ̄гыт. Таима̄гыс са̄выӈпа̄лэ хо̄тпат хӯл алыщлан ва̄рмаль урыл китыглахтасыт. Наталья Комарова Россия сельский хозяйство министр ёт ос хӯл алыщлан ва̄рмаль щирыл рӯпитан кӯщай ёт потрамас. Тэ̄н ла̄вхатсы̄г, хӯл алыщлан ма̄гыс квотанэ̄пакыт тах ке̄тэ̄г. Тыи ос мо̄т та̄рвитыӈ ва̄рмалит урыл па̄влыӈ ма̄хманув кӯщай ёт ты потыртасыт. Округ кӯщай прессслужбатэ ке̄тум ля̄ххал ма̄ньщи ла̄тӈыг Николай МЕРОВ хансыстэ.

1105 2015. 08. 14. Валентина УЗЕЛЬ

Пувласпи а̄гм о̄щнэ хо̄тпат ма̄гыс ля̄ххал Та э̄тпосныл ма̄н округувт яныг кӯщаиг рӯпитан ма̄хум ла̄вве̄сыт – та̄н пувласпи а̄гм (рак IV стадия) о̄щнэ ма̄хумн акваг вос нё̄тэ̄гыт. Ань ты ва̄рмаль акваг уральтаӈкв патаве. Ты рӯпата таима̄гыс о̄вылтавес, пувласпи а̄гм (рущ ла̄тӈыл «рак» нампа а̄гм) о̄щнэ ма̄хум э̄рнэ тэ̄рпил са̄т хо̄тал сыс туп ат хо̄талн майлуве̄сыт. Ос ӯщлахтын хо̄тал порат та̄н та̄нти а̄гманыл ёт юн сака саваласыт. Ты тэ̄рпит а̄гмыӈ хо̄тпан ка̄сыӈ хо̄тал миӈкв э̄ри. Хо̄тпа тэ̄рпи та̄л те хульты, тав а̄гме̄н щар о̄лнэ накыл ат миве. Са̄в хо̄тпа ты хосыт та̄нтина̄ныл холтсаныл, воссыг ве̄ритаӈкв ат ве̄рмысыт, э̄лаль о̄лнэ ё̄р ат о̄щсыт. Мощ мо̄лтынув Москва ӯст Государственный Думат яныг сапра̄ни ва̄рыглавес, та̄н ань ты яныг ос та̄рвитыӈ ва̄рмаль урыл потыртасыт – пувласпи а̄гм о̄щнэ ма̄хум хумус нё̄туӈкв э̄ре̄гыт. Ка̄сыӈ регион та̄н хӯлтнэ нэ̄пакыл те̄тсаныл, маныр рӯпата та̄нанылн ва̄руӈкв э̄ри. Ма̄н округувт а̄гмыӈ хо̄тпан нё̄тнэ ма̄гыс ань тамле рӯпата о̄вылтавес: – округув янытыл 22 пӯльницат рӯпитан ма̄хум а̄гмыӈ хо̄тпат ляпа рӯтаныл ханищтаӈкв патыяныл, хумус таит тэ̄рпил миӈкв э̄ри, нё̄туӈкв ос тыттуӈкв хумус э̄ре̄гыт. – а̄гмыӈ хо̄тпат номтаныл ёмасыг вос о̄лсыт, психологле̄ккар юв ёхталаӈкв паты; – юристхо̄тпа э̄рмыглы те, та̄н о̄с юв ёхталаӈкв патэ̄гыт; – э̄рнэ тэ̄рпит ман мо̄т э̄рнэ пормасыт пуссын юв тотуӈкв патавет, ляпа рӯтанылн нэ̄матыр ёвтуӈкв, нэ̄матыр тинсуӈкв ат э̄ри; – а̄гмыӈ хо̄тпа рӯтанэ о̄с нё̄туӈкв патавет, ты нё̄тмил «социальный защита управление» па̄лыл ва̄руӈкв патаве. Ань Россия янытыл ос округувт «Горячая линия» нампа телефоныг ва̄рвесы̄г. Матыр ва̄рмаль те е̄мты манос пувласпи а̄гм о̄щнэ хо̄тпа хотмус нё̄туӈкв те э̄ри, та̄ра тув свонитэ̄н. 8-800-500-18-35 – ты Россия «Федеральный служба по надзору в сфере здравоохранения» тав телефонэ; 8-800-100-86-03 – ты телефон ма̄н округувт рӯпитаӈкв паты, «Медицинский информационноаналитический центр» тав телефонэ. Мир пусмалтан департаментныл те̄тым ля̄ххал ма̄ньщи ла̄тӈыл В. Хозумова хансыстэ.

1105 2015. 08. 14. Николай МЕРОВ

Хӯлыт ёмщакв па̄йтэ̄н, солвалтэ̄н Ты э̄тпос о̄выл хо̄талэ̄т округ ле̄ккар хо̄тпат хӯл урыл потыртасыт, маныр а̄гм та̄н тотэ̄гыт ос манрыг пусмалтахтуӈкве э̄ри. Я̄ хӯлыт хосыт описторхоз а̄гм е̄мты. Ка̄сэв, щапак, тӯрхул ос мо̄т тамле хӯлыт палт ты а̄гм о̄лы. Тамле хӯлыт ня̄рыг, лю̄льсаӈ па̄йтым ос мощща солвалтым тэ̄пъялан порат хо̄тпа ма̄йтэ̄т ӯит та ква̄лапе̄гыт. Ётыо̄вылт ты хосыт та̄рвитыӈ рака̄гм е̄мтуӈкве ве̄рми. Ос лӯима̄т о̄лнэ ма̄хум номсэ̄гыт, та̄нанылн ты а̄гм пусмалтаӈкве ат э̄ри. Э̄рттам таве̄н нэ̄матыр лю̄ль ат е̄мты. Ле̄ккарыт ос ла̄ве̄гыт, ты а̄гм та̄ра ат ке пусмалтаӈкв, ма̄йтыт о̄лнэ ӯит са̄вмуӈкве патэ̄гыт. Ань ты а̄гм пусмалтан ма̄гыс ёмас тэ̄рпи ва̄рвес. Ты тэ̄рпит, хо̄тпа ма̄йтэ пусмалтан порат, лю̄ль ва̄рмаль ат тотэ̄гыт. Ма̄хумаквет, на̄н ос на̄нкина̄н ёмас ва̄ре̄н, пӯльницан ва̄тихал уральтахтуӈкве ялэ̄н. Медицина ос профилактика Центрыт рӯпитан ма̄хум ке̄тум ла̄тыӈ ма̄ньщи ла̄тӈыг Николай МЕРОВ хансыстэ.

1105 2015. 08. 14. Людмила ТЕТКИНА

На̄йпос, ре̄г ос вит ма̄гсыл ойтхатнэ урыл Общественный палата Ханты-Мансийск ӯст сапра̄ни ва̄рыглас, ма̄хум ре̄г, вит, на̄йпос ма̄гсыл ойтхатнэ ва̄рмаль урыл тот потыртасыт. Округув янытыл о̄лнэ ма̄хум ва̄тихал ты тэ̄ла урыл пищма Общественный палатан хансыглэ̄гыт. Ты та̄лт тот общественный совет ва̄рвес, тув пе̄риим хо̄тпат ЖКХ тэ̄ла хосыт ань акваг рӯпитаӈкв патэ̄гыт. Ма̄хум округ янытыл сапра̄нин во̄виньта̄лве̄сыт. Па̄влытт манос ӯсытт манхурип та̄рвитыӈ ва̄рмалит о̄лэ̄гыт, та урыл потыртасыт. Юрий Новицкий, Ханты-Мансийский район общественный советыт рӯпитан хум, ты урыл о̄с потыртас. Тав ла̄выс, ань та район янытыл о̄лнэ мир ре̄г, на̄йпос, вит ма̄гсыл лю̄льсаӈ ойтхатэ̄гыт. Тыи ма̄гсыл то̄ва компаният мӯсхалыг рӯпитаӈкве ат ве̄рме̄гыт. Ань ще̄мьят коланыл ёмащакв щё̄питан ма̄гсыл олн ойтэ̄гыт. То̄ват ты олн ойтуӈкве щар ат ка̄саще̄гыт. Хоты кол ос хунь ёмащакв щё̄питаӈкве э̄ри, ос манса̄вит олн тув холтаве, общественный советыт рӯпитан хо̄тпат ты урыл акваг потыртэ̄гыт. Нефтеюганск ӯст тамле общественный совет о̄с рӯпиты. Ӯст о̄лнэ ма̄хум пищма тув ва̄тихал хансыглэ̄гыт. Са̄ккон щирыл ка̄сыӈ ще̄мьян такви колэ̄т ре̄г, на̄йпос ос вит ма̄гсыл ойтхатнэ счётчик ва̄руӈкве э̄рыс. Та̄н тамле утыт ёвтсыт, коланылт ва̄рсыт. Тувыл та̄н э̄лаль счётчик та̄л са̄в олныл ловиньтавет. Тыщирыл ма̄хум урккуптавет. Мо̄т ӯсыт, па̄влыт ЖКХ ма̄хум хумус рӯпитэ̄гыт ос манхурип та̄рвитыӈ ва̄рмаль тот о̄лы, сапра̄нит ма̄хум о̄с потыртасыт.

1105 2015. 08. 14. Валентина УЗЕЛЬ

Тыг са̄внув мӯй ма̄хум вос ёхталы Ты э̄тпос о̄вылтахтан порат Кондинский районт фестиваль ва̄рыглавес. Ма̄н округувт туризм тэ̄лат щирыл рӯпитан ма̄хум та̄н тот акванатхатыгласыт. Ань ма̄н о̄лнэ ма̄вн са̄внув мир вос ёхталы, ты тэ̄ла э̄лаль тотнэ ма̄гыс о̄с ёмащакв рӯпитаӈкв э̄ри. Мо̄т ма̄ныл мӯйлуӈкв ма̄хум тыг ёхталаӈкв те патэ̄гыт, то̄нт туризм щирыл рӯпитан хо̄тпат са̄внув олн сэ̄луӈкв патэ̄гыт. Са̄в йильпи ӯщлахтын ма̄ тах щё̄питаве, ёмас лё̄ӈхыт тах пинавет. Ос ты рӯпата ва̄рнэ ма̄гыс округувт рӯпитан хо̄тпат ханищтаӈкв э̄ре̄гыт. Таима̄гыс ты та̄н ань о̄выл фестивальн акванатыглаве̄сыт. Мир пуссын «Леушинка» нампа турбазан тотве̄сыт. Ты турбаза ущты ӯнттувес, ущты рӯпитаӈкв о̄вылтахтас. Урай ӯсныл тув акв щё̄с арыгтем машинал минуӈкв э̄ри. Ма̄тэ сака ёмас, тот яныгман тарыг йӣвыт ёлы тованыл пуссын хотса̄груве̄сыт, ма̄тэ ёмащакв сыстамтавес. Ляпат я̄ ови, тот са̄в хӯл о̄лы. Тув ӯщлахтуӈкв ёхталан ма̄хум ма̄гыс пуссын щё̄питым о̄лы – о̄лнэ колыт, пувлын колыт, тэ̄нэ кол. Татем ёмащакв ва̄рима, улпыл таима̄гыс ма̄хум тот атыглаве̄сыт. Та̄н вос сунсэ̄гыт, хумус турбазат ӯнттуӈкв э̄ре̄гыт, маныр щё̄питаӈкв э̄ри. Ань ты фестиваль кастыл Кондинский район ка̄сыӈ па̄вылныл ма̄хум тув тотыглаве̄сыт, та̄н та̄нти па̄вланыл урыл суссылтап щё̄пита̄лыгласыт. Ка̄сыӈ па̄выл (ты Междуреченский, Луговой, Мортка, Половинка, Мулымья, Леуши, Болчары) та̄нки па̄влыӈ мир о̄лупсаныл урыл тот потыртасыт. Луговой па̄вылныл ёхталам ма̄хум та̄н сака пӯмыщ суссылтап ва̄рыгласыт – ка̄сыӈ хо̄тпа аквхотты мир маснутэ масыс, та мир ла̄тӈыл потыртас, та мир тэ̄нутыл мӯйлын ма̄хум тыттысанэ. Та̄н ма̄ньщи, рущ, хатань, еврей, узбек, таджик, украина мирыт маснутыт масыгласыт. Ка̄сыӈаныл потыртас, э̄ргыс манос йӣквыс. Хӯл алыщлан, во̄раян ва̄рмалит урыл потыртасыт. Таса̄вит ще̄рынка акванатмыт, выставкат суссылтасаныл. Половинка па̄влыӈ нэ̄ хо̄тпаг хӯл ӣсмит яныг путкапай па̄йтсы̄г, ма̄хум хӯлыл тыттысаныл, исмитыл пинсаныл. Та па̄вылт рӯпитан музей урыл потыртасыт. Ка̄сыӈ па̄выл урыл пӯмыщ хӯнтлуӈкв о̄лыс. Тувыл пуссын сапра̄нин та во̄вве̄сыт. Щар яныг кӯщаиг тот Александр Юрьевич Комиссаров о̄лыс, тав природный ресурс округ департаментыт кӯщай ва̄ӈын хо̄тпаг рӯпиты. Тав атхатам ма̄хумн ла̄выс, ма̄н округув о̄лнэ мир туризм щирыл э̄лаль ёмащакв вос рӯпитэ̄гыт, то̄нт тыт о̄лнэ ма̄хум о̄с ёмащаквнув тах о̄лмыгтэ̄гыт. Та̄н департаментанылт Татьяна Павловна Меркушина ялпыӈ ма̄т ӯргалан хо̄тпаг рӯпиты, рущ ла̄тӈыл ты ма̄т тох ла̄вавет – особо охраняемые территории. Тув о̄с турист ма̄хум тотыглавет. Мо̄т ма̄ныл ёхталан хо̄тпатн ма̄ньщи ос ханты мирыг пе̄с о̄лупсаныл урыл матыр ва̄ӈкв сака пӯмащ, таима̄гыс ты та̄н тув воратэ̄гыт, тув ялуӈкв сака таӈхе̄гыт. Ты нэ̄ ла̄выс, туризм тэ̄лат э̄лаль тотнэ ма̄гыс то̄ва са̄кконыт ёмащакв хансуӈкв э̄ре̄гыт. Та̄н ёмащакв рӯпитан урак ат мыгыт. Ос ма̄нти ма̄хманув туризм тэ̄лан ханищтаӈкв э̄ре̄гыт. Ань то̄ва мӯй хо̄тпат тыг ёхталанэ̄ныл порат ёмас колт о̄луӈкв таӈхе̄гыт, маныр э̄ри, пуссын кол тӣврыт вос олы. Ос акв тамле ва̄рмаль осннэ̄глыс – мо̄т ма̄ныл тыг ёхталаӈкв ка̄сащан хо̄тпат интернет хосыт тисхатэ̄гыт. Ос пуссын турбазат, са̄всыр мо̄т ӯщлахтын ма̄т тот хансым ат о̄лэ̄гыт. Та̄наныл акв ма̄н хансуӈкв э̄ре̄гыт, хо̄тпат та̄ра вос хо̄нтыяныл. Мо̄т ва̄рмаль ос тамле – туризм щирыл рӯпитан ма̄хум сака са̄в олн мӯй хо̄тпаныл выгыт. Ос та̄нти ӯщлахтан ма̄наныл ёмащакв ат щё̄питыяныл, э̄рнэ ут а̄тим, машина а̄тим. Тох рӯпитаӈкв, ва̄им, ат ро̄ви. Ты сапра̄ни о̄лум порат «Леушинка» нампа турбаза кӯщай хум Юрий Георгиевич Костылев сака э̄сгувес. Со̄ль, ты ӯщлахтын ма̄ тав сака ёмащакв ва̄рме. Тав потыртаме порат та̄рапатыс, о̄йка нэ̄матыр олн кӯщайныл ат во̄выс, такви олнанэ холтсанэ. Ты урыл тав тох ла̄выс: – Ань ты турбаза о̄лнэ ма̄тэ̄т пе̄с порат тыт лесопункт о̄лыс, во̄р тот са̄грувес. А̄тям тот кӯщаиг о̄лыс. Ам тав ляпатэ̄т акваг о̄лсум. Яныгмасум, институт а̄стласлум. Юв ёхтысум. То̄нт во̄р тыт са̄груӈкв по̄йтсыт. Ам номтыл ёхтуве̄сум, ты ма̄ амти нупылум хансылум ос ӯщлахтын ма̄ тыт ва̄ре̄гум. Са̄всыр кӯщаитн пищмат хансуӈкв патсум, тувыл ла̄тыӈ ёхтыс – та ма̄ 25 та̄лн арендан виӈкв ве̄рмилум ос тыт ӯщлахтын ма̄ ӯнттуӈкв ро̄ви. Амти олнанумтыл тыт колыт ӯнттысанум, ма̄тэ сыстамтаслум, яныг пусас ва̄рсум. Ань ма̄хум тыг ёхталаӈкв сака ка̄саще̄гыт. То̄ват а̄нумн ла̄ве̄гыт, наӈ олныл ул кӯщаитн майве̄сын, та яныт турбазакапай ӯнттыслын. Ам ювле ла̄ве̄гум, нэ̄мхотьют а̄нумн олн ат майлас, нэ̄мхотьют а̄нумн ат нё̄тыс. Рӯпата пуссын амти ва̄рсанум. Тох ты о̄лэ̄в ос рӯпитэ̄в. Хо̄тпа такви рӯпитаӈкв те ка̄сащи, таве̄н нэ̄матыр торас а̄тим, пуссын ва̄ри. Тамле ты тав ка̄ркам о̄йка. Ка̄сыӈ хо̄тпа тох рӯпитаӈкв те паты, то̄нт, со̄ль, ма̄н округувн са̄внув мир ёхталалуӈкв патэ̄гыт.

1105 2015. 08. 14. Валентина УЗЕЛЬ

Каснэ ма̄хум янытлан хо̄тал Ты э̄тпос 8 хо̄талэ каснэ ма̄хум янытлан хо̄талыг о̄лы. Ты кастыл Ханты-Мансийск ӯст ялпыӈ хо̄тал ва̄рыглавес, рущ ла̄тӈыл ла̄ввес – день физкультурника. Касуӈкв ханищтахтын ня̄врамыт, спортсменхо̄тпат, нас каснэ хо̄тпат пуссын акванатхатыгласыт. Та̄наныл янытлан ма̄гыс яныг кӯщаит ёхталасыт. Та юипа̄лт ма̄хум та̄нти халанылт касуӈкв та о̄вылтахтасыт. Ханты ос ма̄ньщи касылыт суссылтаве̄сыт, хум хо̄тпат та̄нти халанылт пе̄рщисыт. Ма̄нь ня̄врамыт велосипедыл миным кассыт. Сака са̄в мир ёхталас, татем пӯмыщ хо̄тал о̄лыс.

1105 2015. 08. 14. Людмила ТЕТКИНА

Соссаӈ мирыт янытлан хо̄тал о̄лыс Во̄ртур э̄тпос 9 щислат соссаӈ мирыт янытлан мирхал хо̄тал кастыл Ханты-Мансийск ӯст ялпыӈ хо̄тал о̄лыс. Та хо̄талэ̄т ӯскант «Город мастеров» нампа суссылтап рӯпитас. Са̄всыр ма̄ныл ёхталам ма̄щтыр хо̄тпат са̄всыр пормасыт, сувенирыт тыналасыт. Соссаӈ ма̄хум общинат хӯл, пил, ла̄хыс тыналаӈкве ёт тотыгласыт. Ка̄сыӈ э̄лумхо̄лас хӯл, нё̄выль ос мо̄т тэ̄нут ёвтуӈкве ве̄рмыс. Ня̄врамыт са̄всыр пӯмащ ёнгилыл ва̄рыглаве̄сыт, та̄н са̄лы сун ӯлтта поргысыт, тыньщаӈ па̄хвтысыт ос мо̄т щирыл кассыт. Акв та хо̄талэ̄т соссаӈ ма̄хум янытлан ма̄гсыл концерт о̄лыс, э̄ргын ос йӣквнэ хо̄тпат округ янытыл тыг ёхталасыт. Ты коныпал Москва ӯсныл ос Алтай ма̄ныл мӯй ма̄хум э̄ргуӈкве ос йӣквуӈкве во̄виньта̄лве̄сыт. Ялпыӈ хо̄тал о̄лум порат «Славим человека труда» нампа конкурс ма̄щтыр хо̄тпат ма̄гсыл ва̄рыглавес. Ма̄н округувт но̄хпатум хӯрум хо̄тпат Татьяна Уколова, Александр Синицын ос Надёжда Павлова ёт касуӈкве 12 э̄лумхо̄лас ёхталас. Та̄н та̄нки о̄лнэ ма̄т Ямалт, Свердловский, Курганский, Тюменский ос Челябинский областит о̄с о̄выл места висыт. Акват са̄сныл хусап ва̄рсыт, мо̄таныт йӣвныл та̄й ёргысыт ос хӯрум хо̄тпат хӯл манос са̄лы совныл тучаӈ ю̄нтсыт. Та̄н нила щё̄с рӯпитаӈкве туп ве̄рмысыт. Ты пора сыс хо̄тпа рӯпататэ ва̄руӈкве ат ке алымас, ювле та хультыс. Та̄н онтолов щё̄с порат рӯпитаӈкве о̄вылтахтасыт ос акв щё̄с порат пуссын а̄стысыт. Ты юипа̄лт жюри но̄хпатум хӯрум ма̄щтыр хо̄тпа пе̄риясыт. Яныг кӯщай нэ̄ Наталья Комарова соссаӈ ма̄хум ялпыӈ хо̄талыл ма̄щтыр хо̄тпат янытлаӈкве о̄с ёхталас. Тав та̄нанылн са̄в сымыӈ ла̄тыӈ ла̄выс. Йӣвныл са̄всыр пормасыт ёргын хо̄тпат халт Юрий Деняев о̄выл места вис. Тав Челябинский областиныл ёхталас. Са̄сныл са̄всыр хусапыт ва̄рнэ хо̄тпат халт ос тав пыге Владимир Деняев но̄хпатыс. Ос са̄лы манос хӯл совныл са̄всыр пормасыт ю̄нтум хо̄тпат халт Яков Салиндер, Ямалт о̄лнэ хум, о̄выл местал майвес. Акв та порат Юван Николаевич Шесталов премиял маим хо̄тпат янытлаве̄сыт. Тамле премиял соссаӈ мирыт пе̄с йис ва̄рмаляныл э̄лаль тотнэ ма̄хум мивет. Ты та̄л тамле олныл кит ма̄ньщи хо̄тпаг А̄с-угорский институтыт рӯпитан учёный нэ̄ Светлана Алексеевна Попова ос «Э̄лы хо̄тал» нампа общинат рӯпитан кӯщай нэ̄ Ольга Александровна Фомичёва майвесы̄г. Тэ̄натэ̄н янытлаӈкве Григорий Ледков, Россия янытыл о̄лнэ мощщаг хультум мирыт Ассоциацияныл кӯщай хум, Москва ӯсныл ёхталас.

1105 2015. 08. 14. Николай МЕРОВ

Йис ма̄т о̄лнэ ма̄хум нё̄тавет Ювле хультум э̄тпост соссаӈ мир округ Дума депутат нэ̄ Надежда Алексеева Ассамблеят сапра̄ни щё̄пита̄лыс. Тот та̄н йис ма̄ ӯргалан са̄ккон урыл потыртасыт. Ты ва̄рмаль щирыл ма̄вит ӯргалан департамент кӯщай Евгений Платонов тув о̄с во̄виньта̄лвес. Соссаӈ ма̄хманув манхурип нё̄тмилыл ва̄равет, на̄н тав потре э̄лаль ловиньтэлы̄н. – Ань юио̄выл та̄лытт пе̄с йис ма̄т са̄в соссаӈ ма̄хум та̄нки рӯпата ва̄руӈкве патсыт. Округ янытыл 2013-2014 та̄лыг сыс 1 со̄тыра 312 хо̄тпа йис ма̄т рӯпитэ̄гыт. Ань ты мус тот о̄лнэ ма̄хум пуссын аквъёт 4 со̄тыра 375 хо̄тпа е̄мтыс. Ма̄хум йис ма̄т акваг о̄лэ̄гыт, тот рӯпитэ̄гыт, олныл нё̄тавет. Ты та̄лт йис ма̄т рӯпитан ма̄хум ма̄гыс 21 миллион солко̄ви ойтвес. Яныгса̄т арыгтем хо̄тпа нё̄тмилыл ва̄рве̄сыт. Ты олнытыл соссаӈ ма̄хум моторха̄пыл, «Бураныл» ёвтве̄сыт ос мо̄т э̄рнэ тэ̄ла ма̄гыс олныл майве̄сыт. Ты олныт хумус холтавет, ма̄н ты ва̄рмаль ёмащакв уральтылӯв. Тувыл йис ма̄т колыт, а̄мпарыт ӯнттын ма̄гыс олн о̄с майлэ̄в. Хо̄тпа хӯл алыщлан ма̄тэ̄т манос во̄раян ма̄тэ̄т матыр кол ӯнттуӈкве таӈхи ке, ма̄н таве̄н о̄с нё̄тэ̄в. Маныр ӯнттуӈкве ро̄ви, э̄рнэ нэ̄пакт ты урыл хансым о̄лы. Ты хосыт йис ма̄т во̄ркол, пувлын кол, а̄мпар, сӯмъях ос са̄лы о̄щнэ пӯсас ӯнттуӈкве ро̄ви. Хотты хо̄тпа са̄лы ёвтуӈкве ке ка̄сащи, та̄н о̄с нё̄тавет. 2013 та̄лт хо̄тхуйплов хо̄тпа 51 са̄лыл ёвтве̄сыт. Ос та па̄сныл воссыг заявлениенэ̄пак нэ̄мхотьют ат хансыглас. Аман ма̄хум ты урыл нэ̄матыр ат ва̄гыт, аман мо̄т матыр рӯпата ва̄руӈкве патсыт. Кӯщай хум ла̄выс, во̄рт о̄лнэ соссаӈ ма̄хумн на̄йив щё̄питан ма̄гыс олн ойтуӈкве ат э̄ри. Тувыл та̄н во̄рт матыр ӯнттын ма̄гыс но̄р яктуӈкве ве̄рме̄гыт. Мо̄лты та̄л тыи ма̄гыс аквхуйплов миллион солко̄ви та̄стыглавес. Ты хосыт ва̄т нупыл хӯрум хо̄тпа нё̄тве̄сыт.

1105 2015. 08. 14. Николай МЕРОВ

Рӯпитан ма̄т уральтан хум Ань та̄л охса ювле хультыс, ты кастыл Ханты-Мансийск ӯст ля̄ххал тотнэ колн рӯпитан ма̄хумн нё̄тмил ва̄рнэ кӯщай Евгений Кривобоков во̄виньта̄лвес. Ань рӯпитан ма̄хум манырсыр нё̄тмил во̄ве̄гыт, маныр ва̄рмаль о̄ньще̄гыт, манса̄вит предприятие уральтавес ос мо̄т тэ̄лат урыл кӯщай хум тот китыглавес. На̄н тав потре э̄лаль ловиньтэ̄лын: «Ты та̄л хо̄т э̄тпос сыс 1 со̄тыра 973 ва̄рмаль щирыл ма̄хум ма̄навныл нё̄тмил во̄всыт. Мо̄лты та̄лныл 20 процент са̄вит са̄внув хо̄тпа нё̄тмил во̄вуӈкве ма̄н палтув ёхталасыт. Ка̄сыӈ тэ̄ла ма̄н я̄нас уральтаслӯв. Ты хосыт та̄рапатыс, 4 со̄тыра 675 тэ̄ла щирыл, кӯщай хо̄тпат рӯпитан ма̄хманыл лю̄камтасаныл манос ла̄паласаныл. Ма̄н о̄влэ̄т предприятиятн предписаниенэ̄пак ке̄тэ̄в, ты ва̄рмалит мӯсхалыг вос щё̄питыяныл. Ётылнув ты тэ̄ла щирыл уральтап ва̄ре̄в. Та предприятият, хотьют ты ва̄рмалит мӯсхал щирыл ат щё̄питасаныл ке, ма̄н та̄наныл штрафолныл пиныянӯв. Ты та̄л о̄хсатэ сыс пуссын аквъёт 62 миллион 609 со̄тыра солко̄ви са̄вит штрафолн атсӯв. Ты пора 243 уральтап са̄ртын майлам предписаниенэ̄пак щирыл ва̄рыгласӯв. Яныгса̄т хо̄тпан щёс ос план щирыл уральтахтуӈкве ялсӯв. Ос рӯпатат кӯщаит ань ощмарыӈыг е̄мтсыт. Хунь ма̄н план щирыл уральтап ва̄руӈкве о̄вылтахтэ̄в, та̄н предприятияныл лаппантыяныл. Тувыл та, ма̄н са̄ккон щирыл та̄н палтаныл щалтуӈкве ат ве̄рме̄в, уральтта̄л та хультэ̄гыт». Кӯщай э̄лаль ла̄выс, та̄н ты та̄л ма̄хум заявлениянэ̄паканыл щирыл 1 со̄тыра 482 уральтан ва̄рмаль ва̄рыгласыт. Округ янытыл акв со̄тыра арыгтем предприятие уральтаӈкве ялсыт. Ты хосыт рӯпитан ма̄хумн та̄ра олн ат ойтнэ 129 предприятие оснпаттысыт. Тыгыл ань 124 предприятие ювпувим рӯпата олныт ма̄хумн пуссын ойтсаныл. Тамле ты ёмас ва̄рмаль рӯпата уральтан ма̄хум ва̄ре̄гыт.

1105 2015. 08. 14. Николай МЕРОВ

Савалап ня̄врамыт ще̄мьят янмалтавет О̄йттур э̄тпос атхуйпловит хо̄талэ̄т Ханты-Мансийск ӯс ля̄ххал тотнэ колн опека ос попечительство округ управленият кӯщай ва̄ӈын нэ̄ Елена Немчинова ёхталас. Тав округувт савалап колытт о̄лнэ ня̄врамыт уральтым рӯпиты. Та̄н ма̄гсыланыл манырсыр рӯпата ва̄раве, тав ты урыл потыртас. Ты кӯщай ла̄выс, ань ты хо̄тал мус округувт ща̄ньа̄щ та̄л хультум 7 со̄тыра 710 ня̄врам о̄лы. Та̄н халанылт яныгса̄т арыгкем ня̄врам савалап колт яныгме̄гыт. Югра ма̄т ат савалап кол ань рӯпиты. Ос моще̄ртын Нефтеюганск ӯст «Светозар» нампа кол лаппантаве. Ты хо̄тал мус тот туп налыман нупыл ат ня̄врам хультыс. Онтоловхуйплов а̄гитпыгыт ты та̄л нёлоловхуйплов та̄ланыл то̄влынэ̄ныл порат та̄нки я̄нас о̄луӈкве патэ̄гыт тах. Та сыс округувт са̄выӈпа̄лэ савалап ня̄врамыт ще̄мья хо̄нтсыт, тот янмалтавет. Ты ва̄рмаль щирыл Россия янытыл Югра ма̄в хӯрмит местат о̄лы. Ань ты хо̄тал мус 98 процент са̄вит са̄валап ня̄врам ще̄мьяна тыт вуйве̄сыт. Тувыл ос акв ёмас ва̄рмаль о̄лы. Ань лю̄льсаӈ о̄лнэ ща̄нита̄щит мощщамаӈкве патсыт. 2013 та̄лт 511 тамле ща̄ньа̄щ о̄лыс. 2014 та̄лт 428 хо̄тпа хультыс. Кӯщай нэ̄ ла̄выс, ты ще̄мьят ёт яныг рӯпата ва̄раве. О̄лупсаныл ёмасыг щё̄питан ма̄гыс та̄н акваг нё̄тавет. Рӯпитан ма̄н паттавет, вина ул вос айсыт, акваг уральтым о̄ньщавет. Ётыл ты ще̄мьят ёмщакв о̄луӈкве патэ̄гыт ке, та̄н ня̄враманыл ювле миӈкве ве̄рмавет.

1105 2015. 08. 14. Николай МЕРОВ

Ӯст о̄с са̄в та̄рвитыӈ ва̄рмаль о̄лы Ханты-Мансийск ӯс миркол кӯщай Максим Ряшин ля̄ххал тотнэ колн во̄виньта̄лвес. Ань округ кӯщай нэ̄ Н. Комарова ӯс кӯщаит пуссын о̄влэ̄т та̄рвитыӈ ва̄рмалит мӯсхал щирыл щё̄питаӈкве ла̄всанэ. Таима̄гыс ля̄ххал тотнэ ма̄хум хум кол ӯнттын, тэ̄нут тыналан ва̄рмаль ос мо̄т тэ̄лат урыл китыгласаныл. Ты та̄л я̄ӈк на̄тнэ э̄тпост ӯс мирколт рӯпитан ма̄хум сапра̄ни ва̄рыгласыт. Тот та̄н щар та̄рвитыӈ ва̄рмалит нэ̄пакн хассаныл. Ты хосыт ань пуссын аквъёт хо̄тпан са̄вит са̄всыр ва̄рмаль щирыл рӯпата ва̄раве. Ань кит ва̄рмалиг урыл э̄лаль хансэ̄гум. Ханты-Мансийск ӯс щар яныг та̄рвит ты о̄лнэ кол. Ань ты мус пе̄с колытт иӈ са̄в хо̄тпа о̄лы. Ты колыт хосат та̄гыл хотло̄сталаӈкве э̄ре̄гыт. Ты та̄л ӯст налыман нупыл хо̄т пе̄с кол хотло̄сталан ма̄гыс олн та̄стувес. Ань Ханты-Мансийск ӯст 86 колытт ма̄хум кӯр па̄лтыглым о̄лэ̄гыт, ты 360 ще̄мья. Миркол па̄лыл ты ма̄хум ма̄гыс ка̄сыӈ та̄л мощщалмощщал кол ёвтаве. Ты ва̄рмаль щирыл яныг нё̄тмил округ мирколт рӯпитан ма̄хум та̄н ва̄ре̄гыт. Ань рӯпитан программат щирыл мо̄лты та̄л 950 миллион солко̄ви майлувес. Ос кӯщай хум ла̄выс, колыт ты кос ёвтэ̄в, ос то̄ва ма̄хум йильпи колн ва̄нтлуӈкве ат таӈхе̄гыт. Та̄н яныгнув кол во̄ве̄гыт. Акв хо̄тпа пе̄с колт хульты ке, та кол хотло̄сталаӈкве ат ве̄рмаве. Тыима̄гыс та э̄лумхо̄лас ёт осэва̄тал та сутытахтэ̄гыт. Кӯщаит ма̄хумн ты кос ла̄ве̄гыт, яныгнув кол ёвтнэ ма̄гыс та̄нки субсидияолн лов та̄лн вос выгыт. Ты тэ̄ла щирыл са̄всыр программат рӯпитэ̄гыт. А̄ти, ма̄хум ат торгамтэ̄гыт, та̄н ойтхатта̄л яныг кол виӈкве таӈхе̄гыт. Тох та акваг воритотэ̄гыт. Тувыл ос кӯщай хум тыналахтын ва̄рмаль урыл потыртас. Ань кризис е̄мтум хосыт мо̄т хо̄н ма̄ныл тэ̄нут тыг ат тотаве. Ос ма̄нки ва̄рум тэ̄нутанув ла̄пкат сака тыныӈыг ул вос о̄лсыт, ты ва̄рмаль кӯщаитн акваг уральтаӈкве патаве. Ла̄пкат тэ̄нутыт тынаныл ман янытыг но̄хнё̄тавет, кӯщаит ма̄хум ва̄тихал китыглыяныл, са̄всыр сапра̄нит ва̄рыглэ̄гыт. Ты коныпал кӯщай хо̄тпат тэ̄нут тыналан ма̄хум ёт о̄с ва̄щиньтахтэ̄гыт, ты ва̄рмалит урыл та̄н ётаныл о̄с потыртэ̄гыт. Тыналахтын ма̄хум о̄лупса та̄рвитыт торгамтыяныл, тэ̄нутыт тынаныл сака янгыг ат ва̄рияныл. Ос акв ёмас ва̄рмаль урыл потыртас. Ма̄нь таквс ос яныг таквс кит э̄тпосыгт Ханты-Мансийск ӯст тэ̄нут тыналан яныг ярмарка щё̄питаве. Округувныл ос э̄лы ма̄ныл тэ̄нут тыналан хо̄тпат та̄нки ва̄рнэ тэ̄нутаныл тыналаӈкве тыг ёхтэ̄гыт тах. Та порат са̄всыр ёмас ос атыӈ тэ̄нут ёвтуӈкве ро̄ви. Ты ва̄рмаль таима̄гыс ва̄рыглаӈкве патаве, тэ̄нут тыналан ма̄хум та̄нки ва̄рнэ тэ̄нутаныл сытамыг ул вос тыналасаныл. Та̄н са̄ккон щирыл рӯпитаӈкве патэ̄гыт. Ёмащакв о̄лэ̄н, ма̄н потранув аквписыг ловиньтэ̄н.

1105 2015. 08. 14. Мария Двинянинова

Хо̄нтаӈ ма̄ньщи о̄йка урыл Кондинский районт ма̄ньщит, хантыт, ё̄рныт, рущит, хатанит ос са̄всыр мо̄т мирыт о̄лэ̄гыт. Ма̄ньщит пе̄с йис порат тув о̄лмыгтасыт. Ань тот туп Шугурт па̄вылт са̄внув ма̄ньщи хо̄тпа о̄лы. Максим Семёнович Шивторов та па̄вылт сака янытлаве. Тав тот о̄лнэ ма̄ньщит пе̄с йис ва̄рмаляныл ва̄ганэ ос ща̄нь ла̄тӈыл потырты. Учёныит хунь тув ёхталэ̄гыт, та̄н пуссын тав колн щалтсэ̄гыт. Ты ма̄ньщи о̄йка 1939 та̄лт яныг таквс э̄тпост Левдым па̄вылт самын патыс. Тот школат ханищтахтас. Тувыл школа лаппантвес ос нилыт классныл са̄тыт класс мус Карымкары школаинтернатыт ханищтахтас. Ша̄нягеа̄щаге сас ма̄ньщииг о̄лсы̄г. А̄тятэ Шивторов Семён Иванович колхоз кӯщаиг рӯпитас. Оматэ Шивторова Александра Григорьевна ос колхоз мисыт по̄снэ нэ̄г рӯпитас. Максим Семёнович Салехардский культпросвет училище а̄стламе юипа̄лт та̄ра колхозн рӯпитаӈкве патхатас. Та поратэ урыл Максим Семёнович тох ла̄выс: «Ме̄н курсыт туп кит пыг о̄лсуме̄н, тувыл пуссын а̄гит. Мо̄т пыг Кульпасныл о̄лыс». Тувыл э̄лаль тав ла̄выс: «Армияныл ёхтумум юипа̄лт Донбасс ма̄н минуӈкве е̄мталасум, шахтат рӯпитаӈкве. То̄нт иӈ ма̄ньлатыг о̄лсум, сака ат номсахтасум, хащта̄л ма̄т мо̄т рӯпата а̄рталаӈкве тахсум. Тув ат минасум, тыт хультсум. Э̄кваме̄нтыл нёлолов ня̄врам янмалтасме̄н». Ма̄ньщи о̄йка китыгласлум: «Манах апыгня̄врам о̄ньщегы̄н? » Тэ̄н э̄кватэ̄ныл куньгим ювле ла̄всы̄г: «Ань тай аты ловиньтыме̄н, манаса̄вит апыг ос апыгня̄врам о̄ньщиме̄н». Максим Семёнович Галина Михайловна э̄кватэ̄нтыл нилахуйплов апыг о̄ньще̄г. То̄ват иӈ школат ханищтахтэ̄гыт, то̄ват институт моще̄рт а̄стлэ̄гыт. Щар яныг апге̄н Тюмень ӯст о̄лы, ле̄ккарыг рӯпиты. Тав оматэ хольт ле̄ккарыг ханищтахтас. Оматэ ня̄врам пусмалтан ле̄ккарыг рӯпиты. Акв а̄гитэ̄н Шугур школа кӯщаиг рӯпиты, наме Лариса Максимовна Шивторова. Э̄кватэ Галина Михайловна Ялуторовский районныл о̄лы, тав саран. Э̄ква 1936 та̄лт Ивановка па̄вылт самын патыс. Шугур па̄вылн мӯйлуӈкве нас ёхталас, Максим Семёнович ёт хо̄нтхатсы̄г, акванминасы̄г. 1990 та̄лт Кондинский районт о̄лнэ ма̄ньщит Максим Семёнович «Северный фонд» кӯщаиг пе̄рия̄лсаныл. О̄йка ты урыл тох потыртас: «Фонд па̄влыӈ ма̄хумн кол ӯнттуӈкве нё̄тыс, кол ӯнттын ма̄гыс э̄рнэ ут ёвтсӯв. Туп акв ва̄рмаль нупыл номтум ат патыс, манрыг ма̄хум национальность щирыл уртуӈкве патве̄сыт. То̄нт са̄в ма̄хум нё̄тмил винэ ма̄гсыл ма̄ньщиг хасхатасыт». Ма̄ньщи о̄йка ща̄нь ла̄тӈе урыл тох потыртас: «Ма̄н Кондинский районт тове̄рт мо̄т па̄вылныл ёхтум ма̄хум ёт потыртамув порат халувт ат торгамтахтасӯв. Левдым па̄вылныл Шугурн ма̄ньщит ёхталасыт, потыртым то̄ва ла̄тӈаныл ат торгамтасаныл. Тамле ты ма̄ньщит са̄всырыт потраныл о̄лсыт. » Ань о̄йка ла̄выс: «Пе̄с ма̄хманув ща̄нь ла̄тӈыл потыртаӈкве ат та̄ртве̄сыт. Яныг ма̄хум номсысыт, ня̄враманыл ма̄ньщи ла̄тӈыл ат ке потыртэ̄гыт, рущ ла̄тыӈ ёмащакв ва̄ӈкв патэ̄гыт. Тыи ма̄гсыл ань хо̄нтаӈ ма̄ньщит ты ла̄тыӈ ат ва̄гыт». Э̄кваго̄йкаг яныг колт тэ̄нккетэ̄н о̄лэ̄г. Тэ̄натэ̄н ма̄рщум а̄ти, ня̄враманэ̄н, ляпа рӯтанэ̄н акваг ёхталэ̄гыт. «Кол рӯпата ме̄нки ва̄риме̄н. Тув палытыл ӯнттым тэ̄нутаме̄н ме̄нки сунсыме̄н. Порс пум маныгтаӈкве, пилыт ла̄ккваӯнттуӈкве, картопка порсаныл хотманыгтаӈкве, пуссын ме̄нки ва̄риме̄н. Ты рӯпата ва̄руӈкв а̄стэ̄гум ос Юконда я̄н няслуӈкве яланта̄лэ̄гум, тэ̄нэ ма̄гсыл хӯл пуве̄гум. Тыщирыл ты о̄лыме̄н. » Максим Семёнович ос Галина Михайловна 56 та̄л аквъёт о̄лэ̄г. Са̄в ёмас ла̄тыӈ тэ̄натэ̄н ла̄вуӈкве таӈхе̄гум со̄т, щунь, хоса нот пуста̄гыл о̄луӈкве. Наталья Ткачук потре ма̄ньщи ла̄тӈыг М. Т. Двинянинова толмащластэ.

1105 2015. 08. 14. Мария Двинянинова

Хо̄нтлаӈкве ялум каӈкыг Ма̄н редакциявн Мария Тихоновна Двинянинова пищма ке̄тыс, тав Победа хо̄тал 70 та̄лэ то̄влум кастыл такви а̄тятэ Тихон Иванович Номин ос тав а̄пщитэ Илья Иванович Номин урыл потыр хансыс. – Ам а̄тям Тихон Иванович Номин Хаӈылсам па̄вылныл о̄лыс. Потре щирыл тав 1916 та̄лт самын патыс. Метрикатэ ат ва̄слум, таи ма̄гсыл ат ва̄глум. Ты па̄выл Ха̄льӯс район Хулюмсӯнт по̄хат о̄лыс. А̄тям ишколат ат ханищтахтас, тувыл рущ ла̄тӈыл ёмащакве потыртас, таи ма̄гсыл военный билетыт хансым о̄лыс – о̄выл класс тав а̄стлам. Хо̄нтлан нак э̄лыпа̄лт ос та юипа̄лт хӯл алыщлан ос во̄раян хо̄тпаг о̄лыс. То̄ва та̄лыт ос туи порат экспедициян тув палытн ялантас. Тав Ленинград ӯс вуянтым хо̄нтлас. Таи ма̄гсыл, улпыл, акваг тамле э̄рыг э̄ргыс: «Кто в Ленинград пробирался болотами, горло сжимая врагу ». Тувыл «Катюша» ос са̄в мо̄т э̄ргыт э̄ргуӈкве сака э̄руптас. Ты коныпал са̄в ма̄ньщи э̄рыг ва̄с. Хо̄нтлын ма̄т ла̄глагека̄таге сакватавесы̄г ос контузитавес, тыи ма̄гсыл э̄лаль хо̄нтлаӈкве ат минас, ювле о̄лнэ ма̄н ке̄твес. Ма̄н яныгмамув порат хо̄нтлам нак урыл сака ат китыгласлӯв. Тав са̄всыр справкат о̄ньщас, туп ты хо̄тал мус ты нэ̄паканэ ат хультсыт. То̄нт ма̄н тувле нупыл тэ̄лав а̄тим о̄лыс. Ань ты ва̄рмаль урыл пӯмщалахтуӈкве ущ патсӯв, тувыл китыглахтуӈкве, хо̄тпа а̄тим. А̄тям 1991 та̄лт во̄ртур э̄тпост а̄тимыг е̄мтыс. Хо̄нтлан то̄рыг по̄сыт о̄ньщас манос а̄ти, ат ва̄глум. Победа хо̄тал юбилейный по̄сыт тай са̄в о̄ньщас ос грамотал 9 май кастыл акваг ке̄тыглавес. А̄тям а̄пщитэ Илья Иванович Номин о̄с хо̄нтлаӈкве ялыс. Тав ос 1925 та̄лт Хаӈылсам па̄вылт самын патыс. Тав 18 та̄лэ то̄влум порат та̄ра хо̄нтлаӈкве вуйвес. Хо̄нтлым Берлин ӯс мус ялыс. Тувыл туп 1947 та̄лт юв ёхтыс. Война оигпам юипа̄лт тав кит та̄л тот рӯпитас. Ювле ёхтыс, Кульпас па̄вылт о̄лмыгтас. Пенсиятэ мус речфлотыт бакенщикыг рӯпитас. Тав уре̄тыл торыӈ ат ва̄глум. Ты ва̄нэ̄кем потранум а̄гитэ̄нтыл хӯлыгласанум. Хо̄нтламе ма̄гсыл сака са̄в по̄сыт о̄ньщас. Тав 1991 та̄лт тэ̄лы порат та̄л котиль э̄тпост а̄тимыг е̄мтыс.

1105 2015. 08. 14. Николай МЕРОВ

А̄с ма̄ньщи э̄ква о̄лупсатэ Клавдия Ксенофонтовна Шадрина, А̄с ма̄ньщи э̄ква, Нягань ӯст о̄лы. Тав мо̄тантыг хо̄тпан та̄лэ то̄влы. Ты туи порат тав Ха̄льӯс район А̄нъя па̄вылн «Шешкинские чтения» нампа ма̄ньщи ла̄тыӈ э̄лаль тотнэ ханищтапн ёхталас. Ам ты нё̄тнэ э̄ква ёт тот хо̄нтхатыгласум, тав о̄лупсатэ урыл китыгласлум. На̄н ань тав потре э̄лаль ловиньтэлы̄н. «Ам о̄лнэ̄м палытыл ма̄нь школат ня̄врамыт ханищтым акваг рӯпитасум. Амки Октябрьский район Нярихуми Алы па̄вылт самын патсум. А̄ӈкум Я̄лпус па̄вылт, а̄щум ос По̄сал па̄вылт самын патсыг. Рӯтанум Комудваныт, Шамашит, Кевавтнёлт колта̄гланыл о̄лсыт. Школан минамум порат о̄влэ̄т яныг ха̄пыл минасум. Тувыл ос катерын та̄лттувесӯв, катерыл Октябрьский район Перегрёбный павылн тотвесӯв. То̄нт 1963 та̄л о̄лыс. Нярихумит Алы па̄вылт ам ане̄квам, а̄квум, ягпыганум ёт о̄лсум. Ма̄н пуссын ма̄ньщи ла̄тӈыл потыртасӯв. Ханищтахтын ма̄н тотвесӯв, Перегрёбный па̄выл интернатн майвесӯв. Тот ма̄нав рущ э̄ква ӯрыстэ. Ам тав нупылэ а̄ӈкватасум, анана, самаге татем янгыг. Ам хотрохтысум (мовиньты). А̄танэ вуйканыт, ощща, марум супыл масхатым о̄лыс. Ам тай хорамыӈ ма̄ньщи суп о̄щсум, хорамыӈ ня̄рал масхатым о̄лсум. Я̄таты, хота̄хвсалахтуӈкве ла̄вве̄сум, рущ маснутыл мастапаве̄сум ос рущиг ва̄руӈкве та патве̄сум. Та сыс ма̄нки халувт ма̄ньщи ла̄тӈыл тох та потыртасӯв. То̄нт школат нолевой класс о̄лыс. Ма̄н пуссын тув ӯнттувесӯв. Та̄л палыт рущ ла̄тыӈ ханищтасӯв. Ётылнув рущ ла̄тыӈ торгамтаӈкве патыслӯв, ущта о̄выл классын минасӯв. Ты ва̄рмаль сака ёмщакв номилум. Ляпа рӯтанум ёт о̄лсум, илттыг мо̄т ха̄щта̄л ма̄хум палт тотве̄сум. Таима̄гыс а̄нумн тот о̄выл порат ханищтахтуӈкве сака та̄рвитыӈ о̄лыс. Ханищтахтумув порат ма̄н Нина Дмитриевна Захарова рущ э̄ква сака э̄руптаслӯв. Тав сака ёмас сымыӈ хо̄тпаг о̄лыс. Ань матумыг е̄мтыс, Тюмень уст о̄лы. Перегрёбный па̄вылт ма̄н хӯрум класс мус ханищтахтасӯв. Тувыл ювле Нярихуми Алы па̄вылн минасӯв. То̄нт а̄щум а̄тимыг е̄мтыс, тав йильпи кол ӯнттуӈкве ат а̄лымастэ. Таима̄гыс ма̄н ювле па̄вылн ёхтумув порат мо̄т кол ёвтсӯв. Тот ма̄нь сӯмъях о̄щсӯв. Тув ва̄тум пиланув, атум ла̄хсанув ос ӯльпа па̄кванув пинтласанӯв. Па̄выл я̄ тапалт са̄в лям, тахт пил, сэ̄мыл пил, ӯйрищ пил яныгмас. Акванатхатэ̄в, я̄ ултта ха̄пыл тове̄в, хо̄тал палыт пил та ва̄тэ̄в. Ма̄н колта̄глув са̄выӈпа̄лэ лям ос ӯйрищ пил ва̄тсув. А̄ӈкум ты пилытныл атыӈ ня̄нь ва̄рыглас. Ты атыӈ ня̄нь ань ты мус номилум. Па̄вылт акв карыс э̄ква о̄лыс. Аквматнакт тав а̄лпыл атахкем щё̄с порат но̄хква̄лыс. Пасан ва̄рыс, ма̄нав пуссын ква̄лттысанэ. Тэ̄нутыл тыттысанэ, тувыл Нярн пил ва̄туӈкв та тотве̄сув. Няр мус нилахкем ве̄рыста ла̄глыл ё̄муӈкве э̄ри. Та во̄рт ма̄нь хара ма̄ о̄лы. Э̄ква тот курщуп йӣв тармыл ӯнтыс, ма̄нав ляпан во̄выстэ. Тэ̄нутанув но̄хвисанэ, тот пӯрлахтасӯв ос э̄лаль та минмыгтасӯв. Насати, пе̄с потыр щирыл та ялпыӈ ма̄т тулыӈ о̄йка о̄лыс. Тот лю̄люм яныг йӣв капай щахылн са̄лаявес, супыгто̄лматас. Ма̄хум та ма̄ ялпыӈыг ла̄выгласаныл, таима̄гыс тот ты пӯрлахтасӯв. Са̄т тэ̄нутломт пинсӯв. Хотьют ща̄й ӯнттыс, хотьют канпетка манос во̄йломт пиныс. Та сыс яныг э̄ква таквирот матыр потыртас, тувыл пӯрлахтуӈкве та ӯнтсӯв. Ма̄н ня̄врамыг о̄лсӯв, тувле тэ̄лав а̄ти, хунь ва̄глӯв, маныр ва̄рыс. Ань ва̄глӯв, тав То̄румн по̄йкщас, са̄в пил вос ва̄тсӯв. Пасан ва̄тат ӯнлэ̄в, э̄ква ма̄навн матыр тэ̄нутломт маяпи, хотща̄гтэ̄в, та тэ̄гув. Тот мощ ӯнлахо̄лсув, тувыл э̄ква ля̄галас: «Та, ня̄врамаквет, атхатэ̄ва, ос э̄лаль минэ̄ва». Нярн ёхтысӯв, ва̄глын ма̄н а̄ти, ам тыса̄вит морах ат ва̄щиньтасум. Таса̄вит, паттуп нас ва̄тэ̄н. То̄нт ве̄тра а̄тим о̄лыс. Хо̄тал сыс совтанув, па̄йпанув та̄глэ̄кв тагиньтаптысанӯв. Татем ты са̄в пил о̄лыглас. Школат нилыт классыт хунь ханищтахтасум, о̄выл щёс морах ва̄туӈкве ялсӯв. Ма̄хум морах та тэ̄гыт, та тэ̄гыт. Номсэ̄гум, манса̄вит тэ̄ӈкве ро̄ви. Насати, та̄н а̄ти пил тэ̄гыт, порс лӯптаныл супасыл хотвуяпантыяныл. Ам ос порсыӈ та̄гыл тох та ва̄тсум. Тувыл яныг э̄кван ханищтаве̄сум, та па̄сныл пилыт порс лӯпта та̄л ва̄тэ̄гум. Нярихуми Алы па̄вылт пе̄рма о̄лыс. Тот лӯвыт, мисыт о̄щве̄сыт. Ма̄хум пуссын совхозт рӯпитасыт. Тувыл ам нилыт класс тот а̄стласум, совхоз ла̄ккватотвес. Са̄выӈпа̄лэ ма̄хум Нярихуми Лӯи па̄вылн минасыт. Тот йильпи интернат пӯсвес, ма̄н о̄с пуссын тув ва̄нтлуптавесӯв. Ӯщлахтын хо̄талт акваг лӯвыӈ суныл юв ялантасӯв. Школа а̄стламум юипа̄лт ам Наталья Николаевна Гындыбина ёт, ме̄н акв па̄вылныл о̄лсуме̄н, Ханты-Мансийский педучилищан э̄лаль ханищтахтуӈкве минасме̄н. Тот школат ма̄нь ня̄врамыт ханищтан хо̄тпаг 1977 та̄лт училище а̄стласме̄н. Ам Сергино па̄вылн рӯпитаӈкве ке̄тве̄сум. Тот кӯщай хо̄тпа а̄нумн кол мис. Тувыл ам а̄гмалтахтасум, санаториян ялсум. Пусмалтахтын ма̄ныл ювле ёхтысум, Шеркалы па̄вылн рӯпитаӈкве ке̄тве̄сум. Тот пионервожатыиг рӯпитасум. Тувыл Ленинград ӯсн акв та̄лн квалификация повышение институтн ханищтахтуӈкве ке̄тве̄сум. Тот хультсум, институтт ня̄врам ханищтан хо̄тпаг ханищтахтасум». Клавдия Ксенофонтовна институт а̄стламе па̄сныл акваг ма̄нь ня̄врамыт ханищтан хо̄тпаг школат рӯпитас. 2009 та̄лт пенсиян минас. Рӯтанэ палт ва̄тихал ӯщлахтуӈкве яланты. Ка̄тыл са̄всыр пормасыт ма̄щтырлы. Ялпыӈ хо̄талыт о̄лыглан порат тав акваг тув во̄виньта̄лаве. Ты А̄с ма̄ньщи э̄ква сака ка̄ркам, тав ётэ потрамаӈкве а̄нумн сака мӯстыс. Тав са̄в пӯмащ потыр ва̄г. Ам таве̄н ос са̄в ёмас ла̄тыӈ ке̄тэ̄гум. Пус ка̄т, пус ла̄гыл э̄лаль о̄лэ̄н!

1105 2015. 08. 14. Людмила ТЕТКИНА

Нэ̄гхумыг кол ӯнттэ̄г Марина Ивановна Тасманова о̄йкатэ Сергей Петрович Самбиндалов ёт Ха̄льӯс район Ня̄хщамво̄ль па̄вылт о̄лэ̄г. Ще̄мья субсидиял майвес, ты олныл йильпи кол ӯнттуӈкве о̄вылтахтасыт. Мария Ивановна кол ӯнттын ва̄рмале урыл ма̄ньщи газета ма̄гсыл тох потыртас. – Ме̄н 2007 та̄лт очередин хасхатсуме̄н, ос соссаӈ ма̄хум ма̄гсыл рӯпитан программа па̄лныл олн ӯруӈкве патсуме̄н. Ань очередин хасхатнэ хо̄тпат та̄нки нэ̄паканыл Ипотечный агентстван пищмал ке̄тыяныл. Ма̄нь па̄влытт о̄лнэ ма̄хумн Ха̄льӯсн ялантаӈкве воссыг ат э̄ри. Ам са̄всыр э̄рнэ нэ̄пакыт акван хунь атсанум, заявлениенэ̄пак хансуӈкве Ха̄льӯсн ялсум. То̄нт акваг тыглетувле ялантым са̄в олн холтсум. 2013 та̄л ва̄т са̄грапнал э̄тпост Ха̄льӯсныл Ипотечный агентстваныл пищма ёхтыс. Тот хансым о̄лыс, очередьме̄н кос ёхтыс, тувыл о̄йкаме̄нтыл кол о̄ньщиме̄н, тыи ма̄гсыл мощща субсидияолныл мивеме̄н. То̄нт ам заявлениенэ̄пак хассум ос ты олн виӈкве ат патсум. Колме̄н хосат пе̄сыг е̄мтыс, са̄всыр нэ̄пакыт акванатсанум, о̄лнэ колме̄н пе̄сыг вос хансаве. Нэ̄пакыт пуссын э̄рнэ щирыл хунь ва̄рсанум, о̄йкаме̄нтыл сас субсидияолн ма̄гсыл хасвесаме̄н. Мо̄лты та̄л во̄ртур э̄тпос о̄ста пищмал ёхтувесме̄н, тот хансым о̄лыс, субсидияолныл мивеме̄н, о̄лнэ кол ёвтуӈкве манос ӯнттуӈкве ве̄рмиме̄н. О̄влэ̄т а̄гиягме̄н ма̄гсыл Хулюмсӯнт па̄вылт манос яныг ӯст кол ёвтуӈкве тахсуме̄н. Тувыл туп ме̄н о̄йкаме̄нтыл субсидияолныл майвесме̄н. Ты олныл мо̄т ма̄т о̄лнэ кол ёвтуӈкве ат то̄влавеме̄н. Ме̄н сас рӯпитыме̄н, тувыл ипотекаолныл ат мивеме̄н, мощща олн сэ̄лыме̄н. Тыи ма̄гсыл номсахтуӈкве воссыг ат патсуме̄н ос Ня̄хщамво̄ль па̄вылт о̄лнэ кол ӯнттуӈкве патсуме̄н. О̄влэ̄т субсидияолн аквло̄мтэ майвес. Олныл ме̄н норыт, партыт ос мо̄т э̄рнэ утыт ёвтсанме̄н. Ты юипа̄лт ам сметанэ̄пак хассум. Хоты ма̄т норыт, партыт ёвтсуме̄н ос манаса̄вит олн тув холтсуме̄н, пуссын тув хассанум ос са̄всыр чекнэ̄пакыт тув пинсанум. Ты нэ̄пакыт Ипотечный агентстван ке̄тсанум. Ты юипа̄лт субсидияолн китыт ло̄мтэ та ке̄твес. Норыт, партыт ос мо̄т э̄рнэ утыт яныг ӯст ме̄нки ёвтуӈкве тахсуме̄н. Номсысме̄н, колме̄н мощ тынта̄лнув е̄мты, тувыл ӯсн ялантаӈкве олн о̄с э̄ри. Тыи ма̄гсыл Ня̄хщамво̄ль па̄вылт рӯпитан коммерсант палт ёвтхатсуме̄н. О̄йкаме̄нтыл хосат та̄гыл ты олн ма̄гсыл хасхатсаме̄н. То̄нт а̄гиягме̄н иӈ ма̄ниг о̄лсы̄г. То̄нт тай яныг кол капай ӯнттуӈкве кусыласме̄н. А̄гиягме̄н яныгмасы̄г, ань тай ме̄наме̄н яныг кол воссыг ат э̄ри. Ипотечный агентстват рӯпитан хо̄тпат ла̄ве̄гыт, йильпи колме̄н акв та̄л ос хо̄т э̄тпос сыс вос а̄стлылме̄н. Ос кол нэ̄паканэ пуссын мӯсхалыг атуӈкве ос та̄н палтыланыл ке̄туӈкв э̄ри. Тох уральтаве̄в, та̄стым олн мо̄т тэ̄ла нупыл ул вос холтыянме̄н. Марина Ивановна кол ӯнттын ма̄тэ ос нэ̄паканэ пуссын ёмащакв щё̄питасанэ, тамле нэ̄пакыт ат ке о̄ньщас, субсидияолныл ат майвес. Ма̄ньщи нэ̄ ла̄выс, ты нэ̄пакыт ва̄руӈкве Ха̄льӯсн ва̄тихал ялантас, тув о̄с са̄в олн холтыс. Ань нэ̄ ща̄гтым о̄лы, нэ̄паканэ э̄рнэ щирыл ва̄рсанэ, субсидияолныл майвес, ань йильпи колэ туп а̄стлуӈкве э̄ри. Тав ла̄выс, та̄стым олныл Ня̄хщамво̄ль па̄вылт йильпи кол ӯнттуӈкве ань то̄влаве̄г.

1105 2015. 08. 14. Людмила ТЕТКИНА

Та̄рвитыӈ порат рӯпитам хо̄тпа Ня̄хщамво̄ль па̄вылт хӯрум яныгпа̄ла хо̄тпа Тимофей Ефимович Канев, Юлия Фёдоровна Рублёва ос Татьяна Ивановна Сагандукова «Труженик тыла» нам о̄ньще̄гыт. Па̄выл клубт рӯпитан хо̄тпат хо̄нтлам ос та порат ка̄ркамыг рӯпитам ма̄хум урыл потрыт акванатсыт. Юлия Фёдоровна Рублёва яныг э̄ква о̄лупсатэ урыл потрыт ловиньтаӈкве тот о̄с ро̄ви. Юлия Фёдоровна Рублёва Ма̄нья па̄вылт яныг ще̄мьят самын патыс. Ща̄нягеа̄щаге 14 ня̄врам янмалтасы̄г. Та порат па̄вылт лов ще̄мья о̄лыс. Тав иӈ ня̄врамыг о̄лыс, тувыл ёмащакв номитэ, хумус хащта̄л хо̄тпат ёхтысыт ос па̄влыӈ мир мисаныл, луваныл, па̄ляныл ос мо̄т ӯйхуланыл хотняртумтасаныл. Ща̄нягеа̄щаге ос хӯрум лув ос са̄лыянэ̄н пуссын колхозн мисанэ̄н. 1941 та̄лт тэ̄лы порат тэ̄н Усть-Манья па̄вылн тэ̄нут ёвтуӈкве минасы̄г. То̄нт ма̄хумн ла̄ввесы̄г, яныг хо̄нтлын нак о̄вылтахтас. Юлия Фёдоровна кит каӈкаге та̄ра хо̄нтлаӈкве тотвесы̄г. Па̄вылт хультум ма̄хум пуссын колхозт рӯпитаӈкве патсыт, пум ва̄рсыт, пил ва̄тсыт, хӯл алыщласыт, во̄раясыт. 1946 та̄лт Усть-Манья па̄вылт колхоз ва̄руӈкве о̄вылтавес, Ма̄нья па̄вылт о̄лум мир рӯпитаӈкве пуссын тув ва̄нтлуптаве̄сыт. Ща̄нягеа̄щаге о̄с тув рӯпитаӈкве минасы̄г. Война оигпам юипа̄лт каӈке Иван ювле ёхтыс, мо̄т каӈке Константин хо̄нтлым порсас. Юлия Фёдоровна о̄выл классын Ма̄нья па̄вылт минас. Тувыл э̄лаль ханищтахтуӈкве Ня̄хщамво̄ль па̄вылн ке̄твес. Школа а̄стламе юипа̄лт па̄вылн ювле ёхтыс, колхозт рӯпитас. Ханищтахтуӈкве тав сака таӈхыс, тыи ма̄гсыл Ханты-Мансийск ӯсн минас. Тот ня̄врам ханищтан хо̄тпаг ханищтахтас, тувыл Усть-Манья па̄вылт школа кӯщаиг рӯпитаӈкве паттувес. Па̄выл школа хунь лаппантвес, тав Кондинский районын ке̄твес. Пенсиян минаме мус тот рӯпитас, 1983 та̄лт Ня̄хщамво̄ль па̄вылн о̄луӈкве ювле ёхтыс. Ты потыр ма̄ньщи ла̄тӈыл Людмила Тасманова хансыстэ.

1105 2015. 08. 14. Людмила ТЕТКИНА

Ня̄врамыт Рума нё̄р мус ялсыт О̄йттур э̄тпос 12 хо̄талныл 21 хо̄талэ мус «Ма̄нь ӯскве» ӯщлахтын ма̄т «Горная» нампа смена рӯпитас. Юлия Боженко, Хулюмсӯнт па̄вылт о̄лнэ а̄ги, тув о̄с ялыс. Ня̄врамыт хумус ӯщлахтасыт, та урыл тав ма̄ньщи газетан потыр хансыс. – Ты та̄л «Горная» нампа смена рӯпитам порат Любовь Павловна Стаканова, «Ма̄нь ӯскве» кӯщай нэ̄, Иван Николаевич Вокуев, яныг хум хо̄тпа, ос Иван Павлович Рокин, МЧС рӯпитан хум, ня̄врамыт ёт Нё̄рн ялсыт. Пуссын аквъёт 32 э̄лумхо̄лас о̄лыс. О̄выл хо̄талт ма̄н Саранпа̄вылт пуссын акванатхатсӯв. А̄лпыл нёлолов щё̄с порат машинал Нё̄рыт нупыл минмыгтасӯв. Ювле миннэ лё̄ӈхыт катамаранха̄пыт ос тэ̄нутанув хультуптасанӯв. Ос э̄лаль онтолов ве̄рыста «Парнук» нампа ӯщлахтын база мус ё̄мсӯв. Мо̄тыт хо̄талэ̄т а̄лпыл но̄хква̄лсӯв, та̄ра Рума нё̄р нупыл минасӯв. Ма̄н пормасыт та̄л кос ё̄мсӯв, тувыл тот са̄в тӯйт патыс, тыи ма̄гсыл сака та̄рвитыӈ ё̄муӈкв о̄лыс. Рума нё̄рн хунь ёхтысӯв, ӯщлахтасӯв, по̄слахтасӯв. Хо̄тал па̄лыт ё̄мимав сака ва̄гта̄л патсӯв, туп ӣтипа̄лаг ёлва̄глысӯв ос «Парнук» нампа ӯщлахтын ма̄н ювле ёхтысӯв. Ам о̄выл щёс Нё̄рн ялсум, сака пӯмащ о̄лыс, хунь акв хо̄тал сыс тӯйис, раквыс, хо̄тал постыс ос во̄т во̄тыс. Кит хо̄тал ӯщлахтасӯв, Регули нё̄р нупыл минмыгтасӯв. Регули нё̄р мус хунь ёхтысӯв, тот ос та по̄слахтасӯв. Та Нё̄рт о̄с са̄в тӯйт о̄лыс, маткем нё̄р ё̄лыпа̄лн тахсӯв. Ма̄витэ тот щар мо̄т хурипаг о̄лы, Нё̄ранув такем нё̄тнэ̄г сусхатэ̄гыт. А̄нум сака пӯмащ о̄лыс, ам о̄йттур э̄тпост таса̄вит тӯйт щар ат ва̄щиньтасум. Регули нё̄рныл ва̄глысӯв, Я̄сунт па̄выл нупыл минуӈкве щё̄питахтуӈкве патсӯв. Тувыл кит хо̄тал катамараныл Ма̄нья̄ хосыт Я̄сунт мус на̄тылтасӯв. А̄нумн Нё̄рн ялуӈкве сака мӯстыс. Мо̄тыт та̄лт о̄с тах тув ялуӈкве таӈхе̄гум. Юлия Боженко ке̄тум потре ма̄ньщи ла̄тӈыл Людмила Тасманова хансыстэ.

1106 2015. 08. 28. Валентина УЗЕЛЬ

Пе̄риян ва̄рмальн щё̄питахтэ̄гыт Сӯкыр э̄тпос 13 хо̄талэ̄т ма̄н округувт пе̄риян ва̄рмаль ва̄раве. Та хо̄талт хо̄т районытт (Ха̄льӯс, Октябрьский, Советский, Белоярский, Кондинский, Сургутский) ос хо̄т яныг ӯсытт (Когалым, Лангепас, Покачи, Нижневартовск, Радужный ос Мегион) нэ̄пак та̄ратан ва̄рмаль тах мины. Ань ты мус округув янытыл 254 хо̄тпа пе̄рияхтуӈкв ка̄сащасыт. Са̄выӈпа̄лэ та̄н халанылт район ман ӯс дума депутатыг рӯпитаӈкв ка̄саще̄гыт. 13 хо̄тпа миркол кӯщаиг тах пе̄риявет. Налымантем хо̄тпа та̄нти нэ̄паканыл лю̄льсаӈ щё̄питаманыл ос хасманыл, таима̄гыс по̄хан те̄тве̄сыт. Пе̄риян хо̄талт округув янытыл 150 со̄тыра хо̄тпа нэ̄пак та̄ратаӈкв патэ̄гыт. Ань ты колыт ёмащакв щё̄питавет, уральтавет. Во̄рт о̄лнэ ма̄хум ман ма̄нь па̄влыӈ мир та̄н ос ты э̄тпос 23 хо̄талэ̄т миркол кӯщаит ос са̄всыр депутатыт тах пе̄рие̄гыт. Округ кӯщай нэ̄ прессслужбатэ те̄тум ля̄ххал ма̄ньщи ла̄тӈыл В. Хозумова хансыстэ.

1106 2015. 08. 28. Людмила ТЕТКИНА

Кӯщай хум рӯпататэ урыл китыглавес Округ мирколт Дмитрий Шаповал кол ӯнттын тэ̄ла хосыт рӯпиты. Тав Наталья Комарова, кӯщай нэ̄, палт ва̄ӈын хумыг о̄лы. Тав ля̄ххал тотнэ ма̄хум ёт хо̄нтхатыглас, округувт манса̄вит кол ӯнттаве ос манхурип та̄рвитыӈ ва̄рмалит ань о̄лэ̄гыт, та урыл потыртас. Кӯщай хум ла̄выс, ань округувт яныгса̄т со̄тыра арыгкем э̄лумхо̄лас кол ӯнттым рӯпиты. Та̄н пуссын акваг тыт о̄лэ̄гыт. Ты э̄лыпалт са̄в ма̄хум ты рӯпата ва̄руӈкве мо̄т ма̄ныл тыг ёхталасыт. Ань то̄ва компаният мӯсхал щирыл ат рӯпитэ̄гыт, йильпи колыт тыналаӈкве ат ве̄рме̄гыт. Ма̄хум кол ат ёвтэ̄гыт, та̄н ипотекаолныл ат мивет. Ань банкыт яныг процентолн во̄ве̄гыт. Дмитрий Шаповал ла̄выс: «Ты та̄л хо̄т э̄тпос сыс мощщанув кол ӯнттувес. Ань са̄внув ще̄мья та̄нки кол ӯнттэ̄гыт. Ма̄н ань планнэ̄пак хосыт рӯпитэ̄в, акв та̄л сыс округ янытыл ма̄навн акв миллион квадратный метра ӯнттуӈкве э̄ри. Ам номсэ̄гум, та̄л оигпан мус ма̄н ты план тах то̄варттылӯв. Ка̄сыӈ та̄л щар са̄в о̄лнэ кол Сургут, Нижневартовск, Ханты-Мансийск ос Югорск ӯсытт ӯнттаве». «Югра» нампа ля̄ххал тотнэ колныл ке̄тым потыр ма̄ньщи ла̄тӈыл Л. Алгадьева хансыстэ.

1106 2015. 08. 28. Людмила ТЕТКИНА

Кол ӯнттын ма̄хум сапра̄нияныл о̄лыс Округ кӯщаюв Наталья Комарова тув ялыс. Тот тав ма̄хум нупыл ла̄выс: «Округув янытыл ань мощща кол ӯнттуӈкве патвес. Ос Нижневартовск ӯст акваг са̄в кол ӯнттаве. Мо̄т миркол кӯщаит на̄н палтын вос ханищтахтэ̄гыт». Ань та ӯст пе̄с колытт о̄лнэ са̄в ще̄мья йильпи колыл мивет. Та̄н ма̄гсыланыл я̄нас программа рӯпиты, ты хосыт ма̄хум тот ёмащакв ты нё̄тавет. Ты порат Россия янытыл о̄с мощща йильпи кол ӯнттуӈкве патвес. Са̄внув ще̄мьят ипотекаолн вос выгыт ос о̄лнэ кол вос ёвтэ̄гыт, ты та̄л о̄вылтахтам порат Россия Правительство кӯщаит йильпи программат пирмайтасыт. Ты программат ань мӯсхал щирыл рӯпитаӈкве патсыт. Ма̄н округувт хо̄т э̄тпос сыс ат со̄тыра ще̄мья ипотекаолн висыт, та̄н халанылт акв со̄тыра э̄лумхо̄лас ювле хультум э̄тпост ты олныл майве̄сыт. Ще̄мьят ань таи ма̄гсыл йильпи кол ат ёвтэ̄гыт, банкыт са̄в олныл та̄н ат мивет. Кол ёвтнэ ма̄хумн 20 % са̄вит олн та̄нкина̄нылн ойтуӈкве э̄ри. Са̄в ще̄мья тыса̄вит олн ат о̄ньще̄гыт, тыи ма̄гсыл ипотекаолн ат выгыт. Сапра̄нит ма̄хум резолюциянэ̄пак пирмайтасыт. Ос ты нэ̄пак хосыт пуссын аквъёт э̄лаль рӯпитаӈкве ла̄вхатсыт. Акв та порат та̄н Наталья Комарован та̄рвитыӈ ва̄рмаляныл урыл потыртасыт. Кол ӯнттын ма̄хум ла̄всыт, ань кирпащ, сэ̄й ос мо̄т са̄всыр э̄рнэ утыт тынаныл акваг но̄хяныгме̄гыт. Тувыл ма̄хум кол ат ёвтэ̄гыт, тыи ма̄гсыл та̄н ӯнттым колыт тынта̄лнуве̄г тыналыяныл. Тыщирыл э̄лаль ке мины, та̄н олн та̄л хультэ̄гыт ос йильпи колыт ӯнттуӈкве тах ат патэ̄гыт. Кӯщай нэ̄ та̄н ётаныл ты та̄рвитыӈ ва̄рмаль щирыл рӯпитаӈкве ос та̄нанылн нё̄туӈкве ла̄вхатас. Округ кӯщай нэ̄ прессслужбатэ ке̄тум ля̄ххал ма̄ньщи ла̄тӈыл Л. Тасманова хансыстэ.

1106 2015. 08. 28. unknown

Россия Президент ла̄тыӈ те̄тыс Сӯкыр э̄тпос 13 хо̄талэ̄т округ Дума депутатыт акв хо̄тпа округ кӯщаиг та пе̄рияныл. Ань Россия Президент хӯрум хо̄тпа наманыл ла̄всанэ: Наталья Комарова («Единая Россия» партияныл), Михаил Сердюк («Справедливая Россия» партияныл) ос Советский ӯс кӯщай Алексей Савинцев (КПРФ). Ты хо̄тпат халт акв хо̄тпа ат та̄л округ кӯщаиг рӯпитаӈкв тах та паты.

1106 2015. 08. 28. Людмила ТЕТКИНА

Ма̄во̄й но̄хвинэ ма̄хум акванатхатэ̄гыт Ань ма̄во̄й но̄хвуим попутный газ нас тох но̄хпе̄ламтаве. Ма̄ янытыл о̄лнэ ма̄хум акваг номсахтэ̄гыт, хумус ты факелыт пуссын лапхарыгтаӈкве. Мо̄т хо̄н ма̄т ты газ са̄всыр э̄рнэ ва̄рмальн холтуӈкве ханищтахтасыт. Ты газ нас тэ̄ла та̄л ул вос тэ̄г, ос ма̄вит ул вос па̄ӈкты, та̄н са̄всыр заводыт ӯнттэ̄гыт. Ма̄н округувт атпан арыгкем та̄л ма̄во̄й но̄хвиве. Ты та̄лыт сыс округ янытыл сака са̄в тамле факел о̄лыс. Ань ты тэ̄ла акваг оснпаттым о̄ньщаве. Ма̄н о̄лнэ ма̄вт та̄н о̄с лапхарыгтаӈкве патве̄сыт. Ма̄во̄й но̄хвинэ Департаментыт кӯщай хум Борис Костюхин ты ва̄рмаль урыл тох ла̄выс: «Ань округувт рӯпитан компаният ты газ но̄х ке пе̄ламтыяныл, та̄н яныг штрафолныл пинавет. Тыи ма̄гсыл ань ты ва̄рмаль ёт та̄н рӯпитаӈкве патсыт. Форум о̄лнэ порат ты рӯпатаныл урыл о̄с потыртаӈкве тах патэ̄в».

1106 2015. 08. 28. Людмила ТЕТКИНА

Ма̄н о̄лнэ ма̄в урыл тэ̄н нэ̄пак хансэ̄г Финляндия ма̄ныл Хельсинки ӯсныл Вилле Роппонен, нэ̄пак хаснэ хӯм, ос Юкка-Пекка Каленен, ка̄тыл хурит по̄слан хум, Ханты-Мансийск ӯсн ёхталасы̄г. Тэ̄н ма̄н округув янытыл яласэ̄г ос тыт о̄лнэ ма̄ньщит ос хантыт о̄лупсаныл урыл пӯмщалахтэ̄г. Ханты-Мансийск ӯст тэ̄н Еремей Айпин ос Надежда Алексеева, соссаӈ ма̄хум Ассамблеят рӯпитан депутатыг, ос Мария Кузьминична Волдина ёт хо̄нтхатыгласы̄г. Ты э̄лыпа̄лт тэ̄н Сургут ӯс по̄хат пе̄с йис ма̄т о̄лнэ ханты ще̄мьят палт ялсы̄г. Тувыл Нижневартовский район Вата па̄вылт о̄лнэ ма̄хум палт тотыглавесы̄г. Ань э̄лаль Октябрьский, Белоярский ос Ха̄льӯс районыт нупыл минэ̄г. Тот о̄лнэ соссаӈ ма̄хум хумус о̄лэ̄гыт, та урыл пӯмщалахтуӈкве патэ̄г. Ма̄ньщит, хантыт ёт хо̄нтхатыгланэ̄ныл сыс тэ̄н кина по̄слэ̄г ос хурит ва̄ре̄г. Юв Финляндия ма̄н хунь ёхтэ̄г, соссаӈ мир о̄лупсаныл урыл «Путеводитель по Югре» нампа нэ̄пак тах хансэ̄г. Вилас Роппонен ла̄выс: «Тамле нэ̄пак ме̄н таи ма̄гсыл хансылме̄н, Финляндия ма̄т о̄лнэ мир ма̄ньщи ос ханты рӯтанув палт мӯйлуӈкве вос ёхталэ̄гыт».

1106 2015. 08. 28. Людмила ТЕТКИНА

Ще̄мьят йильпи колыл мивет Ань Нефтеюганск ӯст 237 пе̄с кол о̄лы ос са̄т кол хот ты лоньхатэ̄гыт. Пе̄с колытт о̄лнэ ще̄мьят йильпи колыл ёвтнэ ма̄гсыл ювле хультум та̄лт округ бюджетныл Нефтеюганск ӯс миркол 340 миллион солко̄ви та̄стувес. Ты олныл та ӯст 128 ще̄мья йильпи колыл ёвтве̄сыт. Пойковский, Салым, Сингапай ос Каркатеево па̄влытт о̄лнэ ще̄мьят о̄с йильпи колыл мивет. Ты та̄л хо̄т э̄тпос сыс тот 48 ще̄мьят йильпи колн ва̄нтлысыт. Ты э̄лыпа̄лт та̄н пуссын пе̄с колытт о̄лсыт. Ань Салым па̄вылт яныг кол ӯнттаве, тот 72 ще̄мья о̄луӈкве тах паты. Ты кол та̄квсы порат а̄стлаве, то̄нт пе̄с колыт о̄лнэ ще̄мьят йильпи колыл тах мивет. «Югра» нампа ля̄ххал тотнэ колныл ке̄тым потыр ма̄ньщи ла̄тӈыл Л. Теткина хансыстэ.

1106 2015. 08. 28. Валентина УЗЕЛЬ

Ма̄вит ос во̄руй ӯргалан рӯпата Са̄всыр кӯщаянув ты та̄л сыс маныр рӯпата ва̄ре̄гыт, ань акваг ты урыл та потыртэ̄гыт. Та э̄тпост ос ма̄вит ӯргалан ма̄хум акванатхатыгласыт. Потыртасыт, хумус рӯпитасыт, маныр ва̄рсыт, ос э̄лаль рӯпатаныл хумус мины. Щар са̄в лю̄ль ва̄рмаль нефтяникма̄хум та̄н ты ва̄ре̄гыт, ма̄витув пулиг но̄хо̄хтартыяныл, па̄ӈктыяныл. Ма̄во̄й тотнэ те̄р турыт э̄рнэ торыг ат пе̄нтыяныл, таит хотхарӈайтавет ос акваг та маныгтахтэ̄гыт. Ма̄витув щар витыг тотыяныл, тувыл тот нэ̄матыр пум ос йӣвыт са̄в та̄л ат яныгме̄гыт. Туи сыс ка̄сыӈ нефтяной компаниян 700 километра палыт ма̄во̄й тотнэ турыт пе̄нтуӈкв э̄ри. Са̄выӈпа̄лэ компаният пуссын туп 300-400 километра палыт турыт пе̄нтэ̄гыт. Ты хосыт пе̄с турыт пуссын асытавет, ос ма̄во̄й са̄в тонна ма̄ тармылн та со̄схаты. Ань ты атхатыглам кӯщаит ла̄всыт, щар са̄в лю̄ль «Роснефть» нампа компаният рӯпитан хо̄тпат та̄н ты ва̄ре̄гыт. «Лукойл» нампа компания туп ёмащаквнув рӯпиты. Та̄н нефть тотнэ 700 километра палыт те̄р турыт пе̄нтыяныл. Ювле хультум хо̄т э̄тпос сыс во̄р мори са̄грын 98 хо̄тпа пувве̄сыт, та̄н разрешениенэ̄пак ат выгыт, нэ̄матыр олн ат ойтэ̄гыт, хо̄т таӈхе̄гыт, тот во̄р та са̄гре̄гыт. Та̄н пуссын штрафолныл пинве̄сыт. Тувыл ма̄хум ты урыл потыртасыт – ань са̄в хо̄тпа ма̄нь пупа̄пщикве во̄рт хо̄нтыяныл, юв тотыяныл. Ос гаражт лаптоварттым о̄ньщияныл. Яныг ӯсыгт, Сургутыт ос Нижневартовскат, о̄лнэ ма̄хум та̄н тох ва̄ре̄гыт. Ос ӯй юн о̄щнэ ма̄гыс разрешениенэ̄пак виӈкв э̄ри, нас юв тотуӈкв ос юн о̄ньщуӈкв щар ат ро̄ви. Ос ань тамле ва̄рмаль о̄лы, па̄влыт, ӯсыт ляпат сака са̄в во̄рто̄лнут о̄лы. Та̄н яныг порсаня ляпан о̄лмыгтэ̄гыт, тот та о̄лэ̄гыт. Пил ман лахыс ма̄гыс ма̄хум во̄рн ялуӈкв пилэ̄гыт. Ты ва̄рмаль щирыл хумус э̄лаль рӯпитаӈкве, ань ма̄вит ӯргалан ма̄хум номсахтэ̄гыт. Ӯсувт о̄лнэ ханты о̄йка Владимир Михайлович Куриков ла̄выс, хо̄тпа ляпан ханьщувлам ворто̄лнутыт э̄ри тэ̄рпил миӈкве, ос тувыл па̄вылныл хотталь э̄лаль тотуӈкв э̄ре̄гыт. Ос сапра̄нит о̄лум кӯщаит тавен ла̄всыт, ты рӯпата ва̄рнэ ма̄гыс сака са̄в олн э̄ри. Ты тэ̄рпикапай тынэ сака яныг. Ос ӯй мо̄т ма̄н те тотаве, тав ханьщувлам ма̄тэ̄н ювле ёхты. Ос тыи, со̄ль, яныг ва̄рмалиг ань ты е̄мтыс. Ворто̄лнутыт сака са̄вмысыт, та̄н ань нэ̄матырыл ат пилэ̄гыт, щар ӯсн ёхтэ̄гыт. Ань ма̄вит ӯргалан ма̄хум ла̄всыт, ты ва̄рмаль ёт маныр ва̄руӈкв э̄ри, э̄лаль номсахтуӈкв тах патэ̄гыт.

1106 2015. 08. 28. Николай МЕРОВ

Тэ̄нутпормас ма̄нки ва̄ре̄в Ты та̄л во̄ртур э̄тпос 27-29 хо̄талытт Ханты-Мансийск ӯст тэ̄нутпормас тыналан ва̄рмаль минас. Ты выставка 2010 та̄л па̄сныл ва̄рыгла̄лаве. Ань хо̄тыт щёс щё̄пита̄лвес. Ты тэ̄ла урыл округ кӯщай ва̄ӈын хум Сергей Полукеев потыртас. Тэ̄нутыт ос пормасыт «Югра-Экспо» колт тыналаве̄сыт. Ань тыналахтын ма̄хум Тюменский, Челябинский, Курганский, Свердловский областитныл, Ханты-Мансийский ос Ямало-Ненецкий округыгныл тыг ёхталасыт. Ты ва̄рмаль округ мирколт рӯпитан ма̄хум, торговопромышленный палатат рӯпитан хо̄тпат, ос Уральский Федеральный округт рӯпитан кӯщаит та̄н э̄лаль тотуӈкве номылматсыт. Ты выставка хосыт, УрФО янытыл агропромышленный комплекс хумус э̄лаль тотаве, та̄рапаттаве. Юио̄выл та̄лытт Югра ма̄т тэ̄нут янмалтан ос ӯйхул о̄щнэ ва̄рмаль акваг са̄вми. Таима̄гыс тыналахтын тэ̄ла ань ма̄н округувт ты щё̄пита̄лаве. Кӯщай ва̄ӈын хум ла̄выс, тыт о̄лнэ ма̄хманув ма̄гыс ма̄нки тэ̄нут ва̄ре̄в. Округувт мо̄лты та̄л сыс 14 со̄тыра тонна щӣщкурек, пӯрщ ос мис нё̄выль, 27 со̄тыра са̄виткем тонна ща̄квит та̄стувес. А̄с ос Иртыш я̄гт лов арыгтем со̄тыра тонна са̄всыр хӯл пуввес. Тувыл 900 тонна са̄вит пил, ла̄хыс ос ӯльпа па̄квсам атвес. Округувт 24 со̄тыра са̄лы о̄ньщаве. Ты ва̄рмаль щирыл па̄влыӈ ма̄т ат со̄тыра хо̄тпа рӯпитэ̄гыт, та̄н ань ёмас са̄витыл олныл ойтавет. Ам ты выставка урыл мо̄тыт газетат э̄лаль хансэ̄гум тах.

1106 2015. 08. 28. Людмила ТЕТКИНА

Йильпи ханищтахтын та̄л ты о̄вылтахты Во̄ртур э̄тпос 21 хо̄талэ̄т округ кӯщаюв Наталья Комарова са̄всыр миркол кӯщаит сапра̄нин Ханты-Мансийск ӯст во̄виньта̄лсанэ. Йильпи ханищтахтын та̄л кастыл округ янытыл о̄лнэ ханищтан колыт ёмащакв щё̄питаве̄сыт ман а̄ти, та урыл та̄наныл китыгласанэ. Округувт рӯпитан 759 ханищтан колыт пуссын уральтаве̄сыт. Ань туп Октябрьский районт хӯрум школа иӈ ремонтыл ва̄равет. Кӯщаит ла̄ве̄гыт, сӯкыр э̄тпос о̄выл хо̄талэ̄т ты ханищтан колыт рӯпитаӈкве о̄с тах о̄вылтахтэ̄гыт. Сапра̄нит ос акв тэ̄ла урыл кӯщаит потыртасыт. Югра янытыл ка̄сыӈ та̄лныл са̄внув ня̄врам самын паты. Тыи ма̄гсыл йильпи школат ӯнттуӈкве кӯщаит ат а̄лыме̄гыт. Ты та̄л округувт 22 со̄тыра арыгкем а̄гирищпыгрищ о̄выл классын ханищтахтуӈкве минэ̄гыт. Ань то̄ва па̄влытт ос ӯсытт ня̄врамыт кит смена щирыл ханищтахтуӈкве патэ̄гыт. Белоярский район миркол кӯщай хум Сергей Маненков ты тэ̄ла урыл потыртас. Та районт то̄ва па̄влыт йильпи школа та̄н ӯнттысыт, то̄ва школат мӯсхалыг щё̄питасаныл, са̄внув колнакыл ва̄рсаныл ос товат хӯрмит этажыл ӯнттысаныл. Ань та районт о̄лнэ а̄гирищитпыгрищит пуссын акв смена щирыл ханищтахтэ̄гыт. Округ кӯщаюв Наталья Комарова мо̄т миркол кӯщаит Белоярский районт ва̄рум рӯпатаныл ёмащакве ханищтаӈкве ла̄всанэ. Ос хоты школат яныгнувег ӯнттуӈкве ке ро̄ви, о̄с аквта щирыл вос ва̄ре̄гыт.

1106 2015. 08. 28. Николай МЕРОВ

Кӯщай нэ̄ во̄рт о̄лнэ ма̄хум палт ялыс Ань йис ма̄т о̄лнэ соссаӈ ма̄хум нё̄туӈкве патавет. Ты урыл округ кӯщай нэ̄ Наталья Комарова сапра̄нит ла̄выс. Та хо̄тпат нё̄туӈкве патавет, хотьют йис ма̄т рӯпиты ос акваг тот о̄лы. Мо̄лалнув округ кӯщай нэ̄ Василий Пяк, са̄лы ӯрнэ ханты хум, йис ма̄тэ̄н уральтахтуӈкве ялыс. Ты ханты хум округт са̄лыӈ ма̄хум Союзт кӯщай ва̄ӈын хо̄тпаг матахмат та̄л рӯпиты. Соссаӈ мирн ёмщакв ва̄ве. Рӯпататэ щирыл Белоярский районын кит хо̄талыгн ялме порат Наталья Комарова ёт таве̄н нё̄тмил ва̄рнэ ва̄ӈын хум Дмитрий Шаповал, Белоярский район кӯщай хум Сергей Маненков, ма̄вит ӯргалан департамент кӯщай хум Евгений Платонов ос округ мир пусмалтан департамент кӯщай Александр Филимонов о̄с тув ялсыт. Округ кӯщай нэ̄ йис ма̄т о̄лнэ ще̄мья палт мӯйлупсаӈ та̄гыл ёхталас. Во̄рт ма̄к щар э̄рнэ пормасыт ты на̄йив сартнэ ке̄р (бензопила) ос няслын утыт та̄нанылн тотыс. Василий Пяк кӯщай нэ̄н ты ма̄гыс яныг пӯмащипа ла̄тыӈ ла̄выс: «Ань тамле пормасыт во̄рт сака э̄ре̄гыт. Во̄ртур ос сӯкыр э̄тпосыгт ма̄к хӯл алыщлан пора, ань тах йильпи ня̄слын утытыл матса̄вит хӯл та пӯве̄в». Наталья Комарова мо̄т тотум мӯйлупсанэ Светлана э̄кватэ̄н ос пыгаге̄н Ильян ос Костян мӯйлуптасанэ. Василий Пяк Ханты-Мансийск ӯсныл ёхтум яныг кӯщаитн о̄влэ̄т такви о̄лнэ йис ма̄тэ суссылтастэ. Тот ӯнлын а̄мпарыт, сӯмъяхыт, пӯвлын кол, «Буран» о̄щнэ кол ос мо̄т са̄всыр колыт ханты хум такви пуссын ӯнттысанэ. Тав сака ма̄щтыр хум, матыра̄ти пуссын ва̄руӈкве ха̄сы. Кӯщай нэ̄ пӯвлын кол сунсыстэ ос хум мощ э̄сгыстэ, тох ла̄выс: «На̄н татем ёмас пӯвлын кол ӯнттысы̄н, яныг па̄вылт тамле пӯвлын кол ат хо̄нтэ̄гын». Ханты хум ла̄выс, тав палтэ ёхталан ма̄хум ты пӯвлын кол о̄с сака э̄сгияныл, ща̄гтым ловтхатэ̄гыт. Юио̄выл щёс Москва ӯсныл ёхталам мӯй ма̄хум халанылт во̄ритотсыт, хотьют тот э̄т хӯлуӈкве паты. Тувыл Василий такви йис ма̄тэ урыл кӯщаитн потыртас. Тав ла̄выс, матахмат та̄л сыс са̄лыянэ кит щёс са̄внуве̄г е̄мтыс. Та̄н ка̄сыӈ та̄л та̄л котиль э̄тпост са̄лыяныл ловиньтыяныл. Ань ты хо̄тал мус о̄лнэ матэ̄т яныгса̄т хо̄тпан ат са̄лы о̄лы. Мо̄тантыг о̄с са̄внуве̄г е̄мтэ̄гыт тах. Ос са̄лы тэ̄пыӈ ма̄ вос то̄вылхатас, арген сака са̄в са̄лы янмалтаӈкве ат паты. Йис ма̄тэ̄т ань нэ̄матыр ва̄рмаль а̄тим. Матыр та̄рвит е̄мты ке, ты са̄лыӈ ще̄мья «Сургутнефтегаз» нампа ма̄во̄й но̄хвинэ компаниян ос Белоярский район кӯщаитн нё̄тмилыл та̄ра ва̄равет. Белоярский район кӯщай Сергей Маненков тох ла̄выс, тот са̄в соссаӈ ма̄хум са̄лы янмалтэ̄гыт. Район янытыл пуссын аквъёт атхуйплов со̄тыра са̄лы тот о̄ньщаве. Округ кӯщай нэ̄ Наталья Комарова ёхталам кӯщаит ла̄всанэ, йис ма̄т рӯпитан соссаӈ ма̄хумн вос нё̄тэ̄гыт. Ты ханты ще̄мьян, мир ёмщакв пирмайтанэ̄ныл ма̄гыс, тав яныг пӯмащипа ла̄тыӈ ла̄выс. Округ кӯщай нэ̄ прессслужбатэ ке̄тум ля̄ххал ма̄ньщи ла̄тӈыг Н. МЕРОВ хансыстэ.

1106 2015. 08. 28. Николай МЕРОВ

Та̄рвитыӈ порат яныгмам э̄ква урыл потыр Вера Кузьмовна Тальма Ха̄льӯс район А̄нъя па̄вылт 1944 та̄лт самын патыс. Тот школат са̄т класс мус ханищтахтас. То̄нт па̄вылт са̄в мир о̄лыс. Колыт пуссын акв ляпат ӯнлысыт. Ма̄хум колхозт рӯпитасыт. Хумус та порат ма̄хум па̄вылт о̄лсыт, на̄н ты ма̄ньщи э̄ква потре э̄лаль ловиньтэлы̄н: «Ам омам Прасковья Ивановна, о̄выл о̄йкатэ щирыл Рукова, о̄лыс. Тэ̄н нила ня̄врам о̄ньщигласы̄г, ня̄враманэ̄н пуссын ма̄нь порат а̄тимыг е̄мтсыт. Та хумитэ хо̄нтлын ма̄н тотвес. Тот хотты ма̄т порславес. Хунь похоронка нэ̄пак юв ёхтыс, омам таквирот номсахтас, ня̄врам та̄л хумус о̄луӈкве паты. Тувыл мощ о̄лыс, ос ам самын та патсум. Омакем а̄щум ёт акван ат ялсы̄г. Таи та̄рвит о̄лыс, яныг увщи ос каӈк ат о̄щсум. Ане̄квам о̄с хотталь щалтыс, а̄нум ӯргалан хо̄тпа а̄тим о̄лыс. Омам ӯщлахтын хо̄тал та̄л лувколт рӯпитас. То̄ванакт мисыт ӯруӈкве пастухыг ке̄тыгла̄лвес. Аквматнакт яныг хармис капай матрыг ва̄ӈкыртахтуӈкве патыс. Омам яныг тып йӣвн но̄хха̄ӈхыс. Матъёмас, та торыг а̄гитпыгыт колхоз ма̄гыс куращ яктуӈкве минасыт. Са̄ртын ма̄хум мисыт тыттын ма̄гыс куращ са̄грысыт. Ёмщакв хотто̄слыгласаныл, тувыл тэ̄лы порат мисыт тыттысаныл. Куращ са̄всыр каша, хӯл ёт па̄йтыгласаныл манос тох мисын тыттыгласаныл. Омам та̄наныл ро̄хсанэ, ма̄ньлат ма̄хум па̄гпӯхвтысыт, хармис по̄хын ня̄влысаныл. Хунь омам хосан рӯпитаӈкв мины ке, а̄нум юв то̄вартта̄лыгластэ. Ам юн амккем та лю̄ньщантэ̄гум. Тувыл кол по̄хыт о̄лнэ пыгрищ Володя Ендырев та̄ра миннэ̄тэ порат ам лю̄ньщум хӯнтамлытэ, ты урыл оматэ̄н ла̄ви. Тувыл Анна Андреевна Ендырева пыгрищанэ ке̄тыянэ, ос ам та̄н коланылн та тотавем. О̄выл классын миннэ̄м мус ам ты ще̄мьян ӯргалаве̄сум. Хӯрум та̄лум то̄влыс, ма̄нь ня̄врам колн тотыглаӈкве патве̄сум. Тот Ульяна Давыдовна потырта̄лыс, э̄типа̄лаг а̄кванылн, увщиянылн манос каӈканылн ня̄врамыт пуссын юв вивет. Ам палтум ос нэ̄мхотьют ат ёхталас, омам хо̄тал палыт рӯпитас. Таима̄гыс тав а̄нум такви ща̄не палт юв тотыгластэ. Ща̄не а̄гмыӈмосыӈ хо̄тпаг о̄лыс. Тав ты а̄нум ӯргаластэ. То̄нт Ульяна Давыдовна туп хурумхуйплов та̄лэ то̄влыс, а̄нум юв тотытэ, такви рӯпитан матэ̄н та ха̄йты. Юв ёхтынэ̄тэ порат, сунсы, ме̄н Анна оматэ̄нтыл ка̄тыл пувхатым ла̄щалла̄щал ё̄мыгтыме̄н. Ётыл сайтыг патсум, садикын акваг сыстам супыл масхатым ёхталасум, хотманыгтахтам ма̄т лолтыглым о̄лсыт. Тув ёхтэ̄в, тот пуссын аквхурип выгырхарпа маснутыл мастыглавесӯв. Э̄типа̄лаг, юв миннэ̄в э̄лыпа̄лт, ос ма̄нки маснутанув масыгласанӯв. Номилум, садикув сака яныг ат о̄лыс. Колнакт ёнгасасӯв, тувыл хуйнэ пора ёхты, пе̄ринат щё̄питавет. Ӯщлахтын ма̄гыс тот ла̄кквапинтлан перинат (раскладушкат) ӯнттыгла̄лве̄сыт. Хуйнэ ма̄ныл по̄йтэ̄в, перинат акванатапавет, а̄ви сунт по̄хын тӯщтавет. Ма̄н юн о̄лнэ̄в сыс, пуссын ма̄ньщи ла̄тӈыл потыртасӯв. Ма̄нь ня̄врам колт ос рущ ла̄тӈыл потыртаӈкве ханищтавесӯв. Ётылнув Тихон Андреевич Вахрушев, ня̄врам ханищтан хум, ёхтыс. Тав ня̄врамыт о̄выл классын хассанэ. А̄нум ляпан во̄выстэ, о̄с нэ̄пакн хансуӈкве е̄мталастэ. Воспитатель тав нупылэ ла̄выс: «А̄ти, Вера иӈ ат мыглум, тав са̄т та̄лэ иӈ ат то̄влыс». Та̄н ма̄нав школан ат ня̄влысаныл. Ам сака нёмса а̄гирищиг яныгмасум. Хунь хо̄т та̄лум то̄влыс, омам ос акв а̄ги о̄ньщис. Пӯльницаныл юв ёхтысы̄г, тав а̄нум йигрищум ӯруӈкве хультуптастэ, такви мисэ уральтаӈкв мисколн минас. Э̄щрищум тай та лю̄ньщи, та лю̄ньщи. Ам хотрохтысум, тав ётэ о̄с та лю̄ньще̄гум. Хотыл ва̄глум маныр ва̄руӈкве, туп хо̄т та̄лум о̄лыс. Омам ме̄наме̄н сака э̄руптым о̄щсаге, э̄л минуӈкве ат та̄ртыгласаге. Хунь ам ханищтахтын ма̄ныл а̄стэ̄гум, та̄ра тав рӯпитан ма̄тэ̄н лувколн минэ̄гум. Тав ётэ тот акваг та о̄лсум. Мощ яныгмасум, тав пӯщкал ва̄рим лувыӈ сун ке̄рыгластэ. Ам на̄лув минэ̄гум, пӯщка та̄глэ̄кв витыл со̄сылум, витыл та тотылум. А̄гмыӈ манос не̄врыӈ лувыт ма̄гсыл вит хартыгласум. Таима̄гыс ань хунь лувыт ка̄салыянум (люньщи), сымум щар ёмасыг е̄мты. Я̄гримт ла̄пкан хунь минэ̄гум, по̄слым лувыт хурияныл ка̄салэ̄гум ке, та̄ра ма̄нь порам номылматыгла̄лылум. Я̄тил, тыныӈ омакем, сымум такем ща̄гты, алаты лю̄ньще̄гум. Лувколув А̄нъя па̄выл о̄вылт о̄лыс. Яныгмам ма̄кем та. Хунь тыг ёхтэ̄гум, тувле нупыл а̄ӈкватэ̄гум, аквтупмат та пора ка̄салэ̄гум. Тӯяг лувыт пуссын кон та̄ртавет. Лувкол ёмщакв хотхосгыглавес, та кол кӣвырт ос кирпащ ва̄рвес. Ма̄хум на̄лми ва̄тал лувыл ке̄рим телегал ра̄кт хартыгласыт. Лув тыглетувле тотыгласыт манос хо̄тпат ня̄р лаглыл а̄хвсалахтэ̄гыт, э̄ргим ракт тот та ня̄ке̄гыт. То̄ва э̄лумхо̄лас ра̄кт ня̄ки, то̄ват ос партыл ва̄рим хусапн ра̄кт по̄щге̄гыт. Кирпащит нормат тармыл то̄слуве̄сыт. Тувыл ты кирпащитыл конторат, садикыт, пӯльницат ос мо̄т са̄всыр колыт кӯраныл хотщё̄пита̄лве̄сыт. Тот ка̄сыӈ тув кирпащ ва̄рыглавес. Ма̄н, то̄нт ня̄врамыт, сыресыр ёнгын а̄ныт та ханлэ̄в. Ёнгын утанув я̄нас то̄слысанӯв, акван ул вос тэ̄лыгтахтасыт. Ты а̄ныянув пилыл ос ня̄нил пиныянӯв. То̄нт хо̄нтлын нак оигпас, о̄лупсав мощ кӯпнитнуве̄г е̄мтыс. Э̄кват пуссын э̄ргим рӯпитасыт. Хо̄нтлын нак юипа̄лт ма̄н иӈ хоса интернат тэ̄нутыл тыттувесӯв. Ма̄хум нусаг о̄лсыт. Хотты колта̄глыт хум хо̄тпа о̄лыс ке, та̄н хӯл пӯвсыт. Ос та колт, хо̄т хум ке а̄тим, щаквит ос щаквит ракс тай акваг о̄лыс. Па̄влыӈ мир пуссын мис о̄щсыт. Ты тэ̄нутытыл ты яныгмасӯв». Вера Кузьмовна оматэ̄н акваг нё̄тыс. Тав а̄тятэ Кузьма Лукич Рочев саран хум о̄лыс. Хо̄нтлын нак порат товлыӈха̄пыл тыламлым яласас. Псков ӯс по̄хыт хо̄нтлыматэ порсыс. Э̄ще ос хосат та̄гыл Белоруссия ма̄н минас, тот ще̄мьяӈ та̄гыл о̄лы. Ты ма̄ньщи э̄ква та̄рвитыӈ порат А̄нъя па̄выл яныгмас, ань о̄лупсатэ кӯпнитыг е̄мтыс, са̄в та̄л пуста̄гыл э̄лаль вос о̄лы.

1106 2015. 08. 28. Николай МЕРОВ

А̄нъя па̄выл ще̄мья урыл потыр Ты тӯи Ха̄льӯс район А̄нъя па̄вылт ма̄ньщи ла̄тыӈ ханищтан ва̄рмаль о̄лыс. Па̄влыӈ хо̄тпат пуссын ты тэ̄ла щё̄питан ма̄гыс нё̄тмил ва̄рсыт. Ань ам акв колта̄гыл урыл хансуӈкве таӈхе̄гум. Ты па̄выл кӯщай нэ̄ Татьяна Рукова тав ще̄мьятэ урыл потыр. Тав ла̄выс, ань па̄вылн яныгса̄т хус хо̄тпа хансым о̄лы. Мо̄лты та̄л ма̄хум ловиньтасанэ, пуссын аквъёт хо̄тпан хо̄тпа акваг тот о̄лы. Мо̄таныт ос ханищтахтуӈкве э̄лаль минэ̄гыт манос Ягрим па̄вылт о̄лэ̄гыт. Тав о̄йкатэ наме Виктор Чалданов, клуб колт рӯпиты. Хум мӯйлын кол ёмщакв хотщё̄питастэ. Кон ке̄р пӯсас ва̄рыс. Ты рӯпатаӈ хум юн ма̄нь пилорама о̄ньщи. Тот акваг матыр ма̄щтырлы. Матыр рӯпата ва̄рнэ ма̄гыс парт такви якты. Ка̄сыӈ тӯяг на̄йиӈха̄пыт па̄гпӯхвтын ӯнсах ва̄ри. Ты э̄кваго̄йкаг акв миспыгрищ, хӯрум лув о̄ньще̄г. Пыгаге̄н Иван ос Улякщи пум са̄груӈкве нё̄тэ̄г. Акватэ па̄вылт о̄лы, мо̄танэЯгримт, тэ̄н па̄вылн ва̄тихал ёхталэ̄г. Сас сака ка̄ркамыг. Туи порат, мӯй ма̄хум тот о̄лнэ̄ныл сыс, тэ̄н пӯщкал вит харттысы̄г, пасаныт ос ӯласыт ва̄рнэ ма̄гыс пилорамал па̄ртыт яктысы̄г ос мо̄т са̄всыр рӯпата ва̄рсы̄г. Матыр нё̄тмил э̄рмыглы ке, тэ̄н тув та̄ра ёхталасы̄г. Ханищтап о̄лме сыс тэ̄н ка̄сыӈ хо̄тал мӯй ма̄хум ущты пувум хӯлыл тыттысанэ̄н. А̄лпыл но̄хква̄лэ̄г, толыг выгтэ̄н, я̄н та минэ̄г. Тэ̄нэ са̄вит щапак, ка̄сэв, сымри, сортпыг хӯлыт пувиньта̄лсы̄г. Мӯй ма̄хумн хӯл алыщлан ва̄рмаль о̄с сака пӯмщиг о̄лыс. Ма̄н: Сургут ӯс ма̄ньщи ма̄щтыр хум Александр Сайнахов, Татьяна Гоголева рӯпататэ̄т нё̄тмил ва̄рнэ нэ̄ Оксана Рыжкова ос ам, ты я̄гпыгыг нялк пувуӈкве во̄выгласагӯв. Ка̄сыӈ хо̄тал, а̄лпыл, аквъёт нялк пувуӈкве па̄выл а̄лмпалн ялантасӯв. То̄нт нялк иӈ а̄тим о̄лыс. Акв толыгкан сыс туп литра са̄виткем нялк пувиньтасӯв. Хо̄тал сыс хӯрумнила толыгкан ва̄рыгласӯв. Ты хо̄талыт сыс мӯй ма̄хум пуссын атыӈ нялкыл тыттыгласанӯв. Ты коныпал лё̄ӈхын миннэ ка̄сыӈ хо̄тпа ма̄гыс я̄нас нялк хӯрыгсоврищ та̄стысӯв. Ла̄ккваминнэ̄в э̄лыпа̄лт та̄наныл мисанӯв, пуссын хотща̄гтсыт. Ань ты нё̄тнэ, хӯлыӈ ма̄ та̄н хоса номуӈкве патыяныл тах. Ты нэ̄хумыг яныг пыге̄н Иван Я̄грим па̄вылт ще̄мьятэ ёт о̄лы. Тот катерыл яласым рӯпиты. Кит ня̄врам о̄ньще̄г. Ма̄нь пыге̄н Улякщи, тав о̄с ще̄мьяӈыг е̄мтыс. А̄нъя па̄вылт ща̄нягеа̄щаге колт э̄кватэ ос ма̄нь ня̄враме ёт о̄лы. Тамле ты ёмас ма̄ньщи ще̄мья А̄нъя па̄вылт о̄лы.

1106 2015. 08. 28. Людмила ТЕТКИНА

Па̄влыӈ мир йильпи клуб хус та̄л ӯре̄гыт Октябрьский район Карымкары па̄выл клуб колт кӯщаиг Ольга Владимировна Скородумова о̄лы. Па̄вылт манхурип ялпыӈ хо̄талыт та̄н ва̄рыглэ̄гыт ос ма̄хум хумус тот мӯйлэ̄гыт, кӯщай нэ̄ та урыл китыгласлум. Ольга Владимировна тамле потыр о̄ньщас: – Ам нёлолов та̄л ты ко̄лт кӯщаиг рӯпитэ̄гум. Ты э̄лыпа̄лт па̄выл клубув, нэ̄пак ловиньтан колув ос Горнореченск па̄выл клубкол аквантотве̄сыт, ам тув кӯщиг рӯпитаӈкве паттуве̄сум. Горнореченск ма̄н па̄влув по̄хат ӯнлы, миннэ лё̄ӈхе нёлолов ве̄рыста палытыг о̄лы. Ань ты хӯрум колытт пуссын аквъёт 22 э̄лумхо̄лас рӯпиты. Ты э̄лыпа̄лт па̄влувт кит клубкол о̄лыс. То̄нт па̄выл совхозт рӯпитам ма̄хум яныг клуб ӯнттысыт, мо̄т колэ ос лесоучасток па̄лныл рӯпитас. 1995 та̄лт яныг клуб на̄йн ё̄свес. Во̄р са̄грын организация лаппантвес, клуб рӯпитаӈкве о̄с ат патыс. То̄нт ма̄н клуб та̄л та хультсӯв. Ань рӯпитан колув сака ма̄нь, са̄всыр концертыт хунь ва̄рыглэ̄в, туп 40 э̄лумхо̄лас акванатхатуӈкве тот ве̄рме̄гыт. Хус та̄л ма̄н йильпи клуб ӯре̄в. Мо̄лты та̄л ла̄ввесӯв, моще̄рт йильпи кол ӯнттуӈкве о̄вылтаве. Планнэ̄пакыл суссылтавесӯв, ма̄н пуссын хотщагтсӯв. Тох акв та̄л ювле хультыс, ты мус йильпи кол ӯнттуӈкве аты о̄вылтавес. Ма̄н кӯщаит палт акваг китыглахтэ̄в ос э̄лаль ӯрхатуӈкве та ла̄ваве̄в. Па̄влыӈ ма̄хум ма̄гсыл ма̄н са̄всыр ялпыӈ хо̄талыт ва̄рыглэ̄в. Йильпи та̄л, нэ̄квет янытлан хо̄тал, Победа хо̄тал кастыл ма̄хум во̄виньта̄лыянӯв. Ка̄сыӈ та̄л о̄йттур э̄тпос Карымкары па̄влув янытлан кастыл яныг ялпыӈ хо̄тал щё̄пита̄лыглэ̄в, ма̄хманув мӯйлуӈкве пуссын тув ёхталэ̄гыт. Ёмас клубкол ат о̄ньще̄в, ялпыӈ хо̄талыт кон ва̄рыглэ̄в. Ос тэ̄лы ӯщлахтын порат ня̄врамыт тыт акванатыглыянӯв. Площадка рӯпитаме сыс тыт 40 ня̄врам ӯщлахтас. Соссаӈ ма̄хум пе̄с наканыл э̄лаль тотнэ ма̄гсыл яныгпо̄ль э̄тпост Ӯринэ̄ква хо̄тал янытлэ̄в. Пе̄с йис ва̄рмалит ва̄нэ ма̄ньщи ос ханты хо̄тпа па̄влувт а̄тим. Ӯринэ̄ква хо̄тал урыл са̄всыр нэ̄пакыт кисхатэ̄в, тот ловиньтэ̄в. О̄влэ̄т ты ялпыӈ хо̄тал янытлаӈкве мощща ма̄хум ёхталас. Ань ка̄сыӈ та̄лныл са̄внув хо̄тпа тот мӯйлы. Ма̄н пасан щё̄питэ̄в, та̄л сыс самын патум ня̄врамыт янытлыянӯв, а̄гирищитпыгрищит са̄всыр касылыл ва̄рыглыянӯв. Акв порат тыт кружок рӯпитас, ня̄врамыт сакныл хартсыт, ю̄нсхатасыт ос са̄сныл са̄всыр хусапыт ва̄рсыт. Ольга Витальевна Мингалёва, па̄вылт о̄лнэ ма̄щтыр нэ̄, та̄наныл ханищтасанэ. Тувыл мощща ня̄врам тув ёхталаӈкве патыс, кружок э̄лаль рӯпитаӈкве воссыг ат патыс. Ты ма̄щтыр нэ̄ сасныл са̄всыр пормасыт са̄всыр сувенирыт ю̄нтуӈкве ос ва̄руӈкве сака ха̄сы. Ма̄н тав ётэ акваг рӯпитэ̄в, округув янытлан хо̄тал кастыл ва̄рум пормасанэ суссылтыянӯв. Па̄влувт ма̄щтыр ханты э̄ква Галина Ивановна Пестикова о̄лы. Тав ва̄рум пормасанэ выставкат о̄с суссылтыянӯв. Клубт «Родные напевы» ансамбль рӯпиты, тот яныгпа̄ла э̄кват э̄ргыт э̄рге̄гыт. Мо̄лты та̄л ты ансамбль 20 та̄лэ то̄влыс. Концертыт ва̄рыгласанӯв, о̄влэ̄т тув щар нэ̄мхотьют ат ёхталас. То̄нт ма̄н номсахтуӈкве патсӯв, манхурип концертыт, ялпыӈ хо̄талыт ва̄рыглаӈкве э̄ри, па̄влыӈ ма̄хум пуссын тув вос ёхталэ̄гыт. Ань ма̄н ня̄врамыт ма̄гсыл йӣквнэ ансамбль ва̄рсӯв, та̄н ща̄няныла̄щаныл ос мо̄т ня̄врамыт концерт сунсуӈкве о̄с ка̄саще̄гыт. О̄влэ̄т а̄гитпыгыт ма̄гсыл дискотека ва̄рыгласӯв. Та̄н йӣквуӈкве щар ат ёхталасыт, клуб по̄хыт вина а̄им ос тӯйтыглахтым нас ха̄йтыгтасыт. Вина ул вос ае̄гыт, йӣквнэ ва̄рмаль воссыг ат ва̄рыглэ̄в. Ань та̄н ма̄гсыланыл ос тренажёрный утыт ёвтсанӯв, тув акваг во̄виньта̄лыянӯв.

1106 2015. 08. 28. Людмила ТЕТКИНА

Хӯрум яныг ма̄щтыр хо̄тпа Надежда Фёдоровна Павлова Ты нэ̄ хо̄тхуйплов арыгкем та̄л «Старый Сургут» нампа центрыт рӯпиты. Ты та̄лыт сыс ма̄щтыр нэ̄ то̄рыл, совныл са̄всыр маснут ос са̄всыр пормас ю̄нты. Ка̄тыл ва̄рум пормасанэ ос ю̄нтум маснутанэ ва̄тихал мирн суссылтавет. Ань Надежда Фёдоровна соссаӈ ма̄хум пе̄с йис ва̄рмалитыл сака пӯмщалахты. Сургут ӯст о̄лнэ мо̄т ма̄щтыр ма̄хум ёт тав суссылтапытн, каснэ ва̄рмалитн такви пормасанэ акваг ке̄тыглыянэ. То̄ват Венгрият ос мо̄т элы хо̄н ма̄т суссылтаве̄сыт. Ты коныпал ос Екатеринбург, Тюмень, Тобольск, Москва, Ханты-Мансийск ос мо̄т яныг ӯсытн тотыглаве̄сыт. Ты ма̄щтыр нэ̄ са̄всыр фестивалитн, конференциятн акваг во̄виньта̄лаве. Тот тав такви ма̄щтырлам пормасанэ урыл потырты ос мо̄т ма̄щтыр ма̄хум палт ханищтахты. Надежда Федоровна са̄в та̄л ка̄ркамыг рӯпитанэ̄тэ ма̄гсыл сака са̄в янытлан нэ̄пакытыл, са̄всыр дипломытыл майлувес.

1106 2015. 08. 28. Валентина УЗЕЛЬ

Татьяна Семеновна Уколова Татьяна Семеновна Уколова Ты ханты нэ̄ такви о̄парищ наме Казамкина, тав Нижневартовский район Аган нампа па̄вылт о̄лы. Та павылт 1959 талт самын патыс. Оматэа̄тятэ акваг матыр ма̄щтырласы̄г. Тэ̄натэ̄н нё̄тым тав ты ханищтахтас. Па̄влэ̄т школа а̄стламе юипа̄лт Тюмень ӯсн минас, торговокулинарный училищат пормас ос тэ̄нут тыналан нэ̄г э̄лаль ханищтахтас. Та юипа̄лт Охтеурье нампа па̄вылн рӯпитаӈкв те̄твес, тот сувенирыт ю̄нтнэ цехт ат та̄лтем рӯпитас. Тот рӯпитаме порат ёмащакв ос ма̄щтырыг ю̄нсхатуӈкв ты ханищтахтас. Са̄всыр янытлан дипломнэ̄пакыл майлувес. 2006 та̄лт юв ёхтыс, ос яныгмам па̄влэ̄т та о̄лмыгтас. Рӯпата та̄л юн ӯнлыматэ такви матыр акваг та щаквщис, са̄всыр сувенирыт ю̄нтыс. Мощ ётылнув па̄вланылт культура центр пусвес, тув рӯпитаӈкв во̄ввес. Ань та па̄сныл, са̄т арыгтем та̄л тот ты рӯпиты. Са̄сныл са̄всыр хусапыт ю̄нтуӈкв ханищтахтас, са̄лы совныл пормасыт ю̄нты, сакныл са̄всыр хорамыт харты. Ты пормасанэ са̄всыр выставкат суссылтавет, яныг ӯсытн, э̄лы ма̄н тотыглавет. Ань ты э̄тпост са̄всыр яныг ма̄щтырыт халанылт касманыл порат ты нэ̄ ман округув па̄лыл ма̄щтырлас. Нила щё̄с сыс са̄сныл хусап ю̄нтуӈкв ат а̄лымас, мощ юв хультыс.

1106 2015. 08. 28. Николай МЕРОВ

Александр Иванович Синицын Александр Иванович Синицын 1949 та̄лт самын патыс. Тав о̄лнэ̄тэ палытыл са̄всыр ма̄тт 45 та̄л рӯпитас. Нила та̄л культура ва̄рмаль щирыл рӯпиты. Ань пенсия олн вӯим юн о̄лы. Тав ма̄нь та̄гыл йӣвныл са̄всыр пормасыт ёргуӈкве ха̄сы. Ты ма̄щтыр о̄йка 2008-2009 та̄лыгт Нягань ӯс музей колт ка̄тыл са̄всыр пормасыт ёргим рӯпитас. Тувыл 2010-2011 та̄лыгт ос Ханты-Мансийск ӯс «Центр народных художественных промыслов и ремёсел» колт рӯпитас. Соссаӈ ма̄хум мирхал фестивалит о̄лыгланэ̄ныл порат, тав йӣвныл са̄всыр хорамыӈ пормасыт ёргиматэ ма̄гыс са̄в щёс о̄выл места вуйлас. Кӯщаитн рӯпатанэ ма̄гыс дипломытыл мӯйлупта̄лвес. Ялпыӈ хо̄талыт о̄лыглан порат, тав акваг тув во̄виньта̄лаве. Такви ва̄рыглам о̄выл суссылтапе «Повесть древних узоров» намаим о̄лыс. Ты вармаль 2008 та̄лт Нягань ӯст щё̄пита̄лвес. Ты та̄л ос кит ма̄щтыр хо̄тпаг, ты Александр Синицын (Нягань ӯс) ос Александр Сайнахов (Сургут ӯс) Нефтеюганск ӯст яныг суссылтап варыгла̄лсы̄г. Ты ма̄щтыр хо̄тпаг тот йӣвныл тэ̄нки ва̄рум пормасанэ̄н суссылтасанэ̄н.

1106 2015. 08. 28. Николай МЕРОВ

Петр Шешкин номылматыглан кастыл Ты тув лӯпта э̄тпост Ха̄льӯс район А̄нъя па̄вылт ща̄нь ла̄тыӈ э̄лаль тотнэ ма̄гыс ханищтап щё̄пита̄лвес. Ты кастыл ка̄тыл хурит по̄слын о̄йка Г. С. Райшев колэ̄т рӯпитан учёный нэ̄ Наталья Николаевна Фёдорова, тув во̄виньта̄лвес. Тот тав Пётр Ефимович Шешкин, Ло̄пмус па̄вылт о̄лум ма̄ньщи ма̄щтыр хум, урыл потыртас. На̄н тав потре э̄лаль ловиньтэлы̄н. Петр Ефимович 1930 та̄лт Ло̄пмус па̄вылт самын патыс. О̄лме па̄лытыл тав йӣвныл, а̄ньтныл китса̄т арыгтем са̄всыр хури ёргыс. Тав ва̄рум пормасанэ Кульпас па̄выл, Ха̄льӯс, Ханты-Мансийск ӯс ос мо̄т ӯс музеитт о̄лэ̄гыт. Тав оматэ са̄в мо̄йт ос а̄мщ ва̄с. А̄ще ос во̄раян, хӯл алыщлан хумыг о̄лыс. Петр ма̄нь та̄гыл во̄рт яныгмас, ма̄витув сака э̄руптастэ. 1960 та̄лт, хунь о̄лнэхӯлнэ наканув но̄хво̄рмалтаӈкве патве̄сыт, са̄всыр ма̄ныл этнографхо̄тпат ма̄нь па̄влытн кисхатым яласаӈкве патсыт. Ма̄к та порат ты тав ёргум хуриянэ ка̄салаве̄сыт. Ка̄тыл хурит по̄слын о̄йка Геннадий Райшев, о̄с та порат мирн ва̄нэ хумыг ты е̄мтыс. Шешкин о̄йка ёрыгхатнэ рӯпататэ коныпал ма̄ньщи хансат атыс. Хансат хаснэйӣвыл нэ̄пакн по̄слысанэ. Аквтупмат пилыс, хуньт хотсоймуӈкве ве̄рме̄гыт. Ань та хансат пуссын акванатве̄сыт ос нэ̄пакыг та̄ртве̄сыт. Ты ма̄щтыр хум такви мо̄йтыт ос э̄ргыт хансыс. Тувыл Ло̄пмус па̄выл пе̄с ӯсквет пормасыт кинсыс. Ты пормасыт ань пуссын этнографический музейт о̄ньщавет. Тав палтэ Ленинград ӯсныл, Эстония ос мо̄т ма̄ныл пе̄с пормас атнэ ма̄хум ёхталасыт. Тав учёный хо̄тпатн наука рӯпата ва̄руӈкве нё̄тыс. О̄лум колэ̄т ӯщлахтаме порат, радио хосыт о̄лнэхӯлнэ нак урыл ля̄ххалыт хӯнтлуӈкве сака э̄руптас. Тав сака ве̄щкат хум о̄лыс. Ам номсэ̄гум, хотьют ты ма̄т о̄лы, та̄н пуссын То̄румн тамле со̄тыл пинавет. Петр Ефимович яныгмам ма̄те̄тэ ма̄гыс сыме сака ща̄ргыс. Ма̄ньщи о̄лупсав э̄лаль тотнэ ма̄гыс ма̄к тав ты яныг рӯпата ва̄рыс. Пе̄с порат хум хо̄тпат са̄выӈпа̄лэ йӣвныл са̄всыр пормасыт ёргысыт. Хунь тав ва̄рум пормасанэ о̄выл щёс Москва ӯст суссылтаве̄сыт, ма̄хум та̄ра пӯмщалахтуӈкве патсыт. То̄нт тув са̄в ма̄щтыр хо̄тпа ёхталас кос, ос туп тав хуриянэ журналн по̄слуве̄сыт. Ты ул таима̄гыс тох е̄мтыс, Шешкин о̄йка во̄раям хум о̄лыс, ка̄сыӈ хури щар аквтупмат лылыӈыг ва̄рыстэ. Во̄руй хумус ё̄ми, товлыӈ ӯй хумус тыламлы, хурияныл пуссын ма̄щтырыг ёргысанэ. Ты ва̄рмалит туп во̄раян хо̄тпа ва̄ганэ. Таима̄гыс тав рӯпатанэ мирн сака мӯстысыт. Наталья Николаевна ты ма̄щтыр хум урыл иӈ хоса потыртас, ос юио̄вылт тох ла̄выс, Петр Ефимович ма̄щтырлаӈкве нэ̄мхо̄т ат ханищтахтас. Ты пормасанэ пуссын такви номтэ щирыл ва̄рсанэ. 1970 та̄лытт тав Ханты-Мансийск ӯст о̄лум творчество колн пищма хансыглам. Ты рӯпататэ э̄лаль тотнэ ма̄гыс та̄нанылныл нё̄тмил во̄выс, та̄н ётаныл са̄в та̄л рӯпитас. Ань тав ёргум хуриянэ пе̄с йис пормас атнэ колт ка̄салаӈкве ро̄ве̄гыт. Ты ма̄щтыр хум 1981 та̄лт а̄тимыг е̄мтыс. Таве кастыглан ма̄гыс округ Дума депутат нэ̄ Татьяна Гоголева са̄в та̄л «Шешкинские чтения» ханищтап ва̄рыглы. О̄выл ханищтапыг Ло̄пмус па̄вылт минасы̄г. Ты та̄л ань хӯрмиттыг А̄нъя па̄вылт щё̄пита̄лвес.

1106 2015. 08. 28. Александр ВЬЮТКИН

Та̄л сыс щё̄питахтуӈкв о̄вылтахтасыт «Ма̄нь ӯскве» кол ня̄врамыт сменаныл а̄стын юипа̄лт мо̄тантыг рӯпитан ва̄рмаляныл кастыл щё̄питахтуӈкв ань ты о̄вылтахтасыт. Мо̄тыт тувыт о̄с аквты са̄вит хӯрум смена ва̄руӈкв номсэ̄гыт. Та коныпал тэ̄лы сыс иӈ са̄всыр пӯмащ ня̄врамыт ёт ва̄руӈкв таӈхе̄гыт. Тэ̄лы порат Саранпа̄вылт о̄лнэ музей колт ва̄тихал акванатхатыглахтуӈкв патэ̄гыт. Ты порат «Ма̄нь ӯскве» ма̄хум акваннё̄тхатым о̄выл журналнэ̄пак та̄ратасыт. Мо̄тантыг о̄с акв тамле нэ̄пак щё̄питаӈкв патэ̄гыт. «Ма̄нь ӯскве» кӯщай нэ̄ Любовь Павловна Стаканова тох ла̄выс: «Ма̄н ты та̄ратан нэ̄пакув хорамыӈыг щё̄питаӈкв патылӯв. Тув ёмас хӯрит ва̄руӈкв э̄ри. Мо̄т щирыл нэ̄пакув нэ̄мхотьютн ловиньтаӈкв ат патаве. Тыи ма̄гсыл ма̄навн ка̄сыӈе̄мт матыр пӯмащ номылматуӈкв э̄ри».

1106 2015. 08. 28. Валентина УЗЕЛЬ

Ня̄врамыт ща̄нь ла̄тӈыл потыртаӈкв ат таӈхе̄гыт Ханты-Мансийск ӯс ляпат Кышик нампа ма̄нь па̄выл ӯнлы. Тот ань са̄выӈпа̄лэ А̄с ма̄хум о̄лэ̄гыт. То̄ват ханты ла̄тӈыл халанылт потыртэ̄гыт. Ос ня̄врамыт ла̄тыӈ ва̄ӈкв щар ат ка̄саще̄гыт. Ты урыл анумн Мария Харанзеева потыртас. Тав тох ла̄выс: Ам са̄в та̄л школат ня̄врамыт ханищтасум. Юио̄выл нила та̄л нэ̄пак ловиньтан колт библиотекариг рӯпитэ̄гум. Школат ам ма̄нь ня̄врамыт ханищтасанум. Тувыл э̄лаль ханищтахтуӈкв ялсум ос яныг классыт ня̄врамыт ханты ла̄тӈыл ханищтаӈкв патсанум. Школат рӯпитаӈкв ань та̄рвитыӈ, ня̄врамыт ханты ла̄тӈыл потыртаӈкв ос ща̄нь ла̄тӈаныл ва̄ӈкв щар ат ка̄саще̄гыт. Ос ты ва̄рмаль таима̄гыс осннэ̄глыс, юн ща̄няныла̄щаныл ханты ла̄тӈыл халэ̄нт ат те потыртэ̄г, ня̄враманэ̄н ла̄тыӈ хӯлуӈкв о̄с тах ат ка̄саще̄гыт. Ва̄им, ка̄сыӈ ще̄мья урыл тох ла̄вуӈкв ат ро̄ви. То̄ва колта̄глыт ёмащакв о̄лэ̄гыт, ма̄н мирув пе̄с ва̄рмалитыл, пе̄с накытыл сака пӯмщалахтэ̄гыт, пе̄с о̄лупса э̄лаль тотуӈкв ка̄саще̄гыт. Ань тамле хо̄тпа са̄внув е̄мтыс, тох э̄лаль те мины, то̄нт э̄рыӈ, со̄ль, ма̄н соссаӈ ма̄хум пе̄с о̄лупсав но̄хво̄рмалтылӯв ос э̄лаль тах тотылӯв. Па̄влувт ялпыӈ хо̄талыт акваг ва̄рыглавет, ма̄н тот мӯйлэ̄в, ӯщлахтэ̄в. Ма̄щтырлаӈкв ка̄сащан нэ̄ хо̄тпат я̄нас атхатыглэ̄гыт, супыт, нуй сахит ю̄нтуӈкв ханищтахтэ̄гыт. Ам ма̄нь а̄гим хо̄т та̄лэ то̄влыс, ань ты таквсы школан тах мины. Пыгум яныг, тав ма̄н мирув нупыл номтэ ёмас. Ма̄нь та̄гыл «Мощ хот» нампа э̄ргын ос йӣквнэ колн ялантас, та ня̄врамыт ёт хо̄та̄ти йӣквыс, э̄ргыс. Ань ты кол ат рӯпиты, кӯщаяныл ӯсн о̄лмыгтас. Ня̄врамыт ёт ань нэ̄мхотьют ат рӯпиты. Ам ханты ла̄тӈум ёмащакв ва̄глум, «Ханты ясанг» нампа газета акваг ловиньтылум. Ща̄нь ла̄тӈув э̄лаль тотуӈкв э̄ри, ань ла̄тыӈ ва̄нэ ма̄хум ня̄враманыл потыртаӈкв вос ханищтыяныл. Ма̄н ма̄нти нэ̄матыр ат те ва̄ре̄в, ла̄тӈув та мины. Тамле ты ёмас потыр ханты нэкве потыртас. Та̄н На̄й-О̄тыранылн ла̄тӈаныл э̄лаль тотнэ магыс вос нё̄тавет, пуста̄гыл вос о̄лэ̄гыт.

1106 2015. 08. 28. Людмила ТЕТКИНА

А̄с я̄ ва̄тат о̄лнэ рӯтыт Во̄ртур э̄тпос 20 хо̄талэ̄т «Торум Маа» нампа музейт «Родовое гнездо Новьюховых» нампа выставка рӯпитаӈкве о̄вылтахтас. Суссылтап «История семьи в истории страны след прожитой жизни» нампа проект щирыл щё̄питавес. Тамле выставкат 2008 та̄л па̄сныл музейт ва̄рыглавет. Ты сыс тот Кондиныт, Молдановыт, Садоминыт ос мо̄т ма̄ньщи, ханты ма̄хум рӯтаныл урыл тот потыртавес. Ты выставка Наталья Евгеньевна Краснопеева, музейт рӯпитан нэ̄, ва̄рыстэ. Таве̄н Тэ̄к па̄вылт о̄лнэ нэ̄г Галина Михайловна Курганова (Новьюхова) ос Елена Леонтьевна Новьюхова нё̄тсы̄г. Новьюховыт ань са̄всыр ма̄т о̄лэ̄гыт, та̄н акв о̄парищ нам кос о̄ньще̄гыт, тувыл рӯтыг ат ловиньтахтэ̄гыт. Рӯпитан суссылтапыт Михаил Андреевич ос Екатерина Семёновна Новьюховыг урыл потыр о̄лыс. Тэ̄н Ха̄льӯс район Тэ̄к па̄вылт о̄лсы̄г. Новьюховыг э̄кваго̄йкаг ня̄враманэ̄н ос апыгрищанэ̄н наманыл акв яныг нэ̄пакн хасве̄сыт. Михаил Андреевич 1898 та̄лт самын патыс. Ще̄мьянылт тав щар яныг ня̄врамыг о̄лыс. Оматэ хунь а̄тимыг е̄мтыс, тав а̄тятэ̄н ма̄нь а̄пщирищанэ, йӣгрищанэ янмалтаӈкве нё̄тыс. Та̄н пуссын янгыг е̄мтсыт, туп то̄нт нэ̄ тотыс. Екатерина Семёновна Рябчикова ёт 1939 та̄лт акванминасы̄г. Аквта та̄лт яныг а̄гитэ̄н Татьяна самын патыс. Тувыл война о̄вылтахтас, Михаил Андреевич хо̄нтлаӈкве тотвес. Тав Ленинград ӯс вуянтас, тот сапёрыг о̄лыс. 1943 та̄лт сакватавес, акв ла̄глэ хотяктувес, ты юипа̄лт юв та ке̄твес. То̄нт тав ке̄р ла̄глыл ва̄рвес, ты ла̄глэ 12 кила та̄рвитэ о̄лыс. Тамле ла̄глыл ё̄муӈкве хоса ат ве̄рмыс. О̄йка ма̄щтыр хо̄тпаг о̄лыс, юв ёхтыс, таквина̄тэ̄н йӣвныл ла̄гыл ва̄рыс. Тамле ла̄глыл ёмащакв ё̄мыгтас, хӯл алыщлаӈкве, во̄раяӈкве о̄с акваг ялантас. Михаил Андреевич ос Екатерина Семёновна нёлолов ня̄врам о̄щсы̄г. Тэ̄н ня̄враманэ̄н пуссын ёмас, ка̄ркам хо̄тпаг янмалтасанэ̄н. Яныг а̄гитэ̄н Татьяна 1979 та̄лт а̄тимыг е̄мтыс, мо̄таныт та̄нки колта̄глыл са̄всыр ма̄т о̄лэ̄гыт. Та̄н наманыл о̄с пуссын яныг нэ̄пакын хансым о̄лэ̄гыт. Михаил Андреевич ос Екатерина Семёновна а̄гитэ̄н Галина Михайловна ты суссылтап ва̄руӈкве нё̄тыс. Тав суссылтапн са̄всыр пе̄с хурит, пормасыт, а̄тятэ ма̄глын тагатан по̄санэ мисанэ. Э̄ква такви о̄с сака ма̄щтыр хо̄тпаг о̄лы, са̄сныл а̄ныт, совтыт, па̄йпыт ю̄нтуӈкве сака ха̄сы. Тав ва̄рум пормасанэ округувт, Россия янытыл ос Венгрия хо̄н ма̄н суссылтаӈкве тотыглаве̄сыт. Ты коныпал э̄ква ханты э̄ргыт э̄ргуӈкве ёмащакве ха̄сы, тав мо̄т нэ̄ хо̄тпат ёт «А̄с нэ̄» нампа ансамблит са̄в та̄л э̄рги. Галина Михайловна такви ща̄нягеа̄щаге урыл тот хоса потыртас. Новьюхов колта̄гыл урыл ва̄рим суссылтап сӯкыр э̄тпос 16 хо̄талэ мус «Торум Маа» музей рӯпитаӈкве тах паты.

1106 2015. 08. 28. Александр ВЬЮТКИН

Ма̄щтырыг о̄лнэ ма̄хум Ма̄нУдмуртия ма̄н Ижевск ӯсн ялмув порат тот о̄лнэ ма̄хум йис та̄гыл о̄лнэ ма̄наныл хосыт са̄всыр пӯмащ суссылтым тотыглавесӯв. Акв тамле пӯмащин, Дебёсы па̄вылт рӯпитан «Дебёсский дом ремёсел» нампа колн, тотыглавесӯв. Тот рӯпитан хо̄тпатка̄тылса̄всырпормасытма̄щтырланэ̄нылма̄гсыл Россия янытыл ёмщаквег ва̄вет. Ты экскурсия ма̄щтырланма̄хум колнаканыл щирыл о̄лыс. Аквъёт пуссын тот хо̄тхуйплов ма̄щтыр хо̄тпа рӯпиты. Щар о̄выл колнакт то̄сам пум ос сас ёт рӯпитан хо̄тпаг ма̄щтырлэ̄гыт, та̄н палтаныл щалтсасӯв. Пум ёт рӯпитан нэ̄ наме ЕленаЧермянина, тав «Заслуженный работник культуры Удмуртской республики»яныг нам о̄ньщи. Тав хансум нэ̄паканэ щирыл аньреспубликанылт о̄лнэ ма̄хум пумыл са̄всыр пормас са̄гуӈкв ханищтахтэ̄гыт. Елена Африкановна ва̄т нупыл тит та̄л пум ёт рӯпиты. Маныр тав сагуӈкв номылматы, пуссын а̄ртми. Тувыл сас ёт рӯпитан ма̄ньлат нэ̄ Татьяна Зобина ёт ва̄йхатсӯв. Татьяна Георгиевна сас ёт хӯрум та̄л рӯпиты. Тав ань ла̄выс: «Ма̄щтыр хо̄тпаг е̄мтнэ мус а̄нумн иӈ хоса, ам иӈ хан ищтахтэ̄гум». Э̄лаль ма̄н ива нампа нир ёт рӯпитан нэ̄ палт тотвесӯв, тав наме Татьяна Зобина. Татьяна Ивановна ма̄нь тагыл ива нирыл а̄ныт, хусапсовыт саги. Ты ма̄щтырлан ва̄рмальн а̄тятэ̄н ханищтавес. Тув палыт яныгман ива нирытныл пормасыт сагнэ ма̄гсыл таквсы щё̄питавет. Таквсы атум нираныл ёмщаквег то̄слым юипа̄лт, хуриянылт я̄ӈк оспаг хосан хультэ̄гыт. Татьяна Ивановна ёт потыртамув юипа̄лт Николай Иванов ёт ва̄йхатасӯв. Тав ос йӣв ёт рӯпиты, са̄всыр хорамыӈ а̄нысупыт, ня̄лыт, ӯмпит яктын ма̄щтырыг о̄лы. Дебёсы па̄вылт йӣвныл яктым хурит пуссын тав яктысанэ. Николай Владимирович ва̄тихал ка̄тыл ма̄щтырлан ханищтапыт о̄лыгланэ̄ныл порат тув акваг во̄виньта̄лаве. Тувыл э̄лаль ма̄н пасанынпиннэто̄рыт, пуӈкын пиннэто̄рыт ос ма̄снутытса̄всыр щирыл хорамтан ма̄щтыр нэ̄ палт ва̄нттувесӯв. Тав наме Наталья Иванова. Наталья Антоновна акв сэ̄тапыл пинтлын то̄ранэ хоса сагиянэ. Акв пасан тармыл пиннэ рушник нампа то̄р ат, са̄т хо̄тал сыс ва̄риянэ. То̄р хорамтан ма̄хум та̄нти рӯпатаныл о̄влэ̄т нэ̄пак тармыл по̄слыяныл. Тувыл ущ рӯпатаныл э̄лаль нёвумты. Наталья Антоновна хосат та̄гыл тамле рӯпата ва̄рнэ̄тэ ма̄гсыл са̄выӈпа̄л хораманэ та̄ра э̄рнэ щирыл ос по̄слын та̄л пиныянэ. Щар юио̄выл колнаканылт та̄нти музеяныл о̄лы, та колнак ма̄навн о̄ссуссылтасаныл. Тамле пӯмащит ма̄навн сака мӯстысыт. Ты ма̄щтырлан хо̄тпат ла̄всыт: «Ты хо̄тал юипа̄лт ма̄н иӈ ёмащакнуве̄г ханьщуӈкв ос ва̄ӈкв патаве̄в».

1106 2015. 08. 28. Валентина УЗЕЛЬ

Ня̄врамыт хури по̄слысыт Ты э̄тпос о̄выл хо̄талэ̄т Кондинский районт туризм тэ̄ла э̄лаль тотнэ ма̄хум ма̄гсыл фестиваль ва̄рыглавес. Тув округув янытыл са̄в мир ёхталас. Ос та̄н районт о̄лнэ ма̄хум о̄лупсаныл урыл вос пӯмщалахтэ̄гыт, са̄всыр пӯмащ рӯпата тот ва̄рвес. Ня̄врамыт тот о̄с нё̄тсыт, мӯй ма̄хум ща̄ил айттысаныл. Ос ты э̄лыпа̄лт та̄н ма̄гсыланыл касыл ва̄рыглавес, хотьютаныл щар нё̄тнэ хури ка̄тыл по̄слы. Тувыл ёмас хурит акванатве̄сыт ос ты мӯйлын ва̄рмаль о̄лум порат та̄н суссылтаве̄сыт. Хурит по̄слум ня̄врамыт халт хӯрум ня̄врам но̄хпатсыт, та̄н наманыл тот ла̄вве̄сыт. Ос ӯщлахтын пора о̄лнэ̄тэ ма̄гсыл та̄н юн а̄тим о̄лсыт, пуссын хотталь мо̄т ма̄н ӯщлахтуӈкв тотымат. Таима̄гыс та̄н ляпа рӯтаныл манос аквъёт ханищтахтын ня̄врамыт та̄н мӯйлупсаныл висаныл. То̄ва ня̄врамыт, со̄ль, сака ёмащакв хури по̄слуӈкв ха̄сэ̄гыт. Ань ты хурит ма̄н ты газетат ты суссылтыянӯв. Тамле касылыт ка̄сыӈ районт ва̄руӈкв патавет. То̄нт ты щар ма̄к ёмащакв по̄слуӈкв ха̄снэ ня̄врамыт та̄рапаттавет ос мӯйлупсал тах мивет.

1106 2015. 08. 28. Людмила ТЕТКИНА

«Юрсил» нампа ӯщлахтын ма̄ Ты э̄тпос 9 хо̄талэ̄т соссаӈ ма̄хум янытлан хо̄тал кастыл Ханты-Мансийск ӯст яныг ялпыӈ хо̄тал ва̄рыглавес. Ольга Александровна Фомичёва, «Элы хотал» нампа община кӯщай нэ̄, тув о̄с во̄виньта̄лвес. То̄нт ты ма̄ньщи нэ̄ ос А̄с-угорский институтыт рӯпитан нэ̄ Светлана Алексеевна Попова янытлавесы̄г. Тэ̄н Юван Шесталов намыл пиным премиял майвесы̄г. Ольга Александровна Фомичёва Кондинский район Силава па̄вылт о̄лы. Пенсиян хунь минас, о̄луӈкве тув ва̄нтлас. Яныгмам па̄влэ Урай ӯст по̄хат ӯнлы, миннэ лё̄ӈхе 14 ве̄рыста палытыг о̄лы. Хосат та̄гыл та па̄вылт нэ̄мхотьют ат о̄лы. Ма̄ньщи нэ̄ Урай ӯст такви о̄лнэ колэ тыналастэ ос Силава па̄вылт кол ӯнттыс. Тот тав «Элы хотал» община ос «Юрсил» нампа ня̄врамыт ӯщлахтын ма̄ ва̄рыс. Ань ка̄сыӈ та̄л Кондинский районныл ос Урай ӯсныл ня̄врамыт ӯщлахтуӈкве тув ёхталэ̄гыт. Ты та̄л Силава па̄вылт акв смена о̄йттур э̄тпос о̄выл хо̄талныл 10 хо̄талэ мус рӯпитас. Урай, Советский ос Ханты-Мансийск ӯсытныл о̄лнэ 50 а̄гирищпыгрищ тот ӯщлахтасыт. Ня̄врамыт тот палаткат о̄лсыт, тыи ма̄гсыл туп 11-15 та̄л яныт ня̄врамыт тув ялуӈкве ве̄рме̄гыт. Ты та̄л Ольга Александровна ня̄врамыт ёт рӯпитаӈкве А̄с-угорский институтыт рӯпитан учёный нэ̄ Светлана Алексеевна Попова тув во̄виньта̄лыстэ. Светлана Алексеевна «Юрсил» нампа ӯщлахтын ма̄ урыл ла̄выс: «Ам о̄выл щёс тув рӯпитаӈкве ялсум. А̄гирищитнпыгрищитн ам ма̄ньщи пе̄с йис ва̄рмаляныл урыл потыртасум. Потрум «Этническая история народа манси» намаяслум. Силава па̄вылт са̄всыр ӯсытт о̄лнэ ня̄врамыт ӯщлахтасыт. То̄ват ма̄ньщи мир о̄лупса урыл щар нэ̄матыр ат ва̄гыт. О̄влэ̄т номсысум, ня̄врамыт пе̄с ва̄рмалит урыл хӯнтлуӈкве ат патэ̄гыт. Та̄н тай такем пӯмщалахтасыт, акваг та китыглахтасыт. Ня̄врамыт ёт тот рӯпитаӈкве а̄нумн сака мӯстыс. То̄ва а̄гирищитпыгрищит ка̄сыӈ та̄л тув ӯщлахтуӈкве ёхталэ̄гыт. Та̄н пуссын Ольга Александровна сака э̄руптыяныл. Матъёмас тамле ӯщлахтын ма̄ Кондинский район Силава па̄вылт о̄лы». Ня̄врамыт ёт рӯпитаӈкве Анатолий Николаевич Хомяков ос Ольга Александровна Кошманова тув о̄с ёхталасы̄г. Анатолий Николаевич Половинка па̄вылт ма̄ньщи музей ва̄рыс, о̄йка хо̄нтаӈ ма̄ньщит пе̄с йис о̄лупса урыл сака са̄в ва̄г. Этностойбище рӯпитам порат округ Дума депутатат Надежда Геннадьевна Алексеева ос Урай миркол кӯщаит тув ёхталасыт. «Юрсил» нампа стойбище ня̄врамыт ма̄гсыл 2008 та̄л па̄сныл рӯпиты. Ты пора сыс 500 арыгкем ня̄врам тот ӯщлахтас. Ты э̄лыпа̄лт та̄н округ бюджетныл олныл та̄стыглаве̄сыт. Ты та̄л Урай ӯс миркол олн майлас. Ща̄нита̄щит ня̄враманыл тот ӯщлахтынэ̄ныл ма̄гсыл олн щар ат ойтэ̄гыт.

1107 2015. 09. 11. Тамара МЕРОВА

Ня̄врамыт ханищтахтын пораныл ёхтыс Сӯкыр э̄тпос о̄выл хо̄талэ̄т округув янытыл 325 школат рӯпитаӈкве о̄вылтахтасыт. Туи сыс ты колыт пуссын ёмщакв щё̄питаве̄сыт. Тувыл ты та̄л Кондинский районт Луговской па̄вылт ос Октябрьский район Сергино па̄вылт кит йильпи школагт ня̄врамыт ханищтахтуӈкве патсыт. О̄выл школа 160 са̄виткем ня̄врамыт ма̄гыс ос мо̄танэ 180 ня̄врамыт ма̄гыс ӯнттым о̄лэ̄г. Сергино па̄вылт йильпи школа пӯснэ ма̄гыс кӯщай Наталья Комарова тув ёхталас. Тав тот рӯпитан ос ханищтахтын ня̄врамыт янытласанэ. Ты школа ань Николай Иванович Сирин намыл пинвес. Ты хум 1941 та̄лт войнан тотвес, Сталинград ӯс по̄хат порславес. Тав «Герой Советского Союза» яныг намыл майлувес. Ань ты школат а̄хвтасыӈ па̄рт тагатавес, тав апге Елизавета Васильевна Климова тот о̄лыс. Аквта хо̄талт Ханты-Мансийск ӯс №6 школа о̄с Н. И. Сирин намыл пинвес. Та ляпат акв ӯсхулы о̄с тав наме̄тыл о̄лы. Ӯс миркол кӯщаиг о̄лнэ хум Максим Ряшин мир пуссын янытласанэ ос Сирин урыл хансым нэ̄пак ня̄врамытн мӯйлуптастэ. Ты та̄л ты школат 159 ма̄нь а̄гирищпыгрищ ханищтахтуӈкве о̄вылтахтасыт. Округ янытыл 198 со̄тыра са̄вит ня̄врамыт ханищтахтуӈкве патсыт. Та̄н халанылт 22 со̄тыра 600 а̄гирищпыгрищ о̄выл щёс школан минасыт. Та̄н губернатор па̄лыл пуссын мӯйлупсал майве̄сыт. Ня̄врамыт номтыӈыщ вос ханищтахтэ̄гыт, пуста̄гыл пуссын вос о̄лэ̄гыт. Ищхӣпыӈ утыт хансым потыр ма̄ньщи ла̄тӈыл Тамара Мерова хансыстэ.

1107 2015. 09. 11. Светлана РОМБАНДЕЕВА

Округ кӯщаюв ӯс ма̄хум ёт потрамас Ма̄н ма̄вт кӯщаиг о̄лнэ нэ̄ Наталья Комарова Нягань ӯс мир ёт хо̄тах щё̄с палыт потрамас. Тувыл ты юипа̄лт па̄выл кӯщаит акванатыгласанэ ос та̄н ётаныл потыртас. Ӯс ма̄хум тав нуплэ ань маныр ла̄всасыт, матыр та̄рвит ва̄рмаль о̄ньще̄гыт ман а̄ти, пуссын ты урыл тав ла̄тыӈ ла̄выс. Ань ма̄хум кӯщаянылн хумус нё̄тавет, та̄рапатыс. Ка̄сыӈ кӯщаин тэ̄латэ хӯлтыстэ, ёмащакв вос рӯпиты, ма̄хманэ̄н мӯсхал щирыл вос нё̄ты. Щар ма̄к та̄рвитыӈ тэ̄ла таи, ань тот са̄в хо̄тпа пе̄с колытт о̄лэ̄гыт. Документыт щирыл, 2013-2015 та̄лыт сыс ма̄хум 229 са̄вит пе̄с колытныл йильпи колн вос ва̄нтлэ̄гыт. Тот прописка щирыл 712 хо̄тпа о̄лэ̄гыт. 2013-2014 та̄лыг сыс ма̄хум туп 31 колытныл мо̄т колн ва̄нтлысыт. Ты тэ̄ла ма̄гыс ӯс нупыл 476 миллион солко̄ви ке̄твес, ань 198 квартират хӯрум йильпи колытт вос ёвтавет. Наталья Комарова ла̄выс: «Ма̄хум коланылн ва̄нтлынэ̄ныл юипа̄лт э̄рнэ нэ̄паканыл мӯсхал щирыл вос ва̄равет, хансавет. Хо̄тпа тав квартиратэ те, тав нуплэ вос хансаве». Каснэ ва̄рмаль урыл о̄с са̄в потыр о̄лыс. Округ кӯщай нэ̄ ӯс кӯщаит нупыл кантлым потыртас: «Нягань ӯст каснэ ва̄рмаль щар нэ̄матарыг ат хо̄йхаты. Каснэ колыт ма̄гыс олн на̄н сака мощща та̄стэгы̄н. Округув янытыл мо̄т ӯсытыт каснэ колыт ма̄гыс кӯщаит са̄в олн щё̄пита̄лэ̄гыт, са̄всыр колыт ӯнттэ̄гыт. Таима̄гыс тот ма̄хум ва̄тихал касыгла̄лэ̄гыт. На̄н ӯс ма̄хманыл каснэ нупыл тэ̄ланыл сака а̄тим. Яныг каснэ колыт коныпал о̄лнэ колыт по̄хат каснэ ма̄гыс ма̄нь ма̄т вос ва̄равет, ня̄врамыт кон коланыл ляпат ёнгынувыт, каснувыт. Школатыт о̄с каснэ ма̄гыс я̄нас колнакыт вос ва̄равет». Округув янытыл школатыт 37 каснэ колнак о̄лы, ань тыгыл э̄лаль 16 тамле колнак о̄с рӯпитаӈкве паты.

1107 2015. 09. 11. Светлана РОМБАНДЕЕВА

Нягань ӯс 30 та̄лэ то̄влыс Округ кӯщай Наталья Комарова Нягань ӯст о̄лнэ ма̄хум янытласанэ, ты ӯс 30 та̄лэ то̄влыс. Тув са̄в мир ёхталас, почётный хо̄тпа нам о̄щнэ ма̄хум, тот хосат та̄гыл о̄лнэ яныгхо̄тпат ос ляпат о̄лнэ ма̄нь па̄влытныл ма̄хум ёхталасыт. Наталья Комарова ла̄выс: «Нягань ӯст о̄лнэ ма̄хум, на̄н пуссын аквъёт юртыӈыщ рӯпитэгы̄н, акв яныг колта̄гыл хольт о̄лэгы̄н, таима̄гыс ӯсын ань тамле янгыг, нё̄тнэ̄г та е̄мтыс. На̄н колта̄глынт са̄в ёмас а̄гипыг яныгмас. Югра ма̄в ос Россияв ма̄гыс ма̄к э̄рнэ то̄ва тэ̄лат на̄н ӯсынт ва̄равет. Тыт ре̄г тотнэ акв яныг станция капай ӯнттувес, йильпи щирыл ва̄рим о̄лы. Ма̄н ма̄вт тамле станция воссыг нэ̄мхо̄т а̄тим, ма̄ янытыл о̄с туп мо̄рсыӈ ма̄т о̄лы. Ты та̄л Няганский ГРЭС хӯрмит энергоблоке ӯнттувес, ань рӯпиты». Ты ӯс урыл потыр акванатнэ ма̄хум ос ӯст са̄в та̄л о̄лнэ яныгхо̄тпат ла̄внэ̄ныл щирыл, Ня̄гань ӯс яныг ӯсыг е̄мтме коныпал, тав Советский Союз янытыл ма̄к молях яныгман ӯсыг о̄лы. Ты урыл округ кӯщаюв ща̄гтым потыртас. Тувыл Наталья Комарова ма̄ньлат хо̄тпатн са̄в ёмас, сымыӈ ла̄тыӈ ла̄выс: «Я̄тил ма̄ньлат ма̄хум, на̄н о̄с яныг хо̄тпанын хольт рӯпитэ̄н, са̄в э̄рнэ тэ̄ла ва̄ре̄н, та̄нанылн нё̄тэ̄н. Э̄лаль ма̄н пуссын акваннё̄тхатым рӯпитаӈкве патэ̄в». Ты юипа̄лт тав то̄ва хо̄тпат ма̄глын тагатан государственный ос окружной по̄сытыл мисанэ. Округ кӯщай прессслужбаныл те̄тым ля̄ххалыг ма̄ньщи ла̄тӈыг С. ромбандееван толмащлавесы̄г.

1107 2015. 09. 11. Валентина УЗЕЛЬ

ЮГУ колн са̄в ма̄хум ханищтахтуӈкв ёхтыс Ты та̄л ты университет колн 967 ня̄врам ханищтахтуӈкв ёхтыс. Та̄наныл янытлан ма̄гыс округ кӯщай нэ̄ ва̄ӈын хуме Алексей Путин тув ёхталас. Тав а̄гитнпыгытн ла̄выс: «Университетт ханищтахтуӈкв о̄вылтахтын порат на̄н ма̄гсылын йильпи о̄лупса та о̄вылтахты. Ань ма̄н округувт са̄в пӯльница, каснэ колыт ӯнттавет, йильпи лё̄ӈхыт пинавет. Ма̄н ёмащаквнув о̄лнэ̄в ма̄гсыл са̄всыр рӯпата тыт ва̄раве. Округувт инженерыт, ле̄ккарыт, ня̄врамыт ханищтан хо̄тпат э̄ре̄гыт. На̄н пуссын туп ёмащакв ханищтахтэ̄н, тыт рӯпата тах хо̄нтэгы̄н. » Тувыл ты яныг кӯщай хум экзаменыт ёмащакв хансум ня̄врамыт пуссын мӯйлупсал мисанэ. Ос хоккей колн ёхталаӈкв во̄всанэ. Ты та̄л ЮГУ рӯпитаӈкв о̄вылтахтаме па̄сныл нилахуйплов та̄лэ то̄влыс, ка̄сыӈ та̄л тув са̄внув ня̄врам ханищтахтуӈкв мины. Округ кӯщай нэ̄ прессслужбатэ те̄тум ля̄ххал ма̄ньщи ла̄тӈыл В. Васильева хансыстэ.

1107 2015. 09. 11. Валентина УЗЕЛЬ

Яныг суссылтап ва̄раве Ма̄нь таквс э̄тпос 29-30 хо̄талаге̄т Ханты-Мансийск ӯст яныг сапра̄ни ва̄раве. Тув на̄йпос ва̄рнэ ма̄тт рӯпитан ма̄хум акванатавет. Та̄н та̄нти ва̄рнэ рӯпатаныл урыл потыртаӈкв патэ̄гыт. Ты сапра̄ни ка̄сыӈ та̄л округ миркол па̄лыл ва̄рыгла̄лаве. Щар ма̄к ёмас специалистхо̄тпат тув атхатэ̄гыт. Та̄н та̄нти халанылт ханищтахтуӈкв патэ̄гыт. Ты йист наска̄ссыг ма̄во̄й, газ ос на̄йпос холтуӈкв щар ат ро̄ви. Ань са̄всыр йильпи лампочкат ва̄равет, мо̄т са̄всыр утыт – та̄н пуссын на̄й мощ ювӯрим холтыяныл. ЖКХ ма̄тт рӯпитан хо̄тпат тув о̄с во̄вавет. Та̄н халанылт касыл хосат та̄гыл ва̄рыглаве, хотьютаныл на̄й ос ре̄г мощща холты. Ань но̄хпатум предприятият наманыл ты ла̄вавет. Са̄в та̄л ос ёмащакв рӯпитан хо̄тпат тот о̄с янытлаӈкв патавет. Округ мирколныл те̄тым ля̄ххал ма̄ньщи ла̄тӈыл В. хозумова хансыстэ.

1107 2015. 09. 11. Николай МЕРОВ

Налоголн та̄ра ойтэ̄н Ювле хультум э̄тпост Ханты-Мансийск ӯс ля̄ххал тотнэ колн налоголн атнэ кӯщай нэ̄ Ольга Литова ёхталас. Ань ма̄хум манырсыр налоголн ойтэ̄гыт, хоты э̄тпост ойтуӈкве э̄ри ос мо̄т ва̄рмалит урыл тав потыртас. На̄н тав потре э̄лаль ловиньтэлы̄н. Та̄л сыс акв щёс ма̄нь таквс э̄тпос о̄выл хо̄талэ мус э̄лумхо̄лас такви о̄лнэ колэ, о̄щнэ ма̄тэ ос яласан машинатэ ма̄гыс налоголн ойты. Ты олныт пуссын округ бюджетн минэ̄гыт. Ань та̄л охса сыс округувт 24, 5 процент са̄вит налоголн ойтвес. Ты хосыт бюджетн 126 миллиард солко̄ви, муниципалитет бюджетн ос 22, 5 миллиард солко̄ви ёхтыс. То̄ва ма̄хум ощмарлэ̄гыт, ат ойтхатэ̄гыт, та̄н ё̄рыл кащилтавет. Та̄нанылн о̄влэ̄т нэ̄пак ке̄таве, нё̄лолов хо̄тал сыс ювпувум олнанэ ойтуӈкве вос ве̄рмысанэ. Ты хо̄талыт сыс олныт ат ке ойтыянэ, сут хосыт хотвиӈкве патавет. Налоголн атнэ хо̄тпат ань банк ёт рӯпитэ̄гыт. Хо̄тпа матыр олн сэ̄лы ке, тувыл а̄рнтаг о̄щнэ олнанэ хотняртасаӈкв ве̄рмавет манос банк олныӈ карточкатэ нас лапто̄варттаве. Хо̄тпа хоты мус налоголн ат ойты, та мус карточканыл олн виӈкве ат ве̄рми. То̄ванакт ат ойтхатнэ ма̄хум э̄лы хо̄н ма̄н минуӈкве ат та̄ртавет. Та хо̄тпат ат та̄ртавет, хотьют арге̄н са̄в олн ат ойтыс. Тыи ма̄гыс 2015 та̄лт 177 хо̄тпа хо̄н ма̄н ат минасыт. Ка̄сыӈ хо̄тпа яныгса̄т со̄тыра арыгтем солко̄ви ат ойтыс. Тувыл кӯщай нэ̄ ос акв тамле ва̄рмаль урыл потыртас. Ань ла̄палахтын хо̄тпат ма̄хумн налоголн ойтнэ̄ныл ма̄гыс урк нэ̄пак ке̄тэ̄гыт, э̄рттам та̄н тот рӯпитэ̄гыт. Тамле нэ̄пак хосыт ойтхатэгы̄н ке, олнаныл сэ̄р ма̄н та минэ̄гыт. Таима̄гыс ма̄хумаквет, ӯргалахтым о̄лэ̄н, матыр нэ̄пак на̄н палтын ке ёхты, олн тув ул ойтэ̄н. О̄влэ̄т налоголн атнэ колн ялэ̄н, тот китыглахтэ̄н. Матыр а̄рнта ке о̄ньще̄гын, та̄ра ойтхатэ̄н. Ювпувим олныт ма̄гыс тыгыл са̄внувыл ойтхатуӈкв ул вос ла̄ваве̄н.

1107 2015. 09. 11. Николай МЕРОВ

Ща̄нь ла̄тӈув э̄лаль тотнэ нэ̄ Та э̄тпос 28 числат ня̄врам ханищтан хо̄тпат округ янытыл о̄выл съездын Ханты-Мансийск ӯсн ёхталасыт. Пуссын аквъёт атса̄т хо̄тпа о̄лыс. Та̄н тыт кит хо̄талыг сыс ханищтап ва̄рмалит урыл потыртасыт. Мӯй ма̄хум янытлаӈкве округ кӯщай нэ̄ Наталья Комарова ёхталас. Тав ла̄выс: «Ты та̄л ханищтан ва̄рмаль урыл ва̄рим конференция коныпал, о̄с акв ёмас ва̄рмаль е̄мты, ва̄т са̄грапнал э̄тпост округув 85 та̄лэ то̄влы. Округув ва̄рим порат, тыт яныг школа щар а̄тим о̄лыс, туп ма̄нь школат рӯпитасыт, ня̄врамыт нилыт класс мус ханищтаве̄сыт. 1934 та̄лт округувт аквхуйплов учитель школат рӯпитаӈкве патсыт. Ань ты накт школатт йильпи щирыл ня̄врамыт ханищтавет. Са̄всыр ищхӣпыӈ утыт школан ё̄втве̄сыт, ня̄врамытн ханищтахтуӈкве сака мӯсты. Ты яныг рӯпата, на̄н, ня̄врам ханищтан хо̄тпат, ё̄ранын хосыт ва̄рвес. На̄н ка̄сыӈ ня̄врам э̄руптым ханищтылы̄н. Ма̄н ты хосыт янытлахтым о̄лэ̄в. Юио̄выл та̄лытт Югра ма̄т яныгса̄ткем са̄всыр ханищтахтын кол ӯнттувес. Округувт о̄лнэ школат пуссын ёмщакв хотщё̄питаве̄сыт. Мощ иӈ са̄внув садик ӯнттаве, ма̄нь ня̄врамыт ма̄гыс пуссын места вос то̄вылхаты. Тувыл ань а̄гмыӈмосыӈ ня̄врамыт ищхӣпыӈ ут хосыт юн ханищтахтуӈкве ве̄рме̄гыт. Ма̄ньлат хо̄тпат университет ос колледж а̄стынэ̄ныл юипа̄лт са̄выӈпа̄лэ ханищтахтам тэ̄ланыл хосыт рӯпитаӈкве патхатэ̄гыт». Ты ла̄тӈыт юипа̄лт округ кӯщай нэ̄ са̄в та̄л рӯпитан учителит Россия наука ос образование Министерства па̄лыл яныг намыл маим хо̄тпат янытласанэ. Пуссын аквъёт хус хо̄тпа тамле намыл майве̄с. Та̄н халанылт акв ма̄ньщи нэ̄ Ольга Владимировна Лелятова о̄лыс. Тав Ха̄льӯс район Саранпа̄выл школат налыман нупыл нёлолов та̄л рӯпитас. Ань Саранпа̄вылт о̄лнэ «Са̄лыкве» нампа садикт ма̄нь ня̄врамыт ма̄ньщи ла̄тӈыл потыртаӈкве ос ма̄ньщи йӣквыт йӣквуӈкве ханищтыянэ. Садикт «Языковое гнездо» проект щирыл ня̄врамыт ханищты, «Со̄вырке» нампа кружок тот ва̄рыс. Тот рӯпитан хо̄тпат халанылт акваннё̄тхатэ̄гыт. Ань тув ёмас са̄вит группа атвес. Тав ётэ кит а̄гииг рӯпитэ̄г, ты Оксана Михайловна Гоголева ос Юлия Владимировна Хозумова. Ольга Владимировна ты а̄гирищиг сака э̄сгысаге, тэ̄натэ̄н акваг нё̄ты. Та̄н тот ня̄врамытн йӣквыт, э̄ргыт суссылтэ̄гыт. Соссаӈ мир ялпыӈ хо̄талыт о̄лыгланэ̄ныл порат щаще̄кваныл, ане̄кваныл о̄с тув во̄виньта̄лыяныл. Ты нэ̄кве ма̄нь ня̄врамыт колт я̄нас колнакыл майвес. Ня̄врамыт ма̄гыс э̄рнэ рӯпататэ тот ва̄ритэ. Ольга Владимировна такви уре̄тыл тох ла̄выс: «Ам ня̄врамыт ёт рӯпитаӈкве сака таӈхе̄гум. Ма̄ньлат хо̄тпатн яныг ща̄гтыл нё̄тэ̄гум. Ань о̄лнэ ня̄враманув ма̄ньщи ла̄тӈыл потыртаӈкве ат ха̄сэ̄гыт, ма̄н та̄наныл ат ке ханищтыянӯв, воссыг хо̄ӈхан ханищтавет. Ам ань таса̄вит та̄л рӯпитанэм ма̄гыс яныг почётный наградал майве̄сум, сака ща̄гтсум». Ань ты конференцият ханищтан хо̄тпат йис та̄гыл о̄лнэ пе̄с накыт ос ла̄тыӈ ханищтан ва̄рмаль урыл потыртасыт. Ханищтан хо̄тпат ла̄внэ̄ныл, ня̄врамыт ёмас хо̄тпаг э̄лаль вос яныгме̄гыт. Школатт ня̄врамыт акваннё̄тхатым ханищтаӈкве э̄ре̄гыт. Тыи ос мо̄т ва̄рмалит урыл ханищтан хо̄тпат кит хо̄тал потыртасыт. Ань тыгыл э̄лаль та̄н ка̄сыӈ та̄л акванатхатыглаӈкве патэ̄гыт.

1107 2015. 09. 11. Николай МЕРОВ

Та̄н округ кӯщайн ла̄тыӈ ке̄тсыт Во̄ртур э̄тпос 25 хо̄талэ̄т округ Ассамблея кӯщай хум Еремей Айпин ӯст о̄лнэ соссаӈ ма̄хум А̄с-угорский институт колт акванатыгласанэ. Ань сӯкыр э̄тпос хӯрумхуйплов хо̄талэ̄т акв хотпа округ губернаторыг ат та̄лн тах пе̄рияве. Ты кастыл Ассамблеят рӯпитан хо̄тпат пе̄рияхтын яныг кӯщаитн ла̄тыӈ ке̄тсыт. Тот та̄наныл ма̄ньщи, ханты ос ё̄рн ма̄хум тэ̄лат мӯсхалыг щё̄питаӈкве во̄всаныл. Та нэ̄пакт ты ва̄рмалит урыл хансым о̄лы. Мо̄лал округ соссаӈ мир Лӯима̄ департамент рӯпататэ ёлпо̄илттавес, нас отделыг ва̄рвес. Ань ты департамент рӯпататэ ювле ва̄руӈкве э̄ри. Тувыл па̄влытт о̄лнэ ма̄хум о̄лупсаныл ёмасыг щё̄питан ма̄гыс округувт соссаӈ мирн нё̄тмил ва̄рнэ кӯщай пе̄рияӈкве э̄ри, рущ ла̄тӈыл тав «Уполномоченный по правам коренных малочисленных народов Севера» ла̄ваве. Тувыл ос округ губернатор палт Совет ва̄руӈкв э̄ри, соссаӈ мир о̄лупса ва̄рмалит ва̄нэ хо̄тпат тот хӯлтыглахтуӈкве вос ве̄рмысыт. Хӯл алыщлан ос во̄раян ма̄т йис та̄гыл о̄лнэ хо̄тпат, та̄нки ма̄наныл ма̄гыс э̄рнэ нэ̄пак ва̄руӈкве вос ве̄рмысыт, тыи ма̄гыс ма̄вит ӯргалан нормативноправовой акт вос пирмайтаве. То̄нт йис ма̄нанылт о̄лнэ соссаӈ ма̄хманув лю̄камтаӈкве ат патавет. Э̄лаль ос та ма̄хум урыл потыр о̄лыс, хотьют родовой угодье нампа ма̄тэ ма̄гыс нэ̄паканэ лю̄льсаӈ ва̄рыгласанэ. Та хо̄тпат ма̄наныл та̄нки нупыланыл ань ты мус хансуӈкв ат ве̄рмияныл. Ань та̄н хотмус нё̄туӈкв э̄ре̄гыт. Тувыл Нижневартовский район «Аганский ягельный бор» ма̄, Сургутский район «Имлор» тӯр, Ха̄льӯс район «Тӯрват» ос «Маньинская» тӯрыг о̄с нэ̄пакн вос хансавет. Ты сыстам ма̄т о̄с ӯргалым вос о̄ньщавет. Ос во̄раян ма̄т, хӯл алыщлан я̄т, пил ва̄тнэ ма̄т, са̄лы ӯрнэ ма̄т община щирыл соссаӈ хо̄тпатн вос мивет. Ты коныпал ос ты ва̄рмалит урыл потыр о̄лыс. Округувт 2014-2020 та̄лытн пирмайтым жилищный программа щирыл са̄внув олн вос та̄ставе. Э̄лы ма̄т ос во̄рт о̄лнэ соссаӈ ма̄хум палт пусмалтан ва̄рмаль, лё̄ӈхыт ос мо̄т э̄рнэ тэ̄лат мӯсхалыг вос щё̄питавет. Тот о̄лнэ ма̄хум та̄нки пе̄с о̄лупсаныл э̄лаль ёмщакв вос тотсаныл, во̄рт атум тэ̄нутаныл та̄нки тыналаӈкве вос ве̄рмысаныл, ты тэ̄ла щирыл государство па̄лыл акваг вос нё̄тавет. А̄с-угорский институт кол йильпииг щё̄питан Лӯима̄ департаментын вос о̄лттаве, та̄н ё̄ранылт вос рӯпитэ̄гыт. Ща̄нь ла̄тыӈ ос пе̄с йис о̄лупса э̄лаль тотнэ рӯпата урыл о̄с хассыт. Ань пе̄с йис ялпыӈ хо̄талыт ёмщакв ва̄нэ хо̄тпа мощща хультыс. Ты ва̄рмалюв акваг ул вос со̄ймыс, соссаӈ па̄влытт «Ӯй йӣквнэ» колыт вос ӯнттавет. Тувыл Ханты-Мансийск ӯст рӯпитан «Лылыӈ со̄юм» нампа соссаӈ ня̄врамыт йӣквнэ ос ёнгын кол йильпи колыл вос ӯнттаве. Ты коныпал Ханты-Мансийск ӯст А̄с-угорский мир театр «Хо̄тал» ос «То̄рум Маа» музей ма̄гыс я̄нас колыг урыл о̄с ла̄тыӈ хасвес. Тувыл ос Ханты-Мансийск ӯст нэ̄пак хаснэ хо̄тпат округ кол о̄лум урыл потыртасыт. Та̄н ты кол ювле во̄вияныл. Ань матахмат та̄л минам юипа̄лт, ты кол Федеральный миграционный службан майвес, ань та̄н тот рӯпитэ̄гыт. Ты ва̄рмалит урыл потыртаӈкве ня̄врам ханищтан хо̄тпат, учёныит, нэ̄пак хаснэ хо̄тпат ос мо̄т са̄всыр ма̄тт рӯпитан ма̄хум ёхталасыт. Пуссын аквъёт хусахкем хо̄тпа о̄лыс. Ты тэ̄лат соссаӈ ма̄хманув ловиньтасаныл ос пирмайтасаныл. Тувыл ты потрыт округ кӯщаиг пе̄рияхтын хо̄тпатн ке̄тсаныл. Э̄рыӈ матарыл нё̄таве̄в.

1107 2015. 09. 11. Николай МЕРОВ

Та̄нки ва̄рум тэ̄нутаныл тыналасаныл Ювле хультум э̄тпост Ханты-Мансийск ӯст тэ̄нутпормас тыналан ва̄рмаль о̄лыс. Та̄нки рӯпата ва̄рнэ ма̄хум Тюменский, Челябинский, Свердловский, Курганский областитныл, Ханты-Мансийский ос Ямало-Ненецкий округныл тэ̄нутаныл тыналан ос а̄рталан ма̄гыс тыг тотыгласаныл. Пуссын аквъёт нёлса̄т предприятие о̄лыс. Ам ты э̄лыпа̄лт нэ̄глум газетат ты урыл хансыгласум, ань потрум э̄лаль мины. Юио̄выл хо̄талт ты суссылтапн округ кӯщай ва̄ӈын хум Сергей Полукеев ёхталас. Кӯщай хум тэ̄нут ва̄рнэ ёмас предприятият дипломнэ̄пакытыл мисанэ. Ты рӯпатаныл ма̄гыс та̄нанылн пӯмащипа ла̄тыӈ ла̄выс. Мӯй ма̄хум хӯрум хо̄тал сыс халанылт са̄в договорнэ̄пак хассыт. Э̄лаль акваннё̄тхатым рӯпитаӈкве потыртахтасыт. Тувыл округ Торговопромышленный палата кӯщай нэ̄ Альфия Павкина о̄с потыртас. Тав тыг ёхталам ма̄хум пуссын янытласанэ ос ла̄выс: «Ма̄н ка̄сыӈ хо̄тал е̄ӈта пасан ва̄тат тэ̄нут ва̄рнэ ва̄рмалит урыл потыртасӯв. На̄н ва̄глын, тэ̄нутанув то̄нт мирн ёвтуӈкве патавет, хунь ма̄н та̄наныл ёмщакв ва̄руӈкве патыянӯв. Тыт ань на̄нки халынт ва̄йхатуӈкве патсы̄н, ань э̄лаль акваннё̄тхатым рӯпитаӈкве иӈ кӯпнитнуве̄г паты тах. Лӯима̄т тэ̄нут янмалтаӈкве та̄рвитыӈ, ос ты а̄ти, ма̄н ты ва̄рнэ рӯпатав э̄лаль ёмщакв мины». Хотьют ты суссылтап ва̄руӈкве нё̄тыс, кӯщай нэ̄ та̄наныл пуссын янытласанэ. Ты суссылтапн Ямало-Ненецкий округныл соссаӈ ма̄хум та̄нки тэ̄нутаныл ос пормасаныл тыналаӈкве ёттотыгласыт. Та ма̄т ма̄во̄й ос газ но̄хвинэ коныпал соссаӈ ма̄хум са̄в са̄лы о̄ньще̄гыт. «Ямал» ма̄ оигпан е̄рыг ма̄ньщи щирыл толмащлаве. Са̄ртын Салехард ӯс Обдорск ӯсыг ла̄ввес. Тот ё̄рн, ханты, саран ос селькуп соссаӈ ма̄хум о̄лэ̄гыт. Та̄н нот па̄лытыл са̄лы янмалтым, во̄руй ос хӯл алыщлым о̄лэ̄гыт. Пе̄с порат кӯпса о̄йкат нё̄выль, нё̄хыс сов ос хӯл ёвтнэ ма̄гыс са̄всыр ма̄ныл тув ёхталасыт. Ань ты хо̄тал мус тот 670 со̄тыра са̄вит са̄лы соссаӈ ма̄хум о̄ньще̄гыт. Та̄л сыс хус со̄тыра са̄лы нё̄влиг ва̄рияныл. Са̄лы нё̄выль та̄нки тушонка па̄нкаг ва̄рияныл. Ты сака по̄ртыӈ, атыӈ нё̄выль, сака са̄в во̄й ат о̄ньщи. Ётылнув тот ма̄нь са̄лы а̄ньтытныл ос то̄сам ке̄лпыл тэ̄рпи ва̄рнэ цех ӯнттуӈкве номсаве. Са̄лы янытэ̄т тэ̄лаг тах мины. Ямал ма̄т о̄втнэ я̄тт ос тӯрытт налыман нупыл хӯрум са̄вит са̄всыр хӯл о̄лы. Ань тот яныгса̄ткем хӯл алыщлан община рӯпиты. Ма̄хум а̄лн, мо̄хсаӈ, ӯсхул, ка̄рай, сӯпыг, кумхӯл, сорх, сӯкыр, писъян ос мо̄т хӯл пӯве̄гыт. Та̄л сыс пуссын аквъёт онтолов со̄тыра тонна хӯл алыщлэ̄гыт. Ты хӯланыл та̄нки са̄всыр тэ̄нутыг ва̄рияныл. Тувыл по̄льтым, со̄лвалтым, восытым та тыналыяныл. Во̄раян ма̄хум тот нё̄хыс, во̄нтыр, о̄хсар ос мо̄т во̄руй алыщлэ̄гыт. Тувыл Ямал ма̄т са̄в пил яныгми. Соссаӈ ма̄хум та̄л сыс яныгса̄т атпан са̄вит тонна пил та̄стэ̄гыт. Ань ты тэ̄нутпормасаныл пуссын выставкан ты тотыгласаныл. Мо̄т областитныл ёхталам тыналахтын хо̄тпат о̄с са̄всыр нё̄выль, хӯл, ща̄квитыл ва̄рум тэ̄нут ос атыӈ ня̄нь тыг тотыгласыт. Хотты хо̄тпа ка̄сащас, ты тэ̄нутыт а̄рталаӈкве тот ве̄рмыс. Тыи ма̄гыс тэ̄нутыӈ па̄саныт щё̄питым о̄лсыт. Ань мо̄тантыг са̄тыт тыналахтын выставка Курганский областит тах ва̄раве.

1107 2015. 09. 11. Мария Тихоновна Двинянинова

Тав са̄в ня̄врам янмалтас Надежда Константиновна Нагибина (Мазеина) 1942 та̄л порат я̄ӈк на̄тнэ э̄тпос 30 хо̄талэ̄т самын патыс. Тав ща̄нягеа̄щаге Кондинский район Кауръя па̄вылт о̄лсы̄г, а̄гитэ̄н нилыт ня̄врамыг яныгмас. А̄ще Константин Александрович Пермский областиныл о̄лыс. 1930та̄лыт репрессия порат та̄н ще̄мьяныл Сургутский районын те̄твес. Ща̄не Наталья Константиновна Нохова Шугур па̄вылныл о̄лыс. Ань Надежда Константиновна тэ̄н уре̄нтыл тох потыртас: «Ам ща̄нягума̄щагум 1935 та̄л порат троица нампа ялпыӈ хо̄талт акванхо̄нтхатсы̄г. А̄тям то̄нт Половинка па̄выл леспромхозт рӯпитас. Тэ̄н акван та минасы̄г». Школа а̄стламе юипа̄лт Надя э̄лаль радистыг ханищтахтуӈкв минас, тувыл тав Шугур па̄вылн рӯпитаӈкв те̄твес. То̄нт ты ма̄нь па̄влыӈ ма̄т о̄лнэ ма̄хум те̄р ква̄лыг хосыт халанылт потыртаӈкв патсыт. Ос ты ут хо̄т яныг то̄сам батарея о̄ньщис, та̄н рӯпитаӈкв вос о̄вылтахтэ̄гыт, а̄гин электрогенератор нампа ут ка̄тыл ё̄хтуӈкв, пе̄ргата̄луӈкв э̄рыс. Э̄ква ты урыл тох потыртас: «О̄лнэ нотум палытыл радисткаг рӯпитасум, ань тыг мус ӯлум ӯлмае̄гум, хумус телеграмма ос радиограмма э̄лаль ке̄тыянум». 1962 та̄лт Шугур па̄вылт связь кол пӯсвес. Тот тав 1992 та̄л пенсиян минаме мус рӯпитас. Та па̄сныл тав ат рӯпиты, ос мирколт са̄всыр рӯпата ва̄руӈкв акваг нё̄тыс. 1993 та̄лныл 1998 та̄л мус са̄в рӯпитам ма̄хум ос хо̄нтлам ма̄т о̄лум ма̄хум нё̄тым рӯпитас. Ма̄нь потрыт ос стихыт хаснэ̄тэ урыл э̄ква тох ла̄выс: «Ам стихотвореният амки ма̄гсылум хансыянум, ка̄с ма̄гыс. О̄влэ̄т Саша пыгум юбилее ма̄гсыл хассум, тувыл а̄гиянум, ва̄псанум ос ляпа рӯтанум ма̄гыс. Ня̄враманум ам стиханум хӯнтлысыт ос тувыл ловиньтан нэ̄пакыг ва̄руӈкв номылматсыт. Ам атпан та̄лум то̄влын кастыл ня̄враманум а̄нумн нэ̄пак мӯйлуптасыт, наме – «Амти урумтыл». 2012 та̄лт Таня а̄гим йильпи стиханум пуссын акванатсанэ, тувыл о̄с акв нэ̄пак ва̄рыс – «Стиханум ос амти о̄лупсам – ты пуссын ня̄враманум ма̄гыс » 2013 та̄л порат ос рӯт ма̄хманум хотыл о̄лэ̄гыт, пуссын акв яныг нэ̄пакн хассанум – ты Мазеиныт, Нагибиныт, Ноховыт. Нэ̄пак тамле намыл пиныслум, «Семейная летопись». Ты э̄ква потрыт ман стихыт хансуӈкв нэ̄мхо̄т ат ханищтахтас, литературный курсыт ат а̄стлас. Поэтэссаг е̄мтуӈкв о̄с ат номсыс. Тувыл тай стихыт колсори рӯпата ва̄рнэ̄тэ халт акваг хотыл та нэ̄глэ̄гыт. Ня̄враманэ, рӯт ма̄хманэ пуссын хумус э̄руптыянэ, та урыл та хансы. Надежда Константиновна ща̄нягеа̄щаге халэ̄нт ма̄ньщи ла̄тӈыл потыртасы̄г, ня̄враманэ̄н тай пуссын туп рущ ла̄тӈыл потыртаӈкв ха̄ссыт. Э̄ква таима̄гыс ты туп рущ ла̄тӈыл хансы, такви ща̄нь ла̄тӈе ат ва̄гтэ. Ня̄враманэ урыл тав ла̄выс: «Ам ня̄враманум пуссын ёмас, номтыӈ ос рӯпитаӈкв ка̄сащан хо̄тпаг яныгмасыт. Ка̄сыӈ рӯпата о̄ньщи. Ме̄н о̄йкаме̄нтыл хо̄т ня̄врам янмалтасме̄н, ань ат апыгня̄врам (правнукыт), аква апыга̄гирищ (правнучка) ос онтолов апыг о̄ньщиме̄н, та̄н халанылт ат пыгрищ ос нила а̄гирищ. »Са̄в ня̄врам о̄щнэ̄тэ ма̄гыс ты э̄ква ме̄талил майлувес, 1975 та̄лт – «Медаль материнства» II степени ос 1977 та̄лт –I степени.

1107 2015. 09. 11. Николай МЕРОВ

Ма̄ньщи хум намхо̄талэ̄тыл янытлавес Сӯкыр э̄тпос китыт хо̄талэ̄т Дмитрий Васильевич Лельхов намхо̄талэ о̄лыс. Ты та̄л тав 65 та̄лэ то̄влыс. Хум армият са̄в та̄л лусытас, подполковникыг лусытан ма̄ныл а̄стлас. Ань сутытан ма̄хум тармылпатнэ хо̄тпат округ комиссиянылт кӯщаиг рӯпиты. Ты ма̄ньщи хум Ха̄льӯс район Восыӈтӯр па̄вылныл о̄лы. Таве намхо̄талэ̄тыл янытлаӈкве са̄в мир ёхталас. Ка̄сыӈ хо̄тпа мӯйлупса тотыс ос тав уре̄тыл са̄в ёмас ла̄тыӈ ла̄выс. Округ общественный ос внешний связь департамент кӯщай хум Илья Верховский таве янытлаӈкве о̄с ёхталас. Дмитрий Васильевич э̄лумхо̄лас нупыл сака сымыӈ хо̄тпа, ма̄н ва̄глӯв, тав хӯл алыщлаӈкве ва̄тихал яланты. Тыи ма̄гыс, ма̄ньщи газета редакция па̄лыл ма̄н таве̄н няс па̄хвтын ут мӯйлуптаслӯв ос пуста̄гыл о̄лнэ ла̄тыӈ ла̄всӯв.

1107 2015. 09. 11. Александр ВЬЮТКИН

Сӯкыръя па̄вылт о̄лум ханищтан кол урыл Ма̄ньщи, саран ос ё̄рн ня̄врамыт ма̄гыс Ха̄льӯс район Сӯкыръя па̄вылт 1925 та̄л сӯкыр э̄тпост ханищтан кол пӯсвес. Аквта порат па̄вылт клуб, ла̄пка, ня̄нь ва̄рнэ кол, садик ос интернат ӯнттуве̄сыт. Сӯкыръя па̄выл ханищтан кол о̄выл кӯщай наме Алексей Васильевич Голошубин о̄лыс. Та пора ма̄хум тох потырта̄лсыт: «Пе̄с порат са̄выӈпа̄лэ ханищтахтын ма̄хум рущ ла̄тӈыл щар ат потыртасыт. Алексей Васильевич ма̄ньщи ла̄тыӈ ёмщакве̄г ва̄стэ, та щирыл ма̄навн кустырнуве̄г ханищтахтуӈкв о̄лыс. Ханищтахтын порат, хотьют хумус ве̄рмыс, такви щире̄т маныр ха̄сыс, ма̄нав ханищтан хо̄тпат ёт тох хотмус рущ ла̄тӈыл аквля̄льт та хӯлтыглахтасӯв». Яныг хо̄нт юипа̄лт 1946 – 1950 та̄лыт сыс Сӯкыръя па̄выл ня̄врамыт Екатерина Кирилловна Артеева ос Лидия Степановна Истомина ханищтасы̄г. Тувыл э̄лаль 1950 та̄лт Мария Александровна Истомина, Агния Тимофеевна Артеева, Мария Васильевна Быстрова, Надежда Георгиевна Рочева, Мария Ивановна Миронова, Анна Николаевна Канева ос Елена Семёновна Квашнина ня̄врамыт ханищтым рӯпитасыт. 1948 та̄лт Мария Васильевна Быстрова ханищтахтын ма̄ныл а̄стуме юипа̄лт Ханты-Мансийск ӯсн ня̄врамыт ёт рӯпитан нэ̄г ханищтахтуӈкв минас. Тот ат та̄л ханищтахтас. Та юипа̄лт Сӯкыръя па̄выл интернат колн воспитателиг рӯпитаӈкв те̄твес. Та коныпал тав иӈ о̄выл классыт ня̄врамыт ханищтас. Аквъёт пуссын хӯс та̄л тав тот рӯпитас. Мария Васильевна потырта̄лыс: «Ам тот рӯпитамум порат интернат кӯщаиг Григорий Григорьевич Репешко ос школа директорыг тав э̄кватэ Клавдия Михайловна Репешко о̄лсы̄г. О̄влэ̄т мощ та̄рвитаӈ о̄лыс. Ма̄нь па̄вылныл о̄лум ня̄врамыт ёт кӯстыр рӯпитаӈкв. Та̄н нэ̄мхотты рӯпатаныл ат пилсыт ос ат урккысыт. О̄выл классныл нилыт класс мус та̄наныл щар ёмас ханищтаӈкв о̄лыс. О̄выл классумт налыман нупыл ат ня̄врам о̄лыс. То̄ва ханищтан ня̄враманум рущ ла̄тӈыл щар нэ̄матыр ат торгамтасыт. То̄нт тит а̄гирищиг Маша Булурдаева ос Дуся Артеева хо̄т та̄лэ̄н ущты то̄влын щирыл ханищтахтуӈкв майвесы̄г. Ханищтахтын колнаканув ма̄ниг о̄лсыт, уласыл ос па̄саныл ат то̄влувесӯв. Ня̄врамыт акв пасан ва̄тат хӯрмахыл ӯнттыгласанӯв. Воссыг хоталь ва̄рхатаӈкв, та̄нанылн ханищтаӈкв хотмус э̄рыс». Потыр тыгыл ты оймыгты. Мо̄тыт газетат ты урыл э̄лаль тах ловиньтэ̄н. Галина Николаевна Ларионова те̄тум потре ма̄ньщи ла̄тӈыл Александр Вьюткин хансыстэ.

1107 2015. 09. 11. Тамара МЕРОВА

Йис ма̄тэ ма̄гыс воритотнэ хум сутытаве Ань акв ханты хум Сергей Кечимов урыл акваг та хансаве. Тав Сургутский районт о̄лнэ Имлор нампа ялпыӈ тӯр ӯргалан хо̄тпаг о̄лы. Тув йис та̄гыл ханты ма̄хум та̄нки На̄й-О̄тыраныл нупыл по̄йкщаӈкве ялантэ̄гыт. Та̄н та ма̄наныл сака ялпыӈыг о̄ньщияныл. Ань ты ялпыӈ тӯр Сергей Кечимов тав ӯргалым о̄ньщитэ. Тав 57 та̄лэ то̄влыс, ще̄мьятэ ёт та тӯр ляпат во̄рыӈ ма̄т о̄лы. Ань та̄н ляпанылт ма̄во̄й но̄хвинэ ма̄хум СарымоРусскинской месторожденият рӯпитэ̄гыт. Та̄н «Сургутнефтегаз» ма̄во̄й но̄хвинэ компания нупыл хансым о̄лэ̄гыт, кӯщаиг Владимир Богданов тот о̄лы. А̄ти сака хосат Имлор тӯр ляпат ма̄во̄й но̄хвинэ йильпи ма̄ хо̄нтвес. Ос Сергей Кечимовн та̄н тув ат та̄ртавет, таи ма̄гыс ты компаният рӯпитан хо̄тпат тав ётэ ань воритотуӈкве патсыт. Мо̄лалнув Сергей Кечимов палт ма̄во̄й но̄хвинэ хо̄тпат пе̄рхатуӈкве патсыт. Тӯлмахыл тав нупылэ лю̄ль потыр ва̄рсыт, э̄рттам о̄йка хотьютаныл порслуӈкве ла̄выстэ. Ты э̄лыпа̄лт Сергей Кечимов акв са̄лытэ хотты а̄мпын щама пурвес. Ма̄во̄й но̄хвинэ ма̄т а̄мпыт о̄ньщуӈкве ат ро̄ви кос, ос хотьютаныл а̄мп тув тотыс. О̄йка «Сургутнефтегаз» ва̄ӈын кӯщаитн ты урыл свонитам, потыртам. Та̄н ювлела̄всыт, а̄мп ляпан ке ёхты, вос алытэ. Тав та щирыл ва̄рыс. Ос тувыл кит нефтяникхо̄тпаг Кечимов нупыл сут ва̄рнэ ма̄гыс нэ̄пак хассы̄г. Сергей Кечимов рущ ла̄тыӈ ёмащакв ат торгамтытэ, ос по̄лщ тотнэ нэ̄пакт ка̄тпос пинум. Тот хансым о̄лыс, аквтуп тав писаль ёто̄ньщум ос акв хо̄тпа пистуӈкве ла̄вме. Ты нэ̄паке̄т хасхатам паттыиг ань о̄йка кит та̄лн турманколн ӯнттуӈкв ве̄рмаве. Ты ва̄рмалит та̄рапаттын ма̄гыс Валентина Шадрина, Сургут ӯст о̄лнэ «Югра лылые̄п» нампа ассоциацият рӯпитан нэ̄, э̄лаль нё̄тмил кинсуӈкв патыс. О̄йка тэ̄ланэ ӯргалан ма̄гыс соссаӈ ма̄хум о̄лупсаныл вуянтан кӯщаитн ла̄тыӈ ке̄тыс. Тувыл Сергей Кечимовн пуссын вос ёмщаквег торгамты ос ювле потыртаӈкв вос ве̄рми, ханты ла̄тӈыл рущ ла̄тӈын потрыт Аграфена Сопочинан толмащлавет. Ты коныпал о̄йка ка̄тпосыл пиннэ нэ̄паканэ о̄с ханты ла̄тӈын толмащлавет. Та щирыл Сергей Кечимов такви ва̄рмалянэ ма̄кыг потыртыянэ ос таве̄н саралан мо̄т лю̄ль ва̄рмалит акван ат тэ̄лыгтыянэ. О̄йка ань туи сыс китхӯрум щёс сутытан колн во̄выглавес. Ос полщ нэ̄пак хансум хо̄тпаг тэ̄нки сут колн щар ат ёхталэ̄г. Тувыл сут ка̄сыӈ порат мо̄тмо̄т э̄тпосн ос э̄лы хо̄талн э̄лаль та тотаве. «Сургутнефтегаз» компания кӯщаит тув о̄с ат ёхталэ̄гыт, ла̄ве̄гыт – тыи хӯрум хо̄тпат та̄н компания па̄лыл нэ̄матыр лю̄ль потыр ат хансыгласыт. Сергей Кечимов та̄рвитыӈ ва̄рмалянэ ма̄гыс ань са̄в ма̄хум сыманыл ща̄рге̄гыт. Та̄н ва̄ганыл, тав таи ма̄гыс полщил ва̄рвес, о̄йка такви пе̄с йис ма̄тэ ӯргалытэ, ма̄витэ пӯлиго̄хтыртаӈкве ос витыг тотуӈкве ат та̄ртыянэ. Таве̄н «Гринпис» яныг организация матыра̄ти нё̄тмил акваг ва̄ри. Ань мо̄тыт сутытан ва̄рмаль сӯкыр э̄тпос нилахуйплов хо̄талн хасвес. Маныр тэ̄лат э̄лаль е̄мтэ̄гыт, ма̄н иӈ ля̄ххал хансуӈкве тах патэ̄в.

1107 2015. 09. 11. Людмила ТЕТКИНА

Тав рӯпитан хо̄тпа кинсы Ка̄сыӈ та̄л соссаӈ ма̄хум общинат ос та̄нки ма̄гсыланыл рӯпитан хо̄тпат пил, ла̄хыс, па̄кв атнэ ма̄гсыл грантолныл мивет. Ха̄льӯс район Ня̄хщамво̄ль па̄вылт рӯпитан «Верховья Северной Сосьва» нампа община 2013 та̄лт тамле олныл майлувес. Кӯщаиг тот Владимир Солодов о̄лы. Община хумус рӯпиты, та урыл ам таве китыгласлум, тав ювле тох ла̄выс: «Ам нэ̄паканум хунь ва̄рсанум, номсысум, пил ва̄тым, ла̄хыс атым олн сэ̄луӈкве патэ̄в. Акв арыгкем та̄л акваг Ха̄льӯсн ос Ханты-Мансийск ӯсн са̄всыр нэ̄пакыт акванатым ялантасум. Тох тувлетыгле яласым яныгса̄т со̄тыра са̄вит солко̄ви холтсум. Община нэ̄паканэ хунь ва̄рсанум, ты юипа̄лт грантолн ма̄гсыл заявканэ̄пак ке̄тсум. То̄нт «На организацию и заготовку дикорастущей продукции» нампа номинацият но̄хпатсум ос акв миллион 700 со̄тыра солко̄вил майве̄сум. Ты олныл ам са̄всыр техника ёвтсум. Челябинск ӯст рӯпитан ма̄хум ёт потыртахтасум, та̄н пиланув ёвтуӈкве ка̄сащасыт. Ня̄хщамво̄ль па̄вылт о̄лнэ ат хо̄тпат общинат рӯпитаӈкве во̄всанум. О̄влэ̄т та̄н пуссын ам ётум рӯпитаӈкве ка̄сащасыт. Тувыл грантолныл хунь майве̄сум, та̄н кантлуӈкве патсыт, ла̄ве̄гыт, та̄н ётаныл олныл вос ӯртхатэ̄гум манос техника вос мыгум. Ам такос потыртасум, ты утыт ам община ма̄гсыл ё̄втсанум, пуссын аквъёт рӯпитаӈкве ке патэ̄в, са̄в пил ва̄тэ̄в, ла̄хыс, пакв атэ̄в, то̄нт олн сэ̄луӈкве патэ̄в. Ма̄хум та̄ра олныл ойтуӈкве э̄ри, ам олн ат о̄ньще̄гум, тыи ма̄гсыл тох рӯпитаӈкве ат ка̄сащасыт. Тӯрва̄тат о̄лнэ Самбиндалов ще̄мья ёт потыртасум, та̄н пил ва̄туӈкве ла̄вхатыгласыт, тувыл пиланыл ань ты мус во̄рт яныгме̄гыт. Амки пил ва̄туӈкве та минасум, тувыл амккем са̄в хунь ва̄тэ̄гум. Ань туризм хосыт рӯпитан ма̄хум о̄с са̄в олныл мивет. Тэ̄лы порат мӯй ма̄хум Ма̄нь Пупыг Нё̄р нупыл тотыглаӈкве тахсум. Яныгпа̄вылт мӯй ма̄хум ма̄гсыл кол ӯнттысум. Та кол ӯнттын ма̄гсыл 200 со̄тыра солко̄ви холтсум, ань пувлын кол ос са̄всыр па̄ртколыт ӯнттуӈкве э̄ри. Тыи ма̄гсыл о̄с 200 со̄тыра арыгкем солко̄ви э̄рмыглы, ам таса̄вит олн воссыг ат о̄ньще̄гум. Ма̄нь Пупыг Нё̄рыт Коми республикат о̄лэ̄гыт, тув нас тох ялуӈкве ань о̄с ат ро̄ви. Ты нё̄рыт «Печоро-Илычский» заповедикыт о̄лэ̄гыт, туристыт туп ма̄ньполь э̄тпост тув ялантаӈкве ве̄рме̄гыт. Тот рӯпитан ма̄хум акв хо̄тпаныл 500 солко̄ви выгыт, тав э̄т тот хӯлуӈкве ке хульты, о̄с акв со̄тыра солко̄ви ойты. Нё̄рн миннэ э̄лыпа̄лт заявканэ̄пак заповедникыт рӯпитан ма̄хум палт ке̄туӈкв э̄ри. Ма̄н о̄лнэ ма̄в машинат яласан лё̄ӈх а̄тим, мӯй ма̄хум нё̄рыт мус тотыглаӈкве ос са̄всыр ёмас машина э̄ри. Тамле утыт ёвтуӈкве олн о̄с ат о̄ньще̄гум, тыи ма̄гсыл грантолн ма̄гсыл нэ̄паканум ке̄тыгласанум, тувыл олныл ат майве̄сум. Общинам ма̄гсыл таса̄вит ё̄р пинсум, ам ты рӯпата э̄лаль ва̄руӈкве патылум. А̄нумн ка̄ркам хо̄тпа хо̄нтуӈкве э̄ри, туп то̄нт э̄лаль мӯсхалыг рӯпитаӈкве патэ̄гум. Миркол кӯщаит община рӯпитанэ̄тэ ма̄гсыл о̄с вос нё̄тнувыт. Яныгпа̄вылт кол ӯнттын ма̄тэ ма̄гсыл нэ̄пакыт хунь ва̄рсанум, та̄н ётаныл маткем та ля̄втсум, воритотсум. Та̄н а̄нумн кол та па̄вылт ӯнттуӈкве ат та̄ртсаныл. Ос ты э̄лыпа̄лт та̄нки ла̄всыт, а̄нумн нё̄туӈкве патэ̄гыт. Тох хотмус та рӯпитэ̄в».

1107 2015. 09. 11. Валентина УЗЕЛЬ

Тав ма̄хум ма̄щтырлаӈкв ханищтыянэ Соссаӈ ма̄хманув халт ань са̄в хо̄тпа ма̄щтырлаӈкв патсыт. Та̄н акванхо̄нтхатыгланэ̄ныл порат халанылт ханищтахтэ̄гыт. Акв тамле нэ̄ Ханты-Мансийский район Кышик па̄вылт о̄лы, тав наме Елена Васильевна Сапегина, такви о̄парищ наме – Обатина. Ты ханты нэ̄ такви уре̄тыл тамле потыр потыртас. Ам атпан нупыл са̄т та̄лум то̄влыс. Лов та̄л клуб колт завхозыг рӯпитэ̄гум. Мо̄т ма̄т нэ̄матыр рӯпата воссыг а̄тим. Хо̄т матыр хо̄нтэ̄в, тот та рӯпитэ̄в. Па̄влувт са̄выӈпа̄лэ ма̄хманув пуссын рӯпата та̄л о̄лэ̄гыт. Ты э̄лыпа̄лт ам са̄в та̄л зверофермат рӯпитасум. Ма̄н тот сэ̄мыл охсарыт ос юн о̄щнэ лэ̄пакыт янмалтасанӯв. Та̄наныл тыттын ма̄гыс па̄влувт о̄лнэ хум хо̄тпат хӯл пӯвсыт, то̄нт та̄н бригадал рӯпитасыт. Охсаранув ос лэ̄паканув акваг ёмащакв тыттысанӯв, ёмащакв о̄щсанӯв. То̄ванакт ӯйсовыт ат пирмайтаве̄сыт. Акв хотты та̄лт ма̄н ӯйсовыт Ленинград ӯст рӯпитам фабрикан те̄тсанӯв. Та̄н ма̄навн ла̄тыӈ те̄тсыт – ӯйсовыт келлуӈкве щар ат ве̄рмияныл, тув мус совыт осыӈыг о̄лсыт. Мо̄т фабрикат ёт ма̄н о̄с рӯпитасӯв. Госпромхозув рӯпитаме порат па̄влыӈ ма̄т о̄лнэ мир пуссын рӯпата о̄щсыт. Ам омагума̄тягум са̄лыӈ хо̄тпаг о̄лсы̄г. А̄тям Василий Яковлевич Лозямов, омам ос Татьяна Тихоновна Обатина. Ма̄н мо̄т ханты ще̄мья ёт са̄лыӈ колт яласасӯв. Ма̄нти са̄лыянув совхозный са̄лыт ёт аквъёт ӯрве̄сыт. Хӯрумса̄ттем са̄лы – ты совхозный са̄лыт о̄лсыт, мо̄т са̄лыт пуссын ма̄нти са̄лыянув. Ам ма̄ньта̄гыл са̄лыӈ колт са̄лы ляпат яныгмасум. Ань ты урыл номылматнэ̄м порат ты мус сымум ща̄рги. То̄нт ма̄н сака ёмащакв о̄лсӯв. Ма̄н мо̄т ще̄мья ёт Кышик па̄вылныл яныгса̄ттем ве̄рыста алгальнув о̄лсӯв, Ненсъюган я̄ ляпат. Ань ты йист тув мус молях ёхтыгпаӈкв ро̄ви, са̄всыр техника о̄лы. Ос ма̄н то̄нт са̄лыӈ суныл тыглетувле яласасӯв. Госпромхозув 2004 та̄лт лаппантвес, тувыл зверофермав, са̄лыянув пуссын хотталь тотве̄сыт. Ань туп мо̄рсыӈ ще̄мья матах са̄лы те о̄ньщи, туп та̄н во̄рт са̄лы ӯрим ты о̄лэ̄гыт. Хӯл алыщлан ма̄хум ос та̄нти хӯл алыщлаӈкв патсыт. Звероферма о̄лум порат пувум хӯланыл пуссын тув мисаныл, ты хосыт олныл ойтве̄сыт. Ань ма̄хманув сака та̄рвитыӈ о̄лэ̄гыт. Клубколт са̄всыр рӯпитан ма̄ о̄лыс, ос пуссын хотвуйве̄сыт. Амти завхозыг рӯпитанэм сыс ня̄врамыт ос нэ̄ хо̄тпат ма̄гыс кружок ва̄рсум. Та̄н тув ёхталэ̄гыт, ам та̄наныл ю̄нсхатуӈкв ханищтыянум. Ня̄врамыт ос сакныл са̄всыр хорамыт хартэ̄гыт – пальсакыт, турло̄псыт. Хотьют ка̄сащи, тав ос сэ̄тапыл матыр пормас саги. Са̄т сыс тит щёс ня̄врамыт ам палтум ёхталэ̄гыт, пуссын аквъёт ловмантем хо̄тпа ма̄щтырлаӈкв ханищтахты. Ня̄врамыт ам ща̄нь ла̄тӈыл потыртаӈкв о̄с ханищтыянум, амти ханты ла̄тӈум ёмащакв ва̄глум. Ма̄н, во̄рт яныгмам хо̄тпат, рущ ла̄тӈыл туп школат потыртаӈкв патсӯв. Матыр ю̄нтнэ̄в порат аквтит йильпи ла̄тӈыл та ла̄виянум, мо̄т щёс ёхтэ̄гыт, титыглыянум – та ла̄тӈыт номияныл ман а̄ти. Ам о̄йкам рущ хо̄тпа, Свердловский областиныл тыг ёхтыс. Александра а̄гиме̄н яныг, ва̄т нупыл нила та̄лэ то̄влыс. Окружной пӯльницат ма̄нь ле̄ккарыг рӯпиты. Такви кол ат о̄ньщи, колнак ма̄гыс олн ойты. Кол во̄выс кос, ос ла̄ввес, тав хантыиг о̄лы, такви кол вос тинсы манос ёвты. Хумус ве̄рме̄в, тох та о̄лэ̄в, воссыг хоталь ва̄рхатэ̄в. Тамле потыр нэ̄кве ты потыртас. Тав о̄йкатэ кос рущ хо̄тпа, ос нэ̄ ханты мир пе̄с о̄лупса, пе̄с накыт э̄лаль тотыянэ. Такви пе̄с щирыл о̄луӈкв сака ка̄сащи. Матъёмас тамле хо̄тпат ма̄н халувт о̄лэ̄гыт.

1107 2015. 09. 11. Александр ВЬЮТКИН

Ка̄тыл по̄слын хум йильпи нэ̄паке Сӯкыр э̄тпос о̄выл хо̄талэ̄т соссаӈ мирн нё̄тнэ Ассамблея колт рӯпитан депутатыт округ губернаторув пе̄риян кастыл прессконференция ва̄рыгласыт. Округ кӯщаюв сӯкыр э̄тпост хӯрумхойплов хо̄талэ̄т тах пе̄рияве. Ты ма̄гсыл соссаӈ мирн пе̄риим депутатыт нё̄тмил во̄внэ наказ нампа нэ̄пак таве̄н щё̄питасыт. Ты урыл ты газета нилыт ло̄псэ̄т хансым о̄лы. Ань титыт сапра̄нияныл юипа̄лт ос ка̄тыл хӯрит по̄слын хум Вадим Савинов йильпи нэ̄глум нэ̄паке урыл потыртасыт. Мощ мо̄лалнув во̄ртур э̄тпос ва̄т нупыл хо̄тыт хо̄талэ̄т тав нёлса̄т нупыл ат та̄лэ то̄влыс. Тав ань Советский ӯст о̄лы. Вадим Иванович нэ̄паке «Таёжные мотивы Югры» намтыстэ. Тот са̄выӈпа̄лэ Октябрьский, Советский, Кондинский ос Ха̄льӯс районытт о̄лнэ во̄ре ос я̄нанэ по̄слым о̄лэ̄гыт. Хотьютын та нэ̄пак ка̄тын те ликми, сунсыглэлы̄н, хуриянэ сака хорамыӈыт ос пӯмащит. Вадим Савинов хуриӈ нэ̄паке та̄ратан ма̄гсыл Ассамблея кӯщай Еремей Данилович Айпин о̄лныл нё̄тыс.

1107 2015. 09. 11. Людмила ТЕТКИНА

Хо̄нтаӈ ма̄ньщит пе̄с йис наканыл ӯргалан кол Кондинский район Половинка па̄вылт музей о̄лы, Галина Анатольевна Мостовых кӯщаиг тот рӯпиты. Ты музей тав а̄тятэ Анатолий Николаевич Хомяков ва̄рыстэ. О̄йка пенсиян минас, а̄гитэ тав ва̄рум рӯпататэ ань э̄лаль тотытэ. Ты та̄л ва̄т са̄грапнал э̄тпос 10 хо̄талэ̄т музей 25 та̄лэ тах то̄влы. Половинка па̄вылн ялмум порат ам Галина Анатольевна ёт хо̄нтхатыгласум ос рӯпатаныл урыл китыгласлум. Кӯщай нэ̄ та урыл тох потыртас: «Музейт хо̄т со̄тыра арыгкем са̄всыр пе̄с пормас, нэ̄пакыт, хурит акванатым о̄лэ̄гыт. Ма̄н хо̄т хо̄тпа тыт рӯпитэ̄в. Ка̄сыӈ э̄лумхо̄лас такви рӯпататэ ва̄ритэ. Ань акв та̄рвитыӈ ва̄рмаль о̄лы, рӯпитан кол ма̄н ат о̄ньще̄в. Ты э̄лыпа̄лт па̄влувт тэ̄нут тыналан ла̄пка рӯпитас. Тувыл лаппантвес, ла̄пка кол ма̄нав майвес. Ань акв э̄тпос сыс 30 со̄тыра солко̄ви арендаолн ойтэ̄в. Ты кол тыналан хум са̄т миллион солко̄ви во̄ви, таса̄вит олн ма̄н ат о̄ньще̄в. Кондинский район миркол кӯщаит ты са̄вит олн ойтуӈкве о̄влэ̄т ка̄сащасыт. Ань ла̄ве̄гыт, олн а̄тим, иӈ мощ ӯрхатуӈкве э̄ри. Ты ва̄рмаль 2014 та̄л порат о̄лыс, ань ты мус хум олныл ат ойтвес, ма̄н арендаолн э̄лаль та ойтэ̄в. Рӯпитан колув мощ мо̄т щирыл ва̄руӈкве таӈхилӯв. Тыт ма̄н са̄всыр суссылтапыт, ялпыӈ хо̄талыт, ханищтапыт ва̄рыглаӈкве номсэ̄в. Ты э̄лыпа̄лт ма̄н палтув Екатеринбург ӯсныл дизайнерхо̄тпат ёхталасыт, колнакыт щё̄питаӈкве кусыласыт. Тувыл колув ма̄гсыл ат ойтхатсӯв, нэ̄матыр тыт ва̄руӈкве ат ве̄рме̄в. Олн ань о̄с ма̄нки сэ̄лэ̄в. Са̄всыр программа щё̄питасӯв, пӯмащ ва̄рмалит ва̄рыглэ̄в. «Выходной в мансийской деревне» нампа программа щирыл мӯй ма̄хумн о̄влэ̄т музей суссылтылӯв, тувыл ос са̄всыр касылыл ва̄рыглыянӯв, хӯл исмитыл тыттыянӯв ос ща̄ил айтыянӯв. Акв билет 295 солко̄ви тынэ о̄лы ос ня̄врамныл 180 солко̄ви выгӯв. Па̄влув Урай ӯс ляпат о̄лы, тыи ма̄гсыл са̄в мир тыг ёхталы. Ма̄хум пӯри ке ва̄ре̄гыт, о̄с тыг во̄виньта̄лыянӯв, та̄наныл о̄с янытлыянӯв, пасан щё̄питэ̄в. Мӯй ма̄хум ва̄тихал ма̄н палтув вос ёхталэ̄гыт, акваг йильпи программа хансэ̄в. 2014 та̄л сыс мӯй хо̄тпат во̄виньта̄лым, ма̄н 500 со̄тыра солко̄ви сэ̄лсӯв. Тувыл то̄ват ла̄ве̄гыт, матъёмас музей тох рӯпиты ос олн сэ̄лы. Мо̄таныт ля̄втэ̄гыт, ла̄ве̄гыт, музейколт пе̄с пормасыт ӯргалаӈкве э̄ре̄гыт, ма̄н тай мӯй ма̄хум ёнгалтым рӯпитэ̄в. Туи порат ня̄врамыт ма̄гсыл «Юсвой» нампа ӯщлахтын лагерь тыт рӯпиты. Ка̄сыӈ тув 20 а̄гирищпыгрищ тот ӯщлахты. Та̄н а̄лпыл тыг ёхтэ̄гыт ос итипа̄ла мус тыт о̄лэ̄гыт. Акв порат ма̄н па̄влув ляпат палаточный лагерь ва̄рыгласӯв. Та ӯщлахтын ма̄ рӯпитанэ̄тэ ма̄гсыл, олныл округ бюджетныл майлувесӯв. То̄нт ма̄н торгамтасӯв, тамле ӯщлахтын ма̄т мо̄т щирыл рӯпитаӈкв э̄ри. Ты юипа̄лт тамле рӯпата ва̄руӈкве воссыг ат вӯйхатэ̄в. Ань туп акв смена ва̄рыглэ̄в, ня̄врамыт пуссын па̄вылт ӯщлахтэ̄гыт. О̄йттур э̄тпост ос хӯл алыщлан хо̄тпат янытлан хо̄тал ва̄рыглэ̄в. Па̄влыӈ мир пуссын тот мӯйлэ̄гыт, ма̄хум Урай ос Кондинский район янытыл тыг ёхталэ̄гыт. Пе̄с порат тыт о̄лум ма̄ньщит сӯкыр э̄тпост пасан щё̄пита̄лыгласыт ос пӯрлахтасыт. То̄нт та̄н по̄йкщасыт, ёмас хо̄тал во̄всыт, туи са̄в пил вос яныгмас, я̄т са̄в хул вос о̄лыс. Тамле ялпыӈ хо̄тал ма̄н ань о̄с ка̄сыӈ та̄л ва̄рыглэ̄в. Галина Анатольевна Мостовых яныг пӯмащипа ла̄тыӈ округ Дума депутатыгн Татьяна Степановна Гоголеван, Еремей Данилович Айпинын ос районный думат рӯпитан депутатын ла̄ви. Та̄н депутатский фондыл Половинка па̄вылт о̄лнэ музейн ва̄тихал олн майлэ̄гыт. Во̄ртур э̄тпос 10 хо̄талэ̄т Галина Анатольевна самын патум хо̄талэ о̄лыс, 55 та̄лэ то̄влыс. Ма̄н, редакцият рӯпитан ма̄хум, таве намхо̄талыл янытлылӯв. Пус ка̄т, пус ла̄гыл таве̄н ла̄ве̄в.

1107 2015. 09. 11. Людмила ТЕТКИНА

А̄с я̄ ва̄тат о̄лнэ ма̄щтыр э̄ква Галина Ивановна Пестрякова ма̄щтырлаӈкве сака ха̄сы. Тав йӣвныл са̄всыр аньщарыт ёрги, хӯл совныл са̄всыр пӯмащ утыт ю̄нты ос са̄сныл са̄всыр хусапыт ва̄ри. Э̄ква Октябрьский район Карымкары па̄вылт о̄лы. Тав Большие Юрты па̄вылт самын патыс. Колхозыт ва̄руӈкве хунь о̄вылтаве̄сыт, ма̄нь па̄вылквет о̄лнэ мир пуссын Карымкары па̄вылн ва̄нтлуптаве̄сыт. То̄нт оматэ о̄с та па̄вылн о̄луӈкве минас. Галина Ивановна а̄тятэ рущ хумыг о̄лыс, ос та колхозт рӯпитас. Тувыл Ямал ма̄н рӯпитаӈкве ке̄твес. Ще̄мьятэ палт мощщан ёхталас, Лабытнанги ӯсн о̄луӈкве ёт во̄всанэ. Галина Ивановна оматэ хащта̄л ма̄т о̄луӈкве ат тахмаяс, о̄йка ювле такке̄т та минас. Ты юипа̄лт тав а̄тятэ воссыг аты ва̄щиньтастэ. Оматэ нила ня̄враманэ такви янмалтасанэ. Галина Ивановна щар яныг ня̄врамыг о̄лыс, са̄т класс а̄стламе юипа̄лт та̄ра рӯпитаӈкве минас. Та поратэ урыл тох потыртас: «Ам э̄лаль ханищтахтуӈкве аты номсысум. Омамн нё̄туӈкве э̄рыс, мис поснэ ма̄т рӯпитаӈкве патсум. То̄нт колхоз кит со̄тыра арыгкем мис о̄ньщас, мисанув посуӈкве а̄лпыл хо̄т щё̄с порат но̄хква̄лсӯв. Тувыл пум тэ̄ӈкве кон та̄ртыгласанӯв, итипа̄лаг ос ювле мисколн посуӈкве ня̄влысанӯв. Ам акв хо̄тал сыс ат яныг фляга щаквит поссум. То̄нт ма̄н пуссын комсомольцыг, коммунистыг о̄лсӯв. Янытлан нэ̄пакыл майвесӯв, янытлавесӯв, ма̄н тай э̄лаль ща̄гтым ка̄ркамыг та рӯпитасӯв. Тувыл хум ва̄рсум, кит ня̄врам самын паттысум. Ты юипа̄лт колхозн рӯпитаӈкве воссыг ат минасум, мань ня̄врамыт ӯргалан колт а̄ныт ловтуӈкве патсум. Пенсиян миннэм мус тот рӯпитасум. О̄йкам а̄тимыг е̄мтыс, амккем хультсум. Пыгум колта̄глэ ёт Сургут ӯст о̄лы, ма̄во̄й но̄хвинэ ма̄т рӯпиты. Ань та ӯсныл па̄влув мус машинал яласан лё̄ӈх ва̄рвес, ам палтум ва̄тихал ёхталы. А̄гим Ханты-Мансийск ӯст о̄лы, Югорский университетт рӯпиты, ӯщлахтын порат а̄гитэ ёт ам палтум ёхталэ̄г. Акв порат пил ва̄туӈкве минасум, во̄рт ё̄мыгтамумт йӣквар ка̄саласлум, юв тотыслум. Йӣквар мощ ёргыслум, нё̄тнэ а̄ныиг та тэ̄лыс. Ёмащакв то̄слыслум, о̄люпыл сартыслум ос пасан тормыл ӯнттыслум. Во̄рт ань акваг йӣквар атэ̄гум, са̄всыр пӯмащ утыт ва̄ре̄гум. Ты юипалт са̄сныл са̄всыр хусапыт ва̄руӈкве ханищтахтасум. Хӯл совныл ос са̄всыр пӯмащ утыт ю̄нтэ̄гум. Па̄влувт ма̄ньщи, ханты хо̄тпа а̄тим, тыщирыл ма̄щтырлаӈкве нэ̄мхотьют ат ха̄сы. Ам амки хумус ха̄сэ̄гум, тох та ва̄ре̄гум. Па̄влыӈ ма̄хум са̄всыр йӣкварыт, са̄с, хӯл со̄в а̄нум ань акваг та тотэ̄гыт. Галина Ивановна па̄вылт о̄лнэ мирн сака янытлаве. Тав мо̄т яныгпа̄ла хо̄тпат ёт «Совет ветеранов» нампа организацият рӯпиты. Яныгпа̄ла хо̄тпат ва̄тихал акванатыглыянэ. Ты рӯпататэ урыл тав ла̄выс: «Ам хӯл алыщлаӈкве сака ка̄саще̄гум, ма̄хманув няслуӈкве ёт во̄виньта̄лыянум. Акв порат ам номтыл ёхтуве̄сум, хӯл алыщлан хо̄тпат халт касыл ва̄руӈкве. Ты юипа̄лт па̄вылт о̄лнэ мир ма̄н акванатыглыянӯв, та э̄лумхо̄лас хотьют щар яныг хӯл пуви, тав но̄х та паты. Ань ка̄суӈкве са̄в хо̄тпа ёхталаӈкве патыс. Пувум хӯланув я̄ ва̄тат па̄йтыянӯв, пуссын аквъёт тот тэ̄ганӯв. Ты ялпыӈ хо̄талн ма̄хум та̄нки тэ̄нут тотэ̄гыт, тыщирыл аквъёт пуссын ӯщлахтэ̄в. О̄влэ̄т ма̄н туи порат тамле касыл ва̄рыгласӯв, ань тэ̄лы порат о̄с акванатхатыглэ̄в». Галина Ивановна са̄в та̄л ка̄ркамыг рӯпитас, са̄в янытлан нэ̄пак о̄ньщи. Э̄ква рӯпата та̄л о̄луӈкве щар ат ве̄рми, тав ань стихыт хансуӈкве о̄вылтахтас.

1107 2015. 09. 11. Светлана РОМБАНДЕЕВА

Соссаӈ а̄гит Ты хурит хӯрум соссаӈ а̄гит по̄слым о̄лэ̄гыт: Виктория Банк, Елена Молчанова ос Екатерина Гришкина. Виктория Октябрьский районныл о̄лы, мо̄т кит а̄гииг Ханты-Мансийск ӯст самын патсыг, яныгмасыг. Елена оматэ ма̄ньщи нэ̄, а̄ги о̄парищ наме Гындыбина, Ха̄льӯс район Кимкъясуй па̄вылныл о̄лы. Екатерина ос а̄тятэ ханты хум, Белоярский район па̄лыл о̄лыс. Ты а̄гиянув туи ма̄ньхапыл каснэ тэ̄ла порат ка̄саласанум, по̄слысанум. Пуссын пуста̄гыл вос о̄лэ̄гыт, На̄й-О̄тыранылн вос ӯргалавет.

1107 2015. 09. 11. Александр ВЬЮТКИН

О̄лнэ ма̄в ӯлтта минам пе̄с лё̄ӈх Удмуртия ма̄т Дебёсы па̄выл ӯлтта «Сибирский тракт» нампа пе̄с лё̄х ва̄рим о̄лыс. Та урыл потыртан ма̄гсыл ма̄н Дебёсский музей колт экскурсиял ва̄рыглавесӯв. Ты кол 1822 та̄лт ӯнттыма. Та порат армият лӯсытам ма̄хумн о̄лнэ колыг тав о̄щвес. Дебёс па̄выл янытыл та кол щар пе̄с колыг ловиньтахты. Тав 1991 та̄лт музеиг ва̄рвес. То̄нт музей иӈ ат о̄лме порат а̄хвтасыл ва̄рим пе̄с лё̄х хультум охсатэ ӯлтта йильпи састум лё̄ӈхыл ва̄руӈкв номсувес. Тувыл титпалъе̄рт лё̄х хосыт яныгман ха̄ль йӣвыт хотса̄груӈкв тахве̄сыт. Та порат ты лё̄х хуритэ̄т хультуптан ма̄гсыл па̄влыӈ ма̄хмыт тармылпатсаныл. Тащирыл ты музеяныл та тэ̄лыгпас. Ань музей кӯщай нэ̄ наме Елена Вениаминовна Опарина. Тув ёхтумувт тав ты ма̄н ляльтув паща ла̄тыӈ ла̄внэ ма̄гсыл нэ̄глалас. Па̄вланыл та̄ра минам лё̄х урыл ма̄навн Павел Васильевич Роготнёв потыртас. Павел Василевич иӈ студентыг о̄лме порат ты пе̄с лё̄х урыл пӯмщалахтуӈкв патыс. Тав ты урыл потре э̄лаль ловиньтэ̄лын. «Ты «Сибирский тракт» нампа лё̄х Россия ма̄в палытэ̄т минас. Тав 1649 та̄лт пинвес. Санкт–Петербург ос Москва ӯсыгныл минам лё̄ӈхыт ма̄н па̄влувт акванёхтысыт. Тувыл э̄лаль минам лё̄ӈханыл ос тит нупыл ва̄рим о̄лсы̄г. Акватэ Салехард ӯс мус ва̄рыглавес. Тав хоса ат о̄щвес, тот сака ащирмаӈ ос аквписыг лё̄ӈх лапво̄тастыматэ ма̄гсыл та лё̄ӈханыл хотарыгтаптысаныл. Мо̄т нупыл минам лё̄ӈхе Екатеринбург, Тюмень, Иркутск ӯсыт та̄ра Китай ма̄ Пекин ӯс мус ва̄рим о̄лыс. Та порат Александр I хо̄ныг о̄лыс. Лё̄ӈх щё̄питан нэ̄паканыл щирыл, лё̄ӈх па̄ӈвхитэ хо̄тпан метран ёхтуӈкв ве̄рмыс. Тувыл титпалъе̄раге̄т во̄ӈхат хилуӈкв э̄рыс. Ка̄сыӈ хус манос ва̄т ве̄рыста почта тотыглан лӯваныл пе̄нтнэ ма̄гсыл лӯвколыт о̄лсыт. Тувыл э̄лаюв яласан ма̄хум ма̄гыс ӯщлахтан колыт ӯнттыглаве̄сыт, ка̄снаколыт тот о̄с о̄лсыт. Лё̄ӈханыл палытэ̄т нёлолов со̄тыра нёлса̄т арыгтем ве̄рыстаг о̄лыс. Та̄л сыс «Сибирский тракт» лё̄х хосыт хус со̄тыра ляпатем мир яласас. Та коныпал иӈ нёлоловхуйплов со̄тыра ляпатем ка̄снаколн ос ссылкан те̄тым ма̄хум тувыл ё̄мсыт. Атпан со̄тыра тонна ляпатем пормас ос тэ̄нут тотыглавес. Нё̄р тыпалъе̄р лӯима̄ныл хӯл ос са̄всыр тыныӈ во̄руй со̄в яныг ӯсыӈ ма̄н тотыглавес. Ты ма̄т во̄руй мощщаг е̄мтме ма̄гсыл Екатерина II, хо̄ныг о̄лум нэ̄, лё̄ӈханыл мо̄т щирнуве̄г ва̄руӈкв ла̄выстэ. «Сибирский тракт» те̄р лё̄х мус о̄лыс. Та юипа̄лт ты лё̄ӈх то̄ва ма̄т те̄р лё̄ӈхыл пинвес». Дебёс па̄вылт о̄лнэ ма̄хум мовиньтэ̄гыт: «Россия ма̄ янытыл о̄лнэ аквпал мирув ма̄н па̄влув та̄ра минас».

1108 2015. 09. 25. Валентина УЗЕЛЬ

Округ кӯщаюв э̄лаль ат та̄л рӯпитаӈкв паты Ты э̄тпос 13 хо̄талэ̄т округувт о̄лнэ мирн пе̄риим депутатыт округ кӯщай пе̄риясыт. Ань йильпи са̄кконыт щирыл Россия Президент тав хӯрум хо̄тпа наманыл ла̄виянэ. Тувыл э̄лаль Тюменский область губернатор ты хо̄тпат ма̄гыс хӯлтын нэ̄пак хансы, та̄н халанылт акв хо̄тпа округ кӯщаиг вос пе̄рияве. Та юипа̄лт ман округ Думат рӯпитан са̄ккон хаснэ ма̄хум та̄н э̄лаль акв хо̄тпа губернаторыг та ӯнттыяныл. Ань Россия ма̄к яныг кӯщаювн ты хӯрум хо̄тпа наманыл ла̄всанэ, ты Наталья Комарова, Алексей Савинцев ос Михаил Сердюк. Ка̄сыӈаныл депутатыт ос са̄всыр кӯщаит нупыл такви номтанэ потыртасанэ. Тав округ кӯщаиг те пе̄рияве, ма̄ныр рӯпата ва̄рункв паты. О̄влэ̄т Наталья Комарова потыртас. Тав ла̄вме щирыл, ань тыт са̄в о̄лнэ кол ӯнттаве, са̄в ня̄врам самын паты, са̄в йильпи ханищтан кол ос ма̄нь ня̄врамын садик ӯнттаве. Туп ма̄хманув ёмащакв вос о̄лэ̄гыт, ты рӯпата таима̄гыс ва̄раве. Ос я̄нас та урыл потыртас, ань округ олныт тыглетувле, нас тэ̄ла та̄л холтуӈкв щар ат э̄ри. Хо̄т са̄в хо̄тпа рӯпиты, та̄н пуссын по̄хан те̄тавет, рущ ла̄тын щирыл – сокращение ва̄раве. Насска̄сыг рӯпата та̄л та̄н ул вос ӯнлэ̄гыт. Ма̄ньщи ос ханты ла̄тӈыг урыл тав о̄с потыртас. Ань ты ща̄нь ла̄тӈыг ёмащакв ханищтаӈкв э̄ре̄г, тыи ма̄гыс «проектыг» ла̄внэ йильпи тэ̄ла щё̄питавес. Ань ты хосыт учёный ма̄хманув рӯпитаӈкв тах патэ̄гыт. Округ Думан пе̄риим депутатыт рӯпитаӈкв о̄вылтахтаманыл па̄сныл ты та̄л ат та̄лыг ты е̄мты. Йильпи пе̄риян ва̄рмаль тах ва̄раве. Ос тот рӯпитан Ассамблеян ма̄к соссаӈ хо̄тпат пе̄рияӈкв э̄ре̄гыт, по̄х хо̄тпат тув ул вос пе̄рияхтэ̄гыт. Та̄н ты ма̄ньщи ос ханты мирыг та̄рвитыӈ ва̄рмаляныл акваг та̄рапаттым ос уральтым о̄ньщуӈкв патыяныл. Наталья Комарова юипа̄лэ̄т Михаил Сердюк потыртас. Ты хум налыман та̄лэ иӈ ат то̄влыс, ос Москва ӯс Государственный Дума депутатыг пе̄риявес. Ань тот рӯпиты. Тав ла̄выс, ань ман округув ювле хультуӈкв патыс. Ты э̄лыпа̄лт ма̄н акваг «щёлыӈ ма̄г» ла̄ввесув, ос ат та̄л сыс ма̄н экономикав э̄рнэ щирыл э̄лаль ат мины. Тыи ёмас хунь. Хӯрмит хо̄тпа Алексей Савинцев о̄с потыртас. Ос пе̄риян ва̄рмаль порат тав ма̄гсылэ нэ̄мхотьют нэ̄пак ат та̄ратас. Округ Дума депутатыг ань 35 хо̄тпа рӯпиты. Наталья Комарова ма̄гыс 28 хо̄тпа нэ̄пак та̄ратасыт, Михаил Сердюк ма̄гыс – 7 хо̄тпа. Округ ма̄к яныг кӯщаюв ма̄гыс ты пе̄риян ва̄рмаль тох ты минас.

1108 2015. 09. 25. Людмила ТЕТКИНА

Ма̄н о̄лнэ ма̄вт пе̄риян хо̄тал о̄с о̄лыс Ты э̄тпос 13 хо̄талэ̄т Россия янытыл пе̄риян ва̄рмаль ва̄рыглавес. Ма̄н округувт о̄лнэ мир ка̄тпос пинуӈкве о̄с во̄виньта̄лве̄сыт. Та хо̄талт то̄ва па̄влытт ос ӯсытт о̄лнэ ма̄хум миркол кӯщаит ос депутатыт пе̄риясыт. Округувт пе̄риян хо̄тал хумус минас, ты урыл окружной комиссият кӯщаиг рӯпитан хум Андрей Павкин ля̄ххал тотнэ ма̄хумн потыртас. Тав ла̄выс, щар са̄в э̄лумхо̄лас Белоярский район Сорум па̄вылт миркол кӯщай пе̄рияӈкве ёхталас. Та̄н халанылт са̄в хо̄тпа Марина Маковеева ма̄гсыл нэ̄пак та̄ртсыт. Тав ань та миркол кӯщаиг рӯпитаӈкве паты. Кондинский район Мулымья па̄вылт миркол кӯщай ма̄гсыл ос са̄в ма̄хум ка̄тпос пинуӈкве ёхталас. Та па̄вылт ань миркол кӯщаиг Евгений Белослудцев рӯпитаӈкве патыс. Октябрьский район Малый Атлым па̄вылт ос миркол кӯщаиг Сергей Дайнеко пе̄риявес. Советский район Коммунистический па̄вылт Людмила Вилочева но̄хпатыс, тав ма̄гсылэ 75% са̄вит хо̄тпа ка̄тпос пиныс. Са̄ккон щирыл, са̄всыр партият о̄лнэ ма̄хум та̄нки нэ̄паканыл избирательный комиссиян ке̄туӈкве ве̄рмияныл. Ань пе̄риян ва̄рмаль о̄лме порат ма̄хум «Единый Россия», ЛДПР, КПРФ ос «Справедливый Россия» партиятныл о̄лнэ хо̄тпат халт депутатыт ос миркол кӯщаит пе̄риясыт. Ты халт «Единый Россия» партият щар са̄в ма̄хум но̄хпатыс. Мо̄т пе̄риян хо̄тал 2016 та̄лт сӯкыр э̄тпос 16 хо̄талэ̄т е̄мты, то̄нт тах Россия янытыл о̄лнэ мир Государственный Думан депутатыт пе̄рияӈкве патэ̄гыт. Акв та хо̄талэ̄т ма̄н окружной Дума депутатыт ма̄гсыл нэ̄пак тах о̄с та̄ратэ̄в. Ос ты коныпал Тюменский Думан ма̄нки депутатанув ма̄гсыл ка̄тпос пинэ̄в. Пе̄риян ва̄рмаль щё̄питан хо̄тпат рӯпитаӈкве ань та о̄вылтахтасыт.

1108 2015. 09. 25. Светлана РОМБАНДЕЕВА

Ма̄хум янытлаве̄сыт Россия Президентув Владимир Владимирович Путин кӯщаиг пе̄риим ма̄хум ёт хо̄нтхатыглас. Ань ты э̄тпос 13 хоталэ̄т Россияв янытыл 22 ӯсытт манос округытт ма̄хум кӯщаит пе̄риясыт. Владимир Владимирович та̄н нупланыл тох ла̄выс: – Ка̄сыӈ ма̄т ма̄хум ёмащакв ва̄нэ хо̄тпаныл пе̄риясыт. Таве̄н та̄н агтэ̄гыт, па̄выл ман ӯс ма̄хманылн тав нё̄туӈкве паты, э̄лы хо̄тал ма̄гыс тав мӯсхал щирыл рӯпитаӈкве паты. Мирн пе̄риим я̄тил хо̄тпате̄нув, на̄нанн ань сака са̄в рӯпитаӈкве э̄ри. На̄н ётын туп ёмас, ка̄ркам ма̄хум вос рӯпитэ̄гыт. Ка̄сыӈ округт, ӯст манос па̄вылт мир ёмащакв о̄лнэ̄тэ ма̄гыс ё̄р ул са̄литэ̄н, номт ул са̄литэ̄н. Ва̄рнэ рӯпатан вос на̄ӈки, ма̄хманын па̄рыс вос тоты. Округ кӯщай прессслужбаныл те̄тым ля̄ххал ма̄ньщи ла̄тӈыг С. Ромбандееван толмащлавес.

1108 2015. 09. 25. Александр ВЬЮТКИН

Ат са̄мпа тит по̄с пӯсвесы̄г Сӯкыр э̄тпост онтоловит хо̄талт Ханты-Мансийск ӯст Самотлор нампа ма̄во̄й ос газ но̄хвинэ ма̄ намхо̄талэ янытлавес. Ты рӯпата о̄вылтан па̄сныл ты та̄л атпан та̄лыг то̄влыс. Хо̄тал палыт ӯс янытыл са̄всыр пӯмащ ва̄рыглавес. Акв тамле ёмас ва̄рмаль ӯс котильт Музей геологии, нефти и газа нампа кол э̄лыпа̄лт ат са̄мпа тит по̄с пӯсвесы̄г. Та по̄сыг Александр Васильевич Филипенко ос Геннадий Михайлович Лёвин намыл намтвесы̄г. Александр Васильевич округ губернаторыг атхойплов та̄л рӯпитас. Тав округ кӯщаиг о̄лме сыс округ янытыл ӯс хал лё̄ӈхыт, о̄лнэ колыт, каснэ колыт, ма̄во̄й ос газ но̄хвинэ ма̄т ущпылнэ̄г са̄вмысыт. Александр Филипенко лов арыгтем са̄всыр по̄с ос государственный яныг намыт о̄ньщи. Титыт хум Геннадий Лёвин ма̄во̄й но̄хвинэ ма̄т са̄в та̄л нас буровикыг рӯпитас. Таима̄гсыл тав о̄с Россия нампа яныг по̄сыл майвес. Хо̄тпаг янытлан порат то̄нт иӈыт пе̄риям губернаторув Наталья Комарова ёхталас. По̄с нам нэ̄пакыг Наталья Владимировна са̄в ёмас ла̄тӈыл янытлым мисаге. Александр Васильевич ат са̄мпа по̄сэ пӯснэ кастыл такви ёхтуӈкв ат ве̄рмыс, таима̄гсыл сертификат нампа нэ̄паке Василий Александрович пыге̄н майвес.

1108 2015. 09. 25. Светлана РОМБАНДЕЕВА

Соссаӈ мирыт нё̄туӈкве патавет Сӯкыр э̄тпос 14 хо̄талэ̄т Москва ӯст са̄всыр мирыт тармыл патнэ Федеральный агентстват рӯпитан ма̄хум ос Россия янытыл Лӯи ма̄т, Сибирьт ос Дальний Востокт о̄лнэ соссаӈ мирыт Ассоциациянылт рӯпитан ма̄хум акванхо̄нтхатыгласыт. Соссаӈ ма̄хум ма̄гыс са̄всыр э̄рнэ программат ва̄рнэ ма̄т кӯщаиг о̄лнэ нэ̄ Алевтина Николаевна Маковоз, олн нё̄тмил ва̄рнэ хум Александр Николаевич Коныгин, Ассоциация кӯщай Григорий Петрович Ледков ос мо̄т са̄в хо̄тпа Россият о̄лнэ соссаӈ мирыт урыл потыртасыт, хумус та̄нанылн нё̄туӈкве. Ма̄к та урыл потыртасыт, ань соссаӈ мирыт ла̄тӈаныл ос культураныл вос о̄лы, э̄рнэ тэ̄ланыл ва̄рнэ ма̄гыс кӯщаитн мӯсхал щирыл вос нё̄тавет. Григорий Петрович Ледков ла̄выс: «Соссаӈ мирыт ма̄гыс са̄кконыт э̄рнэ щирыл вос хансавет. Ма̄хум та̄нти о̄лнэ ма̄нанылт тэ̄нут ка̄тынпаттуӈкве вос ве̄рмынувыт, та̄нанылн ӯйхул алыщлаӈкве ман во̄раяӈкве вос ро̄внув. Пенсия олныл ёмащакв вос ойтавет. Ам ань сусте̄мт, тыт са̄в кӯщай о̄лы, таяныт ёмас ва̄ре̄н, соссаӈ ма̄хманувн нё̄тэ̄н. Пуссын аквъёт рӯпитаӈкв патэ̄в те, та̄рвитыӈ тэ̄ланув э̄лаль мощ нёвумтэ̄гыт». Тув атхатыглам ма̄хум тав ётэ пуссын ка̄сащасыт, ла̄всыт, ань ты тэ̄лат ва̄рнэ ма̄гыс матахмат хо̄тпа ханищтаӈкве э̄ри. Тувыл экспертный совет ва̄руӈкв акванпотыртахтасыт.

1108 2015. 09. 25. Светлана РОМБАНДЕЕВА

Ма̄ньха̄пыл касум ма̄хум Туи порат о̄йттур э̄тпос 5 хо̄талэ̄т Ханты-Мансийский районт Витхон пӯрлан хо̄тал о̄лыс. То̄нт соссаӈ ма̄хум ма̄ньха̄пыл кассыт. Округт о̄лнэ мир коныпал э̄лы хо̄н ма̄ныл мӯй хо̄тпа о̄с са̄в о̄лыс. Ань ты хуритыт по̄слым нэ̄тхумит тот кассыт, та̄нти уранылт аквкит ла̄тыӈ ла̄всыт. Ты хум наме Март Рейманн, Эстонияныл ёхталас: «Ты ма̄н ам о̄выл щёс ёхтысум. Юн ам каноэ ос байдарка ха̄пыл яласасум. Ос ма̄ньха̄п нэ̄мхуньт ат ва̄щинтасум, тыт ань о̄выл щёс ӯнтсум. Ма̄ньха̄пыл яласаӈкве мощ ханищтахтуӈкве э̄ри, илттыг хунь ханьщувлэ̄гын. А̄нум тыт сака ёмас, ма̄витын лылые̄пе сыстам». Людмила Покачева, Сургутский район: «Тамле касылын ам о̄выл щёс ёхтысум. Амти па̄влумт тай ма̄ньха̄пыл акваг яласэ̄гум. Ма̄н о̄лнэ ма̄вт касылыт о̄с ва̄рыгла̄лавет, ам касыгла̄лэ̄гум». Алексей Пуртов, Ханты-Мансийск ӯс: «Тамле касылыт ам ань китыт щёс ты касэ̄гум. Ты ва̄рмаль ам э̄руптылум, касуӈкве сака пӯмыщ. Ам яныг о̄пам ханты хум о̄лыс, тав Ханты-Мансийск ӯс ляпат о̄лум Выстыхой нампа ма̄нь па̄вылт яныгмас, тот о̄лыс. Ты па̄выл хосат а̄тим». Антонина Константиновна Виноградова, Нижневартовский район, Корлики па̄выл: «Ма̄ньха̄пыл ам ва̄тахтем та̄л яласэ̄гум. Тамле каснэ ва̄рмалит о̄лыгланэ̄ныл порат ам акваг касыгла̄лэ̄гум, то̄ванакт о̄выл ме̄стат вуйласум. Ань яласаӈкв сака ат ве̄рме̄гум, мощ о̄с ханищтахтуӈкве э̄ри». Ты хо̄тпат ёт С. Ромбандеева потыртас.

1108 2015. 09. 25. Людмила ТЕТКИНА

Нёрахи па̄вылквет о̄лнэ хо̄тпа Ха̄льӯс район Нёрахи па̄вылт туп хӯрум хо̄тпа Татьяна Семёновна Тасманова ос Калиныг э̄кваго̄йкаг о̄лэ̄гыт. Мо̄т ма̄хум туи порат пил ва̄туӈкве, хӯл алыщлаӈкве, картопка ӯнттуӈкве ёхталэ̄гыт. Татьяна Семёновна тот таккет о̄лы. А̄гиянэ̄н ос апыгрищанэ̄н Ня̄хщамво̄льн акваг во̄ваве, тав ос Нёрахи па̄вылт о̄луӈкве ханьщувлас, мо̄т ма̄н ва̄нтлуӈкве щар ат таӈхи. Татьяна Семёновна а̄гиянэ тав палтэ ва̄тихал ёхталэ̄гыт. Таве̄н хӯл алыщлаӈкве, пил ва̄туӈкве, тэ̄пкант картопка ос са̄всыр мо̄т тэ̄нут ӯнттуӈкве нё̄тэ̄гыт.

1108 2015. 09. 25. Тамара МЕРОВА

Ня̄врамыт ӯщлахтан колыт э̄сгуве̄сыт Туи сыс са̄в ня̄врам округ янытыл о̄лнэ лагеритыт ӯщлахтасыт. Ань ты рӯпитам колыт халт касыл о̄лыс ос но̄хпатум ёмащакв ӯщлахтан ос пусмалтан колыт олн мӯйлупсал майве̄сыт. Щар ёмас лагериг ӯс по̄хат олнэ «Барсова гора» ла̄ввес. Тав «Сибирский легион» Сургут ӯсыӈ муниципалитет па̄лыл ва̄рыглавес ос военноспортивный ва̄рмалит щирыл рӯпитас. Ма̄к ёмас палаткаӈ лагериг Нижневартовск ӯсныл «Патриот» нампа творчество кол па̄лыл ва̄рыглам хо̄тпат намтве̄сыт. Та̄н туристыт ос ма̄витув «По рекам и тропам земли Югорской» о̄вылтыт тэ̄лат ня̄врамытн ханищтасыт. Белоярский районыт «Нумсанг ёх» нампа ӯщлахтан кол «Лучший лагерь с этнокультурным компонентом» номинацият но̄хпатыс. Ос Лангепас ӯст «Атлант» нампа лагерь туи сыс ня̄врамыт ёт щар ёмащакв рӯпитан ос ӯщлахтын лагериг ла̄ввес. Ты касылыт но̄хпатум лагерит мӯйлуптан ма̄гыс 1 млн. 320 со̄тыра солко̄ви та̄стыглавес. Ты нё̄тмил округ департамент па̄лыл ва̄рыглавес. Ты та̄л 24 ня̄врам ӯщлахтан ос пусмалтан колыт та̄нки халанылт кассыт. Тыгыл 12 колыт э̄лаль каснэ ма̄гыс пе̄рияве̄сыт ос тувыл нила номинация щирыл хӯрум лагерит та̄нки халанылт кассыт. Тамле касыл ань округ янытыл щар ёмщакв ос мӯсхалыг ня̄врамыт ёт рӯпитан лагерит та̄рапаттын ма̄гыс щё̄пита̄лвес. Ты ля̄ххал ма̄ньщи ла̄тӈыг Тамара саквъяныл толмащластэ.

1108 2015. 09. 25. Александр ВЬЮТКИН

О̄выл щёс ва̄рыглан касыл Сӯкыр э̄тпос аквхойпловит хо̄талэ̄т Ханты-Мансийск ӯс мувлахи машинал яласан лё̄х Самаров пале̄р охсатэ ма̄хум ха̄йтыл каснэ лё̄ӈхыг ва̄рыглавес. Ты касыл рӯщ ла̄тӈыл «Превзойди себя» намыл ла̄ввес. Каснэ хо̄тал э̄лыпа̄лт касыл щё̄питан ма̄хум ёт прессконференция о̄лыс. Та̄н халанылт Сергей Юрьевич Дегтярёв о̄лыс. Тав Дума Председатель ва̄ӈын кӯщай хумыг ос каснэ ма̄хум ёт рӯпитан президентыг о̄лы. Тувыл ма̄ньлат ма̄хум ёт касыл щирыл рӯпитан хум Александр Валерьевич Лавренов ёхталас. Хӯрмит хумияныл наме Александр Сергеевич Солоп. Касыл шё̄питан щирыл кӯщаиг тав ты о̄лыс. Щар о̄влэ̄т тамле щир касыл мо̄лты номтын ёхыс. Та̄л сыс ма̄н номсысӯв хумус, хо̄т ёмаснуве̄г таве ва̄руӈкв. Таима̄гсыл янытэ̄т «Первый легкоатлетический полумарафон «Превзойди себя» в Ханты-Мансийске» намыл пиным о̄лы. Москва, Санкт-Петербург, Пермь, Челябинск, Екатеринбург, Тюмень ос Ивановский областьныл ма̄хум тыт каснэ кастыл хасхатсыт. Аквъёт пуссын титса̄т арыгтем хо̄тпа касуӈкв по̄стахтас. Титынтыг атхатыглахтамув порат ма̄н касылув ва̄рыглан ма̄ тиссӯв. О̄влэ̄т Ханты-Мансийск ӯс котиль ӯсхулыт, тувыл ӯс мувлахи яласан лё̄ӈх щирыл ва̄руӈкв номсыслӯв. Тох те ва̄рсӯв, ӯс янытыл машинат яласаӈкв ат ве̄рмынувыт. Таима̄гсыл ма̄н ӯс мувылтан йильпинув лё̄ӈхыт ва̄руӈкв потыртахтасӯв». Касыл о̄вылтахтаме хо̄тал янгема̄не аквъёт пуссын хӯрум са̄т ляпатем хо̄тпа ха̄йтуӈкв ка̄сащасыт. Ня̄врамыт лов ве̄рста ха̄йтсыт. Яныгнув ма̄хум хус ве̄рста яныг са̄т нупыл са̄т метра ла̄глыл ха̄йтсыт. Ла̄глыл ха̄йтнэ акв ла̄кв палытэ са̄т ве̄рстаг о̄лыс. Таима̄гсыл ма̄хум хӯрум ла̄кв ха̄йтсыт. Хотьют ха̄йтыматэ порат матаре хотум те е̄мтапи, тара по̄ханминуӈкв ве̄рмыс. Ха̄йтнэ лё̄ӈх палытэ̄т ле̄ккарытын тармыл ӯрвес. Хум хо̄тпат халт щар мо̄ляхыг Михаил Кульков финишин ёхтыгпас. Тав Ханты-Мансийск ӯст о̄лы. Хус арыгтем ве̄рста тав акв щё̄с ос нёлолов минута сыс ха̄йтыстэ. Тав юипа̄лэ̄т Екатеринбург ӯсныл ёхталам хум Алексей Погнуев ёхтыс. Тав ма̄н хумиювныл нила минутан ювхультыс. А̄нох те̄р ос Денис Кораблев вистэ. Тав ё̄рн ма̄хум о̄лнэ ма̄ныл Тарко-Сале ӯсныл тыг ёхталас. Нэ̄ хо̄тпат халт финишин са̄ртын Анастасия Зольникова ёхтыс. Тав о̄с Ханты-Мансийск ӯсыт о̄лы. Хус арыгтем ве̄рста тав акв щё̄с налыман минута сыс ха̄йтыстэ. А̄гииг о̄лме порат тав округ ма̄гсыл ёсал ха̄йтыгтас. Та хо̄тал каснэ ма̄хум нэ̄мхотьют по̄хат ат хультыс, пуссын ма̄нь мӯйлупсал мӯйлуптаве̄сыт. Та коныпал финишин ёхтум ма̄хум пуссын сыплувын тагатан ме̄талил майве̄сыт. Лӯима̄ е̄рныл ащирмаӈ во̄т нэ̄хотьютын торас ат ва̄рыс, мо̄т щирыл тав нё̄тыс. Нэ̄мхотьют тэ̄ла та̄л нас тох ат лю̄лис, ма̄хум э̄ргысыт, ёнгысыт ос йӣквсыт.

1108 2015. 09. 25. Александр ВЬЮТКИН

Йильпи нотыт ханищтан йильпи кол Сӯкыръя па̄вылт о̄лум ханищтахтын кол урыл Галина Николаевна Ларионова те̄тыглам потре э̄лаль ловиньтэ̄лын. 1960 та̄л юипа̄лт Роза Михайловна Минчук, Валентина Кузьминична Вьюткина, Елена Яковлевна Хатанева ос Альбина Васильевна Попова рӯпитаӈкв ёхтысыт. Альбина Васильевна потырта̄лум номтанэ: «Сӯкыръя ханищтахтын колыт ам щар ма̄нь ня̄врамыт ханищтым рӯпитасум. О̄выл рӯпитаӈкв вӯйхатым та̄лум ёмащакв номилум. Ханищтахтын та̄л о̄вылтахтаме юипа̄лт ам ханищтан классум ёт э̄т хулнэ щирыл во̄рын минасӯв. Во̄р хо̄сыт ам пилым ёмсум. Та во̄рыт а̄нум хащта̄лыг о̄лыс, таима̄гсыл тыпылтахтуӈкв пилсум. Ханищтан ня̄враманум та ма̄тэ ёмщакве̄г ва̄нэ щирыл э̄т хӯлнэ потыртахтын ма̄н ёхтумув юипа̄лт палатка тӯщтысӯв, а̄ращ па̄лтсӯв, но̄мтанум ущта ёмщакве̄г е̄мтсыт. Тох ты ам о̄выл щёс ханищтан ня̄враманум ёт во̄рын ялсум». Сӯкыръя па̄вылт ня̄врамыт ханищтан ос интернат колыг 1974 та̄лт ва̄т са̄грапнал э̄тпост пантвесы̄г. Ня̄врамыт пуссын Саранпа̄вылн ханищтахтуӈкв тотве̄сыт. Саранпа̄вылт йильпи интернат ос ханищтахтын кол ӯнттувесы̄т. Та порат а̄гирищиг о̄лнэ нэ̄ Наталья Васильевна Албина потыртан номтанэ ловиньтэлы̄н: «Ханищтахтын колув лапто̄варттан пора ам ёмащакв номилум. Та порат ам хӯрмит классыт ханищтахтасум. Саранпа̄вылт ма̄н о̄луӈкв щар ат тахсӯв. Ма̄нти Сӯкыръя па̄выл щирыл ка̄ста̄л о̄лсӯв. Ам ханищтахын классум Ольга Васильевна Булыга ханищтастэ. Тав ёмас ханищтан нэ̄г о̄лыс. Ма̄н таве сака э̄руптаслӯв». Галина Николаевна ос тот ханищтахтас: «Ам тот о̄с ханищтахтасум. Ня̄врамыт ханищтахтын колн 1969 та̄лт майве̄сум. Та порат садик иӈ а̄тим о̄лыс, па̄выл ня̄врамыт пуссын нулевой классыт ханищтахтуӈкв о̄вылтахтасӯв. Ам ётум Я̄сунтныл, Хо̄сло̄хныл, Хурумпа̄вылныл ос са̄лыӈ колыӈ ня̄врамыт ханищтахтасыт. Аквъёт пуссын налыман нупыл акв ня̄врам о̄лыс. Ма̄нав ханищтахтын ма̄ныл ущты ёхтум нэ̄ Анастасия Григорьевна Сайнахова ханищтастэ. Тав Сӯкыръя па̄вылт самын патыс. Анастасия Григорьева ма̄н таве сака мӯстыслӯв. Ханищтахтын ма̄ныл а̄стынэ̄в юипа̄лт э̄типа̄лаг тав ма̄навн Сӯкыръя я̄ ва̄та сыпыт акванатыгласанэ. Аквъёт пуссын юртыӈыщ мовиньтым сып пуӈкыл ма̄нь сунсовыл тахсысӯв. Титыт классыт ма̄нав ханищтан нэ̄г Альбина Васильевна Попова о̄лыс. Альбина Васильевна ёт ва̄тихал иныгйӣв пил ос сӯйпил лӯптат атуӈкв во̄рын ялантасӯв. Акв щёс ма̄н Саранпа̄вылн, та порат иӈ йильпииг ӯнттым ханищтахтын колн, экскурсиян тотыглавесӯв. То̄нт тав ма̄навн яныг ханищтахтын колыг сусхатас. Хотьютын ва̄ве, хумус ма̄н тав ляльтэ яныг самыл ос па̄лыграгатан сӯпасыл суссӯв». Сӯкыръя па̄вылт 2002 та̄лт йильпи ханищтан кол пӯсвес. Яныг кирпащиӈ кол па̄выл алыпал е̄рет ӯнттувес. 2003 та̄л па̄сныл ханищтахтын кол кӯщаиг Тамара Савельевна Ванюта паттувес. Ня̄врамыт ханищтым Евгения Андреевна Гриценко рӯпиты. Галина Николаевна Ларионова те̄тум потре ма̄ньщи ла̄тӈыл Александр Вьюткин хансыстэ.

1108 2015. 09. 25. Светлана РОМБАНДЕЕВА

Лельхов колта̄гыл урыл потыр Ха̄льӯс район Восыӈтӯр па̄вылт ам Вера Даниловна Лельхова колн щалтсасум. Тав колта̄глэ урыл Александр Вьюткин «Лӯима̄ сэ̄рипос» газетат хансыглас (2012 та̄л, №31). Юн о̄йкатэ о̄лыс, Алексей Петрович, ма̄нь а̄гитэ̄н Алёна ос апыгрище̄н. Ма̄н мощ ӯнлахо̄лсув, потрамасув. Вера Даниловна оматэ ма̄ньщи нэ̄ о̄лыс, а̄тятэ ханты хум. На̄н ань э̄лаль тав потре ловиньтэлы̄н. –Ам Новинск па̄вылт я̄ӈк на̄тнэ э̄тпос 10 хо̄талэ̄т 1958 та̄лт самын патсум. А̄ги о̄парищ намум Анимова. А̄тям Данил Иванович Анимов о̄лыс. Омам Полина Ильинична, а̄ги о̄парищ наме Ромбандеева, Хо̄сло̄х па̄вылныл о̄лыс. А̄тям ёт акванхо̄нтхатаме̄н юипа̄лт, ты ма̄т акваг та о̄лмыгтас. Тэ̄н тыт о̄лум совхозт рӯпитасы̄г. А̄тям хӯл алыщлас, во̄раяс. Ма̄н нила ня̄врам о̄лсув. Ам ань амттем хультсум, хӯрманум пуссын ма̄нь порат а̄тимыг е̄мтсыт. Школат тыт ханищтахтасум. О̄йкам ханты хум, Пашторы па̄вылт самын патыс, тот яныгмас. Акваг во̄раяс, хӯл алыщлас. Катерт капитаныг са̄в та̄л рӯпитас. Хӯрум та̄л ювле хультум порат тав инсульт а̄гмыл е̄мтыс, та юипа̄лт а̄гмыӈмосыӈ хо̄тпа пенсиян та паттувес. Нягань ӯс пӯльницат хоса хуяс, ё̄мыгтаӈкве ат ве̄рмыс. Юв ёхтыс, ё̄мыгтаӈкве патыс, тыт ань кон лылые̄пе сыстам. То̄ванакт машинал яласы. Хӯрум ня̄врам о̄ньщиме̄н – Полина, Алёна ос Витя. Акв а̄гиме̄н Ханты-Мансийск ӯст о̄лы, ма̄нь леккарыг рӯпиты. Китыт а̄гиме̄н Алёнамен Ягрим па̄вылт о̄лы, а̄ги о̄ньщи. Витяме̄н ос Ха̄льӯст о̄лы. Ам ань о̄с пенсият о̄лэ̄гум. – Вера Даниловна, ня̄враманын ма̄ньщи ла̄тӈыл потыртэ̄гыт? – А̄ти, ат потыртэ̄гыт. Апыгрищме̄н аквкит ла̄тыӈ ва̄г, та ля̄галы: «Анана! Миныме̄н». Хунь рӯт нэ̄м Анна Дементьевна Канева ёт акванхо̄нтхатыме̄н, тай ме̄нти ла̄тӈуме̄нтыл мощ потыртыме̄н. Ма̄нь порат ам ма̄ньщи мо̄йтыт ат иӈ хӯлыгласум, акваг интернатыт о̄лсув. Ма̄н, а̄гирищит, интернатыт сакныл акваг матыр хартсӯв – пальсакыт, турло̄псыт, яныгхо̄тпатын мӯйлупта̄лсанув. Аквматнакт ос омам супе щирыл суп йинсум, ю̄нтсум. Ань ты о̄лте̄мт нэ̄матыр ат ю̄нтэ̄гум, хотты хо̄тпан ма̄ньщи суп ос халат ю̄нтылтаӈкве таӈхе̄гум. Тувыл ос Вера Даниловна о̄йкатэ Алексей Петрович потыртас: – Ам Па̄шторы па̄вылт 1960 та̄лт самын патсум, тот яныгмасум. Па̄влувт ханты, ма̄ньщи ос рущ ма̄хум о̄лсыт. О̄выл классытыт ханищтахтан школа рӯпитас. Омам наме Акулина Васильевна, 1923 та̄лт са̄мын патыс. А̄тям Пётр Ефимович Лельхов, 1927 та̄лт самын патыс. Ма̄н ат ягпыг ос акв увщи о̄лсув. Акв каӈкум Ха̄льӯст, мо̄т каӈкум Пашторы па̄вылт, увщим Белоярский ӯст о̄лэ̄гыт. Школа а̄стламум юипа̄лт Ханты-Мансийск ос Тобольск ӯсыгт катерыл яласаӈкве ханищтахтасум. Тув палыт катерыл яласасум, тэ̄лы ос на̄й минэ станцият рӯпитасум. Э̄квам ёт Ха̄льӯст акванхо̄нтхатсуме̄н, то̄нт совхоз ущ ӯнттуӈкве патвес. Татем ёмас совхоз о̄лыс, нё̄выль, щаквит, мисвой ос мо̄т тэ̄нут тот пуссын о̄лыс, ва̄рыглавес. Та порат рӯпата та̄л нэ̄мхотьют ат о̄лыс, та̄лэтуве пуссын рӯпитасыт. Ань ма̄хум па̄выл яныт порс атым ё̄ме̄гыт, рӯпата а̄тим. Ам ве̄рмынэм порат акваг во̄раяӈкве ман хӯл алыщлаӈкве ялантасум. Хӯл, ва̄с та маныр пуссын о̄щсув. Ань хӯлув мощщамас, тувыл алыщлаӈкве торыӈ о̄с ат та̄ртаве̄в. Э̄лнаӈ ме̄н мис о̄щсуме̄н, туи пум ва̄рсув. Ань туп лувуме̄н хультыс. Вера Даниловна ос Алексей Петрович хо̄тпа нупыл сымыӈ нэ̄гхумыг. Ты та̄л во̄ртур э̄тпос 30 хо̄талэ̄т Алексей Петрович 55 та̄лэ то̄влыс. Таве̄н ма̄н са̄в ёмас, сымыӈ ла̄тыӈ ке̄тэ̄в. Ты я̄тил хо̄тпагув ня̄враманэ̄н ёт пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт!

1108 2015. 09. 25. Светлана РОМБАНДЕЕВА

Па̄ссат, щулкиныт ос мо̄т пормасыт Туи порат Архангельск ӯст Гостиный двор колт «Молодые дарования» нампа выставка манос конкурс рӯпитас. Ма̄щтыр ма̄хум тыг 40 ӯсытныл ман округытныл та̄нти ка̄тыл ва̄рум пормасаныл ке̄тыгласаныл – 400 са̄вит са̄всыр маснут, о̄щнут, ёнгынут. Москва, Тула, Владимир, Ханты-Мансийск, Набережные Челны, Рязань, Липецк, Киров, Перьм, Иваново, Сергиев Посад ос мо̄т ма̄ныл тотыглаве̄сыт. 309 ма̄щтыр ма̄хманув халт Ханты-Мансийск ӯст Центр ремёсел колт рӯпитан нила хо̄тпа пормасаныл тыг ке̄тыгласаныл. Кӯщаиг тот Ольга Бубновене тав о̄лы. Китгаге «Народный костюм» тэ̄ла палт но̄хпатсы̄г. Екатерина Смирнова хӯрум рущ суп ю̄нтыс. Тамле супыт ма̄хум Лӯи ма̄т XIX-XX нот порат о̄щсыт. Ольга Бубновене тох потыртас: «Округувт ма̄н ань янгыщ соссаӈ ма̄хум маснут, пормас ва̄ре̄в, пӯмщалэ̄в, ос рущ ма̄хум пе̄с йис маснут урыл сака мат ат номсэ̄в. Таима̄гыс Екатерина ва̄рум рӯпататэ сака янытлылӯв». Китыт нэ̄ Лилия Янкина ос соссаӈ ма̄хум щулкиныт сагыс. Ты маснутыт тав ань XVIII-XIX нотыт порат финский учёный хо̄тпат по̄слыглым хурит щирыл сагиянэ. То̄ва хорамыт рущ ма̄хум хораманыл хурипат. Туристытын тамле щулкиныт сака пӯмщалавет. Ольга Дмитриевна ла̄выс: «На̄н па̄ссат ма̄щтырлэ̄гын, ма̄н ос щулкиныт саге̄в. На̄н ӯсын ёхталаӈкве ам хосат та̄гыл номсысум, ка̄салаӈкве, хумус на̄н о̄лэ̄гын, ма̄ныр ма̄щтырлэ̄гын, хораманын манхурипат. Ам ань тыт са̄в нэ̄пак ёвтсум, юн ловиньтаӈкве патэ̄гум». Архангельский областьт о̄лнэ ма̄хум та̄нти ва̄рум пормасаныл о̄с янытлаве̄сыт. «Народная игрушка», «К юбилею Великой Победы» ос «Медведь в произведениях мастеров и художников народных промыслов» тэ̄ла палт «Беломорские узоры» ос «Декор Севера» колыгт рӯпитан ма̄хум но̄хпатсыт. Выставка хунь ущ рӯпитаӈкве о̄вылтахтас, «Беломорские узоры» колт рӯпитан ма̄хум ма̄стеркласс ва̄рыгласыт – йӣвныл ӯйрищ ма̄щтырласыт. Касай, сартнэте̄р, па̄рт та маныр ёт пуссын о̄щсыт. Ӯйрищ тарыг манос ха̄пка йӣвныл ва̄раве. Ма̄щтыр нэ̄ Татьяна Небоженко йӣв татем молях ёрги, ка̄таге ка̄ркамыщ рӯпитэ̄г. Тувыл ва̄рум утэ ма̄хумн суссылтастэ, со̄ль, ӯйрищиг та тэ̄лыс. Татьяна ла̄выс: «Акв хо̄тал сыс 6-7 тамле ӯйрищ ва̄руӈкве ро̄ви. Ам ма̄ниг о̄лмум порат, номилум, тамле ӯйрищит ма̄хум ка̄сыӈ колт о̄щсыт, та̄наныл ма̄щтырлаӈкве хум хо̄тпат пуссын ха̄ссыт. Ты нэ̄ по̄хат мо̄т ма̄щтыр хум ӯнлыс, тав ос ка̄тыл ва̄рум луве о̄льпыл хорамтастэ. Ты выставка манос конкурс ма̄н 25 та̄л сыс ты ва̄рилӯв. Таве нас хунь суссылтылӯв, ма̄н ань таи ла̄вуӈкве таӈхе̄в: Россиявт са̄в мир о̄лы, ка̄сыӈ такви культура о̄ньщи, пе̄с йис пӯмыщ ва̄рмалит о̄ньщи. Та̄наныл э̄лаль тотуӈкве, мирн суссылтаӈкве ат те патыянӯв, хот та ёрувлахтэ̄гыт. Ма̄ньлат ма̄хум вос пӯмщалахтэ̄гыт, вос ханищтахтэ̄гыт, ты рӯпата ва̄руӈкве вос ка̄сащанувыт. Мо̄т ма̄т о̄лнэ ма̄хум рӯпатаныл э̄рыӈ ёмащакв ойтаве, ма̄н рӯпата олнув тай но̄х ат лапи. Таима̄гыс ма̄ньлат хо̄тпат ма̄н палтув йиӈкве ат таӈхе̄гыт. Ты урыл ам кӯщаянув ёт потыртасум, нё̄туӈкве ла̄ввесӯв. Ам номсэ̄гум, ма̄н нё̄таве̄в, ты э̄рнэ тэ̄ланув о̄с са̄в та̄л о̄луӈкве патэ̄гыт. Мария Гаврилова потре ма̄ньщи ла̄тӈыг С. Хозумован толмащлавес.

1108 2015. 09. 25. Тамара МЕРОВА

Йильпи нэ̄пакыт та̄ратаве̄сыт А̄с-угорский институтт рӯпитан ма̄ньщи нэ̄т ща̄нь ла̄тӈув ханищтан ос э̄лаль тотнэ ма̄гыс са̄в рӯпитэ̄гыт. Та̄н ань са̄всыр пӯмащ потрыт, мо̄йтыт акванатыгла̄лсыт, та̄наныл мӯсхалыг ханищтасаныл ос ты та̄л э̄рнэ нэ̄пакыт та̄ратасыт. Татьяна Дмитриевна Слинкина венгр учёный хум Бернат Мункачи ма̄ньщи ма̄хумныл хансыглам пе̄с э̄ргыт хо̄нтыс ос та̄наныл «Старинные песни народа манси в записях Б. Мункачи» намаим нэ̄пак ва̄рыс. Людмила Николаевна Панченко кит пӯмащ нэ̄пакы̄г щё̄питас, тыи «Краеведение. Дидактический материал» ос «Фольклорные праздники в школе». Светлана Алексеевна Герасимова школат китыт классыт ханищтахтан ня̄врамыт ма̄гыс ма̄ньщи тестло̄псыт щё̄питас. Тувыл Мария Владимировна Кумаева ёмас рӯпата ва̄рыс, ты о̄вылтыт ам таве мощ китыгласлум. Э̄лаль тав потре ловиньтэлы̄н. – Ма̄н ты институтт ань са̄всыр научный рӯпатат ва̄ре̄в. Ма̄ньщи ла̄тӈыл хансым потрыт ёлхансыянӯв ос тувыл э̄рнэ нэ̄пакыт та̄ратэ̄в. Лӯтпа э̄тпост акв йильпи нэ̄пакум та̄ратавес, рущ щирыл тав «Сказки, песни, загадки народа манси (фольклорный сборник)» намаим о̄лы. Ам лов арыгке̄м та̄л ма̄ньщи мо̄йтыт, потрыт, э̄ргыт, а̄мщит ёлхансыгласум. Ань тахольт та̄н нэ̄пакыг та е̄мтсыт. Тот яныгпа̄ла хо̄тпаныл акванатум потрыт наманыл тув хассанум, хурияныл тув ва̄рсанум. Тувыл хо̄т самын патсыт, хоты па̄вылт о̄лэ̄гыт, маныр ще̄мья о̄ньще̄гыт – пуссын тув хӯлтсанум. – Наӈ ань са̄всыр па̄влыӈ ма̄т яласэ̄гын, ла̄ве̄н, са̄в хо̄тпа ма̄ньщи ла̄тӈыл потыртэ̄гыт? – Ам ты потрыт, мо̄йтыт, э̄ргыт яныгпа̄лаг о̄лнэ ма̄хумныл хансыгла̄лсанум, та̄н пуссын ща̄нь ла̄тӈыл ёмщакв потыртэ̄гыт. Тыи Ке̄расколыӈъя па̄вылт о̄лнэ ма̄хмыт, тувыл Хулюмсӯнтыт о̄лнэ ма̄ньщит. То̄ват ань а̄тимыг е̄мтсыт, потраныл ань туп ты нэ̄пакыт хультэ̄гыт тах. Мо̄т кит нэ̄пакыг ам 5 классыт ханищтахтан ня̄врамыт ма̄гыс щё̄питасагум, тыи «Мансийский язык. 5 класс. Дидактический материал» ос «Мансийский язык. 5 класс. Проверочные работы». Тэ̄натэ̄н а̄нумн Валентина Николаевна Соловар ва̄руӈкве нё̄тыс, таве̄н пӯмащипа ла̄ве̄гум. Тав о̄влэ̄т такви акв тамле ханты ла̄тӈыл хансым нэ̄пакыг щё̄питас ос та̄ратас. Ты нэ̄пакыт ишколат ханищтахтын а̄гирищитнпыгрищитн э̄рмыглэ̄гыт тах. Соссаӈ ма̄хум ла̄тӈыг та̄н вос пӯмщалэ̄гыт, вос ханищтэ̄гыт. – Йильпииг та̄ратан ма̄ньщи потрыт манхурип шрифтыл, графикал хансым о̄лэ̄гыт, ловиньтан порат та̄н ёмщакв торгамтавет ман а̄ти? – Ма̄н потрыт пуссын PT Serif шрифт щирыл хассанӯв, ла̄тӈыт ёмщакв торгамтан ма̄гыс хоса суит ман ва̄ти суит пуссын уральтым о̄щсанӯв. Тувыл лӯсум ма̄ньщиянув та̄нки хольт ла̄тӈаныл ля̄галыяныл, ам та̄н щиранылт потраныл хультуптасанум. Ты коныпал нэ̄пакыт ёлхансым потрыт ам турсуяныл диктофонын хансым о̄ньщиянум. Та̄наныл пуссын институтувт о̄лнэ архивын мисанум. Ве̄к ётыл диск ва̄ре̄в тах ос потрыт ма̄хумн хӯнтамлаӈкве ве̄рмавет. Ты мо̄т я̄нас рӯпата. – Ос ты нэ̄пакыт ма̄хманув хо̄т выганыл, та̄н хо̄т тыналавет ман а̄ти? – Ма̄н ань нэ̄пакыт школан, библиотекан мыганув тах. Ос ты э̄лыпа̄лт тот рӯпитан хо̄тпат ма̄н институтувн пищма вос ке̄тэ̄гыт ос манах нэ̄пак э̄ри вос во̄ве̄гыт. Таи лю̄ль, та̄н мощща (250 са̄вит) тиражил туп та̄ратаве̄сыт. Ты рӯпатав ма̄н гоззаказ щирыл ва̄рилӯв. Ман тамле рӯпата ва̄руӈкве округ образование ос ма̄ньлат ма̄хум тэ̄лат департамент па̄лыл ла̄ввесӯв ос нэ̄пак та̄ратан ма̄гыс олныл майлувесӯв. Ань ты нэ̄пакум ва̄рнэ порат ам ётум рӯпитан хо̄тпатын пӯмащипа ла̄тыӈ ке̄тэ̄гум. Та̄н а̄нумн пе̄с потрыт, мо̄йтыт тахольт мо̄йтыгласыт. Тувыл ка̄тыл по̄слын хо̄тпа хури по̄слыс ос э̄рнэ таблицат тув ва̄рыс. – Мария Владимировна, ма̄н наӈын ос яныг пӯмащипа ла̄ве̄в. Ма̄нки ща̄нь ла̄тыӈке̄в э̄лаль тотнэн ма̄гыс номтыӈыщ э̄лаль иӈ са̄в рӯпитэ̄н.

1108 2015. 09. 25. Светлана РОМБАНДЕЕВА

Восыӈтӯр па̄выл школа Ха̄льӯс район Восыӈтӯр па̄вылн ялмум порат школан щалтсасум. Кӯщаиг тот Татьяна Валерьевна Кондратьева рӯпиты. Ам таве школа урыл китыгласлум, на̄н ань э̄лаль тав потре ловиньтэлы̄н. – Школавт нёлса̄т ня̄врам ханищтахты. Ань то̄ва колта̄глыт савалап ня̄врамыт та̄нти палтаныл выгыт, таима̄гыс ты са̄вит ня̄врам, та̄н та̄ланыл тай мощща о̄лнув. Са̄всыр мир ня̄врамыт ханищтахтэ̄гыт – ма̄ньщит, хантыт, рущит, хатанит ос мо̄т мирытныл о̄лнэ а̄гирищитпыгрищит. Ханищтан хо̄тпанув пуссын о̄лэ̄гыт, ёмащакв рӯпитэ̄гыт. Ам ты школат рӯпитанэм атыт та̄лыг ты е̄мтыс. Хоталь а̄ти э̄рнэ матыр пуссын о̄лы, ищхӣпыӈ ут (ноутбук) ка̄сыӈ ня̄врамын ёвтсӯв. Колнакытт кина суснэ экраныт тагатасӯв. Нэ̄пак о̄щнэ колнакн ловиньтан нэ̄пак са̄в ёвтсӯв, ты ма̄гыс олн акваг та̄стэ̄в. Ма̄ньщи ла̄тыӈ ханищтаӈкве ка̄сащан ня̄врамыт Роза Семёновна Новьюхован ханищтавет. Соссаӈ хо̄тпат та̄нти ла̄тӈаныл ат те ва̄ганыл, ты ёмас хунь. Ам а̄гим ищхӣпыӈ ут хосыт Германият о̄лнэ хум ёт потрама̄лы, таитэ ла̄ви: «На̄н округынт ма̄ньщит ос хантыт о̄лэ̄гыт, ам та̄н ла̄тӈаныл ханищтаӈкве сака таӈхе̄гум кос. Ос хотьют ёт потыртаӈкве, ат ва̄глум. Таяныт ёмас ва̄рен, наӈ а̄нумн хотты ла̄тӈыт хансэ̄н, ам сакати ты щирыл мощ ханищтэ̄гум». Э̄лы хо̄н ма̄ хо̄тпат тох та таӈхе̄гыт ханищтаӈкве мо̄т мирыт ла̄тыӈ. Ос тыт о̄лнэ соссаӈ ма̄хум та̄нти ла̄тӈаныл нупыл тэ̄ланыл а̄ти, рущ ла̄тӈыл та потыртэ̄гыт. Тувыл та ла̄ве̄гыт, ань ня̄враманыл ща̄нь ла̄тыӈ ханищтаӈкве ат таӈхе̄гыт. Хумус та̄н патэ̄гыт ханищтаӈкве, юн нэ̄мхотьют ат потырты, ос воссыг хо̄т таве хӯлыяныл. Ма̄н школавт ханищтахтан ня̄врамыт пуссын юртыӈыщ олэ̄гыт, халанылт ат та ла̄ве̄гыт, наӈ ты мирныл, та мирныл о̄лэ̄гын. Ма̄н ма̄гсылув ня̄врамыт пуссын аквхурипат, ка̄сыӈ ня̄врам э̄руптылӯв. Хотьют хоты мирныл о̄лы, ат уртхатэ̄в, акв ляльт ёмас номтыл сунсэ̄в. – Татьяна Валерьевна, наӈ хо̄т самын патсын? – Ам Ма̄рий Эл ма̄т самын патсум, тот яныгмасум. Хӯрум ня̄врам о̄ньще̄гум – акв а̄ги ос кит пыг, пыгагум юрт ня̄врамыг. Та̄н ань пуссын янгыт, школа а̄стласыт. Ам иӈ ма̄ниг о̄лмум порат омагума̄тягум хотталь щалтсы̄г. Ащо̄йкам ос ане̄квам ёт яныгмасум, тэ̄н сас намыӈсуиӈ хо̄тпаг о̄лсы̄г. Ащо̄йкам «Заслуженный учитель Марийской ССР», ветеран войны ос «Участник блокадного Ленинграда» намыт о̄ньщас. Ане̄квам Верховный Совет депутатыг рӯпитас. Ханищтахтамум порат тэ̄н а̄нумн акваг нё̄тсы̄г. Ма̄н пуссын марийский ла̄тыӈ ва̄глӯв, ня̄враманум о̄с потыртэ̄гыт. Татьяна Валерьевна хо̄тпа нупыл сымыӈ нэ̄. Потре ма̄гыс таве̄н ам пӯмащипа ла̄тыӈ ла̄всум. Колта̄гыл ма̄хманэ пуссын пуста̄гыл вос о̄лэ̄гыт, То̄рум ёт, О̄тыр ёт вос о̄лэ̄гыт.

1108 2015. 09. 25. Тамара МЕРОВА

Э̄ква 82 та̄лэ̄тыл о̄с янытлылӯв Наталья Ткачук, Ханты-Мансийскат А̄с-угорский институтт рӯпитан нэ̄, мо̄лал та̄гыл ма̄н газетавн соссаӈ хо̄тпат урыл потрыт ке̄ты. Тав хо̄та̄ти ма̄нь па̄влыӈ ма̄т яласы ос хантыт, ма̄ньщит, ё̄рн хо̄тпат статистиканэ̄пакн хансыянэ ос о̄лупсаныл о̄вылтыт пӯмщалахты. Наталья ос Юлия Валерьевна Исламова, институтт аквъёт рӯпитан нэ̄, Октябрьский район Большой Атлым па̄вылн ялме̄н порат Анна Дмитриевна Глухова ёт ва̄йхатасы̄г. Юлия Исламова филологический наукат кандидат нам о̄ньщи. Тав па̄влыт, я̄т, тӯрыт пе̄с о̄лнэ наманыл ханты ла̄тӈыл та̄рапаттыянэ ос манрыг тох намтуве̄сыт, э̄лаль ханищтыянэ. Ань ты рӯпатат ла̄тӈыт хӯлтнэ ма̄гыс Анна Дмитриевна палт ке̄твесы̄г. О̄выл щёс тав колэн ёхтуме̄н порат э̄ква юн а̄тим о̄лыс. Колпо̄х о̄лнэ хо̄тпат ла̄всыт, тав э̄типа̄лаг туп юв ёхты тах. Э̄ква то̄ва хо̄талыт хӯл няслуӈкве яланты, тав хӯл алыщлан ма̄тэ̄ мус 5 ве̄рста ла̄глыл ё̄ми. Тувыл со̄ль, э̄типа̄лаг тэ̄н э̄ква ёт лё̄х хосыт ё̄мим ка̄саластэ̄н. Тав хӯлыӈ хӯрыг та̄гыл сыспалт тотыс ос ка̄тэт спининг о̄ньщис. Пащалахтаманыл юипа̄лт э̄ква мӯй хо̄тпаг такви палтэ во̄всаге. Такви уре̄тыл Анна Дмитриевна таи потыртас, тав лӯпта э̄тпос атыт щислат 1933 та̄лт Касум ще̄мьят самын патыс. Тав са̄лы янмалтан ще̄мьянтыл о̄лы, а̄ще Дмитрий Григорьевич Ерныхов ос ща̄не Анастасия Алексеевна Обатина. Та̄н Батлымка я̄ хосыт о̄лсыт. А̄ще совхоз са̄лыт янмалтан коныпал такви 30 са̄вит са̄лы о̄ньщис. Тувыл тав хо̄нтлуӈкве тотыглавес ос 1943 та̄лт ювле ёхтыс. Та порат та̄н та̄рвит о̄лупсал о̄лсыт, яныгмасыт. Оматэ хум ва̄рнэ та̄рвит рӯпатат са̄в рӯпитас, во̄раяӈкве такви ялантас, во̄ртолнут таве̄н о̄с ликмыглас. Тав во̄раяме хосыт кастыле ня̄врамыт тэ̄тал ат рагатасыт. Анна Дмитриевна ос ма̄ньта̄гыл во̄р яктым са̄в рӯпитас. То̄нт Большой Атлым по̄хат, 30 ве̄рстан, ма̄хум лесозаготовкан тотыглаве̄сыт. Ань Анна Дмитриевна па̄вылт такви колэ̄т о̄лы. Кол по̄хатэ̄т тэ̄пкант картё̄пка такви янмалты. Па̄ля ос коза о̄ньщи. Туи пил ва̄туӈкве во̄рн ха̄йтталы. Матыра̄ти колсори рӯпата акваг ва̄ри. Галина Григорьевна Мамарова, колпо̄х о̄лнэ нэ̄, матумпа̄ла э̄ква урыл ла̄выс: «Аннэ ань тыг мус во̄раяӈкве яланты. Писалил а̄ӈха патамты, туи ман тэ̄лы такви хӯл алыщлы. Во̄рто̄лнут манах щёс ва̄щинтас. Ма̄н па̄влувт Анна Дмитриевна сака янытлаве, тав ёмас э̄лумхо̄лас». Э̄ква па̄влэ̄т ӯйхул пусмалтан яныг хо̄тпаг ла̄ваве. Ӯйхулыт хотум е̄мтнэ̄ныл порат ма̄хум тав палтэ ёхтэ̄гыт ос таве нё̄туӈкве во̄вияныл. Анна Дмитриевна ат ня̄врам янмалтас. Ань апганэ о̄с яныгмасыт, школа а̄стласыт, та̄нки ще̄мьяӈыг е̄мтсыт. Тюмень ӯст о̄лэ̄гыт. Ань институтт рӯпитан нэ̄г тав ётэ акванхо̄нтхатам хо̄талт Анна Дмитриевна 82 та̄лэ то̄влум. Тэ̄н таве̄н иӈ са̄в та̄л пуста̄гыл о̄луӈкве ла̄всы̄г, сымыӈ хо̄тпаг акваг вос о̄лы. Ма̄н Анна Дмитриевна о̄с янытлылӯв, пус ка̄т, пус ла̄гыл таве̄н, На̄й-О̄тыранэ̄н вос ӯргалаве. Н. Ткачук ке̄тум потре ма̄ньщи ла̄тӈыг Т. хатанева толмащластэ.

1108 2015. 09. 25. Светлана РОМБАНДЕЕВА

Ма̄щтырыг о̄лнэ ма̄ньлат хо̄тпат 1990 та̄л па̄сыл «Народные художественные промыслы России» Ассоциация ос академик К. В. Фролов «Знание» нампа мирн нё̄тнэ мирхал фонд ма̄щтыр ма̄ньлат хо̄тпат кинсэ̄г, та̄рапаттэ̄г. 2008 та̄лныл ты колыгн Министерство образовании России нё̄туӈкве патыс. Та̄н ань ма̄щтырлаӈкве ха̄снэ ма̄ньлат ма̄хум ма̄гсыл «Молодые дарования» конкурс ва̄рыглэ̄гыт. Ювле хультум та̄лыт сыс 21 тамле конкурс о̄лыс. Тот Россия янытыл 50 са̄всыр ма̄ныл 500 арыг ма̄ньлат ма̄щтыр хо̄тпат ос ка̄тыл хурит по̄слын ма̄хум та̄нти рӯпатаныл суссылтасыт. Конкурс оигпаме юипа̄лт но̄хпатум а̄гипыгыт олныл ос мӯйлупсал майлуве̄сыт. Культура – ты сака э̄рнэ тэ̄ла. Таима̄гыс ань «Народные художественные промыслы России» Ассоциация Президентувн о̄с нё̄таве. Тав ма̄ньлат хо̄тпатын нё̄тмил ва̄рнэ̄тэ ос са̄всыр э̄рнэ проектыт щё̄питанэ̄тэ ма̄гыс Россия Президентын Грантолныл майвес. Ань та нё̄тмил олныт янгыщ ты ӯсыт нупыл ке̄тве̄сыт, тот са̄в ма̄ньлат ма̄хум рӯпиты: Великий Новгород, Тула, Саранск, Казань, Киров, Нижний Новгород, Владимир. Ма̄ньлат ма̄хманув ёт акваг потыртаӈкве э̄ри, та̄н ань вос ва̄ганыл, ма̄н о̄лнэ ма̄вт са̄в мирыт о̄лэ̄гыт, ка̄сыӈ о̄лупсатэ пӯмыщ, кос хоты тэ̄ла палт матыр ма̄щтырлаӈкве ро̄ви, рӯпата хо̄нтуӈкве ка̄сыӈ ве̄рми. 2012 та̄лт ма̄щтыр пыг Илья Кошкаров конкурс о̄лум порат но̄хпатыс, 60 со̄тыра солко̄вил майвес. Тав такви ка̄тыл ва̄рум соссаӈ ма̄хум о̄щнэ а̄ныса̄ныт, ӯмпит суссылтас. Илья Ханты-Мансийск ӯст Центр ремёсел колт рӯпиты. 2013 та̄лт Элеонора Митрофанова «Народный костюм» тэ̄ла палт рӯпататэ янытлавес, стипендия олныл майвес. Тав ханты нэ̄ хо̄тпа пальсакыт, турло̄псыт ос мо̄т са̄всыр хорамыӈ утыт суссылтас. Пе̄с порат нэ̄ хо̄тпат нё̄тылтахтан пормасаныл хумус ва̄рыгласаныл, манарыл хорамта̄лсаныл, тав ань та ва̄рмалит пуссын та̄рапаттыянэ. Элеонора ка̄сыӈ пормас ёмащакв ханищтытэ, а̄рталытэ, тувыл ущ ва̄ритэ. Урай ӯст «Школамастерская народных промыслов» колт рӯпитан ма̄ньлат нэ̄ Екатерина Смирнова рущ ма̄хум маснут ю̄нты. Пе̄с порат Лӯи ма̄т ма̄хум манхурип маснутыл о̄лсыт, тав та тэ̄ла ханищты, тувыл супыт ман кощтюмпа̄рат ю̄нты. Конкурсын тав XIX нот пора хӯрум суп щё̄питас: хум хо̄тпа, нэ̄ хо̄тпа ос ня̄врам супыт. Лилия Янкина, Лянтор ӯст «Лянторский центр прикладного творчества и ремёсел» колт художникконструкторыг рӯпитан нэ̄, сэ̄тапыл сагнэ пе̄с йис тэ̄ла ханищты. Ма̄ньщит, хантыт, сараныт, рущит, сербыт, болгарыт ос мо̄т мирыт сэ̄тапыл хумус сагсыт, хораманыл манхурипат о̄лсыт, таит пуссын та̄рапаттыянэ. Ма̄ньлат а̄гирищитпыгрищит ёт тав са̄в рӯпиты, пуссын аквъёт та̄н са̄всыр па̄ссат, щулкиныт ос мо̄т маснутпормас саге̄гыт. Конкурсытыт Лилия ва̄рнэ рӯпататэ са̄в щёс янытла̄лвес. Нижневартовский район Аган па̄вылт о̄лнэ ма̄щтыр хум Анатолий Пельментиков «Югра – 2014» соссаӈ ма̄хум мирхал фестиваляныл о̄лме порат но̄хпатыс. Тав «Художественная резьба по дереву» конкурсыт ка̄тыл ва̄рум а̄ныса̄нанэ суссылтасанэ. Анатолий па̄влэ̄т «Межпоселенческий центр национальных промыслов» колт ма̄щтыр хо̄тпаг рӯпиты. Ань ты ла̄вылтам маснутыт ос пормасыт пуссын «Народные художественные промыслы России» Ассоциация колт Москва ӯст мирн суссылтаӈкве патавет. Тувыл э̄лаль Архангельск ӯс краеведческий музейн ос мо̄т ӯсытын тотыглавет. О. Д. Бубновене ос В. В. Колосова потре̄н ма̄ньщи ла̄тӈыг С. Хозумован толмащлавес.

1108 2015. 09. 25. Тамара МЕРОВА

Потрыт ос стихыт ща̄нь ла̄тӈыл хансэ̄н Ты э̄тпос нилыт щислат Венгрият Бадачоньтомай ӯст финноугор ла̄тӈытыл потрыт, стихыт хаснэ ма̄хум XIII конгрессаныл о̄лыс. Тув Финляндия, Эстония хо̄н ма̄ныл, Россият финноугор мирныл о̄лнэ писателит, поэтыт акванатхатыгласыт. Тувыл та̄н хансым литературат о̄вылтыт мо̄т хо̄н ма̄т о̄лнэ хо̄тпат о̄с пӯмщалахтэ̄гыт. Ма̄хум Австрияныл, Германияныл, Францияныл, Чехияныл, Румынияныл ос Украинаныл тув о̄с ёхталасыт. Ань конгрессыт акванатхата̄лум ма̄хум «Драматургия» о̄вылтыт потыртасыт. Мӯй хо̄тпат ёт Ева Рубовски, венгрыт палт Мирхал финноугорский ма̄хум тэ̄ланыл э̄лаль тотнэ кӯщай нэ̄ ос Янош Пустаи, потрыт ос стихыт хаснэ ма̄хум халт Президентыг пе̄риим хум пащалахтасы̄г. Тэ̄н ла̄всы̄г, тамле акванатхатнэ ва̄рмаль ма̄хманув халт сака э̄ри. Та щирыл хо̄та̄ти ла̄кква ма̄т о̄лнэ финноугор рӯтыт акванхо̄нтхатыглахтэ̄гыт, та̄нки халанылт ва̄йхатэ̄гыт ос ма̄н, венгрыт, о̄вылтытув, матыра̄ти о̄с ва̄ӈкве патэ̄гыт. Мо̄щ ётылнув конгрессыт мӯйлын хо̄тпат ёт пащалахтуӈкве Ласло Л. Шимон, Венгрия госсекретарь кӯщай хум ёхталас. Тав стихыт хаснэ хо̄тпа, таи ма̄гыс тав рӯт ма̄хманув о̄лнэ ма̄н, конгрессыт о̄лыгламаныл порат о̄с яланта̄лыс. Ань ты кӯщай хум эстонский писатель Арво Валтон ма̄гылт о̄щнэ рыцарский нампа яныг намыӈ по̄сыл мӯйлуптастэ. Арво Валтон финноугрыт акванюрщхатан ма̄гыс са̄в рӯпата ва̄рыс, тувыл нэ̄пакыт хаснэ коныпал тав кинодраматургыг о̄лы, ос мо̄т ла̄тӈыл хансым са̄всыр потрыт, мо̄йтыт такви ща̄нь ла̄тӈе̄н толмащлыянэ. Пленарный заседаният Арво Валтон о̄выл ла̄тыӈ ва̄рыс. Тав финноугорский писателит хансум потранылт драма ва̄рмалит та̄рапаттыс. Ос акв ща̄гт ла̄тыӈ тотыс. Эстоният та̄н ма̄ньлат а̄гитпыгыт та̄нки ща̄нь ла̄тӈыл хансум потрыт, стихыт ма̄гыс «Фонд финноугорских литератур» олннё̄тмил мӯйлупса щё̄питасыт. Олннё̄тмил винэ ма̄гыс заявкало̄пс ке̄туӈкве э̄ри, ос щар ёмас потрыт нэ̄пакыг та̄ратавет. Ари-Пекка Лахти, Финляндият театрыт рӯпитан хум, манырсырман драма тэ̄лат ма̄хум сымн хо̄е̄гыт, таит пӯмщалыянэ ос та накыт спектаклиг ва̄риянэ. Ань тав Еремей Айпин «Ханты, или Звезда утренней зари» потре щирыл ма̄хумн суссылтам спектакле урыл потыртас. Еремей Данилович ётыл о̄с ла̄выс, хантыт ул ӯй йӣкв ёнгынэ̄ныл порат драма накын о̄выл щёс суссылта̄лсаныл. То̄нт ма̄хум матыр тэ̄лат ма̄гыс тыстысытвощлысыт, та̄нанылн пӯмащ о̄лыс ос тыгыл э̄лаль тамле ёнгилыт ва̄руӈкве патве̄сыт. Мо̄т маныл ёхталам писателит, поэтыт о̄с та̄нки хансум нэ̄паканыл, театрыт суссылтан спектакляныл урыл потыртасыт. Тувыл Янош Пустаи ос Балаж Фюзфа мо̄лты та̄л о̄вылтам «12 щар ёмас стихыт финноугорский литературат» проектэн урыл ла̄тыӈ тотсы̄г. Ты проект щирыл рӯт ма̄хманув та̄нки ща̄нь ла̄тӈанылн стихыт толмащласаныл ос нэ̄пакыг та̄ратаве̄сыт. Ма̄ньщи ла̄тӈыл хансым нэ̄пак Светлана Динисламова щё̄питастэ. Ты рӯпата урыл ма̄н тах я̄нас потыр хансэ̄в. Хӯрум хо̄тал тот о̄лнэв сыс са̄всыр пӯмащ ва̄рмалит о̄лыгласыт, са̄в номтыӈ хо̄тпат ёт ва̄йхатасӯв. Ты ма̄хум номтыл пинве̄сыт, та̄н ща̄нь ла̄тӈыл са̄внув литература вос та̄ратэ̄гыт. Венгр рӯт ма̄хманувн конгресс ва̄рнэ̄ныл ма̄гыс яныг пӯмащипа ла̄тыӈ ке̄тэ̄в. Ма̄н тот ёмас сымыӈ ма̄хум палт мӯйлысӯв, нэ̄мат та̄рвит тэ̄лан ат хо̄игласӯв. Мо̄тыт акв тамле конгресс Эстоният Тарту ӯст 2017 та̄лт во̄ртур э̄тпост тах е̄мты. Рӯтыг о̄лнэ ма̄хум ань историяныл та̄ра вос паттыяныл.

1108 2015. 09. 25. Тамара МЕРОВА

Акванхо̄нтхатыглаӈкве сака ёмас Венгрият Бадачоньтомай ӯст финноугорский писателит, поэтыт ёт ва̄йхатамув юипа̄лт, ам та̄наныл ты XIII конгресс урыл китыгласанум. Маныр та̄н ювле ла̄всыт, на̄н э̄лаль ловиньтэ̄н. Янош Пустаи, Венгрия, финноугор ма̄хум писателит халт кӯщай хум ла̄выс: – 1989 та̄лт Марий Эл ма̄т о̄вылтам ва̄рмалюв акваг э̄лаль вос о̄лы. Тыт рӯтыг о̄лнэ ма̄хманув та̄нки халанылт ва̄йхатэ̄гыт, юрщхатэ̄гыт. Тувыл культураныл ман ща̄нь ла̄тӈаныл урыл мо̄т ма̄хумн потыртэ̄гыт, та̄нки о̄с матыра̄ти ва̄ӈкве патэ̄гыт. Тамле акванатхатнэ тэ̄ла ма̄навн сака э̄ри. Ты та̄лт финноугор ма̄хманув янгыщ пуссын ёхталасыт. Туп саамыт ма̄н ётув а̄тимыт. Та̄н ла̄внэ̄ныл щирыл, са̄всыр ва̄рмалитын ялантаӈкве сака ат а̄лыме̄гыт, та̄н арктический ма̄т о̄лнэ ма̄хум ма̄гыс ва̄рнэ проектаныл щирыл са̄в рӯпитэ̄гыт. Ева Тулуз, Франция-Эстония, тав потрыт толмащлан нэ̄, ла̄выс: – Тыи ёмас акванатхатнэ нак о̄лыс. Са̄в ма̄ныл ёхталам финноугор ма̄хманув сымн э̄рнэ ва̄рмалит урыл сэ̄ръёрыг потыртасыт. Ка̄сыӈ мир такви палтэ матыр та̄рвит о̄ньщи, ос та̄н тэ̄ланыл ёмасыг е̄мтнэ̄ныл ма̄гыс маныр ва̄ре̄гыт, хумус воритотэ̄гыт, ты урыл писателит о̄с йильпи потрыт хансэ̄гыт. Акв э̄лумхо̄лас о̄лупсатэ̄т о̄лыглам наканэ мо̄т э̄лумхо̄лас наке щирыл тув ро̄выглаве. Та̄рвит порат хоты хо̄тпа хумус э̄лаль о̄лнэ нак кинсы, хота мус ё̄р о̄ньщи – ты ва̄рмалитын ма̄н ос та̄н ётаныл э̄лаль о̄луӈкве ханищтахтэ̄в. Ань финноугор ма̄хум ёт ва̄йхатым ма̄гыс, та̄н пе̄с та̄гыл о̄щнэ мӯтраӈ номтанылн ханищтахтым ам сака хотща̄гтым о̄лэ̄гум. А̄нумн ты конгресс сака мӯстыс, тыт посыӈ номтыл ос та̄нки хольт та̄ксарыг о̄лнэ мирыт акванатхатыгласыт. Та̄н са̄в мӯтраӈ номт хӯлтсыт, тувыл нас о̄лнэ э̄лумхо̄лас нупыл та̄н сымыӈыщ о̄с сунсэ̄гыт. Тамле хо̄тпат урыл та̄н пӯмыщ потрыт хансэ̄гыт. Янош Пустаи ос конгресс ва̄рнэ мо̄т ве̄нгр хо̄тпатн яныг пӯмащипа ла̄тыӈ ла̄вуӈкве таӈхе̄гум. Та̄н пуссын са̄в ёмас рӯпата ва̄рсыт, посыӈ номтыл о̄лнэ сымыӈ хо̄тпат. Арво Валтон, Эстония, прозаик ос кина ва̄рнэ ма̄гыс потрыт хаснэ мирн ва̄нэ о̄йка, потыртас: – Ма̄н, финноугорский делегацият, тамле конгрессын са̄внув ма̄ньлат хо̄тпат ёт акваг ёхтала̄лсӯв кос. Ты порат ма̄н Эстонияныл яныгпа̄лаг о̄лнэ хо̄тпат туп ёхтысӯв. Драматургия щирыл о̄лупсат матыра̄ти са̄в ва̄нэ хо̄тпат потрыт хансуӈкве ха̄сэ̄гыт. Ма̄ньлат нэ̄тхумит са̄в стихыт, мо̄т потрыт янгыщ хансуӈкве ка̄саще̄гыт. Тыт сусте̄мт, финныт халт ма̄ньлат хо̄тпат о̄лсыт, тыи сака ёмас. Тувыл мо̄т ёмас ща̄гт ва̄рмаль, ты конгресс кастыл сака са̄в йильпи нэ̄пакыт та̄ратаве̄сыт. Ань «12 нё̄тнэ са̄всыр стихыт» намаим нэ̄пакыт рӯт ма̄хманув пуссын о̄ньще̄гыт. Са̄в потрыт, мо̄йтыт, стихыт та̄нки ща̄нь ла̄тӈыл хансым о̄лэ̄гыт ос то̄ва поэтанув та̄наныл тыт ловиньтасаныл. Та̄наныл хӯнтлуӈкве сака пӯмыщ о̄лыс. Мо̄тыт IV конгресс ма̄н палтув е̄мты тах. Тот финноугор ма̄хум история потраныл оснпаттыянӯв ос ты урыл потыртэ̄в тах. Пе̄с наканув ханищтэ̄н, матыр йильпи утыт на̄нки ща̄нь ла̄тӈыл хансэ̄н!

1108 2015. 09. 25. Александр ВЬЮТКИН

Лув сыс тармыл яласан ма̄ Ижевск ӯс по̄хат лув о̄щнэ ос янмалтан кол о̄лы. Та ма̄тэ рущ ла̄тӈыл «Золотая подкова» ла̄ваве. Яныг ӯсыӈ ма̄т ӯйхул о̄щнэ кол мус титса̄т нупыл атпан ве̄рста. Машинал яласан ма̄хум ма̄гсыл лё̄ӈхе а̄ти хоса. Ӯщлахтаӈкв ма̄хум тув аквписыг ялантэ̄гыт. Тамле ма̄т та̄нанылн ӯщлахтаӈкв сака ёмас. Мӯй хо̄тпа ма̄гсыл тот пуссын пе̄с порат о̄лнэ щирыл ва̄рим о̄лы. Ты пӯмащ Галина Михайловна Рылова Тамара увщитэ̄нтыл ва̄руӈкв номылматсы̄г. Акваннё̄тхатым тэ̄натэ̄н пуссын ва̄руӈкв а̄ртмыс. Тэ̄н палтылэ̄н ёхталан ма̄хмытын пуссын мӯсты. Мӯй ма̄хум ма̄гсыл лув о̄щнэ па̄вылкант нила ма̄нь нор кол ӯнттым о̄лы. Акв тамле колрищит хуйнэ щирыл титхӯрум хо̄тпа ла̄пи. Тувыл пувлын кол ос ӯйхул о̄щнэ акв яныг кол о̄лы. Та̄нти о̄лнэ коланыл ос музеиг о̄лнэ кол пе̄с хольт о̄лнэ акв яныг колыг ва̄рсаныл. Музеяныл сака пӯмащ, тот пе̄с порат о̄щнэ са̄в пормас суссылтавет. Луваныл коныпал та̄н мисыт, па̄лят, лунтыт, щищкурекат ос пӯрщит янмалтэ̄гыт. Та̄н палтыланыл ёхталан мӯй ма̄хум ма̄гсыл тот янмалтан ос щё̄питан тэ̄нут па̄йтаве. Тэ̄нутаныл пе̄с хо̄льт яныг кирпащ кӯр тармыл па̄йтыяныл, таима̄гсыл пуссын атыӈыг тэ̄лы. Лув сыс тармыл яласаӈкве ка̄сащан ма̄хум ма̄гсыл тот ма̄ щё̄питавес. Щар о̄выл щёс лув сыс тармыл ӯнтын хо̄тпа рот лувыл миве. Тот о̄лнэ лувыт Вятский лувыг ла̄вавет. Та̄н а̄ти сака карсыт. Самыл суснэ щирыл, ма̄н луванув карснувет. Хотьют ка̄сащи, ат хо̄талын лув сыс тармыл во̄рын палаткат о̄лнэ ма̄н ялуӈкв ве̄рми. Лё̄ӈханыл палытэ са̄тлов нупыл ат ве̄рста. Та коныпал та̄н палтыланыл ёхталан мир халт хӯл алыщлан ма̄хум ёхталэ̄гыт. Та̄н ма̄гсыланыл па̄выл по̄хат тӯрхулыӈ тӯр о̄лы. Тот та̄н тӯрхул пувуӈкв ве̄рме̄гыт. Ущты пувим хӯланыл хӯл исмитыл па̄йтавет. Со̄ль, тот о̄лымавт хо̄тал сыс хӯрум щёс мӯй ма̄хмытын ёхталаве̄сыт. Лув о̄щнэ кол кӯщаиг о̄лнэ нэ̄ Галина Михайловна потыр халт ла̄выс: «Ёхтын мӯй ма̄хум по̄хан нэ̄мхотьют ат ня̄влыянӯв. Хуйнэ ма̄л ат то̄влынэ̄ныл порат палаткал майлыянӯв. Тыгыл лю̄ль номтыл нэ̄мхотьют ат мины. Акв щёс ёхталам хо̄тпа тувыл аквписыг ёхталы. Ма̄навн ёмас, та̄нанылн пӯмащ».

1109 2015. 10. 09. Людмила ТЕТКИНА

Нуса тотнэ ще̄мьят са̄внув олныл ойтуӈкве патавет Сӯкыр э̄тпос 24 щислат округ Дума депутатыт сапра̄нин акванатхатыгласыт. О̄влэ̄т та̄н постановлениенэ̄пак пирмайтасыт. Ты нэ̄пак хосыт са̄в та̄л ка̄ркамыг рӯпитан 25 хо̄тпа округ Дума па̄лыл янытлан нэ̄пакыл тах мивет. Тувыл депутатыт мир ӯргалан хо̄тпа пе̄риясыт, рущ ла̄тӈыл тав «Уполномоченный по правам человека в ХМАО-Югре» ла̄ваве. Ат та̄л мир ӯргалан хо̄тпаг Наталья Васильевна Стребкова рӯпитаӈкв тах паты. Тав ты сапра̄нин о̄с во̄виньта̄лвес, ты рӯпата хумус э̄лаль ва̄руӈкве номсы, та урыл китыглавес. Соссаӈ ма̄хум Ассамблея кӯщай хум Еремей Айпин таве̄н ла̄выс: «Ма̄ янытыл о̄лнэ соссаӈ ма̄хум ма̄гсыл ООН декларациянэ̄пак пирмайтас. Ань ты хосыт мощщаг хультум мирыт ӯргалавет ос та̄рвитыӈ ва̄рмаляныл оснпаттым о̄ньщавет. Ты нэ̄пак ёмащакве ловиньтэ̄лын ос ты ма̄т о̄лнэ соссаӈ ма̄хумн нё̄тэ̄н. Ань ма̄во̄й но̄хвинэ компаният пе̄с йис ма̄т о̄лнэ ще̄мьят палт рӯпитаӈкв воратэ̄гыт. Тот о̄лнэ ма̄хум та̄нки коланыл а̄латы коння̄влыяныл, тыи ма̄гсыл халанылт ва̄тихал воритотэ̄гыт. Ты ще̄мьят та̄рвитыӈ ва̄рмаляныл акваг та̄рапаттым о̄ньще̄н». Ты юипа̄лт депутатыт ос атпан арыгкем са̄всыр са̄кконыт пирмайтасыт. Округувт 2012 та̄л юипа̄лт ще̄мьят самын паттум хӯрмит ня̄враманыл ма̄гсыл олныл ойтавет. Тамле нё̄тмилыл нуса тотнэ нэ̄гхумыг мивег. Депутатыт ты ще̄мьятытн ойтнэ олныт но̄хнё̄тсаныл. Ань акв э̄тпос сыс та̄н 12 со̄тыра 975 солко̄вил ойтуӈкве тах патавет. Ты э̄лыпалт ты нё̄тмил 11 со̄тыра 354 солко̄ви са̄вит о̄лыс. Пенсия винэ ма̄хумолнаныл о̄с но̄хнё̄тве̄сыт. Ань акв э̄тпос та̄н 10 со̄тыра 732 солко̄вил ойтуӈкве патавет. Ты э̄лыпа̄лт ты ма̄хум 9 со̄тыра 566 солко̄вил пенсияныл о̄лыс. 2013-2014 та̄лыгт округувт са̄лы ӯрнэ ва̄рмаль хумус минас, ты урыл депутатыт о̄с потыртасыт. Еремей Айпин ла̄выс, са̄лы о̄щнэ ма̄хум акваг кос нё̄тавет, са̄всыр субсидияолныл мивет, тувыл та̄н иӈ са̄в та̄рвитыӈ ва̄рмаль о̄ньще̄гыт. Тыи ма̄гсыл са̄лы ӯрнэ ма̄хум ма̄гсыл рӯпитан са̄ккон то̄ва ла̄тӈанэ мо̄т щирыл хансуӈкве э̄ре̄гыт. Ань мо̄т хо̄н ма̄ныл нё̄выль ос мо̄т са̄всыр тэ̄нутыл воссыгат тотаве̄в. Са̄лы нё̄выль ос мо̄т тэ̄нут янмалтаӈкве ма̄нкина̄вн ань э̄ри. Ос тувыл ма̄хум ты нё̄выль то̄нт ёвтэ̄гыт, хунь ты тэ̄нут ла̄пкат тыналаӈкв патавет. То̄нт са̄лы ӯрнэ ма̄хум ёмаснувег тах о̄лмыгтэ̄гыт.

1109 2015. 10. 09. Александр ВЬЮТКИН

Олннё̄тмил ва̄рнэ кол те̄тум ля̄ххалэ «Ипотечное агентство Югры» нампа кол соссаӈ мир ма̄гсыл ля̄ххал те̄тэ̄гыт. Кол ёвтнэ ма̄гсыл нэ̄пакыт атнэ ма̄хмыт ты миннэ та̄лт мо̄тынтыг ка̄стыл заявление нампа нэ̄пак хансуӈкв во̄вавет. Тамле заявление та̄нанылн 2015 та̄л оигпан мус хансуӈкв э̄ри. 2016 та̄лт о̄лнэ кол ёвтуӈкв номсын хо̄тпан паспортыӈ та̄гыл ты та̄лт заявление хаснэ ма̄гсыл та колн ялуӈкв э̄ри. Округув янытыл са̄тхуйплов яныг ӯсытт кол ёвтнэ ма̄гсыл нё̄тмил во̄внэ заявление хансуӈкв ве̄рмегы̄н. Ты ӯсытт: – Сургут ӯст Профсоюз ӯсхулы, 11; ТРЦ «Агора» нампа кол нилыт наке̄т; – Нижневартовск ӯст 60 лет Октября ӯсхулы, 80 «а»; ТЦ «Мандарин» кол, 407 колнаке̄т; – Нефтеюганск ӯст 16 мкрн, 23 колэ̄т; – Ханты-Мансийск ӯст Мира ӯсхулы, 45 колэ, торговый центркол «Nebo», нилыт наке̄т; – Когалым ӯст Дружбы народов ӯсхулы, 41 колэ̄т; – Нягань ӯст -1 мкрн, 33 колэ̄т, 1 колохсат; – Мегион ӯст – Советский ӯсхулы, 23 колэ, кв. 1; – Лангепас ӯст Парковый нампа ӯсхулы, 25 колэ̄т; – Пыть-Ях ӯст 5 мкрн, 40 колэ̄т, хӯрмит колнаке̄т; – Урай ӯст 1 мкрн, 2/1 колэ̄т; – Югорск ӯст Гастелло ӯсхулы, 6 колэ, 201 «а» колнакт; – Советский ӯст Ленина ӯсхулы, сӯт колт; – Радужный ӯст 1 мкрн, 43 колэ, 78 колнаке̄т; – Покачи ӯст Комсомольский ӯсхулы, 3/1 колэ̄т; – Белоярский ӯст Молодости нампа ӯсхулы, 3 колэ̄т; – Ха̄льӯст Ленина ӯсхулы, 12 колэ̄т, 210 колнаке̄т; – Междуреченский ӯст Титова ӯсхулы, 15 «а»колэ̄т. Ӯсыӈ ма̄н ялуӈкв ат ве̄рмын ма̄хум заявлениенэ̄паканыл почта щирыл пищмал те̄туӈкв ве̄рмияныл. Нэ̄паканын те̄тнэ э̄лыпа̄лт па̄выл миркол по̄сыл тӯщтуӈкв э̄ре̄гыт. Ты та̄л округ бюджетныл соссаӈ ма̄хмыт кол ёвтнэ̄ныл ма̄гсыл 70 млн. солко̄вил майве̄сыт. Та олныл налыман нупыл ат колта̄гыл кол ёвтуӈкв нё̄тавет. Матыр тэ̄лан та̄рапаттын ма̄гсыл 8 800 100 66 00 ты телефон хосыт э̄тэхо̄талэ тув свонитаӈкв ве̄рмегы̄н. «Ипотечный агентство» па̄лыл те̄тым ля̄ххал ма̄ньщи ла̄тӈыл А. анямов хансыстэ.

1109 2015. 10. 09. Валентина УЗЕЛЬ

Ня̄врамыт ханищтан хо̄тпат ма̄гыс касыл Ты э̄тпос 5 хо̄талэ ня̄врамыт ханищтан хо̄тпат янытлан хо̄талыг о̄лыс. Ты ялпыӈ хо̄тал Россия янытыл 50 арыгтем та̄л ты янытлаве. Ма̄н округувт 20 со̄тыра хо̄тпат школатт ня̄врамыт ханищтэ̄гыт. Та̄н халанылт ма̄к ёмащакв рӯпитан 1 со̄тыра 390 хо̄тпа «высший» категория о̄ньще̄гыт. 1 со̄тыра 498 хо̄тпа ос «о̄выл» категория о̄ньще̄гыт. Ялпыӈ хо̄таланыл о̄лум порат 159 хо̄тпа образование департамент па̄лыл янытлаве̄сыт, то̄ваныл почётный грамотанэ̄пакыл, мо̄таныт ос пӯмащипа ла̄тӈыӈ нэ̄пакыл майве̄сыт. Ты хо̄таланыл кастыл ка̄сыӈ ӯст манос па̄влыт ялпыӈ хо̄талыт ва̄рыглаве̄сыт. Ханищтап ос ма̄ньлат ма̄хум тэ̄ланыл щирыл рӯпитан департамент колт рӯпитан хо̄тпат ань йильпи касыл ва̄ре̄гыт, рущ ла̄тӈыл тамле намыл пинсаныл – «Учитель – 2015». Ты касылт кос хотьют – ня̄врамыт, ща̄нита̄щит, ханищтан хо̄тпат, студентыт пуссын касуӈкв ве̄рме̄гыт. Та̄н ты касылн та̄наныл ханищтам манос ань ханищтан хо̄тпат хурияныл вос те̄тыяныл. Хо̄тпа хуритэ ищхӣпыӈ ут хосыт ты адрес щирыл вос те̄таве: tvs@doinhmao. ru. Ос хури ёт та ханищтан хо̄тпа урыл ма̄нь потырохса хансуӈкв э̄ри, тав наме, хоты школат рӯпиты, ты школа хоты ӯст ман па̄влыт о̄лы. Касыл ты э̄тпос 2 хо̄талныл ос э̄тпос юио̄выл 31 хо̄талэ мус мины. Хурит акванатнэ юипа̄лт та̄н ищхӣпыӈ утыт образование департамент ло̄псэ̄т «Учитель – 2015» нампа касылн тув ва̄равет. Ты ля̄ххал ма̄ньщи ла̄тӈыл Валентина Васильева хансыстэ.

1109 2015. 10. 09. Александр ВЬЮТКИН

Лусытан ма̄н миннэ пыгыт урыл Ма̄нь таквс э̄тпос титыт хо̄талэ̄т округ военный комиссарыг о̄лнэ хум Юрий Михайлович Буров, ма̄ньлат ма̄хум лусытан ма̄н винэ ма̄т рӯпитан хум Сергей Борисович Коваленко ос контрактын миннэ ма̄хум ёт рӯпитан хум Сергей Александрович Родинко ёт прессконференция о̄лыс. Ты таквс лусытан ма̄ньлат ма̄хум армиян винэ урыл потрув о̄лыс. О̄влэ̄т Юрий Михайлович лусытаӈкве миннэ ма̄ньлат ма̄хум урыл тох ла̄выс: «Та̄н ань акв та̄л лусытэ̄гыт. Ты таквсы округ янытыл акв со̄тыра атса̄т ма̄ньлат хо̄тпа тув виӈкв номсаве. Хумус, маныр ма̄навн ва̄руӈкв э̄рыс, пуссын ва̄рсӯв. Ущты лусытан ма̄н миннэ ма̄хум ма̄гыс о̄лнэ кол ёмщаквег щё̄питым о̄лы. Та̄н кӯстырнуве̄г лусытанэ̄ныл ма̄гсыл ма̄н пуссын ва̄ре̄в. Ань са̄в пыг ва̄гта̄л ня̄врамыг яныгме̄гыт. Тӯяг армиян винэ акв со̄тыра титса̄т ма̄ньлат хо̄тпа халт хӯрумса̄т налыман ня̄врам юв те̄тве̄сыт, са̄всыр а̄гманыл хо̄нтве̄сыт. То̄ва ня̄врамыт нёлоловхуйплов та̄ланыл мус ат ва̄ганыл, маныр а̄гм та̄н о̄ньще̄гыт. Лусытан ма̄н те̄тнэ э̄лыпа̄лт та̄наныл уральтан комиссия тав тыи та̄рапатты. Тамле ня̄врамыт та̄ра хот та арыгтаптавет». Юрий Буров потыртан ма̄ныл а̄стуме юипа̄лт Сергей Коваленко такви ва̄рнэ рӯпататэ урыл мощ потыртас. Тав ла̄выс: «Округувт лусытан ма̄н те̄тнэ э̄лыпа̄лт ма̄ньлат ма̄хум пуссын Пытья̄х ӯст акванатавет. Тув ущты ёхтын ма̄хум та̄ра щё̄с щирыл о̄луӈкв ханищтыянӯв. Та̄нанылн марщумыг ул вос о̄лыс, ва̄тихал концертыт ва̄рыглэ̄в. Тох та̄н моляхнув лусытан о̄лупсан ханьщувлэ̄гыт. Вина тув тотуӈкв ат ро̄ви. Нэ̄матыр лю̄ль ул вос е̄мты, э̄тэхо̄талэ сыс видеокамерал сунсым о̄ньщавет». Тувыл контракт щирыл лусытан ма̄хум урыл Сергей Родинко мощ потыртас. Тав ла̄выс: «2015 та̄лныл ма̄н округув янытыл титса̄т нупыл хо̄тпан хо̄тпа контракт щирыл армиян лусытаӈкв минасыт. Ань контракт щирыл лусытан ма̄хум ма̄гсыл са̄всыр льгота нампа нё̄тмил ва̄раве. Таима̄гсыл са̄выӈпа̄лэ лӯима̄н ос ща̄рщ хосыт на̄иӈха̄пыл яласан ма̄н во̄вхатэ̄гыт». Потрув оигпаме порат армият яныг кӯщаиг рӯпитан ма̄хум ла̄всыт: «Ань ты о̄лнэ армиявт пыгыт лусытаӈкв ка̄саще̄гыт ос таӈхе̄гыт. Та̄н номтаныл ма̄навн сака мӯсты. Пуста̄гыл вос яныгме̄гыт, лӯсытаӈкв вос ёхтэ̄гыт! ».

1109 2015. 10. 09. Александр ВЬЮТКИН

Во̄рыӈ ма̄т рӯпитан ма̄хум кассыт Сӯкыр э̄тпос хо̄тхуйплов хо̄талэ̄т йӣв ёляктын ма̄т рӯпитан ма̄хум халт Ханты-Мансийск ӯст касыл ва̄рыглавес. Рущ ла̄тӈыл «Лучший вальщик леса с моторной пилой» намтым о̄лыс. Ты касыл во̄р яктын ма̄хум янытлан хо̄тал кастыл ва̄рыглавес. Та хо̄таланыл Россия янытыл сӯкыр э̄тпос хӯрмит ӯщлахтан хо̄талэ̄т янытлаве. Ты та̄л хӯрумхуйплов хо̄тпа та̄нти халанылт кассыт. Курган, Екатеринбург, Челябинск, Тюменский областьныл ос ма̄н округувныл ма̄хум о̄лсыт. Ма̄н о̄лнэ ма̄в ма̄гсыл хӯрум хо̄тпа касыс. Касыланыл о̄вылтанэ порат округ янытыл во̄р ӯргалан федеральный инспекция кӯщаиг о̄лнэ хум Дмитрий Кузнецов о̄выл ла̄тыӈ ла̄выс: «Ханты-Мансийск ӯсн ёхтум ма̄хмытн ам паща ла̄тыӈ ла̄ве̄гум. Тыхо̄тал ма̄к рӯпатаныл ва̄нэ ос ха̄снэ щирыл ва̄рнэ ма̄хум тыг атхатасыт. Вос ма̄щтырыг касэ̄гыт, хумус та̄н ва̄руӈкв номсэ̄гыт, тох пуссын вос а̄ртми. Ма̄н ос на̄н халынт ма̄щтырыг рӯпататэ ва̄рнэ хо̄тпа пе̄рие̄в». Дмитрий Кузнецов юипа̄лт профсоюз тармыл председателиг о̄лнэ хум Федор Сиваш ма̄хум нупыл ла̄выс: «Ты хо̄тал То̄рмув ёмас хо̄тал ва̄рыс. Ань на̄нан на̄нти ва̄рнэ рӯпатан ма̄хмытын ёмщакве̄г суссылтаӈкв э̄ри. Йӣв паттуӈкв ты а̄ти нас мори рӯпата, тыи ма̄к э̄рнэ щирыл ва̄рнэ рӯпата. Хотьют йӣв ат паттыс, таве̄н та̄рвит тыи торгамтаӈкв. Ань каснэ̄нын порат рӯпитан ма̄т ӯргалахтым о̄луӈкв ам на̄нан ла̄виянум. Пуста̄гыл о̄лэ̄н, рӯпатан нэ̄мхоталь ат ва̄рхаты». Хӯрмит хум Евгений Платонов во̄рт рӯпитан ма̄хум о̄с янытласанэ, тав округ янытыл ма̄вит ӯргалан Департамент тармыл кӯщаиг о̄лы. Тав ла̄выс: «Ка̄сыӈ хо̄тпа такви щире̄т матыр ма̄щтырлаӈкв ха̄сы. На̄н ос ка̄тыл ёмщакв рӯпитаӈкв ха̄сэгы̄н, тыхо̄тал ма̄н на̄н ма̄щтырыг ва̄рнэ рӯпатан нупыл тах сунсэ̄в». Во̄р паттын ма̄т рӯпитан ма̄хум касыланыл ат са̄всыр пӯмащ щирыл ва̄рыглавес. О̄влэ̄т йӣв ёлпаттуӈкв э̄рыс. Ёляктын йӣв хо̄тпан по̄стым ма̄н паттуӈкв э̄рыс. Тувыл «бензопила» йӣв сартнэ те̄р рӯпитан кастыл кум щирыл атуӈкв э̄рыс. Хӯрмит касыланыл «продольный рез» ла̄тӈыл намтым о̄лыс. Таи хунь йӣв сартнэ те̄рыл по̄ри хуйнэ йӣв о̄влэ̄т ёлыпал е̄ре сартаве, тувыл нумыл сартаве. Титтыгпаттын ма̄тэ састумыг сартуӈкв э̄рыс. Та юипа̄лт (точный рез) нампа касылыл кассыт. Щуртмилыл по̄стым йӣв щуртмиланэ щирыл сартвес. Щар юио̄выл касыланылт йӣв та̄ганэ састумыг сартуӈкв э̄рыс. Во̄рт рӯпитан ма̄хум хо̄тал палыт кассыт. Ты ма̄гсыл дипломыл ос пӯмащипа ла̄тӈыӈ пищмал янытлаве̄сыт. Но̄хпатум хӯрум хо̄тпа олныӈ мӯйлупсал майве̄сыт. Та хӯрум хо̄тпа пуссын Свердловский областиныл тыг ёхталасыт. О̄выл тит ма̄ акв ще̄мъяӈ хумыг Сергей, Евгений Красиковыг вистэ̄н. Пыге Евгений но̄хпатыс. Хӯрмит ма̄ Виктор Гисматуллин вистэ.

1109 2015. 10. 09. Светлана РОМБАНДЕЕВА

Ищхӣпыӈ ут ка̄сыӈ па̄вылт ва̄раве Округ кӯщай ва̄ӈын хо̄тпатэ Геннадий Бухтин Министерство связи, «Ростелеком» ос округ Правительстват рӯпитан хо̄тпат ёт хо̄нтхатыглас, та̄н ищхӣпыӈ утыт урыл потыртасыт, са̄в э̄рнэ нэ̄пакыт хассыт. Ань ты йист сыресыр ищхӣпыӈ утыт ква̄лтапаптуве̄сыт, та̄н халанылт ма̄к пӯмщалан ут – интернет. Яныг ӯсытт тав ёмащакв рӯпиты, ос ма̄нь па̄влытт торыӈыщ ва̄руӈкве ат ве̄рмаве, лю̄льсаӈ рӯпиты. То̄ва па̄влыт ос тамле ут атпыл о̄ньще̄гыт. Кӯщаит та урыл потыртасыт, ань интернет ат о̄щнэ манос лю̄льсаӈ рӯпитан па̄влытн хумус нё̄туӈкве патэ̄гыт. Геннадий Бухтин ла̄выс: «Алы ма̄т ос хо̄тал нэ̄глын е̄рт о̄лнэ 21 па̄влытн нё̄туӈкве кӯстырнуве. Ос мо̄т ма̄т хумус рӯпитаӈкве патэ̄в, тавагт. Интернет ка̄сыӈ ма̄т мӯсхал щирыл ва̄руӈкве э̄ри. Хо̄тпа кос хо̄т вос о̄лы, яныг ӯст ман ма̄нь па̄вылт, тав ма̄гсылэ ты ищхӣпыӈ ут ёмащакв вос рӯпиты». Округ янытыл о̄лнэ ищхӣпыӈ утыт хосыт ля̄ххал тотнэ Департамент колт кӯщаиг о̄лнэ хум Юрий Торгашин ла̄вме щирыл, ма̄навн ань Министерство связи нё̄туӈкве патыс. Тав округувн нё̄тнэ̄тэ коныпал Россия янытыл мо̄т са̄в ӯсытын ос округытн нё̄ты. Связь тэ̄ла о̄с ва̄ри. Ань ка̄сыӈ ма̄т ма̄хум телефон хосыт потыртаӈкве вос ве̄рме̄гыт, са̄всыр хащта̄л утыт ва̄равет (оптоволокно ос радиорелейный линият). Тот рӯпитан ма̄хум олныл Россия бюджетныл ойтавет». Округ кӯщай прессслужбаныл те̄тым ля̄ххал ма̄ньщи ла̄тӈыг С. Ромбандееван толмащлавес.

1109 2015. 10. 09. Светлана РОМБАНДЕЕВА

Чемаши па̄вылт яныгмам хум Ты туи Ха̄льӯс район Восыӈтӯр па̄вылт ам Александр Прокопьевич Сайнахов ёт хо̄нтхатыгласум, потрамасум. Тав а̄тятэ ма̄ньщи хум о̄лыс, оматэ ос ханты нэ̄. На̄н ань э̄лаль ты хум потре ловиньтэлы̄н. – Ам Чемаши па̄вылт яныгмасум. А̄тям Прокопий Антонович Сайнахов, 1933 та̄лт самын патыс. 1940 та̄лт о̄пам армиян вуйвес, тувыл яныг хо̄нт е̄мтыс, тот та порслувес. А̄тям иӈ ма̄нь о̄лыс, ат та ва̄стэ, хоты ма̄ныл а̄ще олыс. Аман Кульпас е̄рныл ты нупыл ёхталас, тавагт. Оматэ о̄с та та̄лытт а̄тимыг е̄мтыс, а̄тям такте̄т хультыс. Октябрьский па̄вылт Надежда а̄квум о̄лы, а̄тям та̄н палтаныл яныгмас. Омам Лидия Тимофеевна, а̄ги о̄парищ наме Гришкина, 1932 та̄лт Проточные па̄вылт самын патыс, тот ханищтахтас. Кит увщи ос акв ягпыг о̄ньщас. Марья увщитэ Восыӈтӯрт о̄лыс, Лена а̄квум Чемаши па̄вылт, Ханты-Мансийск ӯст ос Николай сасгум о̄лыс. Колта̄глувт ма̄н хо̄т ня̄врам о̄лсув, ат ягпыг ос акв э̄щ. Щар яныг каӈкув Николай, тувыл Федор, Михаил, ам ос Ирина. Ма̄нь а̄пщив Игорь ущ самын патме порат а̄тимыг е̄мтыс. Ам школа а̄стламум юипа̄лт Ханты-Мансийск ӯст СПТУ-8 училищат ханищтахтуӈкве о̄вылтахтыгласум, та училище ат а̄стласлум. Мощ ётылнуве Омский областьт Усть-Ишим па̄вылт о̄лум ДОСААФт машинал яласаӈкве ханищтахтасум. Чемаши па̄вылт леспромхозт рӯпитасум, ётыл Игримский автобазан патхатыгласум. 1992 та̄лт Восыӈтӯрн ва̄нтлысум, нэ̄ тотсум, наме Софья Михайловна Лыскова. А̄гипыг о̄ньщиме̄н. Саша пыгме̄н Ха̄льӯст о̄лы. Аннаме̄н ты та̄л Ханты-Мансийск ӯст педагогический колледж а̄стлас, ня̄врам садикт воспитателиг рӯпитаӈкве паты. – Александр Прокопьевич, наӈ яныгмам па̄влынт ма̄ньщит о̄лсыт? – О̄лсыт, нила колта̄гыл. Ма̄ньщи ла̄тыӈ ам ма̄нь та̄гыл хӯлыгласлум, торгамтэ̄гум, ос потыртаӈкве сака ат ве̄рме̄гум. Э̄квам ханты нэ̄, тав тай ща̄нь ла̄тӈе ва̄гтэ. Па̄влувт янгыщ э̄лныл ёхталам ма̄хум о̄лсыт, Омск ӯс е̄рныл ёхталасыт, таима̄гыс ма̄н акваг рущ ла̄тӈыл потыртасув. Ос таи сака са̄ль, моще̄ртн ща̄нь ла̄тӈув хотталь та со̄йми. Ань мо̄рсыӈ порат ма̄нти ла̄тӈув хӯнтамлаӈкве ро̄ви. Ня̄враманув тай щар ат торгамтэ̄гыт. Ань акваг ищхӣпыӈ утыт нупыл патсыт, тувле сунсым хо̄тал палыт та ӯнлэ̄гыт. Тыт, Восыӈтӯрт, о̄луӈкве сака ёмас. Ня̄врамагум тыт яныгмасы̄г, школа а̄стласы̄г. Па̄влувт йильпи пӯльница ӯнттувес. Хӯлупъяӈкв яланта̄лэ̄гум. Тыт Ирина э̄щум о̄лы. Александр Прокопьевич хо̄тпа нупыл сымыӈ э̄лумхо̄лас. Колта̄гыл ма̄хманэ ёт пуста̄гыл вос о̄лэ̄гыт, На̄янылн-О̄тыранылн вос ӯргалавет!

1109 2015. 10. 09. Тамара МЕРОВА

80 та̄лэ̄тыл янытлылӯв! Хурит Клавдия Васильевна Николаева по̄слым о̄лы. Тав 1935 та̄лт 14 щислат ма̄нь таквс э̄тпост Томский область Криволуцк па̄вылт самын патыс. Э̄ква ань Санкт-Петербург ӯсн Татьяна а̄гитэ̄нтыл о̄лмыгтасы̄г. Ос округт Нижневартовск ӯст о̄лме порат та̄в са̄в та̄л школат рӯпитас, ос са̄всыр партийный тэ̄лат ва̄руӈкве нё̄тыс. О̄влэ̄т тав Ханты-Мансийскат педучилищат ханищтахтас. А̄стламе юипа̄лт Толька па̄вылт соссаӈ ня̄врамыт ёт рӯпитас ос а̄т та̄л Ларьяк па̄вылт школаинтернатыт рӯпитас. Ётыл Ленинград ӯсн ханищтахтуӈкве ке̄тыглавес. Та ӯст Е. А. Нёмысова ёт аквъёт ханищтахтамы̄г. Нижневартовск ӯст А. П. Кауртаев ёт аквъёт рӯпитасы̄г. Ань ма̄н та̄наныл яныгпа̄ла ма̄хум ялпыӈ хо̄талыл, ня̄врамыт ханищтан хо̄тпат ялпыӈ хо̄талыл янытлыянӯв! Ос Клавдия Васильевна 80 та̄лэ то̄влум кастыл о̄с янытлылӯв! Та̄нанылн пус ка̄т, пус ла̄гыл ла̄ве̄в, То̄румн вос ӯргалавет.

1109 2015. 10. 09. Людмила ТЕТКИНА

О̄йка ханищтахтам поратэ ань ты мус номитэ Ма̄нь таквс э̄тпос о̄выл щислат ня̄врамыт ханищтан хо̄тпат ос атыт хо̄талэ яныгпа̄ла ма̄хум янытлан хо̄талыг о̄лсы̄г. Ка̄сыӈ э̄лумхо̄лас, улпыл, такви ханищтахтам поратэ номитэ. Кимкъясуй па̄вылт о̄лнэ ма̄ньщи о̄йка Александр Иванович Монин ты та̄л 78 та̄лэ то̄влыс. Па̄влыӈ мир халт тав щар яныг хум хо̄тпаг о̄лы. Тав школан ялантам та̄ланэ о̄с ат ёрувлыянэ ос та урыл тох потыртас. – Ам 1937 та̄л я̄ӈк на̄тнэ э̄тпос 23 щислат Петкаш па̄выл самын патсум. То̄нт па̄влув Сортыӈъя миркол нупыл ловиньтахтас. А̄тям Иван Евлампиевич Монин Петкаш па̄выл хум, омам ос Мария Ивановна Таратова Во̄лиӈ па̄выл нэ̄. То̄нт Таратовыт пуссын Во̄лья̄ хосыт о̄лсыт. Улпыл та порат омам ло̄ӈхаль рӯпитаӈкве ке̄тыглавес. Петкаш па̄вылт а̄тям ёт акванхо̄нтхатсы̄г, акванминасы̄г, ты урыл ёмащакве ат ва̄глум. Амки тай щаще̄квам ос о̄пам палт яныгмасум. Ма̄нь та̄гыл омам ат ва̄щиньтаслум. Щаще̄квам, о̄пам ляльт хӯнтлэ̄гум: «Пыгпыгкеме̄н ханищтахтуӈкве ке виве, та̄ра ща̄не палт та тотаве, ятаты, ня̄врам савалаӈкве та паты, сав тотуӈкве та паты». Тэ̄н тай сака нусаг ат о̄лсы̄г, мощ о̄луӈкве ве̄рмысы̄г, манхурип тэ̄нут пуссын о̄щсы̄г. Ма̄нь порат номилум, о̄пам ёт во̄рн акваг воратасум, таквсы па̄лаг сорых на̄тылтаӈкве ялантасме̄н, ва̄сыт ёхтын порат па̄тсов ӯрим яласасме̄н. А̄тям 1939 та̄лт финский войнан вуйвес, 1941 та̄лт пищма ёхтыс, ювле ты юв. Тувыл юв аты ёхтыс, мо̄т война о̄вылтахтас ос э̄лаль та тотвес. Ётыл мо̄т пищма о̄лыс, а̄тям 1945 та̄л ма̄ньполь э̄тпост порслувес. Яныгмамум а̄тям аты ва̄щиньтаслум. Ща̄нюмн ул вос тӯлмантавем, щаще̄квам ос о̄пам ханищтахтуӈкве ат майлуве̄сум. Акв та̄л таквсы порат Кульпас па̄вылн та тотве̄сум. Тувыл ханищтахтуӈкве тай ат ханищтахтасум, пувлын колт ловтхатуӈкве туп а̄лымасум. Аквматэ̄рт кон ха̄йтыгтым, яныг а̄гирищитн ла̄вавем: «Оман тотта юв». Ам тай хотыл ва̄глум, омам манхурипа о̄лы, сысы та ое̄гум, тувыл та по̄йкуве̄сум, по̄йкуве̄сум, та пувве̄сум. Яныг саран ха̄пн та̄лттуве̄сум, Няхлаӈ па̄вылн та тотве̄сум. Ханищтахтуӈкве тот патсум. То̄нт тэ̄нут а̄тим, ма̄хум нуса тотэ̄гыт. Ма̄хум ӯй лув па̄лыгхалтыглыяныл, тувыл коласыл утыяныл, вос хасумты, коласэ хунь хасумты, тэ̄нут а̄сты, тащирыл та тэ̄сӯв. Ос ёхылло̄мтыл ща̄й айсӯв. Тӯяг тэ̄пка хилуӈкве патэ̄в, тэ̄лы сыс ма̄т хуям картопкат хо̄нтыянӯв ос ты утыт хотмус ня̄нил ва̄рве̄сыт, тамле тэ̄нут тэ̄сӯв. Няхлаӈ па̄выл школат Клавдия Михайловна Голованова директорыг о̄лыс. То̄нт тамле яныг школа туп та па̄вылт рӯпитас. Ня̄врамыт са̄всыр па̄вылныл ханищтахтуӈкве тув тотыглаве̄сыт, интернатыт пуссын аквъёт 120 ня̄врам о̄лыс. Ты коныпал ос ювыл яласан ня̄врамыт школат ханищтахтасыт. Та порат сака нуса о̄лсыт, мощща соврищил ёхтэ̄гыт. Тувыл пуӈканыл та̄кмыӈыт, пуссын хотхӯратавет. Омам прачкаг интернатыт рӯпитас, кит яныг пӯткапаиг о̄ньщас, та̄кмыӈ утыт тув та̄ртыянэ, ятаты, тот та па̄йтыянэ. Клавдия Михайловна щар ёмас нэ̄г о̄лыс, ма̄ньщи ня̄врамыт пуссын но̄хпаттысанэ. Номилум, ня̄врамыт халанылт китыглахтэ̄гыт: «Наӈ ос хоты классыт ханищтахтэ̄гын? » Мо̄танэ ювле ла̄ви: «Ам китыт классын ялантэ̄гум». Такви карсэ ты янытэ, ананакве, иӈ китыт классыт ханищтахты. Ва̄рмаль а̄ти, двойка о̄ньще̄гын ман а̄ти, туп школан вос яланты, тэ̄та̄л ул вос о̄лы, тот мощ тыттаве. Тамле ты Клавдия Михайловна сымыӈ нэ̄кве о̄лыс, пуссын ня̄врамыт ӯргалым о̄щсанэ. Тав пыге о̄с ня̄врам ханищтан хо̄тпаг о̄лыс. Ос ты коныпал ня̄врамыт ханищтым Валентина Ивановна Ахтямова рӯпитас. То̄нт ня̄врам сака са̄в о̄лыс. Школат тыттуӈкве ва̄нттаве̄в, о̄влэ̄т акв смена тэ̄г, тувыл мо̄т смена пасан ва̄тан ӯнттаве. Кашал тыттаве̄в, ос китыглаве̄в: «Хотьют китыт а̄ны кашал пинуӈкве, ка̄танын но̄ха̄лме̄н». Ма̄н тай ка̄танув хосгим но̄х та лю̄люмтэ̄в. Акв хо̄тал нила щёс тыттувесӯв. Клавдия Михайловна тох ты савалап ня̄врамыт но̄хнё̄тсанэ. Интернат по̄хат яныг тэ̄пкан о̄лыс, тот осэ̄ва̄тал репа, морковка ос мо̄т тэ̄нут ӯнттаве, тувыл ты утыт та̄л сыс тэ̄сӯв. Школа по̄хат ос яныг па̄ртыӈ складка̄пай ӯнттувес, яныг таквс э̄тпос са̄лыӈ ма̄хум нё̄выль тотэ̄гыт. Са̄лы нё̄выль ты складка̄паин пинавет. Тувыл ня̄врамыт китыглавет, хотьют нё̄выль сартуӈкве паты, ма̄н тай пуссын тув воратасӯв. Сартым нё̄выль хульты, ты утыт юв та тэ̄ганӯв. Саваласӯв кос, тувыл э̄лаль о̄луӈкве во̄ратасӯв. Ня̄нил тай норма щирыл майвесӯв. Туп 1949 та̄лт норма хотвуйвес, ня̄нь тыналаӈкве патвес, олн ке о̄ньще̄гын ёвтэ̄н. Атыт классын Кульпас па̄вылн ханищтахтуӈкве ке̄тве̄сум. Тэ̄ӈкве минэ̄в, ще̄панув таглэ̄кв ня̄нил тохриянӯв. Тувыл линейкан тӯщтаве̄в, воспитатель мины, ще̄пныл таса̄вит ня̄нь та аты. Кульпаст хоса ат ханищтахтасум, яныг ня̄врамытн сака саватаве̄сум. То̄нт ам сака ёмщакв по̄сласум. Школат та̄ратан газета ма̄гсыл лю̄льсаӈ ханищтахтан ос лю̄ль ва̄рнэ ня̄врамыт по̄слысанум. Учительский колнакн тотавем, по̄слуӈкве тот ӯнттавем. Владимир Монин, ам рӯт хумим то̄нт о̄с ханищтахтас, сака лю̄ль ва̄рыс. Тав яныг, карыс ня̄врам о̄лыс. Переменат тыглетувле ё̄мыгты, а̄нумн пальтыт та кивтасаптытэ, тох та акваг лю̄щтуве̄сум. Ва̄т са̄грапнал э̄тпост юв акваг та минасум, ханищтахтуӈкве воссыг ат патсум. Тувыл 23 февральт Кульпас школа кӯщай нэ̄ са̄лы суныл Няхлаӈ па̄вылн ты ёхтыс. Китыглахтас, манрыг ня̄врам юв хультуптавес, э̄лаль ханищтахтуӈкве вос тотавем. Ам ос лю̄ньщим ювле ла̄всум, ханищтахтуӈкве ат патэ̄гум. Тав а̄нумн ла̄выс: «Мо̄т порат ты ва̄рмаль урыл тах номылмата̄лэ̄гын, то̄нт сака са̄литаӈкве патэ̄гын ос поран ювле та хульты». Ётыл, со̄ль, номтум ёхтыс, ос тувыл воссыг хоталь минэ̄гум, ханищтахтам порам ювле та хультыс. 1953 та̄лт трудовой книжкал майве̄сум, рӯпитаӈкве минасум. Василий Николаевич Вадичупов ёт во̄рт яласаӈкве патсум. Тыи тай ос мо̄т потыр.

1109 2015. 10. 09. Светлана ХОЗУМОВА

Восыӈтӯр па̄выл яныгхо̄тпа Ты хурит Ха̄льӯс район Восыӈтӯр па̄вылт о̄лнэ рущ э̄ква Зоя Семёновна Непомнящих лю̄ляхо̄лы. Тав ма̄ньполь э̄тпос 10 хо̄талэ̄т 1928 та̄лт самын патыс. Та̄н колта̄гланыл 1936-1937 та̄лыт порат Свердловский область Верхотурье ӯсныл ма̄н ма̄в нупыл ке̄твес, то̄нт Зоя Семёновна нёлолов та̄лэ ущ то̄влыс. На̄н ань э̄лаль тав потре ловиньтэлы̄н. – А̄тям член Совета о̄лыс, тыт порслувес. Ма̄н нила ня̄врам омав ёт хультсӯв. Омав наме Аксинья о̄лыс. Увщиягум Анна ос Нина, а̄пщим Павел. О̄влэ̄т Чуанели па̄вылт о̄лсӯв, ётыл Вотырнель па̄вылн ва̄нтлысӯв. Восыӈтӯр па̄выл мус школан ла̄глыл ялантасӯв. Улас ос пасан мощща о̄лыс, лю̄лим ханищтахтасӯв. Хотьют мощ ӯнлыс, тувыл ос тав лю̄ли, тох пе̄нтхатым хотмус та ханищтахтасӯв. Ам совхозт рӯпитасум. Мис поссӯв, пум ва̄рсӯв. Хо̄т ня̄врам о̄ньщигласум, Валям ос Наташам тыт о̄лэ̄г. Апыгрищит, апыг апыгрищит са̄в о̄ньще̄гум. Зоя Семёновнан ма̄н са̄в ёмас ла̄тыӈ ла̄ве̄в. Пуста̄гыл вос о̄лы, ня̄враманэ̄н, апыгрищанэ̄н вос нё̄таве. Пус ка̄т, пус ла̄гыл!

1109 2015. 10. 09. Валентина УЗЕЛЬ

Са̄в та̄рвит ва̄м э̄ква потре Тӯяг Ханты-Мансийский район Кышик нампа ма̄нь па̄влын ялмум порат са̄в соссаӈ хо̄тпа ёт тот ва̄щиньтахтасум. Ань ма̄н халувт такви ща̄нь ла̄тӈе ва̄нэ соссаӈ хо̄тпа мощща. Ос та ханты па̄вылт ам тамле ма̄хум ёт ва̄йхатасум. Акв э̄ква ёт потыртасум, тав наме Тамара Григорьевна Калягина, о̄йкатэ щирыл рущ о̄парищ намыл о̄лы. Ос такви а̄ги о̄парищ наме Харанзеева. Тав о̄лупсатэ урыл тох потыртас: – Ам нёлсат нупыл титыт та̄лум то̄влыс. Во̄рт самын патсум, ма̄н колта̄глув Кышик па̄вылныл Назым я̄ алгаль нупыл о̄лыс. Сака э̄лы ос сытам ма̄т ма̄н о̄лсӯв. Та ма̄ Сынвар наме о̄лыс. Ань тув мус нэ̄мхотьют ат яланты, хоса минуӈкв э̄ри. Яныг хо̄нт о̄вылтахтам юипа̄лт а̄тям та̄ра хо̄нтлын ма̄н тотвес. То̄нт омагума̄тягум ущты акванминасы̄г, ам туп самын патсум. Ма̄нтте̄в та хультсӯв – омам, щаще̄квам ос ам. Хо̄нт э̄лыпа̄лт ща̄нягума̄щагум са̄в са̄лы о̄щсы̄г, са̄лы ӯрим яласасы̄г. А̄тям тотыма юипа̄лт ма̄н тыг па̄вылн ва̄нтлуптавесӯв. Са̄лыянув о̄с пуссын холтве̄сыт. Хо̄нтлын салтат ма̄хум ма̄гыс нё̄влиг ва̄рве̄сыт. Ма̄н хӯрум ёмас туп акв нэвиса̄лыл хультуптавесӯв. Ла̄ввесӯв, ма̄нти о̄лнэ колув па̄влын вос тотылӯв. Ос хум хо̄тпа та̄л ма̄нти маныр ва̄ре̄в, нэ̄матыр ат ве̄рме̄в. Ётыо̄вылт хультуптым са̄лыюв о̄с хотняртумтавес. То̄нт колхозыт ва̄руӈкв о̄вылтаве̄сыт. Ма̄н тыг ёхтысӯв, ма̄нь пе̄с колрищил майвесӯв, тув та о̄лмыгтасӯв. А̄тям юв ат ёхтыс, хотты хащта̄л ма̄т порслувес. Омам титынтыг хум ва̄рыс, тэ̄н хӯрум ня̄врам о̄щсы̄г – тит а̄ги, акв пыг. Ты а̄пщирищум иӈ ма̄ниг о̄лме̄т хотталь щалтыс, йигрищагум ам ляпамт ань о̄лэ̄г, акватэ Луговой па̄вылт, мо̄танум – тыт Кышик па̄вылт. О̄с сас матумыг. Омам а̄тимыг е̄мтме юипа̄лт ам ущ похоронканэ̄пакыл тотве̄сум, тот хансым о̄лыс – а̄тям я̄ӈк на̄тнэ э̄тпос о̄выл хо̄талэ̄т порслыма, ань ты мус ты нэ̄пакломт ам о̄ньщилум. Войнан а̄тям ёт тав а̄пщитэ тотвес, тав о̄с тот порслувес. Щаще̄квав тит пыг та̄л та хультыс. Тав о̄с са̄лы та̄л та хультуптавес. Та та̄рвитыӈ порат полщ тотнэ хо̄тпа ма̄н халувт са̄в о̄лыс. Па̄влув акв тамле хумрищ о̄лыс, тав ты ма̄хманув полщил ва̄рсанэ, пуссын са̄лы та̄л хультуптасанэ. Тав такви хоса о̄с ат о̄лыс, э̄кватэ ёт хотталь тотвесы̄г, аквторыг а̄тимыг е̄мтсы̄г. Ам во̄рт яныгмамум ма̄гсыл амти О̄тыранум нупыл по̄йкщим о̄лэ̄гум, пупганув янытлым о̄лэ̄гум. Матаре е̄мты, па̄влувт о̄лнэ яныгпа̄ла хо̄тпат акванатхатэ̄в, пӯрлахтуӈкв, йирхатуӈкв тапал ва̄тан та минэ̄в. Пе̄с йис ва̄рмалянув, пе̄с йис наканув э̄лаль тотыянӯв. Тув туп я̄ӈк то̄р тотуӈкв э̄ри. Ань тот арсыныл нэ̄гсалым са̄в йӣв лю̄ли. Юио̄выл та̄лыт сыс па̄влыӈ ма̄хманув ма̄нти пупганув нупыл сунсуӈкв патсыт, пе̄с ва̄рмалянув но̄хво̄рмалтыяныл, тыи сака ёмас. Ма̄н ань ам, пыгум, тав а̄гитэ ос ма̄нь апыгрищум пуссын аквъёт о̄лэ̄в. Пенсиям 11 со̄тыра солко̄ви, туптуп то̄вылхаты. Пыгум ос тав а̄гитэ нэ̄мхо̄т ат рӯпитэ̄г, тыт рӯпата щар а̄тим. Тув порат атхатэ̄в, во̄рн о̄луӈкв минэ̄в, тот хӯл алыщлэ̄в, пил ва̄тэ̄в. Аквтит э̄тпос во̄рт о̄лэ̄в. Ам яныгмам Сынвар нампа ма̄н хосат ат ялсум. Та урыл хунь номылматэ̄гум, сымум сака щарги. Тох ты ма̄н, во̄рт о̄лнэ ма̄хум, па̄влыӈ ма̄н та тотвесӯв, йильпи о̄лупсал о̄луӈкв ханищтавесӯв. Ань та пе̄с о̄лупсав хо̄т та хультыс.

1109 2015. 10. 09. Тамара МЕРОВА

О̄лупсатэ̄т о̄лум накыт номылматыгласанэ Ты э̄тпос нёлоловит щислат Анатолий Прокопьевич Кауртаев 80 та̄лэ то̄влыс. Округ янытыл тав намыӈсуиӈ, са̄в ма̄хумн ва̄нэ хо̄тпа. О̄йка са̄в та̄л Нижневартовск ӯст о̄лыс, та районт о̄лнэ соссаӈ ма̄хум тэ̄ланыл щирыл рӯпитас. Ма̄ньха̄пыл каснэ ва̄рмаль ты тав о̄вылтам рӯпататэ. Тӯяг ма̄ньполь э̄тпост Нижневартовск ӯст акванхо̄нтхатыгламуме̄н порат тав такви ма̄ньпоратэ ос ма̄ньлатыг о̄лум поратэ номылматыгластэ. Таве хӯнтлуӈкве сака пӯмащ о̄лыс. Ка̄сыӈе̄мт матыр лю̄ль манос ёмас накыт е̄мталасыт. Ос тамле та̄рвит ва̄рмалит кастыл э̄лумхо̄лас та̄ксарыг, ё̄рыг е̄мты. Анатолий Прокопьевич Учинья па̄вылт Кондинский районт самын патыс. А̄ще Прокопий Макарович хо̄нтаӈ ма̄ньщи хум хӯл алыщлым ос во̄раим о̄лыс, ща̄не Анфиса Васильевна рущ нэ̄, Свердловский область Пелым ма̄ныл о̄лыс. Прокопий та рущ ма̄н пилыт, хӯлыт, во̄руй совыт тыналан ма̄гыс ялантас, тот ты тэ̄н Анфиса ёт акванхо̄нтхатсы̄г ос тувыл нэ̄г таве юв тотыстэ. Нэ̄гхумыг ат ня̄врам о̄щсы̄г. Акв та̄лт та̄н о̄лум па̄вланылт «оспа» нампа лю̄ль а̄гм е̄мтыс. Ты а̄гм паттыиг са̄в па̄влыӈ ма̄хмыт ёлпаттуве̄сыт. Кауртаев нэ̄гхумыг хӯрум ня̄врамаге̄н о̄с а̄тимыг е̄мтсыт. Ётыл а̄щаныл хотталь щалтыс. Ща̄не Анатолий ос Анна ня̄врамаге ёт хультыс. Мощ о̄лсыт, ос яныг хо̄нтлан ва̄рмаль о̄вылтахтас. Хум хо̄тпат пуссын хо̄нтлуӈкве ке̄тве̄сыт. Оматэ̄н хо̄тал палыт рӯпитым яласас. Хультум ма̄хум янгема̄не тэ̄пканыт хилсыт, пум са̄грысыт, кӯпнат харттыгласыт. Ма̄нь пыгрищит о̄с ве̄рмхатнэ̄ныл мус яныг хо̄тпатн нё̄тсыт, та̄н лувыл яласым рӯпитасыт. Ма̄хум ёмас маснут торыӈыщ ат о̄щсыт, ня̄рло̄мтыл манос хащлум маснутыл масхатым тох та о̄лсыт. Тэ̄нутныл картёпка ос сэ̄мыл коласныл ва̄рим ня̄нь о̄щсыт. Таквсы ня̄врамаквет ханищтахтуӈкве атыглаве̄сыт. Толя о̄выл та̄л школан ат вуйвес, сака талкква пыгрищиг о̄лыс. Та̄л ювле хультум юипа̄лт, ханищтан нэ̄н ка̄салавес ос оматэ ла̄ввес: "Пыгрищин ня̄рло̄мтыл ха̄йтыгты, маснутта̄л ханищтахтуӈкве щар ат выглум". Маныр ва̄руӈкве, то̄нт суп ю̄нтнэ то̄р нэ̄мхо̄т ат тыналавес, тувыл аквты олн о̄с э̄ри. То̄нт оматэ̄н ня̄врамаге ёт во̄рн сӯйпил ва̄туӈкве минасыт. Кит хо̄тал сыс та̄н 200 литра са̄вит пӯщка сӯйпил ва̄тсыт. Рыбкоопн тотсаныл ос то̄р ёвтнэ ма̄гыс пе̄нтсаныл. Тувыл оматэ̄н э̄т котиль мус супыл та ю̄нтвес. А̄лпыл Толик ща̄гтым школан та минас. О̄выл та̄лытыт тав ёмащакв, ла̄тыӈ хӯнтлым ханищтахтас. Атыт классыт ня̄врамыт Ягодинский школан тотыглаве̄сыт. Хо̄т класс а̄стлам юипа̄лт Анатолий Ханты-Мансийск ӯс педучилищат ханищтахтуӈкве номсыс. Тув миннэ ма̄гыс тав юрт пыге ёт катерн во̄вхатсы̄г. То̄нт катерыт на̄йивыл па̄лтыглым яласасыт, тэ̄н нё̄тнэ ма̄гыс тув вуйвесы̄г. Конда я̄ хосыт миннэ̄ныл сыс та̄н са̄в щёс па̄гпӯхталасыт ос на̄йив та̄лттысыт. Э̄ти по̄лям ке̄р люкын пиным на̄йив тармыл хуясы̄г. Ханты-Мансийскан ёхтуме̄т Анатолий э̄лаль ханищтахтуӈкве ат вуйвес. Ла̄ввес, тыт то̄ва Кауртаевыт ла̄тыӈ ат хӯнтлын хо̄тпат, таима̄гыс юв та ке̄твес. Пыгрищ та̄рвитыӈ лё̄ӈхыл ювле та минас. Кондинский па̄вылн миннэ̄тэ мус пормасыт тотыглан на̄йиӈха̄пн акв матросн вуйвес. Толя тав армейский э̄нтапыл мистэ, ты э̄нтап тав кина суссылтан хумн мӯйлупта̄лвес. Лё̄ӈхыт сэ̄мыл ня̄нь таим ос нас вит аим пыгрищ па̄влын ёхтыс, ос тыгыл э̄лаль Ягодный па̄влэ мус хотмус минуӈкве э̄рыс. Та порат во̄тыӈыг е̄мтыс, раквуӈкве патыс ос я̄ хумпыӈыг е̄мтыс. Пыгрищ кон хультыс ос лув колт рӯпитан о̄йка Григорий Кауртаев палт во̄вхатас. Таитэ акв ла̄глыӈ хумыг о̄лыс, лув колт колнак о̄ньщис. Анатолий тот хӯрум э̄т хӯлыс. Э̄ти колхоз тэ̄пканын ке̄тыглаве, картёпка но̄ххилы ос таитэ̄ныл тэ̄пъяласы̄г. Тувыл пыгрищ Ягодный па̄выл мус ла̄глыл минуӈкве кусыс. Лиственничный па̄выл мус ёхтыс, тувыл э̄лаль минас ос во̄рт а̄латы хоттыпыс. Э̄ти Лиственничныйн ювле ёхтыс, тот акв колн э̄т хӯлуӈкве во̄вхатас. А̄лпыл Ягодный мус катер минас, тув ӯнттувес ос тащирыл юв та ёхтыс. Юн школан 7 классын э̄лаль ханищтахтуӈкве вуйвес. Та̄л ханищтахтаме юипа̄лт Анатолий Прокопьевич Ленинград ӯсн ханищтахтуӈкве ке̄твес. Ос ты о̄вылтыт мо̄т щёс тах хансэ̄гум. Ань ос ма̄н таве 80 та̄лэ то̄влум кастыл янытлылӯв! Са̄в та̄л пуста̄гыл э̄лаль вос о̄лы, ма̄ньлат хо̄тпат тав нуплэ ро̄влахтым та̄ксарыг вос яныгме̄гыт, рӯтанэ̄н ӯргалым, э̄руптым вос о̄ньщаве.

1109 2015. 10. 09. Светлана РОМБАНДЕЕВА

Ма̄щтыр а̄гирищ Ты хурит по̄слым а̄гирищ Мадина Исенова Сургутский район Лянтор ӯст о̄лы. Тав китхуйплов та̄лэ то̄влыс, хо̄тыт классыт ханищтахты. Тӯяг Ханты-Мансийск ӯст ма̄щтырлахтан ня̄врамыт ма̄гыс конференция ва̄рыглавес, тав та порат тыг ёхталас. Ань казах ма̄хум пе̄с йис та̄гыл войлокыл ковёр хумус ва̄ре̄гыт, тав таи суссылтас, мастеркласс ва̄рыглас. Янгема̄не тав ётэ рӯпитасыт, таве̄н нё̄тсыт. Ва̄рум ковёраныл татем нё̄тнэ̄г тэ̄лыс. Мадина тох ла̄выс: «Тамле ковёрыт ам Казахстан ма̄т Астана ӯс музейт ка̄саласум. Тув акванатым тамле пормасыт са̄всыр щирыл ва̄рим о̄лэ̄гыт, татем нё̄тнэ̄т. А̄нум сака пӯмыщ о̄лыс, та̄наныл маттем та сунсыгласанум. Тувыл тамле ут ва̄руӈкв Лянтор ӯст о̄лнэ «Школа рукоделия» колт ханищтахтуӈкве патсум. Тот ма̄нь ут ва̄рсум, ань ос тыт татем яныг ковёр капай тэ̄лыс. А̄нумн са̄в хо̄тпа нё̄тсыт, та̄нанылн пӯмащипа ла̄тыӈ ла̄ве̄гум, таве амттем ва̄руӈкве хунь ве̄рмынувлум».

1109 2015. 10. 09. Тамара МЕРОВА

Та̄н стиханылт таквсы пора янытлэ̄гыт Ты э̄тпос хӯрмит щислат Ханты-Мансийскат о̄лнэ ма̄хум нэ̄пак ловиньтан колт стихыт хаснэ хо̄тпат ёт акванхо̄нтхатыгласыт. Литература та̄л кастыл тамле тэ̄лат Югра янытыл са̄в ма̄т ва̄рыглавет. Ты э̄лыпа̄л хо̄талыт та̄н Советский ӯсн ялсыт, тыгыл э̄лаль Сургут нупыл ялэ̄гыт. Ос ань яласан ва̄рмаляныл та̄н таквсы пораг ла̄вияныл. Мӯй ма̄хум э̄лыпа̄лт Владимир Волковец, Советский ӯсныл ёхталам хум, ос Ханты-Мансийскат о̄лнэ Любовь Миляева, Вадим Орлов, Светлана Динисламова ос Павел Черкашин та̄нки стиханыл ловиньтасаныл. Та̄н пуссын таквсы пора стиханылт янытласыт. Ты порат хумле са̄йтыл та̄н о̄лсыт, манос ма̄хум ёт маныр накыт е̄мталэ̄гыт, таит са̄всыр щирыл мо̄тмо̄т ла̄тӈыл та̄н хассаныл. Владимир Волковец акв ма̄нь пӯмыщ потыр ловиньтастэ. Вадим Орлов гитарал са̄ӈквылтас ос э̄ргыт э̄ргыс, Светлана Динисламова ма̄ньщи ла̄тӈыл стиханэ ловиньтасанэ, Любовь Миляева ос Павел Черкашин рущ ма̄хум янытлан о̄вылтыт мощ потыртасы̄г. Та̄н акван ат потыртахтыгласыт кос, ос ка̄сыӈ писатель са̄т стихыт щё̄питам ос таит ловиньтасанэ. Тувыл стихыт хӯнтлам ма̄хум та̄наныл са̄всыр ва̄рмалит о̄вылтыт китыгласаныл. Акв китыглахтын ла̄тыӈ юипа̄лт та̄н та щирыл ювле ла̄всыт: «Писателиг е̄мтнэ хо̄тпаг о̄луӈкве ма̄н ат номсысӯв. Та щирыл та о̄лыглы, ань ка̄сыӈ хо̄тпа такви мо̄т рӯпата ва̄ри, ос ты халт номсахтым матыр потрыт манос стихыт та хансы». Нэ̄пак ловиньтан колт са̄в ма̄ньлат а̄гитпыгыт ань атхатыгласыт, та̄наныл тамле потрыт хӯнтлуӈкве пӯмщиг о̄лыс.

1109 2015. 10. 09. Светлана РОМБАНДЕЕВА

Нэ̄пак ловиньтан колнак Ха̄льӯс район Восыӈтӯр па̄выл школат нэ̄пак ловиньтан колнак о̄лы. Тот Роза Семёновна Новьюхова рӯпиты. На̄н ань э̄лаль тав потре ловиньтэлы̄н. – Ловиньтан нэ̄пак ма̄н са̄в о̄ньще̄в. То̄ванакт э̄рнэ нэ̄пак кисмае̄в, а̄тим те, школа кӯщай нэ̄в Татьяна Валерьевна та̄ра хасылты, тотаве̄в. Ня̄врамыт ханищтахтан нэ̄пакытыл тыт мыганув, ты ма̄гыс олн ат ойтэ̄гыт. Э̄рнэ тетрадит тай та̄нти ёвтэ̄гыт. Соссаӈ мир урыл нэ̄пакыт о̄с о̄ньще̄в. 5, 6 ос 7 классытыт ам ма̄ньщи ла̄тыӈ урок ханищтэ̄гум. Ня̄врамыт ханищтахтуӈкве а̄стынэ̄ныл юипа̄лт ма̄ньщи ла̄тыӈ урокув ущ о̄вылтылӯв, тав ань факультативыг ла̄ваве. Воссыг ты а̄ти, сакати тох ханищтэ̄гыт. Ань йис ня̄врамыт ловиньтан нупыл тэ̄ланыл а̄тим. Акваг ищхӣпыӈ ут нупыл сунсым ӯнлэ̄гыт. Таима̄гыс ам нэ̄пак ловиньтан колнакт са̄всыр конкурсыт, викторинат ва̄рыглэ̄гум. Сунсэ̄гум, та̄нанылн пӯмыщ, пуссын тыг атхатэ̄гыт, аквъёт ловиньтэ̄в, матыр хансэ̄в. Тувыл матарыл мӯйлуптыянӯв. – Роза Семёновна, наӈ хо̄т самын патсын? – Ам Неремово па̄вылт самын патсум. Омам Нина Игнатьевна Чукопеликова, ма̄ньщи нэ̄, 1935 та̄лт Кульпас па̄вылт самын патыс. А̄тям Семён Иванович Новьюхов, 1936 та̄лт самын патыс, Неремово па̄вылныл о̄лыс. Омам яныг вит порат ты ма̄н рӯпитаӈкве ёхтыс, а̄тям ёт акванхо̄нтхатасы̄г, тыт акваг та хультыс. Лов та̄лум ущ то̄влыс, тэ̄н хотталь щалтсы̄г. Ат каӈк о̄щсум, акв увщи. Каӈканум ань пуссын а̄тимыт. Увщим Ягримт о̄лы, а̄ти сака хосат тув ва̄нтлыс. Восыӈтӯрт хус арыгтем та̄л фельдшерыг рӯпитас. О̄йкам соссаӈ хо̄тпаОлег Александрович Лельхов. Ме̄н нила а̄гипыг о̄ньщиме̄н. Яныг пыгме̄н ще̄мьяӈыг е̄мтыс, китыт пыгме̄н онтоловит классын минас. Яныг а̄гиме̄н атыт классыт ханищтахты, ма̄нь а̄гиме̄н хӯрмит та̄лэ то̄влыс, садикын яланты. Ам юил ялантым Санкт-Петербург ӯст А. И. Герцен нампа университетт ханищтахтасум. 2007 та̄лт культуролог ос ма̄ньщи ла̄тыӈ ханищтан учитель дипломнэ̄пакыл майве̄сум. Ты школат ам 2005 та̄л па̄сныл рӯпитэ̄гум. Па̄вылт о̄луӈкве а̄нум сака ёмас, коны ма̄тэ сыстам, ня̄врамыт ёнгасан ма̄гыс площадкат ва̄рве̄сыт. Школав йильпи, яныг спорткомплекс ӯнттувес. Туп таи та̄рвитыӈ – рӯпата а̄тим, са̄в хо̄тпа рӯпата та̄л о̄лэ̄гыт. Роза Семёновна рӯпитан колнаке̄т хорамыӈ лӯпта са̄в о̄лы. Тав ла̄ви, са̄всыр лӯптат акванаты, янмалтыянэ, хусапсовыт тӣвырн ла̄ккваӯнтталыянэ. Ты тэ̄ла сака э̄руптытэ. Со̄ль, щар татем нё̄тнэ̄г сусхатэ̄гыт. Ты я̄тил ма̄ньщи нэ̄кве̄н ма̄н са̄в ёмас, сымыӈ ла̄тыӈ ла̄ве̄в. Колта̄глэ со̄тыӈыщ, щуниӈыщ вос о̄лы! Пус ка̄т, пус ла̄гыл!

1109 2015. 10. 09. Тамара МЕРОВА

Тав нё̄тнэ хансат по̄слы Сӯкыр э̄тпос ва̄т нупыл атыт щислат Ханты-Мансийскат «Торум Маа» нампа музейт акв суссылтап щё̄питавес. Тав «Орнаментированный мир Евдокии Александровны Белявской» намаявес. Евдокия Александровна ханты э̄ква, округ янытыл са̄в ма̄хумн ва̄ве. Тав Ха̄льӯс район Саранпа̄выл школат математика ханищтам нэ̄г 36 та̄л рӯпитас. Тот ня̄врамыт ханищтаме коныпал та̄наныл сакныл хартуӈкве ханищтасанэ. О̄влэ̄т та̄н ханты пормасыл пӯмщалахтын ос потыртан ма̄гыс акванатхатыгласыт. Соссаӈ ня̄врамытын матыра̄ти ва̄ӈкве сака пӯмыщ о̄лыс. Тувыл творчество кружокыл ва̄рве̄сыт. Тот та̄н нё̄тнэ олнкасыт, ка̄т хорамтан ква̄лгыт сакныл хартсыт. Тув сыресыр хансат манос та̄нки наманыл акв хоты харпа сакныл сагуӈкве ханьщувласыт. Ва̄рум утаныл суссылтапыг щё̄пита̄лсыт. Ётыл школат ня̄врамыт ма̄гыс я̄нас урокыт ва̄рве̄сыт. Ты рӯпататэ Евдокия Александровна акваг э̄лаль тотыстэ. Тав ханты ма̄хум хансат сыресыр щуртмилыт, по̄сыт хумле щирыл о̄лэ̄гыт, таит пуссын та̄рапаттысанэ. Математика ёмас ва̄нэ̄тэ ма̄гыс тав хансат хурияныл ма̄кыг о̄лнэ̄ныл щирыл нэ̄пакн по̄слысанэ ос та̄наныл сакныл хумус хартуӈкве ро̄ви таблицат щё̄питас. Ты о̄вылтыт тав 2012 та̄лт «Нестандартное плетение бисером» нэ̄пак та̄ратас. Ос 2005 та̄лт та̄ратам нэ̄паке «Этнотворческая лаборатория» намаим о̄лы. Тот сасныл ва̄рнэ пормасыт тармыл хансат хумус по̄славет ос тув ва̄равет – пуссын суссылтаве ос потрыг хансым о̄лэ̄гыт. Ханты ма̄хум пе̄с хансаныл ёмщакв ханищтаме юипа̄лт, Евдокия Ерныхова (ты такви а̄ги о̄парищ наме) йильпи хансат по̄слуӈкве ханищтахтас. Пе̄с хансат са̄всыр ӯит, йӣвыт хурияныл по̄слым о̄лэ̄гыт, ос мо̄т хансанэ̄т э̄лумхо̄лас манос ӯй матыр ва̄рнэ̄т щирыл по̄слымат. Сак хартнэ коныпал э̄ква са̄с, нуй, сов тармыл хансат по̄слы манос ю̄нты. Ань ты рӯпата хумус ма̄щтырыг ва̄руӈкве э̄ри, тав суссылтапын ёхталам мӯй ма̄хумн потыртас. Сов тармыл хансат по̄слуӈкве ос та̄наныл яктуӈкве, ётыл хумус аквансо̄лтуӈкве – ты рӯпата ёмащакв ва̄ӈкве э̄ри. Ань то̄ва хо̄тпат тыи ат ва̄нэ̄ныл ма̄гыс пормасаныл нё̄тта̄л ва̄рияныл. Аквансо̄лтым кит оспа хансаг аквхурип а̄тимыг, акватэ яныгнуве̄г сусхаты, мо̄танэ ма̄ньнуве̄г о̄лы. Сов манос нуй тармыл ханса по̄слум юипа̄лт та по̄слым щуртмилныл ю̄нтнэ ма̄гыс аквкит сантиметр ювле хультуптаӈкве э̄ри ос тувыл ущ яктуӈкве ос совн манос нуйн ю̄нтуӈкве. Тащирыл я̄ӈк манос сэ̄мыл оспаӈ хансаг акв янытыг тэ̄лэ̄г. Евдокия Александровна такви уре̄т тох потыртас: «Ам яныг ще̄мьят яныгмасум. А̄тям Александр Григорьевич Ерныхов са̄лы о̄щнэ хумыг о̄лыс, ёмщакв рӯпитаме ма̄гыс акваг э̄сгувес, войнан тотыглавес. Ща̄нюм Евдокия Петровна ма̄щтырыг маснутыт ю̄нтыс, па̄ля пуныл сэ̄тап ва̄рыс ос хорамыӈ щӯлкиныт сагыс. Ам са̄всыр пормасыт сагуӈкве, ю̄нтуӈкве омамныл ос Катерина увщимныл ханищтахтасум. Тэ̄н нё̄тнэ̄г ю̄нтум маснутанэ̄ныл ам акваг пӯмщалахтасум ос ты маснутыл масхатаӈкве сака тахсум. О̄выл супум са̄т классыт ханищтахтамум порат амки ю̄нтыслум. Ма̄ньта̄гыл ма̄щтырлан наканум Владислав пыгумн э̄лаль тотавет». Евдокия Александровна Белявская школат ёмащакв рӯпитаме ма̄гыс «Отличник народного просвещения РСФСР» яныг нам о̄ньщи. 1967 та̄лт Сургут ӯсн ханищтапн ялыс ос тот «Лучший математик округа» намыл майвес. Тав пуста̄гыл вос о̄лы, соссаӈ ма̄хум пе̄с наканыл э̄лаль вос тотыянэ.

1109 2015. 10. 09. Людмила ТЕТКИНА

Хо̄нтаӈ э̄кват пе̄с ва̄рмалит э̄лаль тотэ̄гыт Яныгпа̄ла хо̄тпат янытлан хо̄тал кастыл Урай ӯст рӯпитан «Возрождение» нампа клуб урыл потыр ам хансэ̄гум. Та ӯст о̄лнэ ма̄ньщи ос ханты яныгпа̄ла хо̄тпат тув ялантэ̄гыт. Лидия Тихоновна Мотышева кӯщаиг тот о̄лы. Маныр рӯпата та̄н ва̄ре̄гыт, та урыл таве китыгласлум. Тав ос ювле тох потыртас: – «Возрождение» нампа клуб онтолов та̄л рӯпиты. Ма̄н ань ӯст о̄лнэ «Совет ветеранов» нупыл ловиньтахтэ̄в. Та̄н ётаныл акваг рӯпитэ̄в, са̄всыр ялпыӈ хо̄талыт, концертыт ос мо̄т ва̄рмалит аквъёт ва̄рыглэ̄в. Урай ӯст са̄в ма̄ньщи хо̄тпа о̄лы. Та̄н пуссын Кондинский район янытыл тыг о̄луӈкве ва̄нтласыт. Ам Половинка па̄вылныл о̄лэ̄гум. Рӯпата кинсым Урай ӯсн хосат та̄гыл ёхтысум. Мо̄т ма̄хманув о̄с аквта щирыл тыг о̄лмыгтасыт. Рӯпатаныл по̄хын хунь минасӯв, пуссын «Совет ветеранов» нампа колн ялантаӈкве патсӯв. То̄нт ма̄нки халувт ва̄йхатсӯв. Ос та порат ма̄н ты организация ва̄рыслӯв ос «Возрождение» намыл пиныслӯв. Ань ты клубн 25 э̄лумхо̄лас яланты. Сакныл хартуӈкве, ю̄нсхатуӈкве, ма̄ньщи йӣквыт йӣквуӈкве ос э̄ргыт э̄ргуӈкве ханищтахтасӯв. О̄влэ̄т ма̄навн Людмила Митрофановна Анямова сака ёмащакв нё̄тыс. Тав ма̄нав щаквщуӈкве ханищтасанэ. Ты нэ̄ Ха̄льӯс район Ло̄пмус па̄вылныл о̄лы. О̄влэ̄т ма̄н палтув акваг ёхталас. Тувыл хум ва̄рыс, ня̄врамыӈыг е̄мтыс, ань ма̄н ётув рӯпитаӈкве щар ат а̄лыми. Нина Демьяновна Тихонова о̄с ёмащакв нё̄ты. Ты э̄ква ма̄ньщи пе̄с йис ва̄рмалит урыл са̄в ва̄г. Э̄кват э̄ргуӈкве ос йӣквуӈкве ханищтасанэ. Ма̄н ань «Куренька», «Хӯл алыщлан хо̄тпа йӣкв» ос мо̄т йӣквыт йӣквуӈкве хасэ̄в. Ма̄нки ма̄гсылув ма̄ньщи супыт ю̄нтсӯв. Тувыл тамле маснут ю̄нтуӈкве ат ха̄сэ̄в, хумус ве̄рмысӯв, тох та ва̄рсанӯв. Фаина Владимировна Хлопова ос ма̄ньщи ла̄тӈыл э̄ргуӈкве ёмащакв ха̄сы. Альбина Алексеевна Шабурова ос Светлана Владимировна Карнаухова тэ̄нки стиханэ̄н ялпыӈ хо̄талытт ловиньта̄лэ̄г. Урай ӯст о̄лнэ музей, нэ̄пак ловиньтан колт ос мо̄т организацият ёт акваг рӯпитэ̄в. Округув янытлан хо̄тал кастыл соссаӈ ма̄хум о̄лупсаныл урыл тот потыртэ̄в. Ня̄врамыт а̄канит ю̄нтуӈкве ос сакныл хорамыт хартуӈкве ханищтыянӯв. Нэ̄квет янытлан хо̄талт акванатхатыглэ̄в, э̄кват янытлыянӯв. Ань ка̄сыӈ та̄л «Ӯринэ̄ква хо̄тал» округувт янытлаве. Ма̄н тамле ялпыӈ хо̄тал ӯст о̄с ва̄рыглэ̄в, ма̄ньщиянув, хантыянув ос ӯст о̄лнэ мир ты ялпыӈ хо̄талн во̄виньта̄лыянӯв. Нина Демьяновна Тихонова пе̄с порат ма̄ньщи хумус ты ялпыӈ хо̄тал янытласыт, та урыл потырты. Ма̄н ос ня̄врамыт са̄всыр касылыл ва̄рыглыянӯв. Победа хо̄тал янытлан кастыл о̄с са̄всыр рӯпата ва̄ре̄в. Акв та̄л Евра па̄вылн ялсӯв. Та па̄вылт хосат та̄гыл нэ̄мхотьют ат о̄лы. Та ма̄т туп яныг а̄хвтасыӈ па̄рт тӯщтым о̄лы, войнат хо̄нтлам хо̄тпат наманыл тув хансым о̄лэ̄гыт. Ты памятник ма̄н хотщё̄питаслӯв, о̄льпыл сартыслӯв, хорамыӈ лӯптат тув пинсӯв. Ос та по̄хат йӣвыт ӯнттысӯв, ань ты ма̄ ӯргалым о̄ньщилӯв. Хо̄нтлаӈкве ялум яныгпа̄ла ма̄ньщи манос ханты хо̄тпа Урай ӯст ань а̄тим. Хӯрум яныг э̄кват «Труженик тыла» нам о̄ньще̄гыт. Соссаӈ ма̄хум янытлан хо̄тал о̄с янытлылӯв. Мо̄лты та̄л во̄ртур э̄тпос 9 хо̄талэ̄т Ольга Александровна Фомичёван Силава па̄вылн во̄виньта̄лвесӯв. Урай ӯст, Половинка ос мо̄т па̄влыт о̄лнэ ма̄ньщит ос хантыт пуссын тот мӯйлысыт. Ма̄н тот э̄ргысӯв, йӣквсӯв. Урай ӯст «Дары осени» нампа суссылтап ка̄сыӈ та̄л таквсы порат ва̄рыглаве. Тот ма̄н тэ̄пкант янмалтым тэ̄нутанӯв суссылтыянӯв ос тыналыянӯв. Тот солвалыӈ хӯл, пилыӈ ня̄нь ос мо̄т тэ̄нут пасанын щё̄питалэ̄в. 2014 та̄лт «Родная земля кормилица» нампа номинацият но̄хпатсӯв ос кит со̄тыра солко̄вил майвесӯв. Еремей Айпин, округ Дума депутат, ма̄н организациявн мо̄лты та̄лт олн майлас. Ань газета щирыл таве̄н ма̄н яныг пӯмащипа ла̄тыӈ ке̄тэ̄в, тав ма̄навн сака ёмащакв нё̄тыс. Урай ӯст ма̄н ань ва̄ве̄в, са̄всыр ялпыӈ хо̄талын акваг во̄виньта̄лаве̄в, ат ёрувлаве̄в. Ма̄навн тамле рӯпата туп ща̄гт тоты.

1109 2015. 10. 09. Светлана РОМБАНДЕЕВА

Маори мир о̄лупса Туи порат о̄йттур э̄тпост Ханты-Мансийск ӯс ляпат ма̄ньха̄пыл каснэ ва̄рмаль о̄лыс. Та хо̄талытт ма̄н округувн э̄лы хо̄н ма̄ныл са̄в хо̄тпа ёхталас. Та̄н халанылт Новая Зеландия ма̄ныл маори нэ̄ Дорин Беннет о̄лыс. Тав ма̄ньщи ос ханты ма̄хумн «Югра лылыеп» ассоциациян потраман ма̄гыс во̄выглавес. Ма̄н ма̄хманув таве сака ӯрсаныл, маттем та китыгласаныл. На̄н ань э̄лаль Дорин Беннет потре ловиньтэлы̄н. – Ма̄н маори мирув Новая Зеландия ма̄т соссаӈыг о̄лы. Ма̄н мо̄йтанувт ос э̄рганувт на̄н Э̄ква пыгрищин хурип хум о̄с ӯлылаве, янытлаве. Ам ань тыт на̄н ляльтын сунсэ̄гум, на̄н ётын потыртэ̄гум, ос номсэ̄гум, пе̄с йис та̄гыл ань ты хо̄тал мус ма̄н о̄лнэ щиранув щар аквхурипат. На̄н о̄с я̄ ва̄тат о̄лэ̄гын, Витхон пӯрлан хо̄тал ва̄рыглэгын. Ма̄н, маори мир, о̄с аквтох – ма̄витув янытлэ̄в, ялпыӈ хо̄талыт ва̄рыглэ̄в, хӯл алыщлэ̄в. Маснут ма̄нти ка̄тыл ю̄нтэ̄в, матарыл хорамтыянув. Ма̄н ма̄вт 4 миллион арыг хо̄тпа о̄лы, са̄всыр мирыт халт маори ма̄хум туп 12-13 % са̄вит. То̄ва ма̄хманув яныг ӯсытыт о̄лэ̄гыт, то̄ванув ос на̄н са̄лыӈколыӈ ма̄хманын хольт ё̄рнколт о̄лэ̄гыт. Ма̄н ща̄нь ла̄тӈув школатыт ос университетыт ханищтаве. Образование тэ̄ла палт рӯпитан кӯщаянув ва̄ганыл, ма̄н та ма̄т соссаӈ мирыг о̄лэ̄в, таима̄гыс та̄н ма̄навн са̄в нё̄тмил ва̄ре̄гыт, маори ла̄тӈув ма̄ньта̄гыл ханищтаве. Ма̄н колта̄гланув э̄лнаӈ са̄в ня̄врамыӈыг о̄лсыт, акв колта̄гылт лов арыгтем ня̄врам самын паты. Ань туп китхӯрум о̄ньще̄гыт. Ам онтоловиттыг самын патсум, амти ос ань кит ня̄врам о̄ньще̄гум. Ме̄н Америкат о̄лнэ хум Ларри Джеймс Машу Белое Перо (чероки нампа индейский племя вождь) ёт «Голос коренных народов» нампа ратива программа ва̄рсуме̄н. Тот ка̄сыӈ соссаӈ хо̄тпа такви ща̄нь ла̄тӈе̄тыл потыртаӈкве ве̄рми. Ме̄н ма̄ янытыл о̄лнэ са̄всыр ма̄хум ёт (сыресыр племят ёт) потыртыме̄н, о̄лупсаныл урыл пӯмщалахтыме̄н. Ма̄хум та̄нти культураныл, ла̄тӈаныл, ма̄витаныл ос матыр та̄рвитаныл урыл потыртэ̄гыт. Та̄н потраныл ме̄н ративан ва̄риянме̄н, ма̄ янытыл суйтэ̄гыт. Матарыл нё̄туӈкв э̄ри те, нё̄тыянме̄н. Ты программа Интернет хосыт кинсэлы̄н, тот ловиньтэ̄н, хӯнтлэ̄н. Ма̄ньщи ос ханты ма̄хум Дорин Беннет нэ̄н яныг пӯмащипа ла̄тыӈ ла̄всыт. Ты я̄тил сымыӈ нэ̄ такви На̄й-О̄тыранэ̄н вос ӯргалаве, пус ка̄т, пус ла̄гыл вос о̄лы!

1109 2015. 10. 09. Тамара МЕРОВА

Та̄н ма̄ньщи ла̄тӈув хӯлыглыяныл Мо̄лал Венгриян ялмув порат акв венгр ойка ёт ва̄йхатасӯв. Тав ма̄н ётув рущ ла̄тӈыл потыртаӈкве патыс, ты мус ла̄тӈанэ тав мощ мо̄т щирыл ля̄галасанэ. Ма̄н э̄лаль пӯмщалахтуӈкве патсӯв, хотыл тав тув ёхтыс. О̄йка э̄лаль тох потыртас: – Ам намум Миклош Антоненко. Ам Закарпатье Украина ма̄ныл тыг ёхтысум. Та ма̄т йис та̄гыл 150 со̄тыра са̄виткем венгр хо̄тпат о̄лэ̄гыт. Ам Ужгородский национальный университетыт венгерский кафедрат ханищтан хо̄тпаг рӯпитэ̄гум. Тот XX нот палыт венгр ма̄хум хансум нэ̄паканыл, пе̄с мо̄йтаныл урыл потрыт ловиньтэ̄гум ос эстонский рӯт ма̄хманув ла̄тӈыл потыртаӈкве студентыт ханищтыянум. Ма̄н ма̄ньлат хо̄тпанув пуссын ща̄нь ла̄тӈыл ёмащакв потыртэ̄гыт. Ма̄нь па̄влыт о̄лнэ ма̄хум пе̄с наканув ва̄ганыл, та̄наныл ӯргалыяныл ос э̄лаль тотыяныл. – Наӈ тамле конгрессын ва̄тихал яланта̄лэ̄гын. Наӈ ма̄гсылын маныр пӯмащ тот о̄лыгла̄лы? – Ам финноугор рӯт ма̄хум акванатхатыгланэ̄ныл порат то̄внакт тув яланта̄лэ̄гум. 2006 та̄лт культурологыт мирхал конференциян Дебрецен ӯсн ялсум, 2007 та̄лт рӯт ма̄хманув ма̄н палтув во̄виньта̄лсанӯв. Ма̄н Арво Валтон, мирн ва̄нэ эстонский о̄йка, хансум потранэ о̄вылтыт потыртасӯв. То̄нт Удмуртияныл, Финляндияныл, Эстонияныл ёхталам мӯй хо̄тпат Арво хансум потранэ щирыл са̄в пӯмыщ тэ̄лат та̄рапаттысаныл. О̄йка ань ты конференциян о̄с ёхталас, тахольт ва̄щинтахтасме̄н. Тамле хо̄нтхатыглан ва̄рмальн акванатхатыгланэ̄в сыс ма̄н, рӯтыг о̄лнэ мирыт, пуссын ма̄нки халувт ва̄йхатэ̄в, матыра̄ти пе̄с наканув пӯмщалыянӯв, ща̄нь ла̄тӈанув акванро̄выглыянӯв ос о̄лупсав та̄рапаттылӯв. Тувыл пуссын ты ва̄рмалит а̄рталан юипа̄лт ма̄нки о̄щнэ та̄рвитанув манос нас матыр тэ̄лат э̄лаль ва̄руӈкве халувт нё̄тхатэ̄в. Ма̄н ос мо̄т хо̄н ма̄т о̄лэ̄в, тот сыресыр та̄рвит ва̄рмалит е̄мталэ̄гыт. Ань та̄наныл номтыӈыг ва̄рнэ ма̄гыс ма̄н мо̄т ма̄хум нупыл сунсэ̄в, та̄н тэ̄ланыл урыл хӯнтлым ма̄н ханищтахтэ̄в ос о̄лупсав ёмщакв нуве̄г ва̄рилӯв. Тувыл тыт рӯт ма̄хманув пуссын акванюрщхатэ̄гыт, акваннё̄тхатым са̄всыр мӯтраӈ номтыт нэ̄пакн хансэ̄гыт. Ка̄сыӈ хо̄тпа тыгыл посыӈ, та̄к номтыл ювле мины. Таима̄гыс акванатхатнэ ва̄рмалит ма̄навн сака э̄ре̄гыт. Амки потрыт ат хансэ̄гум, са̄всыр писателит та̄н потраныл толмащлыянум. Ань Арво Валтон хансум хо̄т нэ̄паканэ толмащласанум, кит нэ̄пакыг украинский ла̄тӈын ос кит нэ̄пакыг венгр ла̄тӈын хассагум. Тувыл са̄всыр статьят амки хансэ̄гум, ос ма̄ньлат хо̄тпат ханищтэ̄гум. – Ам ва̄глум, наӈ акв ма̄ньщи ративапередача урыл студентытн потыртасын. Ань ты о̄вылтыт ма̄навн аквкит ла̄тыӈ ла̄ве̄н. – Ма̄н кафедравт унгорология (венгроведение) йильпи ханищтан ва̄рмаль ва̄рыглаӈкве патвес. Тот а̄гитнпыгытн венгр пе̄с ла̄тӈе урыл потыртэ̄в, ма̄хумн пе̄с мо̄йтыт, потрыт ловиньтэ̄в. Ос ща̄нь ла̄тӈув щирыл ляпа рӯтыг о̄лнэ мирыт ла̄тӈаныл палт а̄рталылӯв. Финноугристика ва̄рмалитыл пӯмщалахтуӈкве та̄н сака таӈхе̄гыт. Та̄нки ищхӣпыӈ ут хосыт сыресыр ля̄ххалыт кинсэ̄гыт. Венгрыт, ма̄ньщит ос хантыт ёт ляпа рӯтыг о̄лнэ̄в ма̄гсыл та̄н о̄с ва̄ганыл. Ам амки ма̄ньщи ла̄тӈыл китхӯрум ративапередачат хӯнтлысанум. Акв передачат Светлана Динисламова ща̄нь ла̄тӈыл хансум стиханэ ловиньтас. Ма̄н пе̄с пора ла̄тӈанув щар акванро̄ве̄гыт, аквтох потыр суянув акв ке̄мыл о̄лэ̄гыт. То̄ванакт палиг лап ке пантуӈкве, то̄нт со̄ль аквтупмат на̄н венгр ла̄тӈыл потыртэгы̄н. Студентанув ёт такем сымыӈыщ хӯнтлысӯв. –Миклош, ма̄навн сака пӯмыщ наӈ ётын потыртаӈкве о̄лыс. Наӈ ма̄н ма̄хманув о̄лупсатэ э̄лаль тотнэ рӯпатан ма̄гыс яныг пӯмащипа ла̄тыӈ ла̄ве̄в. Пус ка̄т, пус ла̄гыл! То̄рум ёт, О̄тыр ёт!

1109 2015. 10. 09. Тамара МЕРОВА

Ты хурит нупыл сунсым сыманув ща̄гтэ̄гыт «Торум Маа» музеит сыресыр хурит тагатым о̄лэ̄гыт. Ты ня̄врамыт та̄н по̄слум хурияныл. Ань ты хурит о̄вылтыт ма̄навн Ирина Ксенофонтова, музеит суссылтапыт щё̄питан нэ̄, ла̄тыӈ ке̄тыс: «Ты хурит ӯсувт о̄лнэ ня̄врамыт «Легенды «Торум Маа» нампа касыл ма̄гыс по̄слысаныл. О̄выл касыл ма̄н 2012 та̄лт ва̄рыгласлӯв. 2014 та̄лт ма̄н мо̄т касыл щё̄пита̄лыгласӯв. То̄нт са̄в а̄гирищпыгрищ та̄нки по̄слум хурияныл тыг ке̄тыгласаныл ос ма̄н та̄наныл мӯйлупсал мисанӯв. Ань ос касылт хурит ат номинация щирыл уртыянӯв ос но̄хпатум ня̄врамыт мӯйлупсал мыганӯв. Та̄н халанылт та̄ланыл щирыл касэ̄гыт. Соссаӈ ма̄хум о̄лупсаныл, пе̄с наканыл ёмщакв ва̄нэ̄ныл ман а̄ти, та щирыл уральтавет. По̄слым хурит пуссын ма̄н музеювт хультуптыянӯв. Ань ма̄н 54 по̄слым хурит акванатсанӯв ос са̄в ма̄тт суссылтаӈкв тах патыянӯв». «Торум Маа» музейныл ке̄тым ля̄ххал ма̄ньщи ла̄тӈыг Т. Мерован толмащлавес.

1109 2015. 10. 09. Светлана РОМБАНДЕЕВА

Ё̄паньщи ва̄ит ва̄рнэ пыгрищ Ты хурит Сургут ӯс пыгрищ Арсений Суконник по̄слым о̄лы (а̄гирищит халт лю̄ли). Таве̄н хӯрумхуйплов та̄л, нёлолов классыт ханищтахты. Арсений ка̄тыл ё̄паньщи ва̄ит (валенкат) ва̄руӈкве ха̄сы. Тӯяг Ханты-Мансийск ӯст ня̄врамыт ма̄гыс конференция о̄лме порат тав ты урыл аквкит ла̄тыӈ ла̄выс. – Ты тэ̄ла ам Сургут ӯст о̄лнэ Центр ремёсел колт ханищтаслум. Аквматнакт йильпи та̄л кастыл ам омагума̄тягум матарыл мӯйлуптаӈкве э̄рыс, номсахтуӈкве патсум, тувыл тамле ва̄иг ка̄саласум. Ханищтахтуӈкве патсум, ва̄руӈкве о̄вылтахтасум. Тувыл сунсэ̄гум, со̄ль, ё̄паньщииг ты тэ̄лсы̄г. Кит тамле пара ва̄рсум, омагумна̄тягумн мӯйлуптасагум. Та па̄сныл ё̄паньщит акваг ва̄руӈкве патсум, конференцият о̄лыгламаныл порат мастерклассыт ва̄рыгласум. Ты рӯпата а̄нумн сака мӯсты. Ам номсэ̄гум, ты сака э̄рнэ тэ̄ла, ё̄паньщит – ты ма̄к ре̄гыӈ ла̄гыл маснут.

1110 2015. 10. 23. Валентина УЗЕЛЬ

Нё̄ранув мус лё̄ӈхыт лов та̄л сыс тах ва̄равет Ты э̄тпос са̄тыт хо̄талэ̄т округ кӯщаюв Наталья Комарова Санкт-Петербург ӯсн яныг сапра̄нин ялыс, тот ма̄вой ос газ ёт Германия ос Россия ма̄ янытыл рӯпитан ма̄хум акванатыглаве̄сыт. Кӯщаюв ма̄н Нё̄ранув хилнэ урыл тот потыртас. Тав ла̄выс, ань ма̄к яныг тэ̄лаг тыи о̄лы – Нё̄рыт мус машинат яласан лё̄ӈх пинуӈкв э̄ри. Ягрим па̄вылныл Саранпа̄выл мус ва̄раве. Ты лё̄ӈх палытэ 260 ве̄рыста паты. Тувыл Нё̄ранув ляпат са̄всыр заводыт ӯнттавет. Та юипа̄лт те̄рлё̄ӈх ва̄руӈкв патаве. Ты те̄рлё̄ӈх Нё̄ранув хосыт пинаве, Карский ша̄рыщ ва̄татэ мус. Округ кӯщаюв ань Германия ма̄хум ты яныг рӯпатакапай ва̄руӈкв во̄всанэ. Лов та̄л сыс ты лё̄ӈхыг ва̄руӈкв э̄ре̄г. Ты рӯпата хунь а̄сты, то̄нт Нё̄ранувт но̄ххилнэ ма̄щунит ща̄рыщ хосыт ман те̄рлё̄ӈх хосыт хотталь та тотавет.

1110 2015. 10. 23. Валентина УЗЕЛЬ

Яныгхо̄тпат ма̄гыс касыл Ва̄т са̄грапнал э̄тпос ловит хо̄талэ̄т ма̄н округув 85 та̄лэ то̄влы. Ты ялпыӈ хо̄тал янытлан кастыл ань йильпи касыл ва̄раве, рущ ла̄тӈыл тамле намыл пиным о̄лы – «Моя судьба – Югорский край». Ты касылт туп яныгхо̄тпат касуӈкв ве̄рме̄гыт. Та̄н та̄нти о̄лупсаныл урыл хансум потраныл тув вос те̄тыяныл, хумус та̄н яныгмасыт, школат хумус ханищтахтасыт, хо̄т рӯпитасыт. Э̄рыӈ хотьютаныл ӯсыт ӯнттым порат рӯпитас. Ты потрыт ань таима̄гыс акванатавет, ма̄ньнув ма̄хум вос ва̄ганыл, ма̄н округувт мир пе̄с порат хумус о̄лсыт, хумус рӯпитасыт. Ты потрыт акванатнэ юипа̄лт та̄н нэ̄пакыг тах та̄ратавет. Яныг таквс э̄тпос о̄выл хо̄талэ̄т но̄хпатум ма̄хум наманыл ла̄вавет, та̄н ты пуссын Ханты-Мансийск ӯсн мӯйлуӈкв во̄вавет, са̄всыр пӯмыщ о̄лнэ ма̄н тотыглаӈкв патавет. Ань на̄н халынт яныгхо̄тпа те о̄лы, тав такви урыл на̄нан вос потырты. На̄н ос тав потре нэ̄пакн хансэлы̄н ос ты касылн те̄тэлы̄н. Ты адрес щирыл: Ханты-Мансийск ӯс; Дунин-Горкавич ӯсхулы, 1 кол; Департамент природных ресурсов и несырьевого сектора экономики. Ты ля̄ххалы̄г ма̄ньщи ла̄тӈыл Валентина Васильева хассаге.

1110 2015. 10. 23. Валентина УЗЕЛЬ

Ма̄н ма̄вт са̄всыр мирыт о̄лэ̄гыт Ма̄н округувт са̄всыр мирыт о̄лэ̄гыт. Ма̄н ма̄ньщи мирув, А̄с ма̄хум ос ё̄рн ма̄хум – туп ты хӯрум мир соссаӈыг тыт ла̄вавет. Мо̄т мирыт пуссын ётыл тыг о̄лмыгтасыт. Щар са̄в хо̄тпа Украина ма̄ныл ёхтыс – 42%, Средний Азияныл 35%, Закавказье ма̄ныл – 12 %. Ань пуссын мирыт ма̄нти халувт юртыӈыщ вос о̄лэ̄в, округ мирколт координационный совет са̄в та̄л рӯпиты. Ка̄сыӈ районт, яныг ӯст акв тамле советыт о̄с о̄лэ̄гыт. Ва̄тихал та̄н акванатыглавет, та̄нти та̄рвитыӈ ва̄рмаляныл урыл тот потыртэ̄гыт, э̄рнэ торыг ос халанылт нё̄тхатэ̄гыт. Ань ты э̄тпос атхуйплов хо̄талэ̄т яныг сапра̄нияныл о̄лыс. Ос ма̄хумн Ханты-Мансийск ӯсн минуӈкв щар ат э̄рыс, та̄н тина суссылтан то̄тап хосыт потыртасыт. Акв сыс пуссын яныг ӯсытт, районытт атхатам са̄всыр диаспора ма̄хум тина ва̄рнэ камеран аквано̄лтве̄сыт. Ка̄сыӈаныл такви ӯс ман район мирколт ӯнлынэ̄тэ порат пуссын мо̄т ӯсытт о̄лнэ кӯщаит ва̄санэ, та̄н ётаныл потыртаӈкв ве̄рмыс. Ханты-Мансийск ӯст ма̄к яныг кӯщаит ӯнлысыт – округ кӯщай ва̄ӈын хум Геннадий Бухтин, са̄всыр департаментыт кӯщаяныл. Ань та̄нти халанылт тамле ва̄рмаль урыл потыртасыт. Ма̄н округувн са̄в ма̄ныл мир о̄луӈкв ёхты. Та̄н са̄выӈпа̄лэ пуссын рущ ла̄тӈыл ёмащакв потыртаӈкв ат ха̄сэ̄гыт. Та̄н рущ ла̄тыӈ хумус ва̄ганыл, потыртаӈкв ха̄сэ̄гыт ман а̄ти, экзамен миӈкв ла̄вавет. Ты экзамен тынэ ат со̄тыра солко̄ви. Ат те мыганыл, та̄н рӯпата хо̄нтуӈкв ат ве̄рме̄гыт, нэ̄мхоталь рӯпитаӈкв ат вивет. Ханищтан ва̄рмаль департамент кӯщай нэ̄ Любовь Ковешникова ла̄выс, ань округувт мо̄т хо̄н ма̄ныл 3 со̄тыра 648 са̄вит ще̄мья тыг о̄луӈкв ёхтысыт. Та̄н 5 со̄тыра 350 ня̄врам о̄ньще̄гыт. Ты та̄л та̄н халанылт 5 ня̄врам школан ат вуйве̄сыт, та̄н рущ ла̄тыӈ щар ат ва̄ганыл, ат торгамтыяныл ос потыртаӈкв щар ат ве̄рме̄гыт. Щар са̄в Сургут усн ёхтыс – 1 со̄тыра 20 ще̄мья, Нижневартовск ӯсн – 609 ще̄мья. Ань ты ма̄хум ма̄гыс са̄всыр ханищтапыт ва̄равет, та̄н тот ханищтавет. Ос тув ты та̄л нэ̄мхотьют ат ёхтыс, 2013 та̄лт 16 хо̄тпа ёхталас, 2014 та̄лт – 3 хо̄тпа. Тув ялнэ ма̄гыс олн ойтуӈкв э̄ри, ул таима̄гыс ты ма̄хум тув ат минэ̄гыт. Акв о̄йка Нижневартовск ӯсныл потыртас, тав яныг кӯщаитн ла̄выс, ань ты кос са̄всыр экзаменыт ва̄равет, ос та̄н ӯсанылт ханищтахтын та̄л, экзамен та̄л ты нэ̄пакыт пуссын ёвтуӈкв ро̄ве̄гыт. Сапра̄нит о̄лум яныг кӯщаит маныр ювле ла̄ве̄гыт, ты о̄йкан нэ̄матыр ат ла̄всыт. Э̄лы ма̄ныл ёхтын ма̄хумн нэ̄матыр торас а̄тим, маныр нэ̄пак та̄нанылн э̄ри, пуссын ёвтуӈкв ве̄рме̄гыт.

1110 2015. 10. 23. Тамара МЕРОВА

Кӯщаит акванатыглаве̄сыт Округ губернаторув Наталья Комарова ӯсыӈ ос районыӈ кӯщаит акванатыгласанэ ос та̄н аквъёт са̄всыр тэ̄лат та̄рапаттысыт. О̄влэ̄т Наталья Владимировна Нефтеюганскыт о̄лнэ ма̄хум ӯсаныл намхо̄талэ̄тыл янытластэ. Тувыл кӯщайлахтын хо̄тпат хумус та̄нки рӯпатаныл 2014 та̄л сыс ва̄рсаныл, ты урыл Алла Бадина, Нижневартовск ӯс кӯщай нэ̄, ла̄тыӈ тотыс. Ань щар ёмщакв, со̄тыӈыщ, щуниӈыщ ма̄хум Белоярский, Нижневартовский ос Ханты-Мансийский районытыт о̄лэ̄гыт. Ты ма̄хум ёмас о̄лупсал о̄лнэ̄ныл ма̄гыс 12 са̄всыр ва̄рмалит уральтым юипа̄лт но̄хпатсыт. Та̄н юипа̄лыт Югорск, Урай ос Ханты-Мансийск ӯсыт ла̄вве̄сыт. Ты тэ̄лат РФ Президентув ос Правительство па̄лыл ла̄тыӈ хӯлтум юипа̄лт уральтаӈкве патве̄сыт. Тот ма̄хум пусмалтан, ня̄врамыт ханищтан, рӯпитан ма̄хум ос матумпа̄ла хо̄тпа о̄лыглан ва̄рмаляныл пуссын та̄рапаттавет. Тувыл ты рӯпатат маныр оценкал мивет – таияныл акванловиньтым, э̄лаль сунсэ̄гыт, хоты ӯсыт манос районыт но̄хпатэ̄гыт. 2014 та̄л сыс округ янытыл ат со̄тыра са̄вит малый ос средний предпринимательство щирыл рӯпитан колыт пусве̄сыт. Тамле тэ̄латт 21 муниципальный мирколыт рӯпатаныл щар ёмщакв э̄лаль тотыяныл. Ань тыт Мегион ӯст о̄лнэ ма̄хум э̄сгавет. Нягань ӯст сака са̄в хо̄тпа предпринимательство щирыл рӯпитаӈкве патсыт. Наталья Комарова ма̄нь ня̄врамыт садикыл минэ тэ̄лат урыл о̄с потыртас. Ты тэ̄лат палт Белоярский район но̄хпатыс, тот ма̄хум очередит хоса ат ӯрхатэ̄гыт. Юио̄выл та̄лылыт школа а̄стлам ня̄врамыт ЕГЭ хумус хансэ̄гыт, ты ва̄рмалит о̄с та̄рапаттавет ос мониторингнэ̄пакын хансавет. Тувыл акванатхатам кӯщаит лю̄льсаӈ минэ то̄ва ва̄рмалит урыл ла̄тыӈ тотсыт. То̄ва департаментыт олн ат о̄щнэ̄ныл ма̄гыс тэ̄ланыл ва̄руӈкве ат ве̄рмияныл. Та̄н та̄нки олн кинсуӈкве ла̄вве̄сыт, ос рӯпата хосан ул вос лаквтыяныл, та̄л оигпан э̄лыпа̄лт вос а̄стлыяныл.

1110 2015. 10. 23. Светлана РОМБАНДЕЕВА

Ма̄витув ӯргалаве Ка̄сыӈ та̄л округувт «Коренные народы. Окружающая среда. Нефть. Закон» нампа научнопрактический конференция ва̄рыглаве. Тув яныг учёныит, са̄всыр кӯщаит, соссаӈ ма̄хум ос ма̄во̄й но̄хвинэ хо̄тпат акванатхатыгла̄лэ̄гыт. Ма̄ньщи, ханты ос ё̄рн ма̄хум о̄лнэ ма̄наныл, культураныл ос э̄рнэ нэ̄паканыл урыл потыртэ̄гыт. Ты та̄л тамле хо̄нтхатыглап Нижневартовск ӯст ва̄рыглавес, ма̄хум кит хо̄тал рӯпитасыт – ты э̄тпос 15 ос 16 хо̄талаге̄т. Щар ма̄к потраныл та урыл о̄лыс – ма̄витув ӯргалаӈкве э̄ри, соссаӈ мир пе̄с йис о̄лупсал вос о̄лэ̄гыт, э̄лы хо̄таланыл ёмасыг вос е̄мты.

1110 2015. 10. 23. Светлана РОМБАНДЕЕВА

Яныгпа̄ла хо̄тпат колта̄глыӈыг е̄мтэ̄гыт Ма̄н округувт 2012 та̄л па̄сныл «Приёмная семья для пожилого гражданина» нампа программа рӯпиты. Ты тэ̄ла хосыт рӯт ат о̄щнэ яныгхо̄тпат ка̄саще̄гыт те, акв хотты колта̄гылн о̄лмыгтаӈкве ве̄рме̄гыт. Та̄нанылн нё̄туӈкве са̄в хо̄тпа ка̄саще̄гыт. Хунь ты программа ущ рӯпитаӈкве патыс, туп 75 хо̄тпа колта̄глытн ва̄нтлуӈкве номсысыт. Ос ань округ янытыл 115 яныгхо̄тпа тамле колта̄гылт о̄лы. Ты тэ̄ла урыл округ кӯщай нэ̄ Наталья Комарова тох ла̄выс: «Хо̄тпа такте̄т о̄лы те, тав ма̄гсылэ ты сака ёмас ля̄ххал. Яныгпа̄лаг е̄мтум хо̄тпа о̄щнэ колн (рущ ла̄тӈыл ла̄ваве «Дом престарелых») о̄лмыгтаӈкве пуссын хунь ка̄саще̄гыт. Хо̄тпа тув минуӈкве ат те таӈхи, тамле колта̄гылт вос о̄лы». Ты программа коныпал яныгхо̄тпат ма̄гыс мо̄т са̄в тэ̄лат номылматве̄сыт. Акв тамле тэ̄ла тох намаявес: «Надомное социальное обслуживание». Ва̄гталыг о̄лнэ ма̄хум тэ̄нутыл, маснутыл ос мо̄т э̄рнэ пормасыл ёвтавет, та̄н палтаныл юв тотавет. Витыл тотавет, кӯраныл па̄лтыглавет, тӯйтаныл хилаве. Коланылн ле̄ккар ёхталы, тэ̄рпил тотавет. Хотталь ялуӈкве э̄ри те, ма̄шина ёхты. Мо̄т программа щирыл ос яныгхо̄тпат ищхӣпыӈ утын ханищтавет. Та̄н ань та ут о̄с вос ва̄ганыл, ля̄ххал ман мо̄т матыр ловиньтаӈкве вос ха̄сэ̄гыт, та ут хосыт рӯтаныл ёт потыртаӈкве вос ве̄рме̄гыт. Округ кӯщай прессслужбаныл те̄тым ля̄ххал ма̄ньщи ла̄тӈыг С. Ромбандееван толмащлавес.

1110 2015. 10. 23. Александр ВЬЮТКИН

Ле̄ккарыӈ на̄иӈха̄п рӯпитан ма̄ныл та по̄йтыс Ма̄хум пусмалтан «Николай Пирогов» нампа на̄иӈха̄п урыл я̄ӈк на̄тнэ э̄тпост нэ̄глум газетат Н. Меров хансыглас. То̄нт ты ле̄ккарыӈ на̄иӈха̄п округувт ма̄нь па̄влыт янытыл ущты минмыгтас. Ты на̄иӈха̄паныл яласан урыл профессиональный патология Центр тармыл кӯщай хум Николай Ташланов потыртас, тав ла̄выс: «Округ янытыл я̄нанув хосыт ле̄ккарыт ат э̄тпос яласасыт. Яласаманыл сыс та̄н палтаныл хо̄т со̄тыра арыгтем э̄лумхо̄лас уральтахтым ёхталас. Та̄н халанылт акв со̄тыра хо̄тса̄ттем ня̄врам о̄лыс. Ня̄врамыт уральтан ле̄ккар хӯрмит та̄л на̄иӈха̄пт ат яласас. Ты тув сыс атпан нупыл нила ма̄нь па̄выл ва̄тан па̄г пӯхталасыт. Тит па̄выл уральтым та̄л та хультсы̄г. Витэ ма̄ниг о̄лме щирыл Ха̄льӯс район Саранпа̄выл мус на̄иӈха̄п тув ялуӈкв ат а̄ртмыс. Тувыл во̄т такыщ во̄тнэ̄тэ ма̄гсыл А̄с я̄ ва̄тат ӯнлын Полноват па̄вылн па̄г пӯхтуӈкв ат ве̄рмысыт. То̄нт на̄иӈха̄п якораныл я̄ котильт витын та̄рматысаныл ос ма̄хум тох пирмайтаӈкв номсысыт. Ха̄паныл во̄тын ос яныг хумпытн сака хосгынэ̄тэ ма̄гсыл ле̄ккарыт рӯпитаӈкв ат ве̄рмысыт. Номсахтаманыл юипа̄лт Полноват па̄выл тэ̄лы мус хультуптаӈкв ла̄вве̄сыт. Ты тит па̄влыӈ ма̄хум ле̄ккарытн уральтаӈкв тэ̄лы машинал ёхталавет. Ле̄ккарыт нёлолов щё̄с порат рӯпитаӈкве о̄вылтахтасыт. То̄ва порат рӯпитан ма̄ныл э̄типа̄лаг а̄стласыт. Са̄т хо̄тал сыс хо̄т хо̄тал рӯпитасыт. Яныгнув па̄влыӈ ма̄т ле̄ккарыт палт хо̄тал сыс титса̄т хо̄тпан хо̄тпа ёхталас. На̄иӈха̄п титыт наке̄т онтырсатхуйплов колнакытт ле̄ккарыт рӯпитасыт. Тот ле̄ккарын маныр э̄ри, пуссын о̄лы». На̄иӈха̄пыл яласан кӯщай Владимир Чернаков ла̄выс: «Округ янытыл яласамув сыс ха̄пув тит щёс солярал пинтлыслӯв. Ка̄сыӈ ат та̄л ха̄пув тит щирыл уральтаве. Лю̄лигнуве̄г е̄мтын щаӈкванэ та̄ра хотпе̄нтыянӯв. Ты та̄л яласан двигателянэ о̄с пе̄нтуӈкв э̄ре̄гыт. Щё̄питанэ̄в юипа̄лт иӈ са̄в та̄л яласаӈкв ве̄рми». Владимир Чернаков «Николай Пирогов» на̄иӈха̄пыл титхуйплов та̄л яласы. Ты та̄ланэ сыс са̄всыр накын е̄мталас. Аквнакт осыӈ те̄рыӈ трос винтын пе̄румтахтыглас. Ле̄ккарыт рӯпитанэ̄ныл сыс, ты трос хотяктуӈкв а̄лымавес. Яласанэ̄ныл щирыл ты тув юв ат хультсыт. Тамле на̄иӈха̄п воссыг нэ̄мхо̄т а̄тим. Нэ̄мхотты порат хот ул вос саквалы, са̄в та̄л таве̄н вит тармыл яласаӈкв.

1110 2015. 10. 23. Александр ВЬЮТКИН

Пе̄риян ма̄ньщи ма̄хманув хо̄н ма̄н ялэ̄гыт Ма̄нь таквс э̄тпос са̄тыт хо̄талэ̄т Ханты-Мансийск ӯст А̄с-угорский институт нампа колт ма̄ньщи ма̄хум акванатхатыгласыт. Тув округ Дума колт депутатыг о̄лнэ нэ̄г Татьяна Степановна Гоголева ос Надежда Геннадьевна Алексеева ма̄нав во̄выгласаге̄н. Аквъёт пуссын ва̄т нупыл ат ма̄ньщи хо̄тпа ёхталас. Акванатхатыглахтан ва̄рмалюв «VII Всемирный конгресс финноугорских и самодийских народов» кастыл щё̄питым о̄лыс. Тав лӯпта э̄тпос котильт Финлядия хо̄н ма̄т Лахти ӯст Сибелиус нампа колт ва̄раве. Рӯпатаныл хӯрум хо̄талн хансым о̄лы. Хо̄тса̄т арыгтем са̄всыр ла̄тӈыл потыртан мир тув акванатаве. О̄выл конгресс ква̄лттапам пораныл ты та̄л ва̄т нупыл хӯрум та̄лыг ты то̄влы. О̄выл конгресс ва̄рум хум наме – Валерий Павлович Марков. Та коныпал тав иӈ рӯтыг о̄лнэ финноугорский мирыт Консультативный комитет кӯщаиг о̄лы. Валерий Павлович финноугорский ма̄хум э̄лаль о̄лнэ хо̄таланэ щирыл сыме сака ща̄рги. Са̄всыр ла̄тӈыл потыртан мирыт са̄тыт конгрессаныл о̄лнэ порат хоттальсо̄ймын ща̄нь ла̄тӈанув э̄лаль ялтуптан урыл потраныл тах мины. Тувыл миранув пе̄с йис о̄лупсаныл о̄лнэ хуритэ̄тыл хультуптаӈкв э̄ри. Ты номылматам ва̄рмалит тэ̄лаг ёмащаквег ва̄руӈкв э̄ре̄гыт. Та кастыл ма̄н округувт о̄лнэ соссаӈ ма̄ньщи ос ханты ма̄хмытныл хӯс хо̄тпа (тит мирныл лов хо̄тпал) тув пе̄рияӈкв э̄ри. Ма̄ньщиянув халт Советский, Кондинский, Октябрьский ты хӯрум районытныл акв хо̄тпа пе̄рияве. Ха̄льӯс районныл хӯрум ма̄ньщи хо̄тпа тах пе̄рияве. Мо̄т нила ёмас ос округ янытыл яныг ӯсыӈ ма̄т о̄лнэ ма̄хум халт тув пе̄риявет. Та э̄лыпалт ка̄сыӈ районт та̄нти ма̄хманыл пе̄рияӈкв ла̄вавет. Тувыл ты хо̄тпат наманыл Ханты-Мансийск ӯсн те̄тавет. Пе̄риян хум манос нэ̄ пе̄с о̄лупсав ва̄нэ хотпаг вос о̄лы. Такви ма̄ньщииг о̄луӈкв вос вораты. Щар яныг тэ̄латэ тамле вос о̄лнув ща̄нь ла̄тӈув ёмащакв ва̄ӈкв таве̄н э̄ри. Ма̄хум, хотьют тот о̄лыс, пуссын ла̄всыт: «Ка̄сыӈ тамле яныг мирхал сапра̄ни е̄мталан порат, хо̄тпат ёмащакв ос э̄рнэ щирыл пе̄рияӈкв тув э̄ре̄гыт. Вос тох ат е̄мтынув, ка̄сыӈе̄мт аквта хо̄тпат тамле ва̄рмалин ялантэ̄гыт. Ма̄хманув халт иӈ са̄в ёмас ос тув ро̄внэ хо̄тпа о̄лы». Мощ ётылнув тув миннэ ма̄хум пе̄риян ма̄гсыл о̄с атхатыглэ̄в. Ма̄ньщи халт пе̄риян ма̄хум наманыл 2016 та̄л яӈк на̄тнэ э̄тпос хӯс хо̄талэ мус Финляндия хо̄н ма̄н те̄туӈкв э̄ре̄гыт.

1110 2015. 10. 23. Вероника Змановская

Йис о̄пам ос щаще̄квам урыл потрум Са̄в та̄л ма̄н Победавн! Суйта̄л тӯя ма̄ хосытув, Та ма̄т, хо̄т Нё̄рыт хультсыт, Ань, э̄рттум, сэ̄ӈквыг на̄ӈке̄гыт. Хотит войнаныл юв ёхтыс, Хосат яныгмасыт А̄гипыг ня̄враманыл. Кит та̄л ма̄н школавт саран ла̄тыӈ а̄тим о̄лыс, хотпантыглавес. Хультум та̄лт таквсы саран ла̄тӈув ос ханищтаӈкв патсӯв. Таквсы ма̄н уртхатасӯв, хотьютув ма̄ньщи, хотьютув саран ла̄тыӈ ханищтаӈкв мины. Ме̄н юртыӈ ня̄врамыг, Вероника ос Валера Змановские, са̄т классыт ханищтахтыме̄н. Ягпыгум саран ла̄тыӈн минас, ам ма̄ньщи ла̄тыӈн хультсум. Ам кит та̄л сыс ма̄ньщи ла̄тыӈ э̄руптаӈкв патыслум. Ма̄н клубн во̄ввесӯв, ла̄ввесӯв, ялпыӈ хо̄талт вос йӣкве̄в. «Куринька» йӣкв Наталья Константиновна ма̄навн ханищтаӈкв патыстэ. Атахкем ня̄врам – а̄гирищ ханищтахтуӈкв патсӯв. Ялпыӈ хо̄тал ёхтыс. Концертн а̄гирищит ат ёхтысыт, э̄ссамтасыт. Ам амккем «Куринька» йӣкв та йӣквсум. Ма̄хмыт пӯмщалахтасыт, ат хащсаныл. Хунь та̄рапатыс, ат агтсыт, ла̄ве̄гыт, такем та ёмащакв йӣквсум. Хультум та̄лт клубн а̄гирищит йӣквуӈкв ханищтаӈкв ам во̄вве̄сум. А̄гит йӣквсыт, ат оясыт. Потрум э̄лаль йис о̄пам ос щаще̄квам урыл тотуӈкв патылум. Ханищтан нэ̄ акваг ла̄выглы, ветераныт ос труженик тыла урыл вос хансэ̄в. Ам йис о̄пам наме Аркадий Ильич, йис щаще̄квам Анисья Дементьевна Змановские. Йис о̄пам 1912 та̄лт (Остяко-Вогульск) Ханты-Мансийск ӯст самын патыс. Грузчикыг , тувыл партия «Силина» Саранпа̄выл экспедицият геологыг са̄в та̄л рӯпитас. Саранпа̄выл ос Усть–Манья халт (железо) ке̄р, со̄рни ос бокситы а̄хвтасыт киссыт. Усть-Манья па̄вылт аэродром ва̄рсыт, товлыӈха̄пыт тот вос ӣсэ̄гыт. Щаще̄квам Анисья Дементьевна Носова тыг пе̄с а̄ще ёт ёхтыс. Тэ̄н Лупсия я̄ хосыт та̄ратахтасы̄г, Халпа̄вылт ма̄хумн колн вуйлувесы̄г. Рӯпитаӈкв э̄ри, Ня̄хщамво̄льн минасы̄г, тув та о̄лмыгтасы̄г. О̄памн ойттур э̄тпост 1941 та̄лт нэ̄г та тотвес. То̄нт 1941 та̄лт война о̄вылтахтас, пуссын тув та тотве̄сыт. Усть-Маньяныл Тагт па̄выл мус ма̄хмыт ха̄пыл тотве̄сыт. Тот «Шлеев» на̄иӈха̄пн ӯнттуве̄сыт, Омск ӯсн та тотантаве̄сыт. «Сибирская» дивизия ва̄рвес, та щирыл поездыл войнан тотымат. Москва ӯс по̄хат тав хо̄нтлас. «Курский дуга» ма̄т пулемётчикыг о̄лыс. Хо̄нтлан ма̄т пулемёт патронанэ холасыт. Ха̄йталтахтас мо̄т пулемёт палт патрон ма̄гыс, ос немысн пулемётыл та хо̄йвес. Чита ӯс госпитальт хунь са̄йкалас, акв ла̄глэ а̄тим о̄лыс, хотвуиме. Ла̄гыл та̄л юв ке̄твес. Ня̄хщамво̄льн ще̄мьятэ палт ёхтыс. Пӯльницат завхозыг рӯпитас, та коныпал пум, ӯльив, вит хартыс. Са̄т ня̄врам: Владимир, Галина, Николай, Леонид, Виктор, Людмила ос Юрий о̄щсы̄г, янмалтасы̄г. А̄гипыг ня̄враманэ̄н ань мус номаве̄г, янытлаве̄г. Орден, ме̄таль о̄ньщис. Тащир та о̄лыс, 1976 та̄лт а̄тимыг е̄мтыс. Са̄в та̄л ма̄нки Победав Са̄в та̄л, хумус война холас! Ща̄гтым, ощхультым тӯя юв! О̄лэ̄в, пӯмщалахтэ̄в, ща̄гтэ̄в. Война ат ва̄щинтам ня̄врамыт Нэ̄матыр, нэ̄матыр ул ёрувлэ̄н! Вероника Змановская, 7класс, Ня̄хщамво̄ль па̄выл школа. Ты потыр ма̄ньщи ла̄тӈыл Н. Тасманова хансыстэ.

1110 2015. 10. 23. Людмила ТЕТКИНА

Ще̄мьят йильпи колыл мивет Ха̄льӯс район Кимкъясуй па̄вылт Алексей Ефимович Канев старостаг о̄лы. Тав ётэ потыртамумт, кол ӯнттын ва̄рмаль урыл китыгласлум. Алексей Ефимович ла̄выс, Кимкъясуй па̄вылт са̄в та̄л социальный найм щирыл колыт ат ӯнттуве̄сыт. Та ма̄хум, хотьют ве̄рмысыт, о̄лнэ кол та̄нки ӯнттысыт. Ань таи ёмас, юио̄выл та̄лытт са̄в ма̄ньлат ще̄мьят па̄вылт кол ӯнттэ̄гыт. Са̄в ще̄мья Ипотечный агентстват о̄лнэ очередин хасхатасыт, субсидияолн тувыл ӯре̄гыт. Ань Кимкъясуй па̄вылт 36 ще̄мья о̄лы. Ос ты та̄лт социальный найм щирыл очередин хансым хо̄тпат ма̄гсыл колыт ӯнттуӈкве патве̄сыт. Мо̄лты та̄л па̄ртнорыт па̄вылн тотве̄сыт. Кимкъясуй па̄вылт колыт «Рахтынья» нампа община ӯнтты. Ты общинат Александр Игоревич Голошубин кӯщаиг рӯпиты. О̄влэ̄т кит яныг колыг ӯнттувесы̄г. Ты йильпи колыгт нила квартира о̄лы, тув нила ма̄ньщи ще̄мья ва̄нтласыт. Акв колэ са̄ртыннув я̄ӈк на̄тнэ э̄тпос а̄стлавес, кит ще̄мья тув о̄лмыгтасы̄г. Мо̄т кол мощ ётылнув лӯпта э̄тпост а̄стлавес, о̄с кит ще̄мья йильпи колыл тот майвесы̄г. Акв колт Лыткиныт, са̄в ня̄врам янмалтан ще̄мья, ань о̄лы. Мо̄т кол ос савалап пыг Владимир Вынгилевн майвес. Клавдия Ивановна Вынгилева о̄с та очередин са̄в та̄л хасхатым о̄лыс, тав о̄с пе̄с колныл йильпи колн ва̄нтлас. Анна Николаевна Гындыбина колэ на̄йн ё̄свес, тав о̄с колыл майвес. Ты коныпал Кимкъясуй па̄вылт ань кит яныг колыг ӯнттаве̄г. Акв колэ̄т кит квартира о̄лы, ос мо̄т колэ̄т хӯрум квартира ва̄раве. Ты колыт о̄с «Рахтынья» нампа общинат рӯпитан ма̄хум ӯнттэ̄гыт. Алексей Ефимович ты урыл тох ла̄выс: «Нэ̄пакыт щирыл ты колыт яныг таквс э̄тпос 29 хо̄талэ мус а̄стлаӈкве э̄ри. Тувыл ты колыт интернетыт аукцион щирыл тыналаӈкве тах патавет. Са̄ккон щирыл ань тох ва̄руӈкве э̄ри. Туп ты юипа̄лт мирколт рӯпитан ма̄хум ӯнттум колыт па̄влыӈ ма̄хманув ма̄гсыл ёвтуӈкве ве̄рмияныл. Ам номсэ̄гум, ма̄хманув 2016 та̄л о̄вылтахтан э̄лыпа̄лт йильпи колн тах ва̄нтлэ̄гыт». Староста хум китыгласлум, манса̄вит хо̄тпат ты очередин хасхатасыт. Тав ювле ла̄выс: «Ма̄хум ты очередин хасхатнэ ма̄гсыл Кульпас па̄вылн нэ̄паканыл тотыяныл. Манса̄вит ще̄мья тув хансым о̄лы, щар ат ва̄глум. Ань ӯнттым йильпи ат квартира хоты ще̄мьян мивет, о̄с ат ва̄глум. Кульпаст мирколт рӯпитан ма̄хум ты урыл са̄внув ва̄гыт. Та̄н палтыланыл китыглахтуӈкве э̄ри». Кульпас па̄выл миркол кӯщаиг Людмила Тихонона Тихонова о̄лы. Ам таве ты ва̄рмаль урыл китыгласлум, тав Кимкъясуй па̄вылт кол ӯнттын ва̄рмаль урыл тох ла̄выс: «Ты э̄лыпа̄лт па̄влыӈ мир туп Ипотечный агентстван та̄нки нэ̄паканыл ке̄тыгласаныл. Ма̄н палтув о̄лнэ очередит туп йильпи колн ва̄нтлуӈкве ка̄сащан ще̄мьят хансым о̄лсыт, та̄н ма̄гсыланыл колыт ӯнттуве̄сыт. Ань социальный найм щирыл ще̄мьят йильпи колыл ӯнттуӈкве патве̄сыт. Тыи ма̄гсыл па̄влыӈ ма̄хум ты очередин хаснэ ма̄гсыл та̄нки нэ̄паканыл тотуӈкве патсаныл. Манаса̄вит хо̄тпат тув хасхаты тах, щар ат ва̄глум. Тувыл ос Ипотечный агентство па̄лыл ты та̄л Кимкъясуй па̄вылт о̄лнэ ще̄мьят олныл ат майлуве̄сыт, та̄н халанылт йильпи кол нэ̄мхотьют ат ёвтыс. Кульпас па̄вылт о̄лнэ хӯрум ще̄мьят субсидияолныл та̄стуве̄сыт. Акв ще̄мья о̄лнэ кол Саранпа̄вылт ёвтыс, акв ще̄мья Ха̄льӯст кол вис. Ос акв хо̄тпа Ханты-Мансийск ӯст кол ёвтыс».

1110 2015. 10. 23. Людмила ТЕТКИНА

Кимкъясуйт рӯпитан школа Ты хурит Ха̄льӯс район Кимкъясуй па̄выл школат ханищтахтан ня̄врамыт по̄слым о̄лэ̄гыт. Ань та школат са̄т ня̄врам ханищтахты ос садикн 15 агирищпыгрищ яланты. Са̄в та̄л кӯщаиг тот Людмила Васильевна Вынгилева рӯпиты. Тав рупататэ урыл таи потыртас. – Ты яныг ханищтан кол 2002 та̄лт ӯнттувес, акв палъе̄ре̄т школа ос мо̄т палъе̄ре̄т садик ва̄рвес. Ос ам кӯщаиг рӯпитаӈкве тыг паттуве̄сум. Ань ты колув Саранпа̄вылт рӯпитан школа нупыл ловиньтаве. Та па̄выл школат кӯщаиг Андрей Дмитриевич Попов о̄лы. Ам тав палтэ ва̄ӈын хо̄тпаг о̄лэ̄гум. Ханищтан колув рущ ла̄тӈыл тох ла̄ваве: «МБОУ Саранпаульская СОШ филиал Кимкьясуйская начальная школа с группой детского сада». Школат ос садикт 15 э̄лумхо̄лас рӯпиты, та̄н халанылт ат хо̄тпат ня̄врамыт ханищтэ̄гыт. Саранпа̄выл нупыл кос ловиньтахтэ̄в, тувыл ам са̄всыр сапра̄нин Ха̄льӯсн ва̄тихал во̄виньта̄лавем. Тув ялнэ ма̄гсыл туи ха̄п, мотор э̄ри, тэ̄лы порат ос ма̄шина э̄ри. Ос акв та̄рвит о̄лы, садик по̄хат ня̄врам ёнгын площадка ат о̄ньще̄в. Тамле ут ня̄врам ёнгын ма̄гсыл о̄с э̄ри. Ты ва̄рмалиг урыл кӯщаит палт пищма акваг хансыглэ̄в ос олн во̄ве̄в, тувыл ань ты мус ӯрхатэ̄в. Школав ос садикув ма̄гсыл акваг са̄всыр тэ̄нут ёвтуӈкве э̄ри. Та па̄лыт ма̄н тэ̄нут тотуӈкве о̄с са̄в олн э̄ри. Тыи ма̄гсыл предпринимательхо̄тпат ма̄н ётув рӯпитаӈкве щар ат ка̄саще̄гыт. Ань «Рахтынья» нампа община кӯщай ёт Александр Игоревич Голошубин потыртахтасӯв. Тав на̄иӈха̄п ос са̄в мо̄т техника о̄ньщи, тэ̄нут школав ос садик ма̄гсыл тотуӈкве ла̄вхатас. Ня̄врамыт ханищтан ма̄гсыл са̄всыр ищхӣпыӈ утыт ёвтсӯв, интернетыл ва̄рвесӯв. Тувыл ты ут мӯсхал щирыл о̄с ат рӯпиты. Са̄всыр пищмат, нэ̄пакыт ке̄туӈкве ат ве̄рме̄в, сака хоса ӯрхатуӈкве э̄ри. Ань английский ла̄тыӈ ханищтан хо̄тпа тыт а̄тим. Тамле ма̄нь па̄вылквет ма̄хум рӯпитаӈкве ат ка̄саще̄гыт. Ханищтан колувт хунь рӯпитаӈкве о̄вылтахтасӯв, тэ̄лы порат мощ а̄щирмаӈ о̄лыс. Тувыл яныг кӯр мӯсхалыг ва̄рвес, ань ка̄сыӈ колнакт ре̄гыӈыг е̄мтыс. Ты та̄л туи ӯщлахтан порат школав щё̄питаслӯв, ловтыслӯв, о̄льпыл сартыслӯв. Кимкъясуй павылт па̄влыӈ мир ань са̄вми. Ка̄сыӈ та̄лныл тот са̄внув ня̄врам самын паты. Людмила Васильевна ла̄внэ̄тэ щирыл, 2017 та̄лт о̄выл классын ат ня̄врам тах ёхты. Ты э̄лыпа̄лт таса̄вит а̄гирищпыгрищ акв классыт ат ханищтахтас. Ань о̄выл классын хӯрум ня̄врам яланты. Китыт ос хӯрмит классыгт кит ня̄врам ханищтахтэ̄г. Ос нилыт классын кит пыгрищиг ялантэ̄г.

1110 2015. 10. 23. Людмила ТЕТКИНА

Ханты хум во̄раян ма̄тэ такви нупылэ хансыстэ Октябрьский район Карымкары па̄вылт ханты хум Сергей Алексеевич Рукин о̄лы. Ань тав во̄раим ос хӯл алыщлым акваг яласы. Пенсиян миннэ̄тэ мус тав ма̄ урттын комитетыт рӯпитас. 1998 та̄лт родовой угодьянэ такви нупылэ хассанэ. Та порат округувт «О статусе родовых угодий» нампа са̄ккон рӯпитас. Ханты хум нэ̄паканэ акванатсанэ ос э̄рнэ щирыл ва̄рсанэ. Ань Карымкары па̄выл ляпат рӯпитан «Сургутнефтегаз» нампа компания Сергей Алексеевич ёт соглашениенэ̄пак хансыс. Ханты хум ще̄мьятэ акв та̄л сыс хо̄тхуйплов со̄тыра солко̄вил ойтаве. Нила та̄л сыс акв щёс та̄н «Бураныл» ос бензиныл мивет. Ты коныпал кит ханты ос кит рущ ще̄мья Карымкары по̄хат о̄лнэ ма̄ та̄нки нупыланыл хассаныл. Ты хӯрум ще̄мья ёт «Сургутнефтегаз» нампа компания тамле соглашениенэ̄пак о̄с хансыс. Та̄н о̄с аквты щирыл нё̄тавет. Ты ва̄рмаль урыл Сергей Алексеевич ла̄выс: «Пе̄с пора та̄гыл тыт о̄лнэ ханты ще̄мьят та̄нки во̄раян ма̄ о̄щсыт. То̄нт ма̄хум нэ̄пак та̄л ва̄сыт, хоты ма̄т, хоты ще̄мья во̄раи ос хоты я̄т хӯл алыщлы. Ань таса̄вит по̄х хо̄тпа тыт яласы, ам во̄раян ма̄мн во̄раяӈкве ос хӯл алыщлаӈкве акваг воратэ̄гыт. Ты ма̄гсыл тамле са̄ккон хунь пирмайтавес, ам та̄ра нэ̄паканум пуссын акванатсанум, э̄рнэ щирыл ва̄рсанум. Ань по̄х хо̄тпат амки во̄раян ма̄мн щар ат та̄ртыянум. Нэ̄паканум ва̄рмум порат ма̄во̄й но̄хвинэ хо̄тпат тыт ат рӯпитасыт, та̄н ётыл тыг ёхтысыт. Онтолов та̄л ювле хультум порат та̄н ам ётум соглашениенэ̄пак хассыт. Ос ла̄всыт, ам во̄раян ма̄м хосыт акв тӯрпа пинэ̄гыт. Ты рӯпата ва̄рнэ ма̄гсыл ам ос ля̄па рӯтанум пуссын компенсацияолныл ойтаве̄в. Ам ты нэ̄пакт хасхатасум, номсысум, ты ут торас ва̄руӈкве ат паты. Тувыл мощ щирыл е̄мтыс, ань Саватьёга я̄т хӯл щар а̄тим. Тӯрпа та̄рвитыӈ а̄хвтасыл манос мо̄т утыл нэ̄гсалавес ос витн та̄ртвес. О̄влэ̄т нэ̄матыр лю̄ль а̄тим о̄лыс, тувыл акв порат ты тӯрпа витныл но̄хнэ̄глыс, ты юипа̄лт хӯл та̄л та хультсӯв. Ам нефтяникыт палт такос ялантасум, ты тӯрпа урыл такос потыртасум. Ювле ла̄вве̄сум, ам та̄н ётаныл соглашениенэ̄пак хассум, ос та̄наныл во̄раян ма̄мн рӯпитаӈкве амки та̄ртсанум. Ань нэ̄матыр воссыг ат ва̄ре̄гыт, тӯрпа тох та хультуптасаныл. Ты э̄лыпа̄лт нефтяникыт ам ма̄м хосыт са̄всыр яныг техникал тыглетувле яласасыт. Акв порат писаль ёт тув ёхтысум, ла̄всанум, мори ул вос капыртэ̄гыт. Ань нас тэ̄ла та̄л ам родовой угодиям хосыт яныг техникал воссыг ат яласэ̄гыт». Сергей Алексеевич пенсият о̄лнэ̄тэ сыс акваг во̄рт яласы. Ты э̄лыпа̄лт Карымкары па̄вылт пил, ла̄хс ос па̄кв пирмайтан кол о̄лыс. Ва̄тум пиланэ тав тув тыналасанэ. Тувыл ты кол лаппантвес, ань туп такви ще̄мьятэ ма̄гсыл пил ва̄ты. То̄ва порат, хунь са̄внув хӯл пуви, ос э̄лаль тыналы, па̄влыӈ мир хӯл ёмщакве ёвтэ̄гыт. Я̄ӈк хӯл алыщлан ма̄гсыл ос лицензиянэ̄пак выг. Ка̄сыӈ та̄л тав мирколн намнэ̄паканэ тотыянэ ос заявление хансы. Сергей Алексеевич Карымкары па̄вылт самын патыс. А̄тятэ ханты хум о̄лыс, оматэ ос украинкаг о̄лыс. Та па̄вылн тав ссылкан ке̄твес. Сергей Алексеевич школа а̄стламе юипа̄лт Украинан, оматэ яныгмам ма̄н, о̄луӈкве минас. То̄нт рӯт ма̄хманэ пуссын тот о̄лсыт. Тувыл хащта̄л ма̄т хоса о̄луӈкве ат ве̄рмыс, Карымкары па̄вылн ювле ёхтыс. Па̄вылт нэ̄ тотыс, э̄кватэ̄нтыл кит пыг янмалтасы̄г. Акв пыге Сургут ӯст о̄лы, тот «Сургутнефтегаз» нампа компаният рӯпиты. Ма̄нь пыге Карымкары па̄вылт ще̄мьяӈ тагыл о̄лы.

1110 2015. 10. 23. Светлана РОМБАНДЕЕВА

Ка̄ркам а̄гирищ Ты хурит Ханты-Мансийск ӯст о̄лнэ ханты а̄гирищ Маша Гришкина по̄слым олы. Таве̄н хӯрумхуйплов та̄л, нёлолов классыт ханищтахты. Маша «Лылыӈ со̄юм» центрын яланты, тот са̄всыр пормасыт ва̄ри, щаквщи. Такви уре̄т тох потыртас. –О̄мам наме Раиса Васильевна, тав Тугияны па̄вылныл о̄лы, ханты ла̄тӈыл потырты. А̄тям Валерий Борисович Головин. Тэ̄н а̄нум тэ̄нти палтэ̄н вистэ̄н. Хӯрум пыг о̄ньще̄г, ма̄н ань пуссын аквъёт яныгме̄в. Ты центрын ялантанэ̄м са̄тыт та̄лыг ты е̄мтыс. Тот ам па̄сса, щулкин ос сыресыр маснут сагуӈкве ханищтахтасум, сакныл турло̄псыт ос пальсакыт хартуӈкве, ка̄тыл по̄слуӈкве ос мо̄т са̄всыр э̄рнэ тэ̄лат ва̄руӈкве ханищтахтасум. Ты коныпал ма̄н, а̄гирищит ос пыгрищит, ханты ос ма̄ньщи йӣкв йӣквуӈкве ханищтахтэ̄в, са̄ӈквылтапыл са̄ӈквылтэ̄в, э̄ргыт э̄рге̄в. Ты колт пуссын ёмас нэ̄тхумит рӯпитэ̄гыт, тув ялантаӈкве а̄нумн сака мӯсты. Ты я̄тил ка̄ркам а̄гирищ со̄тыӈыщ вос яныгми, ос са̄в э̄рнэ тэ̄ла вос ва̄ри.

1110 2015. 10. 23. Светлана РОМБАНДЕЕВА

Соссаӈ мир янытлан Та̄тья Ты хурит рущ нэ̄ Татьяна Николаева по̄слым о̄лы. Тав ка̄тыл са̄всыр ёнгын утыт, пӯмыщ пормасыт ва̄ри. Татьяна Октябрьский районт о̄лнэ Карымкары па̄вылт самын патыс, тот яныгмас. Ща̄нягеа̄щаге тот о̄лэ̄г. Э̄лаль ань тав потре ловиньтэлы̄н. – Соссаӈ ма̄хум культураныл ам сака э̄руптылум. Ханты-Мансийск ӯст о̄лнэ Искусства колледжит ханищтахтамум порат, ма̄ньщи ос ханты ма̄хум ка̄тыл ва̄рим пормасаныл ка̄саласанум, татем ща̄гтсум. Ты ва̄рмаль а̄нумн сака мӯстыс. Тувыл ам ты урыл пӯмщалахтуӈкве патсум. Ка̄тыл пормасыт ва̄руӈкве о̄вылтахтасум, са̄в ханищтахтуӈкве патсум. Е̄рнколн ялсум, тот мощ о̄лсум, суссум, соссаӈ мир хумус о̄лэ̄гыт. Ма̄щтыр ма̄хманыл ёт хо̄нтхатыгласум, рӯпатаныл пӯмщаласанум, та̄н ётаныл потрамасум. Матыр ма̄щтырлаӈкве, щаквщуӈкве тоха та ханьщувласум. Са̄с ёт рӯпитаӈкве а̄нумн кӯстыр, ты ва̄рмаль ам сака э̄руптылум. Ам ва̄рнэ пормасанум э̄лы хо̄н ма̄ныл ёхталан хо̄тпатын ёвтавет. Туристыт нупыл ам соссаӈ ма̄хум о̄лупсаныл ос культураныл урыл потыртэ̄гум. То̄ванакт э̄лныл ёхтум хо̄тпа ла̄ви: «На̄н лӯи ма̄нт ӯсхулыт хосыт туп пупа̄пщит ё̄мыгтэ̄гыт, турман ма̄хум о̄лэ̄гыт, нэ̄мхо̄т ат ханищтахтэ̄гыт». Хунь тамле потыр хӯлэ̄гум, сымум татем ща̄рги. Та̄н ат ва̄ганыл, ань соссаӈ ма̄хманув манхурип мӯтраӈыт, та̄н номтыӈ э̄лумхо̄ласаквет, ма̄щтырлаӈкве ха̄сэ̄гыт, ма̄вит ӯргалаӈкве ха̄сэ̄гыт. Та хо̄тпа нупыл ювле потраме̄гум, ма̄ньщи, ханты ос ё̄рн мирыт янытлыянум. Ам ётум ань са̄в хо̄тпа рӯпиты. Та̄н халанылт акв ма̄щтыр хум Алексей Анатольевич Бартков. Тав йӣвныл са̄всыр пормасыт ва̄ри, ма̄щтырлы. Красноярский край е̄рныл ты ма̄н нас мӯйлуӈкве ёхтыс кос, ос акваг тыг та о̄лмыгтас. Алексей ла̄вме щирыл, тыт о̄луӈкве таве̄н ёмас, ма̄витэ сака нё̄тнэ, хӯл алыщлаӈкве ро̄ви. Ты ка̄ркам Та̄тьян ос тав ётэ рӯпитан хо̄тпатын ам са̄в ёмас, сымыӈ ла̄тыӈ ла̄ве̄гум. Пус ка̄т, пус ла̄гыл вос о̄лэ̄гыт, са̄в э̄рнэ пормас вос ма̄щтырлэ̄гыт!

1110 2015. 10. 23. Тамара МЕРОВА

О̄лупсатэ̄т о̄лум накыт номылматыгласанэ Анатолий Прокопьевич Кауртаев урыл мо̄лты газетат хансыгласум. Ань о̄йка потре на̄н э̄лаль ловиньтэлы̄н. Тав ма̄ньлатыг о̄лум поратэ, школат ос соссаӈ ма̄хум ёт рӯпитам накыт номылматыглас. Анатолий Ягодный па̄вылт са̄т класс а̄стламе юипа̄лт Ленинград ӯсн э̄лаль ханищтахтуӈкве минас. Тав тув минам порат са̄всыр та̄рвит ва̄рмаль о̄с ва̄щинтас. Юил тав о̄влэ̄т округ образование колн путёвканэ̄пак ма̄гыс ялыс, тувыл на̄иӈха̄пыл Тюмень ӯс мус минас. Яныг ӯст пыгрищ э̄лаль миннэ билет ёвтуӈкве та̄ра та ве̄рмыс. Хӯрум э̄т железнодорожный вокзал по̄хат кон липа йӣв ёлыпа̄лт хӯяс. Тав ань ла̄внэ̄тэ щирыл, ты йӣвыт ань тыг мус та кол по̄хат лю̄ле̄гыт. Та йӣвыт ёлыпа̄лт то̄нт тав ла̄гыл маснутаге ёрувлам. Ты сов ла̄гыл маснутыл кол по̄х хум Ивашкеевн ю̄нтвес. Тав аквтох таве̄н вы̄гыр па̄рт чемоданыл ва̄рвес. Вы̄гыр оспа о̄льпыл то̄нт речникыт я̄ ва̄тат тӯщтым ос витыт о̄лнэ посыт о̄люптасыт. Тюмень ӯст хӯрум э̄т хӯлме юипа̄лт хо̄нтаӈ ма̄ньщи пыгув Свердловск ӯс мус поездыл минас. Тав Ленинград ӯс миннэ мус билет ка̄тыт о̄ньщистэ кос, ос ты ӯст таве̄н билетнэ̄паке̄т по̄с ва̄руӈкве э̄рыс, ос тувыл ущ мо̄т поездыт места о̄лнэ̄тэ порат, тув ӯнттаве. Та щирыл ӯрхатым пыгрищ о̄ста матахмат э̄т вокзал по̄хат хӯлыс. Тыглетувле миннэ ма̄хум са̄в, то̄ват нас мори ос матыр тӯлмантым тот хоссыгхатасыт. Акв э̄типа̄лаг лю̄ль пыгрищитн хо̄нтвес, пувумтавес. Туре̄н тус хуритан пе̄лпыӈ утыл тӯщтувес ос олнанэ, нэ̄паканэ пуссын хот та няртумтаве̄сыт. Тувыл мощ са̄литавес, комсомольский билетэ ос поездын ӯнтнэ билетэ ювле майвесы̄г. Тох олн та̄л, тэ̄та̄л, ла̄гыл маснут та̄л тав Ленинград ӯсн э̄лаль та минмыгтас. Та̄глыӈ поездын ӯнттувес, ӯнлын ма̄ щар а̄тим о̄лыс, тав акв вагоныт ӯнлын ма̄ ёлыпа̄лт та̄тыл ма̄ хо̄нтыс. Тот тувщуӈкырлахтым тох та э̄лаль минас. Таи ёмас, ма̄хумн то̄внакт ня̄нь ло̄мтыл манос картопкал майлувес. Ленинградт яныг ӯсыӈ ма̄т такке̄т тыглетувле кисхатым соссаӈ ня̄врамыт ханищтан колн ёхтыс. Тот лӯима̄ ма̄ныл ёхтум а̄гирищитпыгрищит колнакыл ос тэ̄нэ ма̄гыс талоныл майлуве̄сыт. Тав алеутпыг Валентин Зайка, эвенк – Валера Салаткин, ё̄рн – Яков Салиндер ёт акв колнакт о̄лсыт. Анатолий Ленинградт нёлолов тал ханищтахтас. О̄влэ̄т хӯрум та̄л школат ханищтахтын программат щирыл ханищтавес, тувыл ос ат та̄л естествознание факультетыт. Институт а̄стламе порат тав 23 та̄лэ то̄влыс, ос рӯпитаӈкве Леуши па̄выл Кондинский районын ке̄твес. Тот хӯрум та̄л школа кӯщай хумыг о̄лыс ос тувыл са̄т та̄л Половинка па̄выл кӯщаиг рӯпитас. Рӯпататэ ма̄кыг, мӯсхалыг ва̄рме ма̄гыс тав мо̄т район кӯщаитн ва̄ӈкве патвес. Ос 1969 та̄лт Анатолий Прокопьевич Нижневартовский РАЙОНО колн рӯпитаӈкве во̄ввес. Тэ̄н нэ̄тэ̄нтыл ос кит а̄гияге̄н ёт Нижневартовск ӯсн та ва̄нтлысыт. Нэ̄тэ о̄с педагогхо̄тпа о̄лыс. «То̄нт ӯс ущты яныг колыл ӯнттуӈкве патвес. Са̄в ма̄ныл ёхтум ма̄хум сыресыр балокыт, пе̄с колытт о̄лсыт, ёмас лё̄х торыӈыщ а̄тим. Ос ма̄хум юртыӈыщ о̄лсыт, ка̄с ва̄рсыт, пуссын акваннё̄тхатасыт. Ань сунсэ̄н, манхурип яныг ӯсыг е̄мтыс, » Анатолий Кауртаев та о̄лупсатэ урыл ла̄выс. Са̄всыр мир хо̄тпат ёт ва̄йхатым о̄йка такви соссаӈ ма̄хманэ урыл нэ̄мхуньт ат ёрувла̄лыс. Тот тав «Югра лылые̄п» организация ва̄рылтас, «День обласа» намаим касыл туп Нижневартовск районт ва̄рыглавес, ань тав округ янытыл янытлаӈкве патвес. Ань акв хосат о̄лум наке номылматаслум. Ма̄ньлат пыгрищиг о̄лме̄т Тюмень ӯст май ла̄гыл маснутаге ёрувласаге. Ма̄хум ла̄внэ̄ныл щирыл, хо̄т матыр пормас хультуптэгы̄н ке, тув ювле ёхтэгы̄н тах. Тох е̄мтыс, Анатолий Прокопьевич э̄кватэ̄нтыл 2004 та̄лт тот колыл майвесы̄г. Ос та па̄сыл тэ̄н тув о̄лмыгтасы̄г. Тот о̄лнэ̄тэ сыс Анатолий Прокопьевич акв ма̄т ат ӯнланты, тот тав «Югра лылые̄п» намаим рӯпататэ э̄лаль тотытэ. Округныл тув о̄лмыгтам 250 са̄виткем хо̄тпат та ӯст акванатхатыглэ̄гыт. Ань та̄наныл ма̄н пуссын округув 85 та̄лэ то̄влын кастыл янытлыянӯв, пуста̄гыл вос о̄лэ̄гыт, са̄в щунь, са̄в со̄т та̄нанылн.

1110 2015. 10. 23. Тамара МЕРОВА

Нэ̄пак ловиньтан колыт писателит намыл мивет Ты э̄тпос онтолов щислат литература та̄л кастыл кит ёмас ос пӯмыщ тэ̄лаг о̄лсы̄г. Акв тэ̄ла нэ̄пак ловиньтан окружной колт ва̄рыглавес, мо̄танэ В. А. Игошев нампа музейколт. О̄влэ̄т нэ̄пак ловиньтан колт та̄л сыс ва̄рим рӯпата урыл потыртасыт. Округт о̄лнэ ма̄хум са̄всыр щирыл кассыт, потрыт, стихит хансум хо̄тпат ёт хо̄нтхатыгласыт. Ты тэ̄лат культура департамент па̄лыл ва̄рве̄сыт. Ань ты колн ёхталам мӯй ма̄хум э̄лыпа̄лт Галина Хорос, Владимир Енов, Павел Черкашин ос мо̄таныт потыртасыт. Ты о̄лыглам нак Когалым, Мегион ӯсыгт ос Нефтеюганский районный библиотекат атхатам ма̄хум ищхӣпиӈ ут хосыт суссыт ос хӯнтлысыт. Тувыл та̄н та̄нки рӯпатаныл урыл потыртасыт. В. А. Игошев нампа музейколт «Буранная Россия» йильпи та̄ратам нэ̄паке ма̄гсыл Андрей Тарханов янытлавес. Тав хансум стиханэ урыл культура, ос образование департаментыгт рӯпитан хо̄тпат сымыӈ ла̄тыӈ ла̄всыт. Апыга̄гирище нё̄тнэ э̄рыгсов та̄н пианинал ёнгыс, апыгпыгрище стихотворениятэ ловиньтастэ. Э̄кватэ Антонина Фёдоровна Тарханова сака нё̄тнэ ма̄вит по̄слым хурит щё̄питас ос та̄н диск щирыл суссылтаве̄сыт. То̄ва хурит та̄ратам нэ̄пакт по̄слым о̄лэ̄гыт. Округ Дума па̄лыл таве Еремей Айпин э̄сгыстэ. Тав ла̄внэ̄тэ щирыл, Андрей Семёнович тав ма̄ньлат пораныл 1963 та̄лныл ва̄гтэ. То̄нт тав «Первая завязь» о̄выл хансум нэ̄паке нэ̄глыс. Ань та па̄сыл хо̄нтаӈ ма̄ньщи поэтув хансум 25 са̄всыр нэ̄паканэ та̄ратаве̄сыт. Ты э̄тпос 13 числат Андрей Тарханов 79 та̄лэ то̄влыс. Литература та̄л кастыл ос округув 85 та̄лэ то̄влын кастыл нэ̄пак ловиньтан колыт писателянув намыл пинавет. Междуреченский районный библиотека Андрей Тарханов намыл пинвес, Ягодный па̄вылт о̄лнэ библиотека ань Анна Конькова нам о̄ньщи ос Леуши па̄влыӈ библиотека – Нина Лангенбах. Ты ёмас ва̄рмалит ма̄гыс ма̄н о̄с ща̄гтым о̄лэ̄в.

1110 2015. 10. 23. Тамара МЕРОВА

Хо̄н ма̄ о̄йка потре мирувн потыртавес Ты э̄тпост са̄тыт щислат А̄с-угорский ма̄хум «Хо̄тал» нампа театр рӯпататэ о̄ста о̄вылтастэ. Ӯсувт о̄лнэ ос мо̄т мӯй ма̄хум та хо̄талт акв пӯмыщ спектакль Ханты-Мансийскат суссыт. Тав «Любовная диатриба мужчине в кресле» намаим о̄лы. Ты суссылтан ут Колумбия ма̄т самын патум хум Габриэль Гарсиа Маркес тав потре щирыл ва̄рвес. Тав намыӈсуиӈ хо̄тпа, «Сто лет одиночества» нампа хансум потре ул ма̄ янытыл о̄лнэ мирн ловиньтавес. О̄лме сыс Маркес са̄т яныг потыр, 47 са̄виткем ма̄нь потрыт хансыс ос кина ва̄рнэ ма̄гыс лов сценарият щё̄питас. 1982 та̄лт мирхал Нобелевский премиял майвес. 2012 та̄лт Россиявт таве янытлан ва̄рмалит о̄лсыт. То̄нт тав са̄в мирыт акванюрщхатнэ̄ныл ма̄гыс ма̄гылт о̄щнэ по̄сыл мӯйлуптавес. Ань ос тав хансум акв потре Анна-Ксения Вишневская спектаклиг щё̄питастэ. Тот Марина Марушевская (Кашпирева) ма̄щтырыг ёнгыс. Ты ёнгилэ урыл тав хосат та̄гыл номсахтыс. Тот нэ̄гхумыг 25 аквъёт хумус о̄лсы̄г, таи о̄вылтыт актриса потыртас. Таве̄н Алексей Пересидлый, Мария Лельхова, Пётр Змановский э̄рыг та̄нынса̄ӈквылтасыт, то̄ва ма̄т зрителиг ёхтум хо̄тпат нё̄тсыт. Режиссёр нэ̄ ты ёнгил щё̄питан ма̄хумн, маснутыт ос са̄всыр пормасыт ю̄нтнэ хо̄тпат ёт ты спектакль сака пӯщмиг щё̄питасаныл. Спектакль а̄стум порат Еремей Айпин театрыт рӯпитан ма̄хум э̄сгысанэ, пӯмащипа ла̄тыӈ ла̄выс. Театр кӯщай хум Евгений Литвинчук ма̄хманэ о̄с янытласанэ ос ма̄г ёт ва̄рим яныг атыӈ ня̄нь та̄нанылн мӯйлуптас.

1110 2015. 10. 23. Николай МЕРОВ

Ма̄ньщи хо̄тпанув урыл потыр Ха̄льӯс район А̄нъя па̄вылт ма̄ньщи ла̄тыӈ ханищтан ва̄рмаль о̄лум порат, тув ма̄ньщи нэ̄ Светлана Селивёрстовна Динисламова ёхталас. Тав такви о̄парищ наме Садомина, Ха̄льӯс район Кульпас па̄вылт 1960 та̄лт самын патыс. Ань Ханты-Мансийск ӯст А̄с-угорский институтт рӯпиты. Ты коныпал тав потрыт ос стихотвореният хансы, ань ты хо̄тал мус матахмат нэ̄пак та̄ратас. Анъят о̄лме порат, тав мӯй ма̄хумн нэ̄пак хаснэ ма̄ньщи хо̄тпат урыл потыртас. Хотьют щар о̄выл нэ̄пакыт хансыс. Пантелеймон Чейметов Ма̄ньщи мирув халт щар о̄выл нэ̄пак хаснэ хо̄тпаг Пантелеймон Кириллович Чейметов о̄лыс. Ты хо̄нтаӈ ма̄ньщи хумыг, Кондинский район Евра па̄вылт самын патыс. О̄выл нэ̄пакыт хансум ма̄ньщи хо̄тпанув пуссын та хо̄нтаӈ ма̄ныл о̄лсыт. Та ма̄н ханищтап са̄ртыннув ёхтыс. Чейметов о̄йка «Во̄раян хумыг» нампа нэ̄паке̄т сака пӯмащ потыр хансыс. Ма̄нь потырохсатэ ань ловиньтэлы̄н. «Кит юрт хумыг, Трофим ма̄ньщи ос Василий рущ, во̄раяӈкве минасы̄г. Рущ хум ма̄ньщи о̄йка нупыл акваг та мовиньты. Трофим ла̄ви: «А̄мпме̄н хотталь та минас, хумус во̄раяӈкве патыме̄н». Василий о̄йка таве̄н ос тох ла̄ви: «Маныр наска̄ссыг а̄мп, наӈ хортуӈкве патэ̄гын». Халэ̄нт акваг ощхультым ос кантмалтахтым та о̄лэ̄г. Тэ̄н сас карсыг, яныг хумыг о̄лсы̄г. Халэ̄нт ма̄колыӈо̄йка ос ха̄рмис намыл намталахтасы̄г. Во̄рколт о̄лсы̄г, Трофим нё̄влиӈ пӯтэ кӯр тармыл ӯнттуӈкве е̄мталастэ, Василий ка̄тэ̄тыл хотмус пут утыгпиматэ, нё̄влянэ пуссын колканын со̄схатасыт. Трофим кантмаявес, са̄грап а̄лмаястэ, Василий хотрохтыс, кол сысы ояс. Номсы, воссыг тав ётэ во̄раяӈкве ат паты, ты кос юв атхаты, ос лё̄ӈхе ат ва̄гтэ. О̄с аквъёт во̄раяӈкве та хультсы̄г. Аквматнакт Василий о̄йка нупыл янгуй ляльт минмыгтас. Трофим тав лылытэ урмыгтастэ. Ётылнув Трофим о̄йка нупыл ма̄колыӈо̄йка ляльт миннэ порат Василий ос тав лылытэ урмыгтастэ. Халэ̄нт нё̄тхатым, воритотым манос ощхуль ва̄рим акваг тох та о̄лсы̄г». Ты пӯмащ потыр 1940 та̄лт хо̄нтаӈ ма̄ньщи ла̄тӈыл хансым о̄лыс, рущ ла̄тӈын Варвара Наумован толмащлавес. На̄н ты нэ̄пак хуньт ка̄салылы̄н ке, о̄с ловиньтэлы̄н. Матрёна Вахрушева Тувыл ос та порат Ленинград ӯст Алексей Николаевич Баландин рӯпитас. Тав Матрёна Панкратьевна Вахрушева ёт ва̄йхатуӈкве патыс. Ётылнув тэ̄н акванминасы̄г, э̄кваго̄йкаг Ленинград ӯст о̄лсы̄г. Матрёна Панкратьевна Кондинский район Карым па̄вылт самын патыс, тот яныгмас. Аквматнакт о̄йкатэ тав нупылэ ла̄выс: «Наӈ наӈки яныгмам Юконда ма̄ке̄н урыл татем са̄в пе̄с потыр ва̄гын, ты потранын нэ̄пакн хансуӈкве э̄ре̄гыт». Тувыл Матрёна Панкратьевна пе̄с потрыт пуссын нэ̄пакн хассанэ. О̄йкатэ ты потрыт литературный ла̄тӈыл щё̄питасанэ. Ос 1949 та̄лт ты потрыт «На берегу малой Юконды» нампа нэ̄пакыг та̄ртве̄сыт. Ты нэ̄пак та̄ратан ма̄гыс Баландин о̄йка ёмащакв нё̄тыс. Матрёна Панкратьевна Ленинград ӯст А. И. Герцен нампа лӯима̄ ня̄врамыт ханищтахтын институтт са̄в та̄л рӯпитас. Михаил Казанцев Та та̄лт Михаил Казанцев, о̄с хо̄нтаӈ ма̄ньщи хум, хансум нэ̄паке та̄ратавес. Тав рущ ла̄тӈыл «Рассказ о себе» наме о̄лыс. Тот Ня̄хщамво̄ль па̄влэ урыл потыр хансыс. Ма̄ньлатыг о̄лме порат Ня̄хщамво̄ль па̄выл школан рӯпитаӈкве ке̄твес. Ты о̄йка такви нэ̄паке̄т Ӯй йӣквнэ урыл хансыс. Ты потре юипа̄лт тав воссыг нэ̄матыр ат хансыглас. Тав Ленинград ӯст о̄лыс, тот прокурорыг рӯпитас. Андрей Тарханов Тувыл 1956 та̄лт «Сталинская трибуна» газетат Андрей Семёнович Тарханов щар о̄выл стихотворениянэ хасве̄сыт, тав о̄с хо̄нтаӈ ма̄ньщи хум. Ханты-Мансийск ӯс педучилище а̄стламе юипа̄лт китхуйплов та̄л Кондинский районт ня̄врам ханищтан хо̄тпаг рӯпитас. 1961 та̄лт Ленинград ӯс А. И. Герцен нампа институт а̄стлас. Ювле Ханты-Мансийск ӯсн ёхтыс, тыт «Ленинская правда» газетат корреспондентыг рӯпитас. Кина суссылтан студият редакторыг о̄лыс. То̄нт тав Россия журналистыт Союзн хасвес. 1980 та̄лт ос Россия нэ̄пак хаснэ хо̄тпат Союзн хасвес. Ань ты хо̄тал мус ло̄в арыг нэ̄пак та̄ратас. Рӯпататэ ма̄гыс ма̄гылн тагатан са̄в по̄сыл майвес. Юван Шесталов Ётылнув Юван Николаевич Шесталов потрыт хансуӈкве о̄вылтахтас. Тав Камратка па̄вылт 1937 та̄лт самын патыс, тот яныгмас. Юван школат ханищтахтаме порат стихотвореният хансуӈкве патыс. Аквматнакт Тэ̄к павылт тэ̄н Терентий Герасимович Харамзин ёт моторыӈ ха̄пыл хӯл алыщлаӈкве минасы̄г. То̄нт Юван рущ ла̄тӈыл такви хансум стихотворениятэ ловиньтастэ: – Лодка трёхрядка плывёт. В сорокопятке запутался карась. Терентий таве хӯнтлыс, хӯнтлыс ос ля̄галас: «Ты Пушкин тав хансыс! » Юван таве̄н ювле суиӈ турыл ла̄выс: «А̄ти Пушкин, ты ам хассум». Тамле пӯмащ ва̄рмаль ты о̄лыс. Юван школа а̄стламе юипа̄лт Ленинград ӯсн А. И. Герцен нампа лӯима̄ ня̄врамыт ханищтан институтн э̄лаль ханищтахтуӈкве минас. Тот Алексей Николаевич Баландин ёт хо̄нтхатас. Баландин о̄йка хансум потранэ ма̄гыс таве сака э̄сгыстэ ос тох ла̄выс: «Наӈ ма̄ньщи хо̄тпа, наӈки потранын ма̄ньщи ла̄тӈыл хансэн. Рущ ла̄тӈыл са̄в хо̄тпа хансы, нэ̄мхотьютн ат ка̄салавен. Ма̄ньщи ла̄тӈыл хансуӈкве патэ̄гын ке, мирн ва̄ӈкве патавен». Та па̄сныл Юван Николаевич ма̄ньщи ла̄тӈыл потрыт ос стихотвореният хансуӈкве о̄вылтахтас. Тав о̄выл нэ̄паке «Ма̄кем ат» ма̄ньщи ла̄тӈыл 1959 та̄лт хансыстэ ос та̄ратастэ. Ты нэ̄пак та̄ра рущ ла̄тӈыл толмащлавес. Юван Шесталов мирн ва̄ӈкве та патвес. Светлана Селивёрстовна ты ма̄ньщи хо̄тпат урыл иӈ хоса потыртас. Ты ма̄ньщи нэ̄ такви о̄с са̄всыр стихотвореният ос потрыт хансы. 2007 та̄лт тав Юван Шесталов ва̄рум рӯпататэ щирыл кандидатский диссертация вуянтас. «Витсам» о̄выл нэ̄паке̄т хансум стихотворениянэ Венгрия ма̄т Будапешт ӯст та̄ратаве̄сыт. Анъя па̄влыӈ ма̄хум ос мӯй хо̄тпат тав пӯмащ потранэ ань татем та хӯнтлысаныл.

1110 2015. 10. 23. Александр ВЬЮТКИН

Поэтыг о̄лум хо̄тпа ка̄сталан хо̄тал Сӯкыр э̄тпос титыт хо̄талэ̄т «Торум Маа» музей колт ма̄ньщи поэтув Юван Шесталов намыл пиным колнаке па̄лыгпусме па̄сныл акв та̄лэ то̄влыс, рущ ла̄тӈыл: «Мемориальный кабинетмузей Ювана Шесталова» ла̄ваве. Ты колнакн та̄л сыс нила со̄тыра ляпатем мир ёхталас. Музей ты колнаке нас тох та̄тылаг нэ̄мхоты порат ат о̄лыглы. Тот ва̄тихал са̄всыр пӯмыщ ва̄рмалит ва̄рыглавет. Ань та̄лэ то̄влын кастыл янытлан хо̄тал о̄лум порат «Поэтическое наследие Микуля Шульгина» нампа хо̄тал ва̄рыглавес. Микуль Шульгин ханты поэтыг о̄лыс. Тав Шурышкарский район Муват-Курт па̄вылт самын патыс. Па̄влэ наме ма̄ньщи ла̄тӈыл «ма̄колыӈ па̄влыг» ла̄ваве. О̄йка ань те о̄лыс, нёлса̄т нупыл ат та̄лэ то̄влынув. Таве касталан ма̄гсыл са̄в мир ёхталас. О̄влэ̄т Микуль Шульгин о̄лупсатэ урыл мощ потыртасыт, тувыл тав хансум стиханэ ловиньтаве̄сыт. Таве ат ва̄м ос стиханэ нэ̄мхоты порат ат ловиньтам ма̄ньлат ма̄хмытн ань сака мӯстысыт. Микуль Шульгин стиханэ са̄выӈпа̄лэ А̄с я̄ ос о̄лум ма̄тэ урыл хансым о̄лсыт. Ань та̄н мо̄т хо̄н ла̄тӈыл хансавет. Щар юио̄вылт исум ща̄ил айтымав порат ка̄сыӈ ка̄сащан хо̄тпа Микуль Шульгин стиханэ урыл о̄щнэ номтанэ̄тыл уртхатас.

1110 2015. 10. 23. Светлана РОМБАНДЕЕВА

Новинск па̄вылт яныгмам нэ̄ Ха̄льӯс район Восыӈтӯр па̄вылт ам Анна Дементьевна Канева ёт хо̄нтхатыгласум. Тав 1958 та̄лт Новинск па̄вылт самын патыс, а̄ги о̄парищ наме Шесталова. На̄н ань э̄лаль тав потре ловиньтэлын. – А̄ӈкум Федосья Ионовна Шесталова, ма̄ньщи нэ̄, Камратка па̄вылныл о̄лыс. Ты та̄л онтырса̄т нупыл онтолов та̄лэ то̄влынув. Тав каӈке, Сергей аким, яныг хо̄нтын тотыглавес, юв ёхталас, ще̄мьяӈыг е̄мталас. А̄щум Дмитрий Семёнович Новьюхов Новинскат о̄лыс. О̄пам номилум, хо̄нтлын ма̄ныл юв ёхталас, щар пальта̄л, ат хӯлыс, хоса о̄лыс. Сака са̄в рӯт о̄щсӯв. Восыӈтӯрт ань Ульяна Ивановна Неттина (Шесталова) о̄лы, ты ам яга̄гим. Ма̄ньщи поэтув Юван Николаевич Шесталов о̄патэ Тимофей – ты ам ащо̄йкам тав ягпыге. Колта̄глувт ма̄н хӯрум ня̄врам самын патыгласӯв – Толя каӈкум, ам ос Митя а̄пщим. Иӈ ма̄ниг о̄лмув порат а̄ӈкув а̄тимыг е̄мтыс. Ма̄н о̄ньгувн, Прасковья Ионовнан, янмалтавесӯв. Тав кит а̄ги о̄ньщас, пуссын аквъёт яныгмасӯв. Толик каӈкум 1979 та̄лт а̄тимыг е̄мтыс, то̄нт а̄гитэ ущ самын патыс. Тав ань Ло̄пмус па̄вылт о̄лы, наме Тоня. Ам тыт о̄йка ва̄рыгласум, аквъёт хоса ат о̄лсуме̄н, киттыгминасаме̄н. Тав ань о̄с тыт о̄лы. Кит а̄ги о̄ньще̄гум. Акв а̄гим Оксанам Ханты-Мансийск ӯст о̄лы. Иннам тыт о̄лы, кит а̄гирищ о̄ньщи, Катя ос Света. Яныг пыгум а̄тимыг е̄мтыс, а̄гипыг о̄ньщиглас. Таня манюм сака ёмас, тав ань ня̄врамаге ёт Ханты-Мансийск ӯст о̄лы. Лена а̄гитэ ма̄ньщи хум ва̄рыс, ань пыгрищ о̄ньще̄г. Ам то̄ванакт та̄н палтаныл Ханты-Мансийскын яланта̄лэ̄гум, тот мощ мӯйлэ̄гум, тувыл ювле та̄лматэ̄гум. А̄ӈкум ос о̄ньгум суп ю̄нтуӈкве сака ха̄ссы̄г, ань а̄гим а̄гитэ Катям ёт тэ̄н ю̄нтыглам супанэ̄н но̄х ты масыгласагме̄н, по̄слахтасаме̄н. О̄ньгум ёт сакныл пальсакыт ос турло̄псыт хартыгласум, щулкиныт сагыгласум. Тав ма̄щтыр нэ̄ о̄лыс, ма̄нав акваг щаквщуӈкве ханищтастэ. Ты па̄выл совхозт ам мис посым рӯпитасум, ня̄нь ва̄рсум. Анна Дементьевна тамле ка̄ркам, потрыӈ нэ̄, а̄гирищит ма̄ньщи йӣкв йӣквуӈкве ханищтыянэ. Катятэ сэ̄ръёр, хо̄тпа нупыл сымыӈ а̄гикве. Ане̄кватэ ла̄вме щирыл, тав матыр щаквщуӈкве ман ма̄щтырлаӈкве сака таӈхи. Тав палтэ акваг щалтапа̄лы, ане̄кватэ уральтытэ, нё̄тумта̄лытэ. Ты я̄тил ма̄ньщи нэ̄ ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве!

1110 2015. 10. 23. Светлана РОМБАНДЕЕВА

Ня̄врамыт ханищтахтасыт Ханты-Мансийск ӯст о̄лнэ Центр ремёсел колт са̄всыр мастерклассыт ман выставкат ва̄тихал щё̄пита̄лавет. Тӯяг ня̄врамыт ма̄гыс конференция ва̄рыглавес, а̄гирищит ос пыгрищит тот докладыт ловиньтасыт, мастерклассыт суссылтасыт. Ты а̄гирищит ам та порат по̄слысанум. Ты Настя Минх, тав ё̄паньщи ва̄иг ва̄рыс. Тав ла̄вме щирыл, ты сака пӯмыщ рӯпата, о̄щнэ ё̄паньщииг ва̄рсыт те, тав ща̄гтым о̄щнуваге. Ты Оля Квасюк, Талинский па̄вылныл ёхталас. Таве̄н нилахуйплов та̄л, онтолов классыт ханищтахты. «Тетёрки» нампа печеньят ва̄ри, ты тэ̄ла суссылтым тыг ёхталас. Ты ос Оксана Янкова, таве̄н онтолов та̄л. Мастерклассыт тав сака э̄рупты, ань ос ё̄паньщииг ва̄руӈкве ӯнтсас. Оксана хурит по̄слы, пувлуӈкве ханищтахты. Ты а̄гирищ Динара Нигматулина, таве̄н китхуйплов та̄л, хо̄тыт классыт ханищтахты. Тав ква̄лгыл мохлыт хорамыӈыг нэ̄гсалыянэ, ты урыл потыртас, мастеркласс ва̄рыглас. Динара ла̄выс: «Хунь мохлыт ёмас номтыл ва̄ре̄в, э̄лы хо̄тал урыл номсэ̄в, то̄нт о̄лупсав мощ кӯпнитнуве̄г е̄мты». Ты тэ̄ла тав видео ищхӣпыӈ ут щирыл ханищтастэ. О̄влэ̄т, ла̄ви, та̄рвитыӈ о̄лыс, тувыл ла̄щалла̄щал ва̄руӈкве та ханьщувлас.

1111 2015. 11. 06. Валентина УЗЕЛЬ

Са̄в ня̄врамыӈ ще̄мьят ма̄гыс са̄кконыт Ювле хультум э̄тпост мирн пе̄риим ма̄хум акванатхатыгласыт. Та̄н ань 46 заседанияныл о̄лыс. Са̄всыр са̄кконыт урыл потыртасыт, то̄ванакт акванпотыртахтуӈкв ат ве̄рмысыт, маттем та воритотсыт. Ос акв ёмас тэ̄ла урыл та̄н ань потыртасыт. Ты э̄лыпа̄лт пирмайтым са̄кконыт тох хансым о̄лыс – са̄в ня̄врам о̄щнэ нэ̄квет пенсиян миннэ̄ныл порат пенсияолнаныл мощщаг ловиньтавет. Са̄внув пенсия винэ ма̄гыс, рущит ла̄внэ̄ныл хольт «трудовой стаж», та̄нанылн э̄ри. Тув 17 та̄л ловиньтаве. Нэ̄квет тыса̄вит та̄л ат те рӯпитасыт, та̄н пенсияныл мощщаг е̄мты. Ань ты нэ̄кветн нё̄тнэ ма̄гыс «О наградах и почётных званиях ХМАО-Югры» нампа са̄ккон мощ мо̄т щирыл хасвес. Ань та̄н «Материнская слава» нампа ме̄талил миӈкв тах патавет. Ты ме̄талил маим нэ̄квет пенсияныл са̄внувег ловиньтаве, та̄н са̄внув пенсияолн виӈкв тах патэ̄гыт. Ос мо̄т ля̄ххал тамле. Ань са̄в ня̄врамыӈ ще̄мьят о̄лнэ кол ӯнттын ма̄гыс ма̄ло̄мтыл мивет. Ос округув янытыл та яныт очередькапай та атвес, ще̄мьят пуссын ма̄л ат то̄влавет. Мирколт рӯпитан кӯщаит ань номсахтуӈкв патсыт. Э̄рыӈ ма̄ пе̄нтсыл ты ще̄мьят олныл миӈкв э̄ре̄гыт. Та̄н ты олныл мивет те, хо̄т таӈхе̄гыт, тот ма̄ та̄нти вос ёвтэ̄гыт. Ос ты йильпи ва̄рмаль урыл нэ̄матыр са̄ккон хансым ат о̄лы. Округ мирколт рӯпитан ма̄хум ань олн ловиньтым рӯпитэ̄гыт. Ты ще̄мьят олныл миӈкв те патавет, манах олн тув та̄стуӈкв э̄ри. Са̄ккон хаснэ ма̄хум ла̄всыт, округув янытыл ма̄ ӯрим 5 со̄тыра арыгтем са̄в ня̄врамыӈ ще̄мья очередин хансым о̄лэ̄гыт. Ос та̄н пуссын ёмас ма̄ ӯре̄гыт. Ос то̄ват ма̄ виӈкв таӈхе̄гыт кос, ос тувыл кол ӯнттын ма̄гыс олн ат о̄ньще̄гыт. Банкыт кредитолныл о̄с ат мивет. Ты ще̄мьят халт са̄выӈпа̄лэ ла̄ве̄гыт, та̄н ма̄ло̄мтыл хунь мивет, та̄ра тах тыналыяныл. Тамле та̄рвитыӈ ва̄рмальн кӯщаит ань ты я̄рмысыт. Та̄л оигпан мус та̄н матыр йильпи тэ̄ла ул ва̄ре̄гыт. 2016 та̄л о̄вылтахтын па̄сыл о̄лнэ колыт ма̄гыс налоголн но̄хнё̄таве. Ань ты урыл са̄ккон о̄с пирмайтавес. Ты э̄лыпа̄лт ма̄хум пуссын коланыл ма̄гыс мощща олн ойтсыт. Ань кол тынэ ман янытыг о̄лы, рущит ла̄внэ̄ныл щирыл – «рыночный» тынэ, ты налог тувыл ловиньтаӈкв патаве.

1111 2015. 11. 06. Людмила ТЕТКИНА

Татьяна Гоголева ля̄ххал тотнэ хо̄тпат ёт хо̄нтхатыглас Округ Дума депутат нэ̄ Татьяна Гоголева «Лӯима̄ сэ̄рипос» ос «Ханты ясаӈ» газетагт рӯпитан ма̄хум ёт хо̄нтхатыглас ос акв э̄рнэ ва̄рмаль урыл потыртас. Тав ла̄выс, я̄ӈк на̄тнэ э̄тпос 19 хо̄талэ̄т Россия Президент Владимир Путин яныг сапра̄ни ва̄рыглас. То̄нт кӯщаит ща̄нь ла̄тыӈ э̄лаль тотнэ ва̄рмаль урыл потыртасыт. Ос ты хосыт манхурип рӯпата э̄лаль ва̄руӈкве э̄ри, яныг поручениенэ̄пак хансыс. Та нэ̄пакт Россия янытыл ща̄нь ла̄тӈыл та̄ратым изданият урыл о̄с хансым о̄лы. Ань ты газетат, журналыт нё̄туӈкве патавет. Округ кӯщай Наталья Комарова соссаӈ ма̄хум ща̄нь ла̄тӈаныл ос пе̄с йис ва̄рмаляныл но̄хво̄рмалтан ва̄рмаль урыл о̄с потырталы. Татьяна Степановна ла̄выс, ань соссаӈ ма̄хум та̄нкинанылн номсахтуӈкве ос са̄в рӯпитаӈкве э̄ри. «Лӯима̄ сэ̄рипос» ос «Ханты ясанг» газетаг кӯщайг нэ̄ Раиса Решетникова рӯпата урыл таи потыртас: «Ля̄ххал тотнэ ма̄хум округ янытыл яласым са̄в потрыт, мо̄йтыт диктофонын хансыяныл. Ань ищхӣпыӈ утыт газетат ва̄руӈкве ро̄ви, ма̄хум потрыт, мо̄йтыт тот вос хӯнтлэ̄гыт. Ня̄врамыт ща̄нь ла̄тыӈ вос ханищтэ̄гыт ос пе̄с йис ва̄рмалил вос пӯмщалахтэ̄гыт, та̄н ма̄гсыланыл журнал та̄ратаӈкве э̄ри. Ос Сургутский, Нижневартовский районыгт о̄лнэ хантыт ща̄нь ла̄тӈаныл ул вос соймыс, та̄н ма̄гсыланыл я̄нас газатаг ва̄руӈкве э̄ре̄г. Татьяна Гоголева ла̄выс, ты номтыт пуссын нэ̄пакн вос хансавет ос округ кӯщаит палт вос ке̄тавет. Ты коныпал тав редакцият рӯпитан ма̄хумн «Корпусная лингвистика» нампа проект урыл потыртас ос ты хосыт рӯпитаӈкве ла̄всанэ. Ань Россият о̄лнэ то̄ва соссаӈ мирыт ты ва̄рмаль хосыт рӯпитэ̄гыт ос та̄нки ща̄нь ла̄тӈаныл но̄хво̄рмалтыяныл. Ос ла̄выс, кӯщаитн, ля̄ххал тотнэ хо̄тпатн, учёный ма̄хумн сапра̄нин акванхо̄нтхатыглаӈкве э̄ри. Газетат, телевидениет, радиот рӯпитан ма̄хум пуссын аквъёт рӯпатаныл урыл тот вос потыртэ̄гыт.

1111 2015. 11. 06. Людмила ТЕТКИНА

Самарово па̄вылт о̄лум учёный хум урыл потыртасыт Округув 85 та̄лэ то̄влын кастыл яныг таквс э̄тпос 15 хо̄талэ̄т Ханты-Мансийск ӯст нэ̄пак ловиньтан колт «V Лопаревские чтения» ва̄рыглаве̄сыт. Тот учёный ма̄хум, студентыт, библиотека колытт рӯпитан хо̄тпат та̄нки докладаныл ловиньтасаныл. Тамле хо̄нтхатыглапын ма̄хум кит та̄л сыс акв щёс акванатхатыглэ̄гыт. О̄влэ̄т туп Ханты-Мансийск ӯст о̄лнэ ма̄хум тув во̄виньта̄лве̄сыт. Ань учёный ма̄хум Россия янытыл тыг ёхталэ̄гыт. Ты тэ̄ла «Хрисанф Мифодиевич Лопарев» намыл пинвес. Ты учёный хум 18 но̄т порат Самарово па̄вылт нуса тотнэ ще̄мьят самын патыс. Тувыл пыгрищакве сака номтыӈ о̄лыс, тав Тобольск ӯсн гимназиян, тувыл ос Санкт-Петербург ӯсн ханищтахтуӈкве ке̄твес. Тот о̄лым тав са̄всыр наукал сака пӯмщалахтас. Ханищтахтуӈкве хунь а̄стлыс, Санкт-Петербург ӯст нэ̄пак ловиньтан колн рӯпитаӈкве вуйвес. Яныг ӯст о̄лмыгтым тав такви яныгмам ма̄тэ урыл ат ёрувластэ, акваг юв ёхталас. Самарово па̄выл урыл са̄всыр пе̄с потыр кинсыс ос акванатыс. Ты учёный хум хансум нэ̄паканэ, о̄лупсатэ урыл ос Самарово па̄вылт урыл пе̄с потрыт ма̄хум кинсэ̄гыт, ос «Лопаревский чтеният» акванатхатыгланэ̄ныл порат, ты урыл потыртэ̄гыт.

1111 2015. 11. 06. Николай МЕРОВ

Наска̄ссыг порслым ма̄хум номылматыгла̄лэ̄н Ма̄нь таквс э̄тпос 30 хо̄талэ̄т 1937-1938 та̄лыгт наска̄ссыг порслым ма̄хум номылматыглан хо̄талыг о̄лы. Ты кастыл ля̄ххал тотнэ колн «Родительский комитет Югры» кӯщай нэ̄ Светлана Поливанова, Афганистан ма̄т хо̄нтлум хо̄тпат нё̄тмилыл ва̄рнэ кӯщай хум Салават Ниязов ос лӯсытан пыгытн нё̄тмил ва̄рнэ организацият рӯпитан кӯщай нэ̄ Ирина Браун ёхталасыт. Пе̄с порат Ханты-Мансийск ӯст са̄в хо̄тпа наска̄ссыг порславес. Та̄наныл номтыт хультуптан ма̄гыс ань та ма̄т пупкол тах ӯнттаве. О̄влэ̄т Светлана Поливанова потыртас, тав ла̄выс: «Ам наска̄ссыг порслым ма̄хум урыл нэ̄пак хаснэм порат та̄н о̄лупсаныл ёмщакв ханищтасанум. Тувыл 2009 та̄лт о̄выл нэ̄пак та̄ратаслум. Ос та нэ̄пакт сака мощща потыр хансым о̄лыс. Таима̄гыс 2014 та̄лт ты нэ̄пак йильпииг хансыслум. Хотьют ма̄к та та̄рвитыӈ накн ликмыс, та̄наныл пуссын тув хассанум. Нэ̄пакум та̄ра ловиньтаӈкве патвес. Ты нэ̄пак юипа̄лт ӯст о̄лнэ мир ӯсувт порслым ма̄хум ма̄гыс пупкол ӯнттуӈкв во̄вхатасыт». Салават Ниязов ты урыл тох ла̄выс: «Ты сака э̄рнэ ва̄рмаль. Ты хосыт ма̄н порсум ма̄хманув номтыт акваг о̄ньщуӈкве патыянӯв. Пе̄с нэ̄пакыт щирыл, ӯст 976 хо̄тпа порславе̄сыт. Та̄н савалым порславе̄сыт, о̄влэ̄т та̄нки ма̄гсыланыл во̄ӈхат хилуӈкве ла̄вве̄сыт. Тувыл писалил па̄тлуптаве̄сыт ос та во̄ӈхан вущкасыманыл юипа̄лт ма̄л лаппа̄хвтуве̄сыт. Тамле пилыщмаӈ нак нэ̄мхуньт ул вос е̄мтыс, ма̄навн акваг ты урыл номуӈкве э̄ри». Тувыл ос Ирина Браун потыртас, тав ще̄мьятэ о̄с репрессиян патыс. Тав та та̄рвит нак ёмщакв ва̄гтэ. Нэ̄ ла̄выс: «Ты ма̄т пупкол таима̄гыс ӯнттуӈкве э̄ри, апганув, ня̄враманув, ма̄ньлат ма̄хманув ты урыл о̄с вос ва̄гыт. Тамле накн ул вос патсыт. Ань ма̄ янытыл са̄всыр та̄рвитыт е̄мталэ̄гыт, ма̄хум йис ва̄рмалит мо̄т щирыл хансыяныл. Ты нак тыт ул вос е̄мтыс, ня̄враманув ты та̄рвитыт о̄с вос ва̄ганыл». Ты коныпал тот музей кол щё̄питаӈкве патаве. Округт о̄лум хо̄нтлын хо̄тпат урыл потрыт, хӯрит, пищмат тув атавет. Ка̄сыӈ район, ӯс урыл выставка щё̄питаве тах. Ма̄хумаквет, на̄н хо̄нтлум рӯтаныныл хультум матыр пормасыт юн о̄ньщегы̄н ке, та музейн миӈкве тах ве̄рмияны̄н. Та музей кол а̄ти туп хо̄нтлым ос репрессиян ке̄тыглам хо̄тпат урыл щё̄питаве. Тот ань ты накт хо̄нтлым хо̄тпат урыл я̄нас выставка о̄с тах щё̄питаве. Хотьют пилталы̄г ма̄ ӯргалас, хо̄нтламе ма̄гыс ма̄гылн тагатан по̄сыл майвес, та̄н ураныл тот о̄с суссылтап щё̄питаӈкве патаве. Ань Ханты-Мансийск ӯст наска̄ссыг порслым хо̄тпат номылматыглан ма̄гыс памятник тӯщтым о̄лы. Ка̄сыӈ та̄л порслым ма̄хум номылматыглан хо̄талт тув са̄в мир ёхталы. Ӯс кӯщай хум Василий Филипенко ты ма̄хум урыл мир э̄лыпа̄лт о̄с потыртас. Тувыл тот мир акв кум астал лю̄льсыт ос а̄хвтасыӈ па̄рт тармыл хорамыӈ лӯптат пинсыт. То̄ва яныгпа̄ла хо̄тпат, ат ве̄ритасыт, самвит та̄ратасыт. Ка̄сыӈ хо̄тпа тув посыӈ номтыл ёхталас.

1111 2015. 11. 06. Валентина УЗЕЛЬ

Ня̄врамыт ёмащакв ханищтахтуӈкв ла̄вве̄сыт Ювле хультум э̄тпос 23 хо̄талэ̄т Ханты-Мансийский колледжколт ханищтахтын ня̄врамыт акванатыглаве̄сыт. Та̄н ётаныл хо̄нтхатыглаӈкве округ Дума депутатыг Татьяна Степановна Гоголева ос Надежда Геннадьевна Алексеева, ханты мир яныг э̄ква Мария Кузьминична Волдина ос мо̄т ма̄ньнув ма̄хум ёхталасыт. Ань ты колт са̄в соссаӈ ня̄врам ханищтахты, са̄выӈпа̄лэ пуссын 9 класс а̄стламаныл юипа̄лт тув ёхтысыт. Та̄н ӯст о̄луӈкве вос ханьщувлэ̄гыт, нэ̄матыр лю̄ль ул вос ва̄ре̄гыт, ос матыр та̄рвитыӈ ва̄рмальн я̄рмын порат та̄н хоталь свонитаӈкв ве̄рме̄гыт, ань ты урыл потыртаве̄сыт. О̄влэ̄т Татьяна Степановна Гоголева потыртас, тав ня̄врамытн ла̄выс. Ань та̄н хантыиг манос ма̄ньщииг о̄лнэныл ма̄гыс щар ул вос э̄ссамтэ̄гыт, номтыӈыг ос ка̄ркамнуве̄г вос о̄лэ̄гыт. Ань матыр ёмас тэ̄ла та̄н те ва̄ре̄гыт, та̄н та̄ра ка̄салавет, наманыл ва̄ӈкв патавет. Тувыл Надежда Геннадьевна ты ня̄врамыт ла̄всанэ, та̄н матыр ва̄рмаль те о̄ньще̄гыт манос олн та̄л те хультэ̄гыт, округ Ассамблея колн вос ёхталэ̄гыт, тот та̄н тах нё̄тавет. Маныр телефоныт тот о̄лэ̄гыт, пуссын номерыт ла̄всанэ. Сака пӯмыщ Мария Кузьминична Волдина потыртас. Тав мо̄тыт э̄тпост 79 та̄лэ то̄влы. Школа а̄стламе юипа̄лт тав Ханты-Мансийский педучилищан ханищтахтуӈкв минас. Ос мощ ханищтахтас, пищмал те̄твес, а̄тятэ а̄тимыг е̄мтум, юв вос ёхты, оматэ̄н нё̄туӈкв э̄ри. Ты пищма таве̄н йӣгрище хансум. Оматэ такте̄т ма̄нь ня̄врамыӈ та̄гыл хультыс. Маша а̄гитэ щар яныг ня̄врамыг о̄лыс. То̄нт педучилище кӯщаиг Г. Т. Величко о̄лыс. Ос юв минуӈкв нас тох ат ро̄выс. Туп лю̄льсаӈ ханищтахтын ня̄врамыт та̄н та̄ра юв те̄тве̄сыт. Ос а̄ги сака ёмащакв ханищтахтас. Тав номтыл ёхтувес – са̄внув лю̄ль оценкал вос пинаве, то̄нт та̄ра юв тах те̄таве. Ты ощмар кӯщаитн та̄рапаттувес, Г. Т. Величко тав палтэ та ёхтыс. Ляпат ӯнтыс, ла̄щлакв титыглахты: «Маныр е̄мтыс? » Маша таве̄н нэ̄матыр ат ла̄ви, урккуӈкв о̄с ат ха̄сы, нас та ӯнланты. О̄йка ос таве э̄лаль та титыглытэ. Воссыг хоталь ва̄рхатуӈкв, Маша таве̄н пищма урыл та потыртас. Кӯщай хум тав ётэ мощ потыртас, ос юв минуӈкв ат та̄ртыстэ, ла̄выс: «Юв минэ̄гын те, э̄лаль ханищтахтуӈкв ат ве̄рме̄гын тах. Омам ляпа рӯтанэ̄н тот нё̄таве. » Ты потыр юипа̄лт Мария Кузьминична са̄в ёмас ла̄тыӈ ня̄врамытн ань ла̄выс, такви хансум стиханэ та̄нанылн ловиньтас. Кос хунь, ты потрыӈ э̄ква хӯнтлуӈкв сака пӯмыщ, ощхуль ва̄рим акваг матыр та потырты. Тав юипа̄лэ̄т Татьяна Савельевна Вадичупова потыртас. Тав «Лылыӈ союм» центрыт кӯщаиг о̄лы. А̄гитпыгыт ла̄всанэ, та̄н тув вос ёхталэ̄гыт, матыр ма̄щтырлаӈкв вос ханищтахтэ̄гыт. Евгения Молданова ос «Хо̄тал» нампа театрыт рӯпиты. Тав ос ня̄врамыт йӣквуӈкв ханищтаӈкв ла̄вхатас. Та̄н ма̄гсыланыл йӣквнэ студия тах ва̄ри. Ань колледжит ханищтахтуӈкв о̄вылтахтам ня̄врамыт са̄выӈпа̄лэ пуссын 9 класс а̄стламаныл юипа̄лт тув ёхтысыт. Та̄н пуссын 16-17 та̄л янытыт. Мӯй ма̄хум потыртаманыл порат ёмащакв ат хӯнтлысыт, мовиньтым ӯнлантасыт. Ос та̄ра ла̄кква та оясыт.

1111 2015. 11. 06. Александр ВЬЮТКИН

Савалан мир халанылт касэ̄гыт Ма̄нь таквс э̄тпос хо̄тхуйплов хо̄талт округ мирколт а̄гмыӈмосыӈ ос сакватахтам ма̄хум каснэ ва̄рмаляныл урыл сапра̄ни о̄лыс. Сапра̄нияныл округ яныг ӯсыт халт видеоконференция щирыл ва̄рыглавес. Кӯщаит акв ляльт ӯнлым потыртасыт. Та̄н халанылт щар яныг кӯщаиг округ губернаторув ва̄ӈын хум Геннадий Федорович Бухтин о̄лыс. Потраныл о̄вылтан э̄лыпа̄лт Геннадий Федорович ла̄выс: «Мощ мо̄лалнув Сочи ӯст о̄лум «Кайлас» нампа мирхал касылыт но̄хпатум ма̄нти каснэ ма̄хманув янытласанӯв. Округныл тув ялум ма̄хум ма̄гылн тагатан нилахуйплов по̄с тувыл тотсыт. Вим ме̄талит щирыл ла̄вуӈкв ро̄ви, ма̄н округувт та̄н ма̄гсыланыл пуссын ва̄раве. Та̄н ляльтаныл сунсым, тамле накын патнэ мо̄т хо̄тпа такви ё̄ранэ о̄с тах а̄рталыянэ. Юио̄выл хӯрум та̄л сыс округ янытыл хо̄тса̄т ляпатем хо̄тпа саманыл лю̄льсаӈ на̄ӈкнэ а̄гм щирыл инвалид нэ̄пакыл майве̄сыт. Тамле щир а̄гм о̄щнэ ма̄хумн рӯпитан ма̄ хо̄нтуӈкв сака та̄рвитыӈ. Ань та̄н ма̄гсыланыл Сургут ӯст ле̄ккар колт массаж ва̄рнэ хо̄тпат ханищтахтын кол пунсым о̄лы. Лю̄льсаӈ ка̄салан ма̄хум о̄с пуссын тот нё̄тавет». Геннадий Бухтин потыртан ма̄ныл а̄стуме юипа̄лт а̄гмыӈмосыӈ ос сакватахтам ма̄хум ёт рӯпитан кол тармыл кӯщаиг о̄лнэ хум Николай Петрович Вторушин потыртас. Тав ла̄выс: «Округ янытыл нёлса̄т арыгтем каснэ кол щё̄питым о̄лэ̄гыт. Та колытн атпанса̄т ляпатем хо̄тпа каснэ ва̄рмальн щё̄питахтын щирыл аквписыг тув ялантэ̄гыт. Та̄н ётаныл хо̄тпан нупыл акв хо̄тпа рӯпиты. Инвалидыг о̄лнэ хо̄тпат ёт рӯпитан ма̄хум округ бюджетныл олныл ойтавет. Ка̄сыӈ хо̄тпа ма̄гсыл каснэ пормас кӯщае щире̄т ва̄руӈкв э̄ри. Та̄н пормасаныл сака тыныӈыт. Ха̄йтнэ ма̄гсыл ва̄рим ла̄гыл маснут тынэ акв со̄тыран ёхты. Каснэ пормасаныл ёвтнэ ма̄гсыл о̄с округ бюджетныл олныл миве̄в». Николай Петрович потыртан ма̄ныл а̄стынэ̄тэ э̄лыпа̄лт са̄т ма̄ньлат каснэ хо̄тпа ма̄гсыл нё̄тмил во̄выс. Во̄внэ олннё̄тмил тынэ сака яныг. Таима̄гсыл округ губернатор ва̄ӈын кӯщай олн тув та̄стуӈкв ла̄выс.

1111 2015. 11. 06. Николай МЕРОВ

О̄лнэ кол ма̄гыс ат ойтхатым са̄в олн а̄рнтаг атхаты Ювле хультум э̄тпост Ханты-Мансийск ӯс ля̄ххал тотнэ колн округ судебный пристав кӯщай Олег Артурович Адольф ёхталас. Ма̄нь таквс э̄тпос 30 хо̄талэ̄т ты служба рӯпитанэ̄тэ па̄сныл 150 та̄лэ то̄влыс. Манырсыр рӯпата та̄н тот ва̄ре̄гыт, тав ты урыл потыртас. Югра ма̄т пуссын аквъёт 266 хо̄тпа судебный приставыг рӯпитэ̄гыт. Ты та̄л та̄н ат ойтхатнэ хо̄тпаныл сут хосыт 12 миллиард солко̄ви ювпувсыт. Са̄выӈпа̄лэ ты ва̄рмалит щирыл мир та̄н палтаныл нё̄тмил во̄вуӈкве ёхталэ̄гыт. Ма̄хум рӯпата олнаныл ювпувавет, сутытым хо̄тпат штрафолн ат ойтэ̄гыт, то̄ва хо̄тпат ня̄враманыл ма̄гыс алиментолн ат ойтэ̄гыт ос щар са̄в олн а̄рнтаг кол ма̄гыс атхатас. То̄ва хо̄тпат о̄лнэ коланыл, на̄й ос ре̄г ма̄гыс олн са̄в та̄л ат ойтсыт. Тыи ма̄гыс ка̄сыӈ та̄лныл кол ма̄гыс а̄рнтаг са̄в олн атхаты. Та̄л о̄вылтахтам порат 37 со̄тыра 823 хо̄тпа кол ма̄гыс ат ойтхатамыт. Ань 16 со̄тыра 975 хо̄тпа сут хосыт я̄ртве̄сыт, та̄н ойтхатасыт. Ты хо̄тпатныл пуссын аквъёт 517 миллион солко̄ви атвес. Ты туп та хо̄тпат, хотьют яныгса̄т со̄тыра арыгкем солко̄ви а̄рнтаг атсыт. Са̄выӈпа̄лэ рӯпата ат о̄щнэ ос лю̄льсаӈ о̄лнэ хо̄тпат коланыл ма̄гыс олн ат ойтэ̄гыт. Тамле хо̄тпат коланыл щар та̄тылат, сака нусаг о̄лэ̄гыт. Судебный приставыт та̄н палтаныл олн кащилтаӈкве ты кос ёхталэ̄гыт, ос та̄нанылныл щар нэ̄матыр виӈкве ат ве̄рме̄гыт. Ань ты накт Нижневартовский ос Сургутский районыгт о̄лнэ ма̄хум щар са̄в олн коланыл ма̄гыс а̄рнтаг атсыт. Кӯщай хум ла̄выс, ты ма̄хум коланыл хотвиӈкве таима̄гыс ат ве̄рмавет, округувт намыл тынта̄лнув кол ӯнттым а̄тим. Та̄н рӯпитаӈкве ке патэ̄гыт, то̄нт ущта ты хо̄тпатныл олн хотвиӈкве патаве.

1111 2015. 11. 06. Тамара МЕРОВА

Нёмса э̄лумхо̄лас Яныг таквс э̄тпос нилыт хо̄талэ̄т Дарья Ивановна Белова 55 та̄лэ то̄влыс. Ты ма̄ньщи нёмса нэ̄ хосат та̄гыл Югорск ӯст о̄лы. Тав то̄внакт ма̄навн пищма ке̄тыглы ос хотты хо̄тпат урыл потырта̄лы. Ань ос ма̄н тав уре̄т на̄нан хансэ̄в. Дарья Аментьева, ты тав а̄ги о̄парищ наме, 1960 та̄лт Ня̄хщамво̄ль па̄вылт самын патыс. Тот школа а̄стламе юипа̄лт, тав Тюмень ӯст ханищтахтас. 1982 та̄лт хум ва̄рыс, тэ̄н Югорск ӯст о̄лмыгтасы̄г. Владимир Белов о̄йкатэ̄нтыл тэ̄н хӯрум пыг янмалтасы̄г. Пыганэ̄н ань та̄нки ня̄врамыӈыг е̄мтсыт. Э̄кваго̄йкаг мо̄лнув пенсиян патхатсы̄г ос апганэ̄н янмалтаӈкве нё̄тэ̄г. Тувыл тэ̄нки кол ӯнттэ̄г, моще̄ртын ты а̄стлытэ̄н. Тэ̄н яныг пыге̄н Иван ще̄мьятэ̄нтыл Югорск ӯст о̄лы. Ульяна а̄гитэ ане̄кватэ ёт хо̄та̄ти яласы, йӣкви, соссаӈ ма̄хум урыл стихыт ловиньты, сакныл хартуӈкве ханищтахты. Иван пыге̄н ЮТЭК колт инженерыг рӯпиты. Егор пыге̄н Ханты-Мансийскат о̄лы, тав аньмунтнув а̄гитэ самын патыс. Щар ма̄нь пыге̄н Алексей омагеа̄тяге ёт о̄лы. Тав о̄с ущты нэ̄ тотыс, нэ̄тэ̄нтыл ЮГУт юил ёхталым ханищтахтэ̄г. Алексей трактористыг юн рӯпиты. Дарья Ивановна рӯпата та̄л ат ӯнланты, нэ̄ рӯпатан ма̄ньта̄гыл ханьщувлым о̄лы. Тав са̄в та̄л Югорск ӯст о̄лнэ «Прометей» нампа ня̄врам ханищтан центрыт рӯпитас. Тот а̄гирищитнпыгрищитн соссаӈ ма̄хум о̄лупсаныл о̄вылтыт са̄в потырта̄лыс. Та̄наныл пальсакыт, турло̄псыт сакныл хартуӈкве ос а̄канит ю̄нтуӈкве ханищтасанэ. Ты тэ̄лат ня̄врамытн ма̄кыг суссылтан ос потыртан ма̄гыс Дарья такви ханищтапыт щё̄пита̄лыс. Ты коныпал нэ̄ са̄всыр пормасыт хӯл совныл ю̄нты. Хӯл сов щё̄питаӈкве тыи сака наксылыӈ ос та̄рвитыӈ рӯпата. Сов ха̄снэ щирыл хотнуюӈкве э̄ри, ёмщакв то̄слуӈкве ос ка̄миньтаг тынтлуӈкве. То̄нт нё̄тнэ ос са̄в та̄л о̄щнэ пормасыт щё̄питаӈкве ро̄ве̄гыт. Дарья Ивановна ла̄выс, матыр пормасыт ю̄нтнэ ма̄гыс сорт хӯл сове сака ёмащакв тувро̄ви. Тав сове та̄к ос матыр ю̄нтнэ порат тыглетувле ёмщакв хӯты. Югорск ос Советский ӯсыгт ма̄щтыр хо̄тпат халт са̄всыр касылыт ва̄рнэ порат Дарья Белова акваг тот касы. Тав тот о̄лнэ ма̄хум ханты ос ма̄ньщи мирыг пормасыт ю̄нтуӈкве ханищтыянэ. Ӯст ялпыӈ хо̄талыт е̄мталан порат тав ма̄ньщи маснутыл масхаты ос юртанэ, рӯтанэ ёт ӯсхулы хосыт ё̄ми. Такви мирке̄тэ урыл са̄в ма̄хумн потырты. Таима̄гыс тав э̄сгын пищмал, янытлан нэ̄пакыл мӯйлупта̄лаве. Ма̄н о̄с таве̄н пӯмащипа ла̄тыӈ ла̄ве̄в. Ос пуссын Дарья Ивановна намхо̄талэ кастыл янытлылӯв. Са̄в со̄тыӈ, щуниӈ хо̄тал, посыӈ номтыл тав э̄лаль вос о̄лы, На̄й-О̄тыранэ̄н вос ӯргалаве. Ня̄враманэ̄н, апганэ̄н, о̄йкатэ̄н вос э̄руптаве, пус ка̄т, пус ла̄гыл, То̄рум ёт, О̄тыр ёт!

1111 2015. 11. 06. Людмила ТЕТКИНА

Ма̄нь па̄вылквет о̄лнэ мир о̄лупсаныл урыл Ха̄льӯс район Кимкъясуй па̄вылт старостахо̄тпаг са̄в та̄л Алексей Ефимович Канев рӯпиты. Ма̄хум хумус тот олэ̄гыт ос манхурип та̄рвитыӈ ва̄рмаль о̄ньще̄гыт, та урыл таве китыгласлум. Хум хо̄тпа ювле тох потыртас. – Ты э̄лыпа̄лт па̄влыӈ мир халт са̄в хо̄тпа рӯпата та̄л о̄лсыт. Ты та̄л па̄вылт на̄й харыгтан йильпи станция ӯнттувес, мощще̄рт рӯпитаӈкве ты о̄вылтахты. Са̄всыр машинал ёвтвесӯв, ты техника Ха̄льӯс мус тотвес. Тэ̄лы лё̄ӈх хосыт на̄й харыгтан машинат тыг тотавет. Таи ёмас, ат хум хо̄тпа рӯпитаӈкве тот патэ̄гыт. Ты юипа̄лт па̄вылт туп хӯрум манос нила хум рӯпата та̄л хульэ̄гыт. Нэ̄ хо̄тпат школат, садикыт, ла̄пкат ос пӯльницат рӯпитэ̄гыт. Акв нэ̄ ос «Рахтынья» нампа община ма̄гсыл пил, па̄кв, ла̄хыс ос хӯл пирмайты. Ат э̄лумхо̄лас электростанцият рӯпитэ̄гыт. Пе̄с на̄йпос ва̄рнэ станция ӣти акв щё̄с мус рӯпитас, тувыл ёлпо̄илта̄лвес, а̄лпыл хо̄т щё̄с порат ос но̄хква̄лтапа̄лвес. Ань Кимкъясуй па̄вылт на̄йпос э̄тэхо̄талэ тэ̄г. Тувыл акваг тох рӯпитым станцияв пе̄сыг е̄мтыс. Ма̄н на̄йпос ва̄рнэ йильпи ут акваг во̄всӯв. Миркол ма̄хум ла̄ве̄гыт, моще̄рт йильпи станция тотаве. «Рахтынья» община кӯщай хум Александр Игоревич Голошубин ты ут Кульпасныл Кимкъясуй па̄выл мус тотуӈкве ла̄вхатас. Тав са̄всыр техника о̄ньщи. Ты та̄л па̄вылт йильпи пӯльница ӯнттувес. Иван Хозумов ма̄ньлат хум ма̄нь ле̄ккарыг кит э̄тпос тыт рӯпиты. Йильпи колт акв палъе̄ре̄т пусмалтан кол о̄лы, мо̄т палъе̄ре̄т ос ле̄ккар пыг о̄лнэ колыл ва̄рвес. Па̄вылт ёмас связь ат о̄ньще̄в. Кульпас па̄выл мирколт рӯпитан хо̄тпат ань ла̄ве̄гыт, тэ̄лы порат па̄влувт тах яныг вышка тӯщтаве. То̄нт тыт «Мотив» нампа сотовый связь рӯпитаӈкве тах паты. Алексей Ефимович э̄лаль ла̄выс, па̄вылт иӈ са̄в та̄рвитыӈ ва̄рмаль о̄лы. Кимкъясуйт ня̄нь ва̄рнэ кол ат рӯпиты, ма̄хум хосат та̄гыл ня̄нь та̄нки ва̄ре̄гыт. Тувыл па̄вылт ёмас клубкол а̄тим. Туи порат па̄выл мус на̄иӈха̄пыт о̄с ат яласэ̄гыт. Тэ̄лы порат машина та̄л та ма̄нь па̄вылкве мус о̄с минуӈкв та̄рвитыӈ. Округ кӯщай Наталья Комарова тув ёхталаме порат па̄влыӈ мир ты ва̄рмаль урыл таве̄н потыртасыт. Ты юипа̄лт тэ̄лы порат автобус Кульпасныл Кимкъясуй мус ялантас. Тувыл тыглетувле та̄тыл яласас, ты юипа̄лт рӯпитан ма̄ныл о̄с та по̄йттувес. Па̄вылт интернет о̄с а̄тим, ма̄хум та̄нки яныг антенна ёвтэ̄гыт ос ты хосыт ищхӣпыӈ ут ёмащакве рӯпиты.

1111 2015. 11. 06. Тамара МЕРОВА

Ща̄нь ла̄тӈын ул ёрувлэлы̄н ос э̄лаль тотэлы̄н Пелагея Яковлевна Хлобыстова ёт ме̄н аквъёт рӯпитан нэ̄ме̄нтыл Сургут ӯст акванхо̄нтхатыгласме̄н. Са̄в мирыӈ ма̄хум халт ма̄н акв по̄хан ликмысӯв. Ме̄н то̄нт соссаӈ ма̄хум пормасыт сунсыгласанме̄н ос акв ханты нэ̄ ёт потыртасме̄н. Тувыл ул са̄в пӯмщалахтумаме̄н ма̄гсыл тав ме̄наме̄н китыгластэ, хотьютыг ме̄н о̄лыме̄н. Та̄рапаттуме юипа̄лт э̄ква ла̄выс: – Матъёмас нэ̄нан хо̄нтсагум. Ам ханты газетат хансым потрыт урыл ла̄вуӈкве таӈхе̄гум. Тот юио̄выл та̄ратам газетат то̄ва потрыт манырсырман по̄сыл хансуӈкве патсаны̄н? Та по̄сыт ма̄навн щар ха̄щта̄лыг о̄лэ̄гыт, та̄н щиранылт ла̄тӈыт ат торгамтахтэ̄гыт. Хӯлыслум кос, ань йильпи графикал хансуӈкве таӈхе̄гыт. Ань тамле по̄сыл на̄н хансуӈкве ла̄ваве̄н ке, ма̄хманув газетав хумус ловиньтаӈкве патэ̄гыт? Ма̄н, матумпа̄лаг е̄мтум хо̄тпат, пе̄с по̄сыл хансым потрыт палт ханьщувлым о̄лэ̄в, та̄наныл ва̄ганӯв. Ма̄н, ты е̄рт о̄лнэ хантыт, ма̄нки сургутский диалект о̄ньще̄в кос, ос на̄н касум диалектыл хансым потранын о̄с торгамтаӈкв патсанӯв. Та̄н тох э̄лаль вос хультэ̄гыт. Тыи а̄ти амккем тох ла̄ве̄гум. Ты ва̄рмалит учёныянув о̄с вос хӯнтамлыяныл. Мо̄лал «Югра лылые̄п» кӯщай нэ̄н Валентина Шадринан о̄с ла̄выгласум кос. Ханты газета ловиньтаӈкве ма̄навн сака пӯмыщ, соссаӈ ма̄хум урыл ля̄ххалыт, о̄лупсаныл урыл потрыт ловиньтэ̄в. – Ань наӈки урыл ма̄нав мощ потыртэ̄н, хотыл о̄лэ̄гын, хо̄т ханищтахтасын, маныр ва̄ре̄гын? – Ам амки а̄ги о̄парищ намыл Катисова о̄лсум, Сургутский район Катисово нампа ма̄т самын патсум. Ма̄н ще̄мьявт хо̄т ня̄врам яныгмас. А̄тяв Яков Ефимович номтыӈ хумыг о̄лыс, Катисово колхозт председателиг рӯпитас. Тувыл 1941 та̄лт войнан тотвес, тот хо̄т по̄рславес. Ма̄н ты кос наме щирыл архивыт кисхатасӯв, нэ̄мат ля̄ххал ат хо̄нтсӯв. Тав хо̄нтлуӈкве минам порат омам хо̄тыт ня̄врамыл та̄рвитыӈыщ о̄лыс. Омам ма̄нав такке̄т янмалтасанэ. То̄нт каӈкум Алексей 12 та̄лэ то̄влыс, ханищтахтуӈкве пойтыс ос омамн нё̄тыс. Алексей 1929 та̄лт самын патыс, ам 1939 та̄лт, ань 76 та̄лум то̄влыс. Омав са̄в рӯпитас, ос 80 та̄лэ мус о̄лыс. О̄лме̄т тав о̄йкатэ акваг номыстэ ос юв сака ӯрыстэ. Ам ань ос ты урыл са̄в щё̄с номылматыгла̄лэ̄гум, ос а̄тям хо̄т по̄рсым ма̄тэ хо̄нтуӈкве сака таӈхе̄гум. Алексей каӈкум ётыл партийный школа а̄стлас ос Угут мирколт па̄влыӈ кӯщаиг рӯпитас. Тав ма̄нь та̄гыл рӯпитаме ма̄гыс «За победу над Германией в годы Великой Отечественной войны 1941-1945» ма̄гыл тагатан ме̄талил майвес. Ты ме̄тале̄тыл каӈкум сака янытлахтас. Юрий апщум Ханты-Мансийскат ле̄ккар хо̄тпаг ханищтахтас, тот хотьютн порслувес. Лида увщим Омск ӯст ле̄ккарыг ханищтахтас, ювле ат ёхтыс, тот хо̄т рӯпитас, ань а̄тимыг е̄мтыс. Тав а̄гитэ еврей хум ва̄рыс, ос лов арыгкем та̄л минам юипа̄лт ще̄мьятэ̄нтыл Израиль ма̄н минасыт, тув о̄лмыгтасыт. Ам тыт амкке̄м хультсум. Пенсиян хосат та̄гыл патхатасум, пенсия олнум но̄х ат нэ̄глы, 14 со̄тыра солко̄вил ойтавем. Свердловск ӯст лёгкий промышленность институт а̄стласлум ос Сургутыт са̄всыр ма̄тт рӯпитасум. Рущ хум ва̄рсум ос тувыл Урал нупыл тав о̄лум ма̄тэ̄н минасме̄н. Са̄в рущ ма̄хум халт хус та̄л о̄лсум, ос амки ханты мирум, ща̄нь ла̄тӈум нэ̄мхуньт ат ёрувла̄лыслум. Та рӯт ма̄хманумн ма̄нки маснутанув суссылта̄санум, атыӈ хӯлыӈ тэ̄нутыл, пилыл тотыгласанум. Тувыл о̄йкам а̄тимыг е̄мтме юипа̄лт, тыг ювле ёхтысум. Школат ханищтахтамув порат ма̄н интернатыт о̄лсӯв. Тот ща̄нь ла̄тӈыл потыртаӈкве ат та̄ртвесӯв. Ос са̄в ханты ня̄врамыт халт о̄лмувт, ма̄нки халувт сытамыг хумус ат потыртэ̄в. Ла̄щал тох та потыртасӯв. Таима̄гыс ма̄н ля̄выльтавесӯв ос намталавесӯв. То̄нт ма̄нки ла̄тӈув школат ат ханищтаслӯв, культурав, пе̄с наканув урыл о̄с ат потыртавесӯв. Ам ань таи на̄нан ла̄вуӈкве таӈхе̄гум, на̄нки ща̄нь ла̄тӈын, ма̄хманын ма̄гыс нэ̄мхуньт ул э̄ссамтэ̄н. Ёмас, посыӈ номтыл э̄лаль о̄луӈкве воратэ̄н.

1111 2015. 11. 06. Светлана РОМБАНДЕЕВА

Во̄рыӈ ма̄т яныгмам э̄ква Туи Ханты-Мансийск ӯст хӯл алыщлан ма̄хум янытлаве̄сыт, ялпыӈ хо̄талыл ва̄рыглаве̄сыт. Са̄всыр ёнгилыт, касылыт о̄лсыт, ё̄рнколыт тӯщталаве̄сыт, мӯй ма̄хум исмитыл ос исум ща̄ил айтве̄сыт. Акв ё̄рнколт ханты нэ̄ Тамара Алексеевна Молданова рӯпитас, тав ётэ ам потрамасум, китыгласлум, хотыл о̄лы, хо̄т самын патыс. На̄н ань э̄лаль тав потре ловиньтэлы̄н. – Ам Кышик па̄вылт о̄лэгум. Ханты-Мансийск ӯст о̄лнэ педучилищат ханищтахтасум, 1977 та̄лт а̄стласлум. Школат ня̄врамыт о̄выл классытыт ханищтым налыман нупыл хӯрум та̄л рӯпитасум, тувыл пенсиян минасум. Акв а̄ги о̄ньще̄гум, наме Елена, Москва ӯст Дружбы народов нампа университетт ханищтахтас. А̄щум Алексей Степанович Молданов. Омам намыӈсуиӈ ма̄щтыр хо̄тпа о̄лыс, Анна Тимофеевна, а̄ги о̄парищ наме Вагатова. Тав ва̄рыглам, ю̄нтыглам пормасанэ Москва ӯст этнографический музейт о̄лэ̄гыт. Омам ма̄ньлат ма̄хум ю̄нтуӈкве, щаквщуӈкве ханищта̄лсанэ. Ханты-Мансийск ӯст са̄всыр выставкат ос семинарыт о̄лыгламаныл порат, тув акваг яланта̄лыс. Тэ̄н а̄тям ёт пенсиян минаме̄н юипа̄лт во̄рн о̄лмыгтасы̄г, хӯл алыщласы̄г, во̄раясы̄г. Ань сас а̄тимы̄г. Ма̄н са̄т ня̄врам о̄лсӯв. Пуссын ханищтахтасӯв, ще̄мьяӈыг е̄мтсӯв, рӯпитэ̄в. Лида увщим школат нэ̄пак ловиньтан колт рӯпиты, Кышик па̄вылт о̄лы. Акв э̄щум ос Белоярский ӯст нэ̄пак ловиньтан колт рӯпиты. Ам ань мантем яныгпа̄ла нупыл е̄мтуӈкве патсум, татем во̄рт о̄луӈкве таӈхе̄гум, хӯл алыщланувум, во̄раянувум. Ма̄н колта̄глув во̄рыӈ ма̄т о̄лыс, рӯт ма̄хманум пуссын ханты ла̄тӈыл потыртасыт. Кышик па̄выл мус са̄лыл яласасӯв, манах щёс по̄лиглавесӯв, лё̄ӈхыт савала̄лсӯв. Тох хотмус та яныгмасӯв. Яныгмам порам ам ань э̄рпыӈыщ номылмата̄лылум. Амти ла̄тӈумтыл акваг потыртэ̄гум, па̄влувт ханты ма̄хманув о̄лэ̄гыт. А̄гим такви культуратэ сака э̄руптытэ, пормасанув ос маснутанув суссылтым са̄всыр выставкат ёт хо̄та̄ти акваг яласа̄лы. Тав пыг о̄ньщи, ам ань пенсият о̄лэ̄гум, ӯщлахтэ̄гум, тэ̄натэ̄н нё̄тэ̄гум. А̄гим омагума̄тягум ёт яныгмас, во̄рт акваг о̄лыс, пе̄с йис о̄лупса ва̄гтэ. Ань таве̄н нё̄тым тыт ты яласэ̄гум, ё̄рнколн щалтсан хо̄тпатын ма̄н культурав урыл потыртэ̄гум. Тамара Алексеевна тамле мӯтраӈ, нёмса хо̄тпа. Таве̄н ам са̄в ёмас, сымыӈ ла̄тыӈ ла̄ве̄гум. Пуста̄гыл вос о̄лы, На̄й-О̄тыранэ̄н вос ӯргалаве!

1111 2015. 11. 06. Людмила ТЕТКИНА

А̄гитпыгыт соссаӈ мирыт урыл потыртасыт Технологопедагогический колледжит рӯпитан нэ̄ Елена Брич о̄выл курсыт ханищтахтан ня̄врамыт ма̄гсыл акв пӯмыщ ва̄рмаль щё̄пита̄лыс. Ты э̄лыпа̄лт тав проект хансыс ос «Газпром нефть» компаниян ке̄тыстэ. Тот «Культурный код» нампа номинацият но̄хпатыс ос олныл майвес. Та̄стым олнытныл тав «Юва» нампа центр ва̄рыс. Ань колледжин ялантан ня̄врамыт ма̄ньщит ос хантыт о̄лупсаныл урыл тот потыртыянэ. Та̄н соссаӈ ма̄хум пе̄с йис ва̄рмаляныл урыл са̄внув вос ва̄гыт ос ты урыл вос пӯмщалахтэ̄гыт, ты нэ̄ акв ёнгил ва̄рыс. А̄гитпыгыт ма̄гсыланыл са̄всыр щирыл намаим хо̄т станция щё̄питавес. Акв колнакт «Национальная кухня» нампа станция о̄лыс, ня̄врамыт тот ма̄ньщит ос хантыт тэ̄нутыл тыттуве̄сыт. Соссаӈ ма̄хум я̄т манхурип хӯл пуве̄гыт, хоты ӯйхул ня̄рнё̄влиг тэ̄ганыл ос манхурип тэ̄нут па̄йтэ̄гыт, та урыл та̄н о̄с китыглаве̄сыт. Китыт колнак «Поющее дерево» намаявес, тот а̄гитпыгыт ос са̄ӈквылта̄пыт, нарсъюхыт ос мо̄т музыкальный инструментыт урыл пӯмщалаве̄сыт. Хӯрмит ма̄ «Таинственный символ» намаим о̄лыс, тот ня̄врамыт хансат урыл китыглаве̄сыт. Нилыт колнак «Этносыг» намаявес, тот округув историятэ урыл потыртаӈкве э̄рыс. Нэ̄пак ловиньтан колт «Национальная литература» рӯпитас, тот ня̄врамыт нэ̄пак хаснэ ма̄ньщи ос ханты ма̄хум урыл потыртасыт. «Югорский богатырь», хо̄тыт ма̄т, а̄гитпыгыт са̄лы сун ӯлтта поргысыт ос мо̄т щирыл кассыт. Ня̄врамытн тох ёнгуӈкве сака пӯмащ о̄лыс. Ма̄ньщи ос хантыт о̄лупсаныл ос пе̄с йис ва̄рмаляныл са̄внув ва̄нэ а̄гитпыгыт ты касылт но̄хпатсыт.

1111 2015. 11. 06. Александр ВЬЮТКИН

Яныгса̄т та̄лыӈ а̄мпар йильпи ма̄н ӯнттувес Ма̄нь таквс э̄тпос ва̄тыт хо̄талэ Ханты-Масийск ӯст о̄лнэ «Торум Маа» музей кол намхо̄талэ янытлан хо̄талыг о̄лыс. Тав рӯпитаӈкв о̄вылтахтаме па̄сныл ва̄т нупыл нёлолов та̄л та минас. Музей янытлан хо̄талт мӯй ма̄хум ма̄гыс са̄в пӯмащ ва̄рыглым о̄лыс. Акв тамле пӯмащ тыи – Сухорукова па̄вылныл тотым пе̄с тит накпа а̄мпар мирн суссылтаӈкв патвес. Ты пе̄с а̄мпар хуритэ̄т хультуптан ма̄гсыл тав ӯсыӈ ма̄н ты тотвес. Ань тав «Югорская Долина» нампа ма̄т ӯнттувес, «То̄рум Маа» музейт рӯпитан ма̄хмытн тав ӯргалаӈкв патаве.

1111 2015. 11. 06. Светлана РОМБАНДЕЕВА

Пе̄с йис о̄лупса та̄рапаттын тэ̄ла Ма̄нь таквс э̄тпос 19-23 хо̄таланэ̄т Ханты-Мансийск ӯст IV Международный Северный археологический конгресс о̄лыс. Ма̄хум лов арыг э̄лы хо̄н ма̄ныл (Германия, Индия, Великобритания, Казахстан, Норвегия, США, Финляндия, Франция, Чехия, Швеция, Эстония, Южная Корея) ос Россияв янытыл налыман нупыл нила ӯсытныл ёхталасыт. Та̄н халанылт китса̄ттем мирн ва̄нэ яныг учёный хо̄тпат о̄лсыт – археологыт, этнографыт, языковедыт, историкыт, антропологыт, музеитыт со са̄всыр культурный центрытт рӯпитан ма̄хум. О̄выл ла̄тыӈ округ кӯщай ва̄ӈын хо̄тпатэ Геннадий Бухтин тав ла̄выс: «Мирхал тэ̄ла ма̄гыс ты сака э̄рнэ хо̄нтхатыглап. Мирн ва̄нэ яныг учёный хо̄тпат ос ма̄ньлат ма̄хум пуссын аквъёт рӯпитэ̄гыт, наука палт та̄рапаттын тэ̄ланыл урыл потыртэ̄гыт. Ма̄н Югра ма̄вт ос мо̄т э̄лы хо̄н ма̄т о̄лнэ мирыт «археологический наследие» нампа тэ̄ла хосыт та̄нти ма̄наныл ос йис порат о̄лум ма̄хманыл урыл са̄внув ва̄ӈкв патэ̄гыт». Тувыл конгресс рӯпататэ та о̄вылтахтас. История ос археология УРО РАН нампа Екатеринбург ӯст о̄лнэ институт кӯщай Евгений Тимофеевич Артемов тох потыртас: «Археология са̄в тэ̄ла о̄ньщи (а̄хвтасыӈ нот, а̄нох, ке̄р, средневековье). Тамле мирхал хо̄нтхатыглапыт ань таима̄гыс ва̄рыглавет – ущ та̄рапаттым сыресыр ва̄рмалит урыл потрыт хӯнтлэ̄в, э̄рнэ йильпи нэ̄пакыт щё̄питэ̄в, э̄лаль хумус рӯпитаӈкве патэ̄в, акванпотыртахтэ̄в. Ма̄н э̄лы хо̄н ма̄т о̄лнэ учёныит ёт рӯпитанэ̄в хусах та̄лыг ты е̄мтыс. Наукат туп акв ма̄ хунь ханищтаве, кос Россия ма̄в ла̄вилув. Хунь наука щирыл рӯпитэ̄гын, э̄ри ма̄ янытыл о̄лнэ ма̄витэ пуссын ханищтаӈкве. Таима̄гыс ма̄н ма̄ янытыл о̄лнэ̄ учёныит ёт акванхартэ̄в, археология ос история тэ̄лат пуссын аквъёт ханищтыянӯв. Ань наукат рӯпитан ма̄ньлат хо̄тпанув мо̄т мир ла̄тыӈ молях ханищтапияныл, потыртаӈкве ха̄сэ̄гыт, э̄лы ма̄т о̄лнэ мир ёмащакв торгамтыяныл». Мо̄т учёный хум Вячеслав Иванович Молодин (академик РАН, исторический наука доктор, профессор, Новосибирск ӯст о̄лы) тав ла̄тыӈ ла̄выс: «Хунь СССР ла̄кквапатыс, антикварный рынок ква̄лтапаптувес. Олн коснэ вильтсовта̄л утыт ма̄ хилуӈкве патсыт. Пе̄с йис со̄рнит, са̄всыр тыныӈ пормасыт хо̄нтэ̄гыт, пуссын по̄хантыналыяныл. Ань ищхӣпыӈ ут хосыт кос маныр хо̄нтуӈкве ро̄ви. Наука ос археология ма̄гыс ты сака пилыщмаӈ ва̄рмаль. Ань май мирн ва̄нэ Петровская коллекция тох ты тэ̄лыс. Ма̄н кӯщаянув илямта̄лсанӯв, акв са̄ккон хассӯв, ворил ты пирмайтавес, тох намаим о̄лы: «Борьба с чёрной археологией». Ань ос таи ма̄гыс сыманув ща̄рге̄гыт, хунь колыт ӯнттавет, ма̄ хилаве, таса̄вит э̄рнэ матарыт хо̄нтавет, нэ̄мхотьютн ат сунсыглавет, ат ханищтавет, нас порсанян та па̄хвтавет. Пе̄с йис о̄лупса ханищтан ма̄хум тув та̄ртнувет те, хо̄нтнэ пормасыт пуссын музеин тотнувет. Ма̄н, учёный ма̄хум, ань ты урыл са̄ккон нэ̄пак щё̄питэ̄в. Иӈ лылыӈ та̄гыл о̄лнэ̄в сыс тав пирмайтаве те, тай ёмас о̄лнӯв. Ам номсэ̄гум, тах ты коныпал са̄в хащта̄л тэ̄ла та̄рапаты». О̄с акв яныг учёный хо̄тпа потыртас, наме Дмитрий Витальевич Бугров, исторический наука кандидат, доцент, Екатеринбург ӯст о̄лы: «Ня̄врам такви о̄лнэ ма̄тэ э̄руптаӈкв ма̄ньта̄гыл ханищтаӈкве э̄ри. Ка̄сыӈ хо̄тпа такви мире вос ва̄гтэ, вос янытлытэ. То̄ванакт сунсэ̄гум, пе̄с памятникыт щар матарыл хотщуртгалымат, пулигка̄ралымат. Тох ва̄руӈкве хунь ро̄ви. Пе̄с пормасыт алпи ман пуӈк хольт ӯргалым о̄ньщуӈкве э̄ри». Тувыл Андрей Владимирович Головнёв потыртас. Тав о̄с намыӈсуиӈ учёный хо̄тпа – профессор, исторических наука доктор, членкорреспондент РАН, наука щирыл нэ̄пакыт хансы, хурит по̄слы, кинат ва̄ри: «Археология – ты сака пӯмыщ ва̄рмаль. Хунь э̄лумхо̄лас пе̄с пормас хо̄нты, таве сунсыглытэ, ханищтытэ, номсахты, йис порат ма̄хум хумус о̄лсыт, маныр о̄щсыт. Тувыл тав такви уре̄т номсащлахты, хоты мирныл о̄лы, э̄лы хо̄талэ урыл номсы. Лӯи ма̄ археология тэ̄ла палт ма̄н ань са̄в рӯпитаӈкве патсӯв. Таве ва̄рнэ ма̄гыс Югра ма̄т са̄в о̄лн та̄стла̄лаве. Улпыл таима̄гыс Россия янытыл мо̄т округыт ман областит халт ма̄кыг тав та о̄лы. Хунь ты рӯпата ва̄ре̄гын, пӯмыщ матыр хо̄нтнэ коныпал (кос средневековье тэ̄ла ла̄вилӯв), археология ёт э̄лумхо̄лас таквина̄тэ ханищтытэ, ма̄ (рущ ла̄тӈыл планета) тармыл сохтыл лю̄лим э̄лаль сунсы, ма̄ янытэ̄т ханищтытэ. Ты сака э̄рнэ, та̄рвитыӈ ос пӯмыщ рӯпата». Хо̄талъя̄т юипа̄лт ма̄хум пуссын секцият щирыл ла̄кквауртхатасыт – 8 я̄нас ма̄т докладыт ловиньтасыт, потыртасыт, тэ̄ланыл урыл халанылт китыглахтасыт. Та мат секцият щирыл та̄н хӯрум хо̄тал рӯпитасыт. Конгресс рӯпататэ оигпаме э̄лыпа̄лт учёный ма̄хум ля̄ххал тотнэ хо̄тпатын маттем та китыглаве̄сыт. В. И. Молодин ла̄выс: «Ты конгрессыт ка̄сыӈ секция такви тэ̄ланэ щирыл рӯпитас, ма̄хум пӯмыщ докладыт ловиньтасыт, китыглахтан ла̄тыӈ са̄в о̄лыс. На̄н округынт сака номтыӈ кӯщаит рӯпитэ̄гыт. Та̄н наука ма̄к тэ̄ланэ ма̄гыс (история, археология, культура ос мо̄т э̄рнэ тэ̄лат) яныг па̄рыс тотэ̄гыт, наукат рӯпитан хо̄тпатын са̄в нё̄тмил ва̄ре̄гыт. Тыхо̄тал ам хӯлсум, насати на̄н округынт яныгса̄т арыг национальность о̄лы. Ос щар ма̄кыг ма̄ньщит, хантыт, ё̄рныт ос рущит та̄н ла̄вавет. Тувыл на̄н ань пуссын аквъёт юртыӈыщ о̄лэ̄гын, ка̄сыӈын такви культуратэ э̄лаль тотытэ, мо̄т мирытын суссылтытэ. Ялпыӈ хо̄талыт ва̄рыглан порат кӯщаитын ка̄сыӈ мир нё̄таве. Ка̄сыӈ ня̄врам такви культуратэ ва̄гтэ, мо̄т мир культура янытлытэ. На̄н ляльтын сунсуӈкве татем ёмас. Ам тыг 1970 та̄лыт порат ёхталасум, то̄нт ӯс янытыл туп йӣв колыт ӯнлысыт. Ань тай тамле нё̄тнэ кол капаит ӯнлэ̄гыт, са̄всыр па̄мятникыт ва̄римат. Ты ма̄т ма̄во̄й ос газ хосыт сэ̄лнэ олныт по̄хан ат тотавет, э̄рнэ тэ̄лат ва̄рнэ ма̄гыс тыт хультуптавет – колыт ӯнттавет, культура, наука ос ханищтап тэ̄лат та̄кмалтавет. Ты ма̄гыс на̄нанн ам яныг пӯмащипа ла̄тыӈ ла̄ве̄гум». Аквкит ла̄тыӈ Е. Т. Артемов ла̄выс: «Матъёмас ма̄ньлат ма̄хум археология науканыл пӯмщалахтэ̄гыт, таве ханищтыяныл. Ты сака э̄рнэ ва̄рмаль. Акв тамле пуӈк а̄гм о̄лы, рущ ла̄тӈыл ла̄ваве «амнезия». Ты хунь э̄лумхо̄лас таквина̄тэ хотёрувлытэ, нэ̄матыр ат номи, ат торгамты. Ма̄н ань ты о̄лэ̄в, о̄с аквтох – акв хотты мирхалт, округт манос странат о̄лнэ ма̄хум та̄нти ла̄тӈаныл ос культураныл хотёрувлыяныл. Тувыл тамле ма̄хум мо̄т яныг мирхалн тэ̄лыглэ̄гыт, та̄н ла̄тӈанылт потыртаӈкве патэ̄гыт, пе̄с порат о̄лум та̄нти ма̄хманыл хот та ёрувлыяныл. Археология ка̄сыӈ хо̄тпан, ка̄сыӈ округын нё̄ты. Хунь ма̄н ка̄сыӈ мир янытлаӈкве патылӯв, ханищтаӈкве, то̄нт Россияв янытыл ма̄н пуссын аквъёт юртыӈыщ о̄луӈкве патэ̄в, ма̄хум та̄нти мираныл ос ла̄тӈаныл ва̄ӈкве патыяныл, о̄с са̄в э̄рнэ тэ̄лат тах ва̄рев. Ты ёмас рӯпата на̄н округынт та о̄вылтавес». Округ кӯщаянув ты конгрессын ёхталам учёный хо̄тпатын о̄с са̄в ёмас, сымыӈ ла̄тыӈ ла̄всыт. Мо̄тыт конгресс тах о̄с Ханты-Мансийск ӯст ва̄раве.

1111 2015. 11. 06. Светлана РОМБАНДЕЕВА

Йис со̄рнит суссылтаве̄сыт Ювле хультум э̄тпост Ханты-Мансийск ӯст археология тэ̄ла урыл конгресс о̄лыс. Ты яныг ва̄рмаль кастыл Астрахань ӯсныл тыг пе̄с со̄рнит тотыглаве̄сыт, «Э̄лумхо̄лас ос Ма̄вит» музейт «Золото сарматов» нампа выставка ва̄рыглавес. 200 арыгтем со̄рни ос ща̄лголн пормасыт мирн суссылтаве̄сыт. Та ма̄т савроматы ос сарматы ма̄хум о̄лсыт. Та̄н лувыт о̄щсыт, луваныл сака янытласаныл, но̄хке̄рнэ пормасыт со̄рнил хорамта̄лсаныл. Сарматский археологический культура сака намыӈсуиӈыг о̄лыс. Тав о̄лнэ ма̄тэ̄т хо̄тал нэ̄глын ос хо̄тал ӯнтнэ е̄рпал мирыт пуссын акванхо̄нтхатыгласыт, матыр тыналасыт, халанылт хо̄нтлысыт. Сармат ма̄хум тамле ялнэминнэ ма̄т о̄лманыл ма̄гыс, мо̄т мирыт халн та тэ̄лыгласыт, хотталь та со̄ймысыт. Учёный ма̄хум пе̄с йӣвыт хилнэ̄ныл порат са̄в со̄рни манос ща̄лголн ань ты хо̄тал мус хо̄нтыглэ̄гыт. Ты пӯмыщ выставка Ханты-Мансийск ӯст ты э̄тпос 29 хо̄талэ мус рӯпитаӈкве паты.

1111 2015. 11. 06. Александр ВЬЮТКИН

Ӯсувн пе̄с порат те̄рныл ва̄рим хорамыт тотвесыт Ма̄нь таквс э̄тпос онтоловхуйплов хо̄талэ па̄сныл Ханты-Мансийск ӯст о̄лнэ «Ма̄вит ос э̄лумхо̄лас» музей колт са̄всыр те̄рныл ва̄рим пе̄с йис хорамыт суссылтавет. Та̄н Салехард ӯсныл «им. И. С. Шемановского» музей колныл тыг тотве̄сыт. Выставканыл рущ ла̄тӈыл «У златоструйных вод реки Плутона» намтсаныл, ва̄т нупыл хо̄тыт хо̄талэ мус рӯпитаӈкв паты. Тотум суссылтапаныл пӯснэ э̄лыпа̄лт Салехард ӯс музей кол тармыл кӯщаиг о̄лнэ нэ̄ Татьяна Валерьевна Копцева мощ потыртас. Тав ла̄выс: «А̄нумн на̄н ӯсын ёхталаӈкв сака пӯмащ. Ты пе̄с йис ща̄лыголн ос а̄нох те̄рныл ва̄рим хорамыт тыг тотыглан щирыл номт пуӈканувт хосат о̄ньщислӯв. Номтув матрыг тэ̄лаг ат е̄мтыс манос хотьютын ат та̄ртвесӯв. Тит округыг халт о̄лнэ соссаӈ ма̄хманув та̄нти ва̄ганыл, хотьютув хоталь сунсы, хотьютув хумус номсы. Ань пуссын хумус э̄рыс, тох та а̄ртмыс, ул молямлэ̄н, сунсэ̄н, матыр ат торгамтан щирыл титыглахтэ̄н». Татьяна Копцева потыртан ма̄ныл а̄стуме юипа̄лт Наталья Викторовна Фёдорова та̄нти суссылтапаныл урыл мощ потыртаӈкв ла̄ввес. Ты нэ̄ о̄с Салехард ӯс музейт кӯщай ва̄ӈын нэ̄г рӯпиты. Та коныпал тав иӈ пе̄с па̄вылкан ма̄т но̄ххилнэ хо̄тпаг ос научный консультантыг о̄лы. Тав ла̄выс: «Ма̄н на̄н палтын тыг са̄тлов арыгтем пе̄с йис пӯмащ пормас тотсӯв. Та̄н халанылт о̄лнэ пормасыт то̄ват щар о̄выл щёс мирн суссылтавет. То̄ва пормасыт IX-XI нот па̄сныл о̄лэ̄гыт. Ёрн ма̄хум о̄лнэ ма̄нылт хо̄нтым йис пормасанув урыл историкыг о̄лнэ учёный ма̄хмытын а̄нысуп те̄раныл уральтыманыл, хораманыл та̄рапаттыманыл юипа̄лт акв щирыл ла̄всыт ты пе̄с ща̄лыго̄лн, а̄нох ос латунь пормасыт Византия, Иран, Сирия, Западная Европа ос Волжский Болгарияныл э̄лы ма̄ныл тотве̄сыт. Та̄н са̄всыр щирыл тыг тотыглаве̄сыт. Са̄выӈпа̄лэ ща̄рщ тапал е̄рныл ёхталам тыналахтам ма̄хмытн тыг тотымат. Музейт о̄щнэ пормасанувт халт са̄в пормас са̄лы ӯрнэ ё̄рн ма̄хмыт палт ёвтве̄сыт. То̄ва пормасаныл иӈ йис та̄гыл ялпыӈыг о̄лнэ̄ныл ма̄гсыл нэ̄мхотьютн ат такталаве̄сыт, ще̄мьят о̄щве̄сыт. Юио̄выл нила та̄л ма̄н Усть-Полуй нампа пе̄с па̄вылъёр ма̄тэ но̄ххилым рӯпитэ̄в. Тот са̄лы ос янгуй аньтныл яктым хорамыт, ща̄лыго̄лн, а̄нох те̄рныл а̄нысупыт, хорамтым ла̄хрыт та па̄вылт хо̄нтсанӯв, сака яныг ма̄щтыр ма̄хум тот о̄лмыт». Тамле пӯмащ пе̄с пормасыт суссылтап о̄выл хо̄талн ёхталам мӯй ма̄хмытын сака мӯстысыт. Та̄н ла̄всыт: «Суссылтап хотвинэ э̄лыпа̄лт ма̄н титынтыг ёхталаӈкв номсэ̄в».

1111 2015. 11. 06. Тамара МЕРОВА

Рӯтыг о̄лнэ мирыт акванатхатыгласыт Ханты-Мансийск ӯст ва̄т нупыл нёлолов хо̄талэ̄ныл налыман нупыл о̄выл хо̄талэ мус «Финноугорские встречи в Югре» нампа нак ва̄рыглавес. Тув са̄в ма̄ныл ёхталам финноугор рӯт ма̄хум акванатхатыгласыт. Ты са̄всыр пӯмыщ ва̄рмалит творческое объединение «Культура» колт ос обскоугорский ма̄ньлат хо̄тпат организацият рӯпитан а̄гитпыгыт та̄н щё̄пита̄лсаныл. О̄выл хо̄таланылт та̄н е̄ӈта пасан ва̄тат ща̄нь ла̄тыӈ ӯргалан, культураныл о̄лнэ тэ̄лат ос та̄наныл э̄лаль тотнэ накыт урыл потыртасыт. Мӯй ма̄хум э̄лыпа̄лт Рику Савонен, финноугорский проектыт щё̄питан кӯщай хум, ла̄тыӈ ла̄выс. Тав юипа̄лэт Александр Новьюхов, губернатор ва̄ӈын хум палт советникыг о̄лнэ хум, ханты ос ма̄ньщи о̄лупсав урыл потыртас. Ма̄н соссаӈ ма̄хум о̄лупсав манхурип окружной программат щирыл ӯргалаве, хус та̄л сыс ма̄ньлат а̄гитпыгыт хумле ёмщакве̄г э̄лаль о̄луӈкве патсыт, хо̄т ханищтахтэ̄гыт, хоты колытт рӯпитэ̄гыт – таит пуссын хӯлтсанэ. Тав ла̄выс: «Ма̄ньщи ос ханты ма̄ньлат а̄гитпыгыт ле̄ккарыг манос ханищтан хо̄тпаг ханищтахтуӈкв а̄стламаныл юипа̄лт хотты ма̄нь па̄вылн ат та̄лн рӯпитаӈкве миннувыт ке, сака ёмас о̄лнӯв. Та̄н тот та̄ра са̄в олныл ойтавет, о̄лнэ колыл мивет ос та̄нки рӯпатаныл са̄в ва̄нэ̄г, ёмщакв ва̄руӈкве ханьщувлэ̄гыт. Яныг ӯст рӯпата хо̄нтэ̄гыт кос ос мощща олныл ойтавет, тувыл кол кинсым акваг о̄лэ̄гыт». Людмила Алфёрова, губернатор ва̄ныӈ хум палт советникыг о̄лнэ нэ̄, о̄с сыресыр проектыт урыл потыртас. Ётыл акванатхатам ма̄хум ты кӯщаит мо̄т ва̄рмалит урыл китыгласаныл. Та̄н финноугор ма̄хум переписьнэ̄пакн хансым тэ̄лат урыл, ищхӣпыӈ утыт хосыт ма̄ньщи ос ханты ла̄тӈыг ханищтан накыт урыл та̄рапаттысыт. Ань ищхӣпыӈ ут хосыт «ВКонтакте» нампа рущ сайтыт «Я люблю хантыйский язык» группат ос «Фейсбук» нампа хо̄н сайтыт «in mansi way /мансийским способом/ ма̄ньщи щирыл» нампа группат ла̄тӈагув ханищтаӈкве ве̄рме̄гыт. Ма̄ньщи группав венгр рӯт ма̄хманув ва̄рылтасыт, таве мо̄т хо̄н ма̄ныл хо̄тпат ёт 384 э̄лумхо̄ласн ань пӯмщалаве. Ищхӣпыӈ утыт палт мощ кисхатуӈкве ке, ро̄ви о̄с матыр пӯмащ кинат, хурит хо̄нтуӈкве. Тот ма̄нки соссаӈ ма̄ньлат а̄гиянувпыганув са̄всыр группат о̄с ва̄ре̄гыт. Наталья Ткачук, А̄с-угорский ма̄хум институт рӯпитан нэ̄, соссаӈ хо̄тпат ма̄гыс анкетанэ̄пакыт тотыглас. Тот та̄нки ща̄нь ла̄тӈаныл ва̄нэ о̄вылтыт китыглавет. Соссаӈ хо̄тпатн хансым манса̄вит литература нэ̄пакыт юн о̄ньще̄гыт, та̄наныл ловиньтыяныл ман а̄ти, рущ ла̄тӈыл хансым манхурип потрыт, та̄нки ща̄нь ла̄тӈын толмащлым мо̄йтыт та̄н ловиньтаӈкв ка̄саще̄гыт – ювле ла̄внэ ла̄тыӈ вос хансэ̄гыт. Нила хо̄тал сыс мо̄т са̄в пӯмыщ тэ̄лат ва̄рыглаве̄сыт ос ты о̄вылтыт ётылнув ля̄ххалыт тах хансэ̄в.

1111 2015. 11. 06. Николай МЕРОВ

Яныгхо̄тпат ла̄тыӈ хӯнтлэ̄н Ха̄льӯс район Ягрим па̄вылт Тамара Семёновна Мезенцева о̄лы. Тав такви А̄нъя па̄вылт самын патыс, тот яныгмас. Ам та па̄вылн туи порат ялмум порат, ты ма̄ньщи э̄ква ёт хо̄нтхатыгласум. Тав а̄нумн а̄ще мо̄йтыглам мо̄йт мо̄йтыстэ. Ма̄нь порат хӯлыгластэ, э̄рыӈ мощ хотёрувластэ, на̄н ты мо̄йт э̄лаль ловиньтэлы̄н. «Пе̄с йис порат ма̄ньщи ще̄мьят пуссын во̄рт о̄лсыт. Э̄кваго̄йкаг о̄лэ̄гхӯлэ̄г, хӯрум пыг о̄ньще̄г. Пыгыт пуссын нэ̄ тотсыт. Хум хо̄тпат во̄раим яласэ̄гыт, юн а̄тимыт. Яныгпа̄ла э̄ква хӯрум маньнэ̄т нупыл акваг ла̄выглас, э̄ти та̄н ва̄руӈкве ат ро̄ви. Маньнэ̄т та̄нки коланылт я̄нас о̄лсыт. Аквматнакт э̄тииг е̄мтыс, кит маньнэ̄г та̄н ва̄руӈкве ӯнттсы̄г. Ма̄ньнув маньнэ тэ̄н нупылэ̄н ты кос ла̄ви: – А̄ква ла̄выс, э̄ти та̄н ва̄руӈкве ул ӯнтэ̄н. Э̄ти та̄н ва̄руӈкве ат ро̄ви. Матарын тах ёхтуӈкве ве̄рмаве̄н. Яныгхо̄тпа ла̄тыӈ хӯнтлуӈкве э̄ри. Яныгнув маньнэ̄г щар ат хӯнтлэ̄г. Э̄тииг е̄мты, о̄с та̄н ва̄руӈкве та ӯнтэ̄г. Са̄ртын ма̄ньщи колт ма̄хум йӣв пал тармыл хуясыт. Акв э̄т хӯлэ̄гыт, маньнэ̄т пуссын ня̄врамыӈыт. Аквматэ̄рт э̄ти кол по̄хын хотьют ёхтыс. Ёсаг манос товтыг акванра̄тыяге, па̄ссаг тӯйтныл паргалтыяге. А̄ви сунт мус ёхтыс, матаре та лохги. Яныгнув маньнэ̄г та̄н ва̄руӈкве хотпо̄йтсы̄г. Ма̄ньнув маньнэ ла̄ви: – Ам ты кос ла̄всум, э̄ти та̄н ул ва̄ре̄н. Нэ̄н манрыг тох капыртэгы̄н. Пуссын хотрохтысыт. Пилым тох э̄т та хӯлсыт. А̄лпыл ква̄лсыт, о̄йканыл иӈ ат ёхтысыт. Во̄рт яласэ̄гыт, хосан манос ва̄тин минасыт, та̄нки ва̄ганыл. Хӯрум маньнэ̄т ня̄врамыӈ та̄гыл та̄нки юн о̄лэ̄гыт. Хо̄тал матыр ва̄руӈкве пувиньтахтэ̄гыт, ня̄враманыл ёт сактахтэ̄гыт. Э̄типа̄лаг е̄мты, китгаге о̄с та̄н ва̄руӈкве та ӯнтэ̄г. Ма̄ньнув маньнэ тай хо̄тал порат та̄н ва̄ри. Тав тэ̄натэ̄н ты кос ла̄ви: – Нэ̄н та̄н э̄ти ул ва̄ре̄н, ат ро̄ви. Манрыг ат хӯнтлэгы̄н. Матарын тах ёхтаве̄н. Ат хӯнтлэ̄г, та̄н э̄лаль тох та ва̄ре̄г. Тувыл китыт э̄типа̄лаг е̄мтыс, хуйнэ ма̄ щё̄питасыт. Ёлхуйнэ̄ныл э̄лыпа̄лт о̄с та̄н ва̄руӈкве та ӯнтсы̄г. Аквматэ̄рт кол са̄мт ос матыр суйтуӈкве та патыс. Кӯтювыт кон та ня̄ӈхалтахтасыт. Хотьют ёсаге манос товтаге акванра̄тыяге, пассаге тӯйтныл паргалтыяге. А̄висунтын ёхтыс, матаре та лохги, колса̄мыт нас то̄рге̄гыт. Маньнэг хотрохтысы̄г, та̄н ва̄руӈкве по̄йтыгпасы̄г, ёлхуигпасы̄г. Хӯрмит хо̄тал е̄мтыс. Тэ̄нут па̄йтсыт, маныр ва̄рнут о̄щсыт, ва̄рсыт. Э̄ти ляпамаӈкве та патыс. Хо̄тал ӯнтум юипа̄лт о̄с та̄н ва̄руӈкве та ӯнтылматсы̄г. Аквматэ̄рт, ана на, со̄рни яныг То̄рум, кӯтюв лю̄ль турыл хортуӈкве та ква̄лапас. А̄висунт та лохаве. Щар я̄хамы̄г, пилыщмаӈыг е̄мтыс. Ань пе̄с ма̄хум ла̄всыт, ма̄ньнув маньнэ мӯтраӈыг, номтыӈыг о̄лыс. Ня̄врамыт вильтаныл, ка̄таныл, лутаныл пуссын хӯл во̄ил сартсанэ. Маньнэ̄г кол са̄мн ӯнтсы̄г, паттуп самаге̄н нас лурге̄г, хотрохтысы̄г. Ма̄ньнув маньнэ таквина̄тэ о̄с во̄ил сартыстэ. Яныгнув маньнэ̄г во̄всаге, тэ̄н о̄с сартхатсы̄г. Молямтахтым пуссын сартхатасыт, тувыл пал тармыл пуссын ёл та хуигпасыт. Юв Та̄нварпэ̄ква та щалтыс. Кол янытыл кисхатым та ё̄мыгты. Яныг маньнэ молямтахтыматэ ка̄тэ хӯл во̄ил ёмщакв ат сартме. Аквматэ̄рт Та̄нварпэ̄ква таве та ка̄саластэ, пувумтастэ, та алапастэ. Та̄нварпэ̄ква тув мус та ё̄рыг о̄лыс, яныг маньнэ сыс лув та̄нанэ кон хасумтасанэ. Котиль маньнэ тыи ка̄салас, щама рагатас. Тувыл ма̄нь маньнэ ква̄лапас, Та̄нварпэ̄ква хӯл путыл ӯнттыстэ ос тав нупылэ ла̄ви: – А̄ква, наӈ тэ̄пъялэн, ам мощщан кон ялэ̄гум, ань ёхтэ̄гум. Та сыс ня̄враманэ тӯйтым кон тотыгпасанэ. Пусыг хультум кӯтюванэ ке̄рсанэ, во̄рн о̄йкатэ палт та тахас. Ты мо̄йт тув паты, пе̄с йис потрыт мӯтра тотэ̄гыт яныгхо̄тпат маныр ла̄ве̄гыт, хӯнтлэ̄н! Ты мо̄йт Тамара Семёновна Мезенцева мо̄йтыстэ, нэ̄пакн Николай МЕРОВ хансыстэ.

1112 2015. 11. 20. Валентина УЗЕЛЬ

Ма̄хманув акв э̄тпосн манах солко̄вил ловиньтаве̄сыт Ты э̄тпос 6 хо̄талэ̄т округ кӯщаюв Наталья Комарова хӯлтнэ нэ̄пак хансыс, тот та урыл хансым о̄лы – ань э̄тпос сыс акв хо̄тпан тэ̄нут ёвтнэ ма̄гыс манса̄вит солко̄ви э̄ри. Рущ ла̄тӈыл ты олныт «прожиточный минимумыг» ла̄вавет. Ты нэ̄пак хосыт тамле ва̄рмаль та̄рапатыс. Ювле хультум хӯрум э̄тпос сыс округувт тэ̄нут тынаныл мощщагнувег е̄мтмыт. Таима̄гыс ня̄врамыт, пенсия винэ хо̄тпат, рӯпитан ма̄хум акв э̄тпосн тыса̄вит солко̄вил ловиньтымат: II квартал: ня̄врамыт ма̄гыс – 14 со̄тыра 234 солко̄ви; пенсия винэ ма̄хум – 11 со̄тыра 759 солко̄ви; рӯпитан хо̄тпат – 15 со̄тыра 525 солко̄ви; III квартал: ня̄врамыт 13 со̄тыра 567 солко̄ви; пенсия винэ ма̄хум – 11 со̄тыра 413 солко̄ви; рӯпитан хо̄тпат – 15 со̄тыра 49 солко̄ви. Ты йист ла̄пканувт тэ̄нут ман пормас тынаныл акваг но̄х та нё̄тавет. Ос ты хӯлтнэ нэ̄пак хосыт ань са̄в хо̄тпа нё̄туӈкв ат патавет. Матыр олннё̄тмил винэ ма̄гыс «справка о доходах» нампа нэ̄пак акваг титыглаве. Ос хо̄тпат сэ̄лум манос винэ олнаныл «прожиточный минимум» са̄витныл мощ са̄внув солко̄ви ке выгыт, тав э̄лаль тах ат нё̄тавет. Округ мирколныл те̄тым ля̄ххал ма̄ньщи ла̄тӈыл Валентина Хозумова хансыстэ.

1112 2015. 11. 20. Николай МЕРОВ

Колыт хотщё̄питан ма̄гыс са̄в олн атаве Ты э̄тпост Ханты-Мансийск ӯс ля̄ххал тотнэ колн округ кӯщай ва̄ӈын хум Дмитрий Шаповал ос са̄в накпа колыт хотщё̄питан фондыт рӯпитан кӯщай Сергей Макаров ёхталасы̄г. Тэ̄н о̄лнэ колыт хотщё̄питан урыл хӯлтнэ ла̄тыӈ потыртасы̄г. На̄н ань тэ̄н потранэ̄н э̄лаль ловиньтэ̄н. Мо̄лты та̄л сӯкыр э̄тпост са̄в накпа колыт хотщё̄питан ва̄рмаль рӯпитаӈкве о̄вылтахтас. Ма̄хум ка̄сыӈ э̄тпос олн тув ойтэ̄гыт. Ты тэ̄ла рӯпитан па̄сныл акв та̄л минас. Ань Югра ма̄т хо̄т со̄тыра са̄тсат са̄в накпа кол хотщё̄питан ма̄гыс планнэ̄пакн хасве̄сыт. Тот ниласа̄т арыгтем ще̄мья о̄лы. Округувт хо̄тпан процент са̄виткем ма̄хум ты тэ̄ла ма̄гыс та̄ра олн ойтэ̄гыт. Кӯщаит ты ва̄рмаль щирыл акваг сапра̄нит ва̄рыглэ̄гыт, ма̄хумн хӯлтнэ ла̄тыӈ ла̄ве̄гыт. Ань ты хо̄тал мус пе̄с колыт хотщё̄питан ма̄гыс 550 миллион солко̄ви атвес. То̄ва колыт щё̄питаӈкве патве̄сыт. Хоты колыт арген пе̄сыг е̄мтсыт, тамле колытт о̄лнэ хо̄тпатныл олн ат виве. Ты хо̄тпат мо̄т йильпи колыл тах мивет. Кол ма̄гыс атым олныт государства па̄лыл акваг уральтым о̄ньщуӈкве патавет. Хо̄тпа колэ тыналан порат, та ойтум олнанэ таве̄н ювле ат мивет, кол хотщё̄питан ма̄гыс тох та хультэ̄гыт. Округ янытыл Когалым, Ханты-Мансийск, Белоярский, Югорск, Лангепас, Нягань, Нефтеюганск ос Радужный ӯсытт ма̄хум кол щё̄питан ма̄гыс олн та̄ра ойтэ̄гыт. Ос Сургут, Покачи, Мегион ӯсытт ос Нижневартовский районт о̄лнэ ма̄хум а̄рнтаг са̄в олн атсыт. Тот о̄лнэ са̄выӈпа̄лэ э̄лумхо̄лас ты тэ̄ла урыл нэ̄матыр торыӈ ат ва̄гыт, таима̄гыс ойтхатуӈкве хурахлэ̄гыт. Та̄нанылн ты ва̄рмаль урыл ёмщакв потыртаӈкве э̄ри, та̄ра вос паттысаныл. Ань тот ва̄тихал сапра̄нит ва̄рыглаӈкве патавет. Колыт ма̄гыс олн атнэ фондыт рӯпитан кӯщай Сергей Макаров ла̄выс, 2014 та̄лт 350 са̄в накпа кол хотщё̄питавес. 2015 та̄лт ос 320 колытт рӯпата ва̄раве. Ань Белоярский, Советский ос Октябрьский районытт колыт а̄стлаве̄сыт. Округувт са̄всыр ӯст атхуйплов са̄вит кол иӈ хультыс, та̄н та̄л холнэ мус а̄стлан щирыл о̄лэ̄гыт. Ма̄хум ты рӯпата та̄нки о̄с уральтаӈкве ве̄рмияныл. Хотщё̄питан колыт ат та̄л уральтым о̄ньщавет. Ты та̄лыт сыс, кол матаре хомлег е̄мты ке, рӯпата ва̄рум компания та̄нки ё̄ранылт хотщё̄питаӈкве ла̄вавет тах.

1112 2015. 11. 20. Валентина УЗЕЛЬ

2016 та̄лн округ бюджет пирмайтавес Округ Думан пе̄риим ма̄хум сапра̄нияныл ты э̄тпос 16 хо̄талэ̄т олыс, та̄н йильпи 2016 та̄лн округ бюджет пирмайтасаныл. Округ бюджет са̄кконыг ла̄ваве, таима̄гыс депутатыт таве пирмайтан порат округ кӯщаит титыглыяныл – манса̄вит олн хотталь та̄н та̄стэ̄гыт. Вера Дюдина округ мирколт олн ловиньтан департаментыт кӯщаиг о̄лы. Тав ань депутатыт нупыл 2016 та̄лн хансым олныт урыл потыртас. Тав потре щирыл та̄рапатыс, мо̄тыт та̄л ма̄н та̄рвитыӈнувег о̄луӈкв патэ̄в. Россия Министерство финансов па̄лыл ма̄н округув мощщанув олныл тах миве. То̄ва депутатыт ла̄всыт, ань ты мус та̄н тамле округ бюджет ат ва̄сыт, ка̄сыӈ я̄нас ва̄рмаль (ты образование, здравоохранение, спорт ос мо̄т статьят) пуссын мощща олныл хансымат. Вера Дюдина ювле ла̄выс, 2016 та̄л сыс та̄н мощщамощща олныл ла̄щлакв пуссын нё̄туӈкв патыяныл. Валентина Васильева

1112 2015. 11. 20. Тамара МЕРОВА

Та̄н округ па̄лыл янытлаве̄сыт Ты э̄тпос нила щислат Россият о̄лнэ ма̄хум Единства нампа ялпыӈ хо̄тал янытласыт. То̄нт са̄всыр мирыт акванатхатым юртыӈыщ ӯсхулыт хосыт ё̄мсыт, э̄ргысыт, йӣквсыт ос са̄всыр пӯмащ суссылтасыт. Ос аквта хо̄талт Ханты-Мансийск ӯст «Диалог национальных культур» нампа форум ва̄рыглавес. Уральский федеральный округныл ёхталам мӯй ма̄хум са̄всыр тэ̄ланыл урыл тот потыртасыт, суссылтапыт щё̄пита̄лсыт. Та̄н акванюрщхатнэ ос акваннё̄тхатнэ ма̄гыс та̄нки халанылт потыртахтасыт. Ань тамле ва̄рмалитыт ёт са̄в та̄л рӯпитан, та̄наныл та̄кмалтан ос э̄лаль тотнэ хо̄тпат яныг мӯйлупсал майве̄сыт. Та̄н э̄лыпа̄ланылт о̄влэ̄т губернатор ва̄ӈын хум Алексей Путин паща ла̄тыӈ ла̄выс. Тувыл округувт хосат та̄гыл о̄лнэ армяныт, дагестанцыт, башкирыт, осетиныт, таджикыт, немцыт ос мо̄т мирыт «За вклад в развитие межэтнических отношений в Югре» премиял мӯйлуптаве̄сыт. Ос акв тамле намаим премиял лов хо̄тпат майве̄сыт ос олныл та̄стуве̄сыт. Та̄н халанылт ты ма̄хум о̄лсыт: Сургутский районт о̄лнэ нэ̄ Людмила Егоровна Добрынина, тав ня̄врамыт ма̄гыс туи ӯщлахтын кол ва̄рыглы ос соссаӈ ма̄хум о̄лупсаныл о̄вылтыт та̄нанылн потырты. Касум па̄вылныл ёхталам э̄ква Мавра Михайловна Конева «Асъя кыа» э̄ргын группатэ ма̄гыс э̄сгувес. Ты саран ма̄хум о̄с са̄в ма̄н во̄виньта̄лавет ос тот та̄нки мираныл урыл потыртэ̄гыт. Алексей Клаузер Ханты-Мансийск ӯсныл ос Давид Егшатян Сургут ӯсныл этноспорт щирыл рӯпитанэтэ̄н ма̄гыс янытлавесы̄г. Евдокия Белявская, Надежда Костылева, Ульяна Данило ханты нэ̄т та̄нки культураныл э̄лаль тотнэ щирыл олныл о̄с майве̄сыт. Ос матыр пормасыт манос нё̄тнэ маснутыт ю̄нтнэ нила ма̄щтыр хо̄тпат Диплом нэ̄пакыл мӯйлуптаве̄сыт. Тот Мария Сергеевна Мерова пе̄с щирыл ю̄нтнэ ма̄ньщи маснутанэ ма̄гыс янытлавес. Ханты-Мансийскат ремёсла центрыт рӯпитан нэ̄ Элеонора Митрофанова исум ке̄рныл пе̄с щирыл сыресыр утыт ва̄ри, тав ань о̄с э̄сгувес. «Югра-Классик» яныг колт ма̄хум янытлыманыл юипа̄лт пӯмыщ концерт о̄лыс. Тот «Русь» нампа округ фестиваль ва̄рыглавес. Ань са̄в ма̄ныл о̄лнэ мирыт та̄нки э̄рганыл э̄ргысаныл ос йӣквсыт. Рущ ма̄хум пе̄с та̄гыл о̄ньщум маснутаныл тот о̄с суссылтасыт.

1112 2015. 11. 20. Николай МЕРОВ

Нэ̄пак хансуӈкв ущты о̄вылтахтам ма̄хум нё̄тавет Ты э̄тпос хӯрмит хо̄талэ̄т округ Дума ассамблея кӯщай Еремей Айпин ос тот рӯпитан депутат нэ̄ Надежда Алексеева сапра̄ни щё̄пита̄лсы̄г. Тув ёхталам ма̄хум соссаӈ мир та̄ратан нэ̄пакыт ос ща̄нь ла̄тыӈ э̄лаль тотнэ ва̄рмалит урыл потыртасыт. Ты кастыл ӯст рӯпитан ма̄ньщи ос ханты ма̄хманув тув во̄виньта̄лве̄сыт. Ань ловиньтан нэ̄пак янытлан та̄л мины. Ты хосыт сӯкыр э̄тпост Еремей Айпин Венгрия ма̄н нэ̄пак хаснэ хо̄тпат нёлоловит Конгрессын ялыс. Манырсыр рӯпата тот ва̄рсыт, тав ты урыл потыртас. Тувыл А̄с-угорский институтт рӯпитан нэ̄г Елена Косинцева ос Светлана Динисламова ма̄хум э̄лыпа̄лт потыртасы̄г. Соссаӈ мирув нэ̄пак хаснэ тэ̄ла щар ма̄к 1930 та̄лыт порат э̄лаль тотуӈкве о̄вылтавес. То̄нт ущты нэ̄пак хаснэ соссаӈ ма̄хманув мирн ва̄ӈкве патве̄сыт. Та сыс ань тамле ва̄рмаль о̄лы, соссаӈ мирув халт са̄выӈпа̄лэ нэ̄пак хаснэ хо̄тпат яныгпа̄лаг е̄мтсыт. Ты Андрей Тарханов, Роман Ругин, Мария Вагатова (Волдина), Еремей Айпин ос мо̄таныт. 2007 та̄лт Микуль Шульгин, 2011 та̄лт ос Юван Шесталов а̄тимыг е̄мтсы̄г. Ос акв ва̄рмаль о̄лы, ань хо̄тпат ща̄нь ла̄тӈыл мощща потыр хансуӈкве патсыт. Тыи ос таима̄гыс тох е̄мтыс, соссаӈ ма̄хманув ща̄нь ла̄тӈыл нэ̄пакыт ат ловиньтыяныл. Ань такви ла̄тӈе ва̄нэ хо̄тпат мощщаг е̄мтэ̄гыт, ма̄н ма̄гсылув ты яныг та̄рвит. Ань писателит рущ ла̄тӈыл нэ̄паканыл хансыяныл, са̄внув мир нэ̄паканыл вос ловиньтыяныл. Ань ты накт ма̄ньщи ос ханты мирагув халт потрыт хаснэ хо̄тпат хосат йильпи нэ̄пак ат та̄рта̄лсыт. Ущтынув нэ̄пак хансуӈкв о̄вылтахтам хо̄тпат нэ̄пакыт хансэ̄гыт кос, ос та̄наныл ханищтан ос хӯлтыглан хо̄тпа а̄тим. Та сыс, акв ёмас тэ̄ла о̄лы, ань ня̄врамыт ма̄гыс ща̄нь ла̄тӈыл са̄в нэ̄пак хансаве ос та̄ратаве. Ты сапра̄нит соссаӈ ма̄хум ты та̄рвитыт мӯсхалыг щё̄питаӈкве потыртахтасыт. Са̄всыр потрыт хаснэ яныгпа̄ла хо̄тпат ущты хансуӈкв о̄вылтахтам хо̄тпатн нё̄туӈкве ла̄вхатсыт.

1112 2015. 11. 20. Александр ВЬЮТКИН

Ӯщлахтын ма̄ тармыл кӯщаит потыртасыт Яныг таквс э̄тпос хӯрумхуйплов хо̄талэ̄т туристыт яласан ос та̄наныл пирмайтан ма̄хум ма̄гсыл Ханты-Мансийск ӯст пӯмащ ва̄рыглавес. Пӯмщаныл рущ ла̄тӈыл «XIV специализированная туристическая выставкаярмарка «Югра Тур 2015» ла̄ввес. Туристыт ёт рӯпитан ма̄хум акванхо̄нтхатыглан ва̄рмаляныл тит хо̄тал минас. Та тит хо̄талыг сыс пӯмащ тиснэ яласан ма̄хум ма̄гыс рӯпитан колыт халанылт акваннё̄тхатым э̄лаль рӯпитаӈкв потыртахтасыт. Акв нэ̄пакт хасхатама̄ныл юипа̄лт Крым маныл ёхталам ма̄хум ёт прессконференция о̄лыс. О̄влэ̄т Игорь Алексеевич Котляр такви о̄щнэ номтанэ потыртасанэ. Тав Республика Крым ма̄т ӯщлахтын колыт тармыл кӯщай ва̄ӈын хумыг о̄лы. Игорь Алексеевич ла̄выс: – Ма̄н, тыг ёхтум ма̄хум, на̄нан ма̄нти палтылӯв во̄вуӈкв ёхтысӯв. Ма̄н палтув та̄л палыт ёхталаӈкв ро̄ви. Тэ̄лы порат хо̄таланув а̄ти сака ре̄гыӈыт, ща̄рщ витэ ос по̄лям. Таи ма̄гсыл та̄л порат ма̄н о̄лнэ ма̄вн ёхталан ма̄хум нас пусмалтахтуӈкв ве̄рме̄гыт. На̄н ул номсэ̄н, на̄н лӯима̄ олнанын алы ма̄н ойтхатым пуссын тув та минэ̄гыт. Пӯмащ тиснэ ма̄хум ёт рӯпитан ма̄гыс ма̄н на̄н ётын пе̄нтхатнэ акв номт о̄ньще̄в. Лӯима̄т о̄лнэ ма̄хум тув вос ёхталэ̄гыт, та пе̄нтсыл ос лӯима̄н ялуӈкв ка̄сащан ма̄хманув тыг вос ювыт. Ам номсэ̄гум, тох пе̄нтхатнэ щирыл рӯпитан тэ̄лав ёмасыг тах е̄мты. Республика Крым карс нё̄рыӈ ма̄т о̄лы. Тыт о̄с нё̄рыт о̄лэ̄гыт. Таи ма̄гсыл ма̄навн тыг ёхталаӈкв о̄с сака пӯмащ. Ань са̄в мир ла̄глыл ё̄мыгтан ӯщлахтын ма̄ тинсэ̄гыт. Ам номсэ̄гум, са̄в мир ёмащакв тыт вос ӯщлахтэ̄гыт, ты рӯпата округынт ущты о̄вылтаве. Пуссын те а̄ртми, Крым ма̄ ёт касуӈкв тах ве̄рмегы̄н, хотьютув ёмащаквнуве̄г рӯпиты. Игорь Алексеевич юипа̄лт Валерий Васильевич Батюк такви рӯпататэ урыл мощ потыртас. Тав Евпатория ӯс тармыл ва̄ӈын кӯщаиг о̄лы. Тав тох ла̄выс: – Ма̄н яныгса̄т арыгтем та̄л ӯщлахтын ма̄хум пусмалтэ̄в. На̄н округын ёт хӯс та̄л рӯпитэ̄в. Евпатория ӯсув по̄хат солвалыӈ вит но̄хпостын са̄в во̄ӈха о̄лы. Ты ма̄гсыл ма̄н са̄в а̄гмыӈмо̄сыӈ ня̄врамыт пусмалтым рӯпитэ̄в. Тувыл нас ӯщлахтан мир о̄с пирмайтыянӯв. Хӯрмит хум Андрей Николаевич Ивкин Крым республикат о̄лнэ Саки ӯс кӯщаиг о̄лы. Ты хум ань ла̄выс: – На̄н округын ма̄тэ а̄нумн сака мӯсты. Мирн матыр пӯмащ суссылтаӈкв тыт са̄в ро̄ви. Ма̄н ос мо̄т пӯмащ о̄ньще̄в. Ты хо̄тал ма̄н Урай, Нижневартовск ос Ханты-Мансийск ӯсыт кӯщаит ёт халувт акваннё̄тхатым э̄лаль рӯпитаӈкве потыртахтасӯв. Э̄лы ма̄ныл ёхталам нэ̄ Илона Ансоне о̄с потыртас. Тав туриндустрия Российский Союз Балтийский отделениятэ̄т кӯщай нэ̄г о̄лы. Нэ̄ ла̄выс: – Ма̄н ань аквъёт ёмас э̄рнэ номт тэ̄лаг ва̄рилӯв. Хунь ма̄нти ма̄хманув тыт ӯщлахтаӈкв ка̄саще̄гыт, то̄нт мо̄т хо̄н ма̄ныл ма̄хум тыг ёхталаӈкв о̄с патэ̄гыт. Со̄ль, Россияв янытыл ӯщлахтын ма̄ тыкос са̄в о̄лы. Та̄н мирн сака ат ва̄вет. Хунь акваннё̄тхатым рӯпитаӈкв о̄вылтахтэ̄в, то̄нт ущта ӯщлахтын ма̄ наме хӯнтамлаве. Та пе̄нтсыл пӯмащ тиснэ щирыл ӯщлахтым яласан ма̄хум тув та̄ра минмыгтэ̄гыт. На̄н округынт са̄в паль во̄р, сытам ма̄т, са̄в я̄ о̄лы. Та коныпал иӈ аквты ляпат яныг но̄тпа нё̄рыт ӯнлэ̄гыт. Тыи мирн сака мӯсты. Хум хо̄тпатытн, со̄ль, ща̄рыщ ва̄тан ре̄гыӈ ма̄н ялуӈкв марщумыг е̄мтыс. Таима̄гсыл яныг ӯсытт о̄лнэ ма̄хум на̄н о̄лнэ ма̄н ӯщлахтын ма̄гсыл ты пе̄рие̄гыт. Тыт няслуӈкв, писалил мощ па̄тлуптаӈкв ос хӯнтхӯргыл хӯнтхатым нё̄рн ялуӈкв ро̄ви.

1112 2015. 11. 20. Людмила ТЕТКИНА

Рӯпатаныл урыл потыртаӈкве во̄виньта̄лве̄сыт Ма̄нь таквс э̄тпос оигпам э̄лыпа̄лт са̄всыр ӯсытт ос районытт о̄лнэ ма̄хум Ханты-Мансийск ӯст акванатыглаве̄сыт. Ты тэ̄ла рущ ла̄тӈыл «IV Социальная ярмарка некоммерческих организаций» намаим о̄лыс. Округув янытыл тув ёхталам ма̄хум суссылтапыт ёттотыгласыт. Ӯсыт ос районыт манхурип общественный организацият о̄лэ̄гыт ос манхурип рӯпата ва̄ре̄гыт, тот суссылтасыт. Урай ӯсныл ёхталам ма̄хум та̄нки выставка о̄с щё̄пита̄лсыт. Ты та̄л сыс та̄н ӯсанылт о̄лнэ общественный организацият акв проект хосыт рӯпитэ̄гыт. Та̄н ты тэ̄ла «Этнодвор» намаясаныл, са̄всыр ялпыӈ хо̄талыт о̄лыгланэ̄ныл порат са̄всыр мирыт культураныл урыл та̄н пуссын аквъёт тот потыртэ̄гыт ос суссылтэ̄гыт. Та ӯст по̄хат Силава па̄вылт о̄лнэ Ольга Александровна Фомичёва ты тэ̄ла щирыл о̄с рӯпитас, хо̄нтаӈ ма̄ньщит пе̄с йис ва̄рмаляныл урыл потыртас. Тав ярмаркан ёхталаме порат ла̄выс: «Тамле рӯпата таи ма̄гсыл ва̄рилӯв, тыт о̄лнэ са̄всыр мирыт та̄нки халанылт вос ва̄йхатэ̄гыт ос та̄нки пе̄с йис ва̄рмаляныл э̄лаль вос тотыяныл». Округувт о̄лнэ са̄всыр мирыт э̄лаль юртыӈыщ вос о̄лэ̄гыт, манхурип рӯпата ва̄руӈкве э̄ри, та урыл потыртасыт. «Югра лылые̄п» соссаӈ ма̄хум общественный организация кӯщаӣ хум Вячеслав Новьюхов тув о̄с во̄виньта̄лвес. Ма̄ньщит, хантыт манхурип та̄рвитыӈ ва̄рмалит о̄ньще̄гыт, та урыл тот ла̄тыӈ ла̄выс.

1112 2015. 11. 20. Валентина УЗЕЛЬ

Ма̄нь па̄влыӈ ма̄т о̄лнэ нэ̄кве Валентина Ивановна Тарлина ма̄нь па̄влыӈ ма̄т, Ханты-Мансийский район Кышик па̄вылт, самын патыс, тот яныгмас. Ты па̄вылт са̄выӈпа̄лэ А̄с ма̄хум о̄лэ̄гыт. Валентина тав о̄с ханты нэ̄. Тав а̄ще Иван Григорьевич Молданов Сургутский районныл о̄лыс, ма̄хманэ̄н ханты ла̄тӈыл тох ла̄ввес – Ай Ванька, ма̄ньщи щирыл – Ма̄нь Ванька. Оматэ Елизавета Григорьевна ос Октябрьский район Малый Атлым па̄вылныл тув тотвес, тав а̄ги о̄парищ наме Тарлина о̄лыс. Тэ̄н акванхо̄нтхатамуме̄н юипа̄лт Кышик па̄вылн о̄лмыгтасы̄г. Тот 1962 та̄лт Валя а̄гитэ̄н самын патыс. Омагеа̄тяге мирколн ат ялсы̄г, акванминасы̄г, тох э̄лаль та о̄лсы̄г. Валентина школа а̄стластэ, э̄лаль ханищтахтуӈкв Салехард ӯсн минас. Тот зооветтехникумт ӯйхулыт пусмалтан ле̄ккарыг ханищтахтас. Рӯпитаӈкв тот о̄вылтахтас, ос ат ве̄ритас, сака юв хартвес, юв та минас. Кышик па̄вылт са̄всыр ма̄т рӯпитас, школат, пӯльницат. Тувыл матыр а̄гме̄н илямтавес, хоса пусмалтахтас, ос «инвалидность 2 группы» нэ̄пакыл майвес. Тамле нэ̄пак о̄щнэ ма̄хум сака рӯпитаӈкв ат та̄ртавет. Ос рӯпата та̄л юн ӯнлуӈкв та̄рвитыӈ. Валентина Ивановна акв тамле та̄рвитыӈ а̄гм о̄щнэ хо̄тпат палт юв ялантаӈкв патыс. Та̄н ётаныл потыртыматэ та̄рапаттыс – хотьютэ маныр ма̄щтырлаӈкв ха̄сы. 2006 та̄лт ты ма̄хум ӯргалан кӯщаиг ӯнттувес. Та па̄сныл тав та̄наныл тармылпаттым о̄ньщиянэ. Акваг уральтыянэ, нё̄тыянэ. Тувыл тав мо̄лты та̄л миркол депутатыг пе̄риявес. Ань ты ва̄рнэ рӯпататэ урыл тав а̄нумн тох потыртас: – 2014 та̄лт па̄влыӈ мирн ам миркол депутатыг пе̄рияве̄сум. Аты номсысум ты рӯпата ва̄руӈкв, ос ханты ма̄хманум хотмус нё̄туӈкв э̄ре̄гыт. Та̄н халанылт са̄выӈпа̄лэ пуссын рӯпата ат о̄ньще̄гыт, вина аим нас юн ӯнлантэ̄гыт. Пе̄риим ма̄хум халт ам кол ӯнттын рӯпата уральтым о̄ньщилум. Ам ётум иӈ акв ханты нэ̄ депутатыг пе̄риявес – ты Лидия Сульманова, «Вар» нампа община кӯщай нэ̄. Ме̄н тав ётэ, тит ханты хо̄тпаг, рущит ос мо̄т мир халт ты рӯпитыме̄н. Ма̄н па̄влувн са̄всыр яныг кӯщаит акваг ёхталэ̄гыт. Мо̄лты та̄лныл па̄влувт рущит ла̄внэ̄ныл хольт – «социальный найм» щирыл о̄лнэ колыт ӯнттуӈкв патве̄сыт. Ты колыт пуссын хулытт, витн а̄маран ма̄т, ӯнттавет. Кӯщаит ла̄ве̄гыт, карснув ма̄ па̄влувт а̄тим. Туп хулытт ос я̄ӈкылма тармыл та̄н колыт ӯнттуӈкв ве̄рме̄гыт. Ос ты колыт сака лю̄льсаӈ ӯнттавет, матыр э̄рнэ ут тыг ат тотаве. Ма̄хманув тамле колытт о̄луӈкв хумус патэ̄гыт, по̄люӈкв тот патавет, ре̄ге ащирман та̄ра кон тотаве. Тӯяг Ханты-Мансийский районныл яныг кӯщай ёхталас, ты колыт пуссын ёмащакв уральтасанэ, хо̄т матыр хо̄нтыс – пуссын по̄слысанэ. Ос ювле та минас, рӯпататэ та. Ма̄н па̄влувт нёлоловса̄ттем хо̄тпа о̄лы. Ниласа̄ттем – ты пуссын соссаӈ хо̄тпат. Ва̄им, та̄н пуссын та̄рвитыӈ о̄лэ̄гыт. Ма̄н ӯс ляпат кос о̄лэ̄в, кӯщаянув пуссын ляпат, ос ва̄рмалянув матрыг туп са̄вме̄гыт. Йильпи та̄лт, ла̄ве̄гыт, па̄влувт пӯльница лаппантаве. Ань тот налымантем хо̄тпа рӯпиты, ты хо̄тпаныл туп хӯрум хо̄тпа хультуптаве. Мо̄таныт пуссын рӯпата та̄л тах хультэ̄гыт. Нэ̄ хо̄тпат рӯпата ат те о̄ньще̄гыт, та̄н матыр ма̄щтырлэ̄гыт. Ва̄рум пормасыт тыналаӈкв ро̄ви. Хум хо̄тпат ос хоталь минэ̄гыт. Ань ман, па̄влувт о̄лнэ нэ̄квет, акванатхатыглэ̄в, ма̄щтырлэ̄в, халувт ханищтахтэ̄в. Ос то̄р, нуй, сэ̄тап ёвтнэ ма̄гыс олн са̄в э̄ри. Ань округ дума депутатыт па̄лныл нё̄тмил во̄ве̄в, ма̄навн мощ олнло̄мтыл вос нё̄тыяныл. Валентина Ивановна такви ща̄нь ла̄тӈе сака ёмащакв ва̄гтэ, ма̄хманэ ёт туп ханты ла̄тӈыл потырты. Тав ань сыме сака ща̄рги, тав пыге ос мо̄т ня̄врамыт ла̄тӈаныл ханищтаӈкв, потыртаӈкв щар ат ка̄саще̄гыт. Тав ты урыл тох ла̄выс: «Ма̄н яныгмамув порат ханты ла̄тӈыл потыртаӈкв щар ат та̄ртвесӯв, пуваве̄в те, та ля̄выльтаве̄в. Ань ос яныгман ня̄врамыт тох ла̄ве̄гыт – ты ла̄тыӈ моще̄рт сойми, манрыг наска̄ссыг таве ханищтаӈкв. »Тамле потыр нэ̄кве ты потыртас. Со̄ль, воссыг хоталь ва̄рхатэ̄в, тамле йист ты о̄лэ̄в.

1112 2015. 11. 20. Николай МЕРОВ

Йильпи та̄л кастыл хо̄втыт ӯнттуве̄сыт Наталья Николаевна Чайникова Ханты-Мансийск ӯст о̄лы. Тав я̄нас миннэ то̄в щирыл рӯпитан хо̄тпа. Ӯс ляпат йис ма̄ о̄ньщи, рущ щирыл «Юрты Чайниковых» тох ла̄ваве. Та ма̄тэ яныг, мо̄лты та̄л тот хара ма̄ щё̄питас. Ты та̄л таквсы порат тав палтэ рӯпитан кит хум хо̄тпаг ма̄нь хо̄втыт ӯнттуӈкве патсыт. Ты кастыл нэ̄ ля̄ххал тотнэ хо̄тпат тув во̄виньта̄лсанэ. Такви рӯпататэ урыл потыртас. На̄н тав потре э̄лаль ловиньтэ̄лын: – Ты та̄л ма̄н ма̄нь хо̄втыт ӯнттысанӯв. Тыи ма̄гыс мо̄лты та̄л хара ма̄ щё̄питасӯв. Йӣвыт пуссын хотсартсанӯв. Ань таквсы порат са̄тпанкем ма̄нь хо̄вт ӯнттысӯв. Ам палтум кит хум хо̄тпаг рӯпитэ̄г. Тэ̄н та̄лэтуве̄т йис ма̄т хӯл алыщлым, во̄раим, пил ватым, ла̄хыс атым о̄лэ̄г. Ма̄н хо̄втыт таима̄гыс ань ӯнттысанӯв, 2018 та̄лт яныгпо̄ль э̄тпос 7 хо̄талэ̄т Матрёна Панкратьевна Вахрушева яныгса̄т та̄лэ то̄влы. Ты хо̄нтаӈ ма̄ньщи э̄ква нэ̄пак хаснэ хо̄тпаг о̄лыс. Тав яныгса̄т та̄лэ то̄влын мус хо̄втанув тах яныгме̄гыт. Ты хо̄втыт «Йильпи та̄л» кастыл янмалтаӈкве патыянӯв. Ётыл тыщир ва̄ре̄в: манаса̄вит хо̄вт тыналан ма̄гыс яктэ̄в, таса̄вит ювле ӯнттэ̄в. Ос таи ёмас хо̄втыт акв ма̄т яныгмаӈкве патэ̄гыт. Та̄н ма̄гсыланыл во̄рн э̄л минуӈкве ат э̄ри. Ма̄тэ яныг, са̄в хо̄вт ӯнттуӈкве ро̄ви. Пуссын аквъёт ат со̄тыра са̄виткем хо̄вт ӯнттуӈкве номсэ̄в. Ам 1997 та̄л па̄сныл Йильпи та̄л кастыл хо̄втыт тыналэ̄гум. Ӯст о̄лнэ ма̄хум ва̄гыт, хо̄вт ёвтуӈкве са̄в мир ам палтум ёхталы. Хоты хо̄втыт арыгтэ̄гыт, ат ёвтве̄сыт ке, ма̄н та̄наныл пупколн мыганӯв. Нэ̄матыр ат хульты, хо̄втыт пуссын тэ̄лаг минэ̄гыт. О̄влэ̄т ма̄нь хо̄втыт ӯнттын ма̄гыс Омск ӯсныл ёвтуӈкве номсысӯв. Ос тынаныл сака яныг, таима̄гыс ма̄нки о̄лнэ ма̄ке̄вт ма̄нь хо̄втыт атуӈкве патсанӯв, матъёмас ма̄в тыт яныг. Ты коныпал ма̄н саӈквлыпил янмалтаӈкве патэ̄в. 2007 та̄лт Кострома ӯст ма̄хум саӈквлыпил, сӯйпил ос мо̄т пил та̄нки янмалтаӈкве патсыт. Ма̄хум ла̄внэ̄ныл, лӯима̄т саӈквлыпил ёмщакв яныгме̄гыт. Ты пилыт акв щёс ӯнттавет, та̄н яныгса̄т та̄л палыт яныгмаӈкве патэ̄гыт. Нэ̄матыр ва̄руӈкве ат э̄ри, та̄нкирот яныгме̄гыт. Ма̄н тыт таса̄вит я̄ӈкылма̄ о̄ньще̄в. Та̄наныл пуссын пилсамыл ӯнттыянӯв ке, пил са̄в тэ̄лы. Ань ты пилыт ӯнттын ма̄гыс ма̄н Кострома ӯсн ханищтахтуӈкве во̄ваве̄в. Ӯнттын ва̄рмаль ёмщакв ханищтаӈкве э̄ри. Тот ты пилыт атнэ ма̄гыс намыл ва̄рим техника о̄лы. Тамле пил ка̄сыӈ хо̄тпа янмалтаӈкве ве̄рми. Наталья Николаевна палт рӯпитан Щерки хум ла̄выс: «Ма̄тэ тыт аквтупмат лылыӈ, матыра̄ти пуссын яныгми. Саӈквлыпил, сӯйпил, та̄хтпил, морах ос мо̄т са̄всыр пил о̄лы. Туи порат ма̄хум тыг ла̄хыс атуӈкве ёхталэ̄гыт. Ос ань ты накт са̄в ма̄колыӈо̄йка во̄рт ё̄мыгты. Таима̄гыс мощща хо̄тпа во̄рн ялантаӈкве патыс». Тот яныгман во̄р янытэ̄т ёлсагрын щирыл о̄лы. Таима̄гыс Щерки ма̄нь хо̄втыт тот но̄ххилсанэ, йильпи ма̄н ӯнттысанэ. Ань хӯрум та̄л мины, та̄рапаты, хо̄втыт яныгме̄гыт манос а̄ти. Тамле ты ёмас тэ̄ла соссаӈ ма̄хманув ва̄руӈкве номылматсыт. Маныр тэ̄лаг ты ва̄рмаль е̄мты, хотты порат ты урыл о̄с тах хансэ̄гум.

1112 2015. 11. 20. Людмила ТЕТКИНА

Хо̄нтаӈ ма̄ньщи о̄йка 85 та̄лэ то̄влыс Ты э̄тпос 19 хо̄талэ̄т Анатолий Николаевич Хомяков 85 та̄лэ то̄влыс. Ты ма̄ньщи о̄йка округ янытыл ёмащакве ва̄ве. Пенсиян минаме юипа̄лт тав Кондинский район Половинка па̄вылт хо̄нтаӈ ма̄ньщит пе̄с пормасаныл акванатуӈкве патыс. Ва̄т са̄грапнал э̄тпос 10 хо̄талэ̄т тав ва̄рум музее 25 та̄лэ тах то̄влы. О̄влэ̄т о̄йка такке̄т рӯпитас, са̄в ма̄ньщи пе̄с пормасыт такви ма̄щтырласанэ. Ань а̄гитэ Галина Анатольевна Мостовых музейт кӯщаиг о̄лы, тав ётэ хо̄т хо̄тпа рӯпиты. Анатолий Николаевич ты рӯпатаныл по̄хын хунь минас, ловиньтан нэ̄пакыт хансуӈкве патыс. 2012 та̄лт тав «Река моей жизни» нампа нэ̄пак та̄ратас. Тот тав такви о̄лупсатэ урыл хансыс: тав яныгмаме порат хо̄нтаӈ ма̄ньщит хумус о̄лсыт, а̄тятэ хо̄нтлаӈкве хумус тотвес, хумус ка̄сыӈ хо̄тал таве юв ӯрсаныл. Ты нэ̄паке урыл тав ла̄выс: «Ма̄н та̄рвитыӈ порат яныгмасӯв, то̄ва порат тэ̄та̄л о̄лсӯв. Ты нэ̄пак таи ма̄гсыл хансыслум, ань о̄лнэ ма̄ньлат хо̄тпанув та пора урыл са̄внув вос ва̄гыт». Акв та та̄лт тав «Рецепты кондинской кухни» нампа нэ̄пак щё̄питас. Хо̄нтаӈ ма̄ньщит хӯл исмит хумус пайтэ̄гыт, пилыӈ ня̄нь ос са̄всыр мо̄т тэ̄нут хумус ва̄ре̄гыт, пуссын та нэ̄пакн хассанэ. Кондинский районт Силава па̄выл о̄лы. Та па̄вылт Ольга Александровна Фомичёва ня̄врамыт ӯщлахтан «Юрсил» нампа ма̄ ва̄рыс. Ка̄сыӈ та̄л ня̄врамыт ӯщлахтуӈкве тув ёхталэ̄гыт. Анатолий Николаевич са̄в та̄л Ольга Александровнан нё̄ты. Ты та̄л о̄йттур э̄тпост хо̄нтаӈ ма̄ньщит пе̄с йис ва̄рмаляныл урыл ня̄врамытн потыртаӈкве о̄с тув ялыс. Яныг рӯпата ва̄рнэ̄тэ ма̄гсыл о̄йка Кондинский районт сака янытлаве. Анатолий Николаевич ань «Почётный гражданин Кондинского района» нам о̄ньщи. Ма̄н, редакцият рӯпитан ма̄хум, ты хо̄нтаӈ ма̄ньщи о̄йка 85 та̄лэ то̄влум кастыл ос округув 85 та̄лэ кастыл янытлылӯв. Тав ма̄ньщит пе̄с йис ва̄рмаляныл но̄хво̄рмалтан ма̄гсыл са̄в ё̄р пиныс. Таве̄н ма̄н са̄в сымыӈ ла̄тыӈ ке̄тэ̄в. На̄й-О̄тыранэ̄н вос ӯргалаве. Пус ка̄т, пус ла̄гыл.

1112 2015. 11. 20. Тамара МЕРОВА

50 та̄лэ̄тыл янытлылӯв! Ма̄нь таквс э̄тпос налыман нупыл о̄выл щислат Людмила Рудольфовна Мерова 50 та̄лэ то̄влыс. Тав юио̄выл лов та̄лкем Ханты-Мансийск ӯст о̄лы ос «Светлана» нампа колт ма̄нь ле̄ккарыг рӯпиты. Та колт рӯпитан ма̄хум матумпа̄ла хо̄тпатн нё̄тэ̄гыт. Людмила та̄н палтаныл юв яланты, давленияныл уральты, укол тӯщты манос э̄рнэ тэ̄рпил тотыянэ. Ты пусмалтан ва̄рмалянэ коныпал тав «НЕО-Клиника» нампа мир пусмалтан колн рӯпитаӈкве во̄ввес. Ӯст о̄лнэ ма̄хум тув олн ойтэ̄гыт ос тот пусмалтахтэ̄гыт. Людмила а̄лпыл анализыт ма̄гыс ке̄лп выг. Тав Саранпа̄выл школа а̄стламе юипа̄лт Тюмень ӯст медицинский училищат ханищтахтас ос та юипа̄лт областной пӯльницат ва̄т нупыл кит та̄л рӯпитас. Ма̄хум ла̄внэ̄ныл щирыл, тав ёмас ле̄ккар, ка̄таге̄т кӯпнит, укол ёмас а̄гмта̄л тӯщты. Людмила Рудольфовна кит а̄ги янмалтас, ань кит апыг о̄ньщи. Ма̄н, газетат рӯпитан хо̄тпат, таве 50 та̄лэ̄тыл янытлылӯв. Рӯтанэ̄н тав о̄с яныг паща ос сымыӈ ла̄тӈыл ке̄таве. Са̄в та̄л пуста̄гыл вос о̄лы, рӯт ос юрт ма̄хманэ̄н вос э̄руптаве, На̄й-О̄тыранэ̄н вос ӯргалаве.

1112 2015. 11. 20. Тамара МЕРОВА

Рӯтанэ̄н паща ла̄тыӈ ке̄ты Оксана Камина Саранпа̄вылт самын патыс ос а̄ги о̄парищ наме Тасманова о̄лыс. Мо̄лты та̄лт Ханты-Мансийскан ёхталаме порат тав Наталья Ткачук ёт хо̄нтхатыглас. Ос Наталья тав уре̄тыл ма̄навн ты потыр ке̄тыстэ. Оксана Владимировна ань Нижневартовский район Излучинск па̄вылт ня̄врамыт ханищтан «Спектр» нампа колт рӯпиты. Тав тот ма̄нь а̄гирищитпыгрищит сак хартуӈкве, са̄сныл а̄ныт, хусапыт ва̄руӈкве, а̄канит ю̄нтуӈкве ханищтыянэ. Ханты-Мансийск ӯсн тав ханищтапн ёхталас. Тамле пормасыт ма̄щтырыг ва̄руӈкве тыт ханищтахтас. Ты нэ̄ Саранпа̄выл школа юипа̄лт Ханты-Мансийский педагогический училищат ханищтахтас. 2000 та̄лт а̄стламе юипа̄лт Нижневартовский педагогический институтт ма̄нь ня̄врамыт педагогика ос психология тэ̄лат ва̄нэ хо̄тпаг ханищтахтас. Ос тувыл Излучинск па̄вылн рӯпитаӈкве минас. «Спектр» нампа колт рӯпитанэ̄тэ нилахуйплов та̄лыг ты е̄мтыс. Тот рӯпататэ ёмщакв ва̄рнэ̄тэ ма̄гыс Оксана янытлан нэ̄пакыл ӯс, район па̄лыл майвес, образование департаментныл мӯйлупсал мӯйлупта̄лвес. Тав «Моё призвание учитель», «Сердце отдаю детям», «Мастер кукол из бересты» нампа касылыт касыс. Ань такви уре̄т Оксана тох потыртас: «Излучинск ӯс – тыи о̄йкам ос ня̄врамагум самын патум ма̄. О̄йкам наме Степан Кириллович Камин, ханты хум. Степан «Респект» нампа клубколт методистыг рӯпиты. Тот ня̄врамыт ма̄гыс са̄всыр пӯмыщ ва̄рмалит ва̄ри. Альбина ос Кристина а̄гиягме̄н ос сыресыр ханищтапн ялантэ̄г, «Северные мотивы» ос «Компьютерная графика» кружокн хасхатым о̄лэ̄г. Тувыл тэ̄н о̄с са̄всыр касылыт касэ̄г. Ты е̄рт са̄в та̄л о̄лнэ̄м сыс Саранпа̄выл рӯтанум о̄вылтыт ка̄сум холас, самын патум ма̄м акваг номылматыгла̄лылум. Тот ам апыгрищагум ня̄враманыл о̄лэ̄гыт ос омам Полина Ильинична Тасманова (Пузина) мо̄йтыӈ ёлщё̄питым о̄лы. Омав Я̄сунт па̄вылныл о̄лыс. Ам ва̄глум, «Лӯима̄ сэ̄рипос» ма̄ньщи газета ам рӯтанум ловиньтыяныл. Ань газета та̄ра ам Пузиныт, Анямовыт, Терехиныт колта̄глытн паща ла̄тыӈ ке̄туӈкве таӈхе̄гум. Пуссын пуста̄гыл вос о̄лэ̄гыт». Н. Ткачук хансум потре ма̄ньщи ла̄тӈын Тамара Мерован толмащлавес.

1112 2015. 11. 20. Людмила Алгадьева

Ма̄ньщи нэ̄ савалап ня̄врам янмалты Ты хурит Наталья Анадеева Саша пыгрище ёт по̄слым о̄лэ̄г. Нэ̄ са̄в та̄л «Новости Югры» нампа газетат рӯпиты. О̄влэ̄т тав хурит по̄слас, ань соссаӈ ма̄хум урыл потрыт ос ля̄ххалыт рущ ла̄тӈыл хансы. Такви тав Ха̄льӯс район Ягрим па̄вылныл о̄лы. Ща̄нягеа̄щаге сас ма̄ньщи хо̄тпаг. А̄тятэ 2013 та̄лт а̄тимыг е̄мтыс. Оматэ ань Ягрим па̄вылт о̄лы. Та па̄вылт Наталья самын патыс, тот яныгмас. Ханты-Мансийск ӯсн хунь ёхтыс, газетат рӯпитаӈкве патыс. Тувыл Югорский университетт заочный щирыл ля̄ххал тотнэ хо̄тпаг ханищтахтас. Ань тав Саша савалап ня̄врамакве янмалтытэ. Пыгрищакве таве омаг ла̄витэ ос таве сака э̄руптытэ. Ты та̄л «Торум Маа» нампа музейт а̄гирищитпыгрищит ма̄гсыл ялпыӈ хо̄тал ва̄рыглавес, ка̄сыӈ ня̄врам тот э̄ргуӈкве, йӣквуӈкве манос стихыт ловиньтаӈкве ве̄рмыс. Тот пыгрищакве Юван Шесталов хансум стихе сака ёмащакв ловиньтастэ. Ты э̄тпост ща̄нит янытлан хо̄тал о̄лыс. Ам Наталья ты ялпыӈ хо̄талыл янытлылум. Пус ка̄т, пус ла̄гыл таве̄н ла̄ве̄гум!

1112 2015. 11. 20. Тамара МЕРОВА (Тамара Хатанева)

Пӯмыщ нэ̄пак та̄ратавес Аньмӯнт ма̄н ка̄тувн акв нэ̄пак ликмыс. Тав Нина Георгиевна Рукован хасвес ос щё̄питавес. Э̄ква Югорск ӯст о̄лы ос ма̄ньщи ма̄хум о̄лупсав, культурав э̄лаль тотытэ. Ты пӯмыщ нэ̄паке тав рущ щирыл «Что нам слово говорит» намтыстэ. Тот ма̄ньщи ла̄тӈыт хумус рущ ла̄тӈын толмащлавет, ты урыл ма̄нь стихыт хансыс ос хурит по̄слыс. То̄ва хурит Елена Соколова апге̄н по̄слуве̄сыт. Нина Георгиевна Югорск ӯст о̄лнэ библиотекаколт рӯпитан хо̄тпатн ос «Югорск без наркотиков» нампа фондын яныг пӯмащипа ла̄тыӈ ла̄ви. Та̄н ты нэ̄пак та̄ратаӈкве нё̄тсыт. Нэ̄паке ловиньтан хо̄тпатн Нина Рукова ла̄выс: «Тыныӈ ма̄хумаквет! Ма̄н ма̄ньщи ла̄тыӈке̄в э̄лаль вос о̄лы, йис ла̄тыӈке̄в нэ̄мхотталь ул вос сойми. Пе̄с йис о̄лупсав туп ща̄нь ла̄тӈув кастыл номилӯв, пе̄с наканув сымыт о̄ньщиянӯв. Ань ты ма̄нь нэ̄пакум хосыт ня̄врамаквет ща̄нь ла̄тӈув вос мощ ханищтыяныл ос матыра̄ти тэ̄лат вос торгамтэ̄гыт».

1112 2015. 11. 20. Тамара МЕРОВА

Юван Шесталов ка̄стувес Яныг таквс э̄тпос атыт щислат «Торум Маа» музейт са̄в ма̄хум акванатхатыгласыт. Тот Юван Шесталов мо̄йтыӈ ка̄стыглан ма̄гыс «Стерх улетел, но оставил нам песню» намтым акванхо̄нтхатнэ ва̄рмаль о̄лыс. О̄йка 2011 та̄лт а̄тимыг е̄мтыс. Юван Николаевич са̄в мирн ва̄нэ э̄лумхо̄ласыг о̄лыс, ма̄ньщи мирке̄тэ урыл акваг потырта̄лыс. Ос тав суиӈ наме э̄лаль тотнэ ма̄гыс о̄влэ̄т ЮГУт музей колнак ва̄рыглавес. Тот тав э̄ще Альбина Мехнина пуӈктотыс. Мо̄лты та̄лт ты колнак хотвуйвес ос та̄н «Торум Маа» рӯпитан колт мо̄т колнакыл та̄стуве̄сыт. О̄йка са̄всыр нэ̄паканэ ос о̄ньщум пормасанэ тот атве̄сыт. Ань акванатхатыглам ма̄хум халт Юван рӯтанэ, юртанэ о̄лсыт ос тав уре̄т потыртасыт. Александр Новьюхов, губернатор ва̄ныӈ хо̄тпа палт советникыг о̄лнэ хум, аквъёт ва̄рум тэ̄ланэ̄н урыл номылматыгла̄лыс. Тэ̄н мирхал конференциян соссаӈ ма̄хманув о̄вылтыт ла̄тыӈ тотуӈкве, тувыл о̄йка во̄рт ӯнттум колн во̄раяӈкве, хӯл алыщлаӈкве ялсы̄г. Анастасия Ильинична Сайнахова ос Мария Кузьминична Волдина аквъёт ханищтахтам, аквъёт рӯпитам та̄ланыл урыл потыртасы̄г. Рущ юртаге Любовь Миляева ос Вадим Орлов Шесталов музейколн о̄с ёхталасы̄г. Тэ̄н сас стихыт хаснэ хо̄тпаг, тэ̄нки стиханэ̄н ловиньтасы̄г. Вадим Борисович тав ётэ акванхо̄нтхатыгламе порат гитарал са̄ӈквылтас ос э̄ргыт э̄ргыс. Юванын тамле тэ̄лат сака мӯстысыт. Любовь Геннадьевна ла̄выс, Юван Николаевич о̄лме̄т таве ма̄ньщи хо̄тпаг о̄луӈкве пе̄риястэ, о̄йка ма̄ньщи ла̄тӈыл хансум стиханэ таве̄н рущ ла̄тӈыг толмащлаӈкв ла̄всанэ. О̄влэ̄т тав ат ка̄сащас, ты та̄рвитыӈ рӯпатаг о̄лы. Ос тувыл Шесталовн ла̄ввес, тав ул вос пилы, таве номтыл пиныстэ, ань вос хансы. Тувыл со̄ль, нэ̄ аквтоп хотыл ёмас номтыл ёхтувес, тав то̄ва стиханэ туп Юван ха̄сме щирыл хансуӈкве патсанэ. Акв тамле стих ань нэ̄ ловиньтастэ. «Стерх» нампа журнал та̄ратан ма̄гыс документыл майлувесы̄г, ань ты нэ̄паканэ Любовь Миляева музейн мисанэ. Татьяна Огнева, А̄с-угорский театрыт рӯпитан нэ̄, э̄рыг э̄ргыс, стихыт ловиньтас. Тувыл о̄йка по̄хат о̄лум хо̄тпат, таве̄н нё̄тмил ва̄рум хо̄тпат аквкит ла̄тыӈ ла̄всыт. Та̄наныл Юван Николаевич сака э̄руптым о̄щсанэ. Динисламов э̄кваго̄йкаг таве машинал манос моторыӈ ха̄пыл тотыгластэ̄н. Матыр э̄рнэ нэ̄пакыт акванатыглаӈкве нё̄тсы̄г. Кит Людмилаг, Людмила Каллистратовна Зубакинан ос Людмила Леонидовна Коробейникован, хӯлыӈ, пилыӈ ня̄нил ва̄рыглавес, атыӈ исмитыл па̄йтыглавес. Людмила Рудольфовна Мерова, ма̄нь ле̄ккарыг о̄лнэ нэ̄, таве пусмалтаӈкве ёхталас. Потрыт халт Юван Шесталов урыл кина суссылтавес. Юио̄выл та̄ланэ о̄лме порат тав то̄ва стиханэ ищхӣпыӈ утын хасве̄сыт. Ань та утыт татем пӯмыщ сунсуӈкве о̄лыс. Ты музейколнакт пормасыт пуссын Альбина э̄ще̄н ёмщакв ӯргалым о̄ньщавет.

1112 2015. 11. 20. Людмила ТЕТКИНА

Пе̄с йис ва̄рмалит нэ̄пакн хаснэ хо̄тпат А̄с-угорский институт са̄в та̄л Ханты-Мансийск ӯст рӯпиты. Тот учёный хо̄тпат ма̄ньщи, ханты ос ё̄рн ма̄хум пе̄с йис ва̄рмаляныл ос ла̄тӈаныл ханищтыяныл ос нэ̄пакн хансыяныл. Мо̄тыт та̄л институт 25 та̄лэ тах то̄влы. Ань кӯщаиг тот Виктория Ивановна Сподина о̄лы. Ты э̄тпост ля̄ххал тотнэ хо̄тпат ты институтн ёхталасыт ос учёный ма̄хум ва̄рум рӯпатаныл урыл пӯмщалахтасыт. Кӯщай нэ̄ рӯпатаныл урыл ла̄выс: «Учёный хо̄тпат яныг ос э̄рнэ рӯпата институтт ва̄ре̄гыт, та̄н соссаӈ ма̄хум пе̄с йис ва̄рмаляныл, ла̄тӈаныл нэ̄пакн хансыяныл. Ань тыт 65 э̄лумхо̄лас рӯпиты. Та̄н халанылт 17 хо̄тпа Белоярский, Нижневартовский, Сургутский ос Ха̄льӯс районытт о̄лнэ филиалыт рӯпитэ̄гыт. Кит хо̄тпаг ос ма̄нь па̄вылквет са̄всыр пе̄с потрыт, мо̄йтыт нэ̄пакн хансэ̄г. Акв нэ̄ Ха̄льӯс район Хӯлюмсунт па̄вылт о̄лы – ты Анна Алгадьева, мо̄т нэ̄ ос Белоярский район Нумто па̄вылт о̄лы». Ты институт ханищтап щирыл рӯпитан департаментныл олныл та̄ставе. Та̄н ня̄врамыт ма̄гсыл ма̄ньщи, ханты ос ё̄рн ла̄тӈыт ханищтан нэ̄пакыт хансэ̄гыт. Та̄ратым нэ̄пакыт округ янытыл о̄лнэ школатн ке̄тыяныл. Ты та̄л та̄н 1-11 классытт ханищтахтан ня̄врамыт ма̄гсыл ма̄ньщи литература нэ̄пакыт хассыт. Учёный хо̄тпат ва̄тихал округ янытыл яласэ̄гыт, соссаӈ ма̄хум ёт хо̄нтхатыглэ̄гыт. Ща̄нь ла̄тыӈ та̄н ва̄гыт ман а̄ти, та урыл китыглыяныл. Кӯщай нэ̄ ла̄выс, ань ща̄нь ла̄тыӈ ва̄нэ соссаӈ ма̄хум Советский ос Октябрьский районыгт сака мощща. Сургутский районт пе̄с йис ма̄нылт о̄лнэ ханты ще̄мьят пуссын ща̄нь ла̄тӈыл потыртэ̄гыт. Соссаӈ ма̄хум та̄нки ла̄тӈаныл ханищтаӈкве ка̄саще̄гыт ман а̄ти, та урыл о̄с китыглавет. Ма̄хум халт 70% са̄вит хо̄тпа ма̄ньщи манос ханты ла̄тыӈ ва̄ӈкве таӈхе̄гыт, та̄нки пуссын ты мирыг нупыл ловиньтахтэ̄гыт. Учёный ма̄хум са̄в пе̄с потыр, мо̄йт ва̄нэ хо̄тпат акв нэ̄пакн хансыяныл, рущ ла̄тӈыл ты ва̄рмаль «картотекаг» ла̄ваве. Ань институтт рӯпитан хо̄тпат манхурип рӯпата ва̄ре̄гыт ос манырсыр нэ̄пакыт та̄ратэ̄гыт, пуссын интернетт ловиньтаӈкве ро̄ви. Ты ищхӣпыӈ утыт та̄н рӯпаныл урыл пуссын хансым о̄лы.

1112 2015. 11. 20. Александр ВЬЮТКИН

Во̄раян хо̄тпат маснутаныл Ма̄нь таквс э̄тпос оймыгтан э̄лыпал хо̄талт Ханты-Мансийск ӯст о̄лнэ «Торум Маа» музей кол намхо̄талэ янытлан хо̄тал о̄лыс. Ты та̄л тав ва̄т нупыл нё̄лоловхойплов та̄лэ товлыс. Ва̄т нупыл ат та̄лэ янытлам порат щар о̄выл щёс «Дары и Дарители» нампа пӯмащ тэ̄ла ва̄рыглавес. Пӯмащаныл щирыл, ка̄сыӈ ка̄сащан хо̄тпа такви ка̄тыл ма̄щтырлам манос пе̄с та̄гыл о̄ньщум пормасэ та хо̄талт «Торум Маа» музейн мӯйлуптаӈкв ве̄рмыстэ. Ты та̄л тамле хо̄тал о̄с о̄лыс, «То̄рум Маа» музейн хо̄тпан нупыл ат мӯйлупсал тотвес. Выставканыл пуснэ э̄лыпа̄лт музей кол тармыл кӯщаиг о̄лнэ нэ̄ Валентина Николаевна Кочетыгова потыртаӈкв во̄ввес. Тав ла̄выс: «Ам на̄нан музей кол намхо̄талэ̄тыл янытлыянум. Тамле щир кол ма̄гсыл ва̄т нупыл нёлолов та̄л ты са̄в а̄ти. Ты минам та̄ланув сыс ма̄н са̄в ёмас пӯмащ ва̄рыгласӯв. Мо̄лты ма̄н щар яныг э̄рнэ нак ва̄рыгласӯв – Ӯй йӣквсӯв. Ам номсэ̄гум, тав щар ма̄к соссаӈ ма̄хмытын э̄рнэ ва̄рмалиг ты о̄лы». Валентина Кочетыгова потыртан ма̄ныл а̄стуме э̄лыпа̄лт Зоя Никифоровна Лозямова, Тимофей Алексеевич Молданов ос Евдокия Андреевна Нёмысова та̄н аквписыг нё̄тнэ̄ныл ма̄гсыл пӯмащипа ла̄тӈын пищмал мӯйлуптасанэ. Тувыл музей колт рӯпитан хум Вячеслав Юрьевич Кондин мӯйлупса щё̄питас. Мӯйлупсатэ рущ ла̄тӈыл: «Изготовление традиционного охотничьего костюма и некоторых элементов охотничьего снаряжения северных манси» намтым о̄лыс. Вячеслав Кондин ва̄рим суссылтапе урыл э̄лаль тох потыртас: «Ва̄рум пормасанум а̄ти амтемт ва̄рсанум. Ма̄н акваннё̄тхатым колта̄глыӈыщ пуссын ма̄щтырласанӯв. Ань ты а̄стлам тэ̄лав титыт проектыг о̄лы. Са̄р проектув иӈ 2012 та̄лт а̄стлыслӯв. То̄нт ма̄н янгӯй котыӈ ёсаг, во̄раян ма̄нь сунсов ос пе̄с щирыл ва̄рим ё̄вт ва̄рсӯв. Ма̄щтырыг о̄лнэ хо̄тпат потыртаманыл щирыл пуссын нэ̄пакн ёмщаквег хассум ос ва̄рум пормасаныл по̄слысанум. Ань ва̄глум, маныр порат ос хумус пормас ва̄раве ман щё̄питаве. Титыт проектув ма̄н мо̄лты о̄вылтаслӯв. О̄влэ̄т са̄р а̄ньтсупыт, са̄р нёлнэ а̄нысупыт ос са̄р хартнэ турупка ва̄рсӯв. Пе̄с порат кос хум, кос нэ̄ хо̄тпа са̄р та̄л о̄луӈкв ат ве̄рмысыт. Тувыл пе̄с ма̄хум хӯнтхӯрыг пе̄нтсыл о̄ньщум хӯнтуп ам ва̄рыслум. Хӯнтупум ёмщакве̄г а̄ртмыс. Ань тамле хӯнтупыт Свердловск ӯс нупыл о̄лнэ ма̄ньщитн о̄ньщавет. Хунь са̄всыр то̄рыӈ хӯнтхӯргыт иӈ ат о̄лсыт, та пе̄с хӯнтуп ма̄к хо̄йхатнэ пормасыг о̄лыс. Хӯнтуп коныпал иӈ сыспа̄йпыт ёттотыглаве̄сыт. Сыспа̄йпыт то̄ва па̄влыӈ ма̄т во̄рн тотыглым ань тыг мус иӈ о̄ньщавет. Пе̄с порат во̄раян хо̄тпат хо̄тал сыс са̄в ве̄рыста ё̄мсыт, та̄н нё̄тмил ва̄рнэ ё̄мнэ сув о̄щсыт. Ты суваныл а̄ти нас тэ̄ла та̄л йӣвыг о̄лыс. Тав аквпалъе̄ре̄т ма̄нтыг ва̄рим о̄лыс. Ня̄лит ӯнттын порат ма̄нтыӈ о̄влэ тӯйт хилувъян ма̄нтыг о̄щвес». Вячеслав Юрьевич во̄раян ма̄т о̄щнэ пормасыт урыл потре юипа̄лт йильпи проектэ урыл э̄лаль потыртас. Тав ла̄выс: «Пе̄с порат во̄раян хо̄тпат во̄рн марумнув маснут ёт ат вуйласыт. Та̄нанылн кӯпнит, алпин ёмщаквег ро̄внэ маснут э̄рыс. Ла̄глын ёмщакве̄г хопиӈ ня̄раг ро̄всы̄г. Янгӯй котыл ю̄нтым хопиӈ ня̄ра та̄ра ат ёсвес, кӯпнитыг ос сака ре̄гыӈыг о̄лыс. Алпин ос нуил ю̄нтым лӯс масыгласыт. Лӯс во̄раян порат ос ёмас кӯпнит маснутыг о̄лы. Ё̄мнэ хо̄тпа таве̄нтыл ат ре̄гтыглаве. Э̄рнэ пормас пинумтан са̄в ще̄п о̄ньщи. Ань таве масым мо̄рсыӈ во̄раяӈ ма̄хум во̄рае̄гыт. То̄ват ань ты мус аты ва̄ганыл, лӯс нампа ты манырсыр тамле маснут». Вячеслав Кондин суссылтапе пӯмащ о̄лыс. Мӯйлын хо̄тпат ос ка̄сащан ма̄хум пӯмащ ма̄гсыл тув ялуӈкв ве̄рме̄гыт. Тот ты пормасытыл ёмщакве̄г суссылтаве̄н, пӯмщалахтын тэ̄лан урыл потыртаве̄н.

1112 2015. 11. 20. Александр ВЬЮТКИН

Ма̄ньлат мир ёт рӯпитан кол урыл Ма̄нь таквс э̄тпос оймыгтан порат соссаӈ ма̄ньлат ма̄хум акванатхатыгласыт. Та̄н ётаныл рӯпитан кол рущ ла̄тӈыл: «Молодёжная организация обскоугорских народов» намаим о̄лы, ва̄тииг МООУНыг ла̄ваве. Тув ань титса̄т ляпатем хо̄тпа хасхатым о̄лэ̄гыт. Ань ханты ос ма̄ньщи ма̄ньлат ма̄хум янытлан ма̄гсыл финноугорский рӯт ма̄хмыт тыг о̄с ёхталасыт. Рӯпатаныл хӯрум хо̄тал минас, ты хо̄талыт сыс акваннё̄тхатнэ щирыл са̄в пӯмащ ва̄рмаль тэ̄лаг ва̄руӈкв номсэ̄гыт. Юио̄выл хо̄талт МООУН ва̄рнэ рӯпатанэ ма̄гыс янытлавес. О̄влэ̄т «Югра лылые̄п» тармыл кӯщаиг о̄лнэ хум Александр Вячеславович Новьюхов потыртаӈкв во̄ввес. Тав ла̄выс: «Со̄ль, ма̄н о̄вылтам, ань ос на̄н э̄лаль тотнэ тэ̄лав хӯс та̄лыг та то̄влувес. Хӯс та̄л акв хо̄тал хольт минас. Хунь ма̄н щар о̄влэ̄т атхатсӯв, то̄нт ма̄н на̄н янытыг о̄лсӯв, ёмас самыл э̄лаль суссӯв, сыстам номтыл номсысӯв, ма̄ньлатыг о̄лмӯв ма̄гыс мощнув пилсӯв. Ма̄н ты яныт организацияг е̄мтэ̄в, то̄нт ты урыл аты номсысӯв. Ам ань на̄н ляльтын сунсымам, ва̄глум, округ соссаӈ мирув о̄лупсатэ иӈ хоса. На̄н халынт са̄в ма̄ньлат, нэ̄мхотьютн иӈ ат ва̄нэ хо̄тпа о̄лы. Хотьютн ва̄ве, маныр та̄н ва̄руӈкв ве̄рме̄гыт. Ты ма̄гсыл э̄лаль аквтох рӯпитаӈкв ам на̄нан ла̄ве̄гум». Тувыл округ департамент культура колт рӯпитан нэ̄ Ирина Петровна Кравченко янытлан ла̄тыӈ ла̄выс. Нэ̄ ла̄вум ла̄тӈанэ ты: «Ам на̄нан намхо̄талынт янытлыянум. Хӯс та̄л ты а̄ти са̄в, а̄ти мощща та̄л. Са̄в та̄л аквта щирыл на̄нан э̄лаль рӯпитаӈкв. Мо̄т мирыт культураныл халт ул тыпылтахтэ̄н. Ам амти мо̄т ма̄ныл о̄лнэ хо̄тпаг о̄лэ̄гум. Тыг ёхтумумт, о̄влэ̄т тыт о̄лнэ соссаӈ ма̄хум урыл ам щар нэ̄матыр ат ва̄сум. Ам ма̄гсылум хантыт ос ма̄ньщи хо̄тпат акв мир хо̄тпаг о̄лсыт. Ань ам ва̄глум, хумус на̄н халанынт хащхатэгы̄н. Ам сымум на̄н ма̄гсылын сака ща̄рги». Тувыл Финляндия хо̄н ма̄ныл ёхталам хум Маркку Туркиа потыртаӈкв во̄виньта̄лвес. Тав ла̄выс: «А̄нум на̄н палтын ёхталаӈкв сака пӯмащ. Ты хӯрум хо̄тал сыс ма̄н акваннё̄тхатым ва̄рнэ рӯпатав урыл са̄в потыртасӯв. Ма̄н на̄н ётын ва̄тихал ва̄щинтахтуӈкв таӈхе̄в. Ам ма̄мт тох ла̄ве̄гыт: «Ма̄ньлат хо̄тпа такви ма̄хум о̄лупсатэ э̄лаль о̄лнэ хо̄таланэ щирыл ат те номсы, тувыл о̄лнэ хо̄таланэ мо̄т мир ёт акв хурипаг та е̄мтэ̄гыт». Ам финноугорский рӯт ма̄хмытын ла̄ве̄гум: акваннё̄тхатэ̄н, нэ̄мхотты порат ул ёрувлахтэ̄н. О̄щнэ номтанын моляхнув тэ̄лаг вос е̄мтэ̄гыт». Хум потыртан ма̄ныл а̄стуме э̄лыпа̄лт Еремей Айпин хансум «Божья Матерь в кровавых снегах» нампа нэ̄пак ты ма̄ньлат ма̄хум колт рӯпитан мирн мӯйлуптастэ. Еремей Данилович хансум нэ̄паке мощ мо̄лалнув финский хо̄н ла̄тӈын толмащлавес. Та̄нти ла̄тӈыл хансым нэ̄пак «Кровавый снег в Сибири» намтсаныл. Та юипа̄лт финноугорский ма̄ньлат рӯт ма̄хум ёт рӯпитан МАФУН президент ос соссаӈ мир халт кӯщаиг о̄лнэ хум Алексей Васильевич Цыкарев ла̄тыӈ ла̄выс. Тав тох потыртас: «Ма̄н хумус ве̄рме̄в, тох та рӯпитэ̄в. О̄лупсав пе̄с щирыл хультуптан ма̄гсыл иӈ са̄в ва̄руӈкв э̄ри. На̄н ётын а̄нумн кӯстыр рӯпитаӈкв. Хунь э̄ри, на̄н пуссын э̄рнэ порат ёмщакве̄г ва̄рапаӈкв а̄лымегы̄н. Тамле рӯпатан а̄нумн сака мусты». Тувыл э̄лаль соссаӈ ма̄ньлат ма̄хум ёт рӯпитан организациян атыт президент пе̄риявес, ань тув ханты хум Виктор Банк кӯщаиг ӯнттувес.

1112 2015. 11. 20. Тамара МЕРОВА

Та̄нварпэ̄ква урыл пе̄с мо̄йт Ха̄льӯс район Ягрим па̄вылт Марина Сергеевна Вынгилева о̄лы. Ты ма̄ньщи э̄ква Ло̄пмус па̄вылт самын патыс, тот яныгмас. А̄ще о̄с та па̄вылныл о̄лыс. Пе̄с порат оматэ тув мӯйлуӈкве ёхталас. То̄нт ты тэ̄н тот ва̄йхатсы̄г, ётыл акванминасы̄г. Ло̄пмус ляпат Э̄ква тӯр о̄лы. Марина Сергеевна хунь ма̄ниг о̄лыс, а̄ще ты тӯр урыл мо̄йт мо̄йтыглас. Манрыг та тӯр тамле намыл майвес, на̄н ань ты урыл э̄лаль ловиньтэ̄н. Аквматнакт пе̄с йис порат Ло̄пмус па̄вылт ма̄хум Ӯй йӣквсыт. Ӯй йӣквнэ порат ма̄хманув то̄ванакт ня̄враманыл ётвыганыл. Та порат ань ма̄нь ня̄врам кол а̄тим о̄лыс, хотты ня̄врамыт а̄кванылн юн ӯргалаве̄сыт, хотты ня̄врамыт ос та̄нкирот юн хультупта̄лве̄сыт. Ята, китгыг Ӯй йӣквнэ ма̄н минасы̄г. Ма̄нь ня̄враме̄н ане̄кватэ̄н ёт юн хультуптастэ̄н. Тувыл ань тэ̄н Ӯй йӣквнэ колт ӯнлахо̄лэ̄г. Э̄ква ос ма̄нь ня̄врам ӯрим юн о̄лы. Аквматэ̄рт э̄типа̄лаг е̄мтыс, хуйнэ пора ёхтыс. А̄ви хотьютын та лохсматвес. Ос юв нэ̄мхотьют ат щалтыс. А̄квэ̄кв ты кос ӯрхаты, нэ̄мхотьют а̄тим. Тувыл а̄висӯнтныл ка̄т ты нэ̄глапас. Нэ̄ хо̄тпа турсуил хотьют та ля̄галас: – А̄квэ̄кв, а̄квэ̄кв, пыгкен йӣквнэ колн тув во̄ввес. А̄квэ̄кв ювле китыглахты: – Хотьютн во̄ввес? А̄висӯнтныл нэ̄ ла̄ви: – На̄ӈ китгагын. Ущты а̄нумн ла̄всы̄г, ам таве тув вос тотылум, пыге̄н тув таӈхитэ̄н. Ань а̄квэ̄кв, хотьют ёхталас, ат уральтастэ, ня̄враме ка̄тн та маяпастэ. Ос маяпаме э̄лыпа̄лт та̄ныӈ ка̄т ка̄салас. Тувыл а̄квэ̄кв хурахлаӈкве та патыс. Номсахты, аман хотьют ка̄тн ня̄враме мистэ. Туп мощщан ёлротмыглас, акв ма̄т ӯнлуӈкве щар ат ве̄рми. Ос таквирот ла̄ви: – Сар Ӯй йӣквнэ колн ялапа̄лэ̄гум, уральтылум, со̄ль ма̄н а̄ти, тэ̄натэ̄н ня̄врам мислум. Йӣквнэ колн молях та ха̄йты. Тув ёхтыгпас, ма̄нь китгаге кон во̄всаге, китыглахты: –Пыгын нэ̄н палтын тотвес? Тэ̄н ювле ла̄ве̄г: – А̄ти, ос хо̄ӈхан тотаве? Наӈ хотьютн пыгме̄н мислын? А̄квэ̄кв ла̄ви: –Хотты мат э̄ква ёхталас, ня̄врам вистэ, ла̄выс, э̄рттам нэ̄н во̄выслы̄н. Ма̄нь китгыг ла̄ве̄г: – Наӈ пыгме̄н хотталь мо̄т хо̄тпан та маяпамын. Та̄н пуссын хотрохтысыт. Йӣквнэ колт са̄в мир о̄лыс. А̄квэ̄кв тот атхатам мир нупыл та ля̄галас: – Ма̄хумаквет, ам ня̄врам хащта̄л э̄кван мислум, та нэ̄ пыгум тӯлмантастэ, атапахтэ̄в, ня̄влылӯв таве. Ань ма̄хум та̄ра паттысаныл, ты Та̄нварпэ̄ква ёхталас, молямтахтым атапахтасыт, Та̄нварпэ̄ква юил та ня̄влыгтасаныл. Тот Хо̄рыӈпа̄выл, Хо̄слох ос Саранпа̄выл мус тэ̄лы лё̄ӈх о̄лы. Та лё̄ӈх хосыт юил та ня̄влыяныл. Та̄нварпэ̄ква ма̄нь ня̄врам сысын хомымтастэ, та ои, та ои, та ха̄йты, та ха̄йты. Ма̄хманув татем та таве ёмщакв ня̄влысаныл. Хум хо̄тпат таве юил ёхтысаныл, ня̄врам ла̄глэ̄т пувумтаӈкве а̄лымасаныл, хотхасумтасаныл. Ос тот ма̄нь тӯр о̄лыс. Та̄нварпэ̄ква та тӯрн мӯрмыгтас. Тув мус хотро̄хтыс, такви витанэ̄тлутанэ̄т яныг вит ва̄рыс. Ты юипа̄лт та тӯр янгыг со̄схатас. Та̄нварпэ̄ква та тӯр ӯлтта ӯсыстэ, ма̄хумн тох аты пуввес. Та тӯр ма̄хум Э̄ква турыг ань ты мус ла̄вияныл. Ня̄врам пуста̄гыл хультыс, ма̄хум таве ща̄неа̄ще палт юв тотсаныл. Та колта̄гыл ань ты мус со̄тыӈыщ, щуниӈыщ о̄лы. Ты мо̄йт Марина Вынгилева ма̄ньщи ла̄тӈыл потыртастэ, нэ̄пакн Николай МЕРОВ хансыстэ.

1112 2015. 11. 20. NO DATA

Яныг утыт ос ма̄нь утыт 1951 та̄лт Ленинград ӯст ма̄ньщи ня̄врамыт ма̄гыс сака пӯмыщ нэ̄пак нэ̄глыс. Е. Чарушин рущ ла̄тӈыл хансум нэ̄паке Евдокия Ивановна Ромбандееван ма̄ньщи ла̄тӈыг толмащлавес. «Яныг утыт ос ма̄нь утыт» ты нэ̄пак намаим о̄лыс. Ма̄н ты нэ̄пак ань нэ̄мхо̄т ат хо̄нтылӯв, туп яныг библиотека колытт ул о̄лэ̄гыт. Матъёмас ма̄н рӯпитан колувн венгр а̄ги Чилла Хорват щалтапа̄лыс. Тав ма̄ньщи ла̄тӈыл хансым са̄в пе̄с нэ̄пак хурииг по̄слым о̄ньщиянэ. Тав ты ма̄нав мисанэ. Ань тыгыл э̄лаль ма̄н ты нэ̄пакныл вим потрыт газетат хансуӈкв патыянӯв. Ты йист тамле нё̄тнэ щирыл, ка̄миньт ма̄ньщи ла̄тӈыл мо̄рсыӈ яныгпа̄ла хотпа потырты. На̄н ос на̄нти ня̄враманын ма̄гыс ты о̄выл потырохса ловиньтэлы̄н. Ва̄с ня̄враманэ ёт Эт, эт, ва̄с пыгквет! Эт, эт, ма̄нь утквет! На̄н ма̄ньха̄п хольт на̄талта̄лэгы̄н! Ла̄глантыл тӯп хольт вит хилэгы̄н! Мурмалэ̄н, ма̄ мус ёхтыгпа̄лэ̄н. Тӯр паттат вит ёлыпа̄лт пум, атыӈ тэ̄нут ос во̄иӈ ма̄таракве о̄лы. Торге̄н са̄в та̄е̄н! Молях яныгме̄н!

1112 2015. 11. 20. Тамара МЕРОВА

Ка̄с ва̄рсыт, ёмщакв ӯщлахтасыт Туи А̄нъя па̄вылт «Шешкинские чтения» нампа ханищтап о̄лме порат Наталья Ткачук акв ма̄ньщи пыг ёт ва̄йхатас. Ань та пыг урыл тав ма̄навн пищма хансыс: «Ты ёмас, ка̄ркам пыг наме Толя Мелентьев. Тав ань хо̄тыт классыт ханищтахты. А̄нъя па̄вылт хосат та̄гыл школа ат рӯпиты, таима̄гыс ня̄врамыт ханищтахтуӈкве Ягрим па̄вылн тотыглавет. Ос ӯщлахтанэ̄ныл ма̄гсыл а̄гирищитпыгрищит пуссын юв минуӈкве молямлэ̄гыт. Толя ханищтахтын поратэ̄т ще̄мьятэ Ягримн ва̄нтлы. А̄нъят пыг ащо̄йкатэ о̄лыс, наме Владимир Егорович Хозумов. Ань са̄в рӯтанэ тот о̄лэ̄гыт, та̄н ётаныл сака ёмас, пӯмыщ о̄луӈкве. Ты ма̄ньщи па̄вылкве Тагт я̄ ватат ӯнлы. Тот лылые̄пе сыстам, па̄влыӈ ма̄хум во̄рае̄гыт, ня̄враманыл ёт пил ва̄тэ̄гыт, ла̄хыс атэ̄гыт, хӯл алыщлэ̄гыт. Толя ка̄сыӈ туи тув ёхтала̄лы, таве̄н тот сака мӯсты. Ань ты та̄л «Шешкинские чтеният» са̄всыр ханищтапыт, суссылтапыт, ёнгилыт ва̄рыглам порат, пыгрищ акваг тув ялантас ос матыра̄ти нё̄тмил ва̄рыс. Акв хо̄талт ма̄хум ма̄ньха̄пыл кассыт. Толик яныг хо̄тпат халт касыс. Тав та̄ра ка̄салавес, пыг такем ха̄снэ̄г ёмщакв тупыл товыс ос каснэ хо̄тпанэ юил ёхтысанэ. Тав па̄влыӈ ма̄хманэ̄н э̄сгувес, ла̄ве̄гыт, щар ащо̄йкатэ хольт тэ̄лан вуйхатнэ ма̄щтырыг о̄лы. Анатолий тот о̄выл места вис. Ма̄н ань, Ханты-Мансийсканыл тув ялум ма̄хум, Толян паща ла̄тыӈ ке̄тэ̄в. Олеся Ткачук ос Алина Норова тав ётэ ёмщакв юрщхатасы̄г, тэ̄натэ̄н ты пыг ёт ёнгасаӈкве сака пӯмыщ о̄лыс. Тав па̄влыӈ ня̄врамыт акванатыглаӈкве нё̄тыс, та̄н аквъёт ёнгим хоса ха̄йтыгтасыт. Ань а̄гирищиг Толикн номтыӈыщ ханищтахтуӈкве ла̄ве̄г, мо̄тыт та̄л хо̄т акван вос хо̄нтхатыгланувыт». Н. Ткачук ке̄тум пищма ма̄ньщи ла̄тӈын Т. Мерова толмащластэ.

1112 2015. 11. 20. Валентина УЗЕЛЬ

Та̄н ма̄нь ня̄врамыт пӯмщаласаныл Ханты-Мансийск ӯст «Улыбка» нампа ма̄нь ня̄врамыт садик кол о̄лы. Ты э̄тпос 11 хо̄талэ̄т Ханты-Мансийский технологопедагогический колледж музыкальный отделеният ханищтахтын ня̄врамыт тув ялсыт. Та̄н ма̄нь ня̄врамыт ма̄гыс ханты ос ма̄ньщи мирыг урыл акв пӯмыщ ёнгил щё̄питыгласыт. О̄влэ̄т ня̄врамыт пащалахтуӈкв ханищтаве̄сыт, та̄н пуссын ханты ла̄тӈыл «Вуща» ла̄тыӈ ла̄всыт, ма̄ньщи щирыл тыи – паща. Тувыл та̄н «Со̄выркве» э̄рыг э̄ргын порат йӣкващласыт. Колледжит ханищтахтын а̄гит ты э̄рыг э̄ргысыт ос ня̄врамыт та сыс йӣквсыт. Ма̄ньщи са̄ӈквылтапыл суссылтаве̄сыт ос титыглаве̄сыт – са̄ӈквылтап маныр нупыл хартаве, манырсыр йӣвыл ёргаве. Ня̄врамыт ювле ла̄всыт – тав ха̄п хурипа, хо̄вт йӣвныл ва̄раве. Тувыл тит а̄гирищиг ос Юра Хозумов та̄н ма̄гсыланыл са̄ӈквылтасыт. Тув ёхталам колледж а̄гит пуссын соссаӈ ма̄хум маснутыл масхатым о̄лсыт. Ня̄врамыт маттем та пӯмщалахтасыт, турло̄псыт ос пальсакыт ка̄тыл новсаныл. То̄ва ма̄нь а̄гирищаквет та̄нанылн ла̄всыт, та̄н юн сак о̄ньще̄гыт, та̄нти сакква̄лыг хартуӈкв о̄с ве̄рме̄гыт. Мо̄тыт э̄тпост аквты садикн студентыт о̄с тах ялэ̄гыт. Ос матыр мо̄т пӯмащ тах щё̄питэ̄гыт ос ня̄врамытн суссылтыяныл.

1113 2015. 12. 04. Николай МЕРОВ

Соссаӈ ма̄хманув рӯпатаныл ма̄гыс олныл мивет Ювле хультум э̄тпос 19-20 хо̄талаге̄т та̄нки рӯпата ва̄рнэ хо̄тпат э̄рнэ тэ̄ланыл ма̄гыс субсидияолн винэ ма̄гыс Ханты-Мансийск ӯсн ёхталасыт. Ты ва̄рмаль ма̄вит ӯргалан округ департаментыт рӯпитан хо̄тпат щё̄пита̄лсыт. Ты тэ̄ла ма̄гыс та̄н ва̄т нупыл ат миллион солко̄ви ты ма̄хум халт ла̄кквауртсаныл. Тыг ёхталам ма̄хум халт олныл минэ хо̄тпа пе̄риян ма̄гыс китхуйплов хо̄тпа комиссият рӯпитас. Кӯщаиг тот ма̄вит ӯргалан ма̄т рӯпитан хум Александр Комиссаров о̄лыс. Матъёмас ты комиссият Ассамблея депутат нэ̄ Надежда Алексеева ос губернатор ва̄ӈын хум Г. Бухтин палт нё̄тым рӯпитан ханты нэ̄ Людмила Алфёрова о̄лсы̄г. Тэ̄н, сакати, соссаӈ ма̄хманув тармылпатнэ ма̄гыс тот потыртасы̄г. Па̄влытт о̄лнэ соссаӈ ма̄хманув рӯпатаӈыг вос е̄мтэ̄гыт, «Социальноэкономическое развитие коренных малочисленных народов Севера ХМАО-Югры на 2014-2020 годы» нампа программа рӯпиты. Ма̄хманув ты ва̄рмаль щирыл субсидияолныл ты мивет. Ань соссаӈ ма̄хманув Ха̄льӯс, Белоярский, Кондинский, Нижневартовский, Октябрьский, Советский, Сургутский ос Ханты-Мансийский районытныл ёхталасыт. Пуссын аквъёт та̄н атпан нупыл акв заявканэ̄пак хассыт. Ты хо̄тпат халт са̄выӈпа̄лэ йис ма̄т са̄лы ӯрим, во̄раим манос хӯл алыщлым о̄лэ̄гыт. Ка̄сыӈ хо̄тпа такви я̄нас миннэ тове э̄лаль тотнэ ма̄гыс э̄рнэ нэ̄пакыт щё̄пита̄лыс. Комиссият рӯпитан ма̄хум та̄н потраныл ёмщакв хӯнтлысаныл ос рӯпатаныл урыл китыгласаныл. Ань то̄ва предприятият э̄лаль ёмщакв рӯпитанэ̄ныл ма̄гыс олныл тах нё̄тавет. Пил, ла̄хыс та̄стын ма̄хум халт ты хо̄тпат пе̄рияве̄сыт: – Советский районт ООО «Алекс» нампа предприятият рӯпитан ма̄хум; та̄н пил ва̄тэ̄гыт, ла̄хыс атэ̄гыт. Нижневартовский районт о̄лнэ ос такви рӯпата ва̄рнэ хум Владимир Борисович Водопьянов тах олныл миве. – Ха̄льӯс район Саранпа̄вылт рӯпитан «Э̄рупса» нампа ма̄ньщи община о̄с олныл миве, та̄н во̄рт яныгман ща̄й лӯптат тыналан ма̄гыс атэ̄гыт. Са̄лы ӯрнэ ма̄хум халт ты ма̄хум нё̄тавет: – Сургутский районт са̄лы ӯрнэ ма̄ щё̄питан ма̄гыс ханты хум Клим Егорович Кантеров олныл миве. – Белоярский районт йис ма̄т са̄лы ӯрнэ хум Алексей Семёнович Тарлин о̄с олныл та̄ставе. Хӯл алыщлан ма̄хум халт Кондинский районт хӯл алыщлан «Кама» нампа община олныл нё̄тавет. Во̄раян ма̄хум халт ос ты общинат олныл мивет: – Ха̄льӯст о̄лнэ «Старые Косари» нампа предприятие нё̄твес, та̄н я̄ хӯл са̄всыр тэ̄нутыг ва̄ре̄гыт, кӯщаиг тот Вячеслав Львович Калашников рӯпиты. – «Щекурьинское» нампа хӯл алыщлан община, та̄н о̄с я̄ хӯлыт са̄всыр щирыл щё̄питан ма̄гыс олныл нё̄тве̄сыт. – Кондинский район «Старая Мулымья» нампа во̄раян ма̄ньщи община олныл нё̄твес. – Ханты-Мансийский район «Остяко-Вогульск» нампа во̄раян община о̄с олныл миве. Комиссия яныг кӯщай А. Комиссаров ла̄выс, ты нё̄тмил хосыт ань округув янытыл юио̄выл матах та̄л сыс та̄нки рӯпата ва̄рнэ хо̄тпат яныгса̄т арыгтем йильпи предприятие ва̄рсыт. Ань па̄влытт иӈ са̄внув рӯпитан ма̄ тах щё̄питаве.

1113 2015. 12. 04. Александр ВЬЮТКИН

Та̄нти ва̄рум тэ̄нутаныл ос пормасаныл тыналасаныл Туристыг яласан ма̄хум ма̄гсыл Ханты-Мансийск ӯст ка̄сыӈ та̄л «Югратур 2015» нампа ва̄рмаль о̄лыглы. Рущ ла̄тӈыл «XIV специализированная туристическая выставкаярмарка» ла̄ваве. Ка̄сыӈе̄мт аквты порат ма̄н ӯсувн ма̄хум та̄нти ва̄рум ос щё̄питам тэ̄нутаныл, та̄нти ка̄тыл ма̄щтырлам пормасаныл тыналаӈкв тотыяныл. Ты та̄л рӯпатаныл тит хо̄тал минас. Туристыт ёт рӯпитан ма̄хум акванхо̄нтхатыглан ва̄рмаляныл щар о̄выл щёс «мирхал» яныг намыл пиным о̄лыс. Мо̄лты та̄л округув Болгария, Чехия ос Словакия хо̄н ма̄т ёт акваннё̄тхатым э̄лаль рӯпитаӈкв потыртахтас. Ты порат ос Китай ёт нё̄тхатым э̄рнэ нэ̄паканылт хасхатасыт. Ты тэ̄лат пуссын округув онтырса̄т нупыл ат та̄лэ то̄влын кастыл ва̄рыглаве̄сыт. Ханты-Мансийск ӯст о̄лнэ ма̄хум ты тыналахтын ва̄рмаль сака ӯрияныл. Тыналан утыт нё̄тнэ̄г, хорамыӈыг щё̄питым о̄лэ̄гыт. Тот тынаныл ла̄пка тын щирыл ат о̄лэ̄гыт. Тэ̄нутыт атыӈнуве̄г о̄лэ̄гыт ос мощ тынта̄лнуве̄г тыналавет. Тот ёмщакв ёвтхатуӈкв ро̄ви. Са̄всыр щирыл щё̄питым нё̄влит (ты пӯрщ, мис, янгӯй, юн янмалтан со̄выр, щищкурек ос са̄лы нё̄выль) о̄с тыналаве̄сыт. Атыӈ нё̄выль ӯсыӈ ма̄хмытын та̄ра ёвтвес. Ты тит хо̄тал сыс ӯс ос ляпа па̄вылт о̄лнэ мир матыр ёвтнэ ма̄гсыл тув акваг ялантасыт. Ты порат ам о̄выл щёс тэ̄нутыг щё̄питым са̄лыӈ те̄лп тот ка̄саласлум, тав о̄с тыналавес. Якутия ма̄ныл тыг тотыглавес. Те̄лп тыналан нэ̄ ла̄выс: «Тыналан ма̄гсыл атнэ са̄лы те̄лп ле̄ккарытын аквписыг уральтаве. Ты коныпал нё̄влиг ва̄рнэ са̄лыянув а̄гмыл ул вос е̄мтэ̄гыт, та̄наныл та̄л сыс тит щёс тэ̄рпиӈ уколыл тӯщтыянӯв. Ма̄н ётув рӯпитан ма̄хум нэ̄мхотьют лю̄ль ла̄тыӈ ат ла̄ве̄гыт». Тэ̄нут коныпал тот нёхыс, во̄нтыр, норка, лэ̄пык ос охсар, во̄руй совыт тыналаве̄сыт. Ка̄тыл ма̄щтырлан ма̄хум та̄нти ва̄рум пормасаныл тот о̄с о̄лсыт. Касаит, са̄грапыт, янгӯй ос са̄лы а̄ньтныл яктым хорамыт ос ха̄ль са̄с тармыл по̄слым хурит тыналаве̄сыт. Кон «Югра-Экспо» кол э̄лыпа̄лт тит ё̄рнкол тӯщтыглавесы̄г. Ё̄рнколы̄г тӣврыт ка̄сащан ма̄хум о̄лн ойтым хӯл ос са̄лы нё̄влиӈ исмит тэ̄ӈкв ве̄рмысыт. Туристыг ёхталан ма̄хум тот маттем та по̄слахтасыт, ляпат те̄рим са̄лыӈ сун лю̄лис.

1113 2015. 12. 04. Николай МЕРОВ

Па̄ссаӈ щахныл каснэ ма̄ньщи хум потре Яныг таквс э̄тпос 20 хо̄талэ̄т Ханты-Мансийск ӯс ля̄ххал тотнэ колн пассаӈ щахныл алхатнэ ма̄ньщи хум Руслан Михайлович Проводников ёхталас. Тав Россия ма̄гыс хо̄н ма̄т касым яласы. Ля̄ххал тотнэ ма̄хум таве каснэ ва̄рмаль урыл китыгласаныл. На̄н ул ва̄слын, мо̄лалнув Монако ма̄т Монте-Карло ӯст Руслан Проводников ос Хесус Родригес, мексиканец хум, ка̄миньт па̄ссаг масым щахныл алхатсы̄г. Нилыт щёс акванпӯхталыматэ̄н порат ка̄ркам ма̄ньщи хумиюв та хум татем ха̄сым ра̄тыстэ, о̄йка ёл та патыс. Та юипа̄лт каснэ ва̄рмаль ёлпо̄илттавес, Руслан но̄хпатыс. Ты ва̄рмаль кина суссылтан тотап хосыт суссылтавес. Ань таима̄гыс Руслан тыт сака ӯрвес, ты касыл урыл тав хоса китыглавес. На̄н тав потре э̄лаль ловиньтэлы̄н: – Ань юио̄выл касыл о̄лум порат ам ётум ущтынув касуӈкв о̄вылтахтам хум алхатас. Таима̄гыс ам таве молях ёлпаттыслум. Ам ань мо̄т тренерхо̄тпан ханищтавем. Сакати, а̄рталахтын ма̄гыс алхатасум. Маныр тэ̄лы, маныр ат тэ̄лы, ань та̄рапаттыслум. Ам иӈ ё̄рнув хо̄тпа ёт алхатуӈкве тахсум кос, ос намыӈсуиӈ хо̄тпат ам ётум касуӈкве ань ат таӈхе̄гыт, пилым о̄лэ̄гыт. Ам ётум алхатыманыл, то̄ват ты кос но̄хпатэ̄гыт, ос каснэ ва̄рмаль а̄стын юипа̄лт та̄н та̄ра пӯльницан тотавет. Юио̄выл та̄лт тамле ва̄рмаль о̄лы, са̄выӈпа̄лэ ёмащакв алхатнэ хо̄тпат ва̄гталнув хо̄тпат ёт алхатэ̄гыт. Тыщир та̄нанылн олн сэ̄луӈкве кӯпнит, ос сака са̄в ё̄р пинуӈкве ат э̄ри. Ты э̄лыпа̄лт ам ётум алхатам хум ам урумтыл тох ла̄выс: «Руслан ке о̄вылтахты, каснэ ва̄рмаль ёлпо̄йтнэ мус акваг та̄кыщ алхаты. Хо̄тпа ат ке ӯргалахты, то̄нт таве молях ёлпаттуӈкве ве̄рмитэ». Ань мо̄тыт щёс хоты хо̄тпа ёт касуӈкве патэ̄гум, ат ва̄глум. Э̄лаль сака ат сунсэ̄гум, ань о̄лнэ хо̄талыл о̄лэ̄гум. Каснэ ва̄рмаль щё̄питан кӯщаянум хотьют ёт потыртахтэ̄гыт, ос та хо̄тпа ёт алхатуӈкве та минэ̄гум». Руслан ла̄вме щирыл, ань моще̄рт Нижний Тагил ӯс савалап ня̄врамыт о̄лнэ колт тав наме̄тыл пиным йильпи каснэ кол пӯнсаве тах. Мо̄лалнув ты тэ̄ла ма̄гыс Руслан ёт тот рӯпитан кӯщай хум потыртахтас. Руслан та каснэ кол ма̄гыс маныр э̄рыс, такви сэ̄лум о̄лнанэ̄тыл пуссын ёвтыс. Ты юипа̄лт мо̄т ӯсытныл ма̄хум китыглахтуӈкве о̄с патсыт. Ма̄ньщи хумиюв ты урыл тох ла̄выс: – А̄нумн ты тэ̄ла сака мӯсты. Ма̄ньлат хо̄тпат, ня̄врамыт ты касылн ялантаӈкв ка̄саще̄гыт ке, ам та̄наныл манарыл ве̄рмиянум, таил нё̄тыянум, туп вос касэ̄гыт». Руслан Ха̄льӯст самын патыс. Ма̄ньта̄гыл ты касылн яланты. Па̄влыӈ ма̄хум пуссын таве ёмщакв ва̄ганыл. Ты ма̄ньщи хум соссаӈ ма̄хум ма̄гыс манырсыр рӯпата ва̄ри, ты урыл о̄с потыртас. Округ депутатанув таве са̄всыр конференциятн акваг во̄выглыяныл. Кӯщаянув тав ла̄тӈанэ̄н хӯнтлэ̄гыт. Мир ма̄гыс матыр ёмас ва̄рмаль ва̄руӈкве э̄ри ке, тав та̄нанылн ты урыл ла̄ви, та̄н, сакати, нё̄тэ̄гыт. Ань моще̄ртын Москва ӯст финноугорский мирыт конференцияныл е̄мты, Руслан тув о̄с во̄ввес. Ань тув минуӈкв щё̄питахты. Таве̄н ты рӯпата ва̄руӈкве сака мӯсты. Ма̄ньщи мирув ат ёрувлытэ, матыр та̄рвит ва̄рмалит мӯсхал щирыл щё̄питан ма̄гыс тав нё̄тмилэ э̄ри ке, хум яныг ща̄гтыл нё̄ты. Ань йильпи та̄л ляпаман кастыл тав Саранпа̄вылн ялуӈкве номсы. Тот о̄с каснэ кол рӯпиты. Тув па̄ссаӈ щахныл алхатнэ са̄в па̄влыӈ ня̄врам яланты, та̄наныл мӯйлупсал тотыянэ. Руслан Михайлович ла̄выс, каснэ ма̄ныл хунь по̄йты, ювле Ха̄льӯсн о̄луӈкве мины. Яныгмам ма̄тэ сака э̄руптытэ. Тот о̄лнэ соссаӈ мирытн нё̄тмил ва̄рим э̄лаль рӯпитаӈкве номсы, та̄н тэ̄ланыл пуссын ёмщакв ва̄ганэ.

1113 2015. 12. 04. Александр ВЬЮТКИН

Са̄ӈквылтапыт урыл пӯмщалахтан хо̄тпаг Мощ мо̄лалнув Финляндия хо̄н ма̄ныл тит хо̄тпаг Ханты-Мансийск ӯсн ёхталасы̄г. Хум наме Тимо Вяянянен, нэ̄ хотпа наме – Леена Хяккинен. Тэ̄н сас финн ма̄хум та̄нти «кантеле» нампа утыл са̄ӈквылтэ̄г. Тимо хум са̄всыр мирыт са̄ӈкылтан та̄наныл ханищтан учёныиг о̄лы. Леена нэ̄ тав ос «кантеле» утыл са̄ӈквылты. Тэ̄н ма̄н ма̄ньщи та̄нанув ханищтым ань пӯмщалахтасы̄г. Тимо ос Леена Финляндият щё̄питым «По струнам гуслей» нампа проект щирыл яласэ̄г. Гусли хурип са̄ӈквылтан та̄ныӈ утыт хо̄т о̄ньщавет, тэ̄н та ма̄н та минэ̄г. Та̄л сыс са̄в ма̄т о̄лсы̄г. Хо̄н ма̄ныл ёхталам хо̄тпаг ӯсувт о̄лнэ са̄ӈквылтапыт ма̄щтырлан ос са̄ӈквылтан ма̄хум ёт хо̄нтхатыгласы̄г. Ма̄ньщи хумыг ёт Анатолий Вадичупов ос Владимир Меров ёт тэ̄н о̄с ва̄щинтахтасы̄г. Анатолий ос Владимир – ты мирн ва̄нэ ма̄ньщи хо̄тпаг. Мӯй хо̄тпаг о̄влэ̄т Анатолий Вадичупов ёт потыртасы̄г. Анатолий Васильевич тав округ янытыл са̄ӈквылтапыт, на̄рсъюхыт, нэ̄рнэйӣвыт ос тарыгсыплувйӣвыт ва̄рнэ ёмас ос яныг ма̄щтырыг ловиньтахты. Щар о̄выл са̄ӈквылтап тав иӈ ма̄ниг о̄лме порат Кимкъясуй па̄влэ̄т ва̄стэ. То̄нт яныгпа̄лаг о̄лнэ ма̄хум пуссын са̄ӈквылтасыт. Пыгрищиг о̄лме̄т тав са̄ӈкылтапыт урыл пӯмщалахтуӈкв патыс. Та пора па̄сныл тав ва̄гтэ, хумус та̄н ва̄равет. Са̄ӈквылтапыт ва̄руӈкв о̄вылтахтаме порат, о̄влэ̄т та̄наныл ловиньтасанэ. Хунь са̄в ва̄рыс, то̄нт ловиньтан ма̄ныл хотпо̄йтыс. Тав ань ла̄выс: «Ам, улпыл, яныгса̄т арыгтем са̄всыр са̄ӈквылтан ут ва̄рсум». Анатолий Васильевич ма̄щтырлам са̄ӈквылтапанэ суиӈыг ос хорамыӈыг тэ̄лэ̄гыт. Тав ва̄рум утанэ ма̄ янытыл ань са̄в ма̄т о̄ньщавет. Ма̄щтыр ка̄тыӈ хум ёт потыртаманыл юипа̄лт мо̄т ма̄ньщи хум ёт ва̄йхатасы̄г. Владимир Меров ос са̄ӈквылтапыл са̄ӈквылтан хумыг о̄лы. Тав Саранпа̄вылт о̄лнэ «Са̄лы лё̄ӈх» ёнгын колт Дмитрий Георгиевич Агеев палт ханищтахтас. Владимир Савельевич ань ӯст о̄лнэ ня̄врамыт са̄ӈквылтаӈкв ханищтыянэ, «Лылыӈ союм» колт рӯпиты. Тав пе̄с йис ма̄ньщи та̄ныт пе̄с щирыл са̄ӈквылтыянэ. Ань ханищтахтын ма̄хум са̄в та̄н та̄нти щиранылт ёнгияныл ос мо̄т щирыл намтыяныл. Таи ма̄гсыл тамле ре̄т э̄лаль тотнэ хум ма̄навн сака э̄ри. Тимо ос Леена Владимир Савельевич ёт тит щё̄с ляпатем потыртым ӯнлысы̄г. Хо̄н ма̄ныл ёхталам мӯй хо̄тпаг ма̄н хумиюв ёт та̄нти халанылт хӯлтыглахтым потыртасыт. Володя са̄ӈквылтан та̄нанэ ханищтан ма̄гсыл пуссын ищхӣпыӈ утн ёмащакве̄г хасве̄сыт.

1113 2015. 12. 04. Тамара МЕРОВА

Кӯщай пе̄риявес Округ Дума депутатыт Кондинский район йильпи кӯщай пе̄риясыт. Та̄н са̄выӈпа̄лэ Анатолий Дубовик ма̄гыс номтаныл патыс. Ювле хультум яныг таквс э̄тпос ва̄тыт щислат тав тот кӯщаиг рӯпитаӈкве патыс. Та хо̄талт Анатолий Владимирович кӯщайлан рӯпататэ ва̄рнэ ма̄гыс присягала̄тыӈ ла̄выс. Борис Хохряков, округ Дума председатель хум, таве̄н ке̄тум янытлан ла̄тӈе ловиньтавес. Владимир Дубовик ёмащакв э̄лаль рӯпитаӈкве ла̄вхатас. Та районт о̄лнэ ма̄хум па̄вланыл халт машинал яласан ёмас лё̄ӈхыт ва̄руӈкве ос йильпи о̄лнэ колыт ӯнттуӈкве э̄ре̄гыт. О̄лупсанылт нэ̄мат лю̄ль та̄рвитыӈ ва̄рмаль ул вос о̄лыс. Тав ань ты тэ̄лат акваннё̄тхатым ва̄руӈкве, рӯпатаӈ хо̄тпат пе̄рии. Аквта хо̄талт мо̄т район кӯщаит ищхипыӈ ут хосыт кол ӯнттын ва̄рмалит урыл потыртасыт. Октябрьский район кӯщаиг о̄лнэ нэ̄ Анна Куташова ты тэ̄лат о̄вылтыт мирн ла̄тыӈ тотыс. 2015 та̄л сыс районанылт 25, 6 со̄тыра квадратный ме̄тра са̄вит кол ӯнттуӈкве ла̄вхатыгласыт. Ань тот 8, 2 со̄тыра квадратный ме̄тра ма̄хум та̄нки кол ӯнттэ̄гыт тах, рущ щирыл «индивидуальное жилищное строительство» ла̄ваве. Ань тыг мус Октябрьский район янытыл 19, 3 со̄тыра квадратный ме̄тра са̄вит колыг ӯнттуве̄сыт ос 7, 4 со̄тыра квадратный ме̄тра ма̄хум ИЖС щирыл ӯнттысыт. Тащирыл ань Октябрьский район са̄в о̄лнэ кол ӯнттынэ̄ныл ма̄гыс но̄хпатсыт. Ищхӣпыӈ утыт хансым ля̄ххалыг Тамара Мерова ма̄ньщи ла̄тӈыл хассаге.

1113 2015. 12. 04. Людмила ТЕТКИНА

Во̄ръя па̄вылт яныгмам хо̄тпа Ха̄льӯс район Ня̄хщамво̄ль па̄вылт ма̄ньщи э̄ква Нина Васильевна Анемгурова о̄лы. Тав 1936 та̄лт ва̄т са̄грапнал э̄тпос 11 хо̄талэ̄т Во̄ръя па̄вылт самын патыс. Та па̄выл я̄ хосыт алгаль о̄лыс, Ня̄хщамво̄льныл сака хоса минуӈкве э̄рыс. Пе̄с порат тот са̄в ма̄хум о̄лыс. Нина Васильевна ща̄нягеа̄щаге урыл ос такви о̄лупсатэ урыл ма̄ньщи газетав ма̄гсыл потыртас. Тав потре ань э̄лаль ловиньтэлэ̄н. – Ща̄нюм наме Екатерина Николаевна Анемгурова ос а̄щум Василий Васильевич Анемгуров о̄лыс. Ще̄мьят ма̄н хо̄т ня̄врам о̄лсӯв. Ща̄нягума̄щагум са̄лы ӯрим яласасы̄г. То̄нт миркол Ня̄хщамво̄ль па̄вылт о̄лыс, са̄лыл тыг ёхталасыт. Ма̄н са̄в са̄лы о̄щсӯв, Во̄ръя па̄вылт яныг пӯсас капай о̄лыс. А̄щум о̄лум порат Нё̄рн такви яласас. Акв порат тав Ня̄хщамво̄ль па̄вылн во̄ввес. Тувыл сутытаӈкве та тотвес. Ма̄н са̄в са̄лы о̄щсӯв, улпыл, таи ма̄гсыл сутытавес. Ща̄нюм потырта̄лас, Ха̄льӯсн тотвес, наска̄ссыг тот хо̄т та порславес. То̄нт са̄в ма̄ньщи тох щар насска̄сыг пувве̄сыт. А̄щум хотталь тотыма порат, ам иӈ а̄пат хуясум, таве аты номилум. А̄щ та̄л хунь хультсӯв, са̄лыянув пастухын майве̄сыт, тох ла̄щалла̄щал хотталь тотве̄сыт, са̄лы та̄л та хультсӯв. Яга̄ги о̄щсум, тав наме Мария о̄лыс. Тав хум ва̄рыс, Суеват па̄выл нупыл минас. Тав хо̄т ня̄врам о̄ньщиглас. Ня̄враманэ щар пуссын холасыт. Тувыл о̄йкатэ арыгтас, такви о̄с та арыгтас. Ос Е̄пам о̄лыс, война порат хо̄нтлаӈкве тотвес. То̄нт ща̄нюм, Устин ос ам, хӯрум ёмас хультсӯв. То̄нт Устин иӈ ма̄нь пыгрищ, во̄раяӈкве ат ха̄сы. Ща̄нюм ёт во̄рн аквъёт та ё̄мантэ̄г. Тох а̄щум та̄л ща̄нюм ма̄нь пыге во̄раяӈкве такви ханищтастэ. Е̄пам тай мощ грамотныиг о̄лыс, война о̄вылтахтас, та̄ра тув ке̄твес. Юв воссыг ат ёхтыс. Аквматэ̄рт яныг «Шлеев» ёхтыс. Ма̄хум пуссын на̄лми ва̄тат акванатхатаӈкве та патсыт. Хум хо̄тпат яныг на̄иӈха̄пын та̄лттуве̄сыт. Тувыл «Шлеев» минмыгтас, нэ̄ хо̄тпат тай лю̄ньще̄гыт, манаре̄гыт, хультум хум хо̄тпат писалилил па̄тлуптэ̄гыт. Тувле писалил па̄тлуптэ̄гыт, тыгле писалил па̄тлуптэ̄гыт. То̄нт ам иӈ ма̄нь ня̄врам, сунсэ̄гум, «Шлеев» э̄лаль та ла̄кванты, тувыл ювле о̄с па̄тлуптэ̄гыт. Ща̄нюм яныг пыге ма̄гсыл сака хоса лю̄ньщантас. А̄щум а̄пщитэ о̄с войнан тотвес, ётыл тав ювле ёхтыс. Е̄пам акваг та тотвес. Ща̄нюм Во̄ръя па̄выл колхозт рӯпитас. Тувыл Усть-Тапсуйт колхоз ква̄лтапа̄птувес, тав тот мис поснэ нэ̄г рӯпитас. Во̄ръя па̄вылт яныг кол о̄щсӯв. Армиян тотым ягпыгум колэ Усть-Тапсуй па̄вылн на̄тылтастэ. Тот колхозт мир манхурип рӯпатал мивет, таи та ва̄ре̄гыт. То̄нт норма щирыл та̄н рӯпитасыт. Ща̄нюм ла̄выглас, Во̄ръя па̄вылт ла̄пка, пекарня, ма̄нь пӯльница рӯпитасыт, яныг па̄выл о̄лыс. Устин иӈ ма̄нь ня̄врам кос, тувыл во̄рт ща̄нюм ёт яласас. Ня̄ль сунсуӈкве минэ̄г, ам ос во̄рн тотавем. Ща̄нюм потырта̄лас, яныг па̄йп о̄ньщас. Па̄йп сунтыт тыщирыл ас ва̄рыс, тув ӯнттавем, ла̄глагум тот хосыгхатэ̄г, во̄рн минэ̄г, ёт та а̄лумтавем. Такви тай сака карс а̄ти, тытн но̄хтагматавем. Тувыл Ня̄хщамво̄ль па̄вылн ханищтахтуӈкве мощщаке̄н тотыглаве̄сум. Тапалыт ма̄н тув тотавем, тувыл ӯщлахтын порат ювле хо̄ӈхан тотавем. Сака хоса яласан ма̄тэ о̄лыс. Ща̄нюм палт юн та хультсум, юн та о̄лсум, воссыг ат ханищтахтасум. Юн рӯпата ва̄рсум. Ща̄нюмн колхозт нё̄туӈкве патсум. Ётыл Нёрахи па̄вылн ва̄нтлысӯв. Тот колхозт рӯпитаӈкве паттуве̄сум. Пум ва̄руӈкве ке̄таве̄в, пум ва̄ре̄в. Са̄ртын Устин мо̄йтыӈ тув во̄раяӈкве ялантас. Нёрахи па̄вылт кол ӯнттыс, тот о̄лсӯв. То̄нт са̄в а̄ги о̄лыс, пум ва̄рсӯв, картопка ӯнттэ̄в. Па̄вылт яныг тэ̄пка капай о̄лыс. Картопка тот пинэ̄в ос осэ̄ватал мо̄т тэ̄нут янмалтэ̄в. Суббота ӯщлахтан хо̄тал кос о̄лыс, тувыл рӯпитаӈкве о̄с ке̄таве̄в, пум та хартэ̄в. Тувыл Зоя юрт а̄гим ёт мис посуӈкве паттувесме̄н. Нёрахит яныг мискол о̄лыс. То̄нт ма̄н иӈ ма̄ньлат а̄гит, са̄всыр тэ̄нут Ня̄хщамво̄ль па̄вылн тотуӈкве э̄ри, ма̄н тай пуссын тув воратэ̄в. Лувыл тыг ювӯв. Улпыл тот сытам, то̄нт ма̄ньлат а̄гитн яласаӈкве пӯмащ. Тувыл пуссын тыг Ня̄хщамво̄ль нупыл ке̄твесӯв. Тыт рӯпитаӈкве патсум ос мис поснэ нэ̄г паттуве̄сум. Ты э̄лыпа̄лт Ня̄хщамво̄ль па̄вылн торыӈ ат ёхталасум. Акв порат ла̄пкан щалсум, школа кӯщай Галина Александровна Артеева а̄нум китыглытэ: «Нина, ма̄н палтув техничкаг рӯпитаӈкве минэ̄гын? ». Ам тай ювле ла̄ве̄гум: «Ат ва̄глум, ань иӈ отпускат о̄лэ̄гум, мис по̄снэ нэ̄г рӯпитэ̄гум». То̄нт ща̄нюм Нёрахи па̄вылн ва̄нтлас, ам таве̄н нё̄тым тав палтэ о̄лсум. Нэ̄ ювле ла̄ви: «Номсахтэ̄н, э̄рыӈ ма̄н палтув рӯпитаӈкве патэ̄гын. Отпускын холы, ёхталэ̄н». Тувыл ӯщлахтын хо̄таланум холасыт, ювле Ня̄хщамво̄ль па̄вылн ёхтысум. Конторан та минасум, то̄нт колхоз кӯщаиг Павел о̄йка тав о̄лыс. Ам таве̄н ла̄ве̄гум, школан рӯпитаӈкве во̄вавем. Тав ос ювле ла̄ви, «Во̄ваве̄н ке, минэ̄н». Тох школат колкан ловтуӈкве та патсум. Тувыл ня̄врамыт ёт рӯпитаӈкве о̄с ат ха̄сэ̄гум. Переменат ня̄врамыт та ха̄йтыгтэ̄гыт. О̄влэ̄т ты рӯпатаныл по̄хын минуӈкве кусыгласум. Та̄н тай маныр, ня̄врамыт, переменат тыглетувле та нуйхатыглэ̄гыт. Кон ёнге̄гыт, тӯйт па̄хвтэ̄гыт, тувыл тӯйт не̄лм та̄гыл школан щалтэ̄гыт. То̄нт са̄в ня̄врам о̄лыс. Ме̄н кит техничка рӯпитасме̄н. Устин мо̄йтыӈ Нёрахил ёхталас. Таве̄н ла̄ве̄гум: «Рӯпатаныл хотпатхатэ̄гум, ня̄врамыт ёт рӯпитаӈкве торыӈ ат ха̄сэ̄гум. Звонок миӈкве ла̄вавем, тувыл то̄ва порат мори звонок мыгум». Ётыл ханьщувласум, ёмащакве звонок миӈкве патсум. Школат колкан ловтым 30 та̄л рӯпитасум, ня̄врамыт ёт рӯпитаӈкве о̄с ханьщувласум. Тувыл та школа ӯльян ё̄свес, ань па̄вылт мо̄т кирпащ школа рӯпиты, ань тай ёмас, тот сыстам. 1988 та̄л пенсиян минасум. Ты юипа̄лт иӈ лов та̄л рӯпитасум. О̄влэ̄т сака мощща олн висум. Ань тай олнанум ва̄тихал нё̄тумтантавет. Ща̄нюм сака ма̄щтырыӈ о̄лыс, амки ос ма̄нь порат ма̄ньщи суп ю̄нтсум. Ань тай самагум ат на̄ӈке̄г, юртнэ̄ Людмила Алексеевна Курикова о̄ньще̄гум, тав а̄нум ма̄ньщи суп ю̄нты. Юио̄выл супум сака хоса ю̄нтыстэ. Тамле хоса супыл ат ха̄сэ̄гум, но̄х хунь яныгме̄гум. Амки о̄лнэм касыг хотхалалтыянум лапанэ, тыщирыл мощ ва̄тииг яктыянум. Ва̄ти супыл ханьщувласум. Сахи ат ю̄нтыгласум, ща̄нюм тав ма̄щтырыӈ о̄лыс, маныра̄ти пуссын ха̄сыс, сахи, ва̄й, пуркит ю̄нтыглас. Ань амкирищум о̄лэ̄гум. Соцзащита па̄лыл нэ̄ ёхталы, ӯргалавем, нё̄тавем. Колканум ловтытэ, ӯльюв халталы. Колсори рӯпата ва̄ри. Па̄вылт о̄лнэ Анна Никитична Самбиндалова ма̄ньщи э̄ква палт щалтапа̄лэ̄гум, тав ётэ потыртыме̄н. Сасгум а̄гияге тыт о̄лэ̄г, тув яланта̄лэ̄гум. Акваг юн хунь ӯнлэ̄гум. Хум ва̄рыгласум, о̄йкам сака лю̄ль о̄лыс. Вина аим кит, хӯрум хо̄тал яласас, юв ёхты ос а̄нум ра̄туӈкв тӯлтхаты. Кӯняррищ тох та са̄валасум. Акв порат ня̄врам ӯрим о̄лсум, ня̄врам о̄ньщуӈкве Ханты-Мансийскан тотыглаве̄сум. Та порат школат колкан ка̄тыл ловтсӯв. Ла̄глагум хотпувлахтуӈкве патсы̄г. Тыт сака ёмас ле̄ккар Николай Сагандуков о̄йка о̄лыс. О̄влэ̄т Ха̄льӯсн ке̄тыглаве̄сум, ам тай ат минэ̄гум, юв я̄ртхатэ̄гум. Акв порат юн ӯнлэ̄гум, ща̄й ае̄гум, аквматэ̄рт Коля ле̄ккар щалтапас, а̄ным хота̄лмаястэ. Пӯльницан та ва̄нттуве̄сум. Хӯрум хо̄тал хуясум, тувыл Ха̄льӯсн ке̄тве̄сум. Тот о̄с хӯрум хо̄тал хуясум. Тувыл э̄лаль Ханты-Мансийскан ке̄тве̄сум. Акв э̄тпос тот о̄щве̄сум. Тувыл пыгрищум самын патыс, Толяг намтыгласлум, аты о̄лыс, та ӯст ёл та щё̄питавес. Ня̄врамум ёлщё̄питан ма̄гсыл ат солко̄ви во̄всыт. Тох е̄мтум юипа̄лт ос тох савалым, хотрохтысум, ня̄врам воссыг ат о̄щсум. Ня̄врам та̄л о̄лсум, ань матсум, амккем та о̄лэ̄гум. Нина Васильевна ёмас сымыӈ э̄ква, ма̄ньщи э̄ргыт э̄ргуӈкве сака ха̄сы. Тав а̄нумн такви яныгмам Во̄ръя па̄влэ урыл э̄рыг э̄ргыс. Ты ма̄ньщи э̄ква округув 85 та̄лэ то̄влын кастыл янытлылӯв. Тав та̄рвитыӈ порат яныгмас, колхозт ос школат са̄в та̄л рӯпитас. Таве̄н ма̄н паща ла̄тыӈ ке̄тэ̄в, пус ка̄т, пус ла̄гыл таве̄н ла̄ве̄в.

1113 2015. 12. 04. Тамара МЕРОВА

Ма̄ньщи нэ̄г янытлыягӯв Ювле хультум э̄тпост Ха̄льӯс район Сӯкыръя па̄вылныл Ханты-Мансийскан э̄кваго̄йкаг ёхталасы̄г. Тэ̄н сас ма̄ньщииг, тыи Александр Данилович ос Елизавета Ильинична Сайнаховыг. Са̄нтыр самаге пусмалтан ма̄гыс пӯльницан ялыс. Ам ос Елизавета ще̄мьятэ о̄вылтыт мощ потыртаӈкве во̄выслум. Тав потре э̄лаль ловиньтэлы̄н. – Ам Сӯкыръя па̄вылт 1955 та̄лт округув ялпыӈ хо̄талэ̄т самын патсум. Ты э̄тпос ловит щислат 60 та̄лум тах то̄влы. Сӯкыръят омам о̄лыс, наме Мария Мартыновна Вьюткина. Тав тот колхозт рӯпитас, ётыл интернатыт ня̄врам ӯрнэ хо̄тпаг э̄ти порат рӯпитас. А̄щум саран хум, тав зверофермат ӯйхулыт ӯргалым о̄лыс. Хо̄нтлам ма̄н тотыглавес, тот ка̄тэ саквата̄лвес. О̄йкам омагеа̄тяге Данил Николаевич ос Екатерина Михайловна Сайнаховыг Сӯкыръят о̄лсы̄г. Ме̄н ань о̄йкаме̄нтыл пенсиян патхатамуме̄н юипа̄лт ты ма̄нь па̄вылн о̄с о̄лмыгтасме̄н. 2013 та̄лт йильпи кол ӯнттуӈкве патсуме̄н. Ты э̄лыпа̄лт Саранпа̄вылт о̄лсуме̄н, рӯпитасме̄н. Саранпа̄вылт хо̄тыт класс а̄стласум ос тувыл Сургут ӯс школат э̄лаль ханищтахтасум. 1972 та̄лт тот ГПТУ каменщикыг ханищтахтамум юипа̄лт колыт ӯнттын ма̄т рӯпитасум. То̄нт ӯсытт яныг колыт ущты ӯнттуӈкве патве̄сыт. Ма̄н са̄в ма̄ньщи а̄гит акваннё̄тхатым пирката щирыл кол ӯнттын ма̄т рӯпитасӯв. Тыи Сӯкыръя, Ло̄пмус, Хо̄рыӈпа̄вылныл о̄лнэ а̄гит: Мотя Вьюткина, Зоя Албина, Зоя Ендырева, Дуся Нахрачева, ам. Тувыл 1975 та̄лт ам Тюмень ӯсн ва̄нтлысум. Тот колыт ӯнттын ма̄т карс краныт рӯпитан хо̄тпаг ханищтахтасум. Нумыл ӯс нупыл сунсуӈкве сака пӯмыщ о̄лыс. Тюменьт ам хум ва̄рсум. Наташа а̄гиме̄н самын патыс. Ётылнув о̄йкаме̄нтыл киттыгминасме̄н ос ам Саранпа̄вылн ювле ёхтысум. Саранпа̄вылт ам о̄влэ̄т «Рябинушка» садик колт ня̄врамыт ӯргалан нэ̄г рӯпитасум. Тувыл «Ёлочка» колт ня̄врамыт ма̄гыс тэ̄нут па̄йтсум. Тувыл ты пенсиян патхатасум. Александр ёт акванхо̄нтхатасме̄н. Тав о̄с Сӯкыръя па̄вылныл о̄лы. 1987 та̄лт Вова пыгме̄н самын патыс. О̄йкам о̄влэ̄т Сосьвинский экспедицият рӯпитас, тувыл ЖКХ колн плотникыг рӯпитаӈкве во̄ввес. – Ань пенсият маныр ва̄ре̄гын? Ня̄врамагын урыл мощ потыртэ̄н. – Наташа а̄гим 1978 та̄лт самын патыс, тав хӯрум ня̄врам о̄ньщи. Паша пыге 16 та̄лэ то̄влыс, онтолов классыт ханищтахты. Настюша хо̄тыт та̄лэ то̄влыс, о̄выл классыт ханищтахтуӈкве патыс. Никитушка кит та̄лэ, садикн тотыглаве. Наталья Ханты-Мансийский педучилище а̄стламе юипа̄лт Саранпа̄выл школат рӯпитас. Тувыл Санкт-Петербург ӯст А. И. Герцен нампа институтт о̄с ханищтахтас. Ань полицияколт рӯпиты. Володя пыгме̄н ущты ня̄врамыӈыг е̄мтыс. Ань Ильюша апгуме̄н хо̄тыт э̄тпосэ. Пыгме̄н школа а̄стлас ос Екатеринбург ӯст армият лусытас. Ме̄н ань о̄йкаме̄нтыл йильпи колме̄н щё̄питылме̄н, моще̄ртын ты а̄сты. Апганме̄н янмалтаӈкве нё̄тыме̄н. Тэ̄лы а̄нумн хӯлпыл хӯл алыщлаӈкве сака мӯсты. Китыт э̄руптан ва̄рмалюм, тыи Татьяна Ромбандеева (Коровкина) юртнэ̄м ёт ёсал ё̄мыгтаӈкве ос сыпныл ёлаль тахсуӈкве ялантыме̄н. Ме̄н Сӯкыръят аквъёт яныгмасме̄н. Ты э̄тпос налыман нупыл о̄выл хо̄талэ̄т Татьяна Ильинична о̄с 60 та̄лэ тах то̄влы. Ам таве ань янытлылум, щунь паща ла̄тыӈ ке̄тэ̄гум. Тав Салехард ӯст фельдшерхо̄тпаг ханищтахтаме юипа̄лт о̄влэ̄т Сӯкыръят ма̄хум пусмалтасанэ, тувыл Саранпа̄выл пӯльницат пенсиятэ мус рӯпитас. О̄йкатэ̄нтыл тэ̄н кит пыг о̄ньще̄г, Николай пыге̄н Когалым ӯст ма̄во̄й но̄хвинэ ма̄т рӯпиты, Пётр пыге̄н Ханты-Мансийскат №8 школат ня̄врам ханищтан хо̄тпаг рӯпиты. Ма̄н, газетат рӯпитан ма̄хум, ты кит ма̄ньщи нэ̄г о̄с янытлыягӯв! Пус ка̄т, пус ла̄гыл тэ̄натэ̄н, То̄румн, На̄й-О̄тыранэ̄н вос ӯргалаве̄г.

1113 2015. 12. 04. Светлана РОМБАНДЕЕВА

Ло̄пмуст самын патум нэ̄ Ха̄льӯс район Восыӈтӯр па̄вылт Людмила Савельевна Хозумова о̄лы. Тав ма̄ньщи нэ̄, Ло̄пмуст самын патыс, тот яныгмас. Училище а̄стламе юипа̄лт Восыӈтӯр па̄вылн рӯпитаӈкве ке̄твес. Тувыл тув акваг та о̄лмыгтас. На̄н ань э̄лаль тав потре ловиньтэлы̄н. – Ам лӯпта э̄тпос 14 хо̄талэ̄т 1966 та̄лт Ло̄пмус па̄вылт самын патсум. Омам Тамара Алексеевна Хозумова, а̄ги о̄парищ наме Анадеева, 1935 та̄лт самын патыс. Акв увщи о̄ньщас, наме Нина Анадеева. Рущ о̄йка ва̄рыс, тав ётэ Куйбышев ӯс нупыл минас, тув акваг та о̄лмыгтас. Галя а̄ги о̄ньщигласы̄г. А̄квум тувыл пищмат аквписыг хансыглас, хурит ке̄тыглас. Тэ̄н ань Галя а̄гитэ̄нтыл сас а̄тимыг. Галятэ а̄ги о̄ньщиглас, тав ань тот хо̄т о̄лы, хоттыпылтаслӯв, ат иӈ ва̄йхатэ̄в. Омам рӯтанэ са̄выӈпа̄лэ ань а̄тимыт. Ло̄пмуст Михаил Васильевич Лелятов о̄лы, ты омам тав а̄квэ̄кватэ пыг. Ягримт Михаил акиюв о̄лыс, тав ань о̄с а̄тим. А̄тям Савелий Григорьевич Хозумов Хо̄рыӈпа̄вылныл о̄лыс. Тав увщитэ, Са̄нтыра а̄квум, Саранпа̄вылт о̄лыс, о̄йкатэ щирыл Сайнахова. На̄иӈха̄пыл ма̄н палтув аквписыг ёхталас. О̄выл классытыт ам Ло̄пмуст ханищтахтасум. О̄выл учителюв Алексей Родионович Хозумов тав о̄лыс. Яныгнув классытыт ос Кульпаст ханищтахтасум, интернатт о̄лсум. Школа а̄стламум юипа̄лт Салехард ӯсн минасум, тот культпросвет училищат ханищтахтасум. Каникулын юв ёхтэ̄гум, та порат клубт Зоя Прокопьевна Хозумова рӯпитас, туманне̄лм а̄нумн мыгтэ, ла̄ви, ань клуб ам вос пӯнсылум. Пуссын тув атхатэ̄в, маттем та йӣкве̄в. Ма̄н колув по̄хат станция о̄лыс, та ляпат акваг ёнгасасӯв, омам конква̄лы, та ро̄ӈхи: «Люся, молях юв ха̄йтэ̄н, наӈ э̄ргын э̄ргаве». Ам юв та ха̄йтэ̄гум, аман хоты э̄рыг, насати «Птица счастья». Концертыт акваг ва̄рыгласӯв, э̄ргыт э̄ргысӯв, йӣквсӯв, сыресыр сценкат суссылтасӯв. Йильпи та̄л кастыл костюмыт ю̄нтэ̄в, клубт па̄выл ма̄хманув мовиньтаптым хо̄вт мувлахи та ха̄йтыгтэ̄в. Ма̄н яныгмам порав сака пӯмыщ о̄лыс. «Русская зима» ялпыӈ хо̄тал акваг ва̄рыглавес, таса̄вит мовиньт, ощхоль. Ма̄н, ня̄врамыт, акваг ёнгасасӯв, са̄всыр ёнгилыт о̄щсӯв – «Лапта», «Палочкивыручалочки», «Вышибала». Та̄лэтуве «Часовые» нампа ёнгилыл ёнгысӯв – кит группаг уртхатэ̄в, то̄ват хоттӯйтхатэ̄гыт, мо̄таныт ос та̄наныл кинсыяныл. Та̄л порат сунсовыл ос ёсал тахсысӯв. Ла̄пкат рущ э̄ква Екатерина Григорьевна Трубина рӯпитас, ань лувыӈ сунэ хоттӯлмантылӯв, тэ̄нут тотнэ сун. Яныг сыпн харттылӯв, Тирыска Ващка кол по̄хатэ̄н, таса̄вит хо̄тпа, хо̄своит хольт пуссын тув ӯнтылматэ̄в, хотьют а̄лыми, та̄лматы, сып ёлыпа̄лн ма̄н колув мус та тахамлэ̄в. То̄ванакт сунув тот оссувлылӯв. А̄лпыл омав ла̄пкан мины, ла̄пкаӈ э̄ква ля̄вты, тав нуплэ ла̄ви: «Ты улпыл наӈ ня̄враманын э̄ти тахсысыт, Женян ман Люсян! ? Лувыӈ сун на̄н колын по̄хат лю̄ли». Омав ювле ла̄ви: «Тав хунь ва̄ве, хотьют тахсыс, таса̄вит ня̄врам, хунь ла̄ве̄гыт». Сака тӯлыглахтасӯв, са̄снёлт ва̄ре̄в. Туи пум ва̄руӈкве нё̄тэ̄в, тот няслэ̄в, хӯл пӯт пе̄тэ̄в, сосыг йӣв лупта щаквитыӈ ща̄й ае̄в. Пум ва̄рнэ ма̄т хӯл исмит ман ща̄й сака атыӈ. Та порат, улпыл, ка̄сыӈ колта̄гыл мис о̄ньщас – мисвой, щаквит ракс, ӯнтум щаквит та маныр пуссын о̄щсӯв. Э̄типа̄лаг пум ва̄рнэ ма̄ныл ёхтэ̄в, ма̄н, ня̄врамыт, па̄йтым тэ̄нут хунь ӯре̄в, ня̄ньло̄мт та̄япе̄в, щаквит аялэ̄в, ёнгасаӈкве та ха̄йтэ̄в. Ань па̄влумн ёхталэ̄гум, ня̄врамыт щар ат суйтэ̄гыт, кон аман ёнгаса̄лэ̄гыт, та̄нти та ва̄ганыл. Ма̄н колта̄глувт нёлолов ня̄врам о̄лыс. Щар яныг Володя каӈкум, тувыл Боря, Таня, Женя, ам, Катя, Улякщи ос Вера. Ань хӯрум каӈканум а̄тимыт. Таням ос Катям ще̄мьяӈ та̄гыл Кульпаст о̄лэ̄г, Улякщи а̄пщим Ло̄пмус па̄влэ̄т о̄лы, Вера э̄щум Ха̄льӯсн о̄лмыгтас, а̄гипыг о̄ньщи. Лесманова Анна а̄квув ма̄н палтув ёхты, э̄типа̄ла мус ма̄ньщи мо̄йтыт та мо̄йты, тыхал та̄н ва̄ри. Тав мо̄йтанэ хӯнтлуӈкве ма̄н сака э̄руптасӯв. То̄ванакт э̄ткотиль мус мо̄йты, ма̄н тох та ёлояве̄в. Хо̄нтнэ̄тэ, ма̄н пуссын хуе̄в, омав нупыл ла̄ви: «Тамара, ня̄врамыт пуссын ёлоилматымат, ам юв минэ̄гум». Анна а̄квув а̄мщит, пе̄с потрыт, мо̄йтыт сака са̄в ва̄с, акваг потырта̄лыс. Училищат ам хӯрум та̄л ханищтахтасум, 1982-1985 та̄лытт. Хунь а̄стласум, нэ̄пакыл хасве̄сум, Восыӈтӯр па̄вылн вос ювум. Ань ты хо̄тал мус тыт ты о̄лэ̄гум. Са̄в та̄л клубт рӯпитасум. Ня̄врамыт ёт ма̄н са̄всыр пормасыт сагсӯв, сакныл пальсакыт ос турло̄псыт хартсӯв. – Людмила Савельевна, наӈ о̄йкан ма̄ньщи хум? – О̄йкам Александр Андреевич Тынзянов ма̄ньщи хум о̄лыс, лӯпта э̄тпос 13 хо̄талт 1964 та̄лт самын патыс. Ме̄н тыт акванхо̄нтхатасме̄н, то̄нт армияныл ущ ёхтыс. О̄влэ̄т Андрей пыгме̄н самын патыс, тувыл Наташа а̄гиме̄н. Тэ̄н акв та̄лт самын патсы̄г – пыгме̄н та̄л котиль э̄тпос 3 хо̄талт, а̄гиме̄н ос яныг таквс э̄тпос 1 хо̄талт 1987 та̄лт. Тэ̄н юрт ня̄врамыг хольт яныгмасы̄г, садикн аквъёт ялантасы̄г. Пыгме̄н ат та̄лэ то̄влуме порат щаквт а̄тимыг е̄мтыс. 1994 та̄лт Оля а̄гиме̄н самын патыс. 2008 та̄лт ос о̄йкам хотталь щалтыс. Ам ань хӯрум апыгрищанум о̄лэ̄гыт. Яныг а̄гим кит пыг о̄ньщи – Никита ос Саша, ма̄нь а̄гим пыге наме Савва. Людмила Савельевнан ам са̄в ёмас, сымыӈ ла̄тыӈ ла̄ве̄гум. А̄гиягеапыгрищанэ ёт пуста̄гыл вос о̄лэ̄гыт, На̄й-О̄тыранылн вос ӯргалавет! Пус ка̄т, пус ла̄гыл!

1113 2015. 12. 04. Тамара МЕРОВА

Ёмас э̄лумхо̄лас урыл потыр Валентин Молотков хо̄нтаӈ ма̄ньщи о̄йка. Тав 1939 та̄лт Кондинский район Евра па̄вылт самын патыс. Тюмень ӯсн хосат о̄лмыгтас. Ань Ханты-Мансийскат мӯйлынэ̄тэ сыс тав нэ̄пак ловиньтан колн во̄виньта̄лвес. Та колт акванатхатыглам ма̄хум Валентин Михайлович ва̄рнэ тэ̄ланэ та̄рапаттысаныл. Тав са̄в ва̄нэ ос номтыӈ э̄лумхо̄ласыг о̄лы. Ты хо̄тпа то̄ва тэ̄ланэ урыл ма̄хум ань ты мус атыпыл хӯлыгласыт: ма̄щтырыг шахматыл ёнгынэ̄тэ, ка̄тыл нё̄тнэ хурит по̄слынэ̄тэ. "Евра" нампа хансум нэ̄паке о̄вылтыт мир ущты ва̄ӈкве патсыт. Ханты-Мансийскат рӯпитаме порат ам Валентин Михайлович номилум. Тав то̄нт "Югра лылые̄п" соссаӈ ма̄хум ассоциацият пуӈктотыс. Тувыл 1996 та̄лт пенсиян патхатас ос Тюмень ӯсн минам. Ос тот ма̄ньщит, хантыт, ё̄рныт ма̄гыс "Кедр" нампа организация ва̄рыс. Тав о̄выл кӯщаиг тув пе̄риявес. Тав юипа̄лэ̄т тот Владимир Климов кӯщаиг рӯпиты. Ка̄сыӈ та̄л ты организация Югра ос Ямал ма̄ныл тув о̄лмыгтам ос тот ханищтахтам ма̄хум ма̄гыс "Ӯринэ̄ква" ялпыӈ хо̄тал ва̄рыглэ̄гыт. "Мост Дружбы", «Радуга» нампа ялпыӈ хо̄талыгн са̄в мирыт Тюменьт ӯст акванатхатыглэ̄гыт. Тот та̄нки мираныл о̄вылтыт потыртэ̄гыт, та̄нки ва̄рум пормасыт суссылтэ̄гыт, йӣкве̄гыт ос э̄рге̄гыт. Округувт Валентин Михайлович са̄в та̄л рӯпитас. Тав ма̄во̄й тотнэ тӯрпат пиныглас ос электроэнергетикат рӯпитас. Новосибирский электротехнический связь нампа институт а̄стламе юипа̄лт тав целина ма̄н рӯпитаӈкве ке̄твес. Тот матах та̄л Целиноград ӯст рӯпитас. Тот ты тав юртанэ̄н шахматыл ёнгасаӈкве ханищтавес. Колпо̄х хо̄тпат ёт акванатхатыгласыт ос та̄нки халанылт кассыт. Ты ёнгил Молотковн такем мӯстыс, тав юв ёхтуме порат таве о̄с э̄лаль тотыстэ. Урай ӯст шахматыл каснэ порат тав акваг о̄выл места вуйлас. Тувыл Сургут ӯсн ос окружной касылн яланта̄лме порат о̄с но̄хпатыглас. Таи ма̄гыс о̄йка са̄всыр э̄сгыӈ нэ̄пакыт, грамотат о̄ньщи. 1990 та̄лт Валентин Михайлович Ханты-Мансийский округ депутатыг пе̄риявес. Тот тав соссаӈ ма̄хум тэ̄ланыл ёт рӯпитан кӯщай ва̄ӈын хо̄тпаг паттувес. То̄нт та̄н родовой угодият ӯргалан ма̄гыс э̄рнэ нэ̄пакыт акванатуӈкве патсыт. Ос та юипа̄лт лӯима̄ ма̄хум тэ̄ланыл щирыл рӯпитан Северный фонд ва̄рсыт. Стихыт хаснэ о̄вылтыт Валентин Молотков ла̄выс: «Атыт классыт ханищтахтамум порат пе̄с колт акв нэ̄пак хо̄нтсум ос стихыт ловиньтаӈкве патсум. Акв стихыт хансым ла̄тӈыт такем сымумн хо̄ясыт. Та па̄сныл а̄нумн стихыт ловиньтаӈкве сака мӯсты. Школа а̄стламум юипа̄лт амки номтанум о̄с стихыт хольт хансуӈкве патсанум. Ань та хансум утанум "Евра" нэ̄пакыг ты ва̄рсанум. Тот 1956 та̄лныл 2010 та̄л мус хансум стиханум акванатсанум». О̄йка ты нэ̄паке 2010 та̄лт Курган ӯст та̄ратавес. Ханты-Мансийскат о̄лнэ ма̄хум э̄лыпа̄лт Валентин Молотков то̄ва стиханэ ань ловиньтасанэ. Тот тав Евра ма̄ньщи па̄вылкетэ, нё̄тнэ ма̄витэ ос тот о̄лум ма̄хманэ пуссын янытлыянэ. Э̄лумхо̄лас такви о̄лнэ наке, ща̄гтын манос тыстын пище ёмас номтыӈ ла̄тӈыл хӯлтыянэ. Тувыл о̄йка такви о̄лупсатэ урыл хурит суссылтас. Та̄н халанылт ка̄тыл по̄слум хурит о̄лсыт. Ты хурит, насати, Валентин Михайлович о̄с такви по̄слуманэ. О̄выл хуритэ̄т Максим Горький по̄слым о̄лыс, институтт ханищтахтаме порат по̄слыстэ. То̄нт мо̄т студентыт халт тав о̄выл места вис ос лов солко̄вил та̄стувес. Тувыл мӯйлуптан порат наме илттыг ла̄ввес, тав хотрохтыс. Олн винэ ма̄гыс но̄х ат ква̄лыс. Ётыл кисхатуӈкве патыс, ла̄вима, олн а̄тим, хотьютн хотталь тотвес манос мо̄т хо̄тпан та вуимат. Ань тав хурит по̄слуӈкве то̄внакт ӯнтылматыгла̄лы. Шахматат урыл номсахты, манрыг ма̄ньщит ос хантыт ты ёмас ёнгилыл ёнгуӈкве ат ка̄саще̄гыт. Тамле э̄лумхо̄ласыг Валентин Молотков ты о̄лнэ̄тэ. Ма̄н таве̄н пуста̄гыл о̄луӈкве ла̄вилӯв, ос ты пӯмыш тэ̄ланэ э̄лаль вос тотыянэ. Хансум стиханэ ос по̄слум хуриянэ нэ̄пакыг ва̄руӈкве вос нё̄таве.

1113 2015. 12. 04. Юлия Боженко

О̄щнут ос пормас суссылтап Ха̄льӯс район Хулюмсунт па̄вылт акв пӯмащ суссылтап щё̄питавес. Па̄выл искусство школат рӯпитан хо̄тпат округув 85 та̄лэ ос па̄выл 90 та̄лэ то̄влын кастыл ты пӯмыщ тэ̄ла ва̄рсыт. Па̄влыӈ ма̄хум та̄нки ва̄рум са̄всыр пормасаныл, ка̄тыл по̄слум хурияныл суссылтапн тотуӈкве ве̄рмысаныл. Ань 18 э̄лумхо̄лас та̄нки ма̄щтырлам пормасаныл тот суссылтыяныл. Мария Алгадьева ма̄ньщи супыт, нё̄тнэ турло̄псыт, сакныл хартым хорамыӈ ма̄нь то̄тапсов, то̄рыл ю̄нтым тӯчаӈ, а̄канит ты выставкан тотсанэ. Надежда Маслова ма̄щтырлаӈкве о̄с сака ха̄сы, тав са̄всыр турло̄псыт тув тотыс. Такви рӯпатанэ урыл тав ла̄выс: «Ам сакныл хартуӈкве ос ю̄нсхатуӈкве омамн ханищтаве̄сум. Ты юипа̄лт ос Ханты-Мансийск ӯст ва̄рыглам са̄всыр ханищтапн ялсум. Я̄сунт па̄вылн ня̄врамыт ӯщлахтын «Ма̄нь Ӯскве» ма̄н ялмум порат ос Мария Сергеевна Мерова ёт ва̄йхатасум, тав палтэ о̄с ханищтахтасум. Ты суссылтапт сакныл хартым турло̄псыт суссылтыянум». Надежда тув акв пӯмащ турло̄пс тотыс. Тав сорт сов тармыл сакныл хорамыт ю̄нтсанэ ос сака нё̄тнэ турло̄псыг ва̄рыстэ. Акв ма̄щтыр нэ̄ пормасанэ тот о̄с суссылтыянэ, наме Анна Адина. Тав ханты нэ̄, Ямал ма̄ныл тув о̄луӈкве ёхтыс. О̄йкатэ ма̄ньщи хумыг о̄лы. Анна ма̄ньщи пормасыт ю̄нтуӈкве ань сака ёмащакв ха̄сы. Па̄вылт о̄лнэ ма̄хум то̄ва хурияныл тув тотсыт. Ольга Мерцалова ка̄тыл хурит по̄слы. Выставкат тав «Ома» нампа хуритэ суссылтытэ. Та по̄слым хурит сахил масхатам ма̄ньщи нэ̄ ня̄враме аниглытэ. Ольга округ янытыл ёмащакв ва̄ве. Тав по̄слум хуриянэ ань са̄всыр ӯсыт суссылтавет. Выставкат тав ма̄хумн ла̄выс: «Ам ты па̄вылт самын патсум, тыт яныгмасум. Ка̄тыл хурит по̄слан нэ̄г ханищтахтамум юипа̄лт ювле тыг ёхтысум. Тамле ёмас сымыӈ ма̄хум халт нё̄тнэ, сыстам ма̄т олэ̄в, улпыл тыи ма̄гсыл хуриянум тох ты по̄слыянум». Лариса Туганова ка̄тыл по̄слум хуриянэ тот о̄с суссылтыянэ. Тав хосат та̄гыл хурит по̄слы. Акв хурит щё̄пыр по̄слыстэ, мо̄танэ̄т ос таквсы пора, хӯрмит хурит Нё̄рыт по̄слуманэ. Ты пӯмыщ суссылтап ва̄т са̄грапнал э̄тпос 19 хо̄талэ мус рӯпитаӈкве паты.

1113 2015. 12. 04. Светлана РОМБАНДЕЕВА

Пе̄с хурит суссылтаве̄сыт Ма̄нь таквс э̄тпос юио̄выл хо̄таланэ̄т Ханты-Мансийск ӯст финноугорский мир мӯйлуманыл порат «Родовое гнёздышко: вернуться к своим истокам» выставка суссылтавес. Соссаӈ ма̄хум пе̄с хурияныл янгыгнуве̄г ва̄рве̄сыт, «Культура» колт па̄рт хурип ке̄рыӈ ут тармыл но̄хтагтала̄лве̄сыт. Ма̄ньщи нэ̄ Алла Иштимирова-Посохова та урыл потыртас, ань ты хурит та̄н хумус ка̄тынпаттысаныл. Насати, ты выставка урыл ва̄м ма̄ньщи ос ханты хо̄тпат юн о̄щнэ пе̄с хурияныл тув тотманыл. «Лӯима̄ сэ̄рипос» газетат рӯпитан хумиюв Александр Васильевич Вьюткин тув атах хури майлас. Акв хурит яныг о̄патэ Василий Кузьмич Вьюткин ма̄ньщи ма̄хманэ ёт Сӯкыръя па̄вылт по̄слым о̄лы, котильт тав лю̄ли. Ты хури 1933 та̄лт ва̄рима, яныг о̄патэ то̄нт 33 та̄лэ то̄влыс. Та̄н халанылт са̄выӈпа̄лэ 1937-1938 та̄лыг порат наска̄ссыг порслуве̄сыт. Суссылтапын ёхталам ма̄хум хурияныл урыл аквкит ла̄тыӈ ла̄всыт. Тувыл ка̄сыӈ хо̄тпа янытлан нэ̄пакыл майвес, мӯйлупсал мӯйлуптавес.

1113 2015. 12. 04. Тамара МЕРОВА

О̄йка хурит по̄слыс Хурит ка̄тыл по̄слын о̄йка Геннадий Райшев «Новые работы -2015. Посвящение Югре» нампа йильпи суссылтапе щё̄питавес. О̄йка ты та̄лт по̄слум хуриянэ акванатве̄сыт ос та̄наныл сунсыглан ма̄гыс ювле хультум яныг таквс э̄тпост ма̄хум тув во̄виньталве̄сыт. Тамле тэ̄ла округув 85 та̄лэ то̄влынэ̄тэ кастыл ва̄рвес. Геннадий Степанович яныг таквс э̄тпос о̄выл щислат намхо̄талэ о̄лыс. О̄йка 82 та̄лэ то̄влыс. Та хо̄талт тав мӯй хо̄тпатн янытлавес. Суссылтапн ёхталам ма̄хум э̄лыпа̄лт о̄влэ̄т э̄ргын ос йӣквнэ ансамбль пӯмыщ э̄рыгсов та̄ныт са̄ӈквылтас. Тувыл «Хо̄тал» нампа А̄с-угорский театр ма̄хум акв нё̄тнэ йӣкв йӣквсыт. Ты ва̄рмалиг тув атхатыглам хо̄тпатн сака мӯстысыт. Наталья Фёдорова, та суссылтап щё̄питам нэ̄, мощ потыртас. Тав ла̄выс: «Ань ты йильпи суссылтапув ма̄н «Геннадий Райшев: Новые работы» нампа проект щирыл ва̄рыслӯв. Тав ка̄сыӈ хо̄тал са̄всыр йильпи хурит по̄слы. Та̄л сыс ма̄н сака са̄в хури акванатсӯв. Ань хоты хурит мирн суссылтан ма̄гыс пе̄рияӈкве ос на̄нан суссылтаӈкве, ам са̄в щё̄с номсахтасум. Суссылтапув кит я̄нас колнакыгт ва̄рыслӯв. Тув 70 арыгкем хурит атсанӯв. Та̄н пуссын аквтупмат о̄лнэ ма̄кев янытлан ма̄гсыл по̄слым о̄лэ̄гыт. Акв хури Геннадий Степанович ты суссылтап пӯснэ э̄лыпа̄л хо̄талт по̄слуӈкве а̄стлыстэ, тот о̄люпанэ ущты то̄суӈкве патсыт. На̄н тав по̄слум хуриянэ щирыл То̄румныл ёлаль суснэ самыл нё̄тнэ ма̄кев, са̄всыр ӯйхулыт, соссаӈ ма̄хум о̄лупсаныл ка̄салыяны̄н». Тувыл Геннадий Райшев то̄ва по̄слум хуриянэ о̄вылтыт такви потыртас. Тав по̄слум утанэ нупыл сунсыманы̄н, та̄ра от торгамтахты – маныр тот по̄слым о̄лы. Акв хурит, насати, са̄в лувыт ха̄йтнэ̄ныл по̄слым о̄лэ̄гыт, мо̄т хурит мисыт акванатхатамыт. Хо̄н ма̄ныл ёхталам финн хо̄тпат рӯпитан колн о̄с щалтсасыт. Маткем тот та пӯмщалахтасыт. Ты суссылтап ре̄тыӈ ю̄свой э̄тпос мус рӯпитаӈкве паты. На̄н Ханты-Мансийск ӯст мӯйлынэ̄н порат тув ялуӈкве о̄с ве̄рмегы̄н. Тамара хатанева.

1113 2015. 12. 04. Светлана РОМБАНДЕЕВА

Рӯтыг о̄лнэ мирыт мӯйлысыт Ма̄нь таквс э̄тпос 28-31 хо̄таланэ̄т Ханты-Мансийск ӯст соссаӈ ма̄хум «Финноугорские встречи в Югре» нампа са̄всыр хо̄нтхатыглапыт ва̄рыгласыт. Та хо̄талытт ма̄ янытыл о̄лнэ финноугорский ма̄хум пуссын мӯйлысыт. О̄выл тамле хо̄нтхатыглап 1928 та̄лт ре̄тыӈ ю̄свой э̄тпос 28 хо̄талэ̄т Финляндият о̄лыс. Та порат финноугорский ма̄хум са̄всыр тэ̄лат урыл потыртасыт, э̄рнэ нэ̄пакыт хассыт: халанылт юртыӈыщ рӯпитаӈкве патэ̄гыт, ла̄тӈаныл хотталь ул вос со̄йме̄гыт, но̄хво̄рмалтаӈкве патыяныл. Ань ос о̄выл хо̄нтхатыглап «Культура» нампа колт о̄лыс. Соссаӈ ма̄хум ла̄тӈаныл ос пе̄с йис ва̄рмаляныл урыл потыртасыт. ЮГУ колт «Роль общественных организаций в сохранении финноугорских языков и культур» ханищтап ва̄рыглавес. «Торум Маа» музейт мӯй ма̄хум пӯрлахтасыт. Тув са̄в мир ёхталас, э̄лы хо̄н ма̄ рӯт хо̄тпанув о̄с о̄лсыт – Финляндияныл ос Россия лӯи ма̄ е̄рныл. Ты тэ̄лат округт о̄лнэ ма̄ньлат соссаӈ ма̄хум организация хосыт щё̄пита̄лве̄сыт.

1113 2015. 12. 04. Светлана РОМБАНДЕЕВА

Ма̄н таве номилӯв Ханты-Мансийск ӯст ма̄нь таквс э̄тпос 29 хо̄талэ̄т «Югра-Классик» колт ма̄хум акванатхатыгласыт, Владимир Иванович Шесталов ка̄сталасаныл. Софья э̄кватэ рущ ла̄тӈыл э̄ргыт э̄ргыс, акв нэ̄ пианино нампа э̄рыг то̄тапыл ёнгыс, хум ос скрипка нампа утыл та̄ныт са̄ӈквылтас. Владимир Иванович мо̄лты та̄л яныгпо̄ль э̄тпост атпан та̄лэ то̄влыс, ос ма̄ньтаквс э̄тпост илттыг а̄тимыг е̄мтыс. Тав о̄лме палыт ма̄ньщи мирув э̄рыгсов та̄ныт ос э̄ргыт ханищтас. 2011 та̄лт искусствоведение кандидат намыл майвес. Ханты-Мансийск ӯст о̄лнэ Центр искусств колт са̄в та̄л рӯпитас, ня̄врамыт са̄ӈквылтапыл та̄ныт саӈквылтаӈкве ханищтасанэ. А̄тятэ, Юван Николаевич Шесталов, ос Андрей Семёнович Тарханов стихотвореният э̄ргыг ва̄рыгласанэ, э̄ргысанэ. Андрей Семёнович тув о̄с ёхталас, тав хансум то̄ва стихотворениянэ ловиньтаве̄сыт.

1113 2015. 12. 04. Николай МЕРОВ

Э̄квапыгрищ урыл мо̄йт Э̄ква пыгрищ сака мӯлум о̄лыс. А̄квен янмалтавес. А̄кве сака мӯтраӈ, номтыӈ о̄лыс. Такви во̄раим яласас, лэ̄с ӯнтталас, са̄всыр во̄руй, товлыӈ ӯй алыщлас. Ты хал Э̄квапыгрищ во̄раяӈкве ханищтастэ, таве̄н акваг ла̄выглас, во̄рт мори ул вос капыртас. Акв хо̄тал тав Э̄квапыгрищ нупыл ла̄ви: – Пыгкве, наӈ та яныгмасын. Ам яныгпа̄лаг е̄мтсум, ва̄гтал патсум. Наӈын во̄раяӈкве ханищтаслум. Ань наӈки алыщлаӈкве ха̄сэ̄гын. Ялэ̄н во̄рн, матыр тотэн. Ань Э̄квапыгрищ атхатас. Ня̄ланэё̄втанэ ос касае вис, во̄рн алыщлаӈкве та минас. А̄ӈхарищит тоты манос во̄руй ка̄тынпатты. Тав ань сака мулум пыгыг о̄лыс, во̄рт ё̄мыгтыматэ, ё̄втыл ня̄лэ мори та та̄рматытэ. Ята, ань ня̄лэ ховтын та̄кыщ та пе̄лхатас. Та кос кональ хартытэ, ат ве̄рмитэ. Аквматэ̄рт юипа̄лыл Та̄нварпэ̄кван та ёхтувес. Та̄нварпэ̄ква Э̄квапыгрищ нупыл ла̄ви: – Яа, ам наӈын та пувыслум. Ам ат хӯнтлын ня̄врамыт юв то̄втлыгпиянум, та̄япиянум. Ань Та̄нварпэ̄ква Э̄квапыгрищ са̄с па̄йпын нарыгтастэ. А̄ӈханэ о̄с тув пинсанэ ос таквирот номсахты: – Ята, ань юв ёхтэ̄гум, йильпи исмит тах па̄йтэ̄гум, тортал та тэ̄пъялэ̄гум. Тох номсахтым во̄р хосыт та тотытэ. Ань Э̄квапыгрищ касае но̄хлэ̄ватастэ. Па̄йп па̄лыгяктыстэ, ёргыстэ, тувыл кон та рагатас. Э̄й, сысы сып ёлыпа̄лн та тахамты, та тахамты. Та торыг ро̄ӈхи: – А̄ква, а̄ква, а̄вин па̄лыгпинэ̄лн. Ам ты ювум. А̄кве а̄ви па̄лыгпинуӈкве туп а̄лымастэ. Э̄квапыгрищ юв та щалтапас. А̄ӈха пут та па̄йтэ̄г, та лутэ̄г ос э̄лаль о̄лэ̄г. А̄квен матаре нё̄тлыгты, э̄т хӯлэ̄г. Поратэ ёхты, о̄с во̄раяӈкве во̄рн та атхаты, та мины. Во̄р янытыл кисхатым ё̄мыгты, ос ё̄втыл ня̄лэ мори та та̄ратытэ. Хансаӈыт, а̄ӈхат о̄с та алапи. Ёнгим, ощхулим ха̄йтыгтыматэ, о̄с та ня̄лэ та̄кыщ йӣвн та пе̄лхатас. Та кос хартытэ, та кос хартытэ, кональ ат лэ̄ватахты, ат ве̄рмитэ. Юипа̄лыл Та̄нварпэ̄ква ты ёхтыс, таве̄н ла̄ви: – Та, наӈ а̄нумныл ты оигласын. Ам наӈын ань о̄с та пӯвыслум. Ань тах ат ое̄гын. Пувыстэ, Э̄квапыгрищ тэ̄пыӈ лӯтыӈ та̄гыл сыс па̄йпын о̄с та нарыгтастэ. Тотытэ, ты хал таквирот потрами: – Ань юв ёхтэ̄гум, атыӈ исмит тах та тэ̄пъялэ̄гум. Э̄квапыгрищ касае но̄хлэ̄ватастэ. О̄с та ас пасатаӈкве патыс. Ка̄тынпаттум ӯянэ ёт о̄с та кональ патыс. Сып ёлыпа̄лн о̄с та тахамты, та ро̄ӈхи: – А̄ква, а̄ква, а̄вин па̄лыгпинэ̄лн, ам та ювум. А̄кве а̄ви па̄лыгпинуӈкве туп а̄лымастэ, Э̄квапыгрищ юв та калятас. Ос тэ̄пъялэ̄г, лӯтэ̄г, э̄т хӯлэ̄г. А̄лпылыг е̄мты, о̄с во̄раяӈкве атхаты. Э̄квапыгрищ ё̄втэ выг, ня̄ланэ выг, касае ёт выг, о̄с во̄раяӈкве та мины. Во̄рт ё̄мыгтыматэ, ё̄втыл ня̄л мори та та̄раты. Тыхал щё̄пыр манос а̄ӈха ка̄тынпатты. Мори ня̄лэ та̄ратыматэ, аквматэ̄рт о̄с та ня̄лэ йӣвн хо̄яс, о̄с та та̄кыщ тагапас. Та кос кональ хартытэ, лэ̄ватаӈкве ат ве̄рмитэ. Ос та Та̄нварпэ̄кван юил ёхтувес, ла̄ваве: – Яха, наӈын юв ты товтлыгтылум, татем атыӈ исмит пут па̄йтэ̄гум тах. Ань Та̄нварпэ̄ква Э̄квапыгрищ ке̄р па̄йпын та нарыгтастэ, во̄рн та тотыстэ. Юв тотыстэ, колн тӯлыстэ. Тот Та̄нварпэ̄ква хӯрум а̄гиянэ ӯнлэ̄гыт. Ня̄враманэ нупыл ла̄ви: – А̄гит, ань тай торта̄л та тэ̄пъялэ̄в. Атыӈ исмит па̄йтэ̄в. Ам ань во̄рн о̄с кисхатуӈкве минэ̄гум. На̄н а̄ращ пе̄ламтэ̄н, пӯт па̄йтэ̄н. Ам ёхтэ̄гум, тэ̄пъялэ̄в тах. Ята вос, э̄тииг е̄мтыс, а̄гит а̄ращ палтсыт, пӯт вит исылтаӈкве ӯнттысыт. Ань Э̄квапыгрищ татем мӯтраӈыг о̄лыс. Хӯрум а̄гит матыр ощмар хосыт пуссын та пӯтн пе̄тсанэ. Та̄нварпэ̄ква во̄рт во̄раим яласы. Э̄квапыгрищ таккет юн хӯйгалалы. Нё̄выль пӯтэ ла̄кква ма̄н хӯныстэ. Акв пуӈке акв иснасын, китыт пуӈке китыт иснасын, хӯрмит пуӈке ос а̄ви ва̄тан ӯнттыстэ, такви ос тӯйтыгпахтас. Аквматэ̄рт Та̄нварпэ̄ква ёхтыс, та атыньтахты ос ла̄ви: – Татем атыӈ исмит атыл пасы. Ам тай ты хо̄тал торта̄л та тэ̄пъялэ̄гум тах. Соргум та̄глыӈыг е̄мты, сымум сытми. Та̄нварпэ̄ква юв щалтыс. Яа, тав э̄лыпалэ̄т пуӈк хопалы хуи. А̄ӈкваты, акв иснасэ̄т о̄с пуӈк хопалы хуи. Китыт иснасын а̄ӈкваты, о̄с пуӈк хопалы хуи. Пӯт кивырн а̄ӈкватас, хотощатахтас, ла̄ви: – Э̄квапыгрищ аман таса̄вит пуӈк ос нё̄выль та о̄ньщис. Ос а̄гиянум аман хоталь минасыт. Э̄квапыгрищ тав нупылэ кол са̄мыл иллтыг ля̄галас: – Я̄а, Та̄нварпэ̄кв, наӈ ощмарыӈ, ам о̄с ощмарыӈ. Ты наӈ а̄гиянын пӯтыт па̄йтым о̄лэ̄гыт. Та̄нварпэ̄ква хотро̄хтыс, такви а̄раще̄н хоны та рагатас, тох та порсыс. Э̄квапыгрищ кон ква̄лыс о̄с сып пуӈк ёлыпа̄лн тахамтым та ро̄ӈхи: – А̄ква, а̄ква, а̄ви па̄лыгпунсэ̄лн, ам та ювум. Э̄квапыгрищ юв ёхтыс, ос э̄лаль о̄луӈкве патсы̄г. Тэ̄н ань ты мус щуним о̄лэ̄г, хӯлэ̄г. Ты мо̄йт Т. С. Мезенцева ма̄ньщи ла̄тӈыл потыртастэ, нэ̄пакн Н. МЕРОВ хансыстэ.

1113 2015. 12. 04. Александр ВЬЮТКИН

Са̄снёлыт тӯлыглан ханищтап Белоярский район Касум па̄вылт о̄лнэ Елена Терентьевна Федотова ёт Ханты-Мансийск ӯст «Югратур 2015» о̄лум порат потыртасум. Тав ня̄врамыт ӯщлахтын «Нумсаӈ ёх» ма̄ тармыл кӯщаиг о̄лы. Ты колт ня̄врамыт ёт рӯпитан хо̄тпат мо̄тантыг ма̄ньполь э̄тпос хо̄тыт хо̄талт са̄снёлыт тӯлыглан ханищтап ва̄ре̄гыт. Ты урыл Елена Терентьевна ла̄выс: «Ма̄н яныгман пыгрищанувн тамле пӯмащ сака э̄ри, пе̄с йис наканув ул вос ёрувлахтэ̄гыт. О̄влэ̄т ман та̄н ётаныл са̄снёл тӯлыглапыт ханищтэ̄в, тувыл э̄лаль ялпыӈ ӯлыглан э̄ргыт ханищтаӈкв вуйхатэ̄в. Яныг ма̄хманув о̄лнэ̄ныл сыс ма̄навн а̄лымаӈкв э̄ри. Ань тох ат те ва̄ре̄в, пе̄с наканув нас мо̄йт хольт та оймыгтэ̄гыт». Таи ма̄гсыл Касум па̄вылт о̄лнэ музей колт тамле ханищтап ва̄раве. О̄влэ̄т ты ва̄рмаль ва̄нэ ма̄хум ня̄врамытын потыртэ̄гыт ос суссылтэ̄гыт, хумус та пӯмащ щё̄питаве. Тувыл ка̄сыӈ ханищтахтын ня̄врам такви ма̄гсылэ са̄снёл ва̄ри. Халанылт уртхатнэ̄ныл юипа̄лт аквтит тӯлыглап тӯлыглаӈкв патэ̄гыт. Яныгпа̄ла хум ма̄хум ёмас тӯлыглапыт пе̄рияӈкв патэ̄гыт. Тамле ханищтап ка̄сыӈ та̄л ва̄рыглаӈкв номсэ̄гыт.

1113 2015. 12. 04. Светлана РОМБАНДЕЕВА

Яныг утыт ос ма̄нь утыт Кисуп пыгрищит щА̄няныл ёт На̄н, кисуп ня̄врамаквет, хо̄ӈхан ка̄салаве̄н, таин та саватаве̄н. Са̄кваляк тыг тыламлы на̄хвасаве̄н, охсарн хо̄нтаве̄н – во̄рн тӯлмантаве̄н. На̄н а̄нумн хӯнтлэ̄н. Хунь ам ро̄ӈхувлэ̄гум: «Пиить! Пиить! » то̄нт илттыг хоттӯйтыгпахтэ̄н! То̄ван во̄ӈхан, то̄ван лӯпта ёлыпа̄лн, то̄ван ла̄хыс ёлыпа̄лн, то̄ван па̄кв са̄йн, то̄ван тов са̄йн вос тӯйхаты. На̄н хансаӈаквет, са̄лмыӈаквет, на̄н та̄ра нэ̄мхотьютн ат ка̄салаве̄н. Ам ос а̄гумре̄т ва̄ре̄гум. Товлагум киттыгтактэ̄гум, пунанум ла̄кквапа̄рыстэ̄гум, но̄хтыламлантымнув, но̄хасантуӈкве патэ̄гум. Ӯй ам юипа̄лумт лайхаты. Ам таве на̄нанныл э̄лхуйтылум, амки хотое̄гум, ос на̄н палтын ювле ё̄ӈхе̄гум. Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1114 2015. 12. 18. Тамара МЕРОВА

Округув 85 та̄лэ янытлавес Ты э̄тпос 10 хо̄талэ̄т округув намхо̄талэ янытлан кастыл Совет Федерация кӯщай Валентина Матвиенко, Россия Президент па̄лыл УРФо ма̄т кӯщай Игорь Холманских, Тюменский область губернатор Владимир Якушев, Ямал губернатор Дмитрий Кобылкин ос Государственный Дума па̄лыл депутатыт тыг ёхталасыт. Ялпыӈ хо̄талт мир ёт ищхӣпыӈ ут хосыт Москва ос Тюмень ӯсыг потыртасы̄г. Москваныл Александр Филипенко округувт о̄лнэ ма̄хум янытласанэ. Округувныл Тюменьн о̄лмыгтам матумпа̄ла хо̄тпат акван о̄с атхатыгласыт. Та̄н пуссын Югран паща ла̄тыӈ ке̄тсыт, та̄н ма̄в сымыӈыщ номияныл ос э̄руптыяныл. Валентина Матвиенко Россия экономика тэ̄ланэ но̄хла̄план ма̄гыс округт рӯпитан ма̄хум э̄сгысанэ. Са̄в мирыт аквъёт юртыӈыщ о̄лнэ̄ныл ма̄гыс ёмас ла̄тыӈ ла̄выс ос то̄ва хо̄тпат яныг мӯйлупсал мисанэ. Та̄н халанылт кит ма̄ньщииг о̄лсы̄г, тыи Руслан Проводников ос Светлана Динисламова. Игорь Холманских Россия Президентув Владимир Путин ке̄тум пищматэ ловиньтастэ ос ма̄во̄й но̄хвинэ хо̄тпат мӯйлупсал мисанэ. Россия Правительство кӯщай Дмитрий Медведев округувт о̄лнэ ма̄хум о̄с янытласанэ. Тав ке̄тум ла̄тӈе Наталья Комарован ловиньтавес. Тувыл кӯщай нэ̄ са̄в хо̄тпа яныг нам о̄щнэ посыл мӯйлуптасанэ. Хо̄нтаӈ ма̄ньщи о̄йка Анатолий Прокопьевич Кауртаев ос «Сургутнефтегаз» компаният рӯпитан хум Иван Айдуллин «Почётный гражданин Ханты-Мансийского автономного округа – Югры» яныг намыл майвесы̄г.

1114 2015. 12. 18. Валентина УЗЕЛЬ

Кол ӯнттын ма̄ пе̄нтсыл олн миӈкв патаве Ва̄т са̄грапнал э̄тпос депутатыг о̄лнэ ма̄хум йильпи са̄ккон пирмайтасыт. Ань са̄в ня̄врамыӈ колта̄глыт кол ӯнттын ма̄гыс ма̄ломтыл мивет. Ос миркол кӯщаит тамле ва̄рмальн я̄рмысыт – округув янытыл кол ӯнттын ма̄ а̄тим. Са̄в ня̄врамыӈ ще̄мьят матах та̄л очередит такос ӯрхатэ̄гыт, ос тэ̄ланыл нэ̄матыр э̄лаль ат лакви. Таима̄гыс кӯщаит ты та̄рвитыӈ ва̄рмаль ёт ань мо̄т щирыл э̄лаль рӯпитаӈкв патэ̄гыт. Яныг колта̄глыт ма̄ пе̄нтсыл та̄н олныл тах мыганыл. Ань ты мус округ мирколт кӯщаит ёмащакв ловиньтасаныл, хоты ще̄мья манах солко̄вил миӈкв э̄ри. Та̄ра ты патыс – манах ня̄врам ще̄мья о̄ньщи, та щирыл олныл тах миве. Ос йильпи са̄кконын тыса̄вит олн ты хасвес – 1млн 200 со̄тыра солко̄виныл – 3 млн 600 со̄тыра солко̄ви мус . Тыгыл са̄внув та̄н олн тах ат мыгыт. Щар са̄в ня̄врамыӈ колта̄глыт та̄н ты са̄в олныл та̄ставет. Ань ты ва̄рмаль таи ма̄гыс осннэ̄глыс, то̄ва ще̄мьят ма̄ло̄мтыл мивет кос, ос кол ӯнттын ма̄гыс та̄н олн щар ат о̄ньще̄гыт. Банкыт кредитолныл ат мивет, рущит ла̄внэ̄ныл хольт – та̄н «доход» та̄л о̄лэ̄гыт, мощща олн сэ̄лэ̄гыт. Ань ты са̄ккон щирыл э̄лаль тох ва̄раве, 2016 та̄л о̄вылтахтын юипа̄лт та̄л котиль э̄тпос о̄выл хо̄талэ̄ныл ты олн виӈкв ка̄сащан колта̄глыт заявлениенэ̄пак хансуӈкв ла̄вавет. Ты заявленият туп хо̄т э̄тпос сыс атуӈкв патавет. Тувыл ты ва̄рмаль ёлпо̄илттаве, округув янытыл акв очередь ва̄раве. То̄нт ка̄сащан ще̄мьят нэ̄паканыл ёмащакв уральтавет, ос ла̄вавет – хоты ще̄мья манах олныл миве.

1114 2015. 12. 18. Валентина УЗЕЛЬ

Соссаӈ мир Ассамблея урыл йильпи са̄ккон Ты э̄тпост округ Дума рӯпитам порат тамле са̄ккон хасвес – ань э̄лаль кос хоты хо̄тпа Ассамблеян пе̄рияхтуӈкв ве̄рми. Ты э̄лыпа̄лт туп ма̄ньщи ман ханты хо̄тпа тот рӯпитаӈкв ве̄рмыс. Ты йильпи са̄ккон пирмайтан ма̄гыс округ Уставн (ма̄н округувт ты щар ма̄к яныг са̄ккон) ты урыл о̄с хасвес. Тот «ма̄ньщи» ла̄тыӈ ос «ханты» ла̄тыӈ хотщуртумтавесы̄г. Надежда Геннадьевна Алексеева ла̄выс, ты са̄ккон таима̄гыс тох хасвес, ма̄н округув Тюменский область нупыл моляхнув вос хансаве.

1114 2015. 12. 18. Светлана РОМБАНДЕЕВА

Ханищтан ма̄хум янытлаве̄сыт Яныг таквс э̄тпос 27 хо̄талэ̄т Ханты-Мансийск ӯст Центр искусств колт ня̄врам ханищтан ма̄хум янытлаве̄сыт. Ты хо̄нтхатыглап округув ялпыӈ хо̄талэ кастыл ва̄рыглавес, намаявес: «Учителями славится Югра». «Заслуженный учитель» нам о̄щнэ атса̄т арыг хо̄тпа тув атхатыгласыт. Округ Дума кӯщай ва̄ӈын хум Сергей Юрьевич Дегтярёв то̄ва хо̄тпат янытлан нэ̄пакыл мисанэ, тав ла̄выс: «Ня̄врам ханищтам ос ань школатыт рӯпитан я̄тил хо̄тпанув, ма̄н Дума депутатыт на̄нан округ ялпыӈ хо̄талэ̄тыл янытлыянӯв! Са̄в ёмас, сымыӈ ла̄тыӈ ла̄ве̄в! Ка̄сыӈув таве ханищтам ёмас хо̄тпа номтэ̄т о̄ньщитэ. Тав мӯтратэ, ё̄ре, ва̄рнэ тэ̄ланэ нэ̄мхуньт ат ёрувлахтэ̄гыт. Ня̄врам ханищтан ка̄сыӈ хо̄тпа наме сов хольт То̄румт посты. Ханищтан ма̄хум сака са̄в рӯпитэ̄гыт, таима̄гыс та̄н кӯщаит хольт номтыӈыт, кос маныр урыл китапахтэ̄в, та̄н пуссын ва̄гыт. Ня̄врамыт на̄нанн вос хӯнтлэ̄гыт, вос э̄руптаве̄н. Пуссын пуста̄гыл о̄лэ̄н, со̄тыӈыщ о̄лэ̄н! ». Округ янытыл ханищтан ва̄рмаль Департамент тармыл кӯщаиг о̄лнэ нэ̄ Любовь Николаевна Ковешникова о̄с аквкит ла̄тыӈ ла̄выс: «Ма̄н о̄лнэ ма̄в ма̄гыс щар ма̄к тыныӈ мӯйлупса – ты на̄н ва̄рнэ тэ̄лан. Ня̄врам ханищтам хо̄тпа пенсиян минаме те̄пыл, о̄лнэ̄тэ палытыл э̄лаль о̄с акв та щирыл учителиг та ла̄ваве. Тав кос хоты ма̄т рӯпитаӈкве паты манос юн ӯщлахтуӈкве паты, таве̄ныл туп ёмас, сымыӈ ла̄тыӈ хӯлэ̄в. Пус ка̄т, пус ла̄гыл о̄лэ̄н! ». Заслуженный работник намыл хус арыг хо̄тпа майвес. Хӯрум хо̄тпа Тюменский область Думаныл янытлан нэ̄пакыл ке̄тве̄сыт – Е. П. Максимова (Нижневартовск ӯст о̄лы), Л. С. Карандаева (Ханты-Мансийск ӯст о̄лы), О. П. Пашковская (Сургут ӯст о̄лы) Та̄н ань пуссын яныгпа̄ла э̄кват, пенсиян хосат минасыт. Ма̄хум янытлан тэ̄ла оигпаме юипа̄лт Центр искусств колт ханищтахтан ня̄врамыт «Белоснежка и семь гномов» нампа мо̄йт суссылтасыт. Татем нё̄тнэ̄г йӣквсыт, ощхольласыт.

1114 2015. 12. 18. Александр ВЬЮТКИН

Товлыӈха̄пыл яласан ма̄хум ма̄гыс Яныг хо̄нт минам па̄сныл са̄тлов та̄л минас, ань ос округув онтырса̄т нупыл ат та̄лэ то̄влыс. Ты ялпыӈ хо̄талыг кастыл Ханты-Мансийск ӯст товлыӈха̄пыт ёлиснэ кол по̄хат йильпи памятник тӯщтын ма̄гыс ма̄ щё̄питавес. Ва̄т саграпнал э̄тпост тув яныг а̄хвтас пинвес. Ня̄врамыт ёт рӯпитан «Патриот» нампа кол кӯщай хум Виктор Крот тот тох ла̄выс: «Ма̄н округувт ань хӯрум со̄тыра атса̄т ляпатем товлыӈха̄пыл яласан ос товлыӈха̄пыт уральтан хо̄тпа рӯпиты. Та̄н ва̄рнэ рӯпатаныл сака та̄рвитыӈыг о̄лы. Та̄лэтуве, э̄тэхо̄талэ сыс сэ̄ӈквыттӯйтыт товлыӈха̄пыт тыглетувле та яласэ̄гыт. Тот рӯпитан ма̄хум та̄нти рӯпатаныл ёмщаквег ва̄ганыл, э̄рнэ щирыл ва̄рияныл. Ма̄н та̄нанылн яныг пӯмащипа ла̄тыӈ ла̄ве̄в ос тыт та̄н ма̄гсыланыл памятник тах тӯщтэ̄в.

1114 2015. 12. 18. Александр ВЬЮТКИН

Ханты хум Еремей Айпин урыл кина по̄слувес Округув янытыл ты э̄тпос 3-10 хо̄таланэ культура ос искусство янытлан хо̄талыг намаим о̄лсыт. Ты кастыл са̄всыр мирыт о̄лупсаныл урыл кинат по̄слын нэ̄ Нина Серебрякова ёт прессконференция ва̄рыглавес. Тав «Этнос» нампа кол тармыл кӯщаиг о̄лы. Нэ̄ йильпи кинатэ соссаӈ мир ёт рӯпитан Ассамблея кӯщай хум Еремей Данилович Айпин урыл по̄слыстэ, рущ ла̄тӈыл «Звезда Утренней Зари» Еремея Айпина. Ханты» намыл пиныстэ. Нина Серебрякова ты кинатэ урыл тох ла̄выс: «Еремей Данилович по̄слумум порат ам амти о̄щнэ номтанум щар ат потырта̄лсанум. Еремей Данилович о̄лупсатэ хумус о̄лы, та щирыл пуссын по̄слувес. Тав ётэ рӯпитаӈкв сака пӯмащ. Тав таквирот аквписыг матаре урыл та номсащлахты. Таве̄н матыр ат те мӯсты, та̄ра ля̄льт ла̄ви. Кинав по̄слымав порат Еремей Данилович матаре ма̄гсыл аквписыг мощ э̄ссамтас. По̄слын ма̄ныл а̄стымав ос кинаг ва̄рмув юипа̄лт, тав ты кина та̄ра сунсыстэ. Ма̄н акваннё̄тхатым по̄слум ва̄рмалюв таве̄н мӯстыс». Аквта хо̄талт Еремей Айпин урыл по̄слым кина Ханты-Мансийск ӯсыӈ мирн суссылтавес. Нина Серебрякова ла̄выс, ты кина торгамтаӈкв э̄ри. Таима̄гсыл кина суснэ порат то̄ва ма̄ньлат ма̄хум тувыл кон ква̄лсыт, матыр ул ат торгамтасыт.

1114 2015. 12. 18. Александр ВЬЮТКИН

Э̄рнэ ос ёмас тэ̄ла э̄лаль тотаве Ва̄т са̄грапнал э̄тпос 9-12 хо̄талытт округув янытыл са̄всыр па̄влытныл, ӯсытныл ма̄хум пормасыт ос тэ̄нутыт тыналан ма̄гсыл Ханты-Мансийск ӯсн ёхталасыт. Ты тыналахтын тэ̄ла рущ ла̄тӈыл «Товары земли Югорской» ла̄ваве. Ты та̄л тав хусыт щёс ва̄рыглавес, ма̄хум та̄нти ва̄рум ос щё̄питам тэ̄нутаныл, та̄нти ка̄тыл ма̄щтырлам пормасаныл тот тыналасаныл. Титса̄т са̄всыр нампа организация тыг ёхталас. То̄ват та̄нти халанылт акваннё̄тхатым са̄в та̄л аквъёт рӯпитэ̄гыт. Округ яныг кӯщаюв Наталья Комарова ка̄сыӈ е̄мт тыналахтын ма̄хум палт яланты. Ярмаркат сунсыглахтаме порат ма̄хум ёт потырты, мощ титыглыянэ, та̄н хумус рӯпитэ̄гыт. Ёхтум ма̄хум таве̄н са̄всыр пӯмащ, атыӈ мӯйлупсат мӯйлуптэ̄гыт. Ты порат Наталья Владимировна я̄ӈк сэ̄тапныл сагим, хорамыӈ па̄ссал мӯйлуптавес. Ты ярмарка хӯрум хо̄тал рӯпитас. Тыналан тэ̄нутаныл, пормасаныл нё̄тнэ̄г, пӯмщиг щё̄питым о̄лсыт. Ты порат по̄лям са̄лы нё̄выль а̄тим о̄лыс. Ма̄хум са̄лыӈ нё̄выль урыл аквписыг титыглахтасыт. Са̄всыр щирыл щё̄питым мо̄т ӯйхул нё̄выль са̄в тыналавес. Ма̄н ма̄ньщи хумиюв Иван Качанов, «Турупъя» община тармыл кӯщаиг о̄лнэ хум, ёт тотыглам во̄руй со̄ванэ о̄выл хо̄талт та̄ра ёвтве̄сыт. Нёхыс, во̄нтыр, норка, лэ̄пык ос охсар совытныл ю̄нтым те̄нтыт, са̄всыр хансаӈ ла̄гыл маснут ос янгӯй котыл ю̄нтым пyркат тот о̄с тыналаве̄сыт. Са̄в пурка Ха̄льӯс район Саранпа̄вылныл ос Белоярский район Касум па̄вылныл тыг тотыглавес. Та хӯрум хо̄тал сыс «ЮграЭкспо» колн нёлоловхуйлов со̄тыра ляпатем хо̄тпа ёвтхатуӈкв ёхталас. Ярмарка лаппантым юипа̄лт ма̄хум тув иӈ минасыт. Ёхталан мир ма̄гыс концерт ва̄рыглавес, сценаныл ма̄хум э̄ргысыт ос йӣквсыт. Хӯрмит хо̄талт хо̄тал палыт са̄всыр пӯмащ ёнгилыт ва̄рыглаве̄сыт. Ня̄врамыӈ ма̄хум ня̄враманыл ёнгын ма̄т хультуптаӈкв ве̄рмысаныл. Ща̄няныла̄щаныл тэ̄нут ёвтнэ̄ныл сыс та̄н уральтым о̄щве̄сыт. Ты сака ёмас рӯпата, э̄лы ма̄т о̄лнэ соссаӈ ма̄хманув тыг ёхталанэ̄ныл сыс матыр тыналаӈкв ве̄рме̄гыт, сакати, та̄нти ма̄гсыланыл олн мощ сэ̄лэ̄гыт.

1114 2015. 12. 18. Светлана РОМБАНДЕЕВА

Ща̄нь ла̄тӈыл потрыт вос хансэ̄в Ва̄т са̄грапнал э̄тпос 8 хо̄талэ̄т Ханты-Мансийск ӯст о̄лнэ соссаӈ мир ма̄к яныг библиотекат акванатыглаве̄сыт. Потыр «Антология современной поэзии народов России» ос «Программы поддержки национальных литератур народов Российской Федерации на период 2016-2017 годы» нампа проект ва̄рмаль урыл о̄лыс. Москва ӯсныл кит нэ̄гхумыг ёхталасы̄г, Максим Амелин ос Александра Стрелова. Ты яныг ӯст ма̄хум Антология нампа нэ̄паккапай щё̄питэ̄гыт. Тэ̄н ла̄вме̄н щирыл, рущ мир коныпал Россият о̄лнэ мо̄т мирыт та̄нти ла̄тӈанылт стихыт ос потрыт вос хансэ̄гыт. Ка̄сыӈ мирныл лов хо̄тпа вос хансы, та̄н потраныл ман стиханыл пуссын ёмащакв ловиньтавет. Тувыл ма̄к ёмас потрыт ман стихыт пе̄риявет, рущ ла̄тӈыг толмащлавет, нэ̄пакын хансавет. Тув рущ ла̄тӈыл нэ̄матыр ат виве, туп ща̄нь ла̄тӈыл хансуӈкве э̄ри. Я̄тил ма̄ньщи ма̄хум, э̄рыӈ хотьютын ка̄сащи матыр хансуӈкве, ты нэ̄гхумыг палт потранын ман стиханын ке̄тэ̄н. Тэ̄н телефонэ̄н: 8 (495) 626 24 75. Тув звонитэ̄н, китыглахтан ла̄тыӈ о̄ньщегы̄н те, китыглахтэ̄н, акванпотыртахтэ̄н.

1114 2015. 12. 18. Николай МЕРОВ

Йис ма̄т рӯпитан соссаӈ ма̄хум арыг олныл мивет Ма̄н округувт «Социальноэкономическое развитие КМНС ХМАО Югры на 2014-2020 годы» нампа программан нё̄тмил ва̄рнэ ла̄тыӈ хасвес. Ты урыл округ губернатор нэ̄ Наталья Комарова кӯщаит акванатыгламе порат ла̄выс. Тав ла̄выс, йис ма̄т хӯл алыщлым ос во̄раим о̄лнэ хо̄тпатн 3 миллион 500 со̄тыра солко̄ви са̄всыр тэ̄ланыл ма̄гыс мивет. Ма̄вит ӯргалан департамент кӯщай хум Евгений Платонов ты урыл ла̄выс, ты олныт 28 соссаӈ хо̄тпат халт ла̄кквауртавет, та̄н хосат та̄гыл нё̄тмил ӯре̄гыт. Ты со̄пас олныт Кондинский, Ха̄льӯс, Октябрьский, Белоярский районытт о̄лнэ 25 хо̄тпан йис ма̄т о̄лнэ колыт ӯнттын ма̄гыс ойтавет. Тувыл хӯрум э̄лумхо̄лас Ханты-Мансийский ос Белоярский районыгт рӯпатаныл ущты о̄вылтанэ̄ныл ма̄гыс нё̄тавет. Ка̄сыӈ хо̄тпа 100 со̄тыра солко̄вил миве. Округ кӯщай прессслужбатэ ке̄тум ля̄ххал ма̄ньщи ла̄тӈыг Н. МЕРОВ хансыстэ.

1114 2015. 12. 18. Николай МЕРОВ

Ле̄ккарыт сым а̄гмыт урыл потыртасыт Округувт мир пусмалтан департамент кӯщай Александр Филимонов, округ пӯльница кӯщай Алексей Добровольский ос Россия академия наукат сым а̄гмыт пусмалтан яныг ле̄ккар Ренат Акчурин ва̄т са̄грапнал э̄тпост Ханты-Мансийск ӯс ля̄ххал тотнэ колн ёхталасыт. Та̄н мир пусмалтан ва̄рмаль урыл потыртасыт. На̄н ты урыл э̄лаль ловиньтэ̄н. Ты та̄л сым а̄гмыт пусмалтан та̄лыг намаим о̄лы. Ты ва̄рмаль щирыл рӯпата хумус мины, ань ле̄ккарыт ты потыртасыт. Мир пусмалтан округ департамент кӯщай Александр Филимонов сым а̄гмыт пусмалтан «Югракор» нампа проект урыл потыртас. Тав 2008 та̄лт но̄хво̄рмалтавес. Ты ва̄рмаль таима̄гыс щё̄питавес, сым а̄гмыт хосыт са̄в ма̄хум хотталь ул вос щалтэ̄гыт ос а̄гмыӈмосыӈыг ул вос е̄мтэ̄гыт. Тыт о̄лнэ мирув са̄внув та̄л пуста̄гыл э̄лаль вос о̄лэ̄гыт. Ты проект щирыл Югра ма̄т хӯрум яныг пӯльница ӯнттувес: ты Сургут ӯст о̄лнэ «Центр диагностики и сердечнососудистой хирургии», Ханты-Мансийск ӯст о̄лнэ округ яныг пӯльница ос Нягань ӯст о̄лнэ яныг пӯльница. Тот сым а̄гм о̄щнэ ма̄хум э̄тэхо̄талэ сыс пирмайтавет. Ка̄сыӈ хо̄тпа уральтахтын ма̄гыс тув ялуӈкве ве̄рми. Э̄лы ма̄т о̄лнэ ма̄хум пӯльницан минуӈкве нё̄тавет. Пӯльницат пуссын йильпи ищхӣпыӈ утыл ёвтве̄сыт. Тот ле̄ккарыт ань та̄рвитыӈ операцият ва̄руӈкве ве̄рме̄гыт. Сым а̄гмыт пусмалтан яныг ле̄ккар Ренат Акчурин ла̄внэ̄тэ щирыл, тыт рӯпитан хирургле̄ккарыт та̄л сыс хӯрумса̄тниласа̄ткем операция ва̄ре̄гыт. Та̄н ищхӣпыӈ утыл рӯпитаӈкве ёмщакв ха̄сэ̄гыт. Округ пӯльница кӯщай А. Добровольский тох потыртас. Сым а̄гмыт та̄рапаттын ма̄гыс ва̄тихал пӯльницан уральтахтуӈкве ялуӈкв э̄ри. Сымынт а̄гм мощнув сӯйтнэ те̄пыл, на̄нан пусмалтан ле̄ккарн та̄ра ла̄ве̄н. А̄гмын юв ул пувелы̄н, атиӈк лю̄льнувег е̄мтуӈкве паты. На̄нкина̄н ӯргалэлы̄н, пуста̄гыл о̄лэ̄н.

1114 2015. 12. 18. Тамара МЕРОВА

Литература та̄л та оигпас Ты кастыл Ханты-Мансийскат «Югра-Классик» яныг колт ма̄хум акванатыглаве̄сыт. Губернатор ва̄ӈын хум Алексей Путин мӯй хо̄тпатн ёмас ла̄тыӈ ла̄выс ос хӯрум касылыт но̄хпатум хо̄тпат мӯйлупсал мисанэ. Нижневартовский районт потрыт хаснэ хум Сергей Луцкий «Пока светло» ос Сургут ӯст о̄лнэ хум Николай Сочихин «Ностальгия» хансум нэ̄пакаге̄н ма̄гыс янытлавесы̄г. Николай Сочихин ма̄во̄й но̄хвинэ ма̄т рӯпитас ос лӯима̄вт о̄лум ва̄рмалит урыл стихыт ловиньтас. Ханты-Мансийск ӯст о̄лнэ э̄ква Галина Захарова хӯрмит касылт но̄хпатыс. Тав о̄лупсат о̄лыглам тэ̄лат «Мы – мужики крестьянские» нэ̄пак щирыл щё̄питасанэ. Округ Дума кӯщай советникыг рӯпитан хум Игорь Ширманов депутатытныл паща ла̄тыӈ ловиньтас ос то̄ва поэтыт, писателит янытлан нэ̄пакыл мӯйлуптасанэ. Тувыл А̄с-угорский ма̄хум «Солнце» нампа театр Еремей Айпин хансум нэ̄паке щирыл ва̄рим спектакльныл ма̄нь охсатэ суссылтавес. Ос тувыл мӯй ма̄хум са̄всыр э̄рыгсовыт хӯнтлысыт. Нэ̄пак ловиньтан колт рӯпитан хо̄тпат Литература та̄л кастыл ва̄рим тэ̄лат о̄вылтыт мощ потыртасыт. Та̄л сыс округ янытыл акв со̄тыра атса̄т арыгкем акванатхатнэ хо̄нтхатыглапыт варыглаве̄сыт. Писателит ёт 65 со̄тыра са̄вит ня̄врам ос 480 со̄тыра са̄вит яныг хо̄тпат ва̄йхатуӈкве ёхталасыт. Мо̄тыт 2016 та̄л ня̄врамыт ма̄нь пораныл янытлан та̄лыг округувт намаявес.

1114 2015. 12. 18. Людмила ТЕТКИНА

Та̄рвитыӈ а̄гм о̄щнэ хо̄тпат нё̄тавет Округ Думат рӯпитан депутат Наталья Западнова сапра̄ни ва̄рыглас. Депутатхо̄тпат, ле̄ккарыт ос са̄всыр кӯщаит тув во̄виньта̄лсанэ. Та̄н та̄рвитыӈ а̄гм о̄щнэ ма̄хум урыл тот потыртасыт. О̄влэ̄т мир пусмалтан департаментыт рӯпитан хум Владислав Нигматулин ла̄тыӈ ла̄выс: «Ань округув янытыл акв со̄тыра арыгкем э̄лумхо̄лас са̄всыр та̄рвитыӈ а̄гм о̄ньще̄гыт. Ты а̄гмыӈ ма̄хум нас ӯргалавет ос сака ул вос савалэ̄гыт, уколыл тӯщтавет. То̄ва хо̄тпат пӯльницат о̄ньщавет, то̄ва хо̄тпат ос юн о̄лэ̄гыт, ле̄ккар та̄н палтаныл юв ёхталэ̄гыт. Та̄н халанылт 60% са̄вит э̄лумхо̄лас пувласпиа̄гм (рак) о̄ньще̄гыт. Ты хо̄тпат э̄лаль пусмалтаӈкве воссыг ат ве̄рмавет. Та̄н пӯльницат хультуптавет, ос ка̄саще̄гыт ке, юв тотавет. Ань ка̄сыӈ районт ос яныг ӯст о̄лнэ пӯльницат ты ма̄хум ма̄гсыл аквкит я̄нас палата ва̄рвес. Таи лю̄ль, ка̄сыӈ та̄лныл тамле та̄рвитыӈ а̄гм о̄щнэ э̄лумхо̄лас са̄внуве̄г е̄мтэ̄гыт. Округувт о̄лнэ мир уральтахтынэ̄ныл ма̄гыс ле̄ккарыт палт ялуӈкв акваг ла̄виянӯв. Са̄ртыннув пӯльницан ма̄хум ке ёхтэ̄гыт, то̄нт та̄рвитыӈ а̄гманыл пусмалтаӈкве ро̄ви. Ань ма̄н йильпи рӯпата ва̄руӈкве о̄вылтаслӯв, ты а̄гмыӈ хо̄тпат акв реестрнэ̄пакн хансыянӯв. Округ янытыл рӯпитан ле̄ккарыт а̄гмыӈ хо̄тпат наманыл тув хансыяныл. Тамле нэ̄пак о̄ньщим, ма̄н а̄гмыӈ хо̄тпат та̄ра тэ̄рпил ке̄тыянӯв манос яныг ӯст о̄лнэ пӯльницатн тотыянӯв. Ты кӯщай юипа̄лт округ янытыл ёхталам ле̄ккарыт та̄нки рӯпатаныл урыл о̄с потыртасыт.

1114 2015. 12. 18. Николай МЕРОВ

Татьяна Ильинична намхо̄талэ̄тыл янытлылӯв Ты э̄тпос 30 хо̄талэ̄т Татьяна Ильинична Коровкина, а̄ги о̄парищ наме Ромбандеева, намхо̄талэ е̄мты. Тав ань 60 та̄лэ то̄влы. Ты ма̄ньщи нэ̄ кит яныг пыг о̄ньщи. О̄выл о̄йкатэ̄нтыл пыге Николай Васильевич Ромбандеев ань Когалым ӯст о̄лы. Тот ма̄во̄й винэ ма̄т рӯпиты. Я̄нас ще̄мьял о̄лы, кит ня̄врам о̄ньщи. Татьяна Ильинична ань о̄лнэ о̄йкатэ наме Пётр Петрович Коровкин, тэ̄н са̄в та̄л аквъёт о̄лэ̄г. Пыге̄н наме о̄с Пётр Петрович Коровкин, тав ань Ханты-Мансийск ӯс №8 школатт ня̄врамыт ханищтым рӯпиты. Пётр акв ня̄врам о̄ньщи. Ты ма̄ньщи нэ̄ школа а̄стламе юипа̄лт Ханты-Мансийск ӯст ма̄нь ле̄ккарыг э̄лаль ханищтахтас. Тав о̄влэ̄т Сӯкыръя пӯльницат рӯпитас. Тувыл ётылнув ос Саранпа̄выл пӯльницан патхатас, тот са̄в та̄л рӯпитас. Ань пенсият о̄лы. Пыгыг оматэ̄н намхо̄талыл янытластэ̄н, тэ̄н тамле ла̄тыӈ ке̄тсы̄г: «Я̄тил, тыныӈ омакве, ме̄н наӈын намхо̄талыл сымыӈыщ янытлылме̄н. Ме̄н наӈын сака э̄руптылме̄н. Ос са̄в та̄л пуста̄гыл э̄лаль о̄лэ̄н. На̄й-О̄тыранын вос ӯргалаве̄н». Ма̄н, редакцият рӯпитан ма̄хум, Татьяна Ильинична ёмщакв ва̄глӯв, таве намхо̄талэ̄тыл о̄с янытлылӯв. О̄лупсатэ мӯсхал щирыл вос мины. Э̄лаль о̄лнэ хо̄таланэ посыӈыг вос о̄лэ̄гыт. Рӯтанэ ос апганэ ёт ща̄гтым э̄лаль вос о̄лы. Пыгаге ла̄вум ла̄тыӈ ма̄ньщи ла̄тӈыг Н. МЕРОВ хансыстэ.

1114 2015. 12. 18. Светлана РОМБАНДЕЕВА

Тав оматэ Сакв я̄ е̄рныл о̄лыс Ха̄льӯс район Восыӈтӯр па̄вылт са̄в ня̄врамыӈ колта̄гыл о̄лы. Николай Степанович Анимов ос э̄кватэ Ирина Леонидовна ма̄ньщи хо̄тпаг, ат ня̄врам о̄ньще̄г. Ам та̄н коланылн щалтсасум, тэ̄н ётэ̄н мощ ӯнлахо̄лсум, потрамасум. На̄н ань э̄лаль Николай Степанович потре ловиньтэлы̄н. – Ам Восыӈтӯрт самын патсум, лӯпта э̄тпос 28 хо̄талэ̄т 1968 та̄лт. Омам та порат Новинские па̄выл совхозт рӯпитас, ам тот яныгмасум. Омам наме Мария Петровна, а̄ги о̄парищ наме Сайнахова. Тав Хо̄рыӈпа̄выл манос Ло̄пмус па̄выл е̄рныл о̄лыс. Ам хунь иӈ ма̄ниг о̄лсум, ворил ты номилум, омам ёт тав самын патум ма̄тэ̄н ялсум. Рӯтанув ань тот хо̄т о̄лэ̄гыт, тув ат яланта̄лэ̄в, нэ̄мхотьют ёт ат ва̄йхатэ̄в. Омав потырта̄лыс, тэ̄н увщитэ̄нтыл манос э̄ще̄нтыл яныг каӈке̄н тыгле тотвесы̄г. Та̄н оманыл ос а̄тяныл хотталь щалтсы̄г, та̄нтте̄ныл о̄лсыт. Ты ва̄рмаль яныг хо̄нт порат о̄лыс. Ань ам потрум хотты рӯт хо̄тпанувн ловиньтаве те, а̄нумн пищма вос хансэ̄гыт. Э̄рыӈ хотты нас по̄х хо̄тпа омав ва̄стэ, аквъёт яныгмасыт ман ханищтахтасыт, а̄нумн аквкит ла̄тыӈ вос хасумтанув. Омав урыл сакати ма̄нь потыр та̄ра вос паттынувӯв. Ща̄ньа̄щагув Восыӈтӯрт акванминасы̄г. Колта̄глувт ма̄н ат ня̄врам самын патсӯв –хӯрум каӈк, кит яга̄ги. Ма̄н нила тыт о̄лэ̄в – яныг каӈкум Александр, тав ёлыпал каӈкум Сергей, Таня увщим ос ам. Щар яныг увщиюв Зоя ще̄мьяӈ та̄гыл Украинат о̄лы. Тыт поварыг ханищтахтас, тэ̄нут па̄йтым на̄иӈха̄пыт ос ня̄врам садикт рӯпитас. О̄йкатэ ёт тыт акванхо̄нтхатасы̄г, 1980 та̄лыт порат Украина ма̄н ва̄нтлысы̄г. Тот ань хо̄нтлын ма̄т пыге̄н порслувес. Ты урыл увщим ла̄тыӈ ке̄тсас. Ань аман хумус о̄лэ̄гыт, тавагт, хосат ат потыртасӯв. Пе̄с йис ма̄ньщи па̄вланувт нэ̄мхотьют ат о̄лы, пуссын яныг па̄влытн о̄лмыгтасӯв, ты ма̄гсыл сымум сака ща̄рги. Туи яныгмам па̄влумн, Новинскийн, ялсум. Пумын лапяныгмима, лылые̄пе сыстам, татем нё̄тнэ ма̄кве. Па̄гле ё̄мсум, ла̄гыл маснутагум хота̄хвсагум, ня̄р ла̄глыл мощ ё̄мыгтасум. Я̄тил ма̄тенув, па̄вылтенув пумыннирын лап та яныгмавет. Ма̄н ань а̄хвтасыӈ лё̄ӈх тармыл та ё̄ме̄в, машина мины, сэ̄й но̄хлапи, тыил та лылтэ̄в. Ань ма̄ньлат ма̄хум пуссын яныг ӯст о̄луӈкве таӈхе̄гыт, ще̄мьяӈ та̄гыл тув ва̄нтлэ̄гыт. Ма̄нти па̄вланувт о̄лсӯв те, ня̄враманув сыстам лылые̄пыл лылтым яныгманувыт, ма̄нти хӯлтенув, пиланув та̄им о̄лнувыт. Э̄квам ёт ме̄н тыт акванхо̄нтхатасме̄н, ат ня̄врам о̄ньщиме̄н. То̄ванаме̄н янгыт, ня̄врамыӈыг е̄мтсыт. Тэ̄лы ам кочегаркат кӯр па̄лтыглым рӯпитэ̄гум, туи отпускат о̄лэ̄гум. Хӯл алыщлэ̄гум, хӯлта̄л ат о̄лэ̄в, ня̄рхул тэ̄гӯв. Ань то̄ванакт ма̄хум ла̄выглэ̄гыт: хӯл а̄тим, тав хумус а̄тим, алыщлаӈкв минэ̄гын, тэ̄нэ са̄вит пуве̄гын. Николай Степанович э̄кватэ Ирина Леонидовна 1976 та̄лт самын патыс, тав о̄с мощ потрамас. – Омам наме Валентина Ефимовна Лихачёва, рущ нэ̄, тыт самын патыс, а̄ги о̄парищ наме Непомнящих. А̄тям ма̄ньщи хум о̄лыс, Леонид Андреевич Лихачёв. Тав Неремово па̄вылт самын патыс, Новинскийт яныгмас, хумыгӯиг е̄мтме порат Восыӈтӯр па̄вылн о̄лмыгтас. Омам ёт тыт акванхо̄нтхатасы̄г. Тав о̄лте̄т ма̄ньщи ла̄тӈыл потыртас. Мо̄лты та̄л а̄тимыг е̄мтыс. Ма̄н хо̄т ня̄врам самын патсӯв. Толя каӈкув хотталь щалтыс, тав щар яныг о̄лыс. Ма̄н ань тыт нила о̄лэ̄в, ма̄нь э̄щув Шайтанкан ва̄нтлыс, Оксана Лихачёва. Пуссын тыт яныгмасӯв, школа а̄стласӯв. Ам совхозт мис посым рӯпитасум. Школат ма̄н ма̄ньщи ла̄тыӈ ханищтасув, Гындыбина Елена Николаевнан ханищтавесӯв. Тав уроканэ̄н ща̄гтым ялантасӯв, ма̄нав сака ёмащакв ханищтастэ. Нэ̄ холаме юипа̄лт ла̄тӈув та по̄илттавес. Ня̄врамыт ань Роза Семёновнан ханищтавет. Урокын ялантаӈкве сака ат таӈхе̄гыт. Ща̄нь ла̄тӈаныл ат ва̄ганыл, ат иӈ хӯлыглыяныл, улпыл таима̄гыс уроканылн ка̄смоста̄л та ялантэ̄гыт. О̄йкаме̄нтыл ат ня̄врам о̄ньщиме̄н. Яныг пыгме̄н Андрей, тувыл Таня, Толя, Света. Питипатта пыгме̄н Алеша, китыт та̄лэ то̄влыс. Ты я̄тил ма̄ньщи нэ̄гхумыгн ам са̄в ёмас, сымыӈ ла̄тыӈ ла̄ве̄гум. Ня̄враманэ̄н ёт пуста̄гыл вос о̄лэ̄г, На̄й-О̄тыранылн вос ӯргалавет! Сакв я̄ ва̄тат о̄лнэ ма̄ньщиянув, э̄рыӈ хотьют ва̄стэ Николай Степанович оматэ – Мария Петровна Сайнахова. Тав уре̄т матыр хӯлыгласы̄н те, газетавн манос Восыӈтӯр па̄вылн пищма вос хасумтанувын, ла̄тыӈ вос ке̄тнувын. Ма̄нь таквс э̄тпос № 19 газетат ос Александр Прокопьевич Сайнахов урыл хансыгласум, о̄с Восыӈтӯр па̄вылт о̄лы. Тав а̄тятэ хоты ма̄ныл о̄лыс, о̄с торыӈ ат ва̄гтэ – наме Прокопий Антонович Сайнахов, 1933 та̄лт самын патыс. Александр ла̄вме щирыл, аман Кульпас е̄рныл о̄лыс, аман Ло̄пмус па̄вылныл, ат ва̄гтэ. Ма̄н ань «Жди меня» рущ программа хольт ты хансэ̄в, тот ма̄хум татем хо̄нтыгпавет. Ма̄н о̄с акванюрщхатэ̄в, халанувт нё̄тхатэ̄в, китгагув нё̄тыягӯв. Я̄тил ма̄ньщи ма̄хумате̄нув, таяныт ёмас ва̄ре̄н, матыр та̄рапаттэгы̄н те, газетавн пищма хансэ̄н. Пуссын пуста̄гыл о̄лэ̄н, То̄рум ёт, О̄тыр ёт о̄лэ̄н!

1114 2015. 12. 18. Александр ВЬЮТКИН

Са̄лыт са̄вмалтан ва̄рмаль Ювле хультум э̄тпост ам Сургутский районныл ёхталам ханты нэ̄ ёт ва̄йхатыгласум. Тав наме Людмила Айваседа. Мо̄лты Людмила Сергеевна ӯйхул янмалтан ос туристыг яласан ма̄хум ёт рӯпитаӈкв вуйхатас, рущ ла̄тӈыл те ла̄вуӈкве «Крестьянскофермерское хозяйство» ва̄рыс. О̄лнэ ма̄тэ̄ныл Когалым ӯс мус хо̄тпан ве̄рыста. Та̄н нила хо̄тпа акваннё̄тхатым рӯпитэ̄гыт. Людмила Сергеевна ӯсыӈ ма̄т нэ̄паканэ щё̄питасанэ ос рӯпитан ма̄гсыл э̄рнэ хо̄тпат ёт потыртахтас. Рӯтанэ са̄лыт ӯрим аквписыг во̄рыӈ ма̄т о̄лэ̄гыт. Аняг о̄щнэ са̄лыяныл хо̄тпан ляпатем са̄витын ёхтэ̄гыт. Ты коныпал мощ мо̄лалнув иӈ атхуйплов са̄лы Белоярский район Нумто па̄вылныл ёвтсыт. Нэ̄ хосат та̄гыл ты урыл номсахтас. Мо̄лты Когалым ӯст Людмила Сергеевна общинатэ хӯрумса̄т со̄тыра са̄вит олннё̄тмилыл майлувес. Ва̄рмалянэ та̄ра мощ э̄лаль нёвумтасыт. Та олннё̄тмилыл во̄рт колыт ӯнттуӈкв ос са̄лыӈ пусасыт йильпииг щё̄питаӈкв э̄ре̄гыт. Пуссын номылматым щирыл те а̄ртми, нэ̄ такви палтылэ мӯйлын турист ма̄хум пирмайтаӈкв патыянэ. Мӯй ма̄хум во̄раяӈкв, хӯл алыщлаӈкв ос нас ӯщлахтаӈкв ёхталаӈкв патэ̄гыт. Мо̄лалнув та̄нти ё̄раныл хосыт тит яныг о̄лнэ кол ос акв сӯмъях ӯнттысыт. Йильпи та̄л о̄вылтахтын порат ӯщлахтын хо̄талыт сыс Когалым ӯст о̄лнэ мир са̄лыӈ сӯныл тотыглан ма̄гыс тув ёхталаӈкв во̄вве̄сыт. Та̄н палтаныл са̄в мӯй ма̄хум ёхталаӈкв та̄х патэ̄гыт. Ань Людмила а̄тятэ Сергей Айваседа ё̄рнкол ма̄гсыл а̄влат турасты. Ёрнкол щё̄питан ма̄ныл а̄стынэ̄тэ юипа̄лт та̄н ляпа ӯст са̄лыӈ суныл ма̄хум тотыглаӈкв патыяныл. Нэ̄ ла̄выс: «Ущты о̄вылтам рӯпатам э̄лаль щар ат лакви. Нас мощ ве̄ритаӈкв э̄ри, о̄щнэ номтанум тэ̄лаг ва̄руӈкв те, тувыл ущ матыр та а̄ртми».

1114 2015. 12. 18. NO DATA

Ма̄хум ёт тав ёмас номтыл о̄лыс Москва ӯст Третьяковский галереят ка̄тыл по̄слым са̄всыр пе̄с хурит суссылтавет. «Озорница» нампа хури ка̄салаӈкве тот о̄с ро̄ви. Ты хури Владимир Игошев Ха̄льӯс район Ня̄хщамво̄ль па̄вылт 1956 та̄лт по̄слыстэ. Та порат тав па̄влыӈ ма̄хманув палт ялантас, ма̄ньщи ос саран ма̄хум хурин по̄слысанэ. Ань ма̄хум ла̄ве̄гыт, Владимир Игошев ка̄тыл по̄слум хуриянэ халт «Озорница» ты щар ма̄к ёмас ос мирн ва̄нэ хури. Тот ма̄ньщи а̄гирищакве Прасковья Аментьева по̄слым о̄лы. Тав нё̄тнэ, сэ̄мыл ос яныг самаге̄нтыл тот такем пӯмщалахтым сунсы, щар аквтуп хотьют тав нуплэ ке а̄ӈкваты, а̄гирищ хотэ̄ссамтаве, аӈкрип сайн хоттӯйтхаты. То̄нт Владимир Игошев аквторыг кит картина по̄слум, то̄ванакт а̄гирищ нупыл нас а̄ӈквата̄лыс. Прасковья Ивановна Ня̄хщамво̄ль па̄вылт самын патыс. Школа а̄стламе юипа̄лт Ханты-Мансийск ӯст ханищтахтас. Тувыл Хулюмсӯнт па̄вылн рӯпитаӈкве ке̄твес. Ня̄нь ва̄рнэ нэ̄г 15 та̄л рӯпитас. Ос пенсиян патхатаме мус Сосьвинской ЛПУ ма̄т рӯпитас. О̄йкатэ̄нтыл хо̄т ня̄врам янмалтасы̄г. Пыгаге̄н Данил, Алексей ос Иван Хулюмсӯнт па̄вылт о̄лэ̄гыт, Эля а̄гитэ̄н колта̄глэ ёт Югорск ӯст о̄лы. Ос яныг а̄гитэ̄н Светлана Кондинский район Леуши па̄вылт ще̄мьяӈ та̄гыл о̄лы. Мо̄лты та̄л ва̄т са̄грапнал э̄тпос 18 щислат Прасковья Ивановна а̄тимыг е̄мтыс. Ты та̄л я̄ӈк на̄тнэ э̄тпос онтоловит хо̄талэ̄т 65 та̄лэ то̄влынӯв. Тав ёмас сымыӈ хо̄тпаг о̄лыс, па̄влыӈ мирн сака янытлавес. Ма̄щтыр нэ̄ о̄лыс, ма̄ньщи супыт, пӯркат ю̄нтыс, сакныл хартуӈкве ха̄сыс. Ня̄враманэ пуссын ма̄ньщи ла̄тӈыл потыртаӈкве ханищтасанэ. Та хуритныл Прасковья Ивановна яныг самыл мир нупыл сунсы, ты щирыл мирн яныг ща̄гт тоты. Лариса Туганова: Прасковья Ивановна Пуксикова урыл потыр Светлана Динисламова 2000 та̄лт яныг таквс э̄тпост №44-45 «Лӯима̄ сэ̄рипос» газетат хансыс: «Ам ма̄нь порамт аквнакт нэ̄пакт по̄слым хури ка̄саласлум. Тот ма̄ньщи а̄гирищ по̄слым о̄лыс. То̄нт ты хури ка̄сыӈ хо̄тпан суссылтаслум, рущ юрт а̄гирищит э̄лыпа̄лт э̄ссыгхатасум: «Сунсэ̄н, ма̄ньщи а̄гирищ по̄слым о̄лы! ». Та па̄сныл са̄в та̄л ювле хультыс. Ам Хулюмсӯнт па̄вылт о̄лмыгтамум юипа̄лт та по̄слым а̄гирищакве ёт хо̄нтхатыгласум. Тав наме Прасковья Аментьева. Хум ва̄рыс, ань Пуксиковаг е̄мтыс. Тав Ня̄хщамво̄ль па̄вылт самын патыс. Ща̄нягеа̄щаге ат а̄ги янмалтасы̄г: Прасковья, Нина, Анна, Дарья, Варвара». Ты хури урыл Прасковья Ивановна тох потырта̄лыс: «Рущ хум а̄нум хунь по̄слыстэ, аты ва̄слум, то̄нт ам иӈ ма̄нь ня̄врам. Ам по̄слымам порат, ам нупыл то̄ванакт туп а̄ӈквата̄лас. Тав, насати, та̄ра кит картина по̄слум». 1999 та̄лт №7-8 ма̄ньщи газетавт Владимир Игошев урыл Тамара Мерова о̄с хансыглам. О̄йка ты хуритэ хумус по̄слыстэ, та урыл китыгламе. В. Игошев ювле ла̄выс: «1956 та̄лт тэ̄лы порат Аментьев колэ̄т ам хури по̄слысум. Рӯпата са̄в о̄лыс, хурим ёмащакв по̄слуӈкве матрыг ат ве̄рмыслум. Ущты ёмащакв по̄слыгласлум кос, о̄ста лапсартыслум. Тох рӯпитым, ам ювле а̄ӈкватасум, а̄виныл ам нупылум кит самыг сунсэ̄г, кит яныг сэ̄мыл самквег. А̄ги такем пӯмщиг сунсыс, оматэ̄н нэ̄матыр ат ла̄всум, мо̄т нэ̄пак вислум ос молях а̄гирищ по̄слуӈкве та патыслум». Тыщир ты Игушев о̄йка мирн ва̄нэ «Озорница» нампа хуритэ по̄сластэ.

1114 2015. 12. 18. Николай МЕРОВ

Ня̄врамыт газетагув сунсуӈкве ёхталасыт «Ханты ясаӈ» ос «Лӯима̄ сэ̄рипос» газетагт рӯпитан хо̄тпат Ханты-Мансийск ӯс №6 школат хо̄тыт классыт ханищтахтын ня̄врамыт редакциян во̄виньта̄лсаныл. Ма̄н та̄нанылн газетаг урыл потыртасӯв. Пуссын аквъёт ловманкем а̄гитпыгыт ёхталасыт. Ля̄ххал тотнэ ма̄хманув ма̄нь, яныг па̄влытн соссаӈ ма̄хманув палт ва̄тихал ялантэ̄гыт. Тот са̄в пӯмащ хури по̄слэ̄гыт, са̄в пе̄с потыр хансэ̄гыт. То̄ва хурит колнакувт норыт тармыл тагатым о̄лэ̄гыт. Ань ёхталам ня̄врамыт о̄влэ̄т по̄слын хуритыл такталаве̄сыт. Тувыл ищхӣпыӈ ут хосыт суссыт, хумус газетаг ва̄раве̄г. Та юипа̄лт та̄н яныг колнакн во̄вве̄сыт. Тот ма̄ньщи хум Александр Вьюткин нё̄тнэ та̄ныт са̄ӈквылтас. Тав сака ма̄щтырыг са̄ӈквылты. Ня̄врамыт тав ёнгум та̄нанэ татем та хӯнтлысыт. Тувыл кӯщай нэ̄ Раиса Решетникова газетаг урыл потыртас. Ня̄врамыт ма̄гыс манхурип газетат ма̄н та̄ратэ̄в, манырсыр касылыт щё̄пита̄лэ̄в ос маныр урыл потрыт хансэ̄в. Ня̄врамытн ты ва̄рмаль сака мӯстыс. Та̄н ма̄ньщи ос ханты хо̄тпат о̄лупсаныл урыл мощ ва̄гыт, «То̄рум маа» музейт ялпыӈ хо̄талыт о̄лыглан порат тув акваг тотыглавет. Ос ща̄нь ла̄тӈыл хаснэ газетагув нэ̄мхуньт ат ва̄щиньта̄лсаныл, сака пӯмщалахтасыт. Ты ва̄рмаль оигпан э̄лыпа̄лт ля̄ххал тотнэ хо̄тпанув ня̄врамытн нэ̄пакыт мӯйлуптасыт. Ты ма̄ньщи ос ханты ла̄тӈыл хансым журналыг «Витсам» ос «Хатлые». Андрей Тарханов хансум «Буранная Россия» нампа йильпи нэ̄паке ка̄сыӈ ня̄врамн майвес. Ос школанылт о̄лнэ нэ̄пак ловиньтан кол ма̄гыс нэ̄пакыт мӯйлуптаве̄сыт. Ня̄врамыт ща̄гтым юв та миныгласыт.

1114 2015. 12. 18. Дарья Белова

Соссаӈ мир ялпыӈ хо̄талт мӯйлысыт Советский районт ос Югорск ӯст о̄лнэ ма̄ньщит ос хантыт округув 85 та̄лэ то̄влын кастыл Советский ӯст акванатхатыгласыт. «Югра лылые̄п» нампа организацият рӯпитан хо̄тпат та̄н соссаӈ ма̄хум тув во̄виньта̄лсаныл, кӯщаиг тот Виктор Вискунов о̄лы. О̄влэ̄т тав ма̄хум ялпыӈ хо̄талыл янытласанэ. Тав ла̄выс, та̄н ань этнотуризм щирыл э̄лаль рӯпитаӈкве патэ̄гыт. Миркол кӯщаит та̄нанылн о̄с тах нё̄тэ̄гыт. Советский ӯс по̄хат ма̄ньщи па̄выл ӯнттэ̄гыт ос мӯй хо̄тпат ӯщлахтуӈкве тув во̄виньта̄лыглаӈкве патыяныл. Советский ӯст о̄лнэ Светлана Кузьмина тув ёхталам ма̄хум ялпыӈ хо̄талыл о̄с янытласанэ. Тав ка̄сыӈ хо̄тпа «Югра лылые̄п» организация па̄лныл мӯйлупсал мӯйлуптастэ. Югорск ӯсныл ёхталам ма̄ньщи э̄ква Нина Георгиевна Рукова такви хансум стиханэ тот ловиньтасанэ. Мӯй ма̄хум ня̄враманыл ос апыгрищаныл ёт тув ёхталасыт. А̄гирищитпыгрищит округув янытлан кастыл стихыт ханищтасыт. Ульяна ос Гриша Беловыг стихыт тот о̄с ловиньтасы̄г. Нина Лапсуй, Советский район Таёжный па̄вылныл о̄лнэ нэ̄, мӯй ма̄хум ма̄гсыл ханищтап ва̄рыглас, тав та̄наныл са̄лы сов тынтлуӈкве ханищтасанэ. Ты юипа̄лт мӯй ма̄хум пуссын аквъёт ня̄рхӯл тэ̄сыт, ща̄й айсыт ос потрамасыт. «Югра лылые̄п» отделеният кӯщай хум Виктор Вискунов Советский районт о̄лнэ соссаӈ ма̄хумн тамле ля̄ххал ла̄выс, та̄н Советский ӯст Хвойный ӯсхулыт о̄лнэ колт кит колнакыл майве̄сыт. Ань районт о̄лнэ соссаӈ ма̄хум ва̄тихал тув во̄виньта̄лыглаӈкве патыяныл.

1114 2015. 12. 18. Александр ВЬЮТКИН

Тит хо̄талн пӯнсыглым суссылтап Ты э̄тпост хурит ка̄тыл по̄слын ойка Геннадий Степанович Райшев колт суссылтап ва̄рыглавес, рущ ла̄тӈыл «Живая традиция» намтым о̄лыс. Тав тит хо̄тал рӯпитас. Ма̄щтырлан ма̄хум ка̄тыл ва̄рум са̄всыр пормасаныл тот суссылтаве̄сыт. О̄выл хо̄талт «Со̄рни ёш» (Со̄рни ка̄т) нампа колт рӯпитан ма̄ньлат ханты нэ̄ Надежда Молданова тув атхатыглам ма̄хум янытласанэ, тав та̄нанылн ла̄выс: «Ма̄н ань ва̄рим суссылтапувт нила районныл о̄лнэ ва̄т ма̄щтыр хо̄тпат пормасаныл тыт суссылтавет. Та̄н халанылт нёлолов хо̄тпа «Народный мастер России» яныг нам о̄ньще̄гыт. То̄ват са̄лы ӯрим во̄рт о̄лэ̄гыт. Хорамыӈ пормасаныл та̄нти ка̄тыл ма̄щтырланэ̄ныл ма̄гсыл ам та̄нанылн янытлан ла̄тыӈ ла̄ве̄гум». Тув ёхталам ма̄щтыр ма̄хум халт ма̄н ма̄ньщи хо̄тпав Мария Сергеевна Мерова о̄лыс. Ма̄ньлат нэ̄ юипа̄лт Татьяна Степановна Гоголева янытлан ла̄тыӈ ла̄выс: «Тыхо̄тал матъёмас ма̄н тамле ёмас колт акванатхатсӯв. Тыг ёхталаӈкв сака ёмас. Тамле ма̄щтыр хо̄тпат халт ё̄мыгтамум, сымум ща̄гтым о̄лы. Ты суссылтапн пиным пормасыт кӯщаяныл ам пуссын ва̄ганум, та̄н ёмас сымыӈ ос нёмса хо̄тпаг о̄лэ̄гыт». Тувыл тав ты суссылтап щё̄питам ма̄хмыт пуссын хорамыӈ лӯптал мӯйлуптасанэ. Г. С. Райшев рӯпитан колт кӯщаиг Наталья Николаевна Фёдорова о̄лы, тав ань ла̄выс: «Ам яныг пӯмащипа ла̄тыӈ тыг ёхтум хо̄тпатн ла̄ве̄гум. Та̄н пуссын та̄нти щиранылт яныг ма̄щтырыг о̄лэ̄гыт. Геннадий Степанович йильпи по̄слум хуриянэ ос ма̄щтыр ма̄хум ва̄рум пормасаныл пуссын акванпинсанӯв, та̄н татем аквъёт ёмащакв сусхатэ̄гыт. Ань ты суссылтапув наме «Живая традиция», ам номсэ̄гум, ма̄к ты нам тыг ты ро̄ви. Ма̄навн ты ма̄т о̄лнэ соссаӈ ма̄хум урыл нэ̄мхотты порат ёрувлаӈкв ат э̄ри. Ханты ос ма̄ньщи мирыг о̄лупса нэ̄мхотьютн ёмащакв торгамтаӈкв ос ханищтаӈкв ат ве̄рмаве. Соссаӈ мир пе̄с йис о̄лупса ханищтан учёный ма̄хум ва̄гыт, маныр урыл ам ла̄ве̄гум. На̄н э̄рнэ щирыл ва̄рнэ пормасанын сака нё̄тнэ̄г сусхатэ̄гыт. Мо̄т мир хо̄тпа ва̄рум пормасэ ам тыт та̄ра ка̄салылум. Матыр щирыл, на̄н пормасанын мо̄т хурипаг сусхатэ̄гыт. Ань ма̄н тамле пӯмыщ ты суссылтап ва̄руӈкв номылматсӯв. Ма̄ньлат ма̄хум вос сунсэ̄гыт, вос ханищтахтэ̄гыт. Хотты порат, э̄рыӈ, ма̄н та̄н ва̄рум рӯпатаныл нупыл о̄с сунсуӈкв патэ̄в». Со̄ль, тамле суссылтапыт ӯсыӈ ма̄т о̄лнэ хо̄тпатн сака э̄ре̄гыт. Туп тит хо̄талн пунсыглавес, тыи сака мощща. На̄н о̄с ма̄щтырлэ̄н, пуста̄гыл о̄лэ̄н.

1114 2015. 12. 18. Тамара МЕРОВА

Сымыӈ э̄лумхо̄ласыг о̄лэ̄н «Ма̄хумаквет, на̄нки халынт нё̄тхатым ос акванюрщхатым акваг о̄лэ̄н. Ня̄враманын э̄руптым янмалтэ̄н. Ёмас сымыӈ хо̄тпа са̄в о̄лы, туп то̄ват ул вос айнувыт, » тамле ла̄тыӈ Зинаида Фёдоровна Истомина округт о̄лнэ ма̄хумн ла̄выс. Зинаида Фёдоровна ань а̄гитэ палт Ягрим па̄вылт о̄лы. Тав 1928 та̄лт Саранпа̄вылт самын патыс, ань 87 та̄лэ то̄влыс. Э̄ква такви о̄лупсатэ урыл ма̄навн тох потыртас. – Ам саран ма̄хум колта̄глыт яныгмасум. Ще̄мьявт са̄т ня̄врам о̄лыс: нила а̄ги, хӯрум пыг. Хӯрумхуйлов та̄лум то̄влыс, яныг хо̄нтлан ва̄рмаль о̄вылтахтас. А̄тяв Фёдор Николаевич хо̄нтлуӈкве тотвес, тот хо̄т порславес. Ты э̄лыпа̄лт тав Сортынъя колхоз кӯщаиг паттувес ос ма̄н тув ва̄нтлысӯв. Войнат а̄тяв командирыг лусытас. Василий каӈкув о̄с войнан тотыглавес ос а̄гмыӈмосыӈыг юв ёхтыс. Каӈкум потырта̄лыс, та̄н акв щёс я̄ ултта унсысыт. То̄нт са̄всыр ма̄ныл салта̄тыт тув тотве̄сыт, ос э̄лаль хо̄нтлуӈкве ке̄тыглаве̄сыт. Тот ты каӈкум а̄щув ёт хо̄нтхатыглас. Тэ̄н туп пащалахтуӈкве а̄лымасы̄г ос э̄лаль хо̄нтлуӈкве та тотвесы̄г. Омав Ульяна Степановна хоса ат о̄лыс, а̄тимыг е̄мтыс. Ма̄н Мария яныг увщиювн янмалтавесӯв. Тав мо̄лалнув 90 та̄лэ̄т а̄тимыг е̄мтыс. Ань Ягрим пӯльницат рӯпитан нэ̄ Елена Бондарчук рӯпиты, тав ща̄не ма̄навн акваг нё̄тыс. Са̄литавесӯв, матыр тэ̄нутыл тотыглавесӯв. Ма̄н, ня̄врамыт, юн хультум матумпа̄ла хо̄тпатн э̄тэхо̄талэ сыс нё̄тсӯв. Та̄н ётаныл во̄раясӯв, хӯл алыщласӯв, пум ва̄рсӯв. Сыманув э̄тгалан порат, по̄люйрищит пувиянӯв ос исмитыг па̄йтыянӯв. О̄лупсав сака та̄рвитыӈ о̄лыс, са̄в саваласӯв ос воссыг хоталь ва̄рхатэ̄в. Таи ёмас о̄лыс са̄в сымыӈ ма̄хум халт о̄лсӯв. Ам са̄т класс Тагт па̄вылт а̄стламум юипа̄лт Ханты-Мансийский педагогический училищан э̄лаль ханищтахтуӈкве минасум. Тувыл тот а̄гмыӈыг е̄мтсум, таима̄гыс ханищтахтын ма̄ныл ёлпойтсум ос юв та минасум. Юн са̄всыр рӯпатан патхатыгласум. Матахмат та̄л ня̄врамыт ӯргалан колт рӯпитасум. Ня̄врамаквет ма̄гыс кас ва̄рмув порат, э̄рыгсовыт пианинал ёнгысанум. Ам амки баяныл, гитарал ёнгуӈкве ханищтахтасум. Ёсал ха̄йтыгтаӈкве а̄нумн о̄с мӯстыс. Па̄вылт ялпыӈ хо̄талыт о̄лум порат касылыт ва̄рыглаве̄сыт. Ам тот акваг ёсал ха̄йтсум ос но̄хпатыгласум. Юио̄выл щёс 72 та̄лумт ёсал ё̄мыгтасум. То̄нт ёлпатсум, ла̄глум хотум е̄мтыс, ань тыг мус а̄гмыӈ. О̄йкаме̄нтыл пенсиян патхатамуме̄н юипа̄лт Ягримн ва̄нтлысме̄н. Тыт яныг а̄гиме̄н о̄лыс. Тав инженер хо̄тпаг ханищтахтас, тыт рӯпитас. Па̄вылт депутатыг пе̄рия̄лвес. О̄йкам, ты а̄гим ос акв пыгум ань пуссын а̄тимыт. Тыт ань китыт а̄гим ёт о̄лэ̄гум, тав 60 та̄лэ то̄влыс. Ам ань маныр, юн ӯнлантэ̄гум, ӯщлахтэ̄гум. Пенсия олн выгум, округ ялпыӈ хо̄тал ос Победа хо̄тал кастыл олнанув мощ но̄хнё̄тумта̄лавет. Ялпыӈ хо̄талыт кастыл мӯйлупсал майлаве̄в. Мо̄лты Белоярский районныл мӯй хо̄тпаг ёхталасы̄г ос а̄нум Победа хо̄тал кастыл янытластэ̄н. Ам садикт рӯпитамум порат тэ̄н тув ялантасы̄г. То̄нт то̄ва ня̄врамаквет щар э̄типа̄ла мус садикт оссувлавет, ща̄няныла̄щаныл аим ат а̄стэ̄гыт. Ам ня̄врамыт амки палтум юв тотыгласанум. Ань таима̄гыс ты ла̄ве̄гум, ня̄враманын ул саватэ̄н, э̄румтым о̄ньще̄н. Та̄н ла̄тыӈ хӯнтлан хо̄тпаг вос яныгме̄гыт. Зинаида Фёдоровнан пӯмыщ потре ма̄гыс ма̄н пӯмащипа ла̄ве̄в, пус ка̄т, пус ла̄гыл таве̄н, То̄рум ёт, Отыр ёт!

1114 2015. 12. 18. Светлана РОМБАНДЕЕВА

Яныг утыт ос ма̄нь утыт Хохраит нЯ̄враманыл ёт На̄н ха̄хталахтэгы̄н, на̄н ва̄ӈксэгы̄н, консантыл тагталахтэгы̄н, лэ̄гантыл во̄ртхатэгы̄н! А̄ӈквалт е̄ӈта аскве ка̄салэгын? Ты сул тэ̄нэ те̄рыӈхомлахрищ та̄ра тэ̄м ас. Хӯлылына, а̄ӈквал тӣвырт ярыхтанэ̄тэ суйты, йӣв пури! Ма̄н, хохраит, не̄лманув ю̄нтуп хольт ощщат, пасыглап хольт пе̄лпыт. На̄н не̄лман асквен ма̄гумтэ̄н, те̄рыӈ хомлахрищ тэ̄нэ ма̄гыс конхасумтэлы̄н. На̄н сыман ат э̄тгалавет, ос во̄р йӣв ма̄гыс по̄льса. СО̄вруквет Со̄вруквет, пум кӣвырт ӯнлэ̄н, ул нёвсэ̄н! Саман ул рапщасэ̄н, палян ул нёвумтаптэ̄н! Туи, со̄вруквет, на̄н тыт нэ̄мхо̄тпан ат ка̄салаве̄н. На̄нан ха̄йтыгтаӈкве щар ат ро̄ви – атиӈк охсарн лё̄ӈхын атаяве. Хотьют акв ма̄т ӯнлы, тав лё̄ӈх ат о̄ньщи. Та со̄вырн пилуӈкв ат э̄ри. Ты потырохсаг «Яныг утыт ос ма̄нь утыт» нэ̄пакныл висагӯв, Е. И. Ромбандеева ма̄ньщи ла̄тӈыг толмащласаге, 1951 та̄л.

1114 2015. 12. 18. Александр ВЬЮТКИН

Соссаӈ ня̄врамыт ёнгын утаныл Мощ мо̄лалнув соссаӈ ня̄врамыт ёнгын утыт Ханты-Мансийск ӯст о̄лнэ «Торум Маа» музей колт суссылтаве̄сыт. Ты суссылтап рущ ла̄тӈыл «Мир детства» ла̄ввес. Ӯсыӈ ма̄т яныгман ня̄врамыт ма̄гыс тав ма̄к пӯмщиг о̄лыс. Та̄н вос ва̄гыт, манхурип ёнгын утыл па̄влыӈ ос ё̄рӈколыӈ ня̄врамыт ёнгасэ̄гыт. Ма̄нь ня̄врамыт маснутыт тот о̄с суссылтаве̄сыт. Та урыл Ирина Ксенофонтова потыртас, нэ̄ «Торум Маа» музейт научный сотрудникыг рӯпиты. Севастополь ӯст о̄лнэ хум Александр Сергиенко ня̄врамыт по̄слум хурияныл ма̄нь выставкан атыгласанэ. Тав «Живой журнал» нампа ма̄т хурит по̄слым рӯпиты. Хурит сунсыгламаныл юипа̄лт ня̄врамыт мо̄т колнакн ва̄нттуве̄сыт. Та̄н Мария Кузьминична Волдина ёт тот ва̄йхатасыт, ханты э̄ква та̄нанылн яныгмам та̄ланэ урыл потыртас. Та порат манырсыр ёнгын утыл ёнгасасыт, ос хунь тав о̄выл щёс ю̄нтуп ка̄тын вистэ. Ёхталам ня̄врамытн сака пӯмащ о̄лыс. Юв миннэ̄ныл порат а̄гирищит о̄маныл ёт титынтыг ёхталаӈкв ла̄вхатсыт.

1114 2015. 12. 18. Александр ВЬЮТКИН

Та̄нанылн ма̄нь та̄гыл ты урыл ва̄ӈкв э̄ри Ма̄н ма̄ньщи ос ханты газетагувт рӯпитан ма̄хум ва̄т са̄грапна̄л э̄тпос нилыт хо̄талт Ханты-Мансийск ӯст о̄лнэ «Солнышко» нампа садикн во̄выглавесӯв. Ма̄н хӯрум хо̄тпа ам, Ирина Самсонова ос Людмила Спирякова тув ялсӯв. Нэ̄г сас ханты ла̄тӈыл хаснэ «Ханты ясаӈ» нэ̄пакт корреспондентыг рӯпитэ̄г. Ма̄н тот ня̄врамытн ма̄нти о̄лупсав урыл, ханты ос ма̄ньщи маснутанув, хораманув ос са̄ӈквылтан утанув урыл потыртасӯв. Та хо̄тал округувт янытлан хо̄тал кастыл ва̄рыглавес. Ат группа тув ёхталас, хо̄тпан арыгтем са̄всыр яныт ня̄врамыт акв юипа̄лт ва̄нттата̄лым тув тотве̄сыт. Яныг колнакн щалтум ня̄врамыт акв ляпан ӯнтуӈкв кос тахсыт. Воспитателяныл та̄н ётаныл ворил ве̄ритым ла̄кква та̄нти ляпанылт ӯнттысаныл. Ма̄н ётув о̄лум хо̄нтхатыглап округ пе̄с пора урыл потрыл о̄вылтавес. То̄нт Ханты-Мансийск ӯс Остяко-Вогульск ӯсыг намаим иӈ о̄лыс, хумус та порат ма̄хум тыт о̄лсыт, маныр рӯпата ва̄рсыт. Тувыл ня̄врамыт титыглаве̄сыт хотьютаныл соссаӈ мир халт рӯт манос юрт ма̄хум о̄ньщи ман а̄ти. Ня̄врамыт халт ловмантем ня̄врам туп ма̄ньщи ос ханты рӯт хо̄тпа о̄ньще̄гыт. Тувыл ма̄н, газетагт рӯпитан ма̄хум, мощ ма̄нти рӯпатав урыл потыртасӯв. «Ханты ясаӈ» нэ̄пакт рӯпитан нэ̄г ханты мир маснутаныл урыл мощ потыртасы̄г. Ам ос потыртамум юипа̄лт пӯмащ ма̄гсыл «Куринька» ос «Са̄т тӯрхул тэ̄нэ та̄н» ма̄ньщи та̄ныг са̄ӈквылтасагум.

1115 2016. 01. 15. Николай МЕРОВ

Ня̄врамыт янытлан та̄л кастыл рӯпата ва̄раве Та̄л котиль э̄тпос 20 хо̄талэ̄т Нижневартовский район Излучинск па̄вылт ня̄врамыт ма̄гыс ялпыӈ хо̄тал щё̄питаве. Ты кастыл округ кӯщай нэ̄ Наталья Комарова о̄с тув мины. Тав та порат Нижневартовск ос Мегион ӯсыгт рӯпата щирыл яласаӈкве паты. Аквта хо̄талт Излучинск па̄выл школаинтернат колт округ янытыл са̄всыр ма̄т ня̄врамыт ёт рӯпитан ма̄хум акванатхатэ̄гыт тах. Ты та̄л сыс манырсыр рӯпата ня̄врамыт ма̄гыс ва̄руӈкве э̄ри, та̄н тот потыртахтэ̄гыт. Та̄л о̄вылтахтам порат округ мир э̄лыпа̄лт Наталья Комарова потыртас. То̄нт кӯщай нэ̄ 2016 та̄л ня̄врамыт янытлан та̄лыг намаястэ. Тав ла̄выс: «Югра ма̄т о̄лнэ ня̄враманув ёмас номтыл о̄луӈкве ханищтыянӯв, та̄н ве̄щкатыг ос пуста̄гыл э̄лаль вос яныгме̄гыт». Тыи ма̄гыс округ кӯщай ва̄ӈын хум Алексей Путин ня̄врамыт ёт рӯпитан ма̄хум акван ты атсанэ, та̄н аквъёт та̄л котиль э̄тпос 15 хо̄талэ мус номсахтуӈкве патэ̄гыт, ты та̄л сыс манырсыр рӯпата ня̄врамыт ма̄гыс ва̄руӈкве э̄ри. Ма̄хумаквет, на̄н о̄с матыр номт ке о̄ньщегы̄н, интернет хосыт ты сайтн хансуӈкве ве̄рмегы̄н: ugra2030. admhmao. ru Ке̄тум потранын та̄л котиль э̄тпос 29 хо̄талэ мус пуссын ёмщакв ловиньтавет тах. Округ мирколныл ке̄тым ля̄ххал ма̄ньщи ла̄тӈыл Николай МЕРОВ хансыстэ.

1115 2016. 01. 15. Александр ВЬЮТКИН

Мирн ва̄нэ ма̄ньщи хумиюв Нё̄рн ялыс Ма̄ янытыл мирн ва̄нэ ма̄ньщи хумиюв Руслан Проводников Раиса Алексеевна оматэ самын патум ма̄н ялыс. Та урыл Руслан тох ла̄выс: «Саранпа̄выл урыл номылматыгла̄лнэм порат, ам номтумт та̄ра омам номылматылум». Саранпа̄вылн Наташа э̄кватэ ёт ялыс. Ма̄ньщи хумиюв о̄выл хо̄талт боксын ялнэ ня̄врамыт халт касылн ялыс. Касыланыл округ намхо̄талэ янытлан кастыл о̄лыс. Пассаӈ ка̄тыл алхатнэ ва̄рмаль сунсуӈкв са̄в мир ёхталас. Ня̄врамыт каснэ порат та̄нтина̄ныл та̄ксар, ё̄р, нэ̄матарыл ат пилнэ хо̄тпаг суссылтасаныл. Наталья Проводникова касыл суснэ порат ла̄выс: «Ты пилыщма касылн ханищтахтын ма̄н Саранпа̄вылт а̄гирищит о̄с ялантэ̄гыт, ма̄н Ха̄льӯс па̄влувт ты касылн а̄гирищит ат ёхталэ̄гыт». Аквта э̄типа̄лаг Руслан ёт потыртан ма̄гсыл ма̄ньлат ма̄хум «Спорт Тайм» нампа колт атхатыгласыт. Ты кол хо̄т э̄тпос рӯпиты. Мо̄т хо̄талт Руслан э̄кватэ̄нтыл Нё̄р нупыл ялсы̄г, Парнук нампа базат э̄т хӯлсы̄г. Ханищтахтын ня̄врамыт ёт акванхо̄нтхатыгламаныл порат Руслан титыглавес: « Саранпа̄выл наӈын мӯстыс? » Тав ювле ла̄выс: «Нё̄ранын, нё̄тнэ во̄ранын ос сыстам лылые̄пын а̄нумн сака мӯстысыт! ». Руслан тот о̄лум нила хо̄таланэ сыс са̄в ва̄руӈкв а̄лымас. Саранпа̄выл каснэ ня̄врамыт са̄всыр мӯйлупсал тотыгласанэ, ка̄сыӈ ня̄врам мӯйлуптастэ, ёмас ла̄тӈыл ла̄выстэ. Любовь Стаканова те̄тум потре ма̄ньщи ла̄тӈыл Александр Вьюткин хансыстэ.

1115 2016. 01. 15. Тамара МЕРОВА

Кӯщаит Москван во̄виньта̄лве̄сыт 2015 та̄л оигпам э̄лыпа̄лт округ губернаторув Наталья Комарова Москва ӯсн ялыс. Кӯщаит та сапра̄ният «Развитие образования на 2013-2020 годы» тэ̄лат урыл потыртасыт. Россия Президентув Владимир Путин ня̄врамыт ханищтан хо̄тпат рӯпата олныл ойтнэ ва̄рмаль о̄вылтыт ла̄тыӈ тотыс. Тувыл а̄гмыӈмосыӈ, сакватахтам ня̄врамыт юн вос ханищтавет манос та̄наныл школан тотыглан порат э̄рнэ утыт ёвтым вос о̄лсыт. Наталья Комарова ты о̄вылтыт ювле тох ла̄выс, Юграт ханищтан хо̄тпат рӯпатаныл ма̄гыс олныл са̄внуве̄г ойтавет. Та̄рвит пора о̄лыглы ман а̄ти, та̄н сэ̄лнэ олнаныл о̄с но̄хнё̄тавет. Тувыл а̄гмыӈмосыӈ, сакватахтам ня̄врамыт пуссын уральтым о̄ньщавет. Та̄нанылн нё̄тмил ва̄руӈкве манос ханищтаӈкве пуссын матыра̄ти ва̄раве. Югра янытыл 21% са̄вит школатн щалтнэ̄ныл ма̄гыс э̄рнэ щирыл ӯнттуве̄сыт. Мо̄таныт ань о̄с щё̄питаӈкве патавет. Губернатор прессслужба ля̄ххалэ ма̄ньщи ла̄тӈыг Т. Мерован хасвес.

1115 2016. 01. 15. Валентина УЗЕЛЬ

Са̄ккон хаснэ хӯрум ма̄ Та та̄л оигпам э̄лыпа̄лт хӯрум я̄нас регион ма̄, тыи ма̄н округув, Ямало-Ненецкий округ ос Тюменский область ищхӣпыӈ ут хосыт халанылт потыртасыт. Рущ ла̄тӈыл ты рӯпата тох ла̄ввес – «Совет законодателей» . Ка̄сыӈ ма̄т яныг кӯщаит тинан по̄слын камера э̄лыпа̄лт ӯнлысыт, мо̄т ма̄т ма̄хум та̄наныл ва̄саныл ос потраныл хӯнтлысаныл. Ма̄н округув па̄лыл Б. Хохряков, С. Дегтярев, А. Сальников ос Е. Айпин потыртасыт. Салехард ӯст ос Тюменский область кӯщаит о̄с ӯнлысыт. Та̄н та̄нти рӯпатаныл урыл ос са̄кконыт урыл мо̄т ма̄хумн потыртасыт. О̄выл ла̄тыӈ ма̄н округув па̄лыл ла̄ввес. Округ Дума кӯщай Борис Хохряков мощ потыртас, тав юипа̄лэ̄т Ямал ма̄ныл ос тувыл Тюменский область депутатыт потыртасыт. Мо̄лтынув Россия Президентув Владимир Путин са̄ккон хаснэ ма̄хумн ла̄тыӈ те̄тыс, ла̄всанэ – маныр рӯпата э̄лаль ва̄руӈкв э̄ри. Ань ка̄сыӈ округ ман область планнэ̄пак вос хансы. Ты хосыт та̄н рӯпатаныл э̄лаль ва̄рункв тах патыяныл. Тувыл та̄н ты урыл потыртасыт – ка̄сыӈ ма̄ хӯрум ман нила хо̄тпат наманыл ла̄всаныл, та̄н Тюменский область па̄лыл вос янытлавет. Ма̄н округувт ты хо̄тпат тах янытлавет: А. Андреев, А. Смирнов – тэ̄н сас округ Дума депутатыг рӯпитэ̄г, ос С. Маненков – Белоярский район кӯщай хо̄тпа. Ты Советаныл о̄лум порат та̄рапатыс, 2016 та̄лт пе̄риян ва̄рмаль о̄ста ва̄раве. Тюменский область Думан депутатыт тах пе̄риявет. Ямал ос ма̄н округув Тюменский область нупыл хансым о̄лэ̄г. Ма̄н тах о̄с депутатыт тув пе̄рияӈкв патэ̄в.

1115 2016. 01. 15. Николай МЕРОВ

Округ Дума кӯщай рӯпататэ урыл потыртас Ювле хультум та̄лт ля̄ххал тотнэ колн округ Дума кӯщай Борис Хохряков ёхталас. 2015 та̄л сыс депутатанув манырсыр рӯпата ва̄рсыт, тав ты урыл потыртас. Кӯщай хум ла̄выс: «Щар яныг ёмас ва̄рмаль тамле о̄лыс округ бюджет мӯсхал щирыл пирмайтаслӯв. Номтыт о̄щнэ ва̄рмалянув пуссын тэ̄лаг ва̄рсанӯв. Рӯпатав о̄вылтахтан порат бюджетувт 187 миллиард солко̄ви о̄лыс. Та̄лув холнэ мус 30 миллиард солко̄ви са̄вит са̄внув олн холтсӯв. Ты хосыт тох ла̄вуӈкве ро̄ви, округ кӯщаюв, правительстват рӯпитан хо̄тпат ос депутатанув э̄рнэ тэ̄лат ма̄гыс олн хо̄нтсыт. Ты со̄пас олныт колыт ӯнттын ма̄гыс минасыт. Ма̄ньлат ще̄мьят кол ёвтнэ ма̄гыс субсидияолныл майве̄сыт. Та̄н 2010 та̄л па̄сныл ты олныт ӯрсыт. Тувыл са̄в ня̄врамыӈ ще̄мьят коланыл ӯнттын ма̄ ёвтнэ ма̄гыс ос олныл нё̄тве̄сыт. Тувыл мо̄лты та̄л ос акв программа пирмайтавес. Ты ва̄рмаль щирыл са̄внакпа колыт хотщё̄питан ма̄гыс ма̄хум олн ойтуӈкве патсыт. Йильпи колн ущты о̄лмыгтам хо̄тпатн ат та̄л ты олныт ойтуӈкве ат патэ̄гыт. Ос акв тамле ва̄рмаль урыл потыр о̄лыс. Юио̄выл порат Россиявт мирув са̄внув та̄л о̄луӈкве патсыт. Акв рӯпитан хо̄тпа халт китхӯрум пенсият о̄лнэ э̄лумхо̄лас о̄лы. Тыи ма̄гыс Россия Государственный Думат рӯпитан депутатыт ос акв тэ̄ла урыл ань потыртэ̄гыт хо̄тпа пенсиятэ мус са̄внув та̄л вос рӯпиты. Ля̄ххал тотнэ хо̄тпат округ Дума кӯщай хум ты урыл о̄с китыгласаныл. Тав ла̄выс, ты ва̄рмаль лӯима̄т о̄лнэ ма̄хум нупыл ат паты. Тыт ма̄хум та̄рвит рӯпатаӈ ма̄т о̄лэ̄гыт. Та̄н са̄ртыннув пенсиян минуӈкве тах патэ̄гыт. Ты тэ̄ла о̄влэ̄т ёмщакв ханищтаве, та̄рапаттаве, тувыл ущ матыр пирмайтаве. Округ Дума кӯщай мо̄т са̄в тэ̄ла урыл о̄с потыртас. Юио̄вылт пуссын ма̄хум йильпи та̄лыл янытласанэ.

1115 2016. 01. 15. Людмила ТЕТКИНА

Ня̄врамыт ма̄гсыл касыл «Ханты ясанг» ос «Лӯима̄ сэ̄рипос» ма̄н редакцияв ос «Югра лылые̄п» организация ня̄врамыт янытлан та̄л кастыл «Ими гордится Югра» нампа касыл ва̄ре̄г. Ня̄врамыт, на̄нки хансум потранын, стиханын ты э̄тпос 13 хо̄талныл ре̄тыӈ ю̄свой э̄тпос 15 хо̄талэ мус ма̄н редакциявн ке̄тэ̄н. Хӯрум номинация ва̄раве: «Гордость нашей семьи», «Люди труда» ос «На благо Югры». Жюрихо̄тпат 7-10, 11-15 ос 16-18 та̄л яныт ня̄врамыт халт ёмас потыр хансум хӯрум а̄гипыг пе̄рие̄гыт. Ос ре̄тыӈ ю̄свой э̄тпос ща̄нь ла̄тыӈ янытлан 21 хо̄талэ̄т ты но̄хпатум ня̄врамыт янытлавет. Я̄тил ня̄врамаквет, пищмат Ханты-Мансийск ӯс, Комсомольская ӯсхулы 31 колн ке̄тэ̄н. Ты коныпал ос интернет хосыт ты почтан пищма ке̄туӈкве ро̄ви: E-mai: luima@ugracom. ru. Ты касыл урыл рущ ла̄тӈыл интернетыт о̄с хансым о̄лы. Ты ва̄рмаль урыл ты телефоныт хосыт 8 (3467) 33-23-09 пӯмщалахтэ̄н ос китыглахтэ̄н.

1115 2016. 01. 15. Тамара МЕРОВА

Пенсия олныт та̄рапаттуве̄сыт Россия янытыл пенсионный фондыт мо̄т щирыл рӯпитаӈкв о̄вылтахтаманыл па̄сыл 25 та̄лыг е̄мтыс. Ты э̄лыпа̄лт та̄н пенсиян патхатам ма̄хум рӯпата та̄ланыл ловиньтасаныл ос тувыл олныл ойтсаныл. Ань та̄л сыс тэ̄нутыт, маснутыт, колыт ма̄гыс ойтнэ олныт ка̄сыӈе̄мт но̄хлаплавет. Таима̄гыс фондыт рӯпитан хо̄тпат пенсия олныт о̄с мощ но̄хнё̄тыяныл, рущ ла̄тӈыл ты тэ̄ла «индексацияг» ла̄ваве. Ты та̄л ре̄тыӈ ю̄свой э̄тпост пенсионерыт олнаныл 11, 4% са̄внуве̄г ловиньтавет. 2016 та̄лт туп ат рӯпитан пенсионерыт олнаныл но̄хнё̄тавет. Рӯпитан пенсионерыт олнаныл аквта са̄витыг хультуптавет. 2015 та̄л оигпам мус 1967 та̄лт самын патум хо̄тпат ос тыгыл ма̄ньлатнуве̄г о̄лнэ хо̄тпат пенсияныл «накопительный» щирыл акванатнэ ма̄гыс ка̄сащан ла̄тыӈ ке ла̄всыт, та̄н ётыл кит ма̄ныл пенсиял ойтуӈкве патавет. Та̄нанылн хӯлтуӈкве э̄рыс, та̄н государство палт олнаныл хультуптыяныл манос хотты негосударственный пенсионный фондын олнаныл мыганыл. Ла̄тыӈ нэ̄мхотталь ат ке̄тум хо̄тпат туп страховой пенсиял ойтуӈкв патавет. Аквтох пенсиян ущты патхатнэ хо̄тпат та̄нки документнэ̄паканыл мощ са̄ртыннув акван вос атыяныл. Ань э̄рнэ нэ̄паканылт то̄внакт хансым ла̄тӈыт ат торгамтахтэ̄гыт, печатьпо̄саныл ёмщакв ат на̄ӈке̄гыт. Ка̄сыӈ хо̄тпа тамле ва̄рмалит та̄ра вос паттыянэ, мӯсхалыг щё̄питыянэ ос тувыл тав пенсия олныл э̄рнэ торыг ловиньтаве. Матахмат э̄тпосн олнанэ юв ат пувавет. Пенсионный фонд то̄ва предприятият ёт ищхӣпыӈ ут хосыт потыртахтым ань рӯпитаӈкве патыс. Та предприятият э̄лумхо̄лас пенсиян патхатнэ̄тэ э̄лыпа̄лт «трудовой» нэ̄паке̄т хансум ла̄тӈыт пуссын по̄славет ос пенсионный фондын ке̄тавет. Тот нэ̄пак сунсаве ос матыр лю̄лиг ке о̄лы, ювле ла̄тыӈ ке̄тэ̄гыт. Ань та тэ̄лат ёмщакв щё̄питаӈкве а̄лымавет ке, э̄лумхо̄лас пенсия олнанэ та̄ра виӈкв патыянэ. Ты тэ̄лат урыл такви о̄с вос номсахты ос тэ̄ланэ э̄лаль ул вос лаквтыянэ. Ань округув янытыл 408 со̄тыра пенсионерыт о̄лэ̄гыт. Са̄в та̄л рӯпитам ос са̄в олн сэ̄лум хо̄тпа 18 со̄тыра 800 са̄вит солко̄вил ойтавет. Мощща та̄л рӯпитам хо̄тпа туп «социальный» нампа пенсиял ойтаве, тав округт «прожиточный минимум» са̄витыг олныл миве. Тувыл кит манос хӯрум ня̄врам о̄щнэ ще̄мьят «материнский капиталыг» ла̄внэ олнаныл о̄с фондытн уральтавет. Тамле сертификатнэ̄пакыт 95 со̄тыра 500 ще̄мьят о̄ньще̄гыт. Ань ты тэ̄ла 2018 та̄л оигпан мус э̄лаль тотвес. Та олныт хӯрум тэ̄лан холтуӈкве ро̄ви, ань акв ва̄рмаль о̄с тув хасвес. Тыи а̄гмыӈмосыӈ, сакватахтам ня̄врамыт пусмалтан ма̄гыс олныт холтуӈкве мивет. Ювле хультум та̄лыт сыс са̄выӈпа̄лэ ще̄мьят халт 89% колта̄гыл кол ёвтнэ ма̄гыс олнаныл холтсаныл. 10, 8 % ня̄враманыл э̄лаль ханищтан ма̄гыс холтсаныл, 0, 2 % са̄вит ща̄нит та̄нки пенсияныл ма̄гыс пинсаныл. Ос 2015 та̄л та̄рвитыӈ та̄лыг о̄лме ма̄гыс «материнский капитал» нампа сертификатнэ̄пакныл то̄ва ще̄мьят олныл миӈкве ла̄вве̄сыт. Та̄н та̄нки о̄лнэ ма̄нанылт нё̄тмил ма̄гыс заявлениенэ̄пак вос хансэ̄гыт ос та олнытыл хус со̄тыра солко̄вил тах та̄ставет. Заявленият ма̄ньполь э̄тпос налыман нупыл о̄выл щислатэ мус туп пирмайтаӈкве патавет. Тамара хатанева.

1115 2016. 01. 15. Валентина УЗЕЛЬ

Соссаӈ мирн нё̄тнэ Ассамблея кол рӯпиты Ювле хультум та̄л оигпам э̄лыпа̄лт округ Дума соссаӈ депутатанув сапра̄ни ва̄рыгласыт. Ма̄ньщи ос ханты ла̄тӈыг урыл потыртан ма̄гыс та̄н тув са̄всыр яныг кӯщаит во̄выгласаныл. Аквхуйплов та̄л ювле хультум порат, 2004 та̄лт, ма̄ньщи ос ханты мир ла̄тӈыг ӯргалан ос э̄лаль тотнэ ма̄гыс округ са̄ккон пирмайтавес, рущ ла̄тӈыл тох намаявес – «О языках коренных малочисленных народов Севера, проживающих на территории ХМАО-Югры». Ань ты са̄ккон щирыл ма̄хум рӯпитэ̄гыт ман а̄ти, ты тэ̄ла та̄рапаттын ма̄гыс кӯщаит ты атхатыгласыт. О̄влэ̄т ханищтан ва̄рмалит щирыл рӯпитан департамент кӯщай нэ̄ Любовь Ковешникова потыртас. Тав ла̄выс, ань округув хоты школатт ос хоты садикытт ма̄нь ня̄врамыт ханты ос ма̄ньщи ла̄тӈыл потыртаӈкве ханищтавет. Ня̄врамыт ханищтан ма̄хум та̄н о̄с нё̄тыяныл, са̄всыр касылыл ва̄рыглыяныл. Ань соссаӈ ня̄врамыт ханищтан учителит школатт рӯпитанэ̄ныл ма̄гыс савнув олныл ойтавет. Ты са̄ккон щирыл та̄н рӯпата олнаныл 25% са̄вит са̄внуве̄г о̄лэ̄гыт. Ос рӯпатанылт ма̄к яныг ва̄рмаляныл ты – ань ня̄врамыт ханищтан йильпи нэ̄пак а̄тим, э̄рнэ методический пособият, са̄всыр программат ос учебникыт пуссын йильпи щирыл хансуӈкв э̄ре̄гыт. Ты рӯпата ань А̄с-угорский институтт рӯпитан ма̄хум та̄н ты ва̄рияныл. Культура тэ̄лат урыл ма̄хум о̄с потыртасыт. Та̄н ань пе̄с ялпыӈ ма̄т, пӯрлахтын ма̄т ӯргалан ма̄гыс пуссын нэ̄пакн хансыяныл. Са̄всыр ханищтапыт ва̄рыглэ̄гыт, ка̄сащан ма̄хум тот ма̄ньщи манос ханты пе̄с пормасыт ма̄щтырлаӈкв ханищтавет. О̄лнэ ма̄в янытыл культура тэ̄лат э̄лаль тотнэ нёлолов центрыт рӯпитэ̄гыт, рущ ла̄тӈыл та̄н тох ла̄вавет – центры национальных культур. Та̄н э̄рнэ рӯпата кос ва̄ре̄гыт, ос сака мощща олныл мивет. То̄ват ос лаппантавет, ма̄щтырлан ма̄хум рӯпата та̄л та хультуптавет. Ловиньтан нэ̄пакыт урыл ты нэ̄ тох ла̄выс, ма̄ньщи ос ханты ла̄тӈыл хансым нэ̄пакыт ань библиотека колытн акванатавет. Ань ты хо̄тал мус та̄н 5 со̄тыра 202 са̄вит ханты ла̄тӈыл хансым нэ̄пак о̄ньще̄гыт, ма̄ньщи ла̄тӈыл – 2 со̄тыра 249 нэ̄пак. Нэ̄пак ловиньтан колытт рӯпитан ма̄хум са̄всыр рӯпата ва̄руӈкв патсыт. Та̄н палтыланыл са̄внув ня̄врам вос ёхталы, пӯмыщ касылыт ва̄рыглэ̄гыт. Касум па̄вылт садикн ялантан ма̄нь ня̄врамыт ёт тот рӯпитан хо̄тпат туп ханты ла̄тӈыл потыртэ̄гыт. Э̄рыӈ тох ня̄врамыт ща̄нь ла̄тӈыл потыртаӈкв ханьщувлэ̄гыт. Юн ща̄няныла̄щаныл та̄н ётаныл ос рущ ла̄тӈыл потыртэ̄гыт. Округ депутат нэ̄ Надежда Геннадьевна Алексеева сака ёмас ла̄тыӈ ла̄выс, ань яныгпа̄ла ма̄хманув акваг та мощщаме̄гыт. Ос яныгман ня̄врамыт пе̄с йис ва̄рмалитн, э̄ргуӈкв, йӣквуӈкв ханищтаӈкв э̄ре̄гыт. Пе̄с накыт урыл та̄нанылн акваг потыртаӈкв э̄ри. Та̄н ат те потыртавет, пе̄с о̄лупсав хотталь тах та со̄йми. Ань акв тамле ва̄рмаль осннэ̄глыс – соссаӈ ня̄врамыт халт то̄ваныл ёмас специальность о̄ньще̄гыт. Ос рӯпатан нэ̄мхотталь ат вивет. Тыкос округувт культура са̄всыр центрыт рӯпитэ̄гыт. Рущ ман мо̄т ма̄хум халт акваныл тув рӯпитанкв те вуйвес, тувыл та, пуссын рӯтанэ ман такви ма̄хманэ тув та выганэ. Щар акв соссаӈ хо̄тпа тув ат виве. Ты урыл потыртаманыл юипа̄лт, атхатыглам кӯщаит ла̄всыт – ань ма̄ньщи ос ханты ла̄тыӈ э̄лаль тотнэ ма̄гыс ёмащакв рӯпитаӈкв э̄ри. Ты йис о̄лупсав сака молях мины, матыр номт те о̄ньще̄в, тэ̄лаг ва̄руӈкв э̄ри. Ма̄н юипа̄лувт яныгман ня̄врамыт рущ ня̄врамыт хольт яныгме̄гыт, ща̄нь ла̄тӈув ат ва̄ганыл, пе̄с о̄лупсав ат ва̄щинтасаныл. Таима̄гыс ты та̄наныл пе̄с о̄лупсан ханищтаӈкв э̄ри.

1115 2016. 01. 15. Светлана РОМБАНДЕЕВА

Ла̄тӈув ос культурав ӯргалаве Ва̄т са̄грапнал э̄тпос 16 хо̄талэ̄т Ханты-Мансийск ӯст ханищтап департамент колт соссаӈ мир ла̄тӈаныл ос культураныл урыл потыр о̄лыс. Ты хо̄нтхатыглап округ кӯщай ва̄ӈын хо̄тпатэ Геннадий Бухтин ва̄рыглас. Ма̄ньщи ос ханты хо̄тпат тув о̄с во̄выгласанэ. Потыр грант нампа ва̄рмаль урыл о̄лыс. Ты йист са̄всыр хащта̄л утыт ква̄лтапаптуве̄сыт, грантыг ла̄вавет. Ань хо̄тпа матыр тэ̄ла ва̄руӈкве номылматы те, тав грант минэ организациян э̄рнэ нэ̄пакыт ке̄ты. Тот нэ̄паканэ ёмащакв ловиньтавет, тэ̄латэ хо̄йхаты те, нэ̄паканэ пирмайтавет. Ос ат те а̄ртми, нэ̄паканэ ювле ке̄тавет. Тув са̄в ма̄хум ла̄тыӈ ке̄тыгла̄лэ̄гыт, ос туп ма̄к ёмас, э̄рнэ тэ̄лат но̄хпатэ̄гыт. Ётыл но̄хпатум хо̄тпа округ Правительство па̄лыл нё̄тмил олныл миве, номылматам тэ̄латэ ты олнытыл ва̄руӈкве патытэ. Геннадий Бухтин ла̄вме щирыл, соссаӈ мир ла̄тӈаныл ханищтан манос культураныл но̄хво̄рмалтан тэ̄лат ва̄рнэ ма̄гсыл ты та̄л са̄внув олн миве. Э̄рнэ нэ̄паканыл ань вос щё̄питыяныл, кӯщаит палт вос ке̄тыяныл. Ты хо̄нтхатыглапын ёхталам ма̄хум ёт округ янытыл районытт о̄лнэ хо̄тпат потыртаӈкве о̄с ве̄рмысыт. Ты ма̄гсыл ищхӣпыӈ ут ва̄рыглавес, та мат утаныл хосыт ка̄сыӈ хо̄тпа ка̄салаӈкве ро̄выс, халанылт пуссын потыртаӈкве ве̄рмысыт. Белоярский район кӯщай ва̄ӈын хумитэ Степан Молданов тох ла̄выс: «Ма̄н соссаӈ ма̄хманув матыр рӯпата ва̄руӈкве ул кос таӈхе̄гыт, ос э̄рнэ нэ̄пакыт мӯсхал щирыл хансуӈкве ат ха̄сэ̄гыт, ищхӣпыӈ ут ёт рӯпитаӈкве о̄с торыӈыщ ат ха̄сэ̄гыт. Та̄нанылн хотмус нё̄туӈкве э̄ри. Ма̄нь па̄влытт ос во̄рыӈ ма̄т манса̄вит соссаӈ ма̄хум о̄лы, то̄ват туп та̄нти ла̄тӈанылт потыртэ̄гыт, потырсуяныл сома вит хольт ови. Ма̄ньщи ос ханты ня̄врамыт ма̄гыс ща̄нь ла̄тыӈ ханищтан курсыт ва̄руӈкве э̄ри, та̄нти ла̄тӈаныл ма̄нь та̄гыл вос ва̄ганыл». Геннадий Бухтин тав ётэ та̄ра ка̄сащас, ла̄выстэ – тав ань грантолн винэ ма̄гыс э̄рнэ нэ̄пакыт вос щё̄питы. Ос хотьют ат те ха̄сы э̄рнэ нэ̄пакыт хансуӈкве, акванатуӈкве ос комиссия палт ке̄туӈкве, тав та ма̄хманувн нё̄туӈкве ла̄выс. Ты нё̄тмил олныт урыл кӯщай хум тох ла̄выс: «Ты олныт То̄рум ма̄гыс хунь мивет. Соссаӈ ма̄хум э̄лы хо̄таланыл кӯпнитнуве̄г вос е̄мты, ва̄рнэ рӯпатаныл тэ̄лаг вос е̄мтэ̄гыт, мирн вос ка̄салавет». Ханищтап департамент колт рӯпитан нэ̄ Валерия Александровна Безуевская ма̄ньлат хо̄тпат урыл аквкит ла̄тыӈ ла̄выс: «Ма̄ньщи ос ханты ня̄врамыт школа а̄стлан юипа̄лт янгыщ училищатын ханищтахтуӈкве минэ̄гыт. Са̄в хо̄тпа Ханты-Мансийск ӯст о̄лнэ профколледжит ханищтахты. Высший образование тэ̄лан ос янгыщ ЮГУт ханищтахтэ̄гыт. О̄лупсанылт та̄н э̄рнэ рӯпата пе̄рие̄гыт, ханищтахтэ̄гыт, тувыл та̄ра рӯпитаӈкве та о̄вылтахтэ̄гыт. Китыглахтан ла̄тыӈ са̄в о̄лыс. Ма̄нь па̄влытт о̄лнэ соссаӈ ма̄хманув ищхӣпыӈ ут хосыт татем та потыртасыт. Та̄н э̄лынт о̄лэ̄гыт, китыглахтан ла̄тыӈ са̄в о̄ньще̄гыт. Та̄н ань янгыщ ща̄нь ла̄тӈаныл урыл потыртасыт, ты ма̄гыс сыманыл ща̄рге̄гыт.

1115 2016. 01. 15. Александр ВЬЮТКИН

Ма̄вит ос во̄руй ӯргалан ма̄хум рӯпатаныл Ва̄т са̄грапнал э̄тпос са̄тхуйплов хо̄талт округ янытыл ма̄вит ос во̄руй ӯргалан ма̄т рӯпитан ма̄хум совещанияныл о̄лыс. Акванатхатыгламаныл порат та̄н та̄л сыс ва̄рум тэ̄ланыл урыл потыртасыт. Совещание о̄вылтан э̄лыпа̄лт Юрий Васильевич Василенко ёт потыртасӯв, тав округув янытыл во̄руй ос во̄р ӯргалан кӯщаиг о̄лы. Тав ла̄выс: «2015 та̄л сыс акв со̄тыра 600 са̄всыр лю̄ль ва̄рум ма̄хум пувинта̄лве̄сыт. Та̄н халанылт 524 хо̄тпа во̄раян ма̄т пувве̄сыт, та̄н лицензия та̄л во̄раясыт. Тувыл ань са̄т хо̄тпа ёт полиция рӯпиты. Ма̄н та̄н нэ̄паканыл сутн те̄тсанӯв. Та̄н лицензиянэ̄пак ат о̄щнэ̄ныл порат во̄руй ка̄тынпаттын ма̄т ма̄вит ос во̄руй ӯргалан ма̄хмытн пувве̄сыт. Пувим хо̄тпат яныгса̄т налыман со̄тыра солко̄ви са̄вит яныт штрафыл пинве̄сыт. Хум потыртан ма̄ныл а̄стуме юипа̄лт сапра̄нияныл та о̄вылтавес. Ма̄вит ос во̄руй ӯргалым округ янытыл кӯщаиг о̄лнэ хум Сергей Владимирович Пикунов тох ла̄выс: «Ма̄н округув янытыл са̄в я̄ӈкылма о̄лы ос яласан лё̄ӈх а̄тим, таима̄гсыл ма̄навн та̄рвитыӈнув рӯпитаӈкв. Товлыӈха̄пыл яласан ма̄гсыл са̄в о̄лн э̄ри. Ма̄навн ань спутник та̄ра ма̄вит уральтаӈкв тынта̄лнуве̄г о̄лы, «Дистанционное зондирование земли, дешифрирование космических снимков» ты рӯпата рущ ла̄тӈыл тох ла̄ваве. Спутникыл по̄слым хуриянув щирыл кӯстырнуве̄г рӯпатав мины. Ня̄враманув ма̄гсыл ма̄в сыстамыг хультуптан урыл са̄внув ма̄хум номсахтуӈкв патсыт. Матыр мори те хуйгалы манос порс со̄сантан йильпи ма̄ ка̄салэ̄гыт ке, ма̄хум та̄ра ма̄н палтув свонитэ̄гыт. Тыи сака ёмас, ма̄навн мӯсты. Тувыл ам ма̄во̄й ос газ но̄хвинэ ма̄хум рӯпатаныл урыл ла̄вуӈкв таӈхе̄гум. Округув янытыл пуссын аквъёт 172 со̄тыра ма̄ щунит но̄хвинэ скважина рӯпиты. Ма̄во̄й ос газ мо̄т ма̄н те̄тнэ «газопровод» те̄р тӯрыт палытаныл 112 со̄тыра ве̄рыстан пиным о̄лэ̄гыт. 2014 та̄л сыс тит со̄тыра 537 са̄всыр яныг авария е̄мталас. Ты та̄л сыс акв со̄тыра 195 авария мощщануве̄г о̄лыс. Округув янытыл попутный нампа газ щаритан 693 ма̄т на̄й тэ̄г. Ма̄н, ма̄вит ос во̄руй ӯргалан ма̄хум, та̄н рӯпатаныл ва̄тихал уральтым, тармылӯрим о̄ньщилӯв».

1115 2016. 01. 15. Светлана РОМБАНДЕЕВА

Ня̄врам ханищтан хо̄тпа Ха̄льӯс район Восыӈтӯр па̄выл школат Ольга Кузьминична Пажгина рӯпиты, тав о̄выл классытт ня̄врамыт ханищты. Рӯпататэ ос о̄лупсатэ урыл мощ потрамас, на̄н ань э̄лаль тав потре ловиньтэлы̄н. –Ам 1960 та̄лт самын патсум, ханты нэ̄, а̄ги о̄парищ намум Молданова. Ща̄нягума̄щагум соссаӈ хо̄тпаг, Ванзеват па̄вылт о̄лсыг. Омам Акулина Александровна, 1926 та̄лт самын патыс. А̄тям Кузьма Илларионович Молданов, 1925 та̄лт самын патыс. Тав яныг хо̄нтын ялыс, хо̄нтлыс. Юв ёхталас, Ветеран ВОв нам о̄ньщис, 1987 та̄лт а̄тимыг е̄мтыс. 1976 та̄лт Ванзеват па̄выл школа а̄стламум юипа̄лт Ханты-Мансийск ӯс педучилищан ханищтахтуӈкве минасум. Хунь училищам а̄стласлум, ты па̄вылн ке̄тве̄сум. Ань ты хотал мус тыт та о̄лэ̄гум, рӯпитэ̄гум. Хум ва̄рсум, ня̄враманме̄н тыт самын патсыт. Акв пыг, кит а̄ги о̄ньщиме̄н. Та̄н ань пуссын яныгмасыт, ще̄мьяӈыг е̄мтсыт, образование о̄ньще̄гыт, рӯпитэ̄гыт. Кит яга̄ги, акв каӈк о̄ньще̄гум. Каӈкум ос ма̄нь яга̄гим Белоярский ӯст о̄лэ̄г. Яныг увщим Ванзеват па̄вылт о̄лы. Ма̄н омав колта̄гылт такте̄т о̄лыс, а̄тяв о̄с тактерище яныгмас. Ам хунь янгыгнуве̄г е̄мтсум, китыглахтэ̄гум, ос манрыг ам а̄кв, ный, сасыг ос аки ат о̄ньще̄гум, а̄ӈква̄ги ос а̄ӈквпыг ат о̄ньще̄гум. Ам юрта̄гиянум пуссын са̄в рӯт о̄щсыт. Та порат улпыл ка̄сыӈ колта̄гыл са̄в ня̄врамыӈыг о̄лыс. Омам то̄нт ла̄выс, та̄н колта̄гланылт тав такте̄т самын патыс, а̄тяв о̄с аквтох, таима̄гыс ляпа рӯт ат о̄ньще̄в. Ане̄квам, ащо̄йкам ос о̄пам ам ат номиянум. Щаще̄квам Дарья Леонтьевна 76 та̄л мус о̄лыс. Ханты ла̄тӈыл пе̄с йис мо̄йтыт акваг мо̄йтыглас. Ам ань то̄ванакт хотты ханты мо̄йт ловиньтэ̄гум, амтирот номсэ̄гум, ты мо̄йт щаще̄квав мо̄йтыглас. Тав о̄лте̄т сака нё̄тнэ̄г ю̄нтыс, ма̄щтырлас. Белоярский ӯст о̄лнэ яга̄гим Ирина Кузьминична Фирсова «Народный мастер» намыл маим о̄лы. Тав нё̄тнэ маснутыт ю̄нты. Э̄щтем улпыл щаще̄квав хольт ань та щаквщи, хораманэ, па̄квпаланэ татем ма̄щтырыт, нё̄тнэт. –Ольга Кузьминична, па̄выл ня̄врамыт ща̄нь ла̄тӈыл потыртэ̄гыт? – А̄ти, ат потыртэ̄гыт. Ма̄н школавт ханты ла̄тыӈ нэ̄мхуньт ат ханищтавес. Ма̄ньщи ла̄тыӈ тай мощ ханищтэ̄гыт. Ванзеват ос Тэ̄к па̄выл ня̄врамыт ща̄нь латӈыл потыртаӈкве татем ха̄сэ̄гыт. Тот а̄гирищитпыгрищит школан то̄ванакт ханты супыл ёхталэ̄гыт, ла̄тыӈ ханищтэ̄гыт. Тыт, Восыӈтӯрт, са̄всыр мир о̄лы, ма̄н, соссаӈ хо̄тпат, та̄н халанылн тэ̄лыгласув, туп рущ ла̄тӈыл потыртэ̄в. Ня̄врамыт ща̄нь ла̄тыӈ аты хӯлыглэ̄гыт, хумус таве ва̄ӈкве патыяныл, рущ ла̄тӈыл потыртым та яныгме̄гыт. Ам 1991 та̄л мус интернатт воспитателиг рӯпитасум. Та порат па̄влувт интернат о̄лыс. Тувыл о̄выл классытт ня̄врамыт ханищтаӈкве паттуве̄сум. Школат рӯпитанэм ва̄т нупыл атыт та̄лыг ты е̄мты. Ты та̄л ам лов ня̄врам ханищтэ̄гум. Рӯпатам э̄руптылум, ка̄сыӈ ня̄врам янытлылум. Ольга Кузьминична хо̄тпа нупыл сымыӈ нэ̄. Таве̄н ам са̄в ёмас ла̄тыӈ ла̄ве̄гум! Пуста̄гыл вос о̄лы, То̄рум ёт, О̄тыр ёт вос о̄лы!

1115 2016. 01. 15. Людмила ТЕТКИНА

Во̄раян ос хӯл алыщлан нэ̄ Ха̄льӯс район Ня̄хщамво̄ль па̄вылт Наталья Рогалева, такви о̄парищ наме Тасманова, о̄лы. Тав во̄раяӈкве ос хӯл алыщлаӈкве сака ха̄сы. Ма̄ньщи нэ̄ мотор ха̄пыл ос «Бураныл» такви яласы. Манхурип во̄руй ка̄тынпаттыглас, та урыл Наталья китыгласлум. Тав ювле тох потыртас: – Ма̄н ще̄мьявт хӯрум а̄ги яныгмасӯв. А̄тям во̄раяӈкве хунь щё̄питахтас, ам тав ётэ со̄выр лэ̄с ӯнттуӈкве акваг ёт во̄ратасум. Во̄рн ёхтыме̄н, тав ӯнттум лэ̄санэ̄т со̄врыт о̄лэ̄гыт, ам ӯнттум лэ̄санум по̄хат туп нас ха̄йтыгтасыт. А̄тямн ла̄вве̄сум: «Лэ̄с ӯнттуӈкве о̄с ха̄суӈкве э̄ри, ёмащакве сунсэ̄н, ам хумус ва̄ре̄гум ос аквта щирыл ва̄ре̄н». Тох со̄выр лэ̄с ӯнттуӈкве ханищтахтасум. Ань рущ нупыл о̄лэ̄в, со̄выр лэ̄с ке̄р ква̄лгыл ва̄риянум. Со̄врыт ат ювыт, та̄ра ое̄гыт. Ща̄нюм ла̄ви, ты ке̄р ква̄лыг улпыл пасы, ты ма̄гсыл со̄врыт э̄лын ха̄йтыгтэ̄гыт. Тэ̄лы порат ке̄рняль ӯнттэ̄гум ос нёхыс ка̄тынпаттыглэ̄гум. Нёхыс хоты ма̄т ха̄йтыгты, хумус ос хоты порат ке̄рняль ӯнттуӈкве, о̄с а̄тямн ханищтуве̄сум. Амки писаль ат о̄ньще̄гум, о̄йкам писале ёт во̄рн ялантэ̄гум. Щёпыр, а̄ӈха ос кисуп па̄тлуптэ̄гум, ва̄с ёхтын порат ос ва̄с ӯруӈкве ялантэ̄гум. Ня̄хщамво̄ль па̄вылныл а̄лгаль тӯр о̄лы, туи порат тув са̄в ва̄с исыглы. Акв порат амкем тув минасум, сака хоса ӯнлысум, сака хоса ӯрхатсум, тувыл таса̄вит ва̄с ёхтыс. Ам туп па̄тлуптаӈкве а̄лыме̄гум, то̄нт тай са̄в ва̄с алсум. Юв ёхтысум, ща̄нюм ёт ва̄с маныгтаӈкве ӯнтсуме̄н. Ща̄нюм акв ва̄с вистэ, а̄нумн ла̄ви: «Наӈ тай ха̄сэ̄гын, ва̄с пуӈке та̄ра па̄тамтаслын, щар ювелирыг о̄лэ̄гын». То̄нт ос ты ва̄рмаль урыл сака хоса мовиньтасме̄н. Са̄в ва̄с хунь ёхты, тай сака пӯмащ, па̄тлуптаӈкве туп а̄лымен. А̄нумн са̄внув патрон туп маен, ще̄пын а̄нумн туп тохрен. Надя ос Галя яга̄гиягум лэ̄с ӯнттуӈкве ха̄сэ̄г ос писаль ка̄тын виӈкве пилэ̄г. Ам тай ат пилэ̄гум, писаль ёт во̄рт сака молях ха̄йтыгтэ̄гум. Па̄тлуптаӈкве ща̄нюмн ханищтуве̄сум. Ща̄нюм ёт толгуӈкве ялантыме̄н. Ам ха̄пыл минэ̄гум, ща̄нюм ос я̄ ва̄тат толгув харттытэ. О̄влэ̄т тай толгуӈкве пилсум, моторыл минэ̄гум, нас то̄рыгтавем, ща̄нюм я̄ ва̄тат ро̄ӈхи хоталь минуӈкве. О̄влэ̄т ат ве̄рмысум, мо̄т ма̄н тотавем. Ха̄пум яныг, мо̄т ма̄н хо̄е̄гум. А̄латы лю̄ньще̄гум, ща̄нюм ос ла̄ви: «Ул пилэ̄н, ёмащакве минэ̄н, ёмащакве хартэ̄н». Ань тай ханьщувласум, толгуӈкве о̄с ха̄сэ̄гум. Ня̄врамагум хӯл алыщлаӈкве ёт о̄с во̄выглыягум. Виолетта а̄гим каскан па̄хвты, няслы. Тав спиннинг ос са̄всыр мо̄т утыт акваг во̄ви. Пыгум Володя тувле тэ̄латэ щар а̄тим. Пыгумн тай щар нэ̄матыр ат э̄ри. Во̄рн минэ̄в, такос ёт во̄вилум, ат таӈхи. А̄гим щёпыр па̄тлуптаӈкве вуйласлум, таве̄н тай пӯмащ о̄лыс. Володя нё̄тнэ лӯпта хольт юн ӯнлы. Ща̄нюм ла̄ви, во̄рн ялуӈкве ань ат таӈхи, мощ яныгми, пӯмщалахтуӈкве тах паты. Ня̄хщамво̄ль па̄вылт о̄лнэ хо̄тпат во̄раян ма̄ пуссын о̄ньще̄гыт. Ме̄н Алексей о̄йкаме̄нтыл ос во̄раян ма̄ о̄ньщиме̄н, нэ̄пакыт э̄рнэ щирыл пуссын ва̄рсанме̄н. Мо̄лты та̄лт тот во̄ркол ӯнттысме̄н. Ща̄нюм ос Надя ме̄наме̄н нё̄туӈкве ялсы̄г. Лё̄ӈхе сака хоса, туп тэ̄лы порат «Бураныл» тув ёхтуӈкве ро̄ви. О̄йкам тот тэ̄лы порат во̄раи. Наталья ща̄не Татьяна Семёновна Тасманова Нёрахи па̄вылт о̄лы, тав о̄с во̄раи, хӯл алыщлы. Наталья тав палтэ туи порат ха̄пыл мины, тэ̄лы порат ос «Бураныл» тув яланта̄лы.

1115 2016. 01. 15. Людмила ТЕТКИНА

Кимкъясуй па̄вылт о̄лнэ колта̄гыл Клавдия Ивановна Вынгилева Кимкъясуй па̄вылт 1978 та̄л па̄сныл о̄лы. Ма̄ньщи нэ̄ школа а̄стламе юипа̄лт Салехард ӯст культпроссвет училищат ханищтахтас, тувыл Кимкъясуй па̄вылн рӯпитаӈкве ке̄твес. Та па̄вылн ялмум порат ма̄ньщи нэ̄ ёт хо̄нтхатыгласум, Клавдия Ивановна такви о̄лупсатэ урыл таи потыртас: –Ам Ло̄пмус па̄вылныл о̄лэ̄гум. Са̄тыт класс Кульпаст а̄стласлум. Тувыл нёлолов классн Сортыӈъя па̄вылн ке̄тве̄сум, школат тот ханищтахтасум. Ты юипа̄лт акв та̄л Ло̄пмус па̄вылт о̄лсум, ханищтахтан ма̄гсыл олн мощ сэ̄лсум, садикыт рӯпитасум. 1974 та̄лт Салехард ӯсн минасум. Та порат тот са̄в ма̄ньщи а̄ги ханищтахтас. 1978 та̄л училище а̄стласлум, рӯпитаӈкве ке̄тве̄сум. О̄влэ̄т номсысум, ятаты, Ямал ма̄т о̄лнэ ма̄нь па̄вылкве̄н рӯпитаӈкве тах ке̄тавем, хоталь туп ла̄глыл манос са̄лыӈ суныл ёхтуӈкве ро̄ви. Тувыл матъёмас нэ̄пак ёхтыс, Ха̄льӯс район ма̄гсыл рӯпитан ат хо̄тпа э̄рыс. Ма̄н хӯрум а̄ги: Наталья Камаева, Людмила Филиппова ос ам ювле яныгмам ма̄н рӯпитаӈкве во̄вхатсӯв. Мо̄т группат ханищтахтан кит а̄гииг ос Ха̄льӯс район рӯпитаӈкве минасы̄г. Ам Ха̄льӯсн ёхтумум порат та̄ра Кульпасн ке̄тве̄сум. Тот мирколт рӯпитам ма̄хумн Кимкъясуй па̄вылн минуӈкве ла̄вве̄сум. Та порат тыт Володя Таратов мо̄йтыӈ клубт рӯпитас. Тав хотталь мо̄т ма̄н минуӈкве сака молямлас, ам аты ӯщлахтасум, та̄ра рӯпитаӈкве патсум. Кит та̄л клубт рӯпитасум, тувыл хум ва̄рсум, ня̄врам янмалтым юн о̄лсум. Георгий Васильевич Вынгилев о̄йкам ёт 37 та̄л о̄лсуме̄н, кит та̄л ювле хультум порат тав а̄тимыг е̄мтыс. Ат ня̄врам: акв пыг Ваня ос нила а̄ги Аня, Юля, Оля ос Оксана янмалтасме̄н. Оля а̄гим Хулюмсӯнт па̄вылт колта̄глэ ёт о̄лы, мо̄таныт пуссын тыт ам ляпамт о̄лэ̄гыт, пуссын ще̄мьяӈыт, та̄нки ня̄врамыӈыг е̄мтсыт. Ань 13 апыгрищ о̄ньще̄гум. Клубн рӯпитым са̄всыр ялпыӈ хо̄талыт ва̄рыгласум. Та порат па̄вылт са̄в мир о̄лыс, а̄гитпыгыт клубн йӣквуӈкве акваг ёхталасыт. Па̄влыӈ мир телевизор ат о̄щсыт, клубн кина сунсуӈкве ёхталасыт. Тувыл ня̄враманум ёт юн акваг о̄лым, та рӯпатаныл по̄хан минасум. 1991 та̄лт ма̄нь а̄гим Оксана о̄выл классн ханищтахтуӈкве минас. Та порат ам школат нэ̄пак ловиньтан колт рӯпитаӈкве патсум. Ма̄ньщи супыт, а̄канит ю̄нтсум, турло̄псыт, па̄льсакыт хартсум ос са̄всыр сувенирыт ва̄рсум. Ю̄нтум пормасанум Кульпасн ке̄тсанум. Ма̄щтырлым 2005 та̄л мус рӯпитасум. То̄нт Кимкьясуй па̄вылт на̄йпос туп 12 щёс мус тэ̄с, ам ос лампа по̄хыт ю̄нсхатасум. Тувыл самагум лю̄льсаӈ ка̄салэ̄г, ю̄нтсхатуӈкве воссыг ат патсум. Омам ма̄щтырлаӈкве сака ха̄сыс, тав акваг ю̄нсхатас. Номилум, ма̄ниг о̄лсум, а̄нум такви ляпатэ̄т ӯнттытэ ос ю̄нсхатуӈкве ханищтастэ. То̄нт ам иӈ ня̄врам, кон ха̄йтыгтаӈкве ос ёнгасаӈкве воратэ̄гум. Матъёмас ю̄нтуп ка̄тыт пувуӈкве ханищтастэ. Рӯпата та̄л о̄лым, ма̄ньщи супыт ю̄нтым, тох олн сэ̄лсум. Ань Клавдия Ивановна школат библиотекариг рӯпиты. Ювле хультум та̄л йильпи колыл майвес. Ма̄ньщи нэ̄ хосат социальный найм щирыл о̄лнэ очередин хасхатым о̄лыс. Тав са̄в та̄л урхатас, 2015 та̄л лӯпта э̄тпост йильпи колн ва̄нтлас. Клавдия Васильевна ты урыл ла̄выс: «Ты э̄лыпа̄лт ма̄н ма̄нь пе̄с колт о̄лсӯв. Ам очередин хосат та̄гыл хасхатасум, э̄рнэ нэ̄паканум Кульпасн акваг ке̄тыгласанум. Ты очередь ма̄гсыл нэ̄пакыт ка̄сыӈ та̄л ке̄туӈкве э̄рыс. Са̄в та̄л ӯрхатасум, туп ань йильпи колн ва̄нтласӯв. Ань Кульпас па̄выл мирколн ялантэ̄гум, йильпи кол нэ̄паканэ ва̄риянум. Пыгум ще̄мьятэ ёт ам по̄хамт о̄лы, о̄с колыл майвес, тэ̄н э̄кватэ̄нтыл нила ня̄врам о̄ньще̄г. Ты э̄лыпа̄лт о̄лнэ колэ̄н на̄йн ё̄свес, са̄в та̄л савалым ня̄враманэ̄н ёт ма̄нь пе̄с колт о̄лсы̄г. Ань тай ёмас, яныг йильпи колыл майвесы̄г». Ам ты ма̄ньщи нэ̄кве̄н паща ла̄тыӈ ке̄тэ̄гум ос йильпи та̄л кастыл янытлылум. Пуста̄гыл э̄лаль вос о̄лы, То̄румн ос О̄тырн вос ӯргалаве.

1115 2016. 01. 15. Александр ВЬЮТКИН

Соссаӈ мир ма̄щтырлан тэ̄ла Ювле хультум э̄тпос хусыт хо̄талэ̄т соссаӈ ма̄щтыр ма̄хум ёт рӯпитан хо̄тпат акванатхатыгласыт. Та̄н та̄л сыс ва̄рум рӯпатаныл урыл ос ущтынув о̄лум «Живая традиция» нампа суссылтап урыл потыртасыт. Сапра̄нияныл о̄вылтан порат хурит по̄слан о̄йка Геннадий Райшев ла̄выс: «Ань ты акванатхатнэ тэ̄лав ма̄навн, ма̄щтырыг о̄лнэ ма̄хмытн, сака э̄ри. Ка̄сыӈ ма̄щтыр такви щире̄т пӯмащ хо̄тпа, таима̄гсыл тав ка̄таге̄тыл ва̄рим пормасыт нё̄тнэ̄г тэ̄лэ̄гыт. Та̄н ва̄рум рӯпатаныл нупыл хоса сунсуӈкв ро̄ви, торасыг манос марщумыг ат е̄мты. Округув янытыл са̄выӈпа̄лэ нэ̄ хо̄тпат ма̄щтырлэ̄гыт, хум хо̄тпа та̄н халанылт мощща. Манрыг тох е̄мтыс, нэ̄мхотьют ат ва̄гтэ. Тав улпыл таима̄гыс, хум хо̄тпанув нас та̄нти пормасаныл ман ва̄рнутаныл по̄хан ат суссылтыяныл». Тувыл Геннадий Степанович тит ка̄т тӯпыг висаге. Акватэ пе̄с порат ва̄рима, мо̄танэ мощ мо̄лалнув ва̄рвес. Ты тӯпыг манрыг са̄всырыг, акв щирыл ат сусхатэ̄г, та урыл э̄лаль потыртас: «Хуньт са̄грим пе̄с ка̄т туп та порат хищраӈ щирыл ва̄рим о̄лы. Ты тӯпыл товуӈкв сака кӯстыр, ка̄тын ёмщаквег ро̄ви. Тувыл сунсэ̄н йильпи тӯп нупыл, тав тыкос хорамыӈыг, ёмщаквег ёргувес. Акв тэ̄латэ лю̄ль таве̄нтыл товуӈкв щар ат хо̄йхаты. Сохтыл ва̄рима ма̄гсыл, аквтупмат нас па̄ртыл тове̄гын. Ты ма̄гсыл ха̄п э̄лаль ат лакви». О̄йка юипа̄лт пе̄с йис о̄лупсав ханищтан учёный хантыэтнограф нэ̄ Татьяна Александровна Молданова потыртас. Тав ла̄выс: «Мощ мо̄лалнуве «Живая традиция» нампа о̄лум суссылтап пӯмщиг а̄ртмыс. Пормасыт тув округ янытыл атсанӯв. Та выставкан ма̄к э̄рнэ щирыл ва̄рим пормасыт тотсанӯв. Ань ты йист ты кос са̄в ма̄щтыр хо̄тпа ма̄щтырлы. Та̄н халанылт са̄выӈпа̄лэ пе̄с щирыл ат ма̄щтырлэ̄гыт. Молях ва̄рнэ̄ныл ма̄гсыл ань са̄всыр ощхулиӈ утыл ю̄нтыяныл ос яктыяныл. Ат ро̄внэ щирыл ва̄рим пормас пе̄с йис пормасыг ат ловиньтахты». Э̄лаль соссаӈ ма̄щтыр ма̄хум ёт рӯпитан нэ̄ Наталья Николаевна Фёдорова потыртас. Тав ла̄выс: «Ма̄к ма̄щтырыг о̄лнэ хо̄тпат ёт рӯпитаӈкв, та̄наныл матарыл нё̄туӈкв, аквписыг э̄ри. Тамле хо̄тпат ма̄н, учёныиг о̄лнэ ма̄хум, сака э̄руптыянӯв. Ма̄н та̄нанылныл о̄с ханищтахтэ̄в. Пе̄с щирыл ма̄щтырлан ма̄хумн нё̄тнэ ма̄гсыл ма̄н 1993 та̄лт «Союз мастеров традиционных народных промыслов – Югры» ос «Со̄рни ка̄т» нампа кол ва̄руӈкв номылматсӯв. Матъёмас ма̄н та порат ты кол пӯнсыслӯв. Ма̄щтыранув ульнаг ат хультсыт. Тувыл хус арыгтем та̄л минас, ты сыс са̄в пӯмащ тэ̄ла хотёрувлахтуӈкв ве̄рмыс. На̄н пе̄с о̄лупсан ос ма̄щтырлан наканын ма̄гсыл ам сымум сака ща̄рги. Ань ма̄навн ма̄ньлат ма̄хум э̄рнэ щирыл ханищтаӈкв э̄ри. Хумус ма̄н номсэ̄в, тох те е̄мты на̄н пе̄с пормасанын, пе̄с наканын иӈ хосан хультэ̄гыт».

1115 2016. 01. 15. Николай МЕРОВ

Пе̄с йис о̄лупса урыл кина суссылтавес Ханты-Мансийск ӯс «Ма̄вит ос э̄лумхо̄лас» нампа музейт рӯпитан ма̄хум «Сибирский шаманизм» ос «Боги и духи» кит кинаг мирн суссылтасыт. Ты тэ̄ла ма̄гыс ӯст о̄лнэ са̄в соссаӈ хо̄тпа тув ёхталас. Кина суссылтан э̄лыпа̄лт ма̄ньщи пыг Руслан Вьюткин нэ̄пак хаснэ хум Юван Шесталов хансум стихотворениятэ ловиньтастэ ос ко̄йп ра̄тыс. Та юипа̄лт ос са̄ӈквылтапыл нё̄тнэ та̄ныт ёнгыс. Тувыл Александр Витальевич Конев, ты кинаг по̄слуӈкве номылматан хум, потыртас. Тав ла̄выс: «Округув онтырса̄т нупыл ат та̄лэ то̄влын кастыл ам на̄нан пуссын сымыӈыщ янытлыянум. Югра ма̄т о̄лупсав ёмасыг е̄мтнэ ма̄гыс тыт о̄лнэ ка̄сыӈ хо̄тпа са̄в ё̄р пиныс, са̄в рӯпитас. Музейт рӯпитан хо̄тпат сака э̄рнэ рӯпата ва̄ре̄гыт, та̄н пе̄с йис накыт э̄лаль тотыяныл. Тыи ма̄гыс та̄нанылн яныг пӯмащипа ла̄тыӈ ла̄ве̄гум. Округувт о̄лупсав хумус о̄лыс, хумус ань о̄лы ос хумус э̄лаль мины, ма̄к та̄н ты э̄лы нотн тотыяныл. Соссаӈ мирыт урыл са̄в научный нэ̄пакыт та̄ратавет, археологыт са̄в пе̄с йис ма̄ хо̄нтсыт, ос ты урыл кина сака мощща по̄слувес. Ам ос таӈхе̄гум, ты ва̄рмаль урыл са̄внув мир вос ва̄нув. Таима̄гыс кинат по̄слуӈкве вуйхатасум. Ам амки Ханты-Мансийский район Чегутово ма̄нь па̄вылт самын патсум. Ётылнув ос Селиярово па̄вылн колта̄глыл ва̄нтлысӯв, тот яныгмасум. Па̄выл ляпат во̄рыӈ ма̄т соссаӈ ма̄хум о̄лсыт. Ма̄н та̄н ётаныл сака юртыӈыщ о̄лсӯв. Та̄н па̄вылн ёхталаманыл порат акваг ма̄н палтув хӯлсыт. Яныгпа̄ла хо̄тпат са̄в пе̄с потыр потырта̄лсыт. А̄нумн та̄наныл хӯнтлуӈкве сака мӯстыс. Ётыл янгыг е̄мтсум, амкирот номсэ̄гум, ты йис ва̄рмаль э̄лаль тотуӈкве патылум. Ань номтумт о̄щнэ ва̄рмалянум тэ̄лаг ты ва̄рсанум». «Ма̄вит ос э̄лумхо̄лас» музейколт са̄в пе̄с пормасыт атым о̄лэ̄гыт. Та̄н тот ӯргалым о̄ньщавет. Ты кинаг суссылтан хо̄талт музейколн кит хумыг во̄выглавесы̄г. Ты пе̄с йис о̄лупса ва̄нэ А̄с ма̄ньщи хум Никита Партанов ос Ка̄сум па̄вылныл о̄лнэ ханты хум Тимофей Молданов, тэ̄н о̄влэ̄т пе̄с йис пормасыт урыл потыртасы̄г. Тувыл ос кина суссылтавес. Ты кинагт соссаӈ ма̄хум о̄лупса урыл учёный ма̄хум ос мо̄т са̄в хо̄тпат, хотьют соссаӈ мир о̄лнэхӯлнэ накыт ёмщакв ва̄ганэ, та̄н потыртасыт. На̄н ты кинаг сунсуӈкве ка̄сащегы̄н ке, интернет хосыт округ культура департамент сайтыт сунсуӈкве ве̄рмилы̄н. Тот соссаӈ ма̄хум урыл по̄слым кинат пуссын о̄лэ̄гыт.

1115 2016. 01. 15. Светлана РОМБАНДЕЕВА

Ма̄ньщи ос ханты газетаг урыл потыр о̄лыс Яныг таквс э̄тпос 27 хо̄талэ̄т ма̄н редакциявн («Лӯима̄ сэ̄рипос» ос «Ханты ясаӈ» газетаг ва̄рнэ колн) миркол па̄лыл кӯщай нэ̄ ёхталас, Вера Викторовна Царёва. Тав округ кӯщай ля̄ххал тотнэ ва̄рмалянэ тармыл пуӈк тоты. Таквсы ма̄н ань ла̄тыӈ хӯлсӯв, мирколт рӯпитан кӯщаит ма̄ньщи ос ханты газетаг ва̄рнэ кол лаппантуӈкве номсащлахтэ̄гыт. Ань о̄лупсав та̄рвитыӈыг е̄мтыс, са̄в мир рӯпатаныл по̄ханке̄тве̄сыт, то̄ва колыт лаппантве̄сыт. Та̄н хунь тыстэ̄гыт, тох номсэ̄гыт те, со̄ль, тах газетагув лаппантапаве̄г. Ятаты, ань Ханты-Мансийск ӯст о̄лнэ ма̄ньщи ос ханты ма̄хум уракта̄л та патсыт. Редакциявн соссаӈ мир округ Дума депутат хо̄тпа Т. С. Гоголева ос Венгрияныл ёхталам учёный нэ̄ Чилла Хорват ёхталасы̄г. Т. С. Гоголева ла̄выс, ма̄н ань ул вос хурахлэ̄в, газетаг нэ̄мхотьютн лап ат пантаве̄г, тамле газета ма̄ янытыл воссыг нэ̄мхо̄т а̄тим. Ма̄н ма̄нти ма̄вт о̄лэ̄в, ща̄нь ла̄тыӈ газета та̄л хумус о̄луӈкве патэ̄в. Ань мир титынтыг та атхатас, ма̄н В. В. Царёва э̄лыпа̄лт вос потыртэ̄в, хумус рӯпитэ̄в, газетагув ма̄ньщи ос ханты ма̄хманувн ловиньтаве̄г ман а̄ти, газетат хоталь ке̄тыглыянӯв. О̄влэ̄т яныг кӯщаюв Раиса Германовна Решетникова тав ла̄тыӈ ла̄выс. Потыртас, хумус ма̄н рӯпитэ̄в, газетаг ка̄сыӈ па̄вылт ӯраве̄г, ловиньтаве̄г. Ща̄нь ла̄тӈыл хаснэ̄в коныпал ма̄н ка̄сыӈ потыр рущ ла̄тӈыл толмащлылӯв, ищхӣпыӈ ут хосыт матыра̄ти ань пуссын ловиньтаӈкве ро̄ви. Ма̄ньщи газета кӯщай ва̄ӈын нэ̄ Валентина Васильевна Узель «Лӯима̄ сэ̄рипос» газетав урыл потыртас – хотьют манхурип рӯпата ва̄ри, хоталь яланта̄лэ̄в, маныр урыл хансэ̄в. Тамара Сергеевна Мерова та урыл ла̄выс, ань газета ва̄рнэ колт рӯпитан ма̄хум э̄лы хо̄н ма̄т о̄лнэ финноугорский мирыт ёт ва̄йхатэ̄гыт, халанылт юртыӈыщ о̄лэ̄гыт, аквъёт рӯпитэ̄гыт. То̄ва корреспондентанув мирхал ма̄т ва̄рыглым конкурсытт но̄хпатыгла̄лсыт, янытлан нэ̄пакытыл майлуве̄сыт. «Ханты ясаӈ» газета кӯщай ва̄ӈын нэ̄ Надежда Владимировна Рагимова ня̄врамыт ма̄гыс ханты ла̄тӈыл хансыглым «Хатлые» нэ̄пак урыл потыртас, ма̄ньщи ла̄тӈыл ла̄вуӈкве те – «Хо̄талакве». Корреспондент Людмила Тихоновна Спирякова «Солдаты Обского Севера» нэ̄пак урыл ла̄тыӈ ла̄выс. Яныг хо̄нт порат соссаӈ хо̄тпа са̄в хо̄нтлыс. То̄ва пе̄с нэ̄пакытт ма̄н ма̄хманув урыл мо̄т щирыл хансым о̄лы. Людмила Тихоновна ла̄вме щирыл, та̄н щар ма̄к э̄рнэ потрыт акванатсаныл, нэ̄пакыг ва̄рсаныл. Тувыл В. В. Царёва тав ла̄тыӈ вис: «На̄нан ка̄салан ос на̄н ётын потраман ма̄гыс тыг ам округ кӯщай ва̄ӈын нэ̄тэн Елена Шумакован ке̄тве̄сум. Ам ань таса̄вит пӯмыщ потрыт хӯнтлысум, на̄н ётын ӯнлахо̄луӈкве татем ёмас. На̄н, атхунь, э̄рнэ тэ̄ла ва̄регы̄н, ща̄нь ла̄тӈыл газетат ос ня̄врамыт ма̄гыс журналыт хансэгы̄н. О̄лупсав ань сака та̄рвитыӈыг е̄мтыс. Округ бюджетныл ань туп э̄рнэ рӯпатат ойтуӈкве патавет. Таима̄гыс ка̄сыӈ солко̄ви ма̄гыс хо̄тпа рӯпататэ суссылтаӈкве патытэ – маныр ва̄рыс, манса̄вит ва̄рыс, ва̄рум тэ̄латэ мирн э̄ри ман а̄ти. Ты юипа̄лт олныл тах ущ ойтаве. Ос ма̄к таи: на̄н, ма̄ньщи ос ханты ма̄хум, юн ща̄нь ла̄тӈыл ат те потыртэгы̄н, ла̄тӈын хумус э̄лаль о̄луӈкве паты. Ня̄враманын на̄нти ла̄тӈын ат те хӯлыяныл, ат те ханищтыяныл, мо̄т ла̄тӈыл потыртым та яныгме̄гыт. Сунсэ̄н, хатань ма̄хум ла̄тӈаныл хотталь со̄ймын нупыл а̄латы патыс, ща̄нь ла̄тӈыл ханищтан кит школа туп рӯпитас. Ань тот са̄в тамле школа рӯпиты, ма̄хум хо̄та̄ти пуссын хатань ла̄тӈыл потыртэ̄гыт. На̄н о̄с тох ва̄руӈкве ве̄рмегы̄н. Ма̄н экспертный Совет ва̄руӈкве номсэ̄в, округ янытыл ля̄ххал тотнэ ма̄т тав пуӈк тотуӈкве паты. То̄ва ма̄хум наманыл ма̄н тув хассанӯв, ань ма̄ньщи ос ханты хо̄тпат хансыянӯв, тувыл та̄н рӯпитаӈкве та о̄вылтахтэ̄гыт. Ты Совет ва̄та̄л нэ̄матыр сака ва̄руӈкве ат патаве. Кос выгув, хо̄тпа хансум потре нэ̄пакыг ва̄руӈкве хо̄йхаты ман а̄ти, пуссын та̄н номсуӈкве патэ̄гыт, ка̄саще̄гыт те, нэ̄пакыг ва̄раве. Ты коныпал мо̄т са̄в тэ̄лат та̄н уральтаӈкве патыяныл. На̄н ва̄рнэ тэ̄лан о̄с осыт о̄лы – хумус рӯпитэгы̄н, манса̄вит потыр хансэгы̄н, маныр урыл хансэгы̄н – кӯщаитын пуссын на̄ӈки». Нэ̄ тох та потыртас. Ань тамле йист та о̄лэ̄в, тох та пащралаӈкве патвесӯв. Ва̄рнэ рӯпатав, хансум потранув та маныр пуссын ань ёмащакв уральтаӈкве ос ловиньтаӈкве патыяныл. Матыр та ва̄ре̄гыт, та̄н кӯщаит. Ма̄н ос хумус рӯпитасӯв, хумус хассӯв, газетав э̄лаль о̄с аквтох та̄ратаӈкве патылӯв. Туп акв номт о̄ньще̄в: ма̄ньщи ла̄тӈув вос о̄лы, ма̄ янытыл вос суйты.

1115 2016. 01. 15. Тамара МЕРОВА

Пормасыт ва̄руӈкве ханищты Мо̄лты та̄лт Ягрим па̄выл ам ня̄врамытн нё̄тмил ва̄рнэ «Росток» нампа колн щалтсасум. Тот а̄гмыӈмосыӈ, сакватахтам ня̄врамыт ёт рӯпитан хо̄тпаг ёт ва̄йхатасум. Тэ̄н мастерскойколнаке̄т ня̄врамыт ханищтасы̄г ос та рӯпататэ̄н о̄вылтыт а̄нумн мощ потыртасы̄г. Владислав Забродин а̄гирищитпыгрищит сыресыр пормасыт ма̄щтырлаӈкве ханищтыянэ. Тав тох ла̄выс: «Ам ня̄врамыт ёт матыр ёрге̄гум, по̄щге̄гум ос па̄рт тармыл исум солиӈ ке̄рыл хурит по̄слуӈкве ханищтыянум. Ма̄н сака та̄рвитыӈ рӯпата ва̄руӈкве та̄н ётаныл ат ве̄рме̄в. Ты а̄гмыӈмосыӈ ня̄врамыт ка̄танылла̄гланыл ва̄гта̄лыт, то̄ват тыг нас тотыглавет. Ке̄рныл тыт нэ̄матыр ат ва̄ре̄в, пенопластыл матыр ва̄ре̄в, рактыл по̄щге̄в, йӣвныл ёрге̄в. Пормасыт та̄н мӯсхалыг ва̄рияныл. Сыресыр пормасыт ва̄рнэ ма̄гыс э̄рнэ щаӈквыт ма̄н о̄ньще̄в. Ка̄сыӈ ня̄врам осэса̄йтэ ёмщакв ва̄глӯв, таима̄гыс таве ро̄внэ рӯпатал пӯмщалылӯв. Тамле ня̄врамыт ёт ам лов та̄л рӯпитэ̄гум. Та̄наныл ёмщакв ханищтан ос мощ пусмалтан ма̄гыс ма̄н сыресыр диагностика щё̄питасӯв ос ва̄тихал уральтыянӯв. Ам Курганский область Шадринский педагогический институт а̄стласум. Ань номсыте̄мт, ня̄врамыт ханищтан ка̄сыӈ хо̄тпа школат рӯпитанэ̄тэ э̄лыпа̄лт тамле ня̄врамыт ёт вос мощ рӯпитанув. То̄нт такви рӯпататэ ос ня̄врамыт нупыл мо̄т самыл сунсуӈкве паты». Мо̄т колнакт ты а̄гирищитпыгрищит пормасыт ю̄нтуӈкве, ня̄нь коласныл ёнгын утыт ва̄руӈкве ос тэ̄нут па̄йтуӈкве ханищтавет. Ты о̄вылтыт ам ханищтан нэ̄ о̄с я̄нас китыгласлум, ме̄н потруме̄н 13 ло̄псыт ловиньтэлы̄н.

1115 2016. 01. 15. Тамара МЕРОВА

Ва̄рнутаныл мирн мӯйлуптыяныл Анастасия Александровна Кофанова Ягрим па̄вылт «Росток» нампа колт а̄гмыӈмосыӈ, сакватахтам ня̄врамыт ёт рӯпиты. Тав рӯпитан колнакэ̄т а̄гирищитпыгрищит сыресыр пормасыт ю̄нтуӈкве, ма̄щтырлаӈкве ханищтыянэ. Такви рӯпататэ о̄вылтыт тав тох потыртас: – Ам тамле ня̄врамыт ёт хӯрумхуйплов та̄л рӯпитэ̄гум. Тюмень ӯст училищат ханищтахтасум ос тыт рӯпитаӈкве патсум. Тыт рӯпитанэм сыс Челябинский педагогический университет а̄стласлум. А̄гмыӈмосыӈ, сакватахтам ня̄врамыт ёт ка̄сыӈ хо̄тпа юрщхатуӈкв ат ве̄рми. Тамле ня̄врамыт ёт рӯпитан ма̄гыс ве̄ритаӈкв э̄ри ос та̄н ётаныл ма̄к сымыӈыщ о̄луӈкве э̄ри. То̄ва а̄гирищитпыгрищит коррекционный класс щирыл ханищтахтуӈкве тыг тотыглавет. Акв ма̄т ӯнлын ня̄врамыт палт ма̄н ма̄нки юв ялантэ̄в. Ты ня̄врамаквет палт мори э̄лумхо̄лас ат яланты. Та̄н ле̄ккарытн пусмалтавет ос ма̄н та̄нанылн ханищтаӈкве ялэ̄в. Та̄наныл ва̄тихал уральтаӈкве ос ка̄тыл ва̄рнэ рӯпатал пӯмщалаӈкве э̄ри. Тох ла̄гланыл ос ка̄таныл мощ нёвитыяныл ос та̄кмалтыяныл. Акв са̄т сыс ма̄н кит манос хӯрум щёс акванхо̄нтхатыгла̄лэ̄в. Уроканув о̄с са̄всыр пора щирыл о̄лыглэ̄гыт. То̄ва ня̄врам ёт 15 кум ёмщакв рӯпитэ̄в, тувыл таве̄н ӯщлахтуӈкве э̄ри. Мо̄таныт тыгыл са̄внув ӯнлуӈкве ве̄рме̄гыт. Ты мастерскойколнакт ма̄н то̄рныл а̄канит ю̄нтэ̄в, матыр ва̄ре̄в, тэ̄нут па̄йтуӈкве ханищтыянӯв. Маснут ю̄нтнэ ма̄гыс машина о̄ньще̄в, тэ̄нут па̄йтнэ ма̄гыс плитал ёвтувесӯв. Сака та̄рвитыӈ рӯпата ва̄руӈкве та̄н ва̄руӈкве ат ве̄рме̄гыт. Молях ва̄гта̄л патэ̄гыт, исум ща̄йпут нас ща̄ил та̄ртуӈкве, муӈи па̄йтуӈкве ос муӈи щаритаӈкве ханищтыянум. Сакати ва̄ганыл, хумус тэ̄нут щё̄питаве. Маныр тыт па̄йтэ̄в, тувыл пасан щё̄питэ̄в ос ма̄нки ювта̄япиянӯв. Та̄нанылн тыи сака мӯсты, ты мус рӯтаныл э̄лыпа̄лт э̄ссыгхатэ̄гыт, маныр ва̄руӈкве та̄н ханьщувласыт. Ягримт о̄лнэ са̄всыр та̄л яныт а̄гмыӈмосыӈ ня̄врамыт китхӯрум хо̄тпаг уртым акванатыглавет ос тыг урокын тотыглавет. Ма̄н ка̄сыӈ ня̄врам я̄нас ханищтылӯв ос акваннё̄тхатым матыр ва̄ре̄в. Ма̄н таи ла̄вуӈкве таӈхе̄в, ка̄тыл ва̄рим пормасанув са̄всыр касылн ке̄тыянӯв ос мӯйлупсал миве̄в. Ме̄н Владислав Забродин ёт ня̄врамыт ва̄рнутаныл «Дикая мята» мирхал касылн ке̄тыгласанме̄н. Ты касыл таима̄гыс ёмас, тав дистационный щирыл ва̄рим о̄лы, тув рӯпатат ос потранув са̄ртын хури щирыл ке̄тавет ос кӯщаит ётыл ущ ювле ла̄тыӈ ке̄тэ̄гыт. 2014 та̄лт ма̄н тот о̄выл места вислӯв. Ха̄льӯс районт ва̄рим касылыт ма̄н о̄с касыглэ̄в, ка̄сыӈ та̄л мӯйлупсал майлаве̄в. Тамле ва̄рмалит ма̄н та̄ра ты паттысанӯв. Ты колнак ма̄нь, тот ва̄рум пормасаныл пуссын акванатуӈкве ат ве̄рмияныл. Ня̄врамыт та̄нки рӯтанылн, юртанылн мыганыл манос ялпыӈ хо̄талыт ва̄рнэ порат па̄влыӈ ма̄хумн мӯйлуптыяныл.

1115 2016. 01. 15. NO DATA

Яныг утыт ос ма̄нь утыт ӈын нЯ̄враманэ ёт Тарыгквен но̄хха̄ӈхе̄н, пружина хольт тов о̄вылт нёвумтахтэ̄н, сохтыл ва̄рапахтэ̄н ос порыгме̄н. Ховтныл тарыг палт итапе̄н, тарыгкве̄ныл ха̄пка палт порыгме̄н, ха̄пканыл ха̄ль палт итапе̄н, ха̄льныл нирщахыл тӣвырн порыгме̄н, нирщахныл ма̄н порыгме̄н. Ма̄ хосыт йӣв тытн ха̄йтлыгтэ̄н. Акв товныл нуминув товн, акв товныл нуминув товн итапа̄нтэ̄н, ос йильпииг щар нуми таляхн ха̄ӈхе̄н! Па̄кв палкалтэ̄н, па̄квсам та̄е̄н ос йильпииг акв йӣвныл мо̄т йӣвн порыгма̄нтэ̄н. На̄н, лэ̄ӈынквет, пуӈкан пе̄лпыт, ка̄тла̄гылке̄н таглиӈыт, лэ̄ган посум щуртнут хурипат – хоталь ё̄ӈхыгпа̄лы, тувле та тыламлэгы̄н. Вот на̄н манхурип апрыӈыт! Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1115 2016. 01. 15. Людмила ТЕТКИНА

Ямал ма̄ныл тотым суссылтап Ханты-Мансийск ӯст «Ма̄вит ос Э̄лумхо̄лас» нампа музейт акв пӯмащ суссылтап щё̄питавес. Салехард ӯсныл «И. С. Шемановского» нампа музейныл «Люба» нампа ма̄нь ма̄харакве тув тотвес. 2007 та̄л порат Ямал ма̄т са̄лы ӯрнэ хо̄тпа Юрий Худи я̄ ва̄тат таве хо̄нтыстэ. Музейт рӯпитан хо̄тпат та̄ра тув во̄всанэ. Ма̄хум ты ма̄харакве музейн тотсаныл ос полям ма̄н пинсаныл. Са̄лы ӯрнэ хум ма̄харакве «Люба» э̄кватэ намыл пиныстэ. Ты юипа̄лт ма̄харакве Япония ма̄т тотыглавес, учёный хо̄тпан тот хоса ханищтавес. Та̄н ла̄всыт, Люба 42 со̄тыра та̄л ювле хультум порат самын патыс, акв э̄тпос туп о̄лыс. Ма̄ниг о̄лме порат витын щалтыс. Учёный хо̄тпат ма̄харакве ханищтаманыл порат тав хо̄псаге̄т вит хо̄нтсыт. Ань ты ма̄харакве ма̄ янытыл суссылтым тотыглаве. Хунь хо̄нтвес, та̄рвитэ 50 кила са̄витыг о̄лыс. Учёныит матыр ва̄рсыт, ань та̄рвитэ туп 30 кила са̄витыг е̄мтыс. Ма̄харакве Япония, Франция, Голландия ос США мо̄т хо̄н ма̄т суссылтавес. Ханты-Мансийск ӯс суссылтап ва̄т са̄грапнал э̄тпос 22 хо̄талэ̄т рӯпитаӈкве о̄вылтахтас. Выставка сунсуӈкве са̄в ма̄хум ёхталас. Музей кӯщаиг рӯпитан нэ̄ Светлана Лазарева ла̄выс: «Округув янытыл хо̄нтым ма̄хар лувыт о̄с тыт суссылтыянӯв. Музеювт рӯпитан ма̄хум хус та̄л ювле хультум порат Ханты-Мансийск район Луговской па̄вылт по̄хат ма̄хар лувыт хо̄нтсыт. 2016 та̄лт ма̄н щё̄питам суссылтапанув Салехард ӯсн о̄с тах тотыянӯв». Выставка ты э̄тпос 31 хо̄талэ мус рӯпитаӈкве тах паты.

1116 2016. 01. 29. Людмила ТЕТКИНА

Кӯщай нэ̄ Наталья Комарова Москва ӯсн во̄виньта̄лвес Та̄л котиль э̄тпос 21 хо̄талэ̄т Россия Правительстват яныг сапра̄ни ва̄рыглавес. Правительства кӯщай хум Дмитрий Медведев ня̄врамыт ханищтан ва̄рмаль урыл тув ёхталам ма̄хум потыртаӈкве во̄виньта̄лсанэ. Тав ла̄выс, ань ня̄врамыт са̄всыр кружокн, секциян ялантэ̄гыт. Тот та̄н са̄всыр ищхӣпыӈ утыт хосыт ханищтавет. Тув ялантым, ня̄врамыт ёмаснувег ханищтахтуӈкве о̄вылтахтэ̄гыт. Ос то̄ват э̄рнэ профессия та̄нки ма̄гсыл пе̄рие̄гыт ос школа а̄стлан юипа̄лт э̄лаль ханищтахтуӈкве минэ̄гыт. Ты э̄рнэ рӯпата ань ва̄раве, ос ня̄врамыт ханищтан колыт нё̄туӈкве патавет. Ханищтап ва̄рмаль щирыл рӯпитан министр Дмитрий Литвинов ла̄выс, са̄всыр кружокыт, секцият акваг са̄вмалтавет. Ань ханищтахтан ня̄врамыт халт 65% са̄вит а̄гитпыгыт тув ялантэ̄гыт. Округ кӯщай нэ̄ Наталья Комарова ты сапра̄нит ханищтан ва̄рмаль урыл о̄с потыртас. О̄влэ̄т тав технопарк урыл ла̄тыӈ ла̄выс. Ты кол таквсы порат ӯсувт рӯпитаӈкве о̄вылтахтас. Ня̄врамыт са̄всыр тэ̄латн ищхӣпыӈ ут хосыт тот ханищтавет. Ань ка̄сыӈ ханищтан кол рӯпатаныл ма̄гсыл олн виӈкве ве̄рме̄гыт. Рущ ла̄тӈыл ты ва̄рмаль «Услуги дополнительного образования» намаим о̄лы. Сапра̄нит Наталья Комарова ты урыл ла̄выс: «Вузыт ос колледжит ня̄врамыт ёмащакв ханищтаӈкве ве̄рмавет. Ты рӯпата ма̄гсыл та̄н са̄всыр ищхӣпыӈ утыт о̄ньще̄гыт. 2016 та̄лт ма̄н хӯрум йильпи класс тах ва̄ре̄в, ня̄врамыт тот инженерыг ханищтаӈкве патавет. Рӯпатав мӯсхалыг ке мины, то̄нт ма̄н тамле ва̄рмаль округ янытыл ва̄ре̄в. Ты юипа̄лт школат акв смена щирыл рӯпитаӈкве тах патэ̄гыт». «Югра» нампа ля̄ххал колныл ке̄тым потыр ма̄ньщи ла̄тӈыл Л. Теткина хансыстэ.

1116 2016. 01. 29. Светлана РОМБАНДЕЕВА

Пенсия урыл ля̄ххал Ля̄ххал тотнэ ма̄хум РИЦ «Югра» колн ты э̄тпос 18 хо̄талэ̄т во̄выглаве̄сыт. Тув округув янытыл рӯпитан НПФ (негосударственный пенсионный фонд) кӯщай Алексей Анатольевич Охлопков ёхталас. Ля̄ххал потыр пенсия урыл о̄лыс, тох намаявес: «Новшества в пенсионной системе России». Кӯщай хум ла̄вме щирыл, ань та̄л котиль э̄тпос о̄выл хо̄талэ̄ныл пенсия олныт мо̄т щирыл ловиньтаӈкве патавет. Хотьют пенсия олнанэ Россия пенсионный фондныл НПФ ке̄туӈкве ат те а̄лымас, юв та хультыс. Тав олнанэ воссыг са̄вмуӈкве ат патэ̄гыт, туп страховой охсатэ хульты. Алексей Анатольевич ла̄выс: «Таи сака са̄ль, ань пенсия олныт йильпииг ловиньтан тэ̄ла ма̄хманув са̄выӈпа̄лэ тохи ат торгамтасаныл. Ты тэ̄ла ва̄рнэ ма̄гыс ма̄н са̄в рӯпитасув – Россия янытыл о̄лнэ НПФ 30 миллион арыг хо̄тпа хасхатасыт. Та̄н пенсия олнаныл ань тыгыл э̄лаль НПФ ёт са̄вмуӈкве патэ̄гыт. То̄ват ань сыманыл ща̄рге̄гыт, манрыг ат ка̄сащасыт НПФ ёт рӯпитаӈкве, мори номсахтасыт. Ма̄н, НПФ ма̄т рӯпитан ма̄хум, ты тэ̄ла йильпииг о̄вылтаӈкве номсылув. Хотьют ат а̄лымас тув хасхатаӈкве, хасхаты тах. О̄с ва̄рилув ман а̄ти, ат ва̄глум, ань тай нас ты урыл потыртэ̄в». Алексей Анатольевич пенсиян миннэ та̄лыт урыл китыглавес, са̄внуве̄г ва̄равет ман а̄ти. Тав ла̄выс: «Пенсиян миннэ пора но̄х ат те нё̄таве, Россиявт о̄лупса ущпылнэ̄г та̄рвитыӈыг е̄мты. Таима̄гыс ты тэ̄ла ляпа та̄лыт сыс ва̄руӈкве таӈхаве. Ма̄н воссыг хоталь щалтэ̄в, тамле са̄ккон нэ̄глы те, ат тахнэ̄в те̄пыл, матахмат арыг та̄л тах о̄с та рӯпитэ̄в. Пенсия олн ойтнэ ма̄гыс олныт са̄выӈпа̄лэ Россия бюджетныл вивет. Э̄лаль о̄с аквтох о̄луӈкве патэ̄в те, Россияв атиӈк нусаг е̄мты. Ос мо̄т щирыл хумус ва̄руӈкве, нэ̄мхотьют ат ва̄гтэ. Ань яныг кӯщаит ты тэ̄ла урыл са̄в номсэ̄гыт, са̄в рӯпитэ̄гыт. Та̄н тох ла̄всыт: «Пенсиян миннэ пора но̄хнё̄туӈкве сака са̄в ма̄хум ат ка̄саще̄гыт те̄пыл, ма̄н тохата но̄хнё̄тылув. Воссыг нэ̄мхотмус ва̄руӈкве ат ве̄рме̄в, мо̄т кӯстыр тэ̄ла а̄тим. Европа ма̄т ма̄хум хосатта̄гыл 63-67 та̄л мус рӯпитэ̄гыт. Ма̄н 60 та̄л мӯс рӯпитаӈкве о̄с ве̄рме̄в. Та̄лыт та̄ра но̄х хунь нё̄тумтыянув – ла̄щалла̄щал, та̄лохса ман аквкит та̄л са̄внуве̄г ва̄руӈкве патыянув». Ханты-Мансийский округ НПФ са̄в та̄л э̄рнэ тэ̄ла ва̄ри – о̄лнэ колыт ӯнтты (500 сотыра кв. м. ӯнттувес, 10 со̄тыра колта̄гыл о̄лнэ колыл майве̄сыт. 2015 та̄лт щар ма̄к са̄в кол ӯнттувес – 80 со̄тыра кв. м. са̄вит). Центральный Банкыт рӯпитан кӯщай ла̄вме щирыл, ма̄н НПФ са̄в фондыт халт щар ма̄к ёмащакв рӯпитан фондыг ла̄ввес». Китыглахтан ла̄тыӈ са̄в о̄лыс. Алексей Анатольевич татем ёмащакв потыртас, ань ка̄сыӈ хо̄тпа ты ля̄ххал вос торгамтытэ, пенсия олнанэ урыл мӯсхал щирыл вос номсы.

1116 2016. 01. 29. Николай МЕРОВ

Ле̄ккарыт ма̄нь па̄влытн минасыт Ханты-Мансийск ӯст «Центр профессиональной патологии» нампа пӯльницат рӯпитан ле̄ккарыт ань э̄лы ма̄т ӯнлын па̄влыт мус минасыт. Тот о̄лнэ ма̄хум уральтаӈкве патавет. Та̄н я̄ӈкылмаӈ ма̄ хосыт лё̄ӈх та̄л яласан КАМАЗ нампа вездеходыл минмыгтасыт. Та машина мир пусмалтан ма̄гыс йильпи ищхӣпыӈ утыл та̄стым о̄лы. Тав тӯйтыӈ лё̄ӈх хосыт кӯстырыг минуӈкве ве̄рми. Хоты машина тӯйтыӈ ма̄т ёлтагапи ке, таил молях э̄лхартуӈкве ро̄ви. Та̄н Кондинский, Ха̄льӯс ос Нижневартовский районытн ялуӈкве номсэ̄гыт. Мо̄лты та̄л аквты порат ащирма о̄лыс. То̄нт ле̄ккарыт са̄ртын ма̄нь па̄влытн ялсыт. Тыгыл э̄лаль та̄н ты па̄влытн ка̄сыӈ та̄л яласаӈкве патэ̄гыт. Тот о̄лнэ ма̄хум сака ӯрхатэ̄гыт. Ле̄ккар хо̄тпат о̄влэ̄т хо̄нтаӈ ма̄ньщит о̄лнэ Кондинский районын минасыт. Тот кит са̄т рӯпитаӈкве патэ̄гыт. Ха̄льӯс районт ос ре̄тыӈ ю̄свой э̄тпос атыт хо̄талныл яныгпо̄ль э̄тпос хо̄тыт хо̄талэ мус рӯпитаӈкве патэ̄гыт. Яныгпо̄ль э̄тпос са̄тыт хо̄талныл хусыт хо̄талэ мус ос Нижневартовский районт ма̄хум пусмалтаӈкве патэ̄гыт. Ань ле̄ккарыт та па̄влытн минэ̄гыт, хоталь туи порат «Николай Пирогов» нампа мир пусмалтан на̄иӈха̄п ёхтуӈкве ат ве̄рмыс. То̄нт я̄ витэ ма̄нь о̄лыс. Та̄н китхуйплов ма̄нь па̄выл мус ялэ̄гыт. Тот пуссын аквъёт атпан нупыл нила хо̄тал мир тах пусмалтэ̄гыт. Ань па̄влыӈ ма̄хум сакати ёмщакв уральтахтуӈкве ос пусмалтахтуӈкве ве̄рме̄гыт. Та̄н ле̄ккарытн ищхӣпыӈ утыл щё̄питым машина кӣвырт уральтаӈкве патавет. Тот хирург, ӯлщ пуӈк а̄гм пусмалтан ле̄ккар ос ня̄врам пусмалтан ле̄ккар рӯпитаӈкве патэ̄гыт. Туи порат ты ле̄ккарыт на̄иӈха̄пыл ма̄нь па̄влыӈ ма̄н ялманыл порат хо̄т со̄тыра арыгкем э̄лумхо̄лас уральтасыт ос пусмалтасыт. Ле̄ккар колныл ке̄тым ля̄ххал ма̄ньщи ла̄тӈыг Николай МЕРОВ хансыстэ.

1116 2016. 01. 29. Людмила ТЕТКИНА

Хансум потранын ос стиханын тув ке̄тэ̄н Ханты-Мансийск ӯс нэ̄пак ловиньтан кол ос культура департамент «Слоwwwо» нампа йильпи касыл ва̄ре̄г. Ре̄тыӈ ю̄свой э̄тпос о̄выл хо̄талныл заявка нэ̄пак тув ке̄туӈкве ро̄ви. 18 та̄л яныт ос тыгыл яныгнув хо̄тпат та̄нки хансум потраныл ос стиханыл тув ке̄туӈкве ве̄рмияныл. Э̄лумхо̄лас нёлолов ва̄рум номинациян акв потыр манос акв стих вос ке̄ты. Тамле касыл таи ма̄гсыл ва̄руӈкве номылматвес, округув янытыл потрыт ос стихыт хаснэ ма̄хум вос ва̄вет. «Слоwwwо» нампа касыл ты та̄л о̄выл щёс ва̄раве. Ты ва̄рмаль кит та̄л акв щёс щё̄пита̄лыглаӈкве патаве. Хансым потрыт ос стихыт ре̄тыӈ ю̄свой э̄тпос о̄выл хо̄талныл яныгпо̄ль э̄тпос о̄выл хо̄талэ мус ке̄туӈкве ро̄ви. Ма̄нь таквс э̄тпос но̄хпатум хо̄тпат наманыл ла̄вавет. То̄ват 50 со̄тыра солко̄вил, дипломнэ̄пакыл ос мӯйлупсал мивет. Пищмат ты адресн ке̄тэлын: 628012 Ханты-Мансийск ӯс, Мира ӯсхулы 2, 316 колнак. Ос ты телефон хосыт касыл урыл пумщалахтэ̄н: 8(3467) 33-33-21 Ольга Михайловна Павлова, нэпак ловиньтан кол кӯщай нэ̄, китыглэлы̄н. Ля̄ххал ма̄ньщи ла̄тӈыл Людмила Тасманова хансыстэ.

1116 2016. 01. 29. Тамара МЕРОВА

Пӯмыщ э̄рнэ ханищтап Мо̄лты та̄л оигпан э̄лыпа̄лт Белоярский ӯст «Этнокультурное пространство Югры: опыт реализации и перспективы развития» нампа ханищтап ва̄рыглавес. Тот о̄лыглам ва̄рмалит о̄вылтыт Майя Ефимовна Макарова, развитие образования нампа институтт рӯпитан нэ̄, ма̄навн потыр ке̄тыс. Тот ты урыл хансым о̄лыс. «Ты ханищтап образование ос ма̄ньлат ма̄хум ёт рӯпитан департамент, ма̄н институтув ос Белоярский районт образование комитетт рӯпитан хо̄тпат щё̄питасаныл. Тот ма̄хум соссаӈ ня̄врамыт ханищтан тэ̄лат ма̄гыс та̄нки ва̄рум проектаныл урыл потыртасыт ос сыресыр пӯмыщ ханищтап суссылтасыт. Са̄всыр ма̄ныл са̄тпан арыгкем хо̄тпа тув акванатхатыгласыт. Ма̄н тэ̄ланув пӯмщалаӈкве Москва ӯсныл Алла Львовна Бугаева, федеральный образования институт кӯщай нэ̄, Санкт-Петербургныл лӯима̄ а̄гитпыгыт ханищтан университетт рӯпитан профессоро̄йка Игорь Леонтьевич Набок ёхталасы̄г. Белоярский районт о̄лнэ кӯщай хум Сергей Маненков мӯй ма̄хум ёт пащалахтас. Губернатор ва̄ӈын хо̄тпа палт советникыг нэ̄ Людмила Алфё̄рова ос тав юипа̄лт образование департамент кӯщай нэ̄ Любовь Ковешникова ла̄тыӈ ла̄всы̄г. Тувыл ханищтан программат ос сыресыр проектыт мӯсхалыг рӯпитэ̄гыт ман а̄ти, мо̄т кӯщаит потыртасыт. Тувыл мӯй ма̄хум Касум па̄вылн тотыглаве̄сыт. Та̄н тот акванатыглаве̄сыт ос Касум па̄выл кӯщай нэ̄ Алсу Назырова ёт са̄всыр тэ̄лат та̄рапаттысыт. «Этнокультурный центр» нампа колт мӯйлысыт, тот ня̄врамаквет та̄нанылн са̄всыр ёнгилыт, ка̄тыл ва̄рум пормасаныл суссылтасыт, ханты ла̄тӈыл э̄ргыт э̄ргысыт, йӣквсыт. Полноват па̄вылн мӯй ма̄хум о̄с ялсыт. Тот И. Ф. Пермяков нампа школат соссаӈ ма̄хум культура ос образования тэ̄ланыл урыл я̄нас потыртасыт. Са̄всыр проектыт хумус тэ̄лаг ва̄равет, таи та̄рапаттысыт ос э̄рнэ ла̄тыӈ тув хӯлтсыт. Белоярский районт о̄лнэ ма̄хум та̄нки пе̄с наканыл сака э̄руптым о̄ньщияныл. Пе̄с йис накыт матумпа̄ла хо̄тпаныл ёмщакв ханищтыяныл, нэ̄пакн хансыяныл, кинан по̄слыяныл. Ты ва̄рылтан утыт соссаӈ ма̄хумн э̄лаль тотуӈкве э̄ри. Та щирыл са̄всыр пе̄с накыт хотталь ат со̄йме̄гыт, ма̄ньлат а̄гитнпыгытн ханищтавет ос ма̄кыг, номтыӈыг э̄лаль тотавет. Тувыл та̄н са̄в та̄л аквъёт о̄лнэ мирыт ёмас, акванюрщхатан тэ̄латн ханищтыяныл. Кӯщаитн ты тэ̄лат уральтым вос о̄ньщавет, ма̄н ва̄рнэ рӯпатав вос торгамтыяныл ос ва̄тихал вос нё̄тнувыт. Мо̄т ма̄ныл ёхталам хо̄тпат тыт ка̄салам тэ̄ланув та̄нки палтаныл вос потыртыяныл ос акв тамле рӯпата вос ва̄ре̄гыт. Ма̄ньлат ма̄хум ма̄ньта̄гыл мӯтраӈ ва̄рмалитыл пӯмщалаӈкве э̄ре̄гыт. Таима̄гыс акваннё̄тхатым этнокультурный образовательный колыт са̄в ма̄т щё̄питаӈкве э̄ри. » М. Макарова потре ма̄ньщи ла̄тӈыг Тамара Мерова хансыстэ.

1116 2016. 01. 29. Александр ВЬЮТКИН

Ёсал ха̄йтнэ ма̄хум халанылт кассыт Та̄л котиль э̄тпос хусыт хо̄талэ̄т «Долина ручьев» нампа ма̄т ёсал ха̄йтнэ ма̄ньлат ма̄хум Ханты-Мансийск ӯст кассыт. Касыланыл нила хо̄тал минас. Пуссын аквъёт яныгса̄т арыгтем а̄гипыг о̄лыс. Та̄н Ха̄льӯс, Сургутский, Ханты-Мансийский, Советский ос Октябрьский районытныл, тувыл Радужный, Пыть-Ях, Сургут, Нижневартовск, Нефтеюганск ос Ханты-Мансийск ӯсытныл ёхталасыт. Щар янгыг 1998-1999 та̄лыгт самын патум ня̄врамыт тот о̄лсыт. Та̄н халанылт каснэ̄ныл порат 5, 10 ос 15 ве̄рыста ха̄йтсыт. Ты касыл рущ ла̄тӈыл «XI Спартакиада ХМАОЮгры» намыл пиным о̄лыс. Но̄хпатум лов ма̄ньлат хо̄тпа «Первенство России» нампа касылт ань э̄лаль ха̄йтуӈкв патэ̄гыт. Ты нампа яныг касыл Ханты-Мансийск ӯст ты э̄тпос юио̄выл хо̄талытт тах ва̄раве. Ма̄н округув наме янытлан ма̄гсыл Александр Чекмарёв, Матвей Новиков, Константин Новиков, Азамат Хамантуров, Павел Уляшев, Мария Швец, Кристина Страхова, Арина Валуева, Алина Дурнева, Анжелика Можарцева тот ха̄йтуӈкв патэ̄гыт.

1116 2016. 01. 29. Александр ВЬЮТКИН

Кинат суссылтан ва̄рмаль ты ляпами «На̄й лылы» нампа кинофестиваль щё̄питан ма̄хум ёт Ханты-Мансийск ӯст прессконференция о̄лыс. Ты та̄л тав нилахойпловитыг ва̄раве. Кинат суссылтан мус э̄тпос арыгтем хультыс. Ре̄тыӈ ю̄свой э̄тпос ва̄т нупыл хо̄тыт хо̄талэ̄т о̄вылтаве. Фестиваляныл хо̄т хо̄тал сыс минуӈкв паты. Ля̄ххал тотнэ ма̄хум ёт потыртан ма̄гсыл хӯрум хо̄тпа ёхталас. Та̄н ётаныл «Югорский кинопрокат» нампа кол тармыл кӯщаиг о̄лнэ хум Дмитрий Геннадьевич Пуртов о̄лыс. Тувыл ма̄во̄й ос газ но̄хвинэ «Хантос» нампа колт рӯпитан хум Евгений Владимирович Родионов ёхталас. Хумииг халт акв нэ̄ Светлана Викторовна Лазарева о̄лыс. Тав «Природы и Человека» нампа музей кол кӯщаиг рӯпиты. О̄влэ̄т Дмитрий Пуртов потыртас, тав ла̄выс: «Ты та̄л рущ ла̄тӈыл «Год детства в Югре» намыл пиным о̄лы. Ань ты фестивальт ня̄врамыт урыл ос та̄н ма̄гсыланыл са̄в кина тах суссылтаве. Тувыл кинат халт касыл е̄мты. О̄выл касыл ва̄ти кинат халт ва̄раве, рущ ла̄тӈыл «Человечность» намыл пиныслӯв. Ты кинат 3-5 кум палытыг по̄слым о̄лэ̄гыт. Мо̄танэ «Короткий Мир» намтыслӯв. Тув о̄с ва̄ти кинат пе̄риявет. Ты касылн са̄в кина мо̄т э̄лы хо̄н ма̄ныл тыг те̄твес. Хӯрмитув наме «Кино, которое люблю». Тот щар са̄в кина о̄лы. Ань ты мус титса̄т нупыл налымантем кина те̄твес. Фестивальт но̄хпатум кинат мирн суссылтаӈкв патавет. Та кинат по̄слам ма̄хум о̄с тах янытлавет. Ань тыг Бельгия, Чехия, Польша ос Германия хо̄н ма̄ныл са̄в мӯй ма̄хум ёхты. Кинат суснэ ма̄гыс олн ойтуӈкв э̄ри, тынаныл тамлет: ма̄нь тынэ 25 солко̄ви, щар яныг тынэ 250 солко̄ви са̄витын ёхты». Тувыл «Хантос» нампа колт рӯпитан хум Евгений Родионов ла̄выс: «Ань лов та̄лыг ты е̄мтыс, «На̄й лылы» кинат суссылтан фестивальн ма̄н олныл нё̄тым рӯпитэ̄в. Ань акв йильпи пӯмащ ва̄руӈкв номылматсӯв. Ма̄н округувныл «На̄й лылы» Ямало-Ненецкий округн ва̄нтлы. Кинат по̄слахтан ос мирн ва̄нэ артистма̄хум Салехард, Новый Уренгой ос Ноябрьск хӯрум ӯсытт о̄лнэ мир ёт ва̄щинтахтын ма̄гыс ялуӈкв номсэ̄гыт». Тувыл Светлана Лазарева музей коланылт рӯпатан ма̄хум ты кастыл хумус щё̄питахтэ̄гыт, та урыл мощ потыртас. Тав ла̄выс: «Ма̄н ань йильпи суссылтап щё̄питэ̄в. Пӯмщув рущ ла̄тӈыл «Княжна» намтым о̄лы. Ты суссылтап Москва ӯсныл тыг тотаве. Хӯрумса̄т ляпатем пе̄с йис пормасыт кинат по̄слын порат о̄щве̄сыт, та̄н ты тот суссылтавет». Прессконференция а̄стын э̄лыпа̄лт Дмитрий Пуртов кинат пе̄риян урыл титыглавес. Ювле тав ла̄выс: «Ам ёмас кинат пе̄риян урыл нэ̄матыр ат ва̄глум. Ты рӯпата ва̄рим мо̄т ма̄хум рӯпитэ̄гыт. Та̄н а̄нумн та урыл о̄с нэ̄матыр ат ла̄ве̄гыт. «На̄й лылы» о̄вылтахтын э̄лыпа̄лт ущ та̄ра тах паты».

1116 2016. 01. 29. Тамара МЕРОВА

Сапра̄ни о̄лыс Геннадий Бухтин, губернатор ва̄ӈын хум, департаментыт кӯщаит акванатыгла̄лсанэ. Та̄н хус са̄всыр тэ̄лан хӯлтыглан ла̄тыӈ ва̄рсыт ос та̄наныл та щирыл э̄лаль тотуӈкве патыяныл. Любовь Ковешникова, образование ос ма̄ньлат ма̄хум ёт рӯпитан департаментыт кӯщай нэ̄, школат ня̄врамыт тыттын урыл потыртас. Ань ка̄сыӈ ня̄врам округ бюджет па̄лыл акв хо̄талн 44 солко̄вил та̄ставе. Ты олныт ат то̄вылхатэ̄гыт. Мо̄лты та̄лныл ня̄враманыл ёмщакв вос тыттаве, ща̄нита̄щит олн миӈкве ла̄вве̄сыт. Манос муниципалитетыт хоты нё̄тмил мо̄т ма̄ныл хо̄нтэ̄гыт ке, о̄с ё̄мас о̄лнӯв. Ты тэ̄ла са̄кконыг хансуӈкве таӈхе̄гыт. Ань ка̄сыӈ школат сапра̄нит тах ва̄равет ос ты о̄вылтыт мирн потыртэ̄гыт. Ос тувыл ка̄сыӈ хо̄тпа такви ня̄враме ма̄гыс ла̄тыӈ вос хӯлты, олн ойтуӈкве тав ка̄сащи ман а̄ти. Туп савалап ос матыр а̄гм о̄щнэ а̄гирищитпыгрищит, са̄в ня̄врамыӈ колта̄гылт, мощща олн сэ̄лнэ ще̄мьят яныгман ня̄врам ма̄гыс олн ойтуӈкве ат э̄ри. Та̄н школат кит щёс тыттавет, округ па̄лыл та̄н акв хо̄талн 126 солко̄ви са̄вит та̄ставет. Ня̄врамыт ёмщакв ман лю̄льсаӈ тыттавет, ты тэ̄лат ща̄нита̄щит та̄нки та̄рапаттуӈкве ве̄рмияныл. Тыима̄гыс та̄нки ня̄враманыл ханищтахтын школат совет вос атэ̄гыт. Ма̄н ӯсыӈ школанувт ща̄нита̄щит акванатыглаве̄сыт ос ла̄вве̄сыт, ка̄сыӈ хо̄тал акв ня̄врам ма̄гыс хус солко̄ви манос мощ тыгыл са̄внув солко̄ви ма̄нки вос ойтэ̄в. Олн ойтнэ карточка ва̄раве, тув ка̄сыӈ э̄тпос олн пинуӈкве э̄ри. Ня̄врамыт о̄с карточка щирыл тэ̄пъялан колн щалтуӈкве патэ̄гыт. Олн ойтуӈкве ат ка̄сащан хо̄тпат ня̄враманыл тыттуӈкве ат патавет, ос округ бюджет па̄лыл ойтнэ 44 солко̄ви мо̄т ня̄врамытн та̄ставет. Тувыл ты олнытыл хус солко̄ви, насати, тэ̄нэ колт рӯпитан ма̄хум ма̄гыс вивет. Таима̄гыс ты ня̄врамыт олныл ат то̄влавет ос по̄ртыӈ тэ̄нутыл тыттуӈкве ат ве̄рмавет. Округ государственный имущества тармыл пуӈктотнэ кӯщай нэ̄ Татьяна Мирошник то̄ва предприятияколыт тыналан манос та̄наныл приватизировайтан урыл потыртас. Тох «ЮТЭК» энергокомпания мо̄лты та̄гыл тыналаӈкве ла̄вияныл кос, тувыл ка̄сыӈъе̄мт ювле ӯрмыгтыяныл. Нас мори ма̄н та̄н тыналаӈкве ат таӈхияныл. Тувыл «Северавтодор» компания округувт хультуптан урыл номсэ̄гыт. Тав тэ̄лы лё̄ӈхыт ва̄рнэ ма̄гыс ёмщакв рӯпиты. Ханты-Мансийск ӯст о̄лнэ «Бизнесцентр» нампа кол ос «Югра» гостиница кол ос хотталь тыналаӈкв номсаве̄г. Бизнесцентрыт ань са̄всыр компаният рӯпитан коланыл о̄лэ̄гыт, гостиница тай та̄тлыг та ӯнлы. Нас о̄лнэ колыг ва̄руӈкве о̄с ат а̄ртми. «Юграавиа» акционерный общество рӯпататэ о̄вылтыт о̄с потыртасыт. Та̄н 2017 та̄л мус Ханты-Мансийск ӯст товлыӈха̄пыт ёлӣснэ ос но̄хтыламлан аэропортма̄тэ ёмщакв вос щё̄питыяныл. Евгений Редькин, округ спорт тэ̄лат тармыл кӯщай хум, «Развитие физической культуры и спорта в Ханты-Мансийском автономном округе-Югре на 2014-2020 годы» программа урыл потыртас. Ань 2015-2016 та̄лыгт каснэ тэ̄лат э̄лаль тотнэ ма̄гыс 483 миллион солко̄ви та̄стым о̄лы. То̄ва организацият грантнё̄тмил хосыт та̄нки тэ̄ланыл э̄лаль ва̄рияныл. Та щирыл ань 19 хо̄тпа рӯпиты, та̄н аквхуйплов сыресыр каснэ ва̄рмаль э̄лаль тотыяныл.

1116 2016. 01. 29. Николай МЕРОВ

Югра ма̄ныл са̄в пыг лусытаӈкве минас Округ мирколт губернатор ва̄ӈын хум Геннадий Бухтин сапра̄ни ва̄рыглас. Тыт о̄лнэ мир ва̄рмаляныл ӯргалан хо̄тпат, са̄всыр департаментыт, военный комиссариатыт рӯпитан хо̄тпат ос общественный организация кӯщаит тув ёхталасыт. Округ военкомат кӯщай хум Юрий Буров ла̄вме щирыл, мо̄лты та̄л Югра ма̄т кит со̄тыра ма̄ньлат пыг армиян лусытан ма̄гыс атыглавес. Лӯсытан ма̄н пуссын аквъёт акв со̄тыра атса̄т арыгкем пыг са̄всыр ма̄н ла̄ккваке̄тве̄сыт. Ты хо̄тпатныл акв со̄тыра ниласа̄ткем пыг Россия ма̄т лусытэ̄гыт. Мо̄таныт ос ляпат о̄лнэ хо̄н ма̄н ке̄тве̄сыт. Ты хосыт э̄рнэ са̄вит пыг лусытаӈкве минас. Комиссар о̄йка ла̄выс, тав пыге Михаил о̄с мо̄лты та̄л я̄ӈк на̄тнэ э̄тпост армиян вуйвес. Тав ань Москва ӯст лусыты. Лусытан ма̄н ке̄тнэ пыгыт ле̄ккарытн хумус уральтавет, ты урыл округ мир пусмалтан департамент кӯщай ва̄ӈын хум Александр Владимиров потыртас. Тав ла̄выс: «Пыгыт уральтым яныгса̄т са̄тлов ле̄ккар хо̄тпа рӯпитас. Мо̄лты та̄л сыс армиян вим пыгыт пуссын ёмщакв уральтаве̄сыт. Та̄н халанылт са̄тлов процент са̄вит пыгыт пуста̄гыл о̄лэ̄гыт. Та̄н та̄ра армиян вуйве̄сыт. То̄ва пыгыт лю̄ль тэ̄рпи (наркотик) а̄рталасыт ке, ань ты ва̄рмаль ле̄ккарытн о̄с уральтаве. Матъёмас тыт о̄лнэ са̄выӈпа̄лэ пыганув тамле пищин ат патыгласыт. Тувыл культура департамент кӯщай ва̄ӈын нэ̄ Ирина Кибкало потыртас. Тав ла̄выс: «Ты та̄лныл ма̄н лусытаӈкве миннэ пыгыт мӯйлупсал миӈкве патыянӯв. Тувыл ос школат ханищтахтын ня̄врамыт ма̄гыс касыл щё̄питэ̄в. Ма̄н та̄наныл ма̄ ӯргалан урыл хурит по̄слуӈкве ла̄виянӯв. Тувыл ты хурит лусытан ма̄н миннэ пыгытн мивет. «Ратное дело» нампа каснэ ва̄рмаль округ военкоматыт о̄с щё̄питаве. Тот ма̄ньлат пыгыт армият лусытанэ̄ныл урыл китыглаӈкве патавет, ты тэ̄ла ёмщакв ва̄нэ хо̄тпат о̄с мӯйлупсал тах мивет. Мо̄лты та̄л ма̄нь таквс э̄тпост округ военный комиссариатколт лусытан пыгыт ща̄няныла̄щаныл комитет рӯпитаӈкве патыс. Ка̄сыӈ районныл тув акв хо̄тпа пе̄риявес. Та̄н э̄лы ма̄т лусытан салта̄тыт акваг уральтым о̄ньщияныл. Кӯщаиг тот Нина Колосенко о̄лы. Тав ла̄выс, ань са̄в пыг Хабаровск, Чита, Уссурийск ӯсытт лусытэ̄гыт. Та̄н ща̄няныл акваг та̄н палтаныл свонитэ̄гыт, пыганыл урыл китыглахтэ̄гыт. Та̄н пуссын нё̄тавет. Округ мирколныл ке̄тым ля̄ххал ма̄ньщи ла̄тӈыг Николай МЕРОВ хансыстэ.

1116 2016. 01. 29. Тамара МЕРОВА

Та̄тья хо̄тал янытлаве Та̄л котиль э̄тпос 25 хо̄талэ Россия янытыл Татьяна хо̄талыг ла̄ваве. Ты хо̄тал То̄румн агтнэ Татьяна савалап а̄ги кастыл намтувес, тав о̄лмет ма̄ньлат а̄гитпыгыт ӯргалан ма̄гыс воритотыс. Таима̄гыс студентыт мӯйлын хо̄талыг о̄лы. Ань Ханты-Мансийскат Югорский универститетт хумле щирыл тэ̄лат о̄лэ̄гыт, ты о̄вылтыт ма̄навн тот ректорыг рӯпитан нэ̄ Татьяна Дмитриевна Карминская потыртас. 2015 та̄лт о̄выл курсын 968 студентыт ханищтахтуӈкве вуйве̄сыт, мо̄лты 908 хо̄тпа о̄лыс. Тувыл тыг ка̄сыӈе̄мт а̄гитпыгыт мо̄т ма̄ныл ёхтуӈкве патсыт. Ань 324 студент Россият янытыл о̄лнэ са̄всыр областитныл, республикатныл тыг ёхтысыт, ос 25 хо̄тпат СНГ са̄всыр ма̄ныл о̄лэ̄гыт. Ханты, ма̄ньщи, ё̄рн а̄гитпыгыт пуссын акванловиньтаӈкве ке, 300 са̄вит хо̄тпа е̄мты. Ща̄ньа̄щ ла̄тӈыл потыртаӈкве та̄н тыт ат ханищтавет, экологыг, юристыг, экономистыг ос туризм ва̄рмалитн ханищтахтэ̄гыт. Та̄нанылн нё̄тнэ ма̄гыс Диана Васильевна Герасимова рӯпиты. Соссаӈ ма̄хум ща̄нь ла̄тӈыт ханищтан ва̄рмаль ёл ат по̄илттавес, наука диссертация нэ̄пакыт вуянтан ва̄рмалит э̄лаль тотавет. Мо̄лтынув Елена Косинцева ос Валентина Соловар филология наукат доктор нам вуянтасы̄г. Тыг ёхтум студентыт пуссын о̄лнэ колнакыл мивет, стипендиял ойтавет. Та̄н ма̄гсыланыл сыресыр касылыт ва̄равет. То̄ва касылыт но̄хпатум а̄гитпыгыт мо̄т хо̄н ма̄н ханищтахтуӈкве ке̄тавет манос са̄внув стипендияолныл ойтавет. Ханищтахтын хо̄тпат ос аспирантыт хо̄н ма̄ныл тыг о̄с ёхталэ̄гыт. Ань Чехияныл ос Американыл ёхтум хо̄тпаг тот рӯпитэ̄г. Ат студентхо̄тпат РФ Президент нампа стипендиял майве̄сыт.

1116 2016. 01. 29. Светлана РОМБАНДЕЕВА

Нё̄тмил ва̄рнэ хо̄тпат тэ̄ланыл урыл потыртасыт Ва̄т са̄грапнал э̄тпос 28 хо̄талэ̄т Ханты-Мансийск ӯс мирколт мирн нё̄тмил ва̄рнэ ма̄хум акванатхатыгласыт. Та̄н рӯпатаныл рущ щирыл ла̄ваве – Совет Общественной палаты Югры. Ты тэ̄ла палт Любовь Александровна Чистова пуӈктоты. Мо̄т ӯсытт о̄лнэ ма̄хум та̄н ётаныл о̄с потрамасыт – аквъёт рӯпитан ма̄гсыл ищхӣпыӈ ут щё̄пита̄лвес. Та мат то̄тап хосыт ка̄сыӈ хо̄тпа матыр ла̄вуӈкве манос китыглахтуӈкве ве̄рмыс. О̄выл ла̄тыӈ кӯщай э̄ква тав ла̄выс. Рӯпатаныл хумус минас, ювле хультум та̄л сыс манхурип тэ̄ла ва̄рсыт, хотьютн нё̄тсыт – пуссын ты урыл потыртас. Тав ла̄вме щирыл, ма̄к хо̄нтхатыглап Сургут ӯст о̄лыс – Пятый форум общественных объединений Югры. Та порат та̄н ЖКХ (жилищнокоммунальное хозяйство) тэ̄ла уральтаӈкве номылматсыт. Хо̄тпа пе̄риясыт, наме Олег Миронович Шиян, тав ань ты та̄рвитыӈ тэ̄ла палт пуӈк тоты (рущ щирыл ла̄ваве – Эксперт общественной палаты). ЖКХт китыглахтан ла̄тыӈ са̄в о̄лы, ма̄хум ань нё̄тмил ва̄рнэ компаниятын ла̄пала̄лавет, са̄в олн тув ойтэ̄гыт. То̄ва колыт са̄в та̄л сыс йильпииг ат та щё̄пита̄лавет, ма̄хум такос ойтхатэ̄гыт, олнаныл аман хоталь минэ̄гыт, ты урыл нэ̄мхотьют ат ва̄гтэ. Олег Миронович тох потыртас: «ЖКХ тэ̄ла уральтан ма̄гыс ма̄н ань ка̄сыӈ ӯст рӯпитаӈкве патэ̄в. Па̄влыӈ ма̄хум матыр китыглахтан ла̄тыӈ о̄ньще̄гыт те̄, ма̄навн ла̄тыӈ вос ке̄тэ̄гыт. Са̄в квартираӈ яныг колыт ёмащакв уральтыянӯв: тэ̄лы кастыл щё̄пита̄лавет ман а̄ти, вит со̄сантан ма̄гыс ма̄хум манах солко̄ви ойтэ̄гыт, кол йильпииг щё̄питан кастыл олн та̄стувес ман а̄ти, щар пе̄с колт о̄лнэ мир о̄лнэ̄тем колыл аман хунь мивет – ты ос мо̄т са̄в тэ̄лат пуссын та̄рапаттыянӯв. Ань ма̄навн сака са̄в хо̄тпа пищма хансэ̄гыт, та̄рвитаныл урыл потыртэ̄гыт, ма̄навныл нё̄тмил кинсэ̄гыт. Ты тэ̄ла атхунь та̄рвитыӈ, ос акв вуйхатасӯв, воссыг хоталь щалтэ̄в, та рӯпитэ̄в. Ма̄н хунь ущ о̄вылтахтасӯв рӯпитаӈкве, туп та̄лохсаг е̄мтыс, ос ты сыс са̄в ёмас потыр хӯлыгласӯв, ма̄хум кӯщаитн нё̄туӈкве патве̄сыт. Ма̄н рӯпатав ань хо̄та̄ти ка̄салаӈкве ро̄ви, телевизор хосыт сунсуӈкве ро̄ви. Ань нэ̄мхотьют нэ̄мхо̄т ат восги, хо̄нтхатыглап ва̄рыгланэ̄в порат ка̄сыӈ хо̄тпа тув вос щалтсы, потыр о̄ньщи те, вос потырты, вос китыглахты. Йильпи са̄ккон щирыл, ань мори рӯпитан компаният колыт щё̄питан ма̄н ат та̄ртавет. Э̄рнэ нэ̄пакыт (лицензия) ат те о̄ньще̄гыт, ляпан щар ул вос ро̄влахтэ̄гыт. Ты ва̄рмаль палт ань туп мӯсхал ма̄хум вуйхатэ̄гыт. Округув янытыл 213 компаният э̄рнэ нэ̄пакыт о̄ньще̄гыт». Ты Советыт а̄гмыӈмосыӈ ма̄хумн нё̄тнэ ма̄гыс Станислав Петрович Кононенко рӯпиты. Хум такви инвалидный коляскат ӯнлы, па̄выл хосыт тох яласы. Тав о̄с аквкит ла̄тыӈ ла̄выс: «Ты та̄л ня̄врам янытлан та̄лыг ла̄ввес. Округув янытыл ань ща̄ньа̄щ та̄л ня̄врамыт о̄лнэ колыт лаппантуӈкве патве̄сыт, туп нила ӯсытт тамле колыт рӯпитэ̄гыт. 80 ня̄врам тот о̄лы, та̄н халанылт 25 а̄гмыӈмосыӈ ня̄врамаквет. Та̄н сака а̄гмыӈыт, таима̄гыс нэ̄мхотьютн виӈкве ат таӈхавет. Пуссын пусмалтаӈкве э̄ре̄гыт, тыглетувле пе̄ргата̄луӈкве, пӯльницан хо̄та̄ти тотыглаӈкве та маныр. Ма̄н ань са̄в ма̄н пищмат хансэ̄в, ня̄врамыт коляскатыл ёвтуӈкве вос нё̄тавет, сакати кол тӣвырт яласаӈкве вос ве̄рме̄гыт. Ювле хультум та̄лытт ня̄врамыт са̄в олныл та̄стлаве̄сыт, ос олнаныл ка̄сыӈе̄мт хотталь по̄хантотве̄сыт, тӯлмантаве̄сыт. Ма̄н ань ты тэ̄ла ёмащакв уральтылӯв, кӯщаитн нё̄туӈкве ла̄ввесӯв». Тувыл Сургут, Мегион ос Нижневартовск ӯсытт о̄лнэ хо̄тпаныл потыртасыт – хотьют маныр рӯпата ва̄рыс, ос ты та̄л маныр ва̄руӈкве номсэ̄гыт. Ты Совет округт о̄лнэ мирн э̄рнэ тэ̄ла са̄в ва̄ри. Тот кӯщаиг о̄лнэ э̄ква – Любовь Александровна Чистова сака ёмас, мӯтраӈ э̄лумхо̄лас. Тав яныг таквс э̄тпос 28 хо̄талэ̄т 1949 та̄лт Ханты-Мансийск ӯст самын патыс, тыт яныгмас. А̄гипыг о̄ньщи. Са̄в та̄л округ Думат кӯщай ва̄ӈын хо̄тпаг о̄лыс, са̄кконыт хаснэ ма̄т рӯпитас. «За заслуги перед округом», Заслуженный юрист Российской Федерации ос мо̄т государственный намытыл маим о̄лы. Ань ос округт о̄лнэ мирн нё̄ты, ка̄сыӈ хо̄тпа магыс сыме ща̄рги.

1116 2016. 01. 29. Александр ВЬЮТКИН

Па̄влыӈ мир ё̄рыг о̄луӈкв таӈхе̄гыт Мо̄лты та̄л Ха̄льӯс район Саранпа̄вылт «Спорт Тайм» нампа йильпи кол пӯсвес. Ты колн ялантан ма̄хум те̄рпоталыт но̄ха̄лмим алпи нё̄вляныл та̄кмалтэ̄гыт. Па̄вылт каснэ ва̄рмальн ханищтахтын иӈ тит кол рӯпитэ̄г. Акв колт па̄ссаӈ ка̄тыл ня̄врамыт алхатуӈкв ханищтавет. Ня̄врамыт ёт Иван Александрович Ломакин тот рӯпиты. Тав аквты колн ма̄нь та̄гыл ялантас. Мо̄т колт ос лӯима̄ ма̄хум касылыл ня̄врамыт касэ̄гыт. Ты касылытн Андрей Дорофеевич Филиппов ня̄врамыт са̄в та̄л ханищты. Ты «Спорт Тайм» нампа кол кӯщаиг ань Вадим Чекмазов о̄лы. Па̄влыӈ ма̄хманэ пуста̄гыл, ё̄рыг о̄лнэ̄ныл ма̄гсыл тав ты кол пӯнсыстэ. Рӯпитан щё̄санэ ёмщакв хансым о̄лэ̄гыт. Каснэ колэ ӯщлахтын хо̄тал та̄л рӯпиты. А̄лпыл аквхойплов щё̄с порат пӯнсаве, э̄типа̄ла ва̄т нупыл тит щё̄с мус рӯпиты. Тох рӯпитанэ̄тэ щирыл, па̄выл мире хо̄тал палыт тув ялантаӈкв ве̄рме̄гыт. Каснэ колн ялантан ма̄гсыл олн ойтаве. Аквтит щё̄с тув ялнэ ма̄гсыл 120-180 солко̄ви ойтуӈкв э̄ри. Э̄тпос сыс тув яласан кастыл 850 солко̄ви ос 4 со̄тыра 500 солко̄ви мус тынэ ёхты. Щар са̄в олн ойтум ма̄хум э̄тэхо̄талэ те̄рыт пе̄ргаталуӈкв тот ве̄рме̄гыт. Ты коныпал иӈ мо̄т са̄всыр пӯмыщ тот о̄лы. Ще̄мъяӈ та̄гыл тув о̄с яласаӈкв ро̄ви, туп акв хо̄тпа ма̄гсыл олн ойтуӈкв э̄ри. Та пӯмащ рущ ла̄тӈыл «Семейная» ла̄ваве. Мо̄т пӯмащ «Возьми с собой! » намтым о̄лы, тув тит хо̄тпаг акв тын щирыл ёхталаӈкв ве̄рме̄г. Хӯрмит пӯмщаныл тамле юио̄выл рӯпитан хо̄тал э̄типа̄ла хо̄т щёс юипа̄лт ка̄сащан хо̄тпа олн ойтта̄л тув ёхталаӈкв ве̄рми. 2015 та̄л ва̄т са̄грапнал э̄тпост каснэ кол кӯщай Вадим Чекмазов грантнё̄тмил винэ ма̄гсыл Ха̄льӯсн ялыс. Тав тот «Социальноэкономическое развитие, инвестиции и инновации Берёзовского района на 2014 – 2020 годы» олннё̄тмилыл майвес. Вадим проектэ рущ ла̄тӈыл «Время жить» намтым о̄лыс. Та нё̄тмилолныл Вадим мо̄тсыр йильпи тренажёрыт ёвтуӈкв номсы. Тувыл каснэ кол колнаканэ ёмщаквнув щё̄питаӈкве таӈхи. Номылматам ва̄рмалянэ тэ̄лаг ты тув сыс тах ва̄риянэ. Вадим Чекмазов ма̄ньлат ма̄хум нупыл сунсыматэ, тамле каснэ кол ва̄руӈкв номылматас. Ань ты кол та̄тылаг ат о̄лы. Э̄квато̄йкат, янгема̄не, са̄в мо̄т мир тув яланты. Хотьют тув иӈ ат ялыс, ялэ̄н.

1116 2016. 01. 29. Светлана РОМБАНДЕЕВА

Нила ма̄ньщи юрт нэ̄т Ты хурит нила ма̄ньщи нэ̄квет по̄слым о̄лэ̄гыт – Зоя Васильевна Полищук (Албина), Зоя Валентиновна Пахомова (Хозумова), Альбина Николаевна Мехнина (Шесталова) ос Валентина Борисовна Албина. Та̄н пуссын Ха̄льӯс район Ло̄пмус па̄вылт яныгмасыт. Ювле хультум та̄л ва̄т са̄грапнал э̄тпосэ̄т Ханты-Мансийск ӯст «Товары земли Югорской» ярмаркат илттыг акваннэ̄глапасыт. Сынгатахтасыт, аниглахтасыт, насати ма̄нь порат Ло̄пмуст аквъёт ёнгасасыт, ханищтахтасыт. Та па̄сыл са̄в та̄л овумтас, хотьютаныл хо̄т о̄лы, аты ва̄саныл. Ань пуссын яныг ӯст о̄лэ̄гыт – Альбина Николаевна Ханты-Мансийск ӯст о̄лы, хӯрум юрт нэ̄т ос Сургут ӯст о̄лэ̄гыт. Ханты-Мансийск ӯст ялпыӈ хо̄талыт ва̄тихал ва̄рыгла̄лавет, Зоя Васильевна, Валентина Борисовна ос Зоя Валентиновна тыг тах Сургут ӯсныл хуньт о̄с ёхталэ̄гыт. Та̄н пе̄с йис потрыт ва̄гыт, ма̄ньщи э̄ргыт э̄рге̄гыт, стихотвореният ловиньтаӈкве ха̄сэ̄гыт. Альбина Николаевнан «То̄рум маа» музейн во̄вве̄сыт, тӯяг вос ёхталэ̄гыт, яныгмам пораныл урыл вос потыртэ̄гыт. Ты я̄тил ма̄ньщи хо̄тпанув пуссын пуста̄гыл вос о̄лэ̄гыт, На̄й-О̄тыранылн вос ӯргалавет!

1116 2016. 01. 29. Николай МЕРОВ

Ма̄хманув са̄лы нё̄выль тыналаӈкве ёхталасыт Ха̄льӯс район Саранпа̄выл совхозт ма̄ньщи хум Данил Вынгилев са̄лыт пусмалтым рӯпиты. Та̄л котиль э̄тпост ты хум ос акв саран нэ̄ Наталья Толстова, са̄лы нё̄выль тыналаӈкве Ханты-Мансийск ӯсн машинал ёхталасы̄г. Тыт олме̄н сыс ам Данил о̄йка ёт хо̄нтхатыгла̄лсум, рӯпататэ урыл мощ китыгласлум. На̄н тав потре э̄лаль ловиньтэлы̄н: «Ам Нё̄рт Талья тальхыт са̄лыӈколт самын патсум. Ань та ма̄т Приполярный па̄выл ӯнлы. Са̄ртын та па̄выл тот а̄тим о̄лыс. Тот Кимкъясуй ма̄хум совхоз са̄лыӈколаныл яласасыт. Ам тот ты самын патсум. А̄тям наме Василий Селивёрстович Вынгилев, омам ос Домна Гавриловна Вынгилева о̄лсы̄г. Тэ̄н са̄лы ӯрнэ хо̄тпаг тот рӯпитасы̄г. То̄нт ма̄нки о̄с са̄в са̄лы о̄щсӯв. Ань ты порат са̄лыянум мощ иӈ о̄лэ̄гыт. Ма̄ньта̄гыл акваг Нё̄рт яласасум. Са̄лыӈ ма̄хум рӯпата ёмщакв ва̄глум. Хунь янгыг е̄мтсум, са̄лы пусмалтан хо̄тпаг е̄мтуӈкве номылматсум. Таима̄гыс школа а̄стламум юипа̄лт та̄ра Салехард ӯсн ӯйхул пусмалтан хо̄тпаг э̄лаль ханищтахтуӈкве минасум. 1985 та̄лт ханищтахтын ма̄ныл а̄стысум, ювле па̄вылн о̄луӈкве минасум. Саранпа̄вылн ёхтысум, та̄ра совхозн зоотехникыг рӯпитаӈкве патхатасум. Та па̄сныл акваг тот ты рӯпитэ̄гум. Армиян ялсум, юв ёхтысум ос акв тув минасум. Аквматнакт ос са̄лы ӯрим рӯпитасум. Тувыл ос ювле зоотехникыг патхатасум. Тӯяг нэ̄виса̄лыт ӯнттын порат тув ялантэ̄гум. Яныг таквс ос ва̄т са̄грапнал э̄тпосыгт са̄лы нё̄выль ва̄ре̄в. То̄нт о̄с тув ялантэ̄гум, са̄лыт ловиньтыянум, тэ̄рпиӈ уколыл тӯщтыянум. Та̄л палыт акваг уральтыянум. Ань Саранпа̄вылт нила са̄лыӈкол хультыс. Тот пуссын аквъёт хӯрумхуйплов со̄тыра са̄виткем са̄лы о̄ньщаве. Ты са̄виткемыл акваг ӯрилӯв. Тӯяг са̄лыянув манса̄вит па̄сыг ӯнттэ̄гыт, таса̄вит нё̄выль таквсы ва̄ре̄в. Ты та̄л па̄влувт са̄тлов тонна нё̄выль ва̄рсӯв. Аньты нё̄влянув са̄всыр ма̄т тыналыянӯв. Мӯй хо̄тпат Свердловский областиныл, Пермский крайныл, Тюмень ӯсныл Саранпа̄вылн нё̄выль ма̄гыс та̄нки ёхталэ̄гыт. Манаса̄вит э̄ри, выгыт. Ты коныпал са̄всыр туристыт па̄вылн ёхталэ̄гыт. Та̄н о̄с са̄лы нё̄выль ёвтэ̄гыт. Са̄ртын ма̄н са̄лы нё̄выль Ха̄льӯсн тыналаӈкве тотыгласӯв. Ань ты та̄л о̄выл щёс Ханты-Мансийск ӯсн а̄рталахтын ма̄гыс ёхтысӯв. Нё̄влянув ёмщакв ёвтуӈкве патавет ке, акваг тыг ёхталаӈкве патэ̄в. Нё̄выль коныпал ма̄н пӯркат, юн ё̄мыгтан хопит, са̄лы котыт ос ка̄тыл ва̄рим са̄всыр пормасыт тыналэ̄в. Мощ хосатнув совхозт пормас ю̄нтнэ цех рӯпитас. Та цех ань ат рӯпиты. Ань ма̄хум пормасыт юн ю̄нтэ̄гыт. Та цех о̄лум порат са̄в пӯрка ю̄нтыглавес. Ань та пӯркат иӈ о̄лэ̄гыт, ла̄щалла̄щал тыналыянӯв. Са̄лыӈ хо̄тпат рӯпата олнаныл юв ат пувавет, та̄ра ойтавет кос, ос яныт та̄рвит о̄лы – рӯпатат сака мощща олн ойтаве. Таима̄гыс ма̄ньлат ма̄хум тот рӯпитаӈкве ат таӈхе̄гыт. Та̄л палыт э̄тэхо̄талэ рӯпитэ̄гыт, олнаныл но̄х ат нё̄тавет. То̄ва хо̄тпат ат ве̄ритэ̄гыт, на̄лув ва̄глэ̄гыт, па̄вылт рӯпата кинсэ̄гыт. Ань са̄лыӈколанувт са̄лы ӯрнэ хо̄тпа ат то̄вылхаты. Ты урыл осэва̄тал потыртэ̄в, нэ̄мхотьютн ат хӯлаве̄в. Тыщир э̄лаль акваг паты ке, са̄лы ӯрнэ хо̄тпа ат хульты». Данил Васильевич ла̄вме щирыл, хота мус са̄лы ӯрнэ хо̄тпат рӯпата олныл мощща ойтуӈкве патавет, та мус ма̄хум тув минуӈкве ат ка̄саще̄гыт. Ань акв э̄тпос сыс э̄лумхо̄лас хус со̄тыра са̄виткем солко̄вил ойтаве. Тыса̄вит олн ма̄гыс тот по̄льтахтуӈкве ат хо̄йхаты. Са̄лы са̄вмалтан урыл потыр а̄тим, ань о̄щнэ са̄лыт аквты са̄витыг вос хультнувыт.

1116 2016. 01. 29. Людмила ТЕТКИНА

Сымолн о̄щнэ яныгхо̄тпа Молты та̄л ма̄нь та̄квс э̄тпост яныгпа̄ла хо̄тпат янытлан кастыл ма̄ньщи газетат Александр Иванович Монин яныгмам ос ханищтахтам поратэ урыл хансыгласум. Тав Ха̄льӯс район Кимкъясуй па̄вылт о̄лы. О̄йка та̄ланэ янгыт, о̄лупсатэ сыс са̄в ва̄рмаль ва̄щиньтас. Ань Александр Иванович потре э̄лаль хансылум. Тав Ня̄хлаӈ па̄выл школат нила класс мус ханищтахтас. Тувыл э̄лаль Кульпас па̄вылн ке̄твес. Пыгрищакве тот ханищтахтуӈкве ат патыс, юв та минас. Та поратэ урыл тав ос тох потыртас. – Ханищтахтуӈкве пойтсум Василий Николаевич Вадичупов ёт во̄рт яласаӈкве патсуме̄н, звероферма ма̄гсыл янгӯй па̄тлуптасме̄н. Тав войнат хо̄нтлым акв ла̄глэ та̄л хультыс. Тувыл акв ла̄глыл костыль ёт та̄кыщ ё̄мыгтас. Яныг йӣв ӯлтта нас порыгма̄лас. Ам иӈ ня̄врам, писаль тотнэ ос нас палягум ма̄гсыл о̄щве̄сум. Во̄рн ёхтыме̄н, кӯтьванме̄н ӯй хортаве, писаль таве̄н мыглум, тав та па̄тамтытэ. Ка̄тынпаттым ӯит звероферман тотыянме̄н. 1967 та̄л мус Василий Николаевич ёт во̄раим яласасум. Рӯпитасум кос, тувыл халыт тав ётэ во̄рн ялантасум. То̄нт ма̄нь Илья Алгадьев мо̄йтыӈ ос тав каӈке Михаил мо̄йтыӈ, тувыл Василий Николаевич ос ам пуссын аквъёт яласасӯв. Ма̄н Во̄льян во̄раим ос хӯл алыщлым ялсӯв. Та порат та я̄т хӯл са̄в о̄лыс. 1949 та̄лт Са̄ӈкитур па̄вылт о̄лсум. Та порат са̄в ма̄хум экспедициян тув ёхтысыт. Туи порат товлыӈха̄п ёхты, витын исы. Витын исы, па̄г нас хасумтаве. Но̄хтыламлаӈкве э̄ри, ос та я̄ ва̄тал витн нарыгтаве. Ос винтэ нас ё̄ӈхыгпаве, тувыл та ква̄лапи, но̄х та тыламлы. Са̄ӈкитур я̄ ва̄тат яныг ӯльпат о̄лсыт. Та ма̄хум ты ӯльпат ёлсартсаныл. Тувыл тэ̄лы па̄вылт аэродром ва̄рыгласыт. Па̄вылкант кит сӯмъях хота̄лмаявесы̄г, мощ па̄гле ӯнттыгпавесы̄г, торас ул вос ва̄рсы̄г. Са̄ӈкитурт са̄в э̄ква рӯпитас. Гармошка о̄щсум, кон выглум, та̄н ма̄гсыланыл та ёнге̄гум. Та̄н ла̄ве̄гыт: «Наӈ пыгкве ёнген, ёнген, ма̄нав тох рӯпитаӈкве кӯпнитнув». Товлыӈха̄п иссыглан яныг ма̄ ва̄рыгласыт, щар сыстам ма̄ о̄лыс. Ань тай та ма̄тэ щар лапха̄лигтавес. Кит товлыӈха̄пыг акваг ёхталасы̄г, о̄влэ̄т акватэ исы, тувыл мо̄танэ ёлисы. Тамле утыл яныг кӯщаит тув ёхталасыт. Ам иӈ ня̄врам, тамле хащта̄л утыт нупыл сунсуӈкве сака пӯмащ о̄лыс. 1950 та̄лт о̄лнэ па̄вылквет аквантотуӈкве патве̄сыт. Та ма̄т о̄лнэ ма̄хум Перевалка мус тотве̄сыт, ты па̄выл Толья сӯнтыт о̄лыс. Тӯяг, яныг вит порат на̄иӈха̄пыт ёхтэ̄гыт, Толья хосыт пормас хартэ̄гыт. Э̄лаль Толья то̄сам, ма̄хум та̄нки нас хартэ̄гыт. Тот о̄с са̄в мир о̄лыс. 1953 ос 1954 та̄лыгт Нё̄рт яласасум. Са̄лыл та̄ра минэ̄в, репродуктор нумын о̄лы, э̄лн сӯйты, э̄рганты. Тот тай щар я̄ӈкылма̄ о̄лыс, тох та ва̄рапасаныл ос аэродром ва̄рсыт. Тот яныгнув аэродром о̄лыс, Ан-2 исыгла̄лас. Тахурип па̄выл о̄лыс, школа, ла̄пка, пӯльница, ня̄нь ва̄рнэ кол, маныр э̄ри, пуссын о̄лыс. Та та̄лыт юипа̄лт Нё̄рныл хотпо̄йтыгласум, туп 1963 та̄лт Толья та̄ра минасум. Тув ёхтысум, ята, па̄выл хоталь минас? Щар нэ̄матыр а̄тим, хотталь нупыл тотыгпавес, колналы а̄тимыт, нэ̄матыр а̄тим. Тот о̄лнэ геологыт акваг Нё̄рт матыр кинсым яласасыт. Взрывникхо̄тпат тот рӯпитасыт, таяныт суй акваг ва̄рсыт. Та̄н лувыл тот яласасыт. Ня̄хщамво̄ль па̄выл кит о̄йкаг тот о̄лсы̄г. Акватэ тай ва̄слум, Сан о̄йка о̄лыс. Светлана Алексеевна Попова а̄ще то̄нт о̄с тот яласас. Лувыл экспедиция ма̄гсыл пормас тотыс. Ам Светланан а̄ще урыл потырта̄лыгласлум. Э̄квам ос 1954 та̄л порат рӯпитаӈкве патыс. Та порат Ня̄хщамво̄ль па̄вылт о̄с экспедиция о̄лыс, а̄гит рӯпитаӈкве пуссын тув ня̄влуве̄сыт. Са̄лыл са̄всыр пормасыт хартсыт. 1956 та̄л хӯл алыщлым рӯпитас. Та юипа̄лт э̄квам ёт акван та минасме̄н. О̄лсуме̄н, лю̄лиг манос ёмасыг о̄лсуме̄н, хотмус та о̄лсуме̄н. Ань тай матсуме̄н. 50 та̄л арыгкем аквъёт ты о̄лыме̄н. 1962 та̄л «свидетельство о браке» нампа нэ̄пак ва̄рсуме̄н. Ме̄н кос са̄ртын акванминасаме̄н, та порат Кульпас па̄вылт миркол а̄тим о̄лыс, Сортыӈъя па̄вылт рӯпитас. Кульпаст туп 1961 та̄лт ва̄рвес. То̄нт э̄квам ёт Нё̄рт яласасме̄н, ювле ёхтысаме̄н, Кульпасн ялсуме̄н. Ань округув са̄ккон щирыл ань 50 та̄л аквъёт о̄лнэ э̄кваго̄йкаг олныл ойтаве̄г. Ме̄н о̄с ты олныл майлувесме̄н. 1979 та̄лт яныг таквс э̄тпост Канев кӯщай о̄йкан ла̄вве̄сум лувыл вит тотуӈкве. Налми ва̄тан минасум, лувум илттыг э̄лаль нёвумтас, ам суныл ёлрагатасум ос пуӈкыл ю̄ныгтахтасум. Хоса ман а̄ти, тот по̄варалсум, тувыл лувум юв хартве̄сум. Хӯрум хо̄тал юн о̄лсум, туп ты юипа̄лт ущ вертолёт ам ма̄гсылум ёхтыс, Ха̄льӯсн та тотве̄сум. Тыт рӯпитан ле̄ккар номсыс, ам пуким а̄гмыӈ, Ха̄льӯсн тотве̄сум, инфекционный отделениян тув та пинве̄сум. Пуӈкум то̄ва пора номи, то̄ва пора щар ат номи, тох ё̄р та̄л та хультсум. Китыт хо̄талэ̄т хирургический отделениян та тотве̄сум. Тот хуим са̄всыр пункциял, са̄всыр уколыл ва̄рве̄сум. Акв порат но̄х кос ква̄лсум, ё̄муӈкве тахсум. Ла̄глагум э̄лаль ат минэ̄г, ат ё̄ме̄г. Та юипа̄лт щар лю̄лиг та е̄мтсум, сорумн патнэ ма̄нь колрищн тув тотве̄сум. Тот хотталь та минасум, ёл та оилматве̄сум. Тувыл мо̄т хо̄талэ̄т хӯлэ̄гум, ма̄хум потыртэ̄гыт, ё̄мыгтэ̄гыт. Хо̄тыл о̄лыс, ле̄ккарум ёхтыс, китыглахты, иӈ лылтэ̄гум. Ам ювле ла̄всум: «А̄нум са̄ртын тыг пинуӈкве э̄рыс, то̄нт тах та̄ра но̄хсайкаласум. Тувыл ювле палатан та хартве̄сум. Лида а̄гим рыбокомбинатт тот рӯпитас. Ам палтум ка̄сыӈ хо̄тал ёхталас ос массаж ва̄рыс, тох акв ла̄глум мощ ёмаснуве̄г е̄мтыс, мо̄танэ лю̄лиг тох та хультыс. Акв порат э̄ти но̄хса̄йкаласум, сымум а̄латы конпорыгми. Пе̄с ма̄хум потырта̄лсыт, сымын по̄йтуӈкве ке паты, ла̄гыл яныг тулё̄выл тыщирыл нёвсалтаӈкве э̄ри. Таи урыл номтум патыс, ла̄глум яныг тулё̄влэ та нё̄всалтылум. Ос сунсэ̄гум, ам по̄хамт сорум патум утыт лю̄ле̄гыт, ща̄гтым йӣкве̄гыт, ва̄рыглахтэ̄гыт. Ща̄гтсыт, та̄н палтаныл о̄с аква ты ёхты. Та̄н нупыланыл пилыщмаӈ сунсуӈкве о̄лыс. Аман со̄ль о̄лыс, аман нас ӯлмаясум. Тувыл аквматэ̄рт самагум та нэ̄глысы̄г. Насати, таса̄вит ле̄ккар хо̄тпат я̄ӈк халатыл ам по̄хамт лю̄ле̄гыт. Асланов ле̄ккар о̄йка о̄с ам по̄хамт лю̄ли. Тувыл минасыт, ам мо̄тпалн пе̄румтахтасум ос ёл та о̄илматве̄сум. А̄лпыл палатат о̄лнэ ма̄хум а̄нум китыглэ̄гыт, ла̄глагум ат сакватасагум? Ос ла̄ве̄гыт : «Наӈ ке̄р койка вислын, тувыл, ятаты, ла̄глагын ра̄туӈкве та тӯлтхатасын». Ётыл хӯнтлэ̄гум, ла̄глагум о̄лэ̄г. Тох ат ке капыртасум, улпыл сымум та по̄йтыс. Ёмащакве пусмалтаӈкве аты ве̄рмуве̄сум. Пӯльницат поваралуӈкве тӯрум ёхтыс, юв воратаӈкве та патсум. Тувыл Кимкъясуйн та ке̄тве̄сум. Яныгпо̄ль э̄тпост ювле та тотве̄сум, ӯнлуӈкве щар ат ве̄рмысум, нас хуясум. Туи порат самвитанум хотсэ̄гим, кон ва̄ӈксуӈкве та патсум. Кон ква̄лэ̄гум, э̄ргуӈкве та о̄вылтахтэ̄гум. Ма̄нь а̄гим ам по̄хамт ха̄йтыгты, ла̄ви: «А̄тям, улпыл, вина аялас, э̄ргуӈкве та патыс». Ам тай о̄луӈкве щар та тахсум, сака та̄рвитыӈ о̄лыс. Тувыл Марина ма̄нь а̄гим ос ма̄нь пыгум Илья нупыл сунсым, номсэ̄гум, ма̄нь ня̄врамагум хотьютн оссувлыягум. Мо̄т ня̄враманум яныгнув о̄лсыт. Номсысум, вос савалэ̄гум ос э̄лаль о̄луӈкве воратаӈкве патэ̄гум. Ты номтыт ёт но̄хква̄лсум, костыль ёт ё̄мыгтаӈкве та патсум. Ань 78 та̄л янытыг е̄мтсум. Во̄рн воссыг ат ялантэ̄гум, кӯтьвум матыс ос хотталь порсыс. Ань тамле кӯтюв воссыг а̄тим. Нас тох тэ̄тал хунь о̄лэ̄в, нё̄выль та̄л ат о̄лэ̄в. Пыгагум ам по̄хамт о̄лэ̄г. Тэ̄н тай сымолн о̄ньще̄г. Пе̄с ма̄хум та̄н потырта̄лсыт, хо̄тпат сымолн ке о̄ньщи, во̄рн ялы, матыр алы ос ка̄тынпатты.

1116 2016. 01. 29. Тамара МЕРОВА

Соссаӈ мир ва̄рмаляныл ма̄гсыл тав сыме ща̄рги Нижневартовск ӯст Марина Антонова ёт акванхо̄нтхатыгласме̄н. Са̄выӈпал соссаӈ ма̄хумн тав Ахминеева о̄парищ наметыл ва̄ве. Марина Анатольевна 1999 та̄лныл Нижневартовскат о̄лнэ «Югра лылые̄п» ассоциацият пуӈктотыс. Тувыл соссаӈ ма̄хумн нё̄тнэ колыт лаппантве̄сыт. Са̄ртын ма̄хум хумус о̄лсыт, ос хумле щирыл ань о̄лэ̄гыт, ты о̄вылтыт тав тох потыртас. – Лӯима̄т о̄лнэ ма̄хманув ань щар мо̄т щир о̄луӈкве патсыт. Ма̄нь па̄влытыт ӯнттым школат, фельдшерскоакушерский пунктыт пуссын лаппантавет. Ущтынув Пуг-Юг нампа ма̄нь па̄выл лаппантвес. Са̄в ма̄хум рӯпата ат хо̄нтэ̄гыт, ня̄врамыт ханищтахтынэ̄ныл ма̄гыс э̄лы па̄влыт интернатн акванатавет. Соссаӈ ма̄хманув са̄в та̄рвит о̄ньще̄гыт, нас туп ты ва̄рмалит нэ̄мхо̄т ат потыртавет. Яныг кӯщаит о̄лупсав урыл та̄нанылн э̄рнэ ля̄ххал ва̄ре̄гыт, тувыл та. Ам соссаӈ ма̄хум о̄лнэ ма̄н ва̄тихал яланта̄лсум, ань ам палтум та̄н о̄с ёхталэ̄гыт, таима̄гыс та̄н о̄лупсаныл ёмщакв ва̄глум. Туп то̄внакт та̄нанылн нё̄туӈкве нэ̄мхотмус ат ве̄рме̄гум. Са̄ртын ма̄н лӯима̄ комитет щирыл нусаг о̄лнэ хо̄тпат, ханищтахтын ос пусмалтахтын хо̄тпат олныл нё̄тсанӯв, кол ӯнттуӈкве ос кол ёвтуӈкве нё̄тсӯв. Ка̄сыӈ районт ос яныг ӯсытыт ты тэ̄лат хосыт хотты хо̄тпа рӯпитас. Ос соссаӈ ма̄хум съездын акванатхатыгланэ̄ныл порат та̄н ва̄рмаляныл урыл китыглаве̄сыт. Лю̄льсаӈ миннэ тэ̄ланыл китхӯрум э̄тпос сыс ёмщакв ва̄руӈкве ла̄выглаве̄сыт. То̄нт, со̄ль, ма̄хманув ва̄рмаляныл та̄рапаттым о̄щве̄сыт ос нё̄тве̄сыт. Ань ханты хо̄тпат нё̄тмил китыглэ̄гыт ке, та̄н мо̄тмо̄т хо̄тпат палт нас та ке̄тыглавет ос са̄всыр э̄рнэ нэ̄пак атуӈкве ла̄вавет. Тувыл хотьютаныл та̄н тэ̄ланыл ма̄гыс ма̄к пуӈктоты, аты ва̄ганыл. – Манах соссаӈ э̄лумхо̄лас ӯсынт о̄лы, ос маныр яныг та̄рвит на̄н о̄ньщегы̄н? – Ма̄н хосат та̄гыл «Югра лылые̄п» ассоциацияв рӯпитанэ̄тэ ма̄гыс э̄рнэ нэ̄пакыт щё̄питасанӯв. Туп ань соссаӈ хо̄тпат ёт акван– хо̄нтхатыглан ма̄гыс кол ат о̄ньще̄в. О̄влэ̄т ма̄во̄й но̄хвинэ компанияныл колнакыл майлувесӯв, тот рӯпитасӯв. Тувыл колнакув ма̄гыс ойтхатнэ олнта̄л хультсӯв. Округув мо̄т кӯщаил паттымав юипа̄лт соссаӈ ма̄хумн нё̄тмил ва̄рнэ тэ̄ланув пуссын витыг та минасыт. То̄нт соссаӈ ще̄мьят кол ӯрхатым о̄лсыт, хо̄та̄ти ханищтахтан а̄гитпыгыт олныл нё̄тве̄сыт, а̄гм о̄щнэ ма̄хум пусмалтан колытн ке̄тыглаве̄сыт. Ма̄хманувн ма̄нки ве̄рмхатнэ щирыл нё̄тсӯв. Ань ты ва̄рмалит я̄нас щирыл ва̄рве̄сыт, нё̄тмил китыглан ма̄гыс са̄в ма̄т насска̄сыг ха̄йтыгтаӈкве э̄ри. Нижневартовск ӯст хантыиг, ё̄рныг, ма̄ньщииг 1 со̄тыра 30 э̄лумхо̄лас хасхатым о̄лэ̄гыт. Ма̄н ассоциациявн ань 311 хо̄тпат хасхатасыт. Та̄н халанылт са̄в ка̄ркам хо̄тпат ат кос о̄лэ̄гыт, ос хотьют ка̄сащи, ма̄н аквъёт ялпыӈ хо̄талт атхатыгла̄лэ̄в ос мо̄т мирытн ма̄нки йис о̄лупсав суссылтэ̄в. Тыт «Дружба народов» ялпыӈ хо̄тал ва̄рнэ порат, ма̄н ӯсхулы хосыт о̄вылт ё̄ме̄в. Мо̄т мирыт о̄с о̄вылн воратасыт кос, ма̄н то̄нт та̄к ла̄тыӈ ла̄всӯв. Та̄н ла̄ве̄гыт, ман ӯсувт хантыт ос ё̄рныт щар а̄тимыт, та̄н пуссын во̄рт манос ма̄нь па̄вылт о̄лэ̄гыт. Ӯс кӯщаит о̄с тох та номсэ̄гыт. Тувыл ма̄хманув матыра̄ти нё̄тмил китыглаӈкве ёхталэ̄гыт манос пищма хансэ̄гыт – та̄н ювле ла̄тӈыл ке̄тавет, «Ӯс соссаӈ хо̄тпа о̄лнэ ма̄г ат о̄лы, тэ̄ланыл ма̄гыс районыт манос па̄влыӈ ма̄т вос кисхатэ̄гыт». Ма̄н тамле та̄рвитыӈ ва̄рмаль о̄ньще̄в – ань соссаӈ ма̄хум са̄кконыт щирыл щар ат ӯргалавет. Во̄рт ос ӯст о̄лнэ ма̄хум хӯл алыщлаӈкве ос во̄раяӈкве пуссын лицензия виӈкве ла̄вавет. Во̄рныл районын ёхталаӈкве та̄нанылн о̄с та̄рвитыӈ, тувыл ты лицензия китхӯрум са̄тын туп майлаве. Ма̄хманув тот пуссын рӯпатта̄л о̄лэ̄гыт, тыглетувле ялнэ олн хотыл выгыт. Лизенцият, э̄рттам, ма̄вит ӯргалан ма̄гыс, я̄ хӯл, во̄руй ӯргалан ма̄гыс ва̄равет. Ма̄хум са̄в ул вос алыщласыт. Ам ань таи китыглаӈкве таӈхе̄гум, во̄рт во̄руй та̄л аман хантыянув, ё̄рнанув хультуптасаныл манос я̄т ос та̄н па̄ӈктысаныл? Ӯсувт о̄лнэ соссаӈ хо̄тпанув о̄с рӯпатта̄л о̄лэ̄гыт. Мо̄лты та̄рапаттыслӯв, 32% хо̄тпа рӯпата ат хо̄нтэ̄гыт, тувыл ма̄ньлат а̄гитпыгыт институт юипа̄лт рӯпитаӈкве ос нэ̄мхотталь ат вивет. О̄лнэ кол ат о̄ньще̄гыт, субсидия щирыл сака хоса ӯрхатэ̄гыт, тувыл пенсият о̄лнэ хо̄тпа колэ ма̄гыс ойтнэ олн хотыл выг. Ма̄н тыт са̄всыр та̄рвит ёт капыртэ̄в. Ма̄хманувн хотыл нё̄тмил кинсуӈкве, манос о̄лы. Ма̄нки тэ̄ланув ёмщакв ва̄рнэ ма̄гыс грант хансуӈкве ла̄ваве̄в, то̄нт олныл нё̄таве̄в. Хоты хо̄тпа акв щёс ул кос майлаве, тув ат ликмын хо̄тпат маныр ва̄ре̄гыт. Ам о̄с тох номсэ̄гум. Ма̄хманув о̄лупсаныл ёмщакв ӯргалаӈкве э̄ри. Таима̄гыс ты ассамблеят рӯпитан депутатанув соссаӈ ма̄хум ёт я̄нас кӯщай хо̄тпа ӯнттуӈкве ла̄ве̄гыт кос. Са̄выӈпа̄лэ округ Дума депутатыт та̄н ётаныл ат ка̄саще̄гыт.

1116 2016. 01. 29. Людмила ТЕТКИНА

Юван Шесталов намыл пиным премияолн Ка̄сыӈ та̄л общественный связь департамент касыл щирыл Юван Шесталов намыл намаим премияолн мыг. Ты та̄л ма̄ньпо̄ль э̄тпос о̄выл хо̄талэ мус нэ̄пакыт ке̄туӈкве тув ро̄ви. Ты премия винэ ма̄гсыл ань туп округ миркол, ӯсытт ос па̄влытт рӯпитан мирколыт ос организацият нэ̄пакыт ке̄туӈкве ве̄рме̄гыт. Ты э̄лыпа̄лт ма̄хум нэ̄паканыл та̄нки тув майлысаныл. Ты олныл та хо̄тпа миве, хотьют соссаӈ мир пе̄с йис ва̄рмалит но̄хво̄рмалтым са̄в рӯпиты ос са̄в э̄рнэ ва̄рмаль соссаӈ ма̄хум ма̄гсыл ва̄ри. Олныл туп кит хо̄тпаг миве̄г, тэ̄н 75 со̄тыра солко̄вил ойтаве̄г. Ос акв хотты организация 200 со̄тыра солко̄вил миве. Ты хо̄тпат лӯпта э̄тпос 22 хо̄талэ̄т Юван Шесталов намхо̄талэ̄т округ кӯщаюв Наталья Комарова янытлаӈкве патыянэ ос олныл, дипломнэ̄пакыл мӯйлуптыянэ. Заявканэ̄пак общественный департаментын почта щирыл ос ищхӣпыӈ ут хосыт ке̄туӈкве ро̄ви. Пищмат: «Премия Правительства ХМАО-Югры им И. Н. Шесталова» хансуӈкве ос ты адрес щирыл ке̄туӈкв э̄ри: Ханты-Мансийск ӯс, Комсомольский ӯсхулы 31, 212 колнак. Общественный связь департаментныл ке̄тым ля̄ххал ма̄ньщи ла̄тӈыл Людмила Теткина хансыстэ.

1116 2016. 01. 29. Валентина УЗЕЛЬ

Са̄в нё̄тмил ва̄рум ле̄ккархо̄тпа Пе̄с порат матыр рӯпата ёмащакв ва̄рнэ хо̄тпат сака янытлаве̄сыт. Акв тамле хо̄тпа урыл йильпи нэ̄пак та̄ратавес. Рущ ла̄тӈыл тох намаим о̄лы – «Милосердие», ты нэ̄пак Леонид Филиппович Струсь тав хансыстэ. Ювле хультум та̄л оигпанэ̄тэ э̄лыпа̄лт ӯст о̄лнэ са̄в хо̄тпа пе̄с нэ̄пакыт акванатнэ архивколн во̄выглаве̄сыт. Та хо̄тпат халт са̄в ле̄ккар хо̄тпа о̄лыс, то̄ват ань рӯпитэ̄гыт, то̄ваныл хосат пенсиян патхатамыт, юн ӯнлантэ̄гыт. Ты нэ̄пакт хансым ле̄ккар та̄н са̄выӈпа̄лэ пуссын ва̄маныл, тав ётэ рӯпитаманыл. Э̄ква наме Людмила Александровна Лебедева о̄лыс. О̄лме сыс тав налымантем та̄л мир пусмалтым рӯпитас. Нэ̄пак хансум хум Леонид Струсь тав уре̄т тох ла̄выс: – 1964 та̄л порат ам медучилищат ханищтахтуӈкв о̄вылтахтасум. Ос аквта та̄л Людмила Александровна Ханты-Мансийск ӯст рӯпитаӈкв патыс. Ам тав ётэ ва̄йхатасум, та па̄сныл ме̄н юртыӈыщ о̄лсуме̄н, акваг хо̄нтхатыгласме̄н. Ма̄ янытыл мирн нё̄тнэ яныг рӯпатакапай ва̄раве, рущ ла̄тӈыл тав «Красный крест» тох ла̄ваве. Людмила Лебедева ма̄н округув янытыл ты рӯпата тармыл кӯщаиг о̄лыс. Та порат рӯпитам рущ э̄ква Гортэнзия Хрестофоровна Бакшеева ань тох потыртас: «Ам ле̄ккарыг ханищтахтуӈкв тахсум, ат вуйве̄сум. Педучилищан та минасум. Аквмат порат ла̄тыӈ ёхтыс, ма̄ньлат а̄гит ты «Красный крест» нампа ма̄н атавет ос ма̄нь ле̄ккарыг ханищтаӈкв патавет. Ам та̄ра тув та минасум. Тит та̄л са̄всыр а̄гм пусмалтаӈкв ханищтавесӯв. А̄стламув юипа̄лт Нижневартовский район Ларьяк нампа па̄вылн те̄твесӯв. Тот ханты ма̄хум са̄лы ӯрим о̄лэ̄гыт. Ос та порат татем пилыщма ма̄н та ва̄сӯв. Хантыт во̄рныл па̄вылн ёхтэ̄гыт, пуссын та та̄кмыӈыт, са̄всыр та̄рвитыӈ а̄гмыл а̄гмыӈыг о̄лэ̄гыт. Пувлын колн те̄тавет, ёмащакв ловтхатэ̄гыт, тувыл ущ ма̄н та̄наныл пусмалтыянӯв. Ос ювле во̄рн та минэ̄гыт. Ма̄н то̄нт са̄в хо̄тпа аквъёт тох рӯпитасӯв. Людмила Александровна кӯщаюв ма̄нав та̄кыщ о̄щсанэ. » Леонид Струсь э̄лаль тох ла̄выс. Тав нэ̄пак хаснэ э̄лыпа̄лт э̄ква палт Сургут ӯсн минас, потыртахтасы̄г, Людмила Лебедева такви вос потырты, хумус тав мирн нё̄тым рӯпитас. Потре кина по̄слын камеран хансыстэ. Мо̄т са̄в э̄рнэ нэ̄пак тав округ архивколт хо̄нтсанэ. Ты «Милосердие» нампа йильпи нэ̄пак акв со̄тыра са̄витыг та̄ратавес. Ань са̄всыр пӯльницан, ловиньтан колытн тах те̄таве, мирн вос ловиньтаве. Ам ты нэ̄пак о̄с мощ ловиньтаслум. Соссаӈ ма̄хум урыл таса̄вит лю̄ль тот та хансыма. Аквтуп са̄лыӈколт яласан ма̄хум янытэ̄т щар пуссын та̄кмыӈыг о̄лсыт. Ос рущ ле̄ккарыт та̄н та̄кманыл, та̄н а̄гманыл урыл тот та потыртэ̄гыт. Э̄рттам рущ ман мо̄т мир тох ат о̄лсыт.

1116 2016. 01. 29. Тамара МЕРОВА

Ща̄нягума̄щагум урыл э̄рыг Тыныӈ а̄тякем, со̄рни а̄тякем! Тыныӈ омакем, Ялъюс а̄гиквем! Ам та нё̄вита̄лве̄сум, ам та янмалта̄лве̄сум, Сака вориӈ а̄гииг ам та о̄лсум, Ма̄нь та̄гыл вориӈыг о̄лсум, Каӈкум, а̄пщим сас ра̄тыгла̄лсагум, Ёл ат патхатыгласум, Тувыл э̄лаль ам та яныгмасум. Тыныӈ а̄тякемн, со̄рни а̄тякемн Во̄р па̄вылн вуигла̄лве̄сум, во̄рт та ха̄йтыгтасум, Во̄рн та тотыгпа̄лве̄сум, во̄рт та тотыглахтасум. Тыныӈ омакем, со̄рни омакем Тав маныр ва̄рмаль ва̄рыглас, Ам та ва̄рмалин пувумтахта̄лсум. Тав маныр ва̄рмаль тотыс, Ам таи та тотсум. Э̄лы потыр э̄лаль о̄лы. Тыныӈ а̄тякем, тыныӈ омакем, Я̄тилаквегум, со̄рнияквегум. Ёмас ла̄тӈыл ла̄выглаве̄сум, Ёмас потрыл потырта̄лыглаве̄сум. Тыныӈ а̄тякем, тыныӈ омакем. Ань яныгпа̄лаг е̄мтапасум, То̄ванакт лю̄ньщалтахтэ̄гум, Тэ̄натэ̄н номылматыгла̄лэ̄гум. Ма̄хманум, ня̄враманум нупыл Ань тох ты ла̄ве̄гум: Тамле а̄тял ке ат о̄лсум, Тамле омал ке ат о̄лсум, Ты яныт ёмас а̄гикве но̄х ат яныгмас, Ты яныт ёмас нэ̄кве но̄х ат яныгмас, Омам ла̄тӈыт щирыл э̄лаль о̄лсум, А̄тям ла̄тӈыт щирыл э̄лаль ё̄мантасум, Во̄рт во̄раим яласа̄лсум, Я̄т хӯлпыт ӯнттым яласа̄лсум, Во̄руй алыщласум, хӯл пувыгласум. Тыныӈ а̄тякемн, тыныӈ омакемн Ёмащакв та янмалта̄лве̄сум, Ёмащакв та нёвита̄лве̄сум. Со̄рни омам, со̄рни а̄тям, Во̄рт та яласасӯв, Хӯл та пувыгла̄лсӯв, нё̄выль та тотыгла̄лсӯв. Ам ты ва̄рмаль о̄с ха̄ссум, Ань ня̄враманумн э̄лаль ла̄выглэ̄гум, О̄парищанум, щаще̄кванум ла̄тӈыт э̄лаль тотыянум. Ам номтум лю̄льсаӈ ул вос о̄ньщаве, Ам номтум э̄лаль вос тотаве, Лю̄ль ла̄тыӈ ат ля̄гала̄лсум, Лю̄ль номт ат о̄ньщигла̄лсум, А̄гиянумпыганум нё̄рыг вос ё̄мыгтэ̄гыт, Сохтыл вос ё̄мыгтэ̄гыт, Лю̄ль ла̄тыӈ нэ̄мхотты хо̄тпа нупыл ул вос ла̄выглэ̄гыт. Ты э̄рыг ма̄ньщи ла̄тӈыл Тамара Семёновна Мезенцева потыртастэ, ма̄ньщи ла̄тӈыг Николай МЕРОВ хансыстэ.

1116 2016. 01. 29. Валентина УЗЕЛЬ

Ё̄рн хум номаве Юрий Вэлла ё̄рн хумыг о̄лыс, рущ ла̄тӈыл та̄н мираныл тох ла̄ваве – «лесные ненцы». Ма̄н округувт ты ма̄хум сака мощща хультыс. Та̄н пуӈктотнэ кӯщаяныл Юрий Вэлла ты о̄лыс. Тав намыӈсуиӈ хо̄тпаг о̄лыс, ма̄тэ, такви ма̄хманэ сака вуянтасанэ. Э̄кватэ̄нтыл тэ̄н са̄лы ӯрим о̄лсы̄г. О̄лме̄т тав стихыт, ма̄нь потрыт хансыс. Финноугорский мирыт таве сака янытласаныл, та̄н ты таве̄н нэ̄пакыт та̄ратаӈкве нё̄тсыт. Тит та̄лыг ань ты е̄мтыс, тав хотталь щалтыс. Ос мирн тав номаве, стиханэ, потранэ ловиньтавет. Ты э̄тпос 22 хо̄талэ̄т ӯсувт о̄лнэ мир «литературный гостиный» нампа колнакн во̄виньта̄лве̄сыт. Та хо̄тал атхатыглам мир Юрий Вэлла урыл потыртасыт. Колледжит ханищтахтын а̄гит тав стиханэ ловиньтасаныл. Яныгпа̄ла хо̄тпат – ты Е. А. Нёмысова, А. И. Сайнахова, А. Н. Мехнина тав о̄лупсатэ урыл потыртасыт. Ма̄хум сака ёмащакв потыртасыт, ка̄сыӈ потыртам хо̄тпа Юрий Кылевич урыл са̄в ёмас ла̄тыӈ ла̄выс. Ма̄нь тинаохса суссылтавес. Тот тамле пӯмыщ ва̄рмалит урыл Кольчу апге потыртас. О̄йка во̄рт яласыматэ, нэ̄пакло̄мт акваг ёт тотыглас. Номтэ̄н матыр стих ман потырохса ёхты, та̄ра нэ̄пакн та хансыянэ. Аквнакт нэ̄пак ёт ат о̄ньщум. Тав «Буран» тармыл те̄рсолил ла̄тӈыт щуртсанэ. Мо̄т накт ос тӯйт тармыл йӣво̄влыл стиханэ хассанэ. Тав ты урыл тох потырта̄лас: «Ам номтанум та̄ра ат те хансыянум, та минэ̄гыт. Воссыг аты номылматыянум. »

1116 2016. 01. 29. Светлана РОМБАНДЕЕВА

Мирколт рӯпитан ма̄ньщи нэ̄ Ха̄льӯс район Восыӈтӯр па̄выл мирколт ма̄ньщи нэ̄ рӯпиты, наме Маргарита Витальевна Ковалюк, а̄ги о̄парищ наме Шесталова. Туи тув ялмум порат, мирколт акванхо̄нтыгпахта̄лсуме̄н, мощ потрамасме̄н. Тав соссаӈ мир тэ̄ланыл тармыл пуӈк тоты, ты урыл аквкит ла̄тыӈ ла̄выс: – Па̄влувт 462 хо̄тпа о̄лы, та̄н халанылт 289 – соссаӈ хо̄тпа (29 – хантыт, 260 – ма̄ньщит). О̄лнэ колыт тыт ань ат ӯнтталавет, кол ат о̄щнэ ма̄хум мо̄тыт та̄л колыл ӯнттуӈкве ла̄вве̄сыт. Кит йильпи ӯсхулыиг ва̄рвесыг. Яныг хо̄нтын ялум хо̄тпа па̄влувт а̄тим, пуссын холасыт. Школат ня̄врамыт ма̄ньщи ла̄тыӈ ханищтэ̄гыт, та̄н ётаныл Роза Семёновна Новьюхова рӯпиты. Клубыт са̄в та̄л Людмила Савельевна Хозумова рӯпитас, ма̄ньлат ма̄хум сакныл матыр хартуӈкве ханищтасанэ, са̄всыр пормасыт сагсыт, ма̄ньщи йӣквыт ханищтасыт. Ань ты накт ат атхатыглэ̄гыт. Тот соссаӈ мир пормасыт суссылтан колнак о̄лы. Ань яныгман ня̄врамыт ща̄нь ла̄тӈыл ат потыртэ̄гыт. Ма̄н ат потыртэ̄в, та̄н ос воссыг хо̄т хӯлэ̄гыт. – Маргарита Витальевна, наӈ хо̄т самын патсын? – Ам Восыӈтӯрт самын патсум, тыт яныгмасум. А̄тям Виталий Николаевич Шесталов соссаӈ хо̄тпа о̄лыс. Тэ̄н ма̄ньщи поэтув Юван Николаевич Шесталов ёт ягпыгыӈыщ о̄лсыг. Яга̄гитэ̄н ань Ханты-Мансийск ӯст о̄лы, Альбина Николаевна Мехнина. Омам Лидия Михайловна Молданова, ханты нэ̄. Тыг Ханты-Мансийский район Кышик па̄вылныл ёхталас. Тэ̄н сас хосат а̄тимыг е̄мтсыг. Ам кит яга̄ги о̄ньще̄гум. Акв яга̄гим Ханты-Мансийскыт о̄лы, мо̄танум Тюмень ӯсн ва̄нтлыс. Кит пыг о̄ньще̄гум, нёлолов ос онтолов классыт ханищтахтэ̄г. Ань потруме̄н та оигпас. Маргарита Витальевнан ам са̄в ёмас, сымыӈ ла̄тыӈ ла̄ве̄гум. Ще̄мьятэ ёт пуста̄гыл вос о̄лы, На̄й-О̄тыранэ̄н вос ӯргалаве!

1116 2016. 01. 29. Тамара МЕРОВА

Тав нё̄тнэ супыт ю̄нты Валентина Дорофеевна Саратина Ягрим па̄вылт о̄лы. Тав хосат та̄гыл пенсиян патхатас, ос такви ла̄внэ̄тэ щирыл, наска̄ссыг тэ̄ла та̄л ӯнлантаӈкве ат ве̄рми. Тав матумпа̄ла хо̄тпат акванатыглан «Альянс» нампа колн ӯщлахтын ос кас ва̄рнэ ма̄гыс яланты. Тот юрт ма̄хманэ ёт э̄ргыт ханищтэ̄гыт, сыресыр ощхуль ва̄ре̄гыт, ка̄тыл нё̄тнэ пормасыт ма̄щтырлэ̄гыт. То̄внакт хо̄та̄ти са̄всыр суссылтапыт, касылыт щё̄питалавет, э̄ква тув такви пормасанэ суссылтаӈкве мыганэ. Ханищтапыт о̄лнэ̄ныл поравт тув о̄с яланта̄лы. Мо̄лты тох Октябрьский район Щеркалы па̄вылн ялсыт, Ямал ма̄н о̄с во̄виньталве̄сыт. Ягримт о̄лнэ ма̄ньщи э̄кват ёт акванхо̄нтхатыглэ̄гыт ос пе̄с о̄лупсав номылматым, пе̄с ийс наканув э̄лаль хумус тотуӈкве, та̄н номсахтэ̄гыт. Ты о̄вылтыт ма̄ньлат а̄гитпыгыт пӯмщалаӈкве о̄с э̄ре̄гыт. Валентина Дорофеевна ла̄ви: «Матыр ю̄нтуӈкве ос ма̄щтырлаӈкве сака ёмас тэ̄лаг о̄лы. Ю̄нсхатнэм сыс матыр мо̄йтыт, э̄ргыт номылматэ̄гум, пе̄с о̄лупсав ос ма̄хманув ка̄стэ̄гум, та сыс супум та а̄сты». Тав ма̄ньщи супыт о̄с ю̄нты. То̄ва хо̄тпат таве̄н суп ю̄нтылтаптэ̄гыт. Вика апге о̄с тав по̄хатэ̄т акваг ӯнланты. Матыр ю̄нтнэ тэ̄латыл пӯмщалахты. Ане̄кватэ̄н о̄с нё̄тнэ супыл ю̄нтыма, а̄гирищакве масапастэ ос ма̄навн суссылтастэ. Валентина Дорофеевна рӯт ос юрт ма̄хманэ̄н паща ла̄тыӈ ке̄ты, пуста̄гыл о̄луӈкве ла̄виянэ.

1116 2016. 01. 29. Е. А. Ромбандеева

Яныг утыт ос ма̄нь утыт Ам ляльтум сунсэ̄н! Ам хольтум поргащлэ̄н! Хо̄т нирщахыл ос паль пум, тот но̄хнув порыгма̄лэ̄н, ла̄глын ёл ул вос тагматы! Састум ма̄ тармыл – аквкемыл ха̄йтэ̄н, товлыӈ ӯй хольт минэ̄н. Наӈын щар та̄кыщ ха̄йтуӈкве э̄ри, нэ̄матарыл юил ул вос ёхтавен. Оккакве, наӈ ва̄гта̄л патсын? Нирщахыл ёлыпалн хуен. Тыт хо̄тал йӣв товыт та̄ра покапи. Посыӈ лолтанэ̄тыл пум тармыл ёнги. Наӈ совын хансаӈ, тав о̄с лолтаӈ. Тыт наӈ нэ̄матарн ат ка̄салавен. Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1117 2016. 02. 12. Людмила ТЕТКИНА

Ня̄врамыт ӯргалан кӯщай пе̄риявес Соссаӈ ма̄хум Ассамблеят рӯпитан депутатыт сапра̄ни ва̄рыгласыт. Та̄н са̄кконыт ос ня̄врамыт ӯргалан ва̄рмаль урыл потыртасыт. Сапра̄нин Татьяна Моховикова ёхталас. Тав округувт ня̄врамыт ӯргалан хо̄тпаг рӯпиты, рущ ла̄тӈыл «Уполномоченный по правам ребёнка в ХМАО-Югре» ла̄ваве. Татьяна Дмитриевна ма̄хум э̄лыпа̄лт такви рӯпататэ урыл потыртас. Тав ла̄выс, та̄л котиль э̄тпост Ха̄льӯс район Кульпас па̄вылт о̄лнэ ще̄мья таве̄н пищма хансыс. Ты ще̄мьят яныгман ня̄врам Ха̄льӯс школаинтернатн ке̄таве. Школанылт рӯпитан комиссия таве тув ке̄туӈкве таӈхи. Татьяна Моховикова ла̄выс: «Улпыл, тот рӯпитан хо̄тпат ня̄врам ханищтаӈкве ат таӈхе̄гыт , тыи ма̄гсыл тув ке̄тыяныл. Ха̄льӯст рӯпитан школаинтернатыт ня̄врамыт туп 6 класс мус ханищтавет, ты юипа̄лт та̄н э̄лаль нэ̄мхоталь ханищтахтуӈкве ат вивет. Ре̄тыӈ ю̄свой э̄тпос ам та па̄вылн ос Ха̄льӯс район янытыл рӯпитан школат уральтаӈкве тах ялэ̄гум, школат рӯпитан хо̄тпат ёт потыртаӈкве патэ̄гум». Округ Дума депутат Надежда Алексеева ос ты урыл ла̄тыӈ ла̄выс. Таве̄н пе̄с йис ма̄т о̄лнэ ще̄мьят та̄нки та̄рвитыӈ ва̄рмаляныл урыл пищма хансэ̄гыт. Та ма̄т о̄лнэ ма̄хум пуссын акв реестрнэ̄пакн хасве̄сыт, та̄н самын патум ня̄враманыл ма̄гыс хус со̄тыра солко̄вил мивет. Тувыл ня̄врам акв та̄л ос хо̄т э̄тпос сыс пособияолныл ойтаве. Ос садикн ат ке виве, ня̄врам ма̄гыс олн воссыг атойтаве. Надежда Геннадьевна ла̄выс, во̄рт о̄лнэ ще̄мья хоты садикн ня̄врам тотыглаӈкве патытэ. Ты ще̄мьят ты пособияолныл э̄лаль ойтуӈкве э̄ре̄гыт. Татьяна Моховикова ювле ла̄выс, пособияолныл туп садикн ат ялантан ня̄врамыт ойтавет. Пе̄с йис ма̄т яныгман ня̄врамыт ма̄гсыл мо̄т са̄ккон пирмайтаӈкве э̄ри. То̄нт во̄рт о̄лнэ ще̄мья ты олныл нё̄туӈкве о̄с патаве.

1117 2016. 02. 12. Людмила ТЕТКИНА

Югра ма̄т ёмащакв ӯщлахтуӈкве о̄с ро̄ви О̄лнэ ма̄вт туризм щирыл маныр рӯпата ва̄раве, ты урыл Инна Арканова ля̄ххал тотнэ ма̄хумн потыртас. Тав природный ресурс округ департаментыт рӯпиты. Инна Григорьевна ла̄выс: «Ты порат хо̄н ма̄т ӯщлахтын ма̄гыс сака са̄в олн э̄ри, Турциян ос Египет ма̄н воссыг ат та̄ртаве̄в, Россият ӯщлахтуӈкве э̄ри. Ань са̄в ма̄хум Крым ос Краснодарский крайн ялуӈкве щё̄питахтэ̄гыт. Тувыл Россият са̄в нё̄тнэ ма̄ о̄лы, тот о̄с ёмащакв ӯщлахтуӈкве ро̄ви. Ма̄н округувт тамле ма̄ о̄с са̄в. 2014 та̄л сыс 462 со̄тыра мӯй хо̄тпа тыг ёхталас. Та̄н халанылт 8 со̄тыра э̄лумхо̄лас хо̄н ма̄ныл о̄лсыт. Ты та̄л ма̄ньполь э̄тпос 14 хо̄талныл 21 хо̄талэ мус Ханты-Мансийск ӯст биатлон каснэ ва̄рмаль е̄мты. Ка̄сыӈ та̄л ты касыл сунсуӈкве са̄в мир ёхталы. Мӯй ма̄хум тыт са̄лы сӯныл яласаӈкве ве̄рме̄гыт, ё̄рнколт ща̄й ае̄гыт ос хӯл исмитыл тыттавет, са̄всыр сувенирыт ёвтэ̄гыт. Ма̄ньщит ос хантыт пе̄с йис та̄гыл тыт о̄лэ̄гыт, та̄нки культураныл э̄лаль тотыяныл. Тыг ёхталам мӯй хотпатн та̄н уранылт потыртаӈкве э̄ри. Ань округувт рӯпитан общинат ос пе̄с йис ма̄т о̄лнэ ще̄мьят та̄нки палтаныл туристыт во̄вияныл. Тамле рӯпата ань 15 организация ва̄ри. Ма̄хум тот хӯл алыщлаӈкве, во̄раяӈкве тотыглавет, са̄лы нё̄влил, ня̄рхулыл ос атыӈ ня̄нил тыттавет». Ты рӯпата ва̄рнэ ма̄хум грант нампа нё̄тмилолныл мивет. 2016 та̄лт ты олныт мо̄т щирыл миӈкве патавет. Ты э̄лыпа̄лт ма̄хум проект та̄нки хассыт ос тувыл Ханты-Мансийск ӯсн ке̄тыгласаныл. Та̄н халанылт щар ма̄к э̄рнэ ос ёмас проект пе̄риявес ос олныл майвес. Ты та̄л ты нё̄тмил мо̄т щирыл миӈкве патаве, ань туризм щирыл рӯпитан ма̄хум о̄влэ̄т та̄нки олнаныл холтуӈкве патыяныл. Мӯсхалыг рӯпитаӈкве ке патэ̄гыт, олнаныл ювле мивет. Нефтеюганск ӯс по̄хат «Сибирский двор» нампа ӯщлахтын ма̄ рӯпиты. Та̄н о̄с грантолныл майлуве̄сыт. Тув ёхталам хо̄тпат ань соссаӈ ма̄хум пе̄с йис ва̄рмаляныл урыл потыртавет. Маньщит, хантыт Ӯринэ̄ква хо̄тал тот янытлэ̄гыт, са̄всыр мо̄т ялпыӈ хо̄талыт ва̄рыглэ̄гыт, тох олн сэ̄лэ̄гыт. Нягань ӯс по̄хат ӯщлахтын ма̄ ва̄рвес ос ма̄хум ёсал тахсуӈкве тув во̄вавет. Ханты-Мансийск ӯст экскурсия ва̄рнэ ма̄хум ханищтаӈкве патавет. Инна Арканова ты урыл ла̄выс: «Ты ма̄хум ма̄гсыл ма̄н ханищтап тах ва̄ре̄в. Ань туп хо̄т хо̄тпат тув ялантаӈкве ка̄сащасыт. Акв порат ам мӯй ма̄хум ёт ӯсув сунсыглым яласасум. Ма̄хум ӯс хосыт нас тотыглаве̄сыт, тох рӯпитаӈкве щар ат ро̄ви. Ма̄н тамле нё̄тнэ ӯст о̄лэ̄в, тыт таса̄вит ёмас, сымыӈ, ка̄ркам хо̄тпа, мир ва̄нэ писателит, поэтыт о̄лэ̄гыт. Та̄н ураныл о̄с ла̄тыӈ ла̄вуӈкве ро̄ви, та̄н хансум стиханыл ловиньтаӈкве э̄ри. То̄нт кит щёс са̄внув турист хо̄тпат тыг ёхталаӈкве ка̄саще̄гыт». Нэ̄ э̄лаль ла̄выс, тыт пе̄с йис та̄гыл соссаӈ ма̄хум о̄лэ̄гыт, ты урыл хо̄та̄ти акваг потыртаӈкве э̄ри.

1117 2016. 02. 12. Александр ВЬЮТКИН

Йильпи мӯтра ма̄нь па̄влыӈ ма̄н ты ёхты Округув янытыл налыман нупыл тит ма̄нь па̄влытт телевизор хосыт йильпи программат суссылтаӈкв ты патавет. Ты сэ̄ртал ут рущ ла̄тӈыл «цифровое телевидение» ла̄ваве. Ты пӯмащ «Урало-Сибирский региональный центр» нампа кол щё̄питаӈкв вуйхатас. Йильпи мӯтра Белоярский, Нижневартовский, Сургутский, Ханты-Мансийский, Октябрьский, Советский ос Ха̄льӯс районыт янытыл ва̄раве, моще̄рт карыс вышкат тот тӯщтавет. Рӯпатаныл ань ты минам э̄тпос о̄выл хо̄талныл о̄вылтасаныл, э̄рнэ пормасыт Ханты-Мансийск ос Нижневартовск ӯсыгн тотсаныл. Тувыл э̄лаль округув янытыл па̄влыӈ ма̄н тӯщтын ма̄гсыл ла̄ккватотавет. Рӯпатаныл Покур, Хулюмсӯнт, Каюково, Селиярово, Сытомино, Кышик ос Согом па̄вылт о̄вылтыяныл. 2018 та̄л мус пуссын аквъёт нёлса̄т са̄всыр ищхӣпыӈ ут тӯщтуӈкв э̄ри. Хо̄т та̄л сыс атпан нупыл нёлолов са̄всыр нампа ут ва̄рвес. Те̄тым потыр ма̄ньщи ла̄тӈыл Александр ВЬЮТКИН хансыстэ.

1117 2016. 02. 12. Валентина УЗЕЛЬ

Мирн пе̄риим ма̄хум рӯпатаныл урыл Са̄ккон хаснэ ма̄хум ювле хультум э̄тпост акванатхатыгласыт. Та̄н 53 заседанияныл о̄лыс. О̄выл ла̄тыӈ депутатыт нупыл округ кӯщай нэ̄ Наталья Комарова ла̄выс, тав округ миркол кӯщаит 2015 та̄л сыс ва̄рум рӯпатаныл урыл потыртас. Тав ла̄выс, 2015 та̄л сыс та̄н маныр рӯпата ва̄руӈкв номсысыт, пуссын ва̄рсаныл. Ань ма̄ янытыл о̄лнэ та̄рвитыӈ ва̄рмаль мины, рущ ла̄тӈыл тав «кризисыг» ла̄ваве, тав о̄с ёмас хунь тоты. Ты хосыт ма̄хум рӯпата олнаныл мощщаг е̄мтсыт, ань рӯпитан хо̄тпат пуссын мощща олн сэ̄луӈкв патсыт. Кӯщай нэ̄ ла̄вме щирыл, о̄лупсавт нэ̄матыр сака та̄рвит а̄тим. Кос мощ та̄рвитыӈ, э̄лаль о̄луӈкв э̄ри. Тувыл депутатхо̄тпат рӯпитаӈкв та о̄вылтахтасыт, са̄всыр са̄кконыт пирмайтаӈкв та патсыт. О̄влэ̄т Дума кӯщай хум Борис Хохряков ма̄хум янытлаӈкв патсанэ. Янытлам ма̄хум грамотанэ̄пакыл майве̄сыт. Кӯщай мовиньтым та̄нанылн ла̄выс, ань нас тэ̄ла та̄л олн холтуӈкв щар ат ро̄ви, таима̄гыс ты янытлам ма̄хум мӯйлупса та̄л та хультсыт. Ма̄н округувт са̄в ня̄врамыӈ ще̄мьят, нуса тотнэ ще̄мьят ос а̄гмыӈмосыӈ ня̄врамыт пуссын акван те ловиньтаӈкв 33 со̄тыра 500 ня̄врам е̄мты. Мо̄лты та̄л олн ойтта̄л та̄наныл школат тыттын ма̄гсыл 1 млрд. 700 солко̄ви та̄стувес, ты та̄л 2 млрд. солко̄ви тах миве. Ка̄сыӈ та̄л ты ня̄врамыт са̄вме̄гыт. Та̄н акв хо̄тал сыс тит щёс э̄лаль тыттуӈкв патавет. О̄лнэ колыт щё̄питан ма̄гыс атнэ олныт, рущ ла̄тӈыл та̄н ла̄вавет – «взносы на капитальный ремонт жилых домов», та урыл потыртасыт. Ань йильпи са̄кконын тамле ла̄тыӈ хасвес, яныгпа̄ла хо̄тпат 70 та̄ланыл те то̄влысыт, та̄н ань пуссын 50% са̄вит взносолн ойтэ̄гыт, 80 та̄ланыл то̄влум яныгпа̄ла хо̄тпат ты ма̄гыс олн ойтуӈкв щар ат патэ̄гыт. Тувыл ля̄ххал тотнэ ма̄хум акванатыглаве̄сыт, та̄н депутатыт ос округ Дума яныг кӯщаит ты йильпи пирмайтым са̄кконыт урыл титыгласаныл. Ма̄ньщи хумиюв Никита Партанов титыглахтас, ань 2016 тал о̄вылтахтам па̄сныл ма̄н округувт «Югра» нампа журнал, «Старт» нампа журнал, «Юграинформ» нампа ля̄ххал тотнэ колыт пуссын лаппантве̄сыт. Тот рӯпитан ма̄хум рӯпата та̄л хультсыт. Та̄л котиль э̄тпосныл «Югра» нампа телерадиокомпания колт рӯпитан ма̄хум пуссын по̄хан те̄тве̄сыт. Ань манрыг тох ва̄раве, намыӈсуиӈ журналист хо̄тпат пуссын рӯпата та̄л та хультсыт. Борис Хохряков, округ Дума кӯщай хум, ювле тох ла̄выс. Ань ма̄ янытыл сака та̄рвитыӈ пора мины. Со̄пас олн щар а̄тим, э̄лаль о̄лнэ олн о̄с ат то̄вылхаты. Таима̄гыс ты округ миркол кӯщаит ля̄ххал тотнэ колыт лаппантыяныл. Ты журналыт ос газетат та̄ратан ма̄гыс сака са̄в олн э̄ри. Ос тот рӯпитам ма̄хум та̄нти олн щар ат сэ̄лсыт, округ бюджет па̄лыл олныл майве̄сыт. Э̄лаль маныр е̄мты, нэ̄матыр ат ва̄гыт. Ты та̄л о̄лнэ колыт тынаныл мощ ёлаль минасыт. Сургут ӯст – 10% са̄вит мус, Нижневартовск ӯст – 15% са̄вит мус. Ос Ханты-Мансийск ӯст колыт тынаныл акв тамле са̄витыг хультсыт. Ты ва̄рмаль ань таима̄гыс е̄мтыс, кол ӯнттын ма̄хум олныл щар ат ойтавет ос кол ӯнттын ма̄гыс олныл щар ат мивет. Ма̄н округувт Счётный палата рӯпиты. Та колт рӯпитан ма̄хум та̄л оигпан юипа̄лт депутатыт ма̄гыс отчёт ва̄ре̄гыт, минам та̄л сыс бюджет олныт хумус холтве̄сыт. О̄лн мори холтым организацият олныт пуссын ювле миӈкв ла̄вавет. Та нэ̄пакт Ха̄льӯс район урыл са̄в хансыма. То̄ва порат тот олныт са̄всыр ат ро̄внэ ма̄н маимат.

1117 2016. 02. 12. Мария Кумаева

Ща̄нь ла̄тыӈ ва̄нэ ма̄хум ма̄гыс ля̄ххал Ре̄тыӈ ю̄свой э̄тпос 20 хо̄талэ̄т 12 щё̄с порат ма̄ньщи ла̄тыӈ ва̄нэ ма̄хум ма̄гыс Фронтальный диктант е̄мты, Ща̄нь ла̄тыӈ янытлан хо̄тал кастыл тамле ва̄рмаль ва̄раве. Ка̄сыӈ э̄лмхо̄лас, хотьют ка̄сащи, такви ща̄нь ла̄тӈыл диктант хансуӈкве тув вос ёхталы. Фронтальный диктант ва̄рнэ ма̄гыс А̄с-угорский институт прикладных исследований и разработок нампа кол рӯпиты. Образование и молодёжный политика департамент, образование щирыл рӯпитан кӯщаит, «Спасение Югры» нампа общественный организация нё̄тмил ва̄ре̄гыт. А̄с-угорский институт прикладных исследований и разработок нампа кол ищхӣпыӈ утыт о̄лнэ ло̄псэ̄т (http: //www. оуипиир. рф) ты диктант ва̄рнэ урыл хансым о̄лы. Ты телефон хосыт 8(3467) 33-54-35 манос электронный почта хосыт ouipiir@mail. ru. китыглахтуӈкв ро̄ви. На̄н тамле акциян нё̄тхатуӈкв ве̄рмегы̄н. Ань диктант хаснэ ма̄гыс колнак щё̄питаве, таима̄гыс ре̄тыӈ ю̄свой э̄тпос 19 хо̄талэ мус ты ло̄псыт http: //www. оуипиир. рф «Фронтальный диктант» разделт «форма» нампа нэ̄пак хансуӈкв э̄ри. Институт ля̄ххалэ ма̄ньщи ла̄тӈыл Мария Кумаева хансыстэ.

1117 2016. 02. 12. Александр ВЬЮТКИН

Ка̄сыӈ колта̄гыл касуӈкв ве̄рми Округ янытыл ка̄сыӈ та̄л ма̄льполь э̄тпос о̄выл хо̄талныл ще̄мьят халт касыл о̄вылтаве. Ты пӯмщаныл рущ ла̄тӈыл «Семья года Югры» ла̄ваве. Ты касыл мирн нё̄тмил ва̄рнэ округ департаментыт рӯпитан ма̄хум та̄н ва̄рияныл. Каснэ колта̄глыт ма̄гсыл ат нампа пӯмащ щё̄питавес – «Трудовая династия», «Древо жизни», «Многодетная семья», «Замещающая семья» ос «Аборигенная семя». Лов та̄л округувт о̄лнэ, ня̄враманыл ёмщакве̄г янмалтан, пе̄с о̄лупсаныл э̄лаль тотнэ колта̄глыт касуӈкв ве̄рме̄гыт. Ты ка̄сылн ёхтуӈкв ка̄сащан ще̄мьят я̄ӈк на̄тнэ э̄тпос ва̄т нупыл титыт хо̄талэ мус заявка нампа нэ̄пак тыг вос те̄тэ̄гыт. Ты касыл урыл ищхӣпыӈ ут www. admhmaо. ru, www. pdugra. ru, интернет ло̄псыт хансым о̄лы, тот ловиньтэ̄н. Ты ля̄ххал ма̄ньщи ла̄тӈыл Александр ВЬЮТКИН хансыстэ.

1117 2016. 02. 12. Тамара МЕРОВА

Номтыӈ ня̄врамыт та̄нки халанылт кассыт Округув янытыл 9-11 классыт ханищтахтын а̄гитпыгыт халт щар номтыӈ ня̄врамыт Ханты-Мансийскан ёхталасыт. Ань «право» предмет щирыл атпан нупыл хӯрум ня̄врам касуӈкве ёхталас. 9 классыт халт Ханты-Мансийскат ханищтахтын ня̄врамыт щар номтыӈыг о̄лэ̄гыт. 10 классыт халт Радужный ӯсныл ёхталам а̄гитпыгыт но̄хпатсыт. Ос 11 классыт халт Нижневартовск ӯс а̄гитпыгыт янытлаве̄сыт. Касум ня̄врамыт заданияныл ёмщакв ва̄рсаныл. Тувыл щар номтыӈ ня̄врамыт пе̄рияве̄сыт. «Экономика» предмет щирыл нэ̄мхотьют но̄х ат патыс. «Литература» предмет ма̄гыс касуӈкве са̄тпан нупыл са̄т э̄лумхо̄лас ёхталас. 9 классыт халт Нижневартовсканыл, Когалымныл ос Урай ӯсныл ёхталам ня̄врамыт но̄хпатсыт. 10 классыт халт Нягань, Лангепас ос Сургут ӯсныл хо̄тпат щар номтыӈыг заданияныл ва̄рсаныл, ос 11 классыт ханищтахтын ня̄врамыт халт – Когалымныл, Нижневартовсканыл ос Пыть-Ях ӯсныл. «История» предметыт хо̄тпан нупыл хӯрум ня̄врамыт кассыт. Тот Мегион ос Лангепас ӯс ня̄врам но̄хпатсыт. Са̄тпан нупыл нила хо̄тпа «Основы безопасности жизнедеятельности» предмет ма̄гыс кассыт. Сургут ӯсныл ёхталам пыг, Октябрьский районныл, Ханты-Мансийскат о̄лнэ хо̄тпаг заданият пуссын номтыӈыг хассаныл. «Биология» предмет ма̄гыс онтырса̄т нупыл нёлолов ня̄врам касуӈкве ёхталас. Тот Урай ос Сургут ӯс ня̄врамыт но̄хпатсыт. Ты потыр ма̄ньщи ла̄тӈыг Тамара Мерова хансыстэ.

1117 2016. 02. 12. Валентина УЗЕЛЬ

Ля̄ххал тотнэ хо̄тпат атыглаве̄сыт Ма̄н округувт ка̄сыӈ та̄л журналистма̄хум акванатыглавет. Та̄н та̄нти халанылт ханищтахтэ̄гыт, потыртэ̄гыт – хумус рӯпитэ̄гыт, маныр ва̄рмаль о̄ньще̄гыт. Ань ка̄сыӈ яныг ӯсныл ос районныл титса̄ттем хо̄тпа аквъёт рӯпитасыт. Та̄наныл ханищтан ма̄гыс Москва ӯсныл намыӈсуиӈ журналистхо̄тпат ёхталасыт. Акв хум Вячеслав Терехов «Интерфакс» нампа колт рӯпиты, тав тот ва̄ӈын кӯщаиг о̄лы, Россия Президент Владимир Путин ос Россия Правительство кӯщай Дмитрий Медведев ва̄рнэ рӯпататэ̄н урыл ля̄ххалыт хансы. Тав потыртас, Владимир Путин потыртанэ̄тэ порат то̄ва ла̄тӈанэ щар ат торгамтахтэ̄гыт. Акв порат тав Президент ла̄тӈе лю̄льсаӈ хасме. Та̄ра яныг кӯщайн во̄вима, рӯпатаныл по̄хан а̄латы те̄твес. Та̄нанылн рӯпитаӈкв сака та̄рвитыӈ, та̄н ат ла̄вавет, Президентув холытан хо̄т рӯпитаӈкв паты. Аквтит щё̄с хульты, ущта ла̄вавет, яныг кӯщаит хо̄т акванатхатэ̄гыт. Ос Москва сака яныг ӯскапай, тув ёхтуӈкв а̄лыме̄гыт ман ат а̄лыме̄гыт, ты та̄н рӯпатаныл. Мо̄т хум Константин Лейфер ТАСС нампа ма̄т рӯпиты. Тав хурит по̄слы. Ос сака пӯмыщ потыртас. Та̄н фотоаппаратаныл са̄всыр ищхӣпыӈ утыл ва̄рим о̄лэ̄гыт, ущты по̄слым хурит та̄н та̄ра интернетн те̄тыяныл. Ма̄ янытыл та̄н хурияныл та̄ра та ка̄салавет. Та̄н пуссын аквъёт 22 хо̄тпа рӯпитэ̄гыт. То̄ва хо̄тпаныл мо̄т яныг ӯст рӯпитэ̄гыт. Иваново ӯст о̄лнэ акв хумияныл сака ёмащакв по̄слуӈкв ха̄сы. Ань тав хуриянэ мирн суссылтаве̄сыт. Ос хумус ёмащакв ос э̄рнэ щирыл по̄слуӈкв э̄ри, ань ма̄хум о̄с ханищтаве̄сыт. Людмила Полянова Москва ӯст «Личность» нампа центр кол кӯщаиг о̄лы. Тав ань ӯсувн о̄с ёхталас. Журналистыт ёт са̄выӈпа̄лэ хо̄тпат потыртаӈкв сака ат таӈхе̄гыт, ос та̄нанылн маныр ла̄тыӈ ла̄вуӈкв э̄ри, та̄н ётаныл хумус потыртаӈкв ро̄ви, ты тэ̄лан ханищтаве̄сыт. Э̄лаль тав ла̄выс, ань яныгман ня̄врамыт нэ̄пак ат ловиньтэ̄гыт, телевизор о̄с ат сунсэ̄гыт. Та̄н туп ищхӣпыӈ ут э̄лыпа̄лт хо̄тал палыт ӯнлэ̄гыт, нэ̄матарыл ат пӯмщалахтэ̄гыт. Нэ̄ ла̄выс, ты ня̄врамыт «робот» хурипаг е̄мтэ̄гыт. Ос та̄нанылн ань нё̄туӈкв э̄ри. Ща̄нита̄щит ты урыл о̄с вос номсахтэ̄гыт. Мӯй хо̄тпат потыртаманыл юипа̄лт ля̄ххал тотнэ ма̄хум янытлаӈкв патве̄сыт. «Журналист года 2015» яныг намыл Анатолий Белый майвес, тав Ха̄льӯс районт «Жизнь Югры» нампа газетат рӯпиты. Ос матрыг тав Ханты-Мансийск ӯсн ань ат ёхталас. Ты та̄л сака са̄в хо̄тпа янытлавес, та̄н халанылт са̄в ма̄ньлат хо̄тпа о̄лыс. Та̄н пуссын Москва ӯсныл ёхталам кӯщаитн мӯйлупсал майве̄сыт.

1117 2016. 02. 12. Николай МЕРОВ

Йис ма̄нын на̄нки нупылын хансэлы̄н Ха̄льӯс районт о̄лнэ соссаӈ ма̄хманув та̄нки йис ма̄нанылт хӯл алыщлым, во̄раим ос пил ва̄тым нот палытыл о̄лэ̄гыт. 1992 та̄лт «Родовые угодие» нампа положение рӯпитаӈкве патыс. То̄нт йис ма̄ тармыл рӯпитан хо̄тпат ма̄наныл та̄нки нупыланыл хансуӈкве ве̄рмысаныл. Ос та порат са̄выӈпа̄лэ ма̄хум нэ̄матыр нэ̄пакыт ат ва̄рсыт. Тувыл 1995 та̄лт ты положениенэ̄пак хотпо̄илттавес. Та юипа̄лт ос мо̄т са̄ккон щирыл ма̄хум рӯпитаӈкве патсыт, рущ щирыл «О территории традиционного природопользования коренных малочисленных народов Севера» ла̄ваве. Ань соссаӈ ма̄хманув та̄нки йис ма̄наныл ты са̄ккон щирыл нэ̄пакн хансуӈкве ве̄рмияныл. Ре̄тыӈ ю̄свой э̄тпос нилыт хо̄талэ̄т ам округ Дума депутат нэ̄ Татьяна Гоголева рӯпататэ̄н ялсум. Тот ты урыл таве китыгласлум. На̄н тав потре э̄лаль ловиньтэлы̄н: СА̄ккон урыл «Ань во̄раян ос хӯл алыщлан тэ̄ла, ма̄щунь ма̄ныл но̄хвинэ ва̄рмаль Федеральный са̄ккон №31 хосыт ӯргалым о̄ньщаве. Э̄лумхо̄лас йис ма̄тэ такви нупылэ хансуӈкве таӈхи ке, таве̄н э̄рнэ нэ̄пакыт ты Федеральный са̄ккон щирыл атуӈкве э̄ри. Округ са̄ккон щирыл хо̄тпа йис ма̄тэ такви нупылэ хансуӈкве ат ве̄рмитэ, тыт нас аренда матахмат та̄лытн хансуӈкве ро̄ви. Саранпа̄вылт, Кульпаст ос мо̄т ма̄т о̄лнэ хо̄тпат туп ты тэ̄ла хосыт йис ма̄наныл та̄нки нупыланыл хансуӈкве ве̄рмияныл. Ос Россия янытыл ты са̄ккон щирыл иӈ нэ̄мхотьют йис ма̄ такви нупылэ ат хансыглас. Йис мА̄ хаснэ вА̄рмаль 1992 та̄лт йис ма̄т соссаӈ хо̄тпат нупыл хаснэ ма̄гыс ма̄н Саранпа̄вылт «Сыгва» нампа община ва̄рыслӯв. Та община хосыт соссаӈ ма̄хманув йис ма̄т та̄нки нупыланыл хассаныл. Ань «Тӯрупъя» нампа община тот рӯпиты. Кӯщаиг ма̄ньщи хум Иван Качанов тот о̄лы. Та порат тав э̄рнэ нэ̄пакыт мӯсхал щирыл щё̄питаӈкве а̄лымас. Та сыс ань округувт соссаӈ ма̄хманув во̄раян ос хӯл алыщлан ва̄рмаль щирыл йис ма̄наныл та̄нкина̄нылн хансуӈкве ве̄рме̄гыт. Ты тэ̄ла ма̄вит ӯргалан округ департаментыт рӯпитан хо̄тпаг Владимир Аркадьевич Коллегов ос Светлана Кирилловна Гындышева тэ̄н нэ̄пакыт акванатуӈкве нё̄тэ̄г. На̄н во̄раян ма̄нын манос хӯл алыщлан я̄н на̄нки нупылын хасылтаӈкве ка̄сащегы̄н ке, тэ̄н палтэ̄н ялэ̄н. Тыима̄гыс манырсыр нэ̄пак э̄ри, тот ёмщакв хӯлтаве̄н. СА̄лы ӯрнэ мА̄ Са̄ккон хосыт са̄лы ӯрнэ ма̄ о̄с ва̄руӈкве ро̄ви. Советский ӯст акв ма̄ньщи хум Виктор Вискунов о̄лы. Тав ма̄н щё̄питалум «Йильпи са̄лы колта̄гыл по̄саве» нампа проектув сунсыстэ, ты ва̄рмаль э̄лаль тотуӈкве ка̄сащас. Такви каӈке Ямал ма̄н са̄лы ӯрнэ ва̄рмальн ханищтахтуӈкве ке̄тыгластэ. Та юипа̄лт йис ма̄ винэ ма̄гыс э̄рнэ нэ̄пакыт акванатсанэ. Ань Советский, Кондинский районыг халт са̄лы тэ̄пыӈ ма̄ такви нупылэ са̄в та̄лын аренда щирыл хансыстэ. Тот кит ве̄рыста палыт са̄лы ӯрнэ пӯсас тӯщтыс. Колыт, а̄мпарыт ӯнттыс. Ань са̄лыт ёвтнэ щирыл о̄лы. Са̄лыянэ тот ӯруӈкве патыянэ. Ты коныпал тав тот во̄раян ма̄ о̄ньщи. КА̄ркамыг О̄лнэ хО̄нтаӈ хум Нэ̄пакыт молях ат кос ва̄рхатэ̄гыт, тыи ма̄гыс хо̄тпан, таквина̄тэ̄н яныг ё̄р пинуӈкве э̄ри. Ты ёмас ва̄рмаль ма̄гыс ма̄н ка̄сыӈ хо̄тпан нё̄тмил ва̄ре̄в. Э̄лумхо̄лас ма̄гыс щар яныг щунь ты такви о̄лнэ ма̄тэ. Туп ма̄к та̄ксар хо̄тпат э̄рнэ нэ̄пакыт янытэ̄т мӯсхалыг щё̄питыяныл. Ты ва̄рмаль щирыл ка̄ркамнуве̄г о̄луӈкве э̄ри. Мощ мо̄лалнув хо̄нтаӈ ма̄н Карым па̄вылн ялсум. Тот акв ма̄ньщи хум Евгений Александрович Вахрушев о̄лы. Тав са̄тлов та̄лэ то̄влыс. Татем ка̄ркам о̄йка, хӯл алыщлан ма̄т пуссын таквина̄тэ̄н хассанэ. Матыр йильпи са̄ккон нэ̄глы, тав та̄ра ханищтытэ. Кӯщаит ёт ва̄тихал хо̄нтхатыгла̄лы, э̄рнэ нэ̄пакыт та̄ра щё̄питыянэ». Татьяна Степановна потре ам мо̄тыт газетат э̄лаль хансылум. Ма̄хумаквет, на̄н о̄с йис ма̄ о̄ньщегы̄н ке, э̄рнэ нэ̄пакыт атуӈкве а̄лыме̄н. Юв ул ӯрхатэ̄н, на̄н ма̄гсылын нэ̄мхотьют нэ̄пак атуӈкве ат паты. Матыр ат ке торгамтэгы̄н, депутатанув палт ялэ̄н, тот ёмщакв хӯлтаве̄н.

1117 2016. 02. 12. Тамара МЕРОВА

Ма̄ньлат а̄гитпыгыт э̄лаль вос ханищтахтэ̄гыт Са̄ртын студентыт соссаӈ ма̄хум ла̄тӈытн ханищтан ма̄гыс ЮГУ тармыл я̄нас институт о̄лыс. Ётыл тав рӯпататэ хотпо̄илтавес. 2013 та̄лт мо̄т институт ва̄рвес, тав Лӯима ма̄хум институтыг намаявес. Ань хумус тав рӯпиты, маныр рӯпата тот ва̄раве, ты о̄вылтыт тэ̄лат та̄рапаттын ма̄гыс ам Дина Васильевна Герасимова ёт потыртасум. Тав тот кӯщаиг о̄лы, ань тав ла̄выс: – Ма̄н округувт соссаӈ ма̄хманув о̄лупсаныл ӯргалан ма̄гыс, та̄н ла̄тӈаныл, пе̄с наканыл э̄лаль тотнэ ма̄гыс ты институт ва̄рыслӯв. Тувыл ма̄ньлат а̄гитпыгыт халт са̄внув хо̄тпа яныг образование вос о̄щсыт, та̄нанылн нё̄туӈкве вуйхатсӯв. Ань туп тыт тамле та̄рвит ва̄рмаль о̄лы, ты институтыт ханищтахтан ма̄гыс ма̄н ва̄т нупыл ат хо̄тпа тув атуӈкве ат ве̄рме̄в. Тыса̄вит студент о̄выл курсын пирмайтаӈкве кос э̄ри. Образование са̄кконыт палт тамле хӯлтнэ ла̄тыӈ о̄лы. Ма̄н ханты, ма̄ньщи ос ё̄рн ла̄тӈыт, литература ос культура ханищтан ма̄гыс ат манос хо̄т хо̄тпа хо̄нтэ̄в ке, тувыл та. Ань са̄выӈпа̄лэ а̄гитпыгыт мо̄т ма̄т ханищтахтуӈкве ка̄саще̄гыт. Ты та̄лт гуманитарный институтувт хо̄тпан нупыл онтолов соссаӈ ня̄врам ханищтахты, менеджмент ос экономика палт нёлсат акв хо̄тпа, политехнический институтт китхуйплов студент, юридический тэ̄лат – атхуйплов хо̄тпа, ма̄вит ӯргалан институтт – са̄тхуйплов э̄лумхо̄лас ос управление ма̄т ищхӣпыӈ утыт ёт рӯпитан хо̄тпаг хӯрумхуйплов студентыт ханищтахтэ̄гыт. Хӯрумхуйплов соссаӈ хо̄тпа аспирантурат ловиньтахтэ̄гыт ос яныгса̄ткем э̄лумхо̄лас юил ёхталым са̄всыр ма̄т тыт ханищтахтэ̄гыт. Таи ёмас ма̄н лӯима̄ ма̄хум институтув па̄лыл та̄нанылн матыр нё̄тмил ва̄руӈкве ве̄рме̄в. Та̄нки пуссын акванюрщхатым мо̄т финноугорский университет студентыт ёт ва̄йхатэ̄гыт ос са̄всыр проектыт, семинарыт щё̄питэ̄гыт. Ма̄нки тэ̄ланув э̄лаль тотнэ ма̄гыс, образование ос ма̄ньлат ма̄хум ёт рӯпитан департамент ёт акванпотыртахтым рӯпитэ̄в. Ма̄н палтув пуӈктотнэ нэ̄г Ирина Борисовна Лисютина о̄лы. Ме̄н тав ётэ ма̄нь па̄влыӈ школатн аквъёт ялантыме̄н ос соссаӈ ня̄врамыт ёт ва̄йхатыме̄н. Ща̄нь ла̄тӈыл олимпиадат миннэ порат та а̄гитпыгыт ёт потыртахтэ̄в, ма̄н институтувн ханищтахтуӈкве вос ёхтэ̄гыт. Ам ётум рӯпитан хо̄тпа воссыг а̄тим. Ам амккем тыт рӯпитэ̄гум, соссаӈ студентыт тэ̄ланыл ма̄гыс пуӈктотэ̄гум ос ка̄сыӈ институтыт «Языковая картина мира обскоугорских народов» нампа курс ловиньтэ̄гум. Налыман щё̄с лекцият ка̄сыӈ институтыт ловиньтыянум ос тувыл студентыт зачёт мыгыт. Тот ханты, ма̄ньщи ос рӯтыг о̄лнэ ма̄хманув ла̄тӈаныл, пе̄с о̄лупсаныл о̄вылтыт матыра̄ти пуссын потыртыянум. То̄ванакт, ва̄им, рущ манос мо̄т мир студентыт воращлэ̄гыт, нэ̄матыр ва̄ӈкве ат таӈхе̄гыт ос тувыл китхӯрум лекция хӯнтлын юипа̄лт э̄лаль пӯмщалахтэ̄гыт, нэ̄мат ат нёсара̄лэ̄гыт. Зачёт щирыл ёмас рефератыт хансэ̄гыт. Тувыл та̄н ётаныл ханищтахтын соссаӈ ня̄враманув ат э̄ссамтэ̄гыт, номтыӈыг е̄мтэ̄гыт. Ты лӯима̄ институвт ня̄врамыт рущ ос ща̄нь ла̄тыӈ, литература ханищтан хо̄тпаг ханищтасанӯв. Юио̄выл та̄ланувт рущ ла̄тыӈ ханищтан ва̄рмаль хотвуйвес. Таима̄гыс са̄в ма̄ньлат а̄гиянувпыганув школан рӯпитаӈкве ат вивет. Ма̄н ань э̄лаль тох номсэ̄в, ща̄нь ла̄тыӈ ханищтан коныпал та̄н культурологыг, историкыг акв специальность а̄стлан хо̄тпаг вос ханищтавет. То̄нт са̄внув студентыт ма̄н палтув ханищтахтуӈкве ка̄сащанувыт. Студентыт та̄нки о̄с анкета щирыл тох ла̄всыт. Ос ма̄н акв курс, ты ва̄т нупыл ат студент, атуӈкве ве̄рмынувӯв.

1117 2016. 02. 12. Николай МЕРОВ

Лю̄ль накыт ёлпо̄илттан хо̄тпат Та̄л котиль э̄тпос хусыт хо̄талэ̄т Ханты-Мансийск ӯс ля̄ххал тотнэ колн округ прокурор Евгений Борисович Ботвинкин ёхталас. 2015 та̄л сыс рӯпатаныл хумус минас, манса̄вит та̄рвит та̄н мӯсхал щирыл щё̄питасыт, тав ты урыл потыртас. Кӯщай хум ла̄выс, ювле хультум 2015 та̄л ты кос та̄рвитыӈ о̄лыс, та сыс ань лю̄ль накыт мощщамаӈкве патсыт. Ты прокуратурат рӯпитан хо̄тпат та̄н са̄в ё̄р пинсыт. Мо̄лты та̄лт ва̄т нупыл ат со̄тыра лю̄ль нак е̄мталас. Китса̄т арыгтем тэ̄ла та̄рапаттувес. Нила со̄тыра заявлениенэ̄пак сутн ке̄твес. Ма̄хум рӯпата олнаныл та̄ра вос ойтве̄сыт, ань ты ва̄рмаль ёмщакв уральтым о̄ньщаве. Та та̄лт рӯпата олн ювпувнэ кӯщаит пуссын аквъёт онтоловса̄т со̄тыра солко̄ви ойтуӈкве я̄ртве̄сыт. Ты тэ̄ла щирыл прокуратура са̄в та̄л рӯпата уральтан инспекция хо̄тпат ёт акваннё̄тхатым рӯпитэ̄гыт. Та̄н ма̄хум заявлениенэ̄паканыл хосыт манос план щирыл предприятият уральтыманыл юипа̄лт кӯщаит та̄ра олн хо̄нтэ̄гыт. Хоты кӯщаит рӯпата олн ат ойтэ̄гыт, та̄н сутытан накн паттавет. Ты хосыт мо̄лты та̄л нила кӯщай хо̄тпа сутытавес. Та та̄лт округ прокуратуран ма̄хум налыман нупыл нила со̄тыра нё̄тмил во̄внэ пищма ке̄тсыт. Аквхуйплов со̄тыра э̄лумхо̄лас та̄нки прокурор кӯщай ос таве̄н нё̄тнэ хо̄тпат палт нё̄тмил во̄вуӈкве ёхталасыт. Ма̄хум ты тэ̄лат уральтаӈкве во̄всыт: о̄лнэ кол, вит, ре̄г ма̄гыс тыныт ос тэ̄нут тынаныл сака но̄х ул вос нё̄тве̄сыт, ма̄вит ӯргалан урыл, ханищтап ос тыг рӯпитаӈкве э̄лыл ёхтын ма̄хум вос уральтаве̄сыт. Кӯщай хум ла̄выс, ань лю̄ль тэ̄рпи (наркотик) тыналан хо̄тпат акваг ня̄влалым о̄ньщавет. Ань тамле лю̄ль тэ̄рпи тыг са̄в тотаве. Тувыл ос наска̄ссыг мир порслан хо̄тпат пувнэ ма̄гыс о̄с са̄в рӯпата ва̄раве. Ты кит та̄рвитыӈ ва̄рмалиг акванолтым о̄лэ̄г. Ань хо̄н ма̄т са̄всыр хо̄нтлын накыт е̄мталэ̄гыт. То̄ва ма̄т о̄лнэ мир наска̄ссыг порславе. Ты сымта̄лма̄йтта̄л хо̄тпат рущ ла̄тӈыл «террористыг» ла̄вавет. Ань тамле ва̄рмаль о̄лы, э̄лы хо̄нтлын ма̄ныл тыг ёхтын террористхо̄тпат тыт о̄лнэ мир наска̄ссыг порслуӈкве хуйтавет. Тамле хо̄тпат пувнэ ма̄гыс прокуратурат, спецслужбат ос полицият рӯпитан ма̄хум акваннё̄тхатым кинсыяныл. Ань ты мус кит тамле ва̄рмаль округувт та̄рапаттувес. Лю̄ль нак са̄в ул вос е̄мтыс, прокуратурат рӯпитан ма̄хум акваг ка̄ркамыг рӯпитэ̄гыт. Тувыл ос тамле та̄рвит ва̄рмаль о̄лы, рущ ла̄тӈыл «коррупцияг» ла̄ваве. Ты кӯщаит, хотьют бюджетныл олн тӯлмантэ̄гыт, ла̄палахтэ̄гыт ос матыр ма̄гыс хо̄тпаныл олн во̄ве̄гыт, та̄н о̄с та̄кыщ ня̄влалавет. Та̄л сыс ниласа̄т ва̄тахкем тамле тэ̄ла та̄рапаттувес. Ты ва̄рмаль ювле хультум та̄лныл са̄т процентын са̄внувег е̄мтыс. Ты хосыт 600 миллион солко̄ви са̄вит холтвес, государствав ты олныт ат хо̄нтсанэ. Тыгыл туп акв охсатэ ювле виӈкве а̄ртмыс. Ты коныпал китхуйплов миллион солко̄ви са̄вит олн ювле винэ ма̄гыс ма̄хум заявлениенэ̄пакыт сутн хассыт. Тувыл кӯщай хум ла̄выс, ань лю̄ль накыт ул вос са̄вме̄гыт, та̄н та̄кыщ уральтым о̄ньщавет. Ловмантем процент са̄вит щар та̄рвитыӈ лю̄ль накыт ювпувве̄сыт. Ма̄ньлат ма̄хум лю̄ль пищ ва̄руӈкве ань о̄с сака ат патсыт, мощ ёлпо̄йтсыт. Юио̄вылт Евгений Борисович округувт щар ёмщакв рӯпитан прокуратуратыт урыл потыртас. Тав ла̄вме щирыл, 2015 та̄лт яныг ӯсыт халт Нижневартовск ӯс прокуратура щар ёмщакв рӯпитас. Ма̄ньнув ӯсыт халт ос Когалым ӯс прокуратура но̄хпатыс. Районыт халт ос Ха̄льӯс район прокуратура но̄хпатыс. Тот рӯпитан хо̄тпат кӯщаитн пуссын янытлаве̄сыт.

1117 2016. 02. 12. Николай МЕРОВ

Саранпа̄выл ня̄врамыт пассаӈ щахныл касэ̄гыт Ха̄льӯс район Саранпа̄вылт Иван Александрович Ломакин о̄лы. Тав 1989 та̄лт тот самын патыс. Школат ханищтахтаме порат ма̄нь та̄гыл па̄ссаӈ щахныл алхатым касыс. Округ янытыл каснэ ва̄рмальн ва̄тихал яланта̄лыс. Ёмщакв алхатаме ма̄гыс са̄в щёс ма̄гылн тагатан по̄сыл майлувес. Ань тав Саранпа̄выл школат ня̄врамыт ты каснэ ва̄рмальн ханищтыянэ. На̄н ты хум потре э̄лаль ловиньтэлы̄н: «Ам 2001 та̄лт па̄ссаӈ щахныл касуӈкве о̄вылтахтасум. То̄нт ам ётум ханищтахтын пыгыт пуссын тув ялантасыт. Ма̄нав Иван Дмитриевич Желяп ханищтастэ. Тав э̄лы ма̄ныл па̄вылн ёхтыс. Ты та̄ксар хум Афганистан ма̄т хо̄нтлыс. Па̄ссаӈ щахныл ма̄нь та̄гыл касы. Са̄в та̄л каснэ тэ̄лат рӯпиты. Ма̄ниг о̄лмувт ты хум ма̄нав Ха̄льӯс, Нижневартовский, Нефтеюганский районныт о̄лнэ ӯсыт, па̄влытн касым тотыгластэ. Аквматнакт Радужный ӯст касыл о̄лыс. То̄нт ам та ӯст чемпионыг е̄мтсум. Ам ётум алхатуӈкве лю̄лиглам хо̄тпат пуссын ёлпаттыгласанум. Тувыл ос хо̄тыт классыт ханищтахтамум порат Пыть-Ях ӯсн тотыглавесӯв. Тот мирхал касыл щё̄пита̄лвес. Пыгыт Украина, Казахстан ос мо̄т хо̄н ма̄ныл тыг ёхталасыт. Та порат о̄с но̄хпатыгласум. То̄нт ке̄лпум сака но̄ххулиглас, тавлениям янгыг е̄мтыс. Та юипа̄лт воссыг каснэ ма̄н ат вуйлуве̄сум. Школа а̄стламум юипа̄лт Я̄грим па̄вылн э̄лаль ханищтахтуӈкве минасум. Тот училищат кол ӯнттын хо̄тпаг хӯрум та̄л ханищтахтасум. Я̄гримт о̄лмум сыс о̄выл та̄л па̄ссаӈ щахныл кассум. Тувыл кит та̄л та па̄выл ма̄гыс футбол ёнгысум. Ётыл, хунь ханищтахтын ма̄ныл а̄стысум, ювле Саранпа̄вылн ёхтысум. Ань акваг тыт о̄лэ̄гум. Хунь юв ёхтысум, та̄ра школан ня̄врамыт каснэ ва̄рмальн ханищтаӈкве минасум. Хӯрум та̄л тот рӯпитасум. Тувыл по̄хын миныгласум, акв та̄л рӯпата та̄л о̄лсум. Тувыл о̄с акв тув патхатасум. Ань ты накт ам палтум налыман нупыл кит ня̄врам па̄ссаӈ щахныл касуӈкве ёхталы. Та̄наныл хӯрум группа щирыл ла̄кквауртсанум. Ты 5-7 та̄л яныт ня̄врамыт, 8-18 та̄л яныт а̄гитпыгыт, ос тыгыл яныгнув ма̄ньлат хо̄тпат ёхталэ̄гыт. Ты касыл ня̄врамытн сака мӯсты. Та̄н яныг ща̄гтыл ам палтум ялантэ̄гыт. Сакати кон мори ат ха̄йтыгтэ̄гыт. Лю̄ль пищ ат ва̄ре̄гыт. Округ янытыл касылн ялнэ̄в порат ка̄ркамнув пыганум то̄ванакт но̄хпатыглэ̄гыт». Иван а̄ще наме Александр Степанович Ломакин, Саранпа̄вылт о̄лнэ «Сосьвинский экспедицият» рӯпитас. Мо̄лты та̄л оигпам порат тувыл по̄хын минас. Ань пенсия олн вӯим юн о̄лы. Оматэ Светлана Тихоновна Ломакина, такви о̄парищ наме Анемгурова, ма̄ньщи нэ̄. Тав са̄в та̄л ма̄нь ня̄врам колт тэ̄нут па̄йтым рӯпитас. Ань ты накт аквта ма̄т завхозыг о̄лы. Иван Александрович ты та̄л Ханты-Мансийск ӯс «Школа олимпийского резерва» нампа колн э̄лаль ханищтахтуӈкве патхатас. Ты каснэ хум ханищтапе мӯсхал щирыл э̄лаль вос мины. Тав э̄рнэ тэ̄ла ва̄ри, ня̄врамыт ёмас хо̄тпаг о̄луӈкве ханищтыянэ.

1117 2016. 02. 12. Светлана РОМБАНДЕЕВА

«Колмодай» община хӯл алыщлы Ханты-Мансийский район Цингалы па̄вылт «Колмодай» нампа хӯл алыщлан община о̄лы. Ты э̄тпос о̄выл хо̄таланэ̄т ам «Югория» телекомпаният рӯпитан ля̄ххал тотнэ ма̄хум ёт та па̄вылн ялсум. Тот ма̄н рыбакыт ёт хо̄нтхатыгласӯв, потрамасӯв, тувыл та̄н ётаныл хӯл алыщлан ма̄нанылн ялсӯв. Община кӯщаиг Олег Густавович Шатин рӯпиты, ханты хум. О̄влэ̄т тав общинаныл урыл потыртас: «Ма̄н ань Чилинка манос Колмодайка я̄т хӯл алыщлэ̄в. Ты я̄ Колмодай тӯрныл ови. Та тӯр ва̄тат ам а̄тям яныгмас, о̄пам ос яныг о̄пам ще̄мьяӈ та̄гыл тот пе̄с порат акваг о̄лсыт. Общинат ма̄ньщи ос ханты хум хо̄тпат рӯпитэ̄гыт. Хӯланув округ янытыл тыналыянӯв, мо̄т ӯсытыт о̄лнэ мирн о̄с ёвтавет. Машинат Воронеж, Москва, Томск, Омск, Тюмень, Челябинск ос Екатеринбург ӯсытныл ёхталэ̄гыт. Тыхо̄тал ма̄хум Тюменьныл ёхтэ̄гыт, тув лов тонна са̄вит сорт хӯл ке̄тэ̄в. Хотьютн манхурип хӯл э̄ри, таи та та̄лттэ̄гыт. То̄ва хо̄тпатын туп сорт э̄ри, мо̄танын ос хулюмхул ман сымри. Ты та̄л сорт са̄в пуве̄в, акв кила тынэ атпан солко̄ви. Мо̄лты мощща пувсӯв, тынэ яныгса̄т о̄лыс. Государствавн сака мат ат нё̄таве̄в, субсидия нё̄тмил олныт па̄лыл акв кила ма̄гыс – нёлолов солко̄вил туп ойтаве̄в. Хӯланув тыгыл па̄вылн тотнэ ма̄гыс ёмас ё̄р ма̄шинат о̄ньщуӈкве э̄ри. Пуссын ма̄нти та ёвтэ̄в, са̄в рӯпитэ̄в, халанувт нё̄тхатэ̄в. Общинавт мӯсхал щирыл рӯпитан хо̄тпа ёмащакв ойтаве э̄тпостем яныгса̄т со̄тыра солко̄ви виӈкв ве̄рми, та̄л сыс рӯпата олнэ акв миллионын ёхтахты. Савыӈ ман вина айнэ хо̄тпа са̄в олн ат выг, то̄ва та̄л сыс рӯпата олнэ лов со̄тыран туп ёхты. Ань хо̄тпа рӯпитаӈкве таӈхи те, ёмащакв о̄лы, олн сэ̄лы, э̄рнэ матыр пуссын о̄ньщи». Тувыл Олег Густавович хӯл по̄льтын колыт (холодильникыт) суссылтас. Сака яныг по̄лям кол капаит, ка̄сыӈ колн матахмат тонна хӯл ла̄пи. Ты юипа̄лт ма̄н хӯрум «Бураныл» хӯл алыщлан ма̄н та минмыгтасӯв. Ва̄тахтем ве̄рыста минасӯв. Во̄рт ёмас яныт кол о̄ньще̄гыт, то̄ва рыбакыт тот тармыл о̄лэ̄гыт. Чилинка я̄наныл тув ат по̄львес, а̄рпи ва̄рмыт. Ма̄н тув ёхтумув юипа̄лт, хӯл алыщлан ма̄хум толгуӈкве патсыт. Толыг кит щёс ре̄пыгтасыт, хӯл мощ пувсыт – сорт, хулюмхул, сымри, та̄рка ос тӯрхул. Олег Густавович ла̄вме щирыл, я̄наныл китыт та̄л ат по̄ляве, таима̄гыс та̄н а̄рпи ва̄ре̄гыт. Хӯл алыщлан ма̄хум рӯпатаныл кинан по̄слуве̄сыт, потраныл ёлхассанӯв. Во̄рколн щалтсасӯв, толтыглахтасӯв, хӯл исмит ос исум ща̄й айсӯв. Ты юипа̄лт о̄с акв тув ювле па̄влын та минасӯв.

1117 2016. 02. 12. Тамара МЕРОВА

Та̄н са̄в ханищтан нэ̄пак щё̄питасыт А̄с-угорский ма̄хум институтт ма̄ньщи ла̄тыӈ, литература ос пе̄с потрыт, мо̄йтыт ханищтан отдел о̄лы. Тот Е. И. Ромбандеева, Л. Н. Панченко, М. В. Кумаева, С. А. Герасимова ос Т. Д. Слинкина рӯпитэ̄гыт. Са̄в та̄л ты тэ̄лат тармыл Евдокия Ивановна пуӈктотыс, ань Мария Владимировна Кумаева кӯщаиг тув ӯнттувес. Мо̄лты та̄лыт сыс та̄н са̄всыр йильпи нэ̄пакыт та̄ратасыт. Ань ты урыл пӯмщалахтын ма̄гыс ам Людмила Панченко ёт хо̄нтхатыгласум ос тав рӯпататэ о̄вылтыт китыгласлум. Людмила Николаевна ты отделт ат та̄л рӯпиты. Тав о̄влэт ма̄нь ня̄врамыт ханищтан нэ̄г Ханты-Мансийский педколледжит ханищтахтас, тувыл Югорский университет а̄стлас. Тот ма̄ньщи ла̄тыӈ ос лӯима ма̄хум литератураныл ханищтан нэ̄г дипломыл майвес. Ань ва̄рнэ рӯпататэ̄т ты тэ̄лат пуссын э̄рмыгласыт. Школат ня̄врамыт о̄с ханищтасанэ, таима̄гыс матыра̄ти э̄рнэ накыт ва̄нэ̄г о̄ньщиянэ. Людмила Николаевна а̄нумн тох потыртас: Мо̄лалнув институт кӯщай нэ̄ Виктория Сподина ма̄нав акванатыгласанэ ос йильпи рӯпата ва̄руӈкве ла̄всанэ. Ма̄н образование ос ма̄ньлат ма̄хум департамент па̄лыл госзаказыл ке̄твесӯв. Тот хансым о̄лы, школат соссаӈ ня̄врамыт ма̄гыс ханищтан нэ̄пакыт щё̄питаӈкве э̄ри. Классыт щирыл я̄нас вос щё̄питыянӯв. Ты рӯпатан та̄ра вуйхатуӈкве та̄рвитыӈ о̄лыс. О̄влэ̄т ханищтахтын программат ёмщакв ловиньтаӈкве э̄рыс ос ня̄врамыт та̄ланыл щирыл потрыт ла̄кквауртуӈкве. Тувыл таи ёмас, Клавдия Васильевна Афанасьева нэ̄пакыт щё̄питан ма̄гыс то̄ва разработкат о̄ньщис. Ма̄н ань тув ро̄влахтым нэ̄паканув щё̄питаӈкве патсанӯв. Мо̄т ёмас ва̄рмаль тамле ма̄н потрыт, мо̄йтыт хаснэ ма̄ньщи хо̄тпа тахольт о̄ньще̄в. Ань та̄наныл а̄гирищитпыгрищит ва̄ӈкве патыяныл. Мо̄т ма̄хманувн ты нэ̄паканувт потрыт, стихыт о̄с вос ловиньтыяныл. Ань ос ла̄ве̄гум, та̄н тиражаныл ма̄нь, 200 са̄витыг туп та̄ратаве̄сыт, школат ос нэ̄пак ловиньтан колыт халт ла̄кквауртве̄сыт. О̄влэ̄т ам «Азбука» нэ̄пак ёт хоса рӯпитасум. Таве хумус ва̄руӈкве, а̄нумн Валентина Соловар нё̄тыс. Валентина Николаевна ханты ня̄врамыт ма̄гыс акв тамле «Азбука» хансыс. Ам тув букват щирыл ла̄тӈыт хо̄нтсанум ос та̄н палтаныл ро̄внэ хурит ищхӣпыӈ ут хосыт киссум манос амки по̄слысанум. Тувыл та̄наныл нэ̄пакло̄псын хаснэ ма̄гыс хоса тув щё̄питасанум. Ты маньщи «Азбука» нэ̄пакум 2013 та̄лт та̄ратаслум. 2014 та̄л сыс йильпи ханищтан нэ̄пакыт щё̄питым рӯпитасум ос та̄наныл пуссын 2015 та̄лт та̄ратасанум. Ань 5, 6, 7, 8, 9 классыт ханищтахтын ня̄врамыт «Хрестоматия» ма̄ньщи нэ̄пак о̄ньще̄гыт. Тув ам рущ ла̄тӈыл хансым потрыт акванатсанум, ань ос та̄наныл ма̄ньщи ла̄тӈыл толмащлаӈкве э̄ре̄гыт. Хрестоматиян хансым потрыт институт рӯпитан нэ̄ Е. В. Косинцева уральтасанэ ос С. С. Динисламова а̄нумн рецензия хансыс. Акватэ филология наукат доктор нам, мо̄танэ ос кандидат нам о̄ньщи. «Фольклорные праздники в школе. Сценарии» я̄нас нэ̄пак о̄с хассум. Тот соссаӈ ма̄хум ялпыӈ хо̄таланыл ос ка̄с ва̄рнэ накыт урыл потрыт хассум. Ам школат рӯпитанэ̄м порат а̄гирищитпыгрищит ёт ты урокыт ва̄рсанум. Тувыл «Краеведение» урокыт ма̄гыс ос кит та̄л са̄всыр э̄рнэ утыт тув атсанум, щё̄питасанум. Тув са̄всыр таблицат, кроссвордыт по̄слысанум. Во̄руит, ӯйхулыт намыт ёмщакв ханищтаӈкве ос та̄н урыл матыр хансуӈкве э̄рыс. Ты рӯпата ва̄рмум ма̄гыс ам В. С. Иванован, Санкт-Петербург ӯст о̄лнэ лӯима̄ институт рӯпитан нэ̄н, пӯмащипа ла̄тыӈ ла̄ве̄гум. Тав а̄нумн рецензия хансыс ос то̄ва тэлат ёмщакв хӯлтсанэ. Аквъёт рӯпитан нэ̄ме̄нтыл Светлана Алексеевна Герасимова ёт акваннё̄тхатым ма̄нь классыт ханищтахтан ня̄врамыт ма̄гыс нэ̄пакыт о̄с щё̄питасме̄н. Ты урыл тав такви ётыл о̄с вос потырты. Наука ма̄гыс диссертация хансуӈкве ос вуянтаӈкве, аспиратурат ханищтахтуӈкве э̄ри. Ты урыл номсэ̄гум кос, институт па̄лыл о̄с китыглавем. Ань са̄в рӯпата тыт о̄ньще̄в.

1117 2016. 02. 12. Александр ВЬЮТКИН

Соссаӈ мирн э̄рнэ нэ̄пакыг Та̄л котиль э̄тпос ва̄т нупыл нёлоловит хо̄талэ̄т Ханты-Мансийск ӯст соссаӈ мир культура нампа колт тит йильпи нэ̄пакыг мирн суссылтавесы̄г. Ма̄н пе̄с о̄лупсав урыл хансым о̄лэ̄г. Соссаӈ мир культура ӯргалан кол намхо̄талэ кастыл тэ̄н та̄ратавесы̄г. Мо̄тантыг та нампа кол хо̄тпан та̄лэ то̄влы. Нэ̄пакыг рущ ла̄тӈыл «Одежда народов Югры» ос «Поселения, постройки, средство передвижения, орудия труда народов Югры» намаим о̄лэ̄г. О̄влэ̄т соссаӈ мир культура кол тармыл кӯщаиг о̄лнэ нэ̄ Елена Евгеньевна Исламуратова атхатыглам ма̄хум янытласанэ. Тав ла̄выс: «Ма̄н ма̄ньлат хо̄тпатн ва̄тихал титыглаве̄в, соссаӈ мир о̄лупса ӯргалан кол ва̄руӈкве, хотьютув щар о̄влэ̄т тамле номтыл ёхтувес? » Ам ювле ла̄ве̄гум, 1957 та̄лт соссаӈ ма̄хум о̄лупсаныл, э̄рганыл, йӣкваныл ос са̄ӈквылтан та̄наныл ӯргалан о̄выл кол то̄нт та пӯсвес. Та кол «Дом народного творчества» намтым о̄лыс. Та порат ты рӯпатан вуйхатам ма̄хум ань ты мус ма̄навн нё̄тэ̄гыт. Ма̄н та̄н та̄ланыл нэ̄мхоталь ос нэ̄матыр ва̄руӈкв ат ве̄рме̄в. Та̄н ань са̄в ма̄ньлат хо̄тпа ты рӯпата ва̄руӈкв ханищтасыт. Таи ты ёмас, ма̄хумаквенув сака молях ос ка̄ркамыӈыщ ханищтахтэ̄гыт. Ханты ос ма̄ньщи ма̄хум э̄лаль о̄лнэ о̄лупсаныл хумус мины, маныр е̄мты, та урыл ма̄н ат пилэ̄в, пуссын ёмас тэ̄лаг вос а̄ртми». Пе̄с йис о̄лупсав ханищтан учёный ханты этнограф нэ̄ Татьяна Александровна Молданова о̄с мощ потыртас. Тав ла̄выс: «Ам номилум, 1981 та̄лт Эстония ма̄ныл ёхталам ма̄хум та̄н ты рӯпата о̄вылтасаныл. Та̄н ма̄н пе̄с о̄лупсав ханищтанэ̄ныл ма̄гыс тыт хоса рӯпитасыт. Ань са̄всыр пормас ат ро̄внэ щирыл ю̄нтавет, то̄нт тамле пормас а̄тим о̄лыс. Та̄н ма̄нь па̄влыт янытыл яласаманыл порат пе̄с пормасыт хурин по̄слысаныл, ма̄н ма̄гсылув туп ты хурит хультсыт. Та юипа̄лт ма̄н та̄н ётаныл иӈ ат та̄л рӯпитасӯв. Та порат ма̄н номтыл ёхтувесӯв ты нэ̄пакыг хансуӈкве э̄ре̄г. На̄нти ва̄глын, олн та̄л нэ̄матыр ат ва̄рхаты, таима̄гсыл акваннё̄тхатым такос рӯпитасӯв, ос рӯпатав ёл та по̄илттаслӯв. Ань та па̄сныл ва̄т арыгтем та̄л минас. Та сыс ты нэ̄пакыг мо̄т щирнувег хансуӈкв ро̄выс, ма̄н тох ат ва̄рсӯв. Хумус та порат ва̄руӈкв номылматсӯв, тох та ва̄рсагӯв. Ань ты нэ̄пакыг щё̄питамув порат ма̄н са̄в ма̄ньлат ма̄хум ёт рӯпитасӯв. Та̄н ма̄навн сака са̄в нё̄тсыт, та сыс та̄нти о̄с ханищтахтасыт. Ты ма̄гсыл ам та̄нанылн яныг пӯмащипа ла̄тыӈ ла̄ве̄гум». Нэ̄пакыг суссылтаманыл юипа̄лт нё̄тмил ва̄рнэ ма̄хмыт пӯмащипа ла̄тӈыӈ пищмал ос ты йильпи нэ̄пакыл ловмантем хо̄тпа мӯйлуптаве̄сыт. Та̄н халанылт Татьяна Степановна Гоголева, Еремей Данилович Айпин ос Татьяна Александровна Молданова о̄лсыт.

1117 2016. 02. 12. Людмила ТЕТКИНА

Ма̄ньщи хум ма̄нь па̄вылквет ле̄ккарыг рӯпиты Ха̄льӯс район Кимкъясуй па̄вылт йильпи пӯльница ӯнттувес. Ты кол мо̄лты та̄л яныгполь э̄тпосныл рӯпитаӈкве о̄вылтахтас. Акв палъе̄ре̄т пусмалтан кол о̄лы, мо̄т палъе̄ре̄т ле̄ккар о̄лнэ колыл ва̄рвес. Тамле пӯльницат округ янытыл ань ма̄нь па̄вылквет ӯнттавет. Ты э̄лыпа̄лт Кимкъясуй па̄вылт пӯльница пе̄с колт о̄лыс. Мо̄лты та̄л туи порат ма̄ньлат хум ле̄ккарыг рӯпитаӈкве тув ёхтыс. Тав наме Иван Васильевич Хозумов. Ма̄ньщи пыг Ханты-Мансийск ӯст медицинский академия а̄стлас. Тот тав фельдшерыг ханищтахтас. Таквсы порат Кимкъясуй па̄вылн ялмум порат тав ётэ хо̄нтхатыгласум ос рӯпататэ урыл китыгласлум. Иван Васильевич ювле таи ла̄выс. – Ам о̄йттур э̄тпост тыг ёхтысум, кит э̄тпос ле̄ккарыг рӯпитэ̄гум. Ханты-Мансийск ӯст хӯрум та̄л ос нёлолов э̄тпос ле̄ккарыг ханищтахтасум. Тот хӯрмит курсыт пӯльницат ма̄нь ле̄ккарыг рӯпитасум. Ханищтахтуӈкве а̄стласум, рӯпата кинсым Ха̄льӯсн минасум. Тот ла̄вве̄сум, Кимкъясуй па̄вылт ле̄ккар хо̄тпа э̄ри. Ты э̄лыпа̄лт рӯпитан нэ̄ мо̄т ма̄н о̄луӈкве ва̄нтлас, па̄влыӈ ма̄хум ле̄ккар та̄л хультсыт. Па̄вылт о̄лнэ яныгхо̄тпат пуссын яныг тавление о̄ньще̄гыт, та̄н палтаныл ялантэ̄гум, тэ̄рпил манос уколыл ва̄риянум. Садикын ос школан ялантан ня̄врамыт а̄гмыӈыг ул вос е̄мтсыт, прививкал тӯщтыянум. Таи ёмас, йильпи пӯльницат ань са̄всыр э̄рнэ оборудование пуссын о̄лы. Тувыл то̄ва тэ̄рпи тыт а̄тим, ты утыт ма̄гсыл амки Ха̄льӯсн ялантэ̄гум. ФАПыт тэ̄рпи тыналан кол о̄с ат рӯпиты. Ань лицензиянэ̄пак ва̄руӈкве эри, туп то̄нт тэ̄рпи тыналан кол тыт пӯнсуӈкве ро̄ви. Кимкъясуй па̄вылн мус яласан лё̄ӈх а̄тим, тыг ёхтумум порат ам та̄ра мотор ос ха̄п ёвтсум. Тэ̄лы порат Кульпасн ос Ха̄льӯсн яласанэм ма̄гсыл ма̄шина э̄ри. Щёлыӈыг ке е̄мтэ̄гум, ма̄шина о̄с тах ёвтэ̄гум. Ма̄ньлат хум ёт потыртамум, таве китыгласлум, ле̄ккарыг ханищтахтуӈкве такви ка̄сащас манос ща̄няге̄на̄щаге̄н тув ке̄твес. Ма̄ньщи пыг ювле ла̄выс: «Ам увщим Саранпа̄вылт ле̄ккарыг са̄в та̄л рӯпиты, тыи ма̄гсыл ща̄нягумна̄щагумн, ла̄вве̄сум, ле̄ккарыг о̄с вос ханищтахтэ̄гум. Школа а̄стламум юипа̄лт Ханты-Мансийск ӯсн минасум. Ле̄ккарыт ма̄хум пусмалтым, сака э̄рнэ рӯпата ва̄ре̄гыт, тыи ма̄гсыл тот ханищтахтуӈкве ка̄сащасум». Иван Васильевич ща̄нягеа̄щаге Саранпа̄вылт о̄лэ̄г. Оматэ наме Людмила Ивановна Волкова, а̄тятэ ос Василий Иванович Хозумов. Оматэ ма̄щтыр нэ̄г о̄лы, ю̄нсхатуӈкве сака ёмащакве ха̄сы. Тав са̄всыр маснут, пуркат ос сувенирыт тыналан ма̄гсыл ю̄нты. А̄тятэ ань пенсият о̄лы, ты э̄лыпа̄лт тав са̄в та̄л совхозт трактористыг рӯпитас. Туи порат тэ̄н Кимкъясуй па̄вылн пыге̄н па̄лт мӯйлуӈкве ёхталасы̄г. Ань округувт рӯпитам са̄ккон щирыл, ма̄ньлат хо̄тпат ле̄ккарыг ханищтахтаманыл юипа̄лт ма̄нь па̄вылквен рӯпитаӈкве ке минэ̄гыт, та̄н акв миллион солко̄вил ойтавет. Фельдшерыт ос ма̄нь ле̄ккарыт ос 500 со̄тыра солко̄вил мивет. Иван Васильевич мир пусмалтан департаментыл ты олныл о̄с тах ойтаве. Ань ма̄ньщи хум контрактнэ̄пак щирыл ат та̄л Кимкъясуй па̄вылт рӯпитаӈкве тах паты. Тав па̄вылт о̄луӈкве ханьщувлас, тыи ма̄гсыл Кимкъясуй па̄вылт о̄луӈкве таве̄н мӯсты. Ам ты ма̄ньщи пыгн паща ла̄тыӈ ке̄тэ̄гум. Рӯпататэ э̄рнэ щирыл вос мины, па̄влыӈ ма̄хманэ пуста̄гыл вос о̄лэ̄гыт.

1117 2016. 02. 12. Людмила ТЕТКИНА

Урай ӯст о̄лнэ нэ̄ рӯтанэ урыл потыртас Вера Афанасьевна Бельмесева ёт ам Урай ӯст ва̄йхатасум. Тав такви о̄парищ наме Чейметова. Ма̄ньщи нэ̄ рӯтанэ ос о̄лупсатэ урыл китыгласлум. Тав таи потыртас. – А̄тям наме Афанасий Данилович Чейметов о̄лыс. Тав 1902 та̄лт Евра па̄вылт самын патыс. Анна Митрофановна Конькова тав ляпа рӯтэ о̄лыс. А̄тям савалап ня̄врамыг яныгмас. Гражданский война о̄вылтахтам порат хо̄нтлаӈкве минас. То̄нт тав иӈ кос ня̄врам, тувыл хо̄нтлаӈкве та тотвес. Война оигпам юипа̄лт юв ёхтыс. Кит щёс нэ̄ тотыглас, э̄кваге сас хотталь щалтсы̄г. 1941 та̄лт о̄с хо̄нтлаӈкве та минас. 1943 та̄лт сакватавес, пӯльницат хоса пусмалтавес ос тувыл юв ке̄твес. Волчанка па̄выл та̄ра минас, тот омам Августина Сергеевна ёт акванхо̄нтхатсы̄г ос Евра па̄вылн аквъёт ёхтысы̄г. Ты па̄выл Свердловский областит о̄лыс. Тэ̄н нила ня̄врам янмалтасы̄г, акв пыг ос хӯрум а̄ги. Ам щар ма̄нь а̄гииг о̄лсум. А̄тям Евра па̄выл ляпат такви во̄раян ма̄ о̄ньщас, тот акваг во̄раим ос хӯл алыщлым яласас. Колхозыт ва̄рим порат тув во̄ввес. Тав тот рӯпитаӈкве ат ка̄сащас, ще̄мьяӈ та̄гыл во̄рн о̄луӈкве минас. О̄лнэ ма̄в ма̄хум Верхние Браки намаясаныл, ты па̄выл Пе̄с Половинка ос Учинья па̄выл халт ӯнлыс. Та па̄вылт ам самын патсум. Тувыл Половинка па̄вылт совхоз ва̄рвес. Ма̄хум са̄всыр ма̄ныл тув рӯпитаӈкве ёхтысыт. Совхоз кӯщай хум а̄тям палт ёхтыс ос тув рӯпитаӈкве во̄выстэ. А̄тям ла̄выстэ, тав э̄лаль во̄раим ос хӯл алыщлым вос яласы ос ка̄ттын патум ӯит совхозн вос тотыянэ. Ты пе̄нтсыл тав Половинка па̄вылт яныг кол ӯнттуӈкве нё̄таве. Тыщирыл потыртахтасы̄г, а̄тям та па̄вылт яныг колыл ӯнттувес. Кол норытыл совхозныл майвес. Ма̄н колта̄глыл тув ва̄нтлысӯв. О̄лнэ колув ань ты мус Половинкат ӯнлы. Колув по̄хат ань музей рӯпиты. А̄тям 1962 та̄лт а̄тимыг е̄мтыс, то̄нт ам иӈ ма̄нь. Тав ща̄нь ла̄тӈыл сака ёмащакв потыртас. Омам рущ нэ̄ о̄лыс, тувыл ма̄ньщи ла̄тӈыл о̄с ёмащакв торгамтас. Герман каӈкум а̄тям ёт аквписыг во̄рт яласас, ма̄ньщи ла̄тӈыл потыртаӈкве мощ ха̄сыс. Каӈкум, Зинаида ос Надежда увщиягум а̄тимыг е̄мтсыт, ань амккем хультсум. Ам пе̄с рӯтанум урыл сака пӯмщалахтэ̄гум, та̄н наманыл акв нэ̄пакн хансыянум. Ань рӯтанум 1870 та̄л па̄сныл тув хассанум. То̄нт ма̄ньщит 8-10 ня̄врам о̄щсыт, тыи ма̄гсыл ань ам сака са̄в рӯт о̄ньще̄гум. А̄тям китыт э̄кватэ ёт хӯрум а̄ги Татьяна, Тоня ос Фая янмалтасы̄г. Та̄н пуссын Ленинград ӯст педагогический институтт ханищтахтасыт. Татьяна ёт ам ва̄йхатасум, тав Ха̄льӯст о̄лыс, школа кӯщаиг рӯпитас. Тав палтэ мӯйлуӈкве ялсум. Тав ань о̄с а̄тимыг е̄мтыс. Увщим акв а̄ги о̄ньщас, наме Инна. Ня̄враманум Инна ищхӣпыӈ ут щирыл хо̄нтсаныл. Тав Омск ӯст о̄лы, таве̄н пищма хассӯв, Инна ма̄навн ла̄тыӈ ювле ке̄тыс. Ос мо̄лты та̄л туи порат тыг ёхталас. То̄нт тыт о̄лнэ рӯтанув пуссын акванатыгласанӯв. Тав ётэ Евра па̄вылн ялсӯв. Па̄выл ӯнлум ма̄т ань яныг памятник тӯщтым о̄лы. А̄тям Половинка па̄вылт ёлщё̄питавес, тув о̄с ялсӯв. Ань ва̄тихал халувт потыртэ̄в ос пищма хансыглэ̄в. Тоня о̄с Ха̄льӯст о̄лыс, Фая Болчары па̄вылт о̄лыс, ань ня̄враманэ тот о̄лэ̄гыт. Ня̄враманэ ёт ам о̄с ва̄йхатэ̄гум. Ам са̄в та̄л Урай ӯст о̄лэ̄гум. Ханты-Мансийск ӯст медицинский училище а̄стламум юипа̄лт тыг ёхтысум. Ма̄нь ле̄ккарыг пӯльницат рӯпитаӈкве патсум. Хум ва̄рсум, о̄йкаме̄нтыл нила ня̄врам янмалтасме̄н, кит пыг, кит а̄ги. Та порат ня̄врам ёт юн хоса ӯнлуӈкве ат ро̄выс, та̄ра рӯпитаӈкве э̄рыс. Та рӯпатаныл по̄хын минасум ос садикн ле̄ккарыг патхатасум. Тот рӯпитасум, ня̄враманум садикн ялантасыт. 1990 та̄лт садик лаппантвес, ам рӯпата та̄л хультсум. То̄нт Урай ӯст ма̄нь ня̄врамыт ма̄гсыл пӯльница ва̄рвес. Округ янытыл ща̄нитна̄щитн хультуптым ма̄нь ня̄врамаквет пуссын ань тув ке̄тавет. Ты пӯльницат хус арыгкем та̄л рӯпитэ̄гум.

1117 2016. 02. 12. Тамара МЕРОВА

Тэ̄лы пора э̄тпосыт урыл «Торум Маа» нампа музейт рӯпитан хо̄тпат йильпи суссылтап щё̄питасыт. Суссылтапаныл «Тэ̄лы ма̄» намаим о̄лы. Ань тув ёхталам мӯй ма̄хумн музей кӯщай ва̄ӈын нэ̄ Эрика Сургутскова ос ты ва̄рум проект о̄вылтыт тот рӯпитан нэ̄ Ирина Ксенофонтова потыртасы̄г. Ирина ма̄ньщит ос хантыт э̄тпосыт наманыл мӯсхалыг ханищтасанэ ос ла̄выс: «Ма̄н лӯима̄вн тэ̄лы са̄ртыннув ёхты. То̄нт сака ащирмаӈ ос тӯйтыӈ пора. Ты о̄вылтыт ма̄хум ощхуль ва̄рнэ ма̄гыс тох ла̄выгласыт: «Лӯпта э̄тпост туи ущты о̄вылтахты, во̄ртур э̄тпост туи та минам». Соссаӈ мир э̄тпосыт хумус намтысаныл, наманыл сака пӯмщиг о̄лэ̄гыт. Та̄н э̄лаль миннэ нак Э̄тпос яныгман щирыл ловиньтыяныл ос ма̄витэ манхурипаг е̄мталы – ка̄сыӈ э̄тпос тох та ла̄вияныл. Хӯл алыщлан, во̄раян ос са̄лы ӯрнэ хо̄тпат ка̄сыӈ э̄тпос та̄нки щирыл я̄нас намыл пиныгласаныл». Лӯима̄т тэ̄лы пора «ма̄нь таквсы э̄тпосныл» о̄вылтахты, то̄нт тӯйт паты ос ащирма ва̄ри. Хантыт таве «Ай тахем потты тылащ» э̄тпосыг ла̄вияныл. «Яныг таквсы э̄тпост» я̄т я̄ӈкыл лапхартавет. Тагт ма̄ньщиянув ты пора «яныг тӯйт э̄тпосыг» ла̄вияныл. Осыӈ тӯйт патнэ ма̄гыс во̄раян хо̄тпат а̄мпаныл ёт тӯйт тармыл ворил ты ё̄ме̄гыт. То̄нт хум ма̄хум лэ̄ӈын ка̄тнпаттуӈкве минэ̄гыт, таима̄гыс то̄ват таве «лэ̄ӈын э̄тпосыг» ла̄выгласаныл. Декабрь – «ва̄ти хо̄тал э̄тпосыг» манос «ва̄т са̄грапнал саквалан э̄тпосыг» ла̄ваве. А̄лпыл молях ат постыглы, тувыл хо̄тал мощщан нэ̄глапа̄лы ос кон сатапаӈкве та паты. Нэ̄ хо̄тпат юн колсори рӯпата ва̄ре̄гыт, кӯраныл ёмщакв па̄лтыяныл, тэ̄нут ва̄ре̄гыт. Маснут ю̄нтуӈкве сака ат а̄лыме̄гыт. Этнографыт ла̄ве̄гыт, тыи мо̄йт мо̄йтнэ ос а̄мщит а̄мщнэ пора. Тувыл кон сака ащирмаӈыг е̄мталы, пе̄с ма̄хум ла̄вманыл щирыл, акв хо̄тал сыс ва̄т са̄грапнал сакватавес. Мо̄т тэ̄лы э̄тпос «та̄л котиль э̄тпосыг» ла̄ваве. Ма̄хум ще̄мьяӈ та̄гыл мӯйлуӈкве ялантэ̄гыт ос та̄нки халанылт аквъёт э̄лаль рӯпата ва̄рнэ ма̄гыс потыртахтэ̄гыт. Хантыт таве «А̄с халты тылащ» намыл пинсаныл. Ма̄вит янытэ̄т аста̄лыг та е̄мты. Юио̄выл э̄тпос «ре̄тыӈ ю̄свой э̄тпос» намыл пиным о̄лы. Пе̄с ма̄хум тох ла̄выгласыт: «Ре̄тыӈ ю̄свой акв хо̄тал тыламлым яласы, мо̄т хо̄тал а̄ти», «Акв хо̄талэ ма̄лтып, мо̄т хо̄талэ ащирмаӈ, акв хо̄талэ хосаг о̄лы, мо̄танэ ва̄ти». Хо̄нтаӈ ма̄ньщит ты э̄тпос о̄вылтыт ла̄выгласыт: «Сах еӈхп – щар ащирмаӈ э̄тпос, Э̄тпосо̄йка кантлы». Тувыл мӯй ма̄хум музейт о̄лнэ тэ̄лы о̄щнэ маснутыл, тэ̄лы порат хӯл алыщлан ос во̄раян пормасыл суссылтаве̄сыт. Музейт рӯпитан хум Вячеслав Кондин пормасыт наманыл пуссын ла̄всанэ, манарыл та̄н ва̄рим о̄лэ̄гыт ос хумус хум хо̄тпат алыщласыт, ты о̄вылтыт потыртас. Пе̄с ма̄хманув са̄лы совныл ос котыл ю̄нтым маснутыл масхатым о̄лсыт. Нэ̄ хо̄тпат та̄нки ма̄гсыланыл сахи ю̄нтсыт, хум хо̄тпат мольщаӈыл, кувщил ю̄нтыгласаныл. Ла̄гыл маснут ня̄рат, ва̄ит, пуркат о̄с са̄лы котыл ю̄нтавет. Тамле маснутыл масхатам э̄лумхо̄лас ат по̄ляве. Янгема̄не та̄н пуссын тэ̄лы ре̄гыӈ маснут о̄щсыт. Ань мӯй ма̄хум сахи манос нуил ю̄нтым мольщаӈ масуӈкве ос по̄слахтуӈкве ве̄рмысыт. Аграфена Сопочина, Лянтор ӯсныл ёхталам ханты нэ̄, та̄н е̄ранылт хумус сахи масаве, сахи тэӈанэ хумус нэ̄гсалавет ос пе̄сталавет, тувыл то̄р хумус пинаве, хумус э̄нтаптахтэ̄гыт, таи ма̄хумн суссылтас. Альбина Мехнина, «Торум маа» музеит рӯпитан нэ̄, ма̄ньщи ма̄хум хумус масхатыгласыт, та урыл мощ потыртас. Тувыл тэ̄лы соссаӈ ма̄хманув маныр ка̄с ва̄рсыт, таил ос пӯмщалаве̄сыт. Тэ̄лы хурит суссылтаве̄сыт ос тӯйт поталы пе̄нтсыл нэ̄пак поталы ва̄рсыт ос таитыл па̄хвтащлахтасыт. Ос та юипа̄лт мӯй ма̄хум ща̄й айнэ̄ныл порат та̄н ётаныл о̄лыглам накыт номылматыгла̄лсыт.

1117 2016. 02. 12. Александр ВЬЮТКИН

Ма̄нь та̄гыл ёсал ха̄йтнэ саран хум Мощ мо̄лалнув Ха̄льӯс район Саранпа̄вылт яныгмам ма̄ньлат саран пыг ёт ам хо̄нтхатыгласум. Тав наме Александр Степанович Попов. Омаге, а̄тяге Степан Григорьевич ос Светлана Абрамовна ань Саранпа̄вылт о̄лэ̄г. Тэ̄н са̄в та̄л са̄лыӈколт яласасы̄г. О̄парище наме Григорий Семёнович о̄лыс, щаще̄кватэ Мария Игнатьевна. Александр самын патум па̄сныл ё̄рнколт яныгмас. Тав Люба ос Таня тит увщи о̄ньщи. Тэ̄н сас о̄йкаӈыг, Ханты-Мансийск ӯст рӯпитэ̄г. Александр ла̄выс: «А̄нумн ма̄нь та̄гыл ёсал ё̄мыгтаӈкв сака мӯстыс. Ня̄врамыг о̄лмум порат са̄лыӈколт хо̄птанув щарканыл мувылтым а̄тям ёт аквписыг яласасум. Аквъёт яласамуме̄м ма̄гсыл таве̄н кӯстыр, а̄нумн пӯмащ. Ты коныпал са̄лыӈколт иӈ са̄в та̄рвитыӈ рӯпата то̄вылхаты». Александр ня̄врамыт ханищтан колн миннэ мус са̄лыӈколт яласас. Школат тав ёсал ха̄йтуӈкве ханищтахтын колн Иван Николаевич Вокуев палт та̄ра минас. Тув ёхтуме порат тот иӈ йӣв ёсат ос пе̄с ёсавотыит о̄лсыт. Александр са̄р хо̄талыт хотсаквалым ёсавотыиӈ ёсал майвес. О̄выл хо̄талт ёсаге ла̄глыгныл хотоймыгтамуме̄н ма̄гсыл ла̄щлакве̄г ос то̄ванакт тӯйтыт повара̄лым ха̄йтыс. Иван Николаевич палт школа а̄стламе мус ялантас. Ва̄тихал округ янытыл касуӈкв яласасыт. Иван Николаевич палт яласан ня̄врамыт аквписыг но̄хпатыгласыт. Мо̄т ма̄ ня̄врамыт ёт рӯпитан ма̄хум Иван Вокуев аквписыг титыгла̄лсаныл: – Наӈ ня̄враманын манарыл тыттыянын? – Хумус манарыл? Сыстам я̄ хӯлыл ос во̄иӈ ня̄рнё̄влил тыттыянум. Ёсал ха̄йтнэ коныпал Саша иӈ лӯима̄ ма̄хум каснэ колн Андрей Дорофеевич Филиппов палт ялантас. Тув ялантыматэ̄т мощ матаре ат тэ̄лыс. Ха̄йтуӈкв ос тынщаӈ сӯв нумпа̄лн ре̄пуӈкв таве̄н а̄ртмыс. Сун ӯллта поргуӈкв ос са̄грап э̄ла па̄хвтуӈкв мощ атнув ве̄рмыс, таи ма̄гсыл Александр ёсал касуӈкв ювле та минас. Александр ханищтахтын кол а̄стуме юипа̄лт Ханты-Мансийск ӯсн ва̄нтлыс. Тыт тав ня̄врамыт ханищтан хумыг ханищтахтас. Ӯсыӈ ма̄н ёхтуме̄т ёсал каснэ «Биатлон» нампа ма̄н касуӈкв та̄ра вӯйвес. Ёсал ха̄йтуӈкв ве̄рмыс, писалил па̄тлуптаӈкв тав ха̄сыс, та̄ра тув та минас. Титыт та̄л Александр округув ма̄гсыл касы. Ханищтахтын ма̄ныл а̄стуме юипа̄лт Санкт-Петербург ӯсн о̄луӈкв ва̄нтлыглас. Тит та̄л тот о̄лыс. Мо̄лты ювле Ханты-Мансийск ӯсн ёхтыс. Тыт тав ня̄врамыт ханищтан ма̄н тренерыг рӯпитаӈкв во̄ввес. Ань тав палтылэ ва̄т нупыл нила ня̄врам ёсал ха̄йтуӈкв ёхталы. Щар ма̄нь ня̄врам нёлолов та̄лэ, щар яныг ня̄врам са̄тхуйплов та̄л янытыг о̄лы. Ма̄ньлат хум касуӈкв ты кос ка̄сащи. Таве̄н о̄с щё̄питахтуӈкв э̄ри, ня̄врамыт ханищтым такви ат а̄лыми. Таима̄гсыл тав каснэ ма̄хум пе̄риян хумыг о̄луӈкв ла̄вхатас. То̄ва хо̄талыт ёсал акваг ха̄йтыгты. Тамле ёмас ма̄ньлат хумн ам пуста̄гыл о̄лнэ ла̄тыӈ те̄тэ̄гум, каснэ ма̄т аквписыг но̄х вос паты, ёмас посыӈ хо̄талыл э̄лаль о̄луӈкв ла̄вилум.

1117 2016. 02. 12. NO DATA

Яныг утыт ос ма̄нь утыт Охсар нЯ̄враманэ ёт Во̄ӈхакве хилэке̄н – ма̄ ёлыпа̄лт милмил, ощмарыӈощмарыӈ щалтнэ ос ква̄лнэ а̄виӈ кол ва̄ре̄н: акв ква̄лнэ ма̄ нирщахыл ёлыпа̄лт, мо̄тан тар ёлыпа̄лт, хӯрмит – а̄хвтас та палт, нилыт – паль пум халт, атыт – паль уюмт вос о̄лы. А̄мпытн нявлуӈкве патаве̄н, на̄н во̄ӈхан молямтахтэ̄н! Та̄н вос хортэ̄гыт, та̄н вос хилэ̄гыт! А̄мпыт хортнэ сыс, на̄н э̄лы асныл конва̄ӈксэ̄н ос во̄рн ое̄н На̄нан ва̄маныл та! . . Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1118 2016. 02. 25. Валентина УЗЕЛЬ

Са̄ккон хаснэ ма̄хум Ты э̄тпост са̄ккон хаснэ колт рӯпитан кӯщаит Борис Хохряков, Наталья Западнова ос мир пусмалтан колт яныг кӯщай Николай Ташланов та̄нти рӯпатаныл урыл потыртасыт. Та̄н пуссын «Единая Россия» партиян хасхатым о̄лэ̄гыт, ты партия тэ̄ланэ э̄лаль тотнэ ма̄гыс рӯпатаныл ва̄рияныл. Ты э̄тпос о̄вылтахтам порат та̄н Москва ӯсн ялсыт, тот ты партия съездэ о̄лыс. Маныр рӯпата ва̄руӈкв та̄нанылн э̄лаль э̄ри, тот ёмащакв хӯлтве̄сыт. Борис Хохряков тув ялме урыл потыртас, тав ла̄выс, ань Россия янытыл «Единая Россия» щар ма̄к яныг партияг о̄лы. Ань акванатхатыглам ма̄хум Генеральный Советн ос мо̄т пӯӈктотнэ ма̄н мо̄т кӯщаит пе̄риясыт. Ка̄сыӈ регионма̄ныл акв хо̄тпа тув пе̄риявес. Наталья Западнова ты съездын о̄с ялыс. Тав округ Дума депутатыг о̄лы, мирн нё̄тмил ва̄рнэ комитет кӯщаиг тот рӯпиты. Москва ӯст Россия янытыл ты рӯпата ва̄рнэ ма̄хум я̄нас атыглаве̄сыт. Та̄н ты урыл потыртасыт, яныгпа̄ла хо̄тпат ань акваг са̄вме̄гыт, та̄нанылн нё̄тнэ ма̄гыс я̄нас программанэ̄пак хансым о̄лы, рущ ла̄тӈыл тох намаима – «Стратегия помощи старшему поколению». Ты программа щирыл ма̄хум ёмащакв вос рӯпитэ̄гыт, тув о̄с са̄в олн та̄ставе. Ма̄н округувт ты рӯпата о̄вылтавес, йильпи са̄ккон пирмайтавес, 80 та̄ланыл то̄влум матум хо̄тпаныл кол щё̄питан ма̄гыс олн щар ат виве, ос 70 та̄ланыл юипа̄лт туп акв па̄лэ ойтэ̄гыт. Ты са̄ккон Россия янытыл туп 15 областьт ман округт хасвес, мо̄т ма̄тт яныгпа̄ла хо̄тпат ты олныт мыгыт. Э̄лаль ты кӯщай нэ̄ ла̄выс, ань институт ман университет юипа̄лт а̄гитпыгыт рӯпата хо̄нтуӈкв щар ат ве̄рме̄гыт, та̄н нэ̄мхотталь ат вивет. Та̄нанылн хотмус нё̄тнэ ма̄гыс матыр рӯпата вос ва̄раве ман йильпи са̄ккон хансуӈкв э̄ри. Ле̄ккарыӈ ма̄т рӯпитан хум Николай Ташланов ла̄выс, ань ма̄ньлат ма̄хманув ле̄ккарыг ханищтахтуӈкв ат таӈхе̄гыт. Ань юио̄выл та̄лт медицинский институтн мощщанув хо̄тпа ёхтуӈкв патсыт. Кӯщаит потыртаманыл юипа̄лт журналистхо̄тпан мощ титыглаве̄сыт. Ма̄ньщи хумиюв Никита Партанов та урыл та̄наныл титыгласанэ – соссаӈ мир ӯргалан ма̄гыс «Уполномоченный по правам коренных народов Севера» нампа кӯщай хо̄тпа хунь ӯнттаве. Борис Хохряков ювле тох ла̄выс: «Тамле хо̄тпа округувт вос о̄лыс, ань ма̄н ва̄тихал акваг титыглаве̄в. Ул, со̄ль, тав ма̄н округувт э̄ри. Ты урыл о̄влэ̄т йильпи са̄ккон хансуӈкв э̄ри, тувыл ущ тамле кӯщай хо̄тпа тах пе̄рияве».

1118 2016. 02. 25. Валентина УЗЕЛЬ

Округ миркол кӯщаит сапра̄нияныл о̄лыс Ма̄н округ кӯщаюв Наталья Комарова ань яныг ӯсытн ялантым рӯпиты. Акв са̄тт акв ӯст рӯпиты, мо̄тыт са̄тт – мо̄т ӯсн мины. Ань тав Нефтеюганск ӯст ва̄ӈын кӯщаянэ ёт ялыс. Тот матах хо̄тал о̄лсыт. Тав ётэ са̄в хо̄тпа рӯпиты. Са̄всыр департамент кӯщаит ва̄рнэ рӯпатаныл коныпал та̄н «округ правительстваг» ла̄вавет. Акв са̄т сыс акванатхатыглэ̄гыт, заседанияныл о̄лы. Ты э̄тпос кӯщай нэ̄ Нефтеюганск ӯст о̄лме порат округ правительство сапра̄нин во̄выгласанэ. Ва̄ӈын ма̄хманэ то̄ват тав ётэ тот о̄лсыт, мо̄таныт ос тыт, Ханты-Мансийск ӯст, о̄лсыт. Видеосвязь щирыл та̄н аквано̄лтве̄сыт, халанылт тох потыртасыт. Та̄н ань ва̄тахтем са̄всыр постановлениенэ̄пакытн йильпи ла̄тыӈ хассыт. ЖКХ ма̄т ань са̄в та̄рвитыӈ ва̄рмаль о̄лы, то̄ват сака лю̄льсаӈ рӯпитаӈкв патсыт. Ань ты предприятият пуссын та̄нти я̄нас щирыл рӯпитан хо̄тпатн мивет, рущ ла̄тӈыл та̄н «частный операторыг» ла̄вавет. Моще̄рт округувт акв йильпи ут ва̄раве. Ма̄хум кос хо̄т о̄лнэ̄ныл порат, матыр о̄выл та̄н ётаныл те е̄мты, та̄н «112» номерн свонитаӈкв те патэ̄гыт, та̄н тах та̄ра хӯнтамлавет. Ань ты ищхӣпыӈ ут рӯпитаӈкв вос о̄вылтахты, тув арыг олн округ бюджетныл тах та̄ставе. МЧС ма̄т рӯпитан ма̄хум та̄н ты рӯпата ва̄рияныл, ты ищхӣпыӈ утаныл «Безопасный город» тох ла̄ваве. Ань колыт ӯнттын рӯпата ёл та по̄илттавес. Ханты-Мансийск ӯст щар акв о̄лнэ кол ань ат ӯнттаве, кол ӯнттын ма̄хум пуссын ла̄ккваминыгласыт. Та̄н ань олныл щар ат мивет. Ос округ кӯщаит ты ва̄рмаль мощ мо̄т нупыл ва̄рыгпасаныл – строительхо̄тпат та̄н лю̄льсаӈ рӯпитанэ̄ныл ма̄гыс колыт ань ат ӯнттавет. Ул таима̄гыс ты кӯщаит тамле хӯлтнэ ла̄тыӈ хассыт – о̄лнэ кол ӯнттын ка̄сыӈ ма̄т видеонаблюдение ва̄руӈкв э̄ри. Та ут та̄ра та̄н ка̄салыяныл – кол ӯнттын ма̄хум хумус рӯпитэ̄гыт, кол хумус ӯнттаве. Лю̄льсаӈ рӯпитан хо̄тпат та̄ра тах по̄хан те̄тавет. Наталья Комарова Нефтеюганск ӯсныл видеосвязь щирыл Ханты-Мансийск ӯст о̄лнэ такви ва̄ӈын кӯщаянэ ёт потыртаме порат та̄наныл мощ ро̄хтысанэ, та̄н мо̄т ӯст камера э̄лыпа̄лт кос ӯнлысыт, ос пуссын роттыг, супне̄лм та̄л таве та хӯнтлысаныл.

1118 2016. 02. 25. Светлана РОМБАНДЕЕВА

Община кӯщай хум Москва ӯсн ялыс Ты э̄тпос № 3 газетат ма̄н Ханты-Мансийский районт Цингалы па̄вылт о̄лнэ «Колмодай» община урыл хансыгласӯв. Ань тот рӯпитан ма̄хум урыл потыр э̄лаль мины. Община кӯщай хум Олег Густавович Шатин Москван ялыс. Ты урыл тав тох потыртас: «Россия янытыл лӯи ма̄т о̄лнэ соссаӈ мирыт ма̄гыс Москва ӯст яныг хо̄нтхатыглап ва̄рыглавес. Мурманск ӯсныл Владивосток ӯс палытыл о̄лнэ ма̄хум тув ёхталасыт. Ты тэ̄ла палт Григорий Петрович Ледков пуӈктоты, тав «Лӯима̄т о̄лнэ мощщаг хультум соссаӈ мирыт ассоциация» президентыг о̄лы. А̄нум тав ты тув во̄выгластэ, ам ань округув янытыл о̄лнэ соссаӈ общинат тармыл кӯщаиг паттуве̄сум. Ма̄хум тот са̄в ва̄рмалит урыл потыртасыт. Григорий Петрович ла̄выс, ма̄к яныг пе̄та таи, ань соссаӈ ма̄хум о̄лнэ ма̄нанылт рӯпитан кӯщаит ма̄н ла̄тӈув хӯнтлуӈкве сака мат ат таӈхе̄гыт, са̄ккон нэ̄паканув торыӈ щирыл ат хансавет. То̄ва кӯщаит ат ва̄ганыл, хумус ма̄н ётув потыртаӈкве. Аман потыртаӈкве ат таӈхе̄гыт манос та̄нти нэ̄матыр ат торгамтэ̄гыт. Ма̄н, лӯи ма̄т о̄лнэ ма̄хум, Президентув ос яныг кӯщаянув нэ̄мхуньт ат та ля̄выльтта̄лсанӯв, нэ̄матыр лю̄ль номт ат о̄ньще̄в. Нас то̄ванакт матыр та̄рвитанув урыл потыртэ̄в, нё̄тмил во̄ве̄в. Нё̄таве̄в те, ёмас номтыл ё̄мыгтэ̄в. Ты ма̄т ма̄н ма̄хманув пе̄с йис та̄гыл о̄лсыт, ма̄н тыт самын патсӯв, воссыг мо̄т ма̄ ат о̄ньще̄в. Э̄лы ма̄ныл тыг ёхтум ма̄хум ань рӯпитэ̄гыт, ос хунь ма̄во̄й холы, та̄н та̄нти ма̄нанылн та тахе̄гыт. Ма̄н ос ма̄во̄й холы те̄пыл, тыт хультэ̄в. Ты ма̄н о̄лнэ ма̄в, хотталь хунь ха̄йтэ̄в. Ма̄н са̄в та̄рвит о̄ньще̄в. Кос выгӯв – пусмалтан ва̄рмаль. Э̄лнаӈ ка̄сыӈ ма̄нь па̄вылт ле̄ккар о̄лыс, па̄выл ма̄хум пусмалтас, рӯпата олныл ойтвес. Ка̄сыӈ общинат ма̄нь ле̄ккар акваг рӯпитас. Тувыл ща̄нь ла̄тыӈ ханищтан школат лаппантве̄сыт. Соссаӈ мир халт сака са̄в хо̄тпа о̄лнэ кол ат о̄ньщи. Григорий Ледков ма̄к таима̄гыс сыме ща̄рги, ань ма̄навн э̄рнэ са̄кконыт ка̄сыӈе̄мт ё̄рва̄гыл пирмайтавет. Ма̄н общинав государствавн о̄с сака мат ат нё̄таве. Субсидия нё̄тмилолнэ сака мощща – хӯл пувнэ̄в порат акв кила ма̄гыс нёлолов солко̄вил туп ойтаве̄в. Ямал ма̄т общинат налыман солко̄вил ойтавет. Ма̄н тыт ма̄во̄й ос газ о̄ньще̄в, хӯл алыщлан ма̄хум ма̄гыс олн аман манрыг са̄литаве. Мӯсхал щирыл нё̄тнуве̄в те, хӯл алыщлан хо̄тпанув олн са̄внув сэ̄лнувыт. Ты тэ̄ла ма̄гыс э̄рнэ са̄ккон нэ̄пак хансуӈкве э̄ри, кӯщаянув ма̄н ётув ка̄саще̄гыт ман а̄ти, тавагт». «Колмодай» общинат рыбакыг рӯпитан хум Иван Елишев ла̄выс: «Ам рӯт ма̄хманум йис та̄гыл хӯл алыщласыт. Хӯл тай ка̄сыӈ ма̄т о̄лы, хо̄тпа рӯпитаӈкве таӈхи те, кос хоты ма̄т хӯл пуви. Ювле хультум та̄лт витэ сака яныг о̄лыс, ма̄ са̄выӈпа̄лэ а̄мара̄лвес. Ма̄н тыт рыбакыт ёт тармыл о̄лэ̄в, во̄рколув яныг. Тыхал во̄рае̄в, охсар ос нёхыс ка̄тынпатталэ̄в». Цингалы па̄выл во̄ревитэ ӯргалаӈкве Сергей Малюгин паттувес, тав ма̄вит ос во̄руй тармыл служба безопасность кӯщаиг о̄лы. «Колмодай» община хӯл алыщлан ма̄тэ̄н ва̄тихал яланты, та ма̄ ос тот рӯпитан ма̄хум уральта̄лыянэ. Ма̄н хӯл алыщлан ма̄н ялмув порат, тав ма̄н ётув о̄с ялыс. Ты общинат рӯпитан хо̄тпатын ам са̄в ёмас ла̄тыӈ ла̄ве̄гум. Пуссын пуста̄гыл вос о̄лэ̄гыт, ка̄ркамыӈыщ вос рӯпитэ̄гыт, э̄рнэ са̄вит хӯл вос пуве̄гыт.

1118 2016. 02. 25. Тамара МЕРОВА

Округ кӯщаюв Нефтеюганск ӯсн ялыс Наталья Комарова ты э̄тпост Нефтеюганск ӯст о̄лме порат хӯрумса̄т арыгкем хо̄тпа ёт акванхо̄нтхатыглас. Мо̄лты та̄л тав ма̄ньполь э̄тпос атхуйплов щислат тув ялыс, ӯст та̄рвитыӈ тэ̄лат та̄рапаттыс. То̄нт са̄выӈпа̄лэ хо̄тпат пусмалтан ос коммунальный тэ̄лат палт са̄в та̄рвитыӈ ва̄рмаль о̄щсыт. Та сыс матыр ёмасыг ва̄рвес ман а̄ти, ань та урыл э̄лаль потыртасыт. Мо̄лты та̄л 16 микрорайонт 87 колт о̄лнэ хо̄тпат нё̄тмил во̄всыт. Та кол ёмщакв щё̄питаӈкве патвес кос, ос ань тыг мус коланыл киврыт ащирмаӈ. Ты ва̄рмалит ань э̄лаль уральтаӈкве э̄ре̄гыт. Тувыл кол ӯнттын хо̄тпат та̄нки юн электроплитка о̄щнэ̄ныл ма̄гыс мощща олныл вос ловиньтавет, тамле ла̄тыӈ ла̄всыт. Та юипа̄лт ӯс кӯщаит кол ӯнттын ма̄хум ма̄гыс э̄рнэ нэ̄пакыт щё̄питаӈкве патсыт. Ань ва̄т ще̄мьят нэ̄паканыл э̄лаль та̄ра ва̄рсаныл ос та̄н мощщанув олныл ловиньтаӈкве патве̄сыт. Тувыл ӯс ма̄хум айнэ вит урыл са̄в потыртасыт. Та̄н айнэ витаныл сака лю̄ль, мо̄лал Россия мо̄т ӯсыт халт Нефтеюганск ӯс тот о̄с хӯлтвес. Вит тотнэ турпат хосат пе̄сыг е̄мтсыт, та̄наныл са̄в ма̄т йильпииг пе̄нтуӈкве э̄ре̄гыт, тыи ма̄гыс вит сака па̄ӈкыӈыг о̄лы. То̄ва ма̄т вит сыстамтан утыт ань ва̄рве̄сыт. Ос ӯст айнэ витаныл янытэ̄т сыстамтан ма̄гыс иӈ са̄в рӯпитаӈкве э̄ри. Мир пусмалтан тэ̄лат о̄вылтыт тох потыртасыт. Мо̄лалнув то̄ва а̄гмыт пусмалтан ле̄ккарыт тот а̄тим о̄лсыт. Кӯщай хо̄тпатытн та̄н аквхуйплов йильпи рӯпитан местал пӯльницат щё̄питаве̄сыт. Тувыл ле̄ккарлан ва̄рмалит уральтан порат, таи та̄рапатыс – то̄ва ма̄хум олн ойтнэ щирыл пусмалтахтуӈкве ла̄вимат. Ты ма̄хум наска̄ссыг ла̄пала̄лавет. Тэ̄рпит тынта̄лнув вос о̄лэ̄гыт, тэ̄рпи тыналан ма̄хум ва̄рмаляныл о̄с уральтаве̄сыт, та̄н мӯсхалыг ва̄равет. То̄ва пенсионерыт коланыл ляпат о̄лнэ ма̄ло̄мтыт та̄нки нупыланылн хансуӈкве тахсыт. Ос ӯсыӈ кӯщаитн яныгса̄т метра, акв сотка ма̄гыс лов со̄тыра солко̄ви ойтуӈкве ла̄вимат. Губернатор ты тэ̄лат уральтаме юипа̄лт пенсионерыт кит со̄тыра солко̄ви ойтуӈкве ла̄вве̄сыт. Кӯщай нэ̄ ёт потыртам хо̄тпат ка̄сыӈ ва̄рмаляныл ань э̄лаль акваг уральтаӈкве патавет, ос та̄наныл ёмщакв ва̄рнэ̄ныл мус са̄всыр кӯщаит рӯпитаӈкв тах патэ̄гыт. Губернатор прессслужбаныл ке̄тым ля̄ххал ма̄ньщи ла̄тӈыг Тамара Мерован хасвес.

1118 2016. 02. 25. Тамара МЕРОВА

Пуста̄гыл о̄лнэ ма̄гыс ёсал ха̄йтэ̄н Ёсал ха̄йтнэ хо̄тал э̄лыпа̄лт ля̄ххал тотнэ ма̄хум биатлонный центр колн атыглаве̄сыт, та̄н ётаныл спортыт рӯпитан кӯщаит потыртасыт. Евгений Редькин, округ каснэ тэ̄лат тармыл о̄лнэ кӯщай, ла̄выс, ты та̄л та̄н мо̄лты та̄л хольт округ янытыл лов со̄тыра са̄вит ма̄хум ёсал ха̄йтуӈкве ӯре̄гыт. Сака са̄в хо̄тпа ка̄сащан ла̄тыӈ ат ке̄тсыт. Са̄в мир ёсал ха̄йтнэ хо̄талт тув тах ёхтэ̄гыт. «ЮграМегаСпорт» колт кӯщай ва̄ӈын хум Валерий Радченко тох потыртас: «Ёсал ха̄йтнэ ка̄сыӈ хо̄тпан тыт хасхатуӈкве э̄ри, тав номерыл миве ос нё̄тнэ ке̄нтыл мӯйлуптаве. Ха̄йтнэ лё̄ӈханыл о̄с уральтавес, тав ёмщакв щё̄питым о̄лы. Тувыл ёса ат о̄щнэ хо̄тпат та̄н тыгыл вуйлан ма̄гыс 200 парал щё̄питаве̄сыт. Ос ёсал ха̄йтнэ федерация вицепрезидент хум Сергей Крянин округт о̄лнэ ма̄хум пуссын та хо̄талт каснэ ма̄н во̄всанэ. Та̄н мӯйлын ма̄хум ма̄гыс са̄всыр ка̄с тот ва̄ре̄гыт ос спорт тармыл яныг нам о̄щнэ хо̄тпа тув тах во̄ве̄гыт. Моще̄рт Ханты-Мансийскат биатлон яныг касыл е̄мты, тув билетыт ёвтуӈкве ань э̄ри кос. Мо̄т ма̄т о̄лнэ ма̄хумн молях ёвтавет, ос ӯсувт о̄лнэ хо̄тпат билет та̄л ул вос хультэ̄гыт.

1118 2016. 02. 25. Светлана РОМБАНДЕЕВА

Ӯс ма̄хум ёсал кассыт Ты э̄тпос 14 хо̄талэ̄т Ханты-Мансийск ӯс ма̄хум ёсал ха̄йтсыт. Ты касыл «Лыжня России» намаявес. Ань май акваг ла̄ве̄гыт, пуста̄гыл о̄луӈкве э̄ри. Хо̄тпа пуста̄гыл о̄луӈкве таӈхи те, матыр вос ва̄ри, мощ вос нёвсы – ёсал вос ха̄йтыгты, ла̄глыл са̄в ё̄мыгты, йӣкви, пувлы, зарядка вос ва̄ри, та маныр. То̄нт хо̄тпа пуста̄гыл о̄луӈкве паты, лылытэ тув ат мари, матыр та̄рвитыӈ номт о̄ньщи те, номтэ ка̄мнями. Таима̄гсыл Россия янытыл ка̄сыӈ па̄вылт ман ӯсыт тамле касыл та ва̄рыгла̄лаве. Ханты-Мансийск ӯст о̄лнэ ёсал ха̄йтыгтан ма̄ А. В. Филипенко о̄йка наме̄тыл пинвес. Мирхал касылыт тот ты о̄лыгла̄лэ̄гыт. «Лыжня России» ва̄рмаль ка̄сыӈ та̄л о̄с та ма̄т ва̄рыгла̄лаве. Ты та̄л 1 со̄тыра 576 хо̄тпа ёсал ха̄йтыс. Татем ёмас, ма̄лтып хо̄тал о̄лыс. Мир янгема̄не та атхатас, пуссын ёсал масхатым о̄лэ̄гыт, акв юипа̄лт та лю̄льсыт. Та̄н нупланыл округ янытыл каснэ ва̄рмаль ос физкультура департамент колт кӯщаиг о̄лнэ хум Евгений Редькин ла̄тыӈ ла̄выс: «Ёсал ха̄йтыгтан я̄тил ма̄хум, на̄нан ам ты ялпыӈ хо̄талыл янытлыянум! Кон акваг ё̄мыгтэ̄н, ёсал ва̄тихал яласэ̄н, тахсэ̄н, сыстам лылые̄пыл лылтэ̄н. Ще̄мьянын пуста̄гыл вос о̄лэ̄гыт, ня̄враманын ё̄р хо̄тпаг вос яныгме̄гыт! ». Тав ла̄тӈе оигпаме юипа̄лт, мир та нёвумтас. Ята, ань янгема̄не ёсал та ха̄йтэ̄гыт. То̄ва ёлрагаты, тав нуплэ мо̄тан паты, тот та повара̄лэ̄гыт. Тувыл но̄хлю̄люмтэ̄гыт, э̄лха̄йтэ̄гыт. Сака мат ат молямлэ̄гыт, та са̄вит мир, пуссын са̄ртын хунь ёхтыгпе̄гыт. Ты тэ̄ла палт пуссын нас пӯмыщ ма̄гыс пе̄тхатасыт. О̄влэ̄т ёхтыгпам хӯрум хо̄тпа наманыл ла̄вве̄сыт, янытлаве̄сыт, мӯйлупсатыл майве̄сыт. Щар са̄ртын Антон Гафаров ёхтыс. Мирхал ма̄т ёсал каснэ тэ̄ла палт тав олимпийский чемпион намыл маим о̄лы. Мо̄т хо̄тпат о̄с янытлаве̄сыт – каснэ ма̄хум халт щар яныг хо̄тпа ос щар ма̄нь ня̄врам. Школат ханищтахтан а̄гипыгыт о̄влэ̄т я̄нас ха̄йтсыт. Соссаӈ ма̄хманув о̄с я̄нас кассыт, мольщаӈыл масхатым о̄лсыт. Та̄н о̄с янытлаве̄сыт. Пӯткол рӯпитас, палатка тӯщталавес, ма̄хум тот солдатский каша тэ̄сыт, исум ща̄й айсыт. Ня̄врамыт концерт суссылтасыт, йӣквсыт. Матъёмас тамле хо̄тал о̄лы. Сыстам лылые̄пыӈ ма̄т касуӈкве ман нас ё̄мыгтаӈкве улпыл ка̄сыӈ хо̄тпан мӯстыс.

1118 2016. 02. 25. Людмила ТЕТКИНА

Ня̄хщамво̄льт йильпи колыт ӯнттавет Ха̄льӯс районт Тагт я̄ ва̄тат Ня̄хщамво̄ль па̄выл ӯнлы. Ань ты па̄выл Хулюмсунт миркол нупыл хансым о̄лы. Кӯщаиг Ольга Васильевна Баранова тот рӯпиты. Хулюмсунт, Ня̄хщамво̄ль па̄влыгн ялмум порат кӯщай нэ̄ ёт потыртасум ос кол ӯнттын ва̄рмаль урыл китыгласлум. Тав ты тэ̄ла урыл таи потыртас: – Мо̄лты та̄л Ня̄хщамво̄ль па̄вылт йильпи кит яныг колыг ӯнттувесы̄г. Ка̄сыӈ колт хӯрум квартира о̄лы. Ань рӯпитан са̄ккон щирыл, ма̄н о̄лнэ кол ёвтуӈкве туп ве̄рме̄в. Тувыл колыт ӯнттын организацият ма̄нь па̄вылквет рӯпитаӈкве ат ка̄саще̄гыт. Та̄нанылн тапалыт ма̄н норыт, партыт ос мо̄т утыт тотнэ ма̄гыс са̄в олн холтуӈкв э̄ри. Ня̄хщамво̄ль па̄вылт колыт ӯнттын ма̄хум ёт ма̄н сака хоса потыртахтасӯв. Та̄н та̄нки олныл колыг ӯнттысаныл, ты юипа̄лт Ха̄льӯс район мирколн тыналасаныл. Акв кол са̄ртынув ӯнттуӈкве о̄вылтавес ос 2015 та̄лт я̄ӈк на̄тнэ э̄тпос Победа хо̄тал кастыл а̄стлувес. Мо̄танэ ос таквсы порат а̄стуӈкве тахсыт. Акв колэ тай ёмащакв ва̄рвес, тот о̄луӈкве ро̄ви, мо̄танэ ты мус ёмащакв аты щё̄питавес, иӈ са̄в рӯпата ва̄руӈкве тот э̄ри. Кол ӯнттын ма̄хум олн ат о̄ньще̄гыт, тыи ма̄гсыл воссыг ат рӯпитэ̄гыт. Та̄н ётаныл потыртахтасӯв, ты рӯпата а̄стлаӈкве ла̄вхатсыт. Мо̄лты та̄л оигпам э̄лыпа̄лт мирколт рӯпитан нэ̄ Светлана Омельченко, ты йильпи кол нэ̄пакыт мӯсхалыг ва̄руӈкве Ха̄льӯсн ялыс. Тот ла̄ввес, ты кол ёвтнэ ма̄гсыл округ бюджетныл олн майлувес, ань ты нэ̄пакыт ва̄равет. Ос хунь ты нэ̄пакыт мӯсхал щирыл щё̄питавет, та̄н ат ва̄гыт. – Хотты ще̄мьят ты йильпи колытт о̄луӈкве патэ̄гыт? – Ты колыт очередь щирыл ма̄хумн миӈкве патавет. Ос пе̄с колыт о̄лнэ ще̄мьят йильпи колн тах ва̄нтлэ̄гыт. Та̄н «Снос ветхого и аварийного жилья» нампа программа щирыл колыл тах мивет. Ня̄хщамво̄ль – ма̄нь па̄вылкве, тот о̄лнэ мир пуссын ва̄гыт, хумус ма̄хум о̄лэ̄гыт, хотьют са̄в ка̄ркамыг рӯпиты ос хотьют нас сав тотым о̄лы. То̄ва ма̄хум нэ̄мхуньт ат рӯпитасыт, вина а̄им о̄лнэ коланыл мискол хурипаг ва̄рсаныл. Та̄н палтаныл щалтуӈкве пилыщмаӈ, колканыл хотсаис, колаланыл алаты ёллоньхатэ̄гыт. То̄ват нэ̄паканыл пуссын акванатсаныл ос та очередин хасхатасыт. Ты ще̄мьят колыл о̄с тах мивет. Па̄вылт о̄лнэ ма̄хум пуссын ля̄втэ̄гыт, манрыг ты ще̄мьят акваг нё̄тавет. Ма̄н ос маныр воссыг ва̄ре̄в, та̄н очередин хасхатасыт, о̄лнэ колыл ат миӈкве, о̄с ат ве̄рме̄в. Йильпи колыт нэ̄паканыл хунь ва̄равет, ма̄н комиссия ёт пе̄с колытт о̄лнэ ще̄мьят палт ялэ̄в, коланыл ёмащакве сунсыянӯв. Ты юипа̄лт йильпи колыл ма̄хум миӈкве патыянӯв. Па̄вылт кит яныг колыг ӯнттуӈкве о̄с патаве̄г. Ань кол ӯнттын ма̄тэ нэ̄паканэ ва̄риянӯв. Ос хунь колыг ӯнттуӈкве о̄вылтаве̄г, ла̄вуӈкве ань ат ве̄рме̄гум. Та па̄вылт то̄ва ма̄хум нас ӯрхатэ̄гыт, хунь йильпи колыл мивет, мо̄таныт акваг ка̄ркамыг рӯпитэ̄гыт ос та̄нки о̄лнэ кол ӯнттэ̄гыт. Па̄вылт са̄в ёмас, нё̄тнэ кол о̄лы. Тот о̄лнэ ще̄мьят коланыл ёмащакв щё̄питым о̄ньщияныл, ка̄сыӈ та̄л о̄льпыл сартыяныл. Тамле колыт туп Ня̄хщамво̄ль па̄вылт ка̄салаӈкве ро̄ви. – Ольга Васильевна, мо̄лты та̄л Ня̄хщамво̄ль па̄вылт ФАП ӯнттувес ос яныг пӯльница лаппантвес. Ты ва̄рмаль урыл ос маныр номсэ̄гын? – Со̄ль, о̄влэ̄т Ня̄хщамво̄ль па̄вылт яныг пӯльница рӯпитас. Ле̄ккар хум тув ке̄тыглавес, тав кӯщаиг тот о̄лыс. Ма̄хум пӯльницат ёмащакве пусмалтаве̄сыт. То̄нт па̄вылт са̄в э̄лумхо̄лас о̄лыс. Ань ка̄сыӈ та̄л тот мир мощщанувег е̄мты. Са̄в ма̄ньлат хо̄тпа мо̄т ма̄н о̄луӈкве минэ̄гыт. Ань 590 э̄лумхо̄лас прописка тот о̄ньще̄гыт ос тувыл туп 490 хо̄тпа па̄вылт о̄лэ̄гыт. Тыи ма̄гсыл ка̄сыӈ та̄лныл мощщанув ма̄хум тот пусмалтахтасыт. Ты кол районный пӯльница нупыл ловиньтахтас. Акв та̄л сыс рӯпитанэ̄тэ ма̄гсыл кит миллион солко̄ви та̄стыглавес. Мо̄лты та̄л тот ФАП ӯнттувес ос кирпащ пӯльница лаппантвес. Округ бюджетныл олныл та̄ставе̄в, таяныт пӯльница ма̄гсыл олныл воссыг ат миве̄в. Тувыл ма̄нь па̄вылквет рӯпитаӈкв ле̄ккарыт о̄с ат ка̄саще̄гыт. Ань ФАПыт фельдшернэ̄ ма̄хум пусмалтым рӯпиты. Мо̄лты та̄л ле̄ккар нэ̄ Ня̄хщамво̄льн минуӈкве щё̄питахтас, тувыл пӯльница лаппантвес, тав Саранпа̄вылн рӯпитаӈкве ке̄твес. Ма̄хманув акваг ла̄выгласыт, яныг пӯльница э̄лаль вос рӯпиты. Ос таи лю̄ль, ма̄хум рӯпата та̄л хультсыт. О̄влэ̄т сторожхо̄тпат по̄хын ке̄тве̄сыт. Ань то̄ва ма̄нь ле̄ккарыт по̄хын тах ке̄тавет. Ты ма̄нь па̄вылквет мо̄т рӯпата та̄н воссыг ат хо̄нтэ̄гыт. – Ос ты яныг кирпащ колт манхурип организация рӯпитаӈкве паты? – Ты кӣрпащ колт садик ва̄раве. Ха̄льӯс районныл кӯщаит ты яныг кол сунсуӈкве ёхталасыт. Ань Ха̄льӯст нэ̄пакыт щё̄питавет, ты юипа̄лт колнакыт тот мо̄т щирыл ва̄руӈкве патавет. Ос хунь йильпи садик рӯпитаӈкве о̄вылтахты, ат ва̄глӯв. Ня̄хщамво̄ль па̄вылт о̄лнэ садик хосат пе̄сыг е̄мтыс, ты та̄рвитыӈ ва̄рмаль урыл ма̄н о̄с акваг кӯщаитн потыртасӯв. Ам номсэ̄гум, тох тэ̄ла щирыл ке ва̄руӈкв, садик ма̄гсыл мо̄т кол ӯнттуӈкве э̄ри. – Хулюмсунт па̄вылт са̄в кол на̄ин ё̄све̄сыт, са̄в ще̄мья о̄лнэ кол та̄л хультсыт. Ты па̄вылт о̄лнэ колыт ӯнттуӈкве патавет? – Ты па̄вылт кит яныг кол тах ӯнттаве̄г. Ань э̄рнэ нэ̄пакыт ва̄риянӯв. Ка̄сыӈ колт 36 квартира ва̄раве. Тувыл акв та̄рвит о̄лы, кол ӯнттын ма̄хум тыт рӯпитаӈкве о̄с ат ка̄саще̄гыт. Са̄всыр организациян пищмат хансыглэ̄в, вос ёхтэ̄гыт, вос рӯпитэ̄гыт, а̄стлым колыт ма̄н та̄ра ёвтыянӯв. Нэ̄мхотьют ма̄навн ювле пищма аты хансыс. То̄ва ще̄мьят страховканэ̄пак ва̄рыгласыт, кол та̄л хультманыл ма̄гсыл олныл ойтве̄сыт. Та̄н мо̄т кол ёвтуӈкве кос ве̄рме̄гыт, тувыл па̄влувт о̄лнэ кол щар ат тыналаве. Кол ӯнттуӈкве о̄с ат ве̄рме̄гыт, кол ӯнттын ма̄ тыт а̄тим. Па̄влув мувлахи о̄лнэ во̄р лесфонд нупыл ловиньтахты, йивыт хотса̄груӈкве о̄с ат ве̄рме̄в. Ань па̄выл по̄хат о̄лнэ ма̄ ма̄нки нупылув хансылӯв, нэ̄пакыт пуссын э̄рнэ щирыл щё̄питыянӯв. Ты юипа̄лт ма̄хум кол ӯнттын ма̄гсыл ма̄л миӈкве тах патыянӯв. – Ольга Васильевна, ты па̄вылт школа ӯнттуӈкве о̄вылтавес. Ня̄врамыт йильпи ханищтан колн хунь ялантаӈкве патэ̄гыт? – Йильпи школа мо̄лты та̄лт ӯнттуӈкве о̄вылтавес. Ань рӯпитан ханищтан кол пе̄сыг е̄мтыс. Акв та̄лт па̄влыӈ ня̄врамыт са̄всыр колыт ханищтахтасыт. Акват ФОКын, мо̄таныт ла̄пка колн ханищтахтуӈкве ялантасыт. Ты юипа̄лт па̄влувн та̄ра школа ӯнттын ма̄гсыл кирпащит ос мо̄т э̄рнэ утыт тотве̄сыт. О̄влэ̄т акв проектнэ̄пак ва̄рвес, тувыл ты нэ̄пакыт мо̄т щирыл ва̄рве̄сыт. Школа ӯнттын хо̄тпат ань рӯпита̄ӈкве о̄вылтахтасыт. – Ань соссаӈ ма̄хум окружной программа щирыл о̄лнэ колыл ёвтуӈкве нё̄тавет. Хулюмсунт па̄вылт о̄лнэ ма̄ньщи ще̄мьят тув хасхатасыт? – Акв порат ты программа акв миллиард арыгкем солко̄вил та̄стыглавес, то̄нт са̄в соссаӈ ще̄мья о̄лнэ кол ёвтсыт. Ты юипа̄лт Хулюмсунт па̄вылт о̄лнэ ма̄хум та̄нки нэ̄паканыл Ипотечный агентстван ке̄туӈкве патсаныл. Ты элыпа̄лт кит ман хӯрум ще̄мья тув хасхатым о̄лыс. Ты ще̄мьят колыт Советский, Югорск ос Ханты-Мансийск ӯст ёвтэ̄гыт. Мо̄лты та̄л акв ма̄ньщи хум Борис Вынгилев Югорск ӯст кол ёвтыс, ще̄мьяӈ та̄гыл тув ва̄нтлас.

1118 2016. 02. 25. Светлана РОМБАНДЕЕВА

Округт о̄лнэ соссаӈ мирыт нё̄тавет Та̄л котиль э̄тпос 26 хо̄талэ̄т ма̄вит ӯргалан Департамент колт рӯпитан ма̄хум хо̄нтхатыглап ва̄рыгласыт. Потраныл та урыл о̄лыс, ань ювле хультум та̄ланыл хумус минас, маныр рӯпата ва̄рсыт, хотьютн нё̄тсыт. Ат тэ̄ла урыл докладыт ловиньтаве̄сыт: Во̄рыӈ ма̄ ӯргалан тэ̄ла, Тэ̄пкант матыр янмалтан, Вит ӯргалан, Ма̄хум тыглетувле яласан тэ̄ла (туризм) ос Соссаӈ мир пе̄с та̄гыл ва̄рнэ тэ̄ланыл, алыщлапаныл. Ма̄н ма̄хманув урыл доклад Евгений Александрович Лавров ловиньтас, тав соссаӈ мирыт пе̄с йис ма̄наныл ӯргалан отделт кӯщаиг о̄лы. Ты хум тох потыртас: «Ювле хультум та̄лт ма̄н лов нэ̄пак щё̄питасӯв, округ Правительстван ке̄тсанӯв. Та̄н халанылт акв тамле э̄рнэ программа хассӯв – «Социальноэкономическое развитие КМНС ХМАО-Югры на 2015-2020 годы». 2015 та̄л сыс соссаӈ мирн нё̄тнэ ма̄гыс Федеральный бюджет 15 млн. 900 со̄тыра майлас, ты коныпал кит нефтяной компанияг («АКИ-ОТЫР» ос «Салым Петролеум Девелопмент Н. В. ») 131 со̄тыра солко̄ви нас То̄рум ма̄гыс ке̄тыгласыг. Во̄ртур э̄тпост округ Правительство 77 млн. 100 со̄тыра солко̄ви ке̄тыс. Ты олныт ма̄н ла̄кквауртсанӯв, тамле нё̄тмил ва̄рсӯв: – Соссаӈ ма̄хум пе̄с йис та̄гыл ва̄рнэ тэ̄ланыл палт 42 млн. 200 со̄тыра ке̄тсӯв; – Э̄рнэ матыр ёвтнэ ма̄гыс ман нусаг о̄лнэ хо̄тпатн нё̄тнэ ма̄гыс 7 млн. 900 со̄тыра солко̄ви ойтсув; – Касыл тэ̄ла ма̄гыс 2 млн. 600 со̄тыра солко̄ви ке̄тсӯв; – Пе̄с йис та̄гыл тэ̄лан ань грандолн та̄стуӈкве э̄ри, тув ма̄н 25 млн. солко̄ви мисӯв. Округ янытыл о̄лнэ соссаӈ ма̄хумныл сака са̄в хо̄тпа та̄нти пе̄с йис ма̄нанылт о̄лэ̄гыт, тот во̄рае̄гыт, хӯл алыщлэ̄гыт. Та̄нанылн ма̄н «Буран» ман ха̄пыл яласан моторыт ёвтуӈкве нё̄тэ̄в, кол тӣвырн э̄рнэ матыр винэ ма̄гыс олныл ке̄тыянӯв, во̄руй ка̄тынпаттуӈкве субсидия нампа нё̄тмил олныл нё̄тыянӯв. Ань ос ма̄хум писалил па̄тлуптаӈкве нас ханищтавет, соссаӈ хо̄тпа ма̄гыс ма̄н олн ке̄тэ̄в. Ты коныпал мо̄т са̄в нё̄тмил ва̄ре̄в. Выставкат о̄лыгланэ̄ныл порат тув яланта̄лэ̄в. Мо̄лты та̄л яныгпо̄ль э̄тпост Москва ӯст «Сокровища Севера–2015» мирхал выставкаярмарка о̄лыс. Тув ма̄хум Россия янытыл ос э̄лы хо̄н государстватныл – 27 ма̄ныл ёхталасыт, 500 арыг хо̄тпа акванатхатыгласыт. Е̄ӈта пасан ва̄тан ӯнтсасыт, потрамасыт, потраныл тох намаим о̄лыс: «Проблемы интеграции культуры коренных малочисленных народов России в культурное пространство страны». Акв та порат Россия янытыл о̄лнэ нэ̄пак хаснэ соссаӈ ма̄хум акванхо̄нтхатыгласыт, хансум потраныл ос стиханыл ловиньтасыт. Ты тэ̄ланыл ос намаясаныл «Душа Севера». Тувыл «Полярный стиль» нампа соссаӈ мир мода суссылтавес. «Сокровище Севера–2015» выставка оигпаме э̄лыпа̄лт ма̄хум янытлаве̄сыт. Ма̄н округув хӯрум щёс янытлавес, мӯйлупсатыл майвес». Евгений Александрович ла̄вме щирыл, та̄н соссаӈ ма̄хум о̄лнэ ма̄нанылн ва̄тихал яланта̄лэ̄гыт. Ань таи уральтэ̄гыт, та̄рапаттэ̄гыт – аман со̄ль ма̄хум тот тармыл о̄лэ̄гыт, та̄нти пе̄с йис ма̄нанылт алыщлэ̄гыт ман во̄рае̄гыт. Тувыл та̄нанылн нё̄тнэ ма̄гыс та̄н са̄всыр ма̄н пищмат хансэ̄гыт, э̄рнэ нэ̄пакыт щё̄питэ̄гыт.

1118 2016. 02. 25. Тамара МЕРОВА

Ща̄нь ла̄тыӈ ва̄нэ ня̄врамыт халт касыл о̄лыс Ханты-Мансийскат ща̄нь ла̄тыӈ ва̄нэ соссаӈ ня̄врамыт халт касыл ка̄сыӈ та̄л №6 школат ва̄рыглаве. Ты касыл образование ос ма̄ньлат ма̄хум ёт рӯпитан департамент па̄лыл, развитие образование нампа институт ос А̄с-угорский институт па̄лыл щё̄пита̄лаве. Ты та̄л тув хо̄тхуйплов ня̄врам касуӈкве ёхталасыт. Та̄н халанылт хо̄т ма̄ньщи а̄ги ос лов ханты а̄гипыгыт о̄лсыт. Акв хотты хо̄тпаныл тыг ёхтуӈкве ат ве̄рмум. Ань хӯрум ма̄ньщи а̄ги Ха̄льус район Саранпа̄вылныл, кит а̄ги Октябрьский район Лӯи Нярихуми па̄вылныл ос акв а̄ги Хо̄нтаӈ ма̄ Шугур па̄вылныл кассыт. Ханты а̄гитпыгыт Белоярский, Октябрьский, Нижневартовский, Сургутский, Ханты-Мансийский районытныл о̄лсыт ос акв пыг Ханты-Мансийсканыл о̄лыс. Ты ня̄врамыт то̄ват казымский диалект ла̄тӈыл хассыт, мо̄таныт сургутский диалектыл. О̄влэ̄т мӯй ма̄хум жюри ёт ва̄йхатасыт. Ань ма̄ньщи жюри кӯщаиг Д. В. Герасимова о̄лыс, таве̄н Е. У. Акбаш ос С. С. Динисламова нё̄тсы̄г. Ханты ма̄хум жюри кӯщаиг В. Н. Соловар о̄лыс, тав ётэ Е. А. Нёмысова, И. М. Молданова рӯпитасы̄г. Мӯй хо̄тпат ёт пащалахтын ма̄гыс «Лылыӈ со̄юм» этноцентрыт ханищтахтан пыгыг ёхталасы̄г. Тот Арсентий Ли са̄ӈквылтапыл ма̄щтырыг са̄ӈквылтас, Руслан Вьюткин стих ёмщакв ловиньтас ос ко̄йпыл ра̄тыс. Ты тэ̄ла ня̄врамытн сака мӯстыс ос та юипа̄лт та̄н касуӈкве та минасыт. Тувыл ат щё̄с порат жюри потыртасыт. Ты та̄л касылт ханты ня̄врамыт халт о̄выл местал нэ̄мхотьютн ат майвес. Китыт места Светлана Малыгина, Шеркалы школаныл ёхталам а̄ги, вис. Хӯрмит места Андрей Каксин, «Лылыӈ со̄юм» этноцентрын ялантан пыг вис. Нилыт местат Угутский школаныл ёхталам Анжела Арантеева о̄лыс. Ма̄ньщи а̄гит халт Саранпа̄выл школаныл ёхталам а̄ги Елена Гындыбина заданият ёмщакв ва̄рсанэ ос тав но̄хпатыс. Лӯи Нярихуми па̄вылныл о̄лнэ Полина Уфимцева о̄с са̄в балл атыс, тав китыт места вис. Хӯрмит места Галина Артеева вистэ, тав о̄с Саранпа̄вылныл о̄лы. Ос Лӯи Нярихуми па̄вылныл о̄лнэ а̄ги Елена Карпенко нилыт местал майвес. Ань касылт о̄выл места вим ня̄врам ат со̄тыра солко̄вил майвес, китыт места ма̄гыс – нила со̄тыра солко̄ви, хӯрмит места – хӯрум со̄тыра солко̄ви ос нилыт места ма̄гыс туп э̄сгын нэ̄пакыл майве̄сыт. Но̄хпатум ня̄врамаквет ма̄н янытлыянӯв, мо̄т а̄гитнпыгытн пӯмащипа ла̄тыӈ ла̄ве̄в. Та̄н пуссын номтыӈыщ ханищтахтын ня̄врамаквет. Жюри хо̄тпат ла̄вманыл щирыл, туп то̄ват ла̄тӈаныл фонетический разбор щирыл торыӈыщ ат ва̄рсаныл, тувыл то̄ва ла̄тӈыт аквантэ̄лыгтыяныл. То̄ват литература предмет ма̄гыс хасманыл ма̄гыс Светлана Динисламован э̄сгуве̄сыт. Ётыл ам Саранпа̄выл а̄гит ёт акванхо̄нтхатыгласум ос та̄наныл касыл о̄вылтыт китыгласанум. Елена Гындыбина ювлела̄выс: «А̄нумн ты касылт сака та̄рвитыӈ ат о̄лыс, туп фразеологизмыт палт хоса номсахтасум. Ма̄н школат ты ла̄тӈыт мощща ханищтасанӯв. Тувыл амки о̄с но̄хпатмум ма̄гыс матыра̄ти ханищтасум. Касмув юипа̄лт ма̄н А̄с-угорский ма̄хум театрын тотыглавесӯв, пӯмыщ спектакль суссӯв, а̄нумн тот сака мӯстыс. Театрыт ам каӈкагум рӯпитэ̄г». Галина Артеева ос тох потыртас: «Касыл о̄вылтахтам порат ам мощ пилсум. Литература заданият а̄нумн та̄рвитнуве̄г о̄лсыт, ос ам ва̄нэм щирыл пуссын ва̄рсанум. Тувыл театрын тотыглавесӯв, а̄нумн тот сака мӯстыс. Мо̄т па̄вылныл ёхталам а̄гитпыгыт ёт аквъёт мощща о̄лсӯв, ма̄нки халувт ат ва̄йхатасӯв, то̄ват э̄типа̄лаг та̄ра ювле минмыгтасыт. Ам школа а̄стланэм юипа̄лт ле̄ккарыг ханищтахтуӈкве таӈхе̄гум. Ма̄ньщи ла̄тыӈ та институтыт ат ханищтаве. Ос ам номсэ̄гум, хотты па̄влыӈ ма̄н минэ̄гум ке, тот ма̄ньщи хо̄тпат пусмалтанэм сыс потыртаӈкве тах патэ̄гум». Евгения Ромбандеева ла̄выс: «Ам аквхуйплов класс ма̄гыс кассум. Мо̄лты та̄л заданият мощ кӯпнитнувег о̄лсыт. Литература касылт стихотворение ма̄ньщи ла̄тӈыл хансуӈкве э̄рыс, ам таве та̄ра ва̄руӈкве ат ве̄рмыслум. Юн ма̄ньщи ла̄тӈыл сака ат потыртэ̄в. Ам щаще̄квам потранэ торгамтыянум кос, ос ювле матыр ла̄вуӈкве та̄ра ат ве̄рме̄гум. Ты та̄л школа а̄стлэ̄гум. Ос ма̄ньщи ла̄тыӈ ханищтан нэ̄г э̄лаль ханищтахтуӈкве ат номсэ̄гум. Нас амки рӯтанум ёт потыртан ма̄гыс ла̄тыӈ ханищтылум. Тувыл то̄ванакт юртанум ёт ищхӣпыӈ ут хосыт СМСканув ма̄ньщи ла̄тӈыл хансыянӯв, та̄наныл ловиньтаӈкве сака пӯмыщ». Ма̄н ма̄ньщи газетав школат рӯпитан ма̄хум о̄с сака ӯрияныл ос ща̄нь ла̄тӈув ёмщакв ва̄нэ, торгамтан ма̄гыс ня̄врамытн ловиньтаӈкве акваг ла̄ве̄гыт.

1118 2016. 02. 25. Людмила ТЕТКИНА

Са̄лыӈ ма̄хум Саранпа̄вылн касуӈкве ёхталасыт Ты э̄тпост 21 хо̄талэ̄т Ха̄льӯс район Саранпа̄вылт са̄лыӈ ма̄хум касуӈкве акванатхатыгласыт, тот «71 Олимпиада» о̄лыс. Ты ялпыӈ хо̄тал Ха̄льӯс район миркол, «Саранпаульский» совхоз ос па̄влыӈ миркол ва̄рыгласыт. Ты э̄лыпа̄лт са̄лыӈ ма̄хум 2013 та̄л кассыт. Ты та̄л Саранпа̄вылн са̄в мӯй мир ялпыӈ хо̄талн ёхталасыт. Сакв я̄ ва̄тат са̄т ё̄рнкол тӯщтыглаве̄сыт. Тот мӯй ма̄хум ня̄рнё̄влил тыттуве̄сыт ос исум ща̄ил айтве̄сыт. Ка̄сыӈ хо̄тпа тот са̄лыӈ нё̄выль, хӯл, пил, ла̄хыс ос мо̄т са̄всыр тэ̄нут ёвтуӈкве ве̄рмыс. Са̄лыӈ ма̄хум Ха̄льӯс район кӯщай Владимир Фомин янытласанэ. Тав ла̄выс: «На̄н ань 71 олимпиадан касуӈкве ёхтысын. Тамле ялпыӈ хо̄тал акваг тыт Саранпа̄вылт ва̄рыглаве. Ка̄сыӈ са̄лыӈ хо̄тпа ё̄рыл вос пинаве, са̄лыянын вос молях ха̄йтэ̄гыт». Ты юипа̄лт тав «Саранпаульский» совхозт рӯпитан хо̄тпат янытлан нэ̄пакыл мӯйлуптасанэ. Ма̄ньщи ма̄щтыр нэ̄ Тамара Егоровна Гындыбина о̄с янытлан пищмал майвес. Тав хус арыгкем та̄л совхозт са̄всыр маснут ос сувенирыт ю̄нтым рӯпиты. Ты юипа̄лт са̄лыӈ ма̄хум касыланыл та о̄вылтавес. Та̄н са̄всыр щирыл кассыт, са̄лы сун тармыл лю̄лим, ёсал ос мо̄т щирыл та̄нки халанылт кассыт. Григорий Хозяинов ма̄ньлат хум са̄лыянэ щар молях ха̄йтсыт тав мо̄т хо̄тпат халт но̄хпатыс ос о̄выл места вис. Тав «ГазпромТрансгазЮгорск» па̄лныл «Бураныл» майвес. Мо̄т касылт Василий Ромбандеев но̄хпатыс, о̄с «Буран» вис. Мо̄т касылт но̄хпатум са̄лыӈ ма̄хум ос са̄всыр тыныӈ мӯйлупсал майве̄сыт. Анатолий Валей «Саранпаульский» совхоз кӯщаиг о̄лы, тав ла̄выс, ты та̄л 25 са̄лыӈ хо̄тпат касуӈкве на̄лув ва̄глысыт. Та̄н халанылт щар яныг хо̄тпа 54 та̄лэ то̄влыс ос щар ма̄ньлат пыг туп 17 та̄лэ то̄влыс. Итипа̄лаг са̄лыӈ хо̄тпат ос мӯй ма̄хум концерт сунсуӈкве ос йӣквуӈкве во̄виньта̄лве̄сыт.

1118 2016. 02. 25. Николай МЕРОВ

Нё̄р ва̄та хосыт са̄в ма̄ньщи па̄выл ӯнлы Ре̄тыӈ ю̄свой э̄тпос 12-21 хо̄талытт ме̄н округ Дума депутат нэ̄ Татьяна Гоголева ёт, йис ма̄т о̄лнэ ма̄ньщи ма̄хманме̄н палт ялсуме̄н. Манырсыр па̄влыт тот ӯнлэ̄гыт ос хумус лё̄хме̄н минас, на̄н ты урыл э̄лаль ловиньтэ̄н. О̄влэ̄т ме̄н Советский ӯсн ёхтысме̄н. Тот кит хо̄тал о̄лсуме̄н, ма̄ньщи хо̄тпат ёт хо̄нтхатыгласме̄н. «Ма̄нь Та̄гт» нампа заповедникн ялсуме̄н. Тувыл Ивдель ӯс мус машинал минмыгтасме̄н. Ты ӯс Свердловский областит о̄лы. Тот акв э̄т хӯлсуме̄н. Та е̄рт Нё̄рыт хосыт са̄в ма̄ньщи хо̄тпа йис ма̄нанылт о̄лэ̄гыт. Мо̄т хо̄тал а̄лпыл о̄с та минмыгтасме̄н. О̄влэ̄т машинал Хоса во̄ль па̄выл мус, рущ ла̄тӈыл Бурмантоваг ла̄ваве, ёхтысме̄н. Тот ма̄ньщи э̄ква колн хо̄йсуме̄н. Анна Николаевна Курикова па̄влэ урыл мощ потыртас. Тот пуссын аквъёт атпан са̄виткем хо̄тпа о̄лы, са̄выӈпа̄лэ пенсия олн винэ ма̄хум. Акв э̄т тот хӯлсуме̄н ос ма̄ньщи хум Валера Анямов «Буран» ха̄пыл ляльт ёхтыс. Ос Висумтыт па̄вылн та минмыгтасӯв. Тот ос атахкем колта̄гыл о̄лы, са̄выӈпа̄лэ Анямовыт о̄лэ̄гыт. Висумтыт па̄вылт э̄т хӯлсӯв ос кит «Бураныл» Ке̄расколыӈъя̄ па̄вылн минасӯв. Тот кит колта̄гыл Бахтияровыт ос Анямовыт о̄лэ̄гыт. Ща̄ил айтвесӯв, о̄лупса ва̄рмалит урыл потрамасӯв ос Мирон па̄вылн минасӯв. Тот Тасмановыт о̄лэ̄гыт. Акв хум ёт тот хо̄нтхатыгласӯв ос элаль Лэ̄пла па̄вылн та̄лматсӯв. Лэ̄пла па̄вылт кит колта̄гыл Тасмановыт о̄лэ̄гыт. Э̄т тот хӯлсӯв. Тувыл Тӯрват па̄вылн минасӯв. Тот акв яныг колта̄гыл Самбиндаловыт во̄раим ос са̄лы ӯрим о̄лэ̄гыт. Ты па̄влыт соссаӈ ма̄хманув хумус о̄лэ̄гыт, округ Дума кӯщай нэ̄ Татьяна Гоголева та̄наныл пуссын китыгласанэ. Ма̄хум маныр тэ̄ла о̄ньще̄гыт, та ва̄рмаляныл пуссын потыртасаныл. Ам ётылнув ты па̄влытыт о̄лнэ мир урыл я̄нас потрыт газетанэ̄пакувн тах хансыянум.

1118 2016. 02. 25. Светлана РОМБАНДЕЕВА

Калтыщаны па̄вылт самын патум нэ̄ хо̄тпа Ха̄льӯс район Восыӈтӯр па̄вылт ам ма̄ньщи э̄ква ёт хо̄нтхатыгласум, наме Наталья Павловна Шесталова. Тав 1937 та̄лт ре̄тыӈ ю̄свой э̄тпос ловит хо̄талэ̄т самын патыс, ты та̄л нёлса̄т нупыл онтолов та̄лэ то̄влыс. На̄н ань э̄лаль Наталья Павловна потре ловиньтэлы̄н. – Ам Калтыщаны па̄вылт самын патсум. Тот ань нэ̄мхотьют ат о̄лы. Э̄лнаӈ яныг па̄выл о̄лыс. Я̄ ва̄та ляпат Лысковыт, па̄гле нупыл ос Проскуряковыт о̄лсыт. Тувыл хунь колхозыт аквантӯлве̄сыт, ма̄н Мулигорт па̄вылн ва̄нтлысув. Ам тот яныгмасум, школат нила класс мус ханищтахтасум, тот интернат о̄лыс. Э̄лаль Шеркалы па̄вылт ловит класс мус ханищтахтасум. Тувыл 1957 та̄лт Салехард ӯсн минасум, медицинский училищан поступитасум. О̄йкам ёт тот акванхо̄нтхатасме̄н, тав о̄с ма̄нь ле̄ккарыг ханищтахтас, ма̄ньщи хум, наме Ефим Алексеевич Шесталов. Училище па̄лыл ам са̄лыӈколыӈ ма̄хум палт ке̄тыглаве̄сум. Хунь ювле ёхтысум, ме̄н ме̄нти ма̄ммен минуӈкве номылматсуме̄н, ювле та минасаме̄н. Тав Комратка па̄вылт самын патыс, тот яныгмас. Ётыл ще̄мьятэ Малеевка па̄вылн ва̄нтлыс, оматэ тувыл о̄лыс. Ме̄н о̄влэ̄т тот о̄лсуме̄н, тувыл хунь Люда а̄гиме̄н та̄лэ то̄влыс, ме̄н тав ётэ райком партии па̄лыл Ханты-Мансийск ӯсн ла̄пкат тыналахтан хо̄тпаг ханищтахтуӈкве ке̄твесаме̄н. Тув минасаме̄н, торговый школат ханищтахтасме̄н. Школа а̄стламе̄н юипа̄лт Хо̄рыӈпа̄вылн ке̄твесаме̄н, тот мощ рӯпитасме̄н. 1964 та̄лт ювле йисме̄н. О̄йкам акваг такви ма̄тэ̄н минуӈкве таӈхыс, ювле та ва̄нтлысаме̄н. Ёлка-Шапка па̄выл ла̄пкат ам хо̄т та̄л рӯпитасум, Новинскиит нила та̄л. Тыт ос, Восыӈтӯрт, кит та̄л туп рӯпитасум, тувыл та по̄йтсум, по̄хан минасум. О̄йкам «Отличник Советской торговли» намыл майлавес. Комсомол тэ̄ла хунь 90 та̄лэ то̄влыс, ам о̄с ме̄талил ма̄йлуве̄сум. Омам Ольга Лукьяновна, а̄ги о̄парищ наме Яркина, 1916 та̄лт самын патыс. А̄тям Павел Федорович Проскуряков, тав яныг хо̄нт э̄лыпа̄лт а̄тимыг е̄мтыс. Ам увщи, каӈк ос э̄щ о̄щсум, та̄н ань пуссын а̄тимыт. Яныг хо̄нт о̄вылтахтаме порат ос та юипа̄лт ма̄н ма̄нтте̄в хотмус та о̄лсув. Ане̄квав ма̄н ётув о̄лыс, наме Марфа, 110 та̄лэ мус о̄лыс. Пуста̄гыл ё̄мыгтас, колсори рӯпата ва̄рыс. Хо̄нт оигпаме мус мощ ат о̄лыс, 1945 та̄лт ре̄тыӈ ю̄свой э̄тпост а̄тимыг е̄мтыс. Тав увщитэ Лӯи Нярихумит па̄вылт ос 120 та̄лэ мус о̄лыс. О̄пав о̄с хоса о̄лыс. Омам сакныл са̄всыр пормасыт хартыс. Ам о̄с акваг матыр ю̄нтсум, ня̄враманум ма̄гыс маснут сагсум. Женямн ма̄ньщи суп ю̄нтыгласум. Мулигорт па̄вылт ма̄хум пуссын рущ маснутыл ё̄мыгтасыт. Омам хунь тыг ам палтум ва̄нтлыс, акваг ма̄ньщи супыл о̄лыс. – Яныгмамын порат ма̄ньщи мо̄йт ва̄нэ хо̄тпат о̄лсыт? – Ане̄квав ма̄навн ма̄ньщи мо̄йтыт мо̄йтыглас, омав акваг рӯпитас. Аким пыге Никифор Васильевич Проскуряков мо̄йт ва̄нэ хо̄тпаг о̄лыс. Пе̄с йис потыр ос мо̄йт тав та ва̄с, акваг мо̄йтыс. Та та̄рвитыӈ порат ма̄н ня̄врамыт пуссын рӯпитасӯв. Яныгхо̄тпат ёт тув палыт хӯл алыщласӯв. Ма̄н Терентий Ангашупов ос Тамара Петровна Голошубина акваг аквъёт рӯпитасӯв. Та порат моторха̄пыт хунь о̄лсыт, ка̄тыл товсӯв. Ме̄н о̄йкаме̄нтыл Восыӈтӯрн 1973 та̄лт ва̄нтлысаме̄н. Ӯйхул акваг о̄щсуме̄н, туи порат пум ва̄ре̄в. Хо̄рыӈпа̄вылт мис о̄щсуме̄н, хунь ювле нупыл йисме̄н, ёт тотысламе̄н. Ам 2007 та̄л па̄сныл ӯйхул ат о̄ньще̄гум. Ань иӈ о̄щнувум, ос хотьютумн пумыл ва̄равем, ня̄враманум пуссын э̄лынт о̄лэ̄гыт. Ты о̄лнэ колув ме̄н о̄йкаме̄нтыл ӯнттысламе̄н. Тыт тав лов та̄л туп о̄лыс, а̄гмыл хартыс, а̄тимыг е̄мтыс. То̄ванакт ня̄враманумн ӯсн во̄вавем, ам э̄л хунь минэ̄гум, колум хо̄ӈхан хӯлилум. Тав нас кол хунь – пупгыӈ кол. То̄ванакт ня̄враманум палт мӯйлуӈкве яланта̄лэ̄гум, ӯст мощ о̄лэ̄гум, та̄ра ювле нупыл та номсэ̄гум. Э̄лнаӈ путёвкат щирыл санаториян ялантасум, пусмалтахтасум. Амти па̄влумт о̄луӈкве ёмас, лылые̄пе сыстам. Ня̄враманум ос апыгрищанум ёхталэ̄гыт, уральта̄лавем. – Наталья Павловна, наӈ манах ня̄врам о̄ньще̄гын? – О̄йкаме̄нтыл ме̄н нёлолов ня̄врам о̄ньщигласме̄н. Щар яныг Людаме̄н о̄лыс. Тувыл Света, Гена, Слава. Та̄н ань пуссын а̄тимыт. Женя а̄гиме̄н Лангепас ӯст о̄лы. Ханты-Мансийскыт Майяме̄н ос Алексей пыгме̄н о̄лэ̄г. Игорюме̄н Нижневартовскыт о̄лы, ӯлщпуӈк ле̄ккарыг рӯпиты. Пуссын колта̄глыӈыгня̄врамыӈыг е̄мтсыт. Ам ань лов апыгрищ о̄ньще̄гум. Ленам, Людам тав а̄гитэ, Санкт-Петербург ӯст о̄лы, немецкий ла̄тыӈ ханищтан хо̄тпаг рӯпиты. Ань потруме̄н та оигпас. Ма̄н, редакцият рӯпитан ма̄хум, Наталья Павловна самын патум хо̄талэ̄тыл янытлылӯв! Са̄в ёмас, сымыӈ ла̄тыӈ таве̄н ла̄ве̄в. Пуста̄гыл вос о̄лы, На̄янэ̄н-О̄тыранэ̄н вос ӯргалаве!

1118 2016. 02. 25. Тамара МЕРОВА

Ла̄тыӈ ханищтан нэ̄пакыт о̄вылтыт А̄с-угорский институтт рӯпитан хо̄тпат ёмас рӯпата ва̄ре̄гыт, та̄н ня̄врамыт ма̄ньщи, ханты ос ё̄рн ла̄тӈыт ханищтан ма̄гыс са̄всыр нэ̄пакыт щё̄питэ̄гыт. Йильпи са̄ккон щирыл школат ня̄врамыт соссаӈ ма̄хум ла̄тӈын ханищтан ма̄гыс, э̄рнэ нэ̄пакыт китыглавет. Тамле нэ̄пакыт о̄лэ̄гыт ке, то̄нт ущ ла̄тыӈ ханищтан хо̄тпат рӯпитан щё̄сыл мивет. Светлана Герасимова ма̄ньщи ла̄тыӈ, литература ос пе̄с потрыт, мо̄йтыт ханищтан отделт рӯпиты. Тэ̄н Людмила Панченко ёт о̄выл ос нилыт классыт ма̄гыс ма̄ньщи «Хрестоматия» щё̄питасы̄г. Тувыл тув хансым потрыт, мо̄йтыт, стихыт щирыл Светлана Алексеевна пӯмыщ нэ̄пакыт щё̄питас. Классыт щирыл я̄нас тестыт хансыс, тув китыглахтан ла̄тӈыт, хурит, таблицат ос кроссвордыт ва̄рыс. Ты нэ̄пакыт хасме порат тав К. В. Афанасьева ос У. Н. Зуева хансыглам программат мӯсхалыг ханищтасанэ. Тув хаснэ потрыт С. С. Динисламова пуссын уральтым ловиньтасанэ. Светлана Алексеевна Анастасия Шиянова, Виктория Сязи ос Людмила Панченко ёт «Хантыйскомансийскоанглийскорусский разговорник» нампа нэ̄пак та̄ратасыт. Ань ща̄нь ла̄тӈагув хо̄н ма̄ныл ёхталам хо̄тпатн о̄с вос ханищтаве. Ос ня̄врамыт школат английский ла̄тыӈ ханищтанэ̄ныл порат са̄всыр буквасуит та̄ра вос паттыяныл. Та суит о̄с э̄рнэ щирыл ла̄вуӈкв э̄ре̄гыт, то̄нт э̄рыӈ ма̄н ла̄тӈанув та̄н о̄с ёмщакв торгамтаӈкве патыяныл. Ань ты йильпи нэ̄пакыт пуссын мощщаг та̄ратаве̄сыт, туп 200 са̄витыг о̄лэ̄гыт.

1118 2016. 02. 25. Тамара МЕРОВА

Тав ёмас мӯтраӈ э̄лумхо̄ласыг о̄лыс Ты хурит Галина Семёновна Дунаева оматэ̄нтыл по̄слым о̄лэ̄г. Фёкла Андреевна Дунаева оматэ урыл ма̄н ма̄ньщи газетавт потрыт хансыгласӯв. Акв потыр 2005 та̄лт №14 (672) газетат ловиньтаӈкве ве̄рмилы̄н, мо̄танэ 2010 та̄лт та̄ратым №2 газетат Николай Меров потыр хансыс. Ме̄н ос 2014 та̄л ва̄т са̄грапнал э̄тпост юио̄выл щёс хо̄нтхатыгласме̄н ос то̄нт Галина а̄гитэ ёт таве по̄слыслум. Ягримныл юртанэ̄нылн ла̄тӈыл ке̄твесӯв, матумпа̄ла э̄ква а̄тимыг е̄мтум. Ань тав о̄лупсатэ урыл ты потыр ловиньтэ̄н. Фёкла Андреевна 1923 та̄лт Октябрьский район Хаӈлазино па̄вылт самын патыс. Ща̄нягеа̄щаге са̄лыл яласан хо̄тпаг о̄лсы̄г. А̄ще Андрей Васильевич Дунаев – ма̄ньщи хум, ща̄не Анна Семёновна Игнатьева ханты ще̄мьяныл о̄лыс. Э̄кваго̄йкаг юн тэ̄нки халэ̄нт ма̄ньщи ос ханты ла̄тӈыл потыртасы̄г, таима̄гыс Фёкла маньта̄гыл кит ла̄тӈыг ёмщакв торгамтасаге ос ва̄саге. Школан тав ат ялыс, ос рущ ла̄тӈыл потыртаӈкве ётыл такви ханищтахтас. О̄лмет тав потырта̄лыс, сака са̄в ва̄рмалитыл пӯмщалахтас. Матыр ва̄нэтэ ма̄гыс са̄всыр мирныл о̄лнэ ма̄хум ёт акваг потыртас, та̄н номтыӈ ла̄тӈаныл хӯнтлым о̄лыс ос са̄в мӯтраӈ накн ханьщувлас. Э̄ква ма̄ньпора па̄сныл са̄в рӯпитас, то̄нт ма̄хум сака та̄рвит о̄лупсал о̄лсыт. Ма̄ньлатыг о̄лме̄т такке̄т китхӯрум па̄влытн почта тотыглым рӯпитас. Па̄влыт халт ёсал ха̄йтыс ос пилта̄лыг во̄раяӈкве а̄лыма̄лыс. Ягрим па̄вылт э̄ква Галина а̄гитэ ёт о̄лыс. Галина сэ̄тапныл сагнэ хо̄тпаг ханищтахтас, мо̄т ма̄т са̄в ат рӯпитас, ювле ща̄нэ палт ёхтыс. Ягрим па̄вылн ва̄нтламе порат о̄влэ̄т садикт ня̄врам ӯрнэ хо̄тпаг матах та̄л рӯпитас, ос ётыл савалап ня̄врамыт о̄лнэ колт тэ̄нут па̄йтнэ хо̄тпаг рӯпитаӈкве патыс. Тувыл нэ̄ пенсиян патхатас, такви ня̄врам ат о̄ньщис. Юн ань колсори рӯпата ва̄ри, хорамыӈ сэ̄тапныл маснутыт саги, ос тэ̄пканэ ёт капырты. Туи Вера йигрище ня̄врамаге ёт тав палтэ мӯйлуӈкве ёхталэ̄гыт. Вера ще̄мьятэ̄нтыл Когалым ӯст о̄лы. Тав тот са̄в та̄л на̄иӈтуйтын яласан лё̄х тармыл стрелочникыг рӯпитас, пенсиян о̄с хосат минас. Ань ос апганэ ёт Ягримн ёхтала̄лы. Ма̄н Фёкла Андреевна а̄гияге̄н, рӯтанэ̄н, таве ва̄м хо̄тпатытн сым ща̄ргын ла̄тыӈ ке̄тэ̄в. Ма̄нки таве о̄с посыӈ номтыл э̄лаль номылматыгла̄лылӯв.

1118 2016. 02. 25. Валентина УЗЕЛЬ

Яныгман э̄тпос нупыл ма̄хманув пӯрлахтасыт Пе̄с йис та̄гыл соссаӈ ма̄хманув, хантыт ос ма̄ньщит, Э̄тпос яныгман порат акваг пӯрлахтасыт. Ань ос матах та̄л А̄с ма̄хманув та̄нти пе̄с пӯрлахтан ва̄рмаляныл но̄хво̄рмалтыяныл, та̄нти ла̄тӈыл тох ла̄вияныл «Тылащ поры», ма̄ньщи ла̄тӈыл те ла̄вуӈкв Э̄тпос пури. Ты пе̄с ялпыӈ хо̄таланыл ре̄тыӈ ю̄свой э̄тпосныл о̄вылтаглысаныл, та юипа̄лт хӯрум э̄тпос янытласаныл. Та̄н хӯрум щёс э̄тпос яныгман порат пӯрлахтэ̄гыт. Ань юио̄выл та̄лытт ты ялпыӈ хо̄таланыл са̄всыр ма̄т ва̄руӈкв патвес. Ты та̄л «Старый Сургут» нампа музеиӈ ма̄т ювле хультум титыт са̄тыт 13 хо̄талэ̄т соссаӈ ма̄хум о̄с пӯрлахтасыт. Тот рӯпитан ма̄хманув Марина Викторовна Самсонова, Мария Владимировна Ситникова, Людмила Мелентьева, Ирина Кошелева ос Ирина Ибрагимова, ма̄ньщи ма̄щтыр хумиюв Александр Сайнахов та̄н тот маттем та щё̄питахтасыт. Э̄типа̄лаг хо̄т щё̄с порат та̄н рӯпитан коланыл ляпан са̄в мир атхатас. Ӯст о̄лнэ ханты э̄кват кон пасан тӯщтысыт, та̄нти ю̄нтум ман ма̄щтырлам пормасаныл, а̄каняныл, сакныл хартым хораманыл тот тыналасаныл. Соссаӈ мир отделт рӯпитан ма̄хманув ос та̄н палтаныл ёхтум ма̄ньлат а̄гит пуссын нуй сахи массыт, пыгрищит мольщаӈыл масхатасыт. Ос пӯрлахтуӈкв та о̄вылтахтасыт. Ты хо̄тал пе̄с порат тох о̄вылта̄лвес. А̄лпыл ма̄ньнув хо̄тпат йӣв мант ёт па̄выл хосыт тэ̄нут атым колыт халт ё̄мыгтасыт. Акв хоты колыӈ ма̄хум палт ёхтэ̄гыт, мант та̄нанылн та такталыяныл, та ма̄хум тув матыр тэ̄нут вос пинэ̄гыт. Тох па̄выл хосыт ё̄мыгтым та̄н са̄в тэ̄нут атыгласыт. Тувыл э̄типа̄лаг па̄влыӈ ма̄хум харамат акванатхатыгласыт. Тот тӯйтныл пасан ва̄раве. Ос тэ̄нут та пасан тармыл та пинаве. Ос ма̄к таи о̄лыс – пасан тармыл са̄всыр ӯй хуриӈ ня̄нь пиным вос о̄лы. Ань Сургут ӯст о̄лум ялпыӈ хо̄талт ты щирыл ва̄рим ня̄нь о̄с о̄лыс. Акв нэ̄ тамле ня̄нь та ва̄рум, ты ня̄нь щирыл са̄лы, хӯлыт, мо̄т са̄всыр уит хащхатасыт. Ань тит ханты пыгрищиг атум тэ̄нут та пасан тармыл та пинсаныл. Тувыл мӯй ма̄хум пуссын пасан ляпан во̄вве̄сыт ос Э̄тпос нупыл лю̄люӈкв ла̄вве̄сыт. Александр Сайнахов ма̄ньщи ла̄тӈыл по̄йкщуӈкв та патыс. Тав тох по̄йкщас: «Та̄тылаг ӯнлын а̄мпарыт та̄глыӈыг вос е̄мтэ̄гыт, ва̄гта̄л ка̄танув, ва̄гта̄л ла̄гланув ё̄рыл вос пинавет. Тув порат са̄в пил вос тэ̄лы, во̄руянув, витуянув ёмащакв вос са̄вме̄гыт. Хӯланув по̄рыӈыг вос е̄мтэ̄гыт». Та юипа̄лт ма̄хум пуссын пуӈк пинсыт. Ос тӯйтыл равтхатуӈкв та патсыт. Ты ялпыӈ хо̄талт тӯйтыл таима̄гыс равтхатаӈкв э̄ри, тӯйт молях вос толы ос ма̄тев моляхнув вос нэ̄глы. Ма̄нь ня̄врамаквет тот маттем та равтхатасыт. Тувыл мӯй ма̄хум пуссын яныг кол тӣврын во̄вве̄сыт. Тот та̄н ма̄гсыланыл «Лӯима̄ ханса» ос «А̄с нэ̄» нампа коллективн ялантан а̄гирищит йӣквсыт. Александр Дмитриевичув Андрей Кечимов ёт са̄снёлыл мощ тӯлыглахтас, пӯмыщ тӯлыглап суссылтасы̄г – аквтуп ма̄ньлат а̄ги хум ва̄рнэ ма̄гыс хум хо̄тпа тинсы. Рущ ма̄хум тот маттем та мовиньтасыт. Мария Владимировна Ситникова, Людмила Мелентьева, Ирина Кошелева ос Ирина Ибрагимова Э̄тпос урыл пӯмыщ мо̄йт суссылтасыт. Та̄н ня̄врамытн потыртасыт, Э̄тпосув нупыл манрыг тулё̄выл такталаӈкв ат ро̄ви, манрыг тав нупылэ ва̄рыглахтуӈкв ат ро̄ви. Ты урыл газетав юио̄выл 16 ло̄псэ̄т ловиньтэ̄н. Ня̄врамыт о̄с ёнгуптаве̄сыт, та̄нанылн Людмила Мелентьева ёнгилыт суссылтас. Та юипа̄лт мӯй ма̄хум ща̄й аюӈкв во̄вве̄сыт, хотьют ка̄сащас, пуссын ща̄ил пинве̄сыт. Тувыл ма̄хум ла̄ккваминыглаӈкв та патсыт. Мо̄тыт щёс та̄н ос яныгполь э̄тпос са̄тыт хо̄талэ̄т тув ёхталаӈкв во̄вве̄сыт, Ӯринэ̄ква хо̄тал янытлан ма̄гыс.

1118 2016. 02. 25. Е. А. Ромбандеева

Яныг утыт ос ма̄нь утыт Янгуй Э̄ква ня̄враманэ ёт Ё̄мантэ̄н, няп ня̄врамаквет, ӯсувла̄нтэ̄н! А̄ӈквал ӯлтта ӯсувлэ̄н, лупи ӯлтта ё̄масэ̄н! Во̄ӈхаквен ул поваре̄н, та̄р курщапытн ла̄глын ул вос ойматы, паль уюмн ул тэ̄лыглэ̄н! Ты паль во̄рт на̄н о̄лнэ ма̄н. Вощрамыӈ сул товтащлэ̄н, атыӈ лӯпта маныгтэ̄н. Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1118 2016. 02. 25. Валентина УЗЕЛЬ

Э̄тпосув нупыл манрыг тулё̄выл такталаӈкв ат ро̄ви «Пе̄с Сургут» нампа музеиӈ ма̄т «Тылащ поры» о̄лум порат Мария Владимировна Ситникова Людмила Мелентьева, Ирина Кошелева ос Ирина Ибрагимова пе̄с мо̄йт пӯмщиг ёнгысаныл, та̄н мӯй хо̄тпатн потыртасыт – Э̄тпосув нупыл тулё̄выл такталаӈкв ос ва̄рыглахтуӈкв манрыг ат ро̄ви. Пе̄с ма̄хманув ты ла̄выгласыт, тулё̄выл такталаӈкв патэгы̄н те – тулё̄влын сай ва̄рантаӈкв паты. Ань ос мо̄йтаныл та щирыл минас. Пе̄с порат акв ё̄рнколт Аквэ̄ква тит апыгрищаге ёт о̄лыс, а̄гирищиг сака мулумыг ос а̄прамтахтын ня̄врамыг яныгмасы̄г. Са̄в щёс Аквэ̄ква а̄гирищиг нупыл ла̄выглас, тэ̄н тулё̄выл Э̄тпос нупыл ул вос такталэ̄г, ул вос ва̄рыглахтэ̄г – Э̄тпосакиюв тах кантмаяве. Э̄типа̄лаг а̄гирищиг кон ква̄лсы̄г, Э̄тпосув нупыл ва̄рыглахтуӈкв та тӯлтхатасы̄г. Аквэ̄ква кон ква̄лыс, а̄гирищиг юв во̄всаге. Э̄тпос ёл ва̄глыс, кон турманыг та е̄мтыс. Та сыс Аквэ̄ква а̄гирищаге хоттӯйтсаге, ла̄всаге, тэ̄н роттыг вос ӯнлэ̄г, суй щар ул вос ва̄ре̄г. Э̄тпосакиюв ё̄рнкол тӣвырн щалтыс, та титыглахты: – А̄гирищиг хо̄т о̄лэ̄г? Ам тэ̄натэ̄н ань лю̄ль ва̄рме̄н ма̄гыс хотум ва̄риягум тах. Матум Аквэ̄ква э̄тпос э̄лыпа̄лт ма̄нь пасан тӯщтыс, пасан тармыл солвал а̄ны лю̄ли ос ня̄ньло̄мт хуи. Илттыг солвал потыртаӈкв та патыс: – Э̄тпосакиюв, ул кантлэн. Ам па̄ялтам исум витн та̄ратавем, ам ат кантлэ̄гум. Ня̄нь о̄с ла̄ви: – Ам ос исум кӯрн ӯнттавем, пе̄лп касаил яктавем, ам та ве̄ритэ̄гум. Ты а̄гирищиг а̄прамтахтым лю̄ль ва̄рсы̄г. Наӈ сака ул кантлэн. Ня̄ньло̄мт вуен, тэ̄пъялэн, то̄нт кантлын ма̄ныл тах по̄йтэ̄гын. Э̄тпос нэ̄матыр ювле ат ла̄выс, ня̄ньло̄мт вис, тэ̄пъялас ос ювле То̄румн но̄х та минас. Номтэ о̄с ёмасыг та е̄мтыс. Аквэ̄ква а̄гирищиг нупыл ла̄выс: – Ам такос нэ̄нан ла̄выгласум, Э̄тпос нупыл ул ва̄рыглахтэ̄н, тулё̄выл ул такталэ̄н. Ат хӯнтлыман, та яныт лю̄лькапай та ва̄рсын. Тамле ты пӯмыщ мо̄йт мӯйлын мирн ань та суссылтавес. На̄н ня̄враманын ты урыл о̄с потыртэ̄н. Мо̄йт нэ̄пакн ма̄ньщи ла̄тӈыл В. Аксёнова хансыстэ.

1119 2016. 03. 10. Тамара МЕРОВА

Кӯщаит рӯпатаныл уральтавет Округ губернаторув Наталья Комарова са̄всыр кӯщаит Координационный сапра̄ниян акванатыгласанэ ос та̄н ва̄рнэ рӯпатаныл урыл потыртасыт. Уральский федеральный округ тармыл Россия Президентувн паттым кӯщай Игорь Холманских о̄с тыг ёхталас. О̄влэ̄т мӯй ма̄хум хумус «Многофункциональный центр» нампа колыт рӯпитасыт, та урыл тэ̄лат та̄рапаттысыт. Ань округ янытыл 21 тамле колыт ос 55 филиалыт о̄лэ̄гыт. Тот ма̄хум ёт 402 хо̄тпат рӯпитэ̄гыт ос та̄н 200 са̄вит са̄всыр справкат, нэ̄пакыт миӈкв ве̄рме̄гыт. Та щирыл мо̄т ӯсыӈ ос па̄влыӈ ма̄ныл тыг ёхтум хо̄тпатн нэ̄мхотталь минуӈкве ат э̄ри. Ос МФЦ колт э̄рнэ нэ̄пакыт мо̄т ма̄ныл кисхатнэ ма̄гыс са̄всыр рӯпитан колыт ёт соглашениенэ̄пак хансуӈкве э̄ри. Ма̄хум ань пенсионный фондныл, налоговый ос миграционный службаныл, государственный регистрация, кадастра ос картография тэ̄лат палт э̄рмыглам нэ̄пакыт ва̄руӈкве во̄ве̄гыт. Мо̄лты та̄лт МФЦ хосыт 1 миллион 420 са̄вит справкат ва̄рве̄сыт. Полиция, судебный приставыт службаныл ос округт ма̄вит ӯргалан департаментныл ос са̄в хо̄тпат паспортыт, справкат китыглаӈкве патсыт. Ань ты колыт ёт аквъёт рӯпитан соглашениенэ̄пак хансэ̄гыт. Ос ищхӣпыӈ ут хосыт ты э̄рнэ ло̄псаныл ке̄тнэ порат кӯщаит электронноцифровой ка̄тпосаныл ёмщакв вос торгамтахтэ̄гыт ос наӈке̄гыт. Тувыл кӯщаит округт о̄лнэ ма̄хум пусмалтан ос мо̄т ма̄ныл тэ̄нутыт тыг тотнэ ва̄рмалит о̄вылтыт о̄с потыртасыт.

1119 2016. 03. 10. Галина КОНДИНА

Соссаӈ мир о̄лнэ ма̄ныл вуянтыяныл «Нумто» нампа природный парк Белоярский районт о̄лы. Тот са̄лыӈ ма̄хум ще̄мьяӈ та̄гыл о̄лэ̄гыт. Ка̄сыӈ ханты ос ё̄рн ще̄мья та̄нти са̄лыяныл о̄ньщияныл. Ты мус хӯл алыщлэ̄гыт, во̄рае̄гыт. Та̄н тот ялпыӈ ма̄ ос пӯрлахтын ма̄ о̄ньще̄гыт, «Нумто» тӯраныл ялпыӈтыяныл, ма̄те̄ныл по̄х хо̄тпатныл вуянтыяныл. 1997 та̄лт та ма̄ природный паркыг ва̄рвес ос ӯргалаӈкве патвес. 2001 та̄лт та ма̄ то̄ва ломтанэ заповедный зонаг ва̄рве̄сыт, ты 50 со̄тыра гектар. «Сургутнефтегаз» та ма̄т рӯпиты. Хуньт хоса порат тот ма̄ а̄рталым ос ма̄во̄й хо̄нтыма. Ань ос тот рӯпитан компания таӈхи я̄ӈкылмат тисхатуӈкве, ма̄во̄й но̄ӈхаль няртнэ буровой тув тӯщтуӈкве. Тот о̄лнэ соссаӈ ма̄хум щар ат ка̄саще̄гыт, та̄наныл тув ат та̄ртыяныл. Таима̄гыс ты та̄л ре̄тыӈ ю̄свой э̄тпос 25 щислат Белоярский ӯст са̄в ма̄хум атхатыгласыт ос халанылт потыртасыт, хумус э̄лаль о̄луӈкве ос хумус «Сургутнефтегаз» рӯпитаӈкве паты. Ань тамле ла̄тыӈ хассыт, «Нумто» ма̄т ма̄вит ӯргалан ма̄хум нэ̄паканыл пуссын Москва ӯсн те̄тыяныл, тот ма̄вит ӯргалан государственный экспертиза тах ва̄раве. Тувыл ущ та̄рапаты ма̄во̄й тот но̄хвиӈкве ро̄ви ман а̄ти. Михаил Крейндлин, «Гринпис России» кӯщаиг о̄лнэ хум, ла̄выс: «Соссаӈ ма̄хум ат та̄ртыяныл тыт «Сургутнефтегаз» рӯпитаӈкве. Та̄н тыт о̄лнэ ос алыщлан, пил ва̄тнэ ма̄ныл. Та̄нанылн ма̄н нё̄туӈкве патэ̄в». Ля̄ххал ма̄ньщи ла̄тӈыл Галина Кондина толмащластэ.

1119 2016. 03. 10. Валентина УЗЕЛЬ

Балокытт о̄лнэ ма̄хум колыл мивет Округув янытыл Пыть-Ях ӯст щар са̄в ма̄хум балокытт тот о̄лэ̄гыт. Ты э̄тпос о̄выл хо̄таланэ порат округ кӯщаюв Наталья Комарова тув ялыс, уральтасанэ – балокытт о̄лнэ ма̄хум колыл хумус мивет. Ты ма̄хумн нё̄тнэ ма̄гыс 2012 та̄лт йильпи программа округувт хасвес. Аквта та̄лт ловиньтавес, Пыть-Ях ӯст 1 со̄тыра 645 колта̄гыл балокытт о̄лэ̄гыт. Ань нила та̄л минас, туп 460 ще̄мья мо̄т колн ва̄нтлысыт, 1 со̄тыра 181 ще̄мья иӈ ӯрхатэ̄гыт. Округ кӯщай ань тув ялме порат яныг сапра̄ни ва̄рыглавес. Са̄в хо̄тпа тав ётэ хо̄нтхатыглан ма̄гыс тув ёхталасыт. Та̄н халанылт са̄выӈпа̄лэ пуссын титыглахтасыт, та̄н мо̄т колн хунь ва̄нтлуптавет. Ювле ла̄вве̄сыт, ань ищхӣпыӈ ут хосыт та̄нти наманыл очередьт хо̄нтуӈкв ве̄рме̄гыт. Тот хансым о̄лы, та̄н колыл хунь мивет. Ань хо̄т балок хотвиве, тот яныг колыт ӯнттын ма̄гыс ма̄ щё̄питаве. Ос то̄ва хо̄тпат балокыт кос о̄лэ̄гыт, ос та̄н ӯст о̄лнэ кол о̄щнэ̄ныл. То̄ват балок 2012 та̄л минам юипа̄лт ёвтсыт, ты ва̄рмалит ань та̄рапаттавет. Ос хотьют такви балоке хотвиӈкв ат те ка̄сащи, тав сутн во̄ваве. То̄ват яныгнув кол во̄ве̄гыт, ос тыи ма̄гыс та̄нанылн олн ойтуӈкв э̄ри. Ань та ӯст 4 со̄тыра 76 хо̄тпа балокытт о̄лэ̄гыт. Та̄наныл колыл минэ ма̄гыс са̄в о̄лнэ кол ӯнттуӈкв э̄ри. Ювле хультум та̄лт 44 со̄тыра квадратный метра са̄вит кол ӯнттувес. Ос ма̄хум пуссын ёмас колн ва̄нтлуптан ма̄гыс иӈ сака са̄в кол ӯнттуӈкв э̄ри. Округ мирколныл те̄тым ля̄ххал ма̄ньщи ла̄тӈыл Валентина Хозумова хансыстэ.

1119 2016. 03. 10. Тамара МЕРОВА

Округ Дума депутатыт сапра̄нияныл о̄лыс Та э̄тпос ва̄т нупыл ат хо̄талэ̄т округ Думан пе̄риим ма̄хум акванатхатыгласыт. Борис Хохряков, округ Дума кӯщай, о̄влэ̄т 2015 та̄л сыс ва̄рум рӯпатаныл о̄вылтыт ла̄тыӈ ла̄выс. Мо̄лты та̄лт депутатыт китхуйплов щёс сапра̄ниян акванатхатыгла̄лсыт ос 137 са̄кконыт пирмайтасыт. То̄нт 18 йильпи са̄ккон щё̄питасыт, 119 о̄лнэ са̄ккон палт то̄ва тэ̄лат мо̄т щирыл хӯлтсаныл ос 411 постановление ва̄рсыт. Та̄н халанылт са̄выӈпа̄лэ са̄кконыт округт кӯщайлахтын тэ̄лат э̄лаль тотнэ ма̄гыс хасве̄сыт, мо̄таныт округ бюджет ос ма̄хум о̄лупсаныл ӯргалан ва̄рмалит о̄вылтыт хансым о̄лсыт. Ка̄сыӈ сапра̄ни э̄лыпа̄лт депутатыт акв хотты партиян хасхатам ос округ мирколт манос департаментыт рӯпитан кӯщаит ёт хо̄нтхатыглэ̄гыт ос са̄всыр хӯлтыглан ла̄тӈыт урыл потыртэ̄гыт. То̄ва са̄кконыт манос постановленият пирмайтан ма̄гыс ёмщакв номсахтуӈкве э̄рыс. Мо̄т хо̄н ма̄т па̄лыл санкцият хунь ва̄рве̄сыт, Россиявт олныт сэ̄лнэ тэ̄лат та̄рвитыӈнувег е̄мтсыт. Округ правительство колт ос Думат рӯпитан хо̄тпат мир о̄лупсаныл ёмщакв миннэ̄ныл ма̄гыс номтыӈ тэ̄лат ва̄рсыт. Та̄л сыс депутатыт округувт о̄лнэ ма̄хум ёт са̄в ӯсытт ос па̄влытт акванхо̄нтхатыгласыт. 2015 та̄л сыс та̄н палтаныл 4 со̄тыра 467 китыглахтын ла̄тыӈ ва̄рвес. То̄ва ма̄хум та̄нки депутатыт ёт потыртаӈкве ёхталасыт, мо̄таныт нас пищма ке̄тыгласыт. Атпан хо̄тпа пищманыл китынтыг ке̄тыгласаныл, ос яныгса̄т налыман нупыл са̄т пищмат коллективныл ке̄тыглымат. Ма̄хум потырта̄лум манос хансум ва̄рмаляныл пуссын та̄рапаттуве̄сыт ос ёмас щирыл щё̄питаве̄сыт, туп 147 тэ̄лат ёт депутатыт иӈ э̄лаль рӯпитэ̄гыт. Тох Дума па̄лыл 336 хо̄тпа олннё̄тмилыл майве̄сыт, тув лов миллион солко̄ви минас. Ты коныпал «О ветеранах» федеральный са̄ккон щирыл о̄лнэ колыт ёвтнэ ма̄гыс 22 миллион солко̄ви холтвес. Тувыл Победа ялпыӈ хо̄тал кастыл 15 миллион солко̄ви нё̄тмил ва̄рнэ ма̄гыс та̄стым о̄лыс. Ты сапра̄нит депутатыт федеральный са̄кконытытн хансым ла̄тӈыт ма̄гыс округ са̄кконанувн о̄с йильпи хӯлтыглан ла̄тӈыт хассыт. Тох округ промышленный политика урыл са̄ккон, ма̄вит ос пе̄с йис культура ӯргалан тэ̄лат, тувыл ма̄ ло̄мтыт государство нупыл хаснэ о̄вылтыт, тот колыт ӯнттын ма̄гыс, колыт щё̄питан я̄нас тэ̄лат ос сыресыр мо̄т са̄кконыт ёмщакв хасве̄сыт. Та̄н пуссын китыӈтыг ловиньтавет, матыра̄ти та̄рапаттаве ке, ос тувыл ущ са̄ккон пирмайтэ̄гыт. То̄ва ӯсыӈ ма̄т мировой сӯтьяг о̄лнэ хо̄тпат пе̄рияве̄сыт. Таквсы порат ма̄хум округ Думан мо̄т депутатыт пе̄рияӈкве патэ̄гыт тах. Туи ты депутатанув рӯпатаныл тах та оигпи. Ань та̄н йильпи пе̄рияп урыл потыртасыт. Ат та̄л сыс ма̄н ма̄вт о̄лнэ мир са̄внувег е̄мтыс, тыг 200 со̄тыра са̄вит э̄лумхо̄лас о̄луӈкве ёхтысыт. Та щирыл мо̄т Думан 35 ань рӯпитан депутатыт пе̄нтсыл 38 хо̄тпа пе̄рияӈкве патаве. Тыгыл 19 кандидатыт одномандатный нэ̄пак щирыл пе̄риявет ос 19 партийный список (многомандатный нэ̄пак) щирыл пе̄рияӈкве патавет. Ка̄сыӈ кандидат манос списокн хансым хо̄тпат пе̄риян ма̄гыс я̄нас участкат ва̄равет. Тамле участкат 58 со̄тыра са̄вит э̄лумхо̄лас ловиньтахты. Тувыл депутатыт э̄лыпалт округ МВД кӯщай хум В. И. Романица ва̄рнэ рӯпатаныл урыл потыртас. Та̄н округувт са̄в та̄рвит ос пилыщмаӈ тэ̄лат оснпаттысыт. Ты халт лю̄ль тэ̄рпи тыналан са̄в хо̄тпат хо̄нтве̄сыт, наркотик ёвтнэ хо̄тпат ос сыресыр писалит, яныг касаит о̄щнэ хо̄тпат пувве̄сыт. Матахмат хо̄тпа Сириян лю̄ль ма̄хум палт хо̄нтлуӈкве во̄вимат. Та̄н та̄рвитыӈ рӯпатанылт са̄в участковыйхо̄тпат э̄ре̄гыт кос, ос ань тамле хо̄тпат ат то̄вылхатэ̄гыт. Рущ щирыл та̄н «сокращениян» патсыт. Ань э̄лаль тох ул вос е̄мтыс, депутатыт ты ва̄рмалит уральтаӈкв патыяныл. Ты кӯщай хум потре янытэ̄тыл ам мо̄т щёс на̄нан хансылум тах. Дума тармыл ма̄ньлат ма̄хум палатат кӯщаиг о̄лнэ хум Константин Репин та̄нки рӯпатаныл о̄вылтыт о̄с потыртас. Та̄н о̄с мӯсхалыг тэ̄ланыл ва̄рияныл, то̄ва са̄кконыт палт э̄рнэ ла̄тыӈ хӯлтэ̄гыт ос ма̄ньлат ма̄хум ёт юртыӈыщ ос акваннё̄тхатым рӯпитэ̄гыт.

1119 2016. 03. 10. Николай МЕРОВ

Ма̄витув тот ёмащакв ӯргалаве Советский районт «Ма̄нь Та̄гт» нампа заповедник 1976 та̄лт рӯпитаӈкве о̄вылтахтас. Тот ма̄тэ сака нё̄тнэ, во̄рт са̄всыр во̄руй о̄лы, я̄т ос тӯрытт са̄в хӯл яласы. Ма̄ янытыл мощщаг хультум хорамыӈ лӯптат, йӣвыт яныгме̄гыт, тыи ма̄гыс тав ӯргалым о̄ньщаве. Са̄выӈпа̄лэ ма̄тэ Советский районт о̄лы, туп ма̄нь ло̄мтэ Ха̄льӯс районын паты. Та ма̄т кӯщаиг Борис Витальевич Предит рӯпиты. Тав ты ӯргалан ма̄ урыл а̄нумн мощ потыртас. Ты ма̄ государство па̄лыл ӯргалаве. Тув ӯщлахтын ма̄хум, во̄раян ос хӯл алыщлан хо̄тпат ат та̄ртавет. Тот пум са̄груӈкв, во̄р яктуӈкв, пил ва̄туӈкв, ла̄хыс атуӈкв, тэ̄рпи ма̄гыс матыр лӯптат маныгтаӈкв щар ат ро̄ви. Ма̄щунь хилнэ ма̄хум тот рӯпитаӈкве о̄с ат та̄ртавет. Та ма̄н туп намыл щё̄питым разрешениенэ̄пак щирыл ёхтуӈкве ро̄ви. Инспекция хо̄тпат ка̄сыӈ хо̄тал ты ма̄ уральтым о̄ньщияныл. Тот учёный хо̄тпат научный рӯпата хансэ̄гыт. Та̄н та ма̄ акваг сунсыяныл, лӯптат хумус яныгме̄гыт ос мо̄т са̄всыр э̄рнэ рӯпата ва̄ре̄гыт. Мощщаг хультум во̄руит хумус яныгме̄гыт, хумус э̄лаль о̄лэ̄гыт – акваг уральтавет. Ты урыл са̄в научный нэ̄пак хансым о̄лы. Советский ӯст заповедникколт музей рӯпиты. Тот са̄всыр во̄руй ос товлыӈ ӯй хурит ва̄рим о̄лэ̄гыт. Ты товлыӈ ӯит ос во̄руит а̄ти нас тох ка̄тынпаттуве̄сыт. Та̄н матыр ва̄рмаль щирыл а̄гмыӈыг е̄мтсыт манос та̄нки сакватахтасыт, то̄ва во̄руит мори алыщлан ма̄хмытн порславе̄сыт. Хотьютын хо̄нтве̄сыт ос музейн тотве̄сыт. Тувыл ущ хурииг ва̄рве̄сыт. Та музейт ва̄тихал йильпи выставка ва̄рыглаве. Ма̄нь ня̄врамыт ма̄гыс са̄всыр конкурсыт щё̄пита̄лавет. Та̄н во̄руит хаснэйӣвыл по̄слэ̄гыт. Та музейт школат ханищтахтын а̄гитпыгыт ма̄вит лӯптат ос манырсыр во̄руит, товлыӈ ӯит о̄лэ̄гыт, ханищтыяныл. Ты коныпал ня̄врамыт ма̄вит ӯргалан урыл стихотвореният хансэ̄гыт. Ётыл ты потрыт пуссын нэ̄пакн щё̄питавет. Тох ты Советский районт ня̄врамыт ма̄ке̄ныл ӯргалаӈкве ханищтавет. «Ма̄нь Та̄гт» нампа ма̄вит ӯргалан ма̄ нупыл хӯрум заповедникыт хансым о̄лэ̄гыт. Ты «Верхне-Кондинский», «Елизаровский» ос «Васпухольский». Та ма̄тт мощщаг хультум во̄руит, товлыӈ ӯит о̄с ӯргалым о̄ньщавет. Тот я̄т уйигтан витуй о̄лы. Ты витуит акваг мощщаг е̄мтэ̄гыт, таима̄гыс ма̄ янытыл Выгыр нэ̄пакн хансым о̄лэ̄гыт. Тот манаса̄вит са̄лы, со̄рпи, са̄всыр во̄руит ос товлыӈ ӯит о̄лэ̄гыт, пуссын ловиньтым о̄ньщавет. Тэ̄лы порат арген осыӈ тӯйт паты ке, инспекторыг рӯпитан хо̄тпат во̄руяныл ма̄гыс тэ̄нэ ма̄т щё̄питэ̄гыт. Заповедник ма̄тэ мувлахил во̄рколыт ӯнттысыт. Тэ̄лы порат ма̄вит уральтым «Бураныл» яласэ̄гыт. Туи порат вездеходыл манос ла̄глыл ё̄мыгтэ̄гыт. Ка̄сыӈ та̄л Югра ма̄т «Спасти и сохранить» нампа ма̄вит ӯргалан ва̄рмаль мины. Ты кастыл «Ма̄нь Та̄гт» нампа заповедникт рӯпитан хо̄тпат о̄с э̄рнэ тэ̄ла ва̄ре̄гыт. Ты ӯргалан ма̄ хосыт Конда я̄кве овты. Та я̄ порсыл хотсыстамтыяныл, патыглам йӣвыт хотсартыяныл. Та̄н ма̄ньлат ма̄хум халт ма̄вит ӯргалан касылыт щё̄пита̄лэ̄гыт. Тамле ты ёмас ва̄рмаль Советский районт ма̄вит ӯргалан ма̄гыс ва̄раве.

1119 2016. 03. 10. Тамара МЕРОВА

Ща̄нь ла̄тӈыл потыр хассыт Соссаӈ ма̄хум Ханты-Мансийскат акванатхатыгласыт ос ща̄нь ла̄тӈыл потыр хассыт. Округ янытыл ма̄ньщи диктант Хо̄нтаӈ ма̄т Шугур, Половинка, Урай ӯст хассыт, тувыл Октябрьский район Лӯи Ня̄рихумит школат, Ха̄льӯс районт Кульпаст, Саранпа̄вылт, Хулюмсӯнтыт о̄с хассыт. Щар са̄в – ва̄т нупыл кит хо̄тпа Саранпа̄вылт о̄лыс, ос Шугур па̄вылт ва̄т нупыл акв ня̄врам школат акванатхатыглас. Хулюмсӯнтыт потыр хансуӈкве хӯрум хо̄тпа ёхталасыт, Кульпаст – онтолов хо̄тпа, Половинка па̄выл музейт хо̄т хо̄тпа о̄лыс. Урай ӯст ма̄ньщи ос ханты ла̄тӈыл хансуӈкве хус хо̄тпа ёхталасыт. Округ янытыл хантыт ос ма̄ньщит пуссын акван ке ловиньтым, ты та̄л 511 э̄лумхо̄лас диктант хассыт. Потыр хаснэ ва̄рмаль рущ ла̄тӈыл «Фронтальный диктантыг» ла̄ваве. Ханты-Мансийскат тав китынтыг А̄с-угорский институтт ва̄рыглавес ос о̄выл щёс Ма̄вит ос Э̄лумхо̄лас музейт о̄лыс. Тувыл мо̄т хо̄н ма̄т студентыт Венгрият Сегедский университетт ма̄ньщи ла̄тӈыл ос Германият Мюнхенский университетт ханты ла̄тӈыл хассыт. Сегед ӯст хӯрум ос Мюнхент нила хо̄тпа хансуӈкве ка̄сащасыт. Венгрыт палт потыр Бернадетт Биро ловиньтастэ, ос немец ма̄хум палт Жофия Шён ловиньтастэ. Ты та̄л Светлана Динисламова тотма урыл хансум потре щирыл ма̄хманув диктант хассыт. Ты потыр Тимофей Алексеевич Молдановын ханты ла̄тӈыл толмащлавес ос тав музеин ёхтум ма̄хмытын ловиньтастэ. Ма̄ньщи ла̄тӈыл потыр Анастасия Георгиевна Федий (Вьюткина) ловиньтастэ. Диктант хансуӈкве тув аквхуйплов ханты хо̄тпат ёхталасыт ос нёлолов ма̄ньщи хо̄тпат. Ты соссаӈ ма̄хум халт щар яныгпа̄лаг Евдокия Андреевна Нёмысова о̄лыс, тав 79 та̄лэ то̄влыс, ос щар ма̄ниг Марк Ромбандеев о̄лыс, тав 8 та̄лэ то̄влыс. Ма̄хум ла̄вманыл щирыл, ты та̄л диктант хансуӈкве та̄рвитыӈнув о̄лыс. Ос потыр ловиньтам хо̄тпаг ла̄всы̄г, тотма урыл потыр мӯй ма̄хмыт пуссын э̄рнэ̄г хасманыл. Ма̄вит ос Э̄лумхо̄лас колт рӯпитан а̄гит диктант хансуӈкве ёхталам хо̄тпатн мӯйлупса щё̄питасыт ос мисыт. Диктант хаснэ ва̄рмаль та̄н ка̄сыӈ та̄л э̄лаль ва̄рыглаӈкве номсэ̄гыт. Потрыт ёмщакв сунсыглыманыл юипа̄лт, хотьют ка̄сащас, та̄н оценканыл А̄с-угорский ма̄хум институтт ищхӣпыӈ ло̄псэ̄т номере щирыл хӯлтавет. Музейт нёлолов ма̄ньщи хо̄тпат халт хо̄т э̄лумхо̄лас «5» оценкал пинве̄сыт, акв – «4» ос акв «3» оценка о̄ньщи. Хантыт халт нёлолов хо̄тпа «5» оценка о̄ньще̄гыт, китыг – «4» оценка ос акв э̄лумхо̄лас такви оценкатэ хӯлтуӈкве ат ка̄сащас.

1119 2016. 03. 10. Светлана РОМБАНДЕЕВА

Кина ва̄рнэ ма̄хум мӯйлысыт Ре̄тыӈ ю̄свой э̄тпос 26 хо̄талэ̄ныл ос ма̄ньполь э̄тпос 3 хо̄талэ мус Ханты-Мансийск ӯст «Дух огня» нампа кинофестиваль о̄лыс. Мӯй ма̄хум тыг Россия янытыл са̄в ма̄ныл ёхталасыт, то̄ват ос э̄лы хо̄н ма̄ныл о̄лсыт. Ты ялпыӈ тэ̄ла о̄выл хо̄талэ̄т мир «Юграклассик» колн атхатыгласыт. О̄выл ла̄тыӈ ты кинофестиваль кӯщай о̄йка, кинорежиссёр, народный артист Сергей Соловьёв тав ла̄выс: «Ань ты фестивалюв ма̄н тох намаяслув – «Человек, ты кто? ». Я̄тил ма̄хум, сунсэ̄н, ма̄н тыт колнор онтсыл Леонардо да Винчи по̄слум хуриянэ но̄хтагатасанув. Ты мирн ва̄нэ мӯтраӈ хо̄тпа о̄лме̄т акваг номсахтас: Э̄лумхо̄лас хотыл ёхтыс, манрыг о̄лы, маныр ва̄руӈкве ве̄рми? Ма̄н нас матарыт манос э̄лумхо̄ласыт? Тав акваг кисхатас, нэ̄пак ловиньтас, ка̄тыл хурит по̄слыс, наука тэ̄лат ханищтас. Ма̄н ань о̄с аквтох, кинанув та̄ра номсахтэ̄в. Ос ань ма̄к таи ва̄глув – ма̄н Э̄лумхо̄ласыт. Ма̄н э̄лы хо̄талув урыл номсахтэ̄в, ловумтам ма̄хманув номиянув, мӯсхал щирыл о̄лэ̄в. Со̄ль, ма̄н сака са̄в ёмас тэ̄ла ва̄руӈкве ве̄рме̄в. Ка̄сыӈ фестиваль порат, хунь йильпи кинат сунсэ̄в, хотты ёмас вильт, мӯтраӈ номт ка̄салаӈкве таӈхе̄в». Тувыл округ губернатор Наталья Комарова ла̄тыӈ ла̄выс, кина ва̄рнэ хо̄тпат, мӯй ма̄хум янытласанэ. Игорь Холманских, УрФО кӯщай хум тох ла̄выс: «Россия президент Владимир Путин на̄нан ты ялпыӈ хо̄талыл янытлыянэ. Ма̄ янытыл са̄в кинофестивалит о̄лыглэ̄гыт, ос «Дух огня» хурип кина ва̄рнэ тэ̄ла воссыг нэ̄мхо̄т а̄тим. Тыт ма̄ньлат хо̄тпат кина ва̄руӈкве ханищтахтэ̄гыт, мӯтраӈ хо̄тпатын нё̄тавет, янытлавет. Са̄в кина а̄гмыӈмосыӈ хо̄тпат урыл ва̄равет, суссылтавет. Ты та̄л Россия янытыл «Год Российского кино» намаявес. Кина та̄ра ма̄ янытыл о̄лнэ мир, са̄всыр национальностит, янгема̄не пуссын акванюрщхатэ̄гыт, аквта кина са̄в ма̄т сунсэ̄гыт, аквхольт ща̄гтыглэ̄гыт, сыманыл аквщирыл ща̄рге̄гыт манос мовиньтэ̄гыт. Кина ва̄рнэ я̄тил ма̄хум, о̄лупсав ос о̄лнэ ма̄в (планета) ма̄гыс на̄н ма̄к э̄рнэ тэ̄ла ва̄регы̄н». Округув янытыл кинат са̄ттем суссылтаве̄сыт – 150 арыг кина суссылтан колыт хо̄талпалыт рӯпитасыт, 350 со̄тыра хо̄тпа са̄всыр кинат маттем та суссыт. Юио̄выл хо̄тал мир о̄с акван та атхатас. О̄выл места исландский режиссёр хум Рунару Рунарссону тав вистэ, «Золотая тайга» щар ма̄к яныг приз таве̄н та майвес, «Воробьи» нампа кинатэ янытлавес. Кина пе̄риян ма̄т (жюри) пуӈк тотнэ нэ̄ Изабель Койшет тох ла̄выс: «Ма̄н, жюри тэ̄ла палт рӯпитам ма̄хум, пуссын ты кина та̄ра пе̄рияслув. Ты кина хосыт на̄ӈки, хумус ма̄н, яныгхо̄тпат, ня̄врамытныл ман ма̄ньлат хо̄тпатныл ханищтахтуӈкве ве̄рме̄в. «Воробьи» кина ма̄нав ханищтытэ: ня̄враманув вос хӯнтлыянув, вос хӯнтамлыянув». Китыт места «Вулкан Ишканул» кинан майвес, Гватемала ма̄ныл режиссер нэ̄ Хайро Бустаманте ёхталас. Хурмит места ос «Мост» кинан майвес, кина ва̄рум хум Науру Гармелия Абхазият о̄лы. Мо̄т кинат о̄с янытлаве̄сыт, янытлан нэ̄пакытыл майве̄сыт. Юио̄выл ла̄тыӈ Сергей Соловьёв ла̄выс: «Ань 14 кинофестивалюв ты оигпи. Э̄лумхо̄лас ма̄гыс ты ма̄к ёмас та̄л – хунь ма̄ньлат хо̄тпа ущ о̄луӈкве паты, ёмас номтыл э̄лаль сунсы. Кина ва̄рнэ ма̄хум ты На̄й-О̄тырыӈ ма̄н Искусство тэ̄ла палт ро̄влахта̄луӈкве 14 та̄л ты ёхталасыт. Ань ма̄н ётув я̄тил юртанув а̄тимыт – Александр Абдулов, Олег Янковский ос мо̄т хо̄тпанув. Ты ялпыӈ На̄й ма̄н та̄н ётаныл но̄хпе̄ламтаслув, таве ма̄н ань ӯргалым о̄ньщилув, нэ̄матыр ма̄гыс ат пе̄нтылув». Ты юипа̄лт английский режиссер Теренс Дэвис «Песнь заката» кинатэ суссылтавес.

1119 2016. 03. 10. Николай МЕРОВ

Рӯпата уральтан кӯщай ля̄ххал тотнэ колн ёхталас Округувт рӯпитан ма̄хум нё̄тмилыл ва̄рнэ кӯщай хум Евгений Кривобоков ре̄тыӈ ю̄свой э̄тпост Ханты-Мансийск ӯст о̄лнэ ля̄ххал тотнэ колн ёхталас. 2015 та̄лт рӯпатаныл хумус минас ос ань рӯпатаныл хумле о̄лы, тав ты урыл потыртас. На̄н тав потре э̄лаль ловиньтэ̄лы̄н: «Россия янытыл ма̄н организацияв китыт та̄л рӯпататэ щар ёмщакв ва̄ритэ. Мо̄лты та̄л ма̄н хӯрум со̄тыра нёлса̄т уральтан ва̄рмаль щё̄пита̄лсӯв. Ювле хультум та̄лныл иӈ са̄внув рӯпата ва̄рсӯв. Ты хосыт ма̄н акв миллиард налыман миллион арыгтем солко̄ви рӯпатанылт юв пувим олныт округувт рӯпитан ма̄хмытн та̄нанылн ойтуӈкве нё̄тсӯв. Пуссын аквъёт атхуйплов арыгтем со̄тыра хо̄тпа та̄нки сэ̄лум олнаныл ка̄тынпаттысаныл. Кризис е̄мтме па̄сныл Россиявт о̄лупсав та̄рвитыӈыг патыс. То̄ва кӯщаит ты ва̄рмаль паттат номсэ̄гыт, рӯпитан ма̄хумн олн ро̄ви ат ойтуӈкв. Та та̄лт хо̄т со̄тыракем хо̄тпа ма̄н палтув нё̄тмил во̄вуӈкве ёхталасыт. Ты хо̄тпатныл са̄выӈпа̄лэ ма̄хум рӯпитасыт ос олныл ат ойтве̄сыт. Таима̄гыс ма̄н ты тэ̄ла иӈ та̄кыщнув уральтаӈкве патыслӯв. Ань та кӯщаит пуссын аквъёт яныгса̄т миллион нёлса̄т со̄тыра солко̄ви са̄вит штрафолныл пинсанӯв. Ты коныпал ма̄хум ма̄н палтув нё̄тмил во̄вуӈкве ты тэ̄лат щирыл ёхталэ̄гыт. Китса̄т арыгтем хо̄тпа рӯпитым сакватахтасыт. Ты ва̄рмаль таима̄гыс е̄мты, то̄ва ма̄т ма̄хум иӈ пе̄с оборудованиял рӯпитэ̄гыт. Тувыл ма̄шина тармыл рӯпитан хо̄тпат ма̄шинаныл лю̄льсаӈ о̄ньщияныл. Лё̄ӈхыт матаре хотойматан паттат о̄с са̄в хо̄тпа порсы. Ань ты та̄л та̄л котиль э̄тпост кит хо̄тпаг кол ӯнттын ма̄т порсысы̄г. То̄ва хо̄тпат са̄внакпа лю̄лит колыт ӯнттын ма̄т ӯргалахтын ква̄лыг та̄л нумын ё̄мыгтэ̄гыт, ёлхисатаптавет манос ёлва̄ӈклатэ̄гыт. Та щирыл са̄в хо̄тпа та са̄кватахтэ̄гыт. Та̄л сыс са̄кватахтын хо̄тпат ма̄гыс пуссын аквъёт хӯрумхуйплов миллион солко̄ви кӯщаитн ойтуӈкве ла̄всӯв. Ань та кӯщаит рӯпатаныл ва̄тихал уральтыянӯв. Тувыл ань ос тамле ва̄рмаль о̄лы. Э̄лыл тыг рӯпитаӈкве ёхтын хо̄тпат кӯщай ёт договорнэ̄пак ат хансэ̄гыт, нас потыртахтым олныл ойтавет. Ётыл рӯпата олныл мощщал мивет, ла̄плавет. Та̄н ты ва̄рмаль щирыл рӯпата ӯргалан хо̄тпат палт нё̄тмил во̄вуӈкве ёхтэ̄гыт. Тамле хо̄тпатн нё̄туӈкве сака та̄рвитыӈ. Тыима̄гыс мо̄лты та̄л округувт хо̄тса̄ткем хо̄тпа договорнэ̄пак хансуӈкве кащилтаве̄сыт. Рӯпата минэ кӯщаитн тай ёмас, договорнэ̄пакыт та̄л рӯпитан хо̄тпа ма̄гыс налоголн та̄н ат ойтэ̄гыт. Та сыс, тыщир рӯпитан хо̄тпат ӯщлахтын хо̄талытыл ат мивет ос ӯщлахтуӈкве ке ке̄тавет, олныл ат ойтавет. Тувыл та̄н рӯпатанылт матараныл хотум е̄мты ке, страховкаолныл о̄с ат ойтавет. Таима̄гыс ань та кӯщаит, хотьют договорнэ̄пак та̄л э̄лумхо̄лас рӯпатан выганыл, та̄н ка̄сыӈ хо̄тпа ма̄гыс яныгса̄т атпан со̄тыра са̄вит солко̄ви штрафолныл ма̄н пиныянӯв. Ты ва̄рмаль щирыл о̄выл щёс ликмын кӯщаит, штрафыл ат пиныянӯв. Нас ла̄виянӯв, э̄лаль тамле ва̄рмаль ул вос ва̄рсыт. Ос ётылнув аквты тэ̄ла ма̄гыс хо̄нтыянӯв ке, то̄нт ущ яныг штрафыл пиныянӯв. Ётыл ты кӯщай хо̄тпат организацияныл акваг уральтыянӯв. Ань тамле тэ̄ла щё̄питасӯв. Та̄нки рӯпата о̄щнэ кӯщай хо̄тпат ма̄гыс ханищтап та̄стэ̄в. То̄ва кӯщаит рӯпатан винэ хо̄тпат ёт договорнэ̄пак хасылтаӈкве ат ха̄сэ̄гыт. Ма̄н та̄наныл ты ва̄рмальн ханищтаӈкве патыянӯв тах. Кӯщаит э̄рнэ нэ̄пакыт мӯсхал щирыл хансыянэ ке, во̄ритотнэ нак мощщагнув е̄мты». Евгений Кривобоков ла̄внэ̄тэ щирыл, та̄н ля̄ххал тотнэ хо̄тпат ёт мирн акваг ты урыл потыртэ̄гыт. Ка̄сыӈ хо̄тпа рӯпатан патхатнэ̄тэ порат, кӯщай ёт договорнэ̄пак вос хансыс. Ты ва̄рмаль нэ̄мхотьют ат хӯлы, ос хунь урккуптавет, то̄нт ущта торгамтыяныл. То̄ва порат тох е̄мты, кӯщай о̄влэ̄т са̄внув олн ойтуӈкве ла̄ви. Тувыл а̄рнтаг олныл мощщал, мощщал та майлытэ. Хо̄тпа рӯпата олнанэ но̄х ат нэ̄глэ̄гыт. Ётыо̄вылт тав вуньщалыг та хульты, по̄хын мины ос мо̄т рӯпата кинсы. Таима̄гыс рӯпатан миннэ̄н порат договорнэ̄пак хансэ̄н, ты хосыт сакати сэ̄лум олнаны̄н ка̄тынпаттуӈкве ве̄рмияны̄н.

1119 2016. 03. 10. Светлана РОМБАНДЕЕВА

Ня̄врамыт урыл потыр о̄лыс Ювле хультум э̄тпос 24 хо̄талэ̄т Общественный палатат рӯпитан ма̄хум хо̄нтхатыглап ва̄рыгласыт. Потраныл ня̄врамыт урыл о̄лыс. Ты та̄л округувт ня̄врам та̄лыг намаявес, ты кастыл та̄н э̄рнэ нэ̄пак щё̄питамыт. Ань ты та̄л палыт округ янытыл о̄лнэ ня̄врамыт ма̄гыс са̄всыр ханищтапыт, хо̄нтхатыглапыт манос ялпыӈ хо̄талыт тах ва̄равет. Хотьютн ва̄равет, хо̄т ва̄равет, хотьют пуӈк тотуӈкве паты – ты урыл пуссын ёмащакв хасманыл. О̄выл ла̄тыӈ ты Общественный палата кӯщай э̄ква Любовь Чистова тав ла̄выс: «Ма̄нь пора урыл хоса потыртаӈкве ро̄ви, ма̄н пуссын ма̄ниг о̄лсув. Э̄лумхо̄лас мантем яныгпа̄лаг е̄мтуӈкве паты, ма̄нь поратэ, яныгмам поратэ ва̄тихал та номылматыглытэ. Ня̄врам хунь ма̄нь, нэ̄матыр урыл ат номсы, тэ̄ланэ ща̄няге̄на̄щаген ва̄равет, тав ма̄гсылэ тэ̄н номсэ̄г. Ос хунь осыӈса̄йтыӈыг е̄мты, ущта матыр номсахтуӈкве паты. Ма̄н, яныгхо̄тпат, ня̄враманув ос апыгрищанув ёт о̄лэ̄в те, та̄н ётаныл потраме̄в, ёнгасэ̄в те, ма̄н о̄с мощ ма̄ньнуве̄г е̄мтапа̄лэ̄в, ма̄ньлат хо̄тпа хольт о̄лэ̄в, ё̄мыгтэ̄в. Ня̄врамыт ма̄навныл матыр ханищтэ̄гыт, ма̄н та̄нанылныл о̄с ханищтахтэ̄в. Округувт сака ёмас тэ̄ла о̄лы – ка̄сыӈ та̄л хотмус намая̄лаве: «Колта̄гыл та̄л», «Ма̄ньлат ма̄хум та̄л» манос «Культура та̄л». 2016 та̄л ос «Ня̄врам та̄лыг» намаявес. Хунь ня̄врам самын паты, ща̄няге̄на̄щаге̄н ка̄тынвиве, нёвитаве – тыи тав о̄лнэ̄тэ палыт номуӈкве патытэ. Ёмас ща̄ньа̄щил яныгман ня̄врам сымыӈ хо̄тпаг е̄мты, мирн нё̄туӈкве паты, э̄лы хо̄талэ урыл ёмас номтыл сунсуӈкве паты. Ка̄сыӈ ня̄врам ща̄нь ла̄тӈе ма̄нь та̄гыл хӯлуӈкве патытэ те, такви мире мо̄йтыт, пе̄с потрыт хӯнтлуӈкве паты те, тав щёлыӈыг е̄мты, пе̄с йис о̄лупса урыл са̄в номсуӈкв паты. Тамле ня̄врам хунь янгыг е̄мты, тав тах ща̄нь ла̄тӈе ос такви мире э̄руптаӈкве ос янытлаӈкве патытэ». Ты кӯщай э̄ква юипа̄лт Елена Шумакова аквкит ла̄тыӈ ла̄выс, тав округ ос э̄лы хо̄н ма̄ халт тыглетувле тотыглан ля̄ххалыт Департамент колт кӯщаиг о̄лы: «Общественный палатат рӯпитан я̄тил ма̄хум, на̄н ва̄рнэ рӯпатан округт о̄лнэ мирн, ня̄врамытын сака яныг парыс тоты. Ювле хультум та̄лт ам округ кӯщай нэ̄ ёт Сургут ӯсн ялсум, тот ня̄врамыт ёт яныг хо̄нтхатыглап ва̄рыглавес. Са̄в мир атхатыглас, то̄ва омат Наталья Владимировна нупыл потрамасыт, нё̄тмил во̄всыт, ань та̄н а̄гмыӈмосыӈ ня̄враманыл акваг юн о̄лэ̄гыт, нэ̄мхотталь ат ялантэ̄гыт, торыӈ ат ханищтахтэ̄гыт. Кӯщай нэ̄в нё̄туӈкве ла̄выс, ня̄врамаквет ань ханищтахтын ос ёнгасан колытыл щё̄питавет. Ма̄н о̄с са̄всыр программат щё̄питэ̄в, ня̄врамытн грантолныт виӈкве нё̄тэ̄в». Ты юипа̄лт ня̄врам ханищтап ос ӯщлахтын тэ̄лат урыл ма̄хум докладыт ловиньтасыт. Акв нэ̄ Сургутский район Федоровский па̄вылныл ёхталас, «Федоровский центр дополнительного образования» нампа доклад ловиньтас. Кит нэ̄гхумыг Нижневартовск ӯсныл о̄лсы̄г, китыг ос Ханты-Мансийск ӯст о̄лсы̄г. Сака пӯмыщ потрыт щё̄пита̄лсыт, маттем та хӯнтлысув. Ня̄врамыт э̄руптан хо̄тпа са̄в о̄лнэ̄тэ, та̄н ётаныл хо̄та̄ти ялантэ̄гыт, ханищтавет, татем э̄рпыӈыщ о̄ньщавет. Ня̄врамаквет тамле хо̄тпат палт ликме̄гыт те, тай сака ёмас. Ты юипа̄лт та̄н китыт потыр о̄щмыт. Ань ты Общественный палата кӯщай э̄ква Любовь Александровна по̄ханминаме урыл о̄лыс. Тав заявление нэ̄пак хансум, ань ты рӯпатат тав воссыг пуӈк тотуӈкве ат ве̄рми, тав пе̄нтсылэ хотьют вос пе̄рияве. Ты рӯпата тав щар кос ат оссувлытэ, са̄в та̄л аквъёт рӯпитан ма̄хманэ ёт о̄с аквтох э̄лаль рӯпитаӈкве паты. Ма̄хманэ тав ётэ ка̄сащасыт. Округ кӯщай нэ̄ Наталья Комарова тув щалтсас, тав Любовь Александровнан са̄в ёмас сымыӈ ла̄тыӈ ла̄выс, э̄ква янытластэ. Ты юипа̄лт Общественный палатат рӯпитан ма̄хум ка̄тпос пинсыт, кӯщаиг Ирина Максимова пе̄риясаныл. Ты нэ̄ та̄н ётаныл о̄с са̄в та̄л рӯпиты, ты тэ̄ла ёмащакв ва̄гтэ. Ирина Ивановна янгыщ ня̄врамыт ос ма̄ньлат ма̄хум тэ̄ланыл палт пуӈк тоты. Тувыл ос матыр о̄выл ва̄рапа̄лум хо̄тпатын тав акваг нё̄ты. То̄ва турман колыл конква̄лы, о̄лнэ кол ат о̄ньщи, хоталь минуӈкве ат ва̄гтэ. Та хо̄тпат, насати, Ирина Ивановнан пищма хансэ̄гыт, нё̄тмил во̄ве̄гыт, тав ка̄сыӈ хо̄тпан нё̄ты. Округ губернатор ла̄вме щирыл, тав ань ищхӣпыӈ ут хосыт ловиньтастэ, Ирина Ивановна са̄в хо̄тпан омаг ла̄ваве. Ань тамле ёмас, мӯтраӈ нэ̄ Общественный палатат пуӈк тотуӈкве паты.

1119 2016. 03. 10. Николай МЕРОВ

Пенсияолныт мощ но̄хнё̄тве̄сыт Мо̄лалнув Югра ма̄т Россия Пенсионный фондыт кӯщаиг рӯпитан нэ̄ Татьяна Зайцева Ханты-Мансийск ӯс ля̄ххал тотнэ колн ёхталас. Ювле хультум та̄лт ты рӯпата хумус минас, ты та̄лт пенсияолныт манса̄витыг но̄хнё̄тавет ос маныр нё̄тмил пенсияолн винэ хо̄тпатн та̄стувес, тав ты урыл потыртас. Тав ла̄выс: – Юио̄выл та̄лытт округувт пенсияолн винэ ма̄хум акваг та са̄вме̄гыт. Туп мо̄лты та̄л сыс атхуйплов со̄тыран са̄внувег хо̄тпа пенсиян патыс. Та̄л котиль э̄тпос мус округувт ниласа̄т лов со̄тыра пенсионерхо̄тпа ловиньтавес. Тыгыл налыман арыгкем процент яныгпа̄ла хо̄тпат нэ̄мхо̄т ат рӯпитэ̄гыт, туп пенсияолн вуим о̄лэ̄гыт. Ань ат рӯпитан хо̄тпат нила процент са̄витын пенсияолнаныл но̄хнё̄тве̄сыт. Яныг хо̄нтыт ос мо̄т пилыщмаӈ хо̄нтлын накт сакватахтам ма̄хум, а̄гмыӈмосыӈ хо̄тпат ос мо̄таныт са̄т процент са̄витын олнаныл но̄хнё̄тве̄сыт. Ос та яныгпа̄ла хо̄тпат, хотьютыт рӯпитэ̄гыт, та̄н пенсияолнаныл аквты са̄витыг хультэ̄гыт. Туп рӯпатаныл по̄хын минэ̄гыт, та̄ра олнаныл йильпииг ловиньтавет, ос ущта но̄хнё̄тавет тах. Тувыл ще̄мьятын самын патум ня̄враманыл ма̄гыс ойтнэ олн (тав «материнский капиталыг» ла̄ваве) программа ос кит та̄лыгн э̄лаль тотвес. Ты программа 2007 та̄л па̄сныл рӯпиты. То̄нт самын патум ня̄врам ма̄гыс китса̄т атпан со̄тыра солко̄ви майлувес. Ань ниласа̄т атпан со̄тыра солко̄ви ойтаве. Ты та̄лыт сыс яныгса̄ткем со̄тыра ще̄мья сертификатнэ̄пакыл майве̄сыт. Са̄выӈпа̄лэ ще̄мьят ты олнаныл кол ёвтнэ ва̄рмальн холтсаныл. То̄ва ще̄мьят ос ня̄враманыл э̄лаль ханищтан ма̄гыс ойтхатасыт». Кӯщай нэ̄ потре щирыл, пенсиян миннэ нэ̄ хо̄тпатн лӯима̄т хус та̄л рӯпитаӈкве э̄ри. Нэ̄ кит ня̄врам о̄ньщи ке, таве̄н лӯима̄т са̄тхуйплов та̄л рӯпитаӈкве э̄ри, ос пуссын аквъёт хус та̄л рӯпататэ вос о̄лыс. Хум хо̄тпатн ос пенсия мус ва̄т нупыл ат та̄л рӯпитаӈкве э̄ри. Тыгыл хус та̄л лӯима̄т рӯпататэ вос о̄лыс. Пенсият о̄лнэ хо̄тпат, хотьют иӈ рӯпиты, та̄н 2016 та̄лт во̄ртур э̄тпос о̄выл хо̄талэ̄т пенсияолнаныл ос мощ но̄хнё̄тавет.

1119 2016. 03. 10. Николай МЕРОВ

Тӯрва̄т па̄выл ма̄ньщи хум урыл потыр Ха̄льӯс районт нё̄рыт ляпат Тӯрва̄т па̄выл ӯнлы. Тот Самбиндаловыт о̄лэ̄гыт. Ре̄тыӈ ю̄свой э̄тпост ам та̄н палтаныл ялсум. Тот о̄лнэ нэ̄гхумыг Татьяна ос Савва хо̄т ня̄врам янмалтасы̄г. Яныг а̄гитэ̄н Ольга Ня̄хщамво̄ль па̄вылт Дима пыге̄нтыл о̄лэ̄г. Дима тот школат ханищтахты. Пыганэ̄н Олег, Ӯнтари, Илья, Улякщи ос ма̄нь а̄гитэ̄н Ирина кит ня̄врамаге Кристина ос Никита ёт пуссын Тӯрва̄т па̄вылт о̄лэ̄гыт. Хум хо̄тпат пуссын во̄раяе̄гыт. Матахмат та̄л ювле хультум порат та̄н са̄лыл ёвтве̄сыт. Ма̄н ты ще̄мья урыл ва̄тихал хансыглэ̄в. Та̄н о̄лупсаныл хумле о̄лы, ань о̄с ты урыл э̄лаль хансэ̄в. Пыгыт халт щар янгыг Олег о̄лы. Тав ла̄выс, ань йис ма̄нанылт туп ат са̄лы хультыс. Мо̄лты акв са̄лы то̄ревн понигтавес. Ты ва̄рмаль туи по̄рат о̄лыс, то̄рев са̄лы алыстэ, нё̄вле ма̄л лаправтыстэ. Тувыл та̄н та ма̄н лэ̄с ӯнттала̄лсыт, таве ка̄тнпаттысаныл. Ань ты та̄л нё̄рт сака са̄в тӯйт патыс. Таима̄гыс нёхыс щар а̄тим. Таквсы порат са̄тахкем хо̄тал сыс та̄н во̄раян хум хо̄тпат пуссын аквъёт са̄тхуйпловкем са̄вит нёхыс пувыгласыт, тувыл та, воссыг нэ̄матыр а̄тим. Акв нёхыс щар кол ляпан ханьщувла̄лыс. А̄ӈквал по̄хыт пувсаныл. Ка̄сыӈ хо̄тал тув ёхталас, но̄хлю̄ли, па̄выл ляльт та сунсы. Ты нёхсыт ха̄ль нёхсыг ла̄вавет, пуссын ма̄ниг о̄лсыт. Та̄н хотты ма̄ нупыл та̄ра минасыт. Та юипа̄лт воссыг нэ̄матыр ат пувыгласыт. Ке̄рняль по̄хыл миныгла̄лсыт, матрыг тэ̄нэ утын ат новхатасыт. Таквсы порат са̄в тӯйт патыс, а̄мпыл алыщлаӈкве о̄с ат а̄ртмыс. Таима̄гыс нёхыс ты та̄л торыӈ ка̄тын ат паттыгласыт. Таквсы порат Олег кит со̄рпи алас. Нё̄влянэ во̄рт хультупта̄лсанэ. Тув кит нёхсы̄г ханьщувла̄лсы̄г. Нё̄влит хотпурмаге̄н. Тувыл тав ке̄рнялит тув ӯнтталас, сас пувсаге. Аквматнакт тэ̄лы ос «Бураныл» во̄рколн минас. Акв ма̄т ёлпо̄йтыс, ӯщлахтым ӯнлахо̄лыс. Тав палтэ ля̄льт тӯлмах нэ̄глыс. Таве писалил патамтастэ, акв тув та рагатас. Мо̄лты та̄л я̄ӈк на̄тнэ э̄тпост Олег такви ма̄гсылэ йӣвха̄п ва̄рыс. Ты ва̄рмальн нэ̄мхотьютн ат ханищтавес. Нас сунсыс, хумус ва̄раве. Тувыл такви о̄с а̄рталахтын ма̄гыс ва̄руӈкве тахмаяс. Па̄ртыт такви сартсанэ. Ха̄п палытэ онтолов метра о̄лы. Паттатэ ёмщакв са̄грыстэ, ат са̄сы, ат хумплы. Ойттур э̄тпос о̄выл хо̄талэ̄т ха̄пе янытэ̄т а̄стластэ ос яласаӈкве та патыс. Тувыл мощ о̄лыс ос кол ӯнттуӈкве номылматас. Кол ӯнттуӈкве а̄пщиянэ̄н ос а̄ще̄н нё̄твес. Па̄ртыт ос колала ке̄рыт Ня̄хщамво̄ль па̄вылныл тотсанэ. Норыт о̄с такви «Бураныл» Тӯрва̄т па̄вылн хартыгласанэ. Ты кол нила хо̄тпа хӯрум са̄т сыс ӯнттысаныл. Кол кӣвре такем лощит ос посыӈ. Ке̄ркур ӯнттысыт, осыӈ па̄ртыл хуйнэ па̄лыт ва̄рсыт. Ань ты накт Олег та колн тув та о̄лмыгтас. Тамле ты ёмас маньщи хум Тӯрва̄т па̄вылт о̄лы. Йильпи кол ӯнттыс, ань таве̄н нэ̄ тотуӈкве э̄ри. Хоты нэ̄ тав ётэ о̄луӈкве тахмаи ке, ма̄н редакциявн свонитэ̄н ла̄ве̄н, ма̄н ха̄йталаӈкве нё̄тэ̄в тах!

1119 2016. 03. 10. Тамара МЕРОВА

Касум па̄вылт са̄лыӈ ма̄хум кассыт Белоярский район Касум па̄вылт ка̄сыӈ та̄л са̄лыл каснэ нак ва̄рыглаве. Ты та̄л ма̄ньполь э̄тпос хо̄тыт щислат са̄лыӈ ма̄хум касуӈкве акванатхатыгласыт. Тот ань «77 Олимпиада» о̄лыс. Касыл Белоярский район мирколт рӯпитан кӯщаитн э̄лаль тотаве ос таве ва̄рнэ ма̄гыс та̄н спонсорхо̄тпат хо̄та̄ти акваг кинсэ̄гыт. Касум па̄вылт совхозт рӯпитан са̄лыӈ хо̄тпат, Юильск ос Нумто ма̄нь па̄вылкве̄гныл ос та по̄хат та̄нки са̄лыяныл ӯрнэ хо̄тпат касуӈкве тув ёхталэ̄гыт. Ма̄хум па̄вылт о̄лнэ этнографический музей каныт акваг мӯйлэ̄гыт ос та ляпат Амня я̄ ва̄тат са̄лыӈ ма̄хум та̄нки халанылт касэ̄гыт. Тамле ялпыӈ хо̄тал кастыл музей каныт ё̄рнколыт тӯщтавет. Ты та̄л кон ва̄т нупыл са̄т градус о̄лыс ос мощ во̄тыӈыг о̄лыс. Тох тай ма̄хум посыӈ хо̄талыӈ хо̄талт мӯйлысыт. Хантыт, сараныт ос мӯйлуӈкве ёхталам ма̄ньщит та̄нки о̄щнэ маснутыл масхатасыт. Ня̄враманыл о̄с нё̄тнэ маснутыл мастуманыл, та̄н нупланыл такем пӯмащ сунсуӈкве о̄лыс. Та̄н нё̄тнэ сахи, мольщаӈ ос ла̄гыл ре̄гыӈ маснут о̄ньще̄гыт, таима̄гыс ат по̄лявет. Ань музейн щалтнэ ма̄гыс соссаӈ ма̄хум маснутыл масхатам хо̄тпат олн ат ойтсыт. Мо̄т ма̄хум билет висыт, яныгса̄т солко̄ви са̄вит тынэ о̄лыс. Аквхуйплов щё̄сныл нила щё̄с мус тот каснэ ма̄т мӯйлысыт. Са̄лыл каснэ нак суснэ коныпал о̄с са̄всыр программал щё̄пита̄лве̄сыт. Ма̄хум ул вос по̄льве̄сыт, та̄н ё̄рнколн щалтсуӈкве во̄выглаве̄сыт. Тот та̄н ня̄рнё̄влил тыттуве̄сыт, са̄лы нё̄выль исмитыл, исум ща̄ил айтве̄сыт. Кон о̄с сыресыр тэ̄нут, хӯлыӈ ня̄нил ра̄ктыл по̄щгим кӯрытыт ва̄рве̄сыт. Тамле ня̄нь исум та̄гыл ма̄хумн ёвтавет. Тувыл соссаӈ ма̄хум общинат та̄нки ва̄рум пормасаныл, тэ̄нутыт тыналаӈкве тув ёхталасыт. Ань ка̄сыӈ мӯй хо̄тпа са̄лы нё̄выль, хӯл, пил, ла̄хыс ос са̄всыр пормас ёвтуӈкве ве̄рмыс. Акв ма̄т «Театр берестяных масок» ёнгын кол ва̄рыглавес. Тот Касум музейт яныгпа̄лаг о̄лнэ хум Андрей Александрович Ерныхов ос Николай Анатольевич Тасьманов ханты пыгрищит пе̄с тӯлыглапыт ёнгуӈкве ханищтыянэ̄н. Ань то̄ва ощхуль тӯлыглапыт та̄н суссылтасаныл, ма̄хум маткем та мовиньтасыт. Ма̄нь ня̄врамыт ма̄гыс я̄нас ёнгын кол ва̄рыглавес. Та̄н норколт исылтахтынэ̄ныл порат тот сыресыр номтаныл а̄рталан утыл ёнгалтаве̄сыт. Та по̄хат мо̄т колт мӯй хо̄тпат сахил ман мольщаӈыл масапахтыгласыт ос олн ойтым по̄слахтасыт. Мо̄т ма̄т хумит тыньщаӈ па̄хвтысыт, сун ӯлтта поргысыт, пе̄рщисыт. Хотьют ка̄сащас, са̄лы сов тармыл тахсысыт. Та сыс ё̄рнкол хольт ӯнттым па̄рт колт ханты, саран коллективыт э̄ргыт э̄ргысыт ос йӣквсыт. Ос щар яныг пӯмыщ ос э̄рнэ ва̄рмалиг, ва̄им, са̄лы ӯрнэ ма̄хум касыланыл о̄лыс. Касыл о̄вылтан э̄лыпа̄лт Сергей Маненков, Белоярский район кӯщай, мир ёт пащалахтас ос каснэ хо̄тпатн са̄в сымыӈ ла̄тыӈ ла̄выс. «Казымский» совхозт ёмащакв рӯпитан хо̄тпат э̄сгын нэ̄пакыл ос мӯйлупсал майве̄сыт. Тувыл округ губернатор ва̄ӈын хо̄тпа палт советникыг о̄лнэ нэ̄ Людмила Алфёрова потыртас. Кӯщай нэ̄ ла̄вме щирыл, тав Юграт ос Ямалт са̄лыл каснэ са̄в ма̄н яланта̄лыс, ос тамле ёмас ялпыӈ хо̄тал туп ты па̄вылт ва̄рыглаве, тыт сака са̄в сымыӈ хо̄тпат о̄лэ̄гыт. Мо̄т хо̄н ма̄ныл о̄с акв спортсмен хум о̄лыс, наме Шеннон Ритч. Тав Американыл тув ёхталас, ла̄ви, са̄лыт ос тот о̄лнэ ханты, ё̄рн, саран хо̄тпат о̄выл щёс ка̄саласанэ. Ос тав о̄лнэ ма̄тэ̄т такви рӯтанэ щирыл тав «Чокто» индейцатма̄хумныл о̄лы. О̄патэ о̄с ань тыг мус ё̄рнкол хурип колт о̄лы, туп та̄н щиранылт тамле кол «типи» ла̄тӈыл ла̄вияныл. Ань ма̄ янытыл пе̄с о̄лупсат пӯмщалаӈкве ос матыра̄ти та̄рапаттуӈкве тыг ёхтыс. Таве̄н тыт сака мӯстыс. Тувыл жюри хо̄тпат наманыл ла̄вве̄сыт, олимпиада о̄вылтан ма̄гыс Николай Тасьманов во̄виньтавес ос тав флаг но̄ххартыстэ. Ты хум мо̄лты олимпиадат но̄хпатыс. Са̄лыӈ ма̄хум нила касылыт та̄нки халанылт кассыт. Ань «Гонка на рысь» касылт Сергей Петрович Канев но̄хпатыс, китыт местат Николай Павлович Тасьманов о̄лыс, хӯрмит местат – Иван Сергеевич Логаны. Сергей Петрович акв касылт са̄лыянэ илттыг мо̄т ма̄н ха̄йтсыт ос тав ла̄глэ лю̄льсаӈ хо̄яс. Таима̄гыс юв ке̄твес ос тав ЮТЭК рӯпитан колныл моторыл мӯйлуптавес. Мӯйлупсанэ э̄кватэ̄н майве̄сыт. «Гонка на мах» нампа касылт ос Сергей Петрович Канев но̄хпатыс, китыт места Иван Сергеевич Логаны вистэ ос хӯрмитыг Михаил Кузьмич Молданов ёхтыгпас. Но̄хпатум хо̄тпат мӯйлупсал ос э̄сгын нэ̄пакыл Касум па̄выл кӯщай нэ̄н Алсу Касимовна Назырован ос таве̄н нё̄тнэ нэ̄н Валентина Семёновна Бочкарёван мӯйлуптаве̄сыт. Тувыл «Гонка на амдёре» нампа касылт Иван Сергеевич Логаны но̄хпатыс ос маснут поснэ ищхӣпыӈ утыл мӯйлуптавес. Ты э̄лыпа̄лт ты хум китыт ос хӯрмит места вуйлас. Китыт местат Леонид Константинович Пяк о̄лыс ос хӯрмиттыг Пётр Алексеевич Попов. «Гонка стоя на нартах» нампа касылт Иван Алексеевич Попов но̄хпатыс, тав ищхӣпыӈ телевизорыл майвес. Тав юипа̄лэ̄т Тарлин Юрий Кузьмич ёхтыс. Хум предпринимательо̄йкан Олег Густавович Шатинын на̄йив сартнэ утыл мӯйлуптавес. Хӯрмит места Николай Александрович Кантеров вис. «Гонка на лыжах» нампа касылт Юрий Кузьмич Тарлин но̄хпатыс, ты ханты хум холодильникыл мӯйлуптавес. Михаил Кузьмич Молданов китыт места вис ос Попов Иван Алексеевич хӯрмиттыг о̄лыс. Ты хум туп 2, 10 секундан Молдановыныл юв хультыс. Э̄кват ос я̄нас кассыт. Тот Светлана Владимировна Канева но̄хпатыс (Сергей Канев э̄кватэ). Тувыл Анастасия Ивановна Попова китыт места вис. Мо̄лты та̄лт ты а̄ги ма̄ньлат ма̄хум халт касыс, ань 18 та̄лэ то̄влыс ос яныг ма̄хум халт касы. Хӯрмиттыг Лариса Александровна Попова о̄лыс. Э̄кват халт Сургутский районныл ёхталам мӯй нэ Валентина Тэвлина ёмщакв о̄с касыс, тав нэ̄пакн хансым та̄ра ат о̄лыс, таима̄гыс касылн ат ловиньтавес. Ма̄ньлат а̄гитпыгыт каснэ ва̄рмальт Денис Попов но̄хпатыс, китыт места Вероника Кантерова о̄лыс, хӯрмит местат – Татьяна Попова. Тувыл то̄ва са̄лы ӯрнэ ма̄хум бригадат ма̄гыс округ депутат Леонид Владимирович Михалко олннё̄тмил щё̄питас. Тох №3 бригада кӯщай хум Пётр Алексевич Попов, №5 бригада кӯщай хум Константин Николаевич Канев ос №6 бригада кӯщай хум Иосиф Сергеевич Попов олныл мӯйлуптаве̄сыт. Ань пуссын но̄хпатум са̄лыӈ хо̄тпат ты э̄тпост Ханты-Мансийскан окружной олимпиадан во̄вавет. Ты ва̄рмаль ва̄т нупыл нилыт хо̄талт ва̄раве тах.

1119 2016. 03. 10. Валентина УЗЕЛЬ

Ты а̄ги яныг ма̄щтырыг тах е̄мты Ты хурит Сургут ӯст о̄лнэ ма̄ньщи а̄ги Людмила Николаевна Мелентьева по̄слым о̄лы. Тав ань «Старый Сургут» нампа музеиӈ ма̄т ма̄щтырлан хо̄тпаг рӯпиты. Тав ётэ ам ювле хультум э̄тпос 13 хо̄талэ̄т хо̄нтхатыгласум. Та хо̄тал та̄н рӯпитан ма̄нылт пӯрлахтын кан ва̄рыгласыт, Э̄тпосув яныгман кастыл пӯрлахтасыт. Людмила такви рӯпататэ урыл, рӯтанэ урыл а̄нумн потыртас. Тав ань ва̄т нупыл нёлолов та̄лэ то̄влыс. Колта̄гланылт тав щар яныг а̄ги. Тав ёлыпал а̄пщиянэ, э̄щанэ яныгме̄гыт. О̄магеа̄тяге о̄влэ̄т Потрасӯй па̄вылт о̄лсы̄г, тот акванминасы̄г. Тувыл Та̄гт па̄вылн ва̄нтлысы̄г. Люда самын патме порат оматэ̄н хо̄тхуйплов та̄л то̄влыс. Оматэ такви а̄ги о̄парищ наме Остерова. Нэ̄гхумыг тэ̄нти халэ̄нт юн ма̄ньщи ла̄тӈыл потыртэ̄г, ня̄враманэ̄н пуссын торгамтэ̄гыт ос потыртаӈкв сака ат ве̄рме̄гыт. Люда школа юипа̄лт Югорский университетт ханищтахтас. Тувыл Саранпа̄вылн минас, тот та̄л арыгтем рӯпитас. ДЮЦ (детскоюношеский центр) колн ялантан ня̄врамыт ма̄щтырлаӈкв ханищтасанэ – та̄н ю̄нсхатасыт, са̄всыр пормасыт сэ̄тапыл сагсыт, сакныл хорамыт хартсыт. 2013 та̄лт Сургут ӯсн минас, соссаӈ мир ма̄щтырлан колн рӯпитаӈкв во̄ввес. Ты кол «Пе̄с Сургут» музей нупыл хансым о̄лы. Тот ма̄щтырлаӈкв та о̄вылтахтас, ва̄рнэ рӯпататэ рущ ла̄тӈыл тох ла̄ваве – художникконструктор. Тот рӯпитанэ̄тэ моще̄ртын хӯрум та̄лыг ты е̄мты. Ты тит та̄л сыс са̄всыр йильпи щаквщин ва̄рмальн ханищтахтас. Такви ма̄ньта̄гыл сак харты, тувыл са̄всыр пормас, па̄ссат ман щулкиныт саги. Ос ань ма̄к соссаӈ мир пормас ва̄руӈкв та ханьщувлас. А̄ги ла̄выс: «Ань щар ма̄к яныг учителягум – ты Александр Дмитриевич Сайнахов ос Мария Владимировна Ситникова. Тэ̄н ты а̄нумн сака нё̄тэ̄г. Таквсы Саша ёт ме̄н во̄рн ялсуме̄н, са̄с нуйсуме̄н, ӯльпа та̄рыт, ля̄мйивыт са̄грысаме̄н. Са̄в щё̄питасме̄н, ань та̄л сыс пуссын вос то̄влаве̄в». Ам Люда титыгласлум, та яныт ӯскапайт о̄лэ̄гыт, атум утаныл хо̄т о̄ньщияныл. Тав ювле ла̄выс, рӯпитан кол колалатэ̄т тот пуссын хуе̄гыт. Мо̄лты та̄л Людмила Лянтор ӯсн ялыс. Тот ма̄щтырлан ма̄хум акванатыглаве̄сыт. Та ӯст ханты нэ̄ Анжела Егоровна Обирина о̄лы, са̄всыр щирыл щаквщуӈкв ха̄сы. Тав ма̄хум совъя ва̄й ю̄нтуӈкв ханищтасанэ, са̄лы сов ка̄миньтаг хумус тынтлуӈкв э̄ри, хумус йинуӈкв, о̄льпыл хумус сартуӈкв, та̄нанылн пуссын суссылтас. Тав ты кастыл ёмащакв щё̄питахтам. О̄льп та̄н та̄нти ва̄рмыт, на̄ӈк йӣв сӯлыл па̄йтмыт. Ань Люда ла̄выс, таве̄н тот татем пӯмыщ о̄лыс. Тӯяг та̄н та̄нти во̄рн тах ялэ̄гыт, на̄ӈк те хо̄нтэ̄гыт, сӯл атэ̄гыт. Тувыл та сӯлныл о̄льп па̄йтуӈкв номсэ̄гыт. Нижневартовский районт о̄лнэ Аган па̄вылн та̄н тув о̄с во̄виньта̄лве̄сыт. Тот ос те̄ранак ва̄руӈкв ханищтаве̄сыт. Тувыл ёхтыс, такви хумус ве̄рми, э̄лаль ва̄руӈкв та патыстэ. Ань те̄ранак паттатэ ты а̄стыс. А̄ги ты рӯпататэ урыл тох ла̄выс: «Ӯльпа та̄рыл матыр сагуаӈкв сака та̄рвитыӈ. О̄влэ̄т рӯпатам ат а̄ртмыс, тувыл ла̄щалла̄щал та̄р ёт рупитаӈкв та ханьщувласум». Сэ̄тапыл пормасыт тав о̄с саги. Школат ханищтахтаме̄т сагуӈкв о̄вылтахтас. Ос рӯпитан ма̄тэ̄т нас пормасыт сагуӈкв хунь патэ̄гын, соссаӈ мир пормас пе̄с щирыл сагуӈкв э̄ри. Рӯпитаӈкв о̄вылтахтаме порат акв э̄тпос сыс щулкин акв пара туп сагуӈкв а̄лымас, ань тит пара саги. Тамле щулкиныт А̄с ма̄хум ань тыг мус о̄ньщияныл. Ос та̄н рущ щирыл ат сагавет, нуми е̄ре сагуӈкв Люда Нижневартовский район Излучинск па̄вылт ханищтавес. Та̄н тот 2015 та̄лт атыглаве̄сыт. Тот атхатыглам ма̄хум са̄ӈквылтаӈкв ос матыр ва̄руӈкв ханищтаве̄сыт. А̄гит, нэ̄т ос сэ̄тапыл пормасыт сагсыт. Щулкиныт сагнэ порат хансат о̄влэ̄т нэ̄пакн по̄слуӈкв э̄ре̄гыт. Ат те по̄славет, хорамыт ёмащакв тах ат тэ̄лэ̄гыт. Аквнакт музей кӯщаяныл та̄нанылн ла̄выс, матыр йильпи пормас ман ёнгын ут вос ва̄ре̄гыт, тамле ут соссаӈ мир нэ̄мхо̄т ул вос о̄щсыт. Люда а̄канит ю̄нтуӈкв вуйхатас. А̄канянэ ёмащакв ос нё̄тнэг ва̄рсанэ, ань та̄н та тыналавет. Тыт рӯпитанэ̄тэ сыс тав хусахтем а̄кань ю̄нтыс. Люда титыгласлум, ма̄ньщи супыт ю̄нтуӈкв номтэ паты ман а̄ти. Тав ювле ла̄выс: «Ам са̄сныл хусапыт ва̄руӈкв ханищтахтасум, сэ̄тапыл пормасыт саге̄гум, сакныл хартуӈкв о̄с ёмащакв ха̄сэ̄гум. Ос ма̄ньщи суп ю̄нтуӈкв ань ат таӈхе̄гум, э̄рыӈ ётылнув ю̄нсхатуӈкв о̄вылтахтэ̄гум». Та̄н палтаныл ма̄нь ня̄врамыт тотыглавет. Ань ӯст о̄лнэ ня̄врамыт ма̄ньщи ос ханты культура урыл торыӈыщ нэ̄матыр ат ва̄гыт. Та̄н соссаӈ ма̄хманув рӯпитан колн тотавет, та̄н татем пӯмщалахтэ̄гыт, матыр пормас масапа̄луӈкв ве̄рме̄гыт. Сакыл мивет, хорамыт хартым та ӯнлантэ̄гыт. Людмила ма̄щтырланэ̄тэ коныпал каснэ ма̄н о̄с яланты. Ёсал ха̄йтуӈкв сака ха̄сы. Тӯяг «Лыжня Андрея» о̄лнэ̄тэ порат тот мо̄т ма̄хум ёт касы. Но̄хпатыгламе ма̄гыс тав ме̄талил ос са̄всыр янытлан нэ̄пакыл мӯйлуптавес. Оматэ, а̄тятэ, а̄пщирищанэ ос йигрищанэ та̄л ка̄сэ холас. Тав ла̄выс: «Та̄н пуссын Та̄гт па̄вылт о̄лэ̄гыт, ам амттем тыт о̄лэ̄гум. Туи порат юв ялсум, ань тӯяг та̄ртавем те, о̄с тах юв ялэ̄гум. Тит а̄пщиягум Коля ос Вася, Галя э̄щум та̄н рӯпитэ̄гыт. Мишав ос Таняв школат ханищтахтэ̄г, Таняв о̄выл классын минас, са̄т та̄лэ то̄влыс. Омав 1970 та̄лт самын патыс, ты та̄л атпан нупыл хо̄т та̄лэ тах то̄влы. А̄тяв 1953 та̄лт самын патыс, са̄тлов нупыл хӯрум та̄лэ тах то̄влы. Тэ̄н са̄в та̄л аквъёт о̄лэ̄г, омам хум ва̄рме порат атхуйплов та̄лэ о̄лыс. Тувыл ам самын патсум. Ам та̄наныл пуссын э̄руптыянум, паща ла̄тӈыл те̄тыянум». Тамле ты ёмас ма̄ньщи а̄ги ёт ва̄йхатасум. Тав ма̄щтырлаӈкв сака ка̄сащи. Ма̄ньщи нэ̄ йӣквыт йӣквуӈкв сака ха̄сы. Матах та̄л мины, Людмила Николаевна Мелентьева намыӈсуиӈ ма̄щтыр хо̄тпаг тах е̄мты. Маныр рӯпатан вуйхаты, пуссын ве̄рми, пуссын ха̄сы. Ма̄н Люда ос тав омагеа̄тяге са̄в ёмас сымыӈ ла̄тӈыл ла̄виянӯв. А̄гитэ̄н тамле ёмас хо̄тпаг та яныгмас. То̄румн-О̄тырн пуссын вос ӯргалавет, пуста̄гыл вос о̄лэ̄гыт.

1119 2016. 03. 10. Тамара МЕРОВА

На̄й-О̄тыранув урыл пе̄с потрыт рущ ла̄тӈыл хасве̄сыт Юван Шесталов мо̄йтыӈ хосат та̄гыл о̄вылтам тэ̄латэ э̄ще̄н ос рущ руманэ̄н тахольт э̄лаль тотаве. Ань та̄н «Именитые богатыри обского края» нампа хӯрмит нэ̄пак та̄ратасыт. Нэ̄пакыт та̄ратан ма̄гыс та̄н акваг проект щё̄пита̄лэ̄гыт. Мо̄лал та̄н культура департамент па̄лыл грантолныл майве̄сыт. Ты олн лӯима ма̄хум пе̄с йис ва̄рмаляныл ӯргалан ос э̄лаль тотнэ ма̄гыс округ бюджетныл та̄ставе. Ань хӯрмит та̄ратам нэ̄паканыл суссылтаӈкве авторхо̄тпат «То̄рум Маа» нампа музейн ма̄хум акванатыгласаныл ос та̄нки рӯпатаныл урыл потыртасыт. Тамле ва̄рмалит ма̄навн таи сака мӯсты, ты пе̄с йис потрыт ма̄н йильпи о̄лнэ нотувт ма̄хумн ва̄ӈкве патавет. Пе̄с ма̄ньщиянув халт венгр учёныитн атым потрыт, мо̄йтыт, э̄ргыт ань рущ щирыл ловиньтаӈкве ве̄рмавет. Ма̄ньщи потранув, мо̄йтанув, э̄рганув 1843-1945 та̄лытт Антал Регули тыг ёхталам порат нэ̄пакн хассанэ, тувыл ос 1888-1889 та̄лытт Бернат Мункачи ёхталас. Тэ̄н атыглам пе̄с потранэ̄н 20 нот палыт венгр учёныит та̄нки ща̄нь ла̄тӈыг ос ётылнув немец ла̄тӈыг пуссын толмащлаве̄сыт ос нэ̄пакыг ва̄рве̄сыт. Бернат Мункачи 1892-1921 та̄лыт сыс «Собрание вогульской народной поэзии» нила нэ̄пак венгр ла̄тӈыг хассанэ. Ос ты пе̄с йис ма̄ньщи потранув рущ ла̄тӈыл ущты толмащлаӈкве патве̄сыт. «Именитые богатыри обского края» намаим о̄выл нэ̄пак 2010 та̄лт та̄ратавес. То̄нт йис мо̄йтыт Юван Николаевич такви щё̄питасанэ. Ос ма̄ньщи На̄й-О̄тыранув урыл пе̄с йис потрыт, мо̄йтыт рущ ла̄тӈын толмащлаӈкве кит ма̄ньщи нэ̄гн нё̄твес, тыи филологический наукат кандидатнэ̄ Светлана Динисламова ос «То̄рум Маа» музейт рӯпитан Альбина Мехнина. Тот потрыт пуссын хӯрмыг уртым о̄лэ̄гыт: ма̄ньщи ла̄тӈыл, венгр ос рущ ла̄тӈыг. Венгерский ла̄тӈыл хансым потрыт Юдит Дмитриева ловиньтасанэ ос ёмщакв щё̄питасанэ. Акв тамле китыт ос хӯрмит нэ̄пакыг та нэ̄т э̄лаль щё̄питасаныл. Китыт нэ̄пак та̄н 2012 та̄лт ва̄рсаныл, ос ты та̄л хӯрмит нэ̄пак та̄ратавес. О̄выл нэ̄пак щё̄питаманыл порат Юван Николаевич такви ляпа рӯпитан ма̄хманэ акванатыгласанэ. То̄нт потрыт Герман Николаевич Ионинын, Лӯима ма̄хум институтт рӯпитан профессоро̄йкан, рущ ла̄тӈыл толмащлаве̄сыт. Ма̄н ма̄ньщи профессорув Анастасия Ильинична Сайнахова та̄наныл ёмащакв ловиньтасанэ ос ат торгамтахтын ла̄тӈыт ёмщакв хӯлтсанэ. Тав а̄гитэ Динара Саидовна Гындыбина нэ̄пакн хансым потрыт пуссын ищхӣпыӈ утн печатайтасанэ. Мо̄т нэ̄пакт то̄ва потрыт Юван Шесталов о̄с акв рущ руматэ̄н Вадим Борисович Орловын толмащлаве̄сыт. Юван Николаевич ты ма̄хманэ «рабочий группаг» ла̄всанэ. Ань ты хӯрмит нэ̄пак ва̄рманыл порат та̄н В. С. Иванован, Е. В. Косинцеван, С. А. Герасимован ос Т. С. Мерован нё̄тве̄сыт. Ты нэ̄пакт ма̄ньщи йис Во̄ръя-О̄тырт тэ̄рниӈ э̄рыг, Хо̄нтаӈ Лӯи-О̄трыг мо̄йтыт ла̄вим тэ̄рниӈ э̄рыг, О̄тыр понсуп саӈвлы ня̄р а̄лумпа̄лт тэ̄лум Та̄ръяим – Ко̄ръяим тэ̄рниӈ э̄рыг, Полум-То̄рум О̄йка тэ̄рниӈ э̄рге, Сакв-Сӯнт-То̄рум-Пыг-О̄йка тэ̄рниӈ э̄рге, Ло̄пыӈ-Ӯс-О̄йка кайсов, Куль-О̄тыр кайсов ос Калтащ-А̄ги винэ мо̄йт-О̄тыр Нэ̄ винэ мо̄йт рущ ла̄тӈыг толмащлаве̄сыт. Мункачи о̄йкан хансым пе̄с потрыт, мо̄йтыт то̄ват та̄гт ма̄ньщи ла̄тӈыл потырта̄лве̄сыт, мо̄таныт лӯсум ма̄ньщи ла̄тӈыл о̄лэ̄гыт. Ща̄нь ла̄тыӈ ва̄нэ хо̄тпатн та̄н ёмщакв торгамтахтэ̄гыт. Тувыл аквта тамле мо̄йтыт, э̄ргыт такем номтыӈыщ потыртаве̄сыт, пе̄с йис о̄лыглам накыт пуссын То̄рум А̄щн мӯйлуптым ла̄тӈув щирыл э̄лаль та хультсыт. Ма̄н номсэ̄в, ань ты йис потранув ловиньтан рущитн манос мо̄т хо̄тпатн ва̄рум нэ̄пакув о̄с мӯсты. Тувыл та̄н ма̄н о̄лупсав нупыл сымыӈыщ, мӯтраӈыг ос номтыӈыг сунсуӈкве патэ̄гыт. То̄рум А̄щн тэ̄лтым ма̄вит, э̄лумхо̄лас лылые̄п э̄лаль ӯргалым вос о̄ньщияныл. Ма̄н ос мат палыт о̄луӈкве ла̄ввесӯв, та палыт ма̄нки На̄й-О̄тыранув нупыл по̄икщаӈкве патэ̄в.

1119 2016. 03. 10. Галина КОНДИНА

Ща̄рщит хумус солвалыӈыг е̄мтсыт О̄лсы̄гхӯлсы̄г тит хум, тит ягпыг. Тит кол мус о̄лэ̄г. Акватэ щёлыӈ, акватэ нуса, та о̄лэ̄г. Хоса о̄лэ̄г, ва̄ти о̄лэ̄г. Аквматэ̄ртын ань ма̄ньнув хум э̄кватэ ла̄ви: – О̄йка, каӈкын палт ялэн, нэ̄матыр ат о̄ньщиме̄н, матыр во̄вен. Хум щар ат ка̄сащас кос, ӯнлахо̄лыс, тыстувъяс, каӈке палт та минас. Тув ёхтыс, ла̄ви: – Ме̄н нэ̄матыр ат о̄ньщиме̄н тэ̄ӈкв. Матыр ат мыгын? Каӈке хоткантмаявес: – Маныр акваг во̄ве̄гын, – пӯрщ пуӈкыл мистэ, – та, вуе̄лн, минэн. Ты мус ла̄выс: – Куль лё̄ӈхын минэн. Хум тав ва̄гтэ хунь, ат ва̄гтэ, хо̄т о̄лы куль лё̄х? – Каӈкумн те̄тве̄сум, майве̄сум, э̄ри минуӈкв. Юн тай э̄кватэ та ӯрхаты. Лё̄х хосыт та ё̄ми. Минас, ёхтыс, акв ма̄т о̄йка на̄йив халталы, са̄гри. – Аким о̄йк, ам каӈкумн куль палт те̄тве̄сум. А хо̄т тамле хо̄тпа о̄лы? О̄йка ла̄ви: – Тыт ты лё̄хъяс, тыгыл минэн, тув та ёхтэ̄гын. Тув ёхтэ̄гын, тав тит йӣвсуп о̄ньщи. Наӈ тах акв утэ, пе̄с утэ вуен. Ювле ам палтум ёхтэн. Тув ёхтыс, ня̄врамыт кон ха̄йтыгтэ̄гыт, ла̄ве̄гыт: – А̄тя, а̄тя, э̄лумхо̄лас ёхтыс, сунсэн, пӯрщ пуӈк тотыс, ёвтэ̄лн. Хум ё̄мыгты: – Тав маныр тынэ пӯрщ пуӈк? Наӈ маныр во̄ве̄гын? – А̄нумн йӣвсуп э̄ри. (Колас сакватан йӣвсуп э̄лнаӈ о̄лы). – Ам пе̄снув утыл мыглум. Тав ханылпаттан ма̄гумтастэ, ювле та мины. Та лё̄х хосыт та ё̄ми. Ёхтыс, о̄йка лю̄ляхо̄лы. – Ань наӈ ты майве̄сын. Хунь матыра̄ти э̄рмыглы, ӯнттэ̄лн, ла̄вен, хунь по̄илттаӈкв патылын, ла̄вен: «По̄йтэн». Ята, минас, юв ёхтуме̄т э̄тимас, э̄кватэ ла̄всы: – Манрыг хоса ялсын. Ам такос ӯрхатэ̄гум. Ты маныр тотсын? – Ам хунь ва̄глум матыр. Маим утум. Майвес, та майвес. – Ань лай тыиме̄н ӯнттыме̄н, тах маныр ла̄виме̄н, тэ̄нут нэ̄глы. Ӯнттыстэ, та тэ̄нут ла̄выс, аман ла̄выс «ня̄нь» тувыл ос «хӯл» ман матыр. Ань йӣвсуп та ё̄ӈхи, тэ̄нутыт та нэ̄глэ̄гыт. Тувыл маныр ла̄всы̄г – нэ̄глыс. Ты тэ̄пъяласы̄г. Тэ̄пъяласы̄г, э̄кватэ ла̄ви: – Тахольт ёмас ут тотмын, ань ты тэ̄сме̄н. Тувыл маныр э̄рмыглы, ӯнттыгпитэ̄н, тамле та нэ̄глы. Аквматэ̄ртын каӈке сунсы: – А̄пщирищум ос тэ̄нутыӈыг е̄мтум, ам палтум во̄вуӈкв воссыг ат ёхты. Акв порат каӈке ла̄ви: – Тах лай а̄нумн майлэ̄лн ты тэ̄нут ва̄рнутын. – Тыи тай ам тэ̄лы тах ат мыглум. Туи тах ущ мыглум. Туииг е̄мтыс, каӈке мистэ, кон ма̄н ань тэ̄нут ва̄рнэ коланувт хольт, кон ӯнттыстэ. Матыр ялпыӈ хо̄тал ма̄гыс кищель ла̄выс, нялк. Акваг та нэ̄глысыт. Ань ёлпо̄илттаӈкв ла̄вуӈкв ат ха̄сы, э̄кватэ юн кол тӣвырт о̄лыс, кон нэ̄глыс. Яа, ань па̄вылканэ акваг кищелил со̄сантыма. – О̄йка, лай, маныр ва̄рсын, яа, па̄вылканме̄н лап та со̄сантаслын. Хоталь тыса̄вит тотылме̄н. Тувыл а̄пщитэ палт минас, ла̄ви: – Та утн хотпо̄илттэ̄лын. Ам ат ха̄сэ̄гум. Па̄вылканув ты та̄гиньтас. Хум по̄илттастэ, хотвистэ, ос та юипа̄лт щар ат мистэ, ос аты ла̄ви щар нэ̄мхотьютын хумус хотпо̄илттаӈкве. Та о̄лы, маныр ат ла̄ви – таи та нэ̄глы. Колэ лю̄ль о̄лыс, кол ва̄рнэ матыр ла̄ви, тамле ут о̄с нэ̄глы. Колэ ёмасыг ва̄рыстэ. Акваг маныр э̄ри, таи та ла̄ви. Со̄рни ла̄ви – со̄рни нэ̄глы. О̄влэ̄т нас тох матыр, тувыл со̄рни туля матыр пуссын е̄мтыс. Колэ акваг щё̄питастэ, э̄лыл нэ̄главе – ӯнлынэ̄т та на̄ӈки, янытэ̄т со̄рни. – А̄пщирищум тай щёлыӈыг та е̄мтыс, – акваг та ощатахтыглы а̄пщирище̄тыл. Тувыл о̄лыманыл хо̄н а̄ги рӯпат ма̄хманэ нупыл ла̄ви: – А̄нумн солвал э̄ри, солвал тэ̄ӈкв таӈхе̄гум. Та̄н ма̄ янытэ̄тыл ялыяныл. То̄нт ань па̄рсыӈ ха̄пытыл яласэ̄гыт. Ма̄ янытэ̄тыл ялыяныл, нэ̄мхо̄т солвал ат хо̄нтэ̄гыт. Яласасыт, яласасыт, тувыл та хум каӈке ла̄ви: – Наӈ а̄пщирищум титыглэн. Тав тах хо̄т солвал хо̄нты. Ёхтум хум тув минас, титыглахты: – Ты йӣвсуп а̄нумн мае̄лн. – А̄ти, ат мыглум. Тыттувес, айтвес, э̄тимаӈкв патыс, та̄нти пӯи колн хуясыт. Ёхтум руматэ тав колэ̄т хуюӈкв ты ла̄ви. – Наӈ, лай, юи колн хуен. – А̄ти, ам тыт тэ̄нут ва̄рнэ колт, коны колт хуе̄гум. Ань йӣвсуп пасант ӯнлы. Тувыл хум но̄хква̄лыс, яа, йӣвсупе а̄тим. Та руматэ̄н хот та тӯлмантым. Та румат ань па̄рсыӈ ха̄пыл яласэ̄гыт, ща̄рыщ ва̄тат о̄лэ̄гыт. Рума йӣвсуп ха̄пе̄н тотыстэ, ӯнттыстэ, ла̄ви: – Солвал э̄ри. Со̄ль, акваг ха̄паныл солвалыл та та̄гиньтас. Та̄гиньтас, хот такос ё̄хтэ̄гыт, хот та ё̄хтэ̄гыт, ё̄хтэ̄гыт, ань ат ла̄вияныл, тав тай солвал та нуяве, та та̄гиньтэ̄гыт. Ётыо̄вылт ща̄рще та̄гиньтас. Мо̄т ща̄рщит о̄с патве̄сыт. Ань та йӣвсуп аквматэ̄ртын ёл та минас, солвал нэ̄гылттам йӣвсупаныл. Тувыл ань ща̄рщит таима̄гыс солвалыӈыт. Ань та йӣвсуп тот ёлн та о̄лы. Мо̄йтум ты са̄витэ. Мо̄йт Аксинья Степановна Мерова мо̄йтыгластэ, С. А. Попован ищхӣпыӈ утын хасвес, Г. Кондина нэ̄пакн хансыстэ.

1119 2016. 03. 10. Е. А. Ромбандеева

Яныг утыт ос ма̄нь утыт Витуй ос витуй нЯ̄врамыт Ма̄н, витуит, йӣв пуре̄в, ма̄н ёлпаттыянӯв, охсаг уртыянӯв. Охсаныл ма̄н рамиянӯв, йӣв товн пе̄риянӯв, тувыл лывил ос ма̄л по̄щгиянӯв, лэ̄гыл ва̄рщатаптыглыянӯв. Во̄р со̄юмкве овты, ос по̄римус та̄к, хоса я̄рппи ва̄рима. Со̄юмкве во̄р янытыл та̄рамлы – ос лус во̄ӈхаг е̄мты. Тав котле̄н ма̄н осыӈ колпо̄хта, вит ёлыпа̄л а̄виӈ кол ва̄ре̄в. Лус ӯлтта ма̄н колувн нэ̄мхо̄тпа ва̄ӈкуӈкве ат ве̄рми, ма̄н колалав нэ̄мхо̄тпан ат сакватаве, вит ёлыпа̄л а̄виюв ат хо̄нтаве. Витуй ня̄врамыт, йӣв пуруӈкве ханищтахтэ̄н, та̄нныл я̄рппи ва̄руӈкве ханищтахтэ̄н. Ты потырохса «Яныг утыт ос ма̄нь утыт» нэ̄пакныл вислӯв, Е. И. Ромбандеева таве ма̄ньщи ла̄тӈыг толмащластэ, 1951 та̄л.

1120 2016. 03. 24. Тамара МЕРОВА

Ищхӣпыӈ утыт округ янытыл вос рӯпитасыт Губернатор нэ̄ Наталья Комарова то̄ва кӯщаит акванатыгласанэ ос та̄н ищхӣпыӈ утыт ёт рӯпатаныл урыл потыртасыт. Ань э̄лумхо̄лас са̄всыр документанэ туп нэ̄пакло̄псыт ул вос о̄лсыт, та̄н ищхӣпыӈ утын хансавет. Таима̄гыс та̄н та̄нки наманыл ос сыресыр по̄саныл «госуслуга» нампа округ порталт хӯлтуӈкве э̄ре̄гыт. Рущ щирыл ты тэ̄ланыл «электронное Правительство Югры» намтым о̄лы. То̄нт ма̄хум са̄всыр ва̄рмаляныл ищхӣпыӈ утын пуссын хансавет ос та̄н тэ̄ланыл кӯщаитн ва̄ӈкве патавет. Тувыл таи ёмас, ма̄хум та̄нки ма̄гсыланыл нё̄тмил китыгланэ̄ныл порат, пусмалтахтын манос ханищтахтын порат пуссын э̄рнэ нэ̄паканыл ищхӣпыӈ утыт акванатым о̄лэ̄гыт. Са̄в ма̄т ха̄йтыгтым арыг документанэ ёт тотыглаӈкве ат э̄ре̄гыт. Ань 2015 та̄л сыс округ янытыл 369 со̄тыра э̄лумхо̄лас «госуслуга порталн» хасхатасыт, 2014 та̄лт туп 103 со̄тыра э̄лумхо̄лас хасхатым о̄лыс. Тамле тэ̄лат информационный общество развитие нампа Институтн о̄с уральтавет. Та̄н ань ла̄всыт, Юграт о̄лнэ ма̄хум кӯщаитн ёмщакв ва̄вет, таима̄гыс Россия янытыл ма̄н ма̄в нилыт местат о̄лы. Тувыл ма̄хум пуста̄гыл о̄луӈкве ос нэ̄мат лю̄ль ва̄рмаль та̄н ётаныл ул вос е̄мталас, ӯсхулыт, то̄ва о̄лнэ колыт видеокамерал щё̄питавет. Ма̄шинат ос тамле утыл ва̄равет, тох матыра̄ти лю̄ль накыт та̄ра оснпатэ̄гыт. Тамле ва̄рнутыт ГЛОНАСС ла̄тӈыг ла̄ваве ос пуссын матыр ва̄рмалит спутник щирыл сунсыглавет. Ань тыг мус 6, 5 со̄тыра ма̄шинат ты утыл щё̄питаве̄сыт. Ма̄нь па̄влыт интернетыл о̄с ва̄равет. Ты тэ̄лат мӯсхалыг тотнэ ма̄гыс сапра̄нит Юрий Ильич Торгашин ищхӣпыӈ утыт ёт рӯпитан Департаментыт кӯщай хум китыглавес. Школат ханищтахтын ня̄врамыт оценканыл ань "электронный дневник" щирыл сунсуӈкве ро̄ви. Тувыл ма̄хум ле̄ккарыт палт талоныт винэ ма̄гыс о̄с ищхӣпыӈ ут хосыт хасылтахтуӈкве ве̄рме̄гыт. Округувт ӯсытт ос ма̄нь па̄влыӈ ма̄т о̄лнэ 98 пӯльницат пуссын ищхӣпыӈ утыл ва̄рим о̄лэ̄гыт, о̄с тох э̄лаль рӯпитаӈкве ве̄рме̄гыт. Ма̄хум "Регистратура86. рф" ло̄пс вос хо̄нтэ̄гыт, тувыл та̄нанылн э̄рнэ ле̄ккар вос хо̄нтэ̄гыт ос тув хасхатэ̄гыт. Хо̄тпа такви наме, паспорт ос телефон номере, медицинский полисэ госуслугат ёмщакв хӯлтым ке о̄лэ̄гыт, то̄нт тав талон та̄ра виӈкв ве̄рми.

1120 2016. 03. 24. Людмила ТЕТКИНА

Кӯщай нэ̄ сапра̄ни ва̄рыглас Ханты-Мансийск ӯст Наталья Комарова, округ кӯщай нэ̄, сапра̄ни ва̄рыглас ос са̄всыр кӯщаит тув во̄виньта̄лсанэ. Та̄н тот акв тэ̄ла урыл потыртасыт, рущ ла̄тӈыл «коррупцияг» ла̄ваве. Наталья Комарова ма̄хумн ла̄выс: «2015 та̄лт ма̄н са̄всыр э̄рнэ нэ̄пакыт хассӯв ос са̄ккон пирмайтасӯв, ань общественный организацият ос тыт о̄лнэ мир кӯщаит рӯпатаныл уральтым о̄ньщуӈкве патыяныл. Округ янытыл пӯльницат, ханищтахтын колыт ос о̄лнэ колыт хумус ӯнттавет, ма̄шинат яласан лё̄ӈхыт хумус пинавет та̄н китыглахтуӈкве ве̄рме̄гыт. Манаса̄вит олн тув холтсыт ос мӯсхалыг рӯпатаныл ва̄рсаныл ман а̄ти, ма̄хум та̄рапаттыяныл. Ты рӯпата ма̄н таима̄гсыл ва̄рилӯв, миркол кӯщаит, кол ӯнттын хо̄тпат ос мо̄т ма̄хум бюджетныл та̄стым олныт ул вос тӯлмантасыт». Ань йильпи са̄ккон щирыл са̄в квартираӈ колт о̄лнэ ще̄мьят коланыл ёмащаквег щё̄питан ма̄гсыл ка̄сыӈ э̄тпос олн атэ̄гыт. Ма̄н округувт ты олныт «Югорский фонд» акванаты ос тувыл ты колыт мӯсхалыг щё̄питыянэ. Акванатым олныт ул вос тӯлмантавет, мори ул вос холтавет, общественный организацият ты рӯпата ва̄рнэ ма̄хум о̄с уральтаӈкве патыяныл. Елена Шумакова, общественный связь департаментыт кӯщай нэ̄, ты ва̄рмаль урыл потыртас. Тав ла̄выс, та̄н общественный организацият ос округувт о̄лнэ мир ёт о̄с акваг рӯпитэ̄гыт. Ань ма̄хум телефон хосыт свонитэ̄гыт ос ты лю̄ль нак урыл потыртэ̄гыт. Тамле рӯпата урыл газетат, телевидения ос интернетыт акваг хансыглаве, округувт о̄лнэ ма̄хум ты урыл са̄внув вос ва̄гыт. Сапра̄ни оигпам юипа̄лт ля̄ххал тотнэ ма̄хум тот акванатве̄сыт ос «Стоп, коррупция» нампа касылт но̄хпатум хо̄тпат янытлаве̄сыт. Тамле касыл общественный департамент ва̄рыглас. Округ янытыл 40 э̄лумхо̄лас хансум потраныл тув ке̄тыгласаныл.

1120 2016. 03. 24. Николай МЕРОВ

Округ олныт номсахтым халтыяныл Ма̄ньполь э̄тпос атхуйпловит хо̄талэ̄т округ губернатор Наталья Комарова сапра̄ни ва̄рыглас. Кӯщай нэ̄ ос тав ётэ рӯпитан хо̄тпат «Бережливый регион» ва̄рмаль урыл потыртасыт. Ма̄н ма̄вт о̄лупса кӯпнитыг ос ёмасыг вос о̄лыс, тыима̄гыс ань социальноэкономический развитие 2020 та̄лын ос 2030 та̄л мус йильпи ва̄рмаль щё̄питавес. Ты сапра̄нит кина по̄слын то̄тап хосыт Москва, Краснодар ӯст о̄лнэ экспертыт ты рӯпата урыл нё̄тмил ла̄тыӈ ла̄всыт. Ма̄н округувныл Сургут, Урай ос мо̄т ӯсытныл кӯщаит, са̄всыр предприятият рӯпитан хо̄тпат ос общественный организация ма̄хум хӯнтлысыт ос та̄нки ты урыл маныр номсэ̄гыт, потыртасыт. Округ кӯщай нэ̄ ла̄внэ̄тэ щирыл, Югра ма̄вт рӯпатав тох щё̄питаӈкве э̄ри, арген сака са̄в олн наска̄ссыг ул вос холтаве. Тыима̄гыс рӯпатавт ищхӣпыӈ утанув ӯргалым о̄ньщуӈкве э̄ре̄гыт. Ма̄нки рӯпатав тох щё̄питаӈкве э̄ри, экономикав туп но̄х вос яныгмас. Ты хо̄тал мус ань округув янытыл ӯсытыт ос па̄влытыт атса̄ткем тамле рӯпата ва̄руӈкве ма̄хум о̄вылтахтасыт. Сапра̄ни о̄лум порат ООО «Газпромнефть-Хантос» нампа ма̄во̄й но̄хвинэ ма̄т рӯпитан хум Альберт Зубайдуллин, ты урыл о̄с потыртас. Тав ла̄выс: «Ты тэ̄ла ма̄навн сака мӯсты, ты хосыт ма̄н э̄лаль аквъёт рӯпитаӈкве ка̄саще̄в. Ма̄н са̄в нё̄тмил ва̄руӈкве ве̄рме̄в, Югорский университетт ханищтап щё̄питэ̄в. Ма̄во̄й но̄хвинэ ма̄т хумус ма̄н рӯпитэ̄в, тувыл ханищтахтуӈкве ро̄ви». Округ кӯщай нэ̄ потре щирыл, ты проект урыл ань атхатыглам ма̄хум са̄в ёмас ла̄тыӈ ла̄всыт. О̄лупсав то̄нт ёмаснуве̄г ва̄руӈкве ве̄рмилӯв, хунь ӯргалахтым рӯпатав ва̄руӈкве патылӯв.

1120 2016. 03. 24. Валентина УЗЕЛЬ

Та̄н ва̄рим тӯйт тармыл касэ̄гыт Ты хурин по̄слым о̄йка наме Андерс Бессеберг, тав о̄лнэ ма̄тэ Новегия. Биатлон мирхал Союзт са̄в та̄л ма̄к яныг кӯщаиг о̄лы. Ань ты э̄тпост тав Ханты-Мансийск ӯсн ёхталас. Акв хо̄талт тав ля̄ххал тотнэ колт журналистма̄хум ёт хо̄нтхатыглас. Тув ня̄врамыт о̄с ёхталасыт. Акв а̄гирищкве таве титыгластэ, тав округувт о̄лнэ ня̄врамытн маныр ла̄вуӈкв таӈхи. Андерс Бессеберг ювле ла̄выс, а̄гитпыгыт ма̄нь та̄гыл касуӈкв ханищтахтэ̄гыт те, та̄н о̄лупсаныл ёмас щирыл мины. Та̄н нэ̄мхуньт наркотик нампа лю̄ль тэ̄рпи ат а̄рталэ̄гыт, лю̄ль ва̄руӈкв ат патэ̄гыт ос ёмас хо̄тпаг яныгме̄гыт. Ня̄врам са̄т та̄лэ то̄влын юипа̄лт матыр касылн ханищтахтуӈкв таӈхи те, хоталь номтэ паты, тув вос мины. Акв ма̄т, э̄рыӈ, таве̄н та̄рвитыӈыг е̄мты, мо̄т ма̄н вос мины. Такви вос тисхаты. Ос 15-16 та̄лэ хунь то̄влы, то̄нт ущ ма̄к таве̄н э̄рнэ касылт вос касы. То̄ва ма̄т ня̄врамыт биатлонын ханищтахтуӈкв о̄вылтахтэ̄гыт, ос 10 та̄ланыл то̄влын юипа̄лт писалил ущ мивет. Мо̄т ма̄т ос 16 та̄ланыл юипа̄лт мивет. Ос ань ёмас, та̄лэтуве сыс па̄тлуптаӈкв ос ёсал ха̄йтуӈкв ро̄ви. Туи та̄н «роликыг» ла̄внэ ва̄ти ёсал ха̄йтыгтэ̄гыт. Тэ̄лы ос товтыг масэ̄гыт, ёмащакв касуӈкв ханищтахтэ̄гыт. Ань ня̄врамыт са̄всыр щирыл касуӈкв ханищтавет. Ты э̄лыпалт ты тэ̄лат ёлтӯйтым о̄щве̄сыт. Ка̄сыӈ ма̄т та̄нти щирыл спортсменхо̄тпат щё̄питыяныл. Ань ищхӣпыӈ утыт, интернет, маныр э̄ри, пуссын хансым о̄лы. Ня̄врамыт касуӈкв ханищтан тренерхо̄тпаныл хумус рӯпиты, каснэ ва̄рмалит о̄лнэ̄ныл порат та̄рапаты. Ёмас тренер такви ма̄хманэ ёт хо̄тал палыт рӯпиты. Тренерыг о̄луӈкв о̄с кӯпнит хунь. О̄влэ̄т спортсмен ха̄йтуӈкв ханищтаве, тувыл лувенё̄вле та̄кыг е̄мтэ̄гыт, ё̄рыг паты. Та̄лэтуве сыс та̄н касуӈкв ханищтахтэ̄гыт. Ты яныг касылкапай ка̄сыӈ та̄л Ханты-Мансийск ӯст ва̄рыглаве. Мо̄тыт та̄л тах ат ва̄раве, Тюмень ӯсн ва̄нтлэ̄гыт. Ты тэ̄лы ма̄ янытыл сака ма̄лтып о̄лыс, тӯйт хоттолыс. Та̄има̄гыс мо̄т э̄лы хо̄н ма̄т биатлонистма̄хум нас ва̄рим тӯйт тармыл кассыт. Ты норвежецо̄йка Андрес Бессеберг ань ла̄выс, ма̄н ӯсувт щар ёмас касыл минас, та̄н патум тӯйт тармыл кассыт.

1120 2016. 03. 24. Валентина УЗЕЛЬ

Ма̄витув ос во̄руянув ӯргалавет Ма̄н округув янытыл са̄в ма̄т ӯргалым о̄ньщавет, рущ ла̄тӈыл та̄н ла̄вавет – особо охраняемые территории. Ханты-Мансийск ӯнлын ма̄тэ о̄с ӯргалаве, ты ма̄ «природный паркыг» о̄лы, «Самаровский чугас» нам о̄ньщи. Ма̄ньполь э̄тпост ты парк ва̄рима па̄сныл 15 та̄лыг е̄мтыс. О̄выл щёс 1984 та̄лт ӯст о̄лнэ ма̄хум акванатхатыгласыт, та̄н ты потыртахтасыт – ты ма̄ ӯргалаӈкв э̄ри, то̄нт ты 420 гектар са̄вит ма̄тэ природный паркыг хассаныл. Ты ма̄ янытэ̄т сака урамыӈ, ла̄ве̄гыт, Ханты-Мансийск ӯс са̄т яныг урам тармыл ӯнттыма. Ос во̄ре сака ёмас, 44% са̄вит йӣвыт пуссын ӯльпат. То̄ва ӯльпатын па̄ртло̄мтыт нэ̄гве̄сыт, тот хансым о̄лы, йӣв манах та̄л янытыг о̄лы. То̄ват атса̄т та̄лыӈыг ты е̄мтэ̄гыт. Ань ӯс мувлахи о̄лнэ во̄рт нэ̄матыр ва̄руӈкв ат ро̄ви – йӣвыт са̄груӈкв, порс па̄хвтуӈкв. Во̄рт ё̄мыгтан ма̄гыс лё̄хъясыт ва̄римат, ма̄хум во̄рн сака ул вос щалтэ̄гыт, хо̄та̄ти мори ул вос ё̄мыгтэ̄гыт. Атхуйплов та̄лэ то̄влум кастыл «Самаровский чугас» нампа колт рӯпитан ма̄хум яныг сапра̄ни ва̄рыгласыт. Округувт ма̄вит, во̄р ос во̄руянув ӯргалан ма̄хум акванатыгласаныл, ва̄рнэ рӯпатаныл урыл пуссын тот потыртасыт, халанылт ханищтахтасыт. Евгений Платонов, ма̄вит ӯргалан округ департаментыт кӯщаиг о̄лы, тав атхатыглам ма̄хумн тох ла̄выс: «Ма̄вит ӯргалан ма̄хум сака ёмас рӯпата ва̄ре̄гыт. То̄ват олн та̄л тох та рӯпитэ̄гыт. Ань рӯпатан мощ мо̄т щирыл ва̄руӈкв э̄ри. Хумус ве̄рмегы̄н, ань на̄нти олн сэ̄лэ̄н. Ты э̄лыпа̄лт тох о̄лыс, манах олн на̄нан э̄рыс, округ мирколныл майлувесы̄н. Ты йист о̄лупсав мо̄т нупыл та минас. Ты 2016 та̄л ня̄врамыт янытлан та̄лыг ла̄ввес. Ты та̄л сыс на̄нан та̄н ма̄гсыланыл са̄всыр пӯмыщ ва̄руӈкв э̄ри. Та̄н вос ва̄ганыл, ма̄витув хумус ӯргалаӈкв э̄ри. Ӯст о̄лнэ ня̄врамыт ос во̄рн аквписыг вос тотыглавет, то̄ват во̄р урыл щар нэ̄матыр ат ва̄гыт. Во̄р урыл потыртан порат то̄ва хо̄тпат ӯйрищит наманыл, во̄руит наманыл, йӣвыт аквантэ̄лыгтыяныл, лю̄льсаӈ ла̄вияныл. Тамле хо̄тпат ты рӯпатан виӈкв щар ат ро̄ви. Та̄н ма̄гсыланыл ханищтапыт ва̄рыглаӈкв э̄ри, тот вос ханищтавет». Во̄руянув ӯргалан ва̄рмаль урыл та̄н о̄с потыртасыт. Ка̄сыӈ э̄тпос та̄н матыр йильпи рӯпата ва̄ре̄гыт. Та̄л котиль э̄тпост та̄н янгуит ё̄мыгтан лё̄хъясаныл уральтасаныл, ань ос мори ӯнттым те̄рнялит хотвыганыл. Ювле хультум э̄тпос сыс во̄руит, витуит ӯргалан управлениеколт рӯпитан ма̄хум янгуит ё̄мыгтан ма̄т уральтасаныл. Та̄н ёмащакв щё̄питым нёлолов ма̄ во̄рт хо̄нтсыт. Тот браконьерма̄хум са̄в янгуй алмыт ос хотнуйманыл. Ӯй нё̄выль пуссын ётвиманыл ос ла̄гланыл тот вущкасаманыл. Ты та̄л о̄вылтахтам па̄сыл 65 хо̄тал сыс во̄руит ӯргалан ма̄хум округув янытыл яласасыт ос во̄р колыт уральтасаныл. 57 те̄рняль хо̄нтсыт, хӯрумса̄ттем хо̄тпа пувыгласаныл. Акв охотник пуввес, тав 5 нёхыс алыс, моще̄рт сутытаӈкв патаве. Ань ты рӯпата ва̄рнэ ма̄гыс округув янытыл 30 инспекторхо̄тпа рӯпитэ̄гыт. Та̄н ищхӣпыӈ утыл ётмайлавет. Та утаныл пуссын по̄слы ос хансы, хоталь инспектор хо̄тпа ялыс, манах щё̄с тот о̄лыс, маныр нэ̄пак хансыс. Тав спутник та̄ра уральтаве. Акв ма̄т тав щё̄стем те лю̄лис, тав ётыл титыглаӈкв патаве, манрыг акв ма̄т сака хоса о̄лыс, манаре тот ва̄рыс. Ань ма̄н округувт тит государственный заповедникыг рӯпитэ̄г – «Малая Сосьва» ос «Юганский». Нила природный парк – «Нумто», «Кондинские озера», «Сибирские увалы», «Самаровский чугас», 11 ты «природный заказникыт» ос 7 ты «памятник природы». Та̄н сака ёмащакв ӯргалавет ос акваг уральтавет.

1120 2016. 03. 24. Людмила ТЕТКИНА

Мӯй ма̄хум Нё̄ро̄йка па̄выл мус ялуӈкве во̄вавет Ха̄льӯс район Саранпа̄вылт ялпыӈ хо̄тал о̄лыс, то̄нт са̄лыӈ ма̄хум касуӈкве нё̄рныл на̄лувва̄гылсасыт. Та хо̄тал са̄в ма̄хум тот мӯйлысыт. Сакв я̄ ва̄тат нёлолов са̄лыӈкол тӯщталавес. Акв са̄лыӈколт «Рутил» нампа предприятие рӯпитас. Кӯщаиг тот Любовь Николаевна Филоненко, аги о̄парищ наме Попова, о̄лы. То̄нт ам таве рӯпататэ урыл китыгласлум. Любовь Николаевна, «Рутил» нампа предприятие рӯпитаӈкве хунь о̄вылтахтас ос маныр рӯпата наӈ ва̄ре̄гын? 2011 та̄лт ам «Мансийские оронимы Урала» нампа нэ̄пак ловиньтаслум. Ты нэ̄пак Татьяна Дмитриевна Слинкина хансыстэ. Нё̄рыт маныр нам о̄ньще̄гыт ос ма̄ньщиянув тамле намыл манрыг пинсаныл, са̄в пе̄с потыр, мо̄йт, ты нэ̄пакт хансым о̄лэ̄гыт. То̄нт ам номсахтуӈкве патсум, мо̄т ма̄т о̄лнэ мир нё̄ранув урыл, пе̄с потрыт, мо̄йтыт ос ма̄ньщит урыл ва̄ӈкве о̄с э̄ри. Ты юипа̄лт ам мӯй ма̄хум Нё̄ро̄йкан ялуӈкве во̄вуӈкве патсанум. То̄ва хо̄тпат нас нё̄рт нупыл сунсуӈкве ялантэ̄гыт, мо̄таныт няслуӈкве тув минэ̄гыт. Ос мо̄т хо̄тпат нё̄рытныл ха̄пыл Саранпа̄выл мус я̄ хосыт на̄тылтэ̄гыт. Ма̄н тэ̄лы порат хӯрум э̄тпос ос туи порат хӯрум э̄тпос рӯпитэ̄в. Таквсы ос тӯя порат тув миннэ лё̄ӈх а̄тим. Мӯй ма̄хум Нё̄ро̄йка па̄выл мус тотыглыянӯв, Саранпа̄вылныл тув мус 90 ве̄рыста о̄лы. Та ма̄т ам ма̄ло̄мт амки нупылум хансыслум. Акв ӯщлахтын кол та̄н ма̄гсыланыл хотщё̄питаслӯв. Ты э̄лыпа̄лт тот геологыт рӯпитасыт, па̄вланыл тот о̄лыс. Ма̄хум мо̄т ма̄н миныгласыт, ань туп коланыл хультсыт. Хоты ма̄ныл мӯй ма̄хум нё̄р па̄вылн ӯщлахтуӈкве ёхталэ̄гыт? Туристыт Белоруссия ма̄ныл, Омск, Екатеринбург, Тюмень ӯсытныл ёхталэ̄гыт. Округувт о̄лнэ ма̄хум нё̄рыт сунсуӈкве ос тот ӯщлахтуӈкве тув о̄с ялантэ̄гыт. Нягань ӯсныл, Ханты-Мансийск ӯсныл туристыт ка̄сыӈ та̄л ёхталэ̄гыт. Саранпа̄вылт о̄лнэ ма̄хум тув о̄с во̄виньта̄лыянӯв. Акв э̄лумхо̄лас Нё̄ро̄йка па̄вылн ялнэ̄тэ ма̄гсыл акв со̄тыра 700 солко̄ви ойты. Ма̄хум ӯщлахтын хо̄талт а̄лпыл ма̄шинал тув тотыянӯв, акв э̄т тот хӯлэ̄гыт ос мо̄тыт хо̄тал ӣтипа̄лаг ювле ёхтэ̄гыт. Саранпа̄вылт о̄лнэ ще̄мьят ӯщлахтын базат намхо̄таланыл янытлан кастыл атхатыгла̄лэ̄гыт. Ты ма̄хум тув тотыянӯв, та̄н акв манос кит хо̄тал тот о̄луӈкве ве̄рме̄гыт. Ам ка̄сыӈ та̄л Ханты-Мансийск ӯсн «Югра-Тур» ос «Товары земли Югорской» суссылтапыгн во̄виньта̄лавем. Тот ам о̄с суссылтап щё̄питэ̄гум, амки рӯпатам урыл потыртэ̄гум ос ма̄хум нё̄рн ӯщлахтуӈкве во̄виянум. «Союз турпредприятий Югры» нампа организация ёт рӯпитэ̄гум. Округувт хоты ма̄т ӯщлахтуӈкве ро̄ви, тот рӯпитан хо̄тпат ты урыл акваг потыртэ̄гыт. Любовь Николаевна, 2012 та̄лт «Горными тропами Священного Урала» нампа проект ма̄гсыл олныл майлуве̄сын. Ты олныт хумус холтасанын? «ЮграТур» нампа суссылтап рӯпитам порат «Этнографическая программа для семейного отдыха» нампа номинацият ам но̄хпатсум ос 750 со̄тыра солко̄вил майве̄сум. Ты олнытыл ам яныг ма̄шина ос спутниковый телефон ёвтсум. Ань ты ма̄шинал мӯй ма̄хум нё̄рн тотыглыянӯв. Туристыт хунь нё̄рыт нупыл минэ̄гыт, ты телефон ёт выгыт. Та ма̄т сотовый связь ат рӯпиты. Ма̄хум тув тотыглым ма̄навн телефон о̄ньщуӈкве э̄ри. Саранпа̄вылныл нё̄рн миннэ лё̄ӈхув Сӯкыръя па̄выл та̄ра мины. Тот мӯй ма̄хум Галина Николаевна Ларионова ёт хо̄нтхатыглэ̄гыт. Тав ма̄ньщи пе̄с йис ва̄рмалит пуссын ва̄ганэ. Галина Николаевна ма̄ньщи пе̄с о̄лупса урыл мӯй ма̄хумн потырты, ос са̄всыр пе̄с пормасыт суссылты. Тув мо̄т ма̄ныл ёхталан мӯй ма̄хум тотыглянӯв, ты ва̄рмалил та̄н тай сака пӯмщалахтэ̄гыт. 2012 та̄лт туристический фирмат рӯпитан ма̄хум Москва, Санкт-Петербург ос мо̄т ӯсныл ма̄н палтув ёхталасыт. Та̄наныл Нё̄ройка па̄выл мус ос Сӯкыръя па̄вылн тотыгласанӯв. Ты э̄лыпа̄лт ос ка̄тыл хурит по̄слан ма̄хум нё̄рыт мус ялуӈкве во̄виньта̄лсанӯв. То̄нт 22 э̄лумхо̄лас нё̄рыт по̄слуӈкве ёхталасыт. Та̄н пуссын Нё̄ро̄йка нампа па̄вылт о̄лсыт. То̄нт ка̄тыл по̄слам ма̄хум Россияныл ос мо̄т хо̄н ма̄ныл тыг ёхталасыт. Кит хо̄тпа Франция ма̄ныл ос акв хо̄тпа Чехияныл ёхталас. «Рутил» нампа предприятият са̄в хо̄тпа рӯпиты? Ам нила арыгкем та̄л рӯпитэ̄гум, ты предприятие амки ва̄рыслӯм, нэ̄пакыт щирыл ам амккем рӯпитэ̄гум. Мӯй ма̄хум нё̄рн тотыглаӈкве ат манос хо̄т э̄тпос сыс туп ве̄рме̄в, мо̄т порат тув лё̄ӈх а̄тим. Тыи ма̄гсыл рӯпитан хо̄тпатн та̄л сыс олн ойтуӈкве ат ве̄рме̄гум. Ӯщлахтын пора хунь ёхты, ам Саранпа̄вылт о̄лнэ ма̄хум рӯпитаӈкве во̄виянум. Галина Ларионова ёт потыртахтэ̄гум, тав ам ётум акваг рӯпиты. Любовь Николаевна, ма̄хумн нё̄рыт суссылтым олн сэ̄лэгы̄н? Ань ма̄н палтув туристыт ёхталэ̄гыт кос, тувыл са̄в олн сэ̄луӈкве ат ве̄рме̄в. Нё̄ро̄йка павылт йильпи о̄лнэ колыт ӯнттуӈкве э̄ри. Норыт, па̄ртыт тув тотуӈкве, колыт ӯнттуӈкве о̄с са̄в олн э̄ри. Таса̄вит олн ма̄н ат о̄ньще̄в. Саранпа̄выл мус ёмас лё̄ӈх о̄с а̄тим. Тэ̄лы порат ма̄шинал яласан лё̄ӈх ва̄рыглаве, мӯй ма̄хум та̄нки тыг ёхтуӈкве ве̄рме̄гыт, тувыл лё̄ӈхе сака хоса. Туи порат са̄т хо̄тал сыс туп кит щёс вертолёт тыг ёхтала̄лы. То̄ва мӯй ма̄хум тыи ма̄гсыл тыг йиӈкве сака ат ка̄саще̄гыт. Яныг вит порат на̄иӈха̄пыл тыг ёхтуӈкве ро̄ви. Тувыл 2015 та̄лт Саранпа̄выл мус на̄иӈха̄пыт ат яласасыт. То̄нт мӯй ма̄хманум нё̄р нупыл ялуӈкве аты ве̄рмысыт, Нё̄ро̄йка аты ка̄саласаныл. Па̄вылт рӯпитан миркол кӯщайит наӈын нё̄тэ̄гыт? Та̄н ма̄н ётув ат рӯпитэ̄гыт, аты ва̄гыт, манхурип рӯпата ва̄ре̄в. Районный мирколт рӯпитан хо̄тпат а̄нумн нё̄тэ̄гыт. Районувт предпринимательхо̄тпат ма̄гсыл о̄с са̄всыр программат о̄лэ̄гыт. Акв та̄л ам нэ̄паканум тув ке̄тыгласанум, тувыл 600 со̄тыра солко̄вил майлуве̄сум. Ты олныл ам са̄всыр э̄рнэ пормасыт, ха̄пыт, палаткат, хуйнэхӯргыт ёвтсум. Ань ма̄н палтув ёхталан туристыт нё̄рныл я̄ хосыт ло̄ӈхаль на̄тылтаӈкве ве̄рме̄гыт. «Союз турпредприятий Югры» ёт ма̄н ёмащакв рӯпитэ̄в. Ре̄тыӈ ю̄свой э̄тпост та̄н суссылтап Ханты-Мансийск ӯст ва̄рыгласыт. Округувт хоты ма̄т ӯщлахтуӈкве ро̄ви, ка̄сыӈ э̄лумхо̄лас тот пӯмщалахтуӈкве ань ве̄рми. «Рутил» предприятие урыл тот о̄с пуссын хансым о̄лы. Та организацият рӯпитан хо̄тпат а̄нумн сака нё̄тэ̄гыт. Ань манхурип йильпи са̄кконыт пирмайтавет ос маныр программат о̄лэ̄гыт, а̄нумн акваг хансыглэ̄гыт. Са̄всыр ханищтапын Ханты-Мансийск ӯсн акваг во̄виньта̄лавем. Туризм щирыл рӯпитан департамент о̄с ёмащакв нё̄ты, ам тув о̄с свонитэ̄гум, китыглахтэ̄гум. Тувыл «ЮграТур» ос «Товары земли Югорской» суссылтапыг рӯпитан порат са̄всыр ханищтапыт ва̄рыглавет, тув ам о̄с акваг ялантэ̄гум. Тот э̄рнэ ва̄рмалит, йильпи са̄кконыт урыл потыртаве̄в, рӯпатав хумус мӯсхалыг ва̄руӈкве ханищтаве̄в. Любовь Николаевна, ос манхурип рӯпата ва̄руӈкве э̄лаль номсэ̄гын? О̄влэ̄т Нё̄ро̄йка па̄вылт йильпи о̄лнэ колыт ӯнттуӈкве э̄ри. Тувыл Сӯкыръя па̄вылт акв пе̄с кол ёвтуӈкве ос тот музей ва̄руӈкве таӈхе̄в. Соссаӈ ма̄хум пе̄с пормасаныл тот тах акванатыянум ос мӯй ма̄хум тув тотыглаӈкве патыянӯв.

1120 2016. 03. 24. Николай МЕРОВ

«Ма̄нь Та̄гтыт» рӯпитан ма̄ньщи хум Ювле хультум э̄тпост ам Советский районын рӯпата щирыл ялсум. Тот акв ма̄ньщи хум ёт хо̄нтхатыгла̄лсум. Ты хум наме Павел Кириллович Дунаев, тав Советский районт о̄лнэ «Ма̄нь Та̄гт» нампа заповедникыт ма̄вит ӯргалым рӯпиты. Ты хум рӯпататэ хумус мины ос маныр ва̄рмаль тав о̄ньщи, ты урыл а̄нумн потыртас. На̄н тав потре э̄лаль ловиньтэлы̄н: Ам ща̄ньа̄щ рӯтанум та̄гт ма̄ньщииг о̄лэ̄гыт. Та̄н Полум ос Та̄пс ма̄ е̄рыл ёхтысыт. Яныг щаще̄квам Евфимия яныгса̄т лов та̄л янытыг е̄мталас. Тав ам яныг о̄пам Василий Дунаев ёт о̄лыс. Рӯтанум пуссын та ма̄т во̄раим яласасыт. Тот Дунаевыт ма̄нь па̄выл иӈ ӯнлы. Яныг хо̄нт о̄лум порат о̄пам ще̄мьяӈ та̄гыл Э̄сс я̄ ва̄тат ос Ущтор ва̄тат о̄лсыт. То̄нт а̄щум нёлолов та̄лэ туп то̄влыс, тав во̄рпа̄вылт яныгмас. Ётылнув Хонгакурт па̄вылн ва̄нтлысӯв. Тот ма̄тэ сака во̄руиӈ, хӯлыӈ ос пилыӈ. Ты нё̄тнэ ма̄кве во̄руиӈыг ос сыстамыг э̄лаль хультуптан ма̄гыс тот «Конда-Сосьвинский» нампа заповедник ва̄рвес. О̄выл кӯщаиг тот Василий Владимирович Васильев о̄лыс. Та порат тот Дорогостайский ос Горновский кит о̄йкаг ма̄вит ханищтым рӯпитасы̄г. А̄щум тэ̄н палтэ̄н хансуӈкве ос ловиньтаӈкве ханищтахтас, ва̄тихал тув ялантас. Тэ̄н хосытэ̄нт журналыт ос мо̄т са̄всыр нэ̄пакыт ловиньтаӈкве ханищтахтас. Василий Владимирович са̄в та̄л тот рӯпитас. Са̄ртын ма̄хум Хонгакурт па̄выл мус тэ̄нутпормас йивха̄пыл пе̄що̄влыл хартыгласыт. Аквматнакт тэ̄нутпормас тотнэ хо̄тпат сака айхатасыт, па̄вылн пуссын кучумыг ёхтысыт. Тыима̄гыс ма̄вит ӯргалан кӯщай хум яныг кӯщаитн сака ля̄выльттавес. О̄йка сыме ат ве̄ритас, писалил пистхатас. Тав та ма̄т ёлщё̄питавес. Ма̄н ос колта̄глыл Хонгакурт па̄вылт мисыт о̄щсӯв. Тэ̄пканыт са̄всыр тэ̄нут янмалтасӯв. Та порат па̄вылт ва̄тахкем кол ӯнлыс. Тот ла̄пка, клубкол, ня̄нь ва̄рнэ кол, метеостанция, на̄йпос ва̄рнэ кол ос ма̄нь пӯльница рӯпитасыт. Тувыл 1951 та̄лт та заповедник лаппантвес. Мир па̄вылныл ла̄ккваминыгласыт, туп ма̄н ще̄мьяв тот хультыс. А̄щум 1949 та̄лт армиян лусытаӈкве ялыс. Юв ёхтуме юипа̄лт Хонгакурт па̄вылт охотпромхозт во̄раяӈкве патыс. Тот 1974 та̄л мус нёхыс, лэ̄ӈын ос мо̄т во̄руй алыщлым рӯпитас. Тувыл 1976 та̄лт ма̄н о̄лнэ ма̄вт ос «Ма̄нь Та̄гт» ма̄вит ӯргалан ма̄ ва̄рвес. Тот о̄выл кӯщаиг ос Леонид Фёдорович Сташкевич рӯпитас. Тав та̄ра ам а̄щум такви палтэ рӯпитаӈкве вистэ. Ты ӯргалан ма̄ Штильман о̄йка тав ва̄руӈкве номылматастэ. Тав Москва ӯст йис ма̄ ӯргалан учёный хо̄тпаг рӯпитас. «Ма̄нь Та̄гт» намыл ос ам а̄щум Кирилл Андреевич Дунаев, тав пиныстэ. Тав 1932 та̄лт та ма̄т самын патыс. Са̄в та̄л тот во̄раим яласас, ма̄витэ янытэ̄т ёмщакв ва̄стэ. Тыима̄гыс тув рӯпитаӈкве ты во̄ввес. Ма̄н колта̄глувт нила ня̄врам яныгмасӯв. Яныг каӈкум, кит увщиягум ос ам. Та̄н пуссын холасыт, ань амккем хультсум. Ань яныгмам па̄влумн ва̄тихал ялантэ̄гум. Тот о̄лнэм сыс ща̄нягума̄щагум колт хӯлэ̄гум. Па̄вылт пе̄с колыт пуссын нирыл лапяныгмаве̄сыт, ёлра̄гпысыт. Ам 1977 та̄лт Советский ӯс школат лов класс а̄стласум. Аквта туи «Ма̄нь Та̄гт» ӯргалан ма̄н ле̄сникыг рӯпитаӈкве патхатасум. Ӯргалан ма̄ мувлахил во̄рколыт ӯнттуӈкве нё̄тсум. Армиян миннэм мус тот акваг рӯпитасум. Кит та̄л лусытасум, юв ёхтысум, ос акв тув рӯпитаӈкве патхатасум. Тувыл ётылнув по̄хын минасум. Мо̄т ма̄т мощ рӯпитасум, о̄с амки яныгмам ма̄мн минасум. Тот метеостанцият рӯпитасум. Ос хунь «Ма̄нь Та̄гт» ӯргалан ма̄т мо̄т кӯщай пе̄нтхатас, ам ос ле̄сникыг тув патхатасум. То̄нт ма̄ уральтым тэ̄лы порат ёсал ё̄мыгтасув. Ёмнэ лё̄ӈхе хоса о̄лыс. Таима̄гыс ты ка̄сыӈ атхуйплов ве̄рыста э̄т хӯлнэ ма̄гыс во̄рколыт ӯнттысӯв. «Ма̄нь Та̄гт» янытэ̄т мувлахил хӯрумса̄т ве̄рыста е̄мты. Ам ӯргалан ма̄кем ос яныгса̄т ве̄рыста о̄лы. Ма̄н тот хо̄т инспектор рӯпитэ̄в. Кит хо̄тпаг лов хо̄тал рӯпитэ̄г, тувыл мо̄т кит хо̄тпа патхатэ̄г. Тыщир пе̄нтхатым рӯпитэ̄в. Во̄рт яласан ма̄гыс пуссын «Бураныл» майвесӯв. Ка̄сыӈ э̄тпос ӯргалан ма̄ мувылтылӯв. Мори алыщлан хо̄тпат ул вос во̄раясыт, ма̄в акваг уральтылӯв. Тамле ва̄рмаль о̄лыглы, то̄ванакт мори алыщлан хо̄тпат тув ёхтыпа̄лэ̄гыт. Са̄выӈпа̄лэ щёпрыт, ятрит па̄тлуптым яласэ̄гыт. Аквматнакт ме̄н юрт хо̄тпаме̄нтыл ма̄вит уральтаӈкве минасме̄н. Акв ма̄т лё̄хъяс ӯлтта минам «Буран» лё̄ӈх хо̄нтсуме̄н. Номсыме̄н, тав ювле миннэ̄тэ порат пувиламе̄н. Ты кос ӯрхатсуме̄н, насати мо̄т ма̄ныл тахамыт. Та̄н ань ё̄р «Бураныл» яласэ̄гыт. Осыӈ тӯйтыл ат пилэ̄гыт, ёл ат тагапе̄гыт. То̄ва по̄х хо̄тпат щар ат пилэ̄гыт. Ма̄н ӯнттум во̄рколанувт алыщлым о̄лэ̄гыт. Таквсы, ущты тӯйт патнэ порат тамле хо̄тпат са̄в щёс пувиньта̄лсӯв». Ты рӯпата коныпал инспектор хо̄тпат тэ̄лы порат во̄руй лё̄ӈхыт сунсэ̄гыт. Манырсыр во̄руй во̄рт яласы, манса̄вит во̄руй о̄лы, пуссын ловиньтым о̄ньщияныл. Вертолётыл яласэ̄гыт, со̄руп, са̄лы манса̄вит о̄лы ос ловиньтыяныл. Тувыл манырсыр лӯпта во̄рт тэ̄лы, хансыяныл ос ты хосыт научный рӯпата ва̄ре̄гыт. Ётыл ты лӯптат пуссын нэ̄пакн хансавет. Маныр во̄рт хо̄нтэ̄гыт, хури по̄слэ̄гыт ос кина суснэ то̄тапн снимайтэ̄гыт. Тамле ты пӯмащ рӯпата ва̄ре̄гыт. Павел Кириллович акв та̄рвит ва̄рмаль урыл а̄нумн потыртас. Ам та потре мо̄т газетат тах хансылум.

1120 2016. 03. 24. Светлана РОМБАНДЕЕВА

Ма̄щтыр э̄ква ка̄тыл ва̄рнутанэ суссылтаве̄сыт Ханты-Мансийск ӯст о̄лнэ Государственный художественный музей колт «Наследие Югры» выставка рӯпитаӈкве о̄вылтахтас – ма̄щтыр э̄ква Галина Михайловна Визель ка̄тыл ва̄рнэ утанэ тот суссылтавет. Музей колт 150 арыг пормас ра̄ктныл, кумысканыл манос керамиканыл ва̄рим са̄всыр а̄ныписыт, хорамыӈ ва̄зат, товлыӈ ӯйит, во̄руй ос хӯл хурит колкан янытэ̄т тӯщталаве̄сыт, то̄ват пасан тармыл пинве̄сыт, то̄ват ос колнор онтсыл тагталаве̄сыт. Я̄нас колнакн атым пормасыт Галина Михайловнан тох намаяве̄сыт: «Боги и духи». Тав ма̄ньщи ос ханты хорамыт по̄слыс, мо̄йтанувт ос э̄рганувт ӯлылан На̄й-О̄тыранув хурииг (декоративный скульптураг) ва̄рманэ: «Мирсуснэхум», «Мать Калтащ», «Небесный конь», «Дух воды», «Дух леса» ос мо̄т са̄в хурит. Тав ла̄вме щирыл, «э̄лумхо̄ласво̄руйтовлыӈ ӯй» пуссын акв ляпат о̄лэ̄гыт. Нуми То̄рум, Ма̄ тармыл ос Ма̄ ёлыпал та̄н ты ё̄ӈхияныл, нэ̄мхуньт ёл ат по̄йтсэ̄гыт, сома ла̄кв хосыт та яласэ̄гыт. Галина Михайловна я̄ӈк на̄тнэ э̄тпос 14 хо̄талэ̄т Тюмень ӯст самын патыс, тот яныгмас. А̄тятэ Михаил Захарович Симбирев яныг хо̄нтыт патыс. Оматэ Анна Александровна райкомт рӯпитас. Школа а̄стламе юипа̄лт Омск ӯст медицинский училищат ханищтахтас. 1964 та̄лт училище а̄стластэ, Ашхабад ӯсн рӯпитаӈкве ке̄твес. Тот тав са̄всыр пӯмыщ, хорамыӈ пормасыт ка̄салас, художественный училищат ханищтахтуӈкве номылматас. Ташкент ӯст П. П. Беньков нампа училищат ханищтахтас. О̄йкатэ Александр Георгиевич Визель ёт тот акванхо̄нтхатасы̄г, акванминасы̄г. А̄гипыг янмалтасы̄г. Са̄в та̄л аквъёт рӯпитасы̄г, са̄всыр пормасыт, хурит ва̄рсы̄г. Ва̄рум пормасанэ̄н са̄в ӯсытыт суссылта̄лсанэ̄н. 1981 та̄лт Галина Михайловна колта̄глэ ёт Тюменьн ва̄нтлыс. 1983 та̄л па̄сныл тав область янытыл яласаӈкве патыс. Ханты-Мансийский округ ос Ямал ма̄ янытэ̄т яласастэ, соссаӈ ма̄хум ёт ва̄йхатас, та̄н культураныл ханищтаӈкве патыстэ. 2002 та̄лт тав Российский Академия Художеств па̄лыл Серебряная медаль по̄сыл майвес. Акв та та̄л тэ̄н о̄йкатэ̄нтыл Ханты-Мансийск ӯсын ва̄нтлысы̄г. Та па̄сыл тав Искусство Центр колт ня̄врамыт ханищтым рӯпиты. Выставкан 500 арыг хо̄тпа ёхталас. Округ губернатор Наталья Комарова ты э̄ква янытластэ, са̄в ёмас сымыӈ ла̄тыӈ таве̄н ла̄выс. Выставка ма̄ньполь э̄тпос 17 хо̄талэ мус рӯпитаӈкве паты.

1120 2016. 03. 24. Галина КОНДИНА

Э̄лаль о̄лнэ посыӈ хо̄тал ма̄гыс пӯрлахтасыт Пе̄с ма̄хманув акваг э̄тпос яныгман порат ӯйхул алыгласыт манос пӯрлахтасыт. Ос я̄нас э̄тпос пӯрлын ва̄рмаль ам ат ва̄щиньтасум. А̄тям титыгласлум, тав ос ла̄ви, ма̄н Сакв ма̄хум, тох ат ва̄рыгласӯв. Ань Ханты-Мансийск ӯст 2011 та̄л па̄сыл «То̄рум Маа» музейт «Тылащ пори» э̄тпос пӯри ва̄рыглэ̄гыт. Тув са̄в мӯй ма̄хум во̄ве̄гыт. Ты та̄л ма̄ньполь э̄тпос нёлоловхуйплов хо̄талт э̄типа̄лаг ма̄хум тув мӯйлуӈкве во̄виньта̄лсаныл. О̄влэ̄т ня̄врамыт ма̄гсыл касылыт о̄лсыт. А̄гирищит, пыгрищит ма̄нь суныт ӯлтта поргысыт, тӯщтым йӣвн ла̄кв па̄хвтысыт. Акв порат татем пӯмыщ о̄лыс. Осыӈ ква̄лыгн титпа̄лыл ма̄хум пӯхтэ̄гыт, акв палт а̄гит, мо̄т палт пыгыт, яты тит тыг та хартыяныл. Тот о̄лум а̄гит, нэ̄т пуссын тув ква̄лапасыт, ква̄лгын пувумтахтасыт ос пыгыт та̄нти нупыланыл та хасумтасаныл, но̄х та патсыт. Ос ань ущ о̄выл щёс а̄мпыт тув тотыглаве̄сыт, та̄н сунын те̄равет, ёхтум мӯй ма̄хум яласасыт. А̄мпквет татем нё̄тнэт, ёмасыт, о̄транылна̄яныл ла̄тӈын хӯнтлэ̄гыт. Сунаныл тащир ва̄рим о̄лы, миннэ хо̄тпа сун патан юил лю̄люмты, та тотаве. Ня̄врам сунын ӯнттыгпаве, тащир ха̄йтата̄лаве. Ка̄сащан хо̄тпа ве̄рмыс олн ойтта̄л а̄мпыӈ суныл ялуӈкве. Яты, тувыл са̄ӈквылтап суй сумыллас, ёхтум мир сцена ляпан во̄вве̄сыт ос музейт рӯпитан хо̄тпат ты пӯрлахтын ва̄рмаль урыл потыртасыт. Са̄в мир халыл аквтуп акв ще̄мья нэ̄глыс, а̄гирищкве омагеа̄тяге э̄тпос урыл титыглыяге, ты мус тулё̄влыл но̄ӈхаль хӯлты. Оматэ̄н ла̄ввес: «Айкве, э̄тпос нупыл тулё̄влыл такталаӈкве ат ро̄ви, тулё̄влын а̄гмыӈыг е̄мты». Тав рохтыс ос титыглахты, хумле е̄мты. Оматэ̄н тув ротмалтавес: «Ул пилэн, о̄выл щёс Э̄тпос акин ат кантмаяве, наӈ хунь ва̄слын». Тох ё̄мантым, потыртым та̄н а̄кваныл колн ёхтысыт, пасан ва̄тан ӯнттуве̄сыт, тэ̄пъялаӈкве патсыт. А̄вияныл хотьютын ра̄тащлаӈкве патвес, вуйкан кувщил масхатам хӯрум пыг ёхтысыт. Та̄н хӯл алыщлан со̄т во̄всыт, ӯйхул ка̄тын паттын со̄т во̄всыт. Туитаквс я̄т алгаль са̄в хӯл вос талы, во̄ранув са̄в ӯйхулыӈыг вос о̄лэ̄гыт. Тувыл щар ма̄к пӯрлахтын ма̄н яныгпа̄ла э̄кват, о̄йкат минасыт. Тот пасан тӯйтыл ва̄рим о̄лыс. Пасан ва̄рсыт, тэ̄нут ӯнттысыт, исум ща̄й пинсыт. Тимофей Алексеевич Молданов ханты ла̄тӈыл по̄йкщас, э̄лаль о̄лнэ посыӈ хо̄тал, э̄лаль о̄лнэ нотыӈ хо̄тал во̄выс. Ты мус йӣв ма̄нтыл тӯйт но̄ӈхаль па̄хвтащлас. По̄йкщан ла̄тӈане пуссын вос хӯлавет, тав микрофоныл ва̄рыглавес, тамле суиӈ ищхӣпыӈ уткве. Ты э̄лыпа̄лт, хо̄тыл Зоя Никифоровна Лозямова ня̄нил са̄лы хурит ва̄рыс. Та са̄лыквет касаил ма̄ниг яктуве̄сыт ос ёхталам ма̄хум о̄с вос тэ̄гыт. Пӯрлахтын ма̄ныл хунь яныг ма̄хум а̄стысыт, э̄лаль концерт о̄лыс. Искусство центрыт ханищтахтын а̄гит йӣквсыт. Л. А. Алфёрова, яныг кӯщай палт советникыг рӯпитан нэ̄, Валерий Михайлович Шульгин ос Рудольф Васильевич Меров янытласаге ос по̄сыл мӯйлуптасаге. Ты по̄с рущ ла̄тӈыл тох хансым о̄лы – «хранитель традиций». Тэ̄н матыр ма̄щтырлан семинарн акваг во̄виньтаве̄г, тот тэ̄н са̄гырхатэ̄г, ёрге̄г. Ня̄врамыт ёвтыт, ня̄лыт ва̄руӈкве ханищтасанэ̄н. Ос музей ма̄гсыл тӯпыт, товтыг, ёвтыт, ма̄нь суныт ва̄рсы̄г. Валерий Михайлович Ямал ма̄ныл ма̄ньлат порат тыг ӯсн ёхтыс, тыт акваг о̄лы, рущ рӯпатат рӯпиты. Ос такви ханты ва̄рмалянэ хот ат ёрувласанэ. Рудольф Васильевич Ха̄льӯс районныл Хо̄рыӈпа̄выл о̄лы, тыт музейт матыр ва̄руӈкве э̄ри, тав акваг во̄виньтаве. Юв миннэ ма̄хум ёлн исмитыл, ща̄ил айтве̄сыт. Атыӈ ня̄нил тыттуве̄сыт. Ня̄нь тот музейт рӯпитан нэ̄квет ра̄ктыл по̄щгим кӯрт та̄нти ва̄ре̄гыт, сака ёмас, лапум ня̄нит ва̄руӈкве ха̄сэ̄гыт. Са̄лы нё̄выль исмит манка сыртэпыл мощ та̄ртыяныл, тащир аквтуп пе̄с ма̄хманув хумус колас па̄йтыгласыт. Исмитаныл сака атыӈ, рущ ма̄хум титыглахтэ̄гыт, хумус тох па̄йтаве. Ла̄ве̄гыт, са̄лы нё̄выль ман тамле хунь во̄иӈ. Та̄н ювле ла̄вве̄сыт, са̄лы нё̄выль во̄й та̄л хунь о̄лыглы, тав о̄с са̄в во̄й о̄ньщи. Ань ма̄хманув пӯрлахтаманыл юипа̄лт То̄рмув ёмас о̄лнэ хо̄тал вос ва̄ри, тӯяг яныг вит ул вос е̄мты, ӯйхул яныгман ма̄ вос хо̄нты. Мир пуссын пус ка̄т, пус ла̄гыл вос о̄лэ̄гыт.

1120 2016. 03. 24. Тамара МЕРОВА

Тӯлыглапыт урыл потыр Белоярский район Касум па̄вылт музейт рӯпитан хо̄тпат са̄всыр мӯй ма̄хум акванатыгла̄лсаныл. Та̄н тот пе̄с йис тӯлыглапыт о̄вылтыт потыртасыт. Ма̄хум ёт Алсу Назырова, Касум па̄выл кӯщай нэ̄, ос Людмила Алферова, губернатор ва̄ӈын хум палт советникыг о̄лнэ нэ̄, пащалахтасы̄г ос тамле пе̄с ёнгилыт хумус э̄лаль тотуӈкве э̄ри, ты о̄вылтыт пуссын потыртасыт. Ма̄н ва̄глӯв, хоса порат соссаӈ ма̄хманув Ӯй йикуӈкве ат та̄ратаве̄сыт. Та̄н тӯйтыглахтым Ӯй йӣквсыт, таима̄гыс ань ма̄ньлат пыгыт са̄в пе̄с накыт ат ва̄ганыл. Тувыл ань тох о̄лы, э̄лаль о̄лнэ посыӈ хо̄тал ма̄гыс, та̄к номт о̄щнэ ма̄гыс хантыт, ма̄ньщит э̄лаль кисхатуӈкве патсыт. Э̄лнаӈ пе̄с ма̄хманув Ӯй йӣквыгласыт, пуссын На̄й-О̄тыранув ка̄стым, ащо̄йканув, о̄панув тувле нупыл номтаныл та̄кмалтым э̄лаль о̄лсыт. Ань пе̄с ва̄рмалит ва̄нэ хо̄тпанув мощщаме̄гыт, хотьютныл, маныр китыглаӈкве ма̄ньлат соссаӈ ма̄хум ат ва̄ганыл. Ос тӯлыглапыт щар ул вос со̄ймысыт, Касум па̄выл музейт рӯпитан нэ̄г Елена Федотова ос Марина Кабакова «Театр берестяных масок» нампа проект щё̄питасы̄г. Касум па̄вылт о̄лнэ пыгрищит атсанэ̄н ос яныгпа̄ла хо̄тпат ёт са̄всыр пе̄с э̄ргыт, йӣквыт, ёнгилыт ханищтаӈкве патсыт. Тэ̄натэ̄н Андрей Александрович ос Татьяна Филипповна Ерныховыг э̄кваго̄йкаг нё̄тсы̄г, са̄в э̄ргыт, йӣквыт, ощхуль ва̄рнэ ка̄сыт ханищтасыт. Та щирыл ханищтахтым ты ма̄хманув «А̄пщи» нампа ма̄нь спектакль щё̄питасыт. Тувыл та̄н «Культурная мозаика малых городов и сёл УрФО» касылт кассыт ос тот но̄хпатсыт. То̄нт Тюмень ӯст о̄лнэ «Культура» нампа мирн нё̄тнэ фонд па̄лыл олннё̄тмилыл та̄стуве̄сыт. Ты фондыт Елена ос Геннадий Тимченко пуӈктотэ̄г. Тэ̄н Россия янытыл культура са̄всыр тэ̄лат э̄лаль тотнэ хо̄тпатн акваг нё̄тэ̄г. Ос мо̄лты округувт тэ̄н хӯрум проект э̄лаль тотнэ ма̄гыс а̄рталасы̄г. Акванатхатам ма̄хум ань ла̄всыт, э̄рыӈ ты спектакляныл хосыт тӯлыглахтын порат суссылтан пе̄с накыт ма̄ньлат пыгытн ёмщакв ханищтавет ос э̄лаль тотавет. Яныгпа̄ла хо̄тпат туп таи ла̄ве̄гыт, ты тӯлыглапыт сака та̄рвитыӈ ханищтаӈкве, ань ма̄ньлат пыгыт ханты ла̄тыӈ ат ва̄гыт. Матыр ощхуль ва̄руӈкве, йӣквуӈкве та̄н молях ханищтахтэ̄гыт кос, ос йӣс ма̄хум На̄й-О̄тыр э̄рганыл, мо̄йтаныл та̄ра ат торгамтахтэ̄гыт. Та̄н май пуссын щё̄с арыгкем э̄ргавет, по̄икщавет. Ань хо̄т тамле ва̄нэ хо̄тпа хо̄нтуӈкве. Са̄ртын 1990 та̄лытыт пе̄с э̄ргыт, мо̄йтыт ва̄нэ хо̄тпаг Пётр Иванович Сенгепов ос Пётр Иванович Юхлымов о̄лсы̄г. То̄нт Ӯй йӣквнэ порат тэ̄н кинан по̄слыглаве̄сы̄г. То̄нт пе̄с накыт э̄лаль кинсуӈкве Татьяна ос Тимофей Молдановыг о̄вылтахтасы̄г. Тэ̄н ань исторический наукат сас учёныйхо̄тпаг, тэ̄натэ̄н яныг пӯмащипа ла̄тыӈ ла̄вуӈкв э̄ри. Ань туп кина сунсым тувыл ханищтахтуӈкве ос ляпат ханты ла̄тыӈ ва̄нэ хо̄тпа ёт акваг рӯпитаӈкве ке, тащирыл э̄лаль ты ва̄рмалит тотуӈкве ро̄ве̄гыт. Ханты-Мансийскат тӯлыглапыт урыл акванатым архив ёт Тимофей Молданов рӯпиты, ма̄ньщит палт ты ва̄рмалит Светлана Попован, ма̄ньщи учёный нэ̄н, ханищтавет. Тэ̄н ты тэ̄латэ̄н акваг э̄лаль тотуӈкве ке патэ̄г ос яныгпа̄ла хо̄тпанув о̄лнэ̄ныл сыс матыр потыртэ̄гыт ос суссылтэ̄гыт, ма̄н пе̄с тӯлыглапанув иӈ хотта мус о̄лэ̄гыт. Светлана Демлюга, Тюмень ӯсныл ёхталас, тав ос Тимченко нампа фондыт рӯпиты. Нэ̄ о̄выл щёс тӯлыглапыт о̄вылтыт хӯнтамлас ос тувыл «А̄пщи» спектакль сунсыс. Таве̄н тыи сака мӯстыс ос нэ̄ ла̄выс: «Ты пе̄с культуран на̄нан э̄лаль тотуӈкве ос мо̄т мирыт пӯмщалаӈкве сака э̄ри. Ка̄сыӈ э̄лумхо̄лас агтым, по̄йкщим та̄к номт ва̄ри ос э̄лаль о̄лы, тувыл хотты хо̄тпа ща̄нь ла̄тыӈ ва̄г ке, то̄нт тамире культура э̄лаль тотуӈкве ё̄р хо̄нты. Хантыт ос ма̄ньщит палт аквта щирыл э̄лаль вос о̄лыс».

1120 2016. 03. 24. Тамара МЕРОВА

Пе̄с накыт э̄лаль тотнэ хум Николай Анатольевич Тасьманов ханты нёмса хум, тав йӣвныл са̄всыр пормасыт ёрги, «Народный мастер России» нам о̄ньщи. Мо̄лты та̄лт Николай Тасьманов «Славим человека труда» округ касылт йӣвныл пормасыт ва̄рнэ номинацият китыт места вис. Тав Касум па̄вылт о̄лнэ музейт рӯпиты, а̄гирищит ос пыгрищит пе̄с йис ва̄рмалитын ханищтыянэ. Ме̄н ань са̄лыл каснэ ялпыӈ хо̄талт акванхо̄нтхатыгласме̄н ос тав такви уре̄т потыртас. 2010 та̄лт Николай Анатольевич Югорский государственный университет а̄стлас, тот ма̄вит ӯргалан ос туризм тэ̄лат ва̄нэ хо̄тпаг ханищтахтас. Тувыл юв ёхтуме̄т, музейт рӯпитан коныпал, такви самын патум ма̄тэ̄н мӯй ма̄хум тотыглаӈкве номылматас. О̄влэ̄т тав Касум па̄выл ляпат ёмас ма̄ хо̄нтыс. Тот хӯл алыщлаӈкве, во̄раяӈкве ос са̄лы ӯрнэ ма̄ ва̄руӈкве вос ро̄выс. Николай Анатольевич ла̄выс: «Хосат та̄гыл каӈкум такви са̄лыянэ ты ма̄т ӯргаласанэ. Тав Касумныл Амня я̄ хосыт алгаль 20 ве̄рыстат о̄лы. Ам ань ты ма̄ аренда щирыл вислум ос община ма̄гыс нэ̄пакыт атсанум. Проектдекларация нэ̄паканум кӯщаитн хоса щё̄питаве̄сыт, о̄влэ̄т та̄н хасхатнэ̄ныл ма̄гыс 120 со̄тыра солко̄ви ойтуӈкве во̄всыт. Тувыл яныгса̄т со̄тыра солко̄ви ла̄всыт ос ётыл атпан со̄тыра солко̄ви ойтуӈкве потыртахтасӯв. А̄тям такви са̄лы ӯрнэ ма̄тэ тыгыл 50 ве̄рыстат о̄лы, тув ма̄хум тотыглаӈкве та̄рвитыӈ. Ос вим ма̄в мощ ляпат о̄лы, тот ма̄н каӈканум, рӯтанум ёт о̄лэ̄в, рӯпитэ̄в. Ань йильпи кол ӯнттуӈкве ос са̄лы пӯсас ва̄руӈкве тот патэ̄в. Йильпи ма̄н тотнэ са̄лыт о̄влэ̄т китхӯрум та̄л пӯсас кӣвырт о̄ньщуӈкве э̄ре̄гыт. Матахмат са̄лыл акимн Владимир Данилович Тарлинын мивем. Тав Наталья Егоровна э̄кватэ̄нтыл тув тах ва̄нтлэ̄г ос тот во̄рколт о̄луӈкве патэ̄г. Тэ̄н Касум совхозт №9 пиркатат са̄лы ӯрнэ колт акваг рӯпитасы̄г. Э̄кваго̄йкаг па̄вылт о̄луӈкве щар ат таӈхе̄г ос ам тэ̄натэ̄н амки палтум во̄всагум. Тувыл «Нумсанг ёх» стойбищан ялантан пыгыт а̄нумн о̄с нё̄тэ̄гыт, ам ос пе̄с ма̄хманув хольт та̄наныл хӯл алыщлаӈкве ханищтыянум. Ма̄нки камкат ва̄ре̄в, толыг хасэ̄в, та̄нанылн о̄с пӯмащ. Ётыл са̄лы ӯрнэ ва̄рмальн ханищтаӈкве патыянӯв. Амки са̄лы ӯрнэм ма̄гыс хус ман ва̄т са̄лыл то̄влавем. Са̄в са̄лы о̄ньщуӈкве аквты ёмас тэ̄пыӈ ма̄ э̄ри. Са̄лы ӯруӈкве ам ма̄ньта̄гыл ащо̄йкамн Семён Андреевич Вандымовын ханищтаве̄сум. Туи ӯщлахтамум порат тав палтэ тотыглаве̄сум ос тав а̄нумн са̄в пе̄с накыт урыл потыртас ос суссылтас. О̄пам Кислоры па̄вылт о̄лыс ос хӯл алыщлас. Яныгнувег е̄мтсум, о̄с тав пиркататэ ёт хӯл алыщлаӈкве яланта̄лсум. Ам а̄тям Анатолий Яковлевич Тасьманов Касум па̄вылт плотникыг рӯпитас, омам Екатерина Семёновна Вандымова совхозт экспедиторыг о̄лыс. Тэ̄н сас хантыиг, юн ма̄н акваг ща̄нь ла̄тӈыл потыртасӯв, ос ханты о̄лупса ва̄нэг яныгмасӯв. А̄тям такви са̄тлов са̄вит са̄лы о̄ньщис, тувыл а̄тимыг е̄мтме порат са̄лыянэ рӯтанэ̄н вуйлуве̄сыт кос. Мо̄йт хольт, хоса ман ва̄ти о̄лсӯв, тэ̄нутыг ат тэ̄санӯв ос са̄лыянув хотталь та минасыт. Хунь э̄лумхо̄лас хотталь щалты, ӯйхуланэ о̄с тав юипа̄лэ̄т аквтупмат а̄тимыг е̄мтэ̄гыт. Пе̄с ма̄хманув ла̄внэ̄ныл щирыл тох о̄лы. Ань са̄лы ӯрнэ ва̄рмаль ам э̄лаль тотуӈкве таӈхилум. Музейт рӯпитанэм сыс ма̄н яныгпа̄ла хо̄тпат ёт пыгрищит Ӯй йӣквуӈкве ханищтыянӯв. Ӯй йӣквнэ ва̄рмаль ма̄нь порат амки ат ва̄щиньтасум, нас туп яныгпа̄ла рӯтанумныл са̄в потыр хӯлыгласум. Тувыл Семён Михайлович Лозямов, Ханты-Мансийский районныл тыг ва̄нтлум о̄йка, тав Ӯй ка̄тынпаттыглас, тав колэ̄т йӣквсыт. То̄нт Татьяна ос Тимофей Молдановыг са̄всыр пе̄с йис утыт урыл хансуӈкве патсы̄г, ам ос тыил пӯмщалахтасум. Ань та номтанум ма̄ньлат хо̄тпатн потыртыянум». Ты пӯмыщ потыр ма̄гыс ам Николай Анатольевичин яныг пӯмащипа ла̄тыӈ ла̄ве̄гум.

1120 2016. 03. 24. Светлана РОМБАНДЕЕВА

Акванатым соссаӈ мир пормасыт Ты э̄тпос 16 хо̄талэ̄т «То̄рум Ма̄» музейт «От экспедиции к экспозиции» выставка рӯпитаӈкве о̄вылтахтас. Хунь музейт рӯпитан хо̄тпа соссаӈ ма̄хум палт ялы, та̄н ма̄наныл тав матыр а̄ныса̄н, маснут ман пе̄с пормас тоты те – ты сака э̄рнэ ва̄рмаль. Музейт рӯпитан хо̄тпат командировкан ман экспедициян ялантаманыл сыс ла̄щалла̄щал са̄в пормас атсыт. 1999-2001 та̄лытт ма̄ньщи ос ханты ма̄хум палт Зоя Никифоровна Лозямова, Александр Константинович Матюков ос Анфиса Михайловна Хромова ва̄тихал яланта̄лсыт. Тыт ань та̄н тотыглам пормасаныл ты суссылтавет. «Народный мастер России» нам о̄щнэ ханты э̄ква Зоя Никифоровна ла̄выс: «Ам Белоярский районт о̄лнэ ханты ма̄хманув палт са̄в щёс ялсум. Тувыл пе̄с пормасыт, а̄ныса̄ныт тотыгласум. Акв матнакт Помут па̄вылн хо̄игласӯв, тот нэ̄мхотьют ат о̄лы, пе̄с па̄выл. Ам а̄мпарын щалтсум, тот таса̄вит пормас, о̄щнут, а̄па та маныр. Акв нэ̄пак хо̄нтсум, 1949 та̄лт хотьют хансум, ань маныр ёвтуӈкве э̄ри, тэ̄нут ман о̄щнут, манах са̄лы матыр ма̄гыс пе̄нтуӈкве э̄ри, хотьютн манса̄вит са̄лы миӈкве э̄ри. . . Тувыл ам са̄в пормас тотыгласум, са̄в хури ва̄рсум. Тарлиныт, Молдановыт па̄влыгн ялсум». Александр Константинович ка̄тпосыт урыл потыртас. Тав Зоя Никифоровна ёт ханты ма̄хум палт ялыс, тот ка̄тпосаныл урыл та̄наныл китыгласанэ ос по̄слысанэ. Ань мо̄рсыӈ хо̄тпа ка̄тпосэ ва̄гтэ, э̄лнаӈ ка̄сыӈ колта̄гыл такви ка̄тпосыл о̄лыс. Ты рущ хум ты тэ̄ла ханищты, пе̄с ка̄тпосыт наманыл та̄рапаттыянэ. Ловумтам ма̄ньщи хо̄тпав Анфиса Михайловна Хромова о̄с са̄в ма̄т о̄лыс, музейн са̄в пормас тотыглас, Ха̄льӯс район янытэ̄т яласастэ. Свердловский областьт о̄лнэ Лӯсум ма̄ньщиянув палт ялыс, та̄наныл по̄слысанэ, потраныл ёлхассанэ. Тувыл та̄в ма̄ньщи суп ос ла̄гыл маснут тотыглас. «То̄рум Ма̄» музейт рӯпитан ма̄хманув тамле э̄рнэ ва̄рмаль та ва̄ре̄гыт. Ты пормасыт э̄тпостем суссылтаӈкве патавет.

1120 2016. 03. 24. Николай МЕРОВ

Ма̄н ма̄вт о̄выл кина хумус суссылтаӈкве патвес Ре̄тыӈ ю̄свой э̄тпост Ханты-Мансийск ӯст «Ма̄вит ос э̄лумхо̄лас» музей колт суссылтап щё̄пита̄лвес. То̄нт са̄в кина по̄слын ма̄хум мӯйлуӈкве тыг ёхталасыт. Та суссылтап урыл Пётр Владимирович Назаров, музей колт рӯпитан учёный хум, тав потыртас. Ты суссылтап рущ щирыл «От первой киноустановки до кинофестиваля» намаим о̄лыс. «Ма̄вит ос э̄лумхо̄лас» музейт рӯпитан хо̄тпат ос Ха̄льӯс пе̄с йис пормас атнэ колт рӯпитан ма̄хум та̄н аквъёт щё̄пита̄лсаныл. О̄лнэ ма̄вт кина суссылтан ва̄рмаль хумус о̄вылтахтас, тот ты урыл потыртавес. Пе̄с порат щар о̄выл киномеханикыг Павел Сергеевич Баушкин о̄лыс. Тав уре̄тл Ха̄льӯс район пе̄с йис пормас атнэ колт са̄в потыр хансым о̄лы. Тав са̄в та̄л кина суссылтым тот рӯпитас. О̄выл кинатэ 1928 та̄лт суссылтастэ. Тувыл 1952 та̄лт Ха̄льӯс район янытыл кина суссылтан кӯщаиг пе̄риявес. То̄нт «Украина» кина суссылтан то̄тап о̄лыс, тав па̄влытын тотыглавес. Ань музейт ты то̄тап о̄ньщаве. Та порат о̄лум пе̄с патефон ос мо̄т пе̄с аппаратура о̄ньщис. Мо̄лты та̄л оигпам э̄лыпа̄лт, йильпи та̄л Россия кина та̄лыг ла̄ввес. Таима̄гыс ань ты суссылтап ва̄рыглавес. Тыт о̄лнэ ма̄хманув кина суссылтан тэ̄ла урыл ос хотьют ты рӯпата э̄лаль тотыс о̄с вос ва̄гыт. Са̄ртын кина суссылтан ма̄хум па̄влытын йӣвха̄пыл то̄вим ялантасыт. Ма̄нь па̄вылн ёхтэ̄гыт, мир акв колн атыяныл, я̄ӈк то̄р норыт онтсыл тагатэ̄гыт, кина суссылтан то̄тапаныл ӯнттэ̄гыт, сӯпне̄лмта̄л кина суссылтаӈкве та о̄вылтахтэ̄гыт. Па̄влыӈ ма̄хум хунь о̄выл щёс кина ка̄саласыт, то̄ват хото̄щатахтасыт, то̄ват ос хотрохтысыт, тыщир ты о̄лыс. Та̄н ты тэ̄ла нэ̄мхуньт ат ва̄саныл. Ётылнув, ты ва̄рмаль та̄н торгамтасаныл, кина суссылтан хо̄тпат яныг ща̄гтыл ӯруӈкве патсаныл. Тамле ты пӯмащ ва̄рмаль пе̄с порат о̄лыс. Ос хунь са̄внув кина суссылтан то̄тап е̄мтыс, ка̄сыӈ па̄вылт кина суссылтан кол ва̄рвес. Ӯщлахтын хо̄талытт са̄в ма̄хум та колытн кина сунсуӈкве ёхталасыт. Пе̄с йис о̄лупса, яныг хо̄нтлын нак, ощхулиӈ ва̄рмаль ос мо̄т са̄всыр тэ̄лат суссылтаве̄сыт. Мирн ты ва̄рмаль сака мӯстыс. Ань ма̄н округувт «Дух огня» нампа мирхал кина по̄слын фестиваль ва̄рыглавес. Ты та̄л нилахуйпловит щёс щё̄пита̄лвес. Кина по̄слын ва̄рмаль щирыл рӯпитан хо̄тпат, Россия ос мо̄т хо̄н ма̄ныл тыг ёхталасыт. Та̄нки по̄слум кинаныл тыт суссылтасаныл. Кина по̄слын э̄лыпа̄лт акванхоилтан кит па̄рт ло̄мтыг та выставкат ма̄хум сунсуӈкве ве̄рмысыт. О̄выл фестиваль пӯнсым порат Александр Абдулов, кинат ёнгасам намыӈсуиӈ хум, тав ты кит па̄ртло̄мтыг акванхоилтасаге. Тамле ты пӯмащ ва̄рмаль о̄лыс.

1120 2016. 03. 24. Светлана РОМБАНДЕЕВА

Тӯйтыӈ нэ̄ урыл мо̄йт суссылтавес Ханты-Мансийск ӯст «Дух огня» кинофестиваль о̄лме порат «Тайна Снежной королевы» мо̄йт суссылтавес. Та порат ты мо̄йткина ва̄рум нэ̄ (режиссёр) Наталья Бондарчук ос актриса нэ̄ Анна Снаткина тыг ёхталасы̄г. Мо̄йт суссылтан э̄лыпа̄лт тэ̄н аквкит ла̄тыӈ ла̄внэ ма̄гыс сценан во̄виньта̄лвесы̄г. Наталья Бондарчук тох потыртас: «Паща о̄лэ̄н, я̄тил мир, я̄тил ня̄врамаквет! Ты мо̄йт ам о̄с ат ва̄слум, ань на̄н ётын ущ сунсуӈкве патылум. Матъёмас тав о̄влэ̄т на̄н о̄лнэ ма̄нт суссылтаве. Ань фестивалюв «Дух огня» нас тох хунь намаявес. Соссаӈ мир тыт пе̄с йис та̄гыл о̄лэ̄гыт, ты На̄й-О̄тырыӈ ма̄т та̄н На̄яныл ӯргалым о̄ньщияныл. Ты мо̄йтыт Герда а̄гирищ ё̄рнколт На̄йпос ка̄тынпатты, сунсы – На̄е лылыӈ. Тав та щирыл те Кай пыгрищин нё̄туӈкве ве̄рми. . . Э̄лаль ам воссыг ат мо̄йтэ̄гум, на̄н ань таве сунсуӈкве патылы̄н. Ты мо̄йткина ма̄н нила та̄л ювле хультум порат Ямал ма̄т ва̄руӈкве о̄вылтаслӯв. Та ма̄ ма̄н янытэ̄т яласаслӯв, ё̄рнколт о̄лсӯв, кина ва̄рим тот са̄в хо̄тал рӯпитасӯв. Тувыл Лапландия ма̄н (Финляндиян) минасӯв, тот я̄ӈк са̄лыт ос ха̄йтнутыт кинан по̄слысанӯв. Ты юипа̄лт Германиян ос Австриян ялсӯв, маттем тот по̄слысӯв. Кинав нила та̄л арыг ва̄рыслӯв, щё̄питаслӯв. Ань номтум татем ёмас, ты ялпыӈ хо̄талыт сыс мо̄йтув са̄в ня̄врамытын сунсаве тах. Ты мо̄йтыт Тӯйтыӈ нэ̄ (Снежная королева) Анна Снаткина тав по̄слувес. Ам таве сака э̄руптылум, ты мо̄йт ва̄рмув э̄лыпа̄лт Анна «Пушкин. Последняя дуэль» кинат ёнгыс, Натали а̄гииг о̄лыс». Анна Снаткина ня̄врамыт ёт пащалахтас, аквкит ла̄тыӈ ла̄выс: «Ам ань о̄с омаг е̄мтсум, а̄гирищ о̄ньще̄гум, наме Вероника, таима̄гыс ты мо̄йт ам о̄с сака ӯрыслум. Ма̄н, яныгхо̄тпат, пуссын мо̄йтыт хӯнтлым яныгмасӯв, ань ня̄враманув тох яныгме̄гыт, тувыл та̄н ня̄враманыл о̄с аквтох яныгмаӈкве патэ̄гыт. Ам номсэ̄гум, на̄н сыманынт ты мо̄йткина ёмас номт хультупты. Ты кина кӯщай нэ̄н Наталья Сергеевнан ам яныг пӯмащипа ла̄тыӈ ла̄ве̄гум, тав ётэ рӯпитаӈкве а̄нум матъёмас во̄выстэ. Ята, ань мо̄йтув ты о̄вылтахты, я̄тил ня̄врамквет, сунсэ̄н». Тувыл мо̄йт та о̄вылтахтас. Тӯйтыӈ нэ̄, насати а̄ти по̄лям манос сымта̄л нэ̄. Тав о̄влэ̄т ёмас нэ̄гомаг о̄лум, сымта̄лма̄йтта̄л утытн са̄тыма, Тӯйтыӈ нэ̄г ва̄рапима. Кай пыге о̄йкатэ̄н ё̄рнколн оймалтаптувес. Тот Герда а̄гирищ о̄лыс, тэ̄н ань аквъёт яныгме̄г, ёнгасэ̄г. Аквматнакт Герда Кай пыгрищ хотӯстыстэ, ань кисмаитэ, акватэ а̄тим. Тя̄кв акве̄ныл На̄й а̄лмаяс, таве кинсуӈкве минас. Тӯйтыӈ нэ̄ палт Кай хо̄нтыстэ, тав, насати о̄с Тӯйтыӈыг ва̄рапима. Тувыл та̄ксар а̄ги Герда тэ̄натэ̄н нё̄тыс, сыманэ̄н На̄йн толтыглавесы̄г. Ань нэ̄ ущта хо̄нтыстэ, ты, насати, тав пыге. Пуссын аквансыныгтахтасыт, аниглахтасыт, со̄тыӈыщщуниӈыщ э̄лаль та о̄лмыгтасыт. Тамле ёмас мо̄йт ма̄н та суссӯв. Кина ва̄рнэ нэ̄гн ня̄врамыт пӯмащипа ла̄тыӈ ла̄всыт. Акв а̄гирищ ла̄выс: «Ам ань ущта торгамтаслум: о̄лупсавт, насати, э̄рупса ма̄кыг о̄лы. Хунь ма̄н юртанув нас тох э̄руптыянӯв, тыи ма̄гыс нэ̄матыр ат во̄вев, халанувт сымыӈыщ о̄лэ̄в». Тыгыл э̄лаль мо̄йт Ямал ма̄н тотыглавес, тувыл Москва ӯсн, тот суссылтавес. Наталья Бондарчук ла̄вме щирыл, ты кина тав ань ищхӣпыӈ ут хосыт 3D кинаг ва̄руӈкве номсытэ. Индия ма̄т о̄лнэ хо̄тпа ёт потыртахтасы̄г, тот ва̄раве. Тувыл тыг тах о̄с тотыглытэ, йильпииг сунсылӯв.

1120 2016. 03. 24. Галина КОНДИНА

Ма̄ньщи ла̄тыӈ ханищтэ̄н Хотты рӯтанын ман ляпа ма̄хманын ма̄ньщи ла̄тыӈ ханищтаӈкве те таӈхе̄гыт, тыхо̄тал па̄сыл ма̄н ты кастыл ло̄пс щё̄питаӈкве патэ̄в. О̄влэ̄т на̄нти рӯтанын ма̄ньщи ла̄тӈыл хумус ла̄вуӈкве, тамле ла̄тӈыт ловиньтэ̄н ос ханищтэ̄н. То̄ва ла̄тӈыт э̄рыӈ на̄н ма̄нынт мо̄тнув щирыл ла̄вавет, ма̄н ос на̄нан Сакв ма̄хум потыртан щирыл хансыянӯв. Ханты-Мансийск ӯст са̄в ма̄ньлат ма̄хум ма̄ньщи ла̄тыӈ ханищтаӈкве таӈхе̄гыт. Та̄н университетт, колледжит ханищтахтэ̄гыт манос хо̄т рӯпитэ̄гыт. Акванхо̄нтхатыглаӈкве пуссын ат ве̄рме̄в, газета та̄ра, э̄рыӈ, ла̄тӈув акванёхты. Ома – мама А̄тя – папа Ща̄нь – мать А̄щ отец Увщи – старшая сестра Э̄щ, йигрищ – младшая сестра Каӈк, кыгщи – старший брат А̄пщи – младший брат А̄ги – дочь Пыг – сын А̄кв – тётя (если она старше твоей мамы или папы) Ный – тётя (если она младше твоей мамы) Аки – дядя Ане̄ква – бабушка (по маме) Щаще̄ква – бабушка (по папе) Ащо̄йка – дедушка (по маме) О̄па, о̄парищ – дедушка (по папе) Сасыг – двоюродный брат по материнской линии Па̄нт – племянник (сын старшей сестры) Увщи – тётя (младшая сестра отца) А̄ӈква̄ги – двоюродная сестра (по материнской линии) А̄ӈквпыг – двоюродный брат (по материнской линии) А̄ща̄ги – старшая сестра мужа, тётя О̄па̄ги – тётя (по отцу, его младшая сестра) Ный – тётя, двоюродная сестра (по материнской линий), дочь дяди, т. е. брата мамы Э̄ӈк – племянница (дочь старшей сестры) Апыгрищ – племянник, внук, правнук Ва̄пс – зять (муж младшей сестры) (К)тил – зять (муж старшей сестры) Мань – сноха (жена младшего брата) Ониг – сноха (жена старшего брата) О̄нып – свекровь Аки – свёкор Уп – тесть О̄нып – тёща Па̄нт – деверь О̄нып – золовка (если она старше мужа) Э̄ӈк – золовка (если она младше мужа) А̄гим а̄ги – внучка, (дочь дочери) А̄гим пыг – внук, (сын дочери) Пыгум пыг – внук, (сын сына) Пыгум а̄ги – внучка, (дочь сына) Ань лА̄тӈыт ханищтасанЫ̄н ос Э̄лаль потыртаӈкве патЭ̄в: Ам омам наме – Мою маму зовут Ам а̄тям наме – Моего папу зовут Ам ва̄псум наме – Моего зятя, мужа младшей сестры, зовут Ам ныюм наме – Мою младшую тётю зовут Ам пыгум а̄ги наме . . . – Мою внучку, дочь моего сына зовут . . . Ам а̄гим пыге наме . . . – Моего внука, сына моей дочери зовут . . . Ам о̄пам яныг хо̄нтын тотыглавес. – Мой дедушка (по папе) воевал на фронте. Ам па̄нтум Югорский университетт ханищтахты. – Мой племянник, (сын старшей сестры) учится в Югорском университете. Ам пыгум са̄тыт классыт ханищтахты. – Мой сын учится в седьмом классе. Ам а̄гим садикын яланты. – Моя дочь ходит в детский сад. Ам э̄ӈкум пӯльницат ле̄ккарыг рӯпиты. – Моя золовка (младшая сестра моего мужа) работает врачом в больнице. Ам кыгщим хӯл алыщлаӈкв ло̄ӈхаль минас. – Мой старший брат уехал рыбачить вниз. Мо̄тыт газетат мо̄т урыл на̄нан хансэ̄в. Ань ты ла̄тӈыт ханищтэ̄н. Матыр ла̄вуӈкве те таӈхегы̄н, пищма редакциявн хансэ̄н.

1120 2016. 03. 24. Светлана Динисламова

Яныг утыт ос ма̄нь утыт Пупакве сӮсаманэ ёт: Ята, а̄ӈквал тармыл ха̄ӈхыгтэ̄н, пилсамыт манумтэ̄н! Ёл ул поваре̄н, матарн ул вос хо̄яве̄н! Ма̄н сови нярап пупаквет кос, ос апрыӈыт. Ма̄н такем ха̄йтуӈкве ха̄сэ̄в, лув юил ёхтылӯв. Ма̄н йӣвыт ха̄хталахтэ̄в, витт мӯрсэ̄в. Та̄рвитыӈ а̄ӈквалыт но̄хпе̄рыгтэ̄в, во̄иӈ те̄рыӈхомлахыт кинсэ̄в. Ма̄н ма̄г ос пум тэ̄гув, та̄рохсакве ос пил тэ̄гув. Ӯйхул ке хо̄нтэ̄в, тув о̄с ща̄гтэ̄в. ВО̄р кати ос нЯ̄враме Сӯйта̄л яласэн, ка̄миньтыг ӯсувла̄нтэн – наӈ ла̄гыл паттан пӯтыска хӯрыгсовквеӈыт. Наӈ во̄р алыщлан хум, алыщ палт ла̄щлакве лаквхатэн, ӯрхатым хуен, алн уин ӯрен. Вощрам самыт – э̄ти постэ̄гыт. Сэ̄мыл палит – хосаныл хӯлэ̄гыт. Хоса консыт суйта̄л ё̄маса̄нтэ̄гыт. Картинат сунсыгласы̄на? Ты нэ̄пак ловиньтасы̄на? Ань ва̄глы̄н, хумус товлыӈ ӯит, ла̄глыӈ ӯит ня̄враманыл тэ̄нут кинсуӈкве ханищтыяныл, хумус та̄нтина̄ныл ӯргалаӈкве ханищтыяныл. На̄н, ня̄врамаквет, то̄рум ма̄ тармыл на̄нти кӯщаит. Ма̄ тармыл на̄н йильпи я̄ ясыт ва̄регы̄н – хо̄т пе̄с порат то̄сам хара ос сэ̄иӈ ма̄ о̄лыс, тот во̄рщахлуквет кургуӈкв патэ̄гыт. На̄н саюм я̄ӈкылмаӈ ма̄т ёлымтыяны̄н, я̄т ярппил ӯлтта ва̄рияны̄н, я̄ӈкылма̄ о̄лум ма̄т ща̄рыщ хурип яныг тӯр а̄мари. Ты ща̄рыщ хосыт на̄иӈха̄пыт яласаӈкв патэ̄гыт, пормас ос пор хартуӈкве патэ̄гыт. На̄н нё̄рыт кӣвырн ка̄ралахтапегы̄н, тыныӈа̄хвтасыт хо̄нтэгы̄н. Вит ёлыпа̄л яныг ха̄пыл ща̄рыщ паттан та̄ртахтэгы̄н. Ма̄щтыр, карыс, нё̄тнэ, яныг колквет ӯнттуӈкве патэгы̄н. Во̄р щахлыт тэ̄лтэгы̄н, та̄н палтаныл на̄нан э̄рнэ товлыӈ ӯит, ла̄глыӈ ӯит янмалтаӈкве патэгы̄н. Моляхнув яныгме̄н, торген ёмащакв ханищтахтэ̄н. На̄нки о̄лнэ ма̄н ма̄гсыл ос на̄нки ма̄гсылын ё̄р атэ̄н, номт атэ̄н. Хунь но̄хяныгмегы̄н, по̄йтнэ̄г вос рӯпитасы̄н. Ань ты ма̄нь потырохсат та холасыт. « Яныг утыт ос ма̄нь утыт» нампа нэ̄пак Е. И. Ромбандеева ма̄ньщи ла̄тӈыг толмащластэ, 1951 та̄л.

1121 2016. 04. 07. Людмила ТЕТКИНА

Э̄лаль аквъёт рӯпитаӈкве ла̄вхатсы̄г Та э̄тпос оигпан э̄лыпа̄лт Екатеринбург ӯсныл Штефан Кайль Ханты-Мансийск ӯсн ёхталас. Тав округ кӯщаюв Наталья Комарова ёт хо̄нтхатыглас. Ты хум ӯст Германия ма̄ныл РФ генеральный консулыг о̄лы. Наталья Комарова тав нупылэ ла̄выс: «Германия ёт ма̄н хосат та̄гыл аквъёт рӯпитэ̄в. 2013 та̄лт яныгпо̄ль э̄тпост Ханты-Мансийск ӯст яныг форум о̄лыс. То̄нт ма̄н немецкий компаният Нё̄рт рӯпитаӈкве во̄всанум. Ма̄н Нё̄ранувт сака са̄в тыӈын а̄хвтас о̄лы, аквъёт рӯпитаӈкве ке патэ̄в, са̄в олн сэ̄луӈкве ве̄рме̄в. Сургут ӯст на̄йпос ва̄рнэ станция аквъёт ӯнттыслӯв. Ань ты яныг станция са̄в на̄йпос ва̄ри. Ма̄навн аквта щирыл э̄лаль рӯпитаӈкв э̄ри, то̄нт мирн са̄в э̄рнэ тэ̄ла тах тотэ̄в». Ма̄н округувт ка̄сыӈ та̄л «Спасти и сохранить» нампа ма̄вит ӯргалан тэ̄ла щё̄пита̄лаве. Тӯяг ма̄ янытыл тыг ёхтын мӯй ма̄хум ты урыл кинат тыт суссылтэ̄гыт. Германия ма̄ныл кина по̄слан ма̄хум о̄с ка̄сыӈ та̄л ёхталэ̄гыт. Штефан Кайль ла̄выс, тав мо̄лты та̄л сӯкыр э̄тпост Екатеринбург ӯст акв суссылтапн ялыс. Тот немецкий компаният та̄нки рӯпатаныл урыл потыртасыт. Та̄н Россият э̄лаль рӯпитаӈкве пуссын ка̄саще̄гыт. Округ кӯщай нэ̄ Наталья Комарова ос ёхталам Штефан Кайль аквъёт э̄лаль рӯпитаӈкве ла̄вхатсы̄г.

1121 2016. 04. 07. Галина КОНДИНА

Э̄рнэ са̄кконыт пирмайтаве̄сыт Мирн пе̄риим ма̄хум округ мирколт ма̄ньполь э̄тпос оигпан юио̄выл хо̄талт акванатхатыгласыт. Та̄н хо̄тпан нупыл атыт заседанияныл о̄лыс. Депутатанув хус арыгтем са̄кконыт урыл потыртасыт ос пирмайтасыт. Тӯяг я̄ӈк на̄тнэ э̄тпост Победа хо̄тал кастыл ветераныт пенсияолнаныл ёт ос хӯрум со̄тыра солко̄вил ойтавет. О̄йканыл яныг хо̄нтыт порсум э̄кват, хо̄нт порат рӯпитам хо̄тпат, концлагерит саватым ма̄хум ос блокадный Ленинградыт о̄лум хо̄тпат тит со̄тыра солко̄вил пенсияныл ёт тах ойтавет. Тамле са̄ккон депутатанув ань пирмайтасыт ос ты пищма округ мирколн те̄тсыт. Пуссын ты олныт ойтнэ ма̄гсыл 245 со̄тыра арыгтем солко̄ви тах та̄ставе. Ты та̄л о̄вылтахтам порат Россия са̄ккон пирмайтавес ос «Материнский капиталыг» ла̄внэ олныт о̄с иӈ 2018 та̄л оигпан мус миӈкве патавет. Ма̄н округувт хӯрмит ос тыгыл са̄внув самын патнэ ня̄врам ма̄гсыл «Югорский семейный капитал» нэ̄пакыл ще̄мья миве. Ань ты са̄ккон ма̄н депутатанув 2018 та̄л оигпан мус пирмайтасаныл, э̄лаль тах ос иӈ рӯпиты. Ты олныт ка̄тын ат мивет, та̄нанылтыл ня̄врамыт ханищтан ма̄гсыл ойтхатуӈкве ро̄ви манос кол ёвтнэ порат тув нё̄туӈкве ос ня̄врам пусмалтан ма̄гсыл ты олныт холтуӈкве ро̄ви. Округувт хӯрум со̄тыра атса̄т ще̄мьят кол ёвтнэ ма̄гсыл ты олнаныл холтсаныл, со̄тыра арыгтем ще̄мьят ня̄врамыт ханищтахтын ма̄гсыл висаныл ос 130 ще̄мьят ня̄враманыл пусмалтан ма̄гсыл ойтхатсыт. Ань ты «Югорский капитал» 116 со̄тыра солко̄ви са̄витыг о̄лы. Ос акв э̄рнэ са̄ккон пирмайтавес, тав рущ ла̄тӈыл тащир о̄лы – «О бесплатной юридической помощи в ХМАО -Югре». Ма̄нь па̄вылт манос та̄нти ма̄нылт во̄р па̄вланылт о̄лнэ хантыт, ма̄ньщит ос ё̄рныт адвокатытн, юристытн олн ойтта̄л нё̄туӈкве патавет. Хотьют э̄рыӈ сутн нэ̄паканэ ат ва̄гтэ хумус атуӈкве, маныр ты кастыл э̄ри. Хоталь э̄рнэ нэ̄пакыт атуӈкве, пуссын тах ты ма̄хмытын потыртавет. О̄лнэ ма̄ныл та̄нти нупыланыл хансуӈкве нё̄тавет. Ты коныпал я̄рмум хо̄тпа, нэ̄мхо̄т ат рӯпитан манос рӯпата та̄л хультум э̄лумхо̄лас ос нё̄туӈкве патаве. Ты ва̄рмаль ла̄ваве – «трудная жизненная ситуация». Юристыт олн ойтта̄л хотьютын нё̄туӈкве патэ̄гыт, пуссын ты са̄кконт хансым о̄лы. Сапра̄ни оигпам порат округ Дума кӯщай хум Борис Хохряков ла̄выс, мо̄тыт щёс депутатыт яныгпо̄ль э̄тпост тах акван–атхатыглэ̄гыт. Тув мус о̄с мо̄т са̄кконыт ёт рӯпитаӈкве патэ̄гыт.

1121 2016. 04. 07. Людмила ТЕТКИНА

Ма̄ньлат хо̄тпат олнаныл но̄хнё̄тавет Ка̄сыӈ са̄т округ кӯщай нэ̄ Наталья Комарова такви ва̄ӈын хо̄тпанэ акванатыглыянэ. Сапра̄нит о̄лыгланэ̄ныл порат та̄н са̄всыр постановление ос распоряжениенэ̄пакыт пирмайтэ̄гыт. Ма̄ньполь э̄тпос оигпам э̄лыпа̄лт тамле сапра̄ни о̄с ва̄рыглавес. То̄нт кӯщаит ос са̄в э̄рнэ тэ̄лат урыл потыртасыт. Ань Россия янытыл о̄лнэ мир са̄всыр лю̄ль пищит нупыл ул вос суссыт ос пуста̄гыл вос о̄лсыт, акв яныг тэ̄ла о̄вылтавес, рущ ла̄тӈыл «ГТО» ла̄ваве. Та хо̄тпат, хотьют ё̄рнувег о̄луӈкве таӈхи ос молях ха̄йты, ёмащакве порги, тав ма̄гылт о̄щнэ со̄рни по̄сыл миве. Ты постановлениенэ̄пак щирыл ань ма̄н округувт тамле по̄с о̄щнэ ма̄ньлат хо̄тпат са̄внув стипендияолныл ойтуӈкве патавет. Округувт нуса тотнэ ще̄мьят ма̄гсыл ань о̄с са̄в э̄рнэ са̄кконыт рӯпитэ̄гыт. Тувыл ще̄мьят ты са̄кконыт урыл нэ̄матыр ат ва̄гыт ос нё̄тмил ат во̄ве̄гыт. Ты ма̄хум са̄кконыт урыл потыртаӈкве патавет, рущ ла̄тӈыл ты нё̄тмил «юридический помощиг» ла̄ваве. Ань тамле нё̄тмил соссаӈ ма̄хум о̄с во̄вуӈкве ве̄рме̄гыт, йильпи хӯлтнэнэ̄пакт та̄н тув о̄с хасве̄сыт. Ты юипа̄лт кӯщаит дружинникыт урыл потыртасыт. Ка̄сыӈ ӯст ос па̄вылт ты ма̄хум полицият рӯпитан хо̄тпатын нё̄тэ̄гыт. Ань йильпи щирыл ты хо̄тпат олныл ойтуӈкве патавет. Ос ты ма̄гсыл округ бюджетныл олн та̄ставе.

1121 2016. 04. 07. Людмила ТЕТКИНА

Общинат сапра̄нин во̄выглаве̄сыт Геннадий Бухтин, округ кӯщай ва̄ӈын хум, сапра̄ни ва̄рыглас. Тав общественный организацият ос общинат рӯпитан ма̄хум ма̄вит ӯргалан ва̄рмаль урыл потыртаӈкве акванатыгласанэ. Кӯщай хум ла̄выс, ма̄н округувт ты ва̄рмаль оснпаттым о̄ньщаве. Ма̄во̄й но̄хвинэ компаният ёмащакв уральтавет, ма̄н во̄й ке со̄сэ̄гыт, яныг штрафолныл пинавет. Тыт о̄лнэ мир ма̄вит вос ӯргалэ̄гыт, ка̄сыӈ та̄л округувт «Спасти и сохранить» акция ва̄рыглаве. Александр Хильман, «Экология Югры» нампа общественный организацият рӯпитан хум, Советский ӯсныл ёхталас. Тав нор яктын ма̄хум рӯпатаныл урыл потыртас. Александр Александрович ла̄выс, Советский районт са̄в та̄л во̄р яктаве ос йӣв товыт тот хультуптавет. Ань нор яктын организацият тох ул вос ва̄рсыт, штрафолныл пинавет. Тувыл йӣв товыт аняг атыяныл ос тӯйтым о̄ньщияныл, тэ̄лы порат но̄хпе̄ламтыяныл. Ань Советский район Пионерский па̄выл по̄хат тамле аня но̄хпе̄ламтавес. Тӯйт хунь толы, та̄н район янытыл яласаӈкве патэ̄гыт ос сунсэ̄гыт, хоты ма̄т тамле порс акванатым о̄лы. Ты юипа̄лт нор яктын организацият сапра̄нин во̄виньта̄лыяныл ос ты тэ̄ла урыл та̄н ётаныл потыртаӈкве тах патэ̄гыт. Ты юипа̄лт Анатолий Криста, Нижневартовский район «Экологическая безопасность Югры» нампа организацият рӯпитан хум, ла̄тыӈ ла̄выс. Тав Нижневартовск ӯст на̄йпос ва̄рнэ яныг станция урыл потыртас. Ты станция ма̄вит сака па̄ӈкты, лю̄львит Вах я̄н со̄сы. Ань Нижневартовский районт соссаӈ ма̄хум пе̄с йис ма̄т о̄лэ̄гыт, та̄н ты я̄т хӯл алыщлэ̄гыт ос тамле па̄ӈкыӈ вит ае̄гыт. Анатолий Владимирович ла̄выс, ты ще̄мьят урыл ань нэ̄мхотьют ат номсы. Тувыл Нижневартовский районт Вах я̄ ва̄тат о̄лнэ па̄влыӈ ма̄хум па̄ӈкыӈ витаныл я̄н овты. Ты па̄влыт вит сыстамтан утыт ёмащаквег ат рӯпитэ̄гыт, то̄ва па̄влыт тамле ут щар а̄тим. Та̄н о̄с акваг лю̄львит Вах я̄н со̄сэ̄гыт. Соссаӈ ма̄хум та̄рвитыӈ ва̄рмаляныл урыл потыртаӈкве сапра̄нин о̄с во̄выглаве̄сыт. О̄влэ̄т Владимир Куриков, «Югра лылые̄п» нампа организацият рӯпитан хум, потыртас. Ань са̄в хо̄тпа пе̄с йис ма̄т о̄лнэ ще̄мьят палт хӯл алыщлаӈкве ос во̄раяӈкве воратэ̄гыт. Та̄н тув ёхталым мори капыртэ̄гыт, порс тот хультуптэ̄гыт. Ма̄хум хо̄та̄ти ул вос яласасыт ос лю̄ль ул вос ва̄рсыт, та̄н ма̄гсыланыл нэ̄пак та̄ратаӈкве э̄ри, тув хансуӈкв хоты ма̄т та̄н ня̄слуӈкве ос во̄раяӈкве ве̄рме̄гыт. Олег Шатин, «Колмодай» нампа общинат кӯщай хум, та̄нки ма̄нылт о̄лнэ ще̄мьят урыл потыртас. Ань 470 тамле ще̄мьят акв реестрнэ̄пакн хасве̄сыт. Тувыл то̄ва ще̄мьят о̄лнэ ма̄наныл та̄нки нупыланыл ат хассаныл, нэ̄паканыл мӯсхал щирыл ат ва̄рсаныл. Та̄н о̄лнэ ма̄нылт браконьерхо̄тпат акваг яласэ̄гыт, э̄рнэ нэ̄пак ат о̄ньще̄гыт. По̄х хо̄тпат хотня̄влуӈкве ат ве̄рмавет. Общинат рӯпитан хум ла̄выс, ма̄хумн нё̄туӈкве э̄ри. Геннадий Бухтин ла̄выс, ты та̄рвитыӈ ва̄рмалит ёт ань э̄лаль рӯпитаӈкве патэ̄гыт. Советский ӯст сапра̄ни тах ва̄рыглэ̄гыт, тув во̄р яктын организацият, наукат рӯпитан хо̄тпат тах во̄вавет. То̄нт пуссын аквъётномсахтуӈкве патэ̄гыт. Нижневартовский районт о̄с сапра̄ни щё̄питалэ̄гыт ос Вах я̄ па̄ӈктын ва̄рмаль урыл тах потыртэ̄гыт. Общинат рӯпитан хо̄тпат ос пе̄с йис ма̄т о̄лнэ ще̄мьят та̄рвитыӈ ва̄рмаляныл тах та̄рапаттыяныл. Ты ма̄хум о̄с тах акванатыглавет.

1121 2016. 04. 07. Светлана РОМБАНДЕЕВА

Та̄н акв колт ханищтахтасыт Ювле хультум э̄тпосув 26 хо̄талэ̄т Ханты-Мансийск ӯст о̄лнэ технологопедагогический колледжит «Образование и воспитание: вчера, сегодня, завтра» хо̄нтхатыглап ва̄рыглавес. Ты училище о̄выл пӯнсыма па̄сыл ханищтахтам ос таве а̄стлам ма̄хум тув атхатыгласыт, ханищтап ва̄рмаль урыл потыртасыт. Яныгхо̄тпат та пораныл номылмата̄лсаныл, учителяныл ка̄сталасаныл. Педучилище 1930 та̄лыт порат рӯпитаӈкве патыс. Ты ма̄ Остяко-Вогульский национальный округыг то̄нт ты намаявес. Соссаӈ ма̄хум ё̄рва̄гыл ханищтахтуӈкве кащилтаве̄сыт, а̄гитпыгыт ты училищан ёхталаӈкве патсыт. Округ янытыл о̄лнэ школат ма̄гыс учителит тыт ты ханищтаӈкве о̄вылтаве̄сыт. 1935 та̄лт о̄выл учителит а̄стласыт, нёлолов хо̄тпа, пуссын диплом нэ̄пакыл майве̄сыт. 1964 та̄лт ос садикыт рӯпитан ма̄гыс хо̄тпат ханищтаӈкве патве̄сыт – дошкольный отделение пӯсвес. 1967 та̄лт о̄выл воспитателит а̄стласыт, 50 хо̄тпа. 1973 та̄лт музыкальный отделение пӯсвес. 1977 та̄лт – о̄выл группа, 21 а̄гипыг, ты отделение а̄стлас. 1994 та̄лт педучилище йильпи щирыл намаявес: Технологопедагогический колледж. Тот ань 28 специальностин кит со̄тыра арыг хо̄тпа ханищтахты. Мо̄тыт та̄л колледж 85 та̄лэ то̄влы. Ты та̄лыт сыс са̄в со̄тыра хо̄тпа училище а̄стлас. Та̄н ань округув ос Россияв янытыл о̄лэ̄гыт, рӯпитэ̄гыт. О̄выл ла̄тыӈ колледж кӯщай Алексей Борисович Сарабаров тав ла̄выс: «Училище а̄стлам я̄тил, тыныӈ ма̄хум, мӯй хо̄тпат, студентыт! Тыхо̄тал ма̄н матъёмас акванхо̄нтхатасӯв. Ханищтап тэ̄лав урыл мощ потраме̄в. На̄н ос тыт о̄лум поран номылматыглэлы̄н, ӯнлахо̄лэ̄н». Тувыл «Страна чудес» садикын ялантан ня̄врамыт концерт суссылтасыт, э̄ргысыт, йӣквсыт. Нэ̄пак хаснэ ханты о̄йка, округ Дума депутат Еремей Данилович Айпин ты училище 1971 та̄лт а̄стластэ. Тав тох ты потыртас: «О̄лупсавт ма̄к ва̄рмаль таи – хунь ма̄н акванхо̄нтхатыгла̄лэ̄в, аквъёт ӯнлахо̄лэ̄в, потраме̄в, пе̄с порав номылмата̄лылӯв. Э̄лумхо̄лас хунь нэ̄мхотьют ёт ат потрами, ма̄хум ёт ат ва̄щинтахта̄лы, тав хотёрувлаӈкве та патаве. Ка̄сыӈ мир такви учёный хо̄тпат о̄ньщи, ма̄н соссаӈ мирув халт тамле хо̄тпа о̄с са̄в о̄лы, са̄выӈпа̄лэ ты училище а̄стласыт. Ам ань намыӈсуиӈ яныгхо̄тпагув урыл аквкит ла̄тыӈ ла̄вуӈкве таӈхе̄гум. Ты ханты учёный хо̄тпав – Николай Иванович Терёшкин. Тав 1913 та̄лт самын патыс, 1935 та̄лт ты училище а̄стластэ. Ханты ла̄тыӈ ханищтан са̄всыр нэ̄пакыт, словарит хансыс. Тав нэ̄паканэ хосыт учёный ма̄хум ос школатыт учителит ань ты хо̄тал мус рӯпитэ̄гыт. Китыт хо̄тпав – Ханты-Мансийск ӯст о̄лнэ ма̄ньщи учёныюв Евдокия Ивановна Ромбандеева. Училище тав 1947 та̄лт а̄стластэ. Ты э̄тпос 22 хо̄талэ̄т Евдокия Ивановна 88 та̄лэ то̄влы. Ма̄ньщи мир ла̄тӈе ос культуратэ ма̄гыс тав сака яныг тэ̄ла ва̄рыс – школат ос педучилищат ма̄гыс ща̄нь ла̄тыӈ ханищтан нэ̄пакыт хансыс, мире э̄ргыт, мо̄йтыт, а̄мщит ос пе̄с потрыт ёлхансыс. Наука щирыл са̄в рӯпиты, 150 арыг э̄рнэ потрыт хансыс, щё̄питас. Яныг учёныит ос студентыт ёт хо̄нтхатыгла̄лы. Мо̄лхо̄тал телефон хосыт тав ётэ потыртасум, ла̄ви, пуста̄гыл о̄лы, рӯпиты, на̄нанн паща ла̄тыӈ ке̄ты. Мо̄т ма̄хманув о̄с са̄в ёмас тэ̄ла ва̄рсыт, намыӈсуиӈ хо̄тпаг о̄лсыт – Хиония Петровна Пухленкина, Юван Николаевич Шесталов, Анна Митрофановна Конькова. То̄ванув ань ты хо̄тал мус рӯпитэ̄гыт – Анастасия Ильинична Сайнахова, Мария Кузьминична Волдина, Диана Васильевна Герасимова, Андрей Семёнович Тарханов, Евдокия Андреевна Нёмысова. Округ янытыл яласанэм порат, ка̄сыӈ па̄вылт ты училищат ханищтахтам хо̄тпат ёт ва̄щинтахтыглэ̄гум – то̄ват ня̄врам ханищтэ̄гыт манос воспитателиг рӯпитэ̄гыт, то̄ват ос кӯщайлахтэ̄гыт. Училище рӯпитаӈкве патме па̄сыл са̄в хо̄тпа пуӈктотыс. Та̄н халанылт акв мӯтраӈ э̄лумхо̄лас о̄лыс – Георгий Тарасович Величко (1944-1967 та̄лытт рӯпитас). Яныг хо̄нтын ялыс, тот сакватавес, суво̄влыл ё̄мыгтас. Ань ты накт ты ханищтахтын кол тав хосытэ̄т ты ӯнттувес (1952-1959 та̄лытт). Ты номтыӈ, сымыӈ о̄йка студентытын ос тав ётэ рӯпитам хо̄тпатын тав сака янытлавес». Еремей Данилович коныпал са̄в хо̄тпа потыртас. Тувыл ма̄хум хӯрум колнак щирыл ла̄кквауртхатасыт, ханищтап тэ̄ла урыл докладыт ловиньтасыт. Исум ща̄й айсыт, потрамасыт.

1121 2016. 04. 07. Александр ВЬЮТКИН

Мирн нё̄тмил ва̄рнэ хо̄тпат Ма̄ньполь э̄тпос ва̄т нупыл хӯрмит хо̄талт округ мирколт ма̄хмытын нё̄тнэ, матыр хащта̄л нэ̄пакыт ёт рӯпитан хо̄тпат халт сапра̄ни о̄лыс. Акванатхатыглам юристхо̄тпат та̄нти ва̄рнэ рӯпатаныл урыл потыртасыт. Та̄н халанылт яныг кӯщаиг Валерий Филиппович Анисимов о̄лыс. Тав мир ёт рӯпитан хо̄тпат халт ва̄ӈын кӯщай хумыг рӯпиты. Сапра̄ни о̄вылтым порат тав ла̄выс: «Ма̄н олн та̄л мирн нё̄тнэ рӯпатав конституциян иӈ 1993 та̄лт хасвес. Та па̄сныл са̄в та̄л минас. 2011 та̄лныл ущ та ма̄хум юрист палт олн ат ойтнэ щирыл нё̄тмил во̄вуӈкв ве̄рме̄гыт. Тыхо̄тал та урыл ма̄н мощ потыртэ̄в». Минам та̄ланыл сыс ва̄рум рӯпатаныл урыл внутренней политики Департаментыт ва̄ӈын кӯщаиг о̄лнэ нэ̄ Майя Владимировна Есина потыртас. Тав ла̄выс: «Ты са̄ккон щирыл округув янытыл аквъёт пуссын 268 адвокат рӯпиты. Россия янытыл юристыг о̄лнэ ма̄хум я̄нас уртым аквхойполов са̄всыр тэ̄ла щирыл олн ойтта̄л рӯпитэ̄гыт. Ма̄н округувт та коныпал иӈ са̄т я̄нас нё̄тмил ва̄рнэ тэ̄ла хасылтасӯв. Таи а̄гмыӈмосыӈ, сакватахтам ос нэ̄мхо̄т ат рӯпитан, хо̄нтлын ма̄т порслым хум ма̄хум э̄кваныл, яныг колта̄глыӈ ще̄мьят, хо̄тпан та̄ланыл то̄влум яныг хо̄тпат, ӯсыӈ ма̄ныл э̄лын о̄лнэ соссаӈ ма̄хум ты са̄т я̄нас нё̄тмилын хасылтым о̄лэ̄гыт. Мо̄лты ты ма̄гсыл округ бюджетныл ат арыгтем млн. солко̄ви майвес. Ты олныт 2020 та̄л мус тэ̄лаг ва̄руӈкве э̄ре̄гыт. 2015 та̄л сыс ма̄н Департаментувн 714 са̄всыр заявление хансыглым о̄лыс. Адвокатыт ва̄рум рӯпатаныл ма̄гсыл 615 заявление ойтым о̄лыс. Мо̄т хультум заявленият иӈ сунсыглавет». Тувыл э̄лаль та̄нти халанылт ма̄хмытын йильпи нё̄тмил ва̄рнэ урыл потыртасыт. Потраныл нэ̄пакын хансыяныл ос яныгпо̄ль э̄тпос нилыт хо̄тал мус округ Общественный палатан э̄лаль рӯпитан ма̄гсыл те̄тыяныл.

1121 2016. 04. 07. Валентина УЗЕЛЬ

Са̄лыӈ ма̄хум ӯст ӯрве̄сыт Ка̄сыӈ та̄л ма̄ньполь э̄тпост юио̄выл хо̄таланэ порат са̄всыр районытныл Ханты-Мансийск ӯсн са̄лыӈ ма̄хум ёхталэ̄гыт. Ань каснэ ва̄рмаляныл миннэ э̄лыпа̄лт та̄н ӯст хумус ӯрве̄сыт, маныр рӯпата ва̄рвес, ты урыл потыртан ма̄гсыл округ мирколт яныг сапра̄ни ва̄рыглавес. Евгений Платонов ты сапра̄нит яныг кӯщаиг о̄лыс, тав ма̄вит ӯргалан округ департаментыт пуӈктотнэ хо̄тпаг о̄лы. Ты сапра̄ни о̄лум порат Когалым ӯс, Сургутский, Белоярский ос Ханты-Мансийский районыт видеосвязьн аквано̄лтве̄сыт. Тот пасан ва̄тат кӯщаит о̄с ӯнлысыт, та̄н халанылт ка̄сыӈаныл мо̄т хо̄тпат пуссын ва̄санэ, маныр таит потыртасыт, потраныл пуссын хӯлсаныл. Са̄лыт ос са̄лы суныт ӯсн тотнэ ма̄гыс са̄всыр нефтяной компаният нё̄тсыт. Та̄н яныг ма̄шинат о̄ньще̄гыт, лю̄ль лё̄ӈхыт хосыт та̄н ёмащакв минуӈкв ве̄рме̄гыт. Са̄лыӈ ма̄хумн нё̄тнэ ма̄гыс округувт Союз оленеводов рӯпиты, яныг кӯщаиг тот Степан Кечимов о̄лы. Тав ла̄выс, Ханты-Мансийск ӯст са̄лыт тыттын ма̄гыс са̄лытэ̄п яныг ма̄шинал Когалым ӯсныл тыг те̄тыглас. Ханты-Мансийск ӯст ты кастыл о̄с хоса щё̄питахтасыт. Мори ха̄йтнэ, о̄тыр ат о̄щнэ а̄мпыт пуссын пувве̄сыт. Са̄лы нё̄выль пуссын ёмащакв уральтавес, ветеринарыт ӯсн тотнэ са̄лыт ос вос сунсыяныл, тыи ма̄гыс я̄нас парщин кол тӯщталавес. Ты касылн хантыт, ё̄рныт ос сараныт ёхталасыт, ма̄ньщи ма̄хманув ат ёхталасыт, лё̄ӈхе сака та̄рвитыӈ ос хоса. Каснэ ма̄хум пуссын ла̄вве̄сыт, хум хо̄тпат мольщаӈыл, нэ̄ хо̄тпат ос сахил вос масхатэ̄гыт, са̄лыт солква̄лганыл о̄с вос хорамтыяныл. Са̄лыл каснэ ма̄ныл о̄с ёмащакв щё̄пита̄лвес, тӯйтэ хотсастумтавес. Ляпат са̄лы пӯсас ва̄рвес, тот са̄лыт ӯщлахтасыт. Ӯсувт та̄н хӯрум хо̄тал о̄лсыт, та̄наныл ос са̄лыяныл ӯргалан ма̄гыс полиция ма̄хум э̄тэхо̄талэ тот рӯпитасыт.

1121 2016. 04. 07. Тамара МЕРОВА

Ёвтнэ тэ̄нутанув уральтавет Ма̄ньполь э̄тпос атхуйплов щислат ёвтнэ лю̄ль тэ̄нутныл, маснутныл, пормасытныл ма̄хум ӯргалан мирхал хо̄талыг о̄лы. Тамле хо̄тал ООН па̄лыл ва̄рвес, ос Россиявт тав 1994 та̄лныл янытлаве. Тувыл мирхал организация ка̄сыӈ та̄л акв матыр тэ̄ла я̄нас уральтым акваг о̄ньщияныл. Тох 2016 та̄л та̄н «Исключить антибиотики из меню» намаясаныл. Роспотребнадзор колт рӯпитан хо̄тпатын пуссын тэ̄нутанув уральтавет. Та̄н «антибиотик» тэ̄рпи са̄в ул вос о̄щсыт. Ань сыресыр тэ̄рпиӈ утыл юн о̄щнэ ӯйхулыт мивет ос тэ̄пкант янмалтан тэ̄нутыт моляхнув вос яныгме̄гыт, са̄всыр тэ̄рпиӈ витыл со̄сантавет. Таима̄гыс нё̄влит, щаквит тэ̄нутыт, фруктыт ос овощит са̄в антибиотик о̄ньще̄гыт. Ты о̄вылтыт ля̄ххал тотнэ хо̄тпатн Мария Соловьёва, Юграт санитарный ле̄ккарыг о̄лнэ кӯщай нэ̄, ос Ирина Козлова, гигиена ос эпидемиология центрыт кӯщай нэ̄, потыртасы̄г. Тэ̄нутыт ман пормасыт уральтан щирыл округувт онтолов лаборатория рӯпитэ̄гыт. Тувыл матыр лю̄ль хо̄нтэгы̄т ке, та̄ра ла̄тыӈ хансэ̄гыт. Хотсакум тэ̄нутыт та̄ра по̄хан вивет. Мо̄лты акв со̄тыра 436 щёс ма̄хум телефон хосыт потыртасыт манос пищма хансым роспотребназдорколн ла̄тыӈ ке̄тыгласыт. Хотсакум щаквит тэ̄нут ва̄тихал хо̄нтыглаве. Хӯл алыщлан ос са̄всыр тэ̄нут ва̄рнэ общинат о̄с уральтым о̄ньщавет. Ва̄сыт тыг ёхталанэ̄ныл порат нё̄вляныл уральтан ма̄гыс Новосибирск ӯст о̄лнэ лаботаториян ке̄тавет. Ань тыг мус хӯлыт ос ва̄с нё̄влит нэ̄мат лю̄ль ут ат хо̄нтыглавес.

1121 2016. 04. 07. Валентина УЗЕЛЬ

Хӯл тыналан мир ӯсн ёхталасыт Ёсал ха̄йтнэ ма̄хум касыланыл та минас. Ка̄сыӈ та̄л та̄н тыг ёхталанэ̄ныл порат са̄всыр пӯмащ ва̄рыглаве. Ты та̄л хӯл тыналан ма̄хум Ханты-Мансийск ӯст атыглаве̄сыт, та̄н ма̄гсыланыл «Югорский рыбный фестиваль» о̄лыс. Россия са̄всыр ма̄ныл (Москва, Уфа, Архангельск, Воронеж ос мо̄т са̄всыр ӯсытныл) ёхталам хо̄тпат са̄всыр тэ̄нут, пормас тыт та тыналасыт. Округ Ха̄льӯс районныл Та̄гт па̄вылныл, Октябрьский район Приобьеныл, Кондинский район Междуреченский па̄вылныл ма̄н ма̄хманув пилыт, са̄всыр щирыл щё̄питым хӯл, нё̄выль тыт та тыналасыт. «Рахтынья» община ос Ха̄льӯс рыбокомбинат са̄всыр хӯл тыг тотыгласыт. Нила хо̄тал сыс са̄в мир тув ёхталас. Хо̄тыл биатлон касыл суснэ ма̄хум тот атхатыгласыт. Та̄н ма̄гсыланыл пасаныт щё̄питым о̄лсыт, атыӈ хӯл тэ̄пъялым та̄н ты касыл суссыт. Матыр хал те е̄мты, та̄н ма̄гсыланыл са̄всыр пӯмащ ва̄рыглавес. Акв касыл тамле о̄лыс, та̄н халанылт хотьютаныл хӯл ёмащакв ос молях нилитэ ос ма̄ниг яктытэ. Мо̄т касылт та̄н пельменит ва̄рсыт, ма̄ньщи ла̄тӈыл та̄н «палиӈ ня̄ниг» ла̄вавет. О̄влэ̄т та̄н тэ̄нэ янытыг ва̄рсаныл, тувыл ла̄вве̄сыт – хотьютаныл щар ма̄нь ва̄ри. Та юипа̄лт ос щар яныгкапай хотьютаныл ва̄ри. Та̄н нупыланыл суснэ ма̄хум маттем та мовиньтасыт. Но̄хпатум ма̄хум пуссын мӯйлупсал майве̄сыт.

1121 2016. 04. 07. Светлана РОМБАНДЕЕВА

О̄лнэ колыт урыл потыр Ма̄ньполь э̄тпос 23 хо̄талэ̄т ля̄ххал тотнэ ма̄хум РИЦ «Югра» колн во̄выглаве̄сыт. Тув ОАО «Ипотечное агентство Югры» ма̄т кӯщаиг рӯпитан хум Евгений Чепель ёхталас, о̄лнэ колыт урыл потыртас. Округувт хӯрум ӯсытт арендный колыт ӯнттуве̄сыт – Ханты-Мансийск (90 квартират), Сургут (170) ос Нефтеюганск (94). Бюджетный организацият рӯпитан хо̄тпа о̄лнэ кол ат те о̄ньщи, тамле колн о̄лмыгтаӈкве ве̄рми. Э̄тпостем тув хус арыгтем солко̄ви ойтуӈкве э̄ри. Округувн ань са̄в мир рӯпитаӈкве ювыт, та̄н ма̄гсыланыл ты тэ̄ла сака а̄ртми. Манах та̄л ты ма̄т о̄лэ̄гыт, рӯпитэ̄гыт, та са̄вит тот вос о̄лэ̄гыт. 2020 та̄л мус тамле арендный колыт о̄с тах ӯнттавет – 1800 са̄виттем квартиратын ма̄хум о̄лмыгтэ̄гыт. Ка̄сыӈ колта̄гыл тув прописка ва̄руӈкве ве̄рми. Ты коныпал агентство мо̄т са̄в рӯпата ва̄ри. Тав та̄ратэ ма̄хум о̄лнэ кол ёвтэ̄гыт манос тыналэ̄гыт. Округув янытыл 80 арыг колытт квартират ёвтуӈкве ро̄ви. Мо̄лты та̄л па̄сыл ос Россия янытыл о̄лнэ ӯсытт – Тюмень, Краснодар, Екатеринбург, Санкт-Петербург, Краснодар ос мо̄т ма̄т квартират ёвтуӈкве ро̄ви. Ювле хультум та̄л сыс агентство со̄тыра арыг колта̄глытын нё̄тыс. Кӯщай хум ла̄вме щирыл, ты тэ̄ла та̄н 2020 та̄л мус хассаныл, рӯпитаӈкве ань о̄вылтахтасыт.

1121 2016. 04. 07. Николай МЕРОВ

Ня̄врамыт янытлан та̄л кастыл са̄в ва̄рмаль щё̄питавес Округувт ты та̄л ня̄врамыт янытлан та̄лыг ла̄ввес, ты хосыт манырсыр рӯпата ань ва̄раве, ханищтап ос ма̄ньлат хо̄тпат ёт рӯпитан департамент кӯщай нэ̄ Любовь Ковешникова ос культура департамент кӯщай нэ̄ Надежда Казначеева ты урыл потыртасы̄г. Тэ̄н сас ля̄ххал тотнэ колн ёхталасы̄г. Маныр тэ̄н тот потыртасы̄г, ты урыл э̄лаль ловиньтэ̄н. Любовь Николаевна ла̄вме щирыл, округувт 3-7 та̄л яныт ня̄врамыт ма̄гыс садикыт ос мо̄т са̄всыр ёнгын колыт ӯнттуӈкве хо̄тахкем та̄л ювле хультум порат та̄кыщ вуйхатасыт. Мо̄лты та̄л оигпам мус кӯщаит ты ва̄рмаль мӯсхал щирыл щё̄питасаныл. Ань тыт яныгман ня̄врамыт ма̄нь ня̄врам колыл пуссын то̄влавет. Та сыс, ты тэ̄ла щирыл иӈ са̄в рӯпата ва̄руӈкве э̄ри. Ань округ мирколт рӯпитан кӯщаит акв та̄л ос хо̄т э̄тпос яныт ос хӯрум та̄л то̄влын ня̄врамыт ма̄гыс ма̄нь ня̄врам кол ӯнттын щирыл са̄в рӯпата ва̄ре̄гыт. Кӯщай нэ̄ ла̄выс, та̄л о̄вылтахтын порат налыманкем са̄всыр мероприятие ня̄врамыт ма̄гыс хансым о̄лыс. Кит э̄тпос минас, общественный организацият рӯпитан ма̄хум ос ӯст о̄лнэ нэ̄хумыт иӈ са̄внув рӯпата щё̄питасыт. Ты та̄л та̄н маныр щё̄питэ̄гыт, тув са̄в ня̄врам ща̄няныла̄щаныл ёт во̄виньтаӈкве патэ̄гыт. Тувыл ань са̄в рӯпата а̄гмыӈмосыӈ ня̄врамыт ма̄гыс ва̄руӈкве патаве. Тамле ня̄врам янмалтан то̄ва ща̄нита̄щит, хотьютныл нё̄тмил во̄вуӈкв, ат ва̄ганыл. Ты ще̄мьят о̄лупсаныл кӯпнитыг ва̄рнэ ма̄гыс ща̄нита̄щит акваг хӯлтыглаӈкве ос нё̄туӈкве патавет. Югра ма̄т та̄л сыс ня̄врамыт ӯргалан ма̄гыс интернет щирыл хусахкем ханищтап тах щё̄питаве. Тот та̄н ётаныл психологыт, ле̄ккарыт ос ханищтан хо̄тпат рӯпитаӈкве патэ̄гыт. Акв тамле ханищтап Сургут ӯс педагогический университетт пӯнсаве. Тот рӯпитан ма̄хум ты тэ̄ла щирыл нё̄тмил ва̄руӈкве ла̄вхатасыт. Культура э̄лаль тотнэ кӯщай нэ̄ Надежда Казначеева, округувт о̄лнэ ня̄врамыт ханищтахтын кол урыл потыртас. Ты Искусство Центр кол, тот ань 670 лӯима̄т о̄лнэ ня̄врамыт ханищтавет. А̄гитпыгыт тот ка̄тыл по̄слуӈкве, са̄ӈквылтаӈкве, э̄ргуӈкве, йӣквуӈкве ханищтавет. Россияв янытыл тамле ханищтахтын кол воссыг нэ̄мхо̄т а̄тим. Ты ёнгын кол акваг уральтым о̄ньщаве. Ка̄сыӈ та̄л та̄н ма̄гсыланыл рущ са̄всыр ёнгын утыт ёвтавет ос мо̄т э̄рнэ тэ̄ла щирыл нё̄тавет. Ань ты ляпа та̄лытт округувт ос кит тамле ёнгын колыг ӯнттуӈкве патавег тах.

1121 2016. 04. 07. Александр ВЬЮТКИН

Та̄н ма̄ньлат ма̄хум ёт рӯпитэ̄гыт Мо̄лал ля̄ххал тотнэ колн ма̄ньлат ма̄хум ёт рӯпитан хо̄тпат ёхталасыт ос та̄нти ва̄рнэ рӯпатаныл урыл потыртасыт. Антон Евгеньевич Тимкин такви рӯпататэ урыл тох ла̄выс. Тав ма̄ньлат ма̄хум ёт рӯпитан департамент тармыл ва̄ӈын кӯщаиг о̄лы. Тав ла̄вум потре э̄лаль ловиньтэлы̄н: «Яныгман ня̄враманув ма̄гсыл ма̄н са̄в рӯпата ва̄ре̄в. Акв тамле пӯмащ «Кванториум» ла̄ваве. Округув янытыл ань хӯрмит тамле кол Югорск ӯст ӯнттаве. 2018 та̄л мус хо̄т тамле кол ӯнттуӈкв номсэ̄в. Тув ялантан ня̄врамыт та̄нти ма̄гсыланыл ма̄ньта̄гыл э̄лаль о̄лнэ рӯпатаныл пе̄рие̄гыт. Ань са̄выӈпа̄лэ̄ ня̄врамыт кол ӯнттын, лё̄ӈх ва̄рнэ, тувыл ле̄ккарыг ос ня̄врамыт ханищтан рӯпата пе̄рие̄гыт. Ма̄н палтув ёхталан ня̄врамыт ма̄ньта̄гыл са̄в мир халт юртыӈыщ о̄луӈкв ханищтавет. Ма̄н Россия мо̄т регионыт ёт акваннё̄тхатым рӯпитэ̄в. Ты та̄л лӯпта э̄тпост Нефтеюганск ӯст «Кванториум» колт ханищтахтын ма̄ньлат ма̄хум ма̄гсыл ялпыӈ хо̄тал ва̄ре̄в. Таве ма̄н «Молодые профессионалы» намаяслӯв. Округувт ма̄ньлат мир халт тамле яныг фестиваль нэ̄мхотты порат ат ва̄рыглавес. Ялпыӈ хо̄талув Нефтеюганск ӯст товлыӈха̄пыт ёлисыглам ма̄т ва̄рилӯв, тав ань хотхультуптавес. Тот палаткаӈ па̄выл ва̄ре̄в. Ма̄тэ яныг, састум, пуссын ма̄л то̄влаве̄в. Россия ма̄ янытыл ма̄н палтув 1 со̄тыра атса̄т ня̄врам тах ёхты. Округувныл атса̄т ляпатем ня̄врам тув ялнэ кастыл пе̄риев. Та коныпал нас мӯй ма̄хум тотпирмайтаӈкв номсэ̄в. Ты э̄лыпа̄лт о̄лум фестивалин ялнэ щирыл ма̄н округувт лов ня̄врамытыл акв ня̄врам пе̄риясӯв. Мо̄т номтув о̄с тэ̄лаг щё̄питаӈкв номсылӯв. Ты порат яныг хо̄нт оигпам па̄сыл нёлса̄т нупыл акв та̄лэ ты то̄влы. Таима̄гсыл лӯпта э̄тпос ва̄т нупыл титыт хо̄талэ̄т, а̄лпыл нила щё̄с порат хо̄нт о̄вылтахтам порат яныг суссылтап ва̄раве. Суссылтапувн ма̄н ань щё̄питахтэ̄в. Аквъёт пуссын со̄тыра ляпатем мир сунсуӈкв ёхтэ̄гыт. Ма̄шинат, танкыт, писалит ос маснутыт пуссын та порат о̄ньщим хурипаг ва̄риянӯв. Ань номсэ̄в, маныр щирыл ос хо̄т пуссын ва̄равет. Номтанув тэ̄лаг те а̄ртме̄гыт, ма̄н товлыӈха̄пыл алхатнэ пора о̄с суссылтаӈкв таӈхе̄в. Ань ты урыл нас потыртахтэ̄в».

1121 2016. 04. 07. Светлана РОМБАНДЕЕВА

Соссаӈ общинат хӯл тыналасыт Ма̄ньполь э̄тпос юио̄выл хо̄таланэ̄т Ханты-Мансийск ӯсн общинатыт рӯпитан ма̄хум ёхталасыт, «Югра-Экспо» колн атхатыгласыт. Та̄н халанылт соссаӈ хо̄тпат о̄лсыт. Ха̄льӯс район Ягрим па̄вылныл «Рахтынья» общинат рӯпитан ма̄ньщи хум Александр Юрьевич Захаров ёхталас. Тав ла̄выс: «Тыг ма̄н са̄всыр хӯл тотсӯв по̄лям нялк, солвалыӈ ос восытыптым нялк, ня̄рхул, па̄нкаӈ хӯл. Ма̄хманув Кульпаст хӯл алыщлэ̄гыт, кӯщаюв Александр Игоревич Голошубин о̄с тот о̄лы. Общинав Кульпаст ос Ягримт хӯл тыналан ла̄пкат о̄ньщи. Кульпаст тэ̄нут ва̄рнэ кол (цех) о̄лы, тот котлетат, пельменит, сакватым хӯл ос мо̄т са̄всыр тэ̄нут ва̄раве. Хӯл па̄нкат, са̄всыр фрикаделькат, о̄с тот ты ва̄равет. Капрон па̄нкат тӣвырн ос солвалыӈ хӯлыт пинавет. Хӯланув тыт ань сака ёвтавет, тынаныл яныг а̄ти». Тувыл ам ма̄ньщи супыӈ хум ка̄саласлум, тав ляпатэ̄н ро̄влахтасум, китыгласлум, хотыл о̄лы. Ты насати «Национальный община Лангки» кӯщай хум, наме Андрей Иванович Маремьянин, Октябрьский район Приобье па̄вылныл ёхтыс. «Лаӈки» ма̄ньщи ла̄тӈыг толмащлаӈкве те – лэ̄ӈын. Тав общинатэ урыл тох ты потыртас: «Ма̄н 2001 та̄лт э̄рнэ нэ̄пакыт щё̄питасув, рӯпитаӈкве о̄вылтахтасув. Общинав Приобье па̄вылт о̄лы. Ты рӯпатан ам Ханты-Мансийск ӯст о̄лнэ ЮГУт природопользование факультетт ханищтахтасум. О̄выл та̄лытт ма̄н хӯл алыщласӯв. Ань ос хӯлыт нас ёвтыянӯв, солвалтыянӯв, якытлыянӯв, па̄нкатын пиныянӯв, тыналыянӯв. Нэ̄ хо̄тпат сыг сов сака китыглэ̄гыт. Ма̄н ань музеитын са̄в тамле сов тыналэ̄в. 2015 та̄лт ма̄н во̄раяӈкве патсӯв. Са̄всыр выставкатын ма̄н ва̄тихал яланта̄лэ̄в. Округув коныпал мо̄т ма̄т ва̄рыглаве те, во̄ваве̄в, щё̄питахтэ̄в, та минэ̄в. Ханты-Мансийск, Екатеринбург, Челябинск ос мо̄т ӯсытыт о̄лсӯв. Ам Ягрим па̄вылт самын патсум. Омам рущ нэ̄, а̄щум ханты хум. Шеркалы ос Перегрёбный па̄влыг халт Холопанты па̄выл о̄лы, а̄тям рӯтанэ пуссын тувыл о̄лэ̄гыт. Хӯрум а̄ги о̄ньще̄гум, пуссын школат ханищтахтэ̄гыт». Тамле пӯмыщ соссаӈ хо̄тпаг ёт та хо̄нтхатыгласум, ань потрум та оигпас.

1121 2016. 04. 07. Николай МЕРОВ

Мори алыщлан хо̄тпатн торас ва̄рнэ хум Мо̄лалнув Павел Кириллович Дунаев «Ма̄нь Та̄гт» нампа ма̄вит ӯргалан ма̄т инспекторыг рӯпитан хум такви о̄лупсатэ урыл а̄нумн потыртас. То̄нт тав та̄рвитыӈ ва̄рмалянэ урыл я̄нас потыр ла̄выс. Ма̄вит ӯргалан ма̄н во̄руй мори алыщлан ма̄хум ва̄тытахтасыт. Ма̄ньщи хум та̄н ётаныл хумус капырты, на̄н ты урыл э̄лаль ловиньтэ̄н. Павел Кириллович ла̄вме щирыл, рӯпататэ̄т са̄в та̄рвит е̄мталы. Ма̄вит ӯргалым яласанэ̄тэ порат, во̄руй мори алыщлан хо̄тпат ва̄тихал пувиньта̄лыянэ. Ты хо̄тпат сытамыг яласэ̄гыт. Та̄наныл пувнэ ма̄гыс инспектор хо̄тпат яныг рӯпата ва̄ре̄гыт. То̄ва ма̄т янгуй совыт ос сахыт хо̄нтыглэ̄гыт. Тӯяг ос таквсы порат инспекторыт ма̄вит уральтым сака ат яласэ̄гыт. Лё̄ӈх лю̄лиг е̄мты, ла̄глыл миннэ ма̄тэ о̄с сака хосаг о̄лы. Та порат браконьерыт ты ощмарлэ̄гыт. Тэ̄лы тай та̄наныл пувуӈкве кӯстырнув. Лё̄ӈханыл хосыт юил коияныл. Ань тыг мус са̄в э̄лумхо̄лас кос сутытавес, ос та̄н тыил щар ат пилэ̄гыт, тох та акваг яласэ̄гыт. Аквматнакт Павел Кириллович во̄рколэ̄т такке̄т о̄лыс. Тав ётэ рӯпитан хум матыр ма̄гыс ӯсн ялыс. Ань ма̄ньщи хум писаль па̄тлуптан суй хӯнтамлас. Тав телефон хосыт Советский ӯсн та̄ра свонитас, ты ва̄рмаль урыл кӯщаитн ла̄выс. Тамле тэ̄ла е̄мтыглан порат та̄ра уральтан ма̄хум ке̄тавет. Ос то̄нт матрыг нэ̄мхотьют ат ёхтыс. Ётылнув, хунь юрт хумитэ ёхтыс, тав та ма̄н уральтахтуӈкве минас. Тот со̄рпи хотнуим ма̄ туп хо̄нтыс. Ты ва̄рмаль урыл ос кӯщаин ла̄выс. Кӯщай хум полиция ма̄хум ке̄тсанэ, та̄н нэ̄пак хассыт, тувыл та, аты кисхатасыт. Ты та̄л о̄с акв янгуй алапавес. Тыи ма̄гыс кӯщаит ос инспектор хо̄тпат нупыл номсэ̄гыт, э̄рттам таит та̄нки янгуит алыщлэ̄гыт. Ты ва̄рмаль ма̄гыс са̄в щёс наска̄ссыг та хартата̄лве̄сыт, ётыо̄вылт тох та хультуптаве̄сыт. Щар яныг о̄выл 1994 та̄лт о̄лыс. То̄нт Павел Кириллович ӯргалам ма̄тэ̄т вертолётыл хӯрум со̄руп ос са̄т са̄лы алвес. Та порат ма̄ньщи хум рӯпататэ̄ныл по̄хын ке̄тыглавес. Та халт тамле ва̄рмаль ты о̄лыс. Ос хунь ма̄ ӯргалаӈкве та̄ртвес, тав та̄ со̄рпи алым ма̄н та̄ра минас. Тот ня̄л пе̄лхатам ма̄ хо̄нтсаныл. Ты ва̄рмаль тэ̄лы порат о̄лыс, та ня̄л ма̄ныл но̄ххилсаныл, экспертиза ва̄рнэ ма̄гыс полициян мисаныл. Та ня̄л хосыт писалил па̄тлуптам хо̄тпа та̄ра хо̄нтсаныл. Ос ты хум нэ̄матырыл ат ва̄рвес, ты тэ̄ла лаппантсаныл. Ань ты накт Павел Кириллович ос мо̄т ва̄рмаль щирыл полициян лю̄камтаве. Ань «Ма̄нь Та̄гт» ӯщлахтын база я̄ӈк урам тармыл о̄лы. Та̄л котиль э̄тпост хум ма̄ ӯргалаӈкве тув ёхтыс. Кит хо̄тал тот рӯпитас. Ос тав во̄рколэ̄н нэ̄пакыӈ та̄гыл полиция хо̄тпат ёхтысыт. Рӯпитан ма̄тэ уральтаӈкве патсаныл. Та̄н ла̄всыт, тав нэ̄мхо̄т ат хансым писалит ос сэ̄лясаквня̄лыт тӯйтым о̄ньщи. Э̄рттам та сэ̄лясаквня̄лыл куратаптын утыт ва̄ри. Хум то̄нт во̄рколэ̄т а̄тим о̄лыс, ма̄ уральтым яласас. Ты э̄лыпа̄лт кӯщай таве со̄рпи па̄тлуптан ма̄ сунсуӈкве ке̄тыстэ. Во̄рт яласыматэ юртэ таве̄н телефон хосыт свонитас, кисхатнэ ва̄рмаль урыл ла̄выс. Ос тав та̄ра ювле во̄рколэ̄н та йиймыгтас. Тав миннэ̄тэ сыс, полиция хо̄тпат норт онтсыл ханам пальтув ма̄гыл ще̄пе̄т карабин ня̄л хо̄нтсыт. Та юипа̄лт кисхатыманыл а̄мпарыт пуссын но̄хо̄хтыртасаныл. Колкан па̄ртыт но̄хманыгтасаныл, воссыг нэ̄матыр ат хо̄нтсыт. Тыгыл киснэ ва̄рмаль ёл та по̄илттасаныл, ӯсн минасыт. Тувыл мощ ётылнув Павел Кириллович Советский ӯсн минас. Тот а̄кве а̄тимыг е̄мтыс. Туп юв ёхтыс, тот ос полиция хо̄тпат таве ля̄льт ӯрсаныл. Ос ӯс колэ̄н кисхатнэ ма̄гыс ёхтысыт. О̄влэ̄т китыглавес, юн матыр сэ̄лясаквня̄л о̄ньщи ман а̄ти. Тав браконьерыт о̄ньщум писалит, патроныт ос сэ̄лясаквня̄лыт во̄рколт хо̄нтум, пуссын та̄нанылн мисанэ. Ос ты утанэ та̄ра полициян ат миманэ ма̄гыс тав са̄ккон щирыл 222 статья уголовный тэ̄лан паттувес. Ты ва̄рмаль хосыт хо̄тпа сут щирыл хо̄т та̄лныл нила та̄л мус тӯрманколн ӯнттуӈкве ве̄рмаве. Та юипа̄лт Павел Кириллович полиция колн ялыс, тот ты хо̄нтум утанэ урыл потыртас. Тав ётэ рӯпитан хо̄тпат ты хо̄нтум утыт урыл пуссын ва̄мыт. Ты писалит, патроныт ос сэ̄лясаквня̄лыт тав полициян минэ ма̄гыс тотсанэ. Та порат полиция хо̄тпа та во̄рколн ялнэ щирыл о̄лсыт. Ма̄ньщи хум ла̄выс, та во̄ркол мус «Бураныл» ёхтуӈкве ат ве̄рмыс, хо̄нтум утанэ нила ве̄рыста ёсал ё̄мим тотыгласанэ. Тыима̄гыс пуссын тотуӈкве ат ве̄рмысанэ. Са̄выӈпа̄лэ сэ̄лясаквня̄лыт тот хультсыт. Та во̄ркол алыщлан утыт щар ма̄вит ӯргалан ма̄н ӯнттуманыл. Тот вертолёт ёмщакв исапаӈкве ве̄рми, ма̄тэ хараг о̄лы. Мо̄лты таквс инспекторыт о̄выл щёс тув ялсыт. Та̄н ла̄ве̄гыт, тот алыщлан хо̄тпат ва̄тихал о̄лыглэ̄гыт. Ос то̄нт турманлаӈкве патыс, ёмщакв ат уральтасаныл. Во̄ркол кӣвырт полиция акв пальтув, тувыл «Газпром» ма̄т рӯпитан хо̄тпат пальтувыт норт о̄нтсыл ханасыт. Ма̄ньщи хо̄тпав ул хотьютн во̄раяӈкве торас ва̄ри. Ань ты ва̄рмаль матъёмас по̄илттавес. Павел Кириллович ла̄выс, та̄н ётаныл акваг воритотуӈкве ва̄гтал патыс. Пенсиян патнэ̄тэ мус тот рӯпиты, по̄хын мины тах.

1121 2016. 04. 07. Валентина УЗЕЛЬ

То̄ват са̄лыяныл по̄хын ха̄йтсыт Ювле хультум са̄тыт, яныгполь э̄тпос 2 хо̄талэ̄т, лӯима̄ е̄р нупыл о̄лнэ ханты ос ё̄рн ма̄хум акванатхатыгласыт. Когалым ӯст та̄н яныг касыланыл минас. Каснэ ма̄нылн сака са̄в мир ёхталас. Ань ты касыл ялпыӈ хо̄талыг ла̄ваве. А̄лпыл лов щёс порат тав о̄вылтавес, атахтем щёс мус ма̄хум мӯйлысыт. Са̄в ма̄нь ла̄пка рӯпитас, хантыт ос ё̄рныт са̄лы нё̄выль тыналасыт, та̄нти ю̄нтум маснутаныл, ла̄гыл маснутыт, са̄лы кот, маныр э̄рыс, пуссын тот о̄лыс. Са̄т ё̄рнкол тӯщтыглавес, тот мӯйлын мир ща̄ил айтве̄сыт, тыттуве̄сыт. Касыл э̄лыпа̄лт яныг кӯщаиг о̄лнэ ма̄хум мир ёт пащалахтасыт, са̄в ёмас ла̄тӈыл ла̄всаныл. То̄ват янытлан нэ̄пакыл мисаныл. Тувыл са̄лыӈ ма̄хум касуӈкв та о̄вылтахтасыт. Ань са̄лыӈ сун сака са̄в о̄лыс. О̄влэт хум хо̄тпат кассыт. Та̄н халанылт са̄выӈпа̄лэ пуссын са̄лыяныл ха̄йтуӈкв ат ка̄сащасыт. Лё̄хныл та̄ра во̄ртыпал нупыл ё̄ӈхыгпасыт. Акв ханты э̄ква ты нупыл сунсым тох ла̄выс, ань во̄рт о̄лнэ хантыт ос ё̄рныт «Бураныл» яласэ̄гыт, са̄лыяныл туп то̄ванакт те̄рсыяныл. Ты касыл э̄лыпа̄лт туп мощ ханищтыяныл. Ос са̄лыл акваг яласаӈкв э̄ри, то̄нт та̄н ёмащакв сӯлттуӈкв патэ̄гыт. Манах хо̄тпа тох касуӈкв аты ве̄рмыс. Хум хо̄тпат юипа̄лт нэ̄ хо̄тпат ос ма̄ньлат а̄гит кассыт. Та̄н са̄лыяныл о̄с аквтох ёмащакв э̄лаль ат минасыт. Туп то̄ват ёмащакв ха̄йтсыт ос ювле молях ёхтыгпасыт. Касум мир халт тит хо̄тпаг но̄хпатсыг. Хум хо̄тпат халт – Виталий Алексеевич Сопочин, нэ̄т халт ма̄ньлат нэ̄ но̄хпатыс, тав наме Надежда Ивановна Русскина. Тэ̄н сас «Бураныл» майвесы̄г, но̄хпатме̄н ма̄гсыл ляпа рӯтанэ̄н татем та ща̄гтсыт. Ты касыл миннэ порат кос рущ хо̄тпа, кос мо̄т хо̄тпа са̄лыӈ ма̄хум ма̄гсыланыл сыманыл татем ща̄ргысыт. Щар акв хо̄тпа роттыг ат лю̄лис, пуссын маттем та ро̄хсыт. Ань та е̄рт о̄лнэ хантыт пе̄с о̄лупсаныл нупыл сака сунсуӈкв патсыт. Матах та̄л минам юипа̄лт туп яныгпа̄ла нэ̄ хо̄тпат кастысыт. Ань ма̄ньлат нэ̄квет хум ва̄рманыл юипа̄лт та̄ра кастуӈкв о̄вылтахтэ̄гыт. Хум о̄щнэ ма̄ньлат нэ̄квет щар пуссын пуӈк то̄рыл вильтаныл лаппантыяныл.

1121 2016. 04. 07. Александр ВЬЮТКИН

Са̄лыӈ ма̄хум пе̄лпыщ нуйхатсыт Ма̄ньполь э̄тпост ва̄т нупыл атыт хо̄талт Ханты-Мансийск ӯст округ янытыл о̄лнэ са̄лыӈ ма̄хум халт яныг касыл ва̄рыглавес. Таве рущ ла̄тӈыл «Конкурс профессионального мастерства среди оленеводов Югры на кубок Губернатора» намаялсаныл. Тамле касыл округув янытыл титынтыг ты ва̄рыглавес. Ханты-Мансийск ӯс округув котильт о̄лы, таима̄гсыл таве тыт ва̄раве. Акванёхтын лё̄ӈханыл акв палытыг о̄лэ̄гыт. Са̄лыӈ ма̄хум каснэ хо̄таланыл э̄лыпа̄лт са̄лыяныл урыл титыглахтын ва̄рмаль о̄лыс. Та ва̄рмаль рущ щирыл: «Теоретическая часть конкурса» ла̄ввес. Тот та̄н са̄лыяныл урыл титыглаве̄сыт. Тувыл ма̄хум касуӈкве хумус патэ̄гыт ос матыр хотмус е̄мты, ты урыл ёмщаквег потыртаве̄сыт. Ты та̄л нила районныл ма̄хум ёхталасыт – Нижневартовский, Сургутский, Белоярский ос Ханты-Мансийский. Аквъёт пуссын нёлоловхойплов са̄лыӈ сун касыс. Та̄н халанылт ат нэ̄ кассыт. Ты порат Ха̄льӯс районныл тыг ёхталаӈкв нэ̄мхотьют ат ла̄вхатас. Йинэ лё̄ӈханыл сака хоса, та̄рвитыӈ ос тыныӈ. Касуӈкве о̄щнэ са̄лыяныл са̄ль. Та коныпал та̄н моще̄ртын Нё̄р нупыл ва̄нтлуӈкв о̄вылтахтэ̄гыт. Ань ос я̄нас яласан са̄лыяныл акванатыяныл. Таима̄гсыл нэ̄мхотьют тыг ёхталаӈкв аты ка̄сащас. Тыг ёхталам ма̄хум халт щар са̄в, ты са̄т са̄лыӈ сун, Сургутский районныл о̄лыс. Тувыл Белоярский районныл хо̄т сун о̄лыс. Касыл титынтыг ва̄рыглавес ос ма̄ньщи мирув халт тыт каснэ хо̄тпа а̄тим. Ёхталам ма̄хум пуссын та̄нти ё̄рнколаныл ёттотыгласаныл. Коланылт мӯй ма̄хум олн ойтым са̄лы нё̄выль исмитыл ос исум ща̄ил айтве̄сыт. Та коныпал та̄н та̄нти ю̄нтум ня̄раныл, пӯрканыл, сагум тыньщаӈаныл, ва̄рум э̄нтап ква̄лганыл тыналаӈкве тотыгласыт. По̄лям са̄лы нё̄выль Касум па̄вылныл туп тотыглавес. Ёхтум хо̄таланыл юипа̄лт ос са̄лыяныл каснэ ла̄кв ханищтан щирыл а̄рталым яласасыт. Титыт хо̄талт каснэ ва̄рмаляныл а̄лпыл лов щёс порат о̄вылтавес. Ты порат касыл сунсуӈкве са̄в ма̄хум ёхталасыт. Са̄лыӈ ма̄хум пуссын мольщаӈыл, сахил ос хорамыл ю̄нтым ва̄ил масхатым о̄лсыт, таима̄гсыл касыланыл пӯмщиг сусхатас. Щар ма̄ньлат каснэ хум Евгений Глызин о̄лыс. Тав Ханты-Мансийский районныл Шапша па̄вылныл о̄лыс. Щар янгыг Николай Тасьманов о̄лсыс. Тав ос Белоярский район Касум па̄вылныл ёхталас. Щар ма̄к каснэ хо̄таланылт касыланыл нила щир уртым о̄лыс. О̄влэ̄т са̄лыл сӯлттым кассыт, тувыл са̄лыт юипа̄лыл ёсал лю̄лим акв ла̄кв мувылтасыт. Мо̄т тит касыл тыньщаӈ но̄хтӯщтым сувын ре̄псыт ос тит ла̄глыл акв торыг хӯрум щёс э̄лаль порыгмим кассыт. О̄влэ̄т тыньщаӈ ре̄пнэ ос хӯрум щёс аквторыг поргын щирыл но̄хпатум ма̄хум янытлаве̄сыт. Хӯрмит ма̄н Виталий Русскин е̄мтыс. Титыт места Евгений Глызин вистэ. Щар но̄х Юрий Тарлин патыс. Та юипа̄лт ма̄хум са̄лыяныл урыл титыглым касылт янытлаве̄сыт. Хӯрмит ма̄н Юрий Тасьманов е̄мтыс. Хум нумипал ма̄ Светлана Пяк вистэ. Щар но̄х Пётр Попов патыс. Та̄н пуссын Белоярский районныл Касум па̄вылныл о̄лэ̄гыт. Э̄кват халт касыл щар яныг мӯйлупса Зоя Русскина вис. Тав «Бураныл» майвес. Каснэ хум ма̄хум халт «Кубок губернатора» нампа мӯйлупса Пётр Попов вистэ. Тыи ма̄гсыл тав ос «Бураныл» мӯйлуптавес.

1121 2016. 04. 07. Тамара МЕРОВА

А̄тятэ̄н о̄вылтым тэ̄лат э̄лаль тотыянэ Белоярский район Касум па̄вылт о̄лнэ то̄ва соссаӈ хо̄тпат община ва̄ре̄гыт ос колта̄гланыл ёт тот рӯпитэ̄гыт. Мария Ивановна Игишева «Ильбигорская» нампа община о̄ньщи. Ань такви тэ̄ланэ урыл нэ̄ ма̄навн тох потыртас: Ты общинав 1994 та̄лт ва̄рыслӯв. Тав о̄пав, ащо̄йкав самын патум пе̄с па̄влыӈ ма̄т о̄лы, ма̄н таве аквта наме̄тыл намтыслӯв. Тот Рандымовыт, Тарлиныт, Волдиныт колта̄глыт хуньт о̄лсыт. Тувыл па̄вланыл хотоссувласаныл, ма̄хум мо̄т ма̄н ва̄нтлысыт ос ётыл ты ма̄наныл та̄нки нупыланыл хассаныл. Ты ма̄т ма̄гыс 1998 та̄лт ма̄н нэ̄паканув йильпииг ва̄рыгла̄лсанӯв ос тот акваг а̄тям о̄лыс. Колта̄глыл тот хӯл алыщласӯв, во̄раясӯв. 2008 та̄лт общинав лаппантвес. Тувыл а̄тям а̄нумн ла̄выс, э̄рнэ нэ̄пакыт акван вос атыянум, ты ма̄в амки нупылум вос хансылум ос хӯл алыщлан, во̄раян тэ̄лат амки э̄лаль вос тотыянум. Тох 2010 та̄лныл «Ильбигорская» нампа общинат ам пуӈктотуӈкве патсум. Ань ма̄хум пуссын йильпи щирыл о̄лэ̄гыт, матыр ва̄рнэ тэ̄ланыл ма̄гыс отчётнэ̄пакыт щё̄питаӈкве ла̄вавет, ка̄сыӈ сэ̄лум солко̄ви вос хӯлтыяныл. Тувыл соссаӈ ма̄хум ӯргалан са̄кконыт мо̄т ла̄тӈыл о̄с хансумтавет, тот пуссын матыра̄ти тэ̄лат та̄рапаттым акваг о̄ньщуӈкве э̄ре̄гыт. Ты на̄ксылыӈ рӯпата, таима̄гыс ма̄ньлат хо̄тпанув тамле тэ̄лан вуйхатуӈкве та̄нки сака ат таӈхе̄гыт. 2012 та̄лт «Ильбигорская» нампа общинав «территория традиционного природопользования» нэ̄пакн хассылтавес. Тот хӯл алыщлан, во̄раян ос лӯптат, пилыт атнэ коныпал са̄лы ӯрнэ ва̄рмаль тув о̄с хӯлтыслум. Та̄н ма̄гсыланыл тот ёмас тэ̄пыӈ ма̄ о̄лы. Э̄рыӈ хотты ня̄враманум са̄лы виӈкве номылматэ̄гыт. Ты е̄рувт онтоловхуйплов са̄всыр ще̄мьят община о̄ньще̄гыт, ка̄сыӈ ще̄мьят атахкем хо̄тпа са̄витыл та̄нки рӯпитэ̄гыт. Ам а̄тям ёт ос пыганум ёт тув яланта̄лэ̄гум. А̄тям та ма̄т акваг кос о̄лыс, ань яныгпа̄лаг е̄мтыс, а̄гманэ паттат Касум па̄вылн ва̄нтлыс. Кит пыгагум янгыг, тэ̄н Белоярский ӯст о̄лэ̄г, рӯпитэ̄г. Акв пыгум моще̄ртын ва̄т та̄лэ то̄влы, мо̄танэ ва̄т нупыл са̄т та̄лэ, сас спорт тармыл ма̄щтыр хо̄тпа нам о̄ньще̄г. Мо̄лты та̄л Михаил пыгум Россия янытыл лӯима̄ ма̄хум касылыт китыт местан патыс. Хӯрмит пыгкем иӈ школат ханищтахты, спортыт акв тамле ка̄ркамыг, а̄прыӈ ат о̄лы, тав ос ща̄нь ла̄тыӈ ва̄ӈкве таӈхи. Юн матыр ла̄тыӈ хӯнтамлы ке, торгамты. Яныгнув пыгагум ханты ла̄тыӈ щар ат ва̄гы̄г. А̄нумн тай таи ёмас, пуссын хӯрум пыганум хӯл алыщлаӈкве манос во̄раяӈкве пуссын таӈхе̄гыт. Тамле ва̄рмалитн та̄н ма̄ньта̄гыл ащо̄йканылн ханищтаве̄сыт, та̄нки о̄с акваг пӯмщалахтасыт. Мишам щар ма̄ньпораныл са̄в щёс тув мӯйлуӈкве тотыгла̄лыслӯв. Ань ос ащо̄йкатэ такви тув тотыглаӈкве патыстэ. Ма̄н субсидия вуйласӯв ос тот ма̄нки йильпи кол ӯнттысӯв. Пыганум пе̄с ма̄хманув щирыл хӯл алыщлаӈкве ос во̄раяӈкве ха̄сэ̄гыт. Ва̄рим ня̄лил мансын ка̄тнпаттэ̄гыт, хӯлуп, ӯсма та̄нки ӯнттэ̄гыт. Па̄вылт о̄лнэ ма̄ньлат хо̄тпат о̄с пӯмщалахтуӈкве патсыт, ма̄н палтув ханищтахтуӈкве ёхталэ̄гыт. 2014 та̄лт ма̄н «Дорогами наших предков» проект щё̄пита̄лсӯв ос грантолныл майлуве̄сӯв. Тыг ня̄врамыт тотыгла̄лсанӯв ос пе̄с ма̄хманув о̄лупсаныл урыл потыртасӯв. Туп таи лю̄ль, ты ма̄в Касум па̄вылныл э̄лы ма̄т о̄лы, тыг миннэ лё̄ӈхе сака хоса. Туи моторха̄пыл тув ялантэ̄в, тэ̄лы «Бураныл». Ма̄н ма̄нки тув ялте̄вт, са̄в бенщин холтэ̄в. Таима̄гыс ты амки ма̄мт туризм тэ̄лат ва̄руӈкве ат ве̄рме̄гум. Атахкем та̄л ювле хультум порат Сургутский район па̄лыл ма̄во̄й но̄хвинэ компаниян ма̄нанув уральтаве̄сыт. Мо̄лты о̄с э̄лаль кисхатуӈкве патсыт, таима̄гыс ты ма̄т о̄лнэ общинат атпан со̄тыра солко̄вил ойтве̄сыт. Мо̄т грант ам ханты маснут ю̄нтнэ ма̄гыс вуйласум. Ань са̄внув хо̄тпат ма̄н палтув супыт ю̄нтылтаӈкве патсыт, нё̄тнэ щулкиныт сагуӈкве ла̄ве̄гыт. Тувыл то̄ва маснутанув, пормасанув «Товары земли Югорской» суссылтапыт тыналаӈкве ве̄рмиянӯв. Мо̄лты та̄л оигпан э̄лыпалт ам округ губернатор премиял мӯйлуптаве̄сум». Тамле ва̄рмалит урыл ма̄н та̄рапатысӯв, ос Мария Ивановнан пӯмащипа ла̄тыӈ ла̄ве̄в.

1121 2016. 04. 07. Светлана РОМБАНДЕЕВА

Ханты мир о̄лнэ ма̄т ялпыӈ хо̄тал ва̄рыглавес Минам э̄тпос 20 хо̄талэ̄т Сургутский район Русскинская па̄вылт са̄лыл яласан ялпыӈ хо̄тал ва̄рыглавес. Та ма̄т ханты ма̄хум пе̄с йис та̄гыл о̄лэ̄гыт. А̄лпыл, лов щё̄сыг иӈыт е̄мтыс, мир та атхатас. Са̄лыӈ ма̄хум сака са̄в о̄лыс. Янгема̄не пуссын мольщаӈыл, сахил, ва̄ил масхатасыт. Та̄нти халанылт ща̄нь ла̄тӈыл потыртэ̄гыт. Ма̄нь ня̄враманыл мольщаӈыл сунсов тармыл ӯнттыяныл, тох та тотыглыяныл. Та̄н ляльтаныл сунсуӈкве татем пӯмыщ о̄лыс. Касыл аквхуйплов щё̄ст о̄вылтавес. О̄влэ̄т хум хо̄тпат кассыт. Са̄лыяныл татем молях нуйхатэ̄гыт. То̄ваныл минуӈкве ат таӈхе̄гыт, по̄хан ё̄ӈхыгпе̄гыт, о̄тыранылн тот та по̄савет. Хум хо̄тпат халт о̄выл места Владимир Иванович Сопочин тав вис –тӯйт тармыл яласан «Бураныл» майвес. Нэ̄ хо̄тпат халт ос Анастасия Анатольевна Комтина но̄хпатыс. Тав о̄с «Бураныл» майвес. Мо̄т касыл щирыл хум хо̄тпат мольщаӈыл, нэ̄ хо̄тпат сахил ха̄йтсыт, ань хотьютаныл о̄влэ̄т ёхтыгпи. Хум хо̄тпат халт Виталий Алексеевич Русскин но̄хпатыс, нэ̄ хо̄тпат халт ос Наталья Борисовна Сопочина. Тэ̄н сас телевизорыл майвесы̄г. Хум хо̄тпат тыньщаӈ па̄хвтысыт, о̄выл места Альберт Николаевич Покачев тав вис. Са̄лыӈ сун ӯлтта поргысыт, Леонид Борисович Комтин но̄хпатыс. Тувыл халанылт пе̄рщисыт, ма̄к ё̄р хо̄тпа пе̄риясыт – Михаил Андреевич Покачев но̄хпатыс. Ты юипа̄лт хум хо̄тпат ёсал ха̄йтсыт, Леонид Борисович Комтин сака молях ха̄йтыс, о̄влэ̄т тав ёхтыгпас. Ты ка̄ркам, ё̄р ма̄хум на̄йив сартнэ утытыл (бензопила) майве̄сыт. Ат ё̄рнкол тӯщталавес, тот рӯпитан нэ̄ хо̄тпат халанылт о̄с кассыт, ань хотьют ё̄рнколэ ёмаснуве, хо̄т атыӈ тэ̄нут па̄йтаве. Ирина Максимовна Покачева тав но̄хпатыс, лов со̄тыра солко̄вил майвес. Китыт места Надежда Ивановна Покачева вис, са̄т со̄тыра солко̄вил майвес. Хӯрмит места Русскинская па̄вылт о̄лнэ ЦНК ма̄т рӯпитан ма̄хум та̄н висаныл, ат со̄тыра солко̄вил майве̄сыт. Та хо̄тал сака во̄тыӈ хо̄тал о̄лыс, раквыс, тӯйис. Ма̄хум маснутаныл – мольщаӈаныл, сахияныл щар пуссын та̄рапосве̄сыт. Ос та̄н тох та кассыт, нэ̄мат турап хо̄талыл ат пилсыт.

1121 2016. 04. 07. Николай МЕРОВ

Лэ̄пла па̄выл э̄ква потре Лэ̄пла па̄вылт акв ма̄ньщи яныгпа̄ла хо̄тпа Екатерина Васильевна Тасманова, такви а̄ги о̄парищ наме Дунаева, о̄лы. Тав 1945 та̄лт нё̄рт пе̄с Полум па̄вылт самын патыс. Тувыл тот мощ яныгмас ос номитэ, акв тӯя та̄н колта̄гыл Тимка па̄вылн ва̄нтлысыт, ла̄глыл ё̄мсыт. Екатерина Васильевна ма̄нь та̄гыл акваг во̄рт яныгмас, школат щар ат ханищтахтас. Ты э̄ква а̄нумн такви о̄лупсатэ урыл потыртас. На̄н тав потре э̄лаль ловиньтэлы̄н: «Ща̄нум сампыльталыг о̄лыс. Таима̄гыс ам школан ат майве̄сум. Самаге щар поста̄л о̄лсы̄г, ка̄тыл ма̄лащлахтым лакватахтыглас. Хунь Полумныл Тимка па̄выл мус ва̄нтлысӯв, нила хо̄тал ё̄мсӯв. Ам омакем ка̄тпа̄лыл пувим нас ва̄нттыслум. А̄пщим Ӯнтари мо̄йтыӈ Лэ̄пла я̄т порсыс. Моторха̄пыл миныманыл хоми ё̄хсыт. Та̄н Та̄пыс па̄вылныл Ня̄хщамво̄льн минасыт, э̄лаль ос Ма̄нь Та̄гт я̄ хосыт алгаль минасыт. Тувыл Лэ̄пла я̄ хосыт тыг йисыт. Таквсы порат витэ сака яныг о̄лыс, ты кос кинсыслӯв, тох аты хо̄нтыслӯв. Тӯяг, ма̄нь вит порат, хум хо̄тпат о̄с кисхатуӈкве ялсыт. Ма̄тэ янытэ̄т сунсыгласаныл, ат хо̄нтсаныл. Ань та ва̄рмаль сака хосаг е̄мтыс. Ма̄н ще̄мьявт нёлолов ня̄врам яныгмасӯв. Са̄т ягпыганум, ам питипаттаг о̄лсум. Пуссын хомляг а̄ти та порсысыт. Ань амккем хультсум. Лэ̄пла па̄вылн щар са̄ртыннув ма̄н колта̄глыл ва̄нтлысӯв. То̄нт ам ущты хум ва̄рсум, о̄йкам наме Тимофей Васильевич Тасманов о̄лыс. Ме̄н хумиме̄нтыл акв пыг Вова янмалтасме̄н. Тав ань тыт а̄нумн нё̄тым о̄лы. Во̄рт акваг во̄раим яласы. Хунь Лэ̄план йиймыгтасӯв, ма̄н хӯрум са̄лыӈ сун о̄щсӯв. Ва̄нтсуныл о̄йкам йис, ам тав оматэ ёт я̄нас суныл минасум. Тувыл акв суныл ос а̄пщитэ Алексей Маша э̄кватэ ёт минасы̄г. Тӯяг я̄т но̄ххулигласыт, то̄ва ма̄т нас уссӯв. Ла̄щалла̄щал ты ма̄н та ёхтысӯв. Та па̄сныл акваг тыт ты о̄лэ̄в. Лэ̄пла па̄вылныл мощ ло̄ӈхальнув, са̄в пе̄с па̄выл ӯнлыс. Са̄ртын ма̄хум тот ты о̄лсыт. Ань па̄выл ёрт мощ иӈ на̄ӈке̄гыт. Тӯрва̄т па̄вылт Савва Самбиндалов а̄ще Дмитрий та̄н тот о̄лсыт. Ётылнув та̄н та ма̄ныл Тӯрва̄тан ва̄нтлысыт. Ма̄н хунь тыг ёхтысӯв, о̄влэ̄т та̄н коланылт о̄лсӯв. То̄нт коланыл иӈ ёмасыг о̄лыс. Ётылнув йильпи ма̄т колыт ӯнттысӯв. Ам хунь ма̄ньлатыг о̄лсум, амки во̄раим яласасум. Нёхыс, лэ̄ӈын алыщласум, со̄выр лэ̄сыт ӯнтталасум. Та порат нёхс са̄в о̄лыс. Ма̄хум пуссын во̄раясыт. Акв рущ хум Сӯева̄т па̄вылт ла̄пка о̄ньщис. Та̄л сыс кит щёс тӯяг ос таквсы порат та хум пушнина пирмайтаӈкве тув ёхталас. Ма̄ньщи ма̄хманув са̄лыӈ суныл са̄всыр па̄влытыл та ма̄н акванатхатыгласыт. Алыщлан утанув тув тотыглыянӯв, тот тыналахтэ̄в. Тэ̄нутпормас ёвтэ̄в ос ювле ла̄кква та миныглэ̄в. Са̄ртын па̄выл ляпат о̄лнэ Лэ̄пла ос Хультгыӈ я̄гт ма̄хум са̄в хӯл алыщласыт. Ань ты накт ощща хӯл, а̄лнхӯл касканыл мощ пувыгла̄лэ̄гыт. Ляпат а̄тим, э̄лнув минуӈкве э̄ри. Щар сака мощща хӯл пӯхты, хотхоласыт». Екатерина Васильевна ань Лэ̄плат пыге ос мане ёт о̄лы. Пыге Владимир во̄раим яласы, на̄ив а̄ты ос мо̄т са̄всыр рӯпата ва̄ри. То̄ванакт Ке̄расколыӈъян манос Тӯрва̄тан мӯйлуӈкве тотыглаве. Па̄влэ̄т юн о̄щнэ со̄врыт янмалты. Тыщир ты ла̄щал о̄ланты. Тав ла̄внэ̄тэ щирыл, пе̄с порат Лэ̄пла я̄ ло̄ӈхаль Ёвтыӈ сыс па̄выл, Сакв э̄ква па̄выл, Ще̄кваӈсус па̄выл ӯнлысыт. Ты щар пе̄с па̄влыт о̄лсыт, ань тот туп курщияныл хультсыт. Кол а̄ти, нэ̄матыр а̄ти, лаппорнуве̄сыт. Хосат Венгрия ма̄ныл учёный хум ёхталас, тав тот ты ма̄ньщи ма̄хумныл ялпыӈ э̄ргыт хансыглас. Та э̄ргыт пуссын нэ̄пакн хансым о̄лэ̄гыт.

1121 2016. 04. 07. Тамара МЕРОВА

Потрыт, мо̄йтыт, ля̄ххалыт ловиньтан мир Ты тӯя мир Мария Кузьминична Волдина, са̄в мирн ва̄нэ ос стихыт хаснэ э̄ква, Касум па̄вылн мӯйлуӈкве во̄виньта̄лвес. Тав ётэ тот па̄вылт о̄лнэ ма̄хум нэ̄пак ловиньтан колт акванхо̄нтхатыгласыт. Ань ты кол тав наме̄тыл намтвес. Мария Вагатова – тыи тав а̄ги о̄парищ наме, Юильск па̄выл ляпат 1936 та̄лт самын патыс. Тав 1955 та̄лныл 1968 та̄л мус Касум школат ня̄врамыт ханищтас ос интернатт кӯщаиг о̄лыс. Тувыл нэ̄ Ханты-Мансийск ӯсн рӯпитаӈкве во̄ввес, тот тав ханты ма̄хум культуратэ, ла̄тӈе э̄лаль тотнэ ма̄гыс са̄в ёмас ве̄щкат тэ̄лат ва̄рыс. Ам Касум па̄вылн ялмум порат нэ̄пак ловиньтан колн щалтсасум ос рӯпатаныл урыл китыгласанум. Светлана Ивановна Рандымова нэ̄пак ловиньтан колт 2012 та̄л па̄сыл рӯпиты, тав ла̄выс: «Ма̄н палтув ань 169 э̄лумхо̄лас хасхатасыт, та̄лув оигпан порат 400 са̄вит э̄лумхо̄лас хасхатым о̄лыглы. Са̄выӈпа̄лэ школат ханищтахтын ня̄врамыт ма̄н палтув ёхтыгпа̄лэ̄гыт ос та̄нки ма̄гсыланыл э̄рнэ нэ̄пак выгыт. Ка̄сыӈ та̄л ма̄ньполь э̄тпос хӯрмит щислат писателит мирхал ялпыӈ хо̄таланыл кастыл ма̄н са̄всыр суссылтапыт щё̄питэ̄в. Та хо̄талт а̄гирищит ос пыгрищит та̄нки хансум стиханыл манос потраныл ма̄навн ловиньтыяныл. Ты та̄л Н. А. Лесков 185 та̄лэ то̄влум кастыл «Очарованная Русь Лескова» нампа пӯмыщ суссылтап ва̄рыгласӯв ос тав уре̄т потыртасӯв. Нэ̄ хо̄тпат Дарья Донцова, Юлия Шилова, Екатерина Вильмонд ос Олег Рой хансум потраныл ловиньтэ̄гыт. Хум хо̄тпат янгыщ Николай Леонов, Евгений Сухов ос Борис Акунин детективнэ̄пакыт тыт китыглэ̄гыт. То̄ват Лев Толстой, Антон Чехов, Иван Бунин классикаг ла̄внэ потрыт ловиньтаӈкве выгыт. Еремей Айпин, Юван Шесталов, Мария Вагатова, Юрий Вэлла ос Анна Конькова хансум потраныл, стиханыл ос мо̄йтаныл ня̄врамытн ловиньтаӈкве сака мӯстэ̄гыт. Тувыл акв колнак са̄ме̄т «краеведение» нампа ва̄рмалит суссылтыянӯв. Тот ня̄врамыт та̄нки ка̄тыл ва̄рум сыресыр пормасаныл акванатым о̄лэ̄гыт. Ань тув са̄лыӈ ма̄хум ялпыӈ хо̄таланыл кастыл «Северные напевы» йильпи суссылтап ма̄н щё̄питасӯв. Юрий Вэлла, Микуль Шульгин ос Еремей Айпин нэ̄паканыл суссылтаӈкве тув пинсанӯв. Па̄вылт о̄лнэ ма̄хманув соссаӈ писателит хансум нэ̄паканыл, «Ханты ясанг» ос «Лӯима̄ сэ̄рипос» газетаг ловиньтаӈкве ва̄тихал ма̄н палтув о̄с щалтсэ̄гыт. Газетагт та̄нки рӯт манос юрт хо̄тпаныл урыл потрыт, ля̄ххалыт хо̄нтэгы̄т ке, хотща̄гтэ̄гыт. Ма̄н ань на̄нан яныг пӯмащипа ла̄тыӈ ла̄вуӈкве таӈхе̄в. Соссаӈ мирке̄в, о̄лупсаныл урыл са̄внув хансэ̄н, хури по̄слэ̄н, на̄н ёмас э̄рнэ ва̄рмаль ва̄регы̄н, тыи ма̄навн сака пӯмыщ. Тувыл ма̄н палтув округт о̄лнэ писателит ос мо̄т ма̄ныл са̄всыр мӯйлын хо̄тпат ёхталэ̄гыт ос та̄нки уранылт потыртэ̄гыт. Мо̄лал Людмила Кошиль, Павел Черкашин, Владимир Енов, Наталья Сенькина ос Людмила Стрелец ма̄н ма̄хманув ёт акванхо̄нтхатыгласыт. Та̄н э̄лыпа̄ланылт Касум па̄вылн Валентина Терешкова, о̄выл космонавт нэ̄, мӯйлуӈкве ёхталас. Тыт космос урыл энциклопедиянэ̄пакыт пащалахтын ла̄тыӈ хансыс ос хасхатас. Аньнув Мария Кузьминична Волдина мӯйлуӈкве во̄выгласлӯв. Тав ётэ Касум па̄выл кӯщай нэ̄ Алсу Назырова пащалахтуӈкве ёхталас ос тав наме̄тыл ма̄н нэ̄пак ловиньтан колув намаим тэ̄лат урыл ла̄выс. Ма̄навн таи сака мӯсты, ты ма̄н ма̄вт самын патум хо̄тпат са̄в мирн ва̄вет ос янытлавет. Тыт аквтох Татьяна Молданова «Оланг ясанг» нэ̄паке ос о̄йкатэ Тимофей Молданов ёт хансум «Кань кунш оланг» нэ̄пак ма̄хумн сака пӯмщалаве̄г. Тувыл Елена Тарлина хансум стихыт ма̄навн сака мӯстэ̄гыт, тыт акв «Колыбельная» намаим стихе ка̄сыӈ хо̄тпан ва̄ве. Ма̄н ты ма̄хумкенувн яныг пӯмащипа ла̄тыӈ ке̄тэ̄в, пуста̄гыл вос о̄лэ̄гыт, та̄н ханты ла̄тӈув ос пе̄с накыт э̄лаль тотыяныл». Ам ос Светлана Ивановнан пӯмыщ потре ма̄гыс пӯмащипа ла̄тыӈ ла̄ве̄гум.

1122 2016. 04. 21. Тамара МЕРОВА

Ты тэ̄лат уральтым о̄ньщавет Мо̄лал Наталья Комарова округувт са̄всыр программат хумус рӯпитэ̄гыт, таит уральтан ма̄гыс сапра̄ни ва̄рыглас. Комиссият о̄лнэ кӯщаит 2016 та̄лт хӯрум э̄тпос сыс ва̄рим рӯпатат та̄рапаттысыт ос лю̄ль накыт мӯсхалыг щё̄питаӈкве ла̄всаныл. То̄нт губернатор нэ̄в тох ла̄выс: «Ва̄т нупыл ат программат халт ва̄т нупыл нила ёмщакв рӯпитэ̄гыт, ос тот бюджет олныт ма̄кыг холтавет. Туп мир пумалтан акв программаныл щирыл ювле хультэ̄гыт. Советский ӯст ань тыг мус пӯльницаныл иӈ та ӯнттыяныл. Ты ӯнттын кол аньмунт уральтавес ос тот лю̄ль ва̄рмалит хо̄нтве̄сыт. Ӯст ос районт о̄лнэ ма̄хумн ты кол сака э̄ри, тав график щирыл ӯнттуӈкве вос а̄стлаве». Ань ты тэ̄лат Дмитрий Шаповал, губернатор ва̄ӈын хо̄тпан, э̄рнэ щирыл щё̄питаӈкве ла̄всанэ. Ос Советский район кӯщай ва̄ӈын хум Александр Марушкин ла̄тыӈ ла̄выс, та̄н «дорожная карта» нэ̄пакн хансым тэ̄лат пуссын ва̄рияныл, воссыг юв хультуӈкве ат патэ̄гыт тах.

1122 2016. 04. 21. Галина КОНДИНА

Округувн поснэ мисыт ёвтавет Ка̄сыӈ са̄т оигпан ляпат округ мирколт рӯпитан кӯщаит Наталья Комарова, губернаторнэ̄н, сапра̄нин атыглавет ос та̄н тот э̄рнэ ва̄рмалит урыл потыртэ̄гыт. О̄влэ̄т тав та урыл ла̄выс, мо̄лал Россия Президентув ма̄хмытын титыглавес. То̄нт са̄в ма̄ныл ма̄хум таве̄н свонитасыт, ос та̄нти я̄рмум тэ̄ланыл урыл потыртасыт. Губернаторув округт рӯпитан кӯщаитын ла̄выс, ты та̄рвитыӈ ва̄рмалит пуссын вос уральтыяныл, матыр тэ̄лат э̄рнэг вос ва̄рияныл, ул вос ӯрхатэ̄гыт, хунь та̄н ла̄вавет. Ань ты заседаният кӯщаит тамле постановление пирмайтасыт, ня̄врамыт ханищтан программан ос 480 млн солко̄ви нё̄таве. Ты олнытыл школат ӯнттавет, хуньт школаг о̄лум колыт ювле ёвтавет, ос а̄гмыӈмосыӈ, сакватахтам ня̄врамыт мо̄т а̄гирищит, пыгрищит халт аквъёт ханищтахтуӈкве вос ве̄рмысыт, ты кастыл ва̄рнэ рӯпатан олн та̄ставе. Ты коныпал Россия образование Министерстваныл 8, 9 млн. солко̄ви миве. Любовь Ковешникова, образование департаментыт кӯщай нэ̄, ла̄выс: «Ма̄н округувт ань 20% школанув тамле ня̄врамыт ма̄гсыл ханищтахтуӈкве хойхатэ̄гыт. Ханищтан хо̄тпанув ка̄сыӈ ня̄врамакве тав те̄метыл ханищтыяныл». Бюджетный учрежденият рӯпитан кӯщаит та̄нти сэ̄лнэ олнаныл ос ще̄мьят ляпа ма̄хманыл сэ̄лнэ олныт о̄с ловиньтаӈкве тах э̄ри. Рущ щирыл ты декларацияг ла̄ваве. Са̄ртын туп яныг кӯщаит та̄нти рӯпата олнаныл тох хансыгласаныл, ань ма̄ньнув кӯщаит о̄с ловиньтаӈкве ла̄вве̄сыт. Округувт ӯйхул янмалтан ма̄гсыл федеральный бюджетныл ос матса̄вит олнло̄мт миве. Ос манса̄вит миве, кӯщай нэ̄ ат ла̄выс, ул сака мощща. Туп нила фермерский хозяйства поснэ мис ёвтнэ ма̄гсыл то̄влавет. Ос акв предприятие Кондинский районт ёмас лӯптапум янмалтан ма̄гсыл семенал ёвтаве. Наталья Комарова ла̄выс: «Округувт ӯйхул о̄щнэ хозяйстват, тэ̄пкант са̄всыр тэ̄нут янмалтан ма̄хум ка̄сыӈ та̄л са̄внув рӯпата ва̄ре̄гыт, са̄в щаквит, щаквит во̄й ла̄пкан тотаве ос тыналаве. Ань та̄нанылн ты олннё̄тмил сака ёмас онтас ва̄ри».

1122 2016. 04. 21. Людмила ТЕТКИНА

Миркол кӯщаит китыглаве̄сыт манаса̄вит олн та̄н сэ̄лсыт Ты э̄тпост губернатор кӯщай нэ̄ Наталья Комарова сапра̄нин па̄выл ос ӯс миркол кӯщаит во̄виньта̄лсанэ. Ань рӯпитан са̄ккон щирыл мирколт ос Думат рӯпитан хо̄тпат ювле хультум та̄л сыс манаса̄вит олн сэ̄лсыт, та урыл декларациянэ̄пакыт хансэ̄гыт. Ты рӯпата ка̄сыӈ та̄л яныгпо̄ль э̄тпос 30 хо̄талэ мус ва̄руӈкве э̄ри. Ты та̄л пирмайтым са̄ккон щирыл, ань районный думат манос ӯс, па̄выл думат рӯпитан депутатытн ос тамле нэ̄пак налоговый службан ке̄туӈкве э̄ри. Ма̄н округувт акв со̄тыра 296 э̄лумхо̄лас ты нэ̄пак хансуӈкве ань патэ̄гыт. Ты э̄лыпа̄лт та̄н ты нэ̄пак ат ке̄тыгласыт. Кӯщай нэ̄ ла̄выс, яныгполь э̄тпос 8 хо̄талэ мус округ янытыл 61% хо̄тпат декларациянэ̄пак хассыт ос ке̄тсыт. Советский район Малиновский па̄вылт ос Кондинский па̄вылт рӯпитан депутатыт ты нэ̄пакыт хансуӈкве аты о̄вылтахтасыт. Яныг кущай нэ̄ ты ма̄хумн нэ̄пакыт мӯсхалыг ва̄руӈкве ос молямтахтуӈкве ла̄всанэ.

1122 2016. 04. 21. Валентина УЗЕЛЬ

Ня̄врамыт пе̄с о̄лупсан ханищтаӈкв э̄ре̄гыт Ань соссаӈ ма̄хум пе̄с ва̄рмаляныл, пе̄с наканыл э̄лаль тотнэ ма̄гыс са̄всыр кӯщаиӈ ма̄т рӯпитан ма̄хум сапра̄нит, ханищтапыт акваг ва̄рыглэ̄гыт. Общественный палата нампа колт рӯпитан хо̄тпат ты урыл потыртан ма̄гыс ма̄хум ань акван о̄с атыгласаныл. Ща̄нь ла̄тыӈ школат хумус ханищтаве, ты урыл та̄н ты потыртасыт. Ханищтап департаментыт рӯпитан нэ̄ Ирина Лисютина ла̄выс, округувт яныг программанэ̄пак хансым о̄лы, рущ ла̄тӈыл ла̄ваве – «Концепция по родным языкам». Соссаӈ мир ня̄врамыт ханищтаӈкв хумус э̄ри, тот пуссын ёмащакв хансым кос о̄лы. Ос о̄лупсавт ты нэ̄пак щирыл о̄луӈкв ат а̄ртми. Ань тамле та̄рвитыӈ ва̄рмаль о̄лы – ня̄врамыт та̄нти ща̄нь ла̄тӈаныл ханищтаӈкв ат таӈхе̄гыт, потыртаӈкв ат ка̄саще̄гыт. Ос школатт ла̄тыӈ ханищтан ма̄гыс арыг урок ат миве. Ня̄врамыт мо̄т хо̄н ла̄тӈытын ханищтавет – английский ос немецкий. Тувыл та урыл потыртасыт, во̄р ма̄тт о̄лнэ хантыт мо̄т хо̄н ма̄хум То̄румн по̄йкщуӈкве кащилтавет, ты тэ̄ла «сектаг» ла̄ваве. Ты сака лю̄ль ва̄рмаль. Мо̄т по̄х То̄румн агтнэ ханты ма̄хум маныр о̄ньще̄гыт, пуссын тув та мыганыл, о̄лнэ ма̄наныл, родовой угодияныл та̄нанылн хансыяныл. Та̄нти щар вуньщалыг хультэ̄гыт. Ты ва̄рмаль ёлпо̄илттан ма̄гыс кӯщаит матыр рӯпата ва̄ре̄гыт кос. «Югра лылыеп» ассоциация кӯщай хум Александр Новьюхов ты урыл тох ла̄выс, ань соссаӈ ня̄врамыт школат «православиян» ханищтаӈкв э̄ре̄гыт. Тувыл ты хосыт та̄н «сектан» хуйтуӈкв ке патавет, та̄н тах ат ка̄саще̄гыт. Ос ты ла̄тӈыт ёт ма̄н ат ка̄саще̄в, ма̄н ма̄хманув пе̄с йис щирыл о̄лэ̄гыт. Ханты хо̄тпат та̄нти На̄й-О̄тыранылн по̄йкще̄гыт. Ма̄н ос ма̄нти На̄й-О̄тырыт о̄ньще̄в, ма̄нти То̄рманувн-Пупганувн по̄йкще̄в. Мо̄т мир То̄руме нупыл сунсым ма̄нти пе̄с ва̄рмалянув, пе̄с наканув та ёрувлыянӯв. Ос ня̄врамыт пуӈканылт пуссын аквантэ̄лыгтахты, торгамтаӈкв ат патэ̄гыт хо̄т соссаӈ мир Нуми То̄руме, хо̄т православный мир То̄руманыл, та̄нанылн аман йир тӯщтуӈкв, аман пӯпколн минуӈкв э̄ри. Ты тэ̄лат аквантӯлуӈкв щар ат кос э̄ри.

1122 2016. 04. 21. Александр ВЬЮТКИН

Яныгпа̄ла ма̄хум винэ олнаныл урыл Яныгпо̄ль э̄тпос атыт хо̄талт пенсияолн винэ ма̄хум урыл прессконференция о̄лыс. Ля̄ххал тотнэ ма̄хум ёт потыртаӈкве Татьяна Зайцева ёхталас. Тав округ янытыл пенсионерыг о̄лнэ ма̄хум ёт рӯпитан колт кӯщаиг о̄лы. Акванатхатмув юипа̄лт пенсияолн но̄хнув нё̄тнэ урыл тав титыглавес. Татьяна Сергеевна ювлела̄выс: «Ань ты яныгпо̄ль э̄тпос о̄выл хо̄талт ат рӯпитан, а̄гмыӈмосыӈ ос сакватахтам ма̄хум, савалапыг яныгман ня̄врамыт пенсия олнаныл мощ но̄хнё̄тве̄сыт. Туи во̄ртур э̄тпост ос рӯпитан пенсионерыт пенсияныл мощ нё̄тавет. Та кастыл ань нэ̄паканыл щё̄питавет». Та юипа̄лт Татьяна Зайцева пенсионерхо̄тпат урккуптан ос ла̄пала̄лын урыл титыглавес. Нэ̄ ла̄выс: «Со̄ль, тамле лю̄ль е̄мталы. То̄нт ма̄н ля̄ххалыт мирн потыртэ̄в. Пенсионный фонд нампа колт рӯпитан ма̄хмыт ва̄тихал ма̄нав уральтыяныл. Олныт ул вос хультсыт ос по̄хан ул вос минасыт». Пенсият о̄лнэ ма̄хум ӯщлахтын ос мӯйлын ма̄н ялнэ̄ныл урыл нэ̄ ла̄выс: «Ма̄н тамле яласан ма̄хум ма̄гсыл я̄нас олн та̄стым о̄ньще̄в. Ат рӯпитан яныгпа̄ла хо̄тпа та̄л сыс акв щёс хотталь ялуӈкв ве̄рми. Ювле о̄лнэ ма̄тэ̄н ёхтынэ̄тэ юипа̄лт билетанэ ювле ойтавет. Ань йильпи са̄ккон пирмайтавес. Хотталь ялнэ порат Россия товлыӈха̄пытыл яласаӈкв э̄ри. Мо̄т хо̄н ма̄н ялнэ билетыт ювле ат ойтавет». Татьяна Зайцева Москва ӯст о̄лум конкурс урыл потыртас: «Ты пенсионый колыт халт та̄л сыс акв щёс касыл ва̄рыглаве. Ты порат Россия ма̄ янытыл онтырса̄т нупыл ат са̄всыр нампа пенсионный колыт кассыт. 2015 та̄л сыс окружной пенсионный фонд колув «Лучшее отделение ПФР по клиентоориентированности» номинацият но̄хпатыс».

1122 2016. 04. 21. Александр ВЬЮТКИН

Титыт ма̄ вим хумыг Ма̄ньполь э̄тпос ва̄тыт хо̄талт Москва ӯст ма̄ньлат ма̄хум номсым кассыт. Та касыланыл мо̄т хо̄н хащтал ла̄тӈыл «Global Management Challenge» ла̄ваве. Рущ ла̄тӈын толмащлан щирыл – «Глобальная Задача Управления» ла̄ввес. Ма̄н округ ма̄ньлат ма̄хманув о̄с аквта касылн ялсыт. Тот 2015-2016 та̄лыг сыс аквъёт пуссын ат со̄тыра хӯрумса̄ттем хо̄тпа кассыт. Москват о̄лнэ касыл э̄лыпа̄лт Самарский, Ленинградский, Кировский, Омский областит ос ма̄н округувт кубок нампа пе̄риян касыл о̄лыс. Ты э̄лыпа̄лт акв тамле касыл Ханты-Мансийск ӯст о̄лыс. Округ ма̄ньлат ма̄хум халт соссаӈ а̄гит, пыгыт но̄хпатсыт. Та̄н халанылт Руслан Богордаев, Ольга Власова, Тимофей Ганихин, Надежда Молданова, Лариса Миляхова о̄лсыт. Та̄нтина̄ныл рущ ла̄тӈыл «Наследие Югры» ла̄всаныл. Та̄н но̄хпатманыл юипа̄лт Москва ӯсн тит хумыг Руслан Богордаев ос Тимофей Ганихин тув минуӈкв туп ве̄рмысы̄г. Юио̄выл каснэ ма̄т Кировский, Ленинградский, Нижегородский, Омский, Самарский областитныл ос ма̄н округ ма̄хманув халанылт кассыт. Руслан ос Тимофей ща̄лыг олн по̄с висы̄г. Руслан Богордаев ла̄выс: «Мощнув ёрыл ат то̄влувесме̄н, акв ма̄т мощ мо̄т щирнувег ва̄рмуме̄н ма̄гсыл титыт ма̄н е̄мтсуме̄н. Пуссын ат хо̄тпа тув те минасӯв, э̄рыӈ щар но̄хпатнувӯв».

1122 2016. 04. 21. Николай МЕРОВ

Кӯщай нэ̄ ханищтахтын колн ёхталас Мощ мо̄лалнув округ кӯщай нэ̄ Наталья Комарова «Лылыӈ со̄юм» нампа ханищтахтын колн щалтсас. Маныр рӯпата тот ва̄раве ос хумус ня̄врамыт ханищтавет, тав ань уральтастэ. Ты кастыл о̄лнэхӯлнэ нак ос ханищтап э̄лаль тотнэ ма̄т рӯпитан кӯщаит тув о̄с ёхталасыт. Та порат Нижневартовский район Аган ос Лянтор па̄влыгт ёнгын колт рӯпитан хо̄тпат кина суссылтан то̄тап хосыт та̄нки ва̄рнэ рӯпатаныл урыл о̄с потыртасыт. Тот атхатыглам хо̄тпатн ос ня̄врамытн Наталья Комарова ла̄выс: «Мо̄лты та̄л ма̄н ӯс миркол кӯщаит ос ӯс Дума ёт рӯпитамув порат, ты ёнгын кол мӯсхалыг щё̄питаӈкве потыртахтасӯв. Ты ва̄рмаль щирыл э̄рнэ рӯпата ва̄раве кос, та сыс иӈ са̄в та̄рвитыт о̄лэ̄гыт. Пе̄с йис ёнгын ва̄рмаль акваг э̄лаль вос минас, ма̄навн иӈ са̄в ё̄р э̄ри». Кӯщай нэ̄ ла̄выс, тав ань ты о̄лнэ та̄рвитыт ат ёрувлыянэ. Ты колн акваг нё̄туӈкве э̄ри. Ань ханищтахтын колнаканыл пуссын посыӈыт, лощитыт. Тот са̄в ня̄врам ханищтахтуӈкве ве̄рми. Ня̄врам ханищтан хо̄тпат рӯпатаныл о̄с кӯпнитыг е̄мтыс. Ты та̄л о̄вылтахтын порат Наталья Комарова Нижневартовский районын ялыс. Тот соссаӈ ма̄хум ёт хо̄нтхатыглас. Та̄н ётаныл са̄всыр тэ̄лат урыл потрамас. Тот о̄лнэ мир ла̄внэ̄ныл щирыл, та̄н палтаныл са̄ӈквылтаӈкве ха̄снэ хо̄тпа а̄тим, ня̄врамыт нэ̄мхотьютн ханищтаӈкве. Кӯщай нэ̄ ты урыл тох ла̄выс: «То̄нт ам та̄ра на̄н урынтыл номылматсум ос ла̄всум, ань Ханты-Мансийск ӯст са̄ӈквылтап ва̄рнэ хо̄тпат, са̄ӈквылтаӈкве ха̄снэ ма̄хум ос ты ва̄рмальн ханищтан хо̄тпат о̄лэ̄гыт. На̄нан та̄н ётаныл акванпотыртахтуӈкве э̄ри. Матыр нё̄тмил ты тэ̄ла щирыл э̄ри ке, ма̄н нё̄тэ̄в. Ты тэ̄ла акванюрщхатым э̄лаль тотэлы̄н. На̄н ань э̄рнэ рӯпата тыт ва̄руӈкве патэгы̄н тах». Пе̄с йис ва̄рмалит аквты щирыл номнэ ма̄гыс, округувт тыи кастыл са̄ккон хансым о̄лы. Ос ты тэ̄ла туп нэ̄пакт хансым хультуптаӈкве ат э̄ри. Ёнгын ва̄рмаль ва̄нэ яныгпа̄ла хо̄тпат та̄нки о̄с ня̄врамыт вос ханищтыяныл. Та̄наныл тыг ос во̄вуӈкве э̄ре̄гыт. Мо̄лты та̄л Югра ма̄т йис о̄лупса, о̄лнэхӯлнэ накыт э̄лаль тотнэ та̄лыг ла̄выглавес. Ты та̄лув ос ня̄врамыт янытлан та̄лыг ла̄ввес. Наталья Комарова ты урыл тох потыртас: «Ты кит та̄лыг сыс ма̄н соссаӈ мир ма̄гыс яныг рӯпата ва̄рсӯв. Мо̄лты та̄л ма̄н пе̄с йис о̄лупса номнэ ма̄гыс са̄в рӯпитасӯв. Ань ос йис о̄лупса э̄лаль тотнэ ма̄гыс яныг рӯпата ва̄ре̄в. Ня̄враманув ты ва̄рмаль щирыл э̄лаль вос ханищтахтасыт, ма̄н ань са̄в ё̄р пинэ̄в». «Лылыӈ со̄юм» нампа ёнгын колт кӯщаиг рӯпитан нэ̄ Татьяна Савельевна Хозяинова (а̄ги о̄парищ наме Вьюткина) ла̄выс: «Округувт 2002 та̄лт «Са̄лыкве» нампа о̄выл фестиваль о̄лыс. То̄нт тамле номтын ёхтуве̄сум, манрыг ам а̄гим ты фестивальт ат ёнги ос ат йӣкви. Та порат ам ня̄врамыт ма̄гыс са̄ӈквылтаӈкве ханищтахтын кол ва̄руӈкве ты номылматсум. Тувыл лӯима̄ мирн нё̄тмил ва̄рнэ отделт рӯпитам ма̄хум ма̄навн я̄нас колнак мисыт. Хунь ёнгын колув пӯнсыслӯв, о̄выл щёс ма̄н палтув туп хо̄тпан са̄вит ня̄врам йӣквуӈкв ос са̄ӈквылтаӈкв ёхталасыт. 2006 та̄л оигпам мус ма̄н палтув китса̄т ня̄врам ёхталаӈкве патыс. Та юипа̄лт ма̄н ос «Лылыӈ со̄юм» нампа яныг ёнгын кол ва̄рсӯв. Та порат хӯрумса̄т арыгтем ня̄врам ма̄н палтув атхатыглас. Ёнгын колувт ня̄врамыт са̄ӈквылтаӈкве, йӣквуӈкве, ка̄тыл са̄всыр пормасыт ва̄руӈкве ос ща̄нь ла̄тӈыл потыртаӈкве ханищтыянӯв. Ань колувн атхо̄т та̄л яныт ня̄врамыт ханищтахтуӈкве о̄с ёхталэ̄гыт. Ты хо̄тал мус пуссын аквъёт ма̄н палтув хо̄тса̄т са̄виткем ня̄врам ловиньтым о̄лы. Ханищтан хо̄тпанув Ханты-Мансийск ӯст о̄лнэ ат ма̄нь ня̄врам колытын рӯпитаӈкве ялантэ̄гыт. Тот ма̄нь ня̄врамытын соссаӈ мир йис о̄лупса урыл потыртэ̄в, та̄наныл ма̄ньщи ос ханты ла̄тӈыл ханищтыянӯв. Тувыл а̄гмыӈмосыӈ ня̄врамыт ёт рӯпитэ̄в. Та̄н ща̄няныла̄щаныл ма̄навн яныг пӯмащипа ла̄тыӈ ла̄ве̄гыт. Ва̄тихал ёхталаӈкве во̄ваве̄в. Ня̄врамытн ты ва̄рмаль сака мӯсты. Хо̄псы а̄гм пӯльницат ань са̄в соссаӈ ня̄врам пусмалтахты, тув о̄с ялантэ̄в. Та̄н ма̄гсыланыл ёнге̄в, йӣкве̄в ос аквъёт ка̄тыл са̄всыр пормасыт ва̄ре̄в. Ма̄н тув ёхталанэ̄в порат, та̄н сака ща̄гтэ̄гыт. Ня̄врам ханищтан хо̄тпанув пуссын юртыӈыщ о̄лэ̄гыт, акваннё̄тхатэ̄гыт. Ёнгын колувт аквъёт са̄всыр ханищтап ва̄рмалит щё̄пита̄лэ̄в. Мо̄тыт та̄лт «Лылыӈ со̄юм» ёнгын колув лов та̄лэ то̄влы. Тыгыл э̄лаль ос таӈхе̄в, ёнгын колувт хо̄тал палыт ня̄врамыт вос ханищтахтэ̄гыт. Тот ма̄нь ня̄врамыт тотыглан кол ос о̄выл класс ня̄врамыт ханищтаӈкве патыянӯв. Та торыг ань ялнэ ма̄нь ня̄врам коланувт аквтыхольт э̄лаль рӯпитаӈкве патэ̄в». Наталья Комарова ты урыл тох ла̄выс, ань моще̄ртын Ханты-Мансийск ӯст Шевченко ос Менделеева ӯсхулыиг халт йильпи ханищтан кол ӯнттын ма̄ныл а̄стлаве. Та колт садик ос школа рӯпитаӈкве патэ̄г. Сӯкыр э̄тпос о̄выл хо̄талэ̄т ты кол пӯнсаве тах. Тот ма̄к тамле программа щё̄питым ты о̄лы. «Лылыӈ со̄юм» ёнгын колт рӯпитан хо̄тпат ты ханищтапаныл тот а̄рталаӈкве ве̄рмияныл.

1122 2016. 04. 21. Галина КОНДИНА

«Титул» нампа нэ̄пакыт о̄щнэ ма̄хум! Ань ты та̄л яныгпо̄ль э̄тпос 21 хо̄талныл акв акция–нэ̄пак тынэ 35 солко̄ви. Хотьют ты нэ̄паканэ тыналаӈкве те таӈхи, адресэ тамле: Ханты–Мансийск ӯс, Карл Маркс ӯсхулы, 15 кол. Матыр титыглаӈкве те таӈхегы̄н, телефоныт: 8 (3467) 33–17–41; 33–17–42, 33–17–44. Акцият ВК – Инструмент нампа фирма ёвты. Ты тотым ля̄ххал ма̄ньщи ла̄тӈыл Галина Кондина толмащластэ.

1122 2016. 04. 21. Николай МЕРОВ

Рӯпитан хо̄тпат халанылт кассыт Мо̄лал рӯпата департамент кӯщай хум Алексей Варлаков ос ля̄ххал тотнэ ма̄хум департамент кӯщай ва̄ӈын нэ̄ Ирина Безносова ля̄ххал тотнэ колн ёхталасы̄г. Ань рӯпитан ма̄хум халт «Славим человека труда» нампа касыл минас. Ты касыл яныгпо̄ль э̄тпост а̄стлавес. Ты урыл кӯщай хо̄тпаг ань ты потыртасы̄г. Ты касыл 2011 та̄л па̄сныл Уральский Федеральный округ янытыл ва̄рыглаве. Ты ва̄рмаль таима̄гыс щё̄питавес, са̄внув хо̄тпа ёмщакв рӯпитаӈкв вос таӈхыс. Тувыл ма̄ньлат ма̄хманув ты тэ̄ла щирыл э̄лаль вос ханищтахтасыт, ты э̄рнэ рӯпатат та̄н о̄с вос янытлыяныл. Ма̄хум тыщир пе̄риявет: о̄влэт ӯст, па̄влыт о̄лнэ предприятият рӯпата ёмщакв ва̄рнэ хо̄тпат акванатавет. Та̄нки о̄лнэ ӯсанылт ос па̄вланылт халанылт касэ̄гыт. Тувыл щар ка̄ркамнувег, ха̄снэ щирыл рӯпитан хӯрум хо̄тпат ка̄сыӈ рӯпатат я̄нас вивет ос округ ма̄гыс касуӈкве ке̄тавет. Ка̄сыӈ та̄л акваг са̄внув мир ёхталы. 2013 та̄лт нёлолов со̄тыра хо̄тпа касыс. Пуссын аквъёт атпанахкем предприятияныл ма̄хум ёхталасыт. 2014 та̄лт китхуйплов со̄тыра хо̄тпа атхатас. Ты та̄л тыгыл иӈ са̄внув хо̄тпа е̄мтыс. Ты трактористыт, сварщикыт, металлургыт, инженер механик сельского хозяйства, нё̄выль щё̄питан хо̄тпа, йӣвныл са̄всыр хурит ёргын ма̄хум, хӯл совныл, во̄руй совныл маснутыт ю̄нтнэ хо̄тпат, ма̄вит ӯргалан хо̄тпат, ма̄во̄й ос газ винэ ма̄т рӯпитан хо̄тпат ос мо̄таныт касэ̄гыт. Пуссын аквъёт онтоловхуйплов ва̄рмаль щирыл ма̄хум кассыт. Ма̄н округувныл ты касылытн ялум хо̄тпат хӯрумхуйплов тэ̄ла щирыл но̄хпатсыт. Ты ва̄рмаль ма̄гыс та̄н пуссын мӯйлупсал майве̄сыт ос янытлаве̄сыт. Ирина Безносова ос мо̄т хо̄н ма̄т о̄лнэ рущ ма̄хманув урыл потыртас. Тав ла̄выс, ань хотьют э̄лы ма̄ныл Россиян ювле ёхтуӈкве таӈхи ке, та̄н ты ва̄рмаль щирыл тыт нё̄тавет.

1122 2016. 04. 21. Светлана РОМБАНДЕЕВА

Янгема̄не ёсал кассыт Ты э̄тпос 2 хо̄талэ̄т Ханты-Мансийск ӯст ма̄хум янгема̄не ёсал кассыт – 5, 25 ос 50 ве̄рыста ха̄йтсыт. Ты касыл Югорский лыжный марафоныг ла̄ваве, ма̄н ма̄вт тав нилыт щёс ты ва̄рыглавес. Яныгхо̄тпат, ма̄ньлат ма̄хум ос щар ма̄нь ня̄врамыт та̄ланыл щирыл пуссын я̄нас ловиньтаве̄сыт – хотьют са̄ртын ёхтыгпас, тав юипа̄лэ̄т ёхтум хо̄тпат наманыл пуссын хасве̄сыт. 50 ве̄рыста ха̄йтум хум хо̄тпат халт о̄влэ̄т Тони Ливерс ёхтыгпас. Тав Швейцарият о̄лы, мо̄лты та̄л о̄с аквты ма̄т тав ты но̄хпатыс. Китыт ме̄ста Россия хум Юрий Шопин тав вистэ, хӯрмит – Франция ма̄ныл ёхталам хум Бастьен Порриер тав вистэ. Ос аквты са̄вит ве̄рыста ха̄йтум нэ̄ хо̄тпат халт о̄выл места Юлия Тихонова, Белоруссия ма̄ныл о̄лум нэ̄, тав вистэ. Тав юипа̄лэ̄т Ольга Рочева, Россият о̄лнэ а̄ги, ёхтыгпас, хӯрмит нэ̄ныл – Элиза Брокард, Италияныл ёхталам а̄ги. Соссаӈ ма̄хманув о̄с кассыт, пуссын мольщаӈыл масхатым о̄лсыт. Та̄н тай акв ве̄рыста туп ха̄йтсыт, таима̄гыс я̄нас щирыл ловиньтаве̄сыт. Ты хо̄тпанув халт о̄влэ̄т Виталий Русскин тав ёхтыгпас, тувыл Иван Тэвлин, хӯрмиттыг ос Станислав Комтин. Та̄н пуссын Сургутский районныл о̄лсыт. Виталий Русскин тох ла̄выс: «Та̄л палыт ам сака са̄в ха̄йтыгтасум, рӯпитасум, о̄выл места виӈкве сака тахсум. Молты та̄л о̄с ам но̄хпатсум. Тынакт лё̄ӈхув сака ёмас, кӯпнитыг ха̄йтсӯв. Мир са̄в, пуссын татем ро̄хсыт, ёмас номтыл ма̄н ляльтув суссыт. Ка̄сыӈ хо̄тпан пӯмащипа ла̄тыӈ ла̄ве̄гум». Но̄хпатум хо̄тпат пуссын янытлаве̄сыт, округ кӯщаин Наталья Комарован мӯйлупсатыл майве̄сыт.

1122 2016. 04. 21. Людмила ТЕТКИНА

Я̄сунтныл о̄лнэ ма̄щтыр нэ̄ Тамара Егоровна Гындыбина, такви о̄парищ наме Хозумова, колта̄глэ ёт Ха̄льӯс район Саранпа̄вылт о̄лы. Тав «Саранпаульский» нампа совхозт ма̄щтыр нэ̄г рӯпиты. Ре̄тыӈ ю̄свой э̄тпост са̄лыӈ ма̄хум ялпыӈ хо̄таланыл о̄лум порат ам ты ма̄щтыр нэ̄ ёт ва̄йхатасум ос рӯпататэ урыл китыгласлум. Тамара Егоровна тамле потыр о̄ньщас. – Ам совхозт са̄в та̄л рӯпитэ̄гум. О̄влэ̄т о̄йкаме̄нтыл са̄лыӈколт яласасме̄н. О̄йкам наме Пётр Иванович Гындыбин. Яныг пыгуме̄н школан ханищтахтуӈкве миннэ поратэ̄т ме̄н на̄лув по̄йтсуме̄н, Саранпа̄вылн о̄лмыгтасме̄н. На̄лумт о̄луӈкве патсуме̄н, ам совхозт ю̄нсхатнэ нэ̄г рӯпитаӈкве патхатасум. О̄йкаме̄нтыл нила ня̄врам о̄ньщиме̄н, хӯрум пыг, акв а̄ги. Серёжа, Ваня ос Алеша армия юипа̄лт Ханты-Мансийск ӯсн минасыт, ань тот о̄лэ̄гыт. Яныг пыгум Серёжам А̄с-угорский театрыт рӯпиты. Ваням ос Югорский университетыт ханищтахты, о̄с театрыт рӯпиты. Алёша пыгум колледжит ханищтахты. Ма̄нь а̄гим лов классын яланты. Амки Я̄сунт па̄вылныл о̄лэ̄гум, о̄йкам ос Кимкъясӯй па̄вылныл о̄лы. Оматэ ос рӯтанэ та па̄вылт о̄лэ̄гыт. Тав ма̄ньлат хумыг тыг ёхтыс, нё̄рт лов бригадат рӯпитас. Ме̄н Саранпа̄вылт акванхо̄нтхатсуме̄н, тувыл аквъёт Нё̄рн минасаме̄н. О̄йкам пенсиятэ мус совхозт рӯпитас. Кит та̄л пенсияолн выг. Ам о̄с акв та̄л пенсиям мус хультыс, 23 та̄л совхозт рӯпитэ̄гум. Пӯркат, ня̄рат ос са̄в мо̄т пормасыт ю̄нтэ̄гум. Манарыл ла̄ваве̄в, таи та ва̄ре̄в, таи та ю̄нтэ̄в. Ты рӯпата ва̄руӈкве хунь патхатасум, са̄в нэ̄ совхозт рӯпитасыт, ань ма̄н хӯрум ма̄щтыр нэ̄ хультсӯв. Нэ̄квет пуссын ты рӯпатал по̄хын миныгласыт, акваг ю̄нсхатым ка̄таныл а̄гмалтэ̄гыт ос саманыл поста̄л патэ̄гыт. Ю̄нсхатуӈкве омамн ханищтаве̄сум. Тав сампыльта̄л о̄лыс, тувыл сака ма̄щтыр нэ̄ о̄лыс. Ма̄ньта̄гыл тав нупылэ сунсым ю̄нсхатуӈкве ханищтахтасум. Ам тав по̄хе̄н ӯнтэ̄гум, маныр тав ва̄ри сунсэ̄гум, тох ма̄щтырлаӈкве ханьщувласум. Ня̄рат, ва̄ит, пӯркат ос тапочкат ю̄нтуӈкве пуссын ха̄сэ̄гум. Ма̄ньщи супыт ю̄нтуӈкве о̄с кос ха̄сэ̄гум, тувыл са̄лы сов ёт рӯпитаӈкве ханьщувласум, ты пормасыт ёмаснувег тэ̄лэ̄гыт. Ань манкем ве̄рме̄гум, таса̄вит ю̄нтэ̄гум. Са̄в олн ке э̄ри, са̄внув рӯпитэ̄гум, э̄тпос сыс тапочки лов пара ке ю̄нтэ̄гум лов со̄тыра солко̄ви сэ̄лэ̄гум. Ялпыӈ хо̄талыт манос выставкат ма̄гсыл сувенирыт ва̄ре̄в. Ю̄нтум пормасанув Ханты-Мансийск ӯст са̄всыр ялпыӈ хо̄талыт о̄лыглан порат тыналавет. Саранпа̄вылт тамле пормас сака мощща хо̄тпа ёвтэ̄гыт. Ам Тамара Егоровна ос китыгласлум, ма̄ньлат нэ̄т совхозт рӯпитэ̄гыт ман а̄ти. Тамара Егоровна ювлела̄выс: «Ань а̄гит ты тэ̄лал щар ат пӯмщалахтэ̄гыт, ма̄н яныгмам поравт оманув нупыл сунсым ханищтахтасӯв. Та̄н тай тувле нупыл тэ̄ланыл щар а̄тим, ма̄щтырлаӈкве сака ат ка̄саще̄гыт ос рӯпитаӈкве тыг ат ювыт». Са̄лыӈ ма̄хум олимпиаданыл о̄лум порат Владимир Иванович Фомин, Ха̄льӯс район миркол кӯщай хум, Саранпа̄вылн ёхталас. Тав совхозт ка̄ркамыг рӯпитан ма̄хум янытласанэ ос янытлан нэ̄пакыл мисанэ. Тамара Егоровна то̄нт о̄с янытлан нэ̄пакыл мӯйлуптавес. Ам Тамара Егоровна ты кастыл ос янытлылум, потре ма̄гсыл пӯмащипа ла̄тыӈ ла̄ве̄гум. Ма̄ньщи нэ̄ пуста̄гыл э̄лаль вос о̄лы. На̄й-О̄тыранэ̄н вос ӯргалаве.

1122 2016. 04. 21. Николай МЕРОВ

Мирон па̄влыӈ ма̄ньщи хо̄тпаг Нё̄ранув палытыл са̄в ма̄нь па̄влыт ӯнлэ̄гыт. Тот аквкит манос хӯрум ще̄мьял ма̄ньщи ма̄хманув о̄лантэ̄гыт. Мо̄лал ам та па̄влытын мӯйлуӈкве ялсум. То̄нт Свердловский областит Ке̄расколыӈъя па̄вылт акв ма̄ньщи э̄ква ляльт хо̄нтыслум. Тав наме Мария Васильевна Тасманова, такви а̄ги о̄парищ наме Самбиндалова, э̄ква такви о̄лупсатэ урыл а̄нумн мощ потыртас. На̄н тав потре э̄лаль ловиньтэлы̄н: «Ам 1951 та̄лт Сӯйва̄т па̄вылт самын патсум. Ще̄мьявт онтолов ня̄врам яныгмасӯв. Ань ягпыганум, увщиянум пуссын холасыт, амккем хультсум. Акв ягпыгум а̄гитэ Ира Бурмантово па̄вылт, мо̄т ягпыгум пыге Коля ос Лэ̄плат о̄лы, тувыл та, воссыг нэ̄мхотьют а̄тим. О̄выл о̄йкам наме Ӯнтари Анямов о̄лыс. Тав ётэ лов та̄л нё̄рт са̄лы ӯрим яласасум. Тав хосат а̄тимыг е̄мтыс. Тувыл ме̄н Василий Самбиндалов ёт акванминыгласме̄н. Тав ётэ ос атхуйплов та̄л са̄лы ӯрим нё̄рт яласасум, та хумим о̄с а̄тимыг е̄мтыс. Яныгпа̄ла ма̄ньщи хо̄тпанув холаманыл па̄сныл воссыг са̄лыт нэ̄мхотьют ат о̄ньщиглас. Хум хо̄тпанув пуссын во̄раим о̄лэ̄гыт. Нё̄рт са̄в во̄р са̄лы ос со̄рпи о̄лы, таияныл ня̄влалым яласэ̄гыт. Ань Савва Самбиндалов мо̄лалнув са̄лы о̄щнэ ва̄рмаль э̄лаль тотуӈкве о̄вылтастэ. Тыгыл э̄лаль ань Лэ̄плат ос апгум Володя Тасманов Саранпа̄вылныл са̄лыт ёвтуӈкве ка̄сащи. Ам номсыте̄мт, ла̄щалла̄щал ты ва̄рмаль о̄с но̄хво̄рмалтаве тах. Ань ам атыт та̄л пенсия олн выгум. Паспортум щирыл Ха̄льӯс район Ня̄хщамво̄ль па̄вылн хансым о̄лэ̄гум. Пенсия олнанум тувыл ке̄тавет. Ме̄н ань Алексей а̄пщиме̄нтыл Мирон па̄вылт о̄лыме̄н. Тав мо̄лал а̄гмыл е̄мталас, ё̄мыгтаӈкв щар ат ве̄рмыс. Хум хо̄тпат таве тӯяг ла̄глыл ё̄мим яныг лё̄ӈх мус тотсаныл. Тувыл ос ма̄шинал Ивдель ӯсн ке̄тыгласаныл. Ӯс пӯльницат пусмалтахтас. Во̄р ма̄т тамле та̄рвит о̄лы, матыр а̄гмыл е̄мтыме̄н ке, тэ̄рпи а̄тим. Ӯс мус яласан лё̄ӈх та̄л о̄луӈкве сака та̄рвитыӈ. Ме̄н а̄пщиме̄нтыл яныгпа̄лаг е̄мтсуме̄н. Яныг лё̄ӈх мус ла̄глыл хунь та ё̄миме̄н. Тыщир хо̄тпа матаре хо̄тум е̄мты ке, нэ̄матырыл таве̄н нё̄туӈкве. Тувыл ань тэ̄рпит о̄с сака тыныӈыг е̄мтсыт, та̄наныл ёвтнэ ма̄гыс са̄в олн э̄ри. Мо̄лал а̄пщим Ивдель пӯльницат пусмалтахтыс. Хунь пӯльницаныл конта̄ртвес, маснутанэ ос э̄рнэ нэ̄паканэ пуссын ӯст ёрувламанэ. Ань тав пормасанэ ма̄гыс ӯсн ялнэ олн э̄ри. Та сыс, мо̄т ва̄рмаль тай а̄тим, ты о̄лнэ ма̄ме̄ныл нэ̄мхотталь минуӈкве ат ка̄сащиме̄н». Мирон па̄вылт акв кол ӯнлы. Тот Мария Васильевна ос а̄пщитэ Улякщи о̄лэ̄г. Рӯт хо̄тпанэ̄н ва̄тихал уральтаве̄г. На̄йив са̄груӈкве манос мо̄т матыр ва̄рмаль ва̄руӈкве акваг нё̄таве̄г. Па̄выл яныг лё̄хныл атпан арыгкем ве̄рыстат ӯнлы. Тамле нё̄р ос во̄р ма̄т ма̄ньщи хо̄тпаг ты о̄лантэ̄г.

1122 2016. 04. 21. Тамара МЕРОВА

А̄гитпыгыт ща̄гтым тыг ёхталэ̄гыт Ханты-Мансийск ӯст о̄лнэ Центр ремёсел колт "Ремёсла и промыслы: прошлое и настоящее" нампа аквхуйпловит научнопрактический ханищтап о̄лыс. Тамле ханищтап ня̄врамыт ма̄гыс ка̄сыӈ та̄л ва̄рыглаве. Тув округ янытыл ёхталам а̄гирищитпыгрищит хӯрум хо̄талн мӯйлуӈкве во̄выглаве̄сыт. Ня̄врамыт о̄влэ̄т та̄нки пӯмщалахтын тэ̄ланыл о̄вылтыт потыр ловиньтэ̄гыт ос ётыл ма̄щтырлан урок ва̄ре̄гыт. Ты та̄лт Мегион, Лянтор, Нефтеюганск, Нижневартовск, Сургут, Урай ӯсытныл ос Октябрьский, Сургутский ос Ха̄льӯс районытныл о̄лнэ а̄гирищит ос пыгрищит тыг ёхталасыт. Тувыл 32 са̄вит ня̄врамаквет та̄нки хансум потраныл ловиньтасаныл. Ос 43 ня̄врамыт та̄нки хансум потраныл тыг ке̄тыгласаныл. Центрыт кӯщаиг рӯпитан нэ̄ Ольга Бубновене ла̄выс: «Ма̄н палтув то̄ва ня̄врамаквет китыт манос хӯрмит щёс ёхталэ̄гыт ос та̄нки пӯмщалахтын тэ̄ланыл актох э̄лаль тотыяныл. Мо̄таныт та̄нки ӯсанылт манос па̄вланылт иӈ ханищтахтасыт ос ань о̄выл щёс тыг ёхтысыт. То̄ват ва̄рнэ тэ̄ланыл хосыт мощ са̄внув матыр та̄рапаттуӈкве ла̄виянӯв. Тыг касыл щирыл но̄хпатум ня̄врамыт пе̄рийиянӯв. Та щирыл та̄н та̄нки номтыл э̄лаль о̄с матыра̄ти ва̄руӈкве ка̄саще̄гыт, акваг пӯмщалахтэ̄гыт, акв ма̄т ат ӯнлэ̄гыт». О̄выл хо̄талт Ханты-Мансийскат "Лучик" нампа колн ялантан а̄гмыӈмосыӈ а̄гирищитпыгрищит «Город мастеров» ёнгил суссылтасыт. Ос тув ялантан а̄ги Ангелина Меренкова «а̄каньма̄нь ло̄ӈханьщап» потыр щё̄питас. Тувыл ӯсувт о̄лнэ мо̄т а̄гирищит ра̄ктыл ва̄рнэ пормасыт, кисгынутыт («окарина» пе̄с рущ ла̄тӈыл намтым о̄лэ̄гыт), рущ маснут, тувыл хантыт ос ма̄ньщит хорам ю̄нтнэ то̄рыт урыл потыртасыт. Ма̄ньщи ма̄хум культураныл о̄вылтыт тот Хулюмсӯнт па̄вылныл ёхталам Дарья ос Владимир Алгадьевыг потыртасы̄г. Даша ра̄кытныл по̄щгим кӯр о̄вылтыт потыр щё̄питас. Тав ане̄кватэ кол по̄хат тамле кӯр ка̄салас ос ты урыл э̄лаль пӯмщалахтуӈкве патыс. Володя хум хо̄тпат матыр ва̄рнэ ос юн о̄щнэ са̄всыр пормасыт наманэ нэ̄пакн хассанэ ос хумус, манарыл та̄н ва̄равет, таит та̄рапаттум. Ты кол ӯнттын порат э̄рнэ утыт, хӯлуп щё̄питан утыт. Ты пе̄с та̄гыл о̄щнэ пормасыт ёт ма̄хманув ань тыг мус рӯпитэ̄гыт. Пыг ань мӯй ня̄врамыт ма̄гыс «Изготовление грузила для невода» ма̄щтырлан урок суссылтас. Хулюмсӯнтныл ёхталам мо̄т пыг Кирилл Голов «Традиционный узел при изготовлении Тюменского махрового ковра» потыр щё̄питас. Ты ня̄врамыт Надежда Константиновна Маслован тыг тотыглаве̄сыт. Та̄н пуссын школа искусств нампа колн ялантэ̄гыт, ос тот мо̄т ня̄врамыт халт кассыт. Нэ̄мхо̄т воссыг о̄лыгла̄ттал тэ̄лат та̄н оснпаттысаныл, таима̄гыс э̄сгуве̄сыт. Ань таияныл та̄н э̄лаль ханищтаӈкве ос хо̄та̄ти суссылтаӈкве патыяныл ке, щар ёмас о̄лнув. Тувыл ты ханищтапыт таи сака ёмас тэ̄лаг о̄лы, тыг ще̄мьяӈ та̄гыл ёхталэ̄гыт. Ань тамле ще̄мьят маснут сагуӈкве, ю̄нсхатуӈкве, йӣв ёргуӈкве ос мо̄т пе̄с накыт ат ёрувлыяныл, ня̄враманыл ханищтыяныл. Ольга Бубновене ще̄мьят наманыл ла̄всанэ: тыи Изюмовыт, Корсаковыт, Кулабуховыт, Турута ос Слободян. Тав пуссын э̄сгын нэ̄пакыл мӯйлуптасанэ. Урай ӯсныл ёхталам Изюмовыт хӯл совныл пормасыт ю̄нтнэ о̄вылтыт потыртасыт. Ты урыл ам тах ётыл я̄нас потыр хансэ̄гум. Хӯрум хо̄тал молях оигпасыт, мӯйлын ня̄врамытын тыт сака мӯстыс. Та̄н мӯйлупсал майве̄сыт ос мо̄тыт та̄лт ёхталаӈкве ла̄вхатсыт.

1122 2016. 04. 21. Светлана РОМБАНДЕЕВА

Хо̄сло̄х па̄вылт самын патум хо̄тпав Ты э̄тпос 22 хо̄талэ̄т ма̄ньщи хо̄тпав Евдокия Ивановна Ромбандеева самын патум хо̄талэ, ты та̄л 88 та̄лэ то̄влы. Тав Ханты-Мансийск ӯст о̄лы, А̄с-угорский институтт рӯпиты. Евдокия Ивановна са̄в та̄л Ленинград ос Москва ӯсыгт о̄лыс, АН СССР языкознание Институтт наука щирыл рӯпитас. Ма̄ньщи ла̄тӈув ханищтан ма̄гыс са̄в нэ̄пак та̄ратас – 150 арыг научный нэ̄пакыт ос потрыт хансыс. Евдокия Ивановна Ха̄льӯс район Хо̄сло̄х па̄вылт самын патыс. Оматэ Мария Дмитриевна, а̄ги о̄парищ наме Сайнахова о̄лыс, са̄в мо̄йт ва̄с. А̄тятэ Иван Петрович Ромбандеев сака ёмас охотникыг о̄лыс, «Ударник» ос «Стахановец» намыл майлувес. Ам Евдокия Ивановна ёт хо̄нтхатыгласум, о̄лупсатэ, рӯпататэ урыл китыгласлум, мощ потрамасме̄н. На̄н ань э̄лаль тав потре ловиньтэлы̄н. – Ма̄н, ня̄врамыт, оманувн потыртаӈкве ханищтавесӯв, мо̄йтуӈкве, а̄мщуӈкве ханищтавесӯв. Ма̄н колувт а̄гирищит атхатыгласыт, пыгрищит ос Аньтёпка акиюв о̄йка колт атхатыгласыт. Тот мо̄йт хӯнтлэ̄гыт, са̄ӈквылтэ̄гыт, поргащлэ̄гыт. Аньтёпка о̄йка ня̄врамыт нупыл сака ёмас хо̄тпа о̄лыс. Яныг о̄йкат ос Пе̄трав о̄йка колн атхатыгласыт, Сорт о̄йкаг ла̄ввес. Тав ща̄не Хо̄сло̄хын Сортыӈъя̄ныл тотыглавес. 1938 та̄лт школан Сӯкыръя па̄вылн тотве̄сум. Тот ам нила класс а̄стласум. Учителянув сака ёмасыт о̄лсыт, ат ля̄выльттаве̄в, ат ро̄хтаве̄в. Ма̄н о̄с мори ат капыртасув, ёмщакве̄г хӯнтлысув. Школа кӯщаиг Леонид Иванович Проводников о̄лыс. Тав Сӯкыръян ёхтынэ̄т э̄лыпа̄лт Ло̄пмуст рӯпитам, ма̄ньщи ла̄тӈыл мощ ха̄сыс. Ма̄н рущ ла̄тӈыл щар ат ха̄ссув, тав матыр потырты, ат торгамтылув, суйта̄л та ӯнлэ̄в. Тувыл тав маныр ла̄ви, тав юипа̄лэ̄т та ле̄ӈктантэ̄в. Мо̄йт ханищтасув: «Кот Васька беленький, хвост у Васьки беленький». Переменат ня̄врамыт ма̄нти халувт ла̄ве̄в: «Васька – тай ул о̄йка тав наме. Тав ул кот тынтлы. . . » Ётыл та̄рапаты, ты насати катирищув ӯлылаве. Ам э̄лаль ханищтахтаӈкв номсасум. 1941й та̄лт Лончаков Васял Кульпасн минуӈкве потыртахтасаме̄н. Рӯпитасме̄н, толгысаме̄н, тувыл сӯкыр э̄тпос юио̄выл хо̄таланэ̄т та̄ртавесаме̄н, ма̄нь катерн та̄лттувесме̄н, Кульпасн минасаме̄н. 5-7 классыт тот та а̄стласум. Школат о̄с сака ёмас учителит о̄лсыт. Ма̄ньщи ла̄тӈыл тот Голошубин о̄йкан ханищтавесӯв. Сака пӯмыщ о̄лыс, ма̄н акваг «5»тыл та пинаве̄в, та ща̄гтэ̄в, номтанув сака ёмасыт. Ма̄н, ма̄ньлат хо̄тпат, яныг ма̄хум ёт рӯпитасӯв. Тув мос та хӯл алыщлаӈкве я̄ртаве̄в, толге̄в. Э̄лумхо̄лас мощща, о̄йкат, пыгыт пуссын армиян вуйве̄сыт. 1944 та̄лт сӯкыр э̄тпост Ханты-Мансийскан ущ та минасум. Училище кӯщаиг Георгий Тарасович Величко тав о̄лыс, сака ёмас о̄йка. О̄выл курсыт ма̄ньщи иӈ аква а̄тим о̄лыс, ам амттем. Ханты-Мансийскат хӯрум та̄л ханищтахтасум, учителиг та е̄мтсум. Амти Хо̄сло̄х па̄влумн та те̄тве̄сум. Школат амттем рӯпитасум, тит класс туп о̄лыс – 15 ня̄врам. Яныгнув ня̄врамыт Сӯкыръя школан тотыглаве̄сыт. Амттем школат рӯпитаӈкве та̄рвитыӈ о̄лыс: ня̄враманум рущ ла̄тыӈ щар ат ва̄гыт, ма̄ньщи ла̄тӈыл ханищтан нэ̄пак а̄тим. Уроканум ма̄ньщи ла̄тӈыл толмащлыянум, тащир та рӯпитасум. Ня̄враманум э̄ргуӈкве сака тахсыт, рущ э̄ргыт та э̄рге̄в. Та̄н акваг та̄кыщ ро̄ӈхим та э̄рге̄гыт: «Есть на Севере хороший городок, там моя подруженька живет. . . ». 1949 та̄лт э̄лаль ханищтахтуӈкве та минасум Ленинград ӯсн. Ам номсэ̄гум, Ленинград мощ тотнув о̄лы, Ханты-Мансийск тапа̄лт. Ӯст лё̄х олныл майве̄сум. Паспорт ат о̄щсум, колхозт нэ̄мхотьютув ат о̄ньщас, нэ̄пакыл майве̄сум. Ӯсн ёхтысум, ла̄ве̄гыт, Коля Садомин наӈ ётын Ленинградн мины. Тав тот подготовительный отделеният ханищтахтуӈкве паты. Яты, ща̄гтсум, кит хо̄тпал та миныме̄н. Ӯст на̄иӈха̄пын та̄лттуве̄сме̄н. На̄иӈха̄п сака ла̄щлакв мины, на̄йванэ витыӈыт, ха̄пкайӣв на̄йивыт, кӯре лю̄льсаӈ па̄лтыглаве. Ла̄щлакв та тотаве̄в, такос миныме̄н, ва̄гта̄л патсуме̄н. Тӯплӯсын (Тобольскын) ёхтысаме̄н. Рынкат са̄всыр тэ̄нут тыналаве, выгыр ут ёвтсуме̄н, ла̄виме̄н, ты ул яблока. То̄вмасаслум, насати ка̄миньта, я̄ӈк супыл о̄лсум, ма̄глум ла̄ппе̄рыглавес. Насати – ты помидор. Тав о̄с вуйлас, э̄л та вущкасасанаме̄н. Тувыл Тӯплӯст грузовой машинан та̄лттуве̄сме̄н, ма̄хум па̄рт тармыл ӯнлэ̄гыт, ме̄н о̄с аквтох ӯнттуве̄сме̄н. Тюмень мус та тотвесаме̄н. Тот ос на̄иӈтуйтн та та̄лттуве̄сме̄н. На̄иӈтуйт Ленинград мус та минас. Тот Государственный университетн ликмысум, филологический факультетн патсум, финноугроведение кафедран. Колям ос Герцен институтт подготовительный отделеният ханищтахтуӈкве патыс. Университетт профессор Д. В. Бубрих рӯпитас, сака номтыӈ, хо̄тпа нупыл суснэ хурип о̄йка о̄лыс. Са̄в номтыл хӯлтвесӯв, майвесӯв. Преподавателянув номтыӈыт, нёмса ма̄хум о̄лсыт, ма̄нав са̄литасаныл, ва̄саныл: ма̄н савалым яныгмасув, хо̄нт порат пуссын рӯпитасӯв, сыманув э̄тгала̄лве̄сыт, алпиянув по̄лигла̄лве̄сыт. 1954 та̄лт университет та а̄стласум, дипломумт хансым о̄лы: «Квалификация – финноугровед, специальность – мансийский язык». Студентыг о̄лмум порат А. Н. Баландинын ма̄ньщи ня̄врамыт ма̄гсыл «Букварь» хансуӈкве нё̄тсум, учебникыт хассӯв. Университет а̄стламум юипа̄лт аспирантуран хуйтве̄сум, тот та ханищтахтуӈкве патсум. Ма̄н, аспирантыт, а̄лпыл 9 щё̄ст библиотекан минэ̄в, э̄типа̄ла 9-10 щё̄с мус тот та ловиньтэ̄в, хансэ̄в: диссертация хансуӈкве ханищтахтэ̄в, повырматнэ̄г та рӯпитэ̄в – пуссын ма̄н аквхурипат. Аспирантурат хӯрум та̄л ханищтахтасӯв, а̄стысӯв, хотталь ла̄кква та мингаласӯв. Ам Институт языкознания АН СССР Ленинградский отделеният рӯпитаӈкве ла̄вве̄сум. Тот сектор «Народов Севера» о̄лыс, яныг ма̄хум тот рӯпитасыт, са̄всыр Лӯи ма̄хум ла̄тӈыт ма̄гыс нэ̄пакыт хассыт: П. Я. Скорик – чукча ма̄хум ма̄гыс хансыс, А. М. Меновщиков – эскимос ма̄хум ма̄гсыл, Н. М. Терещенко – ё̄рныт ма̄гыс хансыс, О. А. Константинова – эвенкыт ма̄гыс хансыс, А. Н. Жукова – нивхыт ма̄гсыл хансыс. . . Та̄н ётаныл рӯпитаӈкве сака ёмас о̄лыс. Наталья Митрофановна Терещенко ёт ме̄н акваг финноугорский конференциятын яланта̄лсуме̄н. Тав сака номтыӈ, нёмса э̄ква о̄лыс. Ты ёмас нэ̄кве ам нэ̄мхуньт ат ёрувлылум. Тот ам акваг наука тармыл рӯпитаӈкве патсум: о̄выл щёс ущ та научный грамматикаг хассум – «Мансийский (вогульский) язык» (1973 та̄лт); «Синтаксис мансийского (вогульского) языка» (1979 та̄лт). 1984 та̄лт педучилищатыт ханищтахтан ма̄хум ма̄гыс «Мансийский язык» нэ̄пак хассум. Евдокия Ивановна о̄лнэтэ нот палытыл школа ма̄гсыл нэ̄пакыт хансыс, словарит хансыс. Кит научный грамматика коныпал высший школат ханищтахтан студентыт ма̄гсыл кит грамматика хансыс. Фольклор о̄вылтыт «Героический эпос манси» (На̄йО̄тыр ка̄стын э̄ргыт) ос «Медвежьи эпические песни» (Ӯй э̄ргыт) хансыс. 1994 та̄лт тав «Заслуженный работник образования Ханты-Мансийского автономного округа» намыл майвес, 2003 та̄лт «Почетный гражданин Ханты-Мансийского автономного округа» намыл ос мо̄т са̄всыр намытыл ос ме̄талитыл майвес. Евдокия Ивановна ань тыхо̄тал мус рӯпиты, ма̄ньлат а̄гипыгытн нё̄ты. Ма̄н, ма̄ньщи газета ва̄рнэ хо̄тпат, таве акваг китапа̄лылӯв, хащтал ла̄тӈыт урыл таве̄ныл пӯмщалахтэ̄в. Евдокия Ивановнан нё̄таве̄в, ла̄тӈыт ёмащакв хансуӈкве хӯлтаве̄в. «Луима сэ̄рипос» ка̄сыӈ газета тав ӯритэ, ловиньтытэ. Ма̄н Евдокия Ивановна намхо̄талэ̄тыл янытлылӯв! Са̄в ёмас сымыӈ ла̄тыӈ таве̄н ла̄ве̄в! На̄й-О̄тыранэ̄н вос ӯргалаве, пус ка̄т, пус ла̄гыл вос о̄лы!

1122 2016. 04. 21. Людмила ТЕТКИНА

Та̄н потрыт, стихыт хассыт Ты та̄л о̄вылтахтан порат ма̄н редакцияв ос «Югра лылые̄п» нампа организация ня̄врамыт ма̄гсыл «Ими гордится Югра» нампа касыл ва̄рыгласы̄г. Тамле ва̄рмаль ма̄н округув 85 та̄лэ то̄влум кастыл ос ня̄врамыт янытлан та̄л кастыл щё̄пита̄лыгласлӯв. А̄гирищитпыгрищит та̄нки потраныл ос стиханыл ма̄ньщи ла̄тӈыл хӯрум номинация щирыл «Гордость нашей семьи», «Люди труда» ос «На благо Югры» хассаныл. Хӯрум э̄тпос сыс ма̄н редакциявн 21 ня̄врам рӯпатаныл ке̄тсыт. Ха̄льӯс район Ня̄хщамво̄ль, Кульпас, Кимкъясӯй па̄влытт, Октябрьский район Лӯиня̄рихумит па̄вылт, Кондинский район Шугур па̄вылт ос Ханты-Мансийск ӯст о̄лнэ а̄гирищитпыгрищит потрыт, стихыт хассыт. Ты э̄тпос о̄вылтахтам порат жюрихо̄тпат ня̄врамыт рӯпатаныл ловиньтасаныл ос но̄хпатум а̄гирищит ос пыгрищит пе̄риясыт. Жюрихо̄тпаг Светлана Селивёрстовна Динисламова ос Мария Тихоновна Двинянинова о̄лсы̄г. Ма̄ньщи нэ̄г сас стихыт ос потрыт хансэ̄г. Тыи ма̄гсыл тэ̄н ня̄врамыт рӯпатаныл ловиньтасы̄г. 7-10 та̄л яныт ня̄врамыт халт о̄выл места Роман Гындышев вис. Тав Ха̄льӯс район Кульпас па̄вылт о̄лы, о̄выл классын яланты. Пыгрищ «Я̄тил ане̄квам» нампа потыр хансыс. Китыт местал Оля Рагузова майвес. А̄гирищ ос Ня̄хщамво̄ль па̄вылт о̄лы, нилыт классыт ханищтахты, потре ащо̄йкатэ ос ане̄кватэ урыл о̄лыс. Кирилл Богордаев хӯрмит места вис. Тав Кондинский район Шугур па̄вылт о̄лы, о̄выл классын яланты. Кирилл такви а̄тятэ урыл хансыс. А̄тятэ на̄й харыгтан хумыг са̄в та̄л рӯпиты. 11-15 та̄л яныт ня̄врамыт халт о̄выл места Вероника Змановская майвес. Ня̄хщамво̄ль па̄вылт о̄лнэ аги нёлолов классыт ханищтахты. Тав Владимир Игошев, ка̄тыл хурит по̄слам хум, урыл потыр хансыс. Китыт местал кит ня̄врам майвесы̄г: Саша Слугин ос Света Побокина. Саша Ханты-Мансийск ӯст хо̄тыт классын яланты. Света Ня̄хщамво̄ль па̄вылт о̄лы, хо̄тыт классыт ханищтахты. Тав а̄кань урыл потыр ке̄тыс. Виктория Рядькина «Ка̄тикве» нампа стих ма̄гсыл ос Ярослав Вынгилев «Рахтынья община урыл» стих ма̄гсыл хӯрмит места висы̄г. Виктория Ня̄хщамво̄ль па̄вылт атыт классыт ханищтахты. Ярослав Кимкьясуй па̄вылт о̄лы, нилыт классын яланты. Яныг ня̄врамыт халт о̄выл места Катя Мерова вис. Ма̄ньщи а̄ги Ханты-Мансийск ӯст колледжит ханищтахты. Такви Саранпа̄вылныл о̄лы. Катя ане̄квате урыл потыр хансыс. Китыт местат Лена Карпенко. А̄ги а̄щойкатэ урыл потыр ке̄тыс. Тав Октябрьский район Лӯиня̄рихумит па̄вылт о̄лы, лов классыт ханищтахты. Хӯрмит местал Маша Пакина майвес. Кульпас па̄вылт о̄лнэ а̄ги такви рӯтанэ урыл хансыс. Маша аквхуйплов классыт ханищтахты. Ма̄н, редакцият рӯпитан ма̄хум, ня̄врамыт пуссын янытлыянӯв ос потраныл ма̄гсыл яныг пӯмащапа ла̄тыӈ ла̄ве̄в. Ты потрыт ос стихыт ма̄н «Лӯима сэ̄рипос» ма̄ньщи газетат тах пуссын ва̄риянӯв. Ка̄сыӈ ня̄врам такви потре газетавт ловиньтаӈкве тах ве̄рмитэ.

1122 2016. 04. 21. Александр ВЬЮТКИН

Тӯя тотнэ товлыӈ ӯй янытлавес Ханты-Мансийск ӯст о̄лнэ «То̄рум Маа» музей кант Ӯринэ̄ква хо̄тал яныгпо̄ль э̄тпос са̄тыт хо̄талт янытлавес. Ӯринэ̄ква янытлан хо̄талт са̄в ня̄врам ёхталас. Ха̄ӈхылтап хосыт но̄хха̄хнэ ма̄т ня̄врамыт ма̄нь атыӈ мӯйлупсатыл мӯйлуптаве̄сыт. Нумын ос та̄н ётаныл са̄всыр касылыт ос пӯмащ ёнгыт ва̄рыглаве̄сыт. Ёнгын халт тит ла̄глыл акв торыг сун ӯлтта поргысыт, тыньщаӈ пе̄нтсыл сома лю̄льнэ сув нумпа̄лын тыпйӣв нирныл хӯтылтым ла̄кв па̄хвтысыт. Мо̄тананыл ха̄льйӣв товытыл, пӯмыл ӯринэ̄ква ма̄гсыл питит сагсыт. Ня̄врамыт ва̄рум питияныл ка̄сыӈ е̄мт хорамыӈнувег тэ̄лэ̄гыт. Щар ма̄к пӯмащиг а̄мпыӈ суныл яласан ва̄рмаль о̄лыс. А̄мпаныл хаски, лайка, маламут нампа породаг о̄лсыт. А̄мпыт ёт ня̄врамыт ёнгысыт, по̄слахтасыт. Хаски ос маламут породаӈ а̄мпыт хо̄тпа ляльт щар ат пурхатэ̄гыт. Яныгпа̄ла соссаӈ ма̄хум ӯра по̄хат э̄лаль о̄лнэ ёмас хо̄талыт ма̄гсыл пӯрлахтасыт. Ты та̄л «То̄рум Маа» музей кант тох ты Ӯринэ̄ква хо̄талув янытлавес. Самын патум ня̄врамаквет пуста̄гыл, со̄тыӈыщ, щуниӈыщ вос яныгме̄гыт.

1122 2016. 04. 21. Александр ВЬЮТКИН

Аквторыг нила намхо̄тал Яныгпо̄ль э̄тпос котиль хо̄таланэ̄т Ханты-Мансийск ӯст о̄лнэ нила музей колыт намхо̄таланыл янытлаве̄сыт. Ка̄тыл по̄слым хурит о̄щнэ Государственный музей кол ат та̄лэ то̄влыс. Тувыл В. А. Игошев намыл пиным музей кол атхойплов та̄лэ то̄влыс. Пӯмащ хурит ка̄тыл по̄слын о̄йка Г. С. Райшев ма̄щтырлан колэ хус та̄лэ то̄влыс. Нилыт янытлан кол рущ ла̄тӈыл ла̄ваве – «Коллекция русского искусства», тот ос ка̄тыл по̄слым хурит суссылтавет, тав ос хус та̄л рӯпиты. Ты намхо̄талыт янытлан кастыл суссылтапаныл «5-15-20» намтсаныл. Ань та̄л сыс ка̄сыӈ музейт са̄всыр суссылтапыт тах ва̄рыглавет. Ты суссылтапаныл ка̄тыл по̄слуӈкв ханищтахтын ма̄ньлат ма̄хум ос нас пӯмщалахтын ос ты тэ̄ла э̄руптан ма̄хум тув ёхтала̄сыт. Мӯй хо̄тпат хурит сунсыгламаныл порат ма̄ янытыл мирн ва̄нэ ма̄хум хансум стихыт ловиньтаве̄сыт. Янге, ма̄не пуссын ла̄щлакв ӯнлысыт, хӯньтлысыт. Суссылтап пӯнсым юипа̄лт ма̄хум та̄нтина̄нылн маныр пӯмащ, таи та сунсыгласыт.

1122 2016. 04. 21. Александр ВЬЮТКИН

Па̄влыӈ ма̄т Ӯринэ̄ква хо̄тал янытлавес Ха̄льӯс район Сӯкыръя па̄выл котильт Яныгпо̄ль э̄тпос са̄тыт хо̄талэ̄т товлыӈ ӯй янытлан хо̄тал ва̄рыглавес. Ӯринэ̄ква хо̄талт а̄лпыл тулыӈ о̄лыс, ма̄нь тӯйтсамыл паргыс. Суссылтапаныл о̄вылтан э̄лыпа̄лт Саранпа̄выл культура колт рӯпитан ма̄ньлат хум Максим Анямов са̄ӈквылтапыл са̄ӈквылтаӈкв та о̄вылтахтас. Тащирыл тав Сӯкыръя ма̄хум па̄выл котильн атсанэ. Тав хо̄талув тул халныл са̄ӈквылтап суйил та нэ̄гылттастэ. Титхойплов щё̄с порат суссылтапаныл ты о̄вылтасаныл. Мир нупыл сценаныл тит ма̄ньщи нэ̄г Вера Комкова ос Галина Ларионова потыртасы̄г. Тэ̄н о̄влэ̄т пе̄с порат ты ялпыӈ хо̄тал хумус янытлавес, та урыл потыртасы̄г. Тувыл ня̄врамыт ёт щё̄питам концертаныл суссылтасыт. Са̄ртын «Оленёнок» нампа садикн ялантан ня̄врамыт Ӯринэ̄ква урыл ма̄ньщи ла̄тӈыл э̄ргысыт ос стихыт ловиньтасыт. Та̄н ётаныл рӯпитан ос ма̄ньщи ла̄тӈыл ханищтан нэ̄ Ольга Владимировна Лелятова о̄лыс. Та юипа̄лт Саранпа̄вылт ос Сӯкыръят та̄л сыс самын патум ма̄ньщи ня̄врамыт ма̄нь мӯйлупсал мӯйлуптаве̄сыт. «Поиск» нампа колн ялантан ня̄врамыт тит ма̄ньщи йӣкв йӣквсыт. Та̄наныл ханищтым Анастасия Албина рӯпиты. Тувыл «Э̄ргын сым» нэ̄квет ма̄ньщи поэтув Юван Шесталов хансум стихе щирыл «Ща̄й, ща̄й» нампа э̄рыг э̄ргысыт. Щар юио̄влыт «Са̄лы лё̄ӈх» ня̄врамыт йӣквсыт ос э̄ргысыт. Ёхталам мӯй ма̄хмыт щар ма̄нь пыгрищн ка̄тпатта сака хоса ра̄тсыт. Та пӯмащ пыгрищ наме Коля Гоголев. Концерт суссылтым юипа̄лт мӯйлын мир ма̄гсыл са̄всыр касылыт ва̄рыглаве̄сыт. Халанылт кассыт – ёсал ха̄йтсыт, тит ла̄глыл аквторыг хӯрум щёс э̄лаль поргысыт ос ка̄сащан ма̄хум аквъёт ха̄йтсыт. Ма̄хум нэ̄мхотьют по̄хат ат хультыс. Каснэ ма̄хум ёт Андрей Филиппов, Владислав Хатанзеев ос Владимир Кустышев рӯпитасыт. Ёсал каснэ порат щар янгыг Василий Васильевич Канев о̄лыс. Тав онтырса̄т нупыл нила та̄лэ то̄влыс. Нэ̄пак ловиньтан колт кӯщаиг о̄лнэ нэ̄ Галина ЛАРИОНОВА те̄тум потре ма̄ньщи ла̄тӈыл Александр ВЬЮТКИН хансыстэ.

1122 2016. 04. 21. Александр ВЬЮТКИН

Ӯс котильт ва̄рыглым ялпыӈ хо̄тал Ты э̄тпос лов хо̄талт Югорск ӯс котильт ёнгын ос йӣквнэ кан ва̄рыглавес, соссаӈ ма̄хманув Ӯринэ̄ква хо̄тал янытласыт. Ты э̄лыпа̄л та̄лт Ӯринэ̄ква хо̄тал аквписыг Югорск ӯс по̄хат о̄лнэ «Сӯйва̄т па̄выл» нампа музейт ва̄рыглавес. Ты тӯяг о̄с кос тот ва̄руӈкв тахсыт, мощнув ат а̄ртмыс «Сӯйва̄т па̄выл» музей кант ва̄рыглан ма̄наныл тыкос ёмщаквег щё̄питыгласаныл, тэ̄лы сыс патыглан тӯйтаныл ла̄кква туйсаныл. Э̄тпос о̄вылтахтам аквписыг ма̄лтыпыг, хо̄талыӈ хо̄талыг о̄лсыт. Таима̄гсыл «Сӯйва̄т па̄выл» канэ тӯйт витыл лапа̄маравес. Та пе̄нтсыл ты Ӯринэ̄ква янытлан хо̄тал ӯс котильн ты ва̄нтлуптавес. Пе̄с ма̄ньщит ла̄выгласыт, Ӯринэ̄ква таквсы мо̄ртым ма̄н миннэ̄тэ э̄лыпа̄лт ла̄ви: «Тӯяг ам ёхтынэм кастыл а̄гиӈпыгыӈ са̄в а̄па вос нёвитаве, ам э̄лы ма̄ныл тыг ёхтынэм порат сака ва̄гтал патэ̄гум, по̄лявем, са̄п анят ощща ла̄гылрищагум толтыглыягум». Ты ёмас ла̄тӈанэ ла̄внэ̄тэ ма̄гсыл Ӯринэ̄ква ты янытлаве. Тот о̄лнэ ма̄ньщи ма̄хманув акв палатка тӯщтым о̄щсыт. Та̄н палтаныл ёхталам ма̄хум атыӈ тэ̄нутыл, па̄йтым щёпыр исмитыл, нё̄влил, со̄ламатыл, са̄всыр пилыл ос та̄нти щаритам ка̄миньт ня̄нил тыттысаныл. Ты пуссын Югорск ӯст о̄лнэ соссаӈ мир ёт рупитан «Югра лылыеп» нампа колыӈ ма̄хум щё̄пита̄лсыт. Та кол тармыл кӯщаиг ма̄ньщи нэ̄ Альбина Петровна Багаева о̄лы. Концертаныл пӯмащиг о̄лыс. Са̄в ма̄ньщи суссылтап такталавес. «Пищпищ» нампа пе̄с ма̄ньщи мо̄йт ня̄врамытын суссылтавес. Ялпыӈ хо̄талн ёхталам мир пуссын ёмас номтыл ла̄ккваминыгласыт. Ка̄сащан хо̄тпат ма̄гсыл каснэ ма̄т щё̄пита̄лве̄сыт. Та̄ксарнувег о̄лнэ ма̄ньлат а̄гитпыгыт сун ӯлтта поргысыт. Ма̄ньнув ня̄врамыт оc сома тӯщтым йӣв нумпа̄лн те̄р ла̄кв па̄хвтысыт, нэ̄мхотьют ва̄гтaлыг ат о̄лыс. Каснэ юипа̄лт ня̄врамыт аквта ма̄т ма̄нь мӯйлупсал мӯйлуптаве̄сыт. Хотьют хумус ве̄рмыс ос ха̄сыс, тох та касыс. Щар э̄лыл Екатеринбург ӯсныл «ХурАл» нампа ма̄ньщи ос ханты ла̄тӈыл э̄ргын мӯй ма̄хум ёхталасыт. Та̄нанылн Югорск ӯст ва̄рыглым ялпыӈ хо̄тал сака мӯстыс.

1122 2016. 04. 21. Людмила ТЕТКИНА

Ня̄врамыт А̄с-угорский институтн ёхталасыт Ты та̄л ма̄н округувт ня̄врамыт янытлан та̄лыг намаявес. Ты кастыл Югра янытыл са̄всыр суссылтапыт, ялпыӈ хо̄талыт, касылыт, ханищтапыт акваг ва̄рыглавет. А̄с-угорский институтт рӯпитан ма̄хум ня̄врамыт ма̄гсыл о̄с са̄в рӯпата ва̄ре̄гыт. Ты э̄лыпа̄лт та̄н наука щирыл рӯпитасыт, ань школат ма̄гсыл ханищтахтын нэ̄пакыт хансэ̄гыт ос са̄всыр мо̄йтыт, а̄мщит акванатыяныл ос нэ̄пакыг ва̄рияныл. Яныгпо̄ль э̄тпос китыт хо̄талэ̄т Ханты-Мансийск ӯст хо̄тыт школат о̄выл классыт ханищтахтын ня̄врамыт А̄с-угорский институтн ёхталасыт. Тот рӯпитан хо̄тпат та̄нанылн потыртасыт, манхурип пӯмащ нэ̄пакыт ня̄врамыт ма̄гсыл ань хансэ̄гыт. Светлана Динисламова, ма̄ньщи нэ̄, «Во̄рхум па̄вылт» нампа нэ̄паке урыл ла̄тыӈ ла̄выс. Ты нэ̄пакн тав ма̄ньщи мо̄йт хансыс ос Наталья Жеманская са̄всыр нё̄тнэ ос пӯмащ хурит по̄слыс. Ты нэ̄ А̄с-угорский институтт ка̄тыл хурит по̄слым рӯпиты. Светлана Селивёрстовна хурит суссылтасанэ ос мо̄йт урыл потыртас. Ма̄ньщи мо̄йт са̄внув ня̄врам ловиньтаӈкве вос ве̄рмысыт, рущ ос английский ла̄тӈыг хасвес. Нэ̄паке ты этпост Тюмень ӯст тах та̄ратаве. Людмила Панченко «Ма̄таприщ» ма̄ньщи мо̄йт ловиньтас ос тот ка̄тыл по̄слым хурит суссылтасанэ. Ня̄врамыт таве такем ёмащакв хӯнтлысыт. Ты нэ̄пак о̄с А̄с-угорский институтыт рӯпитан хо̄тпат щё̄питасыт ос та̄ратасыт. Ань тот рӯпитан ма̄хум ня̄врамыт ма̄гсыл кина по̄слэ̄гыт. Акв тамле ва̄рим кина ня̄врамыт о̄с суссыт. Аквта хо̄талт А̄с-угорский инстутытт «День детской книги» нампа суссылтап ва̄рыглавес. Тот ма̄ньщи, ханты ос ё̄рн хо̄тпат а̄гирищитпыгрищит ма̄гсыл хансум нэ̄паканыл суссылтаве̄сыт. Юв миннэ э̄лыпа̄лыт ня̄врамыт пуссын мӯйлупсал мӯйлуптаве̄сыт.

1123 2016. 05. 12. Тамара МЕРОВА

Лӯима̄т о̄лнэ мир со̄тыӈыг вос о̄лэ̄гыт Государственный Думат рўпитан депутат Вячеслав Николаевич Тетёкин Ханты-Мансийскан ёхталас ос ля̄ххал тотнэ хо̄тпат ёт хо̄нтхатыглас. Тав КПРФ партиян Тюменский область па̄лыл пе̄риим о̄лы, таима̄гыс то̄ванакт Ямалт ос Юграт о̄лнэ ма̄хум ёт ва̄щиньтахты ос са̄кконын щё̄питан тэ̄лат урыл потырты. Депутат ла̄вме щирыл, лӯима̄ ма̄хум ёмас ос со̄тыӈыг вос о̄лэ̄гыт, нэ̄мат та̄рвит ул вос о̄ньще̄гыт. Тыи та̄н щёлыӈ ма̄наныл хосыт ос тот рӯпитанэ̄ныл ма̄гыс Россияв э̄лаль наксыпта̄лыг о̄лы. Лӯимат рӯпитан ма̄хум сэ̄лнэ олн ло̄мтаныл ос са̄всыр нё̄тмиланыл хот ул вос няртумтавет, Вячеслав Николаевич таима̄гыс воритоты. Ань нё̄тмилтэ̄лат хотвивет ке, са̄выӈпа̄лэ рӯпитан ма̄хум тыгыл сысы миныглэ̄гыт. Тувыл э̄рнэ специалистаг ханищтахтам ма̄ньлат хо̄тпат тыг о̄луӈкве вос ёхтэ̄гыт, та̄н лӯимат сэ̄лнэ олныл та̄ра ойтуӈкве вос патнувет. О̄йка кол ӯнттын тэ̄лат урыл о̄с потыртас. Тыт ма̄во̄й хо̄нтым порат, ва̄им, са̄в ма̄ныл ма̄хум ёхтысыт. Та̄н пуссын кол та̄л о̄лсыт ос та̄н ма̄гсыланыл балокыт тотве̄сыт ос са̄в норколыт ӯнттуве̄сыт. Ань та̄н пуссын пе̄сыг е̄мтсыт ос ань кол ӯнттын ма̄гыс са̄в олн э̄ри. Округын та̄стым олнытыл ат то̄влавет, ты тэ̄лат федеральный программан акваннё̄тхатым ва̄руӈкве э̄ре̄гыт. Предпринимательство тэ̄лат номтыӈыщ э̄лаль вос ва̄равет, тыт аквтох овощит янмалаӈкве ро̄ви, ма̄хум тэ̄пкатн та̄нки янмалтан тэ̄нутыл о̄луӈкве ве̄рме̄гыт. Са̄ртын тыт са̄в колхозыт о̄лсыт, ос ма̄хум мисыт, лувыт о̄щсыт. «Тувыл соссаӈ ма̄хум о̄лупсаныл ӯргалан ва̄рмаль урыл ёрувлаӈкве щар ат э̄ри. Та̄н тыт пе̄с йис наканыл э̄лаль тотым, ма̄вит ӯргалым хосат та̄гыл тыт о̄лэ̄гыт. Юграт, Ямалт о̄лнэ ос рӯпитан ма̄хум о̄лупсаныл пуссын ёмасыг, сэ̄ръёрыг вос о̄лы ос са̄кконытн та̄рвит тэ̄ланыл ӯргалаӈкве вос ве̄рмавет. Ма̄н партияв па̄лыл рӯпатаныл ма̄гыс сэ̄лнэ олныт, кол минэ ва̄рмаляныл ма̄гыс э̄лаль тотнэ ла̄тыӈ акваг ва̄ре̄в, туп та̄н мо̄т депутатытн э̄лаль вос пирмайтанувет», – Вячеслав Тетёкин ла̄выс.

1123 2016. 05. 12. Александр ВЬЮТКИН

Пыгыт армиян винэ ва̄рмаль ты о̄вылтавес Яныгпо̄ль э̄тпос онтоловхойплов хо̄талт округ военный комиссарыг о̄лнэ хум Юрий Буров ля̄ххалыт потыртас. Лусытан ма̄ньлат ма̄хум та̄н оманыл халт председателиг о̄лнэ нэ̄ Нина Колосенко тав ётэ ёхталас. Потрув ты тӯя армиян винэ ма̄ньлат пыгыт урыл о̄лыс. О̄влэ̄т Юрий Михайлович лусытан ма̄н винэ ма̄ньла̄т ма̄хум урыл ла̄выс: «Ты таквс округ янытыл акв со̄тыра ниласа̄т ма̄ньлат хо̄тпа лусытаӈкв виӈкв номсавет. Ты тӯя хо̄тса̄т со̄тыра хо̄тпа ле̄ккарытын уральтаӈкв э̄ри. Лусытан ма̄н миннэ щирыл щё̄питахтын ня̄врамыт округув янытыл ва̄т нупыл тит ма̄т ле̄ккарытын уральтавет. Ты пыгытыл та̄ксар хо̄тпат пе̄риявет ос лусытаӈкв вивет. Ма̄навн маныр ва̄руӈкв э̄рыс пуссын ва̄рсӯв. Ущты армиян винэ ма̄хум о̄лнэ коланыл ёмщаквег щё̄питым о̄лэ̄гыт. Тув ёхтын пыгыт та̄ра щё̄с щирыл о̄луӈкв ханищтавет. Нэ̄матыр лю̄ль ул вос е̄мты, э̄тэхо̄талэ видеокамерат рӯпитэ̄гыт». Нина Николаевна такви ва̄рнэ тэ̄латэ урыл мощ о̄с потыртас. Тав ла̄выс: «Армиян винэ ма̄хум ёт акваннё̄тхатым аквписыг рӯпитэ̄в. Са̄всыр щирыл о̄лыглы. То̄ва порат лусытан ня̄врам телефон хосыт хосанув юв ат свониты, ма̄н та̄ра тав кӯщаянэ̄н титыглан ла̄тыӈ те̄тэ̄в. Мощ мо̄лалнув ре̄тыӈ ю̄свой э̄тпост Урай ӯсныл Хабаровск ӯст лусытан ня̄врамыт ёт телевизор хосыт акв ляльт потыртан ищхӣпыӈ конференция о̄лыс. Лусытан ма̄ньлат ма̄хум номтаныл ёмас, таи ма̄гыс ма̄навн сака мӯсты».

1123 2016. 05. 12. Валентина УЗЕЛЬ

А̄гит лусытаӈкв о̄с ка̄саще̄гыт Ань яныгман ня̄врамыт о̄лнэ ма̄в янытлаӈкве янгыщ школат ханищтавет. Ос ма̄к ты урыл та̄н Победа хо̄тал э̄лыпа̄лт потыртавет. Ты ёмас тэ̄ла ва̄рнэ ма̄гыс са̄всыр ма̄хум школатн во̄виньта̄лавет, та̄н ня̄врамыт ёт ты урыл вос потыртэ̄гыт. Ты ёмас тэ̄ла общественный ос внешний связь округ департамент колт рӯпитан хо̄тпат та̄н ва̄рыглэ̄гыт. Ювле хультум э̄тпост ты рӯпата ва̄рнэ са̄всыр кӯщай ма̄хум акванатыглаве̄сыт. Пуссын аквъёт хусахтем хо̄тпа тув ёхталас. Ка̄сыӈ хо̄тпа потыртас, та̄н маныр рӯпата ва̄ре̄гыт – ня̄врамыт та̄нти о̄лнэ ма̄наныл вос янытлыяныл, вос вуянтыяныл. Ӯсыӈ ос па̄влыӈ ма̄т «центрыг» ла̄внэ ханищтахтын колыт рӯпитэ̄гыт, та̄н ня̄врамыт патриотизм ва̄рмальн ханищтыяныл. «Центр военнопатриотического воспитания и подготовки граждан к военной службе» нампа кол кӯщаиг Игорь Иванович Есин о̄лы, тав ань ла̄выс, ка̄сыӈ хо̄тал та̄н палтаныл са̄в ня̄врам ёхталы, пыгрищит лусытан ма̄н миннэ̄ныл ма̄гсыл та̄н тот ёмащакв ханищтавет, луванылнё̄вляныл та̄кмалтавет. Та̄л сыс та̄н са̄всыр мо̄т рӯпата о̄с ва̄ре̄гыт, ка̄сыӈ хо̄тал «Россия гимн» нампа э̄ргыл рӯпатаныл о̄вылтыяныл. Пыгрищит та̄н палтаныл ялантаӈкв сака ка̄саще̄гыт. Мо̄тыт та̄л тув акваг ялантан пыгыт воинский частитн тотыглаӈкв тах патыяныл. Ань туи порат о̄выл щёс Елань нампа лусытан ма̄н Урай ӯст о̄лнэ пыгрищит тотыглавет. Та̄н са̄всыр касылыт акваг но̄хпатэ̄гыт, о̄выл местат выгыт. Ка̄сыӈ та̄л пыгыт са̄всыр ма̄н тотыглаӈкв патавет. Военный комиссариат колт отделение рӯпиты. Та ма̄хум пыгыт лусытаӈкв ханищтыяныл, тувыл та̄н ты ла̄ве̄гыт – хоты военный частин та̄наныл те̄туӈкв э̄ри. Кӯщаиг тот Александр Николаевич Попов о̄лы, тав ла̄выс, ань а̄гит лусытаӈкв о̄с сака таӈхе̄гыт. Ювле хультум 2015 та̄лт ма̄н округувныл 250 а̄гит военный училищат ханищтахтуӈкв патсыт.

1123 2016. 05. 12. Людмила ТЕТКИНА

Яныг витыг э̄рыӈ е̄мты Та э̄тпос оигпам ляпат ля̄ххал тотнэ ма̄хум ёт Александр Тиртока хо̄нтхатыглас. Тав ма̄н округувт МЧС яныг кӯщаиг о̄лы. Югра янытыл хоты ма̄т яныг вит е̄мты, та урыл потыртас. Кӯщай хум ла̄выс, я̄ӈк на̄тнэ э̄тпост 44 па̄вылт мус яныг вит ёхтуӈкве ве̄рми. Тувыл лӯпта э̄тпост то̄ва па̄вылт а̄мараӈкве ве̄рмавет. Таи лю̄ль, ты па̄влыт мус яласан лё̄ӈх а̄тим. Александр Тиртока ла̄выс, Алтай ма̄т нё̄рт са̄в тӯйт толы ос ты пора сыс манаса̄вит ракви, та̄н ат ва̄гыт, тыи ма̄гсыл лӯпта э̄тпос яныг вит е̄мты манос а̄ти, ань ла̄вуӈкве ат ве̄рме̄гыт. Хоты ще̄мьят колоныл мус яныг вит ёхты, та̄н ве̄рме̄гыт мо̄т колн ва̄нтлуӈкв, рущ ла̄тӈыл ты колыт «пункты временного размещения» ла̄вавет. Мо̄лтыт та̄л Нижневартовский районт са̄в ще̄мьят о̄лнэ коланыл витн а̄мараве̄сыт. То̄нт 160 э̄лумхо̄лас мо̄т ма̄н ва̄нтлуптаве̄сыт. Ты ма̄хум коланыл щар лю̄лиг е̄мтыс, нэ̄матарыг ат хо̄йхатэ̄гыт, таима̄гсыл та̄н йильпи колыл майве̄сыт. Ты та̄л Нижневартовск ос Сургут ӯсыгт я̄ ва̄тат о̄лнэ ще̄мьят мо̄т ма̄н о̄луӈкве ва̄нтлэ̄гыт, та̄н о̄лнэ коланыл мус вит ёхтуӈкве ве̄рми.

1123 2016. 05. 12. Светлана РОМБАНДЕЕВА

Ӯс ма̄хум Победа хо̄талт мӯйлысыт Я̄ӈк на̄тнэ э̄тпос 9 хо̄талэ Победа хо̄талыг ла̄ваве. Ма̄н ма̄в янытыл мир 71 та̄л ты мӯйлысыт, яныг хо̄нтыт патум хо̄тпанув номылмата̄лсаныл, хо̄нтлум хо̄тпат янытласаныл. Округув янытыл ань 189 хо̄нтлум хо̄тпа лылыӈ та̄гыл о̄лэ̄гыт. Ханты-Мансийск ӯскант ма̄хум лов щё̄с порат акванатхатуӈкве патсыт. Э̄ргынйӣквнэ ма̄хум а̄лпыл па̄сыл э̄ргуӈкве о̄вылтахтасыт, концертаныл намаявес – «Звени, Победная весна! » Янгема̄не хо̄нтлум ма̄хманув хо̄тал палыт ӯлыласаныл, таса̄вит ёмас э̄рыг э̄ргысыт, потрыт ос стихотвореният ловиньтасыт. Ты та̄л Победа парад хо̄талъя̄т юипа̄лт о̄лыс. Кит щё̄с порат мир та атхатасыт. О̄влэ̄т «Девятый день ликующего мая! » нампа ма̄нь концерт охса суссылтавес, тувыл ветераныт хорамыӈ лӯптатыл майве̄сыт. Округ кӯщай Наталья Комарова тох ла̄выс: «Яныг хо̄нт о̄лме хосаг е̄мтыс. Ос тав мантем ювле хульты, ма̄н ты урыл ущпылнэ̄г са̄в номсэ̄в, ты номтув ляпат о̄ньщилӯв. Победа хо̄тал ёхтуме па̄сыл ма̄н о̄лупсав мо̄т щирыг е̄мтыс – ты ма̄н пуссын аквъёт самын патум хо̄талув. Я̄тил тыныӈ ветераныт, хо̄нт порат рӯпитам ма̄хум, ма̄н ань на̄н хосытынтыл ты о̄лэ̄в, ня̄враманув ос апыгрищанув янмалтэ̄в. Хо̄нтлум хо̄тпанув, патум хо̄тпанув та̄нти ма̄витаныл вуянтасаныл, о̄лнэ коланыл ос колта̄гланыл ма̄гыс хо̄нтлысыт. Та̄нти ма̄наныл та̄н сака э̄руптасаныл, таве мо̄т утытын миӈкве номтаныл ат патыс. Таима̄гыс та̄н щёл о̄щсыт ман а̄ти, сакватым о̄лсыт ман а̄ти, тэ̄та̄л, суппис но̄х та воратасыт, та хо̄нтлысыт. Округт о̄лнэ я̄тил мир, та пора ма̄н номим вос о̄ньщилӯв. Манах омат пыганыл тыпылтасаныл, ня̄враманыл а̄щта̄л хультсыт, манах хо̄тпа алпитэ по̄львес, сыме э̄тгалавес, мир концлагерит ос пленыт саватаве̄сыт, Ленинградыт блокада порат тэ̄та̄л марлаве̄сыт – ты пилыщмаӈ нак ма̄н нэ̄мхуньт ат ёрувлылув. Ма̄н ма̄хманув но̄хпатсыт, та̄нти ма̄наныл нэ̄мхотьютн ат мисаныл. Та̄наныл ма̄н янытлыянӯв! Округт о̄лнэ ма̄хум, на̄нан ам Победа хо̄талыл янытлыянум! » Тувыл Ханты-Мансийск ӯс кӯщай хум Василий Филипенко потыртас: «Ка̄сыӈ э̄лумхо̄лас ляпа хо̄тпатэ яныг хо̄нтыт хо̄нтлыс манос тот порслувес. Ма̄н ань та порат хо̄нтлум хо̄тпат ёт потрамаӈкве ве̄рме̄в, та̄нанылн пӯмащипа ла̄тыӈ ла̄ве̄в. Та̄н хо̄нтлуманыл юипа̄лт са̄в рӯпитасыт, хотё̄хтым колыт йильпииг ӯнттысыт. Та̄н нупланыл суснэ̄в порат номтанув татем ёмасыт, ма̄н ань та̄н хольтаныл э̄лаль о̄луӈкве таӈхе̄в, са̄в ёмас тэ̄ла ва̄ре̄в, рӯпитэ̄в. Я̄тил тыныӈ ветераныт, ань о̄лнэ̄в ма̄гыс на̄нанн ма̄н са̄в ёмас сымыӈ ла̄тыӈ ла̄ве̄в! Пуссын пуста̄гыл о̄лэ̄н, на̄нанн Победа хо̄талыл янытлыянӯв! » Яныг хо̄нтыт хо̄нтлум э̄ква Нина Панова о̄с аквкит ла̄тыӈ ла̄выс, ма̄хум Победа хо̄талыл янытласанэ. Ты юипа̄лт парад о̄вылтахтас – ва̄ӈнаныл по̄сыӈ ма̄хум (нэ̄хумит ос школат ханищтахтан на̄врамыт пуссын военный формал масхатым о̄лсыт) ӯсхулы хосыт ё̄мсыт. Та̄н юипа̄ланылт ос хо̄нт порат яласам ма̄шинат, мотоциклыт минасыт. Тувыл атхатам мир акваг тэ̄нэ на̄й (Вечный огонь) нупыл та минмыгтас. О̄влэ̄т хо̄нтлум ма̄хум та̄н ё̄мсыт. Памятник палт хорамыӈ лӯптат пинсыт. Сака са̄в хо̄тпа о̄лыс. Та̄н юипа̄ланылт всенародный патриотический акция «Бессмертный полк» ё̄мыс – хо̄нтыт патум ма̄хум хурияныл ня̄враманылн, апыгрищанылн ос апыг апыгрищанылн тотве̄сыт. Пуссын аквъёт нёлолов со̄тыра са̄виттем хо̄тпа ё̄мыс. Та̄н халанылт округ кӯщай Наталья Комарова о̄лыс, тав о̄патэ хури пувим ё̄мыс. Ты ва̄рмаль ма̄н ӯсувт китыт та̄л ты ва̄рыглавес. Округ янытыл ос 90 сотыра арыг хо̄тпа тох ё̄мыс. Ханты-Мансийск ӯскант мир хо̄тал палыт мӯйлыс. То̄ва ма̄ньлат а̄гипыгыт хо̄нтлум ма̄хум о̄ньщам маснутаныл хурип кощтюмпа̄рат ю̄нтмыт, тамле маснутыл масхатым о̄лсыт. Сусте̄мт, щар э̄рттам та пора ма̄хум халт ё̄мыгтэ̄в, та̄н ётаныл потраме̄в. Ма̄хум пӯмыщ ма̄гыс та̄н ётаныл по̄слахтасыт. Ка̄тыт пувум писаляныл хум хо̄тпатын ос ня̄врамытын маттем та пӯмщалаве̄сыт, ка̄тын виӈкве ро̄выс. Китхуйплов щё̄с порат хо̄нт ва̄рмаль суссӯв. Советский союз ма̄хум ос немцыт ань халаныт хумус хо̄нтлысыт, таи суссылтавес. Ма̄ньлат а̄гипыгыт аквнупыл писалил та па̄тлуптэ̄гыт, ёлхуигпа̄лэ̄гыт, сэ̄й хӯрыг аня са̄йн хоттӯйтхатэ̄гыт. Тувыл э̄рттам акваныл пуӈке̄т ня̄лын та хо̄йвес, а̄гин пуӈке ле̄ккар то̄рыл та пе̄рсалаве. Тувыл ма̄н ма̄хманув но̄х та патсыт. Нила ма̄т «Солдатский привал» ва̄рыглавес, ӯс ма̄хум солдатский кашал тыттуве̄сыт, исум ща̄ил айтве̄сыт. Хӯрум щё̄с порат кина ва̄рнэ колт «Милый Ханс, дорогой Петр» нампа кина суссылтавес, ты ялпыӈ хо̄тал кастыл олн ойтуӈкве ат э̄рыс. Нила щё̄с порат ос «Юграклассик» колт «Война, Победа, Жизнь. . . » нампа концерт о̄лыс. Э̄типа̄лаг «Помнит сердце, не забудет никогда! » нампа э̄ргынйӣквнэ тэ̄ла о̄вылтавес, хо̄нтлум ма̄хманув урыл э̄ргыт артистыт э̄ткотиль мус э̄ргысыт. Аквхуйплов щё̄с порат «Салют Победы! » о̄лыс – ань писаль но̄ӈхальпа̄тамты, нумын са̄всыр хорамыӈ на̄ит нэ̄глапе̄гыт, мощ султге̄гыт, тувыл хотталь та со̄йме̄гыт. Ты салют о̄лме сыс сценат лю̄люм хо̄тпат «День Победы» э̄рыг э̄ргысыт. Ӯскант сака са̄в мир о̄лыс, пуссын суйта̄л лю̄ляхо̄лсыт, салют нупыл ща̄гтым суссыт.

1123 2016. 05. 12. Александр ВЬЮТКИН

Са̄лыӈ ма̄хум ма̄гсыл щё̄питан са̄ккон Ханты-Мансийск ӯст округ Дума колт ищхӣпыӈ телевизор хосыт Россия ма̄ янытыл акв ляльт потыртан сапра̄ни о̄лыс. Тэ̄ланыл рущ ла̄тӈыл: «О государственной поддержке коренных малочисленных народов Севера, Сибири и Дальнего Востока РФ, ведущих кочевой образ жизни» ла̄ввес. Сапра̄нит акв ляльт потыртасыт – Государственный Дума депутатыт, Совет Федерацият рӯпитан ма̄хум, тувыл са̄всыр яныг кӯщаит ос ма̄н округ Дума депутатанув Татьяна Гоголева, Надежда Алексеева ос Александр Филипенко. Конференцият Россия янытыл хӯрумхойплов ма̄ныл ма̄хум аквъёт потыртасыт. Тыи Чукотский округныл, Камчатка ма̄ныл, Хабаровский крайил, Сахалинский областьныл, республика Саха (Якутияныл), Забайкальский крайил, Ямало-Ненецкий ос Ханты-Мансийский округныл, Амурский, Мурманский ос Архангельский областьныл, Саран ма̄ныл ос карелия ма̄ныл. Николай Харитонов, Государственный Думат ӯйхул о̄щнэ ос тэ̄пкант тэ̄нут янмалтан тэ̄лат щирыл рӯпитан хум, ла̄выс: «Ты урыл са̄ккон щё̄питаӈкве иӈ 2013 та̄лт патсӯв. Та па̄сныл ты хӯрумхойплов ма̄ныл о̄лнэ ма̄хум та̄нти халанылт нё̄тхатым ос потыртахтым ты йильпи са̄ккон хансуӈкв о̄вылтахтасыт. Ты тэ̄ла щирыл рӯпитан ма̄хум са̄ккон нэ̄паканыл ёмщаквег щё̄питасанӯв. Ма̄н таӈхе̄в, Россия ма̄ янытыл са̄лыт о̄щнэ соссаӈ ма̄хум нё̄тмил олнаныл ювле ул вос ӯравет. 2014 та̄лт ты ва̄рмальн бюджетныл 240 млн. солко̄ви майвес. 2015 та̄лт мощщанув олн та̄стувес, 205 млн. солко̄ви. Ты та̄лн 127 млн. солко̄ви та̄стувес. Таима̄гсыл ты йильпи хансым са̄кконув федеральный щирыл пирмайтаӈкв таӈхилӯв». Россия ма̄ янытыл юн о̄щнэ ӯйхул янмалтан щирыл министерстват рӯпитан ва̄ӈын кӯщай Павел Семёнов ла̄выс: «Россия ма̄ янытыл аквъёт пуссын налыман са̄всыр ла̄тӈыл потыртан соссаӈ мир о̄лэ̄гыт. Ка̄сыӈ хо̄тпа наме нэ̄пакын хансым порат та̄раг е̄мтыс. Пе̄с пора щирыл та̄лэтуве̄т аквписыг во̄райим, са̄лыт ӯримос ва̄нтала̄лым 258 со̄тыра э̄лумхо̄лас тох о̄лы. Та̄нанылн тох о̄луӈкв сака мӯсты, та̄рвитыӈ о̄лупсаныл ма̄гсыл та̄нанылн нё̄туӈкв э̄ри. Таима̄гсыл ма̄н Россия ма̄в са̄в ла̄тӈыӈ ос мирыӈ ма̄г ты ла̄ваве. Ты пе̄нтсыл тав ма̄к со̄тыӈыг ты о̄лы». Конференцияныл оигпан э̄лыпа̄лт, ка̄сыӈ хо̄тпа такви о̄щнэ номтанэ ве̄рмыс ла̄вуӈкв. Округт о̄лнэ соссаӈ ма̄хум урыл Татьяна Гоголева ла̄выс: «Тыхо̄тал потыртан тэ̄лав соссаӈ мир ма̄гсыл сака э̄ри. Ма̄н ма̄нти номтув тув нё̄тумтаӈкв таӈхилӯв, ты са̄кконын иӈ соссаӈ ня̄врамыт ханищтан ос мирув пусмалтан тэ̄лав ёмщакв та̄раӈнувег тув хасылтаӈкв э̄ри».

1123 2016. 05. 12. Светлана РОМБАНДЕЕВА

Сытамыг порслын нак урыл Ювле хультум э̄тпос 12 хо̄талэ̄т Ханты-Мансийск ӯст ля̄ххал тотнэ Департамент колт ма̄хум е̄ӈта пасан ва̄тан атхатыгласыт. Тув са̄в мир ёхталас – ва̄ӈнаныл по̄сыӈ хо̄тпат, Общественный палатат ос округ янытыл Федеральный служба безопасность ма̄т рӯпитан ма̄хум, пӯп колныл То̄рум нупыл суснэ хо̄тпат, ля̄ххал тотнэ ма̄хум ёхталасыт. Та̄н сытамыг хо̄нтлын нак (терроризм) урыл потыртасыт, хо̄нтхатыглапаныл тох намая̄лвес: «Информационное и просветительское противодействие терроризму». О̄выл ла̄тыӈ ты кол кӯщай ва̄ӈын нэ̄ Вера Царёва тав ла̄выс: «Сытамыг хо̄нтлын нак урыл ма̄навн са̄в потыртаӈкве э̄ри – газетат хансуӈкве, телевизор хосыт потыртаӈкве, кинаохсат ва̄руӈкве э̄ри. Ма̄н ань матъёмас акванатхатасӯв, ты урыл пуссын аквъёт номсуӈкве, потыртаӈкве патэ̄в те, тэ̄лав тах мощ э̄лальнув нёвумты». Ты юипа̄лт Евгений Лейком потыртас. Тав хосан сутытым хо̄тпат о̄выл ва̄рум тэ̄ланыл (помилование) Комиссият пуӈк тоты. Ты рӯпата та̄н округ янытыл ва̄рияныл. Тав ла̄выс: «Ань ты йист ма̄ янытыл то̄ва ма̄т мирыт халанылт хо̄нтлэ̄гыт, са̄всыр террористыт ква̄лапасыт. Ос ма̄к таи лю̄ль, ань ма̄ньлат ма̄хманув тув хуйтавет. Ищхӣпыӈ ут хосыт тув во̄вавет, олныл миӈкве ла̄вавет, акванпотыртахтэ̄гыт, тувыл та̄н таит нупыл та минэ̄гыт. Округув янытыл ва̄т арыг хо̄тпа тув сытамыг минасыт. Та̄н наманыл ма̄н та̄рапаттым о̄ньщиянӯв, ос манах хо̄тпа наманыл ат ва̄ганӯв, тыгыл арге̄н са̄в. Государствавт яныг кӯщаянув ты урыл пуссын ва̄ганыл. Россия Президентув В. Путин 2006 та̄лт ты урыл №116 указ хансыс: «О мерах по противодействию терроризму», мощ ётылнув №35 Федеральный са̄ккон хасвес: «О противодействии терроризму». Сытамыг хо̄нтлын утыт ёт та̄кыщ о̄луӈкве э̄ри, ё̄ранув хота мус то̄влэ̄гыт, та̄н ётаныл хо̄нтлуӈкве э̄ри. Ма̄н ань пуссын аквъёт вос рӯпитанувӯв. Ты пилыщмаӈ нак урыл ня̄врамыт ёт са̄в потыртаӈкве э̄ри, юн ос школатыт потыртаӈкве э̄ри. Ма̄к яныг рӯпата ханищтап Департамент тав ва̄ри са̄всыр конкурсыт ва̄рыглэ̄гыт, школатыт ты нак урыл потыртан ма̄гсыл я̄нас урокыт ва̄рыгла̄лавет. Ма̄хум такос рӯпитэ̄гыт, ос та утыт ма̄н ма̄ньлат хо̄тпанув та̄нти нупланыл тоха та хуйтыяныл». Округ кӯщаюв ты нак ханищтан ма̄гыс я̄нас колнак о̄ньщи, тот пуӈк тотнэ хум Александр Быстров тох ла̄выс: «Ань сака са̄в ня̄врам ищхӣпыӈ утыл ёнгасэ̄гыт, тот кинат сунсэ̄гыт, халанылт ва̄йхатэ̄гыт, пищмат хансэ̄гыт. Ма̄ньлат а̄гит тув о̄с во̄вавет, та̄н тот э̄рттам нё̄туӈкве патавет, э̄руптаӈкве патавет. То̄ва а̄гит ань таит нупыл минуӈкве щё̄питахтэ̄гыт. Округт о̄лнэ я̄тил ма̄хум, ня̄враманын ёт потыртэ̄н, уральтэ̄н, ищхӣпыӈ ут хосыт та̄н маныр сунсэ̄гыт, хотьютн пищма хансэ̄гыт». Округувт са̄в национальностит о̄лэ̄гыт, ка̄сыӈ такви щире̄т То̄рум нупыл сунсы. То̄ванакт сытамыг хо̄нтлын утытн То̄рум нупыл суснэ тэ̄ла мо̄т щирыл утаве. Ханты-Мансийск ӯст ислам (мусульман) мир То̄рум нупыл суснэ тэ̄ланыл палт пуӈк тотнэ хум Рустам хазрат Аминов тох потыртас: «Сытамыг хо̄нтлын утыт та̄нтина̄наныл мусульман хо̄тпаг ла̄вияныл, та̄н э̄рттам То̄рум нупыл суснэ ва̄рмаль ма̄гыс хо̄нтлэ̄гыт, лю̄ль хо̄тпа алыщлэ̄гыт. Ма̄ньлат ма̄хум тох та уркуптыяныл, пуӈканыл тэ̄лыгтыяныл. Ты сымта̄лма̄йтта̄л утыт нэ̄матарыл ат пилэ̄гыт, тахмае̄гыт те, та̄нтина̄наныл витыг тотуӈкве ве̄рмияныл. Та̄нанылн То̄рум нупыл суснэ тэ̄ла ат э̄ри, ща̄ньа̄щаныл ос ще̄мьяныл урыл ат номсэ̄гыт. Таи сака лю̄ль, хунь ла̄ве̄гыт, ислам То̄рум нупыл суснэ ма̄хум пуссын хо̄нтлуӈкве таӈхе̄гыт. Тувыл мо̄т ма̄хум та номсэ̄гыт: «Со̄ль, та̄н янгема̄не пуссын сытамыг хо̄нтлэ̄гыт». Ма̄ньлат ма̄хум ёт потыртаӈкве э̄ри, та̄н вос ва̄ганыл: ты вильтта̄л утыт национальность ат о̄ньще̄гыт, То̄рум нупыл ат сунсэ̄гыт. Ты та̄нти сутыл о̄лнэ матарыт». Тот са̄в хо̄тпа потыртас, ма̄ньлат ма̄хум ма̄гыс ка̄сыӈ сыме ща̄рги. Вера Царёва ла̄вме щирыл, тамле хо̄нтхатыглапыт ва̄тихал ва̄руӈкве патавет.

1123 2016. 05. 12. Галина КОНДИНА

Хо̄нтлум хо̄тпанув номавет Ма̄н округувт са̄в мир хо̄нтлын ма̄н тотыглаве̄сыт ос са̄в хо̄тпа тот порславе̄сыт манос ва̄та̄л ма̄т тыпсыт. Мо̄лты 2015 та̄лт яныг хо̄нт оигпам па̄сыл 70 та̄лыг е̄мтыс. Ты кастыл Ха̄льӯс район Саранпа̄выл музейт рӯпитан нэ̄квет ня̄врамыт ёт татем ёмас, осыӈ нэ̄пак ва̄рмыт. Нэ̄паканыл рущ ла̄тӈыл тох намтсаныл: «Птицы светлой памяти». Конытэ нё̄тнэ, ёмас хурил по̄слым, тот нё̄рыт ляпат ё̄рнколыт лю̄ле̄гыт, ло̄ӈхальнув я̄ ва̄тат колыт ӯнлэ̄гыт. Нумын, то̄румхарт я̄ӈк товлыӈ ӯйит таи яласэ̄гыт. Ул со̄ль тащир о̄лы, хо̄нтыт порсум ма̄хум исаныл товлыӈ ӯйиг е̄мтэ̄гыт. Потрыт Вера Павловна Комкова ос Любовь Павловна Стаканова пуссын акванатсанэ̄н ос хо̄нтлум ма̄хум урыл хассы̄г. Тэ̄натэ̄н «Исторический клубн» ялантан ня̄врамыт сака ёмщакв нё̄тсыт. «Память» нампа нэ̄пакн хансым то̄ва хо̄тпат тот о̄с хо̄нтсанэ̄н. Ос акв рущ хум Леонид Платонович Пешев са̄в хурит ос э̄рнэ нэ̄пакыт Саранпа̄вылн те̄тыс. Тав Горюново па̄вылт Заводоуковский районт Тюменский областит о̄лы, хо̄нтлын ма̄т порсум ма̄хум урыл потрыт, хурит, нэ̄пакыт акванаты. Музейт рӯпитан хо̄тпат ла̄ве̄гыт: «То̄ва па̄влыӈ ще̄мьят та̄нти рӯтаныл урыл хассыт, хурит хо̄нтсыт, музейн тотсаныл. Ты нэ̄пак хансым па̄влыӈ ма̄хум аквтуп пуссын акв рӯтыг е̄мтсыт, акваннё̄тхатым нэ̄пак ва̄рсыт. Ка̄сыӈ хо̄тпа таӈхыс, тав рӯтэ ул вос ёрувлаве, нэ̄пакн вос хансаве». Ва̄им, хо̄нтлум ма̄хумте̄нув яныг пилыщма суссыт, ре̄гтыгла̄лве̄сыт, по̄лигла̄лве̄сыт, сыманыл э̄тгалаве̄сыт. Тох о̄лы, та ве̄рмысыт но̄хпатуӈкве, фашистыт ма̄н ма̄выл э̄л ня̄влуӈкве, ты ма̄гыс ма̄н та̄наныл акваг номуӈкве патыянӯв. Нэ̄пакт 338 хо̄тпа урыл хансым о̄лы, та̄н пуссын хо̄нтлын ма̄н тотве̄сыт: Саранпа̄вылныл –185 хо̄тпа, Сӯкыръяныл – 70, Я̄сунтныл – 11, Ха̄ӈла па̄вылныл – 4, Хо̄сло̄хныл -7, Мувынте̄сныл – 11, Хо̄рыӈпа̄вылныл – 18, ос мо̄т та ляпа па̄влытныл -32 хо̄тпа. 230 са̄лтатыт хо̄нтлын ма̄т порславе̄сыт, 108 хо̄тпат юв ёхталасыт. Са̄выӈпа̄лэ рядовойиг о̄лсыт – 301 хо̄тпа, 25 сержантыт ос 12 – офицерыт. Щар са̄в 125 хо̄тпа 1941 та̄лт хо̄нтлуӈкве тотвес. Саранпа̄выл котильт Победа ӯсхулыт 1979 та̄лт Памятник ва̄рвес, тот 126 хо̄тпа о̄парищ наманыл хансымат. Ос наманыл янытэ̄тыл хансым ат о̄лсыт, музейт рӯпитан ма̄хум тисхатсыт, 11 хо̄тпа тох ат та хо̄нтсаныл хотьютыг та̄н о̄лсыт. Ка̄сыӈ са̄лтат урыл акв я̄нас ло̄пс ва̄рвес, тот хуритэ ос тав уре̄тыл хансым о̄лы. Хотьют урыл щар мощща хо̄нтсыт, тув ня̄врамыт по̄слум хурит ва̄рсыт. Ам ос амти о̄пам Меров Василий Никитич, мо̄т рӯтанум тув хансым о̄лэ̄гыт. О̄пам Ленинградский фронтыт хо̄нтлыс, 1943 та̄лт ка̄таге сакватавесы̄г, мощ пусмалтавес ос юв те̄твес. Юн иӈ хоса нюлмиянэ пусмалтасанэ. Нэ̄пак та̄ратан ма̄гсыл олн мисы̄г: округ Думат рӯпитан депутат Надежда Геннадьевна Алексеева фондэ̄ныл ос такви олн рӯпитан хум Николай Алексеевич Терентьев. Ань Саранпа̄вылт хо̄нтлум хо̄тпа щар ат хультыс, пуссын а̄тимыг е̄мтсыт, ос ма̄н та̄наныл акваг номуӈкве патыянӯв. Матъёмас тамле нэ̄пак ва̄рвес, ня̄врамыт таве ловиньтым, тув сунсым яныг о̄паныл, яныг ащо̄йканыл ка̄стыглаӈкве ос номуӈкве патыяныл. Нэ̄пак ва̄рум ма̄хмытын яныг пӯмащипа ла̄тыӈ те̄тэ̄в.

1123 2016. 05. 12. Валентина УЗЕЛЬ

Во̄рт о̄лнэ э̄кваго̄йкаг Ты хурит Никоновыг э̄кваго̄йкаг по̄слым о̄лэ̄г. Тэ̄н Ханты-Мансийский район Кышик па̄вылт о̄лэ̄г. Э̄кватэ – ханты нэ̄, наме Антонина Николаевна. О̄йкатэ рущ – Василий Геннадьевич. Тэ̄лы оигпан порат тэ̄н са̄лыӈ та̄гыл Ханты-Мансийск ӯсн ёхталасы̄г, тыт рӯпитасы̄г. Ё̄рнкол тӯщталасы̄г, тит са̄лы ёттотыгласы̄г. Ӯст о̄лнэ ма̄хум са̄лыӈ суныл тотыгласаге̄н, яныгса̄т атпан солко̄ви ойтуӈкв э̄рыс. Хотьют са̄лы ёт по̄слахтуӈкв таӈхыс, та̄н о̄с олн ойтсыт. Антонина Николаевна такви уре̄тыл а̄нумн мощ потыртас. Тав оматэ хо̄тал нэ̄глын е̄рныл о̄лыс, та е̄рт о̄лнэ хантыт «пимские» нам о̄ньще̄гыт, та̄н Пим я̄ ва̄тат о̄лэ̄гыт. А̄тятэ Октябрьский районныл о̄лыс. Хотты ма̄т та хо̄нтхатсы̄г, акванминасы̄г, Касум па̄вылн о̄лмыгтасы̄г, тот мощ о̄лсы̄г, тувыл Кышикн та ва̄нтлысы̄г. Антонина Николаевна о̄йкатэ̄нтыл са̄в та̄л па̄вылт рӯпитасы̄г. Тувыл пенсиян минасы̄г. Пыр-Ях нампа я̄ алгаль па̄вылныл атпанахтем ве̄рыстат о̄лнэ ма̄ «родовой угодияг» хансыстэ̄н. Пе̄с порат тав омагеа̄тяге тот са̄лы ӯрим о̄лсы̄г. Са̄лы ёвтсы̄г. Матах та̄л сыс са̄лыянэ̄н мощ са̄вмысыт. Ань хусахтем ул о̄ньще̄г. Сака са̄в са̄лы о̄ньщуӈкв тот о̄с ат ро̄ви, ма̄ ат то̄вылхаты, мощща. Тэ̄н са̄лы ӯрнэ ма̄тэ̄н ляпат ма̄во̄й но̄хвинэ нефтяной компания лё̄ӈх ва̄рсыт, ань та лё̄ӈх хосыт таса̄вит яныг ма̄шина тыглетувле та яласы. Ты та̄л ос «Сургутмебель» нампа компания рӯпитаӈкв тув ёхтыс. Та̄н тот во̄р яктэ̄гыт. Тувыл та лё̄х хосыт яктым норохсат Сургут ӯсн та тотыяныл. Ты лё̄ӈх ва̄рим па̄сныл таса̄вит хащта̄л мир тув та ёхтыс, са̄в браконьерхо̄тпа нэ̄глыс. Са̄лыянэ̄н пӯсас коныпа̄лн та̄ртыянэ̄н те, са̄в са̄лы юв ат ёхты. Ты сылкат молях нуйхатнэ са̄всыр техника о̄ньще̄гыт, са̄лы алапе̄гыт, та̄лтапияныл, тувыл та. Та̄наныл юил ня̄влуӈкв хунь патэ̄гын, та минэ̄гыт. Мо̄т та̄рвитыӈ ва̄рмале̄н тамле. Са̄лы акв ма̄т те о̄ньщуӈкв, са̄лытэ̄п тот нёлоловтем та̄л ат яныгми. Ос во̄р са̄грим ма̄т са̄лытэ̄п налымантем та̄л тот а̄тим. Тав сака ла̄щлакв яныгми, учёныит ла̄ве̄гыт, та̄л сыс акв сантиметраг ат яныгми. Ӯст рӯпитанэ̄тэ̄н урыл Антонина Николаевна тох потыртас: «Мо̄лты та̄л ме̄н са̄лыӈ та̄гыл Добрино нампа ма̄т рӯпитасме̄н, ты ма̄ Ханты-Мансийск ӯсныл атпанахкем ве̄рыстат о̄лы. Тэ̄лы та ӯсыӈ ма̄т тӯйтэ акваг матыр лю̄ль утыл паргалтаве. Ты ут са̄лы тоӈх халн щалты, са̄лыянме̄н ла̄гланыл та юипа̄лт а̄гмыӈыт. Та̄н тӯйт акваг тэ̄гыт, ты лю̄ль утыл са̄лыянме̄н со̄рганыл а̄гмыӈыг е̄мтэ̄гыт, тӣвраныл лю̄лиг ва̄риянэ. Ме̄н тувыл юв, ме̄нти во̄рме̄н, ёхтысаме̄н, са̄лыт со̄рганыл ам пуссын сыстамтасанум. Амки ӯйхул ле̄ккарыг о̄лэ̄гум, ва̄глум, со̄рганыл хумус сыстамтаӈкв э̄ри. Ань ос тыт ӯст рӯпитыме̄н, сымум татем ща̄рги – ань тах са̄лыягме̄н а̄гм нупыл хартуӈкв та патэ̄г. Туи порат ос пупа̄пщите̄в о̄лнэ урак ат мыг. Та̄н ань сака са̄вмысыт. Акв щёс ёхуланме̄н пуссын ювва̄тсанэ. Лэ̄гыӈ утыл щар ат пилыс. Мо̄лты та̄л таса̄вит нэ̄виса̄лыянме̄н ӯнттысыт, па̄сыгрищит яныгмасыт, ме̄н кон та та̄ртысанме̄н. Са̄выӈпа̄лэ пуссын ка̄тнпаттуманэ. Акв матах па̄сыг туп хультыс. О̄йкатэ урыл потыр Тав о̄йкатэ Василий Геннадьевич Тюменский область Ишим ӯст самын патыс, тот яныгмас. Школа а̄стламе юипа̄лт сельскохозяйственный техникумт ханищтахтас. А̄стластэ, тувыл Тюмень ӯсн э̄лаль ханищтахтуӈкв те̄твес. Антонина Николаевна ос Салехард ӯсныл о̄с аквта порат тув те̄твес. Тот акван та минасы̄г. Потыртахтасы̄г, Кышикн ялэ̄г, о̄йкатэ̄н тот ат те мӯсты, ювле ёхтэ̄г. Ань ханты па̄вылн та ёхтысы̄г, мощ о̄лсы̄г, тот та хультсы̄г. Та урыл Василий Геннадьевич сака пӯмыщ потыртас: – Ам рущ, хотыл ва̄глум, хантыт хумус о̄лэ̄гыт. 1981 та̄лт ма̄нь па̄влыӈ ма̄н э̄квам ёт ёхтысум, татем ёмас ма̄хумаквет тот та о̄лэ̄гыт. Тыт та хультсуме̄н. Пе̄с ва̄рмаляныл, пе̄с наканыл пуссын ёмащакв ва̄ганум, ань соссаӈ мир о̄лупсал о̄луӈкв ханьщувласум, мо̄т щирыл о̄луӈкв воссыг ат ве̄рме̄гум. То̄нт па̄влувт Николай Михайлович Лозямов о̄лыс, тав а̄нум щаквщуӈкв, ма̄щтырлаӈкв ханищтастэ, хӯлп хасуӈкв, камка ва̄руӈкв, матыр ва̄руӈкв те э̄ри, ам пуссын ха̄сэ̄гум. Ань яныгпа̄ла хум хо̄тпа па̄влувт а̄тим. Ма̄нти яныгпа̄лаг та е̄мтсӯв. Тонямн са̄лы ӯруӈкв ханищтаве̄сум. Во̄раяӈкве, хӯл алыщлаӈкве акваг ялантэ̄гум. Ты та̄л лэ̄ӈнанув матрыг а̄тимыт, мо̄т ма̄н минасыт. Па̄кв о̄с мощща о̄лыс, та̄н понсуӈкв иӈ ат а̄лымасыт, па̄квтэ̄пинэт ёл та паттысаныл. Лэ̄ӈнытын ул нэ̄матыр тэ̄ӈкве, таима̄гыс мо̄т ма̄н та минасыт. Ха̄льнёхсыт тыт о̄с о̄лэ̄гыт, ты та̄л матрыг о̄с а̄тимыт. Ма̄н о̄лнэ ма̄в ляпат янгуит лё̄ӈханыл минас. Ня̄влын порат тыглетувле яласасыт. Та лё̄ӈханыл ӯлтта ма̄шинат яласан лё̄ӈх ва̄рвес. Аквтит во̄руй туп ты лё̄ӈх ӯлтта мины, мо̄таныт пилэ̄гыт, ань мо̄т нупыл лё̄ӈханыл хотталь та минас. Та̄н браконьерытн те хо̄нтавет, та̄ра ка̄тн та паттавет, нэ̄мхотьютн ат са̄литавет. Ты пиным лё̄ӈх Сургутныл о̄вылтахты, Октябрьский район мус мины. Щар ма̄н о̄лнэ ма̄в ляпат ва̄рвес. Ань мо̄т ма̄ныл ёхтум сымта̄лма̄йтта̄л хо̄тпат матыр товлыӈ уй ман во̄руй ка̄салыяныл, пуссын та алыяныл. Аквнакт Тоням ёт та̄н палтаныл ялсуме̄н, такос ля̄втсумен, та̄н ме̄наме̄н хӯнтлуӈкв хунь патэ̄гыт. Сысы та минасаме̄н, воссыг хоталь ва̄рхатыме̄н. Хотмус э̄лаль о̄луӈкв э̄ри. Тамле ты ёмас хо̄тпаг Ханты-Мансийск ӯс ляпат о̄лэ̄г. Ӯсувт матыр ялпыӈ хо̄тал те ва̄раве, тэ̄н та̄ра тув та во̄ваве̄г. Мо̄т мирн соссаӈ о̄лупса та суссылтэ̄г.

1123 2016. 05. 12. Александр ВЬЮТКИН

Ма̄ньщи мирув ма̄гсыл сыме ща̄ргын нэ̄ Югорск ӯст «Ӯринэ̄ква хо̄тал» янытлым порат тот о̄лнэ ма̄ньщи мирув халт ам ёмас ма̄ньщи нэ̄ ёт вайхатсум. Тав наме Альбина Петровна Багаева. Альбина Петровна ань пенсият ӯщлахты. Пенсият о̄лым юн нас тох тэ̄лата̄л ӯнлантаӈкв ат ка̄сащи. Таима̄гсыл тав тот о̄лнэ соссаӈ мир «Югра лылыеп» нампа колт председателиг рӯпиты. Альбина Петровна такви Ха̄льӯс район Новинские па̄вылт самын патыс. Самын патум па̄влэ̄т тав ня̄врамыт ханищтахтын колын миннэ мус о̄лыс. Ханищтахтуӈкв Восыӈтӯр па̄вылн тотвес. Нёлолов класс а̄стламе юипа̄лт Ханты-Мансийск ӯсн ле̄ккарыг ханищтахтуӈкв минас. Тот тав хӯрум та̄л ханищтахтас. Та юипа̄лт та̄ра ма̄нь ле̄ккарыг рӯпитаӈкв патхатас. Альбина Петровна аквъёт пуссын рӯпитан та̄ланэ те ловиньтаӈкве – налыман нупыл ат та̄л то̄влыс. Тувыл налыман нупыл тит та̄л тав Югорск ӯст о̄лнэ пӯльницат ле̄ккарыг рӯпитас. Пӯльницаныл по̄хан минаме юипа̄лт хӯрум та̄л «Сӯйва̄т па̄выл» музейт кӯщаиг о̄лыс. Ань тав соссаӈ мир ёт рӯпитан «Югра лылыеп» нампа колт кӯщаиг о̄лы. Тув кӯщаиг пе̄риим па̄сныл лов та̄лыг е̄мтыс. Ань о̄щнэ рӯпататэ урыл ла̄выс: «Ма̄н палтув ань аквъёт пуссын титса̄т атхойполов соссаӈ хо̄тпа рӯпиты. Ма̄нти о̄лупсав садикыт ос ханищтахтын колытыт потыртым ос суссылтым яласэ̄в. Ялпыӈ хо̄талыт о̄лыглан порат ма̄н аквписыг ма̄нти ва̄рум пормасанув ос щё̄питан тэ̄нутанув тот суссылтым тыналэ̄в. Югорск ӯс мирколув ма̄навн ва̄тихал нё̄ты. Яныг ӯсыӈ ма̄т о̄лнэ мир ма̄ньщи ма̄хум урыл нас хӯлыгласыт. Таима̄гсыл ма̄н пе̄с о̄лупсав та̄нанылн сака пӯмыщ, манырсыр титыглахтын ла̄тыӈ аквписыг хо̄нтэ̄гыт. Ӯсыӈ ма̄т о̄лнэ то̄ва ма̄хманув та̄нти ща̄нь ла̄тӈыл потыртаӈкв ат таӈхе̄гыт манос э̄ссамтэ̄гыт. Ма̄ньлат ма̄ньщи ма̄хманув ма̄н палтув са̄выӈпа̄лэ рӯтанув ос апганув нё̄туӈкв ёхталэ̄гыт. Тыи ма̄гсыл ам сымум сака ща̄рги».

1123 2016. 05. 12. Людмила ТЕТКИНА

Хо̄нтлам а̄ще тав номитэ Альбина Васильевна Попова ёт ам Ха̄льӯс район Саранпа̄вылт хо̄нтхатыгласум. Тав та па̄вылт «Поиск» нампа ня̄врамыт ханищтахтын колт кӯщаиг рӯпиты. Победа хо̄тал кастыл такви а̄тятэ Василий Николаевич Вадичупов урыл потыртас. Ма̄ньщи хум хо̄нтлын ма̄т ла̄гыл та̄л хультыс. Ювле хунь ёхтыс, пенсиятэ мус хӯл алыщлым ос во̄раим рӯпитас, 1998 та̄лт а̄тимыг е̄мтыс. Альбина Васильевна такви а̄тятэ урыл таи потыртас. – Ща̄нягума̄щагум война э̄лыпа̄лт акванминасы̄г. Омам Елена Ивановна Таратова о̄лыс. Тав Во̄лья па̄вылныл о̄лум нэ̄. То̄нт Таратовыт пуссын та я̄ ва̄тат о̄лсыт. Омам савалап ня̄врамыг яныгмас. А̄тям 1941 та̄лт войнан хо̄нтлуӈкве хунь тотвес, омам о̄ныпе ос акитэ палт о̄луӈкве хультыс. А̄тям хо̄нтлуӈкве минмыгтас, омамн я̄ӈк супыл майвес. Ла̄выстэ, ты супе такви сыме по̄хыт алпитэ̄т акваг вос о̄ньщитэ. Супе пе̄сыг хунь е̄мты, нас тох ул вос вущкасытэ, хотталь йӣвн но̄х вос тагматытэ. А̄тям хо̄нтлым омамн маим супе акваг масым о̄ньщастэ. Тав потырта̄лыс, Сталинград ӯс вуйим, сака са̄в мир порсыс, тав ётэ хо̄нтлум хо̄тпат халт туп лов э̄лумхо̄лас лылыӈыг хультсыт. То̄нт а̄тям «За оборону Сталинграда» ме̄талил майвес. Хо̄нтлым ос фашистыт ювле ня̄влым Польша ма̄н армияв ёхтыс. Та ма̄т а̄тям партизанский отрядыт Висла я̄ вуянтым хо̄нтлыс. Та порат щар тэ̄та̄л о̄лсыт, омамн маим супе тэ̄нут ма̄гсыл пе̄нтыстэ. Ты юипа̄лт та̄ра та сакватавес, ла̄глэ та̄л та хультыс. Пӯльницат та колнакн пинвес, хо̄т сакватым хо̄тпат хоса ат о̄лэ̄гыт. Матахкем хо̄тал тот хуяс, тувыл но̄хса̄йкалас, тав э̄лыпа̄лэ̄т ле̄ккар хо̄тпа лю̄лис, тав нупылэ сунсыс. То̄нт ле̄ккархум а̄тямн ла̄выс, На̄й-О̄тыранэ̄н улпыл ёмащаквег ӯргалаве. Ос ла̄выс, тав ётэ нэ̄матыр лю̄ль нак воссыг ат е̄мты. Тувыл а̄тям Баку ӯсн пусмалтахтуӈкве ке̄твес. Тот сака хоса пусмалтавес, туп 1947 та̄л таквсы порат юв ёхтыс. Юв ёхтумет, тав са̄лыӈ колт яласас ос во̄раим, хӯл алыщлым о̄лыс. О̄влэ̄т тав «инвалид первой группы» майвес. Тувыл матахкем та̄л ювле хультыс, китыт группал майвес, э̄рттум китыт ла̄гле ювле яныгмас. Омам хунь а̄тимыг е̄мтыс, ос а̄тям таккет хультыс, Вера э̄щум таве Тюмень ӯсн ле̄ккарыт палт тотыгластэ, то̄нт тав о̄с о̄выл группал майвес. А̄тям хо̄нтлым ос ётыл Баку ӯст пусмалтахтым са̄в ма̄хум ёт ва̄йхатас, юрщхатас. Са̄в юрт хо̄тпанэ таве̄н пищма хансыгласыт. Ты пищмат тав акв ма̄т о̄щсанэ. А̄тям хунь а̄тимыг е̄мтыс, ам ты пищмат пуссын Ха̄льӯс архивын мисанум. Ты нэ̄пакыт ань тот ка̄салаӈкве ро̄ви. О̄влэ̄т э̄щанум ам нупылум сака кантлысыт, манрыг ты пищмат тув мисанум. Тувыл тамле нэ̄пак юн о̄ньщуӈкве хоса ат ро̄ви, молях пе̄сыг е̄мтэ̄гыт. Архивыт ты пищмат уральтым о̄ньщавет. Ма̄глын тагатан по̄санэ Кульпас па̄вылт Слава а̄пщим палт о̄лэ̄гыт. А̄тяв Орден «Красной Звезды», «Орден Отечественной войны II степени» ос медаль «За отвагу» о̄ньщас. Ты ма̄глын тагатан по̄санэ сака ӯргалым о̄щсанэ. Ань Победа хо̄тал кастыл Россия янытыл ка̄сыӈ ӯст ос па̄вылт «Бессмертный полк» нампа акция ва̄рыглаве. Альбина Васильевна рӯтанэ ёт тув о̄с яланты, тав а̄ще хури пувим колоннат ё̄ми.

1123 2016. 05. 12. Светлана РОМБАНДЕЕВА

Ӯринэ̄ква хо̄тал о̄лыс Яныгпо̄ль э̄тпос 9 хо̄талэ̄т Ханты-Мансийск ӯст о̄лнэ ма̄хум Ӯринэ̄ква янытласыт. Ӯскант, Лосев нампа паркыт, китхуйплов щё̄с порат мир та атхатас. Йис та̄гыл ма̄ньщи ос ханты ма̄хум Ӯринэ̄ква янытласыт. Тӯяг, тав ёхтынэ̄тэ порат, матыр а̄ныса̄н щё̄питасыт, ялпыӈ хо̄тал ва̄рыгласыт. О̄выл ла̄тыӈ округ губернатор ва̄ӈын хум палт советникыг о̄лнэ нэ̄ Людмила Александровна Алфёрова ла̄выс: «Округ кӯщаит ма̄н культурав янытлыяныл, тамле ялпыӈ хо̄талыт ва̄руӈкве ма̄навн та̄н ты нё̄тэ̄гыт, олнло̄мтыл та̄ставе̄в. Таима̄гыс ма̄н ань тыхо̄тал мӯйлэ̄в, Ӯринэ̄ква янытлылӯв. Ювле хультум та̄л сыс самын патум ня̄врамыт ты порат ты янытлавет. Ӯсувт китса̄тыл мощ арыгнув ня̄врам самын патыс». Ханты-Мансийск ӯст та̄л сыс самын патум то̄ва ня̄врамыт наманыл ла̄вве̄сыт, ща̄ньа̄щаныл янытлаве̄сыт, сценан но̄хво̄вве̄сыт, мӯйлупсатыл ос янытлан нэ̄пакытыл майве̄сыт. Ты хо̄тал кастыл ня̄врамыт халт конкурс ва̄рыглавес, та̄н ма̄ньщи ос ханты ла̄тӈыл потрыт ос стихотвореният хассыт. Но̄хпатум а̄гирищитпыгрищит янытлаве̄сыт. Кит ма̄ньщи ня̄врамыг наманэ̄н ла̄ввесы̄г – ты Катя Мерова ос Саша Слугин. Катя технологопедагогический колледжит ханищтахты, Саранпа̄вылныл о̄лы. Саша ос Ханты-Мансийск ӯст о̄лы, хо̄тыт классыт ханищтахты. Ка̄сыӈ та̄л яныт ня̄врамыт я̄нас янытлаве̄сыт, тэ̄н сас китыт места висы̄г. Янытлан нэ̄пакыл ос мӯйлупсал майвесы̄г. Раиса Германовна Решетникова, ма̄ньщи ос ханты газетаг палт пуӈк тотнэ нэ̄, тох ла̄выс: «Ты конкурс ма̄н намаяслӯв – «Ими гордится Югра». Округ янытыл о̄лнэ са̄в ня̄врам потрыт ос стихотвореният ма̄ньщи ос ханты ла̄тӈыл хассыт, ты конкурсын ке̄тсаныл – 38 ня̄врам хассыт. Матъёмас соссаӈ ня̄враманув ща̄нь ла̄тыӈ ханищтэ̄гыт, потрыт хансэ̄гыт. Ты ма̄гыс ма̄н сыманув сака ща̄гтсыт. Ка̄сыӈ потыр ос стихотворение ма̄н ловиньтаслӯв, тувыл ма̄к ёмас рӯпатат пе̄риясӯв. Но̄хпатум ня̄врамыт ма̄н ань ты янытлыянӯв, дипломнэ̄пакытыл мыганӯв ос мӯйлупсатыл щё̄питасанӯв». Ня̄врамыт янытлан юипа̄лт концерт суссылтавес. Са̄в ансамблит выступайтасыт, сценат ма̄ньлат ма̄хум ос яныгхо̄тпат маттем та э̄ргысыт, йӣквсыт. Ӯринэ̄ква хуритэ ва̄рнэ конкурс о̄лум, щар ма̄к ёмас костюмыл о̄лум ма̄хум сценан во̄выглаве̄сыт, та̄нти ка̄тыл ва̄рум утаныл суссылтасаныл. Ты ма̄хум о̄с янытлаве̄сыт, мӯйлупсатыл майве̄сыт. Ма̄хум ӯскан янытэ̄т мӯйлысыт са̄всыр ёнгилыт ва̄рыглаве̄сыт, мастерклассыт, каснэ ва̄рмалит, ня̄врамыт по̄слысыт. Кит са̄лыиг аман хотыл тотыглавесы̄г, тэ̄н ляпатэ̄нт ма̄хум маттем та по̄слахтасыт. Кит ё̄рнколыг тӯщталавесы̄г, ма̄хум исум ща̄ил айтве̄сыт, со̄ламатыл тыттуве̄сыт. Хо̄тал палыт выставка рӯпитас, соссаӈ ма̄хум ка̄тыл ва̄рум пормасаныл, маснут, хӯл ос мо̄т са̄всыр ут тыналавес.

1123 2016. 05. 12. Тамара МЕРОВА

Ёмщакв мӯйлысыт Сургут ӯст о̄лнэ ма̄хум Ӯринэ̄ква хо̄тал ка̄сыӈ тӯя о̄с янытлыяныл. Ты ялпыӈ хо̄тал та̄н ма̄гсыланыл «Старый Сургут» нампа музей колт рӯпитан хо̄тпанувн щё̄пита̄лаве. Марина Самсонова, та музейт соссаӈ ма̄хум отделт рӯпитан кӯщай нэ̄, ла̄выс, ты ялпыӈ хо̄таланыл та̄н са̄тхуйплов щёс ты ва̄рсаныл. Ка̄сыӈ порат та̄н палтаныл ӯст о̄лнэ ня̄врамыт ща̄нянылна̄щанылн тыг мӯйлуӈкве тотыглавет. То̄ват щар о̄выл щёс тыг ёхталэ̄гыт, ос ханты, ма̄ньщи пе̄с о̄лупса урыл ущты ва̄ӈкве патэ̄гыт. Пуссын мӯй ма̄хмытын тыт сака мӯсты. О̄влэ̄т Ӯринэ̄ква хо̄тал та̄н Сургутский районт о̄лнэ ма̄хум ёт акваннё̄тхатым щё̄пита̄лсаныл. Тувыл округ янытыл яныг ялпыӈ хо̄талыг ва̄рвес, ань таи ма̄гыс ка̄сыӈ районт ман ӯст о̄лнэ соссаӈ ма̄хум та̄нки палтаныл янытлыяныл. Ты та̄лт Сургутт о̄с са̄в ня̄врам, матумпа̄ла хо̄тпат ёхталасыт. Та̄н о̄влэ̄т Ӯринэ̄ква урыл ёныг суссыт. Музейт рӯпитан хо̄тпат пе̄с мо̄йт щирыл ты ялпыӈ хо̄тал урыл ёныг щё̄пита̄лсыт. Ӯринэ̄ква суссылтан нэ̄г тот Ирина Ибрагимова о̄лыс. Тав ма̄щтырыг йӣквыс ос ня̄врамыт ма̄гыс са̄всыр касылыт ва̄рыглас. А̄гирищитпыгрыщит ӯйрищ ма̄гыс пити ва̄рсыт, пе̄рщим ё̄раныл а̄рталасаныл. Тот «Лӯима̄ хансат», «А̄снэ» ос «Югра сэм» (ма̄ньщи ла̄тӈыл «Югра сым») коллективыт йӣквсыт. Тув Сургут ӯс школат, училищат ман университет ханищтахтын а̄гит ялантэ̄гыт. Александр Сайнахов ос Андрей Кечимов тӯлыглахтасы̄г. Ты тӯлыглапыт ма̄хумн сака пӯмщалаве̄сыт. Касум ня̄врамыт ос тӯлыглахтам хо̄тпаг «Ханты-Мансийский банкыл» мӯйлупсал майве̄сыт.

1123 2016. 05. 12. Тамара МЕРОВА

Са̄в мирыт Ювле хультум э̄тпост Нефтеюганск ӯст ёсал ха̄йтнэ кан по̄хат Ӯринэ̄ква хо̄тал ва̄рыглавес. Тот соссаӈ ма̄хум ма̄гыс йильпи «Ай Ас рув» нампа этнографический центр ӯнттувес ос тав ущты рӯпитаӈкве о̄вылтахтас. Тув са̄в соссаӈ ма̄хум мӯйлуӈкве во̄виньта̄лве̄сыт. Округ янытыл тамле нёлолов центрыт рӯпитэ̄гыт, тыи онтоловитыг е̄мтыс. Ань китхуйплов щё̄с порат тув атхатам ма̄хум пуссын а̄ращ ва̄тан во̄вве̄сыт ос Касум па̄вылныл о̄лум мӯй нэ̄ Валентина Тарлина (Кондина) Тя̄к-А̄квув нупыл по̄йкщас. Тувыл вы̄гыр то̄р Тя̄к-А̄квувн мистэ ос акванатхатам ма̄хум пуссын пуӈк пинсыт. Та юипа̄лт э̄ргынйӣквнэ кант губернатор ва̄ӈын хум палт советникыг о̄лнэ нэ̄ Людмила Алфёрова ос Нефтеюганский район Думадепутат хум Богдан Богославец мӯй ма̄хум ёт пащалахтасы̄г. Тэ̄н ты центр ва̄рум хо̄тпат янытласанэ̄н. Ты ӯст ань соссаӈ ма̄хум пе̄с наканыл э̄лаль тотнэ ма̄гыс хантыт, ма̄ньщит, ё̄рныт ща̄гтым о̄лэ̄гыт. Ольга Ефимовна Скакунова, яныгпа̄ла ханты э̄ква, сценан во̄виньта̄лвес. Э̄ква тох ла̄выс: «Ам ты ӯст хосат та̄гыл о̄лэ̄гум, школат ня̄врамыт ханищтасанум. Тувыл мо̄т ӯсытыт ос па̄влытыт этнографический центрыт акваг та ва̄равет, тыт а̄тим. Мо̄лалнув ам 80 та̄лум то̄влыс, ань тув мус та ӯрхатсум, ма̄н о̄с соссаӈ ма̄хманув ёт акванатхатнэ колыл ӯнттувесӯв». Ольга Ефимовна ты центр ва̄рнэ хо̄тпагн мӯйлупса щё̄питас, Сергей Андреев, «Сибирский Двор» нампа ӯщлахтын кол кӯщай хум ос Татьяна Грошева, Нефтеюганский район «Югра лылые̄п» кӯщай нэ̄ янытласаге. Тэ̄натэ̄н пӯмащипа ла̄тыӈ ла̄выс ос хум хо̄тпа такви ю̄нтум ханты упыл ос нэ̄ ще̄пт о̄щнэ телефон хӯрыгсовыл мӯйлуптасаге. Сергей Андреев ёхталам ма̄хум ёт са̄всыр мирыт потыртан ла̄тӈытыл пащалахтас. Тав ла̄выс: «Тыт ханты колыт ӯнттуӈкве а̄нумн Клим Кантеров нё̄тыс. Тав Лянтор ӯс по̄хат о̄лы, во̄рт са̄лы янмалты. Ань са̄лыянэ тыг тотсанэ, ё̄рнкол тӯщтыс. Ма̄н пуссын тыт о̄лнэ хантыт, ма̄ньщит, ё̄рныт хольт та̄ксарыг ос ёмас, посыӈ номтыл вос о̄лнувӯв. Ма̄нки мирувт о̄лнэ пе̄с йис накыт э̄лаль вос тотсанӯв, ня̄враманувн та̄н нэ̄мхуньт ул вос ёрувлавет. Ань ты тэ̄лат э̄лаль номнэ ма̄гыс ма̄н акванюрщхатым вос о̄лэ̄в. Ма̄нки акваннё̄тхатым о̄лэ̄в ке, то̄нт ма̄н нэ̄матарыл ат пилэ̄в». Сергей Андреев ос Татьяна Грошева мо̄т нё̄тум хо̄тпатын пӯмащипа ла̄тыӈ ла̄всы̄г. 2015 та̄лт тэ̄н соссаӈ ма̄хум центр ва̄рнэ ма̄гыс проект щё̄питасы̄г ос ма̄вит ӯргалан ос несырьевой сектор экономики Департамент па̄лыл «Развитие этнографического туризма» номинацият грантолныл майвесы̄г. Мо̄т са̄всыр тэ̄лат ва̄руӈкве Нефтеюганск ӯс миркол кӯщай Вячеслав Акиндинович Арчиковн сака нё̄твесы̄г. Тувыл Лангепас, Лянтор, Салым, Сургут ӯсытныл ёхталам э̄ргын ос йӣквнэ ма̄хум э̄ргысыт, йӣквсыт. Салым ӯсныл ёхталам хо̄тпат «Легенда о вороне» мо̄йт суссылтасыт. Светлана Сенгепова, Лянтор ӯсныл о̄лнэ ханты нэ̄, такви ня̄враманэ ёт о̄с са̄всыр ёнгилыт ва̄рыс. Мӯйлын ма̄хум хо̄тал палыт тот концерт суссыт ос нас ӯщлахтасыт, ня̄врамыт ёнгысыт, поргысыт, са̄лыӈ суныл тотыглаве̄сыт. Ос ха̄льн хорамыӈ то̄рса̄лм нэ̄гсаласыт. Акв ма̄т ӯринэ̄ква пити ва̄руӈкве ханищтаве̄сыт, мо̄т ма̄т ӯринэ̄ква хуритэ то̄рса̄лмыл ма̄щтырласыт. Ӯст о̄лнэ ма̄хум хӯлыӈ, нё̄влиӈ тэ̄нут ёвтуӈкве ве̄рмысыт. Тувыл ма̄хум со̄ламатыл тыттуве̄сыт ос хӯл исмитыл айтве̄сыт. Елена Таратован, ма̄ньщи нэ̄н, ты ялпыӈ хо̄тал сака мӯстыс. Тав потыртас: «Ам тыг ва̄нтлумум кит та̄лыг ты е̄мты. Тыт ёмас сымыӈ ма̄хум о̄лэ̄гыт. Са̄всыр мирыл о̄лнэ юртнэ̄ тыт хо̄нтсум, та̄н ётаныл «Обь» нампа колн концерт сунсуӈкве ос «Иртыш» нампа ӯщлахтын колн яланта̄лэ̄гум. Тот маснут сагнэ кружок о̄лы. Ань ос руманэ̄нум ты центрын во̄выглаӈкве патыянум, та̄н ма̄ньщит ос хантыт о̄лупса урыл о̄с вос ва̄гыт».

1123 2016. 05. 12. Татьяна Слинкина

А̄нъя пāвлыӈ Микита Ты э̄рыг яныг хо̄нт порат порыслым рӯтте̄в, Гоголев Микита Иванович, э̄ргыглам э̄рыг. Улпыл хо̄нтлуӈкв тотыматэ э̄лыпāлт вāрум э̄рыгте̄тэ. Туп ты э̄ӈкварп э̄рге та мāнавн хӯлистэ. Тав 1903 тāлт самын патыс ос мāньполь э̄тпост 1943 тāлт та порславес. Хо̄т пыл хо̄нтлыс – торыӈ ат иӈ вāглум, интернет хосыт туп ты хансым лāтыӈ хо̄нтсум. Тав ул Ленинград ӯс ляпат порсыс, мāн мāньщи мāхманув сāвыӈпāлэ тот ты хо̄нтлысыт. Микита А̄нъя пāвлыӈ хум о̄лыс. Яныгпāла рӯтанум лāве̄гыт, тав сака номтыӈ, нёмса, кāркам, алщиӈ хо̄тпа о̄лум. Алыщлан мāнэ Сыс Консы я̄ нупыл о̄лмыт. Э̄кватэ Ромбандеева Прасковья (Пāрыска) Ивановна Мувынте̄с пāвылныл о̄лыс. Ты ам ащо̄йкам, Ромбандеев Иван Петрович, сāр э̄кватэ о̄ньщиглам āгитэ. Ня̄враме самын патум юипāлт, нэ̄кве хотталь щалтыс. Наме ат вāглӯв. Ащо̄йкам оматэ̄нтыл ня̄врам та янмалтастэ̄н. Ётыл ам ане̄квамтыл, Сайнахова Мария Дмитриевна ёт акванминасы̄г. Сāвитэ̄т ат āги но̄хпатталāлсы̄г. Гоголев Микита э̄кватэ̄нтыл тит пыг янмалта̄лсы̄г, Ищтапан ос Митри. Сас А̄нъя пāвылт о̄лсы̄г. Ищтапан сāр э̄кватэ̄ ёт о̄ньщиглам āгитэ̄н хо̄т Москват о̄лы, ёты э̄кватэ̄нтыл тай ня̄врам ат о̄щсы̄г. Митри пыге̄н ща̄не нупыл сака вориӈыг лāвылтавес, нас тай мо̄т э̄лумхо̄ласыт нупыл ёмас хо̄тпа о̄лум. Щāне, Пāрыска, сака хотмус ля̄втыӈ нэ̄ о̄лум, пыге э̄рпыщтāл о̄ньщистэ. Хунь пыге нэ̄ тотуӈкв номылматас, щāне щар тув ат кāсащас. Та паттат Митри няхыгсохыг та порсыс. Ань таве̄ныл туп пыге хультыс. Тох та Микита колтāглэ мощщамлас. Э̄рге э̄лаль э̄ргын хо̄тпа воссыг ул āтим. Мāн хумпал рӯтанув пуссын няхыгсохыг ще̄лумтасыт. Яныгнув хум мāхманув пуссын репрессия порат порславе̄сыт: ащо̄йкам Ромбандеев Иван Петрович Ӯнтари āпщитэ̄нтыл, ос вāпсэ – Хозумов Данил Васильевич (Мāрья э̄ще о̄йка), тав āще ос каӈке ёт порславес. Ане̄квам āпщитэ – Сайнахов Иван Дмитриевич. Тувыл яныгпāла ню̄сманыл о̄с пуссын порславе̄сыт. Ётыл хультум хум мāхманув хо̄нтлын мāт порсысыт: ащо̄йкам āпщитэ – Ромбандеев Илья Петрович, тувыл хӯрум āӈкпыганэ – Ӯнтари āпщитэ пыгыг – Ромбандеев Василий Андреевич ос Ромбандеев Константин Андреевич, ос Марья э̄ще пыг – Хозумов Ефим Данилович. Ане̄квам о̄с сāв рӯтанэ хо̄нтлым мāт порсысыт: āпщитэ – Сайнахов Устин Дмитриевич, Окопья э̄ще хум – Сайнахов Павел Фомич, О̄нища э̄ще хум – Хозумов Пётр. Хум тāл хультум нэ̄ хо̄тпа рӯтанув пуссын ня̄враманыл хотмос нуса тотым, тэ̄тāл харальпил но̄х та патталасаныл… То̄нт хо̄ныг ӯнлум мāхмытн мāньщиянув тамле пилыщматыл нас роттыг о̄лыманыл та суссылтаве̄сыт. Гоголев Микита Иванович мāнавн хӯлюм э̄рге самвиттāл наспыл ловиньтаӈкв ат ве̄рмаве. Сыме тāк хо̄тпан э̄ргаве те – та э̄ргаве. Рущ лāтӈыл о̄с толмащлым о̄лы. Тыгыл э̄лаль мā тармыл о̄лнэ миртенув роттыг вос о̄лнувыт. Хо̄нт пуӈк тотнутанувн халмалтахтуӈкв хоса хунь, мā янытыл няхыгсохыг мир та порсы. Тамле пилыщма юипāлт ёмасмахтын наке сака тāрвитыӈ. Манасāвит нот кос вос ювле хульты, пилыщма о̄лум нак нэ̄мхуньт ат ёрувлахты. Āнъя пāвыл Микита э̄рге Ювана о̄йкаго мāнь Микитага Со̄тыӈага хума ама осаго тыя. А̄нъяго пāвыла Харага нёлкема, Мисыке̄на пукайа Харага нёлкема, Щёпырке̄на пукайа кисыӈага нёлкема. А̄нъяго пāвыла мāнь Микита Хума таго э̄рганатāлыгалыкема. Мувыӈке̄са нэ̄га юртыгоаквега, Наӈ ула ля̄втэ̄на, наӈ ула ля̄втэ̄на, Наӈ ула кантлэ̄на, наӈ ула кантлэ̄на! Āс мāхум кега ёхтыгалыкве̄та, Тāгт мӯй хум ке ёхтанотāлыгалāлы, Мӯй хум ӯнлынэ̄га ёмаса пасана Наӈ о̄саго ӯнттанотāлыгалэкена! Мувыӈке̄са нэ̄га юртыгакве, Хāрыке̄на нё̄выльа тāглыӈа пасана, Ӯйике̄на нё̄выльа тāглыӈа пасана Наӈ о̄саго ӯнттэ̄на, наӈ о̄саго ӯнттэ̄на! Мувыӈке̄са нэ̄га юртыгакема Со̄тыр солко̄вия тыныӈа вильтума – Вильтум ула э̄ссамотāлыголэ̄кена, Со̄тыр солко̄вия ёмаса пуӈкума – Пуӈкум ула тэ̄лыготāлыглэ̄кена! Нāӈкие̄на о̄саго аламагатыйа, А̄виӈа колыго коныо пāлн-ā, Кона ке квāланотāлыглыке̄ма, Ам путума йӣва кит товтагума Атыкена туляпа туляӈ кит лāгылна Ама кега вотанотāлыголыкема, Щакариӈ лэ̄гпа ты кита кӯтювагум ёта Ама кега ё̄манотāлыголыкема, Хāрыӈага лё̄ӈха ё̄мыглыкема, Ӯйиӈага лё̄ӈха ё̄мыглыкема. Карыса йӣвыго котьлигокве̄ныла, Ама о̄са минанотанэ̄кема, Лэ̄лэна йӣвыго тальхыгоквеныла О̄йка та ё̄манотāлыглыкема. Хāр ня̄влуӈквего тапыл та хāснэма, Ӯй ня̄влуӈквего тапыл та хāснэма – Āнъяго пāвыла мāнь Микита. Мувыӈке̄со нэ̄га юртыгаквега, Хāрыке̄на нё̄выльа тāглыӈ āмпараме̄на Мо̄рсыӈаго ӯнланотанэ̄ке̄тэ, Ӯйике̄на нё̄выльа тāглыӈ āмпараме̄на Мо̄рсыгаго ӯнланотанэ̄кетэга. Ам путума йӣва кит товтагума Щакариӈ лэ̄гпа кит кӯтювума Хотале минанотāлы̄кетэ̄на, Тувле та коянотāлы̄глыкема. Хāр ня̄влынэ̄го кит товтагума, Хāрыкена нё̄выльа тāглыӈа суна О̄йка та хартанотāлы̄голыкема, Ӯйикена нё̄выльа тāглыӈа суна О̄йка та хартанотāлыголыкема. Тайигоке̄ма юиго палтага Сорока первойа ёмаса тāла пората Тāл тага ань ёхтаноталыглама. Сорока первойа ёмасагатāла Мāнкевага тыйо аламате̄тэ. Тāгтэна пāвыла сāв хумикева, Āсэ̄на пāвыла сāв хумикева Тӯрыке̄на щираго войкана хāпна, Āсыкена щираго войкана хāпна Пуссын та тāлттанотāлымава. Тӯр по̄х о̄лнэго āгиӈа сāв ӯса, Āс по̄х о̄лнэго пыгыӈа сāв ӯса Хульнэго сакиго ёмаса о̄выла Хумит та хулянотанэ̄кева. Хотальо тотанотанэ̄гокева? ! Алыкена ща̄рыща патытэ нупыла, Алыкена Āсыго патытэ нупыла Хотале тотанотанэ̄кева? ! Ке̄рыӈ хо̄нтыга ёлыга пāлнаго, Караснай армийо яныга мāгылна, Караснай армийо пāхвыӈ ань мāгылна Мāна таго тотанотанэ̄гокеваго. Мāн тотнэ̄кеваго юигопāлта Āгиӈ колыго āгиякенува, Пыгыӈ коланува хӯлюмакева, Āгиӈ коланува хультыке̄на! Э̄тгаланэго сыманыл е̄ра Хотл ул та пойилотанэ̄гокеныла? ! По̄льнэго алпиго о̄вылокеныла, Хотл ул та ре̄гылотанэ̄кеныла? ! Ракв ке аньа патанотанэ̄гокетэга, Э̄тыголанэго сымыкеныл е̄ра Тувыл о̄са по̄йилотанэ̄кеныло! Во̄т кего патанотанэ̄гокетэ, По̄льнэго алпиго о̄вылкеныла Тувыл оса ре̄гтыголанэ̄кеныло! Āсэна пāлыго сāв хумиквега Тāгтэна пāлыго сāв хумиквега Сорока первойа ёмаса тāла Караснай армийо яныго мāгылна Мāна таго ань тотанотанэ̄кева. Āгийаго о̄ньщама сāв юртанува О̄с ёмас ӯлума хультэ̄кена, о̄с пащаквего хультэ̄ке̄наго Тапыл та тотанотаве̄кева… Ты э̄рыг Е. И. Ромбандееван Венгрия яныг учёный нэ̄ Ева Адамовна Шмидт мистэ. Тав толмащластэ, ос э̄лаль ам мощ о̄с щё̄питаслум.

1123 2016. 05. 12. Галина КОНДИНА

То̄рум ва̄рнэ хо̄талыт урыл Газета ловиньтан я̄тил ма̄хумте̄нув! Ты ло̄псыт ма̄н на̄нан то̄рум ва̄рнэ хо̄талыт урыл хансэ̄в, хумус э̄тими, хо̄тыллы, тэ̄лыми манос туйими. То̄рум ва̄рнэ хо̄тал – погода Тӯя – весна; Туи – лето; Тэ̄лы – зима; Таквсы – осень; Хо̄тал – солнце; Хо̄тал – день; Э̄т, э̄ти – ночь; Э̄тпос – луна, месяц; А̄лпыл – утро; Э̄типа̄ла – вечер; Тул – туча; Сов звезда; Ащирма – холодно; Ре̄гыӈ– жарко; Сэ̄кв – прохладно; Вольк – скользко; Тӯйи – снег идет; Ракви – дождь идёт; Во̄тасты – метёт; Ипырты – заметает, кружит; Сэ̄гиты – ветер с мелким снегом; По̄льсамыл мины – град идёт; Турап хо̄тал – дождливый, пасмурный день; Во̄тыӈ хо̄тал – ветреный день; Хо̄талыӈ хо̄тал – солнечный день; Аквте̄м хо̄тал – пасмурный день; Тӯйт – снег; Ракв – дождь; Тӯйтсам – снежинка; Раквсам – дождинка; По̄льсам – град; Во̄т – ветер; Во̄тпыг – вихрь; Я̄ӈк соль – сосулька; Тӯйт поталы (тӯйт ня̄л) – снежок; Нюлытис – радуга; Нюлы а̄ӈквал – неполная радуга; Щищнай – северное сияние; Щахыл – гроза; Щахыл во̄т – гроза с ветром; Щахыл са̄лы – молния сверкает; Колаланыл ёлаль па̄сги – капает с крыши; Туииг е̄мтыс – наступило лето; Тэ̄лииг е̄мтыс – наступила зима; Тӯяг е̄мтыс – наступила весна, пришла весна; Таквсыиг е̄мтыс – наступила осень; Тӯяхлаӈкве – весновать; Таквсылтаӈкве – осеневать; Я̄ӈкыг оратас – обледенело; Сэ̄ӈквыг е̄мтыс – туман поднялся; По̄льсовыӈыг е̄мтыс, по̄лиг е̄мтыс – появился наст; Тӯюӈкве патыс – пошёл снег; Раквуӈкве патыс – пошёл дождь; Ре̄гыг е̄мтыс – наступила жара; Ащирмаг е̄мтыс – наступили холода; Во̄тасыг е̄мтыс – метель началась; Тӯйтравыл парги – идёт мелкий снежок; Раквсамыл парги – идёт мелкий редкий дождь; Э̄типа̄лаг сэ̄квыг е̄мтыс – вечером стало прохладно; Хо̄тал ӯнтыс – солнце село; Хо̄тал нэ̄глыс – солнце встало; Э̄тпосыӈ э̄т – лунная ночь; Турман э̄т – тёмная ночь; Э̄тимаӈкве патыс – начало вечереть (темнеть); Турманлаӈкве патыс – начало темнеть; Сатапаӈкве патыс – только начало темнеть;

1123 2016. 05. 12. Галина КОНДИНА

Нэ̄пак ловиньтаӈкве ма̄ньта̄гыл э̄ри Ань йист ка̄сыӈ хо̄тпа нэ̄пак ловиньтаӈкве ха̄сы. Ос са̄всыр ищхӣпыӈ утыт нэ̄глысыт, ня̄врамыт, ма̄ньлат ма̄хум ос то̄ва яныгпа̄ла хо̄тпат тув сунсым матыр ловиньтэ̄гыт. Ос ма̄хум нэ̄пак ловиньтаӈкве ул вос ёрувлыяныл, таима̄гсыл ань ка̄сыӈ тӯя яныгпо̄ль э̄тпост «Библионочь» нампа ялпыӈ хо̄тал ва̄рыглаве. Э̄типа̄лаг ос э̄т котиль мус пуссын библиотекат рӯпитэ̄гыт. Ты та̄л кинат урыл ма̄хум титыглаве̄сыт. Ня̄врамыт ма̄гсыл нэ̄пак ловиньтан колт рӯпитан нэ̄квет сака пӯмыщ ёнгил ва̄рыгласыт. Аквтуп ня̄врамыт на̄иӈтуйтыл минэ̄гыт, тав «Кинотрамваиг» ла̄ввес ос миннэ̄ныл мус хо̄та̄ти хо̄иглэ̄гыт. Тот та̄н титыглавет, ёнгалтавет. Ёлпо̄йтсын ма̄ныл тох ла̄вве̄сыт «Мультландия», «Карандашкина», «Пазломания», «Музыкальная полянка». Акв ма̄т пластилиныл са̄всыр хурит по̄щгысыт, ня̄кщалтасыт. Мо̄т ма̄т кинат ос мультфильмыт урыл хурит ка̄тыл по̄слысыт. Юио̄вылт кинал суссылтаве̄сыт, мо̄йт «Варвара – Краса, длинная коса» о̄лыс. А̄гирищквет ос пыгрищаквет тот ща̄гтым ёнгасасыт ос юв ёмас номтыл минасыт.

1124 2016. 05. 26. Александр ВЬЮТКИН

Округ наме пе̄нтуӈкв тахвес Яныгпо̄ль э̄тпост округ соссаӈ мир ёт рӯпитан Ассамблея колт заседание о̄лыс. О̄лум сапра̄нин губернатор Аппаратыт кӯщаиг о̄лнэ нэ̄ Ольга Белоножкина ёхталас. Тыт о̄лнэ яныгпа̄ла соссаӈ ма̄хум тув о̄с во̄виньта̄лве̄сыт. Тот ат са̄всыр тэ̄ла урыл потраныл о̄лыс. Та̄н халанылт щар ма̄к ань о̄лнэ округ нам мо̄т щирыг намаяӈкве тахвес, ва̄тииг ла̄вуӈкве Югра. Ма̄н соссаӈ ма̄хманув ос Ассамблея депутатыт округ наме мо̄т щирыл намтуӈкв щар ат ка̄сащасыт. Таима̄гсыл соссаӈ депутатанув округув наме хуритэ̄тыл хультуптаӈкв таӈхияныл. Ольга Белоножкина то̄нт ла̄выс: «Соссаӈ ма̄хум, на̄нти о̄щнэ номтанын аквписыг тох те тармыл патсаны̄н, на̄нан ат э̄рнэ са̄кконыт атыпыл пирмайтанувет! » Александр ВЬЮТКИН хансыс ос хури ва̄рыс.

1124 2016. 05. 26. Николай МЕРОВ

Кинат урыл потрыт ловиньтаве̄сыт Ты та̄л Россия янытыл кина янытлан та̄лыг ла̄ввес. Ань суссылтан кинат пуссын нэ̄пакн хансым потрыт хосыт по̄слым о̄лэ̄гыт. Ты накт са̄выӈпа̄лэ кина по̄слын хо̄тпат та̄нки о̄с нэ̄пакыт та̄ратэ̄гыт. Ты кастыл мо̄лал Ханты-Мансийск ӯст нэ̄пак ловиньтан колт «Библионочь» нампа ва̄рмаль о̄лыс. Ань ты порат «Югорские ваганты» нампа литература э̄лаль тотнэ ма̄ньлат ма̄хум акв пӯмащ ва̄рмаль щё̄пита̄лсыт. Та̄н тот атхатыглам мир ма̄гыс кинат э̄ргыглым э̄ргыт э̄ргысыт, кина хосыт суссылтым мо̄йтыт ос стихотвореният ловиньтасыт. Ты ловиньтан тэ̄ла хосыт ма̄хум та̄ра хащсыт, манырсыр кина урыл потыр о̄лыс. Та хо̄тал нэ̄пак ловиньтан колн са̄в яныгпа̄ла э̄кват ос о̄йкат, ма̄ньлат а̄гитпыгыт ос ма̄нь ня̄врамыт ёхталасыт. О̄выл колнакт «Читаем кино» нампа выставка мӯй ма̄хум ма̄гыс рӯпитас. Тот пе̄с кинат ос ань ва̄рнэ кинат урыл суссылтап о̄лыс. Ты кинат пуссын нэ̄пакыт хосыт по̄славет. Тувыл яныг хо̄нт урыл «А поле боя держится на танках» нампа выставка о̄лыс. Тот танкыт урыл ма̄хумн потыртавес. То̄ва хо̄тпат танкыл яласан порат пуӈкыт о̄щнэ ке̄нт но̄хпинумта̄лым по̄слахтасыт. Ты коныпал тот пе̄с порат кина по̄слын утыт суссылтаве̄сыт. Ма̄хумн ты тэ̄ла сака мӯстыс. Хотьют ка̄сащас, та̄н я̄нас колнакт «Кавказская пленница» манос «Приключения Шурика» ос мо̄т кинат сунсуӈкве ве̄рмысыт. Ня̄врамыт ма̄гыс ос мо̄йткинат суссылтаве̄сыт. Тот та̄н ма̄гсыланыл са̄всыр пӯмыщ ёнгилыт щё̄пита̄лве̄сыт. Тув ёхталам э̄лумхо̄ласын сака пӯмащ о̄лыс. То̄ва хо̄тпат нас ӯнлахо̄лым нэ̄пак ловиньтасыт, то̄ват кина суссыт манос суссылтым кинат урыл потыртасыт ос мо̄т са̄всыр ва̄рмаль ва̄рсыт. Та э̄т ка̄сыӈ хо̄тпа ща̄гтым тот о̄лыс.

1124 2016. 05. 26. Галина КОНДИНА

Са̄кконыт э̄лумхо̄лас ма̄гсыл вос рӯпитасыт Мо̄лал округ депутатанув акванатхатыгламаныл порат ва̄т нупыл хо̄т са̄ккон урыл потыртасыт, ос то̄ват пирмайтасыт. Ты сапра̄нит та̄н округ бюджетын олн нё̄тнэ са̄ккон пирмайтасыт, тув 3, 8 млрд. солко̄ви та̄стувес. Ты на̄лок ос мо̄т олныт мощ акванатхатсыт, та̄нанылтыл ань социальный найм щирыл кол ӯрнэ ще̄мьят колытыл ёвтавет. Мир пусмалтан ва̄рмаль олныл миве, лё̄ӈхыт ва̄руӈкве олныт мивет, пе̄сыг е̄мтум колыт хотщё̄питым рӯпитан Югорский фонд капитального ремонта о̄с тыгыл олныл та̄ставе. Ань туи на̄й харыгтан ма̄гсыл ос тувыл олн тах та̄ставе. Мир пусмалтан программаныл ты олныт Сургут ӯсн мивет, тот ӯнттын пӯльница а̄стлаве. Тот нэ̄ хо̄тпат пусмалтан ос ущ самын патнэ ня̄врамыт ма̄гсыл пӯльница ӯнттаве кос, иӈ а̄стлаӈкве ат ве̄рмаве. Ос акв са̄ккон то̄ва ла̄тӈытыл мощ нё̄твес. Ань таквсы сӯкыр э̄тпост нэ̄пак та̄ратан ва̄рмаль тах паты. Ты кастыл са̄кконын таи хасвес – депутатыг пе̄риян хо̄тпа мир э̄лыпа̄лт потыртаӈкве такви вос ёхты. Ты э̄лыпа̄лт тох о̄лыс, тав хотты партият те о̄лы, тав пе̄нтсылэ партия хо̄тпанэ потыртаӈкве ве̄рмысыт. Ань туп хо̄тпа такви вос мирн потырты, хумус нё̄туӈкв ве̄рми, хумус рӯпитаӈкв паты. Титыт ва̄рмаль – хунь нэ̄пак та̄ратан ва̄рмаль оигпи ос ма̄хум хунь бюллетеньнэ̄пакыт ловиньтэ̄гыт, тот ка̄сыӈ партияныл туп тит хо̄тпа сунсуӈкве та̄ртаве. Хӯрмит ва̄рмаль – кандидатыг о̄лнэ хо̄тпа хотты э̄лумхо̄лас ёт по̄слахтуӈкве ос яныг хури ва̄руӈкве те паты, та э̄лумхо̄ласэ̄ныл хасхатым нэ̄пак вос выг, рущ щирыл ла̄ваве – «письменное согласие».

1124 2016. 05. 26. Александр ВЬЮТКИН

Ня̄врам янмалтым роттыг о̄лэ̄н Ханты-Мансийск ӯст «ВИЧ» нампа пилыщмаӈ а̄гм урыл потыр о̄лыс. Ля̄ххал тотнэ ма̄хумн ты лю̄ль а̄гм урыл таве пусмалтан ле̄ккарыт потыртасыт. ВИЧ а̄гм са̄выӈпа̄лэ ма̄ньлат ма̄хум а̄гмыг ловиньтаве. Юио̄выл хӯрум та̄л сыс округув янытыл ты а̄гмыл сака са̄в ма̄хум сорумн патсыт. Ты та̄нтина̄нылн лю̄ль тэ̄рпи те̄лпта̄рс хосыт та̄ратан ма̄хум, касна колт ӯнлын ос моринув о̄лнэ хо̄тпат халт ты а̄гм сака молях ла̄кквамины. А̄гм нас тох та̄рапаттуӈкв ат ве̄рмаве. Те̄лп анализыг виве ос тащирыл тав та хо̄нтаве. Таве̄ныл а̄гмыӈ хо̄тпат та̄нти нэ̄матыр ат торгамтэ̄гыт. А̄гм ёт хоса сытамыг ве̄рме̄гыт о̄луӈкв. Тащирыл о̄лнэ̄ныл ма̄гсыл то̄ва хо̄тпат акванхуйигпа̄лнэ̄ныл порат пилыщмаӈ а̄гмыл та ха̄ӈхавет. Александр Вьюткин хансыс ос хури ва̄рыс.

1124 2016. 05. 26. Тамара МЕРОВА

Рӯпатаныл мӯсхалыг ва̄рияныл Округ янытыл о̄лыглан сыресыр лю̄ль накыт полициян ос ты тэ̄лат ёт рӯпитан службат пуссын та̄рапаттыяныл. Та̄н «Безопасный город» нампа ва̄рмаль щирыл о̄лупсав уральтыяныл. Ань ты о̄вылтыт са̄всыр службат рӯпитан кӯщаит ля̄ххал тотнэ хо̄тпатн потыртасыт. Полицият подполковникыг о̄лнэ хум Евгений Еськов ла̄выс: «Ма̄н «Безопасный город» системав рӯпитан ма̄гыс са̄в ма̄т видеокамерат ӯнтталасӯв, тыи са̄в ма̄хум аквторыг акванатхатыгла̄лнэ ма̄т, пӯльницат, са̄всыр рӯпитан колыт ос лё̄ӈх ӯсхулыт. Тув сунсым ӯст о̄лнэ ма̄хум лю̄ль ва̄рум наканыл пуссын та̄рапаттыянӯв. Ты та̄л сыс ма̄н онтолов лю̄ль нак та̄рапаттысӯв ос лю̄ль ва̄рум хо̄тпат хо̄нтсанӯв. Тувыл лё̄ӈх хосыт ма̄шинал лю̄льсаӈ яласан хо̄тпат ос молях хо̄нтавет». Округ янытыл тамле камерат 2004 та̄лныл хо̄та̄ти ӯнттуӈкве патве̄сыт. Ань тыг мус 1 со̄тыра 26 камерат рӯпитэ̄гыт, ос та̄н ка̄сыӈ ма̄т уральтым о̄ньщавет. То̄ват сака пе̄сыг е̄мтсыт, та̄н пе̄нтуӈкве э̄ре̄гыт. Ань округ бюджетныл 115 млн солко̄ви та̄стувес. Ханты-Мансийск ӯст ты тэ̄лат уральтан кӯщай ва̄ӈын хум Андрей Кузнецов потыртас: «Ма̄н ӯсув янытыл ань 195 видеокамерат рӯпитэ̄гыт. Тыи 144 камерат щирыл ма̄хум тыглетувле яласан лё̄ӈханыл сунсавет ос 51 утыт лё̄ӈх хосыт яласан ма̄шинат уральтавет. Ань ос йильпи ищхӣпыӈ камерат ӯнттуӈкве патэ̄в, пе̄с утыт хотпе̄нтуӈкве э̄ре̄гыт. Йильпи утыт хосыт тӯлмантан манос матыр сакватан э̄лумхо̄лас ищхӣпыӈ утыт вы̄гыр по̄сыл на̄ӈки. То̄нт полицият рӯпитан хо̄тпат таве э̄лаль уральтыяныл, мо̄т лю̄ль тэ̄ла ул вос ва̄рыс. Тамле хо̄тпат ма̄н базавт ищхӣпыӈ утанувт по̄слым ос хансым о̄лэ̄гыт».

1124 2016. 05. 26. Николай МЕРОВ

Йӣвыт ӯнттуве̄сыт Ань округувт ма̄вит ӯргалан ва̄рмаль рӯпиты. Ты кастыл ӯщлахтын хо̄талт ма̄хум Ханты-Мансийский район Ярки па̄выл по̄хыт «Лес Победы» нампа ма̄т ма̄нь йӣвыт ӯнттысыт. Ты ва̄рмаль ма̄гыс Екатеринбург ӯсныл ма̄вит ӯргалан яныг кӯщай хум Вячеслав Дробышев, округ ма̄вит ос несырьевой экономика департаментыт кӯщай хум Евгений Платонов ос мо̄т са̄в мир тув ёхталасыт. Вячеслав Дробышев ла̄внэ̄тэ щирыл, йӣвыт ӯнттын ва̄рмаль тыт сака ёмщакв щё̄питым о̄лы. Мо̄т ма̄т халт Юграт щар са̄в йӣв ӯнттаве. Ты рӯпата ма̄гыс тав ма̄хум сака янытла- санэ. Евгений Платонов ла̄выс: «Ань ты накт ма̄нь йӣвыт округув янытыл ӯнттавет. Тыт китыт та̄л «Лес Победы» нампа ва̄рмаль щё̄пита̄лаве. Ты хосыт ма̄н хо̄нтлум ма̄хманув номиянув. На̄н на̄нки ос хотты порат ты ма̄ та̄ра минуӈкве патэ̄гын, ты ёмас тэ̄ла урыл номылматыгла̄лэгы̄н тах. Ла̄ве̄гын, ам тыт ос йӣв ӯнттысум. Ань тыт хара ма̄г о̄лы, на̄н хосытынт хуньт тах яныг во̄рыг е̄мты. Ка̄сыӈ хо̄тпа акв йӣв ке ӯнтты, во̄рув са̄вми». То̄ва ма̄хум во̄рн ще̄мьяӈ та̄гыл ёхталасыт. Ты ва̄рмаль ма̄гыс мо̄йтыт, стихыт, пе̄с йис потрыт нэ̄пакн хаснэ яныгпа̄ла ханты э̄ква Мария Кузьминична Волдина о̄с тув ёхталас. Э̄ква ла̄выс: «Ма̄витув акваг ӯргалым о̄ньщуӈкве э̄ри, тав мир ма̄гыс э̄лаль о̄лнэ хо̄тал тоты. Во̄рт тэ̄нэ а̄ращин ул хультуптэлы̄н, наскассыг йӣвыт ул сакватэ̄н, порс мори ул па̄хвтэ̄н. Во̄рув ма̄н ма̄гсылув са̄в тэ̄п ва̄ри. Тот са̄всыр пил тэ̄лы, ла̄хыс яныгми, ӯльпат са̄в па̄кв понсы. Со̄тыӈ ма̄ке̄в аквъёт ӯргалаӈкве патылӯв». Нила гектар палыт ма̄ ма̄гыс хо̄тхуйпловкем со̄тыра са̄вит ма̄нь ӯльпат та̄стым о̄лсыт. Ӯльпа ма̄нн ӯнттын ма̄гыс пуссын аквъёт хӯрумса̄т арыгтем э̄лумхо̄лас тув атхатыгласыт. Ма̄тэ лов участок щирыл ла̄кквауртым о̄лыс. Ка̄сыӈ ма̄т ма̄хум хӯрум манос нила ра̄т щирыл йӣвыт ӯнттысыт. Йӣв ӯнттын ма̄т палытаныл китса̄ткем метра о̄лыс. Йӣвыт ӯнттын ма̄ныл астум ма̄хум, хо̄нтлум рӯтаныл наманыл па̄рт тармыл хассаныл. Тот ня̄врамыт ма̄гыс пӯмащ ёнгилыт щё̄пита̄лве̄сыт. Хотьют ка̄сащас, атыӈ каша тэ̄пъялас, исум ща̄й аис. Ка̄сыӈ хо̄тпа тот ща̄гтым о̄лыс.

1124 2016. 05. 26. Тамара МЕРОВА

Ёмас тэ̄лат ва̄ре̄гыт Некоммерческий организацият, мо̄т щирыл ла̄ваве НКО, хумус рӯпитэ̄гыт, ты урыл ля̄ххал тотнэ хо̄тпат э̄лыпа̄лт Общественный палатат пуӈктотнэ нэ̄ Ирина Максимова потыртас. Тав коныпалэ Нягань ӯс думат кӯщай ва̄ӈын хум Владимир Гульзаров, «Общее дело» нампа Россият о̄лнэ са̄в мирыт ёт рӯпитан нэ̄ Татьяна Бакланова, общественный ос внешний связь округ департаментыт тамле ва̄рмалит уральтан ос э̄лаль тотнэ хум Яков Самохвалов тот о̄с потыртасыт. Округув янытыл кит со̄тыра са̄вит тамле организацият рӯпитэ̄гыт. Та̄н ма̄хум ма̄гыс са̄всыр нё̄тмил ва̄ре̄гыт, то̄внакт нас то̄рум ма̄гыс нё̄тэ̄гыт. Ма̄хум сыресыр о̄лнэхӯлнэ ва̄рмаляныл, олннё̄тмил во̄внэ ос та̄рвитаныл по̄ханла̄квтын ма̄гыс ла̄тыӈ китыглаӈкве та̄н палтаныл ёхталэ̄гыт. Тувыл тамле нё̄тмил ёмщакв ва̄нэ ма̄гыс ос та̄наныл э̄лаль тотнэ щирыл некоммерческий организацият рӯпитан ма̄хмытн о̄с матыра̄ти ва̄ӈкве э̄ри. То̄нт та̄н ханищтахтуӈкве ялэ̄гыт манос са̄в ма̄ныл акванатхатыгланэ̄ныл сыс та̄нки халаныл ханищтахтэ̄гыт. Та̄н акванхо̄нтхатыглан ма̄гыс мирн нё̄тнэ нампа ярмаркал ва̄рыглавет. Тох са̄всыр департамент кӯщаитн общественный колыт нилыттыг акванатыглаве̄сыт. Тот ка̄сыӈ э̄лумхо̄лас таквинатэ̄н э̄рнэ ва̄рмалит та̄рапаттыс. Округувт онтолов программат щирыл ты ма̄хум ма̄гыс онтас ва̄раве. Са̄т департаментыт сыресыр касылыт щё̄питэ̄гыт. Ты щирыл рӯпитан хо̄тпат проектыт вос хансэ̄гыт ос но̄хпатнэ̄ныл порат грантолныл мивет тах. Некоммерческий организацият то̄ва тэ̄лат ва̄рнэ ма̄гыс государство па̄лыл олныл нё̄тавет. Мо̄лты та̄лт Президент фондэ̄ныл ат организацият грантолныл майлуве̄сыт, округ па̄лыл 140 колыт олныл та̄стуве̄сыт. Я. Самохвалов таи ла̄выс: «2016 та̄лт тамле колыт тэ̄ланыл э̄лаль ва̄рнэ щирыл 16 млн. солко̄ви та̄стувес. Ты олнытыл ма̄н яныгса̄т са̄вит проектыт олныл нё̄тыянӯв. Ма̄хум 18 са̄всыр тэ̄лат щирыл касуӈкве ве̄рме̄гыт. Та̄н ань проект вос щё̄питэ̄гыт ос касэ̄гыт. Ты та̄л Президент фондэ̄ныл са̄в олн та̄стувес, тувыл 4, 5 млрд. солко̄ви миве. Тыи мо̄лты та̄лныл 360 млн. солко̄вин са̄внувег о̄лы». Тувыл Т. Бакланова Нягань ӯст о̄лнэ общественный колыт маныр ёмас тэ̄лат ва̄ре̄гыт, ты о̄вылтыт потыртас. Та̄н са̄выӈпа̄лэ программаныл щирыл ма̄ньлат хо̄тпат ёт рӯпитэ̄гыт. Ма̄ньлат а̄гитпыгыт хохса ул вос хартэ̄гыт, вина ул вос ае̄гыт, матыр мо̄т лю̄ль пищ ул вос о̄ньщегыт – ты о̄вылтыт ня̄врамыт ёт акваг потыртэ̄гыт ос ла̄вияныл, а̄гирищитпыгрищит ма̄ньта̄гыл спорт нупыл вос сунсэ̄гыт. Мо̄т ва̄рмаль о̄вылтыт В. Гульзаров таи ла̄выс, школат рӯпитан ма̄хум пусмалтахтым вос о̄лсыт. Таима̄гыс общественный рӯпата ва̄рнэ коланыл Няганьский поликлиника ос Няганьский окружной пӯльница ёт акваннё̄тхатнэ ма̄гыс нэ̄пак хассыт. Тох та̄л сыс ня̄врамыт ӯщлахтынэ̄ныл порат ханищтан хо̄тпат пусмалтахтуӈкве ке̄тыглавет. Та̄н та̄нки олн ат ойтэ̄гыт, ань тыг мус кит со̄тыра э̄лумхо̄лас пусмалтахтасыт. Мо̄т ӯсытыт мирн нё̄тнэ рӯпитан колыт ос са̄в ёмас тэ̄лат ва̄ре̄гыт. То̄ват нэ̄мхотыл олн ат ӯре̄гыт, то̄рум ма̄гыс нё̄тэ̄гыт. Ма̄хум халт «волонтёрство» ва̄рмаль сака ёмасыг о̄лы. Та̄н ань Победа хо̄тал кастыл са̄в рӯпата акваг ва̄ре̄гыт, ветеран хо̄тпатн нё̄тэ̄гыт.

1124 2016. 05. 26. Николай МЕРОВ

Ла̄пкат тыналан вина уральтаӈкве патаве Яныгпо̄ль э̄тпост Ханты-Мансийск ӯст ля̄ххал тотнэ колн Уральский Федеральный округ янытыл вина тыналан ва̄рмаль уральтан кӯщай хум Юрий Владимирович Чащин ёхталас. Тав ла̄выс, ань тыналан винат акваг уральтаӈкве патавет. Ла̄пкатын ищхӣпыӈ утыт ӯнттавет, рущ щирыл «ЕГАИС – Единая государственная автоматизированная информационная система» ла̄ваве. Юио̄выл та̄лытыт сака са̄в лю̄ль вина тыналаӈкве патвес. Мо̄лты та̄л сыс Югра ма̄вт кит со̄тыра арыгтем литра вина хотвуйвес. Ощмарыӈ хо̄тпат вина сытамыг сульян со̄сантыяныл, тув са̄всыр лю̄ль вит тэ̄лыгтэ̄гыт. Тамле вина айнэ хо̄тпат та̄рвит а̄гмыл е̄мтэ̄гыт, то̄ва хо̄тпат тыил хотталь щалтэ̄гыт. 2015 та̄лт №182-ФЗ федеральный са̄ккон мощ мо̄т щирыл хасвес. Ань ты та̄л та̄л котиль э̄тпос о̄выл хо̄талныл айнэ ут тыналан ла̄пкат ищхӣпыӈ утытыл ва̄руӈкве ла̄вве̄сыт. Ты ва̄рмаль щирыл вина ёвтнэ э̄лумхо̄лас та̄ра компьютер хосыт интернетыт сунсуӈкве ве̄рмитэ, хоты ма̄ныл ты вина тотвес. Ты ищхӣпыӈ ут хосыт ёмщакв на̄ӈки, вина хоты заводыт ва̄рвес, хо̄т ёвтвес, хоты лё̄ӈхыл ла̄пка мус тотвес. Кӯщай хум ла̄вме щирыл, ты вина э̄лумхо̄ласн ёвтнэ мус лё̄ӈхе акваг на̄ӈки. Лю̄ль вина хоты ла̄пкат тыналаве, таи та̄рака̄салаве, интернет палт вы̄гыр по̄с нэ̄глапи. Та ла̄пка кӯщай та̄ра штрафолныл хансаве ос ва̄тихал уральтаӈкве патаве. Ма̄н округувт ты та̄л лӯпта э̄тпос о̄выл хо̄талэ мус о̄влэ̄т ӯсыӈ ла̄пкатыт ты ва̄рмаль щё̄питаве. Па̄влыӈ ма̄т ос 2017 та̄л ойттур э̄тпос о̄выл хо̄талэ мус ва̄раве тах. Тамле ищхӣпыӈ утыл ва̄рим ла̄пкатыт ёвтым вина чекнэ̄паке̄т ты урыл хансаве, хо̄т ты вина ва̄рвес ос хотыл тотвес. Тувыл на̄нки юн интернет хосыт о̄с сунсыглаӈкве ве̄рмилы̄н тах. Яныгпо̄ль э̄тпос о̄выл хо̄талэ мус округувт 83, 9% вина тыналан ла̄пкат ос 100% аквторыг са̄выл, то̄тапыл вина тыналан организацият ты ва̄рмаль щирыл рӯпитаӈкве патсыт. Ты ищхӣпыӈ ут ва̄рнэ ма̄гыс са̄в олн ат э̄ри. Ла̄пкаӈ хо̄тпат компьютер о̄ньще̄гыт ке, та̄нанылн ты тэ̄ла щё̄питан ма̄гыс хӯрум со̄тыра атса̄т солко̄ви то̄вылхаты. Ос ты ищхӣпыӈ ут ат о̄ньщегы̄т ке, таи ёвтэ̄гыт, тувыл та, воссыг нэ̄матыр ат э̄ри.

1124 2016. 05. 26. Николай МЕРОВ

«Югория» нампа компания нё̄тмил ва̄ри Мо̄лал ля̄ххал тотнэ колн «Югория» нампа страховой компания кӯщай хум Алексей Охлопков ос ты компаният экономика ос финансы департаментыт рӯпитан кӯщай хум, Михаил Косенко ёхталасы̄г. 2015 та̄лт та̄н рӯпатаныл хумус минас ос ань э̄лаль хумус рӯпитэ̄гыт, тэ̄н ты урыл потыртасы̄г. Ты компания государство нупыл хансым о̄лы. Ань 64 со̄тыра та̄нки олн сэ̄лнэ хо̄тпат ос 1 млн. арыгтем нас хо̄тпат тув хансым о̄лэ̄гыт. Э̄лумхо̄лас такви о̄лнэ наке ӯргалан ма̄гыс матыр тэ̄ла щирыл страховканэ̄пак тот хансуӈкве ве̄рми. Тот хасхатам хо̄тпат ётыл хунь хотум е̄мтэгы̄т ке, тыи ма̄гыс та̄н олныл ойтавет. Ма̄хум коланыл на̄ин ё̄све̄сыт манос ма̄шинал яласан хо̄тпат сакватахтасыт ке, та̄н тувыл вуйлам страховканэ̄пак хосыт та̄ра олныл ойтавет. Тот пуссын аквъёт хус са̄всыр тэ̄ла щирыл ма̄хумн нё̄тмил ва̄раве. Ты компания тыныӈ нэ̄паканэ (акциянэ) округ мирколт о̄ньщавет. Кӯщаит ла̄всыт, 2016 та̄лт лӯпта э̄тпост ты компания иӈ 4 млрд. 295 млн. солко̄вин са̄вмалтаве. Ты ва̄рмаль яныгпо̄ль э̄тпос о̄выл хо̄талэ̄т округ мирколт сапра̄ни о̄лум порат пирмайтавес. Алексей Охлопков ла̄выс: «Ма̄н нила та̄л сыс рӯпатав мӯсхал щирыл щё̄питаслӯв. Пуссын акваннё̄тхатым рӯпитасӯв. Ань ты компания янытэ̄т государстван о̄ньщаве. Тыныӈ нэ̄паканув олныг пе̄нтыянув, ты хосыт 4 млрд. 295 млн. солко̄ви сэ̄лэ̄в. Нэ̄паканув олныг пе̄нтыянув, та̄наныл э̄рнэ тэ̄лан мыганӯв, ма̄н акваг олн сэ̄луӈкве патэ̄в. Ма̄ янытыл ма̄хум пуссын тох рӯпитэ̄гыт. Ты хосыт компанияв щёлыӈыг ос та̄ксарыг е̄мты. Ма̄н палтув страховканэ̄пак ва̄руӈкве иӈ са̄внув хо̄тпа тах ёхты». 2013 та̄лт «Югория» мо̄т яныг компаният халт 32 местат о̄лыс. 2015 та̄лт ты компания 23 местан патхатас. Та па̄сныл ань 13% са̄внув хо̄тпа ёхталаӈкве патыс. Ты компания 3 млрд. 85 млн. солко̄ви са̄вит олн о̄ньщи. Тыныӈ нэ̄пакыт палт ос 10, 5 млрд. солко̄ви са̄вит о̄лы. Россия янытыл ты компания атпан са̄вит ма̄т ма̄хумн нё̄тмил ва̄ри.

1124 2016. 05. 26. Тамара МЕРОВА

Ле̄ккарыт акванатхатыгласыт Я̄ӈк на̄тнэ э̄тпост округ янытыл яныг ле̄ккарыт акванатхатыгласыт ос та̄л сыс о̄лыглам са̄всыр тэ̄лат урыл потыртасыт. Ма̄хум манхурип а̄гмыл е̄мталэ̄гыт ос хумус та̄наныл пусмалтаӈкве ро̄ви, таи та̄рапаттысыт. Акв колнакт сым а̄гмыт пусмалтан ле̄ккарыт акванатхатыгласыт. Та̄н э̄лыпа̄ланылт сым а̄гмыт ханищтан ос пусмалтан колт кӯщаиг о̄лнэ ле̄ккарнэ̄ Ирина Урванцева ла̄выс: «Юио̄выл та̄лыт сыс сым ос ке̄лпта̄рс а̄гмыл са̄в ма̄хум а̄тимыг е̄мтсыт. Ань «Центр диагностики и сердечнососудистой хирургии» округ пӯльница рӯпиты. Тот ма̄хум пусмалтан ма̄гыс ма̄н пуссын матыра̄ти ва̄ре̄в. Э̄лумхо̄лас хоса ул вос савалас, ма̄н ищхӣпыӈ утыт хосыт а̄гме та̄ра хо̄нтылӯв ос пусмалтаӈкве о̄вылтылӯв. Мо̄лты 210 со̄тыра 756 э̄лумхо̄лас сым ос ке̄лпта̄рс а̄гманыл пусмалтаӈкве ма̄н палтув хасхатым о̄лсыт. Та̄н халанылт 31 со̄тыра 477 хо̄тпат о̄выл щёс а̄гмыӈыг е̄мтсыт. Ка̄сыӈ та̄л тамле а̄гм о̄щнэ хо̄тпат са̄вме̄гыт. Ты ма̄хум халт нёлса̄т хо̄тпат а̄гманыл янытэ̄т пусмалтаӈкве ма̄н та̄ра ве̄рме̄в. Ань са̄выӈпа̄лэ мир мо̄т ма̄ныл тыг о̄луӈкве ёхтэ̄гыт, та̄н халанылт са̄в матум хо̄тпат о̄лэ̄гыт. То̄ват а̄гманыл щар ат пусмалта̄лманыл, нэ̄матыр тэ̄рпи ат аймыт ос ётыл тыт а̄тимыг та е̄мтэ̄гыт. Та̄н ма̄н палтув хансавет, таима̄гыс округувт са̄в хо̄тпат ты а̄гмытыл хотталь щалтэ̄гыт ос тыг ловиньтавет». Сым ос ке̄лпта̄рс а̄гмытыл са̄в э̄лумхо̄лас а̄тимыг ул вос е̄мтсыт, мир пусмалтан департамент 2015 та̄лныл 2020 та̄л мус э̄рнэ программа щё̄питас. Ма̄хум ищхӣпыӈ утыт хосыт ёмщакв сунсыглавет, а̄гманыл молях хо̄нтавет. Тувыл та̄н акваг уральтым о̄ньщавет, инфаркт манос инсульт та̄рвит а̄гмыл е̄мтнэ мус та̄нкина̄ныл ул вос тотыяныл. Тамле накн патнэ̄ныл ма̄гыс, та̄н э̄лаль а̄гмыӈмосыӈ, сакватахтам хо̄тпаг та е̄мтэ̄гыт. Ирина Урванцева ла̄выс, то̄ванакт тамле а̄гмыт паттат иӈ ма̄ньлат хум хо̄тпат а̄тимыг е̄мтэ̄гыт. Нэ̄ хо̄тпат тай мощ ӯргалахтым о̄лэ̄гыт, ва̄тихал пӯльницан ёхталэ̄гыт. Ань то̄ва ле̄ккарыт ищхӣпыӈ то̄тапсованыл ёт тотыглым рӯпитэ̄гыт, та̄н ма̄нь па̄влыӈ ма̄т ма̄хум уральтаӈкве ялантэ̄гыт. Мо̄лты та̄л акв со̄тыра китса̄т хо̄тпа са̄вит э̄лумхо̄лас халт хӯрумса̄ткем хо̄тпа окружной пӯльницан пусмалтахтуӈкве ке̄тве̄сыт. Мо̄таныт ищхӣпыӈ ут хосыт па̄влыӈ ле̄ккарыт ёт потыртахтасыт ос та̄наныл ханищтым а̄гмыӈ хо̄тпаныл аквъёт пусмалтасаныл. Сыманыл ос ке̄лпта̄рсаныл а̄гмыӈ 320 та̄рвитыӈыщ о̄лнэ нэ̄ хо̄тпат акваг уральтым о̄щве̄сыт, ты халт китса̄т ня̄врамаквет сым а̄гмыл самын патсыт. Мо̄т ма̄т рӯпитан ле̄ккарыт ос та̄нки ва̄рмаляныл о̄вылтыт потыртасыт. Та̄нанылн тамле та̄рвитыӈ рӯпата ва̄рим акванпотыртахтым ос акваннё̄тхатым о̄луӈкве э̄ри. Ле̄ккарыт ань ты рӯпатаныл о̄с э̄лаль ва̄руӈкве ла̄вхатсыт. 2016 та̄лт та̄н са̄внув хо̄тпа тамле а̄гмыт пусмалтан ле̄ккарыг ханищтаӈкве ке̄тэ̄гыт. Ос ань рӯпитан ле̄ккарыт ищхӣпыӈ утыл пуссын вос рӯпитэ̄гыт. Тувыл хум хо̄тпат акваг уральтаӈкве э̄ре̄гыт, сака са̄в ул вос рӯпитэ̄гыт. Ма̄хумн ты а̄гмыт урыл ва̄тихал потыртаӈкве э̄ри, та̄нкина̄ныл мощ вос ӯргалыяныл.

1124 2016. 05. 26. Людмила ТЕТКИНА

Э̄рнэ ва̄рмалит Ка̄сыӈ са̄тыт округ кӯщай нэ̄ Наталья Комарова такви ва̄ӈын хо̄тпанэ акванатыглыянэ. Я̄ӈк на̄тнэ э̄тпос хус хо̄талэ̄т о̄лум сапра̄нит ма̄хум са̄всыр э̄рнэ ва̄рмалит урыл потыртасыт ос йильпи нэ̄пак пирмайтасыт. Кӯщаит акв программан 165 млн. солко̄ви са̄внув олн хассыт. Ты ва̄рмаль урыл Наталья Комарова ла̄выс: «Ты олныт ма̄н ӯс ос па̄выл мирколыт халт уртыянув. Тамле тэ̄ла ма̄н Россия Президентув ла̄тӈе щирыл ва̄ре̄в. Ты олнытыл культурат рӯпитан ос ня̄врамыт ханищтан ма̄хум сэ̄лнэ олнаныл но̄хнё̄тавет». Ты коныпал мо̄т программат ос то̄ва ла̄тӈаныл мо̄т щирыл хасве̄сыт. Ты тув сыс округувт яныг вит е̄мтуӈкве манос са̄в во̄р на̄йн тэ̄ӈкве ве̄рмаве. Ты программан нё̄тым олнытыл на̄й харыгтан хо̄тпат са̄всыр йильпи техникал ёвтавет, во̄р но̄х ке пе̄ламлы, та̄н та̄ра харыгтаӈкве вос ве̄рмысыт. Ты программа щирыл округ янытыл 18 на̄й харыгтан кол тах ӯнттаве. Щар са̄в тамле кол Сургутский, Кондинский ос Октябрьский районытт рӯпитаӈкве патэ̄гыт. Ты юипа̄лт кӯщаит о̄с акв нэ̄пак пирмайтасыт. Ты нэ̄пак щирыл 2022 та̄л мус округув янытыл ма̄шинал яласан лё̄ӈхыт ва̄рнэ ма̄гсыл 4 млрд. 300 млн. солко̄ви та̄ставе.

1124 2016. 05. 26. Людмила ТЕТКИНА

Кимкъясӯй па̄вылт о̄лнэ ще̄мья Ха̄льӯс район Кимкъясӯй па̄вылт школасад нампа кол рӯпиты. Са̄т ня̄врам тот ханищтахты ос атхуйплов ня̄врам садикын тув яланты. Надежда Ермиловна Лыткина са̄в та̄л тот тэ̄нут па̄йтнэ нэ̄г рӯпиты. Ты урыл тав ла̄выс: «О̄влэ̄т ме̄н Людмила Васильевна Вынгилева ёт ме̄нккеме̄н ма̄нь школат рӯпитасме̄н. Тувыл яныг кирпащ кол ӯнттувес. Ань ты йильпи ханищтахтын колт са̄в э̄лумхо̄лас: воспитателит, ня̄врам ханищтан хо̄тпат, колкан ловтнэ нэ̄т, кӯр па̄лтыглан хо̄тпат рӯпитэ̄гыт». Надежда Ермиловна Кимкъясуй па̄вылт самын патыс. Яныгмам поратэ урыл тох потыртас. – Омагума̄тягум Кимкъясӯй па̄вылт о̄лсы̄г. Омам па̄выл школат колкан ловтнэ ос кӯр па̄лтыглан нэ̄г рӯпитас. А̄тям рыбучасткат хӯл алыщлан ос во̄раян хумыг о̄лыс. Ще̄мьят ма̄н ат ня̄врам яныгмасӯв. Омам о̄влэ̄т Няхлаӈ па̄выл хум Дмитрий Фомич Вынгилев ёт о̄лыс. Та порат та̄н Хӯрумпа̄вылт леспромхозт рӯпитасыт, омам тувыл тӯлмантастэ. Та порат тамле ва̄рмаль о̄лыс. Таве Кимкъясӯй па̄вылн тотыстэ, тув о̄лмыгтасы̄г. Вера яныг увщим ос Василий каӈкум самын патсы̄г. Тэ̄н ань сас а̄тимыг. Акв порат о̄йкатэ Во̄лья̄н хӯл алыщлаӈкве минас, тот сыме хотум е̄мтыс, а̄тимыг е̄мтыс. Омам ня̄врамаге ёт такке̄т та хультыс. Ам а̄тям то̄нт экспедицият яласым тыт рӯпитас. Тыт омам ёт акванминасы̄г. Ты юипа̄лт ма̄н ос хӯрум ня̄врам самын патсӯв: Щерки каӈкум, ам ос ма̄нь э̄щум Татьяна. Каӈкум ань о̄с а̄тим. А̄тям ма̄ньщи о̄йка о̄лыс, наме Ермил Ильич Сангилев, Люлюкары па̄вылныл о̄лум хум. Ам школан тыт Кимкъясӯй па̄вылт минасум, нилыт классыт ханищтахтуӈкве Кульпасн ке̄тве̄сум, интернатт о̄лсум. Тувыл па̄влувт ма̄нь школа лап та пантвес, тот рӯпитан ма̄хум пуссын Кульпасн ва̄нтлуптаве̄сыт. Омам тот интернатыт рӯпитас, тувыл пенсиян минас. Ам школа а̄стламум юипа̄лт э̄лаль ханищтахтуӈкве ялсум. Тобольск ӯст технологыг ханищтахтасум. Туп кит э̄тпос тот о̄лсум, хащта̄л ма̄т о̄луӈкве ат ве̄рмысум, ювле та оясум. Кимкъясӯй па̄вылн ювле ёхтысум. То̄нт Тимам армияныл ёхтыс, акванминасаме̄н. Ам ня̄нь ва̄рнэ колн рӯпитаӈкве патхатасум. Владик нилыт ня̄врамум самын хунь патыс, рӯпитаӈкве воссыг ат патсум, юн ня̄враманум ёт о̄лсум. Ме̄н са̄т ня̄врам о̄ньщигласме̄н, акв а̄гиме̄н иӈ ма̄ниг о̄лме̄т а̄тимыг е̄мтыс. Акв пыгме̄н армия юипа̄лт щаквыт порсыс. Ос акв а̄гиме̄н лов классыт ханищтахтаме порат, а̄гмыл е̄мтыс, па̄выл пӯльницат а̄тимыг е̄мтыс. Ань нила ня̄враманме̄н хультсыт. Люда а̄гим тыт о̄лы, о̄йкатэ̄нтыл нила ня̄врам о̄ньще̄г, 2015 та̄лт йильпи колыл майвесы̄г. Пыгме̄н Владик Белоярский ӯст о̄лы. Ты э̄лыпа̄лт са̄т та̄л Новосибирск ӯст о̄лыс, контракт щирыл армият лусытас. Белоярский ӯст нэ̄ тотыс, ань ма̄шинал яласым рӯпиты. Са̄нтыра а̄гим ос Хулюмсӯнтыт о̄лы, тав Ягрим па̄вылт бухгалтерыг ханищтахтас. Та па̄вылт садикт рӯпитас, ань ня̄врамаге ёт юн о̄лы. Ма̄нь а̄гиме̄н Оксана ос Ягримт тэ̄нут па̄йтнэ нэ̄г ханищтахтас, хум ва̄рыс, Новосибирск ӯст колта̄глэ ёт о̄лы. Ань ме̄н са̄т апыгрищ о̄ньщиме̄н. О̄йкаме̄нтыл ань ме̄нккеме̄н о̄лыме̄н. Тимам связистыг рӯпитас, тувыл 1983 та̄лт во̄раян ос хӯл а̄лыщлан хумыг рӯпитаӈкве патыс. Ань пенсият о̄лы. Во̄рт акваг яласы, юн аты ва̄щиньтылум. То̄ва порат аквъёт во̄рт яласыме̄н. Ма̄ньщи нэ̄ пенсиятэ мус кит та̄л хультыс. Рӯпатаныл по̄хын хунь мины, мис о̄ньщуӈкве номсы. Ла̄ви, юн нас тэ̄ла та̄л ӯнлуӈкве марщум паты, ос апыгрищанэ иӈ ма̄нит, щаквит э̄ри. Надежда Ермиловна э̄ще Татьяна Белоярский район Сорум па̄вылт о̄лы. Тав э̄ще̄н ма̄ньщи газета та̄ра паща ла̄тыӈ ке̄ты. Людмила Алгадьева хансыс ос хури ва̄рыс.

1124 2016. 05. 26. Светлана РОМБАНДЕЕВА

Та̄ныт са̄ӈквылтам хо̄тпав ка̄стувес Ювле хультум э̄тпос 29 хо̄талэ̄т Ханты-Мансийск ӯст о̄лнэ «То̄рум Маа» музейт ма̄ньщи хо̄тпав Владимир Иванович Шесталов ка̄стувес. Ма̄хум Ю. Н. Шесталов колнаке̄т атхатыгласыт, ты хо̄нтхатыглап намаявес «Ты играй, журавль, играй! » Ты та̄л яныгпо̄ль э̄тпос 28 хо̄талэ̄т Владимир Иванович 52 та̄лэ то̄влынув. Тав ма̄нь та̄гыл та̄ныт са̄ӈквылтаӈкве патыс, ты тэ̄ла сака э̄руптастэ. 1987 та̄лт Ханты-Мансийск ӯст о̄лнэ педучилище музыкальный отделениятэ̄т ханищтахтуӈкве о̄вылтахтас. 1991-1996 та̄лыт сыс ма̄ньщи ос ханты та̄ныт са̄ӈквылтан хо̄тпатныл са̄ӈквылтаӈкве ханищтахтас. Ма̄нь па̄влытн яланта̄лыс, ты тэ̄ла ва̄нэ хо̄тпат кинсыс, та̄н ётаныл ва̄йхатас, ханищтахтас. Тувыл Владимир Иванович Петрозаводск ӯст Государственный консерваторият э̄ргын тэ̄лан ханищтахтас. Наука щирыл са̄в рӯпитас, 2011 та̄лт кандидатский диссертация ловиньтас, э̄ргын тэ̄ла палт яныг учёный хо̄тпаг е̄мтыс. Ханты-Мансийск ӯст о̄лнэ Центр искусств колт лов арыг та̄л рӯпитас, ня̄врамыт ма̄ньщи ос ханты та̄ныт са̄ӈквылтаӈкве ханищтасанэ. Акванатхатыглам ма̄хум тав уре̄т са̄в ёмас сымыӈ ла̄тыӈ ла̄всыт, посыӈ номтыл таве ка̄стысаныл. Центр искусств колт ханищтахтан ня̄врамыт та̄ныт са̄ӈквылтасыт.

1124 2016. 05. 26. Светлана РОМБАНДЕЕВА

Полноват па̄вылт самын патум э̄ква Ты э̄тпос 13 хо̄талэ̄т Ханты-Мансийск ӯст ханты э̄ква Евдокия Андреевна Нёмысова намхо̄талэ̄т янытлавес. Тав 80 та̄лэ то̄влыс. Заслуженный учитель РФ, заслуженный работник образования ХМАО – Югры, ветеран труда, кандидат педагогических наук – тамле яныг намытыл маим о̄лы. Евдокия Андреевна 1936 та̄лт я̄ӈк на̄тнэ э̄тпос нилыт хо̄талэ̄т Ха̄льӯс район Полноват па̄вылт самын патыс. А̄тятэ Андрей Васильевич хӯл алыщлан, во̄раян хумыг о̄лыс. Оматэ Анастасия Ивановна, а̄ги о̄парищ наме Лельхова о̄лыс. Евдокия Андреевна Полноват па̄выл школат ханищтахтас, 1952 та̄лт са̄тыт класс а̄стлас. Тувыл Ханты-Мансийск ӯст педучилищат ханищтахтас. Кӯщаиг тот Георгий Тарасович Величко рӯпитас. Ханты ла̄тӈыл Фаина Матвеева Когончинан ханищтаве̄сыт. Ты хо̄тпаг урыл тав са̄в ёмас сымыӈ ла̄тыӈ ла̄выс. Училище а̄стламе юипа̄лт тав Ленинград ӯсн А. И. Герцен нампа педагогический институтн ханищтахтуӈкве ке̄твес. 1961 та̄лт институт а̄стластэ. Евдокия Андреевна тот ханищтахтаме сыс «Русскохантыйский словарь» о̄выл нэ̄паке та̄ратас. 1962-1965 та̄лытт аспирантурат ханищтахтас. Ты ханищтапе а̄стламе юипа̄лт Ха̄льӯс район Ванзеват па̄выл ос Октябрьский район Шеркалы па̄выл школагт 5-9 класс ня̄врамытн рущ ла̄тыӈ ос литература ханищтас. Ты юипа̄лт хо̄т та̄л (1968-1974) Ханты-Мансийск ӯс педучилищат рӯпитас, ма̄ньлат хо̄тпатн ханты ла̄тыӈ ос литература ханищтас. 1974 та̄л па̄сыл тав акваг наука щирыл рӯпитаӈкве та патыс. 1990 та̄лт Москва ӯст кандидатский диссертациятэ ловиньтастэ, учёный намыл майвес. Школат ханищтахтан ханты ня̄врамыт ма̄гыс тав са̄в нэ̄пак хансыс. Ань округув янытыл ханты ня̄врамыт тав нэ̄паканэ щирыл ты ханищтавет. 1991 та̄лт Евдокия Андреевна соссаӈ ма̄хум ёт А̄сугорский институт ва̄рыс, тув кӯщаиг паттувес. 1998 та̄лт тувыл по̄хан минас. Ты институт ань тыхо̄тал мус рӯпиты, соссаӈ ма̄хманув ня̄врамыт ма̄гыс э̄рнэ нэ̄пакыт хансэ̄гыт. Тав такви мире, ща̄нь ла̄тӈе ма̄гыс яныг па̄рыс ва̄ри, ань тыхо̄тал мус рӯпиты, ма̄ньлат мирн нё̄ты. А̄гипыг янмалтас, Наташа а̄гитэ а̄ги ос пыг о̄ньщи. Намхо̄талэ кастыл кит выставка ва̄рыглавес, акватэ намаявес: «История семьи в истории страны – след прожитой жизни». Евдокия Андреевна ка̄тыл ва̄рум пормасанэ суссылтаве̄сыт. Тав насати ма̄щтыр э̄ква о̄лнэ̄тэ – ханты супыт ю̄нты, сакныл пальсакыт, турло̄псыт харты, а̄канит ос мо̄т са̄в пормас ва̄ри. Китыт выставкатэ намаявес: «Язык как смысл жизни. . . » Тыт ос хансум нэ̄паканэ, са̄всыр хурит суссылтаве̄сыт. Таве янытлаӈкве са̄в хо̄тпа ёхталас, мӯйлупсатыл мӯйлуптавес, хорамыӈ лӯптатыл майвес. Ма̄ньлат ма̄хум, ня̄врамыт таве о̄с янытласаныл, э̄ргысыт, йӣквсыт. Светлана Ромбандеева хансыс ос хури ва̄рыс.

1124 2016. 05. 26. Светлана РОМБАНДЕЕВА

Хӯл щё̄питан кол Ханты-Мансийский район Приобский месторождение ма̄т «Обь» нампа община о̄лы. Ам «Югория» телекомпаният рӯпитан ос ля̄ххал тотнэ ма̄хум ёт тув ялсум, ма̄шинал щё̄с арыгтем минасӯв. Хосат тот па̄выл о̄лум, ань туп хӯрум пе̄с кол хультсыт. Та ма̄т «Обь» община хӯл щё̄питан коланэ ӯнттымат. Община кӯщай Анриетта Олеговна Вагнер тох потыртас: «2011 та̄лт ам грантолн ка̄тынпаттысум. Та порат ам тыт ма̄ ёвтсум, ма̄хманум ёт рӯпитаӈкве та о̄вылтахтасӯв. Ты колув ӯнттыслӯв, хӯл щё̄питан са̄всыр ма̄шинат (хӯл сакватан, восытаптан, то̄слын, нильнэ ос хӯлсов хотвинэ ма̄гыс ма̄шинат) ла̄щалла̄щал ёвтуӈкве патсӯв. Мо̄лты та̄л юио̄выл э̄тпосэ̄т пельменит ва̄рнэ ма̄шина ёвтсӯв. Ань тай сака кӯстыр рӯпитаӈкве. Пельменит са̄лы ос янгуй нё̄влил ва̄ре̄в, сорт ос сыг хӯлыл ва̄ре̄в. Ювле хультум са̄тыт котлета ва̄рнэ ма̄шина ёвтсӯв, ты э̄лыпа̄лт ка̄тыл ва̄рсӯв. Хӯл ма̄нти алыщлэ̄в, то̄ванакт хотты ма̄т ёвтэ̄в, ма̄шинал тыг тотыянӯв. Ам ётум лов арыг хо̄тпа рӯпитэ̄гыт. Ат хо̄тпа тыт тармыл о̄лэ̄гыт. Тыг ам ва̄тихал ёхталэ̄гум. Хунь ма̄хманум хӯл щё̄питаӈкве ат а̄лыме̄гыт, ам та̄наныл нё̄тыянум, та̄н ётаныл лю̄люмтэ̄гум, хӯл ниле̄гум, яктэ̄гум. Ма̄хманум ка̄сыӈаныл са̄всыр рӯпата ва̄руӈкве ха̄сэ̄гыт. Тыт рӯпитанэ̄ныл коныпал пил ва̄тнэ пора ёхты, пил ва̄тэ̄гыт, ла̄хс атэ̄гыт, хӯл алыщлэ̄гыт. То̄ванакт ам ётум са̄лыӈ ма̄хум палт яланта̄лэ̄гыт, ё̄рнкол тӯщтуӈкве ха̄сэ̄гыт. Выставкатын ма̄н са̄всыр хӯл тотыглэ̄в: солвалыӈ хӯл, восытаптым сорт ос сорх, исум щирыл щё̄питым хӯл, са̄всыр хӯлыӈ тэ̄нут ва̄ре̄в. То̄ва хӯланув хорамыӈ то̄тапсовын пиныянӯв. Тамле хӯл мӯйлупса пе̄нтсыл хотьютн миӈкве ро̄ви, ма̄хум сака ёвтэ̄гыт». Ты нэ̄ ла̄ви, ань тамле то̄тапсов тынэ акв со̄тыра солко̄ви. Конытэ ма̄ньщи хансал щуртгалым о̄лы. Сыресыр то̄тапсовыт ква̄лтапаптэ̄гыт. Ты улпыл ӯсыӈ ма̄хум та̄н пӯмыщ ма̄гыс ёвтэ̄гыт. Па̄влыӈ ма̄хум тай тувле нупыл тэ̄ланыл а̄ти, пувум хӯланыл хӯргын пинумтыяныл, нэ̄матыр то̄тап ат э̄ри. Юрий Гедз сыг хӯл яктыс, тав ла̄выс: «Ты общинат ам 2012 та̄л па̄сныл рӯпитэ̄гум. Тӯя порат тыт сака ёмас, хӯл алыщлэ̄в. Ам Курган па̄вылныл ёхтысум, тот нэ̄мхуньт хӯл ат алыщла̄лсум. Пил ва̄тнэ пора ёхты, пил ва̄тэ̄в, ла̄хс атэ̄в, то̄слыянӯв. Э̄лнаӈ нё̄выль са̄грапыл са̄грысӯв, ань нё̄выль сартнэ ма̄шина о̄лы. Рӯпитаӈкве татем кӯпнит, олнло̄мтыл ойтаве̄в. Тыт а̄нумн сака мӯсты». Виктор Гуценко нё̄влил са̄всыр тэ̄нут щё̄питы, ма̄шинал ма̄ниг сакватыянэ. Яныг морозилка капай суссылтас, тот та̄с нё̄выль са̄в о̄ньще̄гыт. Юрий Гедз ёт нё̄выль сартнэ ма̄шинал са̄лы нё̄выль сартсы̄г. Са̄груӈкве, хӯтсаӈкве ат э̄ри, нэ̄мат ло̄мтыт ла̄кква ат парге̄гыт – татем молях, нё̄выль ло̄мтаныл щар суйта̄л киттыг та сартумтавет, ман янытыг э̄ри, та янытыг сартыяныл. Рӯпитан ма̄наныл сыстам. Руслан Мингалев хӯл восытапты, солвалты. Тувыл хӯлыӈ тэ̄нут (рулетыт) ва̄ри – хӯл охсат солвалтыянэ, са̄всыр лӯптатыл (приправатыл) паргалтыянэ, тув хотталь акванма̄нигтыянэ, сэ̄тапыл пе̄рсалыянэ. Тав о̄с аквкит ла̄тыӈ ла̄выс: «Хӯл яктуӈкве, хӯлыӈ тэ̄нут ва̄руӈкве ам амти ханищтахтасум. Тыт рӯпитаӈкве, о̄луӈкве сака ёмас». Михаил Попов хӯл нильнэ ос хӯл сов хотвинэ ма̄шинат ёт рӯпиты, тав тох потыртас: «Хӯл щё̄питан утыт та̄л та̄рвитыӈ о̄лыс. Хӯл ка̄тыл нильсӯв, сака хоса рӯпитасӯв. Ань тай татем ёмас, кӯстыр». Со̄ль, хӯланыл хотловтыяныл, яктыяныл, хӯл сов хотвинэ ма̄шина тӣвырн та нарумта̄лыяныл. Яты, щар сыстам, совта̄л ло̄мтыт кональ та нэ̄глапе̄гыт. Анриетта ла̄ви, ты ма̄шина тав 2012 та̄лт ёвтыстэ. Та юипа̄лт хӯл ос нё̄выль сакватан ма̄шина ёвтыс. Тамле яныг мясорубка капайн ма̄ниг яктым хӯл ло̄мтыт пинсыт, утаныл ква̄лтапаптысаныл, щар аквта торыг ма̄ниг та сакватапве̄сыт. Тох хумус ат рӯпитаӈкве, атхунь кӯпнит, мувлахи та са̄вит ма̄шинат, ма̄хум сома ёнгасэ̄гыт. Нэ̄тхумит пуссын тамле ка̄ркамыт, хо̄тпа нупыл сымыӈ ма̄хум. Та кол ма̄н янытэ̄т сунсыгласлӯв, по̄слыслув, кинан ва̄рвес. Анриеттан ос тав ётэ рӯпитан хо̄тпатн пӯмащипа ла̄тыӈ ла̄всӯв. Ты я̄тил ка̄ркам ма̄хум пуссын пуста̄гыл вос о̄лэ̄гыт, атыӈ хӯл са̄в вос щё̄питэ̄гыт. Светлана Ромбандеева хансыс ос хурит ва̄рыс.

1124 2016. 05. 26. Тамара МЕРОВА

Са̄всыр ӯйхулыт ос лӯптат ханищтыяныл Виктор Вагатов Белоярский район Касум па̄вылт «Юганский» нампа заповедникыт инспекторыг рӯпиты. Тав аквъёт рӯпитан хо̄тпанэ халт кӯщаиг о̄лы. Та̄н та ма̄витаныл уральтыяныл, порсыл хотсыстамтыяныл ос тот мори во̄раян, алыщлан хо̄тпат кинсэ̄гыт. «Юганский» заповедник Сургутский районт о̄лы, тув 648 со̄тыра 636 гектар ма̄ хансым о̄лы, ос 93 со̄тыра 893 гектар та̄н уральтым о̄ньщияныл. Ты ма̄т а̄мпарыт ӯнттуӈкве ро̄ви кос, туп ты э̄лыпа̄лт кӯщаит ёт потыртахтуӈкве э̄ри. Тот хо̄тпан во̄р кол ӯнттуӈкве та̄ратаве ке, таве̄н тув ялантан ма̄гыс э̄рнэ нэ̄пакыт акванатуӈкве ос э̄лаль щё̄питаӈкве э̄ри. Малый Юган ма̄т соссаӈ ма̄хум халт то̄ва ханты ще̄мьят угодият тот о̄ньще̄гыт. Та̄наныл о̄с акваг уральтыяныл, нэ̄мат лю̄ль ул вос ва̄ре̄гыт. Ос хунь во̄раяӈкве ат ро̄ви, насати та̄н, мо̄т ёхталан хо̄тпат ёт во̄раяӈкве а̄лыманэ̄ныл. Мори алыщлан утыт киснэ коныпал заповедникыт рӯпитан хо̄тпат тот яныгман йӣвыт, лӯптат, во̄рт о̄лнэ сыресыр ӯйхулыт, ӯйрищит ханищтыяныл. То̄рум хо̄талыт о̄с та̄рапаттыяныл, осыӈ тӯйт патнэ порат, ащирма, ма̄лтып, ре̄гыӈ пораныл пуссын нэ̄пакн хансыяныл. Юио̄выл та̄лытыт акв хурип хо̄тал то̄рум ат ва̄рыглы, ка̄сыӈъе̄мт матыр мо̄тсырыг е̄мты. Пуссын ты ва̄рмалит мӯсхалыг ханищтавет. Тэ̄лы сыс сака осыӈ тӯйт ке паты, тӯяг яныг вит е̄мты. То̄нт ма̄нь я̄т ва̄таныл ёлнилявет ос сака па̄ӈктахтэ̄гыт, са̄в сакватым йӣвыт порсыт акванпатыглэ̄гыт. Яныг вит хоса ке ӯнлы, во̄р ӯйхулыт савалэ̄гыт. Ма̄ тармыл о̄лнэ ӯйит щар мо̄т ма̄н миныглэ̄гыт, то̄внакт ювле ат ёхтэ̄гыт, йӣвыт тармыл ха̄йтыгтан ӯйит та ӯрхатэ̄гыт. Во̄р ӯйхулыт о̄лупсаныл та̄рапаттын ма̄гыс заповедникыт рӯпитан хо̄тпат ищхӣпыӈ ут тув тӯщтэ̄гыт ос тащирыл сунсыяныл. Туи порат ос ты ма̄ на̄йн тэ̄ӈкве ве̄рмаве. Рӯпата тот са̄в о̄лы. Ты рӯпататэ Виктор Константинович сака э̄руптытэ, тав ма̄ньта̄гыл ма̄витыл пӯмщалахтым яныгмас. Ма̄ньлат пыг 2012 та̄лт Полярный Академия кол Санкт-Петербург ӯст а̄стлас. «Юганский» заповедникыт нила та̄л рӯпиты, тот 235 са̄вит э̄лумхо̄лас рӯпитэ̄гыт ос та̄н халанылт туп кит ханты хо̄тпаг. Тамара Мерова хансыс ос хури ва̄рыс.

1124 2016. 05. 26. Валентина УЗЕЛЬ

Те̄лпыӈ ня̄нил тыттуве̄сум Раиса Ивановна Тэвлина – ханты э̄ква. Тав Сургутский районт о̄лы, ма̄тэ Сургут ӯсныл лӯима̄ нупыл титса̄ттем ве̄рыстат о̄лы. Во̄рт тав а̄гитэ ос пыганэ ёт са̄лы ӯрим о̄лэ̄гыт. Таве ам хосат та̄гыл ва̄глум, ловмантем та̄л юртыӈыщ о̄лыме̄н. Ты та̄л ме̄н Когалым ӯст хо̄нтхатыгласме̄н, тот са̄лыӈ ма̄хум акванатхатыгласыт, халанылт кассыт. Раиса Ивановна колта̄глэ ёт тув ма̄шинал ёхталасыт. Са̄лыяныл ёт ат вуйласаныл. Нас ё̄рнкол тӯщталасыт, мӯйлын ма̄хум тот ща̄ил айтсаныл, хӯл исмитыл ос хӯлыл тыттысаныл. Тав а̄нумн та̄ра ё̄рнколн щалтуӈкв во̄выстэ, тот Лена мане, Артем пыге э̄ква, рӯпитас. Кӯр па̄лтыглас, тэ̄нут па̄йтыс. Ам о̄с та̄ра ща̄ил пинве̄сум. Тувыл Раиса Ивановна а̄нумн ла̄ви: «Те̄лпыӈ ня̄нь тэ̄гын? » Ам таве титыглылум: «На̄н тамле ня̄нь ёт о̄ньщегы̄н? » Тувыл те̄лпыӈ ня̄нил та майве̄сум. Ам ма̄нь порат тамле ня̄нь тэ̄щиньтасум. Рущит ё̄рнколт о̄с о̄лсыт, Раиса Ивановнан та̄н пуссын ня̄нил о̄с майве̄сыт. Та̄н о̄влэ̄т мощ хотрохтым суссыт, тувыл пӯмщалахтуӈкв ос то̄втащлахтуӈкв та патсыт. Ам ты э̄ква титыгласлум, та̄н во̄рт хумус ань о̄лэ̄гыт, матыр ва̄рмаль о̄ньще̄гыт ман а̄ти. Тав тох потыртас: – Ам нёлса̄т нупыл нила та̄лум то̄влыс, яныгпа̄лаг акваг та е̄мтэ̄гум. Ам амти во̄рае̄гум, хӯл алыщлэ̄гум. Ань ма̄ньлат ма̄хманув са̄лыл яласаӈкв щар ат таӈхе̄гыт, пуссын «Бураныл» яласэ̄гыт. Ма̄н о̄лнэ ма̄вт нефтяникма̄хум рӯпитэ̄гыт. Ме̄н Лена яныг а̄гим ёт во̄рт о̄лыме̄н. О̄йкам 2012 та̄лт а̄тимыг е̄мтыс, щаквыт порсыс. Яныг а̄гим о̄йкатэ о̄с а̄тим. Ань аквъёт та о̄лыме̄н. Таня мо̄т а̄гим, тав о̄парищ наме Сайнакова, ня̄врамыт ханты ла̄тӈыл потыртаӈкве школат ханищтыянэ. А̄нум матыр нё̄тункве акваг тув во̄выглытэ. Ам школан ёхтэ̄гум, ӯнттытэ, ищхӣпыӈ утыл мивем, потранум тув та хансыянэ. Ма̄н ханищтахтамув порат школав Старый Тромаган па̄вылт о̄лыс, та па̄выл хосат а̄тим. Яныг вит порат па̄влув витн акваг а̄мара̄лвес. Па̄влыӈ ма̄хум коланыл ёт са̄всыр мо̄т па̄влытн ва̄нтлуптаве̄сыт. Интернат, школа ос миркол пуссын ла̄ккватотве̄сыт. Ма̄нти ханты ла̄тӈыл потыртаӈкв щар ат та̄ртвесӯв, рущ ос немец ла̄тыӈ ханищтасӯв. Ма̄н а̄тяв хо̄нтлуӈкв тотыглавес, ам ла̄выгласум – а̄тям немец ма̄хум ёт хо̄нтлуме ма̄гыс, улпыл таима̄гыс ам та̄н ла̄тӈаныл ханищтылум. Ань ам ляпамт хӯрум пыганум о̄лэ̄гыт, ка̄сыӈ такви я̄нас ма̄ о̄ньщи, та̄нти са̄лыяныл ӯре̄гыт. Ма̄нь пыгум Артем тав ам са̄лыянум о̄ньщиянэ. Ме̄н тит нэ̄ хо̄тпаг о̄лыме̄н, мощ та̄рвитыӈ. Ты пыгум а̄нумн сака нё̄ты. Туи порат амттем пил ва̄туӈкв яланта̄лэ̄гум, нефтянико̄йкат а̄нум ка̄салыяныл, титыглахтэ̄гыт – амттем во̄рн ялуӈкв ат пилэ̄гум? Ам ювле ла̄ве̄гум, манрыг пилуӈкв, во̄рто̄лнут –ты ма̄н Пупа̄пщите̄в. Матаре ам ётум те ва̄ри, та ва̄ри. Ще̄ранка ёт о̄ньще̄гум, а̄ращ па̄лтэ̄гум, амтирот та ё̄мыгтэ̄гум, пил та ва̄тащлэ̄гум. Раиса Ивановна – сака ёмас, сымыӈ хо̄тпа. Мо̄тыт та̄л нёлса̄т нупыл ат та̄лэ тах то̄влы. Таквирот во̄рт о̄луӈкв ханьщувлас, ла̄выс, па̄вылт ман ӯст о̄луӈкв щар ат ве̄рми. То̄ва порат таве номылмата̄лылум, номтум татем ёмас. Са̄внув тамле хо̄тпа ма̄н халувт вос о̄лнув. Валентина Васильева хансыс ос хури ва̄рыс.

1124 2016. 05. 26. Людмила ТЕТКИНА

Манса̄вит хӯл пувуӈкве ро̄ви Ханты-Мансийск ӯст сапра̄ни ва̄рыглавес, тув хӯл алыщлан хо̄тпат, общественный организациятт ос общинатт рӯпитан ма̄хум во̄виньта̄лве̄сыт. 2017 та̄лт манаса̄вит ёмас хӯл округувт пувуӈкве тах ро̄ви, та урыл ма̄хум тот потыртасыт. Ты ва̄рмаль 2009 та̄л па̄сныл ва̄рвес, та порат соссаӈ ма̄хум квота щирыл хӯл алыщлаӈкве ла̄вве̄сыт, пе̄с щирыл ке – ты норма са̄витыл хӯл алыщлаӈкве ро̄ви. То̄нт акв э̄лумхо̄лас та̄л сыс туп 57 кила са̄всыр хӯл пувуӈкве ве̄рмыс ос туп лов кила ёмас хӯл. Ты юипа̄лт учёный хо̄тпат я̄т ос тӯрыт ёмащакв ханищтасаныл, тувыл ма̄ньщи, ханты манос ё̄рн хо̄тпа та̄л сыс 300 кила са̄вит хӯл пувуӈкве та̄ртвес, ты халт туп 36 кила ёмас хӯл. Ань соссаӈ ма̄хум ӯсхул, сорх, нялк ос мо̄т хӯл пувуӈкве ке ка̄саще̄гыт, заявканэ̄пак агропромышленный комплекс Управление колн ке̄тэ̄гыт. Ты нэ̄пак па̄влыӈ мирколт манос МФЦ колт хансуӈкве ро̄ви. Ты коныпал хо̄тпа намнэ̄пак ос паспорт копиянэ ке̄туӈкве о̄с э̄ре̄гыт. Ма̄хум нэ̄паканыл та̄л котиль э̄тпосныл сӯкыр э̄тпос о̄выл хо̄талэ мус пирмайтавет. Ты юипа̄лт соссаӈ ма̄хум халт квотат уртавет. Сапра̄нит о̄влэ̄т Сергей Ефимов, «Госрыбцентр» нампа ма̄т рӯпитан хум потыртас. Тав ла̄выс, учёный ма̄хум я̄т, тӯрыт ханищтасаныл ос мо̄тыт та̄л манаса̄вит хӯл е̄мты – ань ва̄гыт. Та̄н хансум нэ̄паканыл щирыл 2017 та̄лт округувт ты са̄вит хӯл пувуӈкве тах ро̄ви: – ӯсхул – 15, 6 тонна; – мохсаӈ – 45 тонна; – сорх – 178 тонна; – сӯкыр 5 тонна; – писъян – 4 тонна; – нялк – 15, 5 тонна; – ка̄рай – 5, 5 тонна. Пуссын аквъёт 268, 6 са̄вит тонна ёмас хӯл округув янытыл пувуӈкве тах ро̄ви. Ты са̄вит хӯл соссаӈ ма̄хум, тувыл няслуӈкве ка̄сащан хо̄тпат, община ос хӯл щё̄питан колыт хӯл алыщаӈкве ве̄рме̄гыт. Тыгыл са̄внув хӯл пувуӈкве ат ро̄ви. 2012 та̄л порат ма̄н округувт «О перечне рыбопромысловых участков на территории ХМАО-Югры» нампа нэ̄пак пирмайтавес. Ты постановление щирыл округув янытыл 2 со̄тыра 412 хӯл алыщлан ма̄ уртвес. Соссаӈ ма̄хум ма̄гсыл 793 участок округ янытыл ва̄рвес, щар са̄в Сургутский районт –287, Кондинский районт –175 ос Ха̄льӯс районт –108 хӯл алыщлан я̄ ва̄та о̄лы. Сапра̄нин Олег Шатин, общинат Союзыт кӯщаиг о̄лнэ хум, ёхталас. Тав ты тэ̄ла урыл ла̄выс: «Ань соссаӈ ма̄хум квота щирыл хӯл алыщлаӈкве ла̄вавет. Тувыл ма̄ньщит, хантыт ос ё̄рн ма̄хум пе̄с пора та̄гыл туп тэ̄нэ ма̄гсыл хӯл пуве̄гыт, тыгыл са̄в ат алыщлэ̄гыт. Ам номсэ̄гум, соссаӈ ма̄хум тох саватаӈкве ат э̄ри ос ты квота хот вос виве. 2015 та̄лт соссаӈ хо̄тпат са̄в заявканэ̄пак ке̄тыгласыт, тувыл округув янытыл яныг вит о̄лыс, ма̄хманув ты са̄вит хӯл аты пувсыт». Природный ресурс департаментыт рӯпитан хум Руслан Романчук ювле ла̄выс, ань ка̄сыӈ та̄лныл я̄т, тӯрыт мощщанув хӯлыӈыг е̄мтэ̄гыт, тыи ма̄гсыл ань ма̄хум туп норма щирыл хӯл алыщлэ̄гыт. Сапра̄нин ёхталам хо̄тпат о̄с акв ва̄рмаль урыл потыртасыт. Ань пе̄с йис ма̄т ос па̄вылт о̄лнэ соссаӈ ма̄хум квотал мивет. Сургут, Нижневартовск, Нефтеюганск ос Ханты-Мансийск ӯсытт о̄лнэ ма̄ньщит, хантыт манос ё̄рн хо̄тпат заявканэ̄паканыл ат пирмайтавет. Департаментыт рӯпитан хум ювле ла̄выс, ань са̄ккон щирыл туп па̄вылт ос пе̄с йис ма̄т о̄лнэ ще̄мьят хӯл алыщлан ма̄гсыл нэ̄паканыл кетэ̄гыт. Тувыл ре̄тыӈ ю̄свой э̄тпост 2015 та̄лт акв йильпи нэ̄пак пирмайтавес, ань ма̄хум пуссын 50 метра палыт хӯлпыл алыщлаӈкве ве̄рме̄гыт. Са̄всыр нэ̄пакыт та̄нанылн акванатуӈкве ат э̄ри. Ӯст о̄лнэ соссаӈ хо̄тпа хӯл алыщлаӈкве ялантаӈкве о̄с ве̄рми. Светлана Гындышева, природный ресурс департаментыт рӯпитан ханты нэ̄, сапра̄ни юипа̄лт ла̄выс, та ма̄хум, хотьют ёмас хӯл алыщлан ма̄гсыл та̄нки нэ̄паканыл ке̄тыгласаныл, та̄н ты управленияныл журналыл ке̄тавет. Соссаӈ хо̄тпа манса̄вит кила ёмас хӯл пувыс, тув хансыянэ. Тувыл ты нэ̄паке ювле ке̄тытэ. Ты та̄л о̄вылтахтам порат округ Правительство нэ̄пак пирмайтас, тот хансым о̄лы, 2016 та̄л сыс 264 тонна ёмас хӯл округ янытыл пувуӈкве тах ро̄ви. Соссаӈ ма̄хум халт 85 тонна хӯл уртаве. Людмила Теткина хансыс ос хури ва̄рыс.

1124 2016. 05. 26. Людмила ТЕТКИНА

Мӯй ма̄хум а̄ращ ва̄тат ӯнлахо̄луӈкве во̄выглаве̄сыт. Ханты-Мансийск ӯст «То̄рум Маа» музейн са̄в мӯй ма̄хум ёхталасыт. Тот «Ночь у очага» нампа акция о̄лыс. «Ночь музеев» нампа ва̄рмаль ка̄сыӈ та̄л я̄ӈк на̄тнэ э̄тпост ва̄рыглаве. Музейт рӯпитан хо̄тпат са̄всыр пӯмыщ щё̄пита̄лсыт. Акв ма̄т ма̄ньлат хо̄тпат хӯл яктуӈкве ханищтаве̄сыт. Китыт ма̄т ма̄нь пыгрищит касайил са̄всыр аньщарыт, ёнгын утыт ёргысыт, хӯрмит ма̄т мо̄йтыл мо̄йтве̄сыт. Нилыт ма̄т мӯй ма̄хум ма̄ньщи манос ханты маснут масапа̄луӈкве ос по̄слахтуӈкве ве̄рмысыт. Ты халт музейт рӯпитан хо̄тпат пасан щё̄питасыт. Ня̄нь ва̄рнэ кӯрт ня̄нь ва̄рсыт, яктым хӯлыл исмит па̄йтсыт. Ё̄рнколт ке̄лпыӈ ня̄нь ва̄рвес. То̄ват о̄выл щёс тув ёхталасыт ос акваг пӯмщалахтасыт, са̄всыр ва̄рмаль урыл китыглахтасыт. Тувыл ма̄хум ёт Альбина Николаевна Мехнина, музейт рӯпитан ма̄ньщи нэ̄, пащалахтас ос ма̄ньлат хо̄тпат та̄нки стиханыл ловиньтаӈкве во̄всанэ. Анатолий Брусницын, Сергей Ремезов, Антон Нахрачев, Алла Иштимирова-Посохова та̄нки стиханыл ловиньтасаныл. Ты ма̄ньлат ма̄хум халт акв ма̄нь ня̄врам Марк Ромбандеева о̄лыс. Ма̄ньщи пыгрищ Юван Шесталов хансум стихе такем ёмащаквег ловиньтастэ. Ты юипа̄лт ня̄врамыт «Выжить любой ценой» пӯмыщ ёнгыл ва̄рыглаве̄сыт. Ня̄врамыт потыртаве̄сыт, манхурип пормасыт та̄нанылн во̄рт э̄рмыглэ̄гыт. А̄гирищитпыгрищит ат станциял ва̄рве̄сыт. Ты станцият ще̄ранка та̄л хумус на̄й па̄лтуӈкве, во̄рт хот ат тыпуӈкве ос са̄в э̄рнэ ва̄рмаль урыл потыртаве̄сыт. Анастасия Крыжанкова, Югорский университетыт ханищтахтын а̄ги, музейн ёхталас. Тав ты ялпыӈ хо̄тал урыл таи ла̄выс: «Ам хӯрмит курсыт ханищтахтэ̄гум. Ам тыг юртанум ёт ёхтысум. Тыт рӯпитан хо̄тпат са̄всыр пӯмыщ ва̄рмаль урыл потыртэ̄гыт. Ам ё̄рнколн ща̄лтсасум, тот нэ̄ ня̄нь ва̄ри, ам таве ты ва̄рмаль урыл китыгласум. Тав ювле ла̄выс, насати ты ня̄нь ке̄лпыл ва̄раве. Ам тамле ня̄нь нэ̄мхуньт ат тэ̄щиньтасум. Ам ка̄сыӈ та̄лт йильпи тэ̄ла урыл тыт хӯлэ̄гум, ты ма̄гсыл тыг ёхталаӈкве сака э̄руптэ̄гум». Хӯл йисмит, атыӈ ня̄нь ос ке̄лпыӈ ня̄нь хунь а̄стысыт, мӯй ма̄хум пуссын пасан ва̄тан во̄вве̄сыт. Людмила Теткина хансыс ос хури ва̄рыс.

1124 2016. 05. 26. Николай МЕРОВ

Финноугор рӯт ма̄хманув палт хотьют ялы Ты та̄л лӯпта э̄тпос 15-17 хо̄талэ̄т Финляндия ма̄т Лахти ӯст VII мирхал финноугор мирыт ма̄гыс конгресс е̄мты. Ты ва̄рмаль кастыл ма̄н округувныл лов ханты ос лов ма̄ньщи хо̄тпа тув минэ̄гыт. Яныгпо̄ль э̄тпост Татьяна Гоголева, округ депутат нэ̄, ма̄ньщи хо̄тпанув акванатыгласанэ. Мо̄т хо̄н ма̄н ялнэ ма̄гыс лов ма̄ньщи хо̄тпа пе̄риясӯв. Ань ты ма̄хманув докладпотыр соссаӈ мирув о̄лупса урыл тах щё̄питэ̄гыт. Ты конгрессыт мощщаг хультум финноугор мирыт ща̄ньа̄щ ла̄тӈаныл ос о̄лнэхӯлнэ наканыл э̄лаль тотнэ тэ̄ла урыл потыртаӈкве патэ̄гыт. Ла̄тӈанув ос о̄лнэхӯлнэ наканув туп акваннё̄тхатым са̄в нотын э̄лаль тотыянӯв. Ты ва̄рмальн общественный организациятт рӯпитан хо̄тпат, кӯщаит, культура э̄лаль тотнэ ма̄хум, учёный хо̄тпат ос мо̄т са̄всыр ма̄т рӯпитан нэ̄тхумыт тот акванатхатэ̄гыт. Ма̄ янытыл са̄всыр ма̄ныл финыт, венгрыт, эстонцыт, саамыт, квеныт, ливыт, карелыт, вепсыт, ингерманландцыт, комит, сето, водь, ижорцыт, ё̄рныт, хантыт, ма̄ньщит, удмуртыт, мордва, марийцыт, селькупыт, нганасаныт ос энцыт тув минэ̄гыт. Пуссын аквъёт хо̄тса̄ткем хо̄тпа тув миннэ щирыл о̄лы. Тот атхатнэ мир э̄лыпа̄лт паща ла̄тыӈ Финляндия ма̄ кӯщай Саули Нийнистё такви тах ла̄ви. Ты потрыт коныпал ма̄хум ма̄вит ӯргалан, ля̄ххал тотнэ ва̄рмаль, экономика урыл, са̄внув ня̄врам самын вос патыс ос мо̄т са̄всыр тэ̄лат урыл тот потыртаӈкве патэ̄гыт. Маныр та̄рвит о̄лы, та урыл потраныл тах мины. На̄н номылматыглан ма̄гыс: о̄выл конгресс 1992 та̄лт Сыктывкар ӯст, китыт конгресс 1996 та̄лт Венгрият Будапешт ӯст, хӯрмит конгресс 2000 та̄лт Финляндият Хельсинки ӯст, нилыт конгресс 2004 та̄лт Эстоният Таллин ӯст, атыт конгресс 2008 та̄лт Ханты-Мансийск ӯст, хо̄тыт конгресс ос 2012 та̄лт Венгрият Шиофок ӯст о̄лсыт. Ань са̄тыт конгресс «Финляндия-Россия» аквъёт рӯпитан хо̄тпат та̄н щё̄питыяныл. Тот рӯпата ёмщакв вос минас, финноугор мир Консультативный комитет та̄н уральтым о̄ньщияныл. Ты ва̄рмаль ма̄гыс Финляндия ма̄т культура ос ханищтап Министерстват рӯпитан ма̄хум та̄н олн ойтэ̄гыт. Конгрессыт рущ, финн ос английский ла̄тӈыл тах потыртаӈкве патэ̄гыт. Ты ва̄рмаль кастыл ка̄сыӈ ма̄ныл ёнгын колыт са̄ӈквылтаӈкв, э̄ргуӈкв ос йӣквуӈкв тув ёхтэ̄гыт. Хумус тот рӯпата мины, ма̄н тувыл ювле ёхтын ма̄хманув китыглыянӯв ос ётылнув ты урыл тах хансэ̄в. Николай МЕРОВ хансыс ос хури ва̄рыс.

1124 2016. 05. 26. Светлана РОМБАНДЕЕВА

Иврит ла̄тыӈ янытлавес Ювле хультум э̄тпос 22 хо̄талэ̄т Ханты-Мансийск ӯст о̄лнэ Государственный художественный музейт «Страницы еврейской литературы» нампа хо̄нтхатыглап ва̄рыглавес. 2014 та̄лт «Страницы национальной литературы» ла̄тыӈ янытлан тэ̄ла ква̄лтапаптувес. Та па̄сыл ань ты хо̄тал мус хӯрум тамле хо̄нтхатыглап о̄лыс – азербайджанский, армянский ос дагестанский мирыт ла̄тӈаныл, потраныл ос стихотворенияныл янытлаве̄сыт. Ты тэ̄ла палт пуӈк тотнэ нэ̄ Любовь Миляева тох ла̄выс: «Ма̄н хунь «Югра многоликая» нэ̄пак щё̄питаслӯв, акв пӯмыщ потыр хӯлсӯв – округувт насати иврит ла̄тыӈ ва̄нэ хо̄тпа о̄лы, Илья Верховский. Тав еврей ма̄хум пе̄с потрыт ва̄г, та̄н ла̄тӈанылт ловиньтаӈкве ха̄сы, пе̄с йис потрыт рущ ла̄тӈыл толмащлыянэ. Илья Аркадьевич ма̄нти палтув во̄выслӯв, ты э̄типа̄ла тав потыртаӈкве паты, ма̄н ань еврей ма̄хум ла̄тӈаныл хӯнтамлылӯв». Илья Верховский такви уре̄т аквкит ла̄тыӈ ла̄выс: «Ам рущ ос еврей колта̄гылт самын патсум. О̄пам ос щащеквам иврит (идиш) ла̄тӈыл мощ потыртаӈкве ха̄ссы̄г. Ва̄т нупыл ат та̄лум мус ам ловмантем ла̄тыӈ туп ва̄сум. Ос ты ла̄тӈыл сака пӯмщалахтасум, э̄ргыт ос стихыт ханищтаӈкве патсум, тувыл ла̄щалла̄щал потыртаӈкве патсум. Ищхӣпыӈ ут хосыт еврей ма̄хум ёт ва̄йхатаӈкве патсум. Ма̄ янытыл насати са̄в хо̄тпа идиш ла̄тыӈ ханищтэ̄гыт. Ам ань та̄н ётаныл потраме̄гум, халанувт пищмат хансэ̄в, идиш ла̄тӈыл потрыт ос стихыт хансэ̄в. Еврей мир та̄нти о̄лум ма̄наныл пуссын ла̄ккваня̄влуве̄сыт, са̄выӈпа̄лэ порславе̄сыт, о̄лнэ коланыл хотё̄хтуве̄сыт. Ма̄н ань ты пе̄с йис мир но̄хялтуптылӯв, хоттыпылтам коланыл кинсылув». Тувыл Илья Верховский Тимофей пыге̄нтыл сценан во̄ввесы̄г. Тот Дагестан ма̄ныл о̄лнэ ма̄хум лю̄льсыт, ка̄тыт на̄й тэ̄нэ исвеща пувсыт. На̄й тэ̄натэ̄н та майвес. Мо̄т щёс тэ̄н тах ты на̄й мо̄т хотты мирын мыгтэ̄н. Илья пыге̄нтыл идиш ла̄тӈыл стихыт ловиньтасы̄г, э̄ргыт э̄ргысы̄г. Илья гитарал та̄ныт са̄ӈквылтас. Еврей колта̄глытт самын патум мӯтраӈ ма̄хум Иегуда Галеви, Менделе Мойхер-Сфорима ос Шолом-Алейхема хансум стиханыл ос потраныл ма̄ньлат нэ̄кветн ловиньтаве̄сыт – Ядвига Вольская, Анастасия Жукова ос Любовь Миляева. Та̄наныл хӯнтлуӈкве сака пӯмыщ о̄лыс.

1124 2016. 05. 26. Валентина УЗЕЛЬ

Савалап ня̄врамыт янмалтан ще̄мьят кассыт Ма̄н округувт савалап ня̄врамыт ос ща̄нита̄щитн хультуптым ня̄врамыт ӯргалым ос акваг уральтым о̄ньщавет. Ань са̄в колта̄глыт тамле ня̄врам та̄нти палтаныл янмалтаӈкв висаныл. Округувт ань ты хо̄тал мус яныгса̄т хо̄тпан ня̄врам савалап колытт иӈ хультсыт. Ще̄мьятытн 7 со̄тыра 500 ня̄врам вуйве̄сыт. Ня̄врам янмалтанэ̄ныл ма̄гсыл ща̄нит ос а̄щит ка̄сыӈаныл я̄нас олныл ойтавет, яныг о̄лнэ колыл ӯнттавет. Ул таима̄гыс ня̄врамаквет пуссын ще̄мьятытн виӈкв ты патве̄сыт. Ты ще̄мьят рущ ла̄тныл «замещающие» тох ла̄вавет. Ань ща̄нита̄щит вим ня̄враманыл та̄нти нупыланыл ат хансыяныл, «опека» нэ̄пакыт ва̄ре̄гыт. Ты хосыт та̄н са̄в олныл ты мивет. Ка̄сыӈ та̄л округув янытыл тамле ще̄мьят ма̄гсыл касыл ва̄рыглаве. Тот та̄рапаттаве – та̄н халанылт хотьют ня̄врамыт э̄руптым янмалтыяныл, та̄наныл ма̄щтырлаӈкв хумус ханищтыяныл. Ань округув янытыл са̄тхуйплов ще̄мья Ханты-Мансийск ӯсн ёхталасыт. Та̄н халанылт на̄ӈкыс – хотьютаныл ня̄врам э̄руптэ̄гыт, хотьют ос ня̄врам сака кантыӈыщ о̄ньщияныл. Савалап ня̄врамыт вим ще̄мьят ма̄гыс ты касылт хӯрум номинация ва̄рыглавес – «Семейный альбом», «Семейная мастерская», «Художественное творчество». Ка̄сыӈе̄т хӯрум ще̄мья янытлавес. «Семейная мастерская» касылт мӯйлын ма̄хум суссылтасыт – та̄н ня̄враманыл маныр ма̄щтырлаӈкв ха̄сэ̄гыт. Но̄хпатум Лисовиченко колта̄гыл Сургутский районт о̄лы. Нэ̄гхумыг нила ня̄врам висы̄г, ань туп акв а̄гитэ̄н тыг ёхталас. А̄гирищакве ханты супыл масхатас, «Кӯринька» йӣквыс. Гараевыт ос Корнийчук колта̄глыг о̄с янытлавесы̄г. Корнийчук ще̄мья Пыть-Ях ӯст о̄лы. Ань оманыл нила ня̄врам ёт тотыглас. Такви рущ э̄ква, вим ня̄враманэ пуссын тав нупылэ татем хартавет. О̄с на̄ӈкыс, ня̄врамаквет пуссын оманыл сака э̄руптыяныл. Ща̄няныл ос татем ёмас самыл ня̄враманэ нупыл сунсыс. Сака яныг ще̄мья Сургут ӯсныл ёхталас – Гатауллин нэ̄гхумыг хо̄тхуйплов ня̄врам висы̄г, ань та̄н ётаныл Ханты-Мансийск ӯсн титхуйплов ня̄врам ёхталасыт. Та̄н «Семейный альбом» нампа номинацият но̄хпатсыт. Советский районныл ёхталам Тукмачёв ще̄мья титыт место висыт, та̄н ат ня̄врам о̄ньще̄гыт. Хӯрмит местал Тищенко ще̄мья майвес. Нефтеюганский районт о̄лнэ яныг ще̄мья, та̄н о̄парищ наманыл – Костюк, о̄выл места висыт. Тэ̄н аквхуйплов ня̄врам висы̄г, та̄нти халанылт сака ёмащакв о̄лэ̄гыт. Ня̄врамыт пуссын э̄руптавет. Ань та̄н но̄хпатманыл ма̄гыс маттем та ща̄гтсыт, оманыл та аниглыяныл, та сынгатахтыглэ̄гыт. Сака ёмас ще̄мья, та̄н яныгса̄т со̄тыра солко̄вил майве̄сыт. Ольга Леонидовна оманыл ань ла̄выс, ты олныт та̄н нас тэ̄ла та̄л ат холтыяныл. Туи порат та̄н ня̄враманыл ёт Урай ӯсн ялуӈкв номсэ̄гыт. Валентина Хозумова Ты хурит торговопромышленный палатат рӯпитан ма̄хум по̄слысаныл.

1125 2016. 06. 09. Тамара МЕРОВА

Округувт ма̄хум хумус пе̄риясыт Я̄ӈк натнэ э̄тпос ва̄т нупыл китыт щислат Россия янытыл ма̄хум нэ̄пак та̄ратасыт. Тамле пе̄рияп «Единый Россия» нампа партия ва̄рыглас. Та хо̄талт ма̄хум Государственный Думан, Тюменский область ос округ Думан кандидатыг хасхатнэ хо̄тпат пе̄риясыт. Ты коныпал округувт нилахуйплов ӯсытт ос нила па̄влытт хотты хо̄тпа кӯщаиг паттуӈкве таӈхияныл, таияныл ма̄гыс о̄с нэ̄пак та̄ратасыт. Ань хоты хо̄тпат ма̄гыс са̄в ка̄тпос пинаве, таит сӯкыр э̄тпос нёлоловхуйплов щислат э̄лаль пе̄рияӈкве тах э̄ри. «Единый Россия» нампа партият рӯпитан хо̄тпат ань та̄рапаттысаныл, хотьютаныл э̄лаль вуйве̄сыт, таит акв нэ̄пакло̄псын хансуӈкве ве̄рмавет ос та̄н ма̄гсыланыл акв нэ̄пак та̄ртуӈкве ро̄ви. Нэ̄мхотьютн ат пе̄риим манос мощща ка̄тпос атум хо̄тпат по̄хан та паттавет. Пе̄рияп ва̄рмалит о̄вылтыт округ Думат кӯщаиг о̄лнэ хум Борис Хохряков тох потыртас: «Юграт пе̄риян ва̄рмаль мӯсхал щирыл ва̄рыглавес, нэ̄мат лю̄ль ва̄рмалит ат е̄мталасыт. Тыт 141 комиссият рӯпитасыт ос 137 со̄тыра 613 э̄лумхо̄лас нэ̄пак та̄ратан ма̄гыс ёхталасыт. Россия янытыл ма̄н ма̄в тыи ма̄гыс янытлавес. Ос ма̄н ма̄нки партияв ма̄гыс ос хотща̄гтым о̄лэ̄в. Ма̄н пӯмащипа ла̄тыӈ мирн ла̄ве̄в». Тувыл тав Государственный Думан пе̄риян хо̄тпат наманыл ла̄всанэ. Ань Ханты-Мансийский одномандатный избирательный №122 участок щирыл 20 со̄тыра арыгкем хо̄тпа Павел Завальный ма̄гыс нэ̄пак та̄ратасыт, Татьяна Гоголева ма̄гыс 14 со̄тыра, Виктор Заболотский ма̄гыс 13 со̄тыра э̄лумхо̄лас, тувыл Эдуард Исаков лов со̄тыра арыгкем ос Николай Ташланов ма̄гыс тыгыл мощщанув э̄лумхо̄лас нэ̄пак та̄ртсыт. Нижневартовский одномандатный №223 избирательный участок щирыл са̄в ма̄хум Александр Сидоров ма̄гыс, Светлана Титова, Ринат Айсин, Эдуард Логинов ос Дмитрий Нечепуренко ма̄гыс ка̄тпос пинсыт. Ос Югра па̄лыл федеральный избирательный список щирыл но̄хпатум хо̄тпат наманыл: Павел Завальный, Татьяна Гоголева, Александр Новьюхов, Виктор Заболотский ос Владислав Малюгин. Та̄наныл пуссын депутатыг пе̄рияӈкве таӈхегы̄н ке, таквсы акв список щирыл нэ̄пак та̄ратаӈкве ве̄рмегы̄н. А̄ти ке, то̄ват хотщуртумтаӈкве ро̄ве̄гыт.

1125 2016. 06. 09. Николай МЕРОВ

Ма̄вит ӯргалым о̄ньщелы̄н Ханты-Мансийск ӯст «Спасти и сохранить» нампа ма̄вит ӯргалан мирхал ва̄рмаль о̄вылтахтас. Ты та̄л тав нилахуйпловит щёс ва̄рвес. Ты ва̄рмаль э̄лаль тотнэ ма̄гыс округ миркол кӯщаит ос нефтяной компаният рӯпитан ма̄хум та̄н яныг нё̄тмил ва̄ре̄гыт. Ань мо̄т хо̄н ма̄ныл са̄в мир мӯйлуӈкве тыг ёхталасыт. Яныг хо̄тпат, школатт, университетыт ханищтахтын ня̄врамыт «Искусство центр» колыт акванатхатыгласыт. Округ кӯщай нэ̄ Наталья Комарова о̄с тув ёхталас. Югра 87% ма̄ са̄витэ во̄р ма̄. Тыт А̄с ос Иртыш кит яныг я̄г овтэ̄г. Тэ̄н палтэ̄н китхуйплов са̄всыр я̄ паты. Китса̄ткем со̄тыра тӯр о̄лы. Я̄тыт ос тӯрытыт са̄всыр хӯл яныгми. Та̄н халанылт щар атыӈ сорых, мохсаӈ, ӯсхул ос ма̄ янытыл ва̄нэ Та̄гт я̄ нялк. Во̄рт са̄выӈпа̄лэ тарыг, ховт, ӯльпа, на̄ӈк, нюлы ос ха̄ль йӣвыт яныгме̄гыт. Округ янытыл 24 ӯргалым о̄щнэ ма̄ о̄лы. Кит федеральный заповедник, нила округ природный паркыт ос са̄всыр заказникыт ос памятникыт ӯргалым о̄ньщавет. Округувт 1 млн. 600 аргытем хо̄тпа о̄лы. Пуссын аквъёт 123 са̄всыр национальностит тыт о̄лэ̄гыт. Та̄н халанылт ма̄ньщит, хантыт ос ё̄рныт 2% са̄вит е̄мты. Россия янытыл ма̄н ма̄вт щар са̄в ма̄во̄й ос газ но̄хвиве. Ань ты хо̄тал мус тыт аквхуйплов млрд. арыгтем тонна ма̄во̄й но̄хвуйвес. Ты хосыт о̄лупсав акваг ёмасыг е̄мты, мир ма̄гыс са̄в э̄рнэ тэ̄ла ва̄раве. Та сыс ма̄во̄й винэ паттат ма̄витув о̄с сака па̄ӈктаве. Тыима̄гыс ма̄щунь сэ̄лнэ компаният ань ма̄ке̄в ӯргалан ма̄гыс са̄в олн холтэ̄гыт. Ат э̄рнэ газ пе̄ламтэ̄гыт, харӈаиӈ ке̄ртурыт йильпииг пе̄нтыяныл ос ма̄во̄й со̄сантым ма̄т, я̄т, тӯрыт хотсыстамтыяныл. Ты коныпал о̄с акв ва̄рмаль о̄лы. Туи порат во̄рытт на̄й пе̄ламлы, во̄ркве на̄йн тэ̄ве. Тыил о̄с яныг та̄рвит ма̄витын е̄мты. Ма̄вит ул вос па̄ӈктавес, 2003 та̄лт округ мирколт рӯпитан кӯщаит «Спасти и сохранить» нампа ма̄вит ӯргалан мирхал ва̄рмаль щё̄питасыт. Ты тэ̄ла о̄вылтаманыл порат, са̄всыр ма̄ныл пуссын аквъёт 22 со̄тыра э̄лумхо̄лас ма̄ ӯргалан ма̄гыс акванюрщхатасыт. 2012 та̄л па̄сныл ты ва̄рмаль э̄лаль рӯпитан ма̄гыс Россия наука ос ханищтап министерства, ма̄вит ӯргалан министерства нё̄тмил ва̄руӈкве патсы̄г. Ань ты накт ляпат ос э̄лы мо̄т хо̄н ма̄тт о̄лнэ 51 мир ты акция щё̄питаӈкве нё̄тэ̄гыт. Россия янытыл ос 78 ма̄тт о̄лнэ ма̄хум ты тэ̄ла э̄лаль тотэ̄гыт. Ты та̄лыт сыс ань пуссын аквъёт атса̄ткем со̄тыра э̄лумхо̄лас рӯпитаӈкве патсыт. Ма̄нки ма̄витув са̄в та̄л ёмщакв ӯргаламув ма̄гыс округув акваг янытлаве. Ма̄вит ӯргалан хо̄талыт рӯпитан сыс ӯсытт, па̄влытт о̄лнэ ма̄хум ӯсхулы порсаныл хотатэ̄гыт, хорамыӈ лӯптат, йӣвыт ӯнттэ̄гыт, во̄рыт, я̄ ва̄тат ос тӯр ва̄тат порсыл хотсыстамтэ̄гыт. Школат ня̄врамыт ма̄вит ӯргалаӈкве ханищтавет. Та̄н ма̄гсыланыл са̄всыр касылыт ос суссылтапыт ва̄рыглавет. Ма̄нки ма̄в нё̄тнэ̄г ос сыстамыг о̄щнэ̄в ма̄гыс, тыт са̄всыр мирхал конференцият, съездыт ос мо̄т тэ̄лат ва̄тихал ань ты ва̄рыглавет. Округ кӯщай нэ̄ Наталья Комарова мӯй ма̄хумн ла̄выс, ма̄вит ӯргалан ва̄рмаль «Искусство Центр» нампа ня̄врамыт ханищтан колт ань таима̄гыс ва̄рвес. Ты та̄лув ня̄врамыт янытлан та̄лыг ла̄ввес. О̄лнэ ма̄в манхурипаг ня̄врамытн хультуптылӯв, тох э̄лаль та̄н таве ӯргалаӈкве та патыяныл. Тав ла̄тӈе щирыл, ма̄кев са̄в нотн сыстамыг вос хультыс, ӯргалан тэ̄лан ня̄враманув ма̄нь та̄гыл ханищтаӈкве э̄ре̄гыт. Ты акция ма̄ньлат хо̄тпа манос ня̄врам ма̄вит ӯргалаӈкве ханищты. Ты ва̄рмаль ма̄н аквъёт са̄в нотн э̄лаль тотылӯв. Кӯщай нэ̄ ма̄ньщи ос ханты ма̄хманув мо̄йт номылматыгла̄лыс. Тав ла̄выс, пе̄с йис потыр щирыл, ма̄н ма̄в ща̄рыщ паттаныл лӯлын тотым ма̄нь ма̄ло̄мтыл тэ̄лыс ос э̄лаль яныгмас. Соссаӈ ма̄хманув пе̄с йис потраныл щирыл, ка̄сыӈ ма̄ло̄мт ӯргалаӈкве э̄ри.

1125 2016. 06. 09. Светлана РОМБАНДЕЕВА

Ня̄врамыт ӯщлахтуӈкве ӯравет Ханты-Мансийск ӯст округ мирколт ня̄врамыт ӯщлахтан ма̄наныл урыл потыр о̄лыс. Тув са̄в кӯщаит ёхталасыт, ва̄ӈнаныл по̄сыӈ ма̄хум ос ӯщлахтан ма̄т ня̄врамыт ӯргалан ос уральтан хо̄тпат о̄лсыт. О̄выл ла̄тыӈ округ янытыл савалап ня̄врамыт ӯргалан департаментыт кӯщаиг о̄лнэ нэ̄ Елена Немчинова тав ла̄выс: «Ты тув округувт 590 ӯщлахтан ма̄ щё̄питавес, 91 со̄тыра 265 ня̄врам ӯщлахтуӈкве паты. 493 ма̄т туп хо̄тал палыт ӯщлахтуӈкве патэ̄гыт, 55 палаткаӈ лагерит, 16 ма̄т ма̄ньлат ма̄хум рӯпитаӈкве патэ̄гыт. Кит ма̄т та̄н пусмалтаӈкве патавет – Нижневартовск ӯст о̄лнэ «Нефтяник Самотлора» колт ос Югорск ӯст о̄лнэ «ЮгорскТрансгаз» колт. Округув коныпал то̄ваныл Россия янытыл ос э̄лы хо̄н ма̄т ӯщлахтуӈкве патэ̄гыт, 20 со̄тыра 515 ня̄врам. 208 ня̄врам Всероссийский детский центрытн ӯщлахтуӈкве ос пусмалтахтуӈкве ке̄тавет: «Орлёнок» (Туапсе ӯст о̄лы), «Смена» (Анапа ӯст о̄лы) ос «Артек» (Крым Республикат о̄лы). Ма̄ньлат ма̄хум вуянтан ва̄ӈнаге по̄сыӈ нэ̄ Татьяна Черкашина та урыл ла̄выс, ань мори капыртан (алхатыгла̄лнэ от матыр лю̄ль ва̄рапа̄лнэ) ня̄врамыт пуссын ӯщахтуӈкве ос пусмалтахтуӈкве ке̄тавет, рӯпатал мивет, сакати олнло̄мт сэ̄лэ̄гыт. Ва̄ӈнаге по̄сыӈ хум Александр Казачинин ла̄вме щирыл, тӯяг ня̄врам ӯщлахтан ка̄сыӈ ма̄ мӯсхал щирыл уральтавес, пуссын ёмащакв щё̄питымат. Ня̄врамыт па̄йтым тэ̄нутыл кит ман хӯрум щёс тыттуӈкве патавет.

1125 2016. 06. 09. Светлана РОМБАНДЕЕВА

Ма̄ньлат хо̄тпат э̄рнэ тэ̄лат ва̄ре̄гыт Ня̄врамыт ялпыӈ хо̄таланыл э̄лыпал хо̄талт Ханты-Мансийск ӯст о̄лнэ РИЦ «Югра» колн ля̄ххал тотнэ ма̄хум акванатапа̄лве̄сыт. Радужный ӯсныл «Пазл+» нампа ма̄ньлат мир организацият кӯщаиг о̄лнэ нэ̄ Юлия Садовская ос Сургут ӯсныл «Центр детского творчества» колт рӯпитан нэ̄ Елена Лебедева ёхталасы̄г. Тэ̄н та урыл потыртасыг, ань ма̄ньлат ма̄хум ос ня̄врамаквет ёт хумус рӯпитэ̄гыт, манхурип нё̄тмил та̄н ма̄гсыланыл ва̄ре̄гыт. Елена Лебедева тох потыртас: «Ма̄н центрувт акв тамле ёмас тэ̄ла о̄лы: «Сладкое письмо солдату». Хо̄тыт та̄л центрын ялантан ня̄врамыт День защитника Отечества хо̄тал кастыл са̄лтатытн пищмат хансэ̄гыт, тувыл атыӈ компеткат щё̄питэ̄гыт, акванпиныяныл, армиян ке̄тыяныл. Округув янытыл мо̄т школат о̄с тох ва̄руӈкве патсыт, ма̄н ӯсув палт о̄лтхатасыт. Ань армияныл юв ёхтын пыгыт ма̄н палтув щалтапа̄лэ̄гыт, пӯмащипа ла̄тыӈ ла̄ве̄гыт». Тувыл ты нэ̄ мо̄т ёмас тэ̄лат урыл потыртас. «Безопасное колесо» ханищтап ва̄рыгла̄лэ̄гыт, ня̄врамыт ма̄шинал яласаӈкве ханищтахтэ̄гыт. «Школьный актив города» нампа тэ̄ла о̄ньще̄гыт, тот ма̄ньлат ма̄хум кӯщаиг о̄луӈкве ханищтахтэ̄гыт, та̄нти халанылт пе̄рияп тэ̄ла та маныр ва̄рыглэ̄гыт. Юлия Садовская ла̄вме щирыл, та̄н ма̄ньлат хо̄тпат ёт о̄с са̄в рӯпитэ̄гыт, са̄всыр э̄рнэ тэ̄лат ва̄ре̄гыт – яныг хо̄тпатын нё̄тэ̄гыт, Победа Хо̄тал кастыл са̄в э̄рнэ ва̄рмалит номылмата̄лэ̄гыт, ветеранытын нё̄тэ̄гыт. Ты нэ̄ ла̄выс: «Хунь хо̄тпа сымыӈ э̄лумхо̄лас, са̄в ёмас тэ̄ла ва̄ри, тав ляльтэ мо̄т ма̄хум сунсэ̄гыт, тувыл та̄н тав хольтэ о̄луӈкве тахмае̄гыт, э̄рнэ тэ̄ла ва̄руӈкве вуйхатэ̄гыт». Нэ̄г потре̄н оигпаме э̄лыпа̄лт округ ня̄врамыт ялпыӈ хо̄талыл янытласанэ̄н, та̄нанылн са̄в ёмас сымыӈ ла̄тыӈ ла̄всыг.

1125 2016. 06. 09. Людмила ТЕТКИНА

Яныг ӯст лё̄ӈхыт ёмащакв щё̄питавет Ты ва̄рмаль урыл сапра̄нит кӯщаит потыртасыт. Яныг кӯщай нэ̄ Наталья Комарова ла̄выс, Сургут ос Сургутский районт ма̄шинал яласан лё̄ӈх ёмащакв щё̄питан ма̄гсыл «Сургутнефтегаз» ма̄во̄й но̄хвинэ компания олн та̄стыс. Ты компания са̄в та̄л округ кӯщаит ёт соглашениенэ̄пак хосыт рӯпиты. Ты нэ̄пак щирыл 2016 та̄лт ма̄во̄й но̄хвинэ компания 14 млрд. арыгкем солко̄ви са̄всыр э̄рнэ ва̄рмалит ма̄гсыл тах мыг. Ты коныпал Сургут ос Сургутский районт ма̄шинат яласан лё̄ӈхыт ва̄рнэ ма̄гсыл 192, 9 млн. солко̄ви та̄стыс. Мо̄тыт та̄л ма̄вит ӯргалан та̄лыг тах намаве. 2017 та̄л сыс манхурип рӯпата ва̄руӈкве патаве ос аквта сапра̄нит кӯщаит потыртасыт. Наталья Комарова та урыл ла̄выс: «Тыхо̄тал «Спасти и сохранить» нампа мирхал акция рӯпитаӈкве по̄йты. Ма̄вит ӯргалан хо̄тпат мо̄тыт та̄л ос тах акванатхатыглэ̄гыт. Та та̄л Россия янытыл ма̄вит ӯргалан та̄лыг намаяве. Таве янытлаӈкве ма̄н ань щё̄питахтуӈкве о̄вылтахтасӯв. Тыи ма̄гсыл ты йильпи нэ̄пак пирмайтэ̄в». Округувт о̄лнэ ма̄хум ты нэ̄пак ищхӣпыӈ утыт ловиньтаӈкве ве̄рмысыт. Сергей Пикунов, ма̄вит ӯргалан департаментыт кӯщаиг о̄лнэ хум, сапра̄нит ты урыл потыртас. Тав ла̄выс ты нэ̄пакн 104 са̄всыр э̄рнэ тэ̄ла хасвес, та та̄л сыс тыт о̄лнэ ма̄хум ма̄вит ӯргалан ма̄гсыл са̄всыр рӯпата пуссын аквъёт ва̄руӈкве тах патэ̄гыт.

1125 2016. 06. 09. Людмила ТЕТКИНА

Музеитт рӯпитан хо̄тпат янытлаве̄сыт Ка̄сыӈ та̄л я̄ӈк на̄тнэ э̄тпос оигпан э̄лыпа̄лт округ янытыл о̄лнэ музеит кӯщаит Ханты-Мансийск ӯст акванатыглавет. Ты та̄л о̄лум сапра̄нит ма̄хум ня̄врамыт ханищтан ва̄рмалит ма̄гсыл манхурип э̄рнэ тэ̄ла ва̄руӈкве номсэ̄гыт, та урыл потыртасыт. Ты юипа̄лт «Музейный олимп Югры» нампа касылн нэ̄паканыл ке̄тыглам музеит янытлаве̄сыт. Тамле касыл культура департамент 2011 та̄л па̄сныл ва̄рыглы. «Музей детям» нампа номинацият Сургут ӯст о̄лнэ краеведческий музей но̄хпатыс. Та̄н касылн «По следам чёрнобурого лиса» нампа проектаныл ке̄тыгласыт. «Музейное издание» номинацият «Птицы светлой памяти» нампа нэ̄пак пе̄риявес. Ты нэ̄пак Саранпа̄выл музейт рӯпитан хо̄тпат та̄н та̄ратасыт. Па̄вылт о̄лнэ ма̄хум ёт та̄н хо̄нтлум хо̄тпат урыл потрыт хассыт. «Выставка года» номинацият «Геология, нефть ос газ» нампа музей но̄хпатыс, та̄н «Самотлор озеро судеб» суссылтап ма̄гсыл янытлаве̄сыт. «Музейный проект года» номинацият «Ма̄вит ос э̄лумхо̄лас» нампа музей но̄хпатыс. Тот рӯпитан ма̄хум ты касылн «История ссылки спецпереселенцев» суссылтап урыл нэ̄паканыл ке̄тыгласаныл. «Признание» номинацият «Газпромнефть Хантос» нампа компания янытлавес ос янытлан нэ̄пакыл майвес. Музеитт рӯпитан хо̄тпат янытлаӈкве общественный связь Департаментыт кӯщай нэ̄ Елена Шумакова ёхталас. Тав ма̄хумн тох ла̄выс: «На̄нан пуссын Наталья Комарова, губернаторув, янытлыянэ ос паща ла̄тыӈ ке̄ты. Ты та̄л ма̄н округувт ма̄вит ӯргалан та̄лыг намаявес. Ты накт «Барсова гора» Сургутский районт о̄лнэ ма̄н ялэ̄в тах. Наталья Владимировна о̄с тув ялы, ма̄хумн рӯпитаӈкве о̄с нё̄ты. Тамле рӯпата ань таи ма̄гсыл ва̄раве, пе̄с йис ва̄рмалит ул вос ёрувлавет. Ань ма̄н Саранпа̄вылт о̄лнэ ма̄хумн яныг пӯмащипа ла̄тыӈ ла̄ве̄в. Та̄н Победа хо̄тал 70 та̄лэ то̄влум кастыл ёмас нэ̄пак щё̄питасыт. Та̄ратым нэ̄пакт о̄выл ло̄псэ̄т хансым о̄лы, войнат хо̄нтлум яныгпа̄ла хо̄тпа ань па̄вылт воссыг а̄тим. Тан пуссын а̄тимыг е̄мтсыт, тувыл рӯтаныл ос Саранпа̄вылт о̄лнэ мир та̄наныл акваг номуӈкве тах патыяныл. Ты нэ̄пакт Юля а̄гирищ урыл ловиньтасум. Тав такви яныг ащо̄йкатэ урыл потыр ты нэ̄пак ма̄гсыл хансум, тав ёлщё̄питым ма̄тэ кинсуӈкве патыстэ. Ащо̄йкатэ ёлщё̄питым ма̄тэ хо̄нтыстэ, ань тув ялуӈкве номсы. Тамле потыр ловиньтым ма̄н ва̄глум, ты нэ̄пак ва̄рум хо̄тпат сака яныг ос э̄рнэ рӯпата ва̄рсыт, ань ма̄ньлат ма̄хум ос ня̄врамыт хо̄нтлам рӯтаныл номуӈкве патыяныл. Тыи ма̄гсыл та̄нанылн ам яныг пӯмащипа ла̄тыӈ ла̄ве̄гум». Людмила Теткина хансыс ос хури ва̄рыс.

1125 2016. 06. 09. Светлана РОМБАНДЕЕВА

Нэ̄пакыт урыл хо̄нтхатыглап ва̄рыглавес Ханты-Мансийск ӯст «Югорика» нампа са̄тыт фестиваль о̄лыс, округ янытыл нэ̄пак ва̄рнэ ма̄хум акванхо̄нтхатыгласыт. Лӯи ма̄вт ювле хультум кит та̄л сыс 400 арыг йильпи нэ̄пак ва̄рвес. Жюрихо̄тпатын ка̄сыӈ нэ̄пак ловиньтавес, тувыл ма̄к ёмас нэ̄пакыт ла̄вве̄сыт. Владимир Струсь «Первая мировая война в жизни югорчан» хансум нэ̄паке ма̄гыс янытлавес, «Лучшая краеведческая книга» намыл пинвес. Ня̄врамыт ма̄гыс мо̄йтыт – «Сказ о чёрном лисе» ос «Сказки обских угров», «История Югры в древности и средневековье», «Хантыйская литература в вопросах и заданиях», «Эринтур» ос мо̄т нэ̄пакыт но̄хпатсыт, ма̄к ёмас нэ̄пакыг ла̄вве̄сыт. Хо̄нтаӈ ма̄ньщи о̄йка Андрей Семёнович Тарханов «Буранная Россия» нэ̄паке̄т хансум стихотворениянэ ма̄гыс янытлавес. «Сказки обских угров» нэ̄пак А̄сугорский институтт рӯпитан ма̄ньщи ос ханты ма̄хум та̄н хассыт. Ка̄сыӈ мо̄йт рущ ла̄тӈыг толмащлым о̄лы, нё̄тнэ хурит тув по̄слым о̄лэ̄гыт. Ты нэ̄пак ня̄врамыт сака пӯмщаласаныл. А̄сугорский институт библиотекатэ̄т рӯпитан нэ̄ Елена Степанова ла̄выс: «Ты нэ̄пакн атым ма̄ньщи мо̄йтыт Ирина Яковлевна Чернецован 1939 та̄лт хансыглаве̄сыт, нэ̄пакыг ва̄рве̄сыт. Ленинград ӯс педагогический институтт ханищтахтам ма̄ньлат а̄гипыгыт та̄н потырта̄лсыт». Но̄хпатум ма̄хум пуссын янытлаве̄сыт, диплом нэ̄пакытыл майве̄сыт. Светлана Ромбандеева хансыс ос хури ва̄рыс.

1125 2016. 06. 09. Людмила ТЕТКИНА

Ня̄врамыт ӯргалан хо̄тпа рӯпататэ Ма̄н округувт са̄т та̄л ня̄врамыт ӯргалан нэ̄г Татьяна Моховикова рӯпиты. Ты нэ̄ па̄лт ня̄врамыт манос та̄н ща̄няныла̄щаныл ялуӈкве ос пищма хансуӈкве ве̄рме̄гыт. Кӯщай нэ̄ ла̄выс, ты пора сыс нила со̄тыра арыгкем пищма тав палтэ ёхтыс. Ка̄сыӈ ня̄врам ма̄гсыл тав сыме ща̄рги, ка̄сыӈ а̄гирищин, пыгрищин тав нё̄туӈкве таӈхи. Ля̄ххал тотнэ ма̄хум ёт хо̄нтхатыгламе порат, Татьяна Моховикова акв тэ̄ла урыл потыртас. Ма̄н округувт кит та̄л «Дети – детям» нампа проект рӯпиты. Ты тэ̄ла хосыт ня̄врамыт та̄нки общественный совет ва̄рсыт. Ань тамле совет Ханты-Мансийск, Сургут, Покачи ӯсытт ос Белоярский районт сака ёмащакв рӯпиты. Тув хасхатам а̄гитпыгыт Кирилл Мухин кӯщаиг пе̄риясыт. Тав Ханты-Мансийск ӯст о̄лы, ос лов классыт ханищтахты. Таквсы порат Калуга ӯст «Дети. Россия. Будущее» нампа всероссийский форум рӯпитаӈкве тах паты. Ма̄н о̄лнэ ма̄вныл хӯрум ня̄врам тув минэ̄гыт. Ты советыт о̄лнэ а̄гитпыгыт та̄нки халанылт тув миннэ хӯрум ня̄врам тах пе̄рие̄гыт. Кирилл Мухин такви рӯпататэ урыл о̄с потыртас. Тав «Безопасность во дворе», «Дорожная безопасность» ос Интернетбезопасность» хӯрум проект хосыт рӯпиты. Кирилл ла̄выс, то̄ва порат ня̄врамыт ща̄няныла̄щаныл, ханищтан хо̄тпаныл ла̄тӈанылн ат хӯнтлэ̄гыт, ос то̄ват мори капыртэ̄гыт. Ня̄врамыт ла̄тыӈ вос хӯнтласыт, ёмащаквег вос ханищтахтасыт ос э̄лаль мӯсхалыг о̄луӈкве вос воратасыт, тав ты проект хансыс. Ань тав ма̄нь ня̄врамытын са̄всыр э̄рнэ тэ̄лат урыл потырты. Кирилл школа а̄стланэ̄тэ юипа̄лт, ты рӯпата ва̄руӈкве ос ня̄врамытын нё̄туӈкве э̄лаль тах паты.

1125 2016. 06. 09. Людмила ТЕТКИНА

Тэ̄пканыт ос ӯйхулыт ловиньтаӈкве патавет Ты та̄л Россия янытыл тэ̄пканыӈ ма̄т ос ӯйхулыт ловиньтаӈкве патавет, рущ ла̄тӈыл ты тэ̄ла «сельскохозяйственный перепись» намаим о̄лы. Тамле рӯпата лов та̄л сыс акв щёс ва̄рыглаве. Госстатистикат рӯпитан хум Валерий Ярлов ос природный ресурс департаментыт кӯщай ва̄ӈын хум Александр Киселёв ля̄ххал тотнэ ма̄хумн ты урыл потыртасы̄г. Валерий Ярлов ла̄выс, ты ва̄рмаль ты та̄л ойттур э̄тпос о̄выл хо̄талныл ос во̄ртур э̄тпос 15 хо̄талэ мус рӯпитаӈкве тах паты. Ма̄нь па̄вылквет ос пе̄с йис ма̄т о̄лнэ ще̄мьят палт ма̄хум сӯкыр э̄тпос 15 хо̄талныл ос яныгпо̄ль э̄тпос 15 хо̄талыт сыс ӯйхуланыл ос тэ̄пкананыл ма̄н янытат ловиньтаӈкве ёхталэ̄гыт. Округ янытыл 104 э̄лумхо̄лас ты рӯпата ва̄руӈкве патэ̄гыт. Ты ма̄хум я̄ӈк на̄тнэ э̄тпост пуссын ханищтахтуӈкве ке̄тыглаве̄сыт. Тот ка̄сыӈ хо̄тпа удостоверениенэ̄пакыл майвес. Та̄н рӯпитаӈкве хунь о̄вылтахтэ̄гыт, ка̄сыӈ колн щалтсэ̄гыт, о̄влэ̄т ты нэ̄паканыл ос паспортаныл ма̄хумн суссылтаӈкве тах патыяныл. Тамле рӯпата хунь ва̄раве, кӯщаит та̄рапаттыяныл, ӯйхул янмалтан манаса̄вит предприятият ань рӯпитэ̄гыт, хоты ма̄т ос манхурип тэ̄нут тэ̄пкант янмалтаве ос ма̄хум манхурип ӯйхул о̄ньще̄гыт. Ты юипа̄лт Александр Киселёв потыртас. Тав ла̄выс, округувт ӯйхулыт ловиньтан ма̄гсыл 14 млн. арыгкем солко̄ви та̄стувес. Ты э̄лыпа̄лт тамле ва̄рмаль Россия янытыл 2006 та̄лт ва̄рыглавес. То̄нт ос ӯйхулыт, тэ̄пканыт пуссын мӯсхалыг ловиньтаве̄сыт, сельский хозяйстват но̄хво̄рмалтан ма̄гсыл яныг программа пирмайтавес. Ань ма̄н округувт ӯйхул янмалтан предприятият акваг нё̄тавет ос олныл та̄ставет. Ля̄ххал тотнэ хо̄тпат китыглахтасыт ос хоты па̄вылт манос пе̄с йис ма̄т о̄лнэ ма̄хум ӯйхуланыл таквсы порат ловиньтаӈкве патавет. Александр Киселёв ювле ла̄выс, таквсы порат во̄рт ос пе̄с йис ма̄т о̄лнэ ще̄мьят ня̄враманыл ханищтахтуӈкве ке̄туӈкве патыяныл. Тувыл аквта порат Россия янытыл ос пе̄риян хо̄тал е̄мты, то̄нт ма̄хум ты ще̄мьят палт тах ёхталэ̄гыт. Ма̄н округувт туп Белоярский район кит па̄влыгт о̄лнэ ма̄хум таквсы порат ӯйхуланыл ос тэ̄пкананыл ловиньтавет. Ӯйхул янмалтым манаса̄вит предприятият рӯпитэ̄гыт, ос ма̄хум манаса̄вит мис, лув ос са̄всыр мо̄т ӯйхул о̄ньще̄гыт, туп 2018 та̄лт тах ла̄ваве.

1125 2016. 06. 09. Светлана РОМБАНДЕЕВА

Соссаӈ ла̄тӈагув янытлавесы̄г Я̄ӈк на̄тнэ э̄тпос 20 хо̄талэ̄т Ханты-Мансийск ӯст Государственный художественный музейт ма̄ньщи ос ё̄рн ла̄тӈыг янытлан хо̄нтхатыглап ва̄рыглавес. Ты тэ̄ла «Югра многоликая» нэ̄пак хансум ма̄хум та̄н щё̄питасыт. Ювле хультум э̄тпост еврейский ма̄хум урыл потыр о̄лыс, ань ос ма̄н поэтанув ос нэ̄пак хаснэ ма̄хманув янытлаве̄сыт. Мо̄йтыт хансум хо̄нтаӈ ма̄ньщи э̄ква Анна Митрофановна Конькова ос Юван Николаевич Шесталов ка̄стувесы̄г, тэ̄н потранэ̄н ос стиханэ̄н ловиньтаве̄сыт. Анна Митрофановна пыге Эмиль Иванович Косполов сценан во̄виньта̄лвес, намыӈсуиӈ оматэ урыл потыртас, ты хо̄нтхатыглап ва̄рум хо̄тпатн пӯмащипа ла̄тыӈ ла̄выс. Нэ̄пак хаснэ ханты э̄ква Мария Кузьминична Волдина ма̄ньщи поэтув Юван Николаевич Шесталов урыл стих хансум, таитэ ловиньтастэ. Рущ нэ̄ Любовь Миляева тав уре̄т о̄с хансыс. Рущ ла̄тӈыл нэ̄пак хаснэ хо̄нтаӈ ма̄ньщи хо̄тпа Андрей Семёнович Тарханов стиханэ ловиньтасанэ. Тувыл ё̄рн ла̄тыӈ урыл потыр о̄лыс. Нэ̄пак хансум ё̄рн хум Юрий Кылевич Вэлла ка̄стувес, тав уре̄т кинаохса суссылтавес. «Лылыӈ со̄юм» колт рӯпитан ма̄ньщи хум Владимир Савельевич Меров са̄ӈквылтапыл са̄ӈквылтас, ханищтан ня̄враманэ йӣквсыт.

1125 2016. 06. 09. Светлана РОМБАНДЕЕВА

Ма̄н ма̄вт о̄лнэ театрыт акванёхталасыт «Белое пространство» нампа окружной театральный фестиваль Ханты-Мансийск ӯст о̄лыс. 2004 та̄л па̄сыл ма̄н ма̄вт тав са̄тыт щёс ты ва̄рыглавес. Округув янытыл рӯпитан 8 театрыт акванёхталасыт –17 спектакль суссылтасыт. Ты та̄л округувт ня̄врам та̄лыг намаявес, таима̄гыс спектаклит янгыщ ня̄врамыт ма̄гыс ва̄рыглаве̄сыт. Сургут ӯсныл «Петрушка» нампа а̄кань театр ос музыкальнодраматический театр о̄лсыг, Ханты-Мансийск ӯст рӯпитан театрыг «Солнце» ос акань театр, Нижневартовсканыл «Барабашка» нампа а̄кань театр ос городской драматический театр, Нягань ӯсныл ня̄врамыт музыкальнодраматический театраныл, Нефтеюганск ӯсныл ос «Волшебная флейта» нампа а̄кань театр ёхталасыт. Нила хо̄тал сыс ӯсыӈ мир ос мӯй ма̄хум спектаклит маттем та суссыт. Фестиваль хо̄талытт ка̄сыӈ э̄типа̄ла жюрихо̄тпат ма̄к ёмас спектаклит пе̄риясыт. Ты та̄л та̄н ётаныл Ханты-Мансийск ӯс гимназият ханищтахтан ня̄врамыт рӯпитасыт, та̄н хольтаныл о̄с пе̄риясыт, щар ма̄к ёмас спектаклит урыл ла̄тыӈ ла̄всыт. Та̄н янгыщ «Наши сказки» (Ханты-Мансийск ӯст о̄лнэ а̄кань театр) спектакль пе̄риясыт, ла̄ве̄гыт, та̄нанылн сака мӯстыс. Юио̄выл хо̄тал э̄типа̄лаг театрытт рӯпитан ма̄хум ос мӯй хо̄тпат «Югра-Классик» колн атхатыгласыт. Санкт-Петербург ӯсныл ёхталам жюри нэ̄ Арина Шепелева тох ла̄выс: «Матъёмас тамле фестиваль о̄лы. Тыт ань на̄ӈки, театрыт нас хунь рӯпитэ̄гыт, та̄нки халанылт касуӈкве ве̄рме̄гыт. Театрытт рӯпитан ма̄хум нас ат о̄лэ̄гыт, та̄н ка̄сыӈ хо̄тал матыр йильпи пӯмыщ тэ̄ла номылматэ̄гыт, акваг номсащлахтэ̄гыт, тувыл ва̄рум рӯпатаныл мирн суссылтыяныл». Тувыл ка̄сыӈ театр янытлавес, тот рӯпитан ма̄хум диплом нэ̄пакытыл ос мӯйлупсатыл майве̄сыт. Светлана МАТВЕЕВА хансыс ос хури ва̄рыс.

1125 2016. 06. 09. Тамара МЕРОВА

А̄гитпыгыт ань ва̄гыт, хо̄т ос хумус кӯщаит рӯпитэ̄гыт Нефтеюганский район Салым па̄вылт №1 школат ханищтахтын ат ня̄врам Ханты-Мансийскан мӯйлуӈкве ёхталасыт. Та̄н округ кӯщай нэ̄н Наталья Комарован тыг во̄выглаве̄сыт. Мо̄лты тав Салым па̄вылн ялме порат тот ня̄врамытын рӯпататэ о̄вылтыт китыглавес. Кӯщаиг рӯпитаӈкве пӯмыщ ман а̄ти, та̄рвитыӈыг о̄лы ман а̄ти. Ос Наталья Владимировна кӯщаит рӯпитан коланыл пуссын суссылтан ма̄гыс та̄наныл тыг во̄всанэ. Югравт 2016 та̄л ня̄врамыт янытлан та̄лыг ла̄ввес. Таима̄гыс а̄гирищитпыгрищит то̄ва номтаныл тэ̄лаг ва̄руӈкве э̄ре̄гыт. Лов ос аквхуйплов классытт ханищтахтын а̄гитпыгыт та̄нки номтаныл ма̄гыс тыт мӯйлысыт. Та̄н моще̄ртын школа а̄стлэ̄гыт ос «государственное и управленческое дело» нампа ва̄рмальн э̄лаль ханищтахтуӈкве номсэ̄гыт. Ань ты рӯпата манхурип, та̄рвитыӈ ман а̄ти, хо̄т кӯщаит рӯпитэ̄гыт, маныр ва̄ре̄гыт, ты урыл мӯй ня̄врамыт саманыл сунсым, потрыт хӯнтлым пуссын та̄нки та̄рапаттысыт. О̄влэ̄т а̄гирищитпыгрищит округ Дума колн тотыглаве̄сыт. Тот та̄н депутатыт палт матыр э̄рнэ утыт щё̄питан кӯщай ва̄ӈын нэ̄ Марина Склярова ёт ва̄йхатасыт ос тав та̄нанылн са̄всыр колнакыт суссылтас ос потыртас. Та̄н са̄ртын са̄всыр комиссият акванатхатыглан колнакыгн щалтсасыт, тот сыресыр ищхӣпыӈ утыт суссыт. Тувыл кит депутатыг рӯпитан колнакн минасыт. Ня̄врамыт тот нэ̄мхотьют ёт ат ва̄щиньтахтасыт, та порат депутатыг сас хо̄т тэ̄ланэ̄н мус яласасы̄г. Ма̄хумн пе̄риим хо̄тпат акв ма̄т ат ӯнлантэ̄гыт, та̄нанылн са̄кконыт ма̄кыг хаснэ ма̄гыс то̄ва тэ̄лат ёмщакв уральтаӈкве ос сунсуӈкве э̄ре̄гыт. Таима̄гыс хо̄та̄ти яласэ̄гыт, ма̄хум ёт акванхо̄нтхатыглэ̄гыт, та̄н тэ̄ланыл щё̄питаӈкве нё̄тэ̄гыт. Тэ̄лат са̄ккон щирыл ва̄рим о̄с вос о̄лэ̄гыт. Ты коныпал округ депутатыт та̄нки о̄лнэ ма̄нылт рӯпитэ̄гыт, тыт колнак ат о̄ньще̄гыт ос сапра̄нит ва̄рнэ порат тыг нас во̄виньта̄лавет. Та юипа̄лт мӯй хо̄тпат депутатыт рӯпитан яныг сапра̄ни колнакн тотве̄сыт. Тот а̄гирищитпыгрищит ос са̄всыр ва̄рмалит урыл пӯмщалахтасыт. Яныг кӯщаит пасан ва̄тан ӯнтсасыт, по̄слуве̄сыт ос ля̄ххал тотнэ ма̄хумн о̄лупсаныл урыл мощ китыглаве̄сыт. А̄гитпыгыт ла̄вманыл щирыл, тамле экскурсият ма̄ньлат хо̄тпатн ва̄руӈкве э̄ри кос. Та̄нки самыл матыра̄ти сунсыглэ̄гыт ос ва̄ӈкве патыяныл, та̄нанылн тамле рӯпата со̄ль э̄ри ман а̄ти. Ос та̄н та̄рапаттэ̄гыт, манрыг са̄всыр са̄кконыт ос э̄рнэ нэ̄пакыт та̄нанылн ёмщакв, ма̄кыг торгамтаӈкве э̄ре̄гыт. Тувыл та хо̄талт ма̄вит ӯргалан ва̄рмалит урыл потыртаӈкве са̄всыр мӯй хо̄тпат конференциян акванатхатыгла̄лсыт. Тув ма̄вит ӯргалан Россия Министерство па̄лыл кӯщаит о̄с ёхталасыт. Ань та̄н акванатхатам э̄лыпа̄лт ня̄врамыт мощщан тув тотыгпа̄лве̄сыт. А̄гитнпыгытн о̄с пӯмыщ о̄лыс. Ос та юипа̄лт округ кӯщаит колн минасыт. Тот та̄н Пётр Франке, губернатор тэ̄ланэ ёт рӯпитан хум ёт, ва̄йхатасыт. Ты хум ня̄врамытын губернатор рӯпитан колэ ос тав ва̄ӈыг хо̄тпанэ рӯпитан колнаканыл суссылтас. Кӯщай нэ̄в акв сытамыг рӯпитан колнакын щалсасыт. Тот тав Россия янытыл мо̄т яныг кӯщаит ёт ищхӣпыӈ ут хосыт потыртаӈкве ве̄рми. По̄х хо̄тпа тув щалтуӈкве ат та̄ртаве, хо̄тпа потранэ пуссын суссылтан ос хӯнтлан то̄тапсовн хансавет. Мӯйлуӈкве ёхталам а̄гитнпыгытн тамле экскурсия сака мӯстыс. Екатерина Зинченко тох ла̄выс: «Ты э̄лыпа̄лт ам нас номсахтасум, управление тэ̄лат палт э̄лаль ханищтахтуӈкве хо̄йхаты ман а̄ти. Ань тай ва̄глум, ва̄им, минэ̄гум. Ам номсыте̄мт, ты рӯпатат ам ма̄хумн ёмщакв нё̄туӈкве ве̄рме̄гум». Ты ня̄врамытыл нила хо̄тпа та̄ра ла̄всыт, тамле пуӈктотнэ ма̄т та̄н рӯпитаӈкве э̄лаль таӈхе̄гыт. Туп акв а̄ги Юлия Зернина метрологыг ханищтахтуӈкве номсы. Ма̄н ань ос хотыл ва̄глув, хоты хо̄тпаг яныгман ня̄врамаквет патэ̄гыт. Та̄н та̄нки та̄нки номтаныл тэ̄лаг вос е̄мтэ̄гыт ос посыӈ о̄лнэ хо̄тал вос хо̄нтэ̄гыт. Тамара Мерова хансыс ос хури ва̄рыс.

1125 2016. 06. 09. Николай МЕРОВ

Кӯщай хо̄тпат ма̄вит урыл потыртасыт Я̄ӈк натнэ э̄тпос хӯрумхуйпловит хо̄талэ̄т Ханты-Мансийск ӯст Россия природный ресурс Министерство атыт рӯпатаныл о̄вылтавес. Ты кастыл округ кӯщай нэ̄ Наталья Комарова, Москва ӯсныл тыг ёхталам ма̄вит ӯргалан яныг кӯщай хум Сергей Донской ос мо̄т кӯщаит округ мирколт акванатхатыгласыт. Тот докладаныл учёный хо̄тпат, мавит ӯргалан ма̄хум ос ма̄во̄й но̄хвинэ хо̄тпат ловиньтасаныл. О̄влэ̄т ма̄вит ӯргалан яныг кӯщай хум Сергей Донской потыртас. Тав ла̄выс, ань Югра ма̄т ты сапра̄ни таима̄гыс ва̄рыслӯв, Россия янытыл тыт щар са̄в ма̄щунь сэ̄лаве. Тыт са̄в щёс ке̄ртурыт па̄лыгманыгта̄лавет. Ос ма̄во̄й со̄схатнэ ма̄т тот рӯпитан ма̄хум кӯстырыг, э̄рнэ щирыл ос молях хотсыстамтаӈкве ханищтахтасыт. Тав ла̄вме щирыл, ка̄сыӈ та̄л ма̄во̄й но̄хвинэ ма̄т матыр саквалан порат, 1 млрд. 500 млн. тонна ма̄во̄й ма̄н со̄схаты. Мо̄лты та̄л оигпам порат ма̄в уральтавес, пуссын аквъёт ань акв со̄тыра арыгтем са̄вит гектар ма̄ па̄ӈктым о̄лы. Тамле тэ̄ла таима̄гыс е̄мталы, ке̄ртурыт пуссын пе̄сыт ос харӈаиӈыт, ва̄тихал пасапе̄гыт. Са̄выӈпа̄лэ тыил ма̄в ты па̄ӈктаве. Ма̄в янытыл, хо̄т ма̄во̄й но̄хвиве, та ма̄т пуссын па̄ӈктым о̄лэ̄гыт. 2011-2014 та̄лытт сыс Россия ма̄ янытыл ке̄ртурыт палыгто̄ллын паттат ты са̄вит ма̄во̄й ма̄н со̄схатас: – 2011 та̄лт нилахуйплов со̄тыра ниласа̄т хо̄т тонна; – 2012 та̄лт нилахуйплов со̄тыра яныгса̄т ат тонна; – 2013 та̄лт хӯрумхуйпловкем со̄тыра тонна; – 2014 та̄лт ос аквхуйплов со̄тыра са̄тса̄т онтолов тонна. Пуссын аквъёт онтырса̄т арыгтем гектар ма̄ па̄ӈктувес. Ань ка̄сыӈ та̄лныл акваг мощщанув ма̄ па̄ӈктын нак е̄мталаӈкве патыс. Та сыс, ты ва̄рмаль щирыл иӈ са̄в рӯпата ва̄руӈкве э̄ри. Округ кӯщай нэ̄ Наталья Комарова ла̄вме щирыл, Юграт рӯпитан ма̄во̄й но̄хвинэ ма̄хум, тыт ма̄вит ӯргалан ма̄гыс хӯрумса̄т арыгтем млрд. солко̄ви ойтсыт. Ты олнытыл онтырса̄т млрд. солко̄ви пе̄с ке̄ртурыт пе̄нтнэ ма̄гыс холтве̄сыт. Ань сакати мо̄рсыӈ порат саквалан нак е̄мталы. Тох о̄лы, ке̄ртурыт па̄лыгманыгтахтэ̄гыт, округувт акв со̄тыра хо̄тса̄т арыгтем квадратный метра ма̄тэ па̄ӈктым о̄лы. 2015 та̄лт ма̄вит ӯргалан ма̄гыс китах щёс са̄внуве олн холтвес. Кит со̄тыра ве̄рыста палыт ке̄ртурыт пуссын хотщё̄питаве̄сыт манос йильпииг пе̄нтве̄сыт. Лов та̄л юипа̄лт ма̄н ма̄вн ва̄т нупыл нёлолов со̄тыра са̄виткем тонна ма̄во̄й со̄схатыглас. Ань акваннё̄тхатым рӯпитэ̄гыт, ма̄в сыстамыг хультуптан ма̄гыс са̄в ё̄р пинэ̄гыт. Са̄ртын па̄ӈктым ма̄ хотсыстамтан ма̄гыс «Роснефть», «Сургутнефтегаз», «Лукойл Западная Сибирь» ос мо̄т атхуйплов компаният рӯпитэ̄гыт. Тыи ма̄гыс о̄с са̄в олн холтаве. Ты та̄л ма̄нув сыстамтан ма̄гыс иӈ онтолов компаният нё̄туӈкве вуйхатэ̄гыт. Тыи тэ̄ла ма̄гыс ма̄во̄й винэ ма̄хум ос округ мирколт рӯпитан кӯщаит нэ̄пакт хасхатасыт. Ты компаният пе̄с порат па̄ӈктыглам ма̄ныл 2020 та̄л мус пуссын хотсыстамтаӈкве ла̄всаныл. Ань тыт атхатыглам ма̄хум сакати халанылт ханищтахтасыт ос хӯлтыглахтасыт. Ма̄витув аквъёт э̄лаль ӯргалаӈкве патылӯв ке, сыстамыг са̄в нотн э̄лаль хульты. Николай МЕРОВ хансыс ос хури ва̄рыс.

1125 2016. 06. 09. Светлана РОМБАНДЕЕВА

Ягрим па̄выл ма̄ньщи нэ̄ Зоя Селивёрстовна Костенко ам Ханты-Мансийск ӯст «То̄рум Маа» музейт ка̄саласлум, тав насати ма̄ньщи нэ̄. Китыгласлум, хо̄тыл о̄лы, хо̄т яныгмас. На̄н ань э̄лаль тав потре ловиньтэлы̄н. – Ам 1965 та̄лт Ха̄льӯс район Сортыӈъя па̄вылт самын патсум. А̄тям Селивёрст Иванович Монин Резимово па̄вылт самын патыс. Омам Александра Васильевна Неремово па̄вылныл о̄лыс, а̄ги о̄парищ наме Новьюхова. Тэ̄н хосат а̄тимыг е̄мтсы̄г, ам иӈ ма̄ниг о̄лсум. Кит увщи ос ягпыг о̄ньще̄гум, та̄н пуссын Ягримт о̄лэ̄гыт. Ам Ягрим па̄вылт яныгмасум, тот школа а̄стласум. О̄йкам наме Владимир Васильевич. Тав ётэ са̄в та̄л Светлый па̄выл ЛПУ Газпромт обходчикыг рӯпитасме̄н, тувыл пенсиян минасум. О̄йкам тот иӈ рӯпиты. А̄гипыг о̄ньщиме̄н, Елена ос Максим. Тэ̄н Ханты-Мансийск ӯст Югорский государственный университет а̄стласы̄г. А̄гиме̄н Финансы и кредит тэ̄ла палт ханищтахтас, пыгме̄н ос кол ӯнттын тэ̄лан ханищтахтас. Ань сас тыт о̄лэ̄г, рӯпитэ̄г. Ты ӯс тэ̄натэ̄н сака мӯстыс, тыг та о̄лмыгтасы̄г. Ня̄врамагум палт ам ва̄тихал ёхталэ̄гум, уральта̄лыягум. Ма̄нь порат, номилум, ма̄н юн пуссын ма̄ньщи ла̄тӈыл потыртасӯв. Ща̄ньа̄щагӯв хотталь щалтме̄н юипа̄лт пуссын рущ ла̄тӈыл потыртаӈкве патсӯв. Рущит халт яныгмасӯв, рӯт хо̄тпанув о̄с пуссын а̄тимыт, ма̄нти ла̄тӈувтыл хотьютув ёт потыртаӈкве патэ̄в. Тох хотмус та яныгмасӯв. Яныг увщиюв Людмила Селивёрстовна Старовойтова ма̄ньщи ла̄тӈыл потырты. Ам ос ла̄тыӈ хӯлэ̄гум, ма̄хманув маныр урыл потыртэ̄гыт, пуссын торгамтэ̄гум, ос потыртаӈкве ат ве̄рме̄гум. Зоя Селивёрстовна хо̄тпа нупыл сымыӈ нэ̄, нёмса э̄лумхо̄лас. Таве̄н ам са̄в ёмас ла̄тыӈ ла̄ве̄гум. Колта̄гыл ма̄хманэ ёт пуста̄гыл вос о̄лы, На̄й-О̄тыранэ̄н вос ӯргалаве! Светлана Ромбандеева хансыс ос хури ва̄рыс.

1125 2016. 06. 09. Валентина УЗЕЛЬ

Пе̄с о̄лупса урыл потыртасыт Ты э̄тпос хо̄тыт хо̄талныл ловит хо̄талэ мус Ханты-Мансийск ӯсн ма̄щтыр ма̄хум акванатыглаве̄сыт. Та̄н ма̄гсыланыл научнопрактический семинар ва̄рыглавес, рущ ла̄тӈыл тох намаим о̄лыс – «Традиционные виды хозяйствования обских угров в музейной экспозиции». О̄выл хо̄тал мир э̄лыпа̄лт наука рӯпата ва̄рнэ учёный хо̄тпат та̄нти хансум номтыӈ потраныл ловиньтасаныл. Та̄н халанылт щар ма̄к яныг учёныиг Валентина Ивановна Семёнова о̄лыс, тав Тюмень ӯст культура институтт рӯпиты. Тав культурология тэ̄лат доктор нам о̄ньщи, профессорыг о̄лы. Потре̄т тав округувт о̄лнэ музеит урыл потыртас. Хоты музеит ёмащакв щё̄питым о̄лэ̄гыт, хо̄т маныр пормас ат то̄вылхаты. Югорский университетт рӯпитан хо̄нтаӈ ма̄ньщи э̄ква Дина Васильевна Герасимова ма̄ньщи мир хӯл алыщлапыт урыл потыртас. Ма̄хманув маныр ха̄пыт о̄щсыт, та урыл о̄с ла̄выс. Ос то̄ва ха̄пыт наманыл лю̄льсаӈ ма̄ньщи ла̄тӈыг толмащласанэ. «Хуриӈ ха̄п» урыл тох ла̄выс, аквтоп ты ха̄пыт хорамыл по̄слуве̄сыт, таима̄гыс тамле нам о̄ньще̄гыт. «Са̄с хуриӈ ха̄п» урыл ос ла̄выс, ты ха̄пыт са̄сныл ва̄рим о̄лсыт ос хорамыл по̄слыглаве̄сыт. Са̄с пормасыт урыл Наталья Величко потыртас. Тав оматэ Евдокия Андреевна Нёмысова ханты э̄ква, пе̄с о̄лупса ёмащакв ва̄гтэ. Ос матрыг а̄гитэ ты тэ̄ла лю̄льсаӈ ханищтаме, ла̄выс – аквтоп ха̄льныл оссы осгыглавес. Татьяна Александровна Молданова кос маныр урыл потырты, таве хӯнтлаӈкв пӯмащ. Ань тав соссаӈ мир маныр хурип колыт, а̄мпарыт, сӯмъяхыт ос мо̄т са̄всыр па̄рт ос нор колыт ӯнттыгласыт, та урыл потре о̄лыс. Пе̄с колыт пуссын нэ̄пакн по̄слымат. Йис та̄гыл пе̄с ма̄хманув налымантем са̄всыр кол ӯнттыгламыт. То̄ва пе̄с колыт музеитт о̄ньщавет. Ань та̄рапаттуӈкве э̄ри, кол ӯнттын порат норанэ, са̄манэ, колалат пуссын та̄нти ла̄тыӈ о̄ньще̄гыт. Ань ты намла̄тӈыт туп во̄р ма̄т ос ма̄нь па̄влыӈ ма̄т о̄лнэ соссаӈ хо̄тпат та̄н ва̄ганыл. Пе̄с ла̄тӈыт пуссын нэ̄пакн хансуӈкв э̄ре̄гыт. Ка̄сыӈ кол хумус ӯнттувес, ты тэ̄лат ань ёмащакв ханищтаӈкв э̄ри. Ты семинар рӯпитаӈкв о̄вылтахтаме хо̄талт Татьяна Александровна намхо̄талэ о̄лыс, тав са̄тлов нупыл ат та̄лэ то̄влыс, тав атхатыглам ма̄хумн янытлавес ос са̄в ёмас ла̄тӈыл ла̄ввес. Со̄ль, ты нэ̄ хо̄тпа ва̄нэ ка̄сыӈ э̄лмхоласн э̄руптаве. Ты сака ёмас сымыӈ хо̄тпа. Ман таве о̄с янытласлӯв. Титыт хо̄талт ма̄щтыранув рӯпитаӈкв та патсыт. Ка̄сыӈ я̄нас рӯпата ва̄рыс. Рӯпатаныл нила хо̄тал сыс минас, ловит хо̄талт а̄стлыяныл. Ты урыл ма̄н мо̄тыт газетавт тах хансэ̄в.

1125 2016. 06. 09. Галина КОНДИНА

«Ворщик хо̄тал» янытлавес Туи ёхтын порат ма̄витув аквтуп но̄хса̄йкалы, ӯйрищаквет луйге̄гыт, лӯптапум нэ̄глы. Йӣвыт нё̄тнэг е̄мтэ̄гыт, лӯптаныл яныгме̄гыт. Аквтох ня̄враманув ща̄гтым кон ха̄йтыгтэ̄гыт, ёнгасэ̄гыт. Лӯпта э̄тпос о̄выл щислат ня̄врамыт янытлан хо̄талт округувт са̄в ма̄т ёнгын каныт, ялпыӈ хо̄талыт ва̄рыглавет. «То̄рум Маа» музейт ня̄врамыт ма̄гсыл ка̄сыӈ тӯя «Ворщик хо̄тал» янытлаве. Ты ялпыӈ хо̄тал хо̄нтаӈ ма̄ньщит хуньт ва̄рыгламыт, ты урыл ма̄ньщи э̄ква А. М. Конькова такви мо̄йтанэ̄т хансыс. Тот ялпыӈ хо̄тал хумус ва̄рыглавес, пуссын хансым о̄лы. Ань та мо̄йтыт ловиньтым музейт рӯпитан ма̄хум тамле ялпыӈ хо̄тал ты ва̄рыглэ̄гыт. Ты та̄л са̄в ня̄врамыт ёхталасыт, ёнгасасыт. Ма̄ньщи кол ӯнлын ляпат, во̄р щахылт ня̄врамыт ёвтыл ня̄л па̄хвтысыт ос акв о̄влэ тольхыӈ касаил пе̄рим йӣв по̄с нупыл па̄хвтысыт. Ос аквта ма̄т то̄выль тармыл ӯнтым акв йӣво̄выл титтыг хартсыт. Хотьют ё̄рнуве, таи та такви нупылэ хасумтытэ. Туи кол ляпат са̄в ня̄врамыт аквъёт ёнгысыт. Та̄н акв ляпан лю̄ле̄гыт, музейт рӯпитан нэ̄ ка̄тэ̄т скакалка пуви, та ква̄лге хунь ма̄ӈыщ тотыгпитэ, ня̄врамыт но̄х–порыгма̄луӈкве вос а̄лыме̄гыт. Хотьют ат а̄лыми, тав по̄хын та паты. О̄с акв пӯмыщ касыл, ты ощща ква̄лыг тит о̄влаге йӣво̄влыгн нэ̄гим о̄лэ̄г. Тит ня̄врамыг аквторыг йӣвыг ка̄тын выгы̄г ос ква̄лыг йӣво̄влыгн пе̄руӈкве та о̄вылтытэ̄н. Хотьютэ̄н котиль мус моляхнув ёхты, тав но̄х та паты. Ос мо̄т са̄всыр ёнгилыт ня̄врамыт ма̄гсыл о̄лсыт. Хунь са̄в ма̄ныл ня̄врамыт атхатсыт, йӣквнэ ос са̄ӈквылтан ва̄рмаль та о̄вылтавес. Хотыл ворщик ёхтыгпас. Ты нэ̄ нё̄тнэ супыл масхатам, тав супе щар ворщик пунанэ хурипа о̄лыс. Сценат исгащлым а̄гирищит–пыгрищит ёт потыртас, а̄мщил а̄мщисанэ, аквъёт стихыт ловиньтасыт. Ты халт «Лылыӈ со̄юм» колт ханищтахтын а̄гирищкве ос пыгрищакве ма̄ньщи та̄ныт са̄ӈквылтасы̄г. «Ялпус ма̄хум» коллектив ёхталасыт. Ты Ф. П. Иштимирова а̄гияге а̄гирищквег ёт стихыт ловиньтасыт ос йӣквсыт. Пуссын А̄с ма̄ньщиянув маснутыл масхатым о̄лсыт. Татем нё̄тнэ, хорамыӈ то̄р сахил, сакыӈ ва̄ил масхатамыт. Сака ёмас концерт о̄лыс, та ляпат лю̄ляхо̄лум ня̄врамыт пуссын ка̄тпатта ра̄тсыт ос йӣкващласыт. Культура департамент иӈ тэ̄лытӯяг конкурс ва̄рыглас, ма̄хум халанылт кассыт, тув та̄нти хансум проектаныл те̄тсаныл. Община «Лэ̄пк» ос В. Ю. Кондин, музейт рӯпитан хум, «Таинство Северного детства» проектаныл но̄хпатыс. Ты проект хосыт ань ня̄врамыт ма̄гсыл ялпыӈ хо̄тал ты ва̄рыглавес. Ты та̄стым олнытыл ня̄врамыт атыӈ, са̄ккарыӈ тэ̄нутыл ёвтве̄сыт, са̄всыр мӯйлупсатыл мӯйлуптаве̄сыт. Юв миннэ̄ныл э̄лыпа̄лт пасаныл ва̄рыглаве̄сыт, тот атыӈ со̄ламат, ща̄й айсыт, ма̄ньщи кӯрт ва̄рим ня̄нил тыттуве̄сыт. Ня̄врамыт пуссын ща̄гтым юв минасыт. Титыглахтасыт, ос хунь тамле ёмас ялпыӈ хо̄тал тах ва̄раве. Галина Кондина хансыс ос хури ва̄рыс.

1125 2016. 06. 09. Валентина УЗЕЛЬ

Юртыӈыщ о̄лнэ ма̄щтыр э̄кваг Римма Кирилловна Молданова са̄в та̄л Сургут ӯст о̄лы. Ос омагеа̄тяге Касум па̄выл е̄рныл о̄лсы̄г. Тувыл Сургутский район Горшково па̄вылн ва̄нтлысы̄г, 1962 та̄лт Римма а̄гитэ̄н тот самын патыс. Тот мощ о̄лсыт, а̄гитэн лов та̄лэ хунь то̄влыс, Сытомино па̄вылн ва̄нтлуӈкв ла̄вве̄сыт. О̄лум па̄вланыл та хультуптасаныл. А̄тяныл ӯйхул ловиньтан хо̄тпаг о̄лыс, ка̄сыӈ та̄л са̄лыт ловиньтым са̄лыӈ колытын ялантас. Оманыл тэ̄нут па̄йтнэ нэ̄г ма̄нь ня̄врамыт ӯргалан колт рӯпитас. Тав а̄ги о̄парищ наме о̄лыс – Волдина. Та̄н юн пуссын ханты ла̄тӈыл потыртасыт, ос школат рущ ла̄тӈын ханищтаве̄сыт. Римма Кирилловна такви о̄лупсатэ урыл тох потыртас: «Ам Сургут ӯсн о̄лмыгтамум па̄сыл моще̄рт налыман та̄лыг ты е̄мты. Хӯрум ня̄врам о̄ньще̄гум, ка̄сыӈум я̄нас о̄лы, пуссын ще̄мьяӈыт. Нила апыг о̄ньще̄гум, щар янгум титхуйплов та̄лэ то̄влыс. О̄йкам о̄с ханты о̄лыс, тав хосат а̄тимыг е̄мтыс. Аквъёт о̄лмуме̄н порат юн туп рущ ла̄тӈыл потыртасме̄н, таима̄гыс ня̄враманум ща̄нь ла̄тнув щар ат ва̄ганыл. Амти ёмащакв потыртаӈкв о̄с ат ве̄рме̄гум, туп торгамтэ̄гум. Ань, ва̄им, тыи ма̄гыс сымум сака ща̄рги – манрыг тох о̄лсӯв, ма̄нти ла̄тӈувтыл щар ат потыртасӯв. Ань апыг а̄гирищагум ма̄н пе̄с о̄лупсав урыл сака пӯмщалахтэ̄г, тэ̄н ма̄нти ла̄тӈув ханищтытэ̄н, потыртаӈкв ханищтахтэ̄г. Соссаӈ мир ялпыӈ хо̄талыт о̄лыгланэ̄ныл порат акваг тув во̄выглаве̄г, тот йӣкве̄г, э̄рге̄г. Тэ̄натэ̄н ам амти о̄с ханищтыягум. Ханты-Мансисйск ӯст о̄лнэ учёный нэ̄ хо̄тпа Валентина Соловар а̄нумн са̄всыр нэ̄пакыт те̄тыглы, та̄н щираныл ла̄тӈув та ханищтылӯв. Юио̄выл та̄лытт ам ма̄щтырлаӈкв вуйхатсум, о̄влэ̄т пормасанум сака ат тэ̄лсыт. Ань тай ха̄сэ̄гум. Мо̄т ма̄щтырлан хо̄тпат ёт са̄всыр ӯсытн во̄выглавем, тот амти ва̄рум, амти ю̄нтум пормасанум тыналыянум. Акв хотты та̄л Ханты-Мансийск ӯсн ялсум, тот яныг касыл о̄лыс, ма̄хум ёсал ха̄йтым кассыт. Тот акв сака ёмас э̄ква ёт ва̄йхатсум, тав наме Клавдия Ивановна Айваседа, ё̄рн э̄ква. Тав ос такви пормасанэ тыналым са̄всыр ма̄т яласы. Та па̄сыл халме̄нт сака юртыӈыщ о̄лыме̄н, тав ам палтум мӯйлуӈкв ёхталы, ам тав палтэ ялантэ̄гум. Потыртахтысаме̄н, ты та̄л Тарко-Сале па̄вылн ялыме̄н, тувыл Надым ӯсн миныме̄н, та юипа̄лт Ханты-Мансийск нупыл минмыгтыме̄н. Валентина Васильева хансыс ос хури ва̄рыс.

1125 2016. 06. 09. Людмила ТЕТКИНА

Сургут ӯст ялпыӈ хо̄тал о̄лыс «Соцветие» нампа фестиваль лӯпта э̄тпос атыт хо̄талэ̄т Сургут ӯст о̄лыс. Ты та̄л онтоловхойпловит щёс ма̄хум мӯйлуӈкве тот акванатхатыгласыт. Яныг ӯст о̄лнэ мирыт та̄нки халанылт юртыӈыщ вос о̄лсыт ос мо̄т мирыт пе̄с йис ва̄рмаляныл вос янытласыт, таима̄гсыл тамле ялпыӈ хо̄тал Сургут ӯст ка̄сыӈ та̄л ва̄рыглаве. Ӯскант марийцыт, рущит, чувашит, киргизыт, чеченцыт, дагестанцыт, хатанит, ос мо̄т мирыт та̄нки суссылтап щё̄пита̄лсыт. Ты та̄л округувт ня̄врамыт янытлан та̄лыг намаявес. Фестиваль рӯпитам порат ка̄сыӈ мир ня̄врамыт ма̄гсыл са̄всыр ёнгил ва̄рыгласыт. Ос концерт о̄лум порат ня̄врамыт э̄ргысыт ос йӣквсыт. Аквта порат ка̄сыӈ мирыт манхурит а̄пат, люлькат ос ня̄врам нё̄витан утыт о̄ньще̄гыт акв суссылтапыт пуссын суссылтаве̄сыт. Ка̄сыӈ мир хумус ня̄нь ва̄ре̄гыт ос та̄н ща̄нь ла̄тӈыл хумус ла̄вияныл, мо̄т суссылтапыт ка̄салаӈкве ро̄выс. Ма̄ньщит, хантыт о̄с тот мӯйлысыт. «Старый Сургут» нампа центрыт ос «Югра лылые̄п» организацият рӯпитан хо̄тпат мӯй ма̄хмытын культурагув урыл потыртасыт. Валентина Шадрина Сургут ӯст «Югра лылые̄п» отделеният кӯщаиг о̄лы. Тав ла̄выс: «Ма̄н ка̄сыӈ та̄л ты ялпыӈ хо̄талт мӯйлуӈкве во̄виньта̄лаве̄в. «Старый Сургут» нампа центрыт рӯпитан хо̄тпанув тот соссаӈ ма̄хум культураныл урыл потыртэ̄гыт. «А̄с нэ̄» ос «Лӯима̄ ханса» ансамблиг тыт йӣкве̄г ос э̄рге̄г. Ты та̄л ня̄врамыт янытлан кастыл «Пимочка» нампа ансамбль э̄ргуӈкве тыг во̄виньта̄лыслӯв. Ня̄врамыт Лянтор ӯсныл о̄лэ̄гыт. Ты коныпал Русскинская па̄вылт о̄лнэ хантыт тыг ёхталасыт. Мӯй ма̄хум ма̄гсыл ма̄н хӯлыӈ, пилыӈ ня̄нь ва̄рсӯв ос ва̄с исмит па̄йтсӯв». Марина Самсонова са̄в та̄л «Старый Сургут» нампа центрыт рӯпиты. Ма̄ньщи нэ̄ таи ла̄выс: «О̄влэ̄т ты фестиваль «Старый Сургут» центрыт ва̄рыглавес. То̄нт ка̄сыӈ ще̄мьят такви культуратэ урыл потыртас. Тувыл ма̄н палтув са̄в ма̄хум ёхталаӈкве патыс. Ты юипа̄лт ты ялпыӈ хо̄тал кон «Старый Сургут» по̄хат ва̄рыглаӈкве патвес. Ань ӯсыӈ мир пуссын ва̄гыт, ялпыӈ хо̄тал яныг ӯскант ва̄рыглаве ос са̄в ма̄хум пуссын аквъёт тот мӯйлэ̄гыт».

1125 2016. 06. 09. Николай МЕРОВ

Финноугор рӯт миранув мӯйлысыт Лӯпта э̄тпос хӯрмит ос нилыт хо̄талаге̄т Ханты-Мансийск ӯст «Хо̄тал ё̄хнэ щирыл о̄лнэ ма̄хум» нампа финноугор мирыт хӯрмит фестиваляныл о̄лыс. Ты кастыл онтолов йӣквнэ ос э̄ргын, ёнгын коллективыт тыг ёхталасыт. Пуссын аквъёт нёлса̄т мӯй хо̄тпа са̄всыр ма̄ныл тыт акванатхатыгласыт. Ты та̄лув ня̄врамыт янытлан та̄лыг ла̄ввес. Таима̄гыс ань ты ёнгын ва̄рмаль округувт о̄лнэ ня̄враманув ма̄гыс ва̄рыглавес. Минам ялпыӈ хо̄талт яныг хо̄тпат, ня̄врамыт ма̄гыс са̄всыр конкурсыт о̄лсыт, та̄н та̄нки халанылт кассыт. Ты ва̄рмаль округ культура департаментыт рӯпитан хо̄тпат ос «Культура» нампа творчество колт рӯпитан ма̄хум та̄н щё̄пита̄лсаныл. Ты йӣквнэ, э̄ргын ос ёнгын тэ̄ла ка̄сыӈ кит та̄л сыс акв щёс ва̄рыглаве. Мӯй ма̄хум Сургутский, Нижневартовский, Белоярский ос Ха̄льӯс районытныл о̄лсыт. Ты коныпал акв ще̄мья Ямало-Ненецкий округныл тыг ёхталас. О̄выл хо̄тал касыл о̄лыс. Ка̄сыӈ ма̄ныл ёхталам мӯй хо̄тпат та̄нки йӣкваныл йӣквсыт, э̄ргыт э̄ргысыт ос са̄кӈквылтапыл са̄ӈквылтасыт. Ты ва̄рмаль жюрихо̄тпат суссаныл ос та̄н халанылт щар ёмаснувег йӣквум, э̄ргум ма̄хум пе̄риясаныл. Мо̄тыт хо̄тал ма̄хум ма̄щтырласыт ос та̄нки ва̄рум утаныл суссылтасыт. Та̄н ю̄нтум хорамыӈ маснутаныл ос ня̄врамыт ёнгын утаныл урыл потыртасыт. Сыктывкар ӯс финноугор центр колт кӯщаиг рӯпитан нэ̄ Татьяна Барахова ма̄ньщи мир урыл по̄слум кина тыг тотыглас. Ты кина рущ щирыл «Манси. Путь промысла» намаим о̄лы. Тот ма̄ньщи ма̄хманув о̄лупсаныл урыл суссылтавес. Манхурип колт та̄н о̄лсыт ос манарыл во̄раясыт. Тувыл тот Ӯй йӣквнэ урыл о̄с по̄слым о̄лыс. 2014 та̄л порат ма̄н округувн Коми республиканыл кина по̄слын хо̄тпат ёхталасыт. Та̄н ты кина Ха̄льӯст по̄слысаныл. О̄влэ̄т Саранпа̄вылн ялуӈкве е̄мталасыт. Ос яласан лё̄ӈхе сака та̄рвитыӈ о̄лыс. Таима̄гыс э̄л ат минасыт. Ха̄льӯст о̄лнэ ма̄ньщит акванатыгласаныл. Ам та порат ос та̄н ётаныл тув ялсум. Ань та кина ущты ёмщакв ва̄рвес ос суссылтаӈкве ты тотыглавес. Моще̄ртын тав Интернетыт ты ло̄псэ̄т www. finnougoria. tv. нэ̄глы. На̄н ва̄тихал тот уральтахтэ̄н, хуньт тах ка̄салылы̄н. Ань ты ялпыӈ хо̄талн иӈ са̄в хо̄тпат мӯйлуӈкве ёхталасыт. То̄ва хо̄тпат тыг йинэ ма̄гыс та̄нки олнаныл холтсаныл. Ха̄льӯс районныл кит ма̄ньщи нэ̄г Ольга Владимировна Лелятова ос Галина Николаевна Ларионова тэ̄нки олнанэ̄нтыл ёхталасы̄г. Тэ̄н сас Саранпа̄вылт о̄лэ̄г. Тот «Э̄ргын сым» нампа ёнгын колн ялантэ̄г. Ты коныпал Ольга Владимировна ма̄нь ня̄врам колт ня̄врамыт йӣквуӈкв, э̄ргуӈкв ос са̄всыр пормасыт ка̄тыл ва̄руӈкв ханищтыянэ. Тав ла̄выс: «Ме̄н таима̄гыс ты ёнгын ва̄рмальн ёхтысаме̄н, ты та̄л ня̄врамыт янытлан та̄лыг ла̄ввес. Ам Саранпа̄вылт ма̄нь ня̄врамыт колт рӯпитэ̄гум. Тамле ялпыӈ хо̄талытн ялантаӈкве сака таӈхе̄гум. Рӯпатам ма̄гыс сакати э̄рнэ тэ̄ла выгум. Тувыл ме̄н Галина Николаевна ёт йӣквыт ос э̄ргыт та̄стысме̄н. Ты ва̄рмальн ме̄н китынтыг ёхталыме̄н. Тыт атхатыгла̄лнэ соссаӈ хо̄тпат ёт ме̄н ва̄йхатыме̄н, та̄наныл ва̄щиньтасанме̄н. Тыт мо̄т ма̄хум хумус йӣкве̄гыт, э̄рге̄гыт ос са̄ӈквылтэ̄гыт, суссуме̄н. Ань ты та̄л са̄в йильпи коллективыт о̄лсыт. Та̄н о̄с нё̄тнэ̄г пуссын йӣкве̄гыт. Са̄в ня̄врам мӯйлуӈкве ёхталас. Ма̄ньщит халт ме̄н кит хо̄тпаг ёхталасме̄н. Воссыг нэ̄мхотьют а̄тим о̄лыс. Ме̄наме̄н тыт сака мӯстыс. О̄выл хо̄тал касыл о̄лум порат мӯй ма̄хум та̄нки йӣкваныл, э̄рганыл суссылтасыт. Китыт хо̄тал но̄хпатум хо̄тпат мӯйлупсал мӯйлуптаве̄сыт. Ме̄н ос мӯйлуптавесме̄н, то̄ва ва̄рмаль щирыл о̄с но̄хпатсуме̄н. Та юипа̄лт о̄с концерт о̄лыс. Ка̄сыӈ ма̄ныл ёхтум ма̄хум йӣквсыт ос э̄ргысыт. Ме̄н «Кӯринька» йильпи э̄рыг э̄ргысме̄н. Хумус ма̄ньщи хо̄тпанув ялпыӈ хо̄талытт йӣкве̄гыт ос манырсыр э̄ргыт э̄рге̄гыт, таит та суссылтасме̄н. Тувыл нэ̄пак хансум ма̄ньщи хо̄тпав Юван Шесталов хансыглам стихотворениянэ хосыт э̄ргыт э̄ргысме̄н. Ма̄ньщи э̄рыг «Миснэ» э̄ргысламе̄н. «Миснэ» ма̄ньщи мирувт На̄й-О̄тырыг о̄лы. Тав мирн нё̄тмил ва̄ри, ка̄сыӈ колта̄глын щунь мыг ос посыӈ хо̄тал тоты. Таима̄гыс ты э̄рыг ме̄н ма̄ньщи ла̄тӈыл э̄ргысламе̄н. Китыт э̄рыг ос ща̄нь урыл э̄ргысламе̄н. Ос Юван Шесталов тав хансум э̄рге. Ты э̄рыг палт са̄ӈквылтап та̄ныт ме̄нки ва̄рсанме̄н. Ма̄ньщи хумув хансыглам потранэ сака э̄руптыянӯв. Та̄наныл э̄ргуӈкве сака ёмас, татем сымын хо̄егыт. Ань ма̄хум пуссын ня̄врамыӈ та̄гыл тыг мӯйлуӈкве ёхталасыт. Ам ос рӯпатамт ня̄враманум пуссын ма̄нит, туп хо̄т та̄ланыл то̄влысыт. Та̄н э̄лы ма̄н тотыглаӈкве ат та̄ртавет. Таима̄гыс ме̄н ме̄нки ты ёхтысме̄н. Тувыл ос ань ма̄в янытыл о̄лупсав та̄рвитыӈыг е̄мтыс. Яласан ма̄гыс олн а̄тим. Ань ты ёнгын ва̄рмальт маныр ка̄саласме̄н, тыин э̄лаль ня̄врамыт ханищтыянме̄н. Та̄н ма̄н пе̄с йис о̄лупсав, о̄лнэхӯлнэ тэ̄ланув о̄с вос ва̄ганыл, э̄лаль вос тотыяныл». Ольга Владимировна ла̄выс, ты йӣквыт, э̄ргыт Саранпа̄вылт та̄нки ханищтыяныл. Таима̄гыс тамле фестивалит сака ӯре̄гыт. Хунь хотталь во̄вавет, яныг ща̄гтыл минэ̄гыт. Тыт ма̄хум халанылт ханищтахтэ̄гыт, потраме̄гыт, ва̄йхатэ̄гыт. Николай МЕРОВ хансыс ос хури ва̄рыс.

1125 2016. 06. 09. Тамара МЕРОВА

Ня̄врамыт э̄рнэ порат вос пусмалтавет Екатерина Пашкова Белоярский район Касум па̄вылт ня̄врамыт пусмалтан нэ̄г хӯрум та̄л рӯпиты. Тав Оренбург ӯсныл тув ёхтыс, тот ле̄ккарыг ханищтахтас ос тувыл о̄йкатэ̄нтыл тыг лӯима̄н о̄луӈкве ёхтысы̄г. О̄йкатэ ма̄во̄й ос газ но̄хвинэ ма̄т Верхнеказымский па̄вылн рӯпитаӈкве яланты. Екатерина Евгеньевна лӯима̄т о̄лнэ̄тэ урыл ма̄навн тох потыртас: – Ма̄н Касум пӯльницавт 386 са̄вит ня̄врам хансым о̄лэ̄гыт. Па̄влув коныпал ты ляпат о̄лнэ ма̄нь па̄влытныл Нумто, Юильск ос са̄лыӈ ма̄хум ня̄враманыл тыг Касумн тотыглыяныл. Тӯяг ня̄врамыт са̄выӈпа̄лэ кон по̄льтахтэ̄гыт ос таима̄гыс а̄гмыл е̄мтэ̄гыт. То̄ва а̄гирищитпыгрищит ма̄ньта̄гыл со̄рыг ӯйн хулиглавет, мо̄таныт во̄сэ̄вхӯрганыл а̄гмыӈыт. Тамле а̄гм о̄щнэ̄ныл ма̄гыс та̄н иммунитетаныл ва̄гталыг е̄мтэ̄гыт, тувыл мо̄т а̄гмыт та̄н палтаныл молях ха̄ӈхе̄гыт. Ам палтум ат та̄л яныт пыгрищакве тотыглавес, тав со̄рыг ӯянэ хо̄нтве̄сыт. То̄ва ня̄врамыт хӯл щар ат тэ̄гыт, та̄н пуста̄гыл о̄лэ̄гыт. Са̄лы о̄щнэ ма̄хум уральтасанӯв, та̄н тамле а̄гм ат о̄ньще̄гыт. Па̄влувт ща̄няныла̄щаныл хӯл акваг тэ̄гыт ке, та̄н ще̄мьят пуссын тамле а̄гм о̄ньще̄гыт. Ма̄н та̄наныл ат кос ла̄виянӯв, хӯл ул вос тэ̄гыт. Нас ӯргалахтым вос о̄лэ̄гыт ос тэ̄рпил вос пусмалтахтэ̄гыт. Э̄лумхо̄лас та̄ра пусмалтахтуӈкве ат ке таӈхи, ётыл тав со̄рыг, сым ос ке̄лпта̄рс а̄гмыл савалаӈкве паты. Таима̄гыс ня̄врамыт пуссын уральтыянӯв ос ща̄нянылна̄щанылн ёмщакв пусмалтаӈкве ла̄виянӯв. Ма̄н ла̄тӈанувн вос хӯнтлэ̄гыт. Ос прививкат урыл таи ла̄ве̄гум, то̄ват уколыл ва̄руӈкве ат та̄ртыяныл, ос а̄гмыл е̄мтнэ порат ня̄враманыл хоса савалэ̄гыт. Та̄ланыл щирыл тӯщтын прививкат ма̄н э̄рнэ порат ва̄риянӯв. Тэ̄рпил тотаве̄в, то̄вылхатнэ са̄вит акваг о̄ньще̄в. Та̄рвитыӈыщ о̄лнэ нэ̄ хо̄тпат тыт ёмщакв уральтавет ос ня̄врам самын паттын магыс Белоярский ӯсн ке̄тавет. Ты пӯльницавт ма̄н стационар о̄с о̄ньще̄в, тыт ат ня̄врам ос са̄т яныг хо̄тпа ма̄гыс койкат щё̄питым о̄лэ̄гыт. Ма̄хум уральтан ма̄гыс тыт анализыт выгӯв, ма̄нки лаборатория, сым уральтан ут о̄ньще̄в, та̄нанылн ӯсн минуӈкве ат э̄ри. Туп та̄рвитыӈ а̄гмыл е̄мтнэ хо̄тпат тув пусмалтаӈкве ке̄тыглавет. А̄нумн тыт рӯпитаӈкве ос о̄луӈкве сака мӯсты, тыт лӯима̄т ёмас ма̄хум о̄лэ̄гыт. Ам амки ма̄мт ос таи ёмас, ма̄ньполь э̄тпосныл тот ма̄лтыпыг е̄мты, рӯтанум моще̄ртын картёпка ос мо̄т тэ̄нут тэ̄пкант янмалтаӈкве патэ̄гыт. Тыт иӈ ащирмаг о̄лы, тувыл ла̄пкат сака са̄в тэ̄нут а̄тим. Тыг тотым овощит, фруктыт э̄рнэ тэ̄рпиӈ утаныл холэ̄гыт. Тувыл а̄нумн пӯмыщ, тыт са̄в э̄тпос осыӈ тӯйт хуи, ма̄тэ войкан, тӯйт сыстам. Ос ма̄н палтув тӯйт тай молях толы манос сэ̄млыг е̄мты. То̄ванакт раквуӈкве о̄вылтахтыглы ос ӯсхулыянув па̄ӈкыӈыг е̄мтэ̄гыт. Ме̄н о̄йкаме̄нтыл тыт китколнакыӈ колыл майвесме̄н, а̄гиме̄н моще̄ртын са̄т та̄лэ то̄влы, таквсы тав ханищтахтуӈкве мины. Ме̄н номсыме̄н, тыт о̄луӈкве хультыме̄н, рӯпата, о̄лнэ кол о̄ньщиме̄н, воссыг маныр э̄ри. Тамара Мерова хансыс ос хури ва̄рыс.

1126 2016. 06. 23. Валентина Хозумова

Олн та̄нти сэ̄лнэ ма̄хум мирколн во̄выглаве̄сыт Округ мирколт яныг кӯщаюв Наталья Комарова сапра̄ни ва̄рыглас. Тув олн та̄нти сэ̄лнэ ма̄хум во̄выглаве̄сыт, рущ ла̄тӈыл та̄н предпринимателиг ла̄вавет. Кӯщаюв ла̄выс, ань ма̄н о̄лнэ ма̄вт 78 со̄тыра предпринимательхо̄тпа ос ма̄нь предприятият рӯпитэ̄гыт, тот 125 со̄тыра арыгтем хо̄тпа олн сэ̄лэ̄гыт. Ос ань ты ма̄хум ла̄вве̄сыт, та̄н округувт о̄лнэ мирув ма̄гсыл матыр нё̄тмилрӯпата о̄с вос ва̄ре̄гыт. Мо̄лты та̄л тамле рӯпата ва̄рнэ 175 предприятие ёмащакв нё̄тве̄сыт, та̄н округ бюджетныл 58 млн. солко̄вил майве̄сыт. Ты ма̄хум та̄нти палтаныл онтырса̄т арыгтем хо̄тпа рӯпитаӈкв висаныл. Мария Краско мирн нё̄тмил ва̄рнэ департаментыт кӯщаиг о̄лы. Тав ты урыл потыртас, округувт о̄лнэ то̄ва хо̄тпат ос ня̄врамыӈ ще̄мьят компенсацияолныл ойтавет. Ка̄сыӈ та̄л тув 72 млн. солко̄ви холтаве. Ань ос акв ёмас рӯпата о̄вылтавес, акв ма̄н патум 396 хо̄тпа ань предпринимательхо̄тпатн нё̄тавет. Ты йильпи тэ̄ла ла̄ваве – «социальное предпринимательство». Хо̄тпа такви олнанэ тамле рӯпата ва̄рнэ ма̄гыс те холты, нила та̄л минам юипа̄лт олнанэ тах ювле ёхтэ̄гыт. Э̄лаль тав ла̄выс, та̄нтте̄ныл хультум яныгпа̄ла хо̄тпат ма̄гыс я̄нас колыт ӯнттуӈкв э̄ре̄гыт, тот та̄н ёмащакв о̄ньщуӈкв ос ле̄ккарытн акваг уральтаӈкв патавет. Ты рӯпата предпринимательхо̄тпат ва̄руӈкв о̄с ве̄рме̄гыт. Ты кӯщай юипа̄лт акв хум потыртас, тав ла̄выс, матах та̄л минам юипа̄лт округувт мир ла̄ввес, хотьют ве̄рми ос олн о̄ньщи, такви ма̄нь ня̄врамыт ма̄гыс садиккол вос пӯнсы. То̄нт са̄в хо̄тпат «частныиг» ла̄внэ садикколыт ва̄рсыт. Ос тит ман хӯрум та̄л минас, округув янытыл са̄в йильпи «государственный» колыт ӯнттуве̄сыт, ты частный колыт ӯнттум ма̄хум пуссын рӯпата та̄л ос олн та̄л та хультсыт. Са̄в хо̄тпа та̄нти олнаныл насска̄сыг та холтманыл. Ань ты йильпи рӯпата о̄вылтан э̄лыпа̄лт о̄с ёмащакв номсахтуӈкв э̄ри.

1126 2016. 06. 23. Людмила ТЕТКИНА

Ма̄ньлат мир Нефтеюганск ӯст акванатхатсыт Нефтеюганск ӯс по̄хат «Утро» нампа форум лӯпта э̄тпос 20 хо̄талныл рӯпитаӈкве о̄вылтахтас. Ма̄ньлат хо̄тпат тот акванатхатсыт. Та ӯс ляпат та̄н ма̄гсыланыл са̄в палаткат тӯщтуве̄сыт. Челябинский, Свердловский, Курганский, Тюменский областитныл, Ямал ос ма̄н о̄лнэ ма̄вныл а̄гитпыгыт тув ёхтысыт. Тамле сапра̄ни ты та̄л ма̄н округувт о̄выл щёс щё̄пита̄вес, ты э̄лыпа̄лт Свердловский областьт ос мо̄т ма̄т акваг ва̄рыглавес. Алексей Путин, губернатор ва̄ӈын хум, ты сапра̄ни ва̄рнэ кастыл ань са̄в рӯпиты. Ля̄ххал тотнэ ма̄хум ёт хо̄нтхатыгламе порат ла̄выс, ты та̄л Нефтеюганск ӯсн хӯрум со̄тыра арыгкем ма̄ньлат хо̄тпат ёхтуӈкв ка̄сащасыт. Касыл щирыл та̄н тув пе̄рияве̄сыт. Форум о̄лнэ порат кит смена тах рӯпиты. Акв смена сыс 750 э̄лумхо̄лас тот о̄луӈкве паты. Та̄н ма̄гсыланыл са̄всыр касылыт, ханищтапыт ос са̄в мо̄т пӯмащит тах ва̄равет. Дмитрий Кузьменко, федеральный инспекторыг о̄лнэ хум, ань ла̄выс, форум рӯпитанэ̄тэ порат тув Уральский округт Россия Президент ва̄ӈын хум Игорь Холман- ских, округ кӯщай нэ̄ Наталья Комарова ос мирн ва̄нэ мо̄т хо̄тпат тах ёхталэ̄гыт. Ты та̄л Польшаныл, Белоруссияныл, Болгарияныл ос мо̄т хо̄н ма̄ныл о̄лнэ ма̄ньлат хо̄тпат Нефтеюганск ӯст ӯщлахтуӈкве патэ̄гыт. Акв хо̄тал ма̄ньщи, ханты ма̄ньлат хо̄тпат тот рӯпитаӈкве патэ̄гыт. Та̄н соссаӈ мир пе̄с йис о̄лупса урыл тах потыртэ̄гыт. Ос мӯйлын а̄гитпыгыт са̄ӈквылтапыл са̄ӈквылтаӈкве ос матыр пормас ма̄щтырлаӈкве ханищтыяныл.

1126 2016. 06. 23. Галина КОНДИНА

Та̄нти ма̄гсыланыл са̄ккон о̄с пирмайтасыт Мирн пе̄риим хо̄тпанув хо̄тпан нупыл са̄тыт сапра̄нин лӯпта э̄тпос котильт акванатхатыгласыт. Та хо̄тал ва̄т са̄всыр са̄кконыт урыл потраныл о̄лыс. О̄влэ̄т округт о̄лнэ то̄ва ма̄хум почетный грамотатыл ос ма̄гылн тагатан по̄сыл мӯйлуптаве̄сыт. Владимир Михайлович Куриков округ Дума кӯщай палт са̄в та̄л советникыг рӯпиты, тав «За вклад в развитие законодательства» ма̄гылн тагатан по̄сыл майвес. Мо̄т ма̄хум почетный грамотатыл мӯйлуптаве̄сыт. Мир о̄лнэ колт э̄ти вина тыналаӈкве ат ро̄ви: Ты накт ты урыл са̄в мир потыртасыт ос ань депутатыт ты пирмайтасаныл. Вина, сур ос мо̄т ё̄р на̄йиӈвит э̄типа̄лаг ва̄т нупыл хӯрум щё̄сныл ос а̄лпыл нёлолов щёс мус тэ̄пъялан ос ӯщлахтын колытыт тыналаӈкве ат ро̄ви. Ты та колыт урыл са̄кконт хансым о̄лы, хо̄т кафе ос рестораныт ма̄хум о̄лнэ колытыт ва̄рим о̄лэ̄гыт. Ань тамле кол са̄в о̄лы, тот ёлн о̄выл этажт тамле тэ̄пъялан колыт рӯпитэ̄гыт. Ос хо̄т я̄нас рестораныт манос кафеколыт те о̄лэ̄гыт, тот акв тох э̄лаль ма̄хум вина ёвтуӈкве ос аюӈкве ве̄рме̄гыт. Ты са̄ккон таима̄гыс пирмайтавес, мир о̄лнэ коланылт э̄ти мӯсхал щирыл ӯщлахтуӈкве вос ве̄рмысыт, нэ̄мхотьют э̄ти кол по̄ханылт мори ул вос ро̄ӈхыс манос та̄кыщ потыртас. Депутатыт рӯпитаӈкве акваг вос ёхталэ̄гыт: Депутатыт та̄нти ма̄гсыланыл о̄с са̄ккон пирмайтасыт. Титхуйплов э̄тпос сыс хотьютаныл хӯрум щёс заседаниян ат ёхталы, тав мандатнэ̄паке хотвиве. О̄влэ̄т ты урыл сака хоса халанылт воритотсыт. Та са̄кконт тащир хансым о̄лы, дума кӯщай ве̄рми сапра̄нияныл о̄лнэ порат хотты депутатэ хотталь мо̄т ма̄н рӯпитаӈкве те̄тсуӈкве. Мо̄т партия депутатыт номтаныл ат патыс, та̄н ла̄всыт, тох кӯщай ве̄рми нас ат ёхталан депутат тармыл–патуӈкве. Такос халанылт потыртасыт ос э̄лаль ты са̄ккон та пирмайтасаныл. То̄ва па̄влыт хотщуртумтаве̄сыт: Округувт са̄в па̄влыт э̄лн о̄лэ̄гыт, та̄н рущ щирыл ла̄вавет – «труднодоступные и отдаленные местности». Ань тит яныг па̄влы̄г Бобровский, Горноправдинск ос ма̄нь па̄выл Батово тувыл хотщуртумтаве̄сыт. Ты па̄влыт мус та̄лэтувет ёмас яласан лё̄ӈх ва̄рим о̄лы, таима̄гыс ань та̄н ты нэ̄пакыл хотвуйве̄сыт. Ты хӯрум па̄выл Ханты-Мансийский районт о̄лэ̄гыт. Мир пусмалтан ва̄рмаль: Мо̄лалнув мир пусмалтан округ департаментын йильпи кӯщай паттувес, ты А. А. Добровольский. Тав ань та̄нти ва̄рнэ рӯпатаныл урыл депутатытн потыртас. Ос тав ювле хоса титыглавес. Ма̄нь ле̄ккарыг манос санитаркаг рӯпитан хо̄тпат манса̄вит солко̄ви сэ̄лэ̄гыт. Депутатыт па̄влытын манос ӯсытын ёхталанэ̄ныл порат ма̄хум та̄нанылн акваг ла̄ве̄гыт, сака мощщал ойтавет. Алексей Альбертович ювле ла̄выс, тав ка̄сыӈ хо̄тпа ёт потырты, хотьют сака мощща олн ка̄тын выг, та хо̄тпа манса̄витыл ловиньтаве – пуссын такви уральтытэ. Лов со̄тыраныл мощщанув нэ̄мхотьют ат ойтаве, пуссын тыгыл са̄внув олн сэ̄лэ̄гыт. Мо̄тыт ва̄рмаль – хунь ма̄хум ле̄ккарыт палт хасхатуӈкве ат ве̄рме̄гыт. То̄ва ма̄нь па̄влытыт ле̄ккар щар а̄тим. Ос ӯсыӈ ма̄т та̄н палтаныл сака хоса ӯрхатуӈкве э̄ри. Ты урыл кӯщай хум о̄с потыртас, ты та̄л округувн яныгса̄т арыгтем са̄в- сыр ле̄ккар рӯпитаӈкве ёхтыс. Та̄н пуссын са̄всыр ӯсанувт ос па̄вланувт рӯпитэ̄гыт. Соссаӈ ма̄хманув вос ва̄ганыл: «О регламенте» нампа постановленият тамле ва̄рмаль пирмайтавес, ань тах таквсы сӯкыр э̄тпос округ думан налыман нупыл нёлолов депутат пе̄рияӈкве патэ̄в. Та ма̄хмытыл ат хо̄тпа соссаӈ мир Ассамблеят рӯпитаӈкве патэ̄гыт. Таима̄гсыл ты Ассамблеят туп ща̄нь ла̄тыӈ ос та̄нти культураныл ва̄нэ хо̄тпат рӯпитаӈкве тах ве̄рме̄гыт. Ассамблея кӯщаиг паттын депутат ты коныпал дума кӯщай ва̄ӈын хо̄тпаг рӯпитаӈкве паты. Надежда Алексеева, округ дума депутат ос соссаӈ мир Ассамблеят ва̄ӈын кӯщаиг рӯпитан нэ̄, ла̄выс: «Таквсы, нэ̄пак та̄ратан юипа̄лт Ассамблеявт тах ат хо̄тпа рӯпитаӈкве патэ̄гыт, то̄нт тах хосат та̄гыл рӯпитан депутатув о̄выл сапра̄ни о̄вылтаӈкве паты. Тот Ассамблея кӯщай пе̄рияӈкве патаве. Ос депутатыг рӯпитан хо̄тпа такви ща̄нь ла̄тӈыл вос потыртас ос пе̄с йис о̄лупса вос ва̄стэ. Туп тамле хо̄тпа тыт рӯпитаӈкве вос ве̄рмыс. Са̄ртын Ассамблеян мир та̄нти та̄ра пе̄риясыт, ань думан пе̄риян депутатытныл тув ат хо̄тпа тах виве». Мо̄т щёс э̄рыӈ о̄с тах атхатыглэ̄гыт: Сапра̄ни оигпам ляпат Борис Хохряков, округ дума кӯщай, ла̄выс, туи э̄рыӈ о̄с акв щёс тах акванатхатыглэ̄гыт. Тыхо̄тал тай та̄н пирмайтам са̄ккона- ныл урыл сака хоса потыртасыт, то̄ва порат а̄ла ты ля̄втсыт. Ань са̄выӈпа̄лэ депутатыт иӈ э̄лаль рӯпитаӈкве таӈхе̄гыт, таима̄гыс хо̄та̄ти яласэ̄гыт, ма̄хум ёт хо̄нтхатыглэ̄гыт. Аквтуп ма̄хумн нё̄тнэ ма̄гсыл та̄н ань ты капыртэ̄гыт. Ул э̄лаль рӯпитан ма̄гсыл мир э̄лыпа̄лт потыртэ̄гыт. Ма̄кыг нё̄туӈкве пуссын хунь ве̄рме̄гыт.

1126 2016. 06. 23. Галина КОНДИНА

Ма̄хманув финно–угор рутанув палт минасыт Соссаӈ ма̄хманув Финляндия ма̄н са̄тыт Конгрессын миннэ э̄лы–па̄лт акван–атхатыгласыт ос лов хо̄тпаныл хӯрум ма̄ньщи хо̄тпа пе̄риясыт. Яныг кӯщаит акваг ла̄ве̄гыт, олн мощща, таима̄гыс ты са̄вит хо̄тпа хультуптавес. Ань Финляндиян делегатыг минасыт – С. А. Попова, А̄с–угорский институтт рӯпитан нэ̄, Татьяна Бахтиярова ос Ас–угорский институт рӯпиты, тав Лусум ма̄ньщи а̄ги ос Л. А. Зорина, Кульпас па̄вылныл о̄лнэ нэ̄. Ты коныпал Д. В. Герасимова доклад тот ловиньтаӈкве паты. Хумус та̄н яласэ̄гыт, манхурип ва̄рмалит урыл тот потраныл паты, ма̄н тах ётыл хансэ̄в. Ёхтынэ̄ныл порат ёмщакв титыглыянув ос ты урыл потыр щё̄питэ̄в.

1126 2016. 06. 23. Людмила ТЕТКИНА

Ка̄ркам хо̄тпат янытлаве̄сыт Округ кӯщай нэ̄ Наталья Комарова Россия ялпыӈ хо̄тал кастыл ка̄ркамыг рӯпитан хо̄тпат янытласанэ. То̄нт 17 э̄лумхо̄лас ма̄глын тагатан по̄сыл ос са̄всыр янытлан нэ̄пакыл майве̄сыт. Наталья Комарова ма̄хум янытлым сака ёмас ла̄тыӈ ла̄выс: «Мо̄тэ̄тпос 28 щислат мо̄й- тыт, пе̄с потрыт хансум э̄кван Анна Конькован яныгса̄т та̄л то̄влынӯв. Тав хансум нэ̄паканэ̄т ма̄ньщи ма̄хум мӯтраныл хансым о̄лэ̄гыт. Акв нэ̄пакт тав хансыс: «Ка̄сыӈ э̄лумхо̄лас о̄лупсатэ̄т такви лё̄ӈх о̄ньщи, тав ты лё̄ӈх хосыт э̄лаль мины». Тыхо̄тал тыт тамле ёмас лё̄ӈхыл миннэ хо̄тпат акванатхатасыт». О̄влэ̄т кӯщай нэ̄ Денис Баймлер «Сургутнефтегаз» нампа компаният рӯпитан хум янытластэ. Ты хум янытлан ма̄гсыл Россия Президент Указнэ̄пак хансыс. Ань округ кӯщай нэ̄ ты хум «За отличие в охране государственной границы» ма̄глын тагатан по̄сыл мистэ. Ты коныпал ма̄вит ӯргалан ма̄хум, ня̄врам ханищтан хо̄тпат, ле̄ккарыт ос ма̄во̄й но̄хвинэ хо̄тпат янытлаве̄сыт. Аквта порат мо̄т ма̄хум ос «Признание» нампа премиял майве̄сыт. Наталья Комарова ос ты урыл ла̄выс: «Ты та̄л интернет хосыт ка̄сыӈ э̄лумхо̄лас хотты хо̄тпа ма̄гсыл ла̄тыӈ ке̄туӈкве ве̄рмыс. Тыт о̄лнэ мир ты но̄хпатум хо̄тпат танки пе̄риясыт». Тамле премиял ма̄хум касыл щирыл мивет. Касыл ань китхойплов та̄л сыс ва̄рыглаве. 2015 та̄л мус хӯрум са̄всыр я̄нас тэ̄ла щирыл ва̄рыглавес, ты та̄лныл са̄т номинациял ва̄рвес. Округ янытыл 30 заявканэ̄пак ке̄твес. Ты та̄л «Гражданское слово», «Народный контроль», «Милосердие без границ» йильпи касылыт о̄с щё̄питаве̄сыт. Ты коныпал жюрихотпат акв номинация ва̄рсыт ос «Бережливый регион» намаясаныл. Ты премиял сака ка̄ркамыг рӯпитан ма̄хум майве̄сыт. Та̄н пуссын савалап ня̄врамытн, а̄гмыӈ хо̄тпатын, нуса тотнэ ма̄хумн нё̄тэ̄гыт.

1126 2016. 06. 23. Людмила ТЕТКИНА

Ищхӣпыӈ утыт э̄рнэ ва̄рмалит тотэ̄гыт Ка̄сыӈ та̄л ищхӣпыӈ ва̄рмаль урыл потыртаӈкве мир янытыл са̄в ма̄хум Ханты-Мансийск ӯсн акванатхатыглэ̄гыт. Ты та̄л лӯпта э̄тпос о̄вылтахтам порат тыт яныг мирхал ITфорум о̄с рӯпитас. Анисет Габриэль Кочофа хӯрмит та̄л Ханты-Мансийск ӯсн ты форумн ёхталы. Ты хум Бенин ма̄ныл о̄лы, Россият Полномочный посолыг рӯпиты. Тав ла̄выс, тамле хо̄нтхатыглап са̄в э̄рнэ тэ̄ла тоты. Ань са̄всыр ищхӣпыӈ утыт сака ёмащакв рӯпитэ̄гыт, ма̄хум телефон хосыт ле̄ккар па̄лт хасхатуӈкве ве̄рме̄гыт, э̄рнэ нэ̄пакыл о̄с интернет хосыт ке̄тавет. Ты коныпал са̄в мо̄т ва̄рмаль ты щирыл ва̄руӈкве ань ро̄ви. Анисет Кочофа ма̄тэ̄т са̄в мир нуса тотым о̄лэ̄гыт, то̄ва па̄вылт ма̄хум на̄йпос та̄л о̄лэ̄гыт, та̄н са̄всыр ищхӣпыӈ тэ̄лат урыл аты ва̄гыт, ань о̄лнэ йильпи пӯмащ утыт нэ̄мхуньт ат ва̄щиньтасыт. Ос ла̄выс, акв порат такви самын патум па̄влэ̄н ялыс ос ханищтахтан колн щалтсас. То̄нт школан кит компьютер мӯйлуптас, тувыл ты утыг ат рӯпитасы̄г, па̄вылт ма̄хум на̄йпос та̄л о̄лсыт. Кит та̄л ювле хультыс, тав ос яныгмам па̄влэ̄н ялыс, ань тот на̄йпос ва̄рвес, ня̄врамыт акв компьютер щирыл пуссын рӯпитэ̄гыт. Хум ла̄ви, тав па̄влыӈ ма̄хманэ ос са̄всыр ищхӣпыӈ утыл рӯпитаӈкве э̄лаль тах пуссын ханищтах- тэ̄гыт. Мохаммед Али Камиль о̄с Полномочный посолхумыг рӯпиты. Тав ос Африка Джибути ма̄ныл о̄лы. Ты хум о̄с ёмащакв рущ ла̄тӈыл потырты. Тав о̄выл щёс Ханты-Мансийск ӯсн ёхталас. Ля̄ххал тотнэ ма̄хумн такви о̄лнэ ма̄тэ урыл потыртас. Ла̄выс, тав о̄лнэ ма̄тэ̄т ма̄хум о̄с са̄в та̄рвитыӈ ва̄рмаль о̄ньще̄гыт, ма̄шинал яласан лё̄ӈх а̄тим, пӯльницат ат рӯпитэ̄гыт, то̄ва па̄вылт ня̄врамыт ханищтахтан колн ат ялантэ̄гыт. Тот о̄лнэ мир о̄с са̄всыр ищхӣпыӈ утыт урыл аты хӯлыгласыт. Тувыл ань то̄ва ма̄т на̄йпос ва̄руӈкве о̄вылтавес, са̄всыр йильпи утыт хосыт ма̄хум тот о̄с тах молях ханищтахтэ̄гыт. Тамле ут хунь ва̄раве, ма̄хманэ мощ ёмщаквнувег о̄лмыгтэ̄гыт. Тыи ма̄гсыл тав тамле форумын ёхталас ос тыт са̄в э̄рнэ тэ̄лат хӯнтлыс, юв хунь ёхты, ты ва̄рмаль урыл э̄лаль потыртаӈкве тах паты.

1126 2016. 06. 23. Галина КОНДИНА

Кандидатыт акванатхатыгласыт «Единый Россия» партият о̄лнэ ма̄хум хӯрум ма̄ныл Тюменский область, Ямал ос Юграныл тыг Ханты-Мансийск ӯсн акванатхатыгласыт. Атхатыглам сапра̄нияныл тох намаим о̄лыс: Межрегиональный форум «Кандидат». Ты мо̄лал я̄ӈк на̄тнэ э̄тпост пе̄риян ва̄рмаль о̄лум порат но̄хпатум ма̄хум тыг ёхталасыт. Та̄н халанылт кӯщаиг о̄лнэ хум Иван Квитка, тав межрегиональный координационный советыт кӯщаиг рӯпиты. Ты коныпал яныг кӯщаит о̄с ёхталасыт – Тюменский область губернатор Владимир Якушев, Ямал ма̄т губернатор Дмитрий Кобылкин ос ма̄н округ кӯщаюв Наталья Комарова. О̄выл ла̄тыӈ атхатам мир э̄лыпа̄лт Иван Квитка ла̄выс, тав ла̄тӈе щирыл о̄выл тамле пе̄риян ва̄рмаль 2011 та̄лт ва̄рыглавес, то̄нт партият о̄лнэ хо̄тпат Госдуман кандидатыг патнэ хо̄тпат ма̄гсыл нэ̄пак та̄ратасыт. Тувыл Россия Президентув ла̄выс, ты нэ̄пак та̄ратан ва̄рмаль Россия янытыл ва̄руӈкве э̄ри, мир та̄нти вос пе̄рие̄гыт, хоты хо̄тпа та̄нанылн э̄ри. Хум потыртас: «То̄нт Владимир Путин ла̄выс, партиявн туп номтыӈ, ка̄ркам хо̄тпат вос ёхтысыт, ты кастыл са̄в вос рӯпитасыт, халанылт касым но̄х вос патсыт, Российский Федерацият о̄лнэ мир та̄рвитаныл партият рӯпитан ка̄сыӈ хо̄тпа вос ва̄стэ ос нё̄туӈкве вос ве̄рмыс». Наталья Комарова, кӯщаюв потыртаме̄т ты урыл ла̄выс, ты та̄лыт сыс са̄в о̄лнэ колыт ӯнттуве̄сыт, хӯрум та̄л сыс ка̄сыӈ порат акв млн. са̄виттем квадратный метра о̄лнэ кол ӯнттаве. Ты са̄вит Советский Союз о̄лум порат ат ӯнтталавес. Ты коныпал ма̄нь ня̄врамыт ма̄гсыл садикыт ӯнттавет, ань хӯрум та̄лныл яныгнув ня̄врамыт пуссын ялантан ма̄л мивет. Пе̄с колыт ос балокыт хотвиӈкве патве̄сыт, ты пе̄нтсыл ма̄хум йильпи колыл манос квартирал мивет. Округувт о̄лнэ яныгпа̄ла хо̄тпат са̄выг е̄мтсыт. Ань та̄н пенсиян патнэ̄ныл порат мо̄т ма̄н ат минэ̄гыт, тыт о̄луӈкве хультэ̄гыт. О̄лнэ ӯсанув, па̄вланув ёмасыг е̄мтсыт. Йильпи пӯльницат ос пусмалтахтын колыт рӯпитэ̄гыт, тыт о̄лым са̄всыр а̄гмытыл ма̄хум пусмалтахтуӈкве ве̄рме̄гыт. О̄с са̄в мо̄т ёмас тэ̄лат урыл кӯщай нэ̄ потыртас. Дмитрий Кобылкин, Ямал ма̄ губернатор, та урыл потыртас: «Ам номсэ̄гум, «Единый Россия, ты аквтуп товлыӈха̄пыт ищхӣпыӈ утэ хумус рӯпиты. Ты ищхӣпыӈ утэ хосыт ма̄н ве̄рме̄в са̄в ёмас, э̄рнэ тэ̄ла ва̄руӈкве, мӯсхал щирыл рӯпитаӈкве. Ма̄н улпыл сака нёмса э̄лумхо̄ласыт, ма̄нти ва̄рнэ рӯпатав урыл сака ат э̄сыгхатэ̄в. Тох ма̄хум ва̄ганыл, хумус ма̄н рӯпитэ̄в, маныр а̄лымасӯв ва̄руӈкве. Ма̄н номе̄в та пора, хунь Госдумат торыӈ щирыл нэ̄матыр са̄кконыт пирмайтаӈкве ат ве̄рмуве̄сыт. Партият халанылт нас та воритотсыт. Ань тамле ва̄рмаль ул вос е̄мтыс, ма̄н Президентувн нё̄туӈкве патэ̄в. Тав э̄лаль тотнэ номтанэ ма̄н тэ̄лаг паттыянӯв. Ты та̄рвитыӈ рӯпата кос, ос ма̄н ва̄им ва̄рилув, ня̄врамув э̄лыпа̄лт ма̄навн э̄сырма ул вос о̄лыс». Ты ла̄тӈанэ Тюменский область губернаторн о̄с сака сымн ро̄всыт. «Ма̄н ань манса̄вит рӯпата ва̄рсӯв, тащирыл ос э̄лаль рӯпитаӈкве э̄ри. Экономикав акваг вос са̄вми. Са̄в ёмас нё̄тмил яныпа̄ла хо̄тпат ос ня̄врамыт ма̄гсыл ва̄раве. Ты пе̄риян ва̄рмальт ка̄сыӈ хо̄тпа вос ва̄стэ, хотьют тав пе̄рияӈкве ве̄рми. Манхурип кӯщаит рӯпитаӈкве паттавет, тащирыл мирув о̄луӈкве паты», – Владимир Якушев ла̄выс. Ты форумн титса̄ттем хо̄тпа ёхталасыт. Та̄н ма̄хманыл халт но̄х–патсыт, та̄н ма̄гсыланыл са̄в хо̄тпа нэ̄пак та̄ратасыт. Та̄наныл ма̄н ань сӯкыр э̄тпост э̄лаль Государственный Думан, округ ос район думатын пе̄рияӈкве патыянӯв.

1126 2016. 06. 23. Николай МЕРОВ

Ле̄ккарыт янытлаве̄сыт Лӯпта э̄тпос онтоловхуйплов хо̄талэ̄т ле̄ккарыт янытлан хо̄талыг о̄лыс. Ты кастыл округ янытыл са̄всыр ма̄ныл ле̄ккар хо̄тпат Ханты-Мансийск ӯсн мӯйлуӈкве ёхталасыт. Та̄н «Югра Классик» нампа колт акванатхатыгласыт. Та хо̄талт ле̄ккарыт янытлан ма̄гыс са̄в кӯщаит ёхталасыт. Хотьют янытлавес, на̄н ты урыл э̄лаль ловиньтэ̄н. Округувт мир пусмалтым пуссын аквъёт атпан нупыл нёлолов со̄тыра арыгтем хо̄тпа пӯльницат рӯпиты. Та̄н халанылт нёлолов со̄тыра арыгтем ле̄ккар ос ва̄т нупыл хӯрум со̄тыра арыгтем ма̄нь ле̄ккар тыт о̄лнэ мирн нё̄тмил ва̄ре̄гыт. Ты хо̄тпат янытлан ма̄гыс округ кӯщай ва̄ӈын хум Алексей Путин, Дума кӯщай ва̄ӈын хум Сергей Дектярёв, мир пусмалтан департамент кӯщай Алексей Добровольский ос мо̄таныт ёхталасыт. А. Путин тамле ла̄тыӈ ла̄выс: «Округ губернаторув Наталья Комарова ос мирколт рӯпитан кӯщаит ма̄н аквъёт ле̄ккарыг рӯпитан хо̄тпат ялпыӈ хо̄талыл янытлыянӯв. Ань Югра ма̄т пӯльницат пуссын ищхӣпыӈ утыл та̄стым о̄лэ̄гыт. Тыт рӯпитан ле̄ккаранув ань са̄всыр а̄гм пусмалтаӈкве ве̄рме̄гыт. Та̄н акваг э̄лаль ханищтахтэ̄гыт. Ты та̄л пусмалтан ва̄рмаль ма̄гыс мощщанув олн та̄стыглавес. Та сыс Сургут ос Нижневартовск ӯсыгт йильпи пӯльницаг ӯнттаве̄г. Мо̄тыт та̄лт ты пӯльницаг а̄стлан щирыл о̄лэ̄г. Ам ле̄ккар хо̄тпат ёмщаквег ва̄рнэ рӯпатаныл ма̄гыс сака янытлыянум, на̄нан яныг пӯмащипа ла̄тыӈ ла̄ве̄гум». Кӯщай хум потре юипа̄лт мир пусмалтан Министерства па̄лыл ма̄гылн тагатан по̄сытыл ты хо̄тпат мисанэ: Татьяна Анатольевна Калганова, Сургут ӯст ӯлщ пуӈк пусматан пӯльницат рӯпитан нэ̄; Елена Геннадьевна Качарина, Советский район Коммунистический па̄вылт участковый пӯльницат рӯпитан нэ̄; Дмитрий Альфредович Линин, Сургут ӯст сым а̄гм пусмалтан пӯльницат рӯпитан хум. Мир пусмалтан Министерства па̄лыл Почётный Грамота нэ̄пакыл ос ты хо̄тпат мисанэ: Антонина Васильевна Шикова, Нягань ӯс пӯльницат фельдшерыг рӯпитан нэ̄; Гульчичай Фаниловна Михеева, Нижневартовск ӯст психоневрологический пӯльницат рӯпитан нэ̄; Елена Юрьевна Золоторева, Сургут ӯст а̄гмыӈ ма̄хум палт ма̄шинал яласан ле̄ккар нэ̄. Округ губернатор па̄лыл са̄в та̄л ёмщакв рӯпитан ма̄гыс ос ты хо̄тпат янытласанэ: Галина Даниловна Яковлева, Нижневартовск ӯс пӯльницат акушерыг рӯпитан нэ̄; Геннадий Павлович Шлыков, Лангепас ӯс пӯльницат ма̄шинал а̄гмыӈ хо̄тпат тотыглан хум. Ле̄ккарыт кӯщай Алексей Добровольский ос янытлан ла̄тыӈ ла̄выс: «Ле̄ккарыт коныпал, хотьют пусмалтан ва̄рмаль ма̄гыс рӯпата ва̄ри, ам ты ма̄хум пуссын ялпыӈ хо̄талыл янытлыянум. Хотьют тэ̄рпи ва̄ри, ищхӣпыӈ ут щё̄питы, та̄наныл ам о̄с янытлыянум. Ань округувт яныгса̄ткем пӯльница ӯнттым о̄лы. Та̄н пуссын ёмщакв рӯпитэ̄гыт. Тот хо̄тпан нупыл кит со̄тыра хо̄тпа мир пусмалтэ̄гыт. Ты хо̄тал ам на̄нан пуста̄гыл о̄лнэ ла̄тыӈ ла̄ве̄гум. На̄нки рӯпатанын мӯсхал щирыл ва̄ре̄н. Ты тэ̄лан акваг э̄лаль ханищтахтэ̄н. Колта̄глынт, рӯтанын ёт ща̄гтым ос э̄руптахтым о̄лэ̄н. Аквъёт рӯпитан хо̄тпаны̄н ёмщакв вос янытлаве̄н». Ты кӯщай хум ле̄ккарыт о̄с янытлан нэ̄пакытыл мисанэ. Тав юипа̄лэ̄т округ Дума кӯщай ва̄ӈын хум Сергей Дектярев янытлан ла̄тыӈ ла̄выс. Тав о̄с мӯй хо̄тпат янытлан нэ̄пакытыл мисанэ. Та юипа̄лт концерт ва̄рвес, ле̄ккарыт ма̄гыс ма̄хум э̄ргысыт ос йӣквсыт.

1126 2016. 06. 23. Николай МЕРОВ

Ань иӈ са̄в ма̄во̄й ос газ виӈкве патаве Мо̄лал округувт рӯпитан ООО «Газпромнефть Хантос» нампа нефтяной компания ля̄ххал тотнэ ма̄хум ма̄во̄й ос газ но̄хвинэ ма̄н тотыгласаныл. Ты ва̄рмаль общественный связь департаментыт рӯпитан хо̄тпат та̄н щё̄пита̄лсаныл. Та ма̄ рущ щирыл Южно-Приобское месторождение ла̄ваве. Тот ювле хультум нотт нёлса̄т та̄лыт порат ма̄во̄й ос газ но̄хвиӈкве о̄вылтавес. Ос ты рӯпата китхуйпловкем та̄л юипа̄лт щар ёмщакв щё̄питавес. Ань та щуниӈ ма̄т маныр рӯпата ва̄раве, ма̄н ты урыл э̄лаль хансэ̄в. Тув миннэ э̄лыпа̄лт ка̄сыӈ хо̄тпа сурум ке̄нтыл, самке̄рыл ос я̄ӈк маснутыл майвес. Та̄ра ла̄ввесӯв, тот мори ул вос ё̄мыгтасӯв ос нэ̄матарын ул вос новхатсӯв. Ты ма̄ Ханты-Мансийск ӯсныл сака э̄лын ат о̄лы, щё̄скем тув мус минасӯв. Тув ёхтумувт ка̄саласӯв, ма̄во̄й ос газ но̄хвинэ утыт яныг тӯр ва̄тат лю̄ле̄гыт. 2005 та̄л па̄сныл ты компания «Пальяновская» ос «Приобская» кит ма̄т рӯпитаӈкве о̄вылтахтас. Ань та̄н округт ос Тюменский областит рӯпатаныл ва̄ре̄гыт. Округувт рӯпитан мо̄т компаният ань ма̄ янытыл та̄рвит ва̄рмалит е̄мтум паттат мощща ма̄во̄й ос газ но̄хвыгыт. Ос «Газпромнефть Хантос» компания иӈ са̄внув ма̄ щунит сэ̄луӈкве патыс. Тот рӯпитан кӯщай хум Андрей Сердюков ла̄вме щирыл, та̄н ка̄сыӈ та̄лныл са̄внуве ма̄во̄й ос газ но̄х–няртэ̄гыт. 2015 та̄лт атхуйплов млн. тонна но̄хвисыт. 2016 та̄лт та̄л котиль ос ре̄тыӈ ю̄свой кит э̄тпосы̄г сыс та̄н ат млн. арыгтем тонна но̄хвисыт. Ань ты та̄л лӯпта э̄тпосныл та̄н ищхӣпыӈ ут щирыл иӈ са̄внув ма̄во̄й ос газ виӈкве патэ̄гыт. Ты э̄лыпа̄лт сака милыщ ма̄ ат пасатасыт, ань иӈ милыг пасатаӈкве ве̄рме̄гыт. Таи ёмас, ты рӯпата ма̄гыс са̄в олн холтуӈкве ат патэ̄гыт. Ты кӯщай ла̄выс, ёлаль пасатан порат ма̄ о̄с ат то̄рнаве. Ма̄н та ма̄т мощ о̄лсӯв, тувыл Ханты-Мансийск ӯсн ювле тотвесӯв. Ӯст «Газпромнефть Хантос» нампа колн ялсӯв. Тот кӯщай ва̄ӈын хум Михаил Черевко ма̄хум ля̄льт ӯрсанэ. Тав ла̄выс: «Ты ма̄т ма̄н хосат та̄гыл рӯпитэ̄в, ма̄нки ӯсанув ат ёрувлэ̄в. Акваг нё̄тмил ва̄ре̄в. Ня̄врамыт ма̄гыс ханищтахтын ос каснэ колыт ӯнттэ̄в, яласан лё̄ӈхыт ва̄ре̄в, ханищтахтын колытын ос пӯльницатын нё̄тэ̄в. Соссаӈ мир ёт акваг рӯпитэ̄в. Та̄н о̄лупсаныл кӯпнитнуве̄г вос е̄мтыс, о̄лнэхӯлнэ наканыл э̄лаль вос тотсаныл, о̄с нё̄тыянӯв». 2015 та̄лт ты нефтяной компания хӯрумса̄т са̄тлов хӯрум скважина ва̄рсыт. Тыитныл хо̄тпан нупыл кит скважина сака милыг ма̄ пасатасыт. Ань ищхӣпыӈ утыт хосыт кит щёс са̄внув ма̄во̄й ос газ сэ̄луӈкве патэ̄гыт.

1126 2016. 06. 23. Валентина Васильева

Тав во̄рт о̄луӈкв таӈхи Ты ханты пыг наме Андрей Кечимов, тав са̄тхуйплов та̄лэ то̄влыс. Онтолов класс а̄стламе юипа̄лт школат э̄лаль ханищтахтуӈкв ат патыс, Сургут ӯс нефтяной техникумн минас, тот пыгыт ма̄во̄й но̄хвинэ ма̄т рӯпитаӈкв ханищтавет. Таве титыгласлум, тот ханищтахтуӈкв таве̄н мӯсты ман а̄ти. Пыг ювле ла̄выс, ат мӯсты. Ос ханищтахтуӈкв вуйхатас те, э̄ри а̄стлаӈкве. Тав ща̄нягеа̄щаге во̄рт о̄лэ̄г, са̄лы о̄ньще̄г. Пыге̄н акваг тэ̄н палтэ̄н яланты, хӯл алыщлы, во̄раи. Тэ̄лы порат «Бураныл» во̄рт яласы. Ӯст ялпыӈ хо̄талыт о̄лыглан порат Андрей тув акваг во̄виньта̄лаве, тав тот сака нё̄ты. Ханты маснутыл масхаты, та тӯлыглахты, йӣквуӈкв о̄с ха̄сы. Ты хурит тав а̄кве Римма Кирилловна Молданова ёт по̄слым о̄лы.

1126 2016. 06. 23. Валентина Хозумова

Во̄рт о̄лнэ яныг ня̄йт хум Ханты-Мансийск ӯсн акв ханты хум хо̄тпа ёхталас. Тав «То̄рум маа» музейт о̄лум семинарн во̄выглавес. Наме Сергей Васильевич Кечимов. Нила хо̄тал тав тыт ма̄щтырлас. Рӯпитаме порат тав сака нэ̄мхотьют ёт ат потыртас. Акв хотты хо̄тал тав ма̄н ётув потыртаӈкв ка̄сащас. Ань тав уре̄тыл ищхӣпыӈ ма̄т са̄всыр потыр ловиньтаӈкв ро̄ви. Матах та̄л тав нефтяникма̄хум ёт сутытахты. Ань таве̄н са̄всыр яныг мирхал организацият нё̄туӈкв ла̄вхатсыт. Ты хум хо̄тпа Сургутский районт о̄лнэ Имлор нампа ялпыӈ тӯр ӯргалан хумыг о̄лы, рущит таве саманыг ла̄вияныл. Та е̄рт о̄лнэ хантыт ма̄гыс ты тӯр сака ялпыӈ. Тув нэ̄ хо̄тпан ялуӈкв щар ат ро̄ви. Туп хум хо̄тпат тот хӯл алыщлаӈкв ос во̄раяӈкв ве̄рме̄гыт. Ос ма̄во̄й но̄хвинэ ма̄хум та тӯр ляпат рӯпитаӈкв таӈхе̄гыт, Сергей Кечимовн тув щар ат та̄ртавет. Ты урыл тав тох потыртас: – Ма̄н во̄рт хӯрум хо̄тпа о̄лэ̄в. О̄лнэ ма̄в Русскинской па̄вылныл Лянтор ӯс нупыл о̄лы, хо̄тпан ве̄рыстатем минуӈкв э̄ри. Ма̄нти са̄лы о̄ньще̄в. Туи са̄лы пӯсас ва̄ре̄в, хӯл алыщлэ̄в. Э̄квам Капитолина Васильевна, са̄в та̄л аквъёт о̄лыме̄н, ня̄врам ат о̄ньщиме̄н. Ань тыг ма̄щтырлаӈкв ты во̄вве̄сум. Ты э̄лыпа̄лт ос Нижневартовск ӯсн ялсум, тот са̄лы сун ва̄рсум. Тох та̄л сыс та яласэ̄гум. Ам ань сунсэ̄гум, ма̄хманув хумус ма̄щтырлэ̄гыт. Ма̄н тыг ёхтысӯв, пуссын маныр э̄ри, щё̄питыма. Ос амтирот номсэ̄гум, ам мощ мо̄т щирылнув ва̄рнувум. Ма̄н акв ляпат пуссын рӯтыт о̄лэ̄в. Ма̄ мощща, ат то̄влаве̄в. Са̄лы ӯруӈкв ма̄ а̄тим. Имлор нампа ялпыӈ тӯрув мувлахи ма̄во̄й но̄хвинэ ма̄хум рӯпитэ̄гыт. Та̄н лё̄ӈх тот ва̄рсыт, ма̄шинат хо̄тал палыт тыглетувле та нуйгатахтыглэ̄гыт. Ос акваг ма̄н тӯрувн та новхатэ̄гыт. Ӯщлахтын хо̄талытт тӯрув нупыл та минмыгтэ̄гыт. Ам са̄т атыт хо̄талэ̄т э̄типа̄лаг тув о̄с минэ̄гум. Ос тув миннэ ма̄гыс «пост» та̄ра минуӈкв э̄ри, ёлпо̄илттавем, нэ̄паканум сунсыглавет. Тувыл та, таит та̄нти халанылт свонитэ̄гыт, ла̄ве̄гыт, хо̄т ам минасум. Тӯрувт мори алыщлан хо̄тпат ла̄кква та мингалэ̄гыт. Таима̄гыс ам ань сытамыг тӯрув нупыл минэ̄гум. Ма̄шинан та̄лматэ̄гум, ма̄ньха̄пум ётвыглум. Во̄рт ма̄шинам хультуптылум, ма̄ньха̄пум вит мус харттылум, ӯнтэ̄гум. Бинокль ёто̄ньще̄гум, тот нирщахылныл та сунсыглахтэ̄гум. Тӯяг о̄с тох тӯрн минасум. Сунсэ̄гум, аква ма̄шинаӈ та̄гыл тув ты ёхтыс, ха̄п ёттотыс. Хум ма̄шинаныл конква̄лыс, тӯр нупыл ла̄глыл минас. Пормасанэ пуссын хультуптасанэ. Ам ла̄щлакв тув минасум, ха̄пе сунсыгласлум. Ха̄пе̄т та тэ̄нут, хӯрум хо̄тпа ма̄гыс яныг палатка, са̄всыр хӯлпыт. Маныр ве̄рмысум, пуссын ётвисанум, туп тэ̄нутанэ тот хультуптасанум. Ха̄пе новуӈкв ат патыслум, такос таве ӯрыслум, ат нэ̄глыс. Таквсы о̄с са̄в ма̄хум тӯрувн ёхталы. Ёхтэ̄гыт, хӯлп ӯнттэ̄гыт, та̄нти пил ва̄туӈкв минэ̄гыт. Ам хӯлпаныл хотвыганум ос ха̄паныл са̄грапыл са̄грапиянум, ас ва̄ре̄гум, тув воссыг ул вос ёхтэ̄гыт. Такос та̄н ла̄вавет, ты тӯрувн щар ул вос новхатэ̄гыт, нэ̄матыр ат хӯлэ̄гыт. Та̄нанылн тот няслуӈкв, хӯл пувуӈкв ос во̄раяӈкв щар ат ро̄ви. Таима̄гыс ты ам та̄н ётаныл тох воритотэ̄гум, та̄наныл тох уральтыянум. Ты тӯр ляпат пе̄с порат сака са̄в ханты колта̄глыт о̄лсыт. Ос нефтяникытн та̄нти о̄лнэ ма̄нанылныл пащиртаӈкв та патве̄сыт. Воссыг маныр ва̄ре̄гыт, мо̄т ма̄н та ва̄нтлысыт. Хотьют са̄в са̄лы о̄ньщис, та порат та̄н сака илямтаве̄сыт. Та̄н палтаныл ты сылкат ёхтэ̄гыт, манах са̄лы та̄нанылн э̄ри, та па̄тамтыяныл. То̄ва ма̄хманув турын ёхтуве̄сыт, мо̄т ма̄н та минасыт. Ма̄н ще̄мьявт хӯрум ня̄врам яныгмасӯв, каӈкум ос ам хультсуме̄н, а̄пщиме̄н а̄тимыг е̄мтыс. Сака са̄в хо̄тпа ань хотталь щалтэ̄гыт. Ты э̄тпос о̄выл хо̄талэ̄т акв рӯтум а̄тимыг е̄мтыс – Иосиф Никитович Кечимов. Тав ань апге хультыс, пыг хо̄тхуйплов та̄лэ то̄влыс. Ащо̄йкатэ̄н са̄лы ӯруӈкв ханищтавес, во̄раяӈкв, алыщлаӈкв. Таквсы интернатн тотаве, щар ат ка̄сащи тув минуӈкв, акваг юв во̄вхаты. Тот ла̄ви: «А̄нум та̄ртэлы̄н, ам на̄нан матыр тотэ̄гум». Акв щёс та̄ртвес, юв ялыс, тувыл хусахтем лунт ёттотыс, интернатт рӯпитан хо̄тпат пуссын мисанэ. Ня̄врамытн саватаӈкв те патаве, «Буранын» та̄лматы, во̄рн ащо̄йкатэ палт та тахи. Матах хо̄тал тот о̄лы, ос ювле минуӈкв та ла̄ваве. Ты пыгрищакве ань ащо̄йкатэ та̄л во̄рт хумус о̄лы. Ань таве̄н сака та̄рвит паты. Сака ёмас ня̄врам. Акваг матыр ва̄ри, рӯпата та̄л щар ат ӯнлы. Э̄типа̄лаг посым пӯт ва̄рум, титыглаве, манрыг на̄ив мощща со̄паслам. Тав ювле ла̄ви, а̄лпыл мус тах то̄влы. Ос са̄в на̄ив те аты, холытан рӯпата та̄л ӯнлуӈкв тах паты. Тох те, во̄рн ялуӈкв ро̄ви. Ам Сергей Васильевич титыгласлум, йирхатнэ̄ныл порат та̄н манах са̄лы йирыг тӯщтыяныл. Тав ювле ла̄выс, са̄всыр щирыл о̄лыглы. То̄ва порат хусахтемва̄тахтем са̄лы алэ̄гыт. Ка̄сыӈ ще̄мья такви са̄лы тоты. То̄ват ёхтуӈкв хунь ат ве̄рме̄гыт, мощ ётылнув пӯрлахтэ̄гыт. Такви ма̄хманэ халт ты хум хо̄тпа сака янытлаве. Со̄ль, тав сака яныг ня̄йт о̄ньщи. Ул таима̄гыс тав Имлор нампа ялпыӈ тӯр ӯргалан хумыг о̄лы.

1126 2016. 06. 23. Валентина Васильева

Ё̄рн ма̄хум о̄лупсаныл урыл Ты ё̄рн нэ̄ наме Клавдия Ивановна Айваседа, о̄лнэ па̄влэ Харампур, Ямало-Ненецкий округ Пуровский районт о̄лы. Нэ̄ такви урыл тох потыртас. Школа а̄стламе юипалт тав 1985 талт Хабаровск ӯс институтн ханищтахтуӈкв минас, тот лӯима̄ ма̄хум ма̄гыс я̄нас институт о̄лыс. Тот хум ва̄рыс, о̄йкатэ – ульчи, тамле мир ань хо̄тал нэ̄глын е̄рт о̄лы. Тит а̄гияге̄н тот самын патсы̄г. Нэ̄ ханищтахтын ма̄ныл а̄стуме юипа̄лт Хабаровский край Ульчский район Булава па̄вылн рӯпитаӈкв минас. Ос о̄йкатэ вина айнэ нупыл сака патыс. Клавдия а̄гияге (Виктория и Валентина) висаге ос ювле такви самын патум ма̄тэ̄н та минас. Юн ё̄рн хум ёт ва̄йхатас, акванминасы̄г. О̄йкатэ нэ̄ та̄л о̄лыс, а̄гипыг о̄ньщис. Пе̄с ва̄рмалит, пе̄с накыт пуссын сас ёмащакв ва̄ганэ̄н. Пе̄с ма̄хум хумус о̄лсыт, ань та щирыл ты о̄лэ̄г. О̄йкатэ рущ наме Александр Иванович, ё̄рн намеХомакасама (ма̄ньщи ла̄тӈыл те ла̄вуӈкве – ёмас хум). Тав атхуйплов та̄лтем ӯйхул пусмалтан хо̄тпаг рӯпитас, тувыл тав па̄выл мирколн рӯпитаӈкв во̄ввес, та па̄сыл тот ты рӯпиты. Клавдия Ивановна ос культура колт методистыг о̄лы, тув ёхталан ма̄хум, а̄гирищитпыгрищит ма̄щтырлаӈкв ханищтыянэ. Клавдия Ивановна тамле пӯмыщ урыл потыртас, ё̄рныт о̄выл апганыл щаще̄кватэ̄но̄патэ̄н манос ане̄кватэ̄нащо̄йкатэ̄н янмалтаве. Хум ня̄врам самын паты, та̄ра яныгхо̄тпа колн виве. Тот та яныгми. Мо̄т ня̄врамыт ос ща̄нянылна̄щанылн о̄ньщавет. Тэ̄н ма̄нь а̄гитэ̄н яныг пыге Дима ос тэ̄нти палтэ̄н вистэ̄н. Дима – ты рущ наме, тав ма̄ньта̄гыл ане̄кватэащо̄йкатэ палт о̄лы. Ё̄рн нам о̄с о̄ньщи – Хайпулю. Ты апыгпыге̄н ё̄рн ма̄хум пе̄с ва̄рмалит, пе̄с накыт пуссын ёмащакв ва̄ганэ, ащо̄йкатэ̄н ханищтаве. Ё̄рн ла̄тӈыл потыртаӈкв ха̄сы. Онтоловхуйплов та̄лэ то̄влын мус тав тэ̄н ётэ̄н о̄луӈкв паты. Ё̄рныт ла̄ве̄гыт, ты щирыл янмалтым ня̄врам ма̄к мӯтраӈыг, ма̄щтырлан ос ёмас хо̄тпаг тах яныгми.

1126 2016. 06. 23. Людмила ТЕТКИНА

«Э̄лы Хо̄тал» община рӯпататэ урыл Ты та̄л о̄вылтахтам порат Хо̄нтаӈ районт рӯпитан «Э̄лы Хо̄тал» нампа соссаӈ ма̄хум община субсидияолныл майвес. Ты олнытыл тот рӯпитан ма̄хум яныгпа̄ла хо̄тпат ма̄гсыл «Возраст счастья» нампа фестиваль ва̄ре̄гыт. Ты община кӯщаиг Ольга Александровна Фомичёва о̄лы. Тав ты урыл ла̄выс: «Яныгпа̄ла хо̄тпат ма̄н Силава па̄вылн во̄виньта̄лыянӯв, нила хо̄тал сыс та̄н ма̄гсыланыл са̄всыр пӯмащ ва̄рыглаӈкве патэ̄в». Община хосат та̄гыл «Импульс» нампа мирн нё̄тнэ центр ёт рӯпиты. Мо̄лты та̄л таквсы порат ты центрын ялантан 16 э̄лумхо̄лас ма̄ньщи па̄вылт кит са̄т сыс ӯщлахтасыт. Ты та̄л «Возраст счастья» нампа ялпыӈ хо̄тал ойттур э̄тпос 13 хо̄талныл 17 хо̄талэ мус рӯпитаӈкве тах паты. То̄нт Силава па̄вылт 30 яныгпа̄ла хо̄тпат тах ӯщлахтэ̄гыт. Та̄н Урай, Югорск, Советский, Нягань, Ханты-Мансийск ӯсытныл ос Кондинский районныл тув ёхтэ̄гыт. Мо̄т хо̄тпат ты фестивалин ёхталаӈкве о̄с ве̄рме̄гыт, та̄н ма̄гсыланыл па̄выл кант палаткат тӯщтавет. Общинат рӯпитан ма̄хум та̄нанылн са̄в пӯмащ щё̄питасыт. Са̄всыр ӯсытныл манос па̄влытныл о̄лнэ яныгпа̄ла хо̄тпат ты нила хо̄тал тот мӯйлуӈкве патэ̄гыт. Ольга Александровна ла̄выс: «Ма̄хмыт рӯпитым акваг хотталь молямлэ̄гыт, акваг ат а̄лыме̄гыт. Тувыл пенсиян патнэ̄ныл порат та̄нанылн нэ̄мхотталь молямлаӈкве воссыг ат э̄ри. Ня̄враманыл пуссын та̄нки ще̄мьял о̄лым, акваг рӯпитым, ща̄няныла̄щаныл палт ёхталаӈкве о̄с ат а̄лыме̄гыт. Яныгпа̄ла ма̄хум юн нас тох ул вос ӯнлысыт, ма̄н тамле фестиваль ва̄рыглэ̄в». Тамле рӯпата ва̄рнэ̄тэ ма̄гсыл Ольга Александровна субсидияолныл ты майвес. Общинат рӯпитан ма̄хум этнотуризм щирыл о̄с рӯпитэ̄гыт. Урай ӯст о̄лнэ мир ӯщлахтын хо̄талыт порат Силава па̄вылн во̄виньта̄лавет. Тэ̄лы порат мӯй ма̄хум ёсал ха̄йтэ̄гыт, суныл тахсэ̄гыт ос «Бураныл» яласэ̄гыт. Та па̄вылт община хо̄тпат ма̄ньщи колыт ӯнттысыт, тот мӯй ма̄хум э̄т хӯлуӈкве ве̄рме̄гыт. Ма̄ньщи колыт ӯнттуӈкве та̄н олныл о̄с та̄стыглаве̄сыт. Туи порат мӯй ма̄хум пил ва̄туӈкве, ла̄хыс атуӈкве, ма̄ньха̄пыл товыгтаӈкве ос Конда я̄т пувлуӈкве во̄виньта̄лавет. Тув ёхталан мир соссаӈ ма̄хум о̄лупсаныл ос пе̄с йис ва̄рмаляныл урыл потыртавет. Ва̄с манос хӯл исмитыл айтавет, пилыӈ ня̄нил тыттавет. Ос «Вогульское подворье» нампа музеит пормасыт суссылтавет. Ань Урай ӯсныл ос Кондинский районыл о̄лнэ ма̄хум ва̄тихал ма̄ньщи па̄вылт ӯщлахтэ̄гыт. Та̄л сыс тув кит со̄тыра э̄лумхо̄лас ӯщлахтуӈкве ос соссаӈ ма̄хум пе̄с йис ва̄рмалитыл пӯмщалахтуӈкве ёхталэ̄гыт. Ань община турпредприятият союзн хасхатым о̄лы. Ты организация мо̄т ма̄т о̄лнэ мир ма̄ньщи па̄вылн ёхталаӈкве во̄вияныл. Ты та̄л яныгпо̄ль э̄тпост общинат рӯпитан ма̄хум «Ӯринэ̄ква хо̄тал» ва̄рыгласыт. Ты ялпыӈ хо̄тал янытлаӈкве 300 арыгкем э̄лумхо̄лас акванатхатыгласыт. Мӯй ма̄хум концерт суссыт, са̄всыр касылт кассыт ос пасан ва̄тат ӯнлахо̄лсыт, со̄ламат тэ̄сыт, ща̄й айсыт. Ты коныпал «Э̄лы Хо̄тал» община ня̄врамыт ёт рӯпиты. Онтолов та̄л сыс Силава па̄вылт «Юрсил» нампа ма̄н ня̄врамыт ӯщлахтаӈкве ёхталэ̄гыт. Ты та̄лыт сыс тот 555 а̄гирищпыгрищ тув ялыс. Ты та̄л 50 ня̄врам ойттур э̄тпос 3 хо̄талныл 13 хо̄талэ мус тот ӯщлахтуӈкве патэ̄гыт. Мо̄лты та̄л А̄сугорский институтт рӯпитан ма̄ньщи нэ̄ Светлана Алексеевна Попова ня̄врамыт ёт тот рӯпитас. Ты та̄л Ольга Александрова таве о̄с тув во̄витэ. Татьяна Огнева, А̄сугорский театрыт рӯпитан ханты нэ̄, а̄гитпыгыт ханищтаӈкве ань тув мины. Сургутский университетыт ханищтахтан ма̄ньлат хо̄тпат ты та̄л ня̄врамыт ёт рӯпитаӈкве о̄с патэ̄гыт. Ты смена ва̄рыглан ма̄гсыл мирн нё̄тнэ департамент олн та̄стыс. Ня̄врамыт тот Андрей Семёнович Тарханов урыл потыртавет. Мо̄тыт та̄л о̄йка 80 та̄лэ то̄влы. Ольга Александровна нэ̄пак хаснэ хо̄нтаӈ ма̄ньщи хо̄тпат сака янытлыянэ. Ань Силава па̄вылт «Музей литераторов Конды» нампа кол ӯнттыс. Ты та̄л лӯпта э̄тпост Анна Митрофановна Конькова яныгса̄т та̄лэ то̄влы. Ты кастыл общинат рӯпитан ма̄хум тот суссылтап щё̄питасыт. Ма̄ньщи э̄ква пыге Эмиль Иванович Косполов оматэ хансум нэ̄паканэ, пормасанэ тув мӯйлуптасанэ. Ты суссылтап лӯпта э̄тпос ма̄щтыр ма̄хум мирхал фестиваляныл о̄лум порат рӯпитаӈкве о̄вылтахтас. Са̄всыр ма̄ныл ёхталам ма̄щтыр хо̄тпат ты выставка сунсуӈкве Силава па̄вылн ялсыт. Тамле музей ӯнттын ма̄гсыл округ Думат рӯпитан депутатыт Надежда Алексеева, Татьяна Гоголева, Еремей Айпин олн депутатский фондыл та̄стысыт. Тэ̄лы пора ты музей по̄хат яныг кол ӯнттаве, тот Ольга Александровна нэ̄пак хаснэ ма̄хум ос учёный хо̄тпат акванатыглаӈкве патыянэ. 2017 та̄лт «Юрсил» нампа ӯщлахтын ма̄ 10 та̄лэ тах то̄влы. Ты кастыл община ань щё̄питахтуӈкве о̄вылтахтас. Ольга Фомичева ты ва̄рмаль урыл таи ла̄выс: «Мо̄тыт та̄л ма̄н туи сыс хӯрум смена ня̄врамыт ма̄гсыл тах ва̄рыглэ̄в. То̄нт акв сменав 14 хо̄тал тах рӯпиты. Ам са̄всыр сапра̄нин ань ва̄тихал во̄виньта̄лавем, тот кӯщаит ня̄врамыт ӯщлахтын ма̄т урыл потыртэ̄гыт. Тот ам акваг ла̄ве̄гум, лов хо̄тал сыс ма̄н ӯст о̄лнэ ня̄врамытн соссаӈ ма̄хум культураныл урыл потыртаӈкве, са̄всыр ут ма̄щтырлаӈкве ханищтаӈкве щар ат а̄лыме̄в. Тамле ӯщлахтын ма̄т а̄гирищитнпыгрищитн са̄внув хо̄тал о̄луӈкве э̄ри. Урай ӯст ханищтап ва̄рмаль щирыл управленият рӯпитан хо̄тпат ювле ла̄всыт, мо̄тыт та̄л та̄н са̄внув олн тах та̄стэ̄гыт. То̄нт Силава па̄вылт ма̄н хӯрум смена щё̄питэ̄в. Акв сменат ня̄врамыт нилахойплов хо̄тал ӯщлахтуӈкве патэ̄гыт». Ольга Александровна пенсиян минаме юипа̄лт Силава па̄вылн ва̄нтлас. Ты э̄лыпа̄лт тав Урай ӯст такви колэ̄т о̄лыс. Рӯпатаныл по̄хын хунь минас, такви яныгмам па̄влэ̄н о̄лмыгтас. Ӯст о̄лнэ колэ тыналастэ ос Силава па̄вылт кол ӯнттыс. Ань та па̄вылт тав пыге ёт о̄лы. Па̄вылт на̄йпос а̄тим, тэ̄н тэ̄нки на̄йпос ва̄рнэ ут о̄ньще̄г. Ты ут туп ӣтипа̄лаг ква̄лтапитэ̄н. Хо̄нтаӈ ма̄ньщи нэ̄ сака ка̄ркамыг о̄лы. Яныгмам па̄влэ̄н о̄луӈкве хунь ёхтыс, туп китхӯрум пе̄с кол ӯнлысыт. Ань па̄вылт са̄в йильпи ма̄ньщи колыт ӯнттым о̄лэ̄гыт. Тав акваг тув са̄в мӯй ма̄хум во̄виньта̄лыянэ, са̄всыр ялпыӈ хо̄талыт, ханищтапыт ва̄рыглы, тыи ма̄гсыл тув акваг са̄в мир ёхталы. Община «Э̄лы Хо̄тал» са̄в та̄л Хо̄нтаӈ районт рӯпиты, ты пора сыс тот рӯпитан хо̄тпат соссаӈ ма̄хум пе̄с йис ва̄рмаляныл но̄хялтуптым са̄в рӯпата ва̄рсыт. Тыи ма̄гсыл 2015 та̄лт община «Э̄лы Хо̄тал» Юван Николаевич Шесталов намыл пиным премиял майвес. Мо̄лты та̄л ойттур э̄тпос 9 хо̄талэ̄т соссаӈ ма̄хум янытлан хо̄тал кастыл Ольга Александровна Ханты-Мансийск ӯсн во̄виньта̄лвес. Ма̄ньщи нэ̄ рӯтанэ пуссын ты общинат рӯпитэ̄гыт, та̄н пуссын аквъёт хо̄нтаӈ ма̄ньщит пе̄с йис ва̄рмаляныл э̄лаль тотыяныл.

1126 2016. 06. 23. Валентина Хозумова

Сӯлкол ва̄рвес Ты э̄тпос нилыт хо̄талныл ловит хо̄талэ мус «То̄рум Маа» музеиӈ ма̄т ма̄щтыр ма̄хум рӯпитасыт. Ты э̄лыпал хо̄талт учёный ма̄хум та̄нти хансум потраныл та̄нанылн ловиньтасаныл. Тувыл титыт хо̄тал та̄н музей о̄лнэ канын тотве̄сыт, тот нила хо̄тал рӯпитасыт. Ань Ханты-Мансийск ӯсн ты ма̄щтыр ма̄хум во̄выглаве̄сыт: Касум па̄вылныл Павел Михайлович Тользин ос Яков Никифорович Тарлин, Сургутский район Русскинской па̄вылныл Сергей Васильевич Кечимов ос Аграфена Семёновна Сопочина ёхталасы̄г, ӯсувныл хӯрум хум хо̄тпа о̄лсыт – ма̄ньщи о̄йка Рудольф Васильевич Меров, хӯрум ханты хумыт Юрий Григорьевич Кондин, тав пыге Вячеслав ос Валерий Михайлович Шульгин. Ты ёхталам ма̄хум халт щар яныг хо̄тпаг Сергей Васильевич Кечимов о̄лыс, ань во̄рт о̄лнэ ты хум хо̄тпа соссаӈ мир халт намыӈсуиӈыг е̄мтыс. Тав уре̄т я̄нас потыр ловиньтэ̄н. Ань тыг ёхталаме порат Сергей Васильевич хӯл яктын па̄рт, пӯт тагатан ва̄ӈкрипйӣв ос хасап йӣвыт ёргыс. Мо̄т хум хо̄тпатн нё̄тыс. Касаянэ, са̄грапанэ ёттотыгламанэ, пуссын татем пе̄лпыт. Касум па̄вылныл ёхталам хум хо̄тпа Павел Михайлович Тользин а̄ращ ва̄рыс. Тамле а̄ращ во̄рт о̄лнэ ма̄хум та̄н ва̄рыглэ̄гыт. Во̄тыӈ хо̄талыт порат тамле а̄ращ ёмас па̄лтуӈкв, во̄тн лап ат харыгтаве. Ре̄гыӈ хо̄талыт о̄с ёмас, на̄е э̄лаль ат мины. Мо̄т ма̄щтырыт ты Рудольф Меров, Валерий Шульгин ос Юрий Кондин Вячеслав пыге ёт сӯлкол ва̄рсыт. Тамле сӯлколт ма̄н пе̄с ма̄хманув туи хӯл алыщлан порат манос пум ва̄рнэ ма̄т о̄лсыт. Ты семинар э̄лыпа̄лт та̄н во̄рн ялсыт, ховт ос нюлы сӯл нуйсыт. Кол лаппантнэ ма̄гыс сака осыӈ йӣв ат а̄ртми, мощ ощщанув йӣвныл нуяве. Тамле йӣв сӯлэ мощ ка̄миньтаг о̄лы, ёмащакв хӯты, па̄лыг ат покматы. Яков Тарлин ос са̄лы сов тынтлын йӣв ва̄рыс, ань тамле ут во̄рт о̄лнэ А̄с ма̄хманув иӈ о̄ньщияныл, тав са̄лы ман мо̄т ӯйхул сов ка̄миньтапты. Яныгман йӣв акв метра карсытэ хультуптаве, нумитэ хотсартаве. Котильн мувлахи ё̄хнэ йӣв ва̄раве. Са̄лмыг яктым сов тув пе̄раве, ос ты ут хунь мувлахи ё̄хтаве, сов мощ тынтлахты ос хосаг хартхаты. Музейт рӯпитан хо̄нтаӈ ма̄ныл о̄лнэ ма̄ньлат хум Анатолий Николаевич Брусницин а̄мп кол ва̄рыс. А̄мп колэ ва̄ти норныл ва̄рыстэ. Ам таве титыгласлум, тамле а̄мп кол тав хо̄т ва̄стэ. Тав ла̄выс, наука пе̄с нэ̄пакыт ловиньтаме порат хурин по̄слым тамле кол ва̄м. Ханты э̄кват ос кол тӣврыт ю̄нсхатасыт. Людмила Калистратовна Зубакина ос Аграфена Семёновна Сопочина хасап ю̄нтсы̄г. Евдокия Андреевна Нёмысова ос суп ю̄нтыс. Нилыт хо̄талт ты семинар рӯпататэ та по̄илттавес. Ка̄сыӈ ма̄щтыр такви рӯпататэ ва̄руӈкв а̄стластэ. Музейн ёхталам мӯй хо̄тпат пуссын ва̄рим утыт ёмащакв сунсыгласаныл, та̄н хумус ва̄рве̄сыт, та урыл потыртаве̄сыт. Музей ва̄ӈын кӯщай нэ̄ Эрика Петровна Сургутскова ка̄сыӈ хо̄тпа янытластэ, пӯмащипа ла̄тӈыӈ нэ̄пакыл мистэ.

1126 2016. 06. 23. Людмила ТЕТКИНА

Яныг тӯр ва̄тат ма̄ньщи па̄выл ӯнттаве Ня̄врамыт ӯщлахтын «Окунёвские зори» нампа ма̄ Советский район Югорск ӯс по̄хат яныг тӯр ва̄тат о̄лы. Лӯпта э̄тпос 15 хо̄талныл 21 хо̄талэ мус «Традиционные знания коренной Югры» нампа ханищтап тот ва̄рыглавес. Ма̄ньщи хо̄тпат Советский район Таёжный, Пионерский, Алябьево па̄влытныл, Ха̄льӯс район Саранпа̄вылныл, Ягримныл, Хулюмсӯнтныл ос Советский, Югорск, Ханты-Мансийск ӯсытныл тув ёхталасыт. Ты ханищтап ва̄рнэ ма̄гсыл округ Думат рӯпитан депутатыг Татьяна Гоголева ос Надежда Алексеева олн та̄стысы̄г. Тамле э̄рнэ тэ̄ла тэ̄н «Таёжные знания» нампа проект хосыт ва̄ре̄г. Ханищтап о̄лум порат хум хо̄тпат тот сӯмъях ӯнттысыт ос ё̄рнкол тӯщтысыт. Ты сӯмъях ӯнттуӈкве кит ма̄ньщи ма̄щтыр хумыг тув во̄виньта̄лвесы̄г. Ханты-Мансийск ӯсныл Анатолий Васильевич Вадичупов ос Сургут ӯсныл Александр Дмитриевич Сайнахов тув ёхталасы̄г. Тэ̄натэ̄н хо̄т ма̄ньщи пыг нё̄тсыт. Ты пыгыт Ха̄льӯс районныл ос Советский районныл о̄лэ̄гыт. Ма̄щтыр нэ̄т ё̄рнкол ма̄гсыл яныг хасап ю̄нтсыт ос ма̄ньщи хум хо̄тпат ма̄ньщи супыл ю̄нтсаныл. Тувыл са̄всыр са̄с то̄тапыт, со̄втыт ос мо̄т пормасыт ва̄рсыт. Саранпа̄вылт о̄лнэ ма̄ньщи нэ̄ Нина Николаевна Загайнова ос Ягримт о̄лнэ ма̄ньщи э̄ква Тамара Семёновна Мезенцева ма̄хум ма̄щтырлан тэ̄лан ханищтаӈкве тув о̄с во̄виньта̄лвесы̄г. Округ Дума депутат нэ̄ Надежда Алексеева ла̄выс, та̄н тамле рӯпата таи ма̄гсыл ва̄ре̄гыт, ма̄ньлат ма̄ньщи пыгыт пе̄с йис ва̄рмалянӯв э̄лаль вос тотыяныл ос о̄паныл, ащо̄йканыл, а̄щаныл хольт ма̄щтырлаӈкве вос ха̄сэ̄гыт. Ань та ма̄т ӯщлахтын ня̄врамыт са̄всыр ханищтапыл ё̄рнколт ва̄рыглаӈкве патавет. Ос сӯмъях суссылтым ма̄н культурав урыл потыртавет. Ты рӯпатаныл та̄н э̄лаль ва̄руӈкве патыяныл. Мо̄тыт та̄л ты ӯщлахтын ма̄н та̄н о̄с ёхталэ̄гыт. То̄нт ма̄щтыр хо̄тпат мо̄т ма̄ньщи колыт ӯнттэ̄гыт. Ня̄врамыт тӯр ва̄тат ма̄ньщи па̄вылт ӯщлахтуӈкве тах патэ̄гыт. Татьяна Гоголева ка̄сыӈ туи ма̄ньщи мир акванатыглыянэ. Ты э̄лыпа̄лт Ха̄льӯс районт ос Свердловский областит о̄лнэ ма̄хум ма̄гсыл са̄всыр ханищтапыт ва̄рыглас. Ань Тапс я̄ ва̄тат ос Советский районт о̄лнэ ма̄ньщит па̄лт ты хо̄нтхатыглап ос ханищтап ва̄рыглас.

1126 2016. 06. 23. Николай МЕРОВ

Щаквщин хо̄тпат Урай ӯст акванатхатыгласыт Ты та̄л лӯпта э̄тпос лов хо̄талныл ос хӯрумхуйплов хо̄талэ мус округувт Урай ӯст ма̄щтырлан ма̄хум акванатхатыгласыт. Ты ва̄рмаль э̄лаль тотнэ ма̄гыс округ мирколт рӯпитан хо̄тпат олн мисыт. Ялпыӈ хо̄тал «Центр Ремёсел», округ культура департаментыт рӯпитан хо̄тпат ос мо̄т организацият пуссын акваннё̄тхатым щё̄пита̄лсаныл. Ты тэ̄лан Урай ӯсн са̄в мӯй ма̄хум ёхталасыт. Ӯс кант суссылтап ва̄рыглавес. Тот ма̄щтыр хо̄тпат халанылт кассыт. На̄н ты урыл э̄лаль ловиньтэ̄н. Ма̄щтырлан ва̄рмаль таима̄гыс тыт щё̄пита̄лаве, Югра ма̄т о̄лнэ ма̄хум ка̄тыл са̄всыр пормасыт нот палытыл ва̄ре̄гыт. Тыт са̄в ма̄щтыр хо̄тпа о̄лы. Ань соссаӈ мир онтоловит щаквщин ва̄рмальн Ханты-Мансийский, Сургутский, Нижневартовский, Нефтеюганский, Ха̄льӯс, Октябрьский ос Кондинский районытныл акванатхатыгласыт. Россия янытыл Ямало-Ненецкий округныл, Тюменский, Свердловский, Самарский ос Сахалинский областитныл, Пермский крайныл, мо̄т хо̄н ма̄ныл Узбекистан, Казахстан ос Конго республиканыл ма̄щтыр хо̄тпат Урай ӯсн ёхталасыт. Пуссын аквъёт китса̄ткем хо̄тпа о̄лыс. Ма̄хум та̄нки ва̄рум пормасаныл суссылтасаныл ос тыналасаныл. Ялпыӈ хо̄тал о̄вылтым порат ӯс кант Урай ӯс кӯщай Анатолий Иванов мӯй ма̄хум янытласанэ. Тав ла̄выс: «Матъёмас ма̄щтырлан ва̄рмаль ма̄н ӯсувт ва̄рвес. Тыт са̄в ма̄щтыр хо̄тпа о̄лы. Юио̄выл та̄лыт ты тэ̄ла э̄лаль тотнэ ма̄гыс са̄в нё̄тмил ва̄раве. То̄ва хо̄тпат та̄нки ва̄рнэ рӯпатал олн сэ̄лэ̄гыт. Ты щирыл рӯпитан хо̄тпат маснут ю̄нтэ̄гыт, а̄ныса̄н ва̄ре̄гыт, алыщлан ут ма̄щтырлэ̄гыт, кол ӯнттэ̄гыт, матыра̄ти пуссын ва̄руӈкве ха̄сэ̄гыт. Ка̄тыл ва̄рим пормас ма̄к яныг тын ты о̄ньщи. Ам на̄нан тыи ма̄гыс сака янытлыянум». Ты кӯщай хум йӣвныл ва̄рум тайил мӯйлупта̄вес. Тав татем хотща̄гтыс. Ты юипа̄лт ма̄щтыр ма̄хум рӯпитаӈкве ла̄ккваминыгласыт. Ка̄сыӈ ма̄ныл ёхталам хо̄тпа ма̄гыс ӯс кант я̄нас палатка тӯщталавес. Тот та̄н ёрыгхатасыт, ю̄нсхатасыт, колканын нортнэ то̄рыт сагсыт, ра̄ктыл а̄ныт по̄щгысыт ос мо̄т са̄всыр рӯпата ва̄рсыт. Тот ам йӣвныл ёрыгхатнэ ма̄щтыр ханты хо̄тпа такви рӯпататэ урыл мощ китыгласлум. На̄н ты хум потре э̄лаль ловиньтэлы̄н: «Ам намум Станислав Семёнович Сопочин, Сургутский район Русскинской па̄вылныл ма̄щтырлаӈкве тыг ёхтысум. Ам ще̄мьяӈ та̄гыл йис ма̄т са̄лы ӯрим о̄лэ̄гум. Ма̄н тот яныгса̄т атпанкем са̄вит са̄лы о̄ньще̄в. Са̄лыӈколт самын патум па̄сныл о̄лэ̄гум. Ща̄нягумныла̄щагумныл хультум са̄лыт э̄лаль о̄ньщиянум. О̄лнэ ма̄в Тромаган я̄ хосыт алгаль о̄лы. Ме̄н тот э̄кваме̄нтыл о̄лыме̄н, тав наме Валентина Леонидовна. Ня̄врам иӈ ат о̄ньщиме̄н. Тав ань ам ётум о̄с тыг ёхтыс. Тыт хорамыӈ пормасыт ю̄нты. Ма̄щтырлан ва̄рмальн ма̄нь та̄гыл амки ханищтахтасум. Ма̄ниг о̄лмум пора о̄пам ос а̄щум мойтыӈыг хӯл алыщлан утыт акваг ва̄рыгласы̄г, тэ̄натэ̄ныл ты ханищтахтасум. Тувыл мощ яныгнуве̄г е̄мтсум, ла̄щалла̄щал амки са̄гырхатуӈкве ос ёрыгхатуӈкве о̄вылтахтасум. Ань матыр йӣв ка̄салэ̄гум, та̄ра ва̄глум, манырсыр хури тэ̄лы. Ты суссылтапн са̄всыр алыщлапыт тотсум. Тувыл ма̄ньха̄п, са̄лыӈ сун, а̄ныса̄н суссылтан ма̄гыс о̄с висанум. Ты коныпал йӣвныл ва̄рум а̄мщанум о̄с тотсанум. Яныг хо̄тпат, ня̄врамыт ты йӣв ло̄мтыт ты кос акванатыяныл, ат ве̄рмияныл. Хӯлтыянум кос, тыглетувле нарыгтым о̄с хот та ёрувлыяныл, номсахтым тот та кае̄гыт, та̄нанылн сака пӯмащ. Ла̄ве̄гыт, татем мӯтраӈ, номт тотнэ ут о̄лнэ̄тэ. Тыг мощща пормас тотсум, са̄выӈпа̄лэ утанум юн хультсыт, хоса яласан лё̄ӈхыт хартатахтыглаӈкве та̄рвитыӈ. Мо̄лты та̄л округ янытыл касыл о̄лыс. Ма̄щтыр хо̄тпат та̄нки рӯпатаныл Ханты-Мансийск ӯсн ке̄тыгласаныл. Ам ос та касылн амки ва̄рум ат пормасанум тув мисанум. То̄нт ам ха̄ль репащил ва̄рум а̄ныиг, ня̄лы, па̄сыглап, ма̄ньха̄п ке̄тыгласум. Ты утанум ма̄гыс о̄выл местал майве̄сум. Тыимагыс янытлан нэ̄пакыл мӯйлуптаве̄сум. Тувыл Русскинской па̄вылт о̄с касыл о̄лыс. Тув о̄с пормасанум майлысанум. Па̄влувт соссаӈ ма̄хум «Культура Центр» кол рӯпиты. Та̄н ам ва̄рум пормасанум ка̄саласаныл. Ань та̄н ётаныл ты рӯпитэ̄гум. Хоты ма̄т ма̄щтырлан ва̄рмаль е̄мты, та̄н та̄ра а̄нум тув ке̄тыяныл. А̄нумн ты ва̄рмаль о̄с сака мӯсты». Ань ты ма̄щтырлан фестивальн Станислав Семёнович э̄кватэ̄нтыл хӯрмит щёс касуӈкве ке̄твесы̄г. Тот хум ня̄лытёвтыт ёргыс. Ня̄ланэ пе̄с ма̄хум хумус ва̄рыгласыт, о̄с акв тох ва̄риянэ. Ёрыгхатме порат тав палтэ та̄савит ня̄врам атхатас. Пыгыт касаил ос йӣво̄влыл мисанэ. Та̄наныл ёвтня̄л ва̄руӈкве ханищтасанэ. Ня̄врамыт татем ща̄гтым ёрыгхатсыт. Ва̄рум ня̄ланыл номнэ ма̄гыс юв тотсаныл. Ма̄щтырлан хо̄талт тот са̄в пӯмащ ва̄рмаль о̄лыс. Ос хотьют тот рӯпитас, ам мо̄тыт нэ̄глын нэ̄пак ло̄псыт э̄лаль тах о̄с хансэ̄гум.

1127 2016. 07. 07. Галина КОНДИНА

Са̄всыр партия кӯщаит акванатыглаве̄сыт Мо̄лал акв ӯщлахтын хо̄талт округ губернатор Наталья Комарова са̄всыр политический партиятыт кӯщаиг о̄лнэ хо̄тпат ёт хо̄нтхатыглас. Ты ма̄хум коныпал федеральный инспекторыг рӯпитан хум Дмитрий Кузьменко, губернатор ва̄ӈын хо̄тпатэ Алексей Шипилов, округ дума кӯщай Борис Хохряков ёхталасыт. Та̄н потраныл таквсы нэ̄пак та̄ратан урыл о̄лыс. Туи сыс са̄всыр партият та̄нти ва̄рнэ рӯпатаныл урыл мирн потыртым мо̄т партия хо̄тпат урыл лю̄льсаӈ ул вос ла̄ве̄гыт, рущит ла̄внэ̄ныл хольт «ма̄хманыл па̄ӈкыл ул вос со̄сантыяныл». Округ думат рӯпитан партият коныпал мо̄т партия кӯщаит тув о̄с ёхталасыт, ты «Гражданская платформа», «Яблоко», коммунистический партия «Коммунисты России», Российский экологический партия «Зеленые», «Партия социальной защиты», «Союз труда», «Родная Партия», «Партия профессионалов», «Партия роста», «Российский Объединенный Трудовой Фронт», «Россий- ская партия садоводов». Кӯщай нэ̄ ла̄выс: «Пӯмащипа на̄нан, хо̄нтхатыглан ма̄гыс матъёмас ёхталан щё̄с хо̄нтсы̄н. На̄н са̄в ма̄хум халт рӯпитэгы̄н, ва̄глын, ка̄сыӈ хо̄тпа манхурип та̄рвитыӈ тэ̄лан я̄рмуӈкве ве̄рми. На̄н ётын аквъёт рӯпитым государствав са̄в ёмас ва̄рмаль э̄лаль ва̄ри. Владимир Путин ты урыл тох ла̄выс, са̄в партият манос мощща партият о̄лэ̄гыт, та̄н туп мир ма̄гсыл онтас вос ва̄рсыт. Ка̄сыӈ партия э̄лаль о̄лнэ ёмас хо̄тал ма̄гыс рӯпиты, Югравт ос Россиявт о̄лупсав ёмасыг вос о̄лыс. Ам номсыте̄мт, политический ё̄ранув акван вос ёхтэ̄гыт, акваннё̄тхатым са̄в рӯпитаӈкве ве̄рме̄в». Наталья Комарова ла̄вме щирыл, кандидатыг патнэ хо̄тпат халанылт ул вос ля̄втэ̄гыт, са̄всыр мирыт халанылт вори ул вос тотэ̄гыт. Ма̄н округувт политический клуб ва̄руӈкве э̄ри ос ва̄тихал акванатхатыглаӈкве, тав ётэ ка̄сыӈ партия кӯщаит потыртаӈкве вос ве̄рмысыт. О̄лум ма̄хум са̄выӈпа̄лэ номтаныл патыс, мо̄т щёс о̄с тах хуньт акван–атхатыглэ̄гыт.

1127 2016. 07. 07. Валентина Хозумова

Ня̄врамыт ӯргалаӈкв ос э̄руптаӈкв э̄ре̄гыт Ты э̄тпос о̄выл хо̄талэ̄т округ мирколт яныг сапра̄ни ва̄рыглавес. Кӯщаиг тот Алексей Путин о̄лыс, тав губернатор ва̄ӈын хо̄тпаг рӯпиты. Ань ня̄врамыт ӯргалан ма̄гыс ва̄рнэ рӯпата урыл тот потыр о̄лыс. Ювле хультум э̄тпос сыс округув янытыл са̄в лю̄ль ва̄рмаль е̄мтыс. Нила ня̄врам витыт пувлуманыл порат щаквыт порсысыт, то̄ват ос кола̄лат ха̄хталахтым ёлрагатасыт. Акв а̄гирищкве ща̄нягеа̄щаге вина аим юн ӯнлысы̄г, ня̄враме̄н туре̄н ёхтыс, тав ӣснасныл такви ёл та патыс. Округувт «комиссия по делам несовершеннолетних» са̄в та̄л рӯпиты. Матыр о̄выл ня̄врам ёт те е̄мты, та̄н та̄ра та атхатэ̄гыт. Тув са̄всыр ма̄т рӯпитан хо̄тпат ос округ департаментыт кӯщаит ёхталэ̄гыт. Ань ты сапра̄ни Алексей Путин ты пилыщма потрыл ты о̄вылтастэ. Тувыл тав департамент кӯщаит титыглаӈкв патсанэ. Та̄н маныр рӯпата та юипа̄лт ва̄рсыт ос э̄лаль маныр ва̄руӈкв номсэ̄гыт. Любовь Ковешникова округ ханищтап департаментыт кӯщаиг о̄лы, тав ла̄выс, ня̄врамыт лю̄льсаӈ янмалтан ще̄мьят ты лю̄ль ва̄рмалит е̄мтсыт. Ань ка̄сыӈ ще̄мья ёмащакв тах уральтаве, та̄н ня̄враманыл манрыг тох ва̄рыс. Мо̄т кӯщай нэ̄ Ирина Уварова ос мирн нё̄тмил ва̄рнэ департаментыт ва̄ӈын кӯщаиг о̄лы. Та̄н ос туи рӯпитан лагерит округ янытыл уральтасаныл. Ань тыг мус та̄н налыман нупыл нёлолов государственный лагерь уральтасыт ос са̄т ӯщлахтын ма̄ – ты него- сударственный лагерит. Та̄н пуссын ёмащакв щё̄питахтамыт, матыра̄ти пуссын ва̄рмыт ос тот ня̄врамыт тув сыс ӯщлахтуӈкв патэ̄гыт. Ӯщлахтын ма̄н те̄тнэ ня̄врам о̄влэ̄т омагеа̄тяге титыглаве̄г, тэ̄н ка̄саще̄г ман а̄ти, ня̄враме̄н хо̄т ӯщлахтуӈкв паты. Нэ̄пакыл миве̄г, тот вос хасхатэ̄г. Ань ка̄сыӈ ня̄врам ма̄гыс тамле нэпак хансым о̄лы. Матыр о̄выл те е̄мты, та е̄мты, тэ̄нти ня̄врам тув те̄туӈкв ка̄сащасы̄г. Сургут ӯсныл ня̄врам ёт рӯпитан нэ̄ ты сапра̄нин о̄с ёхталас. Тав ты урыл потыртас. Ты э̄тпос ва̄тахтем ня̄врам Башкириян минасыт. Тот лов хо̄тал та̄н я̄ ло̄ӈхаль на̄тылтаӈкв патэ̄гыт. Ань кӯщаяныл такос тинсаве, тав телефон хосыт потыртаӈкв щар ат ка̄сащи. Ос тув те̄тым пищмат тай ловиньтыянэ. Ща̄нита̄щит ня̄враманыл тув те̄тманыл ма̄гсыл щар ат пилэ̄гыт, ла̄ве̄гыт, ня̄врамыт ёт ёмас хо̄тпа минас, нэ̄матыр ат е̄мты. Ань кӯщаит ты ла̄всыт, тамле ва̄рмаль воссыг нэ̄мхуньт ул вос е̄мты. Пуссын ёмащакв вос рӯпитэ̄гыт. Округ кӯщаюв Н. Комарова хӯлтнэ приказла̄тыӈ хансыс – ань ка̄сыӈ район, ка̄сыӈ ӯс ос па̄выл кӯщаит ня̄врамыт ӯщлахтын ма̄т акваг уральтым вос о̄ньщияныл.

1127 2016. 07. 07. Людмила ТЕТКИНА

Ле̄ккарыт рӯпатаныл урыл потыр о̄лыс Округ яныг пӯльница кӯщай Всеволод Кольцов ос Медицинский академият ректорыг рӯпитан хум Фёдор Петровский ля̄ххал тотнэ ма̄хум ёт РИЦ «Югра» нампа колт Ханты-Мансийск ӯст хо̄нтхатыгласы̄г. Акв хум ма̄хум пусмалтан ва̄рмаль урыл потыртас, мо̄танэ ос ле̄ккарыт ханищтан ва̄рмаль урыл ла̄тыӈ ла̄выс. Всеволод Станиславович лӯпта э̄тпос са̄тхуйплов хо̄талныл ты яныг пӯльницат кӯщаиг рӯпитаӈкве патыс. Ань тот са̄в ле̄ккар ма̄хум са̄всыр а̄гманыл пусмалтым рӯпитэ̄гыт. Мир округ янытыл пусмалтахтуӈкве тыг ёхталэ̄гыт. Ты э̄лыпа̄лт ты пӯльницат рӯпитам кӯщай о̄с яныгнув кӯщаиг паттувес. Тот рӯпитан ма̄гсыл ка̄сыӈ э̄лумхо̄лас такви нэ̄паканэ ке̄туӈкве ве̄рмыс. Всеволод Кольцов такви нэ̄паканэ о̄с тув ке̄тсанэ. Ты урыл тав ла̄выс: «Тамле пе̄риян ва̄рмаль хунь ва̄рвес, ам палтум ле̄ккарыт ос нас по̄х хо̄тпат ёхталаӈкве патсыт. Та̄н пуссын ла̄выгласыт, амки нэ̄паканум тув о̄с вос ке̄тыянум. О̄влэ̄т ам тув номтум щар ат патыс. Тувыл ты яныг пӯльницан ялсум, тот хоса ё̄мыгтасум ос суссум, хумус ле̄ккарыт рӯпитэ̄гыт. Ты юипа̄лт ты пе̄риян ва̄рмалин нэ̄паканум та ке̄тсанум». Ты пе̄риян ва̄рмалин ос мо̄т ле̄ккарыт нэ̄паканыл майлысаныл, та̄н халанылт тав но̄хпатыс. Акв порат тав мир пусмалтан департаментыт кӯщаиг рӯпитас. Всеволод Кольцов ма̄ньла̄т хумыг Ханты-Мансийск ӯсн рӯпитаӈкве ёхтыс. Тав ва̄т нупыл ат та̄л тыт о̄лы ос ле̄ккарыг рӯпиты. Та порат ӯс пӯльница ма̄нь пе̄с колт о̄лыс. Ань тыт таса̄вит яныг пӯльницат ӯнттуве̄сыт, тот ма̄хум са̄всыр а̄гманыл ле̄ккарытын пусмалтавет ос операциял ва̄равет. Ты пӯльницатын са̄всыр ищхӣпыӈ утыт ёвтве̄сыт, тамле утыл пусмалтым са̄внув ма̄хум пуста̄гыл э̄лаль о̄лэ̄гыт. Ты халт яныг ле̄ккар хум ос та̄рвитыӈ ва̄рмаль урыл ла̄тыӈ ла̄выс. Ань ты пӯльницат мощща ле̄ккар хо̄тпа рӯпиты. Тыи ма̄гсыл ма̄хум ле̄ккарыт палт хасхатуӈкве ат ве̄рме̄гыт. Кӯщай хум ты та̄рвитыӈ ва̄рмаль та̄рапаттым о̄ньщитэ. Ань тув са̄тхуйплов са̄всыр ле̄ккар рӯпитаӈкве во̄выс. Ты халт са̄т хо̄тпа тыг ёхтуӈкве ос рӯпитаӈкве ка̄сащасыт. Ты э̄лыпа̄лт ма̄н о̄лнэ ма̄вт ле̄ккарыт са̄в олныл ойтве̄сыт ос та̄ра о̄лнэ колыл майве̄сыт. Ань мо̄т ма̄т ле̄ккарыт ос са̄в олн сэ̄луӈкве ве̄рме̄гыт. Тыи ма̄гсыл та̄н лӯи ма̄т рӯпитаӈкве воссыг ат ка̄саще̄гыт. Кӯщай хум ла̄внэ̄тэ щирыл, ань яныг пӯльницат рӯпитан ле̄ккарыт акв э̄тпос сыс туп ва̄т нупыл ат со̄тыра солко̄вил ойтавет. Тыи ма̄гсыл ань са̄в хо̄тпат ты рӯпатал по̄хын минэ̄гыт. Хум ань номсахты, хумус ле̄ккарыт сэ̄лнэ олнаныл но̄хнё̄туӈкве ро̄ви. Ты коныпал тав «Пӯмащипа, ле̄ккар! » нампа акция урыл потыртас. Тамле тэ̄ла мо̄лты та̄л ма̄н округувт ва̄руӈкве патвес. То̄нт акв со̄тыра арыгкем э̄лумхо̄лас ле̄ккарытын пӯмащипа ос ёмас, сымыӈ ла̄тыӈ ке̄тсыт. Всеволод Кольцов ты урыл ла̄выс: «Тамле ёмас, э̄рнэ тэ̄ла ка̄сыӈ та̄л ва̄рыглаӈкве э̄ри. Э̄лумхо̄лас хунь тамле ла̄тыӈ хӯлы, номтэ ёмасыг е̄мты. Ле̄ккарыт ка̄сыӈ хо̄тал э̄рнэ тэ̄ла ва̄ре̄гыт, ос та̄нанылн пӯмащипа ла̄тыӈ ла̄вуӈкве о̄с э̄ри». Тав юипа̄лэ̄т ос Фёдор Петровский ма̄ньла̄т хо̄тпат ханищтан ва̄рмаль урыл потыртас. Ань Ханты-Мансийск ӯст ле̄ккарыт ханищтан академия рӯпиты. Тот а̄гитпыгыт са̄всыр а̄гмыт пусмалтан ле̄ккарыг ханищтавет. Кӯщай хум ла̄выс, ты ханищтахтын кол Ханты-Мансийск ӯст о̄лнэ яныг пӯльница ёт хосат та̄гыл аквъёт рӯпитэ̄гыт. А̄гитпыгыт тот сунсэ̄гыт, хумус мо̄т ле̄ккарыт ма̄хум пусмалтэ̄гыт. Ань рака̄гм ос самыт пусмалтан кит йильпи пӯльницагт ты академия а̄стлам ма̄ньлат хо̄тпат рӯпитэ̄гыт. Ты коныпал академия такви ханищтан колыт Урай, Югорск, Нефтеюганск ӯсытт о̄ньщи. Тот рӯпитан ле̄ккарытын мо̄т ӯсын минуӈкве воссыг ат э̄ри, та̄нки о̄лнэ ма̄нылт э̄лаль ханищтахтуӈкве ве̄рме̄гыт. Таи ос ёмас, ань Ханты-Мансийск ӯст а̄гитпыгыт яныг округ пӯльницат та̄ра ищхӣпыӈ утыл ханищтавет. Та̄н ле̄ккарыг хунь патэ̄гыт, тамле утыл ёмащакве тах рӯпитаӈкве патэ̄гыт.

1127 2016. 07. 07. Татьяна Бахтиярова

Ма̄н Финляндиян ялсӯв Ты та̄л лӯпта э̄тпос 15 –17 щислат ма̄н Финляндиян Лахти ӯсн ялсӯв, тот VII конгресс о̄лыс, мир янытыл пуссын финноугорский ма̄хум акван–атыглахтасыт. Конгресста хо̄тса̄т тувыл са̄в ма̄хум о̄лыс: эстонцыт, венгрыт, финныт, саамыт, квеныт, сетыт, ливыт, карелыт, вепсыт, ингерманландцыт, ижорцыт, сараныт, комипермякыт, ё̄рныт, хантыт, водит, ма̄ньщит, нганасаныт, энцыт, селькупыт, удмуртыт, мордват, марийцыт. Конгресс Финляндский Республика хо̄н Саули Ниинистё о̄вылтастэ. Тувыл ос форум ма̄хумн паща ла̄тыӈ ла̄всыт – Венгрия хо̄н Янош Адер, Эстония хо̄н Томас Хендрик Ильвес, тувыл Российский Федерация хо̄н Владимир Путин паща ла̄тыӈ Россия министр культуры ва̄ӈын хум Александр Журавский ёт ке̄тыс. Тав ма̄хумн ла̄выс, тох э̄лаль юртыӈыщ ёмщакв вос о̄лэ̄гыт, вус рӯпитэ̄гыт, ла̄вум ла̄тӈаныл ва̄рмалиг вос е̄мтэ̄гыт, нас во̄тн ул вус минэ̄гыт. Юртыӈыщ о̄лнэ ос номт пиннэ ва̄рмаляныл та̄кыг вус е̄мты. Ма̄н округувныл конгрессын ялсыт: А̄с–угорский институтт рӯпитан хо̄тпаг С. А. Попова ос Т. П. Бахтиярова, тувыл ма̄ньлат ма̄хум организацияныл Руслан Богордаев, Карина Прасина, Виктор Банк, Лариса Миляхова, Виталий Сигильетов ос Кульпас па̄вылныл Л. А. Зорина тувыл общероссийский общественный движенияныл «Ассоциация финноугорских народов Российской Федерации» Анна Рандома, губернатор ва̄ӈын хумн нё̄тнэ нэ̄ Л. А. Алфёрова, А̄сугорский театрыныл Алла Иштимирова-Посохова, тувыл ос Югорский университетыл доцент Т. А. Дятлова, тав ётэ ос филологический наукат кандидат Д. В. Герасимова, З. С. Рябчикова Санкт–Петербург ӯсныл А. И. Герцен нампа институтыл.

1127 2016. 07. 07. Николай МЕРОВ

«Новости Югры» газета 85 та̄лэ то̄влыс Ты та̄л о̄йттур э̄тпос са̄тыт хо̄талэ̄т «Новости Югры» нампа округ газета рӯпитан па̄сныл 85 та̄лэ ты то̄влыс. Тыима̄гыс мо̄лалнув ты газета кӯщай Владимир Меркушев ос са̄в та̄л тот рӯпитан хо̄тпаг Альбина Глухих ос Андрей Рябов ля̄ххал тотнэ колн во̄виньта̄лве̄сыт. Та̄н тот газетаныл урыл потыртасыт. Хумус та̄н рӯпатаныл о̄вылтасаныл, маныр урыл тот хассыт, на̄н ты урыл э̄лаль ловиньтэ̄н. О̄влэ̄т газета кӯщай Владимир Меркушев янытлан ла̄тыӈ ла̄выс: «Округувт щар о̄влэ̄т «Новости Югры» нампа газета та̄ратаӈкве патвес. Тав пе̄с порат «Ленинская правда» нам о̄ньщис. Ань ты порат газетавт са̄в пӯмащ ос мирн э̄рнэ ля̄ххал хансаве. Тыима̄гыс потранув ловиньтан хо̄тпат ма̄навн акваг янытлан ла̄тыӈ ке̄тэ̄гыт. Ань ма̄н газетавт са̄выӈпа̄лэ ма̄ньлат, номтыӈ хо̄тпат рӯпитэ̄гыт. Ты Анастасия Безденежных, Наталья Пивоварчик, Михаил Осипов, Виктория Козырь, Юрий Кручинин ос мо̄т хо̄тпат. Ты хо̄тпатныл ма̄н сака янытлахтэ̄в. Тувыл газетавт са̄в та̄л рӯпитан яныгпа̄ла хо̄тпат ань нё̄тмил о̄с ва̄ре̄гыт. Ты Валентина Патранова, Альбина Глухих ос Ольга Санталова, та̄н потрыт иӈ хансэ̄гыт ос ма̄ньлат хо̄тпат матарыл хӯлтыглыяныл. Амки ты газетан о̄с хосат та̄гыл рӯпитаӈкве ёхтысум. Рӯпитанэ̄м па̄сныл ань ты та̄лт хо̄тхуйплов та̄лыг е̄мтыс. О̄выл щёс рӯпитаӈкве ёхтумум порат Елена Потехина, Евгения Никитина, Виталий Копнов яныг нё̄тмил ва̄рсыт, та̄н а̄нум ханищтасаныл. Та̄нанылн яныг пӯмащипа ла̄тыӈ ла̄ве̄гум». Андрей Рябов ты газетат пуссын аквъёт налыман нупыл кит та̄л рӯпитас. Ты газетан о̄выл потыр 1984 та̄лт хансыс. Та порат газета «Ленинская правда» нам о̄ньщис. То̄нт Новомир Патрикеев, налыман нупыл са̄т та̄л газета кӯщаиг о̄лум хум, рӯпитас. Ты яныгпа̄ла хо̄тпа ань пенсият о̄лы, таве̄н пуста̄гыл о̄лнэ ла̄тыӈ ке̄тсыт. Ты коныпал тот ос мо̄т са̄в ёмас хо̄тпат рӯпитасыт. Ловманкем та̄л юипа̄лт Андрей Рябов ты газета рӯпитанэ̄тэ урыл нэ̄пак хансыс. Рӯпитанэ̄тэ сыс манырсыр пӯмащ ва̄рмаль о̄лыглас, та тэ̄лат пуссын нэ̄пакн хассанэ. Андрей Рябов ты газета урыл тох ла̄выс: «Ам тот рӯпитан ма̄хум пуссын янытлыянум. Ос са̄в пӯмащ ля̄ххал хансэ̄н, ма̄хум ща̄гылттэ̄н». Ты юипа̄лт ос Альбина Глухих потыртас. Тав ты газетат атпан та̄л рӯпиты. Ты та̄л тав газета урыл хансум нэ̄паке а̄стластэ. Ты нэ̄паке урыл тох ла̄выс: «Ам нэ̄пак хаснэ урыл щар ат номсысум. Ос ты газетаныл хунь по̄хын минуӈкве атхатасум, юио̄выл хо̄тал ща̄й айсӯв. То̄нт редакция кӯщаюв Владимир Меркушев ла̄выс, э̄рыӈ наӈ газета урыл нэ̄пак хансэ̄гын. Ам та̄ра номтум тувле та патыс. Ты нэ̄пакум китахкем э̄тпос хансыслум. Газетат о̄лум потрыт хосыт хассум. Ма̄ньлатыг о̄лмум порат ам Москва ӯс институтыт библиографыг ханищтахтасум. Тувыл Иркутск ӯсн рӯпитаӈкве ке̄тве̄сум. Тот аквматнакт газетан потыр кетсум. Кӯщаин ты ма̄гыс сака э̄сгуве̄сум. Тувыл та юипа̄лт ос библиотека урыл хассум. Тыгыл э̄лаль потрыт хансуӈкве та о̄вылтахтасум. 1964 та̄лт туи порат ювле Ханты-Мансийск ӯсн о̄луӈкве ёхтысум. Та па̄сныл акваг ты газетат рӯпитэ̄гум. Рӯпатам щирыл Та̄гт я̄, Саквъя̄ хосыт ӯнлын ма̄ньщи па̄влытын ялантасум. То̄нт то̄ва па̄вылт ма̄хум рущ ла̄тӈыл потыртаӈкве щар ат ха̄ссыт. Рӯпатамт са̄выӈпа̄лэ соссаӈ мир о̄лупса ос ма̄во̄й но̄хвинэ ва̄рмаль урыл хассум». Ты газетан Альбина Сергеевна потрыт иӈ хансы. Пе̄рмат рӯпитан ма̄хум ос пе̄с йис ма̄нылт о̄лнэ хо̄тпат таве та̄нки палтаныл мӯйлуӈкве акваг во̄виньта̄лыяныл. Рӯпитанэ̄тэ сыс ты э̄ква са̄в ёмас хо̄тпа урыл потрыт хансыс. Са̄в та̄рвит ва̄рмаль оснпаттыс. Ма̄н, маньщи редакцият рӯпитан хо̄тпат, «Новости Югры» газетат рӯпитан ма̄хманув ялпыӈ хо̄талыл сымыӈыщ янытлыянӯв. О̄с акв тох э̄лаль пӯмащ потыр хансэ̄н, пуста̄гыл о̄лэ̄н.

1127 2016. 07. 07. Людмила ТЕТКИНА

Ӯщлахтын ма̄т ма̄хум ма̄ньха̄пыл кассыт Округ янытыл о̄лнэ соссаӈ ма̄хум Нефтеюганский районт «Сказка» нампа ӯщлахтын ма̄н акванатхатыгласыт. О̄йттур э̄тпос китыт ос хӯрмит хо̄талаге̄т та̄н ма̄ньха̄пыл кассыт. Рущ ла̄тӈыл ты ва̄рмаль «Соревнования на Кубок Губернатора по гребле на обласах» намаим о̄лы. Ты та̄л 16 команда о̄лыс, пуссын аквъёт 150 арыгкем э̄лумхо̄лас тув ёхталасыт. Ос ты коныпал Якутияныл ос Венгрия мо̄т хо̄н ма̄ныл мӯй хо̄тпат о̄лсыт. Ма̄ньщит, хантыт 2001 та̄л па̄сныл ма̄ньха̄пыл касуӈкве акванатхатыглэ̄гыт. Тамле ва̄рмаль Анатолий Прокопьевич Кауртаев, хо̄нтаӈ ма̄ньщи хум, Нижневартовский районт о̄лнэ соссаӈ ма̄хум ма̄гсыл ва̄руӈкве о̄вылтастэ. Тувыл округ янытыл о̄лнэ ма̄ньщит ос хантыт ма̄ньха̄пыл касуӈкве во̄выглаӈкве патве̄сыт. О̄влэ̄т Пойковский па̄вылт, ты юипа̄лт Нефтеюганский районт «Сказка» нампа ӯщлахтын ма̄т касыл ва̄рыглаве̄сыт. Мо̄лты та̄л ма̄хум ма̄ньха̄пыл Ханты-Мансийск ӯс по̄хыт Ковинский я̄н касуӈкве акванатхатыгласыт. Тувыл та я̄ сака овыӈ, тыи ма̄гсыл ты та̄л касыл ос «Сказка» ӯщлахтын ма̄т ва̄рвес. Ма̄ньха̄пыл касуӈкве ёхтум ма̄хум ялпыӈ хо̄талыл кӯщаитын янытлаве̄сыт. Округ губернатор ва̄ӈын хум Алексей Путин ла̄выс: «Тамле ялпыӈ хо̄тал ма̄н соссаӈ ма̄хум ма̄гсыл ка̄сыӈ та̄л ва̄рыглэ̄в. Ань о̄лнэ̄в мус то̄ва ма̄т ма̄хум ма̄ньха̄пыл иӈ яласэ̄гыт, хӯл алыщлэ̄гыт ос во̄рае̄гыт. Та̄н та̄нки пе̄с йис ва̄рмаляныл э̄лаль тотэ̄гыт. Та̄н ха̄пыл товуӈкве ёмащакв ха̄сэ̄гыт. Ань тыхо̄тал та̄н пуссын тыт акванатхатасыт». «Югра лылые̄п» нампа организация кӯщай хум Александр Новьюхов о̄с ла̄выс: «Кит хо̄тал сыс на̄нки халынт пуссын тах ва̄йхатэгы̄н. Таи ёмас, ка̄сыӈ та̄л са̄внув а̄гитпыгыт ма̄ньха̄пыл касуӈкве ёхталэ̄гыт. Ань ма̄ньлат хо̄тпат ма̄гсыл ма̄н округувт са̄всыр программат, сакко̄ныт хансавет, пирмайтавет. Та̄н ты пе̄с йис ва̄рмалянув э̄лаль тотуӈкве патэ̄гыт. Тыи ма̄гсыл яныг пӯмащипа ла̄тыӈ та̄нанылн ла̄ве̄гум». Тувыл ханты, ма̄ньщи ос мӯй ма̄хум пуссын я̄ ва̄тан во̄вве̄сыт. Ханты-Мансийск ӯст о̄лнэ ханты нэ̄ Светлана Кирилловна Гындышева ос Сургутский районт пе̄с йис ма̄тэ̄т о̄лнэ хум Сергей Васильевич Кечимов Витхонувн пӯрлахтасы̄г. Светлана Кирилловна Тя̄ка̄квув нупыл по̄йкщас. Ханты хум я̄ ва̄тат лю̄лим ос вит нупыл сунсым, Витхон нупыл по̄йкщас. Ос са̄т ня̄л витын та̄ртыс. Тувыл пуссын ма̄хум пасан ва̄тан во̄вве̄сыт ос пуӈк пинуӈкве ла̄вве̄сыт. Ты юипа̄лт ма̄хум та̄нки ма̄ньха̄паныл витын нарыгтасаныл ос касуӈкве та о̄вылтахтасыт. О̄влэ̄т нэ̄ хо̄тпат ма̄ньха̄пыл товсыт. Ос тувыл хум хо̄тпат та̄нки халанылт кассыт. Нэ̄т халт Сургутский районныл о̄лнэ нэ̄ Лидия Покачева но̄хпатыс. Тав ла̄выс: «Ам ще̄мьяӈ та̄гыл пе̄с йис ма̄т о̄лэ̄гум. Туи порат ка̄сыӈ хо̄тал хӯлпанув сунсуӈкве ялантэ̄гум. Тыи ма̄гсыл ма̄ньха̄пыл товуӈкве сака ёмащаквег ха̄сэ̄гум. Тыг миннэ э̄лыпа̄лт хо̄тал палыт ма̄ньха̄пыл яласасум, са̄в рӯпитасум, тыи ма̄гсыл но̄хпатсум». Хумыт халт Виталий Русскин но̄хпатыс, тав сака та̄кыщ ос молях товыс, финиш мус молях ёхтыгпас. Ма̄ньлат хум ос Сургутский район Русскинской па̄вылт о̄лы. Тав а̄тятэ̄н ма̄ньта̄гыл ма̄ньха̄пыл яласаӈкве ханищтавес. Мо̄лты та̄л о̄лум касылт тав о̄с но̄хпатыс. Ты та̄л касуӈкве миннэ э̄лыпа̄лт ос ка̄сыӈ хо̄тал ма̄ньха̄пыл яласас. Тав ла̄выс, та̄кыщ товим ёмащакв лылтуӈкве э̄ри, тох молях ё̄р та̄л ат хультэ̄гын. Ха̄льӯсныл нёлолов э̄лумхо̄лас касуӈкве ёхталасыт. Са̄т хо̄тпа Саранпа̄вылныл ос акв э̄лумхо̄лас Ха̄льӯсныл о̄лсыт. Валентина Спиридоновна Вьюткина ты командат кӯщаиг о̄лыс. Тав ётэ Михаил Васильевич Кустышев, Альбина Даниловна Монина, Эдуард Николаевич Лещук, Анастасия Георгиевна Федий, Леонид Леонидович Бабанин, Татьяна Яковлевна Хозяинова ос Андрей Николаевич Герасимов ёхталасыт. Ты ва̄рмаль урыл тав таи потыртас: «Ам ка̄сыӈ та̄л ма̄хманум ёт тыг ёхталэ̄гум. Таи лю̄ль, ма̄нки ма̄ньха̄панув тыг тотуӈкве ат ве̄рме̄в. Ты ма̄т ханты ха̄пыт мо̄т щирыл ва̄равет, ты утыл ма̄н ёмащакв яласаӈкве ат ве̄рме̄в. Нижневартовский, Сургутский ос Нефтеюганский районытт о̄лнэ соссаӈ ма̄хум ма̄ньха̄паныл ёттотыяныл. Тыи ма̄гсыл молях нуйхатэ̄гыт ос акваг но̄хпатэ̄гыт». Татьяна Хозяинова ма̄ньха̄пыл касуӈкве Саранпа̄вылныл ёхталас. А̄ги ты та̄л са̄тхуйплов та̄лэ то̄влыс. Тав тот мо̄т ня̄врамыт халт касыс. Тав о̄с ла̄выс: «Ам о̄выл щёс тыг ёхтысум. А̄нум ма̄ньха̄пыл яласаӈкве Валентина Спиридоновна Вьюткина ханищтастэ. Тувыл акв хо̄тал турап, китыт хо̄тал во̄тыӈ о̄лыс, хӯрмит хо̄тал ос раквыс. Тыи ма̄гсыл мӯсхалыг ма̄ньха̄пыл яласаӈкве ат ханищтахтасум. Тыт касуӈкве ке мӯсты, мо̄тыт та̄л о̄с тах ёхталэ̄гум, то̄нт тах ма̄ньха̄пыл товуӈкве ёмащакв ханищтахтэ̄гум». Ты та̄л касыл округ правительства, «ЮграМегаСпорт» ос «Югра лылые̄п» нампа организацият пуссын аквъёт ва̄рыгласыт. Тамле ялпыӈ хо̄тал ва̄рыглан ма̄гсыл ма̄во̄й но̄хвинэ компаният олн майласыт. Ань ка̄сыӈ ӯст манос па̄вылт о̄лнэ ма̄хум та̄нки команда атуӈкве ве̄рме̄гыт. Ань о̄лум касылт Сургутский район Русскинской па̄вылныл нёлолов хо̄тпа о̄лсыт. Та район янытыл о̄лнэ ма̄хум о̄с та̄нки команда ва̄рсыт. общинат ос общественный организацият та̄нки ма̄хманыл тув о̄с ке̄тыгласаныл. Ты та̄л о̄лум касылт командат халт Когалым ӯстныл о̄лнэ ма̄хум но̄хпатсыт. Китыт местал Нижневартовский ӯст о̄лнэ хантыт майве̄сыт. Ос хӯрмит места Нефтеюганский районт о̄лнэ хо̄тпат висыт.

1127 2016. 07. 07. Николай МЕРОВ

Ма̄ньлат ма̄хум акванатхатыгласыт Ты та̄л лӯпта э̄тпос 27-29 хо̄талытт Сургутский районт Русскинской па̄выл по̄хыт «Кар-Тохи» нампа ӯщлахтын ма̄т ма̄ньлат соссаӈ ма̄хум акванатхатыгласыт. Ты ма̄ньлат соссаӈ мирыт форуманыл нилыт щёс о̄лыс. Ты ва̄рмальн Сургутский, Ха̄льӯс, Белоярский, Октябрьский, Нижневартовский районытныл, Ханты-Мансийск ӯсныл ос Ямал ма̄ныл са̄тхуйплов ма̄ньлат хо̄тпа ёхталасыт. Ань ма̄нь па̄вылт о̄лнэ соссаӈ ма̄хум та̄нки пе̄с йис ва̄рмаляныл э̄лаль вос тотсаныл, маныр тыи ма̄гыс ва̄руӈкве э̄ри, та̄н тот ты тэ̄ла урыл потыртасыт. Мӯй ма̄хум хӯрум хо̄тал тот о̄лсыт. Па̄выл На̄й-О̄тырытын пӯрлахтасыт, пуӈк пинсыт. «А̄сугорский ма̄ньлат ма̄хум» нампа организацият рӯпитан хо̄тпат координационный совет ва̄рыгласыт. Тот э̄рнэ ва̄рмалит урыл потыртасыт. Нэ̄ хо̄тпат нэ̄ йӣквыт ханищтасыт, турло̄псыт, пальсакыт сакныл хартсыт, ма̄гылн тагатан хорамыт ва̄рсыт ос халанылт касыл щё̄пита̄лсыт. Ма̄ньлат ма̄хум щар о̄выл форуманыл Белоярский район Ванзеват па̄вылт о̄лыс. Китыт щёс ос Ха̄льӯс район Тэ̄к па̄вылт о̄лыс. Хӯрмит форум ос Октябрьский район Шеркалы па̄вылт ва̄рыглавес. Ты ва̄рмаль э̄лаль тотнэ ма̄гыс округ мирколт рӯпитан кӯщаит, «Югра лылые̄п» ос «А̄сугорский ма̄ньлат ма̄хум» нампа организацияг, Сургутский район миркол кӯщаит ос Русскинской па̄выл мирколт рӯпитан ма̄хум та̄н нё̄тсыт. Ты ялпыӈ хо̄талт ма̄ньлат ма̄хум па̄выл кант э̄ргысыт ос йӣквсыт. Ты ва̄рмаль «Утро 2016» нампа Уральский Федеральный округ ма̄ньлат ма̄хум форум ёт аквторыг минас. Тот пуссын аквъёт со̄тыра атса̄т ма̄ньлат хо̄тпат мӯйлысыт. Соссаӈ ма̄хманув та̄н палтаныл мӯйлуӈкве о̄с ялсыт. Ты форумн Уральский Федеральный округт президентын нё̄тмил ва̄рнэ хум И. Р. Холманских ос округ кӯщай нэ̄ Н. В. Комарова, Государственный Дума депутатыт ос мо̄т са̄в хо̄тпат ёхталасыт.

1127 2016. 07. 07. Николай МЕРОВ

Ёмщакв ханищтахтам ня̄врамыт янытлаве̄сыт Щар ёмщакв ханищтахтам ос школа а̄стлам а̄гитпыгыт ты та̄л Ханты-Мансийск ӯс «Юграклассик» нампа колт янытлаве̄сыт. Ты кастыл округ кӯщай нэ̄ Наталья Комарова тув ёхталас. Ка̄сыӈ ща̄нь ос а̄щ такви ня̄враме ёмас хо̄тпаг янмалтаӈкве таӈхитэ. Ня̄врамыт пуста̄гыл, номтыӈыг вос яныгмасыт, тыима̄гыс са̄в ё̄р та̄н ща̄няныла̄щаныл пинэ̄гыт. Ань школа а̄стлам ма̄ньлат хо̄тпат мо̄т о̄лупсал э̄лаль о̄лмыгтэ̄гыт. Округ кӯщай нэ̄ Наталья Комарова, та̄н нупыланыл тамле янытлан ла̄тыӈ ла̄выс: «Школа а̄стлам я̄тил, тыныӈ ня̄врамаквет! Щар ёмащакв ханищтахтамын ма̄гыс ам на̄нан ща̄гтым янытлыянум. Ма̄н, Югра ма̄т о̄лнэ мир, на̄нанылтыл сака янытлахтэ̄в. На̄н ань э̄лаль ханищтахтуӈкве минэгы̄н. Ка̄сыӈ ня̄врам такви номтэ щирыл о̄лупсатэ э̄лаль тоты. Ос яныгмам ма̄ке̄н ул ёрувлэ̄н. Та̄ксарыг о̄луӈкв, акваг но̄хпатуӈкв на̄н школан, ща̄ньа̄щанын, ляпа рӯтанын ос юртанын ханищтавесы̄н. То̄ват на̄н халынт Россия янытыл о̄лум олимпиадат хусах ва̄рмаль щирыл кассыт. Та касылыт са̄выӈпа̄лэ ма̄н ня̄враманув но̄хпатсыт. Ат та̄л сыс на̄н о̄выл щёс тыса̄вит ва̄рмаль щирыл касыгласын. Но̄хпатум ня̄врамыт Нижневартовск, Сургут ос Радужный ӯсныл, Нефтеюганский, Советский районытныл о̄лсыт. Ам ты ня̄врамыт сака янытлыянум. О̄лупсаны̄н кӯпнитыг вос о̄лэ̄гыт. Округув ма̄гыс на̄н яныг ва̄рмаль ва̄регы̄н. Ам на̄нан тыхо̄тал ма̄гыл по̄сыл школа а̄стлам а̄ги урыл потыртэ̄гум. Ты а̄ги наме Елена Лапшина, тав экзаменыт о̄лум порат кит предметыг сас яныгса̄т балл са̄витыг хассаге. Ты номтыӈ а̄гикве Ханты-Мансийск ӯст о̄выл школат ханищтахтас. Ма̄н таӈхе̄в, округувт са̄внув тамле ня̄врам вос ханищтахтас. Пе̄с порат та школат ня̄врам ханищтам акв хо̄тпа рӯпитас. Тав округт о̄выл щёс краеведение предмет ва̄рыс. Та хум ты та̄лт яныгса̄т атхуйплов та̄лэ то̄влынув. 1941 та̄лт тав ханищтам ня̄враманэ школа а̄стламаныл юипа̄лт лов хо̄талын во̄рн ё̄мыгтаӈкве тотсанэ. Тот та̄нанылн йӣвыт, я̄т, я̄ӈкылмаӈ ма̄т суссылтас. Ты ня̄врамыт та̄нки нё̄тнэ ма̄ке̄ныл хо̄нтлын ма̄т та̄кыщ вос вуянтасаныл. Ам таима̄гыс ты потыр потыртаслум, на̄н ань са̄всыр ма̄н ханищтахтуӈкве ла̄ккваминэгы̄н. Ос на̄нки ма̄ке̄н, йис о̄лупсан ул ёрувлэлы̄н. Акваг номтыт о̄ньщелы̄н. Ам на̄нан пуссын янытлыянум, э̄лаль о̄лнэ хо̄талын акваг посыӈыг вос о̄лы». Ты потре юипа̄лт кӯщай нэ̄ щар ёмщакв школа а̄стлам ня̄врамыт ма̄гылн тагатан со̄рни по̄сыл мӯйлуптасанэ: Наталья Пакина, Ха̄льӯс школат ханищтахтам а̄ги. Тав 2014-2015 та̄лыгт мирхал каснэ ва̄рмальт рущ ла̄тыӈ ос литература предметыг щирыл о̄выл места вис; Владимир Соснин, Кондинский район Половинка па̄выл школат ханищтахтам пыг. Тав экзамен о̄лум порат рущ ла̄тыӈ предмет яныгса̄т баллын хансыстэ; Кирилл Домарев, Кондинский районный школат ханищтахтам пыг. Тав 2013 та̄лт наука ос ханищтап ва̄рмаль щирыл губернатор премиял майвес; Юрий Филиппов, Октябрьский район Приобье па̄выл школат ханищтахтам пыг. Тав физика предмет щирыл щар ёмщакв ханищтахтас; Аслан Ражанов, Пыть-Ях ӯс хӯрмит школат ханищтахтам пыг. Ты пыг о̄с сака ёмщакв ханищтахтас; Никита Семенин, Урай ӯс гимназия а̄стлам пыг. Тав 2015-2016 та̄лыгт о̄лум мирхал касылыгт физика щирыл но̄хпатыс. Округ янытыл пуссын аквъёт яныгса̄т арыгтем а̄гитпыгыт янытлаве̄сыт. Ты ня̄врамыт Россия янытыл ос мирхал касылыт о̄с мо̄т са̄всыр ва̄рмалитт но̄хпатыгласыт. Округ кӯщай нэ̄ коныпал, са̄в та̄л ля̄ххал тотым рӯпитам ханты э̄ква Мария Кузьминична Волдина ос мирн ва̄нэ ма̄ньщи хум Руслан Проводников та̄наныл янытлаӈкв ёхталасы̄г. Тэ̄н школа а̄стлам ня̄врамыт ос сымыӈыщ янытласанэ̄н.

1127 2016. 07. 07. Николай МЕРОВ

Во̄раим яласан ма̄ньщи хум Свердловский область Ивдельский районт нё̄рыт ляпат Висумтыт па̄вылт ма̄ньщи ма̄хманув ще̄мьяӈ та̄гыл о̄лэ̄гыт. Тэ̄лы порат ам та па̄вылн ялсум. Па̄выл хосыт мощ ё̄мыгтасум, соссаӈ ма̄хум ёт потрамасум. Ты па̄выл Висум я̄ ва̄тат ӯнлы. А̄лмпа̄лт ловманкем йильпи кол ӯнттувес. Ань ма̄хум тот ты о̄лэ̄гыт. Та па̄вылт ам Ищтапан Анямов колн щалтсасум. Хум такви о̄лупсатэ урыл мощ потыртас. Ты хум 1964 та̄лт Ке̄расколыӈъя̄ па̄вылт самын патыс, тот яныгмас. Такви ма̄тэ̄т акваг о̄лы. Тав ма̄нь та̄гыл во̄раим яласас. Во̄рколэ̄н ёхталанэ̄тэ порат ке̄рнялит, лэ̄сыт ӯнталас. Са̄всыр во̄руй алыщлас. Ты коныпал пил ва̄тсыт, ла̄хыс атсыт, ӯльпа па̄кв паттысыт. Во̄рт маныр тэ̄п о̄лыс, таи та атсыт. Аквматнакт та па̄выл на̄йин пе̄ламлавес. Матахмат кол на̄йин ё̄свес. Ма̄хум о̄лнэ кол та̄л хультсыт. Висумтыт па̄вылт йильпи колыт ӯнттуве̄сыт. Таима̄гыс са̄выӈпа̄лэ колта̄глыт тув ва̄нтлысыт. Ань тот ты о̄лэ̄гыт. Ищтапан аквматнакт Ханты-Мансийск ӯсн о̄луӈкве ёхталас. Тыт э̄кватэ̄нтыл Мария Кумаева ёт мощ о̄лсы̄г. Э̄кватэ А̄сугорский ма̄хум институтыт рӯпиты, филологический наукат кандидатыг о̄лы. Акв а̄ги о̄ньщи, наме Лена. А̄гитэ мо̄лты та̄л школа а̄стлас, ань Югорский университетт ханищтахты. Тэ̄н тыт аквъёт матахмат та̄л о̄лсы̄г, тувыл Иштапан ӯст марщумлавес. Ос такви о̄лнэ ма̄тэ̄н ювле минас. Ань тав Висумтыт па̄вылт во̄раим ты о̄ланты. Колэ во̄р ляпат ӯнлы. Хум ла̄выс, тӯяг ма̄колыӈо̄йка кол ляпатэ̄н ва̄тихал ёхталы. Но̄хлю̄ли, па̄выл нупыл та сунсыглахты. Ищтапан таве иснасыл ёмщакв ка̄салытэ. Мовиньты, тав та̄наныл уральтаӈкве ёхталы. Аквматнакт ос кол сохрипт пӯщка кӣвырт хӯл солвалтас. Нёхыс ты хӯлыт атаясанэ, ос сохрипын тэ̄пъялаӈкве лащхатас. Тувыл хум тув ке̄рняль ӯнттыс, та нёхыс пувыстэ. Тамле ты пӯмащ ва̄рмалит тот о̄лыгла̄лэ̄гыт. Висумтыт па̄вылт ла̄пка а̄тим, тув мус яласан лё̄ӈх о̄с а̄тим. Ма̄хум тэ̄нут ёвтнэ ма̄гыс Ивдель ӯсн ялантэ̄гыт. Тэ̄лы порат «Бураныл» яласэ̄гыт. Туи ос моторха̄пыл я̄ хосыт минэ̄гыт. Тувыл э̄лаль ос ла̄глыл яныг лё̄ӈх мус ё̄ме̄гыт. Ос тыглетувле яласан хотты ма̄шинан та̄лттавет, ӯсн та тотавет. Па̄влыӈ ма̄хум ла̄внэ̄ныл щирыл, нэ̄матыр та̄рвит ат о̄ньще̄гыт. Лё̄ӈх а̄тим, по̄х хо̄тпат сакати ат яласэ̄гыт. Та̄нкирот во̄раим, хӯл алыщлым ла̄щал та о̄лантэ̄гыт. Ань та е̄рт пуссын аквъёт яныгса̄т арыгтем ма̄ньщи хо̄тпа хультыс. Ос таи ёмас, тот о̄лнэ ма̄нь ня̄врамыт ма̄ньщи ла̄тӈыл пуссын ёмщакв потыртаӈкве ха̄сэ̄гыт. Та̄н ща̄нянылна̄щанылн ма̄нь та̄гыл ханищтавет. Ты ва̄рмаль сака ёмас. Ма̄ньщи ня̄врамыт са̄ртын Ивдель ӯс школаинтернатт ханищтаве̄сыт. Ань та школа лаппантвес. Ня̄врамыт Серов ӯсн ханищтахтуӈкве тотыглавет. Ань ты накт тот хӯрумхуйплов ня̄врам ханищтахты. Туи пораг е̄мты, па̄вланыл о̄с суиӈыг та паты. Ня̄врамыт школа а̄стлэ̄гыт, ӯщлахтуӈкве юв ёхтэ̄гыт. Ищтапан э̄кватэ та̄л сака ка̄сэ холас. Тэ̄н о̄лупсатэ̄н урыл акваг китыглахтас. Пус ка̄т, пус ла̄гыл ла̄тыӈ тэ̄натэ̄н ке̄тыс. Ос такви ӯсн минуӈкве воссыг ат таӈхи. Во̄рпа̄вылт таве̄н о̄луӈкве ёмас.

1127 2016. 07. 07. Галина КОНДИНА

Са̄лы ӯрнэ хо̄тпаг ханищтавет Ижемский политехнический техникум Коми республикат о̄лы. Тот хӯрум та̄л ня̄врамыт ханищтаӈкве ат вуйве̄сыт ос ты тув тамле хо̄тпат тинсэ̄гыт. Хотьют са̄лы ӯрнэ хо̄тпаг ханищтахтуӈкве таӈхи, тув ро̄ви минуӈкве, группаныл тыщир ла̄ваве – «Оленевод–механизатор». Са̄лыт ӯрнэ хо̄тпаг ханищтахтын коныпал, тот ос аквторыг тамле квалификация–нэ̄пакыл пыгыт мивет – «Тракторист» ос «Водитель мототранспортных средств» (та̄н «Бураныл» ос квадроциклыл яласаӈкв ве̄рме̄гыт). Ханищтахтуӈкве ка̄сащан хо̄тпат нэ̄паканыл ты та̄л во̄ртур э̄тпос котиль мус те̄туӈкве манос тув тотуӈкве ве̄рмияныл. Тот тит та̄л ос лов э̄тпос ханищтахтуӈкве тах э̄ри. Николай Ануфриев, техникумт кӯщаиг рӯпитан хум ла̄выс, тув та̄н са̄лыӈ колт рӯпитан хум хо̄тпат о̄с во̄вияныл. «Ма̄навн ань са̄лыӈ колт рӯпитан ма̄ньлат пыгыт ос са̄лыӈ ма̄хум ще̄мьят яныгман ня̄врамыт тыг виӈкве э̄ри. Мо̄т ня̄врамыт ханищтахтэ̄гыт кос, ос хунь техникум а̄стлэ̄гыт, са̄лыт ёт рӯпитаӈкве ат минэ̄гыт. Ты сака та̄рвитыӈ рӯпата, таве ёмщакв ва̄ӈкве э̄ри. Таима̄гыс ма̄н ва̄глув, хотьют э̄лаль рӯпитаӈкве тах паты», – кӯщай хум ла̄выс. Николай Ануфриев СПК «Ижемский оленевод» нампа ма̄хум палт ялыс, та̄н ётаныл потыртас ос интинский районт ханищтахтуӈкве ка̄сащан пыгыт ос о̄лэ̄гыт. Та̄н мо̄т ма̄т о̄лнэ ма̄хум о̄с во̄вияныл. Ма̄н ма̄вныл ё̄рныт, ханты ос ма̄ньщит ханищтахтуӈкве ӯрияныл. Ня̄врамыт ханищтан ма̄гсыл ты техникумыт матыр–а̄ти э̄рнэ ут пуссын о̄лы, са̄всыр ищхӣпыӈ утыт 2014–2015 та̄лыт ёвтве̄сыт. Ты кастыл федеральный бюджетыл ос та̄нти саран ма̄хум Коми республиканыл субсидия–олн та̄сталавес. На̄н матыр титыглаӈкве те тахмаегы̄н, ты телефон хосыт свонитэ̄н: 8 (82140) 91 – 3 – 08 манос электронный пищма хансэ̄н: igpt@minobr. rkomi. ru. Лӯима̄вт са̄лы ӯрнэ ва̄рмаль – ты сельский хозяйстват халт акв ма̄, хо̄т са̄выӈпа̄лэ соссаӈ ма̄хум рӯпитэ̄гыт. Соссаӈ ще̄мьят ма̄гсыл ты а̄ти туп нас рӯпата, тох та̄н пе̄с йис та̄гыл о̄лсыт, ос ань тох о̄лэ̄гыт. Российский Федерациявт тахольт ты ва̄рмаль акваг уральтым о̄ньщаве ос олныл та̄ставе. Ань ты та̄л Коми Республикат са̄всыр сельскохозяйственный организациятыт 65 со̄тыра 537 са̄вит са̄лы янмалтаве. Ос пуссын та̄н сараныт о̄лнэ ма̄нылт 85 со̄тыра 749 са̄вит са̄лы о̄ньщаве. Коми республика са̄лы о̄щнэ щирыл Россия янытыл хо̄тыт местат о̄лы. Ат са̄всыр предприятият са̄лыт янмалтавет, ты ПСК «Оленевод», ООО «Северный», ООО «Агрокомплекс Инта Приполярная», ООО «Абезь», ООО «Петруньское» ос ты коныпал ат фермерский хозяйстват са̄лы ӯрим рӯпитэ̄гыт. Пуссын аквъёт хӯрумса̄т хо̄тпа тамле ма̄т рӯпитэ̄гыт. Ты та̄л са̄лыт о̄щнэ ма̄гсыл федеральный ос республиканский бюждетыл 53 млн. солко̄ви та̄стувес. Ань 11 млн. солко̄ви та̄нанылн майвес. Мо̄лты та̄л 46, 9 млн солко̄ви та̄сталавес, 29, 9 млн. солко̄ви та̄нти саран ма̄ныл ос 17 млн. солко̄ви федеральный па̄лыл майлувес.

1127 2016. 07. 07. Валентина Васильева

Хо̄нтлам рӯтанув номиянӯв Валентин Михайлович Молотков ань Тюмень ӯст о̄лы. Тав ма̄ньщи хо̄тпа, Хо̄нтаӈ (Кондинский) районт Евра па̄вылт самын патыс. Тав ань яныгпа̄лаг е̄мтыс, ос то̄ванакт самын патум ма̄тэ̄н яланты. Акв та̄л туи порат тув ялум, ань ты урыл пищма хансыс ос ма̄н газетавн те̄тыстэ. Хансум потре̄т тав ты урыл ла̄ви. Хо̄нтаӈ районт пе̄с йис порат са̄в ма̄ньщи па̄выл ӯнлыс. Акватэ Евра па̄влыг ла̄ввес, ты яныг па̄выл о̄лыс. Яныг хо̄нт э̄лыпа̄лт атпан нупыл ат ще̄мьяныл хум хо̄тпат хо̄нтлын ма̄н тотве̄сыт. Тувыл война оигпам юипа̄лт па̄вланылт хультум ма̄хум мо̄т ма̄н ва̄нтлуӈкве ла̄вве̄сыт. Тох па̄выл та хультуптавес. Ва̄тахтем та̄л ювле хультум порат та па̄вылт самын патум хо̄тпат акванатхатасыт. Потыртахтасыт, войнат порсум ма̄хум ма̄гыс памятник тӯщтуӈкв э̄ри. Ос ты памятник па̄вланыл ӯнлум ма̄т тот вос тӯщтаве. Ка̄сыӈ хо̄тпа манаса̄вит ве̄рмыс, таса̄вит олн та мис. Памятник ма̄гыс олн та̄н та атсыт. Хо̄нтлын ма̄т порслым ка̄сыӈ хо̄тпа наме тув хасвес, налымантем хум хо̄тпа наманыл тот ловиньтаӈкв ро̄ви. Ты Чейметовыт, Кентиныт, Лозвиныт, Молотковыт ос мо̄т ма̄хум. Валентин Михайлович о̄с са̄в рӯтанэ хо̄нтлын ма̄ныл юв ат ёхтысыт – Митрофан акитэ, Петр каӈке, о̄патэ ягпыгыт. А̄тятэ Михаил Иванович Молотков хо̄нтлуӈкв о̄с тотыглавес. Акв та̄л туп хо̄нтлас, 1942 та̄лт та̄кыщ сакватавес. Хоса пусмалтавес, тувыл юв та те̄твес, са̄в ме̄таль о̄ньщис. Пилта̄лыг хо̄нтлуме ма̄гыс «За отвагу» тит ме̄талил майлувес. Та па̄вылт самын патум ма̄хум халт то̄ват намыӈсуиӈыг е̄мтсыт. Евдокия Александровна Кузакова тав мирн ва̄нэ хо̄тпаг о̄лыс, хо̄нтаӈ ма̄ньщит ла̄тӈаныл ёмащакв ханищтастэ, са̄в наука нэ̄пак хансыс, пе̄с мо̄йт атыс. Тав ётэ Е. А. Чейметова, А. А. Чейметов, П. В. Лозвин, И. Т. Казанцев ты памятник тӯщтуӈкв номылматсыт ос ма̄хумныл олн атсыт. Рӯпатаныл ёмащакв та ва̄рсаныл. Ань ка̄сыӈ та̄л Победа хо̄тал э̄лыпа̄лт тув Евра па̄вылн са̄в мир ёхталы. Яныгпа̄ла хо̄тпат ня̄враманыл, апганыл пуссын ёттотыглыяныл. Тот яныг ӯльпа товытн то̄р ло̄мтыт нэ̄гсалэ̄гыт. Тувыл а̄ращ па̄лтэ̄гыт, ща̄й ос хӯл исмит па̄йтэ̄гыт, мощ пӯрлахтэ̄гыт. Тэ̄пъяланэ̄ныл юипа̄лт нэ̄мхотьютаныл юв минуӈкв ат молямлы. Потыртым хоса ӯнлахо̄лэ̄гыт. Акв хотты та̄л Валентин Михайлович тув о̄с ялум. Тот тав Н. М. Манин о̄йка ёт хо̄нтхатыглам. Ты хум хо̄тпа са̄в та̄л рӯпитас, ветеран нам о̄ньщи. О̄с Евра па̄вылт самын патыс, тот яныгмас. Хо̄нтлын ма̄ныл па̄вланылн туп лов хо̄тпа юв ёхталас, ты Ф. В. Саламатов, Я. В. Кентин, В. Д. Чейметов, А. Д. Чейметов, И. К. Чейметов, М. И. Молотков, К. В. Молотков… Та̄н о̄с хоса ат о̄лсыт, пуссын а̄тимыг е̄мтсыт. Та̄нтина̄ныл ат са̄литам хо̄тпат, ма̄н яныг ма̄в вуянтам хо̄тпат пуссын номавет. Матъёмас та̄н ма̄гсыланыл памятник тӯщтувес. Ань та̄н наманыл тот хансым о̄лэ̄гыт. Ос ляпа рӯтанылн ат ёрувлавет, ка̄сыӈ тӯя порат та̄н тув ёхталэ̄гыт ос ща̄й а̄ны та̄н ма̄гсыланыл пинэ̄гыт. Валентин Михайлович пищматэ̄т тамле ла̄тыӈ хансыс: «Юв ат ёхтум Пётр Молотков каӈкум порслыма порат нёлоловхуйплов та̄лэ туп о̄лыс. Тыи ма̄гыс ам сымум сака ща̄рги. Воссыг нэ̄мхуньт ма̄ньлат пыгыт ул вос хо̄нтлэ̄гыт. Округувт о̄лнэ ма̄хум пуссын ёмас ла̄тӈыл те̄тыянум, пуста̄гыл о̄лэ̄н, со̄т ос щунь о̄ньще̄н».

1127 2016. 07. 07. Валентина Васильева

Мирн ва̄нэ хо̄тпа ка̄стувес Лӯпта э̄тпос 22 хо̄талэ̄т ма̄ньщи мир о̄выл поэтув, намыӈсуиӈ хо̄тпав Юван Николаевич Шесталов нёлса̄т нупыл онтолов та̄лэ то̄влынув. Мо̄тыт та̄л нёлса̄т та̄лыг е̄мтнув. Ань таве ка̄сталан ма̄гыс ка̄сыӈ та̄л самын патум хо̄талэ̄т са̄в мир «То̄рум Маа» музейт акванатыглавет. Са̄в та̄л ювле хультум порат ты музей ва̄рнэ ма̄гыс ты хо̄тпат акваннё̄тхатыгласыт – Юван Шесталов, Еремей Айпин, Эмиль Косполов, Татьяна Молданова ос мо̄т ма̄хум. Ань Татьяна Александровна ты потырта̄лы, музей ань ӯнлын ма̄тэ Юван Николаевич тав хо̄нтыстэ. То̄нт тав ты ма̄ вуянтан ма̄гыс сака воритотыс ос «То̄рум Маа» намыл ты музей пинуӈкв ла̄выстэ. Ань ты музей ва̄рим па̄сныл моще̄рт ва̄тахтем та̄лыг ты е̄мты. Ос о̄йка 2011 та̄лт а̄тимыг е̄мтме юипа̄лт та музейт а̄хвтасныл яныг памятникыл тӯщтувес. Ка̄сыӈ та̄л тот мир ты атхатыгла̄лы. Юван Николаевич о̄лме̄т са̄в юрт о̄ньщис. Акв юртэ Вадим Орлов ос стихыт хансы, рущ поэтыг о̄лы. Тав ань ла̄выс, кос манах та̄л мины, Юван Шесталов наме акваг суиӈыг та е̄мты. Ты та̄ксарыг о̄лум хо̄тпа нэ̄мхотьютныл ат пилыс, пуссын ля̄льт ла̄всанэ. Ань тав хансум ла̄тӈанэ, потранэ ос стиханэ мирн акваг ловиньтавет. Тав щире̄т хансуӈкв воссыг нэ̄мхотьют ат ве̄рми. Москва ӯсныл хатань нэ̄ ёхталас, тав наме Альфия Абдрашитова. Тав ма̄ньщи поэтув сака янытластэ, халэ̄нт юртыӈыщ о̄лсы̄г. Рущ ла̄тӈыл хансым «Морах» нампа акв стихе ты хатань нэ̄ хо̄та̄ти акваг ловиньтастэ, таима̄гыс Юван Николаевичн тох намтвес – Морахнэ̄. Хо̄т ка̄салытэ, та ля̄галы: «Морахнэ̄ ты юв». Нэ̄ ань тав уре̄т са̄в ёмас ла̄тыӈ ла̄выс ос хӯрум стиханэ мирн ловиньтасанэ. «Ханты ясанг» газетат рӯпитан хум Владимир Енов акв стих о̄с ловиньтастэ. Юван Николаевич иӈ ма̄ниг о̄лыс, оматэ а̄тимыг е̄мтыс, таима̄гыс тав омате̄тэ урыл о̄лме палытыл са̄в стих хансыс. Ань акв стихе ханты хумн ты ловиньтавес. Альбина Николаевна Мехнина (ты Юван Николаевич э̄ще) та урыл потыртас, та̄н а̄тяныл Николай Тимофеевич Шесталов ма̄нь па̄влыӈ ма̄т акваг колхоз председателиг рӯпитас. 1958 та̄лт та̄н Ло̄пмуст о̄лсыт, а̄щаныл тув рӯпитаӈкв те̄твес. Альбина то̄нт хо̄т та̄лэ то̄влыс, йигрище нила та̄лэ о̄лыс. Та туи порат та̄н палтаныл ляпа рӯтаныл ёхтыс, Фрося Шесталова. А̄ги то̄нт са̄тхуйплов та̄лэ то̄влыс, педучилищат ханищтахтас. Э̄ргуӈкв сака ха̄сыс, турсуе татем суиӈыг о̄лыс. Тав ма̄нь а̄гирищиг э̄ргуӈкв ханищтаӈкв патсаге. Оманыла̄тяныл хотталь рӯпитаӈкв минэ̄г, та̄н та̄нтте̄ныл юн хультэ̄гыт, та э̄ргащлэ̄гыт. Фрося тэ̄натэ̄н ма̄ньщи э̄ргытн ханищтасаге. Тувыл тав ювле та минас. То̄ванакт э̄типа̄лаг Альбина а̄тятэ̄н ла̄ваве: «Фроська э̄рыг э̄рген». А̄гитэ таве̄н та э̄рги. Тав ня̄врам э̄рге хӯнтлуӈкв сака э̄руптас. Аквнакт Ло̄пмус клубт концерт ва̄рвес, ма̄нь а̄гирищиг ла̄ввесы̄г, тэ̄н э̄рыг тот вос э̄рге̄г. Ня̄врамыг э̄ргуӈкв туп о̄вылтахтасы̄г, ма̄хум мовиньтаӈкв та тӯлтхатасыт. А̄тятэ̄н а̄гирищиг сыспалт лю̄лис, ла̄ви, тэ̄н щар ул вос э̄ссамтэг, э̄лаль вос э̄рге̄г. А̄ще̄н то̄нт военный гимнастеркасупыл масхатым о̄лыс, ма̄глэ̄т ме̄талит о̄ньщис. А̄гирищиг э̄ргуӈкв по̄йтсы̄г, ма̄хум мовиньтым ка̄тпатта та ра̄тащласыт, то̄ват ос ты халт ро̄ӈхувла̄лсыт: «Ёмас, сака ёмас». Ло̄пмусныл та̄н ще̄мьяныл Малеевка па̄вылн те̄твес, ты па̄выл Восыӈтӯр ляпат ӯнлыс. Та па̄влыт ос тамле пӯмащ о̄лыс. Тот Валентина Николаевна Новьюхова о̄лыс, тав мис поснэ нэ̄г рӯпитас. Такви талква нэ̄, ос турсуе татем суиӈыг о̄лыс, э̄ргуӈкв сака ха̄сыс. Па̄вылт концертыт о̄лнэ̄ныл порат тав туп Валентина Толкунова э̄рганэ э̄ргыс, таима̄гыс тав тох и намталавес. Нэ̄ Шесталов кӯщай урыл ма̄нь э̄рыгохсат такви номылматы, концерт порат та э̄ргиянэ. Акв э̄рге тамле о̄лыс: Ам ётум, ам ётум, ам ётув хӯрум хо̄тпа – Претщетатель Шесталово̄йка Ос Новьюхов пиркатир. Та па̄сныл са̄в та̄л минас. 2007 та̄лт Альбина Николаевна Ханты-Мансийск ӯсн ва̄нтлыс, Юван Николаевич каӈке палт о̄лмыгтас. Э̄типа̄лаг Юванын та ла̄ваве, матыр ма̄ньщи э̄рыг вос э̄рги. Фрося э̄рганэ ос «Куккук» э̄рыг хӯнтлуӈкв сака ка̄сащас. Ань Альбина Николаевна Юван Николаевич ка̄сталан хо̄талт «Югра – мой рай» нампа стихе мирн ловиньтастэ. Ты стих нэ̄мхо̄т ат хансыглавес. Моще̄рт э̄рыӈ йильпи нэ̄пакт тах хансаве. Ла̄тӈанэ татем ёмасыт, щар сымын хо̄е̄гыт.

1127 2016. 07. 07. Николай МЕРОВ

Сӯева̄т па̄вылт яныгмам нэ̄ Анна Николаевна Хворостова, такви а̄ги о̄парищ наме Курикова, 1952 та̄лт Хосво̄ль па̄вылт самын патыс. Колта̄гылт та̄н ат ня̄врам яныгмасыт. Ща̄нягеа̄щаге, ягпыганэ ос яга̄гиянэ а̄тимыг е̄мтсыт. Ань Никита а̄пщитэ̄нтыл кит хо̄тпаг хультсы̄г. Та̄н пе̄с йис та̄гыл о̄лнэ ма̄наныл Сӯева̄т па̄выл. Пе̄с порат тот пуссын ма̄ньщит о̄лсыт. Тот са̄в мир о̄лыс. Во̄раян ма̄ ат то̄вылхатыгла̄лыс. Та порат лэ̄ӈын, нёхыс, анта̄тыр совыт ос мо̄т пушнина сака пирмайтавес. Ты коныпал щёпыр, ятри, кисуп, со̄руп нё̄влит пуссын вуйве̄сыт. То̄нт ма̄хум пуссын алыщлым яласасыт. Алыщлан ма̄ мощщаг е̄мтме ма̄гыс ма̄хманув мо̄т ма̄ кинсым э̄лы ма̄тын ва̄нтлысыт. Висумтытн, Лэ̄план, Полумн, Мирон па̄вылн, са̄всыр ма̄н ла̄кквата̄рамласыт. Ань нё̄р палыт са̄всыр ма̄т ма̄нь па̄влыт ӯнлэ̄гыт. То̄ва ма̄т ань туп колъёраныл хультсыт. Пе̄с ма̄хум та̄л палыт во̄рае̄гыт, алыщлан ма̄ныл по̄йтэ̄гыт ос мӯйлуӈкве акванатхатыглэ̄гыт. Халанылт касэ̄гыт, ва̄йхатэ̄гыт, ха̄йталахтэ̄гыт, та порат ма̄хум сака пӯмащ щирыл о̄лсыт. Ань Анна Николаевна а̄ще колэ щар пе̄сыг е̄мтыс, хотсаис. Таима̄гыс тэ̄н хумитэ̄нтыл ты та̄л пе̄с па̄вылныл мощ э̄лыннув йильпи во̄ркол ӯнттысы̄г. О̄йкатэ наме Александр Хворостов, тав рущ хум. Анна таве во̄раяӈкве ты ханищтастэ. Ань тав матыра̄ти пуссын ва̄г. Тэ̄н ва̄тихал во̄раяӈкве тув ялантэ̄г. Нэ̄ во̄рт ё̄мыгтан ма̄т янытэ̄т ва̄ганэ. Таквсы порат тот ня̄ль во̄ртэ̄г. Щёпрыт ос мо̄т товлыӈ ӯит алыщлэ̄г. Тӯяг ос ва̄с па̄тлуптаӈкве тув ялантэ̄г. Ляпат яныг тӯр о̄лы. Ка̄сыӈ та̄л тув са̄в ва̄с ёхталы. Са̄сыл са̄ӈкит кисгиянэ, та̄н щар ва̄с кол ляпан исапе̄гыт. О̄йкатэ хотощатахты, китыглытэ: «Наӈ аман хумус тыщир кисгуӈкве ханищтахтасын? ». Анна Николаевна а̄ще̄н тох кисгуӈкве ханищтавес. Ма̄ниг о̄лме̄т а̄ще ёт тӯрн ва̄с па̄тлуптаӈкве акваг ялантас. Таве̄н ты ва̄рмаль сака пӯмащ о̄лыс. Сӯева̄т па̄выл пе̄с порат сака ёмас, тэ̄пыӈ ма̄т о̄лыс. Па̄выл карыс урамт ӯнлыс. Тот са̄в во̄руй о̄лыс. Юио̄выл та̄лытт Аннэ а̄ще тот во̄р ӯргалан хумыг рӯпитас. Тав а̄тимыг е̄мтыс, па̄выл та та̄тламас. Ань ты накт э̄кваго̄йкаг тэ̄нки тот во̄раим о̄лэ̄г. Ма̄тэ акв тох во̄руиӈ. Хащта̄л хо̄тпа тув ат тотыглэ̄г. Тувыл ма̄ ва̄нэ та̄л по̄х хо̄тпат о̄с ат ёхталэ̄гыт. Та сытам ма̄т ёсал во̄раим яласэ̄г. Ке̄рнялянэ̄н атахкем ве̄рыста палыт ма̄т ӯнттым о̄ньщиянэ̄н. Анна Николаевна о̄йкатэ̄нтыл кит ня̄врам янмалтасы̄г. Яныг а̄гитэ Советский район Таёжный па̄вылт о̄лы. Тот хум ва̄рыс, акв пыг янмалты. Пыге ос Ивдель ӯст рӯпиты. Кит ня̄врам о̄ньщи. Ам Аннэ ще̄мьятэ̄н пуста̄гыл о̄лнэ ла̄тыӈ ке̄тэ̄гум. То̄рум ёт, О̄тыр ёт, э̄лаль са̄в та̄л о̄лэ̄н!

1127 2016. 07. 07. Людмила ТЕТКИНА

Ща̄не̄ныла̄ще̄ныл ма̄щтырлаӈкве ханищтахтам нэ̄ Ювле хультум э̄тпост Советский районт «Таёжные знания коренной Югры» нампа ханищтап о̄лыс. Тув ялмум порат ам Софья Ярцева ёт ва̄йхатасум. Тав мо̄т ма̄ньщи нэ̄т ёт са̄сныл са̄всыр хусапыт, со̄втыт ю̄нтыс. Ам тав ётэ потыртасум ос китыгласлум, хоты па̄вылныл тав о̄лы ос хо̄т ма̄щтырлаӈкве ханищтахтас. Тамле ханищтапын Софья Алексеевна о̄выл щёс ёхталас. Ма̄ньщи нэ̄ ла̄выс: «Ам Советский район Пионерский па̄вылт о̄лэ̄гум. Са̄сныл со̄втыт, са̄всыр а̄ныт ва̄руӈкве ха̄сэ̄гум, ма̄ньта̄гыл ва̄щиньтасум, хумус ща̄нягума̄щагум ма̄щтырласы̄г. Тувыл тамле утыт ка̄сыӈ хо̄тал хунь ю̄нтэ̄гум, тыи ма̄гсыл то̄ва ва̄рмалит хотёрувлахтэ̄гыт. Са̄с ёт рӯпитаӈкве о̄с ха̄суӈкве э̄ри, са̄с маныгтахтуӈкве манос хотпоклуӈкве ве̄рми. Матъёмас тамле ханищтапыт ва̄рыглавет ос ма̄ньщи ма̄хум тох акванатхатыглэ̄гыт, та̄нки халанылт ханищтахтэ̄гыт. Тыт ам Ха̄льӯсныл ёхталам ма̄щтыр нэ̄т ёт ва̄йхатасум». Софья Ярцева, такви о̄парищ наме Курикова, Ха̄льӯс районныл о̄лы. Лэ̄пла па̄выл по̄хат самын патыс. Яныгмам па̄влэ рущ ла̄тӈыл «юрты Куриковых» тох намаим о̄лы. Та пе̄с па̄вылныл Ня̄хщамво̄ль мус я̄ хосыт 150 ве̄рыста о̄лы. Пе̄с йис порат та ма̄т Куриковыт о̄лсыт, тыи ма̄гсыл па̄выл тамле намыл пинвес. Ань Софья а̄пщитэ Илья такке̄т тот о̄лы. Илья па̄выл ӯргалан хо̄тпаг хультыс, тыи ма̄гсыл мо̄т ма̄н ва̄нтлуӈкве щар ат ка̄сащи. Софья Алексеевна яныгмам поратэ сака ёмащакв номитэ. Ма̄ньщи а̄ги ща̄нягеа̄щаге по̄хат о̄лыс, акваг са̄всыр тэ̄лал пӯмщалахтас. Тав ла̄выс: «А̄тям акваг матыр рӯпата ва̄рыс. Ам тав юипа̄лэ̄т ха̄йтыгтасум ос маныр ва̄ри, акваг китыгласлум. Акв порат тав во̄рн ялыс, ля̄мйив сӯл хотнуистэ, юв тотыстэ, витыл тытылтастэ. Ам а̄тям китыгласлум, манрыг тав ля̄мйив сӯл витын пиныстэ ос маныр э̄лаль ва̄руӈкве паты. Ты сӯлыл тав са̄лт ва̄рыс ос са̄сныл яныг сыс па̄йпыт ю̄нтыс. Тамле са̄лтыл ю̄нтым па̄йп та̄кнувег о̄лыс. Ля̄мйив сӯлыл ос ёса ква̄лыг ва̄рыс. А̄тям ма̄щтыр хум о̄лыс, са̄грапналыт, тӯпыт ос са̄в мо̄т э̄рнэ утыт такви ва̄рыс. Ще̄мьят ма̄н нёлолов ня̄врам яныгмасӯв. Ща̄нюв акваг ма̄н ётув юн о̄лыс, колсори рӯпата ва̄рыс. Тав щаквщуӈкве о̄с сака ха̄сыс, такви ма̄ньщи супыт ос мо̄т маснут ю̄нтыс. Ам тав юипа̄лэ̄т о̄с акваг ха̄йтыгтасум, пӯмщалахтасум, манхурип рӯпата тав ва̄ри. Тав са̄лы совныл сахит, пӯркат, ва̄ит ю̄нтыс. О̄влэ̄т са̄лы котыт витыл тытылтыянэ ос нумыл яныг а̄хвтасыл ёлпащиртыянэ. Са̄лы кот тох матахкем хо̄тал витын тытылтытэ, туп ты юипа̄лт тынтлытэ. Тувыл пӯркат ос мо̄т маснут ю̄нтыс. Ам тав ётэ ю̄нсхатуӈкве акваг воратасум. Ма̄ньщи суп ю̄нтуӈкве ща̄нюмн ханищтаве̄сум». Са̄т та̄лэ мус а̄гирищ ща̄нягеа̄щаге ёт о̄лыс. Тувыл ма̄ньщи а̄ги Ня̄хщамво̄ль школан ханищтахтуӈкве тотвес. Та па̄вылт тав лов класс а̄стлас ос Тюмень ӯсн э̄лаль ханищтахтуӈкве щё̄питахтас. Тувыл тапалыт ма̄н миннэ ма̄гсыл олн ат о̄ньщас, Софья интернатыт рӯпитаӈкве патыс. Хӯрум э̄тпос тот рӯпитас, билет ма̄гсыл олн сэ̄лыс. Ханищтахтан пора хунь ёхтыс, яныг ӯсн минас. Тюмень ӯст тав кондитерыг ханищтахтас. Ты юипа̄лт хум ва̄рыс, ня̄враме самын патыс. Ще̄мьяӈ та̄гыл яныг ӯсн о̄лмыгтас. Ты юипа̄лт штукатурмалярыг ханищтахтас ос колыт ӯнттым рӯпитас. Тюмень ӯст тав ще̄мьяӈ та̄гыл 12 та̄л о̄лыс. Тувыл рӯтанэ̄н Алябьево па̄вылн о̄луӈкве во̄ввес. Та пора урыл ма̄ньщи нэ̄ таи потыртас: «Яныг ӯст о̄луӈкве ханьщувласум, о̄влэ̄т ма̄нь па̄вылн ва̄нтлуӈкве ат ка̄сащасум. То̄нт Саша пыгум иӈ ма̄нь о̄лыс, ва̄тихал а̄гмыл е̄мталас. Ос та порат Алябьево па̄вылт пӯльница ат рӯпитас, ма̄хум пусмалтахтуӈкве Пионерский па̄вылн ялантасыт. Тыи ма̄гсыл тув минуӈкве ат ка̄сащасум. Тувыл рӯтанум акваг во̄вве̄сум, мощ номсахтасум, па̄вылн та ва̄нтлысӯв. О̄йкаме̄нтыл Алябьево па̄вылт кол ӯнттысме̄н. Ма̄нь пыгме̄н Максим тыт самын патыс, ты та̄л нилахуйплов та̄лэ то̄влыс. Таквсы порат нёлолов классын ханищтахтуӈкве мины. Яныг пыгме̄н Саша Югорск ӯст о̄лы, тот рӯпиты. Ам Максим ёт ма̄нь та̄гыл ма̄ньщи ла̄тӈыл потыртэ̄гум. Ща̄нь ла̄тыӈ ёмащакв торгамты. То̄ва порат китыглылум, ювле рущ ла̄тӈыл ля̄галы, то̄ва порат ёмащаквег ма̄ньщи ла̄тӈыл ла̄ви. Рӯтанум ёт ма̄нки халувт ма̄ньщи ла̄тӈыл потыртэ̄в, тыи ма̄гсыл пыгум ма̄нь та̄гыл ща̄нь ла̄тӈув хӯлытэ. О̄йкам о̄с ма̄ньщи ла̄тӈув ёмащакв торгамты, таве о̄с ханищтаслум. Яныг пыгум Сашам тувле нупыл тэ̄латэ щар а̄тим. Виктор о̄йкам рущиг о̄лы, тыи ма̄гсыл пыгум ос рущиг ловиньтахты. Мо̄лты та̄л Саша Яныгпа̄вылн ялыс, тот Даша увщим ще̄мьяӈ та̄гыл о̄лы. О̄йкатэ Пётр Самбиндалов ам пыгум хӯл алыщлаӈкве ос во̄раяӈкве ханищтастэ. Ань пыгум писалил па̄тлуптаӈкве, ва̄с маныгтаӈкве, хӯл нилюӈкве ёмащакв ха̄сы. Тув ялнэ э̄лыпа̄лт ва̄с исмит, хӯл щар ат тэ̄с, акваг ла̄выглас, ты тэ̄нут пасы. Яныгпа̄вылт таве̄н о̄луӈкве такем мӯстыс, акв та̄л сыс тот во̄раим ос хӯл алыщлым яласас. Тув ялме юипа̄лт ва̄с, хӯл исмит ань тэ̄г, ма̄ньщи тэ̄нут нэ̄матарыл воссыг ат пасы. Ань рӯпиты, ӯщлахтын порат ос Яныгпа̄выл нупыл ялуӈкве номсы». Софья Алексеевна о̄йкатэ ёт Алябьево па̄вылт о̄лнэ колэ̄н тыналастэ̄н ос Пионерский па̄вылт яныг кол ӯнттысы̄г. Колэ̄н по̄хат яныг тэ̄пкан о̄ньще̄г, са̄всыр тэ̄нут тот янмалтэ̄г. Софья Алексеевна пенсият о̄лы, нас тох тэ̄ла та̄л щар ат ӯнлы. Па̄вылт са̄всыр ялпыӈ хо̄талыт о̄лнэ порат акваг ма̄ньщи культура урыл потыртаӈкве ос ю̄нтум пормасанэ суссылтаӈкве тув во̄виньта̄лаве. О̄йкатэ Виктор Тимофеевич ма̄щтырлаӈкве о̄с ха̄сы, йӣвныл са̄всыр сувенирыт ос мо̄т пормасыт сака ёмащакв ва̄ри.

1128 2016. 07. 21. Николай МЕРОВ

Ня̄врамыт ӯщлахтын ма̄т уральтаве̄сыт Мо̄лал округ губернатор Наталья Комарова тыт ня̄врамыт ӯщлахтын ма̄т уральтаӈкве ла̄всанэ. Тыима̄гыс о̄йттур э̄тпос хо̄тхуйпловит хо̄талэ̄т Ханты-Мансийск ӯс мирколт ня̄врамыт ӯщлахтын ва̄рмаль щирыл сапра̄ни о̄лыс. Ты тэ̄ла ма̄гыс округ кӯщай ва̄ӈын хум Алексей Путин са̄всыр департаментыт рӯпитан кӯщаит акванатыгласанэ. Ань тыт ӯщлахтын ма̄т хумус щё̄питым о̄лэ̄гыт, та̄н ты урыл потыртасыт. Тыима̄гыс Югра ма̄т мирн нё̄тмил ва̄рнэ департаментыт рӯпитан ма̄хум ос мо̄т кӯщаит лӯпта ос о̄йттур э̄тпосыгт ӯщлахтын ма̄т уральтаӈкве илттыг ёхталасыт. Округув янытыл ня̄врамыт ӯщлахтын китса̄т арыгтем ма̄ рӯпиты. Ӯсыт ляпат са̄т ӯщлахтын ма̄ о̄лы. Тув ня̄врамыт э̄тэхо̄талэ о̄луӈкве тотыглавет. Тувыл кит лагериг санаторий хольт ва̄рим о̄лэ̄г. Ва̄т нупыл хӯрум ма̄т ня̄врамыт палаткат о̄лэ̄гыт. Яныгса̄т онтырса̄т ма̄т ня̄врамыт туп хо̄тыл сыс ӯщлахтэ̄гыт. Онтолов ма̄т ня̄врамыт ка̄тыл матыр ва̄ре̄гыт ос нас ёнгасэ̄гыт. Ты ма̄тт э̄рнэ нэ̄пакыт пуссын ёмщакв щё̄питым о̄лэ̄гыт. Тот матыр лю̄ль нак е̄мтнэ порат, полиция во̄внэ ма̄гыс понюмтан кнопкат щё̄питаве̄сыт. На̄й пе̄ламлан порат о̄с та̄ра ты урыл ня̄врамыт суил ва̄равет. Ляпан на̄й ул вос ёхтыс, ӯщлахтын ма̄ мувлахил йӣвыт хотсартве̄сыт. Ле̄ккарыт, ня̄врам ханищтан ма̄хум, тэ̄нут па̄йтнэ хо̄тпат пуссын э̄рнэ нэ̄пак о̄ньще̄гыт, та̄нки рӯпатаныл ёмщакв ва̄ганыл. Ӯщлахтын ма̄т э̄рнэ тэ̄рпит та̄стуве̄сыт. Ӯргалан хо̄тпат ма̄ ёмщакв уральтыяныл. Ня̄врамыт ёт рӯпитан ма̄хум халт нэ̄мхотьютаныл ат сутыта̄лвес. Пувлын ма̄т мувлахил ква̄лгыл хартве̄сыт. Ня̄врамыт мил ма̄н ул вос тотве̄сыт. Ӯщлахтын ва̄рмаль э̄лыпа̄лт о̄влэ̄т ня̄врамыт потыртавет, маныр ва̄руӈкве ат ро̄ви. Та̄н ты тэ̄лат пуссын ёмщакв вос ва̄саныл. Ос та сыс иӈ са̄в та̄рвитыт о̄лэ̄гыт. То̄ва ма̄т кина то̄тап хосыт суснэ утыт а̄тимыт. Тувыл на̄й харыгтан ут о̄ньще̄гыт кос, ос то̄ва ма̄т та̄н ат рӯпитэ̄гыт. Рӯпитан утыт ос та хо̄тпатын ква̄лтапаӈкве ат ха̄савет. Тамле ва̄рмаль Ха̄льӯст рӯпитан «Со̄рни Сэ̄й» нампа ӯщлахтын ма̄т о̄лыс. Тувыл ос Советский районт «Сымриӈ а̄лпыл» нампа ӯщлахтын ма̄т ня̄врамыт тэ̄рпи ат о̄щсыт. Ань тот ты ва̄рмаль мӯсхал щирыл щё̄питавес, э̄рнэ тэ̄рпит ёвтве̄сыт. Нижневартовский район «Во̄р мо̄йт» нампа ӯщлахтын ма̄т о̄с са̄в та̄рвит ва̄рмаль о̄лыс. Уральтан ма̄хум ёхталаманыл порат, ты тэ̄лат хотщё̄питаӈкве ла̄всаныл. Ань тыг мус ты ва̄рмаляныл пуссын мӯсхалыг ва̄рсаныл. Сапра̄нин атхатыглам кӯщаит о̄йттур э̄тпос ва̄т нупыл атыт хо̄тал мус ты ӯщлахтын ма̄т о̄лнэ ва̄рмалит пуссын хотщё̄питаӈкве ла̄всаныл. Ня̄врамыт ёмщакв уральтым о̄ньщавет.

1128 2016. 07. 21. Людмила ТЕТКИНА

Па̄влыт ос ӯсыт олныл та̄ставет Та са̄тыт округ кӯщай нэ̄ Наталья Комарова такви ва̄ӈын хо̄тпанэ сапра̄нин атыгласанэ. Ма̄хум са̄всыр э̄рнэ тэ̄лат урыл потыртасыт ос э̄рнэ нэ̄пакыт пирмайтасыт. Кӯщай нэ̄ такви ва̄ӈын хо̄тпанэ нупыл ла̄выс: «Мо̄лты та̄л па̄сныл сака ёмащакв рӯпитан мирколыт касыл щирыл олныл та̄стыянӯв. Ань лов районыт манос ӯсыт пуссын аквъёт китса̄т со̄тыра солко̄ви тах выгыт. Касылт Нефтеюганск ӯс ос Нефтеюганский район но̄хпатсы̄г. Ӯс 25 млн. 800 со̄тыра солко̄вил миве ос район 28 млн. 800 со̄тыра солко̄вил та̄ставе». Тамле касыл па̄выл ос ӯс мирколыт халт ка̄сыӈ та̄л ва̄рыглаве, ёмащакв рӯпитан миркол кӯщаит та̄нки па̄вланыл манос ӯсаныл ма̄гыс олн тох сэ̄луӈкве ве̄рме̄гыт. Та̄н о̄с акв нэ̄пак пирмайтасыт. Ты нэ̄пак щирыл 342 млн. солко̄ви округ янытыл о̄лнэ мирколыт халт уртавет. Ты олнытыл па̄влытт ос ӯсытт ня̄врамыт ёнгын площадкатыл ос са̄в мо̄т э̄рнэ рӯпатал ва̄равет. Ты э̄лыпа̄лт мирколытт рӯпитан ма̄хум хассыт, манаса̄вит олн та̄н па̄вланыл, ӯсаныл ма̄гсыл э̄ри. Са̄внув олн Сургут, Нефтеюганск, Ханты-Мансийск ӯсыт ос Белоярский район мивет. Ты ва̄рмаль урыл Наталья Комарова ла̄выс: «Та̄стым олныт та̄ра па̄влыт, ӯсыт халт вос уртавет. О̄йттур э̄тпосув ты оигпи, молямлаӈкве э̄ри, тэ̄лы рӯпата ань вос ва̄раве. Ат ке молямлэ̄в, ма̄хманув о̄с тах ла̄ве̄гыт, таквсы пора ты ёхтыс, турап хо̄талыт лё̄ӈхыт ва̄руӈкве та о̄вылтаве̄сыт ос хорамыӈ лӯптат ма̄н ӯнттавет». Сапра̄нит кӯщаит туризм ва̄рмаль урыл потыртасыт. Пирмайтым нэ̄пак щирыл ань природный ресурс Департамент ты рӯпата ва̄руӈкве патытэ. Кӯщай нэ̄ ла̄выс, ювле хультум та̄л сыс тыг атса̄т со̄тыра мӯй хо̄тпат ёхталасыт. Ань туристыт тыт вос ӯщлахтасыт, округувт хӯрумса̄т са̄всыр программа рӯпиты. Ты хосыт са̄всыр предприятият, общинат олныл та̄ставет. Мӯй ма̄хум о̄лнэ ма̄вн ва̄тихал вос ёхталасыт ос соссаӈ ма̄хум пе̄с йис ва̄рмалитыл вос пӯмщалахтасыт, ань природный ресурс департамент ты рӯпата э̄лаль ва̄руӈкве тах патытэ. Ты коныпал кӯщаит ос соглашениенэ̄пак урыл потыртасыт. Ань ты нэ̄пак щирыл округ правительство ос «Салым Петролеум Девелопмент» ма̄во̄й но̄хвинэ компания э̄лаль аквъёт рӯпитаӈкве ла̄вхатсы̄г. Ты компания ня̄врамыт ма̄гсыл ханищтахтын колыт ос пӯльницат округувт ӯнттуӈкве тах паты.

1128 2016. 07. 21. Валентина Васильева

Та̄нанылн акваг нё̄туӈкв э̄ри Ты э̄тпос округ мирколт яныг сапра̄ни о̄лыс, кӯщаюв палт са̄в ма̄хум во̄выглаве̄сыт. То̄ват та̄н халанылт кӯщаиг о̄лэ̄гыт, манос а̄гмыӈмосыӈ ма̄хумн нё̄тнэ колт рӯпитэ̄гыт. То̄ват сампыльтал ма̄хумн ос пальта̄л ма̄хумн нё̄тэ̄гыт, мо̄таныт ня̄врамыт ёт рӯпитэ̄гыт. Та̄н ань ты урыл потыртасыт – ань та̄нти я̄нас щирыл рӯпитан ма̄хум мирн нё̄тмил о̄с вос ва̄ре̄гыт. Маныр рӯпата та̄нанылн ва̄руӈкв ро̄ви, ты урыл Россия Президентув ювле хультум та̄л оигпаме порат ла̄выс. Ань некоммерческий организацият нё̄туӈкв во̄вавет. Ос та̄н рӯпитаӈкв о̄вылтахтуӈкв ань та̄ра ат ве̄рме̄гыт. Яныг кӯщаюв Наталья Комарова та̄нанылн ла̄выс, та̄н та̄нти манса̄вит олн тув холтуӈкв номсэ̄гыт, вос ловиньтыяныл. Тувыл округ мирколт ловиньтавет. Та юипа̄лт ущ ты организацият а̄гмыӈмосыӈ хо̄тпатн нё̄туӈкв тах патэ̄гыт. Ма̄н округувт ты ма̄хум та̄нти матыр организация ва̄руӈкв о̄с ве̄рме̄гыт, ты хосыт олн сэ̄луӈкв. Ос та̄нанылн сака та̄рвитыӈ рӯпитаӈкв. Ань кӯщаит ты сапра̄нит «Диа-Сервис» нампа организация урыл потыртасыт. Ты организация 1998 та̄л па̄сыл Нягань ӯст рӯпиты. Та̄н пе̄ринан нортнэ то̄рыт ю̄нтэ̄гыт, ос та̄нти рӯпитан колнаканылт торыӈ нэ̄матыр ат о̄ньще̄гыт. Ань Наталья Комарова хӯлтнэ нэ̄паке̄т хансыс, ты организация ёмащакв вос нё̄таве, маныр та̄нанылн э̄ри, пуссын вос ёвтаве. Сергей Кононенко Общественный палата колт рӯпиты, социальный политика комиссият кӯщаиг о̄лы. Тав такви ё̄мыгтаӈкв ат ве̄рми, коляскал яласы. Тав ты урыл потыртас, округувт я̄нас комиссия ва̄рвес, та ма̄хум ла̄пкат, пӯльницат, са̄всыр колыт уральтыяныл, хо̄тпа тот коляскал минуӈкв ве̄рми ман а̄ти. Та̄н ань Ханты-Мансийский районт яныгса̄т хус арыгтем кол уральтасаныл. То̄ват щё̄питым щар ат о̄лэ̄гыт, та кол кӯщаит ань пуссын ла̄вве̄сыт, ё̄мыгтаӈкв ат ве̄рмын ма̄хум колн щалтнэ̄ныл ма̄гыс я̄нас састум лё̄ӈхыл вос ва̄равет.

1128 2016. 07. 21. Валентина Хозумова

Хӯл алыщлан ма̄хум янытлан хо̄тал О̄йттур э̄тпос титыт ӯщлахтын хо̄талэ̄т хӯл алыщлан ма̄хум янытлан хо̄талыг о̄лы, рущ ла̄тӈыл ла̄ваве – День рыбака, ань ос мо̄т щирыл ла̄вуӈкв патвес – День Югорского муксуна. Ань та хо̄талт Ханты-Мансийск ӯст на̄лми ва̄тат ялпыӈ хо̄тал ва̄рыглавес. А̄лпыл тув таса̄вит мир та ёхтыс. Онтолов щё̄с порат хӯл пувуӈкв ка̄сащан ма̄хум атве̄сыт, та̄н ма̄гсыланыл касыл ва̄рвес хотьютаныл щар ма̄к яныг хӯл нясыл пуви. Тит щё̄с сыс няслуӈкв ве̄рмысыт. Ка̄сыӈ хо̄тпа такви нясэ ёттотыглас. Ла̄вве̄сыт, ма̄нь ка̄рай хӯл те пуве̄гыт, та̄ра ювле витн вос та̄ртыяныл. Налыман нупыл хӯрум хо̄тпа касуӈкв ла̄вхатсыт, хум хо̄тпат халт хӯрум нэ̄квет няслысыт. Каснэ щё̄саныл минам юипа̄лт пувум хӯланыл та̄рвитаныл сунсуӈкв патве̄сыт. Ка̄сыӈ хо̄тпа ма̄к яныг хӯлэ я̄нас ве̄скалавес. Тувыл яныг хӯл пувум хо̄тпат янытлаве̄сыт. Ос та сыс мо̄т ма̄т йӣквнэ ос э̄ргын кан ва̄рыглавес. Тув атхатам ма̄хум э̄лыпа̄лт о̄влэ̄т Евгений Платонов потыртас, тав ма̄вит ӯргалан департаментыт кӯщаиг о̄лы. Тав ла̄выс, пе̄с та̄гыл ма̄н миранув хӯл алыщлэ̄гыт, ты ма̄к э̄рнэ рӯпата. Яныг хо̄нт порат тыт пувим хӯл пуссын хо̄нтлам ма̄хманувн те̄тыглавес. Хӯл алыщлан хо̄тпат – та̄н ты ма̄ янытыл мир хӯлыл тыттыяныл. Ханты-Мансийский район кӯщай Пётр Захаров о̄с са̄в ёмас ла̄тыӈ мирн ла̄выс, тав ос тох потыртас. Хӯл алыщлан рӯпата хосыт ма̄н округув о̄с са̄в олн сэ̄лы. Ань тот са̄в ма̄ньлат ма̄хум вос рӯпитэ̄гыт. Ос хӯл акваг пувуӈкв о̄с ат ро̄ви, хӯл янмалтаӈкв э̄ри. Таима̄гыс хӯлыӈ я̄т ос тӯрыт ӯргалаӈкв э̄ре̄гыт, та̄н сыстамыг вос о̄лэ̄гыт, ул вос па̄ӈктавет. Тэ̄н потыртаме̄н юипа̄лт хӯл алыщлан ма̄хум ос общинат янытлаӈкв патве̄сыт. Ка̄сыӈ янытлан нэ̄пакыл ос мӯйлупсал майвес. Та юипа̄лт соссаӈ ма̄хманув концерт суссылтасыт. Юлия Яркина «Хо̄тал» нампа театрыт артисткаг рӯпиты, тав ма̄ньщи э̄рыг э̄ргыс. Татем нё̄тнэ э̄рыгэ̄лыс. Оматэ Маргарита Рябова ос ма̄хум маттем та пӯмщаласанэ. Рущ э̄ргыт ханты э̄ргыг ва̄рсанэ, ма̄хумн о̄с сака мӯстыс. Аквты порат мощ э̄лыннув «Пикник» нампа ӯщлахтын ма̄ щё̄питым о̄лыс. Тот ня̄врамыӈ ма̄хум ос нас мӯйлын ма̄хум ӯщлахтасыт ос матыр ма̄щтырлаӈкв ве̄рмысыт. Хӯл исмит па̄йтвес, ща̄й виӈкв ро̄выс, ма̄хум олн щар ат ойтсыт. Э̄типа̄ла мус ӯст о̄лнэ ма̄хум мӯйлысыт, ма̄ньщи ма̄хманув тот о̄с ё̄мыгтасыт. Та̄нанылн ты ялпыӈ хо̄тал о̄с сака мӯстыс.

1128 2016. 07. 21. Валентина Хозумова

Мо̄т мирыт урыл о̄с ёмащакв вос хансэ̄гыт Ма̄н ӯсувн Москваныл ля̄ххал хаснэ нэ̄ ёхталас, наме Маргарита Лянге. Тав тот кӯщаиг рӯпиты, рӯпитан ма̄тэ тох ла̄ваве – Гильдия межэтнической журналистики России. Тав ля̄ххал тотнэ ма̄хум ёт Ханты-Мансийск ӯст хо̄нтхатыглас, та̄наныл ханищтасанэ – мо̄т мирыт урыл хумус хансуӈкв э̄ри, та̄н ул вос кантлэ̄гыт, халанылт юртыӈыщ пуссын вос о̄лэ̄гыт. Ань ма̄н о̄лнэ ма̄вт титса̄ттем (193) са̄всыр мирыт о̄лэ̄гыт. Нэ̄ ла̄выс, ань ка̄сыӈ мир урыл потыртаӈкв э̄ри ос та̄н тох суссылтаӈкв э̄ре̄гыт, ка̄сыӈ такви о̄лупсатэ янытлым о̄лы, о̄лнэхӯлнэ наканэ э̄лаль хумус тотыянэ. Та̄н потыртан ла̄тӈаныл мо̄тхурипат, э̄рганыл ос йӣкваныл са̄всырыт. Ты рӯпата ат те ва̄раве, то̄нт то̄ват та̄нтина̄ныл сака янытлаӈкв патыяныл. Акв хо̄тал тав ма̄н рӯпитан колувн щалтсас, ма̄н ётув потыртас. «Ханты ясаӈ» ос «Лӯима̄ сэ̄рипос» газетагув суссаге ос ла̄выс, ма̄н пе̄с щирыл рӯпитэ̄в, пе̄с щирыл нэ̄пакыг ва̄риягӯв. Газетаг мощ мо̄т щирыл ва̄руӈкв э̄ре̄г, тэ̄н рущ газета хурипаг вос о̄лэ̄г. Ня̄врамыт ма̄гыс ханищтан нэ̄пакыт хансум ханты э̄ква Евдокия Андреевна Нёмысова таве̄н ювле ла̄выс, ма̄н газетагув рущ хурипаг те ва̄раве̄г, то̄нт та̄рвитыӈ ловиньтаӈкв паты. Ос ань яныгпа̄ла ма̄хумн ловиньтаӈкв ёмас. Ёмас хурит тот ва̄равет, сунсыглаӈкв пӯмыщ. Ня̄врамыт ма̄гыс та̄ратан журналыг «Витсам» (ты ма̄ньщи журнал) ос «Хатлые» (ханты журнал») урыл ма̄хум о̄с потыртасыт. Татьяна Волдина ла̄выс, ты журналыг ёмасыг кос, ос ань та̄рапаттуӈкв э̄ри ма̄н яныт ня̄врамыт ма̄гыс ты нэ̄пакыг хансаве̄г. Ма̄нь ня̄врамыт ма̄гыс те та̄ртаве̄г, тот ма̄нь ва̄ти потырохсат хансуӈкв э̄ри. Яныгнув ня̄врамыт ма̄гыс ос мо̄т журнал ва̄руӈкв э̄ри. Атхатыглам ма̄хум са̄выӈпа̄лэ пуссын ла̄всыт, ань ма̄к яныг э̄рнэ рӯпата ща̄нь ла̄тӈыл ля̄ххалыт хаснэ ма̄хум та̄н ты ва̄ре̄гыт – ма̄ньщит ма̄ньщи ла̄тыӈ э̄лаль тотыяныл, А̄с ма̄хум ос та̄нти ханты ла̄тӈыл хансэ̄гыт. Ты ёмас рӯпата ёлпо̄илттаӈкв щар ат ро̄ви. Ма̄н ос ты урыл потыртасӯв, ань ма̄ньлат ма̄хманув халт ща̄нь ла̄тӈув мо̄рсыӈ хо̄тпа ва̄гтэ. То̄ват потыртэ̄гыт кос, ос ма̄ньщи ла̄тӈыл потрыт хансуӈкв ат ве̄рме̄гыт. Ёхталам кӯщай нэ̄ Маргарита Лянге ты урыл ювле тох ла̄выс: «Э̄лаль ты нэ̄пакыг та̄ратаӈкве номсэгы̄н те, на̄нан ма̄ньлат ма̄хум ма̄гыс матыр хансуӈкв ос матыр рӯпата ва̄руӈкв э̄ри. Ты рӯпата ва̄руӈкв ат те патылы̄н, то̄нт на̄н нэ̄пакын хотьютн ловиньтаӈкв патаве».

1128 2016. 07. 21. Николай МЕРОВ

Колта̄глыт янытлаве̄сыт О̄йттур э̄тпос хо̄тыт хо̄талэ̄т округувт са̄в та̄л аквъёт ёмщакв о̄лнэ нэ̄тхумит ма̄гылн тагатан по̄сыл Ханты-Мансийск ӯст майве̄сыт. Рущ щирыл ты по̄с «За любовь и верность» ла̄ваве. Тувыл ос Юван Шесталов, ма̄ньщи поэтув, намыӈ премияолныл соссаӈ хо̄тпат майве̄сыт. Ты кастыл ще̄мьяӈ ма̄хум «Югра-Классик» колн во̄выглаве̄сыт. Та̄наныл янытлаӈкв округ кӯщай нэ̄ Наталья Комарова тув ёхталас. Ма̄гыл по̄сыт минэ э̄лыпа̄лт округ кӯщай нэ̄ ла̄выс: «О̄йттур э̄тпос нёлоловит хо̄тал ще̄мьят янытлан хо̄талыг о̄лы. Пе̄с порат ты ялпыӈ хо̄талт а̄гитпыгыт акванминыгласыт, пӯри ва̄рыгласыт. Ам пуссын ще̄мьяӈ ма̄хум ты хо̄тал янытлыянум. Ма̄н ты тэ̄ла ӯргалан ма̄гыс са̄в э̄рнэ рӯпата ва̄ре̄в». Ёмас ще̄мьят ка̄сыӈ та̄л янытлавет. Ты хо̄тпат округувт ёмщакв о̄лнэ ма̄гыс са̄в рӯпата ва̄ре̄гыт. Та̄н халанылт то̄ват са̄в ня̄врамыӈ колта̄глыт. 2009 та̄л па̄сныл ань ты та̄л мус ниласа̄ткем хо̄тпат ма̄гылн тагатан по̄сыл майве̄сыт. Ты та̄л ос нёлса̄т нупыл акв ще̄мья ма̄гыл по̄сыл майве̄сыт. Ты Кондинский, Ханты-Мансийский районыгныл, Нягань, Урай, Югорск ӯсытныл о̄лнэ ще̄мьят янытлаве̄сыт. Ты хо̄тпат ханищтап, мир пусмалтан, кол ӯнттын ос мо̄т са̄всыр ма̄т рӯпитэ̄гыт. То̄ват пенсият о̄лэ̄гыт. Тувыл ань Юван Шесталов намыӈ премияолныл хӯрум хо̄тпа мӯйлуптаве̄сыт. Ты олныт 2012 та̄л па̄сныл та хо̄тпатын мивет, хотьютыт соссаӈ мир о̄лупса ос о̄лнэхӯлнэ нак э̄лаль тотым са̄в та̄л рӯпитэ̄гыт. Ань ты олныт ты нэ̄кветн майве̄сыт: Марина Александровна Горшкова, Ханты-Мансийск ӯст А̄сугорский ма̄ньлат ма̄хум организацият са̄всыр ма̄хум ёт юртыӈыщ о̄лнэ ва̄рмаль э̄лаль тотым рӯпитан нэ̄. Ты ма̄ньлат ма̄хум организация хо̄тхуйплов та̄лныл ос налыман нупыл ат та̄ланыл то̄влын ма̄ньлат хо̄тпат ёт рӯпитэ̄гыт. Ты хо̄тпат пе̄с йис о̄лупса, о̄лнэхӯлнэ нак ос ща̄нь ла̄тыӈ э̄лаль тотуӈкве нё̄тэ̄гыт; Наталья Владимировна Крюкова, Октябрьский район Шеркалы па̄вылт о̄лнэ ханты нэ̄. Тав Шеркалы па̄вылт пе̄с йис пормас атнэ колт са̄в та̄л рӯпиты. Йӣквнэ ос э̄ргын ма̄хум такви акванатсанэ. Ты коныпал А̄с ма̄хум ла̄тыӈ э̄лаль тотуӈкве нё̄ты. Наука ма̄гыс са̄в рӯпата ва̄ри. Финноугор мирыт атыт Конгрессаныл о̄лум порат тав о̄с мо̄т хо̄н ма̄н ялыс. О̄с мо̄т са̄в э̄рнэ рӯпата соссаӈ мирув ма̄гыс ва̄ри; Фаина Алексеевна Гизатуллина, Нижневартовский район Варъёган па̄вылт о̄лнэ нэ̄. Такви тыг ёхтуӈкве ат ве̄рмыс, кина суссылтан то̄тап хосыт потыртас. Ты хо̄тпа са̄в та̄л школат ня̄врамыт ханищтым рӯпиты. Тувыл А̄с ма̄хум о̄лнэхӯлнэ накыт э̄лаль тотыянэ. Кина суснэ то̄тап хосыт тав тот атхатам ма̄хумн щуньпаща ла̄тыӈ ке̄тыс. Рӯпататэ̄т янытлым ма̄гыс нэ̄ сака ща̄гтыс. Соссаӈ мир пе̄с йис о̄лупсаныл э̄лаль тотнэ ма̄гыс, тав округ кӯщай нэ̄н яныг пӯмащипа ла̄тыӈ ла̄выс. Мӯйлуптан ва̄рмаль а̄стлым юипа̄лт ма̄хум е̄ӈта па̄сан ва̄тан мувлахил ӯнтсыт ос ще̄мьянылт о̄лнэ ва̄рмалит урыл потыртасыт. Кӯщай нэ̄ ла̄выс, ты та̄л лӯпта э̄тпос хус хо̄талныл округувт а̄гмыӈмосыӈ ня̄врамыт ханищтан ма̄гыс са̄т кол рӯпатаныл о̄вылтасаныл. Ты ва̄рмаль Сургут ӯс реабилитационный Центр колт ва̄рвес. Ща̄ньа̄щ советыт рӯпитан хо̄тпат та̄наныл акваг тах уральтыяныл. Тыгыл э̄лаль ты ня̄врамыт ма̄гыс са̄внув ханищтахтын колыт иӈ щё̄питаӈкве тах патавет.

1128 2016. 07. 21. Валентина Васильева

Ам ё̄рнколт самын патсум Ты хум Ханты-Мансийск ӯсн ма̄щтырлаӈкв во̄выглавес. Тав ханты хо̄тпа, наме Павел Михайлович Тользин. О̄лупсатэ ос такви уре̄тыл тох потыртас: Ам Касум е̄рныл о̄лэ̄гум, тот 1959 та̄лт ё̄рнколт самын патсум. То̄нт омагума̄тягум са̄лыӈ колт яласасы̄г, па̄вылт ат о̄лсы̄г. Ам са̄лы ӯрнэ рӯпата ёмащакв ва̄глум, таима̄гыс школа а̄стламум юипа̄лт са̄лы уральтан хумыг (зоотехникыг) ханищтахтуӈкв минасум. Тувыл по̄йтсум, ювле па̄влумн ёхтысум, совхозт рӯпитаӈкв патсум. Мощ рӯпитасум, ос совхозув витыг та тотвес. Ам о̄лнэ колыт па̄лтыглан котельныйколн минасум. Тот рӯпитанэм сыс са̄лыӈ ма̄хманув палт таквсы ялантасум, са̄лыяныл уральтасанум. Нэ̄ тотсум, э̄квам ё̄рн нэ̄, наме Светлана Фёдоровна Вылла. Акванминасме̄н, хӯрум ня̄врам о̄ньщиме̄н, тит а̄ги, акв пыг. А̄гиягме̄н сас рӯпитэ̄г. Яныг а̄гиме̄н Наташа Сургут ӯс университет а̄стлас, тот рӯпитаӈкв хультыс. Хум ва̄рыс, о̄йкатэ казак. Ань тав ня̄врамыт касуӈкв ханищтыянэ. Котиль а̄гиме̄н Настя ань Ханты-Мансийск ӯсн ва̄нтлас, тыт хум ва̄рыс. О̄йкатэ – хо̄нтаӈ ма̄ньщи хум. Тэ̄н «То̄рум маа» музейт аквъёт рӯпитэ̄г. Ма̄нь пыгме̄н Дима нёлолов класс а̄стламе юипа̄лт Нижневартовск ӯсн минас, тот строительный техникумт ханищтахты. Э̄квамн ос пенсиян минуӈкв кос ро̄ви, ос тав ла̄ви – пыгме̄н ханищтахтуӈкв хунь а̄сты, то̄нт ущ пенсиян мины. Ма̄н пе̄с рӯтанув Куноват нампа ма̄т о̄лсыт. Ам та ма̄ амти нупылум хансуӈкв таӈхыслум кос, ос нэ̄паканум атуӈкв хунь патсанум, ла̄вве̄сум – ты ма̄ Ямал нупыл хансым о̄лы. Ань нас тув ялантэ̄гум. Тот ма̄н ащо̄йкав колта̄глэ ёт о̄лыс. Та̄н ще̄мьянылт са̄в ня̄врам яныгмасыт. Тав щар ма̄ниг о̄лыс, таима̄гыс тох ла̄ввес – Ай Митрий, ма̄нь Митрий, сака ёмащакв ма̄щтырлаӈкв ха̄сыс. Са̄лы сун ва̄рыс, йӣвныл матыра̄ти ёргуӈкв ха̄сыс. Сараныт тав палтэ ёхтэ̄гыт, халанылт пе̄нтхатэ̄гыт – ащо̄йкам та̄нанылн са̄лы сун мыг, та̄н ос са̄лы ювле мыгыт. Акв та̄л ам та ма̄ о̄с уральтаслум, янытэ̄т йӣвытн лапяныгмавес. Ам нэ̄ тотмум па̄сыл юн туп рущ ла̄тӈыл потыртэ̄в, э̄квам – ё̄рн хо̄тпа, ханты ла̄тӈув щар ат ва̄гтэ. Мощ торгамты, потыртаӈкв ат ве̄рми. Ам ос ё̄рн ла̄тыӈ ат ва̄глум. Ня̄враманме̄н ёт туп рущ ла̄тӈыл потыртасме̄н. Ань та̄н ме̄н нупыламе̄н кантлэ̄гыт, манрыг ханты ла̄тӈыл потыртаӈкв ат ханищтасанме̄н. Ам омагума̄тягум хоса ат о̄лсы̄г, э̄квам ос ляпа рӯтанэ холасыт. Ань туп акв э̄щум са̄лыӈ колт яласы. Ма̄н тай пуссын па̄вылт о̄лэ̄в, са̄лы ат о̄ньще̄в. То̄ванакт тыи ма̄гыс сымум татем ща̄рги, ам са̄лыӈ колт яныгмасум, са̄лыт сака э̄руптыянум. Ма̄н яныгмамув порат хантыт, сараныт пуссын акв пирка̄тат яласасыт. Та̄н ма̄н ла̄тӈув ва̄ганыл, ма̄н ос саран ла̄тыӈ ва̄глӯв. Ёмащакв о̄лсӯв, яныгмасӯв. Ань тыг мус ма̄н, са̄лыӈ колт аквъёт яныгмам ня̄врамыт, халувт юртыӈыщ о̄лэ̄в. Ам ма̄нь та̄гыл хӯрум ла̄тӈыл потыртаӈкв ха̄ссум – ща̄нь ла̄тӈыл, саран ос рущ ла̄тӈыл. Ща̄нь ла̄тӈум мощ мо̄т щирыл суйты, Касум па̄вылт о̄лнэ хантыт то̄ват а̄нум ат торгамтыяныл, ла̄ве̄гыт – то̄ва ла̄тӈыт щар хащта̄лыт, ат торгамтахтэ̄гыт. Ам амти ла̄тӈум тох ла̄ваве – «приуральский». Ямалт Нё̄ранув ляпат о̄лнэ хантыт тох потыртэ̄гыт. Ам ань Касум ма̄хум ла̄тӈанылн ханьщувласум, та̄н щиранылт потыртэ̄гум.

1128 2016. 07. 21. Людмила ТЕТКИНА

Во̄раяӈкве ха̄снэ нэ̄ Наталья Рогалева, такви о̄парищ наме Тасманова, Ха̄льӯс район Ня̄хщамво̄ль па̄вылт о̄лы. Ща̄нь ла̄тӈыл потыртаӈкве ёмащакв ха̄сы. Тав уре̄тыл газетат ма̄н потыр хансыгласӯв. Ма̄ньщи нэ̄ во̄раяӈкве ос хӯл алыщлаӈкв о̄йкатэ ёт яланты. Наталья ва̄с па̄тлупты ос ӯйхул ка̄тынпаттыглы. Тав ла̄выс: «О̄йкаме̄нтыл во̄раян ма̄гсыл са̄всыр э̄рнэ нэ̄пакыт о̄ньщиме̄н ос лицензиянэ̄пак ёвтыме̄н. Со̄руп ка̄тынпаттын ма̄гсыл лицензиянэ̄пак тынэ ат со̄тыра солко̄ви. Акв порат Лёша о̄йкам ёт во̄рн минасаме̄н. Во̄рт ё̄мыгтым, ӯщлахтуӈкве ӯнтсуме̄н. Ща̄й аиме̄н, со̄руп ме̄н нупыламе̄н та нэ̄глыс. Лёша писаль а̄лмаястэ, а̄нумн ла̄ви: «Писаль вуе̄лн, патамтэ̄лн. Ам тай тув мус рохтысум, писаль ат э̄рыс, нэ̄матыр ат э̄рыс. Тох аквмат ӯнлахо̄лым, янгуюм во̄рн та минас. Ань тыг мус во̄рт ха̄йтыгты. О̄йкам ты юипа̄лт мовиньтым ла̄выс: «Наӈ янгуй ка̄тынпаттуӈкве тахсын ос манрыг акв ма̄т ӯнлахо̄лэ̄гын. Ань минэ̄н, ха̄йтэн, юил ёхтэ̄лын». Мо̄т щёс со̄рупын нэ̄главем, воссыг тох ат рохтэ̄гум, ё̄р хо̄нтэ̄гум, па̄тамтылум». Ма̄ньщи нэ̄ а̄ти туп во̄раяӈкве ве̄рми, тав са̄в пӯмащ потыр ос мо̄йт ва̄г, мо̄йтуӈкве сака ха̄сы. Тав а̄ще Владимир Николаевич Тасманов са̄в пе̄с потыр ос мо̄йт ва̄с. Наталья ма̄ньщи газета ма̄гсыл акв пӯмащ потыр потыртас: Ты потыр а̄щум потырта̄лыс. Нё̄рахи па̄вылт акв хум о̄лыс. Па̄влыӈ ма̄хум таве пуссын Венькаг ла̄выгласаныл. Акв порат Венька во̄рт ма̄нь во̄рап пувыс. Во̄рапе юв тотыстэ, юн о̄ньщуӈкве патыстэ. Ӯйрищ юн о̄лым, Венька палт ханьщувлам. Колыл ва̄рыстэ. Колэ ёлыпа̄лт а̄нысуп ӯнттыс. Во̄рапе па̄кв тэ̄г, па̄квсаманэ хаслы ёлыпа̄лн тӯйтыянэ. Па̄квсамыт ёлаль а̄нысупын та патыглэ̄гыт. Венька атуӈкве туп а̄лыми. Хурыг сове па̄квсамыл та̄глэ. Во̄рапе тай кӯняр, та рӯпиты, та рӯпиты. Венька ӯйрище ла̄гле ква̄лгыл нэ̄гсаластэ. Во̄рапе рӯпитаӈкве хунь ва̄гта̄л паты, кон тотытэ. Ӯйрищ э̄лаль тыламлаӈкве кос кусыглы, Венька ква̄лге ювле хасумтытэ. Во̄рапе ювле та ёхтыгпи. Ква̄лгыл нэ̄гсалым о̄ньщастэ, э̄лаль тыламлаӈкве ат ве̄рмыс. Тувыл юв о̄с та тотаве. Юв тотаве ос ва̄рим колн ӯнттыгпаве, рӯпитаӈкве о̄с та о̄вылтахты. Венька во̄рн ха̄йтталы ос па̄кв юв тоты. Во̄рапе ос та па̄квсамыт хаслы ёлыпа̄лын тӯйтыянэ. Па̄квсамыт ос а̄нысупын та патыглэ̄гыт. Во̄рапе тох акваг па̄квсамыт тӯйтыглым, нёлэ та̄л та хультыс. Тыщирыл Венька во̄рап та саватастэ. Венька тай та̄л сыс па̄квсамыт та̄йим о̄лыс. Венька хосат а̄тимыг е̄мтыс. Ты потыр а̄щум потырта̄лыс. Наталья щаще̄кватэ ёмащакв номитэ. Тав ма̄ниг хунь о̄лыс, щаще̄кванылн ӣтипа̄лаг мувиньтаӈкве щар ат та̄ртве̄сыт. Наталья ты урыл о̄с акв потыр номылматас. Щаще̄квам Ме̄ӈкв урыл потыр акваг потырта̄лыс. Тав ла̄выглас, со̄ль пилата̄лвес. О̄пам во̄раим яласас, щаще̄квам ос ня̄враманэ ёт юн такке̄т хультыс. Кон нила кӯтюв о̄лыс. Аквматэ̄рт кӯтьванэ пуссын хортуӈкве та патсыт. Та хортэ̄гыт, та хортэ̄гыт. Щаще̄квав хотрохтыс, тувыл а̄витэ мощ па̄лыгпӯнсыстэ. Кол по̄хыт яныг хо̄вт яныгмас. Ты хо̄вт тапалт яныг Ме̄ӈкв лю̄лис. Кӯтьванэ та хортэ̄гыт, та хортэ̄гыт. Щаще̄квав ущпыл хотрохтыс, тувыл ма̄ньщи ла̄тӈыл ла̄выстэ: «Ята минэн, а̄нум ул нове̄лын, минэн, ня̄враманум иӈ ма̄нит». Самаге та янытыг, э̄рттум кит яныг а̄нысупыг. Ме̄ӈкв мощ лю̄ляхо̄лас, сысы та минас. Мо̄тыт хо̄тал мощ турманлас, кӯтьванэ хортуӈкве та патсыт. Щаще̄квав а̄витэ мощ па̄лыгпӯнсыстэ, сунсы, Ме̄ӈкв ос та ёхтыс, яныг хо̄вт тапалт о̄с та лю̄ли. Щаще̄квав о̄с ла̄выс: ««Ята минэн, а̄нум ул нове̄лын, минэн, ня̄враманум иӈ ма̄нит». Хӯрум хо̄тал Ме̄ӈкв тох ёхталас. Ос та яныг хо̄вт сыспа̄лт лю̄лис, кол нупыл сунсыс. Ам иӈ ма̄ниг о̄лсум, хунь щаще̄квам ты потыр потырта̄лыс, тувыл сака ёмащакв номилум. Ща̄нюм ты потыр урыл китыгласлум, со̄ль щаще̄квав Ме̄ӈкв ва̄стэ. Ща̄нюм ювле ла̄выс: «Щаще̄кван акваг ты потыр потырта̄лыс, улпыл, со̄ль ва̄стэ».

1128 2016. 07. 21. Светлана РОМБАНДЕЕВА

Соссаӈ хум хо̄тпаг Яныгпо̄ль э̄тпост Ханты-Мансийск ӯст Ӯринэ̄ква хо̄тал ва̄рыглавес. Та порат ам соссаӈ ма̄хум ёт хо̄нтхатыгласум, по̄слысанум, потраныл ёлхассанум. На̄н ань кит хумыг о̄вылтыт ловиньтэ̄н. Ма̄ньщи пыг Константин Вадимович Назаров ма̄ньполь э̄тпос атыт хо̄талэ̄т 1993 та̄лт Ижевск ӯст самын патыс. Тав такви уре̄тыл мощ потыртас: Омам Людмила Николаевна, ма̄ньщи нэ̄, а̄ги о̄парищ наме Гындыбина, Ха̄льӯс район Кимкъясӯй па̄вылт самын патыс. Тюмень ӯст о̄лнэ медицинский институтт яныг ле̄ккарыг ханищтахтас. Ань Кульпас пӯльницат рӯпиты. А̄тям Вадим Алексеевич Назаров, тав Бугурусланский авиационный техникумыт ханищтахтас, мощ ётылнуве юил ялантым Ульяновск ӯст авиационный институт а̄стлас. Ань товлыӈха̄пыл щуртым яласы. Тэ̄н Ха̄льӯст акванхо̄нтхатсы̄г, омам тот пӯльницат рӯпитас, а̄тям ос тув мус товлыӈха̄пыл яласас. Тувыл а̄тям рӯпататэ щирыл Ижевск ӯсн ке̄твес, омам ёт тув ва̄нтлысы̄г, ам тот ты самын патсум. Э̄щ о̄ньще̄гум, наме Света, Кульпас школат аквхуйплов классыт ханищтахты. Кульпаст ане̄квам о̄лы, Ульяна Павловна Гындыбина. Тав школат са̄в та̄л ня̄врамыт ханищтым рӯпитас, пенсиян минас. Тот Витя сасгум ще̄мьяӈ та̄гыл о̄лы, хо̄т ня̄врам о̄ньщи. О̄пагмщаще̄квагум ос а̄тям Самарский область Кротовка па̄вылт о̄лэ̄гыт. О̄пам Алексей Александрович Назаров трактористыг рӯпитас. Щаще̄квам Анна Семёновна, са̄в та̄л ма̄нь ле̄ккарыг рӯпитас. Тэ̄н ань сас пенсият о̄лэ̄г. Ам Самара ӯст авиационный техникум а̄стласум. Тувыл э̄лаль ханищтахтуӈкве э̄рыс кос, ос ань ка̄сыӈ экзамен ма̄гыс са̄в олн ойтуӈкве э̄рыс. Ам хотыл та са̄вит олн выгум, ща̄ньа̄щагумтыл акваг хунь во̄вуӈкве патэ̄гум. Тувыл ханищтахтуӈкве та по̄йтсум. Ань Транснефть «Приволга» компаният ма̄во̄й со̄сантым рӯпитэ̄гум. Ты накт отпускат о̄лэ̄гум, омам ос ане̄квам палт Кульпасн ялсум. Тот китах са̄т о̄лсум, ма̄хманум пуссын ва̄санум, мощ мӯйлысум. Тыт о̄с рӯтанум о̄лэ̄гыт, Витя сасгум а̄гияге, Настя ос Аня. Тувыл тэ̄н каӈке̄н Сюнер Анышев ос юртум Юра Ильин. Ма̄н ань тыт пуссын аквъёт ё̄мыгтэ̄в, пӯмщалахтэ̄в, са̄всыр музеитын ялсӯв. Мо̄лхо̄тал «То̄рум Маа» музеин ялсӯв, тот сыресыр конкурсыт ва̄рыглаве̄сыт, ёнгасасӯв, ӯйрищ пити ва̄рсӯв, сака пӯмыщ о̄лыс. Ма̄н соссаӈ ма̄хманув алыщлапаныл суссылтаве̄сыт, о̄лнэ коланыл, ха̄паныл, а̄ныса̄наныл та маныр. Тот маттем та ё̄мыгтасӯв, сунсыглахтасӯв, пӯмыщ потрыт хӯнтлысӯв. Китыт хум Ефим Андреевич Рынков, ханты хо̄тпа, 1980 та̄лт Сургутский район Лямино па̄выл ляпат са̄лыӈ колт самын патыс. Такви уре̄тыл аквкит ла̄тыӈ ла̄выс: Ты ӯсын ам кӯщаюм ёт ёхтысум, наме Клим. Ӯринэ̄ква хо̄тал кастыл ме̄н тыг са̄лыянме̄н тотсанаме̄н, ань мӯй ма̄хум та̄н ётаныл ты по̄слахтэ̄гыт. Ам ще̄мьяӈ та̄гыл са̄лыӈ колт о̄лэ̄гум, хус арыгтем са̄лы о̄ньще̄в. Э̄кваме̄нтыл хӯрум ня̄врам о̄ньщиме̄н, та̄н пуссын Лямино па̄вылт ханищтахтэ̄гыт, интернатыт о̄лэ̄гыт. Тув мус яныгса̄т са̄виттем ве̄рыста минуӈкве э̄ри. Ам ща̄нягума̄щагум са̄лы ӯрим во̄рт тот тармыл о̄лэ̄г. Ма̄н пуссын ма̄нти маснутанувтыл о̄лэ̄в, ханты ла̄тӈыл потыртэ̄в. Ты хум хо̄тпаг колта̄гланэ̄н ам са̄в ёмас, сымыӈ ла̄тыӈ ла̄ве̄гум. Ты я̄тил соссаӈ ма̄хманув пуста̄гыл вос о̄лэ̄гыт, На̄й-О̄тыранылн вос ӯргалавет!

1128 2016. 07. 21. Николай МЕРОВ

Пе̄с йис ва̄рмаль э̄лаль тотаве Ты туи ма̄щтырлан ма̄хум Урай ӯст касуӈкве акванатхатыгласыт. Пыть-Ях ӯсныл ханты нэ̄ Наталья Поянкина Маша апге ёт о̄с тув ёхталасы̄г. Тэ̄н тот хорамыӈ ва̄рим э̄нтапква̄лыг сэ̄тапыл сагсы̄г. Ам Наталья Кононовна такви рӯпататэ урыл китыгласлум, нэ̄ ты урыл потыртас. Тав пе̄с йис пормас атнэ колт рӯпиты. Тот ня̄врамыт сэ̄тапыл сагуӈкве, ка̄тыл хурит по̄слуӈкве, маснут ю̄нтуӈкве ос сакныл хорамыт хартуӈкве ханищтыянэ. Ты коныпал тав школат ханищтапыт ва̄рыглы. Нэ̄ ва̄тихал са̄всыр конференциятын, суссылтапытын ос са̄всыр ялпыӈ хо̄талытын мӯйлуӈкве во̄виньта̄лаве. Та̄н музеяныл 2007 та̄лт рӯпитаӈкве патыс. То̄нт ты ва̄рмаль э̄лаль тотнэ ма̄гыс ӯс кӯщай Валерий Веснин яныг нё̄тмил ва̄рыс. Ты пе̄с йис пормас атнэ кол ӯс ляпат ӯнттувес. Ня̄врамытын тот ӯщлахтуӈкве сака мӯсты. Тот та̄н соссаӈ мир о̄лупса ос о̄лнэхӯлнэ накыт ханищтэ̄гыт. То̄ва хо̄тпат ӯщлахтуӈкве ще̄мьяӈ та̄гыл тув ёхталэ̄гыт. Та̄н ма̄гсыланыл са̄всыр пӯмащ соссаӈ мир касылыт щё̄пита̄лавет. Тот пуссын колыт хо̄тал нэ̄глын е̄рт о̄лнэ ханты ма̄хум о̄лупсаныл щирыл ӯнттуве̄сыт. Ты о̄лнэ кол, ма̄нькол, хӯрум сӯмъях, хӯл посымыл понслан па̄рткол, алыщ пормасыт о̄щнэ а̄мпар ос ня̄нь кӯр. Туи порат ӯщлахтуӈкве тув са̄в мир атхатыглы. Мӯй ма̄хум ма̄гыс акваг тот соссаӈ мир о̄лупса урыл потыртаве. Тот пуссын аквъёт атса̄ткем са̄вит са̄всыр пормас о̄лы. 2010 та̄л па̄сныл тот «Ювле хультум ва̄рмаль номылматыглэ̄н» нампа суссылтап рӯпитаӈкве патыс. Тот Пётр Семёнович Бахлыков, Сургутский район Угут па̄выл музейт рӯпитам о̄выл кӯщай, ка̄тыл по̄слум хуриянэ суссылтавет. Тав рӯпатанэ Москва ӯс Третьяковский галерея колн тотыглаве̄сыт. Ты хум ювле хультум нотт нёлса̄т та̄лытт намыӈсуиӈыг е̄мтыс. Ма̄щтыр о̄йка хуриянэ мо̄т хо̄н ма̄н о̄с тотыглаве̄сыт. Хуриянэ коныпал музейт ханты ма̄хум о̄ньщигла̄лум са̄всыр пе̄с йис пормасыт атыс. Тав хо̄тал нэ̄глын е̄рт о̄лнэ ханты ма̄хум о̄лупса э̄лаль тотыс. Ань Наталья Кононовна рӯпитан музеет ма̄щтыр хо̄тпат во̄руй со̄вныл са̄всыр хурит ос пе̄с йис пормасыт ва̄рсыт. Ярмаркат о̄лыглан порат, тот ка̄тыл ва̄рум утаныл суссылтыяныл ос тыналыяныл. Аквматнакт ӯст о̄лнэ мир ма̄гыс пе̄рияп щё̄пита̄лвес. Пыть-Ях ӯст щар маныр ёмас ва̄рмаль о̄лы, та̄н ка̄тпос пинсыт. Ма̄хум пуссын ты музей пе̄риясаныл. Тамле ты ёмас ва̄рмаль о̄лыс. Ань Наталья Кононовна Маша апге ханищтытэ. Ма̄нь а̄гикве ханты ма̄хум йис о̄лупса э̄лаль тотнэ щирыл рӯпитаӈкве таӈхи. Урай ӯс касылыт Наталья Кононовна сагнэ ва̄рмаль щирыл китыт местал майвес. Касылт ма̄хум халт Маша щар ма̄ниг о̄лыс, э̄нтапква̄лыг сагме ма̄гыс тав о̄с янытлан нэ̄пакыл майвес.

1128 2016. 07. 21. Людмила ТЕТКИНА

Но̄хпатум ма̄ньлат пыг Ты э̄тпос о̄вылтахтам порат Нефтеюганский район «Сказка» нампа ӯщлахтын ма̄т соссаӈ ма̄хум ма̄ньха̄пыл касуӈкве акванатхатыгласыт. Каснэ ва̄рмаль ка̄сыӈ та̄л о̄йттур э̄тпост ва̄рыглаве. О̄выл хо̄талэ̄т нэ̄ хо̄тпат та̄нки халанылт кассыт ос та̄н юипа̄ланылт хумыт пуссын товсыт. Хум хо̄тпат халт о̄выл места Виталий Русскин вис. Тав Сургутский район Русскинской па̄вылныл тув ёхталас. Ма̄ньла̄т ханты пыг ты та̄л ва̄т нупыл кит та̄лэ то̄влыс. Тав ща̄нягеа̄щаге ёт во̄рт о̄лы. Ханищтахтын поратэ ёхтумет пыгрищ Русскинской па̄вылн ке̄твес. Тот тав интернатыт о̄лыс. Ӯщлахтын порат ща̄нягеа̄щаге палт ёхталас. Школа а̄стламе юипалт лусытаӈкве ялыс. Ань ма̄во̄й но̄хвинэ компаният рӯпиты. Виталий а̄тятэ ёт во̄раим ос хӯл алыщлым акваг яласы. Ты каснэ ва̄рмаль урыл тав таи ла̄выс: «Ма̄нь порат а̄тямн ма̄ньха̄пыл ва̄рве̄сум, ам тав ётэ хӯлпыт сунсуӈкве ялантасум. Мощ яныгмасум, а̄тямн мо̄т ма̄ньха̄пыл ва̄рве̄сум. Ма̄н о̄лнэ ма̄вт ханты ма̄хум ха̄пка йӣвныл манос ӯлпаныл ха̄п ва̄ре̄гыт. Тамле яласан ут а̄тям ва̄руӈкве ёмащаквег ха̄сы. То̄ват мощ яныгнуват, то̄ват мощ ма̄ньнувег ос ощщаг ва̄равет. Тамле ха̄п ам ёт касуӈкве тотыслум, ты утыл пе̄лпыщ нуйхатуӈкве ро̄ви. Ма̄ньха̄пыл яласаӈкве ха̄суӈкве э̄ри. По̄х хо̄тпа ты ха̄пын ке ӯнты, та̄ра е̄ри ёӈхи. Мо̄лты та̄л о̄лыглам касылт ам о̄с но̄хпатсум. То̄нт ам тыг нас пӯмащ ма̄гсыл ёхталасум, аты номсысум, мо̄т хо̄тпат халт но̄хпатэ̄гум. Ты та̄л тыг миннэ э̄лыпа̄лт ам мӯсхалыг щё̄питахтасум, ка̄сыӈ хо̄тал ма̄ньха̄пыл товыгтасум, тыи ма̄гсыл ань ща̄гтым о̄лэ̄гум». Виталий ос ла̄выс, таве̄н касуӈкве сака мӯстыс, ань ма̄ньлат пыг э̄лаль каснэ тэ̄ла щирыл рӯпитаӈкве номсы.

1128 2016. 07. 21. Людмила Теткина

Тав ю̄нсхатуӈкве ос во̄раяӈкве ха̄сы Нина Николаевна Загайнова ёт ам Советский район «Таёжные знания коренной Югры» нампа ханищтапыт ва̄йхатасум. Тот тав со̄втыт ос мо̄т са̄с хусапыт ма̄хум ю̄нтуӈкве ханищтасанэ. Ма̄ньщи нэ̄ Саранпа̄вылныл тув ёхталас. Па̄вылт тамле ханищтапыт о̄лыгланэ̄ныл порат Нина Николаевна акваг тув во̄виньта̄лаве. Мо̄т ма̄н ма̄хум ханищтаӈкве тав о̄выл щёс ёхталас. Ам таве китыгласлум, хотьютын ма̄щтырлаӈкве тох ханищтавес. Ма̄ньщи нэ̄ ювле ла̄выс: «Ам ма̄щтырлаӈкве омамн Агафья Кирилловна Вьюткинан ханищтаве̄сум. Тав матыра̄ти пуссын ва̄руӈкве ха̄сыс, сака ма̄щтыр хо̄тпаг о̄лыс. Омам ма̄ньщи супыт, пӯркат, ва̄ит ос мо̄т маснутыт ю̄нтыс. Ма̄н ань тамле порат о̄лэ̄в, пуссын рущ маснутыл ё̄мыгтэ̄в. Омам ла̄пкат туп то̄р ёвтыглас, маснут пуссын такви ю̄нтыс. Ам ма̄ньщи супыт, пӯркат ос мо̄т ма̄ньщи пормасыт ю̄нтуӈкве о̄с ха̄сэ̄гум. Ма̄ньнувег о̄лсум, сакныл са̄всыр турло̄псыт, пальсакыт ос мо̄т утыт хартсум, ань самагум лю̄льсаӈ на̄ӈке̄г, тамле утыт воссыг ат ва̄ре̄гум. Акв порат омам а̄нумн ма̄нь со̄вт мис. Ла̄выс, ты со̄вт ам ат та̄л яныт порат ю̄нтыслум. Ань ты ма̄нь со̄втрищин тулё̄влум ат ла̄пи. Ма̄нь порат ва̄рум со̄втум омам са̄в та̄л такви тучаӈе̄т о̄ньщастэ». Ханищтап лӯпта э̄тпост о̄лыс. Та э̄тпос о̄вылтахтан порат са̄с нуяве. То̄нт Павел Кириллович Дунаев ханищтап ма̄гсыл са̄с во̄рныл тотыс. Нина Николаевна манхурип рӯпата ханищтапыт ва̄рыс, та урыл китыгласлум. Тав ла̄выс: «Ханищтап ма̄гсыл Павел Кириллович ёмас са̄с тотас. Тав ты ма̄ныл о̄лы, ёмащакв ва̄гтэ, хоты во̄рт ёмас ха̄ль яныгми. Ма̄н нё̄р по̄хат о̄лэ̄в, о̄лнэ ма̄вт сака са̄в я̄ӈкылма о̄лы. Тот яныгман ха̄ль са̄сэ лю̄ль, та̄ра маныгтахты. Я̄ ва̄тат яныгман ха̄ль са̄сэ ёмаснув. Ханищтапын ёхталам ма̄ньщи нэ̄т та̄нки пуссын со̄втыт ю̄нтуӈкве ха̄сэ̄гыт. Та̄н ос оманылна̄тянылн ма̄ньта̄гыл ханищтаве̄сыт. Тыт о̄лнэ ма̄ньщит со̄втыт ля̄мйӣв сӯлныл ю̄нтэ̄гыт, ма̄н ос та̄ныл ю̄нтэ̄в». Нина Николаевна Марина ма̄нь а̄гитэ тав ётэ о̄с ёхталас. А̄гирище ос оматэ ёт ю̄нсхатас. Ма̄ньщи нэ̄ ма̄нь а̄гитэ ма̄ньта̄гыл ма̄щтырлаӈкве ханищтытэ. Тав са̄сныл со̄вт ю̄нтыс, а̄гитэ о̄с са̄сныл матыр ва̄рыс. Нина Николаевна ю̄нсхатас, Марина ос а̄кань ю̄нтыс. А̄гирищ оматэ по̄хыт о̄лы, ма̄ньщи ла̄тыӈ акваг хӯлы. Ща̄нь ла̄тӈе ёмащакв торгамтытэ. Ка̄сыӈ туи Марина «Ма̄нь Ӯскве» нампа ӯщлахтын ма̄н яланты. Мо̄лты та̄л Нина Николаевна о̄йкатэ ёт ня̄врамыт ӯщлахтын ма̄т рӯпитасы̄г. Тэ̄н «Кочующая» нампа смена о̄лум порат Сакв я̄ алгаль 27 ня̄врам тотыгласанэ̄н. Ты ва̄рмаль урыл тав таи потыртас: «Ме̄н Сергей о̄йкаме̄нтыл «Ма̄нь Ӯскве» ӯщлахтын ма̄т о̄выл щёс рӯпитасме̄н. Ня̄врамыт ёт ма̄н Сакв я̄ хосыт аквхуйплов хо̄тал яласасӯв. Ты пора сыс хо̄т хо̄тал раквыс. Ма̄н тув нила ха̄пыл минасӯв. Та ня̄врам, хотьют юв воратаӈкве паты, акв ха̄пув щё̄питым о̄лыс. Нэ̄мхотьют юв ат воратас, пуссын аквъёт юв ёхтысӯв. Ня̄врамытын тув я̄ хосыт ялуӈкве сака мӯстыс. Та̄н ётаныл хӯл алыщласӯв. О̄йкам а̄гирищитпыгрищит ёт са̄всыр пусмалтан лӯптат атсыт. Та ма̄т тамле лӯпта са̄в яныгми. Манхурип лӯпта манырсыр а̄гм пусмалты, тав ты урыл сака са̄в ва̄г. Юн са̄всыр пусмалтан лӯптат урыл са̄в нэ̄пак о̄ньщиме̄н. «Ма̄нь Ӯсквет» рӯпитан ма̄хум ла̄ве̄гыт, 2017 та̄лт ня̄врамыт Со̄рахта я̄ хосыт минэ̄гыт. То̄нт ня̄врамыт ёт рӯпитаӈкве ме̄наме̄н о̄с во̄ве̄гыт. Ме̄н о̄йкаме̄нтыл та я̄ хосыт во̄раян ма̄ о̄ньщиме̄н». Нина Николаевна о̄йкатэ ёт Саранпа̄вылт акванхо̄нтхатсы̄г. Сергей Тюмень ӯсныл на̄й харыгтан хо̄тпаг тув рӯпитаӈкве ке̄твес. О̄йкатэ Волгоград ӯсныл о̄лы. Ростовна-Дону ӯст техникум а̄стламе юипа̄лт Тюмень ӯсн рӯпитаӈкве минас. Тот тав во̄рт на̄й харыгтым рӯпитас. Ма̄ньщи нэ̄ Сӯкыръя па̄вылт самын патыс. Школа Саранпа̄вылт а̄стлас, Сургут ӯсн тэ̄нут тыналан нэ̄г ханищтахтуӈкве минас. Акв та̄л арыгкем тот ла̄пкат рӯпитас. Тувыл яныгмам ма̄тэ̄н ювле ёхтыс. Тот ла̄пкат тэ̄нут тыналым рӯпитас. Ань о̄йкатэ̄нтыл сас пенсият о̄лэ̄г. Саранпа̄вылт хоса ат о̄лэ̄г, во̄раим ос хӯл алыщлым акваг яласэ̄г. Нина Николаевна ты урыл ла̄выс: «Ме̄н о̄йкаме̄нтыл Со̄рахта я̄ ва̄тат во̄ркол о̄ньщиме̄н. Тот тэ̄лы сыс о̄лыме̄н, лэ̄с ӯнттуӈкве ос сунсуӈкве ялантыме̄н. А̄лпыл но̄хква̄лыме̄н, кон иӈ турман, лэ̄сыт уральтаӈкве миныме̄н, ӣтипа̄лаг туп ювле ёхтыме̄н, хо̄тал палыт во̄рт ё̄мыгтыме̄н. Акв хо̄тал сыс нёлолов манос лов ве̄рыста ё̄миме̄н. Тӯя порат ва̄с ос мо̄т товлыӈ ӯй па̄тлуптыме̄н. Хӯл алыщлым тот яласыме̄н. Нё̄влил, хӯлыл, ва̄сныл са̄всыр тушёнка па̄нкат па̄йтэ̄гум. Ам хӯрум писаль ос са̄всыр патроныт о̄ньще̄гум. Па̄тлуптаӈкве ёмащакв ха̄сэ̄гум. Писаль о̄щнэ ма̄гсыл са̄всыр э̄рнэ нэ̄пак ва̄рсум. Тӯяг ва̄сыт ёхтын порат путёвканэ̄пак выгум ос янгуй ма̄гсыл лицензия ёвтэ̄гум. 2000-2004 та̄л порат ам «Сыгва» нампа общинат во̄раян хо̄тпаг рӯпитасум. Община кӯщаиг Надежда Геннадьевна Алексеева о̄лыс. То̄нт ма̄н план щирыл рӯпитасӯв». Нина Николаевна оматэ хольт ма̄щтырлы, ма̄ньщи супыт ос мо̄т пормасыт ю̄нты. А̄тятэ хольт во̄раяӈкве ос хӯл алыщлаӈкве ве̄рми. Ма̄ньщи нэ̄ ёмащакв э̄ргуӈкве ха̄сы. Тав увщиянэ ёт ос Ольга Владимировна Лелятова ёт «Э̄ргин сым» нампа ансамблит э̄рги. Па̄вылт ялпыӈ хо̄талыт о̄лыглан порат та̄н э̄ргуӈкве акваг во̄выглавет. Ма̄ньщи нэ̄ о̄йкатэ̄нтыл нила ня̄врам о̄ньще̄г. Яныг а̄гитэ̄н Агафья ще̄мьяӈ та̄гыл Ханты-Мансийск ӯст о̄лы. Саша ос Ваня пыгаге̄н Саранпа̄вылт о̄лэ̄г. Ма̄нь а̄гитэ̄н Марина школат иӈ ханищтахты. Тамле ка̄ркам ос ма̄ньщи пе̄с йис ва̄рмалит э̄лаль тотнэ ще̄мья Саранпа̄вылт ты о̄лы.

1128 2016. 07. 21. Николай МЕРОВ

Нягань ӯст о̄лнэ ма̄щтыр о̄йка Александр Иванович Синицын Нягань ӯст о̄лы. Тав Кировский областит Николаевский па̄вылт самын патыс. Тот яныгмас, школа а̄стлас. Ётылнув училищат механизаторыг ханищтахтас ос рӯпататэ щирыл лӯима̄н ёхтыс. Ты ма̄ таве̄н сака мӯстыс. Ювле такви ма̄тэ̄н о̄луӈкве воссыг ат минас, тыт хультыс. Ань ня̄врамыт нилахуйплов та̄ланыл то̄влын порат ущ касаил матыр ёргуӈкве та̄ртавет. Ты хум йӣвныл са̄гырхатуӈкв ос ёрыгхатуӈкв таквина̄тэ номнэ па̄сныл ханьщувлас. Школат ханищтахтаме порат мо̄т пыгыт ёт йӣвныл телескоп ос мо̄т са̄всыр э̄рнэ утыт та̄нки ва̄рсыт. Нёлоловит классыт ос на̄иӈтуйт такви ёргыс. Тав а̄ще яныг хо̄нтыт хо̄нтлыс. Таима̄гыс та порат яныгмам пыгыт йӣвныл са̄всыр писалит ва̄рсыт. Ты ка̄ркам пыг писалит о̄с ёргыс. Ма̄щтырыг ёрыгхатнэ̄тэ ма̄гыс, юртанэ таве̄н акваг писаль ва̄рылтасыт. Ётылнув, хунь мощ яныгнувег е̄мтыс, тэ̄нут пиннэ а̄ныт, ня̄лыт, уласыт, пе̄ринат, матыра̄ти пуссын ва̄руӈкве патыс. То̄нт тав Нягань ӯст о̄лнэ ялпыӈкол ма̄гыс хорамыл яктым пӯсас а̄ви ва̄рыс. 1990 та̄лыт та̄рвитыӈ о̄лупса о̄лыс. Са̄выӈпа̄лэ ма̄хум рӯпатта̄л хультсыт. О̄йка йӣв ня̄лыт ва̄руӈкве номылматас. Ты ня̄лыт ла̄пкан тыналан ма̄гыс мисанэ, ма̄хум та̄ра ёвтуӈкве патсаныл. Тох ты а̄ныса̄ныт ва̄руӈкве патыс. Тувыл соссаӈ мирыт пормасыт ханищтаӈкве патыс. Ты пормасыт таве̄н ва̄руӈкве сака мӯстыс. Хум ма̄ньщи хо̄тпат халт о̄лыс, маныр та̄н ёргысыт, ёмщакв сунсыс. Тувыл ос такви матыр ва̄руӈкве а̄рталахтас. Пормасанэ ёмщакв тэ̄луӈкве та патсыт. Тыима̄гыс ма̄щтыр хумкве Нягань ӯс соссаӈ мир ремёсла Центр кол кӯщаин рӯпитаӈкве во̄ввес. Пе̄с порат ма̄хум йӣвныл манырсыр пормасыт ва̄рсыт, тав ос акв тамле пормасыт тот ва̄руӈкве ла̄ввес. Та ма̄щтыр колт хум соссаӈ мирыт пормасыт ёргуӈкве та овылтахтас. Ты ва̄рмаль сыме̄н патыс, ань тыг мус пе̄с йис щирыл пормасыт ва̄ри. Аквматнакт Вологда ӯст Россия янытыл ка̄тыл ма̄щтырлан хо̄тпат ма̄гыс суссылтап щё̄питавес. Александр Иванович ва̄рум утанэ о̄с тув тотве̄сыт. То̄нт ты о̄выл щёс тав ва̄рум утанэ тамле яныг суссылтапн ликмысыт. Та па̄сныл акваг са̄всыр суссылтапытн во̄виньта̄лаве. Ма̄хум тав ва̄рум нё̄тнэ пормасанэ̄тыл сака пӯмщалахтэ̄гыт. Мо̄лты та̄л во̄ртур э̄тпост Россия янытыл ма̄щтыр хо̄тпат халт касыл щё̄пита̄лвес. То̄нт Александр Иванович округ ма̄гыс касыс ос о̄выл места вис. Тыима̄гыс тав ма̄ньщи поэтув Юван Шесталов намыӈ премияолныл майвес. То̄нт тав ӯльпа йӣвныл хӯл ос нё̄выль хӯннэ соссаӈ ма̄хум таи ёргыс. Ка̄т пувнутэ э̄лаль акволпаг хӯрум ла̄квыг ёргыстэ. Ты рӯпататэ ма̄гыс сака янытлавес. Ань хум пенсият о̄лы. Ос ты а̄ти, матыр фестиваль, суссылтап манос мо̄т ва̄рмалит о̄лыгланэ̄ныл порат, тав акваг тув во̄виньта̄лаве. Ань лӯпта э̄тпост Урай ӯст ма̄щтыр ма̄хум фестивальн акванатхатыгламаныл порат тав йӣвныл ма̄ньщи хоса а̄ны ва̄рыс. Пе̄с порат рущ ма̄хум тамле а̄нын ня̄нь пинтласыт. Ты ва̄рум утэ ма̄гыс тав янытлан нэ̄пакыл майвес. Тамле ты ёмас ма̄щтыр рущ о̄йка Нягань ӯст о̄лы.

1128 2016. 07. 21. Николай МЕРОВ

Са̄ӈквылтан утыт ва̄рнэ рущ хум Урай ӯст онтоловит ма̄щтырлан фестиваль о̄лум порат тув са̄всыр ма̄ныл ма̄хум ёхталасыт. То̄нт ам акв ёмас хо̄тпа ёт хо̄нтхатыгласум. Тав наме Сергей Константинович Лукъянчиков, йӣвныл матыра̄ти ма̄щтырлан хум. Тав Челябинский областит самын патыс. Ос Нягань ӯст налыман нупыл ат та̄л о̄лы. Тот са̄в та̄л художникоформителиг рӯпитас. Ань пенсиян патыс. Ты хум такви рӯпататэ урыл а̄нумн потыртас. Сергей Константинович о̄лнэ̄тэ палытыл са̄всыр пормас ва̄ри. Ёргын ос по̄слын хуриянэ нэ̄мхуньт ат ловиньта̄лсанэ. Тав 2010 та̄л па̄сныл ма̄к ты ва̄рмаль щирыл рӯпитаӈкве о̄вылтахтас. Акв порат тав ка̄тыл хурит по̄слум хум Владимир Игошев рӯпатанэ хосыт хусахкем картина ос хури йӣвныл ёргыс. Та утанэ таквина̄тэ̄н хультуптасанэ, пӯмащ ма̄гыс юн о̄ньщиянэ. Ты хуриянэ таима̄гыс ва̄руӈкве номылматсанэ, тав ка̄тыл хурит по̄слын нэ̄ Лариса Пастернак ёт ва̄йхатуӈкве патыс. Ты нэ̄ Россия народный ма̄щтыр нам о̄ньщи. Таве э̄руптанэ̄тэ ма̄гыс «Я̄, Ха̄п, О̄лупса» нампа ва̄рмаль щирыл пормасыт ва̄руӈкве номылматас. Та порат ва̄рум хуриянэ ос ха̄пыл товнэ тӯпанэ (са̄всыр тӯп юн о̄ньщи) Ханты-Мансийск ӯс музеитн ос округ янытыл са̄всыр ма̄н суссылтаӈкве тотыглаве̄сыт. Пе̄с йис порат ма̄хум са̄всыр пормасыт хумус ва̄рсыт, Сергей Константинович щар ма̄к акв тох ты ва̄риянэ. Тӯпыт ва̄руӈкве то̄нт о̄вылтахтас, хунь тав округ Ассамблея кӯщай хум Еремей Айпин рӯтанэ палт Нижневартовский районын пе̄с йис о̄лнэ ма̄н ялыс. Тот тав ханты ма̄хум ёт э̄тпоскем о̄лыс, ос пе̄с порат ва̄рим тӯпыт ханищтас. Насати, во̄раяӈкве ос хӯл алыщлаӈкве ялантан тӯпыт акв щирыл ат ва̄равет. Тувыл тав соссаӈ ма̄хум о̄лупсал пӯмщалахтуӈкве патыс. Пе̄с ма̄хум манхурип йӣвныл манырсыр пормас ва̄рсыт, тав Ханты-Мансийск ӯс «Ма̄вит ос Э̄лумхо̄лас» нампа музейколт сунсыс ос ты ва̄рмаль урыл тот хансым потрыт ловиньтас. Ты ма̄щтыр хум округт о̄лыглам ма̄щтырлан касылыт са̄в щёс но̄хпатыглас. Тыима̄гыс тав ань лӯпта э̄тпост о̄лум соссаӈ ма̄хум мирхал фестивальн ёмщакв щё̄питахтас. Ань са̄в ма̄щтыр хо̄тпат а̄ныса̄ныт ва̄ре̄гыт. Таима̄гыс о̄йка матыр та̄рвитнув рӯпата ёргуӈкве номылматас. Ос пе̄с ма̄хум о̄ньщам нэ̄рнэ йӣв ва̄руӈкве номтэ патыс. Ты ёнгын ут хумус ва̄раве, ёмщакв ханищтастэ. Ос ты ут ва̄руӈкве та о̄вылтахтас. Таве кит хо̄тал ӯльпа йӣвныл ёргыстэ. Та̄ныт ва̄рнэ ма̄гыс са̄лы сыс та̄н тотыс. Ёнгын утэ суиӈыг ос нё̄тнэ̄г вос суйтыс, та̄н о̄вланэ лув лэ̄г а̄тыл хартсанэ. Ты касылыт са̄в ма̄щтыр хо̄тпат ёрыгхатсыт. Ос Сергей Константинович рӯпататэ щар нё̄тнэ̄г ва̄рыстэ. Жюрихо̄тпат та̄ра тав ва̄рум утэ пе̄риясаныл. Тыи ма̄гыс «Лучший мастер по художественной обработке дерева» намыл майвес. Ты о̄йка такви рущиг о̄лы ос соссаӈ мир о̄лупса татем ты ханищты. Ма̄ньщи ос ханты ма̄хум о̄ньщигла̄лум пе̄с пормасыт ва̄руӈкве сака э̄рупты. Ань ос тамле номт о̄ньщи, соссаӈ ма̄хум са̄ӈквылтан утыт пуссын ва̄руӈкве кусыглахты. Ам таве̄н тамле ла̄тыӈ ке̄тэ̄гум, номтыт о̄щнэ ва̄рмалянэ тэ̄лаг вос е̄мтэ̄гыт.

1128 2016. 07. 21. Галина КОНДИНА

Сымри сове хумус са̄лмыӈыг е̄мтыс Со̄врукве ма̄хманэ халт сака молях ха̄йтыгтас. Ос сака таӈхыс ма̄нь Во̄нтыракве тох ханищтаӈкве. «Ялэ̄гум, – номсы, – Ва̄тила̄глуп румам ха̄йтуӈкве ханищтылум», – тох ощхуль ва̄рим руматэ ла̄выстэ. Я̄ ва̄тан ёхтыгпас, тот Во̄нтыркве о̄лыс, сунсы – тав вит ва̄тат хуйгала̄лы, ла̄щлаквег ма̄нь лэ̄ге нёвита̄нты. Лэ̄ге тай аквтуп ма̄тар хурипа. – Ва̄тила̄гыл, наӈ маныр тыт ёралахтэ̄гын? Я–та, ха̄йтыме̄н, хотьютаме̄н молях! – Ам ва̄гтал патсум. Наӈ ам ляпамн ӯнтэн, потыртэн, хотьют ёт ха̄йтыгтасын, хотьют юил ёхтыгпаслын. Со̄выркве ущ э̄сыгхатуӈкве о̄вылтахтас, ты халт Во̄нтыракве та ро̄ӈхалтахты: – А–на–на! Хотьютын лэ̄гт та пувве̄сум! А–на–на! Лэ̄гум а̄гмыӈ! А–на–на! Хотьютын витын ты харттавем! . . Со̄выркве сунсы, со̄ль, Во̄нтыракве ва̄таныл э̄л ты тотаве. Руматэ ка̄таге̄ныл пувыстэ ос ювле та хартытэ, ты мус ро̄ӈхи: – Нёхсуквет! Охсараквет! Йие̄н, нё̄тэ̄н! Нёхс ня̄врамыт, охсар ня̄врамыт ёхтыгпасыт, Со̄выркве палт консыгтахтасыт, хартуӈкве таве̄н та нё̄тэ̄гыт. Та кос хартэ̄гыт, ос Во̄нтыракве щар нэ̄мхотталь ат нёвумты. То̄нт Со̄выркве Ва̄с ро̄ӈхувлас: – Ва̄с, та ёмас ва̄рен, витн мӯрмыглэн, сунсэ̄лн, хотьютувн ам румам пуввес! Ва̄с ро̄ӈхувлас такви ва̄спыгрищанэ̄н: – Пумыт халн тӯйтхатэ̄н! Такви витн та мӯрмыс. Ва̄спыгрищаквет ла̄тыӈ хӯнтлысыт, ща̄няныл о̄выл ла̄внэ ла̄тыӈ та̄ра хӯнтамлэ̄гыт: някщ–някщ, вит хосыт та ё̄мантасыт, ос пумыт халн та па̄тырасыт. Ва̄с витныл но̄х–нэ̄глыс ос ро̄ӈхалтахтас: – Ты тав, тав са̄втэ̄нут! Тав то̄нт ам ва̄сня̄врамум ла̄гыл па̄лыт пувыстэ. – Наӈ маныр акваг нас ро̄ӈхе̄гын, мӯсхал щирыл ла̄вен, хотьютын ам Ва̄тила̄глуп румам пуввес? – Ос хотьют тох ве̄рми, ты осыӈ совуп Сымри! Ӯйит Во̄нтыракве такос хартыяныл, Ва̄с та̄н нумпа̄ланылт та яласы, товлаге̄тыл такос хосги, та ро̄ӈхи: – Тыщир, тыщир Во̄нтыракве хартэ̄лын, кантыӈ, сысмокариӈ Сымрин ул мае̄лын. Матъёмас Во̄нтыракве витныл сысэ нэ̄глыс, тав юи–па̄лэ̄т Сымри пуӈке о̄с нэ̄глыс. Сымри хо̄лам лӯпта оспа самаге тыгле–тувле ё̄ӈхата̄лы, Во̄нтыракве такви нупылэ та хартытэ. – Эт–эт! – Ва̄с ро̄ӈхи. – Сунсэн, тав лэ̄г хот аты та̄ртытэ. Ты маныр лю̄ль капай! Ты маныр по̄йтта̄л ут! Ань ма̄н таве ёмщакв ханищтылӯв! Ня̄врамате̄нум, ва̄сте̄нум, пуссын нир вуе̄н, ха̄йтэ̄н, таве хосгелы̄н. Ам таве пуӈке̄т на̄хвилум. Ва̄сыт Сымри та хосгияныл, хо̄т хосувлыяныл – тот са̄лум хульты. Ща̄нь–ва̄с пуӈкыт та на̄хвитэ – Сымри кантлы, э̄лы та̄ӈхаге кантлым выгрыг та е̄мтсы̄г. Юи–о̄вылт сӯпе та пӯнсыстэ, Во̄нтыракве лэ̄ге хот та та̄ртыстэ ос витн хотталь та па̄тырас. Мощ э̄лнув уйис, витныл пуӈке нэ̄гылттастэ ос хот–мовалас: – Аха–ха, а̄нумн а̄ти а̄гмыӈ, щар а̄ти а̄гмыӈ. Ам сахим сака осыӈ. Ос Во̄нтыррищ нэ̄мхуньт лэ̄ге̄тыл ул вос ёнгасы, ул вос не̄рхаты. Ос паты те – пувилум ос а̄мти палтум харттылум. Витныл но̄х–порыгма̄лыс, вит нумпалыт щакариӈыг ва̄рапахтас, сома нулытис то̄рум харт, ос вит ёлы–па̄лн та па̄тырас, такви о̄лнэ ма̄тэ̄н. Та па̄сныл Сымри сове са̄лмыӈыг е̄мтыс, ос э̄лы та̄ӈхаге выгрыг хультсы̄г.

1128 2016. 07. 21. NA

Хумус ам омамн нё̄тсум Аквщёс ань туи порат ма̄н кол по̄х юрт ня̄враманув ёт па̄кв паттуӈкве минасӯв. Ань та порат па̄выл ляпат яныг ӯльпаӈ ур о̄лыс. Ма̄н юрт ня̄враманув ёт ӯльпаӈ урн но̄х та ха̄хсӯв. Тувыл па̄кв паттуӈкве та тӯлтхатсӯв. Ма̄н та порат яныг сэ̄мыл а̄мп о̄щсӯв, таве ёт вислӯв. Ма̄н ань па̄кв паттэ̄в, капыртэ̄в. Тав тай ёралахтым ма̄н ляпавт ё̄мыгты. Сава нампа ма̄ньщи пыгрищув тай ма̄нав пилуптытэ. Тав ла̄ви: – Алам ты ӯльпаӈ урт во̄рто̄лнут ё̄мыгты. Па̄кв са̄в ул паттэ̄н. Моляхнув юв минэ̄в. Ма̄н ань таве̄н ат хӯнтлэ̄в, ма̄нтирот па̄кв паттэ̄в. Та порат па̄кв са̄в тэ̄лыс. Ма̄н ань хӯрганув та̄гиньтасыт ос ювле та минасӯв. Тох ань па̄кв хӯргыӈ та̄гыл па̄вылн та ёхтысӯв. Омам ос матум ане̄квам тай сака ща̄гтсыг. Омам ла̄выс: – А̄гикве, пӯмащипа, наӈ ань нё̄тмил ва̄рнэ янытыг та е̄мтсын. Та порат туи сыс ма̄н са̄в ёмас э̄рнэ рӯпата ва̄рсӯв. Оманувн–а̄тянувн нё̄тсӯв.

1128 2016. 07. 21. Галина КОНДИНА

Ма̄ньщи мо̄йтыт ос потрыт хансум э̄ква Анна Митрофановна Конькова 1916 та̄лт о̄йттур э̄тпос ва̄т нупыл нёлолов хо̄талт самын патыс. Ты та̄л тав яныгса̄т та̄лэ то̄влынув. Э̄ква мир ма̄гсыл са̄в потрыт, ма̄ньщи мо̄йтыт рущ ла̄тӈыл хансыс. Ань тав хансум мо̄йтанэ хосыт мир соссаӈ о̄лупса урыл са̄в ва̄гыт. А̄гирищкве Хо̄нтаӈ ма̄т Евра нампа па̄вылт самын патыс ос тот яныгмас. Аннэ ма̄ньщи щирыл Щират рӯтныл о̄лыс. Ётыл янгыг е̄мтме̄т «И лун медлительных поток» нампа потрет тав такви яныгмаме урыл хансыс. Анна Митрофановна 1937 та̄лт Остяко–Вогульск ӯст педтехникум а̄стлас. Ва̄тахтем та̄л ня̄врамыт ханищтым Ха̄льӯс районт, ётылнув ос ХантыМансийский районт рӯпитас. Такви ты урыл потырта̄лыс, хо̄нт о̄вылтахтам порат тэ̄н о̄йкатэ̄н ёт хантыт палт рӯпитаӈкве те̄твесы̄г. О̄йкатэ та̄ксар хум о̄лыс, ёмщакв па̄тлуптас, матыра̄ти ва̄руӈкве пуссын ха̄сыс. Ева Адамовна Шмидт 1991 та̄лт Ханты-Мансийск ӯст Анна Митрофановна ёт потыртам потре̄н пуссын ёлхасме. «Детство и юность Анны Коньковой в мансийском селении» нампа нэ̄пакт тох хансым о̄лы, тав Еван титыглаве: Хо̄т рӯпитасын, хоты па̄выл та ляпат о̄лыс? Писъян. Ос манхурип я̄ тот о̄лыс? Щапакыӈ я̄. Хо̄т тав о̄лыс? Хотьютын тав ва̄ве. Ты урыл нэ̄матыр ла̄вуӈкве ат ве̄рме̄гум. Ме̄н о̄влэ̄т Сортъя хосыт минасаме̄н, тувыл налыман нупыл ат ве̄рыста я̄ӈкылмат хосыт ё̄мсуме̄н, ня̄врамаме̄н но̄ха̄лмим тотысламе̄н. Тох ты э̄ква такви о̄лупсатэ урыл ученый нэ̄н потыртас. Хотталь э̄л те̄тыглавесы̄г, тув рӯпитаӈкве та минасы̄г. То̄нт ня̄врамыт рущ ла̄тыӈ щар ат ва̄сыт. Тав рӯпитам ма̄тэ̄т ханты ос ё̄рн ня̄врамыт о̄лсыт. Ня̄врамыт ханищтан ма̄гсыл тав ё̄рн ла̄тыӈ такви ханищтастэ ос ня̄врамыт ёт ё̄рн ла̄тӈыл потыртас. Тох та̄наныл ловиньтаӈкве, хансуӈкве та ханищтасанэ. Тув, та па̄вылн ня̄врамыт са̄ртын тотымат, тэ̄н о̄йкатэ̄нтыл о̄с са̄ртыннув ёхтумы̄г, школа иӈ ат рӯпитас. Тав акв ё̄рн а̄гирищкве Вэнго Нэтту такви палтэ вистэ, тав ётэ акваг потыртым ла̄тыӈ та ханищтастэ. Хо̄нт о̄вылтахтас, о̄йкатэ акв та̄л юн о̄лыс, мо̄тыт та̄л хо̄нтлуӈкве та тотвес. Тав ня̄врамаге ёт та па̄вылт та хультыс. Пыге Эмиль то̄нт иӈ ма̄нь, титахтем та̄лэ туп о̄лыс. Акваг а̄тятэ тинсыстэ, лю̄ньщис. Ла̄пканылт торыӈ тэ̄нут а̄тим о̄лыс. Ётыл Ханты-Мансийск ӯсн ёхтысыт, то̄нт о̄йкатэ хо̄нтлын ма̄т порславес. Анна Митрофановна ва̄гтал о̄лыс, тот о̄луӈкве та хультсыт. О̄влэ̄т тав ма̄нь ня̄врамыт палт рӯпитаӈкве вуйвес. Тувыл ос са̄в та̄л ня̄врамыт ханищтым рӯпитас. Сака ёмщакв мо̄йтыт мо̄йтуӈкве, пе̄с потрыт потыртаӈкве ха̄сыс. Таима̄гыс ма̄хум таве хӯнтлуӈкве сака тахсыт. Хуньт ма̄нь порат ане̄кватэ̄н акваг мо̄йтыл мо̄йтыглавес. Ты мо̄йтыт тав номтэ̄т пуссын о̄лсыт. Околь ане̄кватэ сака мӯтраӈ э̄ква о̄лыс, тав ла̄ввес – Ща̄нит Ща̄нь. Ётыл тав оматэ о̄с тащир ла̄ввес. О̄с потрыӈ ос мӯтраӈ нэ̄г оматэ о̄лыс. Анна Митрофановна хунь рӯпитан ма̄ныл по̄йтыс, такви потрыт, мо̄йтыт хансуӈкве патыс. Мо̄т хо̄н ма̄ныл Венгрияныл, Германияныл, Францияныл, Англияныл ма̄хум ёхталасыт, тав потранэ, мо̄йтанэ акваг хассаныл. Ювле хультум нот нёлса̄т та̄ланэ̄т э̄ква мо̄йтанэ «Огонь–камень» нэ̄пакн хасве̄сыт. 1976 та̄л па̄сныл «Ленинская правда» газетат мо̄йтанэ, потранэ акваг хансыглаве̄сыт. Геннадий Сазоновыл акв яныг потыр аквъёт хассы̄г – «И лун медлительных поток», ты потыр хӯрум щёс йильпи нэ̄пакыг ва̄рыглавес. 1983 та̄лт Анна Митрофановна СССР Союз писателит палт пирмайтавес. Ётыл, тит та̄л минам порат «Сказки бабушки Аннэ» я̄нас нэ̄паке та̄ратавес. «Вожак Ивыр» нэ̄паке нёлса̄т нупыл ат та̄лэ то̄влум кастыл ва̄рвес. Та нэ̄пакт хурит Геннадий Райшев по̄слысанэ. Сака нё̄тнэ, ёмас нэ̄пак о̄лыс. Щар юи–о̄выл нэ̄паке 1996 та̄лт хансыстэ ос тыщир намтыстэ – «Свидание с детством». Нэ̄пакет хансыс, хумус ане̄кватэ̄н мо̄йтытыл мо̄йтыглавес, хумус тав янмалтавес. Яныгмам поратэ та̄рвитыӈ о̄лыс. Э̄лаль на̄н тав потре ос мо̄йтэ ловиньтэ̄н.

1128 2016. 07. 21. Кирилл Богордаев

Ам а̄тям на̄й харыгтан хум Опасная работа – Для сильного мужчины. Нельзя в душе с тревогой Бороться со стихией, Звучит «пожарный» славно, А мне в двойне приятно: Герой огня – мой папа! Ты стихотворение ам йильпи та̄л о̄вылтахтам порат потырта̄лыслум. Аа! Аа! Ам а̄тям хольт о̄с на̄й харыгтан хо̄тпаг е̄мтэ̄гум. Таима̄гыс йильпи та̄л ялпыӈ хо̄тал кастыл ам на̄й харыгтан хум маснут ва̄рсум. Ам а̄тям Андрей Алексеевич Богордаев, Шугур па̄вылт на̄й харыгтан ма̄т рӯпиты, тот ма̄шинал яласы. Ты рӯпатат сака пӯмащ ос тот пилта̄лыг о̄лнэ хо̄тпат рӯпитэ̄гыт. Тав а̄ти аквкит щёс на̄й харыгтаӈкве ялыс. Туп матыр лю̄ль суй хӯнтамлэ̄гыт ке, та̄нанылн та̄ра молях щё̄питахтуӈкве э̄ри ма̄хманувн нё̄туӈкве. Хунь ам а̄тям палт ялсум, тав а̄нумн яныг ма̄шинат ос рӯпатат э̄рнэ са̄всыр пормасыт суссылтас. На̄й харыгтан профессия тыи сака пилыщмаӈ ос э̄рнэ рӯпата. Ос ам хунь яныгме̄гум, ам а̄тям хольт на̄й харыгтан хо̄тпаг е̄мтэ̄гум. Ам а̄тямтыл янытлахтэ̄гум! Таима̄гыс янытлахтэ̄гум, тав на̄й харыгтан хум!

1128 2016. 07. 21. Владислав Ануфриев

Ам ща̄нюма̄щум ле̄ккарыг Ам номсыте̄мт, ле̄ккар – ты сака э̄рнэ рӯпата. Шугур па̄влувт ФАПыг ла̄внэ пӯльница о̄лы, тот ам ща̄нягума̄щагум сас ле̄ккарыг рӯпитэ̄г. Омам Наталья Джимовна Ануфриева – яныг ле̄ккарыг атхуйплов та̄л тот рӯпиты, а̄тям Геннадий Анатольевич Ануфриев ӯлщ пуӈк ле̄ккарыг нёлоловхуйплов та̄л рӯпиты. Тэ̄н сас рӯпататэ̄н э̄руптытэ̄н, са̄в щё̄с пӯльницат о̄лэ̄г. Ма̄хманувн тэ̄н э̄руптаве̄г. О̄пам ос щаще̄квам наманэ̄н Анатолий Александрович ос Александра Яковлевна Ануфриевыг. Анатолий Александрович трактористаг ос Александра Яковлевна ле̄ккарыг рӯпитасы̄г. Ам о̄пам ща̄нягеа̄щаге наманэ̄н Александр Изосимович ос Елена Ивановна Ануфриевыг. Александр Изосимович яныг хо̄нт порат санинструкторыг Москват рӯпитас, ос Елена Ивановна Ня̄хщамво̄ль па̄выл пӯльницат завхозыг рӯпитас. Ам щаще̄квам ща̄нягеа̄щаге наманэ̄н – Яков Михеевич ос Татьяна Ивановна Болотовыг. Яков Михеевич ос Татьяна Ивановна хо̄нт о̄лум порат сас зверофермат рӯпитасы̄г. Ам ащо̄йкам ос ане̄квам наманэ̄н Джим Павлович ос Галина Павловна Медведевыг. Джим Павлович рентгенологле̄ккарыг о̄лыс, ос Галина Павловна ле̄ккарн нё̄тнэ нэ̄г рӯпитас. Джим Павлович омагеа̄тяге – Павел Фёдорович и Татьяна Семёновна Медведевыг. Павел Федорович ня̄врам ханищтан хо̄тпаг рӯпитас, ос Татьяна Семёновна ле̄ккарыг. Галина Павловна ща̄нягеа̄щаге Павел Трофимович ос Мария Васильевна Серебряковыг о̄лсы̄г. Павел Трофимович хирургыг рӯпитас, ос Мария Васильевна бухгалтерыг. Ам колта̄гыл о̄лнэ ма̄хманум янгыщ пуссын ле̄ккарыг о̄лсыт, таима̄гыс а̄нумн татем та ёмас. Ам та̄нанылтыл сака янытлахтэ̄гум ос пуссын э̄руптыянум, ам о̄с ле̄ккарыг о̄луӈкве таӈхе̄гум.

1129 2016. 08. 11. Светлана РОМБАНДЕЕВА

Соссаӈ мир округ кӯщаин янытлаве̄сыт Округ янытыл о̄лнэ мир щуниӈыщ вос о̄лэ̄гыт, са̄ккон щирыл вос ӯргалавет, ты урыл хо̄нтхатыглап ва̄рыглавес. Та порат округ кӯщай Наталья Комарова атхатам хо̄тпат нупыл тох ла̄выс. – Во̄ртур э̄тпос 9 хо̄талэ – ты ма̄ янытыл о̄лнэ соссаӈ мирыт та̄н ялпыӈ хо̄таланыл. Ма̄н ма̄в ма̄гыс ты сака ёмас хо̄тал. Ань тыт о̄лнэ ханты ос ма̄ньщи ма̄хум мо̄т мирыт ёт акваннё̄тхатым рӯпитэ̄гыт, э̄рнэ нэ̄пакыт, э̄рнэ са̄кконыт аквъёт хансэ̄гыт. Ювле хультум са̄тыт округ Правительстват ма̄н йильпи комиссия щё̄питасӯв, тав соссаӈ ма̄хманувн нё̄туӈкве паты, матыр хащта̄л тэ̄лат, манос сыресыр китыглахтан ла̄тыӈыт пуссын аквъёт ва̄руӈкве патыянӯв. Ам номсэ̄гум, тыт соссаӈ ма̄хманув ла̄тӈаныл тав та ма̄кыг паты, матыр тэ̄ла та̄нанылн э̄рнэ щирыл ва̄руӈкве, та̄нти ва̄ганыл, ма̄н ос туп нё̄туӈкве патыянӯв. Ань тамле ёмас хо̄талт ма̄н акванхо̄нтхатасӯв. Я̄тил ма̄хум – хантыт, ма̄ньщит ос ё̄рныт, на̄нанн ам ты ялпыӈ хо̄талыл янытлыянум! Ань ма̄ янытыл о̄лнэ мир на̄н ма̄гсылын сыманыл ща̄рге̄гыт, на̄н культуран, ла̄тӈын урыл номсэ̄гыт, на̄нанн нё̄тэ̄гыт. Пуссын пуста̄гыл о̄лэ̄н, миранын ма̄гсыл са̄в э̄рнэ тэ̄ла ва̄ре̄н! Ля̄ххал тотнэ кол потре ма̄ньщи ла̄тӈыг С. Ромбандееван толмащлавес.

1129 2016. 08. 11. Галина КОНДИНА

Редакцияв янытлаве Ма̄н редакциявн янытлан ла̄тыӈ Маргарита Лянге те̄тыс, тав соссаӈ хо̄тпат урыл ля̄ххал тотнэ ма̄хум Гильдият Президентыг о̄лы. Тав ма̄нав янытласанэ. – Тыныӈ юрт ма̄хманум! Во̄ртур э̄тпос 9 хо̄талэ Россияв янытыл Лӯима̄т, Сибирьт ос Дальний Востокт о̄лнэ соссаӈ ма̄нь мирыт янытлан хо̄талыг о̄лы. Ты хо̄тал ам яныг пӯмащипа ла̄тыӈ та хо̄тпатын ла̄ве̄гум, хотьют ка̄сыӈ хо̄тал такви рӯпататэ̄тыл пе̄с йис о̄лупса ос ща̄нь ла̄тыӈ э̄лаль ялтуптытэ, мо̄т яныг ва̄рмалитыл ӯргалытэ. Ты рӯпата ва̄рим, ва̄им, ля̄ххал хаснэ ос по̄слын хо̄тпат та̄н яныг рӯпата тотэ̄гыт. Тыхо̄тал журналистыг рӯпитаӈкве та̄рвитыӈ, ос соссаӈ ма̄хум ла̄тӈыл хансуӈкве титщёс та̄рвитыӈнув. Ты а̄ти туп наӈти рӯпатан ёмщакв ва̄ӈкве, тыт ща̄нь ла̄тӈыл ёмщакв потыртаӈкве ос хансуӈкве э̄ри. Соссаӈ мирыт ла̄тӈыл хаснэ газетат сунсыглым ос ловиньтым на̄ӈки, хоты ма̄хум мо̄т са̄в мирыт халт о̄луӈкве ханьщувласыт. Соссаӈ хо̄тпатын ам сымыӈ ла̄тыӈ те̄тэ̄гум, са̄в мирыӈ Родинавт йильпи номтыл, йильпи ё̄рыл э̄лаль вос рӯпитэ̄гыт! Маргарита Лянге те̄тум потре Галина Кондина ма̄ньщи ла̄тӈыл толмащластэ.

1129 2016. 08. 11. Тамара МЕРОВА

Ма̄хманув щуниӈыг вос о̄лсыт Наталья Комарова губернаторувн о̄йттур э̄тпос оигпан э̄лыпа̄лт то̄ва кӯщаит акванатыглаве̄сыт. Та̄н округувт о̄лнэ ма̄хум о̄лупсаныл щуниӈыг, со̄тыӈыг вос о̄лыс, ты о̄вылтыт потыртасыт. Ань то̄ва рӯпитан ма̄т ма̄хум олныл та̄ра ат ойтавет, рӯпата кӯщаит манаса̄вит солко̄ви а̄рнта о̄ньще̄гыт, ты урыл потраныл о̄лыс. Ма̄хум рӯпата та̄л хоса ул вос о̄лсыт, округ кӯщаит номсахтэ̄гыт ос са̄всыр тэ̄лат ва̄ре̄гыт. Таима̄гыс туи сыс са̄внув хо̄тпа рӯпатал хо̄нтве̄сыт ос Уральский федеральный округт ма̄н ма̄в мо̄т регионыт халт ва̄рмалянэ ёмасыг е̄мтсыт. Ань рӯпата киснэ ма̄хум ма̄гыс та̄л охса сыс 6 со̄тыра 873 рӯпитан йильпи ма̄ та̄стувес. Мо̄лты та̄л 730 рӯпитан ма̄ мощщанув о̄лыс. Ты та̄л та̄нки рӯпатал олн сэ̄лнэ хо̄тпат государство па̄лыл олннё̄тмилыл майве̄сыт ос та̄н та̄нки палтаныл акв со̄тыра са̄вит хо̄тпа рӯпитаӈкве висаныл. Тамле ва̄рмалит кӯщаитн э̄лаль уральтаӈкве о̄с э̄ре̄гыт, таквсы порат то̄ва кӯщаит та ма̄хум арыгтаптыяныл ос та̄н оста рӯпата та̄л хультэ̄гыт. Тувыл ма̄хумн олн ойтнэ ва̄рмалит уральтаве̄сыт. Ты урыл рӯпата ос мир тэ̄ланыл та̄рапаттын Департаментыт кӯщай ва̄ӈын хум Валерий Беспояско ла̄выс: «Ань хӯрумхуйплов рӯпитан ма̄т мир олныл торыӈ ат ойтавет. Та предприятият 41, 1 млн. солко̄ви а̄рнтаг о̄ньще̄гыт. Ты э̄лыпа̄лт а̄рнтаг о̄лум 87 млн. солко̄ви ойтве̄сыт. Ань хо̄т предприятият а̄рнта воссыг ат о̄ньще̄гыт, мо̄т нёлолов – па̄ланыл туп ойтсаныл». Ань тыг мус кит со̄тыра онтоловса̄т атпан нупыл нила э̄лумхо̄лас сэ̄лум олнаныл ка̄тн иӈ ат та паттуманыл. Ты тэ̄лат ёмасыг ва̄рнэ ма̄гыс кӯщаит номсахтэ̄гыт.

1129 2016. 08. 11. Светлана РОМБАНДЕЕВА

Пе̄рияп кастыл щё̄питахтэ̄гыт О̄йттур э̄тпос 19 хо̄талэ̄т Ханты-Мансийск ӯс мирколт округ кӯщай нэ̄ Наталья Комарова таквсы пе̄риян ва̄рмаль кастыл хо̄нтхатыглап ва̄рыглас. Ань та ювле хультум э̄тпос 8 хо̄талэ па̄сныл пе̄риян ма̄т щар ма̄к ёмащакв уральтавет, сака са̄в лю̄ль матарыт хо̄нтве̄сыт – то̄ва ма̄т ищхӣпыӈ ут (система видеонаблюдения) а̄тим манос матыр илттыг е̄мтапи те, та̄кыщ потыртан турпка а̄тим, ты коныпа̄л мо̄т са̄в утыт но̄ххулигласыт. Ты урыл Наталья Комарова тох ла̄выс: «Тамле ма̄т ма̄н пуссын нэ̄пакын хансыянӯв, ос тувыл ка̄сыӈ ма̄ мӯсхал щирыл уральтылӯв, со̄ви хуйнэ ут сохтыл пинумтылӯв. Ам номсэ̄гум, пе̄риян хо̄талыт кастыл ка̄сыӈ ма̄ уральтаӈкве а̄лыме̄в». Э̄лаль потыр та урыл о̄лыс, ань пе̄рияп ва̄рмаль палт наманыл хансум ма̄хум пуссын мӯсхал щирыл вос уральтавет, та̄н халанылт сутытым хо̄тпа ул вос о̄лы. Округ кӯщай ла̄выс: «Ты тэ̄ла ма̄н та̄ра ва̄руӈкве патыслӯв. Тувыл ань таи та̄рапатыс, пе̄рияп кастыл хасхатам 13 со̄тыра мир халт 14 хо̄тпа ань ты хо̄тал мус сутытавет манос ва̄ӈнаныл по̄сыӈ ма̄хумн кинсавет». Наталья Комарова ла̄вме щирыл, ты тэ̄ла палт ма̄кыг таи о̄лы пе̄риян хо̄тпа тав кӯщай, ты рӯпатав тав ма̄гсылэ ва̄рилӯв.

1129 2016. 08. 11. Николай МЕРОВ

Рӯпитан ма̄хум ӯргалавет ос нё̄тавет Округувт рӯпитан ма̄хум нё̄тмилыл ва̄рнэ кӯщай Евгений Кривобоков, рӯпата ӯргалан кӯщай ва̄ӈын нэ̄ Наталья Чикунова ос са̄всыр ва̄рмалит щирыл нё̄тмил ва̄рнэ хум Владислав Терентьев ля̄ххал тотнэ колн ёхталасыт. Ань ты та̄лув акв охсатэ сыс рӯпитан ма̄хум манырсыр та̄рвит ва̄рмалит о̄щсыт, та̄н ты урыл тот потыртасыт. Ты та̄л хо̄т э̄тпос сыс инспекторхо̄тпат план щирыл кит со̄тыра арыгтем рӯпата ма̄т уральтасаныл. Ты колыт ӯнттын ва̄рмаль, ма̄шинал яласан предприятият, ня̄врамыт ханищтахтын колыт, тэ̄нутпормас тыналан ма̄т, кол ма̄гыс ойтхатнэ тэ̄ла, мир пусмалтан ва̄рмаль ос мо̄т тэ̄лат уральтасыт. Ты рӯпатат пуссын аквъёт ат со̄тыракем са̄всыр та̄рвит нак о̄лыс. Са̄выӈпа̄лэ ма̄хум рӯпата олныл э̄рнэ са̄витыл ат ойтавет, тувыл ӯргалахтын ва̄рмальн ёмщакв ат ханищтавет. То̄ва хо̄тпат рӯпатат э̄рнэ маснут ат о̄ньще̄гыт ос мо̄т са̄в тэ̄ла мӯсхал щирыл щё̄питым ат о̄лы. Округувт инспекцияхо̄тпат уральтан ва̄рмаль ва̄рыгламаныл хосыт ань нила со̄тыракем са̄вит хо̄тпатн рӯпата олнаныл ойтве̄сыт. Пуссын аквъёт кит млн. арыгтем солко̄ви ма̄хумн ойтвес. Наска̄ссыг рӯпатаныл по̄хын ке̄тым нила хо̄тпа, ань ювле вуйве̄сыт, та̄н э̄лаль рӯпитэ̄гыт. Атса̄т атпан хо̄тпа рӯпатанылт ӯргалахтын ва̄рмалин ёмщакв ханищтым ат о̄лсыт, та̄н по̄хын паттуве̄сыт. Тувыл ос то̄ва рӯпитан ма̄тын инспекцияхо̄тпат ма̄хум хансум потраныл хосыт тув ялсыт. Са̄выӈпа̄лэ тамле ва̄рмаль о̄лы, рӯпитан хо̄тпат ла̄пала̄лавет, ос то̄ва хо̄тпат та̄нки ат торгамтэ̄гыт. Акв хо̄тпа номсыс яныгса̄т ва̄т со̄тыра солко̄ви ма̄гыс рӯпиты. Ос э̄тпос сыс туп китхуйплов со̄тырал ойтвес. Та хум плотникыг рӯпитас. Тав хорамыӈ утыт ат ва̄рыс, кол ла̄кв па̄ртыт хотло̄сталым рӯпитас. Кӯщаин тав ат ла̄плувес. Нас ты хум такви ёмщакв ат торгамтам. Манхурип рӯпата ва̄регы̄н, таса̄вит олныл ойтаве̄н. Ва̄рнэ рӯпатан ма̄гыс э̄рнэ са̄вит олныл ойтаве̄н манос а̄ти, на̄нки о̄с номсахтым о̄лэ̄н. Ты та̄л рӯпатат сакватахтын ва̄рмаль мо̄лты та̄лныл аквте̄мыг хультыс. Ос ты хосыт порсум хо̄тпа нёлолов процентын мощщанувег е̄мтыс. Та̄кыщ сакватахтын хо̄тпат ос хӯрум арыгтем процентын са̄внувег е̄мтыс. Са̄выӈпа̄лэ ма̄шинал рӯпитым яласан хо̄тпат ва̄тихал сакватахтэ̄гыт. Рӯпатат сакватахтам хо̄тпатн ос матыр ва̄рмаль щирыл тот порсум ма̄хум, та̄н ще̄мьянылн страховкаолн ёмщакв вос ойтвес, инспекцият рӯпитан хо̄тпат о̄с уральтыяныл. Ань хо̄т э̄тпос сыс рӯпата кӯщаит ты хо̄тпатн ат млн. арыгтем солко̄ви ойтсыт. Рӯпатат ӯргалахтын ва̄рмаль мӯсхал щирыл щё̄питым ат о̄лыс, таима̄гыс кӯщаит пуссын аквъёт онтолов млн. солко̄вил штрафолныл хасве̄сыт. Тувыл ань интернетыт тамле ло̄пс ва̄рвес, рущ щирыл «Электронный инспектор» ла̄ваве. Рӯпатат матыр та̄рвит ва̄рмаль о̄ньщегы̄н ке, тув хансэ̄н, китыглахтэ̄н, тувыл хӯлтнэ ла̄тӈыл ювле хансаве̄н тах.

1129 2016. 08. 11. Тамара МЕРОВА

Пӯльницат са̄в ма̄т вос рӯпитэ̄гыт Общественный палатат о̄лнэ кӯщай нэ̄ Ирина Максимова мо̄лал сапра̄ни ва̄рыглас ос мо̄т кӯщаит ёт губернатор нэ̄ ла̄вме ла̄тӈанэ тэ̄лаг ва̄рнэ о̄вылтыт потыртасыт. Тав ка̄сыӈ та̄л Юграт о̄лнэ ма̄хум ос округ депутатыт э̄лыпа̄лт такви ва̄рнэ тэ̄ланэ хӯлтыянэ. Тот потыр са̄выӈпа̄лэ ма̄хум пусмалтан урыл о̄лыс. Ты сапра̄нит видеоконференция щирыл ва̄рыглавес, тот потрыт пуссын хӯнтлуве̄сыт ос та торыг матыр китыглаӈкве ро̄выс. О̄влэ̄т Сургут, Ханты-Мансийск, Нефтеюганск, Нижневартовск, Нягань ос районный пӯльницат рӯпитан кӯщаит та̄нки о̄лнэ тэ̄ланыл урыл потыртасыт. Та̄н ла̄внэ̄ныл щирыл, ань яныг ӯсыӈ ма̄т ма̄хум пусмалтан ма̄гыс ка̄сыӈ микрорайоныт я̄нас рӯпитан колыт ва̄ре̄гыт. Ӯсанылт яныг пӯльницал ос са̄всыр а̄гмыт пусмалтан ле̄ккарытын та̄н ат то̄влавет. Ма̄хум та̄нки о̄лнэ ма̄наныл ляпат я̄нас пусмалтахтын кол о̄щнувыт ке ос тот рӯпитан ле̄ккарыт, щар ёмас о̄лнув. Таима̄гыс кӯщаит ӯсанылт то̄ва колыт а̄рталыяныл, тот ма̄хум ма̄гыс пӯльница ва̄руӈкве ро̄ви ман а̄ти. То̄внакт са̄внакпа лю̄лит колт ёлы о̄выл наке̄т колыт хо̄нтыглэ̄гыт кос, ос та колт о̄лнэ ма̄хум пӯльница тот ва̄руӈкве ат ка̄саще̄гыт. Мо̄т ма̄т колыӈ ма̄хум тахнувыт кос, ос тув э̄рнэ пусмалтан утыт тотуӈкве ат а̄ртми манос тув лё̄ӈхе та̄рвитыӈ. Ирина Максимова ты о̄вылтыт тох ла̄выс: «Ань то̄ва ма̄т йильпи кол ӯнттын порат ёлы наке та̄ра пӯльница ма̄гыс хультуптаӈкве э̄ри. То̄нт тув о̄лмыгтан ма̄хум та̄ра ва̄ганыл, та̄н коланылт пӯльница ва̄раве. Та̄н ка̄саще̄гыт ке, тув о̄лмыгтэ̄гыт, а̄ти ке, мо̄т кол кинсэ̄гыт». Алексей Добровольский, ма̄хум пусмалтан департаментыт кӯщаиг о̄лнэ хум, тамле тэ̄лат ва̄нэ̄г о̄ньщуӈкве ма̄хманэ̄н ла̄всанэ ос та̄н ӯсанылт о̄лнэ кӯщаитын вос нё̄тавет. Ма̄хум пусмалтахтын кол та̄л хультуптаӈкве о̄с ат э̄ре̄гыт. Тувыл мо̄т ва̄рмалит урыл «Центр профилактики и борьбы со СПИДом» колт рӯпитан ва̄ӈын нэ̄ Наталья Шаляпина потыртас. Округувт са̄в ма̄хум ВИЧа̄гм о̄ньще̄гыт. Ань нэ̄т ос хумыт сака мори о̄луӈкве патсыт. Ты а̄гмыл са̄в ма̄ньлат хо̄тпат та̄нкина̄ныл наска̄ссыг витыг тотыяныл, то̄ват э̄рнэ торыг та̄нкина̄ныл ат хӯлтыяныл, ат пусмалтахтэ̄гыт ос мо̄т хо̄тпат а̄гмыл ха̄хтыяныл. Ос нэ̄матыр ат ва̄нэ хо̄тпа э̄лаль та о̄лы, номсы акв щёс лю̄ль пищ ва̄рапа̄лы ке, матыр яныг э̄ссырма хунь е̄мты. Та сыс ты а̄гм э̄лумхо̄лас ке̄лпе сакылтытэ, тав лувенё̄вле ва̄гталыг е̄мтэ̄гыт ос тав хотталь та щалты. Тувыл ма̄ньлат ма̄хум тэ̄ланыл ёт рӯпитан департаментыт пуӈктотнэ хум Геннадий Забайкин о̄с потыртас. Тав ла̄вме щирыл, та̄н ма̄ньлат а̄гитпыгыт ёт ВИЧа̄гм о̄вылтыт акваг потыртэ̄гыт. Та̄н э̄рнэ программа щё̄питасыт, тащирыл са̄всыр ханищтап ва̄ре̄гыт, ос сыресыр нэ̄пакыт та̄ратэ̄гыт, мань кинат суссылтэ̄гыт. Хум хо̄тпа юипа̄лт общественных ос внешних связей департаментыт кӯщай нэ̄ Елена Шумакова ла̄выс, тамле тэ̄лат ёт рӯпитаӈкве некоммерческий организацият о̄с вос нё̄тэ̄гыт. Округувт са̄в тамле кол о̄лы ос та̄н ма̄хум ёт са̄в рӯпитэ̄гыт. Ва̄им, тамле ва̄рмалит туп акванпотыртахтым, акваннё̄тхатым ва̄руӈкве э̄ре̄гыт. То̄внакт э̄лумхо̄лас а̄гме паттат номтэ сака савалы, ма̄хумн ла̄внэ ла̄тӈытыл хурахлы. Тох ул вос о̄лыс, тав таяныт ёмас вос ва̄рнув, та̄ра вос пусмалтахтуӈкве о̄вылтахтынув.

1129 2016. 08. 11. Николай МЕРОВ

Ка̄сащан хо̄тпат хӯл алыщлан ма̄ хасылтаӈкве ве̄рме̄гыт Мо̄лал Ханты-Мансийск ӯс ляпат о̄лнэ хӯл янмалтан заводыт общинат ос мо̄т са̄всыр ма̄т рӯпитан кӯщаит акванатхатыгласыт. Ты ва̄рмаль округт ма̄вит ӯргалан департаментыт рӯпитан хо̄тпат та̄н щё̄пита̄лсаныл. Кӯщаиг тот ань Александр Киселёв рӯпиты. Та̄н потраныл хӯл са̄вмалтан ва̄рмаль урыл о̄лыс. Ты тэ̄ла хумлег о̄лы ос хумус хӯл алыщлан я̄т хотщё̄питаӈкве ро̄ви, та̄н ты урыл тот потыртасыт. Матахмат та̄л ювле хультум порат округувт о̄лнэ я̄нувт хӯланув мощщаг е̄мтуӈкве патсыт. Тыима̄гыс тыт ма̄нь хӯл янмалтан завод ӯнттувес. Ань округувт яныгса̄т нёлсӑт нупыл хӯрум предприятият хӯл пувим ос хӯлыӈ тэ̄нут ва̄рим рӯпитэ̄гыт. Ты ва̄рмаль щирыл ка̄сыӈ та̄лныл са̄внув ма̄хум рӯпиты. Ань ос юио̄выл кит та̄лыг сыс са̄внув хӯл пувуӈкве патвес. 2014 та̄лт лов тонна хӯл ка̄тынпаттувес. Мо̄лты та̄л китхуйплов арыгтем тонна хӯл та̄стувес. Ты та̄л ущпылнэ̄г са̄в хӯл пуваве тах. Ань ка̄сыӈ та̄л хӯлэ са̄вмуӈкве патыс. Рыбзаводыт рӯпитан хо̄тпат ла̄щалла̄щал я̄т ос тӯрыт ма̄нь хӯлыл та̄ртсаныл. Ань ты завод ёт хӯл алыщлан налыман нупыл ат предприятие рӯпиты. Тамле ва̄рмаль о̄лыглас, округувт то̄ва тӯрыт нас хотто̄сыгласыт. Ань та та̄рвит ва̄рмаль ювле хультыс. Кӯщай хум ла̄выс, ты заводыт ка̄рай, мохсаӈ, сорых тыныӈ хӯлыт янмалтавет. Юио̄выл та̄лытт тамле ва̄рмаль о̄лы, хӯл алыщлан хо̄тпат мо̄рсыӈ порат толге̄гыт, са̄выӈпа̄лэ ма̄хум хӯлуп ӯнттэ̄гыт манос на̄тылтэ̄гыт. Ань толгын ва̄рмаль о̄с но̄хво̄рмалтаӈкве номсаве. Ты та̄л сорых ос мохсаӈ хӯл пувнэ ма̄гыс са̄внув квота майвес. Ань ла̄пканувт э̄рнэ са̄вит хӯл тыналаве. Са̄выӈпа̄лэ ты хӯлыт Иртыш ос А̄с я̄т ма̄хум алыщлэ̄гыт. Ка̄сыӈ та̄лныл са̄внув хо̄тпа хӯл алыщлэ̄гыт. Ма̄хум э̄рнэ нэ̄пакыт атэ̄гыт ос хӯл алыщлан щирыл та рӯпитэ̄гыт. Хӯл алыщлан ка̄сыӈ ма̄т плашкоутыт о̄лэ̄гыт. Хӯлыт хот ул вос нё̄виясыт, тот по̄лям ма̄т о̄ньщавет. Округувт щар са̄в хӯл Кондинский ос Ха̄льӯс районт ма̄хум пуве̄гыт. Ты районыгт са̄в предприятият рӯпитэ̄гыт. Та̄н по̄лям, солвалтым, восытаптым хӯл акваг та̄стэ̄гыт. Хӯл алыщлан тэ̄ла щирыл рӯпитаӈкве ань хо̄тпа кит ва̄рмаль хосыт ве̄рми. Ань хӯл пувнэ ма̄ конкурс щирыл миве. Э̄рнэ нэ̄пакт акванатнэ̄н юипа̄лт, хӯл алыщлан ма̄л та̄ра миве̄н. Ты алыщлан ма̄ лов арыгтем та̄лын миве. Тыныӈ хӯлыт туп квота щирыл алыщлаӈкве ро̄ве̄гыт. Китыт ва̄рмаль хосыт ос тыщирыл хӯл алыщлан ма̄ виӈкве ро̄ви. Вит ӯргалан фондын заявлениенэ̄пак хансуӈкве э̄ри. Тувыл ма̄л та миве̄н. Ты тэ̄ла щирыл ос тамле та̄рвит е̄мтыс, хӯл алыщлан акв ма̄н атаххо̄тах хо̄тпа воратэ̄гыт. Та̄нанылн ты ма̄т мивет кос, ос ётылнув ты хо̄тпат хӯл алыщлан ма̄л вуянтахтуӈкве о̄вылтахтэ̄гыт. Халанылт ма̄хум вори ул вос тотсыт, тыима̄гыс та̄н конкурс щирыл хӯл алыщлан ма̄ виӈкве ла̄вавет. Ка̄сыӈ хо̄тпа ёт договорнэ̄пак хансаве. Тот пуссын ва̄рмалит ёмщакв хансым о̄лэ̄гыт. Ётыл та̄рвит ва̄рмалит ат е̄мталэ̄гыт.

1129 2016. 08. 11. Галина КОНДИНА

Ёмас хо̄тпа хотта мус номуӈкве патылӯв О̄йттур э̄тпос ва̄т нупыл титыт хо̄талт «То̄рум Маа» музейт рӯпитам кӯщай нэ̄ Валентина Николаевна Кочетыгова а̄тимыг е̄мтыс. Тав 2008 та̄л па̄сныл музейт кӯщаиг рӯпитас, са̄в ёмас ва̄рмаль, ёмас рӯпата хантыт ос ма̄ньщит ма̄гсыл ва̄рыс, акваг соссаӈ мир ма̄гсыл сыме ща̄ргыс. Во̄ртур э̄тпос титыт хо̄талт Валентина Николаевна яныг намхо̄талэ о̄лнув. Та намхо̄талэ мус аквматах хо̄тал ат о̄лыс, са̄тлов нупыл ат та̄лэ то̄влынув. Ка̄ркам, сымыӈ нэ̄кве ка̄стуӈкве тав рӯпитам ма̄тэ̄н са̄в мир атхатыгласыт. Округ яныг кӯщаюв Наталья Комарова о̄с ёхталас, тав сака ёмас, сымын ро̄внэ ла̄тӈыт ла̄выс: «Ам тав хольтэ тыса̄вит та̄л тыт ат кос о̄лэ̄гум, ос таве ка̄стуӈкве хумус ат ёхталэ̄гум. Валентина Николаевна сака ё̄р хо̄тпа о̄лыс. Тав ляпатэ̄т о̄лым ты ё̄ре, ты ва̄ге ка̄сыӈ хо̄тпа ва̄стэ. О̄лме сыс тав таса̄вит э̄рнэ рӯпата ва̄рыс, са̄в тэ̄ла ва̄руӈкве а̄лымас. Тав соссаӈ ма̄хум сака э̄руптасанэ, та̄н о̄лупсаныл ёмщакв ва̄стэ. Тамле хо̄тпа сака мощща, тав мо̄т мирныл о̄лыс ос тох хантыт ос ма̄ньщит ма̄гсыл сыме ща̄ргыс, та̄нанылн нё̄тыс, та̄н культураныл но̄хво̄рмалтас. Ты нэ̄кве соссаӈ мир культура а̄ти туп осныл ва̄стэ, тав та̄н хольтаныл о̄луӈкве ха̄сыс. Тав ты э̄рупсатэ ос номтэ ма̄навн, ка̄сыӈ хо̄тпан мистэ». Тох ты самвит сэ̄гумта̄лым яныг кӯщаюв потыртас. Валентина Николаевна ма̄ньлат порат 1975 та̄лт тыг лӯима̄н Сургут ӯсн рӯпитаӈкве ёхтыс. О̄влэ̄т «Геолог» нампа культураколт методистыг рӯпитас. Ка̄ркамыг рӯпитаме ма̄гсыл Сургутский район культура отделн кӯщаиг паттувес. Та порат тав ё̄ре̄тыл Угут па̄вылт Пётр Бахлыков намыл пиным музей рӯпитаӈкве о̄вылтахтас. Ма̄вит музей Русскинской па̄вылт, краеведческий музей Лянтор ӯс ос лӯима̄ ма̄хум культура центр пӯсве̄сыт. Валентина Николаевна налымантем та̄л культурат рӯпитаме ма̄гсыл «Заслуженный работник культуры РФ» нам о̄ньщас, «За выдающийся вклад в социальноэкономическое развитие Ханты-Мансийского автономного округа», «За развитие культуры коренных малочисленных народов Севера» нампа премиятыл майлувес. Тав ма̄н ма̄ньщи ос ханты газетагувт рӯпитан ма̄хманув ёт акваг юртыӈыщ о̄лыс. Са̄всыр выставкатын, ялпыӈ хо̄талытын, матыр ма̄щтырлан семинарытын ма̄нав акваг во̄виньта̄лсанэ. Ма̄н та̄н ётаныл акваннё̄тхатым рӯпитасӯв. Ты сака ка̄ркам, номтыӈ, хо̄тпа нупыл ёмас э̄лумхо̄лас о̄лыс. Округув янытыл, мо̄т хо̄н ма̄т яласас, соссаӈ мир культура сака янытластэ. Ма̄н, редакцият рӯпитан ма̄хум, «То̄рум Маа» музей коллективын, тав юрт хо̄тпанэ̄н, ляпа рӯтанэ̄н ос ще̄мьятэ̄н са̄литан ла̄тыӈ хансэ̄в. Ёмас э̄лумхо̄ласакве о̄лыс, таве хотта мус туп ёмас ла̄тӈыл ка̄сталаӈкве патылӯв. Валентина Николаевна такви самын патум ос яныгмам ма̄тэ̄т Кемерово ӯст о̄йттур э̄тпос ва̄т нупыл атыт хо̄талт ёлщё̄питавес.

1129 2016. 08. 11. Николай МЕРОВ

Ма̄ньщи учёныюв хансум нэ̄пакыт ловиньтэ̄н Евдокия Ивановна Ромбандеева Ханты-Мансийск ӯст о̄лы, А̄сугорский институтт рӯпиты. Тав филологический наукат доктор нам о̄ньщи. Мо̄лалнув ам тав палтэ ялсум, тав ётэ мощ потрамасум. Тав такви о̄лупсатэ урыл а̄нумн потыртас. Ты номтыӈ ос мӯтраӈ хо̄тпа 1947 та̄лт Ханты-Мансийск ӯс педучилище а̄стлас, кит та̄л Хо̄сло̄хыт ня̄врамыт ханищтым рӯпитас. Тувыл 1949 та̄лт Ленинград ӯсн э̄лаль ханищтахтуӈкве минас. Тот Ленинградский Государственный университетыт финноугор мирыт ла̄тыӈ кафедрат ат та̄л филологыг ханищтахтас. Та юипа̄лт тав языкознание институтын рӯпитаӈкве вуйвес. Тот лӯима̄ мирыт ла̄тӈыт ханищтан ты хо̄тпат рӯпитасыт: Пётр Скорик, Наталья Терещенко, Клавдия Новик, Ольга Константинова, Владимир Нидялков, Альбина Жукова, Ольга Суник ос мо̄т ма̄хум. Та институтыт кӯщаиг Валентин Аврорин рӯпитас. Та̄н сака ёмас ма̄хумаквет о̄лсыт, пуссын акв колнакыт ӯнлысыт. Евдокия Ивановна та̄наныл акваг номиянэ. 1968 та̄лт тав Москва ӯсн ва̄нтлуптаӈкве ква̄лтапаптувес. Тот языкознание Центральный институтыт рӯпитаӈкве патыс. Тот о̄с сака ёмас учёныит о̄лсыт: Клара Майтинская, Евгения Коведяева, Александр Феоктистов, Раиса Боталова, Григорий Ермушкин. Евдокия Ивановна ла̄выс: «Ма̄н палтув кӯщаиг Б. А. Серебрянников рӯпитас. Ты пуссын яныг учёныит о̄лсыт. Та̄н ётаныл рӯпитаӈкве сака кӯпнит о̄лыс. Ам та̄наныл ёмас ла̄тӈыл ка̄стыянум, ань та̄н пуссын та То̄румн патсыт. Я̄тил ма̄хумаквет номтыӈыт о̄лсыт». Москват Евдокия Ивановна ма̄ньщи ла̄тыӈ нэ̄пакн хансым са̄в та̄л рӯпитас. То̄нт о̄выл научный грамматика «Мансийский (вогульский) язык», «Синтаксис мансийского (вогульского) языка» нэ̄пак хансыс. Ты нэ̄паке мо̄т хо̄н ма̄т Мюнхен ӯст немецкий ла̄тӈыл толмащлавес. Тувыл 1984 та̄лт Евдокия Ивановна ма̄ньщи ла̄тӈув литература щирыл хансыстэ. Та па̄сныл ань тыг мус пуссын аквщирыл хансэ̄в. Ётылнув 1989 та̄лт ре̄тыӈ ю̄свой э̄тпост тав Москва ӯсныл Ханты-Мансийск ӯсн округ заседаниян во̄ввес. Тот тох ла̄ввес: «Ханты-Мансийск ӯсн ва̄нтлэн, научный Центр пӯнсэн». Тав та̄ра касащас. Москван ёхтыс, ты о̄вылтыт ла̄выс ос кӯщаянэ̄н ат та̄ртвес, та̄н ла̄всыт: «Москват ма̄ньщи ла̄тыӈ ва̄нэ хо̄тпа э̄ри». Тувыл ос Евдокия Ивановна такви ма̄тэ̄н минуӈкве номтэ патыс, ла̄щмарт нэ̄паканэ, пормасанэ миннэ щирыл та щё̄питасанэ. 1990 та̄лт ма̄ньполь э̄тпос са̄тыт хо̄талэ̄т заявлениенэ̄пак кӯщаин хансыс. То̄нт кӯщаиг Валентин Степанов о̄лыс, о̄йка ка̄тпос пиныс, та̄ратастэ. Тыщир Ханты-Мансийск ӯсн ты ёхтыс. Тыт та̄н хӯрум хо̄тпа В. Бойко, Н. Шведова ос тав научноисследовательский лаборатория план ва̄рсыт. Ты лаборатория хосыт 1991 та̄лт ос А̄сугорский институт ва̄рнэ ма̄гыс округ кӯщай хум А. Филипенко хасхатас. Ты институт тыт ань тыг мус рӯпиты. Тот хантыт, ма̄ньщит, рущит ос мо̄т мир хо̄тпат ты рӯпитэ̄гыт. Тыт рӯпитанэ̄тэ па̄сныл хӯрум фольклорный нэ̄пак хансыс: «Мифы, сказки, предания манси (вогулов)», «Героический эпос манси (вогулов)», «Медвежьи эпические песни манси (вогулов)». Хӯрум монографиянэ̄пак хансыс: «Душа и звёзды», «История народа манси (вогулов) и его духовная культура», «Эволюция становления семьи манси». Ты ла̄вылтам нэ̄паканэ̄т пе̄с йис ма̄хум та̄н ва̄м, ва̄рыглам э̄ргыт, мо̄йтыт, На̄й-О̄тыр ка̄стыл э̄ргыт, по̄йкщан ня̄йтсовыт хансым о̄лэ̄гыт. Та̄наныл хасме порат Евдокия Ивановна маттем та пӯмщалахтас, пе̄с йис ма̄хумтыл маттем та янытлахтас. Тав ла̄выс: «Маныр ёмас номтыӈ ма̄ньщи ма̄хумате̄нув о̄лмыт, маныр о̄луӈкве ха̄смыт. Та̄нанылныл ань о̄лнэ ма̄хумте̄нувн матыр номтло̄мт ул ханувъяс. Номтанылт маныр са̄в йис э̄рыг, йис На̄й-О̄тыр ка̄стыл та̄н ва̄мыт, хащмыт». Ма̄хумаквет, та яныт ёмас ва̄ре̄н, тыт хӯлтым нэ̄пакыт ловиньтэ̄н. Евдокия Ивановна та̄наныл ма̄ньщи ла̄тӈыл хассанэ, тувыл рущ ла̄тӈыл толмащласанэ. На̄нан торгамтан те̄мыг та̄н о̄лэ̄гыт. Ты потрыт тав ро̄внэ щирыл хассанэ. Ма̄ньщи ма̄хумате̄нув, пус ка̄т, пус ла̄гыл о̄лэ̄те̄н, хӯлэте̄н. На̄й-О̄тыраны̄н вос ӯргалаве̄н. Е. И. Ромбандеева потре нэ̄пакн Николай МЕРОВ хансыстэ.

1129 2016. 08. 11. Тамара МЕРОВА

Сака ка̄ркам нэ̄ урыл потыр Ханты нэ̄ Валентина Тарлина, такви о̄парищ наме Кондина, округ янытыл са̄в ма̄хумн ва̄ве. Тав Белоярский район Касум па̄вылт о̄лы, соссаӈ ма̄хум ялпыӈ хо̄талыт о̄лыгланэ̄ныл порат хотты ӯсытн манос па̄влытын во̄виньта̄лаве ос тот пе̄с щирыл пӯрлахты, э̄рги, йӣкви ос такви ю̄нтум пормасанэ тыналы. Я̄ӈк на̄тнэ э̄тпост тав мо̄т нэ̄т ёт Москва ӯсн «Сокровища Севера» нампа фестивальн ялыс. Та̄н са̄всыр пормасыт ма̄щтырласыт, суссылтапыт ва̄рыгласыт, хӯл, пил, нё̄влиӈ тэ̄нут тув тотыгласыт ос мо̄т лӯима̄ са̄в ма̄хум халт «Гран-При» яныг мӯйлупсал майве̄сыт. Валентина Григорьевна юн крестьянское (фермерское) хозяйство ва̄рыс ос тот ще̄мьятэ ёт ты рӯпитэ̄гыт. Мо̄лал ам таве ты рӯпататэ о̄вылтыт китыгласлум, Валентина таи потыртас: – Ам 2014 та̄лт «Йис пурмасат» нампа проект щё̄питасум ос но̄хпатсум. Проектыт хаснэ̄в порат таи ёмас, ма̄н пе̄с пора о̄лупсав э̄лаль тотуӈкве ве̄рмилӯв. Та щирыл соссаӈ ма̄хманув хӯл алыщлэ̄гыт, во̄рае̄гыт манос са̄лы янмалтэ̄гыт. Ам супыт, мольщаӈыт, ла̄гыл маснутыт ю̄нтэгум, са̄лы котныл, нуйныл сыресыр сувенирыт ва̄ре̄гум, о̄йкам ос пыгум касаит, ма̄ньха̄пыт ос мо̄т пормасыт ва̄ре̄г. Тох акваннё̄тхатым матса̄вит солко̄ви ма̄нки сэ̄лэ̄в. Ма̄н Касум, Юильск, Нумто па̄влытыт са̄в ханты ще̄мьят тамле рӯпата ва̄рим о̄лэ̄в. Таима̄гыс ма̄н о̄влэ̄т проект хансэ̄в, таве вуянтылӯв, ос тувыл грант щирыл маим олнытыл матыр э̄рнэ утыт ёвтэ̄в манос колыт ӯнттэ̄в, ётыл э̄лаль ма̄нки олн сэ̄луӈкве та патэ̄в. Ванзеват ос Полноват па̄влытыт о̄лнэ ма̄хум тох олн сэ̄луӈкве матрыг ат ка̄саще̄гыт. Та̄н ма̄нанылт аквтох мис, лув янмалтаӈкве ро̄ви, тот ёмас пумканыт о̄лэ̄гыт. Тэ̄пкананыл ёмас то̄сам ма̄т о̄лэ̄гыт, тот картёпка, са̄всыр овощит янмалтаӈкве ро̄ви. Туп та па̄влыӈ ма̄хум ла̄ве̄гыт, матыр ва̄рнэ ма̄гыс сака са̄в нэ̄пакыт акванатуӈкве э̄ре̄гыт, хунь та са̄в ма̄т та̄н ха̄йтнэ̄ныл. Ань та̄н матыр ва̄руӈкве ка̄саще̄гыт ке, ма̄н та̄нанылн нё̄туӈкве ла̄вхатсӯв. Ма̄н ма̄нки олн сэ̄лнэ рӯпата хо̄нтсӯв, тыил о̄лэ̄в ос пе̄с наканув э̄лаль тотыянӯв. – Валентина, на̄ӈ о̄влэ̄т хусахкем та̄л школат ня̄врамыт ханищтасын, ань ты мо̄т рӯпатан патхатсын. Наӈки ще̄мьян о̄вылтыт матыр ла̄вен. – Ме̄н о̄йкаме̄нтыл Юрий Кузьмич Тарлиныл 1996 та̄лт акванхасхатсуме̄н. Тав палтэ тыг Касумн о̄луӈкве ва̄нтлысум. Тувыл Касум па̄выл я̄ тапа̄лт ме̄нки о̄лнэ кол ӯнттуӈкве патсуме̄н. Тыт матахмат ханты ще̄мьят о̄с о̄лэ̄гыт. Ме̄наме̄н Юра ща̄нягеа̄щаге нё̄тсы̄г. Тэ̄н матыра̄ти пе̄с накыт ва̄нэ хо̄тпаг, са̄лы ӯрим акваг яласасы̄г. О̄йкам ос матыр пормасыт ва̄рнэ ма̄щтыр хум. Такви ха̄пыт, са̄лы суныт ва̄ри, са̄лы а̄ньтныл пормасыт ёрги. Колумт шка̄пыт, пасаныт, уласыт – ты тав ва̄рум утанэ. Тувыл тав та̄наныл хансал яктыянэ. Крестьянское хозяйство ме̄н аквъёт номсым ва̄рысламе̄н. Ты тав ща̄няге̄ныла̄щаге̄ныл родовой угодият хультсыт ос ме̄н та ма̄ ме̄нки нупыламе̄н хансысламе̄н, тот кол ӯнттысме̄н ос матахмат са̄лы ёвтсуме̄н. Юра са̄лыӈ колыт яныгмас, таима̄гыс ты тэ̄лат пуссын ва̄ганэ. Ам акваг тав нуплэ сунсым са̄всыр тэ̄лат ва̄руӈкве ханищтахтасум. Тэ̄лы о̄щнэ маснутыт са̄лы совныл амки ю̄нтэ̄гум, тувыл са̄всыр сувенирыт ю̄нтэ̄гум. Артём пыгкеме̄н йӣвныл ма̄ньха̄пыт ёрги, сыпалиӈ касаит ва̄руӈкве ханищтахтас. Тувыл пуссын ты пормасыт тыналыянӯв. Са̄всыр фестивалит о̄лнэ порат мӯй ма̄хум акваг ёвтэ̄гыт. Мо̄лал бокскасыл округ Чемпионатэ Белоярский ӯсувт о̄лыс, ам боксёр ма̄нь па̄ссат ю̄нтуӈкве номылматсум. Таиянум такем молях ёвтве̄сыт, ам тувыл э̄ти сыс о̄с хус па̄ра ю̄нтсум. Ма̄н ань матыра̄ти ва̄ре̄в ке, пуссын акваннё̄тхатэ̄в. О̄йкам матыр ла̄тыӈ хӯлты, а̄нумн пе̄с порат о̄ньщим новтуп ос мо̄т э̄рнэ утыт ва̄рыс, ам ос таве̄н нё̄тэ̄гум, пыгме̄н пе̄с накытыл о̄с пӯмщалахты. Ань ма̄ янытыл соссаӈ мирыт ялпыӈ хо̄таланыл кастыл ма̄н Тарлин ще̄мья янытлылӯв. Пус ка̄т, пус ла̄гыл та̄нанылн ос На̄й-О̄тыранылн вос ӯргалавет!

1129 2016. 08. 11. Тамара МЕРОВА

Ма̄нь пора та̄ланэ ань тыг мус номиянэ Мария Яковлевна Бармич 1967 та̄л па̄сныл Санкт-Петербург ӯст о̄лнэ А. И. Герцен нампа лӯима̄ ма̄ньлат ма̄хум ханищтан институтт рӯпиты. Тав тот а̄гитпыгыт ё̄рн ла̄тӈыл потыртаӈкве ханищтыянэ. Тувыл ё̄рн ма̄хум халт тав о̄выл учёный нэ̄г о̄лы, ань профессор ос филология наукат кандидат нам о̄ньщи. Ты та̄л тав онтырса̄т нупыл кит та̄лэ то̄влыс. Мо̄лты та̄л лӯима̄ ня̄врамыт институтн ялмум порат ам Мария Яковлевна ёт ва̄щинтахтасум. Э̄ква аквтох энецкий ос нганасанский ла̄тӈыгтыл студентыт потыртаӈкве ханищтыянэ. Са̄в та̄л рӯпитанэ̄т сыс э̄ква яныгса̄т атпан са̄вит научный нэ̄пакыт хансыс. Школат ос институтт ханищтахтын а̄гитпыгыт ма̄гыс са̄всыр учебникыт, словарит щё̄питас. Мария Яковлевна ла̄ви: «Ань то̄ват ул номсэ̄гыт, лӯима̄ ма̄хум ла̄тӈыл хансым нэ̄пакыт – тыи наска̄ссыг ва̄рнэ рӯпата. Ма̄ньлат хо̄тпат ань ща̄нь ла̄тӈаныл ат ва̄ганыл, потыртаӈкве ат таӈхе̄гыт. Сар ла̄щ, пора аквты щёс мины ос э̄лумхо̄лас такви рӯтэ о̄лум пе̄с накыт э̄лаль кисмайиянэ тах. Ос тав номсахтынэ̄тэ сыс са̄выӈпа̄лэ пе̄с накыт туп нэ̄пакын хансым, хуритн по̄слым тах хультэ̄гыт. Ӯст самын патум ё̄рн манос мо̄т лӯима̄ мир хо̄тпат о̄лупсав нэ̄пакн хансым потрыт щирыл ва̄ӈкве туп патэ̄гыт тах». Ты ла̄тӈе ёт ам о̄с ка̄саще̄гум, манах щёс ма̄нки ма̄хманув ёт тох е̄мталас. То̄внакт ма̄ньщи хо̄тпа мо̄т ма̄н о̄луӈкве мины, тот хоса о̄лы ос ётыл ща̄нь ла̄тӈыл потыртан та̄л марщумлаве, то̄нт тав ма̄ньщи газетат манос нэ̄пакыт хо̄нты ос ловиньтыянэ. Мо̄т порат ма̄ньта̄гыл ла̄тыӈ ат ва̄нэ хо̄тпа такви ща̄нь ла̄тӈе̄тыл пӯмщалахтуӈкве паты. Ва̄тихал акваг пӯмщалахтым, ханищтахтым тав потыртаӈкве та ханьщувлы. Тувыл мо̄т хо̄н ма̄ӈ хо̄тпат ла̄тӈув учёныитн хансым словарит, нэ̄пакыт щирыл о̄с ханищтыяныл ос ма̄нав такем ёмщакв торгамтыяныл. Мария Яковлевна ма̄нь поратэ ва̄тихал номылматыгла̄лытэ. Тав потыртас: «Ам Ненецкий автономный округ Канинский тунра ма̄т самын патсум. Ща̄нягума̄щагум са̄лыӈ хо̄тпаг о̄лсы̄г, ма̄н ще̄мьял са̄лыӈколт яныгмасӯв. Рӯтанув пуссын ё̄рн ла̄тӈыл потыртасыт ос ам о̄выл хӯнтамлам рущ ла̄тӈум «война» о̄лыс. Манырсырмат ла̄тыӈ, ма̄н, ня̄врамыт, щар ат торгамтаслӯв. Туп сусте̄вт, яныгнув ма̄хманув пуссын ка̄смоста̄лыг е̄мтсыт ос акваг хурахлым о̄лсыт. Ам яныгпо̄ль э̄тпос ва̄т нупыл хо̄т щислат хо̄т та̄лум то̄влыс ос я̄ӈк на̄тнэ э̄тпост яныг хо̄нтлан ва̄рмаль е̄мтыс. Номилум, тэ̄лы пора о̄лыс, са̄в са̄лыӈколытыл хум хо̄тпат ёхтысыт ос са̄лы суныт по̄хат пуссын акванатхатсыт, хоса потыртасыт. Ётыл а̄щув юв ёхтыс ос ла̄выс – та̄нанылн па̄вылн минуӈкве э̄ри. Матахмат ще̄мьяӈ ма̄хум са̄лыл па̄выл мус та минмыгтасӯв. Хоса минасӯв ос хотталь нор колыт ӯнлын ма̄н та ёхтысӯв. Тот аквта щирыл хум хо̄тпат акванатхатсыт, та̄н палтаныл акв ха̄щтал хум ёхтыс, матаре потыртас. Тувыл а̄тяв ма̄н ляпавн ёхталас, ма̄нав сынумта̄лсанэ, нэ̄матыр ат ла̄выс, сысы ё̄ӈхыс ос та минас. Омав о̄с нэ̄матыр ювле ат ла̄выс, нас ла̄щлакв лю̄лим ма̄н ётув та хультыс. Мо̄таныт о̄с аквта хольт о̄с ёмас ӯлум ва̄рсыт. Ам лю̄ньщалтахтуӈкве ос а̄тям юипа̄лт ха̄йтуӈкве тахсум, омамн ювле хасумтаве̄сум ос тав ла̄выс: «Ат э̄ри, а̄тян тах ювле ёхты. Тав войнан тотвес, ань аман хумус э̄лаль ма̄н о̄луӈкве патэ̄в, ты пилыщмаӈ ма̄т ма̄хум порславет». Ам ущты «война» ла̄тыӈ мощ торгамтаӈкве патыслум. Амкирот номсэ̄гум, насати, ты хащта̄л о̄йка ты «война» наме о̄лнэ̄тэ, ма̄н хум ма̄хманув хотталь сысы ты тотсанэ. Омам то̄нт ва̄т нупыл хо̄т та̄лэ о̄лыс ос тав хӯрум ма̄нь ня̄враме ёт такке̄т хультыс. Тав такви ё̄рнкол рӯпата ва̄рыс, са̄лы ӯрнэ ма̄н ялантас, ма̄нав янмалтас ос а̄тяв акваг юв ӯрыстэ. Ам ётыл ханищтахтуӈкве школаинтернатн тотве̄сум ос тот рущ ла̄тӈыл потыртаӈкве ханищтаве̄сум. Интернатыт о̄лмув порат о̄с са̄всыр а̄гмыл е̄мталасӯв, пилыщмаӈ па̄тлумтан ва̄рмалит о̄лыгласыт. Акв щёс юн о̄лнэ̄в сыс пищма ёхтыс, омам рущ ла̄тӈыл щар ат потыртас, таима̄гыс а̄нумн ловиньтаӈкве мистэ. Ам а̄тям урыл ловиньтаслум, тот хансым о̄лыс – «без вести пропал». Ты ла̄тыӈ мощ торгамтаслум кос ос хотрохтумум ма̄гыс пищма кӯрн вущкасаслум. Омам ты урыл нэ̄матыр ат ва̄с, тав а̄тям акваг юв та ӯрыстэ. Ка̄сыӈ э̄тпос на̄иӈхап ёхталам порат ма̄н аквъёт тув ялантасӯв ос тот хоса лю̄льсӯв, ӯрхатсӯв. Тувыл нас кисхатым ха̄йтыгтасӯв, ве̄к а̄тяв са̄в ма̄хум халт хоттыпыс. Ам ва̄слум кос, маныр лю̄ль тэ̄ла ам ва̄рапасум, омам то̄нт са̄литаслум ос лю̄ль ля̄ххал таве̄н ат толмащласлум. Ты номтыл ань тыг мус о̄лэ̄гум, омакем ма̄гыс сымум ща̄рги. А̄тяке̄в воссыг нэ̄мхуньт ат та хо̄нтыгласлӯв».

1129 2016. 08. 11. Светлана РОМБАНДЕЕВА

Кульпас па̄выл паркмузей 25 та̄лэ то̄влыс Ты та̄л Ха̄льӯс район Кульпас па̄вылт о̄лнэ «На̄йо̄тыр Маа» паркмузей 25 та̄лэ то̄влыс. Ювле хультум э̄тпост ам тув ялсум, кӯщай нэ̄ ёт потрамасум, тот мощ ё̄мыгтасум, колыт ос акванатым пормасыт по̄слысанум. Паркмузей кӯщаиг ма̄ньщи нэ̄ Светлана Николаевна Немкова рӯпиты. На̄н ань э̄лаль тав потре ловиньтэлы̄н. – Тӯяг «На̄йо̄тыр Маа» паркмузей 25 та̄лэ то̄влыс. Таве ва̄руӈкве ма̄ньщи нэ̄ Анфиса Михайловна Хромова номылматастэ. О̄влэ̄т тав школат колнак щё̄питас, тув пе̄с пормасыт атуӈкве патыс. Ханищтахтан ня̄врамыт тув акваг во̄виньта̄лсанэ, аквъёт матыр щаквщисыт, сакныл са̄всыр пормасыт – пальсакыт, турло̄псыт ос олнкасыт хартсыт. Анфиса Михайловна а̄ги о̄парищ наме Гындыбина о̄лыс, Кимкъясӯй па̄вылт самын патыс. О̄лме палыт тав такви ма̄ньщи мире ма̄гыс са̄в э̄рнэ тэ̄ла ва̄рыс, ща̄нь ла̄тӈе янытластэ, сака ка̄ркам хо̄тпа о̄лыс. Матыр тэ̄ла ва̄руӈкве номылматас те, номтэ щар ат хӯлистэ, ла̄щалла̄щал ва̄рыстэ. 1990 та̄лт тав ты музей ва̄руӈкве о̄вылтастэ. Колыт ӯнттуӈкве ха̄снэ ма̄хум та̄рапаттыс, рӯпитаӈкве во̄всанэ. Тувыл акв та та̄л колыт ӯнттуӈкве та патве̄сыт – тэ̄лы кол, туи кол, тэ̄лы пормас о̄щнэ сӯмъях ос мо̄т э̄рнэ колыт. Во̄ртур э̄тпост яныгхо̄тпат пуссын акванатхатасыт, музей пӯмщаласаныл, ӯнлахо̄лсыт, потрамасыт. Ос то̄нт музей урыл нэ̄матыр нэ̄пак хансым ат о̄лыс, иӈыт щё̄питаве̄сыт. Туп 1991 та̄лт э̄рнэ нэ̄пакыт ущ хасве̄сыт, ре̄тыӈ ю̄свой э̄тпост ос тыт рӯпитан ма̄хум наманыл хасве̄сыт та маныр. Ма̄н ань та па̄сныл паркмузей намхо̄талэ та ловиньтылӯв. Анфиса Михайловна хосат а̄тимыг е̄мтыс, ос ма̄н таве ёмас номтыл ка̄стылӯв, тав о̄вылтам тэ̄ланэ э̄лаль тотыянӯв. Ты та̄л ялпыӈ хо̄талув лӯпта э̄тпост ва̄рыгласлӯв. Номсэ̄в, ты порат на̄иӈха̄п яласаӈкве паты, са̄внув хо̄тпа ёхтуӈкве ве̄рми. О̄влэ̄т клубколт акванатхатыгласӯв. Ма̄н ань ма̄ньщи мирув культура но̄хво̄рмалтанэ̄в, пе̄с йис пормасыт акванатнэ̄в, ӯргалым о̄щнэ̄в ма̄гыс Ха̄льӯс район ос Саранпа̄выл кӯщаитн янытлан нэ̄пакытыл майвесӯв. Клубыт рӯпитан ма̄хум концерт суссылтасыт, йӣквсыт, э̄ргысыт. Тувыл мӯй ма̄хум пуссын музейн во̄выгласанӯв. Тыт хӯл исмит па̄йтсӯв, восытаптым хӯл, исум ща̄й щё̄питасӯв. Хӯлыл «Рахтынья» община па̄лыл майлувесӯв. Аквтох ма̄навн Елена Афанасьевна Рокина нё̄тыс, тав Саранпа̄вылт о̄лы, такви ва̄рум рӯпатал олн сэ̄лы. Светлана Николаевна музей колнакыт суссылтас. Акв колнак тох намаим о̄лы: «Комната боевой славы». Тот яныг хо̄нтыт хо̄нтлам ма̄хум хурияныл колнор онтсыл тагталым олэ̄гыт. Мо̄т я̄нас колнакн ма̄ньщи мир маснут, пормас та маныр акванатым о̄лы. Светлана Николаевна ла̄вме щирыл, а̄мпаранылт са̄в пе̄с пормас о̄лы – ма̄ньщи супыт, нуй сахит, ла̄гыл маснутыт. Ма̄ньщи нэ̄ Зоя Петровна Тоголмазова (Монина) ка̄тыл акваг матыр щаквщи, ма̄щтырлы. Тав са̄в та̄л интернатт рӯпитас, ня̄врамыт матыр ва̄руӈкве ханищтасанэ. Музейн са̄в пормас мис, та̄наныл ма̄н о̄с мирн суссылтыянӯв. Кимкъясӯй па̄вылт о̄лнэ ма̄ньщи нэ̄ Евдокия Владимировна Таратова о̄с акваг матыр ма̄щтырлы, тав ва̄рум пормасанэ музейт о̄лэ̄гыт. Кульпас нэ̄ Татьяна Абрамовна Качанова о̄с сака ка̄ркам, тав па̄квпалыӈ ё̄рнхӯрыг ос маньнэ пӯтска ю̄нтыс. Музейн э̄ргынйӣквнэ ма̄хум ёхталэ̄гыт, концерт кастыл ма̄ньщи э̄рыг ман йӣкв щё̄питэ̄гыт, Татьяна Абрамовна та̄н ётаныл о̄с акваг э̄рги, йӣкви. Ты колнакт са̄сныл ва̄рим ма̄нь ё̄рнкол лю̄ли, Марфа Андреевна Солянова тав ва̄рыглам, э̄ква хосат а̄тим. Са̄с па̄лыт па̄йтсанэ, тувыл акваню̄нтсанэ, тамле колыг та е̄мтыс. Колнор онтсыл пе̄с хурит но̄хтагталым о̄лэ̄гыт. Янгыщ тот Анфиса Михайловна а̄гит ёт по̄слым о̄лы. Та̄н ань э̄ргимйӣквим са̄в ма̄т яласасыт, манос сакныл матыр хартым ӯнлэ̄гыт, пуссын ма̄ньщи супыл масхатым о̄лэ̄гыт. Акв хурит ос Татьяна Андреевна Канева школа музей колнакт ня̄врамыт нупыл пе̄с пормасыт урыл потырты. То̄нт тав такви о̄с иӈ ханищтахтас, ань э̄лаль тыт рӯпиты. Музейт 1 сотыра 607 са̄вит пормас акванатым о̄лы – са̄всыр маснутыт, о̄щнутыт, а̄ныса̄ныт, са̄с хусапыт, кон ос колыт ӯнлэ̄гыт, са̄лыӈ сун, ня̄нь ва̄рнэ кӯр, та маныр. Аквматнакт тыт ма̄н «Родиной стала Сибирь» нампа выставка ва̄рыгласӯв. Мӯй ма̄хумн таи суссылтаӈкве тахсӯв, ань хосат тыг ёхталам рущ ма̄хум маныр ёт тотыгласыт, маныр о̄щсыт, хумус о̄лсыт. Ма̄ньщи ма̄хум утюгыт манос са̄мварыт ат о̄щсыт, ты пормасыт рущ ма̄хум а̄мпаранылт хо̄нтве̄сыт. Кит утюг Кимкъясӯй па̄вылныл тотсагув. Ты пе̄с утыт ань хотьютн э̄ре̄гыт, тыт та хультсыт. Та̄н ма̄гсыланыл я̄нас колнак ва̄рсӯв, тох намаяслӯв: «Домашний быт переселенцев». Нилыт колнакт намыӈсуиӈ ма̄ньщи хо̄тпав Пе̄тр Ефимович Шешкин о̄вылтыт выставка ва̄рим о̄лы. Тав хуритэ ос тав ва̄рыглам хуриянэ колнор онтсыл но̄хтагатым о̄лэ̄гыт, йӣвныл ёргыглам пормасанэ – ӯйхулыт, товлыӈӯйит пуссын пасан тармыл тӯщталаве̄сыт. Пе̄тр Ефимович ма̄ньщи ма̄хманувн номаве, янытлаве. Тот рӯпитан хо̄тпат тав уре̄т мӯй ма̄хумн ос ня̄врамытн потыртэ̄гыт, тав ва̄рыглам пормасанэ мирн суссылтыяныл. Светлана Николаевна музей тэ̄ланэ ма̄гыс сыме ща̄рги, тав тох ла̄выс: – Матыр пе̄с пормас ёвтнэ ма̄гыс ма̄н кӯщаянувн олныл ат майлаве̄в. Хотты хо̄тпа музейн ма̄тыр нас тох мыг те, манос мӯйлупты, ты сака ёмас тэ̄ла, ма̄н хотща̄гтэ̄в. То̄ванакт мастерклассыт ва̄рыглэ̄в, ка̄тыл ва̄рим пормасыт мирн суссылтан ма̄гсыл о̄с тыг хотталь но̄хтӯщталыянӯв. Ма̄хум тыг ва̄тихал ёхталэ̄гыт, «Ӯринэ̄ква хо̄тал» ос «Ворщик хо̄тал» ва̄рыглэ̄в. То̄ванакт тыг яныгхо̄тпанув во̄виньта̄лыянув, хӯл исмитыл па̄йтыянӯв, исум ща̄ил айтыянӯв. Та̄нанылн пӯмыщ, сакати тыт акванхо̄нтхата̄лэ̄гыт, ӯнлахо̄лэ̄гыт, потраме̄гыт. Садикын ялантан ня̄врамыт ма̄лтып хо̄тал порат кон ёнгалтыянӯв, яныгнув ня̄врамыт ма̄гыс ос са̄всыр хо̄нтхатыглапыт ва̄рыглэ̄в. Ма̄хум э̄лы хо̄н ма̄ныл о̄с ёхталэ̄гыт – Финляндияныл, Венгрияныл, тыт мощ ё̄мыгтэ̄гыт, пӯмщалахтэ̄гыт. Ань потруме̄н та оигпас. Ам Светлана Николаевнан пӯмащипа ла̄тыӈ ла̄ве̄гум. Ты я̄тил ма̄ньщи ма̄хманув тамле э̄рнэ рӯпата ва̄руӈкве ё̄р вос о̄ньще̄гыт, На̄й-О̄тыранылн вос ӯргалавет! Пус ка̄т, пус ла̄гыл! Ты потыр Светлана Ромбандеева хансыс ос хури ва̄рыс.

1129 2016. 08. 11. Людмила Теткина

Соссаӈ ма̄хумн нё̄тнэ ма̄ньщи нэ̄ Сургут ӯст са̄в та̄л «Югра лылые̄п» общественный организация отделениятэ рӯпиты. Тот Валентина Шадрина кӯщаиг о̄лы. Ма̄ньщи нэ̄ ла̄выс, та̄н соссаӈ ма̄хумн нё̄тэ̄гыт ос са̄всыр ялпыӈ хо̄талыт о̄лыглан порат э̄рге̄гыт, йӣкве̄гыт ос культурав урыл потыртэ̄гыт. Валентина Шадрина Сургутский районный методический центрыт рӯпиты. Та отделеният та̄н хӯрум хо̄тпа ханты ма̄хум пе̄с йис ва̄рмаляныл но̄хво̄рмалтэ̄гыт. Ма̄ньщи нэ̄ ёт ам Сургут ӯст ялпыӈ хо̄тал о̄лум порат ва̄йхатасум. То̄нт та ӯст «Соцветие» фестиваль о̄лыс. «Югра лылые̄п» организация ос «Старый Сургут» нампа центрыт рӯпитан хо̄тпат ты ялпыӈ хо̄тал о̄лум порат ма̄ньщи ос ханты мирыт урыл потыртасыт. Ты ва̄рмаль урыл нэ̄ ла̄выс: «Тамле ялпыӈ хо̄талт ӯскант са̄всыр мирыт та̄нки культураныл суссылтэ̄гыт ос потыртэ̄гыт. Ма̄н ка̄сыӈ та̄л тамле фестивалин мӯйлуӈкве во̄виньта̄лаве̄в. Ма̄щтыр ма̄хманув тув ёхталан мир а̄кань ю̄нтуӈкве ос са̄сныл ня̄лы ва̄руӈкве ханищтасаныл. Хумус са̄сныл молях ня̄лы ва̄руӈкве ро̄ви, ма̄хум сака пӯмщалахтасыт. Во̄рт о̄лнэ соссаӈ ма̄хум ёмащакв ва̄гыт, хумус ты ня̄лы ва̄руӈкве э̄ри. Ӯст о̄лнэ хо̄тпа тамле ва̄рмаль урыл ат ва̄г, тыи ма̄гсыл акваг са̄в мир ма̄н палтув ёхталасыт ос ханищтахтасыт. Концертын «Вэнт нэ», «Пимочка» нампа ансамблиг Русскинской па̄вылныл ос Лянтор ӯсныл ёхталасы̄г. Тувыл «Лӯима̄ ханса» коллектив тот э̄ргыс ос йӣквыс. Ты коллективыт о̄лнэ хо̄тпат пуссын «Старый Сургут» нампа центрыт рӯпитэ̄гыт. Ялпыӈ хо̄тал кастыл са̄всыр тэ̄нут па̄йтсӯв, ма̄хум хӯлыӈ ня̄нил, ва̄с исмитыл тыттысанӯв, ос ма̄ньщи ща̄ил, пилыӈ витыл айтсанӯв. Ка̄сыӈ мир та̄нки тэ̄нутаныл тув тотыгласаныл. 2016 та̄л – ня̄врамыт янытлан та̄лыг намаявес, та ялпыӈ хо̄талт а̄гирищитпыгрищит са̄всыр пӯмащ тэ̄лал суссылтаве̄сыт. Ты та̄л фестивалин ма̄н ма̄ньщи ос ханты ня̄врамыт э̄ргуӈкве ос йӣквуӈкве во̄виньта̄лсанӯв. Ма̄н палтув азербайджанцыт ёхталасыт, ма̄ньщи ос ханты ёнгытыл ёнгуӈкве ханищтахтасыт. Ма̄н ня̄враманув ос хатань ма̄хум палт мӯйлысыт, тот та̄н тыттуве̄сыт ос са̄всыр щирыл ёнгалтаве̄сыт. Тамле яныг фестиваль ӯст ка̄сыӈ та̄л таима̄гсыл ва̄рыглаве, тыт о̄лнэ са̄всыр мирыт халанылт юртыӈыщ вос о̄лсыт, мо̄т ма̄хум культураныл вос янытласыт ос ня̄враманыл ма̄нь та̄гыл вос ханищтасаныл». Сургут ӯст «Югра лылые̄п» отделеният рӯпитан хо̄тпат са̄в мо̄т э̄рнэ рӯпата о̄с ва̄ре̄гыт. Соссаӈ ма̄хум пе̄с йис ва̄рмаляныл э̄лаль тотнэ ма̄гсыл са̄в ё̄р пинэ̄гыт. Ты тэ̄ла урыл ма̄ньщи нэ̄ Валентина Шадрина тох потыртас: «Ты та̄л ма̄н хӯрум яныг проект хосыт рӯпитасӯв. Акв проект «Встреча родов сургутских ханты» намаим о̄лыс. Сургут ӯст, Сургутский районт ос Пим, Аган, Тромаган, Юган я̄ ва̄тат о̄лнэ ханты ма̄хум акванатыгласанӯв. Тамле хо̄нтхатыглап ма̄н таима̄гсыл щё̄пита̄лсӯв, акв ляпат о̄лнэ ма̄хманув та̄нки халанылт вос ва̄йхатасыт. Ты юипа̄лт ос «Этноэкспедиция» нампа ханищтап ма̄ньлат хо̄тпат ма̄гсыл ва̄рыгласӯв. Сургутский районт ань са̄в ханты ще̄мьят са̄лыяныл ёт пе̄с йис ма̄нылт о̄лэ̄гыт. Та̄н пуссын ща̄нь ла̄тӈыл потыртэ̄гыт, то̄ват рущ ла̄тыӈ щар ат торгамтэ̄гыт. Ты ще̄мьят та̄нки То̄руманылн по̄йкще̄гыт. Тув ма̄н пӯрлахтуӈкве ялсӯв. Ӯст ос яныг па̄влыт о̄лнэ ма̄ньлат а̄гитпыгыт тув тотыгласанӯв, пе̄с йис ва̄рмаляныл урыл са̄внув вос ва̄гыт. ««Хо̄тал» нампа школамастерская» ханищтап ва̄рыгласӯв. Тот ма̄щтыр ма̄хум акванатыгласанӯв. Школан ёхталам хо̄тпат та̄нки халанылт ма̄щтырлаӈкве ханищтахтасыт. Ма̄хум совья ва̄й ю̄нтнэ сов щё̄питасыт ос ка̄сыӈ ма̄щтыр хо̄тпа такви щирыл ва̄рыс. Ханищтапын са̄в мир ёхталас, мо̄т щёс тамле ва̄рмаль о̄с тах ва̄рыглэ̄в. Ты та̄л ма̄н «То̄рум Маа» нампа музей ёт Ӯй йӣквнэ ва̄рмаль щё̄пита̄лсӯв. Ань «Этноакадемия» ханищтап ня̄врамыт ма̄гсыл ва̄руӈкве патэ̄в. Сургутский районт Сергей Васильевич Кечимов пыгыт ялпыӈ э̄ргыт э̄ргуӈкве ос йӣквуӈкве ханищтаӈкве патыянэ. Тамле ханищтап ма̄н «Орт Ики» нампа ня̄врамыт ӯщлахтын ма̄т о̄йттур э̄тпост ва̄руӈкве тахсӯв. Ань ня̄врамыт во̄ртур э̄тпос оигпан ляпат ханищтаӈкве патавет. Касум па̄вылт о̄лнэ ма̄хум тамле тэ̄ла о̄с ва̄рыгласыт. Ты ма̄т о̄лнэ хантыт мо̄т щирыл потыртэ̄гыт, мо̄т щирыл пӯрлахтэ̄гыт ос мо̄т ялпыӈ э̄ргыт о̄ньще̄гыт, та̄н пе̄с йис ва̄рмаляныл э̄лаль тотуӈкве о̄с э̄ри». Ты рӯпата ва̄рнэ ма̄гсыл Сургут ӯст рӯпитан «Югра лылые̄п» отделениятэ грантолныл майвес. Валентина Шадрина ла̄выс, та̄н нэ̄паканыл Сургутский район мирколн, культура департаментын акваг ке̄тыглыяныл ос касыл щирыл олныл та̄ставет. Та̄н ань Россия Президентын та̄нки нэ̄паканыл о̄с ке̄тсаныл. Та̄н «Встреча родов восточных ханты» нампа акв яныг тэ̄ла щё̄питаӈкве таӈхе̄гыт. Сургутский, Нижневартовский ос Нефтеюганский районытт о̄лнэ ханты ма̄хум акванатыглыяныл, та ма̄т о̄лнэ соссаӈ ма̄хум халанылт пуссын вос ва̄йхатэ̄гыт. Валентина Терентьевна ла̄выс, та̄нанылн ма̄во̄й но̄хвинэ компаният нё̄тэ̄гыт. Мо̄лты та̄л «Сургутнефтегаз» 15 ханты ня̄врам ӯщлахтын ма̄гсыл олн та̄стыглас. Ты та̄л ос «Лукойл – Западная Сибирь» олн мис ос 15 ня̄врам ӯщлахтуӈкве ялсыт. Ма̄ньщи нэ̄ ты урыл таи ла̄выс: «Ма̄во̄й но̄хвинэ компаният ёт ма̄н акванпотыртахтым рӯпитэ̄в. Ты коныпал Сургут ӯст о̄лнэ миркол ёт рӯпитэ̄в. Ты э̄лыпа̄лт мирколт соссаӈ ма̄хум ёт рӯпитан хо̄тпа о̄лыс, тав палтэ ма̄хманув ёхталасыт. Ань тамле хо̄тпа тот воссыг ат рӯпиты. Ма̄хманув ат ва̄гыт, хоты ма̄ныл нё̄тмил во̄вуӈкве. Ам ӯс мирколн пищма хансыгласум, соссаӈ ма̄хум ёт рӯпитан хо̄тпа вос пирмайтэ̄гыт. Ювле хасве̄сум, Сургут ӯст мощща ма̄ньщи ос ханты о̄лэ̄гыт, тыима̄гсыл та̄н ётаныл рӯпитан хо̄тпа виӈкве ат ве̄рме̄гыт. Ань та̄н пуссын та̄нки ва̄рмаляныл ёт ма̄н палтув ёхталэ̄гыт. Акв порат тэ̄нки ма̄тэ̄нт о̄лнэ э̄кваго̄йкаг ёхталасы̄г, тэ̄н пенсияолн винэ ма̄гсыл нэ̄пакыт атуӈкве ат ве̄рмысы̄г. Пенсионный фондын ялсы̄г, тувыл рущ ла̄тӈыл лю̄льсаӈ потыртэ̄г, тот рӯпитан хо̄тпатын ат торгамтавесы̄г, мощ лю̄ляхо̄лсы̄г, сысы та минасы̄г. Тэ̄натэ̄н ма̄н нэ̄пакыт акванатуӈкве нё̄тсӯв, ань сасы пенсияолн выгы̄г. Ма̄н Сургут ӯст о̄лнэ отделенияг ловиньтахтэ̄в ос ма̄н палтув районт о̄лнэ ще̄мьят ва̄тихал ёхталэ̄гыт, та̄наныл пуссын нё̄тыянӯв. Районт о̄лнэ са̄в ще̄мьят ма̄во̄й но̄хвинэ компаният ёт соглашениенэ̄пак щирыл рӯпитэ̄гыт. То̄ват ты нэ̄пакт хасхатуӈкве ат ка̄саще̄гыт ос ты компаният ёт воритотэ̄гыт. Халанылт потыртахтуӈкве ма̄н о̄с нё̄тыянӯв. Ань Сергей Васильевич Кечимов «Сургутнефтегаз» ма̄т рӯпитан ма̄хум ёт сутытахты. Ты ханты о̄йка ма̄н о̄с ань нё̄тылӯв. Ӯст о̄лнэ соссаӈ ма̄хум о̄с та̄рвитыӈ ва̄рмалит о̄ньще̄гыт. То̄ват рӯпата хо̄нтуӈкве ат ве̄рме̄гыт. 2015 та̄лт 15 э̄лумхо̄лас рӯпатал хо̄нтсанӯв. Ты та̄л хӯрум хо̄тпа рӯпитаӈкве патсыт. Ханищтахтуӈкве а̄стлан ма̄ньлат ма̄хум о̄с нё̄тыянув, ты та̄л кит ма̄ньлат пыгыг рӯпатаӈыг е̄мтсы̄г». Валентина Шадрина Сургуст ӯст о̄лнэ отделеният са̄в та̄л кӯщаиг о̄лы. Ӯст о̄лнэ соссаӈ ма̄хумн тав ёмащакв ва̄ве. Ань ты ӯст о̄лнэ организациян яныгса̄т арыгкем э̄лумхо̄лас хасхатым о̄лэ̄гыт. Та̄н таве̄н нё̄тэ̄гыт, тыи ма̄гсыл ма̄ньщи нэ̄ та̄нанылн пӯмащипа ла̄тыӈ ла̄ви. Людмила Теткина хансыс ос хури ва̄рыс.

1129 2016. 08. 11. Людмила Теткина

Хум ма̄ньлат хо̄тпат касуӈкве ханищтыянэ О̄йттур э̄тпост Нефтеюганский район «Сказка» нампа ӯщлахтын ма̄т соссаӈ ма̄хум ма̄ньха̄пыл кассыт. Ты касыл рущ ла̄тӈыл тох намаим о̄лыс: «Международные соревнования на Кубок губернатора по гребле на обласах». Сургут ӯст о̄лнэ ма̄ньщи, ханты ма̄хум о̄с тув во̄виньта̄лве̄сыт. Ма̄ньха̄пыл касуӈкве нёлолов хо̄тпа ёталасыт. Та̄н халанылт ханты хум Егор Романович Кельмин о̄лыс. Тав ка̄сыӈ та̄л касуӈкве ты ӯщлахтын ма̄н яланты. Ты ва̄рмаль урыл тох ла̄выс: «Матъёмас ань тамле ялпыӈ хо̄тал ва̄рыглаве ос са̄всыр ма̄т о̄лнэ соссаӈ ма̄хум акванатыглавет. Ты та̄л ма̄н о̄выл места ат висӯв, номсэ̄гум, мо̄тыт та̄л тах ма̄н командав но̄хпаты. Улпыл, лю̄льсаӈ щё̄питахтасӯв ос ма̄ньха̄пыл мощща яласасӯв». Хум потре щирыл, та̄н, Сургут ӯсныл ёхталам ма̄хмыт, ты та̄л «Старый Сургут» нампа центр по̄хат о̄лнэ тӯрт ма̄ньха̄пыл товуӈкве ханищтахтасыт. Егор Романович «Пупикат» нампа колт кӯщаиг о̄лы. Тав ня̄врамыт, ма̄ньла̄т хо̄тпат ос яныг ма̄хум са̄всыр щирыл касуӈкве, пе̄рщуӈкве ханищтыянэ. Ты рӯпататэ урыл тав тох потыртас: «Ань ма̄н палтув 600 арыгкем э̄лумхо̄лас ёхталы. Ма̄н ат та̄л яныт ня̄врамыт тув пирмайтэ̄в ос касуӈкве ханищтэ̄в. Щар яныг хо̄тпа 57 та̄лэ то̄влыс, ты хум рӯпатаныл по̄хын минаме юипа̄лт ма̄н палтув ёхталаӈкве патыс. Ня̄врамытыл ма̄н кит со̄тыра солко̄ви выгӯв, яныг ма̄хум ос хӯрум со̄тыра солко̄ви акв э̄тпос ма̄гсыл ойтэ̄гыт. Касуӈкве ханищтахтын ма̄хум халт са̄в ма̄ньлат хо̄тпа о̄лы. Та̄н пуссын бокс, самбо, дзюдо щирыл касуӈкве ка̄саще̄гыт. Ма̄н палтув са̄всыр мирыт ханищтахтэ̄гыт. Ма̄ньщи, ханты пыгыт о̄с ёхталэ̄гыт. Ты коныпал ма̄ньлат хо̄тпат тыньщаӈ, са̄грап, касай по̄с нупыл па̄хвтуӈкве ос са̄лы сун ӯлтта поргуӈкве ханищтыянӯв». Егор Романович ма̄ньта̄гыл касуӈкве сака э̄руптас. Тав Сургутский район Угут па̄вылт самын патыс. Школа а̄стламе юипа̄лт Тобольск ӯст ня̄врам ханищтан хумыг ханищтахтас. Та ӯст о̄лме̄т акв порат архивколн минас, са̄всыр пе̄с нэ̄пакытт кисхатым акв пӯмащ ва̄рмаль урыл ловиньтас. Тот хансым о̄лыс, хумус пе̄с порат ханты ма̄хум пе̄рщисыт. Тав ты ва̄рмаль урыл сака пӯмщалахтуӈкве патыс. Ханищтахтын ма̄ныл а̄стуме юипа̄лт ювле о̄лнэ ма̄тэ̄н ёхтыс. Ос яныгпа̄ла хо̄тпат халт китыглахтуӈкве патыс, хумус пе̄с порат ханты ма̄хум пе̄рщисыт. Ты урыл хум таи потыртас: «Ам яныгпа̄ла хо̄тпат ты тэ̄ла урыл китыгласанум. Яныгмам ма̄мт пе̄с йис ва̄рмалит ва̄нэ хо̄тпат то̄нт иӈ са̄в о̄лсыт. То̄ват ты вармаль урыл а̄нумн са̄в потыртасыт. То̄нт ам Касум па̄вылт о̄лнэ хантыт палт ялсум, ты пе̄рщин тэ̄ла урыл тот о̄с китыглахтасум. Ам ты касыл урыл 40 арыгкем та̄л сыс пӯмщалахтасум, ань ма̄ньла̄т хо̄тпат ханищтэ̄гум». Ам Роман Егорович китыгласлум, тав ва̄рум рӯпататэ урыл нэ̄пак хасуӈкве номсы ман а̄ти? Ханты хум ювле ла̄выс, ты касыл урыл нэ̄пак хансуӈкве иӈ ат о̄вылтахтас. Ань тав мо̄т яныг рӯпата ва̄ри, са̄внув ма̄ньлат хо̄тпат ханищтаӈкве таӈхи, та̄н тав но̄хво̄рмалтам тэ̄латэ э̄лаль вос тотыяныл, пе̄с ма̄хум хольт вос пе̄рще̄гыт. Ханты хум ща̄нь ла̄тӈыл потыртаӈкве ёмащакв ха̄сы. Акв порат тав ӯст о̄лнэ мирколт толмащиг рӯпитас. Тув ёхталан рущ ла̄тыӈ ат ва̄нэ ханты ма̄хумн мирколт рӯпитан хо̄тпат ёт потыртаӈкве нё̄тыс. Роман Егорович пе̄с йис ва̄рмалит о̄с ёмащакв ва̄ганэ, тыи ма̄гсыл са̄всыр ялпыӈ хо̄талыт о̄лыглан порат ханты культура урыл потыртаӈкве акваг во̄виньта̄лаве.

1129 2016. 08. 11. Галина КОНДИНА

Янгуй ос ма̄нь Во̄нтыр Ане̄квам а̄ращ ва̄тан ӯнтыс ос мо̄йтуӈкве о̄вылтахтас: – Ха̄лиӈ ва̄тат, вуйкан витуп я̄ ва̄тат Во̄нтыр Ма̄нь Во̄нтырте̄тэ ёт о̄лсы̄г. Я̄т тэ̄н хӯл пувыгла̄лсы̄г ос сэ̄й ва̄тат тэ̄пъяла̄лсы̄г ос ӯщлахтасы̄г. Ма̄нь Во̄нтырте̄тэ иӈ ма̄нь ос оссамрищ о̄лыс. Ща̄не тав ма̄гсылэ акваг пилыс, хурахлас. Хунь хӯл алыщлаӈкве мины, пыге акваг ёт тотытэ. Я̄ ва̄тан ӯнттытэ ос ла̄витэ: – Пыгкве, ам ань хӯл алыщлаӈкве мил ма̄н мӯрме̄гум, наӈ я̄ ва̄тат ӯнлэн, а̄нум ӯре̄лн. Пувлуӈкве те тахмае̄гын, вит ва̄тат полщтэн, мил ма̄н ул уен, щаквын тотавен. Тох та олсы̄г, о̄лым аквмат Во̄нтыракве ты яныгмас. Хунь тав янгыг е̄мтыс, номсахтуӈкве патыс: – Маныр ам акваг вит ва̄тат ӯнлэ̄гум, омам акваг такви та мӯрми, хӯл та алыщлы? Амти хӯл алыщлаӈкве патэ̄гум. Аквматнакт тэ̄н хо̄талъят порат тэ̄пъяласы̄г, Во̄нтырща̄нь ла̄ви: – Ам ва̄гтал патсум, мощщан ёл поварттахтыглэ̄гум, мощ ӯщлахтэ̄гум, наӈ ос та ёмас ва̄рен, нэ̄мхотталь ул минэн. Ос Во̄нтыракве номса̄лы: – Омам вос хуи, хунь ояве, ам амти хӯл алыщлаӈкве минэ̄гум. Но̄хса̄йкалы – тав э̄лыпа̄лэ̄т йильпи хӯл. Тав ща̄гты ос а̄нум тах э̄сгитэ. Тав тащир ты ва̄рыс. Оматэ туп ойвес, Во̄нтыракве – витн мӯрмыс ос хӯл тинсуӈкве та уйис. Уйисуйис, сунсы – тав э̄лыпа̄лэ̄т яныг, пуӈкыӈ сорт капай. Тав хотрохтыс, номса̄лы: – А̄ти, ты хӯл тай ат пувилум, тав ётэ ам ё̄рум ат ёхты. О̄с э̄лаль та уи. Уйисуйис, вольгын щапакыт ка̄салас о̄с номсы: – Тамле хӯл пувуӈкве о̄с ат патэ̄гум, тав сака ма̄нь. О̄с э̄лаль та уйи. Уйисуйис, татем ва̄гтал патыс, щар ё̄р ат о̄ньщи, мощертын ёл ты уйттаве. Сунсы, хоталь но̄хха̄ӈхуӈкве. – Э̄рыӈ а̄нумн ва̄тан уюӈкве э̄ри? Ос ё̄рум ат то̄вылхаты. Э̄рыӈ тапал ва̄тан минэ̄гум? А̄ти, тув мус о̄с хоса, ат ёхтэ̄гум – ёлуйттавем. Во̄нтыракве илттыг а̄ӈквал ка̄салас, тув уйлыгтас ос но̄х та ха̄ӈхыс. Ёмщакв ӯнтыс, илттыг тав пуӈке нумпа̄лт матыр та ва̄рщатас. «А̄ӈквал» ё̄ӈхыгпас, Во̄нтыракве ёлхисатаптувес, витн та рагатас. Витныл но̄хнэ̄глапас, нёлсамасаге̄тыл па̄ргалтахтас ос титыглахты: – Наӈ, А̄ӈквал, манарыл тох ва̄рщалтэ̄гын ос манрыг ё̄хсэ̄гын? – Ты щар а̄ти а̄ӈквал, ты ам пуӈкум, – хотьют осыӈ турсуил ла̄выс. Во̄нтыракве хотрохтыс, таглуӈкве патыс: – А ннаӈ хотьют? – Хумус – хотьют? Ам Янгуй. – Янгуй аки, ос наӈ наӈти хо̄т о̄лэ̄гыт, алпин ат на̄ӈки? – Ам витыт. – Ос наӈ манрыг наӈтина̄н витын нарыгтаслын? – Хумус манрыг? Ре̄гыл ос лё̄мвоитыл тӯйтхатсум. Лё̄мвоит ва̄глын хумус пурхатэ̄гыт. – Ос наӈ манарыл, Янгуй аки, тох та̄кыщ ва̄рщалтэ̄гын? – Ам хӯнтпагумтыл (палягумтыл) ва̄рщалтэ̄гум. – Ос манрыг тэ̄натэ̄нтыл ва̄рщалтэ̄гын? – Ам хӯнтпагум янгыг, тэ̄н о̄с лё̄мвоин сака пураве̄г, таима̄гыс ам тэ̄натэ̄н акванра̄тащлыягум, лё̄мвоит хотня̄влыянум. – Янгуй аки, наӈ хӯнтпагын о̄с витн нарыгтэ̄гын… – А̄ти, апыгкве, хӯнтпыг витн нарыгтаӈкве ат ро̄ви. Тув вит щалтуӈкве ве̄рми, ам хӯлуӈкве ат патэ̄гум. Ам май па̄ль во̄р тӣвырт о̄лэ̄гум. А̄нумн матыра̄ти пуссын хӯлуӈкве э̄ри, та̄л ёлпатнэ суй пыл вос хӯлэ̄гум. – Янгуй аки, наӈ лэ̄гынтыл лё̄мвоит хот ат хосгиянын? Янгуй татем ка̄смоста̄лыг патыс ос ювле та̄ра ат ла̄выс: – Апыгкве, наӈ ва̄глын, ма̄н, янгуит, лэ̄г ат о̄ньще̄в. – Хумус тох, щар ат о̄ньщегы̄н? – Мащк о̄ньще̄в, тав сака ма̄нь. Наӈ, апыгкве, ам сыплувумн ха̄ӈхен, мощ ӯщлахтэн. Во̄нтыракве вольк Янгуй сыплувн воратас, ёмщаквег ӯнтыс, ос тав хӯнтпаге, вильтъя̄тэ сунсыглаӈкве патыс: «Ос манрыг ам тав вильтъя̄тэ̄т ӯнлахо̄луӈкве ат ве̄рме̄гум, тав нёлэ мокариӈ». – Янгуй аки, нёлын хотталь хо̄илта̄лыслын, тамле мокари хультыс? – А̄ти, ма̄н, янгуит, пуссын нёланув мощ тамле мокариӈыт. Во̄нтыракве Янгуй хӯнтпаге̄т лё̄мвоит ка̄салас, та̄наныл хотвотумтасанэ ос ла̄выс: – Тамле яныг хӯнтпы̄г, ка̄сыӈе ам янытам. Ва̄им тох лё̄мвоитын пуруӈкве патаве̄г. О̄с та лё̄мвоит хотосгасасанэ, мощ вотгащласаге. Тувыл тав сыплуве̄ныл ёлтахамтас, акитэ мащк сунсуӈкве уйлыгтас. Тав мащке ка̄саластэ ос са̄литым ла̄выс: – Тамле яныг ӯй ос лэ̄ге тамле та ма̄нь. Тав ам омам лэ̄гныл о̄с ма̄нь. Тох ла̄выс ос та̄ра оматэ урыл номылматас: – Ята, Янгуй аки, ос ёмас ӯлум! Ам молях омам палт минэ̄гум. – Ла̄щал, апыгкве, ам сыплувумн ха̄ӈхен, ам наӈын та па̄лн унсуптылум. Янгуй уйи, Во̄нтыракве тав сыплуве̄т ӯнлы ос хосыгхата̄нты. Янгуй мо̄т ва̄тан ёхтыс, пуӈке ёлхӯтылтастэ ос ла̄выс: – Ята, апыгкве, ань ёлва̄глэн ос оман палт молях минэн, тох воссыг э̄л таве̄ныл ул оен. Во̄нтыракве Янгуй нупыл ка̄тэ хосувла̄лыс ос молях вит ва̄та хосыт оматэ палт та уйис. Мо̄йт оигпам юипа̄лт ам иӈ хоса аквтуп Янгуй ос Во̄нтыракве нупыл суссум ос хӯлсум, хумус тэ̄н халэ̄нт потыртэ̄г. Тувыл номылматаслум, хумус во̄нтырыт витыт о̄лэ̄гыт, ос ане̄квам титапаслум: – Ане̄ква, во̄нтырыт о̄с щаквыт порсуӈкве ве̄рме̄гыт? – Ве̄рме̄гыт, во̄нтырыт о̄с щаквыт порсуӈкве ве̄рме̄гыт. Та̄н о̄с ма̄н хольтув лылтэ̄гыт, о̄с ма̄н хольтув ма̄ та̄л о̄луӈкве ат ве̄рме̄гыт. Ма̄кве, айкве, ка̄сыӈ хо̄тпан, ка̄сыӈ ӯйн э̄ри. Анна Конькова хансум мо̄йт ма̄ньщи ла̄тӈыг Галина Кондина толмащластэ.

1129 2016. 08. 11. Светлана РОМБАНДЕЕВА

Кульпас па̄выл ня̄врамыт Ты хуритыт Ха̄льӯс район Кульпас па̄вылт о̄лнэ ма̄ньщи ня̄врамыт по̄слым о̄лэ̄гыт. На̄н ань э̄лаль та̄н уранылт ловиньтэ̄н. Валя Батманова ва̄т са̄грапнал э̄тпос 3 хо̄талэ̄т 2003 та̄лт самын патыс. Ань хо̄тыт классын ханищтахтуӈкве мины. Валя таи ма̄гыс номтэ ёмас, ты та̄л та̄н классаныл ма̄ньщи ла̄тыӈ ханищтаӈкве паты. Учителяныл ма̄ньщи нэ̄ Альбина Митрофановна Кулешова, а̄ги о̄парищ наме Сайнахова. Валя кит увщи о̄ньщи, Даша ос Рая, акв йигрищ – наме Соня. Оманыл Татьяна Андреевна Канева «На̄йо̄тыр Маа» музейт рӯпиты. Ты пыгрищ наме Андрей Садомин, тав ва̄т са̄грапнал э̄тпос 22 хо̄талэ̄т 2003 та̄лт самын патыс. Тав о̄патэ Николай Михайлович Садомин Ленинград ӯс мус яласа̄лыс, яныг учёныит ёт рӯпитас. О̄йка ща̄нь ла̄тӈе сака э̄руптастэ, такви мире ма̄гыс са̄в ёмас, э̄рнэ тэ̄ла ва̄рыс. Андрей о̄патэ хольт школат ханищтахтуӈкве сака э̄рупты, омаге̄на̄тяге̄н акваг нё̄ты. Ты ос Абрам Гындыбин. Тав лӯпта э̄тпос 23 хо̄талэ̄т 2009 та̄лт самын патыс. Таквсы тав о̄выл классын ханищтахтуӈкве мины. Кит увщи о̄ньщи, Люда ос Вика. Оманыл Наталья Владимировна, а̄ги о̄парищ наме Лелятова. Абрам Аня а̄кве ос Юра акитэ ёт хӯл алыщлаӈкве яланты. Ты ня̄врамыт «Брусничка» нампа садикын ялантэ̄гыт. Та̄наныл ӯргалым кон Валентина Николаевна Липина о̄лыс. Тав ла̄вме щирыл, садиканыл йильпи, колнакыт янгыт, посыӈыт. Са̄тлов нупыл ат ня̄врам тув яланты. Ань кӯщаяныл Светлана Константиновна Кустышева отпускат о̄лы. Валентина Николаевна садикт налыман нупыл са̄тыт та̄л рӯпиты. Ня̄врам янмалтан пе̄с коланыл на̄лми ва̄тат ӯнлыс, ань кит накпа лю̄лит колыл ӯнттуве̄сыт. Такви хӯрум ня̄врам янмалтас, ань хӯрум апыг о̄ньщи. Светлана РОМБАНДЕЕВА хансыс ос хури ва̄рыс.

1130 2016. 08. 25. Светлана РОМБАНДЕЕВА

Округув янытыл пе̄рияп щё̄питаве Ты э̄тпос 15 хо̄талэ̄т Ханты-Мансийск ӯст о̄лнэ РИЦ «Югра» колт пе̄риян ва̄рмаль палт пуӈк тотнэ ма̄хум ёт хо̄нтхатыглап о̄лыс. Округув янытыл ты тэ̄ла кӯщаиг Андрей Павкин паттувес, тав ва̄ӈын хо̄тпаге Денис Корнеев ос Ксения Дмитриева. Ля̄ххал тотнэ хо̄тпатн та̄н та урыл китыглаве̄сыт, ань пе̄риян ва̄рмаль кастыл хумус щё̄питахтэ̄гыт, манах хо̄тпа наманыл ос манах партият тув хасве̄сыт? Андрей Павкин тох ла̄выс: «Ма̄н ань э̄рнэ щирыл ты рӯпитэ̄в. Юио̄выл э̄тпос тав ма̄к та̄рвитыӈ, пе̄рияпын пе̄тхатам хо̄тпат ос ты тэ̄ла уральтан ма̄хум ань ущпылнэ̄г са̄в рӯпитэ̄гыт. Округувт 701 ма̄т ма̄хум пе̄рияӈкве патэ̄гыт, 7 со̄тыра 308 по̄сыӈ хо̄тпа ос нас нё̄тмил ва̄рнэ мир тот рӯпитаӈкве патэ̄гыт. Таи ма̄кыг о̄лы, ань пе̄риян ма̄хум пилта̄л, роттыг вос пе̄рие̄гыт, нэ̄матарыл ул вос пилэ̄гыт. Таи ма̄гыс ка̄сыӈ ма̄ ёмащакв ӯргалаӈкве, уральтаӈкве патаве. Округув янытыл 1 млн. 281 со̄тыра 47 хо̄тпа пе̄рияӈкве ве̄рме̄гыт, ма̄н номсыте̄вт та̄н пуссын ёхтэ̄гыт». О̄йка ла̄вме щирыл, ты пе̄рияп ва̄рнэ кастыл та̄н та̄л палыт рӯпитасыт, таи ма̄гыс са̄в йильпи тэ̄ла ман хащта̄л матыр та̄рапаттысыт. Ань ты пе̄рияп сака та̄рвитыӈыг паты, сака са̄в хо̄тпа наманыл хансым о̄лэ̄гыт. Государственный Думан – 18 хо̄тпа, округ Думан – 81 хо̄тпа, Тюмень ӯс Думан – 37 хо̄тпа, округ янытыл о̄лнэ ӯсытн ос па̄влытн – 1 со̄тыра 44 хо̄тпа. Ты та̄л кит йильпи партияг хасвесы̄г – «Партия роста» ос «Коммунисты России», тэ̄н палтэ̄н хансым хо̄тпат округ Думан пе̄рияӈкве патавет. Пе̄рияп щё̄питан ма̄хум ань ты э̄тпос 28 хо̄талэ̄ныл э̄лынт о̄лнэ ма̄хум ёт рӯпитаӈкве патэ̄гыт. Ма̄нь па̄влытытн ман са̄лыӈколыӈ ма̄хум палт ялэ̄гыт, та̄н ка̄тпос ань вос пинэ̄гыт. Атиӈк ат а̄лыме̄гыт, таима̄гыс о̄влэ̄т та ма̄хум пе̄рие̄гыт.

1130 2016. 08. 25. Светлана РОМБАНДЕЕВА

Соссаӈ ма̄хум нё̄туӈкве патавет Ты э̄тпос атыт хо̄талэ̄т Ханты-Мансийск ӯс мирколт округ кӯщай Наталья Комарова хо̄нтхатыглап ва̄рыглас. Та порат тав потыр халт та урыл ла̄выс, ань тыгыл э̄лаль округувт соссаӈ мирн нё̄тнэ ма̄гыс ма̄хум рӯпитаӈкве патэ̄гыт, йильпи рӯпат ма̄ ва̄рвес (рущ щирыл ла̄ваве – межведомственная комиссия по развитию коренных малочисленных народов Севера). Кӯщай нэ̄ тох ла̄выс: – Соссаӈ ма̄хум ты урыл хосат та̄гыл потырта̄лсыт, та̄н ётаныл рӯпитан хо̄тпат о̄с аквписыг ла̄выгласыт, ань я̄нас кол ва̄руӈкве э̄ри. Округ янытыл о̄лнэ соссаӈ хо̄тпат китыглахтан ла̄тыӈ манос сыресыр та̄рвитыӈ ва̄рмаль са̄в о̄ньще̄гыт, э̄рнэ нэ̄паканыл ёт тыглетувле ха̄йтыгтаӈкве рӯпатаӈ. Ань ёмас, тэ̄ланыл акв ма̄т ва̄руӈкве патыяныл, матыр ат те торгамтэ̄гыт, тот рӯпитан хо̄тпатн нё̄тумтавет тах. Округув янытыл тамле колыт ка̄сыӈ ӯст ман районт ва̄равет. Ты тэ̄ла палт вуйхатам хо̄тпат округ кӯщаит ёт акваннё̄тхатэ̄гыт. Ты коныпал та̄н са̄всыр организацият ёт рӯпитаӈкве патэ̄гыт. Ма̄к ка̄ркам соссаӈ ма̄хманув ты тэ̄ла ва̄руӈкве о̄с ве̄рме̄гыт. Хо̄тпа ка̄сащи те, такви ма̄хманэ̄н вос нё̄ты. Тувыл юио̄выл ла̄тыӈ о̄с кӯщай нэ̄ ла̄выс: – Ты рӯпатан вуйхатам ма̄хум тэ̄ланыл со̄ль те ёмащакв ва̄руӈкве патыяныл, ты йильпи рӯпатав тах округт о̄лнэ соссаӈ мирн яныг па̄рыс тотуӈкве паты.

1130 2016. 08. 25. Николай МЕРОВ

Ӯйхулыт ловиньтавет Во̄ртур э̄тпос нилыт хо̄талэ̄т Ханты-Мансийск ӯст ля̄ххал тотнэ колн округ ма̄вит ӯргалан кӯщай ва̄ӈын хум Александр Киселёв ос тав ётэ рӯпитан хум Александр Фадин, округт статистика щирыл кӯщаиг рӯпитан хум Валерий Ярлов ос таве̄н нё̄тмил ва̄рнэ нэ̄ Людмила Франке, ёхталасыт. Та̄н сельхозперепись урыл потыртасыт. Ты та̄л о̄йттур э̄тпос о̄выл хо̄талныл Россия ма̄ янытыл пе̄рмат ос тэ̄пканыт тэ̄нут, ӯйхул янмалтан щирыл рӯпитан хо̄тпат манаса̄вит ӯйхул о̄ньще̄гыт, манаса̄вит тэ̄нут тэ̄пканыт янмалтэ̄гыт, ты тэ̄лат нэ̄пакын хансуӈкве о̄вылтаве̄сыт. Ма̄н округувт ты ва̄рмаль о̄выл щёс о̄йттур э̄тпос о̄выл хо̄талныл ос во̄ртур э̄тпос атхуйпловит хо̄тал мус о̄лыс. Э̄лын о̄лнэ па̄влытыт ос сӯкыр э̄тпос о̄выл хо̄талныл яныг таквс э̄тпос атхуйплов хо̄талэ мус ты ва̄рмаль хансуӈкве патаве. Юио̄выл щёс тамле хансым ва̄рмаль 2006 та̄лт о̄лыс. Та па̄сныл лов та̄л минас. Ты тэ̄ла таима̄гыс ань ловиньтаве, ма̄нки ма̄вт ӯйхул ос тэ̄нут са̄вмыс манос а̄ти, ань та̄рапаттаве. Ань юио̄выл та̄лыт ма̄ янытыл о̄лупсав та̄рвитыӈыг е̄мтыс, мо̄т хо̄н ма̄ныл тэ̄нут тыг мощща тотаве. Ань ты тэ̄нутыт ма̄нки ма̄вт та̄стуӈкве ве̄рме̄в. Тыима̄гыс матыра̄ти пуссын о̄лы. Ты накт то̄ва ӯсыт ос районыт хасылтан ва̄рмаль а̄стлавес. Ты Когалым, Урай, Покачи ос Белоярский районт ӯйхулыт ос тэ̄нут янмалтан рӯпатат пуссын ловиньтаве̄сыт. Кондинский районт ты ва̄рмаль щирыл о̄с рӯпата ёмщакв мины. Округувт пе̄рмат о̄щнэ ӯйхулыт ос тэ̄пкант янмалтан тэ̄нутыт са̄тлов процентын, ма̄хум та̄нки тэнут янмалтан ма̄т ос атпан процент са̄витын ань тыг мус хасве̄сыт. Ань ос ма̄хум та̄нки колта̄глыл о̄щнэ ӯйхуланыл ловиньтавет. Ты о̄с сака та̄рвитыӈ рӯпата. Хотьют манаса̄вит ӯйхул о̄ньщи, та̄наныл пуссын ловиньтаӈкве э̄ре̄гыт. Ма̄нки ма̄вт тэ̄нут са̄внув вос ва̄рвес, ань тыима̄гыс то̄вылхатнэ са̄вит олн та̄ставе. Ка̄сыӈ хо̄тпа ӯйхулэ ма̄гыс субсидияолныл ойтаве. Са̄в ӯйхул о̄ньщуӈкве ка̄сащан ма̄хум ма̄л мивет. Ань са̄выӈпа̄лэ яныг ӯст о̄лнэ ма̄хум пӯрщит, мисыт ос мо̄т са̄всыр ӯйхулыт о̄ньщуӈкве патсыт. Та̄н ӯс ляпат ма̄л мивет. Тот ӯйхуланыл янмалтэ̄гыт ос тыима̄гыс олныл ойтавет. Са̄лы о̄щнэ соссаӈ ма̄хманув са̄лыяныл о̄с ловиньтавет. Са̄лыяныл ма̄гыс субсидияолныл ойтавет. Ань ӯйхул о̄щнэ ма̄гыс ос тэ̄пканыт тэ̄нут янмалтан ва̄рмаль ма̄гыс са̄тлов щирыл нё̄тмил ва̄раве. Ты рӯпата акваг вос са̄вмыс, э̄лаль нё̄тмилыт иӈ щё̄питаӈкве патавет. Ань ты ловиньтан ва̄рмаль янытэ̄т 2017 та̄л оигпан порат а̄стлаве. Манаса̄вит ӯйхул о̄лы ос манаса̄вит тэ̄нут тэ̄пканыт тэ̄лы, то̄нт тах та̄рапаттаве.

1130 2016. 08. 25. Тамара МЕРОВА

Э̄лы хо̄тал кастыл хо̄нтхатыглап о̄лыс Ты э̄тпос атхуйплов щислат «Команда Югры» нампа акванатхатыглам ма̄хум рӯпатаныл о̄вылтасаныл. Та̄н «Единая Россия» нампа партия ва̄рнэ тэ̄лат э̄лаль тотыяныл. Государственный Думан, округ Думан ос ӯс манос па̄влыӈ мир депутатыг пе̄риян ма̄гыс кандидат хо̄тпатн нё̄тэ̄гыт. Та̄нки тэ̄ланыл урыл потыртасыт, хумус э̄лаль рӯпитаӈкве э̄ри, матыра̄ти акваннё̄тхатым щё̄питаӈкве э̄ри, пуссын ты о̄вылтыт ӯст о̄лнэ ма̄хум потрамаӈкве акванатыгласаныл. «Команда Югры» са̄всыр тэ̄лат та̄рапаттын ма̄гыс нёлоловит ма̄т ма̄хум ёт хо̄нтхатыглапыт ва̄рыглэ̄гыт тах. О̄влэ̄т Ханты-Мансийск ӯст о̄лнэ ма̄хум ёт акванхо̄нтхатыгласыт. Ос та̄н «Общество и человек» тэ̄лат урыл маныр номсэ̄гыт, таи аквъёт та̄рапаттысыт. Ты э̄лыпа̄лт «Единая Россия» партият пуӈктотнэ хум, округ Дума кӯщай Борис Хохряков ла̄тыӈ ла̄выс. Тан партия па̄лыл ва̄рнутаныл пуссын мирн нё̄тнэ ма̄гыс о̄лсыт. 2011 та̄лт ма̄хум са̄внув о̄лнэ колыт, школат, садикыт ӯнттуӈкве ла̄выгласыт. Пе̄с колыт э̄рыс хотлоӈхитаӈкве, ос та ма̄т ёмас кирпащиӈ колыт ӯнттуӈкве. Ты тэ̄лат ёт депутатыт ос мо̄т кӯщаит акваг рӯпитасыт, э̄рнэ программат щё̄питасыт ос та̄н ма̄к тэ̄лаг е̄мтнэ̄ныл ма̄гыс олн та̄стысыт. Мир о̄лупса урыл Ханты-Мансийск ӯс кӯщай хум Василий Филипенко, ӯс мирколт кӯщаиг рӯпитан хум Максим Ряшин, общественный палатат кӯщай ва̄ӈын хум Виктор Заболотский ос ля̄ххал тотнэ центрыт пуӈк тотым рӯпитан хум Анатолий Корнеев потыртасыт. Тот акванатым ма̄хум лов группаг ла̄ккваӯнттуве̄сыт, та̄н ань пуссын халанылт ва̄йхатасыт ос матыр э̄рнэ тэ̄ланыл нэ̄пакн хассаныл. Тувыл пасан ва̄тат ӯнлын мо̄т ма̄хум ёт потыртасыт. Маныр ёмас о̄лыс, маныр лю̄ль е̄мталас ос хумле щирыл тэ̄лат э̄лаль тотуӈкве ве̄рмавет, та̄н ла̄тӈаныл кӯщаитн о̄с вос хӯнтамлавет. Тамле акванатхатнэ накыт пе̄рияп э̄лыпа̄лт туп ул вос ва̄рве̄сыт. То̄нт пенсиян патхатам хо̄тпа са̄в о̄лыс. Аквта хо̄талт ётылнув мо̄т ма̄хум «Качество жизни» урыл ва̄рмалит та̄рапаттын ма̄гыс ос акванатыгла̄лве̄сыт. Мо̄тыт хо̄тал о̄с тамле кит ма̄т ма̄хум рӯпитасыт. Мегион, Нефтеюганск, Нижневартовск, Нягань, Сургут ос Урай ӯсытыт о̄лнэ ма̄хум тах ётылнув акванатыглавет ос та̄н депутатыг пе̄риян хо̄тпат ёт тах ва̄йхатэ̄гыт.

1130 2016. 08. 25. Светлана РОМБАНДЕЕВА

Соссаӈ ма̄хум янытлаве̄сыт Ты э̄тпос 9 хо̄талэ ма̄ янытыл о̄лнэ соссаӈ мирыт ялпыӈ хо̄талыг ла̄ваве. Ты хо̄тал кастыл ля̄ххал тотнэ хо̄тпат соссаӈ ма̄хум ёт «Ханты ясанг» ос «Лӯима̄ сэ̄рипос» газетаг ва̄рнэ колт хо̄нтхатыгласыт, ща̄й айим ӯнлахо̄лсыт, потрамасыт. О̄выл ла̄тыӈ «Лӯима̄ сэ̄рипос» газета пуӈк тотнэ нэ̄ Галина Кондина тав ла̄выс: «Кос хоты мир атпан со̄тыраныл мощщаг о̄лы те, тав соссаӈ мирыг ла̄ваве. Округувт ма̄н, ма̄ньщи ос ханты ма̄хум, соссаӈыг о̄лэ̄в. Ма̄н ань ла̄тыӈ ва̄нэ соссаӈ ма̄хум янгыщ ма̄нь па̄влытыт яныгмасув, та порат ма̄хманув пуссын ща̄нь ла̄тӈыл потыртасыт. Таи ма̄гыс ма̄н ань ма̄нти ла̄тӈув та ва̄глӯв. Ос ань йис ня̄врамыт ща̄нь ла̄тыӈ ат хӯлыглэ̄гыт, хумус та̄н таве ва̄ӈкве патыяныл». Ханты мир учёный нэ̄ Софья Онина о̄с мощ потыртас: «Ма̄ньщи ос ханты ла̄тӈыг ань э̄лы хо̄н ма̄т студентытн ос мо̄т са̄всыр рӯпата ва̄рнэ хо̄тпатн ханищтаве̄г. Та ма̄хум ма̄н о̄лупсав сака пӯмщалыяныл. Ам Финляндиян ос Венгриян ва̄тихал яланта̄лэ̄гум, ня̄врамыт ханты ла̄тӈыл ханищтыянум. Ла̄тӈагув Ев- ропа ма̄ коныпал Япо- ният ос мо̄т ма̄т ханищтаве̄г. Учёный ма̄хум ла̄внэ̄ныл щирыл, акв хотты ла̄тыӈ хотталь со̄йми те, ма̄н пуссын мощ нусагнув та е̄мтапе̄в. Ка̄сыӈ мир, ка̄сыӈ ла̄тыӈ туп такви хурип пӯмыщ матыр, э̄рнэ матыр о̄ньщи. Таима̄гыс ка̄сыӈ ла̄тыӈ янытлаӈкве э̄ри». Я̄тил тыныӈ ма̄ньщи ма̄хум! Ма̄н, редакцият рӯпитан хо̄тпат, на̄нан ты ялпыӈ хо̄талыл янытлыянӯв! Пуссын пуста̄гыл о̄лэ̄н, То̄рум ёт, О̄тыр ёт о̄лэ̄н. Пус ка̄т, пус ла̄гыл!

1130 2016. 08. 25. Тамара МЕРОВА

Ня̄врамыт ма̄гыс ӯнттын колыт Матахмат хо̄тал хультыс ос тувыл ня̄врамыт ханищтахтуӈкве та о̄вылтахтэ̄гыт. Ань туи сыс маныр ва̄рмалит е̄мталасыт, школа а̄стлам а̄гитпыгыт экзаменаныл хумус хассаныл, хо̄т та̄н э̄лаль ханищтахтуӈкве таӈхе̄гыт ос хо̄т йильпи колыт ӯнттуве̄сыт, пуссын ты о̄вылтыт ма̄навн образование ос ма̄ньлат ма̄хум ёт рӯпитан Департамент кӯщай нэ̄ Любовь Ковешникова потыртас. Ты та̄л ня̄врамыт экзаменаныл сдавайтан порат ищхӣпыӈ утыт хосыт янытаныл сусве̄сыт ос матыр хаснэ нэ̄паканыл ос та утаныл хосыт майлуве̄сыт. То̄внакт ищхӣпыӈ ут лю̄льсыӈ рӯпитас, то̄нт «Ростелеком» нампа связьколн та̄ра хотщё̄пита̄лве̄сыт, тащирыл экзаменыт сдавайтан ва̄рмаляныл ёмщакв минас. Департамент ань тот рӯпитан хо̄тпатн яныг пӯмащипа ла̄тыӈ ке̄ты ос акваннё̄тхатым аквтох э̄лаль вос рӯпитасыт. Мо̄лты та̄л ос ты та̄лт хумус ня̄врамыт ёмас манос лю̄ль ЕГЭ хассаныл ань акванро̄влалтаӈкве ат хо̄йхаты. То̄нт щар мо̄т а̄гирищитпыгрищит о̄лсыт, ты та̄л мо̄таныт. Ты та̄л а̄гирищитпыгрищит халт 42 э̄лумхо̄лас 100 балл атсыт. Тыгыл 25 хо̄тпа рущ ла̄тыӈ щар ёмасыг хасмыт, математика – ат хо̄тпа ос аквалкитгыл мо̄т предметыт хасве̄сыт. Экзамен лю̄льсаӈ хансум хус са̄вит а̄гитпыгыт таквсы тах йильпииг хансуӈкве во̄виньта̄лавет. Мо̄т тэ̄лат палт Любовь Ковешникова таи ла̄выс: «Ань федеральный проект реализация ос развитие образование программа хосыт аквпа̄л та̄стым олныт са̄всыр колыт ӯнттын ма̄гыс холтавет. Тащирыл налыман нупыл онтолов йильпи колыт ӯнттуӈкве патве̄сыт. Тыгыл хо̄тхуйпловит садикыт, хо̄т школаӈсадикыт, студентыт ма̄гыс кит о̄лнэ колыг ос акв интернат. Интернат Нижневартовский район Излучинск ӯст ӯнттаве, тот пальта̄л, сӯпнелмта̄л ос сампыльта̄л ня̄врамыт о̄луӈкве патэ̄гыт. Округ янытыл ты э̄тпос оигпан мус са̄т йильпи колыт ӯнттуӈкве а̄стлавет. Ос сӯкыр э̄тпос о̄выл хо̄талэ̄т Кондинский район Междуреченский па̄вылт 550 са̄вит ня̄врамыт йильпи школан ханищтахтуӈкве минэ̄гыт, Ханты-Мансийск ӯст 320 ня̄врамаквет йильпи садикн щалтэ̄гыт. Тувыл Ханты-Мансийский район Кедровый па̄вылт о̄лнэ ма̄хум ма̄гыс йильпи Культура кол, нэ̄пак ловиньтан кол ӯнттувес. Ты коныпал 110 а̄гирищитпыгрищит йильпи школат ханищтахтуӈкве патэ̄гыт ос 60 ня̄врамаквет садикын минэ̄гыт. Ос та̄л оигпан э̄лыпа̄лт иӈ хӯрум школа, са̄т садик, кит о̄лнэ кол, интернат ос ат школа тармыл рӯпитан садикыт ӯнттуӈкве а̄стлавет. Та̄н пуссын кол ӯнттын йильпи щирыл ӯнттавет, колыт э̄рнэ пормасыл та̄ра ёвтавет ос ищхӣпыӈ утыл ва̄равет. Югравт ты ва̄рмалит уральтан юипа̄лт та̄рапатыс, 94% школат щар ёмас ищхӣпыӈ утыт о̄ньще̄гыт ос таима̄гыс мо̄т регионыт халт ма̄н о̄выл ма̄т о̄лэ̄в». Школат ханищтахтан ня̄врамыт акв о̄выл смена щирыл вос ханищтавет, мо̄лты Россия Президент ты хӯлтнэ ла̄тӈе департамент о̄с ва̄гтэ ос таве тэ̄лаг ва̄рнэ ма̄гыс са̄в номсахтэ̄гыт. Ва̄т со̄тыра ня̄врамыт ма̄гыс акв смена щирыл ханищтан кол йильпииг ӯнттуӈкве сака та̄рвит. Тувыл акв классыт аквторыг ва̄т арыг ня̄врамыт ханищтаӈкве ат та̄ртавет. Таима̄гыс ты ла̄щалт 2018-2019 та̄л сыс начальный классытыт ханищтахтан ня̄врамыт ущ о̄выл сменан ӯнттавет, 2020 та̄лт ос яныгнув а̄гитпыгыт. Ос щар йильпи тэ̄лаг таи паты, ань нэ̄пакыӈ журнал хотвиве. Ща̄нита̄щит ня̄враманыл оценкат электронный дневник хосыт та̄ра вос паттыяныл. Ня̄враманыл урокыт а̄тимыт ке о̄с тот хӯлтавет, тувыл та̄нки вос китыглыяныл хоталь тав тыпыс, маныр ва̄рыс. Таима̄гыс ща̄нита̄щит ма̄гыс «Портал государственных услуг» ва̄рвес. Ты та̄л округ янытыл 23 со̄тыра а̄гирищитпыгрищит о̄выл щёс школан минэ̄гыт. Школа а̄стлам а̄гитпыгыт са̄в ма̄н хотталь а̄ти э̄лаль ханищтахтуӈкве нэ̄паканыл мисаныл. Са̄в хо̄тпа ле̄ккарыг ханищтахтуӈкве номсэ̄гыт, медицинский Академиян акв ма̄н хо̄т хо̄тпа воратэ̄гыт ос мо̄т са̄всыр рӯпатан акв ма̄н хӯрум хо̄тпа пе̄рие̄гыт. Ва̄рмалит о̄вылтыт потыр са̄в кос о̄лыс, туп хансуӈкве пуссын ат ве̄рмиянӯв.

1130 2016. 08. 25. Светлана РОМБАНДЕЕВА

Потыр пенсия урыл о̄лыс Во̄ртур э̄тпос 9 хо̄талэ̄т Ханты-Мансийск ӯст РИЦ «Югра» колт ля̄ххал тотнэ ма̄хум округ янытыл рӯпитан Пенсионный фонд кӯщай нэ̄ Татьяна Зайцева ос пенсия минэ, таве йильпи щирыл ловиньтан отделт пуӈк тотнэ хум Евгений Нордгеймер ёт хо̄нтхатыгласыт. Китыглахтан ла̄тыӈ са̄в о̄лыс, кӯщай нэ̄ ювле тох ты потыртас: – Лӯпта э̄тпос 23 хо̄талэ̄ныл ос яныг таквс э̄тпос 30 хо̄талэ мус материнский (семейный) капитал о̄щнэ ма̄хум ва̄т нупыл ат со̄тыра солко̄ви хасылтаӈкве ве̄рмегыт. О̄йттур э̄тпос сыс 10 со̄тыра 279 колта̄гыл олн винэ ма̄гыс нэ̄паканыл щё̄питаве̄сыт. Йильпи са̄ккон щирыл, ты материнский (семейный) капитал акв хотты па̄лэ а̄гмыӈмосыӈ ня̄врамыт ма̄гыс матыр э̄рнэ пормасыт ёвтуӈкве ро̄ви, тыглетувле яласан улас манос пусмалтан э̄рнэ матарт. Округ янытыл ань 5 со̄тыра колта̄глыт тамле ня̄врамаквет о̄лэ̄гыт. Пе̄нсиян минам хо̄тпа ат те рӯпиты, ӯщлахтан ма̄н ялуӈкве ве̄рми, лё̄ӈх олнэ ювле ойтаве. Ань пенсият о̄лнэ ма̄хманув мощ яласаӈкве патсыт, ка̄сыӈ та̄л ущпылнэ̄г са̄в хо̄тпа яласам нэ̄паканыл ма̄н палтув тотыяныл. 2015 та̄л хо̄т э̄тпосэ сыс 10 со̄тыра 620 хо̄тпа лё̄ӈханыл ойтве̄сыт. 2016 та̄лт ос акв та са̄вит э̄тпос сыс 12 со̄тыра 860 хо̄тпа нё̄тве̄сыт. Ма̄хум янгыщ алы ма̄н ӯщлахтуӈкве ялантэ̄гыт – Краснодар, Анапа, Минеральные воды. То̄ват Москва ос Новосибирск ӯсыгт мӯйлэ̄гыт. Евгений Нордгеймер ос пенсия олн но̄хнув нё̄тумтан урыл потыртас. Тав ла̄вме щирыл, ань во̄трур э̄тпос о̄выл хо̄талэ̄ныл пенсиян минам рӯпитан ма̄хум пенсия олнаныл но̄хлаплвет – 222 солко̄ви 81 копейка. Ань тыхо̄тал мус округув янытыл 166 со̄тыра 783 хо̄тпа пенсия олнаныл йильпи щирыл ловиньтаве̄сыт. Тувыл нэ̄гхумыг та урыл потыртасыг, ань ка̄сыӈ хо̄тпа такви пенсиятэ урыл ищхӣпыӈ ут хосыт ловиньтаӈкве вос ха̄сы. Ты коныпал тот тав такви наме вос хансытэ, «Личный кабинет гражданина» нампа утын тув хотталь вос хасхаты. То̄нт тав ка̄сыӈ йильпи ля̄ххал тот ловиньтаӈкве ве̄рми, нэ̄мхотталь ялантаӈкве ат э̄ри, юн ӯнлым пуссын ва̄ӈкве паты. Ты та̄л са̄т э̄тпосанэ сыс 259 хо̄тпа тамле ищхӣпыӈ утын хасхатасыт.

1130 2016. 08. 25. Светлана РОМБАНДЕЕВА

Пе̄с йис о̄лупсав, ща̄нь ла̄тӈув э̄лаль тотылӯв Во̄ртур э̄тпос онтоловит хо̄талэ ма̄ янытыл о̄лнэ соссаӈ мирыт ялпыӈ хо̄талыг ла̄ваве. Ты кастыл Ханты-Мансийск ӯст во̄ртур э̄тпос 12 хо̄талэ̄т соссаӈ мир Ассамблея хо̄нтхатыглап ва̄рыглас, ма̄хум ты ялпыӈ хо̄тал урыл потыртасыт. Мирн ва̄нэ хо̄нтаӈ ма̄ньщи э̄ква А. М. Конькова ка̄стысаныл, ты та̄л тав 100 та̄лэ̄ то̄влынув. Ты хо̄тпав самын патум ма̄тэ̄т Кондинский район Силава па̄вылт Дом писателей Конды нампа кол ӯнттувес, ты урыл о̄с аквкит ла̄тыӈ ла̄всыт. Ассамблея кӯщай, округ Дума депутат о̄йка Еремей Айпин округт о̄лнэ соссаӈ мирув ты ялпыӈ хо̄талыл янытластэ. Тав ла̄вме щирыл, хантыт, ма̄ньщит ос ё̄рныт сака номтыӈ ос мӯтраӈ ма̄хум. Ань Кондинский районт нэ̄пак хаснэ ма̄хум тамле ёмас колыл ӯнттуве̄сыт. Тот са̄в мӯтраӈ хо̄тпа самын патыс – ма̄ньщи литература о̄вылтам хум Пантелеймон Еврин (Чейметов), яныг хо̄нтын ялыс. Ма̄ньщи ла̄тыӈ ня̄врамытын ханищтам э̄ква Матрёна Вахрушева (Баландина) ос нэ̄пак хансум э̄ква Анна Конькова, ты та̄л о̄йттур э̄тпост 100 та̄лэ то̄влынув. Та ма̄ныл о̄лнэ нэ̄пак хаснэ ма̄ньщи хум Андрей Тарханов таквсы порат 80 та̄лэ то̄влы. Ва̄т са̄грапнал э̄тпост ос нэ̄пак хаснэ ханты э̄ква Мария Кузьминична Волдина (Вагатова) 80 та̄лэ то̄влы. Ма̄ньщи поэт Юван Николаевич Шесталов о̄с ка̄стувес, тав о̄лме палыт такви мире, ща̄нь ла̄тӈе сака янытластэ. «Хо̄тал» нампа э̄ргынйӣквнэ соссаӈ мир колт рӯпитан нэ̄ Татьяна Лоншакова ма̄хманэ урыл потыртас, та̄н культурав но̄хво̄рмалтыяныл. Ань пӯмыщ спектаклит щё̄питэ̄гыт, округт ос мо̄т ма̄т о̄лнэ мирн моще̄ртн тах суссылтыяныл. Округ Дума депутат Надежда Алексеева соссаӈ мир ялпыӈ хо̄тал урыл мощ потыртас: «Ма̄ янытыл о̄лнэ мир соссаӈ мирыт нупыл суснэ̄ныл 20 та̄лыг ты то̄влыс. Ма̄н округув ты тэ̄ла 1989 та̄лт о̄вылтавес. О̄влэ̄т тыт соссаӈ мир общественный организация ва̄рсыт. Тувыл ма̄хманув са̄ккон щирыл рӯпитаӈкве патсыт, ты тэ̄ла ханищтаӈкве о̄вылтасаныл, та̄рапаттысаныл. Хус та̄л сыс соссаӈ ма̄хманув ма̄гыс са̄в э̄рнэ тэ̄ла ва̄рвес, щё̄питавес». Надежда Алексеевна ла̄вме щирыл, соссаӈ ма̄хманув та̄нти о̄с сака ка̄ркамыт, са̄в рӯпитэ̄гыт. Ань сӯкыр э̄тпос 18 хо̄талэ̄т пе̄рияп е̄мты. Ма̄хум Государственный Думан, Тюменский область Думан, округ Думан ос округ янытыл о̄лнэ ӯсыт ос па̄влыт Думатын пе̄рияӈкве патавет. Ты хо̄нтхатыглапт тув хасхатам хо̄тпат о̄лсыт, та̄н пе̄риявет те, та̄нти культураныл ос ла̄тӈаныл но̄хво̄рмалтаӈкве патэ̄гыт, та̄нти ма̄хманыл ма̄гыс э̄рнэ тэ̄лат ва̄руӈкве патэ̄гыт: Государственный Думан Татьяна Гоголева наме хасвес, округ Думан – Еремей Айпин, Надежда Алексеева ос Татьяна Меркушина, Ханты-Мансийск ӯс Думан – Галина Кондина, Ханты-Мансийский район Думан – Руслан Богордаев. Надежда Геннадьевна ты тэ̄ла урыл тох ла̄выс: «Депутатанув ты ва̄рмалит о̄вылтыт вос номсысыт, ань соссаӈ мир э̄ргынйӣквнэ театр ос «Живой ручеек» («Лылыӈ со̄юм») нампа ня̄врамыт ханищтахтан центр тэ̄нти кол ат о̄ньще̄г. Тувыл округ янытыл ялпыӈ ма̄нанув ул вос хилавет, мори ул вос ё̄мавет. Ка̄сыӈ тамле ма̄ э̄рнэ нэ̄пакын вос хансаве. Соссаӈ ма̄хманувн э̄рнэ нэ̄пакыт хансуӈкв нё̄туӈкве э̄ри, та̄нти олн сэ̄луӈкве вос ха̄ссыт». Округ Дума депутат Татьяна Гоголева ла̄вме щирыл, ща̄нь ла̄тыӈ – ты ма̄к яныг тэ̄ла, таве ёрувлаӈкве ат э̄ри. «Хо̄тал» нампа э̄ргынйӣквнэ колт рӯпитан ма̄хум выступайтанэ̄ныл порат туп ща̄нь ла̄тӈыл вос потыртэ̄гыт. Ла̄тӈув суйты те, культурав, пе̄с йис о̄лупсав тах о̄с мощ о̄лы. «Лӯима̄ сэ̄рипос» газетат кӯщаиг о̄лнэ нэ̄ Галина Кондина о̄с аквкит ла̄тыӈ ла̄выс: «Ща̄нь ла̄тыӈ юн, ще̄мьят ханищтаӈкве э̄ри, ня̄врамыт та̄нти ла̄тӈаныл юн вос хӯлыяныл, та̄н ётаныл потыртаӈкве э̄ри». Ма̄вит ӯргалан департамент колт рӯпитан ханты нэ̄ Т. П. Меркушина атхатам ма̄хум ялпыӈ хо̄талыл янытласанэ: «Ам таи ла̄вуӈкве таӈхе̄гум, ань ма̄н ма̄хманув ёмас номтыл вос о̄лэ̄гыт, пе̄с йис о̄лупса но̄х вос во̄рмалтыяныл, халанылт юртыӈыщ вос о̄лэ̄гыт. Кӯщаиг о̄лнэ хо̄тпа манос депутат хо̄тпа э̄рнэ тэ̄лат такте̄т ва̄руӈкве хунь ве̄рми, ма̄навн акваннё̄тхатым рӯпитаӈкве э̄ри». Тувыл Татьяна Павловна та урыл потыртас, ань Аган я̄ ва̄тат ялпыӈ ма̄ о̄лы, соссаӈ хо̄тпатын «Ягельный заказник» намыл пинуӈкве таӈхаве. Ос ма̄во̄й но̄хвинэ ма̄хум та̄н ётаныл ат ка̄саще̄гыт, ты ма̄гыс та̄н халанылт воритотэ̄гыт. Нэ̄ тох ла̄выс: «Ма̄н ань та ма̄ урыл яныг кӯщаит ёт потыртэ̄в. Та̄н, со̄ль, та ма̄ ялпыӈ ма̄г ла̄вуӈкве щар ат таӈхияныл. Ма̄навн ань пуссын акваннё̄тхатуӈкве э̄ри, тот о̄лнэ ма̄хманувн нё̄туӈкве, та̄н о̄лнэ ма̄наныл э̄рнэ нэ̄пакын вос хансаве. Хунь хо̄тпа такви ма̄тэ̄т о̄лы, то̄нт тав ла̄тӈе суйты, пе̄с йис ма̄хманэ хольт о̄лы. Ма̄н халанувт акваннё̄тхатым о̄луӈкве патэ̄в те, ва̄рмалянув аквъёт ва̄руӈкве ос ма̄ньлат ма̄хманув ханищтаӈкве патыянӯв те, то̄нт тах ма̄н мощ та̄ксарыг е̄мтэ̄в, ня̄враманув пе̄с ма̄хманув хольт о̄луӈкве патэ̄гыт». Надежда Рагимова потре ма̄ньщи ла̄тӈыг Светлана Ромбандееван толмащлавес.

1130 2016. 08. 25. Тамара МЕРОВА

Ка̄сыӈ хо̄тал атыӈ ня̄нь ва̄ре̄гыт Октябрьский район Лӯи Ня̄рихумит па̄вылн ялмум порат са̄в ёмас хо̄тпат ёт ва̄йхатасум, о̄лупсаныл урыл китыгласанум. Тот па̄выл кӯщай ва̄ӈыг нэ̄ Елена Валентиновна Маркова, аквъёт рӯпитан ханты нэ̄ме̄нтыл ме̄н такем ёмщакв нё̄твесме̄н. О̄лнэ колыл хо̄нтвесме̄н ос хоты хо̄тпа хо̄т хо̄нтыглаӈкве ро̄ви таи ла̄выс. Нё̄тмил ва̄рнэтэ ма̄гыс ме̄н яныг пӯмащипа ла̄тыӈ ке̄тыме̄н. Тот ёмас сымыӈ ма̄хум о̄лэ̄гыт, ме̄наме̄н тот мӯстыс. Тыгыл палыл газетат ам то̄внакт тот о̄лнэ ма̄хум урыл потрыт на̄нан хансуӈкве патэ̄гум тах. Та̄н маныр тэ̄лат ва̄ре̄гыт ос хумус о̄лэ̄гыт, э̄лаль ловиньтэ̄н. Хурит Виталий Мальцев Ирина э̄кватэ̄нтыл по̄слым о̄лэ̄г. Тэ̄н Лӯи Ня̄рихумит па̄вылт «Сударыня Булка» нампа ня̄нь ва̄рнэ кол о̄ньще̄г ос па̄вылт о̄лнэ ма̄хум ка̄сыӈ хо̄тал атыӈ ня̄нил тыттыянэ̄н. Хумус ты рӯпатан тэ̄н патхатсы̄г, ты урыл Виталий Юрьевич тох потыртас: – Ты ня̄нь ва̄рнэ колув ме̄н мо̄лты та̄лт лӯпта э̄тпос о̄выл хо̄талт па̄лыгпӯнсысламе̄н. Па̄вылт о̄лнэ ма̄хум са̄в щёс ня̄ньтал хультыгласыт, та̄н пекарнянил пе̄сыг е̄мтыс, тот са̄в ня̄нь ва̄руӈкве ат ве̄рмувес. Тыг мо̄т ляпа ӯсныл ман па̄вылныл тотыглам ня̄нь сака тыныӈыг о̄лыс. Ос па̄вылт са̄выӈпалэ пенсиян патхатам ос матумпа̄ла хо̄тпат о̄лэ̄гыт, рӯпата торыӈыщ о̄с а̄тим. Таима̄гыс ме̄н э̄кваме̄нтыл хоса ат номсахтым пекарня ва̄рсуме̄н. Ам Нягань ӯст о̄лсум, са̄в та̄л машинал яласан хо̄тпаг рӯпитасум. Тувыл Ирина ёт хо̄нтхатасум, аквано̄лмыгтасме̄н ос тыг тав самын патум па̄влэ̄н ёхтысме̄н. 2015 та̄л ма̄ньполь э̄тпост ме̄н Октябрьский па̄вылн ханищтахтуӈкве ялсуме̄н, тот сертификат висме̄н ос грант ма̄гыс э̄рнэ нэ̄пакыт щё̄питасме̄н. То̄нт ты 300 со̄тыра солко̄ви грант щирыл майвесме̄н. Октябрьский районт кӯщай нэ̄ Анна Куташован ме̄н тэ̄ламе̄н ос э̄лаль ӯрмыгтастэ, пекарня ва̄рнэ ма̄гыс кол хо̄нтсӯв. Ань ты кол о̄влэ̄т хӯл щё̄питан цехыг о̄лыс, таве ма̄навн майвес. Ма̄н тыт ма̄нки ёмащакв щё̄питаслӯв ос ня̄нь ва̄рнэ сыресыр утыт ёвтсӯв. Грант щирыл маим олнанув пуссын тув холтсанӯв, ос кол ма̄нки олнанувт ос ма̄нки ёрва̄гыл щё̄питаслӯв. Ань тыт хӯрум ёмас нэ̄ хо̄тпат ня̄нь ва̄рим рӯпитэ̄гыт, э̄квам ня̄нь тыналы. Ма̄н тыт аквтох хӯлыӈня̄нь, пилыӈня̄нь ва̄ре̄в. Ма̄хум сыресыр ма̄гнянь, пиццат ма̄н палтув ва̄рылтэ̄гыт. Ня̄нь ва̄рнэ порат ме̄наме̄н Ирина оматэ нё̄тыс, тав са̄всыр рецептыт ва̄г, такви ня̄нь ва̄рнэ нэ̄г па̄вылт рӯпитас. О̄влэ̄т рӯпитаӈкве, ва̄им, та̄рвитнувег о̄лыс, ань та̄л сыс ханьщувласӯв. Ва̄гув, касыӈ хо̄талт манаса̄вит ня̄нь ва̄руӈкве э̄ри. Колас Нягань ӯст ёвтэ̄в, акв фирма ёт договор щирыл рӯпитэ̄в. Мо̄т хо̄тпат хольт ма̄н ня̄нь тынэ сака но̄х ат лаплылӯв. Матумпа̄лаг о̄лнэ хо̄тпат ма̄навн ла̄ве̄гыт, ня̄нюв атыӈ ос пӯмащипа ла̄ве̄гыт. Тыг то̄внакт ма̄хум Ягрим па̄вылныл ня̄нь ёвтуӈкве ёхтыгпа̄лэ̄гыт. Пуссын ты ва̄рмалит о̄вылтыт Ирина Мальцева тох ла̄выс: «Та̄рвит ман а̄ти, э̄лумхо̄лас матыр ва̄руӈкве сака тахмаи ке, тав пуссын ва̄ри». Ма̄н потыртамув сыс ла̄пкан ма̄хум такем ёхтыгпа̄лэ̄гыт, аквкит атыӈ ня̄нь ёвтэ̄гыт ос ща̄гтым юв минэ̄гыт.

1130 2016. 08. 25. Тамара МЕРОВА

Мӯй хо̄тпат хӯл алыщлаӈкве во̄вавет Михаил Яркин Октябрьский район Лӯи Ня̄рихумит па̄вылт о̄лы. Мо̄лты та̄л тав предприниматель щирыл районный касылыт проект щё̄пита̄лыс. Тот таквсы онтолов са̄всыр номинацият хо̄тпан э̄лумхо̄лас проектаныл ма̄гыс воритотсыт. То̄нт район па̄лыл 4, 2 млн. со̄тыра солко̄ви та̄стым о̄лыс. Ос Михаил Васильевич предпринимательство тэ̄ла ущ о̄вылтан ма̄хум халт грантыл майвес. Ань хумле тэ̄ланэ о̄лэ̄гыт, тав таи потыртас: – Ам мо̄лты та̄лт «Развитие бизнеса по туризму» нампа проект ва̄руӈкве номылматсум. Тот туристический тэ̄ла хосыт хӯл алыщлан накыт щё̄питасум. Предпринимательство о̄выл щёс ва̄рнэ ма̄хум халт но̄хпатсум ос 300 со̄тыра солко̄вил майве̄сум. Ты проектум кастыл ам мӯй хо̄тпат тыг во̄виньта̄лсанум ос та̄наныл хӯл алыщлаӈкве тотыгласанум. Ам палтум Екатеринбург ос Нягань ӯсныл ма̄хум ёхталасыт ос ма̄н аквъёт хӯл алыщласӯв. Тыи та̄н та̄нки ще̄мьяныл хӯлыл тыттын ма̄гыс тыг ёхтыгпалэ̄гыт. Ань туи сыс хӯл алыщлан ва̄рмаль ёлпо̄илттаслум. Хӯлыт та̄ра тыналан ма̄ ат хо̄нтэ̄в, ма̄нкинавн хотты ӯсн ма̄н па̄вылн тотуӈкве о̄с ат а̄ртми. Октябрьский район ляпа па̄вланув А̄с я̄ хосыт ӯнлэ̄гыт, тот о̄лнэ ма̄хум та̄нки хӯл алыщлым яласэ̄гыт. Мо̄т ӯсыӈ ма̄н яласан ва̄рмаль, тыи туп наска̄ссыг лё̄ӈх тармыл олн пахвуӈкве ос тувыл хӯланув молях хотсаке̄гыт. Таима̄гыс ань ма̄нки тэ̄нэв ма̄гыс туп хӯл алыщлэ̄в. Туи мӯй ма̄хум та̄нки тыг о̄с ат ювыт, тэ̄лы лё̄ӈх хосыт тай машинан та̄лматэ̄гыт, ам та̄наныл хӯл алыщлаӈкве тотыглыянум ос ювле та̄нки хӯлыӈ та̄гыл та минэ̄гыт. Ха̄льӯс рыбокомбинат ёт ам ат рӯпитэ̄гум, та̄н тот та̄нки Я̄грим хӯл алыщлан ма̄хум ёт акваннё̄тхатым рӯпитэ̄гыт. Ма̄н районувт Маремьянин общинатэ о̄лы кос, тув хӯланув тотуӈкве ке, ос наска̄ссыг пора мины. Туи ма̄хум тэ̄нэ ма̄гыс йильпи хӯл кинсэ̄гыт. Ма̄н хӯланув польтуӈкве ул кос пиныянӯв, ос хотталь тотнэ̄в мус та̄н хоттолэ̄гыт. Тувыл олныл та̄ра ат ке ойтаве̄в, ам предпринимательство тэ̄ланум ма̄гыс отчётыт ва̄рнэм порат налоголн ойтуӈкве ла̄вавем. Амки хотыл олн выгум. – Наӈ ос та̄стым олнанын хоталь холтсанын, маныр ёвтсыт, проектын э̄лаль ва̄руӈкве патылын ман а̄ти? – Маим олнытыл ам палаткат, хӯл алыщлапыт, маснутыт ос кит электростанцияг ёвтсум. Электростанцияг сака тыныӈыг, таима̄гыс мо̄т пормас са̄в ёвтуӈкве олныл ат товлуве̄сум. Во̄рт кол о̄ньще̄гум, мӯй ма̄хум тув тотыглыянум, тот хӯл алыщлэ̄в. Тӯяг Екатеринбург ос Нягань ӯсыгныл хум хо̄тпат ёхталасыт. Ёхталам ма̄хумн тыт мӯстыт, пуссын ща̄гтым ювле минасыт. Ань я̄ витэ мощ о̄нты, тувыл ущ хӯл алыщлан ма̄хум тах во̄виянум. Этнотуризм нупыл тэ̄ла ат щё̄пита̄лсум, хӯл алыщлан хо̄тпатн тох ёмас. Хӯл алыщланэ̄ныл юипа̄лт хо̄тпат вагта̄л патэ̄гыт, хунь та пе̄с ва̄рмалянув нупыл номсуӈкв. Та̄н тыг ӯс о̄лупсаныл ӯщлахтуӈкве ёхталэ̄гыт. – Ты э̄лыпа̄лт наӈ маныр ва̄рсын, хо̄т ханищтахтасын? – Ам ты па̄влумт самын патсум, тыт школа а̄стласум, армиян ялсум. Тувыл ма̄во̄й ос газ но̄хвинэ ма̄т рӯпитан хо̄тпаг ханищтахтасум, лов арыгкем та̄л рӯпитасум. Ань амки соссаӈ ма̄хманув о̄лупсав щирыл о̄луӈкве патсум. Елена Маркова, Лӯи Ня̄рихумит па̄выл тармыл пуӈктотнэ нэ̄г о̄лы, тох ла̄выс: «Михаил такви мотор ос буран о̄ньщи. Мӯй ма̄хманэ такви тыглетувле тотыглыянэ. Па̄влыӈ ма̄хманув, ва̄им, хумус та̄нки щирыл о̄луӈкве ка̄саще̄гыт, тох та о̄лэ̄гыт. Рӯпата киснэ хо̄тпа матыр тэ̄ла хо̄нты ке, та ва̄ри, ще̄мьятэ тыттытэ. Михаил нэ̄тэ̄нтыл ма̄нь а̄ги ос пыг янмалтэ̄г». Моще̄ртын проект щё̄питан ос каснэ ва̄рмаль е̄мты. Хотьют тув хансы ман а̄ти, ма̄н а̄т ва̄глӯв. Михаил ла̄выс, тав ань нэ̄матыр ат хансы, нё̄тмил ва̄рнэ ма̄гыс олныл китынтыг ат миве. Ань ты о̄вылтам тэ̄латэ хотмус э̄лаль тах та тотытэ. Тамара Мерова хансыс ос хури ва̄рыс.

1130 2016. 08. 25. Тамара МЕРОВА

А̄кань суссылтап «То̄рум Маа» нампа музейт рӯпитан хо̄тпат акв суссылтап о̄с щё̄питасыт ос ӯст о̄лнэ ма̄хум тув во̄виньта̄лсаныл. Ты суссылтап та̄н «Кукольная история» намтысаныл ос таве ма̄ янытыл соссаӈ мирыт ялпыӈ хо̄таланыл кастыл ва̄рсаныл. О̄влэ̄т музей кӯщай ва̄ӈын нэ̄ Светлана Михайловна Астапович тув атхатам мӯй хо̄тпат ёт пащалахтас, ялпыӈ хо̄талыл янытласанэ ос то̄ват рӯпатанылт нё̄тнэ̄ныл ма̄гыс хорамыӈ лӯптал мӯйлуптасанэ. Тыи Е. А. Нёмысова, Н. Н. Фёдорова, Т. А ос Т. А. Молдановыг, З. Н. Лозямова, Л. К. Зубакина ос А. М. Константинов. Та̄н пе̄с накыт ва̄ганыл, э̄рнэ торыг ма̄к ла̄тыӈ хӯлтэ̄гыт манос мо̄т ва̄рмалитыт матыр нё̄тэ̄гыт, та̄н ань акваннё̄тхатым аквтох э̄лаль вос рӯпитанувыт ос пуста̄гыл вос о̄лэ̄гыт. Тувыл музейт рӯпитан мо̄т нэ̄ Наталья Ворокосова ты выставка урыл потыртас. Тыт суссылтан а̄канит «Музейный комплекс им. Ивана Яковлевича Словцова» нампа музейт рӯпитан хо̄тпатн акванатыглаве̄сыт. Ты музей Тюмень ӯст о̄лы, ос та̄н ва̄т та̄л сыс яныгса̄т са̄вит а̄канит Тюменский область лӯима̄ ос рущ ма̄хум халт яласым акванатмыт. Щар о̄выл а̄канит ма̄н округувныл Вах я̄ ва̄таныл 1986 та̄лт Наталья Николаевна Фёдорова тотыглас. Тав ёмас искусствоведхо̄тпа, хурит по̄слын ма̄хум халт тав РФ Союзын пирмайтавес. Наталья Николаевна мӯйлуӈкве ёхталам ма̄хумн хантыт, ма̄ньщит ос ё̄рныт палт хо̄нтум а̄канит урыл потыртас. Ма̄навн пӯмыщ хӯнтлуӈкве о̄лыс, хо̄т ос хотьютн а̄канит ю̄нтве̄сыт. Та̄н то̄рыл, совныл ман пуныл ва̄рим о̄лэ̄гыт. То̄ват ю̄нтве̄сыт, мо̄т утыт нас акванма̄нигтаве̄сыт. Пе̄с пора а̄канит щар мо̄таныт, ань ос са̄в а̄кань то̄рныл ю̄нтавет ос супаныл хорамтавет. Ка̄сыӈ а̄каньт по̄хат нэ̄пак ло̄мтыт хансым о̄лы, хотьютн ва̄рвес ос хоты па̄вылныл тав о̄лы. Наталья Фёдорова ла̄внэ̄тэ щирыл, ка̄сыӈ а̄кань такви ва̄рум хо̄тпатэ хурипа. Тувыл мӯй ма̄хум э̄лыпа̄лт Зоя Никифоровна Лозямова а̄канит ва̄рнэ нак суссылтас ос та̄наныл китыгласанэ, маныр тэ̄лат ва̄руӈкве ро̄ве̄гыт, маныр ат ро̄ви. Ос э̄ква ла̄выс, хотьют ма̄к ла̄тыӈ ювле ла̄ви, та хо̄тпан о̄выл ва̄рум а̄кане мӯйлуптытэ тах. Соссаӈ ма̄хманув а̄каняныл вильтта̄л, ка̄т ос ла̄гыл та̄л ва̄рыгласаныл. Э̄типа̄лаг а̄канит пуӈканыл мощ то̄вмасалуӈкве э̄рсыт, тыи э̄рттам та̄н ня̄врам ул вос пилуптасаныл. Тамле пе̄с ла̄тыӈ о̄лыс. Тувыл а̄кане Евдокия Андреевна Нёмысован мӯйлуптастэ. Суссылтап оигпаме юипа̄лт музейт рӯпитан хо̄тпат мӯй ма̄хум ща̄й айнэ пасан ва̄тан во̄всаныл ос тот потраныл э̄лаль о̄лыс. Тамара Мерова хансыс ос хури ва̄рыс.

1130 2016. 08. 25. Николай МЕРОВ

Маснут сагнэ ма̄ньщи нэ̄ Урай ӯст соссаӈ ма̄хум мирхал фестиваляныл о̄лум порат тув Белоярский район Полноват па̄вылныл акв ма̄щтыр ма̄ньщи нэ̄ ёхталас. Наме Людмила Николаевна Костина, тав хорамыӈ пормасыт сэ̄тапыл саги. Ам ты нэ̄ такви уре̄тыл ос па̄выл урыл потыртаӈкве во̄выслум. На̄н ань тав потре э̄лаль ловиньтэлы̄н: – Ам Полноват па̄вылт о̄лэ̄гум. Тот сэ̄тапыл са̄всыр хорамыӈ пормасыт ка̄тыл саге̄гум. Ты щулкиныт, пуӈкто̄рыт, па̄ссат ос мо̄т пормасыт. Па̄выл клуб колувт кружок рӯпиты. Соссаӈ ма̄хманув матыр ма̄щтырлаӈкве акваг тув ёхталэ̄гыт. Хотьют пормасыт саги, мо̄тан сакныл хорамыт харты, то̄ва ю̄нсхаты, матыра̄ти пуссын тот ва̄ре̄в. Мощ мо̄лалнув ма̄н па̄влув хӯрумса̄т та̄лэ то̄влыс. Тот миркол, клубкол, пӯльница, школа, ма̄нь ня̄врам колыт рӯпитэ̄гыт. Па̄влувт пуссын аквъёт акв со̄тыра арыгтем хо̄тпа о̄лы. Тув ляпат ӯнлын Тугияны, Пашторы ма̄нь па̄влыгныл ня̄врамыт школан ханищтахтуӈкве тотыглавет. Ханищтахтын порат ня̄врамыт интернатыт о̄лэ̄гыт. Туи порат я̄ хосыт «Заря» на̄иӈха̄п яласы. Тэ̄лы ма̄хум ос автобусыл яласэ̄гыт. Тӯяг ос таквсы порат, хунь лё̄ӈхыт лю̄лиг е̄мтэ̄гыт, ма̄хум вертолётыл тотыглавет. Па̄вылт ма̄ньщи, ханты, рущ ос мо̄т ма̄хум пуссын юртыӈыщ о̄лэ̄гыт. Ос тамле ва̄рмаль о̄лы, па̄влувт рӯпата а̄тим. Ма̄хум хӯл алыщлым ос во̄раим о̄лантэ̄гыт. Тот хӯл алыщлан акв община рӯпиты. Па̄влыӈ ма̄хум пувнэ хӯланыл пуссын тув мыганыл. Ты коныпал ма̄хум пил ва̄тэ̄гыт. Пилыт тыналэ̄гыт, таил та о̄лэ̄гыт. Ам ма̄щтырлан фестивалин китыт щёс ликмысум. О̄выл порат 2014 та̄лт ялсум. То̄нт ма̄щтырлан ма̄хум Сургут ӯст акванатхатыгласыт. О̄с аквтох пормасыт сагим кассум. Та порат сагум пормасум ма̄гыс мо̄т ма̄щтыр хо̄тпат халт хӯрмит местал майве̄сум. Ань Урай ӯст ос ты ва̄рмаль щирыл рӯпата ва̄руӈкве ка̄сащасум. Са̄р та̄лт маныр лю̄льсаӈнув ва̄рсум, та тэ̄лат ань ёмщакв ханищтасанум. То̄нт ам пе̄с йис пормасыт хольт сагсум. Тувыл ос то̄ва пормасанум йильпи щирыл ва̄рсанум. Жюри хо̄тпатн ты пормасанум акв щирыл ва̄руӈкве ла̄вве̄сум. Пе̄с йис пормасыт ва̄ре̄гум ке, таи э̄лаль вос тотсум. Ос йильпи щирыл ке саге̄гум, пе̄с йис пормасыт хольт ул вос ва̄рсум. Аквантэ̄лыгтаӈкве ат ро̄ви, ма̄хум ва̄рум пормасанум ат ханьщияныл. Таима̄гыс ань ам туп пе̄с йис хольт пормасыт ва̄ре̄гум. Амки номтум щирыл пормас палт нэ̄матыр ат о̄лтэ̄гум. Людмила Николаевна лов та̄лэ то̄влум порат пормасыт такви сагуӈкве патыс. Ты ма̄щтырлан тэ̄лан тав оматэ̄н ханищтавес. Хунь а̄ги нёлоловхуйплов та̄лэ то̄влыс, а̄кве хорамыл сагим щулкин таве̄н мӯйлуптас. Та щулкиныг а̄гиквен татем сымын хо̄ясы̄г, тав сака ща̄гтыс, э̄руптым о̄щсаге. Та па̄сныл тав соссаӈ пормасыт сагуӈкве та о̄вылтахтас. Ты ва̄рмаль щирыл ань тыг мус рӯпиты. Николай МЕРОВ хансыс ос хури ва̄рыс.

1130 2016. 08. 25. Светлана РОМБАНДЕЕВА

Кульпас ня̄врамыт рӯпитасыт Ань ты туи Ха̄льӯс район Кульпас па̄выл школат ханищтахтан яныгнув ня̄врамыт кит э̄тпос рӯпитасыт. Ты урыл ам мирколт рӯпитан хум Владимир Геннадьевич Черников ёт потыртасум. Тав ла̄вме щирыл, ты та̄л миркол па̄лыл ман центр занятости колныл олн щар мощща та̄стувес, таи ма̄гыс рӯпитаӈкве таӈхум ня̄врамыт пуссын ат вуйве̄сыт. Лӯпта э̄тпост лов ня̄врам рӯпитасыт, о̄йттур э̄тпост ос туп нила. Па̄выл янытыл порс атсыт, ӯсхулыт сыстамтасыт, пӯсасыт о̄льпыл сартсыт ос мо̄т рӯпата ва̄рсыт. А̄лпыл онтолов щё̄с порат рӯпитаӈкве о̄вылтахтэ̄гыт, китхуйплов щё̄стем порат рӯпитан ма̄ныл та по̄йтэ̄гыт, ӯщлахтуӈкве юв минэ̄гыт. Са̄т арыг со̄тыра солко̄вил ойтуӈкве ла̄вве̄сыт. Ты я̄тил, ка̄ркам ня̄врамаквет пуссын пуста̄гыл вос о̄лэ̄гыт, На̄й-О̄тыранылн вос ӯргалавет! Ка̄ркам а̄ги Ты хурит Катя Садомина по̄слым о̄лы. Тав я̄ӈк на̄тнэ э̄тпос 14 хо̄талэ̄т самын патыс. Ты та̄л аквхуйплов классын ханищтахтуӈкве мины. Катя а̄тятэ наме Геннадий Николаевич, оматэ Любовь Андреевна. Та̄н колта̄гланылт ат ня̄врам самын патыс. Катя ханищтахтуӈкве сака э̄рупты, учителянэ пуссын янытлыянэ. О̄йттур э̄тпост тав юртанэ ёт рӯпитас, ты урыл тох потыртас: – Ма̄н нила хо̄тпа рӯпитасӯв – Игорь Ромбандеев, Лолита Солкуцан, Ксюша Черникова ос ам. Па̄выл янытыл порс атым ё̄мыгтасӯв, то̄ванакт па̄ртыт о̄льпыл сартсӯв. А̄лпыл 9 щё̄сныл 11. 30 щё̄с мус рӯпитасӯв. А̄нумн рӯпитаӈкве сака мӯстыс, хунь олныл ойтаве̄в, школат ханищтахтан ма̄гыс э̄рнэ матыр ос маснут ёвтэ̄гум. Светлана Ромбандеева хансыс ос хури ва̄рыс.

1130 2016. 08. 25. Николай МЕРОВ

«Со̄рни сэ̄й» ӯщлахтын ма̄ Ха̄льӯс ляпат «Со̄рни сэ̄й» нампа ня̄врамыт ӯщлахтын ма̄ рӯпитанэ̄тэ па̄сныл ат та̄л то̄влыс. Тот кӯщаиг Ольга Константиновна Филиппова рӯпиты. Ты туи ам та ӯщлахтын ма̄н ялсум. Тот мощ о̄лсум, суссум, хумус ня̄врамыт ӯщлахтэ̄гыт. Воспитатель хо̄тпат ёт ос ня̄врамыт ёт потрамасум. «Со̄рни сэ̄й» ма̄т са̄выӈпа̄лэ Ха̄льӯс районт о̄лнэ ня̄врамыт ӯщлахтэ̄гыт. Та̄н тув яныг ща̄гтыл ёхталэ̄гыт. Тот хӯрум ё̄рнкол, тэ̄нут ва̄рнэ кол, ёнгасан кол, тэ̄нутпормас о̄щнэ а̄мпарыт ос сӯмъяхыт ӯнттым о̄лэ̄гыт. То̄ва ня̄врамыт палаткат, то̄ват ос ё̄рнколт э̄т хӯлэ̄гыт. Ма̄тэ мӯвлахи тэ̄рпил расгалтавес, тыима̄гыс лё̄мвой тот щар а̄тим. Туи сыс хӯрум смена щирыл тот яныгса̄т хус ня̄врам ӯщлахтэ̄гыт. Та̄н ма̄гсыланыл са̄всыр пӯмащ ёнгилыт ос касылыт щё̄питавет. Ня̄врамытн тот ӯщлахтуӈкве сака мӯсты. Ты нё̄тнэ ма̄кве Ха̄льӯсныл атахкем ве̄рыстат о̄лы. Николай МЕРОВ хансыс ос хури ва̄рыс.

1130 2016. 08. 25. Светлана РОМБАНДЕЕВА

Паща о̄лэ̄н, я̄тил ня̄врамаквет! Ты нила ло̄пс на̄н ма̄гсылын щё̄питаслӯв, намтыслув «Султум» (Искорка»). Тыг ня̄врамыт ке̄тум потраныл ма̄ньщи ос рущ ла̄тӈыл хассанӯв, хурияныл ва̄рсанӯв. На̄н о̄с потрыт хансэ̄н, газетан ке̄тэ̄н, та̄наныл ма̄н тах о̄с пуссын тамле ло̄псын хансыянӯв. Ты тэ̄ла намаяслӯв «Юный корреспондент». Ма̄ньта̄гыл хансэ̄н, ханищтахтэ̄н, ма̄н на̄нан нё̄тыянӯв. Яты, ань потрыт ловиньтэ̄н.

1130 2016. 08. 25. Светлана РОМБАНДЕЕВА

Ам хӯл алыщлэ̄гум Ам намум Саша Кочкин, та̄л котиль э̄тпос 2 хо̄талэ̄т 2008 та̄лт самын патсум. Ам Ха̄льӯс район Кульпас па̄вылт о̄лэ̄гум. Омам Мария Викторовна, а̄тям Сергей Сергеевич. Увщи ос э̄щ о̄ньще̄гум, увщим наме Лена, э̄щум Ксюша. Ане̄квагумащо̄йкагум, Татьяна Николаевна ос Виктор Александрович Батмановыг, о̄с Кульпаст о̄лэ̄г. Оля щаще̄квам э̄лынт о̄лы. Лӯпта э̄тпост ам омам ёт Ивановский областьн ялсум, тот ащо̄йкам оматэ о̄лы, Дарья Федотовна Батманова. Тав 80 арыгтем та̄лэ. Ам а̄тям ёт хӯл алыщлаӈкве ялантэ̄гум, аквъёт няслыме̄н, толгиме̄н.

1130 2016. 08. 25. Светлана РОМБАНДЕЕВА

Ам ма̄хманум э̄руптыянум Ам намум Арина Рядькина, Ха̄льӯс район Кульпас па̄вылт о̄лэ̄гум. Са̄т та̄лум то̄влыс, яныг таквс э̄тпос 9 хо̄талэ̄т 2008 та̄лт самын патсум. Ты та̄л китыт классын ханищтахтуӈкве минэ̄гум. Омам наме Татьяна Игоревна, а̄тям Денис Иванович. Ам йӣгрищ о̄ньще̄гум, наме Даша. Тав хӯрум та̄лэ то̄влыс, садикын яланты. Ме̄н ане̄ква ос ащо̄йка о̄ньщиме̄н – Наталья Борисовна ос Игорь Валентинович Дудоревыг. Щаще̄кваме̄н Татьяна Кузьминична Рядькина. Ам колта̄гыл ма̄хманум сака э̄руптыянум, пуссын пуста̄гыл вос о̄лэ̄гыт.

1130 2016. 08. 25. Соня Хатанзеева

Ло̄пмус па̄вылт о̄лнэ ще̄мья Паща о̄лэн, тыныӈ редакция! Ам намум Соня Хатанзеева. Ам Ло̄пмус па̄вылт о̄лэ̄гум. Ам ще̄мьям яныг, ма̄н хо̄т хо̄тпа о̄лэ̄в. Омам наме Светлана, а̄тям Василий, увщим Оксана, каӈкум Игорь ос а̄пщим Никита. А̄нумн аквхуйплов та̄л, атыт классыт Кульпас исколат ханищтахтэ̄гум. 2004 та̄л яныг таквсы э̄тпос хус щислат самын патсум. Ань ам ще̄мьям урыл хансэ̄гум. Ам а̄тям электростанцият дизелистыг рӯпиты. Тав сака номтыӈ, мӯтраӈ хум. Хӯл алыщлаӈкве, во̄рн ялантаӈкве тав сака ха̄сы. Тав яныг ще̄мьят яныгмас. Хӯрум увщи ос акв каӈк о̄ньщи. О̄влэ̄т ще̄мьят щар яныг тыи Раиса, тувыл Аграфена, Валерий, Татьяна ос ам а̄тям Василий. Ам Аграфена а̄квум янытлылум ос э̄руптылум. Тав хосат тагыл Ха̄льӯст районный пӯльницат рӯпиты. Ань тав пенсият о̄лы, тувыл э̄лаль иӈ рӯпиты. Рӯпитан ма̄гыс тав са̄всыр грамотат, дипломыт о̄ньщи. Тав сака ёмас, ка̄ркам, мӯтраӈ нэ̄. Рӯпитан ма̄хманэ̄н тав сака э̄руптаве ос янытлаве. О̄йкатэ ёт кит ня̄врам янмалтасы̄г. О̄лнэ ма̄тэ ат ёрувлытэ, хунь отпускан мины, Ло̄пмус па̄вылн ма̄н палтув аквписыг ёхтала̄лы. Раиса а̄квум ам о̄с янытлылум. Тав о̄с хоса рӯпитас, ань пенсият о̄лы. Тав ма̄ньщи э̄ргыт, йӣквыт, мо̄йтыт сака са̄в ва̄г. Аквписыг клубыт э̄ргыс, йӣквыс, ня̄врамыт о̄с ханищтасанэ. Са̄всыр пормасыт сакныл харты, хорамыӈ пӯркат ю̄нты, са̄сныл а̄ныса̄ныт ва̄ри. Тав сака сымыӈ, ка̄ркам нэ̄. Ам тэ̄натэ̄н сака э̄руптыягум ос янытлыягум. Тэ̄н сас ще̄мьянэ̄н ёт Ха̄льӯст о̄лэ̄г. Ам та̄н палтаныл мӯйлуӈкве ялантэ̄гум. Щаще̄квам ос о̄пам Ло̄пмус па̄вылт о̄лсы̄г. Щаще̄квам наме Софья Семёновна Албина, о̄йкатэ щирыл Хатанзеева. Намхо̄талэ са̄т щислат яныгполь э̄тпос 1934 та̄лт о̄лыс. Тав Ло̄пмус па̄вылт яныгмас. Война порат тав хӯл алыщлаӈкве нё̄тыс, пум са̄грыс, пил ва̄тыс, ла̄хыс атыс. Ма̄хманэ̄н ма̄нь та̄гыл нё̄тыс. Хунь хо̄нтлан пора а̄стыс, тав о̄выл классын ущта минас. Са̄т класс а̄стламе юипа̄лт Ханты-Мансийск ӯсн минас, тот фельдшерскоакушерский школат ханищтахтас. Тувыл са̄в та̄л Ло̄пмус па̄вылт ле̄ккарыг рӯпитас. Ам таве янытлылум, нэ̄мхуньт ат ёрувлылум. О̄парищум наме Пётр Иванович Хатанзеев о̄лыс. Тав нилахойплов щислат о̄йттур э̄тпос 1936 та̄лт самын патыс. Пенсиян патме мус са̄в та̄л лесникыг рӯпитас. Омагеа̄тяге са̄лы ӯрнэ хо̄тпаг о̄лсы̄г. Ще̄мьят ат ня̄врам яныгмасыт. Таима̄гыс тав рӯпатал ат пилыс, матыра̄ти тав пуссын ва̄рыс. Ӯйхул о̄щсыт, туи Со̄рахтат пум ва̄рсыт. Хӯл алыщлаӈкве, во̄рн ялантаӈкве, ӯйхул коюӈкве тав сака ма̄щтырыг о̄лыс. Ам о̄пам сака ёмас, мӯтраӈ о̄йка о̄лыс. Ма̄хмытын тав э̄руптавес, янытлавес. Ам таве ос э̄руптылум ос янытлылум. Пӯмащипа ла̄тыӈ ла̄ве̄гум щаще̄квамн ос о̄памн, матъёмас тэ̄н о̄лсы̄г, ёмас ня̄врамыт янмалтасы̄г. Тыи а̄тям ще̄мьятэ урыл хассум. Ань омам ще̄мьятэ урыл хансэ̄гум. Омам Ло̄пмус па̄вылт клубыт рӯпиты. Ма̄н таве сака э̄руптылӯв. Та̄н ще̄мьяныл яныг о̄лыс, хӯрум пыг ос хӯрум а̄ги яныгмасыт. О̄влэ̄т яныг каӈке Семан, тувыл увщитэ Клава, э̄лаль Якуп, Микол, Уринэ, тувыл ма̄нь э̄ще Лелюк. Тав омагеа̄тяге сас са̄лы ӯрнэ хо̄тпаг о̄лсы̄г. Таима̄гыс каӈкаге о̄с са̄лы ӯрнэ хо̄тпаг о̄лсы̄г. Микол аким ань тыг мус са̄лы ӯргалым рӯпиты. Ащо̄йкам Герасим Яковлевич Солянов Хо̄сло̄х па̄вылт 1933 та̄лт о̄выл хо̄тал та̄л котиль э̄тпост самын патыс. Тав Саранпа̄выл совхозт са̄лы ӯрнэ хо̄тпаг хоса рӯпитас. Э̄кватэ Александра Дмитриевна Сӯкыръя па̄вылт 1931 та̄лт ва̄т са̄грапнал э̄тпос ва̄т нупыл онтолов хо̄талт самын патыс. О̄йкатэ ёт о̄с са̄лыӈ колт яласас. Са̄лы совныл са̄всыр пормас ю̄нтыс: пӯркат, сахит, мольщаӈыт, нэ̄ ва̄ит, хум ня̄рат. Ма̄ньщи хорамыӈ супыт, то̄рыт о̄с ю̄нтыс. Сакныл са̄всыр хорамыӈ пальсакыт, турлопсыт о̄с хартыс. Тыи сака ка̄ркам, ёмас, мӯтраӈ нэ̄ о̄лыс. О̄йкатэ̄нтыл са̄т ня̄врам янмалтасы̄г. Тэ̄н ня̄враманэ̄н сака э̄руптым янмалтасанэ̄н. Я̄тил тыныӈ ащо̄йкам ос ане̄квам, ам тэ̄натэ̄н ат ва̄щинтасагум, омам потыртам потранэ хосыт, хумус та̄н янмалтаве̄сыт, ам та̄наныл номтыт о̄ньщиянум ос сака э̄руптыянум. Соня Хатанзеева, 11 та̄л, Ло̄пмус па̄вылныл о̄лнэ а̄гирищкве.

1130 2016. 08. 25. Рома Гындышев

Ане̄квам урыл потыр Я̄тил ане̄квам, Наӈ аквписыг матыр ва̄ре̄гын: Колсори щё̄питэ̄гын, Ёмас тэ̄нут па̄йтэ̄гын, Наӈын ка̄сын ва̄рмаль сака э̄ри. Та̄лыт молях минэ̄гыт, Ювле та̄н ат ё̄ӈхе̄гыт, Пуста̄гыл э̄лаль о̄лэн, Ма̄навн ка̄с наӈ тотэн! Ам ане̄квам Ха̄льӯс район Кульпас па̄вылт о̄лы. Тав наме Евдокия Ивановна Кугина. Ам ане̄квам – а̄нумн сака сымын э̄рнэ э̄лумхо̄лас. Хунь ам самын патсум, тав а̄нум янмалтастэ, э̄руптастэ, нёвитастэ, э̄рыг э̄ргыс, нэ̄пак ловиньтас, мо̄йтыт мо̄йтыс. Ане̄квам а̄нумн пуныӈ носкит сагыс, ка̄миньт па̄ссат, ре̄гыӈ нуми суп охсат, са̄рпыт ос ке̄нтыт сагыс. Колта̄глувт ам щар о̄выл апыг. Ялпыӈ хо̄талыт порат тав а̄нумн са̄всыр мӯйлупсат мӯйлупты: ва̄рнэ ёнгыт, номтыӈ нэ̄пакыт ос са̄ккарыӈ мӯйлупсат. Ань ме̄н омам ёт мо̄т колт о̄лыме̄н, ты э̄лыпа̄лт ане̄квам колт о̄лсуме̄н. Ань ане̄квам палт нас мӯйлуӈкве ялантыме̄н. Ма̄н во̄рувт са̄в пил ос ла̄хыс яныгми. Ане̄квам ёт ме̄н пил ва̄тыме̄н, ла̄хыс атыме̄н, тав а̄нум са̄всыр потрыт То̄рум ма̄вит урыл, во̄руйит урыл потырты. Аквнакт во̄рт та̄хтпил ва̄тсӯв. Ам ва̄гтал патсум, номсэ̄гум мощнув ӯщлахтэ̄гум. Матырсыр ка̄миньт а̄ӈквал хо̄нтсум, тув ӯнтхатсум. Ане̄квам ляльт ро̄ӈхе̄гум: «Ам ка̄миньт улас хо̄нтсум». Ане̄квам кос а̄ӈкватас, ро̄ӈхувлас: «Тыи хо̄свой кол, но̄хква̄лэн». Хунь юв минмыгтасӯв, хоса ты урыл мувиньтасӯв. Ане̄квам а̄нум са̄всыр рӯпата ва̄руӈкве ханищтастэ: тэ̄пкан витыл со̄сантаӈкве, щар пуссын тэ̄лум утыт атуӈкве, пум хотманыгтаӈкве. Таима̄гыс ам таве̄н пӯмащипа ла̄тыӈ ла̄ве̄гум. Ане̄квам ёт ам са̄всыр потрыт потраме̄гум. Тав а̄нумн аквписыг ёмас, номтыӈ, э̄рнэ щирыл ла̄тӈыл нё̄ты. Ам сака таӈхе̄гум, ане̄квам хоса э̄лаль ма̄н ётув вос о̄лыс. Ам таве сака э̄руптылум. Тав ань о̄лы, рущ щирыл ла̄вуӈкве «в ногу со временем», са̄в ловиньты, сэ̄тапыл саги, исколат рӯпиты. Ам тав палтэ ма̄ньщи ла̄тыӈ ханищтан кружокн ща̄гтым ялантэ̄гум. Тав ты кружок ня̄врамыт ма̄гыс ва̄ри, та̄наныл ма̄ньщи ла̄тӈыл потыртаӈкве ханищтыянэ. Я̄тил ане̄квам, пуста̄гыл са̄в та̄л о̄лэн! Наӈ ма̄нав пуссын ӯргалым о̄ньщилын, номтыл хӯл тылын, щар ма̄к а̄нумн ляпа э̄лумхо̄лас! Хосанув о̄лэн, ма̄н ётув ща̄гтым о̄лэн, посыӈ хо̄талка̄т хольт вольген. Ам наӈ хольтын хо̄йхатнэ щирыл о̄луӈкве патэ̄гум. Рома Гындышев, 8 та̄лэ, Кульпас па̄выл.

1131 2016. 09. 08. Тамара МЕРОВА

Ма̄хум о̄лупсанылт нё̄тавет Та хультум э̄тпост Правительство кӯщаит ка̄сыӈ са̄тыт акванатхатыгла̄лсыт ос са̄всыр ва̄рмалит урыл потыртасыт. Ты э̄лыпа̄лт са̄всыр ма̄т комиссиян атхатам хо̄тпат са̄кконын хансум тэ̄лат мӯсхалыг ханищтыяныл, хоттальа̄ти а̄рталыяныл ос тувыл э̄лаль ма̄к ла̄тыӈ йильпииг о̄с щё̄питэ̄гыт. Тувыл са̄пранит кӯщаит хоты тэ̄лат ва̄руӈкве а̄лымасыт, маныр э̄лаль щё̄питаӈкве э̄ри, ты о̄вылтыт потыртэ̄гыт ос пуссын та̄к ла̄тӈыл хӯлтавет. Щар о̄выл потранылт кӯщаит 2016 та̄л сыс округ бюджет олныт урыл ла̄тыӈ ва̄рсыт. Ань ты та̄л хо̄т э̄тпос сыс сака са̄в олн мори ат холтвес, ос сыресыр налогыт атнэ щирыл са̄в олн сэ̄лсыт. Тох ань 8, 9 млрд. солко̄ви па̄рсыг е̄мтыс. Наталья Комарова ла̄внэ̄тэ щирыл, ты олныт ма̄хум та̄рвит ва̄рмаляныл ёмщакв щё̄питан ма̄гыс мивет. Ты олныт государство па̄лыл щё̄пита̄лнэ мирн нё̄тнэ са̄всыр программат тэ̄лаг ва̄рнэ̄ныл ма̄гыс са̄в ма̄н ке̄тавет. Ос аквпа̄лэ олныт кӯщаит ма̄хум колыл ӯнттын манос ёвтын ма̄гсыл мыганыл тах. Тох ань 4, 6 млрд. солко̄ви колыт ӯнттын щирыл та̄стысыт, тыгыл хо̄тса̄т со̄тыра миллион солко̄ви ма̄ньлат ще̄мья ма̄гыс миве ос 200 миллион солко̄ви соссаӈ ма̄хум ма̄гыс миӈкве ла̄всыт. Ты коныпал ма̄хум та̄нки ӯйхулыт о̄щнэ, тэ̄пкананылт матыр ӯнттын ма̄гыс, бизнес тэ̄лат ос са̄всыр спортивный тэ̄лат э̄лаль тотнэ щирыл олныл о̄с мощ нё̄тавет. Тувыл округ янытыл машинал яласан лё̄ӈхыт щё̄питан ма̄гсыл акв миллиард солко̄ви Югра дорожный фондын мивет ос ты коныпал ӯсанувт ос па̄вланувт лё̄ӈх ва̄руӈкве 955 миллион 889 со̄тыра солко̄ви холтэ̄гыт. Тувыл «Сотрудничество» 2016 та̄л кастыл щё̄питам программа палт о̄с йильпи ла̄тыӈ хӯлтвес. Тот Югра ма̄вт са̄в ня̄врам янмалтан ще̄мьят олныл ойтнэ ос колыл минэ пе̄нтсыл то̄рум ма̄гыс ма̄л вос мивет. Ос ты ма̄наныл та̄нки палтаныл хансуӈкве ве̄рмияныл, нэ̄матыр олн ойтуӈкве ат э̄ри. Наталья Комарова ты о̄вылтыт ла̄выс: «2016 та̄лт ты программа рӯпитан щирыл 150 миллион солко̄ви та̄стым о̄лыс. Тамле ще̄мьят сертификатнэ̄пакыл майлуве̄сыт. Ань са̄в ня̄врам янмалтан ще̄мьят ос кит миллиард 282 миллион солко̄ви э̄лаль нё̄тве̄сыт. Тыгыл кит со̄тыра арыг ще̄мьят кол ӯнттын ма̄ ло̄мтыл миӈкве ро̄ве̄гыт тах. Мо̄лты та̄л 173 тамле ще̄мьят ма̄ ло̄мтыл майве̄сыт. Правительство па̄лыл щё̄питан программат ма̄н пуссын тэ̄лаг ва̄риянӯв». Мо̄т кӯщаит тамле э̄рнэ ва̄рмалит ёт о̄с ка̄саще̄гыт ос мӯсхалыг рӯпитэ̄гыт.

1131 2016. 09. 08. Светлана РОМБАНДЕЕВА

Наска̄ссыг порслым ма̄хум урыл потыр о̄лыс Ты э̄тпос 2 хо̄талэ̄т Ханты-Мансийск ӯс мирколт хо̄нтхатыглап о̄лыс. Округ кӯщай Наталья Комарова са̄всыр ма̄т пуӈк тотнэ ма̄хум акванатыгласанэ, э̄рнэ тэ̄лат урыл потыртасыт. Акв ма̄к потыр та урыл о̄лыс, ань 1930 та̄лыт порат насска̄ссыг порслым ма̄хум ка̄сталан хо̄тал ты ляпамас – ма̄нь таквс э̄тпос 30 хо̄талэ. Ты хо̄тал кастыл то̄нт савалам ма̄хум нё̄тмил олныл мивет, ка̄сыӈ хо̄тпа 1 со̄тыра 500 солко̄ви манос 3 со̄тыра са̄вит солко̄вил миве. Округув янытыл 3 со̄тыра 500 арыг хо̄тпа тамле нё̄тмилыл ва̄раве. Та пилыщмаӈ та̄лыт порат ма̄в янытыл ма̄хум порслын ма̄гыс хо̄т центр о̄лыс, та̄н халанылт – Ханты-Мансийск ӯс. Тыт 598 хо̄тпа насска̄ссыг порслуве̄с. Округ кӯщай тох ла̄выс: «Ты пилыщмаӈ нак ма̄н номим о̄ньщилӯв, тав хосат кос о̄лыс, ос ты ма̄н йис о̄лупсав. Ма̄н ань о̄лнэ ма̄вт са̄в ма̄хум порслувес, савалам хо̄тпат та пора номияныл, ма̄н о̄с таве нэ̄мхуньт ат ёрувлылӯв». Афганистан ма̄т хо̄нтлам ма̄хум «БАГРАМ» нампа общественный организациянылт пуӈк тотнэ хум Салават Ниязов та урыл потыртас, ань 1930 та̄лыт порат порслым мир ка̄сталан ма̄гыс Ханты-Мансийск ӯст кол вос ӯнттаве. 2015 та̄лт Госдумат наска̄ссыг порслым ма̄хум урыл э̄рнэ нэ̄пак щё̄питыма – та̄н ма̄гсыланыл колыт ос памятникыт вос ӯнттавет. Салават Ниязов ла̄вме щирыл, 2016 та̄лт ты э̄рнэ нэ̄пакт Россия Президентув хасхатас. Та̄н организаниянылт рӯпитан хо̄тпат ты урыл Ханты-Мансийск ӯс миркол кӯщай Максим Ряшин нупыл потыртасыт, тав нё̄туӈкве ла̄вум. Округ кӯщай нэ̄ ты хум ёт ка̄сащас, та̄наныл тав о̄с нё̄тыянэ.

1131 2016. 09. 08. Тамара МЕРОВА

А̄гмыӈмосыӈ хо̄тпат касуӈкве ат та̄ртавет РИЦ «Югра» колт ля̄ххал тотнэ ма̄хум акванатыглаве̄сыт ос та̄н РФ Совет па̄лыл кӯщаиг о̄лнэ хум Эдуард Исаков ос «Центр адаптивного спорта Югры» кол кӯщай хум Михаил Вторушин ёт акванхо̄нтхатыгласыт. Ля̄ххал тотнэ ма̄хум тэ̄натэ̄нтыл Паралимпиадан миннэ урыл ёмас ля̄ххал ӯрсыт. Паралимпиада сӯкыр э̄тпос са̄т хо̄талныл нёлоловхуйплов щисла мус Риоде-Жанейро ӯст Бразилия ма̄т о̄вылтахты. Таима̄гыс округт о̄лнэ а̄гмыӈмо̄сыӈ, сакватахтам хо̄тпат ё̄ранылва̄ганыл пиным ёмщакв щё̄питахтэ̄гыт ос тув минуӈкве сака таӈхе̄гыт. Эдуард Исаков то̄нт ла̄выс: «Ущтынув та̄рапатыс, российский а̄гмыӈмосыӈ, сакватахтам спортсменанув нэ̄мхотталь ат минэ̄гыт. Тамле ла̄тыӈ мирхал паралимпийский комитетыт рӯпитан хо̄н хо̄тпат ва̄рсыт. Та̄н антидопинговый тэ̄лат нупыл я̄ртхатэ̄гыт ос тув пе̄рхатым ма̄нав Паралимпиадан ат та̄ртыяныл. То̄внакт ма̄н спортсменанув а̄гманыл пусмалтан ма̄гыс сыресыр тэ̄рпит ае̄гыт, тувыл ке̄лпаныл уральтан порат алпиянылт арге̄ннув ат э̄рнэ утыт хо̄нтавет. Та̄н кастыланыл э̄лумхо̄лас ё̄рыг е̄мты ос каснэ порат мо̄т спортсменыт ювлехультуптыянэ ос такви но̄хпаты. Ты ва̄рмалит ма̄гыс сыманыл ща̄рге̄гыт ос ма̄н ма̄хманув тув ат та̄ртыяныл. Ма̄н ты тэ̄ла тох о̄с ат хультуптылӯв, ма̄нки ё̄рув хота мус то̄вылхаты, мирхал комитетыт палт ла̄тыӈ ке̄тэ̄в ос спортсменанув ма̄гыс воритотэ̄в». Хотты тэ̄рпит тэ̄ӈкве ат ро̄ве̄гыт, та̄н ул кос ва̄ганыл, ос мо̄лты хо̄н ма̄т комиссият рӯпитан хо̄тпат илттыг мо̄т антидопинг ут хо̄нтыгпасыт ос тув та пе̄рыгтаӈкве патсыт. Хотьют ул кос матыр тэ̄рпи пусмалтахтын ма̄гыс хосат та̄гыл аис, ос та утанэ алпитэ̄ныл моляхыл кон ат минэ̄гыт, ке̄лпе̄т хосан хультэ̄гыт. Тувыл таима̄гыс та̄н та лю̄камтавет. Округувт а̄гмыӈмосыӈ, сакватахтам спортсменанув ма̄гыс ёмас центрыт ӯнттуве̄сыт. Тыг касылын мо̄т ма̄ныл ма̄хум са̄в щёс ёхталасыт. Ма̄н та̄н ё̄ранылн агтэ̄в, та̄н та̄ксарыг о̄лнэ хо̄тпат Паралимпиадан миннувыт ке, са̄в касылыт но̄хпатнувыт.

1131 2016. 09. 08. Тамара МЕРОВА

Ма̄хум о̄лтуланыл ловиньтавет Ма̄н ань сельхозперепись ва̄рмалит иӈ та̄рапаттыянӯв ос на̄нан ля̄ххалыт хансэ̄в тах. Мо̄лал Октябрьский район Лӯи Ня̄рихумит па̄вылн ялмум порат Валентина Фёдоровна Тарханова ёт потыртасум. Тав па̄выл мирхал колт рӯпиты ос тот о̄лнэ ма̄хум о̄лтуланыл урыл китыглаӈкве ялыс. Маныр тав оснпаттыс, ма̄навн потыртас: – Ам Лӯи Ня̄рихумит па̄вылт 183 о̄лнэ колытын щалтсасум ос Алы Ня̄рихумит па̄вылн ялсум. Тот ма̄н мирколув палт 17 колыт хансым о̄лэ̄гыт. Ань па̄влыг янытыл китса̄т са̄вит ще̄мьят о̄щнэ о̄лтуланыл уральтасанум ос нэ̄пакн хассанум. Ма̄н палтув 272 соссаӈ э̄лумхо̄лас о̄лы, та̄н халанылт 211 ма̄ньщи хо̄тпа, 58 – хантыт ос хӯрум ё̄рныт. Лӯи Ня̄рихумит па̄вылт туп акв крестьянское (фермерское) хозяйство о̄лы, тот Кривых ще̄мья пуӈктоты. Та̄н пӯрщит, щищкуре̄кат о̄ньще̄гыт, мисыт ос ха̄рмисыт янмалтэ̄гыт. Ань мо̄рсыӈ хо̄тпа юн матыр ва̄руӈкве ка̄сащи. Па̄вылт ань хо̄тхуйплов ще̄мьят туп та̄нки ӯйхул янмалтэ̄гыт. Ам ань лов мис нэ̄пакн хассум, аквхуйплов ха̄рмис, хо̄т ма̄ньмис а̄гирищ, налыман пӯрщит. Хӯрум ще̄мьят ка̄тыл о̄щнэ со̄выр хурип ӯит (кроликыт) янмалтэ̄гыт. Соссаӈ ма̄хум халт ань щар нэ̄мхотьют мис, лув ат о̄ньщи. Китхӯрум ювле хультум та̄лыт хотьютаныл то̄рум ма̄гыс субсидияолн винэ нэ̄пак хасылта̄лум. То̄нт налыман со̄тыра солко̄вил майлуве̄сыт ос мис ёвтыгласыт. Тувыл ёмас пум ва̄рнэ ма̄ а̄тим, мо̄т ма̄ныл ёвтуӈкве олн о̄с э̄ри. Тэ̄лат ёл та по̄илттаве̄сыт. Па̄влыӈ ма̄хум та̄нки коланыл по̄хат картёпка ос мо̄т тэ̄нэ утыт мощ янмалтэ̄гыт. Тувыл ос школа та̄нки са̄вит тэ̄нэ ма̄гыс картёпка ӯнтталэ̄гыт, воссыг мо̄т яныг тэ̄пкан а̄тим.

1131 2016. 09. 08. Тамара МЕРОВА

Порсныл о̄с са̄в олн сэ̄луӈкве ро̄ви Мо̄лалнув ля̄ххал тотнэ ма̄хум ёт ма̄вит ӯргалан ос несырьевой сектор экономики нампа департаментыт о̄лнэ кӯщай Павел Ващенко ос общественный палата па̄лыл ма̄вит ӯргалан ва̄рмалит пуӈктотнэ хум Валерий Булатов акванхо̄нтхатыгласыт. Та̄н порсыт хотталь акв ма̄н тотнэ манос тыгытныл матыр мо̄т пормас ва̄рнэ урыл ма̄навн потыртасыт. Кӯщаиг 2014 та̄лт федеральный са̄кконын акв йильпииг щё̄питым ла̄тыӈ хӯлтсы̄г ос хумле щирыл э̄лаль рӯпитаӈкве патэ̄гыт, ма̄навн ла̄всыт. Та са̄ккон щирыл, ма̄хум сака са̄в порс ул вос ва̄ре̄гыт, мори хоттальа̄ти ул вос па̄хвтэ̄гыт, порс акванатнэ ма̄ вос о̄щсыт ос нэ̄пак, пластмасса манос кумыскаӈ утыт ла̄кква вос атыяныл ос я̄нас порс то̄тапн вос пинлыяныл. Ань ты тэ̄лат Югра янытыл хумус ва̄равет, таи та̄рапаттуве̄сыт. 2017 та̄л ва̄т са̄грапнал э̄тпос о̄выл хо̄талэ кастыл йильпи са̄ккон щё̄питаве. Тав щире̄тыл порсыт хотталь э̄лаль тотнэ ма̄гыс я̄нас рӯпитан компания вос о̄лнув ос тав пуссын ты тэ̄лат ма̄гыс пуӈк вос тотыс. Ка̄сыӈ ӯсыт ос па̄вылт акванатнэ порсыт та̄нки по̄хат о̄лнэ полигонын вос тотавет ос тувыл ла̄кква атым утытныл китынтыг мо̄т пормас ва̄рнуве. Ань ЖКХ компаният ма̄хумныл олн атэ̄гыт ос тувыл машинал яласан колыт ёт акваннё̄тхатым порсыт хотталь во̄рн тотыяныл, тув та со̄сантыяныл. Воссыг тот та̄н тэ̄ланыл а̄тим. Тувыл порс сайнэ̄тэ мус тот та хуи, хосаг е̄мтнэ мус та ма̄витэ хотсаки. Мо̄тынтыг та ма̄хум мо̄т порс ма̄ ва̄ре̄гыт. Тыи о̄с лю̄ль. Ма̄н ань таи ла̄ве̄в, то̄ва пормасыт иӈ э̄лаль о̄щнэ ма̄гыс щё̄питаӈкве ро̄всыт. Мо̄т хо̄н ма̄т тамле утыт я̄нас то̄тапн пинавет ос та̄н тувыл хотвивет ос матарыг ва̄рнэ ма̄гыс э̄лаль тотыгпавет. Ма̄н ань о̄с аквтох ке ва̄рнувув, щар ёмас о̄лнув. Ань порсыт ӯльнаг во̄рыӈ ма̄т ул вос оссувлаве̄сыт ос матыр мо̄т утыт щё̄питан ма̄гыс округ янытыл полигоныт ӯнттуӈкве э̄ре̄гыт. Таима̄гыс кӯщаит округ бюджетныл олн та̄стысыт ос полигоныт ӯнттын ма̄гыс ма̄ щё̄питасыт. 2020 та̄л мус тамле колыт Нефтеюганск, Нижневартовск, Нягань, Сургут ос Ханты-Мансийск ӯсыт по̄хат ӯнттавет. Пуссын ты ва̄рмалит тэ̄лаг е̄мтнэ̄ныл ма̄гыс миллиард солко̄ви холтаве тах. Сусте̄вт, тав ул кос са̄в олн холтаве. Тувыл насска̄сыг сайнэ ма̄н вущкасам порсытыл ма̄хум, насати, таса̄вит олн тыпылтэ̄гыт. Та̄н касыӈ порсыт я̄нас атэ̄гыт ке, ос таитныл матыр мо̄т пормас ва̄раве ке, то̄нт сака са̄в олн сэ̄луӈкве ро̄внув. Тащирыл кумыскаӈ утыт, пластмассал ва̄рим утыт, полиэтиленыл ва̄рим хӯргыт ос са̄всыр нэ̄пакыт – ма̄хум порс а̄нян вущкасанэ̄ныл э̄лыпа̄лт я̄нас то̄тапн пинлыяныл ке, тувыл тыитныл мо̄т пормасыт ва̄равет ке, то̄нт та̄л сыс 60 миллиард солко̄ви сэ̄луӈкве ро̄внув. Ань ӯсыӈ ма̄т порсыт я̄нас атнэ щирыл то̄тапыт ӯнттуве̄сыт кос, туп таи та̄рвитыг о̄лы, ма̄хум та̄нки порсаныл я̄насыг ла̄кква ат уртыяныл, пуссын акв хӯрыгсовын атыяныл. Мо̄рсыӈ хо̄тпа порсаныл ла̄ккващё̄питыяныл ос э̄рнэ урнан пиныяныл. Тувыл пуссын порсыт я̄нас атнэ компания о̄с а̄тим, ты ва̄рмалит нэ̄мхотьютныл э̄лаль китыглаӈкве. Югравт са̄кконын хӯлтым ла̄тӈыт ёт кӯщаит таима̄гыс ты рӯпитэ̄гыт, ма̄витув порсыл сака ул вос па̄ӈктувес ос таитныл матыр ёмас утыт вос ва̄рве̄сыт.

1131 2016. 09. 08. Тамара МЕРОВА

Соссаӈ ма̄хум о̄лупсаныл ӯргалап Округ правительство колт соссаӈ мир о̄лупсаныл ӯргалан ма̄гыс о̄выл совет нампа сапра̄ни ва̄рыглавес. Тамле совет соссаӈ ма̄хманув мо̄лты та̄гыл ва̄руӈкве тахсыт ос тахольт та̄н ла̄тӈаныл хӯнтамлаве̄сыт. Таве ва̄рнэ ма̄гыс пуссын э̄рнэ нэ̄пакыт щё̄питаве̄сыт ос тувыл са̄в па̄лыл ма̄хум тув пе̄рияве̄сыт. Совет ты та̄лт я̄ӈк на̄тнэ э̄тпост ва̄рвес, ос тынакт о̄выл сапра̄нитэ о̄лыс. Ты совет ханты, ма̄ньщи, ё̄рн ма̄хум пуссын о̄лыглам тэ̄ланыл тармыл уральтаӈкве патавет, матыр нё̄тмил ва̄руӈкве аквъёт кисхатэ̄гыт, пе̄с йис о̄лупсаныл ӯргалавет. Ань та̄н тэ̄ланыл ма̄гыс советын пе̄риян хо̄тпат пуӈктотуӈкве патэ̄гыт. Ка̄сыӈ ӯст ос районыт хоты акв соссаӈ хо̄тпа советын пе̄риявес, та̄н о̄выл сапра̄нит наманыл ла̄вве̄сыт. Са̄выӈпа̄лэ хо̄тпат «Югра лылые̄п» общественный организацият рӯпитэ̄гыт, таима̄гыс соссаӈ мирытн та̄н ва̄вет. Правительство колт акванатхатам кӯщаит та̄н ётаныл ищхӣпыӈ ут хосыт ва̄йхатасыт. О̄выл пащалахтын ла̄тыӈ округ кӯщай нэ̄ Наталья Комарова ла̄выс. Тав рӯпататэ щирыл Сургут ӯст о̄лыс ос ма̄хум ёт ищхӣпыӈ ут хосыт потыртас: «Соссаӈ ма̄хум совет рӯпататэ ущты о̄вылтытэ. Тув ань са̄всыр тэ̄лат ва̄нэ хо̄тпат пе̄риим о̄лэ̄гыт, тыи общественный рӯпата ва̄рнэ хо̄тпат, матумпа̄ла ос ма̄ньлат хо̄тпат, во̄рт о̄лнэ пе̄с о̄лупса ёмщакв ва̄нэ хо̄тпат. Ты э̄лыпа̄лт соссаӈ мир о̄лупсаныл ӯргалан щирыл хо̄т департаментыт пуӈктотсыт. Ань ос я̄нас совет щё̄питасӯв ос та̄н пуссын департаментыт ёт акваннё̄тхатым государственный программат ма̄кыг, мӯсхалыг вос ва̄рияныл». Та юипа̄лт советыт рӯпитан хо̄тпат та̄нки палтаныл кӯщай хо̄тпа пе̄риясыт. Ты хо̄тпаг та̄н Александр Новьюхов наме ла̄всаныл ос правительство па̄лыл мо̄лал А. В. Шипилов паттувес. Тувыл ханты, ма̄ньщи, ё̄рн ма̄хум палт маныр нё̄тмил ва̄рсыт, хумус тэ̄ланыл о̄лсыт ма̄вит ӯргалан департамент па̄лыл А. Ю. Комиссаров, соссаӈ ня̄врамыт ханищтан тэ̄лат палт пуӈктотнэ нэ̄ И. Б. Лесютина, культура тэ̄лат палт Н. М. Казначеева потыртасыт. Та̄нки па̄лныл щё̄питалум социальноэкономический программаныл ёт акваг рӯпитэ̄гыт, матыра̄ти нё̄тмил ва̄рыглэ̄гыт. Ты э̄лыпа̄л хо̄талыт Правительство па̄лыл соссаӈ ма̄хум колыт ӯнттын манос ёвтын ма̄гыс 200 миллион солко̄ви та̄стувес.

1131 2016. 09. 08. Светлана РОМБАНДЕЕВА

Лӯима̄т о̄лнэ ня̄врамыт потрыт вос хансэ̄гыт Я̄тил юрттенув! Лӯима̄т ос Дальний Востокыт о̄лнэ соссаӈ мирыт Ассоциация, ты мирыт музеяныл ос «Русское географическое общество» Лӯима̄т, Сибирьт ос Дальний Востокыт о̄лнэ ня̄врамыт ма̄гыс Литературный конкурс ва̄ре̄гыт. Ты тэ̄ла та̄н таима̄гыс ва̄руӈкве таӈхияныл, ань соссаӈ ня̄врамыт хаснэ потраныл хосыт са̄в тэ̄ла та̄рапаттуӈкве ро̄ви – Россия янытыл о̄лнэ соссаӈ мир хумус о̄лэ̄гыт, о̄лупсаныл, культураныл манхурипат, ня̄врамыт ща̄нь ла̄тӈыл потыртэ̄гыт ман а̄ти. Ты конкурс 2016 та̄лт сӯкыр э̄тпос 1 хо̄талэ̄ныл ос ва̄т са̄грапнал э̄тпос 31 хо̄талэ мус ва̄раве. 8-17 та̄л яныт ня̄врамыт ЭПОС РОССИИ (героикоисторическое литературное произведение собственного сочинения) нампа конкурсын хансум потраныл вос ке̄тыяныл. Ня̄врам акв манос китаххӯрум потыр тув ке̄туӈкве ве̄рми. Потре ва̄ти ман хоса, тав тэ̄латэ. Шрифт: Times Roman, 12. Потре ёт ка̄тыл по̄слум хурит ке̄туӈкве ве̄рми, формат А4 яныт нэ̄пакыт вос по̄слытэ. Такви по̄слуӈкве ат те ха̄сы, потре ма̄гыс мо̄т ня̄врам хури по̄слуӈкве ве̄рми. Тэ̄н наманэ̄н сас хансуӈкве э̄ри. Ос ка̄тыл по̄слуӈкве ат те ха̄сэ̄гыт, нэ̄матыр ул вос по̄слэ̄гыт, ма̄н тыт тах ма̄нти хотты хури тув ва̄ре̄в. Конкурс оигпанэ юипа̄лт, яныгполь э̄тпост ма̄н тах ма̄к ёмас потрыт нэ̄пакын хансыянӯв. Ка̄сыӈ потыр о̄влэ̄т рущ ла̄тӈыл, тувыл ща̄нь ла̄тӈыл хансылув. Я̄тил ня̄врамыт! Потранын ищхӣпыӈ ут хосыт ты электронный адресын ке̄тэ̄н: svet. cascheikina@yandex. ru. Акв потрын ща̄нь ла̄тӈыл, мо̄т ос – аквты потыр рущ ла̄тӈыл толмащлым вос о̄лы, Word (doc манос docx) щирыл ке̄тэлы̄н. Но̄хпатум ня̄врамытын ма̄н тах свонитэ̄в, хуритэ во̄вилӯв, такви уре̄т тах ма̄нь потырохса вос хасумты. Я̄тил юрттенув! Ты сака ёмас, э̄рнэ рӯпата. Ня̄врамытын, та̄н ща̄ньа̄щанылн ос ханищтан хо̄тпанылн тав сака яныг па̄рыс тоты. Матыр китыглахтан ла̄тыӈ о̄ньщегы̄н те, Светлана Николаевна Кашейкина электронный адресэн хансэ̄н: svet. cascheikina@yandex. ru. Ма̄н, ты конкурс ва̄рнэ ма̄хум, на̄н потранын ӯриянӯв. Хансэ̄н, касэ̄н! Ты ля̄ххал ма̄ньщи ла̄тӈыг С. Ромбандееван толмащлавес.

1131 2016. 09. 08. Светлана РОМБАНДЕЕВА

Ат са̄мпа по̄сыг но̄хва̄рвесы̄г Ка̄сыӈ та̄л сӯкыр э̄тпос о̄выл хо̄таланэ̄т Ханты-Мансийск ӯст ма̄во̄й ос газ но̄хвинэ ма̄т рӯпитан ма̄хум янытлавет. Ты та̄л атыт щислат мир «Музей геологии, нефти ос газа» кол а̄ви сӯнтэ̄т атхатыгласыт. Са̄в хо̄тпа тув ёхталас – ма̄во̄й но̄хвинэ ма̄хум, округ кӯщай нэ̄ Наталья Комарова, тувыл са̄всыр ма̄т рӯпитан кӯщаит, ӯс мир, мӯй ма̄хум, студентыт. Ты та̄л ат са̄мпа по̄сыг кит о̄йкаг ма̄гыс щё̄питавесы̄г, по̄санэ̄н музей колнор онтсыл но̄хва̄рвесы̄г – ты геологыг рӯпитам хо̄тпа Владимир Уриелевич Литваков ос буровой мастер, Герой Социалистического труда – Григорий Кузьмич Петров. О̄выл ла̄тыӈ Россия янытыл Министр энергетики кӯщай ва̄ӈын хум Кирилл Молодцов тав ла̄выс: «Ма̄во̄й но̄хвинэ ма̄хум сака яныг рӯпата ва̄ре̄гыт, таима̄гыс ма̄н та̄наныл янытлыянӯв. 50 та̄л сыс, о̄влэ̄т СССР, ань ос Россиявт са̄в ёмас номт тэ̄лаг е̄мтыс. Та порат о̄вылтым ва̄рмалит ма̄н ань э̄лаль тотыянӯв». Тувыл округ кӯщай нэ̄ Наталья Комарова потыртас: «Ка̄сыӈ ат са̄мпа по̄с сака са̄в та̄рвитыӈ рӯпата о̄ньщи. Тамле по̄с са̄в со̄тыра хо̄тпан миӈкве э̄ри. Ма̄во̄й но̄хвинэ ма̄т та̄ксар ма̄хум рӯпитэ̄гыт, ма̄н ма̄вт та̄н ань пуссын сов хольт постэ̄гыт. Тамле хо̄тпат халт ма̄н лё̄ӈхув со̄ви ат мины, э̄лаль ёмас номтыл о̄лэ̄в. Ань Югра ма̄ – ты ма̄н колув, тыт о̄луӈкве ма̄навн ёмас». Тамле ат са̄мпа по̄с о̄влэ̄т Григорий Кузьмич Петровын майвес. О̄йка Шаим ос Самотлор нампа ма̄во̄й но̄хвинэ ма̄т буровой мастерыг рӯпитас. 1973 та̄л сыс тав бригадатэ 92 со̄тыра метра са̄вит ма̄ хилыс, таима̄гыс тав Герой Социалистического труда намыл майвес. Григорий Кузьмич тох ла̄выс: «Ты туп ам по̄сум хунь – ты ма̄н аквъёт рӯпитам хо̄тпанум ёт по̄сув. То̄нт ка̄сыӈ хо̄тпа сака са̄в рӯпитас. Лӯима̄н ма̄хум са̄в ма̄ныл йисыт, ащирмаӈте̄пыл тыт рӯпитасыт, нэ̄мат та̄рвитыл ат пилсыт. Ань Лӯима̄т мӯсхал щирыл о̄лнэ ма̄гыс та̄н са̄в ё̄р пинсыт». Китыт хо̄тпа ос Владимир Уриелевич Литваков – отличник нефтяной промышленности, Октябрьской Революции ос Трудового Красного знамени нампа ма̄гылн тагатан по̄сыгл майлувес. О̄йка а̄тимыг е̄мтум, тув Елена а̄гитэ ёхталас, по̄с таве̄н майвес. Елена Литвакова ла̄выс: «А̄тям о̄лнув те, тав ань хотща̄гтнув. Ма̄н таве ёмас ла̄тӈыл ка̄стылӯв. Тав рӯпататэ сака э̄руптастэ, янытластэ». Китхуйплов та̄л сыс та музей колноранэ онтсыл 39 тамле ат са̄мпа по̄сыт но̄хва̄рве̄сыт.

1131 2016. 09. 08. Светлана РОМБАНДЕЕВА

Ӯй йӣквнэ ва̄рмаль урыл потыр о̄лыс Во̄ртур э̄тпос 26-28 хо̄таланэ̄т Нижневартовский район Мегион ӯст Ўй йӣквнэ тэ̄ла ва̄нэ соссаӈ ма̄хум акванхо̄нтхатыгласыт, ты урыл е̄ӈта пасан ва̄тат потыртасыт. Ты хо̄нтхатыглап тох намаявес: «Хатлые» (Хо̄тал) Региональный музейный фестиваль. Тав акв охсатэ «Региональный историкокультурный и экологический центр» колт о̄лыс, мо̄т охсатэ ос «Югра» нампа Музейноэтнографический и экологический паркыт ва̄рыглавес. Са̄в мир тув ёхталас – Мегион ӯс ляпат о̄лнэ соссаӈ ма̄хум, округ Дума ос ӯс Дума депутатыт, учёныит, нэ̄пак хаснэ хо̄тпат. Акванатхатыглам ма̄хум округт о̄лнэ соссаӈ мир культураныл о̄вылтыт потыртасыт. Щар ма̄к потыр Ӯй йӣквнэ ва̄рмаль урыл о̄лыс. Ты центр экскурсия тэ̄ланэ палт кӯщаиг о̄лнэ нэ̄ Анна Алексеевна Горлова ла̄вме щирыл, Ӯй йӣквнэ тэ̄ла ва̄нэ ханты хум Тимофей Алексеевич Молданов ос Мегион ӯс кӯщай хум Олег Александрович Дейнека халэ̄нт потыртахтасы̄г, э̄рнэ нэ̄пакыт хассыг. Ты кӯщай хум ань соссаӈ мирн нё̄ты, са̄всыр хо̄нтхатыглапыт та̄н ӯсанылт ва̄руӈкве патавет. Мощ ётылнуве ты фестиваль тах мирхал намыл пинаве. Ты юипа̄лт О. А. Дейнека атхатам мир ёт пащалахтас ос тох ты ла̄выс: «Ты центрыт ёмас ма̄хум рӯпитэ̄гыт, таима̄гыс ма̄н ань тыт ты ӯнлахо̄лэ̄в, потраме̄в. Ам номсыте̄мт, пе̄с о̄лупса но̄хво̄рмалтаӈкве э̄ри. На̄н, соссаӈ ма̄хум, матъёмас ты рӯпата ва̄регы̄н, пе̄с ва̄рмалит кинсэгы̄н, ханищтыяны̄н. На̄н ма̄н сака ёмас ма̄кве, ам тыт 1975 та̄л па̄сныл о̄лэ̄гум, номтум сака ёмас. Акваг номсэ̄гум – матъёмас ам тыг о̄лмыгтасум. Ань ты хо̄нтхатыглапув юипа̄лт ма̄н аквъёт э̄лаль рӯпитаӈкве патэ̄в, са̄в э̄рнэ тэ̄ла ва̄ре̄в. На̄нанн пӯмащипа ла̄тыӈ ла̄ве̄гум». Э̄лаль Дума депутат Еремей Данилович Айпин потыртас: «Ам тыт, Мегион ӯс по̄хат, яныгмасум, тыт хӯл алыщласум, во̄раясум. Ань пе̄с йис о̄лупсав урыл тыт ты потыртэ̄в. Ма̄навн нё̄тнэ номтыӈ хо̄тпатын, ёмас кӯщаитын ам пӯмащипа ла̄тыӈ ла̄ве̄гум. Та̄н о̄с ма̄н хольтув о̄лупсав ма̄гыс сымыныл ща̄рге̄гыт, ва̄тихал нё̄тумта̄лаве̄в». Тувыл ты ва̄рмаль но̄хво̄рмалтаӈкве номылматам хум Тимофей Алексеевич Молданов тав ла̄тыӈ вис: «Ты та̄л я̄ӈк на̄тнэ э̄тпост Ханты-Мансийск ӯст о̄лнэ Асугорский институт кӯщай нэ̄ Виктория Ивановна Сподина а̄нумн ты це̄нтр урыл потыртас. Тав ла̄вме щирыл, ма̄н ханты, ма̄ньщи ос ё̄рн ма̄хум тыт акванхо̄нтхатыглаӈкве ве̄рме̄в, халанувт э̄рнэ тэ̄ланув урыл потыртаӈкве. Со̄ль, ты сака ёмас ма̄, тыг ма̄хум кос хоты ма̄ныл ёхтуӈкве ве̄рме̄гыт. Ам тыг ёхталасум, ӯс кущай О. А. Дейнека ёт хо̄нтыглахтасум, ме̄н э̄рнэ нэ̄пакыт хассуме̄н. Ма̄н ань тынакт янгыщ Ӯй йӣквнэ тэ̄ла урыл потыртаӈкве патэ̄в. Ты ма̄т о̄лнэ ханты ма̄хманув пуссын ща̄нь ла̄тӈыл потыртэ̄гыт, ос Касум ма̄т ла̄тӈув сака ат суйты. Ӯй йӣквнэ ва̄рмаль о̄вылтыт ща̄нь ла̄тӈыл потыртаӈкве э̄ри. Ты йист ма̄н йильпи щирыл о̄лмыгтасув, ос ла̄тӈув хотталь со̄ймуӈкве патыс. Ань морсыӈ ня̄врам ща̄нь ла̄тӈыл потырты. Ма̄навн таи ва̄ӈкве э̄ри – йильпи о̄лупса тав ма̄кыг хунь о̄лы. Ос таи ма̄кыг о̄лы – ма̄н хунь ща̄нь ла̄тӈув ва̄глув, мо̄йтанув, э̄рганув ва̄ганув. То̄нт ма̄н со̄ль щёлыӈ хо̄тпаг та о̄лэ̄в. Акв учёный нэ̄ ла̄внэ̄тэ, ань Ӯй йӣквнэ порат туп акв касай урыл хӯрумса̄т щирыл ла̄вуӈкве ро̄ви. Сунсэ̄н, ща̄нь ла̄тӈув тамле та, тав яныг ё̄р о̄ньщи. Ань яныгман ня̄врамыт таве ва̄нуваныл те, та̄ксар хо̄тпаг о̄лнувыт». Тимофей Алексеевич хоса потыртас, таве хӯнтлуӈкве сака пӯмыщ о̄лыс. Мо̄т ма̄хум о̄с ла̄тыӈ ла̄всыт – Дума депутатыг о̄лнэ ма̄ньщи нэ̄ Татьяна Степановна Гоголева, мо̄йт ва̄нэ ханты хум – Владимир Егорович Енов ос соссаӈ ма̄хум. Э̄типа̄лаг «Югра» нампа во̄рыӈ ма̄н минасув, тот Ӯй йӣквнэ тӯлыглапыт суссылтаве̄сыт, ма̄хум а̄ращ ва̄тат ӯнлахо̄лсыт, исум ща̄й айсыт, потрамасыт. Ты хо̄нтхатыглап оигпаме юипа̄лт, фестиваль палт пуӈк тотнэ ма̄хум манхурип нэ̄пак щё̄питасыт, ам тах ты урыл мо̄тыт газетат хансэ̄гум.

1131 2016. 09. 08. Светлана РОМБАНДЕЕВА

Рущ кол суссылтап Нижневартовский район Мегион ӯст Центр народных художественных промыслов и ремёсел колт рущ ма̄хум колнак ва̄рим о̄лы. Ань рущ мир пе̄с порат хумус о̄лсыт, маныр о̄щсыт – о̄лтуланылпормасаныл тот суссылтавет. Та колнак тармыл кӯщаиг рӯпитан нэ̄ Флюра Салихьяновна Ахметчина тох потыртас: «Ты колнак ма̄н таима̄гсыл ва̄рыслӯв, ань яныгман ня̄врамыт пе̄с о̄лупса вос ва̄ганыл, рущ ма̄хум э̄лнаӈ хумус о̄лсыт, вос сунсэ̄гыт, вос пӯмщалахтэ̄гыт. Ты рущ кӯр 2012 та̄лт йильпииг ва̄рыслӯв. Кол нор онтсыл тагатым покрывала акв яныг э̄ква ат та̄л ва̄рыстэ (рущ щирыл – вышивайтастэ), 1990 та̄л порат ма̄навн мӯйлуптастэ. Тыг акванатым пе̄с пормасыт ӯсувт о̄лнэ яныгхо̄тпат янгыщ та̄н музейн тотсыт. Мӯй ма̄хум матыр о̄с мӯйлупта̄лэ̄гыт. То̄ват ос ма̄нти хотталь экспедициян ялантанэ̄в порат тотыглэ̄в». Яты, ань тот по̄слум хурит сунсыглэ̄н.

1131 2016. 09. 08. Тамара МЕРОВА

О̄лупсав пӯмщалаӈкве ёхталасы̄г Та хультум э̄тпост ма̄н редакция колувн кит мӯй хо̄тпаг щалтсасы̄г. Тыи ща̄нь ос пыг, наманэ̄н Гизелла Сегеди ос Мишель Сегеди. Тэ̄н венгрыг ос тыг ань США ма̄ныл ёхталасыг. Тот Нью-Джерси штат Хилсборо ӯст о̄лэ̄г. Гиззела Венгрият Мишкольц ӯст самын патыс, тот яныгмас ос Дебреценский университет лингвистика тэ̄лат ханищтас. Хум ва̄рыс ос тувыл хумитэ̄нтыл Американ о̄луӈкве минасы̄г. Гизелла Джорджтаунский университет о̄с а̄стлас. Та хо̄н ма̄т нэ̄гхумыг Мишель пыге̄н самын патыс. Тэ̄н тэ̄нки ня̄врамаге̄н ща̄нь ла̄тӈыл потыртаӈкве ханищтасаге̄н ос рӯт не̄лм ла̄тыӈ ма̄хмыт урыл о̄с потыртасы̄г. Щар ляпа рӯтыг ма̄ньщи, хантыт о̄лэ̄гыт. Мишель мощ яныгнуве̄г е̄мтме порат ма̄н ма̄вт о̄лнэ соссаӈ ма̄хум ёт акванхо̄нтхатыгла̄луӈкве сака таӈхыс. Ань ты номтэ тэ̄лаг е̄мтыс. Тав оматэ̄н Югра ма̄н тотвес ос хо̄т ма̄ньщит, хантыт ёт ва̄йхатуӈкве ро̄ви, тув ёхталасы̄г. Тэ̄н ма̄нав ка̄сала̄лсанэ̄н ос ма̄н ща̄нь ла̄тӈув хӯнтамластэ̄н. Гизелла мощ рущ ла̄тӈыл торгамтаӈкве ве̄рми, пыге тай а̄ти. Ма̄н рущ потранув венгр ла̄тӈыг Софья Онинан толмащлаве̄сыт. Ма̄н ма̄нки рӯпатав о̄вылтыт потыртасӯв, са̄всыр хурит суссылтасӯв, пе̄с йис о̄лупсав номылматыгласлӯв. Ма̄ньлат пыг ма̄ньщи ла̄тыӈ суянэ хӯнтамлаӈкве сака таӈхыс ос газетавт хансым потрыт ловиньтаӈкве патсанэ. Таве̄н сака пӯмыщ о̄лыс. Мишель мо̄лал школа а̄стлас ос инженерхо̄тпаг э̄лаль ханищтахты. Тыи щар мо̄т рӯпата кос, ос ма̄н о̄лупсав, ла̄тӈув сака пӯмщалытэ. Ань тав агты ос ты мус о̄щалтахтыглы, ма̄н тыпа̄лт э̄лы ма̄т о̄лантэ̄в ос ма̄н, со̄ль, не̄лм рӯтыг о̄лэ̄в. Тэ̄н ань ма̄ньщи ос ханты ма̄хумн яныг паща ла̄тыӈ ке̄тэ̄г.

1131 2016. 09. 08. Тамара МЕРОВА

Рӯт миранув халанылт ва̄йхатэ̄гыт Ты хури Бадачоньтомай ӯст Венгрият по̄слувес. Мо̄лты таквсы тот финноугор ла̄тӈытыл потрыт, стихыт хаснэ ма̄хум XIII конгрессаныл о̄лыс. Ты ма̄хум акванхо̄нтхатыгласыт ос та̄нки халанылт ва̄йхатасыт. Хурит саран мӯй ма̄хум венгр нэ̄ ёт по̄слуве̄сыт. Во̄ртыпал нупыл э̄кваго̄йкаг Лариса ос Алексей Поповыг лю̄ле̄г. О̄йка Коми ма̄т мирн ва̄нэ драматургыг о̄лы, тав хансум потранэ хосыт акваг спектаклит щё̄пита̄лавет. Тэ̄н по̄хатэ̄нт Михаил Хорошев ос Дуекисс Вираг венгерка нэ̄ лю̄ляхо̄лэ̄г. Поэт Хорошев такви самын патум ма̄тэ о̄вылтыт стихотовреният хансы. Дуекисс Вираг финноугор рӯт писателит тэ̄ланыл ма̄гыс пуӈктотыс. О̄йкатэ̄нтыл тэ̄н ат ня̄врам о̄ньще̄г, ще̄мьятэ̄н ёт ва̄йхатуӈкве ма̄навн сака сымыӈыщ о̄лыс. Тувыл Наталья Горикова лю̄ли. Тав саран писателит палт драматургия тэ̄лат ханищтасанэ, диссертация нэ̄пак хансыс ос филология наукат кандидат нам вуянтас.

1131 2016. 09. 08. Тамара МЕРОВА

Ка̄сыӈ юртэ̄тыл щёлыӈ Со̄выркве ос Во̄нтыракве халэ̄нт сака юртыӈыщ о̄лсы̄г. Со̄выркве Во̄нтыре палт ха̄йтталы, Во̄нтыр Со̄врукве палт ха̄йтталы. Аквщёс Во̄нтыракве Со̄вре палт ёхтыгпас ос таве пувлуӈкве во̄витэ. Со̄врукве уйигтаӈкве ат ха̄сы, таима̄гыс таве̄н ла̄вуӈкве э̄ссамты ос ла̄выс: – Ам тыхо̄тал пувлысум, хӯрум щёс я̄ ӯлтта уйигласлум, щар мил ма̄н мӯрмыгласум. – Тащир те миныме̄н сэ̄иӈ сыпныл тахсуӈкве. – Тув ам омамн ат та̄ртавем. Тот ха̄йтнутыт о̄лэ̄гыт. – Ялыме̄н, ёлпатум йӣв тармыл повара̄лыме̄н, исылтахтыме̄н, тав мо̄йтанэ хӯнтлыме̄н. Тот татем сытам. Охсар манос Тӯлмах ме̄н палтме̄н те лаквхатэ̄г, ме̄н йӣвныл витн ёлпорыгмиме̄н, тувыл та. – Наӈын тай ёмас, наӈ витн мӯрме̄гын, ам ос хумус? Ам уйигтаӈкве ат ха̄сэ̄гум. – Хумус ат ха̄сэ̄гын, ущ ты э̄ссыгхатасын, я̄ ӯлтта хӯрум щёс уйислын! – Ам нас тох ла̄всум, – Со̄выркве ла̄выс. – Ята, миныме̄н ёлпатум йӣв мус, – Во̄нтыраквен кащилтаве. – Тот маныр ва̄руӈкве тах номсахтыме̄н. Ёлпатум йӣв ляпан ёхтысы̄г. Со̄выркве сунсы, йӣв я̄ ӯлтта патум ос овын нёвсалтаве. Вит йӣв тольхе ӯлтта овты, тав пе̄с тованэ̄н тэ̄лыглы, кантыӈыщ ща̄вги: – Тыт лё̄х ӯлтта хуи: нэ̄мхотмус минуӈкве, нэ̄мхотмус ё̄муӈкве. Со̄выркве Во̄нтыре̄нтыл туп та йӣвн ё̄масасы̄г, таве̄ныл ма̄нь саксам хурип витсамыт ёлпассамасыт. Со̄выркве хотрохтыс, щар акванщуӈкыртахтас ос ка̄танэла̄гланэ тувка̄ртсыт. – Яа, маныр? Минэн, ул пилэн. Ты ам ягпыганум ос яга̄гиянум ты йӣвт ӯщлахтасыт, хо̄тал ляльт исылтахтасыт, тэ̄лы кастыл ре̄г атсыт. Ка̄саласаныл, ме̄н о̄с исылтахтуӈкве таӈхиме̄н, витын та минасыт. Во̄нтыракве йӣв тармыл хуяс, тав сове ос пе̄с йӣв щар акв оспаг е̄мтсы̄г. – Наӈ, Со̄выркве, тув хуен, тот ля̄мйив тованэ йӣв нумпа̄лн ёлта̄ртахтасыт. Наӈ тот о̄с ат на̄ӈкегын. Туп тэ̄н ёлро̄влахтасы̄г, я̄ ме̄сыгныл хӯл алыщлан хум нэ̄глыс. Тованты такви ма̄ньха̄пе̄тыл ос ты мус э̄ргащлы: Ам амти ха̄пте̄мтыл амти я̄тем хосыт Хоталь таӈхе̄гум, тув та товантэ̄гум. Хӯл алыщлэ̄гум, нё̄выль ка̄тынпаттэ̄гум Ос пил ва̄тэ̄гум – ня̄враманум тыттыянум. Во̄нтыракве ла̄ви: – Наӈ ул пилэн. Во̄нтырыт пуссын тыт ӯщлахтэ̄гыт, та̄н тыт алыщлан хо̄тпатн ат ка̄сала̄лавет, та̄ра та тове̄гыт. – Ам тай ат пилэ̄гум, – э̄ссыгхатым Со̄выркве потырты. Хӯл алыщлан хум йӣв толих торыг тови. Тав ха̄пе пе̄с, тув то̄сум товытын нильталаве. Хӯл алыщлан хум ёлпатум йӣв салитытэ: – Куняр, тыг та патмын. Тыт та хуе̄гын, нэ̄мхотьютын онтас ат ва̄ре̄гын, туп торастахтэ̄гын. Ёлпатум йӣв кантмаявес, нёвумтас, хӯл алыщлан хум ха̄пе карсатаптыстэ, а̄ла ты таве е̄ри ё̄хтастэ, ты мус ла̄щлакв ла̄выс: – Ам вит тармыл хуе̄гум, вит ос ма̄ тармыл овты. Ма̄ тармыл нэ̄матыр сэ̄йсам, порссам арыг а̄ти. Матыра̄ти пуссын э̄рнэ ма̄т о̄лы ос па̄рыс тоты. Ам ань Ва̄тила̄глупат амти палтум ат те нёвитасанум, хо̄т та̄н хо̄тал ляльт исылтахтынувыт? Хумус та̄н ма̄хмытыл ос са̄всыр ӯйитыл та̄нти ла̄гланылтыл оймалтахтынувыт? Хӯл алыщлан хум номсахтуӈкве патыс ос восгим ла̄выс: – Со̄ль яныг ма̄хманув ла̄ве̄гыт, хо̄т пыл лё̄ӈханув ат минасыт, ма̄ хосыт манос вит хосыт, – акваг э̄лумхо̄лас ханищтэ̄гыт. Хӯл алыщлан хум та̄ра минас, Во̄нтыракве ла̄глаге̄н но̄хлю̄люмтас ос ща̄гтым э̄ргалтахтас: Хӯл алыщлан хум самаге ощщаг, Ам самагум пуврыг, сома саксамыг. Ос ам таве ка̄салылум, тав а̄нум – а̄ти. Ам таве ка̄салылум, тав а̄нум – а̄ти. Со̄выркве тувротмыс, хуйнэ йӣв нупыл сунсы ос титыглахты: – Маныр, матум ут, акваг то̄рге̄гын ос хосыгхатэ̄гын? – А, ам ос хуньт ма̄ньлат ос нё̄тнэ о̄лсум, карыс я̄ ва̄тат лю̄льсум, пуссын ка̄салаве̄сум. Хо̄талакве ам тованумт ӯщлахтас, ӯйрищаквет а̄нумн луйгысыт, я̄ мо̄йтыт мо̄йтыс. Аквщёс Виткащ – кантыӈ Вит Кӯщай ам ва̄там хотпурыстэ, ос ам витын та патсум. Хоса ам я̄ хосыт уйсум. Хотыл во̄т та̄кыщ хо̄яс, капыртаӈкве патыс, вит хупмыг ква̄лтапаптыстэ, щар аквтуп я̄ӈк во̄р са̄лыт ха̄йтэ̄гыт. Та хумпытын ва̄тан нуясаптуве̄сум, та̄ранум сэ̄йл лохщуве̄сыт. Та па̄сыл ам та нёвитахтэ̄гумнёвитахтэ̄гум – нёвитахтын ма̄ныл ат по̄йтсэ̄гум. Воратэ̄гумворатэ̄гум – хот ат сэ̄тэ̄гум. Уе̄гумуе̄гум – э̄л ат уймыгтэ̄гум. Ёлпатум йӣв мо̄йтым ӯйиг ёлоилтасаге, та̄н мо̄йтыт хӯнтлым аты ва̄саныл, хумус нирыт са̄йныл тэ̄та̄л о̄лнэ Охсар нэ̄глыс, тав пунанэ акванханамыт. Нёлэ̄тыл атыньтахты, ос ӯйиг ка̄салаӈкве ат ве̄рми. Во̄нтыракве таве ка̄саластэ, ла̄щлаквег Со̄врын ла̄ви: – Тот та йӣв ляпан а̄ӈквал ропвес, тув порыгмен. Такви йӣвныл ёлпорыгмас ос витн та мӯрмыс. Со̄выркве а̄ӈквал тармыл порыгмас, Во̄нтыракве ка̄таге витныл но̄хнэ̄глапаптысаге ос а̄ӈквал туим мо̄тпал ва̄тан та тотытэ. Охсар кантмим лылые̄п хасумтас, ос хорталтахтас: – Ававав, маныр са̄ль, нэ̄нан та̄ра ат ка̄саласагум! Охсар минас, Во̄нтыракве ос такви ва̄татэ нупыл а̄ӈквал ё̄ӈхыгпастэ. Со̄выркве ва̄тан порыгмас ос юв та тахас. Юв молях лылтым ёхтыгпас ос оматэ̄н потыртас: – Ома, наӈ ва̄глын, ам Охсарн а̄ла ты юв та̄йве̄сум. Ам Во̄нтыраквен лылым нэ̄гылттавес. – Сака ёмас руман. Пӯмащипа таве̄н. – Маныр пӯмащипа? Маныр ма̄гсыл таве̄н пӯмащипа? Ам таве о̄с то̄нт Сымриныл вуянтаслум, – Со̄выркве э̄ссыгхаты. – Ам таве маныр ма̄гсыл вуянтаслум? Ос ща̄нь пыге̄н ла̄выс: – Пыгкве, хунь ёмас ва̄рмаль ва̄ре̄гын – ул са̄литэн, ос лю̄ль ва̄рмалил ул э̄ссыгхатэн. Анна Конькова хансум мо̄йтэ ма̄ньщи ла̄тӈыг Т. Мерован толмащлавес.

1131 2016. 09. 08. Тамара МЕРОВА

Э̄лнаӈ маныр о̄лыс Тӯяг ма̄н редакциявн Саранпа̄вылныл пищма ёхтыс. Таве Тамара Ванюта ке̄тыстэ. Тамара Савельевна ла̄выс, мо̄лал юн пе̄с нэ̄пакыт сунсыгланэ̄тэ порат акв нэ̄пакло̄мт хо̄нтыс. Тот хаснэйӣвыл акв стихотворение ма̄ньщи ла̄тӈыл хансым о̄лыс. Ты потыр хуньт а̄ще̄н Савелий Иванович Вьюткинын хансыма. Ань пе̄с ма̄хманув э̄лнаӈ хумус о̄лсыт, о̄йка мо̄йтыӈ ул номылматыглас. Тувыл о̄лме̄т тав са̄всыр общественный тэ̄лат ва̄рыглас. Стихе на̄н ань э̄лаль ловиньтэлы̄н. Сэ̄ри постыс, хо̄тал нэ̄глыс Э̄лаль лё̄ӈхув пӯсхатас. Ёмас ма̄хум, хаснэ ма̄хум, Хумыс о̄лсын пе̄с порат. Хумус э̄ргум э̄ргын Е̄мтыс суиӈыг. Па̄сыгке̄нын хультсыт Ӯльнаг ва̄спыг хольт. Таквсы ӯйрищ хурил Холас мовиньтын. Тивыр суп ре̄гыл То̄сыс самвитын. Ёмас пора ӯрим Воратасын на̄н, Э̄твит холкве щирыл Хультсыт хо̄талан. Хумус ла̄всын на̄н та Э̄лнаӈ пе̄с порат. Ёмас хо̄тал ёхты, Со̄рниӈ посэ ёт. Восыхнути посэ Ёмщакв постылӯв, На̄н ла̄вум ла̄тӈын Сымувт о̄ньщилӯв. Ла̄щлакв нёвитылӯв Витэ овтнэ хольт. Э̄лаль потыртылӯв, Э̄ргыл э̄ргилӯв. Ащирмаӈ ма̄ е̄рт Ма̄н о̄лнэ ма̄вт, Хо̄тал нэ̄глыс Ма̄н ма̄гсылув. Ма̄нь ма̄хум, Ёмащакв о̄лэ̄н, На̄н лё̄ӈхте̄н Э̄лаль посыӈ. Пищма газетан Т. Мерован хасвес.

1131 2016. 09. 08. Светлана РОМБАНДЕЕВА

Паща о̄лэ̄н, я̄тил ня̄врамаквет! «Султум» («Искорка») нампа нила ло̄пс ма̄н ты э̄лыпал газетат («Лӯима̄ сэ̄рипос» № 16) ва̄руӈкве о̄вылтаслӯв. Ня̄врамыт ке̄тум потраныл тыт ань о̄с акв та щирыл ма̄ньщи ос рущ ла̄тӈыл хассанӯв, хурияныл ва̄рсанӯв. На̄н потрыт о̄с хансэ̄н, газетан ке̄тэ̄н, та̄наныл ма̄н тах пуссын тамле ло̄псын хансыянӯв. Ты тэ̄ла намаяслӯв «Юный корреспондент». Ма̄ньта̄гыл хансэ̄н, ханищтахтэ̄н, ма̄н на̄нан нё̄тыянӯв. Ань ты э̄тпост о̄выл хо̄талэ̄ныл йильпи ханищтахтан та̄л та о̄вылтахтас. Ма̄н на̄нан ты ялпыӈ хо̄талыл янытлыянӯв! Пуссын пуста̄гыл о̄лэ̄н, яныгме̄н, ёмащакв ханищтахтэ̄н! Яты, ань ос мо̄т ня̄врамыт потраныл ловиньтэ̄н.

1131 2016. 09. 08. Мария Пакина

Посыӈ на̄й хольт янытлам хо̄тпам Ка̄сын э̄лумхо̄лас о̄лупсатэ̄т мӯтраӈ хо̄тпа о̄ньщи. Ты э̄лумхо̄лас таве̄н э̄ри, таве тав э̄руптытэ, тав уре̄тыл номсы. Тамле э̄лумхо̄лас тыи ам ане̄квам – Агния Николаевна Пакина. Ам ане̄квам хурип тамле мӯтраӈ э̄лумхо̄лас воссыг ат ва̄сум. Ане̄квам са̄в та̄л школат ня̄врам ханищтан нэ̄г рӯпитас, тав Ветеран труда нам о̄ньщи. Школа а̄стлам ма̄ньлат ма̄хум таве ат ёрувлыяныл, э̄руптыяныл, яныг ялпыӈ хо̄талыт порат мӯйлупсал мӯйлупта̄лыяныл. Ане̄квав ма̄н э̄руптылув, тав ла̄тӈе̄н хӯнтлэ̄в, ка̄сыӈ хо̄тал таве уральтылув. Ма̄н тав хольтэ о̄луӈкве таӈхе̄в. Ань ане̄квам пенсият о̄лы. Юн нас тох ат ӯнлы, ма̄н ма̄гсылув па̄сса ос носки саги. Тав сака атын ня̄нь ва̄ри, хӯлыӈ ня̄нь, колэ акваг ня̄нил пасы. Хунь ам тав палтэ ёхтала̄лэ̄гум, тав а̄нум акваг ӯритэ. Ма̄н акваг ёхтэ̄в тув, хо̄т э̄руптаве̄в ос ӯраве̄в. Мария Пакина, 17 та̄л, Ха̄льӯс район Кульпас па̄выл.

1131 2016. 09. 08. Валя Сайнахова

Каӈкагум армият луситэ̄г Ам Валя Сайнахова, ты та̄л 9 та̄лум то̄влыс, Кульпас па̄вылт о̄лэ̄гум. Ре̄тыӈ ю̄свой э̄тпос 14 хо̄талэ̄т 2007 та̄лт самын патсум. Ань хӯрмит классыт ханищтахтэ̄гум. Омам наме Евдокия Ильинична, а̄ги о̄парищ наме Оманова, а̄тям Алексей Сергеевич. Каӈк о̄ньще̄гум, наме Максим, тав ань армият луситы. Ма̄н ётув а̄квум пыге яныгмас, Кирилл Санжин, тав о̄с армиян вуйвес. Тыт ам о̄пам о̄лы – Сергей Митрофанович Сайнахов. Школат ам ма̄ньщи ла̄тыӈ ханищтэ̄гум, учителюв Евдокия Ивановна Кугина. Сакныл матыр хартэ̄гум, Барби куклам ма̄гыс машинкал са̄всыр маснут ю̄нтэ̄гум, омамн матыр колсори ва̄руӈкве нё̄тэ̄гум. Валя Сайнахова, 9 та̄л, Кульпас па̄выл.

1131 2016. 09. 08. Никита Гындыбин

Ма̄н щаще̄квав э̄руптылӯв Ам намум Никита Гындыбин. Ты хурит ме̄н Тамара э̄щум ёт по̄слым о̄лыме̄н. Ам яныг таквс э̄тпос 29 хо̄талэ̄т 2006 та̄лт самын патсум, тав ос о̄йттур э̄тпос 20 хо̄талт 2008 та̄лт самын патыс. Ань ам нилыт классыт ханищтахтэ̄гум, Тамарам китыт классын минас. Ме̄н йӣгрищ ос а̄пщирищ о̄ньщиме̄н, Лена ос Павлик. Тэ̄н иӈ ма̄ниг, садикн ялантэ̄г. А̄тяв наме Виталий Николаевич, омав Вера Леонидовна. Ам щаще̄квав урыл ла̄вуӈкве таӈхе̄гум, тав наме Ульяна Павловна Гындыбина. Школат са̄в та̄л учителиг рӯпитас, ань пенсият о̄лы, ӯщлахты. Щаще̄квав сака ёмас, сымыӈ хо̄тпа, тав ма̄нав э̄руптытэ. Ма̄н таве о̄с сака э̄руптылӯв, янытлылӯв, са̄в ёмас ла̄тыӈ таве̄н ла̄ве̄в, са̄в та̄л пуста̄гыл вос о̄лы! Ане̄квав наме Инна Леонидовна. Таве ма̄н о̄с э̄руптылув, ёмас, сымыӈ ла̄тӈыл ла̄вилув. Пус кат, пус ла̄гыл таве̄н! Никита Гындыбин, 9 та̄л, Кульпас па̄выл.

1131 2016. 09. 08. Светлана РОМБАНДЕЕВА

Ло̄пмус па̄выл ня̄врамыт Ты хуритыт Ха̄льӯс район Ло̄пмус па̄выл ня̄врамыт по̄слым о̄лэ̄гыт. Туи та̄н ӯщлахтасыт, матыр рӯпата ва̄руӈкве ща̄ньа̄щанылн нё̄тсыт. Тув палыт хо̄талыӈ хо̄талаквет о̄лсыт, кон сака ре̄гыӈ о̄лыс. Ня̄врамыт Ло̄пыӈ ос Со̄рахта я̄г ва̄тат хо̄тал палыт пувлым ат а̄стысыт. Тот маттем та ёнгысыт, мӯрмысыт, туп ро̄хсуяныл ос мовиньтаныл суйтыс.

1131 2016. 09. 08. Тамара МЕРОВА

Ка̄с ва̄рим ӯщлахтасыт Октябрьский район Лӯи Ня̄рихумит па̄вылт кирпащиӈ клубкол ос школа ӯнттым о̄лы. Ты колыг хосат нэ̄мхуньт лап ат пантыглаве̄г, тот ма̄хум аквписыг рӯпитэ̄гыт. Туи порат та па̄вылт о̄лнэ ня̄врамаквет ма̄гыс са̄всыр ка̄с ос нас ӯщлахтын нак ва̄рылтэ̄гыт. Клуб кӯщай нэ̄ Людмила Торохова ла̄выс: «Ма̄н ка̄сыӈ туи тыт а̄гирищитпыгрищит ёт рӯпитэ̄в. Ты э̄лыпа̄лт школа ёт потыртахтэ̄в, хоты пора мус та̄н палтаныл ня̄врамыт ӯщлахтэ̄гыт, хоты порат ма̄н палтув ёхталаӈкве патэ̄гыт. Акв та̄л ма̄н кит смена щирыл а̄гитпыгыт клубн во̄выглыянӯв, школа акв сменан выганыл. Тувыл ос мо̄тыт та̄лт пе̄нтхатэ̄в. Ма̄нки сменав «Солнечная телепланета» намтыслӯв. Ня̄врамыт обед юипа̄лт кит щё̄с порат ёхталэ̄гыт ос ат щё̄с мус ма̄н ётув о̄лэ̄гыт. Тыт ёнге̄гыт, йӣквыт ханищтэ̄гыт, пальсакыт, турло̄псыт хартэ̄гыт манос по̄слэ̄гыт. Э̄типа̄лаг юв миннэ̄ныл порат тэ̄ланыл урыл потыртахтэ̄гыт, матыр йильпи йӣкв суссылтаӈкве патэ̄гыт ке, таияныл юн ханищтыяныл. Пӯмащ э̄рыг хӯнтлуӈкве таӈхе̄гыт ке, таияныл ищхӣпиӈ ут хосыт кинсыяныл, тувыл тыт юртыӈыщ аквъёт ханищтыяныл. Па̄влыт хультум ня̄врамыт коныпал мо̄т ӯсныл манос па̄влытныл мӯйлуӈкве ёхтум ня̄врамаквет тыг яланта̄лэ̄гыт. Та̄н тыт рӯт а̄пщияныл, каӈканыл, увщияныл палт мӯйлэ̄гыт. Та̄нанылн тыт мӯсты, йильпи юрт тыт хо̄нтэ̄гыт ос юв ща̄гтым минэ̄гыт, . Мо̄лты ма̄н рӯпатав щирыл яныг хури нэ̄пак ва̄рсӯв. Матыра̄ти ёнгилыт, касылыт ва̄рнэ̄в порат пуссын хурин по̄слысанӯв. Ма̄нки ёмас номтыл о̄с хультсӯв».

1132 2016. 09. 22. Валентина УЗЕЛЬ

О̄ста нэ̄пак та̄ратаӈкв во̄выглавесӯв Ювле хультум са̄тыт 18 хо̄талэ̄т Россия о̄лнэ ма̄в янытыл пе̄рияп ва̄рмаль минас. Ма̄н округувт Государственный Думан, Тюменский областной Думан, округ Думан, ка̄сыӈ район ос ӯс такви Думан депутат ма̄хум пе̄риясыт. Ань та̄рапатыс, хоты политический партият но̄хпатсыт, ос хоты хо̄тпат мирн пе̄рияве̄сыт. То̄ват пе̄риим хо̄тпат наманыл ты ла̄вве̄сыт. Та̄н ань са̄всыр са̄кконыт ма̄н ма̄гсылув хансуӈкв ты патэ̄гыт. Ос ты хосыт э̄лаль о̄лнэ о̄лупсав тах та мины. Государственный Думан одномандатный пе̄риян ма̄т ты тит хум хо̄тпаг пе̄риявесы̄г – П. Н. Завальный ос А. Л. Сидоров. Ётылнув «Единый Россия» партия па̄лыл тув хо̄тпат о̄с тах пе̄риявет. Тюменский областной Думан ты хо̄тпат но̄хпатсыт: Ю. С. Холманский; В. А. Нефедьев; А. А. Аносов; Б. И. Богославец; Г. А. Резяпова; И. А. Иванов; С. В. Дубровин; И. В. Лосева; Е. М. Макаренко; Ю. А. Елин. Округ Думан ты хо̄тпат ма̄гыс мир са̄в нэ̄пак та̄ратавес: Л. В. Михалко; П. М. Созонов; А. М. Осадчук; А. В. Филипенко; В. А. Филипенко; С. Ю. Дегтярев; И. В. Винников; С. Е. Елишев; А. И. Сальников; Ю. И. Важенин; И. С. Кандаков; Р. Р. Айсин; Л. А. Малышкина; А. С. Филатов; С. А. Кочкуров; А. В. Андреев; Н. Л. Западнова; Б. С. Хохряков; С. С. Великий. Пуссын аквъёт округ Думат 38 депутат рӯпитаӈкв паты. Ань онтоловхуйплов хо̄тпа пе̄риявес, мо̄т хо̄тпат наманыл ётылнув та̄рапатэ̄гыт. Та̄н о̄с политический партият щирыл тув ӯнттавет. «Единый Россия» партия ват нупыл ат хо̄тпа депутатыг округ Думат рӯпитаӈкв патэ̄гыт, ЛДПР партия па̄лыл – хо̄т хо̄тпа, КПРФ партияныл – нила хо̄тпа ос «Справедливый Россия» партияныл – тит депутатхо̄тпа. Ка̄сыӈ район ос ӯст та̄нти депутатаныл о̄с пе̄риясаныл. Ань мирн та̄ратам нэ̄пакыт ёмащакв ловиньтавет, ос ӯщлахтын хо̄талытт йильпи депутатма̄хум наманыл пуссын тах ла̄вавет. Ма̄н округувт са̄выӈпа̄лэ пуссын мир «Единый Россия» партия ма̄гыс нэ̄пак та̄ратасыт. Та̄н юипа̄ланылт ЛДПР партия но̄хпатыс, КПРФ партия хӯрмит ма̄т о̄лы. Тувыл ущ «Справедливая Россия» партия.

1132 2016. 09. 22. Тамара МЕРОВА

«Хо̄тал» нампа театр 15 та̄лэ то̄влы Юио̄выл хультум та̄лытт та̄н акваг пӯмыщ спектаклит щё̄питалэ̄гыт. Маныр ёнгилыт та̄н ань щё̄питасыт, ты урыл кӯщай хум Е. Литвинчук, режиссёр пыг А. Тургачёв ос артистка а̄ги А. Могульчина потыртасыт. Атхуйплов та̄л сыс артистанув са̄в ма̄н во̄выглаве̄сыт. Тувыл юв ёхтэ̄гыт, ща̄гтым мо̄т спектаклит э̄лаль та щё̄питэ̄гыт. Ты э̄тпост Финляндиян ялсыт. Хо̄н ма̄хумн та̄н ёнгиланыл сака мӯстыс. Ань ос Красноярск ӯсныл ёхтысыт. Та̄н тув фестивальн во̄виньталве̄сыт. Ань ос ирландец хум Мартин Макдонах ос эвенк хум Александр Латкин хансум нэ̄пакаге̄н хосыт спектаклиг щё̄питасыт. Хӯрмит спектакляныл ма̄нь ня̄врамыт ма̄гыс ва̄рияныл. Та̄наныл сунсуӈкве ма̄хум ма̄нь таквс э̄тпос во̄вавет. Ты урыл ма̄н ётыл я̄нас потыр хансэ̄в тах.

1132 2016. 09. 22. Светлана РОМБАНДЕЕВА

Шахматы ёнгил о̄вылтыт потыр о̄лыс Ань 2020 та̄лт Ханты-Мансийск ӯст Всемирный шахматный олимпиада ва̄раве тах. Ты урыл Василий Филипенко тох ла̄выс: «Ты ёнгил ма̄н ӯсувт ва̄руӈкве ань ма̄ янытыл о̄лнэ Мирхал шахматный федерация Конгрессыт рӯпитан мир пуссын ка̄сащасыт. Ты ма̄гыс ма̄н номтанув ёмасыт. Ты тэ̄ла палт ма̄н нёлолов арыг та̄л ты рӯпитэ̄в, 2010 та̄лт тыт май Шахматный олимпиада о̄лыс. Таима̄гыс ма̄н о̄лнэ ма̄в ань ва̄ве, ӯсув о̄с та пе̄риявес». Игорь Губкин ос тох потыртас: «Округувт са̄всыр олимпиадат ва̄тихал ва̄рыглавет, таима̄гыс ма̄н ань ты рӯпата ва̄глув. Ам номсэ̄гум, ты яныг ёнгил кос мо̄тыт та̄л ва̄рнуве те, маныр э̄ри ма̄н пуссын молях щё̄питапнувув. Ты ёнгил ва̄нэ ма̄ янытыл о̄лнэ мир ма̄н ма̄в ос ӯсув колыг ла̄вияныл, тыг та̄н ка̄сыӈъе̄мт ёхтуӈкве ве̄рме̄гыт. Мирн ва̄нэ хо̄тпат таима̄гыс тыг ва̄тихал та ёхталэ̄гыт». Округув янытыл ань шахматы ёнгил палт са̄в касылыт ва̄рыглавет – ня̄врамыт ос ма̄ньлат ма̄хум коныпал са̄всыр организациятыт рӯпитан хо̄тпат халанылт касэ̄гыт. Галина Ковалёва ла̄вме щирыл, Югорский шахматный академия колт ӯщлахтан хо̄талыт ат о̄лыглэ̄гыт, ма̄хум тот ка̄сыӈ хо̄тал ёнге̄гыт, ханищтахтэ̄гыт манос касэ̄гыт». Ань тыгыл э̄лаль ка̄сыӈ школат ос спортивный колт ня̄врамыт шахматы тэ̄ла ханищтаӈкве патыяныл. Ты тэ̄ла палт пуӈк тотнэ хо̄тпат округ янытыл яласэ̄гыт, ма̄хум ма̄гыс мастерклассыт ва̄рыглэ̄гыт – 43 са̄вит тамле тэ̄ла о̄лыс. Ищхӣпыӈ ут хосыт о̄с ханищтэ̄гыт. Ань округ янытыл 15 со̄тыра арыг ня̄врам шахматал ёнгасэ̄гыт, яныгхо̄тпат ёт – 18 со̄тыратем. Георгий Рябов онтолов та̄лэ то̄влыс, тав нила та̄лэ то̄влум па̄сыл шахматал ёнгасы. Ля̄ххал тотнэ ма̄хум нупыл тав тох ла̄выс: «Ам 2020 та̄л порат е̄мтнэ Мирхал олимпиадат ёнгуӈкве таӈхе̄гум. Тот э̄лыхо̄н ма̄хум ёт ёнгуӈкве ро̄ви, та̄наныл йильпи матыр ханищтаӈкве, ос тувыл мо̄т хо̄тпат ёт каснэм порат но̄хпатуӈкве ро̄ви».

1132 2016. 09. 22. Тамара МЕРОВА

Ня̄враманын ӯргалым янмалтэ̄н Ювле хультум са̄тыт округт о̄лнэ ла̄тыӈ ат хӯлтнэ ня̄врамыт лю̄ль тэ̄ланыл ёмщакв щё̄питан щирыл Ханты-Мансийск ӯст ханищтап о̄лыс. Тамле ня̄врамыт тэ̄ланыл ёт рӯпитан ма̄хум акван тув атхатыгла̄лсыт ос пуссын о̄лыглан ва̄рмалит урыл потрыт хӯнтлысыт. Тувыл та̄рвит ва̄рмалит э̄лаль ёмщакв щё̄питан ма̄гыс халанылт потыртасыт. О̄влэ̄т Татьяна Черкашина, округт о̄лнэ ня̄врамыт тэ̄ланыл уральтан комиссият кӯщай ва̄ӈын нэ̄, та̄н рӯпатаныл урыл ла̄тыӈ тотыс. Мори ха̄йтнэ ос ла̄тыӈ ат хӯнтлын, мори капыртан ня̄врамыт ма̄гыс сыресыр ханищтапыт Юграт ва̄рыглавет. Мо̄лты та̄гыл та̄н са̄всыр рӯпитан колыт ёт «Подросток» нампа уральтан нак ва̄ре̄гыт. Ос хотты лю̄ль накн патнэ а̄гирищитнпыгрищитн матыр ёмас ва̄руӈкве нё̄тэ̄гыт. Та̄н туи сыс ӯщлахтуӈкве тотыглавет, хотты ма̄н рӯпитаӈкве вуйла̄лавет. Тувыл ща̄няныла̄щаныл ёт о̄с потыртэ̄гыт. Ты ня̄врамыт мо̄т хо̄тпатн сымта̄лыг ос кантыӈыг ул вос о̄щве̄сыт, акваг уральтавет. А̄гитпыгыт ёмас о̄лупсан ханищтан кинал щё̄питавет ос суссылтавет. Лю̄ль тэ̄рпи ке̄лпта̄рсытн ул вос тӯщтэ̄гыт, вина ул вос ае̄гыт, ма̄ньтагыл хохса ул вос хартэ̄гыт, пуссын ты тэ̄лат урыл тот потыртаве. Ты коныпал ня̄врмыт ёт полицият, МЧС ма̄т ос ле̄ккарыт акванхо̄нтхатыглэ̄гыт. Та̄н о̄с са̄всыр касылыт, ханищтапыт ва̄рыглэ̄гыт. Культурат рӯпитан ма̄хумн ёнгилтапыл щё̄питавет, аквъёт кас ва̄ре̄гыт. Тувыл тамле пӯмыщ о̄лупсал о̄лнэ̄ныл юипа̄лт са̄внув а̄гирищитпыгрищит ла̄тыӈ хӯнтлуӈкве патэ̄гыт. Мо̄лты та̄л нёлолов э̄тпос сыс акв со̄тыра 301 лю̄ль ва̄рмалит ня̄врамыт ва̄рсыт. Ос ты та̄л акв со̄тыра 217 лю̄ль ва̄рмалит е̄мтала̄сыт. Ла̄тыӈ ат хӯнтлан ня̄врамыт ёмас номтыӈ ва̄рмалит ва̄руӈкве мо̄т ма̄ньлат хо̄тпатн о̄с нё̄тавет. Та̄н тӯи ӯщлахтын ма̄н аквъёт ялэ̄гыт, ӯсхулыт ма̄хум ё̄мнэ лё̄х та̄ра мӯсхалыг минуӈкве ханищтавет. Машинат ялнэ лё̄ӈхытыт мори ул вос ха̄йтэ̄гыт. Ты урыл Урайныл ёхталам аквхуйплов классыт ханищтахтын пыг Георгий Чебыкин потыртас. Тувыл ля̄ххалыт тотнэ хо̄тпат та̄нки рӯпатаныл о̄вылтыт потыртасыт. Ольга Лазарева, «Югра» телерадиокомпаният рӯпитан нэ̄, ма̄нь кинат щё̄питан урыл ла̄тыӈ тотыс. Михаил Осипов «Новости Югры», нампа газетат кӯщай ва̄ӈын хум, ля̄ххалыт хумус э̄рнэг хансуӈкве э̄ре̄гыт, таи хӯлтыс. Ня̄врамыт ёт ос та̄н ща̄няныла̄щаныл ёт матыр лю̄ль ва̄рмалит е̄мталанэ̄ныл порат, та̄н ма̄к наманыл хансуӈкве ат ро̄ви. Тувыл о̄лнэ ӯсаныл манос па̄вланыл хӯлтуӈкве о̄с ат э̄ре̄гыт. Ла̄тыӈ ат хӯнтлын ня̄врамыт янмалтан ще̄мьят рущ щирыл «неблагополучныиг» ла̄вавет. Тамле ла̄тыӈ то̄ватытн ат мӯсты, та щирыл хӯлтыглахтуӈкве та̄н ат ка̄саще̄гыт. Ма̄н ань та̄наныл «лю̄ль ва̄рмалитн ликмын ще̄- мьяг» ла̄вуӈкве патсанӯв. Тувыл ань пилыщмаӈ ва̄рмалиг таи о̄лы, са̄в а̄гирищитпыгрищит Интернет нупыл сака хоса сунсым ӯнлантэ̄гыт. Маныр ля̄ххалыт ловиньтэ̄гыт, маныр кинат сунсэ̄гыт ос хотьютаныл ёт тот ва̄йхатым о̄лэ̄гыт, то̄внакт ща̄ньа̄щанылн та̄н щар ат уральтавет. Тот са̄в лю̄ль пищитн ханищтаӈкве ве̄рмавет. Юио̄выл та̄лытыт то̄ва ня̄врам та̄нкина̄ныл но̄х- саватыяныл, карс колытныл ёл порыгме̄гыт. Тамле тэ̄лат ул вос е̄мталэ̄гыт, на̄н такем ёмас ва̄рмаль ва̄ре̄н, на̄нки ня̄враманын мощ уральтым о̄ньще̄н. Ва̄тихал та̄н ётаныл потыртэ̄н, тэ̄ланыл урыл пӯмщалахтэ̄н.

1132 2016. 09. 22. Валентина УЗЕЛЬ

Во̄р ёляктын ма̄хум кассыт Во̄рыӈ ма̄т йӣв ёляктын ма̄хум янытлан хо̄таланыл ва̄рим па̄сыл ты та̄л атпан та̄лыг ты е̄мтыс. Ань о̄лнэ ма̄в янытыл та̄н ма̄гсыланыл са̄всыр касылыт, ялпыӈ хо̄талыт ос суссылтапыт ва̄равет. Ханты-Мансийск ӯст округ янытыл щар ма̄к ёмащакв рӯпитан лесничиит, во̄р ёляктын ма̄хум акванатыглаве̄сыт. Ань ӯсн ёхталам аквхуйплов хо̄тпа та̄нти халанылт кассыт. Са̄выӈпа̄лэ та̄н халанылт пуссын ма̄ньлат хумквет о̄лсыт. Ты касыл э̄лыпа̄лт та̄н ма̄нь на̄ӈкрищит ос ха̄льйивыт ма̄н ӯнттысаныл. О̄влэ̄т кӯщаит та̄наныл янытласаныл, ёмас ла̄тӈыл ла̄всаныл. Тувыл касыл ущ та о̄вылтавес. Ка̄сыӈ хо̄тпа такви йӣв сартнэ те̄ре ёмащакв уральтастэ, ёмащакв рӯпиты ман а̄ти. Тувыл акв хо̄тпал я̄нас кассыт, аквторыг та̄нанылн касуӈкв ат ро̄выс. Та̄н йӣвыт ёлсартсаныл, тувыл йӣв товыт пуссын хотьютаныл моляхнув сартыянэ, та щирыл кассыт. Юио̄вылт ла̄вве̄сыт, хотьютаныл йӣвохса щар во̄втаг сартытэ. Та̄н пуссын хӯрум сантиметраг сартсаныл. Каснэ̄ныл халт тыттуве̄сыт. Ляпан полевой кухняг ла̄внэ яныг пӯткапай хартвес, тот тэ̄нутыл та па̄йтве̄сыт. Кон мощ ащирма во̄тыг о̄лыс, ма̄хум ул вос по̄льве̄сыт, исум ща̄ил пиныглаве̄сыт. Ты касыл рущ ла̄тӈыл тох ла̄ввес «Лучший лесоруб Югры». Тыг ёхталам хум хо̄тпат, со̄ль, сака ёмащакв рӯпитэ̄гыт. Акв касыланыл тамле о̄лыс, яныгман йӣв ёляктыма юипа̄лт по̄стым ма̄н вос паты. Э̄лыннув тит йӣво̄влыг тӯщтуве̄сы̄г, халэ̄нт – акв метра. Йӣв сартаве, тав та халн ёл вос паты. Каснэ ма̄хум пуссын э̄рнэ ма̄н йӣв ёлпаттысаныл. Та юипа̄лт пуссын кол тӣврын во̄вве̄сыт, тот янытлаӈкв та патве̄сыт. Округув янытыл ул ка̄сыӈ районныл лесникма̄хум ёхталасыт. Хальус район Ня̄хщамво̄ль па̄вылныл ёхталам тит хум хо̄тпаг сас янытлавесы̄г. Александр Николаевич Выгузов ма̄вит ӯргалан округ департамент па̄лыл янытлан нэ̄пакыл майвес. Ос Сергей Павлович Загудаев ма̄гылн тагатан «Почётный работник лесного хозяйства» нампа по̄сыл майвес. Советский, Октябрьский ос Кондинский районытт рӯпитан ма̄хум о̄с янытлаве̄сыт, са̄в ёмас ла̄тӈыл ла̄вве̄сыт. Ущты рӯпитаӈкв о̄вылтахтам тит хум хо̄тпаг Андрей Чертов ос Валерий Кузнецов присягала̄тыӈ ла̄всы̄г, рӯпататэ̄н ёмащакв ва̄руӈкв ла̄вхатсы̄г. Евгений Платонов ма̄вит ӯргалан департаментыт кӯщаиг о̄лы, тав во̄р ӯргалан рӯпата ёмащакв ва̄гтэ. Во̄р яктын ма̄хум янытламанэ порат тав тох ла̄выс, округувт лов со̄тыра арыгтем хо̄тпа ты рӯпата ва̄ри. Ма̄н округув ты хосыт са̄в олн сэ̄лы. Во̄рув товлыӈха̄пыл яласан ма̄хум нумыл о̄с уральтыяныл. Ты э̄тпост Россия янытыл Москва ӯс ляпат яныг касыл о̄лыс, тув ма̄н округувныл парашютистпожарный хум ялыс, тот касыс. Тав Россия янытыл ёхталам ма̄хум халт титыт ме̄ста вис. Тав наме Андрей Зуев, тав ань сака янытлаве. Ты о̄лум касылт Дмитрий Меликов «Лучший лесоруб Югры» яныг намыл майвес, тав ань о̄выл места вистэ. Титыт ме̄стал Николай Фирсов майвес, ос хӯрмит –Артем Смирнов. Та̄н ань пуссын мӯйлупсал майве̄сыт, ёмащакв янытлаве̄сыт. Мо̄тыт та̄л ты касыл о̄с тах ва̄раве.

1132 2016. 09. 22. Людмила Теткина

Та̄нки ла̄тӈаныл тув ке̄туӈкве ве̄рме̄гыт Ханты-Мансийск ӯст ля̄ххал тотнэ ма̄хум общественный связь департаментыт акванатыглаве̄сыт. Тот рӯпитан ма̄хум «Социальноориентированные услуги» нампа проект урыл потыртасыт. О̄влэ̄т департаментыт рӯпитан ма̄ньлат хум Яков Самохвалов ты ва̄рмаль урыл ла̄тыӈ ла̄выс. Ма̄н округувт ань хӯрум со̄тыра са̄всыр некоммерческий организацият рӯпитэ̄гыт. Та̄н халанылт кит со̄тыра организация мирн нё̄тэ̄гыт, ос ты рӯпата ва̄рим олн ат сэ̄лэ̄гыт. Та̄н та̄нки нэ̄паканыл ты департаментын ке̄туӈкве ве̄рме̄гыт ос рӯпатаныл ма̄гсыл олн виӈкве. Тувыл тамле олн ма̄гсыл туп аквта ма̄хум нэ̄паканыл ке̄тыглэ̄гыт, мо̄таныт по̄хыт хультэ̄гыт. Ань округувт о̄лнэ мир китыглавет, манхурип тэ̄ла ма̄гсыл ты организациян олн та̄стуӈкве. Ка̄сыӈ э̄лумхо̄лас такви ла̄тӈе ищхӣпыӈ ут щирыл тыг www. crowdugra. ru ке̄туӈкве ве̄рми. «Открытый регион» нампа центрыт кӯщаиг рӯпитан нэ̄ Оксана Макеева ла̄выс: «Ка̄сыӈ э̄лумхо̄лас такви ла̄тӈанэ сӯкыр э̄тпос 30 хо̄талэ мус ма̄н палтув вос ке̄ты. Ма̄н тав номтанэ ёмащакве тах ловиньтыянӯв. Тамле рӯпата ва̄рим ма̄н са̄в э̄рнэ тэ̄ла тах ва̄ре̄в».

1132 2016. 09. 22. Людмила Теткина

Ханты-Мансийск ӯст ӯльпат ӯнттуве̄сыт Ты э̄тпос 17 хо̄талэ̄т Ханты-Мансийск ӯст «Ӯльпа хо̄тал» о̄лыс, ӯст о̄лнэ мир ще̄мьяӈ та̄гыл тув ёхталасыт. Тамле ялпыӈ хо̄тал ка̄сыӈ та̄л сӯкыр э̄тпост во̄р ӯргалан хо̄тпат янытлан кастыл ва̄рыглаве. «Ӯльпа хо̄тал» несырьевой сектор экономики департаментыт, ӯс мирколт рӯпитан хо̄тпат щё̄питасыт. Ӯст о̄лнэ мир Дунин-Горкавич ӯсхулыт акванатыглаве̄сыт. Ня̄врамыт ма̄гсыл са̄всыр суссылтапыт, ханищтапыт рӯпитасыт. А̄гирищитпыгрищит ка̄тыл хурит по̄сласыт ос э̄нтапыт сагуӈкве, ра̄ктыл по̄щгуӈкве ханищтахатсыт. Ос са̄всыр ёнгитыл ёнгылтаве̄сыт. Ханты-Мансийск ӯст миркол кӯщай нэ̄ Татьяна Волгунова, Ханты-Мансийский район кӯщай хум Пётр Захаров ос ма̄вит ӯргалан департамент кӯщай хум Евгений Платонов ма̄хум ялпыӈ хо̄талыл янытласаныл. Евгений Платонов ла̄выс, та̄н ӯльпат ӯнттуӈкве ма̄хум ка̄сыӈ та̄л во̄виньта̄лыяныл. О̄влэ̄т тамле ва̄рмаль туп Ханты-Мансийск ӯст ва̄рыглавес, ань округ янытыл о̄лнэ мир ӯльпат ӯнттуӈкве акванатыглэ̄гыт. Тамле тэ̄ла таи ма̄гсыл та̄н щё̄пита̄лэ̄гыт, тыт о̄лнэ мир во̄р ӯргалым вос о̄ньще̄гыт, порс во̄рт ул вос па̄хвтэ̄гыт ос ма̄витув ул вос па̄ӈктэ̄гыт. Та хо̄тпа хотьют йӣв такви ӯнтты, наска̄ссыг йӣвыт са̄груӈкве ос нэ̄матыр лю̄ль ва̄руӈкве ат паты. Ты юипа̄лт ма̄хум янытлаӈкве мирн ва̄нэ ханты э̄ква Мария Кузьминична Волдина во̄ввес. Тав ма̄хум ёт ща̄нь ла̄тӈыл пащалахтас. Ханты э̄ква потыртас, хумус соссаӈ ма̄хум ты йӣв янытлэ̄гыт. Пе̄с щирыл ӯльпа То̄рум пыгыг о̄лыс, ты ма̄гсыл ханты ма̄хум таве ялпыӈ йӣвыл ловиньтыяныл. Ос ла̄выс, соссаӈ ма̄хум ка̄сыӈ йӣв янытлэ̄гыт ос ӯргалэ̄гыт, та̄н нас тох тэ̄ла та̄л йӣв ат са̄гре̄гыт. Ля̄мӣйв, ӯльпа, на̄ӈк, тарыг ос са̄в мо̄т йӣвыт урыл ханты ма̄хум са̄всыр мо̄йтыт, а̄мщит о̄ньще̄гыт. Ня̄врамыт пе̄с потрыт, мо̄йтыт, а̄мщит потыртым та̄н ма̄витув янытлаӈкве ханищтэ̄гыт. Тамле мӯтраӈ ма̄хум пе̄с порат та̄гыл ты ма̄т о̄лэ̄гыт. Округ губернатор Наталья Комарова ӯлпат ӯнттуӈкве о̄с ёхталас. О̄влэ̄т кӯщай нэ̄ суссылтапыт сунсыс ос тувыл ма̄хум ёт ӯльпат ӯнттыс.

1132 2016. 09. 22. Тамара МЕРОВА

Са̄всыр То̄румн агтнэ мир мирколт атхатыгласыт Аньмӯнтнув округ мирколт пе̄рна пиннэ хо̄тпат ос ислам щирыл То̄румн агтнэ ма̄хум Ханты-Мансийск ӯст акванхо̄нтхатыгла̄лсыт. Тот «Православие и ислам в Югре: диалог во имя мира и согласия» нампа сапра̄ни ва̄рыглавес. Ты ва̄рмалит урыл потрамаӈкве округ янытыл ӯсыт ос районыт о̄лнэ та̄нки То̄руманылн агтнэ хо̄тпат акванатыглаве̄сыт. Ты ма̄хум пуссын халанылт ищхӣпыӈ ут хосыт потыртасыт. Акванатхатыглам хо̄тпат э̄лыпа̄лт о̄влэ̄т Илья Верховский потыртас. Тав ЮГУ колт «Югра-Социум» нампа ханищтан центрыт кӯщаиг о̄лы. Пе̄рна пиннэ ос ислам щирыл То̄румн агтнэ мирыг хосат та̄гыл Югра ма̄вн о̄лмыгтасыт. Акв ляпан тыт о̄лмыгтаманыл па̄сыл та̄н юртыӈыщ о̄лэ̄гыт, тэ̄ланыл акваннё̄тхатым ва̄рияныл. Матыр лю̄ль тэ̄лат то̄внакт ул кос е̄мталэ̄гыт, ос та̄н акванпотыртахтым, аквъёт ё̄р пиным по̄хан ла̄квтыяныл. Ка̄сыӈ э̄лумхо̄лас ёмас посыӈ номтыл э̄лаль вос о̄лы, такви ляпат о̄лнэ хо̄тпат нупыл сымыӈыщ вос сунсы. То̄нт ущ са̄в мирыт та̄нки халанылт акваг юртыӈыщ ос со̄тыӈыщ о̄луӈкве патэ̄гыт. Тувыл мӯй ма̄хум ма̄гыс Ханты-Мансийский ос Сургутский митрополит Павел ащо̄йка ке̄тум паща ла̄тӈе Ханты-Мансийск ӯст о̄лнэ протоиерей Сергий Кравцов ловиньтастэ. Тав ла̄внэ̄тэ щирыл, ма̄н о̄лнэ ма̄в таима̄гыс та̄кыг ос ё̄рыг о̄лы тыт са̄в нотпа о̄лум ма̄хум та̄нки То̄румн агтым са̄в та̄лыт о̄лсыт, нэ̄мхуньт нэ̄мхотты хо̄тпа ат люкамта̄лсыт. Туп хотьют То̄руманылн ат агты, тав мори ка̄пырты, такви о̄лупсатэ витыг тотытэ ос мо̄т ма̄хумн пе̄рхаты. Тувыл тыи ты пилищмаӈ – тамле хо̄тпат па̄ттыиг ма̄хум халмалтахтэ̄гыт ос хо̄нтлан ва̄рмалит е̄мталэ̄гыт. Ислам щирыл То̄румн агтнэ ма̄хум палт Муфтий кӯщай Тагир Хазрат Саматов мирыт пуссын Курбанбайрам ялпыӈ хо̄талыл янытласанэ, пуста̄гыл о̄лнэ паща ла̄тыӈ ма̄хманэ̄н ке̄тыс. Ос ты форум ва̄рнэ хо̄тпатн пӯмащипа ла̄тыӈ ла̄выс. Тамле акванпотыртахтын нак округт внутренний политика департамент, Ханты-Мансийский митрополия ос Юграт мусульманыт акванатхатнэ колытытн ва̄рвес. Ка̄сыӈ ӯсныл ос районныл ищхӣпыӈ ут хосыт мӯй хо̄тпат потыртасыт. Та̄н ла̄тӈаныл пуссын акв ёмас номтын хо̄е̄гыт. Та̄нки То̄руманылн агтнэ ма̄хум тох ла̄выгласыт, та̄н о̄лупсанылт нэ̄мхотты На̄й-О̄тыраныл ла̄кквауртуӈкве щар ат э̄ри. Ос хотьютаныл ма̄ янытыл кӯщайлахтын ма̄гыс ё̄р кинсы, тамле номтыт ёл вос по̄илтыяныл. Та̄н То̄рманыл аквке̄мыл о̄лэ̄гыт, аквке̄мыл ӯргалавет. Мӯтраӈ номт э̄лаль пинуӈкве ке, та̄н То̄румн нё̄тнэ На̄й-О̄тыраныл наманыл мӯсхалыг ханищтавет ке, насати, та̄н а̄латы аквхурип намыл хӯлтавет. Таима̄гыс та̄н та̄нки халанылт каӈкыг манос апщииг ла̄вхатуӈкве ве̄рме̄гыт. Са̄в нотпа та̄лыт та̄н пе̄с ма̄хманыл посыӈ номтыл э̄лаль о̄лсыт, ань аквтох э̄лаль вос о̄лнувыт. Таима̄гыс ань ма̄хум палт о̄лыглан та̄рвит ос пилыщмаӈ тэ̄лат акванпотыртахтым по̄хан ла̄квтуӈкве патыяныл. Лю̄ль пищит о̄щнэ хо̄тпат То̄румн хунь агтэ̄гыт, ёмас номтыл о̄лэ̄гыт. Тувыл мо̄т ха̄щтал агт тотнэ ма̄хум палт ул вос ликмысыт. Та̄нанылн ань нё̄туӈкве э̄ри, лю̄ль пищаныл хот вос ёрувлыяныл. Ты номтыл ань акванатхатыглам хо̄тпат ты э̄лаль о̄луӈкве патэ̄гыт, ёмас тэ̄лаг е̄мтнэ мус та̄н э̄лаль аквъёт тах ва̄рияныл.

1132 2016. 09. 22. Людмила Теткина

Таёжный па̄вылт о̄лнэ нэ̄ Ты та̄л лӯпта э̄тпос Югорск ӯст по̄хат ня̄врамыт ӯщлахтын ма̄т «Таёжные знания коренной Югры» нампа ханищтап о̄лыс. Советский ос Ха̄льӯс районыгт, Ханты-Мансийск ос Сургут ӯсыгт о̄лнэ ма̄ньщит тот акванатхатыгласыт. Хум хо̄тпат ня̄врамыт ӯщлахтын ма̄т сумъях ӯнттысыт ос ё̄рнкол тӯщтысыт. Нэ̄ хо̄тпат ос са̄сныл са̄всыр хусапыт ва̄рсыт, ма̄ньщи супыт ос яныг хасап ю̄нтсыт. Ты ханищтап рӯпитан порат тот ам акв нэ̄ ёт ва̄йхатасум, тав таме Елена Хаматнурова. Тав оматэ Евдокия Дунаева ма̄ньщи нэ̄г о̄лыс, а̄тятэ Хайдарян Хужахметов башкир хо̄тпа. Елена Советский район Таёжный па̄вылт о̄лы. Тав ла̄выс, тав о̄выл щёс тамле ханищтапын ёхталас. Тамле тэ̄ла таве̄н сака мӯстыс. Елена ла̄выс: «Ханты-Мансийск ӯст округ Думат рӯпитан ма̄ньщи нэ̄ Оксана Рыжкова ты ва̄рмаль урыл а̄нум потыртас ос ма̄щтырлаӈкве ханищтахтуӈкве тыг во̄выстэ. Ань телевизор хосыт ва̄тихал суссылтаве, ос газетат хансыглаве – тамле ханищтапыт ос ялпыӈ хо̄талыт округ янытыл соссаӈ ма̄хум ма̄гсыл акваг ва̄рыглавет. Ма̄н о̄лнэ ма̄вт тамле тэ̄ла о̄выл щёс о̄лыс, тыи ма̄гсыл тамле ханищтапын ялуӈкве та̄ра ка̄сащасум. Ам Советский район Таёжный па̄вылт самын патсум, тот яныгмасум. Школан миннэ порам хунь ёхтыс, Советский ӯсн ке̄тве̄сум, тот интернатыт о̄лсум. Нёлолов класс мус тот ханищтахтасум, тувыл Ивдель ӯс школа а̄стлаӈкве ке̄тве̄сум. Ты юипа̄лт акв та̄л та ӯст маснут ю̄нтнэ нэ̄г ханищтахтасум ос тувыл яныгмам па̄влумн ювле ёхтысум. Акв та̄л маснут ю̄нтнэ нэ̄г рӯпитасум. Тувыл омам а̄гмыл е̄мтыс, пӯльницан пинвес. Ле̄ккарн ла̄вве̄сум, омав щар ё̄р та̄л хультыс, а̄гме сака та̄рвитыӈ, пӯсмалтаӈкве ат ве̄рмаве. То̄нт омам а̄нум ла̄выс, а̄тям Башкирия ма̄т о̄лы, пищмал вос хансылум ос тыг вос во̄виньта̄лылум, тав ётэ ва̄щинтахтуӈкве вос ёхталы. Ща̄нягума̄щагум киттыгминасы̄г, хунь ам иӈ ма̄нь ня̄врамыг о̄лсум, тыи ма̄гсыл а̄тям аты ва̄щиньтаслум. Омам хунь а̄гмыл е̄мтыс, ам 20 та̄лум то̄влыс. А̄тям пищма хунь ловиньтастэ, та̄ра ёхтыс. Омам таве ка̄саластэ, улпыл, сыме̄т ёмас е̄мтыс, э̄лаль о̄луӈкве ё̄р хо̄нтыс, пусмалтахтас. Ты юипа̄лт а̄тям Башкириян ме̄наме̄н о̄луӈкве во̄всаге. Ма̄н пуссын аквъёт тув минасӯв. Тот ам са̄сныл сувенирыт ва̄руӈкве ханищтахтасум, тувыл ремёсла центрыт рӯпитасум. Та ма̄т о̄лнэ ма̄хум ос пе̄с йис та̄гыл са̄сныл са̄всыр хусапыт, а̄нысупыт ва̄рсыт. Ань ты мус ма̄нь па̄вылквет о̄лнэ ма̄хум тамле утыт са̄всыр тэ̄нут о̄ньще̄гыт. Башкирия ма̄т са̄сныл са̄всыр пормасыт мощ мо̄т щирыл ва̄рияныл. Са̄сныл са̄всыр нё̄тнэ а̄ныт, сувенирыт ва̄руӈкве а̄нумн мӯстыс, рӯпатам сака э̄руптаслум. Та ма̄т лов та̄л о̄лсӯв. Тувыл пуссын аквъёт ювле Таёжный па̄вылн о̄луӈкве ёхтысӯв. Омагума̄тягум па̄вылт кол ӯнттысы̄г, тувыл во̄раим ос хӯл а̄лыщлым акваг яласасы̄г. Ты та̄л ма̄ньполь э̄тпост омам а̄тимыг е̄мтыс, а̄тям такке̄т хультыс. Тыг ювле ёхтумув порат ам па̄вылт ла̄пкат тэ̄нут тыналам рӯпитасум. Ань Толя ма̄нь пыгум ёт юн о̄лэ̄гум. Па̄вылт рӯпата щар а̄тим. Ты э̄лыпа̄лт Таёжный па̄вылт леспромхоз о̄лыс, па̄влыӈ мир пуссын тот рӯпитас, тувыл организация лаппантвес, ма̄хманув рӯпата та̄л та хультсыт. Ты ханищтапыт ам нэ̄квет ёт ма̄ньщи супыт ос хасап ю̄нтсум. Ты э̄лыпа̄лт тамле маснут ам ат ю̄нтыгласум. Ам ма̄ниг хунь о̄лсум, ма̄н ётув ане̄квав о̄лыс. Таве ам ёмащакве номилум, ма̄ньщи супыт ос са̄в мо̄т маснут ю̄нтуӈкве тав сака ха̄сыс. Ане̄квам по̄хыт о̄лым, ам ма̄ньщи ла̄тыӈ ёмащакве ханищтаслум. Ляпа рӯтанум пуссын ма̄ньщи ла̄тӈыл потыртаӈкве ха̄сэ̄гыт. Тыи ма̄гсыл ща̄нь ла̄тыӈ ат ёрувлылум. Оля а̄квум ще̄мьятэ ёт Таёжный па̄вылт о̄лы. Соня ос Марина а̄квагум во̄рт о̄лэ̄г, па̄вылн ва̄нтлуӈкве щар ат ка̄саще̄г».

1132 2016. 09. 22. Людмила Теткина

Тав о̄патэ Сукыръяныл о̄лыс Ка̄сыӈ та̄л туи порат о̄йттур э̄тпост соссаӈ ма̄хум Нефтеюганский район «Сказка» нампа ӯщлахтын ма̄н ма̄ньха̄пыл касуӈкве во̄виньта̄лавет. Ты та̄л округ янытыл яныгса̄т арыгкем э̄лумхо̄лас касуӈкве тув акванатхатыгласыт. Ялпыӈ хо̄тал о̄лум порат ам Зоя Николаевна Молданова ёт ва̄йхатыгласум. Тав ханты супыл масхатым о̄лыс, тамле суп Ямал ма̄т о̄лнэ соссаӈ ма̄хум о̄ньще̄гыт. Ам таве китыгласлум, тав ма̄ньха̄пыл касуӈкве Ямал ма̄ныл ёхтыс? Тав ла̄выс: «Ам Ямал ма̄т Шурышкарский район Овгортыт самын патсум. 29 та̄л Сургутский район Сытомино па̄вылт о̄лэ̄гум. О̄йкам Василий Афанасьевич Молданов мо̄т яныгхо̄тпат халт тыт касы, ам нас пӯмащ ма̄гсыл тав ётэ тыг ёхтысум. Ам ань пенсият о̄лэ̄гум, ты э̄лыпа̄лт са̄в та̄л па̄выл клубт рӯпитасум. Ма̄н па̄влувт тамле касыл о̄с щё̄пита̄лыгласӯв. О̄влэ̄т соссаӈ ма̄хманув та̄нки халанылт ма̄ньха̄пыл касуӈкве во̄виньта̄лсанӯв. Тувыл Сытомино па̄вылт о̄лнэ ма̄хум акваг ла̄вуӈкве патсыт, манрыг туп ма̄нки акванатхатыглэ̄в ос мо̄т мирыт тув ат во̄виньта̄лыянӯв. Ань тамле касыл ос о̄йттур э̄тпост щё̄пита̄лаве, ка̄сыӈ э̄лумхо̄лас ма̄ньха̄пыл касуӈкве тот ве̄рми». Зоя Николаевна о̄йкатэ щирыл рӯтанэ Белоярский район Касум па̄вылныл о̄лэ̄гыт. Ща̄нягеа̄щаге ос хосат та̄гыл Сургутский районын о̄луӈкве ва̄нтласы̄г. Та ма̄ныл ёхтум ханты ще̄мьят Сенгеповыт, Молдановыт, Рандымовыт пуссын Ляма я̄ ва̄та хосыт о̄лсыт. Тувыл та̄н Сытомино па̄вылн пуссын о̄лмыгтасыт. Василий Афанасьевич Белоярский район Касум па̄вылныл рӯтанэ ма̄ньха̄пыл касуӈкве о̄с ёхталасыт, та̄н ётаныл ялпыӈ хо̄талт ва̄щиньтахтас. Зоя Николаевна ос Ямалныл ёхталам ма̄хум ёт тот ва̄йхатас. Ты урыл тав ла̄выс: «Ты ялпыӈ хо̄талт ма̄хум хӯл, пил ос мо̄т тэ̄нут тыналасыт. Акв палаткат Ямал ма̄ныл ёхтум ма̄хум са̄всыр тэ̄нут ос пормас тыналасыт. Та̄н Приуральский районныл тыг ёхталасыт. Ам ка̄сыӈ та̄л Ямал ма̄н рӯтанум па̄лт мӯйлуӈкве ялантэ̄гум. Тот о̄лнэ ханты ма̄хум пе̄с йис щирыл о̄лэ̄гыт, пуссын ща̄нь ла̄тӈыл потыртэ̄гыт. Амки о̄парищ намум Ептина. Ща̄нягума̄щагум потырталсы̄г, пе̄с порат рӯтанув Ха̄льӯс район Сӯкыръя па̄вылт о̄лсыт. О̄пам ма̄ньщи хо̄тпаг о̄лыс. А̄с я̄н хӯл алыщлым яласаманыл Ямал ма̄т о̄луӈкве хультыс. Ань Ха̄льӯс районт Яптиныт о̄лэ̄гыт, улпыл, ам рӯтанум. Сытомино па̄вылт о̄лнэ ханты ма̄хум ла̄тӈаныл ёмащакве ханищтаслум. Ма̄нки культурав урыл акваг пӯмщалахтасум, клубт рӯпитасум, соссаӈ ма̄хум ма̄гсыл ялпыӈ хо̄талыт акваг ва̄рыгласӯв. Па̄влыӈ мир ма̄гсыл округувт янытлан хо̄тал кастыл концерт, Ӯринэ̄ква хо̄тал, Витхо̄н пӯрлахтан хо̄тал ос са̄в мо̄т ялпыӈ хо̄тал щё̄пита̄лсӯв. Ма̄ньлат хо̄тпат тув акваг во̄виньта̄лсанӯв. Са̄всыр мирыт халт о̄лым, та̄нки пе̄с йис ва̄рмаляныл нупыл щар ат суссыт. О̄влэ̄т а̄гитпыгыт тамле ялпыӈ хо̄талын ёхталаӈкве щар ат ка̄сащасыт, э̄ссамтасыт. Ща̄нь ла̄тӈыл потыртаӈкве о̄с ат тахсыт. Ань таи ёмас, ма̄ньла̄т хо̄тпанув ос ня̄враманув культурав урыл пӯмщалахтуӈкве патсыт. Ялпыӈ хо̄талыт о̄лыглан порат пуссын ёхталэ̄гыт». Зоя Николаевна ла̄выс, Сургутский район Сытомино па̄вылт о̄лнэ хантыт пе̄с йис ва̄рмаляныл ат ёрувлыяныл, пе̄с ма̄хум хольт ялпыӈ ма̄н пӯрлахтуӈкве ялантэ̄гыт, та̄нки То̄руманыл нупыл по̄йкще̄гыт. Ань яныгхо̄тпат ма̄ньлат пыгыт ты урыл потыртыяныл ос суссылтыяныл, таит ты ва̄рмалит урыл о̄с вос ва̄гыт.

1132 2016. 09. 22. Светлана РОМБАНДЕЕВА

Тюмень ӯст о̄лнэ ма̄ньщи хо̄тпав Ма̄ньщи нэ̄ Галина Павловна Проскурякова 1970 та̄л па̄сныл Тюмень ӯст о̄лы. Тот тав соссаӈ мир ма̄гыс «Миснэ» нампа культурный фонд ва̄рыс, я̄нас колнакыл майвес. Ты о̄вылтыт тав тох ты потыртас: – Тюмень ӯст са̄всыр мирыт о̄лэ̄гыт – хатанит, белорусыт, украинцыт, ка̄сыӈаныл такви организация о̄ньщи, пуссын акванатхатыглэ̄гыт, культураныл но̄хво̄рмалтыяныл, аквъёт мӯйлэ̄гыт. Ам о̄с тох о̄луӈкве сака тахсум, сымум ща̄ргыс, манрыг ма̄н, ма̄ньщи ма̄хум, акван ат хо̄нтхата̄лэ̄в. Кӯщаит палт ялсум, ты урыл потыртасум, рӯпитан ма̄гыс колхусап во̄всум. Ялпыӈ хо̄талт ма̄н, ӯст о̄лнэ соссаӈ ма̄хум, акванатхата̄лэ̄в – Хӯл алыщлан ма̄хум ялпыӈ хо̄тал, Ӯринэ̄ква хо̄тал ос Тылащ поры хо̄тал порат мӯйлэ̄в. Ма̄н, нэ̄ хо̄тпат, матыр саге̄в, сакныл са̄всыр пормасыт хартэ̄в, супыт ю̄нтэ̄в. Ма̄ньщи э̄рыг ва̄нэ хо̄тпа – э̄рги, ща̄й ае̄в, ӯнлахо̄лэ̄в, ма̄нти ла̄тӈувтыл потраме̄в. Выставкат о̄лыгланэ̄ныл порат ка̄тыл ва̄рум пормасанув тув тотыглыянув. Ты колувн ловмантем хо̄тпа акваг ёхталы. Ты коныпал ма̄хманув о̄с о̄лэ̄гыт, ос пе̄с йис о̄лупсал сака мат ат пӯмщалахтэ̄гыт. Ялпыӈ хо̄талыт порат тай ёхталэ̄гыт, мӯйлэ̄гыт. Ты та̄л я̄ӈк на̄тнэ э̄тпост ма̄н о̄парищанув пе̄с хурит но̄хвуйлысанув, ӯс мирхалт «Бессмертный полк» лё̄ӈхыт ё̄мсув. – Галина Павловна, наӈ хо̄т самын патсын? – Ам Мулигорт па̄вылт 1951 та̄лт я̄ӈк на̄тнэ э̄тпос 19 хо̄талэ̄т самын патсум. Омам колхозт мис поснэ нэ̄г о̄лыс. Ма̄н па̄вылте̄в сака нё̄тнэ, карс ма̄т ӯнлы. Э̄лнаӈ тот школа, ня̄врам садик, ла̄пка ос клуб о̄лыс. Ма̄хум пуссын хӯл алыщласыт, во̄раясыт. Хунь колхозыт аквантӯлве̄сыт, па̄выл ма̄хум мо̄т ма̄н ва̄нтлысыт. Ма̄н колта̄глув Восыӈтӯрн о̄лмыгтас. Э̄лаль ам Перегребный па̄вылт ханищтахтасум, интернатыт о̄лсум. Татем ёмас интернат о̄лыс, тот ма̄н маснутыл майлувесӯв, мӯсхал щирыл тыттувесӯв, о̄щвесув. Мощ ётылнуве Восыӈтӯрт ханищтахтуӈкве патсум. Ам Наталя увщи о̄ньще̄гум, тав ань Восыӈтӯр па̄вылт о̄лы, ня̄враманэ пуссын колта̄глыӈыг е̄мтсыт. Андрей каӈкум хосат а̄тимыг е̄мтыс. Ам хунь ат та̄лум то̄влыс, омам ю̄нсхатан машина ёвтыс. Такви мо̄рсыӈ порат ю̄нтыс, ам ос ма̄ньта̄гыл тот ю̄нтуӈкве патсум. О̄влэ̄т нас матыр ю̄нтсум, простынит та маныр, тувыл супыт ю̄нтуӈкве патсум. Нё̄лолов класс а̄стлынэ̄м кастыл амтина̄нум выпускной суп ю̄нтсум. Та порат ам ты а̄гирищит ёт ханищтахтасум – Люда Шевырина, Оля Сюмина, Вера Шадрина, Нина Самбиндалова, Люба Монина ос Света Шесталова. Ме̄н Вера Каратаева ёт Тюмень ӯсн минуӈкве номылматсуме̄н. Ань хӯлысламе̄н, тот ю̄нсхатан нэ̄г ханищтахтан училище о̄лы. Э̄рнэ нэ̄паканме̄н тув ке̄тсанаме̄н, мощ ётылнуве ме̄нти минасаме̄н. Тув ань ёхтысаме̄н, училищаме̄н хо̄нтысламе̄н, ос нэ̄паканаме̄н а̄тимыт, тув мус ат та ёхталасыт, хо̄т лё̄ӈхыт хотталь та тыпсыт. Ме̄н ювле та йисуме̄н. Ха̄льӯст ам лов класс а̄стласум. Школа директорыг то̄нт Севастьянов о̄йка рӯпитас, тав а̄нум китыгластэ, эрыӈ Ленинград ӯсн Герцена нампа институтн ханищтахтуӈкве минэ̄гум, тот, ла̄ви, ма̄ньщи ос ханты ня̄врамыт ханищтахтэ̄гыт. Ам рущ ла̄тыӈ ос литература ханищтаӈкве сака ат тахсум, ос математика ман физика тай э̄руптасум. Ща̄нь ла̄тӈумтыл потыртаӈкве ха̄ссум, омав ма̄ньщи ос ханты ла̄тӈыл потыртас, ма̄н о̄с кит ла̄тыӈ ва̄сув. Тув минуӈкве ат ка̄сащасум, Людмила Шевырина ёт Тюмень ӯсн минасаме̄н, № 16 текстильщикыт училищан поступитасме̄н, о̄лнэ колнакыл майвесаме̄н. Тот ханищтахтуӈкве ме̄наме̄н сака мӯстыс. Са̄всыр йӣквыт ханищтасме̄н – венгерский, украинский, татем йӣквсуме̄н, коцертытт выступайтасме̄н. Училищаме̄н а̄стламуме̄н юипа̄лт, хунь комвольный комбинатыт рӯпитасме̄н, ме̄н о̄с акв тох концертыт ёт яласасме̄н, йӣквсуме̄н, э̄ргысаме̄н. Сака ка̄ркам а̄гииг о̄лсуме̄н. Людмила ань о̄с Тюменьт о̄лы, ще̄мьяӈыг е̄мтыс, ме̄н ва̄тихал ва̄щинтахта̄лыме̄н, юртыӈыщ о̄лыме̄н. Ам акв пыг янмалтасум. 1988 та̄лт ам юилялантым Москва ӯст о̄лнэ Текстильный институтыт ханищтахтуӈкве о̄вылтахтасум, 1993 та̄лт таве а̄стласлум. Та порат ӯсувт Комитет по делам национальностей ва̄рвес. Ам хӯнтамласлум, тув ань соссаӈ хо̄тпа рӯпитаӈкве кинсаве. Тув минасум, нэ̄паканум вуйве̄сыт. Ётыл во̄вавем, ла̄вегыт, ёхталэн, тыт рӯпитэн. Тув та патхатасум. Та порат «Спасение Югры» ассоциация пӯсвес, соссаӈ мир о̄лупса но̄хво̄рмалтаӈкве патвес. Ханты-Мансийск ӯст увщим а̄гитэ о̄лы, Маина Ефимовна, тувыл ос рӯтум Альбина Николаевна Мехнина (а̄ги о̄парищ наме Шесталова). Тэ̄н палтэ̄н мӯйлуӈкве ёхтысум, тыт мощ о̄лэ̄гум. Ань потруме̄н та оигпас. Галина Павловна хо̄тпа нупыл сымыӈ нэ̄, мӯтраӈ э̄лумхо̄лас. Такви ма̄тэ, рӯтанэ тав сака э̄руптыянэ, янытлыянэ. Галина Павловнан ам са̄в ёмас, сымыӈ ла̄тыӈ ла̄вегум. Пуста̄гыл вос о̄лы, На̄й-О̄тыранэ̄н вос ӯргалаве!

1132 2016. 09. 22. Светлана РОМБАНДЕЕВА

Варъёган па̄вылт о̄лнэ хо̄тпа Ты фестиваль е̄ӈта пасан ва̄татэ̄т акв яныгхо̄тпа Павел Янчевич Айваседа потыртас. Ты о̄йка «Почётный житель Нижневартовского района» намыл маим о̄лы. Такви мире ма̄гыс тав са̄в ёмас тэ̄ла ва̄рыс, ань тыхо̄тал мус рӯпиты. На̄н ань э̄лаль тав потре ловиньтэлы̄н. – Ам ща̄нь ла̄тыӈ урыл ла̄вуӈкве таӈхе̄гум. Хо̄тпа такви ла̄тӈе ат те ва̄гтэ, тав ханты манос ма̄ньщи хунь – тав рущ э̄лумхо̄лас. Интернатыт ханищтахтамум порат, амти ла̄тӈумтыл потыртамум ма̄гыс воспитатель э̄кван колса̄мын ке̄тыглаве̄сум, тот ань акв щё̄с вос лю̄ле̄гум, мольщаӈум масылум те – кит щё̄стем лю̄легум, ня̄рагум масыягум – хӯрум щё̄с лю̄легум. Ань ос ня̄врамыт ё̄рва̄гыл ханищтавет, са̄выӈпа̄лэ та̄нти ла̄тӈаныл ат ва̄ганыл. Ма̄н хотьютн хунь ханищтавесӯв, ла̄тӈув ма̄нти ханищтаслӯв. Ам омам ханты нэ̄ о̄лыс, а̄щум – ё̄рн хум. Кит ла̄тӈыг амти ханищтасагум. Округт о̄лнэ ё̄рн ма̄хум ханты ла̄тӈыл потыртаӈкве пуссын ха̄сэ̄гыт. Ань ня̄врамыт ща̄нь ла̄тӈыл ханищтан ма̄гыс ёмас хо̄тпат вос о̄лнувыт. Ханты ма̄хум халт тамле ханищтан хо̄тпат о̄лэ̄гыт, ты Евдокия Андреевна Нёмысова, Еремей Данилович Айпин, Владимир Егорович Енов. Атпантем та̄л мины, та сыс тах ла̄тӈув хотталь со̄йми, ма̄н пуссын рущиг е̄мтэ̄в – тах акв соссаӈ хо̄тпа ат хульты. Е̄ӈта пасан ва̄тат потыр оигпам юипа̄лт ам Павел Янчевич ёт потрамасум. Тав Нижневартовский район Варъёган па̄вылт самын патыс, о̄йттур э̄тпос 20 хо̄талт 1941 та̄лт. Самын патум па̄влэ̄т яныгмас, нилыт класс мус ханищтахтас. То̄нт атыт класс яныт ня̄врамыт пуссын Сургут ӯсн тотыглымат, тот э̄лаль нёлолов манос лов класс мус ханищтахтасыт, интернатыт о̄лсыт. Павел Янчевич та та̄ланэ о̄вылтыт тох ты потыртас: – Та порат ня̄врамыт округ янытыл са̄всыр па̄влытныл пуссын Сургут ӯсн тотыглаве̄сыт – Самаровский, Октябрьский ос Ха̄льӯс районытныл, Ларьяк па̄вылныл о̄лсыт. Акв пыг Чульчамы па̄вылныл ханищтахтас, ты па̄выл ань а̄тим. Ам тот нёлолов класс а̄стласум, тувыл Ханты-Мансийск ӯст лесникыг ханищтахтасум. Училище а̄стламум юипа̄лт акв э̄тпос туп рӯ- питасум, армиян вуйве̄сум. Камчатка ма̄т морфлотыт хӯрум та̄л лусытасум. Армия юипа̄лт ам Василий Васильевич Бахилов ёт рӯпитасум, та порат тав Сургутский райком партият первый секретариг рӯпитас. Во̄рыӈ ма̄ уральтан инспекторыг паттуве̄сум. Э̄тпостем туп рӯпитасум, командировкан ке̄тве̄сум, тот ань ла̄глум хотняхсатас. Яты, ань хумус рӯпитаӈкве патэ̄гум. Тувыл кӯщай о̄йка ам нуплум ла̄ви: «Тащиӈк наӈти па̄влын минэн, тот Партийный организация секретариг рӯпитэн». Ам тот ва̄т нупыл ат та̄л рӯпитасум. Тувыл Василий Семёнович Сондыковын Нижневартовский райисполкомын рӯпитаӈкве во̄вве̄сум, ос тув патхатасум, юил ялантым рӯпитасум, тувыл пенсиян минасум. – Павел Янчевич, наӈти колта̄глын о̄вылтыт аквкит ла̄тыӈ ла̄вен. – Ма̄н колта̄глувт лов арыг ня̄врам о̄лыс. А̄щум омам ёт акванминаме̄н э̄лыпа̄лт э̄ква о̄ньщас, тэ̄н са̄в ня̄врам янмалта̄лсыг. А̄тям ос омам хунь аквано̄лмыгтасы̄г, ягпыганум ос яга̄гиянум пуссын ще̄мьяӈыг о̄лсыт. Ётылнув ам самын патсум, юрт ня̄врамыг о̄лэ̄гум, аквам иӈ ма̄нь та̄гыл а̄тимыг е̄мтыс. Ам ань хӯрум ня̄враманум о̄лэ̄гыт. Маргарита а̄гим Варъёгант ня̄врамыт ханищтым рӯпиты. Аркадий пыгум о̄с ханищтан хо̄тпа. Колта̄глэ̄тыл Ямал ма̄т Тарко-Сале ӯст о̄лы. Наташам о̄влэ̄т Ханты-Мансийск ӯс колледжит учителиг ханищтахтас, мощ ётылнуве ос юридический факультет а̄стлас. Та̄н оманыл, ам са̄р э̄квам, наме Татьяна Степановна о̄лыс, а̄ги о̄парищ наме Сардакова. Ме̄н школат аквъёт ханищтахтасме̄н, тувыл акванминасаме̄н, ня̄враманме̄н самын патсыт. Тав сым а̄гмыл хартыс, тоха та а̄тимыг е̄мтыс. Ам амти па̄влумт о̄лэ̄гум, мо̄т э̄ква тотсум, наме Елизавета Даниловна Василькова. Ты Еремей Данилович Айпин тав яныг увщитэ. Тав ты а̄пщитэ янмалтастэ, акваг нё̄тыстэ. Э̄квам ёт ме̄н ва̄т нупыл ат та̄л ты о̄лыме̄н. Павел Янчевичин потре ма̄гыс ам пӯмащипа ла̄тыӈ ла̄всум. Э̄кватэ̄нтыл халэ̄нт юртыӈыщ ос э̄рпыӈыщ о̄лэ̄г, хо̄тпа нупыл сымыӈ э̄кваго̄йкаг. Пуста̄гыл вос о̄лэ̄г, На̄й-О̄тыранэ̄н вос ӯргалаве̄г!

1132 2016. 09. 22. Светлана РОМБАНДЕЕВА

Пе̄с пормасыт суссылтан кол Нижневартовский район Мегион ӯст о̄лнэ МАУ «Региональный историкокультурный и экологический центр» кол Краеведческий музей о̄ньщи. Ты центр 1987 та̄лт рущ нэ̄н Виктория Ивановна Сподинан ва̄рвес. Та порат тав школат история учителиг рӯпитас. Ты нэ̄ ань Ханты-Мансийск ӯст А̄сугорский институтт кӯщаиг о̄лы. Экоцентр кӯщаиг Руслана Богдановна Галив тав паттувес. Краеведческий музеин округ янытыл о̄лнэ соссаӈ ма̄хум ка̄тыл ва̄рум маснутаныл, са̄всыр пормасаныл ос алыщлапаныл акванатым о̄лэ̄гыт. Тот рӯпитан хо̄тпат яныг тэ̄ла ва̄регыт – наука щирыл рӯпитэ̄гыт, нэ̄пакыт та̄ратэ̄гыт, пе̄с йис пормасыт акванатэ̄гыт, суссылтапыт ва̄рыглэ̄гыт. Ты коныпал тот ханищтан хо̄тпат ма̄гыс сыресыр курсыт ос семинарыт о̄лыглэ̄гыт, школат ханищтахтан ос садикын ялантан ня̄врамыт ма̄гыс я̄нас суссылтапыт щё̄пита̄лавет.

1132 2016. 09. 22. Валентина УЗЕЛЬ

Ма̄щтырлан соссаӈ ма̄хманув Марина Викторовна Самсонова Сургут ӯст о̄лы, тав а̄ги опарищ наме Кугина, Тагт павылт яныгмас. Ань соссаӈ мир пе̄с пормасыт ю̄нтнэ ос ма̄щтырлан колт кӯщаиг рӯпиты. Музейколаныл ӯнлын ма̄тэ рущ ла̄тӈыл тох ла̄ваве – «Старый Сургут». Тот са̄всыр колыт ӯнттымат, ка̄сыӈ колт матыр я̄нас пӯмащ суссылтаве. Рӯпататэ урыл Марина Викторовна тох потыртас. 2000 та̄лт рӯпитаӈкв тув ёхтыс, хо̄тхуйплов та̄л тот рӯпиты. Ань та̄н хо̄т соссаӈ хо̄тпа аквъёт рӯпитэ̄гыт, ат хо̄тпа ма̄щтырыг о̄лэ̄гыт ос акв методист хо̄тпа. Матах та̄л минам порат та̄н кӯщаитн ла̄вве̄сыт, соссаӈ мир ялпыӈ хо̄талыт музей ӯнлын ма̄т но̄х вос ялтуптыяныл, ялпыӈ хо̄талыт янытлан ма̄гыс ӯст о̄лнэ ма̄ньщи, ханты ос ё̄рн мир та̄н палтаныл акваг вос ёхталэ̄гыт. Тувыл ма̄хманув рӯпитаӈкв та о̄вылтахтасыт, ка̄сыӈ та̄л туя порат «Ӯринэ̄ква хо̄тал» янытлаӈкв патсыт. Тув порат ос ма̄ньха̄пыл каснэ хо̄тал акваг ва̄рыглэ̄гыт. Ань юио̄выл хӯрмит та̄л Э̄тпос яныгман порат «Тылащ поры» нампа пӯрлахтын кан ва̄ре̄гыт. Ӯст о̄лнэ ма̄хум ты ялпыӈ хо̄талыт о̄лнэ порат тув акваг ёхталэ̄гыт, соссаӈ хо̄тпат тэ̄нут ёттотэ̄гыт. Сытамнув ма̄т мощ пӯрлахтэ̄гыт. Ма̄щтыр хо̄тпа ос такви ю̄нтум пормасанэ тув ёттотыянэ. Пасаныл, ӯласыл миве, тот ӯнттавет, тот та тыналахтэ̄гыт. Тох та̄нти ма̄гсыланыл мощ олнло̄мт сэ̄лэ̄гыт. Ма̄нь таквс э̄тпос ос рӯтыг о̄лнэ финноугорский мирыт янытлавет, та̄н ты та̄л ты ялпыӈ хо̄тал о̄с тах ва̄ре̄гыт, акван тах о̄с атхатэ̄гыт. Тот ма̄ньщи, ханты ос ё̄рн ма̄хум пе̄с о̄лупса, пе̄с ва̄рмалит, пе̄с накыт урыл потыртаӈкв патэ̄гыт. Ань са̄в мир та̄н палтаныл ёхталы, ня̄враманыл, апганыл ётво̄вияныл. Ма̄хум та̄нти нас мӯйлуӈкв о̄с ат таӈхе̄гыт, матыр ва̄руӈкв ман касуӈкв ань сака ка̄саще̄гыт. Ма̄ньха̄пыл каснэ ва̄рмаль порат са̄в хо̄тпа тув хасхаты, ка̄сыӈе касуӈкв таӈхи. Ювле хультум та̄л хо̄тпанахтем хо̄тпа касыс. Ты э̄лыпа̄лт туп хусахтем хо̄тпа та̄нти халанылт кассыт. Ань ма̄ньлат соссаӈ ня̄врамыт сака ат э̄ссамтэ̄гыт, касуӈкв о̄с сака таӈхе̄гыт. Ты касыланыл музей ляпат овнэ Сайма нампа я̄ ва̄тат ва̄рыглаве. Ты я̄ па̄хвыӈ, а̄ти сака милыӈ. Музейколт рӯпитан ма̄хманув школатт ханищтахтын ня̄врамыт ёт рӯпитаӈкв о̄с ла̄вве̄сыт. Са̄т сыс тит щёс та̄н палтаныл ня̄врамыт ёхталэ̄гыт. Тит группаг урттым о̄лэ̄гыт, ка̄сыӈе̄т титхуйплов ня̄врам. Са̄внув ня̄врам виӈкв ат ро̄ви. Коланыл а̄ти сака яныг, пуссын ат ла̄пе̄гыт. Ты ня̄врамыт ма̄гыс та̄н са̄всыр пӯмащ ва̄ре̄гыт. Акв хо̄тал та̄н са̄всыр мо̄йтыл мо̄йтавет, мо̄тыт хо̄тал ос о̄лнэ ма̄в урыл потыртавет. То̄ва ня̄врамыт ма̄гыс о̄с са̄всыр ханищтапыт ва̄рыглавет. Хотьют матыр ю̄нтуӈкв ман ма̄щтырлаӈкв те таӈхи, таве̄н олн ойтуӈкв э̄ри. Та̄н классыл тув ёхталэ̄гыт, соссаӈ мир пе̄с о̄лупса урыл потыртавет, хотьютаныл ма̄ньщи ман ханты супыл, мольщаӈыл ман нуй сахил по̄слахтуӈкв те ка̄сащи, тав та по̄слахты, ос туп тав олн вос ойты. Ань рущит ман мо̄т хо̄тпат тох по̄слахтуӈкв сака таӈхе̄гыт. Ты э̄лыпал та̄лытт тув ёхталан мӯйлын ма̄хум ща̄ил айтве̄сыт, хӯл исмитыл па̄йтыглаве̄сыт. Ань ма̄хум тыттуӈкв ат ро̄ви, матыр ул вос е̄мты. Та̄л сыс ты яныг ӯст са̄всыр ялпыӈ хо̄талыт о̄лыглэ̄гыт. Ка̄сыӈ туи «Соцветие» нампа фестиваль ва̄раве, тув са̄всыр мирыт атхатыглэ̄гыт. Ка̄сыӈ мир такви йӣкванэ суссылты, э̄рганыл э̄ргияныл. Та̄нти тэ̄нутаныл па̄йтыяныл, ка̄сащан хо̄тпат пуссын та тыттыяныл. Музейт рӯпитан соссаӈ ма̄хманув тув о̄с во̄выглавет, та̄н ос маныр ха̄сэ̄гыт, маныр ве̄рме̄гыт, пуссын тот та суссылтыяныл. Ӯст о̄лнэ соссаӈ ня̄врамыт йӣквуӈкв ос э̄ргуӈкв ханищтан ма̄гыс та̄наныл акванатсаныл. То̄ват «Лӯима̄ ханса» коллективн ялантэ̄гыт, та̄н ань йӣквуӈкв сака ёмащакв ханищтахтасыт. Мо̄т коллективаныл о̄с тох ла̄ваве – «А̄с нэ̄». Тот нэ̄квет э̄ргыт э̄рге̄гыт, йӣкве̄гыт. Ань та̄н ва̄вет. Хо̄т матыр ялпыӈ хо̄тал те ва̄раве, тув та во̄вавет. Марина Викторовна тох ла̄выс, ты йист рӯпитаӈкв та̄рвитыӈыг е̄мтыс, ань ка̄сыӈ хо̄тпа я̄нас планнэ̄пакыл хансаве, акв э̄тпос сыс маныр рӯпата таве̄н ва̄руӈкв э̄ри. Ты нэ̄пак щирыл тав вос рӯпиты. Ма̄щтырлан ма̄гыс то̄рыл, нуйил, сэ̄тапыл пуссын мивет. Пормас хунь ю̄нтаве, тав рущ ма̄нь ла̄пкан тотаве, тот тыналаве. Тувыл ва̄рум рӯпатаныл урыл отчётнэ̄пак хансуӈкв э̄ри, хо̄тпа э̄тпос сыс рӯпататэ ва̄рыстэ ман а̄ти. Ты ма̄ньщи кӯщай нэ̄кве ос тав ётэ рӯпитан ма̄хманэ пуссын пуста̄гыл вос о̄лэ̄гыт, ма̄щтырлан ма̄гыс са̄в ё̄рыл вос пинавет.

1132 2016. 09. 22. Валентина УЗЕЛЬ

Ю̄нсхатнэ нэ̄ Юлия Антоновна Казанжи Нижневартовский район Аган па̄вылт о̄лы, ремесла центр колт рӯпиты. Тав ма̄щтырланкве сака ха̄сы, кос маснут, кос мо̄т матыр пормас пуссын ю̄нты. Ты колт тав атахтем та̄л рӯпиты, са̄всыр рӯпата ва̄рыс, то̄ванакт ма̄щтырыг вуйлаве, ань тав ос кол ӯрнэ хо̄тпаг тот о̄лы. Рӯпататэ урыл тох ла̄ви, ялпыӈ хо̄талыт хунь о̄лыглэ̄гыт, тав па̄влыӈ ма̄щтырыт ю̄нтум пормасаныл тыналыянэ. Ос э̄типа̄лаг рӯпатан хунь ёхты, то̄нт ты тав ма̄щтырлы, нэ̄мхотьют таве̄н торас ат ва̄ри, таквирот та ю̄нсхаты. Тав а̄ги о̄парищ наме щирыл Казамкина, ща̄нягеа̄щаге сас хантыиг о̄лсы̄г. Тэ̄н Юлия а̄гитэ̄н самын патме порат ты па̄вылн ва̄нтлысы̄г. Ты а̄гитэ̄н школа юипа̄лт тэ̄нут па̄йтнэ нэ̄г ханищтахтас, а̄стламе юипа̄лт юв ёхтыс. Школат мощ рӯпитас. Тувыл хум ва̄рыс, ань хӯрум ня̄врам о̄ньщи. О̄йкатэ ёт титтыгминасы̄г. Ань яныг пыге ва̄т нупыл ат та̄лэ, котиль пыге – ва̄т нупыл акв та̄лэ, пити патта а̄гитэ лов та̄лэ то̄влыс. Такви та̄наныл янмалтыянэ. О̄йкатэ увщитэ палт минас, Юлия ос тав увщитэ ань сас акв о̄парищ намыл о̄лэ̄г. Таитэ наме Любовь Васильевна, тэ̄н ань о̄йкатэ ёт община ва̄рсы̄г, са̄лы ёвтсы̄г, са̄лы ӯрим во̄рт о̄лэ̄г. Туристыг яласан ма̄хум ма̄гыс о̄лнэ колыт ӯнттысы̄г, во̄рн ань са̄в хо̄тпа ёхталы. Яныг пыге̄н мӯй ма̄хум во̄рн тотнэ ма̄гыс ӯсн яланты, тот ля̄льт хо̄нтыянэ, тувыл о̄лнэ ма̄нанылн та тотыянэ. Юлия тэ̄натэ̄н о̄с сака нё̄ты, са̄лы котныл ла̄гыл маснут ю̄нты, са̄всыр сувенир ва̄ри. Люба увщитэ са̄лы суныл яласаӈкв ёмащакв ха̄сы. Хо̄т касыл ва̄раве, тув та мины. Мо̄лты та̄л Ханты-Мансийск ӯсн ёхталас, тыт касыс. Тувыл Когалым ӯст такви ханты ма̄хманэ халт касыс. Тох та аквъёт та о̄лантэ̄гыт, воссыг хоталь ва̄рхатэ̄гыт. Ня̄врамыт янмалтаӈкв ос тыттуӈкв э̄ре̄гыт.

1132 2016. 09. 22. Светлана РОМБАНДЕЕВА

Соссаӈ ма̄хум э̄рнэ нэ̄пак щё̄питасыт Ты э̄лыпал газетат ма̄н Нижневартовский район Мегион ӯст соссаӈ ма̄хманув хо̄нтхатыглапаныл о̄вылтыт хансыгласӯв. Ань потрув э̄лаль мины. Ты «Хатлые» нампа Региональный музейный фестиваль оигпаме э̄лыпа̄лт тот пуӈк тотум хо̄тпат резолюциянэ̄пак щё̄питасыт, акванатхатам мир нупыл ловиньтасаныл. Маныр та̄н тот хассыт, ты урыл ань э̄лаль ловиньтэ̄н. – Ма̄н тыт соссаӈ мирув о̄лупса ос культура о̄вылтыт потыртасув, во̄рыӈ ма̄т о̄лнэ ма̄хманув потраныл хӯнтлысӯв, щар ма̄к э̄рнэ тэ̄лат пуссын нэ̄пакын хассанув, тувыл ты нэ̄пакув щё̄питаслӯв. На̄н ань э̄лаль ма̄н хансум потрув ловиньтэлы̄н: Округ Правительстват рӯпитан ма̄хум, округ культура департаментыт ос округ янытыл о̄лнэ ма̄во̄й но̄хвинэ департаментыт рӯпитан хо̄тпат, таяныт ёмас ва̄ре̄н, номтанув тэ̄лаг е̄мтнэ̄ныл ма̄гыс ма̄навн таи нё̄тэ̄н: 1. Ма̄н о̄лнэ ма̄вт рӯпитан яныг кӯщаит соссаӈ ма̄хманувн э̄рнэ нэ̄паканыл та̄ратаӈкве вос нё̄тэ̄гыт: Ӯй йӣквнэ ва̄рмаль порат э̄ргын э̄ргыт, ханты манос ма̄ньщи хо̄тпат та̄нти ва̄рум э̄рганыл. 2. Округ культура депертамент «Хатлые» Региональный фестиваль окружной намыл вос пинытэ. 3. Ща̄нь ла̄тыӈ ханищтан ос Ӯй йӣквнэ ва̄рмаль ма̄гыс Мегион ӯст о̄лнэ Экоцентрыт я̄нас колнак вос щё̄питаве, тот соссаӈ хо̄тпа нупыл сымыӈ ма̄хум рӯпитэ̄гыт, тувыл ос хо̄тал нэ̄глын е̄рт о̄лнэ ханты ма̄хумн та мус яласаӈкве кӯстыр. 4. МАУ Экоцентр «Югра» нампа Музейноэтнографический ос экологический парке нё̄тмил олныл вос миве. 5. Ща̄нь ла̄тыӈ ханищтан тэ̄ла мӯсхал щирыл нэ̄пакын вос хансаве, ос ма̄к та урыл номуӈкве э̄ри: – ты тэ̄ла ва̄нэ мирхал ма̄т о̄лнэ хо̄тпат ёт ва̄йхатаӈкве э̄ри, та̄н ётаныл рӯпитаӈкве, ла̄тӈанув ос культурав акв ё̄рыл но̄х вос во̄рмалтылӯв; – соссаӈ хо̄тпанув пе̄с йис пормас ос маснут ханищтан тэ̄ла палт мӯсхал щирыл вос вуйхатэ̄гыт, э̄рыг ос мо̄йт, тувыл хорам яктын ва̄рмаль мӯсхал щирыл вос ханищтыяныл, та̄рапаттыяныл. Ты тэ̄ла хосыт тах соссаӈ ма̄хманувн рӯпитаӈкве кӯпнитнувег е̄мты; – Ӯй йӣквнэ ва̄рмаль о̄вылтыт э̄рнэ нэ̄пакыт щё̄питаӈкве э̄ри, ты ва̄рмалюв ма̄гыс акв кол вос о̄ньще̄в; – мо̄йт, э̄рыг ос Ӯй йӣквнэ ва̄рмаль ва̄нэ ма̄хум наманыл ищхӣпыӈ ут хосыт акван вос хансавет, ма̄н о̄лнэ ма̄в янытыл тамле хо̄тпанув пуссын та̄рапаттуӈкве э̄ре̄гыт; – туристыт ма̄гыс яласан лё̄ӈх нэ̄пакын мӯсхал щирыл вос хансаве, та̄н соссаӈ ма̄хманув палт ма̄нь па̄влытын вос ёхталэ̄гыт – Варъёган, Аган, Корлики ос Вампугол, ка̄сыӈ па̄вылт ань музейт о̄лэ̄гыт, ма̄щтыр хо̄тпат ос пе̄с потрыт ман мо̄йтыт ва̄нэ ма̄хум о̄лэ̄гыт; – «Югра многоликая» проект кастыл ма̄навн аквъёт са̄всыр хо̄нтхатыглапыт ос проектыт ва̄руӈкве э̄ри; – со̄ссаӈ мир ща̄нь ла̄тӈаныл ос пе̄с йис пормасаныл, маснутаныл ма̄щтырлан семинарыт ва̄руӈкве э̄ри; – ань яныгман ня̄врамыт ма̄гыс соссаӈ мир о̄лнэ ма̄т ос Экоцентрыт Ӯй йӣквнэ ва̄рмаль о̄вылтыт хо̄нтхатыглапыт вос ва̄рыглавет, ма̄ньлат ма̄хум ты тэ̄ла вос ва̄ганыл. Тамле резолюциянэ̄пак ты ма̄хум щё̄питасыт: округ Дума депутат нэ̄гхумыг Т. С. Гоголева ос Е. Д. Айпин, педагогический наука кандидат Р. Н. Шайхулов, Мегион ӯст о̄лнэ МАУ «Экоцентр» ма̄т научный сотрудникыг рӯпитан нэ̄ А. И. Мингалимова, исторический наука кандидат Т. А. Молданов, МАУ «Экоцентр» кӯщай ва̄ӈын нэ̄ Н. Е. Бренич, экскурсия тэ̄ла палт кӯщаиг о̄лнэ нэ̄ А. А. Горлова ос соссаӈ хо̄тпат – П. Я. Айваседа, С. А. Айпин, Л. Н. Айпин, В. А. Тылчин, А. Д. Казымкина, М. Ю. Казымкин ос мо̄т ма̄хум.

1132 2016. 09. 22. Тамара МЕРОВА

Самын патум ма̄нанылт ёмас ӯщлахтасыт Кондинский район Шугур па̄вылныл кит нэ̄г ля̄ххал ма̄навн ке̄тсы̄г. Тыи Светлана Попова ос Инна Бринстер, тэ̄н сас школат рӯпитэ̄г ос туи ня̄врамыт ёмщакв ӯщлахтан ма̄гыс сыресыр ханищтапыт ос ка̄с ва̄ре̄г. Тот «Ня̄врамыт па̄выл» нампа ӯщлахтын ос пусмалтахтын кол та̄лэтуве рӯпиты. Ань ты о̄вылтыт тэ̄н потыр ты хассы̄г. «Шугурт о̄лнэ а̄гирищитнпыгрищитн «Ня̄врамыт па̄выл» колт матыра̄ти ва̄руӈкве сака мӯсты. Та̄н ты мӯйлын ма̄наныл сака э̄руптыяныл. Тот ня̄врамыт та̄нки о̄щнэ ха̄снутаныл э̄лаль ханищтаӈкве нё̄тавет, та̄нки номтыӈ тэ̄ланыл о̄с э̄лаль тотыяныл. Тувыл а̄гит ос пыгыт хо̄нтаӈ ма̄ньщи мир пе̄с о̄лупса урыл са̄всыр накыт та̄рапаттэ̄гыт. Та пе̄с ма̄хманув хумус со̄тыӈыг, номтыӈыг о̄лсыт, маныр ва̄рыгласыт, ань аквта е̄рт о̄лнэ мо̄т мирыт та̄н щиранылт о̄луӈкве о̄с ханищтавет. Ма̄н та̄нанылн сыресыр ханищтапыл щё̄питасанӯв ос я̄нас тумп щирыл (рущ щирыл ке ла̄вуӈкве «Островок») ла̄кквауртсанӯв. Тыи «Пе̄с потрыт ос мо̄йтыт», «Ма̄щтырлан ма̄хум», «Ма̄вит тӯйтыглан утанэ», «Номтыл тахнэ ва̄рмалит», «Ёнгилыт ос ка̄с». Тамле нам ты о̄ньще̄гыт ос тот са̄всыр тэ̄лан ханищтавет, во̄р халт ха̄йтыгтым, сыстам лылые̄п атаим – ня̄врамаквет пусмалтахтэ̄гыт. Лӯима̄ ма̄хум о̄вылтыт таи ла̄вуӈкве э̄ри, та̄н ма̄витаныл сака э̄руптыяныл. Йис та̄гыл маныр, хо̄т ос хумус о̄лыглы – пуссын ты накыт пе̄с ма̄хманув та̄рапыттым о̄ньщияныл. Тувыл ма̄хманув ма̄вит сыресыр суссылтапанэ палт ханьщувлым, та̄наныл та̄нки о̄лупсанылн а̄рталым, тув ро̄влахтым э̄лаль та о̄лэ̄гыт. Ма̄н ань ня̄врамаквет аквта щирыл ном- тыӈыщ о̄луӈкве ханищтыянӯв. «Ня̄врамыт па̄выл» нампа колув сыстам тарыгйӣвыт яныгман ма̄т ос тӯр ляпат о̄лы. Тӯрын Тантулъя паты, ос та ляпат пилыт, ла̄хсыт яныгме̄гыт. Ты во̄р халт ма̄н кол ӯнттысӯв, кит колнакыгт ня̄врамыт хӯлэ̄гыт, акв колнакт ӯщлахтэ̄гыт ос ханищтахтэ̄гыт, мо̄т колнакыгт ёнге̄гыт ос тэ̄пъялэ̄гыт. Яныг верандат палаткат, турист пормасыт акванатве̄сыт, турап порат тот ёнге̄в. Ань ты туи сыс ва̄т а̄гирищитпыгрищит во̄рт о̄лнэ па̄вылквет ӯщлахтасыт. То̄ва ня̄врамыт палаткат о̄лсыт. Тот о̄лнэ̄в сыс ма̄н ма̄витув сыстамтылӯв, я̄ ва̄тат ос во̄рт о̄лнэ хара ма̄т йӣвсакыт, порс хотатыянӯв. Хо̄свой колыт пусастыянӯв, намыл хансыянӯв ос номерыл пиныянӯв. Лӯима̄ соссаӈ ма̄хум ёнгилыл ёнге̄в, та̄н касыланыл та̄рапаттыянӯв, тувыл ос халувт касэ̄в. Ханты ос ма̄ньщи ма̄хум йӣкваныл, э̄рганыл ханищтыянӯв ос мӯй хо̄тпатн суссылтыянӯв. Э̄ргынэ̄ныл кастыл ня̄врамыт мощ ла̄тыӈ ханищтэ̄гыт. Тувыл а̄гирищитнпыгрищитн ка̄тыл ва̄рнэ пормасыт ва̄руӈкве сака мӯсты. Ма̄н тыт сортхӯл совныл ма̄нь пормасыт ю̄нтуӈкве ос товлыӈ ӯй пунытыл хурит щё̄питаӈкве та̄наныл ханищтыянӯв. Ка̄тыл ва̄рим пормасаныл са̄всыр касылын ке̄тыяныл ос тот та̄н э̄сгавет. Э̄типа̄лаг ня̄врамыт яныг а̄ращ ва̄тан акванатхатэ̄гыт ос яныг хо̄тпат та̄нынылн пе̄с потрыт, мо̄йтыт мо̄йтэ̄гыт. Та̄н акв ляпан акванӯнтым, асталыг ос то̄внакт туп лё̄мвой суй хӯнтамлым пе̄с йис мо̄йтыт пӯмщалым хӯнтлэ̄гыт. Та сыс а̄ращт атыӈ хӯлыӈ исмит па̄йтаве, хӯл пӯт пе̄таве ос ня̄врамыт атыӈ исмит тэ̄гыт. Тувыл пыгрищит та̄нки пувум хӯланыл па̄йтэ̄гыт ке, то̄нт таса̄вит ща̄гт та̄нанылн. А̄гирищит ос хӯл совныл нё̄тнэ пормасыт ва̄ре̄гыт. Ты сака ёмас ӯщлахтын пора! Потыр ма̄ньщи ла̄тӈын Тамара Мерован хасвес.

1132 2016. 09. 22. Саша Хозумова

О̄магума̄тягум янытлыягум! Паща о̄лэ̄н, «Лӯима̄ сэ̄рипос» газетат рӯпитан тыныӈ ма̄хмыт! Ам Александра Хозумова, Кульпас па̄вылт хо̄тыт классыт ханищтахтэ̄гум, китхуйплов та̄лум то̄влыс. Омагума̄тягум Ло̄пмус па̄вылт о̄лэ̄г. Тот хорамыӈ во̄рыӈ ма̄, па̄вылте̄в сака нё̄тнэ. Тыт Кульпаст, хунь ханищтахтэ̄в, ам увщиягум ёт интернатыт о̄лэ̄гум. Туи Ло̄пмус па̄вылт ма̄н во̄рн ялантэ̄в, пил ва̄тэ̄в, ла̄хыс атэ̄в. Ӯйхул о̄ньще̄в: мисыт, лувыт. Омам ос а̄тям ёт пум са̄гре̄в, толге̄в. Тэ̄натэ̄н аквписыг нё̄тэ̄в. Ма̄н ще̄мьяв яныг, са̄т хо̄тпа. Ам ань омагума̄тягум урыл хансуӈкве таӈхе̄гум. А̄тям наме Александр Владимирович Хозумов. 1961та̄л лӯпта э̄тпос са̄тхуйпловит хо̄талэ̄т самын патыс. О̄пам Пупъисум па̄вылныл о̄лыс, Владимир Устинович Хозумов. Щаще̄квам Елена Константиновна, а̄ги о̄парищ наме Юрьева, Сума па̄вылныл о̄лыс. Хунь та̄н яныгмасыт, Ло̄пмус па̄вылт о̄лсыт. А̄тям ще̄мьянылт са̄в ня̄врам о̄лыс. Та̄н оманыл ос а̄тяныл сака ёмас хо̄тпаг о̄лсы̄г. Ня̄враманэ̄н ёмащакв янмалтасанэ̄н, аквписыг рӯпитасыт – мис, лув о̄щсыт, пум са̄грысыт, на̄йив щё̄питасыт. А̄тям нила каӈк о̄ньщи ос акв э̄щ. Щар яныг Валера, Щерки, Леонид, Ӯнтари ос Татья. Ам а̄тям сака ма̄щтырыг ёса ва̄ри, тувыл ма̄нь ха̄пыт, йӣвха̄пыт, тӯпыт. Хӯл алыщлаӈкве, во̄рт яласаӈкве о̄с тав сака ма̄щтыр хум. Хӯлпыт о̄с такви ва̄ри. Ма̄хум мо̄т па̄вылныл таве̄н ёса ва̄рылтэ̄гыт, ма̄ньха̄пыт, хӯлпыт, тав пуссын ва̄ри. Ма̄навн аквписыг са̄всыр пе̄с потрыт потырты, мо̄йтыт мо̄йты. Ма̄н хунь каникулын юв ёхтэ̄в, таве хӯнтлуӈкве ма̄навн сака пӯмыщ. Пе̄с мо̄йтыт, потрыт ма̄н сака пӯмщалэ̄в. Сака пилыщмаӈ потрыт хӯнтлуӈкв о̄с ка̄саще̄в. Тав пе̄с йӣквыт о̄с ва̄г. Хунь па̄влыт са̄всыр ощхулит, тӯлыглапыт, тувыл са̄всыр семинарыт ва̄равет, тав тот о̄с акваг йӣкви, э̄рги, ёнги. Тав сака ёмас а̄тя. Ма̄н таве э̄руптылӯв, янытлылӯв. Тав ма̄н ётув ма̄ньщи ла̄тӈыл акваг потырты. Таима̄гыс ма̄н ма̄нти ла̄тӈув торгамтылӯв. Я̄тил, тыныӈ а̄тям, ам наӈын сака э̄руптылум, ёмас ла̄тыӈ, сымыӈ ла̄тыӈ наӈын ке̄тэ̄гум! Пуста̄гыл хоса о̄лэ̄н, наӈ ма̄навн сака э̄ре̄гын! Ань ос омам урыл хансэ̄гум. Омам Тамара Алексеевна Хозумова. Тав о̄с Ло̄пмус па̄вылт ма̄нь та̄гыл о̄лы. Тав намхо̄талэ 1972 та̄л во̄ртур э̄тпос са̄тыт хо̄талэ. Ане̄квамащо̄йкам о̄с тыт Ло̄пмус па̄вылт о̄лсыг. Ащо̄йкам Алексей Михайлович Хозумов. Тав ща̄рщ ва̄тат армият лусытас, яныг катерыл яласас. Ане̄квам наме Анастасия Даниловна. Омам ще̄мьятэ яныг о̄лыс. Тав нила увщи ос нила каӈк о̄ньщис – Михаил, Лёня, Валера, Юра, Матрёна, Ле̄люк, Исвета, Марина. Матрёна увщитэ Ха̄льӯс пӯльницат ма̄нь ле̄ккарыг рӯпиты. Тав хунь отпускат о̄лы, Ло̄пмусн аквписыг ёхталы. Ма̄н таве э̄руптылӯв ос янытлылӯв. Марина э̄ще Саранпа̄вылт о̄лы. О̄йкатэ ёт са̄лы ӯрим Нё̄рт яласы. Омам ма̄ньщи супыт ю̄нты, пальсакыт харты, сэ̄тапыл са̄всыр пормасыт ва̄ри, пӯркат ю̄нтуӈкве ха̄сы. Ма̄н таве о̄с сака э̄руптылӯв, ёмас сымыӈ ла̄тыӈ ке̄тэ̄в. Тэ̄н а̄тям ёт сака ёмас о̄лэ̄г, халэ̄нт ма̄ньщи ла̄тӈыл потыртэ̄г. Тыныӈ омам ос а̄тям, хоса о̄лэ̄н, со̄тыӈыщ, щуниӈыщ о̄лэ̄н. Пус кат, пус ла̄гыл, То̄рум ёт, О̄тыр ёт о̄лэ̄н! Саша Хозумова, Кульпас па̄выл.

1133 2016. 10. 06. Людмила ТЕТКИНА

Пе̄рия хо̄тал о̄лыс Ювле хӯльтум э̄тпос онтоловхуйплов хо̄талэ̄т нэ̄пак та̄ратан хо̄тал о̄лыс. Ма̄н округувт манса̄вит э̄лумхо̄лас «Единый Россия» нампа партия ма̄гсыл ка̄тпо̄с пинсыт ос хотьют депутатыг рӯпитаӈкве тах патэ̄гыт, та урыл Борис Хохряков ля̄ххал тотнэ ма̄хумн потыртас. Тав ань ты партия округ отделениятэ̄т секретарьхо̄тпаг о̄лы. Борис Хохряков ла̄выс, пе̄риян хо̄тал о̄лум порат партия ма̄гсыл 243 со̄тыра э̄лумхо̄лас нэ̄пак та̄ратасыт. Щар са̄в ма̄хум Нефтеюганский, Белоярский ос Ханты-Мансийск районытт ка̄тпос пинсыт. Уральский округув халт Югра хӯрмит местат о̄лы. Депутатхо̄тпат пе̄рияӈкве Тюменский областит ос Ямал ма̄т са̄внув ма̄хум ёхталасыт. Югра ма̄ныл Государственный Думат хӯрум хо̄тпа – Павел Завальный, Александр Сидоров ос Татьяна Гоголева рӯпитаӈкве патэ̄гыт. Павел Завальный №222 одномандатный округыт но̄хпатыс, тав ма̄гсылэ са̄в ма̄хум нэ̄пак та̄ратасыт. Александр Сидоров ос №223 одномандатный округыт но̄хпатыс. Татьяна Гоголева партийный список щирыл тув пе̄риявес. Ты ма̄ньщи нэ̄ ань Москва ӯст рӯпитаӈкве тах паты. Мо̄т партияныл о̄с са̄в ма̄хум тот рӯпитаӈкве воратасыт, тувыл округувт о̄лнэ ма̄хум ты хӯрум хо̄тпа ма̄гсыл са̄внув нэ̄пак та̄ратасыт, тыи ма̄гсыл Борис Хохряков Югра ма̄т о̄лнэ ма̄хумн яныг пӯмащипа ла̄тыӈ ла̄выс. Ань Тюменский областил, Югра ос Ямал ма̄ныл Государственный Думат аквхуйплов депутатхо̄тпат рӯпитаӈкве патэ̄гыт. Та̄н пуссын «Единый Россия» нампа партият о̄лэ̄гыт. Округ Думат хоты ма̄хум рӯпитаӈкве тах патэ̄гыт, ты урыл о̄с потыр о̄лыс. Ань ты Думат 38 депутат са̄кконыт пирмайтым рӯпитаӈкве тах патэ̄гыт. 28 э̄лумхо̄лас «Единый Россия» партияныл о̄лэ̄гыт. Та̄н халаныл 17 хо̄тпа одномандатный округыт но̄хпатсыт, 11 депутат партийный список щирыл тув пе̄рияве̄сыт. Тот ань хӯрум соссаӈ хо̄тпа – Еремей Айпин, Руслан Проводников ос Василий Сондыков рӯпитаӈкве патэ̄гыт. Ты коныпал «Единый Россия» партият о̄лнэ ма̄хум Тюменский Думат са̄кконыт пирмайтаӈкве тах патэ̄гыт. Ма̄н округувныл ос Ямал ма̄ныл партия та̄л пе̄риим депутатыт ос тув минэ̄гыт. Аквта хо̄тал ма̄хум районный ос па̄выл Думан депутатыт ма̄гсыл нэ̄пак та̄ратасыт. «Единый Россия» партияныл 255 хо̄тпат тот рӯпитаӈкве патэ̄гыт. Советский ӯст, Саранпа̄вылт, Приполярный, Мортка ос Зеленоборск па̄влыт ма̄хум миркол кӯщаит пе̄риясыт. Та ӯст ос хӯрум па̄влыт «Единый Россия» партиян хасхатум хо̄тпат но̄хпатсыт. Туп Приполярный па̄вылт мо̄т партияныл о̄лнэ хум пе̄риявес.

1133 2016. 10. 06. Галина КОНДИНА

Финноугор ла̄тӈытыл хаснэ нэ̄пакыт Карелия ма̄т Петрозаводск ӯст сӯкыр э̄тпос 21-22 хо̄талыгт ля̄ххал хаснэ ма̄хум са̄в па̄лыл тув атхатыгласыт, та̄н мирхал сапра̄нияныл тох намаим о̄лыс – «Финноугорский мир. Фокус Карелия». Карелия ма̄ныл 100 та̄лэ то̄влы, таима̄гыс ма̄хум Удмуртияныл, Мордовияныл, Марий Эл, Коми, Ямало-Ненецкий, Ханты-Мансийский округыгныл, Тверской, Ленинградский, Московский областитныл тув ёхталасыт. Ка̄сыӈ ма̄ныл мир та̄нти ва̄рнэ рӯпатаныл урыл потыртасыт. Мирхал журналистикат кӯщаиг рӯпитан нэ̄ Маргарита Лянге яныг кӯщаит нупыл ла̄выс, та̄н ля̄ххал тотнэ хо̄тпатын акваг вос потыртасыт, хумус финноугорский мир ла̄тӈаныл ос культураныл о̄лы, ма̄ янытыл ты урыл вос ва̄йвес. Хо̄талъя̄т юипа̄лт ля̄ххал тотнэ ма̄хум хӯрмыг уртхатсыт ос тох рӯпитасыт. Та̄н ка̄сыӈ мир та̄нти ла̄тӈыл хаснэ газетат урыл потыртасыт. Та̄нти та̄рвитыӈ ва̄рмаляныл оснпаттысыт ос хумус акваннё̄тхатым рӯпитаӈкве ве̄рме̄гыт, та урыл потыртасыт. «Периодика» издательстват рӯпитан хо̄тпат вепс, карел ос финн ла̄тӈыл хаснэ газетат, журналыт урыл потыртасыт. Ня̄врамыт ма̄гсыл ва̄рнэ утаныл ма̄хумн сака пӯмщалаве̄сыт. Карелият ня̄врамыт журналыт хӯрум ла̄тӈыл ловиньтэ̄гыт. Ты коныпал са̄всыр нэ̄пакыт, словарит ва̄ре̄гыт. Мо̄тыт хо̄тал журналистыт Кинерма ос Ведлозеро па̄влыгн тотыглаве̄сыт. Тот та̄н па̄влыӈ ма̄хум ёт хо̄нтхатыгласыт, та̄нти ва̄рнэ рӯпатаныл урыл потыртасыт. Ня̄врамытын журналаныл суссылтасыт. Ка̄сыӈ хо̄тпа таве̄н э̄рнэ нэ̄пакыт таквина̄тэ̄н хасылтас. Аквта порат карел ла̄тыӈ Колт сапра̄ни о̄лыс. Тот са̄в па̄лыл ёхтум хо̄тпат ла̄всыт, «Финноугорский газета» нампа нэ̄пак э̄ри э̄лаль та̄ратаӈкве, финноугорский мирыт о̄лнэ ма̄т ты газета ма̄гсыл ля̄ххал хаснэ хо̄тпат вос рӯпитасыт. Раиса Решетникова, ханты ос ма̄ньщи газетаг кӯщай, ма̄н ва̄рнэ рӯпатав урыл потыртас, хумус ня̄врамыт ёт ма̄н аквъёт ля̄ххалыт, потрыт хансэ̄в, та̄н ма̄гсыланыл газетат ос журналыт ва̄ре̄в. Тох сакати ня̄врамыт та̄нти ща̄нь ла̄тӈыл нэ̄пак ловиньтэ̄гыт, потрыт хансэ̄гыт. Округ правительствавн ос Наталья Комарова губернаторувн ма̄н нё̄таве̄в, ты кастыл олныл та̄ставе̄в. Раиса Решетникова хансум потыр Галина Кондина ма̄ньщи ла̄тӈыг толмащластэ.

1133 2016. 10. 06. Валентина УЗЕЛЬ

Олн ат ойтнэ ма̄хум тох ты пувавет Олн ат ойтнэ хо̄тпат ёт ань судебный приставыг ла̄внэ ма̄хум рӯпитэ̄гыт. Ювле хультум э̄тпост та̄н кӯщаяныл Олег Адольф ля̄ххал тотнэ хо̄тпат ёт хо̄нтхатыглас. Тав рӯпатаныл урыл потыртас. Ты кӯщай хум тох ла̄выс, коланыл ма̄гыс ат ойтхатнэ хо̄тпат, ГИБДД штрафыт, кредит ос алиментолн ат ойтнэ ма̄хум ань 75 млрд. солко̄ви а̄рнтаг о̄ньще̄гыт. 796 со̄тыра 307 сутытан тэ̄ла щирыл та̄н нэ̄пакыт о̄ньще̄гыт. Ка̄сыӈ тэ̄ла щирыл я̄нас рӯпитаӈкв э̄ри. Ань округувт 220 хо̄тпа ты та̄рвитыӈ рӯпата ва̄рияныл. Акв приставхо̄тпа 3 со̄тыра арыгтем тамле тэ̄ла ёт рӯпиты. Са̄в олн ат ойтум хо̄тпа акваг тинсаве, тав банкыт са̄в олн те о̄ньщи, та олнанэ пуссын тувыл вивет. Ма̄шина те о̄ньщи, водительский праванэ̄паке хота̄лмаяве. Тох рӯпитаӈкв приставыт ущты о̄вылтахтасыт кос, ос ма̄хум та̄ра а̄рнтаолнаныл ойтуӈкв та патсаныл. Сака са̄в хо̄тпа алиментолн ат ойтэ̄гыт. Ань судебный приставыт палт 19 со̄тыра арыгтем тамле тэ̄ла о̄лы. Юио̄выл та̄лытт матум ща̄няныла̄щаныл ма̄гыс са̄в хо̄тпат алиментыт о̄с ат ойтэ̄гыт. Ты та̄л туи порат ты урыл хансым са̄ккон мощ мо̄т щирыл хасвес – ань алиментолн ат ойтум ма̄хум мо̄т хо̄н ма̄н ялуӈкв ат та̄ртавет, округувт 4 со̄тыра 765 тамле хо̄тпа о̄лы. 1 со̄тыра 178 хо̄тпа ма̄шинал яласан ма̄гыс праванэ̄паканыл хотвуйве̄сыт. Ты кӯщай ла̄выс, ань тыи ма̄гыс са̄в хо̄тпа та̄ра ойтхатуӈкв ты патсыт. Са̄в нэ̄пак ГИБДД па̄лыл та̄н палтаныл те̄таве. Ма̄шина о̄щнэ ма̄хум сака са̄в штрафолн о̄ньще̄гыт. Хо̄тпа лов арыгтем штраф те о̄ньщи, тав лё̄ӈхыт яласанэ̄тэ порат акваг тинсаве, хо̄нтаве те – ма̄шинатэ виве. То̄ват хунь пувавет, та̄ра ойтхатэ̄гыт. То̄ва порат приставхо̄тпат вокзалын манос аэропортын минэ̄гыт, тот ма̄хум пувияныл. Та̄н ищхӣпыӈ ут ёто̄ньще̄гыт, а̄рнтаолн о̄щнэ ка̄сыӈ хо̄тпа наме тув хансым о̄лы. Тох тинсыяныл. Туи та̄н Сургут ӯст яныг ла̄пкаӈ ма̄н минасыт. Тот кон сака са̄в машина ӯнлыс. Номер щирыл акв хум пувсаныл, тав ня̄враме ма̄гыс сака са̄в алиментолн ат ойтум. Пуввес, машинатэ ул вос виве, аквта та̄ра ойтхатуӈкв тот та патыс. О̄лнэ коланыл ма̄гыс то̄ват о̄с та̄ра ат ойтхатэ̄гыт. Округув янытыл приставыт палт ты урыл хансым 40 со̄тыра 90 нэ̄пак о̄лы. ЖКХ ма̄н 1 млрд. 500 со̄тыра солко̄ви олн ат ойтвес. Ань ты хо̄тал мус туп 380 млн. солко̄ви атвес. Тамле хо̄тпа хунь яныг колт о̄лы, тав по̄хе̄т о̄лнэ ма̄хумныл тав ма̄гсылэ олн атаве. Таит аты ва̄ганыл, та̄н ляпат о̄лнэ ат ойтхатнэ хо̄тпа ма̄гыс та̄нти олнаныл тув мыганыл. Ань ка̄сыӈ хо̄тпа такви наме уральтаӈкв ве̄рми, ищхӣпыӈ утыт «банк данных исполнительных производств» нампа я̄нас ло̄пс о̄лы, тот тисхатэ̄н – r. 86. fsspus. ru/iss/ip.

1133 2016. 10. 06. Светлана РОМБАНДЕЕВА

Яныгхо̄тпатн ва̄рнэ нё̄тмил уральтаве Ювле хультум э̄тпос юио̄выл хо̄талэ̄т Ханты-Мансийск ӯс мирколт округ кӯщай ва̄ӈын хум Геннадий Бухтин хо̄нтхатыглап ва̄рыглас. Тав та о̄вылтыт ла̄выс, ань округув янытыл о̄лнэ яныгхо̄тпат са̄всыр нё̄тмилыл ва̄руӈкве патве̄сыт. Кӯщаит Россия Президент ла̄тӈе хӯнтамласаныл. Тав яныгхо̄тпатн мӯсхал щирыл нё̄туӈкве ла̄выс, та̄н нэ̄матыр сав ул вос тотэ̄гыт, ёмащакв вос о̄лэ̄гыт, пуста̄гыл вос о̄лэ̄гыт. Геннадий Бухтин тох ла̄выс: «Яныгхо̄тпатн нё̄тмил ва̄рнэ тэ̄ла ма̄н ёмащакв уральтаслув, тувыл ань таи та̄рапаттысӯв, Россияв янытыл та̄н ёмащакв нё̄тавет. Окуругув янытыл о̄с аквтох, ты рӯпата э̄рнэ нэ̄пакыт палт хансым о̄лы, олныл ва̄тихал нё̄тумта̄лаве. Ты тэ̄ла кӯщаянувн номим о̄ньщаве». Округ янытыл мирн нё̄тнэ департаментыт пуӈктотнэ нэ̄ Мария Краско ла̄вме щирыл, тамле э̄рнэ рӯпата та̄н округт хо̄т госпрограмма хосыт ва̄рияныл –нё̄тмил ва̄рнэ тэ̄ла палт, рӯпата кинсуӈкве нё̄тнэ кол, пусмалтан ва̄рмаль, культура ос мӯйлым ман пӯмщалахтым яласан тэ̄ла, физкультура ос ля̄ххал ва̄рмаль ханищтан мир. Ты нэ̄ тох потыртас: «Ты та̄л сыс округт о̄лнэ яныгхо̄тпат ма̄гыс нё̄тмил олн мощ но̄хнё̄твес, 4 млн. солкови са̄витан но̄хлапыс. Ань ма̄хум ва̄гталыг е̄мтум яныгхо̄тпат та̄нти палтаныл о̄луӈкве выганыл, нё̄тыяныл, о̄ньщияныл. Ты олныт тах тамле колта̄глыт халт уртавет». Нё̄тмил ва̄рнэ колта̄глыт ханищтаӈкве патавет, ань яныгхо̄тпа такви ё̄мыгтаӈкве ат те ве̄рми, хумус таве̄н нё̄туӈкве манос хумус таве пе̄ргата̄луӈкве э̄ри – ты тэ̄лан ма̄хум ханищтавет тах. Тувыл ос йильпи рӯпата ква̄лтапаптувес – «мультидисциплинарная бригада по оказанию комплексной медикопсихологосоциальной помощи». Яныгхо̄тпатын нё̄туӈкв вуйхатам организацият но̄хпатум проектаныл тэ̄лаг е̄мтнэ ма̄гыс пуссын олнло̄мтыл миӈкве ла̄вве̄сыт. Та̄н хосытанылт яныгхо̄тпат ищхӣпыӈ утын ханищтаӈкве патавет, ты проект тох намаявес – «Университет третьего возраста».

1133 2016. 10. 06. Светлана РОМБАНДЕЕВА

Ля̄ххал тотнэ хо̄тпат Дагомыс ӯсн ялсыт Сӯкыр э̄тпос 26 хо̄талэ̄ныл ма̄нь таквс э̄тпос 2 хо̄талэ мус мо̄ртым ма̄т Дагомыс па̄вылт XX фестиваль Союз журналистов «Вся Россия – 2016» нампа хо̄нтхатыглап ва̄рыглавес. Тув нёлоловса̄т арыгтем ля̄ххал тотнэ хо̄тпат акванёхталасыт. Е̄ӈта пасан ва̄тат рӯпитасыт, халанылт ва̄йхатасыт, потрамасыт. Ты тэ̄ла Россия Союз журналистыт палт пуӈктотнэ хо̄тпат та̄н ва̄руӈкве номылматсаныл. Фестиваль о̄вылтахтаме порат са̄всыр ма̄ныл ёхталам хо̄тпат ла̄тыӈ ла̄всыт: Финляндияныл, Индияныл, Францияныл, Болгарияныл, Афганистан, ЮНЕСКО организация, ля̄ххал тотнэ Мирхал федерация ос мир ӯргалан мирхал организация (ОБСЕ) па̄лыл хо̄тпат потыртасыт. Округныл ёхталам ма̄хум та̄нти рӯпатаныл о̄вылтыт о̄с аквкит ла̄тыӈ ла̄всыт. Ольга Лазарева «Югра» телекомпаният рӯпиты. Тав ла̄вме щирыл, ты та̄л ма̄н о̄лнэ ма̄вт Ня̄врам та̄лыг намаявес. Ты кастыл та̄н ня̄врамыт ма̄гыс са̄всыр передачат щё̄пита̄лэ̄гыт, ва̄рнэ тэ̄ланыл тох намаясаныл: «Год детства в Югре и на «Югре». Атхатам ма̄хумн тав «Бессмертный полк глазами детей» нампа программа суссылтастэ. «Новости Югры» газетат кӯщаиг рӯпитан хум Владимир Меркушев рӯпататэ урыл аквкит ла̄тыӈ ла̄выс. Ты газета ань ищхӣпыӈ ут хосыт ловиньтаӈкве ро̄ви. «Сургутинтерновости» телекомпаният рӯпитан нэ̄ Светлана Стебенькова «Может каждый» нампа проектаныл о̄вылтыт потыртас. Та̄н а̄гмыӈмосыӈ ня̄врамытын нё̄тэ̄гыт, та̄н уранылт потыртэ̄гыт, нё̄тмил во̄ве̄гыт. Ма̄н, округт о̄лнэ ля̄ххал тотнэ ма̄хум, мо̄т ма̄ныл ёхталам хо̄тпат ёт ва̄йхатасӯв – Тюменский область, Саха Республика, Татарстан, Крым ос мо̄т са̄в ма̄хум ёт потрамасӯв, та̄н ва̄рнэ рӯпатаныл пӯмщаласанӯв. Ты фестиваль оигпанэ̄тэ э̄лыпа̄лт ма̄н Россия Союз журналистыт палт пуӈктотнэ хум Всеволод Богданов ёт хо̄нтхатыгласӯв. Ля̄ххал тотнэ ма̄хманув рӯпатаныл урыл мощ потыртасыт. Тав ос ма̄н нуплув са̄в ёмас ла̄тыӈ ла̄выс. Ва̄тихал акван вос хо̄нтхата̄лэ̄в, са̄всыр э̄рнэ проектыт аквъёт вос щё̄питэ̄в, то̄нт тах рӯпатав мощ кӯстырнувег е̄мты. Раиса Решетникова потре ма̄ньщи ла̄тӈыг С. Матвееван толмащлавес.

1133 2016. 10. 06. Людмила ТЕТКИНА

Туи порат са̄в ня̄врам ӯщлахтасыт Са̄всыр ма̄т рӯпитан кӯщаит Ханты-Мансийск ӯст акванатхатыгласыт ос туи сыс ня̄врамыт хумус ӯщлахтасыт, та урыл потыртасыт. Мирн нё̄тнэ департаментыт, пӯльницат, ханищтахтын колыт, мирколыт ос са̄в мо̄т ма̄т рӯпитан хо̄тпат тув во̄виньта̄лве̄сыт. О̄влэ̄т ма̄хум э̄лыпа̄лт мирн нё̄тнэ департаментыт рӯпитан кӯщай ва̄ӈын нэ̄ Елена Немчинова потыртас. Тав ла̄выс, туи порат 70 со̄тыра 392 а̄гирищпыгрищит ӯщлахтасыт. Округувт 580 ӯщлахтын ма̄ ва̄рыглавес. Та̄н халанылт ня̄врамыт ӯщлахтын 37 йильпи ма̄т рӯпитаӈкве о̄вылтахтасыт. Ты тув сыс хӯрум ханищтахтын колт Сургут ӯст политехнический колледжин, Ханты-Мансийск ӯст физикоматематический лицейн ос ты районт о̄лнэ Добрино па̄вылн ня̄врамыт во̄виньта̄лве̄сыт. Туи сыс округ янытыл 55 палаточный лагерь рӯпитас, кит со̄тыра арыгкем а̄гирищпыгрищ тув ялсыт. Нилахуйплов районыт манос ӯсыт 18 лагерит акв со̄тыра арыкем ня̄врамыт ӯщлахтасыт ос рӯпитасыт. Мо̄т ӯщлахтын ма̄т та̄н пусмалтаве̄сыт. Ты та̄л Нижневартовск ӯст «Нефтяник самотлора» нампа санаторият ос Югорск ӯст «ЮгорскТрансгаз» нам- па санаторият 279 ня̄врам пусмалтаве̄сыт. Нуса тотнэ ще̄мьят яныгман ня̄врамыт ӯщлахтуӈкве ос пусмалтахтуӈкве ке̄тыглаве̄сыт. Ты та̄л тамле ще̄мьят о̄лнэ 18 со̄тыра 604 а̄гирищпыгрищ са̄всыр ма̄т ӯщлахтасыт. Та̄н халанылт нила со̄тыра арыгкем ня̄врам ща̄рыщт пувлуӈкве тотыглаве̄сыт. Мо̄таныт Советский районын «Окунёвские зори», Белоярский районын «Северянка» ос Кондинский районын «Юбилейный» нампа лагерин ке̄тыглаве̄сыт. Ты та̄л 10 со̄тыра 735 ня̄врам хӯрум э̄тпос рӯпитасыт ос олн сэ̄лсыт. Тох рӯпитаӈкве 14-18 та̄л яныт а̄гитпыгыт ань ве̄рме̄гыт. Та̄н халанылт 942 ня̄врам нуса тотнэ ще̄мьят яныгме̄гыт. Акв э̄тпос сыс ня̄врамыт 7 со̄тырал ойтве̄сыт. Елена Немчинова ос ла̄выс, ань округувт единый телефон 8-800-10-100-11 рӯпиты, тот китыглахтуӈкве ро̄ви, хо̄т ӯщлахтын ма̄т рӯпитэ̄гыт. Ты юипа̄лт тав ос касылыт урыл ла̄тыӈ ла̄выс. Мирн нё̄тнэ департамент ка̄сыӈ та̄л ня̄врамыт ӯщлахтан ма̄т ма̄гсыл касыл нила номинация щирыл ва̄рыглы. Ань ты касылн 29 ня̄врам ӯщлахтын ма̄ нэ̄паканыл ке̄тыгласаныл, та̄н халанылт 12 организацият но̄хпатсыт ос грантолныл майве̄сыт. Та̄н пуссын аквъёт 1 млн. 320 со̄тыра солко̄вил та̄стуве̄сыт. Касылт этностойбищат ма̄гсыл о̄с акв номинация о̄лыс. Белоярский районт Касум па̄выл по̄хат о̄лнэ «Нумсаӈ ёх» о̄выл места вис. Китыт местал Ха̄льӯс район Ясунт па̄вылт рӯпитан «Ма̄нь Ӯскве» майвес. Нижневартовский районт о̄лнэ «Патриот» нампа ӯщлахтын ма̄ хӯрмит места вис. Та̄н пуссын грантолныл майве̄сыт.

1133 2016. 10. 06. Тамара МЕРОВА

Са̄в нотыт о̄лупса Кондинский район Половинка па̄вылт са̄в мӯтраӈ, ёмас хо̄тпат о̄лэ̄гыт. Та̄н халанылт тот Алла Копьева о̄лы. Тав сака нёмса э̄лумхо̄лас, таквинатэ нэ̄мхуньт ат хӯлтытэ. Ос районт о̄лнэ ма̄хумн тав стихыт хаснэ нэ̄г ва̄ве. Алла Фёдоровна самын патум ма̄тэ о̄вылтыт, па̄вылт о̄лнэ мир урыл номтыӈ стихыт хансы. Ма̄хум та̄наныл ловиньтыяныл ос сымыӈ ла̄тыӈ таве̄н ювле ла̄ве̄гыт. Ты та̄л ма̄ньполь э̄тпос онтоловхуйплов щислат Алла Копьева 60 та̄лэ то̄влыс. Ма̄н таве ань янытлылӯв ос щуньпаща ла̄тыӈ ла̄ве̄в. Учинский музейт рӯпитан кӯщай нэ̄ Галина Мостовых ма̄навн пищма ке̄тыс. Та̄н музейколанылт «Дано любить, дано и воспевать» намтым акванхо̄нтхатыглан нак ва̄рыглавес. То̄нт мӯйлуӈкве ёхталам ма̄хум Алла Фёдоровна Копьева ёт ва̄йхатасыт ос «Дыхание вечности» йильпи та̄ратам нэ̄паке урыл потыртасыт. Щар о̄выл стихотворениятэ Алла са̄тхуйплов та̄лэ порат хансыстэ. Таве̄н акв пыг сака мӯстыс, тувыл то̄нт сымн хо̄йнэ номтанэ нэ̄пакн хассанэ. Тыгыл э̄лаль ос мо̄т са̄всыр номтанэ нё̄тнэ ла̄тӈыг тэ̄луӈкве патсыт. 1996 та̄лт акв хансум потре «Может это быль» нэ̄ хо̄тпат акванхо̄нтхатыглан мирхал конгрессыт ловиньтавес. Тав английский ла̄тӈын толмащлым о̄лыс. Ты коныпал потранэ Урай ӯст та̄ратым са̄всыр нам о̄щнэ сборникыт о̄лэ̄гыт. Тувыл 2008 та̄л па̄сыл нэ̄ «Литературное объединение «Возрождение» Кондинского района» акванатхатам хо̄тпат ёт рӯпиты. Такви уре̄тыл Алла Копьева таи потыртас: «Ам яныг колта̄гылт яныгмасум. А̄тям Фёдор Иванович Исыпов хо̄нтаӈ ма̄ньщи хумыг о̄лыс. Ос тэ̄н Августа Петровна омаме̄нтыл нёлолов ня̄врам янмалтасы̄г. Ам щар янгыг о̄лсум, а̄пщиянум, йигрищанум янмалтаӈкве нё̄тсум, колсори рӯпата ва̄рсум. Школам а̄стламум юипа̄лт о̄влэ̄т во̄рт йӣв яктын ма̄т ос тувыл ре̄г та̄ратан машинат о̄лнэ ма̄т рӯпитасум. Ётыл Половинка па̄вылт о̄лнэ ма̄хумн почта тотыгласум ос та юипа̄лт матумпа̄ла хо̄тпат о̄щнэ колт ка̄с ва̄рнэ нэ̄г рӯпитасум. Стихыт хаснэ ва̄рмаль ул омамныл ам палтум ёхтыс. Тав о̄лме̄т, насати, стихыт о̄с хансум. Туп ты урыл нэ̄мхотьют ат ва̄с. Тамле тэ̄лат э̄лаль тотуӈкве а̄тямн ат та̄ртыма. Тувыл ма̄нь ня̄врам янмалтаме сыс са̄в матыр ва̄руӈкве хунь а̄лыме̄гын. Тав ам ётум та̄рвитыӈыщ о̄лме порат стихыт акваг ловиньтам. Ань таима̄гыс ам о̄с стихыт ловиньтаӈкве э̄руптэ̄гум ос то̄ванакт номтанум кӯстырыг нэ̄пакн хансыянум. Омам номтыл таӈхум ва̄рмале а̄нумн та ёхтыс». Ханты-Мансийс ӯсныл тав стиханэ хӯнтлуӈкве Людмила Родионова ялум. Тав Александра Тимофеевна Кауртаева оматэ ос ты па̄вылт самын патыс. Ань нэ̄ тох ла̄выс: «Ам Алла Фёдоровна ёт ёмщакв ва̄йхатым ат о̄лэ̄гум. Ос тав хансум потранэ о̄выл щёс хӯнтамласанум. Та̄н а̄нумн такем та сымын хо̄ясыт. Тав э̄рттам ам номтанум аквтох э̄лаль тотыянэ, тувыл аквтупмат акв лылые̄пыл лылтыме̄н. Пӯмащипа ла̄тыӈ таве̄н ке̄тэ̄гум, тав са̄в та̄л пуста̄гыл э̄лаль вос о̄лы. Ма̄н лӯима̄ о̄лупсав, ёмас ма̄хум о̄вылтыт э̄лаль вос матыра̄ти хансы, посыӈ номтанэ э̄лаль вос постэ̄гыт ос такви та̄ксарыг вос о̄лы».

1133 2016. 10. 06. Светлана РОМБАНДЕЕВА

Ня̄врам ханищтам хо̄тпа Мария Константиновна Туркина Нижневартовский район Мегион ӯст о̄лы. Тав ханты э̄ква, школат ня̄врамыт ханищтым ос садикыт са̄в та̄л рӯпитас. Ам тав ётэ хо̄нтхатыгласум, потрамасум. На̄н ань э̄лаль тав потре ловиньтэлы̄н. – Омагума̄тягум сас ханты хо̄тпаг о̄лсы̄г. А̄щум Константин Платонович, омам Пелагея Николаевна. Тэ̄н сас Туркиныг о̄лсы̄г, ты ханты о̄парищ нам. Колта̄глувт китхуйплов ня̄врам самын патыглас. Та порат са̄всыр а̄гмыт о̄лсыт, то̄ванув ма̄ньта̄гыл а̄тимыг е̄мтсыт. Ам ань щар амттем хультсум. Юн пуссын ма̄нти ла̄тӈувтыл потыртасӯв. Та порат ма̄н о̄лнэ ма̄вн рущит ёхталаӈкве патсыт, ма̄н, ня̄врамыт, са̄всыр щирыл намталаӈкве патвесӯв. Тувыл акваг рущ ла̄тӈыл потыртаӈкве та патсӯв. Ам лӯпта э̄тпос 26 хо̄талэ̄т 1936 та̄лт самын патсум. Ты та̄л 80 та̄лум то̄влыс. Тыт, Мегион ӯст, ханищтахтасум, интернатыт о̄лсум. Школа а̄стламум юипа̄лт Тобольск ӯст рыботехникумыт ханищтахтасум. Ты рӯпата а̄нум щар ат мӯстыс. Тувыл э̄лаль о̄с аквта ӯсумт учителиг ханищтахтасум. 1963 та̄лт Мегионын рӯпитаӈкве ёхтысум, амти а̄стлам школамт о̄выл класс ня̄врамыт ханищтаӈкве патсанум. Туп ат та̄л рӯпитасум. Ам самагум лю̄льсаӈ на̄ӈкег, ты а̄гмум ёт ма̄ньта̄гыл о̄лэ̄гум. Школат рӯпитаӈкве патсум, самагум ущпылнэ̄г лю̄льсаӈ на̄ӈкуӈкве патсы̄г. Налыман нупыл ат ня̄врам ханищтасум. Ка̄сыӈ хо̄тал тетрадяныл юв тотыянум, э̄ткотиль мус ӯнлэ̄гум, ловиньтыянум, уральтыянум. Та порат тыт ма̄во̄й но̄хвиӈкве о̄вылтавес, ма̄хум лӯима̄вн нё̄рыглаӈкве патсыт. Ня̄нь ат то̄вылхатас, акв пулка ма̄гыс ла̄пкат очередь э̄т сыс лю̄льсӯв. Торыӈ ат хуе̄в, тувыл рӯпитаӈкве та̄рвитыӈ. Рӯпатамыл по̄ханминуӈкве ла̄всум, ос ань школа кӯщаин ат та̄ртавем, ла̄ви: «Наӈ ёмащакв рӯпитэ̄гын, ня̄врамытн э̄руптавен, хумус наӈ по̄ханминэ̄гын». Ам ос ювле ла̄ве̄гум: «Ам сампыльта̄лыг ты е̄мтэ̄гум, хумус рӯпитаӈкве патэ̄гум? Ма̄нь ня̄врам садикын патхатэ̄гум, тот тетрадит уральтаӈкве ат э̄ри». Та порат электрический на̄йпос хоса хунь посты, э̄ткотиль мус тэ̄г, хотхарумтаве. Э̄лаль ос ла̄мпа посыл ловиньтэ̄гум. Тоха та по̄ханминасум, садикын воспитателиг патхатасум. Тот налыман нупыл онтолов та̄л рӯпитасум. Мария Константиновна тамле нёмса, та̄ксар яныгхо̄тпа, ма̄ньнуве̄г сусхаты. Мегион ӯст тав намыӈсуиӈ хо̄тпаг о̄лы, ханищтан ма̄хумн э̄руптаве, янытлаве. Ань ты э̄тпос атыт хо̄талт ханищтан ма̄хум ялпыӈ хо̄таланыл. Ма̄н Мария Константиновна янытлылув, са̄в та̄л пуста̄гыл вос о̄лы, со̄тыӈыщ вос о̄лы!

1133 2016. 10. 06. Валентина УЗЕЛЬ

Ма̄харыт луваныл хо̄нтве̄сыт Ханты-Мансийск ӯс ляпат налымантем ве̄рыстат Луговское нампа ма̄ о̄лы. Тот матах та̄л минам юипа̄лт са̄в яныг лувкапаит хо̄нтве̄сыт. Ученый ма̄хум та̄наныл ёмащакв ханищтасаныл, тувыл ла̄всыт – ты махарыт та̄н луваныл. Тот по̄х хо̄тпат сака ул вос яласэ̄гыт, 2008 та̄л па̄сныл та ма̄ ӯргалаӈкв патвес, рущ ла̄тӈыл тох намаявес – особо охраняемая территория. Ка̄сыӈ туи «Ма̄вит ос э̄лумхо̄лас» нампа музейт рӯпитан хо̄тпат тув ялантэ̄гыт, тот ма̄ ла̄щлаквла̄щлакв хилыяныл. Матыр акваг тот та хо̄нтэ̄гыт. Ӯйрищит, са̄всыр лӯптат ханищтаӈкв о̄с патсаныл, то̄ват татем мощщаг хультсыт, та̄н «Красный книга» нампа нэ̄пакн хансымат. Наманыл та̄рапаттавет, ловиньтавет. Янгуит ма̄гыс тэ̄нэ ма̄ щё̄питэ̄гыт. Маныр тот ка̄салэ̄гыт, пуссын хурин по̄слыяныл. Ань ты ма̄ «Луговские мамонты» рущ ла̄тӈыл тох ла̄ваве. Ты ма̄т пе̄с йис порат ма̄харыт о̄лмыт ос та̄н матрыг тот порсысыт. Наука рӯпата ва̄рнэ ма̄хум э̄лаль тот рӯпитаӈкв тах патэ̄гыт. Мощ ётылнув туристыт тув тотыглан ма̄гыс та ма̄ ёмащакв щё̄питаве. Ос ка̄сащан ма̄хум тот суссылтаӈкв ос потыртаӈкв патавет, лов со̄тыратем та̄лыт ювле хультум порат ма̄витув манхурипаг о̄лыс. М. Трифонова те̄тум потре ма̄ньщи ла̄тӈыг Валентина Хозумова хансыстэ.

1133 2016. 10. 06. Светлана РОМБАНДЕЕВА

Нё̄тмил ва̄рнэ ма̄ньщи нэ̄ Ань соцзащита па̄лыл ка̄сыӈ па̄вылт ос ӯсыт яныгхо̄тпат ман а̄гмыӈмосыӈ хо̄тпат нё̄тмил ва̄рнэ ма̄хумн нё̄тавет. Ха̄льӯс район Кульпас па̄вылт тамле нё̄тмил ма̄ньщи нэ̄ ва̄ри, наме Екатерина Савельевна Миль, а̄ги о̄парищ наме Хозумова. Тав «Альянс» нампа комплекс социального обслуживания кол па̄лыл рӯпиты, пуӈктотнэ ма̄хманыл пуссын Ха̄льӯст о̄лэ̄гыт. Ам Екатерина Савельевна ёт хо̄нтхатыгласум, рӯпататэ урыл китыгласлум. На̄н ань э̄лаль тав потре ловиньтэлы̄н. – Тыт ам хӯрмит та̄л рӯпитэ̄гум. Ма̄н па̄влув Саранпа̄выл нупыл хансым о̄лы, ос кӯщай нэ̄в Елена Сергеевна Горбунова Ха̄льӯст о̄лы. Кульпаст яныгхо̄тпа са̄в о̄лы, ам туп лов хо̄тпан нё̄тэ̄гум. Рӯпата сака са̄в – посхатэ̄гум, колкан ловтэ̄гум, яныгхо̄тпат пувлынколт ловтыянум, тэ̄нутыл па̄йтыянум, витыл а̄лумтыянум, на̄йвыл са̄гриянум ос мо̄т рӯпата ва̄ре̄гум. То̄ва хо̄тпа ам ётум нас потрами те, сыме ка̄мнями, номтэ ёмас. Та̄н халанылт то̄ва щар такте̄т о̄лы, ляпа хо̄тпа ат о̄ньщи. То̄ва ня̄врамыт о̄ньщи кос, ос та̄н э̄лын о̄лэ̄гыт. Ка̄сыӈ такви щире̄т о̄лы, матыр хумус ва̄руӈкве тав ханьщувлас, ам о̄с тох вос ва̄ре̄гум. Воссыг ты а̄ти, та нё̄тыянум. Хум хо̄тпа ты рӯпатан аман манрыг ат виве, тыт на̄йив сартуӈкве, са̄груӈкве ос а̄лумтаӈкве э̄ри. Та̄ксар хо̄тпан тай мощ кӯстырнуве о̄лнув. А̄нумн атхунь та̄рвитыӈ рӯпитаӈкве, ос воссыг хоталь щалтэ̄гум, тыг патхатасум, та рӯпитэ̄гум, яныгхо̄тпатн нё̄туӈкве э̄ри. – Екатерина Савельевна, наӈ хо̄т самын патсын? – Ам ма̄ньполь э̄тпос 24 хо̄талэ̄т 1968 та̄лт Ло̄пмус па̄вылт самын патсум, тот яныгмасум. О̄выл классытыт тот ханищтахтасум. Э̄лаль Кульпас школат ханищтахтасум, интернатт о̄лсум. Колта̄глувт нёлолов ня̄врам о̄лыс – нила пыг, нила а̄ги. Омав Тамара Алексевна, а̄ги о̄парищ наме Анадеева. А̄тяв Савелий Григорьевич Хо̄рыӈпа̄вылныл о̄лыс. Ма̄н иӈ ма̄ниг о̄лмув порат тав а̄тимыг е̄мтыс. Омавн янмалтавесӯв. Мис, лув о̄щсӯв, туи пум ва̄рсӯв. Щар яныг увщим Таням о̄с Кульпаст о̄лы, Люсям Восыӈтӯрт, Вера э̄щум Ха̄льӯст о̄лы. Пуссын ще̄мьяӈыг, ня̄врамыӈыг е̄мтсыт. Хӯрум каӈканум – Володям, Борям ос Женям пуссын а̄тимыт. Омав 2000 та̄лт хотталь щалтыс. Ло̄пмуст ань Улякщи а̄пщим о̄лы. О̄йкам наме Андрей Яковлевич, тав Кульпаст яныгмас. Почтат кӯр па̄лтыглы. Туи сыс, ма̄лтып порат, тот ат рӯпиты. Омагеа̄тяге хосат ловумтасы̄г. Тыт ань Игорь а̄пщитэ о̄лы. О̄йкаме̄нтыл ат ня̄врам о̄ньщиме̄н. Щар яныг Максим, тав ще̄мьяӈ та̄гыл Ханты-Мансийск ӯст о̄лы, а̄гитэ наме Софья. Юляме̄н Нижневартовск ӯст о̄лы, пыге Данил. Пана а̄гиме̄н Ханты-Мансийск ӯст о̄лнэ медучилищат ма̄нь ле̄ккарыг ханищтахты. Олег Ягрим па̄вылт колледж а̄стлас. Питипатта пыгме̄н Женя китхуйплов та̄лэ то̄влыс, ань са̄тыт классыт ханищтахты. Туи Я̄сунт па̄вылн лагерин ялыс. Ань потруме̄н та оигпас. Ты я̄тил ма̄ньщи нэ̄квен ам пӯмащипа ла̄тыӈ ла̄ве̄гум. Тамле э̄рнэ рӯпата ва̄руӈкве ё̄р вос о̄ньщи, щёл вос о̄ньщи. Колта̄глэ̄тыл пуста̄гыл вос о̄лы, На̄янэ̄н-О̄тыранэ̄н вос ӯргалаве!

1133 2016. 10. 06. Тамара МЕРОВА

Енизоров яныг рӯтыӈ кол урыл Зинаида Яковлевна Матвеева Октябрьский район Лӯи Нярихумит па̄вылт о̄лы. Ме̄н юртнэ̄ме̄нтыл тав палтэ ёхтумаме̄н порат тав ня̄врамыт ёт потрамим кол а̄висӯнтэ̄т лю̄ляхо̄лыс. Ма̄н пащалахтасӯв ос манрыг тав палтэ ме̄н ёхтысаме̄н, таи та̄рапаттуме юипа̄лт э̄ква колэ̄н щалтуӈкве ла̄выс. Ка̄сыӈ туи тав палтэ апганэ мӯйлуӈкве ёхталэ̄гыт, коланыл ня̄врамытыл та̄глыӈ. Та̄н та̄нки халанылт юртыӈыщ ёнге̄гыт, ха̄йтыгтэ̄гыт. Зинаида Яковлевна ма̄ньпоратэ номылматыглас, яныг ще̄мьятэ урыл потыртас. Тав Енизоров Иммануил о̄патэ кит щёс нэ̄ тотыглас, ос таима̄гыс са̄тхуйплов ня̄врам о̄ньщис. О̄патэ ос та̄ксар хо̄тпаг о̄лыс, пыганэ ос а̄гиянэ акваг матыр ва̄рсыт, рӯпитасыт. Тэ̄ла та̄л нэ̄мхотьют мори ат ё̄мыгтас. Мо̄лтынув э̄ква Енизоров рӯтэ о̄вылтыт пе̄с нэ̄пакыт ловиньтам ос ты урыл ме̄наме̄н ла̄выс: «Енизоров о̄парищ нам ёмщакв ма̄кыг ке толмащлаӈкве, тыи «яныг со̄руп» рӯт ма̄хум. О̄пам са̄тпан та̄лэ то̄влыс, хунь а̄тям Яков Иммануилович Енизоров омаме̄нтыл Анастасия Павловна Шарова ёт акванминасы̄г. Енизоровыт яныг ще̄мьяӈ коланыл Лӯи Ня̄рихумит па̄выл ляпат Чемаши намаим ма̄т о̄лыс. Тот та̄н акв коланыл туп ӯнлыс. Ань пе̄с нэ̄пакыт щирыл кисхатым Енизоровыт ниласа̄ткем та̄л тот хӯл алыщлым, во̄раим э̄лаль та о̄лсыт. Во̄раяӈкве та̄н Нё̄р нупыл ялантасыт, тувыл тув мус китса̄ткем ве̄рыстаг е̄мты тах. 1914 та̄лт Мандуховы кит ягпыгыг тув ёхтысы̄г. Акватэ Спиридон наме о̄лыс, мо̄танэ Иван Петрович. Та̄н йильпи кол ӯнттысыт ос тот та о̄лмыгтасыт. Тувыл 1930 та̄лыт юипа̄лт ссылкан ке̄тым ма̄хум тув о̄с тотве̄сыт, та щирыл са̄в ма̄хум о̄луӈкве патсыт. Акв щёс ма̄н палтув Анна Вандер учёный нэ̄ ёхталас. Ам таве̄н нё̄туӈкве ла̄вве̄сум. Тох тав ётэ архивнэ̄пакыт сунсыгламум сыс тамле ва̄рмалит та̄рапаттысанум. Енизоровыт – ты ма̄ньщи колта̄гыл. Та хультум нотыт о̄лум рӯтанув ос то̄ват репрессировайтуве̄сыт, мо̄таныт яныг хо̄нтлан ма̄т порслуве̄сыт. О̄пам Егор ос Григорий пыгаге хо̄нтлан ма̄т хо̄т а̄тимыг е̄мтсы̄г. Тэ̄н тыгыл Ха̄льӯс па̄лыл хо̄нлуӈкве тотвесы̄г, таима̄гыс тэ̄н намаге̄н ань Ха̄льӯст хансым о̄лэ̄г. Василий ягпыганыл юв ёхталас ос ётыл тыт ёлщё̄питавес. А̄тям яныгпа̄лаг о̄лыс, хо̄нтлуӈкве ат ялыс. Мо̄т каӈканыл Никон репрессия та̄лыт порат порслувес. Та̄н ще̄мьяныл со̄тыӈыгщуниӈыг о̄лыс, са̄в ӯйхул о̄щсыт, пуссын рӯпитасыт. Тувыл ӯйхуланыл хотняртумтаве̄сыт. Никон ма̄нь не̄выррищ во̄рн тотыстэ ос аластэ. Хотьютн ка̄салыма ос ётыл полщил ва̄рима. Тав мо̄т хум хо̄тпат ёт яныг йӣв ха̄пн ӯнттувес ос хотталь сысы та тотве̄сыт. Та̄н яныг витт пуссын та порслуве̄сыт. Ма̄н оманува̄тянув яныт ма̄хум ос ма̄н, ня̄врамыт, колхозт са̄в рӯпитасӯв. Ам нёлолов класс а̄стламум юипа̄лт та̄ра рӯпитаӈкве патсум, ма̄ньмисыт янмалтасум, мисыт поссум, ня̄нь ва̄рсум. Са̄ртын тыт сака яныг колхоз о̄лыс. 2, 5 со̄тыра са̄вит ӯйхул янмалтасыт. Ётыл пуссын нёвлиг ва̄рве̄сыт, ма̄хум рӯпата та̄л хультуптаве̄сыт. Таи ёмас о̄лыс, ма̄хум акваг хӯл алыщласыт. Та̄нки ма̄гсыланыл тэ̄нэ ма̄гыс пуве̄гыт ос арыг утаныл общинан тыналыяныл. Тох мощ ня̄нь винэ олн сэ̄лыгласыт. Ань сымри хӯл кила хус солко̄ви тыныл виве. Хунь нас на̄лми ва̄тат рещинха̄пыл хӯл алыщлаӈкве ялэ̄гыт ке, то̄нт тамле тыныл миӈкве ро̄ви. Ос хотталь моторха̄пыл ке минэ̄гыт, бенщин ма̄гыс са̄в олн холтэ̄гын. Тыщирыл ке, тамле тыныл тыналаӈкве тай ат хо̄йхаты. Ам ань Максим ма̄нь пыгкем хӯл алыщлым яласы. О̄йкаме̄нтыл ме̄н ат ня̄врам янмалтасме̄н. О̄йкам наме Валерий, ме̄н Тюмень ӯст акванхо̄нтхатсуме̄н. Наталья яныг а̄гиме̄н ще̄мьятэ ёт Приобье па̄вылт о̄лы, Виктория Излучинск ӯст, Люба Ягримт, Ульяна ос Наста Междуреченск па̄вылт о̄лэ̄гыт. Ань та̄н а̄гиянылпыганыл туи ӯщлахтуӈкве тыг ёхталэ̄гыт, та̄нки халанылт ва̄йхатэ̄гыт. Максим пыгме̄н туп нэ̄ та̄л о̄лы, тав ва̄т нупыл са̄т та̄лэ то̄влыс. Ань пуссын ты ще̄мьятын щуньпаща ла̄тыӈ ке̄тэ̄в. Та̄н пуста̄гыл вос о̄лэ̄гыт, То̄румн ос На̄й-О̄тыранылн вос ӯргалавет.

1133 2016. 10. 06. Светлана РОМБАНДЕЕВА

Во̄р ма̄т яныгмам нэ̄ Римма Никитична Канева Белоярский район Касум па̄вылт о̄лы, а̄ги о̄парищ наме Ерныхова. Тав Амня па̄вылт яныгмас. Ты па̄выл Касум па̄выл а̄лумпа̄лт ӯнлы. Римма Никитична яныгмам поратэ урыл тох потыртас: – А̄щум Никита Григорьевич, омам Ольга Константиновна, а̄ги о̄парищ наме Тоголмазова о̄лыс. Ма̄н са̄лыт о̄щсӯв. Туи хӯл алыщласӯв, то̄ванакт А̄с мус яланта̄лсӯв, тот хӯлупъясӯв. Ам Гена каӈк о̄щсум. Хунь ам са̄т э̄тпосум то̄влыс, омаме̄н хотталь щалтыс. Ане̄кваме̄н палт яныгмасме̄н, наме Мария Яковлевна. Тув палыт тав ётэ родовой угодиянувт о̄лсӯв, во̄рт ха̄йтыгтасме̄н. То̄нт ма̄нти маснутыл о̄лсӯв, ща̄нь ла̄тӈыл потыртасӯв, тох та яныгмасӯв. Ане̄кваме̄н рущ ла̄тӈыл щар ат потыртас. Ам хунь школан минасум, рущ ла̄тыӈ о̄с ат ва̄сум. Тув ане̄квамн тотве̄сум, тав учитель нэ̄ нупыл ханты ла̄тӈыл ла̄выс: «Ты ма̄нь а̄гирищ ханищтахтуӈкве вуе̄лн». А̄нум школат хӯлистэ, такви юв ё̄мантас. Ам рӯщ ла̄тыӈ ат ва̄глум, нэ̄матыр ат торгамтэ̄гум, тувыл ла̄щалла̄щал хотмус потыртаӈкве та ханьщувласум. А̄тяме̄н ма̄н ётув о̄лыс. О̄выл классыт ханищтахтамум порат, 1978 та̄лт, ане̄кваме̄н а̄тимыг е̄мтыс. Тав юипа̄лэ̄т а̄тям ос каӈкум аквнув ляпат ловумтасы̄г. Ам амттем та хультсум. Тувыл ане̄квам яга̄гитэ̄н вуйве̄сум, э̄лаль тав палтэ Касум па̄вылт о̄лмыгтасум. Тав ке̄р ла̄пкат рӯпитас, онтырса̄т нупыл хӯрум та̄л о̄лыс. 1984 та̄лт ам школа а̄стласум. Э̄лаль Тобольск ӯсн ханищтахтуӈкве минасум. Тот кит та̄л ханищтахтасум. Ювле ёхтысум, хум ва̄рсум, о̄йкам наме Олег Петрович. Кит ня̄врам о̄ньщиме̄н, пыгме̄н Женя, а̄гиме̄н Оля. Женяме̄н Ханты-Мансийск ӯст ЮГУт физкультура ос спорт тэ̄лан ат та̄л ханищтахтас. Тав ань «Газпром» ма̄т рӯпиты. Нэ̄ тотыс, кит ня̄врам о̄ньще̄г. Ам пермат мис поснэ нэ̄г рӯпитасум. Тувыл перма хотвуйвес, ӯйхулыт пуссын алве̄сыт. Татем ёмас мисыт о̄лсыт, янгыщ поснэ мисыт. Ма̄н тувле нас та суссӯв, пуссын лю̄щсув. Та порат тот кӯщаиг Куликов о̄йка рӯпитас, тав ла̄вме щирыл ты тэ̄ла ты о̄лыс. Ты юипа̄лт такви мо̄т ма̄н тахас, Ямал ма̄ нупыл, тув хотталь о̄лмыгтас. Ам тыт Касумт тармыл о̄лэ̄гум, ня̄врамагум тыт яныгмасы̄г. Ёмас па̄выл, лылые̄пе сыстам. Ань о̄йкаме̄нтыл ме̄нттеме̄н хультсуме̄н, а̄гипыгагме̄н яныгмасы̄г, э̄лын о̄лэ̄г. Ня̄врамагум ща̄нь ла̄тыӈ ат ва̄гы̄г, рущ ла̄тӈыл потыртым та яныгмасы̄г. Ань ам нуплум ла̄ве̄г, китыглахтэ̄г: «Ома, наӈ манрыг ме̄наме̄н ханты ла̄тӈыл потыртаӈкве ат ханищтасагын? » Сусте̄мт, ла̄тӈе̄н ат ва̄нэтэ̄н ма̄гыс сыманэ̄н ща̄рге̄г. Ам ос ювле ла̄ве̄гум: «Ам нэ̄нан тахсагум ханищтаӈкве, нэ̄н ла̄тӈув хӯнтлуӈкве ат тахсын». Ань номсэ̄гум, оссамрищиг о̄лсыг, э̄рыс ханищтаӈкве ханты ла̄тӈыл потыртаӈкве. Пыгум а̄гитэ ань мощ яныгмас, тав ётэ тай ханты ла̄тӈыл потыртэ̄гум. Римма Никитична потре та оигпас. Ты соссаӈ нэ̄кве, хо̄тпа нупыл сымыӈ э̄лумхо̄лас са̄в та̄л пуста̄гыл вос о̄лы, На̄й-О̄тыранэ̄н вос ӯргалаве!

1133 2016. 10. 06. Светлана РОМБАНДЕЕВА

Ща̄нь ла̄тӈе янытлан э̄ква Тӯяг Ӯринэ̄ква хо̄тал о̄лум порат Ханты-Мансийск ӯскант ам Людмила Романовна Хомляк ёт хо̄нтыгпахта̄лсум. Тав ханты э̄ква, Нягань ӯст о̄лы. Тот э̄ргын, йӣквнэ ансамбль ва̄рыс. Ялпыӈ хо̄талыт о̄лыгланэ̄ныл порат та̄н ва̄тихал выступайта̄лэ̄гыт. Людмила Романовна ла̄выс: «Ма̄н ансамблювн са̄т хо̄тпа яласы. Ань тыг хӯрум хо̄тпа ёхтысув. А̄гирищ наме Ксюша, таве ам ханты йӣкв йӣквуӈкве ос ханты ла̄тӈыл э̄ргуӈкве ханищтылум. Ювле хультум са̄тыт Нягань ӯст Ӯринэ̄ква хо̄тал о̄с ва̄рыглавес. Ханты-Мансийск ӯсныл ма̄ньщи нэ̄ Маргарита Федоровна Рябова ос ханты нэ̄ Фаина Павловна Иштимирова ёхталасы̄г. Тот ма̄н янгема̄не маттем та йӣквсув, са̄всыр сценкат ва̄рыгласув. Ӯс мирн ма̄н э̄рганув, йӣкванув сака мӯстысыт».

1133 2016. 10. 06. Людмила ТЕТКИНА

Тав са̄в та̄л кӯщаиг рӯпиты Ня̄врамыт ханищтан хо̄тпат янытлан хо̄тал кастыл ам Альбина Васильевна Попова урыл потыр хансэ̄гум. Тав Ха̄льӯс район Саранпа̄вылт «Поиск» нампа центр кӯщаиг о̄лы. Альбина Васильевна 47 та̄л ня̄врамыт ханищтым рӯпиты. Тав «Отличник народного просвещения», «Заслуженный учитель ХМАО» яныг намыг ос са̄в мо̄т янытлан нэ̄пакыт о̄ньщи. Ювле хультум та̄лт «Поиск» нампа центр Россия янытыл о̄лум касылт но̄хпатыс. То̄нт «100 лучших организаций дополнительного образования России» намыл майвес. Альбина Васильевна Няхлаӈ па̄вылт самын патыс. Тот о̄выл классыт ханищтахтас. Тав ща̄нягеа̄щаге Василий Николаевич Вадичупов ос Елена Ивановна Таратова ма̄ньщи хо̄тпаг о̄лсы̄г. Ще̄мьят Альбина яныг а̄гииг о̄лыс. Са̄т та̄лэ хунь то̄влыс, школат ханищтахтуӈкве патыс. Та поратэ урыл Альбина Васильевна таи потыртас: «Няхлаӈ па̄вылт яныг школа рӯпитас, а̄гирищитпыгрищит са̄всыр ма̄ныл тув ханищтахтуӈкве тотыглаве̄сыт. Па̄вылт таса̄вит ня̄врам о̄лыс, та̄н пуссын школан ялантасыт. Тыи ма̄гсыл та̄н ётаныл ханищтахтуӈкве ам сака ка̄сащасум. Ёмащакв номилум, хумус а̄тям ёт ты яныг школан ё̄мсуме̄н, хумус о̄выл щёс партан ӯнттуве̄сум. То̄нт омам мо̄т нэ̄ ёт во̄рт рӯпитас. Юв ёхтыс, а̄тям нупыл ла̄выс: «Манрыг ханищтахтуӈкве ке̄тыслын, а̄гиме̄н иӈ ма̄нь, юн вос о̄лы». А̄тям таве̄н ла̄выс: «Вос ханищтахты». Тох школан ялантаӈкве та патсум. Тувыл Няхлаӈ ос Кимкъясӯй па̄влыгт о̄лнэ колхозыг аквантотвесы̄г. Бешкильцев о̄йка кӯщаиг паттувес. Няхлаӈ па̄вылт о̄лнэ мир Кимкъясӯйн ва̄нтлуптаӈкве патве̄сыт. Тыи ма̄гсыл китыт классыт ханищтахтуӈкве та па̄вылн тотве̄сум. Та хо̄тал о̄с ёмащакве номилум, Кимкъясӯй па̄вылн на̄иӈха̄пыл тотве̄сум, ты ут такем кургыс, тыи ма̄гсыл сака пилсум, а̄латы лю̄щсум. Па̄вылн ёхтысӯв, ос хащта̄л ма̄хум палт та ва̄нттуве̄сум. Таса̄вит та̄л ювле хультыс, та хо̄тал ань тыг мус номилум. Тувыл ща̄нягума̄щагум Кимкъясӯйт кол ӯнттысы̄г. Э̄щанум, а̄пщирищанум та колт яныгмасыт. Ам ма̄ниг о̄лмум порат тэ̄н са̄лы ӯрим яласы̄г, тувыл на̄лув ва̄глысы̄г, та па̄вылн о̄лмыгтасы̄г. Тэ̄н ӯнттум колэ̄н ань тыг мус па̄влувт ӯнлы. Ам та̄л сыс кит щёс тув ялантэ̄гум. Э̄щанум э̄лн о̄лэ̄гыт, тыи ма̄гсыл туп тэ̄лы порат ёхталэ̄гыт, тот ва̄щиньтахтэ̄в». Кимкъясӯй па̄вылт Альбина нила класс мус ханищтахтас, тувыл э̄лаль Кульпасн ке̄твес. Та па̄вылт тав школа а̄стлас ос Ханты-Мансийск ӯсн э̄лаль ханищтахтуӈкве минас. Та порат училище а̄стлам а̄гитпыгыт та̄ра рӯпитаӈкве ке̄тве̄сыт. Ос та па̄вылт хӯрум та̄л рӯпитаӈкве э̄рыс. Ма̄ньщи а̄ги Ванзеват па̄вылн ке̄тыглавес. Тув минуӈкве тав щар ат ка̄сащас, ты юипа̄лт Ха̄льӯс район Сӯкыръя па̄вылн ня̄врамыт ханищтаӈкве минуӈкве ла̄ввес. Та урыл Альбина Васильевна ла̄выс: «Акв порат ща̄нягумна̄щагумн Саранпа̄выл нупыл тотыглаве̄сум, ва̄глум, Сӯкыръя ты па̄выл ляпат о̄лы. Тыима̄гсыл тув минуӈкве та̄ра ка̄сащасум. Ха̄льӯсныл Саранпа̄выл нупыл ам на̄иӈха̄пыл минасум. То̄нт витэ ма̄нь о̄лыс, Хо̄рыӈпа̄выл мус туп тотвесӯв. Аквта порат Ха̄льӯсныл Сӯкыръян интернат ӯральтаӈкве нэ̄ йис. Ты хащта̄л нэ̄ ёт Хо̄рыӈпа̄вылт на̄лми ва̄тат ӯнлысаме̄н. Тувыл тав ма̄гсылэ ха̄п ке̄твес, ам тав ётэ Саранпа̄выл мус ёхтысум. Ань номсэ̄гум, ты нэ̄ Сӯкыръя па̄вылн ат ке йис, улпыл, Хо̄рыӈпа̄вылт на̄лми ва̄тат хоса ха̄йтыгтасум. Тувыл аквъёт мирколн минасаме̄н. Миркол кӯщаиг Малюгинхум о̄лыс. Ме̄н ма̄гсыламе̄н ма̄шина хо̄нтыс, Николай о̄йкам тот водителиг о̄лыс. Тав ме̄наме̄н звероферма мус тотсаге ос тот хультуптасаге. Ты звероферма по̄хыт такем та пасыс, такем па̄ӈкыӈ о̄лыс. Тот лю̄ляхо̄лым, номсысум, акв та̄л тах ве̄ритэ̄гум, тувыл юв ое̄гум, ты па̄вылт о̄луӈкве щар ат хультэ̄гум. Тувыл интернатыт завхозыг рӯпитан хум я̄ӈк лувыл ты ёхтыс, телеган та̄лттувесме̄н, интернат нупыл та тотвесаме̄н. Ам э̄лыпа̄лумт ос акв ма̄ньлат а̄ги тув рӯпитаӈкве ёхтыс, акв колыл майвесаме̄н. О̄лнэ колме̄н ёмащакв хотщё̄питаслуме̄н, ла̄пкат обои ёвтсуме̄н. Тувыл хунь ва̄глуме̄н, хумус ты утыт ханлуӈкве э̄ри, нас ма̄нь кнопкал тув ва̄рсанме̄н. Мощ о̄лсуме̄н, ты кнопкат ёлпатыглаӈкве патсыт, нё̄тнэ обоит ёл та рагатасыт. Таквсы пора ёхтыс, ащирмаӈыг е̄мтыс, кӯр па̄лтуӈкве о̄с ат ха̄сыме̄н. Ю̄рт а̄гим ёт маткем та саваласме̄н. Ам ма̄ньта̄гыл интернатыт о̄лсум. Юв ос туп туи порат ӯщлахтуӈкве ёхталасум, омам тэ̄нут па̄йтуӈкве, вит тотуӈкве, посхатуӈкве, мис посуӈкве акваг нё̄тыслум. Тэ̄лы тай мощщаке̄н ёхталасум, омам кӯр акваг такви па̄лтыгластэ. То̄нт па̄вылт сака са̄в ма̄ньлат пыг о̄лыс. Ка̄саласаныл, кит хащта̄л а̄гииг ёхтысы̄г, ме̄н палтуме̄н пе̄рхатуӈкве та патсыт. Акв хо̄тал кӯрме̄н па̄лтысламе̄н, тувыл, яаты, посым но̄ӈхаль ат мины, ювле харты, нас конойсуме̄н. Ма̄хум во̄всуме̄н, хум кӯртур сунсуӈкве колалан но̄хха̄ӈхыс, тувыл ёлва̄глыс, акв ка̄тэ̄т яныг то̄р о̄ньщас. Ме̄н нупыламе̄н ла̄ви: «Ос манрыг кӯртурын то̄рыл ла̄ппантыслын». Ме̄н тай ты урыл щар нэ̄матыр ат ва̄глуме̄н. Па̄вылт о̄лнэ пыгыт тох та капыртасыт, ме̄наме̄н тох саватасыт. Акв хо̄тал ӣтипа̄лаг юрт а̄гим ёт юн о̄лыме̄н. Тувыл хӯлыламе̄н, иснас хотьютн та ра̄таве, ме̄н тув ха̄йтсуме̄н. Сунсыме̄н, иснасын ква̄лыгн картопка нэ̄гсалым о̄лы. Ты картопка иснасыт та ра̄ты, ос ква̄лге э̄л хотталь мины. Конха̄йтсуме̄н, пыгыт та̄ра сысы оясыт, тыщирыл рохтуптавесме̄н. Сӯкыръя па̄вылт ам хӯрмит классын ялантан ня̄врамыт ханищтасанум. Па̄вылт интернат рӯпитас, тот яныгса̄т арыгкем ня̄врам о̄лыс. А̄гитпыгыт кит смена щирыл ханищтахтасыт. То̄нт нё̄рт са̄всыр ма̄ныл ёхтум ма̄хум рӯпитасыт, та̄нки ня̄враманыл тыг ханищахтуӈкве ке̄тыгласаныл. Кит та̄л ня̄врамыт ханищтым рӯпитасум. Тувыл Саранпа̄вылт яныг школа ӯнттувес, интернатыт о̄лум ня̄врамыт тув ке̄тве̄сыт. Та порат Саранпа̄вылт кит школа рӯпитасы̄г, тот 700 арыгкем ня̄врам ханищтахтасыт. Сӯкыръя па̄вылт туп о̄выл школа хультуптавес, ос ам тот кӯщаиг паттуве̄сум. Кит та̄л тот рӯпитасум. Та порат ма̄н, ма̄ньлат а̄гитпыгыт, пуссын комсомольцыг о̄лсӯв. Ам ты организацият кӯщаиг пе̄рияве̄сум. То̄нт ма̄н Сӯкыръя па̄вылт о̄лнэ а̄гитпыгыт ёт клуб ӯнттуӈкве о̄вылтахтасӯв. Колала мус ӯнттыслӯв, уласыт, пасаныт ос ма̄нки ва̄рсӯв. Тувыл ам Саранпа̄вылн рӯпитаӈкве минасум, па̄вылт ӯнттум клубув тох та хультыс, нэ̄мхотьют э̄лаль ва̄руӈкве воссыг аты патыс. Саранпа̄выл школат рӯпитаӈкве патсум. Тувыл Володя пыгум иӈ ма̄нь, ва̄тихал а̄гмыл е̄мталас. Акваг тав ётэ юн о̄лсум. Ам классум мо̄т хо̄тпатын акваг та ханищтавес. То̄нт ты рӯпатаныл по̄хынминуӈкве тахсум, тувыл школа кӯщай ла̄выс, ня̄врам ханищтан хо̄тпа мощща, о̄с акв та̄л вос рӯпитэ̄гум. Акв та̄л о̄с рӯпитасум, тувыл интернатын воспитателиг патхатасум. То̄нт таса̄вит ня̄врам о̄лыс, Саранпа̄вылт кит интернат рӯпитасы̄г. Ам ма̄нь интернатыт воспитателиг о̄лсум. Тувыл яныг интернат кӯщай та̄л хультыс, ам тув рӯпитаӈкве паттуве̄сум. Хунь ты интернатын ёхтысум, о̄влэ̄т та̄ра кон оюӈкве тахсум, такем пилыщмаӈ о̄лыс. Иснасытыт хащлум то̄рло̄мтыт ханащласыт, колкан о̄люпыл нэ̄мхуньт аты сартыгласаныл, а̄вит, улпыл, о̄с нэ̄мхуньт ат ловтыглаве̄сыт. Тамле интернатыт ня̄врамыт о̄лсыт. Ам рӯпитаӈкве хунь патсум, интернат ёмщакв щё̄питаслум. Са̄всыр пормасыт ма̄гсыл Тюмень ӯсн ялантасум, тот маныр э̄ри, пуссын ёвтсум, тувыл яныг вит порат на̄иӈха̄пыл Саранпа̄вылн тотсанум. Интернат кӯщаиг ам 11 та̄л рӯпитасум. Тувыл о̄выл школан рӯпитаӈкве во̄вве̄сум. Тот ам 1992 та̄лныл 2006 та̄л мус кӯщаиг о̄лсум. 2007 та̄лныл ты центрыт рӯпитэ̄гум. Ань тот ня̄врамыт са̄всыр кружокытын ялантэ̄гыт, сакныл хартуӈкве, ю̄нсхатсуӈкве ос мо̄т щирыл ма̄щтырлаӈкве ханищтавет. Альбина Васильевна ты центрыт рӯпитаӈкве хунь о̄вылтахтас, ня̄врамыт ма̄гсыл Саранпа̄выл ляпат «Долина Польи» ӯщлахтын ма̄ ва̄рыс. Ань ня̄врамыт нё̄рт ёсал тахсуӈкве ве̄рме̄гыт. Ты центр рӯпататэ урыл Альбина Васильевна о̄с ла̄тыӈ ла̄выс: «Ка̄сыӈ та̄л хунь йильпи ханищтахтын та̄л о̄вылтахты, ня̄врамыт тыг во̄виньта̄лыянув. Та̄нанылн потыртэ̄в, тыт манхурип кружокыт рӯпитэ̄гыт. А̄гирищит э̄ргуӈкве ос йӣквуӈкве сака э̄руптэ̄гыт. Ты коныпал та̄н са̄всыр атыӈ ня̄нь ва̄руӈкве ос тэ̄нут тыт па̄йтуӈкве ханищтавет. Яныгнув а̄гит ос са̄всыр нё̄тнэ супыт тыт ю̄нтэ̄гыт. Пыгрищит бильярдыл ос теннисыл ёнгуӈкве ёхталэ̄гыт. Ань центр по̄хат яныг кол ӯнттуӈкве тахсӯв. Ня̄враманув тот футбол ос волейбол вос ёнгынувыт, тувыл таса̄вит олн ат о̄ньще̄в. Ань «Кабинет юных спасателей» ва̄руӈкве номсэ̄в, тувыл рӯпитан колув сака ма̄нь, колнак ат то̄вылхаты. Ма̄н са̄всыр ёмас номт о̄ньще̄в, тувыл мощща олныл та̄стыглаве̄в. Нё̄р ляпат ӯщлахтын ма̄ хунь ва̄рыслӯв, ма̄навн Татьяна Степановна Гоголева нё̄тыс, депутатский фондыныл олн та̄стыглас. Ты олныл ня̄врамыт ӯщлахтын ма̄ ма̄гсыл «Бураныт», са̄в мо̄т э̄рнэ пормасыт ёвтсӯв. Ань Татьяна Степановнан яныг пӯмащипа ла̄тыӈ ла̄ве̄в. Ма̄н сака ёмащакв Саранпа̄вылт о̄лнэ музей ос клуб ёт рӯпитэ̄в. Са̄всыр ялпыӈ хо̄талыт порат ня̄врамыт ва̄рнэ пормасаныл тот суссылтыянӯв. Ня̄враманув са̄всыр концертыт э̄ргуӈкве ос йӣквуӈкве сака э̄руптэ̄гыт».

1133 2016. 10. 06. Валентина УЗЕЛЬ

Яныгпа̄ла хо̄тпат а̄канит ва̄рсыт Ты э̄тпос о̄выл хо̄талэ яныгпа̄ла ма̄хум янытлан хо̄талыг о̄лыс. Ты ялпыӈ хо̄тал юио̄выл та̄лытт ущты янытлаӈкв о̄вылтавес, ты э̄лыпа̄лт ма̄н о̄лнэ ма̄вт тамле хо̄тал ат ва̄рыглавес. Ты ялпыӈ хо̄тал кастыл ка̄сыӈ ӯст ос па̄вылт матум ма̄хум янытлавет. Ханты-Мансийск ӯст та̄н акванатыглаве̄сыт ос а̄кань ва̄руӈкв ханищтаве̄сыт. «То̄рум Маа» музейт рӯпитан хо̄тпат та̄н тамле пӯмыщ ва̄рмаль ва̄руӈкв номылматсыт. Та̄н рӯпитан коланыл мо̄тпал е̄рт санаторияг ла̄внэ кол о̄лы. Тув округ янытыл ма̄хум пусмалтаӈкв те̄тыглавет. Хусахтем хо̄тал та̄н ӯст о̄лэ̄гыт, ёмащакв пусмалтавет, са̄всыр ма̄н тотыглавет. Ос са̄т сыс тит щёс та̄н ты музей колн во̄выглавет. Ань ты э̄тпос о̄выл хо̄талэ̄т та̄н тув о̄с во̄выглаве̄сыт, о̄влэ̄т экскурсиял ва̄рве̄сыт, соссаӈ мир о̄лупса урыл потыртаве̄сыт. Тувыл ӯнттуве̄сыт ос ханты а̄кань пе̄руӈкв ханищтаӈкв патве̄сыт. Та̄наныл Альбина Николаевна Мехнина ос Светлана Менделева ханищтасаге̄н. Тыг пусмалтахтуӈкв те̄тым ма̄хум пуссын яныгпа̄лаг о̄лэ̄гыт, са̄выӈпа̄лэ та̄н халанылт рущит. Тыг са̄в та̄л ювле хультум порат, яныг хо̄нт минам юипа̄лт, рӯпитаӈкв те̄тве̄сыт. Ань та̄н ювле та̄нти о̄лум ма̄нанылн минуӈкв щар ат таӈхе̄гыт, тыт ӯнтхатасыт, ня̄враманыл о̄с пуссын тыт о̄лэ̄гыт. Ос та̄н ётаныл потыртамув порат та̄н ма̄ньщи ос ханты о̄лупса урыл нэ̄матыр торыӈ ат ва̄гыт. Та титыглахтэ̄гыт, манрыг а̄канит тох ва̄равет, вильт манрыг ат о̄ньще̄гыт, саманыл манрыг ат по̄славет. О̄с та соссаӈ мир о̄лупса урыл потыртавет. То̄ват ла̄ве̄гыт, рущ а̄кань манрыг ю̄нтуӈкв ат ханищтавет. Ма̄хманувн ла̄вавет, ты музей ма̄ньщи ос ханты мир о̄лупса суссылтан ма̄гыс рӯпиты, рущит ма̄гыс мо̄т музей о̄лы. Ос э̄лаль роттыг та ӯнлантэ̄гыт, ла̄щлакв а̄канит та пе̄ре̄гыт. Ам тит ма̄тум э̄кваг ёт потыртасум, тэ̄н сас Советский ӯсныл ёхтумы̄г. Акватэ рущ э̄ква, мо̄танэ башкир э̄ква. Рущ э̄ква наме Мария Васильевна Жигульская, тав 84 та̄лэ то̄влыс. Ва̄т са̄грапнал э̄тпост онтырса̄т нупыл ат та̄лэ тах то̄влы. Мо̄т э̄ква наме Фарзана Гафуровна Динишева, тав ос 85 та̄лэ то̄влыс. Ты э̄кваг щар о̄выл щёс Ханты-Мансийск ӯсн пусмалтахтуӈкв те̄твесы̄г. Ла̄ве̄г, татем ёмащакв та̄н тыт о̄ньщавет, пусмалтавет, тыттавет. Мо̄т ма̄т тамле ёмас ма̄хум а̄тим. Ла̄всы̄г, воссыг мо̄т ма̄н аты минэ̄г, пусмалтахтуӈкв тыг ёхталаӈкв патэ̄г. Ань а̄кань ва̄рум яныгпа̄ла хо̄тпат «То̄рум Маа» музейт рӯпитан ма̄хумн яныг пӯмащипа ла̄тыӈ ла̄всыт, та̄нанылн тот сака мӯстыс.

1133 2016. 10. 06. Тамара МЕРОВА

Во̄раян хумыт рӯпитасыт Ханты-Мансийск ӯст та хультум са̄тыт «То̄рум Маа» нампа музейт соссаӈ ма̄хманув во̄раян кол ӯнттысыт ос сыресыр алыщлапыт щё̄питан ханищтап о̄лыс. Тамле тэ̄лат ва̄руӈкве 2006 та̄лт о̄вылтаве̄сыт. То̄нт тув са̄в ма̄ныл во̄раян хум хо̄тпат ёхталасыт. Та̄н музейт «Охотничья тропа» ё̄мыгтан лё̄х хосыт са̄всыр алыщлан утыт ӯнттысыт. Ань ты та̄л музейт ханищтап проектыт ма̄гыс пуӈктотнэ хум Вячеслав Кондин тав ты семинар ва̄рыгластэ. Музейн мӯйлуӈкве ёхталан хо̄тпат пуссын во̄раян утытыл сака пӯмщалахтэ̄гыт, са̄всыр алщит урыл китыглахтэ̄гыт. Вячеслав Юрьевич таима̄гыс та̄наныл янытэ̄т ханищтасанэ. Тав са̄в ма̄ныл о̄лнэ во̄раян хо̄тпат ёт хо̄нтхатыглас, та̄н ётаныл потырта̄лме юипа̄лт пе̄с йис тэ̄лат та̄рапаттыс. Тувыл музейт йильпи алыщлапыт ӯнттын ма̄гыс проект щё̄питас. Таве̄н Ханты-Мансийск ӯст «Лэпк» нампа общинат рӯпитан хум хо̄тпат нё̄тсыт: тыи Юрий Григорьевич Кондин ос Михаил, Григорий пыгаге, Валерий Михайлович Шульгин. Белоярский район Касум па̄вылныл ханты хум Павел Михайлович Тользин во̄виньта̄лвес ос Ха̄льӯс район Хо̄рыӈпа̄вылныл ма̄ньщи о̄йка Рудольф Васильевич Меров ёхталас. Тувыл музейт рӯпитан хо̄нтаӈ ма̄ньщи пыг Анатолий Брусницын та̄н ётаныл рӯпитас, тав о̄с са̄в тэ̄лат ва̄г. Тав тув ёхталам а̄гирищитпыгрищитын алыщлапыт урыл потыртас. Мӯйлуӈкве ёхталам а̄гитпыгыт МУК ханищтан колныл тотыглаве̄сыт. Тот та̄н ётаныл Айс Аджаев рӯпиты, во̄раян ва̄рмалитын ханищтыянэ. Айс Вячеславович Калмыкия ма̄ныл тыг ёхтыс. Ос тав хӯрмит та̄лт Вячеслав ёт ва̄йхатас ос тувыл ханищтан ня̄враманэ музейн тотыглаӈкве патсанэ. Айс такви ма̄тэ̄т о̄лме порат о̄с акваг во̄раяӈкве таӈхыс, ань ты номтэ тыт ма̄н ма̄хманув ёт э̄лаль тотытэ. Соссаӈ хо̄тпанув ат хо̄тал сыс во̄раян кол а̄стласаныл. Кол а̄висӯнт по̄хат а̄ращ ва̄рсыт, тэ̄нут о̄щнэ ма̄нь сӯмъях ӯнттысыт. А̄мп ма̄гыс ос я̄нас кол щё̄питасыт. Тамле во̄р кол ка̄сыӈ хум такви во̄раян ма̄тэ̄т ӯнтталас. То̄ванакт тав матах хо̄талн во̄раяӈкве яланты. Кол кит хо̄тпа о̄лнэ янытыг ӯнттаве. Тот тэ̄нут со̄пасыг акваг хультуптэ̄гыт, а̄ращ по̄хат на̄йӣв щё̄питэ̄гыт. Кол исыглан ма̄гыс ма̄нь кӯр па̄лтыглэ̄гыт, тэ̄нут ос кон а̄ращт па̄йтуӈкве ве̄рме̄гыт. Музейн ёхталан ма̄хумн суссылтан ма̄гыс та̄н па̄тас ва̄рсыт. Пе̄с порат па̄тасыл янгыщ нэ̄ хо̄тпат ня̄враманыл ёт ва̄с алыщласыт. Тувыл Вячеслав Кондин нёхс ня̄ль ва̄рыс. Тамле ня̄ль таве̄н Кимкъясӯйт о̄лум Виктор Анямов суссылтас. Валерий Шульгин янгуй ка̄тынпаттын ма̄гыс ёвт ва̄рыс. Тамле алыщлап янгуит вит айнэ лё̄х хосыт ӯнтталавес. Ань алыщлапыт ва̄рум хум хо̄тпат пуссын йильпи утаныл хумус рӯпитэ̄гыт, мӯй ма̄хумн потыртасыт ос суссылтасыт. Ма̄навн сака пӯмыщ о̄лыс. Тувыл Эрика Петровна Сургутскова, музей кӯщай нэ̄, са̄в хо̄тал рӯпитам ма̄хумн пӯмащипа ла̄тыӈ нэ̄пакыт мӯйлуптас ос ма̄хум пуссын тэ̄нэ пасан ва̄тан во̄всанэ. Рӯпитам хо̄талыт молях оигпасыт, ос хумыт посыӈ хо̄талыт сыс ёмас рӯпата ва̄руӈкве а̄лымасыт. Тамара Мерова хансыс ос хури ва̄рыс.

1133 2016. 10. 06. Валентина УЗЕЛЬ

Э̄ргын ос йӣквнэ касыл о̄лыс Ты э̄тпос о̄выл хо̄талэ яныгпа̄ла хо̄тпат янытлан хо̄талыг о̄лы. Ты кастыл ос а̄гмыӈмосыӈ, сакватахтам хо̄тпа урыл потыртан ма̄гыс Ханты-Мансийск ӯст ялпыӈ хо̄тал ос йӣквнэ, э̄ргын касыл ва̄рыглавес, рущ ла̄тӈыл тох ла̄ввес – «Я радость нахожу в друзьях» нампа фестиваль. Ӯсувн са̄в мир ёхталас. Ты касыл лӯпта этпос 25 хо̄талэ̄т о̄вылтавес, ты э̄тпос о̄вылтахтам порат ущ та по̄илттавес. Са̄всыр ӯсытныл, ма̄нь па̄влытныл титса̄ттем хо̄тпа та̄нти ураныл тув пищма хассыт. Хотьют ёмащакв по̄слы, хотьют ёмащакв ю̄нты, та̄н пуссын касуӈкв ка̄сащасыт. Хотьют ос э̄ргуӈкв ман йӣквуӈкв ха̄сы, та̄н о̄с кассыт. Стихыт ос потрыт хаснэ ма̄хум о̄с та̄нти халанылт кассыт. Тит хо̄тал ӯст о̄лнэ ма̄хум искусство центрын ялантасыт. О̄выл хо̄тал ма̄к каснэ хо̄талыг о̄лыс. Са̄всыр ма̄т рӯпитан яныг кӯщаит ос артистыт жюрихо̄тпаг тув пе̄риялве̄сыт. Та̄н о̄выл хо̄тал ты ма̄хум йӣкваныл нупыл суссыт, э̄рганыл хӯнтлысаныл. Титыт хо̄тал но̄хпатум ма̄хум янытлаве̄сыт. Лангепас ӯст о̄лнэ хум Анатолий Матузик но̄хпатыс, тав ты щар яныг мӯйлупсал майвес. Мо̄т ма̄хум о̄с пуссын мӯйлуптаве̄сыт. Ӯсувн ёхталам ма̄хум халт акв хум о̄лыс, тав афган мир о̄лнэ ма̄т хо̄нтлыс, ань ветераныг ла̄ваве. Хум наме Анатолий Зарубин. Тав ма̄н о̄лнэ ма̄в урыл такви э̄рыг хансум. Ань матыр ялпыӈ хо̄тал те о̄лы, тав ты э̄рге тот та э̄ргитэ. Тав ты фестиваль о̄лнэ порат о̄с янытлавес. Ханты-Мансийский район Горноправдинск па̄вылныл рущ э̄кват ёхталасыт, та̄н ансамбль ва̄рсыт. Па̄вланылт о̄лнэ яныгпа̄ла э̄кват пуссын тув ялантэ̄гыт. Та̄н ань о̄с тыг ёхталасыт, турсуяныл татем суиӈыт, маттем рущ э̄ргыт тыт та э̄ргысыт. Ты ма̄хум халт то̄ва хум хо̄тпат та̄нти ё̄мыгтаӈкв ат ве̄рме̄гыт, та̄н сценан коляскал тотве̄сыт. Э̄ргынэ̄ныл ман потыртанэ̄ныл порат ма̄хум пуссын ка̄тпатта маттем та̄нанылн та ратсыт. Тит хумыг э̄кванэ̄ныл ёт йӣкв суссылтасы̄г. Та̄н ань хурит по̄слым ты о̄лэ̄гыт.

1133 2016. 10. 06. Валентина УЗЕЛЬ

Во̄раян ма̄хум пормасаныл Ма̄вит ос э̄лумхо̄лас нампа музейт сака пӯмыщ выставка суссылтаӈкв о̄вылтавес, рущ ла̄тӈыл тамле намыл пинвес – Мужчина. Воин. Охотник. Тот са̄всыр мирыт во̄раян хум хо̄тпаныл пормасыт акванатве̄сыт. То̄ва пормасыт Санкт-Петербург ӯсныл тыг тотве̄сыт. Тот сака яныг музей о̄лы, музей этнографии тох ла̄ваве. О̄лнэ ма̄в янытыл атым пе̄с пормасыт тот ӯргалым о̄ньщавет, то̄ва пормасыт яныгса̄т арыгтем та̄лыг е̄мтсыт. Ка̄сыӈ мир такви хум хо̄тпанэ янытлыянэ, та̄н ще̄мьяныл тыттыяныл, э̄кваныл, ня̄враманыл ма̄гыс во̄рае̄гыт, хӯл алыщлэ̄гыт. Нэ̄ хо̄тпат юртаныл ма̄гыс ёмас маснут ю̄нтыгласыт –та̄н во̄рт ё̄мыгтанэ̄ныл порат ул вос по̄лявет, та̄нанылн нэ̄матыр торас ул вос ва̄ри. Во̄раян хо̄тпа таве̄н ма̄к э̄рнэ пормас та̄нти ва̄рыгласыт. Ань ты выставкат са̄всыр мир пормасыт суссылтавет. Сараныт, грузиныт, эвенкыт, мо̄т мирыт – пормасаныл пуссын мощ аквхурипаг ю̄нтым о̄лэ̄гыт. Матрыг ма̄ньщи хум хо̄тпат пормасаныл тот а̄тимыт. Петр Ефимович Шешкин туп тав йӣвныл ёргум пормасанэ тот о̄лсыт. Ос акв пе̄с хури нор о̄нтсыл тагатым о̄лыс, тот пе̄с порат ул ма̄ньщи ма̄хманув по̄слуве̄сыт.

1133 2016. 10. 06. Светлана РОМБАНДЕЕВА

Рӯтыг о̄лнэ ма̄хманув ёт мӯйлысӯв Ювле хультум э̄тпос 24 хо̄талэ̄т Ханты-Мансийск ӯст о̄лнэ Государственный художественный музейт марийский ла̄тыӈ янытлан ма̄гыс ма̄хум акванатхатыгласыт. Тамле хо̄нтхатыглап «Югра многоликая» нэ̄пак хансум хо̄тпат та̄н щё̄пита̄лыяныл. Юио̄выл щёс лӯпта э̄тпост ма̄ньщи ос ё̄рн мирыг о̄вылтыт потыр о̄лыс, та э̄лыпа̄лт ос иврит ла̄тыӈ янытлавес. О̄выл ла̄тыӈ ты тэ̄ла палт пуӈктотнэ нэ̄, «Молодёжный центр» ма̄т кӯщаиг о̄лнэ нэ̄ Людмила Юрьевна Кучипалова тав ла̄выс: «Паща о̄лэ̄н, я̄тил мир! Тыхо̄тал ма̄н марийский литература о̄вылтыт мощ потраме̄в. Ты тэ̄лав палт щар ма̄кыг ялпыӈ исвещав о̄лы. Ювле хультум хо̄нтхатыглапувт исве̄щав ма̄ньщи ос ё̄рн ма̄хумн майлувес, ань та̄н таве марийцытын мыганыл». Тувыл исве̄ща рӯтыг о̄лнэ ма̄хманувн та майвес. Марийцыт Марий Эл республиканыл ос округт о̄лнэ ӯсытныл, па̄влытныл ёхталасыт: Сургут, Нижневартовск, Фёдоровский, Салым, Нягань, Советский, Югорск ос Шапша па̄вылныл о̄лсыт. Ты мир финноугорский группа палт хансым о̄лы, пе̄с порат тав тох ла̄ввес – черемисы. Та̄н ос та̄нтина̄ныл ла̄вияныл – мари. Россияв янытыл 690 со̄тыра арыг марийцыт о̄лэ̄гыт. Та̄н я̄нас республика о̄ньще̄гыт, лававе – Марий Эл. Щар ма̄к яныг ӯсаныл – Йошкар-Ола. Марий Эл ма̄т 43% са̄вит мари хо̄тпа о̄лы. Та̄нтина̄ныл кит мирыг уртыяныл – горные ос луговые. Та̄н о̄лнэ ма̄нанылт рущ ла̄тыӈ ос кит марийский ла̄тӈыг (горный ос луговой) пуссын государственный ла̄тӈыг ла̄вавет. Мари мир культураныл, искусство ос этнография тэ̄ланыл сака нё̄тнэ, пӯмыщ. Ёхталам ма̄хманыл маттем та йӣквсыт, э̄ргысыт, ка̄тыл ю̄нтым маснутаныл суссылтасыт. Янгема̄не, пуссын аквъёт атпан арыг хо̄тпа выступайтасыт. Ты хо̄нтхатыглап палт пуӈктотнэ нэ̄ Любовь Миляева ла̄выс: «Округ янытыл о̄лнэ марийский общественный организациятын ам пӯмащипа ла̄тыӈ ла̄ве̄гум. Ань акванхо̄нтхатамув ма̄гыс та̄н яныг рӯпата ва̄рсыт. То̄ваныл Марий Эл ма̄ныл ёхтысыт, ща̄нь ла̄тӈанылт стихыт ман э̄ргыт хӯнтамлан ма̄гыс та палыт ма̄ныл та йисыт». Тувыл хатань хум Тагир Аюпов потыртас, тав Ханты-Мансийск ӯст о̄лнэ Совет по делам национальнокультурных объединений и религиозных организаций тэ̄ла палт пуӈктоты: «Я̄тил мари ма̄хум, матъёмас на̄н ань тыг ёхтысын, йӣкванын суссылтасын, э̄ргысын. Ам хатань хум, тыг хосат Татарстан ма̄ныл ёхтысум. Ма̄н тот пуссын акв ляпат юртыӈыщ о̄лэ̄в – марийцыт, хатанит, чувашит. Са̄в мирыӈ странавт тох о̄луӈкве э̄ри. Ос таи лю̄ль, ань паспортанувт национальность ат хансаве. Ка̄сыӈ ма̄ ма̄хманэ хосыт щёлыӈ, ё̄р о̄ньщи. Ма̄н Россияв сака яныг, тав нэ̄мхотьютн ёлпаттуӈкве ат ве̄рмаве. Акванатхатам я̄тил мирыт, я̄тил ма̄хум, ня̄врамаквет, пуссын пуста̄гыл о̄лэ̄н, пе̄с порат о̄лум ма̄хманын номе̄н, омаа̄тянын янытлэ̄н, ня̄враманын э̄рпыӈыщ янмалтэ̄н! Ос таи акваг номим о̄ньщелы̄н: кос хоты национальностил ма̄н о̄лэ̄в ма̄н пуссын Россия ма̄хум, тыт акваг о̄лсӯв, ань о̄лэ̄в, ос э̄лаль о̄луӈкве патэ̄в». Са̄в хо̄тпа ёмас, сымыӈ ла̄тыӈ ла̄выс, рӯт ма̄хманув та̄нти ла̄тӈанылт мощ э̄ргащласыт, потрамасыт. Тувыл э̄типа̄ла оигпанэ̄тэ э̄лыпа̄лт атхатам ма̄хум «Кандра» («Верёвочка» «Ква̄лыг») нампа марийский йӣкв йӣквсыт. Ты йӣкв, насати, са̄всыр мирыт юрщмалтыянэ, пе̄с пора о̄лупса ос ань йис о̄лупса аквано̄лтыяге, яныгхо̄тпат ос ня̄врамыт акванляпамтыянэ. Мо̄тыт щёс, яныг таквс э̄тпост, ты ялпыӈ исве̄ща тах рущ мирын миве.

1133 2016. 10. 06. Светлана Динисламова

Андрей Тарханов нёлса̄т та̄лэ ты то̄влы Андрей Семенович Тарханов ма̄ньщи поэт, ос потранэ рущ ла̄тӈыл хансыянэ. Тав хо̄нтаӈ ма̄ньщи хум, та̄н ща̄нь ла̄тӈаныл хосатнув тыпылтасаныл. Ювле хультум йис па̄сныл та̄н рущ ла̄тӈыл потыртэ̄гыт, таима̄гыс ла̄тӈаныл та минас. Ня̄врамыт школат о̄с туп рущ ла̄тӈыл ханищтаве̄сыт. Андрей Тарханов рущ ла̄тыӈ ёмащакв ханищтастэ, такви ма̄витэ, такви ма̄ньщи мире, пе̄с йис о̄лупса урыл ёмащакв ва̄гтэ, ты урыл рущ ла̄тӈыл стиханэ хансыянэ. 1963 та̄л порат тав о̄выл нэ̄паке нэ̄глыс, намаим о̄лыс – «Первая завязь». Ловиньтан хо̄тпатн ты нэ̄пак ёмащакв ловиньтавес, критикыт ла̄всыт, потрыт сака ёмащакв хансым о̄лэ̄гыт. Ты урыл Юван Шесталов тох ла̄выглас: «Нэ̄пак ловиньтамум юипа̄лт номсахтасум, ты о̄выл ма̄нь нэ̄пакныл хуньт тах яныг йӣв яныгми». Ты поэт Москва ӯст литературный курсыт а̄стлас, кина по̄слын хо̄тпаг ханищтахта̄лыс, о̄выл кинатэ «Са̄т на̄ӈкыт» намаястэ, та та̄лыт порат тав стихыт хансуӈкве ты о̄вылтахтас. Учёный хо̄тпа Н. Рогачёва ма̄н ма̄ньщи поэтув урыл тамле ла̄тӈыт ла̄выс: «Ты поэт хаснэ потранэ такви сыме та̄ра та̄ртыянэ, тав сака сымыӈыщ ма̄витэ торгамтытэ, ты хосыт тав ма̄вит урыл нё̄тнэг ты хансы». Андрей Тарханов «Плач неба» («Торум лю̄ньщ») акв нэ̄паке намаястэ, ты нэ̄пак 1996 та̄л порат та̄ратавес. Поэтув ща̄гтым ма̄вит нупыл сунсы, тав сыме аквтоп во̄йт хуи: «Я̄тил нё̄тнэ ма̄виткем, ам щар ма̄нь ня̄врам хольт таве э̄руптылум». Ма̄вит нё̄тмилэ сака янгыг о̄лы, э̄лумхо̄лас тав ляпатэ̄т – щар ма̄нь. Ос хо̄тпа аквхурипа о̄лупсатэ са̄всырыг о̄лы, са̄всыр ва̄рмалит ва̄руӈкве ве̄рми, то̄ванакт – ёмас ва̄рмалит, то̄ванакт – лю̄ль ва̄рмалит. Таима̄гыс То̄рмув ты лю̄ньщи, э̄лумхо̄лас о̄лупсатэ урыл тав тысты. Хо̄тпат лю̄ль ва̄рмалит ул вос ва̄ре̄гыт, ӯргалахтым вос о̄лэ̄гыт, та̄нти сыманыл, номтаныл вос хӯнтлыяныл. Номтыӈ, сэ̄ръёр хо̄тпаг о̄луӈкве те патэ̄гыт, то̄нт ма̄ янытыл о̄лупса ёмаснувег тах е̄мты. Ма̄ньщи поэт ты урыл сыме о̄с лю̄ньщи, о̄с тысты, хо̄тпат о̄лупсаныл урыл номсахтым, тав сыме а̄гмыӈ. Тав ка̄сыӈ хо̄тпан нё̄туӈкве таӈхи, хо̄тпат ӯргалаӈкве, э̄рнэ ла̄тыӈ ля̄галаӈкве. Поэт номсахты, тав такви ла̄тӈе но̄ӈхаль те̄тытэ, ты урыл тав хансы: Поэт во̄внэ̄тэ ма̄гыс лё̄ӈх но̄ӈхаль мины, Сыме ротмалтан ма̄гыс лё̄ӈх но̄ӈхаль мины. Тох нё̄тнэ̄г Андрей Тарханов ла̄вуӈкве ха̄сы. «То̄рум а̄ви ла̄тӈыл пӯнсуӈкве – ты ва̄рмаль туп ёмас ма̄щтыр поэт ва̄руӈкве ве̄рми». Хаснэ̄тэ сыс э̄рнэ ла̄тыӈ акваг хо̄нтуӈкве ве̄рми, ты ла̄тыӈ хосыт о̄лнэ хо̄таланув илттыг ща̄гтыӈыг е̄мтапе̄гыт. Тамле э̄рнэ ла̄тӈыт хо̄нтуӈкве маныр таве̄н нё̄ты? Ма̄ньщи ма̄тетэ̄т ты ла̄тӈыт сымын, номтын ёхтэ̄гыт, такви ма̄ньщи мире ляпат, пе̄с йис потрыт ос мо̄йтыт ос ты о̄лупса ва̄нэ̄тэ ма̄гыс, такви стиханэ таве̄н кӯстыр хансуӈкве. Ю. Мешков ла̄выс: «Андрей Тарханов такви мире халт о̄лы, такви щире̄т ма̄вит нупыл сунсы, мир нупыл а̄ӈквата̄луӈкве ха̄сы, такви ма̄витэ торгамтаӈкве ве̄рмитэ. Тав ма̄ньщи хо̄тпа. Тав номтанэ ма̄тэ нупыл, мире нупыл пиным о̄лэ̄гыт. Туп ма̄вит э̄руптым ты хо̄тпа тох ма̄щтырыг потрыт хансуӈкве ха̄сы». Андрей Тарханов – лӯи ма̄т о̄лнэ хо̄тпа, тав во̄рт яныгмам хо̄тпат хольт номсахтуӈкве ве̄рми. Тав акв потре тох ты о̄лы: Таквсы па̄рсыт ха̄пытныл ёлта̄раты, То̄рум щалги, аквтоп тыстын та̄н, Наӈ тотэн а̄нумн, во̄ткве, тарыг аткве, Сэ̄ӈквыл хартым э̄лы са̄мыӈ ма̄ныл. Тот хультсыт пупгыт ос пе̄с йис мо̄йтыт, Ос са̄лы хультыс э̄лы во̄р щахылт, Тот са̄снёлыт – тыи пӯмыщ утквет, Ат мовиньтэ̄гыт воссыг нэ̄мхотьютн. Тот ялпыӈ ма̄квет хот- ёрувлаве̄сыт, Нэ̄мхо̄т хӯнтамлаӈкве потыр суй, Хотьют ма̄навн тыщир о̄луӈкв ла̄выс, На̄н, ма̄хумаквет, э̄л та минамы̄н… Па̄рсум минмыгтамын ма̄гыс тысты, Улпыл матыр ва̄рапасум лю̄ль, Наӈ а̄нумн тотэн, во̄ткве, тарыг аткве, Сэ̄ӈквыл хартым э̄лы са̄мыӈ ма̄ныл. Ты поэт яныг ма̄кев урыл хансы, тав ва̄гтэ, хумус ос манхурип потрыт Пушкин, Лермонтов, Фет, Тютчев, Некрасов, Есенин хассыт. Ты яныг поэтыт хольт такви потранэ хансуӈкве ханищтахтас, ты сака та̄рвитыӈ ва̄рмалиг о̄лы. Нэ̄пак хаснэ ва̄рмаль ка̄сыӈ хо̄тпан э̄ри, тав йильпи номт, йильпи ма̄щтыр тоты. Ань Тарханов стиханэ хунь ловиньтэ̄гын, стихыт щирыл ма̄н ма̄вт яныгман йӣвытлӯптат аквтоп щар тыт ты яныгме̄гыт, таӈхе̄гын те, та̄наныл атувъяӈкве ро̄ви, рущ ла̄тӈыл те ла̄вуӈкве, тав поэзиятэ живопись хольт хансым о̄лы. Са̄всыр мо̄т ва̄рмалит урыл поэт о̄с хансы, то̄ва потранэ ща̄гт урыл, то̄ват – тыстым хассанэ. «Холам па̄вылт», «Хулорт», «Во̄раян хумыт ювле ат ёхтысыт…», «Ощ», «Щакыр хо̄тпат урыл», «Куль номтанэ», «Ёрувлым ва̄рим ут», «Ха̄ль ос ма̄тум о̄йка», «Ма̄н пуссын ма̄ньлат порат э̄руптаве̄сув», «Машина кургын суй ма̄ янытыл суйты». Поэт ка̄сыӈ ма̄нь па̄выл урыл э̄рнэ ла̄тыӈ ла̄ви, маныр ты па̄вылт пе̄с порат о̄лыс, хоты хо̄тпат хо̄нтлам ма̄ныл юв ат ёхтысыт, хоты хо̄тпа мир ма̄гыс маныр ёмас ва̄рыс. Андрей Тарханов то̄ва стиханэ пе̄с порат о̄лум ва̄рмалит урыл хансы, мо̄тмо̄т хо̄тпат урыл хансы, тав тамле стихыт о̄ньщи: «Маршал Жуков», «Утро Достоевского», «К Лермонтову», «Костер Вавилона», «Батько Махно», «Сталин», «Брежнев», «Миссия Юлиана», «Явление Нерона» и другие. Щар ёмащаквег тав потранэ ма̄вит урыл тэ̄лэ̄гыт, тав хансы, хомус а̄лпыл хо̄тал нэ̄глы, э̄типа̄лаг хо̄тал хумус ӯнты, во̄ркве, я̄кве тав сыме̄н ща̄гт тоты. Ам ань лё̄хъясыт лю̄ле̄гум, Амти ощща лё̄хъясум мӯйлупты пос. Со̄рниӈ пос тоты хо̄талкве я̄тил, Сымум торге̄ннув ща̄гтылыӈ вос. Посыӈ номтум ёт э̄лаль ё̄ме̄гум, По̄йкил мӯйлуптас хо̄талкве ка̄т. Сымыӈ хо̄тпаг вос э̄лаль о̄лэ̄гум, А̄нумныл хо̄свой ат пилы ты ма̄т. Хо̄свой юртаге па̄ӈх ос та йӣвкве, Тот та йӣв хосыт ха̄йты тав но̄х, … номтум ха̄йты тав ётэ аквпо̄х… Ня̄врам хольт хотыл номтанум виӈкве, Хумус о̄лэ̄гыт юртыӈыщ тох. Ма̄ньщи ла̄тӈын Светлана Динисламова толмащластэ.

1134 2016. 10. 20. Николай МЕРОВ

Са̄внакпа лю̄лит колыт хотщё̄питавет Ля̄ххал тотнэ хо̄тпат округ мирколн во̄виньта̄лве̄сыт. Югра ма̄т са̄внакпа лю̄лит колыт хумус хотщё̄питавет, манырсыр рӯпата ва̄рвес ос ань ва̄раве, журналистыт э̄лыпа̄лт Югорский фондыт кӯщаиг рӯпитан нэ̄ Елена Владимировна Дарибабина потыртас. Са̄в мир о̄лнэ колыт хотщё̄питан ма̄гыс 2014 та̄л па̄сныл ма̄хумныл олн атуӈкве патвес. То̄нт ты ва̄т та̄лын программа пирмайтавес. Ты та̄лыт сыс округув янытыл хо̄т со̄тыра хо̄тса̄т са̄внакпа колыт хотщё̄питаӈкве э̄ре̄гыт. 2016 та̄лт тыи кастыл нила млрд. арыгтем солко̄ви холтаве. Ань мус яныгса̄т нёлса̄т нупыл кит кол рӯпатаныл а̄стлаве̄сыт. Мо̄таныт иӈ щё̄питавет. Округувт квартираныл та̄нки нупыланыл хансум хо̄тпатныл ты та̄л кит млрд. арыгтем солко̄ви атуӈкве номсаве. Сӯкыр э̄тпос о̄выл хо̄талэ мус ма̄хум пуссын аквъёт акв млрд. са̄т солко̄ви ойтсыт. Мо̄тыт та̄лт ниласа̄т китхуйплов са̄внакпа лю̄лит кол хотщё̄питан щирыл о̄лэ̄гыт. Тыима̄гыс хӯрум млрд. нёлоловса̄т солко̄ви холтаве тах. Ты олныт са̄выӈпа̄лэ колыӈ ма̄хум та̄нки ойтсыт. Округ бюджетныл яныгса̄т млн. ос муниципалитет бюджетныл яныгса̄т хо̄тпан нупыл са̄т млн. солко̄ви майвес. Тыгыл э̄лаль ос мо̄т хӯрум та̄л сыс пуссын аквъёт акв со̄тыра китса̄т са̄внакпа кол хотщё̄питаве тах. Ты ма̄гыс пуссын аквъёт лов млрд. арыгтем солко̄ви холтаве. Округувт мо̄лты та̄л сыс ты ва̄рмаль ма̄гыс налыман процент са̄вит ма̄хум ойтхатыгласыт. Ты та̄л ос нёлса̄т процент са̄вит ма̄хум ойтхатсыт. Ма̄хум Югорск, Урай, Лангепас, Нефтеюганск ӯсыт ёмщакв олныт ойтэ̄гыт. Мегион, Сургут, Нижневартовск ӯсытт ос щар мощща хо̄тпа тыи ма̄гыс олн мыгыт. Ты хо̄тал аквхуйплов со̄тыра ат ойтхатнэ хо̄тпат нэ̄пакытыл ке̄тве̄сыт. Та̄н пуссын аквъёт китса̄т млн. солко̄ви ойтнэ щирыл о̄лэ̄гыт. Ты ма̄хум э̄лаль ойтхатуӈкве ат ке патэ̄гыт, нэ̄паканыл сутын мивет. Ань ты накт акв со̄тыра арыгтем заявлениенэ̄пак тув ке̄твес. Та̄н а̄рнтаг о̄щнэ олнаныл коныпал штрафыл тах хансавет. Сут ла̄вум хосыт о̄с ат ке ойтхатэ̄гыт, та̄н сут палт рӯпитан хо̄тпатын юн о̄щнэ пормасаныл хотвивет ос э̄л тыналавет, сэ̄лым олныт ос пуссын колыт хотщё̄питан ма̄гыс ке̄тавет. Ты коныпал ат ойтхатнэ хо̄тпат мо̄т хо̄н ма̄н ялуӈкве ат та̄ртавет. Округувт ань ты хо̄тал мус колыт хотщё̄питан ма̄гыс ма̄хум акв млрд. арыгтем солко̄ви са̄вит ат ойтсыт. Ма̄хум а̄рнтаг атхатам олнаныл ойтуӈкве вос о̄вылтахтасыт, ты ва̄рмаль щирыл рӯпитан хо̄тпат ӯсытын, па̄влытын ва̄тихал ялантэ̄гыт. Мирн ойтхатнэ урыл акваг потыртэ̄гыт. Хотьют ты олныт юв пувиянэ, ётыл тав иӈ са̄внув олн ойтуӈкве ла̄ваве. Таима̄гыс ма̄хумаквет, на̄н кол хотщё̄питан ма̄гыс та̄ра олн ойтэ̄н. То̄нт нэ̄матыр та̄рвит ат е̄мты.

1134 2016. 10. 20. Тамара МЕРОВА

Кӯщаит э̄рнэ ла̄тыӈ хӯлтсыт Ка̄сыӈ са̄т атыт хо̄талэ̄т округ мирколт са̄прани ва̄рыгла̄лаве. Тот губернатор ва̄ӈын хум Геннадий Бухтин са̄всыр департамент кӯщаит акванатыгласанэ ос та̄н то̄ва постановлениенэ̄пакытын йильпи ла̄тӈыт хассыт. Кӯщаитн Геннадий Бухтин ла̄выс: «Россия Правительстват ань 2017 та̄лн хансым бюджет олныт ёмщакв ловиньтаве̄сыт ос 2018-2019 та̄лыгн э̄лаль хассаныл. Ма̄н округ бюджетув о̄с тув ро̄влахтым щё̄питаслӯв. Ма̄во̄й акв баррель ма̄гыс тынэ 40 доллар са̄витыг ловиньтаслӯв. Ань мирн нё̄тмил ва̄рнэ̄в порат олныт вос то̄вылхатнувыт, та̄наныл мори холтуӈкве ат э̄ри. Рӯпитан ма̄хум сэ̄лнэ олнаныл та̄ра вос ойтавет ос то̄ванакт мощ но̄хнё̄туӈкве вос ве̄рмысанӯв». Округт о̄лнэ ма̄хум ма̄гыс аквхуйплов программат щё̄питаве̄сыт. Колыт ӯнттын ос ЖКХ ва̄рмалиг, мир пусмалтан ос ханищтан тэ̄лаг, са̄всыр нё̄тмил ва̄рнэ, мир ӯргалан ос мо̄т программат хансым о̄лэ̄гыт. Та̄н пуссын олныл та̄стуве̄сыт, ань ӯсытыт ос па̄влытыт миркол кӯщаит ты олныт э̄рнэ щирыл вос холтыяныл. Тувыл округув намхо̄талэ кастыл пенсионерыт олныл ойтуӈкве ла̄вве̄сыт. Ань ма̄н ма̄вт 222 со̄тыра пенсионерыт о̄лэ̄гыт, та̄н пуссын акв со̄тыра солко̄вил мивет. Тюменский областин 8, 5 со̄тыра пенсиян патхатам хо̄тпат о̄луӈкве ва̄нтлысыт, та̄н 650 солко̄вил тах мивет. Ань та̄л сыс тамле олн нё̄тмил ойтнэ ма̄гыс округ бюджетныл 229 млн. солко̄ви та̄стувес. Диана Саваровская, кол ӯнттын департамент кӯщай ва̄ӈын нэ̄, родовой угодият ма̄во̄й но̄хвинэ рӯпатат ва̄рнэ о̄вылтыт потыртас. Ань Белоярский, Нефтеюганский, Сургутский ос Ханты-Мансийский районытыт тамле ма̄ ло̄мтыт пуссын уральтаве̄сыт, ма̄во̄й но̄хвинэ ма̄т тот о̄с та̄рапаттуве̄сыт. Соссаӈ ма̄хум ёт рӯпитан договорнэ̄пакыт хассыт.

1134 2016. 10. 20. Галина КОНДИНА

Хо̄тыт созывын пе̄риим депутатыт рӯпитаӈкве та о̄вылтахтасыт Таквсы пе̄риим депутатыт ань округувт ма̄нь таквс э̄тпос хо̄тыт хо̄талт о̄выл щёс акванатхатыгласыт. Ты хо̄тыт созывын пе̄риим депутатыт рӯпитаӈкве та патсыт. Сапра̄нияныл щар яныгпа̄лаг о̄лнэ депутат Валерий Салахов о̄вылтастэ. Нэ̄пак та̄ратан хо̄тал хумус о̄лыс, тав ты урыл Андрей Павченко, округ избирком кӯщай, потыртаӈкве во̄выстэ. Хум ла̄выс, округувт таквсы э̄лн о̄лнэ па̄влытын ос са̄лыӈ ма̄хум палт нэ̄пак та̄ратан то̄тапыт са̄ртыннув тотыглаве̄сыт, ты ва̄рмаль ла̄ваве – «досрочное голосование». Тох тит со̄тыра атса̄т хо̄тпа нэ̄пак та̄ратасыт. Округувт пе̄риян хо̄тал кастыл рӯпитам ма̄хум пуссын мӯсхал щирыл щё̄питахтасыт. Тувыл э̄лаль депутатыт та̄нти халанылт округ Дума кӯщай пе̄риясыт. О̄с э̄лаль Борис Хохряков кӯщаиг паттысаныл, тав ма̄гсылэ са̄выӈпа̄лэ депутатыт номтаныл патыс. Ос кӯщай ва̄ӈын хо̄тпаг хӯрум депутат пе̄рияве̄сыт, ты Наталья Западнова, Александр Сальников ос Еремей Айпин. Еремей Данилович ты коныпал соссаӈ ма̄хум Ассаблеян кӯщаиг пе̄риявес. Тот Ассамблеят ань хӯрум депутатыт рӯпитаӈкве патэ̄гыт: Еремей Айпин, Руслан Проводников ос Александр Филипенко. Мо̄лтыныл ань Думат са̄внув депутатыт рӯпитаӈкве патэ̄гыт, налыман нупыл нёлолов депутат тув пе̄рияве̄сыт. Та̄н ань пуссын са̄всыр комитетытн уртхатсыт. Са̄кконыт хаснэ ос мирколыт халт рӯпитан комитетт ты депутатыт хасве̄сыт: Вячеслав Дубов, Сергей Елишев, Андрей Миляев, Александр Сальников, Виктор Сысун. Комитет кӯщаиг Сергей Дектярёв паттувес, тав ва̄ӈын хо̄тпаге – Владимир Семенов ос Алексей Савинцев. Социальный политика комитетытн Игорь Винников, Наталья Западнова, Александр Филипенко, Василий Жуков, Елена Дубенчук, Олег Сазонов, Валерий Салахов, Николай Ташланов паттуве̄сыт. Та̄н халанылт кӯщаиг Василий Филипенко паты, ва̄ӈын хо̄тпатэ – Николай Ташланов. Олныт ловиньтан ос на̄лок пувнэ комитетн Ринат Айсин, Алексей Андреев, Юрий Важенин, Илья Кандаков, Сергей Кочкуров, Любовь Малышкина, Руслан Проводников, Михаил Сердюк, Пётр Созонов пе̄рияве̄сыт. Кӯщаиг тот Андрей Филатов паттувес, ва̄ӈын хо̄тпаг Евгений Марков ос Леонид Михалко рӯпитаӈкве патэ̄г. Экономический политика ос ма̄вит ӯргалан комитетн ты депутатыт паттуве̄сыт: Еремей Айпин, Олег Зацепин, Андрей Осадчук, Сергей Тульников, Владислав Фоменко. Кӯщаиг тот Сергей Великий паты, тав ва̄ӈын хо̄тпаге – Александр Мещангин ос Степан Пыталев. Постоянный комиссиян ты ма̄хум хасве̄сыт: Сергей Великий, Сергей Елишев, Олег Сазонов, Виктор Сысун, кӯщаиг Валерий Салахов паты, таве̄н нё̄туӈкве ва̄ӈын хо̄тпаг Александр Сальников паттувес. Аквта хО̄тал титыт сапрА̄нияныл Аквта хо̄тал та̄н титыт сапра̄нияныл ва̄рыгласыт. Тот ма̄н округувныл Совет Федерациян те̄тнэ хо̄тпа пе̄риясыт, тув Юрий Важенин мины. Ты э̄лыпал Василий Сондыков Москва ӯст рӯпитас. Василий Семенович тот рӯпитаме ма̄гсыл Борис Хохряковын пӯмащипа ла̄тӈыл ла̄ввес ос янытлан нэ̄пакыл майвес. Та юипа̄лт фракцият урыл постановление пирмайтасыт, ос Дума кӯщай хум ла̄выс, ань Думат нила фракция рӯпитаӈкве паты, ты «Единый Россия», тот кӯщаиг Наталья Западнова паты, ЛДПР фракцият Евгений Марков, «Справедливая Россия» Михаил Сердюк ос КПРФ фракцият Алексей Савинцев пуӈктотуӈкве паты. Парламентский фракция – ты депутатыт акв манос титхӯрум политический партияныл акванхасхатэ̄гыт, ос акваннё̄тхатым та̄нти номтаныл э̄лаль тотэ̄гыт, акв номтыл э̄лаль рӯпитэ̄гыт. Тох аквъёт та̄н са̄внув э̄рнэ са̄кконыт мир ма̄гсыл пирмайтэ̄гыт.

1134 2016. 10. 20. Галина КОНДИНА

Ма̄ньщи поэтув нэ̄паканэ ловиньтэ̄н А̄сугорский институтт библиотека колнакт Андрей Семёнович Тарханов хансум нэ̄паканэ суссылтан выставка рӯпитаӈкве о̄вылтахтас. Та библиотекат рӯпитан нэ̄квет А. Тарханов стиханэ ёт манхурип нэ̄пакыт о̄ньще̄гыт, пуссын суссылтаӈкве пинсаныл. Мӯй ма̄хум ёхталасыт, ма̄н тув о̄с во̄виньта̄лвесӯв. Светлана Динисламова поэтув урыл татем ёмас ла̄тӈыт ла̄выс, о̄йка ма̄витув сака э̄руптытэ, ка̄сыӈ йӣв манос лӯпта таве̄н татем нё̄тнэг сусхаты. Ка̄сыӈ ла̄тӈе̄т тав туп ма̄те̄в, йӣванув, лӯптанув янытлыянэ. Мария Кузьминична Волдина о̄с тув ёхталас, тэ̄н Андрей Семёновичил педучилищат ханищтахтам та̄ланэ̄н номылматсы̄г, татем та потыртасы̄г. Хумус та̄н ве̄щкат хо̄тпаг яныгмаӈкве ханищтаве̄сыт, нэ̄мхуньт мо̄т э̄лумхо̄лас пормасэ а̄лмаяӈкве ул вос номсысыт, ул вос тӯлмантасыт. Та̄наныл ханищтам хо̄тпаныл сака ёмасыт о̄лсыт. Та̄н а̄гитпыгыт та̄нти ня̄враманыл хольт э̄руптасаныл. Ань ул таима̄гыс тамле ка̄ркам яныгпа̄ла ма̄хум ма̄н халувт о̄лэ̄гыт. Выставкат нэ̄пакыт халт акв яныг хури ка̄саласлум, тот Андрей Семёнович Еремей Даниловичил аквъёт по̄слым о̄лэ̄г. Та хурит тэ̄н иӈ ма̄ньлат хумыг, а̄танэ̄н щаклиӈыт, сас рущ маснутыл масхатым о̄лэ̄г. Ань тэ̄н яныгпа̄лаг е̄мтсы̄г, тамле хури сунсыглаӈкве ёхталам ма̄хмытын сака пӯмыщ о̄лыс. Ма̄ньщи поэтув хансум нэ̄пакыт иӈ э̄тпостем суссылтаӈкве патавет. То̄ва та̄ратам о̄выл нэ̄паканэ мо̄т библиотекат э̄рыӈ а̄тимыт, таима̄гыс ӯст о̄лнэ ма̄хум тув ялуӈкве во̄вавет, нё̄тнэ ла̄тӈыл хансым стихыт вос ловиньтэ̄гыт.

1134 2016. 10. 20. Тамара МЕРОВА

Тав саӈквлыпил янмалтаӈкв таӈхи Ма̄н рӯпитан колувн Наталья Чайникова щалтсас ос акв ва̄рмаль урыл потыртас. Тав сӯкыр э̄тпос са̄тыт ос нёлоловит щислат Кострома ӯст мӯйлыс. Тот пилыт янмалтан ос ва̄тнэ урыл ханищтап о̄лыс. Та ма̄т Центральноевропейский лесной опытный станция (ЦЕ ЛОС) ва̄рим о̄лы, ань ты рӯпитан кол 60 та̄лэ то̄влыс. Кострома ма̄нылт акваг са̄в пил яныгмас. Ма̄хум та̄нки ма̄гсыланыл ва̄тсыт, тувыл по̄хан о̄с тыналасыт. Акв порат ос са̄внув пил янмалтаӈкве тахмаясыт. То̄нт тот о̄лнэ хо̄тпат пилыт нас ӯнттым янмалтаӈкве патсыт. Та̄н сыресыр ва̄рмалит ханищтасыт ос тох налыман та̄л рӯпитэ̄гыт. Янмалтан пиланыл молях понсэ̄гыт, тувыл са̄в яныгми ос тэ̄лы порат пил йӣвыт ат по̄лявет. Та̄н во̄рт яныгман пилыт хольт акв тамле ат ос витаминат о̄ньще̄гыт. Ань та колт рӯпитан хо̄тпат я̄ӈкылмат яныгман саӈквлыпил хурип онтолов са̄всыр пил янмалтэ̄гыт. Ты коныпал хӯрум нампа са̄всыр сӯйпилыт, «узколистый» та̄хтпил, «арктический» са̄вни ос княженика, «приземистый» морах, ты пилыт тамле са̄всыр намыл ла̄вияныл. Янмалтан пиланыл пуссын патентнэ̄пакыл ва̄рсаныл. Та̄н 200 гектар яныт ма̄ о̄ньще̄гыт, тот 70 гектарт саӈквлыпил янмалтэ̄гыт. Хуньт та̄н палтаныл Архангельск ӯсныл предпринимательхо̄тпат мӯйлуӈкве о̄с ёхталасыт. Тувыл та̄н саӈквлыпил янмалтан «Архангельская клюква» нампа проект щё̄питасыт. Та па̄сыл акванпотыртахтым ты ма̄хум я̄ӈкылмат онтолов са̄всыр саӈквлыпилыт янмалтэ̄гыт. ЦЕ ЛОС колт рӯпитан хо̄тпат Юграт о̄лнэ предпринимателит ёт рӯпитаӈкве о̄с ка̄саще̄гыт. Ма̄н округувт аквтох са̄в пилыӈ ма̄ о̄лы, ты коныпал ма̄вт нас ӯнттым пил янмалтаӈкве сака ёмас. Наталья Чайникова тамле ва̄рмалит э̄лаль тотнэ ма̄гыс ма̄вит ӯргалан департамент кӯщайн Евгений Платоновын пищма ке̄тыс. Ань Наталья ла̄выс, Крестьянскофермерский хозяйство ма̄тэ̄т пилыт нас ӯнттым янмалтаӈкве ро̄ви. Ты тэ̄ла э̄лаль ма̄кыг тотнэ щирыл нэ̄ акваг номсахты. Туи о̄йттур э̄тпос 28 хо̄талт Россия Президентув Владимир Путин Тверской областин ялме порат ла̄выс, пилыт ма̄нки ма̄вт э̄лаль вос янмалтавет, мо̄т хо̄н ма̄ныл ёвтуӈкве ат э̄ри.

1134 2016. 10. 20. Людмила Теткина

Ма̄ньщи ма̄хум Татьяна Гоголева ёт хо̄нтхатыгласыт Ювле хультум э̄тпост Татьяна Гоголева Государственный Думан депутатыг пе̄риявес. Тав ат та̄л Москва ӯст рӯпитаӈкве тах паты. Ты э̄тпос атыт хо̄талэ̄т тот рӯпитан депутатыт о̄выл щёс акванатхатыгласыт. То̄нт та̄н са̄всыр комитетытн кӯщаит пе̄риясыт. Татьяна Степановна мо̄т ма̄хум ёт «комитет по делам национальностей» нампа колт рӯпитаӈкве ань паты. Та юипа̄лт тав юв ёхталас ос ма̄ньщи ма̄хманэ ёт Ханты-Мансийск ӯст хо̄нтхатыглас, ос йильпи рӯпататэ урыл потыртас. Ань ка̄сыӈ депутатхо̄тпа ты та̄л оигпан мус ос 2017 та̄л сыс манхурип рӯпата ва̄руӈкве номсы, та урыл яныг планнэ̄пак хансы. Татьяна Степанова ла̄выс, культурав ос ща̄нь ла̄тӈув э̄лаль тотнэ ма̄гсыл манхурип ва̄рмаль ва̄руӈкве ань э̄ри, ты урыл ма̄ньщи хо̄тпат таве̄н пищма вос хансэ̄гыт. Ёмас, э̄рнэ номтыт тав такви планнэ̄паке̄н тах хансыянэ ос ты хосыт э̄лаль рӯпитаӈкве паты. Мо̄тыт э̄тпост манос ва̄т са̄грапнал э̄тпост Татьяна Степановна яныг сапра̄ни ва̄руӈкве номсы. Ань ма̄н округувт соссаӈ ма̄хум ма̄гсыл 12 са̄ккон рӯпитэ̄гыт. Пе̄с йис ма̄т о̄лнэ ще̄мьят ма̄гсыл «О территориях традиционного природопользования» нампа я̄нас са̄ккон пирмайтавес, ос во̄р ӯргалан кодекс рӯпиты. Ты кит пирмайтым нэ̄пакыг акван щар ат а̄ртме̄г. Рӯпитан са̄кконын йильпи ла̄тыӈ хансуӈкве ро̄ви ман а̄ти, та урыл депутатхо̄тпат потыртаӈкве тах патэ̄гыт. Йильпи та̄л ре̄тыӈ ю̄свой э̄тпос тав конференция тах щё̄пита̄лы. То̄нт та̄н ма̄ньлат ма̄хум ханищтан ва̄рмаль урыл тах потыртэ̄гыт. Ань ма̄ньщи ос ханты ня̄врамыт школа а̄стлан юипа̄лт э̄лаль ханищтахтуӈкве ат ве̄рме̄гыт, олн ат о̄ньще̄гыт. Та̄нанылн хумус нё̄туӈкве ро̄ви, та урыл ма̄хум тах потыртэ̄гыт. Я̄ӈк на̄тнэ э̄тпост ос хӯрмит яныг сапра̄ни тах ва̄рыглаве. То̄нт депутатхо̄тпат ос мо̄т ма̄хум ща̄нь ла̄тыӈ э̄лаль тотнэ ва̄рмаль урыл ла̄тӈаныл мины. Нэ̄ акв ва̄рмаль урыл о̄с латыӈ ла̄выс. Та̄н Руслан Проводников ос Надежда Алексеева ёт «Оленный Урал» нампа яныг проект щирыл рӯпитаӈкве о̄вылтахтэ̄гыт. Ха̄льӯс район Саранпа̄вылт ос Ня̄хщамво̄льт о̄лнэ ма̄хум са̄лыӈ колт яласаӈкве ка̄саще̄гыт, та̄н са̄лыл тах ёвтавет. Тамле нё̄тмил хосыт ма̄хум са̄лы ӯрим пе̄с йис ва̄рмаляныл ос ща̄нь ла̄тӈув э̄лаль вос тотэ̄гыт. Ма̄ньщи ла̄тӈув нё̄рт э̄лаль вос суйты. Сапра̄нит ма̄ньщит Финноугорский консультативный комитетын кит хо̄тпаг пе̄риясыт. Тот ань Татьяна Гоголева ос Надежда Алексеева э̄лаль рӯпитаӈкве патэ̄г. Аквта порат ма̄хум Надежда Геннадьевна янытласаныл, тав ма̄нь таквс э̄тпос 11 хоталэ̄т 55 та̄лэ то̄влыс.

1134 2016. 10. 20. Светлана РОМБАНДЕЕВА

Ханищтахтын кол намыӈсуиӈыг е̄мтыс Ты э̄тпос Югорский государственный университетын ля̄ххал тотнэ ма̄хум во̄выглаве̄сыт. Та̄н ётаныл ты ханищтахтын кол кӯщай нэ̄ Татьяна Дмитриевна Карминская потрамас. Ты та̄л ЮГУ кол 15 та̄лэ то̄влыс. 2001 та̄лт ма̄нь таквс э̄тпос 5 хо̄талэ̄т РФ Министерство образование па̄лыл э̄рнэ нэ̄пак щё̄питавес – ань Ханты-Мансийск ӯст высший образование тэ̄лан ханищтахтын кол ӯнттувес, тыгыл э̄лаль ма̄хум тот рӯпитаӈкве патэ̄гыт, ма̄ньлат хо̄тпат ханищтахтуӈкве о̄вылтахтэ̄гыт. Та па̄сыл атхуйплов та̄л овумлас. Та колт ань 89 са̄вит са̄всыр рӯпатан ма̄хум ханищтахтэ̄гыт. Татьяна Дмитриевна ла̄выс: «Ма̄н университетув намыӈсуиӈыг е̄мтыс, тав ань Россия янытыл ос э̄лы хо̄н ма̄т ва̄ве. Тыт ханищтахтын тэ̄ла коныпал ма̄хум наука щирыл рӯпитэ̄гыт, тувыл ос ва̄тихал са̄всыр хо̄нтхатыглапыт ва̄рыгла̄лэ̄в. Россиявт тамле колыт сака э̄ре̄гыт, тот ань яныгман а̄гитпыгыт о̄луӈкве ханищтавет, та̄нти о̄лнэ ма̄наныл, Россияныл янытлаӈкве вос ха̄сэ̄гыт, ӯргалаӈкве вос ве̄рме̄гыт». Тот ань хо̄тыл порат хӯрум со̄тыра атса̄т арыг ма̄ньлат хо̄тпа ханищтахты, со̄тыра арыг хо̄тпа юил та̄л сыс кит щёс ёхталым ханищтавет. Та̄н халанылт хӯрумса̄ттем соссаӈ хо̄тпа. Ты университет округув янытыл филиалыт о̄ньщи – Нефтеюганск, Сургут, Нижневартовск, Лянтор ос Лангепас ӯсытыт. Тот нила со̄тыра арыг хо̄тпа ханищтахты. Ань юио̄выл та̄лытт ма̄хум янгыщ тамле тэ̄ла пе̄рие̄гыт: «Нефтегазовое дело», «Электроэнергетика и электротехника» ос хащта̄л тэ̄ла – «Управление персоналом». Мо̄т тэ̄лат – «Юриспруденция», «Экономическая безопасность», «Журналистика» ос «Филология» о̄с сака пӯмщалавет. Ты университет э̄лы хо̄н ма̄т – Европа, США ос Китай ма̄т о̄лнэ организацият ёт рӯпиты, аквъёт са̄всыр проектыт ва̄ре̄гыт, акваннё̄тхатым рӯпитэ̄гыт. То̄ва ня̄враманув мо̄т хо̄н ма̄т ханищтахтэ̄гыт – Финляндият, Венгрият, Чехият, Китайт ос Южный Кореят. Тот та̄лтем о̄лэ̄гыт. Кӯщай нэ̄ ла̄вме щирыл, ЮГУ а̄стлам хо̄тпат пуссын округт рӯпитэ̄гыт. Ва̄им, ты кол таима̄гсыл ты ӯнттувес, тот ма̄хум округн па̄рыс ва̄рнэ ма̄гыс ханищтахтэ̄гыт. Ань округув янытыл са̄всыр ма̄т ЮГУт ханищтахтам лов со̄тыра арыг хо̄тпа рӯпиты. Ты ма̄гыс кӯщай нэ̄ номтэ ёмас. ЮГУ рӯпитаӈкве патме па̄сыл атхуйплов та̄лыг то̄влыс, ты кастыл Татьяна Дмитриевна аквъёт рӯпитан ма̄хманэ̄н ос тот ханищтахтын мирн са̄в ёмас сымыӈ ла̄тыӈ ла̄выс.

1134 2016. 10. 20. Светлана РОМБАНДЕЕВА

Э̄ргын ос йӣквнэ кол капай ӯнттувес Надежда Михайловна Казначеева округ янытыл культура тэ̄ланэ департамент колт пуӈктоты. Тав ма̄нь таквс э̄тпос 11 хо̄талэ̄т Ханты-Мансийск ӯс мирколт ля̄ххал тотнэ ма̄хум ёт хо̄нтхатыглас. Тав Сургут ӯст э̄ргын ос йӣквнэ йильпи кол о̄вылтыт потыртас, ты ма̄гыс тот ӯс мир са̄ттем мӯйлуӈкве патэ̄гыт. На̄н ань э̄лаль Надежда Михайловна потре ловиньтэлы̄н. – Ань округ янытыл культура тэ̄ла палт рӯпитан ма̄хум акв яныг ва̄рмальн щё̄питахтэ̄гыт – тынакт Сургут ӯст «Нефтяник» нампа Дворец искусств кол рӯпитаӈкве о̄вылтахты. Ты сака яныг, са̄в накпа кол капай, са̄в сценат о̄ньщи. Аквторыг китхӯрум концерт суссылтаӈкве ро̄ви. Ты колув щар ма̄к йильпи щирыл ӯнттувес, кос хоты хо̄тпа, кос хоты ансамбль тот э̄ргуӈкве ос йӣквуӈкве ве̄рми. Аквхотты сценатэ мувлахи ё̄ӈхи – ущ э̄ргум, йӣквум ма̄хум ё̄ӈхим сцена са̄йн па̄тыре̄гыт, мо̄таныт тыгле нэ̄глапе̄гыт. Мо̄т сценат ос ма̄хум акв па̄лн тотавет, тувыл та̄н ма̄нанылн колкан ёлыпа̄лныл мо̄т хо̄тпат самынпатапе̄гыт, хотмус но̄хтотыгпавет. Щар мо̄йт хольт, сунсуӈкве сака пӯмыщ. Оркестр ёнгын ма̄хум ма̄гыс яныг во̄ӈха ва̄рвес. Опера ос балет ма̄гыс о̄с я̄нас колнакыт ва̄рве̄сыт. Э̄лнаӈ ма̄н округувт тамле кол ат о̄щсӯв, таима̄гыс ма̄н палтув то̄ва ма̄хум йӣквуӈкве ат ка̄сащасыт. Ань Сургутн кос хоты хо̄тпа ёхтуӈкве ве̄рми. Округув янытыл тамле пӯмыщ, яныг кол капай воссыг нэ̄мхо̄т а̄тим. Тув аквторыг са̄в со̄тыра мир щалтуӈкве ве̄рми, пуссын ла̄пе̄гыт. Ты кол «Сургутнефтегаз» ма̄во̄й но̄хвинэ компаниян ӯнттувес. Ам хунь яныг кӯщаит ман нас хо̄тпат ёт хо̄нтыглахта̄лэ̄гум, потраме̄гум, та̄н пуссын ла̄ве̄гыт – ань ма̄н округувт са̄в ёмас тэ̄ла ва̄раве, матыра̄ти ма̄н пуссын о̄ньще̄в, ма̄н рӯпитаӈкве о̄с сака ха̄сэ̄в, ос ӯщлахтуӈкве ха̄сэ̄в. Ань ос тамле колыӈыг та е̄мтсув. «Нефтяник» Дворец искусств кол пӯснэ̄в юипа̄лт, «Неделя культуры и искусства в Сургуте» тэ̄ла ва̄ре̄в, тот ӯс ма̄хум са̄ттем мӯйлуӈкве патэ̄гыт. Сургутн округув янытыл э̄ргын ос йӣквнэ щар ма̄к ёмас ансамблит ялэ̄гыт, та̄н пуссын са̄всыр конкурсытт (Россия янытыл манос э̄лы хо̄н ма̄т) но̄хпатсыт – Нижневартовск ӯсныл, Ханты-Мансийск, Мегион, Нефтеюганск, Урай ос Нягань. Ка̄сыӈ ӯсныл ос районытныл культура тэ̄ла палт рӯпитан са̄в хо̄тпа тув ялы. Ханты-Мансийск ӯсныл Духовой оркестр Югры тув тотыглаве. Тувыл «Хо̄тал» нампа А̄сугорский театрыт рӯпитан хо̄тпат «И больше века длится день» Чингиз Айтматов хансум потре щирыл спектакль суссылтэ̄гыт тах. Таве та̄н Финляндият о̄лум фестивальт ос Красноярск ӯст суссылта̄лсаныл. Мирн сака мӯстыс. Таи ма̄гыс тав ань Сургут ӯст ӯраве. Ма̄ньлат ма̄хум ма̄гыс «Наташина мечта» спектакль тотыглаве, тав Москва ӯст о̄лнэ мирн суссылтавес, о̄с сака мӯстыс. Ёнгын хо̄тпат янытлаве̄сыт, са̄всыр диплом нэ̄пакытыл майве̄сыт. Таи ёмас, ты йильпи колт ань о̄влэ̄т ма̄нти ма̄хманув выступайтаӈкве патэ̄гыт, мо̄т хо̄н ма̄хум Сургутн тах ётыл ущ ёхталаӈкве патэ̄гыт. Ты Дворец колув ань са̄в ма̄т ва̄ве. Яныг таквс э̄тпост округувн Мариинский театрыт рӯпитан ма̄хум ёхтэ̄гыт, тот Валерий Гергиев тав пуӈктоты, ма̄к дирижёрыг о̄лы. Хӯрмит щислат та̄н «Нефтяник» колувт концерт суссылтэ̄гыт, мо̄тыт хо̄тал ос Ханты-Мансийск ӯсн ёхтэ̄гыт. Ва̄т са̄грапнал э̄тпост ос Игорь Моисеев нампа Государственный академический ансамбль народного танца Сургутн ёхталы тах. Ты кол капайт ань аквторыг 450 ня̄врам ханищтахтуӈкве ве̄рми – э̄ргын, йӣквнэ ос кинаохсат ва̄рнэ колнакыт о̄лэ̄гыт. Ань май ты та̄л округувт Ня̄врам та̄лыг ла̄ввес, Сургут ӯс ня̄врамыт ма̄гыс ты ма̄к яныг мӯйлупса. Тот э̄ргуӈкве манос йӣквуӈкве ха̄снэ матса̄вит ня̄врам о̄лы – тах та̄рапаттаве, ка̄сыӈаныл э̄лаль ханищтаӈкве патаве. Хотьютаныл э̄рыӈ хуньт тах намыӈсуиӈ хо̄тпаг е̄мты. Надежда Михайловна потре та оигпас. Тав Сургут ӯст ӯнттым Дворец кол урыл татем са̄в потыртас, ань ма̄ньщи ма̄хум улпыл пуссын ты кол ка̄салаӈкве тахмаясыт. Хотмус тув вос ёхталанувӯв, мо̄йт хольт ӯнттым кол ма̄н о̄с вос ка̄саланувлӯв.

1134 2016. 10. 20. Людмила Теткина

Нэ̄ яныгпа̄ла хо̄тпатын нё̄тым рӯпиты Яныглат хо̄тпат янытлан хо̄тал кастыл ка̄сыӈ па̄вылт ос ӯст са̄всыр суссылтапыт, концертыт ва̄рыглаве̄сыт. Ха̄льӯс район Саранпа̄вылт о̄с концерт щё̄пита̄лвес. «Альянс» нампа центрыт рӯпитан ма̄хум ка̄сыӈ яныгхо̄тпа янытлаӈкве ос хорамыӈ лӯптал мӯйлуптаӈкве юв коланылн ялсыт. Ты центр Ха̄льӯс район янытыл ка̄сыӈ па̄вылт я̄нас отделение о̄ньщи. Тот рӯпитан ма̄хум яныгхо̄тпатын ос нуса тотнэ ще̄мьятын нё̄тэ̄гыт. Раиса Николаевна Артёмова, такви о̄парищ наме Гындыбина, Саранпа̄вылт «Альянс» нампа колт рӯпиты. Ма̄ньщи нэ̄ такви рӯпататэ урыл таи ла̄выс: «Ам ты центрыт яныгпа̄ла хо̄тпат уральтым са̄т та̄л рӯпитэ̄гум. Та̄н палтаныл ялантэ̄гум, вит тотуӈкве ос мо̄т колсори рӯпата ва̄руӈкве нё̄тэ̄гум. Та̄н ма̄гсыланыл тэ̄нут ос тэ̄рпи ёвтэ̄гум. Яныгхо̄тпат та̄нкке̄ныл о̄лэ̄гыт, то̄ват рӯт щар ат о̄ньще̄гыт. Мо̄таныт ня̄враманыл манос рӯтаныл мо̄т ма̄т о̄лэ̄гыт. Хо̄тал палыт та̄нкке̄ныл юн о̄луӈкве та̄нанылн марщум, тыи ма̄гсыл а̄нумн сака ӯрияныл. Та̄н палтаныл хунь ёхтэ̄гум, пуссын такем ща̄гтэ̄гыт. Та̄н халанылт ма̄ньщит ос сараныт о̄лэ̄гыт. Ам ты ма̄т яныгмасум, ща̄нь ла̄тӈум ёмащакв ва̄глум ос саран ла̄тыӈ торгамтылум. Ма̄тум хо̄тпат ёт ма̄ньщи ла̄тӈыл хунь потыртэ̄гум, о̄с сака ща̄гтэ̄гыт. Па̄влувт ань налыман нупыл хӯрум яныгхо̄тпа та̄нкке̄ныл о̄лэ̄гыт, ма̄н хӯрум э̄лумхо̄лас та̄нанылн нё̄тэ̄в. Ам аквхуйплов ма̄хум палт юв ялантэ̄гум». Раиса Николаевна ты центрыт рӯпитаӈкве хунь патыс, юил ялантым ханищтахтас. Ань ты рӯпата ва̄рнэ ма̄гсыл дипломнэ̄пак о̄ньщи. Такви рӯпататэ тав сака э̄руптытэ, яныгпа̄ла хо̄тпан нё̄туӈкве таве̄н сака мӯсты. Ма̄ньщи нэ̄ а̄ти нас тох мощщаке̄н ма̄хманэ палт ёхтыгпа̄лы, вит тоты, колсори рӯпаты ва̄ри ос тэ̄нут ёвты, тав ка̄сыӈ хо̄тпа ёт мощ потрами, та̄н ётаныл мощ ӯнлахо̄лы. Яныгхо̄тпат пуссын 80 та̄л янытат о̄лэ̄гыт. Раиса Николаевна ла̄выс, та̄н та̄нки яныгмам пораныл ос о̄лупсаныл урыл потырта̄лэ̄гыт, ос та̄наныл хӯнтлаӈкве таве̄н сака пӯмащ. Ты урыл тав тох ла̄выс: «Та̄н пуссын ёмас, сымыӈ, мӯтраӈ хо̄тпат, о̄лупсаныл сыс таса̄вит та̄рвит ва̄щиньтасыт, тэ̄та̄л о̄лнэ порат яныгмасыт ос са̄в рӯпитасыт. Та̄н пуссын мир нупыл ёмас номтыл сунсэ̄гыт. Тыи ма̄гсыл та̄нанылн нё̄туӈкве а̄нумн сака мӯсты. Амки Сӯкыръя па̄вылныл о̄лэ̄гум. Та па̄вылт самын патсум, тот яныгмасум. Школа а̄стламум юипа̄лт э̄лаль ханищтахтуӈкве Тюмень ӯсн минасум. Тот о̄йкам ёт акванхо̄нтхатсуме̄н, та̄ра акванминасаме̄н, тыи ма̄гсыл э̄лаль ханищтахтуӈкве ат патсум. То̄нт о̄йкам ёт сас 18 та̄л яныт о̄лсуме̄н. Тав ётэ Казахстан ма̄н о̄луӈкве минасаме̄н. 27 та̄л та ма̄т о̄лсуме̄н, хӯрум ня̄враманме̄н яныгмасыт. Тот яныг кол ӯнттысаме̄н. Ам садикыт тэ̄нут па̄йтнэ нэ̄г рӯпитасум. Тувыл ня̄врам ӯргалан кол лаппантвес, ам рӯпатал по̄хынке̄тве̄сум. Рӯпата та̄л юн о̄лым, ам са̄всыр ӯйхул янмалтаӈкве патсум. Мис, пӯрщ, щищкурек о̄щсум. Па̄вылт о̄лнэ мир рӯпата та̄л мо̄т ма̄н о̄луӈкве ва̄нтласыт. Ма̄ньлат ще̄мьят са̄всыр ӯйхул янмалтым па̄вылт о̄луӈкве ат ка̄сащасыт, яныг ӯсн о̄луӈкве миныгласыт, па̄вылт туп яныгхо̄тпат хультсыт. Мо̄т ма̄хум па̄влувт воссыг а̄тим о̄лыс. Ам по̄хамт о̄лум яныгхо̄тпат акваг нё̄тсанум, щаквитыл, мӯӈил ос мо̄т тэ̄нутыл майлысанум. Саранпа̄вылн хунь ёхтысум, о̄влэ̄т о̄с садикт рӯпитасум, ты юипа̄лт ос «Альянс» нампа колн рӯпитаӈкве патхатасум. Казахстан ма̄т ма̄нь па̄вылквет яныгпа̄ла хо̄тпат халт о̄лсум, та̄н ётаныл потыртаӈкве ёмащакв ханьщувласум, тыи ма̄гсыл ты ма̄хум ёт рӯпитаӈкве ха̄сэ̄гум». Раиса Николаевна о̄йкатэ «Сосьвинский экспедицият» ма̄шинал яласым рӯпиты. Пыге Саша Германия ма̄т ще̄мьяӈ та̄гыл о̄лы. А̄гитэ Лена Казахстан ма̄т о̄луӈкве хультыс. Ма̄нь а̄гитэ Надя Саранпа̄вылт школа а̄стламе юипа̄лт Москва ӯст ханищтахтас. Тувыл хум ва̄рыс ос Барнаул ӯсн о̄луӈкве минас. Раиса Николаевна ӯщлахтын порат о̄йкатэ ёт ня̄враманэ̄н палт мӯйлуӈкве ялантэ̄г, ты та̄л Саша пыге̄н палт ялсы̄г.

1134 2016. 10. 20. Тамара МЕРОВА

А̄гмыт та̄ра пусмалтаӈкве кос э̄ре̄гыт Людмила Афанасьевна Рочева Касум па̄выл пӯльницат рӯпиты. Тав 60 та̄лэ то̄влыс. Ос ма̄хум атпан нупыл кит та̄л пӯльницат пусмалты. Тав 1974 та̄лт Ханты-Мансийский медицинский училище а̄сламе юипа̄лт Касум па̄вылн ке̄твес, та па̄сыл тувыл нэ̄мхотталь ат минас. Са̄в та̄л рӯпитанэ̄тэ о̄вылтыт нэ̄ таи потыртас: «Ам о̄влэ̄т тыг ёхтумум порат Касум пӯльницав ма̄нь о̄лыс, атхуйплов э̄лумхо̄лас ма̄гыс койкат щё̄питым о̄лсыт. Ань ты йильпи ӯнттым колувн о̄с аквта са̄вит э̄лумхо̄лас пинуӈкве ро̄ви кос, тувыл ма̄хум щар мо̄т щирыл пусмалтаӈкве патсанӯв. Тыг ань са̄всыр ищхӣпыӈ утыт тотве̄сыт, хо̄тпат а̄гманыл та утыт хосыт та̄рапаттавет. Пӯльница кӯщай нэ̄в наме Ольга Александровна Скиба, тав тыт рӯпитанэ̄тэ са̄т та̄лыг ты е̄мтыс. Та пора сыс па̄вылт о̄лнэ ма̄хманув пуссын ва̄ӈкве патсанэ. Ма̄хум тав палтэ о̄с ханьщувласыт, пусмалтахтуӈкве акваг ёхталэ̄гыт. Тыт ищхӣпыӈ ут хосыт сыманыл хӯнтлавет. Са̄всыр анализыт тыт вивет ос ке̄лпаныл уральтавет. Са̄ртын тамле ва̄рмалит а̄рталан ма̄гыс Белоярский ӯсн ке̄тыглаве̄сыт. Ань туп хо̄псыяныл уральтан ос УЗИ ва̄рнэ ма̄гыс тув ялантэ̄гыт. Тувыл щар сака а̄гмыӈ хо̄тпанув о̄с тув пусмалтахтуӈкве ке̄тыглыянӯв. Улщпуӈк пусмалтан ле̄ккар тыт о̄с рӯпиты. Ма̄н пӯльницавт ос Юильск, Нумто па̄влыгт о̄лнэ ФАПыгт рӯпитан мир акванловиньтым налыман нупыл са̄т хо̄тпа е̄мты. Та па̄влыгт медсестра хо̄тпаг рӯпитэ̄г, фельдшерыг рӯпитаӈкве нэ̄мхотьют тув минуӈкве ат ка̄сащи. Са̄выӈпа̄лэ ма̄хманув давление а̄гмыл савалэ̄гыт. Ты э̄лыпа̄лт но̄ӈхаль минам давлениятыл сака са̄в хо̄тпа ат савалас. Тувыл сым а̄гм о̄щнэ хо̄тпат са̄выг е̄мтсыт. Ань тай аман манарын ёхтувесӯв. Аман ма̄витув па̄ӈкыӈыг е̄мтыс, аман мо̄т матыр лю̄ль о̄лы. Хӯл тэ̄нэ ма̄хум ос со̄рыг ӯйн хулиглавет. Ма̄н е̄рувт 150 соссаӈ э̄лумхо̄лас во̄р па̄вланылт о̄лэ̄гыт, та̄н пуссын тамле а̄гм о̄ньще̄гыт. Та̄н ка̄сыӈ та̄л ма̄н палтув ёхталэ̄гыт ос ма̄н та̄наныл уральтыянӯв. Округ пӯльницаныл ле̄ккарыт туп 2013 та̄лт тэ̄лы лё̄ӈхыл тыг ёхталасыт. А̄гмыӈ ма̄хманув тынта̄л тэ̄рпил хасылтавет. А̄гмыӈмосыӈ, сакватахтам хо̄тпат федеральный льгота щирыл тэ̄рпил мивет, та̄н олн ат ойтэ̄гыт. Пенсият о̄лнэ хо̄тпат 50% са̄вит тынэ та̄нки ойтыяныл. Йильпи та̄л о̄вылтахтын э̄лыпа̄лт ма̄н нэ̄пак хансэ̄в, манхурип ос манса̄вит тэ̄рпи ма̄навн э̄ри. Тувыл э̄рнэ тэ̄рпил тотаве̄в ос ма̄ньполь э̄тпост а̄гмыӈ хо̄тпатн мыганӯв. Та̄н пуссын ты тэ̄лат ва̄ганыл ос ӯрхатым о̄лэ̄гыт. Мо̄т ма̄хум тэ̄рпи та̄л о̄с ат о̄лыглэ̄гыт, пӯльницавт аптека колнак рӯпиты. Хоты тэ̄рпит э̄ре̄гыт, ма̄н пуссын о̄ньще̄в. Тох та о̄лэ̄в, рӯпитэ̄в». Такви о̄вылтыт нэ̄ о̄с потыртас, тав ла̄выс, Касумт хум ва̄рыс, нила пыг янмалтасы̄г. Хӯрум пыганэ та̄нки ще̄мья о̄ньще̄гыт ос ма̄нь пыге тав ётэ иӈ о̄лы, нэ̄ ат о̄ньщи. Людмила Афанасьевна самын патум Паштор па̄влэ̄н то̄ванакт яланта̄лы. Пе̄с коланыл уральтытэ, ща̄нягеа̄щаге палт па̄г яланты. Акв яныг увщитэ Полноват па̄вылт а̄гитэ палт о̄лы, тав 80 та̄лэ то̄влыс. Ты нэ̄ потре Надежда Вах, ханты газетат рӯпитан нэ̄н, хасвес. Ам ма̄ньщи ла̄тӈыг толмащласлум. Ме̄н таве̄н яныг пӯмащипа ла̄тыӈ ла̄виме̄н, э̄ква ёмщакв потыртас. Ты э̄лыпа̄лт ме̄н Касум пӯльницат кӯщай нэ̄ ёт потыртаӈкве номсысме̄н. Пуссын ва̄рмалит та̄рапаттуӈкве кусыглахтасме̄н, тав а̄гмыӈ хо̄тпат ёт рӯпитас. Та халт тав палтэ о̄с щалтапа̄лсум, ла̄выс, а̄ви по̄хат вос ӯрхатыме̄н. Ме̄н щё̄с арыгке̄м а̄гмыӈ хо̄тпат ёт та кос ӯнлантасме̄н, ӯрхатсуме̄н, та ле̄ккар нэ̄ хотмус кантыӈыг о̄лыс, матыр по̄слуӈкве щар о̄с та̄ратас, ме̄наме̄н тох ат та во̄выстэ. Ётыл ме̄наме̄н школан минуӈкве э̄рыс, тот ӯрвесме̄н. Пӯльницаныл сысы та ё̄мантасме̄н. Мо̄т па̄влытын ялмувт, нэ̄мхуньт ма̄хум тох лю̄льсаӈ ат ва̄рыгласыт, акваг сымыӈыщ ма̄н ётув потырта̄лсыт.

1134 2016. 10. 20. Светлана РОМБАНДЕЕВА

Ща̄нь ла̄тыӈ сымын сака ро̄ви Сургут ӯст акв тамле сымыӈ нэ̄кве о̄лы, наме Римма Кирилловна Молданова. Таве ам тӯяг Ханты-Мансийск ӯст Ӯринэ̄ква хо̄тал о̄лме порат ка̄саласлум. Тав, насати соссаӈ хо̄тпа, ханты нэ̄, ка̄тыл са̄всыр пормасыт ва̄ри, ма̄щтырлы. На̄н ань тав потре ловиньтэлы̄н. – Ам Сургутский районт ма̄нь па̄вылт 1962 та̄лт самын патсум. Ты па̄выл хосат а̄тим, 1972 та̄лт тот о̄лум мир пуссын Сытомино па̄вылн ва̄нтлысыт. Тув о̄лмыгтасӯв, школат ханищтахтасӯв. А̄ги о̄парищ намум Вандымова. Омав Евгения Петровна, а̄ги о̄парищ наме Волдина. Тав Касум нэ̄ о̄лыс, та е̄рныл ёхталас. Колта̄глувт ма̄н хо̄т ня̄врам о̄лсӯв. Ме̄н ань китыг, а̄пщим ёт, лылыӈ та̄гыл о̄лыме̄н, тав наме Слава, Сытомино па̄вылт о̄лы. Школа а̄стламум юипа̄лт ам тыт, Ханты-Мансийскыт, торговый техникумт ханищтахтасум, 1981 та̄лт таве а̄стласлум. Та та̄л па̄сыл, ань 35 та̄лыг ты е̄мты, ам Сургут ӯст о̄лэ̄гум. О̄йкам Пётр Тихонович Молданов о̄лыс, нила та̄л ювле хультум порат хотталь щалтыс. Ме̄н хӯрум ня̄врам о̄ньщиме̄н, пуссын яныгмасыт, та̄нти колта̄глыл о̄лэ̄гыт. Оля а̄гим ка̄тыл са̄всыр маснут саги, ре̄гыӈ па̄ссат ос носкит саги. Тувыл ме̄н аквъёт са̄всыр пормасыт ра̄ктныл ва̄риме̄н, са̄лы совныл ёнгынутыт ю̄нтыме̄н. Ма̄хум пӯмыщ ма̄гыс ёвтэ̄гыт. – Римма Кирилловна, наӈ ня̄враманын ханты ла̄тӈыл потыртэ̄гыт? – А̄ти, та̄н ща̄нь ла̄тыӈ ат хӯлэ̄гыт, ӯст рущ мир халт яныгмасыт. Ам яныгмамум порат па̄выл ма̄хум ос юн омагума̄тягум халанылт ханты ла̄тӈыл потыртасыт. Та порат ты йильпи о̄лупса ква̄лтапаптувес, ань ща̄нь ла̄тӈыл ул вос потыртэ̄в. Таи ма̄гыс яныгхо̄тпат ня̄врамыт ёт акваг рущ ла̄тӈыл потыртаӈкве патсыт. Па̄влувн ма̄нь ня̄врамыт яслин рущ нэ̄ рӯпитаӈкве ке̄твес, кӯщаиг паттувес. Тав ханты ма̄хум ёт сака воритотыс, щар нэ̄мхотьют такви ла̄тӈе̄тыл ул вос потыртас. Тамле пора та о̄лыс. Ка̄сыӈ хо̄тпа ма̄гыс такви ща̄нь ла̄тӈе сымын сака ро̄ви, тав ётэ алпитэ ат по̄ляве, номтэ ёмас. Омагума̄тягум хоса о̄лсы̄г, тоха та тэ̄нти ла̄тӈе̄нтыл потыртасы̄г, ань сас а̄тимыг. Ам нила апыгрищ о̄ньще̄гум, та̄н пуссын «Старый Сургут» Центр культуры колн ялан- тэ̄гыт, ханты йӣквыт ос э̄ргыт ханищтэ̄гыт. Хо̄та̄ти акваг выступайта̄лэ̄гыт, сака нё̄тнэ̄г э̄рге̄гыт, йӣкве̄гыт. Та̄н ма̄гсыланыл ам па̄квпалыӈ ханты супыт ю̄нтэ̄гум. Пӯркат ю̄нтэ̄гум. «Старый Сургут» колн ам ва̄тихал яланта̄лэ̄гум, тот ма̄ньщи хо̄тпат ёт ва̄щинтахтыглэ̄гум, аквъёт ӯнлахо̄лэ̄в, потраме̄в, пе̄с пора о̄лупса ка̄сталылӯв. Ма̄н ма̄ньха̄пыл яласан ма̄гыс команда атсӯв, намаяслӯв «Старый Сургут». Ты касыл о̄лыгланэ̄тэ порат ма̄н тув о̄с яланта̄лэ̄в, ма̄ньха̄пыл маттем та тове̄в, касэ̄в. Китхуйплов та̄л яныт апыгрищум тай ты касыл сака э̄руптытэ, ань тув палыт таве тах ма̄ньха̄пыл яласаӈкве ханищтылум, вос тови. Римма Кирилловна тамле нёмса соссаӈ хо̄тпа, ма̄щтыр нэ̄. Таве̄н ам са̄в ёмас сымыӈ ла̄тыӈ ла̄ве̄гум. Пуста̄гыл вос о̄лы, На̄й-О̄тыранэ̄н вос ӯргалаве!

1134 2016. 10. 20. Галина КОНДИНА

Пос ос щунь «Пос ос щунь» – тамле ла̄тӈытыл стихыт ос мо̄йтыт хаснэ э̄ква Ма- рия Кузьминична Волдина такви потре о̄вылтастэ. Тэ̄н рущ ла̄тӈыл стихыт хаснэ хум Павел Черкашин ёт Ханты-Мансийск ӯст ма̄нь ня̄врамыт ялантан №18 «Улыбка» садикт рӯпитан ма̄хумн во̄виньта̄лвесы̄г. Ты ханищтапт тэ̄н садикт рӯпитан нэ̄кветын потыртасы̄г, хумус соссаӈ ма̄хум потрыт, стихыт хансэ̄гыт, хумус ня̄врамыт ма̄ньта̄гыл ма̄вит э̄руптым янмалтаӈкве э̄ри. Хантыт ос ма̄ньщит пе̄с йис о̄лупсаныл урыл матыр о̄с вос ва̄сыт. Ханищтахтын семинараныл тох ла̄всаныл – «Ознакомление де- тей дошкольного возраста с традициями и культурой коренных народов Севера через художественную литературу». Ты коныпал садикт ма̄нь музей ва̄ре̄гыт, «Югорский край» намтсаныл. Та̄н №6 ӯс библиотекат акванатхатыгласыт. Тот ма̄н ма̄вт о̄лнэ писателянув хансум нэ̄паканыл суссылтаве̄сыт. Павел Рудольфович округувт нэ̄пак хаснэ ма̄хум отделеният ответственный секретариг о̄лы. Тав такви потранэ, стиханэ ёт атпан нупыл ат нэ̄пак та̄ратас. Юграт о̄лнэ соссаӈ ма̄хум мо̄йтыт кӯстырыг ловиньтан ма̄гсыл ёмщакв хансыянэ. Ма̄н писателянув ёт са̄в нэ̄пак та̄ратасыт. Ты акванатхатыглан ханищтап ос ня̄врамыт ма̄гсыл выставка ва̄руӈкве «Газпромнефть-Хантос» компания та̄нанылн олн та̄стыс. Ла̄ккваминыгламаныл порат ма̄хум пуссын номтаныл ёмас о̄лыс, тамле ёмас тэ̄ла ма̄нь ня̄врамаквет ос ня̄врамыт ӯргалан нэ̄квет ма̄гсыл ты ва̄рыглавес. Ля̄ххал Галина Кондина ма̄ньщи ла̄тӈыг толмащластэ.

1134 2016. 10. 20. Николай МЕРОВ

Хо̄нтаӈ о̄йка йильпи нэ̄пак та̄ратас Ханты-Мансийск ӯст В. А. Игошев музейколэ̄т ловиньтан нэ̄пакыт хаснэ ма̄ньщи хум Андрей Семёнович Тарханов суссылтап ва̄рыглас. Тав «Природы чудное мгновение» нампа йильпи нэ̄пак хансыс. Са̄в та̄л рӯпитанэ̄тэ сыс, ань ты накт тав ва̄т нупыл атыт нэ̄паке нэ̄глыс. Ве̄щкат о̄йка ты та̄л 80 та̄лэ то̄влыс. Йильпи хансум нэ̄паке ты кастыл щё̄питастэ. Андрей Семёнович Кондинский районт Аманья па̄вылт 1936 та̄лт самын патыс. А̄ще во̄раян хумыг о̄лыс. Оматэ ос юн са̄всыр рӯпата ва̄рыс. Пыг школа а̄стлас ос Ханты-Мансийск ӯс педучилищан э̄лаль ханищтахтуӈкве минас. Та юипа̄лт ос Ха̄льӯс район Юмас па̄выл школан ня̄врам ханищтан хо̄тпаг ке̄твес. Тот ты стихыт хансуӈкве о̄вылтахтас. 1956 та̄лт тав стиханэ «Сталинская трибуна» нампа газетат хасве̄сыт. Хунь Ленинград ӯст э̄лаль ханищтахтас, тав стихотворениянэ «Молодой Ленинград», «На Севере Дальнем», «Сибирьские просторы» газетат хансуӈкве патве̄сыт. Ётылнув пединститут а̄стламе юипа̄лт Кондинский район газетат рӯпитас. Тот рӯпитаме порат стиханэ коныпал тав мо̄йтыт, са̄всыр потрыт ос кина ва̄рнэ потрыт са̄в хансыс. 1961 та̄лт Андрей Семёнович Ханты-Мансийск ӯсн о̄луӈкве ва̄нтлыс. То̄нт ма̄ньщи хум та̄ра «Союз журналистов СССР» палт пирмайтавес. 1967 та̄лт округувт нэ̄пак хаснэ ма̄ньлат хо̄тпат о̄выл сапра̄нияныл о̄лум порат тав тот такви хансум потранэ ос стиханэ ма̄хумн ловиньтасанэ. Та па̄сныл о̄йка са̄всыр ма̄т яласас, рӯпитас, са̄в нэ̄пак та̄ратас. Ань ма̄ньщи хо̄тпав намыӈсуиӈыг е̄мтыс. Ка̄сыӈ хо̄тпа таве ханьщитэ. Нэ̄пакыт хансуӈкве о̄вылтахтаме урыл тав тох потырты. Пе̄с йис пораныл соссаӈ ма̄хум на̄ӈк йӣв ялпыӈ йӣвыг о̄ньщияныл. Таима̄гыс ты йӣв наска̄ссыг ёл ат са̄граве. Андрей Семёнович ма̄ниг о̄лме порат ща̄няге̄на̄щаге̄н тох ла̄выглавес, на̄ӈк йӣв ӯргалым вос о̄ньщистэ, та йӣв ляпан ул вос ялыс, ю̄ныгтаӈкв ты йӣв щар ат ро̄выс. Аквматнакт пыг на̄ӈк ляпан ёхтыс, ла̄щлакв ка̄тэ тув пиныстэ ос молях хотвистэ. Номсы, ань тай матыр лю̄лил та ва̄раве, ӯрхатуӈкве та патыс. Мощ лю̄ляхо̄лыс, таве̄н нэ̄матыр ат е̄мтыс. Йӣв нупыл но̄ӈхаль а̄ӈкватас, татем нё̄тнэ на̄ӈк лю̄лис. Пыг тав э̄лыпа̄лэ̄т ёлротмыс, та йӣв потре хӯнтлуӈкве патыс. Андрей Семёнович ла̄внэ̄тэ щирыл, тав то̄нт нэ̄пак хаснэ хо̄тпаг ты е̄мтыс. Ань хансум нэ̄паке̄т Андрей Семёнович округувт о̄лнэ нё̄тнэ ма̄вит урыл стихотвореният хансыс ос хурит тув ва̄рыс. Та хурит «Ма̄нь Та̄гт» нампа ма̄вит ӯргалан ма̄т рӯпитан хо̄тпа А. М. Васин тав по̄слысанэ. Поэтув э̄кватэ Антонина Фёдоровна Россия янытыл «Ма̄вит ӯргалан хо̄тпа» намыл майвес. Ты ва̄рмаль э̄лаль тотнэ ма̄гыс тав о̄с яныг нё̄тмил ва̄рыс. Ма̄хумаквет, на̄н ма̄ньщи о̄йкав нэ̄паке о̄с ловиньтэлы̄н. Тот тав са̄в пӯмащ стихотвореният ма̄н ма̄витув урыл хансыс. Ты коныпал ты нэ̄пакт на̄н по̄слым хурит ка̄салэгы̄н тах.

1134 2016. 10. 20. Валентина УЗЕЛЬ

Ӯй йӣквнэ урыл потыртасыт Ты э̄тпос о̄выл хо̄таланэ̄т сака ёмас тэ̄ла Ханты-Мансийск ӯст о̄лыс. Ӯй йӣквнэ нак ва̄нэ хум хо̄тпат тыт акванатыглаве̄сыт. Та̄н пуссын хантыт, Нижневартовский, Сургутский районыгныл ос Белоярский район Касум па̄вылныл ёхталасыт. Та̄наныл Тимофей Молданов тыг во̄выгласанэ. Тимофей Алексеевич учёный хум, исторический наукат кандидатыг о̄лы. Тав Ӯй йӣквыт ос ялпыӈ э̄ргыт ёмащакв ва̄ганэ. Ты ханищтап тав ты ва̄рыгластэ. Ань ӯсн ёхталам ханты хум хо̄тпат пуссын во̄рт, та̄нти о̄лнэ ма̄нанылт пе̄с щирыл о̄лэ̄гыт. Та̄нти мираныл пе̄с накыт, пе̄с йис тэ̄лат э̄лаль тотыяныл. Та̄н халанылт щар янгыг ос ве̄сар ва̄нэ хо̄тпаг Сергей Васильевич Кечимов о̄лы. Тав ты ханты мир халт ма̄к яныг ня̄йтыг ты ла̄ваве. Ӯсувт та̄н хӯрум хо̄тал о̄лсыт. О̄выл хо̄талт та̄н нас потыртым ӯнлахо̄лсыт, потраныл пуссын хасве̄сыт. А̄пщите̄в ка̄тынпаттын порат маныр ва̄раве, юв ва̄гылттан порат маныр э̄ргыт э̄ргавет, ёлтӯйтнэ ла̄тӈыт пуссын ла̄всаныл. Титыт хо̄талт та̄н Ӯй йӣкв э̄ргыт э̄ргысыт, та̄н пуссын ищхӣпыӈ утын хасве̄сыт. Ма̄ньщи хо̄тпа па̄влыӈ ма̄ныл тув нэ̄мхотьют ат во̄выглавес. Ты тэ̄ла ва̄нэ хо̄тпа ат хо̄нтыма. Владимир Меров тув нас мощщан щалтапа̄лыс. Ма̄ньщи мир урыл матыр титыглахтын ла̄тыӈ те о̄лыс, тав пуссын тот та потыртас. Тимофей Молданов ла̄выс, тӯлыглапыт суссылтаӈкв та̄рвитыӈ а̄ти, ня̄врамыт тӯлыглахтуӈкв ханищтаӈкв молях ро̄ви. Ос э̄ргыт э̄ргуӈкв туп яныгхо̄тпат ве̄рме̄гыт, та̄н ты э̄ргыт ва̄ганыл. Ос ня̄врамыт ань ща̄нь ла̄тыӈ та̄л яныгме̄гыт, потыртаӈкв ат ве̄рме̄гыт. Э̄ргытн та̄наныл хумус ханищтаӈкв. Таима̄гыс ань Ӯй йӣкв ва̄нэ хо̄тпат сака янытлавет. Моще̄рт Ӯй йӣквнэ ва̄рмаль урыл ловиньтан нэ̄пакыт нэ̄глэ̄гыт, 2018 та̄лт та̄н тах олныл мивет, о̄выл хӯрум нэ̄пак тах та̄ртавет. Ань ты о̄лум ханищтап урыл о̄с я̄нас ма̄нь нэ̄пак тах щё̄питаве.

1134 2016. 10. 20. Валентина УЗЕЛЬ

Ю̄нсхатнэ э̄ква Ты хурит Федосья Тимофеевна Вылла по̄слым о̄лы. Тав 1948 та̄лт Касум па̄выл е̄рт самын патыс. Оматэ ё̄рн нэ̄г о̄лыс, а̄ще – ханты хум, Молданов. Та̄н о̄лнэ ма̄наныл Ямал ляпат о̄лыс, Надым нампа я̄ таляхт тот о̄лсыт. Ма̄н округувт ты я̄ Ханты-Мансийск ӯс ляпат А̄с я̄н паты. Та̄н колта̄гланыл са̄лыӈ о̄лыс. Федосья яныгмаме порат о̄с са̄лыӈ хум ва̄рыс, о̄йкатэ о̄парищ наме Вылла, тав о̄с ё̄рн хум. Ще̄мьянылт пуссын тит ла̄тӈыл потыртаӈкв ве̄рмысыт, ё̄рн ос ханты ла̄тӈыл. Ня̄враманэ ань пуссын ты тит ла̄тӈыл потыртаӈкв о̄с ве̄рме̄гыт. Тэ̄н ат ня̄врам о̄щсы̄г, школан Касум па̄вылн тотыгласанэ̄н. Ос тыглетувле яласан лё̄ӈхе сака хоса о̄лыс. Ня̄врамыт школа а̄стласыт, та̄н Муравленко ӯсн Ямалн о̄лмыгтасыт. Ань хӯрум а̄гиянэ, яныг пыге пуссын акв ляпат о̄лэ̄гыт. А̄гиянэ ю̄нсхатуӈкв сака ха̄сэ̄гыт, пӯркат, сахит ю̄нтэ̄гыт. Яныг пыге о̄с са̄лы ӯрим яласы. Ма̄нь пыге интернатыт о̄лме̄т пуӈке̄т та̄кыщ ю̄ныгтыма, ань акваг пӯльницат та хуи. То̄ванакт оматэ палт юв та̄рталаве, оматэ̄н о̄ньщаве. Ты э̄ква ам Когалым ӯст по̄слыслум, та̄н тув тыналахтуӈкв ёхталасыт, та̄нти ю̄нтум пормасаныл тыналасаныл.

1134 2016. 10. 20. Тамара МЕРОВА

Ӯльпа та̄рыл сагим те̄ранакыт Сӯкыр э̄тпост «То̄рум Маа» нампа музейт рӯпитан хо̄тпат о̄с акв пӯмыщ суссылтап ва̄рсыт. Таве «Вязаный сундучоккорневатик» намтысаныл. Тот Ханты-Мансийскат о̄лнэ кит музеигн атым пормасыт мӯй ма̄хумн суссылтавет. Мо̄танэ тыи «Ма̄вит ос Э̄лумхо̄лас» нампа музей. То̄ват сака хосат Белоярский, Ха̄льӯс, Сургутский ос Нижневартовский районытыт акванатве̄сыт. Те̄ранакыт сагуӈкве соссаӈ ма̄хум йис та̄гыл ханьщувласыт. Пе̄с порат са̄всыр пормасыт та̄нки ва̄рсыт. Ма̄н ма̄вт са̄всыр йӣвыт, лӯптат яныгме̄гыт. Ос хантыянув, ма̄ньщиянув ӯльпа та̄рыт а̄рталаманыл юипа̄лт те̄ранакыт ва̄руӈкве ханьщувласыт. Ощща ля̄м йӣвыт ӯльпа та̄рыл аквансагве̄сыт Ты та̄рныл сагим утыт та̄кыт, хоса ат саквалэ̄гыт, кӣвырн пиннэ тэ̄нутыт молях ат саке̄гыт ос матыр пормасыт са̄в та̄л тот о̄ньщуӈкве ро̄ви. Ты о̄вылтыт ма̄навн Ирина Ксенофонтова, «То̄рум Маа» музейт рӯпитан нэ̄, потыртас, ӯльпа та̄рыл ос ощща ля̄м йӣвыл ва̄рим хусапыт суссылтас. Ты утыт халт щар пе̄сыг акв те̄ранак ос а̄ны о̄лсы̄г. Ты пормасы̄г «Ма̄вит ос Э̄лумхо̄лас» нампа музейт рӯпитан хо̄тпатн ӯргалым о̄ньщаве̄г. Тэ̄н тув Ло̄пмус па̄вылт о̄лум ма̄щтыр хумн Пётр Ефимович Шешкинын мӯйлуптавесы̄г. Пе̄с ма̄хманув тамле а̄нын ня̄нь пинтласыт. Хусап кӣвырт тай са̄всыр тэ̄нутыт о̄щве̄сыт. Соссаӈ ма̄хманув яныг хусапанылт ла̄гыл маснут ю̄нтнэ кот о̄щсыт. Тот кот хот ат саи, витн ат ёсаве. Лё̄ӈхыт хотталь миннэ̄ныл сыс пормасыт тув пинтлысаныл ос тащир мо̄т ма̄н тотыгласаныл. Акв сагим хусапт ра̄кт а̄ныт мо̄т ма̄н тотыглаве̄сыт. А̄ныт ат сакваласыт, нэ̄мат лю̄ль ат е̄мталас. Тамле хусап Ха̄льӯс район Саранпа̄вылныл Тамара Савельевна Ванюта (Вьюткина) музейн суссылтаӈкве мистэ. Ань ӯльпа та̄рныл те̄ранак ва̄руӈкве мо̄рсыӈ хо̄тпа ха̄сы. Хусапыт хоты йӣвныл ва̄равет, хунь щё̄питавет о̄с ва̄ӈкве э̄ри. Ӯльпа та̄рыл сагим те̄ранакыт нот палыт о̄ньщуӈкве ве̄ритэ̄гыт. Ос матыр сагуӈкве тыи сака та̄рвит рӯпатаг о̄лы. Са̄ртын ты рӯпата туп хум хо̄тпат ва̄рсыт. Ань юио̄выл та̄лытыт нэ̄ хо̄тпат ос ва̄руӈкве ханьщувласыт. 2000 та̄лт «То̄рум Маа» музей рӯпитан хо̄тпат те̄ранак сагнэ ханищтап ва̄рыгласыт. То̄нт Нижневартовский район Варъёган па̄вылныл Ульяна Фи- липповна Иуси, Полина Васильевна ос Тамара Михайловна Казамкиныг ёхталасыт. Та̄н те̄ранак урыл потыртасыт ос ма̄хум та̄рныл сагуӈкве ханищтасыт. Ты суссылтапыт та̄н ва̄рум утаныл о̄с о̄лэ̄гыт. Ва̄рнутаныл о̄вылтыт ос ма̄нь кина по̄слым о̄лы, тав тот о̄с суссылтавес. Ты пӯмыщ суссылтап, на̄н тув сунсуӈкве ялэгы̄н ке, на̄нки са̄внув ва̄ӈкве патэгы̄н.

1134 2016. 10. 20. Тамара МЕРОВА

Рӯтыг о̄лнэ ма̄хманув янытлыянӯв Эстония ма̄т Тарту ӯст яныг музей ӯнттувес ос тав сӯкыр э̄тпос юио̄выл хо̄талэ̄т па̄лыгпӯсвес. Эстонцыт яныг кӯщаяныл тув ёхталасыт, са̄в ма̄ныл рӯт не̄лм ма̄хум мӯйлуӈкве о̄с во̄виньта̄лве̄сыт. Ты э̄лыпа̄лт та̄н мо̄т музейкол о̄щсыт, тав 1909 та̄л па̄сыл рӯпитас. Ань йильпи кол капай са̄всыр ищхӣпыӈ утыл ва̄рвес ос сыресыр пормасыт пӯмыщ щирыл сусссылтавет. Ма̄нь таквс э̄тпосныл тув ёхталан ма̄хумн ка̄тыл по̄слым хурит суссылтавет. Тувыл мо̄т утыт ла̄щалт щё̄питаӈкве патавет. Ос кит суссылтапыг акваг тот рӯпитэ̄г тах. «Хо̄нтхатыглап» нампа экспозиция эстонцыт йис та̄гыл о̄лупсаныл ос ты пора урыл о̄лы. Пе̄с порат ты ма̄хум хумус о̄лсыт, маныр ва̄рсыт, ты о̄вылтыт пуссын потыртаве. О̄выл эстонский флаганыл 1884 та̄лт о̄йттур э̄тпос нила хо̄талэ̄т постувес, ань та̄н таве ёрыӈыщ тот суссылтыяныл. Мо̄т яныг экспозицияныл «Нё̄р ойнас» намтвес. Тот нила яныг колнакытт пӯмыщ суссылтапыт ва̄рве̄сыт. Рӯт мирыт о̄лупсаныл урыл потыртаве ос са̄всыр пе̄с пормасыт суссылтавет. Саран колт мощ мӯйлуӈкве ос карелыт пувлынколын щалтапа̄луӈкве ро̄ви, удмуртыт ос марийцыт хумус пӯри ва̄ре̄гыт ос хантыт во̄р коланыл кӣвырт мощ ӯнлахо̄луӈкве ро̄ви. Тувыл та кит экспозициягт нэ̄гхумыг хумус аквъёт о̄лэ̄г, акваннё̄тхатэ̄г, та урыл потыртаве. Музейн акванатым пормасыт, потрыт ма̄гыс эстонцыт финноугор ма̄хумн яныг пӯмащипа ла̄тыӈ ке̄тэ̄гыт. Ма̄н ос ты э̄тпост рӯтыг о̄лнэ миранув пуссын акванхо̄нтхатыглан, акванюрщхатнэ хо̄талытыл янытлыянӯв. То̄рум ёт, О̄тыр ёт вос о̄лэ̄гыт! Светлана Карм, Эстония музейт рӯпитан нэ̄, ке̄тум ля̄ххалэ Тамара Мерован ма̄ньщи ла̄тӈыг хасвес.

1134 2016. 10. 20. Николай МЕРОВ

Йильпи школа хӯрмит та̄л рӯпиты Ты туи ля̄ххал тотнэ ма̄хум Ханты-Мансийск ӯст ӯнттым йильпи № 4 школан тотыглаве̄сыт. Тот ань хӯрмит та̄л ня̄врамыт ханищтавет. Кӯщаиг тот Василий Михайлович Репский рӯпиты. Тав ма̄нав школа янытыл ва̄нтата̄лыстэ, колнакыт суссылтасанэ ос ты урыл потыртас. Ты школат ня̄врамыт кит смена щирыл ханищтавет. О̄выл классын ялантан ня̄врамыт ма̄гыс я̄нас кол ӯнттувес. Яныг классыӈ а̄гитпыгыт ма̄гыс о̄с я̄нас кол щё̄питым о̄лы. Ань ты накт школан пуссын аквъёт со̄тыра арыгтем ня̄врам яланты. Акв сменат нёлса̄т ня̄врам ханищтахты. Тот яныг а̄гитпыгыт а̄лпыл акв смена щирыл ханищтахтэ̄гыт. Котиль классын ялантан ня̄врамаквет ос китыт сменат ханищтахтэ̄гыт. Школа нилаг уртым о̄лы. Ка̄сыӈ классын кӣвырныл щалтуӈкве ро̄ви, тыи ма̄гыс конква̄луӈкве ат э̄ри. Колыт халанылт унсахыл ва̄рве̄сыт, та̄н пуссын колхусапыл лапва̄рим о̄лэ̄гыт, ре̄гыӈыт. Яныг школат а̄гитпыгыт атыт классныл аквхуйпловит класс мус ханищтахтэ̄гыт. Тот нэ̄пак ловиньтан яныг колнак рӯпиты. Ханищтахтын ня̄врамыт нэ̄пакыт виӈкве пуссын тув ялантэ̄гыт. Сапра̄ни ва̄рыглан акв яныг колнак ос пувлын ма̄гыс бассейн о̄лэ̄г. Каснэ ма̄гыс ёмас, посыӈ кол ва̄рвес. Тувыл лощит, тэ̄пъялан яныг колнак капай о̄лы. Йильпи школат ня̄врамыт ханищтан ма̄гыс са̄в э̄рнэ ва̄рмаль щё̄питавес. А̄гмыӈмосыӈ ня̄врамыт нуми классын ёхтынэ̄ныл ма̄гыс ёлано̄х яласан лифтыт ва̄рве̄сыт. Тувыл рущ, литература предметыг ос мо̄т хо̄н ла̄тыӈ ханищтан колнакыт о̄лэ̄гыт. Ты урокыт кина суснэ то̄тап хосыт ос нас хӯнтлым ханищтаӈкве ро̄ве̄гыт. Я̄нас ма̄т ос ла̄тӈаныл ат тэ̄лнэ ос таглын ня̄врамыт ёмщакв потыртаӈкве ханищтавет. Ты коныпал ня̄врамыт ханищтан ма̄гыс са̄всыр лабораторият рӯпитэ̄гыт. Ма̄нь писалил па̄тлуптан ма̄гыс колнак о̄лы. Тот та̄н по̄с нупыл писалил па̄тлуптаӈкве ве̄рме̄гыт. Матыр ма̄щтырлан ва̄рмаль щё̄питавес. Тот ня̄врамыт пусмалтан ма̄гыс ма̄нь пӯльница о̄лы. Тот терапевтле̄ккар ос ӯлщ пуӈк пусмалтан ле̄ккар рӯпитэ̄г. Ня̄врамыт хоталь номтаныл патэ̄гыт, та ва̄рмаль щирыл тот э̄лаль ханищтахтуӈкве ве̄рме̄гыт. Тыи ма̄гыс матыра̄ти пуссын о̄лы. Ёнгын утыл са̄ӈквылтан ма̄гыс о̄с са̄в кол щё̄питым о̄лы. Тамле ты ёмас школа Ханты-Мансийск ӯст ӯнттувес. Ня̄врамыт ща̄гтым тот ханищтахтэ̄гыт. Кӯщай хум ла̄выс, школанылт ма̄нь ня̄врам кол рӯпиты. Ты накт туп акв группан ня̄врамыт тув ялантэ̄гыт, э̄лаль садик яныгнувег ва̄руӈкве номсыяныл.

1134 2016. 10. 20. Николай МЕРОВ

«Со̄рни сэ̄йт» ня̄врамыт ӯщлахтуӈкве ка̄саще̄гыт Ты та̄л Ха̄льӯс ляпат «Со̄рни сэ̄й» нампа ня̄врамыт ӯщлахтын ма̄ рӯпитанэ̄тэ па̄сныл ат та̄лыг то̄влыс. Тот кӯщаиг Ольга Константиновна Филиппова рӯпиты. Ты нэ̄ ня̄врамытын сака э̄руптаве. Туи порат ам тув ялсум. Та ма̄т кит хо̄тал о̄лсум. Кӯщай нэ̄ ӯщлахтын ма̄ ос та̄нки ва̄рнэ рӯпатаныл урыл китыгласлум. Маныр тав потыртас, ам ты урыл хансэ̄гум. Ты ӯщлахтын ма̄ ущнув рӯпитаӈкве о̄вылтахтас. Ос ат та̄л сыс тот са̄в ня̄врам ӯщлахтуӈкве а̄лымасыт. Тот о̄лум то̄ва ня̄врамыт ань янгыг е̄мтсыт. Ты порат хӯрум смена сыс яныгса̄т хус ня̄врам ӯщлахтасыт. Та̄н пуссын ща̄гтым тув ёхталэ̄гыт, та̄нанылн тот сака пӯмащ. Са̄выӈпа̄лэ ня̄врамыт хосат та̄гыл аквъёт ӯщлахтэ̄гыт, халанылт ёмщакв ва̄йхатэ̄гыт. Ма̄витэ тот нё̄тнэ, лылые̄п сыстам, ляпат я̄ овты. Ты тув лё̄мвой тот щар а̄тим о̄лыс. Ӯщлахтын ма̄ тэ̄рпил расалта̄лвес. Ня̄врамыт пуссын палаткат о̄лсыт. Палаткат пуссын ёмасыт, раквын та̄ра ат посавет. Ка̄сыӈ палаткат нила ня̄врам э̄т хӯлыс. Мо̄лты та̄л палатка кӣвырт колканын нортнэ ре̄гыӈ то̄влит ёвтве̄сыт. Та хуйнэ утыт сака ёмасыт, ре̄гыӈыт. Тувыл ты та̄л Ха̄льӯсныл ӯщлахтын ма̄ мус лё̄ӈх ва̄руӈкве патвес. Ты э̄лыпа̄лт ня̄врамыт ӯсныл я̄ хосыт моторха̄пыл тув тотыглаве̄сыт. Ӯлтта яласан лё̄ӈхе ат ве̄рыста палытыг о̄лы. Тыщир та̄нанылн сака кӯстыр паты. Ань ты порат ня̄врамыт пуссын Ха̄льӯс районныл ӯщлахтуӈкве тув ёхталасыт. Мо̄лты та̄лыт тай Ханты-Мансийск, Нижневартовск ӯсыгныл ос Лӯи Ня̄рихумыт па̄вылныл ня̄врамыт о̄лсыт. Ос ты туи са̄в ня̄врам Ха̄льӯс район са̄всыр па̄влытныл тот ӯщлахтуӈкве ка̄сащасыт. Таима̄гыс район миркол кӯщаит туп та̄нки районанылт о̄лнэ ня̄врамыт ма̄гыс ӯщлахтын ма̄ та̄стыгласыт. Э̄лын о̄лнэ ня̄врамыт о̄с сака тув ялуӈкве тахсыт кос, ос ӯщлахтын ма̄ ат то̄вылхатнэ ма̄гыс та̄н тув виӈкве ат ве̄рмуве̄сыт. Ня̄врамыт Тюмень, Сургут ӯсыгныл ты кос тув во̄вхатасыт. Ты коныпал Казахстан ма̄ныл а̄гитпыгыт о̄с ӯщлахтуӈкве тот тахсыт. Кӯщай нэ̄ та̄н ма̄гсыланыл сыме сака ща̄ргыс кос, ос нэ̄матыр ва̄руӈкве ат ве̄рмыс. «Со̄рни сэ̄йт» щар о̄влэ̄т соссаӈ ня̄врамытын, нусаг о̄лнэ ще̄мьят ос са̄в ня̄врамыӈ ще̄мьят яныгмам ня̄врамытын ӯщлахтын ма̄ миве, тувыл ущ мо̄танытын. Тот ня̄врамыт ма̄ньщи ла̄тӈыл потыртаӈкве ханищтавет. Та̄н ань «О̄с ёмас ӯлум», пащалахтын ла̄тыӈ сакати ва̄ӈкве патсыт. О̄лупса палытыл манырсыр ма̄ньщи ла̄тӈыт ва̄тихал потыртавет, та ла̄тӈытын ханищтавет. То̄ват ла̄ве̄гыт, та̄н ща̄няныла̄щаныл ма̄ньщит кос, ос тамле ла̄тӈыт ат хӯлыгласыт. Юн акваг рущ ла̄тӈыл потыртэ̄гыт. Ань та̄н хунь юв ёхтэ̄гыт, ща̄няныла̄щаныл ёт ма̄ньщи ла̄тӈыл ёрыӈыщ пащалахтэ̄гыт. Ювле хультум та̄лытт та ӯщлахтын ма̄т ма̄ньщи ла̄тӈыл Клавдия Семёновна Плеханова ня̄врамыт ханищтас. Ты нэ̄ Лӯи Ня̄рихумит па̄вылныл тув ёхталас. Тав тот та̄наныл ёмщакв ханищтасанэ, ня̄врамыт таве сака э̄сгияныл. Тав ханищтам то̄ва а̄гирищанэпыгрищанэ ань ма̄ньщи ла̄тӈыл потыртэ̄гыт. Акв а̄ги Юлия Воложанина ань ӯщлахтын ма̄т ты ла̄тӈыл ня̄врамыт такви ханищтыянэ. Ты а̄ги ща̄нягеа̄щаге сас ма̄ньщи хо̄тпаг, таима̄гыс тав кӯстыр щирыл потыртаӈкве ханьщувлас. Ка̄сыӈ смена оигпан э̄лыпа̄лт ня̄врамыт ӯщлахтын ва̄рмаль урыл нэ̄пакт татем ёмас, сымыӈ ла̄тӈыт хансэ̄гыт. Тувыл юв минуӈкве щар ат таӈхе̄гыт, тув мус та ма̄ э̄руптаӈкве патсаныл. Тот рӯпитан хо̄тпат ка̄сыӈ хо̄тал я̄нас тэ̄ла щирыл щё̄питыяныл. Акв хо̄тал ма̄ ӯргалан ва̄рмаль щирыл ня̄врамыт ёнгалтаве̄сыт, мо̄тыт хо̄тал соссаӈ ма̄хум хо̄талыг о̄лыс, э̄лаль о̄с матыр рӯпата ва̄ре̄гыт, ня̄врамытн ты ва̄рмаль сака мӯсты. Соссаӈ ма̄хум хо̄талт ка̄сыӈ ня̄врам хорамыӈ ма̄ньщи, саран манос ханты суп но̄хмасы. Та̄н концерт ва̄рыглэ̄гыт, йӣкве̄гыт, э̄рге̄гыт ос мо̄йт хосыт ощхулиӈ тӯлыглапыт суссылтэ̄гыт. Ка̄тыл пормасыт ма̄щтырлан хо̄тал ва̄рыглэ̄гыт. Тот та̄н са̄сныл са̄всыр хусапыт, со̄втыт ю̄нтэ̄гыт, хорамыл щуртыяныл. Ха̄ӈхай пумныл пормасыт саге̄гыт, тох ты пӯмащ щирыл тот ня̄врамыт ӯщлахтэ̄гыт. Ольга Константиновна ла̄выс, ты та̄л ӯщлахтын ма̄ уральтаӈкве са̄в комиссияхо̄тпа ёхталас. Маныр ва̄рмаль о̄щсыт, та тэ̄лат пуссын мӯсхал щирыл щё̄питасаныл. Ня̄врамыт во̄рт ул вос тыпсыт, ӯщлахтын ма̄ мувлахи карыс пӯсасыл ва̄рим о̄лы. Тэ̄нэ на̄й ӯщлахтын ма̄ нупыл ул вос тотвес, пӯсас коныпа̄лт йӣвыт ёляктуве̄сыт. Тот я̄тэ сака овыӈ, таима̄гыс ня̄врамыт пувлуӈкве ат та̄ртавет, та̄н на̄лув туп витыл со̄сантахтуӈкве ялантэ̄гыт. Ань ос ре̄щина яныг хурыг ёвтнэ щирыл о̄лэ̄гыт, тав лылые̄пыл янгыг пувлаве. Мо̄тынтыг ня̄врамыт та ут кӣвырт пувлуӈкве тах патэ̄гыт. Кӯщай нэ̄ ла̄выс, ты та̄л э̄рыӈ юио̄выл щёс рӯпитас, ва̄гтал патыс. Тав таӈхи, мо̄тыт та̄лныл хотты мо̄т ма̄ньлат хо̄тпа тот ты ва̄рмаль э̄лаль вос тотнув.

1135 2016. 11. 10. Светлана РОМБАНДЕЕВА

Ма̄хум округ кӯщай премиял майве̄сыт Ты э̄тпос 5 хо̄талэ̄т Ханты-Мансийск ӯст КТЦ «Югра-Классик» колт ма̄хум «За вклад в развитие межэтнических отношений в Ханты-Мансийском автономном округе – Югре» округ кӯщай нампа премиял майве̄сыт. Ма̄н ма̄вт тамле ва̄рмаль ань атыт та̄л ты о̄лыс. Тамле премиял ма̄хум ёмас тэ̄ланыл, проектаныл ос са̄всыр программаныл ма̄гыс мивет. Округувт о̄лнэ мирыт пуссын аквъёт ёмащакв вос о̄лэ̄гыт, ка̄сыӈ культуратэ манос ла̄тӈе вос янытлытэ, ма̄ньлат мир халанылт юртыӈыщ вос о̄лэ̄гыт – ты ма̄гыс ма̄хум са̄в ёмас, э̄рнэ тэ̄ла ва̄ре̄гыт. Округ кӯщай премиял хус хо̄тпа майве̄сыт – 10 организация, 10 нас ма̄хум. Премият округ губернатор ва̄ӈын хум Алексей Забозлаев тав мис. Ты ка̄ркам ма̄хмум тав янытласанэ, та̄н ва̄рнэ рӯпатаныл э̄сгысанэ. То̄ва проектыт, ла̄ви, сака пӯмщиг намаим о̄лэ̄гыт. Алексей Геннадьевич тох потыртас: «Тыхо̄тал ма̄н са̄в ёмас тэ̄ла ва̄рнэ хо̄тпат о̄вылтыт потраме̄в. Тамле та̄рвитыӈ рӯпата та̄н ка̄сыӈ хо̄тал ва̄ре̄гыт. Та̄рвитыӈ те̄пыл, тав сака пӯмыщ, сака э̄ри. Кос выгув тамле нам – «Страницы национальной литературы», ты яныг рӯпата. Ма̄н ма̄в – ты сома акв яныг нэ̄пак. Таве̄ныл акв хотты ло̄пс хотманумтылӯв те, нэ̄пакув э̄лаль ловиньтаӈкв ат ве̄рмилув, потрув мо̄т нупыл та мины. Округувт о̄лнэ ка̄сыӈ мир, ка̄сыӈ культура – ты Югра ма̄в тав о̄лупсатэ, тав йис потре. Тыт о̄лнэ соссаӈ ма̄хум пе̄с порат ла̄выгласыт: «Ка̄сыӈ мир ма̄гыс мо̄йт – ты тав самаге, ос э̄рганэ – ты тав тӣвре манос номтэ». Я̄тил ма̄хум, ам ань о̄с таи ла̄вуӈкве таӈхе̄гум, ма̄н мо̄йтанув ос э̄рганув ма̄в янытыл вос суйтэ̄гыт, саманув акв ляльт вос сунсэ̄гыт, номтанувт аквъёт о̄луӈкве вос ка̄саще̄в». Тамле премият хоты хо̄тпан миӈкве, ка̄сыӈ организацият манос па̄вылт о̄лнэ кӯщаит та̄н номсэ̄гыт, щар ма̄к ка̄ркам, мӯтраӈ хо̄тпа та̄н ты пе̄рие̄гыт. Тувыл наманыл культура, образование департаментын ос Общественный палата Югры колн ке̄тыяныл, тот рӯпитан ма̄хум янытлан нэ̄пак та щё̄питэ̄гыт.

1135 2016. 11. 10. Людмила Теткина

Ищхӣпыӈ ут ханищтан кол рӯпиты Ты э̄тпос о̄выл хо̄талэ̄т Югорск ӯст «Кванториум» нампа ня̄врамыт ханищтан кол рӯпитаӈкве патыс. Ты э̄лыпа̄лт акв тамле колыг Нефтеюганск ос Ханты-Мансийск ӯсыгт ӯнттувесы̄г. Ань тув ялантан а̄гитпыгыт са̄всыр ищхӣпыӈ утыт ва̄руӈкве тот ханищтавет. Та ӯст ты йильпи кол пуснэ порат са̄в ма̄хум акванатхатыгласыт. Та̄наныл округ кӯщай нэ̄ Наталья Комарова янытласанэ. Тав Ханты-Мансийск ӯст рӯпитан акв тамле намыл пиным «Кванториум» нампа колн ёхталас ос кина суссылтан тотап хосыт та ма̄хум янытласанэ. Тав ла̄выс, тамле ищхӣпыӈ тэ̄лат ханищтан колыт ань таи ма̄гсыл ӯнттавет, ня̄врамыт са̄в йильпи тэ̄ла вос ханищтэ̄гыт ос са̄в э̄рнэ, ёмас ва̄рмалитыл пӯмщалахтэ̄гыт. Россия янытыл тамле ханищтахтын кол мощща ӯнттым о̄лы. Тыи ма̄гсыл ня̄врамыт ты ищхӣпыӈ утыт ма̄ньта̄гыл ханищтым са̄в э̄рнэ тэ̄ла тах ва̄руӈкве патэ̄гыт. Ты кол ӯнттуӈкве «ГазпромТрансгазЮгорск» нампа компания олныл нё̄тыс. Наталья Комарова ты компаният рӯпитан ма̄хумн яныг пӯмащипа ла̄тыӈ ла̄выс. Ань Югорск ӯст ӯнттым йильпи ханищтахтын колн ня̄врамыт ва̄т са̄грапнал э̄тпос о̄выл хо̄талныл ялантаӈкве патэ̄гыт. Ань ищхӣпыӈ утыт ханищтаӈкве тот са̄в ня̄врам ка̄сащи.

1135 2016. 11. 10. Светлана РОМБАНДЕЕВА

Ка̄сыӈ колта̄гыл янытлаӈкве э̄ри Ня̄врамыт вуянтан округ комиссия ос «Родительский комитет Югры» нампа ма̄нь пора ос э̄лумхо̄лас вуянтан организация «Ще̄мья ос ще̄мья щунит» урыл потыртан ма̄гыс Ханты-Мансийск ӯс мирколн ёхталасыт. Тув са̄в мир атхатыглас – ка̄сыӈ ӯст ман районт рӯпитан комиссият кӯщаяныл о̄лсыт, ва̄ӈнаныл по̄сыӈ ма̄хум, ма̄ньлат мир ос общественный организациятыт рӯпитан хо̄тпат, пупколт рӯпитан ма̄хум ос ля̄ххал тотнэ нэ̄тхумит. Ня̄врамыт вуянтан округ комиссият кӯщай пе̄нтсыл о̄лнэ нэ̄ Татьяна Черкашина ла̄вме щирыл, округувт ань ня̄врамыт ос ма̄ньлат ма̄хум лю̄ль матыр ва̄рапан тэ̄ла 16% мощщамас. 20% са̄вит ос та ва̄рмаль мощщамас, хунь ща̄ньа̄щит ня̄враманыл мӯсхал щирыл ат янмалтыяныл, хо̄та̄ти ӯльнаг оссувлыяныл. Нусаг о̄лнэ колта̄глыт 4% са̄вит мощщагнув е̄мтсыт. Ань ка̄сыӈ колта̄гыл со̄тыӈыщ ос щуниӈыщ вос о̄лнув, ты ма̄гыс округ комиссия са̄в э̄рнэ тэ̄ла ва̄ри. Ня̄врамыт мори ул вос ё̄ме̄гыт, лю̄ль матыр ул вос ва̄ре̄гыт, ща̄ньа̄щит киттыг ул вос минэ̄гыт – ты ма̄гыс са̄всыр конкурсыт ва̄рыглэ̄гыт, ма̄хум ёт потыртэ̄гыт. Ща̄ньа̄щит ос ня̄врамыт аквъёт о̄луӈкве вос ха̄сэ̄гыт, халанылт вос нё̄тхатэ̄гыт. Ты хо̄нтхатыглапын Тюмень ӯсныл Константин Александрович Шестаков ёхталас. Тав «Центр защиты материнства «Покров» организация кӯщай ва̄ӈын хумыг о̄лы, социологический наукат кандидат намыл майвес. Тав колта̄гыл о̄вылтыт потыртас. Хум такви колта̄глэ яныг, са̄в ня̄врам о̄ньщи. Ма̄ньлат ма̄хум ос студентыт ма̄гыс са̄в потыр хансыс, щё̄питас. Потранэ ловиньтым тав са̄в ма̄т яласы, школатыт ос училищатыт ханищтахтан ня̄врамыт ёт потрами. Та̄н ща̄ньа̄щаныл вос э̄руптыяныл, ла̄тыӈ вос хӯнтлэ̄гыт, колта̄гланыл вос янытлыяныл. Хунь яныгме̄гыт, та̄нти ще̄мьяӈыг е̄мтэ̄гыт, ня̄враманыл мӯсхал щирыл вос янмалтыяныл. Тав ла̄вме щирыл, ань мо̄т хо̄н ма̄хум та̄нти са̄кконаныл ма̄н палтув ханлуӈкв манос ро̄влаӈкве таӈхияныл. Ма̄н ня̄враманув ёт та̄кыщ ул вос потыртэ̄в, та̄кыщ ул вос ла̄валыянӯв, ты ма̄гыс ня̄враманув тах хотвивет. Ты тэ̄ла хосыт та̄н Россияв ва̄гталыг паттуӈкве таӈхияныл. Ня̄враманув ла̄тыӈ ул вос хӯнтлэ̄гыт, колта̄гланыл ул вос э̄руптыяныл, ща̄ньа̄щаныл вос лю̄камтыяныл. Ты сака лю̄ль ва̄рмаль. Ты урыл хум ма̄ньлат ма̄хум нупыл та потырты.

1135 2016. 11. 10. Николай МЕРОВ

Лё̄ӈханув ёмщакв хотщё̄питавет Округ кӯщай ва̄ӈын хум Дмитрий Шаповал ля̄ххал тотнэ ма̄хум ёт ма̄нь таквс э̄тпост хо̄нтхатыглас. Ты та̄л сыс ма̄н ма̄вт ма̄шинал яласан лё̄ӈхыт хумус щё̄питаве̄сыт, тав ты урыл потыртас. 2016 та̄лт округувт лё̄ӈхыт мӯсхал щирыл хотщё̄питан ма̄гыс э̄рнэ са̄вит олн та̄стыглавес. Ань ащирмаӈыг е̄мтыс, моще̄ртын лё̄ӈхыт ва̄руӈкве ат патавет. Туи сыс са̄в э̄рнэ рӯпата ва̄рвес. Ты хосыт онтолов арыгтем ве̄рыста палыт йильпи лё̄ӈх пинвес ос ва̄т ве̄рыста палыт ма̄ ёмащакв хотщё̄питавес. Тув па̄влытт ос ӯсытт о̄лнэ лё̄ӈхыт пуссын аквъёт ловиньтым о̄лэ̄гыт. Сургут ӯст Никольский нампа йильпи ӯсхулы ва̄рвес. Тот акв ве̄рыста палыткем йильпи лё̄ӈх хосыт ань ма̄хум ма̄шинал яласаӈкв патсыт. Ты коныпал ань Белоярский районт я̄ ӯлтта уснэ кит унсахы̄г ва̄раве̄г. Тыи ма̄гыс э̄рнэ нэ̄пакыт акванатве̄сыт. Ты унсахыг Югорск – Советский – Верхний Казым – Надым ӯс мус яласан лё̄ӈх ва̄равег. Ты ва̄рмаль щирыл «Газпром Югорск трансгаз» газ но̄хвинэ компаният рӯпитан хо̄тпат о̄с нё̄туӈкве патэ̄гыт. Ты тэ̄ла та̄н аквъёт щё̄питасаныл. Та̄л о̄вылтахтам порат манаса̄вит лё̄ӈх ва̄руӈкве номсасыт, та̄н ты та̄л оигпан мус пуссын а̄стласаныл. Ань Нягань – Талинка, Нягань – Юган, Радужный – Новоаганск, Ягрим – Ня̄рихумит Лӯи па̄выл мус яласан ва̄тахкем ве̄рыста палыт лю̄ль лё̄ӈхыт хотщё̄питасаныл. 2016 та̄лт лё̄ӈхыт пуссын аквъёт ва̄рнэ ма̄гыс са̄т арыгтем млрд. солко̄ви майвес. Ма̄нь таквс э̄тпос о̄выл хо̄талэ мус нила млрд. солко̄ви холтвес. Ты олныт та̄л оигпан мус пуссын тэ̄лаг минэ̄гыт тах. Тыгыл э̄лаль ань лё̄ӈхыт мӯсхал щирыл ва̄рнэ кастыл ӯс ос па̄выл мирколыт субсидияолныл миӈкве патавет. Ты та̄л сыс округувт ӯсытт ос па̄влытт лё̄ӈхыт ва̄рнэ ма̄гыс хӯрум млрд. нёлса̄ткем млн. солко̄ви субсидияолн холтвес. Тувыл онтырса̄т арыгтем млн. солко̄ви лё̄ӈх ва̄рнэ фондыл майвес. Йильпииг ва̄рим лё̄ӈхыт нёлолов та̄л ве̄ритэ̄гыт ке, ты рӯпата ма̄к э̄рнэ щирыл ва̄рвес. Россия янытыл ма̄н округувт ва̄рим лё̄ӈхыт ёмасыг о̄лэ̄гыт. Хоты ма̄т во̄ӈхаӈыг манос лю̄лиг е̄мтэ̄гыт ке, та̄н та̄ра хотщё̄питавет. Акв ве̄рыста палыт лё̄ӈх ва̄рнэ ма̄гыс нёлоловса̄т хо̄тпан со̄тыра солко̄ви са̄вит олн э̄ри. Тыса̄вит олн ёмщакв то̄вылхаты. Кӯщай хум ла̄выс, ты тэ̄ла ма̄гыс олн са̄литаӈкве ат э̄ри. Мо̄тынтыг лё̄ӈхыт ва̄рнэ ос хотщё̄питан ма̄гыс иӈ са̄внув олн та̄ставе тах. Хурит Дмитрий Шаповал по̄слым о̄лы.

1135 2016. 11. 10. Галина КОНДИНА

Ма̄ньлат ма̄хум ханищтан кӯщаит Ма̄н не̄лм ла̄тыӈ рӯтанув ёт акваг матыр ва̄рмаль аквъёт ва̄рыглэ̄в. Финноугорский ла̄тӈыт ханищтан университетыт ань акв ассоциациян хасхатмыт, акванпотыртахтым рӯпитэ̄гыт. Мо̄лал университет кӯщаит ма̄н Ханты-Мансийск ӯсувн ёхталасыт. Ос хотьют ёхталаӈкве ат ве̄рмыс, та̄н видеосвязь хосыт потыртасыт. Нила хум ёхталасыт: А. В. Воронин Петрозаводский университетт ректорыг рӯпиты, тав ты ассоциацият кӯщаиг о̄лы. М. Н. Швецов Марийский университетт кӯщаиг рӯпиты. П. В. Сенин Н. П. Огарёв нампа Мордовский университетт наука рӯпата щирыл проректорыг о̄лы. Д. И. Пинаевский Питимирин Сорокин намыл пиным Сыктывкарский университетытт проректорыг рӯпитан хум. Та̄н та̄нти рӯпатаныл урыл потыртасыт, хумус акваннё̄тхатым халанылт рӯпитаӈкве кӯстырнув паты. Ма̄н Югорский университетувт са̄всыр институтыт о̄лэ̄гыт, Лӯима̄ ма̄хум институтт директорыг Т. А. Дятлова рӯпиты. Тав мӯй ма̄хум тыг во̄всанэ ос потыртаманыл порат та̄н халанылт тав кӯщай нэ̄г о̄лыс. А. В. Воронин ты та̄л ос мо̄тынтыг ассоциацияныл маныр ва̄руӈкве паты, ты урыл потыртас. Та̄н а̄гитпыгыт матыр ханищтан ма̄гсыл халанылт мӯйлуӈкве те̄тсыяныл, халанылт вос ханищтахтэ̄гыт, вос касэ̄гыт. Тыгыл э̄лаль ос таӈхе̄гыт а̄гитпыгыт халт касыл ва̄рыглаӈкве, ка̄сыӈ мир та̄нти щирыл пе̄рще̄гыт, ёнге̄гыт, таима̄гыс акв яныг касылт са̄всыр мирыт каснэ щирыл ва̄рыглаӈкве. Марийский университет кӯщай хум М. Швецов потыртас, та̄н ханищтахтын коланылт ма̄ньлат ма̄хум акв яныг ищхӣпыӈ ут та̄нти ва̄рсыт, рущ щирыл тав «супер компьютер» ла̄ваве. Ань та̄нанылн нэ̄мхотыл ты тыныӈ ут ёвтуӈкве ат э̄ри. Программа ты кастыл о̄с ат ёвтэ̄гыт. Тамле ты номтыӈ ос ка̄ркам а̄гит, пыгыт тот ханищтахтэ̄гыт. Мӯй ма̄хум ӯс сунсуӈкве о̄с тотыглаве̄сыт. Нё̄тнэ на̄ил суртгын ӯсувт са̄всыр памятникыт, музеит о̄лэ̄гыт, тох сунсыглахтым хо̄тал ат то̄вылхаты. Та̄н ла̄всыт, Ханты-Мансийск – сака нё̄тнэ, ёмас ӯс.

1135 2016. 11. 10. Валентина УЗЕЛЬ

Ма̄вит ӯргалан хо̄тпа ма̄н халувт мощща 2017 та̄л Россия янытыл ма̄вит ӯргалан та̄лыг тах ла̄ваве. Ань ты ёмас ва̄рмаль ма̄гыс ма̄н округувт ты о̄лнэ та̄лув сыс са̄в ёмас рӯпата ва̄рвес. Ты урыл нила хум хо̄тпа потыртасыт. Та̄н ля̄ххал тотнэ ма̄хум ёт хо̄нтхатыгласыт. Ка̄сыӈе я̄нас потыр о̄ньщис. О̄выл хум наме Евгений Калашников, тав «Самаровский чугас» нампа природный парк кӯщаиг о̄лы. Ханты-Мансийск ӯс мувлахи о̄лнэ ма̄ тох ла̄ваве, та̄н ты ма̄ ӯргалыяныл. Ляпат о̄лнэ во̄рт сака пе̄с йӣвыт лю̄ле̄гыт, то̄ва ӯльпат хо̄тса̄т та̄лыг ты е̄мтэ̄гыт. Ань ты кӯщай ла̄выс, во̄р ӯргалан ма̄гыс та̄н са̄в ӯщлахтын ма̄ щё̄питасыт, ӯст о̄лнэ ма̄хум а̄ращ мори ул вос ва̄ре̄гыт. Та ма̄т акваг хотсыстамтавет. Ханищтахтын ня̄врамыт тув тотыглавет, то̄ва уроканыл во̄рт ва̄рыглавет. Та̄н ӯйрищит, лӯптат ос йӣвыт наманыл ёмащакв вос ва̄ганыл. Ё̄мыгтан ма̄хум ма̄гыс нас ва̄рим лё̄хъясыт во̄рт о̄лэ̄гыт, та̄н па̄хвыӈыт, састумыт. Яныгхо̄тпан тот ё̄мыгтаӈкв сака ёмас. Ос ты ма̄ ёмащакв кос ӯргалаве, туи мус таса̄вит порс тот та атхаты. Ма̄хум матыр ат э̄рнэ ут ёто̄ньще̄гыт те, вит о̄щнэ сульясоврищит пуссын во̄рт тот та па̄хвтыяныл. Ма̄лтыпыг е̄мтнэ порат, тӯйт хунь толы, акв хотты ӯщлахтын хо̄талт ӯст о̄лнэ ма̄хум пуссын во̄р сыстамтаӈкв во̄выглавет. Ка̄сыӈ организация такви ма̄хманэ тув те̄тыглы. Хо̄тал сыс матах яныг ма̄шина порс та атаве. Соссаӈ хум потре Александр Новьюхов тув о̄с во̄выглавес. Тав «Югра лылые̄п» организацият са̄в та̄л кӯщаиг о̄лы. Тав ань ты урыл потыртас, ма̄н округувт акв яныг ялпыӈ ма̄ о̄лы. Тот ё̄рн ос ханты ма̄хум пӯрлахтэ̄гыт. Та ма̄т о̄лнэ Нумто нампа тӯр о̄с сака ялпыӈыг ла̄ваве. Са̄в та̄л ты ма̄ ӯргалаве. Ос та ляпат матах та̄л минам юи– па̄лт ма̄во̄й но̄хвинэ ма̄хум рӯпитаӈкв патсыт. Та̄н акваг та тӯрн воратэ̄гыт. Тӯяг са̄в кӯщаиӈ мир акванатхатыгласыт, потыртасыт – матыр ва̄руӈкв э̄ри, ты тӯр ос ляпат о̄лнэ ма̄тэ ущпылнэ̄г та̄кыщ вос ӯргалавег. Ань та̄н тамле хӯлтнэ ла̄тыӈ хассыт, ты ма̄ ул вос новаве, рущ ла̄тӈыл тох ла̄вуӈкв патаве – достопримечательное место. Э̄рыӈ, со̄ль, по̄х ма̄хум ты ма̄н новхатуӈкв ат патэ̄гыт. Хум мо̄т потыртам та̄рвитыӈ ва̄рмале тамле о̄лыс. Советский район нупыл ань Свердловский областиныл са̄в мир йиймыгтас. Ань тот лё̄ӈхыт пуссын ёмащакв ва̄рве̄сыт, са̄в йильпи лё̄ӈх пинвес. Та̄лэтувет тув та ювыт. Акв хо̄тал сыс со̄тыратем ма̄шина ма̄н округувн ёхты. Та е̄рт са̄в сыстам тӯр о̄лы, сыстам я̄квет овтэ̄гыт. Ты ма̄шинаӈ утыт матах хо̄талн ёхталэ̄гыт, са̄в хӯл пуве̄гыт, юв та тахе̄гыт. Ос тӯрыт, я̄т ляпат ма̄тэ щар витыг тотыяныл, таса̄вит порс тот та хультуптэ̄гыт. Такос та̄н ётаныл ма̄вит ӯргалан хо̄тпат потыртэ̄гыт, та̄нти юв миннэ̄ныл э̄лыпа̄лт ма̄ сыстамыг вос хультуптыяныл. Таит ла̄тыӈ щар ат хӯнтлэ̄гыт, ювле ла̄ве̄гыт – хо̄т таӈхе̄в, тот та яласэ̄в, ма̄нав тыг ат та̄ртнэ тамле са̄ккон а̄тим. Ты кулит яныг лю̄ль ва̄руӈкв ты патсыт. Юио̄выл та̄лыт та̄н акв ма̄т ат алыщлэ̄гыт. Та̄н пуссын яныг ё̄р ма̄шина о̄ньще̄гыт, хоталь таӈхе̄гыт, тув та та̄лматэ̄гыт. Ань та̄н Сургутский ос Нижневартовский район нупыл яласаӈкв патсыт. Матыр ты ва̄рмаль ёт ва̄руӈкв э̄ри, та̄наныл ёлпо̄илттаӈкв э̄ри. Нэ̄матыр рӯпата ат те ва̄раве, та̄н ты ма̄витув щар пулиг та па̄ӈктыяныл. НЯ̄врамыт ханищтаӈкв Э̄рЕ̄гыт Мо̄т хум наме Валерий Булатов о̄лыс, тав эколог хо̄тпа. Са̄в та̄л ты рӯпата ва̄ри. Ма̄витув ёмащакв вос ӯргалаве, тыи ма̄гыс сыме сака ща̄рги. Тав тох ла̄выс, округ мирколт йильпи кӯщаит рӯпитаӈкв патсыт, лю̄лькапай та̄ра та ва̄рсыт – ма̄вит ӯргалан департамент хотвуйвес, мо̄т са̄всыр ма̄т рӯпитан хо̄тпат ма̄витув ань та ӯргалыяныл. Округувт о̄лнэ ма̄хум аты ва̄ганыл, матыр лю̄ль ва̄рмаль те е̄мты, хоталь ла̄тыӈ те̄туӈкве. То̄ва ля̄ххал хаснэ нэ̄пакыт, рущ газетат, яныг кӯщаит урыл ма̄к э̄рнэ ла̄тыӈ аты хансэ̄гыт. Таит акваг ёмасыт, ёмащакв рӯпитэ̄гыт, мирув о̄с аквтуп ёмащакв о̄лы. Ты хум хо̄тпа ань та титыглахты, манрыг тох е̄мтыс, ма̄хманув та̄нти та̄рвитыӈ ва̄рмаляныл урыл потыртаӈкв пилэ̄гыт. Ос газетатт ты урыл щар нэ̄мхуньт ат хансыглаве. Школат ханищтахтын ня̄врамыт ань ма̄вит ӯргалаӈкв ат ха̄сэ̄гыт, торыӈ нэ̄матыр аты ва̄гыт. Ёмас о̄лнув, ань та̄н халанылт хотьютаныл во̄р ӯргалаӈкв вос ханищтахты, мо̄танэ я̄ӈкылмат вос ханищты, мо̄т ня̄врам ос я̄т урыл са̄в вос ва̄г. Ты рӯпата школат о̄вылтаӈкв э̄ри, ня̄врамыт халт «юный эколог», «юный лесничий», «юный географ» вос о̄лэ̄гыт. Ня̄врамыт ханищтан «География» нэ̄пакыт ань пуссын пе̄сыт, атхуйплов та̄лтем минам юипа̄лт та̄н хасве̄сыт. Йильпи нэ̄пакыт хансуӈкв э̄ре̄гыт. Ань о̄лупсавт акваг матыр йильпи ва̄рмаль та нэ̄глы. Во̄рт йильпи лӯптат хо̄нтавет, я̄нанувт хащта̄л хӯлыт пувавет. Округувт образование институт ты кос рӯпиты, тот ос тамле нэ̄пак хаснэ хо̄тпа а̄тим. ЛА̄хсыт, пилыт ос йӣвыт мА̄нти вос ӯнттЭ̄в Ты ёхталам кӯщаит халт сака пӯмщиг акв хум потыртас, тав башкир о̄йка. Наме Мидхат Равилович Хасанов. Башкирия ма̄т самын патыс ос яныгмас. Ханищтахтаме юипа̄лт ма̄н округувн рӯпитаӈкв ёхтыс, та па̄сыл тыт та о̄лы. Тав сака потрыӈ ос ощхулиӈ хум. Татем пӯмыщ та потыртас. Тав ань са̄всыр рӯпата ва̄ри, общественный организацият кӯщаиг о̄лы, хо̄нтлын ма̄н ялум ма̄хумн нё̄ты. Округув янытыл рӯпитан Общественный палата нампа колт о̄с рӯпиты. Олныл та̄н тот щар ат ойтавет. Ма̄витув ӯргалан ма̄гыс сыме о̄с сака щарги. О̄лнэ ӯсэ Радужный нам о̄ньщи. Ты ӯс сака яныг а̄ти. Ӯсанылт «Совет ветеранов» организация рӯпиты. Тув хансым ма̄хум Мидхат акваг атыглыянэ. Акваннё̄тхатым та̄н са̄всыр рӯпата ва̄ре̄гыт. О̄йка ты урыл тох потыртас: – Ма̄н ӯсув ляпат посал овты. Са̄в та̄л ӯсыӈ мир маныр порс о̄щсыт ос па̄ӈкыӈ вит пуссын тув та со̄сантасаныл. Сыстам посал па̄ӈкыӈ витво̄ӈхаг ва̄рсаныл. Ам пенсият о̄лнэ ма̄хманум атсанум, ла̄всанум – ты посал сыстамтаӈкв э̄ри. А̄нумн нё̄туӈкв пуссын ка̄сащасыт. Ёмащакв сыстамтаслӯв. Тувыл мо̄т номтыл ёхтуве̄сум – ма̄нь хӯлрищит тув та̄ртуӈкв э̄ри, тот вос яныгме̄гыт, ётыл ма̄хум няслуӈкв тув ялантаӈкв патэ̄гыт. Со̄ль, матах та̄л минас. Ань ӯщлахтын хо̄талыт порат мир тув та мины, хотьют хӯл пуви, хотьют нас ё̄мыгты. Та ляпат во̄р а̄тим о̄лыс, йӣвыт ат яныгмасыт. О̄ста ма̄хманум атсанум, ла̄виянум – э̄рыӈ йӣвыт тот ӯнттэ̄в. Ма̄нь ӯльпат тув тотсанӯв, та ӯнттысанӯв. Э̄лаль та о̄лэ̄в. Номсахтэ̄гум, во̄р о̄лы, тот ла̄хыс ос пил а̄тим. Ты тэ̄ла ёмащакв ханищтаслум, ла̄хсыт ос пилыт э̄рнэ щирыл те ӯнттуӈкв, яныгмаӈкв тах патэ̄гыт. Та ӯнттэ̄в, тувыл та̄ра ня̄врамыт ё̄ме̄гыт. Ляпан во̄всанӯв, титыглахтэ̄гум: «Маныр ма̄н ӯнттэ̄в, ва̄глына? » Та̄н та сунсэ̄гыт, ювле ла̄ве̄гыт: «А̄ти». Ла̄виянум: «Ма̄н ла̄хыс ӯнттэ̄в». «Ла̄хсыт аман ӯнттуӈкв ро̄ви? » – та пӯмщалахтэ̄гыт. «Хумус ат ро̄ви, э̄рнэ щирыл те ӯнттуӈкв, са̄в яныгми». Ань та̄ра та патыс, ханищтахтын ня̄врамыт аты ва̄ганыл, йӣвыт, ла̄хсыт ос пилыт хумус ӯнттуӈкв э̄ри. Та юипа̄лт образование комитет колт рӯпитан ма̄хумн свонитасум, ла̄всум, школа кӯщаит акван хунь атавет, а̄нум тув о̄с во̄велы̄н. Та во̄вве̄сум, ханищтахтын кол кӯщаит ма̄гыс нэ̄пакыт щё̄питасум. Ка̄сыӈ нэ̄пакт я̄нас потыр хансым о̄лыс: – во̄р хумус ӯргалаӈкв э̄ри; – ла̄хсыт хумус ма̄н ӯнттавет; – пилыт хумус янмалтаӈкв ро̄ви; – порс манах та̄л хотсаи. Ла̄всанум, ты нэ̄пакыт са̄выг вос ва̄равет, ос ка̄сыӈ ня̄врам тамле нэ̄пакыл вос миве. Ня̄врам юв ёхты, оматэ̄на̄тятэ̄н мыгтэ, тэ̄н вос ловиньтэ̄г. Э̄рыӈ, со̄ль, ӯст о̄лнэ ма̄хманув порс хо̄та̄ти па̄хвтуӈкв ат патэ̄гыт. То̄ва порат хӯл алыщлаӈкв минэ̄гум, ляпат хум хо̄тпат хохса хартым ӯнлантэ̄гыт, тувыл хартум хохсаныл я̄н та вущкасыяныл. Та̄нанылн ла̄ве̄гум, ань ты хартум хохсан хӯрум та̄л сыс хотсайнэ̄тэ мус я̄ витэ лю̄лиг ва̄руӈкв патытэ, хӯлыт тамле витыт яныгмаӈкв ат патэ̄гыт. Хумыт та хӯнтлэ̄гыт, э̄лаль воссыг тох ат ва̄ре̄гыт. Ла̄ве̄гыт, ты урыл та̄н о̄выл щёс потыртавет. Ань ты потыр о̄лме порат ты ёмас сымыӈ башкирхум ля̄ххал хаснэ ка̄сыӈ хо̄тпа тамле нэ̄пакыл мистэ. Тот хансым о̄лы, манах та̄л сыс порсанув хотсае̄гыт: – алюминий па̄нкат – 500 та̄л; – те̄р па̄нкат – 10 та̄л; – эльм хӯргыт – 100-200 та̄л; – кумыска – 1000 та̄л; – хартым хохса – 3 та̄л; – то̄втащлым рущ о̄ӈх – 30 та̄л; – ма̄нь ня̄врамыт кищум нэ̄пак ёлы сованыл – 300-500 та̄л; – а̄ны ловтнэ гупкат – 200 та̄л. Тамле ты пилыщма о̄лы. Ма̄нти ма̄витув тох лю̄лиг та ва̄рилӯв. Пе̄с порат ма̄нь па̄влыӈ ма̄т нас хотвущкасым порс нэ̄мхо̄т ат ка̄салэ̄гын, ма̄н я̄тил пе̄с ма̄хманув тув мус ма̄витув ӯргалым та о̄щсаныл.

1135 2016. 11. 10. Татьяна Бахтиярова

Хотьют рӯпитаӈкве э̄лаль пе̄рияве О̄йттур э̄тпост ам рӯтанум палт Свердловский область Ивдельский район Ушма па̄вылн, тувыл Ке̄расколыӈъя па̄вылн ялсум. Тот ам ма̄хум ёт потыртасум. А̄нумн хосат та̄гыл пӯмащ, хомус соссаӈ ма̄хмытын государствав нё̄ты, тувыл ӯргалыянэ тыт о̄лнэ, хоты арыгтас туп со̄тыркем э̄лмхо̄лас. Акв ва̄рмаль а̄нумн та̄кыщ пӯмащиг о̄лыс. Моще̄ртын ма̄ньщи кӯщаюв пе̄нтаве. Е. М. Алексеев ма̄н ма̄вт Ивдельский районт «По выживанию и социальноэкономическому развитию народа манси» обществат кӯщаиг о̄лы. Тав ос руководителиг «Фактория» национальный компаният, тувыл автономный некоммерческий организация родовая община коренного малочисленного народа манси «Нёмстур» кӯщаиг рӯпиты. Евгений Михайлович Ивдельский районт лӯсум ма̄ньщит представителиг о̄лы. Пуссын ва̄рмалит тыт о̄лнэ соссаӈ ма̄хумыт 2016 та̄л лӯпта э̄тпос мус тав састласанэ. Евгений Алексеев а̄гмыл е̄мтыс, пуӈква̄лм ке̄лупта̄рсанэ хотум е̄мтсыт, тав ань по̄льницат ле̄ккарытн пусумлаве, таима̄гыс ань пуссын ка̄сащан ма̄хум тав пе̄нтсылэ ма̄ньщи кӯщаиг таӈхе̄гыт патуӈкве. Щар о̄выл хо̄тпа Сергей Александрович Зайцев, тав са̄всыр компаният кӯщаиг о̄лы, аква Ивдель ӯст о̄лнэ ООО «Чистоп». О̄с мо̄т ма̄хум о̄лэ̄гыт, та̄н ос сака мат та̄кыщ ат ка̄саще̄гыт. Пуссын номсахтэ̄гыт: «Маныр ёмас ва̄ри лильпи кӯщай? Тувыл хомус ёмас кӯщай пе̄рияӈкв, тав вос ве̄рмыс Ивдельский соссаӈ ма̄хум о̄лнэ йисэ ёмасыг, кӯстырыг ва̄руӈкв». Ты ва̄рмаль та̄рвитаӈ, тыгыл э̄лаль ма̄ньщит о̄лупсаныл хумлег тах паты, нэ̄мхотьют ат ва̄г. Ты ма̄хум ва̄ганыл, государства па̄лыл ма̄ньщит сака ма̄т ат нё̄тавет. Ивдельский районт соссаӈ ма̄хум нё̄тнэ программа ёмщакв о̄с ат рӯпиты. Ма̄хум потыртэ̄гыт, хомус тэ̄лы та̄наныл та̄рвитаӈ о̄лыгла̄лы: лё̄ӈхыт лапво̄таставет, хотьют матыр ма̄сынарищ о̄ньщи, туп та̄нки хотмус ве̄рме̄гыт, Ивдельл-Ушман-Ке̄расколыӈъя па̄вылн лё̄ӈх ва̄рыглэ̄гыт. Тыгыл аквты ва̄рмаль ос ты но̄хква̄лтапаве. Ва̄ти хо̄тал э̄тпост каникулыт патэ̄гыт, ня̄врамыт ос та щарим Вижай па̄выл мос государства ма̄сынал тотавет, э̄лаль ос та̄нки ща̄няныла̄щанылн во̄тым лё̄х хосыт 60 ве̄рыста хотум та тотавет. Ня̄врамыт лильпи та̄л юн рӯтаныл, ма̄хманыл ёт ялпыӈ хо̄тал ва̄рыглаӈкв вос ве̄рмысыт. Ты ва̄рмаль урыл хунь ла̄ваве, номсахтуӈкве та о̄вылтахтэ̄гын, хотьют кущаиг пе̄рияӈкве? Хунь пе̄риян ва̄рмаль юипа̄лт ёмасыг паты? Ты хо̄тал мус иӈ та пе̄риян урыл потрамаве. Са̄в ма̄хум ла̄ве̄гыт, Е. М. Алексеев такви пусми, э̄лаль рӯпитаӈкве паты. Тав ос матыр а̄гме хӯрум э̄тпосыг е̄мтыс, рӯпитаӈкв иӈ ат ве̄рми. Пе̄риян ва̄рмаль улпыл тах хотум та мины.

1135 2016. 11. 10. Тамара МЕРОВА

Са̄в та̄л э̄лаль вос рӯпитэ̄гыт Рущ щирыл ла̄внэ прикладных исследований и разработок нампа А̄сугорский институт ты э̄тпос ва̄т нупыл нёлоловит хо̄талэ̄т рӯпитанэ̄тэ па̄сыл 25 та̄лэ то̄влы. О̄влэ̄т тав А̄сугорский нампа институтыг ла̄ввес, о̄выл кӯщаиг Е. А. Нёмысова тот о̄лыс. 2010 та̄лт кол ты йильпи наме̄тыл пинвес, кӯщаиг В. И. Сподина тув паттувес. Са̄всыр йильпи отделыт ва̄рве̄сыт, са̄выӈпа̄лэ ма̄ньлат хо̄тпат рӯпитаӈкве тот патсыт. Яныг хо̄тпатныл тот Евдокия Ивановна Ромбандеева рӯпиты, ма̄ньщи пе̄с, йис потрыт ос мо̄йтыт нэ̄пакн хансыянэ ос э̄лаль мирн вос ловиньтавет. Институтт ханты, ма̄ньщи ос ё̄рн ма̄хум ла̄тӈаныл, пе̄с йис о̄лупсаныл ос ань е̄мталан тэ̄ланыл ханищтавет. Тувыл тот рӯпитан хо̄тпат мо̄т мирыт о̄лупсаныл сунсым са̄всыр нэ̄пакыт хансэ̄гыт. То̄ват матыр пӯмыщ накыт я̄нас ханищтым, научный диссертация вуянтэ̄гыт ос учёный намыл мивет. Соссаӈ ма̄хум ла̄тӈаныл ханищтан ма̄гыс са̄всыр нэ̄пакыт щё̄питасыт. Са̄в та̄л рӯпитанэ̄ныл сыс та̄н пе̄с потрыт, мо̄йтыт, э̄ргыт ва̄нэ хо̄тпат ёт ва̄щиньтахтэ̄гыт ос та̄наныл хаснэ утытн хансыяныл. Яныгпа̄ла ма̄хманув та̄нки турсуил потыртам мо̄йтаныл акванатсаныл ос архивн хультуптасаныл. Я̄тил ла̄тыӈкев ань тох тот та хӯнтлылӯв. Тувыл ла̄тӈыт ханищтан коныпал та̄н мирн нё̄тнэ ос щёлыӈыг ман нусаг о̄лнэ са̄всыр тэ̄лат уральтыяныл. Ты социальноэкономический ва̄рмалит ёт А̄сугорский институтт С. Х. Хакназаров, О. Ю. Динисламова, Ю. В. Исламова ос Н. В. Ткачук рӯпитэ̄гыт. Та̄н Нижневартовск, Новосибирск, Тюмень ӯсытыт ос Россия янытыл о̄лнэ мо̄т социологхо̄тпат ёт ва̄йхатэ̄гыт ос акваннё̄тхатым рӯпатаныл э̄лаль тотыяныл. Конференцият акванатхатнэ̄ныл порат са̄в э̄лумхо̄ласныл ханищтам тэ̄лат оснпаттыяныл ос та̄нки ма̄хманыл ёт маныр е̄мтыс, хумус та̄н о̄лэ̄гыт, кӯщаитн хӯлтэ̄гыт. Тувыл кӯщаит тув а̄рталахтым мирн нё̄тнэ программат щё̄питаӈкве ве̄рме̄гыт. Ань та̄н рӯпатаныл о̄вылтыт ам ты колт рӯпитан ма̄ньлат нэ̄ Наталья Ткачук китыгласлум. Тав а̄нумн тох потыртас: – Ма̄н соссаӈ ма̄хманув о̄лнэ ва̄рмаляныл та̄рапаттын ма̄гыс округ янытыл акваг яласэ̄в. Ты рӯпатавт анкетанэ̄пак ос хаснэйив щар ма̄кыг э̄ри. Ма̄нь па̄влыӈ ма̄н туи порат ялантэ̄в, тэ̄лы сыс нэ̄пакн хансым утанув ёт рӯпитэ̄в. Ты э̄лыпа̄лт ман анкетат щё̄питэ̄в, кӯщаянув маныр ва̄рмалитыл пӯмщалахтэ̄гыт, хоты тэ̄лат ва̄ӈкве таӈхе̄гыт – таит китыглан ма̄гыс тув хансыянӯв. Тувыл хотты ӯсн ман па̄влын ёхтэ̄в, тот о̄лнэ̄в сыс ма̄хманувн мыганӯв, та̄н ла̄тыӈ ювле хансэ̄гыт. Та̄нки ма̄нанылт соссаӈ ма̄хманув хумус о̄лэ̄гыт, ма̄во̄й но̄хвинэ порат новавет манос а̄ти, кӯщаит таил пӯмщалахтэ̄гыт. Ма̄вит хумус ӯргалаве, са̄в ӯйхул о̄лы ман а̄ти. Тот хӯл алыщлан, во̄раян ос са̄лы ӯрнэ тэ̄лат ма̄н пуссын китыглыянӯв. Ща̄нь ла̄тыӈ ва̄нэ ос ханищтан тэ̄лат урыл я̄нас анкетанэ̄пак хансэ̄в. Ма̄ньлат а̄гитпыгыт ос ня̄врамаквет ща̄нь ла̄тыӈ ханищтаӈкве таӈхе̄гыт кос ос та̄н по̄ханылт ла̄тыӈ ва̄нэ хо̄тпа мощща. Ма̄н институтувт социология, экономика ос право ва̄рмалит ханищтан колнакув 2002 та̄лныл рӯпиты. Тув ханты о̄йка Терентий Герасимов Харамзин кӯщаиг паттыглавес, мо̄лал тав пенсиян минас. Тав социология наукат доктор учёный нам о̄ньщи. Аквъёт рӯпитам хо̄тпатын диссертацият щё̄питан порат тав пуӈктотнэ хумыг о̄лыс. 2002 та̄лт Саид Хамдамович Хакназаров геологоминеральный наукат кандидатыг е̄мтыс, ань тав ма̄н отделувт кӯщайлахты. Тамара Михайловна Алгадьева 2006 та̄лт социологический наукат кандидат нам вуянтас ос ётыл мо̄т рӯпата хо̄нтыс. Отделувт рӯпитан хо̄тпат са̄всыр научный потрыт хансэ̄гыт, нэ̄пакыт та̄ратэ̄гыт. Ты рӯпатав ва̄руӈкве ма̄навн мӯсты, соссаӈ ма̄хум о̄лупсаныл уральтыянӯв. То̄ванакт та̄н палтаныл яланта̄лэ̄в, та̄рвит ва̄рмаляныл оснпаттыянӯв, та юипа̄лт ма̄н сыманувт такем та̄рвитыӈ. Ос ма̄хманув та̄нки та̄ксар хо̄тпаг о̄лэ̄гыт, э̄лаль посыӈ номтыл о̄луӈкве воратэ̄гыт, ань тыг мус пе̄с йис наканув ат ёрувлыяныл. Ма̄н отделув ань аквъёт рӯпитан мо̄т ма̄хманув институтув намхо̄талэ кастыл янытлыянӯв. Та̄н пуста̄гыл вос о̄лэ̄гыт, нэ̄мат лю̄ль та̄н палтаныл ул вос е̄мталы ос рӯпатаныл номтыӈыг вос ва̄рияныл. Ма̄н ос, газетат рӯпитан хо̄тпат, та̄нанылн ос тамле ла̄тыӈ ла̄ве̄в – пус ка̄т, пус ла̄гыл, То̄румн, На̄й-О̄тыранылн вос ӯргалавет!

1135 2016. 11. 10. Тамара МЕРОВА

Пилыщмаӈ а̄гмкапаит по̄ханыл вос минэ̄гыт Туи во̄ртур э̄тпост ме̄н аквъёт рӯпитан нэ̄ме̄нтыл Лӯи Ня̄рихумит па̄вылт ӯсхулы хосыт ё̄мсуме̄н. Кон иӈ а̄лпыл, нэ̄мхотьют ля̄льт ат нэ̄глы, ос ме̄н ма̄хум пусмалтан кол, рущ щирыл ФАПыг ла̄внэ кол, кинсысламе̄н. Тувыл ӯсхулы наме ос кол номере щирыл таве та хо̄нтысламе̄н. Ты а̄ти сака яныг кол, тув щалтсуме̄н, сыстам, щар сома па̄вылт а̄гмыӈ хо̄тпа а̄тим. Тащирыл ке о̄лы, тыи манаре лю̄ль, ты сака ёмас ва̄рмаль. Ань мир пусмалтан тэ̄лат урыл ме̄н тот о̄лнэ кӯщай нэ̄ ёт потыртаӈкве патсуме̄н. Надежда Лиджиевна Сарайкова ме̄наме̄н ла̄выс: «Ма̄н ФАПув Кевавтнёл па̄выл (Перегрёбное) пӯльница нупыл ловиньтаве, тот са̄всыр а̄гм пусмалтан ле̄ккаранув рӯпитэ̄гыт. Тыт ма̄н ма̄хум нас уральта̄лым о̄ньщиянӯв. Та̄н а̄гмыӈыг е̄мтнэ̄ныл порат, тэ̄рпил хансыянӯв ос та̄н юн та̄нки пусмалтахтэ̄гыт. То̄ванакт укол ва̄руӈкве тыг щалтсэ̄гыт. Ма̄нки та̄н палтаныл юв о̄с яланта̄лэ̄в. Лӯи Ня̄рихумит па̄вылт 396 э̄лумхо̄лас о̄лы, тувыл Алы Ня̄рихумыт па̄вылт са̄т хо̄тпа ос Мулигортыт нила хо̄тпа. Та̄наныл уральтым ам фельдшер, ня̄врам суснэ ле̄ккарнэ̄, уколыт тӯщтын ле̄ккарнэ̄, ос ма̄шинал яласан хум тыт рӯпитэ̄в. Ос акв ле̄ккарнэ̄ школан ос садикын ялантан ня̄врамыт ёт я̄нас рӯпиты. Ты колнакт ам яныг хо̄тпат пусмалтыянум, мо̄т колнакн самын патум ня̄врамаквет тотыглавет. Тувыл кит колнакыгт ӯлщпуӈкыт пусмалтан утыт ос нэ̄т суснэ ут о̄ньще̄в. Тамле ле̄ккарыт то̄ванакт па̄влувн ке̄тыглавет ос ма̄хманув пусмалтахтуӈкве ёхталэ̄гыт. Ма̄н палтув та̄н давленияныл уральтаӈкве щалтсэ̄гыт. Ке̄лпанылт гемоглобин, са̄ккар, холестерин суснэ ма̄гыс ос э̄рнэ утыт о̄ньще̄в. Уколыл тыт тӯщтыянӯв, ЭКГ ва̄руӈкве во̄виньта̄лыянӯв. Туп мо̄т анализыт ос ке̄лп виӈкве ма̄н та̄наныл Кевавтнёл пӯльницан ке̄тыглыянӯв. То̄ват Ягрим пӯльницан минэ̄гыт. Та па̄вылн ань ма̄шинал яласан ёмас лё̄х ва̄рвес, ма̄н тув молях ёхтэ̄в. Ань сака а̄гмыӈ хо̄тпат о̄с тув тотыянӯв. Тот тахольт ма̄хманув ёмащакв сунсавет, ювле ат ке̄тавет. Ягрим па̄выл Ха̄льӯс районт о̄лы, ма̄н ос Октябрьский районын ловиньтаве̄в. Туи э̄тпосыт па̄влыт мус «Николай Пирогов» нампа на̄иӈхап ёхталы, тот са̄всыр ле̄ккарыт рӯпитэ̄гыт. Ма̄хманув тот матыр тэ̄рпил хасылтыяныл, уколыл тӯщтуӈкве ла̄вияныл. Ма̄н мирув ёт тох та рӯпитэ̄в. Школат ханищтахтын ос садикн ялантан ня̄врамыт грипп а̄гмыл ул вос е̄мтэ̄гыт, ма̄н прививкал ва̄риянӯв. Ты э̄лыпа̄лт ща̄ньа̄щанылн нэ̄пак ке̄тэ̄в, та̄н тот ка̄сащан ла̄тыӈ ман ат ка̄сащанэ̄ныл ма̄гыс вос хасхатэ̄гыт. А̄гияныл, пыганыл прививкал ва̄руӈкве тахольт ка̄саще̄гыт, школат о̄с ты урыл са̄в потыртаве. Па̄влувт ань самын патум ат ня̄врамакве о̄лэ̄гыт. Та̄н о̄влэ̄т ле̄ккар нэ̄н юн уральтавет, ос тувыл ка̄сыӈ э̄тпос уральтаӈкве манос ве̄скалаӈкве тыг тотыгпа̄лавет. Ма̄ньта̄гыл а̄тимыг е̄мтнэ накыт тыт о̄с о̄лыглэ̄гыт, мо̄лалнув хӯрум ня̄врам хотталь щалтсыт. Ты а̄ти а̄гманыл ма̄гыс тох е̄мталы. Яныг хо̄тпат клещевой энцефалит, туляремия а̄гмытыл прививкат ка̄сащим ва̄ре̄гыт. Тувыл Кевавтнёл па̄вылныл ле̄ккарыт ёхталанэ̄ныл порат, ма̄хманув пӯльницавн во̄виньталыянӯв. Ты тув такем та ре̄гыӈ о̄лыс, номсэ̄гум, матумпа̄ла хо̄тпат давленияныл ёлано̄х яласантаӈкве паты. Сар а̄ти, нэ̄мхотьют сака ат савалас». Тувыл хащта̄л о̄парищ намыл о̄лнэ нэ̄ Надежда Лиджиевна такви уре̄тыл потыртаӈкве во̄высламе̄н. Тав калмык нэ̄, такви о̄лнэ ма̄тэ̄т Тамара Хахлынова нампа Калмыцкий медицинский училище а̄стлас. 2002 та̄лт юртанэ̄н о̄выл щёс Ямал ма̄н рӯпитаӈкве во̄ввес, тав тот Аксарка па̄вылт фельдшерыг рӯпитас. Ос ма̄н округувт нила та̄л о̄лы. Ма̄хум пусмалтым тав ва̄т та̄л рӯпиты. Ань ё̄рн ма̄хум палт «сибирский язва» пилыщмаӈ а̄гм хо̄нтвес. Таи ма̄гыс о̄с сыме ща̄рги, ла̄выс, тамле а̄гмыт нэ̄мхо̄т ул вос е̄мталанувыт. Илттыг ёхтын а̄гм порат ле̄ккарыт нэ̄матыр ва̄руӈкве ат а̄лыме̄гыт, тувыл са̄выӈпа̄лэ ле̄ккарыт та̄нки о̄с а̄гмыл ха̄хтавет. Я̄тил ма̄хумаквет, на̄нки о̄с ӯргалахтым о̄лэ̄н.

1135 2016. 11. 10. Николай МЕРОВ

Пе̄с йис пормасыт акванатнэ колт рӯпитан хум Ха̄льӯст ма̄ньщит, хантыт ос саран ма̄хум о̄лупсаныл э̄лаль тотнэ ма̄гыс культура Центр кол щё̄питым о̄лы. Тот акв ма̄ньщи хум Андрей Албин рӯпиты. Туи порат ам тот о̄лмум сыс тав ётэ хо̄нтхатыгла̄лсум. Тав такви о̄лупсатэ ос рӯпататэ урыл мощ потыртас. На̄н ты урыл э̄лаль ловиньтэ̄н. Андрей Саранпа̄вылт самын патыс, тот яныгмас. Школа а̄стламе юипа̄лт Ханты-Мансийск ӯс Югорский университетыт э̄лаль ханищтахтас. Тувыл ювле Саранпа̄вылн минас. Тот мощ о̄лыс, ос рӯпата ат хо̄нтыс, таима̄гыс тав Ха̄льӯсн ва̄нтлыс. Тот тав нэ̄ тотыс. Э̄кватэ наме Наталья, такви аги о̄парищ наме Лельхова, Тэ̄к па̄вылныл о̄лнэ ханты а̄ги. Тэ̄н акв ня̄врам о̄ньще̄г. Э̄кватэ савалапыг яныгмаме ма̄гыс, ань ма̄ньлат нэ̄гхумыг Ха̄льӯст йильпи колыл майвесы̄г. Андрей Ха̄льӯст та̄ра пе̄с йис пормасыт атнэ колн рӯпитаӈкве патхатас. Ты коныпал тав фольклорный архив ма̄гыс пе̄с йис потрыт хансы. Ма̄нь па̄влытн ва̄тихал яланты. Яныгпа̄ла соссаӈ ма̄хмытныл мо̄йтыт ос амщит аты. Тувыл пе̄с йис пормасыт кинсым яласы. Рӯпитан коланылт ма̄хум са̄всыр ялпыӈ хо̄талыт ва̄рыглэ̄гыт, суссылтапыт щё̄пита̄лэ̄гыт. Ма̄щтыр хо̄тпат ю̄нсхатэ̄гыт, са̄сныл хусапыт ва̄ре̄гыт, сакныл хорамыт хартэ̄гыт, ква̄лгыл саге̄гыт ос мо̄т са̄всыр пормас ва̄ре̄гыт. Рӯпатанылт «Ма̄ мувем» нампа ёнгын кол о̄лы, э̄кват ма̄ньщи ос ханты э̄ргыт э̄рге̄гыт. Ӯсытн, па̄влытн мӯйлуӈкве акваг ялантэ̄гыт. Ты культура Центр кол 1991 та̄лт рӯпитаӈкве патыс. Ань тот ханты нэ̄ Раиса Петровна Загородняя кӯщаиг рӯпиты. Соссаӈ ма̄хум та колн ва̄тихал атхатыглэ̄гыт. Ялпыӈ хо̄талыт о̄лыгланэ̄ныл порат концерт ва̄рыглэ̄гыт. Атыӈ тэ̄нутыӈ пасан щё̄пита̄лэ̄гыт, пуссын аквъёт мӯйлэ̄гыт. 2012 та̄л па̄сныл ты культура колт рӯпитан хо̄тпат «Со̄рни сэ̄й» нампа ня̄врамыт ӯщлахтын ма̄н акваг нё̄тмил ва̄ре̄гыт. Тот ёхыл ва̄рнэ, хӯл со̄вныл са̄всыр пормасыт ю̄нтнэ ос хӯл яктын касылыт щё̄пита̄лэ̄гыт. Тот ма̄щтыр хо̄тпат урыл са̄в потрыт хансым о̄лэ̄гыт, та̄н пормасаныл тот ӯргалым о̄ньщавет. Я̄нас колнакытыт ханты, ма̄ньщи ос саран ма̄хум о̄лупса пормасаныл о̄лэ̄гыт. Мӯй хо̄тпат пӯмщалахтуӈкве акваг тув ёхталэ̄гыт. Ты ма̄хум рӯпитанэ̄ныл хосыт ань ӯст «Ӯринэ̄ква хо̄тал», «Тылащ поры», «Ӯй йӣкв», во̄раян хо̄тпат ос хӯл алыщлан ма̄хум ялпыӈ хо̄талыт акваг ва̄рыглаӈкве патве̄сыт. Ха̄льӯст о̄лнэ ма̄щтыр хо̄тпат са̄всыр семинарытн, фестивалитн ва̄тихал во̄виньта̄лавет. Ты кол мӯсхал щирыл э̄лаль рӯпитанэ̄тэ ма̄гыс округ культура департаментыт ос мощщаг хультум мирытн нё̄тмил ва̄рнэ отделт рӯпитан хо̄тпат та̄н сака нё̄тэ̄гыт. Ам культура Центр колт рӯпитан хо̄тпатн пуста̄гыл о̄лнэ ла̄тыӈ ке̄тэ̄гум. Андрей ще̄мьятэ̄н о̄с пуста̄гыл о̄лнэ ла̄тыӈ ла̄ве̄гум, То̄румн вос ӯргалавет.

1135 2016. 11. 10. Николай МЕРОВ

Нё̄р ма̄т о̄лнэ ма̄ньщи нэ̄ Тэ̄лытӯяг Свердловский область Ивдельский район Ке̄расколыӈъя па̄вылн ялмум порат ма̄ньщи нэ̄ Лиза Бахтиярова ёт хо̄нтхатыгласум. Тав ань мо̄т ма̄т о̄лы. Такви па̄влэ̄н мӯйлуӈкве ма̄нь а̄гитэ ёт ёхталас. Тав са̄в ня̄врам о̄ньщи. Яныг а̄гитэ Света, тувыл пыге Сергей, Татьяна Ханты-Мансийск ӯст рӯпиты, пыге Тима школат ханищтахты, ма̄нь а̄гитэ Настя тав ётэ юн о̄лы. Нэ̄ о̄лупсатэ урыл китыгласлум. На̄н тав потре э̄лаль ловиньтэлы̄н: – Ам самын патум ма̄кем – Ке̄расколыӈъя па̄выл, ма̄нь та̄гыл акваг тыт о̄лсум. Са̄р хумиме̄нтыл Ханты-Мансийский округ Советский район Тимкапа̄вылт о̄лсуме̄н. Тот ам та̄рвитыӈыг е̄мтсум. Тувыл мощ о̄лсуме̄н, о̄йкам а̄тимыг е̄мтыс. Ань Настя ма̄нь а̄гиме̄н ат та̄лэ то̄влыс. Мо̄тынтыг школан миннэ щирыл о̄лы. Ань ам мо̄т хум ва̄рсум. О̄йкам Пермский крайныл о̄лы. Нё̄рт ма̄вит ос во̄руй ӯргалым рӯпиты. Тав о̄с ма̄ньщи хум. Ме̄н «Бураныл» ва̄тихал Ке̄расколыӈъя̄н ёхталыме̄н. Сохтыл миннэ лё̄ӈхе онтырса̄ткем ве̄рыста. Ань па̄влувт ма̄нь ня̄врам а̄тим. Настя такке̄т ёнгасым ха̄йтыгты. Э̄типа̄лаг стихыт ханищтыме̄н, ловиньтан стиханме̄н пуссын ёмщакв ва̄ганэ. Таве̄н тыт о̄луӈкве сака мӯсты. Хунь школаныл ня̄врамыт ӯщлахтуӈкве ёхталэ̄гыт, па̄выл но̄ха̄лмияныл. Хо̄тал палыт кон яласэ̄гыт. Во̄р па̄влытныл пуссын аквъёт хӯрумхуйплов ня̄врам э̄лн ханищтахты. Та̄н Серов ӯст о̄лнэ школаинтернатыт китыт та̄л ханищтахтэ̄гыт. Ивдель ӯст о̄лум интернат лаппантвес. А̄гиянувпыганув та палыт ма̄н та тотыглавет. Ам Тима пыгум о̄с тот ты ханищтахты. Ты порат тав нилахуйплов та̄лэ то̄влыс. Пыгтем хо̄тыт классыт ханищтахты. Омам яныгпа̄лаг е̄мтыс, ань па̄выл колэ̄т такке̄т хультыс. Таима̄гыс пыгум тав палтэ о̄лы. Вит тоты, на̄йив аты, ане̄кватэ̄н нё̄ты. Тэ̄н аквъёт во̄раим ё̄мыгтэ̄г, нёхыс ке̄рнялит, со̄выр лэ̄сыт ӯнттэ̄г. Мо̄лты йильпи та̄л кастыл ме̄н палтме̄н Пермский крайн мӯйлуӈкве ёхталасы̄г. Тот нё̄р ма̄т ке̄рнялит ӯнтталасы̄г. Ӯщлахтын хо̄талыт о̄лнэтэ̄н сыс кит нёхыс пувсы̄г. Ма̄н ма̄вт акв нёхыс сов нила со̄тыра солко̄ви са̄вит тынэ о̄лы. Тима та соваге Ивдель ӯсн тотсаге. Тот тыналасаге ос са̄т со̄тыра солко̄ви сэ̄лыс. Та олнанэ̄тыл ще̄пт о̄щнэ телефон ёвтыс, сака ка̄ркам пыг. Ань во̄руй совыт нэ̄мхо̄т ат пирмайтавет. Алыщлан хо̄тпат та̄нки ё̄ранылт ёвтхатнэ э̄лумхо̄лас хо̄нтэ̄гыт. Ӯст о̄лнэ ма̄хум то̄ват та̄нки нёхыс сов во̄ве̄гыт. Тувыл тэ̄лы лё̄ӈх е̄мты, ӯсыӈ ма̄хум яласаӈкве та о̄вылтахтэ̄гыт. Та̄н ма̄н палтув э̄лыл ёхталэ̄гыт. Хотьют маныр во̄ви, таи таве̄н та тыналэ̄в. То̄ват ма̄шинал яласэ̄гыт, то̄ват ос та палыт ма̄ хӯнт хӯргыӈ та̄гыл ла̄глыл ё̄ме̄гыт. Э̄тимаӈкв паты, па̄вылт хӯлэ̄гыт ос э̄лаль нё̄рн та минэ̄гыт. Туристыт ань рущ щирыл ла̄внэ «Перевал Дятлова» нампа нё̄рн ялантэ̄гыт. Хоса порат тот са̄в хо̄тпа матыр щирыл порсысыт. Та ма̄ урыл са̄в потыр о̄лы. Ос маныр ма̄гыс ма̄хум а̄тимыг е̄мтсыт, ань тыг мус торыӈ нэ̄матыр ат ва̄ве. То̄ва хо̄тпат ос «Бураныл» Лэ̄пла, Тӯрват па̄выл мус во̄раим ялантэ̄гыт. Туи порат ос яныг колёсаӈ утыл (квадроциклыл) ёхталэ̄гыт. Ты кос лё̄ӈхыт лю̄лит, аман хумус ве̄рме̄гыт, тох та минэ̄гыт. Во̄р ма̄т о̄лнэ соссаӈ ма̄хманув пенсия олнаныл а̄ти сака янгыт. Та̄нки ё̄ранылт тох та о̄лэ̄гыт. Во̄руй совыт э̄л тыналэ̄гыт. Таквсы порат пил ва̄тэ̄гыт, ла̄хыс атэ̄гыт, па̄кв паттэ̄гыт, нё̄выль то̄слэ̄гыт. Нё̄рт о̄лнэ ма̄ньщиянув тыил ты о̄лэ̄гыт. Та̄нки тэ̄нут со̄паслэ̄гыт.

1135 2016. 11. 10. Тамара МЕРОВА

Рӯпата э̄руптан ка̄ркам ще̄мья Ма̄нь па̄влыӈ ма̄т ка̄сыӈ а̄лпыл хотты колныл хум щищкурек ро̄хнэ суй суйты, ос мис поснэ ве̄трат са̄ӈылтэ̄гыт. То̄нт номсэ̄гын, та колт рӯпата э̄руптан ка̄ркам колта̄гыл о̄лы. Та̄н ӯйхул о̄ньще̄гыт ос та̄наныл янмалтым са̄в рӯпата ва̄ре̄гыт. Октябрьский район Лӯи Ня̄рихумит па̄вылт тамле ще̄мья о̄лы. Ты Сергей Владимирович ос Любовь Александровна Кривых о̄щент щищкурекыт, мисыт, пӯрщит ро̄хсуяныл суйтэ̄гыт. Тэ̄н ётэ̄н ва̄йхатнэ̄в ма̄гыс аквъёт рӯпитан нэ̄ме̄нтыл тув щалтсасме̄н. Нэ̄гхумыг, со̄ль, таса̄вит са̄всыр ӯйхул о̄ньще̄г. Щищкурекыт ёт акв о̄щ кӣвырт сэ̄мылхарпа пӯрщит ха̄йтыгтасыт. Колыӈ кӯщаиг ла̄вег, ха̄рмис ос мисанэ̄н пум та̄им иӈ кон ё̄мыгтэ̄гыт. О̄йка ущнув пум са̄грын ма̄ныл юв ёхтыс, нэ̄тэ ос мисанэ посуӈкве ӯриянэ. Ты халт тэ̄н ме̄н ётуме̄н потыртаӈкве ка̄сащасы̄г. О̄влэ̄т нэ̄гхумыг тэ̄нки олнанэ̄нтыл щищкурекыт, мис ёвтыгласы̄г ос та̄нки колта̄гланыл ма̄гсыл янмалтасыт. Ань нила мис ос ма̄ньмисыт о̄ньще̄гыт. Тувыл пыганэ̄н ёт крестьянскофермерское хозяйство ва̄руӈкве номылматсыт. Та̄н э̄рнэ нэ̄пакыт акванатсаныл ос ты та̄л ре̄тыӈ ю̄свой э̄тпост «Кривых П. С» нампа КФХ ва̄рсыт. Хозяйстваныл Пётр пыге̄н нупыл хансыстэ̄н, мо̄т пыгаге̄н о̄с нё̄таве̄г. Ань та̄н са̄в пӯрыщ ёвтсыт, нё̄выль ма̄гыс янмалтыяныл. Сергей Владимирович потыртас: «Ты сэ̄мылхарпа пӯрщит мо̄т щирыл «вьетнамский порода» ла̄вавет. Ты пӯрщит туп нё̄вляныл ма̄гыс янмалтавет. Та̄н ма̄н пӯрщанув хольт са̄в во̄й ат о̄ньще̄гыт, э̄лумхо̄ласныл хультум са̄всыр тэ̄нут ат тэ̄гыт. Овас ос мисыт хольт пум тэ̄гыт. Туи сыс колув мувлахи яныгман са̄всыр пум пуссын юв то̄втащласаныл. Щищкурекыт ёт акв ляпат ха̄йтыгтэ̄гыт, та̄наныл ат новияныл. Тувыл сака ре̄гыӈ кол та̄нанылн о̄с ат э̄ри. Ты тэ̄лы 37 градус ащирмат та̄н поликарбонатыл пантым колт о̄лсыт. Та кӣвырт та̄н ёмас ве̄ритасыт, ма̄н я̄ӈкхарпа пӯрщанув хольт тыглетувле ат нуйгатахтыглэ̄гыт, нэ̄матыр ат сакватэ̄гыт. Грантолн ма̄н ат вуйласӯв, ты олныт ма̄гыс ня̄влалахтуӈкве ат таӈхе̄в. Нэ̄паканув атнэ̄в сыс ос тувыл Ханты-Мансийск ӯсн ялнэ ма̄гыс таса̄вит олн холтуӈкве ат хо̄йхаты. Ма̄нки олнанувтыл ма̄нь пӯрщит ёвтыгласӯв. Свердловский область Нижний Тагил ӯсн ёвтуӈкве ялсӯв. Комбикорм Приобье ӯсныл ма̄нки тотэ̄в, акв хӯрыг тынэ атса̄т солко̄ви. Акв хӯргыл туп акв хо̄талн то̄влавет. Ӯйхуланув прививкал о̄с ма̄нки ва̄риянӯв, тэ̄рпил ёвтыянӯв. Ты тув нё̄выль ма̄гыс налыман пӯрыщ алсӯв. Нё̄выль мо̄т ӯсн тыналыянӯв. Ты тув сака ат раквыс, ань пумканыт то̄самыт, пум са̄в тах ва̄ре̄в. Мо̄лты та̄л мо̄т ма̄ныл ёвтуӈкве ос тотуӈкве э̄рыс. Са̄ртын тыт ӯйхул янмалтан яныг перма о̄лыс. Ма̄хум тот рӯпитасыт, юн ос ӯйхуланыл ёт капыртасыт. Ань па̄влыӈ ма̄хманув сака са̄выӈыг е̄мтсыт, та̄нки ма̄гсыланыл рӯпитаӈкве о̄с ат таӈхе̄гыт. Сыресыр ищхӣпыӈ утыт квалтапаве̄сыт, тувле сунсым та ӯнлантэ̄гыт. Кол по̄хт о̄лнэ ма̄хманув ае̄гыт, ма̄н акв яныг колыл о̄лэ̄в. Кит щёс колув а̄латы на̄йн ё̄свес, ма̄н таима̄гыс колув сака ёмщакв ат щё̄питылӯв. Щаквит, нё̄выль, мӯӈи ма̄нки о̄ньще̄в, ла̄пкат туп солвал, са̄ккар, ща̄лыг во̄й ос колас ёвтэ̄в. Ос то̄ванакт хӯл алыщлаӈкве ялапа̄лэ̄в». Нэ̄гхумыг ань сас пенсият о̄лэ̄г. Сергей Владимирович 1990 та̄лт Саратовсканыл тыг совхозн рӯпитаӈкве ёхтыс. Любовь Александровна Ягрим па̄вылт самын патыс. Тэ̄н акванминаме̄нт о̄влэ̄т Приполярный па̄вылт о̄лсы̄г, тувыл ущ тыг ёхтысы̄г. Нэ̄ метеостанцият рӯпитас. Тэ̄н ат ня̄врам янмалтасы̄г. Акв а̄гитэ̄н мо̄т хо̄н ма̄т о̄лы, пыганэ̄н тыт о̄лэ̄гыт. Котиль пыге̄н ЮГУт ёмщакв ханищтахтас, ань ювле ёхтыс. Тувыл ме̄н юв мӯйлуӈкве во̄виньта̄лвесме̄н, пилыӈ ня̄нил ос щаквит тэ̄нутыл тыттувесме̄н. Миннэме̄н э̄лыпа̄лт та̄нки янмалтан огурцал, помидорыл ос пӯрщ во̄ил майвесме̄н. Тэ̄н тамле ёмас сымыӈ хо̄тпаг та.

1135 2016. 11. 10. Людмила Теткина

А̄гитпыгыт касуӈкве акванатхатыгласыт Сургутский район Солнечный па̄вылт ня̄врамыт ма̄гсыл касыл ва̄рыглавес, рущ ла̄тӈыл «северное многоборье» намаим о̄лыс. Ма̄нь таквс э̄тпос 24-28 хо̄талыт сыс та̄н ха̄йтыгтасыт, поргысыт, тыньщаӈ ре̄пыгтасыт, са̄грап па̄хвтысыт ос са̄лыӈ сун ӯлтта поргысыт. Ня̄врамыт та̄л сыс туи ос таквсы порат тох акванатыглавет. Ты касыл спорт щирыл рӯпитан департамент, «ЮграМегаСпорт» ос округувт северный многоборье щирыл рӯпитан федерация пуссын аквъёт щё̄питасыт. Ты федерацият Олег Андреевич Хатанев кӯщаиг о̄лы. Ма̄ньщи хум ты касыл щирыл 26 та̄л рӯпиты. Касыл о̄лме порат тав ла̄выс: «Ты та̄л округ янытыл 10 команда тыг ёхтыс. Акв командат 12-13 ня̄врам о̄лы. Хӯрум группа щирыл 12-13 та̄л, 14-15 та̄л ос 16-17 та̄лыт яныт ня̄врамыт та̄нки халанылт касэ̄гыт. Пуссын аквъёт тыг яныгса̄т арыгкем а̄гирищпыгрищ ёхтысыт. Ты та̄л китхуйплов район ос ӯс та̄нки спортсменаныл тыг ке̄тсаныл. Ань са̄лыӈ сун ӯлтта поргуӈкве, тыньщаӈ па̄хвтуӈкве ос мо̄т щирыл халанылт касуӈкве ма̄нь па̄влытт о̄лнэ ня̄врамыт ёмащакв ха̄сэ̄гыт. Сургут, Нижневартовск ос мо̄т яныг ӯсыт о̄лнэ а̄гитпыгыт соссаӈ ма̄хум хольт ат касэ̄гыт. Октябрьский ос Советский районыгт ня̄врамыт тамле секциян о̄с ат ялантэ̄гыт. Ань Сургутский, Нефтеюганский, Нижневартовский ос Ха̄льӯс районытт са̄лыӈ сун ӯлтта поргуӈкве, са̄грап па̄хвтуӈкве, тыньщаӈ ре̄пыгтаӈкве а̄гитпыгыт ханищтавет. Ты ма̄нувт соссаӈ ма̄хум са̄внув о̄лы, тыи ма̄гсыл ма̄ньщи, ханты ос ё̄рн ня̄врамыт та̄нки пе̄с йис ва̄рмаляныл нупыл сунсэ̄гыт ос тыщирыл касуӈкве ка̄саще̄гыт. Ань Сургутский районт Русскинские, Нижний Сортым, Солнечный па̄влытт ос Лянтор ӯст ня̄врамыт соссаӈ ма̄хум хольт касуӈкве о̄с ёмащакв ханищтавет. Тув акваг са̄в ня̄врам ёхталы. Ты э̄лыпа̄лт ка̄сыӈ районт ня̄врамыт халанылт кассыт ос тот но̄хпатум а̄гитпыгыт тыг ке̄тве̄сыт. Сургутский ос Нижневартовский районыгт тамле касыл щё̄пита̄лаве. Ха̄льӯс районт туп Саранпа̄вылт ня̄врамыт касэ̄гыт. Акв порат Ягрим па̄вылт тамле секция ва̄рыглавес, тувыл ня̄врамыт тув ат ялантасыт, лаппантвес. Тыи ма̄гсыл ка̄сыӈ та̄л туп Саранпа̄вылныл ня̄врамыт касылн тотыглавет. Ты э̄лыпа̄лт са̄в та̄л Белоярский районт о̄лнэ а̄гитпыгыт акваг о̄выл места висыт. Ань тай Сургутский ос Нефтеюганский районыгт ня̄врамыт ё̄рнувег е̄мтсыт. Ань щар ат ва̄глӯв, хоты районныл ёхтум ня̄врамыт о̄выл места выгыт. Тыщирыл касуӈкве ня̄врамытын сака пӯмащ, тыи ма̄гсыл тыг ёхтынэ̄ныл э̄лыпа̄лт та̄н пуссын мӯсхалыг щё̄питахтэ̄гыт». О̄выл хо̄тал ня̄врамыт акванатыглаве̄сыт ос касыл о̄вылтым порат янытлаве̄сыт. Олег Хатанев та̄нанылн са̄в ёмас сымыӈ ла̄тыӈ ла̄выс. Ма̄нь таквс э̄тпос 20 хо̄талэ̄т ма̄ньщи хум самын патум хо̄талэ о̄лыс, тав 50 та̄лэ то̄влыс, ты кастыл о̄с тот янытлавес. Ты юипа̄лт а̄гитпыгыт касуӈкве о̄вылтахтасыт. О̄влэ̄т та̄н акв ма̄ныл э̄лаль поргысыт. Э̄лнув порыгмам ня̄врам тав но̄х та паты. Китыт хо̄тал та̄н йӣво̄выл ка̄тыт пувим ха̄йтсыт. Ма̄нь ня̄врамыт акв ве̄рыста, яныгнув а̄гитпыгыт кит ве̄рыста ха̄йтсыт. Яныг пыгытын хӯрум ве̄рыста ха̄йтуӈкве э̄рыс. Ка̄тыт пувнэ ощща йӣво̄выл 130 сантиметра палытэ о̄лы, тыил хосанув виӈкве ат ро̄ви. Ка̄сыӈ ня̄врам такви йӣве тув ёттотыстэ. О̄влэ̄т а̄гит ха̄йтсыт. Ты ня̄врамыт халт Лена Тихонова касыс. Тав Ха̄льӯс район Саранпа̄вылныл ёхталас. Ма̄ньщи а̄ги кит та̄л Андрей Дорофеевич Филиппов палт са̄лыӈ сун ӯлтта поргуӈкве, са̄грап па̄хвтуӈкве ос мо̄т щирыл касуӈкве ханищтахтуӈкве яланты. Ты э̄лыпа̄лт тав мо̄т а̄гитпыгыт ёт касуӈкве Нижневартовск ӯсн ялыс. Та хо̄тал Лена молях ха̄йтуӈкве ат ве̄рмыс, лё̄ӈх лю̄ль о̄лыс. Мо̄тыт хо̄тал ня̄врамыт са̄грап па̄хвтысыт. А̄лпыл пыгрищит та̄нки халанылт кассыт, ос та̄н юипа̄ланылт а̄гит каснэ ма̄н во̄вве̄сыт. Олег Хатанев ла̄выс, а̄гит са̄т манос нёлолов та̄л тув касуӈкве во̄виньта̄лавет. А̄гит порге̄гыт, ха̄йтыгтэ̄гыт ос са̄лыӈ сун ӯлтта порге̄гыт. Ань китыт та̄л са̄грап нас па̄хвтэ̄гыт, тувыл зачётыл ты касылт ат хансавет. Мо̄тыт та̄л та̄н са̄грап па̄хвтым зачётыл хансуӈкве патавет ос та̄н халанылт но̄хпатум а̄гит тах пе̄риявет. Ка̄сыӈ ня̄врам тот каснэ ма̄гсыл о̄с такви са̄грапе выг. А̄гит хунь кассыт, тӯйис ос сака во̄тыс, тыи ма̄гсыл та̄н э̄лнув вущкасаӈкве сака ат ве̄рмысыт. Ха̄льӯс район Саранпа̄вылныл Татьяна Хозяинова ёхталас. А̄ги ла̄выс: «Ам са̄в та̄л Андрей Дорофеевич Филипповн ханищтавем. Тыг амки са̄грапум ёттотыслум. Тамле са̄грап 350 грамм та̄рвитэ о̄лы, тыгыл кӯпнитнув манос та̄рвитыӈнув ул вос о̄лы. Тыхо̄тал тӯйи ос во̄ты, тыи ма̄гсыл са̄грап па̄хвтуӈкве сака та̄рвитыӈ. Ам такос суссум, хотыл во̄т во̄ты, тувыл са̄грап такос э̄рнэ щирыл вущкаса̄лыслум, во̄тын мо̄т ма̄н нуяве. Турап хо̄тал, тыи ма̄гсыл мӯсхалыг па̄хвтуӈкве ат а̄ртмыс». Мо̄тыт хо̄тал пыгрищит тыньщаӈ ре̄пыгтасыт. Та̄н пуссын а̄лпыл акванатве̄сыт. Аквторыг 12-13 та̄л, 14-15 та̄л ос 16-17 та̄л яныт пыгыт кассыт. Ка̄сыӈ пыг такви тыньщаӈе ёттотыглас. Тыньщаӈ са̄лы совныл 30 метра палытыг сагаве. Максим Бырка Солнечный па̄вылт ня̄врамыт касуӈкве ханищтыянэ. Ма̄нь ня̄враманэ ёт тув о̄с ёхталас. Тав ла̄выс, та̄н па̄вланылт соссаӈ ма̄хум хольт касуӈкве яныгса̄т арыгкем ня̄врам ёхталы. То̄ват ань ущты ханищтахтуӈкве о̄вылтахтасыт. Ос ня̄враманэ тав нас пӯмащ ма̄гсыл ты касылн тотыгласанэ. Пыгрищит суссыт, хумус мо̄т яныг ня̄врамыт касэ̄гыт, та̄н нупыланыл сунсым э̄лаль ханищтахтуӈкве тах ка̄саще̄гыт. Пыгыт халт щар ма̄ниг Атэй Лялькин о̄лыс. Ханты пыгрищ Нижневартовский район Варъёган па̄вылныл тув ёхталас. Тав нилыт классыт ханищтахты. Тыньщаӈ па̄хвтуӈкве, са̄лыӈ сун ӯлтта поргуӈкве сака ха̄сы. Тав хӯрум та̄л Александр Юрьевич Фальченко тренер палт яланты. Александр Юрьевич ла̄выс, пыгрищ са̄лыӈ сун ӯлтта сака ёмащакве порги, тыи ма̄гсыл яныгнув ня̄врамыт ёт касуӈкве вуйвес. Атэй рӯтанэ пуссын во̄рт са̄лы ӯрим о̄лэ̄гыт. Тав ща̄нягеа̄щаге ань Варъёган па̄вылн о̄луӈкве ва̄нтласы̄г. Та̄н са̄лыяныл рӯтанылн о̄ньщавет. Пыгрищ ӯщлахтын порат во̄рн рӯтанэ па̄лт яланты. Атэй ла̄выс, ань тав са̄лыӈ сун ӯлтта 210 щёс порыгмаӈкве ве̄рми. Нилыт хо̄тал ня̄врамыт са̄лыӈ сун ӯлтта поргысыт. Аквта хо̄тал та̄н халанылт но̄хпатум команда пе̄риявес. Ты касылт команда мощщанув очки ке выг, тав но̄х та паты. Командат халт Ха̄льӯс район Саранпа̄вылныл ёхталам ня̄врамыт но̄хпатсыт. Нижневартовский район китыт местал майвес. Хӯрмит места Нефтеюганский район вис. Солнечный па̄вылт но̄хпатум ня̄врамыт Ямал ма̄н Новый Уренгой ӯсн э̄лаль касуӈкве минэ̄гыт. Та ӯст Россия янытыл ёхтын спортсменыт яныг таквс э̄тпос 20-26 хо̄талытт касуӈкве патэ̄гыт.

1135 2016. 11. 10. Светлана РОМБАНДЕЕВА

Наука янытлан хо̄тал о̄лыс Ювле хультум э̄тпос 21 хо̄талэ̄т Ханты-Мансийск ӯст Югорский государственный университетт наука Всероссийский фестиваль о̄лыс. Нёлоловхуйплов колнакытт наука щирыл ва̄рнэ рӯпата суссылтавес. Тув ӯст о̄лнэ ка̄сыӈ хо̄тпа щалтсуӈкве ве̄рмыс. Та̄н ма̄гсыланыл са̄всыр потрыт ос ёнгилыт щё̄пита̄лве̄сыт, наука тэ̄ла торыг ква̄лтапаптан са̄всыр йильпи матарыт суссылтаве̄сыт. Ты ва̄рмаль палт пуӈктотнэ нэ̄ Наталья Бровина ла̄выс, тамле хо̄тал университетт ань хӯрмит та̄л ты ва̄рыглыяныл. Тув атхатыглам ма̄хумн та̄н наука урыл потыртэ̄гыт, сыресыр мастерклассыт ва̄рыглэ̄гыт. Школат ханищтахтан ня̄врамыт тамле тэ̄ла сака э̄руптэ̄гыт, матыр пӯмыщ потыр хӯнтамлаӈкве ман хащта̄л тэ̄ла ка̄салаӈкве та̄нанылн сака пӯмыщ. Студентытын ёнгалтаве̄сыт, са̄всыр викторинатыл ос выставкатыл щё̄пита̄лве̄сыт. Класс са̄вит ня̄врамыт акв колнакыл нэ̄глэ̄гыт, мо̄т колнакын минэ̄гыт. ЮГУ янытыл хо̄тал палыт акв юипа̄лт та ва̄нтала̄лсыт, матыр пӯмщаласыт, ханищтасыт. Ам то̄ва ня̄врамыт ёт «День из жизни обских угров» щирыл намая̄лым колнакн щалтсасум. Тот кит ханты а̄гииг Виктория Костылева ос Алиса Макарова ня̄врамыт нупыл соссаӈ мир о̄лупса ос культура о̄вылтыт потыртасы̄г. Тувыл та̄наныл сакныл сыресыр хорамыт ва̄руӈкве ханищтасанэ̄н. Ня̄врамытын сака пӯмыщ о̄лыс, маттем та ма̄щтырласыт. Виктория Белоярский ӯст самын патыс, тот яныгмас. Ма̄ньта̄гыл Ванзеват па̄вылн ялантас. ЮГУт ханищтахтас, ань э̄лаль тот рӯпиты, творческий лабораторият пуӈктотнэ нэ̄г о̄лы. Виктория ла̄выс: «Тыт ма̄н ка̄тыл са̄всыр пормасыт ва̄ре̄в, щаквще̄в – тучаӈыт ю̄нтэ̄в, сакныл олнкасыт ос ю̄нтуп тӯщтын ма̄нь пӯтскат саге̄в, ос мо̄т са̄в пормасыт ма̄щтырлэ̄в. Ма̄н «Югра хосыет» («Созвездие Югры») нампа э̄ргын, йӣквнэ ансамбль о̄ньще̄в. Мо̄лты та̄л тыт «Живущие по солнцу» нампа фестиваль о̄лыс, ма̄н та порат о̄выл места висӯв. Та юипа̄лт ма̄н Санкт-Петербург ӯсн финноугорский фестивальн во̄выглавесӯв, ос тув ялсӯв, э̄ргысӯв, йиквсӯв». Китыт а̄ги Алиса Ха̄льӯс район Тэ̄к па̄вылт самын патыс. Тав о̄с ЮГУ а̄стлас, ань тэ̄н Викториял аквъёт рӯпитэ̄г. Югорский государственный университетт тамле пӯмыщ хо̄талыт та о̄лыгланэ̄ныл.

1135 2016. 11. 10. Галина КОНДИНА

Ма̄хманув мӯйлысыт «То̄рум Маа» музей рӯпитанэ̄тэ па̄сыл ты таквс ва̄т нупыл онтолов та̄лыг е̄мтыс. Намхо̄таланыл мӯйлуӈкве тув ӯс мир во̄виньта̄лвес. Ма̄н соссаӈ ма̄хманув сценат йӣквсыт ос э̄ргысыт. «Лылыӈ союм» колн ханищтахтуӈкве ялантан ня̄врамыт тув о̄с ёхталасыт. Та̄наныл ма̄ньщи йӣквыт йӣквуӈке, са̄ӈквылтапыл са̄ӈквылтаӈкве ос э̄ргуӈкве Владимир Меров ханищтыянэ. О̄влэ̄т та̄н Юван Шесталов хансум стихе э̄ргыг э̄ргысаныл, ты мус ма̄нь пыгрищиг Руслан Вьюткин ос Руслан Аширбакиев ка̄тыт ня̄л пувим хум йӣкв йӣквсы̄г, Владимир Савельевич койп ра̄тыс. Хащта̄л рущ ма̄хум татем та суссыт. Тох ты Ханты-Мансийск ӯст ня̄врамыт та̄нти мираныл культура э̄лаль тотыяныл, ма̄хум э̄лыпа̄лт йӣквуӈкве манос э̄ргуӈкве ат э̄ссамтэ̄гыт.

1135 2016. 11. 10. Николай МЕРОВ

Ня̄врамыт ӯщлахтын ма̄ урыл потыртасыт Ха̄льӯс ляпат «Со̄рни сэ̄й» нампа ӯщлахтын ма̄ о̄лы. Тот са̄т та̄лныл ос нёлоловхуйплов та̄л яныт ня̄врамыт ӯщлахтуӈкве акванатыглавет. Ты туи о̄с са̄в ня̄врам тув ёхталас. Та̄н ма̄гсыланыл тот са̄в пӯмащ ёнгилыт щё̄пита̄лве̄сыт. Ань ты пора ня̄врамыт хумус тот ӯщлахтасыт, на̄н та̄н потраныл э̄лаль ловиньтэ̄н: – Ам намум Кристина Воронцова, ты ӯщлахтын ма̄н о̄выл щёс ёхталасум. А̄нумн тыт сака мӯстыс. Тэ̄нут ва̄рнэ хо̄тпат ма̄н ма̄гсылув татем атыӈ тэ̄нут па̄йтыгласыт. Ӯщлахтын ма̄ кӯщаюв ос воспитателянув пуссын сымыӈ хо̄тпат. Ам та̄наныл пуссын э̄руптыянум. Тыт ам са̄в юрт хо̄нтсум. Мо̄тыт та̄л ос яныг ща̄гтыл тыг ёхтэ̄гум тах. Тамле ёмас ва̄рмаль щё̄питан ма̄гыс ам кӯщаин яныг пӯмащипа ла̄тыӈ ла̄ве̄гум. Ты ӯщлахтын ма̄ са̄в та̄л вос рӯпиты. – Ам намум Валентин Матей, Ха̄льӯст самын патсум, тот о̄лэ̄гум. Ань китхуйплов та̄лум то̄влыс. Ӯст нилыт та̄л ка̄миньт па̄ссал масхатым щахныл касэ̄гум. Ань ты пора китыт щёс тыг ёхтысум. Лов хо̄тал сыс тыт са̄в юрт хо̄нтсум, пуссын э̄руптыянум. Ты ӯщлахтын ма̄ лап ул вос пантвес, мо̄тынтыг ос тыг ёхтуӈкве номсэ̄гум. – Паща о̄лэ̄н! Ам намум Юлия Воложанина, ты та̄л са̄тхуйплов та̄лум то̄влыс. Ты ӯщлахтын ма̄н нилыт щёс ёхтысум. А̄нумн тыт сака мӯсты. Лагерьт лылые̄п сыстам, ляпат я̄ овты, во̄рт йӣвыт яныгме̄гыт. Тыт ам ма̄вит урыл са̄в ва̄ӈкве патсум. Тыт о̄лнэм сыс ма̄вит ӯргалан хо̄тпаг ханищтахтуӈкве номтум патыс. Ам соссаӈ мир о̄лупса тыт ханищтасум. Ма̄н ма̄гсылув са̄всыр пӯмащ ёнгилыт щё̄пита̄лве̄сыт. Ам тыг юио̄выл щёс ӯщлахтасум. Ты нё̄тнэ ма̄ сымумн сака хо̄яс, таве акваг э̄руптаӈкве патылум. Кӯщаин, воспитателитн ос ам ётум ӯщлахтам ня̄врамытн щуньпаща ла̄тыӈ ке̄тэ̄гум. Пуста̄гыл о̄лэ̄н! – Ам намум Игорь Зубарев, «Со̄рни сэ̄йн» китынтыг ёхтысум. Тыт са̄в а̄гитпыгыт ёт юрщхатасум. Ма̄н тыт ёмщакв ӯщлахтэ̄в, ёнге̄в, ма̄щтырлэ̄в, ма̄ньщи ла̄тыӈ ханищтэ̄в ос мо̄т са̄всыр пӯмащ ва̄рмаль ва̄ре̄в. Мо̄тынтыг о̄с тыг ёхтуӈкве номсэ̄гум. Ва̄нэ хо̄тпатын паща ла̄тыӈ ла̄ве̄гум. Пус ка̄т, пус ла̄гыл э̄лаль о̄лэ̄н. – Ам намум Лиза Загороднюк. Ты туи хӯрумхуйпловит та̄лум то̄влыс, ам Ха̄льӯс школат са̄тыт классыт ханищтахтэ̄гум. Ты ӯщлахтын ма̄н китыт щёс ёхтысум. Амки ща̄нягума̄щагум щирыл рущиг о̄лэ̄гум, ос тыт ӯщлахтамум сыс ма̄ньщи ла̄тӈыл мощ потыртаӈкве патсум. Ань то̄ва ла̄тӈанум ёмщакв тэ̄лэ̄гыт. Воспитателит пуссын ёмас хо̄тпат, ам та̄наныл сака э̄руптыянум. Мо̄тынтыг ӯщлахтын ва̄рмаль о̄с щё̄питаве ке, та̄ра тыг во̄вхатэ̄гум тах. – Ам намум Маша Молданова, ам хӯрумхуйплов та̄лум то̄влыс. Ты ӯщлахтын ма̄н о̄выл щёс ёхтысум. Та̄ра са̄в юрт хо̄нтсум. Ань кӯщай нэ̄ ла̄выс, э̄рыӈ мо̄тыт та̄л «Со̄рни сэ̄й» рӯпитаӈкве ат паты. Тав лап ул вос пантвес, ма̄н ты ма̄ сака э̄руптылӯв. Мо̄тыт та̄л туи порат о̄с ялуӈкве таӈхе̄гум. – Ам Максим Киржаев, ты та̄л хӯрумхуйплов та̄лум то̄влыс. Тыг китынтыг ёхтысум. Ты та̄лыг сыс ам са̄в тэ̄лан ханищтаве̄сум. Хаснэйӣвыл са̄всыр хурит по̄слысӯв. Мо̄йтыт хосыт пӯмащ, ощхулиӈ тӯлыглапыт ва̄рыгласӯв. Са̄сныл са̄всыр хусапыт ю̄нтсӯв ос мо̄т са̄всыр пормасыт ма̄щтырласӯв. Воспитатель хо̄тпат ма̄н ма̄гсылув пӯмащ ёнгыт щё̄пита̄лэ̄гыт. Тот рӯпитан хо̄тпат пуссын э̄руптыянум. Та̄н ка̄сыӈ хо̄тал ма̄нав матыр ва̄руӈкве ханищтасаныл. – Ам Настя Кустышева, китхуйплов та̄лум. «Со̄рни сэ̄йт» атыт та̄л ӯщлахтэ̄гум. Ты ма̄ а̄нумн сака мӯсты. Во̄рт о̄луӈкве сака ёмас. Ты нё̄тнэ ма̄вит урыл номтум та̄л палыт о̄лы. Сымум акваг тув во̄вхаты. Тыт са̄в юрт хо̄нтсум. А̄гитпыгыт пуссын ва̄ганум. Ань ма̄нки халувт ще̄пт о̄щнэ телефон хосыт ва̄тихал потыртэ̄в. Мо̄тыт та̄л о̄с тах ёхтэ̄гум. – Ам Юлия Матей, а̄нумн нилахуйплов та̄л. Ты та̄л онтоловит классын ханищтахтуӈкве минасум. Ме̄н а̄пщиме̄нтыл китынтыг тыт ӯщлахтыме̄н. Са̄в юрт тыт хо̄нтсуме̄н. Ам таӈхе̄гум, «Со̄рни сэ̄й» э̄лаль вос рӯпитас. Ма̄н ты ӯщлахтын ма̄ сака э̄руптаӈкве патыслӯв. Пӯмащ о̄лум накыт акваг номылматыгла̄лыянум. Сым кӣврум татем ёмасыг е̄мты. Ам номсэ̄гум, мо̄тыт та̄л пуссын юртанум о̄с ка̄салыянум тах. – Ам Вероника Броваренко, китхуйплов та̄лум, «Со̄рни сэ̄й» э̄руптылум. Мо̄тынтыг о̄с тув ялуӈкве таӈхе̄гум». – Ам Ксюша Курганова, китхуйплов та̄лум, китыт тув тыт ӯщлахтасум. Тыг ёхталан а̄гитпыгыт ёт ёмщакв юрщхатасум, пуссын э̄руптыянум. Лагерь лап ул вос пантвес. О̄с тув ялуӈкве номсэ̄гум». – Ам Дима Тихонов, нилахуйплов та̄лум, хӯрмит та̄л тыт ӯщлахтэ̄гум. Юртанумн пуссын паща ла̄тыӈ ке̄тэ̄гум. Пуста̄гыл о̄лэ̄н, ёмщакв ханищтахтэ̄н! Ты ӯщлахтын ма̄т ка̄сыӈ ня̄врам акв урыл во̄выс, «Со̄рни сэ̄й» лап ул вос пантвес. Та̄нанылн тот ӯщлахтуӈкве сака мӯсты. Тамле ты ёмас ма̄кве ӯс ляпат о̄лы. Тот са̄в ня̄врам ӯщлахтуӈкве ка̄сащи. Ань кӯщай нэ̄ Ольга Константиновна Филиппова «Со̄рни сэ̄йт» рӯпитан ма̄гыс мо̄т кӯщай кинсы. Мо̄тыт туи мус хотты ма̄ньлат, ка̄ркам хо̄тпа хо̄нтхаты ке, ты ма̄ э̄лаль рӯпитаӈкве паты. Ня̄врамыт потраныл Николай МЕРОВ нэ̄пакн хассанэ.

1136 2016. 11. 24. Галина КОНДИНА

Мо̄тыт та̄лын олныт ловиньтаве̄сыт Округ депутатанув хӯрмит ос нилыт сапра̄нин акванатхатыгламаныл порат э̄рнэ, яныг ва̄рмаль пирмайтасыт, рущ щирыл тав ла̄ваве – «бюджет». Мирн пе̄риим хо̄тпанув ты э̄лыпа̄лт олн ловиньтан комитетыл акванатхатыгласыт, олныт хоталь та̄стуӈкве, хоса потыртасыт. Са̄выӈпа̄лэ олныт ма̄хум пусмалтан, ня̄врамыт ханищтан, о̄лнэ колыт, ханищтахтын колыт, пӯльницат ӯнттын ма̄гсыл та̄стуве̄сыт. Олныт мО̄тыт тА̄лытын ловиньтавЕ̄сыт: Мо̄тыт 2017 та̄лн олныт хансым порат ма̄во̄й тынэ акв баррель ма̄гсыл 40 доллар са̄витыг ловиньтасаныл, ты акв доллар ма̄н олнанувтыл 67, 5 солко̄ви са̄вит тынэ о̄лы. Округ бюджет хунь хансаве, акваг ма̄во̄й тынэ̄н сунсым олныт ловиньтавет. Тох та̄н номсэ̄гыт, 2017 та̄лт бюджетув 178, 1 млрд. солко̄ви тах паты. Ты та̄лныл 5, 9 процентын мощщанувег е̄мты. Ос 2017 та̄лт 195, 5 млрд. солко̄ви холтуӈкве номсэ̄гыт. Холтнэ олныт ты та̄лныл 9 процентын мощщаг хасве̄сыт. 17, 5 млрд. солко̄ви тах ат то̄вылхаты, тав рущ ла̄тӈыл ла̄ваве – «дефицит», ты 10 процент са̄вит бюджет олн. 2018 та̄лт 8, 6 млрд. солко̄ви тах ат то̄вылхаты, ты 4, 9 процент са̄вит, 2019 та̄лт 6, 2 млрд. солко̄ви тах ат то̄вылхаты, ты 3, 5 процент са̄вит. Савалап нЯ̄врамыт мА̄гсыл: Югра ма̄вт прокурорыг рӯпитан хум Евгений Ботвинкин тамле ва̄рмаль урыл потыртас, тав савалапыг хультум ня̄врамыт ма̄гыс хансым са̄ккон уральтастэ ос тамле ла̄тӈыт хотвиӈкве ла̄выс. Савалап ня̄врам та̄нти палтаныл винэ хо̄тпат олн ма̄гсыл хунь са̄всыр нэ̄пакыт атэ̄гыт, тот ань прописка манос временный регистрация суссылтаӈкве ат э̄ри. Ос ты коныпал ня̄врам винэ ща̄нита̄щит ИНН ос СНИЛС нэ̄пакыг ат те тотыглэ̄гыт, та̄н о̄с ат во̄вавет. Опека ос попечительстват рӯпитан хо̄тпат та̄нти ты нэ̄пакыт мо̄т ма̄ныл выганыл. Тох ня̄врам янмалтан ща̄нита̄щит мощщанув са̄всыр нэ̄пак атуӈкве ла̄вавет. Депутатыт ты ла̄тӈыт ёт пуссын ка̄сащасыт, ла̄ве̄гыт, матъёмас прокуратурат рӯпитан кӯщаит ня̄врамыт янмалтан тэ̄ла акваг уральтым о̄ньщияныл. ТА̄нти мА̄нылт олнэ соссаӈ мА̄хум нА̄лок тах ат ойтЭ̄гыт: Ма̄нь па̄вланылт манос та̄нти нупыланыл хансум ма̄нылт о̄лнэ ханты ос ма̄ньщи ма̄хманув снегоходаныл, мотораныл ос ма̄шинаныл ма̄гыс на̄лок ойтуӈкве ат патэ̄гыт. Тамле са̄ккон ань депутатанув пирмайтасыт. Хотьют хӯл алыщлым, во̄раим, са̄лы ӯрим о̄лы, та̄н яласан утаныл ма̄гсыл на̄локолн тах ат пуваве. Соссаӈ хо̄тпа 50-60 лув ё̄р о̄щнэ снегоход манос мотосани те о̄ньщи, ос ха̄пыл яласан моторе 30-50 лув ё̄р са̄вит, то̄нт таве̄н ты утанэ ма̄гыс на̄локолн ойтуӈкве ат э̄ри. СА̄ккон торыӈ щирыл ат рӯпиты: Яныг сапра̄ни ва̄рыглан э̄лыпа̄лт соссаӈ ма̄хум Ассамблеят рӯпитан депутатыт Еремей Айпин, Александр Филипенко, Руслан Проводников ос миркол кӯщаит акванатхатыгласыт. Та̄н ханты ос ма̄ньщи ма̄хманув нё̄тнэ ва̄рмалит урыл потыртасыт. «О факториях» нампа са̄ккон ма̄н округувт мӯсхал щирыл ат рӯпиты. Ты са̄ккон хосыт общинат манос мо̄т предприятият э̄лы па̄влытын тэ̄нут, пенщин ос соляра тотуӈкве ве̄рме̄гыт, ты пе̄нтсыл хӯл, нё̄выль, пил пирмайтэ̄гыт. Ос ма̄н ма̄вт матрыг ты са̄ккон ат рӯпиты, Ямал ма̄т тай ма̄хум рӯпитэ̄гыт, э̄лын о̄лнэ ще̄мьят тох ты нё̄тавет. Та̄нанылн матыр ма̄гсыл э̄л яныг ӯсн ялуӈкве ат эри. Хумус та̄н тот рӯпитэ̄гыт, ма̄н кӯщаянувн тув ялуӈкве э̄ри ос та̄нанылныл ханищтахтуӈкве. Ассамблея рӯпитан депутатанув, ла̄всыт, са̄ккон пирмайтым о̄лы, ос миркол кӯщаит торыӈ щирыл рӯпитаӈкве ат ве̄рме̄гыт. Соссаӈ ма̄хманувн хумус нё̄туӈкве, э̄лаль номсахтуӈкве э̄ри. Кол ёвтнэ мА̄гсыл мансА̄вит олн тА̄ставе: Татьяна Урсу, олн ловиньтан департаментыт кӯщай ва̄ӈын хо̄тпаг рӯпитан нэ̄, ла̄выс: «Социальноэкономическое развитие коренных малочисленных народов народов Севера» нампа программан 2017 та̄лт 94 млн. солко̄ви хультуптаве. Мо̄тыт тит та̄лыгн 89 млн. солко̄ви ка̄сыӈ та̄лн. Соссаӈ ще̄мьятын колыт ёвтнэ манос ӯнттын ма̄гсыл хансым субсидиял 2017 та̄лн 70 млн. солко̄ви тах та̄ставе, 2018 та̄лн – 66 млн. солко̄ви ос 2019 та̄лн о̄с 66 млн. солко̄ви хультуптаве. Ты коныпал о̄с са̄внув олн хотыл те хо̄нтэ̄в, кол ёвтнэ субсидиян олн о̄с нё̄тэ̄в. На̄н ул номилы̄н, 2015 та̄лт 570 млн. солко̄ви тыи ма̄гсыл холтсӯв, ос ты та̄л 270 млн. холтуӈкве номсэ̄в. Соссаӈ ма̄хум ма̄н акваг нё̄тыянӯв».

1136 2016. 11. 24. Тамара МЕРОВА

Рӯпата олнанув хумус ойтавет Округ кӯщай нэ̄ Наталья Комарова са̄прани ва̄рыглас. Тав Сургут ӯсныл ищхӣпыӈ ут хосыт мирколт акванатхатам кӯщаит са̄всыр тэ̄ланыл о̄вылтыт китыглас. О̄влэ̄т кӯщай нэ̄ «Сотрудничество» нампа программа хӯрум та̄л сыс ва̄рнэ рӯпататэ уральтастэ. Ма̄хум ёмас ос щёлыӈыг о̄лнэ̄ныл ма̄гыс тув са̄в олн та̄стым о̄лы. Са̄в ня̄врамыӈ ще̄мьят ма̄ло̄мтыл мивет ос та̄н кол ӯнттуӈкве ат ке ка̄саще̄гыт, ты пе̄нстыл олн виӈкве ве̄рме̄гыт. Тувыл ма̄хум пусмалтан порат ос лё̄ӈхыт холтнэ олныт па̄ланэ субсидия щирыл ойтнэ ма̄гыс олн о̄с та̄стувес. Ты олныт хосыт матумпа̄ла хо̄тпат интернат колытыт о̄ньщавет, та̄н ма̄гсыланыл э̄рнэ колыт ӯнттавет ос ма̄шинал яласан лё̄ӈхыт щё̄питавет. Пуссын ты рӯпатат хумус ва̄равет, общественный советн пе̄риим хо̄тпатн уральтавет. Владимир Куриков, округ экономика департаментыт рӯпитан хум, ла̄выс: «Ма̄н ты тэ̄лат оснпаттым юипа̄лт ёмас ла̄тыӈ ла̄ве̄в, кӯщаит мирыт ёт ёмщакв рӯпитэ̄гыт, та̄н о̄лупсаныл ӯргалым о̄ньщавет». Тувыл кӯщаит ма̄хум рӯпатанылт сэ̄лнэ олнаныл урыл потыртасыт. Ань школат, пӯльницат, культура колытыт ман мирколытт рӯпитан ма̄хум та̄н зарплатаныл акв щирыл йильпииг ловиньтаӈкве патавет. Профсоюз колыт ты ва̄рмалит та̄рапаттысаныл ос тамле тэ̄лат ёт ка̄саще̄гыт. Тот лӯима̄т рӯпитан ма̄хум са̄выӈпа̄лэ олн ойтнэ э̄рнэ накыт хультуптаве̄сыт ос таит акванловиньтым ке, зарплатаныл са̄внувег е̄мтэ̄гыт тах. Алексей Варлаков, труд ос занятость департаментыт кӯщай хум, ла̄выс, тот ка̄сыӈ хо̄тпа номтыӈыг ва̄рнэ рӯпататэ сунсаве, ос та щирыл олныл ойтуӈкве патаве. Ань тав уре̄т кӯщай ла̄вум ла̄тӈе тув ат хӯлтаве. Са̄в ос ёмас рӯпататэ ва̄рыстэ ке, са̄в олныл ойтаве».

1136 2016. 11. 24. Светлана РОМБАНДЕЕВА

Ма̄ньлат пыгыт армиян виӈкве та патве̄сыт Сергей Коваленко ля̄ххал тотнэ ма̄хум ёт РИЦ «Югра» колт хо̄нтхатыглас. Ты хум округ Военный комиссариат колт рӯпиты, ма̄ньлат ма̄хум армиян те̄тнэ отделт кӯщаиг о̄лы. Тав та урыл потыртас, ань ты э̄тпос 7 хо̄талэ̄ныл округт о̄лнэ ма̄ньлат пыгыт армиян виӈкве та патве̄сыт. Ты ва̄рмаль щар ма̄к колэ Пыть-Ях ӯст ӯнлы, рущ щирыл ла̄ваве – окружной сборный пункт. Тувыл ты э̄тпос 10 хо̄талт День открытых дверей ва̄рыглавес – та порат тув э̄ргынйӣквнэ ма̄хум ёхталасыт, яныг кӯщаит ёт, пӯпколт рӯпитан хо̄тпат ос хо̄нтлам мир ёт са̄всыр хо̄нтхатыглапыт ва̄рыглаве̄сыт. Армиян миннэ пыгыт ос ща̄ньа̄щаныл Военный комиссариат кӯщаит ос лусытан ма̄нылт рӯпитан ма̄хум ёт потрамаӈкве ве̄рме̄гыт, матыр китыглахтан ла̄тыӈ о̄ньще̄гыт те, вос китыглахтэ̄гыт, та̄нанылн э̄рнэ тэ̄лат пуссын та̄ра вос паттыяныл. Сергей Коваленко ла̄выс: «Тамле хо̄нтхатыглап ма̄н ань таима̄гыс ва̄рыглэ̄в, ма̄ньлат пыгыт ос ща̄ньа̄щаныл ма̄н ва̄рнэ рӯпатав вос ка̄салыяныл, вос ва̄ганыл, хумус пыгыт тыт ӯриянув. Ты тэ̄ла палт пуӈктотнэ ма̄хум та̄н ётаныл потраме̄гыт, пыгыт армиян тотнэ э̄лыпа̄лт манхурип маснутыл маставет, манарыл тыттавет, пуссын суссылтыянӯв. Ты та̄л са̄т со̄тыра арыгтем ма̄ньлат хо̄тпа армиян виӈкве номсаве. Ань тыхо̄тал кастыл хӯрум со̄тыратем пыг э̄рнэ нэ̄паканыл щё̄питаве̄сыт, ле̄ккарытын сусве̄сыт. Таквсы порат кос хоты военный частин пыгыт вивет, ос туп Президентский полк нампа частин ат вивет, тув тӯяг ущ пе̄риявет. Ань винэ пыгыт халт то̄ват альтернативный служба щирыл минэ̄гыт, та̄н ма̄гсыланыл я̄нас рӯпата манос ханищтахтан тэ̄ла щё̄питавес».

1136 2016. 11. 24. Людмила Теткина

Ма̄н ма̄вт мирыт юртыӈыщ вос о̄лэ̄гыт Ты э̄тпос о̄вылтахтам порат Наталья Комарова губернаторув районытыт ос ӯсытыт о̄лнэ ма̄хум ёт кина суснэ то̄тап хосыт потыртас. Тыт о̄лнэ са̄всыр мирыт халанылт хумус о̄лэ̄гыт, пе̄с йис ва̄рмаляныл, ща̄нь ла̄тӈаныл э̄лаль тотэ̄гыт ман а̄ти, та урыл потраныл о̄лыс. Наталья Комарова ла̄выс: «Тыт о̄лнэ мирыт ул вос воритотэ̄гыт, та̄н по̄ханылт о̄лнэ мо̄т мирыт вос янытлэ̄гыт, ка̄сыӈ районт ос ӯст яныг рӯпата ва̄раве. Ты рӯпата ва̄рнэ ма̄хумн та̄нки халанылт о̄с ханищтахтуӈкве э̄ри, пӯмщалахтуӈкве, манхурип ялпыӈ хо̄талыт манос проектыт районыт, ӯсыт ва̄рыглавет. Ма̄нь таквс э̄тпост Пермь ӯст Всероссийский форум рӯпитас. Ма̄н округ ма̄хманув о̄с тув во̄виньта̄лве̄сыт. Осман Имамерзаев та сапра̄нит янытлавес. Тав «Центр объединения народов Дагестана «Дружба народов» нампа организацият кӯщаиг о̄лы. Хум касылт но̄хпатыс ос китыт местал майвес. Тамле хо̄тпатныл ань ханищтахтуӈкве э̄ри». Сапра̄нит кӯщаит ос мо̄т хо̄н ма̄ныл ёхтум мирыт урыл потыртасыт. Та̄н пуссын олн сэ̄луӈкве тыг ёхтэ̄гыт. Тувыл тыт о̄луӈкве хультэ̄гыт, ще̄мьяӈыг, ня̄врамыӈыг е̄мтэ̄гыт. Та̄н хумус ань нё̄тавет, са̄всыр организацият рӯпитан хо̄тпат о̄с потыртасыт.

1136 2016. 11. 24. Валентина УЗЕЛЬ

Та̄н мирн нё̄туӈкве пе̄риявет Общественный палатаг ла̄внэ кол округувт лов та̄л рӯпиты. Ка̄сыӈ хӯрум та̄л тув ва̄тахтем хо̄тпа пе̄рияве. Та̄н тот са̄всыр рӯпата ва̄ре̄гыт. Ты кӯщаиӈ колт нила комитет рӯпиты, нёлолов комиссия ос хӯрум группа. Пе̄риим хо̄тпат пуссын ла̄кквауртавет, акв хотты комиссиян ман комитетн рӯпитаӈкв ӯнттавет, ка̄сыӈ ма̄т я̄нас рӯпата ва̄раве. Ань ювле хультум хӯрум та̄л тот рӯпитам хо̄тпат рӯпатаныл та а̄стлысаныл, мо̄т хо̄тпат округув янытыл ань тув пе̄риявет. Ты э̄тпос о̄выл хо̄талэ̄т округ кӯщаюв Наталья Комарова ты хо̄тпат наманыл ла̄всанэ. Ань тот ва̄т нупыл тит хо̄тпа рӯпитаӈкв паты. Ирина Максимова хӯрум та̄л кӯщаиг тот о̄лыс, тав ла̄выс: «То̄ват номсэ̄гыт, ка̄сыӈ район ос ӯс такви хо̄тпатэ тув пе̄рияӈкв ве̄рми. Ань тох ат ва̄раве, тув пе̄риян хо̄тпат номтыӈыг, ка̄ркамыг вос о̄лэ̄гыт, округувт о̄лнэ мир ма̄гыс сыманыл вос ща̄рге̄гыт, кос хотьютн нё̄туӈкв вос ве̄рме̄гыт, ос наманыл намыӈсуиӈыг вос о̄лэ̄гыт. Округувт о̄лнэ мирн нё̄тмил ва̄рнэ ма̄гсыл та̄н тот олныл ат ойтавет». Соссаӈ мирн нё̄тнэ ма̄гыс та колт ма̄хум о̄с рӯпитасыт, кӯщаиг тот Екатерина Лоншакова о̄лыс. Та̄н комитетаныл тох ла̄ввес – округувт о̄лнэ са̄всыр мирыт акванюрщхатын нак ос соссаӈ ма̄хум культура э̄лаль тотнэ ма̄гыс рӯпитан комитет. Юио̄выл сапра̄нияныл о̄лме порат хӯрум та̄л рӯпитам хо̄тпат пуссын яныг пӯмащипа ла̄тӈыл ла̄вве̄сыт, ка̄сыӈ хо̄тпа янытлавес. Ань то̄ват та̄н халанылт э̄лаль рӯпитаӈкв патэ̄гыт. Округ кӯщаюв хӯлтнэ нэ̄паке̄т та̄н наманыл хансым о̄лэ̄гыт – ты Л. А. Чистова, В. В. Заболотский, О. А. Сидорова, И. И. Максимова, С. П. Кононенко ос мо̄таныт.

1136 2016. 11. 24. Светлана РОМБАНДЕЕВА

Колта̄глыт Урай ӯст мӯйлуӈкве патэ̄гыт Округ мирколт ля̄ххал тотнэ хо̄тпат образование департамент ос ма̄ньлат ма̄хум политика палт пуӈктотнэ нэ̄ Любовь Ковешникова ёт хо̄нтхатыгласыт. Тав Урай ӯст ма̄ньлат колта̄глыт фестиваляныл урыл потыртас. Тув атпантем ще̄мья ёхты. Ща̄ньа̄щит ма̄хум э̄лыпа̄лт выступайтаӈкве патэ̄гыт – ань ня̄врам янмалтан о̄вылтыт маныр ва̄гыт, нэ̄гхумыг халэ̄нт ёмащакв о̄лнэтэ̄н ма̄гыс маныр ва̄руӈкве э̄ри, пуссын ты урыл тот тах та потыртэ̄гыт. Ты фестиваль Лангепас ӯст 1999 та̄лт ва̄руӈкве номылматвес. Та порат ты о̄выл колта̄гыл грантолныл майвес. Любовь Ковешникова ла̄выс: «2000 та̄лт Нижневартовск ӯст «Молодая семья» нампа организация рӯпитаӈкве о̄вылтахтас. Тав ань округув янытыл ма̄к яныг, тот 250 арыг хо̄тпа акваг акванхо̄нтхатыглэ̄гыт, аквъёт рӯпитэ̄гыт, са̄всыр конкурсыт, та маныр щё̄питэ̄гыт. Ялпыӈ хо̄талыт о̄лыгланэ̄ныл порат та̄н палтаныл кит со̄тыра са̄вит хо̄тпа ёхтала̄лы. Тамле акванхо̄нтхатыглан ва̄рмаляныл фестивалиг 2001 та̄лт намаявес, ущ акванминам ма̄нь ма̄хум та па̄сныл та мӯйлэ̄гыт. Нэ̄гхумыг акв хотьютэ̄н та̄ланэ̄н 35 та̄лныл ма̄ньнувет те, тув хас- хатуӈкве ве̄рме̄г. Фестиваль порат нэ̄квет ос хумыт колта̄гланыл о̄вылтыт потыртэ̄гыт, маныр ва̄руӈкве ха̄сэ̄гыт, маныр ва̄гыт, пуссын потыртэ̄гыт. Тувыл ня̄врам хунь ущ самын паты, хумус таве тыттуӈкве, мастуӈкве ман ма̄нигтаӈкве, ты о̄вылтыт о̄с акваг потраме̄гыт. Матыр пӯмыщ номт ман потыр о̄ньще̄гыт те, ты урыл ла̄ве̄гыт, тувыл таве тэ̄лаг (проектыг) ва̄руӈкве ро̄ви. Ма̄ньлат колта̄глыт ма̄гыс сыресыр ёнгилыт ос мастерклассыт щё̄пита̄лавет. Ма̄ньлат колта̄глыт фестиваляныл – ты сака э̄рнэ суссылтап. Ма̄ньлат ма̄хум халанылт юртыӈыщ о̄луӈкве ханищтахтэ̄гыт, йильпи потрыт хӯнтлэ̄гыт, ка̄сыӈаныл матыр ёмас номт о̄ньщи те, ла̄вуӈкве ве̄рми. Ань Югра ма̄в янытыл 60 тамле клубыт рӯпитэ̄гыт. Ты организацият ще̄мьятын сака нё̄тэ̄гыт, округт о̄лнэ мирн яныг па̄рыс тотэ̄гыт. Таима̄гыс ма̄н та̄наныл нё̄тыянӯв, янытлыянӯв. Касыӈ та̄л ма̄н ань «Развитие образования в Югре на 2014-2020 годы» нампа тэ̄ла торыг сыресыр конкурсыт ва̄рыгла̄лэ̄в. Ма̄ньлат ще̄мьятын ос ня̄врамытын ёмас тэ̄ла ва̄рнэ некоммерческий организациятын ка̄сыӈ та̄л 10 миллион солкови та̄сталэ̄в». Образование департамент ос ма̄ньлат ма̄хум политика палт пуӈктотнэ нэ̄ ла̄вме щирыл, фестивалин са̄в хо̄тпа ёхталы, ка̄сыӈ та̄л мир акваг та са̄вми. Ты ва̄рмаль о̄лупсавт улпыл э̄ри, ань колта̄гыл ма̄хманув халанылт ёмас тэ̄лан ханищтахтэ̄гыт, тувыл э̄лаль со̄тыӈыщ, щуниӈыщ о̄лэ̄гыт.

1136 2016. 11. 24. Галина КОНДИНА

Мӯй ма̄хум нё̄тнэ ма̄те̄втыл о̄щатахтыглэ̄гыт Ма̄н округувт са̄т хо̄тал сыс мӯй ма̄хум ёхталан ва̄рмаль янытлавес, рущ щирыл ла̄ваве – Неделя туризма. Ля̄ххал тотнэ ма̄хмытын ты урыл потыртаӈкве тит кӯщаиг ёхталасы̄г – Алексей Забозлаев, губернатор ва̄ӈын хо̄тпаг рӯпитан хум, ос ма̄вит ос несырьевой сектор экономики департаментыт кӯщай ва̄ӈын хум Александр Комиссаров. Яныг таквс э̄тпос са̄тыт хо̄талэ̄ныл ос хӯрумхуйплов хо̄тал мус округувт са̄в ма̄т Сургут ӯст ос Сургутский районт, Ханты-Мансийск ӯст ос Ханты-Мансийский районт, Нефтеюганский районт мӯйлын ва̄рмалит ва̄рыглаве̄сыт. Алексей Забозлаев ла̄вме щирыл, ка̄сыӈ ма̄т кӯщаит та̄нти ла̄тыӈ те̄тсыт, та̄н таӈхе̄гыт ман а̄ти та̄нти ма̄нылт тамле мероприятият ва̄руӈкве. Ос ты коныпал тув мус яласан лё̄ӈханыл ёмас вос о̄лыс, мӯй ма̄хум кӯстыр щирыл мӯйлуӈкве вос ялэ̄гыт. Хумыг туризм урыл хунь потыртасы̄г, ос та̄л палыт хоты ма̄нувт ма̄хум ӯщлахтуӈкве ка̄саще̄гыт, та ма̄т урыл ла̄тыӈ ла̄всы̄г. Пе̄с порат Та̄гт я̄ ва̄тат Пе̄ткас па̄выл о̄лыс, ань тамле хурип намыл акв ӯщлахтын ма̄ намтвес, рущ щирыл ла̄вияныл – «Бедкаш». Тот о̄лнэ колыт, пувлынкол ос мо̄т э̄рнэ колыт ӯнттым о̄лэ̄гыт. Мӯй ма̄хум акваг тув ялнэ путевка ёвтэ̄гыт. Тэ̄лытуи акваг тот хӯл алыщлэ̄гыт, туи няс па̄хвтэ̄гыт, яныг сортыт пуве̄гыт, тэ̄лы о̄с няслэ̄гыт. Та̄н тот «Бураныл», яныг ма̄шинал тотыглавет. Туи округ правительстват рӯпитан кӯщаит нё̄ранув сунсуӈкве тотыглаве̄сыт. Хуньт Нё̄ро̄йка ляпат па̄выл о̄лыс, тав тохи ла̄ввес, тот ма̄хум рӯпитасыт, нё̄ра̄хвтас сакватавес, мо̄т ма̄н хотталь тотвес, нё̄ра̄хвтасыл са̄всыр э̄рнэ утыт ва̄рве̄сыт. Алексей Забозлаев ла̄выс, тот ань э̄ри са̄внув ёмас кол ос пувлынкол ӯнттуӈкве, тэ̄лы порат нор тув хартуӈкве. Ань са̄в хо̄тпа аквторыг тув ёхталаӈкве ат ве̄рми, о̄лнэ кол мощща, палаткат ракв порат та̄раёсавет. Саранпа̄выл мус вертолётыл тотыглаӈкве патавет, ты урыл та̄н «Ютэйр» авиакомпания ёт потыртахтэ̄гыт. Ань яласан вертолётыт па̄влыӈ мирн ат то̄вылхатэ̄гыт. Кӯщаит ёт мо̄т хо̄н ма̄ныл Швейцарияныл о̄лнэ хумыг тув о̄с ёхталасы̄г. Ма̄в, Нё̄ранув, сыстам я̄тенув сунсыглым тэ̄н маттем та о̄щатахтыгласы̄г. Тыг йийме̄н порат тэ̄н номсасы̄г, Россияв па̄ӈкыӈ, хо̄та̄ти порс хуиглы. Ос тув мӯй ма̄хум ёхталан ма̄гсыл тэ̄н тамле номтэ̄н ла̄всы̄г, колыт э̄ре̄гыт соссаӈ мир о̄лнэ колыт хольт ӯнттуӈкве, ма̄н ма̄ньщи ос ханты хансанув тув по̄слуӈкве. Ля̄ххал тотнэ хо̄тпат кӯщаиг ос та урыл титыгласаныл, ёхталан ма̄хум порс па̄хвтуӈкве патэ̄гыт, ма̄витув щар тах Байкал тӯр хольт порсыӈыг ва̄раве. Алексей Забозлаев ты ва̄рмаль урыл тох ла̄выс, матъёмас тыт о̄лнэ мир ма̄витув урыл сыманыл ща̄рге̄гыт. Тот Нё̄рт рӯпитан хумыт та̄ра мӯй хо̄тпатын ла̄ве̄гыт, маныр порс о̄ньще̄гыт, ёт вос выганыл, та̄тыл сульят манос па̄нкат па̄хвтуӈкве щар ат ро̄ви, тыи та̄н уральтым о̄ньщияныл. Нё̄ранув сунсуӈкве тув лов хо̄талн ялуӈкве акв э̄лумхо̄ласн 70-80 со̄тыра солко̄ви ойтуӈкве тах э̄ри.

1136 2016. 11. 24. Валентина УЗЕЛЬ

Яныг кӯщаиг рӯпитан ле̄ккар потре Мир пусмалтан департамент колт кӯщаиг ань Алексей Добровольский о̄лы, ты э̄лыпа̄лт тав округ пӯльницат яныг кӯщаиг рӯпитас. Тав ань маныр рӯпата ле̄ккарыт ты кӯщаиӈ колт ва̄ре̄гыт, та урыл потыртас. Кӯщай хум ла̄выс: – Ты та̄л оигпанэ̄тэ мус округувт то̄ва яныг ӯсытт ущты ӯнттым йильпи пӯльницатт ма̄хум пусмалтаӈкв патавет. Нефтеюганск ӯст ня̄врамыт самын патнэ кол ань о̄с ёмащакв хотщё̄питаве, тувыл хирургический отделение тах ремонтыл ва̄раве. Ань то̄ва яныг ӯсытт о̄лнэ колытыт о̄выл этажт поликлиникат пӯнсавет. Тот о̄лнэ ма̄хум ты ва̄рмаль ёт щар ат ка̄саще̄гыт, ла̄ве̄гыт, са̄всыр а̄гм о̄щнэ хо̄тпат та̄н коланылн ёхталаӈкв патэ̄гыт. Ма̄шинаӈ ма̄хум коланыл мус лё̄ӈх тах лаппантыяныл, та̄нанылн торас ва̄руӈкв патэ̄гыт. Я̄нас пӯльница ӯнттын ма̄гыс сака са̄в олн э̄ри, ань таима̄гыс о̄лнэ колытт поликлиникат ты ва̄равет. Мирув акваг са̄вми, таима̄гыс матыр та̄рвитыӈ а̄гм о̄щнэ манос пуста̄гыл о̄лнэ хо̄тпат акв колн атуӈкв щар ат ро̄ви. Тэ̄рпи тыналан колыт урыл тав тох ла̄выс, ты щар ма̄к та̄рвитыӈ ва̄рмаль Ха̄льӯс ос Кондинский районт та̄рапаттувес, ма̄хум тот сака савалэ̄гыт. Аптека колыт пуссын лаппантве̄сыт, тэ̄рпи па̄влытн тотаве те, тынкапаяныл та янгыт. Ты департамент колт рӯпитан кӯщаит номсахтэ̄гыт, ты ва̄рмаль ёт хумус ань э̄лаль рӯпитаӈкв э̄ри. Аман пӯльницат тэ̄рпит вос тыналавет, аман акв хо̄тпа тэ̄рпи тыналан ма̄гыс я̄нас организация вос пӯнсы. Ань та̄рвитыӈ порат о̄лэ̄в, ма̄ янытыл мир акваг мощща олныл ойтуӈкв та патвес, рущ ла̄тӈыл ты лю̄ль ва̄рнэ тэ̄ла тох ла̄ваве – бережливый регион. Ты кӯщай ла̄выс, ань пӯльницат рӯпитан ма̄хум олнаныл но̄х щар ат нё̄тавет. Манса̄вит олн ань выгыт, аквтыса̄вит олныл ойтуӈкв патавет. Льготный рецепт щирыл тэ̄рпи ёвтнэ ма̄гыс округув янытыл акв та̄л сыс 2 млрд. солко̄ви холтаве. То̄ва тэ̄рпит сака тыныӈыт, ань та̄н пе̄нтсыланыл мощ тынта̄лнув тэ̄рпит а̄гмыӈ хо̄тпатн миӈкв патавет. Матах та̄л Россия янытыл тамле йильпи тэ̄ла ва̄рвес, рущ ла̄тӈыл «земский доктор» ла̄ваве. То̄ва пӯльницатт ле̄ккарыт ат то̄вылхатэ̄гыт. Та̄н мо̄т ма̄ныл тыг во̄вавет те, 1 млн са̄вит солко̄вил ос о̄лнэ колыл мивет. Акв та̄л сыс ма̄н округувт 60 ле̄ккар кос ӯрвес, 75 ле̄ккар тыг ёхтыс. Та̄н пуссын олныл майве̄сыт, ёмащакв нё̄тве̄сыт. Алексей Добровольский ла̄выс, ма̄н ма̄вт ма̄нти ле̄ккаранув вос рӯпитэ̄гыт, мо̄т ма̄ныл ле̄ккарыт тыг ул вос ёхтэ̄гыт. Акв журналист таве титыгластэ: «Аман со̄ль, хотьют тыт округувт ханищтахты, та̄н лю̄льсаӈ ханищтавет ос ёмащакв рӯпитаӈкв ат ве̄рме̄гыт? » Кӯщай ювле ла̄выс, хотьют ущты ханищтахтуӈкв а̄стыс, рӯпитаӈкв хунь о̄вылтахты, ва̄им, тав ёмащакв рӯпитаӈкв ат ве̄рми. Матах та̄л тав рӯпиты, ущта ёмас ле̄ккарыг е̄мты. Моще̄ртын ханищтахтын ма̄ныл а̄стын ле̄ккарыт рӯпитаӈкв та̄ра ат та̄ртавет, о̄влэ̄т та̄н номтаныл комиссиян ёмащакв а̄рталавет, «аккредитация» нампа уральтан ва̄рмалил ва̄равет. Тувыл та юипа̄лт ущ рӯпитаӈкв о̄вылтахтэ̄гыт.

1136 2016. 11. 24. Николай МЕРОВ

Нё̄рт та̄ксар ма̄ньщи хо̄тпав о̄лы Свердловский область Ивдельский районт ма̄ньщиянув о̄лэ̄гыт. Та е̄рт са̄в во̄р па̄выл иӈ ӯнлы. Тот ма̄ньщи ма̄хманув ань ты хо̄тал мус во̄раим о̄лэ̄гыт. Ты та̄л тэ̄лытӯяг ам тув ялсум. Тот акв ма̄ньщи хум ёт хо̄нтхатыгласум. Тав наме Валерий Анямов, на̄н тав уре̄тыл э̄лаль ловиньтэ̄н. Ты ма̄ньщи хум Ке̄расколыӈъя̄ па̄вылт самын патыс. Тот яныгмас, Полуночный па̄выл школа а̄стлас. Па̄влэ̄т во̄раим мощ о̄лыс. Ос Санкт-Петербург ӯст кина по̄слын хо̄тпаг э̄лаль ханищтахтас. Тувыл Ханты-Масийск ӯсн ёхталас. Тыт ос «Югра» нампа телерадиокомпаният матахмат та̄л рӯпитас. Та юипа̄лт о̄с такви ма̄тэ̄н ювле минас. Ань Ке̄расколыӈъя̄ па̄вылт туп кит ще̄мьяг о̄лэ̄г. Акв колт Михаил Тимофеевич ос Светлана Прокопьевна Пеликовыг о̄лэ̄г. Тэ̄н кит ня̄врам о̄ньще̄г. Ня̄врамаге̄н сас Полуночный па̄выл школаинтернатт ханищтахтэ̄г. Китыт колыт ос Александра Васильевна Анямова, Валера тав оматэ, о̄лы. Тувыл та, тэ̄лы порат па̄вылт воссыг нэ̄мхотьют а̄тим. Туи пораг е̄мты, ущта са̄в мир ёхты. Валера ос ань Висумтыт па̄вылт Ирина э̄кватэ ёт о̄лы. Ты па̄выл мощ яныгнув. Тот ловманкем кол ӯнлы. Ке̄расколыӈъя̄ па̄выл мус хӯрумхуйплов ве̄рыста палыт ма̄тэ. Тав ва̄тихал оматэ̄н нё̄туӈкве тув ёхталы. Во̄рколэ̄н яланты, ке̄рнялит ӯнтты, нёхыс алыщлы, щёпрыт па̄тлупты ос со̄рп ка̄тынпатты. Тав ла̄выс, о̄патэ о̄лме̄т потырта̄лыс, та̄н ще̄мьяныл са̄в са̄лы о̄щмыт. Пуссын аквъёт нёлоловса̄т пуӈк о̄лыс. Пе̄с порат нё̄р тапалт са̄в рущ па̄выл ӯнлыс. Тув олн сэ̄лнэ ма̄гыс са̄в э̄лумхо̄лас э̄лыл рӯпитаӈкве ёхталас. Ма̄ньщи хо̄тпанув са̄лыяныл лув ма̄гыс пе̄нтуӈкве акваг тув тотыгла̄лсаныл. Та луваныл йирыг алыгласаныл. Нё̄р тапалт пе̄щар ма̄хум о̄лсыт. Ма̄ньщиянув та̄н ётаныл о̄с тыналахтасыт. Тувыл советский власть ёхтыс, са̄лыяныл хотвуйве̄сыт, туп тэ̄нэ са̄вит хультуптавес. Ётылнув яныгпа̄ла хо̄тпат пуссын а̄тимыг е̄мтсыт, са̄лыт о̄с пуссын холасыт. Воссыг нэ̄мхотьют о̄ньщуӈкве ат ка̄сащас. Та па̄сныл па̄влыӈ ма̄хум туп во̄раим о̄лэ̄гыт. Са̄лы воссыг ат о̄ньщигласыт. Ань ты накт ма̄ньлат хо̄тпат о̄с са̄лы о̄щнэ ва̄рмаль урыл номсахтэ̄гыт. Ты ёмас ва̄рмаляныл тэ̄лаг вос е̄мтнув. Э̄рыӈ хотты порат та тэ̄пыӈ ма̄т ма̄ньщиянув са̄лыяныл о̄с ха̄йтыгтаӈкве патэ̄гыт тах. Ань тот та̄ксар, ка̄ркам ма̄ньщи хо̄тпанув иӈ о̄лэ̄гыт.

1136 2016. 11. 24. Валентина УЗЕЛЬ

Ё̄рнколт мӯйлум э̄кваг Ты э̄кваг ам ё̄рнколт по̄слысагум. Тэ̄н Когалым ӯсн мӯйлуӈкв ёхталасы̄г. Во̄ртыпалт ё̄рн э̄ква лю̄ли, наме Лилия Кантлевна Акичева. Ямал ма̄т о̄лы, ма̄н округувн та̄н са̄в хо̄тпа на̄иӈтуйтыл ёхталасыт. Тыт та̄н ӯрве̄сыт, ма̄шинал са̄всыр мӯйлын ма̄н тотыглаве̄сыт. Ам таве о̄лупсатэ урыл мощ титыгласлум, э̄ква тох потыртас: – Ма̄н о̄выл щёс на̄н округын ёхтысӯв. Ань тыт мӯйлынэм сыс ляпа рӯтанум ёт ва̄йхатасум. Ам омам ханты нэ̄г о̄лыс. Тувыл тав хум ва̄рыс, Пяк ё̄рн о̄йкан (ты ма̄н а̄тяв) Ямалн та тотвес. Ам хумим ос селькуп хо̄тпаг о̄лыс, ме̄н хӯрум пыг о̄ньщиме̄н, пуссын ань са̄лы ӯрим яласэ̄в. О̄йкам хосат а̄тимыг е̄мтыс. Ань Тарко-Сале ӯст о̄лэ̄в, са̄лыянув та ляпат о̄ньщиянӯв. Титса̄ттем са̄лы о̄ньще̄в. Пыганум пуссын ще̄мьяӈыг е̄мтсыт, я̄нас о̄лэ̄гыт. Тав юртнэ̄тэ такви урыл о̄с мощ потыртас. Наме Татьяна Владимировна Айваседа. Ща̄не о̄с ханты нэ̄г о̄лыс, Белоярский район Нумто па̄вылт о̄лсыт. 1975 та̄лт а̄тятэ илттыг а̄тимыг е̄мтыс, тав ные̄н Когалым ӯсн ёхтуӈкв ла̄ввес. Тув ёхтыс, тот о̄луӈкв та хультыс. О̄йкатэ о̄с ё̄рн хум, ня̄враманэ̄н са̄лыӈ колт яласэ̄гыт, пуссын са̄лы о̄ньще̄гыт.

1136 2016. 11. 24. Людмила Теткина

Са̄лыяныл вос са̄вме̄гыт Ха̄льӯс район Саранпа̄вылт са̄лыт янмалтан совхоз 1931 та̄лт ва̄т са̄грапнал э̄тпос 15 хо̄талныл рӯпитаӈкве о̄вылтахтас. Мо̄тыт э̄тпост онтырса̄т нупыл ат та̄лэ тах то̄влы. Ты та̄лыт сыс са̄всыр щирыл совхоз рӯпитас, акв порат са̄в ма̄хум са̄лы ӯрим яласасыт. Ётыл совхоз а̄латы лаппантвес, са̄лы тот сака мощща хультсас ос ма̄хум олныл лю̄льсаӈ ойтве̄сыт. Ань совхоз мо̄т намыл пинвес, ГУП «Саранпаульский» тох ла̄ваве. 2009 та̄лт ты предприятие кӯщаиг Анатолий Валей рӯпитаӈкве паттувес. Манса̄вит са̄лы совхоз о̄ньщи ос хумус ань рӯпиты, ты урыл ам Анатолий Прокопьевич китыгласлум. Тав ла̄выс: «Са̄т та̄л ювле хультум порат совхозт са̄т со̄тыра са̄вит са̄лы о̄лыс. Акв та̄л туп 15 тонна нё̄выль ва̄рвес. Ань 12 со̄тыра са̄лы о̄ньще̄в. Та̄л сыс кит со̄тыра арыгкем са̄лы нё̄влиг алыянӯв. Предприятият 42 э̄лумхо̄лас рӯпиты, нила бригада о̄лы. Советский власть о̄лум порат совхозт 20 со̄тыра са̄лы янмалтавес ос 12 бригада рӯпитас. Ка̄сыӈ бригадат акв со̄тыра хӯрумса̄т са̄лы о̄лыс. Ань акв бригадат ма̄хманум хӯрум со̄тыра са̄лы ӯрим яласэ̄гыт. 2015 та̄л сыс ма̄н 70 тонна нё̄выль ва̄рсӯв. Ань ма̄н са̄лынув э̄лаль янмалтаӈкве, са̄вмалтаӈкве патэ̄в. Ямал ма̄т о̄лнэ ма̄хум хольт ты нё̄влил са̄всыр колбаса ва̄руӈкве ат патэ̄в. Тамле атыӈ, ёмас са̄лы нё̄выль туп ня̄рнё̄влиг тэ̄ӈкве э̄ри. Ам номсэ̄гум, мо̄т щирыл тамле тэ̄нут тэ̄ӈкве щар ат ро̄ви. Ма̄н, Саранпа̄вылт о̄лнэ ма̄хум, мо̄т нё̄выль щар ат тэ̄гӯв. Ос мо̄т ма̄ныл ёхтум мирыт ты нё̄выль сака ат тэ̄гыт. Тыи ма̄гсыл ань хо̄та̄ти са̄лы нё̄выль урыл акваг потыртаӈкве ос са̄всыр ма̄т тыналаӈкве патэ̄в, мо̄т мирыт ты тэ̄нут тэ̄ӈкве о̄с вос ханьщувлэ̄гыт. Акваг са̄лы нё̄выль туп вос ёвтэ̄гыт, мис, пӯрщ нё̄выль нупыл ул вос сунсэ̄гыт. Ань Касум па̄вылныл ос Ямал ма̄ныл тотнэ са̄лы нё̄выль ёвтуӈкве о̄с ро̄ви. Тувыл ма̄н нё̄влюв атыӈнувег, во̄иӈнувег ос ёмаснувег о̄лы. Саранпа̄вылныл тотым нё̄выль акв щёс ке тэ̄щиньтэ̄гыт, мо̄т щёс туп ма̄н па̄влувныл ты тэ̄нут ёвтуӈкве патэ̄гыт, тув мус нё̄влюв атыӈ. Ма̄н са̄лыянув ат саватыянӯв, па̄выл мус ат ня̄влыянӯв, нё̄рт са̄лы ловиньтан пӯсас о̄ньще̄в, нё̄влиг тот ва̄риянӯв. Саранпа̄вылн нё̄выль туп тыналаӈкве тотэ̄в. Са̄всыр комбикормыл ос хӯлыл та̄наныл ат тыттыянӯв. Та̄н туп сыстам вит ае̄гыт ос тэ̄п тэ̄гыт. Нё̄выль пуссын тыналаӈкве ань ат ве̄рме̄в. Ка̄сыӈ та̄л Ха̄льӯсн тыналахтуӈкве ма̄шинал ялантэ̄в. Тот о̄лнэ мир нё̄выль ёмащакв ёвтэ̄гыт. Ты та̄лт Ханты-Мансийск ӯсн ялсӯв, тот са̄лы нё̄выль тыналасӯв. Ка̄сыӈ са̄лы пуӈк ма̄гсыл субсидияолныл ойтаве̄в. Та̄л сыс акв са̄лы ма̄гсыл са̄тса̄т солко̄вил та̄стыглаве̄в. Ты олныт 2008 та̄л порат туп но̄хнё̄тыглаве̄сыт. Та пораныл таса̄вит та̄л ювле хультыс, ань ня̄нь, са̄ккар ос мо̄т тэ̄нут тынаныл са̄в щёс но̄хлаплуве̄сыт. Ты ва̄рмаль урыл ма̄н ётув рӯпитан кӯщаитн акваг потырта̄лэ̄в. Таи ёмас, ма̄н ма̄нки олн сэ̄луӈкве патсӯв. 2009 та̄лт са̄лы ӯрнэ ма̄хум туп 6-7 со̄тыра солко̄ви сэ̄лсыт. Ань акв э̄тпост сыс 20 со̄тыра солко̄ви выгыт. Ма̄ньлат ма̄хум ма̄нки палтув акваг во̄виянӯв, та̄н нё̄рт рӯпитаӈкве сака ат ка̄саще̄гыт. Ань кит пыгыг Салехард ӯст зоотехникыг ханищтахтэ̄г. Ханищтахтын ма̄ныл хунь а̄стэ̄г, Саранпа̄вылн ювле ёхтэ̄г, совхозт рӯпитаӈкве номсэ̄г. Акв пыг ань ма̄н палтув практикан ёхтыс. Са̄лыӈ ма̄хманув ня̄враманыл ӯщлахтын порат нё̄рн хунь минэ̄гыт, ща̄няныла̄щанылн нё̄тэ̄гыт, та̄наныл о̄с олныл ойтыянӯв. Ханищтахтуӈкве а̄стлан юипа̄лт са̄лы ӯрим о̄с вос яласэ̄гыт. Па̄влувт ялпыӈ хо̄тал о̄лум порат ты пыгыт мӯй ма̄хум ос ма̄нь ня̄врамыт пӯмащ ма̄гсыл са̄лыӈ суныл тотыгласаныл. Тыщирыл о̄с мощ олн сэ̄лэ̄гыт. Ты ма̄хум янытлан хо̄тал округувт янытыл ва̄рыглаве. Тамле тэ̄ла ань таи ма̄гсыл щё̄пита̄лаве, ма̄ньлат хо̄тпат са̄лыӈ колт рӯпитаӈкве вос ка̄сащасыт. Ты та̄л Саранпа̄вылт ты ялпыӈ хо̄таланыл ре̄тыӈ ю̄свой э̄тпос 21 хо̄талт о̄лыс. То̄нт 25 хо̄тпат касуӈкве ёхталасыт. Са̄в ма̄ньлат пыг касуӈкве тув акванатхатыгласыт. Са̄лыянув а̄гмыл ул вос е̄мтэ̄гыт, са̄всыр тэ̄рпил тӯщтыянӯв. Ле̄ккар хум са̄лыянув уральтыянэ, ос ва̄тихал ке̄лпаныл выг. Ты туи Ямал ма̄т «сибирский язва» а̄гм хо̄нтвес, тот са̄в са̄лы патыс. Округувт о̄лнэ са̄лыт а̄гмыл ул вос е̄мтсыт, о̄с прививкал ва̄равет. Ма̄н ка̄сыӈ та̄л са̄лыянув э̄рнэ те̄рпил тӯщтыянӯв, тыи ма̄гсыл туи порат воссыг уколыл ат ва̄рыгласанӯв. Белоярский районт о̄лнэ ма̄хум са̄лыяныл ёт Ямалн ялантэ̄гыт. Ма̄н тай мо̄т ма̄н ат воратэ̄в, тыт нё̄ранув ляпат са̄лыянӯв о̄ньщиянӯв. Ащирмаӈыг хунь е̄мты, та порат са̄лыянув нё̄выль ма̄гсыл алыянӯв. Тамле ва̄рмаль яныг таквс э̄тпос манос ва̄т са̄грапнал э̄тпос о̄вылтахтан порат ва̄рыглэ̄в». Анатолий Прокопьевич китыгласлум, ты та̄л манаса̄вит тонна нё̄выль та̄н тыналаӈкв номсэ̄гыт? Тав ювле ла̄выс: «Са̄лыянув мис хольт мисколт ат о̄ньщиянӯв, та̄н хара ма̄т ха̄йтыгтэ̄гыт. Акв ма̄н нэ̄гсалым ат о̄ньщиянӯв. Таима̄гыс манаса̄вит нё̄выль ты та̄л ва̄ре̄в, ань ат ла̄ве̄гум. 70 тонна ке ва̄ре̄в, то̄нт ёмас паты. Нас тох са̄лы са̄вмалтаӈкве о̄с ат ве̄рме̄в. Ка̄сыӈ ӯйхул тыттуӈкве э̄ри. Сака са̄в са̄лы ке паты, тэ̄пыӈ ма̄ ат то̄вылхаты. Ань манса̄вит са̄лы о̄ньщуӈкве ве̄рме̄в, ты урыл акваг номсахтэ̄в. Ка̄сыӈ бригада хӯрум со̄тыра арыгкем са̄вит са̄лы ӯри, тыил са̄внув са̄лы ке е̄мты, са̄в э̄лумхо̄лас рӯпатан виӈкве э̄ри. Ма̄хманув са̄внув олныл ойтуӈкве кос патсанув, тувыл по̄х хо̄тпат тыт рӯпитаӈкве щар ат ка̄саще̄гыт. Ань совхозт рӯпитан хо̄тпат ща̄няныла̄щаныл ёт ма̄ньта̄гыл са̄лы ӯрим яласасыт, нё̄рт яласаӈкве ханьщувласыт. Ты рӯпата сака та̄рвитыӈ, тыи ма̄гсыл та̄нки ня̄враманыл э̄лаль ханищтахтуӈкве ке̄тыяныл манос па̄вылт мо̄т рӯпатан патхатэ̄гыт. Са̄лы ӯрим та̄н та̄л сыс ащирмаӈ хо̄талыт, во̄тыӈ хо̄талыт, ре̄гыӈ хо̄талыт са̄лыяныл по̄хыт о̄лэ̄гыт. Таи ма̄гсыл ма̄хум ма̄н палтув рӯпитаӈкве ат ювыт». Ам Анатолий Валей ха̄йтнутыт урыл о̄с китыгласлум, ты утыт са̄вмысыт ман а̄ти? Кӯщай хум ты ва̄рмаль урыл тох ла̄выс: «Щар со̄ль, тамле та̄рвитыӈ ва̄рмаль о̄с о̄лы. Та̄нанылн па̄тлуптыянӯв». Ань совхозт са̄лы ӯрнэ ще̄мьят олныл нё̄тавет. Са̄лыт ловиньтан ма̄гсыл палянылн чипыт ва̄рве̄сыт. Ты рӯпата ва̄рнэ ма̄гсыл округ бюджетыл олн та̄стыглавес. Ань са̄лыт ёмащакв ловиньтаӈкве ве̄рмавет. «Саранпаульский» нампа предприятие кӯщай хум ла̄выс, тамле рӯпата нас олн холтнэ ма̄гсыл, улпыл, ва̄рыглавес. Та̄н та̄нки са̄лыяныл осэва̄та̄л утыт та̄л ёмащакв ловиньтаӈкве ве̄рмияныл. Предприятие нё̄выль тыналым олн сэ̄лы, ты коныпал ос са̄всыр сувенирыт, маснутыт, пӯркат тыналы. Ты э̄лыпа̄лт тот сувенирный цех о̄лыс. О̄влэ̄т са̄в нэ̄квет тот рӯпитасыт, ань туп хӯрум ма̄ньщи нэ̄ тот ю̄нсхатэ̄гыт. Нэ̄ хо̄тпа манаса̄вит пормас ю̄нтуӈкве ве̄рми, таса̄вит ю̄нты, планыл та̄н ат хансавет. Са̄лы кот та̄н та̄нки тынтлыяныл, пӯркат ос мо̄т пормасыт ка̄тыл ю̄нтыяныл. Ты нэ̄т са̄лыӈ колт яласан ма̄хум маснутыл пуссын ю̄нтыяныл. Анатолий Прокопьевич ла̄выс, ань ты сувенирыт, пӯркат ос мо̄т пормасыт ма̄хум о̄с лю̄льсаӈ ёвтэ̄гыт, тыи ма̄гсыл са̄внув ма̄щтыр нэ̄ та̄н совхозн рӯпитаӈкве ат выгыт.

1136 2016. 11. 24. Тамара МЕРОВА

Ма̄ньлат ма̄хум ёт вос ва̄йхатэ̄в Югорский государственный университетт о̄лнэ кӯщай нэ̄ Татьяна Карминская ос профессор хум Павел Потапов ля̄ххал хаснэ хо̄тпат ёт акванхо̄нтхатыгласы̄г. Ханищтан коланылт ма̄ньлат ма̄хум ёт хумус рӯпитэ̄гыт ос маныр ва̄ре̄гыт, ты о̄вылтыт тэ̄н потыртаӈкве во̄выглавесы̄г. Ань то̄ва тэ̄лат ма̄хумн са̄всыр проектыт хосыт э̄лаль тотавет. Номтаныл тэ̄лаг ва̄рнэ̄ныл ма̄гыс государство па̄лыл олныл нё̄тавет. Ты ва̄рмалит университетт ханищтахтын а̄гитнпыгытн пуссын ва̄вет, ос тувыл та̄н ка̄ркамыг сыресыр проектыт о̄с щё̄питэ̄гыт. Тащирыл ЮГУ ёмас номтыӈ, нэ̄матарыл ат пилнэ ос та̄нки ма̄наныл э̄руптан ма̄ньлат хо̄тпат янмалты. Акв проект «Югра молодёжная» намаим о̄лы. Ань са̄всыр потрыт хаснэ ос ма̄нь кинат ва̄рнэ касыл ущтынув о̄вылтахтас. Школат ханищтахтын ня̄врамыт ос студентыт та̄нки халанылт касуӈкве ве̄рме̄гыт. Тот хо̄т са̄всыр номинацият потраныл ос кинаныл а̄рталавет. Ма̄ньлат хо̄тпат э̄лумхо̄лас ёмас пищанэ вос ва̄ганыл ос лю̄ль накыт ёл вос по̄илттыяныл. Ты о̄вылтыт потрыт ос кинат сунсуӈкве патэ̄гыт. Ма̄ньлат ма̄хум сыресыр наркотикыт ос хохса хартнэ накыт вос ёрувлыяныл, пуста̄гыл о̄лнэ̄ныл ма̄гыс ка̄танылла̄гланыл вос та̄кмалтыяныл ос са̄в ка̄с вос тотэ̄гыт. А̄гирищитпыгрищит ма̄ньта̄гыл тох ханьщувлым о̄лэ̄гыт ке, та̄н номтыӈ хо̄тпаг яныгме̄гыт ос нэ̄мат лю̄ль ат ва̄ре̄гыт. Тувыл потрыт хаснэ ня̄врамыт ка̄саще̄гыт ке, э̄лаль ля̄ххал тотнэ тэ̄лан ханищтахтуӈкве ве̄рме̄гыт. Университет тармыл хо̄т та̄л сыс «СМИшка» касыл ва̄рыглаве. Тот а̄гитпыгыт ля̄ххалыт хансуӈкве ханищтавет, хотьют потрыт хансы, хотьют кинат ман мультфильмыт по̄слуӈкве ханищтахты, мо̄таныт телевидение манос ра̄тива ма̄гыс матыр ва̄ре̄гыт. Ты накт округ янытыл «86 региону 86 добрых дел» акция о̄вылтавес. ЮГУт ханищтахтын студентыт «Лучик» нампа а̄гмыӈмосыӈ, сакватахтам ня̄врамыт колн ялсыт, ка̄с ва̄рсыт ос мӯйлупсат тув тотсыт. Та̄н та̄л сыс иӈ са̄в тэ̄лат э̄лаль ва̄руӈкве кусэ̄гыт.

1136 2016. 11. 24. Татьяна Бахтиярова

Лӯсум ма̄ньщит ла̄тӈыл толмащлан нэ̄пак та̄ратавес А̄сугорский институт ва̄т нупыл ат та̄лэ то̄влын кастыл ме̄н С. С. Динисламовал Лӯсум ма̄хум ла̄тыӈ толмащлан нэ̄пак та̄ртсуме̄н. Нэ̄пакт ань йӣс акваг потраман ла̄тӈыт хансым о̄лэ̄гыт, матыр рӯпитан ва̄рмаль ла̄тӈыт, культура ва̄рмалит, пуссын мир о̄лнэ ва̄рмаль тувыл нас о̄лнэ хал потраман Лӯсум ла̄тӈыт пуссын тув хансым о̄лэ̄гыт. Лӯсумя̄ таляхта ань йис ма̄ньщи ма̄хмыт иӈ о̄лэ̄гыт, яныгса̄ткем хо̄тпа туп арыгтас, хоты лӯсум ма̄ньщи ла̄тӈыл потырты. Ты ла̄тыӈ толмащлан нэ̄пак о̄выл Лӯсум ла̄тыӈ нэ̄пакыг ловинтахты. Ты нэ̄пак ва̄рнэ порат ме̄н са̄всыр толмащлан нэ̄пак ёт рӯпитасме̄н: В. Н. Чернецов ос И. Я. Чернецова «Краткий мансийскорусский словарь» (1936 та̄л), Munkácsi – Kálmán «Wögulischse worterbuch» (1986 та̄л), А. Н. Баландин ос М. П. Вахрушева «Мансийскорусский словарь» (1958 та̄л), Е. И. Ромбандеева «Русскомансийский словарь» (2005 та̄л), Е. И Ромбандеева, тувыл Е. А. Кузакова «Мансийскорусский и русскомансийский словарь» (1982 та̄л), Е. И. Ромбандеева «Графика, орфография и пунктуация мансийского языка» (2006 та̄л). Ме̄н яныг пӯмащипа ла̄тыӈ ла̄виме̄н ма̄хмытын, хотьют матыр мо̄рсыӈ ла̄тыӈ атуӈкв нё̄тыс: А. А. Анямован, А. В. Анямован, А. Н. Алгадьеван, В. Н. Анямовын, В. В. Анямован, П. Т. Бахтияровын, С. П. Пеликован тувыл ос та ма̄хмытын, хотьют хуньт нё̄тыглас ты толмащлан нэ̄пак ва̄руӈкв. Сака яныг пӯмащипа ла̄ве̄в редакторн Т. Д. Слинкинан, рецензентын В. Н. Соловарн, А. Р. Станиславецн тыныӈ ёмас хӯлтыглан э̄рнэ ла̄тӈаныл ма̄гыс. Ма̄н номсэ̄в, ты толмащлан нэ̄пакув та̄кыщ э̄рмаи ос нё̄ты ханищтан хо̄тпатын, ханищтахтан ма̄хмытн, тувыл пуссын хотьютын Лӯсум ма̄хум ла̄тыӈ пӯмащиг о̄лы, хотьют ка̄сащи ты ла̄тыӈ ханищтаӈкв. А̄сугорский институт ма̄н янытлылӯв, тот рӯпитан ма̄хум сака номтыӈ хо̄тпат, вос э̄лаль тох рӯпитан ва̄рмаляныл кӯстырыщ ва̄рхаты, э̄лаль ла̄щал ущпыл са̄в ёмас, э̄рнэ матыр нэ̄пакыт вос та̄ратэ̄гыт. Кӯщаюв В. И. Спондина пуста̄гыл вос о̄лы, тав ты ва̄рмаль акваг э̄лаль ёмщакв но̄ӈхаль тотуӈкве вос ве̄рмитэ, та̄кыщ ӯргалаӈкве, тавен яныг пӯмащипа ла̄тыӈ ла̄ве̄в.

1136 2016. 11. 24. Светлана РОМБАНДЕЕВА

Соссаӈ мир янытлан ле̄ккар о̄йка Во̄ртур э̄тпост Нижневартовский район Мегион ӯст Ӯй йӣквнэ тэ̄ла ва̄нэ соссаӈ ма̄хум акванхо̄нтхатыгласыт. Та̄н халанылт ле̄ккар о̄йка о̄лыс – Валерий Леонидович Михайловский. Ам тав ётэ потрамасум, рӯпататэ урыл китыгласлум. Ты рущ о̄йка Нижневартовск ӯст о̄лы, член Союза писателей намыл майвес, ты коныпал тав ле̄ккар, исследователькраевед, этнограф, нэ̄пак хаснэ хо̄тпа, яласаӈкве ка̄сащан ос во̄раян хум. Валерий Леонидович тамле мӯтраӈ хо̄тпа та о̄лнэ̄тэ. Тав Россия янытыл о̄лнэ соссаӈ мирыт сака янытлыянэ, та̄н о̄лупсаныл пӯмщалы, ханты ма̄хум халт са̄в юрт о̄ньщи. Ань Нижневартовский районт о̄лнэ ваховский хантыт хурияныл, вильтаныл мо̄т ханты ма̄хманыл хурип а̄ти, ла̄тӈаныл о̄с мощ мо̄тнув хурипа. Ты о̄вылтыт Валерий Леонидович акваг номсыс – та̄н аман манрыг мо̄т хурипат, пе̄с порат улпыл хотты мир ёт акв ляпат о̄лсыт, тув тэ̄лыгтахтасыт. Ос хоты мир ёт та̄н ва̄йхатасыт, тавагт. 2008 та̄лт о̄йка тыи та̄рапаттуӈкве вуйхатас, кит экспедициян ялыс. Ты урыл тав тох ты потыртас: «Ам кит яныг экспедиция ва̄рыгласум, ам ётум са̄т хо̄тпа яласас. О̄выл щёс ма̄н Санкт-Петербург ӯсныл Нижневартовск ӯс мус тӯйт тармыл яласан «Бураныл» 5 со̄тыра 700 ве̄рыста минасӯв. Миннэ̄в мус ма̄нь па̄влытын хо̄игла̄лсӯв, ма̄хум ке̄лпаныл анализ ма̄гыс висӯв. Ты э̄лыпа̄лт ам Томск ӯст о̄лнэ генетика институтыт рӯпитан учёныит ос ле̄ккарыт ёт потыртахтасум, ань винэ ке̄лпанув та̄н анализыг вос ва̄рияныл, то̄нт тах ханты ма̄хманув тэ̄ланыл та̄рапаттыянӯв. Со̄ль, хунь юв ёхтысӯв, атум ке̄лпанув тув тотсанӯв. Тувыл мо̄т ма̄н ялсӯв, Вах я̄ ва̄тат о̄лнэ хантыт палт минасӯв. Тув мус ос со̄тыра арыг ве̄рыста «Бураныл» минасӯв. Тот ханты ма̄хум ке̄лпаныл висӯв, ювле та йисӯв. Ке̄лпаныл о̄с акв та институтн тотсанув. Ле̄ккарыт анализ ва̄рсыт, тувыл потыр ма̄гыс а̄нум та̄нти палтаныл во̄всаныл, ла̄ве̄гыт, ты ма̄хум ке̄лпаныл саран ма̄хум ке̄лп хурипа. Яты, насати Вах я̄ ва̄тат о̄лнэ ханты ма̄хум пе̄с порат сараныт ёт акв ляпат о̄лмыт, таима̄гыс та̄н ань акв хурипнувет. Ты сака яныг рӯпата о̄лыс. Тув ялмум юипа̄лт ам «Великий северный путь» нампа нэ̄пак хассум. Хо̄т о̄лсув, хумус яласасӯв, хотьют ёт хо̄нтхатыгласӯв, ам тот пуссын хассум. Лё̄ӈхув та̄рвитыӈ те̄пыл сака пӯмыщ о̄лыс. Ам пе̄с щирыл о̄лнэ рущ ма̄хум ка̄салаӈкве сака тахсум, рущ ла̄тӈыл та̄н ла̄вавет – староверы. Амтирот номсысум, ань тамле ма̄хум улпыл воссыг а̄тим. Тав сар хумус а̄тим, тамле э̄лумхо̄ласыт ма̄н хо̄нтсӯв – та̄н пе̄с щирыл о̄лэ̄гыт, То̄рум нупыл сунсэ̄гыт, нэ̄мат ищхӣпыӈ ут манос кина суссылтан то̄тап ат о̄ньще̄гыт. Рущ мир маныр ёмас тэ̄ла ва̄рыглас ос манхурип ёмас номт о̄ньщас, та̄н та пе̄с ма̄хманыл хольт та о̄лэ̄гыт, та йис о̄лупсаныл э̄лаль та тотыяныл. «Великий северный путь» нэ̄пакумт ам ханты юртагум потранэ̄н хассагум. Нижневартовский район Корлики па̄выл ляпат о̄лнэ соссаӈ хо̄тпаг – Илья Прасин ос Александр Могульчин ка̄сыӈ хо̄тал потырохса хасмы̄г, рущ щирыл ла̄ваве – дневник. Ты потранэ̄н тэ̄н 20 ман 25 та̄лтем хаснэтэ̄н. Тэ̄н хунь а̄нум ты урыл ла̄всы̄г, ам пӯмщалахтуӈкве патсум. Тэ̄н ла̄вме̄н щирыл, нас хассы̄г, ань ка̄сыӈ хо̄тал маныр ва̄рсыг, хоталь ялсы̄г. Акв хум во̄рт о̄лы, мо̄т па̄влын мо̄рсыӈ порат яланта̄лы. Мо̄т хум ос па̄влыӈ ма̄т о̄лы, тав палтэ рӯтанэ ёхталэ̄гыт, рущ ос мо̄т мирыт ёт ва̄щинтахты, потрами. Тэ̄н потранэ̄н а̄нумн мисанэ̄н, вос ловиньтыянум, нэ̄пакын хансуӈкве ка̄сащасы̄г. 2005 та̄л сыс хансум потранэ̄н висанум, ловиньтасанум, тувыл нэ̄пакын хассанум. Ам номсэ̄гум, тох улпыл воссыг нэ̄мхотьют ат хансы. Ты потрыт хосыт пуссын на̄ӈки, ань соссаӈ хо̄тпа хумус о̄лы – во̄р ма̄т о̄лнэ хо̄тпа нэ̄мхотьют ёт ат ва̄щинтахты, нэ̄мат ищхӣпыӈ ут ат о̄ньщи, ос па̄влыӈ ма̄т о̄лнэ э̄лумхо̄лас мо̄т щирыл о̄лы. Ты нэ̄пак ка̄тынпаттылы̄н те, потранэ̄н ловиньтэ̄н, сака пӯмыщ». Валерий Леонидович Украинат самын патыс. Лӯи ма̄н 1976 та̄лт ёхтыс. О̄влэ̄т Екатеринбург ӯст ле̄ккарыг рӯпитас, тувыл 1980 та̄лт Нижневартовск ӯсн ва̄нтлыс. Тав а̄тятэ хо̄нтлын ма̄т о̄лыс, тот саквата̄лвес, юв ёхталас, тувыл та нюлмиянэ̄т акваг а̄гмыл хартыс, хоса ат о̄лыс. Оматэ пӯпколн ялантас, монахиняг о̄лыс, тав ань о̄с а̄тим. Валерий Леонидович каӈк ос а̄пщи о̄ньщи, акватэ Украина ма̄т о̄лы, мо̄танэ тыг, Лӯи ма̄н ва̄нтлыс, на̄иӈтуйтыл щуртым яласы. Кит а̄ги о̄ньщи, акв а̄гитэ Санкт-Петербург ӯст о̄лы, тав хольтэ ле̄ккарыг рӯпиты, мо̄т а̄гитэ ос мо̄т хо̄н ма̄т Канадат о̄лы, ханищтан нэ̄г рӯпиты. О̄йка э̄лаль тох потыртас: «А̄гиягум ам ва̄рнэ тэ̄лам сака э̄руптытэ̄н, хансум нэ̄паканум ловиньтыянэ̄н, соссаӈ ма̄хум янытлыянэ̄н. Ма̄ниг о̄лме̄н та̄гыл ма̄н колувн акваг ханты ма̄хум ёхталасыт, ӯнлахо̄лсыт, потрамасыт, то̄ванакт э̄т хӯлсыт. Ам ханты хум Кузьма Михайлович Покачев колта̄глэ ёт ва̄йхатэ̄гум, тав ня̄враманэ ма̄нь та̄гыл ма̄н палтув ёхталасыт, а̄гиягум ёт ёнгасасыт. Тэ̄н ань та ма̄хум о̄вылтыт акваг китыглахтэ̄г, хумус та̄н о̄лэ̄гыт, ва̄щинта̄лыянум ман а̄ти. Ам та̄н палтаныл о̄с акваг яланта̄лэ̄гум, то̄ванакт отпускам порат ханты ма̄хманум палт минэ̄гум, та̄н халанылт э̄тпостем о̄лэ̄гум. Ань соссаӈ мирыт акваг мощщаг хультмыг ла̄вавет, ты ла̄тыӈ а̄нум щар ат мӯсты. Со̄ль та̄н мощщаг о̄лэ̄гыт, ос ма̄ янытыл о̄лнэ мирыт ма̄гыс, цивилизация ма̄гыс та̄н сака яныг па̄рыс тотэ̄гыт. Ань ма̄ янытыл о̄лнэ мирыт та̄нтина̄ныл моще̄ртн витыг ты тотыяныл, матыр йильпи ут, сыресыр ищхӣпыӈ ут, та маныр акваг та ва̄ре̄гыт. То̄ва ма̄хум ты урыл ань номсэ̄гыт. Хунь о̄лупса сака та̄рвитыӈыг е̄мты, то̄нт тах соссаӈ мирыт кисмаявет, ма̄хум та̄нанылныл о̄луӈкве ханищтахтуӈкв патэ̄гыт. Ма̄навн соссаӈ ма̄хум хольт о̄луӈкв э̄ри. Та̄н ма̄вит ат па̄ӈктэ̄гыт, та̄нти На̄й-О̄тыраныл нупыл по̄йкщим о̄лэ̄гыт, То̄рум нупыл сунсэ̄гыт. Ма̄к ла̄вуӈкве те, та̄н То̄рум о̄луӈкв ха̄сэ̄гыт. Ань йис ма̄хум соссаӈ мирыт хольт о̄луӈкве ат те ханьщувлэ̄гыт, хуньт матыр лю̄ль нак е̄мты, тах э̄лаль о̄лнэ хо̄тал ат хо̄нтэ̄в. Тамле пилыщмаӈ нак ань на̄ӈки. Ща̄нь ла̄тыӈ урыл са̄в потыр хӯлыглэ̄гум, ос соссаӈ мирыт йильпи щирыл о̄луӈкв патэ̄гыт те, ла̄тӈаныл атхунь хотталь со̄йми. Яныг ӯст ма̄хманув та̄нти ла̄тӈыл потыртаӈкве хунь патэ̄гыт. Ща̄нь ла̄тыӈ са̄лы о̄щнэ ос янмалтан ма̄т, пил ва̄тнэ ос пум са̄грын ма̄т суйты. Ка̄сыӈ ма̄т соссаӈ мирыт та̄нти ма̄наныл ма̄гыс яныг па̄рыс тотэ̄гыт. То̄ва соссаӈ мирыт странаныл е̄рт ос ма̄к ащирмаӈ ма̄т о̄лэ̄гыт, тамле ма̄т ка̄сыӈ мир о̄луӈкве ат ве̄рми. Ма̄хум тот о̄лнэ̄ныл ма̄гыс та ла̄ве̄в: ма̄н странав яныг. Хо̄т э̄лумхо̄лас ат о̄лы, та ма̄ о̄лнэ ма̄г ат ла̄ваве, тав нас ма̄, тот нэ̄матыр а̄тим, нэ̄мхотьют ат о̄лы. Тувыл ка̄сыӈ соссаӈ мир такви культура о̄ньщи, ла̄тӈе мо̄т хурипа. Ма̄ньщит ос хантыт хольт пе̄с щирыл о̄лнэ рущ ма̄хум манос хатанит, башкирыт яныг ӯсытныл э̄лын о̄лэ̄гыт, пе̄с хольт о̄лэ̄гыт, То̄рум нупыл сунсэ̄гыт. Та̄н о̄лнэ̄ныл хосыт ма̄ о̄лнэ ма̄г та ла̄ваве». Валерий Леонидович научнопопулярный нэ̄пакыт коныпал ловиньтан нэ̄пакыт хансы. Во̄раяӈкве сака э̄рупты, во̄рн ва̄тихал яланта̄лы. Аквматнакт а̄гитэ палт э̄лы хо̄н ма̄н Канадан ялыс, тот индейцыт ёт ва̄йхатас, та̄н ётаныл во̄раяс. Ты о̄йка са̄в ма̄т яласас, са̄в ма̄хум ёт хо̄нтхатыглас, потыр са̄в о̄ньщи. Таве ялум лё̄ӈханыл урыл китыгласлум, ань Санкт-Петербург ӯсныл Нижневартовск ӯс мус хоты ӯсыт ос па̄влыт та̄ра минасыт. О̄йка ювле ла̄выс: «Санкт-Петербург ӯсныл вепс ма̄хум палт Винница па̄вылн хо̄игласӯв, тувыл Пудож ӯс та̄ра минасӯв, Плесецк, Архангельск, Нарьян-Мар, Печора, Вуктыл, Приполярный, Саранпа̄выл, Приобье, Лянтор, Сургут ос Нижневартовск. Ты лё̄ӈхув урыл ищхӣпыӈ утыт о̄с хансым о̄лы, хумус ма̄н яласасӯв, тот ловиньтаӈкве ро̄ви». Тамле мӯтраӈ хо̄тпа ёт та хо̄нтхатыгласум, потрамасум. Валерий Леонидович хо̄тпа нупыл сымыӈ о̄йка, нёмса э̄лумхо̄лас. Са̄в та̄л пуста̄гыл вос о̄лы, То̄рум ёт, О̄тыр ёт вос о̄лы!

1136 2016. 11. 24. Тамара МЕРОВА

Са̄ӈквылтапыт ва̄руӈкве ханищтаве̄сыт Сургут, Ханты-Мансийск ӯсыгт ос районытыт клубколт рӯпитан ма̄хум Ханты-Мансийскат о̄лнэ «Культура» нампа колн ханищтахтуӈкве во̄выглаве̄сыт. Мӯй хо̄тпат та̄нки рӯпатанылт о̄лнэ са̄всыр та̄рвит тэ̄ланыл урыл потыртасыт. Ань халанылт хӯлтыглахтым са̄всыр проектыт, грант манос субсидия олныт урыл потыртасыт, культурат хоты хо̄тпат рӯпитаӈкве ве̄рме̄гыт, ты о̄вылтыт та̄н аквъёт ла̄тыӈ ва̄рсыт. Тувыл та̄нки рӯпатаныл ма̄гыс са̄всыр отчётнэ̄пакыт китыглавет. То̄ват ты рӯпата ат торгамтыяныл ос нэ̄паканыл лю̄льсаӈ хансыяныл. Ань та̄наныл э̄рнэ щирыл хумус щё̄питаӈкве э̄ри, пуссын ханищтаве̄сыт. Соссаӈ ма̄хум са̄ӈквылтап ва̄рнэ ос йӣквыт суссылтан мӯй хо̄тпат ма̄гыс ханищтапы̄г ва̄рыглавесы̄г. Анатолий Вадичупов са̄ӈквылтапыт ва̄руӈкве пыгыт ханищтас. Тав палтэ кит ма̄ньлат пыгыг Евгений Миляхов ос Василий Перетятко ханищтахтасы̄г. Мо̄т пыгыт нас пӯмщалахтасыт ос рӯпатаныл суссыт. Тамле ханищтапыт ань ва̄тихал ва̄руӈкве патавет тах, таима̄гыс ты «Культура» колт мастерскойколнак пӯсвес. Ань са̄ӈквылтаӈкве ханищтахтын урокыт суссылтаӈкве тот о̄с патавет. Ты о̄вылтыт Светлана Нестерова, соссаӈ ма̄хум пе̄с накыт э̄лаль тотнэ нэ̄, потыртас: «О̄выл акв тамле ханищтапыг Дмитрий Георгиевич Агеевн 2001 та̄лт ос ётыл 2005 та̄лт ва̄рыглавесы̄г. Ма̄хум то̄нт «Са̄лы лё̄ӈх» нампа театрыт рӯпитан Георгий Лелятовын ос Наталья Истоминан са̄ӈквылтапыл ёнгуӈкве ханищтаве̄сыт. Анатолий Вадичупов са̄ӈквылтапыт ва̄руӈкве тув о̄с во̄выглавес. Та юипа̄лт РФ культура министерстватэ ос финноугор ма̄хум центр акваннё̄тхатым са̄ӈквылтапыт ва̄руӈкве ос та̄ныт ханищтан урыл потыртахтасыт. 2010 та̄лт койпыт ва̄руӈкве Дмитрий Нимперов ма̄хум ханищтаӈкве во̄выглавес ос нарсъюхыт, са̄ӈквылтапыт Гаврил Кунин ос Александр Вьюткин ва̄рсы̄г. Та̄ныт са̄ӈквылтаӈкве Валентина Перован, Наталья Истоминан ос Владимир Меровн ханищтаве̄сыт. Тувыл 2012 та̄лт тумраныт ва̄руӈкве ос хумус ёнгуӈкве э̄ри, Яков Тарлин, Николай Тасьманов ос Яков Аликов суссылтасыт. Киров ӯсныл то̄нт Александр Кулиш ёхталас, тав варганыл ёнгуӈкве ма̄хум ханищтас. Ос 2014 та̄лт нэ̄рнэ йӣв ва̄рнэ ханищтап о̄лыс. Тот Дмитрий Нимперов, Сергей Кечимов, Анатолий Вадичупов ос Герман Хатанзеев рӯпитасыт. Ты туи порат Анатолий Вадичупов та̄рыгсыплув йӣв ва̄рыс. Ань ты тэ̄лат э̄лаль тотнэ ос ня̄врамыт ханищтан ма̄гыс ты колнак ва̄рвес». Ханты пыг Евгений Миляхов хосат та̄гыл са̄ӈквылтап ва̄руӈкве таӈхыс, ос тамле ханищтап урыл хӯнтамлас, та̄ра тыг молямлас. Тав ла̄выс: «Туи порат ам Анатолий Васильевич палт ялсум, тот мощ ханищтаве̄сум. Ань э̄лаль рӯпитэ̄гум, ма̄н ань хотаӈ ва̄ре̄в. А̄нумн тыт мӯсты, ва̄тихал тыг ёхталаӈкве патэ̄гум тах». Василий Перетятко хо̄нтаӈ ма̄ньщи пыг, ЮГУт программный инженериян ханищтахты. Тав пе̄с накыт акваг пӯмщалыянэ, мо̄лал университетт анкета хансыс, тав са̄ӈквылтапыл са̄ӈквылтаӈкве тахнув кос. Тувыл свонитавес, китыглавес ос тыг во̄ввес. Василий ла̄выс: «Ам тыт амки самагумтыл сунсэ̄гум, маныр хумус ва̄руӈкве э̄ри. Ань амки хотаӈ ва̄ре̄гум. Тувыл ты утум а̄сты, таве̄тыл са̄ӈквылтаӈкве ханищтахтэ̄гум тах». Анатолий Васильевич ты рӯпататэ̄т ща̄гт тоты. Са̄ӈквылтапыт манос мо̄т са̄ӈквылтан утыт ва̄рнэ ма̄гыс такви йӣв та̄сты. Рӯпитан колнаке̄н пуссын э̄рнэ утыт тотыс. Ань са̄ӈквылтан утаныл ке̄р та̄ныл хартыяныл, таима̄гыс суяныл мо̄т щирыл о̄лэ̄гыт. Са̄ртын лув а̄тыл ос сыс та̄ныл ва̄рве̄сыт. Ань тай то̄ва пе̄с наканув ювле та хультсыт. Нэ̄ хотпат ма̄ньщи йӣкв йӣквуӈкве ханищтаве̄сыт. Ты урыл мо̄т газетат хансэ̄гум тах. Та̄н ётаныл Фаина Иштимирова рӯпитас.

1136 2016. 11. 24. Николай МЕРОВ

Ӯщлахтын ма̄т урыл суссылтап о̄лыс Ты та̄л яныг таквс э̄тпост «ЮграТур 2016» атхуйпловит суссылтап Ханты-Мансийск ӯст щё̄пита̄лвес. Ты тэ̄ла э̄лаль тотнэ ма̄гыс округ мирколт ос Россия культура Министерстват рӯпитан хо̄тпат яныг нё̄тмил ва̄рсыт. Ты суссылтапн округ кӯщай ва̄ӈын хум Алексей Забозлаев, Россия культура Министерстват туризм ва̄рмаль щирыл рӯпитан хум Андрей Рамеев, Крым ма̄т ӯщлахтын тэ̄ла э̄лаль тотнэ кӯщай ва̄ӈын хум Игорь Котляр ос мо̄т кӯщаит ёхталасыт. Тот ма̄хум та̄нки ва̄рнэ рӯпатаныл урыл мирн потыртасыт. Ты суссылтапыт хосыт ань Югра ма̄вт са̄внув э̄лумхо̄лас ӯщлахтуӈкве ёхталаӈкве патыс. Акванатхатыглан ва̄рмаль таима̄гыс э̄ри, тыт та̄нки халанылт мо̄т ма̄ныл ёхталан хо̄тпат ёт рӯпатанылт хӯлтыглахтэ̄гыт, хумус ты тэ̄ланыл ёмщакв ва̄руӈкве – аквъёт номсахтэ̄гыт. Ань Россия янытыл са̄всыр ма̄ныл пуссын аквъёт китса̄т арыгтем проект тыг тотыглавес. Ма̄н округувныл туризм ва̄рмаль щирыл хӯрумхуйплов проект щё̄пита̄лвес. Суссылтап о̄вылтым хо̄талт Алексей Забозлаев ла̄выс: «Ка̄сыӈ та̄л яныг таквс э̄тпост ма̄н округувт тамле пӯмащ суссылтап щё̄пита̄лаве. Мир са̄всыр ма̄ныл мӯйлуӈкве тыг ёхталэ̄гыт. Ма̄н палтув ань Крым ма̄ныл Евпатория ӯсныл туризм щирыл рӯпитан хо̄тпат ёхталасыт. Пуссын аквъёт налыманкем ма̄ныл ма̄хум тыт о̄лсыт. Чешский республиканыл ма̄хум о̄с ёхталасыт. Округувт соссаӈ мир о̄лупса э̄лаль тотнэ щирыл са̄в ӯщлахтын ма̄т щё̄питавет. Ты та̄лув Югра ма̄вт ня̄врамыт янытлан та̄лыг ла̄ввес. Таима̄гыс са̄выӈпа̄лэ суссылтапыт ня̄врамыт ма̄гыс ва̄рсанӯв. Ня̄врамыт, яныг хо̄тпат аквтем э̄лы ма̄н ялуӈкве ка̄саще̄гыт. Ам на̄нан ма̄н палтув мӯйлуӈкве во̄виянум. Ӯщлахтуӈкв тыг о̄с ёхталэ̄н, на̄н яныг ща̄гтыл тыт ӯраве̄н. Тыт на̄н ма̄гсылын са̄в пӯмащ ва̄рмаль та̄стым о̄лы. Та̄нки предприятие о̄щнэ хо̄тпат ам пуссын янытлыянум». Тав юипа̄лэ̄т ос Андрей Рамеев потыртас. Тав ма̄хум ёт пащалахтас ос Россия культура Министр кӯщай хум ке̄тум ла̄тӈе ловиньтастэ. Тав ла̄выс, ты порат ма̄хум ӯщлахтын ва̄рмаль урыл щар са̄в проект щё̄питасыт. Ты рӯпата ва̄рнэ хо̄тпат тав пуссын янытласанэ. Тувыл ос Крымт о̄лнэ ӯщлахтын ма̄т уральтым рӯпитан кӯщай хум Игорь Котляр потыртас, тав ла̄выс: «Ты суссылтапн ма̄н китынтыг ёхтысӯв. Ма̄навн ты ва̄рмаль сака э̄ри, ӯщлахтын ма̄в урыл мир са̄внув вос ва̄гыт ос ма̄нки ма̄вт вос ӯщлахтэ̄гыт. Китыт хо̄тал тыт Крым хо̄талыг ла̄ввес. Тыима̄гыс ам тыт о̄лнэ ма̄хумн яныг пӯмащипа ла̄тыӈ ла̄ве̄гум. Ма̄н палтув ӯщлахтуӈкве ёхталэ̄н, ма̄н на̄нан сака ӯриянӯв». Ты порат суссылтапн ты хо̄тпат атхатыгласыт: тэ̄лы порат касыл ва̄рыглан хо̄тпат, ӯщлахтын ма̄т щё̄питан ма̄хум, пе̄с йис щирыл ӯщлахтын ва̄рмаль, ӯщлахтын колыт, тэ̄нэ колыт о̄щнэ хотпат ос мо̄таныт. Та̄н Краснодарский, Ставропольский крайныл, Владимирский, Томский, Тюменский областитныл, Санкт-Петербург ӯсныл, Кавказ, Якутия, Камчатка ма̄ныл тыг ёхталасыт. Ма̄вит ӯргалан департамент палт туризм щирыл рӯпитан нэ̄ Инна Арканова ла̄выс: «Ма̄н округувт ты ва̄рмаль ёмщакв э̄лаль тотаве. Ха̄льӯс, Сургут, Нижневартовск, Октябрьский, Белоярский ос мо̄т районытт соссаӈ ма̄хманув са̄в ӯщлахтын ма̄т щё̄питасыт, та̄нки олн сэ̄лэ̄гыт. Мӯй ма̄хум йис ма̄т соссаӈ мир о̄лупса ханищтэ̄гыт ос та̄н хольтаныл о̄лэ̄гыт. Тувыл ань ты накт ӯйхул янмалтан са̄в пе̄рма пӯнсуӈкве патвес. Тув о̄с ялуӈкве ро̄ви. Ань ты тэ̄лат э̄лаль тотнэ ма̄гыс государство па̄лыл нё̄тмил ва̄раве. Округ бюджетныл та̄нки рӯпата ва̄рнэ хо̄тпатн субсидияолн ос грантолн акваг майлаве». Ты суссылтапн Советский районныл Татьяна Сысоева ёхталас. Ты ма̄ньщи нэ̄ «Окунёвские зори» нампа ӯщлахтын ма̄т рӯпиты. Ты ма̄ Югорск ӯсныл э̄лаль са̄тхуйплов ве̄рыста палыткемт сымриӈ тӯр ва̄тат о̄лы. Тот пе̄с щирыл а̄мпарыт, сӯмъяхыт ос о̄лнэ колыт ӯнттуве̄сыт. Та ӯщлахтын ма̄н ма̄хум ще̄мьяӈ та̄гыл ялантэ̄гыт. Ня̄врамыт тот ёнгалтавет ос са̄всыр касылытыл щё̄пита̄лавет. Яныгпа̄ла хо̄тпатн сыстам ма̄вит тармыл ӯщлахтуӈкве о̄с сака мӯсты. Яныг ӯсытт о̄лнэ ма̄хум ще̄мьяӈ та̄гыл тув ялэ̄гыт. Белоярский районныл Касум па̄вылныл такви са̄лыянэ о̄щнэ нэ̄ Валентина Тарлина ёхталас. Тав ще̄мьятэ ёт йис ма̄нылт са̄лыяныл о̄ньщияныл. Тэ̄н о̄йкатэ̄нтыл па̄вылт о̄лнэ музей ос кит туристический фирма ёт договорнэ̄пак хассы̄г, ань та̄н аквъёт рӯпитэ̄гыт. Пе̄с йис ма̄тэ̄н та̄л сыс хӯрум со̄тыратем туристхо̄тпа мӯйлуӈкве ёхталы. Та̄н тот во̄раян хо̄тпат алщаныл сунсэ̄гыт, са̄лыӈ суныл тотыглавет, пе̄с йис пормасыт атнэ колн щалтсэ̄гыт, «Бураныл» яласэ̄гыт, хӯл алыщлэ̄гыт ос атыӈ тэ̄нут а̄рталэ̄гыт. Ты суссылтапын тав ка̄сыӈ та̄л ёхталы. Йис ма̄тэ̄т мольщаӈыт, са̄лы котыл ня̄рат ос мо̄т са̄всыр пормасыт ма̄щтырыг ю̄нты. Ю̄нтнэ утанэ мирн о̄с сака ёмщакв ёвтавет. Пыть-Ях ӯсныл Наталья Поянкина ёхталас. Ты нэ̄ сусылтапытн о̄с акваг во̄виньта̄лаве. Тав ӯс по̄хыт пе̄с йис пормасыт атнэ колт рӯпиты. Тот са̄всыр пормасыт ю̄нтуӈкв, сакныл хартуӈкв, ква̄лгыл сагуӈкв ня̄врамыт ханищтыянэ. Та ӯщлахтын ма̄ о̄с во̄р ляпат ӯнттым о̄лы. Та̄л сыс тув са̄в мир ӯщлахтуӈкве ёхталы. Ты коныпал о̄с са̄в мо̄т хо̄тпат та̄нки рӯпатаныл суссылтаӈкве тыг ёхталасыт. Суссылтап щё̄пита̄лум кол э̄лыпа̄лт кит ё̄рнколыг тӯщтала̄лвесы̄г. Акв ё̄рнколт ща̄й па̄йтвес ос тэ̄нут ва̄рвес. Мо̄т ё̄рнколт по̄слахтын ма̄гыс сахи ос мольщаӈ масыглаӈкве ро̄выс. Хотьют ка̄сащас, са̄лыӈ суныл тотыглаве̄сыт. Ты суссылтап ка̄сыӈ та̄л ва̄рыглаве, мир сака пӯмщалахтасыт. Ма̄хум тыт хӯрум хо̄тал рӯпитасыт. Е̄ӈта пасан ва̄тан акванатхатыгласыт, та̄рвит ва̄рмаляныл урыл потрамасыт. Та̄нки халанылт са̄в договорнэ̄пакыт хассыт, акваннё̄тхатым рӯпитаӈкве потыртахтасыт. Суссылтап колт ос са̄всыр конкурсыт щё̄пита̄лве̄сыт, ма̄хум ма̄щтырлаӈкве ханищтаве̄сыт. Ня̄врамыт ма̄гыс ёнгын колнак рӯпитас. Ты хо̄талыт сыс тув са̄в хо̄тпа выставка сунсуӈкве ёхталас.

1136 2016. 11. 24. Тамара МЕРОВА

«Северяночка» нампа колт мӯйлысӯв Ты та̄л округувт ня̄врам янытлан та̄лыг намтым о̄лы. Кӯщаянув та̄наныл уральтыяныл ос са̄всыр щирыл нё̄тыяныл. Ма̄н нила хо̄тпа, тыи мирколт рӯпитан нэ̄ Людмила Алфёрова, соссаӈ ма̄хум газетагт кӯщаиг о̄лнэ нэ̄ Раиса Решетникова, ханты газетат ля̄ххал хаснэ нэ̄ Ирина Самсонова ос ам, ты э̄тпост Нягань ӯсн ялсӯв. Ма̄н тот савалап ня̄врамыт о̄лнэ «Северяночка» нампа колт мӯйлысӯв. Ма̄н тув ёхтынэ̄в э̄лыпа̄лт ня̄врамыт ӯйрищит ма̄гыс ма̄нь колсовыт тагатаӈкве кон ялмыт. Ты ёмас сымыӈ тэ̄ла «86 региону 86 добрых дел» нампа акция щирыл та̄н ва̄рсыт. Ос па̄рт ло̄мтытыл колсовыт а̄гирищитпыгрищит та̄нки ка̄тыл ва̄рмыт. Та̄н центранылт са̄всыр ма̄щтырлан колнакыт о̄лэ̄гыт. Ты о̄вылтыт ма̄навн ты колт кӯщай ва̄ӈын нэ̄ Елена Анатольевна Логинова ла̄выс ос тувыл ма̄навн пуссын колнакыт суссылтасанэ. Ня̄врамыт ёмас, сыстам колнакытт о̄лэ̄гыт, матыра̄ти э̄рнэ утыт о̄ньще̄гыт. Кит а̄гирищиг палт щалтсамув порат о̄лупсатэ̄н урыл китыгласагӯв. Алина ос Озода ювле ла̄всы̄г, тэ̄натэ̄н тот о̄луӈкве сака мӯсты. Та̄н ёмащакв тыттавет, та̄нки халанылт юртыӈыщ о̄лэ̄гыт. Марщумлаӈкве ат а̄лымавет, акваг матыра̄ти ва̄ре̄гыт, э̄типа̄лаг э̄ргуӈкве ман йӣквуӈкве ханищтахтэ̄гыт. Тувыл ялпыӈ хо̄талыт порат концерт ва̄ре̄гыт манос мо̄т центрыт ёт касэ̄гыт. Тот та̄н ёмас, сымыӈ хо̄тпатн ханищтавет. Матыр та̄рвит е̄мталан порат та̄н ётаныл са̄всыр педагогыт, психологыт, ле̄ккарыт рӯпитэ̄гыт. Ня̄врамыт я̄нас колнакн во̄выглавет, тот пусмалтахтын ма̄гыс э̄рнэ утыт о̄лэ̄гыт. Ты центрыт ща̄ньа̄щта̄л хультум ня̄врамыт о̄лэ̄гыт, та̄н ётаныл, ва̄им, ёмас номтыл потыртаӈкве э̄ри. Ӯйрищит ма̄гыс та колсовыт та̄н мастерскойколнакт ва̄руӈкве нё̄тве̄сыт. Тот рӯпитан хум Владислав Геннадьевич Вялков а̄гирищитпыгрищит сыресыр пормасыт ва̄руӈкве ханищтыянэ. Ма̄н тот хантыт ос ма̄ньщит о̄щнэ са̄ӈквылтап, тӯпыт, а̄ныт ос хансал ва̄рим пормасыт ка̄сала̄лсанӯв. Тувыл акв колнакт ня̄врамыт нё̄тнэ маснутыт ю̄нтуӈкве ханищтавет. Са̄всыр хорамыӈ супыт ю̄нтэ̄гыт ос мо̄т акв тамле центрыт халт «Созвездие» нампа окружной касылт касэ̄гыт. Та̄н о̄выл местал майве̄сыт. Ань ос акв касылн щё̄питахтэ̄гыт, ты та̄л та̄н рущ ма̄хум маснутаныл суссылтэ̄гыт тах. Тувыл акв яныг колнаканыл музеиг ва̄рсаныл, акв па̄лэ̄т хо̄нтлуӈкве ялум хо̄тпат урыл потыртэ̄гыт, мо̄т колнакт рущ ма̄хум пе̄с пормасаныл акванатве̄сыт. Ня̄врамыт тот урокыл ва̄рыглавет. Та̄н палтаныл ва̄тихал «Союз добровольцев России» нампа организацият о̄лнэ хо̄тпат щалтсэ̄гыт. Тот кӯщаиг Юлия Трушкова о̄лы, тав ётэ рӯпитан нэ̄тхумыт матыр нё̄тмил акваг ва̄ре̄гыт. Ня̄врамыт ма̄гыс са̄всыр ханищтахтын щё̄сыт щё̄пита̄лэ̄гыт ос пӯмыщ хо̄тпат ёт ва̄йхатуӈкве тотыглыяныл. Ма̄н ань та̄нанылн ос ма̄нки рӯпатав о̄вылтыт потыртасӯв. Ханты ос ма̄ньщи газетагув суссылтасагӯв, Андрей Тарханов хансум нэ̄паканэ та̄нанылн мӯйлуптасанӯв. Ос тувыл а̄канит ю̄нтуӈкве ханищтасанӯв. Ва̄рум а̄каняныл та̄нкина̄нылн висаныл. Ты э̄лыпа̄лт а̄гирищит ма̄навн э̄ргыт э̄ргысыт. Ня̄врамытын ань паща ла̄тыӈ ке̄тэ̄в, пуста̄гыл вос о̄лэ̄гыт, ос нэ̄мат лю̄ль нак та̄н палтаныл ул вос е̄мталы.

1137 2016. 12. 08. Людмила Теткина

Ханищтан хо̄тпат рӯпатаныл мощ кӯпнитыг паты Ва̄т са̄грапнал э̄тпос о̄вылтахтам порат губернаторув Наталья Комарова ва̄ӈын хо̄тпанэ сапра̄нин акванатыгласанэ. Та порат яныг кӯщай нэ̄ Москва ӯст о̄лыс ос ма̄хманэ ёт кина суссылтан то̄тап хосыт потыртас. О̄влэ̄т ня̄врамыт ханищтан хо̄тпат рӯпатаныл урыл потыр о̄лыс. Ань ты ма̄хум са̄всыр отчётнэ̄пакыт хансуӈкве акваг ла̄вавет, ты рӯпата ва̄рим ня̄врамыт мӯсхалыг ханищтаӈкве та̄н ат а̄лыме̄гыт. Ты урыл Наталья Комарова ла̄выс: «Ань то̄ва ханищтан хо̄тпат акв та̄л сыс 18 са̄всыр отчётнэ̄пак хансэ̄гыт. Тувыл ты нэ̄пакыт манрыг та̄н хансуӈкве ла̄вавет, щар нэ̄мхотьют ат ва̄г». Ты сапра̄нин Ханты-Мансийск ӯст №3 школат рӯпитан нэ̄ Наталья Чернышева во̄виньта̄лвес ос ты рӯпата урыл китыглавес. Нэ̄ ла̄выс, ань ня̄врамыт ханищтан хо̄тпат туп ищхӣпыӈ утыт хосыт са̄всыр нэ̄пакыт хансэ̄гыт. Тот хансым отчётнэ̄пакыт та̄ра са̄всыр ма̄н ке̄туӈкве ве̄рме̄гыт, акв ты рӯпата са̄в щёс ва̄руӈкве воссыг ат э̄ри. 2017 та̄лт туи порат ня̄врамыт хумус ӯщлахтуӈкве патэ̄гыт, кӯщаит та урыл о̄с потыртасыт. Наталья Комарова ла̄выс: «Ӯщлахтын пора мус иӈ хоса, тувыл ты рӯпата ва̄руӈкве ань о̄вылтахтэ̄н. Туи ня̄враманув ёмщакв вос ӯщлахтэ̄гыт». Тувыл кӯщаит пе̄с йис ма̄нылт о̄лнэ соссаӈ ма̄хум урыл потыртасыт. Ань Нижневартовский, Сургутский, Нефтеюганский, Ханты-Мансийский районытныл ос Радужный ӯсныл ма̄во̄й но̄хвинэ ма̄гсыл на̄йпос ке̄рква̄лгыт хартуӈкве патавет ос мо̄т э̄рнэ утыт ӯнттавет. Ты ва̄рмаль урыл колыт ӯнттын департаментыт рӯпитан хум Рустам Сафин ла̄выс: «Ань ма̄во̄й но̄хвинэ ма̄хум 13 объект ӯнттуӈкве патэ̄гыт. Хӯрум тамле утыт та̄н пе̄с йис ма̄нылт о̄лнэ соссаӈ ще̄мьят палт ӯнттыяныл». Губернаторув ос ювле китыглахтас, со̄ль ман а̄ти, та ма̄т о̄лнэ ще̄мьят ма̄во̄й но̄хвинэ ма̄хум та̄нки палтаныл та̄ртуӈкве ка̄сащасыт. Ос манхурип номт та̄н ты ва̄рмаль урыл о̄ньще̄гыт, китыглаве̄сыт. Рустам Сафин ла̄вме щирыл, пе̄с йис ма̄т о̄лнэ хо̄тпат ёт та̄н потыртахтасыт, ты ма̄хум олныл ойтуӈкве патавет. Кӯщаит о̄с акв нэ̄пак пирмайтасыт. Ты нэ̄пак хосыт 2017 та̄лт округувт о̄лнэ мир на̄йпос, вит, ре̄г ма̄гсыл ойтнэ олнаныл но̄хнё̄тавет. Мо̄тыт та̄лныл о̄йттур э̄тпос о̄выл хо̄талныл ма̄н 4% са̄внув олн тув ойтуӈкве тах патэ̄в. Белоярский районт «Нумто» нампа ӯргалан ма̄ о̄лы, ань тув кӯщаиг Людмила Александровна Матвеева рӯпитаӈкве паттувес. Сапра̄ни о̄лум порат кӯщаит ты кастыл распоряжениенэ̄пак пирмайтасыт.

1137 2016. 12. 08. Светлана РОМБАНДЕЕВА

На̄локолн ань кос хоты ма̄т ойтуӈкв ве̄рме̄в Округ янытыл на̄локолн ловиньтан колт кӯщай нэ̄ Ольга Литова, округт государственный о̄лтулыт ман колыт акванхаснэ департамент палт пуӈктотнэ хум Анатолий Уткин ос «МФЦ Югры» колт кӯщаиг о̄лнэ хум Александр Сучков РИЦ «Югра» колн ёхталасыт. Потраныл ань на̄локолн урыл о̄лыс. Ты та̄л па̄сныл Россияв янытыл на̄локолн ойтнэ юио̄выл хо̄талэ йильпииг хасвес – ва̄т са̄грапнал э̄тпос 1 хо̄талэ. О̄лнэ кол, ма̄ ло̄мт, ма̄шина ос мо̄т э̄рнэ матыр э̄лумхо̄лас о̄ньщи те, на̄локолнанэ ты хо̄тал мус вос ойтыянэ. Кӯщай нэ̄ тох ла̄выс: «Россия янытыл на̄локолн ойтнэ ма̄гыс ань акв хо̄тал ва̄рвес. Ты тэ̄ла палт ма̄хум сака са̄в рӯпитасыт, акванпотыртахтасыт. Со̄ль, ты сака ёмас ва̄рмаль, ань хо̄тпа кос хоты ма̄т о̄лы, на̄локолнэ ойтуӈкве ве̄рмитэ. Э̄рнэ нэ̄пакыт ка̄сыӈ ӯст ман па̄вылт налоговый служба колт виӈкве ве̄рмегы̄н, тот тармыл ойтхатэ̄н. Э̄лумхо̄лас э̄рыӈ мо̄т ӯсыт ман па̄вылт о̄лнэ кол ёвтыс, на̄локолнэ ойтнэ ма̄гыс тув минуӈкве ат э̄ри, о̄лнэ ма̄тэ̄т вос ойтхаты. Тох тай сака кӯстыр». Кол ман ма̄ о̄щнэ ма̄гыс на̄локолн 2015 та̄лт округ бюджет 5, 5% са̄витан са̄вмыс. Ма̄шина ма̄гыс ос 2% са̄вит па̄рыс тотыс. Округувт ань 1, 5 млрд. арыгтем солко̄ви Федеральный налоговый службан ойтуӈкве э̄ри, ма̄хум ань таса̄вит на̄лока̄рнта та о̄щнэ̄ныл. Ольга Литова ла̄вме щирыл, ты а̄ти сака яныг а̄рнта, э̄лнаӈ ма̄хманув тыгыл са̄в олн ойтуӈкве ат ве̄рмысыт. Ань округувт налоговый служба ма̄хум сака ка̄ркамыщ рӯпитэ̄гыт, халанылт нё̄тхатэ̄гыт. Та̄н ань мир ёт акваг потыртэ̄гыт, хотьют матыр ат те торгамты, хӯлтыяныл, нё̄тыяныл. А. Уткин ла̄выс, ань 2017 та̄л па̄сныл о̄лнэ колыт ос кол ӯнттын ма̄ тынаныл мо̄т щирыл ловиньтаӈкве патавет. Э̄лнаӈ акв са̄ккон щирыл колыт ӯнттуве̄сыт, аквса̄вит тыныл пинве̄сыт, тох та тыналаве̄сыт. Йильпи та̄лт ты тэ̄ла хумус ва̄руӈкве ма̄хум атавет, ханищтавет – о̄лнэ колыт хумус тыналаӈкве, тынаныл манса̄вит солко̄ви паты, та̄н тах та ла̄ве̄гыт. На̄локолн ань Многофункциональный центрыт та̄ра ойтуӈкве ро̄ви. А. Сучков ла̄выс: «Ма̄н округт о̄лнэ ма̄хманувн ос са̄всыр организациятын нё̄тэ̄в. Центрыт хотальа̄ти э̄рнэ нэ̄пакыт, сыресыр справкат та маныр ма̄н пуссын хансэ̄в, хо̄та̄ти ва̄рылтыянӯв. Э̄рнэ нэ̄пакыт акванатым хо̄тпан нэ̄мхо̄т ха̄йтуӈкве ат э̄ри, кӯщаит палт ё̄муӈкве ат э̄ри, ма̄н пуссын ма̄нти ва̄ре̄в, нэ̄пакыт ка̄тынпаттыянӯв. Хо̄тпа роттыг о̄лы, сыме ат ща̄рги, центрын ёхты, туп та̄с нэ̄паканэ выг, юв тах та ё̄манты».

1137 2016. 12. 08. Валентина УЗЕЛЬ

Ля̄ххал хаснэ нэ̄пакыт лаппантавет Россия янытыл матах та̄л ОНФ рӯпиты, рущ ла̄тӈыл ты кол тох ла̄ваве – Общероссийский народный фронт. Ты йильпи рӯпата ва̄рнэ кол Россия Президентув Владимир Путин 2011 та̄л я̄ӈк на̄тнэ э̄тпос 6 хо̄талэ̄т ва̄руӈкве ла̄выс. Та па̄сныл ка̄сыӈ регионт акв тамле намыл пиным кол рӯпиты. Ма̄н округувт Ханты-Мансийск ӯст та̄н о̄с ва̄вет. Ма̄к яныг кӯщаиг Снисаренко Виктор Анатольевич тот о̄лы, таве̄н нила хо̄тпа нё̄тэ̄гыт – Белкин Роман Михайлович, Белоцерковцева Лариса Дмитриевна, Дубовец Сергей Николаевич ос Терновой Константин Владимирович. Та̄н ка̄сыӈе̄мт матыр я̄нас ва̄рмаль щирыл атхатыглэ̄гыт. Ювле хультум э̄тпост та̄н журналист ма̄хум ёт яныг сапра̄ни ва̄рыгласыт. К. Терновой пуӈктотнэ хо̄тпаг тот о̄лыс. Ань ты та̄л сыс округувт хӯрум редакциякол лаппантве̄сыт: ты «Югра» ос «Старт» нампа журналыг, ос «Югра-Информ» интернетгазета. Са̄в хо̄тпа рӯпата та̄л хультсыт. Ос ма̄к та̄рвитыӈ ва̄рмалиг ты нак о̄лыс, тот намыӈсуиӈ журналистхо̄тпат рӯпитасыт, та̄н округувт ёмащакв ва̄вет. Та̄н сапра̄ни ва̄руӈкв ты ла̄всыт. Александр Григоренко «Югра» нампа журналт кӯщаиг рӯпитас. Тав ань ла̄выс, ля̄ххал хаснэ ма̄хум ань сака уральтавет, кӯщаит урыл матыр ат ро̄внэ ла̄тыӈ потранылт те хассыт, ты потыр ат печатайтаве. Ля̄льт ла̄внэ хо̄тпат пуссын рӯпатаныл по̄хан те̄тавет. Округ кӯщай ва̄ӈын хо̄тпаг о̄лнэ хум Алексей Шипилов ювле ла̄выс, ань ты йист мо̄т щирыл рӯпитаӈкв э̄ри. Ты э̄лыпа̄лт ка̄сыӈ журнал ос газета округ бюджетныл олныл майлувес. Ань ос о̄влэ̄т проектыг ла̄внэ тэ̄ла ва̄руӈкв э̄ри, тувыл ущ олныл мивет ос э̄лаль рӯпитаӈкв тах ве̄рме̄гыт. Ань тох е̄мтыс, хо̄тпа газета ман интернетыт ля̄ххалыт хансуӈкв те таӈхи, тав акв тамле рӯпата ва̄рнэ ма̄хум ёт касылыл ва̄рыглаве. Тот сунсаве, та̄н халанылт ма̄к ёмащакв хотьютаныл рӯпитаӈкв ве̄рми, тав но̄х та паты. Тувыл олныл та миве. Ты сапра̄нит кӯщаит ла̄всыт, пе̄с щирыл воссыг нэ̄мхотьют ат рӯпиты. «Новости Югры» газета, ма̄н «Лӯима̄ сэ̄рипос» ос «Ханты ясанг» газетагув госзаказ щирыл рӯпитэ̄в. Кӯщаитн ань акваг та хӯлтаве̄в, та̄л сыс маныр потрыт ос манса̄вит ло̄пс ма̄навн хансуӈкв э̄ри. Тыгыл арыг рӯпата ва̄руӈкв ат ро̄ви.

1137 2016. 12. 08. Николай МЕРОВ

Каснэ колыт ӯнттавет Яныг таквс э̄тпост округувт касыл щирыл рӯпитан департаментыт кӯщаиг о̄лнэ хум Игорь Губкин ля̄ххал тотнэ хо̄тпат ёт хо̄нтхатыглас. Ты та̄л ма̄н ма̄вт манаса̄вит каснэ кол ӯнттаве ос э̄лаль манырсыр колыт ӯнттуӈкве патавет, тав ты урыл потыртас. На̄н ты урыл э̄лаль ловиньтэ̄н. Кӯщай хум ла̄выс, ты та̄л кит каснэ колыг Мегион ос Лангепас ӯсыгт ӯнттувесы̄г. Ты тӯя па̄сныл касылыт ань тот щё̄пита̄лавет. Округувт касыл э̄лаль тотнэ магыс 2016-2020 та̄лытн программа пирмайтым о̄лы. Ты тэ̄ла щирыл ань са̄в кол ӯнттаве. Нефтеюганск ӯст я̄ӈк тармыл конькил тахсын кол, Октябрьский район Приобье па̄вылт, Югорск ӯст, Сургут ӯст яныг каснэ колыт, Ханты-Мансийск ӯст са̄всыр касылыт ва̄рыглан кол, Нижневартовский районт Излучинск па̄вылт хоккеил ёнгын кол ӯнттаве. То̄ва колыт ты та̄л а̄стлавет, то̄ват ос мо̄тыт та̄л о̄вылтахтын порат ӯнттавет тах. Мо̄тыт та̄л Мегион ӯст ня̄врамыт ма̄гыс о̄с акв каснэ кол ӯнттуӈкве о̄вылтаве. Игорь Васильевич ла̄выс, ма̄н ма̄вт ма̄хум акваг халанылт касэ̄гыт. Ань ты накт Югра ма̄т онтырса̄т кит ва̄рмаль щирыл са̄всыр касыл э̄лаль тотаве. Китса̄т хо̄тпан са̄виткем э̄лумхо̄лас Россия янытыл ос мо̄т хо̄н ма̄т ма̄н ма̄в ма̄гсыл касым яласэ̄гыт. Ма̄н округувт ва̄тихал са̄всыр касылыт щё̄пита̄лавет. Мощ мо̄лалнув ӯсувт хоккеил ёнгысыт. Китхуйплов команда халанылт кассыт. Пуссын аквъёт нёлса̄т хо̄тпа о̄лыс. Та̄н халанылт хӯрум команда мо̄т хо̄н ма̄ныл ёнгуӈкве тыг ёхталасыт.

1137 2016. 12. 08. Тамара МЕРОВА

Э̄лумхо̄лас ёмас рӯпататэ ма̄гыс янытлавес Ханты-Мансийск ӯст «Славим человека труда» нампа касыл о̄лыс. Югравт ань китынтыг «Народные художественные промыслы» намаим ханищтап Уральский федеральный округ янытыл о̄лнэ ма̄щтыр хо̄тпат халт ва̄рыглавес. Тот Курганский Свердловский, Тюменский ос Челябинский областьныл ос Ямал ма̄ныл ёхталам налыман нупыл хо̄т хо̄тпа та̄нки халанылт кассыт. Ты ма̄щтырыт халт нёлолов хо̄тпа Юграныл о̄лсыт. Ань ты ма̄хмыт хӯрум номинация щирыл кассыт. Та̄нанылн нила щё̄с сыс матыр пормас ва̄руӈкве ман маснут ю̄нтуӈкве э̄рыс. Жюри та̄н рӯпатаныл сунсыглым, ёмас, ха̄снэ наканыл та̄рапаттысаныл. Тувыл ка̄сыӈ ма̄щтыр хум манос нэ̄ оценкал хассаныл. Та юипа̄лт оценканыл акванловиньтым ос мо̄т хо̄тпат ёт а̄ртала̄лым, хотьютаныл но̄х та патыс. Ты о̄вылтыт Юлия Иванова, жюри кӯщай нэ̄, ла̄выс, тав изобразительный ос декоративноприкладной искусство отделт Государственный Российский творчество колт рӯпиты. Ӯст о̄лнэ ос мӯйлуӈкве ёхталам ма̄хум ма̄щтырлан рӯпатат о̄с сунсуӈкве ве̄рмысыт. Тувыл та̄н ма̄гсыланыл «Аллея мастеров» ос «Ярмарочное подворье» суссылтапыт щё̄пита̄лве̄сыт. Ка̄сыӈ э̄лумхо̄лас матыр ма̄щтырлаӈкве ве̄рмыс, ма̄ньлат хо̄тпат ханищтаве̄сыт. Пуссын ты тэ̄лат округ культура департаментын, тувыл труд ос занятость департаментын ва̄рыглаве̄сыт. Ань хӯрум са̄всыр номинацият но̄хпатум хо̄тпат наманыл хансыянӯв. Тох е̄мтыс, хӯрум о̄выл мӯйлупсат пуссын Ямал ма̄н тотве̄сыт, Юграт кит мӯйлупсаг хультсы̄г, мо̄таныт мо̄т ма̄н ла̄кква миныгласыт. Лувныл, а̄ньтныл яктын хо̄тпат халт но̄хпатсыт: О̄выл места – Сергей Аляба, Салехард ӯс. Китыт места – Эльвира Иванова, Тюмень ӯс. Хӯрмит места – Михаил Турышев, о̄с Тюмень ӯс. То̄рныл, нуйныл ю̄нтнэ хо̄тпат халт ты нэ̄т но̄хпатсыт. О̄выл места Роза Накова, Салехард ӯс. Китыт места – Вероника Факеева, Челябинск ӯсныл ёхталам нэ̄, вис. Хӯрмит места – Жанна Щербакова, Сургут ӯсныл о̄лнэ нэ̄, вис. Соссаӈ ма̄хум о̄щнэ маснут ю̄нтум хо̄тпат халт та̄н но̄хпатсыт: О̄выл места – Яков Салиндер, Салехард ӯс. Китыт места – Екатерина Смирнова, Урай ӯс. Хӯрмит места – Евгения Ядрышникова, Челябинск ӯс. Ма̄н та̄наныл о̄с янытлыянӯв, та̄н ка̄ркамыг рӯпитасыт, ха̄снэ утаныл ёмащакв суссылтасаныл. Ос хотьют ань но̄х ат патыс, мо̄тынтыг вос а̄лыме̄гыт.

1137 2016. 12. 08. Валентина УЗЕЛЬ

Та̄л сыс ма̄вит хумус ӯргалавес Ты оигпан та̄лт округув янытыл ма̄вит ӯргалан са̄в рӯпата ва̄рвес, рущ ла̄тӈыл ос сака пӯмыщ намыл пиным о̄лыс – экологический вахта. Ты кастыл ань округ мирколт кӯщаит акванатхатыгласыт ос та̄л сыс ва̄рум рӯпатаныл урыл потыртасыт. Ты сапра̄нит губернатор Наталья Комарова кӯщаиг о̄лыс. Тув ма̄вит ӯргалан ма̄хум атхатыгласыт. Мо̄т яныг ӯсытт (Покачи, Мегионт, Нефтеюганскыт), Белоярский ос Ха̄льӯс районыгт ма̄хум тина суснэ то̄тап э̄лыпа̄лт ӯнлысыт, видеосвязь щирыл округ миркол ёт аквано̄лтыглаве̄сыт. Та щирыл та̄н халанылт ёмащакв потыртаӈкв ве̄рмысыт. О̄выл ла̄тыӈ округ кӯщай нэ̄ ла̄выс. Тав тох потыртас, матъёмас тамле ёмас тэ̄ла округувт ва̄рыглавес. Во̄руй ӯргалан хо̄тпат ат уральтан рӯпата ва̄рыгласыт, та̄н рущ ла̄тӈыл тох ла̄вве̄сыт – «Лось», «Капкан», «Боровая дичь», «Наст», «Пернатая дичь». Во̄рт тит пупа̄пщаквег ка̄тынпаттымаг, нила янгуй, ат нёхыс. Ты хо̄тпат пуссын пувве̄сыт, яныг шрафолныл пинве̄сыт. Ма̄хум во̄р наска̄ссыг ул вос са̄грияныл, лесникыт та̄л сыс во̄р уральтасыт. Та̄нанылн ань мощ кӯпнитнув рӯпитаӈкв патыс, са̄всыр ищхипыӈ ут о̄ньще̄гыт. Рущ ла̄тӈыл ла̄вавет – беспилотный летательный аппарат. Ты ут но̄хтыламлы, са̄в щё̄с нумын яласаӈкв ве̄рми, ма̄ нумыл по̄слытэ, ос по̄слум хуриянэ ищхӣпыӈ ут хосыт та̄ра сунсавет. Во̄р ёлса̄грын хо̄тпат тох та пувавет. Ма̄во̄й но̄хвинэ ма̄хум о̄с акваг уральтаве̄сыт. Ань та̄н ма̄вит ӯргалым рӯпитэ̄гыт. Ма̄во̄й ма̄ тармыл те со̄сыяныл, та ма̄ та̄ра хотсыстамтыяныл. Ос нефть я̄н те паты, то̄нт я̄ о̄с сыстамтаӈкв э̄ри. Ма̄н округувт ма̄нь я̄т ос Иртыш я̄ па̄ӈканыл овн пуссын А̄с я̄н тотавет. Ты я̄капай Северный Ледовитый океан нупыл овты. Яныг кӯщаюв ла̄выс, А̄с я̄ ань сака са̄в лю̄ль ут ат о̄ньщи, витэ сыстамнувег е̄мтыс. Наталья Комарова ка̄сыӈ ӯс ос район кӯщаит ань титыгласанэ – та̄л сыс маныр рӯпата та̄н ва̄рсыт. О̄влэ̄т Покачи ӯсныл ма̄хум потыртасыт, та̄н юипа̄ланылт Радужный ӯсныл ос Белоярский районныл. Та̄н пуссын ла̄всыт, та̄л сыс са̄в ёмас рӯпата ва̄руӈкв а̄лымасыт, щар ма̄к яныг рӯпатаныл тамле о̄лыс – та̄н ня̄врамыт ма̄витув ӯргалаӈкв ханищтасаныл. Та ӯст о̄лнэ ня̄врамыт юн ат э̄рнэ са̄всыр нэ̄пакыт атсаныл ос школан тотсаныл, атум нэ̄пакыт та̄рвитаныл пуссын аквъёт 205 тоннаг е̄мтыс. Ты ёмас ва̄рмаль хосыт ань 2 со̄тыра йӣв ёлса̄груӈкв ат э̄ри. 11 со̄тыра са̄всыр йӣв ма̄н ӯнттувес, 750 тонна порс атвес. Ты рӯпата 200 со̄тыра арыгтем хо̄тпа ва̄рсыт. Ань ка̄сыӈ студият ня̄врамыт ӯнлысыт. Та̄н округ кӯщайн титыглаве̄сыт, школат ма̄вит ӯргалаӈкв хумус ханищтавет. Белоярский ӯсныл акв а̄ги ла̄выс, та̄н о̄с са̄в ёмас рӯпата ва̄рсыт, школат ма̄вит ӯргалаӈкв ёмащакв ханищтавет. Тав такви ма̄витув, во̄руянув ӯргалаӈкв сака таӈхи. Яныгми, экологыг тах ханищтахты ос ювле о̄лнэ ӯсэ̄н ёхты. Наталья Комарова мовиньтым ювле ла̄выс, ань Белоярский район янытыл о̄лнэ браконьерхо̄тпат ты а̄гирищныл пилым вос о̄лэ̄гыт, наме пуссын вос ва̄ганыл.

1137 2016. 12. 08. Людмила Теткина

Кӯщай хум рӯпатаныл урыл потыртас Ювле хультум э̄тпос лов щислат полицият рӯпитан ма̄хум янытлан хо̄тал о̄лыс. Ты кастыл округ полицият рӯпитан яныг кӯщай Василий Романица ля̄ххал тотнэ ма̄хум ёт хо̄нтхатыглас ос рӯпатаныл урыл потыртас. О̄влэ̄т тав ня̄врамыт урыл ла̄тыӈ ла̄выс. Округув янытыл о̄лнэ ня̄врамыт ул вос тӯлмантэ̄гыт, хохса ул вос хартэ̄гыт, вина ул вос ае̄гыт ос мо̄т лю̄ль пищ ул вос о̄ньще̄гыт, ань яныг рӯпата ва̄раве. Полицият рӯпитан хо̄тпат са̄всыр лю̄ль накыт нупыл суснэ ня̄врамыт ёт акваг рӯпитэ̄гыт, потыртэ̄гыт. А̄гитпыгыт акв щёс лю̄ль ке ва̄рсыт, та̄н пилата̄лнэ ма̄гсыл каснаколн тотыглавет ос хумус ма̄хум тот о̄ньщавет, суссылтавет. Тув ялнэ̄ныл юипа̄лт ня̄врамыт номсахтэ̄гыт, то̄ват мори капыртан ма̄ныл хотпо̄йтэ̄гыт. Василий Романица ла̄выс: «2011 та̄л сыс а̄гитпыгыт акв со̄тыра 200 лю̄ль тэ̄ла ва̄рсыт. Ты та̄л онтолов э̄тпос сыс 346 лю̄ль ва̄рмаль ва̄руӈкве а̄лымасыт. Ма̄н ня̄врамыт ёт ос та̄н ща̄няныла̄щаныл ёт акваг рӯпитэ̄в, тыи ма̄гсыл мощщанув а̄гитпыгыт лю̄ль накыт нупыл сунсуӈкве патсыт». Округувт ма̄хум манхурип о̄выл ва̄рыглэ̄гыт, та урыл о̄с ла̄тыӈ ла̄выс. Ка̄сыӈ та̄лныл вина айнэ хо̄тпа са̄внувег е̄мты. Кучим та̄н мори капыртэ̄гыт, та̄нки халанылт алхатэ̄гыт, мо̄т хо̄тпа порслэ̄гыт. Винэ айнэ хо̄тпат ос та̄н ще̄мьяныл ёт полиция акваг кос рӯпитэ̄гыт, тувыл то̄ват ла̄тыӈ щар ат хӯнтлэ̄гыт, ат торгамтэ̄гыт. Ка̄сыӈ та̄лныл са̄внув хо̄тпат аим ма̄шинал яласаӈкве воратэ̄гыт. Ань са̄ккон щирыл тох капыртан хо̄тпат яныг штрафолныл пинавет. Тувыл та̄н ты олн ат ойтэ̄гыт ос аквтащирыл ма̄шинал мори яласэ̄гыт. Ань ос атхуйплов хо̄талн каснаколн ӯнттавет, юв хунь та̄ртавет, э̄лаль тох ва̄ре̄гыт. Ка̄сыӈ та̄лныл са̄внув ма̄хум аим ма̄шинан та̄лматэ̄гыт ос сакватахтэ̄гыт, ты паттат са̄в э̄лумхо̄лас а̄тимыг е̄мтэ̄гыт. Василий Романица ла̄выс, ма̄шинал яласан аюм хо̄тпат щар нэ̄матарыл ат пилэ̄гыт.

1137 2016. 12. 08. Тамара МЕРОВА

Тӯлмахыл олн нэ̄мхуньт ул вос выгыт Округ мирколт Ирина Астапенко гражданский служба департамент кӯщай нэ̄ ля̄ххал тотнэ хо̄тпат ёт ва̄щиньтахтас. Ос нэ̄ та̄нанылн коррупция урыл потыртас. Коррупция – тыи хунь кӯщаит хотты хо̄тпаныл та̄нки ма̄гсыланыл олн манос тыныӈ мӯйлупса сытамыг во̄ве̄гыт. Ань ты йист то̄ва яныг кӯщаит матыр нё̄тмил ва̄рнэ̄ныл ма̄гыс мо̄т хо̄тпаныл олн, тыныӈ мӯйлупса тӯлмахыл во̄ве̄гыт. Округувт тамле ва̄рмалит та̄рапаттын ма̄гыс я̄нас комиссия рӯпиты. Тот са̄всыр ма̄т рӯпитан хо̄тпат акванатыглавет, тувыл пуссын тэ̄лат губернатор нэ̄ Наталья Комарован уральтавет. Кӯщаиг рӯпитаӈкве патхатам хо̄тпат коррупция тэ̄лат о̄вылтыт та̄ра ла̄вавет, та̄н вос ва̄гыт ос нэ̄матыр лю̄ль ул вос ва̄ре̄гыт. Ирина Анатольевна ла̄вме щирыл, округ янытыл тамле ва̄рмаль са̄в ат е̄мталы. Мо̄лал хӯрум со̄тыра ма̄хум анкета щирыл китыглаве̄сыт, ос таи та̄рапатыс: 87% хо̄тпат нэ̄мхотьютн олн ат ойтыгласыт ос та̄рвитаныл по̄ханпаттуӈкве кӯщаитн нас нё̄тве̄сыт. Мо̄т 8% хо̄тпат олн ойтуӈкве манос мӯйлупса миӈкве ла̄выглымат. Кӯщай такви рӯпататэ̄ныл по̄хан мины ке манос мо̄т ма̄н о̄луӈкве ва̄нтлы ке, тав кит та̄л иӈ уральтаве. Лю̄ль нак хо̄нтаве ке, та̄ра полициян э̄лаль уральтаӈкве патаве. Округув тамле накыт мо̄рсыӈыг о̄лыглэ̄гыт, аман ла̄тыӈ хӯнтлэ̄гыт, аман пилэ̄гыт.

1137 2016. 12. 08. Тамара МЕРОВА

Россия Президентув мирн ла̄тыӈ ке̄тыс Ля̄ххал тотнэ хо̄тпат Ирина Максимова, Общественный палатат кӯщаиг о̄лнэ нэ̄, ёт хо̄нтхатыгласыт. Тав Москва ӯсн ялыс, тот Владимир Путин РФ Президентув мир ма̄гыс ла̄тыӈ ловиньтам колт о̄лыс. Ирина Ивановна ла̄выс: «Россия Президентув Владимир Путин Кремльт хӯнтлуӈкве, ва̄им, хо̄йхатнэ̄г ос ёмасыг о̄лыс. Тот ка̄сыӈ хо̄тпа такви ва̄рнэ тэ̄ланэ Президентув ла̄тыӈ ла̄внэ̄тэ юипа̄лт та̄ра тув а̄рталыянэ ос та̄наныл э̄лаль тотнэ щирыл номсахты. Ма̄хум та̄нки номтаныл тэ̄лаг ва̄рнэ ос мо̄т ма̄хумн нё̄тнэ урыл потыртаме порат а̄нумн сака мӯстысыт. Ты «добровольческий движенияг» ла̄ваве. Округувт тамле ва̄рмалит о̄с о̄лэ̄гыт, ма̄нки о̄с са̄в рӯпитэ̄в. Концепциянэ̄пак о̄ньще̄в, ос са̄всыр тэ̄лат некоммерческий объединениеколыт кастыл э̄лаль тотыянӯв. Ма̄навн таи ёмас хӯнтлуӈкве о̄лыс, ань яныг кӯщаюв мирн маныр ла̄выс, ма̄н округув тамле рӯпатат хосат та̄гыл ва̄риянэ. Тувыл ня̄врамыт ханищтан о̄вылтыт потыртас. Тав ла̄выс, ка̄сыӈ ня̄врамакве такви щирыл номтыӈ. Тав сыме̄н э̄рнэ ос ханьщувлым наке̄н э̄лаль вос ханищтаве. Ма̄навн номтыӈ ос та̄ксар ма̄ньлат хо̄тпат янмалтаӈкве э̄ри. Тувыл акванпотыртахтым, акваннё̄тхатым тэ̄лат ва̄руӈкве э̄ре̄гыт. Ма̄н округувт о̄лнэ ма̄хум тыщирыл ты рӯпитэ̄гыт ос акванюрщхатым о̄лэ̄гыт».

1137 2016. 12. 08. Людмила ТЕТКИНА

Ма̄витув ёмащакв вос ӯргалаве Россият ма̄вит ӯргалан Министр Сергей Донской та э̄тпос 15 хо̄талэ̄т Москва ӯсныл ма̄н округувн ёхталас, тав Общественный палатат рӯпитан хо̄тпат ёт ва̄щиньтахтас. Ты хо̄нтхатыглап «Час с министром» намаим о̄лыс. Ты э̄лыпа̄лт ма̄хум ты яныг кӯщаитн ма̄вит ӯргалан ва̄рмаль урыл китыглахтан ла̄тыӈ ке̄тыгласыт. Сапра̄ни о̄лум порат Министр хум Россия янытыл о̄лнэ мир ёт кина суссылтан то̄тап хосыт потыртас. Общественный палатат рӯпитан хум Сергей Чернин акв ва̄рмаль урыл китыглахтас. Тав ла̄выс, ань Норильск, Магнитогорск, Новокузнецк ос мо̄т яныг ӯсытыт ма̄вит па̄ӈктын са̄всыр предприятият рӯпитэ̄гыт. Та̄н са̄всыр ищхӣпыӈ утыл ва̄руӈкве хосат та̄гыл ла̄вве̄сыт. Ты утыл хунь ва̄равет, Министерстват, Роспотребнадзорт ос Общественный палатат рӯпитан кӯщаит кина суснэ то̄тап хосыт рӯпатаныл уральтаӈкве акваг патыяныл. Сергей Чернин китыглахтас, ма̄вит па̄ӈктын предприятия тамле э̄рнэ утыл хунь ва̄равет. Сергей Донской ювле ла̄выс: «Ань Россия янытыл 300 предприятият сака са̄в лю̄ль ва̄ре̄гыт. Щар о̄влэ̄т та̄н уральтан ищхӣпыӈ утыл ва̄риянӯв. Ты утыт ва̄рнэ ма̄гсыл олныл тах та̄стыянӯв. Ты рӯпата ма̄н 2019 та̄лт тах ва̄руӈкве о̄вылтахтэ̄в». Министр хум акв та̄рвитыӈ ва̄рмаль урыл э̄лаль потыртас, тав ла̄выс, ма̄вит па̄ӈктын организацият яныг штрафолныл акваг хансыглавет. Тувыл та̄н олн ойтэ̄гыт кос ос э̄лаль лю̄ль та ва̄ре̄гыт. Та̄н ётаныл хумус рӯпитаӈкв, та̄н ань аты ва̄ганыл. Челябинский областьныл о̄лнэ хо̄тпат ва̄рмаляныл урыл яныг кӯщай палт хассыт. Та областьт яныг тӯр ва̄тат Томинский горнообогатительный комбинат ӯнттуӈкве о̄вылтавес. Тот о̄лнэ ма̄хум номтаныл щар ат патыс. Тамле яныг колка̄пай хунь ӯнттаве, тот о̄лнэ сыстам тӯр па̄ӈктаве ос ма̄тэ пулигхилаве. Ты урыл Сергей Донской маныр номт о̄ньщи, о̄с китыглавес. Тав ты та̄рвитыӈ ва̄рмаль та̄рапаттуӈкве ла̄вхатас. Якутият о̄лнэ ма̄хум та урыл яныг кӯщайн потыртасыт. Ань мори яласан са̄в хо̄тпат ма̄хар лувыт тот кинсэ̄гыт. Министр хум ювле ла̄выс, пирмайтым са̄ккон щирыл Якутият рӯпитан кӯщаит лицензиянэ̄пак та̄нки мыгыт. Ань ма̄вит ӯргалан хо̄тпат ос полицияма̄хум аквъёт вос рӯпитэ̄гыт, ты лю̄ль ва̄рнэ ма̄хум пуссын пувуӈкве э̄ре̄гыт. Яныг кӯщай ос мо̄т са̄всыр тэ̄лат урыл китыглавес. Ма̄н округувныл ма̄хум са̄в китыглахтын ла̄тыӈ о̄щсыт.

1137 2016. 12. 08. Тамара МЕРОВА

Борис Ельцин наме э̄лаль суйты Борис Ельцин намыл пиным Президенский центр о̄выл щёс 2009 та̄лт я̄ӈк на̄тнэ э̄тпос 27 щислат Санкт-Петербург ӯст рӯпитаӈкве патыс. Ётыл тамле ма̄нь центрыт мо̄т ӯсытыт ва̄руӈкве патве̄сыт. Ань Ханты-Мансийск ӯст нэ̄пак ловиньтан колт акв тамле кол пӯсвес. Тув Наталья Комарова губернаторув ос яныг центрыт о̄лнэ кӯщаит Санкт-Петербург ӯсныл ёхталасыт. Ты тэ̄ла ва̄рнэ о̄вылтыт та̄н 2013 та̄лт потыртасыт ос то̄нт акваннё̄тхатнэ ма̄гыс нэ̄пак хасмыт. Мӯй хо̄тпатн Наталья Владимировна ла̄выс: «Ма̄н ань ты президенский фондыт акванатым нэ̄пакыт, по̄слым кинат, ёлхансым потрыт, са̄всыр хурит о̄ньщуӈкве патэ̄в. Югравт ма̄нки о̄щнэ утанув ос та фондын мыганӯв. Ты 2016 та̄лув округувт ня̄врам янытлан та̄лыг ла̄выслӯв. Ма̄н ань тамле мӯйлупсал ва̄риянӯв, акванатнэ утанув пуссын та̄нанылн хультуптыянӯв». Павел Терещенко, ты Президентский центрыт кӯщай ва̄ӈын хумыг о̄лы, тав ты ёт о̄с ка̄сащас. Ань тыг мус та̄н центраныл ёт нёлолов миллион хо̄тпат ищхӣпыӈ ут хосыт рӯпитэ̄гыт. Тот 500 со̄тыра документыт ос 136 со̄тыра нэ̄пакыт ищхӣпыӈ ут хосыт сунсыглаӈкве ос ловиньтаӈкве ве̄рмавет. Ань нэ̄паканув тув ке хансавет, та̄н пуссын ты ма̄хумн о̄с ка̄салавет. Нэ̄пак ловиньтан колт рӯпитан хо̄тпат 200 арыгкем документыт тув щё̄питасаныл ос 50 со̄тыра нэ̄пакло̄псыт ищхӣпыӈ утытн по̄слысыт. Тувыл мӯй хо̄тпат мо̄т колнакн во̄вве̄сыт. Та̄н тот Наталья Кириллова ёт ва̄йхатасыт. Ты э̄ква «Уральское кино: время, судьбы, фильмы» нэ̄паке урыл потыртас. Наталья Борисовна культурологият доктор нам о̄ньщи, тав Б. Н. Ельцин нампа Уральский федеральный университетт профессорыг о̄лы ос кина о̄вылтыт матыра̄ти пуссын ва̄г. Россия янытыл ты та̄л кина намыл пиным о̄лыс. Ань э̄ква такви рӯпататэ урыл потыртас ос мӯй хо̄тпат нэ̄пакыл мӯйлуптасанэ.

1137 2016. 12. 08. Галина КОНДИНА

Ма̄ньщи нэ̄те̄в Москват рӯпиты Государственный Думат рӯпитан депутатыт ань ка̄сыӈ э̄тпос оигпан ляпат та̄нти ма̄нанылн ёхталэ̄гыт ос ма̄хум о̄лнэ тэ̄ланыл тарапаттэ̄гыт. Татьяна Степановна Гоголева яныг таквс э̄тпост о̄с Ханты-Мансийск ӯсн ёхталас, «Единый Россия» партия колт акв хо̄тал ма̄хум пирмайтас. Тав палтэ ёхталам ма̄хум са̄всыр тэ̄ланыл мус ёхталасыт. Яныгпа̄лаг е̄мтум э̄ква тамле потре о̄лыс, та̄н ще̄мьял ӯс котильт титнакпа лю̄лит колт о̄лэ̄гыт, коланыл пе̄сыг е̄мтыс, таве хотло̄сталаӈкве номсаве. Ос ты квартираныл пе̄нтсыл я̄ ва̄та нупыл Самарово ма̄т мивет. Тав о̄йкатэ ань сака а̄гмыӈ, рака̄гмыл е̄мтум. Тувыл Самарованыл пӯльницан ялантаӈкве хоса, таима̄гсыл та̄н тув ва̄нтлуӈкве ат ка̄саще̄гыт. Миркол кӯщаитын ты коныпал мо̄т колыл ат мивет. Тав ла̄ви, о̄лнэ̄тэ палытыл акваг ня̄врамыт ханищтым рӯпитас, ӯст о̄лнэ мир ма̄гсыл ул матыр онтас ва̄рыс. Манрыг тох ат титыглым та̄н колыл маяпавет, та̄нанылн тот а̄ртми ман а̄ти. Татьяна Степановна э̄кван ла̄выс, ты урыл миркол кӯщаитын пищма те̄ты, пуссын тав ла̄вум ла̄тӈанэ хансы, вос ляпатнув колыл тинсавет. Акв ма̄ньлат нэ̄ хо̄т ня̄врам о̄ньщи, тав ос ущ самын патум а̄гитэ пропискал ва̄руӈкве ат ве̄рмитэ. Ты нэ̄паке та̄л тав ня̄враме ма̄гсыл олныл ат ойтаве ос пӯльницаныл тэ̄рпил, щаквитыл миӈкве ат ве̄рмаве. Ӯс мирколн ялыс кос, тот торыӈ щирыл нэ̄матарыл ат ла̄ввес. Депутатув таве̄н нё̄туӈкве ла̄вхатас, маныр ва̄рмаль э̄лаль паты, ты урыл нэ̄ пищмал те̄таве. Ты ма̄хмыт коныпал потрыт хаснэ ма̄ньщи нэ̄ Светлана Динисламова ёхталас. Тав потыртас, Ханты-Мансийск ӯсныл налыман ве̄рыста палытат Юван Шесталов ёлщё̄питым ма̄т ва̄татэ тӯяг витн ёлниляве, та ляпат Юван Николаевич ӯнтталам колэ ӯнлы, ань ва̄та колэ мус ты ёхты. Светлана Силиверстовна таӈхи ма̄хум ме̄талаӈкве, а̄врах а̄хвтасыл вос пинаве, та ляпа ма̄тэ̄т порсыт хотатуӈкве, ёмщакв хотсыстамтаӈкве, клещте̄рыӈхомлахыт тэ̄рпил вос расалтавет. Пуссын ты рӯпата ва̄рнэ ма̄гсыл тав проект хансыс ос нэ̄паканэ конкурсын мисанэ. Ань ӯрхаты, олныл миве ман а̄ти. Татьяна Степановна таве̄н о̄с нё̄туӈкве ла̄вхатас, маныр ва̄руӈкве ты кастыл ве̄рми, ва̄им, нё̄ты. Та ма̄, ла̄ви, э̄ри Юванпа̄влыг намтуӈкве. Юван Николаевич о̄лме̄т та ма̄ пе̄рияс, тот колыл ӯнттувес, са̄всыр а̄мпарсовыт о̄ньщас. Ва̄тихал тув ялантас, тот э̄т хӯлуӈкве хультсас. Ма̄тэ э̄руптастэ. Ос о̄лме̄т ла̄выс, хунь а̄тимыг е̄мты, тув ёл вос щё̄питаве. Ань та ма̄ хотщё̄питан юипа̄лт, Светлана Силиверстовна таӈхи туристыт тув тотыглаӈкве, ма̄ньщи поэтув урыл потыртаӈкве. Ос ме̄н тав ётэ акв яныг ва̄рмалюв урыл потыртасме̄н, ань ма̄ньлат ма̄хум ос ня̄врамыт ма̄ньщи ла̄тӈыл щар ат потыртэ̄гыт, то̄ват туп мощ торгамтэ̄гыт, морсыӈ ня̄врам ань ма̄ньщи ла̄тӈыл потыртаӈкве ха̄сы. Э̄ри ма̄ньщиянув ёт потыртаӈкве, ня̄враманыл, апганыл ёт ма̄нти ла̄тӈувтыл вос потыртэ̄гыт. Атиӈк моще̄ртын ла̄тыӈте̄в хотталь ты со̄йми, ма̄н юипа̄лувт хотьют потыртаӈкве паты. Татьяна Гоголева ла̄выс: «Со̄ль, ань ты тэ̄ла тай ма̄кыг номтын виӈкве э̄ри, ла̄тӈув ул вос со̄йми, матыр ва̄руӈкве патэ̄в». Татьяна Степановна Государственный Думат по делам национальностей комитетыт рӯпиты. Тав мо̄лал таквсы тув пе̄риявес. Ма̄н тав тув патме ма̄гсыл сака ща̄гтсӯв, ма̄ньщит халт нэ̄мхотьют иӈыт тот ат рӯпита̄лыс, хантыт халт тай ма̄хум о̄лсыт. Ма̄ньщи мирув тот яныг миркол па̄сыл вос ва̄ве. Ань яныг таквс э̄тпос ва̄т нупыл хо̄тыт щислат Татьяна Степановна хо̄тпан нупыл ат та̄лэ то̄влыс, таве ма̄н сымыӈыщ янытлылӯв, са̄в ё̄р вос о̄ньщи, са̄в та̄л пуста̄гыл вос о̄лы, ма̄ньщи мирув э̄лаль вос са̄вми, нотыӈыг, щуниӈыг пуссын вос о̄лэ̄гыт. Ма̄ньщи нэ̄те̄в На̄й-О̄тыранувн вос ӯргалаве, То̄румн вос нё̄таве!

1137 2016. 12. 08. Светлана РОМБАНДЕЕВА

Йис ма̄в наме о̄вылтыт потыр о̄лыс Ва̄т са̄грапнал э̄тпос 10 хо̄талэ – Югра ма̄вт ялпыӈ хо̄талыг о̄лы, ты та̄л округув 86 та̄лэ то̄влы. Ювле хультум нот 1930 та̄лэ̄ныл 1940 та̄лэ мус ма̄н ма̄в Остяко-Вогульский национальный округыг ла̄ввес. Ханты-Мансийск ӯст история ос этнография тэ̄ла ханищтан ма̄хум акванатхатыгласыт, ань о̄лнэ ма̄в наме о̄вылтыт потрамасыт. Ля̄ххал тотнэ ма̄хум нупыл нила хо̄тпа потыртасыт – «Государственный архив Югры» кӯщай нэ̄ Наталья Судакова, А̄сугорский институт научноисследовательский отделт рӯпитан хум, исторический наука кандидат Михаил Ершов, «Ма̄вит ос Э̄лумхо̄лас» музей этнография колнаке тармыл пуӈктотнэ нэ̄ Лариса Поршунова ос «Югра-Социум» центр кӯщай, ЮГУт ханищтан хо̄тпа Илья Верховский. Михаил Ершов ла̄вме щирыл, «Югра» – ты сака пе̄с нам. Тав йис порат хансыглым нэ̄пакытт ёлхансым о̄лы, пе̄с та̄гыл ла̄вылтаве. Ань йист ты пе̄с нам о̄вылтыт исторический наука доктор, пе̄с пора ханищтан нэ̄ Зоя Соколова тав ла̄вуӈкве патыс. Ты нэ̄ ла̄вме щирыл, ты ма̄ ма̄к наме «Югра». Тувыл тав ла̄тӈе кӯщаитн хӯнтамлавес, ма̄в о̄с акв та пе̄с щирыл та намаявес. Ос соссаӈ ма̄хум та̄нтина̄ныл акваг кос тох ла̄выгласаныл – хантыт ос ма̄ньщит. Остякыг ос вогулыг та̄н мо̄т хо̄тпатын ла̄вве̄сыт, о̄влэ̄т нас намталаве̄сыт, тувыл э̄лаль акваг тох ла̄вуӈкве та патве̄сыт. «Вогул» – саран ла̄тӈыл толмащлаӈкве те, ты «во̄р хо̄тпа» манос «мо̄т хо̄тпа». Ма̄ньщи ма̄хум йис та̄гыл та̄нтина̄ныл «ма̄ньщииг» ла̄всаныл – «мощщаг хультум мир». 1940 та̄л юипа̄лт ма̄н ма̄хманув о̄с акв та пе̄с щирыл ла̄вуӈкве та патве̄сыт. Ершов о̄йка ла̄выс: «Вогул» манос «остяк» – ты ма̄н ма̄хманув тох намталаве̄сыт, ты мо̄т ма̄хум ла̄тӈыг, хантыт ос ма̄ньщит ла̄тӈанылт тамле ла̄тыӈ а̄тим. Таима̄гыс соссаӈ ма̄хум, хунь тамле ла̄тыӈ хӯнтамла̄лсыт, сака кантлысыт. 1930-1950 та̄лытт пуссын ханищтаӈкве патве̄сыт, соссаӈ ма̄хум мощ грамотныиг е̄мтсыт. Тувыл ты ва̄рмаль та порат ты та̄рапатыс. Кӯщаит та̄н ётаныл ка̄сащасыт, мощ ётылнуве округув мо̄т щирыл та намаявес». Илья Верховский тох потыртас: «Матъёмас этнографыт пе̄с о̄лупса ханищтэ̄гыт, ты о̄вылтыт потыртаӈкве патсыт. Та̄н хосытанылт ты та̄рапатыс, Югра ма̄т о̄лнэ соссаӈ ма̄хум ма̄к наманыл – хантыт ос ма̄ньщит. Ханты-Мансийск ӯс ӯнлын ма̄тэ – пе̄с йис та̄гыл ялпыӈ ма̄. Ань «Югра» ма̄в Россияв янытыл ос мо̄т хо̄н ма̄т ва̄ве. Ма̄хум ва̄ганыл, тыт ма̄во̄й но̄хвиве. Хунь Алы ма̄ ос Лӯи ма̄, Хо̄тал ӯнтнэ е̄р ос Хо̄тал нэ̄глын е̄р халанылт китыглахтын ла̄тӈыт но̄ххулиглэ̄гыт манос са̄всыр мирыт халанылт воритотэ̄гыт, ты Югра ма̄т пуссын ёмасмахтэ̄гыт, э̄лаль юртыӈыщ о̄лэ̄гыт. Ам номсыте̄мт, ты ма̄ сака няӈра На̄й-О̄тырытын ӯргалаве». Наталья Судакова архив рӯпататэ урыл аквкит ла̄тыӈ ла̄выс. Та̄н пе̄с карта ка̄тынпаттумыт, ань 1930 та̄лыт порат ма̄хум Самарово район ос Остяко-Вогульск па̄выл нэ̄пакын по̄слуманыл. Ты кӯщай нэ̄ ла̄выс: «Ты карта хотьютн хаснэйӣвыл щуртыма, э̄рнэ колыт та маныр пуссын тув по̄слымат – пӯльница, радио кол, школа. Тувыл нэ̄пакт хансым о̄лы, ань па̄вылт манах хо̄тпа о̄лы – рущь мощща, янгыщ соссаӈ ма̄хум о̄лэ̄гыт. Кӯщаянув соссаӈ ма̄хум урыл та па̄сыл номсысыт, та̄н культураныл но̄хво̄рмалтан ма̄гыс са̄в э̄рнэ тэ̄ла ва̄рсыт». Ань ка̄сыӈ хо̄тпа архив колт таве̄н э̄рнэ нэ̄пакыт хо̄нтуӈкве ве̄рми. Наталья Судакова ла̄выс: «Хо̄тпа архив колн ёхты те, ма̄н таве̄н ищхӣпыӈ ут хосыт э̄рнэ матыр хӯлтэ̄в. Ты щирыл ма̄н 2011 та̄л па̄сныл рӯпитэ̄в. Ищхӣпыӈ ут хосыт сыресыр электронный суссылтапыт ва̄рыглэ̄в, пӯмыщ нэ̄пакыт суссылтэ̄в. Щар о̄выл тамле выставка ань ты ла̄вылтан тэ̄лав о̄вылтыт о̄лыс – Югра ма̄в э̄лнаӈ хумус ла̄ввес, манхурип намыт тав о̄ньщас». Лариса Поршунова «Ма̄вит ос э̄лумхо̄лас» музей о̄вылтыт потрамас. Яныг таквс э̄тпос юио̄выл хо̄таланэ̄т музей 80 та̄лэ то̄влыс. Тав ань йильпи щирыл ва̄рвес, колнаканэ сыресыр ищхӣпыӈ утыт о̄ньще̄гыт. Нэ̄ ла̄вме щирыл, тот рӯпитан ма̄хум ань ка̄сыӈ хо̄тпан э̄рнэ нэ̄пакыт, пормасыт суссылтаӈкве ве̄рме̄гыт, пе̄с йис пора о̄вылтыт потыртаӈкве ман ищхӣпыӈ ут хосыт матыра̄ти ка̄салаӈкве ве̄рме̄гыт.

1137 2016. 12. 08. Людмила ТЕТКИНА

Тӯранувт пусмалтахтын ра̄кт о̄лнэ̄тэ Юрий Федорович Перепелицын «НПЦ Мониторинг» нампа организацият геологыг рӯпиты. Тав округув янытыл яласы ос са̄всыр тыныӈ а̄хвтасыт ма̄т кинсы. Рущ о̄йка такви рӯпататэ сака э̄руптытэ, ты урыл сака хоса потыртаӈкве ве̄рми. Ань тав округувт о̄лнэ тӯрыт ханищтым яласы. Ты ва̄рмаль урыл Юрий Федорович таи ла̄выс: «Югра ма̄в янытыл хӯрум со̄тыра арыгкем тӯр ань о̄лы. Та̄н пуссын ёмащакв ханищтаӈкве э̄ре̄гыт. Ка̄сыӈ тӯр витэ мощ такви хурипаг о̄лы, тыи ма̄гсыл то̄ва тӯрытыт са̄в хӯл о̄лы, мо̄т тӯрытыт хӯл щар а̄тим. Ты тӯрыт ханищтым ма̄н «сапропели» нампа полезный ископаемый киссӯв. Тамле э̄рнэ утыт тӯр паттат о̄лэ̄гыт. Тӯрт о̄лнэ витэ нэ̄мхотталь ат овты, тыи ма̄гсыл то̄ва ма̄т витэ хотсаки ос тот ӯсум са̄всыр ма̄нь ке̄рыӈхомлахыт, ма̄тарыт, ӯсум хӯлыт, са̄всыр лӯптат тӯр паттан уйттавет ос тот акванатхатэ̄гыт. Тот ма̄ ёт аквантэ̄лыглым тамле ра̄ктыг е̄мтэ̄гыт, тав «сапропель» ла̄ваве. Тамле ра̄кт сака са̄в ёмас ва̄рмаль мир ма̄гсыл тотуӈкве ве̄рми. Ты утыл ма̄хум пусмалтаӈкве ро̄ви. Ань са̄всыр ӯсытыт манос па̄влытыт пусмалтахтын колыт пӯнсавет, тот ма̄хум тӯр паттаныл но̄хвинэ ра̄ктыл сартавет ос тащирыл пусмалтавет. Тувыл ты ра̄кт тэ̄пканын расалтаӈкве ро̄ви ос са̄всыр тэ̄нут янмалтаӈкве. Ос ты коныпал тамле ут бетон ёт аквантэ̄лыгтаве ос колыт ӯнттавет». Юрий Федорович ла̄выс, ма̄н округувт о̄лнэ тӯрыт паттанылт 50 млрд. тонна арыгкем тамле ра̄кт о̄лы. Ты рӯпата 1996 та̄лт та̄н ва̄руӈкве о̄вылтасыт. То̄нт округ миркол кӯщаит тыт о̄лнэ ма̄ ёмащаквег ханищтаӈкве ла̄всаныл. Та порат округ янытыл 80 тӯр ханищтаве̄сыт. Тувыл 2012 та̄лт ты рӯпата э̄лаль ва̄руӈкве патвес. То̄нт Ханты-Мансийский районт Придорожное ос Добринское кит тӯрыг ос Сургутский район Сэгутлор тӯр геологма̄хум уральтасаныл. Ты рӯпата урыл Юрий Федорович ла̄выс: «Ма̄н ты хӯрум тӯр ёмащакв ханищтасанӯв ос тот сапропелира̄кт хо̄нтсӯв. Ань ма̄н округувт туп Югорск ӯст ма̄хум пусмалтан санаторийкол рӯпиты. Тот ма̄хум ос ты утыл пусмалтавет. Ам тот рӯпитан хо̄тпат китыгласанум, ма̄хум пусмалтан ма̄гсыл манаса̄вит ра̄кт э̄рмыглы. Та̄н ла̄всыт, акв та̄л сыс та̄н палтаныл акв со̄тыра 200 э̄лумхо̄лас ёхталы. Та̄наныл пусмалтан ма̄гсыл 100-120 кубометра савит ра̄кт э̄ри. Ма̄н округувт сака са̄в тамле ёмас ма̄ о̄лы, тыи ма̄гсыл тыт щар ка̄сыӈ районт тамле пусмалтахтын кол ӯнттуӈкве ро̄ви. Э̄лумхо̄лас тамле ра̄ктыл хунь сартаве, тав сыме ёмащакв рӯпитаӈкве о̄вылтахты, ке̄лупта̄рсанэ ёмасыг е̄мтэ̄гыт, купнитыщ лылты ос луванэта̄нанэ та̄кме̄гыт. Мо̄т а̄гмыт ты утыл пусмалтаӈкве о̄с ро̄ви». Юрий Перепелицын ла̄вме щирыл, ты сапропелил ӯйхул тыттуӈкве о̄с ро̄ви. Мисыт ма̄гсыл комбикорм ёт аквантэ̄лыгтаве. Щищкуре̄кыт, па̄лят ос пӯрщит ты утыл о̄с тыттавет. Ам ты рущ о̄йка китыгласлум, тамле ра̄кт тӯр паттаныл но̄хвиӈкве ке о̄вылтаве, тӯрыт ат па̄ӈктавет ос хӯл та̄л ат хультэ̄гыт. Тав ос ювле ла̄выс: «Тамле сапропели са̄в нот сыс акванатхатас. То̄ва тӯрыт щар лап ты яныгмавет, тамле витыт хӯлыт о̄луӈкве ат ве̄рме̄гыт. Тӯр паттат о̄лнэ ма̄тэ но̄х ке виӈкве, тӯр сыстамыг е̄мты, са̄внув хӯл о̄луӈкве тот паты. Сургутский районт Вачлор нампа тӯр о̄лы. Ань лап ты яныгмаве, тот хӯл воссыг а̄тим. Тӯр 7, 15 ве̄рыста яныт ос паттатэ мус 5, 7 метра милытэ о̄лы. Ма̄хум рӯпитаӈкве ке о̄вылтахтэ̄гыт, тот 1, 5 метра милыт ма̄ хотвыгыт. Таса̄вит ма̄ хунь но̄хвиве, тӯр воссыг лап ат яныгмаве, витэ сыстамтахты ос хӯл са̄выг е̄мты. Ань са̄всыр ищхӣпыӈ утыт о̄лэ̄гыт, тӯр ва̄тат ты утыл ёмащакв рӯпитаӈкве ос тӯр хотсыстамтаӈкве ро̄ви. Лап ке яныгмаве, ты ра̄кт но̄хвиӈкве воссыг ат ро̄ви, лю̄лиг е̄мты». Юрий Федорович ты рӯпата ва̄рме̄т, вит ос тӯр паттаныл ма̄, тӯр ва̄тат яныгман лӯптат пуссын ёт вис. Юв хунь ёхтыс, та ма̄, вит ос лӯптат о̄влэ̄т такви ёмащаквег ханищтасанэ. Тувыл э̄лаль са̄всыр яныг ӯсытыт о̄лнэ лабораториятын ке̄тсанэ. Тот рӯпитан ма̄хум ты ма̄, вит ос лӯптат ханищтасаныл ос та̄нки хансум ла̄тыӈ ювле ке̄тсыт. Ты юипа̄лт рущ о̄йка такви рӯпататэ урыл са̄всыр отчётнэ̄пакыт хансыс, ос хо̄нтум ра̄кт урыл кӯщаитын потыртас. Кӯщаит округувт о̄лнэ тӯрытыт ма̄хум рӯпитаӈкве ань ат та̄ртыяныл, мощ ӯрхатуӈкве ла̄всыт.

1137 2016. 12. 08. Светлана РОМБАНДЕЕВА

Ялпус нэ̄ намхо̄талэ̄т янытлылӯв! Фаина Павловна Иштимирова ювле хультум э̄тпост 55 та̄лэ то̄влыс. Тав Ханты-Мансийск ӯст о̄лы, «Хо̄тал» нампа э̄ргын, йӣквнэ театрыт рӯпиты. Культурат рӯпитаме па̄сныл ос 35 та̄лыг то̄влыс. Ам тав ётэ хо̄нтхатыгласум, потрамасум, о̄лупсатэ о̄вылтыт китыгласлум. На̄н ань э̄лаль Фаина Павловна потре ловиньтэлы̄н. – Ам яныг таквс э̄тпос 28 хо̄талэ̄т 1961 та̄лт Белоярский район Ванзеват па̄вылт самын патсум. Ты сака ёмас сыстам па̄вылкве, карс ма̄т, ӯльпаӈ ма̄т ӯнлы. Колта̄глувт хо̄т ня̄врам самын патыс – нила а̄ги, кит пыг. Ма̄н пуссын ма̄ньта̄гыл рӯпитасӯв, колсори рӯпата коныпал на̄йив са̄грысӯв, вит а̄лумтасӯв. Мис о̄щсӯв, туи пум ва̄рсӯв. Ам а̄тям ёт тув палыт хӯл алыщласум. А̄тям Павел Тарасович Костин Ялпус па̄вылт самын патыс, ма̄ньщи хум о̄лыс. О̄пам Тарас Григорьевич Костин сампыльта̄л хо̄тпаг о̄лыс. Ма̄ньщи э̄рыг, мо̄йт са̄в ва̄с, са̄ӈквылтапыл са̄ӈквылтас. Ӯй йӣквнэ ва̄рмаль ва̄нэ хо̄тпаг о̄лыс, па̄выл ма̄хманэ ёт тӯлыглахтас. Омам Ольга Ильинична ханты нэ̄, а̄ги о̄парищ наме Миляхова. Тав ма̄ньта̄гыл савалапыг хультыс, щаще̄кватэ̄н янмалтавес. Ащо̄йкам яныг хо̄нтыт порслувес, тав юипа̄лэ̄т ос ане̄квам а̄тимыг е̄мтыс. Омам школа а̄стламе юипа̄лт Ханты-Мансийск ӯст медучилище а̄стлас. Полноват па̄вылт са̄в та̄л ма̄нь ле̄ккарыг рӯпитас. Тав ань такте̄т яныгмас, акваг номсыс, тах са̄в ня̄врамыӈыг е̄мты. А̄тям ёт Тугияны па̄вылт акванминасы̄г, ма̄н хо̄т ня̄врам самын патсӯв. Омав ань 78 та̄лэ то̄влыс, Полноват па̄вылт Улякщи а̄пщим ёт о̄лы. Тав палтэ ва̄тихал яланта̄лэ̄в, уральтылӯв, ма̄нав акваг ӯритэ. Яныгмамув порат тав ма̄н ма̄гсылув носкит ос хорамыӈ щулкиныт сагыс. Пенсиян минаме юипа̄лт ос па̄квпалыӈ ханты супыт ос то̄р сахит ю̄нтуӈкве патыс. А̄тяв а̄тимыг е̄мтме хус та̄лыг ты то̄влыс. Ам 1977 та̄лт школа а̄стласум. Ма̄нь та̄гыл сака йӣквсум, э̄ргысум, ты тэ̄ла а̄нумн сака мӯстыс. Улпыл таима̄гыс э̄лаль ханищтахтуӈкве Салехард ӯсн минасум, культпросвет училищан поступитасум. Училище а̄стламум юипа̄лт Полноват па̄вылн о̄лмыгтасум, хум ва̄рсум, Алла а̄гим самын патыс. 1981 та̄лт тот клубын патхатасум. Концертыт ва̄рыгласӯв, округ янытыл яласасӯв, э̄ргысӯв, йӣквсӯв. 1991 та̄лт колта̄глум ёт Белоярск ӯсн ва̄нтлысум, «Увас хурамат» ансамблит рӯпитасум. Тот китхуйплов та̄лтем о̄лсӯв. Хунь тыт «Хо̄тал» нампа театр ва̄рвес, ам тыг рӯпитаӈкве во̄вве̄сум. Тувыл тыг та ва̄нтлысум, театрын патхатасум. А̄гиягум о̄с тыт о̄лэ̄г, сас колта̄глыӈыг е̄мтсы̄г, а̄гипыг янмалтэ̄г. Ма̄н Алла ос Юля а̄гиягум ёт «Ялпус» нампа э̄ргын, йӣквнэ ансамбль ва̄рсӯв, та па̄сныл ань нила та̄лыг ты то̄влыс. А̄гиягум, тэ̄н ня̄враманэ̄н ос ам акваг ханты ос ма̄ньщи э̄ргыт э̄рге̄в, йӣкве̄в. 2014 та̄лт ма̄н Африкан ялсӯв, ма̄нти йӣкванув тот о̄лнэ мирн суссылтасанӯв. А̄тям Ялпус па̄вылныл о̄лыс, таима̄гыс ансамблюв тох та намаяслӯв. Щар яныг аким Леонид Тарасович Костин Ленинград ӯст А. И. Герцен нампа педагогический институтт ханищтахтас, тувыл э̄кваӈа̄гиӈ та̄гыл ёхтыс. Та̄лтем Полноватыт о̄лсыт, ётыл Кульпасн во̄ввес школат рӯпитаӈкве, тув та ва̄нтлысыт. Э̄кватэ̄нтыл тот школат рӯпитасы̄г. Аким хосат а̄тимыг е̄мтыс. Тав ёлыпа̄лэ̄т а̄тям о̄лыс, тувыл Евгения э̄щен. Тав са̄в та̄л Тобольск ӯст о̄лыс, ань о̄с а̄тим. Акв э̄ще̄н Варвара Тарасовна Полноват па̄вылт о̄лы. Раиса Тарасовна Сытомино па̄вылт о̄лы. Щар ма̄нь а̄пщияге Алексей ос Николай, тэ̄н ань сас а̄тимыг. Ялпус па̄вылт э̄лнаӈ янгыщ ма̄ньщи мир о̄лыс. Тот ла̄пка, пе̄карня рӯпитасы̄г. Ань па̄вылн туи порат мо̄рсыӈ хо̄тпа ёхтала̄лы. Ам рӯпатам сака э̄руптылум, рущ ла̄тӈыл ла̄ваве – «балетмейстер», ма̄хум ханты, ма̄ньщи йӣкв йӣквуӈкве ханищтыянум. Ма̄н театрув ёт округув янытэ̄т яласаслӯв. Э̄лы хо̄н ма̄т о̄лсӯв – Венгриян, Финляндиян, Болгариян, Э̄стониян ялсӯв. Ань потруме̄н та оигпас. Ты я̄тил нэ̄те̄в ма̄н намхо̄талэ̄т янытлылӯв! Са̄в та̄л пуста̄гыл вос о̄лы, На̄й-О̄тыранэ̄н вос ӯргалаве! Пус ка̄т, пус ла̄гыл!

1137 2016. 12. 08. Галина КОНДИНА

О̄панув, ащо̄йканув сунсум кинат Ха̄льӯс район Сӯкыръяныл ма̄ньщи а̄гирищкве Яна Филиппова ма̄навн пищма те̄тыс, тав тот кина янытлан та̄л ос такви о̄патэ урыл хансыс. Яна Саранпа̄выл школа а̄стлас, та̄н ще̄мьял Сӯкыръят о̄лэ̄гыт. Оматэ Надежда Каллистратовна ма̄ньщи нэ̄, а̄тятэ Сергей Фёдорович о̄с ма̄ньщи хум. Кина ва̄руӈкве 119 та̄л ювле хультум порат патвес. Щар о̄выл кина мир янытыл тит ягпыгыг Луи ос Огюст Люмьерыг ва̄т са̄грапнал э̄тпос 28 щислат 1895 та̄л «Гран кафе» колт суссылтастэ̄н. Тэ̄н тот по̄слысы̄г, хумус рӯпитан ма̄хум фабриканыл конква̄лэ̄гыт. Кина сунсум ма̄хум маттем та пӯмщалахтасыт, та̄нанылн пӯмыщ о̄лыс, хумус хурит нёвсысыт. О̄выл кинат сака ва̄тит о̄лсыт, аквтит минута са̄витыт. Та̄н тот нас ё̄мыгтасыт, ха̄йтыгтасыт ос потраныл ат суйтыс, рущ щирыл ла̄ввес – немое кино. 1927 та̄л мус кинат пуссын потыр ат о̄щсыт. Та юипа̄лт мо̄т ищхӣпыӈ ут ква̄лтапаптувес, таве̄тыл потыр о̄с хасвес. Потыр ёт хансым о̄выл кина ла̄ввес – «Певец джаза», ты «Уорнер Бразерс» американский фирма ва̄рум кина о̄лыс. Россиявт 1896 та̄л кина по̄слуӈкве патвес. Югра ма̄вт государственный архивын ам хунь нэ̄пакыт ловиньтаӈкве ялсум, тот хо̄нтсум – кина 1930 та̄лыт порат тыт суссылтаӈкве патвес. Округув янытыл пионерытын кина суссылтан 32 кол рӯпитас. Та̄н халанылт щар ёмщакв рӯпитан колыт ты «Юбилейный» Ха̄льӯст, «Художественный» Ханты-Мансийск ӯст, «Октябрь» Сургут ӯст ос мо̄т колыт па̄влыӈ ма̄т о̄лсыт. Тот ня̄врамыт та̄нти кина са̄т сыс акв щёс суссылтасыт. То̄ва па̄влытын кина хоса ат тотаве, ма̄хум хоса ӯрхатэ̄гыт, почтат кинапа̄нкат матпалыт та хуе̄гыт. Акв нэ̄пакт хансым о̄лыс: Ягрим па̄выл почтат акв кина са̄т хо̄тал хуяс, таве Светлый па̄вылн тотуӈкве кос э̄рыс, тох ма̄хум онтолов хо̄тал кинаныл ӯрсаныл. Ха̄льӯс почтат нёлолов хо̄тал кинат о̄щве̄сыт, Тэ̄к, Восыӈтӯр ос Шайтанкан тотуӈкве ат ве̄рмуве̄сыт. Сортыӈъят хусахтем арыг хо̄тал почтаныл о̄с ат рӯпитас. Ань ам ма̄хум титыгласанум, номияныл та̄н тамле пора ман а̄ти. Атпан нупыл са̄т та̄лныл ос онтырса̄т акв та̄л яныт 12 хо̄тпа титыгласанум. Ты хо̄т хо̄тпа Сӯкыръят о̄лэ̄гыт ос хо̄т хо̄тпа Саранпа̄вылт. Та̄н ла̄всыт, сака ёмщакв та пора номияныл, сунсуӈкве акваг ялантасыт, то̄ва кинат титхӯрум щёс суссаныл, хо̄нтлым урыл кинат сунсуӈкве сака ка̄сащасыт: «Повесть о настоящем человеке», «17 мгновений весны», «Неуловимые мстители», «Дети партизана». О̄с са̄всыр мо̄т кинат «Весна на Заречной улице», «Тимур и его команда», «Свадьба в малиновке», «Свинарка и пастух», «Пётр Первый», «Розыгрыш» та̄нанылн сымын ро̄всыт. Титыглам ма̄хманум номылматсаныл, Саранпа̄вылт ос Сӯкыръят билет тынэ манса̄вит ос клубт манса̄вит ӯнлын улас о̄лыс. Кина сунсуӈкве акваг са̄в хо̄тпа ёхталас, ӯнлын ма̄л аты то̄влуве̄сыт. Ма̄хум ла̄щлаквег ӯнлысыт, нэ̄мхотьют па̄квсам ат пурыглас, ат потыртас, аюм хо̄тпат то̄ва порат о̄с ёхталасыт, та̄н о̄с ла̄щлаквег ӯнлахо̄лсыт, нэ̄мхотьютын торас ат ва̄рсыт. Сӯкыръят ка̄сыӈ хо̄тал кина суссылтавес, ня̄врамыт ма̄гсыл билет тынэ 5 копейка са̄вит о̄лыс ос яныг ма̄хум ма̄гсыл – 20 копейка. Ня̄врамыт ма̄гсыл э̄типа̄лаг са̄т щё̄с порат кина суссылтавес, яныг ма̄хум ма̄гсыл онтолов щё̄с порат. Кина сунсуӈкве Саранпа̄вылныл ма̄хум о̄с ёхталасыт. Тӯяг ос таквсы лё̄хта̄л порат кина о̄с суссылтавес. Сӯкыръят ва̄тахтем та̄л кина суссылтым ам о̄пам Фёдор Сергеевич Филиппов рӯпитас. О̄пам 1941 та̄лт сӯкыр э̄тпос 22 хо̄талт Саранпа̄вылт самын патыс, Сергей Иванович ос Елена Моисеевна омаге, а̄тяге наманэ̄н о̄лсыт. О̄пам нёлолов класс а̄стлас. 1965 та̄лт Тюмень ӯст школа рабочей молодежи №16 а̄стлас. 1968 та̄лт Ханты-Мансийск ӯсн минас, тот киномеханикыг ханищтахтас. 1969 та̄лт ва̄т са̄грапнал э̄тпос о̄выл хо̄талт Пунгинский киноустановкан мотористыг пирмайтавес. Мо̄тыт та̄лт во̄ртур э̄тпос 13 хо̄талт Саранпа̄вылн киномеханикыг рӯпитаӈкве минас. Ос аквта та̄л аквта э̄тпост 18 щислат тав Сӯкыръян рӯпитаӈкве те̄твес. Туи 1972 та̄лт о̄йттур э̄тпост ам щаще̄квамтыл Софья Ивановна Сайнаховал акванминасы̄г. Тэ̄н ат ня̄врам янмалтасы̄г, нила пыг – Олег, Сергей, Иван, Александр ос акв а̄ги Елена. Ань Филипповыт колта̄гланыл яныг – тэ̄н ня̄враманэ̄н 11 ня̄врам о̄ньще̄г, ос тит апыгрищиг яныгме̄г. Ам о̄пам сака ёмщакв рӯпитас. Тав номтыӈ хум о̄лыс, киноустановкатэ ёт рӯпитаӈкве ха̄сыс, суссылтан кинатэ ос потрыт акв порат акваг рӯпитасыт. Акв кина суссылтан порат хӯрум бобина пе̄нтуӈкве э̄рыс. Тав пе̄нтнэ̄тэ порат ма̄хум аты ва̄саныл, хунь акв утэ холы ос мо̄танэ о̄вылтахты. Тох ма̄щтырыг тав рӯпитаӈкве ха̄сыс. Ка̄сыӈ е̄мт кинатэ оигпан порат таве̄н пленка ювле ка̄тыл со̄хтуӈкве э̄рыс. Па̄влыӈ ма̄хум а̄нумн ань потыртэ̄гыт, о̄пам хо̄тпа нупыл сака ёмас э̄лумхо̄лас о̄лыс. Рӯпитан ма̄тэ̄н акваг са̄ртын ёхталас, э̄рнэ утанэ са̄ртын щё̄питасанэ, тувыл клуб а̄витэ пӯнсыс. Фёдор Сергеевич 1998 та̄лт пенсиян минас ос э̄лаль рӯпитаӈкве ат патыс. О̄пам 1996 та̄лт «Почётный кинематографист России» ма̄гылн тагатан по̄сыл майвес. Тав 1999 та̄лт лӯпта э̄тпос 14 хо̄талт а̄тимыг е̄мтыс. Ам о̄пам кина ос такви рӯпататэ сака э̄руптастэ. Ам тав киноустановкатэ хо̄нтыслум, ты утэ̄тыл тав ма̄к ёмас, э̄рнэ тэ̄ла ва̄рыс, тав ма̄хумн ань тыг мус номаве. Потыр ма̄ньщи ла̄тӈыг Галина Кондина толмащластэ.

1137 2016. 12. 08. Людмила Теткина

Ма̄ньщит урыл по̄слым кина Ювле хультум э̄тпост «Диалог национальных культур» нампа форум Ханты-Мансийск ӯст рӯпитас. Ты ёмас ва̄рмаль «Культура» нампа кол щё̄пита̄лыглас. Ма̄хум форумн атыглан ма̄гсыл та̄н Россия Президент па̄лыл грантолныл та̄стыглаве̄сыт. О̄выл хо̄талэ̄т та̄н са̄всыр ханищтапыл ва̄рыглаве̄сыт ос кинал суссылтаве̄сыт. Китыт хо̄талэ̄т са̄всыр мирыт пе̄с йис ва̄рмаляныл э̄лаль хумус тотуӈкве ос халанылт юртыӈыщ хумус о̄луӈкве, та урыл потыртасыт. Ты э̄лыпа̄лт округув янытыл рӯпитан культура колыт халанылт кассыт. Форум о̄лум порат ты касылт но̄хпатум колыт янытлаве̄сыт. О̄выл местал Сургутский район Русскинская па̄вылт о̄лнэ культура кол майвес. Тот рӯпитан хо̄тпат хантыт ма̄хум пе̄с йис ва̄рмаляныл э̄лаль тотыяныл. Нижневартовск ӯст рӯпитан культура кол китыт места вистэ. Хӯрмит местал Нефтеюганск ӯст о̄лнэ кол майвес. Ты колыт кӯщаяныл Ханты-Мансийск ӯсн во̄виньта̄лве̄сыт ос ты форум рӯпитаме порат янытлан нэ̄пакыл мӯйлуптаве̄сыт. Ты юипа̄лт ма̄хум та̄нки рӯпатаныл урыл пуссын потыртасыт. Сыктывкар ӯсныл Российский финноугорский центр кӯщай нэ̄ Татьяна Барахова ёхталас. Тав ла̄выс, та̄н финноугор мирыт пе̄с йис ва̄рмаляныл ос ща̄нь ла̄тӈаныл э̄лаль тотуӈкве о̄с нё̄тэ̄гыт. Ты рӯпата та̄н ищхӣпыӈ ут хосыт ва̄ре̄гыт. Ань та̄н интернетыт я̄нас ло̄пс о̄ньще̄гыт, тот рӯтыг о̄лнэ мирыт урыл са̄всыр ля̄ххалыт хансэ̄гыт. Са̄всыр хансым потрыт ос кинат тув ва̄рияныл. Центрыт рӯпитан хо̄тпат кинат о̄с та̄нки по̄слэ̄гыт. Мо̄лты та̄л та̄н округувн ёхталасыт. Ха̄льӯс районын ялсыт, тот ма̄ньщи ма̄хманув урыл кина по̄слысыт ос намаясаныл – «Манси. Путь промысла». Тав ла̄выс, ты кинаныл са̄всыр ма̄т ань суссылтыяныл. «Берегиня» нампа кина суссылтан мирхал фестивальн Архангельск ӯсн ке̄тсаныл. Ма̄ньщиянув урыл по̄слум кинаныл тот но̄хпатыс ман а̄ти мо̄тыт газетат ловиньтэ̄н.

1137 2016. 12. 08. Галина КОНДИНА

Са̄т сӯйт ӯнлын музей Ка̄сыӈ яныгнув па̄вылт манос ӯст музеит о̄лэ̄гыт, тот та̄н мираныл о̄лупса урыл са̄всыр суссылтапыт ва̄рыглавет. Ос хунь тамле музеит рӯпитаӈкве патсыт, улпыл мощща хо̄тпа ты урыл ва̄гыт. Ма̄н «То̄рум Маа» округ музеюв тэ̄лытаквс яныг таквс э̄тпост ва̄т нупыл онтолов та̄лэ то̄влыс. Музей пе̄с нэ̄паканэ̄т хансым о̄лы: «17 хо̄талт лӯпта э̄тпост Ханты-Мансийский исполком нэ̄пак та̄ратас, тот хансым о̄лыс, этнографический музей ӯнттын ма̄гсыл «Са̄т сӯйт» 15 гектар ма̄ вос та̄ставе». То̄нт 1987 та̄лт сӯкыр э̄тпос 9 хо̄талт музей ӯнттуӈкве та о̄вылтавес. Ма̄ ӯсыӈ мирн харамтавес. Хотьют ка̄сащас, ка̄сыӈ хо̄тал ёхталасыт. Училищат ханищтахтам ня̄врамыт ма̄шинал тотыглаве̄сыт, та̄н сака ёмщакв нё̄тсыт. Щар акваг тот рӯпитам хо̄тпат наманыл са̄выӈпа̄лэ округув янытыл ва̄вет: Ю. Н. Шесталов, Е. Д. Айпин, У. Н. Шульгина, В. И. Шульгин, Т. А. Молданова, З. Н. Лозямова, Э. И. Косполов, Г. И. Егорова, Леонид Юдин, Николай Волдин, Е. П. Соломина, Г. С. Райшев ос мо̄таныт. Та̄н ва̄рум рӯпатаныл хосыт та ма̄ соссаӈ мир музеиг ты е̄мтыс. О̄выл кӯщаиг 1989 та̄лт тот Р. С. Ользина рӯпитас. Тав юипа̄лэ̄т Г. Лазарев кӯщаиг о̄лыс. 1997 та̄лт Т. А. Клеменова кӯщаиг паттувес. 2008 та̄лныл В. Н. Кочетыгова рӯпитас. Ань музей ва̄т нупыл онтолов та̄лэ то̄влыс, намхоталэ янытлан ма̄гсыл ӯс мир мӯйлуӈкве тув во̄виньта̄лве̄сыт. Са̄всыр коллективыт ёхталасыт, тот ма̄ньщи ос ханты ма̄хманув э̄ргыт э̄ргысыт, йӣквсыт, ня̄врамыт стихыт ловиньтасыт. «Лылыӈ союм» колт ханищтахтын ня̄врамыт о̄с сака ёмщакв ханищтахтэ̄гыт. Акв пыг Арсений са̄ӈквылтапыл са̄ӈквылтас, ты мус йӣквнэ а̄каниг йӣквсы̄г. Руслан Вьюткин ос Руслан Аширбакиев ня̄лыт ёт хум йӣкв йӣквсы̄г. Марк Ромбандеев, ма̄нь пыгрищакве, Юван Шесталов стихотворениятэ ма̄ньщи ла̄тӈыл ловиньтас. Ма̄ньщи нэ̄ Маргарита Рябова татем пӯмщиг йӣквыс, тав тай тӯлыглахтуӈкве сака ха̄сы. Тав нупылэ сунсуӈкве ма̄хматын сака пӯмыщ о̄лыс. Фаина Иштимирова ма̄ньщи йӣквыт нё̄тнэг йӣквыс. Йӣквнэ ма̄хманув нупыл сунсым пора сака молях ювле хульты, концерт оигпас, мӯй ма̄хум ща̄й аюӈкве во̄вве̄сыт. Ня̄врамыт хотьют ка̄сащас, ня̄л па̄хвтуӈкве ве̄рмысыт, сунсовыт ӯлтта поргысыт. Ӯсыӈ ма̄хум а̄мпыӈ та̄гыл тув ёхталасыт, та а̄мпыт сунын те̄равет, ня̄врамыт суныл тотыглаве̄сыт. Тот таса̄вит ма̄хум атхатыгласыт, ка̄сыӈ хо̄тпа а̄мпыл ялуӈкве таӈхыс. А̄мпыт ёмщакв ханищтым о̄лэ̄гыт, о̄траныл ла̄тӈын хӯнтлэ̄гыт, та̄н о̄с татем ща̄гтмыт, сакати, хотталь во̄р ма̄н тотве̄сыт, лыпащ мощ ха̄йтыгтэ̄гыт. Тох ты музей намхо̄талэ̄т янытлавес, ань ӯсыӈ мир ва̄ӈкве патсаныл, матыр ялпыӈ хо̄тал порат акваг тув ёхталэ̄гыт. Сыстам лылые̄пыл тот лылтэ̄гыт, нё̄тнэ во̄рквел пӯмщалахтэ̄гыт. Ма̄н о̄с хунь тув ёхталэ̄в, ма̄нти яныгмам ма̄в номылматылӯв, сымт кӯпнитнувег е̄мты.

1137 2016. 12. 08. Тамара МЕРОВА

«Витсам» ма̄ньщи нэ̄пакув но̄хпатыс Яныг таквс э̄тпос 24 хо̄талт Москва ӯст «СМИротворец» нампа касылт но̄хпатум ля̄ххал тотнэ хо̄тпат янытлаве̄сыт. Ты касыл са̄всыр мирыт та̄нки халанылт акваннё̄тхатнэ̄ныл ос акванюрщхатнэ̄ныл ма̄гыс щё̄питым о̄лы. Ля̄ххал тотнэ хо̄тпат ты о̄вылтыт потрыт хансэ̄гыт, кинат по̄слэ̄гыт ос ра̄тива хосыт потыртэ̄гыт. Тувыл ты утанылт касэ̄гыт. Та̄н рӯпатаныл Россият мирыт ёт ва̄йхатым ос та̄н тэ̄ланыл ма̄гыс пуӈктотнэ хо̄тпатн лов номинация щирыл сунсавет. Та̄н та̄нкина̄ныл рущ щирыл «Гильдия межэтнической журналистики» намтсаныл. Тав 2008 та̄л па̄сыл рӯпататэ о̄вылтастэ, тот Маргарита Арвитовна Лянге кӯщайлахты. Ты касылт но̄хпатум хо̄тпат Москва ӯсн во̄виньта̄лве̄сыт ос тот мӯйлупсал майве̄сыт. Мӯй ма̄хум са̄всыр мирыт ёт хо̄нтхатыгласыт ос халанылт ханищтахтасыт. О̄выл хо̄талт та̄н Государственный Думан са̄всыр мирыт ёт рӯпитан хо̄тпат ёт ва̄йхатуӈкве тотыглаве̄сыт. Ань Россияв янытыл 193 са̄всыр мирыт о̄лэ̄гыт, та̄н 239 сыресыр ла̄тӈыл ман диалектыл потыртэ̄гыт ос ма̄хум хо̄та̄ти 89 ла̄тӈытыл потыртаӈкве ханищтавет. Мо̄тыт хӯрум хо̄талыт сыс мӯй хо̄тпат МГУ журналистика ханищтан колытыт та̄нки рӯпатаныл пӯмщиг ва̄рнэ̄ныл ма̄гыс мӯтраӈ тэ̄латн ханищтаве̄сыт. Ты коныпал са̄всыр мирыт ёт рӯпитан, та̄н тэ̄ланыл палт нё̄тмил ва̄рнэ кӯщаит ёт ва̄йхатасыт ос ма̄хум о̄лупсаныл та̄рапаттысыт. Тувыл ФАДН ос ТАСС колыгн тотыглаве̄сыт. Тамле хо̄нтхатыглапыт ос ханищтапыт ля̄ххал тотнэ хо̄тпатн пуссын э̄ре̄гыт. Ань ка̄сыӈ мӯй хо̄тпа такви палтэ о̄лнэ ва̄рмалит тув а̄рталыянэ ос тэ̄лат ёмасыг е̄мтнэ̄ныл ма̄гыс ла̄тыӈ тоты. 2016 та̄лт «СМИротворец» нампа касылн ля̄ххал тотнэ 759 колытыл та̄нки рӯпатаныл ке̄тсаныл. Комиссия лов номинацият щирыл 7 со̄тыра каснэ утыт суссыт. Ос 36 хо̄тпат мӯйлупсал майве̄сыт. Ань федеральный ос региональный ля̄ххал тотнэ колыт но̄хпатнэ ма̄гыс я̄нас пе̄рияве̄сыт. Тувыл та̄н пуссын ва̄нэ ос янытлан ма̄гыс шортнэ̄пакн хансавет. Мо̄т са̄всыр колыт халт ма̄н «Лӯима̄ сэ̄рипос» ма̄ньщи газетав ос «Витсам» нампа журналув о̄с тув хансым о̄лэ̄г. Аквтох 17 са̄всыр газетат, ищхӣпыӈ ут хосыт ля̄ххал тотнэ 16 колыт, 11 телевидение ос 8 радиостанцият наманыл тот хӯлтым о̄лэ̄гыт. Ты та̄л акв йильпи «Актуальная проблема» нампа номинация ва̄рвес, тот 16 са̄всыр ма̄ныл ке̄тым рӯпатат сусве̄сыт. Мо̄лты та̄лт 940 са̄всыр ма̄ныл рӯпатат ке̄тым о̄лсыт, ты та̄л мощ мощщануве. То̄ва ма̄т ля̄ххал тотнэ колыт, тувыл то̄ва республикат ща̄нь ла̄тӈыл потыртан теле ос ра̄тива колыт лаппанве̄сыт. Ща̄нь ла̄тӈыл хансым потрыт манос передачат Ямал ос Югра ма̄ныл са̄внув ке̄тве̄сыт. Тот тахольт газетат, ра̄тиват иӈ рӯпитэ̄гыт. Ань «Смиротворец-2016» касылт «Пресса» нампа номинацият хӯрмит местат Ямал ма̄ныл «Няръяна Нгэрм» нампа газета о̄лыс. Тув Салехард ӯсныл Хабэча Яунгад ёхталас, тав «Миротворец» потре ма̄гыс мӯйлуптавес. Югравныл «Телевидение» номинацият ТРК «Север» Сургут ӯст рӯпитан нэ̄ Оксана Рагуцкая (Ярославцева) но̄хпатыс. Тав о̄выл места – «Мелодия для ханты», «Мама, я нерусского люблю», «Отцы и дети» по̄слум кинат ма̄гыс яныг мӯйлупсал майвес. Тувыл «Детские и молодёжные СМИ» номинацият хӯрмит места – ГТРК «Карелия» Петрозаводск ӯсныл ке̄тым «Чудесная земля Вепсов» мультфильм ос ма̄ньщи нэ̄пак «Витсам» халэ̄нт уртыстэ̄н. Ты нэ̄пак Светлана Динисламован ва̄раве. Ос китыт места – «Югра» телеканалн майвес. Та̄нанылн «Югорика. Манси. Вода – источник жизни» кина сака мӯстыс. Таве Ирина Чукомина щё̄питастэ. Мо̄т но̄хпатум ма̄хум о̄вылтыт на̄н ма̄н газета ищхӣпыӈ утэ̄т рущ потрыт ловиньтаӈкве ве̄рмегы̄н тах.

1137 2016. 12. 08. Светлана РОМБАНДЕЕВА

А̄сугорский институт 25 та̄лэ то̄влыс Ювле хультум э̄тпост Ханты-Мансийск ӯст о̄лнэ А̄сугорский институт 25 та̄лэ то̄влыс. Ты хо̄тал кастыл тот рӯпитан ма̄хум хо̄нтхатыглап ва̄рыгласыт, докладыт ловиньтасыт. О̄выл ла̄тыӈ институт кӯщай нэ̄ Виктория Ивановна Сподина тав ла̄выс: «Институтт янгыщ соссаӈ хо̄тпат рӯпитэ̄гыт. Ма̄н округт о̄лнэ соссаӈ ма̄хум мо̄йтаныл, пе̄с йис потраныл ёлхансыянӯв, акванатыянӯв, нэ̄пакыг та̄ратыянӯв. Фольклорный фондувт хӯрум со̄тыра атса̄т арыг щё̄с са̄вит мо̄йт ос потыр акванатым о̄лы. Ань то̄ва мо̄йтыт манос потрыт ищхӣпыӈ ут хосыт хӯнтлуӈкве ро̄ви. Научный сотрудниканув ня̄врамыт ма̄гыс ловиньтан нэ̄пакыт хансэ̄гыт, школат ма̄гыс ханищтан нэ̄пакыт та̄ратэ̄гыт, словарит щё̄питэ̄гыт, нэ̄пакыг ва̄рияныл. 25 та̄л сыс институтт 400 арыг са̄всыр нэ̄пак хассӯв. Округ янытыл ань 28 школатыт кит со̄тыра арыг ня̄врам ща̄нь ла̄тыӈ ханищты. Ищхӣпыӈ утыт институтув я̄нас ло̄пс о̄ньщи, тув ма̄н Электронный библиотека ва̄рыслӯв. Тот матыра̄ти ловиньтаӈкве ро̄ви, манхурип нэ̄пакыт ма̄н та̄ратасӯв, хотьют хансыс, са̄всыр ля̄ххалыт, та маныр тот пуссын хансым о̄лэ̄гыт. Тувыл та ут хосыт ка̄сыӈ мо̄йт ман потыр хӯнтлуӈкве ро̄ви, та̄наныл тув ща̄нь ла̄тӈыл, рущ ос английский ла̄тӈыл хансыянӯв. Наука тэ̄ла но̄хво̄рмалтаӈкве э̄ри, таима̄гыс ма̄хманув са̄в рӯпата ва̄ре̄гыт. Хо̄т хо̄тпа научный диссертация хассыт, ювле хультум та̄лт та̄н наука кандидат намыл майве̄сыт. Ань налыман научный сотрудникыт халт онтоловхуйплов хо̄тпа учёный нам о̄ньще̄гыт. Ня̄врамыт ос яныгхо̄тпат ма̄гыс ма̄н са̄всыр конкурсыт щё̄пита̄лэ̄в. «Югра литературная» нампа конкурс китыт та̄л ты ва̄рыгласлув. О̄выл та̄л яныгса̄т ляпатем хо̄тпа потыр хассыт, китыт та̄л – китса̄т арыг хо̄тпа участие пирмайтасыт. Мо̄тыт конкурсын «Голоса книг писателей Югры» о̄выл та̄л китса̄т арыгтем ня̄врам потыр хассыт, китыт та̄л ос са̄тса̄т ляпатем потыр ке̄тсыт. «Фронтальный диктант» нампа акция китыт та̄л ты ва̄рыгласӯв – ма̄ньщи, ханты ос ё̄рн ма̄хманув та̄нти ла̄тӈыл диктант хассыт. Ты тэ̄ла ка̄сыӈ та̄л ре̄тыӈ ю̄свой э̄тпос 21 хо̄талэ̄т ва̄рыгла̄лаве. Ос манрыг ты хо̄тал ма̄хум диктант хансэ̄гыт? Ты урыл ам аквкит ла̄тыӈ ла̄ве̄гум: 1952 та̄лт ты хо̄талт Бангладеш ма̄т о̄лум студентыт кӯщаяныл нупыл потыртасыт, ань ща̄нь ла̄тӈаныл государственный ла̄тӈыг вос о̄лы, ты о̄вылтыт са̄кконнэ̄пакыт вос хансавет. Тох ла̄вманыл ма̄гыс та студентыт пуссын порславе̄сыт, писалил щама па̄тлуптаве̄сыт. Та пилыщмаӈ нак о̄лме ма̄гыс ётыл ЮНЕСКО организация ре̄тыӈ ю̄свой э̄тпос 21 хоталэ ща̄нь ла̄тыӈ хо̄талыг намаястэ. Ань ка̄сыӈ та̄л та хо̄талт ма̄ янытыл о̄лнэ мирыт та̄нти ла̄тӈыл диктант хансэ̄гыт. Ма̄н о̄с ты тэ̄ла палт о̄лтхатсӯв. Мо̄лты та̄л хӯрумса̄т арыг хо̄тпа диктант хансыс, ты та̄л хо̄тса̄т ляпатем хо̄тпа хансыс. Ты тэ̄ла хосыт ма̄к таи на̄ӈки – ань ма̄н ла̄тӈанув о̄лэ̄гыт, ма̄ янытыл суйтэ̄гыт. Мо̄т хо̄н ма̄т о̄лнэ учёный хо̄тпат ёт ма̄н о̄с рӯпитэ̄в, аквъёт са̄в э̄рнэ тэ̄ла ва̄ре̄в – Венгрият, Финляндият, Германият ос Нидерланды ма̄т о̄лнэ ма̄хум ёт ва̄йхатэ̄в. Россияв янытыл о̄лнэ мо̄т научный организацият ёт о̄с рӯпитэ̄в, ма̄нти халувт договорнэ̄пакыт хансэ̄в, тувыл аквъёт са̄в э̄рнэ тэ̄лат ва̄ре̄в. Институтувн ка̄сыӈ хо̄тпа ёхтуӈкве ве̄рми, матыр китыглахтан ла̄тыӈ о̄ньщи те, вос китыглахты, библиотекан вос щалтсы, матыр вос ловиньты. Институтт рӯпитан я̄тил ма̄хумаквет, мӯй хо̄тпат пуссын пуста̄гыл о̄лэ̄н, э̄лаль о̄с са̄в ёмас тэ̄ла ва̄ре̄н». Кӯщай нэ̄ потре оигпаме юипа̄лт мо̄т ма̄т рӯпитан ма̄хум ла̄тыӈ ла̄всыт, А̄сугорский институт 25 та̄лэ̄тыл янытласаныл, тот рӯпитан хо̄тпат нупыл са̄в ёмас сымыӈ ла̄тыӈ ла̄всыт, та̄наныл янытласаныл, хорамыӈ лӯптатыл ос мӯйлупсатыл мӯйлуптасаныл. Тувыл ма̄хум научный докладыт ловиньтасыт. Санкт-Петербург ӯсныл акв учёный хо̄тпа ёхталас Алексей Алексеевич Бурыкин, тав РАН лингвистический исследование институтт научный сотрудникыг рӯпиты, «Язык – родной, первый, материнский, этнический, какой ещё? Проблемы идентификации и самоидентификации личности в полиэтничном и многоязычном социуме» нампа доклад ловиньтас. Ты о̄йка потре сака пӯмыщ о̄лыс. Ма̄ньщи ма̄хманув докладыт о̄с ловиньтасыт – С. А. Попова, С. С. Динисламова ос М. В. Кумаева. Та̄н потраныл тах пуссын «Вестник угроведения» нэ̄пакт хансавет.

1138 2016. 12. 22. Людмила Теткина

Э̄рнэ нэ̄пакыт ищхӣпыӈ ут хосыт ва̄руӈкве ань ро̄ви Са̄т та̄л ювле хультум порат ва̄т са̄грапнал э̄тпос 15 хо̄талэ̄т Россия янытыл акв э̄рнэ ва̄рмаль рӯпитаӈкве о̄вылтахтас, рущ ла̄тӈыл «Единый портал государственных услуг» намаим о̄лы. Ань ма̄хум ты ищхӣпыӈ ут хосыт са̄всыр э̄рнэ нэ̄паканыл ва̄рияныл. Ма̄н о̄лнэ ма̄вт «Электронное правительство Югры» о̄с рӯпиты. Округ мирколт рӯпитан ма̄ньлат хум Павел Ципорин ла̄выс: «Тамле э̄рнэ тэ̄ла ка̄сыӈ э̄лумхо̄лас о̄лупсатэ мощ кӯпнитыг ань ва̄ритэ. Ты ут хосыт штрафолн, на̄локолн ойтуӈкве ро̄ви, мо̄т хо̄н ма̄н ялантан ма̄гсыл паспорт ос са̄в мо̄т нэ̄пакыт тот ва̄равет. Таи ёмас, ты э̄рнэ нэ̄пакыт ма̄гсыл мирколн ос мо̄т ма̄н минуӈкве ос хо̄тал палыт очередит лю̄люӈкве щар ат э̄ри. Туп ты ищхӣпыӈ утыт рӯпитаӈкве ха̄суӈкве э̄ри. Ма̄н округувт о̄лнэ 53% мир тув хасхатасыт ос са̄всыр э̄рнэ нэ̄паканыл ань тот ва̄рияныл. Рӯпитан хо̄тпа манаса̄вит та̄л рӯпиты ос манаса̄вит пенсияолн сэ̄лыс, тот о̄с хансым о̄лы. Ма̄ньлат хум ла̄вме щирыл, ты ищхӣпыӈ ут акваг мощ ёмаснувег ва̄раве. 2017 та̄лт ща̄нита̄щит самын патнэ ня̄враманыл намнэ̄пакыл о̄с тувыл хасылтаӈкве тах патэ̄гыт. Ты ут хосыт намнэ̄пакыт ке ва̄ре̄гыт, ня̄враманыл та̄ра садик ма̄гсыл очередин хансавет ос са̄всыр СНИЛС ос мо̄т нэ̄паканыл ва̄равет. Ты юипа̄лт ща̄няныла̄щанылн нэ̄пакыт ка̄тын винэ ма̄гсыл ялуӈкве туп э̄ри. Ты ще̄мьят са̄всыр пособиеолныл та̄ра ойтуӈкве о̄с тах патавет. Тувыл ты э̄рнэ ва̄рмаль урыл са̄в ма̄хум иӈ ат ва̄гыт. Округувт о̄лнэ мир ты ищхӣпыӈ ут урыл вос пӯмщалахтасыт ос нэ̄паканыл тот вос ва̄рсаныл, правительстват рӯпитан хо̄тпат са̄в рӯпата ва̄ре̄гыт. Павел Ципорин ла̄выс, сӯкыр э̄тпост пе̄риян хо̄тал о̄лум порат та̄н нэ̄пак та̄ратаӈкве ёхталам ма̄хум ёт рӯпитасыт ос ты ва̄рмаль урыл потыртасыт. Ос са̄в ма̄хум ты ищхӣпыӈ утн хассаныл. Ань то̄ва ма̄хум ты ут хосыт са̄всыр э̄рнэ нэ̄пакыт ва̄руӈкве ка̄саще̄гыт кос, тувыл тув хасхатуӈкве ат ве̄рме̄гыт. Ма̄ньлат хум ла̄выс, ты ма̄хум МФЦколн ялуӈкве э̄ри, тот та̄н нё̄тавет. Ма̄ньлат хо̄тпат ёт ос ханищтап щирыл рӯпитан департаментыт кӯщай нэ̄ Любовь Ковешникова ты тэ̄ла урыл о̄с потыртас. Тав ла̄выс, ань ня̄врамыт пуссын электронный дневник тот о̄ньще̄гыт. Та̄н хумус ханищтахтэ̄гыт, ща̄няныла̄щаныл сунсуӈкве тот ве̄рме̄гыт. Школа а̄стлан ня̄врамыт ЕГЭ хумус хассыт, тот о̄с ро̄ви сунсуӈкве.

1138 2016. 12. 22. Галина КОНДИНА

Тамле о̄выл воссыг нэ̄мхуньт ул вос е̄мты Мо̄лал правительство кӯщаит ля̄ххал хаснэ ма̄хум э̄лыпа̄лт та урыл потыртасыт, автобусыл сакватахтам ня̄врамыт хумус о̄влэ̄т хо̄нтве̄сыт ос нё̄туӈкве патве̄сыт. Мо̄лал Нефтеюганск ӯсныл ня̄врамыт Ханты-Мансийск ӯсн касуӈкве тотыглаве̄сыт. Тыт та̄н акробатика касылыт ёнгысыт. Ювле хо̄талъя̄т порат тотмаяве̄сыт, хо̄т лё̄ӈхыт яныг ма̄шина ля̄льт йис, автобус та ма̄шинал акванпе̄лхатсы̄г, автобус котильт хо̄йвес, титтыгсаквалас. Лов хо̄тпа та̄ра тот а̄тимыг е̄мтсыт ос тит хо̄тпа пӯльницан тотуӈкве а̄лымавесы̄г, тот лылыянэ̄н ойматсыт. Ты о̄вылкапай мощ сатапаӈкве патме порат е̄мтыс, та хо̄тал сака тӯйис. Нила ма̄шина сакватаве̄сыт. Дмитрий Шаповал, губернатор ва̄ӈын хум, тав та о̄выл е̄мтум ма̄н са̄рыг минас, хум ла̄выс: «Щар о̄влэ̄т сакватым ня̄врамыт ос яныгхо̄тпат моляхнув пӯльницан тотуӈкве э̄рыс. Пуссын службат молях рӯпитасыт, та̄н ка̄сыӈ та̄нти рӯпатаныл ёмщакв ва̄рсаныл». Алексей Шипилов, округ кӯщай ва̄ӈын хум, та урыл потыртас, тамле яныг о̄вылкапай воссыг нэ̄мхуньт ул вос е̄мтыс, ань ва̄ӈкве э̄ри, хумус ня̄враманув ӯргалаӈкве э̄ри. Ань следователит ёмщакв рӯпатаныл ва̄рияныл, ос то̄нт та̄раг е̄мты, маныр ма̄гсыл тох автобус хо̄яс, хумус тох таса̄вит э̄лумхо̄лас порсысыт. «Ма̄н ань ла̄вуӈкве ат ве̄рме̄в, хумус тамле о̄вылкапай е̄мтыс, тыт а̄ти акв хо̄тпа лю̄льсаӈ рӯпитас, тыт са̄в ма̄хум э̄рнэ щирыл ат ва̄рсыт, таима̄гыс ня̄врамаквет та сакватаве̄сыт. Ма̄н округ кӯщаюв та̄ра ты урыл ла̄ввес, тав такви пуссын ва̄рмалит тармыл уральтым о̄щсанэ, хо̄т э̄рыс, такви тув ялыс», – ва̄ӈын кӯщай ла̄выс. Ва̄ӈнаге по̄сыӈ кӯщай хум Василий Романица потыртас: «Ам ва̄глум, ань ка̄сыӈ хо̄тпа та урыл титыглахтуӈкве таӈхи, манрыг ня̄врамыт ёт полиция ма̄шинат ат минасыт? Ма̄н палтув нэ̄мхотьют тамле нэ̄пак ат хансыглас, ма̄н ты лё̄ӈханыл урыл аты ва̄слӯв. Ня̄врамыт ёт рӯпитан кӯщаит МВД РФ Югра ма̄н нэ̄матыр ат те̄тыгласыт, ат ла̄выгласыт». Сергей Дектярев, Нефтеюганск ӯст кӯщаиг рӯпитан хум, ла̄выс: «Та спортивный школат кӯщаиг рӯпитам нэ̄ ань по̄хын те̄твес, тав полиция колн тотыглавес, ань таве̄н такви колэ̄ныл нэ̄мхотталь кон ква̄луӈкве ат ро̄ви, тав «домашний арестыл» хасвес». Алексей Шипилов ос та урыл ла̄выс: «Ма̄навн ань ка̄сыӈ хо̄тпан э̄ри номсахтуӈкве, хоталь тав ня̄враме те̄тытэ, хотьют ёт та̄ратытэ, тох сакати тамле пилыщмаӈ о̄выл э̄рыӈ воссыг ат е̄мты».

1138 2016. 12. 22. Николай МЕРОВ

Ля̄ххал тотнэ ма̄хум округ мирколт акванатхатыгласыт Ва̄т са̄грапнал э̄тпос хо̄тхуйпловит хо̄талэ̄т округ мирколт ля̄ххал тотнэ ма̄хум акванатхатыгласыт. Тув Маргарита Лянге, савсыр мирыт ва̄рмаляныл щирыл рӯпатан кӯщай нэ̄, ёхталас. Са̄всыр мирыт аквъёт юртыӈыщ вос о̄лсыт, маныр рӯпата тыи ма̄гыс ва̄руӈкве э̄ри, тав ты урыл тот потыртас. Ты кастыл Мария Волдина, яныгпа̄ла ханты э̄ква, ос Геннадий Райшев, ка̄тыл хурит по̄слын о̄йка, ос мо̄т са̄в хо̄тпа тув во̄виньта̄лве̄сыт. Кина суссылтан то̄тап хосыт мо̄т районытыт о̄лнэ ма̄хманув ты потыр хӯнтлысыт ос та̄нки ва̄рмаляныл урыл потыртасыт. О̄выл ла̄тыӈ Маргарита Лянге ла̄выс: «Сӯкыр э̄тпос о̄выл хо̄талытт Россия Президентув «Доктрина информационной безопасности» э̄рнэ нэ̄пакт хасхатас. Ань ты нэ̄пак щирыл та̄нки ла̄тӈыл потыртан мирыт аквъёт юртыӈыщ вос о̄лсыт, тот ты урыл са̄в потыр хансым о̄лы. Ты ва̄рмаль таима̄гыс э̄ри, лю̄ль нак ул вос е̄мталас. Ма̄н ма̄вт са̄всыр ща̄нь ла̄тӈытыл потыртан мир о̄лы. Юио̄выл та̄лыт тамле ва̄рмаль о̄лыглы, ма̄хум халанылт намыл воритотуӈкв хуйтавет. Ты лю̄ль нак ма̄н палтув ул вос е̄мтыс, ань са̄в рӯпата ва̄раве. Кина суссылтан то̄тап хосыт Лангепас, Мегион, Сургут, Нягань, Ха̄льӯс ос мо̄т ӯст о̄лнэ мир та̄нки о̄лупсаныл урыл потыртасыт. Ма̄н округувт ма̄хум потраныл щирыл, воритотнэ сака яныг ва̄рмаль ат е̄мталы. Ма̄хум юртыӈыщ о̄лэ̄гыт. Ка̄сыӈ ӯст «Культура центр» колыт рӯпитэ̄гыт. Тот са̄всыр ща̄нь ла̄тӈыл потыртан хо̄тпат пуссын аквъёт рӯпитэ̄гыт. Ялпыӈ хо̄талыт порат ка̄сыӈ ма̄хум та̄нки пе̄с йис о̄лупсаныл мирн суссылтэ̄гыт. Та̄н э̄рге̄гыт, йӣкве̄гыт, атыӈ тэ̄нут па̄йтэ̄гыт, акв пасан ва̄тат ӯнлэ̄гыт, аквъёт сака юртыӈыщ о̄лэ̄гыт. Тыи сака ёмас ва̄рмаль, тыщир ты о̄луӈкве э̄ри. 2018 та̄лт кина суссылтан телекомпаният пуссын цифровой ва̄рмаль щирыл ля̄ххалыт тотуӈкве патэ̄гыт. Ты кастыл Ха̄льӯст ля̄ххал суссылтан хо̄тпат ты урыл потыртасыт, та̄н та̄нки по̄слум кинаныл ӯст суссылтаӈкве ат ве̄рмияныл тах. Округувт ля̄ххал тотнэ мир яныг кӯщаяныл Елена Шумакова ла̄выс, ты та̄рвит ва̄рмаль са̄в ма̄т тах е̄мты. По̄слын кинат ОТРК «Югра» нампа колт суссылтаӈкве тах ро̄ви. Тувыл ос ля̄ххал тотнэ ма̄ньщи нэ̄ Галина Эдин (Яптина) акв ва̄рмаль урыл китыглахтас. Са̄ртын «Северный дом» нампа передача соссаӈ ма̄хманув о̄лупса э̄лаль тотнэ урыл ва̄рвес. Ань та передача хумус э̄лаль рӯпитаӈкве паты. Кӯщай нэ̄ Елена Шумакова ты урыл тох ла̄выс. Ты передача лап ат пантвес. Тав ань мо̄т щирыл ва̄руӈкве патвес. Ля̄ххалыт соссаӈ ма̄хум о̄лнэ йис ма̄нылт по̄славет. Ты передача нас мо̄т щирыл ва̄руӈкве патаве. Ты сапра̄нит ма̄хум китахкем щё̄с са̄всыр ва̄рмаль урыл потыртасыт. Тувыл ос мощ мо̄лалнув соссаӈ мирыт халт «Мыслящие люди» нампа касыл ва̄рыглавес. Ханты ос ма̄ньщи ла̄тӈыл ля̄ххал тотнэ хо̄тпат та̄нки хансум потраныл о̄с тув ке̄тыгласаныл. Щар ёмас потыр хансум хо̄тпат ань янытлан нэ̄пакыл майве̄сыт. Янытлан нэ̄пакыт Маргарита Лянге ты хо̄тпатн мӯйлуптас: «Югория» нампа телерадиокомпаният рӯпитан ма̄ньщи нэ̄ Татьяна Мерован ос ханты нэ̄ Ольга Лонгортован, «Ханты ясанг» газетат рӯпитан кит хо̄тпагн, ты Ирина Самсонова ос Ульяна Данило майвесы̄г. «Лӯима̄ сэ̄рипос» газетаныл о̄с кит хо̄тпаг, ты Людмила Теткина ос Николай Меров мӯйлуптавесы̄г. Сапра̄ни о̄лум порат ля̄ххал тотнэ ма̄хум департаментыт кӯщай ва̄ӈын э̄ква Вера Царёва намхо̄талэ о̄лыс. Тав хо̄тпан та̄лэ то̄влыс. Ля̄ххал тотнэ ма̄хум таве ты кастыл о̄с янытласаныл. Потрыт оигпам юипа̄лт ма̄хум пуссын ща̄й аюӈкве во̄вве̄сыт.

1138 2016. 12. 22. Галина КОНДИНА

Са̄всыр тэ̄нут, маснут тыналаӈкве тотыглавес Ка̄сыӈ та̄л аквты порат округув намхо̄талэ кастыл тыналахтын ма̄хум са̄в ӯсытныл, па̄влытныл ёхталэ̄гыт. Та̄нти янмалтан манос ва̄рнэ тэ̄нутаныл, ю̄нтнэ пормасаныл тыналаӈкве Ханты-Мансийск ӯсн тотыглыяныл. Тыналахтын хо̄талыт рущ щирыл ла̄вавет – «Товары земли Югорской». Ты ярмаркан мир 1995 тал па̄сныл атхатыглэ̄гыт. Ты та̄л тыналахтын ва̄рмаль о̄вылтым порат Экспоцентрколн округ губеранторув ва̄ӈын хум Алексей Забозлаев хащта̄л ма̄ныл ёхтум тит мӯй хумыг тув тотыглас. Ты Африка ре̄гыӈ ма̄ныл Бенин республиканыл Анисет Габриэль Кочофа посолыг о̄лнэ хум ос Центрально-Африканский Республиканыл Российский Федерацият полномочный посолыг о̄лнэ хум Клод Безо ёхталасы̄г. Тэ̄н кӯщаянувн тыт ма̄н ма̄вт ва̄рнэ са̄всыр тэ̄нутыл суссылавесы̄г, маныр ка̄сащасы̄г, таи а̄рталасы̄г. Тэ̄натэ̄н сака пӯмыщ о̄лыс, хумус тыт пилыт, ла̄хсыт са̄сныл ва̄рим хусапсовытын пинавет. «Регион-К» Кондинский районт рӯпитан компания пил, ла̄хыс пирмайтэ̄гыт ос та̄наныл то̄слыяныл манос са̄всыр атыӈ тэ̄нутыг ва̄рияныл, нё̄тнэ хусапсовытын пиныяныл. Тэ̄н ла̄ве̄г, тамле хусап ка̄тын виӈкве ёмас, тамле мӯйлупса ка̄сыӈ хо̄тпа виӈкв тахмаи. Титыглахтасы̄г, хумус ты ёмас, нэ̄матыр лю̄ль утыл ат тэ̄лыгтым тэ̄нут та̄н о̄лнэ ма̄нылн тотуӈкве, тот та̄н палтаныл вос тыналаве. Ань округ кӯщаит ты ва̄рмаль хосыт рӯпитаӈкве патэ̄гыт, потыртахтэ̄гыт ос ма̄н ма̄вт ва̄рнэ тэ̄нут тув тыналаӈкве тах тотаве. Василий Новосёлов ты компаният кӯщаиг о̄лнэ хум ла̄выс, та̄н ань тарыг па̄квныл ма̄г па̄йтэ̄гыт. Па̄квыт па̄йтыяныл, витэ ма̄г хольт е̄мты, та витын пил та̄ртэ̄гыт, та щирыл атыӈ тэ̄нут ва̄ре̄гыт. Ань округув янытыл хусахтем ӯсытын тамле хусапсованыл тыналаӈкве те̄тыяныл. Моще̄ртын Казахстан ма̄н те̄туӈкве патыяныл. Титса̄т арыгтем общинат, крестьянскофермерский хозяйстват, та̄нти рӯпатал олн сэ̄лнэ хо̄тпат тыналахтуӈкве ёхталасыт. Хӯл са̄всыр щирыл ва̄рим о̄лыс – йильпи хӯл, солвалыӈ хӯл, коптитым хӯл, ёхул хольт то̄слым хӯл. Тыт пувнэ хӯлыт тыналаве̄сыт ос ща̄рщит пувим хӯлыт о̄с тотыглаве̄сыт, хоса ка̄тупла̄глуп утыт, та̄н крабыг ла̄вавет, о̄с о̄лсыт. Хотьют тамле ут о̄с улпыл ёвтыс. Ща̄рыщ хӯлыт по̄р тай ве̄трал тыг тотыглавес, тав сака тыныӈ, грамм щирыл тыналавес. Нё̄влиӈ тэ̄нут о̄с сака са̄в о̄лыс. Пӯрыщ, мис, па̄ля, щищкурек нё̄выль, юн о̄щнэ ва̄с нё̄выль, пӯрыщ во̄й ма̄хум тыналасыт. Ты хо̄тпат ӯйхул та̄нти янмалтыяныл, нё̄вляныл татем ёмасыт, во̄иӈыт, са̄всыр тэ̄рпил ӯйхуланыл ат тыттыяныл. Акв ма̄т хум яныг мӯӈикапаит тыналас, ты страус, товлыӈ ӯй, тамле мӯӈи тоты. Хум страусыт о̄щнэ̄тэ. Ма̄н соссаӈ ма̄хманув о̄с ёхталасыт, та̄н са̄выӈпа̄лэ та̄нти ю̄нтнэ пӯрканыл, пальсакыт, турло̄псыт, са̄с то̄тапыт, сакныл хартым са̄всыр хорамыт тыналасыт. Белоярский район Касум па̄вылныл Тарлиныт, Тасьмановыт та̄нти ю̄нтум ла̄гыл маснутаныл тотыгласыт. Казымский оленеводческий компания са̄лы нё̄выль тыналасыт, са̄лы нё̄влил ва̄рим тушёнка, ветчина ос колбаса тотыгласыт. Ам Салават Байгузин, кӯщаяныл, титыгласлум, манса̄вит са̄лы нё̄выль та̄н мо̄т тэ̄нутыг ва̄рияныл. Тав ла̄выс, нё̄вляныл туи лӯпта э̄тпос мус тыналыяныл, хультнэ па̄лэ Курганский мясокомбинатн те̄тыяныл, тот па̄нкаг ва̄равет ос ювле тыналаӈкве те̄тавет. Колбаса Белоярский ӯст ва̄рылтэ̄гыт. Са̄в ат ва̄рыглэ̄гыт, ялпыӈ хо̄талыт кастыл тыналан са̄витыл ва̄равет. Ань тыналам са̄лы нё̄вляныл тынэ нила са̄т атпан солко̄ви, ма̄нь ло̄мтыг сартым о̄лсыт, ма̄хумн молях ёвтве̄сыт. Ха̄льӯс район Саранпа̄вылныл Иван Митрофанович Качанов ёхталас. Тав «Тӯрупъя» общинат кӯщаиг о̄лы. Общинатэ 2000 та̄л па̄сныл рӯпиты. Иван нёхыс, лэ̄ӈын, охсар совыт тыналас. Ты коныпал ма̄н ма̄вт яныгман пилытыл ва̄рим кисель, ма̄г, джемыт суссылтаӈкве тотыглас. Ты урыл ме̄н тав ётэ хоса потыртасме̄н, потрум ам ётылнув тах хансылум. Нё̄р а̄хвтасыт суссылтаӈкве о̄с тотыглаве̄сыт. Ка̄сащан хо̄тпат та̄нтина̄нылн ёвтуӈкве ве̄рмысыт. Саранпа̄вылт экспедиция о̄лы, тот рӯпитан ма̄хум хо̄нтнэ а̄хвтасаныл тыналаве̄сыт. Акв та ёт Любовь Филоненко лю̄ляхо̄лыс, тав мӯй ма̄хум Нё̄ро̄йка па̄вылн тотыглыянэ. Тот тав такви рӯпататэ урыл потыртас. Ма̄хум мӯйлуӈкве ос нё̄рыт сунсуӈкве вос ёхталэ̄гыт. Округувт ты та̄л ня̄врамыт янытлан та̄лыг ла̄вим о̄лыс, таима̄гыс ня̄врамыт ёт рӯпитан хо̄тпат о̄с ёхталасыт. Мегион ӯсныл «Умный ребёнок» нампа школаныл нэ̄г о̄лсы̄г, тэ̄н ёхталам ня̄врамыт ёнгалтасы̄г. Тэ̄нти рӯпататэ̄н урыл таи потыртасы̄г, лю̄льсаӈ потыртан ма̄нь ня̄врамыт ёт та̄н рӯпитэ̄гыт. Ка̄сыӈ ла̄тыӈ ёмщакв ла̄вуӈкве ханищтыяныл, са̄всыр щирыл ёнгалтыяныл, ёнгим номсуӈкве, потыртаӈкве ханищтыяныл. Сэ̄ил матыра̄ти ва̄ре̄гыт, кумыска тармыл сэ̄ил по̄слэ̄гыт. Ма̄нь ня̄врамыт аты торгамтыяныл та̄н ханищтанэт, тох та̄н ва̄гта̄л ат патэ̄гыт ос ханищтахтуӈкве торасыг ат е̄мты. Школан миннэ яныт ня̄врамыт ос мо̄т щирылнуве ханищтавет, та̄н акв ма̄т ла̄щлакв ӯнлуӈкве, хӯнтлуӈкве ва̄гта̄л ул вос патэ̄гыт, ос ёнгим ханищтавет. Ловиньтаӈкве молях ханьщувлэ̄гыт. Экспоцентр колн ёхталам ня̄врамыт по̄слуӈкве, сакныл хорамыт ва̄руӈкве ве̄рмысыт. Ка̄сыӈ ня̄врам таквина̄тэ̄н э̄рнэ тэ̄ла хо̄нтуӈкве ве̄рмыс. Па̄ля пунныл рущ а̄кань ва̄руӈкве ханищтаве̄сыт. Ва̄рум утаныл ёт виӈкве ро̄выс. Шахматыл ёнгуӈкве ня̄врамыт ханищтаве̄сыт. Хотьют щар ат ха̄сыс, сакати ва̄ӈкве патыс, хумус ро̄ви манос э̄ри ёнгуӈкве. Тамле ты пӯмыщ тыналахтын ярмарка о̄лыс. Ты та̄л са̄в ма̄ныл титса̄т арыгкем компаният та̄нти тэ̄нутаныл, пормасаныл тыналаӈкве тотыгласыт. Ка̄сыӈ та̄лныл са̄внув ма̄хум тыналахтуӈкве ёхталэ̄гыт ос ка̄сыӈ та̄лныл са̄внув хо̄тпа ёвтхатуӈкве ёхтыгпа̄лэ̄гыт. Ӯсыӈ ма̄хум ос мӯй ма̄хум ань ва̄ганыл, ты ярмаркат щар ёмас ос йильпи тэ̄нут тыналаве.

1138 2016. 12. 22. Галина КОНДИНА

Лю̄льсаӈ хӯлнэ хо̄тпат нё̄тавет А̄гмыӈмосыӈ, сакватахтам ма̄хум халт кӯщаиг о̄лнэ хо̄тпат округ мирколн во̄виньта̄лве̄сыт, тот та̄н ма̄гсыланыл сапра̄ни ва̄рыглавес. Геннадий Бухтин, губернатор кӯщай ва̄ӈын хум, ла̄выс, пальта̄л манос лю̄льсаӈ хӯлнэ атса̄т э̄лумхо̄лас ма̄н округувт акваннё̄тхатым о̄лэ̄гыт. Та̄н ма̄гсыланыл са̄всыр касылыт ва̄рве̄сыт, та̄н ань ёсал ха̄йтуӈкве, акв па̄хвыӈ ёсан лю̄люмтым сыпныл ёлаль тахсуӈкве, волейболыл, теннисыл ёнгуӈкве ве̄рме̄гыт, бассейныт уйигтэ̄гыт. Ты спортсменанув Россияв янытыл касуӈкве ялантэ̄гыт. Сургут ӯст Станислав Руденко волейболыл ёнгын ма̄хум ханищтыянэ. Та командав са̄в ме̄талит о̄ньщи, каснэ ма̄т са̄в щёс но̄хпатыглас. Яныг таквс э̄тпост та̄н Италия мо̄т хо̄н ма̄н ялсыт, европейский Лигат но̄хпатсыт. Ань Сургут ӯст инвалидыт ма̄гсыл каснэ кол ӯнттувес, тот та̄нанылн касуӈкве э̄рнэ утыт ва̄рим о̄лэ̄гыт. Тот ха̄йтыгтаӈкве, поргуӈкве ро̄ви, са̄всыр дискыт, тольхыӈ йӣвыт, яныг те̄рщакыт, пувыр те̄рпоталыт па̄хвтуӈкве ро̄ви, ты кастыл лапва̄рим ма̄т о̄лэ̄гыт. Та колт спортсменыт каснэ̄ныл порат тув сунсуӈкве ёхталан ма̄хум ма̄гсыл 450 ӯнлын улас ва̄рвес. Тренировайтахтын са̄в- сыр те̄рыт ва̄рве̄сыт, тот ка̄тытла̄глыт ё̄рыг ва̄руӈкве ве̄рмияныл. Тот ловтхатнэ ос ӯщлахтын колнакыт о̄с о̄лэ̄гыт. Лю̄льсаӈ хӯлнэ хо̄тпат ма̄гсыл ань интернет хосыт потыртан служба ва̄рвес. Та̄н тув СМСпищма хансуӈкве ос Skype ищхӣпыӈ ут хосыт потыртаӈкве ве̄рме̄гыт, ты ут хосыт ка̄салавет, маныр та̄н ка̄тыл, тулё̄влыл суссылтэ̄гыт, хӯлтэ̄гыт, ты кастыл ханищтым хо̄тпат та̄наныл торгамтэ̄гыт. Лӯпта э̄тпосныл ос ань тыг мус 261 э̄лумхо̄лас тув хансыглас, са̄выӈпа̄лэ та̄н интернет хосыт хассыт. Станислав Лазурко «Всероссийское общество глухих» общественный организацият ма̄н округувт кӯщаиг о̄лы, тав ла̄выс, ты ищхӣпыӈ ут ва̄рнэ ма̄гсыл та̄н субсидиял майве̄сыт, 714 со̄тыра солко̄ви са̄вит. Ань та̄н а̄гмыӈмосыӈ, сакватахтам са̄в хо̄тпатын нё̄туӈкве ве̄рме̄гыт. Туп сурдопереводчикыг ла̄внэ хо̄тпат ат то̄вылхатэ̄гыт. Ты хо̄тпат, пальта̄л манос лю̄льсаӈ хӯлнэ э̄лумхо̄ласн хотты кӯщаит ёт потыртаӈкве ос торгамтаӈкве нё̄тэ̄гыт. Яныг ӯсыӈ ма̄т туп тамле хо̄тпат рӯпитэ̄гыт. Ань тамле толмащ хо̄тпат ханищтаӈкве э̄ре̄гыт.

1138 2016. 12. 22. Валентина УЗЕЛЬ

Тэ̄лы лё̄ӈхыт та ва̄рве̄сыт Юио̄выл тит э̄тпосыг, яныг таквс э̄тпос ос ва̄т са̄грапнал э̄тпос, сака ащирмаг о̄лсы̄г. Таима̄гыс округув янытыл тэ̄лы лё̄ӈхыт молях ва̄рве̄сыт. Ты урыл потыртаӈкве округ мирколн тит кӯщай хо̄тпаг ёхталасы̄г, акватэ Сергей Брусков, мо̄танэ Андрей Новиков. Тэ̄н сас лё̄ӈх ва̄рнэ Управленият рӯпитэ̄г. Андрей Новиков ла̄выс, лё̄ӈхыт ва̄руӈкве яныг таквс э̄тпост о̄вылтаве̄сыт. «Северавтодор» нампа предприятие та̄н ты рӯпата ва̄руӈкв ла̄вве̄сыт. Ань округувт 84 тэ̄лы лё̄ӈх о̄лы. Та̄н хосытаныл – 488 ве̄рыста. 17 ве̄рыста – ты я̄т ӯлтта уснэ лё̄ӈхыт. Я̄ ӯлтта щар хоса лё̄ӈх Октябрьский район Шеркалы па̄вылт ва̄рвес, тав 2 ве̄рыста 600 метра палытыг о̄лы, А̄с я̄ ӯлтта мины. То̄ва ма̄т лё̄ӈх ва̄руӈкве сака та̄рвитыӈ. Сергей Брусков ты урыл тох ла̄выс: Ханты-Мансийский район Согом па̄выл ляпат ос Кондинский районт то̄ва ма̄т я̄ӈкылмат тув щар ат по̄лявет. Лё̄ӈх ва̄рнэ порат тот ма̄хум сака хоса рӯпитэ̄гыт. Яныг гусеничный техника тот рӯпитанэ̄тэ порат я̄ӈкылма нуми осэ тӯйт ёт мощ аквантэ̄лыгтыяныл. Та юипа̄лт лё̄ӈх са̄грим йӣвытыл нортаве, тувыл ущ я̄ӈкылма мощ по̄ляве. Округувт тэ̄лы лё̄ӈхыт пуссын акв постановлениенэ̄пакн хансым о̄лэ̄гыт. Мо̄т йильпи лё̄ӈх ва̄руӈкв ат ро̄ви. Э̄лы па̄влыт мус тэ̄лы лё̄ӈхыт ва̄рнэ ма̄гсыл та па̄влыӈ ма̄хумн о̄влэ̄т округ кӯщаитн пищма хансуӈкве э̄ри. Манах олн тув холтуӈкв э̄ри, ёмащакв ловиньтаве, та юипа̄лт ущ кӯщаит ла̄ве̄гыт, лё̄ӈх тот ва̄раве ман а̄ти. Ань ты кӯщай хумыг сас ла̄всы̄г, тэ̄лы лё̄ӈх ва̄рнэ ма̄гыс о̄с са̄в олн э̄ри. Ты та̄л округ бюджетныл 272 млн. солко̄ви тув та̄ставе. Тӯяг мус лё̄ӈхыт уральтаӈкв патавет, хунь лап те во̄таставет, тӯйтаныл тах хотхилавет. Ос щар ма̄к яныг рӯпата та̄н ва̄ре̄гыт, хунь лё̄ӈхыт ущ ва̄руӈкв о̄вылтавет. То̄нт сака са̄в техника э̄ри. Ты э̄тпос о̄вылтахтам порат нила лё̄ӈх ёмащакв ва̄рве̄сыт ос ма̄хум тот яласаӈкв та̄ртве̄сыт. Белоярский районт тит лё̄ӈхыг ва̄рвесы̄г, ма̄хум тот хосат яласаӈкв патсыт. Белоярский ӯсныл Сосновка ос Полноват па̄влыг мус, ос Кондинский районт Междуреченскийныл Карым па̄выл та̄ра Шугур мус. Ханты-Мансийский районт Талинский па̄вылныл Белогорье мус. Тот ма̄тэ ёмас, я̄ӈкылма ос тӯр а̄тим, таима̄гыс лё̄ӈхыт тот молях ва̄равет. Хо̄т ляпат ма̄во̄й но̄хвинэ компаният рӯпитэ̄гыт те, тот лё̄ӈхыт нумыл витыл со̄сантавет, я̄ӈке осыӈыг вос по̄ли. Хунь э̄рнэ осытыг по̄льтаве, то̄нт 60 тонна та̄рвитпа яныг ма̄шинат тот яласаӈкв ве̄рме̄гыт.

1138 2016. 12. 22. Тамара МЕРОВА

Акваннё̄тхатым рӯпитаӈкве патэ̄гыт Хӯрум кӯщаит ля̄ххал тотнэ ма̄хум ёт РИЦ «Югра» колт хо̄нтхатыгласыт. Тыи Наталья Стребкова, э̄лумхо̄лас о̄лупсатэ ӯргалан кӯщай нэ̄, Татьяна Моховикова, ня̄врамыт ва̄рмаляныл ӯргалан нэ̄ ос Николай Евлахов, предпринимательхо̄тпат тэ̄ланыл ӯргалан хум, та̄н пуссын округувт рӯпитэ̄гыт. Рущ щирыл та̄н пуссын уполномоченыиг ла̄вавет. Татьяна Моховикова ня̄врамыт ва̄рмаляныл ёт хосат та̄гыл рӯпиты, Наталья Стребкова та̄л арыгкем ос Николай Евлахов ты э̄тпос атыт хо̄талт кӯщайлахтуӈкве паттувес. РФ Конституция ялпыӈ хо̄тал кастыл та̄н та̄нки рӯпатаныл о̄вылтыт потыртасыт. Та̄н акв са̄ккон нупыл ро̄влахтым пуссын рӯпитэ̄гыт, туп ка̄сыӈ такви рӯпатэ̄т пуӈктоты ос нэ̄мхотты кӯщайлахтын хо̄тпатытн ат я̄рми. Тувыл та̄н Россия янытыл пуссын ӯсыт, районыт мирколыт ёт аквъёт потыртахтым то̄ва тэ̄лат ёмщакв щё̄питанэ̄ныл порат акваннё̄тхатым рӯпитаӈкве ве̄рме̄гыт. Ка̄сыӈ хо̄тпа матыр та̄рвитэ порат ты кӯщаитн ла̄тыӈ хансы ке, тав нё̄туӈкве патаве. То̄ва хо̄тпат та̄нки та̄рвитаныл ёмщакв ос э̄рнэ̄г хумус щё̄питаӈкве э̄ри, щар ат ва̄ганыл. Та̄н лю̄льсаӈ пусмалтаве̄сыт ке, а̄гманылт савалэ̄гыт, э̄рнэ торыг нэ̄паканыл ат щё̄питасаныл – та̄ра ат хӯлтве̄сыт ос таима̄гыс колыл ат майве̄сыт, ханищтан хо̄тпан ня̄врам кантлым ханищтаве, а̄гирищ манос пыгрищ номтэ савалы – тамле лю̄ль ва̄рмалит ос мо̄т накыт хо̄та̄ти акваг о̄лыглэ̄гыт. То̄ванакт ты лю̄ль накытыт нэ̄мхотьютн ат нё̄тавет, та̄нки хоты кӯщаитн ла̄тыӈ хӯлтуӈкве о̄с ат ва̄ганыл. Ань таима̄гыс ты уполномоченыит о̄лэ̄гыт, та̄н округ ма̄хум та̄рвит тэ̄ланыл ёт рӯпитэ̄гыт. На̄н та̄н наманыл ань ва̄ганы̄н, йильпи о̄вылтахтын та̄л па̄сныл та̄н округ янытыл хо̄та̄ти яласаӈкве ос ма̄хум ёт ва̄йхатуӈкве патэ̄гыт тах. Та̄н ань аквъёт э̄лаль рӯпитанэ̄ныл ма̄гыс та̄нки халанылт соглашениенэ̄пак хассыт. Ос ань ва̄рум рӯпатаныл о̄вылтыт кит кӯщай нэ̄г тох потыртасы̄г. Татьяна Моховикова ня̄врамыт тэ̄ланыл уральтаме юипа̄лт ла̄выс: «Щар о̄выл та̄рвит – тыи кол ма̄гыс кисхатнэ ва̄рмаль. То̄ват ань тыг мус ат ва̄ганыл, хоты мирколн ос хоты кӯщаитн нэ̄паканыл тотуӈкве, хоты хо̄тпатныл маныр китыглаӈкве. То̄ват коланыл ма̄гыс ла̄пала̄лавет. Мо̄т та̄рвит – тыи то̄ва ня̄врамыт ёмщакв ат пусмалтавет, тэ̄рпил хансавет кос ос тав пусмалтахты ман а̄ти, э̄лаль торыӈ ат уральтыяныл. Тамле накыт урыл ма̄н ле̄ккарыт ёт акваг потыртэ̄в. Школат ханищтан хо̄тпат ёт акваг ва̄щиньтахтэ̄в, то̄ват ня̄врамыт нупыл кантлэ̄гыт, халмалтахтым о̄лэ̄гыт. Соссаӈ ма̄хум ня̄враманыл интернатт о̄лнэ̄ныл сыс ща̄нянылна̄щанылн аман тув мус та ёрувлавет, та̄н па̄вылн ёхталанэ̄ныл порат ня̄враманыл палт атыпыл щалтсынэ̄ныл. Ма̄н номтанув о̄с савалэ̄гыт». Ань ты накт пилыщмаӈ о̄выл е̄мтыс, ня̄врамыт Нефтеюганск ӯсн тотыманыл порат автобус яныг ма̄шинан хо̄яс, тав пулигсакватавес. Тот лов ня̄врам ос кит яныг хо̄тпаг та̄ра а̄тимыг е̄мтсыт. Мо̄т китхуйплов ня̄врамаквет лылыяныл нэ̄глысыт, та̄наныл ань ле̄ккарыт э̄тэхо̄талэ пусмалтэ̄гыт. Ня̄врамыт пуста̄гыл яныгман ма̄гыс яныг хо̄тпат та̄н номт тотэ̄гыт. Янгыщ ка̄сыӈ ща̄ньа̄щ тав та̄кыщ китыглаве – хоталь ос хотьют ёт тав а̄гитэ ман пыге ке̄тытэ ос маныр тот ва̄ре̄гыт, ва̄нэг вос о̄ньщияныл. Наталья Стребкова ла̄выс: «Ма̄н ма̄хум кол ва̄рмаляныл ма̄гыс о̄с са̄в рӯпитэ̄в. То̄ванакт нё̄туӈкве ве̄рме̄в, то̄ванакт нэ̄матыр лю̄ль ат хо̄нтэ̄в ос ма̄н палтув ла̄тыӈ ке̄тум хо̄тпат ёт нас потыртэ̄в. Тувыл нэ̄гхумыг киттыгминнэтэ̄н юипа̄лт а̄щ ня̄враме ма̄гыс олн ат ойты. Хум хо̄тпат рӯпата ма̄наныл ат хӯлтыяныл, тӯйтыглахтым о̄лэ̄гыт, ма̄н ты ва̄рмалит та̄рапаттуӈкве нё̄тэ̄в. То̄ва ма̄хум сыресыр ма̄н рӯпитаӈкве патхатэ̄гыт, тот олныл ат ойтавет. Тувыл та кӯщаит сут щирыл олныл ойтуӈкве ла̄вавет кос, ос та̄н олн ойтсыт ман а̄ти, сутн воссыг тэ̄ла а̄тим. Э̄лумхо̄лас ӯрхатым нас та о̄лы, тувыл пора мины, хотьютныл маныр китыглаӈкве, ат ва̄гтэ. Э̄лаль тох ул вос о̄лнув, сутн ты тэ̄лат уральтым о̄ньщуӈкве э̄ре̄гыт». Николай Евлахов предпринимателиг рӯпитан ма̄хум акваннё̄тхатым рӯпитаӈкве ла̄выс. Матыр та̄рвитыт е̄мталан порат таве̄н вос хансэ̄гыт манос вос потыртэ̄гыт. Ёмас ханьщувлым наканыл та̄нки халанылт э̄лаль вос тотыяныл ос йильпи тэ̄латн аквъёт э̄лаль ханищтахтуӈве патэ̄гыт тах.

1138 2016. 12. 22. Людмила Теткина

Та̄н олныл майве̄сыт Ма̄н округувт туризм щирыл рӯпитан ма̄хум грантолныл каснэ̄ныл юипалт ущ мивет. Ты та̄л ты ва̄рмаль ма̄гсыл 16 млн. солко̄ви та̄стувес. Округ янытыл 25 заявканэ̄пак ёхталас. Ма̄хум Ханты-Мансийск, Лангепас, Нягань ӯсытныл ос Сургутский, Кондинский, Белоярский, Ха̄льӯс районытныл та̄нки нэ̄паканыл касылн ке̄тыгласаныл. Тувыл туп 14 хо̄тпа проектаныл урыл потыртаӈкве Ханты-Мансийск ӯсн во̄виньта̄лве̄сыт. «Развитие инфраструктуры для внутреннего и въездного туризма» нампа номинацият «Зап-СибАвия» компания но̄хпатыс, та̄н хӯрум млн. солко̄вил майве̄сыт. Тот рӯпитан ма̄хум Ковенская я̄ ва̄тат ма̄нь товлыӈха̄пыт иснэ ма̄ ва̄руӈкве патэ̄гыт. Ос та по̄хат ӯщлахтын кол тах ӯнттэ̄гыт. Ты компаният рӯпитан кӯщай хум Павел Заруцкий рӯпатаныл урыл комиссия э̄лыпа̄лт потыртас. Ты ма̄ мус Ханты-Мансийск ӯсныл 74 ве̄рыста минуӈкве э̄ри. Павел Александрович ла̄выс, Ковенская я̄ по̄хыт са̄в мо̄т я̄т ос ма̄нь тӯрыт о̄лэ̄гыт, тот няслуӈкве ро̄ви. Ань та̄н палтаныл мӯй ма̄хум Тюмень, Пермь, Уфа, Екатеринбург ӯсныл ёхталэ̄гыт. Та̄н ты ӯщлахтын ма̄ ва̄рнэ ма̄гсыл о̄с та̄нки олнаныл холтсаныл, ма̄ло̄мт арендащирыл та̄нки нупыланыл хассаныл. Ма̄нь товлыӈха̄пыт исыглан ма̄ ма̄гсыл сэ̄й тув тотсыт ос кол ӯнттын ма̄ щё̄питасаныл. «Продвижение внутреннего, въездного туризма» нампа номинацият «Кама» нампа соссаӈ ма̄хум община олныл майвес. Та̄н касылн «Дорогою предков» хансум проектаныл ке̄тыгласаныл. Община кӯщай Николай Андрейченко рӯпатаныл урыл потыртаӈкве тыг ёхталас. Та̄н Кондинский район Алтай, Чантырья, Болчары ос Кама па̄влытт рӯпитэ̄гыт. Тот о̄лнэ ма̄хум пуссын ты община ма̄гыс пил ва̄тэ̄гыт, ла̄хыс атэ̄гыт. 60 э̄лумхо̄лас хӯл алыщлым тот рӯпитэ̄гыт. 2010 та̄лт община Светлый Сор тӯр ва̄тат ӯщлахтын ма̄ ва̄руӈкве о̄вылтахтас. 2011 та̄лт та̄н грантолныл майлуве̄сыт. Ты олныл та̄н яныг ёмас колыт тот ӯнттысыт ос са̄всыр э̄рнэ техника ёвтсыт. Ат та̄л сыс тув кит со̄тыра арыгкем э̄лумхо̄лас ӯщлахтуӈкве, няслуӈкве ос пил ва̄туӈкве ёхталасыт. 2014 та̄лт аквты община Крестовый Сор тӯр ва̄тат мо̄т ӯщлахтын ма̄ ва̄руӈкве ос о̄лнэ колыт ӯнттуӈкве о̄вылтахтас. Ты колыт а̄стлан ма̄гсыл кӯщай хум олн ань во̄выс. Ты тӯр Алтай па̄выл ляпат о̄лы, ха̄пыл 25 ве̄рыста минуӈкве. Та ма̄т сака са̄в ӯйхул о̄лы, во̄рт са̄всыр пил яныгми. Общинат рӯпитан хо̄тпат мӯй ма̄хум хӯл алыщлаӈкве ос пил ва̄туӈкве тотыглаӈкве патыяныл. Николай Андрейченко ла̄выс, пе̄с пора та̄гыл та ма̄т ма̄ньщи ма̄хум о̄лэ̄гыт. То̄ват ань тыг мус во̄рт хӯл алыщлым ос во̄раим о̄лэ̄гыт. Туристыт та̄н палтаныл мӯйлуӈкве о̄с тотыглавет. Крестовый Сор я̄ ва̄тат общинат рӯпитан ма̄хум кит кол ӯнттысыт. Аквторыг тот лов э̄лумхо̄лас о̄луӈкве ве̄рми. Ань община ха̄пыт, «Бураныт», квадроциклыт ос мо̄т са̄всыр э̄рнэ утыт о̄ньще̄гыт. Мӯй ма̄хум та̄л сыс тув тотыглаӈкве ве̄рме̄гыт. Ань маим олныл та̄н ты тӯр ва̄тат ос кит кол тах ӯнттэ̄гыт. Ха̄льӯс район Саранпа̄вылт рӯпитан «Рутил» о̄с олныл майвес. Ты предприятиет кӯщаиг Любовь Филоненко о̄лы. Тав «Развитие инфраструктуры для этнографического туризма» нампа номинацият но̄хпатыс. Любовь Николаевна Нё̄ро̄йка рущ па̄выл о̄лум ма̄т ӯщлахтын ма̄ ва̄рыс ос мӯй ма̄хум нё̄рыт сунсуӈкве тотыглыянэ. Саранпа̄вылныл Нё̄ро̄йка мус яныг ма̄шинал яласан лё̄ӈх о̄лы. Миннэ лё̄ӈх 90 ве̄рыста. Ма̄хум тув ӯщлахтуӈкве 2011 та̄лныл ялантэ̄гыт. Акват нас нё̄рыт сунсыглаӈкве ос тот по̄слахтуӈкве ёхталэ̄гыт, мо̄таныт ос туи катамараныл я̄ хосыт Саранпа̄вылт мус на̄тылтэ̄гыт. То̄ват ма̄ньщи ма̄хум о̄лупсал пӯмщалахтэ̄гыт, Сӯкыръя па̄вылн тотыглавет. То̄ват ос хӯл алыщлаӈкве тув ёхталэ̄гыт. Ты олнытыл Любовь Николаевна мӯй ма̄хум ма̄гсыл Нё̄ро̄йка па̄вылт о̄лнэ колыт ӯнттуӈкве паты. «Маркетинг Эволюшн» компания акв номинацият о̄с но̄хпатыс. Тот рӯпитан ма̄хум «Хозяин тайги» нэ̄пак ма̄гсыл олныл майве̄сыт. «Техноком» нампа предприятие тот о̄с янытлавес. Тот рӯпитан ма̄хум маим олныл са̄всыр сувенирыт ва̄руӈкве тах патэ̄гыт.

1138 2016. 12. 22. Людмила Теткина

Кимкъясӯй па̄вылт о̄лнэ ще̄мья Людмила Тимофеевна Лыткина ос Иван Георгиевич Вынгилев ат ня̄врам янмалтэ̄г. Ты ма̄ньщи колта̄гыл Ха̄льӯс район Кимкъясӯй па̄вылт о̄лы. Ювле хультум та̄лт ты ще̄мья йильпи колыл майвес. Ты урыл Людмила таи ла̄выс: «2013 та̄лт о̄лнэ колув на̄йн ё̄свес. То̄нт ам ня̄враманум ёт Саранпа̄вылт о̄лсум, о̄йкам ос во̄рт яласас. Юв хунь ёхтысӯв, колув ӯнлум ма̄т туп щарим ма̄ хультыс. Па̄влыӈ ма̄хум ла̄всыт, колув сака молях но̄хпе̄ламлас, лапхарыгтаӈкве аты а̄лымавес. На̄й харыгтан ма̄хум ёхталасыт, ла̄всыт, колувт на̄йпос ква̄лыг но̄хпе̄ламлам. Юн ке о̄лсӯв, э̄рыӈ лапхарыгтаӈкве ве̄рмыслӯв, тох колув та̄л та хультсӯв. Кит та̄л рӯтанув палт о̄лсӯв. Ты э̄лыпа̄лт ам 2011 та̄лт нэ̄паканум пуссын акванатсанум ос йильпи кол ма̄гсыл очередин хасхатасум. Та порат ма̄н са̄в ня̄врам янмалтан ще̄мьят палт хасвесӯв. Колув на̄йн хунь ё̄свес, ма̄н о̄лнэ колыл Саранпа̄вылт майла̄лвесӯв. О̄влэ̄т такем хотща̄гтсум, номсысум, яныг па̄вылн хунь ва̄нтлэ̄в, о̄йкаме̄нтыл сас рӯпата хо̄нтыме̄н, рӯпитаӈкве патыме̄н. Кимкъясӯй па̄вылт ань туп яныгса̄т арыгкем э̄лумхо̄лас о̄лы, рӯпата щар а̄тим. О̄йкаме̄нтыл щё̄питахтасме̄н, йильпи кол сунсуӈкве Саранпа̄вылн та минасаме̄н. Та па̄вылт ма̄нь пе̄с колыл майлуве̄сме̄н, тыи ма̄гсыл тув ва̄нтлуӈкве ат ка̄сащасме̄н. Ты юипа̄лт Хулюмсӯнт па̄вылн минуӈкве кусыгласӯв. Ам та па̄вылт рӯпата хо̄нтсум, ня̄врам ӯргалан колн рӯпитаӈкве патхата̄лсум. Хулюмсӯнт па̄вылт о̄лнэ кол ат хо̄нтсӯв, ювле Кимкъясӯйн о̄луӈкве та ёхтысӯв. Тувыл па̄влувт йильпи колыт ӯнттуӈкве о̄вылтаве̄сыт, то̄нт ма̄н аты номсысӯв, акв яныг кол ма̄н яныг ще̄мьяв ма̄гсыл ӯнттаве. Йильпи колыл хунь майвесӯв, сака ща̄гтсӯв. Ань мо̄т ма̄н о̄луӈкве воссыг ат воратэ̄в, па̄влувт о̄лэ̄в. Иван во̄раим ос хӯл алыщлым акваг яласы. Яныг тэ̄пкан о̄ньщиме̄н, тот са̄в картопка янмалтыме̄н. Тувыл ты картопка тыналыме̄н. Туи ос таквсы пил ва̄тыме̄н, ла̄хыс атыме̄н ос э̄лаль тыналыянме̄н, тох мощ олн сэ̄лыме̄н. Община «Рахтынья» такви пирмайтан кол тыт о̄ньщи, ка̄сыӈ хо̄тпа пил, ла̄хыс тув тыналаӈкве ве̄рми. Тувыл та̄н тынта̄л ёвтэ̄гыт, тыи ма̄гсыл ма̄хум пиланыл, хӯланыл сака тув ат тотыяныл». Кимкъясӯй па̄выл мус туи порат ха̄пыл ёхтуӈкве туп ро̄ви, Кульпас мус 90 ве̄рыста о̄лы. Ань Кимкъясӯй па̄выл Саранпа̄выл миркол нупыл ловиньтахты, то̄ва порат па̄влыӈ ма̄хум тэ̄ланыл ма̄гсыл тув ялантэ̄гыт. Людмила Тимофеевна ла̄выс, о̄лнэ коланыл на̄йн хунь ё̄свес, та̄н то̄ва э̄рнэ нэ̄паканыл та̄л хультсыт. Ты юипа̄лт тав нэ̄паканэ ва̄рим Ха̄льӯсн, Саранпа̄вылн ос Кульпасн ва̄тихал ялантас. Тувыл тэ̄н о̄йкатэ̄нтыл сас ат рӯпитэ̄г, тыглетувле яласан ма̄гсыл са̄в олн ат о̄ньще̄г. Ма̄ньщи нэ̄ нэ̄паканэ пуссын хунь ва̄рсанэ, туп то̄нт ня̄враманэ ма̄гсыл олныл ойтуӈкве патвес. Нэ̄гхумыг Кимкъясӯй па̄вылт самын патсы̄г. Кульпас па̄вылт школа а̄стласы̄г. Ты юипа̄лт Иван армиян вуйвес. Людмила Ханты-Мансийск ӯсн минас. О̄влэ̄т акв тот тав подготовительный курсыт ханищтахтас. Ты юипа̄лт тав ня̄врамыт ханищтан нэ̄г э̄лаль ханищтахтуӈкве патыс. Югорский университетыт кит та̄л ханищтахтас, тувыл ювле па̄влэ̄н ёхтыс. Кимкъясӯйт ня̄врамыт ӯргалан колн рӯпитаӈкве патхатас, ат та̄л тот рӯпитас. Ань нэ̄ ма̄нь ня̄враманэ ёт юн о̄лы. Ня̄враманэ хунь яныгнувег е̄мтэ̄гыт, э̄лаль ханищтахтуӈкве номсы. Ма̄нь па̄вылт дипломнэ̄пак та̄л рӯпитаӈкве о̄с ат виве, юил ялантым э̄лаль ханищтахтуӈкве паты. Тэ̄н о̄йкатэ̄нтыл сас ма̄ньщииг, ща̄нь ла̄тӈыл потыртэ̄г. Ам нэ̄ китыгласлум, ня̄враманэ̄н ма̄ньщи ла̄тӈыл потыртаӈкве ха̄сэ̄г ман а̄ти. Людмила ла̄выс: «Ня̄враманме̄н ма̄ньщи ла̄тыӈ ат ва̄гыт. Ща̄нюма̄щум ма̄ньщи ла̄тӈыл потыртэ̄г, таи ма̄гсыл то̄ва ла̄тыӈ та̄н хӯлэ̄гыт, торгамтэ̄гыт. Ам ты ва̄рмаль урыл щар ат номсахтасум. Ма̄н ма̄ньщи па̄вылт кос о̄лэ̄в, тувыл пуссын туп рущ ла̄тӈыл потыртэ̄в, ня̄враманув ща̄нь ла̄тӈыл аты ханищтыянӯв».

1138 2016. 12. 22. Светлана РОМБАНДЕЕВА

Соссаӈ хо̄тпа 80 та̄лэ ты то̄влы Ты э̄тпост нэ̄пак хаснэ ханты э̄ква Мария Кузьминична Волдина 80 та̄лэ то̄влы. Тав ва̄т са̄грапнал э̄тпос 28 хо̄талэ̄т 1936 та̄лт Юильск па̄выл ляпат Куръёх я̄ ва̄тат самын патыс. Ты ма̄ э̄лнаӈ Ха̄льӯс район нупыл хансым о̄лыс, ювле хультум нотт тав Белоярский район нупыл хасвес. Ща̄ньа̄щаге са̄лыӈ хо̄тпаг о̄лсы̄г. Мария Кузьминична Ханты-Мансийск ӯст о̄лы. Самын патум хо̄талэ э̄лыпа̄лт ам тав ётэ хо̄нтхатыгласум, о̄лупсатэ урыл китыгласлум, мощ потрамасме̄н. Тав о̄влэ̄т яныгмам поратэ номылматастэ, ла̄выс: «Ам о̄пагумщаще̄квагум, ащо̄йкам ос ане̄квам акваг ӯлылыянум, акваг ка̄сталыянум. Ма̄н яныгмамув порат, та̄н ка̄сыӈ э̄типа̄лаг ма̄навн мо̄йт мо̄йтсыт. Очера о̄лыс – акв хо̄тал ты хо̄тпа мо̄йты, мо̄тыт хо̄тал ос мо̄тананыл мо̄йты. Ма̄н, ня̄врамыт, ты пора сака ӯрыслӯв. То̄ванакт мо̄йт хӯнтлым, ёлояве̄в. Тамле тэ̄ла ка̄сыӈ ё̄рнколт о̄лыс. Хуйнэ пора ёхты, пуссын ёлщё̄питахтэ̄гыт, яты, мо̄йт манос пе̄с йис потыр та о̄вылтаве. Ма̄хманув то̄ванакт а̄мщуӈкве тӯлтхатэ̄гыт, э̄ткотиль мус та а̄мще̄гыт. Ам о̄пам Николай Александрович сака ка̄ркам хум о̄лыс, 36 та̄лэ то̄влуме порат сампыльта̄лыг е̄мтыс. Са̄лыл сака молях яласас, о̄влэ̄т по̄сасыянэ, сунэ̄н ӯнтылматы, э̄л та нуяве. Аквматнакт о̄с аквтох са̄лыянэ по̄сасанэ, ос сунэ̄н ӯнтылматуӈкве ат а̄лымас, хо̄ны рагатас, йӣв та̄рытын щё̄притэ хо̄яс, та юипа̄лт самаге поста̄лыг е̄мтсы̄г, сампыльта̄лыг та е̄мтыс. О̄влэ̄т щаще̄квамн ва̄нтата̄лвес, тувыл хунь ам яныгмасум, таве̄н нё̄туӈкве патсум. То̄нт ам ат та̄лум о̄лыс. Ам таве ва̄нтата̄лыслум, тав ос а̄нум са̄всыр мӯтран ханищтастэ. Ам сака мулумыг о̄лсум, ос туп та порат ёлротмыгласум, хунь о̄пам матыр потыртас манос мо̄йтыс. Ань са̄лыӈ суныл миныме̄н, То̄рум нупыл сунсэ̄гум, татем тулыӈ, тав ла̄ви: «Моще̄ртн сыстамлы». Со̄ль, То̄рмув сыстамыг та е̄мты. Ам номсасум, аман хумус тав ва̄гтэ. Манос таве̄н ла̄ве̄гум: «Сэ̄мыл тулыӈыг е̄мтыс, щар лапхартхатас, щахыл а̄тим». О̄пам ювле ла̄ви: «Ань тах аквтем хо̄талыг паты». Тав сампыльта̄л те̄пыл тамле ощхуль, потрыӈ о̄лыс. Ма̄ньта̄гыл ма̄н са̄всыр потрыт, сыресыр пословицат ос поговоркат хӯлыгласӯв». Мария Кузьминична оматэ наме Варвара Ивановна, а̄ги о̄парищ наме Молданова о̄лыс. Тав Нумто тӯр ва̄тат Масаӈкорт па̄вылт самын патыс. А̄тятэ Кузьма Николаевич Вагатов Осётное нампа са̄лыл яласан ма̄ па̄лыл о̄лум хум. Тэ̄н китхуйплов ня̄врам о̄щсы̄г. Мария Кузьминична 1943 та̄лт хо̄т та̄лэ то̄влуме порат Юильск па̄выл школан вуйвес. Ты урыл тав тох ты потыртас: «Ка̄сыӈ такв- сы са̄лыӈ колныл ня̄врамыт школан тотавет. Ня̄врамыт акванатнэ ма̄хум ма̄н палтув ёхтысыт, номсэ̄гыт, ам са̄т та̄лум, ань ам ёлыпа̄лум Катя йӣгтем ос Проня а̄пщим о̄лсы̄г. Тот нила класс мус ханищтахтасум, тувыл Касум па̄вылн тотве̄сум, э̄лаль тот ханищтахтасум. Са̄тыт класс а̄стламум юипа̄лт э̄лаль Ханты-Мансийск ӯст о̄лнэ педучилищат ханищтахтасум». 1955 та̄лт Мария Кузьминична училище а̄стластэ. Касум па̄выл школат о̄выл класс ня̄врамыт ханищтас, интернатыт кӯщаиг рӯпитас. 1968 та̄лт тав колта̄глэ ёт Ханты-Мансийск ӯсн ва̄нтлыс, педучилищан патхатас. 1971 та̄лт Лениниград ӯст о̄лнэ А. И. Герцен нампа институт а̄стлас. Та юипа̄лт КПСС комитетн тав «Ленинская правда» газетан рӯпитаӈкве ке̄твес, тот ханты ос ма̄ньщи ла̄тӈыл хансым ло̄псыт палт пуӈктотыс. 1974 та̄лт «Ленин пант хуват» газета редакторыг паттувес. 1991 та̄лт «Ханты ясаӈ» ос «Лӯима̄ сэ̄рипос» аквъёт рӯпитан колэ̄н ва̄рвес. Мария Кузьминична тув кӯщаиг паттувес, пенсиян минаме мус тот рӯпитас. Ля̄ххал тотнэ хо̄тпаг тав ва̄т арыг та̄л рӯпитас. Югра ма̄в янытэ̄т яласастэ. Мирн нё̄тмил ва̄рнэ тэ̄лат акваг ва̄рыс, депутатыг пе̄рия̄лвес. Нусаг о̄лнэ колта̄глытын ос савалап ня̄врамытын тав акваг нё̄тыс. Хо̄нтлам ма̄хум ос та пилыщмаӈ порат рӯпитам хо̄тпат палт тав ва̄тихал яланта̄лыс, матыр нё̄тмилыл ва̄рыгласанэ. Мария Кузьминична такви ла̄тӈе̄тыл ос рущ ла̄тӈыл хансы. Тав хансум стиханэ, мо̄йтанэ ос пе̄с потранэ нэ̄пакыг ва̄рве̄сыт, са̄всыр журналытыт ос газетатыт хансыглаве̄сыт. То̄ва потранэ школат ханищтахтан ня̄врамыт нэ̄паканылн хасве̄сыт, ань уроканылт ловиньтэ̄гыт. Тав мо̄йтанэ, потранэ мо̄т хо̄н ла̄тӈыг толмащлаве̄сыт – якутский, венгерский, английский, французский, чешкий ос мо̄т ла̄тӈыг. 2006 та̄лт тав «Ёшак на̄й» ансамбль ва̄рыс, колта̄гыл ма̄хманэ ёт э̄рге̄гыт ос йӣкве̄гыт. Тав «Заслуженный работник культуры РСФСР» нам о̄ньщи, «Ветеран труда», нэ̄пак хаснэ ма̄хум Союз палт хансым о̄лы. 2005 та̄лт «Почетный гражданин Ханты-Мансийского автономного округа – Югры» намыл майвес. Мария Кузьминична кит а̄ги ос апыгрищит о̄ньщи. Тав со̄тыӈ ома, хо̄тпа нупыл сымыӈ э̄лумхо̄лас. Ма̄н, «Лӯима̄ сэ̄рипос» газетат рӯпитан ма̄хум, таве яныг намхо̄талэ̄тыл янытлылӯв! Са̄в та̄л пуста̄гыл вос о̄лы, На̄й-О̄тыранэ̄н вос ӯргалаве!

1138 2016. 12. 22. Светлана РОМБАНДЕЕВА

Нэ̄пак хаснэ ма̄ньщи о̄йка 80 та̄лэ то̄влыс Ма̄нь таквс э̄тпос юио̄выл хо̄талэ̄т «То̄рум Ма̄» музейт хо̄нтаӈ ма̄ньщи поэтув Андрей Семёнович Тарханов 80 та̄лэ̄т янытлавес. Ты хо̄нтхатыглап намая̄лвес «Иду, распахнув свою душу. . . » Андрей Семёнович кит нэ̄пакаге суссылтас, тынакт ущты та̄ратавесы̄г – «Когда улыбаются кедры» ос «Природы чудные мгновенья». Ты нэ̄пакаге тав округ ня̄врамыт ма̄гыс хассаге. О̄выл нэ̄паке̄т стихотвореният, мо̄йтыт ос потрыт хансыс. Китыт нэ̄паке̄н фотоаппаратыл по̄слым хурит ва̄рыс, ань округув ма̄витэ манхурипа, пуссын тув по̄слым о̄лэ̄гыт. Ка̄сыӈ ло̄пс тамле хури о̄ньщи, тувыл тав по̄хатэ̄т стихотворение хансым о̄лы. Ты нэ̄пак ва̄руӈкве таве̄н учёный экологыт нё̄тсыт. «Лылыӈ со̄юм» ханищтахтын колныл ня̄врамыт ёхталасыт, концерт суссылтасыт – ма̄ньщи йӣкв йӣквсыт, са̄ӈквылтапыл са̄ӈквылтасыт, мощ тӯлыглахтасыт, Андрей Семёнович стихотворениянэ ловиньтасыт. Хо̄нтаӈ ма̄ньщи поэтув Кондинский район Аманья па̄вылт самын патыс. А̄тятэ во̄раян хо̄тпаг о̄лыс. 1956 та̄лт тав Ханты-Мансийский педучилище а̄стлас. Юмас па̄выл школат ня̄врамыт ханищтан хо̄тпаг о̄лыс, стиханэ хансуӈкве тот ты о̄вылтахтас. «Утро» нампа щар о̄выл стихотворениятэ «Сталинская трибуна» газетат хасвес. Та юипа̄лт Ленинград ӯст А. И. Герцен нампа педагогический институт а̄стлас. 1961 та̄лт Ханты-Мансийск ӯсн ва̄нтлыс. Андрей Семёнович Ханты-Мансийск ӯс ос ХМАО – Югры Почётный гражданин намыл майвес, тувыл заслуженный деятель культуры Югры, член Союза журналистов, «За развитие культуры народов Севера» лауреат премии намыл майвес, «Снежная симфония» нэ̄паке ма̄гыс округ губернаторн янытлавес. Ты коныпал о̄йка орден Дружбы ос мо̄т са̄в ме̄талит о̄ньщи. Ма̄н, газетат рӯпитан нэ̄тхумит, Андрей Семёнович намхо̄талэ̄т янытлылӯв! Пуста̄гыл вос о̄лы, о̄с са̄в нэ̄пак вос хансы!

1138 2016. 12. 22. Валентина УЗЕЛЬ

Ма̄щтырлаӈкве ха̄снэ хум Ты ханты хум наме Яков Никифорович Тарлин. Ма̄щтырлаӈкве сака ха̄сы. Хо̄т матыр ханищтап ман семинар ва̄раве, тав та̄ра тув та во̄ваве. Мо̄тыт йильпи 2017 та̄л о̄вылтахтын порат та̄л котиль э̄тпос 29 хо̄талэ̄т хум атпан та̄лэ то̄влы. Оматэ-А̄тятэ урыл Тав такви о̄лупсатэ урыл тох потыртас. Омагеа̄тяге сас Касум па̄вылт о̄лсы̄г, 1938 та̄лт самын патсы̄г. Колта̄гланылт ат ня̄врам яныгмасыт – хӯрум а̄ги, тит пыг. А̄щаныл Никифор Георгиевич грамотныиг о̄лыс, школа а̄стламе юипа̄лт ӯйхул пусмалтан ле̄ккарыг ханищтахтас, тувыл бухгалтерыг ханищтахтуӈкве те̄тыглавес. Юв ёхтыс, колхоз экономистыг са̄в та̄л рӯпитас. Акв та̄лт та̄н Москва ӯсн те̄тыглаве̄сыт, са̄всыр ма̄ныл ма̄хум акванатыглаве̄сыт. Та̄н тот экзаменыл ва̄рве̄сыт, атпан хо̄тпа халт туп ат хо̄тпа та экзамен ёмащакв хассыт. А̄щаныл та ма̄хум халт о̄лыс, тав то̄нт сака янытлавес. Ань ты мус тав номылматыгла̄лаве, тав сака ёмас хо̄тпаг о̄лыс, па̄влыӈ ма̄хумн э̄руптавес. Атпан та̄лэ то̄влуме порат та̄рвитыӈ а̄гмыл е̄мтыс, ма̄йтэ̄т пувласпи хо̄нтвес, та а̄гмыл а̄тимыг та е̄мтыс. Оманыл Екатерина Николаевна са̄в та̄л пӯльницат колкан ловтнэ хо̄тпаг рӯпитас. Са̄тлов нупыл ат та̄лэ о̄лыс, 2003 та̄лт а̄тимыг е̄мтыс. НЯ̄враманЭ̄н урыл Ня̄враманэ̄н ка̄сыӈе ань такви о̄лупсал о̄лы. Яныг а̄гитэ̄н Ольга педучилищат ханищтахтас, тувыл Санкт-Петербург ӯсн минас. Акв та̄л туп ханищтахтас, хум ва̄рыс. О̄йкатэ Якутия ма̄ныл о̄лыс, тув нэ̄тэ та тотыстэ. Та па̄сныл тот та о̄лэ̄гыт. Нила ня̄врам о̄ньще̄г, хӯрум пыг ос акв а̄ги. А̄гитэ̄н – пити патта ня̄врам, сака э̄руптаве. Ольга Касум па̄вылн юв щар ат ёхталы. Тыи ма̄гыс оманыл о̄лме̄т сака кантлыс, а̄гитэ нупыл акваг ла̄выглас – наӈ тув минасын, наӈти юв ёхталэн. Котиль а̄ги Лена матах та̄л Ханты-Мансийск ӯст о̄лыс. Тувыл ханты ма̄ньлат хум Ваня Ермаков ёт акванминасы̄г, во̄рн та о̄лмыгтасы̄г. Хумитэ са̄лы о̄ньщи, родовой угодияныл тармыл тот та о̄лэ̄гыт. Нила ня̄врам янмалтэ̄г. Лена ос Ваня сас хантыиг кос, ос потыртанэтэ̄н порат ща̄нь ла̄тӈанэ̄н са̄всырыт, то̄ванакт халэ̄нт ат торгамтахтэ̄г. Лена Касум ма̄ныл о̄лы, ща̄нь ла̄тӈаныл казымский диалектыг ла̄ваве, Ваня ос сургутский диалектыл потырты. Во̄рт о̄лнэтэ̄н ма̄гыс ань Лена та ла̄тӈыл потыртаӈкв ханьщувлас. Ня̄враманэ̄н потыртаӈкв ат ве̄рме̄гыт, туп мощ торгамтэ̄гыт. Яков такви О̄лупсатэ урыл потре Ань округувт тав наме сака суйты. Ма̄щтырлаӈкв ха̄снэ̄тэ ма̄гыс акваг са̄всыр ма̄н во̄выглаве. Такви уре̄тыл тав тох потыртас: – Ма̄н па̄вылт акваг о̄лсӯв. А̄тям са̄лы пусмалтан хо̄тпаг о̄лыс, ос ма̄нти са̄лы щар ат о̄щсӯв. Школа а̄стламум юипа̄лт рӯпитаӈкв минасум, са̄всыр рӯпата ва̄рсум. Армиян вуйве̄сум, тит та̄л Москва ӯс ляпат лусытасум. Юв ёхтысум, хӯл алыщлан пӣркатан те̄тве̄сум. Совхоз ма̄гыс хӯл алыщласӯв. Ос ма̄нти ма̄гсылув мощло̄мт о̄с пувсӯв. План щирыл хулюмхул, щапак ос сорт хӯланув совхозн мыганӯв. Маныр хульты, па̄влыӈ ма̄хумн тыналыянӯв. Яныг вит порат сорх ос писъян пувыгласӯв. Ты хӯлыт ма̄нтина̄нувн хультупта̄лсанӯв. То̄ванакт нялк щалты, то̄нт тай матъят ва̄гыл та ща̄гтэ̄в. Пӣркатат хо̄тса̄т хо̄тпа аквъёт рӯпитасӯв. Па̄вылт о̄лнэ мир ва̄ганыл, ма̄н арыг хӯл тыналэ̄в. Ма̄н палтув ёхтэ̄гыт, акв хӯрыг хӯл атса̄т солко̄вил ёвтыгласыт. Тох, сакати, ще̄мьянув ма̄гыс мощ олн сэ̄лыгласӯв. Та та̄лыт ты ам касаит ва̄руӈкв патсум. «Касум КАШ» нампа школа па̄влувт пӯсвес, рӯпитаӈкв тув во̄вве̄сум. Пыгрищит касаит ва̄руӈкв ханищтаӈкв патсанум. Ты рӯпата та̄нанылн сака мӯстыс. Са̄в ня̄врам ам палтум ёхталас. Ты рӯпатан патхатмум порат та̄ра ла̄вве̄сум, маныр рӯпата ва̄руӈкв патэ̄гум, пуссын нэ̄пакн хансуӈкв э̄ри. Рущ ла̄тӈыл ты рӯпата «методичкаг» ла̄ваве. Акв хотты порат яныг кӯщай нэ̄ ма̄н школавн ёхтыс, наме профессор Бугаева. Тав ётэ мо̄т па̄вылныл са̄в учителит о̄с ёхтысыт. Ма̄навн уроканув та̄нанылн суссылтаӈкв э̄рыс. Ам амти урокум та о̄вылтаслум. Ты мӯй ма̄хум а̄нум ёмащакв хӯнтлысыт, тувыл титыглавем – образование о̄ньще̄гум ман а̄ти. Ювле ла̄всум, туп школат ханищтахтасум. «Высший образование э̄ри, » – ла̄вве̄сум. Ам ханищтахтуӈкв та патсум, Ленинград ӯс А. И. Герцен университетн исторический факультетн минасум, акв та̄л ат ханищтахтасум, та по̄йтсум. Тувыл ЮГУ психология факультетт ханищтахтуӈкв о̄вылтахтыгласум, о̄с та по̄йтсум. Юв ёхтысум, та рӯпатаныл по̄хан минасум, хасыглам методичканэ̄паканум пуссын кӯрн вущкасасанум. Ётыл са̄в ма̄хум ты нэ̄паканум титыгласаныл. 1997 та̄лт ня̄врамыт соссаӈ мир каснэ ва̄рмальн ханищтаӈкв патсанум, «Этнос» нампа каснэ колт рӯпитасум. Ос ты сыс касаит акваг та ва̄рсум. Ань ма̄хум ты касаит акваг титыглыяныл. Яныг кӯщаиӈ колт та̄наныл тыналыянум. Нэ̄мхотьютаныл касаянум урыл лю̄ль ла̄тыӈ а̄нумн ат ла̄выглас. Тох ты Яков такви уре̄тыл потыртас. Ты хум атпан та̄лыг иӈ ат е̄мтыс, ос пе̄с о̄лупса, пе̄с накыт, пе̄с ва̄рмалит сака ёмащакв ва̄ганэ. Таима̄гыс ты тав хотальа̄ти акваг та во̄выглаве. Ӯй йӣквнэ нак о̄с ва̄гтэ, ань ня̄врамыт тӯлыглахтуӈкв ос ялпыӈ йӣквыт йӣквуӈкв ханищтыянэ. Тумран ва̄руӈкв о̄с ха̄сы. Ханты-Мансийск ӯст «Хо̄тал» нампа соссаӈ мир театр рӯпиты. Тот рӯпитан артистма̄хум Яковн тумраныл ёнгуӈкв ханищтавет. «То̄рум Ма̄» музейн тав акваг во̄выглаве. Тот са̄всыр ханищтапыт, семинарыт ва̄рыглавет. Яков тот о̄с ма̄щтырлы. Туи порат тав тот ӯйхул сов тынтлын ос хосаг хартнэ йӣв ва̄рыс, тав рущ ла̄тӈыл «кожемялкаг» ла̄ваве. Ты урыл хум тох потыртас. Пе̄с порат ханты ма̄хум па̄вылт ат о̄лсыт. Пуссын сытам во̄рыӈ ма̄т ще̄мьяӈ та̄гыл ос са̄лы ӯрим та̄нтирот о̄лантасыт. Акв хотты та̄лт тав ляпа рӯтанэ Вандымовыт о̄лум пе̄с ма̄т сов хосаг хартнэ йӣв ка̄саластэ. Нэ̄пакн по̄слыстэ ос та̄рапаттыстэ, хумус ты ут э̄рнэ щирыл ва̄руӈкв э̄ри. Туи порат акв тамле йӣв «То̄рум Ма̄» музей ма̄гыс ва̄рыстэ, ань тот ка̄салаӈкве ро̄ви. Яков ань са̄в янытлан нэ̄пак о̄ньщи. Тав мо̄тыт э̄тпос намхо̄талэ тах е̄мты, атпан та̄лэ то̄влы. Та хо̄тал са̄в ма̄хумн вос янытлаве, са̄в мӯйлупсал вос миве. Касум ма̄ На̄й-О̄тырытын вос ӯргалаве.

1138 2016. 12. 22. Светлана РОМБАНДЕЕВА

Соссаӈ ма̄хум мӯйлысыт Ма̄ньполь э̄тпост Сургутский район Русскинская па̄вылт са̄лыл каснэ ва̄рмаль о̄лыс. Тот ам ханты ма̄хум ёт хо̄нтхатыгласум, потрамасум. На̄н ань та ма̄т о̄лнэ то̄ва хо̄тпат урыл ловиньтэ̄н. Са̄лыӈ ма̄хум: Ты хурит Олег Прокопьевич Короб Серёжа апыгрище ёт по̄слым о̄лы. Тав ё̄рнколэ Тяновский ос Контлорский нампа ма̄во̄й но̄ххилнэ ма̄г халт лю̄ли. Олег Прокопьевич такви о̄вылтытэ аквкит ла̄тыӈ ла̄выс. – Э̄квам наме Елизавета. Ня̄враманме̄н яныгмасыт, ще̄мьяӈыг е̄мтсыт. Ань туп ма̄нь а̄гиме̄н, Екатеринаме̄н, лов классыт ханищтахты. Та̄н пуссын Русскинская па̄выл школат ханищтахтасыт, интернатыт о̄лсыт. Во̄рт ма̄н налыман арыгтем са̄лы о̄ньще̄в, янмалтэ̄в. Хӯл алыщлэ̄в, пил ва̄тэ̄в, ла̄хс атэ̄в. Тувыл ма̄нти тыналыянӯв, тох хотмус та о̄лэ̄в. А̄гиянме̄н пуссын матыр ма̄щтырлэ̄гыт, са̄лы котыл пӯркат, ва̄ит ос ня̄рат ю̄нтэ̄гыт, хансал ва̄рияныл. Та̄н Улы тӯр ва̄тат о̄лэ̄гыт: Покачев э̄кваго̄йкаг, Александр Ефимович ос Евдокия Фёдоровна, Улы тӯр ва̄тат ё̄рнколт о̄лэ̄г. Тэ̄н ма̄тэ̄н мус яныгса̄т ляпатем ве̄рыста минуӈкве э̄ри. Нила ня̄врам янмалтасы̄г, ань пуссын ще̄мьяӈыг е̄мтсыт, лов апыгрищ о̄ньще̄г. Пе̄с йис ма̄нылт са̄лыяныл ӯрим о̄лэ̄гыт. Ялпыӈ хо̄талын та̄нти янмалтам са̄лыл ёхтысыт. Владик апыгрище̄н тэ̄н ётэ̄н хо̄та̄ти акваг яласы. Ты та̄л пыгрищ онтолов та̄лэ то̄влыс. Ань та̄н хӯрум ёмас тув о̄с та ёхтыгпасыт, ханты ма̄хманыл ёт са̄лыл мощ кассыт, яласасыт. Мӯй ма̄хум та̄н ётаныл маттем та по̄слахтасыт. Са̄лыӈ э̄кваго̄йкаг: Данил Николаевич ос Эльвира Никитовна Покачевыг Нижневартовский район Тромаган я̄ ва̄тат о̄лэ̄г. Каснэ ма̄н са̄лыл ёхталасы̄г. Нила ня̄врам о̄ньще̄г, ань пуссын яныгмасыт, ще̄мьяӈыг е̄мтсыт. Данил Николаевич Ӯй йӣквнэ ва̄рмаль ва̄нэ хум. Ань округув янытыл ты тэ̄ла о̄вылтыт хо̄та̄ти матыр хо̄нтхатыглап о̄лыглы те, тав тув акваг во̄выглаве. Ханты э̄ргыт ва̄г, тӯлыглахтуӈкве ха̄сы. Во̄ртур э̄тпост Мегион ӯст Ӯй йӣквнэ тэ̄ла ва̄нэ соссаӈ ма̄хум акванхо̄нтхатыгласыт, ты урыл е̄ӈта пасан ва̄тат потыртасыт. Данил Николаевич э̄кватэ̄нтыл тув о̄с ялсы̄г. Во̄р ма̄т о̄лнэ нэ̄: Ма̄щтыр нэ̄ Римма Романовна Покачева Русскинская па̄вылт яныгмас. О̄йкатэ наме Яков, Конитлор нампа ма̄т самын патыс. Тэ̄н хунь акванминасы̄г, о̄йкатэ яныгмам ма̄тэ̄н о̄лмыгтасы̄г. Ань тот во̄рколт са̄лы ӯрим о̄лэ̄г, нила ня̄врам о̄ньще̄г – кит а̄ги, кит пыг. Э̄кваго̄йкаг ня̄враманэ̄н нё̄таве̄г – во̄рт пил ва̄тэ̄гыт, ла̄хс атэ̄гыт. Яков хӯл алыщлы, во̄раи. Матыр ка̄тынпаттэ̄гыт, та̄нти тыналыяныл. Римма Романовна акваг матыр ма̄щтырлы – хорамыӈ сахит, мольщаӈыт ос ла̄гыл маснутыт ю̄нты. Тав о̄патэ Касум е̄рныл о̄лыс: Надежда Ивановна Покачева Фёдоровский па̄выл ӯнлын ма̄т самын патыс, яныгмас. Ты па̄выл Сургут ляпат ӯнлы, э̄лнаӈ тот ханты ма̄хум о̄лсыт. Ань тав Водораздел ма̄т о̄лы. Надежда Ивановна ат а̄ги янмалтас. О̄патэ Касум е̄рныл о̄лыс. Хунь репрессия тэ̄ла ква̄лтапаптувес, тав Сургутский районын оймалтахтас, тув о̄лмыгтас, нэ̄ тотыс. Надежда Ивановна тамле ма̄н мӯйлуӈкве ва̄тихал яланта̄лы, ё̄рнколт рӯпитан нэ̄ хо̄тпат халт касы. Мӯй ма̄хум ос са̄лыл каснэ ма̄хум ма̄гыс тэ̄нут па̄йты хӯл исмит, со̄ламат, ня̄рхул, ня̄рнё̄выль, ща̄й исылты. Тынакт тав китыт места вис. Аган па̄вылт о̄лнэ нэ̄г: Ты нэ̄г ос Нижневартовский район Аган па̄вылныл ёхталасы̄г – Марина Михайловна Айпина ос Оксана Анатольевна Ляшко. Тэ̄н Центр ремёсел колт рӯпитэ̄г, ань тот ка̄тыл ва̄рим пормасыт тыналасы̄г. Марина Михайловна ла̄вме щирыл, та̄н Центр коланылт хо̄т ма̄щтыр хо̄тпа рӯпиты. Хум хо̄тпат янгыщ йӣвныл матыр ва̄ре̄гыт, ёрге̄гыт. Нэ̄квет ос совныл маснут ман мо̄т са̄всыр пормас ма̄щтырлэ̄гыт, са̄сныл сыресыр хусапсовыт ва̄ре̄гыт. Ка̄тыл ва̄рнэ пормасаныл округ янытыл о̄лыглан выставкатын тотыглыяныл, мирн суссылтыяныл. Хотты пормас хо̄тпан мӯсты те, тыналыяныл. Русскинская па̄вылт самын патум нэ̄г: Ты хурит Римма Антоновна Мултанова ос Капитолина Ивановна Покачева по̄слым олэ̄г. Тэ̄н сас Русскинская па̄вылт самын патсы̄г, тот яныгмасы̄г. Римма Антоновна о̄йкатэ Муравленко ӯсныл о̄лы, хунь акванминасы̄г, тав тув ва̄нтлыс. Хӯрум ня̄врам ос нёлолов апыгрищ о̄ньще̄г. Капитолина Ивановна о̄с хӯрум ня̄врам о̄ньщи, та̄н ань пуссын ще̄мьяӈыг е̄мтсыт, са̄т апыгрищ о̄ньщи. Ты ма̄хум ёт С. Ромбандеева потыртас.

1138 2016. 12. 22. Николай МЕРОВ

Ма̄ньлат мир акванатыглаве̄сыт Мо̄лал финноугор рӯт мирыт хо̄тал кастыл округув янытыл са̄всыр ӯсытныл, па̄влытныл Ханты-Мансийск ӯсн соссаӈ ма̄хманув ёхталасыт. Ты Белоярский, Ха̄льус, Нижневартовский, Октябрьский, Сургутский, Ханты-Мансийский районытныл, Когалым, Нягань, Москва ӯсытныл, Ямало-Ненецкий округныл ос Финляндия ма̄ныл ма̄ньлат ма̄хум о̄лсыт. Ты та̄л ня̄врам янытлан та̄лыг о̄лыс. Таима̄гыс ты ва̄рмалин са̄выӈпа̄лэ ма̄ньлат хо̄тпат ос ня̄врамыт атхатыгласыт. Ты тэ̄ла Ханты-Мансийск ӯс мирколт, А̄сугорский ма̄ньлат ма̄хум организацият ос «Югра лылыеп» ассоциацият рӯпитан хо̄тпат та̄н аквъёт щё̄пита̄лсаныл. Ты сапра̄ни щар о̄выл щёс 1928 та̄лт Финляндия ма̄т ва̄рыглавес. Ты тэ̄ла таима̄гыс щё̄питавес, са̄всыр мирыт юртыӈыщ, акваннё̄тхатым э̄лаль вос о̄лсыт. Ка̄сыӈ мир такви пе̄с йис о̄лупсатэ ос о̄лнэхӯлнэ наке ул вос ёрувластэ, акваг э̄лаль вос тотыстэ. Ма̄ньлат ма̄хманув Югорский университетыт акванатхатыгласыт. О̄выл ла̄тыӈ «Югра лылыеп» кӯщай хум Александр Новьюхов потыртас. Тав ла̄выс: «Ма̄н ма̄ньлатыг о̄лмувт о̄с аквтох акванатхатыгла̄лсӯв. Ты сака ёмас ва̄рмаль, на̄н хосытынт ань са̄в э̄рнэ рӯпата э̄лаль тотаве. Ты рӯпатанын акваг э̄лаль вос мины, номтыт о̄щнэ ва̄рмалянын тэ̄лаг вос е̄мтэ̄гыт». Потре оигпам э̄лыпа̄лт тав пуссын атхатам мӯй ма̄хум янытласанэ. Тувыл Диана Васильевна Герасимова, Югорский университетт ня̄врамыт ханищтан э̄ква, потыртас. Тав ла̄выс: «Мо̄лты лӯпта э̄тпост Финляндия ма̄т финноугор мирыт конгресс о̄лыс. Тот акв нэ̄пак урыл потыртасыт. Та нэ̄пак финноугор ма̄ньлат ма̄хум ма̄гыс Мордовский университетт хасвес ос та̄ратавес. Тот атхуйплов ща̄нь ла̄тӈыл потрыт хансым о̄лэ̄гыт. Ань ма̄ янытыл пуссын аквъёт ва̄т нупыл ат млн. са̄вит хо̄тпа са̄всыр ма̄т о̄лэ̄гыт, та̄н финноугор ла̄тӈыл потыртэ̄гыт. Ам атпан арыгтем са̄вит та̄л ня̄врамыт ханищтым рӯпитэ̄гум. То̄ва ханищтам хо̄тпанум ань школат ос мо̄т са̄всыр ма̄т ня̄врамыт ёт рӯпитэ̄гыт. Та̄нки ща̄нь ла̄тӈаныл э̄лаль тотыяныл. Ам ща̄нь ла̄тӈум ма̄гыс сымум сака ща̄рги. Таима̄гыс щар о̄влэ̄т таи лаве̄гум, ща̄нь ла̄тӈув ул вос ёрувлавес, акваг э̄лаль вос тотвес». А̄сугорский ма̄ньлат ма̄хум организация кӯщай хум Виктор Банк та̄л сыс ва̄рум рӯпатаныл урыл потыртас. Тав лавыс, ты та̄л са̄в мероприятие ва̄рыглавес. Ань то̄ва ялпыӈ хо̄талыт ты: – Нижневартовский районт ма̄ньлат ма̄хум ёт Карина Прасина рӯпиты. Тав Корлики па̄вылт рӯтыӈыщ о̄лнэ ма̄хум акванатыгласанэ. Тот ще̄мьяӈ ма̄хум халанылт кассыт. Ты ва̄рмаль сака пӯмащ о̄лыс. – Нижневартовск ӯст во̄раян хумыт хо̄тал щё̄пита̄лвес. Тот о̄с са̄в мир атхатыглас. – Округувт соссаӈ ма̄хум нилыт форум минам порат о̄с ма̄ньлат ма̄хум организация нё̄тмил ва̄рсыт. – Финноугор мирыт Конгрессын та̄н рӯпитаӈкве ялсыт ос мо̄т са̄в э̄рнэ тэ̄ла ва̄рсыт. Та̄н ма̄ньлат хо̄тпатн акваг нё̄тмил ва̄ре̄гыт.

1138 2016. 12. 22. Галина КОНДИНА

Ма̄щтыр нэ̄гхумыг Ты хурит Белоярский район Касум па̄вылт о̄лнэ ханты нэ̄гхумыг по̄слысагум. Тэ̄н тыналахтын ярмаркан ёхталасы̄г. Алексей ос Светлана Тарлиныг крестьянскофермерский хозяйстват рӯпитэ̄г, таве тэ̄нти о̄парищ наме̄н щирыл хансыстэ̄н. Светлана Александровна са̄лы котныл пӯркат, тапочкат, са̄лы совныл са̄всыр тэ̄лы маснутыт ю̄нты. Алексей Семёнович ты пӯркат ка̄т па̄сыглапыл рущ паттал ю̄нтыянэ. Ты коныпал пил, со̄с ос лӯпта ща̄й тыналаӈкве тотыгласы̄г. Тэ̄натэ̄н ма̄н ёмас рӯпитан ла̄тыӈ те̄тэ̄в. Со̄т ос щунь ще̄мьятэ̄н вос о̄ньщи!

1138 2016. 12. 22. Галина КОНДИНА

Саранпа̄выл ма̄хманув но̄хпатсыт Ты хурит Ха̄льӯс район Саранпа̄вылт ю̄нтнэ пӯркат тыналан нэ̄ по̄слым о̄лы. Саранпа̄выл ма̄хум та̄нти ёхталаӈкве ат ве̄рмысыт, тэ̄лы лё̄ӈх то̄нт иӈ ат ва̄рвес, таима̄гыс та̄н хотты ва̄нэ нэ̄ныл ты пӯркат тыналаӈкве во̄виньтасаныл. Ярмаркан ёхталам ма̄хум халт щар ёмас тэ̄нут, нё̄тнэ маснут пе̄риявес. Ос «Лучший товар Югры» касылт «Изделия национальных промыслов и сувенирная продукция» нампа номинацият «Саранпаульский оленеводческий компания» но̄хпатыс. Та̄наныл ма̄н сымыӈыщ янытлыянӯв, са̄лыяныл акваг вос са̄вме̄гыт.

1139 2017. 01. 12. Галина КОНДИНА

Та та̄лт юио̄выл сапра̄ни о̄лыс Округ депутатанув ювле хультум та̄лт юио̄выл щёс ва̄т са̄грапнал э̄тпос ва̄т нупыл хӯрмит хо̄талт сапра̄нин атхатыгласыт. Та хо̄тал та̄н автобусыл сакватым ня̄врамыт кастым о̄вылтасаныл, но̄хлю̄льсасыт ос акв кӯм асталаквег лю̄лсыт. Ул номилы̄н, ня̄врамыт автобусыл Нефтеюганск ӯсн тотве̄сыт, лё̄ӈхыт яныг ма̄шинал акванхо̄ясы̄г, тот тит яныгхо̄тпа ос лов ня̄врам порсысыт. Э̄лаль та̄н рӯпатаныл та о̄вылтасаныл. О̄влэ̄т округ Дума па̄лыл почётный грамотал янытлым ма̄хум наманыл ла̄вве̄сыт. Ты хотьют са̄в та̄л округувт ёмщакв рӯпиты, мир ма̄гсыл ёмас рӯпата ва̄ри, та̄н халанылт А̄сугорский институтт рӯпитан ма̄ньщи нэ̄ Светлана Герасимова янытлавес. Светлана Алексеевна са̄в та̄л ма̄ньщи ла̄тӈыл хаснэ отделт старший научный сотрудникыг рӯпиты, школат ма̄гсыл ма̄ньщи ла̄тыӈ ханищтан нэ̄пакыт щё̄питы. Ма̄н таве ос сымыӈыщ янытлылӯв. О̄с акв тох ка̄ркамыг вос рӯпиты. Ань ня̄врамыт мӯсхал щирыл автобусыл тотыглан ма̄гсыл ма̄н депутатанув Москван Владимир Колокольцевын, внутренних дел Министркӯщаин, ос Максим Соколов транспорт Министрын пищма те̄тсыт. Тот хассыт, ма̄н округувт на̄иӈтуйтыл яласан те̄рлё̄х мощща, Ханты-Мансийск ӯсн тамле лё̄х щар а̄тим, таима̄гыс хотты касылын са̄выӈпа̄лэ ня̄врамыт автобусыл ос ма̄шинал тотыглавет. Са̄ккон мо̄тнув щирыл вос хансаве, ня̄врамыт тотнэ акв автобус ёт полиция ма̄шина вос мины ос та̄н ётаныл ле̄ккар вос ялы, ня̄врамыт ле̄ккарын акваг уральтым вос о̄ньщавет. Ты э̄лыпал туп хӯрмыл са̄внув автобусыт акв юипа̄лт миннэ̄ныл порат полиция ма̄шинан ӯргалаве̄сыт ос ле̄ккар та̄н ётаныл о̄лыс. Ос автобусыл рӯпитан хо̄тпат ань ат та̄л са̄вит стажаныл вос о̄лыс. Ня̄врамыт автобусыл тотыглым рӯпитан компаният лицензиянэ̄пак вос о̄ньще̄гыт, ты нэ̄паканыл та̄л та̄н воссыг рӯпитаӈкве ат ве̄рме̄гыт. Са̄всыр касылытын ня̄врамыт тотыглан организацият та̄л оигпан порат полициян нэ̄пак вос те̄тэ̄гыт, тот мо̄тыт та̄лн хансым вос о̄лыс, хоты порат ос хоталь ня̄врамыт касуӈкве тотыглавет. Полиция кӯщаит ты урыл вос ва̄ганыл ос та̄нти плананылн тах хансыяныл. Нэ̄пак та̄ратан порат округув то̄ва па̄влытын то̄тапыт са̄ртын тотыглавет, ма̄хум тот са̄ртын голосовайтэ̄гыт, ты па̄влыт манос ӯсыт «труднодоступные и отдаленные» ла̄вавет. Ань о̄лум сапра̄нит тамле са̄кконыл ты па̄влыт ос ӯсыт хотщуртумтаве̄сыт – Радужный ӯс, Октябрьский районт Приобье, Талинка, Унъюган, Сергино, Сургутский районт Высокий Мыс, Тундрино, Ханты-Мансийский районт Ягуръях па̄выл. Тув мус ань ёмас лё̄ӈхыт ва̄рим о̄лэ̄гыт, ма̄хум та̄лэтуве̄т тыглетувле яласаӈкве ве̄рме̄гыт. Ты урыл Дума кӯщай Борис Хохряков тох ла̄выс: «Са̄ртын ты па̄влытын ос ӯсн тэ̄нут туп туи я̄ хосыт ос тэ̄лы лё̄ӈх ва̄рнэ порат тотуӈкве ро̄выс. Ань тув ёмас лё̄ӈхыт ва̄рве̄сыт. Таима̄гыс ма̄н та̄наныл ты списокыл хотщуртумтасанӯв». Мо̄лал акв депутат нэ̄ Елена Дубенчук заявление хансыс ос по̄хын минас, тот рӯпитаӈкве ат паты. Тав пе̄нтсылэ ань ханты хум Александр Новьюхов паттувес, Александр Вячеславович экономический политика ос ма̄вит ӯргалан комитетн хасвес, ты коныпал тав соссаӈ ма̄хум Ассамблеят нилыт депутатыг паты. Сапра̄ни оигпам юипа̄лт дума кӯщай хум Борис Хохряков ос тав ва̄ӈын хо̄тпанэ ля̄ххал хаснэ ма̄хмытын титыглаве̄сыт. О̄влэ̄т тав журналистытын та урыл титыглавес, хумус ань та̄н ущ ёхтум йильпи ма̄хманыл ёт рӯпитэ̄гыт. «Са̄выӈпа̄лэ ты э̄лыпал рӯпитам ма̄хум хультсыт ос са̄внув ма̄ньлат хо̄тпат ма̄н палтув ёхтысыт. Тыщир рӯпитаӈкве сака ёмас, ма̄н акваннё̄тхатым, акванпотыртахтым мирув ма̄гыс са̄в рӯпата ва̄ре̄в. То̄ва порат халувт воритотэ̄в, воращлэ̄в ос тох э̄рнэ номтын ёхтаве̄в». Александр Сальников, Дума кӯщай ва̄ӈын хум, мовала̄лым ла̄выс: «Ма̄ньлат ма̄хум ёт рӯпитаӈкве, ва̄им, ёмас. Ос ань ма̄н ётув тит нэ̄г туп рӯпитэ̄г, мо̄лты созывыт хо̄т нэ̄ рӯпитасыт. Нэ̄ хо̄тпат та̄н, ва̄им, ве̄щкатыг рӯпитэ̄гыт, та̄н ётаныл кӯстырнув рӯпитаӈкве». Юио̄вылт Борис Сергеевич ля̄ххал тотнэ ма̄хум пуссын Йильпи та̄л ёхтын кастыл янытласанэ. Пуста̄гыл о̄лнэ ла̄тыӈ ла̄выс.

1139 2017. 01. 12. Светлана МАТВЕЕВА

Ма̄к ёмас тэ̄ла ва̄рнэ хо̄тпат янытлаве̄сыт Ювле хультум э̄тпост Ханты-Мансийск ӯс мирколт ёмас тэ̄ла ва̄рнэ хо̄тпат округ кӯщаин янытлаве̄сыт, то̄ват ма̄гылн тагатан по̄сыл майве̄сыт. Ма̄щтыр ма̄хум, ханищтан хо̄тпат, нэ̄пак хаснэ ос ка̄тыл по̄слын ма̄хум, кол ӯнттын ма̄хум, нефтяникыт ос газовикыт пуссын акв колнакын во̄виньта̄лве̄сыт. Наталья Комарова ла̄выс: «Ань округув ты 86 та̄лэ палыт са̄в ма̄хум ёмас, э̄рнэ тэ̄ла ва̄рсыт. Тыхо̄тал то̄ваныл ма̄н янытлыянӯв. Я̄тил, тыныӈ ма̄хум, на̄н ва̄рнэ рӯпатан хосыт Югра ма̄в щёлыӈ, тэ̄ланув э̄рнэ щирыл минэ̄гыт. Ма̄н на̄н хольтын о̄луӈкве ос рӯпитаӈкве патэ̄в, на̄н ма̄гсылын номтанув ёмасыт». Оксана Михайловская «Материнская слава» ме̄талил майвес, тав ат ня̄врам о̄ньщи. Яныг пыге 24 та̄лэ то̄влыс, пити патта пыге нила та̄лэ то̄влыс. Тав ла̄вме щирыл, са̄в ня̄врам янмалтаӈкве ма̄ньта̄гыл таӈхыс, ня̄враманэ сака э̄руптыянэ. О̄йкатэ̄н ос яныгнув ня̄враманэ̄н нё̄таве. Са̄в ня̄врамыӈ китыт колта̄гыл о̄парищ наманыл Переясловыт о̄с янытлавес, диплом нэ̄пакыл майвес. Ты та̄л Россия янытыл са̄в ня̄врамыӈ ще̄мьят халт «Семья года» касыл ва̄рыглыма, та̄н но̄хпатсыт. Галина о̄йкатэ̄нтыл хо̄т ня̄врам янмалтэ̄г, нила – тэ̄нти ня̄враманэ̄н, кит ос ня̄врам о̄щнэ колт висы̄г. Та̄нти халанылт юртыӈыщ о̄лэ̄гыт, хотальа̄ти са̄всыр ва̄рмалит пуссын акваннё̄тхатым ва̄рияныл. Ня̄врам хунь яныг колта̄глыт яныгми, нэ̄матарыл ат пилы, ма̄хманэ̄н нё̄таве, со̄тыӈыщ яныгми. «Центроспас-Югория» ма̄т рӯпитан хум Михаил Привалов Россия Президентын янытлан нэ̄пакыл ке̄твес. Тав хосытэ̄т нила хо̄тпа лылыяныл нэ̄глысыт. Та хо̄тал тав ат рӯпитас, лё̄ӈхыт мины, сунсы, кит ма̄шинаг акванпе̄лхатмы̄г. Тав хоса ат номсахтас, та̄ра тув ха̄йтыс, ма̄хум конхартсанэ. Михаил ва̄стэ, ань ма̄шина но̄хпе̄ламлаӈкве ве̄рми, тув тоха та молямлас. Акв ханты э̄ква янытлавес – Зоя Никифоровна Лозямова, тав «То̄рум Маа» музейт рӯпиты, диплом нэ̄пакыл майвес. «Новости Югры» газетат рӯпитан ма̄хум почётный грамота нэ̄пакыл майве̄сыт. Пуссын аквъёт хус арыг хо̄тпа янытлавес, округ кӯщай нэ̄ та̄н нупланыл са̄в ёмас ла̄тыӈ ла̄выс.

1139 2017. 01. 12. Валентина Васильева

«Югра лылые̄п» йильпи кӯщаиӈыг е̄мтыс Ювле хультум э̄тпост Советский районт соссаӈ ма̄хум акванатхатыгламыт. Тот «Югра лылыеп» нампа общественный организация съезд ва̄рыглам. Ань ты урыл ма̄навн Алексей Шесталов мощ потыртас. Тав ла̄выс, тув са̄всыр ма̄ныл хо̄тпан нупыл акв хо̄тпа делегатыг ёхталасыт. Акв хо̄тал туп рӯпитасыт. О̄влэ̄т Александр Новьюхов потыртас, тав са̄в та̄л ты организацият кӯщаиг о̄лыс. Ань округ Дума депутатыг пе̄риявес, тав пе̄нтсылэ ЛюдмилаАлфёрова кӯщаиг тув ӯнттувес. Ты съезданыл XIIыг о̄лум. Са̄всыр кӯщаит акванатхатыглам ма̄хум янытласаныл, са̄в ёмас ла̄тӈыл ла̄всаныл. Та̄нти ва̄рум рӯпатаныл урыл потыртасыт, ты урыл мо̄тыт газетат ловиньтэ̄н.

1139 2017. 01. 12. Светлана МАТВЕЕВА

Мир ӯргалан ма̄гыс округувт Росгвардия щё̄питаве Ханты-Мансийск ӯст РИЦ «Югра» ля̄ххал тотнэ колн полиция полковник хум Евгений Федоткин во̄виньта̄лвес. Тав ань Россият рӯпитан национальный гвардия тэ̄ла палт округув янытыл пуӈктоты, ты ва̄рмаль урыл мощ потыртас. Ювле хультум та̄л яныгпо̄ль э̄тпосэ̄т Россия Президент Владимир Путин йильпи тэ̄ла ква̄лтапаптыс – ань о̄лнэ ма̄в янытыл Россия национальный гвардия вос рӯпиты, Росгвардияг намаявес. МВД (министерство внутренних дел) о̄с тув вос о̄лтаве, пуссын аквъёт вос рӯпитэ̄гыт. Та̄н ань матыр о̄выл ва̄рапан ма̄гыс акванпотыртахтан утыт ос террористыт ёт хо̄нтлуӈкве, тувыл таит юипа̄лт ня̄влалахтуӈкве патэ̄гыт, о̄лнэ ма̄наныл та̄рапаттуӈкве, та маныр. Щар ма̄к яныг рӯпатаныл тыи ты. МВД коныпал тув мо̄т организацият о̄лтве̄сыт – ОМОН, СОБР, ЦНС СОР ос товлыӈха̄пыл яласан тэ̄ла (авиация России). Росгвардия та порат ва̄руӈкве номылматвес, хунь мир вуянтан, ӯргалан тэ̄ла йильпииг щё̄питаӈкве патвес. То̄нт та̄рапатыс, ань акв яныг матыр организация ва̄руӈкве э̄ри, ма̄хум пуссын аквъёт вос рӯпитэ̄гыт, тох та̄н са̄в э̄рнэ тэ̄ла ва̄ре̄гыт, ё̄рнувег е̄мтэ̄гыт, ка̄ркамыщ рӯпитаӈкве патэ̄гыт. Россия янытыл Росгвардия кӯщаиг Виктор Золотов паттувес. Тав та̄ра рӯпитаӈкве о̄вылтахтас, э̄рнэ нэ̄пакыт хансыс, ка̄сыӈ ма̄т тамле рӯпатан пуӈктотнэ хо̄тпат пе̄рияве̄сыт. Э̄рнэ ма̄шинат ёвтуӈкве патве̄сыт, рӯпитан ма̄гыс колыт ӯнттуӈкве о̄вылтаве̄сыт. Виктор Золотов ла̄вме щирыл, Росгвардия организация ма̄гыс та̄н ань са̄в э̄рнэ тэ̄ла щё̄питэ̄гыт, 2018 та̄л порат рӯпатаныл ущ оигпи. Евгений Федоткин ла̄выс: «ОМОН ос СОБР ка̄сыӈ я̄нас ва̄рнэ тэ̄ланыл ань ма̄н аквъёт ва̄риянӯв. Ма̄к яныг тэ̄лав таи, ань округт о̄лнэ мир пуста̄гыл вос о̄лы, ка̄сыӈ хо̄тпа ма̄н ӯргалылӯв. Мори капыртан утыт ма̄гыс та̄стум писалянув ляпат о̄ньщиянӯв, та̄н нэ̄матыр лю̄ль ва̄руӈкве ул вос а̄лымасыт». Рӯпитан коланыл янгыщ щё̄питаманыл, э̄рнэ нэ̄пакыт хассыт, ты та̄л оигпан мус тах тэ̄ланыл пуссын ва̄рияныл. Евгений Владимирович э̄лаль тох потыртас: «Ань ро̄ви ла̄вуӈкве, щар ма̄к яныг тэ̄ла ма̄н ва̄рсӯв – мо̄т организацият ёт акванпотыртахтасӯв, маныр ма̄шинат та̄н о̄щсыт ос ань йильпи матыр ёвтсӯв, пуссын аквантотсанӯв, акв нупыл хассанӯв. Мо̄тыт та̄л охса ты рӯпатав тах о̄с аквтох э̄лаль ва̄руӈкве патылӯв. Ма̄н ань, округт ос Россия янытыл о̄лнэ ма̄хум, пуссын аквъёт яныг тэ̄ла ва̄ре̄в – мирув тармылпатылӯв, ма̄в ӯргалылӯв. Тыт рӯпитан ма̄гыс э̄рнэ са̄вит хо̄тпа хо̄нтсӯв. Росгвардият туп та̄к ма̄хум, ё̄р хо̄тпат рӯпитаӈкве патэ̄гыт. Акв колув моще̄ртн Сургут ӯст рӯпитаӈкве о̄вылтахты, э̄рнэ нэ̄пакыт пуссын щё̄питасанӯв. 2017 та̄лт тӯяг кол ӯнттаве, тув тах та̄ра щалтэ̄в. Ма̄к яныг тэ̄лав ва̄рнэ ма̄гыс – ань тыт ма̄хум пилта̄л вос о̄лэ̄гыт, нэ̄матарыл ул вос хурахлэ̄гыт, округт рӯпитан организацияв хотальа̄ти э̄рнэ матыр пуссын о̄ньщи». Росгвардия организация рӯпататэ Россия Президентын уральтым о̄ньщаве. Ювле хультум та̄л яныгпо̄ль э̄тпост Владимир Путин Россия мир нупыл потыртаме порат ла̄выс, ты Национальный гвардия таима̄гыс рӯпитаӈкве паты – ань ма̄н ма̄вт манах писаль о̄лы, хотьютн о̄ньщавет, хотьют тыналы, та маныр, ма̄хум ты торыг рӯпитаӈкве патэ̄гыт, то̄нт тах са̄в ва̄рмаль та̄рапаты.

1139 2017. 01. 12. Валентина Хозумова

Пенсияолн винэ ма̄гыс ань са̄в та̄л рӯпитаӈкв э̄ри Та̄л оигпам э̄лыпа̄лт ля̄ххал тотнэ ма̄хум Пенсионный фонд колт акванатыглаве̄сыт. Тот кӯщаиг рӯпитан нэ̄ Татьяна Зайцева потыртас, ань ты та̄л сыс пенсияолн винэ ма̄хум ма̄гыс маныр йильпииг ва̄рвес, са̄кконытн йильпи ла̄тӈыт хасве̄сыт ман а̄ти. Ма̄н о̄лнэ ма̄в янытыл са̄всыр пенсия мирн ойтаве – трудовой, социальный ос мо̄т са̄всыр пенсият. Ка̄сыӈе такви са̄вит олныл ловиньтаве. Ань округув янытыл трудовой пенсия 18 со̄тыра 775 солко̄ви са̄витыг о̄лы, социальный пенсия – 11 со̄тыра 721 солко̄ви. Яныгпа̄ла ма̄хум та̄н щар са̄в олныл ойтавет, пенсияныл тыса̄витыг хансым о̄лы – 19 со̄тыра 764 солко̄ви. Ща̄нь манос а̄щ та̄л яныгман ня̄врамыт о̄с пенсияолныл мивет, ты пенсия – 9 со̄тыра 119 солко̄ви са̄вит. Округувт са̄в соссаӈ хо̄тпа туп 8 со̄тыра арыгтем солко̄вил ойтавет. Тувыл нумыл иӈ мощ олнло̄мт миве, та̄н винэ олнаныл «прожиточный минимум» са̄витыг вос е̄мтэ̄гыт. Та ювле хультум та̄лт 10 со̄тыра 732 солко̄ви «прожиточный минимумыг» хансым о̄лсыт. Пенсиян миннэ пора урыл Округувт ань 420 со̄тыра арыгтем хо̄тпа пенсияолн выгыт. Та̄н халанылт 152 со̄тыра 345 хо̄тпа иӈ рӯпитэ̄гыт. Нэ̄квет 50 та̄ланыл то̄влын юипа̄лт пенсиял миӈкв о̄вылтавет, хум хо̄тпат 55 та̄ланыл юипа̄лт. Ос пенсия винэ ма̄гыс ань «трудовой стажиг» ла̄внэ рӯпитан та̄лыт титыглавет. Хум хо̄тпат 25 та̄л вос рӯпитасыт, нэ̄квет – 20 та̄л. Хо̄тпа лӯима̄т тыса̄вит та̄л ат те рӯпитас, тав ат та̄л ювле хультнэ юипа̄лт пенсиял ойтуӈкв ущ патаве. Россия янытыл са̄всыр ма̄тт ма̄хум мощ мо̄т щирыл пенсиян минэ̄гыт. Нэ̄квет 55 та̄ланыл то̄влын юипа̄лт, хум хо̄тпат 60 та̄ланыл юипа̄лт. Ос матрыг та̄н туп 7 та̄л вос рӯпитасыт. Тытем мощща та̄л тот та титыглаве. Мирколытт рӯпитан ма̄хум ма̄гыс, та̄н рущ ла̄тӈыл «государственный служащииг» ла̄вавет, ань я̄нас са̄ккон хасвес. Са̄в та̄л кӯщаиг рӯпитам хум хо̄тпат ань пенсиян 65 та̄ланыл юипа̄лт минуӈкв ве̄рме̄гыт, нэ̄т ос 63 та̄ланыл хунь то̄влы, то̄нт ущ. Рӯпитан тА̄лыт хумус ловиньтавет Татьяна Зайцева ань ла̄выс, пенсияолн винэ ма̄гыс та̄лыт пуссын акван ат ловиньтавет. Армият лӯсытан та̄лыт, институтт ман университетт ханищтахтын та̄лыт ос ня̄врамыт ёт юн ӯнлын та̄лыт ань пуссын стажиг ат ловиньтавет. То̄нт хо̄тпа ма̄гыс нэ̄мхотьют пенсионный фондын олн ат ойтыс. Туп олныл ловиньтым э̄тпосыт ос та̄лыт «трудовой стажиг» та е̄мтэ̄гыт. Са̄в ня̄врамыӈ омат рӯпитам та̄ланыл о̄с титыглавет. Нэ̄квет кос манах та̄л ня̄враманыл ёт юн вос ӯнлысыт, та̄н округувт 17 та̄л вос рӯпитасыт. Тыса̄вит та̄л ат те рӯпитамыт, о̄с мощщанув олныл ойтуӈкв патавет. Ат манос тыгыл са̄внув ня̄врам о̄щнэ нэ̄квет 49 та̄ланыл то̄влын юипа̄лт пенсиян минуӈкв ве̄рме̄гыт. Са̄лы ӯрнэ ма̄хум, хӯл алыщлан ос во̄раян ма̄хум о̄с мощ са̄ртыннув пенсиян минуӈкв ве̄рме̄гыт. Хум хо̄тпат 50 та̄ланыл юипа̄лт, нэ̄ хо̄тпат 45 та̄ланыл то̄влын юипа̄лт. НЭ̄пакыт хунь щЁ̄питаӈкв Э̄ри Ма̄н округувт о̄лнэ ма̄хум ты урыл акваг потыртавет, та̄н мощ са̄ртыннув нэ̄паканыл щё̄питаӈкв вос о̄вылтахтэ̄гыт, та мус тит та̄л вос хульты. То̄ва нэ̄пакытт о̄парищнамыт манос намыт лю̄льсаӈ хансавет, печать ат на̄ӈки. Тыи ма̄гыс хо̄тпан пенсиятэ мус хультум та̄л сыс архивколт э̄рнэ нэ̄пакыт хо̄нтуӈкв э̄ре̄гыт. Э̄лумхо̄лас ты ва̄рмалянэ ёмащакв ва̄руӈкв ат те а̄лыми, тав атпан та̄лэ то̄влын юипа̄лт иӈ хӯрум э̄тпосыл миве. Ты э̄тпосыт сыс э̄рнэ нэ̄пакыт ат те атыянэ, ос лӯима̄т рӯпитам та̄ланэ э̄рнэ са̄витыг ат те ловиньтавет, тав ла̄ваве, манах та̄л ат то̄вылхаты, тав вос рӯпиты. Рӯпитаӈкв ат те ка̄сащи, тав иӈ ат та̄л пенсияолныл тах ат миве ос та юипа̄лт ма̄нь пенсиял хансаве. Пенсият О̄лнэ мА̄хум ханищтавет Пенсионный фонд кӯщай нэ̄ Татьяна Зайцева ла̄выс, та̄н пенсионер ма̄хум ханищтанэ̄ныл ма̄гыс олныл мивет, 2015 та̄лт 420 со̄тыра арыгтем солко̄вил майлуве̄сыт. Та̄н ты олнытыл 141 хо̄тпа ханищтасаныл. Мо̄лты 2016 та̄лт та̄н 450 со̄тыра арыгтем солко̄вил та̄стуве̄сыт. Та̄н ты олнытыл о̄с са̄в хо̄тпа ханищтаӈкв а̄лымасыт.

1139 2017. 01. 12. Тамара МЕРОВА

Ня̄врамыт ща̄нь ла̄тӈын ще̄мьят вос ханищтавет Соссаӈ ма̄хум пе̄с йис ма̄нанылт хумус о̄лэ̄гыт, ща̄нь ла̄тӈаныл э̄лаль тотыяныл ман а̄ти, пуссын ты ва̄рмалит та̄рапаттын ма̄гыс сапра̄ни ва̄рыглавес. Ань Ханты-Мансийск ӯст координационный советн пе̄риим кӯщаит рӯпатаныл урыл потыртасыт ос мо̄т ӯсытныл ма̄хум ищхӣпыӈ ут хосыт та̄наныл хӯнтлысыт ос суссыт. Округувт соссаӈ ма̄хманувн нё̄тмил ва̄рнэ ма̄гыс са̄всыр программат ос са̄кконыт хансым о̄лэ̄гыт. Та̄н правительство па̄лыл олныл та̄ставет ос тэ̄ланыл акваг уральтым о̄ньщавет. Ань пе̄с щирыл о̄лнэ ос во̄раян, хӯл алыщлан, са̄лы янмалтан ма̄хум о̄лупсаныл урыл Александр Ковешников потыртас. Тав ма̄вит ӯргалан департаментыт хантыт, ма̄ньщит, ё̄рныт тэ̄ланыл палт пуӈктоты. Тав юипа̄лэ̄т Нижневартовский районныл Оксана Липунова ос Нефтеюганский районныл Ольга Воронова потранэ̄н ловиньтасы̄г. Нефтеюганский районт 540 са̄вит соссаӈ хо̄тпа о̄лэ̄гыт, та̄н халанылт 84 э̄лумхо̄лас хӯл алыщлэ̄гыт, во̄рае̄гыт манос са̄лы янмалтэ̄гыт. Та ма̄нанылт то̄ват йильпи кол ӯнттэ̄гыт, то̄ват па̄вылн ман ӯсн о̄луӈкве ва̄нтлэ̄гыт. Район янытыл 157 соссаӈ ня̄врамыт школат ханищтахтэ̄гыт манос садикн ялантэ̄гыт. Лемпинский школат ханищтахтын а̄гирищитпыгрищит ща̄нь ла̄тӈыл потыртаӈкве ханищтавет. Пе̄с накыт э̄лаль тотнэ ма̄гыс центрыт ос музеит ӯнттавет, са̄всыр ялпыӈ хо̄талыт ва̄рыглавет. Нижневартовский районт 2, 5 со̄тыра соссаӈ хо̄тпат о̄лэ̄гыт. 133 ма̄нь па̄влыт пе̄с щирыл о̄лнэ ма̄г хасве̄сыт ос тот 360 хо̄тпа – ты хантыт ос ё̄рныт. 115 э̄лумхо̄лас са̄лы янмалтэ̄гыт, та̄н 2 со̄тыра 460 са̄лы о̄ньще̄гыт. Ты коныпал районт 9 община рӯпиты. Районанылт 507 соссаӈ ня̄врам школат ханищтахтэ̄гыт ос 244 а̄гирищитпыгрищит садикн ялантэ̄гыт. Тувыл хо̄т школат 307 ня̄врамыт ос хӯрум садикт 58 ма̄нь ня̄врамаквет ща̄нь ла̄тӈыл потыртаӈкве ханищтавет. Ла̄тыӈ тотнэ нэ̄г ла̄внэтэ̄н щирыл, та е̄рт о̄лнэ соссаӈ ма̄хманув тэ̄ланыл пуссын ёмасыт. Са̄в ёмас ва̄рмалит 2011-2016 та̄л сыс государственный программат хосыт ма̄кыг щё̄питаве̄сыт. Ма̄хум э̄рнэ тэ̄ланыл ма̄гыс олннё̄тмилыл майлуве̄сыт, тувыл ма̄во̄й но̄хвинэ компаният ёт договорнэ̄пакыт щё̄питаӈкве нё̄тавет. Мо̄т тэ̄лат урыл Виктория Сподина, А̄сугорский институтт рӯпитан кӯщай нэ̄, ос Татьяна Дятлова, ЮГУт лӯима̄ ма̄хум нампа институтт рӯпитан кӯщай нэ̄, потыртасы̄г. Виктория Ивановна ла̄выс, РФ ма̄вт са̄в мирыт халт 133 ма̄хум ща̄нь ла̄тӈаныл моще̄ртын со̄ймуӈкве ве̄рме̄гыт. Ханты ос ма̄ньщи ла̄тӈыг о̄с тот хӯлтвесы̄г. Ты ла̄тӈыл потыртан хо̄тпат мощщаме̄гыт, ще̄мьят та̄нки ща̄нь ла̄тӈыл юн щар ат потыртэ̄гыт. Ань А̄сугорский институтт рӯпитан хо̄тпат школат ня̄врамыт ла̄тыӈ ханищтан ма̄гыс са̄всыр нэ̄пакыт хансэ̄гыт ос та̄ратэ̄гыт. Та̄н ЮГУ, Нижневартовский ос Сургутский университетыг ёт акваннё̄тхатым рӯпитэ̄гыт. Ирина Лисютина, образование департаментыт рӯпитан нэ̄, ла̄выс: «Ханты ос ма̄ньщи ла̄тӈыг, ва̄им, молях со̄ймуӈкве патэ̄г, та̄н та̄нки ще̄мьянылт ат потыртэ̄гыт ос ня̄в- раманыл ат ханищтыяныл. Ма̄нь та̄гыл ла̄тӈын ат ханищтавет ке, ня̄враманыл хотыл ва̄ӈкве патэ̄гыт. На̄н тыт на̄нки хосат та̄гыл о̄лнэ ма̄ о̄ньщегы̄н, тыи на̄н о̄лнэ ма̄н, тэ̄лан ма̄кыг на̄нки о̄с ва̄ре̄н». Округувт Ворщик ялпыӈ хо̄тал, Ӯринэ̄ква хо̄тал, Тылащ пори ос мо̄т ялпыӈ хо̄талыт ва̄рыглавет кос, тот йӣкве̄гыт, э̄рге̄гыт, ос ща̄нь ла̄тӈув тыгыл э̄лаль нэ̄мхотталь ат лакви. Округ са̄кконыт хансым о̄ньще̄в кос, ос федеральный са̄кконыт хумус хансавет, ма̄н о̄лупсав янытэ̄т тув ро̄влаве ос та щирыл э̄лаль тэ̄ланув та тотавет. Янгыщ образование палт са̄всыр йильпи ла̄тыӈ пе̄нтаве. Мо̄лты па̄сыл школат ща̄нь ла̄тыӈ ханищтан урок та̄л хультсыт, ос та̄наныл ханищтан ма̄гсыл э̄рнэ щирыл хансым нэ̄пак а̄тим. А̄сугорский институтт па̄лыл нэ̄пакыт щё̄питаве̄сыт кос ос моще̄ртын та̄н о̄с пе̄сыг е̄мтэ̄гыт, мо̄таныт та̄ратаӈкве э̄ре̄гыт. Тэ̄ланув ты кос ёмщакв щё̄питаӈкве патавет, матыр ва̄раве ос та̄н акваг хотты та̄рвитын хо̄е̄гыт.

1139 2017. 01. 12. Николай МЕРОВ

Ма̄ньлат хо̄тпат округ кӯщай нэ̄ ёт потрамасыт Округув янытыл Ханты-Мансийск ӯсн ёхталам ма̄ньлат хо̄тпат ос школат ханищтахтын ня̄врамыт «Югра-Классик» колт акванатхатыгласыт. Ты ня̄врамыт школат ля̄ххалыт хансэ̄гыт, то̄ва ма̄ньлат хо̄тпат ос ань ля̄ххал тотнэ хо̄тпаг э̄лаль ханищтахтэ̄гыт. Округ губернатор Наталья Комарова та̄н ётаныл тот хо̄нтхатыглас. Пуссын аквъёт китса̄ттем са̄вит а̄гипыг о̄лыс. Та̄н кӯщай нэ̄ о̄лупсатэ урыл китыгласаныл. Округ кӯщай нэ̄ ня̄врамытн акв пе̄с йис мо̄йт потыртас. Пе̄с порат лӯима̄т туп ӯльпат лю̄льсыт ос ма̄хум о̄лсыт. Та̄к, яныг ӯльпат о̄лсыт, лӯи во̄тын ат сакватаве̄сыт, ащирман ат по̄лиглаве̄сыт. Э̄лумхо̄ласыт ос ва̄гталнувег о̄лсыт, ащирма порат по̄лигла̄лве̄сыт, а̄гмыл е̄мтала̄лсыт ос то̄ват порсысыт. То̄нт ӯльпат лӯи во̄т ляльт лю̄льсыт, лӯима̄т о̄лнэ ма̄хум ащирма во̄тыл лаппантсаныл. Ты ялпыӈ ӯльпат о̄лсыт. Та̄н лӯима̄ ма̄хум э̄лаль о̄лнэ̄ныл ма̄гыс яныг нё̄тмил ва̄рсыт, ма̄хум та̄рвитаныл торгамтасаныл. Кӯщай нэ̄ ма̄ньлат хо̄тпат нупыл ла̄выс, та̄н о̄с аквтох о̄луӈкве вос ханищтахтэ̄гыт. Халанылт юртыӈыщ ос акваннё̄тхатым вос о̄лсыт. Тувыл ня̄врамыт китыглахтуӈкве патсыт. Белоярский районныл ёхталам а̄ги Анастасия Наталья Комарова китыгластэ, тав ма̄ниг о̄лме̄т, хотьютыг рӯпитаӈкве номсыс. Тав ла̄выс: «Ма̄ниг о̄лмумт, ма̄к акв хотты рӯпата нупыл номтум ат патыс. Ща̄нягума̄щагум потырта̄лсы̄г, хунь тэ̄н а̄нум ма̄нь порат китыгластэ̄н, ам ла̄всасум, э̄рттам полиция хо̄тпаг манос на̄й харыгтан хо̄тпаг рӯпитаӈкве тахсум. Ам номсыте̄мт, ул таима̄гыс тэ̄натэ̄н тох ла̄выгласум, а̄нум ты урыл воссыг ул вос китыгластэ̄н. Ам мо̄т хо̄н ма̄т школат ханищтахтасум, хунь лов класс а̄стласум, са̄в юрт о̄щсум. Ма̄н халувт хот ул вос тыпылтахтэ̄в, аквъёт э̄лаль ханищтахтуӈкве потыртахтасӯв. Ос ща̄нягумна̄щагумн ат та̄ртве̄сум. Тэ̄н ла̄всы̄г, ювле ма̄нки ма̄вн ёхтэн, тыт хо̄т таӈхе̄гын, тот ханищтахтэн. Ам юв ёхтысум, ос сака кантмуве̄сум, таима̄гыс юио̄выл хо̄тал мус э̄лаль ханищтахтын ма̄гыс э̄рнэ нэ̄пакыт ат мисанум. Ща̄нягума̄щагум са̄йттал а̄ла ты патсы̄г. Ос тувыл экономика, организация, строительство щирыл ханищтахтуӈкве патсум. Ётыл, ты ханищтахтам тэ̄лам рӯпатамт сака э̄рмыглас». Акв а̄ги Яна Пыть-Ях ӯсныл таве китыгластэ, ма̄нь порат манырсыр нё̄тмил тав ма̄хумн ва̄рыс. Наталья Владимировна ла̄выс, та̄н ма̄ниг о̄лманыл порат ӯсытт, па̄влытт тимуровцыт о̄лсыт. Ты а̄гитпыгыт яныг хо̄нтыт хо̄нтлум ветеранхо̄тпатн нё̄тмил ва̄рсыт. Тав ос юртанэ ёт акванюрщхатым на̄йив сартыс, вит тотыс ос мо̄т са̄всыр рӯпата ва̄рыс. Ха̄льӯс районныл ёхталам а̄ги Елизавета ос касыл урыл китыглахтас. Кӯщай нэ̄ ла̄выс, тав каснэ ва̄рмалит акваг сунсы. То̄ванакт китыглаве, манырсыр касылн тав яланты, кӯщай нэ̄ ювле ла̄выглы, нас са̄внув ё̄мыгты ос каснэ колн ню̄нсалахтыглаӈкве яланты. Тыи ос мо̄т ва̄рмаль урыл ля̄ххал тотнэ а̄гитпыгыт кӯщай нэ̄ щё̄скем китыгласаныл. Потыр оигпам юипа̄лт ма̄ньлат хо̄тпат таве аквъёт по̄слахтуӈкве во̄всаныл. Ка̄сыӈ ня̄врам ща̄гтым хультыс.

1139 2017. 01. 12. Галина КОНДИНА

Ма̄ньщи мир яныг учёныюв а̄тимыг е̄мтыс Йильпи та̄л о̄вылтахтам порат та̄л котиль э̄тпос хӯрмит щислат яныг учёныюв, ма̄ньщит ма̄гсыл тыныӈ э̄лумхо̄ласув Евдокия Ивановна Ромбандеевав а̄тимыг е̄мтыс. Тав мире ма̄гыс, ма̄ньщи ла̄тӈе ма̄гыс о̄лме палытыл акваг рӯпитас, акваг та хансыс. Тав хосытэ̄тыл ма̄ньщи мир ма̄ янытыл ва̄ӈкве патвес. Евдокия Ивановна мо̄т хо̄н ма̄т учёныитын ва̄йвес, тав хансум нэ̄паканэ ловиньтаве̄сыт, ханищтаве̄сыт, тав тот сака янытлавес. Тамле яныг намыӈсуиӈ э̄лумхо̄ласув ма̄н та тыпылтаслӯв. Ма̄ньщи па̄вылт, Хо̄сло̄хт, самын патум, яныгмам а̄гирищкве э̄лаль ханищтахтуӈкве патыс. Школа а̄стламе юипа̄лт Ханты-Мансийск ӯсн педагогический училищан ханищтахтуӈкве минас. Тот ня̄врамыт ханищтан хо̄тпаг 1944-1947 та̄лыт сыс ханищтахтас. Училищатэ а̄стламе юипа̄лт ювле такви па̄влэ̄н рӯпитаӈкве минас. Хо̄сло̄хт титахтем та̄л ня̄врамыт ханищтасанэ. О̄лме̄т такви потырта̄лыс, хаснэ нэ̄пак торыӈ ат о̄щсыт, учебник о̄с а̄тим о̄лыс. Тав матыр газета манос журнал ло̄мтыл ня̄врамыт мыганэ, та тармыл та хассыт. Тох рӯпитым акваг номсыс, ня̄врамыт ма̄гсыл ханищтахтын нэ̄пакыт хансуӈкве э̄ри, ма̄ньщи ла̄тӈыл ня̄врамыт вос ловиньтэ̄гыт. 1949 та̄лт атхатас ос яныг ӯскапайн, Ленинградын, А. А. Жданов нампа государственный университетн э̄лаль ханищтахтуӈкве та минас, 1954 та̄лт а̄стластэ. Аквта та̄л э̄лаль аспирантурат ханищтахтуӈкве патыс. 1957 та̄лт аспирантура а̄стластэ. Та та̄л о̄выл «Русскомансийский словарь» та̄ратас, тот 392 ла̄тыӈ хансым о̄лыс. 1957 та̄л па̄сыл Академия Наук СССР Ленинградский отделеният научный сотрудникыг рӯпитаӈкве патыс. 1968 та̄лныл ос 1990 та̄л мус Москва ӯст Академия Наук СССР языкознание институтт рӯпитас. 1964 та̄лт Евдокия Ивановна кандидатский диссертациятэ вуянтас ос та та̄л лӯпта э̄тпос ва̄т нупыл хо̄тыт щислат филологических наук кандидат намыл майвес. Та урыл ань Евдокия Андреевна Нёмысова потыртас, ла̄ви: «Ме̄н Москват Евдокия Ивановнал туи ёмас хо̄талт аквъёт ё̄мантасме̄н ос татем ща̄гтым о̄лсуме̄н, тав научный рӯпататэ вуянтастэ, номтанме̄н татем ёмасыт о̄лсыт». Евдокия Ивановна ня̄врамыт ханищтан ма̄гсыл са̄в ловиньтан нэ̄пакыт, учебникыт хансыс. Тав хансум нэ̄паканэ хосыт таса̄вит ня̄врам ханищтаве̄сыт ос ань ханищтавет. Рӯпитаме сыс яныгса̄т атпан са̄виттем научный рӯпата хансыс. Тав ё̄ре̄тыл тыт Ханты-Мансийск ӯст Научноисследовательский институт возрождения обскоугорских народов ва̄рвес. Тот тав старший научный сотрудникыг ос ща̄нь ла̄тыӈ, литература, фольклор отделт пуӈктотыс. Ётыл институт мощ мо̄тнув щирыл намтвес, Евдокия Ивановна акваг тот рӯпитас, ка̄сыӈ хо̄тал рӯпата та̄л ат о̄лыс, юио̄выл та̄лыт та осыт нэ̄пакыт хансыс, тот пе̄с йис ма̄ньщи потрыт, мо̄йтыт хансым о̄лэ̄гыт. Такви мире сака э̄руптастэ, ма̄ньщи ла̄тӈе ма̄гыс сыме ща̄ргыс. О̄лме̄т ла̄вса̄лыс, ма̄ньщи ла̄тӈув акваг хотталь та со̄йми, ма̄нь ма̄хум та̄нти ла̄тӈаныл ат ва̄ганыл, ат потыртэ̄гыт. 1998 та̄лт Е. И. Ромбандеева филологический наукат доктор намыл майвес. Тав ма̄гылн тагатан са̄в по̄с о̄ньщас: «Ветеран труда», «За заслуги перед Отечеством II степени», ты коныпал тав Почетный гражданин ХМАО-Югры, «Заслуженный деятель науки РФ», «Заслуженный работник образования ХМАО», «Звезда Утренней Зари» нампа премиял майлувес, Академия Наук СССР президиумыл Почётный грамота о̄ньщас ос са̄в янытлан нэ̄пакыл майлувес. «Лӯима̄ сэ̄рипос» ма̄ньщи газетав ловиньтаӈкве сака таӈхыс, газета акваг ӯрыстэ, хунь хосанув ат те тотаве, редакциявн та свониты, титыглахты, газетав ва̄рыслӯв ман а̄ти. Акваг ла̄вса̄лыс, ма̄навн матыр таве̄ныл титыглаӈкве те э̄ри, вос свонитэ̄в. Евдокия Ивановна ма̄н ма̄гсылув яныг учителиг о̄лыс, ма̄навн акваг нё̄тыс, ма̄н школат ос институтт пуссын тав хансум нэ̄паканэ хосыт ханищтахтасӯв. Я̄тил яныг учёныюв, мир янытыл ва̄им хо̄тпав воссыг а̄тим. Ма̄н, редакцият рӯпитан ма̄хум, пуссын ма̄ньщи мирувн са̄литан ла̄тыӈ хансэ̄в, тав рӯтанэ̄н, ляпа хо̄тпанэ̄н, руманэ̄н акваг вос номаве, тав ва̄рум рӯпататэ нэ̄мхуньт ул вос ёрувлаве. Обскоугорский институтт рӯпитан ма̄хманэ газетан ла̄тыӈ те̄тсыт. Евдокия Ивановна Ромбандеева институтт главный научный сотрудникыг рӯпитас, тав филологический наукат доктор нам о̄ньщас. Аквъёт рӯпитам ма̄хманэ тав рӯтанэ̄н, ляпа хо̄тпанэ̄н са̄литан ла̄тыӈ ла̄ве̄гыт. Тамле номтыӈ, ёмас э̄лумхо̄ласаныл та̄л та хультсыт.

1139 2017. 01. 12. Николай МЕРОВ

Во̄раян ма̄ньщи пыг Молты тэ̄лытӯяг Лӯсум ма̄хум палт ялмум порат акв ма̄ньщи пыг ёт о̄с хо̄нтхатыгласум. Тав наме Евгений Юрьевич Анямов, ты пыг Ке̄расколыӈъя̄ па̄вылт самын патыс, тот яныгмас. Ты па̄выл Нё̄р ма̄т ӯнлы. Тав ань ане̄кватэ Альбина Александровна палт Висумтыт па̄вылт о̄лы. Тот таве̄н нё̄ты, на̄йив аты, вит тоты ос мо̄т са̄всыр та̄рвитыӈ рӯпата ва̄ри. Оматэ Татьяна ос Лэ̄пла па̄вылт о̄лы. Тот хум ва̄рыс. О̄йкатэ Владимир Тасманов во̄раян хум, тэ̄н аквъёт са̄в та̄л о̄лэ̄г. Евгений ка̄сыӈ хо̄тал во̄раим яласы. Нёхыс алыщлы, со̄выр лэ̄с ӯнтты ос щёпыр па̄тлупты. То̄ванакт со̄тыл пинаве, со̄рп ка̄тынпатты. Ты коныпал пыг ка̄тыл алыщлап пормасыт ма̄щтырлы, матыра̄ти пуссын ва̄руӈкве ха̄сы. Ам мӯйлуӈкве тув ёхталамум порат, тав а̄нум «Бураныл» тотыгластэ. Саквалам щаӈкванэ о̄с такви хотщё̄питыянэ. Ма̄ньлат хум тох ла̄выс: «Ӯсн мощщан ялэ̄гум, па̄влум та̄л та̄ра ка̄сум холы. Сымум о̄лнэ ма̄мн во̄вхаты. Ам ӯст о̄луӈкве щар ат таӈхе̄гум. Тот рӯпата а̄тим, нэ̄матыр ва̄руӈкве. Па̄влумт ам рӯпата та̄л щар ат ӯнлэ̄гум, акваг матыр ва̄ре̄гум. Тыт лылые̄п сыстам, нэ̄матыр суй а̄тим, а̄нумн тыт сака мӯсты». Евгений Полуночный па̄выл школа а̄стламе юипа̄лт та̄ра такви о̄лнэ ма̄тэ̄н ёхтыс. Ивдель ӯст ма̄шинал яласаӈкве ханищтахтас. Тыгыл э̄лаль во̄рт яласан ма̄гыс матыр ма̄шина ёвтуӈкве номсы. Тамле ты ка̄ркам ма̄ньщи пыг Нё̄р ляпат о̄лы.

1139 2017. 01. 12. Николай МЕРОВ

Сӯева̄т па̄вылт по̄слым ма̄хманув Ты хурит ма̄ньщи ма̄хманув Ивдельский районт Сӯева̄т па̄вылт по̄слым о̄лэ̄гыт. Во̄ртыпал нупыл Евгений Анямов, тувыл Владимир Тасманов, Анна Хворостова, такви о̄парищ наме Курикова, Татьяна Гоголева ос Александр Хворостов лю̄ле̄гыт. Мо̄лты тэ̄лытӯяг ма̄н округ Думат депутатыг рӯпитам нэ̄ Татьяна Гоголева ёт нё̄р хосыт Тӯрва̄т па̄выл мус «Бураныл» ялсӯв. Ка̄сыӈ па̄вылн хо̄игласӯв, ма̄ньщи хо̄тпанув ёт потрамасӯв. Китыгласанӯв, хумус та̄н о̄лэ̄гыт, маныр та̄рвит ва̄рмаль о̄ньще̄гыт. Пе̄с порат Сӯева̄т па̄вылт са̄в мир о̄лыс. Ань тот акв кол ӯнлы. Тот Александр ос Анна Хворостовыг о̄лэ̄г, во̄рае̄г. Во̄рколэ̄н тэ̄нти ӯнттыстэ̄н. Колэ̄н пе̄с па̄вылныл мощ э̄лыннув ӯнттыстэ̄н, сытам ма̄т, мори яласан хо̄тпат ул вос хо̄нтсаныл. Та йис ма̄тэ̄нт во̄рае̄г, пил ва̄тэ̄г ос ла̄хыс атэ̄г.

1139 2017. 01. 12. Светлана РОМБАНДЕЕВА

Соссаӈ ма̄хум ёт рӯпитан нэ̄ Мо̄лты во̄ртур э̄тпост Нижневартовский район Мегион ӯст «Региональный историкокультурный и экологический центр» колт Ӯй йӣквнэ тэ̄ла ва̄нэ соссаӈ ма̄хум акванхо̄нтхатыгласыт, ты о̄вылтыт е̄ӈта пасан ва̄тат потыртасыт. Та̄н халанылт акв рущ нэ̄ о̄лыс, Наталья Егоровна Бренич. Тав насати соссаӈ мирн сака са̄в нё̄тмил ва̄ри, та̄н ётаныл рӯпиты. Ам Наталья Егоровна ёт потрамасум, на̄н ань э̄лаль ме̄н потруме̄н ловиньтэлы̄н. – Ӯй йӣквнэ тэ̄ла о̄вылтыт ханты хум Тимофей Алексеевич Молданов тав потыртаӈкве патыс, ты ма̄гыс сыме ща̄рги. Тав ла̄ви, ты о̄вылтыт потыртаӈкве ань ат те патэ̄в, ты тэ̄ла тах молях хотталь со̄йми. Тав ла̄ви, ты ва̄рмаль ва̄нэ хо̄тпат ань иӈ о̄лэ̄гыт. Сургутский районт Сергей Васильевич Кечимов о̄лы, тав хо̄тал нэ̄глын е̄р нупыл о̄лнэ ханты ма̄хум Ӯй йӣквнэ ва̄рмаляныл ёмащакв ва̄гтэ. Ань пе̄с ма̄хманыл хумус Ӯй йӣквсыт, хумус тӯлыглахтасыт, тав пуссын номиянэ, э̄ргыт, тӯлыглапыт ва̄г. Туи порат ма̄н таве тыг во̄виньтаслув, потрамасув, тав ма̄н ётув рӯпитаӈкве ка̄сащас, нё̄туӈкве ла̄выс. Мегион ӯс сака ёмас ма̄т ӯнлы, тыг кос хоты ма̄ныл мир ёхтуӈкве ве̄рми. Ханты-Мансийск ӯс па̄лыл йиӈкве о̄с кӯпнит. Тыг тах ня̄врамыт ёхталаӈкве патэ̄гыт, ты ва̄рмаль ва̄нэ хо̄тпатын ханищтаӈкве патавет. – Наталья Егоровна, тыг ма̄ньщи ма̄хумн ёхталаӈкве ро̄ви? – Хумус ат ро̄ви, ты колув соссаӈ мир ма̄гыс о̄лы. Кос ма̄ньщи, кос ханты манос ё̄рн хо̄тпат тыг вос ювыт, аквъёт рӯпитаӈкве патэ̄в. Ма̄н палтув Нижневартовский районт о̄лнэ ханты ма̄хманув ва̄тихал ёхталэ̄гыт, «Ночь сказок» ва̄рыглэ̄в. Ӯс мир, школат ханищтахтын ня̄врамыт ты ва̄рмаль сака э̄руптыяныл, ханты ос рущ ла̄тӈыл мо̄йт сака хӯнтлэ̄гыт. Варъёган па̄вылт о̄лнэ ханты о̄йка Павел Янчевич Айваседа Елизавета Даниловна э̄кватэ̄нтыл ма̄н палтув ва̄тихал ёхталэ̄г, мо̄йтэ̄г, пе̄с потрыт потыртэ̄г. Тэ̄н ань мирн ва̄ве̄г, ня̄врамытн э̄руптаве̄г. Ма̄н, ты колт рӯпитан ма̄хум, ханты ма̄хманув палт Варъёган па̄вылн ва̄тихал яланта̄лэ̄в. Во̄рколанылт ма̄нав ӯрияныл, туп юв щалтэ̄в, та̄н матыр а̄ныса̄н ӯнттыгпа̄лэ̄гыт, пӯрлахтэ̄гыт. Ты ма̄хум та̄нти халанылт сака юртыӈыщ о̄лэ̄гыт, та̄н палтаныл ма̄н ща̄гтым яланта̄лэ̄в. – Ты колт наӈ манах та̄л рӯпитэ̄гын? – Тыт 2007 та̄л па̄сныл рӯпитэ̄гум. Ты э̄лыпа̄лт ва̄т нупыл са̄т та̄л ня̄врамыт ханищтым школат рӯпитасум, этнография ос культура народов Севера урок ханищтасум. Ӯс янытыл тамле рӯпата амттем ва̄рсум, ня̄врамытн Ӯй йӣквнэ ва̄рмаль о̄вылтыт потыртасум. Ты центр колт то̄нт Виктория Ивановна Сподина рӯпитас. Ня̄врам ханищтан хо̄тпат тав ва̄тихал акванатыгласанэ, ма̄н ань ня̄врамытн соссаӈ ма̄хум о̄вылтыт вос потыртэ̄в. Та порат школатыт мори капыртан ня̄врам са̄в о̄лыс, то̄ват ща̄ньа̄щанылн аты уральта̄лве̄сыт, ӯльнаг ха̄йтсыт. Виктория Ивановна ма̄н нуплув ла̄выс: «Ӯльнаг яныгман ня̄врамыт акванатыянув, та̄н ётаныл потраме̄в, ханты ма̄хманув палт тотыглыянӯв, вос сунсэ̄гыт, ань во̄рт ма̄хум хумус о̄лэ̄гыт, ня̄врамыт мощ сыстам лылые̄пыл вос лылтэ̄гыт». Со̄ль, ма̄н экспедиция ва̄рсӯв, ня̄врамыт ёт соссаӈ ма̄хманув палт минасӯв, тот кит са̄ттем о̄лсӯв. Тувыл та̄н щар мо̄т хо̄тпаг е̄мтапасыт, мо̄т щирыл о̄луӈкве патсыт. Та ня̄врамыт ань пуссын яныгмасыт, э̄лаль ханищтахтасыт, ще̄мьяӈыг е̄мтсыт. Хунь та̄наныл ка̄салыянум, та пора акваг номылмата̄лыяныл, пӯмащипа ла̄тыӈ ла̄ве̄гыт. Тувыл ам акваг тыг та патхатасум, ань исследовательский рӯпата ва̄ре̄гум. Школа а̄стлан ма̄ньлат ма̄хум Юио̄выл звонок ос Конта̄ратан экзаменаныл ань акваг ма̄н палтув ва̄руӈкв таӈхияныл. Ма̄н, тыт рӯпитан хо̄тпат, воссыг хоталь щалтэ̄в, ня̄врамыт мо̄йт хӯнтлуӈкве таӈхе̄гыт, та ка̄саще̄в. Во̄рт «Югра» нампа база о̄ньще̄в, тот о̄лнэ колыт ӯнлэ̄гыт, ань ма̄ньлат ма̄хманув ща̄ньа̄щаныл ёт пуссын тув ёхтала̄лэ̄гыт, э̄т палыт тот та мо̄йтэ̄в. – Наталья Егоровна, наӈ хо̄т самын патсын? – Свердловский область Талица ӯст ре̄тыӈ ю̄свой э̄тпост 1960 та̄лт самын патсум. Ӯсум Тюменьныл 90 ве̄рыста палыт ӯнлы. Мегионын 1975 та̄лт о̄лмыгтасум. Кит а̄ги, ат апыгрищ о̄ньще̄гум. Акв а̄гим Томскыт о̄лы, мо̄т а̄гим тыт ам ляпамт о̄лы. Ань потруме̄н та оигпас. Наталья Егоровна хо̄тпа нупыл ёмас нэ̄, мӯтраӈ э̄лумхо̄лас. Ты я̄тил нэ̄кве са̄в та̄л пуста̄гыл вос о̄лы, со̄тыӈыщ вос о̄лы!

1139 2017. 01. 12. Тамара МЕРОВА

Ка̄с ва̄рим э̄лаль ёмащакв вос о̄лэ̄в Яныг таквс э̄тпос юио̄выл хо̄таланэ̄т Ханты-Мансийск ӯст са̄всыр культура тэ̄лат о̄лыгласыт. Ма̄щтырлан хо̄тпат та̄нки халанылт касcыт, нэ̄пак ловиньтан колт Ельцин нампа Президенский центр рӯпитаӈкве патыс, Россия янытыл о̄лнэ музеит тыг VII биеналеханищтапн ёхталасыт ос Юграт культура тармыл рӯпитан ма̄хум IV Форумн акванатыглаве̄сыт. Россия янытыл са̄в ма̄ныл тыг ма̄хум ёхталасыт. Форумн хӯрумса̄т э̄лумхо̄лас акванатхатыгласыт. Культурат рӯпитан ма̄хум ка̄сыӈ е̄мт йильпи ёнгилыт ва̄руӈкве ла̄вавет. Та̄н хосат та̄гыл ханьщувлым ёнгын утаныл по̄хан вос оссувлыяныл ос йильпи щирыл рӯпитаӈкве вос о̄вылтахтэ̄гыт. Тащирыл та̄н акв ма̄т ат ӯнлантэ̄гыт, акваг номтыӈыщ рӯпатаныл э̄лаль тотыяныл. Тувыл ма̄хум ма̄гыс ка̄с тотым, са̄в мирыт та̄нки халанылт акваннё̄тхатэ̄гыт ос юрщхатэ̄гыт. Ань ты урыл акванатхатыглам хо̄тпат потыртасыт. Та̄н тот 2030 та̄л мус государственный культурный политика тэ̄лат хансым нэ̄пакыт суссыт ос тув э̄рнэ ла̄тыӈ хассыт. Округувт ма̄хум ёмщакв ӯщлахтынэ̄ныл ма̄гыс са̄в колыт ӯнттавет, тот са̄всыр ялпыӈ хо̄талыт ва̄рыглавет. Ще̄мьяӈ та̄гыл матыр сунсуӈкве, пӯмщалаӈкве ма̄хум тув вос ёхталэ̄гыт. Тувыл ща̄ньа̄щит та̄нки о̄ньщум пе̄с йис наканыл ня̄врамытын вос потыртыяныл, та̄н о̄с вос ва̄ганыл. Ма̄хум ӯщлахтын колытыт ня̄врамыт йӣквуӈкве ос э̄ргуӈкве, ка̄тыл матыр ва̄руӈкве ос по̄слуӈкве ханищтавет. Тувыл а̄гирищитпыгрищит та̄нки халанылт касуӈкве акваг тотыглавет. Са̄в мирыт пе̄с йис наканыл хот ул вос ёрувлавет, та̄наныл яныгман ня̄врамытын ва̄нэ ма̄гыс хультуптаӈкве э̄ре̄гыт. Ань программан хансым тэ̄лат ёмщакв рӯпитанэ̄ныл ма̄гыс бюджет па̄лыл олныл вос та̄стуве̄сыт ос са̄всыр ма̄т рӯпитан ма̄хум аквтох вос нё̄тсыт. Культура тармыл рӯпитан хо̄тпат нэ̄пак ловиньтан колыт, музеит, са̄всыр ӯщлахтын колыт, спортивный колыт ёт, та̄нанылн нё̄тым аквъёт вос рӯпитэ̄гыт. Ань ма̄хум та̄нки коланылт ка̄ркамыг ос ёмщакв рӯпитанэ̄ныл ма̄гыс ищхӣпыӈ утыл пуссын ёвтве̄сыт. Ты ва̄рмалит о̄вылтыт Надежда Казначеева, культура департаментыт кӯщай нэ̄ ла̄выс: «Округувт манос мо̄т ма̄т матыра̄ти ва̄рыглан порат культурат рӯпитан ма̄хманув та̄л нэ̄матыр ат о̄лыгла̄лы. Са̄всыр ханищтапыт, суссылтапыт, конференцият ос форумыт о̄лнэ̄ныл порат та̄н акваг тув во̄виньта̄ла- вет. Та̄н йӣквыт ос э̄ргыт щё̄питэ̄гыт, ка̄с тотэ̄гыт, таима̄гыс та̄нанылн яныг пӯмащипа ла̄тыӈ ла̄ве̄гум». Тувыл Надежда Михайловна то̄ва хо̄тпат э̄сгын нэ̄пакыл мисанэ ос янытлысанэ. РФ культура Министерство па̄лыл благодарственный пищмал Е. Д. Галяга, Сургутский музыкальный колледжит рӯпитан нэ̄, ос О. А. Пронина, Югорск ӯст балетмейстерыг о̄лнэ нэ̄, мӯйлуптавесы̄г. Округ губернатор почётный грамотал Е. А. Нёмысова, «То̄рум Маа» нампа музеит рӯпитан э̄ква, тувыл П. С. Макаров, Белоярский школа искусств рӯпитан хум, ос Е. Г. Бельтюкова, Октябрьский район Унъюган па̄вылныл о̄лнэ нэ̄, майве̄сыт. «Ла̄тыӈ» нампа литература премиял Е. С. Капитонова, Ю. И. Папанова ос А. Е. Мякишева мӯйлуптаве̄сыт. Та̄н са̄всыр номинацият но̄хпатсыт. Тувыл музеит, нэ̄пак ловиньтан колытыт, театрыт рӯпитан хо̄тпат о̄с э̄сгуве̄сыт. Соссаӈ хо̄тпат халт «Хо̄тал» нампа А̄сугорский ма̄хум театрыт рӯпитан Татьяна Фоминых ос Валентин Неттин округ па̄лыл э̄сгын нэ̄пакыл майвесы̄г. Ты театрув ёмас спектаклянэ ма̄гыс о̄с мӯйлупсал майвес. Пуссын но̄хпатум ма̄хманув ма̄н о̄с янытлыянӯв. Та̄н Югра ма̄в наме э̄лаль суиӈыг тотнэ щирыл сымыӈыщ рӯпитэ̄гыт, та̄нанылн пӯмащипа ла̄тыӈ ла̄ве̄в.

1139 2017. 01. 12. Тамара МЕРОВА

Ня̄врамыт яныг хо̄нт урыл са̄в ва̄гыт Касум па̄вылт о̄лнэ ня̄врамыт ёт Елена Федотова ос Марина Кабакова са̄в рӯпитэ̄г. Тэ̄н туи «Нумсанг ёх» этностойбищан а̄гирищитпыгрищит ӯщлахтуӈкве во̄выглыянэ̄н ос тот та̄н ма̄гсыланыл са̄всыр смена ва̄ре̄г. Мо̄т порат па̄вылт о̄лнэ ня̄врамыт ёт музейт акванхо̄нтхатыглэ̄гыт ос соссаӈ ма̄хум пе̄с о̄лупса о̄вылтыт та̄нанылн потыртэ̄г. Ань ты йис акванатым пе̄с пормасыт, са̄всыр потрыт мо̄т ма̄хумн ва̄нэ ма̄гыс э̄лаль суссылтаӈкве э̄ре̄гыт. Нэ̄квег о̄лыглам накыт ма̄хумн тӯлыглапыт щирыл суссылтаӈкве номылматсы̄г. Тэ̄н «Нумсанг ёх» этностойбищан ня̄врамыт театральный сменан атыгласанэ̄н ос мо̄т ма̄ныл ёхталам хо̄тпат ёт ка̄с ва̄рсыт. Ты ва̄рмаль ма̄хумн мӯстыс, та̄нанылн сака пӯмыщ о̄лыс. Ос ётыл Елена Федотова ос Марина Кабакова ня̄врамыт ёт театрыг ла̄внэ кол ва̄руӈкве номылматсы̄г. 2012 та̄лт та̄н Эстонияныл о̄лнэ режиссернэ̄ Анне Тюрпну ёт акваннё̄тхатым «Сны забытого стойбища» спектакль щё̄питасыт. Та па̄сыл та̄н иӈ нила спектакль ва̄рсыт ос ма̄хумн суссылтасыт. Та̄нанылн Евгения Молданова ос Екатерина Потпот, «Хо̄тал» нампа А̄сугорский ма̄хум театрыт рӯпитан нэ̄г, нё̄тсы̄г. Мо̄лты та̄л ва̄ти хо̄тал э̄тпост та̄н «Не судьбой наделённые судьбы» нампа спектакль суссылтаӈкве Ханты-Мансийскан ёхталасыт. Ты ёнгиланыл та̄наныл Игорь Устинович, Санкт-Петербургныл о̄лнэ режиссёрхум щё̄питаӈкве нё̄тыс. Марина Кабакова аквъёт рӯпитан пора урыл ла̄выс: «Игорь Устиновичн ма̄н яныг пӯмащипа ла̄тыӈ ла̄ве̄в, тав ма̄к номтыӈ хум хо̄тпа. Соссаӈ ма̄хум о̄лупса ёмщакв торгамтытэ. Ма̄н яныг хо̄нт о̄лыглам тэ̄лат суссылтаӈкве тахсӯв. Тав ка̄нащит о̄лум пе̄с пора ос репрессия та̄лыт осн о̄с паттысанэ, тувыл э̄рнэ̄г ма̄навн хӯлтсанэ. Ма̄н ма̄хманув о̄лте̄нылт ла̄тыӈ мори ат ла̄выглэ̄гыт, таима̄гыс ма̄н спектаклянув то̄ванакт сӯпне̄лмта̄лыг, нас са̄в по̄сыт ва̄рнэ щирыл щё̄питыянӯв. Ты ёнгилув ма̄н Тимофей Молданов хансум сти- хотворениятэ̄тыл о̄вылтылӯв, таве Михаил а̄пщитэ̄н ловиньтаве. Тувыл Пелагея Гришкина ос Екатерина Тоголмазова э̄рыг э̄рге̄г, ос мо̄т хо̄тпат пе̄с о̄лупса о̄вылтыт потыртэ̄гыт. А̄гитпыгыт хо̄нтлам ма̄ныл ке̄тым пищмат ловиньтэ̄гыт. То̄ва тэ̄лат «Склоняем головы перед вашим подвигом» нампа нэ̄пакныл та̄рапаттысанӯв. Ты нэ̄пак Касум па̄вылт о̄лнэ нэ̄ хо̄тпат хассыт». Спектакль сунсум ма̄хум о̄влэ̄т асталыг ӯнлысыт, ётыл потыртаӈкве патсыт. Ханты-Мансийск ӯст о̄лнэ э̄ква Зинаида Аркадьевна Лебедкина ла̄выс: «Ня̄врамаквет, на̄нан пӯмащипа ла̄тыӈ ла̄ве̄гум. Ам а̄тям Карельский фронтыт, тувыл Ленинградский фронтыт хо̄нтлыс. Тав а̄пщитэ полковой разведкат хо̄нтлыс, ётыл тав пыге ос апге аквтох разведкат лусытасы̄г. Таима̄гыс хо̄нтлам ва̄рмаль ще̄мьявт акваг номилӯв. Мо̄лты Россияв янытыл «Бессмертный полк» нампа акция ва̄рвес, ты ёмас ва̄рмаль номылматам хо̄тпа ам о̄с янытлылум. На̄н ань ты спектакль щё̄питаслы̄н, такем ёмщакв суссылтаслы̄н. На̄н, э̄рттам, на̄нки та пилыщмаӈ порат о̄лсын, са̄в та̄рвит урыл ва̄гын». Светлана Попова ос Фаина Иштимирова ня̄врамыт ос спектакль щё̄питам хо̄тпат о̄с э̄сгысанэ̄н. Тэ̄н тэ̄нки рӯт ма̄хманэ̄н война порат хумус о̄лсыт, потыртасы̄г. Светлана Алексеевна а̄ще хо̄нтлуӈкве ялыс, тав ла̄выс: «То̄ва хум хо̄тпат рущ ла̄тӈыл потыртаӈкве щар ат ха̄ссыт. Та̄н ма̄ньщи ла̄тӈыл ля̄галам ла̄тӈаныл рущ са̄лтатытн нэ̄пакло̄мтын хасве̄сыт ос та щирыл пищма юв ке̄тыгласыт. Ха̄льӯс архив колт тамле пищмат о̄лэ̄гыт. Са̄всыр ма̄ныл о̄лум хо̄нтлам ма̄хум та̄нки халанылт нё̄тхатасыт». Фаина Павловна ащо̄йкатэ о̄с хо̄нтлас, юв ат ёхтыс, тот хо̄т тыпыс. Тав 1916 та̄лт самын патыс, ты та̄л яныгса̄т та̄лэ то̄влынӯв. Нэ̄ ла̄выс: «Ка̄сыӈ е̄мт войнат порсум ма̄хум наманыл хӯнтланэм порат ам ащо̄йкам ос мо̄т рӯтанум наманыл тув ро̄вылтыянум ос ка̄стыянум. Война о̄лум ма̄гыс ка̄сыӈ хо̄тпа сыме ща̄рги, пилыщмаӈ нак нэ̄мхуньт воссыг ул вос е̄мты».

1139 2017. 01. 12. Светлана МАТВЕЕВА

Пе̄с накыт, пе̄с пормасыт э̄лаль тотнэ рӯпата Ювле хультум э̄тпос 15 хо̄талэ̄т Ханты-Мансийск ӯст «Творческое объединение «Культура» колт хо̄нтхатыглап ва̄рыглавес, тох намая̄лвес: «Формирование заявки (заполнение анкетыпаспорта) объекта нематериального культурного наследия Ханты-Мансийского автономного округа – Югры». Тув ля̄ххал тотнэ ма̄хум ос «То̄рум Маа» музейт рӯпитан нэ̄тхумит во̄виньта̄лве̄сыт. Та̄н ань пуссын соссаӈ мир культура ӯргалан манос но̄хво̄рмалтан ма̄т рӯпитэ̄гыт. Потраныл та о̄вылтыт о̄лыс: хоты пормасыт урыл хансуӈкве ро̄ви, потыр хумус щё̄питаӈкве э̄ри, э̄рнэ нэ̄пакыт мӯсхал щирыл хумус хансуӈкв э̄ре̄гыт, та маныр. Тувыл анкетапаспорт урыл я̄нас потыр о̄лыс. Ты нэ̄пак ма̄хум торыӈ щирыл хансуӈкв ат ве̄рмияныл, ка̄сыӈ е̄мт мо̄т щирыл хансыяныл. Соссаӈ мирыт колнак тармыл пуӈктотнэ нэ̄ Светлана Нестерова та урыл мощ потыртас, ань ты анкетанэ̄пак э̄рнэ щирыл хумус хансуӈкве, щё̄питаӈкве э̄ри. Та̄н ётаныл рӯпитаӈкве ань ка̄сыӈ хо̄тпа ве̄рми. Хо̄тпа матыр пе̄с йис пормас манос хотты э̄ӈкварп пормас о̄ньщи те, таве вос по̄слытэ, тав уре̄т вос хансы. Тувыл э̄рнэ нэ̄пакыт мӯсхал щирыл вос щё̄питыянэ, ищхӣпыӈ ут хосыт культура колн вос ке̄тыянэ. Та̄н адресаныл тамле: onk@to-kultura. ru. Матыр ат те торгамтасын, о̄с аквта ищхӣпыӈ ут хосыт ловиньтаӈкве ро̄ви, ты о̄вылтыт тот пуссын хансым о̄лы. Ты потрыт о̄лнэ ма̄ сайтыг ла̄ваве, ань ты утыг щирыл кисхатэ̄н – www. ugra-nasledie. ru ос www. rusfolknasledie. ru Светлана Николаевна ла̄вме щирыл, тыг а̄ти туп пормасыт урыл хансуӈкве ро̄ви, мо̄йтыт, э̄ргыт, тӯлыглапыт о̄с вос хансавет. Тувыл хо̄тпа матыр ва̄руӈкве ха̄сы те, ты тэ̄ла кинан вос по̄славе ос нэ̄пакн вос хансаве. Ань хумус рӯпитаӈкве ман щаквщуӈкве о̄вылтахты, тувыл а̄стынэ̄тэ мус хумус рӯпиты, пуссын кинан вос по̄славе. Ты о̄с я̄нас тэ̄лаг ловиньтаӈкве патаве. Нэ̄ ла̄выс, та̄н ань Ӯй йӣквнэ ва̄рмаль о̄вылтыт са̄в потыр хассыт, э̄рнэ щирыл щё̄питасаныл. Я̄тил ма̄ньщи ма̄хумате̄нув, на̄н э̄рыӈ о̄с матыр урыл хансуӈкве ка̄сащегы̄н манос э̄рыӈ матыр ва̄руӈкве ха̄сэгы̄н, та колн соссаӈ ма̄хманувн пищма хансэ̄н, китыглахтэ̄н. Тот рӯпитан ма̄хумн нё̄таве̄н. На̄н тэ̄лан тах ма̄ янытыл о̄лнэ мирн ка̄салаве, ва̄ӈкв патаве.

1139 2017. 01. 12. Валентина Васильева

Ма̄нь па̄вылт о̄лнэ нэ̄ Ты нэ̄ Нижневартовский район Варъёган па̄вылт о̄лы. А̄ги о̄парищ наме щирыл Лидия Васильевна Айваседа. Та па̄вылт музей колт рӯпиты. О̄лупсатэ урыл тав тох потыртас: – Ам а̄тям ё̄рн хумыг о̄лыс, омам ханты нэ̄. Ма̄н колта̄глув са̄лы ӯрим яласас. Ма̄н, ня̄врамыт, са̄лыянув ёт яныгмасӯв, та̄наныл хумус о̄ньщуӈкв, пуссын ва̄глӯв. Во̄рт ма̄нти ма̄ о̄ньще̄в, тот ань каӈкум са̄лы ӯрим о̄лы. Школан миннэ пора хунь ёхты, ма̄н пуссын интернатн та тотаве̄в. Тот мощ о̄лсӯв. Тувыл омагума̄тягум па̄вылт о̄лнэ колыл майвесы̄г, та колув ла̄пка ляпат ӯнлыс. Во̄рт о̄лнэ ма̄хум па̄вылн ёхтэ̄гыт, ма̄н палтув хо̄е̄гыт, колувт э̄т хӯлэ̄гыт, то̄ват матах хо̄тал о̄лэ̄гыт. Омам такви ханты ла̄тӈе, а̄тям ос такви ё̄рн ла̄тӈе ёмащакв ва̄стэ̄н. Ос халэ̄нт то̄ванакт ханты ла̄тӈыл, то̄ванакт ос ё̄рн ла̄тӈыл потыртасы̄г. Та пе̄с пора ма̄хманув пуссын хӯрум ла̄тӈыл потыртаӈкв ха̄ссыт, рущ ла̄тӈыл о̄с мощ ве̄рмысыт. Ма̄н, ня̄врамыт, акваг та хӯнтлэ̄в, маныр урыл яныг хо̄тпат потыртэ̄гыт. Тох мощ торгамтаӈкв патсӯв. Яныгмасӯв, ам рущ хум ва̄рсум. Хӯрум ня̄враманме̄н самын патсыт. О̄йкам хосат а̄тим, ам ня̄враманум ёт амттем хультсум. Нэ̄мхотьютум ща̄нь ла̄тӈыл потыртаӈкв ат ве̄рми, пуссын туп рущ ла̄тӈыл потыртэ̄гыт. Яныг пыгум ва̄т нупыл хо̄т та̄лэ то̄влыс, котиль а̄гим ва̄т нупыл ат та̄лыг е̄мтыс. Ма̄нь а̄гим титхуйплов та̄лэ ущ то̄влыс. Котиль а̄гим товуӈкв сака ха̄сы. Туи порат ма̄ньха̄пыл каснэ ва̄рмаль ва̄рыглаве, тав ка̄сыӈ та̄л тот тови. Ты та̄л ам тот о̄с кассум. Ам са̄в та̄л Варъёган па̄выл музейт рӯпитэ̄гум. Ма̄н районувт са̄в ма̄щтыр хо̄тпа о̄лы. То̄ват во̄рт са̄лыяныл ӯрим о̄лэ̄гыт. Та̄н юн матыр пормас ма̄щтырлэ̄гыт, тувыл ма̄н музеювн тотыяныл. Ма̄н ма̄нь ла̄пка о̄ньще̄в, рущ ла̄тӈыл «сувенирный лавкаг» ла̄ваве. Тот та пормасыт тыналыянӯв. Тох, сакати, ма̄н соссаӈ ма̄хманув олн мощ сэ̄лэ̄гыт. Округув янытыл тотыглаве̄в. Хотты ӯст ман па̄вылт каснэ ва̄рмаль ман ялпыӈ хо̄тал ва̄раве, тув тыналахтуӈкв та минэ̄в.

1139 2017. 01. 12. Анна Конькова

Таӈхе̄гум – ат таӈхе̄гум Со̄выр Со̄вырэ̄кватэ ёт ёмщакв о̄лсы̄г. Тэ̄нут акваг о̄щсы̄г, сыстам виткве айсы̄г. Туп тэ̄н ня̄врам та̄л о̄лсы̄г, ня̄врам ат о̄щсы̄г. Ка̄сыӈ хо̄тал мо̄т хо̄тпа ня̄врамыт тэ̄нти колэ̄н тотыгласы̄г, ловтыянэ̄н, вотгащлыянэ̄н ос атыӈ тэ̄нутыл тыттыянэ̄н. Акв порат Тисупэ̄ква такви апганэ ёт мӯйлуӈкве во̄всанэ̄н. Тисупэ̄ква сунсы, хумус тэ̄н мо̄т хо̄тпа ня̄врамыт э̄руптыянэ̄н, вотыянэ̄н, ос ла̄выс: – Со̄выр ос Со̄вырэ̄ква, нэ̄н нэ̄нти пыгыӈыг о̄с е̄мтэгы̄н. Ва̄им, е̄мтэгы̄н. Щар со̄ль, Со̄выр Со̄вырэ̄кватэ̄нтыл ня̄врамыӈыг е̄мтсы̄г, Тӯйтсам пыгтетэ̄н самын патыс. Ща̄нига̄щиг ща̄гтсы̄г: ща̄не тав ляпат акваг ё̄ӈхатахтыглы, э̄ти торыӈ ат хуи, а̄па нёвитытэ, э̄ргыл э̄ргитэ. Пыгте̄тэ молях яныгми – во̄рӯит таве̄н ла̄гыл мӯйлуптасыт, товлыӈ ӯйит мо̄ртым ма̄ныл ёхтысыт, таве̄н не̄лм(ла̄тыӈ) тотсыт. Туп та я̄рум о̄лыс: пыгрищакве ат ёнгасы, ат тэ̄г, акваг нас та тэ̄рсы, маныр ка̄салы, ка̄таге тувле такты ос та ла̄ви: – Таӈхе̄гум, таӈхе̄гум! Во̄внэ утыл миве, мощ о̄ньщитэ, сунсыглытэ о̄с та ро̄ӈхи: – Ат таӈхе̄гум! Оматэ̄н ва̄гта̄л патнэ̄г та кос по̄икщаве, а̄тятэ ӯщлахтта̄л во̄рт та ха̄йты, ёмас, вощрам лӯптат аты. Во̄рныл та̄глыӈ хӯнтхӯргыл ёхты, ла̄глаге̄тыл ворил лю̄ли, та̄ра пыге палт: – Тӯйтсам, сунсэн, манхурип ёмас, вощрам лӯптат наӈын тотсум, та̄ен. Тӯйтсам лӯптат а̄рталыянэ о̄с та ро̄ӈхалтахты: – Ат таӈхе̄гум! А̄тятэ порыг хотнили, пыге̄н мыгтэ, ла̄ви: – Таа, пыгкве, ты сака атыӈ порыг: та̄н янгуйитын о̄с тэ̄вет, таима̄гыс та̄н тамле янгыт. Со̄выррищкве мощло̄мт то̄вми, ёмщакв ат то̄втащлытэ ос юв ат тэ̄гтэ, о̄с та ро̄ӈхи: – Ат таӈхе̄гум! Акв порат а̄тятэ ла̄ви: – Ам таи ла̄вуӈкве таӈхе̄гум, холытан пуссын аквъёт во̄рн минэ̄в. Наӈ, Тӯйтсам, во̄рт мощ ё̄мыгтэ̄гын, во̄рӯйит ёт ёнгасэ̄гын, наӈтина̄н э̄рнэ тэ̄нут хо̄нтэ̄гын, то̄нт мӯсхал щирыл тах тэ̄пъялэ̄гын. Во̄рн минасыт. Тӯйтсам во̄рӯит ёт ат ёнгасы, тэ̄нут ат тинсы, акваг та ро̄ӈхи: – Тыт ё̄мыгтаӈкве ат таӈхе̄гум! Юв таӈхе̄гум, таӈхе̄гум! Охсарэ̄кван хӯлвес, ла̄щлаквег тав ляпатэ̄н лаквхатас, лю̄ляхо̄лы, кӯньги, лэ̄ге тыглетувле хосгащлы: такви тыгле ё̄ӈхыгпи, тувле ё̄ӈхыгпи, нёлэ̄ныл лё̄мвоит хотосгасы. Тӯйтсам Со̄вырэ̄ква лэ̄г ка̄салас, лю̄щнэ ма̄ныл хотпойтыс. Лю̄ли ос тувле сунсы. Сунсыссунсыс, ос омагеа̄тяге палт та нуясаптыстэ. Ёхтыгпас, тэ̄н лэ̄гаге̄н нупыл сунсыс ос ла̄ви: – Анана, ам омагума̄тягум лэ̄гта̄лыг. Ос такви лэ̄ге о̄с сунсуӈкве таӈхыс, таима̄гыс ё̄ӈхуӈкве патыс. Ёӈхысё̄ӈхыс – лэ̄ге ат ка̄саластэ. Ёлӯнтыс, ка̄тэ̄тыл э̄лню̄нсыс, по̄хлап хурип ма̄нь лэ̄ге ма̄лаястэ ос лю̄ньщалтахтас: – Ат таӈхе̄гум, ат таӈхе̄гум тамле ма̄нь лэ̄г! Охсар э̄ква лэ̄ге хурип лэ̄г таӈхе̄гум. Омаге̄на̄тяге̄н такос по̄икщаве, такос потыртаве, тав тэ̄натэ̄н хӯнтлуӈкве ат таӈхи, во̄р янытыл ро̄хсуе суйты: – Таӈхе̄гум! Таӈхе̄гум! Охсарэ̄ква тав палтэ ё̄мантас, ла̄ви: – То̄влы, тох ул ро̄ӈхен, ам наӈын пе̄с лэ̄гум мӯйлуптылум. Пе̄с, хотманащлым лэ̄г тотыс, ӯльпа та̄рыл тав лэ̄ге̄н ю̄нтыстэ, ла̄щлаквег таве карсатаптыстэ, тувыл э̄лаль ла̄щлакв туясастэ ос ла̄выс: – Ята, ха̄йтыгтэн, э̄сыгхатэн йильпи лэ̄гыл. Тӯйтсам ква̄лапас, омагеа̄тяге палт ха̄йтыс, тэ̄н мувлахил ха̄йтлыгтас, акв ма̄т ё̄ӈхыгпас, лэ̄ге̄тыл ёнгасым ос ща̄гтым ро̄ӈхувла̄лым во̄рн та тахас: – Хата, ӯйит, сунсэ̄н, манхурип ам яныг ос нё̄тнэ лэ̄г о̄ньще̄гум! На̄н нэ̄мхуньт со̄врыт палт тамле лэ̄г ат ва̄щинтасы̄н! Во̄рӯйит пат ты э̄сыгхатнэ ут нупыл нас мовиньтасыт. Со̄выррищкве сыме э̄тгалаӈкве патвес, ха̄йтым, лё̄ӈхыт лӯпта а̄лмаяс. Атыӈ. Э̄лаль ха̄йты, пат лэ̄ге йӣвыт халт па̄тырматыглы. Тольхыӈ сампа ю̄свойн ка̄салавес, ёлта̄ратахтас, Тӯйтсам лэ̄гт консыгтастэ ос таквина̄тэ̄н тэ̄ӈкве та нуясаптыстэ. Со̄выррищкве хотрохтыс, ро̄ӈхалтахтас: – Анана, ты маныр капай? Лэ̄г, наӈ а̄нум хоталь тотылын? Ла̄глаге̄тыл такос ра̄ты, лэ̄ге̄т ханащлым та ё̄ӈхата̄лаве. Капыртаскапыртас, ма̄н ёл та рагатас. Ӯнлы, хо̄илтам ма̄нэ вотгащлыянэ ос ты мус ла̄ви: – А̄ти, лэ̄гум ма̄нь кос, ос амти утум, Яныг лэ̄г, мо̄т хо̄тпа ут.

1139 2017. 01. 12. Алина САДОМИНА

Ма̄н Кульпаст о̄лэ̄в Ам намум Алина Садомина. Школат китыт классыт ханищтахтэ̄гум. Ка̄тыл са̄всыр хурит по̄слэ̄гум. Э̄ргуӈкве ха̄сэ̄гум, школат ос клубт акваг выступайта̄лэ̄гум. Тэ̄лы порат ёсал яласэ̄гум. Омам наме Мария Васильевна Садомина. Ам кит йигрищ о̄ньще̄гум, Карина ос Юля. Карина ты та̄л о̄выл классын минас. Ка̄тыл са̄всыр хурит по̄щги, великыл тахсы. Тув палыт ме̄н я̄т маттем та пувлысаме̄н. Юля йигтеме̄н тай иӈ ма̄нь, ме̄н тав ётэ ня̄нькалахтыме̄н, омаме̄н нё̄тыламе̄н.

1139 2017. 01. 12. Надя Кугина

Ам ре̄гыӈ ма̄н ялсум Ам намум Надя Кугина. Лӯпта э̄тпос хо̄тыт хо̄талэ̄т 2002 та̄лт Ха̄льӯс район Ло̄пмус па̄вылт самын патсум. Омам наме Лидия Дмитриевна, тав Ло̄пмус нэ̄, а̄ги о̄парищ наме Таратова. А̄тям Яков Иванович Кугин, Кульпаст самын патыс. Тэ̄н сас ма̄ньщииг. Ам кит каӈк ос увщи о̄ньще̄гум. Щар яныг каӈкум Игорь, увщим Оксана, ма̄нь каӈкум Лёва. Та̄н пуссын школа а̄стласыт. Ма̄н омав ос а̄тяв ёт акваг во̄рн яланта̄лэ̄в, пил ва̄тэ̄в, ла̄хс атэ̄в. А̄тям ос каӈкагум ёт хӯлуп сунсуӈкве яланта̄лэ̄в, толге̄в, няслэ̄в. Ам Кульпас школат нёлолов классыт ханищтахтэ̄гум. Школавт са̄всыр касылыт о̄лыгланэ̄ныл порат акваг касыглэ̄гум, э̄ргын ос йӣквнэ ансамбль ёт выступайтэ̄гум. Школат ам ща̄нь ла̄тӈум ханищтэ̄гум. Юн омагума̄тягум халэ̄нт акваг ма̄ньщи ла̄тӈыл потыртэ̄г. «Лӯима̄ сэ̄рипос» газета юн ма̄н акваг ловиньтылӯв, ка̄сыӈ йильпи номер ӯрилӯв. Мо̄лты та̄л ва̄т са̄грапнал э̄тпост ам Краснодарский край Туапсе ӯст о̄лнэ «Орлёнок» нампа лагерин ялсум. Тот э̄тпостем о̄лсум, ӯщлахтасум. Са̄всыр ма̄н тотыглавесӯв – вит ёлаль со̄схатан нё̄тнэ ма̄т (рущ щирыл – водопад) суссӯв, ща̄рыщ ва̄тат ё̄мыгтасӯв, пусмалтахтын лылые̄пыл лылтсӯв. Сочи ос Новороссийск ӯсыгн ялсӯв, тот о̄с мощ ё̄мыгтасӯв, пӯмщалахтасӯв. Хо̄тал сыс нила щёс исум тэ̄нутыл тыттувесӯв. Тэ̄лы алы ма̄т ма̄лтып. А̄нум тот сака мӯстыс.

1140 2017. 01. 26. Тамара ХАТАНЕВА

Манса̄вит хӯл пувуӈкв ро̄ви Округ миркол кӯщаит сапра̄нин акванатыглаве̄сыт ос мо̄т район мирколытныл та̄н ищхӣпыӈ ут хосыт сусве̄сыт. Та хо̄талт кӯщаит ва̄т нупыл са̄т са̄всыр тэ̄лат урыл потыртасыт. Ва̄т са̄грапнал э̄тпост автобусыл сакватахтам ня̄врамыт урыл о̄влэ̄т потрамасыт. Та̄н Нефтеюганскын тотве̄сыт. Ань са̄всыр ма̄т рӯпитан кӯщаит маныр нё̄тмил ва̄рсыт, манах олн атсыт, пуссын ты тэ̄лат Наталья Комарован та̄рапаттуве̄сыт ос та̄наныл ёмщакв щё̄питаӈкве э̄лаль ла̄всанэ. Тувыл та па̄сыл округувт ня̄врамыт мо̄т ӯсытын касылын ялуӈкве ат та̄ртыглаве̄сыт. Октябрьский районт моще̄рт о̄с акв касыл ва̄раве. Та кӯщаит китыглахтасыт, та̄н акв ляпат о̄лнэ па̄вланыл халт та ня̄врамыт, сакати, акванатыглаӈкве вос та̄ртавет. А̄гирищитынпыгрищитын акв ма̄т ӯнлуӈкве о̄с ат э̄ри, та̄н ётаныл аквтох э̄лаль вос рӯпитэ̄гыт ос яныг хо̄тпатн та̄н тэ̄ланыл вос уральтавет. Тувыл соссаӈ ма̄хманув тэ̄ланыл урыл Людмила Алфёрова потыртас. Тав о̄с акв уральтан ва̄рмаль о̄вылтыт ла̄выс. Тыи ЗАГСыт самын патум ня̄врамыт намнэ̄паканыл щё̄питан порат, то̄ва ща̄ньа̄щит та̄наныл хантыиг, ма̄ньщииг манос ё̄рныг хансыяныл. Хумус та̄н ла̄ве̄гыт, тох та хансавет, тав кос о̄парищнаманыл щирыл а̄ти соссаӈ ма̄хумныл о̄лэ̄гыт. Ань кӯщаит тамле э̄рнэ нэ̄пак вос щё̄питанувыт, национальность хаснэ э̄лыпа̄лт та ща̄ньныл ос а̄щныл та̄н намнэ̄паканыл вос сунсавет. Оматэ ман а̄тятэ хантыиг, ма̄ньщииг манос ё̄рныг хӯлтым ке о̄лы, то̄нт ущ ня̄враме та щирыл хансуӈкве ро̄ви. Соссаӈ ма̄хум хӯл алыщлан урыл Евгений Платонов, ма̄вит ӯргалан департамент кӯщай хум, ос округ депутат Александр Новьюхов потыртасы̄г. Тэ̄н квотанэ̄пак урыл ла̄всы̄г: «Округувт то̄ва хӯлыт квотанэ̄пак щирыл алыщлаӈкве та̄ртавет. Тыи мохсаӈ, ӯсхул, ка̄рай ос сорх алыщлан ма̄гыс ма̄н 1 со̄тыра 836 соссаӈ хо̄тпаныл заявкат пирмайтасӯв. Ты та̄л ма̄н 64 тонна хӯл алыщлаӈкве та̄ртыянӯв. Тувыл ка̄сыӈ хо̄тпа журналыл мыглӯв, тав тот такви пувум хӯланэ тув вос хансыянэ». Тувыл кӯщаит округт ма̄хум пусмалтан колыт урыл потыртасыт, то̄ва постановлениенэ̄пакын йильпи ла̄тӈыт хассыт.

1140 2017. 01. 26. Тамара МЕРОВА

Ля̄ххал хаснэ хо̄тпат янытлаве̄сыт Мо̄лты та̄лт ля̄ххал тотнэ ма̄хум ма̄гыс общественный ос внешний политика департамент колт рӯпитан ма̄хум кит касылыг ва̄рыгласыт. Тэ̄н рущ щирыл «Журналист года» ос «Мир нашему дому» ла̄ввесы̄г. Ань ты накт та̄н ялпыӈ хо̄таланыл кастыл округ кӯщай нэ̄н но̄хпатум хо̄тпат мӯйлупсал майве̄сыт. Та̄н пуссын Ханты-Мансийск ӯс мирколн во̄виньта̄лве̄сыт ос Наталья Комарова та̄нанылн ла̄выс: «Ма̄н ань йильпи та̄л о̄вылтахтам порат акванхо̄нтхатасӯв. 2017 та̄лт «Мегионские новости» газета 25 та̄лэ тах то̄влы, Урай ӯст о̄лнэ «Знамя» нампа газета — 45 та̄лэ, «Кондинский вестник» — 80 та̄лэ, Нефтеюганский район «Югорское обозрение» газета 20 та̄лэ ос «Ханты ясанг» нампа газета 60 та̄лэ то̄влавет. Тувыл ре̄тыӈ ю̄свой э̄тпост округ радио 85 та̄лыг е̄мты. Ты ялпыӈ хо̄талыт урыл на̄н са̄всыр ля̄ххалыт хансэгы̄н, ищхӣпыӈ ут хосыт кина суссылтэ̄гы̄н ос хури тах по̄слэгы̄н. Тыи на̄н рӯпатан, на̄н таве ёмасыг, ма̄кыг ва̄рилы̄н. Округувт матыр е̄мталам тэ̄лат на̄н пуссын ва̄ганы̄н ос са̄в ма̄хумн э̄лаль потыртэгы̄н. Маныр ла̄тыӈ хо̄нтэгы̄н, та щирыл на̄н потрын хансыяны̄н. Тыгыл э̄лаль тэ̄ланув ма̄хумн ва̄вет. Та̄н о̄лупсав ёмщакв торгамтыяныл манос а̄ти, ты ма̄хум та̄нки э̄лаль номсахтым вос о̄лэ̄гыт. На̄н рӯпатан хосыт Юграв аквтох э̄лаль вос янытлаве». Тувыл радио, телевидение, газета ос ищхӣпыӈ ут хосыт ля̄ххал тотнэ но̄хпатум ма̄хум мӯйлуптаве̄сыт. Ты та̄л касылыт 505 рӯпатат са̄всыр номинация щирыл сусве̄сыт. То̄ват акв редакцият рӯпитан хо̄тпат мо̄тмо̄т номинацият но̄хпатсыт, тыи «Новости Радужного», «Новости Югры», «Сургутская трибуна» газетат ос мо̄таныт. «Север», «Югра», «Югория» телерадиокомпаният рӯпитан са̄в хо̄тпат ёмас ва̄рнэ тэ̄ланыл ма̄гыс наманыл ла̄вве̄сыт. Ты та̄л «Легенда журналистики» яныг намыл Тамара Емельяновна Сутягина майвес. Тав са̄в та̄л «Югория» нампа телекомпаният кӯщай нэ̄г о̄лы ос «Спасти и сохранить» телефестиваль ва̄рыглы. Ма̄н но̄хпатум ма̄хманув пуссын янытлыянӯв!

1140 2017. 01. 26. Тамара МЕРОВА

Соссаӈ ма̄хум ма̄гсыл хансым са̄кконыт 2016 та̄л оигпам э̄лыпа̄лт округ Думат конференция о̄лыс, Ассамблеяныл хус та̄лэ то̄влуме кастыл тав ва̄рыглавес. Тот соссаӈ ма̄хум о̄лупсаныл урыл потыртасыт. Са̄в ма̄ныл ханты, ма̄ньщи, ё̄рн хо̄тпат тув во̄виньта̄лве̄сыт. Округ Дума кӯщай хум Борис Хохряков о̄влэ̄т ма̄хум но̄хлю̄люӈкве ла̄всанэ ос акв кӯм асталыг лю̄льсыт. Ты э̄лыпал хо̄талт Сочи ӯс ляпат товлыӈха̄п ща̄рыщн ёлпатыс, ма̄хум пуссын порсысыт. Тувыл ущ мӯй ма̄хум ёт пащалахтас, Государственный Дума па̄лыл са̄всыр мирыт ёт рӯпитан комитетколныл ке̄тым пищма ловиньтастэ ос хумус Ассамблея рӯпататэ о̄вылтавес, ты урыл потыртас. Ассамблея ва̄рнэ урыл о̄выл щёс 1996 та̄лт Сергей Собянин потыртас. Ты ва̄рмаль округ Дума депутатытн мӯстыс ос та̄н ты тэ̄ла э̄лаль тотсаныл. Ос тот рӯпитан ма̄гыс нила депутатыт пе̄рияве̄сыт. Ка̄сыӈ та̄лэ̄тыл ты депутатыт соссаӈ ма̄хум ӯргалан ма̄гыс са̄всыр са̄кконыт хассыт, та̄рвит ва̄рмаляныл ёмщакв щё̄питаӈкве нё̄тсыт. Ханты, ма̄ньщи, ё̄рн ма̄хмыт ма̄витаныл ӯргалан, факторият щё̄питан са̄ккон, пе̄с йис накыт, ща̄нь ла̄тӈаныл, э̄рганыл, мо̄йтаныл э̄лаль тотнэ са̄кконыт о̄ньще̄гыт. Ты Ассамблеят депутатыг са̄в та̄л ма̄ньщи нэ̄г Татьяна Гоголева ос Надежда Алексеева, ханты о̄йкаг Василий Сондыков ос Еремей Айпин рӯпитасыт. Еремей Данилович ань тыг мус тот кӯщаиг о̄лы. Рущ ма̄хумныл тув Алексей Андреев ос Александр Филипенко пе̄риялвесы̄г. Мо̄лты таквс пе̄рияп о̄лум порат тув Руслан Проводников пе̄риявес. Ань хус та̄л сыс та̄н ма̄кыг ва̄рум рӯпатаныл Государственный Думат, Совет Федерацият, ООН нампа колт ос мо̄т хо̄н ма̄т ва̄вет. Россия янытыл лӯима̄ ре̄гионыт та̄н нупланыл тувро̄влахтым аквтох о̄с са̄кконыт хансэ̄гыт. Хус та̄ланыл то̄влум кастыл Еремей Айпин грамотал майвес. Тав ос са̄в ма̄ныл ёхталам мӯй хо̄тпат э̄сгын нэ̄пакыл мӯйлуптасанэ. Та̄н халаныл Когончиныт, Нимперовыт, Кельчиныт ос кит Сопочин ще̄мьяг о̄лсы̄г, тувыл М. К Волдина, З. Л. Жарко, Г. А. Мумракова, Н. В. Плотникова ос мо̄таныт э̄рнэ са̄кконыт щё̄питан порат ёмас номтыт хӯлтыгласыт манос нас нё̄тсыт. Тувыл Еремей Данилович депутатыт аквъёт рӯпитан та̄ланыл урыл потыртас, хурит суссылтас. Ассамблея ва̄рум рӯпататэ о̄вылтыт са̄в ёмас сымыӈ ла̄тыӈ Наталья Стребкова, округувт э̄лумхо̄лас о̄лупсатэ ӯргалан кӯщай нэ̄, ла̄выс. Тав та̄н ётаныл аквтох э̄лаль акваннё̄тхатым рӯпитаӈкве таӈхи ос соссаӈ ма̄хум о̄лупсаныл ӯргалым, та о̄вылтыт номсахтым о̄лы. Акванатхатам ма̄хум э̄лыпа̄лт Надежда Алексеева доклад ловиньтас. Тав то̄ва са̄кконытт хотщуртумтым э̄рнэ ла̄тӈыт хо̄нтыс ос тувыл та тэ̄лат мо̄т щирыл ва̄руӈкве патве̄сыт. Ты о̄вылтыт ам я̄нас потыр хансэ̄гум тах. Пе̄с накыт ӯргалан о̄вылтыт Тимофей Молданов ос Светлана Нестерова кит научный потрыг ловиньтасы̄г. Тимофей Алексеевич тӯлыглапыт урыл потыртас. Светлана Николаевна лӯима̄т о̄лнэ хантыт пе̄с наканыл акванатнэ тэ̄лат урыл ла̄тыӈ ла̄выс.

1140 2017. 01. 26. Тамара МЕРОВА

Та̄н хансум потраныл ма̄ янытыл ке̄тыяныл Та̄л оигпам э̄лыпа̄лт «СМИротворец» касылт но̄хпатум ля̄ххал тотнэ хо̄тпат акв колн тотыглаве̄сыт. Тот о̄с са̄в журналистыт рӯпитэ̄гыт, ты кол ИТАР-ТАСС ла̄ваве. О̄влэ̄т Алла Семенышева, са̄всыр мирыт акванюрщхатым ос та̄н тэ̄ланыл ёт рӯпитан советникнэ̄, ос Маргарита Лянге, журналистыт Гильдият кӯщаиг о̄лнэ нэ̄, та касыл ва̄рим о̄вылтыт потыртасы̄г. Алла Семенышева ты касыл ва̄рнэ урыл ёмас сымыӈ ла̄тыӈ ла̄выс. Ты сака э̄рнэ ва̄рмаль. Са̄в мирытн та̄нки халанылт ёмщакв ва̄йхатуӈкве э̄ри, ань ты тэ̄лат ля̄ххал хаснэ ма̄хум э̄лаль тотуӈкве нё̄тэ̄гыт. Та̄н хансум потраныл, по̄слум кинаныл, хурияныл хосыт Россият о̄лнэ ма̄хманув о̄вылтыт матыра̄ти ва̄гӯв. Ща̄нь ла̄тӈыл хансым газетат ловиньтаӈкве ос ра̄тива, телепередачат хӯнтлуӈкве, сунсуӈкве о̄с сака пӯмщиг о̄лы. Ты та̄л касылын мощщанув потрыт ке̄тымат, тыи то̄ва рӯпитан колыт лаппантымат. Ань то̄ва колыт туп ищхӣпыӈ ут хосыт рӯпитаӈкве патсыт, мо̄таныт олныл ат майве̄сыт. Янгыщ ща̄нь ла̄тӈыл хаснэ манос потыртан редакцият рӯпатаныл ёлпо̄илттаве̄сыт, ос таима̄гыс тувыл ля̄ххал тотнэ мощща хо̄тпа ёхталас. Маргарита Лянге ты о̄вылтыт ла̄выс: «Са̄всыр мирыт урыл потыртан журналистанув халт ва̄рнэ касылув э̄лаль тотуӈкве ма̄н государство па̄лыл нё̄таве̄в. Хунь ка̄сыӈ ма̄ныл потрыт ке̄тэ̄гыт, ма̄навн о̄с пӯмащ. Та̄н ля̄ххаланыл са̄в ма̄хумн ловиньтавет ос журналистыт та̄нки халанылт ханищтахтэ̄гыт. Ля̄ххалыт ловиньтэ̄гыт ос тувыл ты тэ̄лат та̄нки палтаныл ро̄влыяныл, матыр тэ̄ла та̄рапаттэ̄гыт ос ма̄навн йильпи потыр хансэ̄гыт». Ос ётыл ма̄н Георгий Старосельский, та колт ищхӣпыӈ утыт ма̄гыс пуӈктотнэ хум ёт, ва̄йхатасӯв ос тав ма̄навн рӯпатаныл урыл потыртас: «ТАСС рӯпитан колув хӯрмыг уртым о̄лы. О̄выл яныг колт со̄тыра арыгкем э̄лумхо̄лас рӯпитэ̄гыт, тот хусахкем са̄вит редакция колыт о̄лэ̄гыт. Та̄н са̄всыр тэ̄лат урыл, экономика, внешний политика, каснэ ман мо̄т ва̄рмалит о̄вылтыт са̄всыр ля̄ххалыт хансэ̄гыт. Тот ка̄сыӈ редакцият я̄нас кӯщай о̄лы ос рӯпатаныл та̄нки э̄рнэ щирыл э̄лаль ва̄рияныл. Китыт рӯпитан кол — «региональныиг» намтым о̄лы. Ты ма̄н Россияв янытыл са̄всыр ма̄тт 65 рӯпитан колнакыт о̄ньще̄в, тувыл ма̄н ля̄ххалыл о̄с ке̄таве̄в. Ос хӯрмит утув – тыи мо̄т хо̄н ма̄т рӯпитан ма̄хманув ля̄ххал ке̄тэ̄гыт. Тыи 67 ТАСС колнаканувт 63 са̄всыр хо̄н ма̄т рӯпитэ̄гыт. Та ма̄т матыр е̄мталан накыт ма̄н о̄с та̄рапаттым о̄ньщиянӯв. На̄нки сусте̄нт, ля̄ххал потыртан ма̄хманув ма̄ янытыл рӯпитэ̄гыт, та̄н матыра̄ти о̄лыглан са̄в ва̄рмалит пуссын ва̄ганыл ос тувыл мирн ля̄ххал э̄лаль тотэ̄гыт. Ма̄н о̄влэ̄т ущты е̄мтнэ йильпи ва̄рмаль ля̄ххалыг хансылӯв ос тувыл ищхӣпыӈ ут хосыт ке̄тылӯв. Тав ма̄ янытыл мо̄т ля̄ххал тотнэ колытыт ловиньтаве ос тувыл та̄н та̄нки о̄лнэ ма̄нанылт таве ла̄ккваке̄тыяныл. Матыр ва̄рмалит йильпииг та̄рапаттуӈкве ве̄рмияныл ке, ос тув хансумтыяныл. Ма̄н рӯпатав ма̄к э̄рнэг тотуӈкве таӈхилӯв, ма̄хум нэ̄мат уркуптан ла̄тӈыл ул вос ва̄рве̄сыт. Таима̄гыс ма̄н «достоверность» ос «оперативность» кит тэ̄лаг нупыл ё̄р пиным са̄в рӯпитэ̄в». Тувыл ма̄н акв яныг колнакн, ля̄ххал тотнэ ма̄хум палт щалсуӈкве та̄ртыглавесӯв. Тот са̄всыр тэ̄ла уральтан хо̄тпат рӯпитэ̄гыт. Ка̄сыӈ ля̄ххал та̄н номтыӈыг ловиньтыяныл, ёмщакв хотщё̄питыяныл ос ла̄кква ма̄н та ке̄тыяныл. Ты хо̄тпат хурин по̄слахтуӈкве ат ка̄саще̄гыт, таима̄гыс ма̄н тот по̄слуӈкве ат та̄ртвесӯв. ТАСС колн рӯпитаӈкве мори хо̄тпа ат виве. Ля̄ххал хаснэ хо̄тпат та̄л сыс кит щёс номтаныл уральтан тестнэ̄пак хансэ̄гыт. Георгий ла̄вме щирыл, таве та̄рвитыӈ ва̄руӈкве. То̄ват балланыл э̄рнэ мус ат ке то̄вылхатэ̄гыт, та̄ра ханищтахтуӈкве ла̄вавет. Тестнэ̄пак та̄н ма̄гсыланыл рущ ла̄тыӈ ханищтан институтт учёныит щё̄питэ̄гыт. Ма̄н ювле хультум нотыт по̄слым хурит сунсуӈкве тотыглавесӯв, тувыл манхурип пе̄с утытыл ма̄хум рӯпитасыт, тыи пе̄с телетайпыт, по̄слын утыт ос мо̄т пормасыт суссанӯв. Ма̄навн сака пӯмыщ о̄лыс. Ань ты э̄тпост ля̄ххал тотнэ ма̄хум ялпыӈ хо̄таланыл о̄лыс, ма̄н ты ма̄хум пуссын янытлыянӯв. На̄н о̄лупсан со̄тыӈыг вос о̄лы ос та̄н то̄нт са̄в ща̄гт тотнэ ля̄ххалыт о̄с хансэ̄гыт. Лю̄ль накыт воссыг ул вос е̄мталасыт. Пуста̄гыл о̄лэ̄н, щуне̄н.

1140 2017. 01. 26. Светлана РОМБАНДЕЕВА

Ля̄ххал тотнэ э̄ква нэ̄пак та̄ратас Ты э̄тпос 16 хо̄талэ̄т Ханты-Мансийск ӯст нэ̄пак ловиньтан колн ма̄хум акв ёмас тэ̄ла ма̄гыс во̄виньта̄лве̄сыт – «Новости Югры» рущ газетат потыр хаснэ э̄ква Альбина Сергеевна Глухих «Судьба журналиста» нэ̄паке та̄ратавес. Тув аквъёт рӯпитан ма̄хманэ, юртанэ, рӯтанэ ёхталасыт. Ювле хультум та̄лт «Новости Югры» газета 85 та̄лэ то̄влыс, Альбина Сергеевна потрыт хансым тот 52 та̄л рӯпиты. Тувыл тав аквъёт рӯпитан ма̄хманэ̄н ты нэ̄пак хансуӈкве кащилтавес. Ань атпан та̄л сыс хумус рӯпитас, хо̄т яласас, хотьют ёт ва̄щинтахтас, маныр урыл хансыс – пуссын вос номылматыянэ, нэ̄пакн вос хансыянэ. Э̄ква ка̄сащас, нэ̄пак хансуӈкве та вуйхатас. Тав потранэ коныпал нэ̄пакт Ольга Маслова потре хансым о̄лы. Тав о̄с «Новости Югры» газетат рӯпитас, тувыл Москва ӯсн ва̄нтлыс, ань та о̄лупса урыл газетан потрыт ке̄ты. Николай Баталов потыр хансыс, тав 1997–2003 та̄лытт газетат пуӈктотыс. Тувыл Елена Потехина хансыс, тав ты газетат 25 арыг та̄л рӯпитас. Та̄н о̄с пуссын аквъёт рӯпитам хо̄тпаныл ка̄сталыяныл, са̄всыр пӯмыщ тэ̄ланыл номылмата̄лыяныл, ма̄хманылн са̄в ёмас сымыӈ ла̄тыӈ, пӯмащипа ла̄тыӈ ла̄ве̄гыт. О̄выл ла̄тыӈ «Новости Югры» газетат кӯщаиг рӯпитан хум Владимир Меркушев тав ла̄выс: «Газетав урыл са̄в нэ̄пак хансыглавес, ос тот рӯпитам, ос ань тыхо̄тал мус рӯпитан ма̄хум газетаныл хумус ва̄рсаныл, хумус о̄лсыт, ты о̄вылтыт нэ̄мхо̄т хансым ат о̄лы. Альбина Сергеевнав са̄в потыр о̄ньщи, тыитаи номылматы. То̄ва потранэ сака пӯмщит, ма̄н пуссын аквъёт мовиньтэ̄в. Ма̄н тав нуплэ ла̄всӯв, тав ань рӯпитам та̄ланэ о̄вылтыт нэ̄пак вос хансы. Альбина Сергеевна ка̄сащас, потыр щё̄питас, ань та нэ̄пак на̄н ка̄тыт ты пувилы̄н. Газета хумус ва̄рвес, хотьютн щё̄питавес, ань ма̄хум хумус рӯпитэ̄гыт, ты урыл на̄н о̄с ловиньтэ̄н. Альбина Сергеевна, наӈ нэ̄пакын ам мо̄лхо̄тал ка̄тынпаттыслум, янытэ̄т ловиньтаслум. Са̄в ма̄хум ёт ва̄йхатамын, хоталь о̄лнэ ма̄н наӈ та ялсын, матыра̄ти наӈ та ва̄щинтамын. Наӈ намын «Первопроходцы Самотлора» памятникын хасвес, наӈ та̄н палтаныл ва̄тихал яланта̄лсын, та̄н ураныл са̄в потыр хансыгласын. Таима̄гыс намын тув та хасвес. Я̄тил Альбина Сергеевна, са̄в та̄л пуста̄гыл о̄лэ̄н, со̄тыӈыщ о̄лэ̄н». Атпан та̄л сыс ты э̄ква округ янытэ̄т яласастэ – ма̄нь па̄влытыт о̄лыс, во̄р ма̄т о̄лнэ соссаӈ ма̄хманув палт ялантас, ё̄рнколыӈ ма̄хум уральта̄лсанэ, та̄н уранылт хансыс. О̄выл щёс соссаӈ ма̄хум палт Кульпасн ялыс. Нэ̄паке̄т тав тох хансы: «Хунь ам Ха̄льӯс районын ялсум, соссаӈ ма̄хум ка̄саласум, та̄н пуссын ща̄нь ла̄тӈыл потыртэ̄гыт, та̄нти маснутыл ё̄мыгтэ̄гыт, па̄квпалыӈ супыл, ва̄ил, сахил о̄лэ̄гыт, та̄нти На̄й-О̄тыраныл нупыл сунсэ̄гыт. О̄лнэ коланыл а̄ти сака янгыт, акв колнак о̄ньще̄гыт. Ты щар мо̄т о̄лупса, ам нэ̄мхуньт тамле ма̄хум ат ва̄сум. Та̄н о̄лупсаныл, та̄н хурияныл ам сымумн сака хо̄яс. Та па̄сныл атпан та̄л овумлас. Тувыл та юипа̄лт ам соссаӈ ма̄хманув о̄вылтыт акваг хансуӈкве та патсум, ка̄сыӈ потрум ам э̄рпыӈыщ щё̄питаслум, хансыслум. Та̄н халанылт ам ань са̄в юрт хо̄тпа о̄ньще̄гум, соссаӈ ма̄хманум палт ам акваг яланта̄лэ̄гум, ва̄щинтахтэ̄гум». Ха̄льӯс район янытыл яласас — Сортыӈъя̄, Кульпас, Потрасӯй, Кимкъясӯй, Саранпа̄выл, Алтатумп ос мо̄т па̄влытыт о̄лыс. Нё̄рн ялыс, Касумт, Кондинский районт ос мо̄т ма̄т о̄лыс. Товлыӈха̄пыл ос вертолётыл тыламлас, моторха̄пыл яласас, «Бураныл», са̄лыӈ суныл ос лувыӈ суныл тотыглавес. Во̄р харыгтан ма̄н яланта̄лыс, ма̄во̄й но̄хвинэ ма̄хум рӯпатаныл сунсыс, тувыл акваг та хансыс, са̄всыр потрыт газетан щё̄питас. Яласам лё̄ӈхе̄т са̄в щёс по̄лиглавес, раквын посыглавес. Акв щёс лылытэ ворил ты нэ̄глыс – вертолётыл минас, кон ань сэ̄ӈквыӈ, щар нэ̄матыр ат на̄ӈки, вертолётаныл нумын хоса ё̄ӈхыс, тувыл щуртнэ хо̄тпат хотмус ма̄ ка̄саласыт, ворил ты ёлӯнтсыт. Та пора тав акваг номим о̄ньщитэ. Альбина Сергеевна ань тыхо̄тал мус рӯпиты, я̄ӈк на̄тнэ э̄тпост тав 80 та̄лэ то̄влы. О̄лнэ̄тэ сыс тав янытлан намытыл, ма̄гылн тагатан по̄сытыл ос почётный грамотатыл са̄в щёс майлувес, та̄н халанылт – «Легенда Югорской журналистики». Ля̄ххал тотнэ хо̄тпа ма̄гыс ты щар ма̄к яныг нам. Тав 2007 та̄л па̄сыл та хо̄тпан миве, ань хотьют ля̄ххал тотнэ ма̄т хус та̄л рӯпитас. Мӯй хо̄тпат халт Кристина апыгрище Настя а̄гитэ̄нтыл о̄лсы̄г, тэ̄н ане̄кватэ̄н янытластэ̄н, хорамыӈ лӯптал мӯйлуптастэ̄н. Ма̄н, ма̄ньщи газетат рӯпитан хо̄тпат, Альбина Сергеевна о̄с янытлылув, са̄в ёмас, сымыӈ ла̄тыӈ таве̄н ла̄ве̄в. Пус ка̄т, пус ла̄гыл вос о̄лы, вос щуни!

1140 2017. 01. 26. Валентина Хозумова

Ма̄ньщи ка̄нащит 1193 та̄л порат тыт о̄лмыт Ювле хультум та̄л ва̄т са̄грапнал э̄тпос 23 хо̄талэ̄т округ кӯщай нэ̄ Наталья Комарова ма̄н ма̄вт о̄лнэ мирн ла̄тыӈ те̄тыс. Потыртас, та та̄л сыс маныр рӯпата та̄н ва̄рсыт, э̄лаль хумус рӯпитаӈкв патэ̄гыт. Потыртаме порат тав акв пӯмыщ ва̄рмаль урыл ла̄выс. 1193 та̄лт хансым сака пе̄с нэ̄пакытт (та̄н рущ ла̄тӈыл ла̄вавет – «новгородские летописи») ма̄н ма̄в урыл хансым о̄лы. Ты тэ̄ла о̄лме па̄сныл моще̄рт 825 та̄лыг тах е̄мты. Тот тох хансыма – ты ма̄т «ляпинский княжества» о̄лыс. Округ кӯщаюв ань ла̄выс, пе̄с тэ̄лат ханищтан учёныит ты тэ̄ла ёмащакв вос ханищтыяныл. Ос маныр рӯпата ва̄руӈкв э̄ри, 2018 та̄л мус вос ва̄рияныл. Та та̄лт округувт конференция тах ва̄раве, са̄всыр яныг учёный ма̄хум тыг тах во̄вавет, тот сака пе̄с ва̄рмалит урыл потыртаӈкв тах патэ̄гыт. Ты рӯпата о̄вылтан ма̄гыс ты э̄тпост округувт комиссия атвес, тув археологыт, историкыт ос мо̄т са̄всыр ма̄хум хасве̄сыт. Та̄н ань э̄лаль планнэ̄пакыт хансэ̄гыт. Ос маныр ва̄руӈкв номсэ̄гыт, та̄н ля̄ххал тотнэ ма̄хумн тах потыртэ̄гыт. Ты тув ос мо̄тыт тув порат Ха̄льӯс район нупыл экспедицият те̄тавет. Саранпа̄выл ос Ло̄пмус нупыл археологыт ос мо̄т учёный ма̄хум тах ялэ̄гыт. Та̄н тот «Ляпинский городищег» ла̄внэ ма̄ тинсуӈкв патыяныл. Ма̄к яныг археологыг о̄лнэ хум Георгий Петрович Визгалов ань ла̄выс, наука ма̄хум ты щирыл номсэ̄гыт – «Ляпинский городище» тав ул Ло̄мпус ляпат о̄лы. Та̄н ва̄рп э̄ква Ӯс щахылт манос та ляпат ул тот пе̄с йис порат ма̄ньщи ка̄нащ Ищтапан Ля̄па о̄лум ма̄тэ тот ты о̄лыс. Ищтапан Ля̄па ка̄нащ урыл о̄с сака пе̄с нэ̄пакт хансым о̄лы. 14 нот порат ма̄н ма̄вн рущ ма̄хум ёхталасыт. Та̄н ща̄лыголн а̄ныт во̄руй совыг пе̄нтсыт. Та порат ты Ищтапан Ля̄па ма̄ньщи ка̄нащ ты ва̄щинтасыт ос тав уре̄тыл нэ̄пакт хасмыт. Сака пе̄с йис пора округувт ань тыг мус ёмащакв ат ханищтавес. Ма̄н ма̄вт 1930 та̄л юипа̄лт ма̄хум хумус о̄лсыт, туп та урыл хансым о̄лы. Ань ты тит та̄л сыс 2018 та̄л мус маныр йильпииг хо̄нтаве ман та̄рапаттаве, учебникыт хаснэ ма̄хум йильпи ханищтахтын нэ̄пакытт ты урыл хансэ̄гыт. Михаил Фёдорович Ершов А̄сугорский институтт рӯпиты, тав исторический наукат кандидат нам о̄ньщи. Тав ань ла̄выс, учёныит яныг рӯпата тах ва̄ре̄гыт, та рӯпатаныл рущ ла̄тӈыл «академическииг» ла̄вияныл. Та̄н ма̄н округув историятэ йильпииг хансыяныл, 8-9 са̄вит осыӈ наука нэ̄пак тах та̄ратэ̄гыт. Та юипа̄лт школат ханищтахтын ня̄врамыт ма̄гыс йильпи учебникыт тах хансавет. Ты йис мус ма̄н о̄лнэ ма̄в нэ̄мхотьютн ёмащакв ат ханищтавес. Ань ты ёмас тэ̄ла оснпаттым юипа̄лт учёныит маттем рӯпитаӈкв тах та патэ̄гыт. Ос ань таи ёмас, пе̄с йис ма̄ньщи ма̄хманув татем та̄ксарыг, ё̄рыг та о̄лмыт, 1193 та̄л порат тыналахтым яласам рущ купсат та̄н о̄вылтыт та̄нти нэ̄паканылт хансыгламыт.

1140 2017. 01. 26. Светлана МАТВЕЕВА

Колыт уральтан ма̄хум рӯпатаныл Округ мирколт колыт уральтан, йильпииг щё̄питан ос на̄йпос тэ̄ла Департамент кӯщай хум Егор Ковальчук 2016 та̄л сыс ва̄рум рӯпатаныл урыл потыртас. Тав ла̄вме щирыл, 2016 та̄лт 551 ко̄л йильпииг щё̄питаӈкве номсысыт, ос туп 501 са̄в квартираӈ кол щё̄питаӈкве а̄лымасыт. Тув 2, 9 млрд. солко̄ви холтвес. 50 колыт ты та̄л щё̄питавет тах. Ань колыт йильпииг ва̄рнэ ма̄гыс округув янытыл ма̄хум са̄выӈпа̄лэ олн ойтэ̄гыт, 88% са̄вит мир ойтхатсыт. На̄йпос округ мир халт мӯсхал щирыл уртаве, Россия янытыл ты ва̄рмаль щар ма̄к э̄рнэ щирыл ма̄н ма̄вт ва̄раве. Округувт на̄йпос постын тэ̄ла о̄вылтыт 15 са̄вит э̄рнэ нэ̄пак хасвес. Егор Ковальчук ла̄выс, ювле хультум та̄лт 16 па̄влытыт на̄йпос мӯсхал щирыл ва̄рвес, тот ань 20 со̄тыра арыгтем хо̄тпа о̄лы. Ты ва̄рмаль нила та̄л сыс ва̄руӈкве тахсаныл кос, ос тувыл вуйхатасыт, акв та̄л сыс ва̄рапасаныл. Ты хум ла̄выс: «На̄йпос минэ яныг станция палт ма̄н хӯрум па̄выл о̄лтсӯв: Нялина Ханты-Мансийский район, Устрём ос Тэ̄к па̄влыг Ха̄льӯс районт ӯнлэ̄г. Тув ань соляра тотуӈкве ат э̄ри, па̄ӈкыӈ колт консуӈкве ат э̄ри. Та па̄влытт на̄й ань э̄тэхо̄талэ тэ̄г, ма̄хум са̄в олн ат ойтэ̄гыт. Сака ёмас, хунь па̄выл яныг станция палт о̄лтаве, ма̄хум са̄в э̄рнэ тэ̄ла ва̄руӈкве ве̄рме̄гыт. Посыӈ на̄й о̄щнэ па̄вылт мир о̄лупсаныл кӯпнитнуве ос номтаныл ёмас».

1140 2017. 01. 26. Николай МЕРОВ

Э̄типа̄лаг вина тыналаӈкве ат та̄ртаве Округ Общественный палатат рӯпитан хо̄тпат сапра̄ни ва̄рыгласыт. Ла̄пкат э̄типа̄лаг нёлолов щё̄с юипа̄лт вина тыналаӈкве ат та̄ртавет. Ты ва̄рмаль щирыл мо̄лалнув Сургут ӯст ла̄пкат илттыг уральтаве̄сыт. Ля̄ххал тотнэ ма̄хум Общественный палата кӯщай нэ̄ Ирина Максимова ос полиция кӯщай ва̄ӈын хум Ермек Аубакиров ты тэ̄ла урыл китыгласаныл. Тэ̄н маныр потыртасы̄г, на̄н ты урыл э̄лаль ловиньтэ̄н. Общественный палата кӯщай нэ̄ ла̄вме щирыл, ты сапра̄нит та̄н кит тэ̄ла урыл потыртасыт. О̄выл ва̄рмаль тамле, ла̄пкаӈ хо̄тпат уральтан ма̄хумныл ул вос пилсыт, аквъёт вос рӯпитасыт. Ирина Ивановна ла̄выс: «Ла̄пкаӈ кӯщаит мӯсхал щирыл вос рӯпитасыт, ма̄н та̄нанылн акваг нё̄тмил ва̄ре̄в. Таима̄гыс ма̄н таӈхе̄в, та̄н уральтан ва̄рмалил щар ул вос пилсыт. Матыр ва̄рмаль о̄ньще̄гыт ке, тот китыглахтуӈкве ве̄рме̄гыт. Та̄нки рӯпатаныл э̄лаль акваг вос са̄вмыс, уральтан хо̄тпат нупыл агтым о̄луӈкве э̄ри». Китыт тэ̄ла ос тамле, Общественный палатат комиссияхо̄тпат рӯпитэ̄гыт, та̄н «Общественный контроль» нампа проект щё̄питасыт. Ты ва̄рмаль э̄лаль тотнэ ма̄гыс Наталья Комарова губернаторув ос округ мирколт рӯпитан кӯщаит та̄н яныг нё̄тмил ва̄рсыт. Хунь округ мирув вина тыналан ва̄рмаль та̄нки уральтаӈкве патыяныл, то̄нт ущ ты тэ̄ла э̄рнэг минуӈкве паты. Округувт щар о̄влэ̄т Сургут ӯст ла̄пкат уральтаӈкве патве̄сыт. Общественный палатат рӯпитан комиссияхо̄тпат ос полиция ма̄хум акванюрщхатым вина тыналан ла̄пкат уральтасаныл. Са̄выӈпа̄лэ ла̄пкаӈ хо̄тпат са̄ккон щирыл рӯпитэ̄гыт, нёлолов щё̄с юипа̄лт вина ат тыналэ̄гыт. Ос ты халт то̄ват ощмарлэ̄гыт. Уральтым порат нила ла̄пка пувве̄сыт, тот ма̄хумн вина тыналаве. Кӯщай нэ̄ ла̄выс, вина тыналан ла̄пкат акваг уральтаӈкве э̄ре̄гыт. То̄нт ла̄пкаӈ хо̄тпат э̄типа̄лаг вина тыналаӈкв мори ат патэ̄гыт тах. Ма̄хум са̄ккон щирыл рӯпитаӈкве патэ̄гыт, нэ̄матыр лю̄ль ва̄рмаль ат е̄мты. Потре оигпан э̄лыпа̄лт Ирина Максимова округ мирколт ос полицият рӯпитан хо̄тпатн нё̄тмил ма̄гыс пӯмащипа ла̄тыӈ ла̄выс. Нёлолов щё̄с юипа̄лт вина хо̄т тыналаве, ань ты урыл нас хо̄тпат о̄с полициян ла̄ве̄гыт. Полицият э̄лумхо̄лас потре щирыл маныр ва̄раве, ты урыл Ермек Аубакиров потыртас. Тав ла̄выс: «Тамле ма̄хумныл са̄в нэ̄пак ма̄н палтув ёхты. Ма̄н ты ва̄рмаль уральтан ма̄гыс та̄ра та ла̄пкан минэ̄в. Ла̄пкат лю̄ль вина тыналаве ке, о̄влэ̄т та сулья хот виве ос экспертиза ва̄рнэ ма̄гыс ке̄таве. Матыр лю̄ль ут хо̄нтаве ке, сут хосыт та ла̄пкаӈ хо̄тпа штрафыл пинаве, ос та винат хотвивет. Ань округувт о̄влэ̄т Нижневартовск, Ханты-Мансийск, Нягань, Нефтеюганск яныг ӯсытт уральтан тэ̄ла э̄лаль ва̄раве. Тувыл ос мо̄т ӯсыт, па̄влыт уральтаӈкве патавет тах.

1140 2017. 01. 26. Галина КОНДИНА

Потрыт мори хансуӈкве ат ро̄ви Ань ты йист сыреса̄т пилыщмал ма̄хум пилуптавет, хотты колн марлавет, са̄в мир аквторыг порыславет. Рущ щирыл «терроризм» ла̄ваве. Ма̄н, ля̄ххал хаснэ ос потыртан хо̄тпат, акв хо̄тал мирколн акванатыглавесӯв ос хумус ты урыл хансуӈкве, полиция хо̄тпатын ос мир ӯргалан кӯщаитын ханищтавесӯв. Округ губернаторув аппаратыт рӯпитан кӯщай ва̄ӈын хум Максим Киселев ла̄выс: «Ля̄ххал хаснэ ма̄хум э̄ре̄гыт ханищтаӈкве, на̄н вос ва̄глын, хумус мирн ты урыл потыртаӈкве. То̄ва порат нас хотыл ла̄внэ, хӯлнэ ла̄тыӈ журналистыт хӯлыяныл, яты, ля̄ххал та ва̄рапе̄гыт, ос хотыл ты ля̄ххал ёхтыс, та̄нти аты ва̄ганыл. Тох ва̄руӈкве щар ат э̄ри, мир наска̄ссыг рохтуптыяныл, хотьют э̄рыӈ пилуӈкве паты. Туп кӯщаитныл те̄тым ля̄ххал ро̄ви э̄лаль хансуӈкве». Тав ла̄тӈе щирыл, ты сымта̄л, ма̄йтта̄л утыт, террористыт, намыл тох капыртэ̄гыт. Та̄н сака таӈхе̄гыт, телевизор хосыт вос суссылтавет, ма̄ янытыл вос ва̄вет, вос пилавет. Тох та̄наныл суссылтаӈкве щар ат э̄ри. Ля̄ххал тотнэ хотпат акваг вос номияныл, о̄влэ̄т э̄лумхо̄лас лылытэ урыл номсуӈкве э̄ри, тувыл ущ матыр ла̄вуӈкве манос хансуӈкве. Ос хунь полицияв террористыт ёт хо̄нтлы, о̄с ат ро̄ви ла̄вуӈкве, манса̄вит хо̄тпа, манса̄вит ма̄шина та порат рӯпиты. Ты ма̄н полициян торас ва̄ре̄в. Хунь яныг кӯщаит, губернаторув ла̄тыӈ ва̄ри, таве ма̄навн хансуӈкве ос суссылтаӈкве ро̄ви ос э̄ри. Евгений Лейком, губернатор палт рӯпитан хум, ла̄тӈе щирыл, ты пилыщмаӈ тэ̄ла урыл ля̄ххалыт э̄ри номсахтым хансуӈкве, ма̄хум ул вос рохтэ̄гыт, мори ул вос ха̄йтэ̄гыт. Ма̄н полициял акванпотыртахтым вос рӯпитэ̄в. Маныр та̄н ла̄ве̄гыт, тащир ва̄руӈкве э̄ри. Россияв янытыл тох ловиньтаве, ка̄сыӈ пилыщмаӈ тэ̄ла такви оспа ла̄тӈыл ла̄ваве: атыр оспа (синий) – хунь ма̄хум ва̄ганыл, ӯргалахтым о̄луӈкве э̄ри, хо̄лам ха̄ль лӯпта оспа (жёлтый) – ты ма̄хум ӯргалахтым ос щё̄питахтым вос о̄лэ̄гыт, ос выгыр оспа (красный) – щар атхатым ос ӯргалахтым вос о̄лэ̄гыт. Ты оспа ӯргалахтын тэ̄лат туп яныг кӯщаюв, губеранторув, тав ла̄вуӈкве ве̄рми. Тав ла̄тӈе юипа̄лт пуссын полиция хо̄тпат ла̄щхатым, щё̄питахтым о̄лэ̄гыт. Хунь полиция мир ма̄гыс ла̄тыӈ те̄тэ̄гыт, то̄нт журналистыт нэ̄матыр ла̄тыӈ тув нё̄туӈкве ат э̄ри, атиӈк ма̄хум наска̄ссыг хотрохтуптавет. Ос ма̄н ма̄вт тамле пилыщма нэ̄мхуньт ул вос е̄мты, полиция ма̄хум э̄тэхо̄талэ рӯпитэ̄гыт, лю̄ль ва̄рнэ утыт ла̄щиглэ̄гыт.

1140 2017. 01. 26. Светлана РОМБАНДЕЕВА

Э̄ргынйӣквнэ тэ̄ла урыл потыр Округ мирколт са̄всыр рӯпата ма̄т пуӈктотнэ хо̄тпат 2016 та̄л сыс ва̄рум рӯпатаныл о̄вылтыт ань тыхо̄тал мус потыртэ̄гыт. Культура кол кӯщай нэ̄ Надежда Казначеева о̄с потыртас, ань ювле хультум та̄лт та̄н маныр ва̄рсыт, хумус рӯпитасыт. На̄н ань э̄лаль тав потре ловиньтэлы̄н. — Россия ма̄в янытыл культура тэ̄ла э̄рнэ нэ̄паке йильпииг хасвес, тох намаявес: «Стратегия государственной культурной политики на период до 2030 года». Ты нэ̄пак ювле хультум та̄л ре̄тыӈ ю̄свой э̄тпост хасвес. Ма̄н ань мо̄тнув щирыл рӯпитаӈкве патсӯв, 2030 та̄л мус са̄в э̄рнэ тэ̄ла ва̄руӈкв вос а̄лыме̄в. Округ янытыл культура палт рӯпитан ма̄хум ань о̄с пуссын акв ты щирыл рӯпитаӈкве о̄вылтахтасыт. Бюджет олныл туп э̄рнэ тэ̄ланув ма̄гыс ойтуӈкве патаве̄в. Ань яныг ӯст ман ма̄нь па̄вылт библиотекат ёмащакв вос рӯпитэ̄гыт, са̄в э̄рнэ нэ̄пак вос о̄ньще̄гыт, тот рӯпитан ма̄хум сыресыр хо̄нтхатыглапыт вос ва̄рыглэ̄гыт. Хо̄тпа акваг тув щалтуӈкве вос таӈхи. Музеит о̄с аквтох, мӯсхал щирыл вос рӯпитэ̄гыт, хо̄тпа тув ёмас номтыл вос щалтсы. 2016 та̄л сыс округ янытыл о̄лнэ музеит 7 со̄тыра 193 са̄вит пормас ка̄тынпаттысыт. Музеянувт ань 646 со̄тыра 594 пормас о̄лы. Э̄ргынйӣквнэ ма̄хум ань о̄с сака нё̄тавет, са̄всыр пӯмыщ концертыт вос щё̄питэ̄гыт, э̄рнэ программат вос хансэ̄гыт, тэ̄ланыл мирн вос суссылтыяныл. Ма̄к ёмащакв э̄ргын ос йӣквнэ ма̄хум рӯпатаныл ма̄гыс ань мӯсхал щирыл олныл ойтавет. Соссаӈ мир халт о̄лнэ ма̄щтыр хо̄тпат рӯпатаныл сака янытлыянӯв, э̄лаль о̄с аквтох вос ма̄щтырлэ̄гыт, ка̄тыл ва̄рнэ пормасаныл мирн вос суссылтыяныл. Лӯпта э̄тпост Кондинский район Урай ӯст ос Половинка па̄вылт ма̄ янытыл о̄лнэ ма̄щтыр соссаӈ ма̄хум ма̄гыс «Югра-2016» фестиваль ва̄рыгласӯв. 150 арыгтем ма̄щтыр хо̄тпа тув ёхталас, округув коныпал ма̄хум Конго, Узбекистан, Казахстан ос Кыргызстан ма̄ныл о̄лсыт. Ювле хультум та̄лт округув янытыл 16 со̄тыра арыгтем са̄всыр концертыт ва̄рыглаве̄сыт. 406 са̄вит конкурс номылмата̄лвес, ма̄хум маттем та кассыт. Артистанув Россия янытыл ос э̄лы хо̄н ма̄т э̄ргим, йӣквим яласасыт, юв 1 со̄тыра 118 са̄вит ма̄гылн тагатан по̄сыт ос янытлан нэ̄пакыт тотсыт. Округувт культура ос искусство тэ̄ла палт 11 сотыра 767 хо̄тпа рӯпиты. Та̄н халанылт высший образование 7 со̄тыра 273 хо̄тпа о̄ньщи, культпросвет училищат 4 сотыра 494 хо̄тпа ханищтахтас. Округ культура тэ̄латэ̄н 267 млн. солко̄ви холтвес. Белоярский район Сорум па̄вылт, Сургут ос Урай ӯсыгт яныг библиотекат ӯнттуве̄сыт. Пыть-Ях, Белоярский ос Когалым ӯсыгт кина суссылтан колыт ӯнттуве̄сыт. Сургутыт «Нефтяник» нампа э̄ргынйӣквнэ колкапай ӯнттувес, Россия янытыл воссыг нэ̄мхо̄т тамле яныг кол а̄тим. А̄гмыӈмосыӈ ма̄хум ма̄н акваг нё̄тыянӯв, хо̄та̄ти матыр хо̄нтхатыглап ва̄рыглэ̄в те, та̄наныл акваг во̄виньта̄лыянӯв. Ос туп таи лю̄ль, та̄н то̄ва музеитн манос э̄ргынйӣквнэ колытн щалтуӈкве ат ве̄рме̄гыт. Та̄н ма̄гсыланыл ань то̄ва колыт а̄ви сӯнтаныл йильпииг ва̄равет, та̄нанылн тув щалтсуӈкве тах кӯстырнуве̄г е̄мты. Щар ма̄к ёмащакв э̄ргын манос йӣквнэ ня̄врамыт ка̄сыӈ та̄л ӯщлахтын ос пусмалтахтын путёвкатыл та̄ставет. 2016 та̄лт 220 ня̄врам Сэ̄мыл ща̄рщин, Болгария ма̄н ос «Хелиос» нампа мирхал центрын тотыглаве̄сыт. Аквкит ла̄тыӈ Александр Березин ла̄выс, тав Ханты-Мансийск ӯст о̄лнэ Центр искусств Колледжинтернатт кӯщаиг о̄лы: — Ювле хультум та̄л сака ёмас та̄лыг о̄лыс, Центр искусств колт ханищтахтын ма̄хум ма̄ янытыл са̄в ма̄т выступайтасыт, ювле са̄в янытлан нэ̄пак тотсыт. Ань ма̄н ханищтахтын колув мо̄т хо̄н ма̄т ва̄ве, ня̄враманув ва̄ӈкве патве̄сыт. Ты та̄л сӯкыр э̄тпост Центрув хус та̄лэ то̄влы. Ты та̄лыт сыс тот са̄в ня̄врам ханищтахтас, та̄н ань округ ос Россия янытыл рӯпитэ̄гыт. То̄ваныл намыӈсуиӈыг е̄мтсыт, «Березка» ос Александров нампа ансамблит рӯпитэ̄гыт, э̄ргимйӣквим ма̄ янытыл яласэ̄гыт. Та̄н яныгмам, ханищтахтам коланылн, тыт о̄лнэ колледжинтернат колн, ва̄тихал ёхталэ̄гыт, ня̄врамытн мастерклассыт суссылтэ̄гыт. Ма̄н, культурат рӯпитан ма̄хум, тыт ханищтахтам хо̄тпат ос ань йис ня̄врамыт халанувт юртыӈыщ о̄лэ̄в, аквъёт рӯпитэ̄в, ханищтахтэ̄в. Таима̄гыс культурав тэ̄латэ ёмас щирыл мины. Округ кӯщаит ма̄навн о̄с акваг нё̄тэ̄гыт, та̄нанылн яныг пӯмащипа ла̄тыӈ ла̄ве̄гум. Надежда Казначеева ла̄вме щирыл, культурат рӯпитан ма̄хум Россия яныг кӯщаитн ос округ губернаторын ва̄тихал янытлавет. Ювле хультум та̄лт 8 хо̄тпа «Заслуженный деятель культуры ХМАО — Югры» намыӈыг е̄мтсыт. Ты коныпал са̄в хо̄тпа премияолныл ос янытлан нэ̄пакыл майве̄сыт.

1140 2017. 01. 26. Людмила ТЕТКИНА

Касуӈкве ханищтан саран хум Ювле хультум та̄л ма̄нь таквс э̄тпост Сургутский район Солнечный па̄вылт ня̄врамыт касылыл ва̄рыглаве̄сыт. Та̄н са̄лыӈ сун ӯлтта поргысыт, тыньщаӈ ре̄пыгтасыт, са̄грап па̄хвтысыт ос ха̄йтыгтасыт. То̄нт Ха̄льӯс район Саранпа̄вылныл ёхталам ня̄врамыт о̄выл места висыт. Ань туп Саранпа̄выл ня̄врамыт тох касуӈкве ханищтавет. Са̄в та̄л ня̄врамыт ёт Андрей Дорофеевич Филиппов рӯпиты. Саран хум такви рӯпататэ урыл таи ла̄выс: «Ам ня̄врамыт са̄лыӈ сун ӯлтта поргуӈкве, тыньщаӈ па̄хвтуӈкве хус та̄л ханищтыянум. Щар о̄влэ̄т ам Александр Тасьманов ёт рӯпитасум, таве касуӈкве ханищтаслум. Тав Белоярский район Касум па̄вылт о̄лы. Ме̄н Салехард ӯст культпросвет училищат аквъёт ханищтахтасме̄н. Ос ёсал акваг ха̄йтыгтасме̄н. Тувыл мо̄т ма̄ньлат хо̄тпат нупыл сунсым ос са̄лыӈ сун ӯлтта поргуӈкве, тыньщаӈ па̄хвтуӈкве патсуме̄н. Александр са̄лыӈ сун ӯлтта поргуӈкве сака ёмащакв ве̄рми. Тав ань «Гиннес» нампа нэ̄пакн хасвес. Тав ӯщлахтын та̄л са̄лыӈ сун ӯлтта 890 щёс порыгма̄лыс. Ань тыгыл са̄внув нэ̄мхотьют са̄лыӈ сун ӯлтта порыгмаӈкве ат ве̄рми. Та юипа̄лт Александр Тасьманов ма̄ янытыл ва̄ӈкве патвес, тав нупылэ сунсым са̄в ма̄ньлат хо̄тпат соссаӈ ма̄хум хольт касуӈкве патсыт. Ань тав Белоярский район Касум па̄вылт ня̄врамыт ханищтым рӯпиты. Ты пора сыс тав са̄в а̄гитпыгыт са̄лыӈ сун ӯлтта поргуӈкве, тыньщаӈ ос са̄грап па̄хвтуӈкве ханищтасанэ. Ань Белоярский районт са̄в ще̄мьят са̄лы ӯрим яласэ̄гыт. Тамле ма̄т яныгман ня̄врамыт ма̄ньта̄гыл ва̄гыт, хумус тыньщаӈ ре̄пыгтаӈкве, са̄грап хумус па̄хвтуӈкве ос са̄лыӈ сун ӯлтта хумус поргуӈкве. Ты ня̄врамыт ёт рӯпитаӈкве сака ёмас, та̄н ма̄ньта̄гыл ё̄рнувег о̄лэ̄гыт, касуӈкве сака ёмащакве ха̄сэ̄гыт. Ань Касум па̄вылт интернет ва̄рвес, та ня̄врамыт поргуӈкве, ха̄йтыгтаӈкве сака ат ка̄саще̄гыт. Александр Тасьманов ань туп кит ня̄врамыг ёт тув ёхталас. Ма̄н па̄влувт ань ищхӣпыӈ ут лю̄льсаӈ рӯпиты, тыи ма̄гсыл ня̄врамыт ты утыл ат ёнгасэ̄гыт, ам палтум ханищтахтуӈкве акваг ёхталэ̄гыт. О̄лупсатэ урыл Ам Салехард ӯст о̄лупсатэ урыл касуӈкве ханищтахтасум. То̄нт ам ётум Геннадий Владимирович Сысолятин рӯпитас, а̄нум ханищтастэ. Ты о̄йка ань тыг мус ня̄врамыт ханищты. Ты э̄рнэ рӯпата ва̄рнэ̄тэ ма̄гсыл тав «Заслуженный тренер Ямала» намыл майвес. Ам ща̄нягума̄щагум са̄лы ӯрим яласасы̄г, ам ма̄ньта̄гыл тыньщаӈ ре̄пыгтаӈкве ос са̄грап па̄хвтуӈкве хассум. Тыи ма̄гсыл хунь тох касуӈкве во̄вве̄сум, ам та̄ра тув хасхатасум. Нила та̄л Салехард ӯст ханищтахтасум ос нила та̄л касым яласасум, акваг о̄выл места вӯйласум. Ханищтахтын ма̄ныл хунь по̄йтсум, ювле Саранпа̄вылн ёхтысум. Совхозт ветеринарыг рӯпитаӈкве патхатасум. То̄нт лов та̄л са̄лы пусмалтым рӯпитасум. Тувыл та порат Саранпа̄вылт спорткомитет ва̄рвес, ам тув тренерыг рӯпитаӈкве во̄вве̄сум. Ня̄врамыт касуӈкве ханищтаӈкве патсанум. Ман организацияв школа нупыл ловиньтахты. Ня̄врамыт ма̄гсыл маныр э̄ри, пуссын ёвтаве. Ань нё̄рыт нупыл спортивный база ӯнттувес. Ма̄н ня̄врамыт ёт тув акваг яланта̄лэ̄в. Тот та̄н ёсал тахсэ̄гыт, спортивный залт ос са̄всыр упражненият ва̄ре̄гыт. Ка̄сыӈ ня̄врам такви программа щирыл рӯпиты. Ат хо̄тал сыс школат ханищтахтэ̄гыт, ты базан та̄н туп ӯщлахтын хо̄талыт ялантэ̄гыт». Ань тав палтэ хатанит, рущит, сараныт, ё̄рныт, ма̄ньщит, хантыт, дагестанцыт, узбекыт ханищтахтуӈкве ялантэ̄гыт. Ты урыл хум ла̄выс: «Ня̄враманум лакква щар ат ӯртыянум. Ня̄врамакве ат ке савлы ос ам палтум ханищтахтуӈкве ва̄тихал ёхталы, са̄всыр упражненият мӯсхалыг ке ва̄ри, ам тав ётэ са̄внув рӯпитаӈкве о̄вылтахтэ̄гум. Акв порат Саша Сметанин ёхталас. Тав са̄грап па̄хвтуӈкве сака ёмащакве ха̄сыс. Тувыл ма̄ниг о̄лме порат ёнгасым ёлрагатас ос пуӈке̄тыл та̄кыщ хо̄яс. Ты юипа̄лт ле̄ккарн поргуӈкве ос ха̄йтыгтаӈкве щар ат та̄ртвес. Ам таве касуӈкве ле̄ккар та̄л тотыгласлум. Оматэ ос ма̄н ётув акваг ялантас. Тав мо̄т ня̄врамыт ёт касым хӯрум та̄л сыс округувт о̄выл места вуйлас. Ань тав янгыг е̄мтыс, Саранпа̄вылт о̄лы, водителиг рӯпиты. Та порат тыщирыл ат ке ха̄йтыгтас, ат ке поргыс, акваг юн ке ӯнлыс ос са̄всыр тэ̄рпи аим, уколыл ва̄рим са̄в мо̄т а̄гмыл е̄мтнув. Ань тай сака ёмащакв о̄лы, а̄гм щар ат о̄ньщи. Ам палтум Афанасий Шашкин ань ёхталы. Пыгрищ ха̄йтыгтаӈкве сака ве̄рми. Тувыл таи лю̄ль, ам палтум ка̄сыӈ хо̄тал ёхталаӈкве ос ханищтахтуӈкве сака ат ка̄сащи. Савлы, ам тав ётэ такос потырта̄лэ̄гум, пыгрищ ам ла̄тӈум щар ат хӯлы. Ня̄враманум хунь тох ва̄ре̄гыт ос ла̄тыӈ ат хӯнтлэ̄гыт, сымум сака щарги. То̄ва порат номсахтэ̄гум, улпыл амки потыртаӈкве ат ха̄сэ̄гум, ня̄враманум ла̄тың ат хӯнтлэ̄гыт. Ня̄врамыт урыл потре Ня̄врамыт хӯрум группа щирыл уртсанум. 12-13 та̄л яныт ня̄врамыт о̄выл группан хассанум, китыт группан 14-15 та̄л яныт ня̄врамыт ялантэ̄гыт. Ос 16-17 та̄л яныт а̄гитпыгыт хӯрмит группат о̄лэ̄гыт. » Андрей Дорофеевич ла̄выс, ты яныг группат мощща ня̄врам о̄лы, та̄н пуссын 9 класс а̄стлан юипа̄лт э̄лаль ханищтахтуӈкве мо̄т ма̄н минэ̄гыт. Тыи ма̄гсыл тув мощща ня̄врам яланты. «Йильпи правила щирыл ты касылт а̄гит о̄с касуӈкве ве̄рме̄гыт. Ты э̄лыпа̄лт туп пыгыт та̄нки халанылт кассыт. Ань а̄гит ощща йӣв ёт ха̄йтыгтэ̄гыт, са̄лыӈ сун ӯлтта порге̄гыт ос са̄грап па̄хвтэ̄гыт. Ты хӯрум касылт зачётыл хансавет. Ань ам па̄лтум а̄гирищит о̄с ёхталэ̄гыт. Та̄н ё̄таныл рӯпитаӈкв кӯпнит, та̄н ла̄тыӈ та̄ра хӯлэ̄гыт ос нэ̄мхуньт лю̄ль ла̄тыӈ ювле ат ла̄ве̄гыт. Пыгрищит тай то̄ва порат ля̄галэ̄гыт. Ам та̄н нупыланыл щар ат кантлэ̄гум, ка̄сыӈ ня̄врам ам э̄руптылум. Та̄н нупыланыл кантлуӈкве щар ат ве̄рме̄гум. Сургутский район Солнечный па̄вылн Таня Хозяинова, Снежана Савчук ос Лена Тихонова ялсыт. Та̄н пуссын тот ёмащакв кассыт. Тыи ма̄гсыл ты а̄гитын ам яныг пӯмащипа ла̄тыӈ ла̄ве̄гум. Пыгыт халт ос Максим Никитин но̄хпатыс. Ты ма̄ньщи пыг тыньщаӈ ре̄пыгтас. Максим сака ка̄ркам пыг, маныр ла̄ве̄гум, та̄ра ва̄ри. Тав ща̄нягеа̄щаге сас ма̄ньщииг. Улпыл тыима̄гсыл пыгрищ тох тыньщаӈ па̄хвтуӈкве ёмащакв ха̄сы. Ма̄ньщи ла̄тыӈ урыл Ам амки са̄лыӈколт яныгмасум. А̄щум бригадирыг о̄лыс. Ма̄н нила ще̄мья акв ё̄рнколт о̄лсӯв. Ам ма̄ньта̄гыл ма̄ньщи ла̄тыӈ хӯлыслум, ты ма̄хум пе̄с йис ва̄рмаляныл о̄с ёмащакв ва̄ганум. Ма̄н ётув акв мӯтраӈ ма̄ньщи о̄йка Пётр Спиридонович Анямов о̄лыс. Тав ма̄н ётув акваг ма̄ньщи ла̄тӈыл потыртас. То̄нт ма̄н о̄с ма̄ньщи ла̄тӈыл потыртасӯв. Ань таса̄вит та̄л ты ла̄тыӈ ат хӯлыгласлум, хотёрувлаӈкве патыслум. Таи лю̄ль, ма̄ньщит та̄нки ща̄нь ла̄тӈыл ат потыртэ̄гыт. Максим ща̄нягеа̄щаге ма̄ньщииг кос, сас ла̄тӈе̄тыл потыртаӈкве ха̄сэ̄г, тувыл пыге̄н ат ханищтастэ̄н. Пыг ща̄нь ла̄тӈе ат ва̄г. Мо̄т ня̄врамыт ос аквтыщирыл ща̄нь ла̄тӈыл ат пӯмщалахтэ̄гыт. Ма̄н тренеровочный базан хунь яланта̄лэ̄в, ӣтипа̄лаг пуссын яныг пасан ва̄тан акванатхатэ̄в. То̄нт ма̄н ня̄врамыт ёт ма̄ньщи ла̄тыӈ ханищтэ̄в. Ты ня̄врамытын ща̄нь ла̄тыӈ ва̄ӈкве э̄ри».

1140 2017. 01. 26. Людмила ТЕТКИНА

Ханты нэ̄ хо̄тпа Мо̄лты та̄л туи порат Нефтеюганский район «Сказка» нампа ӯщлахтын ма̄т ам Мария Яковлевна Сенгепова ёт ва̄йхатасум. То̄нт округ янытыл о̄лнэ соссаӈ ма̄хум ма̄ньха̄пыл касуӈкве тув акванатхатыгласыт. Яныгпа̄ла ханты э̄ква Сургутский район Сытомино па̄вылныл тув ёхталас. О̄влэ̄т ме̄н ма̄ньха̄пыл каснэ урыл потыртасме̄н, ханты э̄ква ка̄сыӈ та̄л тув ёхтала̄лы. Ты урыл ла̄выс: «Ма̄н Сытомино па̄вылт ка̄сыӈ та̄л ма̄ньха̄пыл касэ̄в, 17 та̄л сыс тот акванатхатыглэ̄в. Тамле касыл ма̄н хӯл алыщлан ма̄хум янытлан хо̄тал кастыл щё̄пита̄лылӯв. Па̄влувт ань са̄всыр мир о̄лы. О̄влэ̄т ма̄н туп ма̄нки халувт касыл ва̄рыгласлӯв. Тувыл па̄влыӈ мир ма̄н нупылув кантлуӈкв патсыт, манрыг та̄наныл ат во̄виньта̄лыянӯв. Ань то̄ва рущит ма̄ньха̄пыл сака ёмащакв яласаӈкве ха̄сэ̄гыт». Мария Яковлевна яныг хо̄тпаг о̄лы, са̄всыр ялпыӈ хо̄талыт урыл о̄с са̄в ва̄г. Таве Витхо̄н нупыл по̄йкщан хо̄тал урыл китыгласлум. Ханты э̄ква ты урыл ла̄выс: «Ты ялпыӈ хо̄тал о̄лум порат ханты ма̄хум Витхо̄н нупыл по̄йкщасыт. Ам амки Дарко-Горшково пе̄с ханты па̄вылт самын патсум. Ань та па̄вылт хосат та̄гыл нэ̄мхотьют ат о̄лы. Колхозыт аквантотым порат ща̄нягума̄щагум колта̄глув ёт тыг Сытомино па̄вылн о̄луӈкве ва̄нтлуптаве̄сы̄г. Ам ма̄ниг о̄лмум порат ты ялпыӈ хо̄тал хумус ва̄рыглавес, ань ты мус сака ёмащакв номилум. Витхо̄н нупыл по̄йкщан хо̄тал я̄ӈк на̄тнэ юипа̄лт та̄ра ва̄рыглавес. Яныг хо̄тпат на̄лми ва̄тан ёхталасыт, пасан щё̄пита̄лсыт, ма̄нь ня̄нь ло̄мтыт я̄н па̄хвтысыт. Тыщирыл пӯрлахтым са̄в хӯл во̄всыт. Тыг ёхталан мӯй ма̄хум мо̄т щирыл Витхо̄н нупыл по̄йкще̄гыт. Ва̄им, са̄всыр ма̄т о̄лнэ хантыт, ма̄ньщит та̄нки На̄й-О̄тыр о̄ньще̄гыт ос та̄нки щирыл по̄йкще̄гыт».

1140 2017. 01. 26. Тамара МЕРОВА

Не̄лм рӯтанув акванюрщхатэ̄гыт Ня̄гань ӯст о̄лмув порат ма̄н культура центрын во̄виньта̄лвесӯв. Тот ӯст о̄лнэ хантыт, ма̄ньщит, ё̄рныт ос марийцыт акваннё̄тхатым «Мост дружбы» нампа ёнгил ва̄рыгласыт. Тав финноугор ма̄хум ялпыӈ хо̄таланыл кастыл щё̄пита̄лвес. Ма̄навн ты ва̄рмаль сака пӯмыщ сунсуӈкве о̄лыс. Тот э̄рттам соссаӈ ма̄хум о̄лнэ колта̄глын мариец рӯтаныл мӯйлуӈкве ёхтысыт. Тувыл та̄нки халанылт ва̄йхатэ̄гыт, коланыл, маснутаныл ос тэ̄нутаныл, йӣкваныл о̄вылтыт потраме̄гыт, мӯйлупса мыгыт. Хум хо̄тпат та̄нки ва̄рум пормасаныл суссылтэ̄гыт, нэ̄ хо̄тпат ю̄нтэ нутаныл о̄вылтыт потыртэ̄гыт, ня̄врамаквет аквъёт ёнге̄гыт. Насати, то̄ва пе̄с йис наканыл акванхартавет, то̄ва ла̄тӈаныл аквхурипаг о̄лэ̄гыт. Ань ты ва̄рмалит урыл ам Наталья Ахмедуллина (а̄ги о̄парищ наме — Яврова) китыгласлум, тав потре э̄лаль ловиньтэлы̄н. — Мо̄лты ва̄т са̄грапнал э̄тпост ӯст ма̄н о̄лнэ соссаӈ ма̄хум ос марийцыт ёт акванатхатыглахтасӯв. Ос то̄нт финноугорский рӯт ма̄хум Ассоциация ва̄руӈке номылматсӯв. Тув Владилен Третьяков пуӈктотнэ хо̄тпаг пе̄рияслӯв. Ос та па̄сыл акваннё̄тхатым ма̄нки пе̄с йис наканув э̄лаль тотыянӯв. Ма̄н са̄всыр ка̄с ва̄ре̄в, ялпыӈ хо̄талыт щё̄питэ̄в, ос ня̄враманувн пе̄с наканув о̄вылтыт потыртэ̄в. Ты коныпал ам ӯст обскоугорский ма̄ньлат ма̄хум акванатхатыглан колт пуӈктотэ̄гум ос «Югра лылые̄п» ассоциация ма̄гыс са̄всыр тэ̄лат ва̄руӈкве нё̄тэ̄гум. Пе̄с йис накыт э̄лаль тотуӈкве а̄нумн сака мӯсты, ам амки о̄с са̄в пӯмыщ тэ̄лат оснпаттэ̄гум. Ӯст о̄лнэ культура центрыт акванхо̄нтхатыглахтэ̄в ос тот матыра̄ти ханищтэ̄в, пӯмщалахтэ̄в. Ма̄навн яныг хо̄тпат нё̄тэ̄гыт. Ам Эвелина а̄ги о̄ньще̄гум, тав онтолов та̄лэ. Тав ам омамн ханты ла̄тӈыл потыртаӈкве ханищтаве, маснутыл ю̄нтаве. Амки ос школат рӯпитэ̄гум, ма̄нь ня̄врамыт ма̄гыс физкультура урокыт ва̄ре̄гум. Ам 2002 та̄лт Санкт-Петербург ӯст А. И. Герцен нампа университетт ханищтахтасум. Та порат Дина Васильевна Герасимова ёт юрщхатасум, тот ос лӯима̄ а̄гирищитпыгрищит ёт пе̄с о̄лупсав урыл са̄в потыртасӯв. Университет а̄стламум юипа̄лт кит та̄л Белоярский ӯст рӯпитасум. Тот Надежда Костылева ос Маргарита Рябова ёт ва̄йхатасум, тэ̄н палтэ̄н «Увас хурамыт» нампа йӣквнэ колн ялантасум. Ань тэ̄н ханищтан ва̄рмале̄н ам тыт э̄лаль тотылум. А̄нумн тыт Людмила Романовна Хомляк са̄в нё̄ты, тав Белоярский ӯсныл о̄с тыг ёхтыс. То̄внакт ма̄хумн китыглавем, манрыг ам пе̄с накыт кинсыянум ос э̄лаль тотыянум, олныл хунь ойтавем. Ам та̄нанылн ювлела̄ве̄гум, тыи ам сымумн э̄рнэ ут. Тувыл Эвелина а̄гитэ а̄нумн потыртас: «А̄нумн пе̄с йис накыт ханищтаӈкве сака пӯмыщ, ам юрт а̄гиянум о̄с тыг во̄виянум. Аквъёт тыт йӣкве̄в, ёнгасэ̄в, ма̄навн тыт мӯсты». Владилен Третьяков мариец хум ёт ва̄йхатасме̄н, тав ла̄выс: «Нягань ӯст о̄с са̄в мари ма̄хманув о̄лэ̄гыт, са̄в ма̄т рӯпитэ̄гыт. Тувыл тыт ханты, ма̄ньщи ос ё̄рн ма̄хмыт ёт ва̄йхатасӯв. Не̄лм рӯт ма̄хум акванюрщхатнэ Ассоциация ва̄руӈкве номылматсӯв. Культура центрыт тыт акванхо̄нтхатыглахтэ̄в. Тыт рӯпитан кӯщай нэ̄ Альфия Рафкатовнан пӯмащипа ла̄тыӈ ла̄ве̄в, тав ма̄навн акваг нё̄ты. Ӯст о̄лнэ ма̄хум тыг мӯйлуӈкве ёхталэ̄гыт, ма̄н ка̄с ва̄рнэ рӯпатав нупыл сунсэ̄гыт ос ща̄гтым юв минэ̄гыт, пӯмащипа ла̄ве̄гыт. Ма̄навн воссыг маныр э̄ри».

1140 2017. 01. 26. Валентина Васильева

Са̄в та̄рвит ва̄щинтам э̄ква Ма̄н округувт яныгпа̄ла ма̄хум ма̄гыс са̄всыр нё̄тмил ва̄раве. Юио̄выл та̄лытт та̄н Ханты-Мансийскан пусмалтахтуӈкв ос ӯщлахтуӈкв те̄тыглавет. Тыт яныг санаторий та̄н ма̄гсыланыл рӯпиты, рущ ла̄тӈыл ты колкапай «Югорский долинаг» ла̄ваве. Ювле хультум та̄л акв хотты э̄тпосэ̄т са̄в хо̄тпа «То̄рум Маа» музейн тотыглавес. Та̄н тув ёхталэ̄гыт, соссаӈ мир пе̄с о̄лупса урыл потыртавет, а̄кань ва̄руӈкв ханищтавет. Та ма̄хум халт акв матум э̄ква о̄лыс, рущ ла̄тӈыл мощ лю̄льсаӈнув потыртас. Ам таве о̄лупсатэ ос такви уре̄тыл потыртаӈкв во̄выслум. Тав ла̄выс, наме Фарзана Гафуровна Димишева, башкир э̄ква. Советский ӯст о̄лы, ань ня̄враманэ пуссын колта̄глыӈыг е̄мтсыт, я̄нас о̄лэ̄гыт. Ос оманыл акваг уральтым о̄ньщияныл. Мо̄лты та̄л тав 85 та̄лэ то̄влыс, ты та̄л яныгпо̄ль э̄тпос 25 хо̄талэ̄т 86 та̄лэ тах то̄влы. Тав кос яныгпа̄лаг о̄лы, ос яныгмам поратэ, яныг хо̄нт о̄лум пора сака ёмащакв номиянэ. Ты урыл тав сака пӯмыщи потыртас. Колта̄гланыл урыл Оматэ ос а̄тятэ сас башкирыг о̄лсы̄г. А̄ще онтоловхуйплов та̄лэ то̄влуме юипа̄лт армиян тотвес. Хо̄т та̄л Лӯима̄т Мурманск ӯс ляпат лусытас. Юв 1923 та̄л порат ёхтыс. Юв ёхтыс, мо̄т па̄вылт о̄лнэ ма̄ньлат а̄ги ёт ха̄йталавесы̄г. Акв та̄л минас, 1924 та̄лт о̄выл ня̄враме̄н самын патыс. Тувыл ка̄сыӈ хӯрум та̄л аквакв ня̄врам о̄щсы̄г. Та порат о̄луӈкве сака та̄рвитыӈ о̄лыс, ма̄хум тэ̄та̄л саваласыт. А̄щаныл па̄ля совныл матыр маснут ю̄нтуӈкв сака ха̄сыс – те̄нтыт, тулупыт. Па̄влыӈ ма̄хманыл пуссын таве̄н матыр ю̄нтылта̄лсыт. Та порат о̄лум кӯщаит мирн мощ нё̄тнэ ма̄гыс па̄влыӈ ма̄т о̄лнэ ма̄хум ма̄ло̄мтыл миӈкв патсаныл, та ма̄ рущ ла̄тӈыл тох ла̄ввес – «наделы». Нэ̄гхумы̄г та пора мус хӯрум пыг о̄щсы̄г. Ос ма̄ туп хум хо̄тпатн ос хум ня̄врамытн майлувес. Та̄н колта̄гланыл нила ма̄ло̄мтыл та майвес. Та̄н тот ня̄ньпум янмалтасыт, тувыл коласыг ва̄рсаныл. Матах па̄ля о̄щсыт. Ще̄мьяныл мощ ёмащаквнув о̄луӈкв та патыс. Сакати, ня̄враманэ̄н тэ̄та̄л ат о̄лсыт. Яныг хо̄нт Яныг хо̄нт о̄вылтахтам э̄лыпа̄лт та̄н колта̄гланыл са̄в ня̄врамыӈыг е̄мтыс. Юио̄выл ня̄враме̄н 1939 та̄л порат самын патыс. Тувыл ла̄тыӈ та ёхтыс – война о̄вылтахтас. Та хо̄тал Фарзана Фаридовна сака ёмащакв номитэ, ань тох потыртас: — Па̄влыӈ ма̄хманув пуссын па̄выл канын акванатхатасыт. Ма̄н, ня̄врамыт, акв та ляпат о̄лэ̄в. Хӯнтлэ̄в, сунсэ̄в, яныг ма̄хманув маныр потыртэ̄гыт, маныр ва̄ре̄гыт. Тувыл пуссын ла̄кква та миныгласыт. Матах хо̄тал минас, хум хо̄тпат ла̄вве̄сыт, хотьют лув о̄ньщи, хо̄нтлын ма̄н луве ёт вос мины. Тох ты Башкирский конный армия атвес. Ам а̄тям о̄с тув хасвес. 1942 та̄лт 6 со̄тыра хо̄тпа ос 4, 5 со̄тыра лув хо̄нтлын ма̄н та минасыт. Та̄н Сталинград нупыл тотве̄сыт, тот хо̄нтлуӈкв патсыт. Тав ма̄навн туп акв пищма хансыглас, тувыл та. Нэ̄пакыл тотвесӯв, тот хансым о̄лыс, Сталинград ӯс ляпат тот хо̄т та тыпыс. Ма̄н па̄влувныл акв хум юв ёхталас, тав ос та ма̄т хо̄нтлас. Яныг пилыщмакапай урыл потырта̄лыс. Сталинградский битва о̄лум ма̄т таса̄вит хо̄тпа па̄тлуптавес, пуссын ёлщё̄питаӈкв ат а̄лымаве̄сыт. Танкыт э̄лаль минуӈкв ат ве̄рмысыт. Порслым хо̄тпат яныг аняг акв тармыл пиным тот хуясыт, танкыт та̄наныл ёлялыглым нумыл минасыт. Ма̄н ма̄те̄в вуянтан ма̄гыс ма̄хум тох та хо̄нтласыт. Юн хультум ма̄хум са̄в рӯпитасыт Юн хультум мир урыл Фарзана Фаридовна тох ла̄выс. Па̄вылт нэ̄квет ня̄враманыл ёт ос яныгпа̄ла ма̄хум хультсыт. Колхоз претщетателиг рущ о̄йка о̄лыс, тав нэ̄мхотьют ат са̄литас. Кос ня̄врамаквет, кос яныг хо̄тпат пуссын акв ё̄рыл рӯпитасыт, пуссын аквса̄вит нормал хансыглаве̄сыт. Та порат ос ка̄сыӈ ще̄мья хумус ве̄рмыс, тох та о̄лантас. То̄ва колта̄глыт мислув о̄щсыт, то̄ват нуса тотым о̄лсыт. Э̄ква э̄лаль тох потыртас: «Ма̄н мис о̄щсӯв, тав ма̄гсылэ пум ва̄руӈкв щар ат та̄ртвесӯв. Э̄типа̄лаг те̄таве̄в, мисув ма̄гыс пумло̄мт вос атэ̄в. Яныг пумканыт о̄лнэ ма̄н минэ̄в, тот пум та̄ври та атэ̄в. Атыянӯв, юв тотыянӯв. Акв щёс пуввесӯв, пумло̄мтанув пуссын та а̄лмаяве̄сыт. Мисув туп э̄ти кон та̄ртыгласлӯв. А̄лпыл юв ёхты, омав посытэ ос мисколн лап та пантылӯв. То̄нт мис ат те о̄щсӯв, ань ул ат о̄лнувӯв». Па̄влыӈ нэ̄ хо̄тпат 40 тила са̄вит коласыл майлуве̄сыт. Та коласныл ня̄нь ва̄руӈкв э̄рыс, то̄слуӈкв ос сукари ва̄руӈкв. Та сукарит пуссын ювле вуйве̄сыт ос ёмащакв ве̄скалаве̄сыт, мощща ул вос о̄лыс. Тувыл хо̄нтлын ма̄хумн та те̄тыглаве̄сыт. Акв нэ̄ тит ня̄врам о̄ньщум, а̄гитэ мощ яныгнув, пыгрище ат та̄л янытыг о̄лыс. Ня̄врамаге тыттын ма̄гыс ня̄ньпум самыт атуӈкв минас. Тот нэ̄кве та пуввес. Претщетатель лув сыс тармыл яласас, нумын ӯнлым нэ̄кве хо̄мщал щама та хосгыстэ. Тит ня̄врамаквег ос тэ̄та̄л та рагатасы̄г, нэ̄мхотьютн ат нё̄твесы̄г. Тамле пилыщма та о̄лыс. Яныг каӈканыл о̄с та вуйвес Яныг каӈке нёлоловхуйплов та̄лэ иӈ ат то̄влыс, тав ос хо̄нтлын ма̄н 1942 талт тэ̄лы порат та тотвес. То̄нт лаппантым вагоныт хунь о̄лсыт, на̄иӈтуйтыт пуссын матыр яныг пормас ман яныг техника тотнэ ма̄гыс щё̄питым о̄лсыт. Хум ня̄врамыт пуссын грузовой вагонын та̄лттуве̄сыт, хӯрум хо̄тал минасыт. Тэ̄лы, та ащирма. Ёлпо̄йтса̄лэ̄гыт, ляпат о̄лнэ па̄влытн минэ̄гыт, тэ̄нут ос вит тот та во̄ве̄гыт. Каӈканыл 1944 та̄л ва̄т са̄грапнал саквалан э̄тпост та порславес. Хо̄нтлын ма̄ныл юв са̄в пищма хансыглас, ка̄сыӈ пищматэ̄т акваг матыр хури тув та по̄слыгпи. Ма̄нь йигрищанэ̄н, а̄пщирищанэ̄н ты пищмат сунсыглаӈкв сака пӯмыщ о̄лыс. Хо̄нт юипа̄лт ма̄хум хумус о̄лсыт Яныг хо̄нт хунь оигпас, а̄гирищ 14 та̄лэ то̄влыс. Па̄вылт о̄лум 1928-1929 та̄лыгт самын патум ма̄ньлат а̄гит пуссын Украинан рӯпитаӈкв те̄туӈкв патве̄сыт. Тот ДнепроГЭС ёмащакв хотщё̄питавес. Э̄ква ла̄выс: — Ам хо̄тхуйплов та̄лум то̄влыс, паспортыл майве̄сум, мирколн минасум, тот по̄с тӯщтуӈкв э̄рыс. Ла̄вве̄сум, Украинан минуӈкв вос щё̄питахтэ̄гум, моще̄рт а̄гит тув тотнэ ма̄гыс ма̄хум тах ёхтэ̄гыт. Туи яныг ялпыӈ хо̄тал ва̄рвес, ма̄хум пуссын тув акванатхатасыт. Номилум, нэ̄пак хаснэ яныг писательо̄йка ёхтыс. Ма̄н тув вос минэ̄в, та потырты. Та порат котиль каӈкум юн о̄лыс, тав Уфа ӯст институтт ханищтахтас. А̄нумн ла̄ви: «Наӈ тув минуӈкв щар ул касащен. Минэ̄гын те, ювле воссыг нэ̄мхуньт ат ёхтэ̄гын тах. Тӯйтхатэн». Акв хо̄тал а̄гит акван та атве̄сыт. Ма̄н колув мощ э̄лыннув ӯнлыс, ам ювя̄ртхатасум, кон щар ат нэ̄глэ̄гум. Тисве̄сум ман а̄ти, ат ва̄глум. Ам ма̄гсылум юв нэ̄мхотьют ат ёхталас. Тох юн та хультсум. Тув тотым а̄гит щар нэ̄мхотьютаныл юв ат ёхтыс, пуссын тот аман а̄тимыг е̄мтсыт, аман тот хультсыт. Ат ва̄глум. Мир потырта̄лсыт, тув тотым а̄гит пуссын сака та̄рвитыӈ рӯпата ва̄рсыт. Тох ты па̄влув ла̄щлакв та та̄тламас». Хум ва̄рыс Каӈке̄н ла̄ввес, яныг ӯсн э̄лаль ханищтахтуӈкв вос мины. Аквъёт тув та минасы̄г, а̄ги тот школа а̄стлас. Тувыл оматэ палт юв ёхтыс. Юн о̄лыматэ, ма̄ньлат пыгн ха̄йталавес. Акван та о̄лмыгтасы̄г. Ётыл о̄йкатэ во̄р ёлса̄грын ма̄н рӯпитаӈкв то̄твес, тот лов та̄л о̄лсы̄грӯпитасы̄г. Ат ня̄враманэ̄н самын патсыт. Тувыл тэ̄н 1967 та̄лт ма̄н округувн Советский ӯсн те̄твесы̄г, тув та о̄лмыгласы̄г. Ня̄враманэ̄н пуссын тот яныгмасыт. Ты йис о̄лупсатэ О̄йкатэ 2000 та̄лт а̄тимыг е̄мтыс, э̄ква ты та̄л 86 та̄лэ тах то̄влы. Ма̄нь пыге палт о̄лы. Яныг пыге Ханты-Мансийск ӯст о̄лы, тит пыгаге ос а̄гияге оматэ̄н ляпат о̄лэ̄гыт. Ам таве титыгласлум, юв Башкирия ма̄н хартавет ман а̄ти, э̄ква ювле ла̄выс: — А̄ти, ма̄н тыт о̄луӈкв ханьщувласӯв, ня̄враманум ос мо̄т ма̄н минуӈкв щар ат таӈхе̄гыт. Ань тот та̄рвитыӈ о̄луӈкв, рӯпата а̄тим, кол а̄тим. Тув минмыгтэ̄в те, о̄влэ̄т тот кол ӯнттуӈкв э̄ри. Тот ань каӈке ос э̄ще о̄лэ̄г. Каӈке 90 та̄лэ то̄влыс, са̄в та̄л школат рӯпитас, ань сака матум. Э̄ще о̄с яныгпа̄ла, ань а̄гм нупыл хартуӈкв патыс. Ос такви Фарзана Гафуровна сака ка̄ркам э̄квакве. Маныр урыл таве титыглылын, пуссын ва̄г, пуссын номи. Тамле хо̄тпа ёт ты ва̄йхатасум, тав та̄рвитыӈ о̄лупсатэ урыл потре хӯнтлыслум ос газета ловиньтан ма̄хум ма̄гыс ань ма̄ньщи ла̄тӈыл ты хансыслум.

1140 2017. 01. 26. Николай МЕРОВ

Савалап ня̄врамыт колн кӯщай нэ̄ ёхталас Ханты-Мансийск ӯст савалап ня̄врамыт о̄лнэ «Радуга» нампа кол рӯпиты. Тот ма̄ньта̄гыл ща̄ньа̄щ та̄л хультум ня̄врамыт о̄ньщавет. Ань ты накт тот онтоловхуйплов а̄ги ос пыг хультыс. Та колн ле̄ккарыт, каснэ ма̄т рӯпитан, та̄нки рӯпатаныл ва̄рнэ хо̄тпат ос мо̄таныт ёхталасыт. Ня̄врамыт та̄наныл о̄лупса урыл китыгласаныл. Ты хо̄нтхатыглапн округ кӯщай нэ̄ Наталья Комарова, Общественный палата кӯщай нэ̄ Ирина Максимова, лувнакыт пусмалтан ле̄ккар хум Кирилл Драган, полицият рӯпитан кӯщай Владимир Долгалёв, такви рӯпата ва̄рнэ хум Сергей Колупаев, телевиденият ля̄ххалыт потыртан хум Вячеслав Смуров, МЧС кӯщай ва̄ӈын хум Сергей Антонов ос товтыл каснэ намыӈсуиӈ хо̄тпа Дмитрий Ярошенко ёхталасыт. Ня̄врамыт ты муй хо̄тпат китыгласаныл, та̄н ма̄ниг о̄лманылт хотьютыг рӯпитаӈкве тахсыт. Ка̄сыӈ кӯщай хо̄тпа такви уре̄тыл потыртас, ня̄врамыт пӯмащ потрыт хӯнтлым астал ӯнлысыт. О̄влэ̄т округ кӯщай нэ̄ Наталья Комарова такви уре̄тыл потыртас. Тав «Радуга» нампа колн ва̄тихал ёхталы. Кӯщай нэ̄ такви кит а̄ги янмалтас, ань кит апыг о̄ньщи. Тав мо̄т ня̄врамытн сака э̄руптаве. Такви ла̄тӈе щирыл, ма̄ниг о̄лме̄т тав на̄й харыгтан ос полиция хо̄тпаг рӯпитаӈкв ка̄сащас: Ам нас ще̄мьят яныгмасум. Ма̄нь порат сака ёмщакв о̄щве̄сум, тыима̄гыс яныг пӯмащипа ща̄нягума̄щагумн ла̄ве̄гум. Ань э̄рыӈ ты ва̄рмаль на̄нан ат то̄вылхаты. Таима̄гыс ам ка̄сыӈ порат тыг ёхталэ̄гум, на̄н ща̄гтым вос о̄лсы̄н, ма̄нь поранын урыл ты посыӈ номт сыманынт вос хульты. Ам ма̄ньлат порат сака хоса номсахтасум, хотьютыг рӯпитаӈкве патэ̄гум. Тувыл институтн экономистыг ханищтахтуӈкве минасум. Ётылнув ты ханищтахтын тэ̄ла а̄нумн сака э̄рмыглас, ань номсэ̄гум, матъёмас ханищтахтасум. Ирина Максимова: — Ма̄нь порат ам о̄влэ̄т вит ёлыпа̄лт уйигтан хо̄тпаг ханищтахтуӈкве номсасум. Ётылнув ос ля̄ххал тотнэ хо̄тпаг е̄мтуӈкве ка̄сащасум. Ос тох е̄мтыс, ань ам Общественный палатат кӯщаиг рӯпитэ̄гум. Ам сымум сака ща̄гты, хунь хотьютын нё̄тмил ва̄ре̄гум. Кирилл Драган: — Ам ос ма̄нь порат ёнгын ос э̄ргын хо̄тпаг е̄мтуӈкве сака тахсум. Ос йӣквнэ колт э̄ргын ос са̄ӈквылтан ма̄гыс ма̄щтырнувег о̄луӈкве э̄ри. Тувыл школат хо̄т класс а̄стласум ос юристыг е̄мтуӈкве номылматсум. Мощ о̄лсум, аквматнакт а̄щум сакватахтас, Нягань ӯс пӯльницат хуяс. Тот тав кит э̄тпос пусмалтахтас, ам тав палтэ ка̄сыӈ хо̄тал ёхтала̄лсум. Ос то̄нт ты ле̄ккарыг рӯпитаӈкве номтум патыс. Ётылнув, хунь институтн ёхтысум, ам та̄ра э̄лумхо̄лас сакватам манос хотняхсатам ка̄тэ, ла̄глэ пусмалтан хо̄тпаг ханищтахтуӈкве минасум. Хо̄т та̄л —институтыт, кит та̄л — ординатурат ханищтахтасум. Ань ты накт ка̄сыӈ та̄л ханищтахтуӈкве ялантэ̄в. Сергей Антонов: — Ам о̄влэ̄т э̄сыгхатэ̄гум, нила а̄ги янмалтэ̄гум. Яныг а̄гим университет а̄стлас, щар ма̄нь а̄гим ат та̄лэ то̄влыс. Ня̄враманум хотьютыг рӯпитаӈкве э̄лаль номсэ̄гыт, юн ма̄н ва̄тихал ты урыл потыртэ̄в. Хо̄т на̄н рӯпитаӈкве ка̄сащегы̄н, та ва̄рмаль щирыл э̄лаль ханищтахтэ̄н, на̄нан ка̄с е̄мты. То̄нт на̄н а̄лпыл рӯпитаӈкве яныг ща̄гтыл минэгы̄н, э̄типа̄лаг ос ще̄мьян палт ща̄гтым ёхтэгы̄н тах. Ам а̄ти нас ты рӯпатамн патхатасум. Ханищтахтынэм порат ма̄н на̄й харыгтан ма̄н тотыглавесӯв. Тот суссӯв, хумус та̄н мирн нё̄тэ̄гыт, на̄й харыгтэ̄гыт, то̄нт ам ты ва̄рмаль щирыл акваг рӯпитаӈкве номылматасум. Ань ам атпан нупыл хо̄т та̄лум то̄влыс. Ты та̄лытныл хо̄тхуйплов та̄л ам на̄й харыгтан ва̄рмаль щирыл э̄лаль ханищтахтасум. Сергей Колупаев: — Ма̄хманув потраманыл халт ам акваг номсахтасум, ос ты урыл ла̄ве̄гум. Ам ще̄мьям ма̄гыс амки рӯпатам ва̄рилум. Та̄н ёмщакв о̄лнэ̄ныл ма̄гыс ам са̄в ё̄р пинсум. Ам о̄с нила ня̄врам о̄ньще̄гум: кит пыг, кит а̄ги. Ам ма̄ниг о̄лмумт о̄влэ̄т военныиг е̄мтуӈкве ка̄сащасум, тувыл ос каснэ хо̄тпаг ка̄сащасум. Ты хо̄тпаг ат кос е̄мтсум ос ще̄мьямт ам пе̄нтсылум ань акв а̄гим, акв пыгум каснэ хо̄тпаг о̄лэ̄г. Дмитрий Ярошенко: — Ам ма̄нь порат писалил па̄тлуптаӈкве ос молях ха̄йтуӈкве сака ка̄сащасум. Тувыл ам касуӈкве патсум. О̄влэ̄т ам ня̄врамыт каснэ ва̄рмальн ханищтан хо̄тпаг е̄мтуӈкве номсасум. Тувыл ос каснэ тэ̄лат ма̄щтыр нам о̄щнэ хо̄тпаг е̄мтуӈкве номылматсум. Ётылнув, хунь ва̄т нупыл хо̄т та̄лум то̄влыс, ам товтыл каснэ ва̄рмалит яныг намыл майве̄сум. Ам на̄нан тох ла̄ве̄гум, акв ма̄т ӯнлуӈкве патэгы̄н ке, нэ̄матарыг ат ро̄вегы̄н тах. Та̄ксар хо̄тпаг е̄мтнэ̄м ма̄гыс, яныг пӯмащипа ла̄тыӈ а̄нум касуӈкве ханищтам кӯщаюмн ла̄ве̄гум. Тав а̄нум та̄кыщ о̄ньщистэ. Ам юн мощща о̄лыгласум, са̄выӈпа̄лэ каснэ колт кассум, аквтуп китыт ще̄мьям тот о̄лыс. Владимир Долгалёв: — Ам полициян армия юипа̄лт рӯпитаӈкве ёхтысум. Ам о̄с тох номсэ̄гум, э̄рнэ рӯпата хо̄нтуӈкве таӈхегы̄н ке, тыи ма̄гыс ёмщакв ханищтахтэ̄н, нолам э̄лаль воратэ̄н. Ам ма̄ниг о̄лмумт о̄с мо̄т пыгыт хольт мори капыртасум. Ос арген лю̄ль ва̄рмаль нэ̄мхуньт ат ва̄рыгласум. Ёмас хо̄тпаг яныгме̄н. Вячеслав Смуров: — Ам рӯпатам мирн о̄с сака э̄ри, ОТРК «Югра» телекомпаният пӯмащ ля̄ххалыт суссылтэ̄гум. Аквматнакт ё̄мимам акв хо̄тпа а̄нум ювле ӯрмыгтастэ. Тав а̄нумн янытлан ла̄тыӈ ла̄выс: «Вячеслав, пӯмащипа наӈын. Наӈ а̄лпыл кина то̄тап хосыт татем пӯмащиг потраме̄гын. Ам хо̄тал палыт кӯньгантым ё̄мыгтэ̄гум». Ам ос на̄нан тох ла̄ве̄гум, о̄лупсанынт маныр та̄рвит ке е̄мталы, кӯньгантым э̄лаль о̄лэн. Потрыт оигпам юипа̄лт ка̄сыӈ ня̄врам таквина̄тэ̄н хаснэ нэ̄пак щё̄питас. Тот Наталья Комарова ос тув ёхталам кӯщаит пуссын ня̄врамыт ма̄гыс сымыӈ ла̄тыӈ хассыт.

1141 2017.02.09. Людмила ТЕТКИНА

Кӯщай нэ̄ мо̄лты та̄л сыс ва̄рум рӯпататэ урыл потыртас. Та̄л котиль э̄тпос 30 хо̄талэ̄т Ханты-Мансийск ӯст округ Думат депутатхо̄тпат сапра̄нин акванатхатыгласыт. То̄нт та̄н хӯрумхуйплов са̄ккон пирмайтасыт. О̄влэ̄т та̄н э̄лыпа̄ланылт округ яныг кӯщай нэ̄ Наталья Комарова мо̄лты та̄л сыс ва̄рум рӯпатаныл урыл потыртас. Государственный Думан пе̄риим депутатыт, Совет Федерацият рӯпитан хо̄тпат, миркол кӯщаит, округ правительстват рӯпитан ма̄хум таве хӯнтлуӈкве ёхталасыт. Наталья Комарова ла̄выс, ювле хультум та̄лт та̄н ёмас бюджет пирмайтасыт. Ка̄сыӈ программа э̄рнэ щирыл рӯпитас, ты хосыт тыт о̄лнэ ма̄хум акваг нё̄тве̄сыт. Олн сэ̄лнэ урыл Ань округ бюджетын са̄в олн ма̄во̄й но̄хвинэ ма̄хум ойтэ̄гыт. Мо̄лты та̄л ма̄во̄й о̄щнэ йильпи ат ма̄ хо̄нтвес, ос са̄т ма̄т ма̄хум рӯпитаӈкве о̄вылтахтасыт. Кондинский районт во̄р са̄грын компаният рӯпитэ̄гыт, та̄н кол ӯнттын ма̄гсыл нор яктэ̄гыт, па̄ртыт сылэ̄гыт. Норыт, па̄ртыт, иснасыт Великобританиян, Швециян, Индиян ос мо̄т хо̄н ма̄н тыналыяныл. Ӯйхул янмалтан хо̄тпат о̄с ёмащакв рӯпитэ̄гыт. Мо̄лты та̄л сыс та̄н са̄в мӯӈи, щаквит, нё̄выль ос мо̄т тэ̄нут тыналасыт. Ос 16 со̄тыра арыгкем тонна хӯл тыт пуввес. Ка̄сыӈ та̄лныл са̄внув хо̄тпат та̄нки ма̄гсыланыл рӯпитаӈкве о̄вылтахтэ̄гыт ос рӯпата та̄л о̄лнэ ма̄хум рӯпитаӈкве выгыт. Ань сака мощща хо̄тпа рӯпата та̄л о̄лэ̄гыт. Са̄всыр тэ̄нут, пормас тыналым олн сэ̄лэ̄гыт. То̄ва ма̄хум ань пормасаныл, тэ̄нутаныл Россия янытыл ос мо̄т хо̄н ма̄н тыналаӈкве патсыт. Ёмащакв рӯпитан хо̄тпат округ правительства па̄лыл нё̄тавет, са̄всыр субсидияолныл та̄ставет. Та та̄л сыс округ янытыл интернет ва̄рвес. Ты ищхӣпыӈ ут ёмащакв вос рӯпитас, ке̄рква̄лгыт ка̄сыӈ па̄выл мус хартавет. Ювле хультум та̄лт 550 ве̄рыста ке̄рква̄лыг пинвес. Ань Нижневартовский, Белоярский ос Октябрьский районыт 12 ма̄нь па̄вылкветт ты ут ёмащакв рӯпиты. Тамле ищхӣпыӈ ут о̄с акв ёмас тэ̄ла тотыс, ань округ янытыл о̄лнэ мир телефон хосыт 112 номерн свонитаӈкве ве̄рме̄гыт. Ань Югра ма̄т интернет о̄щнэ 630 со̄тыра э̄лумхо̄лас единый порталн хасхатасыт. Ма̄хум ты ут хосыт ня̄враманыл ма̄гсыл намнэ̄пакыт ос са̄всыр мо̄т э̄рнэ нэ̄пакыт ва̄ре̄гыт. Мо̄лты та̄л сыс 48 ве̄рыста палыт ма̄шинал яласан лё̄ӈх ва̄рвес ос 23 ве̄рыста ёмащакв щё̄питавес. Ты рӯпата ма̄гсыл ка̄сыӈ та̄л са̄в олн холтаве. Тувыл то̄ва ма̄т лё̄ӈхыт сака ощщаг ва̄равет, мо̄т ма̄т по̄сыт ат тагатавет ос тӯйт ёмащакв хот ат хилаве. Тыи ма̄гсыл сака са̄в ма̄хум сакватахтэ̄гыт ос а̄тимыг е̄мтэ̄гыт. Наталья Комарова миркол кӯщаит ты ва̄рмаль та̄рапаттуӈкве ла̄всанэ. Кол ӯнттын ва̄рмаль Яныг кӯщай нэ̄ ань ла̄выс, 2016 та̄л сыс округувт о̄лнэ ще̄мьят кит со̄тыра 789 о̄лнэ колыл ёвтве̄сыт. Са̄т со̄тыра 556 ще̄мья ос о̄лнэ кол ёвтуӈкве нё̄тве̄сыт, та̄н субсидияолныл майве̄сыт. Са̄в ще̄мья ипотекаолн висыт. Лов та̄л сыс тыт о̄лнэ ма̄хум 133 млрд. солко̄вил банкыт майве̄сыт. 61 со̄тыра ще̄мья о̄лнэ колыт ёвтсыт манос ӯнттысыт. Ма̄ньлат ще̄мьят о̄с ёмащакв нё̄тавет, та̄н о̄лнэ колыл мивет. Ань округувт ма̄хум ма̄гсыл колыт ӯнттавет, рущ ла̄тӈыл «арендный колыг» ла̄вавет. Ты пора сыс нила яныг кол ӯнттувес, тув 600 ще̄мья о̄луӈкве ва̄нтлас. Ювле хультум та̄лт Сургут ӯст о̄с тамле кол а̄стлавес, ань 512 ще̄мья тув ва̄нтлуӈкве ве̄рме̄гыт. Балокколт о̄лнэ ще̄мьят о̄с ат ёрувлавет. 2012 та̄лныл ты пора мус нила со̄тыра арыгкем ще̄мья йильпи колыл майве̄сыт. Ань йильпи са̄ккон щирыл, са̄в ня̄врам о̄щнэ ще̄мьят ма̄ло̄мт виӈкве ат ке ка̄саще̄гыт, та̄н олныл мивет. Ювле хультум та̄лт 522 ще̄мья кол ӯнттын ма̄ пе̄нтсыл кол ёвтнэ олныл ойтве̄сыт. Миркол кӯщаит округувт о̄лнэ ка̄сыӈ хо̄тпа урыл номсэ̄гыт ос о̄лупса ёмаснувег ос кӯпнитнувег ва̄руӈкве таӈхе̄гыт. Тыи ма̄гсыл акваг са̄в рӯпитэ̄гыт. Та̄н минам та̄л сыс па̄влытт, ӯсытт о̄лнэ мирколыт 346 млн. солко̄вил та̄стысаныл. Ты олныл Белоярский ӯст на̄лми ва̄татэ ёмащакв щё̄питавес, Пойковский па̄вылт «Югра» нампа парк ва̄рвес. Покачи ӯст яныг хо̄нтлын нак порат порслым ма̄хум ма̄гсыл памятник тӯщтувес. Соссаӈ ма̄хумн нё̄тнэ урыл Кӯщай нэ̄ ла̄выс, тыт о̄лнэ соссаӈ мирыт та̄н акваг ӯргалым о̄ньщияныл ос та̄н ёмащакв о̄лнэ̄ныл ма̄гыл са̄в олн та̄стыглэ̄гыт. Ань пе̄с йис ма̄т о̄лнэ соссаӈ ще̄мьят ма̄шинаныл ма̄гсыл на̄локолн воссыг ат ойтэ̄гыт. Ма̄ньщи, ханты ос ё̄рн ма̄хум пе̄с йис ва̄рмаляныл но̄хво̄рмалтан ма̄гсыл о̄с нё̄тавет. Та та̄лт Ӯй йӣквнэ ва̄рмаль урыл ва̄нэ хо̄тпат акванатыглаве̄сыт, та̄н а̄гитпыгыт йӣквуӈкве ос э̄ргуӈкве ханищтасыт. Мир пусмалтан ва̄рмаль, ня̄врамыт ханищтан ва̄рмаль урыл кӯщай нэ̄ ла̄выс, округувт ма̄хум ёмаснувег вос о̄лсыт, мирув акваг вос са̄вмыс, тав ос ва̄ӈын хо̄тпанэ са̄в рӯпитэ̄гыт. Ка̄сыӈ та̄л округувт ма̄шинал яласан лё̄ӈхыт пинавет, я̄ ӯлтта унсахыт ва̄равет, о̄лнэ колыт, ня̄врамыт ӯргалан колыт ос ханищтахтын колыт, пӯльницат ӯнттавет.

1141 2017.02.09. Тамара МЕРОВА

Номтыӈыг ханищтахтын а̄гитпыгыт. Ва̄т са̄грапнал э̄тпос ва̄т нупыл ат щислатэ Татья янытлан хо̄талыг ла̄ваве. Университетт ханищтахтын ма̄ньлат хо̄тпатын тав сака янытлаве. Та хо̄тал Югорский государственный университетыт рӯпитан хо̄тпат ос студентыт аквъёт сыресыр ка̄с ты кастыл ва̄ре̄гыт, нас ӯщлахтэ̄гыт. Тувыл кӯщаит ля̄ххал тотнэ ма̄хум э̄лыпа̄лт та̄л сыс е̄мталам ва̄рмаляныл о̄вылтыт потыртэ̄гыт. Ань 2017 та̄л Югравт пуста̄гыл о̄лнэ нак янытлан та̄лыг намтвес. Таима̄гыс ма̄н ётув та̄н спорт яныг коланылт акванхо̄нтхатыгласыт. О̄влэ̄т спортивный коланыл ма̄навн суссылтасаныл, пуста̄гыл о̄лнэ ма̄гыс та̄н матыра̄ти пуссын тот о̄щнэ̄ныл. Тувыл акв колнакн во̄ввесӯв, тот ща̄й айнэ пасан ва̄рмыт, ма̄н тот э̄лаль потыртасӯв. ЮГУ кӯщай нэ̄ Татьяна Карминская тув во̄выглам мӯй ма̄хманэ пуссын хӯлтсанэ ос тувыл ка̄сыӈ хо̄тпа аквкит ла̄тыӈ ла̄выс. ЮГУ проректорыг о̄лнэ хум Роман Кучин ла̄выс, та̄н палтаныл 5 со̄тыра 555 студентыт высший образование ма̄гыс ханищтахтэ̄гыт ос 5 со̄тыра 550 — средний образование а̄стлэ̄гыт ос рӯпитаӈкве патэ̄гыт. Са̄выӈпа̄лэ студентыт ёмщакв ханищтахтэ̄гыт ос таима̄гыс стипендиял ойтавет. Хотты наукат матыр ва̄рмаль та̄рапаттын хо̄тпат я̄нас олннё̄тмилыл мивет. Ты та̄л о̄выл курсыт ханищтахтын а̄гитпыгыт пуссын «5» ос «4» оценка о̄ньще̄гыт. Тувыл «Бережное производство» ханищтан накыт урыл Юлия Родь менеджмент ос экономика институтанылт о̄лнэ кӯщай нэ̄ ла̄тыӈ тотыс. Тав юипа̄лэ̄т «Северные строительные технологии» нампа ва̄рнутыт урыл ЮГУ а̄стлам ос колыт ӯнттын хо̄тпат потыртасыт. Татьяна Дятлова, соссаӈ ма̄хум нампа институтт кӯщай нэ̄, такви рӯпататэ урыл китыглавес. ЮГУ финноугор рӯт ма̄хум университетаныл ёт акванюрщхатым о̄лэ̄гыт. Та̄н та̄нки университетаныл халт Ассоциация ва̄рсыт, тувыл образование ос наука щирыл аквъёт рӯпитэ̄гыт. Ка̄сыӈ та̄л «Мисс студенчества Финно-Угрия» нампа касыл ва̄рыглэ̄гыт, ань ты о̄вылтыт мо̄лты та̄лкасум а̄ги Анастасия Батющенко потыртас. Тав «Мисс стиль» номинацият но̄хпатыс. Мо̄лты та̄лт соссаӈ ще̄мьят хумус ня̄врам янмалтаве, а̄гит тамле пе̄с накыт суссылтасыт. Ты та̄л сыресыр ёнгилыт тах суссылтэ̄гыт, таима̄гыс ань касылн минуӈкве тамле накыт ва̄нэ а̄ги кинсаве. Хумус ЮГУ мо̄т хо̄н университетыт ёт рӯпиты, ма̄навн Оксана Гололобова потыртас. Югорский университетыт студентыт мо̄т хо̄н ла̄тӈыт пӯмщалэ̄гыт ос ка̄сащим та̄наныл ханищтэ̄гыт. То̄ванакт та̄н рӯпатанылт хотты ла̄тыӈ ва̄нэ нак сака э̄ри. Ань ЮГУ 30 са̄всыр мот хо̄н университетыт ёт аквъёт рӯпитан ос ханищтан соглашениенэ̄пак хансыс. Та щирыл 2016 та̄лт лов студентыт Чехиян, Венгриян, Финляндиян, Китайн ос Южный Кореян э̄лаль ханищтахтуӈкве минасыт. Ма̄н палтув са̄в мо̄т хо̄н ма̄ныл студентыт ман аспирантыт о̄с ёхталэ̄гыт. Ань тыг Венгрияныл Норберт Силадьи ханищтахтуӈкве ёхтыс, маныр тав тыт ва̄ри, ты урыл я̄нас потыр ловиньтэ̄н. Ос Чехия ма̄ныл Ивана Враёва ЮГУт рӯпиты, тав тыт студентыт чешский ла̄тӈыл потыртаӈкве ханищтыянэ. Тэ̄натэ̄н тыт о̄луӈкве сака мӯсты. ЮГУт студентыт ханищтахтынэ̄ныл коныпал са̄всыр щирыл касэ̄гыт, та̄нки касылыт ва̄ре̄гыт ос мо̄т российский университетыт халт но̄хпатыглэ̄гыт. Ань о̄с акв касылт но̄хпатсыт ос мӯйлупса юв тотсыт. Ты урыл студенческий советыт пуӈктотнэ а̄гитпыгыт потыртасыт. О̄лнэ коланылт я̄нас совет о̄с ва̄рсыт, тот о̄лнэ ва̄рмаляныл уральтым о̄ньщияныл. А̄гитпыгыт нэ̄мат лю̄ль накын ул вос патыгласыт, та̄н акваннё̄тхатым, акванюрщхатым вос о̄лэ̄гыт. Аквтох сыресыр касылыт щё̄пита̄лэ̄гыт ос ёмщакв ӯщлахтэ̄гыт.

1141 2017.02.09. Валентина Васильева

А̄с ма̄хум алфавитаныл урыл мирколт потыртасыт. Округ мирколт яныг сапра̄ни ва̄рыглавес. Тув атхатыглам соссаӈ хо̄тпат са̄всыр ма̄т рӯпитэ̄гыт, та̄н ань ханты ла̄тыӈ урыл потыртасыт. А̄с ма̄хум акв сака та̄рвитыӈ ва̄рмальн ань я̄рмысыт. Хӯрум та̄л минам порат то̄ва учёный хо̄тпат йильпи алфавит щё̄питасыт, та̄н хащта̄л букват тот хассыт. Ос ань таӈхе̄гыт, ты щирыл ка̄сыӈ хо̄тпаныл вос хансы, ка̄сыӈ школат ханты ня̄врамыт ты йильпи алфавитн вос ханищтавет. Ловиньтан нэ̄пакыт, учебникыт, ханты газетаныл пуссын ты йильпи буквал вос хансавет. Са̄выӈпа̄лэ ханты ма̄хум ты йильпи ва̄рмаль ёт щар ат ка̄сащасыт. Та̄н ла̄тӈаныл ань пуссын щар мо̄т щирыл хансуӈкв э̄ре̄гыт. Нила та̄лыг моще̄рт ты е̄мты, та̄н та̄нти халанылт воритотэ̄гыт. Ты сапра̄нит о̄лум Ирина Лисютина образование департаментыт рӯпиты. Нэ̄ ла̄выс, округ департамент приказе щирыл, Белоярский район хӯрум ханты па̄влытт (Полноват, Касум ос Ванзеват) школат ня̄врамыт ты йильпи алфавит щирыл ханищтаӈкв вос патве̄сыт. Хӯрмит та̄л туп Касум па̄вылт ня̄врамыт тыщирыл ханищтавет. Ванзеват па̄вылт школат рӯпитан ма̄хум пе̄с учебникыт щирыл ня̄врамыт ёт рӯпитэ̄гыт. То̄ват ат ка̄саще̄гыт Яныгпа̄ла э̄ква Мария Кузьминична Волдина ты сапра̄нит ла̄выс, ты йильпи тэ̄ла ёт тав о̄с щар ат ка̄сащи. Ма̄нь ня̄врамыт ань ща̄нь ла̄тӈаныл щар ат ва̄ганыл. Тав са̄всыр ма̄т яласы, школан хунь во̄ваве, соссаӈ ня̄врамыт пуссын титыглыянэ – хотьютаныл та̄н халанылт ща̄нь ла̄тӈе ва̄гтэ. Аквтит а̄гипыг туп ва̄гтэ. Ос йильпи хащта̄л букват те нэ̄глэ̄гыт, то̄нт ня̄врамытн сака та̄рвитыӈ паты. Сака ёмас ла̄тыӈ Александр Новьюхов ла̄выс. Тав ань округ Дума депутатыг о̄лы, са̄кконыт пуссын ёмащакв ва̄ганэ. Тав тох потыртас. Ань Касум па̄выл ня̄врамыт йильпи букватн ханищтавет. Ос ма̄к тамле са̄ккон о̄лы, ма̄нь ня̄врамыт туп государственный программа щирыл ханищтаӈкв э̄ре̄гыт. Са̄всыр йильпи тэ̄ла школат тӯлуӈкв ос йильпи щирыл та̄наныл ханищтаӈкв са̄кконыт щирыл ат ро̄ви. Манрыг Касум ня̄врамыт ты тэ̄лал ва̄рве̄сыт. Наука ма̄хум потраныл А̄сугорский институт кӯщай нэ̄ Виктория Сподина ла̄выс, тав йильпи алфавит хансум ма̄хум янытлыянэ, та̄нанылн нё̄ты. Ос э̄лаль тох ла̄выс, 1990 та̄лыт порат щё̄питым ханты алфавит сака пе̄с, ань тав школатн щар ат хо̄йхаты. Йильпи рӯпата о̄вылтам ма̄хум пуссын нё̄туӈкв э̄ре̄гыт. Ма̄к та̄н ты ханты мир ща̄нь ла̄тӈе ёмащакв ва̄ганныл. Ань А̄с ма̄хум нила диалект щирыл потыртэ̄гыт. Ты йильпи алфавит пирмайтаве те, то̄нт ка̄сыӈ ла̄тыӈ хумус ля̄галаве, та̄н таве э̄рнэ щирыл нэ̄пакн хансуӈкв ве̄рмияныл. Ня̄врамыт ханищтан нэ̄пакыт урыл Учебникыт урыл Софья Каксина потыртас. Тав Касум па̄вылт ня̄врамыт ханты ла̄тӈын ханищтыянэ, Ханты-Мансийск ӯсн ат ёхталас. Белоярский ӯст видеосвязь урыл такви рӯпататэ урыл тох ла̄выс, та̄н са̄в та̄л пе̄с учебникыт щирыл ня̄врамыт ханищтасаныл. Ань ос йильпи букватыл хансым учебникыт школан о̄с сака ат ро̄ве̄гыт. Та̄наныл йильпииг хансуӈкв э̄ре̄гыт. Ос ты тэ̄ла хунь о̄вылтаве, школат рӯпитан ма̄хум тув вос во̄вавет, та̄н ты ёмащакв ва̄ганыл, ня̄врамыт ма̄гыс манырсыр учебникыт э̄ре̄гыт. Йильпи букват ос алфавит урыл нэ̄ тох ла̄выс, тав о̄влэ̄т о̄с щар ат ка̄сащас, такви ты букват ат торгамтасанэ. Тувыл ла̄щлакв ёмащакв ханищтасанэ, ань ня̄врамыт ты йильпи букват хансуӈкв ханищты. Ня̄врамыт ос та̄н ща̄няныла̄щаныл нэ̄матыр ювле ат ла̄ве̄гыт, та̄н ты тэ̄ла ёт ка̄сащасыт ман а̄ти. Сапра̄ни кӯщай ла̄тӈе Ты сапра̄нит общественный ос внешний связь департамент кӯщай нэ̄ Елена Шумакова пуӈктотнэ хо̄тпаг о̄лыс. Ка̄сыӈ хо̄тпа потыртаме юипа̄лт тав тамле ла̄тыӈ ла̄выс. Ань э̄лаль ханты алфавит хаснэ рӯпата ва̄рнэ ма̄гыс яныг учёный хо̄тпат тыг вос во̄вавет. Та̄н ты ёмащакв ла̄ве̄гыт, школат ханищтахтын ня̄врамыт ма̄гыс манырсыр алфавит хансуӈкв э̄ри, ханищтан нэ̄пакыт э̄рнэ щирыл хумус хансавет. Тувыл округувт яныг комиссия атаве, рущ ла̄тӈыл те ла̄вуӈкв – «независимый» рӯпата та̄н ва̄руӈкв патэ̄гыт. Нэ̄мхотьют та̄нанылн хӯлтнэ ла̄тыӈ ат ла̄ви. Образование департаментыт рӯпитан ма̄хум о̄с ла̄вве̄сыт, та̄н округув янытыл ка̄сыӈ школат рӯпитан хо̄тпат ос ня̄врамыт ща̄няныла̄щаныл вос титыглыяныл – ты йильпи рӯпата ос йильпи алфавит ханты мирн э̄ри ман а̄ти. Ма̄хум титыгланэ̄ныл юипа̄лт тах ущ ты рӯпата э̄лаль ва̄руӈкв патаве. Ос ты сапра̄нит о̄лум ма̄хум са̄выӈпа̄лэ пуссын ла̄всыт, ты йильпи алфавит та̄н та̄нти ёмащакв ат торгамтыяныл. Ос ма̄нь ня̄врамыт школат саватаӈкв ёмас хунь. Тамле о̄лупса ты е̄мтыс, аквтит хо̄тпа та̄нти мираныл ма̄гыс йильпи букват номылматсыт ос ань пуссын ня̄врамыт ты йильпи тэ̄лан вос ханищтавет. Мо̄т хо̄тпаныл ка̄саще̄гыт ман а̄ти, ань о̄с тах та̄рапаттаве. Тамле ты ва̄рмаль А̄с ма̄хум ань о̄ньще̄гыт. Ма̄ньщи ла̄тӈув урыл Ты институтт ма̄н ма̄ньщи ма̄хманув о̄с рӯпитэ̄гыт. Ос юио̄выл та̄лытт матрыг та̄н о̄с йильпи щирыл то̄ва ла̄тӈыт хансуӈкв патсаныл. Ты ла̄тӈыт ловиньтаӈкв ос хансуӈкв сака та̄рвитыӈ. Ос ла̄тыӈ ханищтан ня̄врам хумус торгамтытэ, э̄рнэ щирыл хумус хансуӈкв э̄ри – пе̄с учебникыт манос ущты хансым нэ̄пакыт щирыл. Ань тот рӯпитан ма̄хум то̄ва ла̄тӈыт тох хансыяныл, на̄н ань ловиньтэ̄н: Тэ̄лыиг – тэлыйыг; Туииг – туйыйыг; Ва̄иг – вайыг; На̄иӈхап на̄йыӈхап.

1141 2017.02.09. Валентина Васильева

Ялпыӈ тӯр урыл потыр о̄лыс. Ты э̄тпос округ Думат Ассамблея сапра̄ниятэ о̄лыс. Тув Государственный Дума депутат нэ̄ Татьяна Степановна Гоголева во̄выглавес. Та̄н соссаӈ ма̄хум о̄лупсаныл урыл потыртасыт. Ма̄н округувт акв сака ялпыӈ тӯр о̄лы, тав ла̄ваве — Нумто. Ты яныг тӯр Белоярский районт о̄лы, та ляпат ханты ос ё̄рн ма̄хум са̄лы ӯрим о̄лэ̄гыт. Та̄н ты тӯр сака ӯргалыяныл ос ялпыӈтыяныл. Ос ань акв та̄рвитыӈ ва̄рмаль осннэ̄глыс. Мо̄лты та̄л та ма̄н ма̄во̄й но̄хвинэ ма̄хум рӯпитаӈкв та̄ртве̄сыт. Потыртаве, та тӯр ляпат ос витэ ёлыпа̄лт сака са̄в ма̄во̄й о̄лы. Ма̄тэ ёмащакв сусвес, ос нефтяникытн хоталь новхатуӈкв ат ро̄ви, пуссын нэ̄пакн хасвес. Ос ань ты сапра̄нит та̄рапатыс – нефтяник ма̄хум та̄н та̄нти та ма̄т ханищтаманыл, таима̄гыс тот рӯпитанэ̄ныл ма̄гыс лицензиянэ̄пакыл майве̄сыт. Ань сапра̄нит о̄лум кӯщаит Татьяна Степановнан ла̄вве̄сыт, та̄н ты рӯпата щар ат ро̄внэ щирыл ва̄рсаныл. Та е̄рт о̄лнэ соссаӈ ма̄хум моще̄рт тот ма̄ та̄л ты хультэ̄гыт. Таквсы тав та е̄рн ялыс. Ань са̄лы ӯрим са̄выӈпа̄лэ яныглат ма̄хум тот во̄рт о̄лэ̄гыт. Та̄н о̄лнэ ма̄наныл родовой угодияг пуссын хассаныл. Ос ляпат ма̄во̄й но̄хвинэ ма̄хум те рӯпитэ̄гыт, та ма̄ щар я̄ӈкылма хурипаг е̄мты. Витэ но̄хпащиртаве. Хантыт о̄лнэ коланыл урамыӈ ма̄н ань ӯнттыяныл, ос мувлахи нас витыӈ ма̄. Са̄лыт ё̄мыгтан ма̄ тот сака мощща. Нумто тӯр ляпа ма̄тэ ань тыг мус сака ат новвес. Ань тах «Сургутнефтегаз» нампа компаният рӯпитан ма̄хум тув рӯпитаӈкв та ёхтэ̄гыт. Ань ты сапра̄нит о̄лум миркол кӯщаит тыкос ла̄всыт, нефтяникыт тот сака ёмащакв ос ма̄ ӯргалым рӯпитаӈкв патэ̄гыт. Ассамблеят рӯпитан хо̄тпат та̄нанылн ла̄всыт, та̄н Нумто тӯр ос ляпа ма̄тэ акваг уральтым о̄ньщуӈкв э̄лаль патыяныл. Со̄ль, та тӯр ялпыӈе сака яныг. Ос Россия ма̄гыс тав ма̄ щуне сака э̄ри.

1141 2017.02.09. Людмила ТЕТКИНА

Тав а̄гмыӈмосыӈ мирн нё̄ты. РИЦ «Югра» нампа ля̄ххал тотнэ колн Эдуард Исаков ёхталас. Ты хум Москва ӯст Совет Федерацият рӯпиты. Тав ма̄н округувныл тув пе̄риявес. Ханты-Мансийск ӯсн ёхталаме порат тав мо̄лты та̄л сыс ва̄рум рӯпататэ урыл потыртас. Кӯщай хум ла̄выс: «Ам мирн нё̄тнэ Комитетыт рӯпитэ̄гум. Тот ма̄н а̄гмыӈмосыӈ хо̄тпат ма̄гсыл э̄рнэ са̄кконыт хансэ̄в. Ювле хультум та̄л оигпан э̄лыпалт акв ёмас са̄ккон пирмайтавес. А̄гмыӈмосыӈ хо̄тпат реестрнэ̄пакн хансуӈкве патавет. Кӯщаит ва̄ӈкве патэ̄гыт, манаса̄вит ос хоты ма̄т ты ма̄хум о̄лэ̄гыт, нё̄туӈкве ёмащакве тах ве̄рмавет. Ма̄н савалап ня̄врамыт ма̄гсыл са̄ккон ань щё̄питэ̄в. То̄ва савалап ня̄врамыт ща̄няныла̄щаныл наманыл ат ва̄вет ос намнэ̄паканылн та̄н ат хансымат. Тыи ма̄гсыл а̄гитпыгыт то̄ват нё̄тмилыл ат мивет. Та̄н о̄с ёмащакв вос нё̄тве̄сыт, ты са̄ккон пирмайтаӈкве ань э̄ри. Совет Федерация колт рӯпитан ма̄хум спорт ма̄гсыл акв са̄ккон щё̄питэ̄гыт. Ань касуӈкве ялантан ма̄ньлат а̄гитпыгыт са̄всыр лю̄ль тэ̄рпит аюӈкве тренерытын кащилтавет. Йильпи са̄ккон щирыл, ты хо̄тпат тох ва̄руӈкве ке патэ̄гыт, сутытавет. Мо̄т хансым са̄ккон щирыл, спортивный командат мощщанув олныл тах та̄ставет. Хультум олныт мо̄т э̄рнэ тэ̄ла ма̄гсыл холтавет. Ты олныл ма̄нь па̄вылквет ос ӯсытт са̄всыр каснэ колыт тах ӯнттавет, са̄внув ма̄хум тув вос ёхталэ̄гыт ос са̄всыр щирыл вос касэ̄гыт, пуста̄гыл э̄лаль вос о̄лэ̄гыт». Ты та̄л ма̄н округувт ма̄хум пуста̄гыл о̄лнэ та̄лыг намаявес. Эдуард Исаков ла̄выс: «Ань ма̄хум пусмалтан ма̄гсыл са̄в ёмас пӯльницат ӯнттавет, са̄всыр ищхӣпыӈ утыл ёвтавет. Ты тэ̄ла ма̄гсыл сака са̄в олн акваг холтаве. Тувыл ма̄хум пуста̄гыл олнэ̄ныл урыл та̄нкина̄нылн номсахтуӈкве э̄ри. Ам номсэ̄гум, та̄н ма̄гсыланыл а̄ти са̄в пӯльницат ӯнттуӈкве ос са̄всыр тэ̄рпи ёвтуӈкве э̄ри. Ты пе̄нтсыл округ янытыл са̄всыр каснэ колыт вос ӯнттавет, ма̄хманув тув ялантым пуста̄гыл э̄лаль о̄луӈкве тах патэ̄гыт». А̄гмыӈмосыӈ хо̄тпат ма̄гсыл мирхал касыл щё̄пита̄лаве, рущ ла̄тӈыл «Паралимпийские игры» ла̄ваве. Мо̄лты та̄лт Бразилия мо̄т хо̄н ма̄т о̄лум касылн Россия спортменыт ат та̄ртве̄сыт. Ань ма̄ янытыл о̄лнэ а̄гмыӈмосыӈ ма̄хум мо̄т касылн щё̄питахтэ̄гыт, ма̄н хо̄тпанув тув о̄с ат во̄вве̄сыт. Ты ва̄рмаль урыл Эдуард Исаков маныр номт о̄ньщи, ля̄ххал тотнэ хо̄тпатын китыглавес. Тав ювле ла̄выс: «Ма̄н ма̄хманув са̄всыр касылн ялантым акваг но̄хпатэ̄гыт. Тыи ма̄гсыл, улпыл, та̄н тув ялуӈкве ат та̄ртавет. Ань ма̄н сутытахтуӈкве о̄вылтахтасӯв. Тыгыл ёмас тэ̄лаг е̄мты ман а̄ти, ань щар ат ва̄глум».

1141 2017.02.09. Людмила Алгадьева

Ма̄ньлат соссаӈ хо̄тпат са̄в олныл ойтавет. «Югра» нампа телеканалт рӯпитан хо̄тпат са̄всыр передачат щё̄пита̄лэ̄гыт ос тув округ мирколт рӯпитан кӯщаит во̄выглыяныл. Та̄н кӯщаит ва̄рнэ рӯпатаныл урыл китыглыяныл ос тыт о̄лнэ ма̄хум та̄рвитыӈ ва̄рмаляныл урыл та̄нанылн потыртэ̄гыт. Ань та̄н о̄с акв передача ва̄ре̄гыт, рущ ла̄тӈыл «Открытый регион» намаим о̄лы. Та̄л котиль э̄тпос 24 хо̄талэ̄т та̄н тамле передача щё̄питасыт ос округ мирколт рӯпитан кӯщаит Алексей Шипилов, Алексей Забозлаев, Всеволод Кольцов, Павел Сидоров ос Юрий Южаков тув во̄выгласаныл. Яныг кӯщаит ёт хо̄нтхатыгламаныл порат ля̄ххал тотнэ ма̄хум са̄всыр тэ̄ла урыл пӯмщалахтасыт. Ма̄н, редакцият рӯпитан нэ̄т, о̄с тув во̄виньта̄лвесӯв. «Ханты ясанг» нампа газетат рӯпитан нэ̄ Ирина Самсонова а̄гитпыгыт ханищтан ва̄рмаль урыл кӯщаит китыгласанэ. Тав ла̄выс: «Ань са̄в ма̄ньщи, ханты ос ё̄рн ня̄врамыт школа а̄стланэ̄ныл юипа̄лт э̄лаль ат ханищтахтэ̄гыт. Мо̄таныт училищат манос университетыт ханищтахтэ̄гыт кос, тувыл та̄нки олн ойтэ̄гыт. Ты э̄лыпа̄лт соссаӈ ма̄хум льгота щирыл ханищтахтуӈкве ве̄рмысыт. Тамле тэ̄ла ювле ва̄раве ман а̄ти? ». Округ мирколт рӯпитан кӯщай Всеволод Кольцов таве̄н ла̄выс: «Ма̄н пуссын Россия ма̄т о̄лэ̄в. Ань рӯпитан са̄ккон щирыл, ня̄врамыт пуссын э̄лаль ханищтахтуӈкве ве̄рме̄гыт. Ма̄н округувт соссаӈ ма̄хум ӯргалым о̄ньщавет ос та̄н ма̄гсыланыл са̄всыр са̄кконыт ос программат пирмайтавет. «Социальноэкономическое развитие коренных малочисленных народов Севера до 2020 года» нампа яныг программа хосыт соссаӈ ма̄хум ань ёмащакв нё̄тавет. Ханищтахтын ма̄ньлат хо̄тпат урыл тот о̄с хансым о̄лы. Училищат манос университетыт ханищтахтын а̄гитпыгыт ща̄няныла̄щаныл та̄нки олн ке ойтэ̄гыт ос ще̄мьяныл нусаг ке о̄лэ̄гыт, та̄н олнаныл ювле мивет. Университетыт ханищтахтын ня̄врамыт акв та̄л 100 со̄тыра солко̄вил ювле выгыт, заочный щирыл ханищтахтын а̄гитпыгыт 55 со̄тыра солко̄вил мивет. Училищат ханищтахтын ня̄врамыт акв та̄л сыс 50 со̄тыра солко̄вил ювле ойтавет, заочный щирыл ханищтахтын ма̄хум 25 со̄тыра олн ювле виӈкве ве̄рме̄гыт. Ты коныпал та̄н ка̄сыӈ та̄л ханищтахтын нэ̄пакыт, пормасыт ёвтнэ ма̄гсыл ос та̄л сыс акв щёс юв ялантан ма̄гсыл олныл мивет. Мо̄лты та̄лт ты ня̄врамыт ма̄гсыл округ бюджетныл 36 млн. солко̄ви та̄стыглавес. Ты олныл 580 ня̄врам нё̄тве̄сыт. Ма̄ньщи, ханты ос ё̄рн ня̄врамыт Россия янытыл о̄лнэ университетыт «целевой набор» щирыл ханищтахтуӈкве о̄с вивет. То̄нт олн ойтуӈкве щар ат э̄ри. Та̄н ань ма̄вит ӯргалан хо̄тпаг, метеорологыг Полярный академият, Арктика университетыт ханищтахтуӈкве ве̄рме̄гыт. 2016 та̄лт школа а̄стлам соссаӈ ня̄врамыт халт 52% са̄вит училищат ос 44% са̄вит университетыт ханищтахтэ̄гыт. Ань ма̄ньщи, ханты, ё̄рн а̄гитпыгыт халт 700 училищан ос 100 арыгкем ня̄врам ВУЗын ялантэ̄гыт. Та̄н халанылт 38 э̄лумхо̄лас ма̄во̄й но̄хвинэ хо̄тпаг ханищтахтэ̄гыт. Ам номсэ̄гум, ты ня̄врамыт та̄нки э̄лаль ёмащкв ханищтахтуӈкве патэ̄гыт ке, та̄н пуссын тах нё̄тавет». Сургут ӯсныл ёхталам нэ̄ Алексей Шипилов китыгластэ, тав ла̄выс: «Ань ма̄хум акваг потыртэ̄гыт, Сургут ӯс ос Сургутский район мирколыг аквантотаве̄г. Тамле тэ̄ла со̄ль ва̄раве манос а̄ти? ». Алексей Шипилов ювле ла̄выс, ты ва̄рмаль урыл та̄н ань номсахтэ̄гыт. Ты э̄лыпа̄лт тамле рӯпата та̄н Ха̄льӯс районт ва̄рсыт, район ос па̄выл мирколыг аквантотвесы̄г. Тот ань па̄выл ос район кӯщаит акв колт рӯпитэ̄гыт. То̄ва хо̄тпат рӯпатаныл по̄хын ке̄тве̄сыт, ань ты хосыт са̄внув олн хультыс. Ты олныт мо̄т э̄рнэ тэ̄ла ма̄гсыл ань та̄ставет. Сургут ӯс ос район о̄с аквты щирыл аквантотуӈкве ро̄ви ман а̄ти, округ миркол кӯщаит ань номсахтэ̄гыт. Сургут ӯст о̄лнэ мир са̄вми, тот акваг са̄в о̄лнэ колыт, пӯльницат, ханищтахтын колыт ӯнттуӈкве э̄ри, тувыл ма̄ щар ат то̄вылхаты. Тыи ма̄гсыл та̄н ты рӯпата тот о̄с ва̄руӈкве номсэ̄гыт. Ты передачан ёхталам ля̄ххал тотнэ хо̄тпат са̄всыр ва̄рмалит урыл пӯмщалахтасыт. Акват ма̄шинат яласаӈ лё̄ӈхыт, ма̄во̄й но̄хвинэ ва̄рмаль урыл, мо̄таныт ос пӯльницат, школат ӯнттын тэ̄лат урыл китыглахтасыт. Кӯщаит ты ва̄рмалит урыл ювле потыртасыт.

1141 2017.02.09. Тамара ХАТАНЕВА

Ханищтап урыл потыртасыт. Та э̄тпост департаментыт о̄лнэ кӯщаит та̄нки рӯпатаныл о̄вылтыт ла̄тыӈ ва̄ре̄гыт. Та̄н округ янытыл ищхӣпыӈ ут хосыт мо̄т кӯщаитн хӯнтлавет ос э̄рнэ порат ла̄тыӈ ювле ла̄ве̄гыт манос матыр китыглэ̄гыт. Любовь Ковешникова, образование ос ма̄ньлат ма̄хум ёт рӯпитан тэ̄лат кӯщай нэ̄, ла̄выс: «2016 та̄л сыс 21 йильпи садик ӯнттувес. Тув 3 со̄тыра 645 са̄вит ма̄нь ня̄врамакве ялантаӈкве патсыт. Округ янытыл 448 садик о̄лы, то̄ват та̄нки щирыл рӯпитым олн сэ̄лэ̄гыт. Мо̄лал та̄нанылн нё̄тмил ва̄рнэ ма̄гыс «Сертификат дошкольника» нампа лиценция щё̄питавес. Школат ханищтахтын ня̄врамыт о̄с тамле нэ̄пак о̄ньще̄гыт. Ань 2 со̄тыра 700 э̄лумхо̄лас ты нэ̄пак висыт ос тув та̄стым олнытыл ойтхатуӈкве ве̄рме̄гыт. Акв сертификатнэ̄пак тынэ 16 со̄тыра 419 солко̄ви са̄вит о̄лы, ос а̄гмыӈмосыӈ ня̄врам ма̄гыс минэ нэ̄пак тынэ 16 со̄тыра 887 солко̄ви са̄вит о̄лы». Кӯщай нэ̄ школат ханищтахтын а̄гитпыгыт о̄вылтыт о̄с потыртас. Соссаӈ ня̄врамыт ханищтан тэ̄ла урыл нэ̄матыр ат ла̄выс. Пуссын ла̄вум ля̄ххалыт на̄н округ образование нампа ищхӣпыӈ ло̄псэ̄т ловиньтаӈкве ве̄рмегы̄н.

1141 2017.02.09. Тамара МЕРОВА

Рӯпатаныл ма̄гыс э̄сгавет. Общественный ос внешний связь департаментыт о̄лнэ кӯщай нэ̄ Елена Шумакова 2016 та̄л сыс ва̄рум рӯпатаныл о̄вылтыт ля̄ххал тотнэ хо̄тпат э̄лыпа̄лт потыртас. Тав та̄нанылн пӯмащипа ла̄тыӈ ла̄выс, та̄н акваннё̄тхатым са̄всыр ёмас тэ̄лат ва̄рсыт. Кӯщай нэ̄ ла̄выс, мо̄лты та̄лт та̄н хӯрум ва̄рмалитыт ёмас рӯпитасыт, ос пуссын тэ̄ланыл э̄рнэг тотнэ̄ныл ма̄гыс мо̄т регионыт халт но̄хнув патсыт. Таима̄гыс департамент РФ Министерства па̄лыл э̄сгувес ос мо̄т хо̄тпат тэ̄ланыл аквтахольт ма̄кыг тотуӈкве, аквтох ка̄ркамыг о̄луӈкве ла̄вве̄сыт. Ма̄н ма̄хманув са̄всыр некоммерческий колыт, российский ос мо̄т хо̄н ма̄ныл акванатхатам нё̄тмил ва̄рнэ колыт ёт юрщхатым о̄лэ̄гыт ос та̄н номтаныл тэ̄лаг ва̄руӈкве нё̄тэ̄гыт. Та̄н ань 85 са̄всыр некоммерческий колыт ёт рӯпитэ̄гыт. Тувыл ля̄ххал тотнэ колыт тэ̄ланыл о̄с акваг уральтым о̄ньщияныл. Мо̄лты та̄лт департамент «Открытый регион» нампа рӯпитан кол пӯнсыс. Ос тав рӯпататэ хосыт ма̄н о̄лупсав Россия янытыл са̄в ма̄хумн ва̄нэ̄г о̄ньщаве. Ма̄н тэ̄ланув урыл ма̄хум ищхӣпыӈ ут хосыт ля̄ххалыт, потрыт ловиньтэ̄гыт, тот матыра̄ти ва̄рмалит пуссын та̄рапаттыяныл. Ма̄хум та̄нки хӯлтыглан ман матыр китыглахтын ла̄тыӈ департаментыт рӯпитан хо̄тпатн ке̄туӈкве ве̄рме̄гыт ос тувыл та̄наныл ёмщакв щё̄питан мус аквъёт матыр ва̄ре̄гыт, э̄рнэ торыг хо̄та̄ти нё̄тавет. Тувыл Россият са̄всыр ма̄т о̄лнэ 12 предпринимателит тэ̄ланыл э̄лаль тотым мо̄т хо̄н ма̄т рӯпитэ̄гыт. Ма̄н округув та регионыт ёт о̄с тох рӯпитаӈкве во̄ввес. Ань то̄ва предпринимательствоколыт департаментувн нё̄тым нёлолов щёс мо̄т хо̄н ма̄хум ёт акванхо̄нтхатыгласыт. То̄нт та̄н ва̄т нупыл хӯрум мо̄т хо̄н ма̄ ёт пормасыт тыналан щирыл нэ̄пак хассыт ос мо̄т хо̄н ма̄т о̄лнэ ма̄хум ёт аквъёт рӯпитан щирыл потыртахтасыт. Соссаӈ ма̄хум ёт рӯпитан тэ̄ланыл о̄с э̄сгувес. Ты та̄л ООН нампа колт ты рӯпатаныл э̄лаль ханищтаве ос мо̄т хо̄н ма̄т аквты щирыл тэ̄ланыл ва̄руӈкве патыяныл. Ма̄ньполь э̄тпост округ мирколувн Франция ма̄ныл мӯй хо̄тпат ёхтэ̄гыт ос та̄н тот э̄лумхо̄лас праватэ о̄вылтыт тах потыртэ̄гыт. Владимир Меркушев, ты департамент Общественный Советэ̄т кӯщай ва̄ӈын хум, ла̄выс: «Та̄л сыс ты департаментув ёмщакв рӯпитас, са̄в тэ̄лат ма̄кыг ва̄руӈкве а̄лымаве̄сыт. 29 некоммерческий колыт олннё̄тмилыл майве̄сыт. Та̄н рӯпатаныл ма̄гыс 16 млн. солко̄ви холтвес. Тувыл ля̄ххал тотнэ ма̄хум халт 43 са̄всыр проектыт тэ̄лаг ва̄рве̄сыт. Ты йильпи та̄лувт ва̄рмалянув о̄с ёмасыг вос о̄лсыт».

1141 2017.02.09. Светлана МАТВЕЕВА

Округувт мир ёмщакв пусмалтаве. Алексей Добровольский мир пусмалтан ва̄рмаль урыл Ханты-Мансийск ӯс мирколт потыртас. Ты тэ̄ла палт тав округ янытыл пуӈктоты. Ань ювле хультум та̄л сыс ма̄хум хумус рӯпитасыт, пусмалтан ма̄гыс та̄стым олныт хоталь холтве̄сыт, ты урыл тав докладнэ̄пак ловиньтас. Ты кӯщай хум тох ла̄выс: — Округт о̄лнэ ка̄сыӈ хо̄тпа олн ойтта̄л пусмалтаве. 2012 та̄лныл 2016 та̄л мус ма̄н о̄лнэ ма̄вн сака са̄в хо̄тпа йиӈкве патыс, э̄рнэ нэ̄паканув са̄вмуӈкве патсыт, олн о̄с ущпылнэ̄г са̄в э̄рмыглас. Тувыл нэ̄паканувт мо̄т щислат хансуӈкве патсӯв. Ювле хультум та̄лт государственный программа щирыл пусмалтан ва̄рмаль палт округ янытыл 59 миллиард са̄вит солко̄ви ойтсӯв. Туп акв хо̄тпа ма̄гыс 36 со̄тыра солко̄ви ойтуӈкве э̄рыс. Пусмалтан ва̄рмаль ма̄к яныг колт ос пӯльницатыт рӯпитан ма̄хум пуссын ёмащакв рӯпитэ̄гыт, са̄в э̄рнэ тэ̄ла ва̄ре̄гыт, ань округ янытыл ма̄хум пуста̄гыл вос о̄лэ̄гыт, ня̄врамыт самын вос патэ̄гыт. Та минам та̄лт Россия янытыл ма̄н ма̄вт са̄внув ня̄врам самын патыс. «Земский доктор» нампа программав о̄с мӯсхал щирыл ва̄рилӯв. 2012 – 2016 та̄лыт сыс ма̄н ма̄вн 244 ле̄ккар рӯпитаӈкве ёхтыс, та̄н халанылт 200 хо̄тпа ма̄нь па̄влытн о̄лмыгтасыт, ань пуссын тот рӯпитэ̄гыт. 44 ле̄ккар ос яныг ӯсытт рӯпитан ма̄гыс во̄всанӯв. Тувыл ка̄сыӈ ле̄ккар акв миллион солко̄вил майвес. Ма̄н ань сыресыр ма̄шинат, аппаратыт о̄ньще̄в, ищхӣпыӈ ут хосыт округувт рӯпитаӈкве ве̄рме̄в. 2016 та̄лт 13 со̄тыра арыгтем хо̄тпа тох пусмалтасанӯв, та̄нанылн нэ̄мхотталь минуӈкве ат э̄рыс. Хотальа̄ти э̄рнэ матыр тыт ань пуссын о̄лы, пуссын о̄ньще̄в. Пӯльницат ань округ янытыл тыхо̄тал мус ӯнттэ̄в. Мо̄лты та̄л Урай ӯст яныг пӯльница а̄стласлӯв, тот ань аквторыг 72 хо̄тпа пусмалтахты. Сургутыт сым а̄гмыт пусмалтан пӯльница ӯнттувес. Когалым ӯст поликлиника йильпииг щё̄питавес, хо̄тыл порат тув 850 хо̄тпа щалтсуӈкве ве̄рми. Моще̄ртн Белоярский район Полноват па̄вылт пӯльница а̄стлаве, тот 15 хо̄тпа пусмалтахтуӈкве верме̄гыт, хо̄тыл ос 33 хо̄тпа ле̄ккар палт щалтсэ̄гыт тах. Алексей Добровольский а̄гмыӈ ма̄хум пӯльницан вертолётыл тотнэ̄ тэ̄ла урыл о̄с потыртас, ты хум тох ла̄выс: Ты тэ̄лав ма̄н мӯсхал щирыл округувт ва̄рилӯв. Ань Россия янытыл о̄лнэ ле̄ккарыт ма̄н нуплув сунсэ̄гыт, ма̄навныл ханищтахтэ̄гыт, таима̄гыс ма̄н о̄лнэ ма̄в ёмащакв ва̄ганыл. Округув янытыл вертолёт ёлиснэ ма̄гыс яныгса̄т ма̄ щё̄питым о̄лы, тув э̄тэхо̄талэ ле̄ккарыӈ вертолётыт исуӈкве ве̄рме̄гыт. Нижневартовск, Сургут, Ханты-Мансийск ӯсытыт ос Ха̄льӯс районт вертолётыл яласан ма̄хум акваг рӯпитэ̄гыт, та̄л сыс кит со̄тыра арыгтем хо̄тпа яныг пӯльницан тотыглэ̄гыт. Кос хоталь э̄ри, тув минэ̄гыт, э̄ти во̄вавет те, э̄ти минэ̄гыт. Э̄лын о̄лнэ ма̄нь па̄влытын яланта̄лэ̄гыт, ма̄хум лылыяныл нэ̄гылттан ма̄гыс э̄тэхо̄талэ та рӯпитэ̄гыт. Россияв янытыл ле̄ккарыт тох юртыӈыщ воссыг нэ̄мхотты ма̄т ат рӯпитэ̄гыт, вертолётыл яласан ва̄рмаль туп ма̄н ма̄вт мӯсхал щирыл щё̄питым о̄лы. Ты кӯщай хум потре та оигпас. Я̄тил ма̄ньщи ма̄хум, пуссын пуста̄гыл о̄лэ̄н, со̄тыӈыщ о̄лэ̄н!

1141 2017.02.09. Тамара МЕРОВА

Мирныл олныт акв ма̄н атуӈкве патавет. 2017 та̄лныл на̄лок ойтнэ страховой взносолныт акв ма̄н атуӈкве патавет. Ты э̄лыпа̄лт ты олныт пенсионный, социальный манос медицинский фондын ла̄кква ма̄н ке̄тыглаве̄сыт. Ань ос ты олныт пуссын о̄влэ̄т налоговый служба колн ке̄туӈкве патавет. Тот рӯпитан ма̄хум та нэ̄пакыт ёмщакв уральтыяныл ос тувыл ущ та̄нки э̄рнэ ма̄н э̄лаль ке̄тыяныл. Ты урыл налоговый службат кӯщаиг о̄лнэ нэ̄ Ольга Литова РИЦ «Югра» нампа колт ла̄выс. Тав ётэ йильпи тэ̄ла о̄вылтыт потыртаӈкве мирн нё̄тнэ страхование колт о̄лнэ кӯщай хум Михаил Рыбьяков, пенсионный фондыт пуӈктотнэ нэ̄ Татьяна Зайцева ос медицинский страхование колт кӯщай ва̄ӈын хум Дмитрий Святченко ёхталасыт. Та̄н ла̄вманыл щирыл, ань страховой олныт атнэ ма̄гыс а̄ти та̄н пуӈктотэ̄гыт, са̄всыр организациятын та̄н палтаныл ань я̄нас отчётыт ва̄руӈкве ос ке̄туӈкве ат э̄ри. Та̄н туп ка̄сыӈ хӯрум э̄тпос ма̄гыс отчётнэ̄пак вос ва̄ре̄гыт, тувыл пуссын та̄н нэ̄паканыл ёт ань налоговый службат рӯпитэ̄гыт.

1141 2017.02.09. Валентина Васильева

Та̄гт па̄выл ма̄хманэ номиянэ. Ма̄н округувныл Государственный Думан ма̄ньщи хо̄тпав Татьяна Гоголева пе̄риявес. Ювле хультум э̄тпост тот яныг съездкапай ва̄рыглавес. Россия янытыл ка̄сыӈ регионныл тув ма̄хум ёхталасыт. Та мир халт Татьяна Степановна акв нэ̄кве ёт хо̄нтхатыглас. Наме Татьяна Янова, а̄ги опарищ наме – Мартынова. Тэ̄н халэ̄нт хоса потыртасы̄г. Тувыл нэ̄кве ва̄нэ ма̄хманэ̄н паща ла̄тыӈ те̄тнэ ма̄гыс ма̄ньщи газетавн пищма хансыс. Ань тав хансум потре ловиньтэлы̄н: — Ты яныг ӯскапайт ам Татьяна Степановна Гоголева ёт та хо̄нтхатасум. Ам таве хосат та̄гыл ва̄глум. Тав а̄кве Елена Яковлевна Баусова а̄нум школат ханищтастэ, тав ам о̄выл учителюм ты о̄лыс. Татьяна о̄с Та̄гт па̄выл школат ханищтахтас. Таве ам а̄тям Алексей Петрович Мартынов ханищтастэ. Та па̄сныл ань тыг мус ме̄н халме̄нт юртыӈыщ о̄лыме̄н. Ань ам тох ла̄ве̄гум, ме̄н тав ётэ сас Та̄гт па̄выл янытлыме̄н. Ма̄нав ханищтам хо̄тпат ам пуссын номиянум. Владимир Вячеславович Хромов литература урок ханищтас. Тав уроканэ сака пӯмщиг о̄лсыт. Школа а̄стламум юипа̄лт ам Тюменский государственный университет филологический факультетыт ханищтахтасум. Екатерина Федоровна Елфимова химия урок ма̄навн ханищтас. Тав ла̄тӈанэ ам ань тыг мус номиянум. Тав ла̄выглас, маныр ма̄н ляпавт о̄лыглы, ты пуссын химияг ла̄ваве. Мо̄т ханищтам ма̄хум наманыл ты – Леонид Тарасович Костин, Светлана Васильевна Кабакова, Лидия Григорьевна Вовк, Юлия Феоктистова Мартынова (ты ам омам). Ты ма̄хум ё̄раныл хосыт ма̄н ёмас хо̄тпаг яныгмасӯв. Ань са̄всыр ма̄т о̄лэ̄в, ла̄ккваминыгласӯв. Та̄гт па̄вылт о̄лнэ ма̄хум, а̄нум ва̄нэ хо̄тпат пуссын паща ла̄тӈыл те̄тыянум. Хотьют ам ётум ханищтахтас, ам на̄нан номиянум. Пуста̄гыл пуссын о̄лэ̄н. Тамле пищма ма̄н рӯпитан колувн те̄твес. Э̄рыӈ на̄н халынт хотьют о̄с тамле пищма хансуӈкв номсы. Хансэ̄н, хури те̄тэ̄н. Ма̄ньщи газетавт пуссын ва̄риянӯв, потранын хансыянӯв. Ма̄ньщи ла̄тӈыл Валентина ВАСИЛЬЕВА хансыс.

1141 2017.02.09. Тамара МЕРОВА

Ща̄нь ла̄тӈыл потыртаӈкве сака таӈхи. Туи Октябрьский район Лӯи Ня̄рихуми па̄вылн ялмум порат Зоя Борисовна Глушкова ёт ва̄йхатасум. Тав А̄с ма̄ньщи ла̄тыӈ ва̄нэ э̄ква. Ос та е̄рт о̄лнэ ма̄ньщит мощ та̄нки щирыл потыртэ̄гыт, ань тамле ла̄тыӈ ва̄нэ хо̄тпа ка̄сыӈ е̄мт мощщаг е̄мты. Таима̄гыс э̄ква сыме ща̄рги, ань ме̄н потруме̄н на̄н э̄лаль ловиньтэлы̄н. — Ма̄н ма̄ниг о̄лмув порат пуссын ща̄нь ла̄тӈыл потыртасӯв. Омам а̄тимыг е̄мтнэ мус акваг тав ётэ потыртасум. Ань па̄влувт ща̄нь ла̄тыӈ ва̄нэ хо̄тпа торыӈ а̄тим. Аквкит э̄кват ла̄кква ма̄т о̄лэ̄в кос, ос юн хо̄тал палыт колсори рӯпатав ва̄рим щар а̄ты ва̄щиньтахтэ̄в. Клавдия Плеханова э̄щум ам палтум щалтапа̄лы ке, манос ам тав палтэ ха̄йтталэ̄гум, то̄нт маткем та потыртыме̄н. На̄н ма̄ньщи газетан ёхты, ща̄гтэ̄гум, тот ля̄ххалыт, потрыт ловиньтэ̄гум. На̄н туп то̄ва ла̄тӈанын мощ мо̄т щирыл о̄лэ̄гыт. Са̄ртын то̄ват щар ат торгамтасанӯм, ань ханьщувласум. Амки урумт таи ла̄ве̄гум, ам тыт яныг таквс э̄тпос атыт щислат 1950 та̄лт самын патсум. Районувт са̄всыр па̄вланувт школат ханищтахтасум, хо̄т интернатт о̄лсум. Школа а̄стланэм юипа̄лт Салехард ӯсн минасум. Тот, май, ӯйхулыт пусмалтан ле̄ккарыг зооветтехникумт ханищтавет. Тувыл тот практика е̄мтум порат а̄мпыт па̄лыгяктуӈкве ос суссылтаӈкве патве̄сыт, ам хотрохтысум ос юв та оясум. Юв ёхтысум, акв та̄л колхозт мис поснэ нэ̄г рӯпитасум. Тувыл кит юрта̄гиягум ёт Казахстаныт о̄лнэ Павлодар ӯсн ханищтахтуӈкве минасӯв. Ань тай мовиньтым номылматыглэ̄гум, мо̄т ляпа ма̄, э̄рттам, а̄тим о̄лыс. Та палыт ма̄н, тув та минэ̄в. О̄влэ̄т са̄т хо̄тал на̄иӈха̄пыл Омск ӯс мус ма̄н минасӯв, тувыл э̄лаль «Ракета» на̄иӈха̄пн та̄лсӯв. Э̄типа̄лаг Павлодарн ёхтысӯв, мӯйлын колн э̄т хӯлуӈкве минасӯв. Ам тай, яа, паспорт ат о̄щнэм. Тамлэ э̄рнэ нэ̄пак та̄л мо̄т ма̄н та минамум, юн амки ат ва̄рыгласум. Ты нэ̄пак о̄выл щёс а̄нумныл ущты китыглавес. Тувыл кон хунь хультуптавем, ам акв юрта̄гирищум палт хуюптаве̄сум. Ма̄н па̄влувт то̄нт са̄в хо̄тпа паспорт ат о̄щсыт, нэ̄мхотталь ат ялантасыт, пе̄с намнэ̄паканылт о̄лсыт. Тувыл юв мирколн пищма хассум, юил справкал ке̄тве̄сум, паспортум щар ат ва̄рыглавес. Ётыл тыт та ва̄рвес. Павлодар ӯст ам акв та̄л слесарьаппаратчикыг ханищтахтасум. Училище сака ёмас а̄стласлум ос акв та̄л опытный заводыт рӯпитасум. Тот о̄йкам ёт акванхо̄нтхатасме̄н ос ётыл тав самын патум ма̄тэ̄н, Казахстаныт хо̄тал нэ̄глын е̄рн о̄луӈкве минасме̄н. Тав ма̄тэ̄т ат та̄л о̄лсӯв ос тыг лӯима̄вн ёхтысӯв. Тыт ам нёлоловхуйплов та̄л мис поснэ нэ̄г рӯпитасум. Тувыл 1992 та̄л колхозув лаппантвес. Ам садик кол ӯрнэ хо̄тпаг пенсиян миннэм мус рӯпитасум. О̄йкам прорабыг рӯпитас, тувыл пилораман патхатыглас. Ос астма а̄гме паттат 53 та̄лэ̄т а̄тимыг е̄мтыс. Ме̄н ат ня̄врам янмалтасме̄н. Ма̄нь пыгме̄н китхуйплов та̄лэ о̄лыс, а̄щта̄л хультыс. Ань тай пуссын яныгмасыт, та̄нки ще̄мьяӈ хо̄тпаг е̄мтсыт. Ты ня̄враманум коныпал каӈкум ня̄враманэ янмалтасум. Тэ̄н илттыг э̄квате̄нтыл сас хотталь щалтсы̄г. Нёлолов ня̄врам ща̄ньа̄щта̄л хультсыт. Ме̄н Клавдия Семёновна Плеханова э̄щме̄нтыл ня̄врамыт янмалтаӈкве киттыг висанме̄н. Тав нила ос ам нила ня̄врам янмалтасум. Ма̄нь пыгрище̄н нёлолов э̄тпос яныт о̄лыс, ань тыт ты, нила класс а̄стлас. Хо̄тал палыт школат тот та ха̄йтэ̄гыт. А̄лпыл ханищтахтуӈкве минэ̄гыт, обед юипа̄лт уроканыл манос кружокын ялантэ̄гыт. Ань хунь та колсори рӯпатан та̄наныл ханищтаӈкве а̄лыме̄гын. Пуссын мо̄т тэ̄ла о̄ньще̄гыт. Амки акв мат о̄с ат ӯнлантасум. Па̄влувт ветераныт Советыт матыр тэ̄лат ва̄руӈкве нё̄тсум. Ме̄н Александр Плеханов ёт са̄всыр ялпыӈ хо̄талыт кастыл касылыт щё̄пита̄лсуме̄н. Са̄ртын хо̄нтлум хо̄тпат ос та порат рӯпитам са̄в яныгпа̄ла ма̄хум о̄лыс. Пуссын та̄н ётаныл хо̄нтхатыгласӯв, аквъёт ка̄с ва̄рсӯв. Тувыл районувн са̄в калмык ос немец ще̄мьят тыг тотыглаве̄сыт. Мо̄лтынув ветераныт Советныл по̄хан патхатсум, ма̄ньнув ма̄хум та̄н вос рӯпитэ̄гыт, ань тот Галина Шадрина пуӈктоты. Ты яныгпа̄ла э̄ква ёт пӯмыщ потыртаӈкв, ма̄ньлат та̄ланэ номылматым акваг мовиньты, ощхуль ва̄ри. Аквтопмат нэ̄мат та̄рвит о̄лупсал ат о̄лыс.

1141 2017.02.09. Николай МЕРОВ

Алыщлан ма̄ньлат пыг. Та̄л котиль э̄тпост Ха̄льӯс район Ня̄хщамво̄ль па̄вылныл акв ма̄ньщи хум а̄нумн сво̄нитас. Ме̄н тав ётэ хоса потрамасме̄н. На̄н ты хум о̄с ва̄глы̄н, тав наме Олег Самбиндалов, Тӯрва̄т па̄вылт о̄лы. Самбиндаловыт ще̄мья урыл ма̄н ва̄тихал хансыглэ̄в. Та̄н йис ма̄нанылт са̄лы янмалтым о̄лэ̄гыт. Ань хум такви о̄лупсатэ урыл а̄нумн мощ потыртас. Тав ла̄внэ̄тэ щирыл, ты та̄л нё̄рт мощща тӯйт патыс. То̄ва ма̄т а̄хвтасыт на̄ӈке̄гыт. Ты пора та е̄рт со̄рп щар а̄тим. Мо̄рсыӈ порат хо̄нтыглэ̄гыт. Хотталь мо̄т ма̄н, улпыл, миныгласыт. Нёхыс тай о̄с са̄в о̄лы. Тэ̄лы сыс Олег налыман арыгтем нёхыс пувыс. Ма̄ньщи хум туи па̄сныл са̄в йильпи ёса ва̄рыс. Аквхуйпловкем палыт метра йӣвха̄п ма̄щтырлас. Ты э̄лыпалт ха̄пыт щар ат ва̄рыглас. О̄выл ха̄пе татем ёмасыг ва̄рыстэ, таквина̄тэ̄н сака мӯсты. Я̄т щар ат хумплы, састумыг ӯнлы. Ты пормасанэ э̄рнэ ма̄гыс та̄стысанэ. Тав хосат та̄гыл йильпи «Буран» ёвтуӈкве номт о̄ньщас. Ты кастыл таквсы та̄ра во̄раяӈкве патыс. Таи ёмас, ты та̄л са̄в нёхыс о̄лыс. Алыщлам утанэ нилаат со̄тыра са̄вит солко̄вил тыналасанэ. Ва̄рум ёсанэ о̄с тыналасанэ. Олнанэ пуссын акванатсанэ, тӯйт тармыл яласан ут ты ёвтыс. Такви ты урыл тох ла̄выс: «Алыщлан ма̄в палытэ хоса, ла̄глыл ё̄мыгтаӈкве хунь ё̄рум ёхты. «Буранум» щар пе̄сыг е̄мтыс. Ва̄тихал саквалаӈкве патыс. Таима̄гыс щар о̄влэ̄т олнанум ты ут ёвтнэ ма̄гыс атсанум. Ань тай сымум ротмыс. Хотальа̄ти э̄рнэ ма̄н кӯстырыг ёхтэ̄гум». Олег ла̄выс, мо̄лты та̄л со̄рп та̄н ма̄нанылт са̄в о̄лыс. Ты пора матрыг мощщаг е̄мтыс. Ляпан ат ёхтэ̄гыт. Мо̄лалнув во̄рт алыщлым яласыматэ, ёмаспал какыр по̄хе та̄кыщ хо̄илтастэ. По̄хе хотпувлахтас. Тыима̄гыс Ня̄хщамво̄ль пӯльницан пусмалтахтуӈкве ялыс. Ле̄ккарыт ла̄всыт, оӈтыллуванэ пусыт, нэ̄матыр лю̄ль а̄тим. Мощ хуяс, юв та̄ртвес. Акв пӯмащ ва̄рмаль урыл потыртас. Таквсы па̄сныл та̄л котиль э̄тпос мус акваг во̄рт алыщлым яласас. Со̄рп ка̄тынпаттуӈкве тох аты ве̄рмыс. Ос Ня̄хщамво̄льн минмыгтас, акв ма̄т кит та̄л яныт со̄рп лё̄ӈхын нэ̄глапас. Хум «Буранэ» ёлпо̄йтыгпаптастэ, писале но̄хлэ̄ватастэ, щама та патамтастэ. Лё̄ӈх торыг ка̄тынпаттыстэ, хотнуистэ, нё̄влиӈ та̄гыл па̄вылн ёхтыс. Тав ётэ минам ма̄хманэ пуссын хотща̄гтсыт. Тамле ты со̄тыӈ хумкве Тӯрва̄т па̄вылт о̄лы. Рӯтанэ хумле о̄лэ̄гыт, ам таве о̄с китыгласлум. Ща̄нягеа̄щаге Сава ос Татьяна пуста̄гыл о̄лэ̄г. Сава пыганэ Улек, Ӯнтари, Ӣлья ос Улякщи. Тав пыганэ ёт во̄раяӈкве ва̄тихал яланты. Татьяна оманыл ос юн маснутыт ю̄нты, тэ̄нут па̄йты ос мо̄т са̄всыр колсори рӯпата ва̄ри. Ирина а̄гитэ̄н хум ва̄рыс, ня̄врамаге ёт о̄йкатэ палт ва̄нтлыс. О̄йкатэ наме Павел Бахтияров, Висумтыт па̄вылт о̄лы. Ос во̄раян хум, во̄рколэ̄т нёхыс, со̄рп алыщлым яласы. Тӯрва̄т па̄вылт татем ёмас, сымыӈ, нёмса ма̄ньщи хо̄тпат ты о̄лэ̄гыт. Ам ты ма̄хманувн яныг щуньпаща ла̄тыӈ ке̄тэ̄гум. О̄лупсаныл кӯпнитыг вос о̄лы. На̄й-О̄тыранылн вос ӯргалавет. Пуста̄гыл э̄лаль вос о̄лэ̄гыт.

1141 2017.02.09. Валентина Хозумова

На̄й-О̄тырыӈ кол ӯргалан хо̄тпа. Ты э̄тпос 10 хо̄талэ̄т Наталья Павловна Шесталова 80 та̄лэ то̄влы. Ань тав ня̄враманэ̄н ма̄ньщи газетав та̄ра янытлаве. Та̄н я̄тил оманыл урыл потыр хассыт ос ма̄нав во̄всаныл, ты потыр ма̄н газетат вос хансылӯв. Наталья Павловна Калтыщаны па̄вылт самын патыс. Ты па̄выл Микояновский (ань Октябрьский) районт о̄лыс. А̄тятэ Павел Федорович Проскуряков, оматэ Ольга Лукьяновна Яркина сас «Мулигортский» нампа колхозт рӯпитасы̄г. Ётыл ты колхоз «Нижне-Нарыкарский» намыл пинвес. А̄тятэ война э̄лыпа̄лт а̄тимыг е̄мтыс. Ольга Лукьяновна такте̄т тит ня̄врамаге ёт хультыс. Тэ̄натэ̄н янмалтан ма̄гыс сака са̄в рӯпитас. Таима̄гыс Наталья а̄гитэ Домна ане̄кватэ̄н вуйвес. Яныг хо̄нт порат ос та юипал та̄лытт па̄влыӈ ма̄хум са̄в рӯпитасыт. Ня̄врамыт яныг ма̄хум ёт хӯл алыщласыт. Та̄н пиркатанылт акв пиркатир ос хо̄т ня̄врам о̄лыс. Толганыл сака янгыг ос хосаг 250 метра палытыг о̄лыс. Э̄ква ань потырты: «Па̄влув ляпат са̄в мат хӯл алыщласӯв. Акв ма̄т я̄ ӯлтта лапто̄вартта̄лвес, тот хӯл вос атхаты. Мо̄т ма̄т алыщлэ̄в. Хӯланув тот холэ̄гыт, ювле аквта ма̄н та ёхтэ̄в. Ос атхатам хӯл та пуве̄в. Ты щирыл ма̄н хӯл планув акваг то̄вартта̄лыгласлӯв. Рӯпитаӈкв сака та̄рвитыӈ о̄лыс». Мулигорт па̄выл А̄с ва̄тат о̄лыс. Тот Наталья Павловна нила класс а̄стлас. Э̄лаль тав Шеркалы па̄вылн ханищтахтуӈкв минас. Тот ханищтахтаме порат тав комсомольский организацият пуӈктотыс, тот школа а̄стлас. Тувыл тав Челябинский институтн ле̄ккарыг ханищтахтуӈкве а̄латы те̄твес. Ос оматэ̄н ат та̄ртвес. Мощ олнло̄мт атсыт, Салехард ӯсн ма̄нь ле̄ккарыг ханищтахтуӈкв та минас. Та̄н са̄лыӈколн те̄тыглаве̄сыт, тот ё̄рн ма̄хум хансуӈкв ос нэ̄пак ловиньтаӈкв вос ханищтыяныл. То̄нт ты рӯпата рущ ла̄тӈыл тох ла̄ввес – «Красный чум». Ты рӯпата ва̄руӈкв ат ка̄сащан ма̄хум пуссын комсомолыл хотня̄влуве̄сыт. Ефим Алексеевич Шесталов ёт Салехард ӯст хо̄нтхатсы̄г, тот акванминасы̄г. О̄йкатэ Ха̄льӯс районын рӯпитаӈкв те̄твес. Наталья о̄с тав ётэ тув минас. Яныг а̄гитэ̄н тот самын патыс. Э̄лаль ханищтахтуӈкв Наталья ат ка̄сащас, юн та хультыс. Нэ̄гхумы̄г Ха̄льӯс районныл Ханты-Мансийскан те̄твесы̄г, тэ̄н пормас ман тэ̄нут тыналан хо̄тпаг вос ханищтахтэ̄г. Та юипа̄лт тэ̄н Хо̄рыӈпа̄вылн те̄твесы̄г. Наталья тот ла̄пкат ня̄нь тыналас, о̄йкатэ ос во̄р са̄грим ос во̄руй совыт пирмайтым рӯпитас. Та порат тэ̄н ла̄ввесы̄г, Саранпа̄вылн рӯпитаӈкв вос минэ̄г. Тэ̄н ат ка̄сащасы̄г, Ягрим нупыл та ва̄нтлысы̄г. Та ляпат ма̄ньщи па̄влыт ӯнлысыт – Ёлка-Шапка, Новинский, Камратка, Малеевка. Ка̄сыӈ па̄вылт та̄н мощ о̄лсыт. Тыглетувле яласым тэ̄н ла̄ввесы̄г, ня̄враманэ̄н интернатт вос о̄лэ̄гыт. Тэ̄н щар ат ка̄сащасы̄г. Восыӈтӯр па̄вылн колта̄глыл та о̄лмыгтасыт. Тэ̄н нёлолов ня̄врам о̄щсы̄г. О̄йкатэ о̄с сака ёмас хо̄тпаг о̄лыс, потыртаӈкве сака пӯмщиг ха̄сыс. Тав хосат а̄тимыг е̄мтыс. Ань Наталья Павловна Восыӈтӯрт а̄гитэ ос апге ёт о̄лы. Мо̄т ма̄н минуӈкв щар ат ка̄сащи, ла̄ви – Та̄гт котиль о̄йка На̄й-О̄тыре хультуптаӈкв ат ро̄ви. Ань яныг намхо̄талэ кастыл ня̄враманэ̄н Ханты-Мансийск ӯсн ёхтуӈкв во̄ввес. Та̄н тыт я̄тил оманыл ма̄гсыл ялпыӈ хо̄тал тах ва̄ре̄гыт, оманыл тыт вос мощ мӯйлы. Тамле потыр ня̄враманэ тав уре̄тыл ты хассыт. Ты потыр ма̄ньщи ла̄тӈыл Валентина ХОЗУМОВА толмащластэ.

1141 2017.02.09. Людмила ТЕТКИНА

Ма̄ньщи хум рӯпататэ урыл. Ма̄н о̄лнэ ма̄вт северный многоборье щирыл рӯпитан федерация ка̄сыӈ та̄л ня̄врамыт ма̄гсыл касыл ва̄рыглы. Ты организацият кӯщаиг ма̄ньщи хум Олег Хатанев рӯпиты. Округ янытыл о̄лнэ а̄гитпыгыт са̄лыӈ сун ӯлтта поргуӈкве, тыньщаӈ, са̄грап па̄хвтуӈкве вос ханищтахтасыт, тав са̄в ё̄р пины ос акваг са̄в рӯпиты. Олег Андреевич Ха̄льӯс район Саранпа̄вылт самын патыс. Тот школа а̄стлас. А̄тятэ Андрей Яковлевич Хатанев ня̄врамыт ханищтан хо̄тпаг тот рӯпитас. Тав «Мастер спорта СССР» нам о̄ньщас, таимагыс мир янытыл ва̄йвес. Ня̄врамыт акваг касуӈкве ханищтасанэ. Па̄влыӈ ма̄хумн тав сака янытлавес. 1980 та̄лт а̄тимыг е̄мтыс. Оматэ Тамара Николаевна Хатанева, такви о̄парищ наме Вьюткина, ань Саранпа̄вылт о̄лы. Ма̄ньщи э̄ква пенсиятэ мус ма̄нь ня̄врамыт ӯргалан колт рӯпитас. Олег школат ханищтахтаме порат акваг ёсал ха̄йтыгтас. Ты юипа̄лт Санкт-Петербург ӯсн минас, тот физический культура Институтыт ханищтахтас. Тот о̄с ёсал ха̄йтыгтас ос са̄всыр ма̄н касуӈкве ва̄тихал ялантас. Олег Андреевич «Мастер спорта по биатлону» нам о̄ньщи. Ва̄рнэ рӯпататэ урыл таи ла̄выс: «Ам институт 1990 та̄лт а̄стласум ос тыг Ханты-Мансийск ӯсн о̄луӈкве ёхтысум. Та пора па̄сыл ам северный многоборье щирыл рӯпитэ̄гум. О̄влэ̄т ма̄н «Этнос» нампа каснэ кол ва̄рсӯв ос округув янытыл яласасӯв, соссаӈ ма̄хум о̄лнэ па̄влытыт ты касыл урыл потыртасӯв. Ань ма̄н о̄лнэ ма̄вт са̄лыӈ сун ӯлтта поргуӈкве, тыньщаӈ ре̄пыгтаӈкве, са̄грап па̄хвтуӈкве, ощща йӣв ка̄тыт пувим ха̄йтыгтаӈкве ня̄врамыт Нижневартовский, Нефтеюганский, Сургутский, Белоярский, Ха̄льӯст районытт ханищтахтэ̄гыт. О̄влэ̄т ма̄н туп ма̄ньщи, ханты ос ё̄рн ня̄врамыт тыщирыл касуӈкве во̄всанӯв. Мо̄т ня̄врамыт са̄лыӈ сун ӯлтта поргункве, тыньщаӈ па̄хвтуӈкве, ха̄йтыгтаӈкве ань о̄с ханищтахтэ̄гыт. А̄гирищит ос аквтыщирыл касуӈкве ань во̄виянӯв. Ка̄сыӈ та̄лныл округувт ва̄рыглан касылн са̄внув ня̄врам ёхталы». Олег Андреевич ты рӯпата ва̄руӈкве хунь о̄вылтахтас, тренерхо̄тпа щар а̄тим о̄лыс. Ань ка̄сыӈ районт тамле э̄лумхо̄лас о̄лы, та̄н пуссын ня̄врамыт касуӈкве ёмащакв ханищтыяныл. Ха̄льӯс район Саранпа̄вылт Андрей Дорофеевич Филиппов ня̄врамыт ёт рӯпиты. Белоярский район Касум па̄вылт Александр Павлович Тасьманов а̄гитпыгыт касуӈкве ханищтыянэ. Александр Юрьевич Фальченко Нижневартовский район Варьёган па̄вылт ня̄врамыт ханищты. Ос са̄в мо̄т па̄вылт тамле тренерхо̄тпат ань рӯпитэ̄гыт. Та̄н пуссын ня̄врамыт ёмащакв ханищтыяныл, тыи ма̄гсыл ань ма̄н округувт о̄лнэ а̄гитпыгыт ва̄тихал мо̄т спортсменыт халт но̄хпатэ̄гыт. Ювле хультум та̄л яныг таквс э̄тпос 20-26 хо̄талытт Ямал ма̄т Новый Уренгой ӯст Россия янытыл о̄лнэ а̄гитпыгыт касуӈкве акванатхатыгласыт. Ань северный многоборьят Ямал, Чукотка, Красноярский краит о̄лнэ а̄гитпыгыт сака ёмащакв касэ̄гыт. Таи ма̄гсыл тамле касылт но̄хпатуӈкве ань сака та̄рвитыӈ. Тув ялманыл порат ма̄н округувныл о̄лнэ кит пыгыг Максим Нагаматуллин ос Михаил Игишев но̄хпатсы̄г. Ма̄ньщи хум ла̄выс, ты э̄тпос 27 хо̄талныл ма̄ньполь э̄тпос 3 хо̄талэ мус Белоярский ӯст ня̄врамыт касуӈкве акван тах атхатэ̄гыт. Та̄н ха̄йтыгтаӈкве, тыньщаӈ ре̄пыгтаӈкве, са̄грап па̄хвтуӈкве, са̄лыӈ сун ӯлтта поргуӈкве ос пе̄рщуӈкве тот патэ̄гыт. Округ янытыл 12 команда тув ёхты. Тот но̄хпатум а̄гитпыгыт ма̄ньполь э̄тпост Красноярский крайн Дудинка па̄вылн минэ̄гыт. Та па̄вылн Россия спортсменыт касуӈкве тах ёхтэ̄гыт.

1141 2017.02.09. Валентина Хозумова

Тав мирн ёмас номт тоты. Яныгпа̄ла ханты э̄ква Мария Кузьминична Волдина ма̄н округувт сака намыӈсуиӈ хо̄тпаг о̄лы. Тав тина суссылтан то̄тап хосыт акваг суссылтаве, округувт ос ма̄ янытыл мирн ва̄ве. Ювле хультум та̄л ва̄т са̄грапнал э̄тпос 28 хо̄талэ̄т нёлса̄т та̄лэ то̄влыс. Мо̄тыт э̄тпост ущ ялпыӈ хо̄талэ ва̄рыглавес. Искусство центр колн са̄в мир та хо̄тал атхатас. Титахтем щё̄с тав тот янытлавес. Округувт о̄лнэ ма̄к яныг артист ма̄хум, «Хо̄тал» нампа э̄ргынйӣквнэ колт рӯпитан а̄гитпыгыт, ляпа рӯтанэ Мария Кузьминична ма̄гыс э̄ргысыт, йӣквсыт. О̄выл ла̄тыӈ округ яныг кӯщай нэ̄ Наталья Владимировна Комарова ла̄выс. Тав ты кастыл нё̄тнэ ханты супыл масхатас, пе̄с порат тамле супыт Иртыш я̄ ва̄та хосыт о̄лум хантыт та̄н о̄щсаныл. Кӯщаюв ханты э̄ква сыныгтастэ, анигластэ ос са̄в ёмас ла̄тӈыл ла̄выстэ. Тав Мария Кузьминична сака э̄руптым о̄ньщитэ. Соссаӈ махум урыл хо̄т матыр потыр те е̄мты, тав ты яныгпа̄ла хо̄тпа акваг титыглытэ, э̄рнэ щирыл хумус ва̄руӈкв э̄ри. Тав юипа̄лэ̄т Государственный Дума депутат ма̄ньщи нэ̄ Татьяна Гоголева, соссаӈ ма̄хум Ассамблеят рӯпитан депутатыт Еремей Айпин, Руслан Проводников ос депутатытн нё̄тнэ хо̄тпа Надежда Алексеева э̄ква ма̄гыс потыртасыт. Ка̄сыӈе са̄в ёмас ла̄тыӈ таве̄н ла̄всыт. Ос э̄лаль Мария Кузьминична ляпа рӯтанэ̄н – а̄гияге̄н, апганэ̄н, ва̄псаге̄н янытлавес. Акв ва̄псэ Валерий Ледков э̄ргуӈкв сака ха̄сы, тав э̄ргуме порат рӯтанэ аквалаквал сценан та нэ̄глысыт. Тувыл пуссын оманылане̄кваныл палт та минасыт. Хорамыӈ лӯптал, мӯйлупсал мӯйлуптасаныл, янытласаныл. Юио̄вылт э̄ква сценан ты во̄ввес. Артист ма̄хум пуссын тав сыс па̄лэ̄т лю̄льсыт. Аквъёт э̄рыг э̄ргысыт. Тувыл э̄ква ла̄тыӈ ла̄вуӈкв во̄ввес. Тав такви уре̄т, ма̄ниг о̄лум поратэ, яныгмаме урыл мощ потыртас. Та юипа̄лт залат ӯнлум ма̄хум пуссын но̄хлю̄люӈкв ла̄всанэ. Пуссын но̄х та лю̄льсыт ос са̄т щёс ты ла̄тӈыт аквъёт ла̄всыт: «Пос ос щунь! » Мария Кузьминична ка̄сыӈ хо̄тпа ёмас номтыл ос ты ла̄тӈыт номим э̄лаль о̄луӈкв ла̄выстэ.

1141 2017.02.09. Тамара МЕРОВА

Ма̄ньщи ла̄тыӈ ханищтан венгр хум. Хурит ма̄ньлат венгр хум по̄слым о̄лы. Тав ма̄н рӯпитан колувн щалтсас, ма̄н ётув ва̄йхатас. Хум ма̄ньщи ла̄тыӈ ёмщакв торгамты ос ма̄н палтув тав Азат Гарипов хатань пыг ёт ёхталас. Азат ма̄н потранув Норберт ма̄гыс английский ла̄тӈын толмащласанэ, венгр мӯй хум рущ ла̄тыӈ ущты ханищтаӈкве патыс, такви уре̄т тав ла̄выс: — Паща о̄лэ̄н, ам намум Норберт Силадьи. Ам мо̄лты та̄л ва̄т са̄грапнал э̄тпост Венгрия ма̄ныл Ханты-Мансийскан ёхтысум ос тыт Югорский университетт я̄ӈк на̄тнэ э̄тпос оигпан мус ханищтахтуӈкве патэ̄гум. Ам амки о̄лнэ ма̄мт Сегедский университетыт филология факультет а̄стласум, тот са̄т та̄л финноугор рӯт ма̄хум ла̄тӈаныл ханищтасанум, ты тэ̄лат палт бакалавр ос магистр университет а̄стлам нэ̄пак о̄ньще̄гум. Тувыл ань э̄лаль аспирантурат ханищтахтэ̄гум, ма̄ньщи ла̄тыӈ о̄вылтыт научный потыр хансуӈкве таӈхе̄гум. Таима̄гыс мо̄лты Венгрия правительство па̄лыл грантолныл майве̄сум ос тыг ёхтысум. Югорский университетын пӯмащипа ла̄тыӈ ла̄ве̄гум, та̄н а̄нумн тыг ёхтуӈкве во̄всаныл ос са̄всыр ва̄рмалянумт акваг нё̄тэ̄гыт. Тыт о̄лнэ̄м сыс ам то̄ва соссаӈ хо̄тпат ёт хо̄нтхатыгла̄лсум, та̄н ётаныл ва̄йхатасум. Та̄н пуссын та̄нки ща̄нь ла̄тӈыл потыртэ̄гыт, таима̄гыс сымумт ёмас. Ма̄ньщи ла̄тыӈ палт «синтаксис» накыт та̄рапаттыянум ос диссертация нэ̄пак тах щё̄питэ̄гум. Венгрият ма̄н «FinUgRevita» нампа проект щё̄питасӯв. Ань маныр ма̄н тот ва̄ре̄в, ищхӣпыӈ ут хосыт ла̄тӈыт хумус хансуӈкве ос ханищтаӈкве ро̄ве̄гыт, пуссын на̄нан суссылтыянум. Тамле пораг е̄мтыс, мощщаг хультум ма̄хум ла̄тӈаныл молях со̄йме̄гыт ос мо̄т мирытн потраныл, мо̄йтаныл аты ва̄вет. Ма̄н ань удмурт ос ма̄ньщи ла̄тӈыг ищхӣпыӈ утн хансуӈкве вос а̄лыманувӯв, таима̄гыс са̄в рӯпитэ̄в. Тыт ам рущ ла̄тыӈ ханищтылум, культуратэ ос пӯмщалылум. Ам Ханты-Мансийск ӯсн сака а̄щирмаӈ порат ёхтысум, мощ по̄льве̄сум. А̄нумн тыт сака пӯмыщ, лӯима̄т о̄луӈкве мӯсты.

1141 2017.02.09. Николай МЕРОВ

Номтыӈ ня̄врамыт я̄нас колт ханищтавет. Лӯима̄т о̄лнэ номтыӈ ня̄врамыт ма̄гыс Ханты-Мансийск ӯст колледжинтернат 1997 та̄лт пӯсвес. Тот кӯщаиг 2007 та̄л па̄сныл Александр Березин рӯпиты. Тав ля̄ххал тотнэ хо̄тпатн ты ханищтахтын кол урыл потыртас. Ты колт ня̄врамыт школа а̄стлэ̄гыт ос ка̄сащан тэ̄ла щирыл э̄лаль ханищтавет. Э̄лы ма̄т ӯнлын па̄влытт са̄в номтыӈ, ве̄щкат а̄гитпыгыт о̄лэ̄гыт. Та̄н ха̄снэ ва̄рмаляныл щирыл э̄лаль ханищтахтуӈкве вос ве̄рмысыт, таима̄гыс ты кол ва̄руӈкве номылматвес. Ня̄врам школат ёмщакв ханищтахты ке, тав та̄ра тув виве. 2000 та̄л па̄сныл «Искусство Центр» кол ЮНЕСКО нампа мирхал организация нупыл хасвес, тувыл ӯргалаве. Россия янытыл китса̄ткем тамле школа о̄лы. Мир янытыл ос лов со̄тыракем тамле школат са̄всыр ма̄т ня̄врамыт ханищтым рӯпитэ̄гыт. Тамле школат ханищтахтын а̄гитпыгыт халанылт ва̄тихал хо̄нтхатыглэ̄гыт, хӯлтыглахтэ̄гыт, потраме̄гыт, юртыӈыщ ос акваннё̄тхатым о̄лэ̄гыт. О̄выл па̄сныл ты ханищтап кол кит ва̄рмаль ма̄гыс щё̄питавес. О̄выл ва̄рмаль ня̄врамыт о̄лнэхӯлнэ нак ос искусство ва̄рмаль э̄лаль вос тотсаныл. Э̄лы ма̄ныл о̄лнэ ня̄врамыт тот ханищтахтынэ̄ныл сыс интернатт о̄луӈкве вос ве̄рмысыт. Китыт ва̄рмаль — ты школан ханищтахтын ма̄гыс ня̄врамыт акваг вос ёхтысыт, тувыл ос тот са̄всыр ва̄рмальн ханищтахтуӈкве вос ро̄выс. Тот ня̄врамыт о̄выл классыт ос яныг классыт а̄стланэ̄ныл мус ханищтавет. Тувыл тот та̄н колледж а̄стланэ̄ныл юипа̄лт та̄ра рӯпитан нэ̄пакыл мивет. Са̄ртын 2014 та̄л мус тот ма̄ньлат хо̄тпат университет а̄стласыт, ётыл ты ва̄рмаль лаппантвес. «Искусство Центр» колт ня̄врамыт са̄ӈквылтаӈкве, йӣквуӈкве ос ка̄тыл хурит по̄слуӈкве ханищтавет. Тот йӣквнэ ос э̄ргын яныг колнак о̄лы. Ханищтап кол хӯрум яныг кол щирыл акв ляпат ӯнттуве̄сыт. Колыт халанылт унсахыл щё̄питым о̄лэ̄гыт. Акв колныл мо̄т колн лапва̄рим ӯнсах хосыт ё̄муӈкве ро̄ви, конква̄луӈкве ат э̄ри. Интернатт пуссын аквъёт китса̄т атпан хо̄тпа о̄лы. Ханты-Мансийск ӯст кол ат о̄щнэ учительхо̄тпат о̄с интернатт колнакыл майве̄сыт. Тот яныг тэ̄нэ кол рӯпиты. Ня̄врамыт хо̄тыл сыс хо̄т щёс тыттавет. Ты коныпал «Искусство Центр» колн Ханты-Мансийск ӯст о̄лнэ ня̄врамыт йӣквуӈкве, ёнгуӈкве ос хаснэ йӣвыл щуртуӈкве ханищтахтуӈкве о̄с ёхталэ̄гыт. Пуссын аквъёт яныгса̄т са̄тлов ня̄врам атхаты. А̄гитпыгыт тот са̄всыр са̄ӈквылтан утыл са̄ӈквылтаӈкве ханищтавет. Ня̄врам баяныл ёнгуӈкве тув ёхты ке, тав школа а̄стланэ̄тэ юипа̄лт ос э̄лаль ты ва̄рмаль щирыл колледжин минуӈкве ве̄рми. Йӣквнэ колнакт ня̄врамыт ос са̄всыр йӣквнэ тэ̄лан ханищтавет. Тув са̄всыр та̄л яныт ня̄врамыт ёхталэ̄гыт. Мо̄лты та̄л а̄стлам акв а̄ги Саранск ӯс театрын йӣквуӈкве во̄ввес. Акв пыг ос Астрахань ӯс театрын йӣквуӈкве вуйвес. Тот ня̄врамыт сака ёмщакв ханищтавет. Ты ханищтап колт нэ̄пак ловиньтан яныг кол щё̄питым о̄лы. Тот пуссын аквъёт са̄тлов со̄тыра нэ̄пак о̄ньщаве. Са̄выӈпа̄лэ ханищтахтын нэ̄пакыт. «Искусство Центр» ёмщакв рӯпитан ма̄гыс округ бюджетныл китса̄т са̄тлов млн. солко̄ви та̄ставе. Тот пуссын аквъёт хӯрумса̄т хус хо̄тпа рӯпиты. Ты хо̄тпатныл яныгса̄т налыман хо̄тпа ня̄врамыт ханищтэ̄гыт. Акв колнакт ма̄нь пӯльница рӯпиты ос э̄лаль хотвиӈкве номсаве. Ня̄врамыт тотыглан ма̄гыс ма̄шинат о̄ньще̄гыт, колкан ловтнэ хо̄тпат ос мо̄таныт тот рӯпитэ̄гыт. Ня̄врам ханищтан хо̄тпат ка̄сыӈ та̄л па̄влытын ялантэ̄гыт. Школат китыглахтэ̄гыт, хоты ня̄врам номтыӈыщ ханищтахты манос матыр пӯмащ ва̄рмаль ва̄ри, таве та̄ра тув ханищтаӈкве виве. Ня̄врамыт ща̄гтым ханищтахтуӈкве тув минэ̄гыт.