Вана казян тенть паця
Превев-содавксов ультяя;
Пилезэть путан мон пилекст —
Кулсониця ультяя;
Сурозот тонган сырнень суркс —
Кедь челькевне ультяя;
Кедезэть тонган сиянь кетькс —
Кедь виевне ультяя.
Ох, урьвинем, эедьнем!
Цёран кувалт какамат!
Сайдан мон тонть, эедьнем,
Чокшнэ кувать аштицякс,
Валцьке толонь пувицякс,
Кудос пенгень кандыцякс,
Начко ведрань кирдицякс,
Ваньксстэ кудонь теицякс,
Чевте таркань ацыцякс,
Сэрей прялксонь путыцякс,
Равужо палянь саицякс.
Ашо палянь максыцякс,
Калгодо мушконь томбицякс,
Кувака коцтонь кодыцякс.
Кучт-киява молицякс,
Эрьва козонь кундыцякс,
Якинь, пакинь вастыцякс,
Тусь-ломанень ильтицякс.
Пиже дугам, а Охим!
Мазы дугам, а Охим!
Молиньдерят юткознок,
Совиньдерят кудознок,
Лия чистэнть, дугинем,
Чинезэ лиси пель экштэ,
Тонезэть токи манейстэ.
Лия лиясто, сазорнэм,
Чинезэ лиси манейстэ,
Тонезэть токи пель-экштэ,
Тон иля ёвта берянь вал,
Иля ёвта кельме вал.
Берянь валось, дугинем,
Кувать мельцэ сон ашти,
Кельме валось, сазорнэм,
Мари седей кельмевти.
Ультяя тон, дугинем,
Таргань резинкань коньдямо,
Касы роспухонь кондямо —
Ков таргатан, тов таргавт,
Ков пуватан, тов пувавт,
Кильдиньдерятан корневойкс,
Чирьке велькска иля вант;
Кильдиньдерятан пристяшкас,
Иля тарга кинь пелев.
Иях, иях, ия-ях
Иё, ваёх ва-я-ёх
Ох, свахинем -- матушка!
Чешкстазь кадан умарина,
Кружазь кадан умарь чувто,
Сыть кучозень мельганзо,
Сырнесэ сынь сявтавызь —
Масторонь келес корёнонзо,
Сиясо сынь сыргавтцызь —
Менелень келес тарадонзо.
Иляк сорновт, свахинем,
Равужо човаля моданзо,
Илить синьде, матушкам,
Мазыстэ свети тарадонзо
Кода каца шумбрасто,
Истя максык вадрясто.
Иях, иях, ияях,
Иё ваёх, ваяёх!
Пасиба, сват, пасиба!
Серойть-буройть ракшазот,
Перелётнойть нурдозот,
Таргань уськеть ождязот.
Пасиба ломанькс ловмозот,
Пасиба ломанькс теймезэть.
Видна якить -- цислава,
Видна якить -- эрьгава,
Цислань теик цисласо
Эрьгань теик эрьгасо.
Ох, сватушка, батюшка!
Ох, свахине, матушка!
Илядыя пеняця
Седе покшке кизнинес:
Пиже дугам парыям (или сазором)
Эзь содакшно аштима,
Тыненк казнеть анокстась,
Чокшне куватьс аштекшнесь,
Валцьке рана стякшнокшнось.
Эзь чийнекшне ульцява,
Эзь яксекшне кужова.
Иях, иях ияях
Иё ваёх, ваянь.
Идика, сват, идика,
Рамика, сват, рамика,
Каяка, сват, каяка
Ниле пева ниль алтоть,
Кунчказонзо ветеце.
Тесэ оянок тусозо,
Тесэ ялганок чамазо,
Гостинецекс кучцынек,
Гостинецекс макссынек,
Радошнасто саессэ,
Вечкезь кельгезь улезэ.
Куд-авинень, авинень!
Куд-авинень, корьмакан!
Весе казненк тынк казневсть,
Весе ловманк тынк лововсть,
Ве казниненк эзь казевть,
Ве ловминенк эзь лововт:
Кода пачкодян кудок -- чиг,
Кода пачкодян кардазонг,
Пиже какам лиси каршозон,
Пекстазь кенкшень панжомо,
Кильдезь лишмень нолдамо.
Мезес оймавца тедензэ,
Мезес рожомца седензэ?
Куд-авинем, авинем!
Куд-авинем, корьмакай!
Весе казьневсть казненек,
Весе ловновсть ловманок,
Мекенг берюмат пештинек,
Мекенг берюмат полнинек.
Ве казьненек эзь казевть,
Ве ловманок эзь лововт.
Паця кучтанок шолковой,
Каршонзо вештянок целковой.
Кода пачкодят кудонг-чинг,
Кода пачкодят кардазонг
Пиже какат лиси каршозот
Пекстазь кенкшень панжомо,
Кильдезь лишмень нолдамо,
Тезэ оймавтык седенгзэ,
Тезэ рожомтык седенгзэ.
Мазы дугай, а Сёма!
Минь туинек гостинець
Лиця мазы пацязо;
Тесэ сэрьзэ, рунгозо,
Тесэ туссо-поназо.
Туи, а туи мелезэть,
Туи, а туи превезэть.
Вере, вере, вере пас!
Вере шки пас сияка!
Ниле ёнов сюкунян,
Ниле пазнэнь инялдан,
Кона пазось максымем,
Секе пазось чануязман
Чис сэринень лажамо,
Чис сэринень вальмамо.
Тетянь юртонь кирдезэ,
Тетянь кардо сяркозо!
Иля тандавт шумнэдень,
Сэрь ёмамо вайгельдень,
—
Аволь тонть мон тандавтлян.
Аволь тонть мон тормошан.
Эсь сэринень мон лажан,
Эсь сэринень коволян.
Лисьмань кирди, тейтерь-эй!
Лисьмань кирди, кастарго!
Иля тандат шумнэдень,
Сэрь ёмамо вайгельдень:
Аволь тонть мон тандавтлян,
Аволь тонть мон тормошан,
-- Монсинь сэрень коволян,
Монсинь эрямон мон лажан.
Седь икеле эрямсто,
Тейтерькс пиньгень печтямсто
Валське рана сакшнылень,
Чокшнэ позда сакшнылень,
Эзинь сакшно лангозот
Кол ёмамо крик маро
Киштезь аштильть пильгинень
Пейдезь аштиль кургинем,
Валське рана самосто,
Чокшнэ позда самосто,
Паряк токалить удомсто
Паряк токалить оймамсто
Паряк чалгакшнынь
Виде килей сэреть ланкс,
Мазы умарь тусот ланкс,
Чевте паро алксот ланкс,
Сэрей паро прялксот ланкс,
Паряк чалгакшнынь
Котова таргазь палят ланкс,
Кумыкас путозь руцят ланкс,
Матразь коцт ашко пильгеть ланкс,
Сия вец навазь карь прят ланкс,
Илямака осудя:
Седь икеле эрямсто,
Тейтерькс пиньгень печтямсто,
Киштезь аштильть монь пильгень,
Пейдезь аштиль монь кругом.
Покшт покштинень, бодинень!
Мода мазыть бабинень!
Сырк мерезэ, бодинень,
Матрась, оймась киськинеяк,
Кепсть мерезэ, бабинень,
Равужо човоля модыненк.
Покшт, покштинень бодинень!
Мода мазыть бабинень!
Аволь шкастонк порастонк,
Мазы леменк ушоцынь,
Мода челькенк явавцынь.
Аволь пси пачалксес терттядызь,
Аволь пси ямнэс туйдядызь.
Кува, кува, терттядызь?
Кува, кува, туйдядызь?
Тердевледезь покш киява,
Покш кинь ламо якизэ,
Ламо каршо понгинзэ,
Ламо мельга сасынзэ:
Пелян покш покштинень, бабинень,
Берянь ломань вастыде,
Берянь валонь тергиде.
Тердевледезь, бодинень,
Туевледезь, бабинень,
Ош порядка юткова,
Москов ульцянь кувалма,
Ульцянь ламо неинзэ,
Ульцянь ламо рединзэ:
Пелян берянь сельмеде,
Пелян берянь вачтавксто.
Тердевледезь, бодинень,
Туевледезь, бабинень,
Ташто, тайной киява —
Ташто, кадонь киява.
Пелян, покш бодинень, бабинень,
Одранк, саванк сезневить,
Тарад прява кадновить.
Тердевледезь, бодинень,
Туевледезь, бабинень,
Мода алга киява,
Мастор алга киява.
Коть мода алга кисть
Арась кияк якизэ,
Арась кияк пакизэ,
Ламо мода пульнезэ,
Ламо мода челькезэ,
—
Пелян, бодинень, бабинень,
Кисеянь одранк, саванк
Мода пульне сайсынзе,
Мода чельке муйсынзе.
Садыя, бодян, садыя!
Гадыя, бабан, садыя!
Велень бодянь кснав рядга,
Туеде, бедян, туеде,
Туеде, бабан, туеде,
Кеверить кснавт сельветькеть.
Садыя, бодян, садыя,
Садыя, бабан, садыя,
Каль пулова киява,
Пешкс пулова киява,
Туеде, бодян, туеде
Чулгонь пештькеть валнэде.
Васня ливан, куркс саян
Эрзянь верань кулытнень,
Эрзянь верань ёмитнень,
Поптомо калмастнень,
Диаконтомо служастнень,
Тикше трукасо курястнань,
Сиянь крёстомо ливтестнень.
Кува нолдан вальгеень?
Кува оргатян шуминень?
Валень частой пирявтка,
Чузонь канава чирева,
Озавтлень килей юткова,
Шачи сюро паксява,
Парсей ялав корёнга,
Штатолжс палы олгова,
Сырьне арьге эзьнева,
Сееде кудря колозга,
Золотакс кольги зёрнава.
Оштё ливан, куркс саян
Рузонь верань кирдитнень,
Поп маро калмастнень,
Диякон маро служастнень,
Ладом качамсо курястнень,
Кадиласо кадястнень,
Сиянь крёст марто ливтестнень.
Кува кучан вальгеень?
Кува нолдан шуминень?
Церькувань крута уголга,
Ниленьгемень крёст алга,
Колоньгемень паз алга.
Вай, пувазо, пувазо
Сёксень кельме вармазо,
Вай кандозо, кандозо
Озась мода челькиненк,
Явшевест кото лазыненк,
Илиштявост одрыненк,
Панжинк глухой вальминенк,
Кулсонинк тейтерь вальгеем,
Езда туи превезэнк,
—
А вальгейнень маштомо,
А валозне пупырдьме.
Зоря пувась толонзо,
Сялксь кувака чевензэ,
Уськеть, уськеть сятконзо,
Рисьметь, рисьметь куловзо,
Масторонь келес валдозо,
Менелень келес зэркезэ,
Диринь тетянь кардайс,
—
Зоря валдо эзь токак,
Зорянь шумнэ эзь марявт:
Диринь тетянь кардайсэ
Мон пайстомо ломанян,
Пайстомо сэрень мон лажан,
Грешной сэрень коволян.
Велень бодят, бодинень,
Велень бабат, бабинень,
Велень алят, алинень,
Велень урят, уринень,
Кона можот токати
Тантей паро удомсто;
Кона можот токати
Апак удок аштемстэ.
Кона токати аштемстэ,
Се марясазо мон шумом,
Сэрь ёмамо вальгеем.
Кона некшнесь берянень,
Марсесь берянь монь валонь,
Се эрьгедезь мерезэ:
Коля сука Охима
Чис сэрензэ коволи,
Чис сэрензэ сон лажи.
Кона эзь некшнек берянень,
Эзь марьсек берянь валынень,
Се мерезэ монь жалязь:
Коля грешной Охима
Пайстомо сэрензэ сон лажи,
Грешной сэрензэ коволи.
Ох, тетякай диринем!
Ох, авакай ванынем!
Мезень удозь саидизь,
Мезень оймазь муидизь,
Эли пек эрьгедиде
Мон ёмамо чинезэнь?
О, тетякай диринем!
О, тетякай ванынем!
Удок ней, тетякай, удок!
Удок ней, тирякай, удок:
Мелявтлить, тетяй, мелявтлить,
Ризнэкшныть, диряй, ризнкшныть,
Аютыкс пижеть а юты,
Асолыкс киветь а солы;
Майшь тетякай, ней, ризксэть,
Майшь, тетякай, мелявксот:
Аютыкс пижеть -- тонть ютась,
Асолыкс киветь тонть солась.
Мон ней, тетякай диринем,
Пижедеяк пек ютан,
Киведеяк пек солан.
Ох, тетякай диринем,
Ох, тетякай ванынем
Мейсь безардить эстэдэнь?
Мейсь ёмавтат монь эйсэнь?
Эли кудот вишкиньгаць?
Эли сюрот тонть эзь шачт?
Авай, авакай ванынем!
Авай, авакай диринем!
Маштокшныть, авай, трямон ваномон,
-
Теле чинень самосто
Шолкке поцо трякшнымек;
Кизэ чинень самосто
Пухке поцо трякшнымек;
Монь трямостон, ваномстон
Эзить содакшно удомо,
Эзить содакшно аштеме
...
Эзить машт, авакай, эзить машт
Ёмавтомон эзить машт!
Систякая, стякая,
Диринь, ванынь тетинем!
Систякая, стякая,
Диринь, ванынь авинем!
Меень удозь муидизь,
Меень васьказь саидизь?
Монь а удомнэ мукшнымем,
А васькамнэ сайкшнымем,
—
Пси пачалго алксынем,
Дикой кевге прялксынем,
Татаронь палакс вельксынем;
А ульнинь тейтерь васькиця,
Ульнинь тейтерь оймиця:
Ульнесь тисовой краватем,
Ацазь пуховой тёшаком,
Ладянь паршовой тодовом,
Вельтянь нумолонь тулупом,
Стявтонь ашо шарчавом,
Мень седей кирдезь саимем!
Мень седей оймазь муимем!
Кевкс кеведнясь седеем,
Повкс поводнясть сельведень.
Эли мон эрьгединь,
—
Лужадузан,
- урекс-чис,
Эли мон пек кецинь,
—
Лондадузан,
— вардокс-чис.
Моньдень юкеле урекс чись
Эрьгедезэ -- кецязо,
Моньдень икеле вардокс-чись
Радувань сецэ аштезэ.
Промодо, ялган, промодо!
Промодо, оян, промодо,
Сэрь лажамо тарказон,
Сэрь вальмамо тарказон!
Умок марясынь, ялгинень,
Мазы циповкат вальгеенк,
(или Москов баяга вальгеенк)
Умок марясынь, ялгинень,
Сахьянской котанк чикордыть,
Пуховой цюлканк каштордыть.
Лисикскелень каршозонк,
Лисикскелень вастомонк,
Диринь, ванынь тетинем
Икельган таргась таргань столь,
Удалган пирясь кшнинь пирявт,
Вить пельган нолдась
Келейстэ чуди -- чуди ведь;
Керчь пелень сон вачкась
Сэрейстэ палы -- палы тол.
Ютыкскелень стольсть трокска —
Пелинь тетянь мельнеде,
Норов авань кежнеде.
Ютыкскелень пирявцьть трокс —
Кедень вентинь -- эсть сатот,
Пильгень чалгинь -- эсть пекстак.
Печкикскелень, ялгинень,
Чуди веденть мон трокска
Пелинь, ялгинень,
—
Бояр авакс-чим начки.
Ютыкскелень, ялгинень,
Палы толонть мон велькска —
Пельтия, ялгинень,
Бояр авакс-чим куртави.
Эрь взинь лисевть каршозонк,
Эрь эзинь лисевть вастомонк,
Илядоя пеняця,
Илядоя осудя.
Аштеде, ялган, ёвтлиса,
Кода манявинь урекс чис,
Кода манявинь вардокс-чис:
Теде веде удылень,
Вере, вере утомсо,
Вере утомонь цюлансо,
Цюлан мазы вальмало;
Вальмань сэрьсэ алксомоль,
Лавсянь сэрьсэ прялксомоль.
Пелеведе икеле,
Атякш морамодо мееле,
Сайтець лембе монь вельксэм,
Калготксомсь чевте монь алксом,
Алкиньгаць сэрей монь прялксом
Штатоць тантей удомом.
Чикор мерькшнесь, ялгинень,
Диринь тетянь ортазо,
Лавузьнаякшность, оинень,
Диринь тетянь кисканзо.
Вачтынь вальма чирева —
Урекс-чи ашти вальмало
Диринь тетянь тускесэ;
Ве кецэнзэ -- сахьянской котат,
Омбоцесэ -- пуховой цюлкат.
Маньчесь, маньчесь нень эснэ,
Эзинь манявт мон тензэ:
Диринь тетянь вийнесэ
Эзинь пиштлек котадо,
А пуховой цюлкадо.
Мейле сакшнось, ялгинень,
Ванынь авань тускесэ;
Парсей кесак кецэнзэ.
Маньчесь, маньчесь нень эснэ,
Эзинь манявт мон тензэ:
Ванынь авань вийнесэ
Эзинь пишлек суреде.
Оштё сакшнось, ялгинень,
Вечкима лелянь тускесэ,
Мазыть семеричкат кецэнзэ.
Сувтем легень карьть кецэнзэ.
Маньчесь, маньчесь сынст эснэ,
Эзинь манявт мон тензэ:
Вейкине лелянь вийнесэ
Эзинь пишлек семеричкадо
Сувтем ленгень карьнеде.
Мейле сакшнось, ялгинень,
Вечкима ялгань тускесэ,
Мазы алнэ кецэнзэ,
Тровицянь каштаз прясонзо:
А, ялгинем а,
Охим!
А, оинем, а Охим!
Диринь тетять вальмало
Шачозь мазы поляна,
Пиже лугань поляна,
Ниле ряцо тикшезэ,
Ниле ряцо лукшозо.
Васенце ряд тикшезэ —
Пильге лапава -- ташто гавданзо;
Омбоце ряд тикшезэ —
Карькс тапардамга —
Тантей цяпор тикшезэ;
Колмоце ряд тикшезэ,
Кумажава -- керясь-тикшезэ;
Нилеце ряд тикшезэ,
—
Карсамова — горнипов цецязо.
Се полянасть кунчкасо
Виев кужо эй налки,
Се полянасть кунчкасо
Виев кужо эй чары.
Весе ялгат сынь киштить, морыть,
Весе оят пеедить-шутить,
Ансяк арасят тон, ялгай,
Ансяк арасят тон оям.
Содасынк, ялгинень,
Кужо вечкя ульнекшнынь,
Ялга вечки ульнекшнынь.
Истя манявинь урек-чис
Истя манявинь вардокс-чис.
Адядо, ялгинень, адядо
Килей пулова якамо.
Таратто тарац кунцеме,
Лопадо лопас чалксеме.
Сакшнодо, ялган, сакшнодо
Сэрь лажамо тарказон.
Сакшнодо, ояк, сакшнодо
Сэрь вальмамо тарказон.
Илядо безарть эстэдень,
Илимизь катт тынь скушнас,
Илимизь катт тынь тошнас,
Илядо пель, ялгинень,
Диринь тетянь мельнеде,
Илядо пель, оинень,
Ванынь авань мельнеде,
Илядо пель, ялгинень,
Перекладонь сивмеде,
Илядо пель, ялгинень,
Алов мостонь меньмеде.
А, ялгинень, оинень,
Кадынка, ялган, кадынка
А теевикст монь тевень,
А прядовикст монь тевень;
Истякак, ялгинень,
Чи печтиде иешка,
Шка печтиде кавтошка,
Вай, пасиба тенк пасиба!
Лисекскелень каршозонк,
Лисикскелень вастамонк,
Тейтерькс-чим марон арасель,
Мазы чим марон арасель.
Дирим тетям сайнизе
Покш базарга якамо,
Базарной одрань рамамо.
Весе рамамот рамавкшность,
Весе саймат саевкшнэсть,
Меельць рамамо сынь рамасть
Базар мазы кинигат.
Столень келесэ сынст келест,
Столень сэрьсэ сынст сэрест.
Дирвнь тетям, ялгинень,
Икельган таргась таргань столь
Удалган ладясь сиянь стул.
Васень листке кепединь,
Васень листке мон штавтынь.
Ловнынь, ловнынь эснэнзэ,
Цётынь, цётынь эснэнзэ:
Сесэ весе сёрмадозь,
Кудо поцо семиясь,
Арась ютксост, ялгинень,
Монь пайстомо леминем.
Омбоце листке кепединь,
Ловнынь, ловнынь эснэнзэ,
Цётынь, цётынь эснэнзэ,
-
Весе раськеть сёрмадозь,
Весе раскеть сёрмадозь.
Сесэяк арась, ялгинень,
Монь пайстомо леминем.
Колмоце листке кепединь,
—
Ловнынь, ловнынь эснэнзэ,
Цётынь, цётынь эснэнзэ,
Весе сесэ сёрмадозь
От цёратне-ялгатне.
Нилеце листке кепединь,
Сесэ весе сёрмадозь
Бояр ават ялгатне,
—
Сесэяк арась, ялгинень,
Монь пайстомо леминем.
Ветеце листке кепединь —
Весе уреть сёрмадозь,
—
Эрь сесэня, ялгинень,
Моньгак лемем сёрмадозь.
Якинь-пакинь, ялгинень,
Лисинь-совинь, оинень.
Диринь тетянь кардазга;
Ванынь тетянь кардазга.
Кардазонть вить пелензэ
Шачозь мазы поляна;
Се полянанть кунчкасо
Ашо мазы килея.
Кавтов аштить пирянзо.
Ве пирясонть калинат светить,
Омбоцесэнть малинат палыть.
Се килейсть ало, ялгинень,
Тейтерькс-чим ашти озадо,
Котова таргазь палясо,
Кумажас путозь руцясо,
Коморо цецят кецэнзэ,
Тровицянь каштаз прясонзо,
Авардезь ашти кургозо,
Сюмордезь ашти кургозо.
Аштеде молян, ялгинень.
Килей пулова якамо,
Кона килейесть, ялгинень,
Тарадонзо сееднеть,
Лопинензэ пижинеть,
Се килейстень поводян,
Се килейстень нежедян.
Вечкиминем, ялгинем!
Кельгиминем, оинем!
Поладыка вайгелем,
Лецлитяяк, ялгинем,
Муевикст монь валон;
Марясак, ялгинем,
Вельть пек ёмсить монь ёнон,
Вельть пек машнить монь превень.
Седе икеле эрямсто
Вельть ладнойстэ эрсинек,
Ве кужосо налксильнек,
Ве моросо морцильнек,
Ве превнесэ арцильнек,
Ве валнэсэ кортыльнек,
Ве таркасо удсильнек.
Кода полаца, ялгинем,
Москов баяга вайгелеть.
Кода ледстясынь, оинем,
А муевикст валынеть?
А маштан, ялгай, а маштан,
Тонть вейгелеть поладмо.
А маштан, оям, а маштан
Тонть валынеть ледстямо.
Умок маряса, ялгинем,
Вельть пек ёнот ёмсетить,
Вельть пек преветь машлетить,
Кснавкс кеверать сельведеть.
Молевелень ваксозот,
Вай, а смеян, а смеян,
Тонть ваксозот мольмедень:
Ней а кармат, ялгинем,
Минек марто якамо,
Ве кужосо налксеме,
Ве моросо морамо.
Аштеде, ялгат, аштеде,
Илядо листь икелев.
Аштеде, оян, аштеде,
Вить кедень мон рикстедян —
Сиянь кетьксэм рикстеца,
Тыненк сэдян сиянь сэдь.
Керч кединень рикстедян —
Сирьнень сурксом рикстеца,
Тарган сырьнень балясат.
Аштеде, ялган, аштеде,
Сия ютан монць васня:
Талерт, талерт монь карень,
Талер сёрмат монь следэн;
Талер карьцэнь мон чалган —
Талер печать мон теян.
Талер слетстень чалгадо,
Балясатненень кундадо.
Сакшнодо, ялган, сакшнодо,
Илимизь кадо монь скушнас
Илимизь кадо монь тошнас;
Содасынк, ялгинень,
Пижедеяк пек ютан,
Киведеяк пек солан.
Промодо, ялган, промодо
Сэрь лажамо тарказон.
Промодо, оян, промодо,
Сэрь вальмамо тарказон;
Умок эрьван мон эйсэнк.
Мейсь а сатадо тынь курок,
Мейсь безарьдиде эстэдень?
Пазонь чизэ иешка,
Нишкень чизэ кавтошка:
Вельть пек скушна саимем,
Вельть пек тошна муимем,
Чоп ванынь вальмава,
Вальмас кадовсть монь сельмень,
Пельцас кадовсть сур пирян,
Вальма ланкс сизесть кенерень,
Эземс педясть кумажан
...
Умок марясынь, ялгинень,
Москов баяга вайгеленк;
Вачтынь вальма чирева,
Москов поряткасьть кувалма
Мазы ялган кепетецьть,
Ашо дигань полкокс сынь сыргасьть.
Котова таргазь сынст паляст,
Клетка мартот сынст руцяст;
Ашот цюлкаст каштордыть,
Сахьяннойть котаст чикордыть;
Мазы морот сынь морыть,
Васолдояк марявить
...
Вачтынь омбоць вальмава:
Цёра ялган кепетецьть,
—
Седить мазы седямсо;
Поярышнойть чапаност,
Подяцейкс карксазь сынст карксост,
Кримской шапкат сынст прясост,
Чикордыть кемть сынст пильксэст.
Вачтынь колмоць вальмава,
Пиже дуган кепетецьть,
Гулькань полкокс сынь сыргасть.
О, ялгинень-оинень!
О, ялгинень-дугинень!
Лисикскелень каршозонк,
Лисикскелень вастамонк,
Визьдилгадынь, ялгинень,
Эсь пайстомо пирядон:
Виде килейть тынк сэренк,
Мазы скрипкат уставонк,
Якстерь умарьть тынк чаманк,
Мако лопат тынк руцянк,
Вачтынь сэрень кувалма,
—
Пайстомо сэрем нувара,
Мазы тусом оланя.
Вачтынь ашо палянь ланкс,
Ашо палям румакаць,
Клетка руцям олакаць.
Секс эзинь листь каршозонк,
Секс эзинь листь сречамонк.
Илямизьга осудя,
Илядоя леняця.
Аштеде, ялган, ёвтниса,
Кода чечо чинть печтия,
Кода шканьть ютавтыя:
Лисинь, совинь, ялгинень,
Диринь тетянь кардазга.
Кардазонть вить пелензэ
Шачозь мазы поляна.
Ниле ряцо тикшэзэ:
Пильге лапава -- ташто гавданзо;
Карькс тапардамга -- цяпор тикшезэ;
Кумажава -- керясь тикшезэ;
Карксамова лопа тикшезэ.
Се полянанть кунчкасо
Ашо — мазы килея,
Се килейсть ало, ялгинень,
Бояр-авакс-чим ашти озадо:
Котова таргазь палясо,
Кумажас путозь руцясо,
Коморо цеця кецэнзэ,
Тровицянь каштас прясонзо.
Нусмангадозь шачозо,
Аварьдезь ашти кургозо.
Вачтынь мон, ялгинень,
Вере пазонть чинзэ ланкс,
—
Пазонь чизэ а вере,
Нишкень чизэ а вере,
—
Тукшнось чи-паз тетянцтэнь,
Тукшнось нишке аванцтэнь.
Тетязо учи эснэнзэ,
Лись орта ланкс каршонзо:
Сырьнень венець прясонзо,
Сиянь мандо кецэнзэ,
Якстереть кемть пильксэнзэ.
Авазо лись каршонзо:
Сиянь венець прясонзо,
Пижень мандо кецэнзэ,
Пижеть котат пильксэнзэ.
Саизь чи-пазость, ялгинень,
Кавто пельде -- кавалдо,
Кавт кедь ланксо сынь кандызь,
Эзем пиряс озавтызь.
Икельганзо таргасть таргань столь,
Ацасть ашо столешникь,
Сиянь блидя столанкс пуцьть,
Кавт садумарьть эснэнзэ.
Тукшнось дирень тетязо
Садовой пенгень керямо;
Тукшнось ванынь авазо
Писи банянь уштомо.
Истя учить чи-пазоньть
Истя эрьвить чи пазонть:
Лись тетязо каршонзо.
Лись авазо каршонзо.
Монь тетям безарьць эстэдень,
Авам безарьць эстэдень,
Сыненст жаль а маряван
Сыненст жаль а маряван,
Промодо, ялхан, промодо,
Сэрь лажамо тарказон.
Промодо, оян, промодо.
Сэрь вальмамо тарказон.
Умок марясынь, ялгинень,
Москов баяга вайгеленк,
Умок марясынь, оинень,
Мазы циповка вайгеленк.
Лясиксэлень каршозонк,
Лисиксэлень сречамонк,
Бояр-авакс-чим мартон арасель,
Мазыкс-парокс-чим мартон арасель.
Аволь тукшнось, ялгинень,
Кавто ёнга шабрава
Ломань превень вешкеме,
Ломань превень кевснеме:
Соньсинзэяк ульнесть, ялгинень,
Паро превень максынзэ,
Паро превень ёвтынзэ.
Бояр-авакс-чим, ялгинень,
Вере, вере утомсоль,
Верь утомонь вальмалоль,
Цюлан мазы вальмалоль.
Ашо кеньде алонзоль,
Сиянь мукорь пильгалонзоль,
Тужо тевзэ кецэнзэль:
Ажо конёв коцтозо,
Конёв сёрмат артонзо,
Сиянь салмукс кецэнзэ,
Парций суре песэнзэ.
Салмукскесэньть якавты,
Мишарасонть кемельди.
Пшкалинь, пшкалинь -- сон эзь пшкать,
Тердинь, тердинь эзь тердевть.
Соньтемензэ, ялгинень,
Эзинь лисьть мон каршозонк,
Соньтемензэ, оинень,
Эзинь листь мон сречамонк.
Илимизьга осудя,
Илядоя пеняця.
Аштеде, ялган, ёвтниса,
Кода теде веде мон удынь:
Пеле веде икеле,
Атякш морамодо мейле
Сайгець лембе монь вельксэм,
Штатоць таньтей удомом.
Вачтынь пиря пенезэнь,
Пиря песэнь, ялгинень,
Кумажас путозь руцязо,
Сахтиянской котат пильксэнзэ,
Нусманьгадозь шачозо,
Аварудезь ащи кургозо.
Вачтынь пильге пенезэнь,
Пильге песэнь, ялгинень,
Урокс-чись ашти озадо:
Кумажава палязо,
Кочкарява нуланзо
Кенерева ожанзо,
Сур-пирява нуланзо;
Ленге лутконь карензэ,
Левш нулынень карьксэнзэ;
Весёлгадозь шачозо,
Пеедезь ашти кургозо.
Вачтынь пильге пенезэнь,
—
Пильге песэнь, ялгинень,
Урекс-чись ашти озадо:
Лукшты лавьссэ пильксэнзэ,
Ризань парго вакснэнзэ,
Каль карёнонь кечкассо,
Тумо-тарад салмукссо.
Ризат-рязат эй пантли.
Ве семстэнзэ сый чуди,
Омбоцестэ верь кольги.
Калмов, -- сонгак эй кишти.
Модав, -- сонгак эй моры.
Аштеде молян, ялгинень,
Килей пулова якамо,
Килей рощава пакамо;
А муян-ли, ялгинень,
Бояр-авакс-чим ашти озадо:
Таргань паля ланксонзо,
Моньсинь коньдямо килейне,
Кона кялейсть, ялгинень,
Тараткензэ нуварат,
Лопинензэ ожолат,
Кошкевтеме коськенить,
Вармавтомо либордыть,
—
Се килейстень поводян,
Се килейстень нежедян.
Сакая, урькай, сакая!
Сакая, авкай, сакая!
Ёвтлика, урькай, ёвтлика,
Кодамо сон урекс-чись,
Кодамо сон вардокс-чись.
Ёвтлика, урькай, ёвтлика,
Ломань тетясь кодамо.
Ёвтлика, авкай, ёвтлика,
Ломань авась кодамо.
Ёвтлика, урькай, ёвтлика,
Ломань семиясь кодамо.
Ёвтлиса, другай, ёвтлиса,
Кодамо сон урекс-чись;
Ёвтлиса, дугай, ёвтлиса,
Кодамо сон вардокс-чись:
Ве ёндо сон ванмосто,
Кизэ чинь сон коньдямо,
Мазы чинь сон кондямо;
Малазонзо пачкодят,
Эзэзэнзэ эшкиват,
-
Кшнинь потковс поткуватанзат,
Кевь пандова кустятанзат.
Ёвтлиса, другай, ёвтлиса,
Ломань тетясь кодамо:
Ве ёндо сон ванмосто,
Инечинь чинь коньдямо;
Малазонзо пачкодят,
Эзэзэнзэ эшкиват.
-
Ломань тетясь, дугинем,
Благой пургинень коньдямо,
Пшти ёндолонь коньдямо,
Бути серьгеди лангозот,
Арамс тарка а муят,
Аштемс тарка а муят.
Ёвтлиса, дугай, ёвтлиса,
Ломань авась кодамо:
Ве ёндо сон ванмосто,
Таньтей ярцамонь коньдямо,
Сетц педи ярцамонь коньдямо;
Малазонзо пачкодят,
Эзэзэнзэ эшкиват,
-
Ломань авась, дугинем,
Пици палаксонь коньдямо.
Бути сон пицитянзат,
Шлязь-гак, дугай, а шляви,
Коцькерезь-гак, а коцькереви.
Ёвтлиса, дугай, ёвтлиса,
Ломань семиясь кодамо:
Ве ёндо сон ванмосто,
Мазы одюжань коньдямо,
Педи одюжань коньдямо.
Малазонзо пачкодят,
Эзэзэнзэ эшкиват,
Чинезэнзэ лепият:
Бути ютат, дугинем,
Кудонь кувалт эрекстэ,
Сестэ мери семиясь:
Перекладнок синьцынзе,
Ало мостнок менцынзе;
Бути ютат урядна,
Сестэ мери семиясь:
А усксевить пильгензэ,
А кантлеви пирязо.
Ужо ёвтниса, парыям,
Кодамо ятсо эрямось,
Кодамо ятсо аштимась:
Икелеэ сыргат -- пекь бойкат,
Мекевкс кадуват -- нузяксат,
Мартост молит -- тон сёвнат.
Душмансь неессэ, парыям,
Ломань тетясо эрямонть;
Душманьць арьсессэ, дугинем,
Ломань тетясо эрямонть,
Аварьть, аварьть, парыям,
Тиринь тетять кудосо,
Шкинень авать икеле:
Сыненст жальне маряват,
Сыненст мила неяват.
Ятсо-чужойсэ, парыям,
Кинень-гак жаль а маряват.
Ломань тетясь-авась, парыньгем,
Тицакс-нармынькс сынь кортыть,
—
Сурсост нейтить — а кучить,
Сельмсэст кончтыть — а терьдить.
Салмукс песэ кшиньге максыть,
Пеель пряса сал почодыт,
Пильге сурсэст кенкшке паньжить,
Кочкарясуст кенкшке сёлгить.
Сынст келезэст ат чаркодят,
Сынст валузуст ат содат.
Маштыть пряста превиньгеть
Ёмить куркста валыньгеть,
Ловташкады, парыньгем,
Экстерь умарь чаминьгеть,
Дёкушуми, парыньгем,
Пар(о) калаця шачиньгем,
Тоньсеть солы, парыньгем,
Пар(а) пеняда телыньгеть.
Ох, лужадовлень лужадозь,
Лондадовлень лондадозь!
Чудеде, сельветь, чудеде!
Чамань келес чудеде,
Уло пезэнь промодо,
Лиця мазым саеде!
Мештень кувалт чудеде,
Седей алем саеде.
Чудеде, сельветь, чудеде,
Одонь сэрень кувалма!
Кумажа прязон промодо,
Кумажа прястон чудеде,
Пильге виень саеде.
Карь пирязон промодо,
Карь пирястон чудеде,
Диринь тетянь киякска
Чуди керькске тееде,
Чуди лейнекс чудеде,
Поровт экшес промодо:
Паряк сия токати
Диринь тетям совамдо,
Ванынь авам лисемде,
Паряк сестэ тетянень
Диринь тяказо жальне маряви,
Паряк сестэ аванень
Ванынь тяказо мила неяви.
Аштеде, ялган, аштеде,
Тыненк накас наказан,
Тыненк прикас приказан:
Вальске рана стямосто
Ашот пацят сюлмседе,
Таргань палят орчледе,
Лиседе тынь, ялгинень,
Диринь тетянк орта ланкс,
Вачтадо тынь, ялгинень,
Диринь тетянь турба ланкс:
Бути лиси, ялгинень,
Диринь тетянь турбава
Ашо — мазы качамо,
-
Сестэ, диринь авинем
Кудосо семиянь кис стряпаи.
Бути лиси, ялгинень,
Диринь тетянь турбава
Виев штурма качамо,
Сестэ диринь тетинем
Покш поминкат кепеди
Пастоймо лемень ливамо.
Сестэ садо, ялгинень,
Мазы лемень ливамо,
Мазы лемень кундамо,
Илядо учо терьдимат,
—
Кучмо таркам монь арась,
Арась шожда посолом —
Пиже дугам сазором,
Мазы дугам ялаксом.
Ох, лужадовлень лужадозь,
Лондадовлень лондадозь.
Ванодо, ялган, ванодо,
Ванодо, пижеть дугинень,
Истя якинь, ялгинень,
Прянь ёмавтума базаров
Анок ярмаксо рамсеме.
Тов мольместэ, ялгинень,
Ки чирестень касокшнось
Умарина сад-чувто.
Чувтонт васень таратсо
Бояр-авакс чим ашти озадо,
Лажамо паця прясонзо,
Сельведь паця кецэнзэ-
Саия бояр-авакс-чим,
Чинь каршо лавкас ведия
Мазы нарядонь рамсеме.
Бояр-авакс-чим, ялгинень,
Эзь радува мазы нарятнэс,
Эзь пеедезевть кургозо,
Эзь весёлгат шачозо.
Нярс яксилень, ялгинень,
Эсь ярмаксон рамсеме,
Весёлгалиль тейтерькс-чим,
Пеедезь якиль олякс-чим.
Вай, пасчанготь, пасчанготь!
Лиси чи паз чантьтянок,
Валги ков паз чантьтянок.
Кона пазось Сёмань максызе,
Секе пазось чаньтямизь
Норов-авань тееме.
Вай, удалак, удалак,
Норов-ава, матушка!
Сёмань полас тейдядызь,
Сёмань полас сыргавттадызь.
Аволь сусик прясто саидизь,
Аволь сусик потмаксто таргидизь.
Аволь сусик пряксонят,
Аволь сусик потмаксонят,
—
Аволь мода пулеват,
Аволь криша челькеват,
—
Сусик кунчкасто саезят,
Сусик седейстэ саезят.
Монь шичинем-алинем,
Монь шичинем-лелинем
Покш каявтонь каиця,
Покш оброконь пандыця,
Ламо модань сокиця,
Ламо сюронь видиця.
Норов-ава, матушка!
Норов-ава, сияка!
Козо, козо видезят?
Козо, козо, шачозят?
Пойма паксяс — од модас,
Равужо човаля од модас.
Сисемь сокасо сокидизь,
Сисемь изасо изыдизь;
Парт боярт тоньть сокидизь,
Сыре бояр видиньзеть,
Бояр ават кочкидизь,
Бояронь тейтерьть нуидизь.
Тейтерть, бояр авинеть!
Тейтерть, азор авинеть!
Азьдо — минь кучтадызь,
Азьдо — минь нолдатадызь
Покш родня ланга якамо,
Родня раськень тердеме,
Надо палкат макстанок,
Илядо пель кискадо.
Велень кругом ютадо,
Весеменень ёвтадо,
Ве кардаз-гак, тейтерь-эйть,
Апак терьть илядо кад,
Кудо зайне совседе,
Кудо зайне тердеде.
Конань а панжови ортазо,
Чукадеде вальмалов.
Бояр-ават, стряпухат!
Азор-ават стряпч-ават!
Лиседеяк каршознок,
Лиседеяи вастомонок,
Тынк накаснэ аштинек,
Тынк приканэ аштинек,
Велень кругом ютынек,
Велень ломать тердинек,
Ве кудояк эзьнек кат,
Ве ломань-гак эзьнек стувт,
Сыренек однэк терьдинек,
Сыретьнень минь терьдинек
Садовойде ярсамо,
Медовойде симеме.
Седе отнэнь терьдинек
Стака канцтонь кандомо,
Отнэнь-отнэнь эйкакштнэнь —
Мазы свадьбань ваномо.
Вай, якинек, якинек,
Кудо зайне совсинек,
Весе роднят мукшнынек,
Весе раськеть тердинек,
Ансяк, уряш, эзьнек ней,
Пиже тякат Андрееть;
Ансяк сонзэ эзьнек муйть,
Ансяк сонзэ эзьнек терть.
Вай якинек, якинек,
Велень кругом ютынек,
Покш ульцявасть ютамсто,
Неинек минь киштицят,
Неинек минь морыцят:
Велень вере песэнзэ
Од цёратьне-бояртнэ
Седить мазы седямсо
...
Велесть ало песэнзэ
Бояр-ават тейтертьне
Морыть мазы моросо;
Эзнек лотксе ваксозост,
Эзьнек вано лангозост,
Эзьнек печтя минь шканок,
Эзьнек ютавт поранок:
Минь капшинек ёвтлинек,
Минь капшинек тердинек.
Карксамова ведьнева,
Кумажава рудазга,
Эзьнек совсе костлеме,
Эзьнек лотксе оймсеме.
Вай, пасиба, пасиба!
Тейтерть, бояр-аванеть!
Вай, пасиба, пасиба,
Тейтерть, азор-авинеть!
Ламо труда неиде,
Ламо нужа примиде,
Эзите пель пиземде,
Эзиде пель вармадо.
Вай, совадо, совадо,
Эземь пиряс озадо.
Кудон кирьди корминець,
Керень шочконь пас, матушка!
Иля тандат шумдонок,
Иля срастявт криктенек.
Аволь тонть срастямс таргинк,
Аволь тонть тандавтомс нолдынек.
Мазынзэ кис таргинек,
Паронзо кис нолдынек.
Миша леляй, лелякай!
Миша леляй, корьмакай!
Тонть кецтэ превнеть кевстянок:
Тонть кецтэ превнеть вештянок:
Мерят, а мерят, лелякай,
Сваха мельга молемде?
Куд-ава мельга туемде?
Буди мерят, лелякай,
Сваха мельга мольдянок,
Куд-ава мельга туйдянок
Кильдень поводень лишмесэ,
Камбрастонь -- панцтонь ракшасо.
Кува, кува мольдянок
Кува, кува арттанок?
Москов улиця юткова,
Ростов порядкань кувалма,
Кшнисэ сэдязь сэдь ланга,
Пижень баляса юткова,
Штадо пазава икельга,
Курвастень свеча валдова,
Ладонь качамо чинева.
Серойть, буройть лишменек,
Чопуда-сивойть ракшанок,
Чопуда карцо кирцынек,
Чукань виште анцынек,
Лембе ветьте симцынек.
Киштезь киштить сынст пильгест,
Ветькс юмболдыть лангинест,
Юдмакс юводыть пулынест,
Штерьдезь штерьдить сельминест,
Васонь пеельть пилинест,
Таргань парцейть гривинест,
Щипецьс а понгить сынст понаст,
Крустальной стопкат сынст кеншест.
Коське таркава молемстэ,
Лисьма прят лисить пильг-алдост,
Начко таркава молемтсэ
Толт верьгедить пильг-алдост
Ану патянь кардазонь кирьдизэ,
Ану патянь кардо-сяркозо!
Иля тандатт шумдонок,
Иля срастявт увттонок,
—
Аволь тонть тандавтомс таргинек,
Аволь тонть срастямс нолдынек.
Патянь кардазонь кирьдизэ,
Патянь кардо-сяркозо!
Буди улят тон мадезь,
Озакая озадо.
Буди улят озадо,
Стякаяк тон пильге ланкс,
Ризат орчить лангозот,
Крёстот каик киргазот,
Кадилат саик кедезэть.
Ризат эйсэ вельтямизь,
Крёстот эйсэ пирямизь,
Кадиласот сувтамизь.
Велень кувалт ютынек,
Порядкань кувалт ардынек;
Кудонь, кудонь ловнынек,
Кавтонь кавтонь цётынек:
Кода минь почкодинек
Ану патянь орта ланкс,
Ортазо понжозь келейстэ,
Кришазо кепедезь сэрейстэ.
Минь ортадонзояк келейтянк,
Кришадонзояк сэрейтянк.
Ану патяй, патякай!
Ану патяй, корьмакай!
Буди учат эйсэнек,
Листяятя карчонок.
Кудонь кирьдись, покштянок!
Кудонь покшось, бодянок!
Сия шерже, покштянок!
Сырнень превне, бодянок!
Тонть пельде толкке кевсттянок,
Тонть пельде толкке вештянок:
Кучсак, а кучсак, покштякай,
Саень урьват тон свахакс?
Нолдасак, а нолдасак,
Рамань урьват кудавакс,
Миненек цислань ветямо,
Миненек мазынь тееме,
Полконь кирьди полковникс,
Беседань веди исправникс?
Атявтонь кудонь кирьдизэ!
Атявтонь керзэ шочкозо!
Иля тандатт шумнэдэнь,
Иля тандат вайгельдень,
—
Аволь беряньс нолдыя,
Аволь апарс таргия,
Сёмань покш цислас нолдыя,
Сёмань пошк эрьгас таргия.
Покш покштинень, бабинень!
Эсь диринень, ванынень!
Содатадо саймедень,
Ней содадо эстэдень,
—
Пиже дугам крёстникем
Паро цислас сась кисэнь,
Мазы тевнес сайсамам.
Баславимизь, покштинень
Покш цислава якамо,
—
Тынк баславкасо, покштинень,
Толс каязьгак, а палан,
Вец каязьгак, а ваян.
Атявткинем, саинем!
Атявкинем, раминем!
Мерят, а мерят, атявткем,
Покш цислава якамо,
Покш эрьгава якамо?
Бути мерят, атявткем,
Монень помогас мольтяя:
Пыже ду-гам сайсамам
Живой товаронь рамамо,
Тейтерь пирянь идеме,
Ськамон вием а саты.
Аволь вешан сядосо,
Аволь вешан кавтосо,
—
Сур пирясо сиясо,
Кенже песэ сырьнесэ,
Коморо поцо пижесэ.
Ававткинем, саинем,
Аваткинем, пурнынем!
Тонть апак кевсть а молян
Покш цислава якамо,
Покш эрьгава якамо.
Бути мерят, ававткем,
Тонетькак, авай, инялдан,
—
Тоненькак, авай, докучан:
Тонеть кадан кудонь тевть,
Тонеть кадан пиж-эйкакшт.
Кудонь тевтнень теитя,
Пиже тякан ванытя.
Ки монь сецэ учицям?
Ки монь мельсэ эрьвицям?
Ох, лелякай, диринем!
Ох, лелякай, ванынем!
Учат, а учат монь эснэ?
Эрьват, а эрьват монь эснэ?
Бути, лелякай диринем,
Пиже дугам крёстникем,
Тонть кучовцо сон якась,
Тонть меревцэ туимем,
Сестэ листяк каршозон,
Ортат панжик келейстэ,
Кришат кепедик сэрейстэ:
Алон пара монь ракшан
Гуйкс юмболдыть лангинест,
Киштезь киштить пильгинест,
Вешказь вешкить пилинест.
Ёндолкс верьгедить сельминест.
Бути сецэть тон учат,
Пара лишмень совавцынь,
Паро повоскам перьгавца.
Бути а учат монь эснэнь,
Паро повоскам потавца
Пара лишмень мурдавцынь.
Лелянь кардазонь кирдизэ!
Лелеянь кардо-сяркозо!
Иля тандатт вайгельдень
Седь икеле сакшнылень,
Эзия нолтне эзэзэть
Москов баяга вайгелем,
Ростов горнипов шуминем.
Кардаэонь кирьди, матушка!
Иля кулцоно монь ёнов,
Иля приметя валынень.
Козой седееть рожомца?
Козой сэринеть оймавца?
Диринь лелянь -- корьмакань
Ниле уголс кардассо,
Колмо путонь кардонзо.
Ве кардоньтень пекстазельть
Сивойть, буройть ракшанзо,
Омбоцентень пекстазельть
Сия сюрот скалонзо,
Колмоцестень пекстазельть
Суркс кудринеть ревензэ.
Сезэй сэреть оймавтык,
Сезэй седееть рожомтык.
Бути сезэйгак а оймат,
Бути сезэйгак а рожомат,
Лелянь кардас кунчкасо
Пиже лугань поляна,
Мазы лугань кружокке.
Се полянанть кунчкасо
Сиянь стольне аравтозь.
Се стольненть икеле
Пазонь кучовт ангелнэть,
Пазонь валнэть сёрмадыть,
Божественнойть моравтыть.
Сынст вальгеест кулцонок,
Сынст валынест приметяк.
Ох, патякай, диринем!
Ох, авакай, ванынем!
Бути учат монь эйсэ,
Сестэ листтяк каршозон,
Витть кедьнеде саимак,
Сур пирядо кундамак.
Седь икеле, патякай,
Чокшнэ позда мон сылень,
Вальцке рана чиилень,
А училинь стречицят.
Кува сэрем мон печса?
Лелянь кустим песэнзэ
Кругловой эрьке, покш эрьке;
Сиякс оймась лангозо,
Сырьнекс оймась потмакссо.
Се эрькенть трокс, патякай,
Молезь сэрем а саты,
Уезь вием а ламо.
Вить кедьнесэнь сиянь суркс,
Керч кедьнесэнь пижень суркс.
Керч кединень рикстедян,
Пижень сэдьне мон сэдян;
Вить кединень рикстедян,
Сиянь баляст вачкудян.
Сия сэрем ютавца.
Ох, лелякай, кумушкам!
Буди учат монь эснэ,
Кенкшеть панжик келейстэ,
Косяксть кепедик сэрейстэ.
Кецэнь шачи норовом,
Вереть алот кувонзо,
Кемгавтово лувонзо,
Москов нарятт ланксонзо,
Кенкшедеттяк келейне,
Косякттоткак сэрейне.
Буди сецэть тон учат,
Поровтот велькска эськельдян,
Кудо сэрень совавтан.
Сэрь совамодон икеле,
Сия валдо кеверьдян
Сия валдо совазо.
Лелянь кудонь кирьдизэ!
Лелянь кудонь ванызэ!
Иля тандатт шумнэдень,
Иля тандатт вайгельдень.
Аволь беряньц нолдыя,
Аволь апарц таргия,
Покш радостес нолдыя,
Покш эрьгедьмас таргия.
Кудонь кирьди, матушка,
Козой седееть рожомца?
Лелянь эзем прясонзо
Путозь таргань столезэ,
Се столенть кунчкасо
Сиянь блидя аравтозь;
Се блидиненть ланксо!
Колмо садовойть яблочкат,
Колмо медовойть преничкат,
Сезы седееть рожомтык,
Сезэ седееть оймавтык.
Ох, а патякай, диринем!
Сакаятя малазон,
Кецтэнь норовом саика,
Пешксе берюмам чамдыка.
А, лелякай а Илё!
А, патякай, а Ану!
Коли сайсамизь покш цислас,
Коли сайсамизь покш эрьгас,
Козо тень тарка невттядо?
Козо тарка максттадо?
Коли сайсамизь покш цислас,
Коли сайсамизь покш эрьгас,
Монь озавтымизь покш таркас,
Монь баславимизь покш таркас.
Туйдай, туйдай, туйдай-дай,
Туйдо, ваёх ваяёх.
Косо, косо те туйдайсь?
Косо, косо ваяёхсь?
Колоньгемень лаз поцо,
Ниленьгемень пинкс экшнэ.
Ядо симеде, симеде,
Канды мекшкеть, симеде,
Стакинестэ кандыде,
Бойкинестэ чииде.
Монь лелинем, алинем
Эрьва мезе анокстась,
—
Ули мезде тынк симдемс,
Ули мезде каванямс:
Кавт варт пия сон видесь,
Кавто мацтка путынзе,
Дестерик вина сон рамась,
Кавт утомга путынзе.
Минь кемень-комсь иеть
Те чинесэнть учинек,
Комснь-комсь иеть
Те чинисэнть эрьвинек:
Ваекя ловнынек минь читнень —
Кемень-комсь чить тополесть,
Мейле: ловнынек минь ковтнэнь —
Кемень-комсь ковт тополесть,
Мейле ловнынек иетнень —
Кемень-комсь иеть тополесть.
Аволень симе винадо,
Аволень симе пиядо,
Вечкан паро роднядо,
Вечкан паро раськеде.
Кечесь мери кандумак,
Поймась мери симимак.
Козонь шачнось комуль-авась?
Козонь каснось комуль-авась?
Начко таркас -- каль пулос,
Летьке таркас -- чеядавкскес.
Рукшнат-рукшнат лопинензэ,
Мокшнат, мокшнат шишкинензэ,
Прась кельминесь чавокшнызе,
Лиси чинесь костякшнызе,
Пуви вармась пувакшнызе,
Вить межинес кандокшнызе.
Вить межасонть норов-ава.
Норов-ава — бояр-ава.
Норовт комлят сынь здорякшность,
Норовт комлят сынь пельксташность:
Норовсь мери: мон здорован,
Комлясь мери: мон виеван.
- Ёвтык, норов, здоров чинеть,
- Ёвтык, комля, виев чинеть.
- Давай, норав, мирятанок,
- Давай, комля, ладятонок.
Превеень поц минь пратанок,
Морокс, валнэкс аратанок.
Дураконь поц — минь пратанок,
Турикс, сёвныкс арастанок.
Каштом кирьди, матушка!
Каштом кирьди сияка!
Пиди пани мазыстэ,
Мельс туишка тон теи.
Или пулта тон лангост,
Или ченгя тон алксост:
Васолонь таркас саимат,
Кельгезень таркас саимат.
Ломань пря марто спорямо,
Ломань пря марто пелькстамо.
Каштом ава, матушка!
Каштомонь кирьди, сияка!
Максыть минек пряканок,
Нолдыть минек пряканок,
И шумбрасто, паросто,
И мазыстэ, вадрясто,
Иляст яжавт сынст кувост,
Иляст скирявт сынст краест.
Каштом ава, матушка!
Каштомонь кирьди, сияка!
Пасиба тенть, пасиба,
Пасиба парьсте пидемест,
Пасиба, парьсте панемест:
Вельть вадрясто тон пиди,
Вельть мазыстэ тон пани.
Эзить пулта сынст лангост,
Эзить чентя сынст алкосост.
Цярмун велень атятьне,
Цярмун велень бабатьне!
Цислань содамодо колттадо,
Вадрянь содамодо бойкатад(о).
Эрьга ванынка, ванынка,
Кодамо панинек лувонь-кшенть,
Кодамо пидинек той-пряканть.
Туи, а туи мелезэнк,
Педи, а педи содейзэнк.
Эрьде, вачинка, вачинка,
Минек панезь пряканок,
Туить, а туить мелезэнк,
—
Минь аволь коськстэ теинек,
Аволь ведь пряс ичинек,
Сисем скал ойс ичинек,
Вельть тантейстэ теинек.
Вана тезэ путтадызь,
Норов-ава, сияка!
Аштекаять шубрасто.
Иля саевть душманнэнь,
Иля саевть злодейнень,
Ярцадо, кудат, ярцадо.
Пекенк пешкедьмес ярцадо.
Симеде, кудат, симеде,
Сименк явамс симеде.
Ят масторов кучтадызь
Вачо пекень кирьдеме,
Нучкань седейть аштеме.
.
Уредев, аля, пар-аля!
Уредев, аля, пар-аля!
Ламо, ламо аванок,
Лам(о) авасо пар(о) арась:
Панчт каштомо — ям арась,
Панчт столь потмо -- кше арась,
Ведрас вачтак — ведь арась.
Уредев аля, пар-аля,
Уредев аля, маз-аля!
Азё тука пар-ава,
Азё тука маз-ава.
Ярцамс ямонь пидиця,
Симемс ведень кандыця.
Ойсэ пирят вадьнеснэк,
Сурцемесэ судряснэк,
—
Оенть кондямо
Чевте седей улезэ,
Сурцементь кондямо
Валаня кель улезэ.
Сваха, бояр авине!
Сваха, азор авине!
Мекш-авинень вальгейне,
Подяцеень уставнэ!
Кода молят ят масторц,
Ванок, ванок эсь пирят,
Седе-як ванок кудань прят.
Буди ванат эсь пирят,
Буди ванат кудань прят,
Эсь икелеть пачалксеть,
Лишметь икелев пинеметь.
Буди а ванат эсь пирят
Буди а ванат кудань прят,
Эсь икелеть розь кошксеть,
Лишметь икелев чей тикшеть.
Илё мейсь радуваясь,
Илё мейсь весёлгаць?
Колинкава палянь кис,
Сур пирява ожань кис.
Секс Илё радуваясь,
Секс Илё весёлгаць.
Ану мейсь радувась,
Ану мейсь весёлгаць?
Кочкарява руцянь кис,
Сур пырява ожань кис.
Секс Ану радувась,
Секс Ану весёльгаць.
Митя мейсь радувась,
Митя мейсь весёлгаць?
Ош калаця потень кис,
Мако лопа турвань кис.
Митя секс радувась,
Митя секс весёлгаць.
Вася куда мейсь рдувась?
Вася куда мейсь весёлгаць?
Кече пулос кундынь кис,
Кече рядонь нолдынь кис,
Алов сюк прянь максынь кис.
Секс Вася куда радувась,
Секс Вася куда весёлгаць.
Сизьгемень сисемь, монь кудан,
Кавксоньгеменьце монць улян,
Вейксэнь геменьце монь дугам;
Сядонь топавтеме адядо;
Седе курок проворне,
Тынь кильдинка поводинк,
Серойть, буроть ракшиненк,
Перёлетнойть нурдыненк,
Таргань уськеть ождиненк.
Серойть, буройть тынк ракшанк,
Штерекс велить сынст пильгест,
Юдмакс юводыть сынст пулост,
Ветькс гумбольдить лангинест,
Нучкань парцейть гривинест,
Кичакс нолкить пилинест,
Толт верьгедить сельминест,
Цёеко поцо шлеинест,
Цицерь мерить лангинест.
Седе курок пурнадо,
Седе курок адядо,
Умок учи мазынек:
Вальмас кадовсть сельмензэ,
Пельцас пуворьсть сур пензэ,
Мольць учозь мельнезэ,
Каргоцькацть, минек учозь,
Хрустальной стопкат пильгензэ,
Равушкаць минек учозь,
Котова таргазь палязо,
Челькиясь, монь кудан,
Кумажас путозь руцязо.
Васнят учось пижесэ,
-
Пижесэ эзьнек учовт,
Пижесэ эзьнек эрьвавт;
Мейле орчась сиясо,
Учось, учось сиясо,
Сиясояк эзьнек учовт.
Мейле орчась сырьнесэ,
Сырьнесэ учи эснэнэк,
Сырьнесэ эрьви эснэнэк.
Бояр-ават, стряпч ават!
Азор-ават, стряпч ават!
Сядо ютксто кочкидизь,
Кавто ютксто пурныдизь,
Вай, пурнамизь, пурнамизь,
Вай, сэрьнямизь, сэрьнямизь!
Васолонь таркас мольдянок,
Васолонь таркас туйдянок:
Сисемь паксянь томбалев.
Сисемь паксянь томбалов.
Эрьва мезе вачадо,
Эрьва мезе путодо:
Вить пелень путодо ой парьне,
Керчь пелень — медь парьне,
Икелень вина боцькине,
Удалонь пия лагуннэ.
Покш вирень трокс ютамсто,
Покш вирень трокс печкемстэ,
Лиси каршон, стряпухат,
Вирень кирьди покш овто,
Сянгоргавтозь поназо,
Низыльгавтозь пеензэ.
Ойсэсть ватьца лангонзо,
Валакавца понанзо,
Мецэнть ватьца кургонзо,
Тантейгавца келензэ.
Нолдасамам шумбрасто,
Нолдасамам паросто.
Кода пачкодян веле пес,
Лиси каршон, стряпухат,
Велень кирьди, велень покш,
А карми эснэнь нолдамо.
Тарган тантей прякине,
Пуца сонзэ икелев,
Нолдасамам паросто.
Нолдасымам шумбрасто.
Кода пачкодян, стряпухат,
Од сватонок орта ланкс,
Весе лисить каршозон,
Весе кармить кирьдемень,
Покштнэнь казнесынь сиясо,
Вишкинетьнень -- пижесэ,
—
Ортаст паншсызь келейстэ,
Кришаст кепецызь сэрейстэ,
Арыть кавто бокава,
Нолдасамизь ютковаст.
Сован сватон кудостень,
Сватон, свахан -- кеждедеть,
Нусмангадозь тусынест,
Казякадозь чаминест.
Вина боцькам совавца,
Кандан вина цяркинеть,
Весёлгадыть чаминест;
Кандан пия плошкинеть,
Пеедезевить кургинест,
Кармить парьсте кортамо,
Сизьгемень сисем монь кудан,
Промадояк монь парькан,
Прядо пилькс мон вандадызь,
Кода пурназь сэриненк,
Кода сэрнязь рунгиненк,
Лома родняс мольдянок,
Чужой ломаньс арттанок,
Илязо уль тень стыда,
Илязо уле визькс чама.
Алкукс парсте наряжазь,
Алкукс парьсте тынь пурназь.
Козловойть кемть тынк пильксэнк,
Питнев сукнань одюжанк,
Нижегородскойть тынк шляпанк,
Павань толгат шляпаванк,
Моньсяк мазыян, мазыян,
Моньсяк ашинян, ашинян,
Сисемь банясо парязян,
Белиницясо белязян,
Румяницясо вадьнезян,
Сулика экшне кирьдезян,
Те таркастень ванозян.
Телас педи монь палям,
Кумажас викшнезь монь руцям,
Палы зорюва монь хватам,
Валдо пелюма монь пангом,
Чидеяк валдо коклацем.
Икель ёндо ванмосто,
Виев комулянь кондяман,
Удал ёндо ванмосто,
Крута, крута пандоян,
Чинь токамо таркаян.
Вить пель ёндо ванмосто,
Кудряв, вадряв килеян,
Ур налкамо таркаян.
Керч пель ёндо ванмосто —
Нулав-валав пекшеян,
Мекш валгума таркаян.
Пильге ёндо ванмосто —
Ошонь бояр-аваян.
Пиря ёндо ванмосто —
Нижегородской поп-аван.
Азьдо, кудат, тынь кильдинк,
Серойть, бурой ракшиненк,
Перелётнойть крандазонк,
Киштезь киштест пильгенест,
Налказь налкаст пилинест,
-
Сиянь сивекст тонгодо,
Пижень шлеять каядо,
Рисьмень ождят путодо.
Чирькесть кильдинк кель марто,
Супонсть таргинек вал марто.
Вай, баславамизь-нолдамизь,
Васолонь таркас мольменень,
Асодазь таркас мольменень
Баславамизь шумбрасто,
Тынь кучомизь паросто,
Кода кучсамизь паросто,
Истя парьсте сазданок.
Туйдай-дуйдай, дуйдай-дай,
Туйдо-ваёх ваяинь.
Те ваяёхсь ков сыргась?
Те туйдаесь ков моли?
Мазы мельга сон сыргась,
Мазынь сайме сон моли.
Ков карей наряжась,
Ков карей урядась,
Ниле пильгень вачкодезь,
Меште грудень кепедезь?
Штатолкс палыть сельмензэ,
Ёндолкс, налксить пилензэ,
Пурдань сюлгам ашкозо,
Пижень кетькске чирькезэ,
Мишарань плетявкст шлеянзо,
Пурдань уськеть ождянзо.
Карей пурнась мазынь кис,
Карей пурнась паронь кис.
Карей ракша, корьмакай,
Карей ракша, дирякай,
Иля капша икелев,
Иля кадовт удалов,
Арт кунчка видьнесэ,
Арт мазы таркасо.
Анна кази пацине,
Се лангазот шлеинекс!
Анна кази сюлгамне,
Се кирьгазот ашкинекс;
Анна кази тенть суркске,
Се чирькезэть колицькакс.
Анна кази тенть кетькске,
Се пильгалот подковнэкс,
Ардодо, кудат, ардодо!
Ардодо, андат, ардодо!
Киява молезь, кинь колазь.
Кивтеме молезь, кинь теезь.
Мадезь тикшенть стявтодо,
Стядо тикшенть мадстеде.
Паронь каршо -- щемешка,
Апаронь каршо -- шучавшка.
Дикой степка ардомсто,
Тикшень, тикшень тынь ловнынк,
Кавтонь, кавтонь тынь цётынк,
Кона тикшесь ськамнензэ,
Кона тикшесь лишнойне,
Нурдо прязонк тынь путынк,
Кудов-кардазов тынь ускинк.
Покш вирень тракс ардомсто
Чувтонь, чувтонь тынь ловинк,
Кавтонь, кавтонь тынь цётынк,
Кона чувтось ськамнензэ,
Кона чувтось лишнойне,
Нурто прязонк тынь путынк,
Кудов-кардазов тынь ускинк.
Цярмун велес совамсто
Кудонь, кудонь тынь ловинк,
Кавтонь, кавтонь тынь цётынк,
Кона кудось ськамонзо,
Кона кудось лишнойне,
Се кудостень совадо.
Се кудосонть ломатьнень
Вейте, вейте тынь ловинк,
Кавтонь, кавтонь тынь цётынк,
Кона ломаньсь лишнойне,
Кона ломаньсь ськамонзо,
Нурдо-прязонк озавтынк,
Кудов-кардазов тынь ускинк
Пизэнь-ашконь пурнамо,
Левксэнь-эйдень ливтеме.
Кардазонь кирьди, корьминець,
Кардо-сярко, матушка!
Кода листянок шумбрасто,
Истя сазданок вадрясто.
Велень-сядонь пас, матушка,
Велень кирьди кормилиць!
Аштек берянь арьсиде,
Ванумизь лихой ломаньде,
Верьга ливти лихоенть
Синдить кавто сёлнонзо,
Алга юты беряненть
Синдить кавто пильгензэ.
Ох, тетинем, диринем!
Ох, авинем, ванынем!
Мейсь безарьдиде эстэдень?
Потмакстомо лисьмас каимизь,
А лисиван пингезэн.
Колмо недлят, тетякай,
Пря ормасо сэрединь,
Колмо недлят, авакай,
Седей ормасо сэрединь,
Кошткевтеме коськенинь,
Вармавтомо либордынь,
Моцем лияць аламне,
Седей алем кадовсь аламне.
Ох, тетякай, диринем!
Ох, авакай, ванынем!
Аштиде, эзьде накаснэнь?
Аштиде, эзьде прикаснэнь?
Анокстыде эзиде
Бояр ават ялгинень
Симдемс, андомс поилат?
Комсь ие роботакшнынь,
Комсь ие мон пракшнынь,
Келей икелькс панекшнынь,
Сееде петкат ведяшнынь,
Те таркастень анокстынь,
Те таркастень роботынь
Ярцледе, ялган, ярцледе!
Ярцледе, оян, ярцледе!
Те истяня анокстазь
Келей икелькс пень паньмень кис,
Велявтумга пултонь кис,
Сееде петка рядонь кис.
Мезе сэвинь, ялгинень,
Диринь тетянь дольнестэ,
Мезе каинь потмозон,
Ванынь авань пайнестэ,
Сень таркас тетянень
Пас максозо, максозо,
Верьде пиземекс пизезэ,
Алдо лисьмакс лисезэ,
Сусикень, парень пешкедезь,
Вере кришань кепедезь,
Ало мостонь меневезь.
Мень седей кирьдезь саимем
Мень седей оймазь муимем!
Эли радувинь урекс-чис?
Эли радувинь вардокс-чис?
Кевкс кеведьнясь седеем,
Повкс поводьнясть сельведень.
Авай, авакай диринем!
Авай, авакай ванынем!
Мерят, а мерят, авакай!
Ялган марто молеме,
Покш родня ланга якамо,
Вачо пекень пештеме,
Нучкань седеень витеме?
А, ялгинень, оинень!
А, ялгинень бояр авинень!
Чечен чокшэ, ялгинень,
Чинзэ валгомодо мееле,
Вензэ ёндо кепети
Виев штурма почт варма,
Тетянь кардайс сон сови.
Тетянь кудозо пешкеди
Пазонь сюдовт ломаньде —
Авечкима ногайде.
Ногай чинес а кирьдян,
Ай аштиван сынст ютксо,
-
Алядо бояр ават, ялгинень,
Покш родная ланга якамо,
Родня раськень кевстлеме,
Ули, а ули нолдыцям?
Ули, а ули примицям?
Айдо ютадо, ялгинень,
Илядо капша икелев,
Илядо кадовт удалов:
Икелев бродоньть моньць тейса,
Удалов следэньть моньць каца.
Адядо, ялгинень,
Ош порятка юткова,
Кона родняс, ялгинень,
Учи минек эснэнек,
Сень ортазо панжадо.
Ульцянь кирьди, матушка!
Ульцянь кирьди, сияка!
Иля тандат шумнэдень,
Кол ёмамо вайгельдень:
Аволь тоньть тандавтлян,
Аволь тоньть тормошан,
Эсь сэринень мон лажан,
Эсь сэринень коволян.
Седь икеле эрямсто
Ульцянь кувалт ютылень,
—
Киштезь аштильть монь пильгень,
Моразь аштиль монь кургом.
Остатка раз ней ютан
Бояр авакс чинь марто,
Ней а карман, ульцянь кирьди,
Порядкань кувалт якамо,
Мазы моронь морамо.
Ужодо, ялган, ужодо,
Пурнавданок ве таркас,
Те таркинесэньть, ялгинень,
Седьикеле эрямсто,
Тейтерькс пингень печтямсто
Валське рана мон сылень,
Чокшне поздас аштилень,
Мазы моросо морылень,
Шуткат баснят тейнилень.
Ней а карман, ялгинень,
Те таркастень сакшномо.
Мазы моронь морамо.
Монь туймедень мееле
Те таркастень раштазо
Тумо-пуло цёрань полк,
Килей-пуло тейтерь полк,
А, алгинем, а Васён!
А, оинем, а Васён!
Остатка раз, ялгинем,
Ульцянь кувалт мольдянок,
А карматанок, ялгинем,
Ве кужосо налксеме,
Ве моросо морсеме.
Кода сы, ялгинем,
Тундокь чись, мазы шкась,
А кармат, ялгинем,
Мазы алнэсэ налксеме.
А, алгинем, а Васён,
Седьикеле эрамсто
Вельть ладнойстэ эрьсинек,
Ве кужосо налксильнек,
Ве моросо морсильнек.
Бодянь кардазонь кирьдизэ,
Бодянь кардо-сяркозо!
Иля тандатт вайгельдень,
Иля срастяв шумнэдень:
Аволь тоньть сраслян, тандавтлян,
Эсь сэринень мон лажан,
Эсь сэринень коволян.
Седь икеле эрямсто
Аволь истя сакшнылень,
Киштезь, моразь сакшнылень,
Киштезь аштильть монь пильгень,
Моразь аштиль монь кургом.
Лисьтяяк, урькай, лисьтяяк,
Лисьтяяк, авкай, лисьтяяк:
Каршон апак лисьть а сован,
Апак стречак а смеян.
Седь икеле эрямсто,
Тейтерькс пингень печтямсто,
Чокшнэ позда сакшнылень,
Валське рана сакшнылень;
Эзинь сакшно, урякай,
Кол ёмамо шум марто,
Кол ёмамо крик марто,
Эзитснь терьтле каршозон,
-
Эзинь учле стречамот.
Аштедеяк, ялгынень,
Мон а сован истяко,
Ужодояк, оинень,
Мон а ютан истяко:
Вить кедьнесэнь сиянь суркс,
Керч кедьнесэнь пижень кетькс.
Керч кидинень лукштядян —
Пижень сэдьне мон теян;
Витьть кединень лукштядян —
Сиянь балясат мон чаван.
Се седьневанть мон ютан,
Се броднэванть мон молян.
Аштеде ванца, ялгинень,
Кона киякс сэдявксось
Учозь гостень стречиця;
Ужодо ванца, оинень,
Кона киякс мостинась
Туи гостень ильтиця,
-
Се сэдявксканть, ялгинень,
Бояр-авакс-чим ютавца,
Се мосткевасть, оинень,
Азор-авакс-чим моливца.
Сэрьцэнь, алгай, а Поля!
Сэрьцэнь, оям, а Поля!
Мерят, а мерят озамдо
Чесной паро тарказот,
Валдо зеркала вальмалот.
Пасиба, бодяй, пасиба,
Вачо пекень пештемзэть,
Нучкань седеень витьмезэть.
Мон мезе сэвинь поц каинь
Диринь бодянь дольнестэ,
Ванынь бодянь пайнестэ,
Пас максозо, максозо!
Верьде пиземкс пизезэ!
Алдо лисьмакс лисезэ!
Сусикень парень пешкедезь,
Вере кришань кепедезь,
Ало мостонь меневезь.
Кизэ чинень самосто,
Молиньдеряй монь бодям
Велень сядонь атя юткс
Паксянь модань явшеме,
Илязо сатот бодянень
Чире чама -- кев мода,
Латконь-лутконь трокс ума.
Сатозояк бодянень
Кувака ряцто -- пакся кунчкасто,
Равужо човаля -- сёр мода.
Кода сырьги бодям видьмензэ,
Пас максозо, максозо
Сэтьме паро пиземе,
Кечне валонь пиземе.
Кода пачкоди монь бодям
Равужо моданьть пезэнзэ —
Чизэ лисезэ манейстэ,
Чизэ вачтазо яснасто.
Карминьдеряй монь бодям
Раужо моданьть видеме,
Ёртыньдеряй чуросто,
Сон шачозо сеецтэ.
Оштё шки пас максозо
Шачи сюрость коренс летькеде,
Пирязонзо наливде,
Ажияшка олгодо,
Локшо нетьчка колоздо.
Истя сакшнынь, бодякай,
Кекшмекс таркань вешнеме,
Пштидьмекс таркань вачамо.
Теде веде, бодякай,
Диринь тетянь кардассо
Ногай нурдодо пешкеди,
Диринь тетянь кардонзо
Пешкедить ногай лишмеде,
Ванынь авань кудозо
Сыре ногайде пешкеди.
Ногай чинес а кирьдян,
Башкир чинес а кирьдян.
Бути менян эстэдест,
Бути оргодиван эстэдест,
Тонеть, бодяй, кекшме сан,
Тнеть, бодяй, кекшме сан,
Бодяй, ярмакокс теимак,
Ярмакот вакс кекшимак,
Илямак макст ногайнень,
Илямак макст башкирнэнь.
Истя сакшнынь, урякай,
Кекшме таркань вешнеме,
Теде веде, урякай,
Диринь тетянь кудозо
Пешкеди сыре ногайде.
Ногай чинес а кирьдян.
Башкир чинес а кирьдян.
Тонеть, уряш, оргодян.
Тонеть, авай, кекшме сан.
Нолдамак, уряш, нолдамак
Лембе паро кудозот.
Кекшимак, уряш, кекшимак,
Илязан муевь ногайнень,
Илязан муевть башкирнэнь.
Пшти салмуксокс теимак,
Кецэ тевзэть сялгумак,
Тев паргозот путумак.
Якстере сурекс теимак,
Мазы артокс викшнимак.
Пижень сурксокс теимак,
Покш сурозот тонгумак.
Парыинем, дугинем!
Парыинем, ойминем!
Улевлетькак, дугинем,
Мешц каямо крёст ведьме,
Каявлетень мештезэнь,
Кантлевлетень пингезэнь.
Аволь мешц каямо крёст ведьмат —
А каяват мештезэнь,
А кантливат пингезэнь.
Улевлетькак, дугинем,
Сия валдо копийка.
Сырьне валдо денешка,
Путовлетень пилезэнь,
Ванцтовлетень пингезэнь,
—
Аволь сиянь копийкаят,
Аволь сырнень денешкаят,
А путуват пилезэнь,
А вачцтуват пингезэнь.
Парыинем, дугинем,
Парыинем, ойминем!
Улевлетькак пшти салмукс —
Сялговлетень тевезэнь,
Ванцтовлетень пингезэнь,
Аволь пишти салмуксат,
А сялгуват кецэ тевс.
Чи валдынем, лелинем!
Ков валдынем, алинем!
Леляй, прикас приказан,
Аляй, накас наказан:
Азё, кучтан, лелякай,
Азё, кучтан, алякай,
Покш вирь ланга якамо,
Дикой вирьга якамо.
Ютак валдо гривава,
Керяк мазы килейне.
Иляк керяк пек верьга,
Иляк керяк пек алга:
Верьга, керязь, лелякай,
Понги прясто тарацо;
Алга керязь, алякай,
Понги корён пильгезэ.
Керика тон, лелякай,
Лавцядо лавцяс сатозо,
Стенадо стенас токазо.
Сезэ ламбавтца, лелякай,
Котова таргазь мон палям,
Сезэ ламбавтца, алякай,
Кумажас путозь мон руцям.
Ох, а урякай, азакай,
Ох, а урякай, корьмакай,
Тонетькак, урякай,
Кармавтума кармавтан,
Наказамо наказан:
Теде веде, урякай,
Иляк мацьтя тон толот,
Илить тулот, урякай,
Кшнинь тулосо тон кенкшеть.
Пеле ве шкане, урякай,
Авам каясамам кудосто,
Тетям Паньцамам кардайстэ,
-
Тыненк сан, уряш, эжнеме,
Тыненк сан, корьмакай,
Начко пракстань костямо.
Илить ёмсевте, урякай,
Тейтерькс чинь ёнонзо,
Илить маштлевть, авакай,
Азор-авакс-чинь превензэ.
Адядо, ялган, адядо,
Варма коштка якамо.
Ужодо, ялган, сюкунян
Покштянь уголсо рузонь пазостень-
Аштеде, дуган, сюк пря максан
Покштянь уголсо рузонь нишкестень-
Истя якинь, ялгинень,
Кекшме таркань вешнеме.
Истя якинек, ялгинем,
Тонеть кекшме таркань вешнеме.
А, урякай, авакай!
А, урякай, корьмакай!
Аволь истя эряволь,
Аволь истя ладяволь,
-
Паневелеть, урякай,
Кавто ламбамсто сюкорот,
Коське ваканс путовлеть,
Ашо пацясо вельтявлеть.
Тетянь кенкшка совамсто
Керч кедеть ланкс каявлеть,
Покштят бабат ливевлеть,
Моньгак лемем, урякай,
Вейсэ марост кундавлек.
Мон мезе сэвинь, потс каинь,
Федя лелянь дольнестэ,
Федя лелянь пайнестэ,
Сень таркас Федя лелянень
Пас максозо, максозо,
Верьде пиземкс пизезэ,
Алдо лисьмакс лисезэ,
Сусикень, карень пешкедезь,
Вере кришань кепедезь,
Ало мостонь меневезь.
Ох, урякай, авакай!
Ох, урякай, корьмакай,
Мезекс казик те казьненть?
Мезекс максык те ловманть?
Моньськак сатан ёмицякс,
Моньскак сатан арыцякс.
Парыям, пиже дугинем!
Парыям, бояр авинем!
Течонь чине, парыям,
Стинь чопудава -- зорява,
Валське марто ранаяк,
-
Явась таньтей удомом,
Ютась стака удомом.
Ледить, парыям, мелезэнь,
Прыть, дугам, потмозон.
Васьня кевстинь, парыям,
Кудонь прявтке атявтонь,
Мейле кевстинь, дугинем,
Семиянь покшке ававтонь,
Мерить, а мерить, парыям,
Цислас, эрьгас молеме,
Цислань эрьгань тееме.
Ятонь тетясь нолдымем,
Ятонь авась кучимем.
Пурнынь -- сэрьнинь пиринень,
Орчинь-каринь рунгининь,
Таньтей каша тенть кандынь:
Ашо сахаронь ашосо,
Пеште топонь таньцтесэ.
Ярцак, ярцак, парыям,
Ярцак, пиже дугинем,
Пештик вачо пекинеть,
Витик нучкань седееть.
Ятсо, чужойтэ, дугинем,
Вачи, вачи пекинеть,
Нучки, нучки седееть.
Ох, а урякай, авакай!
Ох, а урякай, родноем!
Тонгак, урякай, корьмакай,
Вачо пекем мелявтыкь,
Нучкань седеем ризнэвтыкь,
Стить чопудава-зорява,
Валське марто ранаяк,
Ламо ливезь тон ливтить,
Пульга содга тон якить,
Пси качамо тон нильнить.
Монень каша анокстыть,
Ашо сахоронь ашосо,
Пеште топонь таньтесэ.
Авай, авакай диринем!
Авай, авакай ванынем!
Мон кинзэ кучан, авакай,
Пси банинень уштомо?
Кинзэ кучан, диринем,
Лембе ведень эждямо.
Ох, а урякай, решкакай!
Ох, а урякай, авакай!
Азё-ка, кучтан, урякай,
Остатка банянь уштомо,
Азёка, кучтан, авакай,
Лембе банянь уштомо.
Прян а шнан — диринь тетянь
Сисемь костерт пенгензэ.
Прян а шнан — жалинь тетянь
Сисемь костерт пенгензэ.
Ве костерц вачказь тумонь пенк,
Омбоцес вачказь килей пенк.
Колмоцес вачказь пекшень пенк.
Иля сае, уринем,
Тумонь пенгень костерстонть,
Иля сае, авинем,
Килей пенгень костерстонть,
Точ сайтяя, уринем,
Пекшень пенге костерстонть.
Тумонь пенгень, урякай,
Чинезэ пек корцяня.
Килей пенгень, авакай,
Чинезэ пек а тантей.
Лужадовлень бояр-авакс сэрневан,
Лондадовлень азор-авакс рунгован.
Аштеде, озан, ялгинень,
Тейтерькс-чинь васькамо таракзон,
Ужодо озан, оинень,
Сэрь оймамо тарказон,
Те таркасоньть, ялгинень,
Мазы арткеть тейнекшнынь;
Те таркасоньть, оинень,
Кецэ тевнень тейнекшнынь.
Пижине дугам, парыям!
Мазыне дугам, парыям!
Кучт кияват мон якинь,
Кармавтонь тевсэть мон теинь:
Дугакай, мон якинь
Остатка банянь уштомо,
Ялакай, мон якинь
Пси банинень уштомо.
Банясьть икеле, дугинем,
Пиже, мазы лугине,
Лугасьть кунчкасо, ялынем,
Сиякс лиси лисьма пря,
Пижине дугам, парыям!
Мазыне дугам, парыям!
Весе ялгат тусть, парыям,
Пиже лугаваньть якамо,
Весе дугат тусть, парыям,
Ожо балягань кочкамо.
Весе ялгатьнень, парыям,
Копорень келес калавтозь
Тюжа мишара пря черест,
Весе дугатьнень, парыям,
Лавтодо лавтос сынст сравтозь
Лавка мишара пря черест.
Давай миньгак, сравцынек
Копорень келес пря череть,
Давай миньгак розняснэнк
Лавтодо лавтос пря череть.
Кенгелят, урькай, кенгелят,
Маньчат, урькай, тон маньчат,
—
Шказо аволь кизэ чи,
Шказо аволь мазы чи.
Урякай, шказо теле чи,
Авакай, шказо якшамо.
Пиже лугасть вельтизе
Кумажава ашо лов,
Балягатнень, урякай,
Виев кельме чавиньзе.
А максса, урькай, пря черем,
Сукань кедьнень калавтомс,
А максса, авкай, мон черем
Сукань кедьнень разнявтомс.
Кабо монь арасть, уринем,
Бояр-ават ялгинень,
Кабо монь арасть, авинем,
Азор ават оинень.
А, ялгакай, а Маша!
А, оинем, а Маша!
Эрьга калавтык, ялгинем,
Тужа мишара пря черем.
Састынька, ялгинем, састынька,
Стамбарнэ, ялгинем, стамбарнэ.
Ве чернеяк, ялгай, иля сесть,
Ве чернеяк, ялгай иля правт.
Бути сезят ве черьне —
Кумажава грехс соват,
Бути сезят омбоце —
Карксамова грехс соват.
О ялигием, оинем!
О ялигинем, дугинем!
Седьикеле эрямсто,
Тейтерькс пингень печтямсто,
Вельть ладнойстэ эрьсинек,
Ве сускомсо ярцыльнек,
Ве валнэсэ кортыльнек.
Ней а карматанок, ялгинем,
Ве валнэсэ кортамо,
Ве сускомсо ярцамо!
Ох, а ялгакай,
Пияда!
Ох, а оякай,
Пияда!
Тука розняса пря череть.
Тука калавца пря череть.
Иля пель, ялгакай,
Ве черьнеяк а сезян,
Ве черьнеяк а тувтан.
Тейтерькс чинень кандомсто
Вельть ладнойстэ эрцильнек.
Празник чинень самосто
Колмо чинь лева арьсильнек,
Кода пурнамс сэренек,
Кода школямс пирянок.
Ней а карматанок, ялгинем,
Ве валнэсэ кортамо,
Ве сускомсо ярцлеме.
Пасиба, ялгай, пасиба,
Беряжа мельнень ванмозот,
Пасиба, ялгай, пасиба,
Камажа мельнень неймезэть.
Авай, авакай диринем!
Ох, авакай ванынем!
Ваныка, авай, диринем,
Кода серьсэ ялгинем
Копорень келес рознизе
Тужа мишара пря черем.
Тейтерькс чинень печтямсто
Эзия кантле пря черем
Копорень келес калавтозь.
Эрьга пурныка, авакай,
Копорень келес пря черем.
Тука пурнаса, пижине какам,
Тужа мишара пря череть.
Седьикеле эрямсто,
Тейтерькс-чинеть кандомсто
Сисемь тевень кадылень —
Тонть пря череть пурнылень.
Ней а карман, какинем,
Сисемь тевень кадомо,
Тонть черинеть пурнамо.
Бути сюлмасыть, авакай,
Пиже галой лентасо,
Сестэ кучумак, авакай,
Пиже лугава якамо,
Ожо балягань кочкамо;
Бути сюлмасыть, авакай,
Якстере галой лентасо,
Сестэ кучумак, авакай,
Ашо балягань раздеме;
Бути сюлмасыть, авакай,
Ожо галой лентасо,
Сестэ кучумак, авакай,
Горнипов цецянь кочкамо;
Бути сюлмасак, авакай,
Равужо галой лентасо,
Сестэ кучумак, авакай,
Равужо модань киява.
Авай, авакай диринем!
Авай, авакай, ванынем!
Анокстыть эзить, авакай,
Тейтерькс чинь туртов палине?
Анокстыть эзить диринем,
Олякс чинь туртов руцине?
Вешевлень кецтэть, авакай,
Котова торгазь мон паля,
Кумажас путозь мон руця;
Арась теезь, авакай,
Котова таргазь монь палям,
Кумажас путозь монь руцям.
Коть ульнесь оймамо таркинем,
Коть ульнесь васькамо таркинем,
Кужо вечки ульнекшнынь,
Ялга вечки ульнекшнынь,
—
Козо сялгомсоль колмине,
Сезэ сялгинь котыне,
Козо сялгомсоль кавтыне,
Сезэ сялгинь нилине.
Пиже какам, а Наста!
Мазы какам, а Наста!
Анокстынь, какай, анокстынь
Котова таргань тенть паля,
Кумажас путозь тенть руця.
Тужат, ашот панарот
Викшнезь мазы суресэ,
Козо сялгумаль нилине,
Сезэ сялгить кавтыне,
Козо сялгумаль котыне,
Сезэ сялгить колмине.
Аволь весёла сетцэ тон сайсак,
Аволь весёла, сетцэ орчаскак,
Пси сельведь маро тон сайсак,
Пси сельведь маро орчасак.
Наятя, авай, наятя
Бояр-авакс-чим -- кистючкам,
Азор-авакс-чим -- кистючкам.
Путыка, авай, путыка,
Виеть потмос пельксэзэть,
Седей мари потмозот.
Иляк нолда карксот пачк,
Иляк чалксе пильгалот.
Пиже какам, а Наста!
Мазы какам, а Наста!
Пуца, пуца, какинем,
Бояр-авакс-чить -- кистючкат
Виеть потмо пельксэзэнь,
Седей мари потмозон,
А нолдаса карксон пачк,
А чалксиса пильгалон.
Бояр-авакс-чим, тейтерькс-чим!
Азор-авакс-чим, ольнойкс-чим!
Остатка раз озавттан
Чевте пухонь тодов ланкс,
Остаткадо урьневттян
Пухонь тодов ланксо.
Туян, бояр-авакс-чим,
Остатка банянь парямо,
Остатка ведьнень валномо!
А каца таркам чавосто,
А каца таркам чавосто,
А, ялгинем, а Таня!
А, оинем, а Таня!
Озакаять тарказон,
Ванцтыкаяк, ялгакай,
Бояр-авакс-чинь таркам.
Иля манявт уренень,
Иля манявт вардонень.
Сындеряй, ялгакай,
Боря-авакс-чим валмалов,
Саикаяк, ялгакай,
Вереть, алот улицяв
Налкинь кужос морамо.
Сыньдеряй, ялгакай,
Сука урекс-чись вальмалов,
Пшкадиньдеряй, ялгакай,
Диринь авать вайгельсэ,
—
Иля вачта вальмава,
Иля манявт тон тензэ.
Аштек, ялгай, видесэть,
Аштек, дугай, правдасот.
Тетяй, тетякай диринем!
Тетяй, тетякай жалинем!
Сакая, тетякай диринем,
Туи тейтерькс-чинь икелев,
Сакая, тетякай жалинем,
Яви тейтерькс-чинь икелев.
Кармавтума теньть кармавтан,
Наказамо наказан:
Азё, кучтан, тетякай,
Ратор ошов базаров,
Азё кучтан, жалинем,
Ратор ошов ярмункав,
Половой ласт рамака,
Гривинной эск рамака:
Банядо мейле, тетякай,
Лоткить пильгень якамдо,
Лотки келем кортамдо.
Авай, авакай диринем!
Авай, авакай ванынем!
Кармавтума тенть кармавтан,
Наказамо наказан:
Монь туймедень мееле,
Пси пачалксеть паньтяя.
Васень пачальксесть каямсто
Очи нашинь ловныка;
Омбоць пачальксенть каямстэ
Богородицань ловныка,
Колмотькс пачалксенть каямсто
Покштят бабат поминак.
Мондяк лемем, авакай,
Сынст ваксозост поминык.
Урьвалинем лелинем!
Урьвалинем алинем!
Азё кучтан, лелинем,
Покш вирь ланга якамо,
Онкстамо чувтонь керямо.
Иляк керяк, лелинем,
Эсинь сэрьде сэрейстэ.
Тон керяка, дугакай,
Сэрень марто вейкетьстэ.
Иля керяк, дугинем,
Нудей-булонь болотань,
Пайстомо, чувтонь -- пой чувтонь;
Тон керяка, лелякай,
Пиче мазы гривасто,
Улезэяк, лелинем,
Апак строгак валаня,
Апаж красяк якстере.
Тонетькак, дугинем,
Кармавтума кармавтан,
Наказамо наказан:
Азё кучтан, дугинем,
Покш родня ланга якамо,
Родня, раськень пурнамо.
Сыреть, сыреть бабатьнень
Тердиятя, дугинем,
Мазы лемень ливамо,
Седе отнэнь урятнень
Пайстомо сэрень пурнамо,
Монцинь сэрьсэ ялгатьнень
Пайстомо сэрень лажамо,
Вишкинетьнень дугатьнень
Кулы сэрень ваномо.
Сыреть, сыреть атятьнень —
Кандо лазонь теемме,
Седе отнэнь алятьнень —
Кельме калмонь чувомо.
Пиже дугам, а Гриша!
Мазы дугам, а Гриша!
Кармавтума тенть кармавтан,
Наказамо тенть наказан:
Само тарказон тейтяя
Баляса марто скамика,
—
Банядо мейле, дугинем,
Се скамикасть ланксо
Стака сарем оймавтца.
Адядо, ялган, адядо
Пси банясо парямо,
Кельме вецэ валномо.
А карман мейле, ялгинень,
Тейтерькс-чинь марто якамо
Пси банясо парямо.
Ужодо, ялган, ужодо!
Аштеде, дуган, аштеде!
Знярс тесэ ульнекшнэсть
Колмо кинеть ки улот,
Колмо броднэть — брод улот
Ве кинесь моли, ялгинень,
Вереть-алот улицяв,
Омбоцесь моли, дугинень,
Заутреняв, обедняв,
Колмоцесь моли, ялгинень,
Шки пазонь баняс парямо.
Мон а молян, ялгинень,
Вереть алот улицяв,
Мон а молян, дугинень,
Заутреняв, обедняв.
Адядо, молян, ялгинень,
Шки пазонь бакяс парямо.
Ужодо, ялган, ужодо,
Илядо, моль, ялгинень,
Монцинь сэрьдень икеле.
Коть аламодо, ялгинень,
Тейтерькс-чинь мельде пеледе;
Коть аламодо, оинень,
Олякс-чидень визьдеде.
Тынк мельга молемс, ялгинень,
Пильге виень а сатыть,
Тынк мельга ютамс, оинень,
Седей алем а саты:
Диринь тетям колмо недлят
Онкстань кшеде антлимем,
Ванынь авам колмо недлят
Золотниксэ симтлимем.
Пижине дугам, а Ната!
Мазыне дугам, а Ната!
Азёка, дугам, икелев
Монень кинень тееме,
Монень бродонь бродямо.
Ужодо, ялган, ужодо,
Корцяня чине качады,
Качамо чине кайсети.
Пижине дугам, а Марё,
Мазыне дугам, а Марё!
Азёка, дугай, никсика,
Сукань уштовт пси банянть,
Азёка, ялам, никсика,
Вардонь уштовт пси банянть
Ох, лужадузан лужадозь,
Лондадузан лондазь!
Мон а сайса тейтерькс-чим
Сукань баняс парямо,
А совавца олякс-чим
Вардонь баняс парямо.
Бояр-авакс-чим, тейтерькс-чим!
Бояр-авакс-чим, олякс-чим!
Азё кучтан, тейтерькс чим,
Пиже лугава якамо,
Тейтерькс чинь баняс парямо.
Пиже мазы лугасоньть
Кавто ёнов тропат сыть,
Иля манявт, бояр-авакс-чим,
Керчь кедь ёнга тропаваньть,
Сука урень тропаваньть,
—
Сука урень тропазо
Кумажава рудазга,
Карксамова ведьнева.
Се тропасть ланкосо, тейтерьксчим,
Сука урень банязо.
Сука урень банясь, олякс-чим,
Уштозь кузонь пенгесэ,
Сувтазь поень суднэсэ.
Азё кучтан, боар-авакс-чим,
Вить кедь ёнга тропаваньть;
Се тропаньть ланксо, тейтерьксчим,
Бояр-авакс-чинь банязо
Пиже мазы лугасо,
Самой кунчка таркасо,
Сэнь артума модасо,
Чинь чарамо таркасо.
Ошонь боярт керинзэ,
Ош подяцейть ускинзэ.
Ускозь тейтерькс-чинь банясь
Сивойть-буройть ракшасо,
Сынць молиця нурдосо.
Керязь олякс-чинь банясь,
Пиче мазы гривасто,
Ур налкамо таркасто.
Видеть скалкат шочконзо,
Пиже парцей лупоньзэ,
Пижень груша вельксэзэ,
Сия трёшник кенкшезэ,
Ниле ёнов вальманзо:
Васеньце вальмалость,
Кайсить руцят тон палят;
Омбоце вальмалость тон пезык
Тужа мишара пря череть,
Колмоце валмалонть шлик нардык
Кенерешка тон сэреть,
Полушкашка тон чамат.
Нилеце вальмалонть, тейтерьксчим,
Орчик таргань тон палят,
Кумажас путозь тон руцят,
Карьцить, бояр-авакс-чим,
Хрустальной стопка тон пильгеть,
Сувтем ленгень тон кареть.
Бояр-авакс-чинь банясь
Садовой пенксэ сон уштозь,
Цяпор тикшесэ сон сувтазь.
Сисемь лисьма прят перьканзо,
Кона лисьма прясьть, тейтерьксчим,
Сиякс лиси ведьнезэ,
Сырьнекс кеверить кевнензэ,
Сиянь яндава вакснэнзэ,
Сырнень кече эснэнзэ,
—
Сенейсэ, шляка нардака,
Яндавасоньть ведьне кант,
Сырьнень кечсэнть тон валнок.
Адядо, ялган, адядо
Пиже лугава якамо,
Горьнипов цецянь кочкамо.
Бань(я) авушка, матушка!
Бань(я) авушка, сияка!
Верьга юты пси парот,
Кунчкава юты качамот,
Сех алга юты, тонть пулеть.
Пси парсот монь пидимак,
Качамосот артумак,
Кулов пульсэть вельтямак.
Совака, патяй, совака,
Аволь минь банянть уштынек,
Аволь минь ведьнесть кандынек,
Пазонь васень тейтерьзэ,
Садовой пенксэ уштызе,
Цяпор тикшесэ сувтызе.
Пурнамизь, урян, пурнамизь,
Школямизь, аван, школямизь,
Уряднойстэ, мазыстэ.
Тейтерькс-чинень печтемстэ,
Олякс-чинень кандомсто,
Уряднойстэ якилень.
Илимизь пурна, уринень,
Сурсо невтлима таркинекс,
Илимизь сэрьня, авинень,
Сельмсэ кончима таркинекс,
Илинк савто, уринень,
Икельць полом удалов,
Илинк тонда, авинень,
Удальць полом икелев.
Бань, авушка, матушка!
Банянь кирьди, корьмакай!
Тон козой, козой шачозят,
Козой, козой касозят?
Суронь,
Равонь томбалев,
Пиче гривас шачозят,
Пиче гривас касозят.
Тон кона шкане,
Банянь кирьди, сэрьс касыть?
Тон кона шкане,
Банянь кирьди, эчкс совить?
Пеле ве шкане серьс касыть,
Чопуда вене эчкс совить:
Мон а содаса, бань авушка,
Васень шепкань лутыцят,
Мон а содаса, банянь кирьди,
Васень тарадонь керицят.
Керицят ульнесть, бань-авушка,
Кемгавкс(э) иесэ отт цёрат,
Сявтыцят ульнесть, банянь кирьди,
Кевейкс(э) иесэ отт ломать.
Няро узерьсэ керязят?
Няро узерьсэ сявтазят?
Сисемь узерьсэ керязят,
Сисемь узерьсэ сявтазят,
Сисемь парасо ускозят,
Сисемь тройкасо туезят.
Кува, кува ускозят?
Кува, кува туезят?
Покш столбовой киява,
Бояр якамо таркава.
Диринь тетям, бань авушка,
Пире кунчкас путыньзеть,
Эн паро таркас ладиньзеть.
Виде скалкат тонть шочкот,
Матрань парцей нупонеть,
Чопуда пельнеть тонть стенат,
Равужо тапаркст тонть кеветь,
Сиянь блидя полокот.
Банянь кирьди матушка,
Банянь кирди сияка!
Месьне панца тонть честеть?
Месьне ванца тонть честеть?
Курвастевлия баня кунчкастень
Пурнань сэрьнянь сэринем,
Истякак палы, бань авушка,
Лома ломаньсэ монь сэрем.
Курвастевлень полок чирезэть
Кемень сурон, сур пирян,
Истякак, банянь кирьди,
Яцо, чужойсэ сынь коськить.
А пандови, бань авашка,
Честеть, парот кодяк:
Кумажава эзэзэть
Колмо недлянь сэкс каинь,
Стака сэрем шождыньгаць,
Чопуда чамам валдомгаць.
Аштеде ялган, сюкунян,
Алов сюк прян мон максан.
Вай пасиба, пасиба,
Бань авушка, матушка,
Пасиба жлямост, нардамост,
Суро ямксокс теймезэть.
Монь туймедень мееле
Пас мерезэ, мерезэ
Отс шачинь шачмодо.
Ужодо, ялган, ужодо,
Аштеде, ялган, аштеде,
Мейсь пек, кемевинь, ялгинень,
Саень, рамань урян ланкс.
Ужодо ванцлян, ялгинень,
Коната дугась, ялгинень,
Мазы уставонь кандыця,
Коната дугась, оинень,
Паронь вадрянь содыця.
Пижине дугам, а Проска!
Мазыне дугам, а Проска!
Эрьга ваныка, дугинем,
Кода пурназь сэринем,
Кода сэрьнязь рунгинем.
Эзизь тейть ли урятьне
Керч пелем витть бокас?
Витть пелем керч бокас?
Эзизь тейть-ли урятьне
Икельць келем нирькасто,
Удалць келем кувакасто.
Пасиба, дугай, пасиба
Беряжа мелень неймезэть,
Камажа сэрень ванмозот.
Ванодо, ялган, ванодо!
Кода пурназь сэринем,
Ванодо, оян, ванодо,
Кода сэрьнязь рунгинем,
Бути, ялгинень, дугинень,
Тынк вакс аладить нарядон,
Бути дугинень, ялынень,
Тынк вакс алади пурнавксом,
Кочкарязон чалгадо,
Черь пулозон кундадо,
Човонезэнь сельгеде.
Карчонк валгак а муян,
Карчонк валгак а ёвтан.
Бояр авакс чим, тейтерькс чим!
Вольнойкс парокс чим, тетейрькс чим!
Кенерить эзить, тейтерькс чим,
Моньцинь маро шлямо-нардамо?
Экшелевсь эзь, тейтерькс чим,
Виде килей тонть сэреть,
Мазы умарь тонть тусот?
Орчавсь эзь, бояр авакс чим,
Котова торгазь тонть палят,
Кумажас путозь тонть руцят?
Карцевсть эсьть, тейтерькс чис,
Хрустальной стопкат тонть пильгеть?
Бути кенерить, тейтерькс чим,
Чалгак вить карь пирязон,
Кундак вить руця полозон.
Чалгак вить лавтом лангозон,
Кундак лента краезэнь.
Иля кадовт эстэдень,
Иля саевть уренень.
А, ялгинем, а Катя,
А,
- аинем, а Катя,
Накаять, дугай, тейтерькс чим,
Накаять, ялгай, олякс чим!
Саикать, дугай, тейтерькс чим
Шки пазонь баняс парямо.
Пижине, дугам, а Катя,
Мазыне дугам, а Катя,
Аштить, эзить прикаснэнь?
Аштить эзить правдасот?
Сайник, эзик тейтерькс чим
Шки пазонь баняс парямо?
Аштинь, ялгакай, видесэнь,
Аштинь, патякай, правдасон:
Сайния, патякай, теитерькс чить
Шки пазонь баняс парямо,
Фунтовой сапуньцэ мон шлия
Касы роспухсо нардыя,
Пасиба, дугай, пасиба,
Беряжа меленшь неймезэть,
Пасиба, дугай, пасиба,
Камажа мелень ванмозот.
Ох, лужадовлень, ялгинень,
Пурнань сэрьнянь сэрьсть маро,
Ох лондадовлень, дугинень,
Валаня судрянь прясть маро.
Мень потомозь саимем?
Мень кароштозь муимем?
Мейсь мон стувтынь, ялгинень,
Покшт покштинень бабинень?
Аштеде терьцынь, ялгинень,
Покш покштинень, бабинень,
Тейтерькс чинь марто
Остатка вень печтеме.
Аштеде серьгецынь, дугинень,
Покш покштинень, бабинень
Олякс чинь марто
Остатка вень удомо
Покш покштинень бодинень!
Мода мазыть, бабинень!
Кува, куви тертьтядызь?
Кува, кува тертьтядызь?
Тердевледезь покш покштинень бабинень,
Мода алга киява,
Мода алга броднэва,
—
Пелян, покштинень, бабинень,
Одранк, саванк пулиить,
Одранк, саванк гадявить.
Тердевледезь бодинень, бабинень,
Каль пулова киява,
Каль пулова сэдь ланга,
Пелян, покштинень, бабинень,
Одранк, саванк раздевить,
Тарад прява кадновать
...
Тертевледезь, покштян, бабан,
Покш столбовой киява,
Покш кинь ламо якинзэ,
Пелян, -- сторонной ломать
Ашо одрадонк тандадыть,
Незнамой ломать
Ашо савандонк срастявить.
Покш покштинень, бабинень!
Аштедеяк терттядызь
Москов порядка юткова,
Казань улицянь кувалма!
Московсоньть ламо церькуват,
Казаньсэныть ламо конторат.
Эрьва церькувас совадо,
Эрьва конторас совадо,
Кона церкувасонть
Покш покштинень, бабинень,
Вельть гайтевстэ моравтыть,
Пек звонкасто моравтыть,
Се конторастонть, бабинень,
Монень вальгей туеде;
Кона конторасонть, бабинень,
Вельть сеецтэ сёрмадыть,
Се конторасонть, бабинень,
Монень валнэть туеде.
Велес совамсто,
Покш покштинень бабинень,
Веле нармунькс прянк теинк,
Кардайс совамсто —
Кардаз гулькакс прянк теинк,
Кудос совамсто,
Кудо немилявкс прянк теинк.
Кона пазавасть, диринь тетям
Апак споряк рамизе,
Кона пазавасть ванынь тетям
Апак пелькстак саинзе,
Се пазавсть пряс валгодо.
Ох лужадовлень, лужадозь,
Лондадовлень лондадозь!
Мень потомозь саимем,
Мень кароштозь муимем!
Или мон шачинь пиже луга ланкс
Ожо пиря балягакс?
Или мон касынь мазы луга ланкс
Якстере пиря поцимкакс?
Кабо монь арасель
Шкинем, тринем авинем?
Родительницам жалинем?
Кепсть мерезэ авкань ланксто
Равужо модась, сёр модась.
Сырк мерезэ диринь авань
Калмо мазы сэрьнезэ.
Сиякс каладост, авакай,
Сизьгемень сисемь ловажат,
Сия ветькс чудест, авакай,
Ловажа поцо удеметь.
Сакая, авакай, тейтерькс чинь маро
Остатка вень удомо,
Сакая, жалим, олякс чинь маро
Остатка вен печтеме.
Вельть пек, авакай тиринем,
Тейтерькс чинь превензэ машлетить,
Вельть пек, авакай шкинем,
Олякс чинь ёнзо ёмсети.
Арась, авай, те шкане
Паро толконь ёвтызэ.
Паро превень максызэ,
Кардазонь кирьди, матушка!
Кардазонь кирьди корьмакай!
Чокшнэнь зорядо мееле,
Валцькень зорядо икеле
Совить эйзэть колмо тройкат.
Васень тройкань ветицяньть
Шаркс кеверьдик, кардас сярко,
Сявдикс ланксто пирязо.
Шар палкакс меник
Виде килей сэрезэ.
Кардозонь кирди, матушка,
Кардазонь кирди кормилець!
Иляк кулцонок курго поцо вальгеем,
Или приметя кель пирясо валынень:
Цисланзо кис сынь ёвтазь,
Эрьганзо кис сынь тергезь.
Лисьмань кирьди, матушка.
Лисьмань кирьди, корьмакай!
Иля тандат вайгельдень.
Седь икеле эрямстон
Валцьке рана мон сылень,
Чокшнэ позда чиилень,
Можот тондавкшнынь удомстот,
Можот чалгавшнынь пильгеть лавкс,
Простямак сэрьга рунгова,
Простямак кедьга пильгева.
Авай, авакай диринем!
Авай, авакай ванынем!
Листяяк, авкай, листяяк!
Кустима песэть, авакай,
Пиже лугань поляна,
Мазы лугань поляна:
Луганть ланксо, авакай,
Грешнюй чувто, -- пой чувто,
Пайстомо чувто -- пой чувто.
Тарадонзо чурынеть,
Лопинензэ ожинеть.
Чувтость прясо, авакай,
Грешной куко кукорды,
Пайстомо куко кукорды.
Тарац чалгазь пильгензэ,
Цюцёвс кундазь кедензэ.
Се кукось, авай, мон улян,
Се пайстомось, дирим, мон улян.
Листяяк, авкай, листяяк,
Листяяк, дирим, листяяк,
Вить кецэть ливть солы шта,
Керч кецэть ливть сод вальма.
Солы штаксонть солазан,
Сод вальмаксонть вальмазан.
Ванумак, авкай, ванумак!
Прясто саезь пилькс ванумак!
Прясто саезь пилькс ванумак!
Содамак, авкай, содамак,
Хрустальной стопка пильгеван,
Сувтем ленгень карьневан,
Вейкине лелям кодыньзе,
Ськамнензэ лелям кодыньзе.
Бути а содаван сияня,
Сестэ содамак, авакай,
Котова торгазь паляван,
Кчмажас путозь руцяван,
Ашо конёв коцткеван,
Конёв сёрмат арткеван.
Бути а содаван сияня,
Сестэ содаван, авакай,
Эсь кедь теевтькеть кувалма,
—
Стамед мазы суреват.
Бути а содаван сияня,
Сестэ, авай, содамак
Виде килей сэрьневан,
Мазы умарь тускеван,
Пиле прява кудряван,
Чама пелькеска свисткаван.
Чалган васень приступкас,
Яван тетястон, авастон!
Чалган колмотькс приступкас,
Яван урястон, алястон,
Яван патястон, сазорстон
Чалган кольмотькс приступкас,
Яван роднясто раськестэ;
Чалган нилетькс приступкас,
Яван ялгасто, оясто;
Чалган вететькс приступкас,
Яван налки кужосто.
Аштеде, урькан, аштеде,
Колмо валон эсть ёвтат,
Колмо валон эсть терьгевть:
Адядо, ялган, адядо,
Адядо, дуган, адядо,
Илядо кадов эстэдень,
Илядо лиятт эстэдень.
Адядо, ялгинень, оинень,
Остатка вень печтямо,
Коморо чевень пултамо,
Пеште блидянь поркслеме
Тетянь кудонь кирьдизэ!
Тетянь керьзэ, шочкозо!
Пелеведе икеле,
Атякш морамодо мейле
Совить тетянь кудос ят ломать.
Икельць ломандесть меельценьть,
Меельць ломаньдесть икельценть
Саик сэрьга -- рунгова,
Саик черьга,
-- пулова.
Совак пря кунчкаванзо,
Листь кочкаряванзо.
Ужодо, озан, ялхинень,
Кона эземстень лоткасть покштянь
Яки пильгензэ якамодо,
Кона эземстень жалинь лоткась,
Кортли келезэ кортлемде.
Паряк моньгак, ялгинень,
Лоткить пильгень якамодо,
Поряк моньгак, дугинень,
Лотки келем кортлемде
Монь эсть лотка, ялгинень,
Яки пильгень якамодо;
Монь эсь лоткак, ялгинень,
Кортли келем кортлемеде.
Ужодо вачтан, ялгинень,
Бояр-авакс-чинь тарказон,
Аштеде вачтан, дугинень,
Паро васькамо тарказон.
Ох! а ялгакай, а Проска!
Ох, а дугакай, а Проска!
Аштить эзить, ялгакай,
Бояр авакс таркасон?
Аштинь, ялгакай,
Бояр-авакс-чинь таркасот.
Сакшнось, патякай, тейтерькс чить
Сакшнось, ялгакай, олякс чить.
Васнят вачтась, патякай,
Каштом икельга вальмава,
Мейле вачтась, ялгакай,
Пазавалга вальмава:
Котова паля ланксонзо,
Семерик карьть пильксэнзэ,
Кисия коцтонь пракстанзо,
Мишара сурень карьксэнзэ,
Лажамо паця прясонзо,
Сельведень паця кецэнзэ.
Васня саиния, патякай,
Вереть алот улицяв,
Тозо эзь оймак седейзэ,
Тозо эзь рожомт седейзэ,
Мейле сайния, патякай,
Бояронь садга якамо,
Азоронь садга якамо,
Тосо сезинь, патякай,
Кавто садовой сад умарьть,
Максынь тензэ, патякай,
Кавто медовой преничкат.
Сезэ оймась, седейзэ,
Сезэ рожомсь седейзэ.
Мейле сакшнось, патякай,
Сука урекс чись вальмалов.
Васня сакшнось, ялгинем,
Диринь тетять тускесэ.
Сафьяной котат кецэнзэ,
—
Ашто монень -- невцыньзе,
Ашто моньдень кекшсынзе.
Маньчесь, маньчесь монь эйсэ,
Эзинь манявт мон тензэ.
Мейле сакшнось, патякай,
Вейкине лелять тускесэ,
Семерик карьть кецэнзэ,
—
Ашто монень невцынзе,
Ашто моньдень кекшсынзе,
Маньчесь, маньчесь монь эйсэ,
Эзинь манявт мон тензэ.
Мейле сакшнось, патякай,
Диринь авать тускесэ,
Хранцуской паця кецэнзэ.
Маньчесь, маньчесь монь эйсэ,
Эзинь манявт мон тензэ.
Аштинь, ялгай, правдасон,
Аштинь, патяй, видесэнь.
Авай, авакай, диринем!
Авай, авакай, ванынем!
Сакаяк, авай, малазон,
Аракаять, икелень.
Кевстлимака, авакай,
Цела уповод ков якинь?
Обеттэ меельксэс косолень?
Истя якинь, авакай,
Вардонь баняс парямо.
Урень баняс парямо,
Кода карминь, авакай,
Банясть малав пачкодьме —
Корцяня чине каятоць,
Качамо чине марятоць.
Кода совинь банястень,
—
Кев удалга пар вешнинь,
Парь утрава ведь вешнинь,
Кельме вецэ прян пезынь,
Кемень сурсон прян судринь.
Ох, авакай диринем!
Ох, авакай ванынем!
Кенгелян, авкай, кенгелян:
Кода карминь, авакай,
Банясть малав пачкодьме,
Таньтей чине каятоць,
Цяпор чине марятоць.
Кода совинь банястень,
Сапунь вецэ прян пезынь,
Пижень сурцемсэ прян судринь,
Парцей цёкосо мон паринь.
Пасиба, авай, пасиба,
Вадрят кучлить, уштыцят
Остатка банянь уштомо.
Седей пельскем, дугинем!
Седей пелькскем, ялынем!
Теить, эзить, ялынем,
Баляса марто скамика?
Стака сэрень оймавтомс?
Аволь истямо, пиже дугай, кармавтлинь,
Аволь истямо, мазы дугай, кармавтлинь.
Кармавтокшнынь, дугинем,
Баляса марто скамика.
Авай, авакай, диринем!
Авай, авакай, ванынем!
Тукаятя, авакай!
Пирянь мийма поила,
Тукаятя, авакай,
Пирянь сэвма поила.
Кинень пшкадян, а пшкадян?
Киньзэ терьдян, а терьдян?
Пиже дугам, а Маша!
Мазы дугам, а Маша!
Сакаяк, ялгай, сакаяк,
Пурныка, дугай, пурныка
Тужа мишара пря черем.
Кавто кецэть пурныка,
Кемень сурсот кайсика.
Стамбарнэ, дугам, стамбарнэ,
Састынька, дугам, састынька,
Ве черьнеяк иля сесть,
Ве черьнеяк иля тувт.
Сезиньдерят ве пря черь,
Кумажава грехс соват;
Сезиньдерят омбоце,
Кирьга видьга грехс соват.
А, ялгинем, а Маша!
А, оинем, а Маша!
Диринь тетям яксекшнэсь
Серёдат-пецят базаров,
Серёдат-цетверк ярмункав.
Пондо урот сон рамась,
Конёв салмукст сон рамась.
Пуло юрстень, ялгинем,
Не уротнень вачкодить.
Кодазь, кодазь, ялгинем,
Не салмукснэнь вачкодить.
Пуло пестень, ялгинем,
Пачк сюлмо тон сюлмак,
Илязо саевть урянень,
Илязо саевть вардонень.
Тука, пурнаса, патякай,
Копоре мазы пря череть,
Лавка мишара пря череть.
Вейте, вейте кайсиса,
Кавтонь, кавтонь пурнаса.
Иля пеле, патякай,
Ве черьнеяк а сезян,
Ве чернеяк а правтан.
Цетверкстэ якинь, патякай,
Арабузев базаров.
Тосто раминь, патякай,
Чидеяк валдо драгун пов,
Ковдояк валдо драгун пов.
Корёнстень чавса, патякай,
Чидеяк валдо драгун повсть.
Пецясто якинь, патякай,
Ратор ошов базаров,
Тосто раминь, патякай,
Коморо потмо булавкат.
Кодазь, кодазь, патякай,
Булавкатьнень мон чавсынь.
Недлясто якинь, патякай,
Кармалеев базаров,
Тосто раминь, патякай,
Мей пурдамо панжума.
Сех песьтень пурдаса,
Мей пурдамо панжумасть.
Летиньдеряй, патякай,
Сукань кедьнень калавтомс,
Мей пурдамо панжумась
А панжови уренень.
Пасиба, дугай, пасиба,
Мазыстэ черень пурнамост,
Пасиба, ялай, пасиба,
Ларьсте черень школямост.
Ваныка, авай ваныка,
Кода пижине дугась
Мишара черем пурнызе,
Бути парьсте пурнызе,
Пингезэнь мон кантлиса,
Бути беряньстэ пурнызе,
Вандынь валцкес кантлиса.
Авай, авакай, диринем!
Авай, авакай ванынем!
Туика, авай, туика,
Копоре мазы кистючкам,
Сэрень вити кистючкам.
Эзик кайсе ли пильгалот,
Эзик тейне-ли тон сэксэкс?
Ох, уринем диринем!
Ох, уринем авинем!
Кода смеить, уринем,
Парень малас мольмеде,
Пекстазь панжумань панжомо,
Плотна парь кундонь саймеде,
Матрась паро чинь токамо?
Монь паро чим, уринем,
Медь сюкорокс тапарязь,
Парцей суресэ сон сюлмсезь.
Кинь прикаснэ тон саить,
Руцян, палян, парыям?
Кевстлик эзик, урякай,
Тиринь ванынень-авинень?
Тиринь ванынь тетитнень?
Парыинем дугинем!
Парыям бояр авинем!
Аволь эсинь мельнесэ
Пекстадь пареть панжия,
Аволь моньцинь превнесэ
Руцят, палят мон саинь.
Васня кевснинь, парыям,
Диринь тетять, шкинь авать,
Мейле кевснинь, дугинем,
Васькаминеть лелинеть,
Тоньцить саень уряжоть,
Сынст прккаснэ мон саинь
Кавто кедень кедь-челькеть,
Кемень сур прянь теевкеть.
Ятонь нишке пазозо!
Ятонь кормилцькезэ!
Баславитяк, нишке пас,
Не руцятьнень, палятьнень
Паро седейсэ кантлеме.
Нака, парыям, дёлитька,
Кавто кедень кедь челькеть,
Кемень сур прянь ливтевтькеть,
Васьказь, оймазь сынь теезь,
Эльнезь, кольнезь сынь пурназь.
Нака ванытя, парыям,
Ваныть, бояр авинем,
Мейле, парыям дугинем,
Чить чи валдо а неить.
Веть ков валдо а неить.
Илить баслававт, урякай,
Паро седейсэ кантлеме,
Баслававтыть, урякай,
Лажазь, авардезь кантлеме,
Кельме калмонь киява,
Равужо модань яннэва.
Вечкиминень, ялгинень,
Пижеть, мазыть, дугинень,
Ванынка, дуган, ванынка
Кавто кедень теевткень,
Кемень суронь ливтевткень:
Кона артось, ялгинень,
Колминесэ теевтьке,
Се палиненьть, ялгинень,
Васьказь, оймазь теия,
Пильгень пурдазь викшния.
Кона палясь, ялгинень,
Котынесэ викшневтьке,
Чуро арцо теевтьке,
Се палиненть, оинень,
Удумань сазь теия,
Мелень молезь викшния.
Адядо, ялгат, адядо,
Пешксе парень чамдомо,
Чаво парень пештямо.
Те палиненьть, дугинем,
Яцо, чужойсэ орчика
Кизэ чинень самосто
Вирьга укшторга якамо.
Те палиненть орчика,
Ятцо нуемстэ кочкамсто.
Те палиненть орчика
Ятцо мушконь таргамсто.
Те палиненть орчика
Яцо тикшень пурнамсто.
Те палиненть орчика
Яцо, чужойсэ, дугинем,
Покш праздникень самосто.
Те палиненьть орчика
Цислань мазынь ветямсто.
Ванодо, ялган, ванодо,
Зняро паро мон теинь,
Зняро паро мон таштынь.
Эзинь некшэ парт ульцят,
Эзинь вачле таньтей удомо:
Чокшнэ позда мадилень,
Валцьке рана мон стилень.
Мезень кисэ мон трудинь,
Мезень кисэ стараинь?
Кевс вачкодинь мон кедень,
Вармас нолдынь мон виень.
Ванодо, ялган, ванодо,
Зняро паро мон пурнынь,
Аволь зняро эряволь,
Аволь зняро ладяволь:
Васькамо таркам ульнекшнэсь,
Оймамо таркам ульнекшнэсь,
Ялга вечки ульнекшнынь,
Кужо вечжи ульнекшнынь.
Мушком ламо ульнекшнэсь,
Сэльгем ламо ульнекшнэсь,
Васькамо таркам арасель,
Оймамо таркам арасель.
Штердемс шка тень эзь пракшнок,
Кодамс шка тень эзь ульнек.
Арасель мушконь видицям,
Арасель мушконь сокицям.
Авань киялось, уринем!
Авань киялось, авинем!
Тонетькак лияць казнинем,
Тонетькак кадовсь монь ловмам.
Кундыка, уряй, кундыка,
Саика, авай, саика.
Иля пеняца, урякай,
Седе покшке казнинес,
Седе покшке ловминес,
Монцькак содаса, урякай,
Аволь истя эряволь,
Аволь истя ладяволь,
-
((JevseM1931-174))
Пильгефтеме ревень питьнесан,
Сельмевтеме ревень чондасан.
Сякнэнь казьне мон казинь,
Сякнэнь ловма мон ловинь.
Покш покштинень, бабинень,
Тыненкак казьне мон казян,
Тыненкак ловма мон лован;
Весемезэнк ве казьне.
Весемезэнк ве ловма.
Илядо-як пеняца
Седе покшке казнень кис,
Седе покшке ловмань кис.
Улевледеяк те чисэ,
Аволь те казнесь ладяволь,
Аволь те ловмась улевель.
О, тетякай, диринем!
О, тетякай, ванынем!
Кевстима кевстян мон кецтэть,
Вешима вешан мон кецтэть:
Якить эзить, тетякай,
Ратор ошов базаров?
Рамить, эзить тетякай,
Апак пелькстак пазава?
Рамить эзинь тетякай,
Апак споряк пазава?
Невтика, тетяй, невтика,
Кона лазавасть лемезэнь
Апак пелькстак тон рамик.
Тетяй, тетякай диринем!
Тетяй, тетякай ванынем!
Кевстима кевстян тонть кецтэ,
Янкшамо янжшан тонть кецтэ:
Тонть ули арась, тетякай,
Пирянь мийма поилат,
Пирянь сэвма поилат?
Вельть лисевлень, тетякай,
Покш велень тейтерь ялга юткс
Мазы моросо морамо,
Налкинь кужосо налкамо.
Ялган поилавтомо а примить,
Дуган поилавтомо а нолдыть,
Авакай, авакай, диринем!
Авакай, авакай ванынем!
Кевстима кевстян тонть кецтэ.
Янкшамо янкаш тонть кецтэ:
Мерят, а мерят, авакай,
Остатка раз тейтерькс чинь маро
Ульцяв ялган юткс лисьмеде,
Мерят а мерят, диринем,
Остатка раз олякс чинь маро
Тейтерь ялган юткс лисьмеде,
Налкинь кужосо налксеме,
Мазы моросо морамо.
Давай, простятнак, авакай,
Давай, простятнак, диринем,
Давай сюкунян, авакай,
Кавто яки пильгезэть,
Давай паласа, диринем,
Кисэнь корты кургинеть.
Аволь моньсь прослян марот, авакай,
Аволь монць прослян марот, диринем,
Туи бояр авакс чим
Просли, марот, авакай,
Яви бояр-авакс-чим
Палци марот, диринем:
А кармат мейле авакай,
Чокшнэть позда ильтлемень,
Валцкень зорят учлемень,
А кармат мейле, авакай,
Юты ломанень ванцлеме,
Стуки ломанень марямо,
Тулодонь кенкшень панжамо.
Адядо, ялган, адядо
Остатка раз тейтерькс чинь марто
Налкинь кужосо налкамо,
Мазы моросо морамо.
Нярс тесэ ульнекшнэсь, ялгинень,
—
Пиже лугань поляна,
Нярс тесэ ульнекшнэсь
Мазы лугань поляна.
Лугасьть кунчкасо ульнекшнэсь
Эйень, кевень часовня.
Часовнясосьть ульнекшнэсь.
Божи матерь пазава.
Пазаванть икеле ульнекшнэсь
Рублевой свеча курвастезь.
Се свеча валтсоньть, ялгинень,
Налки кужова якилень,
Се валдосоньть пеле ве шкане
Ульцянь кужосто мон сылень.
А ней, ялгинень оинень,
Часовнясь кармась сяворьме,
Свечась кармась мадеме,
Лугась кармась коськеме,
Бояр-авакс-чим кармань туеме.
Ужодо ванцлян, ялгинень,
Коната ялганть, ялгинень,
Тейтерькс чинь печтямсто
Берянь валзо арасель,
Коната дуганть, ялгинень,
Кельме валзо арасель.
Пиже дугам, а Иван!
Мазы дугам, а Иван!
Сакаяк, дугай, малазон,
Сакаяк, дугай, икелень.
Давай, дугай, простятанок,
Давай, дугай, палатанок.
Аволь монць простян марот,
Бояр-авакс-чим прости,
Аволь монць палан марот,
Бояр-авакс-чим палы.
Сэрьсэ, ялгинем, а Ваня!
Сакаяк тонгак икелень:
Тонетькак кадовсь тейтерькс чим.
Тонетькак кадовсь олякс чим.
Я, прощайте, прощайте,
Прощайте, тейтерь ялгинень,
Прощайте, цёра ялгинень.
Авай, авакай, ванынем!
Авай, авакай, ванынем!
Истя якинь, авакай,
Ялган марто простямо,
Кужон эйстэ явомо.
Кода саия, авакай,
Ялган ютксто тейтерькс чим,
Моли, моли велявты,
Моли, моли пульзяви,
Соньць килейкс кольги аварьди,
Чувтокс меневи — мелявты.
Вельть жаль, авай, тень марявсь,
Вельть мила, авай, тень неявсь.
Авай, авакай диринем!
Авай, авакай ванынем!
Анокстыть, эзить, авакй,
Остатка стольне тон монень?
Анокстыть, эзить, ванынем,
Остатка ужин тон монень?
Пурнака, авай, пурнака,
Остатка стольне пурнака,
Вечкима ваканс ям каяк,
Вечкима пенчснэнь андумак.
А, ялгинем, а Наста!
А, оинем, а Наста!
Сакая, ялгай, малазон,
Озакая, ваксозон,
Аварьстика, ялгай, олякс чим,
Мелявтыка, оям, тейтерькс чим:
Тейтерькс пиньгень печтемстэ
Вельть ладнойстэ эрьцинек:
Ве валнэсэ кортыльнек,
Ве сускомсо ярцыльнек.
А, ялгинем, а Маша!
А, оинем, а Маша!
Ужо аварьсца олякс чить,
Ужо мелявца тейтерькс чить
А, ялгинем, а Еня!
А, оинем, а Еня!
Сакая, ялгай, малазон,
Озакая ваксозон.
Иляк аварьцть, ялгай, тейтерькс чим,
Иляк мелявт оям, тейтерькс чим,
Аварьцтик, ялгай, эсь сирёта чить,
Мелявтык, оям, эсь пайстомо чить,
—
Тон мастор лангонь безчасной,
Менель алдонь пайстомо:
Арась ланкс орчамс одижат,
Арась пилькс карьцемс тонть кареть,
Арась пряс сюлмамс пацинеть,
Визьдят лома юткс лисьмедеть.
Асмеят ялгадо, оядо.
А, ялгакай, а Маша!
А, олякай, а Маша!
Ужо молян малазот,
Ужо озан ваксозот!
Ай-аварьсца олякс чить,
А мелявца тейтерькс чить,
Мон аварьсца эсь сэрем,
Мон мелявца эсь принем,
Потмо тошнам чамдаса,
Потмо горям ёвтаса:
Арась диринь авинем,
Арась седей маринем.
Арась превень максынем,
Арась толконь ёвтынем.
Мень седей кирдезь саимем,
Мень седей оймазь муимем,
Кевкс кеведнясь седеем,
Повкс поводнясть сельведень.
Састь тетянь учозь гостензэ.
Тетян аван эрьгедест,
Тетян аван радуваст,
Умок учильть сынь эснэст.
Диринь тетянь кардассо
Пешкець ногай нурдодо,
Ванынь тетянь кардонзо
Пешкецть ногай лишмеде,
Кардо икеле тулотне
Пешкецть ногай сивекстэ.
Ванынь авань кудозо
Пешкець сыре ногайде,
Тетянь лавця лангонзо
Пешкецьть нотай, шкапкадо.
Вай пащанготь, пащанготь!
Свахань кирьгас сиянь крёст,
Тейтерень кирьгас лепень крёст,
Свахань кельбряс баяга,
Тейтерень кельбряс кормарав,
Свахань пей алов кочкань кенавт,
Тейтерень пей алов начко вишть.
Ах сватушкат, батюшкат!
Нолдамизь, сват, нолдамизь,
Васолонь тарка минь сынек,
Сисемь вирень трокс печкинек,
Сисемь паксянь трокс ютынек,
Письмар масторсто минь сынек,
Дунай масторсто минь сынек.
Ортасть панжинк келейстэ,
Кришасть саинк сэрейстэ,
-
Минь соватанок келейстэ,
Минь ютатанок сэрейстэ.
Буги ортасть а панчсынк,
Бути крышанть а сайсынк,
Ажия песэнек паньчсынек,
Чирьке прясонок сайсынек.
Вай пащанготь, пащанготь!
Лиси чи паз чантязо!
Валги ков паз чантязо!
Свахань кирьгас лепень крёст,
Тейтерень кирьгас сиянь крёст
Свахань кирьгапарьс кормалав,
Тейтерень кирьгапарьс горни пов,
Свахань кель пряс шуж сюва,
Тейтерень кель пряс баяга,
Свахань пей алов начко вишть,
Тейтерень пей алов кочкань кснавт.
Вай кудат састь, кудат састь!
Вай андат састь, андат састь!
Кудань карчо лис(и) арась,
Лишмень пиряс кунд(ы) арась.
Листяяк, алькай, листяяк!
Листяяк, урькай, листяяк!
Терьдень гостеть тонть ней састь,
Учонь гостеть тонть пачкоцьть.
Промодо, кудат, промодо!
Промодо, андат, промодо,
Велядо, кудат, велядо,
Сырнень кумбо ланксо,
Чарадо, кудат, чарадо,
Сиянь кумбо ланксо.
Бояр ава, куд ава!
Азор ава, мекш ава!
Икель ёндо ванмосто,
Кудря мазы пичеят,
Ур налкамо таркаят,
Удал ёндо ванмосто,
Сэрей, келей пандоят —
Чинь налкамо таркаят;
Витьть пель ёндо ванмосто
Ашо мазы килеят —
Суркань налкамо таркаят.
Керчь пель ёндо ванмосто
Ризэв, рязов пекшеят —
Мекш валгума таркаят.
Ошонь бояр, уредев!
Ошонь писэрь, уредев!
Плисовойсэ оршазят,
Шелковойсэ карксазят,
Кримской шапка тонть прясот,
Сурт рукавцят тонть кецэть,
Кавто пельга тонть зепеть,
Ве зепесэнть тонть сият,
Омбоцесэнть тонть сырьнеть.
Каядо, кудат, каядо,
Каядо, андат, каядо,
Минь аволь сяцо вештянок,
Минь аволь кавтцо вештянок,
Коморо поцо пижесэ,
Сур пирясо сиясо,
Кенже песэ сырьнесэ.
Тейтерть, бояр авинеть!
Чирёлт, чирёлт якинеть!
Чирь каштазонь кантлицят!
Чирь кочкарянь чалксицят!
Сыреждень толга мекш ават!
Курвастень толга мекш ават!
Аволь каян сядосо,
Аволь каян кавтосо,
Каян семишниксэ-трешниксэ.
А рамавдадо сынст эснэ
Прязонк сюлмамс паця;
А теевдядо сынст эснэ
Лангозонк орчамс одюжа.
Ансяк рамавдадо, тейтерь-эйть,
Кедь кирьгас путмокс пижень кетькс,
Сурозонк тонгомс кивень суркс.
Сетненьгак парост а нейсынк,
Сетненьгак лезэст а нейсынек,
-
Цёрань зепева яжавить,
Цёрань зепева паморить.
Кодамо чудась чудиявсь!
Кодамо причась причудявсь!
Диринень тетянь столанксо
Норов ава матушка!
Столень келес келезэ,
Лавцянь сэрьцэ сэрезэ,
Тюжа мазы лангозо,
Вереть алот кувонзо.
Кемгавтово лувонзо.
Радувак, авай, радувак,
Анок пидень норовстень;
Радувак, тетяй, радувак,
Анок усконь пойластень.
Мон ванца-тейса, авакай,
Сянякадояк ливчанят,
Мон ванца-тейса, тетякай,
Комулядояк шождынят.
Авай, авакай диринем!
Иля вельтяк, радува
Анок пидень норовстень;
Тондак тетякай, диринем,
Иля вельть пек радува
Анок усконь пойластень:
Те анок усконь норовось,
Те анок усконь поилась
Ломань пря маро сынь пелькстыть,
Ломань пря саить кудостонк.
Ай, авакай, диринем!
Ай, авакай, ванынем!
Мезень озкске кепедить?
Мезень озкске сыргавтыть?
Гривенной свеча курвастить?
Бути кепедить, авакай,
Кавто цёра какант кис,
Верев кедеть кепедить —
Верев ризэть ризэдьняст,
Алов кедеть тон валтыть —
Алов ундокст сынь нолдаст.
Бути, озкскенть сыргавтык.
Монь пайстомо сэрень кис,
Верев кедеть кепедить,
Вере пазнэнь алтамак,
Алов кедеть тон валтыть,
Мастор пазнэнь алтамак.
Илязан ульть, авакай,
Мастор ланга якиця,
Илязан ульть, корьмакай,
Ломань ютксо эриця.
Урьвалинень, алинень!
Урьвалинень, дугинень!
Диринь тетянь кудозо
Пешкець сыре ногайде,
Ванынь авань кудозо
Пешкець сыре башкирдэ,
Бояр-авакс-чим, алинень,
Ногай чинес а кирьди,
Айдо саимизь, лелинень,
Козо сельме а неи,
Козо пиле а мари,
Илязан муев ногайнень,
Илязан муев башкирнэнь.
Вейкесь озазо, алинень,
Пара лишмень панеме,
Омбоцинесь саезэ
Ве кедезэнзэ покш койме,
Омбоцестень покш веник.
Койменть эйсэ следэнь валязо,
Вениксть эснэ ровнязо.
Тетянь кудонь кирьдизэ!
Тетянь кудонь ванызэ!
Монь туймедень мееле,
Монь явмодон мееле
Кепетть виев пиземе,
Нолдак виев вармине,
Талер сёрмат монь следэнь
Пиземесэнть тон пизить,
Се вармасость тон вельтить,
Илязан муев ногайнень,
Илязан муев башкирнэнь.
Листяяк, бодяй, листяяк!
Листяяк, бабай, листяяк!
Нолдамак, бодяй, нолдамак!
Нолдамак, бабай, нолдамак!
Кенерева кедень палсть,
Кумажава пильгень палсть.
Авам панимем кудосто,
Тетям кравтымем кардайстэ.
Ах, сватушкам, батюшкам!
Ах, сватушкам, любезной!
Мерят а мерят, сватушкам,
Моро вайгелень теймеде?
Бути мерят, сватушкам,
Моро вайгелень теймеде,
Сестэ панчса, сватушкам,
Сёксь чопуда мон потмом,
Сестэ ёвтаса, сватушкам,
Тундонь тарькске седеем.
Васолонь таркас минь сынек,
Кельгезень таркас минь сынек,
Сисемь паксянь трокс ютынек,
Сисемь вирень трокс печкинек;
Покш вирень трокс ютамсто
Лись покш овто каршозон,
Кундась лишмень пирязон,
Оште таки, сватушкан,
Запас мартон ульнесель,
Эзь ёмсетек монь ёном,
Эзьть машлетек монь превень:
Вить бокасон медь парель,
Кершь бокасон ой парель.
Кургонзо вадия мон мецэ,
Понанзо вадия мон ойсэ.
Кода лисинь, сватушкан,
Цярмун велень паксястень,
Цярмун велень масторстень,
Паксянь кирьдись лись каршон,
Кундась лишмень пирязон.
Оште таки, сватушкан,
Запас мартон ульнесель,
Пойлам мартон монь ламоль.
Паксянь кирьдистень мон алтынь
Пия боцька, той боцька.
Паксянь кирьдись нолдымем.
Кода пачкодинь Цярмун веле пес,
Велень кирьдись лись каршон,
Кундась лишмень пирязон.
Велень кирьдистень мон алтынь
Тантей пряка -- той пряка.
Велень кирьдись нолдымем,
Сядонь кирьдись нолдымем.
Кода совинь, сватушкан,
Сватон, свахань, кардайстень,
Вачтынь виеть бокастень,
Кардазонь виеть бокасонть,
Пиже мазы лугине,
-
Пиже лугасть кунчкасо.
Таргазь ашти таргань столь,
Экшнензэ ашти озадо
Сватонь кардазонь кирьдизэ,
Сватонь кардо-сяркозо.
Столенть ланксо столешник,
Столешниксть ланксо сиянь блидине,
Блидиненть ланксо
Кавто садовойть яблучкат,
Колмо медовойть преничкат.
Кардозонь кирьдись, сватушкан,
Сянгоргавтызе понанзо,
Почакавтынзе толганзо.
Эрь соракацть, сватуйкан,
Кавто яки пильгинень,
Кавто кунды кединень:
Месть отвечан карчонзо,
Месть ней кортан мон тензэ?
Мезе алтан сонензэ,
Мезе невтян мон тензэ?
Сонензэ алтынь покш пряка,
Сонензэ ёвтынь лувонь кше.
Сизьгемень сисемь монь кудан!
Сизьгемень сисемь монь андан!
Промодояк монь перькан,
Арседеяк ве превсэ:
Мезе мельга минь сынек?
Мезень кисэ ардынек?
Истя сынек мазынь кис,
Истя сынек паронь кис —
Косо минек мазынек?
Косо минек паронок?
Мейс а маряви вайгельзэ?
Рамадояк тынь свечат,
Пурнадояк тынь хонарьть!
Айдо паньдянок следганзо,
Вешнитянок бродонзо!
Те весть седейнестэнзэ,
Отс пизекшнесь лов поровт,
Се поровсть ланга ютакшнось
Пазонь зверьне чинеме.
Се чинементь следганзо
Адядо, кудат, мольдянок;
Се чинементь следганзо
Адядо, кудат, пандянок.
Вай, адядо, адядо
Килей пулова якамо,
Ческстазь килеень вешнеме,
Ческстазь килеень саеме.
Аволь синдезь синтьцынек,
Аволь синдезь сайсынек.
Минь корёном сявтаснэк,
Минь сиясо кружаснэк,
Минь пижесэ сявтаснэк;
А сорновцнэк моданзо,
А яжаснэк тарадонзо
А певерцнэк лопанзо.
Ят велень кирьди, матушка!
Ят велень кирьди, сияка!
Иля тандат вайгельдень,
Иля тандат шумнэдень,
-
Аволь тонть сраслян, тандавтлян,
Мазы мельга мон сыргинь,
Мазынь вешнеме мон молян.
Вай, адядо, адядо,
Тейтерь ошонь яжамо,
Тейтерь ошонь синтреме!
Адядо, кудат, ванцынек,
Месьне пирязь тейтерь ошось.
Бути теснэ сон пирязь,
Кевсэ ацазь потмозо,
Муравлинойть столбанзо,
Кавто заставт орта ланксонзо,
Сестэ минь соватанок
Коморо-поцо пижесэ,
Сур пирясо сиясо.
Стякая, дугай, стякая!
Стякая, ялай, стякая!
Тетят терьдиньзеть, дугинем,
Покш авнянь пивцэме,
Ават терьдиньзеть, ялынем,
Стака ведрань кандомо.
Ох, а урякай, решкакай!
Ох, а урякай, авакай!
Анцяк кармакшнынь, урякай,
Матедевме, сутяммо,
Тантей удомонь удомо,
Кода серьгедить, урякай,
—
Сука урень вайгельсэть,
Тандаць боря-авакс-чим,
Сука урень вайгельдеть.
Молян-гак лисян, урякай,
Лиси чи пазонь кевстеме,
Молян-гак лисян, авакай,
Валги ков пазонь кевстеме.
Мерить, а мерить тень стямодо.
Саень урям кенгелесь,
Рамань авам кенгелесь,
-
Саень урям мерекшнэсь:
Диринь тетят терьдиньзеть
Покш авнянь пивцэме,
Шкинь ават терьдиньзеть
Стака ведрань кандомо,
-
Шказо поразо пеле ве,
-
Чизэ прянзо эзь невтле,
Ковсь тарканзо эзь полавт.
Ранной стямом ульнекшнэсь
Чинзэ лисьмеде мееле,
Поздой стямом ульнекшнэсь
Поздой завторк порава.
Пиже, дугам, парыям!
Мазы дугам, парыям!
Мезень сетьцэ тон удат?
Мезень сетьцэ тон аштят?
Сыре ногайтьне, парыям,
Пильге следгат пек ванцлить;
Сыре башкиртнэ, парыям,
Сэрь сулейгат пек пракшныть.
Стякая, дугам, стякая.
Аволь те шкане, дугинем,
Тантей удомот удовлек,
Аволь те шкане, ялынем,
Тейтерь удомот удовлек.
Бояр-ава куд-ава!
Сыреждень толга мекш ава!
Мейсь эзить неявт ютамдо?
Мейсь эзить маряв совамдо?
Минек алянок-тетянок
Верьга путозь кудозо,
Сэрестэ керязь вальманзо,
Шачь умарина порофцо,
Пижень груша кенкшезэ,
Сиянь булавка нежезэ,
Груша цёко песэнзэ,
Панджилинек — гай мериль;
Пекстылинек -- чоль мериль.
Кода састь ногайтьне,
Панжизь алянок кенкшезэ,
Маштызь мазы гайтензэ.
Минек алянок тетянок
Таргазь перестолозо,
Парций паця ланганзо.
Перестолонть экшнэнзэ
Пазонь ангелт озадот,
Ашо конёвт икелест,
Сёрмадмо толгаст сур юткосост;
Божественнойть сёрмадыть,
Иже херат моравтыть.
Алянок столензэ кунчкасо
Кодамо шачи норовось?
Шачмо иень товзюронь,
Вереть алот кувонзо.
Мезе поцонзо, сецэнзэ?
Колмо иень атякш поцонзо,
Колмо морамо толганзо,
Пижес навазь пильгензэ,
Сияс навазь нерезэ.
Ярмак сёрма тутмазо,
Золоченойть толганзо,
Серебряной лангозо.
Бояр-ава, куд-ава!
Азор-ава, куд-ава!
Полконь нурны полковлик,
Беседань вети исправник!
Сизгемень сисемь тонть кудат,
Сизгемень сисемь тонть андат,
Пурнытяя ве таркас,
Арседеяк ве превсэ,
Кортадо-як ве валсо:
Свахань мазызэ эземь-бря,
Свахань парозо столь экшнэ.
Рами-ка, сваха те мазынть:
Столенть вельтик прякасо,
Пряканть вельтик курниксэ,
Курниксть вельтик пижесэ,
Пижесть вельтик сиясо.
Бояр-ават, отт тейтерть!
Азор-ават, отт тейтерть!
Кизэ чинень самосто
Котань-цюлкань кантлицят.
Мазы чинень самосто
Котова палянь кантлицят,
Теле чинень самосто.
Здёгань пильксэ якицят,
Нилева палянь кантлицят,
Секс эзинь неявт мон тыненк
Лельканк вальмалга ютамсто,
Секс эзинь марявт мон тыненк,
Лельканк кенкшка совамато:
Кудат туинь от цёрат,
Андат туинь от ломать.
Цёра ланкс ваность тынк сельменк,
Цёрат кулцоность тынк пиленк.
Бояр-ават -- тейтерь-эйть!
Азор-ават, тейтерь-эйть!
Столенть вельтин прякасо,
Пряканть вельтия курниксэ,
Курниксть вельтия пижесэ,
Пижесть вельтия сиясо.
Тейтерть, бояр-авинеть!
Тейтерть, азор-авинеть!
Цислань теия цисласо,
Эрьгань теия эрьгасо.
Аньцяк а максса, тейтерь-эйть,
Атявтонь сюро меньтезэ,
Акавтонь чапавтумазо.
Сюро меньтенть мон сайса
Равужо модас шачомо;
Чапавтуманть мон сайса
Ош калацянь панеме.
Тейтерть, бояр авинеть!
Ядо вачинка, вачинка,
Ош калаця курникем,
Седей вити монь прякам,
Пеште товонь оришкая.
Аволь сусик потмаксонь,
Аволь сусикень прявтонь,
Самой сусик седеень,
Шачмо иень товзюронь,
Вереть алот кувонзо,
Кемгавтоэо лувонзо,
Колоньгемень сборонзо.
Аволь ведь пряс сон ичезь,
Сисемь скал ойс сон ичезь.
Эрьде ярцадо, ярцадо,
Бояр ават, тейтерь эйть!
Бути ули чапамо,
Сестэ куватьс удовинь,
Бути ули ламбамо,
Сестэ курок мон стявинь.
Эрьде ярсадо, ярсадо,
Здоровиякс молезэ,
Пукшокс телакс озазо.
Пасиба, свахай, пасиба!
Ош каляця курникезт,
Седей вити пряказот,
Пеште товонь оришказт.
Пасиба паро честезэть,
Пасиба ломанькс путмозот.
Ошонь бояр уредев,
Ошонь писэрь уредев!
Сядо ютксто кочксимизь,
Те таркастень путымизь,
Адякая, мольдянок,
Килей пулова якамо,
Таратто тарац кунцеме,
Лопадо лопас чалксеме.
Кона килеесь, уредев,
Сэрень пелев сэрейне,
Тарад ёнов сеедьне,
Се минек ческстазь чувтонок,
Се минек уметной чувтонок.
Давай, уредев, ванцынек,
Якить, а якить пильгензэ,
Кундыть а кундыть кедензэ.
Ошонь бояр уредев!
Ошонь писарь уредев!
Сядо ютксто кочсимизь,
Настоящейкс путымизь,
Адя, мольдянок, уредев,
Мазы килей пулостень,
Караблиной рощастень,
Ашо лебедь полкостень,
Килейде килейс чалксеме,
Таратто таратс кунцеме.
Адя, ванцынек, уредев, кона лебеденть
Таратс чалгазь пильгензэ,
Цюцевс кундазь кедензэ,
Кепедезь аштить сёвнонзо,
Се лелянок приметсэ,
Се лелянок уметьсэ.
Давай ванцынек, уредев,
Якить, а якить пильгензэ,
Кундыть, а кундыть кедензэ.
Бояр ават, свахинень!
Азор ават, свахинень!
А якан вирень керямо,
А якан дёготень панеме,
Аволь сюпав ломанян,
Аволь славной ломанян.
Вай простямизь, простямизь
Арасть максомс ярмакон.
Пиже дугай, пеньурьва,
Мазы дугай, пеньурва,
Стопкам мери -- кундамак,
Пойлам мери -- симимак,
Чалгить а чалгить тонть пильгеть?
Кундыть а кундыть тонть кедеть?
Иля веля икельган,
Иля чара икельган,
Велямошкат айаштян,
Чарамошкат а улян:
Нудейнешка монь сэрем,
Почкинешка монь эчкем,
Полушкашка монь чамам,
Олгинешкат монь кедень,
Салмукскеыкат монь сурон,
Стопкат кундышка а улян,
Пойлат симишка а улян.
Киргазот каян крёст ведьме,
Пазонь соды ультяя,
Пилезэть путан мон пилекст —
Кулсониця ультяя.
Сурозот тонгак сырьнень суркс,
Сур виекшев ультяя.
Кедезэть путан сиянь кетьке
Кедь виевкшев ультяя.
Пиже дугам, пеньурвам,
Мазы дугам, пеньурвам!
Иля, иля аварьде,
-
Аволь ёмамо сайдядызь,
Аволь вальмамо, сайдядызь,
—
Кустима песэ лисьманок,
Сыньсь молицят ведранок.
Кудо песэ костернок,
Сынць молицят пенгенек.
Аварьть, аварьть, дугинем,
Те шканенть лади, дугинем,
Икельгат нолдамс чуди ведь,
Удалгат теемс чады ведь,
Аварьть, аварьть, дугинем,
Знярс шачи родноеть эсь перькат,
Касы родноеть кругомгат:
Пси сельведеть
Пиже дугай, сынь нейсызь,
Кол вайгелеть, мазы дугай, марясызь.
Моньцяк, дугакай,
Исень саевть одирьван,
Моньцяк, ялакай,
Улконь максовт тейтерян,
Моньсиньгак, дугай,
Туймень апарось эзь стувтовт,
Моньциньгак, ялай,
Явмонь апарось эзь стувтовт.
Мон аволь дугасть крееснавазан
— авазан.
Аволь мон яластень васень панаронь максызан,
Апак учок те таркастень мон понгинь,
Апак эрьвак те цисластень мон понгинь,
Эзинь анукста те таркась те ламо валт.
Вай пасиба пазнэнь, пасиба!
Ломать мерьнекшнесть,
Мастор сильдей сэрьнезэ,
Сильдейень чейть черензэ,
Колинкава руцязо,
Кочкарява нуланзо,
Кенерева ожанзо,
Сур пирява нуланзо.
Виде килей сэрезэ,
Мазы умарь тускезэ,
Котова таргань палязо,
Кумажас путозь руцязо.
Ашо конёв коцтозо,
Конёв сёрмат артонзо,
Хрустальной стопкат пильгензэ.
Сия вец навазь карь прянзо.
Иля веля, сыре бояр, икельган,
Иля веля, ошонь бояр, икельган,
-
Аволь тия тенть велямсоль,
Аволь тия чарамсоль —
Базар кунчкасо велямсоль,
Базар кунчкасо чарамсоль,
Дешевойнестэ рамамсоль,
Питневнестэ миемсэль.
Велямошкат, айаштян,
Чарамошкат айаштян:
Ох а, ято, а ломань!
Кода смеить, а ято,
Монь икелев самодо,
Монь карчозон арамо?
Кевстьник эзик, а ято,
Монцинь диринь тетинень?
Кевстьнкк эзик, а ято,
Монцинь шкинень авинень?
Бути тетям приказась,
Тетядон покшто а теян;
Бути авам приказась,
Авадон покшто а теян.
Мезнень кандык, а ято,
Тоньцить кецэть кечиненть,
Кечинесэнть поиланть?
Кечинедеть каназан,
Кече пулодот кичкерян,
Поиладот равужан,
Косынеденьть ловтаняк,
Комулядонть шождынян.
Саевлея кедезэнь —
Розь олгинеть кединень,
Пелян виест а сатыть,
Розь колоскеть сурынень,
Сня копийкат кеньжинень,
Кече пулозот кадовить,
Кепедевлея кургозон,
Мако лопат турвинень
Кече крайга кадовить,
Мако вицкеть пеинень
Кечинезэть сынь озыть.
Сюдовлетень, а ято
Паксясо видень сюрова,
Моньцинь диринень тетям,
Ламо сюронь видиця,
Сюдовлетень, а ято,
Кардайсэ скотинань кувалма,
Моньцинь диринень тетям
Ламо скотинань тириця.
Ужо сюдутан, а ято,
Кавто яки пильгева,
Кавто пильгень коськемга.
Ужо сюдутан, а ято,
Кавто кунды кедьнева,
Кавто ваны сельмева.
Ох, а ято, а ломань!
Илязо уль мелест апаро,
—
Цисланзо кис мерия,
—
Пислань соды ломанян,
Цисладо некшнесь сельминем,
Мазыде марьцесь пилинем,
Паро кудос шачозян,
Паро тетянь тирявтан,
Паро авань ванувтан.
Вай, пасиба, пасиба,
Пасиба паро честезэнк,
Садовойде андымизь,
Медовойде симдимизь.
Минь меринек тейтерь ошонь
Тёснэ пирязь крукозо,
Кевсэ ацазь потмозо,
Муравлинойть столбанзо,
Сия копийка ортазо,
Пижень груша кришазо.
Калькснэ кулькснэ пирязь крукозо,
Пичень щепка кенкшезэ,
Капста коцён нежезэ,
—
Кучкордынек -- синьдинек,
Тулкадинек -- тувтынек.
Пиже дугам, а Сёма!
Мазы дугам, а Сёма!
Весе ломать мерекшнесть,
Весе ломать кортакшность:
Мастор сильдей сэрезэ,
Сильдеень чейть черензэ,
Карксамова панарзо,
Кочкарява нуланзо,
Кенерева ожанзо,
Сур пирява нуланзо.
Виде килей серезэ,
Мазы умарь тусозо,
Котова таргазь палязо,
Кумажас путозь руцязо.
Ох, а ялгинень, оинень!
Ох, а ялгинень, дугинень!
Саимизь-гак, ялгинень,
Остатка раз варма коштка якамо,
Пиже лугава чийнеме,
Горнипов цецянь сезьнеме.
О, а урякай авинем!
О, а урякай диринем!
Невтика, уряй, невтика,
Кона сэдявксось пайстомо,
Кона сэдявксось грешнойне?
Се сэдявксканть мон ютан,
Се сэдявксканть мон молян.
Бодянь кардазонь кирьдизэ!
Бодянь кардо-сяркозо!
Иля тандатт шумнэдень и проч.
Лисинь дерят, бабинем,
Валськень зорят венелев,
Мариньдерят, бабинем,
Лисьма унявтонь прясто
Мазыстэ моры нармушка —
Се бабай, монь тейтерькс чим,
Се, бабай, монь олякс чим,
Жалика, бабай, жалика:
Моньтемень сонзэ, бабакай,
Вельть пек ёнзо ёмсети,
Пек превензэ машлетить.
Тейтерькс чинем, ойминем!
Вольнойкс чинем, ойминем!
Кавто кецэнь кундатан,
Кемень сур юткс мон сайдян,
Кумажа прязон чалгавттан —
Меште пелезэнь кундавттан,
Сельме потмозон ванттаяк.
Тейтерькс чинем, ойминем!
Волнойкс чинем седейнем!
Остатка раз кортан мон мартот,
Остатка раз нен(г) думан.
Улевельгак потмом панчлима,
Улевельгак седеем сайнима,
Путовлетень ламо думи потмозон,
-
Потмом аволь панчнима,
Седен(г)ем аволь сайнима.
Путмокс тарканть а муян,
Нолдамс кинеть а содан.
Нен(г) кон(г) тейдян, кон(г) каттан?
Улевлетькак, тейтерькс чим,
Сурс путума сиянь суркс,
Путовлетень сурозон,
Кантлевлетень пингезэнь,
—
Аволь сиянь тон сурксат,
Аволь сурцо кантлимаят.
Нен(г) кон(г) тейдан, ков каттан?
Козо путтан, варчатан?
Путмокс тарканьть а муян,
Нолдамс киненьть а содан.
Ужо кучтан, тейтерькс чим,
Покш киява якамо,
Покш киява пакамо,
-
Покш кинь ламо якинзэ,
Покш кинь ламо пакинзэ.
Боярт артнить тройкасо,
Купецть артнить дрожкасо.
Лишмест алон(г) тен понгат,
Пшти подковзост керяват,
—
Сезэ-як жальне маряват,
Сезэ-як ёми тонть сэреть.
Нен(г) кон(г) тейдян, кон(г) каттан?
Путмокс тарканть амуян,
Нолдамс киненть а содан:
Кучовлетень тейтерькс чим,
Пижень сурцем вирь лангот
Нолдавлетень, олякс чим,
Пижень сурцем вирь ланга.
Молиньдеряйть лелян-алян
Угодной чувтонь керямо,
Се чувтонь пряс тондават,
Узерь вальгейсэст глушават,
Штепкаст алон(г) валяват,
-
Сезэ-як жальне маряват,
Сезэяк ёми тонть сэреть.
Нен(г) кон(г) тейдян, кон(г) каттан,
Нен(г) кон(г) кучтан, нолдатан?
Кучомс тарканть а муян,
Нолдамс киненть а содан.
Кучовлетень, тейтерькс чим,
Пиже лугава якамо:
Лугань сэрьсэ сэринеть,
Тветка мазысэ мазынет,
-
Молиньдеряйть лелян-алян
Пшти пелюмсо ледеме,
Пелюма нерьсэ керяват,
Покоз алон(г) валяват.
Седеяк жальне маряват,
Сезэ-як ёми тонть сэреть.
Нен(г) кон(г) кучтан, кот кучтан?
Кучомс тарканть а муян,
Нолдамс киненть а содан.
Кучовлетень, тейтерькс чим,
Сюронь шачмо покш цаксян(г),
-
Тетяй, тетякай, диринем!
Тетяй, тетякай ванынем!
Содылеть, тетькай, шачмодан,
Содылеть, жалим, касмодон,
Ней содат, аздат, тетякай,
Сэрень сэвма цястодон,
Пирянь мийма минуттон?
Тетяй, тетякай диринем!
Тетяй, тетякай ванынем!
Улевлеть-как чи ланксо,
Улевлеть-как те чисэ,
Аволь ёмсе монь ёном,
Авольть маштле монь превень.
Ней арась, тетякай диринем,
Монень превень максыця,
Монень ёнонь ёвтыця,
Кисэнь валонь каиця.
Седей пелькскем, лелинем!
Седей пелькскем, роднойнем!
Содат, лелькай, шачмодон,
Содат, лелькай, касмодон.
Тон а содат, лелякай,
Сэрень сэвма цастодон.
Пирянь мийма минуттон.
Бути токатят, лелякай,
Таньтей удомонь удомсто,
Човоргадузан онозот.
Бути тондават лелякай,
Стака ружиянь кантлемстэ,
Ледезэ, ледяй, мелезэть.
Шачи-касы масторот,
Кудо-поцо семият,
Ледизан монгак мелезэть.
Пиже дугам, парыям!
Мазы дугам, парыям!
Тука, парыям, рознясынек
Сэрень вити тонть пулот,
Копоре мазы пря череть.
Седь икеле эрямсто,
Седь икеле аштомсто
Эзьнек ургале черезэть,
Эзьнек кунтле пулозот.
Тукая ней, парыям,
Остатка раз розьняснэк
Тюжа мишара пря череть,
Ней а кармат, парыям,
Чи валдосо кантлемест,
Кармат кекшезь кирьдемест,
Чопудасо кантлемест.
Пкже дугай, а Наста!
Мазы дугай, а Наста!
Орчавттанок, лангозот,
Котова таргазь минь паля,
Кумажас путозь минь руця,
—
Мельц паросо кантлика.
Ох, уринень, диринень,
Ох уринень, ванынень,
Илинк орчавт лангозон
Сэрь ёмавты те панарсть,
Киськень косьти те руцянть,
Тука укснесынек, парыям,
Хрустальной стопкат тоньть пильгеть,
Суфтем ленгень тонть кареть.
Илинк укснек, уринень,
Хрустальной стопкат монь пильгень,
Илинк полавт, авинень,
Суфтем ленгень монь карень.
Туитька, урькай, вачасынь,
Туить а туить мелезэнь,
Туить, а туить превезэнь.
Не цюлкатьнень, уринень,
Аволь тетям раминьзе,
—
Сыре ногай раминьзе,
Сыре башкир саиньзе,
—
Ногай чинест качадыть,
Башкир чинест качадыть.
Оргодеде, ялгинень,
Кавтов яводо, оинень,
Пильгень ёмавтысть каяса,
Пильгень костисть мон ёртца.
Ванодо, алгат, ванодо,
Ванодо, ялган, ванодо,
Кода пурнымизь урятьне,
Кода сэрьнимизь вардотьне,
Пеедеде ялгат, пеедеде!
Моньць пеедьмеде кол ульнинь.
Бодянь кудонь, кирьдизэ!
Бодянь, керзэ шочкозо!
Иля тандат шумнэдень,
Кол ёмамо криккедень,
—
Аволь тонть тандавтлян.
Монь туймедень мееле,
Монь явмодон мееле,
Паз максозо, максозо,
Бодянь кудос совиде.
Козо пильгем чалгаса,
—
Паз максозо, максозо
Кумажава пижеде.
Козо кедем нежетьца
Паз максозо, максозо
Кенерева сиядо.
Козо суром токавца,
Паз максозо, максозо
Суронь сэрьцэ сырнеде.
Бодянь, три-ваны пазозо,
Остатка раз тенть сюкунян,
Ней а карман бодянень
Чокшнэ позда сакшномо,
Валське рана сакшномо.
Урвалинень, алинень!
Айдо, алян, саимизь
Диринь бодянь кудосто,
Бодянь мельзэ мольстия,
Курок суткам топоди.
Бодянь кудонь кирьдизэ!
Бодянь керьзэ шочкозо!
Илямак нолда шумбрасто,
Илямак нолда паросто.
Бодянь кардазонь кирьдизэ!
Бодянь кардо сяркозо!
Илямак нолда шумбрасто,
Илямак нолда паросто.
Ульцянь кирьди матушка!
Ульцянь кирьди, сияка!
Седь икеле эрямсто,
Эзинь артлекшне кувалмат
Кильдень поводень лишмесэ,
Сивойть буройть ракшасо,
Перелётнойть крандайсэ.
Адя, дугай, сайдядызь,
Пиже лугава якамо,
Мазы лугава якамо,
Тикшеде тикшес кунцеме,
Лопадо лопас чалксеме,
Горни-пов цецянь кочксеме.
Листяяк, авай, листяяк,
Листяяк, дирим, листяяк!
Кустима песэть, авакай,
Пиже лугань поляна,
Мазы лугань поляна.
Се полянасть кунчкасо
Грешной чувто -- пой чувто.
Чувтонть васень таратсо,
Тарандонь васень цюцёвсо
Тундонь куко кужорды,
Тундонь цёков цёкорды.
Аволь куконь шкась-порась,
Пиже тякат аварьди,
Мазы тякат аварьди.
Ванумак, авакай, ванумак,
Ванумак, дирим, ванумак,
Пилькстэ саезь, пряс ванумак.
Прясто саезь, пилькс ванумак.
Меревлень, авакай, содамак
Меревлень, дирим, явумак
Хрустальной стопка пильгеван,
Сия вец навазь карь пряван.
Аволь хрустальной стопкат, монь пильгень,
Аволь сия вец навазь карь пирян,
-
Кискань кедень котат монь пильксэнь,
Кискань понань цюлкат монь пильксэнь.
Меревлень, авакай, содамак —
Меревлень, авакай, явумак
Котова таргазь паляван,
Кумажас путозь руцяван,
—
Аволь котова таргазь монь палям,
Аволь кумажас путозь монь руцям.
Сыре эльдень кедь монь ланксон.
Меревлень, авакай, содамак,
Меревлень, авакай, явумак
Виде килей сэрневан,
Мазы умарь тускеван,
Пиле прява кудряван,
Чама пелькска свисткаван,
-
А неевить сынь тонеть,
-
Базарной одра вельтинзе,
Базарной сава кекшинзе
Содамак, авакай, содамак,
Содамак, дирим, содамак.
Курго поцо вайгельган,
Кель пирясо валнэван.
Бути, а содаван тияня,
Содамак, авакай, содамак.
Вить бокасон, авакай,
Седей пилькскем дутинем;
Керч бокасон, авакай,
Чи валдынем — дугинем.
Сынст кувалма, содамак,
Сынст кувалма, явумак.
Авай, авакай, диринем!
Авай, авакай, ванынем.
Ащекая, авай, ёвтлиса,
Кода манимизь дугатне,
Кода макимизь ялакстнэ:
Исяк саимизь, авакай,
Ош порядка юткова,
Москов ульцянь кувалма
Сиясо сэдязь сэдь ланга,
Сырнень баляса юткова,
Штавтозь паз-ава икельга,
Курвастезь свеча валдова.
Шечо туимизь, авакай,
Мода алга киява,
Олгонь, калгонь сэдь ланга,
Чувтонь баляса юткова,
Вельтязь пазава икельга,
Мадстязь свеча юткова.
Оштё, авакай, ёвтлиса,
Оштё, ваным, ёвтлиса,
Кода уретьне манимизь,
Кода вардотьне манимизь:
Адя-ка, парыинем дугинем,
Диринь тетять кардайсэ,
Шачозь пиже лугань поляна,
Се полянасть кунчкасо
Сиякс лиси лисьма пря,
Сиякс лиси ведьнезэ,
Сырнекс кеверить кевнензэ.
Сесэ, парыинем дугинем,
Бояравакс чить экшели,
Сесэ, парыинем ялынем
Бояравакс чить шли-нарды.
Аньцяк кадовкшнось, авакай,
Вольнойкс парокс чим
Явонь касмо пирязон,
-
Тетянь орта ланксонзо
Шачозь ульнесь килей роштя,
Касозь ульнесь тумо пуло,
Тумо пулость алга ютамсто
Килей пулость алга ютамсто
Тумо тарац новцордавсь,
Килей тарац авцордавсь.
Кедень венстинь эсть сатот,
Сельмень каинь -- эзь неявт,
Вайгель максынь -- эзь маряк!
Кода совинь, авакай,
Диринь тетянь кардайстень,
Ванынь тетянь кардайстень,
Вачтынь виеть бакастень —
Арась пиже полянась,
Арась лиси лисьма прясь,
—
Пиже лугань полянасть,
Ногай лишметь нать шешкизь,
Лиси лисьма прянть, авакай,
Башкир лишметь, нать, симизь.
Чалган васень приступкас
Яван тетястон, авастон,
Чалган омбоце приступкас.
Кода сован, ялгинень,
Диринь тетянь кудостень,
Чекшнэ кадынь, ялгинень,
Диринь тетянь эзем пряс
Мастор лангонь куломо,
Мастор лангонь ёмамо.
Зорякс тетькезь сельмензэ,
Вихоткс автезь кургово,
Ломань ловажа курконзо
Ломань веревть пеензэ.
Покш покштят, бабат!
Улест чантенк!
Вана Аннань
Максынек мирденень, чантинк,
Паро эрямга — аштомга,
Танозонзо шачозо сюро,
Раштаст кильдеметь.
Ванынк душмандо, апародо; талановт улест.
Покш покштинень, бодинень!
Мода мазыть, бабинень!
Седь икеле эрямсто,
Тейтерькс пингень печтямсто,
Киштезь якильть монь пильгень,
Пеедезь аштиль монь кургом,
Паряк чалгавкшнынь, покштинень,
Матрась, оймась сэренк ланкс,
Паряк чалгавкшнынь, бабинень,
Матрась-оймась рунгонк ланкс;
Бути чалгавкшнынь сэренк ланкс,
Саимизь сэрьга-рунгова;
Бути чалгавкшнынь пильгенк ланкс,
Саимизь кедьга-пильгева;
Бути чалкавкшнынь черенк ланкс,
Саимизь черьга -- пулова.
Я прощайте, бодян, прощайте,
Я прощайте, бабан, прощайте,
Кува савтовсь, кува эзь
Илимизь-га осудя.
Айдо саимизь, уринень,
Пешксе парень чамдомо,
Улинь-аразень вачамо,
Остаткатнень пурнамо.
Мезень кисэ, уринень,
А содылень удомо,
А содылень аштеме!
Вирьцэ чувттнэнь мон орчинь,
Пире палмать мон вельтинь,
Кевс вачкодинь мон кедень,
Вармас нолдынь мон виень.
Стяко ёмась роботам.
Пярян сорновтан -- парновтан,
Пирям веши пряс паця,
Кирьган сорновтан -- парновтан,
Кирьгам веши кирьга паця;
Бути каздядо пряс паця,
Обидняс молян -- сюлмаса,
Кудос сован -- пурнаса.
Бути каздядо пильге пекст,
Кардайс лисян -- чурасынь,
Кашланкс кузян -- костясынь.
Вай ванодо, ванодо,
Велень ломать, ванодо!
Кодамо казнесть монень кайсть,
-
Лийма ёнов кувака,
Кодемкс ёнов сон келей,
Паро лёнонь лиймазо,
Ашо гумагань кодемкссэ;
Келес вачаса -- пек келей,
Сонсь човине, ашине.
Кувалт вачаса -- кувака,
Чинь карчо стявца — валаня,
Чамас ладяса -- солоня.
Нать эзь аштекшнэ пеньурвам
Чокшнэ куватьс кужосо,
Нать эзь ашеткшнэ пеньурвам
Валське куватьс таркасо —
Капшась казнеть анокстась.
Ох, тетякай, диринем!
Ох, авакай, ванынем!
Илядояк пеняця,
Седе покшке казнинес:
Аволь васьказь эрьсекшнынь,
Аволь оймазь эрьсекшнынь,
Васькамо таркам арасель,
Оймамо таркам арасель.
Аламонть ломинк тынь ламокс
Вишкиненть ловинк тынь покшос.
Крёстнавинем, авинем!
Кельме ветьстэ таргинем!
Крёст-тетинем, тетинем,
Попонь кецтэ идинем,
Илядояк пеняця
Седе покшке казнинес:
Монць-как содаса крёснавай,
Аволь истя эряволь,
Аволь истя ладяволь,
—
Берянь ревень питнесан,
Вели ревень чондасан.
Сизьгемень сисемь монь кудан!
Сизьгемень сисемь, монь андан!
Лисинь-совинь кардазга,
Ютынь ракшан юткова.
Колоньгемень монь ракшан,
Кеветее монь паран,
Сисемь парат повоскан.
Монь животан -- ракшаень
Киштезь киштить пильгинест,
Ветькс гумбольдить лангинест —
Оляс вешить сынь пиряст,
Похотс вешить сынь теласт:
Тикшест арасть -- пекест вачть,
Ведест арась -- симест сась,
Кудан, кудан — ягудан,
—
Покш полянань малинан,
Пурнынкая ракшатьнень,
Пора тенек кудов-чив.
Сватушкан кардас кунчкасо,
Батюшкань стройна юткосо,
Пиже лугань поляна,
Мазы лугань поляна;
Се полянасть кунчкасо,
Потмакстомо эрькине,
Эрькеванть укшны яксярго,
Эрькеванть укшны мазыне,
Виде скалкат пильгензэ,
Ярмак сёрма лангозо,
Пижень турба кирьгазо,
Рублевой свеча нерезэ.
Туикс ашти мельнезэ,
Ливтикс аштить сёлнонзо,
-
Либор меревель -- туевель,
Лабор меревель -- ливтяволь.
Чарадо, свахан, куроксто,
Велядо, свахан, эрейстэ,
—
Пазонь шказо завторкс сась,
Нишкень шказо обетс сась,
Миненек пора ней лисемс,
Миненек пора ней туемс,
Яксяргостень ливтямо,
Эрькинестень оймамо.
Вечкима роднян, од роднян!
Кельгима роднян, од орднян!
Моледе горнойкс, моледе.
Аволь колмоненк моледе,
-
Аволь нилененк моледе,
Колоньгеменненк моледе,
Ниленьгеменненк моледе.
Тетям пидесь вар пия,
Лелям рамась чан вина,
-
Сисемь иень бука печксь,
-
Менельц токильть сюронзо,
Московс сатыль пулозо.
Сень горнойнень пидизе,
Сень горнойнень ванстызе.
Вете иень баран печксь,
Вете иень баран чавсь,
-
Масторц токильть монанзо,
Казаньц сатыль пулозо.
Колмо иень атякш печксь,
Масторонь келес вайгельзэль,
Менелень келес гайтезэль.
Моледе, горнойкс, моледе,
Пенчень-кундынь пес моледе,
Кортлинь-пшкадинь пес моледе:
Ули месьне каванямс,
Ули месьне потчувамс.
Аштеде озан, уринень,
Бояр-авакс тарказон,
Аштеде озан, авинень,
Сэрь оймамо тарказон.
Ох, лужадовлень лужадозь!
Лондадовлень лондадозь!
Тетянь чесной таркасо,
Кодамо ломаньць озадо?
Мейсь радувазь сон ашти?
Гуйкс кикерьди сэрезэ,
Чаразь чары пирязо,
Куркстонзо лиси качамо,
Сельмстэнзэ ливтить палы сяткт.
Аволь тесэ тарказоль,
-
Тетянзо эзем пирясо,
Ниле келес коцт поцо,
Ниле сювордазь лаз ютксо.
Ужо а ёвтан берянь вал,
Ужо а терьган кельме вал,
-
Берянь валонть васень сускомсо сусковцызь,
Кельме валонть васень корштавцо корштавцызь.
Пиже дугам, кресникем!
Мазы дугам ялаксом!
Ёвтыньдеряй берянь вал,
Тергинь деряй тенть кельме вал,
Кундык, дугай, кедезэ,
Сурксонь кетьксэнь пачк туезэ.
Чалгик, ялаксом, пильгезэ,
Кота эскень пачк туезэ,
А ёвтыньдеряй берянь вал,
А терьгиньдеряй кельме вал,
Кедезэ кундык састынька,
Пильгезэ чалгик стамбарнэ.
Вай пасиба, пасиба!
Пасиба пазнэнь паронень:
Сия човоргаць пиже юткс,
Пиже човоргаць сия юткс,
Дуганок човоргаць минек юткс,
Мон човоргадынь од родняс,
Апак содак ломань юткс.
Лома ломань, ят ломань —
Кетькске ланга кундымем,
Кетьксэнь пачк кедем нолдызе
Суркске ланга кундымем,
Сурксонь пачк сурон нолдызе.
Пильгем чалгизе кемсэнзэ,
Кемь эскень пачк нолдызе.
Коть визьдевлеть тон, ято,
Шачы-касы роднойдень,
Коть пелевлеть тон, ято,
Кудо поцо семьядон.
Коли эзить висть недеяк,
Коли эзить пель недеяк,
Тон визьдевлеть а ято,
Диринь ванынь авадон,
Тон визьдевлеть, а ято,
Диринь ванынь тетядон.
Коли эзить висть недеяк,
Коли эзить пель недеяк,
Тон визьдевлеть, я ято,
Тетькань уголцо паздонзо,
Жалинь уголцо паздонзо.
Коли эзить визть недеяк,
Коли эзить пель недеяк,
Лужадознак, ят ломань,
Эземь прястень кавонек;
Лондадознак, ят ломань,
Те таркастень кавонек.
Ней ков туян, ков молян,
Козо пирян мон каян?
Витть кедь ёно бокасонть
Озадо ашти орькс овто (жених)
Керчь кедь ёно бокасонть
Благой пургине сеери (сваха)
Удалон тетянь тюжа стеназо,
Икелень тетннь таргань столезэ.
Урьвалинень, алинень!
Урьвалинень, дугинень!
Илимизь кад, алинень,
Куломошка визьксэстень,
Илимизь кад, дугинень,
Ёмамошка стыдастень.
Баславамизь, шкинень-тринень,
Баславамизь, седей маринень,
Чи валдодо валдосто,
Ков валдодо светласто.
Тукаяк, тетяй, паласа,
Паронь корты кургинеть.
Тукая, тетяй паласынь
Мельган ваныть сельминеть,
Тукая, тетяй, паласа
Кисэнь ризны седееть,
Тукая, тетяй, паласынь
Трямо-ванмо кединеть,
Тукая, тетяй, сюкунян,
Кавто яки пильгезэть.
Авай, авакай, шкинем.
Авай, авакай, диринем!
Авакай, седей маринем!
Авахай, ашо ловцынем!
Авакай, тюжа оинем!
Авакай, ашо палинем!
Авакай, чевте руцинем,
Тука паласа, авакай,
Марон корты кургинеть,
Тука паласынь, авакай,
Мельган ваны сельминеть.
Тука паласынь, авакай,
Трямо-ванмо кединеть,
Тука сюкунян, авакай,
Кавто яки пильгезэть.
Васня явимек, авакай,
Ашо ловцодот,
Ашо ловцодот, тюжа ойнедеть,
Мейле явимек чевте руцядот,
Чевте руцядот — ашо палядот,
А ней явсамак пиже дугасто,
Пиже дугасто -- уряжсто, алясто,
Путонь кудосто, пирянь кардайстэ,
Кардас поцо скоткасто.
Тетякай, паро пурнынем!
Тетякай, паро сэрнинем!
Дайка, тетякай, паро баславка
Ятонь ломань, теть мерян,
Ятонь ломань, теть кортан:
На-ка саика баславкам.
Бути вечкезь сайсамак,
Бути кельгезь вешсамак,
Яжо малазот аравтык,
Седей ваксозот тон ладик;
Весёлгавтык шачинеть,
Шождыньгавтык рунгинеть.
Бути а вечкезь сайсамак,
Бути а кельгезь вешсамак,
Потморгавтык лицинеть,
Стакалгавтык рунгинеть.
Нать алкужс, шкинень, паньцамизь,
Нать алкулкс, тринень, кравцамизь.
Ох тетякай, диринем!
Ох авакай, ванынем!
Путонь кудосто лисимась,
Равужо кулумань коньдямо.
Шкистэ, тристэ явумась
Смертный часкень коньдямо,
Кардаз поцто лисимась
Калмс мадимань кондямо.
Тетянь кардазонь кирьдизэ!
Тетянь кардо-сяркозо!
Монь туймедень мееле,
Монь лисьмедень мееле,
Пас аштезэ лисиде,
Пас мерезэ совиде,
Чольдерь-кальдерь мериде
Вай простямак, простямак,
Кардо-сярко матушка!
Ульцянь кирьди, матушка!
Ульцянь кирьди, сияка!
Остатка раз мон ютан,
Ош порядкава ульцизат.
Вай простямак, простямак.
Ней а карман якамо
Ош порядка ульцяват.
Те таркастень, ялгинень,
Валське рана сакшнылень,
Чокшнэ поздас аштилень,
—
Ульця вечки ульнекшнынь,
Кужо вечки ульнекшнынь.
Ней а карман, ялгинень,
Те таркастень сакшномо,
Кувака моронь морамо.
Монь туймедень мееле
Тумо пулось раштазо,
Килей пулось маштозо,
Монь кияван туезэ,
Монь следнэван чалксезэ.
Я, прощайте, прощайте,
Бояр-ават ялгинень.
Сиянь блидя паксянок!
Покай таргавкст тонть умат,
Потмо рисьметь тонть межат.
Нать яван мон эстэдеть,
Нать туян мон эстэдеть.
Монь туймедень мееле,
Монь явмодон мееле
Шачи сюро саинзат,
Шачи сюро муинзат:
Карь пирява петкадо,
Эськельдямга скирдадо.
Пижень сурцеме виренек,
Нать кадуват эстэдень,
Нать лиядат эстэдень.
О, ялгакай, а Наста,
Ялга вечки ульнекшныть,
Кужо вечки улькнекшныть.
Пасиба, рыжой, пасиба!
Пасиба, карей, пасиба!
Стака сэрень усксемест,
—
Монь кекшлиман кувалма
Ламо нужа неиде,
Ламо труда примиде.
Илядо-я пеняця,
Вана казян тенк пацят,
Кантлинка тынь, кантлинка,
Тейтерень максмо таркава,
Цёрань урьвакстума таркава.
Я, прощайте, прощайте,
Бояр ават, ялгинень.
Я, прощайте, прощайте,
Урьвалинень, авинень!
Урьвалинень, лелинень!
Я, прощайте, прощайте,
Шачи велень народом!
Велень кирьди корминець,
Сядонь кирьди сияка!
Мазы ускан мон марон,
Паро ускан мон марон,
Ризат орчить лангозот,
Кадилат саить кедезэть,
Ризат эйсэ вельтямизь,
Кадилат эйсэ пирямизь,
Илимизь макст душманнэнь,
Илизмизь макст злодейнень.
Паронь арцись каршонок,
Апаронь арцись ваксканок.
Кардазонь кирьди, матушка!
Кардо-сярко сияка!
Ортат панжик келейстэ,
Кришат кепедик сэрейстэ,
Минь ютатанок келейстэ,
Минь соватанок сэрейстэ.
Радувак-кецяк эзэзнэк,
Радувань сецэ нолдамизь.
Вай пасиба, пасиба,
Пасиба пазнэнь паронень,
Пасиба пазнэнь нишкенень,
Кода туинек шумбрасто,
Истя сынек вадрясто.
Шич-алинем, листяять!
Листяяк, пятяй, листяяк!
Овтокс, сярдокс листяяк!
Анцяк эрямсто — аштомсто
Овтонь сецэ иля ульть,
Сярдонь сецэ иля ульть.
Листяя, патяй, листяя!
Шич-алинем; листяя!
Кустима пезэнк мон ускинь
Умарь чувто -- сад чувто,
Аволь синдезь синдия,
Аволь керязь керия:
Корёном мон саия,
Корёном мон сявтыя.
Эзия сорновт моданзо,
Эзия тувто росанзо,
Пирястонзо тветказо.
Аволь узерьсэ сявтыя,
Аволь грёбуксо таргия.
Васня пирия пижесэ,
Пижесэ тень эзь саевть,
Мейле пирия сиясо,
Сиясо-як эзь саевть.
Сырьнесэ пирязь саия,
Сырьнесэ пирязь сявтыя.
Листяя, патяй, листяя,
Мон ускинь тенть, патякай,
Равужо палянь саиця,
Ашо палянь максыця,
Чевте таркань ацыця,
Лембе вельксэнь каиця,
Кувака кесаконь щердиця,
Келей коцтонь кодыця.
Валцьке толонь лувиця,
Чокшнэ толонь мадстиця.
Вай, адядо, пуцынек
Атят, ават гульканок
Пизэнь ашконь пурнамо,
Левксэнь-эйдень ливтеме.
Аволь минь тарканть ацынек,
Аволь минь прялксонть путынек,
Шки пазонь васеньць тейтерзэ,
Три пазонь иненць каказо.
Алксонть ацызе
Сисемь цёрань муемга,
Прялксонть путызе
Сисемь тейтерень муемга.
Кува, кува сон сакшнось?
Кува, кува — валгонесь?
Сиянь рисьмень вельде
Сырьнень лавсес озакшнось.
Амбаронь кирьди, матушка!
Амбаронь кирьди, сияка!
Од човалот каттанок,
Вечкезь кельгезь тенть улест,
Шумбрасто парьсте сынь аштест
Иляст саевть душманнэнь,
Иляст муев злодейнень.
Аштеде, дуган, аштеде,
Шумбрасто парьсте аштеде.
Кшнинь пирявцо пиридизь,
Кев сялгосо кружидизь.
Илядо муевть душманнэнь,
Илядо саевть злодейнень.
Кевстимака, авакай,
Иешка вене ков якинь?
Иешка вене ков тушкшнынь?
Васолонь таркас мон якинь,
Кельгезень таркас мон якинь,
—
Сисемь вирень тамбалев,
Сисемь паксянь томбалев.
Покш вирень трокс ютамсто,
Чопуда вирень трокс печкемстэ,
Покш овто лись каршозон,
Сянгоргавтызе поназо,
Низэльгавтыньзе пеензэ.
Вить бокасон ульнесь ой-барем,
Керч бокасон — медь-барем.
Осэнть вадия пирянзо —
Валакавтызе поназо,
Мецэнть вадинь турванзо,
Сювордызе кургозо.
Покш паксянь трокс ютамсто,
Покш паксянь трокс печкемстэ
Паксянь кирди лись каршон.
Попонь одижат ланксонзо,
Попонь шляпа прясонзо,
Лишмем кундызе пирядо,
Моньцинь кундымем сур прядо.
Ёмась одонь ёнынем,
Майшть прясто превинень.
Мезе тензэ мон кадан?
Мезе тензэ мон максан?
Марон ульнесь покш пряка,
Се прякасьть тензэ максыя.
Истя ладия паксянь кирьдинть.
Кода пачкодинь веле пес,
Велень кирьдись лись карчон,
Лишмем кундызе пирядо,
Моньцинь кундымем сур прядо.
Таго ёмась ёнынем,
Майшть прястон превинень.
Марон ульнесь вар пия,
Марон ульнесь чан вина.
Кандынь тензэ ве стопка,
Весёлгавтызе шачозо,
Каньдынь тензэ омбоце —
Пеедезевсь кургозо.
Кода, ардынь, авакай,
Вася сватон орта ланкс,
—
Вальмалов молинь -- тол арась,
Орта ланкс молинь тулодозь.
Орта велькска кузинек,
Сватонок кудос совинек.
Ойме ковшнэнь тол пувинь,
Кол вайгельсэнь сватон пултынь.
Вася сватонь, авакай,
Кудонь мазы нармуньзэ,
Кол вайгельдень сон тандаць,
Сравтыньзе кавто сёвнонзо,
Почоргавтыньзе толганзо,
Тусь ливтязь кудостоньть.
Сватоньть пире кунчкасо
Кругловой эрьке -- покш эрьке.
Се эрькестень сон ливтясь.
Таго ёмась ёнынем,
Майшть прясто превинень,
Ладна ломаньць докаян,
Ладна монць чарькотьксэван:
Монь диринем, тетинем
Недлянь пева якакшнось
Середат -- пецят базаров,
Тосто тетям рамакшнось
Сивекс кирьга яксярго.
Се яксяргось мароноль;
Се яксяргоньть нолдыя,
Мазы гульканьть кундызе.
Истя, авакай, якинек
Пиже мазы дугаять кис.
Пиже мазы дугиненть,
Тандавтыя вайгельсэнь;
Кармась юткстонок туеме.
Сонць туйместэ мерекшнэсь,
Сонць туйместэ кортлекшнэсь:
Монь туймедень мееле
Пас максозо, максозо,
Верьдень каи погуда,
Алгань пуви почт варма,
Пильге следэнь вельтинзе,
Сэрь сулейтень валиньзе.
Таго ёмась ёнынем,
Майшть прясто превинень:
Мон меринь а муеви
Пиже дугась костыяк;
Мон меринь а вешневи
Мазы дугась костыяк.
Кода кармась пазонь чизэ
Ашолгадмо, валдоммо,
Лисинь сватонь орта ланкс,
Лисинь сватонь мон кенкш ланкс.
Сватонь кенкшензэ ланксто
Колмо ёнов кинеть тусьть,
Колмо ёнов броднэть тусьть.
Вейкинесь тусь, авакай,
Вереть, алот улицяв,
Омбоцесь тусь
Заутреняв, обидняв,
Коломоцесь тусь
Покш родня ланга якамо.
Содынь таки дугась тусь
Покш родня ланга якамо,
Содынь таки мазысь тусь
Покш раське ланга якамо.
Кода молинь, авакай,
Дугасьть сиведень кудостень,
Кода совинь, корьмакай,
Яласть сиведень кудостень,
Вальмань сэрьсэ
Пиже дугасть алксозо,
Лавцянь сэрьсэ
Мазы дугасть прялксозо.
Васня стявтыя пиже дугасть,
Мейле стявтынь урянзо.
Кода карминь, авакай,
Дугасть малав молеме,
Кода карминь, корьмакай,
Яласть малав ацеме,
Ногай валдо
Пиже дугась пештимем,
Башкир валдо
Мазы дугась пештимем.
Истямо нужа артелень маро
Иешка вене мон неинь;
Истямо горя камандан маро
Годнэшка вене мон неинь.
А, лелякай, алякай!
А, лелякай корьмакай!
Нать алкукс паро ломанят,
Нать алкукс вадря ломанят:
Паро роднят тон муить,
Паро раськеть тон муить.
Паро честьке сынь путлесть,
Паро симмат сынь тарксесть:
Садовойде андымизь,
Медовойде симдимизь.
Пасиба паро честезэст,
Пасиба паро пойлазост,
Цислань теизь цисласо,
Эрьгань теизь эрьгасо.
Вай пащангонть, пащангонть!
Учовсть тердень гостенек,
Учовсть учонь гостинек.
Вай, совадо, совадо,
Сватонк лембе кудынес.
Вай озадо.
Озадо,
Сватонк таргазь столь-экшес,
Ламо запас теинек,
—
Ули месьне каванямс,
Ули месьне честювамс:
Сватонк пидесь вар пия,
Батёнк рамась чан вина,
Сисемь иесэ бука печксь,
Латос токильть сюронзо,
Московс сатыль пулозо,
Ош вельтямшка кедезэ.
Ниле иесэ баран печксь,
Скрипичникнень сюлонзо,
Табашникнень сюронзо.
Колмо иесэ атякш печксь,
Колмо морамо толганзо
...
Эрьде ярцадо, ярцадо,
Вечкима роднят, отт роднят,
Эрьде симеде, симеде,
Кельгима роднят, отт роднят.
Терьдень гостекс терьдидизь,
Учонь гостекс учидизь,
Кода якинь юткозонк,
Аравтомс тарка тень эзьде муй,
Озавтомс тарка эзьде муй.
Нурьтянь метьте андымизь,
Човазь пуреде симдимизь.
Вай, пасиба, пасиба,
Пасиба кшезэнк салозонк,
Пасиба паро валозонк.
Кшеденк салдонк ярцынек,
Тантей пойладонк симинек,
Ирець пиря эзьмизь сайть,
Весёла шачо эзьмизь муйть.
Лелянок кардаз удало
Десятина садозоль,
Сацонть ульнесь павазо,
Сацонть ульнесь мазызэ.
Кизэ чинень самосто,
Экшэ таркасо киртлильнек,
Свежа ведьнеде симтлильнек.
Теле чинень самосто
Лембе таркасо кирьтлильнек.
Лембе ведьнеде симтлильнек,
Кемгавксово иес
Сацо павасть ванцтынек,
Кевейксэе иес
Садонь мазынть кирьдинек.
Теде веде
Сацо павась эзь ванцтовт,
Теде веде
Садонь мазысь эзь кирьдевть;
Теде веде
Садонь мазынек ливтязь тусь.
Кува ливтясь -- пух нолдась,
Кува ливтясь -- толгат тувць.
Сонзэ мельга минь сынек,
Сонзэ следга панинек.
Бояр-ава, куд-ава!
Азор-ава, куд-ава!
Тонть маро дуганок макслинек,
Тонть маро мазынек кучлинек,
Невтика дуганок — ванцынек,
Невтика мазынек — ванцынек
Мезе мельга минь сынек?
Мезе мельга панинек?
Чинеме мельга минь сынек,
Чинеме мельга панинек:
Чинь кунчкане, чинь седейстэ
Отц пизекшнэсь лов поровт,
Отц кандокшнось лов поровт.
Сия ютакшнось чинемесь,
Сия ардокшнось чинемесь.
Се следнэвасть минь сынек,
Се следнэвасть панинек.
Мазы мельга минь сынек,
Паро мельга панинек.
Косо пиже дуганок?
Косо мазы дуганок?
Вай, адядо, вачаснэк
Пижеть, мазыть дугатьнень,
Тейсть, эсть лембе ёжине,
Нолдасть, эсть пухт, толгат.
Вай, нолдамизь, нолдамизь,
Пижеть, мазыть дугинень!
Сыргавтовсь, эзь таркиненк?
Чаравтовсь, эзь пизыненк?
Бути ульдядо тынь мадезь,
Тарка чирес озадо,
Бути ульдядо озадо,
Тарка чирес тынь стядо.
Пенирвинем, дугинем!
Пенирвинем, авинем!
Алов сюк прят нолдыка,
Весёла шачот невтика:
Те ули тонть атявткеть,
Те ули тонть сакчеть,
Те ули визьдима таркинеть.
Чокшнэ мадьместэ ацык тарказо,
Валцьке сти -- пурнык тарказо.
Те жали седей ававткеть,
Толконь максы ававткеть,
Тень эйсэ тон кулцонок,
Тень мелензэ тон ванок.
Шачи велень народом,
Ванынкая, ванынка,
Кода пурназь сэрезэ,
Кода школязь рунгозо:
Кедь кунчкасо кантлима,
Вальма ланксо кирьдима,
Вальма крайга ванума.
Зепсэ пижень сурцемне,
Валаня прянь судрямо;
Стенасо валдо зеркала,
Мазы чамань ванума.
Эрьде ванынка, ванынка,
Пиже мазы дугавок,
Туи, а туи мелезэнк.
Васня ванынк
Виде килей сэрьнева,
Мазы умарь тускева,
Кавто сельмень вачтавтка,
Кавто пильгень чалгавтка,
Кавто кедень кайсевтька.
Мейле ванынк дуганок
Кавто кедень теевтька,
Кемень суронь прядовтка:
Паро ломанць содави
Кавто сельмень вачтавтка,
Досуж ломаньць неяви
Кавто пильгень чалгавтка,
Кавто кедень каявтка.
Боярт, боярт, горнойнек,
Бояр, ават, горн-ават!
Эрьде, ярцадо, ярцадо!
Эрьде, симеде, симеде!
Пекенк пешкедемс ярцадо,
Сименк явамс симеде,
—
Паро азоронь вийнесэ
Ули месьне каванямс,
—
Корминецьке лелянок
Ламо сюронь видиця,
Покш каявтонь каиця.
Боярт, боярт горнойнек,
Бояр ават — горнават!
Эрьде вачинка, вачинка
Ош калаця курникнек,
Эрьде вачинка, вачинка,
Седей вити курникнек,
Кодамо сонзэ танцьтезэ,
Кодамо сонзэ парозо.
Аволь сусик потмаксонь,
Аволь сусик сон пряксонь,
—
Самой сусик седеень,
—
Арась сусик пряксонь пулезэ,
Арась сусик потмаксонь челькезэ.
Эрьде вачинка, вачинка,
Кодамо сонзэ парозо,
Буди ули чапамо,
Сестэ куватьц удовинек,
Буди ули ламбамо,
Сестэ рана стявинек.
Вай, пасиба, сват, пасиба!
Пасиба ломанькс теймезэнк!
Пасиба ломанькс ловмозонк:
Видна якиде цислава,
Видна якиде эрьгава,
—
Цисласть теинк цисласо,
Эргасть теинк эрьгасо.
Вай, пасиба, сват, пасиба!
Пасиба паро честезэнк,
Пасяба паро пойлазонк.
Садовойде андымизь,
Медовойде симдимизь.
Мень седей кирьдезь саимем!
Мень седей оймазь муимем!
Или мон пек радувинь,
Лужадузан, урекс чис!
Или мон пек эрьгединь,
Лондадузан, вардокс чис!
Истя сакшнынь, ялгинень,
Бояр-авакс-чинь вешнеме;
Истя сакшнынь, оинень,
Вольнойкс парокс чинь вешнеме;
Недля ютко мон якинь
Диринь тетянь кудова,
Недля ютко мон вешнинь,
Бояр-авакс-чинь кинзэ,
Недля ютко мон вешнинь,
Вольнойск-парокс-чинь следэнзэ.
Эзинь нейть мон, ялгинень,
Суфтем ленгень карь кинэзэ.
Эзия маряк, оинень,
Мазы циповка вайгельзэ.
Чокшнэ позда лисилень
Диринь тетянь мон кардайс.
Валцьке рана лисилень
Ванынь тетянь мон кардайс,
Эзия маряк, оинень,
Мазыстэ моры нармушка,
Эзия маряк, оинень,
Бояр-авакс-чинь вальгейзэ.
Адядо, ялган, адядо,
Бояр-авакс-чинь вешнеме!
Адядо, оян, адядо,
Вольнойкс-парокс-чинь вешнеме!
Кафто недлят, ялгинень,
Соньтемензэ мон якинь,
Вельть пек сукшна саимем,
Вельть пек тошна муимем.
Эзинь яка, ялгинень,
Налки чары кужова,
Эзинь яка, оинень,
Ялга, оя юткова.
Кардазонь кирьди, матушка,
Кардас-сярко сияка!
Иля тандат урень-вардонь вайгельдень,
Иля страстяв урень-вардонь шумнэдень.
Аволь тонть страстямс таргия,
Аволь тонть тандавтомс нолдыя.
Эсь тейтерькс-чинь аварцтян,
Эсь олякс-чинь мелявтан.
Ульцянь кирьди, матушка!
Ульцянь кирьди сияка!
Кол ёмамо шумнэдень,
-
Аволь тонть мон тандавтлян,
Аволь тонть мон эй страстлян,
Бояр-авакс-чинь мон вешнян.
Вальнойкс-парокс-чинь монь вешнян.
Седь икеле эрямсто,
Тейтерькс пингень печтямсто,
Ульцянь кувалт ютамсто,
Моразь аштиль моць кургом.
Киштезь аштильть монь пильгень.
Бодянь кудонь кирьдизэ!
Бодянь керзэ шочкозо!
Иля тандат урень-вардонь вайгельдень,
Бабай, бабакай, диринем!
Бабай, бабакай, ванынем!
Остатка раз туйместэнь
Тезэ кадыя бояр-авакс-чим,
Тезэ кадыя вольнойкс-парокс-чим,
Эзить ней-ли, бабакай,
Валцькень зорят стямостот
Мазыстэ моры нармушка?
Се, бабай, монь бояр-авакс-чим,
Се вольнойкс-парокс-чим,
-
Вельть пек ёнзо ёмсети,
Вельть пек превензэ машлетить:
Вельть пек скушна саизе,
Велть пек тошна муизе,
—
Умок сон явсь эстэдень.
Пасиба, бабай, пасиба,
Вачо пекень пештямост,
Нучкань седеень витемест.
Ней а карман, бабакай,
Чокшнэ позда сакшномо,
Валцьке рана сакшномо.
Бабай, бабакай, диринем!
Бабай, бабакай, ванынем!
Тонеть прикас приказан,
Тонеть накас наказан:
Сы, бабакай, диринем,
Тундонь празник инечи,
Ялган промить столь экшес.
Кармат, бабакай, диринем,
Инечинь алонь явшеме.
Весе алот явшесыть,
Весе алот макслесыть,
Ве алот кадови кедезэть,
Ве алот лияды апак макст.
Се, бабакай, монь долем,
Се, бабакай, монь паем,
Максык сонзэ, авакай,
Вечкима ялганень -- Натальнень,
Вечкима оянень -- Натальнень.
Бодянь кудонь кирьдизэ!
Бодянь кудонь ванызэ!
Монь туймедень мееле,
Монь лисмедень мееле,
Пас ванозо лисиде,
Пас мерезэ совиде.
Ох, авакай тиринем!
Ох, авакай ванынем!
Тонеть прикас приказан,
Тонеть накас наказан:
Сы, ванымем, мазы чи,
Сы, ванынем, мазы чи.
Сы, авакай покш празник,
Тундонь празник инечи.
Семият проми столь экшес.
Кармат, авакай тиринем,
Инечинь алонь явшеме.
Весе алот явшесыть,
Весе алот макслесыть,
Ве алот кадови кедезэть,
Ве алот кадови апак макст.
Се, авакай, монь долем,
Се, авакай, монь паем.
Иляк макст, авай ютынень,
Иляк макст, авай, потынень,
Максык сонзэ, авакай,
Вечкима ялганень -- Натальнень,
Вечкима оянень -- Натальнень.
Сы тундонь праздник -- Тровиця,
Сы мазы празник -- Тровиця.
Ялган туить, авакай,
Пиже лугава якамо,
Мазы лугава якамо,
Лопадо лопас налксеме,
Тветкадо тветкас кунцеме,
Мазы тветькань сезьнеме,
Горни-пов тветкань кочкамо.
Монь-гак долем, авай, а кацызь,
Мондяк паем сынь сейсызь.
Тонеть канцызь, авакай,
Саик, авай тон кецтэст,
Паз икелев тон путык,
Паз икелев тон ладик.
Чи эряк, авай, тон вачик,
Кавто эряк -- тон вачик.
Кода, авай, тветкатьне
Кармить чистэ пужомо,
Кармить чистэ коськеме,
Монгак истя, авакай,
Карман ятцо пужомо,
Карман чужойсэ коськеме
.