[OLONETS-KARELIAN = olo]
1
VUVVEN 2012 KUNNALLISVALLIČENDAT
Suomi jagavuu kundih, kudamil konstitutsien mugah on autonoumii. Kundien
ruado on organizuija kunnan eläjile palveluloi. Kunnat ollah vastuollizet
ezimerkikse lapsien päivyhoijon, perusopastuksen, vahnoin palveluloin da
tervehyönhuollon organizuičendas.
Kunnan korgevin piättäi organ on kunnan eläjien vallittu nevvosto. Nevvoston
deputuatat vallitah kunnallisvalličendas kerral nelläkse vuvvekse. Tuliet
kunnallisvalličendat ollah pyhänpiän 28.10.2012.
Kunnallisvalličendas voijah andua iäni libo azettuo kandiduatakse Suomen
kanzalazet da tiettylöin ehtoloin mugah kunnas eläjät toizien mualoin
kanzalazet.
Ahvenanmuan muakunnan alovehel ei ole kunnallisvalličendua vuonnu 2012.
Iänioigevus - ken suau andua iänen
Kunnallisvalličendas suat andua iänen, ku ollet Suomen libo mintahto muun Europan
Liittoh kuulujan muan, Islandien libo Norveegien kanzalaine da täytät alahan luvetellut
vuadimukset:
- sinul on 18 vuottu ei myöhembi valličendupäiviä (28.10.2012)
- da sinul on kodikundu Suomes ei myöhembi 7.9.2012
Ku ollet muun muan kanzalaine, suat andua iänen kunnallisvalličendas, ku
- sinul on 18 vuottu ei myöhembi valličendupäiviä (28.10.2012)
- da enne 7.9.2012 sinul on olluh kodikundu Suomes jo kaksi vuottu peräkkäi
Kodikundu miärätäh kodikunduzakonan mugah. Puaksuh se on se kundu, kudamas elät.
Vuvven 2012 kunnallisvalličendas kodikundu miärätäh seh mugah, mi kundu on merkitty
sinun kodikunnakse rahvalistotiedosistiemah 7.9.2012 24 čuasul.
Ku pidänöy, voit tarkistua kodikundutiijon magistruatas.
Kunnallisvalličendas voit andua iänen vaiku oman kodikunnan kandiduatale.
2
Suat kodih ilmoituksen iänioigevukses.
Rahvalistoregistrukeskus da magistruatat pietäh iänioigevusregistrua, kudamas
ollah tiijot kaikis, kel on iänioigevus. Nikenen ei tarviče erikseh ilmoittauduo
iänioigevusregistrah.
Magistruattu työndäy, ei myöhembi 4.10.2012, ilmoituksen iänioigevukses,
ilmoituskartin, jogahizele, kudaman ozuteh on tiijos. Ilmoituskartis on
ohjavoloi, kui iänestiä.
Valličendukelbozus - ken voi olla kandiduattu
Olet valličendukelboine, toizin sanojen voit ruveta kandiduatakse
kunnallisvalličendas, ku täyttänet alahan luvetellut ehtot:
- kundu, kudamas duumaičet ruveta kandiduatakse, on sinun kodikundu
- sinul on iänioigevus mistahto kunnas
- et ole vajaivaldaine, toizin sanojen huolenpidonalaine
Yhtelläh erähät valdivon virgumiehet da kunnan johtos olijat virgumiehet da
ruadajat ei olla valličendukelbozet.
Kandiduatoin azettamine kunnallisvalličendah
Kunnallisvalličendas kandiduattoi voijah azettua
- registriiruitut puolovehet
- iänioigevuksen kandajat, ku hyö oldaneh perustettu valličenduyhtistys
Valličenduyhtistyksen perustamizeh pidäy olla ei vähembi kymmendy kunnan
eläjiä, kudamil on iänioigevus, no erähis pienis kunnis kolme libo viizigi eläjiä.
Kaksi libo moni puolovehtu voijah luadie valliččenduliitto. Kaksi libo moni
valličenduyhtistysty voijah luadie yhtehine listu.
Puolovehel, valličenduliitol libo yhtehizel listal voi olla kandiduatoinnu ei
enämbi migu puolitostukerdahine kunnas vallittavien deputuatoin lugu.
Nevvostoloih vallitah 17-85 deputuattua kunnan eläjien luvun mugah.
Jogahizel kandiduatal on oma noumer. Kandiduatois luajitah bumuagale
painettu kandiduattulistoin kombinatsii, kudamah kandiduatat kirjutetah
noumeran mugazes jälletykses algajen noumeras 2. Kandiduatat on
listukombinatsiele sijoiteltu puolovehien da yhtehizien listoin mugah. Jogahizes
kandiduatas listukombinatsiel on nämmä tiijot: nimi, kandiduattunoumer da
ammatti. Lizäkse listukombinatsies voi nähtä
- mittumat puolovehet ollah valličenduliitos
- mittumat valličenduyhtistykset ollah luajittu yhtehine listu
- mittumat puolovehet ei olla valličenduliitos
3
- mittumat kandiduatat ei olla yhtehizel listal
Kandiduattulistoin kombinatsii luajitah 27.9.2012.
Iänenandoaijat
Voit andua iänen libo valličendupäivänny pyhänpiän 28.10.2012 libo enne
valličendupäiviä edukädeh iänestykses. Voit andua iänen vaiku yhten kerran.
Kaksi kerdua iänen annandas on miärätty rangaistus kriminualuzakonas.
Iänenando edukädeh:
Edukädeh iänenando algavuu kolmanpiän 17.10.2012.
Edukädeh iänenando lopeh ulgomualoil suovattan 20.10.2012 da Suomes
tossargen 23.10.2012. Erähis edukädeh iänenandopaikois iänenandoaigu on
lyhyömbi.
Iänen voit andua mistahto edukädeh iänenandopaikas, kodimuas libo
ulgomualois. Edukädeh iänenandopaikkoi ollah:
- kodimuas kundien miärätyt edukädeh iänenandopaikat, puaksuh kundien
virastot libo poštat.
- monet Suomen posol'stvat ulgomualois
- laitokset, ezim. bol'ničat, sotsiualuhuollon toiminduyksiköt da
rangaistuslaitokset. Laitoksis iäni voijah andua vaikusie hoijettavat libo
niilöih otetut rahvas.
- suomelazet laivat, kuduat ollah ulgomualois edukädeh iänestyksen
aijannu. Laivas iänen suahah andua vaiku laivan ruadajat - matkustajat
ei suaha andua iändy laivas.
Iänenando valličendupäivänny:
Valličendupäivänny iänenando on pyhänpiän 28.10.2012 9-20 čuasul.
Valličendupäivänny voit andua iänen vaiku sit kunnas da sil iänenandopaikal,
kudai on kirjutettu sinule työnnetty ilmoituskartih.
Iänenando kois:
Ku sinul ollou vaigei liikkuo libo toimie da et piäze ilmai liijallizii vaigevuksii
iänenandopaikale, voit andua iänen kois edukädeh iänenandoaijannu. Kois
iänenandoh pidäy ilmoittauduo enne tossarren 16.10.2012 16 čuassuu.
Ilmoittua pidäy kodikunnan keskusvalličendulaudukunnale. Samas talohuos eläi
rodn'uhoidai voi tiettylöil ehtoloil sežo andua iänen.
4
Nenga annat iänen:
Iäni annetah iänenandopaikal. Voit andua iänen vaiku yhtele kandiduatale,
kudaman nimi on kirjutettu oman kunnan kandiduattulistoin kombinatsieh.
1) Tovesta oma identitiettu valličenduvirguniekale, toizin sanojen
ozuta pasportu, identifikatsiikarti, ajoluba libo muu sen jyttyine
dokumentu. Valličenduvirguniekku andau sinule iänenandolipun.
2) Mene iänenandokamorkah. Iänenandokamorkas suau olla kerrallah
vaiku yksi ristikanzu.
3) Kirjuta iänenandolippuh sen kandiduatan noumer, kudamale annat
iänen. Suat andua iänen vaiku yhtele kandiduatale. Kirjuta kandiduatan
noumer iänenandolipun syväinpuolel olijah pyörikköh. Nimidä muudu älä
kirjuta iänenandolippuh. Taita iänenandolippu muga, ku kirjutettu
noumer jiäy taitetun lipun sydämeh peittoh.
4) Vie taitettu lippu valličenduvirguniekale. Valličenduvirguniekku lyöy
štampan lippuh.
5a) Ku andanet iänen valličendupäivänny, lykkiä iänenandolippu
štampanke valličendu-uurnah.
5b) Ku andanet iänen edukädeh, valličenduvirguniekku
andauvalličendukanvertan, kudamah salbuat iänenandolipun
štampanke.
Ku sinun kygy kirjuttua kandiduatan noumer valličendulippuh ollou liijan heikko,
suat käyttiä iänenannos ičen vallittuu avvuttajua libo valličenduvirguniekkua.
Avvuttajannu ei sua olla valličendan kandiduattu. Avvuttajal pidäy pidiä peitos
tiijot kudamat häi sai iänenannos.
Lizätieduo
- Lizätiedoloi valličendas andau kunnan keskuvalličendulaudukundu.
Hengikohtastu iänioigevuttu koskijoih kyzymyksih vastuau magistruattu.
Mollembien ozuttehet da telefonnoumeran lövvät ilmoituskartis.
- Edukädeh iänenandopaikoin ozuttehet da avvoiolenduaijat,
kandiduatturegistru da muudu tieduo valličendas voit lugie
oigevusministerstvan valličendusivuloil internetas www.vaalit.fi
- Tiijot kunnallisvalličendan kandiduatois ollah oigevusministerstvan
valličendusivuloil enne ligakuun alguu da tiijot edukädeh
iänenandopaikois enne elokuun puolivälii.
OIGEVUSMINISTERSTVU