![Äng Äng](/Sve/Bilder/Bilder/fc76354e-70f1-44b5-971d-4f6d77004491.jpg)
Foto: Maria Svensk
Ruuhmiin useimiten sairala, palvelutalo eli, onnettomuuessa, puliisi ottaa taltheen. Net hoitavat ette ruumis viethään ruumishuohneesheen ilman ette tässä vaiheessa tarvittee ottaa päätöstä arkunostosta. Sitä saattaa sen eestä rauhalisesti suunitella hautajaisia. Se on tärkeä ette ottaa hyvästi, olletikki elämän viimisessä vaiheessa – kuolema. Sillon tavat ja perintheet hautajaisitten yhteyvessä voi olla lohtuna ja tuena vaikeassa ja kipeässä hyvästin otossa.
Ensimäinen tehtävä
Ennen mailmassa menthiin suorhaan papin tykö kun joku kuoli. Nykymailmassa ilmotethaan kuolemantaphauksen paikalisheen verolaitoksheen. Se saattaa olla hyvä ensimäinen tehtävä, jos haluaa saa käynthiin prusessin. Net kirjottavat hautajais- ja kremeerinkitoistuksen, jonka tarvithaan hautajaishiin. Verolaitokselta saapi kans muita tokymenttiä niinkun rejisteriulosveon (tarvittee pankkikontaktissa), kuolemantoistuksen ja sukulaisselvittelyn (tarvittee myöhemin kuolinpesäselvityksessä).
Ota yhteyttä seurakunthaan
Parasta on jos lähimäiset itte kontaktaavat seurakunnan ja sen papin ketä haluthaan toimittamhaan hautajaiset. Sillon saattaa yhessä varata hautajaisitten jumalanpalvelun päivän ja lähimäiset tietävät alusta asti ette saavat sen papin kenen haluavat. Pappi ja aika hautajaisitten jumalanpalvelhuun ei tarvitte varata hautaustoimiston kautta.
Keskustelu papin eli tiakoonin kansa
Kuoleman lähelä on luonolista olla epävarmana ja pölössä. Kun meitä kohtaa suru ja kuolema met reakeeraama sekä ruuhmiila että sielula. Välistä suru saattaa tuntua liian raskhaana kantaa omin voimin. Papit ja tiakoonit on tottunheet kohata ihmisiä vaikeissa tilantheissa ja niilä on vaitiolovelvolisuus. Ota yhteyttä oman paikalisen seurakunnan kansa.
Ei ole yhtään oikeata tappaa olla surussa – kaikin tehemä sen omala tavala ja yks tapa ei ole parempi eli kehnompi kun toinen. Met häymä ymmärtää ja hyväksyä ette met käsittelemä meän surun eri tavoila. Se saattaa näyttäytyä resinasjuunina ja ahistuksessa siittä mitä ei koskhaan tullu sanotuksi eli tehtyksi, piian vihassa kun jätethiin. Met saatama kans tuntea helppausta, jos se poismenny oli kipeä pitkhään ja kuolema tullee vapahtuksena.