Vihkiminen

Tanja Petersdottir Eskandari och Salman Eskandari. Foto: Carolina Ryberg

Kirkolinen vihkiminen on sympoolirikas jumalanpalvelu. Met luppaama toisile  Jumalan ja vierhaitten eessä ette huoltaa rakhautta ja seisoa toisitten laijala elämän läpi. Met tahoma Jumalan siunata meän avioliittoa ja auttaa meitä kaikitten vaikeuksitten läpi mitä kohtaama elämän aikana.

On hyviä maholisuuksia panna personaalisen leiman vihkimisheen. Jokku pariskunnat haluavat kirjottaa omia luppauksia, laulaa laulun toisile eli tehhä jotakin muuta henkilökohtaista. Perustana on ette jumalanpalvelu on ilossa ja kiitolisuuessa elämän ja rakhauen lahjasta sekä avioparile ette vierhaile.

Vihkimiskeskustelu

Kirkolisen vihkimisen eelä käypi aina vihkimiskeskustelu missä pappi ja aviopari suunittelevat vihkimistä. Mikkä tekstit pittää valita, kuinka luppaukset  pitävät olla, kuka tekkee mitä ja koska? Tavalisesti pappi pruukaa kans kysyä avioparilta koska ja kuinka net kohtasivat, mistä net erittäin tykkäävät toisista, mitä net pruukaavat tehhä yhessä. Stressatulle avioparile se saattaa olla rentoutuva tilaisuus kun laskee kontrollin planeerinkista vähäksi aikaa ja konsentreeraa siihen miksi sitä oikeasthaan mennee naimishiin justhiins toisitten kansa. Papile se on yks maholisuus oppia tuntemhaan henkilöt paremin ja on hyvä pohja vihkijäispuhheele. Keskustelu saattaa tapahtua kirkossa eli avioparin koissa. Jos keskustelu on koissa pruukathaan valvoa ette piethään ekstra kohtauksen kirkossa ette paikan päälä saattaa käyä läpi koko seremonian.

Erit perintheet

Ruottissa met saama paljon vaikutheita olletikki amerikkalaisesta kulttuurista. Tämä lyöpi läpi kans monen avioparin toivomuksissa häistä. Tavalinen kysymys on jos aviovaimon isä saattaa viä tyttären etheen alttarile. Ei mithään Ruottin kirkossa kielä sitä tappaa, mutta piian kannattee miettiä toimen sympoliikasta. Alkuperäsesti se merkittee ette vastuu vaimosta jätethään isältä miehele ja se tullee siittä aijalta kun vaimot ei olheet täysikäsiä. Jokkut papit saattavat siittä syystä kieltää ette aviovaimon isä johtaa alttarile tyttärensä. Ruottissa on perine ette aviopari mennee yhessä etheen, sympoolina siittä ette vaimo itte valittee miehensä ja mies itte valittee vaimonsa ja ette net vaphaasta tahosta tasa-arvosin kulkevat vihkimisheen.