Foto: Leif Gustavsson
Kun köyhä vaimo saapi luottamuksen ette lainata ja parantaa perheensä elämää se on osa kansainvälisestä työstä. Sama asia kun hiv-infeksjuunissa oleva potilas eli aidsisairas kohelthaan hoijola sen eestä kun erottelula. Eli kun ihmiset keskustelevat sovinosta sen eestä kun ette het kohtelevat toisia vihala, ja konflikti korvathaan kranninsovinola.
Koko mailma, Ruottin kirkon kansainvälinen työ, on olheet yhteistyössä Aafrikan ja Aasian kirkoitten kansa yli sata vuotta. Tänä päivänä työ oikeuenmukaisemasta mailmasta ilman nälkää, köyhyyttä ja sortoa on osa mailmanlaajuisesta kristilisestä yhteisöstä. ACT-aliansi on koko mailmassa. Joka paikassa ihmiset työskentelevät vaikuttaaksheen ja parantaaksheen elämäänsä.
Lahjoja yksityisiltä on tärkeää
Tähhään työhön kuuluu työntekoa ette kaikin saavat ruokaa ja vettä, maaseutukehitys, teolookinen opetus, mikrulaina, ja säästäminen niinkun sovinto ja uskonontialooki. Mutta kans oikeuenmukaisuuen taistelu, esimerkiks kaupankäynistä, ihmisoikeuksista ja vaimoitten johtajuuesta.
Ruottissa kerätyt rahat maksavat suuren osan tästä työstä. Seurakunnan lahjoja, yksityiset antajat ja yhistykset kantavat paljon työstä paremasta mailmasta. Tärkeät sisäletulot on varoja mitä saathaan SIDA:sta ja EU:sta.
Ruottin kirkon seurakunnat on pohjana kansainvälisessä työssä. Net ilmottavat, opettavat ja kerräävät rahoja, esimerkiks kolehtila, basaarilla ja aktiviteettila kaupunkissa.
Vääryyet häätyvät poistua
Tuki on tärkeä, mutta ei selvitä kaikkia prupleemia. Vääryyet jokka estävät ihmisiä elämhään arvokhaisela tavala häätyy poistaa. Samala kun kaikin pitävät nyt pystyä elättämhään ittensä, niin mailman resyrsit häätyvät riittää tulevile sukupolvile.
Koko mailma, Ruottin kirkko tukkee paikalisia kirkkoja ja järjestöjä Euruupassa, Aafrikassa, Aasiassa, Eteläameriikassa ja Lähi-iässä yhteistyölä kansainvälisissä kirkolisissa verkostoissa. Se on tehokas keino saa aikhaan kestävän muutoksen.
Uppsalan kirkkokansliassa suunitelhaan keräyksiä, kansanopetusta ja vaikutustyötä. Sielä Koko mailma, Ruottin kirkon kansainvälinen työ, päättää mikkä prujektit ympäri mailmaa pittää tueta rahalisesti eli työntekijöitten kautta.