Erikoinen rönkkikone tarvithaan
Mammugrafi tehhään useasti mammugrafieenheetissä, joka saattaa olla oma vapa osa eli sairalan rönkkiaavteelninkin yhteyvessä. Tutkimus tehhään kans erikoisissa rintavasthaanotoissa ja vississä hoitosentraalissa.
Se rönkkiaparaatti eli -kone mitä käytethään on erikoisesti mookattu sillä tavala ette se saattaa antaa hyviä kuvia rinnankuoksesta heijon rönkkisäteilyn avula. Vississä tapahtumissa sen saattaa huomata kanseritymööriä, jokka ei ole kun jonku millimetrin suuria.
Näin se toimii
Sitä ei tartte valmistautua milhään erikoisela tavala. Ensiks saapi vastata muutamhaan kysymyksheen ja sanoa jos on ollu vaivoja rinnoissa, eli jos sitä syöpi metesiiniä missä on hormoonia. Sitä saapi kans riisua päälysruuhmiista ja siukkasysteri kattoo rintoja ja nuteeraa jos on näkyviä muutoksia, esimerkiks syntymämerkkiä eli arpia aiemista leikkauksista. Se saattaa näkyä rönkkikuvissa ja sen mennee väärin tulkata ette se on kanseritymööri.
Sitten sitä saapi mennä rönkkikonheele ja seisoa sen eessä. Yks rinta kerrala panthaan sjiivan pääle joka sisältää kuvatetektorin. Rinta litistethään sitten läpinäkyvän sjiivan kans joka painethaan rintaa vasthaan. Sitä saapi pittää käen ylhäälä ja levätä sitä konetta vasten sillä aikaa kun kaks kolme kuvvaa otethaan. Se on tärkeä ette sitä seisoo aivan rauhassa. Sitten toistethaan sama prusetyyri toisen rinnan kans. Koko tutkimus kestää 15-30 minuuttia, itte kuvanotto viis ja piian kymmenen minuuttia.
Kuinkas mammugrafi tuntuu?
Se saattaa tuntua epämielyttävältä eli ottaa kipeästi lyhyn aijan kun rinta prässäthään yhteen, siis litistethään. Mutta sen häätyy tehhä, koska kuva saapi pareman kvaliteen ja tutkimus tullee luotettavamaks. Sen lisäks matalampaa sätetuusia mennee käyttää kun jos rintaa ei litistettäis yhteen.
Välistä saapi tulla takashiin
Usseimiten se on kaks rönkkilääkäriä jokka riippumatta toisista arvostelevat mammugrafikuvia. Se lissää arvostelun luotettavuutta. Jos net löytävät mithään joka ei näytä olevan niinku se pittää olla, sitä kuttuthaan takashiin uutheen tutkimuksheen. Sillon otethaan lissää mammugrafikuvia ja sitä tutkithaan kans ylttraäänelä.
Lääkäri saattaa kans ottaa pruuvin muutoksesta. Jos se on pieni muutos joka on vaikea tuntea pruuvin saatethaan ottaa uuen mammugrafitutkimuksen yhteyvessä eli ylttraäänen avula. Ohun neulan pistethään muutoksheen ja sellipruuvi imethään ulos. Pruuvi lähätethään mikruskooppisheen tutkimuksheen. Kaikki tämä tehhään sen takia ette olla varmana siittä jos on kyse kanserista eli ei.
Vastaus mammugrafitutkimuksesta lähätethään suorhaan kotia kahen viikon aikana, jos sitä on kuttuttu terhveyskontrolhiin. Jos sitä on remiteerattu mammugrafhiin sitä saapi tietoja tutkimustuloksista omalta lääkäriltä.
Hormoonikäsittely saattaa vaikeuttaa arvostelun
Jokkut vaimot saavat hormoonihoitoa klimakteerin aikana ja jälkhiin eli kun net syövät p-pilleriä. Sellainen hoito vaikuttaa rinnankuosta ette se tullee tivhiimäks mikä tekkee ette mammugrafikuvvaa on vaikeampi arvostella. Se on sen takia tärkeä ette sanoa jos sitä syöpi metesiiniä joka sisältää hormoonia.
Tutkimus ei ole vaaralinen
Se säteilymäärä mitä sitä saapi mammugrafitutkimuksessa on niin pieni ette sitä ei pietä merkittävän mithään riskiä eli vaaraa. Sen lisäks on jatkuva tekninen kehitys minkä tavote on ette vähentää säteilytuusia lissää. Sitä ei piä venyttää eli viivyttää mammugrafitutkimusta kun on saanu kuttun, eli jos on huomanu muutoksen omassa rinnassa.
Mammugrafitutkimuksen mennee hyvin tehhä vaikka on olemassa rintaimplantaattia. Siinä ei ole vaaraa ette implantaatti menis rikki, mutta koska rintoja ei mene litistää samala tavala kun jos on ilman implantaattia sen saattaa tarvita yksityisele sovitetun tutkimuksen. Useasti mammugrafin kompleteerathaan tuntemalla läpi koko rinnan ja ylttraääni tutkimus lisänä.
Ketä ei piä tutkia mammugrafiila?
Tutkimuksessa pruukathaan käyttää ylttraääntä sen eestä kun mammugrafita, jos on hyvin nuori. Se riippuu siittä ette rinnan rauhasenkuos on niin tiivis ette mammugrafikuvat on vaikea tulkata. Ylttraääni antaa sillon varmeman vastauksen.
Jos lääkäri eppäilee ette on olemassa pahka rinnassa sillon pruukathaan välttää mammugrafita koska se sillon on tuskalista litistää rintaa. Sen eestä se saattaa olla hyvä ette tehhä ylttraäänitutkimuksen, jolla näkkee jos on märkää mitä tarvithaan tyhjentää. Kun infeksjuuni on käsitelty sitä pittää tehhä mammugrafi tutkimuksen. Se on erikoisen tärkeä jos sitä on vanheempi.
Jos on raskhaana sitä ei piä tehhä terhveystutkimusta, niin kuttuttu screeninkiä, mammugrafila. Mutta jos huomaa ette on muutos rinnassa sitä pittää aina kontaktata hoijon ja kätevästi saa tutkimuksen, vaikka sitä on raskhaana. Sillon tutkimus pruukaa alkaa ylttraäänelä ja jos tarttee kompleteerathaan mammugrafila.
