Jos et ole tytyväinen hammashoithoon
Om man inte är nöjd med tandvården

Oon olemassa eri paikkoja mihin kääntyä

Jos sulla oon valittamista hammashoiosta, oon olemassa eri instansia mihin kääntyä. Mihin sitä kääntyy, riippuu siittä minkä asian kans sitä ei ole tytyväinen ja siittä minkä kans halva apua. Usseimissa taphauksissa valitukset ja maholiset väärinkäsitykset saattaa selvittää ko oon yhtheyessä siihen joka oon antanu hammashoitoa.

Jos ei pääse yhtheisymmäryksheen eli jos oon kyse väärin hoitamisesta eli vammoista, häätyy piiain kääntyä jonku toisen puohleen, esimerkiksi maakäräjitten potilaslautakunnan, privaatti­hammaslääkäritten luottamuslautakunnan, Sosiaalihallituksen eli Potilasvakkuu­tus LÖF:in puohleen.

Huolimatta siittä kenen puohleen sitä kääntyy, saattaa olla hyvä tahtoa kirjotetun vastauksen sen takia ette estää väärinkäsityksiä.

Valittaa suohraan hammashoitopärsunaalile

Ensikäessä sitä saattaa valittaa suohraan sille joka oon sinut syynäny eli hoitanu. Kyse saattaa esimerkiksi olla siittä ette sie et ole tytyväinen siihen työhön joka oon tehty, ette sinua oon koheltu väärin eli sie piät ette sie olet joutunu maksamhaan liikaa.

Jos olet ollu kansanhammashoiossa (Folktandvården)

Jos sie et halva olla kontaktissa siihen joka oon sinut hoitanu eli jos tet että pääse yhtheis­ymmäryksheen, sie saatat kääntyä vasthaanoton kliniikki- eli toiminanjohtajan puohleen. Sitä saattaa kans kontaktata oman maakäräjän/seu´un kansanhammashoitojohtajan eli jonku muun joka sielä vastaa kansanhammashoiosta.

Joka maakäräjillä eli seu´ula (region) oon kans niin kuttutu potilaslautakunta, jota kans joskus nimitethään luottamuslautakunnaksi. Potilaslautakunta ottaa vasthaan valituksia ja mieli­pitheitä muumuassa kohtelusta, tiaknoosista, lääkityksestä, hoiosta, maksoista ja sekretessi­kysymyksistä. Lautakunnassa istuu politiikkeriä mutta virkamiehet käsittelevä valitukset. Potilaslautakunnan jäsenillä ja virkamiehilä oon  vaitiolovelvolisuus.

Potilaslautakunta antaa neuvoja ja tukea sille joka tarttee valittaa kansanhammashoiosta eli hoiosta jonka maakäräjät eli seutu kokohnaisuuessa eli osittain oon maksanu.

Potilaslautakunta informeeraa kans siittä mihin saatat kääntyä erityyppisissä asioissa ja saa net selvitetyksi.

Potilaslautakunthaan kääntyminen ei maksa mithään. Mithään aikaraijaa asian vanhenemiselle ei ole olemassa.

Jos sinut oon hoiettu privaatti vasthaanotola

Jos sie ei halva ottaa kontaktia sen kans joka sinut oon hoitanu eli jos tet että pääse yhtheis­ymmäryksheen, sie saatat kääntyä vasthaanoton kliniikki- eli toiminanjohtajan puohleen.

Jos olet käyny privaatti hammaslääkärin tykönä joka oon Privaattihammaslääkärit-orkanisasuunin jäsen, sie saatat kans kääntyä jonku Privaattihammaslääkäritten luottamuslauta­kunnan puohleen. Saatat kans kääntyä luottamuslautakunnan puohleen jos olet käyny hammashoitajan eli hammashykienistin tykönä jos se oon semmosen hammaslääkärin töissä joka kuuluu Privaattihammaslääkärhiin.

Privaattihammaslääkäritten luottamuslautakuntia oon monila eri paikkakunnila maassa ja net antava ehotuksia siittä mitenkä hammaslääkärin kans saattaa sopia. Jos privaattihammas­lääkäri ei nouattais niitten ehotusta, hään ei saa olla matkassa yhistyksessä Privaattihammas­lääkärit. Normaalisti luottamuslautakunta ei selvitä taphauksia jokka oon vanhemat ko kaks vuotta.

Oikean luottamuslautakunnan kans kontaktin saamiseksi, sie saatat soittaa Privaattihammas­hoion tiottamisheen (-upplysningen). Jos sie et ole tytyväinen luottamuslautakunnan päätöksheen,  sie saatat valittaa siittä Privaattihammaslääkäritten keskheisheen luottamus­lauta­kunthaan.

Privaattihammaslääkäritten webpaikalta sie saat tietoa siittä mihinkä kääntyä jos sulla oon valittamista. Sieltä saattaa kans tehä haun (sök) siittä oonko hammaslääkäri Privaattihammas­lääkärit-jäsen.

Jos hammaslääkäri ei ole Privaattihammaslääkäri-jäsen, luottamuslautakunthiin ei saata kääntyä. Asiaa saattaa kuitenki aijaa oikeustietä, mutta sillon häätyy olla tietonen siittä riskistä ette joutuu maksamhaan niin omat ko vastapuolen oikeuskostanukset jos häviää asian.

Sie saatat kans kääntyä maakäräjitten potilaslautakunnan puohleen ko olet ollu privaatti­hammaslääkärin hoiossa jos toiminta kokohnaisuuessa eli osittain oon maakäräjiten rahottama. Kysseessä saattaa esimerkiksi olla vasthaanotto jonka toiminta oon lapsi- ja nuorisohammashoito.

Potilaslautakunnan puohleen käänythään kans ko oon kyse hammashoiosta joka oon privaatti mutta jossa hammaslääkärillä eli hammashykienistilä oon sopimus maakäräjitten kans hammashoiosta  joka oon osa siukuushoitoa rajotetulla ajala.

Jos oon sitä mieltä ette oon tehty väärin

Sosiaalihallituksheen saattaa ilmottaa taphauksen eli henkilön joka oon sinut käsitelly. Sillä ei ole mithään merkitystä jos henkilö oon kansanhammashoion töissä eli privaatistin töissä.

Ilmotuksen häätyy tehä kahen vuen sisälä hoitamsien jälkhiin ja sen häätyy olla kirjalinen. Ensikäessä ilmotuksen saapi tehä itte potilas, mutta omhaiset ja lähheiset saattava kans tehä ilmotuken jos sitä ei itte pysty tekehmään.

Niin ilmotus Sosiaalihallituksheen ko Sosiaalihallituken päätös oon julkinen asiapaperi jonka kuka vain saattaa lukea. Potihlaitten surnaalille ja semmosille asiapaperille jokka kuuluva selvityksheen oon kuitenki sekretessi.

Sosiaalihallitus saattaa antaa kritiikkiä hammashoitopärsunaalile ja se saattaa kans ilmottaa henkilöitä Terhveys- ja siukkahoion vastuulautakunnale (-ansvars-), HSAN. Sen häätyy tehä jos oon kyse siittä ette topata rytinit eli työmenetelmät joissa saattaa olla riskiä.

HSAN saattaa harkita (pröva) ja päättää:

• ette perruuttaa sen hammaslääkärin eli hammashykienistin lekitimasuuni joka oon hoitanu huonosti oman työn
• ette määrätä pruuiajan, joka tarkottaa ette hammaslääkäriä eli hammashykienistiä tarkkaihlaan korkeinthaan kolme vuotta, ja ette sille ajale tehhään erityinen plaani
• ette rajotethaan eli perruutethaan hammaslääkärin oikeus määrätä lääkheitä.

Sosiaalihallitus ja HSAN ei ota kantaa siihen saapiko korvausta. Jos sie piät ette sie olet saanu vamman/loukkaintunnu ko sinua oon hoiettu, rahalista korvausta häätyy hakea Potilas­vakkuutuksesta LÖF.

Ilmotuksen Sosiaalihallituksheen saattaa kans tehä jos oon ylheisesti valittamista. Se saattaa olla kritiikkiä orkanisasuunia kohthaan eli ylheisesti puutheita potilasturvalisuuessa. Valitukset häätyy selvittää puolueettomasti, eikä sitä tartte itte tietää kuka oon tehny virhheen eli mikä se oon joka ei ole toiminu hyvin.

Silloinki pittää kääntyä Sosiaalihallituksen puohleen jos halva ette omasta surnaalista jotaki poistethaan.

Kansanhammashoito eli privaatti vasthaanotto oon velvolinen ilmottamhaan ittensä Sosiaali­hallituksheen jos joku vamma/loukkaintuminen sattuu eli jos jollaki oon riski louk­kaintua pahasti hammashoiossa. Se tehhään Lex Maria-mukhaisesti.

Sie saatat saa korvausta jos loukkainut

Jos sitä loukkaintuu ko oon saanu hammashoitoa, saattaa joskus olla oikeus saa rahalista korvausta potilasvakkuutuksesta, joka kaikila hammashoitovasthaanotoila häätyy olla. Eikä se pellaa mithään rollia jos loukkaintuminen oon tapahtunnu kansanhammashoiossa eli privaatti hammashoiossa. Korvausta saattaa saa loukkaintumisesta joka oon tapahtunnu niin syynin ko hoitamisen yhtheyessä. Tämä jällaa vaikka loukkaintuminen olis tapahtunnu jonku erheyksen takia, sen takia ette jokku laitheet oon särkynhee eli jos sitä oon saanu väärän tiaknoosin ja sen takia loukkaintunnu.

Joitaki esimerkkiä siittä koska saattaa saa korvausta Potilasvakkuutuksesta:

• Hammaslääkäri oon missanu tehä tiaknoosin ja hoitamisen siukkuuesta jonka takia hamphaat lähtevä vaikka kaikki hamphaat säänölisesti oon syynätty, ja hamphaat sen takia lähtevä.
• Väärä hammas oon korjattu eli veetty pois.
• Loukkaintuminen oon tapahtunnu sen takia ette kliniikin laitheet oon särkynhee.

Korvaus jota saattaa maksaa saattaa koskea esimerkiksi fyysistä eli psyykkistä kärsimistä, ekstra hammashoitokostanuksia ja reisukostanuksia loukkaintumisen takia ja menetetyn työtulon korvausta.

Hammashoithoon kuuluu kuitenki aina riski saa prupleemia joita ei saata estää. Se ette hoitaminen ei tuota toivottua tulosta eli sitä joutuu kokehmaan paljon särkyä ko hammas oon veetty pois eli korjattu, oon esimerkkiä semmosesta jota ei saata estää. Siittä ei saata saa korvausta.

Esimerkkiä siittä koska ei saa korvausta:

• Jos oon sitä mieltä ette tulos ei ole komea, ette esimerkiksi kruunuissa ja silloissa (broar) eli paikoissa oon väärä färi eli muoto.
• Sitä oon saanu pruteesin joka ei istu hyvin ko syöpi eli puhhuu.
• Ko paikka ei pysy ja häätyy käyä hammaslääkärissä useaman kerran ette saa sen taas korjatuksi.

Jos sitä ei saa korvausta loukkaintumisesta eli kärsimisestä niin se oon ussein sen takia ette sitä ei saatettu estää.

Sitä tekkee itte ilmotuksen Potilasvakkuutuksheen LÖF. Ilmotuksen saattaa kans omhainen eli joku lähheinen tehä  jos sitä ei itte saata tehä.

Ilmotuksen häätyy tehä kolmen vuen sisälä siittä ko sai tietää ette rahalista korvausta loukkaintumisesta saattaa vaatia. Vakkuutuspuulaakilla häätyy kans olla maholisuus arvioija ette oon kyse loukkaintumisesta. Sen vakkuutuspuulaaki tekkee sen hammaslääkärin surnaalitten ja rönkkikuvitten avula joka loukkaintumista oon tutkinu.

Loukkaintuminen kansanhammashoiossa

Jos halva ilmottaa luokkaintumisen/vamman joka oon tullu ko oon käyny kansanhammas­hoiossa, sen saattaa tehä Maakäräjitten keskinhäisen (ömsesidig) vakkuutuspuulaakin Potilasvakkuutuksheen, LÖF. Niitten webpaikala oon plankettia jokka täytethään ko tekkee ilmotuksen ja sieltä saattaa lukea enämpi siittä mikä jällaa sille ette korvausta saattaa saa. Informasuunia ja apua saattaa kans saa potilaslautakunnalta ilmotuksen tekemisen kans.

Jos sie et ole tytyväinen Potilasvakkuutuksen päätöksheen, siittä saattaa valittaa Potilas­vammalautakunthaan (-skade-). Enämpi tietoa Potilasvammalautakunnasta oon Potilas­vakkuutuksen LÖF:in webpaikala.

Loukkaintuminen privaatti vasthannotola

Jos hammaslääkäri oon orkanisasuuni Privaattihammaslääkäritten jäsen, sie saatat kääntyä sinne ilmotuksen tekemisen kans. Tämä jällaa vaikka vamma olis tapahtunnu hammas­hykienistin eli hammashoitajan tykönä jos hään oon töissä hammaslääkärille joka oon Privaattihammaslääkärit-jäsen. Privaattihammaslääkäritten kotisivula oon enämpi tietoa siittä mihinkä kääntyä.

Jos hammaslääkäri ei ole Privaattihammaslääkärit-jäsen, sitä häätyy ottaa selvile mihinkä vakkuutuspuulaakhiin ilmotus lähätethään. Helpointa oon kysyä omalta hammaslääkäriltä, mutta sitä saattaa kans kääntyä Potilasvakkuutusföreninkin PFF, puohleen, ette saapi tietoa siittä mihinkä ilmotus jätethään. Tämä jällaa kans jos oon käyny privaatti hammashykienistin tykönä.

Vamma lääkheestä hammashoion yhtheyessä

Jos sitä oon saanu etukätheen arvaamattoman sivuvaikutuksen eli vamman jostaki lääkheestä hammashoitamisen yhtheyessä, saattaa olla oikeus saa korvausta Lääkevakkutuksesta. Lääkevakkuutus oon vakkuutus joka kaikila jokka valmistava ja tuova maahan lääkheitä Ruottissa oon. Vamman häätyy ilmottaa Lääkevakkuutuksheen kolmen vuen sisälä siittä ko sai tietää ette vamma toennäkösesti oon tullu lääkheestä.

Ilmotusta ei saata tehä Ruottissa

Jos oon saanu väärää hoitoa, hoitovamman eli sitä ei ole tytyväinen hammashoithoon jonka oon saanu ulkomaila, siittä ei saata tehä ilmotusta Ruottissa. Sen siihan ilmotus tehhään siinä maassa jossa syyni eli hoitaminen oon tapahtunnu.

Vakkuutusturva oon ussein huonompi muissa maissa ja tavalisuuessa maholisuuet saa apua kans oon pienemät. Pohjosmaila oon kuitenki vakkuutusturva joka muistuttaa sitä mikä Ruottissa oon.