Jos ei ole tyytyväinen hoijon kans
Om man inte är nöjd med vården

On oikeus valittaa

Potilhaana terhveys- ja siukkahoijossa on oikeus saa hyvvää kohtelua missä on yksityisen respekti osana ja saa selvää informasjuunia terhveyentilantheesta ja niistä tutkimuksista ja hoijosta mitä esitethään. Pittää saa hyvän hoijon hyvälä kvaliteela.

Jos ei ole tyytyväinen hoijon kans mitä on saanu eli on epätyytyväinen kohtelun kans sillon on oikeus valittaa ja jättää mielipitheitä. Se saattaa koskea kaikenlaisista pienistä prupleemista aina vaikeihin tilantheishiin, jokka on saahneet pysyviä vikoja eli kuolemantapahtumia. Saattaa kans tehhä ilmotuksen missä viitathaan millä saathaan pareman toiminan.

On olemassa monta eri instansia mihinkä saattaa kääntyä valituksitten kans. Se saattaa olla hyvä ette pyytää kirjotetun vastauksen kun valittaa ja sillon saattaa kaikessa rauhassa lukea vastauksen ja välttää väärinkäsityksiä.

Valita suorhaan hoitopersunaalile

Se on hyvä ette ensi käessä kääntyä suorhaan sille lääkärille eli muu hoitopersunaalile, joka on tehny tutkimuksia eli antanu hoitoa. Useasti suoria väärinkäsityksiä ja epäselvyyksiä mennee selvittää tällä tavala ja vähentää vaaran ette se tapahtuu uuesti. Saattaa kans aina kääntyä sen eenheetin pomole missä on saanu hoijon, esimerkiks toiminanpomo yhessä orttopeetin vasthaanotossa.

Kun koskee kunnan terhveys- ja siukkahoitoa, kun esimerkiks kotisiukkahoitoa käänethään sille kunnan metesiinin vastuussa olevalle siukkasysterile, jota kans kuttuthaan MAS.

Mikä on maakäräjän eli kunnalinen hoito vaihtelee maan eri osissa. Saattaa kysyä kunnalta eli maakäräjiltä kuka on vastuussa hoijosta. Useasti kunta on vastuussa yksinkertasesta kotisiukkahoijosta ja maakäräjä hoitaa avanseeratun siukkahoijon koissa.

Ottaa vasthaan valituksia

Instansi johonka saattaa jättää mielipitheiä on potilaslautakunta, joka välistä kuttuthaan luottamuuslautakunnaks. Potilaslautakunta pittää vaikuttaa korkehaan potilasturvhaan terhveys- ja siukkahoijossa.

Lautakunta pittää olla kaikissa maakäräjissä missä se ottaa vasthaan valituksia ja mielipitheitä mm. kohtelusta, tiaknoosista, metesineerinkistä, maksoista, salhaisuusasioista ja hoitokarantiista. Lautakunnassa istuu pulitiikkeriä, mutta se on virkamiehet jokka käsittelevät valituksia. Lautakunnan pulitiikkerillä ja virkamiehilä on vaitiolovelvolisuus.

Potilaslautakunta seisoo vaphaana terhveys- ja siukkahoijosta ja se ei maksa mithään ette kääntyä sinne kysymyksitten ja valituksitten kans.

Paitti terhveys- ja siukkahoito potilaslautakunnan toiminanalhaan kuuluu kans hammashoito, jonka maakäräjä ja privaattihammashoito toimittaa, ja jonka maakäräjä maksaa täyesti eli osittain.

Sen lisäks kuuluu terhveys- ja siukkahoito jonka kunnat toimittavat, eli kunnitten kans sopimuksitten mukhaan, ja se ylheinen huolenpito Sosiaalivirkalain mukhaan, jonka saapi sellaisen terhveys- ja siukkahoijon kans.

Potilaslautakunnalta saattaa saa apua esimerkiks

• informasjuunia mitä tarvittee ette ottaa vaarin omista intressistä terhveys- ja siukkahoijossa
• kontaktia hoitopersunaalin kans
• ette löytää oikean viranomaisen
• ilmottaa mitä on nähny ja poikkeuksista joihin on reakeeranu hoijonantajalle ja hoitoeenheetile.

Sekä suulisia ette kirjotettuja valituksia selvitethään

Saattaa sekä soittaa ette lähättää kirjotettuja valituksia potilaslautakunthaan. Virkamies kattoo perhään ette valitukset selvitethään eli ette oikea instansi liitethään asihaan.

Potilaslautakunnala ei ole oikeuksia päättää jos siukkahoijonpersunaali on tehny jotakin väärin eli ei. Se on sen eestä kysymys vastuun toiminassa oleville eli viranomaiset kun Sosiaalihallitus.

Yhteystietoja potilaslautakunthaan pittää olla missä olet saanu hoitoa ja maakäräjitten omissa veppisivuila.

Valvoo laatua ja turvalisuutta

Huolto ja huolonpion tarkistus, IVO (Inspektionen för vård och omsorg), on valvonanvirasto muun muassa terhveyen ja siukkahoijon alala. Heilä on tehtävänä tarkistaa ette saathaan hoitoa joka on turvalinen, hyvä laatu ja ette se toimitethaan laitten ja määräyksitten mukhaan. Aiemin tämä kuului Sosiaalihallituksen tehtävhiin. Vastuu siittä ette toimitethaan hyvvää ja turvalista huoltoa ja huolonpitoa on päämiehitten ja heän toiminassa. IVO:hon saattaa ilmottaa jos on saanu hoijonvahinkon eli kokenu puutheelisuuksia potilasturvalisuuessa hoijon eli käsittelyn yhteyvessä terhveys- ja siukkahoijon eli hammashoijon aloila. IVO tutkii tapahtumaa, mutta ei katto vain terhveys- ja siukkahoijon henkilökunnan toimintaa, mutta kans kokonaisuutta, mikä se oli joka meni väärhään ja miksi. Net arvostelevat kans mikä on tärkeä muuttaa ettei se sama tapahtuma toistu.

Ilmotus saattaa johtaa ette IVO moittii ja kritiseeraa kysheessä olevaa hoitosentraalia, sairaalaa, hammashoijon vasthaanottoa, vanhuskotia eli terhveys- ja siukkahoijon henkilökuntaa. IVO saattaa kans asettaa vaatimuksia ette hoijonantaja ottaa päätöksiä toiminasta, jokka estävät ette samanlaisia tapahtumia saattaa toistua.
 
Kaikin jokka kuuluvat terhveys- ja siukkahoijon henkilökunthaan, riippumatta jos net on töissä kunnassa, maakäräjissä eli privaatti hoijonyrityksessä, mennee ilmottaa.
 
Pääsääntönä IVO ei tarkista tapahtumia jokka tapahtuit enemän kun kaks vuotta aikaa ja IVO:n päätöstä ei mene valittaa. 
 
Sekä ilmotus IVO:le ja heän päätös on julkiset tokymentit mitä kaikin jokka haluavat saattavat lukea. Potilassjurnaalit ja muut sellaiset tokymentit jokka kuuluvat selvittelhyyn kuuluvat sen eestä salanpion lain alle. Ilmotukset tapahtumista jokka saattavat olla rikolisia jätethään puliisile. Se saattaa esimerkiks koskea sitä ette siukkahoijon henkilökunta syytethään seksyaalisista laittomuuksista eli pahonpitelystä.

Jos IVO arvostellee ette joku terhveys- ja siukkahoijon henkilökunnasta on näyttänheet selvästi sopimattomina ammatissaan, tehhään erikoinen tutkimus asiasta. Se tutkimus saattaa muun muassa johtaa siihen ette IVO anoo Terhveys- ja Siukkahoijon Vastuulautakunnalta (HSAN) ette vettää takashiin henkilökunnan lekitimasjuunin.

Seuraa ylös Lex Maria-ilmotuksia

IVO käsittelee kans lex Maria asioita missä hoijonantaja on ilmottanu tapahtumia jokka on aiheuttanheet eli olis saattanu johtaa vakahviin hoijon vahinkhoon, ja lex Sarah asioita, siis ilmotettuja epäkohtia eli riskiä epäkohthiin sosiaalipalvelun alala.

Terhveys- ja siukkahoijon vastuulautakunta

Vain IVO, Jystitieombyytsmanni ja Jystitiekansleri saattavat tehhä ilmotuksia HSAN:hiin. Uuen lekitimasjuunin hakemus, uusi pätevyys ja koeaika mennee tehhä siltä ammatinharjottajalta ketä asia kuuluu.

HSAN saattaa kokeila ja päättää

• ette vettää takashiin lekitimasjuunin siltä lääkäriltä eli siukkasysteriltä joka on hoitanu huonosti työnsä
• ette asettaa koeaijan, mikä merkittee ette lääkäri eli siukkasysteri häätyy seisoa valvonan alla korkeinthaans kolme vuotta, sekä ette erikoinen suunitelma tehhään sillä aikaa
• ette rajottaa eli vettää sisäle lääkärin oikeuen kirjottaa ulos lääkheitä.

Puliisi, potilasorkanisasjuunit ja pulitiikkerit

Jos pittää ette rikos on tehty hoijon alala saattaa tehhä puliisi-ilmotuksen. Ilmotus saattaa esimerkiks koskea ette joku on aiheuttanu muun kuoleman. Ruottissa se on hyvin harvon ette sellaiset ilmotukset johtavat syytheesheen ja rangastuksheen, koska se rikoslaissa vaaithaan niin kututun tietoisen aikomuksen eli krouvin varomattomaisuuen ennenku mennee rangastaa.

Potilasorkanisasjuunit saattavat välistä auttaa asian käsittelyssä jokka koskevat valituksia. Net saattavat joissakin tapahtuksissa arvostella mihinkä instanshiin on parasta viä omat valitukset ja saattavat auttaa kirjottamhaan ilmotuksen.

Diskrimineringsombudsmannen, DO, arbetar mot diskriminering. Om man anser sig osakligt särbehandlad utifrån kön, könsidentitet, könsuttryck, ålder, etnisk tillhörighet, religion eller annan trosuppfattning, funktionsnedsättning och sexuell läggning, kan detta anmälas till DO.

Tiskrimineerinkiompyytsmanni eli Syrjintäompyytsmanni, DO ruottiks lyhenetty, käsittellee tiskrimineerinkiä. Jos pittää ette sitä on epäasialisesti ja erikoisesti käsitelty sukupuolen, sukupuolisen identtiteetin, sukupuolisen ilmauksen, eetnisen kuuluvuuen, uskonon eli muun uskononkäsityksen, fynksjuuniestheen ja seksuaalisen luontheen takia, sillon sen mennee ilmottaa DO:le.

Se on aina maholista tuoa framile valituksia niile siukkahoijon pulitiikkerile, joila on maakäräjän eli kunnan puliittinen vastuu.

Muutamissa maakäräjissä on erikoisia potilasompyytmannia, jokka välistä kans kuttuthaan potilasompyytiks eli potilasophaaks.

Jos esimerkiks on huonosti koheltu eli muula tavala ei ole tyytyväinen hoijon kans saattaa ottaa yhteyttä heihin. Potilasompyytsmanni saattaa auttaa ja ohjata sinun muuale, jos ei ole tyytyväinen vastauksen eli kohtelun kans mitä on saanu kun on ensin suorhaan kääntyny siukkahoitopersunaalhiin.