Useasti särky yölä
Lapset jokka on lentsussa saattavat saa korvakipeää siittä ette liimakalvot (slemhinna) korvassa paisuvat. Net saattavat kans saa särkyä välikorvassa märkivästä inflamasjuunista, korvatulehus. Lapsila on sekä lentsu ja korvatulehus tavaliset infeksjuunisairhauet. Useasti lapset herräävät yölä särjyn takia koska paisuma korvassa kasvaa yhä lissää kun sitä makkoilee. Se saattaa tuntua paremalta nukkua jos on joku ekstra polsteri pään alla.
Muut vaivat jokka saattavat antaa korvasärkyä on tulehus kuulokanalissa joka viepi trumpukalvhoon, vaksiproppi eli vaiva leukajäsenitten kans.
Korvatulehus koskee välikorvaa
Korvatulehus välikorvassa alkaa useasti yhtäkkiä ja on lyhyaikanen. Paitti kipeää korvassa lapsi saattaa tuntea ette on kansi korvan päälä ja kehnompi kuulo. Se on kans tavalista ette on feeperi. Välistä trumpukalvo halkeaa ja neste valoaa ulos kuulokanaalhiin. Sillon särky pruukaa vähentyä. Lapsila saattaa kans olla korvatulehus ilman särkyä.
Särkyä vähentävä metesiini
Jos tietää ette lapsela on korvatulehus sitä saattaa antaa särkyä vähentävää metesiiniä joka sisältää paracetamol, esimerkiks Alvedoni ja Panodili, eli metesiiniä joka sisältää ibuprofenia, esimerkiks Ipreni ja Ibumetini. Metesiinit on nestheenä, peräpuikkona ja taplettina. Tarkkoja käyttöohjeita seisoo metesiiniloovassa.
Lapsile, jokka on alle kuus kuukautta, ei piä antaa särkyä vähentävää metesiiniä ilman ette ensiks keskustellee siukkasysterin eli lääkärin kans.
Lapset jokka on alle 18 vuotta jolla on feeperi ei piä käyttää särkyä vähentävää ja feeperiä laskevaa ainetta missä on acetylsalicylsyraa, esimerkiks Magnecyli, Treo eli Albyli minori, jos ei lääkäri ole kehottanu sitä.
Nokkasprei
Paisuntaa laskevaa nokkasprei vähentää nokkatukkoa ja tekkee vähän helpomaks lapsele ette henkiä. Mutta ajatus ette nokkasprei pitäis parantaa korvatulehusta ei ole menny näyttää eli toistaa.
Korvaprupleemia ja paati
Jos on tullu reikä trumpukalvhoon pittää oottaa paatin kans siihen asti ette se on loppunu valoaamasta kuulokanaalista. Kun trumpukalvo on parantunu, mikä saattaa mennä aika kätevästi, sitä saattaa paatata kun tavalisesti. Jos on rööriä korvassa eli käynissä oleva korvatulehus ei piä paatata päätä veenpinnan alla.
Sitä saattaa tarvita kontaktata hoijon
Lapsi saattaa saa tilapäisen korvasärjyn lentsun yhteyvessä. Mutta jos särky ei mene yli, vaikka on hoijettu särjynlaskevalla metesiinilä ja pietty pää korkeassa asenossa, sillon lasta pittää tutkia hoitosentraalissa eli sjuurivasthaanotossa kahen-kolmen päivän sisälä.
Jos lapsi on laiska ja veltto, ei jaksa leikkiä ja ei halua juoa eli on alle kuus kuukautta, sillon pittää kontaktata hoijon varsin.
Pittää kans aina ottaa yhteyttä hoitosentraalin kans jos valoaa nestettä lapsen kuulokanaalista - riippumatta jos lapsela on kipeä eli ei.
Sitä saattaa aina soittaa siukkahoijonneuvonthaan josta saapi neuvoja.