Oikeus second opinionhiin eli toisheen mielipitheesheen
Jos on käyny lääkärissä ja saanu tion sairhauesta, joka merkittee ette sitä häätyy ottaa vaikeita metesiinisiä päätöksiä, sillon saattaa olla oikeus uutheen metesiinisheen arvostelhuun muulta lääkäriltä, niin kuttuttu second opinion. Se merkittee ette on maholisuus saa tutkimuksen muulta lääkäriltä kun se kenheen sitä ensiks kääntyi. Tavote second opinionila on ette sitä pittää olla varmana ette sitä saapi sen hoijon ja kohtelun joka parhaiten soppii ittele.
On oikeus second opinionhiin jos
- on elämää uhkaavaa eli erittäin vakava sairhaus eli vahinko ja
- tiaknoosi eli esitetty hoito saattaa merkitä erikoisia riskiä eli saa merkitystä tulevalle elämänkvaliteele.
Esimerkiks sitä saattaa saa oikeuen second opinionhiin jos on kanseri eli joku sairhaus hermosysteemissä. Sitä aina saattaa kysyä omalta lääkäriltä jos on maholisuus saa second opinionin.
Kotimaakäräjä maksaa
Tavalisiin on ette sitä saapi kohata lääkärin eli hoitotiimin muussa sairalassa kun se mitä sitä ensin vieraili siinä maakäräjässä missä sitä assuu. Jos on toivheita ette tulla jonku erikoisen lääkärin tykö eli kliinikhiin Ruottissa sillon maakäräjä missä sitä assuu on velvolinen maksamhaan toisen metesiinisen arvostelun, vaikka se merkittee ette sitä häätyy matkustaa toisheen maakärähjään. Kotimaakäräjä pittää kans maksaa reisukostanuksen.
Mihinkä saattaa kääntyä?
Jos haluaa hakea second opinionin sitä saattaa kysyä mihinkä sitä saattaa kääntyä kysymyksen kans omalta lääkäriltä eli joltaki muulta eustajalta siinä vasthaanotossa missä sitä on saanu ensi metesiinisen arvostelun.
Sitä saattaa kans kontaktata potilaslautakunnan eli potilasompyytsmannin siinä maakäräjässä missä sitä assuu ja saa informasjuunia mihinkä sitä saattaa kääntyä ja saa second opinionin. Lue lissää: Jos ei ole tyytyväinen huolon kans.
