Hoitokarantii joka jällaa koko maassa
Hoitokarantii merkittee ette pittää saa hoitoa vissin aijan aikana. Se on laissa päätetty osa terhveys- ja siukkahoitolaissa. Hoitokarantii määrää minkä aikarajotten sisälä maakäräjän eli rekiuunin pittää tarjota hoitoa. Sitä vaston hoitokarantii ei määrittele jos hoitoa pittää antaa eli minkälaisen hoijon pittää saa.
Hoitokarantii määrää kuinka pitkhään sitä pissiin saattaa tarvita oottaa hoitoa. On olemassa eri aikarajoja eri tyyppisitten hoijole, esimerkiks 7 päivää ette kohata lääkärin yhessä hoitosentraalissa eli 90 päivää tehhä yhen vierailun, vaihtoehtona ette saapi hoitoa spesialiseeratussa hoijossa. Jos ei mene saa hoitoa aikarajotten sisälä siinä hoitoeenheetissä mihinkä on hakenu, tarjothaan käynin eli oman hoijon muussa hoitoeenheetissä. Välistä osoitethaan hoitoeenheethiin muuhun maakärähjään. Se on aina vapaehtosta ette sanoa jo eli ei tarjouksheen kätevämästä hoijosta muussa hoitoeenheetissä kun mihinkä on hakenu.
Akyytti hoito ei kuulu hoitokaranthiin. Jos tullee akyytti kipeäks eli tärväintyy pittää saa hoitoa niin kätevästi kun maholista.
Kansalinen Hoitokarantii 0–7–90–90
Hoitokarantiin mukhaan on oikeus:
- 0 - Kontaktia priimäärihoijon kans samana päivänä.
Samana päivänä kun hakkee apua pittää saa kontaktia primäärihoijon kans, esimerkiks hoitosentraalin eli siukkahoijonneuvonan kans. Se saattaa toimia telefuunin eli vierailun kautta.
- 7 - Lääkärinkäynti priimäärihoijossa seittemän päivän sisälä.
Jos hoitopersunaali arvostellee ette sitä tarvittee kohata lääkärin sitä pittää saa aijan korkeinthaan seittemän päivän aikana, esimerkiks hoitosentraalissa eli perheelääkärissä.
- 90 - Käynti spesialiseeratussa hoijossa 90 päivän kautena.
Jos saapi remissin spesialiseerathuun hoithoon sillon pittää saa käyntiaijan 90 päivän sisälä. Se jällaa kans vaikka on hakenu hoitoa ilman remissiä.
- 90 - Hoito alotettu 90 päivän sisälä.
Jälkhiin päätöksen hoijosta, esimerkiks leikkaus, sitä pittää saa aijan 90 päivän aikana.
Koskas hoitokarantii ei jällaa
Hoitokarantii ei jällaa
- uuestikäynile
- jos sitä metesiinin syistä pittää oottaa pitemphään kun karantiin aikarajotus
- metesiininen palvelu, esimerkiks laburatuurie- ja rönkkitutkimus
- tutkimukshiin ja selvittelhyin
- apuvälinehuolthoon, yks poikkeus on kuuloaparaatin pruuvailu
- jos sannoo ei yhteen hoijon tarjouksheen muussa hoitoeenheetissä (jos jälemin muuttaa kantaa sitä saattaa sanoa jo tarjouksheen).
Oottoaikoja hoijossa
On olemassa kansalinen veppipaikka missä seurathaan ylös hoitokarantiita ja oottamisaikoja, Vantetider.se. Veppipaikala näytethään oottamisaijoitten tilanetta kaikissa maakäräjissä ja rekiuunissa.
Hoitoa muuala
Jos tarjothaan käynin eli hoijon, jota ei mene antaa hoitokarantiin aijan rajotuksissa, sillon pittää tarjota hoitoa muussa hoitoeenheetissä. Se saattaa olla hoitosentraali, sairala eli vississä privaatti vasthaanotoissa. Sitä saattaa itte tua esile toivomuksia mihinkä sitä haluaa tulla, mutta jos hoitokarantii pittää jällata sitä ei saata valita vaphaasti. Jos ei halua saa hoitoa muuala kun missä on hakenu sitä saattaa hylätä hoitokarantiin tarjouksen. Se saattaa merkitä ette saapi oottaa pitemphään. Jos jälkhiin kattuu sitä aina saattaa kontaktata hoijonantajan. Hoitokarantii alkaa jällaamhaan siittä päivästä.
