Valitte hoitosentraali eli tohturin vasthaanotto
Ruottissa saattaa itte valita primäärihoion, eli siis mihin hoitosentraahliin eli tohturin vasthaanotole sitä halva kuulua. Useasti sielä kans saattaa valita fasta tohturin.
Vanhemat valitteva avomen (öppen) hoitovasthaanoton lapsilheen. Vissistä iästä lähtien, ja se saattaa vaihtella maakäräjitten ja seu´uitten välilä, nuori saattaa itte valita.
Siihen saattaa olla eri syitä ette itte halva valita hoitosentraalin eli tohturin vasthaanoton. Sitä piiain halva mennä semmosen tykö joka esimerkiksi
- oon likelä kotia eli työpaikkaa
- jossa on pärsunaalia joka puhhuu eli antaa tietoja kielelä jota sitä ymmärtää
- jossa oon tokymenteeratusti hyvä laatu
- jossa oon aukioloajat jokka passaava
- jolle saattaa puukata näätilä
- jossa oon spesialistiä, esimerkiksi hoitoa tiapeettikkerile eli vanheemille ihmisille.
Mikkä vasthaanotot sitä saattaa valita?
Se hoitosentraali eli tohturin vasthaanotto jonka sitä valittee saapi olla missä vain omala maakäräjä- eli seutualuheela.
Joissaki taphauksissa omat maakäräjät oon kirjottanhee sopimuksen muitten maakäräjitten kans, ja niissä taphauksissa senki maakäräjän hoitosentraalille saattaa listata ittensä.
Yksittäisiä käyntiä saattaa aina tehä jonku muunki maakäräjän hoitosentraalilla ja sillon se maakäräjä saapi makson siltä maakäräjältä jossa sitä assuu. Reisukostanukset häätyy itte maksaa jos hoitokarantti ei jällaa.
Hoitovalinthaan kuuluva niin privaatit ko maakäräjitten omat hoitosentraalit eli tohturin vasthaanotot. Jos se oon privaatti vasthaanotto, sillä häätyy olla sopimus maakäräjitten/seu´un kans.
Hoitolaatua koskeva samat vaatimukset riippumatta siittä annethaanko hoito privaatilta eli julkiselta hoitoatarjoavalta.
Jos se hoitosentraali eli tohturin vasthaanotto, jonka sitä oon valinu, ei saata ottaa vasthaan useampia pasienttiä, maakäräjät saattava auttaa oornaahmaan paikan jonossa. Valinan saattaa kans tehä uuesti, jos sitä jostaki syystä oon muuttanu mieltä.
Jos sitä tarttee spesialistin hoitoa, sitä saattaa valita avomen hoitovasthaanoton eli siukkatuan. Vississä taphauksissa tarttee remissin.
Hoitovalinta eli terhveysvalinta vaihtelee
Se mitenkä hoito oon orkaniseerattu ja mitenkä hoitovalinta eli terhveysvalinta tehhään saattaa vaihtella maakäräjitten/seu´uitten välilä.
