Komisuuni
Komisuuni oon valtiolinen komitea jossako oon seittemän jäsentä jokka oon valikoittu hallitukselta. Se oon jäsenet jokka ottavat päätöksiä työn aikana ja vastaavat komitean ehotuksista. Puhheenjohtaja johtaa komisuunin työtä.
Sekretariaatti
Sekretariaatti oon tutkimussekreteerarit. Komisuunin puhheenjohtaja oon sekretariaatin johtaja. Puhheenjohtajan johola sekretariaatti suunittellee, järjestää ja atministreeraa komisuunin työtä. Sekretaariatin vastuu oon muun muassa ette tehhä tutkimuksia, järjestää kokkouksia ja sympoosioita ja tehhä henkilökohtasia haastatteluja ja fuukysryhmiä. Sekretariaatti valmistaa ja tokymenteeraa jäsenitten päätöksiä. Sekretariaatila oon kokkous puhheenjohtajan kansa kerran viikossa ette verrata kunka työ jatkuu.
Komisuunikokkouksia
Komisuuni kokkointuu suunile viis kertaa vuessa (pantemiin johosta komisuuni oon kuitenki lisäny monta ekstra kokkouksta). Kokkouksissa keskustelthaan ja otethaan päätöksiä prinsipiellissä kysymyksissä jokka koskevat esimerkiksi työmetutia, rajottamisia ja ehotuksia jatkuville toimile oikasulle ja sovinolle.
Alotuskokkouksia
Alotuskokkouksitten päämäärä oon ette lua innostusta ja osalistumista ja kohata minuriteettiä heän omila arenoila. Kokkouksitten tarkotus oon ette antaa minuriteetile maholisuuen hunteeraukselle ja keskustelulle mitä net haluaavat komisuunilta ja mitä net saattvat tuottaa. Toinen tärkeä tarkotus oon ette levittää informasuunia maholisuuesta ette jakkaa ommaa kertomusta henkilökohtasessa haastattelussa.
Kahvikokkouksia
Kahvikokkoukset oon vähemän informellia kokkouksia jossako sekretariaatti käypii eri paikoissa ette kahvikupin yli kuttua keskustelhuun ja rohkasta yhtheisheen jakamisheen kolektiivista kertomuksista. Joka kahvikokkoksen aikana oon maholisuus varata aijan henkilökohtaselle haastattelulle sekretariaatin kansa.
Sympoosiymmi
Sympoosiymmit oon eri muotoja luenoista/seminaariymmistä joitten tarkotus oon ette levittää informasuunia jotako komisuuni saapii esile, esimerkiksi eri tutkimuksia ja raporttia tutkioilta ja ekspertiltä. Muu tärkeä tarkotus oon ette keskustella ja formyleerata ajatuksia sovinosta. Työplaanin mukhaan komisuuni tullee pithään kuus viiva seittemän sympoosioita. Komisuunin ensimäinen sympoosiymmi tulhaan järjestämhään STR-T:n kansa ja piethään Tornionlaaksolaisitten päivänä 15 heinäkuuta 2021.
Keskustelu- ja neuvottelukokkouksia organisasuunitten ja virastoitten kansa ja niin pois päin.
Komisuuni tullee jatkuvasti pithään yhtheyttä ja keskustelua minuriteetin kansa ja neuvotella relevantitten virastoitten ja organisasuunitten kansa tehtävän totheuttamisessa. Sekretariaatila oon jatkuvia neuvotteluja STR-T:n, Met Nuoret liiton, Sosiaalihallinon ja Ruottin kirkon kansa. Sekretariaatila oon kansa säänölisiä kokkouksia Norjan tottuus- ja sovintokomisuunin kansa ette jakkaa kokemuksia. Sekretariaatti oon kansa luonu verkoston eri referensihenkilöistä, ekspertistä ja yhtheistyöpaartnerista, esimerkiksi Arkiivikeskusta Luulajassa ja projekti Meän Ääni – nuoret filmitekiät Tornionlaaksossa.
Henkilökohtasia haastatteluja ja fuukkysryhmiä
Komisuuni kuttuu yksityisiä jättämhään toistuksia ja kertomuksia heän omista elikkä likhiisitten kokemuksista assimileerinkipolitiikasta. Ette koota sisäle toistuksia ja kertomuksia oon tärkeätä komisuunile sillä ko kaikkia mitä oon tapahtunnu menneisyyessä ei mene tutkia arkiivissa olevan kirjotetun materiaalin avula. Net henkilökohtaset kertomukset oon sen takia yhtä tärkeitä tionlähtheitä ko kirjotettu lähemateriaali. Joilekki intiviitile kokemuksitten näkyviksitekeminen elikkä maholisuus ette saaja kertoa heän kokemuksista hyökkäyksistä ja väkistämisestä saattaa merkitä intivityellin oikasun. Ko yksityinen kertomus tullee osaksi kollektiivistä kertomuksesta se saattaa tuottaa käsityksheen toisisitten eri elämyksistä ja kokemuksista ja sillä laila kansa eistää prosessia sovinolle minuriteetissä. Toistuksitten ja kertomuksitten kokoaminen oon sen takia kansa tärkeä osa oikasu- ja sovintoprosessista.
Ette antaa toistuksen elikkä kertomuksen mennee tehhä monela eri laila. Sen mennee tehhä henkilökohtasella haastattelulla elikkä ette yksityinen itte jättää kirjotetun elikkä suulisen kertomuksen. Komisuuni kuttuu kansa fuukkysryhmiin jossako ryhmä henkilöitä kokkointuu ja keskustellee yhtheisestä aihneesta (ryhmähaastattelu)
Tehtävä tutkioile ja informasuuninkokoaminen ekspertiltä
Komisuuni pittää reetuviisata olemassaolevaa tutkintoa aluheela ja palkkaa kansa jonku tutkian tekheen tutkimuksia eri temattisislla aluheila. Komisuuni tekkee kansa yksityisiä haastatteluja ekspertitten kansa monela aluheela.
Arkiivihakua
Komisuuni pittää käyttää arkiivimateriaalia ja muuta lähemateriaalia neuvottelussa koskevitten tutkimus- ja arkiivi-institysuunitten kansa. Arkiivihakuja tehhään niin sekretariaatilta ko tutkioilta joitako komisuuni palkkaa eri tehtävhiin.
Komisuunin arkiivi
Komisuuni tokymenteeraa ja rekistreeraa kaikki koottut ja sisälelähätetyt materiaalit omhaan arkiihviin jotako sekretariaatti huolehtii. Jälkhiin ko komisuuni oon lopettannu työnsä komisuunin materiaali arkiveerathaan Riikinarkiihviin.