Komisuuni pittää selvittää olemassaolevasta tutkimuksesta aluheela ja palkata jonku tutkian tekheen tutkimuksia eri temattisilla aluheila. Tässä alla selvitethään net tehtävät jokka komisuuni tähhään mennessä oon pannu tehtäväksi.
Tutkimus kunka tornionlaaksolaiset, kväänit ja lantalaiset oon olheet Valtion raasipiolookisen instityytin tutkimuksitten kohtheena.
Komisuunin ja Luulajan teknisen yniversiteetin sopimuksen mukhaan varayniversiteettilehtori Curt Persson pittää tehhä kartotuksen kunka tornionlaaksolaiset, kväänit ja lantalaiset oon olheet Valtion raasipiolookisen instityytin tutkimuksitten kohtheena.
Tutkimus pittää syventää ja laajentaa sitä tietoa joka oon tullu esile esimerkkitutkimuksessa raasipiolokiista raportissa Då var jag som en fånge: Statens övergrepp på tornedalingar och meänkielitalande under 1800- och 1900-talet./Silloin mie olin ko fanki: Valtion väkistäminen tornionlaaksolaisia ja meänkieltäpuhuvia kohitti 1800- ja 1900-luvuila. Tutkimus pittää kartottaa kunka laaja tämä toiminta oli, minkä muotonen se oli, kunka se oli järjestetty ja rahotettu ja millä laila se koski minuriteettiä. Tutkimus pittää kansa kuvata kunka raasipiolookitten käyttäytyminen elikkä kannanotto erilä laila vaikutti tornionlaaksolaisia, kvääniä elikkä lantalaisia – niin minuriteettiä kolektiivinä ko yksityisiä intiviitiä jokka kuuluit minuriteethiin. Tutkimuksessa pittää kansa selvittää kunka hiljain aijassa raasipiolookisia tutkimuksia käytethiin praktiikassa ja vastuulisuutta.
Tutkimusylheiskatshaus ja tutkimus työtuvista meänkielialuheela
Komisuunin ja Uppsalan yniversiteetin sopimuksen mukhaan yniversiteettilehtori Daniel Nilsson Ranta pittää tehhä tutkimusylhsiekatshauksen ja tutkimuksen työtuvista meänkielialuheela ja työtuvitten laatusta verraten muita koulukotiamuistuttavia institysuunia Ruottissa.
Tutkimusylheiskatshaus pittää selvittää olemassaolevaa tutkintoa ja panna työtuvat kansalisheen ja kansanvälisheen perspektiihviin.
Tutkimus ottaa lähtäkohtansa kokohnaisvaltasesta kysymyksestä jos lapsia työtuvissa meänkielialuheela kohelthiin erhiin laihiin ko lapsia muissa vastaavissa toiminoissa muissa osissa maata.
Tutkimus kunka tornionlaaksolaiset, kväänit ja lantalaiset oon olheet ruuhmilisitten jäänöksitten kokoamisen kohtheena
Komisuuni oon tehny sopimuksen yniversiteettilehtorin Carl-Gösta Ojalan kansa Institysuunila arkeolokiile ja antiikile histuurialle Uppsalan yniversiteetilä.
Tehtävhään kuuluu ette tarkistaa kunka tornionlaaksolaiset, kväänit ja lantalaiset oon olheet ruuhmilisitten jäänöksitten kokoamisen kohtheena 1800-luvula ja varhain 1900-luvula ja tutkia jos niitä jäänöksiä säilytethään museokokoelmissa tänäpäivänä. Tehtävhään kuuluu ette kuvata ja tutkia minkälainen näkemys oli tornionlaaksolaisia, kvääniä ja lantalaisia vasten arkeolookisessa tutkimuksessa ja muussa tutkimuksessa Tornionlaakson muinaisaijasta, 1800-luvuna ja varhaisenna 1900-luvuna Ruottissa, ja tämän tutkimuksen suhtheet assimileerinkipolitiikhaan ja raasitietheelisheen ja raasipiolookisheen tutkimuksheen.
Tutkimusylheiskatshaus ja tutkimus joka käsittellee koulu- ja kielipolitiikkaa Tornionlaaksossa
Komisuuni oon tehny sopimuksen professori emerituksen Lars Eleniuksen kansa tutkimusylheiskatshauksesta ja tutkimuksesta joka käsittellee koulu- ja kielipolitiikkaa Tornionlaaksossa.
Tutkimusylheiskatshaus pittää käsitellä koulu- ja kielipolitiikkaa Tornionlaaksossa; selostaa tutkimuksen etulinjoista ja tutkimustuloksista ja kuvata kysymyksiä jokka oon essiintynheet tutkioila ja minuriteetilä. Ylheiskatshaus pittää kansa panna assimileerinkipolitiikan kansalisheen ja kansanvälisheen perspektiihviin.
Tutkimus rakentautuu tarkistelhuun kunka lapset jokka kuljit koulua 1940-ja 1950-luvula koit kielipolitiikan vaikutuksia heän kotimiljööhöön, koulussa ja ympäriolevassa yhtheiskunnassa. Niitten kokemuksia verrathaan entisen tutkimuksen kansa.
Tutkimusylheiskatshaus monikielisyyestä, kielen menettämisestä ja kielelisestä revitaliseerinkistä
Komisuuni oon tehny sopimuksen professori Leena Hussin kansa tutkimusylheiskatshauksesta monikielelisyyestä, kielen menettämisestä ja kielelisestä revitaliseerinkistä.
Ylheiskatshaus pittää sisältää uutta tutkimusta kielen menettämisen ja revitaliseerinkin suhtheesta ja sosio-tuntheelisesta ja kognitiivistä kehityksestä ja terhveyestä. Ylheiskatshaus pittää esittää niin kansalisia ko kansanvälisiä lähtökohtia ja selostaa stikmatiseerinkiongelmasta suhtheessa kiehleen ja itenttiteethiin, perithyyn stikhmaan ja sukupuoliaspekthiin. Tutkimus pittää panna prosessit siiheen perspektiihviin ette nykyaijan nuorila oon suurempi innostus kiehleen jotako net ei ole koskhaan saahneet oppia. Kieliestheistä ja muista psykolookisista ilmiöistä kielenoppimisessa pittää kansa jutela.