Meänkieltä puhuthaan monessa paikassa Ruottissa olletikki Jällivaaran, Haaparannan, Pajalan, Kirunan ja Övertorneån kunnissa. Puhujat kuttuvat itteä tornionlaaksolaisiski, lantalaisiksi elikkä kvääniksi riippuen mistä aluheesta net tulevat elikkä missä net asuvat. Niitä oon monta eri meänkielen varieteettiä Ruottissa. Kieltä puhuthaan kansa Suomen ja Norjan puolela.
Norjassa kieli oon tunnustettu minuriteettikielenä kvääninkieli. Suunile 75 000 henkilöä uskothaan puhuvan meänkieltä Ruottissa. Joulukuussa 1999 valtiopäivät tunnustit ette meänkieli oon yks Ruottin kansalisista minuriteettikielistä. Se merkittee ette Ruotti pittää suojata, säilyttää ja eistää meänkieltä Euroopparaatin raamikonvensuunin mukhaan suojasta kansalisille minuriteetile ja eurooppalaisen säätänön mukhaan maanosa- ja minuriteettikielile. Se merkittee kansa ette minuriteetilä oon oikeus oppia ja kehittää ommaa minuriteettikieltä.
Erityisiä päätöksiä oikeuesta ette saaja käyttää meänkieltä ja saaja vissiä palvelua meänkielelä oon laissa (2009:724) kansalisista minuriteetistä ja minuriteettikielistä ja kielilaissa (2009:600). Tänä päivänä yheksän kuntaa: Jällivaaran, Haaparannan, Kaihnuun, Kirunan, Luulajan, Pajalan, Stokholmin, Uumajan ja Övertorneån kunnat, kuuluvat meänkielen hallintoaluheesheen.