Komisuunin tirektiivissä puhuthaan hyvityksestä ja sovinosta.
Hyvitys saattaa merkitä ette antaa vahvistusta elikkä tunnustamista intiviitile elikkä ryhmile jokka oon sattunheet väkistämisen elikkä loukkauksitten kohtheeksi. Väkistämiset ja loukkaukset oon saattanheet olla osana politiikasta elikkä stratekiistä jonka valtio ja muut aktöörit tehit minuriteettiä vasten yhtheiskunnassa ja tehtävitten konsekvensit saattavat vaikuttaa minuriteettiä pitkän aikaa etheenpäin. Hyvitys saattaa silloin olla ette tehhä näkyviksi ja tunnustaa ette väkistämiset ja loukkaukset oon toela tapahtunheet ja ette net oon antanheet konsekvensiä ihmisille elikkä minuriteetile.
Ette saaja jättää toistuksen ja selittää oman kertomuksen saattaa olla tärkeä osa ette kartottaa väkistämiset ja loukkaukset ihmisoikeuksista. Tunnustaminen uhritten kärsimisestä ja oikeuksista saattaa merkitteä hyvityksen niin intiviitile ko ryhmäle jollekko se oon tapahtunnu. Tunnustaminen saattaa auttaa ihmisiä ette jatkaa etheenpäin elämässä.
Se ei kuulu Tottuus- ja sovintokomisuunin tehtävhiin ette jättää ehotuksia korvauksesta elikkä muusta rahalisesta kompensasuunista yksityisile joilekko tämä oon tapahtunnu. Se ei kuulu ette vaatia vastuuttakhaan henkilöiltä jokka oon olheet matkassa väkistämisissä ja loukkauksissa.
Sovinto minuriteettiyhteyessä saattaa olla ette parantaa suhtheita ja ette pyrkiä elähmään enämpi tasavertasessa suhtheessa. Se saattaa kansa olla ette lisätä tietoa histuurialisista tapahtumisista ja minkä näköset suhtheet oon olheet majuriteettiyhtheiskunnan ja minuriteetin välilä. Tietoa saatethaan käyttää ette käsittää tämän päivän tilanetta paremin. Jos se joka oon tehny väkistämiset elikkä loukkaukset myöntää vastuuen entisille tapahtumille ja niitten konsekvensile, se saattaa tuottaa sitä ette suhtheet minuriteethiin puhistuvat ja ette saapii sovintoa intiviiti- ja ryhmätasola.