Akyytti-p-pilleri on keino millä välttää raskhautta jos on jo pitäny suojaamattoman samlaakin, esimerkiks kun unhoutti käyttää suojaa, ei ole perustanu siittä eli jos on joutunu seksuaalisen oikeuen loukkauksen kohteeksi.
Pittää kans ottaa akyytti-p-pillerin jos on riski ette se suoja mitä sitä käytti ei toiminu, esimerkiks jos kontoomi halkesi eli jos sitä on oksentanu ylös oman p-pillerin.
Tapletti minkä sitä ottaa sisältää hormoonia gestagen (gulkropps-hormooni). Se tekkee ette sitä ei saa ovylasjuunia (ägglossning) eli ette ovylasjuuni lykkäintyy etheenpäin.
Gestagen on kans tavalisissa p-pillerissä, mutta tuusi akyytti-p-pillerissä on paljon korkeampi. Se tekkee ette sivuvaikutukset saattavat tuntua enemältä, vaikka se on epätavalista.
Akyytti-p-pilleriä pittää vain käyttää hätäratkasuna ja ei säänölisenä suojana raskhautta vasthaan.
Akyytti-p-pilleri ei siis lopeta raskhautta ja siksi se ei ole sama asia kun abortti eli niin kututtu aborttipilleri.
Kuinkas käyttää akyytti-p-pilleriä?
Välistä akyytti-p-pilleriä kututhaan päivän-jälkhiin-pilleriks. Se on vähän väährään viittaavaa koska sitä ei häy ottaa tapletin päivän jälkhiin samlaakin. Akyytti-p-pillerin saattaa ottaa 72 tiiman sisälä, siis kolme vuorokautta jälkhiin samlaakin. Siinä aikakautena se vielä vaikuttaa.
Sen varemin sitä ottaa tapletin sen pienempi riski ette sitä tullee raskhaaks. Joku eli muutama päivä jälkhiin kun on ottanu akyytti-p-pillerin sitä saattaa saa vuoon, mutta suuriin osa ei saa sitä.
On kans olemassa erikoinen akyytti-p-pilleri mitä mennee käyttää aina viis vuorokautta jälkhiin suojaamattoman samlaakin. Sen saattaa vain baarmurska eli lääkäri kirjottaa ulos reseptilä.
Jos tarttee sellaisen reseptin sitä saattaa kontaktata nuoritten vasthaanoton, seksi- ja yhteiselämävasthaanoton, hoitosentraalin, baarmurskavasthaanoton eli vaimokliniikan. Useimiten sitä maksaa siittä. Joissaki vasthaanotoissa sitä saattaa saa sen ilman maksoja.
Mistäs saattaa saa akyytti-p-pilleriä?
Sitä saattaa saa akyytti-p-pilleriä uesimissa nuoritten vasthaanotoissa, seksi- ja yhteiselämävasthaanotoissa ja hoitosentraalissa.
Akyytti-p-pilleriä saattaa kans saa joissaki baarmurskavasthaanotoissa ja vaimokliniikoissa.
Niitä mennee kans ostaa aputeekissa ilman reseptiä.
Jos esimerkiks mennee nuoritten vasthaanothoon saahmaan akyytti-p-pilleriä sitä saattaa kans saa uuen aijan tehhä raskhaustestin, ja, jos niin haluaa, yhen klamydiatestin.
Sitä saattaa kans saa neuvoja kuinka suojaa itteä tulevaisuuessa raskhautta ja sukupuolitautia vasthaan, jos sitä haluaa sitä.
Mitäs akyytti-p-pilleri maksaa?
Jos ostaa akyytti-p-pillerin ilman reseptiä aputeekista sitä saapi maksaa siittä. Nuoritten vasthaanotossa saapi tapletin ilmhaisesti.
Kuinkas varma akyytti-p-pilleri on?
Riski ette tulla raskhaaks jälkhiin kun on syöny tapletin on pieni. Riski ette akyytti-p-pilleri ei toimi, siis sitä tullee raskhaaks, kasvaa sen pitemphään mennee ennen kun sitä ottaa pillerin jälkhiin samlaakin.
Jos oksentaa kolmen tiiman sisäle jälkhiin kun on ottanu tapletin eli jos on tiaree sillon ei ole varma ette ruumis on keriny ottaa ylös hormoonin. Sen takia sitä häätyy ottaa uuen tapletin niin hoppua kun maholista, muuten on riski ette tullee raskhaaks.
Mikä jällaa just sille akyytti-p-pillerile mitä sitä ottaa saattaa lukea metesiinin instryksjuunissa eli metesiinin pakkauspaperissa (bipacksedel). Metesiinin instryksjuuni on se lappu joka on metesiiniloovassa kun ostaa eli saapi akyytti-p-pillerin. Sitä saattaa aina kysyä baarmurskalta esimerkiks nuoritten vasthaanotossa eli iho- ja sukupuolivasthaanotossa, jos tuntee epävarmuutta.
Noin kolme viikkoa jälkhiin kun on syöny tapletin pittää tehhä raskhauventestin joka varmistaa ette ei ole tullu raskhaaks.
Kuinkas useasti saattaa ottaa akyytti-p-pilleriä?
Ei ole raijaa kuinka monta kertaa sitä mensiperjuutin aikana saattaa ottaa yhen akyytti-p-pillerin. Jos on pitäny samlaakia ilman suojaa ja ei halua tulla raskhaaks se on sen takia parempi ette ottaa akyytti-p-pillerin monta kertaa saman mensiperjuutin aikana, kun ette ei tehhä sitä, vaikka riski välivuothoin lissäintyy.
Jos tarvittee ottaa akyytti-p-pilleriä useasti sillon pittää ajatella kuinka sitä suojaa itteänsä samlaakin aikana, ja jos sitä tarttis muuttaa. Apua saapi kontaktaamalla nuoritten vasthaanoton, hoitosentraalin eli iho- ja sukupuolivasthaanoton.
Etuja
- Jos ei ole suojanu eli se suoja mitä on käyttäny ei ole toiminu sillon se on yks keino millä vähentää riskin ette tulla raskhaaks.
Haittoja
- Akyytti-p-pilleri ei suojaa sukupuolitauista.
- Hormooni saattaa vaikuttaa sillä tavala ette saapi esimerkiks päänsärkyä, jännityksiä rinnassa eli tuntee huonoa vointia, mutta net pruukaavat usseimiten ei kestää pitemphään kun vuorokauen.