Nuoritten suojaksi on olemassa ikärajoja koska saapi ostaa alkkuhoolia: 18 vuotta ette ostaa restayrangissa eli pybissä ja 20 vuotta ette ostaa systeemipuulaakissa. Vaikka saapi itte ostaa alkkuhoolia se on silti kieletty ette ostaa sellaisele joka ei saa tehhä sitä.
Miksis sitä juopi?
Moni juopi alkkuhoolia koska net pitävät ette se on hyvvää ja hauskaa. Jokkut juovat koska net tuntevat ittensä epävarmaksi. Jos juopi ette saa pareman ittentunnon eli ette vähentää ongestia eli jos juopi liikaa se juonti saattaa johtaa väärinkäythöön. Sitä saattaa kans voija kehnosti, sekä sillon kun juopi ja jälkhiin.
Kun on nuori se alkkuhoolin kokeminen saattaa tuntua ette se on kun yks askel raavastumisessa. Piian joku tarjoaa kotona, eli sitä pruuvaa itte eli kaveritten kans. Se on tavalista ette sitä ei oikeasthaan tiä jos sitä haluaa juoa ensi kerran, mutta tekkee sitä koska muut juovat eli ette sitä "pitäis" tehhä sitä. Mutta jos tohtii seisoa vasthaan porukanpainoa ja oottaa sillon on paljon voitettavana. Sen pitemphään sitä oottaa sen parempi, koska riskit vähentyvät ette sitä tärväintyy eli tullee riippuvaiseks alkkuhoolista.
Mitäs tapahtuu kun juopi?
Jos tullee päihiin aivon siknaalit häiriintyvät sillä tavala ette ajatus, tuntheet, muisto, balansi ja päätös- ja arvostelukyky toimii kehnomin. Kyky millä yhteisesti ohjaaa liikuntaa saapi kans vaikutuksia.
Kun päätös- ja arvostelukyky tullee kehnomaks sitä ei ymmärä asioita samala tavala kun sitä on selvilä eli raitis. Sitä piian tekkee sellaista mitä sitä ei muuten tekis: puhhuu enemän ja monen henkilön kans, tansaa, flirttaa eli rakkaa ja testaa uusia asioita. Kehnompi päätös- ja arvostelukyky vaikuttaa kans ette on vaikeampi ymmärtää jos joku on vaaralista eli missä on vaaroja. Jos on päissä sitä saattaa yhtäkkiä hoksata ette tehhä sellaista mikä saapi vakavia seurauksia.
Jokkut asiat mikkä saattavat tapahtua kun on juonu:
- Sitä menettää kampheita eli ette net menevät rikki, koska ei ole kollia eli ette joku varastaa.
- Sitä joutuu riithaan, taistelhuun eli tappelhuun. Se on tavalista ette riita päissä alkaa värkkäämällä jostaki mistä sitä ei riitelis selvin päin.
- Sitä pittää seksiä vaikka ei halua sitä. Jos on päissä se saattaa olla vaikea sanoa ei, ja se saattaa johtaa ette sitä itte, se eli net kenen kans sitä pittää seksiä eli muut voivat kehnosti jälkhiin päin, eli ette joutuu seksuaalisheen loukkauksheen.
- Sitä pittää seksiä ilman suojaa, ja riskeeraa ette sitä saapi sukupuolitautia, eli tulla eli tehhä jonku raskhaaks.
- Sitä testaa uusia trookia. Suuriin osa on juonheet alkkuhoolia kun net käyttävät narkotiikkaa ensi kerran, piian sen takia ette sitä ei usko ette se on vaaralista.
- Sitä joutuu vahinkhoon. Se saattaa esimerkiks olla mupeetin eli biilin kans, sitä lankeaa ja lyöpi ittensä eli putoaa vetheen.
- Sitä ottaa eli rikkoo kampheita jokka ei ole omat, eli sitä mennee sisäle johonki missä sitä ei saa olla.
- Sitä voipi kehnosti ja saapi ongestia jälkhiin kun on juonu. Se saattaa riippua siittä ette sitä on tehny asioita mitä sitä kattuu eli häpeää, eli se tullee reaksjuunina ruuhmiista.
- Sitä saapi vaikeuksia hoitaa koulun eli työn. Alkkuhooli jääpi ruuhmiisheen jälkhiin kun ette sitä on ollu päissä, ja se saattaa ottaa enemän kun päivä ennen kun aivot toimivat täyesti esimerkiks ette muistaa ja oppia uusia asioita.
Jokku uskovat ette se ei ole niin vaaralista ette juoa jos ei tehe sitä liian useasti, esimkerkiks vain viikonloppuina, juhlina, vaikka sitä sillon juopi paljon. Mutta se ei piä paikkaa.
Päivän jälkhiin
Sitä saattaa vieläkin olla alkkuhoolin vaikutuksessa päivän jälkhiin kun on juonu. Se riippuu siittä kuinka paljon on juonu. Yks esimerkki on ette yhen starköölin alkkuhooli on ruuhmiissa suunile kolme neljä tiimaa. Ei ole keinoa millä sen sais menemhään poies kätevämin. Kun on kohmelossa päätös- ja arvostelukyky on sillonki kehnompi kun tavalisesti ja on vaikea hoitaa asioita niin kun pitäis. Esimerkiks se saattaa olla vaaralista aijaa mupeetia eli biiliä, ja jos on alkkuhoolia jäljelä ruuhmiissa se on laitonta.
Alkkuhoolimyrkytys
Kaikin reakeeraavat eri tavala alkkuhoolhiin ja kestävät enemän eli vähemin, mutta on olemassa aina yks raja missä ruumis sannoo poies. Se pruukaa olla ette sitä oksentaaa eli nukahtaa. Se saattaa olla hyvinki vaaralista jos menehtyy eli mennee tyrhmään, ja sitä häätyy mennä sairalhaan.
Jos on kiusoissa jostaki joka on juonu, sitä pittää kontaktata jonku raahvaan, siukkahoijonneuvonan, puliisin eli mennä sairalhaan. Jos joku mennee tyrhmään sitä pittää soittaa 112. Sitä ei piä yrittää saa henkilön oksentamhaan eli kaataa kylmää vettä sen pääle, koska sillon on riski ette saapi muita vahinkoja eli tärväyksiä.