Oma ittentunto vaikuttaa paljon kuinka sitä ellää oman elämän ja kuinka sitä voipi. Hyvä ittentunto vaikuttaa ette sitä tekkee sellaista mikä on hyvä ittele, ette tohtii tehhä sellaista mitä haluaa, tohtii sitoa uusia kontaktia ja saattaa sanoa sekä joo ja ei asihoin.
Jos on prupleemia oman ittentunnon kans se saattaa vaston päin johtaa ette sitä välttää tehhä sellaista mitä sitä oikeasthaan haluais tehhä. Sen eestä sitä piian tekkee sellaista mitä sitä oikeasthaan ei halua eli tekkee sellaista enemän muitten vuoks kun oman vuoks.
Ittentunto ja ittenluottamus ei ole sama asia
Ittentunto ja ittenluottamus sekotethaan välistä yhteen, vaikka net ei ole oikein samoja asioita.
Ittenluottamus on prestasjuunitten kans tekemistä, siis kuinka paljon sitä uskoo ette sitä saattaa tehhä ja pärjätä eri asioitten kans.
Ittentunto koskee sitä kuinka sitä kattoo kuka sitä on syvviimessä, sekä vahvoitten ette heijotten puolilta kattottu.
Jos on hyvä ittentunto sitä ei välitä yhtä paljon siittä mitä muut tykkäävät ja ajattelevat sinusta. Sitä tohtii olla niinku sitä on, olla ittensä. Sitä ei perusta jos kaikin ei piä ette sitä on paras eri asioissa.
Jos on huono ittentunto se saattaa vaston päin tuntua kauhean raskhaalta jos saapi ainukaisen komentaarin esimerkiks omasta ulkonäöstä.
Yhteys vallan ja ittentunnon kans
Jos on valtaa omasta elämästä riippuu siittä jos on hyvä eli huono ittentunto. Kun sitä tuntee ette sitä saattaa itte päättää ja vaikuttaa omhaan elämhään se on helpompi pittää hyvän ittentunnon.
Vastonpäin ittentunto saattaa laskea jos tuntee ettei ole valtaa omasta elämästä. Se saattaa esimerkiks tuntua raskhaalta ette muuttaa ommaa tilanetta kun on pitkhään hakenu töitä ilman ette saapi mithään, eli kun net kenen kans sitä assuu yhessä päättävät liikaa omasta elämästä.
Kuinkas hyvän ittentunnon saattaa huomata?
Oma ittentunto saattaa olla parempi eli kehnompi eri elämän vaiheissa ja se saattaa kans olla vaihtelevan vahva eri tilantheissa. Kun on hyvä ittentunto sen saattaa huomata kun:
- tuntee ette sitä kelpaa, vaikka ei ole hyvä kaikissa
- tuntee ette on oikeus ottaa tillaa ja tehhä sijjaa ittele ja näkyä ja kuulua ja ette tuntea ette sitä on respekteerattu
- tohtii sanoa kuinka sitä voipi eli mitä sitä tykkää
- hyväksyy ette ei kaikin tykkää ittestä
- tuntee ette on oikeus sanoa sekä joo ja ei asioile
- saattaa tahtoa apua kun sitä tarttee
- tuntee ette sitä on sen arvonen ette saapi voija hyvin, ette sitä hoitaa ittensä ja tekkee sellaista mikä sitä voipi hyvin
- tohtii pruuvata uusia asioita ja uusia tilantheita
- tohtii epäonnistua
- tohtii ottaa yhteyttä ihmisitten kans
- saattaa antaa sekä pusitiivista ja nekatiivista kritiikkiä muile
- saattaa olla se mitä sitä on ja sen näkönen kun sitä on
- tuntee olevan okej vaikka kaikki ei ole perfektiä
- tohtii ottaa vastuun siittä mitä tekkee ja on tehny
- tohtii tunnustaa virheitä ja pyytää antheeksi jos on loukanu kethään
- saattaa palkita ja killata itteä
Kuinkas heijon ittentunnon saattaa huomata?
Kun ittentunto on heiko sen saattaa huomata kun:
- tuntee voivan kehnosti, ette sitä pittää ettei sitä ole minkhään arvonen
- tekkee sellaista joka ei ole hyvä ittele
- välttää olla muitten kans
- välttää pruuvata uusia asioita
- yrittää olla mieleksi kaveri- ja rakhaussuhteissa
- ei tehe sijaa ja tillaa ittele eri paikoissa ja tilantheissa
- on useasti mustasukkanen eli katheelinen muile
- tullee kauhean ikäväks jos epäonnistuu jonku kans mitä tekkee
Huono ittentunto saattaa näkyä kun henkilö tappelee, mobbaa eli on ilkeä muile. Se saattaa kans olla niin ette sitä yrittää piilottaa huonon ittentunnon olemalla syyppervireä ja paras kaikissa, eli ette sitä kehhuu itteä.
Miksis saapi heijon ittentunnon?
On monta eri syytä miksi saattaa olla matala ittentunto. Kaikin tarvittevat saa killausta, tulla nähtyksi ja respekteeratuks siittä mitä net on. Ittentunto laskee jos sitä kasvun aikana on saanu kuulla ette sitä ei ole tarpheeks hyvä, ette sitä ei kelpaa mihinkhään eli ette sitä on vaikea ja pruplemaattinen.
Samala henkilö joka on saanu arvostusta ja killausta vain sillon kun se on presteeranu hyvin, esimerkiks sporttikilpailussa eli koulupruuvissa, saattaa uskoa ette hän ei kelpaa muuten kun se tekkee jotakin hyvvää. Ette sitä ei kelpaa vain olemalla.
Ittentunthoon vaikuttaa kans nekatiivisesti jos sitä ei ole nähty ollenkhaan koko kasuamisen aikana, esimerkiks jos omat vanheemat eli net kenen kans kasus ylös ei ole kotona paljoakhaan, jos net on kipeät, käyttävät väärin viinaa ja trookia eli on liikaa omassa elämässä ja net ei kerkiä ja jaksa nähhä omia lapsia.
Tunne ette sitä ei kelpaa saattaa kans riippua siittä ette sitä on herkempi tuntheissa alusta lähtien. Jos on herkkätuntheinen saattaa olla matala ittentunto, vaikka on ollu hyvä kun kasus ylös.
Riippumatta mistä se johtuu ette on matala ittentunto, se saattaa tulla paremaks.
Tuntea itteä erinlaisena, ulkopuolela ja verrata itteä muihin
Se saattaa kans vaikuttaa omhaan ittentunthoon kuinka samanlainen sitä on sen perheen eli niitten henkilöitten kans kenen kans kasvaa ylös. Jos kaikin muut tykkäävät sportista ja sitä itte ei ole ollenkhaan kiinostunu siittä, sitä saattaa tuntea väärinkäsitetyks ja tulla epävarmaks ittestä. Muut asiat jokka saattavat vaikuttaa ette ittentunto laskee saattaa olla ette sitä:
- tuntee olevansa ulkopuolela eli on mobattu
- on työtön
- on vaikea päättää mitä pittää tehhä elämän kans, niinku minkälaista koulutusta pitäis käyä eli minkälaisheen työhön pitäis satsata.
- voipi psyykkisesti huonosti ja on esimerkiks paljon ahistusta eli tuntee olevan teprimeerattu.
- Moni vertaa niitten kans ketä tuntee eli henkilöitten kans reklaamissa ja meetiassa. Sen korkeamat vaatimukset on itheen – ette sitä pittää olla paras kaikessa, kaunis ja popylääri – sen vaikeampi on ette olla tyytyväinen ittensä kans.
Ittentunto ei aina näy päältä päin
Se on vaikea nähhä ulkoa päin kuinka joku kokkee ommaa ittentuntoa. Joku saattaa pinnalta näyttää hyvin onnistunheelta, olla hyvän näkönen, olla hyvä koulussa eli töissä ja olla paljon kaveria, sillä saattaa tosiasiassa olla matala ittentunto ja tuntea ette hän ei kelpaa ja riitä mihinkhään.
» Tipsiä kuinka parantaa ommaa ittentuntoa