Jokkut, ketä mobathaan, alkavat uskhoon ette se on heissä ittessä vika. Net piian ajattelevat ette muuttaa itteä ja sillä tavala päästä poies mobbauksesta. Mutta ei piä tarttea muuttaa sellaista kun harrastuksia eli mitä vaatheita pittää päälä, vain sen takia ette muut on ilkeät. On aina oikeus olla vapa mobbauksesta.

Koskas se on mobbaus?

Se on mobbaus, jos monta kertaa kiusathaan, uhathaan, halveksuthaan, lyöthään, loukathaan eli pilkathaan. Mobbaus saattaa olla viskuttelua, silmänvilkhauksia, naurua, pukkimista, lyöntiä ja häijyjä sanoja. Se on mobbaus jos ei koskhaan saa olla matkassa, eli jos joku levittää valheelisia huhuja jostaki.

Sitä saattaa kans olla ette joku lähättää häijyjä sms:iä eli meiliä, kirjottaa alentavia komentaaria feispukissa, blokissa eli muuala internetissä. Eli ette joku pannee pilkaavia eli loukkaavia kuvia internetti verkosthoon.

Jos joku sannoo ilkeitä ja alentavia asioita, jos sitä on erikoisissa vaatheissa eli jonkun tietyn laila näkönen eli jos on fynksjuunieste, sillon se on mobbaus. Jos sitä on jonkun näitten kohteena, ja alkaa voimhaan kehnosti siittä, saattaa hakea apua ette saa sen loppumhaan.

Selitä mobbauksesta

Sen saattaa tuntea hermostusta siittä ette selittää jollekin ette sitä on mobattu. Piian uskothaan ette se tullee pahemaks jos selittää. Piian hävethään ette sitä on hylätty ja jätetty ulkopuolele. Mutta se joka on mobattu ei ole tehny mithään väärin!

Jos tullee mobbauksen kohteeksi on parasta ette selittää sen ja saa apua ette lopettaa mobbauksen. Sitä saattaa esimerkiks selittää sen yhele opettajalle, koulukyraatturile eli koulusysterile.

Se saattaa olla hyvä ette alkaa selittämhään mobbauksesta jollekin raahvaale kenheen on luottoa, esimerkiks joku perheessä, ja sitten ottaa apua niiltä ette selittää sen jollekin koulussa.

Jos koulu saapi tietää ette yks koululainen tuntee olevan mobattu net häätyvät varsin ottaa selvile mitä on tapahtunu. Net häätyvät kans tehhä kaiken ettei se tapahtu uuesti. Koulussa olevilla raahvoila on velvolisuus ette kattoa perhään ettei yhtään koululaista mobata eli uhata. Se seisoo laissa ette se on koulun vastuu kattoa perhään ettei kethään mobata.

Hyvä ajatella jos kokkee mobbausta:

  • Ei saa koskhaan syyttää itteä, jos sitä kokkee mobbausta.
  • On olemassa lakia jokka sanovat ette ei saa mobata esimerkiks koulussa eli työpaikala.
  • Se on kans rikos jos joku uhkaa kethään, esimerkiks uhkaa väkivallala eli uhkaa levittämällä kuvia internetissä.
  • Koulut ja työnantajat on velvolisia yrittämhään tehhä niin ette kaikin tuntevat turvaa.
  • On hyvä ottaa yhteyttä johonki raahvaasheen kenheen luottaa, esimerkiks yks vanheemista eli joku muu ketä tuntee.
  • Saattaa kans ottaa yhteyttä koulukyraatturin eli nuoritten vasthaanoton kans ja sielä saa puhua ja saa neuvoa ja tukea.
  • Jos koulu saapi tietää ette koululainen tuntee olevansa mobattu net on velvoliset kattoa perhään ette se ei jatku.
  • Jos mobathaan koulussa ja ei saa apua omalta koululta sillon saattaa tehhä ilmotuksen Lasten- ja koululaisenompyytile.
  • Ota yhteyttä puliisin kans jos joku levittää kuvia sinusta ilman sinun luppaa. Se on rikos henkilötietolain mukhaan. Loukata eli mobata kethään internetissä on yhtä laitonta kun tehhä sitä koulukartanolla eli vapa-aijankoissa.