Sitä saattaa käyttää kontoomia sukupuolitauvitten suojana monenlaisessa seksissä niin kun vakiinaseksi, anaalisamlaaki ja jos pittää suuseksiä peeniksen kans. Vakiinaseksissä se suojaa kans raskhauvesta.
Sitä saattaa kans käyttää kontoomia kun unaneeraa, jos sitä pittää ette se on mukava ja sen takia ette sitä tullee taitavaks panna pääle sen ja tietää miltä se tuntuu ette saa spermaa kontoomhiin.
On olemassa erikokosia kontoomia, muotoja, färiä ja makuja. Suuriin osa kontoomista mitä on ostettavana tavalisissa kaupoissa on aika samanlaisia, mutta niitä mennee löytää intternetistä ja seksikaupoista missä on monenlaista tavaraa rikhaasti aika suuren vaihtelun koosta ja muoosta
Erit kontoomit sopivat paremin eri peenikshiin ja sen takia se saattaa olla hyvä ette testata siksi ette löytää kontoomin mistä tykkää.
Suuriin osa kontoomista on saahnet liukuvoitheen käsittelyn siksi ette net pitävät olla mukavat käyttää eikä saa hieroa.
Jos on laateksin (kymmin) alerkinen sitä saattaa käyttää kontoomia joka on tehty plastista.
Kuinkas kontoomia käytethään?
Kontoomi panthaan kovan peeniksen eli seksileeksaakin pääle. On tärkeä ette kontoomi on päälä koko samlaakin aikana, muuten se ei suojaa sukupuolitauvista ja raskhauvesta.
Jos tullee sperma kontoomhiin sitä pittää olla varovainen kun vettää ulos peeniksen ettei yhtään spermaa valoaa vakiinhaan eli anaalhiin.
Sitä saattaa tarvita träänata vähän kuinka panthaan oikeala tavala kontoomin pääle. Jos on peenis sitä saattaa träänata panna pääle sen kun unaneeraa. Jos ei ole sitä sitä saattaa käyttää esimerkiks dildoa eli muuruuttia mihinkä träänaa.
Näin tehhään kun pittää panna kontoomin esimerkiks peeniksen eli dildon pääle:
- Aukase kontoomiloovan.
- Rullaa ylös kontoomin vähän matkaa ette se näkkyy mihinkä päin sen pittää rullata pääle.
- Jos kontoomi panthaan peeniksen pääle se peenis pittää olla kova kun kontoomi rullathaan pääle.
- Jos on esinahka sen pittää vettää takashiin.
- Pane kontoomi ollonin nokhaan, paina sormila kontoomikäärön pääle samala kun kontoomi rullathaan alas, sillä tavala ei tule ilmaa peeniksen eli dildon ja kontoomin välhiin.
- Kun kontoomi on rullattu koko matkan alas, veä kontoomia sillon vähän ylös ja alas aina siihen asti ettei ole mithään rullaamista ulos. Jos kontoomi on peeniksen päälä sen pittää vettää ulos ennen kun stonti on laskenu. Piätä kontoomin ympäri peeniksenvarrela, kun peenis veethään ulos, ja ettei kontoomi putoaa pois.
- Viskaa kontoomi roskhiin. Älä spuulaa sitä tualethiin.
Mistäs kontoomia saathaan?
Kontoomia pruukathaan jakkaa eli myyä nuoritten vasthaanotoissa.
Niitä mennee kans ostaa muun muassa aputeekissa, ruokakaupoissa, kioskissa ja verkostossa. Kontoomia myythään kans joissaki biukraafin auttomaatissa, restayrangissa ja klybissä. Suurempia kontoomin mallin variasjuunia löytää seksikaupoissa, missä on rikas tarjonta, ja verkostossa.
Mitäs kontoomi maksaa?
Kontoomia myythään useasti monta yhessä paketissa. Kostanus riippuu siittä minkälaisen kontoomin valittee ja missä sen ostethaan. Nuoritten vasthaanotossa pruukathaan jakkaa kontoomia ilmhaisesti eli myythään halvemala hinnala.
Kuinkas varma kontoomi on?
Kontoomi on varma suoja sekä sukupuolitauthiin ja raskhautheen jos sitä käytethään oikeala tavala, koko samlaakin aikana ja joka kerta kun on samlaaki.
Kontoomia pittää säilyttää huonheenlämmössä ja paikassa missä se ei hio mihinkhään. Hyvät paikat missä niitä säilyttää on esimerkiks jakanplakkari eli väskyssä.
Huonot paikat on esimerkiks takaplakkari eli aurinkonpuolisen klasipenkilä. Kontoomi joka on vanhaa eli kuivanu halkea helpola.
Etuja
- Hyvä suoja sukupuolitauthiin.
- Varma suoja raskhautheen.
- Ei vaikuta ruumista.
Haittoja
- Saattaa olla häirittevä mumentti koska sen mennee panna pääle vasta kun se seisoo, eli on ereksjuuni.
- Sitä häätyy kans valvoa ette se on käytettävissä kun sitä haluaa pittää samlaakia.
- Sitä tarvittee vähän harjottelua ennen kun se on helppo panna pääle ja tuntuu hyvältä käyttää.
Älä käytä ihovoijetta eli öljyä!
Sitä ei piä käyttää rasvabaseerattua ainetta kun öljy eli ihovoijetta suojitten kans jokka on tehty laateksista (kymmistä), kun kontoomi, femitoomi eli nuolulappu (slicklapp). Rasva saattaa nimittäin hauristaa suojaa ja tekkee ette se helpomin särkyy.
Sen eestä, jos käyttää liukuvoijetta, joka perustuu vesi- eli silikooni ainheeshiin, laateksi suojan kans, se toimii erittäin hyvin.
On olemassa erityyppisiä liukuvoitheita: vesi- eli silikoonibaseerattuja, eli liukuvoije joka on sekotus molemista ainheista. Nämät ainheet mennee hyvin käyttää kaikitten eri tyypitten suojitten kans.