Se joka joutuu mobbauksen kohteeksi saattaa tuntea pölköä, ikävää ja loukkausta. Sitä saattaa tietysti tulla ikähviin ja voija kehnosti jos se vain tapahtuu kerran, vaikka sitä ei kuttuta mobbaukseks. Mutta se jota mobathaan pitemän aijan saattaa saa ittentunnon vaikutuksia ja sitä saattaa tuntea olevan hyvinki yksin.
Mikäs on mobbinki?
Mobbaus saattaa olla viskutuksia, kattomista, naurua, pukkimista, lyöntiä ja häijyjä sanoja. Se saattaa kans olla ilkeitä sms:iä, meiliä, eli kirjotuksia feisbukissa, eli jos sitä on vainottu verkostossa.
Mobbaus saattaa kans olla ette joku jätethään ulkopuolele vain sen takia ette henkilö ei ole sellaisissa vaatheissa mitä muut pitävät ette pitäis olla, eli ette sitä on jotenki erityisen näkönen. Se saattaa olla ette sitä ei saa olla matkassa, eli ette ihmisiä levittävät huhuja ittestä. Jos se saapi sen tuloksen ette joku voipi kehnosti, sillon se on mobbaus.
Mobbaus on vahva sana monele. Piian net jokka mobbaavat ei ymmärä ette se toela on kysymys mobbauksesta. Net saattavat piian esimerkiks sanoa ette se oli vain lievä kiusaus, riita eli värkkäys. Mutta riiassa sitä on enemän tasalujia ja suunile yhtä ilkeät toisile.
Samala tavala toimivat häijyt vitsit. Se joka mobbaa saattaa välistä syyttää ja kieltää sanomalla ette se oli vain vitsi. Mutta jos joku voipi kehnosti siittä, sillon se on mobbaus.
Välistä mobbaus on niin vakavaa ette se on rikolista. Esimerkiks pahonpitely, jos lyöpi kethään. Trakaseeraus eli tiskrimineerinki on kans rikolista. Se on rikolista ette uhata kethään, eli ette pakottaa jonku alle 15 vuotta tekemhään jotakin seksuualista verkostossa.
Jos sitä kohtelee kethään ilkeästi esimerkiks henkilön sukupuolen eli uskonon takia, sillon se on tiskrimineerinki. Varsin ku joku on ilkeästi koheltu sen pittää ottaa vakavasti!
Mistäs mobbinki johtuu?
Useasti mobbaus saattaa alkaa siittä kun porukassa on huono stämninki eli tunnelma. Net jokka mobbaavat yrittävät piian pittää pientä porukkaa koossa olemalla ilkeä jollekin muule. Välistä mobbaus johtuu siittä ettei ole yhtään raavasta lähelä joka ottaa vastuun ette kaikin käyttäytyvät hyvin toisia kohti.
Mobbaus saattaa kans riippua siittä ette se joka mobbaa voipi kehnosti ja käypi muitten pääle ja sillä tavala tuntee ittensä lujemaks. Välistä mobbaus saattaa lissäintyä koska muut siinä lähelä ei tohi vastustaa ja kieltää sellaista. Net piian pölkäävät ette tulla itte mobatuks eli menettää kaveria.
Kuinkas mobbinki saattaa vähentyä?
Se ei ole koskhaan nuoren henkilön vastuu ette estää mobbausta. Koulussa se on vanheemitten vastuu ette valvoa ettei kukhaan jouvu mobbauksen kohteeks. Silti kaikin saattavat vaikuttaa ette vähentää mobbausta.
Jos sitä huomaa ette joku loukkaintuu eli tuntee olevansa ulkopuolela, sitä saattaa näyttää ette sitä on huolissa ja perustaa. Välistä se saattaa riittää ette sanoa hei, eli kysyä jotakin arkipäivälistä, ja se sinänsä saattaa antaa tunnetta ette joku perustaa.
Sitä saattaa kans olla avuks selittämällä jolleki joka on koulussa töissä jos sitä huomaa ette joku on mobattu.
» Jos kokkee mobbausta