Jos sitä ajatellee kuinka pittää tehhä kun muiskii eli kuhertellee, se saattaa olla hyvä ajatella ettei ole yhtään sääntöä kuinka pittää tehhä. Jos testailee ja tekkee sillä tavala mikä tuntuu hyvältä ittele, sillon se usseimiten tuntuu hyvältä kenen kansa sitä muiskii ja kuhertellee.

Pyssiä

Pyssaaminen on ette painella huulia toisen huulia vasthaan eli muuhun paikhaan ruuhmiisheen. Useasti sitä smakkaa äänekhäästi samala. Kun pyssailee toista ihmistä suu on kiini.

Muiskuja

Kun muiskii toisen kans niin pruukathaan sekä huulila ette kielelä koskettaa toisia. Se on kuin hyväilthään ja tulthaan smeekatuks kielelä ja huulila. Sen saattaa kans kuvata ette sitä maistaa jotakin toista. Tavalinen tapa ette alkaa muiskimhaan on ette alkaa ensin pyssaamisella. Jos sitten haluaa muiskia sitä saattaa erottaa vähän huulia ja painaa ulos kielen juuri vähän niin ette se juuri koskee toisen huulhiin. Sillon huomaa jos se toinen kans erottaa huulet niin ette kielet saattavat kohata.

Ei ole sääntöjä kuinka muiskithaan toisia, esimerkiks kuinka kauas sisäle sitä pittää pistää kielen eli kuinka paljon pittää erottaa huulia, vain itte sen päätethään. Usseimiten se pruukaa selvitä ittestä kun muiskii jotaki. Mutta yks tipsi on ette alottaa varovaisesti niin ette ei varsin paina kieltä ja liikuta ja survo sitä lujasti toisen suussa. Se pruukaa tulla hyvä jos kokkeilee.

On vaikea muiskia jotaki suorhaan eestä koska nokat helpola krokkaavat. Sen takia pruukathaan tarvita kallistaa vähän päätä ette päästä paikale. Se saattaa olla helppoin ette henkiä nokan kautta kun muiskii jotaki. Saapi pruuvata ette oppii mikä tuntuu hyvältä.

Se mennee hyvin muiskia hammaställninkin eli piersinkin kans.

Sitä saattaa kans muiskia toisia ruuhmiin pääle. Missä paikkaa ruuhmiissa sitä muiskii ja pyssailee eli haluaa tulla muiskituks sitä päättää itte yhessä sen kans ketä sitä muiskii ja saapi pyssiä ja muiskuja.

Halauksia ja hyväilyä

Se saattaa tuntua hyvältä ette tuntea jonkun muun ruumista, esimerkiks hallaamalla ja hyväilylä. Sitä saattaa hyväilä ja halaila sekä ilman ette vaatheitten kans. 

Kuhertelu eli hongeli

Kuinka kuhertelhaan eli honglathaan oikeasthaan? Kuherteluks pruukathaan kuttua sitä kun muiskii, pyssaa, hallaa ja hyväilee jotaki. Muiskiminen ja hallaaminen samala aikaa saattaa siis olla kuhertelu. Just niinku hyväily ja pyssailu ruuhmiin pääle saattaa olla kuhertelu. Kun kuhertellee sitä saattaa kans painaa ja hieroa toishiin.

Sitä saattaa kuhertella monela eri tavala, esimerkiks rauhalisesti ja hiljaisesti eli kovasti ja kiihkosesti. Useasti kuhertelu vaihtelee samala aikana kun sitä tehhään. Se saattaa kans vaihtella kerrasta kerthaan ja henkilöstä henkilhöön. Sitä saattaa kuhertella täyesti vaatetettuna, vähäsillä vaatheila eli täysin alasti. Saattaa kuhertella monessa asenossa, esimerkiks kun seisoo, istuu eli makkaa.

Kun kuhertellee paljon ja on vähän eli on ilman vaatheita sitä kans kututhaan krouviks hongeliks eli kuherteluks.

Sotku (strul)

Jokkut kuttuvat kuhertelun sotkuks. Mutta sotku saattaa kans merkitä muita asioita. Jokkut pitävät esimerkiks ette sitä sotkee kun sitä flörttaa eli pittää seksiä jonku eli muutaman kans. Henkilö kenen kans on tehny sitä mennee kans kuttua yheks sotkuks. 

Mikä tekkee muiskimisen ja kuhertelun nautittavaks?

Ette olla lähelä ja olla hyväilun kohteena tekkee ette iho, kieli ja huulet reakeeraavat ja lähättävät signaalia aivhoin ette se tuntuu hyvältä ja jännittävältä. Se saattaa kans tehhä ette tullee kiimhaan. Se on ruuhmiin hermot jokka hoitavat tuntheen ja lähättävät signaalia aivhoin. Niin ette kuhertelu tullee tuntumhaan hyvältä ja hauskalta on tärkeä ette sitä itte ja sen kans kenen kuhertellee haluaa tehhä sitä.  

Eri henkilöt pitävät vaihtelevasti paljon muiskimisesta ja kuhertelusta. Ei ole yhtään mikä on oikein eli väärin ette tuntea, vain sitä saapi kuunella itteä, jos sitä tykkää ette on hyvä muiskia ja kuhertella, eli jos sitä mielumin haluaa tuntea läheisyyttä muula tavala.

On aina oikeus kieltää jos ei halua muiskia eli kuhertella, eli jos se ei tunnu hyvältä sillä aikaa kun tekkee sitä. Ei piä koskhaan hyväksyä muiskimista ja kuhertelua vain sen takia ette joku muu haluaa sitä.

Maku ja haiju

Kaikin maistuvat ja haisevat eri tavala. Kuinka sitä haisee ja maistuu muuttuu kans, esimerkiks riippuen mitä on syöny, kuinka sitä on pessy ittens, kuinka vaatheet haisevat ja niin pois päin. Jos on lentsu ja on infeksjuuni sillon sitä saattaa haista eri tavala suusta kun muuten tekkee.

Saattaako tulla raskhaaks eli saa sukupuolitautia kuhertelusta?

Sitä ei saata tulla raskhaaks kuhertelusta. Sitä ei saata saa minkhäänlaista sukupuolitautiakhaan. Kuhertelu on siis sekä nautittava ja varma tapa olla jonku lähelä.