On olemassa monta eri sortin kombineerattuja p-pilleriä, joissaki on enemän östrojeeniä, toisissa enemän gestajeeniä. Se tekkee ette net vaikuttavat ruuhmiissa eri tavala. Sen takia saattaa tarvita testaila ennenku löytää sen sortin joka passaa parhaiten.
Net p-pillerit jokka vain sisältävät pienissä tuusissa hormoonia gestajeeniä kututhaan miinipilleriks. On olemassa kans pilleri missä on korkeampi gestajeenituusi, jolla on sama suoja kun kombineeratuissa p-pillerissä.
Minkälaisen kartan sitä saapi riippuu siittä minkälaista p-pilleriä sitä käyttää. Kartta missä kans on taplettia ilman hormoonia saattaa olla hyvä pittää, jos tykkää ette se on vaikea muistaa koska pittää alkaa seuraavan kartan kans.
Sillä viikola, kun syöpi taplettia ilman hormoonia, eli ei ota taplettia ollenkhaan, saapi erinlaisen mensi tyypin. Sitä kututhaan välistä p-piller-mensiks, eli poislykkäävä vuoto. Vaikka ei ota p-pilleriä sitä on silti raskhauvesta suojattu sillä viikola.
Kuinka käytethään p-pilleriä?
Jos käyttää p-pilleriä sitä saapi kartan missä on 21 eli 28 taplettia. Sitä pittää ottaa yhen tapletin suunile samala aikaa joka päivä.
Jos on kartta missä on 21 taplettia niin sillon sitä ottaa viikon pitkän pausin, jälkhiin kun on syöny kaikki tapletit kartassa.
Jos on kartta missä on 28 taplettia niin sillon syöthään taplettia ilman hormoonia kartan viimisinä päivinä. Kuinka monta taplettia ilman hormoonia sitä saapi vaihtelee ja riippuu siittä minkälaisia p-pilleriä sitä ottaa. Net tapletit jokka ei sisälä hormoonia kututhaan välistä sokkeripilleriks.
Jos on unohtanu eli oksentanu ylös p-pillerin?
Se on tärkeä ette ottaa tapletin suunile samala aikaa joka päivä. Jos missaa enemän kun 12 tiimaa, siis ette mennee enemän kun 36 tiimaa kahen tapletin välissä, sillon on vaara ette sitä ei ole ennää suojattu.
Kuinka pitkhään saapi korkeinthaans mennä kahen tapletin välissä vaihtelee ja riippuu siittä minkälaista p-pilleriä sitä käyttää ja missä paikassa sitä on kartassa. Se mikä jällaa just niile p-pillerile mitä sitä ottaa saattaa lukea pakkauspaperissa. Pakkauspaperi on se informasjuuni, joka seuraa taplettiloovassa kun ostaa p-pillerit.
Sitä saattaa kans kontaktata sen vasthaanoton missä sitä sai p-pillerit uloskirjotetuks.
Jos on riski ette sitä ei ole ennää raskhauvesta suojattu sitä saattaa tehhä seuraavalla tavala:
- Ottaa se eli net p-pillerit mitä sitä missasi niin kätevästi kun maholista.
- Käyttää kontoomia eli pesaaria, jos on yhtyntää seuraavina seittemän päivän aikana. Sitten sitä on taasen suojattuna.
- Ottaa akyytti-p-pillerin, jos on pitäny yhtyntää viimi viien vuorokauen aikana ennenku missasi ottaa oman tapletin, koska spermiet saattavat ellää kohtuussa ja munajohtimessa (äggledare) monta päivää.
Jos oksentaa neljän tiiman aikana jälkhiin kun on ottanu p-pillerin, eli jos on tiaree sillon se ei ole varmaa ette ruumis on keriny ottaa ylös hormoonit. Sillon pittää ottaa uuen tapletin ja sillä tavala sitä on vieläki suojattuna.
Sen uuen tapletin pittää ottaa muusta kartasta niin ette ei puutu mithään siittä mistä sitä just sillon käyttää. Sen kartan saattaa pittää reservinä, jos tarvittee ottaa ekstraa jollakin muulaki kerrala.
Jos on ollu vattakipeänä eli jostakin syystä tuntenu ette sitä on epävarma, jos on ottanu kaikki tapletit kun pittää, sillon on hyvä suojata ittens kontoomila eli pesaarila seuraavitten seittemän päivän aikanaki.
Saattaa aina kysyä yheltä paarmurskalta, esimerkiks nuoritten vasthaanotossa eli paarmurskan vasthaanotossa, jos tuntee ette sitä on epävarmana.
Siirtää mensin p-pillerin avula
Välistä se saattaa olla sopivaa ette lykätä mensiä etheen päin, esimerkiks jos pittää mennä reishuun. Sen saattaa tehhä p-pillerilä. Sillon sitä alottaa uuela kartala suorhaan perhään kun aiempi on loppunu. Jos ottaa sokkeripilleriä sitä hyppää yli net, ja mennee suorhaan uutheen karthaan. Se merkittee ette sitä ei tehe yhtään paysia hormoonitapletitten kans ennenku haluaa saa mensin, esimerkiks kun tullee kotia reisusta.
Se ei ole vaaralista siirtää mensiä tällä tavala, ja sitä saattaa tehhä sen monta kuukautta.
Mutta sen pitemphään sitä yrittää lykätä oman mensin sen suurempi vaara on ette lykkäys epäonnistuu ja ette sitä sillon saapi vuotoja kuitekki. Sen takia pruukathaan neuvoa ette antaa mensin tulla kuitekki joka kolmas kuukausi, siis neljä kertaa vuoessa.
Pieni veripropin riski
Preventiivimeeteli joka sisältää östrojeeniä saattaa antaa suureman riskin saa veripropin. Mutta se riski on erittäin pieni. Esimerkiks on suurempi vaara ette saapi veripropin kun on raskhaana kun sillon ku syöpi p-pilleriä.
Veripropin vaara lissäintyy jos on liikaa ylipainoa, on yks vanheempi eli sisko joka on saanu veripropin ennen 50 vuoen ikkää, eli jos ittelä on ollu veriproppi aiemin. Sillon pruukathaan kehottaa ette valittee jonku raskhauen suojan joka on ilman östrojeeniä, esimerkiks p-savva eli miinipilleri.
Mistäs saattaa saa p-pilleriä?
Paarmurska eli lääkäri nuoritten vasthaanotossa, paarmurskan vasthaanotossa eli seksi- ja yhteiselämän vasthaanotossa, saattava kirjottaa ulos p-pilleriä reseptilä. Sitä saattaa kans kääntyä vaimokliniikhiin eli huoltosentraalhiin. Itte tapletit saapi noutaa ulos aputeekista.
Mitäs p-pilleri maksaa?
Kuinka paljon p-pilleri maksaa saattaa vaihtella riippuen missä paikkaa maassa sitä assuu ja kuinka vanhaa sitä on. Mutta usseimissa maakäräjissä ja rekiuunissa preventiivimeeteli on halvempi kun on alle 20 vuotta.
Kuinkas varma p-pilleri on?
Jos ottaa omat p-pillerit niinku pittää sillon riski ette tulla raskhaaks on hyvin pieni.
Kuinkas heittää p-pillerin kans?
Jos haluaa heittää p-pilleritten kans, niin paras pruukaa olla ette syöä valmhiiks sen p-pillerikartan mikä on jo käytössä ja sitten ei alottaa uutta.
Ei se ole vaaralista heittää p-pillerin kans keskelä yhtä karttaa, mutta on riskiä ette sitä sillon saattaa saa epäsäänölisiä vuotoja. Jos ei halua tulla raskhaaks on tärkeä ette alkaa käyttämhään jotaki muuta suojaa raskhautta vasten, jos harjottellee emätinyhtymistä (slidsamlag).
Se vaihtelee kuinka kätevästi mensi tullee käynthiin jälkhiin ko on heittäny p-pillerit. Jokku saavat säänölisen mensin suorhaan ja toisila se saattaa kestää monta kuukautta.
Jos ei halua tulla raskhaaks on tärkeä ette muistaa ette suojata ittens raskhautta vasten, jos harjottellee emätinyhtymistä, vaikka mensi ei ole tullu takashiin. Ovylasjuuni tapahtuu (ägglossning), siis munasolu löysää, suunile 14 päivää ennen ku mensi tullee ja sillon on riski suuriin ette tulla raskhaaks.
Pittää ottaa yhteyttä nuoritten vasthaanoton, paarmurskan vasthaanoton, iho- ja sukupuolen vasthaanoton eli huoltosentraalin kans, jos ei ole saanu mensiä takashiin kuuen kuukauen jälkhiin kun on lopettanu p-pillerit, ja sillä tavala saa selvile miksi se niin on ja mistä se johtuu.
Etuja ja hyviä puolia
- Se on varma raskhauven suoja.
- Mensi vähenee ja tullee enemän säänöliseks.
- Saapi vähemin mensikipuja.
- Inflamasjuuniriski munajohtimessa (äggledare) ja kanseri munasarjassa (äggstockar) ja kohtuussa (livmoder) vähenee.
- Sitä saattaa lykätä etheenpäin mensin, jos esimerkiks aikoo reisata jonneki.
Haittoja
- P-pilleri ei suojaa sukupuolitauvista.
- Hormoonit saattavat vaikuttaa ette saapi esimerkiks päänsärkyä, saapi finniä eli tuntee olevansa matalapainheessa eli alakulonen. Koska erit p-pillerit vaikuttavat ruuhmiissa eri tavoila sitä saattaa pruuvata muuttaa muuhun sorthiin, jos saapi paljon sivuvaikutuksia.
- Jos oksentaa, on tiaree, eli unohtaa ottaa tapletin sitä ei saata olla varmana ettei tule raskhaaks.