On olemassa laki joka sannoo ette ei saa ostaa tupakkaa jos on alle 18 vuotta. Se on nuoritten suojaksi tupakan vaaroista.
Tupakka
Sitä saattaa polttaa tupakkaa paperossina, sikarina, sikarillinä ja vesipiipussa. Paperossit on tavalisimat. Paperossi ei sisälä aivan tupakkaa, yhen sytytetyn paperossin savvussa on suunile 4000 tjeemistä ainetta. Moni niistä antaa kanseria. Vaaralisimat ainheet on:
- Nikutiini, aine joka vain on hyväksytty tupakassa ja prutyktissä jokka pitävät auttaa sitä joka haluaa heittää polttamisen eli nuuskun käytön. Nikutiini on niin vaaralinen ette jos sais neljän paperossin nikutiinin suorhaan verheen sitä kuolis.
- Cyanväätte, myrkylinen kaasu.
- Koolmoono-oksiiti eli häkä on myrkylinen kaasu, jonka mm. löytää biilinaavkaasuista.
- Terva, joka sisältää paljon eri ainheita, jokkut saattavat antaa kanserin. Paitti paperossissa tervaa käytethään mm. asfaltissa ja maalifärissä.
- Esimerkkiä muista vaaralisista ainheista on plyijy, kadmiumi, amuniakki, benseeni ja raatiuaktiivinen poloniumi.
Miksis alethaan polttamhaan?
Tavalisiin syy on ette kaveritten kans testathaan polttaa ensi kerran. Sitä haluaa testata miltä se maistuu ja kuinka se tuntuu. Piian sitä tykkää ette se on tyffiä. Eipäs juuri kukhaan piä ette se maistuu hyväle ensi kerrala.
Jokkut polttavat sen takia ette net haluavat tuntea vanheemalta eli ittenäiseltä. Saattaa kans tuntea ette se on helpompi olla muitten kans, jokka kans polttavat.
Suuriin osa tietää ette se on vaaralista
Suuriin osa tietää ette se on vaaralista polttaa. Mutta se on helppo ajatella ette tauvit ei tule ittele, eli ette sitä aikoo heittää ennen ku se tullee vaaraliseks.
Jos alkaa polttamhaan on vissit asiat mitä mennee huomata aika kätevästi, esimerkiks ette saapi kehnoman kunnon. Se tullee siittä ette jos polttaa ruumis tullee kehnomaks ottamhaan ylös syyreä ilmasta, ja nikutiini mikä on tupakassa saapi syämen lyöhmään kätevämin.
Sen varemin elämässä kun alkaa polttamhaan, sen suurempi vaara ette tullee riippuvaiseks ja ette saapi vahinkoja ja tautia polttamisesta. Niin pitkhään ku keuhkot ei ole kehittynheet valmhiiks net on ekstra herkät tupakalle. Vaikka ei oikeasthaan mene saa tupakkaa jos on alle 18 vuotta, silti moni jokka on nuoremat alkavat polttamhaan.
Passiivi polttaminen
Jos on polttajitten lähelä, esimerkiks samassa huonheessa, sitä saapi henkiä kaasuja jokka on savvussa. Sitä kututhaan passiiviseks polttamiseks. Koska passiivi polttaminen on kans vaaralista, polttaminen on kieletty restayrangissa, kahviloissa, työpaikoissa ja julkisissa paikoissa sisälä.
Lopettaa polttamisen
On helppo tulla tupakasta riippuvaiseksi. Vain muutaman paperossin perästä aivot saattavat tulla riippuvaiseks nikutiinistä. Jos on riippuvainen tupakasta merkittee ette ruumis on harjantunu nikutiinhiin, ja se tullee raskhaaks jos ei polta, niin kututtu apstinensivaivoja. Mutta se on kans itte tapa johonka sitä tarttuu, se tullee tavaks ette polttaa.
On vaikea lopettaa polttamisen, vaikka haluaa olla vapa siittä. Mutta se mennee, ja sen varemin kuen heittää polttamisen sen paremin se mennee. Suuriin osa vahinkoista ja tauista mitä polttaminen antaa, saattavat kehittyää hyvään suunthaan jos lopettaa.
Hyvät syyt miksi ei polttaa:
- Saattaa käyttää rahat muuhun, koska polttaminen on tyyristä.
- On parempi kunto jos ei polta.
- Sitä on terhveempi ilman paperossia, sekä nyt ette tulevaisuuessa.
- Luultavasti sitä saapi pitemän elämän jos ei polta.
- Ei tartte tehhä vanheempia ja muita pahale pääle ja pettynheeksi.
- Ei tartte olla riippuvainen ja tuntea ette sitä on poltonhalussa, stressaintua eli olla kiusoissa.
- Vaatheet ei haise savvule.
- Ei tartte saa huonoa hengitystä eli keltaset hamphaat.
- Jos on alle 18 vuotta saattaa tehhä hauskempaa aijan kans kun ette yrittää saa tupakkaa.
- Ei tartte saa kryppysiä kasuvia tarpheettoman varhain.
- Tupakanviljelys pillaa miljöötä monela tavala ja viljeliät loukkaintuvat myrkylisistä torjunta-ainheista (bekämpningsmedel).
Jos on vaikea päättää jos pittää polttaa eli ei, saattaa yrittää tehhä listoja missä on etuja ja haittoja. Se saattaa olla pikku asioita ja suuria asioita, jokka koskevat ommaa elämää, muita henkilöitä, miljöötä ja muuta. Se on omat listat, ja itte sitä päättää mitä listaa aikoo seurata, kuinka sitä haluaa tehhä polttamisen kans.