Pyberteetin alottaa hormoonit. Hormoonit on ainheet jokka kehittyvät eri ruuhmiin rauhasissa. Hormoonit vaikuttavat kuinka ruumis toimii monela eri tavala. Esimerkiks net määräävät kuinka uni, verenpaino, kiiri ja kuinka paljon vettä on ruuhmiissa. Se on kans hormoonit jokka määräävät kuinka ja koska ruumis kehittyy.
Koska tullee pyberteethiin ja kuinka sitä kokkee sitä, se vaihtelee paljon henkilöstä henkilhöön. Jokkut saattavat kaivata ette saa mensin eli parrankasvua, ja toiset pitävät ette se tuntuu ilkeältä.
Jos tullee varhain eli hiljain pyberteethiin, se ei ole mithään mitä sitä itte saattaa määrätä. Tyttärillä pruukaa pyberteetti alkaa kun sitä on 10 ja 12 vuoen välissä, ja pojila se alkaa 11 ja 13 vuoen välissä. Mutta on kans tavalista ette se tapahtuu sekä varemin ette myöhemin kans. Kuinka vanhaa sitä on kun tullee pyberteethiin on suureks osaks jeneettistä ja siis perintöä.
Koko pyberteetti pruukaa ottaa viis-kuus vuotta, ja sillä aikana kaikila om oma tahti. Pyberteetti alkaa useasti ette sitä kasvaa kätevästi. Välistä saattaa tuntea ittens vähän kömpelöks koska kaikki ruuhmiinosat ei kasva samassa vauhtissa. Esimerkiks käet ja jalat pruukaavat kasvaa paljon alussa.
Kun pyberteetti loppuu sitä on kasvanu pittuuvelta valhmiiks.
Olla pyberteetissä
Sitä saapi useasti kuulla ette pyberteetti on raskas aikakausi. Niin se saattaa olla muutamile, mutta ei kaikile. Monele se on hauska ja jännittävä aika elämässä, kun tapahtuu paljon uutta sekä ittensä kans ette kaikki muu oman ympärilöä. Moni tykkää kasuta ja saa enemän raahvaan ruuhmiin ja ulkonäön, mutta ei kaikin. Se saattaa tuntua sekavalta ette ruumis muuttuu, välistä saattaa tuntea ette sitä ei oikein pysy matkassa.
Välistä saattaa tuntua ette on olemassa ajatuksia ja vaatimuksia, esimerkiks kuinka pittää olla ja minkä näkönen tyär ja poika pittää olla. Raahvaila saattaa olla iteoita kuinka tonoorinkit "on", mitä saatethaan kuvata nekatiivisilla sanoila, niinku ette tonoorinkit on vaikeita ja riitasia. Pittää muistaa ette ei kelhään ole oikeus käyttyäytä tylysti eli epäkorektisti kethään kohti ja ette on aina oikeus olla kuka sitä haluaa olla.
Jos tuntuu raskhaalta se saattaa olla hyvä puhua jonku kansa. Se saattaa esimerkiks olla koulun siukkasysteri, koulukyraatturi, eli joku muu nuoritten vasthaanotossa.
Mitäs tapahtuu pyberteettinä?
Rinnat
Tyttäritten ensi merkki ette on tullu pyberteethiin on ette rinnat alkavat kasvamhaan. Sen saattaa tuntea kun saapi pieniä kovia kuhmuja rintavoortan eli nännin takana. Se on rinnan rauhanen joka kehittyy. Kun rinnat kasvavat net saattavat kutistaa ja olla arkoja. Se on kans tavalista ette se ottaa kipeästi kun pukkaa johonki eli koskettaa rintoja liian lujasti.
Usseimiten yksi rinta alkaa kasvamhaan ennen toista. Se on tavalista ette rinnat jatkuvasti kasvavat omassa tahissa.
Kohta puolet pojista saavat rintarauhasia, jokka mennee nähhä ja tuntea pienenä kuhmuna yhen eli molemitten rintavoortitten alla. Rintarauhaset saattavat kans tuntua vähän aroilta, mutta se on täysin vaaratonta. Vähän aijan päästä rintarauhanen pruukaa mennä pieneks uuesti. Se saattaa kestää kaks kolme vuotta.
Ruuhmiinkarvoja
Pyberteein aikana saapi sukuelimen karvoja. Karva alkaa kasvamhaan sukupuolen pääle ja jymskheen eli kupheesheen päin. Sekä pojat ette tyttäret saattavat saa karvaa viivana naphaan päin.
Saapi kans karvaa kainalhoon ja se on tavalista ette saapi enemän karvaa ruuhmiin muihin paikhoin kans, esimerkiks käshiin ja jalkhoin. Pojat saattavat saa karvoja rinthaan ja selkhään.
Pojila kasvaa parta. Se pruukaa alkaa ylähuulen päälä ja leviää sitten poskhiin ja leukhaan. Joilaki karvankasvu jatkuu ja lissäintyy ja tullee vahvemaks kauas raahvaasheen ikhään.
Pyberteetin aikana pään hiukset tulevat rasvasemaks kun aiemin. Se riippuu siittä ette talirauhaset tekevät lissää rasvaa. Sen takia saattaa tarvita pestä hiukset useamin kun aiemin.
Alapuoli, ynterliivi eli sukuelimet
Sukuelimet muuttuvat pyberteetin aikana, sekä koossa ette färissä. Talirauhaset alkavat näkyä selvemin, mikä merkittee ette sitä huomaa pilkkuja ja klupuja, jokka on luonoliset ja vaarattomat. Hiki ja nestheet, jokka alkavat kehittymhään tekkee ette sukuelin haiseeki eri tavala kun aiemin.
Tyttärillä tulevat sekä ulkopuoliset ette sisäiset häpyhuulet vahvemaks ja tummemaks. Useasti net sisäiset häpyhuulet kasvavat sillä tavala ette net näkyvät ulos päin. Kliitturiski kasvaa. Emätin, kohtu ja munasolut (äggstockar), jokka on ruuhmiin sisälä tulevat isomaks. Ovylaasjuuni eli munanlaskenta (ägglossning) alkaa.
Pojila alkavat testikkelit kasvamhaan. Ja testikkelinpussi ja peeniski alkaa kasvamhaan ja tulevat isomaks ja testikkelinpussi saapi tummeman färin. Kuinka paljon peenis kasvaa vaihtelee henkilöstä henkilhöön. Sisäiset sukupuolirauhaset, mitä kututhaan prostaataks ja spermarakko (spermablåsa), kasvavat kans. Esinahka eli suoronkota laajenee ja tullee isomaks ja sen alla alkaa smegma, valkeamainen voiteleva neste, kehittymhään.
Sperma
Kun testikkelit kasvavat net saattavat olla vähän arat. Se pruukaa olla merkkinä ette net on alkanheet tekemhään spermieitä. Se pruukaa alkaa 14-15 vuotena, mutta se saattaa alkaa sekä varemin ette hiljemin. Jos tullee spermaa kun saapi ejakylasjuunin, se merkittee ette sitä on seksinkypsä. Sillon sitä saattaa tehhä jonku raskhaaks, jos pittää emätinyhtyntää (slidsamlag). Pyberteetin aikana on tavalista ette sitä saapi ejakylasjuunin yölä kun nukkuu. Joilekin se tapahtuu vain joskus harvoin, ja muut taas saattavat saa öisiä ejakylasjuunia monen vuoen aikana.
Vuotoja
Ennenku mensi tullee sitä alkaa saahmaan vuotoja. Sen huomaa ette tullee vähän keltavalkeata truushoin. Vuoot tekevät ette emättimen limakalvot pysyvät tuorheina. Net pitävät kans emättimen puhthaana ja suojaavat sitä infeksjuunista.
Mensi
Kun saapi mensin se merkittee ette ovylasjuuni eli munanlasku (ägglossning) on alkanu. Se merkittee ette sitä on seksinkypsä, siis ette saattaa tulla raskhaaks ja saa lapsia.
Ensi mensi pruukaa tulla suunile kaks vuotta jälkhiin kun rinnat on alkanheet kasvamhaan. Usseimiten se alkaa ette tullee vain vähän verta truushoin eli paperhiin kun pyhkii.
Se on kans tavalista ette on ruskeanfärisiä vuotoja ennenku saapi mensin ensi kerran. Se on ruuhmiin tapa näyttää ette mensi on tulossa. Verensekanen vuoto pruukaa olla tumma ja ruskeanfärinen, se tullee siittä ette veri kerkiä kuivaa vähäsen ennenku se tullee ulos.
Alussa on tavalista ette mensi tullee epäsäänölisesti. Sitä saattaa esimerkiks saa mensin vain kerran ja sitte se saattaa kestää monta kuukautta ennenku seuraavaa mensi tullee. Se on tavalista ja täysin vaaratonta.
Seksinhalu
Sitä saattaa olla kiimanen, unaneerata eli pittää seksiä muula tavala ja saa orkasmin jo ennenku on seksuaalisesti kypsä. Mutta kun tullee seksin kypsäksi pruukaa seksin halu ja sen kaipu lissäintyä. Vaikka on unaneeranu jo kun oli nuorempi se on useasti pyberteetin aikana kun suuriin osa alkaa unaneeraamhaan enemän tietosesti. Moni ajattellee useamin seksistä ja siihen liittyvää, ja se on tavalista ette alkaa hunteeramhaan kuinka se tuntuu ensi kerran kun pittää seksiä jonku muun kans.
Pojile seksin ajatukset saattavat tehhä ette saapi helpola ereksjuunin. Välistä se tapahtuu ilman ette itte ymmärtää miksi. Se saattaa esimerkiks tapahtua kun istuu byssissä joka huiskuu eli kun pyöräilee kryysitien päälä. Huiskumiset tekevät ette signaalit menevät suorhaan peeniksheen, ilman ette menevät aivoitten kautta. Se saattaa tuntua piinaliselta ja sitä helpola uskoo ette sitä on yksin siittä ette saa ereksjuunin ilman tahtoa, vaikka se on oikeasthaan hyvinki tavalista.
Iho
Just niinku hiukset tulevat kätevämin rasvaseks niin tullee ihokin. Se tullee siittä ette talirauhaset prutyseeraavat enemän rasvaa kun aiemin, välistä enemän kun mitä oikeasthaan tarvithaan. Sitä huomaa sen sillä tavala ette iho kiiltää enemän, olletikki nokan ympäri ja ottassa, mutta kans poskissa ja selässä. Kun iho tullee rasvasemaks se saattaa johtaa ette saapi finniä ja ihomatoja, eli puurmaskia.
Pyberteetin aikana saattaa kans saa viivoja ihhoon, niin kututtuja ihonsärkemisiä. Se tullee siittä ette iho vennyy kätevämin kun se kerkiä sopeutua. Tyttärillä se on tavalisiinta ette saa särkemisiä rinthoin, lonkhaan ja reishiin. Pojila se on tavalisiinta saa sitä selkhään ja olkapäihin. Särkemiset haalistuvat aijan olhoon.
Hiki
Sitä alkaa kans hikeämhään enemän pyberteetin aikana. Sen takia on tärkeä ette sitä pessee ittensä joka päivä. Jos tykkää ette tarvittee, sitä saattaa kans käyttää teoturanttia kainalossa.
Ääni
Just niinku muukin ruumis kehittyy niin ääniki kehittyy pyberteetin aikana. Kurkunpää kasvaa ja äänihuulet (stämband) tulevat pitemäks, mikä tekkee ette ääni tullee tummemaks ja syvemäks. Sitähän sitten kututhaan ette tulla äänenmurroksheen. Se tapahtuu sekä pojissa ette tyttärissä. Mutta pojitten ääni muuttuu enemän kun tyttärillä, ja se saattaa merkitä ette pojila on vaikeampi kontroleerata ääntä. Se saattaa välistä kuulua kröhmyseltä eli vaihtella vaalon ja tummeman välissä yhtenä aikana, ennen kun se tummenee ja syvenee.
Ruumis kasvaa ja muuttuu
Pyberteetin alussa käet ja jalanpohja eli jalat kasvavat erityisen kätevästi. Sitten kasvavat käsivarret ja itte jalat eli sääret. Jälkhiin sen sitä kasvaa enniiten pittuuvelta. Sitä saattaa kasvaa monta senttimetriä muutamassa kuukauessa. Sitä kututhaan kasvuspyrtiks.
Ruumis ei kasva aivan pittuuveela, mutta muuttuu kans formissa eli muoossa. Tyttäret pruukaavat saa leveämät lonkat ja pojat saavat leveämän ruuhmiin yläpuolen.
Varhainen ja hiljainen pyberteetti
Koska pyberteetti alkaa vaihtelee ja riippuu mm. jeenistä ja mitä on periny. Jos tullee varhain pyberteethiin saattaa tuntua hauskalta ja raskhaalta. Ette tulla liian varhain pyberteethiin, ennenku on täyttäny kaheksan vuotta tyttärenä eli yheksän vuotta poikana, ei ole tavalista. Jos saapi pyberteetinmerkkiä niin varhain on hyvä jos puhhuu vanheemitten kans eli jonku muun huoltajan kans, ja ottaa yhteyttä siukkasysterin eli huoltosentraalin kans.
Jos ei ole yhtään pyberteettimerkkiä kun täyttää 14 vuotta sitä kututhaan hiljaiseks pyberteetiks. Sillon saattaa puhua vanheemitten eli jonku muun huoltajan kans, ja niitten kans yhessä eli itte ottaa yhteyttä siukkasysterin, nuoritten vasthaanoton eli huoltosentraalin kans. Jos tarvittee pyberteetin mennee panna käynthiin metesiinin avula. Sitä ei saata itte tehhä mithään millä pääsis kätevämin pyberteethiin.
Jos tuntuu raskhaalta ettei kehittyä samassa tahissa kun omat kaverit se saattaa tuntua hyvältä ette puhua jonkun kansa. Koulunsysteri on esimerkiks hyvä henkilö mihinkä saattaa kääntyä. Se mennee kans saa apua nuoritten vasthaanotosta eli huoltosentraalista.