Ajatuksia ensimäisestä kerrasta
Kun ei ole koskhaan pitäny seksiä kenheen kansa saattaa olla paljon ajatuksia kuinka se tullee tuntumhaan, kuinka sitä haluaa ette se pittää olla ja koska se pittää tapahtua. Saattaa ette sitä on kuullu kaveria puhua siittä, nähny filmissä, lukenu avisissa eli kuullu muuta, joka tekkee ette sen on saanu ideoita ja kuvitteluja kuinka se pittää olla.
Useasti nämät ajatukset koskevat ette pittää emätinyhtymistä (slidsamlag). Net tutkimukset mikkä on tehty näyttävät ette on moni joka ei ole pitäny emätinyhtymistä kun net jättävät jymnaasien. Se saattaa johtua monestaki syistä, esimerkiks ette ei halua, ettei ole ollu maholisuus, ette tykkää pittää seksiä henkilöitten kans jokka on samasta sukupuolesta, eli on kiinostunu pitämhään muunlaista seksiä kun just emätinyhtymistä.
Sitä päättää itte
Välistä tuntee stressiä eli ette on pakotettu pitämhään seksiä vaikka sitä ei oikeasthaan itte halua sitä eli ei ole valmis siihen.
Sitä saattaa kans tuntea ette on pakko oottaa seksin kans vaikka sitä haluais tehhä sitä. Ette tuntea pakkoa ette pittää eli oottaa seksin kans saattaa riippua oman kaveriporukan painosta eli ototuksia esimerkiks perheeltä.
Mutta on tärkeä muistaa ette pittää tehhä sen joka tuntuu hyvältä ittele. Itte sitä päättää:
- omasta ruuhmiista
- jos eli koska sitä haluaa pittää seksiä
- millä tavala sitä haluaa pittää seksiä
- kenen kans sitä haluaa pittää seksiä
Ikäraja seksile?
Ei se mene päättää erikoista ikkää koska sitä on valmis pitämhään seksiä jonku muun kans, sen häätyy itte tuntea. On sen eestä olemassa laki joka sannoo ette henkilö joka on yli 15 vuotta ei saa pittää yhtyntää, eli seksiä milhään tavala, sellaisen kans joka on alle 15 vuotta. Mutta laissa seisoo kans ette sitä ei piä tuomita, jos se on ittesthääns selvä ette se ei ole ollu kysymys oikeuen loukkauksesta.
Tärkeintä on ensi käessä kuinka suuri on ikäero, jos kehityksitten erot henkilöitten välissä jokka on pitänheet seksiä on pienet ja jos se on ollu täysin omasta tahosta. Laki jällaa samala tavala kaikile riippumatta sukupuolesta. Tämän lain tarkotus on ette suojata lapsia ette net ei tule kohteeksi sellaiselle mitä net ei halua joltaki vanheemalta henkilöltä. Lain mukhaan ei keneläkhään ole oikeus tehhä mithään seksuaalista kelheen joka sitä ei halua.
Tipsiä ennen ku pittää seksiä jonku muun kansa
Se on tavalista ette ensi kerran kun pittää seksiä on erinlaisempi kun sitä on ajatellu. Välistä se saattaa tuntua ette se on epäonnistunu koska se ei ollu kun sitä oli kuvitellu ja oottanu.
Seksi on sellaista mitä tarvittee harjotella ennen kun se tullee oikein hyväksi, niinkun kaikki muu elämässä. Eihän se ole moni joka ossaa pelata jitarrila favuriittilaulua, ilman tietämättä kuinka otethaan yhen akortin, eli ei ees ole koskhaan piättäny yhestä instrymentistä! Ennen ensi kertaa on olemassa asioita mitä saattaa pittää mukana ajatuksissa ja joitakin asioita saattaa kans testata ja harjotella.
- Kokeile eri tapoja unaneerata ennen, sillon se on helpompi tietää mistä sitä tykkää.
- Kuinka löytää nautittavia paikkoja toisitten ruuhmiissa: puhua toisitten kans, hakea, tuntea ja sanoa kuinka.
- Sitä saattaa hyväilä, muiskia ja tehhä paljon muuta hauskaa missä kiima nousee molemilla.
- Käytä suojaa, esimerkiks kontoomi eli nuolulappu, ja harjottele ennen kuinka sitä käytethään.
- Pittää seksiä turvalisessa paikassa saattaa vaikuttaa siihen ette on helpompi rentoutua.
Koskematon eli piikuus
Välistä saattaa kuulla sanan koskematon, eli ette jollakin on jäljelä piikuus, siittä joka ei ole pitäny seksiä. Se saattaa merkitä ette sitä ei ole pitäny seksiä missä peenis on ollu emättimessä, mutta se saattaa kans merkitä ette ei ole pitäny seksiä ollenkhaan.
Jokkut ei tykkää käyttää sannaa piikuus. Piian sen takia ette sitä kuulustaa ette sitä on jonkinlainen syylinen kun ei ole ennää jäljelä piikuus. Niinku pitäis hävetä ette on pitäny seksiä.
Suuriin osa jokka käyttävät sannaa piikuus ei ajattele niin. Sanothaan yksinkertasesti koskematon yhtenä sanana joka kuvvaa ettei ole pitäny seksiä. Kun on pitäny seksiä ensi kerran pruukathaan sanoa ette sitä on menettäny piikuuksen, eli menettäny sen koskemattoman. Piian sitä tuntee olevan vähän ylpeä eli ilonen ette ei ole ennää koskematon.
Jokhaisella on oikeus itte päättää koska pittää seksiä ensi kerran. Siihen asihaan ei kelheen muula ole mithään tekemistä eli sanomista. Sitä ei mene nähhä jos joku on pitäny seksiä eli ei. Ei ees lääkäri eli paarmurska saata nähhä sen.
Immenkalvo eli piikuus? (mödomshinna)
Sitä mitä meinathaan immenkalvola eli piikuuksella on oikeasthaan se aukko missä emättimen (livmoder) ulkopuolinen osa muuttuu emättimen sisäpuoliseks osaks. Aukola saattaa olla vaihteleva muoto ja aukon syrjä saattaa olla vähän kryppynen eli liuskanen. Aukko leviää ja vennyy paremin pyberteetin aikana, mutta se ei koskhaan katoaa. Mutta siis ei ole yhtään kalvoa joka kattaa emättimen.
Koska ei ole yhtään kalvoa ei ole myöskhään mikhään joka saattaa mennä rikki yhtymisessä. Silti jokkut tyttäret saattavat vuotaa kun heilä on ensi kerran emätinyhteys, mutta tavalisinta on ette ei ole vuotoa.
Se saattaa olla niin ette net jokka vuotavat riippuu siittä ette emättimenaukon syrjä on tiukka. Mutta se on tavalisempi ette sitä vuotaa jostaki muusta syystä, niin kun ette sitä on jännittyny eli ei ole tarpheeks kiihottunu.
Ei sitä saata kattomalla henkilöä nähhä jos se on koskematon eli ei. Ei ees lääkäri eli paarmurska saata nähhä jos joku on pitäny seksiä eli ei.