Mitäs se merkittee bii, hetero ja homo?

On olemassa kolme seksuaalista taipumusta eli luonetta: biiseksuaalisuus, heteroseksualisuus ja homoseksuaalisuus. Useasti sanothaan vain ette sitä on homo, hetero eli bii.

  • Biiseksualisuus on sillon kun rakastuu ja tullee kiimhaan sekä tyttärhiin ette poikhiin.
  • Heteroseksuaalisuus on sillon kun sitä rakastuu eli tullee kiimhaan johonki jolla on muu sukupuoli. Muu sana tälle on straight.
  • Homoseksuaalisuus on sillon kun rakastuu eli tullee kiimhaan johonki samasta sukupuolesta. Toinen sana tälle on gay. Tyttäret jokka tykkäävät tyttäristä saattavat kuttua itteä lespiseks eli lespo (flata). Pojat jokka tykkäävät pojista saattavat kuttua itteä pöökiks. 

On tavalista ette sitä hunteeraa omasta seksuaalisesta luontheesta

Se on tavalista ette sitä hunteeraa omasta seksuaalisesta luontheesta. Käsitys omasta seksuaalisesta luontheesta saattaa kuitekki muuttua elämän aikana.  

Sitä päättää itte jos sitä haluaa kuttua itteä bii, homo eli hetero. Sitä saattaa kans valita sanomalla ette ei ole minkhäänlainen erikoinen seksuaalinen taipumus.

Ototuksia muilta ympäristössä

Ympäristö olettaa eli luulee useasti ette sitä on heteroseksuelli. Jos ei tunne ette se käsitys soppii ittele siittä se saattaa aiheuttaa ette sitä tuntee olevan erinlainen, näkymätön eli ulkopuolela.

Selittää omasta seksuaalisesta luontheesta

Riippumatta mikä seksuaalinen luone on, jokhainen päättää aina itte jos ja koska sitä haluaa selittää siittä muile.

Tavalisesti ei pruukata tarvita selittää, jos sitä on heteroseksuaalinen, koska sen otethaan monta kertaa ittesthääns selväks.

Jos on homoseksuaalinen eli biiseksuaalinen, saattaa välistä tuntea ette sitä haluaa eli tarttee selittää sen.

Seksuaalinen luone ei ole milhään tavala kosketuksissa tavan eli ulkonäön kans

Välistä piian jokku uskovat ette sitä on erikoisela tavala riippuen minkälainen seksuaalinen luone on. Siis sitä pittää tykätä vissistä asioista, olla erikoisen näkönen eli harrastaa vissiä intressiä.

Mutta ominaisuuet, ulkonäkö, intressit, eli kuinka sitä valittee ette ellää elämänsä, ei ole tekemistä sen kans mikä seksuaalisuus ittelä on.

Laitonta tiskrimineerata seksuaalisen luontheen takia

Riippumatta mikä seksuaalinen taipumus on niin on oikeus ellää oman elämänsä niinku haluaa.  

Se on laitonta ette milhään perustheela tiskrimineerata kethään seksuaalisen luontheen vuoksi.

Jos kokkee väkivaltaa seksuaalisen luontheen takia se on erittäin vakava rikos mitä kututhaan viharikokseks.