Miksis saapi prupleemia svampin kans?

Se on epäselvää miksi sitä saapi prupleemia svampin kans. Mutta yks syy saattaa olla ette sitä ottaa jotakin metesiiniä, esimerkiks anttipiotikkaa, joka tappaa hyöyliset pakteerit jokka tavalisesti on alapäässä ja sillä tavala svamppi saattaa alkaa kasvamhaan.

Svamppi saattaa kans riippua siittä ette imyynipuolustus on heijontunu jostaki syystä, esimerkiks kun alkaa tulemhaan kipeäks eli on stressanu paljon.

Ruuhmiin hormoonipalansi saattaa kans vaikuttaa. Sen takia on tavalista ette sitä saapi svamppia just ennen mensiä eli kun on raskhaana.

Svamppi ei ole mikhään sukupuolitauti. Se saattaa tartuttaa samlaakissa, mutta se ei ole tavalista. Toishaalta svamppi ei saata tarttuttaa suuseksin kautta eli ette sitä käyttää sammaa tualettia kun joku jolla on svamppi.

Kuinkas huomaa ette on saanu svamppia?

Tyttärenä huomaa useasti ette on saanu svamppia koska se kutisee ja kirventellee vakiinan aukossa ja häpyhuulissa. Häpyhuulet saattavat kans tulla punaseks ja paisunheeks. Vuoot saattavat tulla valkeaks, kuivaks ja kryyniseks, mutta välistä net on ohut ja sillon tällöin ei ole yhtään vuotoa kun on svamppi.

Svamppi tekkee kans ette se saattaa kirventellä eli ottaa kipeästi kun pissaa eli kun pittää seksiä. Välistä saapi ekseemin häpyhuulhiin ja jymskhiin eli kupheeshiin.

Pojila pruukaa olloni, varsi, kivespussi eli nivukset tulla punaseks, kuivaks ja hilsheiseks eli fnaasiseks kun on saanu svampin. Sitä saattaa kans saa valkosen päälyksen ollonin pääle eli esinahan alla, eli varressa. Päälys pruukaa olla vaikeampi pestä poies kun smekma joka luonolisesti on esinahan alla.

Milläs svampista pääsee erinhääns?

Jos on pieniä vaivoja svampista vakiinassa eli peeniksessä se pruukaa tavalisesti kohta aina kaota ittesthääns ilman hoitoa muutaman päivän jälkhiin.

Mutta välistä se ei mene yli, eli kutisee ja kirventellee niin paljon ette sitä haluaa kätevästi tehhä jotakin sille. Jos se on ensi kerta kun saapi prupleemia pittää ottaa yhteyttä nuoritten vasthaanoton kans, iho- ja sukupuolenvasthaanoton eli hoitosentraalin kans missä saattaa saa selvile jos se toela on svamppi eli ei. Jos mennee vasthaanothoon saapi tehhä tutkimuksen. Se pruukaa mennä kätevästi koska se joka tutkii helpola saattaa nähhä jos se on svamppi.

Jos on ollu svamppi aiemin ja tuntee prupleemin samala tavala sitä saattaa ostaa aputeekista jonku metesiinin mitä mennee saa ilman reseptiä. On olemassa kräämiä jolla saattaa voijela vakiinaa ja häpyhuulia eli peenistä ja kivespussia. Tyttärille on kans olemassa pilleriä, niin kututtu vakituuriymmi, jota panthaan vakiinhaan sormila, ja kräämä jota pruutathaan sisäle pienelä plastipruutala. Vähän aijan jälkhiin kun on ottanu ainetta se saattaa kirventellä ja kutista vielä enemän, mutta se pruukaa kätevästi mennä yli. 

Jos seuraa päähän koko hoijon kohta kaikin tulevat hyväks näistä ainheista jokka saapi ilman reseptiä. Jos ei tule siittä hyväks eli jos svamppi tullee takashiin useamin kun kaks kertaa puolen vuoen aikana pittää kontaktata nuoritten vasthaaoton, iho- ja sukupuolivasthaanoton eli hoitosentraalin missä saapi apua.

Se on tärkeä ette ei käytä svamppia tappavaa ainetta liian useasti eli tarpheettomasti koska se saattaa tehhä vaikeamaks ja vaikeamaks ette saa poies svampin, eli ette se tullee takashiin jo vähän aijan päästä. Se saattaa kans kuivattaa liimakalvon ja tehhä sen hauraks, mikä saattaa johtaa ette saapi muita prupleemia.

Mitäs pittää tehhä ettei saa svamppia?

Koska on epäselvää miksi saapi svampin se on vaikeata suojata itteä siittä.

Välistä sanothaan ette riski ette saa svamppia kasvaa jos pessee alapäätä useasti ja saipuala. Ei ole yhtään varmaa tietoa ette se niin on. Mutta jos on svamppia eli useasti saapi svamppi-infeksjuunia ja pessee ittensä useasti se saattaa tulla paremaks jos pessee itteä harvemin. Riippumatta jos on svamppi eli ei se riittää ette pessee alapäätä kerran päivässä haileala veelä. Sitä ei piä käyttää tavalista saipuata alapäässä koska se kuivattaa. Joa haluaa saattaa käyttää öljyä ilman parfyymiä.

Kysymykset ja vastaukset alapään svampista

Saapikos svamppia stringistä, lämpimistä ja ahtaista vaatheista?

Ei ole yhtään tietheelistä faktaa siihen ette lämpimät, ahtaat vaatheet eli stringi tekis ette on helpompi saa svamppia. Mutta jos on svamppi se saattaa kirventellä ja kutista vähemin jos on truusat eli pikkuhousut pumpulista ja ei liian ahthaita vaatheita. Se saattaa kans auttaa jos nukkuu ilman alusvaatheita ja jos on tyttö saattaa olla hyvä ettei käytä truusansuojaa.

 

Katoaakos svamppi jos voitelee alapään jokhyrtilä?

Sanonta ette jokhyrtti auttaa svamphiin on myytti, missä ei ole yhtään tietheelistä pohjaa. Sen sijasta joghyrtti saattaa tuntua viileältä ja siittä syystä saattaa olla hyvä kutinaa vasthaan.

 

 

 

Saattaakos svamppi tartuttaa?

Svamppia ei tartu esimerkiks tualetin käynistä. Sen sijasta svamppi saattaa tartuttaa vakiinasamlaakissa, vaikka se ei ole tavalista.

 

Saapikos sitä svamppia syömällä paljon sokkeria?

Ei ole yhtään tietheelistä pohjaa siihen ette svamppi kehittyy jos sitä syöpi paljon sokkeria. Mutta jos on prupleemia svampin kans ei tietystikhään ole vaaralista testata jos erinlaiset ruokatavat saattava tehhä ette se tullee paremaks.

Saattaakos pittää seksiä kun on svamppia?

Se ei ole vaaralista ette pittää seksiä kun on svamppia, mutta koska liimakalvot on haurhaat sitä saattaa saa pieniä rakkoja niihin ja se saattaa ottaa kipeästi kun esimerkiks samlaakissa. Jos pittää vakiinasamlaakia on kans pieni riski ette svamppi tarttuu toisele. Sen lisäks riski on suurempi ette sitä saapi eli tartuttaa sukupuolitauen jos pittää vakiinasamlaakia vaikka on svamppia, koska kun on pieniä rakkoja liimakalvossa se tekkee ette on helpompi ette saa eli tartuttaa infeksjuunia.