Miksis mie sanoin nuin (Varför sa jag så).
En hyvä mishään (Inte bra på nåt).
Kaikin muut on paremat (Alla andra är bättre).
Hmm, tämä on piian liian kovvaa (Hmm, det här är kanske lite väl hårt).
Ei kukhaan halua minua (Ingen vill ha mig).
Ei seksikäs ja ruma (osexig och ful).
- Jos on heiko ittentunto tarttuu helpola nekatiivishiin ajatukshiin kuinka kehno sitä on. Kun on ajatuksia kuinka kehno sitä on sitä saattaa yrittää taittaa net kysymällä itteltä: auttaakos se minua ette ajatella näin? Onkos tämä tosi ette mie en ole hyvä mishään?
- Tapa millä pääsee pois ajatuksista ulkonäöstä ja prestasjuunista, joila ei ole mithään tekemistä ittentunnon kans, on ette kysyä henkilöiltä kenheen sitä luottaa mikkä on net ominaisuuet mistä net tykkäävät sinusta. Saattaa tahtoa henkilöltä ette kirjottaa listan jonka panhaan ylös hyvin näköselle paikale.
- Sitä saattaa kans ajatella mikkä ominaisuuet net on mistä sitä tykkää muissa. Mikäs on oikeasthaan tärkeätä? Olla "kaunis", paras koulun pruuvissa eli ette sitä on utelias, huolehtiva, viisas, luova eli rohkea ihminen joka tohtii olla oma ittensä?
- Se vahvistaa ittentuntoa ette pittää hyviä relasjuunia muihin, sekä kaverhiin, rakhaussuhteishiin ja perheesheen. Jos henkilöitä omassa läheisyyessä sanovat ilkeitä asioita toisile, sitä saattaa tahtoa ette heittää sellaisesta hommasta. Piian sitä saattaa sen eestä tahtoa toisilta ette sanoa jotakin pusitiivista jokhaisesta?
- Sitä saattaa tehhä asioita mitä sitä ei pruukaa tehhä. Jos sitä ei koskhaan pruukaa olla se joka nostaa kättä ensiks, sitä saattaa yrittää tehhä sitä seuraavalla leksjuunila. Eli sitä saattaa yrittää kieltää ja puolustaa itteä ja muita jos joku yrittää tehhä hauskaa jonku muun kostanuksella. Eli sitä saattaa hakea yhen työn minkä sitä toela haluaa, soittaa jollekki kenestä sitä tykkää, eli näyttää nuvellin minkä sitä on kirjottanu jolleki kaverile.
- Sen eestä kun tarttua ajatukshiin sellaisesta mikä on ollu väärin aiemin elämässä, sitä saattaa yrittää hyväksyä se mikä on ollu ja net tuntheet mikkä olit sillon. Jos esimerkiks pittää ette omat vanheemat ei killanheet tarpheeks eli nähneet sinua kun sie olit pieni, piian on olemassa muita läheisyyessä just nyt jokka tykkäävät ja saattavat vahvistaa sinua. Sitä saattaa kans kysyä itteltä mikä on paras ette tehhä just nyt. Se ei tarvitte merkitä ette ei saa näyttää ette sitä on ikävissä siittä mikä on tapahtunu, vaston päin, piian sitä tarvittee surehtia yhen aikakauen ette sitten saattaa jatkaa elämää.
Nuorisopaneelin parhaimat tipsit
UMO:n oma nuorisopaneeli antaa omat parhaimat tipsit kuinka saapi pareman ittentunnon:
- Saattaa yrittää olla ekstra rohkea ja tohtia vähän enemän: tohtia sanoa mitä sitä tykkää, tohtia kysyä sellaisesta mistä ei tiä, tohtia tehhä pois itten ja tohtia olla ja näyttää itteä.
- Saattaa olla henkilöitten kans joitten kans sitä on sopiva ja tuntee turvalisuutta.
- Sitä saattaa tuntea rohkeamalta ja lujemalta jos kuuntelee mysiikkiä mistä sitä tykkää, kun esimerkiks on menossa jonneki missä sitä tuntee epävarmuutta, eli samala aikaa kun sitä tekkee jotaki mitä sitä tuntee on ilkeätä eli kauheata.
- Sitä saattaa tulla paremaks ottamhaan vasthaan killausta ja kehumista. Sen eestä ette sitä tuntee ette se on piinalista, sitä saattaa vettää syästi henkheen, sanoa kiitos ja antaa sen mitä henkilö sanoi painua sisäle ja antaa itten tulla iloseks siittä.
- Sitä saattaa killata itteä ja antaa luvan ette tuntea tyytyväisyyttä kun esimerkiks on tehny läksyt eli kun on soittanu yhen samtaalin joka tuntui raskhaalta.
- Sitä saattaa olla hyvä ja tukeaava ystävä ja itte valita kaveria jokka killaavat ja pitävät sinusta sellaisena kun sie olet.
- Ei sitä piä välttää killauksia, mutta killata toisia sellaisena kun olthaan.
- Halata paljon!
- Vaikka ittenluottamus ja ittentunto ei ole sama asia saattaa ittentunto kasvaa ja kehittyä kun tekkee sellaista missä sitä on hyvä.
- Kirjota ylös asiat mistä sie tykkäät ittestä.
- Kirjota ylös asiat mikkä tekevät sinun iloseks.
- Pane ylös maalia sinun päiväle, esimerkiks ette sie piät tehhä jotakin mistä sie tykkäät eli mitä sie et ole koskhaan tehny aiemin ja älä välitä jos se meni hyvin eli kehnosti, tuli rumaks eli fiiniks.
- Ittentunto kuuluu yhteen omantunnon kans. Jos sitä on häijy, sitä saapi huonon omatunnon ja voipi kehnosti. Vastakohta on jos sitä on on hyvä ja siivo ihminen, sillon sitä voipi paremin ja saapi kans pareman ittentunnon.
- Hyvä opettaja tukkee sinua ja saattaa nostaa sinun omakuvvaa.
- Jos tarvittee, hae apua psykolookilta eli kyraatturilta, esimerkiks nuoritten vasthaanotossa.
» Ittentunto