Daniel Fälldin, Haaparannan kaupunkin tie´ottaja´. Kuva: Haaparannan kaupunki.
-Mie toivon, ette nuoret saattava olla ylpeitä heän kaupunkista ja alkava kiinostua heän alkuperästä, sannoo Daniel Fälldin, 40vuotias Haaparannan kaupunkin tie´ottaja. Hään oon laittannu Instagramhiin histuurialisesti mielenkiintosia kuvia.
Fälldinin alottama instagrammitili ”Haparanda i bakspegeln” (Haaparanta perruutuspeilissä) käynnisty keskelä syänkesän lämpöä. Siihen oon laitettu joka arkipäivä vähinthään yks tekstitetty kuva Haaparannan kaupunkinarkistosta ja selostettu sitä lyhyellä ja persuunalisella tavala.
-Mie tehen aina selvitystä jokhaisen kuvan kohala, Daniel sannoo. Meininki oon saaha aikhaan vuorovaikutusta, missä kuvan kattojat auttava heän omila tie´oila ja kommentaareila.
Instagrammista saattaa nähhä, miltäs se näytti ko huomiota herättänyttä kirkkoa pystytethiin 1960-luvun lopula. Sielä oon kans kuvia ihmisistä jännittävissä tilantheissa ja katukuvia ajalta ko Domus ja Posti olit kaupunkissa tärkheitä käyntikohtheita.
Danielilla oova hänen juuret Åtvidabergillä lähelä Linköpinkiä, mutta hään muutti Haaparanthaan viis vuotta aikaa työn perässä. Ko hään sai käshiin ulkosen kovalevyn, jossa oli lukusia skannattuja histuuriallisia kuvia Haaparannalta, hään alko hunteerata, kunka hään vois saaha net kaikkitten näkösälle.
-Mie havattin, ette osa kunnista, muitten muassa Örebro, olit jo alottanheet Instagramhiin heän kuvatilin. Ei siinä ollu mithään ko ette laittaa kuva päivässä lyhyyellä selostuksella ilman sen kummempaa planeerausta.
Haaparannan kirkko rakennethiin 1967. Arkkitekti kuttu pykinkiä nimelä ”Puhas huone”. Kuva: Haaparannan kaupunkinarkisto.
Haluthaan vuorovaikutusta
Daniel sannoo, ette hään halvaa saaha juuri elävää vastakaikua ja saaha käynthiin vuorovaikutuksen haaparantalaisitten ja heitten välile, jokka jotenkikhaan liittyvä kuvitten paikhoin, henkilhöin taikka tavahroin.
-Mie toivon, ette tämä tästa laajentuu ja jo nyttenhään tämä lissäytyy uuvela kuvala joka päivä. Meilä oon nytten jo kasassa läheemäs 300 kuvvaa.
Kunkas montaa kuvvaa sie aattelet siirtävästi?
-Sitä ei saata suoralta käeltä sanoa, mutta kyse oon kuiten useeammasta tuhaanesta. Se oon kiini Mia Greenin kuvista vuuesta 1915 aina 1960-luvule asti. Usseimat niistä oova 1940- ja 1950-luvuilta – ihana kuvakokoelma!
Muutampia kuvia oon 1800-luvultaki, esimerkiksi arkisia kuvia Tornion tullitalosta, ”neulansilmästä”.
Köpmangatanilta1950. Taustalla Kaupunkinhotelli. Kuva: Haaparannan kaupunkinarkisto.
Kunkas sie valittet kuvat niin ette niistä tullee mielenkiintoset?
-Mie tehen sen aivan näppituntumalla. Ko mie itte pääsen sisäle johhoonki niin mie valitten sen. Mie oon mahottoman kiinnostunnu histuuriasta ja mulle oon soma hunteerata, miltäs se tuntu ellää vississä miljöössä kauan sitte.
Lasten päivät 1948. Kuva: Haaparannan kaupunkinarkisto.
Meänkielensi Matti Junes
