Uuen levyn nimi oon ”Mitt emellan någonstans.” (Jossaki välissä) Valokua: Privaatti
Julma, jolla oon juuret Pajalassa, julkasee uuen levyn ja toivottaa tervetulheeksi suorakonsäähriin olohuonheesta Gammelstanista. Lauantaina 26 syyskuuta kello 20 alkaa kotijuhlat tuvissa. Lokkaa sisäle Facebookhiin niin näet ja saatat kuula ”Mitt emellan någonstans” (Jossaki välissä), mikä enämpi ko koskhaan kuuluttaa Julmalta.
Julman jäsenet, Peter Fredriksson kans, tuleva Pajalasta vaikka net oon levinhee Norr- ja Västerbottenhiin. Valokua: Privaatti
-Meän suunitelma oli oikeasthaan päästä kiertuheele ja pelata niin monessa paikkaa ko maholista, sannoo Peter Fredriksson, laulaja joka assuu Piitimen ulkopuolela, Holmträskissä.
-Mutta nykysen tilantheen vuoksi met tehemä niinku monet muut ja piämä tämän live netin kautta.
Peter ja hänen äitinsä Ann-Britt Jauhojärvi oon kirjottanheet tekstin ja mysikin monheen lauhluun ”Mitt emellan någonstans”-levyssä. Mutta siinä oon kans Vladimir Vysotskijn ”Den glödande bastun” (Hehkuva sauna) ja John Grothin ”Vals från Pajala” (Valsi Pajalasta).
-Mummun pappa John oon tehny ”Vals från Pajala” ja mamma oon kirjottannu tekstin siittä kunka John kohtasi vaimonsa Emman – niin se tuntuu erikoiselta julkasta sen.
-Muuten kaikin ryhmässä oon olhee myötä alusta lophuun, mikä oon uutta. Met olema panheet oman leiman.
Samana viikkona ko levy julkasthaan niin Julma kuplioittee raatiossa P4 Veckans färsking-ohjelmassa kappalheela ”Det borde vart vi” (S’olis pitäny olla met). Valokuva: Elona Planman
Hitunen hyymoria
Julma, ruottiksi ”grym”, kuvvailee mysikkiänsä näin: ”viisurokkia, läpiharkituita tekstiä, pellaamisen iloa ja hitunen hyymoria”. Mysikhiin oon vaikuttannu mm bluegrass, reggae ja lähheisyys Suohmeen.
Ryhmän jäsenet oon Torbjörn Emmoth, paasi, Jan Johansson, haitari, Simon Wilhelmsson, trummut/lyömävärkit, Daniel Snell, sähköjitarri ja Peter Fredriksson, laulaja/mantuliini/jitarri.
Julma. Valokuva: Kim Kangas
Julma perustethiin vuona 2000 Erkheikin Meänfestivaalin eelä. Seuraavat vuet ryhmänjäsenet lepäsit kunthoon. Vuesta 2004 ryhmä oon essiintynny nuin kerran vuessa. Mutta vuona 2016 myysikkerit, jokka asuva hajahlaans ympäri Norrbottenia, sait tarpheeksi vauhtia ja julkasit levyn missä oon mm Cornelius Vreeswijkiä meänkielelä.
Sen jälkhiin ryhmä voitti kevväilä 2019 P4 Nästa Norrbotten. Ja nyt sitte julkasthaan seuraava levy. Tällä kertaa vähän enämpi rokkinen.
-Met olema kehittynheet ryhmänä ja alama saahmaan oman soundin. S’oon selvemin Julma nyt verrattunna entisheen levhyyn.
-S’oon selvemin Julma nyt verrattunna entisheen levhyyn. Met olema kehittynheet ryhmänä ja alama saahmaan oman soundin. Valokuva: Privaatti
Trumpumies köökissä
Pantaus tehtiin jo 2018 kotona Peterin tykönä missä Daniel Snell sai istua karteroopissa ja pelata ja trumpumies asetethiin köökhiin. Levyn julkasu hiljastu eri syistä.
Livestreaminki 26 syyskuuta lähätethään olohuohneesta Torbjörn Emmothin kotoa Luulajassa, Gammelstad. Yleisö oon kuttuttu ja viis kaameraa varmistaa ammattimaisen tuotanon, monta kaameravinkkeliä ja hyvänlaatunen ääni.
-Meininki oli julkasta levyn Pajalan markkinoila mutta eihään siittä tullu mithään. Mutta oonhaan se hauska pruuata jotaki uutta.
Ajatus oon ette ryhmä pääsee kiertuheele ympäri maata uusitten lauluitten kans niin pian ko koronarajotuksia poistethaan.
Live-essiintymisestä markkinoila ennen Coronaa. Jan Johansson ja Peter Fredriksson. Valokua: Kim Kangas
Lähiaikana Peter oottaa innola päästä Tornionlaakshoon ja hirvimethään.
-Hirvenpyynti oon ainua mitä Korona ei ole pilanu.
Peter joka mennyvuona sai täyttää fryysin ko koirashirvi sattu sihtiin.
Meänkielentäny Märta, Karin ja Linnea Nylund
Nootti: Levyn julkasu ja suorakonsääri tapahtuu lauantaina 26 syyskuuta kl. 20-21.30 Julman Facebook-sivun kautta: www.facebook.com/julmamusik
Kotisivu: www.julma.se
