TV-tiimi seurasi Muonion Botoxridersia Ruottin tunturimaisemhaan asti. Kuva: SVT Meänkieli
SVT Meänkielen uusi dokymentäärisarja Skotergalen/Skuutterihullu kuvvaa skuutterinajointoa Toornionlaaksossa.
– Ko tyttäret ajavat yhessä pojitten kansa niin aina herrää kilpailuinto, sannoo Niina Pietikäinen, joka kuuluu tyärjänghiin Botoxriders. Siittä met pääsemä nyt.
– Pojat saattavat sen lisäksi stressaintua siittä ette jokku tyttäret oon paremat aihaan ko het.
Muoniolainen Botoxriders-jänghiin kuuluu ainuasthaan tyttäriä ja sen henki oon kehottaa vaimoittenki ajahmaan itte: ette ei tyytyä vain ookaahmaan matkassa.
Ahti Aasa Juoksengista toimittaa uutta meänkielistä (ja ruottinkielistä) kolmiosasta sarjaa, jota näytethään sunnuntaisin SVT2:ssa. Viiminen osa lähätethään 22 maita klo 18. Kaikki osat saattaa kattoa jälkhiinpäin SVT Playssä.
Ahti selittää ette työ Skuutterihullun kansa oon menny kovvaa vauhtia:
-Met tehimä ensimäisen inspeelningkin febryaarin viimisennä viikonloppuna ja viiminen oli aprillin toisena viikonloppuna. Se oon ollu villin hauskaa hommaa.
Ahti oon yhessä valokuvvaajan Sofie Wernerin kansa seuranu Sebastian Aspia Kirunassa kilpailuissa. Kaverijängi Botoxriderin kansa het filmasit Muoniossa ja Kilpisjärvessä ja elämännauttijan Tagen het kohtasit Kaalasjärvessä ja Nikkaluoktassa.
Ahti sannoo ette oon ollu helppo löytää ”skuutterihulluja” Toornionlaaksossa tähhään prugramhiin.
– Joka yks ja joka toinen oli joko itte semmonen eli tunsi niitä kymmenkunnan. Skuutterihomma oon toela osa elämää täälä ylhäälä.
Ahti Aasa Juoksengista oon ollut töissä SVT:n satsauksessa Skuutterihullu tänä kevväinä. Kuva: SVT Meänkieli
36-vuotias Botoxridersin Niina Pietikäinen kokoaa tuntheita sen jälkhiin ko hään oon ollu ensimäistä kertaa tv:ssä:
– Se oli oikeen ilkeätä nähhä itteä tv:ssä, mutta mie tykkään ette tiimi sai kiini siittä ajamisen innosta hyvin.
Hään oon kyllä saanu vähän huomautuksia tutuilta jokka oon nähneet ensimäisen osan kappalheen jossa hään oon juuri alkamassa itkheen.
– Mie en pruukaa olla niin tuntheelinen. Mutta se oli niin erityistä Ahti Aasan ja valokuvvaajan Sofia Wernerin kansa. Kontakti meän välilä onnistu niin hyvin ja met tyttäret unohtimma kerrassa ette met olima puhumassa koko Ruottin kansale.
Botoxriders koostuu viiestä tyttärestä Muoniosta ja Kittilästä.
– Skuutterin ajaminen oon yksi tapa päästä ulos luonthoon ja 800 kybiikin konheen hallittemisen tunne oon paha lyä. Meile skuutterinajaminen oon yhtä luonolista ko aijaa pyörälä.
Botoxridersin kuttumus oon kehottaa tyttäriä ajahmaan skuutteria. Tässä Niina Kallojärvi, Niina Pietikäinen ja Marika Vehovuori. Kuva: SVT Meänkieli
Mutta kesilä ko ei ole lunta?
Silloin met ajama vesicrossia järvelä. Niina Kallojärvi meän tiimistä oon kaksi kertaa tullu toiseksiparhaaksi Suomessa, hään oon oikeen hyvä.
Toimittaja Ahti Aasa selittää inspeelningkistä:
– Se oon tuntunu oikeen isolta etulta ette saa seurata näitä ihmisiä ja päästä tuntemhaan niitä nyt kevättalvesta.
Into Skuutterihulhuun on olli suuri, treileriä verkossa oon jaettu kauhean monta kertaa.
– Reaksjuunit oon olhee peukalo ylös, sannoo tyytyväinen Ahti Aasa.
Meänkielensi Erling Wande
