![](https://www.str-t.com/wp-content/uploads/2016/04/Ida-Boman.-Foto-Maria-Schinkler.jpg)
Kuva: Maria Schinkler
Haaparannale oon lahjotettu uusi ruottin mestari. Ida Boman oon histuurialinen sen jälkhiin ko Luulaja/MSSK voitti Ruottin SM-pukaalin iishokissa. Ensimäinen Luujalan osalta.
-Olen pelanu pojitten kansa kohta koko elämän aikana, sannoo pakki, joka suureksi osaksi saapii kiittää Asplöven HC:tä tästä menestyksestä.
Päivämäärä oli 20 marsia ko 22-vuotihaan Ida Bomanin laaki sai nostaa kovasti ootettua pukaalia, ko het olit voittanheet Linköpingin yli niitten kotiplaanala. Pybliikkiä oli jättiläismäärä: yli 4000 henkeä kattoit ottelua, joka lopetethiin kultakypärä päässä. Mennyt säsonki oon ollut hänen uran tärkein, vuosikausitten raataamisen jälkhiin.
-Vasta nyt SM-kulta alkaa tuntumhaan toelta, sannoo Ida. Voiton takana oon kova työ ja se oon erityisen mukava ette meitä oon niin monta norrbottenilaista joukossa.
Ida oon kasunut ylös Haaparannala ja hään oon pelanut hokkia seittemän vuen ikäsestä asti. Ko hokissa oli puute tyttäristä niin Ida joutu liikkumhaan eri poikajoukoitten välilä ko hään kävi träänaamassa ja pellaamassa matsia nuortten ja vanheemitten kansa. Tältä se näytti siksi ette hään täytti 18. Ko hään pääsi pellaahmaan vaimoitten kansa hänen äiti Annikka ja isä Anders jouit kyytitheen häntä ympäri Norrbottenia. Träänaria oon ollut monta, mutta Arsi Melkko Haaparannalta oon ollut erityisen tärkeä hänen kehitykselle.
Koskas sie tunsit ette sinusta saatto tulla vaikka kunka hyvä?
-Paha sanoa mutta mulla oon aina ollu halu tulla paremaksi ja päästä jyniuurlandslaakhiin.
Siittää haahveesta, ikävä kyllä, ei tullut mithään ja tämä saattaa vieläki harmittaa häntä. Mutta ilo siittä, ette Leif Boork näki hänen kovan defensiivipelin viimi vuona ja siksi otti hänen myötä landslaakhiin desemberissä 2015 korvasi tämän.
-Se oon mukava jälkikätheen nähhä ette se ei ole niin vaaralista jos ei pääse niin kauas jyniuurina. Asiat saattava järjestyä hiljemin, ei tartte antaa perhiin sen vuoksi.
Sinun vahvat puolet?
-Puolustuspeli omala puolela. Mie en tehe yhthään ainuata puängiä koko säsongina. Olen kansa aika luja.
Vaimoitten hokissa pellaajat ei saa taklata samala laila ko poikaklossit tekevä, sen siihaan sitä saattaa painaa kovin luistimissuunthaan.
-Jokku tuomarit sallivat enämpi ko toiset, ero saattaa olla aika suuri ottelusta ottelhuun, kunka paljon net päästävä läpi. Harmittaa vähän ette se oon sillä laila.
Landslaaki oon justhiinsa nyt Kanadassa mittaamassa voimia Mailmanmestaruuskilvassa. Ida ei päässyt matkhaan tällä kertaa, mutta sitähään ei ollut oottanutkhaan ko hään oon vielä niin uusi tässä joukossa.
Säsongila Ida träänaa jäälä neljä kertaa viikossa laakin kansa ja lisäksi oon matsia lauantaisin ja pyhinä ja kuntoträäninkiä 3-4 kertaa viikossa. Hään sannoo ette ei ole minkhäänlaisia prubleemiä selvitä elämässä, hään seuraa ensimäistä vuotta esikoulunopettajanprukrammia ja hoitaa itte hänen oman aikataulun.
Tavotheet hokissa?
-Olis hauska puolustaa SM-kullan ja saa lissää aikaa landslaakissa.
Meänkielensi Erling Wande
22-vuotias Ida Boman oon Haaparannan ensimäinen tyär, joka oon ottanut SM-mitalin hokissa. Kuva: Privaatti