Bo-Lennart Uusitalo oon saanu koulutusta ruanlaitossa Hanoissa Vietnamissa ja tykkää kummastaki tornionlaaksolaisesta ja vietnamilaisesta ruasta. Valokuva: Privaatti
Löytyy yks kitisevä lisä kahviin, mikä oon erityinen Tornionlaaksole. Bo-Lennart Uusitalo Porjuksessa tuntee isoa rakhautta kahvijuustole ja Tornionlaakson ruale. Tässä hään jakkaa paikkakunnan tipsiä ja resähtiä.
Into ruale sai vauhtia ko hään 19-vuotihaana sai syövän. Ison osan päivistä hään vietti kotona köökissä Aapuassa missä hään saatto seurata äitiä joka leipo ja laitto ruokaa.
Pehmeäleipä Bo-Lennartin mallila oon erityisen sitkeä joka erottaa sen Hönökakosta. Valokuva: Bo-Lennart Uusitalo
-Se harvon tartti tarkkoja mittoja, se oli vain ette mennä kenninkin päältä hään aina sano.
Syksyksi hään julkasee kirjan ruottiksi ja meänkieleksi ruanlaitosta pohjosessa. Siihen hään kokoaa resähtiä ja kylttyyrihistuurilisia kertomuksia ruasta Tornionlaaksosta.
Kahvijuusto ko se oon vastapaistettu. Valokuva: Bo-Lennart Uusitalo
Bo-Lennart muistaa rakhauella kahvijuuston hänen lapsuuesta Aapuassa. Hänen setän vaimola oli lehmiä ja se teki juustoja maijosta, niin teki moni muuki vaimo hänen suvussa.
-Se oon vanhaa perine Aapuassa ette tehä juustoa ja minun mamma ja farmuuri tehit sitä kans.
Hään selittää ette Tornionlaaksossa käytethiin vissin tyyppisiä haapapärheitä poikkisahhauksen pinnasta ko puut olit kaaettu. Pärheistä laothiin neliskanttisia pohjia minkä päälä juusto oli pesässä. Laotun pärepohjan alle panthiin helläloova mihinkä vasla/hera valosi.
Etu haavan käyttämisessä sen siihaan ko muitten puulajitten oon ette haapa ei anna yhthään makua.
-Minun pappa oli töissä Svea skogile ja sai ottaa haapapärheitä mettästä, hään opetti mulle minkä tyyppinen haapa toimii.
Mutta se oli siihen aikhaan se. Bo-Lennart käyttää tänhään mielumin perintheistä uuninkestävää paiformua paistamisheen. Samala ko met saarnama hään oon tekemässä kahvijuustoa köökissä.
-Justhiins nyt massa siilathaan vanhaan köökinhantuukin läpi.
Siivilä toimii kans hyvin, mutta sillon isompia osia harmajasta vaslasta tullee matkhaan ja siittä se ei tykkää. Vaslasta Bo-Lennart leipoo ruisleipää, koska hään vastahakosesti viskaa semmosta minkä saattaa ottaa taltheen.
Aine kahvijuustosta siilathaan köökihantuukin läpi. Valokuva: Bo-Lennart Uusitalo
Ruisleipä jossa oon vaikutusta Suomesta. Valokuva: Bo-Lennart Uusitalo
Ko juustoaine oon saanu valota se pyöritethään palloksi ennenko se panthaan forhmuun, painethaan tasaseksi ja paistethaan.
-Moni valittaa ette kahvijuusto maksaa niin paljon, nuin 200 kruunua kilo, mutta jos hunteeraa kunka paljon työtä siinä oon takana…..?
Kunkas sie mielumin syöt sen?
-Mie palottelen sen ja panen kuphiin, kaajan kuumaa kahvia siihen ja sitte jauhosokkeria pääle.
Kahvi jähtyy hopusti kylmästä juustosta, niin uutta kuumaa kahvia kaajethaan niitten haileitten neliskanttipalasitten pääle. Toinen malli syä juuston oon jälkiruokana. Sillon juusto leikothaan pitkhiin viipalheishiin mikkä laothaan forhmuun ennenko net lämmitethään pesässä (200 kraijaa) 10-15 minuttia. Tarjothaan hillasyltin ja vispatun kretan kans.
Bo-Lennart hunteeraa laajentaa repertuaaria ja pruuata panna juuston peilin pääle, joka oon tehty tornionlaaksolaisista vaaraimista mikkä oon miksattu fluursokkerin kans. Saattaa piiain tulla kaunis kuva kirhjaan mikä tullee syksylä? Facebookryhmässä ”Tornionlaaksolaisia reseptiä” löytyy enämpi Bo-Lennartin resähtiä.
Jästinisupyötkyt syöthään siivoiksi leikattunna maijon kans. Valokuva: Bo-Lennart Uusitalo
Meänkielentänny Märta, Karin ja Linnea Nylund
Bo-Lennartin kahvijuusto (nuin 500 krammaa)
2 liiteriä stantartimaitoa
1/2 tl krettaa
2 tlk lööppeä (löytyy aputeekissä)
1 tlk suolaa
Kaaja maitoa ja krettaa 3-liiterin pathaan, mielelhään teflooni.
Lämmitä maito 37° C. Nosta pois ja sekota lööppe siihen ja anna sen istua niin kauon ette neste oon hyytyny (tullu juustoksi). Siinä mennee nuin 30 minuttia.
Liikuta varovasti ainetta reikäkauhala paassa matalalla lämmölä niin kauon ette aine oon sormenlämmin. Siirä varovasti juustoainetta laijoilta keskele.
Ko juustoaine oon koottu palloksi, lämmitä se kiehumispistheele. (Ei saa kiehua)
Ota ylös juusto ja pane se juustoforhmuun/siivilhään ja paina pois niin paljon vaslaa ko maholista. Pane paino pääle ja anna istua jonku tiiman ette loppu vaslasta painuu ulos.
Lämmitä pesä 200° C. Paista juusto hyvinvoijeltussa uuninkestävässä formussa kunnes se oon saanu fiinin färin.
Mie paistan minun juuston laotun prikan päälä mikä oon tehty haapapärheistä minkä mie panen uuninrehkilön pääle ja panen formun alle. Mie pruukan kans kääntää juustoa kerran paistonaikana.
Säästä vaslan juustosta, siittä sie saatat leipoa ruisleipää.
