![](https://www.str-t.com/wp-content/uploads/2016/02/Marianne-Berglund.-Foto-Linda-Danhall..jpeg)
Marianne oon puoliaikasesti työssä Haaparannanlehen jurnalistinna. Kuva: Linda Danhall.
Jurnalisti Marianne Berglund julkasee nuorile ja vanhoile passelin luontokirjan meänkielelä ja ruottila. Rikas luonon elämä oon hänen kameeralinsin keskiössä.
– Lastenkirjoissa ole kohta ollenkhaan luonnon kuvia ko ainoasthaan piiroksia, Marianne sannoo.
Kirja ”Elläimet meän ympärillä” oon runssaasti kuvitettu Mariannen itte otetuila valokuvila kauhniista Tornionlaaksosta. Hään julkasi jo 2010 kuvakirjan Naturligt fångat yhessä kirjailia Bengt Pohjasen kanssa. Nytten kuus vuotta myöhemin oon julkasun takana sama kustantaja Barents Publisher ja Bengt oon kääntänny tekstit meänkielele.
Marianne sai kylttyyrineuvoston apurahan elläinkirjan julkasemisseen ko valtio näkkee hyäksi tuottaa kirjalisuutta väheemistökielilä. Koska varsinki meänkieli oon laiminlyöty kirjamuotosenna niin tällä sarala oon paljon vielä tekemistä.
Marianne oon koulutukselthaan esikoulun ja ala-astheen opettaja – ja vielä jurnalistiki. Usseimat tuntevakki hänen juuri jurnalistinna ja Haaparannanlehen toimitussehvinä.
– Minua halutti käyttää ommaa kläpitten kasvatustietheen tietoa minun uuessa kirjaprujektissa.
Elläimet meän ympärillä oon Mariannen toinen luonthoon liittyvä kirja. Kuva: Privaatti.
Muistitreeninkiä vanheemille
Jos kirja oon passeli esikoulu- ja koulukläpeile niin se oon kyllä yhtä passeli vanhuusten asunthoinki, Marianne toteaa.
– Het, joila oon muistin kanssa vaikeutta, saattava varhmaan kuvia kattoessa ja lyhhyitä tekstejä lukkiissa pallauttaa miehleen eri elläimiä. Tiä vaikka se innostas heitä itteä omhaanki kertomisseen?
Kirjan kuvat oova useamman vuuen ajalta. Koko joukko niistä oon otettu Hietaniemelä Mariannen koin lintulaualta. Hällä oonki varsin hyä lintusilmä. Mutta myös Tornion väylän törmitten elläimiä oon tuotu framile samoin ko niitytten ja maatilotten nelijalkasia ystäviä. Oon poroja, lamphaita ja lehmiä. Lyhyet tekstit ruottila ja meänkielelä kertova elläinten elämästä.
Kirjaa vain voipii käyttää kirjalisuutennaki heile jokka halvaava oppia meänkieltä niinko heilekki jokka halvaava tietää enämpi eri lintu- ja elläinsorteista.
Kirjaan layoutti (sommittelu) oon Mariannen itten tekemää ja kirja oon aateltu julkasta maalishuhtikuulla.
Tämä elläinkirja ei toennäkösesti ole Mariannen viihmeinen. Hällä oon suunitheilla julkasta vielä usseita valokuakirjoja. Ehkäpä joku niistä olis suunattu juuri varsin vanheemallekki väele? Enämpi Marianne ei halvaa suunitelmiihaan vielä paljastaa.
Fakta: Elläimet meän ympärillä kirjan hinta tullee olehmaan 180 kr ja lisäksi lähetyskostanukset ja sitä voipii tilata [email protected]
Meänkielensi Matti Junes