Tornionlaaksonkellossa oon arpanti joka soppii yhtheen Meänflaun kansa. Kuva: Privaatti
Tornionlaaksonkello lanseerathiin ennen Tornionlaaksolaisten päivää 15 heinäkuuta. Kellon takana oon Mattias Snäll, joka oon kasunu ylös Kukkolassa. Kellossa hään ottaa esile färit Tornionlaakson flausta, Meänflausta.
Tornionlaaksonkellola sie saatat kantaa Meänflakua ylpeästi joka päivä, meinaa Mattias. Ja saatat näyttää kuka sie olet.
Yheksäntoistavuotias, joka muutti siirty Luulajhaan viis vuotta sitten, selittää kunka kaikki alko. Hään halusi tehhä tuotheen mikä tuntu erikoiselta ja ittelekullekki kuuluvalta, ja millä oli yhtheyttä alueele missä hällä oon syän.
-Se tuntu luonoliselta ette lähteä Tornionlaaksosta. Ei ole sopevampaa asunpaikkaa ko Kukkola.
2017 hään alotti liikheen Mazas ittemuotoiltuila kelloila kohtuulisilla hinnoila. Tornionlaaksonkellola oon musta kellontaulu ja kuottu arpanti mikä oon keltanen, sininen ja valkea, färit jokka muistuttava aurinkoa, taivasta ja lunta. Malli oon yniseksi ja soppii yhtä hyvin miehile ko vaimoile.
Tyyli oon ykskertanen, niin ette se soppii monenmallissiin vaatetyyhliin.
Kelhoon kuuluu kans musta nahka-arpanti minkä omistaja saatttaa vaihettaa.
Kunkas oon vasthaanotto ollu tähän asti?
-Moni tykkää kellosta, ja tykkää ette se oon hauska ja kiva kampe.
Talo oon jäljelä
Mitäs kotiseutu merkittee sulle?
-Paljon. Miehään olen kasunu ylös Tornionlaaksossa ja muuttanu Luulajhaan mutta se tuntuu tärkeältä ette käyä kylästelemässä sielä usseen.
Mattiaksella oon nepokkia Kukkolassa ja talo missä hään kasusi ylös oon jäljelä. Hänen mamman vanhimat asuva Haaparannala.
Uusi yrittäjä ymmärtää meänkieltä vaikka hällä oon vaikea puhua sitä.
-Mutta mie saatan komyniseerata suomeksi, se mennee paremin.
Mattias halvais julkasta lissää tuotheita millä oon yhtheyttä Tornionlaakson kans, piiain useampia erityylisiä kellonmallia. Tulevaisuus saapii näyttää mitä tullee. Tornionlaaksonkelloja oon ostaa kotisivun kautta mazas.se ja jälleenmyyjitten tykönä Sisaret P, Kukkolankoski, Pesulan Maanpruuki, Restaurang Utblick ja Taavolantalo.
Meänkielensi Märta, Karin ja Linnea Nylund
Mattias Snäll oon 19 vuotta ja assuu Luulajassa mutta syän oon Haaparannala/Kukkolassa. Kuva: Privaatti
