![](https://www.str-t.com/wp-content/uploads/2018/06/queene-pink-mercy-charity-photo-scaled.jpg)
Emily oon valittu jeneraaltirektööriksi Ruottin maajoukkuelle tämän vuen Overwatch World Cup.
Emily Krumlinde valithiin Ruottin parhaaksi vaimo Starcraftpellaajaksi 2014. Tänäpäivänä 27-vuotias oon yks harvista ammattimaisista taattapellaajista mailmassa. Hänen juuret oon Kieruna-Lainiossa missä mamman suku assuu.
-Mie olen löytäny minun oman pikku loovan mihinkä mie sovin, sannoo Emily ko oon puhe hänen menestyksistä
Emilyn mamma, Anna Elenius, oon nepokka uupperalaulajan Carina Henrikssonnin kans Kieruna/Lainiosta.
– Mie olen itte viettäny suuriiman osan lapsuuesta Lainion ympärillä.
Vuesta 2015 saakka hään assuu Manchesterissä, Englantissa. Emily tykkää ette maa oon pärfekti koska sielä oon enämpi vakava kattanto ammathiin ko muuala mailmaa. Sen lisäksi se oon helppo matkustaa eri tapahtumhiin jos lähtee Englantista.
Emily Krumlinde kuuluu huippuryhmään mailmassa SC2-pellaajanna.
Neljä vuotta taappäin hään elättää ittensä laivstriimaamalla yleisölle netilä. Olla ammattipellaaja ei ole niin tavalista ja ette hään oon tyär oon vielä enämpi harvinaista.
-Ko mie alon pellaahmaan kotona Västerviikissä ei mulla ollu aavistustakhaaan ette se tullee olheen minun työ.
Mutta vähän kertaa hään oon ottanu halthuun tikitaalisen mailman eri tyrneerinkien kautta. 2014 hään meni koko välin E-urheilun mailmanmestaruutheen Azerbajdzjanissa. Siinä samassa hään valithiin Ruottin parhaaksi vaimo Starcraftpellaajaksi. Hään tuli kolmanelle siale mailmanmestaruuessa.
-SC2 oon niinku sekotus sjakista, pookkerista ja pianusta yhtäaikaa. Sie häyt olla kauhean kätevä sormista samala ko sie häyt räknätä stratekisesti vaikka informaatio oon rajotettu.
Joku aika sitten hään oon heittäny kilpailemasta ja sen siihaan satsanu laivstriiminkhiin twichissä missä hällä oon nimi QueenE. Twich oon viiteostriimpalvelu missä kattojat vaihettava viestiä suohraan Emilyn kans semmosessa yhtheyessä. QueenElä oon tänäpäivänä 91 000 seuraajaa.
Emily kantaa Madeleine ”MaddeLisk” Leanderia ankaran ottelun jälkhiin Starcraftissa.
Ei yhthään semestiä kuutheen vuotheen
Emily oon aijan olhoon menny SC2:sta Overwatchiin missä hään pellaa ryhmissä tyttäritten kans koko mailmassa. Hään elättää ittensä tillaajitten, reklaamin ja sponsoritten kautta. Mutta kans kattojitten kautta jokka antava hälle ”triksiä” jos net tykkäävä ette viiteo oon hyvä.
-Mie pellaan noin kuuesta yheksään tiihmaan päivässä. Sen lisäksi oon paljon kontturitöitä niin mie olen töissä suunile 16 tiimaa vuorokauessa joka päivä.
Emily triivastuu mahottoman hyvin työnsä kans, ainua hankaluus oon ette se kestää vuorokauen ympäri.
-Minun työ ei lopu koskhaan ja ko mie en jaksa enämpää mie menen nukkumhaan. Mulla ei ole ollu semestiä kuutheen vuotheen.
Se oon tietysti stressistä tietää ette niin hopusti ko hään oon poijessa lähätyksistä hään menettää rahhaa ko ei tule tillaajia. Emily oon tullu tunnetuksi taattamailmassa kans sen vuoksi ko hään kehottaa tyttäritten pellaamista.
-Se oon tullu tärkeä asia mulle. Mie olen useasti myötä panelikeskusteluissa ja tapahtumissa mikkä kehittävä tyttäritten pellaamista. Syy: se oon paljon rasismia, homofopiitä ja huonoa kattantoa vaihmoin tässä urheilussa.
Spyro, liilafärisellä lohikäärhmeelä, kuulu Playstation-sukupolhveen. Nykyhään se oon Emilyn käsivarressa.
Seksistisiä komentaaria
-Met tyttäret saama ottaa vasthaan paljon ilkeyksiä ko met pellaama, enämpi ko mitä pojat saava. Siksi moni tyär heittää pellaamasta vaikka net oon hyvin päteviä. Kunkas hauska se oon hypätä pelhiin ja kuula ko ihmiset jatkuvasti huutava HUORA sulle ?
Emily halvaa kehottaa tyttäriä löytämhään yhtheyksiä missä oon muita samasta sukupuolesta joita net saattava pelata vasthaan. Hään oon itte uhattu. Kerran hään ei lähteny yhtheen tapahtumhaan seksyaalisen uhan takia yheltä mieheltä joka oli ärsäintynny siittä ko hään yritti ottaa siiaa yhtheen mailman miehisiimphään teolisuutheen. Mikkäs ominaisuuet tekevä sinun niin päteväksi?
-Jonku verran menestykset riippuva siittä ette mulla oon aspergerin syntroomi, mie saatan keskittyä yhtheen asihaan hyvin kauon. Ja sitte mie käytän paljon aikaa träänaamisseen.
-Sitten häätyy kattoa mitä saattaa parantaa. Monela pellaajalla oon hankala nähhä omia erheyksiä ja syyttävä muita.
Sie olet viettäny monta kessää Lainiossa. Kaipaaks sie mithään sieltä?
-Joo, kauhean paljon. Koska mie helposti rasitun valosta ja äänistä minun työssä mie tykkään tulla Lainion luonthoon ja kokea hiljasuuen. Ja sitte mie kaipaan minun perettä sielä ylhäälä, mulla oon iso läheinen pere ja monta nepokkaa. Ja mie rakastan lunta.
Meänkielensi Karin, Märta ja Linnea Nylund
Fotnot 1: Emily oon valittu jeneraaltirektööriksi ruottin maajoukkuelle tämän vuen Overwatch World Cupissä.
Fotnot 2: Katto ko Emily pellaa www.twitch.tv/QueenE.