Gun Olofsson, johtokuntajäsen, ja stipentinsaajat Julia Niemi ja Klara Pasma. Kuva: Hasse Stenudd, Haaparannanlehti
Julia Niemi ja Klara Pasma saava nuorten kulttuuristipentin heän pätevistä saavutuksista Tornionlaaksonteatterin lavala. Net oon olhee myötä useassa julkisessa teatterituotanossa ja 2017 net esitit näytelmän KONTROLLI! Tornionlaaksonteatterin puolesta. Se oon hymoristinen traama nuorele ja täyele yleisölle, kirjotettu ainuasthaan orkinaalikielelä, meänkielelä. Vaikka Julia ja Klara ei puhu meänkieltä joka päivä, mutta oon kasuhnee ylös meänkielisessä ja suomalaisessa ympäristössä ja lukeva kieliä koulussa, net esitit 40 minutinpitusen tialookin aivan meänkielelä. Kappale näytethiin 17 kertaa tyrneevuona 2017, niin koulu- ko ylheisnäyttelynnä Norrbottenissa. Rapea 800 henkilöä, joista issoin osa oli yläastheen nuoria, sait tällä mallin ottaa ossaa teatterista jonka Julia, Klara ja Anton Hennix-Raukola esitit meänkielelä.
Julia ja Klara oon nuoret esikuvat näyttämötaitheessa meänkielelä.
