![](https://www.str-t.com/wp-content/uploads/2018/03/gym4-scaled.jpg)
Fredrik Gunnelbrand, Anna Stålnacke och Kärstin
Koira Kärstin lähtee mielelänsä Annan ja Fredrikin kansa Jymhiin. (Valokuva: Privaatti)
Privaatit jymmit saava aina vaikeaman olon isoja ketjuja vasthaan. Mutta poikkeuksia löytyy. Stålnacke/Gunnelbrandin pari Kirunasta aukasee nyt heän viienen laitoksen. Yks voima Jymmi Sverigen takana oon Anna Stålnacke joka kilpailee pikinifitnessissä.
-Ette into meihin oon niin suuri johtuu osittain siittä ette Annala oon niin monta seuraajaa sosialisissa meetioissa, sannoo sampu ja osakas Fredrik Gunnelbrand, 37.
Kieruna, Luulaja, Tukholma, Ypsaala ja nyt kuukaven päästä Västerås. Siinä oon kaikki net viis laitosta jonka takana oon Gunnelbrand/Stålnaken pari.
-Moni jolla oon juuret pohjosessa träänaava meän tykönä etelä Ruottissa aivan sen vuoksi ette met tulema samasta maanosasta. Se oon mukava. Fredrik oon tooltis meetieyhtheyksissä vaikka hään oon ollu töissä Jymmet Sverige:ssä vuesta 2002, ko hään täytti 21.
-Mie pruukaan lykätä Annan minun etheen, hään nauraa, mie en välitä niin paljon avisista ja teeveestä ja semmosesta.
Mutta sampun innossa rakentaa kroppaa ja tulla arvosteltu pikinifitneskilpailuissa, oon luonolinen halu näkyä.
Instakrammiprufiili Anna Stålnacke, 29, oon kilpailu pikinifitnesissä ja voittanu hyviä palkinoita. Tässä sampun Fredrikin kansa, 37, joka mielumin halvaa olla taustala. (Valokuva: Privaatti)
Kompleteeraava toisia
Pari jolla oon juuret Vittankissa (Anna) ja Parkalompolossa (Fredrik) hoitava liikheen yhessä vaikka Fredrik selvittää hänen osan näin:
-Mie olen vahtimestari ja hoijan palvelun. Jos jotaki mennee rikki niin mie sen fiksaan. Anna hoitaa ekonomiin, palkat, hakea uutta väkeä, syöttää sosialisia meetioita, järjestää trääninkireisuja ja tapahtumia…
2011 heän tiet kohtasit Kierunan Jymmissä ja heti ketju sai hyän vauhtin. Vuotta jälkhiin Luulajassa vihithiin yks laitos, 2015 Tukholmassa, 2017 Ypsaalassa ja nyt 2018 Västeråsissa. Paikanmuutos tänä vuona Kierunassa oottaa kruuakaivoksen takia. Uusi Jymmi heän kotikaupunkissa tullee kohta tuplasti niin suuri ko entinen; 1450 neliöä.
Liike kasuaa koko aijan ja tänäpäivänä siinä oon 15 työntekijää. Pari kulkee ylös ja alas maassa ja assuu kolmessa paikkaa: Kierunassa, Luulajassa ja Tukholmassa.
-Viimisinnä vuosina oon valitettavasti ollu paljon Tukholmaa koska met olema alkanhee niin monta jymmiä sielä. Mutta sitähään aina kaipaa kotia…
Miksis Jymmilä mennee niin hyvin?
-Met yritämmä uuistua uusila laitheila koko aijan, laittaa net viimiset. Jos mie löyän jonku erilaisen konheen mie ostan sen heti, siittä tykäthään. Jos met vielä saatama muuttaa eli rakentaa ulos niin met tehemä sen. Markkinarako oon kans tullu ette tottunhee ja vasta-alkuset träänaava yhessä, kaikki oon tervetulheita.
Kirunassasyntynhee Fredrik Gunnelbrand ja Anna Stålnacke valithiin vuosina 2015, 2016 ja 2017 Vuen jymmiksi Fitnessfästivaalissa Tukholmassa.(Valokuva: Privaatti)
158 000 seuraajaa instassa
Fredrik selittää ette kuvia ja filmiä sosiaalisissä meetioissa Annasta ja hänen kaverista leviävä isosti ja se antaa ilhmaista PR:iä. Annala oon esimerkiksi 158 000 seuraajaa instakontussa @annastalnacke.
-Met emmä koskhaan anonseeraa avisissa, ihmiset tuleva siltikki meile.
Annasta oon tullu pyllyträäninkin puolestapuhuja?
-Jaa, piru tiesi kunka monta pylly- ja jalkakonetta meilä oon, ha ha. Se oon tullu kohta meän markkinarako; jos sie halvat träänata pyllyä ja jalkoja niin tehe se Jymmissä.
Mikäs oon sinun favuriittilihas?
-Taitaa olla pahempi minun lihaksitten kansa, mie olen enämpi monipuolinen, mie voin hyvin siittä. Vaikka toivoisin ette olisin enämpi ko Anna. Jos se oon päättäny träänata yhtenä päivänä se tekkee sen, vaikka mitä tapahtuis.
-Itte mie helposti löyän syitä ette ei träänata.
Mitäs sie ja Anna tehettä kymmenen vuen päästä?
–Met jatkama tätä vielä. Luultavasti met asuma Luulajassa sillon, eli USA:ssa se oon unelma mikä meilä oon, ette hoitaa jymmin ulkomaila. Mutta meilä oon kans monta paikkaa jäljelä missä saattaa aukasta täälä Ruottissa ja met saama useasti kysymyksiä emmäkö met saata alkaa jossaki uuessa paikassa.
Meänkielensi Märta, Karin ja Linnea Nylund
Fuutnuutti: Gymmet Sverige löytyy instrakrammissa (@gymmetsverige niinki @annastalnacke) ja kotisivula gymmet.nu