Riitinkit uutheen Särkilaksen kirkhoon joka rakenethaan tien 99 varrele ylöspäin Mataringistä. Kuva: Särkilaksen kirkon ystävät
Särkilaksen kirkko, joka meni kevätulvan matkassa 400 vuotta aikaa, rakenethaan ylös uuesti vanhaassen paikhaan vähän matkaa ylöspäin Mataringistä. Kesälä järjestethään työpajoja hirrenveistoksessa Haapakylässä ja syksylä saatethaan vihitä repliikan.
– Siihen vailtuu vielä 500 000 kruunua niin met lähemä nyt laajalta ja tahoma avustusta ja vapaehtosta työtä, sannoo Leif Toolanen, Särkilaksen kirkon ystävät.
Mataringin seurakunta oon päättäny antaa 20 000 kruunua repliikhaan, niinku rakenusta kuttuthaan. Simo Rundgren, kirkkoherra Mataringissä, selvittää miksi summa oon niin matala:
– Met tykkäämä ette se oon jännä ja arvokas prujekti ko kattoo paikalishistuuriata ja tyristiliikettä. Hyvä jos se onnistuu. Mutta meän seurakunnassa oon jo viis kirkkoa, se riittää meile. Tämä oon enämpi prujekti kunnale.
Piispa Hans Stiglund, jolla oon juuret Haaparannala, oon sanonu ette hään ei meinaa vihitä rakenusta kirkoksi, ja silti ei luultavasti tule olheen kirkonmenoja seinäin sisälä. Mutta Ruottin kirkon laimea into ei vaikuta Särkilaksen kirkon ystäviä, niinku se vastajärjestetyn föreninkin nimi oon. Jäsenet uskova ette oon monta yrittäjää ja privaatihenkilöä jokka halvava tukea rakenusta. Rahala, hirsilä eli työavustuksella.
Mataringin seurakunta antaa 20 000 kruunua Särkilaksen kirkon ystäville, sannoo kirkkoherra Simo Rundgren. Kuva: Privaatti
Neljäsattaa vuotta kevätulvasta asti
Tarkotus föreninkillä oon ette levittää tietoa tästä kylttyyriaartheesta mikä tämä vanha kirkko ja kaikki taphaukset siinä oon.Tänä vuona siittä oon 400 vuotta ko kapelli kulku menheen kevätulvan kans ja ainuasthaan risti oon jäljelä muistona tien 99 varrela.
Repliikka rakenethaan osaksi vanhaan tekniikan ja tion avula, selittää Leif Toolanen jolla oon ollu rakenusliike kakskymmentä vuotta. Kirkko tehhään hirsistä luonolisen kokosen, mutta ko ei ole riitinkiä säilytetty ette näkkee minkämallinen se oli, niin oon päätetty lähteä Älvrosin 1600-luvun kirkosta Härjedalenissa. Isot ja pistot katot olit sen aijan mallia ja se löytyy kans Särkilaksen kapellin riitinkissä.
Pitkä prusessi
Monen kieroksen jälkhiin kunta oon antanu rakenusluvan. Rannansuojasäänöt oon tehnee ette kirkko siirethään nykyseltä ristiltä koijulehthoon etelän puolela tietä joka mennee ittenäisyyssaarile.
– Jo kymmenen vuotta aikaa otethiin ensimäinen askel tässä asiassa, mutta kiitos meän puhheenjohtajalle Jan Tollinille kysymys oon nyt otettu ylös uuesti.
Mataringin kunta oon luanu tuntuvaa rahalista tukea, mutta se vaatii enämpi. Rakenustavara oon jo
melkeen valmis ko mettänomistajat oon luahnee lahjottaa puuta.
– Met piämä veistoskursia Haapakylän sahala huhtikuusta kesäkuuhun ihmisille Ruottin ja Suomen puolelta. Ette saa kokhoon tämän vaatii vanhan aijan vapaehtosta työtä.
Kirkko pittää olla auki enimäkseen kesänaikana ja sinne järjestethään esimerkiksi teatteritoimintaa mikä yhtyy rakenuksen histuurian kans.
Prujekthiin kuuluu kans kirja Petter Antilta ja Sture Torikalta. Se tullee ulos kesälä ja selvittää tarkasti mikä merkitys kristilisyyen toiseksi pohjoisimalla kirkola oli siihen aikhaan.
Jos niin oon ette iso osa prujektistä ei onnistu niin rahat maksethaan takasi antajille, luppaa Leif Toolanen.
Nootti: Oleks innostunnu olheen myötä veistoskursissa Haapakylässä? Eli auttaa muula mallila rakenukseen? Soita Leif Toolaselle 070-56 46 179
Meänkielensi Märta, Karin ja Linnea Nylund
Tänäpäivänä Toornion väylän varrela oon risti joka näyttää missä kirkko oli ennenko kevätulva otti
