Erik Kuoksu oon kirjottannu kummitusjuttuja kotikylästhään Jukkasjärvestä. Kuva: Privaatti
Tornionlaaksosta kertovat novellit levittävvä kauhua Ruottin raation kotisivuilla. Näitten Tornion Lapin yliluonoolisten kertomusten takana oon sosionoomi Erik Kuoksu Jukkasjärveltä:
– Tarinat oova tulosta siittä ko mie uuesti löysin net paikat, joissa mie kläppinä olin, kertoo 38-vuotias kirjottaja.
Näitten raatiojutuitten takana oon Metro-jurnalisti Jack Wernerin ylläpitämä netin Kauhupoddi (Creepypodden). Poddhiin oon latattunna äänityksiä, joihiin kuulija pääsee käsiksi ympäri vuorokauen. Tämä poddi koostuu viiestäkymmenestä eri kirjottajan kummitusjutusta.
Jukkasjärveläinen Erik Kuoksu oon tehny sukututkimusta aina 1990-luvun puolivälistä saakka. Hään julkasi ensimäisen kirjan v.1998 ja oon sen jälkheen julkassu 25 kirjaa ja lehtiartikkelia. Kirjoissa hään oon tutkinnu enimäksheen yleemän Tornionlaakson suurempia sukuja.
Hään oon viientoista iästä asunnu Jöötteporissa mutta hällä oon talo kotikylässä.
– Mie oon aina ollu kiinostunnu vanhasta kauhukirjalisuuesta, hään kertoo.
Viistoista vuotta aikaa hään alko kirjottaa vähän irvailevia kauhunovelleja. Suurin osa julkasthiin eri aikakauslehissä, varsinki Kiruna-lehessä. Pikkuhiljaa hään kokosi net sitten kirjaksi Autio ja muita kertomuksia Tornion Lapinmaasta.
Ruottin Raation kotisivuila oon Kauhupoddissa luettunna kaksi Erik Kuoksun novelia kirjasta Autio ja muita kertomuksia Tornion Lapinmaasta.
Jack Werner soitti
Nytten syksylä Erik sai puhelun Jack Werneriltä, joka halusi jakkaa hältä kaksi novellia hänen poddissa, novellit Kauhua Haukimaassa ja Supasvaaran männyt. Nytten net oova sielä ja oova suunnilheen 60 minuutin mittaset.
Tunnettu jurnalisti Jack Werner oon antannu hänen äänen Erikin noveleille. Kuva: Ruottin raatio
Mites paljon sinun kertomuksissa oon totta?
– Haukimaa-kertomuksella ole mithään toelisuuspohjaa.
Kertomuksen mukhaan Haukimaa kuiten mainithaan ensiimäisen kerran Kiirunassa 1703 yhen tuomiokirjan ilmotuksessa. Tästä ilmotuksesta kasvaa mystinen kertomus paikasta, jolla oon sielä asunheissiin pelottava vaikutus.
Supasvaaran männyt kertoo kahesta vereksestä miehestä, jokka saava kuulla kappalheen matkaa Kierunasta ylös olevasta paikasta, jossa oon männyissä ikivanhoja kaiveruksia. Het päättävä ottaa pareeman selvän tästä.
Erik oon usean vuuen ajan käynny läpitte vanhoja sukukirjoja 1500 luvulta aina 1800 luvule saakka ja lykästynny fangittemhaan ajan kielen, mikä tekkee kertomukset uskottaviksi.
Mikäs kauhussa oon niin koukuttavvaa?
– Miehään oon sosionoomi ja tehen työtä ihmisten parissa, joila oon erilaisia propleemia. Elämän varjopuoli oon kiinostavvaa ja kauhuhaan oon ihmisen perustuntheita.
Viis vuotta aikaa loppu kuiten Erikiltä kokohnaan lysti kirjottaa ennää kauhunovellia.
– Nytten mie kirjotan toisenlaisia tekstejä.
Erik kertoo, ette Tornionlaaksossa oon vielä mahottoman paljon sukutarinoita julkastavaksi.
– Sielä ylhäällä kaikin oova sukua keskenhään ja suvut oova mahottoman suuria. Suurta ossaa aluheen asukhaista voipii seurata kehosta hauthaan tuomiokirjoista, manttaalikirjoista ja kirkonkirjoista.
Oos sulla ittelä mithään yliluonnolista kokemusta Tornionlaaksosta?
– Mie oon käynny ympäri Jukkasjärveä paikoissa, jokka oova olheet mulle jotenki tutut. Se oon herättänny minussa tuntheen, jota minun oon ollu vaikea selittää.
Meänkielensi Matti Junes
