Turvalisuuđen tunnet

Tässä makasiinissa sie saat lukkeet muutaman kielisentterin johtaajan ja fylkinkommuunin osakunnanjohtaajan ympäri; het oon höölisti errii mieltä siitä ette oonko kvääniilä fasti staatin finansieeraus eli ei.

«Piian siinä oon kysymys siitä mitä sanapari fasti finansieeraus tarkoittaa?»

Se oli kielisentterin johtaaja joka totes ette nyt pittää näitten sannoin käsittämisen defineerata, ja puhui sillä probleemistä mikä koskee meiđänki ihmissii. Eli taiđosta ja erittäinki halusta olla sammaa mieltä siitä mistä oon puhet. Kielihän annethiin ihmisille sillä ette sen avula saama rajattoman mahđolisuuđen ymmärttäät väärin toinen toisen. Sen tähđen olema viishaat jos ensistä pääsemä yhtheisymmäryksheen siitä mistä meilä ei ole yhtheisymmärystä.

Vaatimus tieten oon ette ihmiset ylipään halluuvat päästä yhtheisymmäryksheen erimielisyyđestä. Tähän kyllä tarvithaan sekä korvii ette empatiita. Helpompi se oon viskata ittensä keppihevoisen sölkhään ja liuhtoot cowboyhatun kansa ja rattastaa ymmyrää kiini siihen asti ette oon polkenu kaikkiin pääle. Met olema sikkarit ette kvääniväki päässee piđemälle ko ääni kuuluu sisältä. Sillä se oli eriliikaisen iloinen assii kuula sentterin johtaajan muistutuksen. Se muistutus ei ollu kovaääninen mutta halus rakenttaat yhtheisymmärystä, mikä meiđän kokemuksen jälkhiin auttaa assiita enämen ko huutaminen.

Met ymmärämmä ette fylkinkommuuni puolustaa ittensä avustusoorninkkkii. Niinhän sitä pittääki. Mutta sillä se epäsuorasti puolustaa staatin – meiđän mielestä – laihoi prioriteerauksii ja tekkee ette noppeesti kasvaava määrä erilaissii instanssiita ja prosektiita tunttee ittensä turvattomaksi.

Mitä sitte oikkeesthaan sanala fasti meinathaan siinä sanaparissa fasti finansieeraus? Oonko se nokko, niin ko osakunnanjohtaaja sannoo, ette oon olemassa yhtheinen ruokasäkki, ja staatti takkaa ette se säilyy? Vain tarkoittako sana fasti sitä ette jokhainen erittyinen toimiija saapi oman taatun niestapakan staatilta, niin ko kielisentterin johtaaja meinaa ette olis oikhein?

Ko tässä vähäsen aikkaa olema hunteeranheet assiita, se meistä näyttää ette viiminen vaihtoehto oon oikhein. Ja jos met kuitenki olema väärässä, se meiđän mielestä pittää ajatella mihin oorningilla tođesti haluthaan päästä. Met omasta puolesta toivoma ette sillä haluthaan päästä siihen ette saisima työtelä ilman pölkkäämättä finansieerauksen vailumista.

Turvalisuus ei ole tyhä mikhään teoreettinen assii, joku semmonen mikä synttyy siinä ko lujet luppauspreivin. Turvalisuus oon kansa tunnet. Eikä fastit kvääniaktöörit juuri koje ette het oon ekonoomisesti turvassa. Tämän kyllä tiettää Ruijan Kaiku sillä ko met olema samassa venheessä, ja meistä tunttuu samalta.

Hyvän staatin tehtävhiin kuuluu kuunela argumenttiita, mutta kans perustaat tuntheista. Ja tääpänä kväänit kyllä tuntteevat ittensä kaikkee muuta ko turvaliseksi.