Kalaallisut allaaserinninneq
Isikkoq

Uani allaaserisami najoqqutaq isikkoq samminiarpara, tassanilu najoqqutani Margrethe aamma Bussimi naapinneq-mi inuttaasut ilisaritinneqarneranni oqaatsit sunniutitut atorneqartut misissussavakka sanilliullugillu. Sanilliunneranilu isummerfigissallugit.

 Margrethe:
Najoqqutaq Villads Villadsenip atuakkiaa Margrethe 1995-imi saqqumersumit tingulaagaavoq.
Margrethe atuakkami inuusuttunnguatut kusanartutut minguittutullu saqqummiuneqarpoq, tamanna takuneqarsinnaavoq isikkuata oqaluttuarineqarnerani, oqaatsillu atorneqartut qiviarneranni.
Margrethe sukkulaajusanik angisuunik iseqarpoq, qimeriarsuaqarlunilu. Amia qaqoqaaq, kiinanngualu iluserilluinnarluni, uluaalu sinngoqqallutik. Kingutaai qaqqoriit, sigguilu issulaartut aappillaarittut, ipumminganngitsut. Issaqarpoq, tulluarilluakkaminik, nujaalu sukkulaajusaallutik.
Inooqatikkuminartuuvoq, ikinngutikkuminarluni, qiimasuullunilu.
Atuakkiortup Margrethe kusanartumik saqqummiuppaa, sunartanngua tamaat ajortortaqartinnagu. 
Oqaatsit positivit atorneqarput, soorlu kusanartoq, qiimasoq, qungujulasoq, uiguutillu –nngua, -suar atorneqarput. Tassani –suar positivitut atorneqarpoq, oqaatigineqarmat qimeriarsuaqartoq, qimeriarsuarnik oqarneranut pissutaavoq kusanangaarmata pikkunarpaluttumik oqaluttuarimmagit. 
Oqaluttuartup kusanartingaaramiuk qungujunnera aasalersup seqernanut nuisumut assersuuppaa, illarnera upernalaami nunap iluani kuuppaluttarnertut tusarnertigitillugu.
Minguinneranut ersiutaavoq oqaluttuartup oqaatigimmagu Margrethe 17’liingami soorlu ”manniarannguaq qalipaarlugu”. Tassami mannik qalannikoq qalipaajaraangatsigut qaqortuinnaalluni manittuinnaasarpoq, mingoqarpasingani.
Aammattaaq sapakkatut kusanarnersaalluni akisunersaalluni pinnernerpaatut oqaatigaa, tassani oqaatsit atugaasa inornartutut inissippaat, soorlu kusanangaarmat tamanit anguneqarsinnaanngittoq.
Allaammi Margrethe inornartigaaramiuk utoqqarnut nikallulersunut ukiualunnik inuusullinartutut inissippaa. 

Katrine (Bussimi naapinneq):
Najoqqutaq Maaliaaraq Vebæk’ip atuakkiaa ”Bussimi naapinneq” 1981-mi saqqummertumit tigulaagaavoq.
Najoqqutami inuttaq saqqummiunneqartoq arnaavoq kalaaleq Katrine’mik atilik. 
Oqaluttuartup Katrine kusanartutut maligassatullu saqqummiutinngilaa, tassami Katrine imerajuppasittutut imminullu paarerpasinngittutut saqqummiunneqarpoq. Imminut paarerpasinnginneranut ersiutaavoq kinaa pullalluni aappalukujummat, nuuttooqqalluni, imerajuppasillunilu. Atisaatiguttaaq takuneqarsinnaavoq, atisaami ulluinnarnut naleqqutinngillat. Kjoleqarpoq nuilaatigut ammanertuumik, kimmikkaanillu støvleqarluni.
Pinnerani ersinangajappoq, qungujulanera silanngajaartumut eqqaanarneruvoq.
Peqqissaartuunnginneranut ersiutaasunut ilaavoq, inummut nalusaminut pulaarluni illup iluani cigaretti qamitaq pujortarmagu. 
Oqaluttuartup oqaatsit atugaai negativiupput, nalornerpasillutillu. Oqaatsit negativit atorneqrtut ilaat tassaapput qiasunnisoq, qasoruloortoq, imeruloortartoq (imerajuttoq), iluserinngittoq, silanngajaartoq, ersinangajattoq.  Nalornerpasinneranut ersiutaapput uiguutit –kujuttoq aammalu 
-ngajattoq atukkajummagit, soorlu oqaatsit atoraai qungujulakujuttoq, siaakujussimasoq, ersinangajappoq. Aammattaaq oqaatsit pikkunasaarisut atorpaai, tassanilu uiguut –ruloor atorpaa, soorlu qasoruloortoq, imeruloortartoq.

Sanilliussineq:
Najoqqutani inuttaasut Margrethe aamma Katrine imminnut akerleriilluinnartuupput. Margrethe’mi saqqummiunneqarpoq, minguitsutut kusanartutut malingassiusutullu. Akerlianilli Katrine imminut paarerpasinngittoq, kiinaa pinnerani pullattoq, imerajuppasittorlu. Margrethe saqqummiunneqarami inornartutut inissinneqarpoq, ajortortaqanngivissorlunilu. Soorlumi ukiap seqernanut nuisumut assersuunneqartoq, allaallu oqaatigineqarluni utoqqaat nikallulersut ukiualunnik inuuttatsittarpaai, pilluarnerulersillugillu. Katrineli saqqummiunneqarpoq ajunngittortaqanngitsumik, inuttaalu allaat silanngajaarpasingajattutut, ersinangajattutut, imerajuttoorpasittutullu oqaatigineqarluni. Margrethep pisataai tamarmik imminnut tulluartuupput, kusanarlutillu, inuttaalu sapakkamut akisunersaalluni kusanarnersamut assersuunneqarpoq. Katrineli atisaat ulluusumut tulluutinngillat, pinnersaataa nuuttooqqalluni, kiinaa pinnerani, aallaammi oqartoqarsinnaapajaarpoq atortittartunut eqqaanangajattoq, imaaliallaannaq pineqarsinnaalluni. Oqaluttuartup Margrethe tulluusimaarutigerpasillugu maligassatullu inissippasillugu oqaluttuaraa, Katrinemilli oqaluttuartup Katrine pakatsissutigerpasittutut saqqummiuppaa soorlumi oqartoq ”Takorloortagara kiinaq aliasuppasittoq soorlu asanassasoq (…) Maanna takusara allaalluinnarpoq. Kiinaa pinninngilaq. Ersinangajappoq.” Assigiissutituaalli tassaavoq tamarmik arnaangamik kalaallit. Maaliaaqqap 1981’mi kalaallit arnat Katrine-tut ittut paqumigineqaraluartut paqumiginagu saqqummiuppaa, ilaatigut kalaallit Danmarkimut katikkiartoraluartut kingunerisartagaat saqqummiullugit. Villadsillu Margrethe 1995’mi siuariartuleruttornerup nalaani maligassatut inissillugu saqqummiuppaa.