Limousine aappilarujuttoq
Uanga uani allaaserisami Arnajaap taalliarisimasaa “Limousini aappilarujuttoq” sammissauara. Taallami sammisat pingaarnerusorisakka isumasiussavakka, naggataatigullu 
Arnajaap taallioriaasia nalilersussallugu. Najoqqutaq ilaatigut mingutitsinermik sammisaqarpoq, tamannalu Arnajaap oqaluttuatoqqanik taallanillu pioreersunik, mingutsinermut attuumassuteqartunik, tingulaarinerminingut ersersinniarpaa.

Limousine aappilarujuttoq
“Limousine aappilarujuttoq” Arnajaaq Lyngemit taalliaavoq, Arnajaallu 2008-mi saqqummersitaanit “Nattoralik marloralik”-mit tingusaalluni. 
“Limousine aappilarujuttoq” taallaavoq moderneq, tassungalu ersiutaapput taallap eqimattanut arlalinnut agguangaanera, naanikkaarnertaqaranilu ataneqannginnera, kiisalu oqaluttuatoqqanit taallanillu pioreersunik tingulaarinertaqarnera. Taallaq ammasuuvoq, atuartussallu nammineerluni oqariartuutaa ujartortussanngorlugu sanaajulluni, tamanna ilaatigut taallap moderniuneranut ersiutaaqataanginnarpoq. Taallap allanit allaanerussutigaa, sammisanik arlalinnik ataneqanngiusartunik ilioraaffigipajuinnakkatut isikkoqarnera, soorlumi taalliortup eqqaasaani tamaasa taallamut ilioraannarsimangai, oqaatsinik pinnguartutut illuni. 
Taallanik oqaluttuanillu pioreersunik assigiinngittunik taallami ersertoqarpoq (intertekstualitet), soorlu taallap aallartinnerani “Inunngorama nunamit saqqummerama”, taallamut “Inunngorama nunamiilerlunga”-mut eqqaanartuuvoq. Taallalli ingerlaqqinnerani Arnajaap oqaatsinik pinnguarneranik ersertoqarpoq, anaanaq taallaami innersuunneqartumi toqqissisimanartutut kissalaartutullu saqqummiunneqartoq, mumingasumik saqqummiukkamiuk. Taallamimi anaanaq utoqqalisoq, misunnikoq, qaamanermik nalusalittut saqqummiunneqarpoq. Aammattaaq taallaq pioreersoq “Nunarput utoqqarsuanngoravit”, ilanngullugu tingulaariffigineqarpoq, anaanaq qiinittoq saqqummiunneqarnerani. Tassani anaanaq utoqqalilluni qiinittoq, nunatsinnut “utoqqaalisumut” assersuunneqarpoq. 
Uanga isumaqarpunga Arnajaap mingutitsineq sammisatut pingaarnertut inississimangaa, tassanilu oqaluttuatoqqanik taallanillu pioreersunik tingulaarinikkut takutinniarlugu.
Soorlumi anaanaq misunnikutut saqqummiunneqartoq, ullutsinnimi amerlasuut nutsatik qiinikkaangata misuttarpaat, qiitik tarrisinniarlugit. Misukkaangattami nutsagut akuutissartalinnik misuttarpagut “mingutsillugit”. Taallami eqimattat ilaanni allassimavoq: “Aak aappaluttoq siku qaqortoq”, tassani aappaluttoq qaqortorlu aammut sikumullu isumaqartitatut inissinneqarput. Isumaqarpunga kalaallit erfalasutta qalipaataat, aappaluttoq qaqortorlu pineqartut. Taallammi qulequtaa qiviaraanni “Limousine aappilarujuttoq”, qalipaatit taakku taaneqareernerata kingorna eqqaaneqarpoq. Aappilarujuttormi qalipaat
akusaavoq (qalipaat “falskeq”), kalaallit erfalasutta qalipaataat aappaluttoq qaqortorlu akulerukkaanni aappilarujuttunngortarput. Isumaqarpunga taallap qulequtaa “Limousine aappilarujuttoq” isumaqartinneqartoq, kalaallit avataaneersunik akusaaleraluttuinnartugut,  piisaakalaarutinillu mingutitsisunik atuileraluttuinnarluta. Limousinemi atuipilunnermut assilialersuutigineqarsinnaavoq, tusaamasat limousinenik atuikkajuttarput, ingattajaarlutik pigissaartuunertik takutikkumallugu, naak biilit naliginnaasut atorsinnangaluarlugit. Kalaallimmi siornatigut kulturitsinni mingutitsinngittunik, atuipilunnerunngittunillu atuisaraluarpugut, soorlu siornatigut qimussit atorneqartaraluartut maanna snescooterit atungaanerusalerput, taakkulu orsussaqartarput mingutitsisunik, soorlu aamma biilit mingutitsisunik orsussaqartartut. Siullermillu qajaq atugaangaluartoq ullutsinni umiatsianik taarserneqarsimavoq, umiarlu umiarsuarnik pujortuleeqqanik assigisaannillu taarserneqarluni.
 Taallami aamma ilanngunneqarsimavoq: “Bussinunngooq sungaartunut akiliilluta ikiinnariarta”. Tassani Arnajaap takutinniarpaa mingutitsineq annikinnerusoq atorsinnaagipput, immikkut tamatta biililersunngikkaluarluta, bussini ataatsini ataatsimut ilaasaleraluarutta, annikinnerusumik mingutitsisalissangatta.
Taallanik pioreersunit allanik tingulaarinernik ersertoqarpoq, soorlu eqimattat ilaanni allaqqasoq: ”Puiaassap iluani tamatta poorsimavugunngooq”, taanna Sume-kkut taalliaannut innersuussutaavoq, imigassamut tunngassuteqartumut. Isumaqarpunga Arnajaap mingutitsisunik sammisaqarnermini, imigassaq ilanngukkaa nunatsinni 1960-kkunni atupilunneqarnikuummat, kalaallinik “mingutitsilluni”. Taamanikkummi imigassap kingunerisimavai ilaqutariit avissaartuunnerat, imminortarneq/ajunaarneq, meeqqanik sumiginnaaneq, pinerlunneq, aningaasanillu atuipilunneq. Tamanna suli ullutsinni ajornartorsiutigineqartarpoq, naak taamanikkumut sanilliullugu takussaannginnerungaluartoq. 
Taallami aamma ilaatigut Sassumap arnaa, Manguaraq, Aningaaq-Maliinalu kalaallit oqaluttuatoqaatitsinneersut ilanngussuunneqarput. 
Sassuma arnaa oqaluttuatoqaatitsinniik nalunngilarput, mingutitsisoqaleraangat nujai ilattartut, taamaasillutillu piniangassat nujaanut ilanguttarput, piniangassaarullugu. Taamaattumik Sassuma arnaa mingutitsinermut assilialersuutitut taaneqarsinnaavoq.
Aningaaq Maliinalu eqqaaneqaraangata ilaqutariit iluanni atoqatigiinneq eqqaasarparput, tamaammat ilimangisinnaavara Arnajaap ilanngussimangai, ullutsinni piumasaannarsulersimangaaratta inatsisinik, inatsisinillu “ersinngitsunik” unioqqutitsisoqartaleraluttuinnarnera takutinniarlugu. Atornerluisarneq tusarsaasarpoq, ajornartorsiuterujussuullunilu. Inatsisinik “ersinngitsunik” unioqqutitsinermut Manguaraq ilanngunneqarsinnaavoq, Manguaqqammi qaammassuup piniangassaa eskimoplet, piniaqqusaanagu paasereeraluarlugu pisaraa. Arnajaap taalliamini allassimavaa: “Qaammatip inua pinerrarissoq akornusernagu iluamik piniaritsi!” Tassani ilimanarpoq piniapilunneq upuaruarneqartoq, piniapilunnerummi killissamik qaangiineruvoq, kingunerisinnaavaalu piniangassat nungukkiartulernerat. 
Eqimattat ilaanni eqqaaneqarpoq “Sermersuit aalerput, kuussuit kuulerput, aningaasat puttussuupput, piniagassat sussat”. Isumaqarpunga Arnajaap sermersuit aakkiartornerat silaannaap kissakkiartorneranut assilialersuutaatikkaa, silaannaallu kissakkiartornera mingutitsinermut isumaqartitaasoq. Ullutsinni Alcoa eqqartungaasorujussuusarpoq, aningaasammi ullutsinni ima naalagaatigilersimapput, allaat aatsitassarsiorfiit aningaasannassutaanissaat siunertaralugu pilersinneqarnissaat eqqartorneqartalerpoq, naak pinngortitamut piniangassanullu mingutitsisuusussaangaluartut.
Uanga isumaqarpunga Arnajaap allattariaasia alutornartoq, nunatsinnimi taalliortartut ataasiakkaanginnaat ammasunik, paasiuminaattunik eqqarsaatigilluagassanillu “moderniusunik” taalliortarput. Taallap ataneqannginnera, sammisanillu assigiinngittunik akulerussuutaasunik imaqarnera, atuartussamut paatsiveerutitsisutut ippoq. Taallaq qallikkut qiviaannarlugu takivallaarnera atuarnissaanut eqianarsisitsisutut ippoq, imarisaali misissoraanni paasiniarusulernarsivoq suna atuartussamut oqariartuutiginiarneraa.
Isumaqarpunga Arnajaap taalliamini oqariartuutigingaa, ullutsinni moderniorusungaaratta nutaanut “nakungaluttuinnartugut”, mingutitsinissarput eqqarsaatigeqqaarnagu, aningaasat pingaarnerutillugit iliuuseqarniartarluta. Taamaattumik Arnajaap uisinniartutut ippaatigut, ullutsinnimi avataaneersunik akusaalersimangaaratta, kulturitoqarput mingutitsiviunngittoq qimakkaluttuinnaleripput, mingutitsisarnerpullu pisussaannartut isigileraluttuinnarlutigut.
Naggasiut
Arnajaap “Limousine aappilarujuttoq” taalliaringamiuk, ilaatigut taallanik oqaluttuatoqqanillu pioreersunik tingulaarinertalersimavaa (intertekstualitet). 
Uanga isumaqarpunga oqaluttuatoqqat qangaaniilli kalaallit oqaluttuaataaneersut atuartussamut tinguuaasussatut, taallallu oqariartuutaanut tikkuaasussatut, ilanngunneqarsimasut. Oqaluttuatoqqammi taakku tingulaariffigineqartut mingutitsinermut inatsisinillu “ersinngitsunik” unioqqutitsinernut tunngassuteqarput. Taamaattumik isumaqarpunga Arnajaap una taallaq uisitsiniutigisimassangaa, ullutsinni piumasaannarsorpallaalernerput, pinngortitamut avatagiisitsinnullu mingutitsinerput takutinniarlugu. Eqqaasinniarpaatigullu qanga kulturerput mingutitsiviunngittoq qimakkaluttuinnaleripput, nutaanik avataaneersunik akusanngoraluttuinnartilluta.