Nunagisamik nittarsaassineq
Nunagisamik nittarsaassinermi taallat marluk sammissavakka, siullertut Villads Villadsenip taalliaani “Qeqertat pingaarnersaraatsit”-mi oqaatsit assilialersuutillu atorneqartut misissussavakka, aappaatullu Arkaluk Lyngep taalliaa “Takusiuk nunarput” taallamut siullermut sanilliutissallugu

“Qeqertat pingaarnersaraatsit” Villads Villadsenip taalliaraa, erinarsoqatigiillu Qissiat cd saqqummersitaannit taallaq tigusaavoq.
Villadsip taallaq allakkamiuk qularnanngittumik nuna nittarsaassani Qeqertarsuaq ataqqillugu misigissuseqarfigalugulu saqqummiuppaa, tamanna oqaatsit atugaasa ataqqinnippaluttut ajunngitsuinnavimmik kusanginnittumillu nipeqartut qularnaarpaat.
Taallaq atuarlugu versip siulliup aallartinnera “Qeqertat pingaarnersaraatsit pinnivissoq Qeqertarsuaq. Alutornartut annersaraatsit tikeraanut pingaartorsuaq!”, naqissuseereerpoq taallami Qeqertarsuaq allanit tamanit inorneqartussanngorlugulusooq inissinneqartoq.
Versit aappaanni “qaqqat qaavi moriittorasaartut qaallorimmik nasarsimasut” assilialersuutaavoq, tassami qaqqat nasarsimatinneqarmata, natsamik nasarsimanatik, kisiannili apummik qalleqqaneqarnerminni aputinik nasarsimasutut isikkoqartinneqarlutik.
Taallap nanginnera “..soorlumi nerrivissuit tassa qaqqorimmik ulissimasut” assersuussineruvoq, isumaqartitaallunilu (symbol). Tassami qaqqat aputinik ulissimasut nerrivissuarmut qalilimmut assersuunneqarput, kisiannili aamma isumaqartitaalluni (symbol), qeqertarsuup pinngortitaa  uumasunik, paarnanik, kuannernik allanillu inuussutissanik/nerisassanik peqangaarmat nerrivissuartut isumaqartinneqarsinnaalluni.
Versit tallimaanni taalliortup qeqertat allat eqqartuleramigit negativimik eqqartorpai,  nallersuunnissaminnut ajukkunnerarlugit, anneruniarnissaminnullu pissaqannginnerarlugit.
Versit pingajuanni assilianngortitsineq erserpoq mallit sissamut qaartarusaartut  inoroorsaartillugit oqartinneqarmata “Tikilluarit!”, naak mallit taamak nipeqanngikkaluartut, saneqquttunut tikikkusulersitsinerat ersersinniarneqarpoq, kiisalu immaqa inuttaasut tikiffigalugit tikilluaqqusaasutut misiginarnera assilianngortillu mallit taamak oqartinneqarlutik.
Taallap ingerlanerani oqaluttuatoqqamik iserfigisaqallatsiarneranik ersertoqarpoq (intertekstualitet) versi kingullerpaami “-Perloqqullutit maanngaassaraatsit qaannat marluk qimarngullutit”, tassanimi iserfigillatsiarneqarmat Qeqertarsuaq pillugu oqaluttuaq; qaannat marluk naalugiarsuup nujaanik allunaasalerlutik Qeqertarsuaq kalillugu avalatsikkaat piniarnerminni ajoqutigingamikku. Taalliortup taanna oqaluttuaq iserfigillatsiariarlugu nangippoq “Niaquussasutit naluaatsit tamanit nersugaassallutit”, tassani “niaquussasutit” isumaqartitaasinnaavoq niaqorummut, niaqorut kunngikkormiutut isumaqarluni, taamaasilluni Qeqertarsuaq “naalakkatut” akimasuutut inissillugu. Taamaasilluni taalliortup oqaluttuaq taanna isornartorsiullatsiarpaa, Qeqertarsuaq perloqqullugu avalatsinneqarsimanera, kisiannili kingorna tamanit kusanarninngorlunilu akimanerulertutut inissippaa. (ass. grimme ælling?)
Taalliortup misigissutsiminik saqqummersitsilluni taalliornera erserpoq, taallap naalernerani taalliortup naggasiutiminut ilanngullugu allammagu “Nuannaraakkit, asavakkit pilluarnermik kissaappagit!”.
Naggasiutimini “Maani imaani pinnequtaagit qalipakkatut pinnersutut”, Qeqertarsuaq assersuuppaa qalipakkamut pinnersumut, tassami ungataaniit isigalugu qeqertarujussuaq pisuussuterpassuarnik ulikkaartoq, kusanartorlu assersuunneqarsinnaammat qalipakkamut pinnersumut, tassali kusanangaarmat.
 
Sanilliussineq
Villads Villadsen taalliamini “Qeqertat pingaarnersaraatsit”-mi nuna saqqummiussani kusanartutmik ataqqinnittumillu saqqummiuppaa. Akerlianilli Arkaluk Lynge taalliamini “Takusiuk nunarput”-mi kalaallit nunaat tanngassimaarutissartaqanngitsumik saqqummiuppaa. Taalliaminimi kalaallit pigisaat tanngassimaarutigisartagaallu taakkartorpaai, taamaaseriarlunilu kalaallit kaasimaartut atisarluttullu taakkartorlugit, tanngassimaarutissaagaluit tanngassimaarutissaannginnerarlugit, taama kalaallit atungarliortigitillugit. 
Villadsip pinngortitaq allanit tamanit pingaarnerutillugu saqqummiullugu taalliaraa, Arkaluk Lyngep kalaallit atungarliortut (atisarliortut imerajuttullu), arlalitsigullu meeqqat pinngortitamit salliullugit saqqummiuppaai. Arkaluk Lynge’p innutaasut pinngortitamiit salliutinniarneranut peqqutaaqataangunarpoq, siornatigut ICC’mut ilaasortaallunilu psykologitut atorfeqarnikuunera.
Villadsip taalliamini Qeqertarsuit isornartoqartinngiivippaa, ajoqutigisinnaasaai soorlu avalassimanini pissutigalugu tikiffigissallugu imarlukkajunnera eqqaanngilaa, taamaasillunilu inornartorujummut inissillugu.
Arkaluk Lyngelli nunatta ajortortaai tulleriiaatiinnaavillugit uparuarpaai isornartorsiorlugit, tassanilu qallunaaluarnera aamma erserpoq, taakku atugarissaartuummata atungarliortunullu ikiuutinngimmata isornartorsiorpaai, soorlulu qallunaat pisuutinneqaannarpaluttut kalaallit atungarliornerannut. Taallarmi qallunaalualeruttornerup nalaani 1974-mi allagaavoq, 1950-60’kkunnilu sanaartupiloornerit, nunaqarfinniit illoqarfinnut nutsernerit, imigassaq, qallunaanngorsangaanerlu qallunaat tikeralerneranniit pilertupallassimapput kalaallinut ajornartorsiutinut saatsitsillutik. 
Villadsip assilialersuutini atukkamini pinngortitap peqassusersua nerrivissuartut allaat saqqummiuppaa, Arkaluk Lynge-lli nunatta sikua Whisky-mik aakkiartortutut assilialersuutigivaa, imerajuttoqarpallaarnera uparuarlugu.
Villadsip taalliamini Qeqertarsuaq kusanarnerpaatut saqqummiuppaa, taamaakkaluartorli taalliarisimasaai allat qiviaraanni, assersuutigalugu Qasigiannguit aamma kusanartumik taalliarinikuuaa, tamanna ersersitsiinnarunarpoq Villadsip taalliortutut pisussaaffigimmagu kusanartumik taalliorniaruni isornartoqanngiiviusartumik taalliornissani. 
Arkaluk Lynge’lli kalaallinut eqeersaasumik taalliornermini isornartorsiuinissani pisussaaffigaa, takutinniaruniuk ilumut aaqqiisoqartariaqartoq. Taallaq mumigasumik paasisassaavoq (ironi), taalliortup taallaq paquminartuutillugulu allanikkajaamik allakkamiuk kalaallinik maluginiarneqarnerunissaa anguniarsimassuaa, taamaalillunilu kalaallit imminnut takulerunik, ajornartorsiutitillu paasilerunikkit oqallisilernissaat angusinnaallugu.
Qulequtaanilu allaqqasunut ilaavoq “takornarianut pilerisaarut”, taamaasillutik kalaallit kamalissapput nunartik taamannak saqqummiunneqarmat, aaqqiiviginialerlugulu.
Naatsumik oqaatigalugu Villads Villadsenip taalliaa positiverujuuvoq, akerlianillu Arkaluk Lyngep taalliaa negativerujuulluni.