!Sermitsiaq02_2008 32-1.
Dumpertinneqarpoq.
Naalakkersuisut siulittaasuat Hans Enoksen tupaallannartumik qinersisartunit dumpertinneqarpoq. Taamaallaat Enoksenip politikikkut kiffakulua, naalakkersuisunut ilaasortaq Finn Karlsen, ikinnerusunik pointinnappoq, partit siulittaasuisa nuannarineqarnerannik misissuinermi, Sermitsiap ullumi saqqissaani. Misissuinerup immikkoortuata allap takutippaa ullumikkut qinersisoqartuuppat Siumut ajorsarujussuassagaluartoq, Inatsisartunilu ilaasortaatitani marluk annaallugit. Siumup ilaasortaatitai quliniit arfineq-pingasunut ikileriassapput, Atassutip ilaasortaatitani arfinillit attatiinnassagai. Allatut oqaatigalugu tunngavissaqarluarpoq partip naalakkersuisuni siuttuusup eqqarsaatersulernissaanut, partip ataatsimeersuarnissaa sapaatit akunnialunnguinik sioqqullugu. Nalunngilluaraluarparput Hans Enoksenip nalinginnaasumi politikikkut isumasiuinerit uppererpiarneq ajorai, isumaqatigaarpullu Sermitsiaq qinersisartunik akuttunngitsumik isumasiuisarnermini ataasiarluni kukkusimasoq. Amerlanernilli sinniisunik misissuinerup takutimmagu Inatsisartuni ilaasortaatitat marluk annaaneqassasut tamanna ersarippasilluinnarpoq. Qinersisartunik isumasiuinerup takutippaa ullumikkut qinersisoqartuuppaat naalakkersuisooqatigiit Siumup Atassutillu Inatsisartuni amerlanerussuteqarnertik annaassagaluarpaat. Arfineq-pingasut arfinillillu naluneqanngitsumik 14-iupput, inatsisartunilu 31-inik ilaasortaqartuni amerlanerussuteqarnissamut naammanngillat. Misissuinerup inernera partiini naalakkersuisooqatigiinni partiinilu illua’tungiliuttuni politikikkut isumaliutersuuteqartitsisariaqaraluarpoq, mimani tupinnaannartumik pingaakujunniarnersua. Inatsisartunut folketingimullu ilaasortap Lars-Emil Johansenip qallunaanik akeqqersimaarpasittarnera. Hans Enoksenip pikkorliorluni kalaalinngorsaanermik taassaminik saqqummiussinera aammalu allattoqarfissuarmi allaffissornikkut pissusilersorpallaarneq departementschefinik nutaanik pisortalersorluni. Namminersorneq pillugu innuttaasut taasitinneqarnissaannik Enoksenip tuaviuussinera. Pisimasut tamakkua tamarmik kiisalu isumaginninnermi, peqqinnissami, atuartitaanermi angallannikkullu politikimi ajornartorsiuterpassuit aaqqinneqanngitsut innuttaasut akornanni naammaginngilersitsisimapput. Naammanngilaq (pingaarnerpaamillu uppernarani) isumaqalersissalluta aluminiuliorfeqalerpat, piiaaffiit tulliit tallimat arfinillit ammarpata, uulia gassilu nunap iluanit qallorneqalerpata taava ajunngilluinnartumik ingerlalissasugut. Qinersisartut naalakkersuisut, ukiuni 30-ingajanni namminersornerusoqarnermi inuiaqatigiinnik avissaartuutsitsinermik pilersitsimasut, inuit akornanni nammaqatigiinnerup atugaqarnerluffigisaanik, tatigiunnaarsimagunarpaat. Qinersisartunik isumasiuinerup partip Siumup ilaasortaanik immikkut isumaliortitsisariaqaraluarpoq, qanittukkut siullermeersumik ilaasortat tamarmiullutik siulittaasumik qinersinissaanni. Siumumi politikerit kinguaariit nutaat immaqa partii politikikkut qasusoorsimasoq imminullu pingaartippallaartoq ilorraap tungaanut sangutissinnaagaluarpaat. Tamanna nukingernarpoq. Taamatullu pisoqanngippat immaqa nunatsinni politikimi Siumup nalaa qaangiutingajalerpoq.